Text
ff. 1a–272a · 543 folio sides
- 1a
༄༅། །རྒྱུད་འབུམ་ཏ་བ་བཞུགས་སོ། །
- 1b
༄༅༅། །རྒྱ་གར་སྐད་དུ། སརྦ་ར་ཧ་སྱོ་ནཱ་མ་ཏནྟྲ་རཱ་ཛཱ། བོད་སྐད་དུ། ཐམས་ཅད་གསང་བ་ཞེས་བྱ་བ་རྒྱུད་ཀྱི་རྒྱལ་པོ། བཅོམ་ལྡན་འདས་ཡེ་ཤེས་སེམས་དཔའ་ལ་ ཕྱག་འཚལ་ལོ། །འབྱུང་ལྔ་ཉིད་ཀྱིས་ལྔ་ཡི་བདག་ཉིད་ཅན། །མི་རྣམས་ལུས་ལ་ངེས་པར་མཐོང་བ་དག །རང་སེམས་རབ་ཏུ་བསྒོམས་པར་གྱུར་ན་ནི། །དངོས་དེར་བསྒོམས་ པས་ངེས་པར་སངས་རྒྱས་འགྱུར། །རང་ཤེས་གསང་བ་དམ་པ་ནི། །སངས་རྒྱས་ཡེ་ཤེས་བླ་མེད་དེ། །གཉིས་མེད་གཉིས་ཀྱི་ཚུལ་ཅན་ཏེ། །སངས་རྒྱས་རྟག་པར་རབ་ཏུ་འདུད། ། གང་ཡང་བདག་མེད་ལས་བྱུང་ཞིང་། །གཉིས་མེད་ཡེ་ཤེས་ལས་བྱུང་བ། །སྡུག་དང་མི་སྡུག་རྣམ་སྤངས་པ། །ཅི་ལའང་ཕྱག་ནི་མི་འཚལ་ཏོ། །མ་སྐྱེས་པ་ནི་ཡང་དག་བསྐྱེད། ། སྐྱེས་པའི་འོག་ཏུ་རྟག་པར་ནི། །སངས་རྒྱས་སྐུར་ནི་བསྒོམ་པ་དེ། །རང་གི་ཡེ་ཤེས་མཆོག་ཕྱག་འཚལ། །རྣལ་འབྱོར་པ་དང་སེམས་ཅན་ཀུན། །མ་སྐྱེས་པ་ནི་ཡང་དག་བསྐྱེད། །
- 2a
སྐྱེས་པའི་འོག་ཏུ་རྟག་པར་ནི། །ཉོན་མོངས་བག་ཆགས་ཀྱིས་སུན་འབྱིན། །ལུས་ཅན་རྣམས་ནི་འཁོར་གྱུར་པ། །སྡུག་དང་མི་སྡུག་རྣམ་འབྱེད་ཡིན། །སེམས་གང་དེ་ཉིད་སྡུག་བསྔལ་ཏེ། །སེམས་ཅན་རྣམས་ཀྱི་ལུས་འབྱུང་ངོ་། ། སེམས་དེ་ཡི་ནི་རྒྱུན་ཉིད་ཀྱིས། །འགྲོ་བ་སྡུག་བསྔལ་གནོན་པར་འགྱུར། །རྣམ་པར་སྣང་མཛད་རྒྱལ་བ་མགོན། །སངས་རྒྱས་ཐམས་ཅད་བསྡུས་གཅིག་པུ། །སངས་རྒྱས་ཐམས་ཅད་རྟོགས་གྱུར་པ། །སངས་རྒྱས་འཁོར་བ་སྒྲོལ་བ་པོ། ། སེམས་ཅན་ཀུན་ལ་ཀུན་ལ་ཕན་པའི་ཕྱིར། །ཐུགས་རྗེའི་ཉམས་དང་ཡང་དག་ལྡན། །རྒྱུ་ཡི་དེ་ཉིད་མཉམ་སྦྱོར་བས། །འབྲས་བུའི་དེ་ཉིད་རྣམས་ཀྱང་སྟོན། །འབྲས་བུའི་དེ་ཉིད་ཡང་དག་ཞུགས། །རྒྱུ་ཡི་དེ་ཉིད་མི་འདོད་དོ། །གང་དུ་འདོད་པ་སྐྱེས་གྱུར་པ། ། དེ་ཉིད་འཁོར་བའི་བག་ཆགས་ཡིན། །མཁས་པ་ཡི་ནི་ཆོ་ག་ཡིས། །བསྒོམ་པ་རུ་ནི་ཡོངས་སུ་བརྟགས། །གང་ཞིག་སླར་ཡང་གཅིག་གྱུར་པ། །རྣལ་འབྱོར་པ་ཡི་རྣལ་འབྱོར་བྱུང་། །སངས་རྒྱས་རྗེས་དྲན་ལ་དམིགས་ཤིང་། །ཆོས་ནི་རྗེས་སུ་ དམིགས་པ་ཡི། །ཚོགས་གཉིས་ཀྱི་ནི་སྦྱོར་བ་ཡིས། །རྐང་གཉིས་དམ་པ་ཉིད་དུ་འགྱུར། །བྷ་གར་ལིང་ག་རབ་བཞག་སྟེ། །སངས་རྒྱས་སྐུར་ནི་རྣམ་པར་བསྒོམ། །སངས་རྒྱས་རྗེས་དྲན་རྣལ་འབྱོར་པ། །སངས་རྒྱས་སྤྲིན་ནི་བསྒོམ་པར་བྱ། ། བྷ་གར་ལིང་ག་རབ་བཞག་སྟེ། །རྡོ་རྗེ་ཆོས་ནི་རྣམ་པར་བསྒོམ། །ཆོས་ནི་རྗེས་དྲན་རྣལ་འབྱོར་པ། །ཆོས་ཀྱི་སྤྲིན་ལས་ཆར་རབ་འབེབས། །མཚན་མ་ལིང་ག་ཞེས་བཤད་དེ། །ཕྱག་རྒྱའི་མཚན་མ་རྣམ་པ་བཞི། །འཇོམས་པས་བྷ་ག་ཞེས་བཤད་
- 2b
དེ། །ཉོན་མོངས་འཇོམས་པའི་དམ་པ་ཡིན། །སེམས་ཅན་ཀུན་གྱི་དངོས་ཀུན་གྱི། །རང་སེམས་ཆོས་ནི་བསྡུས་པ་ཡིན། །ཆོས་བདག་མེད་པའི་སྦྱོར་བ་ཡིས། །བསད་ན་རང་ཉིད་འཆི་བར་འགྱུར། །རང་གི་སེམས་ཉིད་རྫོགས་སངས་རྒྱས། །རྟོགས་པར་བྱ་བ་ སེམས་ཉིད་ཡིན། །རང་གི་སེམས་ཉིད་གསད་བྱ་བ། །སེམས་ཉིད་ཁོ་ན་གསད་པར་བྱ། །སྦྱོར་བ་ཉིད་དང་ཡང་དག་འབྲེལ། །གང་ཡང་སྲིད་པ་འབྱུང་མ་ཡིན། །གང་ཚེ་སངས་རྒྱས་དེ་ཚེ་ནི། །སྦྱོར་ལྔ་སངས་རྒྱས་བདག་ཅེས་བསྒོམ། །ཏིང་འཛིན་ཡེ་ཤེས་ལས་ བྱུང་བ། །སངས་རྒྱས་ཉིད་ཕྱིར་མདོར་བསྡུས་པས། །སངས་རྒྱས་རྣལ་འབྱོར་མེད་པར་ནི། །རྣལ་འབྱོར་པ་ནི་འཚང་མི་རྒྱ། །ཕྲ་མོའི་དངོས་པོ་ཅི་བཞིན་མཐོང་། །སྡུག་པའི་དངོས་པོར་དེ་བཞིན་ཏེ། །དངོས་དང་དངོས་མེད་ཁྱད་པར་ནི། །བསྒོམ་པ་ཀུན་ཏུ་ བརྟགས་པ་ཡིན། །དངོས་པོ་བསྒོམ་པའི་དངོས་མ་ཡིན། །བསྒོམ་པར་བྱ་བ་བསྒོམ་པ་མིན། །དངོས་པོ་བསྒོམས་པར་གྱུར་པ་ཡིས། །རང་གི་སེམས་ནི་ཡོངས་སུ་སྦྱངས། །སངས་རྒྱས་སངས་རྒྱས་ཡུལ་མ་ཡིན། །སེམས་ཅན་ཡུལ་དུའང་མི་འགྱུར་གྱི། ། རང་སེམས་རྟོགས་པས་སངས་རྒྱས་ཏེ། །སངས་རྒྱས་སངས་རྒྱས་རྟོགས་པས་མིན། །གཉིས་མེད་སྦྱོར་བ་འདི་ལ་ཡང་། །ཏིང་ངེ་འཛིན་གྱིས་ཡེ་ཤེས་བརྟགས། །རྒྱུ་ཡི་དེ་ཉིད་ཇི་ལྟར་མཐོང་། །འབྲས་བུའི་དེ་ཉིད་དེ་ཉིད་ཡིན། །རྒྱུ་ཡི་དེ་ཉིད་ཅུང་ཟད་མེད། །འབྲས་བུའི་ དེ་ཉིད་དེ་བཞིན་ནོ། །དེ་ཉིད་དེ་ནི་དེ་བཞིན་ཤེས། །དེ་ཉིད་རྣལ་འབྱོར་པ་ཀུན་སྤྱོད། །རྒྱུ་ཡིས་རྒྱུ་ནི་དངོས་པོར་མིན། །འབྲས་བུའི་དངོས་པོར་འབྲས་བུས་མིན། །རྒྱུ་དེ་འབྲས་བུའི་དངོས་པོར་རུང་། །རང་གི་སེམས་ནི་སོ་སོར་སྣང་། །ཡེ་ཤེས་དེ་ནི་རྒྱུ་དངོས་ཏེ། །གསང་ དེ་འབྲས་བུའི་དངོས་པོ་ཡིན། །གསང་བ་གཉིས་མེད་སྤྱོད་པ་ཡིས། །དེ་ཡི་དངོས་པོས་མཆོག་ཡིན་ནོ། །དེ་ཉིད་དེ་ཉིད་རྟོགས་གྱུར་པ། །གསང་དེ་གསང་བའི་རྣལ་འབྱོར་པ། །གསང་བ་དེ་རིག་ཤེས་པ་སྟེ། །མཆོག་ནི་མཆོག་གི་རྣལ་འབྱོར་པ། །སྡུག་པའི་ངོ་བོར་གང་
- 3a
བཤད་པ། །མི་སྡུག་པ་ཡང་དེ་ཡི་དངོས། །སྡུག་དང་མི་སྡུག་གཟུགས་གང་ཡིན། །མི་མཐོང་དེ་ནི་དེ་བཞིན་གཤེགས། །རྣམ་ཤེས་ཙམ་ནི་མེད་པ་རུ། །རྣལ་འབྱོར་རྣལ་འབྱོར་འབྱུང་མི་འགྱུར། །ཅི་ལྟར་ཡེ་ཤེས་མཆོག་དག་པ། །དེ་ལྟར་དག་ པ་དེ་བཞིན་གཤེགས། །རྣམ་པར་ཤེས་པ་རྣམ་པ་བཞི། །ཕྱག་རྒྱ་བཞི་ཡི་ཆོ་ག་ཡིས། །གསང་བ་གཉིས་མེད་སྦྱོར་བ་ཡིས། །སྐུ་གསུང་ཐུགས་ནི་ཡང་དག་བྱུང་། །ཐུགས་ནི་ཕྱག་རྒྱ་ཆེན་པོ་སྟེ། །དམ་ཚིག་ཕྱག་རྒྱ་ཀུན་ཏུ་འགྲོ། །ཆོས་ཀྱི་ཕྱག་རྒྱ་གསུང་གི་སྟེ། ། ལས་ཀྱི་ཕྱག་རྒྱ་སྐུ་ཡི་ཡིན། །རྒྱ་ཡིས་རྒྱས་བཏབ་དངོས་པོ་ནི། །གསང་བདག་གསང་བའི་རྣལ་འབྱོར་པའོ། །རང་རིག་པ་ཡི་ངོ་བོ་ཡིས། །ཏིང་འཛིན་ཡེ་ཤེས་བརྟགས་པ་ཡིན། །ལུས་ངག་སེམས་སུ་རྣམ་བརྟགས་པའི། །བྱ་བ་རྒྱུད་དུ་རྣམ་བརྟགས་པ། །གསང་ བ་རྣམ་པ་གསུམ་དུ་བཤད། །རྡོ་རྗེ་ལས་ཅན་སྣ་ཚོགས་བཞིན། །སངས་རྒྱས་ལྔ་ཡི་བདག་ཉིད་ནི། །གསང་བའི་ཡེ་ཤེས་བླ་མེད་ཡིན། །ཕྱག་རྒྱ་བཞི་པོ་གསང་བ་དེ། །རྣལ་འབྱོར་པ་ཡིས་ལས་གྲུབ་བྱེད། །འབྱུང་བ་ཆེན་པོ་བཞི་པོ་ཡང་། །ཕྱག་རྒྱ་བཞི་ཞེས་བཤད་ པ་ཡིན། །ཕྱག་རྒྱ་བཞི་ཡི་མཉམ་སྦྱོར་བ། །ལྷ་མོ་བཞི་དང་ཡང་དག་སྦྱོར། །ས་ནི་སྤྱན་ཞེས་བཤད་པ་ཡིན། །ཆུ་ནི་མཱ་མ་ཀཱི་ཞེས་བཤད། །མེ་དང་རླུང་ཞེས་གྲགས་པ་ནི། །གོས་དཀར་མོ་དང་སྒྲོལ་མ་ཡིན། །དབང་ཆེན་ས་ཡི་ཁམས་ཡིན་ཏེ། །ཆུ་ཡི་ཁམས་ ནི་ཆུ་དཀྱིལ་འཁོར། །མེ་ནི་མེ་ཡི་ཁམས་ཡིན་ཏེ། །རླུང་ནི་རླུང་གི་དཀྱིལ་འཁོར་རོ། །དབང་ཆེན་ཁ་དོག་སེར་པོ་སྟེ། །གྲུ་བཞི་པ་སྟེ་རྒྱས་པ་ཡིན། །ཆུ་ཡི་དཀྱིལ་འཁོར་ཟླུམ་པོ་སྟེ། །དཀར་པོའི་མདོག་ཅན་ཞི་བའི་ཡིན། །མེ་ཡི་དཀྱིལ་འཁོར་ཁ་དོག་དམར། ། གྲུ་གསུམ་དབང་གི་ལས་རྣམས་ལའོ། །རླུང་གི་དཀྱིལ་འཁོར་གཞུ་ཡི་དབྱིབས། །ནག་པོའི་གདུག་པའི་ལས་རྣམས་ལ། །འབྱུང་བ་ཆེ་བདག་ལས་གྲུབ་པ། །ལས་ཀྱི་དངོས་གྲུབ་ཡོན་ཏན་བཞི། །ལས་ཀྱི་དངོས་གྲུབ་དངོས་གྲུབ་མཆོག །འཁོར་ལོས་སྒྱུར་བ་
- 3b
རྣམ་པ་བཞི། །ཞི་བ་ལ་ནི་སྤྱན་གྱི་ཚུལ། །རྒྱས་པ་པདྨའི་རྡོ་རྗེ་ཅན། །དབང་ལ་རྣམ་པར་སྣང་མཛད་གནས། །རྡོ་རྗེ་ཁྲོ་བོ་མངོན་སྤྱོད་ལའོ། །ཞི་བ་དགོངས་ཀ་བྱ་བ་ཡིན། །དེ་བཞིན་རྒྱས་པ་སྔ་དྲོ་ལ། །གདུག་པའི་ལས་རྣམས་ཉི་མའི་གུང་། །དབང་ གི་ལས་ནི་མཚན་ཕྱེད་བྱ། །ཞི་ལ་དཀར་པོ་སྦྱར་བར་བྱ། །སེར་པོར་སྣང་བ་རྒྱས་པ་ལ། །དབང་གི་ལས་ལ་དམར་པོ་སྟེ། །གདུག་པ་ནག་པོ་རབ་ཏུ་སྦྱར། །ཏིང་འཛིན་ཡེ་ཤེས་ལས་བྱུང་བ། །ལས་ཀྱི་བསྒྲུབ་པ་དམ་པ་ཡིན། །བཅོམ་ལྡན་དག་པ་བསྒོམ་ བྱ་སྟེ། །སངས་རྒྱས་ཀུན་ལས་མི་གཡོ་གྱུར། །བྷ་གའི་དབུས་སུ་གསང་བའི་བདག །རྡོ་རྗེའི་དབྱིངས་ནི་དེ་བཞིན་གཤེགས། །ལྔ་ཡི་བདག་གྱུར་བདག་ཉིད་ནི། །བསྒོམས་ན་གཡོ་བ་མེད་པར་འགྱུར། །སྙིང་ལ་གནས་པའི་ལྷ་མོ་ཆེ། །རྣལ་འབྱོར་པ་ཡི་ རྣལ་འབྱོར་བསྐྱེད། །སངས་རྒྱས་ཐམས་ཅད་སྐྱེད་མཛད་ཡུམ། །རྡོ་རྗེ་དབྱིངས་ཀྱི་དབང་མོར་བཤད། །འདོད་ཆགས་ཞེ་སྡང་གཏི་མུག་སྟེ། །འདི་དག་འཇིག་རྟེན་དུག་གསུམ་ཡིན། །སངས་རྒྱས་བཅོམ་ལྡན་དུག་མི་མངའ། །རྡོ་རྗེ་དབྱིངས་ནི་དེ་བཞིན་གཤེགས། ། ཆགས་དང་སྡང་དང་རྨོངས་པ་རྣམས། །བསྒོམས་ནས་ཁམས་གསུམ་པ་ཡི་བདག །སངས་རྒྱས་བཅོམ་ལྡན་འདས་གྱུར་ཏེ། །སངས་རྒྱས་བདེན་པས་དུག་བཅོམ་མོ། །རང་སེམས་སོ་སོར་རྟོགས་པ་ཡིས། །གཏི་མུག་སེམས་ནི་དེ་བཞིན་གཤེགས། ། རྨོངས་པ་ཉིད་ནི་འཇིག་རྟེན་གྱུར། །སེམས་ཅན་ཀུན་ལ་བལྟ་བར་བྱ། །ཞེ་སྡང་སེམས་ནི་དེ་བཞིན་གཤེགས། །ཕྲ་མོའི་ཡེ་ཤེས་ཡང་དག་བསྐྱེད། །སྡང་གྱུར་རྡོ་རྗེ་ཉིད་དུ་གྱུར། །སེམས་ཅན་ཐམས་ཅད་གཞིག་པར་བྱ། །འདོད་ཆགས་སེམས་ནི་དེ་བཞིན་ གཤེགས། །བྱང་ཆུབ་སེམས་ནི་ཡང་དག་བསྐྱེད། །ཆགས་གྱུར་བཟང་པོ་ཉིད་གྱུར་པ། །སངས་རྒྱས་ཐམས་ཅད་ཆགས་པར་བྱ། །བྱམས་པའི་སེམས་ནི་དེ་བཞིན་གཤེགས། །ང་རྒྱལ་ཡང་དག་བསྐྱེད་ནས་ནི། །མཛའ་བོར་གྱུར་ཅིང་ཀུན་ཉིད་གྱུར། །
- 4a
སངས་རྒྱས་ཀུན་ལ་འཁྱུད་པར་བྱ། །ཆགས་པའི་ལྟ་བས་བྱམས་པ་སྟེ། །ཐུགས་རྗེའི་ཆོས་ནི་སྨྲ་བ་དང་། །ཀུན་ལ་མི་འཇིགས་སྦྱིན་པ་དང་། །སངས་རྒྱས་ཐམས་ཅད་མཉེས་བྱ་བའོ། །རྣལ་འབྱོར་སྦྱིན་ལས་རབ་དགའ་སྟེ། །ཚུལ་ཁྲིམས་ལྡན་ ལས་དྲི་མེད་འགྱུར། །བཟོད་པ་ལས་ནི་འོད་བྱེད་པ། །བརྩོན་ལས་འོད་འཕྲོ་ཅན་དང་ལྡན། །བསམ་གཏན་ལས་ནི་སྦྱང་དཀའ་བ། །ཤེས་རབ་ཀྱིས་ནི་མངོན་གྱུར་མཐོང་། །ཐབས་ཆེན་ལས་ནི་རིང་དུ་སོང་། །སྟོབས་དང་ལྡན་ལས་མི་གཡོ་འགྱུར། །སྨོན་ལམ་ གྱིས་ནི་ལེགས་བློ་ལྡན། །ཡེ་ཤེས་ལྡན་ལས་ཆོས་ཀྱི་སྤྲིན། །རྒྱལ་བ་དེ་བཞིན་གཤེགས་པ་ནི། །རང་རིག་བདག་ཉིད་བཅུ་གཅིག་འགྱུར། །ཕ་རོལ་ཕྱིན་པ་བཅུ་རྣམས་དང་། །སྟོབས་དང་དབང་ནི་རྫོགས་གྱུར་ཅིང་། །ས་བཅུ་ལས་ནི་འདས་གྱུར་པ། །མཚན་མ་ བརྟན་གྱུར་དེ་ལས་ནི། །རྡོ་རྗེའི་ཆུ་ནི་རྫོགས་སངས་རྒྱས། །ཆོས་ཀྱི་བདུད་རྩི་བཅུད་ལེན་ཡིན། །སངས་རྒྱས་ཀུན་གྱི་མཐའ་ཡས་པ། །གཟུང་དང་འཛིན་པ་སྤོངས་པ་ཡིན། །ཆོས་ཀྱི་བདུད་རྩི་བཅུད་ཀྱིས་ལེན། །རྡོ་རྗེའི་ཆུ་ནི་དག་འཐུངས་པས། །རྡོ་རྗེ་སློབ་དཔོན་ རྣལ་འབྱོར་པ། །གདོད་ནས་དག་པར་དེ་ཚེ་འགྱུར། །གདོད་ནས་དག་པར་གནས་གྱུར་པ། །དེ་ནས་བྱང་ཆུབ་སེམས་སུ་འགྱུར། །བྱང་ཆུབ་སེམས་ཀྱི་བདག་ཅན་འགྱུར། །བྱང་ཆུབ་སེམས་དཔའ་དེ་བཞིན་གཤེགས། །རྣམ་པར་གྲོལ་བའི་རས་ཀྱིས་གཡོགས། ། བྱང་ཆུབ་སེམས་ནི་བླ་ན་མེད། །ཡང་དག་བསྐྱེད་གྱུར་རྣལ་འབྱོར་པ། །རྡོ་རྗེ་སེམས་དཔའ་སྙིང་ལ་འདུག །སེམས་ཅན་ཁམས་ནི་མཐའ་ཡས་པའི། །མ་གྱུར་དམ་ཚིག་འཛིན་བྱེད་པ། །རྡོ་རྗེ་དམ་ཚིག་གིས་སྤྱོད་ན། །རྟག་ཏུ་དམ་ཚིག་གནས་པར་འགྱུར། ། ཁམས་གསུམ་ལམ་ནི་ཉམས་དགའ་བར། །བུད་མེད་ཅེས་བཤད་ཇི་སྙེད་པ། །ཆོ་ག་བཞིན་དུ་ཀུན་སྤྱོད་ཅིང་། །ཐུགས་ཀྱི་རྡོ་རྗེ་སྨད་མི་བྱ། །རྡོ་རྗེ་གསུམ་གྱི་སྐུ་ལ་གནས། །དམ་ཚིག་ཕྱག་རྒྱ་ཇི་སྙེད་པ། །རྡོ་རྗེ་དམ་ཚིག་གསུམ་གྱིས་བྱ། །གསུང་གི་རྡོ་རྗེ་སྨད་
- 4b
མི་བྱ། །རྡོ་རྗེ་སེམས་དཔའ་ལས་བྱུང་བའི། །ཕྱག་རྒྱ་ཀུན་ནི་བུད་མེད་བཟང་། །དེ་རྣམས་སྟེན་པའི་རྣལ་འབྱོར་པ། །ཕྱག་རྒྱ་ཐམས་ཅད་དབང་དུ་འགྱུར། །འཇིག་རྟེན་ཁམས་ནི་ཐམས་ཅད་ན། །བུད་མེད་ཅེས་བྱ་ཇི་སྙེད་པ། །ཕྱག་རྒྱ་ཆེན་པོའི་སྦྱོར་བ་ ཡིན། །དེ་དག་ཀུན་ལ་ཉེ་བར་སྦྱོར། །གསང་བ་མཆོག་གི་རྣལ་འབྱོར་པ། །ཏིང་འཛིན་ཡེ་ཤེས་དམ་པ་ཡིན། །གལ་ཏེ་དངོས་གྲུབ་མཆོག་འདོད་ན། །ང་རྒྱལ་མ་ཡིན་ཧཱུྃ་མ་ཡིན། །རིག་པ་མ་ཡིན་སྔགས་རིག་མིན། །ལག་པའི་ཕྱག་རྒྱའང་མི་བཅའོ། ། མཆོད་རྟེན་གྱི་ནི་ལས་མི་བྱ། །གླེགས་བམ་དག་ཀྱང་བཀླག་མི་བྱ། །དཀྱིལ་འཁོར་དག་ནི་མི་བྱ་ཞིང་། །རྡོ་རྗེ་མཆོག་གསུམ་ཕྱག་མི་བཙལ། །སློབ་དཔོན་སྨད་པར་མི་བྱ་སྟེ། །བླ་མ་སངས་རྒྱས་ཀུན་དང་མཉམ། །ཁྱོད་ཀྱིས་སྲོག་ཆགས་གསད་པར་བྱ། ། བརྫུན་གྱི་ཚིག་ཀྱང་སྨྲ་བར་བྱ། །ཁྱོད་ཀྱིས་མ་བྱིན་བླང་བྱ་ཞིང་། །གཞན་གྱི་བུད་མེད་བསྟེན་པར་བྱ། །སྦྱིན་སྲེག་ཡང་ན་བསམ་གཏན་མིན། །ལུས་ངག་ཡིད་ནི་མི་ཕྱེད་པ། །གཞན་མིན་སེམས་ཀྱིས་བྱ་བ་སྟེ། །འདི་ནི་གསང་བའི་མཆོག་ཡིན་ནོ། །སྔགས་ རྣམས་ཐམས་ཅད་རབ་ཏུ་འགྲུབ། །རྣལ་འབྱོར་ཀུན་ཀྱང་རྣམ་ཀུན་ཏུ། །དེ་བས་འབད་པ་ཐམས་ཅད་ཀྱིས། །སངས་རྒྱས་ཆོས་ནི་བསྒོམ་པར་བྱ། །མ་འདྲེས་ཆོས་ནི་བཅྭ་བརྒྱད་པོ། །སངས་རྒྱས་ཆོས་ཞེས་བཤད་པ་ཡིན། །དེ་རྣམས་རྟག་ཏུ་བསྒོམ་པ་ནི། ། སངས་རྒྱས་ཆོས་ནི་སྒྲུབ་བྱད་ཡིན། །བསམ་གཏན་བཞི་དང་གཟུགས་མེད་བཞི། །རྟག་ཏུ་ཐོབ་པར་བྱས་པ་དང་། །འགོག་པའི་སྙོམས་འཇུག་དེ་ཡིས་ནི། །སངས་རྒྱས་བྱང་ཆུབ་རབ་ཏུ་བསྒྲུབ། །བྱང་ཆུབ་ཕྱོགས་ནི་སུམ་ཅུ་བདུན། །ཆོས་སུ་ཡང་དག་ བཤད་པ་གང་། །དེ་རྣམས་བསྒོམས་པས་དག་པ་དང་། །བྱང་ཆུབ་སེམས་དཔའ་འགྲོ་ཕན་ཡིན། །འགྲོ་བ་རྣམས་ལ་སྤྲོ་བའི་སེམས། །བརྟན་ཞིང་སྙིང་པོ་རབ་བསྒོམས་པ། །སྟོང་པའི་དེ་ཉིད་ལས་བྱུང་བ། །རྡོ་རྗེ་ཡེ་ཤེས་ཞེས་བྱ་བ་བཤད། །ཆོས་བདག་
- 5a
མེད་ལས་ཡང་དག་བྱུང་། །གཉིས་མེད་ཡེ་ཤེས་དམ་པ་སྟེ། །ཆོས་ཉིད་མཆོག་གི་ཡེ་ཤེས་ནི། །ཆོས་ཀྱི་དབྱིངས་ཞེས་ཡང་དག་བཤད། །འདི་ནི་ཆོས་དབྱིངས་ཡེ་ཤེས་ཏེ། །རྡོ་རྗེ་ལྟ་བུའི་ཏིང་འཛིན་སྐྱེས། །རྡོ་རྗེ་ཡེ་ཤེས་རང་བཞིན་ སེམས། །རྡོ་རྗེ་དབྱིངས་ཞེས་བྱ་བར་བཤད། །སེམས་ཀྱི་སྤྲོ་བའི་སྦྱོར་བ་ཡིས། །ཕྲ་མོའི་ཡེ་ཤེས་སོགས་སྦྱོར་བ། །དེ་བཞིན་གཤེགས་ཀུན་ཡེ་ཤེས་ནི། །རྣམ་པར་སྣང་མཛད་ཅེས་བྱར་བཤད། །བྱམས་པ་སྤྲོ་བའི་སྦྱོར་བ་ཡིས། །སྦྱོར་བ་སྤྱོད་པར་ བྱེད་པའི་མཆོག །ཟག་མེད་བརྟན་པར་གྱུར་པ་ཡི། །ཐུགས་ནི་མི་བསྐྱོད་པ་ཞེས་བཤད། །ཐུགས་རྗེ་སྤྲོ་བའི་ཚུལ་གྱིས་ནི། །སེམས་ཅན་ཕན་འདོགས་མཛད་པ་པོ། །ཐུགས་ནི་འགྲོ་དོན་ཡང་དག་ལྡན། །རིན་ཆེན་འབྱུང་ལྡན་ཞེས་བཤད་དོ། ། དགའ་བས་སྤྲོ་བའི་སྦྱོར་བ་ཡིས། །ཐེག་ཆེན་མཆོག་ནི་དྲི་མ་མེད། །ཐུགས་ནི་འོད་གསལ་དག་པ་ནི། །འོད་དཔག་མེད་ཅེས་དེ་བཤད་དོ། །བཏང་སྙོམས་སྤྲོ་བར་མཛད་པའི་ཤུགས། །སེམས་ཅན་ཐམས་ཅད་རྟོགས་མཛད་པ། །དོན་ཡོད་བླ་མེད་བྱ་བ་ནི། ། དོན་ཡོད་གྲུབ་པར་དེ་བཤད་དོ། །བྱང་ཆུབ་རང་བཞིན་ཡེ་ཤེས་མཆོག །དེ་འདིར་རྡོ་རྗེ་ཞེས་བཤད་དེ། །རྡོ་རྗེ་ཡེ་ཤེས་ལས་བྱུང་བ། །རྡོ་རྗེ་སེམས་དཔའ་དེ་བཤད་དོ། །སངས་རྒྱས་ཐམས་ཅད་སྤྱན་འདྲེན་པ། །རྡོ་རྗེ་ལྕགས་ཀྱུ་ཞེས་བཤད་དེ། །རྡོ་རྗེའི་རིགས་རྣམས་ ཀུན་གྱི་རྒྱལ། །རྡོ་རྗེ་རྒྱལ་པོར་དེ་བཤད་དོ། །སངས་རྒྱས་ཐམས་ཅད་ཆགས་བྱེད་པས། །མཉེས་པར་བྱེད་པ་ཞེས་བཤད་དེ། །བདུད་ཀྱི་སྦྱོར་བ་ཆགས་པ་ཆེ། །རྡོ་རྗེ་ཆགས་པར་དེ་བཤད་དོ། །སངས་རྒྱས་ཐམས་ཅད་མཉེས་བྱེད་ཅིང་། །ལེགས་སོ་ཞེས་པ་རབ་ སོགས་པ། །བྱང་ཆུབ་སེམས་དཔའ་དགའ་བྱེད་པས། །རྡོ་རྗེ་ལེགས་པར་དེ་བཤད་དོ། །བྱང་ཆུབ་སེམས་དཔའི་སྦྱིན་པ་གང་། །མཁའ་མཉམ་རྡོ་རྗེ་ལས་བྱུང་བ། །དོན་ཡོད་རིན་ཆེན་ཆེན་པོ་སྟེ། །རྡོ་རྗེ་རིན་ཆེན་དེ་བཤད་དོ། །མ་རིག་བྲལ་བའི་ཡེ་ཤེས་ནི། །ཚོགས་
- 5b
དག་ལས་ནི་ངེས་པར་བྱུང་། །ཐར་པའི་སྣང་བ་གཟི་བརྗིད་ཆེ། །རྡོ་རྗེ་ཉི་མར་དེ་བཤད་དོ། །རྣམ་པ་ཀུན་གྱི་དངོས་ཡེ་ཤེས། །ཐར་པའི་ལམ་འཇུག་ཐོབ་མཛད་གང་། །ཆོས་ཀྱི་རྒྱལ་མཚན་ཏོག་ཆེན་པོ། །རྡོ་རྗེ་དབལ་དུ་དེ་བཤད་དོ། །རྡོ་རྗེ་བཞད་པ་རྣལ་འབྱོར་ཆེ། །སངས་ རྒྱས་ཀུན་འབྱུང་རྨད་བྱུང་བ། །འདི་ནི་བྱང་ཆུབ་སེམས་དཔའ་ཆེ། །རྡོ་རྗེ་བཞད་པར་དེ་བཤད་དོ། །སངས་རྒྱས་ཀུན་གྱི་རྣལ་འབྱོར་ཆེ། །སངས་རྒྱས་ཆོས་ནི་རྟོགས་མཛད་པ། །དེ་བཞིན་གཤེགས་པའི་ཆོས་དག་པ། །རྡོ་རྗེ་ཆོས་སུ་དེ་བཤད་དོ། །ཤེས་རབ་རྣོན་པོ་ཐེག་པ་ཆེ། ། ཉོན་མོངས་ཐམས་ཅད་ངེས་གཅོད་མཛད། །ཤེས་བྱའི་སྒྲིབ་པ་གཅོད་པ་པོ། །རྡོ་རྗེ་རྣོན་པོར་དེ་བཤད་དོ། །སངས་རྒྱས་རོལ་མོའི་འཁོར་ལོ་ནི། །ཆོས་ཀྱི་འཁོར་ལོ་རབ་བསྐོར་བས། །སེམས་དཔའ་ཆེན་པོ་ཐེག་པ་ཆེ། །རྡོ་རྗེ་རྒྱུ་ཞེས་དེ་བཤད་དོ། །ཤེས་རབ་ཡེ་ ཤེས་རང་བཞིན་དག །གསུང་གི་སྒྲ་ནི་རྣམ་པར་སྤངས། །འཇམ་པའི་གསུང་གི་བདག་ཉིད་གྱུར། །རྡོ་རྗེ་སྨྲ་བར་དེ་བཤད་དོ། །ཕ་རོལ་ཕྱིན་པ་ཀུན་གྱི་ཞབས། །ཆོས་རྣམས་ཐམས་ཅད་རྟོགས་མཛད་པ། །སེམས་ཅན་ཀུན་དོན་སྤྲུལ་པ་པོ། །རྡོ་རྗེ་ལས་ཞེས་བྱ་བར་ བཤད། །སངས་རྒྱས་རྗེས་དྲན་ཡང་དག་གྲུབ། །ཐེག་པ་དམན་པ་རྣམ་སྤངས་ཤིང་། །བྱང་ཆུབ་སེམས་ལ་རབ་ཞུགས་པ། །རྡོ་རྗེ་བསྲུང་བར་དེ་བཤད་དོ། །སྡིག་པ་ཐམས་ཅད་ཟད་བྱེད་ཅིང་། །དེ་བཞིན་ཉོན་མོངས་རྣམ་སྲེག་ལ། །ཉོན་མོངས་ཟད་པ་ཉེར་ལེན་པས། ། རྡོ་རྗེ་གནོད་སྦྱིན་དེ་བཤད་དོ། །སྐུ་གསུང་ཐུགས་ཀྱི་རྡོ་རྗེ་རྣམས། །བཅིང་བ་རུ་ནི་ཡང་དག་གྱུར། །དེ་ཉིད་དེ་ཉིད་ཡེ་ཤེས་ཏེ། །རྡོ་རྗེ་ཁུ་ཚུར་ཞེས་བཤད་དོ། །དམ་ཚིག་ཕྱག་རྒྱ་ཐམས་ཅད་ནི། །རྡོ་རྗེ་བསྡམས་ལས་ཡང་དག་བྱུང་། །རྡོ་རྗེ་ཁུ་ཚུར་གཉིས་གྱུར་པ། ། ལས་ཀྱི་ཕྱག་རྒྱ་ཞེས་བཤད་དོ། །ང་རྒྱལ་མེད་ཅིང་སྣང་བ་མེད། །མཚན་མ་མེད་ཅིང་ཞེན་པ་མེད། །བདག་མེད་མཉམ་ཉིད་ཡེ་ཤེས་ནི། །རྡོ་རྗེ་སེམས་དཔའ་ཞེས་བྱར་བཤད། །གསང་བའི་མཉམ་པར་འབྱོར་པ་འདིར། །ཡེ་ཤེས་ཕ་རོལ་ཕྱིན་དགེ་བ། །རྣམ་པ་
- 6a
བཅུ་གཉིས་ཡང་དག་བྱུང་། །རྡོ་རྗེ་ཕ་རོལ་ཕྱིན་པའི་འོད། །བྱང་ཆུབ་སེམས་ནི་རབ་བསྒོམས་པས། །ཕ་རོལ་སངས་རྒྱས་ཉིད་སོན་པའི། །ཕ་རོལ་ཕྱིན་ཐོབ་ཡེ་ཤེས་ནི། །རྡོ་རྗེ་སེམས་མར་བཤད་པ་ཡིན། །བསྡུ་བའི་དངོས་པོ་བཞི་རྣམས་ནི། ། ཤེས་རབ་ཕ་རོལ་ཕྱིན་རྡོ་རྗེ། །ཆོས་བཞི་གཅིག་ཏུ་གྱུར་པ་ནི། །རྡོ་རྗེ་རིན་ཆེན་མར་བཤད་དོ། །གསང་བའི་ཡེ་ཤེས་ཡེ་ཤེས་ཆེ། །དེ་ཉིད་ཕ་རོལ་ཕྱིན་དགེ་བ། །ཕ་རོལ་ཕྱིན་པ་ཆེ་ལས་བྱུང་། །རྡོ་རྗེ་ཆོས་མར་ཤེས་པར་བྱ། །ཕ་རོལ་ཕྱིན་པའི་དགེ་བ་ནི། །སྦྱོར་ བའི་ཐབས་སུ་རབ་བསྟན་པ། །རྡོ་རྗེ་ལས་མར་ཤེས་པར་བྱ། །གང་ཕྱིར་དེ་ནི་རོལ་བ་དགེ། །སྒེག་མོ་སྦྱིན་པའི་ཕ་རོལ་ཕྱིན། །ཚུལ་ཁྲིམས་ཕ་རོལ་ཕྱིན་དགེ་བས། །བརྒྱན་པའི་ཡན་ལག་ཡིད་འོང་ཡིན། །གླུ་མ་བཟོད་པའི་ཕ་རོལ་ཕྱིན། །ཆེད་དུ་བརྗོད་པའི་ཆོས་ བརྗོད་པའོ། །གར་མ་བརྩོན་འགྲུས་ཕ་རོལ་ཕྱིན། །མྱུར་དུ་སངས་རྒྱས་ཉིད་སྟེར་བའོ། །བདུག་པ་ཤེས་རབ་ཕ་རོལ་ཕྱིན། །ཀུན་ཏུ་ཁྱབ་པར་སྤྲོས་ཕྱིར་རོ། །མེ་ཏོག་བསམ་གཏན་ཕ་རོལ་ཕྱིན། །འདོད་པའི་འདམ་གྱིས་མ་གོས་པའོ། །མར་མེ་སྨོན་ལམ་ཕ་རོལ་ཕྱིན། ། ཕྱོགས་ཀུན་སྣང་བར་བྱེད་པ་ཡིན། །དྲི་ནི་ཐབས་ཀྱི་ཕ་རོལ་ཕྱིན། །དྲི་ངན་ཐུར་སེལ་དགེ་བ་ཡིན། །སངས་རྒྱས་ཀུན་གྱི་ཐབས་ཆེན་པོ། །དབྱེ་བ་རྣམ་པ་བཞི་ཡིས་གནས། །ཐམས་ཅད་འདོད་པའི་ཐབས་ཆེན་པོ། །རྡོ་རྗེ་ལྕགས་ཀྱུ་ཞེས་བཤད་དོ། །བྱང་ཆུབ་སྤྱད་པ་ སྤྱོད་བྱེད་པ། །རྡོ་རྗེ་ཞགས་པ་ཞེས་བཤད་དོ། །ཐེག་པ་འདི་ལ་བརྟན་འགྱུར་གང་། །རྡོ་རྗེ་ལྕགས་སྒྲོག་ཅེས་བཤད་དོ། །ཆོས་རྣམས་ཐམས་ཅད་མ་སྐྱེས་ཤིང་། །གདོད་ནས་ཞི་བ་མཁའ་དང་མཉམ། །དེ་ལྟའི་ཚིག་ནི་རབ་འཇུག་པས། །རྡོ་རྗེ་དྲིལ་བུ་ཞེས་བཤད་དོ། ། ཚོགས་གཉིས་ཀྱིས་ནི་སྦྱོར་བ་ཡིས། །སེམས་ཅན་ཀུན་གྱི་དོན་སྟོན་པའི། །སེམས་ནི་རང་བཞིན་གྱིས་འོད་གསལ། །ཟླ་བའི་དཀྱིལ་འཁོར་ཡིན་པར་བཤད། །ཡང་དག་རྡོ་རྗེ་རྟོགས་པ་སྟེ། །འཛིན་པའི་སྦྱོར་ཉིད་ལྕགས་ཀྱུ་ཡིན། །ཕྲ་བར་འབིགས་པ་མདའ་ཞེས་བྱ། །
- 6b
དགྱེས་པས་ལེགས་སོ་ཞེས་བྱ་བ། །སྤྲས་པས་རིན་པོ་ཆེ་རུ་བཤད། །གཟི་བརྗིད་ཅེས་བྱ་ཉི་མ་ཡིན། །བསྒྲེང་བས་ཏོག་ཏུ་བཤད་པ་སྟེ། །རྣམ་པར་འབྱེད་པས་བཞད་པར་བཤད། །འདོད་ཆགས་དག་པ་པདྨ་ཡིན། །ཉོན་མོངས་དགྲ་བཅོམ་རལ་གྲི་སྟེ། །དཀྱིལ་ འཁོར་སྦྱོར་བས་འཁོར་ལོ་ཡིན། །གང་གི་བརྗོད་པས་སྨྲ་བར་བཤད། །ཀུན་ཉིད་སྣ་ཚོགས་རྡོ་རྗེ་ཡིན། །གཞིག་དཀའི་སྦྱོར་བ་གོ་ཆ་ཡིན། །འཇིགས་པའི་སྤྱོད་པའི་མཆེ་བ་སྟེ། །ཕྱག་རྒྱའི་སྦྱོར་ཉིད་བཅིང་བ་ཡིན། །དཀྱིལ་འཁོར་དུ་ནི་གང་བཤད་པ། །ཡིད་ཀྱི་དཀྱིལ་ འཁོར་དམ་པ་ཡིན། །གཞལ་ཡས་ཁང་ནི་ཡེ་ཤེས་ཏེ། །སེམས་ཀྱི་བརྩེགས་པ་བསྒྲེང་བ་ཡིན། །ཕྱི་ཡི་གྲུ་བཞི་བ་གང་ཡིན། །ཚད་ཀྱིས་མཉམ་པ་ཉིད་གྱུར་པ། །བྱམས་པ་ལ་སོགས་སེམས་གང་ཡིན། །ཐིག་བཞི་ཞེས་ནི་བཤད་པ་ཡིན། །ཆོས་ཀྱི་སྦྱོར་བ་རྗེས་དྲན་ཉིད། ། གང་དེ་རྡོ་རྗེ་ཐིག་ཏུ་བཤད། །ལྟ་བ་ཀུན་ལས་རྣམ་གྲོལ་བ། །ཡེ་ཤེས་ཐིག་ཏུ་བཤད་པ་ཡིན། །ཚུལ་ཁྲིམས་ཚོགས་ཀྱི་དམ་པ་ནི། །གང་ཞིག་རྒྱན་དུ་བཤད་པ་ཡིན། །དད་དབང་ལ་སོགས་སེམས་གང་ཡིན། །ར་བ་ལྔར་ནི་ཡང་དག་བྱུང་། །རྣམ་པར་ཐར་པ་བཞི་པོ་ནི། །སྒོ་ རྣམས་སུ་ནི་ཡང་དག་བཤད། །ཡང་དག་སྤོང་བ་བཞི་པོ་ནི། །རྟ་བབས་རྣམས་དག་ཀ་བར་བྱུང་། །དྲན་པ་ཉེར་གཞག་བཞི་པོ་ནི། །ཁྱམས་རྣམས་བཞི་པོར་ཤེས་པར་བྱ། །རྫུ་འཕྲུལ་རྐང་པ་བཞི་པོ་ནི། །དེ་ནི་སྒོ་ཁྱུད་རྣམ་བཞི་ཡིན། །བྱང་ཆུབ་ཡན་ལག་བདུན་པོ་ནི། ། ཕྲེང་བ་མེ་ཏོག་ཆུན་བརྒྱན་པ། །འཕགས་ལམ་ཡན་ལག་བརྒྱད་པོ་ནི། །ཀ་བ་བརྒྱད་ཅེས་བྱ་བར་བཤད། །སྒྲིབ་པ་གཉིས་ལས་རྣམ་གྲོལ་ཞིང་། །ཏིང་འཛིན་ཡེ་ཤེས་ཀྱིས་བརྟགས་པ། །ལམ་གྱི་ཡེ་ཤེས་ཁྱད་པར་རྣམས། །རྔ་ཡབ་ཅེས་ནི་ཡང་དག་བཤད། །ཉོན་ མོངས་ཐམས་ཅད་དེས་གཅོད་ཅིང་། །ཉོན་མོངས་འཕྲོག་པས་དྲ་བ་སྟེ། །ཡང་དག་གཅོད་ཅིང་སྤོང་བ་ཉིད། །སེལ་བའི་སྤོང་བ་ལ་གནས་པ། །ཚོགས་གཉིས་ཀྱི་ནི་སྦྱོར་བ་ཉིད། །ཉོན་མོངས་པ་ཡི་ཕྱེད་འཕྲོག་པ། །དྲ་བ་ཕྱེད་ཅེས་བྱ་བར་བཤད། །རང་བཞིན་འོད་གསལ་གང་
- 7a
ཡིན་དེ། །བྱང་ཆུབ་སེམས་ནི་བླ་མེད་ཡིན། །སེམས་ནི་དོན་ཀུན་སྐྱེད་བྱེད་པ། །ཟླ་བའི་དཀྱིལ་འཁོར་ཡིན་པར་བཤད། །ཤེས་རབ་ཡེ་ཤེས་རང་བཞིན་དག །རྡོ་རྗེ་ལྟ་བུའི་ཏིང་འཛིན་སྐྱེས། །ཐར་པའི་སྣང་བ་གཟི་བརྗིད་ཆེ། །ཉི་མའི་དཀྱིལ་འཁོར་ ཡིན་པར་བཤད། །ཚོན་རྩི་ལྔར་ནི་ཡང་དག་བཤད། །ལྟ་བ་ལྔ་ཡི་མེ་ཏོག་ཡིན། །ཡེ་ཤེས་ལྔ་ཡི་དེས་སྦྱོར་ཉིད། །སངས་རྒྱས་ལྔ་ཞེས་ཡང་དག་བཤད། །ནམ་མཁའ་བཞིན་དུ་བདག་མེད་པའི། །རྣམ་ཤེས་ཡེ་ཤེས་དམ་པ་ཡིན། །ཡེ་ཤེས་དེ་ཡི་རྒྱན་ བཤད་པ། །ཆགས་པའི་སེམས་ཞེས་བྱ་བར་བཤད། །ཆགས་བྲལ་ལས་ནི་བྱང་ཆུབ་འབྱུང་། །ཆགས་པའི་སེམས་ལས་གཞན་ཡིན་ནོ། །དེ་བས་ཆགས་དང་ཆགས་བྲལ་བ། །བྱང་ཆུབ་སེམས་ཞེས་ཡང་དག་བཤད། །འཇིག་རྟེན་ཆགས་དང་བྲལ་བས་འདུལ། ། ཕྱག་རྒྱའི་དངོས་གྲུབ་ཆགས་ལས་བྱུང་། །དེར་ནི་ཐབས་ཀྱི་སྒོམ་པ་དག །དངོས་གྲུབ་ཐམས་ཅད་སྟེར་བ་ཡིན། །ཇི་ལྟར་འཇིག་རྟེན་འདུལ་འགྱུར་བ། །དེ་ལྟར་རྣལ་འབྱོར་པ་ཡིས་སྤྱད། །ཇི་ལྟར་གདུལ་བྱ་དག་གྱུར་པ། །ཞེན་པ་ཀུན་ཏུ་མཆོད་པར་འགྱུར། །མཚན་ ཉིད་གང་ཞིག་ཡང་དག་བཤད། །མཚན་ཉིད་དེས་ནི་མཚོན་པར་འགྱུར། །སྐུ་གསུང་ཐུགས་ཀྱི་ཕྱག་རྒྱ་ཡིས། །རྒྱས་བཏབ་ཡེ་ཤེས་ཡིན་པ་བཤད། །ཕྱག་རྒྱ་བསྒོམས་པས་རྣལ་འབྱོར་པ། །རྟག་ཏུ་ཕྱག་རྒྱའི་བདག་ཅན་འགྱུར། །རྒྱས་བཏབ་དངོས་པོ་ཤེས་ནས་ནི། ། བསྒོམས་ན་ཕྱག་རྒྱས་བཏབ་པར་འགྱུར། །མཚན་དང་མཚན་ཉིད་འབྲེལ་བ་ནི། །ཤེས་ནས་རྣལ་འབྱོར་ཡང་དག་སྤྱོད། །ཇི་ལྟར་མཚན་ཉིད་ཡང་དག་གྲུབ། །དེ་བཞིན་དག་པ་མྱུར་དུ་འགྲུབ། །གཡས་པའི་ཆ་ཡི་མཚན་མས་ནི། །ཤེས་རབ་ཅན་ནི་རབ་ཏུ་བསྟན། ། གཡོན་གྱི་མཚན་མ་ཇི་ལྟར་མཐོང་། །དེ་ཡིས་ཐུགས་རྗེ་མཚོན་པ་ཡིན། །ཕྱག་ནི་གཉིས་ཀའི་མཉམ་སྦྱོར་ལས། །ཏིང་འཛིན་གཉིས་སུ་བཤད་པ་ཡིན། །ཞབས་གཉིས་ཀྱི་ནི་མཚན་མ་ཡིས། །ཚོགས་གཉིས་དག་ནི་བསྟན་པ་ཡིན། །སོར་མོ་ལྔ་ཡི་མཉམ་སྦྱོར་ལས། །དཀྱིལ་
- 7b
འཁོར་ལྔ་ཡིས་བརྒྱན་པ་ཡིན། །སངས་རྒྱས་ལྔ་ཡི་མངོན་བྱང་ཆུབ། །རིམ་པ་བཞིན་དུ་བསྟན་བྱ་སྟེ། །གང་ཞིག་གུང་མོ་སྟོན་པ་ནི། །ནམ་མཁའ་ལས་ནི་བྱུང་བ་མཚོན། །གང་ཞིག་མཛུབ་མོ་སྟོན་པ་ནི། །དེས་ནི་དབང་ཆེན་དཀྱིལ་འཁོར་ཡིན། །གང་ཞིག་ སྲིན་ལག་སྟོན་པ་ནི། །ཆུ་ཡི་དཀྱིལ་འཁོར་ཞེས་བཤད་དོ། །གང་ཞིག་མཐེ་བོ་སྟོན་པ་ནི། །དེ་ཡིས་མེ་ནི་མཚོན་པ་ཡིན། །གང་ཞིག་མཐེའུ་སྟོན་པ་ནི། །རླུང་གི་དཀྱིལ་འཁོར་ཉིད་དུ་འགྱུར། །གང་ཞིག་ལྟེ་བ་སྟོན་པ་ནི། །རྡོ་རྗེ་དབྱིངས་ཀྱི་དབང་ཕྱུག་བཤད། ། གང་ཞིག་སྙིང་ག་སྟོན་པ་ནི། །རྡོ་རྗེ་སེམས་མར་རྗེས་སུ་དཔག །གང་ཞིག་སྨིན་མཚམས་སྟོན་པ་ནི། །རྡོ་རྗེ་རིན་ཆེན་མ་ཞེས་བྱ། །གང་ཞིག་ལྐོག་མ་སྟོན་པ་ནི། །རྡོ་རྗེ་ཆོས་མར་ཤེས་པར་བྱ། །གང་ཞིག་སྤྱི་བོ་སྟོན་པ་ནི། །རྡོ་རྗེ་ལས་མར་ཤེས་པར་བྱ། །བྱང་ཆུབ་ ལྔར་མངོན་བྱང་ཆུབ་པའམ། །ཡང་ན་ཡེ་ཤེས་ལྔ་རྣམས་སམ། །སངས་རྒྱས་ལྔ་དང་ཡང་དག་ལྡན། །དཀྱིལ་འཁོར་བྱང་ཆུབ་ཡིན་པར་བསྟན། །སྔོན་གྱི་སྒྲར་ནི་ཇི་སྐད་བཤད། །མདུན་དུ་དེ་ནི་རབ་ཏུ་བསྟན། །རྒྱབ་ཀྱི་སྒྲར་ནི་ཇི་ལྟར་བཤད། །ཕྱི་མར་དེ་ནི་ཡང་དག་བསྟན། ། གང་དུ་ཐོག་མའི་སྒྲར་གྱུར་པ། །དེ་ནི་རྒྱུ་ཡི་སྒྲ་རུ་བསྟན། །གང་ཞིག་ཐ་མའི་སྒྲར་གྱུར་པ། །འདིར་ནི་འབྲས་བུར་ཡང་དག་བསྟན། །སངས་རྒྱས་བཅོམ་ལྡན་གཉིས་མི་མངའ། །རྒྱུ་དང་འབྲས་བུར་ལྡན་འགྱུར་མིན། །གང་ཕྱིར་ཐོག་མ་ཐ་མ་མེད། །དེ་ཕྱིར་རྟག་པ་ཞེས་བཤད་དོ། ། རང་སེམས་རྟོགས་པས་སངས་རྒྱས་ཏེ། །རྟོགས་པར་བྱ་བའང་སེམས་ཉིད་ཡིན། །སངས་རྒྱས་ཞིང་ཞེས་བཤད་པ་དང་། །བྱང་ཆུབ་སེམས་སུ་ཤེས་པར་བྱ། །རང་བཞིན་དག་པའི་སེམས་ཅན་ནི། །ཀུན་ཏུ་རིག་པར་ཡང་དག་བཤད། །སེམས་ཅན་རང་བཞིན་དག་པ་ནི། ། བྱང་ཆུབ་སེམས་སུ་ཤེས་པར་བྱ། །དང་པོར་གྱུར་པ་སྙིང་གར་རྡེབས། །བརྟན་པ་ཉིད་དུའང་རང་ཉིད་འགྱུར། །སྐྲ་འཛིན་པ་ནི་རལ་པའི་དབུས། །འོད་དཔག་མེད་དུ་མཉམ་གཞག་ཡིན། །ཙུམ་པ་ན་ནི་རྗེས་བཤད་པ། །དེ་བཞིན་གཤེགས་པ་རྡོ་རྗེ་གསུང་། །དབང་པོ་གཉིས་
- 8a
ནི་མཉམ་སྦྱོར་བ། །རྣམ་པར་སྣང་མཛད་ཅེས་བཤད་དོ། །བུ་མོ་ལོ་གྲངས་བཅུ་གཉིས་པར། །སྐྱེས་མཆོག་ཐུབ་པས་གང་གསུངས་པ། །ཕ་རོལ་ཕྱིན་པ་བཅུ་གཉིས་སུ། །གསུངས་ཀྱི་གཞན་དུ་མི་བརྟག་གོ། །བུ་མོ་ལོ་གྲངས་བཅུ་དྲུག་པར། །དེ་ བཞིན་གཤེགས་པས་གང་གསུངས་པ། །རྡོ་རྗེ་སེམས་སོགས་སེམས་དཔའ་ཡི། །བསྒོམ་པའི་དོན་གྱི་སྒྲ་ཡིན་ནོ། །ལྷ་མོ་ལོ་གྲངས་ཉི་ཤུ་པར། །འཁོར་ལོས་སྒྱུར་བས་ཇི་སྐད་གསུངས། །མཆོད་པ་ཉི་ཤུའི་བདག་ཉིད་ཅན། །ཉི་ཤུ་པོ་དང་རིམ་བཞིན་ནོ། །རང་ གི་ཆུང་མ་རང་རིག་ལས། །བྱུང་བའི་རང་རིགས་ཡིན་པར་བཤད། །གཞན་གྱི་ཆུང་མར་གང་བསྟན་པ། །གཞན་སྡུག་གཞན་གྱི་རིག་པ་ཡིན། །གཅི་དང་རྡོ་རྗེ་ཞེས་བཤད་པ། །རྡོ་རྗེ་ཡེ་ཤེས་བླ་མེད་ཡིན། །བཤང་དང་པདྨ་ཞེས་བཤད་པ། །ཆོས་ཀྱི་ཡེ་ཤེས་ རྙོག་མེད་ཡིན། །ཡོངས་སུ་གསལ་བར་རྣམ་ཤེས་པ། །དཀྱིལ་འཁོར་ཐུགས་ཀྱི་དམ་པ་ཡིན། །སྐུ་གསུང་ཐུགས་ཀྱི་སྤྱོད་པ་ཡིས། །འབད་པ་ཡིས་ནི་མཆོད་བྱེད་པ། །རང་གི་རྡོ་རྗེ་པདྨར་ལྡན། །དབང་པོ་གཉིས་ལས་བྱུང་བ་ཡི། །རང་གི་ཁུ་བ་ཐིག་ལེ་ཡིས། ། རྡོ་རྗེ་སེམས་དཔའ་མཆོད་པར་བྱ། །ཚོགས་གཉིས་ཀྱི་ནི་སྦྱོར་བ་ཡིས། །སངས་རྒྱས་ཐམས་ཅད་གཅིག་བསྡུས་པ། །གཉིས་མེད་གཉིས་ཉིད་ལ་བརྟེན་པ། །ཐུགས་རྗེ་ཉམས་དང་ཡང་དག་ལྡན། །དབང་པོ་གཉིས་ཀྱི་མཉམ་སྦྱོར་བས། །རང་གི་ཁུ་བ་མཁས་པ་ཡིས། ། རྣལ་འབྱོར་ཆེན་པོ་བྱུང་ནས་ནི། །དཀྱིལ་འཁོར་ཡང་དག་བྱིན་གྱིས་བརླབ། །དགོད་དམ་རབ་ཏུ་སྨྲ་བ་འམ། །སངས་རྒྱས་རོལ་མོའི་གར་བྱེད་པ། །ལྷ་མོ་བཞི་ཡི་མཉམ་སྦྱོར་བས། །རྒྱུ་དང་མི་རྒྱུ་རྣམས་ཀྱིས་རོལ། །གསང་ཞིང་ལེགས་པར་བསྒྲིལ་པ་དང་། །ཚད་དང་ལྡན་ཞིང་ མཛེས་པ་ཡིས། །ཤེས་རབ་ཅན་གྱིས་ཐིག་གདབ་པ། །སྐུ་གསུང་ཐུགས་ནི་བསྒོམས་པས་སོ། །ཟུར་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་བྱས་ལ། །ཐིག་བཞི་དང་ནི་ཡང་དག་ལྡན། །དར་དང་མེ་ཏོག་ཕྲེང་བས་བརྒྱན། །གྲྭ་ཡི་མཚམས་ནི་ཐམས་ཅད་དང་། །སྒོ་ཁྱུད་
- 8b
ཀྱི་ནི་ནང་རྣམས་སུ། །རྡོ་རྗེ་རིན་ཆེན་སྤྲས་པས་ནི། །ཕྱི་ཡི་དཀྱིལ་འཁོར་ཐིག་གདབ་བོ། །རྡོ་རྗེའི་ཐིག་གིས་ཡོངས་བསྐོར་ཞིང་། །ཀ་བ་བརྒྱད་ཀྱིས་ཉེ་བར་མཛེས། །ཀ་བ་བརྒྱད་ཀྱི་ནང་གནས་པའི། །དཀྱིལ་འཁོར་བརྒྱད་པར་བསྟན་པ་དང་། །གྲྭ་ཡི་དཀྱིལ་འཁོར་དོར་བར་ནི། །རྡོ་རྗེ་ལྷ་མོའི་ཚོགས་ཀྱིས་ མཆོད། །འཁོར་ལོ་ལྔ་དང་ཡང་དག་ལྡན། །དཀྱིལ་འཁོར་ལྔ་ཡིས་རྣམ་པར་བརྒྱན། །དྲ་བ་དྲ་ཕྱེད་ཀྱིས་བརྒྱན་ཅིང་། །རྔ་ཡབ་ཀྱིས་ནི་ཉེར་སྤྲས་པ། །ཁྲུ་ནི་བཅུ་གཉིས་བྱ་བ་འམ། །ཁྲུ་བཅུ་དྲུག་ཏུ་རབ་ཏུ་བརྟག །ཡང་ནི་ཁྲུ་ནི་ཉི་ཤུ་ཙམ། །ཉི་ཤུ་ལྔ་དང་ལྡན་པ་ཡིས། །ཁྲུ་ནི་ཉི་ཤུ་ ལྔ་པ་ཡིས། །དཀྱིལ་འཁོར་ཡང་དག་བྱིན་གྱིས་བརླབ། །སྒོ་རྣམས་ཀྱི་ནི་དབུས་མའི་ཆ། །ཆ་དགུ་རུ་ནི་རྣམ་དབྱེ་བ། །དཀྱིལ་འཁོར་སྒོ་རུ་བསམས་ནས་ནི། །སྒོ་ཁྱུད་དེར་ནི་བྱ་བ་ཡིན། །སྒོ་ཁྱུད་དཀྱིལ་འཁོར་རྣམ་པ་ནི། །སྙིང་པོའི་དཀྱིལ་འཁོར་དང་མཉམ་པར། །དགུ་ ཆ་རུ་ནི་རྣམ་བགོས་ཏེ། །གྲྭ་ཡི་དཀྱིལ་འཁོར་དོར་བར་བྱ། །ཐ་མར་ཁྱམས་དང་ལྡན་པ་ཡི། །དཀྱིལ་འཁོར་ལྔས་ནི་བརྒྱན་པ་དང་། །ཁ་དོག་ལྔ་དང་ཡང་དག་ལྡན། །གྲུ་བཞི་པར་ནི་བརྟག་པར་བྱ། །ལྟ་བ་ལྔ་པོ་བགྲོད་དཀའ་ཆེ། །ཁ་དོག་ལྔ་ཡི་དེ་བཞིན་གཤེགས། ། སངས་རྒྱས་ལྔ་དང་མཉམ་སྦྱོར་བས། །ས་ནི་ཚོན་གྱིས་རབ་ཏུ་བསྒྱུར། །དཀྱིལ་འཁོར་ལྔ་ཡི་དབུས་སུ་ནི། །སངས་རྒྱས་ལྔ་ནི་དགོད་པར་བྱ། །ཁ་དོག་ལྔ་དང་ཏིང་འཛིན་གྱིས། །འདོད་པའི་ཡོན་ཏན་ལྔ་ཡིས་ཁྱབ། །ཤེལ་དང་ཟླ་བའི་འོད་འདྲ་ཞིང་། །སངས་རྒྱས་ཐམས་ ཅད་གཅིག་བསྡུས་པ། །དེ་བཞིན་གཤེགས་པ་རྣམ་སྣང་མཛད། །དཔའ་བོའི་ལྟ་བ་དེ་བཞིན་གཤེགས། །ཨིནྡྲ་ནཱི་ལའི་འོད་འདྲ་ཞིང་། །རྡོ་རྗེ་ཐམས་ཅད་གཅིག་བསྡུས་པ། །མི་བསྐྱོད་ཡེ་ཤེས་ལས་བྱུང་བ། །རྡོ་རྗེའི་ལྟ་བ་དེ་བཞིན་གཤེགས། །འཛམ་བུའི་གསེར་གྱི་ འོད་འདྲ་ཞིང་། །སངས་རྒྱས་ཐམས་ཅད་གཅིག་བསྡུས་པ། །སེམས་ཅན་ཀུན་གྱི་དོན་དུ་བྱུང་། །འབར་བའི་ལྟ་བ་དེ་བཞིན་གཤེགས། །དཔའ་བོ་ཆེན་པོ་པདྨ་འདྲ། །པདྨ་རཱ་གའི་ནོར་བུའི་འོད། །ཆོས་ཀྱི་ཡེ་ཤེས་ལས་བྱུང་བ། །ཆགས་པའི་ལྟ་བ་དེ་བཞིན་གཤེགས། །
- 9a
མ་རྒད་ཀྱི་ནི་འོད་འདྲ་ཞིང་། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གཅིག་ལས་བྱུང་བ། །བྱམས་པའི་ལྟ་བ་དེ་བཞིན་གཤེགས། །དབུས་མའི་ས་ཡི་གཞི་དག་པ། །ནོར་བུ་ཆུ་ཤེལ་མདོག་འདྲ་བ། །ཤར་ཕྱོགས་ཉིད་ དུ་སྔོན་པོ་ཆེ། །ལྷོ་རུ་སེར་པོ་ཡང་དག་ལྡན། །ནུབ་ཕྱོགས་དེར་ནི་དམར་པོ་སྟེ། །བྱང་དུ་ལྗང་དང་ཡང་དག་ལྡན། །ཀུན་ཏུ་ཁྱམས་དང་ལྡན་པ་ལ། །སྒོར་ནི་ཁྱམས་དང་བྲལ་བའོ། །གང་ཞིག་དབུས་མར་ཡང་དག་བཤད། །སངས་རྒྱས་ཡེ་ཤེས་བླ་མེད་ཡིན། ། གཞན་དག་དོན་ཀུན་ཡང་དག་ལྡན། །ཏིང་འཛིན་ཡེ་ཤེས་དམ་པ་ཡིན། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་སྐུ་ནི་རྣམ་བསྒོམས་ལ། །སྤྱན་ནི་དབུས་སུ་བསམ་པར་བྱ། །བཞིན་བཟངས་སྤྱན་ནི་ཡངས་པ་དང་། ། ནོར་བུ་ཆུ་ཤེལ་མདོག་འདྲ་ལ། །མཚན་རྣམས་ཐམས་ཅད་ཡོངས་སུ་རྫོགས། །བུད་མེད་སྒྱུ་མའི་མཆོག་འཛིན་པ། །ཕྱག་ཏུ་འཁོར་ལོ་བསྒོམ་བྱ་སྟེ། །ཁམས་གསུམ་པ་ནི་དབང་བྱེད་པ། །དངོས་ཀུན་གྲུབ་བྱེད་ཡེ་ཤེས་ནི། །འཁོར་ལོ་ཡིད་བཞིན་ནོར་བུའི་མདོག །ནམ་ མཁའི་རྡོ་རྗེ་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་སྐུ་ནི་རྣམ་བསྒོམས་ལ། །ནམ་མཁའི་རྡོ་རྗེ་མཆོག་བསྒོམ་མོ། །ཞལ་མཛེས་སྤྱན་ནི་ཡངས་པ་དང་། །ཨུཏྤལ་སྔོན་པོའི་འདབ་མའི་མདོག །མཚན་རྣམས་ཐམས་ཅད་ཡང་དག་རྫོགས། ། ནམ་མཁའི་སྒྱུ་མའི་མཆོག་བསམ་མོ། །ཕྱག་ཏུ་ཨུཏྤལ་སྔོན་དམར་ཏེ། །ཁམས་གསུམ་པ་ནི་ཕྱག་བྱས་པ། །སངས་རྒྱས་བྱང་ཆུབ་བྱེད་པའི་མཆོག །གསང་བའི་དངོས་གྲུབ་རྡོ་རྗེ་ཅན། །ནམ་མཁའ་རྡོ་རྗེའི་དབུས་ཆུད་པ། །ཟླ་བའི་དཀྱིལ་འཁོར་དམ་པ་བསམ། ། སངས་རྒྱས་སྐུ་ནི་རྣམ་བསྒོམས་ལ། །རྡོ་རྗེ་ཆོས་མར་རྣམ་པར་བསམ། །མཛེས་པའི་ཞལ་ལ་སྤྱན་ཡངས་པ། །པདྨ་རཱ་ག་ལྟ་བུའི་མདོག །སྐུ་མདོག་དམར་པོ་ཡང་དག་བྱུང་། །ཆགས་པའི་པདྨ་འཛིན་སྡུག་པ། །མཚན་རྣམས་ཐམས་ཅད་ཡང་དག་རྫོགས། །རྒྱན་
- 9b
རྣམས་ཀུན་གྱིས་རྣམ་པར་བརྒྱན། །ཕྱག་ཏུ་ཨུཏྤལ་དམར་པོ་ནི། །སངས་རྒྱས་ཐམས་ཅད་རབ་བསྒོམས་པའོ། །ཆོས་ཀྱི་ཡེ་ཤེས་བྱེད་པ་མཆོག །གསང་བ་དམ་ཚིག་རྡོ་རྗེ་ཅན། །མཁའ་དབྱིངས་རྡོ་རྗེའི་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་ རྒྱས་གཟུགས་ནི་རྣམ་བསྒོམས་ལ། །སྒྲོལ་མ་མཆོག་ནི་བསམ་པར་བྱ། །ཞལ་མཛེས་སྤྱན་ནི་ཡངས་པ་དང་། །སྣ་ཚོགས་རྒྱན་གྱིས་རབ་ཏུ་བརྒྱན། །ཁ་དོག་སེར་པོ་ཉིད་བསམ་ཞིང་། །བུད་མེད་སྒྱུ་མའི་དྲེགས་བོར་བ། །ཕྱག་ཏུ་ཨུཏྤལ་དམ་པ་ནི། །སེར་པོ་སྣང་བ་བསྒོམ་ པར་བྱ། །རྡོ་རྗེ་ཉིད་འཛིན་ལས་བྱུང་བ། །སེམས་ཅན་ཀུན་གྱིས་ཕྱག་བྱས་པའོ། །ཨོྃ་རུ་རུ་སྥུ་རུ་ཛྭ་ལ་ཏིཥྛ་སིད་དྷ་ལོ་ཙ་ནེ། སརྦ་ཨརྠ་སཱ་དྷ་ནི་སྭཱ་ཧཱ། ཨོྃ་ཤཾ་ཀ་རེ་ཤཱནྟི་ཀ་རེ་གྷྲུཊྚ་གྷྲུཊྚི་ནི། གྷཱ་ཏ་ཡ་གྟཱ་ཏ་ཡ་གྷུ་ཊྚི་ནི་སྭཱ་ཧཱ། ཨོྃ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊྃ་ཀ་ཊེ་སྭཱ་ཧཱ། ཨོྃ་ཏཱ་རེ་ཏུ་ཏྟཱ་རེ་ ཏུ་རེ་སྭཱ་ཧཱ། རིག་པའི་ལྷ་མོ་བཞིའོ། །སྐུ་ནི་ལུས་ཀྱི་ངོ་བོ་ཡིས། །ཐུགས་ནི་སེམས་ཀྱི་རྣམ་པ་ཉིད། །གསུང་ནི་ངག་གི་རྣམ་པ་ཡིན། །མཆོད་ན་མཆོད་པའི་བདག་ཉིད་འགྱུར། །སྐུ་གསུང་ཐུགས་ཀྱི་གསང་བ་ནི། །མཁས་པ་ཡིས་ནི་བསྲུང་བྱ་སྟེ། །བསྲུངས་ན་མཆོག་ ཏུ་གསང་བ་ནི། །རྟག་པར་ཀུན་ཏུ་འབྱུང་བར་འགྱུར། །དངོས་པོ་ཡོངས་སུ་དག་པ་ནི། །མེད་པས་ཀུན་ཏུ་བརྟག་མི་འབྱུང་། །རྣལ་འབྱོར་པ་ཡིས་རྣལ་འབྱོར་ཐོབ། །ཚོགས་མེད་ཡང་དག་མི་མཐོང་ངོ་། །དེ་བས་གསང་བའི་ཡེ་ཤེས་འབྱུང་། །རྣལ་འབྱོར་ཀུན་ཏུ་ འབྱུང་བར་འགྱུར། །ཤེས་རབ་ཕ་རོལ་ཕྱིན་པའི་ཐབས། །ཏིང་འཛིན་ཡེ་ཤེས་བརྟགས་པ་ཡིན། །ཆོས་རྣམས་ཐམས་ཅད་རྣམ་དག་པ། །དག་པ་ཉིད་དུ་གྱུར་པ་ནི། །ཇི་ལྟར་ལྷ་ཡི་ནོར་བུ་ནི། །རང་གི་འོད་ཀྱིས་རྟག་ཏུ་སྣང་། །སྲིད་པ་ཡོངས་སུ་དག་པ་ཡང་། ། རྣལ་འབྱོར་རྣལ་འབྱོར་ཐོབ་བྱེད་ཡིན། །རྡོ་རྗེ་དབྱིངས་ནི་གསང་ཆེན་དུ། །གང་ཞིག་དབང་བསྐུར་མཁས་པ་ལ། །ཐུགས་ཀྱི་གསང་བའི་རྣལ་འབྱོར་མཆོག །མཁས་པས་དེ་ལ་བཤད་པར་བྱ། །ཐམས་ཅད་གསང་བ་ཞེས་བྱ་བའི་རྒྱུད་ཀྱི་རྒྱལ་པོ་རྫོགས་སོ།། །།
- 10a
རྒྱ་གར་གྱི་མཁན་པོ་པདྨཱ་ཀ་ར་བ་རྨ་དང་། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅། །རྒྱ་གར་སྐད་དུ། ཏྲཻ་ལོ་ཀྱ་བི་ཛ་ ཡ་མ་ཧཱ་ཀལྤ་རཱ་ཛཱ། བོད་སྐད་དུ། འཇིག་རྟེན་གསུམ་ལས་རྣམ་པར་རྒྱལ་བ་རྟོག་པའི་རྒྱལ་པོ་ཆེན་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་རབ་རིའི་རྩེ་མོ་ན་རྡོ་རྗེ་དང་ནོར་བུ་རིན་པོ་ཆེ་རྩེ་མོའི་ ཁང་པ་བརྩེགས་པ་ན། བྱང་ཆུབ་སེམས་དཔའ་བྱེ་བ་ཕྲག་དུ་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མིའམ་ཅི་དང་། འབྱུང་པོ་དང་། ཤ་ཟ་དང་། བརྗེད་བྱེད་དང་། མ་མོ་རྣམས་དང་། བལྟར་རུང་བ་དང་། བལྟར་མི་རུང་བ་དུ་མ་སངས་ རྒྱས་ཀྱི་བསྟན་པ་ལ་མངོན་པར་དད་པ་རྣམས་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ་ནམ་མཁའི་དཀྱིལ་ནས་བབས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ནས། བཅོམ་ལྡན་འདས་ལ་ ལན་གསུམ་བསྐོར་བ་བྱས་ཏེ་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་བདག་གིས་ལྷ་ཆེན་པོ་ལ་སོགས་པ་སེམས་ཅན་མ་རུངས་པ་དེ་དག་ལ་དམ་ཚིག་འཛིན་དུ་སྩལ་བར་འཚལ་ན། བཅོམ་ལྡན་འདས་དེའི་སླད་དུ་བདག་ལ་བཀའ་སྩལ་དུ་གསོལ། དེ་ནས་ཕྱག་ན་རྡོ་རྗེ་བྱང་ ཆུབ་སེམས་དཔའ་ཆེན་པོའི་ཚིག །བཅོམ་ལྡན་འདས་ཆོས་ཀྱི་རྒྱལ་པོ་ཆེན་པོ་དེ་བཞིན་གཤེགས་པས་གསན་ནས་ཕྱག་ན་རྡོ་རྗེ་ལ་འདི་སྐད་ཅེས་གསུངས་སོ། །གནོད་སྦྱིན་ཁྱོད་ཤིན་ཏུ་ཁེངས་པ་ཤིན་ཏུ་ཁྲོ་བ་ཤིན་ཏུ་འཐུར་བ་དེ། ཅི་ལྟར་ཁྱོད་ཀྱིས་སེམས་ཅན་རྣམས་ཀྱི་དོན་གྱི་ཕྱིར་ འདི་ལྟ་བུའི་སྔགས་ཀྱི་ཚིག་སྨྲ། དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྐད་ཅེས་གསོལ་ཏོ། །དེའི་ཕྱིར་ན་བཅོམ་ལྡན་འདས་བདག་སེམས་ཅན་མ་རུངས་པ་འདུལ་བར་བགྱིད་དོ། །གང་གི་ཕྱིར་ཞེ་ན། བདག་གིས་འདོད་པའི་
- 10b
བདེ་བ་ཅན་རྣམས་དབང་དུ་བགྱི་བ་ལ་སོགས་པས་བཏུལ་ནས། བླ་ན་མེད་པའི་བདེ་བ་ལ་དགོད་པར་འཚལ་ལོ། །སེམས་ཅན་མ་རུངས་པ་རྣམས་བསད་པ་ལ་སོགས་པས་སྦྱངས་ཏེ་ཞི་བ་ལ་དགོད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་ དཔའ་ལ་ལེགས་སོ་ཞེས་བྱ་བ་བྱིན་ཏེ། ཕྱག་ན་རྡོ་རྗེ་ལེགས་སོ་ལེགས་སོ། །འཇིག་རྟེན་ཐམས་ཅད་ཀྱི་དོན་གྱི་ཕྱིར་དང་། ཕན་པའི་ཕྱིར་དང་། བདེ་བའི་ཕྱིར་སྙིང་པོ་འདི་སྨྲོས་ཤིག །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔས་ལྷ་ཐམས་ཅད་ནས་མི་རྣམས་ཐམས་ཅད་ ཀྱི་བར་དུ་སངས་རྒྱས་ཀྱི་བསྟན་པ་ལ་མངོན་པར་དད་པ་དེ་རྣམས་ལ་བཀའ་སྩལ་པ། གྲོགས་པོ་དག་སངས་རྒྱས་ལ་སྐྱབས་སུ་དོང་ཤིག །ངའི་བཀའ་ཡང་རྗེས་སུ་སྐྱོངས་ཤིག །དེ་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་ན་རྡོ་རྗེས་ཕྱག་འཚལ་ནས། འཇིག་རྟེན་ གསུམ་ལས་རྣམ་པར་རྒྱལ་བའི་སྙིང་པོ་འདི་གསུངས་སོ། །ཨོྃ་སུམ་བྷ་ནི་སུམ་བྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀ་ཧྞཱ་པ་ཡ་གྲྀཧྞཱ་བ་ཡ་ཧཱུྃ། ཨཱ་ན་ཡ་ཧོ་བྷ་ག་བཱ་ན་བཛྲ་ཧཱུྃ་ཕཊ། དེ་ནས་འདི་གསུངས་པ་ཙམ་གྱིས་འཇིག་རྟེན་གསུམ་ཐམས་ཅད་གཡོས་རབ་ཏུ་གཡོས་ཀུན་ཏུ་རབ་ཏུ་ གཡོས་སོ། །འགུལ་རབ་ཏུ་འགུལ་ཀུན་ཏུ་རབ་ཏུ་འགུལ་ཏོ། །འཕར་རབ་ཏུ་འཕར་ཀུན་ཏུ་རབ་ཏུ་འཕར་རོ། །དེ་ནས་ལྷ་ཐམས་ཅད་ལ་སོགས་པ་སེམས་ཅན་ཐམས་ཅད་འདར་ཡེད་ཡེད་ནས། བཅོམ་ལྡན་འདས་ག་ལ་བ་དེར་ལྷགས་ནས། ཁོ་ར་ཁོར་ཡུག་དང་ཁོ་ར་ ཁོར་ཡུག་ཆེན་པོའི་རི་ལ་སོགས་པ་ཚུན་ཆད་ཀྱི་གླིང་བཞི་པའི་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ཀྱིས་གང་ངོ་། །དེ་ནས་བཅོམ་ལྡན་འདས་ཕྱག་ན་རྡོ་རྗེས་གླིང་བཞི་བའི་འཇིག་རྟེན་གྱི་ཁམས་སུ་ཚོགས་པའི་དཀྱིལ་འཁོར་ཐམས་ཅད་ལ་གཟིགས་ནས་ འདི་སྐད་གསུངས་སོ། །གྲོགས་པོ་རྣམས་སངས་རྒྱས་ལ་སོགས་པ་ལ་སྐྱབས་སུ་འགྲོ་བར་ཁས་ལོང་ཤིག །ངའི་བཀའ་ཡང་རྗེས་སུ་སྐྱོངས་ཤིག །དེ་ནས་འདུས་པའི་འཁོར་ཆེན་པོ་ཐམས་ཅད་བཅོམ་ལྡན་འདས་ཕྱག་ན་རྡོ་རྗེས་སྐྲག་སྟེ། འདར་ཡེད་ཡེད་ནས་བཅོམ་ལྡན་
- 11a
འདས་དེ་བཞིན་གཤེགས་པ་ལ་སྐྱབས་སུ་དོང་ངོ་། །དེ་ནས་བཅོམ་ལྡན་འདས་ལ་ལྷ་ཆེན་པོའི་ལྷ་དང་མཐུ་བོ་ཆེ་དང་ཚངས་པ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་སེམས་ཅན་འདི་ལྟར་རྫུ་འཕྲུལ་ཆེ་བ། འདི་ལྟར་བྱིན་ཆེ་ཞིང་བདག་ཅག་ལ་ འཆོས་པ་འདི་སུ་ལགས། དེ་ནས་བཅོམ་ལྡན་འདས་ཀྱིས་དོན་འདི་བསྟན་པའི་ཕྱིར་ཚིགས་སུ་བཅད་པ་འདི་གླེངས་ཏེ་གསུངས་སོ། །སེམས་ཅན་ཀུན་ལ་ཕན་པའི་ཕྱིར། །སངས་རྒྱས་ཀུན་གྱིས་བྱིན་གྱིས་བརླབས། །ཀུན་ཏུ་བཟང་པོ་ཀུན་གྱི་བདག །སངས་རྒྱས་ཐམས་ ཅད་ཉིད་སྐྱེས་འདི། །ཕྱག་ན་རྡོ་རྗེ་གནོད་སྦྱིན་ཆེ། །མ་རུངས་འཆོས་ལ་དབང་བ་སྟེ། །གང་གི་མིང་བརྗོད་པ་ཡིས་ནི། །སངས་རྒྱས་པ་ཡང་ཐོབ་པར་འགྱུར། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་ཡང་གསུངས་པ། ཀྱེ་ཀྱེ་ལྷ་དག་སངས་རྒྱས་ལ་ སྐྱབས་སུ་དོང་ལ་ངའི་བཀའ་བཞིན་དུ་ཡང་གྱིས་ཤིག །རྡོ་རྗེ་འབར་བ་གཅིག་ཏུ་འབར་བར་གྱུར་པ་འདིས་ཁྱེད་ཐམས་ཅད་གཏན་སྲེག་པར་འགྱུར་ཏ་རེ། དེ་ནས་ལྷ་ཆེན་པོ་ལ་སོགས་པ་ཐམས་ཅད་ཀྱིས་འདི་སྐད་སྨྲས་སོ། །ཁྱོད་ནི་གནོད་སྦྱིན་ངེད་ནི་ལྷ་བས་ན་ངེད་ཀྱིས་གནོད་ སྦྱིན་གྱི་བཀའ་རྗེས་སུ་སྐྱོང་བར་མི་ནུས་སོ། །དེ་ནས་ཕྱག་ན་རྡོ་རྗེས་དེ་ཐོས་ནས་ཁྲོས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་བདག་མ་རུངས་པ་ཐམས་ཅད་འདུལ་བར་དབང་བསྐུར་ཏེ་བསྐོས་སོ། །དེ་བས་ན་གལ་ཏེ་བཅོམ་ ལྡན་འདས་ཀྱིས་བདག་ལ་བཀའ་སྩལ་ན། ལྷ་ཆེན་པོ་འདི་འདུལ་བར་འཚལ་ལོ། །དེ་ནས་བཅོམ་ལྡན་འདས་ཀྱིས་ལྷ་ཆེན་པོ་ལ་འདི་སྐད་ཅེས་གསུངས་སོ། །སེམས་ཅན་ཆེན་པོ་ཁས་ལོང་ཤིག །འདིས་ཁྱོད་བསད་ཏ་རེ། དེ་ནས་བཅོམ་ལྡན་འདས་ལ་ལྷ་ཆེན་པོ་ལ་སོགས་ པ། འཇིག་རྟེན་གསུམ་ཐམས་ཅད་ཀྱི་དབང་པོ་ལྷ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གནོད་སྦྱིན་མ་རུངས་པ་འདིའི་བཀའ་བཞིན་དུ་བྱེད་པ་བདག་ཅག་མ་ལགས་སོ། །དེ་ནས་ལྷ་ཆེན་པོས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། བཅོམ་
- 11b
ལྡན་འདས་ཕྱག་ན་རྡོ་རྗེ་ལ་འདི་སྐད་ཅེས་སྨྲས་སོ། །ཀྱེ་གནོད་སྦྱིན་ང་ནི་ཐམས་ཅད་ཀྱི་དབང་པོ་ཆེན་པོ་བྱེད་པ་པོ་འཇོམས་པ་པོ་སྐྱེ་དགུའི་བདག་པོ་ཚངས་པའོ། །གཏོགས་འདོད་དོ། །དབང་ཕྱུག་ཆེན་པོའོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ་ཁྲོས་ནས་ འདི་སྐད་གསུངས་སོ། །ཁྱོད་ནི་ལུས་སྲུལ་པོ་མི་ཤ་ཟ་བ་མ་རུངས་པ་དྲག་ཤུལ་གྱི་ལས་བྱེད་པས་ན་གཏུམ་པ་སྟེ། ཤ་ཟའི་ལུས་སྲེལ་བ་ན་ཇི་ལྟར་ཚངས་པ་དང་གཏོགས་འདོད་དང་དབང་ཕྱུག་ཆེན་པོ་ཡིན་ཚངས་པ་ཞེས་བྱ་བ་ནི་མི་འགྱུར་བའོ། །གཏོགས་འདོད་ཅེས་བྱུ་བ་ནི་ ཐར་པའོ། །དབང་ཕྱུག་ཆེན་པོ་ཞེས་བྱ་བ་ནི་འདོད་པའི་ཁམས་ཀྱི་དབང་པོ་སྟེ། སེམས་ཅན་ཐམས་ཅད་ཀྱི་དབང་པོ་དེ་ནི་ང་ཡིན་པས་འདུལ་ནུས་སོ། །དེ་ནས་དབང་ཕྱུག་ཆེན་པོ་ལྷ་ཆེན་པོ་ཁྲོས་ནས། བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། འཇིགས་སུ་ རུང་བ་ཆེན་པོའི་གཟུགས་ཁྲོས་པ་ཆེན་པོའི་གད་མོས་བགད་ནས་འཇིགས་པ་ཆེན་པོར་བྱེད་པ་འབར་བ་ཆེན་པོ་སྟོང་པ་འཇིག་རྟེན་གྱི་ཁམས་ཐམས་ཅད་མཐའ་མེད་པར་གཟུགས་སྣ་ཚོགས་སུ་བྱས། འབར་བ་ཆེན་པོའི་གྲུབ་པ། མི་མཚུངས་པ་རྡོ་རྗེ་དང་། མདུང་རྩེ་གསུམ་པ་དང་། འཁོར་ལོ་དང་། ཤཀ་ཏི་དང་། བེ་ཅོན་དང་། མི་མཚུངས་པའི་མཚོན་ཆ་འདེབས་ཤིང་གཏོང་བ་མ་མོ་རྣམས་ཀྱི་ཚོགས་དང་འབྱུང་པོའི་ཚོགས་རྣམས་དང་བཅས་པར་ཀུན་བསྟན་ཏོ། །བདུད་དང་བགེགས་བྱེད་པ་དང་མཐའ་དང་མུ་མེད་པའི་གཟུགས་སྣ་ཚོགས་སུ་སྤྲུལ། ཁྲོ་བོ་རབ་ཏུ་མི་བཟད་པ་མ་རུངས་པའི་ཚོགས་ཆེན་པོ་དང་ལྷན་ཅིག་ཏུ་རབ་ཏུ་འཐབ་ཅིང་ཤིན་ཏུ་འགྱེད་པ། གླིང་བཞི་པའི་འཇིག་རྟེན་གྱི་ཁམས་མཚན་མོའི་མུན་གནག་ཏུ་བྱས། འབར་བ་ཆེན་པོའི་ཕུང་པོས་ཀློངས་ཏེ་རབ་ཏུ་སྣང་བར་བྱས་སོ། །དེ་ནས་བཅོམ་ལྡན་འདས་ རྡོ་རྗེ་འཆང་བ་ཆེན་པོ་ཅུང་ཟད་དུ་མཆེ་བའི་ཐོག་མ་གཙིགས་པ། སྨིན་མཚམས་ཀྱི་ཁྲོ་གཉེར་གྱི་རླབས་བསྐྱོད་པ། མིག་གཡོན་པ་ཆེར་བགྲད་དེ། རྡོ་རྗེའི་ལྟ་བ་ཁྲོ་བ་དང་བཅས་པས་ཟབ་མོའི་ཚིག་གིས་སྙིང་པོ་མཆོག་འཇིག་རྟེན་གསུམ་ལས་རྣམ་པར་རྒྱལ་བའི་དཔལ་
- 12a
ཞེས་བྱ་བ་འདི་གསུངས་སོ། །ཧཱུྃ། དེ་ནས་ཧཱུྃ་ཞེས་བྱ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་སྒྲ་དེས་གང་ནས། གཡོས་རབ་ཏུ་གཡོས། ཀུན་ཏུ་རབ་ཏུ་གཡོས་གཡོས་སོ། །འཁྲོལ་རབ་ཏུ་འཁྲོལ་ཀུན་ཏུ་རབ་ཏུ་འཁྲོལ་ལོ། །དེ་ ནས་དབང་ཕྱུག་ཆེན་པོ་ལ་སོགས་པ་ལྷའི་ཚོགས་ཐམས་ཅད་བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྐྱབ་ཏུ་གསོལ་ཞེས་ནས་བཅོམ་ལྡན་འདས་ལ་སྐྱབས་སུ་དོང་ངོ་། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་འདི་སྐད་གསུངས་སོ། །གང་འདི་ལྟ་ བུའི་སྔགས་ཀྱི་ཚིག་སྨྲ་བ་ནི་ཁྱོད་རབ་ཏུ་མི་བགྲུངས་སོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས། ཡང་འཇིག་རྟེན་གསུམ་ལས་རྣམ་པར་རྒྱལ་བ་འདི་གསུངས་སོ། །ཨོྃ་སུམ་བྷ་ནི་སུམ་བྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀཏྞཱ་པ་ཡ་གྲྀཧྞཱ་པ་ཡ་ ཧཱུྃ། ཨཱ་ན་ཡ་ཧོ་བྷ་ག་བཱན་བཛྲ་ཧཱུྃ་ཕཊ། དེ་ནས་འདི་གསུངས་པ་ཙམ་གྱིས་ལྷ་ཆེན་པོ་ལ་སོགས་པ་ལྷའི་བདག་པོ་ཐམས་ཅད་འཁོར་དང་བཅས་པར། བཅོམ་ལྡན་འདས་ཕྱག་ན་རྡོ་རྗེ་གང་ན་བ་དེར་མགོ་རྐང་བཟློག་སྟེ། རི་རབ་རིའི་རྩེ་མོའི་དཀྱིལ་འཁོར་ཆེན་པོར་བཙུད་ ནས་བརླམས་པར་བྱས་ཏེ། བཅོམ་ལྡན་འདས་ཕྱག་ན་རྡོ་རྗེའི་ཞབས་གཡོན་པས་མནན་ཏོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ལེགས་སོ་ཞེས་བྱ་བ་བྱིན་ཏེ་ཕྱག་ན་རྡོ་རྗེ་ཁྱོད་ཀྱིས་འདི་འདྲ་བར་སེམས་ཅན་འདུལ་བར་ བྱེད་པ་ལེགས་སོ་ལེགས་སོ། །དེ་བས་ན་ཐུལ་ལ་དབུགས་ཕྱུང་ཤིག །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་དག་གི་དོན་གྱི་ཕྱིར་རྡོ་རྗེས་བཅིངས་པ་འདི་གསུངས་སོ། །ཧཱུྃ་བཛྲ་ཌྀ་དྷོ་མེ་བྷ་བ་རཀྵ་སརྦཱ་ན་སྭཱ་ཧཱ། དེ་ནས་ཕྱག་ན་རྡོ་རྗེས་འདི་ གསུངས་པ་ཙམ་གྱིས་ལྷ་ཆེན་པོ་ལ་སོགས་པ་ལྷ་དེ་དག་ཐམས་ཅད་དྲན་པ་རྙེད་དོ། །དེ་ནས་བཅོམ་ལྡན་འདས་ཀྱིས་དེ་དག་ལ་འདི་སྐད་གསུངས་སོ། །གྲོགས་པོ་དག་སེམས་ཅན་ཆེན་པོ་འདིའི་བཀའ་བཞིན་དུ་བྱེད་པར་ཁས་ལོང་ཤིག །དེ་ནས་བཅོམ་ལྡན་འདས་ལ་དེ་དག་ཐམས་
- 12b
ཅད་མགྲིན་གཅིག་ཏུ་བདག་ཅག་མཆིད་ཀྱིས་འཚལ་ལོ་ཞེས་གསོལ་ཏོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་རང་གི་སྙིང་པོ་འདི་གསུངས་སོ། །ཧཱུྃ་ཊཀྐི་ཧོ། དེ་ནས་འདི་བརྗོད་པ་ཙམ་གྱིས་ལྷ་ལ་སོགས་པ་ཐམས་ཅད་དབང་དུ་བྱས་ཏེ། བཅོམ་ ལྡན་འདས་ཕྱག་ན་རྡོ་རྗེ་ལ་ཕྱག་བྱས་ནས་མཆི་མ་བླགས་ཏེ། ང་རོ་བཏོན་ནས་སྐྱབས་སུ་དོང་སྟེ། བཅོམ་ལྡན་འདས་བསྐྱབ་ཏུ་གསོལ། ད་བདག་ཅག་ཁྱོད་ཀྱི་བཀའ་ཉན་ན་ཅི་ལྟར་བགྱི་བ་བཀའ་སྩལ་དུ་གསོལ་ཞེས་སོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་དེ་ རྣམས་ལ་གསུངས་པ། གྲོགས་པོ་དག་བྱང་ཆུབ་ཀྱི་སེམས་དང་སྡོམ་པ་གཟུང་བར་ཁས་ལོང་ཤིག །དེ་དག་གིས་གསོལ་བ། བཅོམ་ལྡན་འདས་བདག་ཅག་གིས་སངས་རྒྱས་བཅོམ་ལྡན་འདས་རྣམས་ལ་བསྙེན་བཀུར་བགྱིད་ཅིང་བྱང་ཆུབ་ཏུའང་སེམས་བསྐྱེད་པར་འཚལ་ལོ། ། དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་ཡང་དེ་རྣམས་ཇི་ལྟ་བ་བཞིན་དུ་དཀྱིལ་འཁོར་དུ་བཙུད་ནས་སྡོམ་པ་འཛིན་དུ་བཅུག་སྟེ། བྱང་ཆུབ་སེམས་ནི་བརྟན་བྱས་པ། །སེམས་ཅན་ཐམས་ཅད་བདེ་བ་སྩལ། །ཕྱག་ན་རྡོ་རྗེ་བདག་ཆེན་དང་། །འདོད་པ་སྨད་པར་ མི་བྱའོ། །འདི་ནི་གསང་བ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་དེ་དག་སྡོམ་པ་འཛིན་དུ་བཅུག་ནས། དམ་ཚིག་བྱིན་པ་ནི། །ཨོྃ་བཛྲ་ས་མ་ཡ་ཨ་བྷི་ཥིཉྩ་མཱ་བི་རཱ་ག་ཡ་སརྦ་ཀཱ་མཱན་ཧཱུྃ་ཕཊ། དེ་ནས་དེ་དག་གིས་སྨྲས་པ། འདི་ནི་བདུད་ཀྱིས་སྨྲས་པས་ན་བདག་ཅག་ མི་ཉན་ཏོ། དེ་ནས་བཅོམ་ལྡན་འདས་དེ་བཞིན་གཤེགས་པས་དེ་དག་ལ་ཁྱེད་ཅག་གིས་འདི་ལ་མ་བརྙས་ཤིག་ཅེས་གསུངས་པ་དང་། དེ་དག་གིས་གསོལ་པ། ཇི་ལྟར་འདོད་ཆགས་དང་བྲལ་བ་ནི་སངས་རྒྱས་ཀྱི་བྱང་ཆུབ་བོ་ཞེས་བཅོམ་ལྡན་འདས་ཉིད་ཀྱིས་བཀའ་སྩལ་ ཏོ། །བཅོམ་ལྡན་འདས་ཀྱིས་གསུངས་པ། ཀྱེ་གྲོགས་པོ་དག་ང་ནི་ཇི་ལྟར་འདུལ་བཞིན་དུ་བྱེད་པ་སྟེ། འདི་ཉིད་ཀྱིས་འཇིག་རྟེན་གྱི་ཁམས་འདི་སུན་འབྱིན་ཏེ། ཇི་ལྟར་བདེ་བ་ལ་མི་ཆགས་པ་དང་། སྡུག་བསྔལ་ལ་འདོད་ཆགས་པ་ཅན་ཇི་ལྟ་བུས་འཇིག་རྟེན་འདུལ་བར་
- 13a
འགྱུར་བའི་ཆོས་སངས་རྒྱས་བཅོམ་ལྡན་འདས་རྣམས་འཆད་པར་མཛད་དེ། དེ་དག་སྦྱང་བའི་ཕྱིར་འདི་ནི་དེ་བཞིན་གཤེགས་པ་ཐམས་ཅད་ཀུན་ཏུ་བཟང་པོ་བྱང་ཆུབ་སེམས་དཔས་ཅི་ནས་ཀྱང་འདོད་ཆགས་དང་བྲལ་བར་མ་བྱེད་ཅིག་ཅེས་བཀའ་སྩལ་ཏོ། །དེ་ནས་ ཕྱག་ན་རྡོ་རྗེས་ཡང་གསུངས་པ། །ཨོྃ་བཛྲ་ས་མ་ཡ་ཨ་བྷི་ཥིཉྩཱ་མི་བི་རཱ་ག་ཡ་སརྦ་ཀཱ་མཱྃ་ཧཱུྃ་ཕཊ། དེ་ནས་དེ་དག་གིས་ཇི་ལྟར་བཅོམ་ལྡན་འདས་ཀྱིས་བཀའ་སྩལ་པ་བཞིན་ནོ་ཞེས་གསོལ་ཏོ། །དེ་ནས་ཡང་ཕྱག་ན་རྡོ་རྗེས་ལག་ཏུ་རྡོ་རྗེ་བྱིན་ཏེ། རྡོ་རྗེའི་དབང་བསྐུར་བ་འདི་བྱིན་ནོ། ། ཨོྃ་བཛྲ་ཨ་བྷི་ཥིཉྩ་སརྦ་ཏ་ཐཱ་ག་ཏ་བཛྲ་དྷ་རོ་ཏྟྭེ་བཛྲ་པཱ་ཎི་ཧཱི། ཧ་ཧ་ཧ་ཧ། དེ་ནས་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། དབང་ཕྱུག་ཆེན་པོ་ནི་རྡོ་རྗེ་རིག་སྔགས་མཆོག་གོ། །མཐུ་བོ་ཆེ་ནི་རྡོ་རྗེ་སྒྱུ་མའོ། །ཚངས་པ་ནི་རྡོ་རྗེ་མི་སྨྲ་བའོ། །སྒྲ་གཞོན་ནུ་ནི་རྡོ་རྗེ་ དྲིལ་བུའོ། །དབང་པོ་ནི་རྡོ་རྗེ་འཐབ་ཆ་སྟེ། དེ་དག་ལ་སོགས་པ་འཇིག་རྟེན་གསུམ་གྱི་དབང་པོ་ཐམས་ཅད་རིག་པའི་བློན་པོ་ཆེན་པོར་དབང་བསྐུར་རོ། །དེ་ནས་བར་སྣང་ལ་རྒྱུ་བ་རྣམས་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། བདུད་རྩི་འཁྱིལ་པ་ནི་རྡོ་རྗེ་འཁྱིལ་ པའོ། །ཟླ་བ་ནི་རྡོ་རྗེ་འོད་དོ། །བེ་ཅོན་རྩེ་མོ་ནི་རྡོ་རྗེ་བེ་ཅོན་ནོ། །སྐྱ་སླེང་ནི་རྡོ་རྗེ་སྐྱ་སླེང་སྟེ། དེ་རྣམས་ནི་རྡོ་རྗེ་ཁྲོ་བོར་དབང་བསྐུར་རོ། །དེ་ནས་ནམ་མཁའ་ལ་རྒྱུ་བའི་ལྷ་རྣམས་རྡོ་རྗེ་མིང་གིས་དབང་བསྐུར་བ་བྱིན་པ་ནི། འདི་ལྟ་སྟེ་ཆང་གིས་མྱོས་པ་ནི་རྡོ་རྗེས་ཟིན་པའོ། ། ཆང་བྱེད་ནི་རྡོ་རྗེ་ཕྲེང་བའོ། །རྒྱལ་བ་ནི་རྡོ་རྗེ་དབང་ངོ་། །རྒྱལ་བ་སྐྱེས་པ་ནི་རྡོ་རྗེ་རྣམ་པར་རྒྱལ་བ་སྟེ། དེ་དག་ལ་སོགས་པ་ནི་ཚོགས་ཀྱི་བདག་པོར་དབང་བསྐུར་རོ། །དེ་ནས་ས་པ་རྣམས་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། མཛོད་སྐྱོང་ནི་རྡོ་རྗེ་གྲུ་ཤིང་ངོ་། །རླུང་ནི་རྡོ་རྗེ་ རླུང་ངོ་། །མེ་ནི་རྡོ་རྗེ་མེའོ། །ཀུ་བེ་ར་ནི་རྡོ་རྗེ་འཇིགས་པ་སྟེ། དེ་དག་ལ་སོགས་པ་ནི་རྡོ་རྗེ་ཕོ་ཉར་དབང་བསྐུར་རོ། །དེ་ནས་སའི་འོག་ན་གནས་པའི་ལྷའི་དབང་པོ་ཐམས་ཅད་རྡོ་རྗེ་མིང་གིས་དབང་བསྐུར་བ་བྱིན་པ་ནི་འདི་ལྟ་སྟེ། ཕག་ནི་རྡོ་རྗེ་ཀྱོ་བའོ། །གཤིན་རྗེ་ནི་རྡོ་རྗེ་ནག་པོའོ། །
- 13b
སའི་སྤྱི་བོ་ནི་རྡོ་རྗེ་རྣམ་འདྲེན་ནོ། །བཱ་རུ་ཎ་ནི་རྡོ་རྗེ་ཀླུ་སྟེ། དེ་དག་ལ་སོགས་པ་ནི་རྡོ་རྗེ་བྲན་དུ་དབང་བསྐུར་རོ། །དེ་ནས་འཇིག་རྟེན་གསུམ་གྱི་བདག་པོ་རྣམས་ཀྱིས་ལྷ་མོ་ཐམས་ཅད་ཀྱི་ལག་ཏུ་རྡོ་རྗེ་བྱིན་ཏེ། རྡོ་རྗེའི་དབང་བསྐུར་ནས་རྡོ་རྗེ་མིང་གི་དབང་བསྐུར་བ་བྱིན་པ་ནི་འདི་ལྟ་སྟེ། ཉོན་ མོངས་པ་ནི་རྡོ་རྗེ་ཁྲོ་བ་མའོ། །ནོར་ཅན་ནི་རྡོ་རྗེ་གསེར་མའོ། །ཚངས་མ་ནི་རྡོ་རྗེ་ཞི་མའོ། །དུག་མོ་ནི་རྡོ་རྗེ་གཞོན་ནུ་མའོ། །དབང་མོ་ནི་རྡོ་རྗེ་ཁུ་ཚུར་ཏེ། དེ་དག་ལ་སོགས་པ་ནི་རིག་སྔགས་ཀྱི་བློན་མོ་ཆེན་མོར་དབང་བསྐུར་རོ། །དེ་ནས་བར་སྣང་ལ་རྒྱུ་བའི་མ་རྣམས་དབང་བསྐུར་བ་བྱིན་ པ་ནི་འདི་ལྟ་སྟེ། བདུད་རྩི་མ་ནི་རྡོ་རྗེ་བདུད་རྩི་མའོ། །འཁྲུང་མ་ནི་རྡོ་རྗེ་སྡུག་གུ་མའོ། །བེ་ཅོན་འཆང་མ་ནི་རྡོ་རྗེ་བེ་ཅོན་རྩེ་མོའོ། །སྐྱེ་འཕྲོག་མ་ནི་རྡོ་རྗེ་རྐེད་ཆིངས་ཏེ། དེ་དག་ལ་སོགས་པ་ནི་རྡོ་རྗེ་ཁྲོ་མོར་དབང་བསྐུར་རོ། །དེ་ནས་ནམ་མཁའ་ལ་རྒྱུ་བའི་མ་རྣམས་དབང་བསྐུར་བ་བྱིན་ པ་ནི་འདི་ལྟ་སྟེ། གསོད་མ་ནི་རྡོ་རྗེ་གསོད་མའོ། །ཟ་བ་མོ་ནི་རྡོ་རྗེ་ཟ་བ་མོའོ། །གོས་ནི་རྡོ་རྗེ་བགོ་བ་མོའོ། །དགའ་མོ་ནི་རྡོ་རྗེ་དབང་མོ་སྟེ། དེ་དག་ལ་སོགས་པ་ནི་རྡོ་རྗེ་ཚོགས་མ་མོར་དབང་བསྐུར་རོ། །དེ་ནས་ས་ལ་རྒྱུ་བའི་མ་རྣམས་དབང་བསྐུར་བ་བྱིན་པ་ནི་འདི་ལྟ་སྟེ། ཞི་བ་མོ་ ནི་རྡོ་རྗེ་ཕོ་ཉ་མོའོ། །རླུང་མ་ནི་རྡོ་རྗེ་མགྱོགས་མའོ། །མེ་ནི་རྡོ་རྗེ་འབར་མའོ། །ཀུ་བེ་ར་ནི་རྡོ་རྗེ་ཐག་ཐུག་མ་སྟེ། དེ་དག་ལ་སོགས་པ་ནི་རྡོ་རྗེ་ཕོ་ཉ་མོར་དབང་བསྐུར་རོ། །དེ་ནས་ས་འོག་ན་གནས་པའི་མ་ཐམས་ཅད་དབང་བསྐུར་བ་བྱིན་པ་ནི་འདི་ལྟ་སྟེ། ཕག་མོ་ནི་རྡོ་རྗེ་གདོང་ངོ་། །མགོ་ ལྤགས་མ་ནི་རྡོ་རྗེ་ནག་མོའོ། །སྣ་ཆད་མ་ནི་རྡོ་རྗེ་མྱགས་མའོ། །ཀླུ་མོ་ནི་རྡོ་རྗེ་ཆུ་སྲིན་མ་སྟེ། དེ་དག་ལ་སོགས་པ་ནི་རྡོ་རྗེ་བྲན་མོར་དབང་བསྐུར་རོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་བཙུད་པ་དེ་དག་ཐམས་ཅད་ཀྱིས་སངས་རྒྱས་ཀྱི་ཡེ་ཤེས་བསྐྱེད་ནས་རྡོ་རྗེའི་ དམ་ཚིག་བྱིན་པའོ། །ཨོྃ་བ་ལི་ཏོད་བ་ལི་ཏོད་བཛྲ་ཨཱ་ཀརྵ་ཡ་ཧཱུྃ་ཛ། ལྷ་རྣམས་དགུག་པའོ། །ཨོྃ་བཛྲ་ཨ་གྲི་པི་ཊཱ་ཡ་ས་མ་ཡ་ཧཱུྃ། བར་སྣང་ལ་རྒྱུ་བ་རྣམས་ཀྱིའོ། །ཨོྃ་བཛྲ་མཱ་ལཱ་གྲ་ལྃ། ཕྲེང་བ་འཆང་བ་རྣམས་ཀྱིའོ། །ཨོྃ་བཛྲ་བནྡྷ་ཧྃ། ས་ལ་རྒྱུ་བ་རྣམས་ཀྱིའོ། །
- 14a
ཨོྃ་བཛྲ་པཱ་ཏཱ་ལ་བྷཉྫ་ཧཱུྃ་ཕཊ། འོག་ན་གནས་པ་རྣམས་ཀྱིའོ། །ཨོྃ་ཧེ་རུ་ཀ་བཛྲ་ས་མ་ཡ་སརྦ་དུཥྚཾ་ས་མ་ཡ་མུ་པྲ་བྷནྡྷ་ཙཀྲ་ཧཱུྃ་ཕཊ། མ་མོ་རྣམས་ཐམས་ཅད་ཀྱིའོ། །དེ་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་ན་རྡོ་རྗེས་ཕྱག་འཚལ་ནས་འདི་སྐད་གསོལ་ ཏོ། །བཅོམ་ལྡན་འདས་བདག་ནི་སེམས་ཅན་ཐམས་ཅད་འདུལ་བ་ལགས་ན། བཅོམ་ལྡན་འདས་མ་རུངས་པའི་སེམས་ཅན་གྱི་དཀྱིལ་འཁོར་དེ་དག་ལ་ཇི་ལྟར་བགྱི་བ་བཀའ་སྩོལ་ཅིག །བཅོམ་ལྡན་འདས་ཀྱིས་གསུངས་པ། གང་གིས་སེམས་ཅན་དེ་རྣམས་སེམས་ཅན་ ཐམས་ཅད་ལ་ཕན་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བའི་དམ་ཚིག་འདི་ཉིད་ལ་ཚུད་ཅིག །དེ་ནས་ཡང་ཕྱག་ན་རྡོ་རྗེས་གསོལ་པ། བཅོམ་ལྡན་འདས་མཁའ་འགྲོ་མ་ལ་སོགས་པའི་གདོན་འདི་དག་ལ་ ཇི་ལྟར་ནན་ཏན་བགྱི། རིམས་ལ་སོགས་པ་ཇི་ལྟར་བགྱི། དམྱལ་བ་ལ་སོགས་པ་ངན་སོང་གི་རྣམས་ཇི་ལྟར་བགྱི། བཅོམ་ལྡན་འདས་ཀྱིས་གསུངས་པ། དམ་ཚིག་དེ་ཉིད་ལ་ནན་ཏན་བྱེད་དུ་ཚུད་ཅིག །དེ་ནས་ཕྱག་ན་རྡོ་རྗེས་ཡང་གསོལ་པ། བཅོམ་ལྡན་འདས་མི་འདི་ རྣམས་ཇི་ལྟར་ནན་ཏན་བགྱི། བཅོམ་ལྡན་འདས་ཀྱིས་གསུངས་པ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོར་བཙུད་ནས། རྡོ་རྗེའི་དཀྱིལ་འཁོར་དུ་ཚུད་ཅིག །རྡོ་རྗེའི་དཀྱིལ་འཁོར་དུ་བཙུད་ནས། དམ་ཚིག་གི་དཀྱིལ་འཁོར་དུ་ཚུད་ཅིག །དམ་ ཚིག་གི་དཀྱིལ་འཁོར་དུ་བཙུད་ནས་ལས་ཀྱི་དཀྱིལ་འཁོར་དུ་ཚུད་ཅིག །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོ། བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ། ཚིགས་སུ་བཅད་པ་འདི་སྨྲས་སོ། །སེམས་ཅན་ཀུན་ལ་ཕན་པའི་ཕྱིར། །སངས་རྒྱས་ ཀུན་གྱིས་བྱིན་བརླབས་ཏེ། །གྲུབ་པ་ཐམས་ཅད་བྱེད་པའི་མཆོག །དཀྱིལ་འཁོར་ཆེན་པོ་བཤད་པར་བྱའོ། །དེ་ནས་ཡང་དག་རབ་བཤད་པ། །དཀྱིལ་འཁོར་ཆེན་པོ་དམ་པ་སྟེ། །ཆོས་ཀྱི་འཁོར་ལོ་ཚུལ་འདྲ་བར། །དཀྱིལ་འཁོར་ཐམས་ཅད་ཐིག་གདབ་བོ། །དེ་ལ་སྲད་བུ་
- 14b
བྲེ་བའི་ཆོ་ག་ནི་འདི་ལྟ་སྟེ། །གསར་ཞིང་ལེགས་པར་བྱས་པ་དང་། །ཚད་མ་བཟང་པོ་སྲད་བུ་ཡིས། །ཤེས་རབ་ཅན་གྱིས་སྲད་བྲེ་བ། །འཇིག་རྟེན་གསུམ་རྒྱལ་དྲན་ཞིང་ངོ་། །དེ་ཡི་དབུང་དུ་གདབ་པ་ནི། །སེང་ལྡེང་ཕུར་པ་བརྟེན་པར་རོ། །དེ་ལས་སྲད་བུ་བྲེ་གསུངས་པའི། །སྲད་ བུ་ཉིས་ལྡབ་ཀྱིས་བྱས་ཏེ། །བཅུ་དྲུག་ཆ་རུ་བགོ་བར་བྱ། །ཐམས་ཅད་དུ་ནི་རིམ་གསུམ་མཆོག །ཁོ་ར་ཁོར་ཡུག་རིགས་དག་ཀྱང་། །ཕུར་བུ་ཡིས་ནི་དེ་བཞིན་ནོ། །དེ་ཡི་ནང་དུ་བྱ་བ་ནི། །སྲད་བུ་རིམ་བདུན་ལྡན་བར་ཏེ། །ཚོན་སེར་དྲི་ཞིམ་ལྡན་པ་ཡིས། །ཐིག་རྣམས་ ཀྱང་ནི་གདབ་པར་བྱ། །དེ་ཡི་དབུས་སུ་གཞག་པ་ནི། །ཤིན་ཏུ་བཀྲབས་པའི་ནས་ཕུལ་བཞིའོ། །དེ་ཡི་སྟེང་དུ་མགོན་པོ་སྟེ། །སངས་རྒྱས་གཟུགས་བརྙན་གཞག་པར་བྱ། །སངས་རྒྱས་ཐད་འཁོར་ཐམས་ཅད་དུ། །བྱང་ཆུབ་བརྒྱད་ནི་རིམ་བཞིན་པར། །བྲིའམ་ཡང་ ན་གཞག་པར་བྱ། །ཚོན་སྣ་ལྔ་མཆོག་རྣམས་ཀྱིས་སོ། །སངས་རྒྱས་སྤྱན་སྔ་དེ་རུ་ནི། །ཕྱག་ན་རྡོ་རྗེ་དེ་བཞིན་ནོ། །བྲིའམ་གཞག་པར་བྱ་བ་ནི། །རྡོ་རྗེ་ཧཱུྃ་ཞེས་པར་འདུས་སོ། །དེ་ཡི་ཞབས་ནི་གཡོན་པ་ཡིས། །དབང་ཕྱུག་ཆེན་པོ་མནན་པར་བྱའོ། །གཡས་པའི་ ཞབས་ཀྱིས་བཙིར་བ་ནི། །ཉོན་མོངས་མ་ཡིན་ལྷ་མོའོ། །འདོད་དྲུག་སྤྱོད་པའི་ལྷ་རྣམས་དག །སྲད་བུ་རིམ་བདུན་བར་དག་ཏུ། །བྲི་འམ་ཡང་ན་གཞག་པར་བྱ། །རྡོ་རྗེ་ཤུགས་ཀྱིས་འགོངས་ནས་སུ། །ཕྱི་རོལ་བྱུང་ནས་དེ་རུ་ཡང་། །གླིང་རྣམས་བཞི་ཡང་བྲི་བར་བྱ། ། དབྱིབས་དང་ཆོ་ག་ཇི་བཞིན་དུ། །གྲྭ་ཡི་རི་མོ་ལེགས་པར་དགོད། །གླིང་རྣམས་དབུས་ནི་ཐམས་ཅད་དུ། །འཇིག་རྟེན་ཇི་བཞིན་བ་སོགས་པར་བྱའོ། །ཚངས་པ་ལ་སོགས་བཞི་ཡི་རྣམས། །དེ་རུ་འཇིག་རྟེན་དབང་པོ་བྲི། །ཁོ་ར་ཁོར་ཡུག་རི་དང་ནི། །གླིང་རྣམས་ཀྱི་ཡང་ བར་དག་ཏུ། །ཕྱི་ཡི་རྡོ་རྗེའི་རིགས་རྣམས་ཀྱི། །དཀྱིལ་འཁོར་ཡང་དག་བྲི་བར་བྱ། །སྒོ་སྲུང་བྲི་བར་བྱ་བ་ཡང་། །རྡོ་རྗེ་སྒོ་བཞི་དེ་དག་ཏུ། །རྡོ་རྗེ་ཀྱོ་བ་ཞགས་པ་དང་། །སྒྲོག་དང་དྲིལ་བུ་དེ་བཞིན་ནོ། །ཁོ་ར་ཁོར་ཡུག་རི་ཡི་ནི། །ཕྱི་རོལ་དམྱལ་བ་བརྒྱད་རྣམས་སོ། །
- 15a
གནམ་དལ་དང་ནི་ནད་དག་དང་། །མཁའ་འགྲོ་མ་དང་གདོན་དྲག་རྣམས། །བཞག་གམ་ཡང་ན་བྲི་བར་བྱ། །ཆོས་མིན་ཅན་ནི་གཞིག་ཕྱིར་རོ། །དེ་ཡི་ཕྱི་རོལ་དུ་དགོད་པ། །གཏོར་མ་སྣ་ཚོགས་མཆོག་རྣམས་སོ། །དེ་ནས་དཀྱིལ་འཁོར་ཆེན་པོའི་ཆོ་ ག་འབྱུང་སྟེ། དེ་ལ་ཐོག་མ་ཉིད་དུ་སློབ་དཔོན་གྱིས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ཏེ་འཇུག་པ་ནི། གཙང་མས་གོས་གཙང་མ་བགོས་ལ། སེ་རལ་ཐག་གུ་དམར་པོ་ཐོགས་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་དེའི་སྟེང་དུ་དྲི་ཞིམ་པོའི་མེ་ཏོག་བཞག་ ནས། སྙིང་པོ་འདི་བརྗོད་ལ་ཞུགས་ཤིག །ཨོྃ་བཛྲ་པྲ་ཏཱིཙྪ་མྃ་ཧ་ཧ་ཧ་ཧ་ཧི། དེ་ནས་པུས་མོ་གཡས་པའི་ལྷ་ང་ས་ལ་བཙུགས་ནས་དུ་རུ་སྐའི་བདུག་པ་འམ་ཅི་བདོག་པས་གསོལ་ཏོ། །རྡོ་རྗེ་འཛིན་མ་མཛུབ་མོ་གཉིས་ཀྱོ་བ་ཏང་དུ་བྱས་ལ་སྙིང་པོ་ནི་འདི་བརྗོད་དོ། །ཨོྃ་ཨུ་རུ་ གྲ་གྲ་བི་རི་ཎི་བི་རི་ཎི། བཛྲ་མ་ཡ་ཧི། བྷི་ད་ཡེ་སྭཱ་ཧཱ། ཉི་ཤུ་རྩ་གཅིག་བཟླས་ན། དེ་ལས་མཚན་མ་འབྱུང་བ་ནི་བ་སྤུ་གཡོ་བ་ལ་སོགས་པ་དང་ས་གཡོ་བའམ་དྲི་ཞིམ་པོའམ་འོད་ཟེར་མཐོང་བའོ། །དེ་ནས་ཕྱག་ན་རྡོ་རྗེའི་སྤྱི་བོར་མེ་ཏོག་གཏོར་ཅིག །དེ་ནས་སློབ་མ་ གཞུག་སྟེ། དེ་ལ་ཐོག་མ་ཉིད་དུ་བཀྲུས་ནས་སློབ་མ་གོས་གཙང་མ་བསྐོན་ཏེ་གསུམ་ལ་སྐྱབས་སུ་བཏང་བ་དང་། བསླབ་པའི་སྡོམ་པ་འཛིན་པ་ལ་སོ་སོར་གནས་པར་བྱས་ནས་བྱང་ཆུབ་ཀྱི་སེམས་སྐྱེད་ཅིག །དེ་ནས་གདོང་རས་ཀྱིས་གཡོགས་ནས་མགོ་གཙུག་ཏོར་དུ་བྱས་ ཏེ། རྡོ་རྗེ་འཛིན་མའི་ཕྱག་རྒྱ་བཅིངས་ལ་ཆུག་ཅིག །བཅུག་ནས་མེ་ཏོག་གཏོར་ཏེ། དེ་ནས་གང་ལ་བབ་པ་ནི་དེའི་ལྷའོ། །དེ་ནས་གདོང་བཅིངས་པ་བཀྲོལ་ནས་རང་གི་རིག་པའི་ལྷ་སྟོན་ལ། དེ་ལ་མཆོད་ཅིང་སློབ་དཔོན་ལ་ཡང་ཅི་འདོད་པའི་ཡོན་ཕུལ་ནས། དེ་རང་གི་ རིག་པའམ་སྔགས་བཟླས་ཏེ་ཕྱག་རྒྱ་ཡང་བཅིང་ངོ་། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས། འཇིག་རྟེན་གསུམ་གྱི་འཁོར་ལོ་ཞེས་བྱ་བའི་དཀྱིལ་འཁོར་ཆེན་པོའོ།། །།དེ་ནས་རྡོ་རྗེའི་དཀྱིལ་འཁོར་འབྱུང་སྟེ། རྡོ་རྗེའི་ཕྲེང་བ་མཉམ་
- 15b
ལྡན་པས། །རྡོ་རྗེའི་དཀྱིལ་འཁོར་བརྟག་པར་བྱའོ། །འཇུག་པར་བྱ་བ་དེ་བཞིན་ཏེ། །ལས་ཀྱང་དེ་དང་འདྲ་བར་བྱའོ། །དཀྱིལ་འཁོར་དེ་རུ་ཞུགས་ནས་སུ། །དེ་བཞིན་རྡོ་རྗེ་གསོར་བར་བྱ། །འཇིག་རྟེན་གསུམ་རྒྱལ་རབ་བསླབས་ནས། །རྡོ་རྗེ་མཆོག་ནི་བསྒྲུབ་པར་བྱ། ། དེ་ལ་རྡོ་རྗེ་བསྒྲུབ་པའི་ཆོ་ག་ནི། ལག་པ་གཉིས་ཀྱིས་རྡོ་རྗེའི་ཕྱག་རྒྱ་འཛིན་པས་རྡོ་རྗེ་བཟུང་ལ། ཇི་སྲིད་དུ་འགུལ་བ་དེ་སྲིད་དུ་བཟླས་སོ། །དེ་ཕྱིན་ཅད་རྡོ་རྗེ་དེས་ལས་ཐམས་ཅད་བྱེད་དོ། །རྡོ་རྗེའི་དཀྱིལ་འཁོར་རོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ། དཀྱིལ་འཁོར་ ཆེན་པོ་ཀུན་བྲིས་ནས། །མཚན་མ་ཐམས་ཅད་བསྟན་པར་བྱ། །འཇུག་པ་རྡོ་རྗེ་དྲིལ་བུ་དང་། །རྡོ་རྗེ་འཛིན་མཆོག་ཕྱག་རྒྱས་སོ། །དེ་ལ་རྡོ་རྗེ་དྲིལ་བུའི་ཕྱག་རྒྱ་ནི་འདི་ཡིན་ནོ། །རྡོ་རྗེ་འཛིན་མ་ཀུན་བྱས་ནས། །རྡོ་རྗེར་ཀུན་ཏུ་བརྟག་པར་བྱ། །གཡས་པར་བཞག་ནས་གཡོན་ པ་ཡིས། །དྲིལ་བུ་གསིལ་ཞིང་འཇུག་པར་བྱ། །བཅུག་ནས་སུ་ནི་དྲིལ་བུ་དེ། །མཉམ་པར་བཞག་པས་གསིལ་བར་བྱ། །སློབ་དཔོན་གྱུར་ཅིག་དམ་ཚིག་ཀྱང་། །རྟག་ཏུ་བསྲུངས་ཞེས་བརྗོད་པར་བྱ། །ཇི་ལྟར་དྲིལ་བུའི་སྒྲ་འདི་ནི། །དེ་ཡི་མི་རྟག་པ་རུ་གསུངས། ། དེ་ལྟར་ཁྱོད་ལ་བྱིན་པ་ནི། །རྡོ་རྗེ་ཆེན་པོ་ཞེས་བྱ་འདིས། །ངེས་པར་བསྲེག་པར་གྱུར་པ་ནི། །དེ་སྟེ་རྡོ་རྗེ་འཛིན་དད་དང་། །སྐྱབས་གསུམ་བརྟུལ་ཞུགས་དེ་བཞིན་ཏེ། །དེ་ལྟར་བྱང་ཆུབ་སེམས་འདོད་རྣམས། །ཁྱོད་ཀྱིས་འདི་ཚེ་སྤངས་གྱུར་ནའོ། །དེ་ལ་འདི་ཉིད་དམ་ཚིག་གི་ སྔགས་སོ། །ཨོྃ་ཧ་ན་ས་མ་ཡ་ཧཱུྃ་ཕཊ། དེ་ནས་དེ་བཞིན་དུ་འདུག་ལ་རྡོ་རྗེའི་ཆུ་འདི་བླུད་དོ། །དེ་ནས་གདོང་བཅིངས་པ་བཀྲོལ་ནས་ཆོ་ག་དེ་བཞིན་དུ་བྱའོ། །དམ་ཚིག་གི་དཀྱིལ་འཁོར་རོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ། དེ་བཞིན་དཀྱིལ་འཁོར་བྲིས་ ནས་སུ། །ཆ་ལུགས་མང་པོ་གཞག་པར་བྱ། །བཙུད་ནས་ལས་རྣམས་ཐམས་ཅད་ཀྱང་། །སློབ་དཔོན་གྱིས་ནི་དེ་བཞིན་བསླབ། །དེ་ནས་ལས་ཀྱི་རབ་ཏུ་སྦྱོར་བ་འདིའོ། །བཅོམ་ལྡན་འདས་ཀྱི་སྤྱན་སྔར་ཐབ་གྲུ་བཞིར་བྱས་ལ། མངར་པོའི་ཡམ་ཤིང་ལ་མེ་བུས་ལ།
- 16a
མངར་པོའི་མེ་ཏོག་དང་འབྲས་བུ་རྣམས་སྦྲང་རྩི་དང་ལྡན་པའི་མར་ལས་སྦགས་ཏེ། བླ་གོས་གཡས་སུ་གཟར་ལ་ཀུ་ཤའི་བམ་པོ་ལ་འདུག་སྟེ། རྡོ་རྗེའི་ཚིག་ཏུ་བཟླས་ཤིང་ཞི་བ་དང་། རྒྱས་པ་དང་། དབང་དུ་བྱ་བ་ལ་སོགས་པའི་ཞི་བའི་ལས་རྣམས་ལ་ལག་པ་ གཡོན་པས་བདག་གིས་ཕྱག་རྒྱ་བཅིངས་ཏེ། གཡས་པས་བསྲེགས་ན་དེ་དག་འགྲུབ་པར་འགྱུར་རོ། །བཅོམ་ལྡན་འདས་ཀྱི་རྒྱབ་ཏུ་ཐབ་ཟུར་གསུམ་དུ་ཁྲོ་བོའི་ཚེར་མ་རྣོན་པོའི་ཡམ་ཤིང་དང་། འདབ་མ་དང་། མེ་ཏོག་དང་། ཡལ་གའི་རྩེ་མོ་དང་། སྡོང་བུ་དང་། འབྲས་བུ་ཡང་དེ་དང་འདྲ་བར་རང་གི་ཁྲག་གིས་བསྐུས་ནས་སྟན་མཁྲང་པོ་ལ་འདུག་སྟེ། བླ་གོས་གཡོན་དུ་གཟར་ལ་ཁྲོས་པའི་ཚིག་གིས་བཟླས་ཤིང་གཡོན་པས་བསྲེགས་ན། དགུག་པ་དང་། གཞུག་པ་དང་། བཅིང་བ་དང་། རྒྱས་གདབ་པ་དང་། གཞོམ་ པ་དང་། བཙིར་བ་དང་། བསྙལ་བ་དང་། མྱོས་པར་བྱ་བ་དང་། གཏན་འཕོ་བ་ལ་སོགས་པའི་ལས་དྲག་པོ་རྣམས་རབ་ཏུ་འགྲུབ་པར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དགུག་པ་དང་། གཞུག་པ་དང་། དམ་ཚིག་གིས་ བཅིང་བ་དང་། དབང་དུ་བྱ་བ་ལ་སོགས་པ་གྲུབ་པ་ཐམས་ཅད་ཀྱི་ལས་ནི་བཅོམ་ལྡན་འདས་ཀྱི་གཡས་སུ་རྩྭ་འཇམ་པོ་བཏིང་བ་ལ་འདུག་ནས། སྟོད་གཡོགས་སྦྱར་མ་ལྟར་བགོས་ཏེ། ཏིང་ངེ་འཛིན་གྱིས་བཟླས་ཤིང་འཁོར་ལོ་ལྟ་བུའི་ཐབ་ཏུ་དུ་བ་མེད་པའི་མདག་མ་ལ། ཏིལ་དང་འབྲས་ལ་སོགས་པ་ནས་འབྲས་གཡས་གཡོན་གྱིས་བསྲེག་གོ། །བཅོམ་ལྡན་འདས་ཀྱི་གཡོན་དུ་རྡོ་རྗེ་ལྟ་བུའི་ཐབ་བྱས་ལ་སྟོད་གཡོགས་ཀྱིས་ཡན་ལག་ཀུན་བཅིངས་ཏེ། རློད་སྟན་འཇམ་པོ་ལ་འདུག་ནས། ཡམ་ཤིང་ཐམས་ཅད་འབར་བའི་ཕྲེང་བ་ལ་ འཛིངས་པའི་མེ་ལ་ལག་པ་གཡས་པ་རྡོ་རྗེ་དང་བཅས་པ་རྡོ་རྗེ་ཁུ་ཚུར་གྱི་ཕྱག་རྒྱ་བཅིངས་ནས། ལག་པ་གཡོན་པ་རྡོ་རྗེ་ཁུ་ཚུར་འཛིན་པས་གཟར་བུ་བཟུང་ནས་འཛུམ་ཞིང་དགའ་བར་བྱས་ཏེ། རྡོ་རྗེའི་ཚིག་གིས་ཟློས་ཤིང་རོ་ཐམས་ཅད་བསྲེགས་ན། རྡོ་རྗེ་འཛིན་པ་དགུག་
- 16b
པ་དང་། གཞུག་པ་དང་། བཅིང་བ་དང་། དབང་དུ་བྱ་བ་ལ་སོགས་པ་དམ་པ་འགྲུབ་པའི་སྦྱིན་སྲེག་གི་ཆོ་ག་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་དཀྱིལ་འཁོར་ཐམས་ཅད་ཀྱི་ཆོ་གའོ།། །།དེ་ནས་ཡོ་བྱད་བཤད་པར་བྱའོ་ཞེས་ནས་ བཅོམ་ལྡན་འདས་རྡོ་རྗེ་འཛིན་གྱིས་གསུངས་པ། དཀྱིལ་འཁོར་གྱི་ཆོ་ག་ཐམས་ཅད་མཐོང་བར་འགྱུར་ནས་བསྒྲུབ་བོ། །དེ་ཅིའི་ཕྱིར་ཞེ་ན། དཀྱིལ་འཁོར་དུ་ནི་མ་ཞུགས་སམ། །དམ་ཚིག་སྤངས་པར་གྱུར་པ་ནི། །ཕྱག་ན་རྡོ་རྗེ་མི་འགྲུབ་པ། །གསང་བ་ཡང་དག་མི་ཤེས་བས། ། བཅོམ་ལྡན་འདས་སེམས་འདོད་པའོ། །ཆགས་དང་རྡོ་རྗེ་དེ་ཉིད་དེ། །དེ་ལ་ཆགས་པར་མ་གྱུར་ན། །ཕྱག་ན་རྡོ་རྗེ་མི་འགྲུབ་བོ། །དེ་བས་ཡང་དག་མ་མཐོང་བས། །དཀྱིལ་འཁོར་དུ་ནི་གྲུབ་མ་གསུངས། །ཡང་དག་མ་མཐོང་གྲུབ་པ་ནི། །ཐེ་ཚོམ་ཅན་གྱིས་མི་ འཐོབ་བོ། །རབ་ཏུ་འཇིགས་པ་རྙེད་ནས་སུ། །ནད་ཀྱིས་ཀྱང་ནི་འཇིག་པར་བྱེད། །གདོན་ཡང་དེ་ལ་བརྩོན་པར་འགྱུར། །ཤི་ནས་ངུ་འབོད་དུ་ལྟུང་ངོ་། །དེ་ལྟར་དཀྱིལ་འཁོར་ཐམས་ཅད་དུ་ཆུག་ལ། ནད་དང་གདོན་ལ་སོགས་པ་སྟོན་ཅིག །བཅོམ་ལྡན་འདས་ དེ་བཞིན་གཤེགས་པ་གསེར་གྱི་ཁ་དོག་རས་ལ་བྲི་བར་བྱ་སྟེ། དེའི་ཐད་འཁོར་ཀུན་ཏུ་བྱང་ཆུབ་སེམས་དཔའ་བརྒྱད་བྲི་བ་ནི་འདི་ལྟ་སྟེ། གཡས་ཕྱོགས་སུ་ནི་འཕགས་པ་སྤྱན་རས་གཟིགས་ཀྱི་དབང་པོ་དང་། འཇམ་དཔལ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་ བསྐོར་བའོ། །གཡོན་ཕྱོགས་སུ་ནི་རྡོ་རྗེ་ཁུ་ཚུར་དང་། བྱམས་པ་དང་ནམ་མཁའི་མཛོད་དོ། །སྟེང་དུ་ནི་ནམ་མཁའི་སྙིང་པོའོ། །བཅོམ་ལྡན་འདས་ཀྱི་འོག་ཏུ་ནི་ཕྱག་ན་རྡོ་རྗེ་སྟེ། རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་རྡོ་རྗེ་དང་བཅས་པ་ལག་པ་གཉིས་ཀྱིས་བཅིང་ངོ་། །ལག་པ་ གཉིས་པོ་གཞན་ལ་གཡས་པས་ནི་རྡོ་རྗེ་གསོར་གཡོན་པས་ནི་མེ་ཏོག་གི་གཞུ་དང་མདའ་ལྔ་བསྣམས་པ། སྐུ་མདོག་ནི་ཨུཏྤལ་སྔོན་པོ་ལྟ་བུ། ཡིད་ཙམ་འཛུམ་ལ་མཆེ་བ་ཅུང་ཟད་གཙིགས་པ། ཁྲོ་བ་དང་བཅས་པས་བཞད་པའི་ཞལ། ཕྱིར་བརྐྱང་བསྐུམ་དུ་གནས་
- 17a
པ། རྒྱན་ཐམས་ཅད་ཀྱིས་བརྒྱན་པ། ཞབས་གཡོན་པས་ལྷ་ཆེན་པོའི་འདན་པ་གཡོན་པར་མནན། ཞབས་གཡས་པ་བསྐུམས་པས་ཨུ་མའི་ནུ་མར་བཙིར་ཏེ། སྟོད་གཡོགས་ཁྲ་བོས་ཡན་ལག་གཡོགས་པ། ཀོ་རློན་གྱི་སྨད་གཡོགས་ཅན། དེ་བཞིན་གཤེགས་པ་ཐམས་ཅད་དབུ་རྒྱན་དུ་ཐོགས་པའོ། །དེ་ནས་ཚེས་ཞག་གཅིག་ནས་མགོ་བརྩམས་ཏེ། ཚེས་བཅོ་ལྔའམ། ཟླ་བའམ། ལོའི་བར་དུ་ཉིན་རེ་ཞིང་བརྒྱད་སྟོང་བཟླས་ཏེ། གོས་དཀར་པོ་གཙང་མ་བགོས་ཏེ་བདག་གི་ཁྱིམ་དུ་གནས་ཤིང་། ཟས་གཙང་མ་ཡིད་བཞིན་དུ་ཟོས་ཏེ་བཟླས་ན། དེ་ནས་ཟླ་བ་གཅིག་ལོན་པ་དང་། ཟླ་བ་དང་པོས་ནི་ཧཱུྃ་ཞེས་བྱ་བས་ཕྱི་རོལ་གྱི་ལས་རྣམས་འགྲུབ་པར་འགྱུར་རོ། །གཉིས་ཀྱིས་ནི་ལས་ཐམས་ཅད་འགྲུབ་པར་འགྱུར་རོ། །གསུམ་གྱིས་ནི་བཅོམ་ལྡན་འདས་རྨི་ལམ་ དུ་སྟོན་ཅིང་འདས་པ་དང་མ་འོངས་པ་ཐམས་ཅད་སྟོན་ཏོ། །བཞིས་ནི་སེམས་ཅན་ཐམས་ཅད་དགུག་པ་དང་། དབང་དུ་བྱ་བར་ནུས་སོ། །ཟླ་བ་ལྔས་ནི་ཡིད་བཞིན་དུ་སྣང་བ་དང་མི་སྣང་བར་འགྱུར་རོ། །ཟླ་བ་དྲུག་གིས་ནི་ཅི་འདོད་པ་ཐམས་ཅད་ཀྱི་གཟུགས་སུ་འགྱུར་ རོ། །ཟླ་བ་བདུན་གྱིས་ནི་བདག་གི་ལུས་སངས་རྒྱས་དང་བྱང་ཆུབ་སེམས་དཔའ་དང་ཕྱག་ན་རྡོ་རྗེར་སྟོན་ཅིང་། ཆོ་འཕྲུལ་ཐམས་ཅད་ཀྱང་སྟོན་ཏོ། །ཟླ་བ་བརྒྱད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་ལ་སོགས་པ། དགུག་པ་དང་། གཞུག་པ་དང་། བཅིང་བ་དང་དབང་དུ་བྱེད་ཅིང་ལས་སུ་བསྐོའོ། །ཟླ་བ་དགུས་ནི་བྱང་ཆུབ་སེམས་དཔའ་རྣམས་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱེད་དོ། །ཟླ་བ་བཅུས་ནི་ས་བཅུ་ཐོབ་པར་འགྱུར་རོ། །ཟླ་བ་བཅུ་ གཅིག་གིས་ནི་ས་བཅུ་གཅིག་པ་སངས་རྒྱས་ཀྱི་ས་ཐོབ་པོ། །ཟླ་བ་བཅུ་གཉིས་པས་ནི་རྡོ་རྗེ་འཛིན་པར་འགྱུར་རོ། །དེ་ནས་སྒྲུབ་པ་བསྟན་ཏེ། རས་ལ་བཅོམ་ལྡན་འདས་རྡོ་རྗེ་ཧཱུྃ་ཞེས་བྱ་བ་དེ་བཞིན་དུ་བྲིས་ལ། དེའི་ཐད་འཁོར་ཐམས་ཅད་དུ་མཐུ་ཆེན་པོ་ལ་སོགས་པ་
- 17b
ནས། ཀླུ་བཱ་རུ་ཎའི་མཐའི་བར་དུ་བཅོམ་ལྡན་འདས་ལ་སྒོང་ཞིང་པུས་མོ་བཙུགས་པ་བྲིས་ལ། དེ་ནས་དེ་བཞིན་དུ་བཟླས་པ་ནི་རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་གྲངས་མེད་པར་བཟླས་ཏེ། ཟླ་བའི་མཐའི་བར་དུ་ཚེས་ཉི་ཤུ་དགུའི་མཚན་ཐལ་བྱུང་དུ་བཟླས་ན་ནང་པར་ཐམས་ཅད་ འོང་ངོ་། །འོངས་ནས་ཀྱང་དབང་དུ་འགྱུར་ཏེ་ཐམས་ཅད་བསྒོ་བ་བཞིན་དུ་བྱེད་དོ། །དེ་ནས་སྒྲུབ་པ་གཞན་འབྱུང་སྟེ། བཅོམ་ལྡན་འདས་དེ་བཞིན་དུ་བྲིས་ནས། གསེར་གྱི་མདངས་ཀྱི་ལྷ་མོ་ལ་སོགས་པ་ཐམས་ཅད་རང་རང་གི་ཕྱག་རྒྱ་བསྒྲེང་ནས་གར་བྱེད་ཅིང་མི་སྡུག་པ་ འཇིགས་པའི་གཟུགས་སུ་བྲིའོ། །དེ་ནས་དེ་བཞིན་དུ་ཟླ་བ་གཅིག་གི་མཐའི་མཚན་ཐལ་བྱུང་དུ་ཟློས་ཤིག །དེ་ནས་ནང་པར་ཀུན་ལྷགས་ཏེ། དེ་བཞིན་དུ་གར་དག་གིས་སྒྲུབ་པ་པོ་ལ་མཆོད་དོ། །འདི་ནི་རྟོག་པ་འདིར་བྲིས་པ་དེ་བཞིན་ནོ་སྙམ་དུ་བསམས་ནས་དེས་མི་འཇིགས་ པར་བྱའོ། །དེ་ནས་དབང་དུ་འགྱུར་ཏེ་རྟག་ཏུ་ལས་ཐམས་ཅད་བྱེད་པའི་གཡོག་མོར་འགྱུར་རོ། །དེ་ནས་ཆོ་ག་གཞན་ཏེ་རས་ལ་བཅོམ་ལྡན་འདས་དེ་བཞིན་དུ་བྲིས་ལ། དེ་ནས་དེ་བཞིན་དུ་བརྒྱད་སྟོང་དུ་བཟླས་ན། ནུབ་ཐ་མ་ལ་རྡོ་རྗེ་འཛིན་པ་འཐོབ་སྟེ། ཅི་འདོད་པ་གྲུབ་པའི་ མཆོག་ཀྱང་འཐོབ་བོ། །གཞན་ཡང་སྒྲུབ་པ་ཕྱག་ན་རྡོ་རྗེའི་སྤྱན་སྔར་འབུམ་ཟློས་ཤིག །དེ་ནས་དགོས་པ་ཀུན་བཅོམ་ལྡན་འདས་ཀྱིས་མཛད་དོ། །ཕྱག་ན་རྡོ་རྗེའི་སྤྱན་སྔར་ཅི་འདོད་པར་ཡམ་ཤིང་ཐམས་ཅད་ཀྱིས་སྦྱིན་སྲེག་གིས་ལོ་གཅིག་གི་བར་དུ་བསྲེགས་ན་ཐམས་ཅད་ འགྲུབ་པར་འགྱུར་རོ། །དེ་ནས་རྡོ་རྗེ་ཧཱུྃ་ཞེས་པ་བྲིས་ལ་དེའི་སྤྱན་སྔར་ལོ་གཅིག་གི་མཐའི་བར་དུ་གྲངས་མེད་པར་ཟློས་ཤིག །དེ་ནས་ཐ་མར་བཅོམ་ལྡན་འདས་རང་གི་ཅི་འདོད་པའི་མཆོག་སྩོལ་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པའི་སྤྱན་སྔར་རྡོ་རྗེ་ཧཱུྃ་ཞེས་ པའི་ཕྱག་རྒྱ་བཅིངས་ལ། དེ་བཞིན་གཤེགས་པ་འགུལ་གྱི་བར་དུ་ཟློས་ཤིག །དེ་ནས་ཕྱག་རྒྱ་འགྲུབ་པར་འགྱུར་རོ། །གྲུབ་པ་དེས་ན་དགུག་པ་དང་དབང་དུ་བྱ་བ་དང་། གཞུག་པ་དང་། དྲང་བ་དང་། ལྟུང་བ་དང་། དབབ་པ་དང་། གཏན་འཕོ་བ་ལ་སོགས་པ་
- 18a
ལས་ཕྲན་ཚེགས་རྣམས་ཀྱི་ཟེར་བཅིངས་པས་ཧཱུྃ་ཞེས་པས་མཛད་དོ། །དེ་ནས་ཆོ་ག་གཞན་ཏེ། རིག་པས་དབང་བསྐུར་བར་བྱ་བར་འདོད་ན། བྲིའམ་འཇིམ་པ་ལས་ཕྱག་ན་རྡོ་རྗེའི་ཆ་ལུགས་བྱས་ལ་ཕྱག་གཉིས་བརྐྱང་སྟེ་རྡོ་རྗེ་འཛིན་ཏོ། །དེ་ཟླ་བ་ཡར་གྱི་ཚེས་ གཅིག་ནས་བརྩམས་ཏེ། ཚེས་བཅོ་ལྔའི་བར་དུ་མར་བཞི་བྲེ་བརྒྱད་སྟོང་གིས་ཁྲུས་ཤིག །དེ་ནས་ཐ་མར་མཚན་ཐལ་བྱུང་བཟླས་སོ། །དེ་ནས་ནང་པར་གཟུགས་དེ་བཞད་དེ། དེ་ནས་རིག་པ་ཐམས་ཅད་ཀྱི་བདག་པོར་འགྱུར་རོ། །དེ་ནས་སྒྲུབ་པ་གཞན་འབྱུང་སྟེ། སངས་རྒྱས་བཅོམ་ལྡན་འདས་ཀྱི་ཆ་ལུགས་བྲི་འམ། །འཇིམ་པ་ལ་དེ་བཞིན་དུ་ཕྱག་བརྐྱང་བ་རྡོ་རྗེ་འཛིན་པར་བྱས་ལ་དེ་ཞིགས་ཀྱི་བར་དུ་སྤོས་ཆུས་བཀྲུས་ན་དེ་ཕྱིན་ཅད་ཡིད་བཞིན་དུ་མི་སྣང་བར་འགྱུར་རོ། །དེ་ནས་སྒྲུབ་པ་གཞན་འབྱུང་སྟེ། རས་ལ་བཅོམ་ལྡན་འདས་ཕྱག་ ན་རྡོ་རྗེ་ཕྱག་བཞི་པ་བྱས་ནས། དེའི་ཕྱག་གཡས་པར་པདྨོ། གཡོན་པར་རྡོ་རྗེ་གཡས་པར་རྡོ་རྗེ་ཧཱུྃ་ཞེས་པ། གཡོན་པར་མདའ་དང་གཞུའོ། །དེ་ནས་དེའི་སྤྱན་སྔར་སྟོང་ཕྲག་བརྒྱ་བཟླས་པའི་མཇུག་ཏུ་ཞག་གསུམ་སྨྱུང་བ་བྱས་ཏེ་མཚན་ཐལ་བྱུང་བཟླས་ན། དེའི་ ནང་པར་དེ་དང་འདྲ་བའི་གཟུགས་སུ་འགྱུར་ཏེ། བསྐལ་པར་གནས་ཤིང་མི་དགའ་བ་དང་། སེམས་ཅན་ཐམས་ཅད་དབང་དུ་བྱ་བ་དང་། ཐམས་ཅད་དུ་འགྲོ་བར་འགྱུར་རོ། །དེ་ནས་དཀྱིལ་འཁོར་བསྒྲུབ་པ་འབྱུང་སྟེ། དཀྱིལ་འཁོར་མཐོང་བས་ལྕི་བ་གསུམ་གྱིས་ཁྲུས་ བྱས། དུས་གསུམ་དུ་གོས་བརྗེས་ལ་རྡོ་རྗེ་འཛིན་མའི་ཕྱག་རྒྱ་བཅིངས་ནས། བརྒྱད་སྟོང་དུས་གསུམ་དུ་ཉིན་བདུན་བཟླས་ན། དེ་ནས་ཕྱག་ན་རྡོ་རྗེ་སློབ་དཔོན་གྱི་གཟུགས་སུ་བྱས་ནས་རྨི་ལམ་དུ་ཐམས་ཅད་སྨྲའོ། །དེ་ནས་དཀྱིལ་འཁོར་སྒྲུབ་པའི་ཆོ་ག་གཞན་ འབྱུང་སྟེ། དཀྱིལ་འཁོར་ཆེན་པོ་མཐོང་བས་ཟླ་བ་གཅིག་གི་བར་དུ་དེ་བཞིན་དུ་དུས་གསུམ་དུ་ཁྲུས་བྱས་ནས། དུས་གསུམ་དུ་གོས་བརྗེས་དུས་གསུམ་དུ་བ་ལང་གི་ལྕི་བས་དཀྱིལ་འཁོར་བྱས་ཏེ། རྣོ་ལྕགས་ཀྱི་མཚོན་ཆས་དེར་རྡོ་རྗེ་བྲིས་ལ་དེ་ལ་ལྟ་ཞིང་། རྡོ་རྗེ་
- 18b
འཛིན་མའི་ཕྱག་རྒྱ་བཅིངས་ཏེ་བརྒྱད་བརྒྱ་བཟླས་ན། ཟླ་བ་གཅིག་གི་མཐར་བཅོམ་ལྡན་འདས་མཐོང་ངོ་། །དེ་ནས་རྡོ་རྗེ་སྒྲུབ་པ་འབྱུང་སྟེ། རྡོ་རྗེ་རས་སམ་རྩིག་པའམ་ཤིང་ལེབ་ལ་བྲིས་ནས་དེ་ལ་མཆོད་པ་བྱས་ཏེ། རྡོ་རྗེ་ཁུ་ཚུར་གྱིས་བཟུང་ལ་ལོ་གཅིག་ཚུན་ཅད་རྡོ་རྗེ་ ནམ་འབར་བའི་བར་དུ་ཟློས་ཤིག །འབར་བ་དེས་ན་ནམ་མཁའ་ལ་འགྲོ་བ་དང་། ལོ་བཅུ་དྲུག་ལོན་པའི་ལུས་ཕྱག་ན་རྡོ་རྗེ་དང་མཚུངས་པའི་གཟུགས་དང་སྟོབས་དང་མདོག་ཏུ་འགྱུར་ཏེ། འདོད་པའི་ལོངས་སྤྱོད་ཐམས་ཅད་དང་ལྡན་པ། བདེ་བ་དང་ཡིད་བདེ་བ་ཐམས་ ཅད་འཐོབ་པར་འགྱུར་རོ། །ཚེ་ཡང་ལོ་སྟོང་ཕྲག་བརྒྱར་འགྱུར་རོ། །དེ་ནས་རལ་གྲི་སྒྲུབ་པ་འབྱུང་སྟེ། རྡོ་རྗེ་ཁུ་ཚུར་གྱིས་རལ་གྲི་བཟུང་ལ་ལོ་གཅིག་གི་བར་དུ་བཟླས་ན། རིག་འཛིན་ཐམས་ཅད་ཀྱི་བདག་པོ་རིག་པ་འཛིན་པར་འགྱུར་རོ། །དེ་ནས་འཁོར་ལོ་སྒྲུབ་ པ་འབྱུང་སྟེ། འཁོར་ལོའི་དཀྱིལ་འཁོར་བྲིས་ལ་ལྕགས་ཀྱི་འཁོར་ལོ་ཐོགས་ནས་ནམ་རྡོ་རྗེར་གྱུར་ཅིང་སླར་ཡང་འཁོར་ལོར་གྱུར་གྱི་བར་དུ་བཟླས་སོ། །དེ་ནས་དེ་ཐོགས་པས་ན་རིག་འཛིན་ཐམས་ཅད་ཀྱི་འཁོར་ལོ་བསྐོར་བར་འགྱུར་རོ། །དེ་ནས་ཀྱོ་བ་ཏང་བསྒྲུབ་པར་ འདོད་པས་ཕྱག་ན་རྡོ་རྗེའི་སྤྱན་སྔར་གསེར་གྱི་ཀྱོ་བ་ཏང་བྱས་ཏེ་ལག་པ་གཡོན་པའི་རྡོ་རྗེ་ཁུ་ཚུར་གྱིས་བཟུང་ལ། གྲུབ་པ་རྣམ་གསུམ་དུ་གྱུར་གྱི་བར་དུ་བཟླས་ཏེ། དྲོས་པ་ཙམ་གྱིས་ཐམས་ཅད་ཀུན་དགུག་ནུས་པར་འགྱུར་རོ། །དུད་པ་བྱུང་བ་ཙམ་གྱིས་ཐམས་ཅད་དབང་དུ་བྱེད་ ནུས་པར་འགྱུར་རོ། །འབར་བས་ནི་ཐམས་ཅད་དགུག་པ་དང་དབང་དུ་བྱས་ཤིང་རིག་འཛིན་གྱི་རྒྱལ་པོར་འགྱུར་རོ། །དེ་ནས་ལྷ་ལ་སོགས་པ་ཐམས་ཅད་དགུག་པ་འབྱུང་སྟེ། ལྷ་ཆེན་པོ་ལ་སོགས་པ་ལྷ་རྣམས་གང་ཡང་རུང་བའི་ཆ་ལུགས་རྐང་པ་གཡོན་པས་མནན་ལ། རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་བཅིངས་ཏེ་བསྡིགས་ཤིང་ཟླ་བ་གཅིག་གི་མཐའི་བར་དུ་བཟླས་ན་ལྷ་ཐམས་ཅད་ལྷགས་ཏེ། ལས་ཐམས་ཅད་བྱེད་པའི་གཡོག་ཏུ་འགྱུར་རོ། །ཀླུ་དབང་དུ་བྱ་བར་འདོད་ན་ཀླུའི་མཚོར་ལྟེ་བ་མན་ཆད་ཆུའི་ནང་དུ་བཅུག་ལ་ལོ་གཅིག་ཚུན་ཆད་ཀླུ་ཐམས་
- 19a
ཅད་རང་གི་གཟུགས་སུ་སྟོན་ཅིང་ལས་ཐམས་ཅད་བྱེད་པའི་གཡོག་ཏུ་གྱུར་པའི་བར་དུ་བཟླས་སོ། །གནོད་སྦྱིན་དབང་དུ་བྱ་བར་འདོད་པས་གནོད་སྦྱིན་གང་ལ་གནས་པའི་གནས་དེར་རྡོ་རྗེ་ཧཱུྃ་ཞེས་པའི་ཕྱག་རྒྱ་བཅིངས་ལ་གནོད་སྦྱིན་དེ་དག་ལྷགས་ཏེ། བཀའ་ཅི་སྩལ་ ཞེས་སྨྲ་བའི་བར་དུ་བཟླས་སོ། །དེ་ཕྱིན་ཅད་བཀའ་ཐམས་ཅད་བྱེད་པའི་གཡོག་ཏུ་འགྱུར་རོ། །དེ་ནས་མ་རྣམས་ཐམས་ཅད་དབང་དུ་བྱ་བར་འདོད་པས་མའི་གནས་སུ་སོང་ནས། ཁྲོ་མོའི་སྙིང་གར་རྡོག་པས་མནན་ལ་ཟླ་བ་གཅིག་ལོན་གྱི་བར་དུ་བཟླས་ན། ཚེས་ཉི་ཤུ་དགུ་ལ་ འཇིགས་སུ་རུང་བ་ཆེན་པོའི་སྒྲ་འབྱིན་པར་བྱེད་དེ། དེ་ནས་དབང་དུ་གྱུར་ནས་བཀའ་བཞིན་བྱེད་པའི་གཡོག་མོར་འགྱུར་ཏེ། ཕྲག་པ་ལ་ཁྱེར་ནས་མཐོ་རིས་སུ་ཁྲིད་དེ། སླར་ཡང་ཁྲིད་ཅིང་འོངས་ནས་ཚོགས་ཀྱི་བདག་པོར་བཅུག་ཅིང་། དེ་དག་གིས་མཆོད་དེ། སྔོན་མ་བྱུང་ བའི་དོན་ཐམས་ཅད་དང་། འདོད་པ་ཐམས་ཅད་དང་ན་ཆུང་ཐམས་ཅད་འགུག་གོ། །འདི་ལྟ་བུའི་རྣལ་འབྱོར་ཡང་སྟེར་ཏེ། རྣལ་འབྱོར་གང་གིས་ཁྲོ་བོའི་འཇིག་རྟེན་དུ་ཡང་འགྲོ་ཞིང་ཕྱིར་ཡང་འོང་ངོ་། །དེ་ལ་སུས་ཀྱང་ཅུང་ཟད་ཀྱང་བྱེད་མི་ནུས་སོ། །དེ་ནས་དཔལ་ཆེན་མོ་ བསྒྲུབ་པར་འདོད་པ་དེས་ཕྱག་ན་རྡོ་རྗེའི་སྤྱན་སྔར་བཟླས་པ་ནི་ཕྱག་ན་རྡོ་རྗེའི་སྐུ་ལས་ལྷ་མོའི་ལུས་མཐོང་གི་བར་དུ་སྟེ། དེ་ལས་མ་འགུལ་ཅིག་ཅེས་བསྒོའོ། །དེ་ཕྱིན་ཅད་དོན་ཐམས་ཅད་སྟེར་བར་འགྱུར་ཏེ། སངས་རྒྱས་པའང་སྟེར་བའི་བར་དུའོ། །དེ་ནས་མཚོ་དབྱངས་མ་ དབང་དུ་བྱ་བར་འདོད་ན། དེས་ཕྱག་ན་རྡོ་རྗེའི་སྤྱན་སྔར་ཡི་གེའི་ཕྲེང་བར་བྱས་ལ་ཕྲེང་བའི་ཡི་གེ་བཀོད་ཅིང་མཐར་ཕྱིན་གྱི་བར་དུ་བཀླགས་ཏེ། ཉིན་རེ་ཞིང་དུས་གསུམ་དུ་ལས་དེ་བྱས་ལ་དེ་ནས་བརྒྱད་སྟོང་བཟླས་ན། ཟླ་བ་གཅིག་ལོན་པ་དང་མཚོ་དབྱངས་མ་མཐོང་ངོ་། །དེ་ཕྱིན་ ཅད་ཐོགས་པ་མེད་པའི་སྤོབས་པ་དང་ལྡན་པར་འགྱུར་རོ། །འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་ཀྱི་གཙུག་ལག་ཐམས་ཅད་ཤེས་ཉེན་ཅན་དུ་བྱ་བ་ཐམས་ཅད་དང་། བཟོ་ཐམས་ཅད་ཀྱང་མ་བསླབས་པར་དེ་ལྟར་རབ་ཏུ་ཤེས་སོ། །དེ་ནས་ལིག་བུ་མིག་དང་
- 19b
གུར་གུམ་དང་། ལྡོང་རོས་དང་། བ་བླ་རྣམས་ལ་བསྒྲུབ་པ་འབྱུང་སྟེ། ལིག་བུ་མིག་བླངས་ལ་འཇོམ་པའི་སྟེང་དུ་བཞག་ནས། ལག་པས་མནན་ཏེ་གྲུབ་པ་རྣམ་གསུམ་བྱུང་གི་བར་དུ་བཟླས་སོ། །གཅིག་གིས་ནི་མི་སྣང་བར་འགྱུར་རོ། །གཉིས་པས་ནི་གཟུགས་མང་ པོར་འགྱུར་རོ། །གསུམ་པས་ནི་ནམ་གནས་གོང་མར་འཛེག་པ་ན་ནམ་མཁའ་ལ་འགྲོ་བར་འགྱུར་རོ། །གུར་གུམ་ལ་སོགས་པ་བཟུང་སྟེ། འཇོམ་པའི་བུ་གར་བཅུག་ལ། རྡོ་རྗེ་འཛིན་མའི་ཕྱག་རྒྱས་མནན་ནས་ནམ་འབར་གྱི་བར་དུ་བཟླས་སོ། །དེ་ནས་ཐིག་ལེ་བྱས་ནས་ འདོད་པ་ཐམས་ཅད་ཀྱི་བདག་པོ་དང་རིག་འཛིན་དང་ཐམས་ཅད་དུ་འགྲོ་བ་དང་ཚེ་ལོ་སྟོང་ཐུབ་པར་འགྱུར་རོ། དེ་ནས་སཱ་ལ་བྷཉྫི་ཀ་སྒྲུབ་པ་འབྱུང་སྟེ། གནས་གང་ལ་སཱ་ལ་བྷཉྫི་ཀ་རི་མོ་བྲིས་པ་འམ། །གཟུགས་སུ་བྱས་པ་དེའི་འཇོམ་པ་ལ་སོར་མོ་བཞག་སྟེ་ཟླ་བ་གཅིག་ ཏུ་ཟློས་ཤིག །དེ་ནས་ཟླ་བ་གཅིག་གི་མཐར་མཚན་ཐོག་ཐག་ཟློས་ཤིག །དེ་ནས་ནང་པར་རང་གི་གཟུགས་སུ་བསྟན་ནས་འདོད་པ་ཐམས་ཅད་སྦྱིན་པའི་ཆུང་མར་འགྱུར་རོ། །གནོད་སྦྱིན་མོ་བསྒྲུབ་པར་འདོད་པས། གནོད་སྦྱིན་མོ་གང་ན་འདུག་པའི་གནས་དེར་ འདུག་ལ། རང་གི་གཟུགས་སུ་འོངས་ཀྱི་བར་དུ་བཟླས་ན། དེ་ལ་འདོད་པ་ཐམས་ཅད་སྟེར་བའི་བྲན་མོར་འགྱུར་རོ། །དེ་ནས་ཤ་ཟ་མོ་བསྒྲུབ་པར་འདོད་པས་ཕྱག་དར་ཕུང་པོ་མེས་བཏང་སྟེ། ལག་པ་གཡོན་པས་རང་གི་མཚན་མ་དེ་བཟུང་ལ། གཡས་པས་ གཟེགས་མ་བསྲེགས་པ་ནི་ཕྱག་དར་གྱི་ཕུང་པོ་དེ་ལས་ཅི་ཙམ་ན་ཤ་ཟ་མོ་གདོང་མདངས་གཟུགས་མི་སྡུག་པ་འོངས་ཏེ་རང་གི་གཟུགས་སུ་གནས་སོ། །དེ་ཡང་དེ་བཞིན་དུ་བྲན་མོར་འགྱུར་རོ། །དེ་ནས་ཅི་བགྱི་བ་བསྒྲུབ་པར་འདོད་པས་ཉིན་ཞག་གཅིག་སྨྱུང་བ་ བྱས་ལ། ཚེས་ཉི་ཤུ་དགུ་ལ་བརྒྱད་སྟོང་བཟླས་ཏེ། དེ་ནས་ཟླ་བ་གཅིག་སློང་མོ་ལ་ཟ་ཞིང་གྲངས་མེད་པར་བཟླས་ཏེ། ཟླ་བ་གཅིག་ལོན་པ་དང་། ནུབ་གསུམ་སྨྱུང་བ་བྱས་ནས་མཚན་ཐོག་ཐག་བཟླས་སོ། །དེ་ནས་ནང་པར་ཅི་བགྱི་འོངས་ན་དེས་མི་འཇིགས་པར་
- 20a
བྱ་སྟེ། དེ་ནས་དེ་རངས་ནས་འགྲུབ་བོ། །དེ་ཕྱིན་ཅད་འདོད་པ་ཐམས་ཅད་འབུལ་བའི་གཡོག་ཏུ་འགྱུར་ཏེ། མཐོ་རིས་ཀྱི་ལྷ་མོ་ཡང་འགུགས་ཤིང་འབུལ་ལོ། །དེ་ཡང་སྐྱེལ་ཅིང་སླར་ཡང་འགུགས་སོ། །འདས་པ་དང་མ་འོངས་པ་དང་ད་ལྟར་གྱི་ཐམས་ཅད་ཀྱང་ སྨྲའོ། །གཞན་གྱི་ནོར་ཐམས་ཅད་ཀྱང་ཕྲོགས་ནས་འབུལ་ལོ། །དེ་ནས་རིག་པའི་བརྟུལ་ཞུགས་བྱ་བར་འདོད་པ་དངོས་གྲུབ་མེད་པ་གང་ཡིན་པ་དེས། ཟླ་བ་དྲུག་གི་བར་དུ་ཉིན་ཞག་བཅུ་བཅུ་ཞིང་སྤྱད་པ་སྔ་མ་བརྗེས་ལ། སློང་མོའི་ཁ་ཟས་ལ་སོགས་པ་ནས་རླུང་བཟའ་བའི་བར་ དུའོ། །དེ་ནས་མཇུག་ཏུ་མཚན་ཐལ་བྱུང་བཟླས་ན་ནང་པར་སངས་རྒྱས་པའང་སྦྱིན་པར་འགྱུར་རོ། །དེ་ནས་ཉིན་རེ་ཞིང་བཅྭ་བརྒྱད་ཀྱི་བར་དུ་སྔོན་གྱི་སྤྱད་པ་རྣམས་བྱས་ལ་དེའི་མཇུག་ཏུ་མཚན་ཐལ་བྱུང་བཟླས་ན་ནང་པར་ལས་ཐམས་ཅད་འགྲུབ་པར་འགྱུར་བ་ནི་ཧཱུྃ་ཞེས་ཐང་ཅིག་བརྗོད་ པས་ཀྱང་ངོ་། །དེ་ནས་རོ་ལངས་བསྒྲུབ་པ་འབྱུང་སྟེ། མ་རྨས་མ་ཉམས་པའི་མི་རོ་བླངས་ལ་ལེགས་པར་བཀྲུས་ནས་བྱུག་པས་ལེགས་པར་བྱུགས་ཏེ། མེ་ཏོག་གི་ཕྲེང་བ་བཏགས་ནས། རྐང་པ་གཡོན་པས་མནན་ལ་དབུགས་བྱུང་གི་བར་དུ་བཟླས་ན་དེ་ལྡང་སྟེ་ལངས་པ་དང་། དེ་ཞོན་ནས་ཐམས་ཅད་དུ་འགྲོ་ཞིང་ཚེ་ཡང་ལོ་སྟོང་ཕྲག་བརྒྱར་འགྱུར་རོ། །དེ་ནས་རོ་ལངས་ཀྱི་གྲུབ་པ་མཆོག་སྒྲུབ་པ་འབྱུང་སྟེ། མ་རྨས་མ་ཉམས་པའི་མི་རོ་བླངས་ནས། དེ་བཞིན་དུ་རབ་ཏུ་བརྒྱན་ལ་ཞོན་ཏེ། ལངས་ཤིང་ཡང་འགྱེལ་གྱི་བར་དུ་བཟླས་ན་དེ་བཞིན་གཤེགས་པའི་ སྐུར་འགྱུར་རོ། །དེ་ཕྲག་པ་ལ་ཁྱེར་ན་དེ་བཞིན་གཤེགས་པ་ཐམས་ཅད་སྲེལ་བའི་རིག་འཛིན་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་རྫུ་འཕྲུལ་གྱིས་འགྲོ་བ་དང་ཚེ་ཡང་བསྐལ་པར་འགྱུར་རོ་ཞེས་བཅོམ་ལྡན་འདས་ཕྱག་ན་རྡོ་རྗེས་གསུངས་སོ། །དེ་ནས་མ་བསྒྲུབས་ཀྱང་ དཀྱིལ་འཁོར་མཐོང་བ་ཉིད་ཀྱིས་ལས་སུ་འགྱུར་བ་ནི་འདི་ལྟ་སྟེ། ཐང་ཅིག་བརྗོད་པས་ནི་བདག་དང་གཞན་དང་གྲོང་དང་། གྲོང་ཁྱེར་དང་། རྒྱལ་པོ་ལ་སོགས་པ་བསྲུང་པར་འགྱུར་རོ། །མཚམས་བཅད་པ་ལ་སོགས་པ་ནི་བརྟན་པར་ལྟ་བས་མཚམས་བཅད་ན། དེ་བཞིན་
- 20b
གཤེགས་པ་ཐམས་ཅད་ཀྱང་མི་འདའ་ན་གཞན་ལྟ་ཅི་སྨོས། སའི་དཀྱིལ་འཁོར་དང་ནམ་མཁའ་དང་ཕྱོགས་བཅིང་བའང་ལྟ་བ་དེས་སོ། །དབབ་པ་ནི་རེག་པ་དང་མ་རེག་པས་རལ་གྲི་དང་། མེ་ལོང་དང་། སྣོད་དང་། མཐེ་བོ་དང་། ཤིང་ལྗོན་པ་དང་། བྲིས་པ་དང་། ཆ་ལུགས་དང་། གཞུ་དང་། མདའ་དང་། རྡོ་རྗེ་ལ་སོགས་པ་རྡོ་རྗེ་དབབ་པའི་ཕྱག་རྒྱ་གོས་ཀྱིས་གཡོགས་ལ་བཅིངས་ཏེ། གུ་གུལ་གྱི་བདུག་པས་དབབ་པོ། །གདོན་ཞི་བར་བྱ་བ་ནི་ཧཱུྃ་ཞེས་པས་སོ། །རྡོ་རྗེ་ཧཱུྃ་ཞེས་པའི་ཕྱག་རྒྱས་ནི་སེམས་ཅན་ཐམས་ཅད་འཕུངས་ པར་བྱེད་དོ། །རྡོ་རྗེ་ལྕགས་སྒྲོག་གི་ཕྱག་རྒྱས་ནི་བྱད་མའི་གདོན་ལས་ཐར་བར་བྱེད་དོ། །ཧེ་རུ་ཀ་རྡོ་རྗེའི་ཕྱག་རྒྱ་བསྟན་པས་ནི་བྱད་མས་བསད་པ་ལས་སླར་གསོ་བར་བྱའོ། །རྡོ་རྗེའི་ཕྱག་རྒྱ་གཟུང་བས་སྐྲ་ལ་བཟུང་སྟེ་བསླང་བས་ནི། དུག་གནོན་པ་དང་། དུག་བསླང་བ་ དང་། དུག་ཞི་བར་བྱ་བ་དང་། དུག་སྦ་བ་དང་། དུག་གཞིག་པར་བྱ་བ་དང་། དུག་གིས་ཤི་བ་ལས་གསོ་བར་བྱ་སྟེ། རྡོ་རྗེ་ཧཱུྃ་ཞེས་པ་གཅིག་གིས་སོ། །གཏེར་དབྱུང་བ་ནི། ཟངས་ཀྱི་རིལ་བ་ཆུས་བཀང་ལ། རྡོ་རྗེ་ཧཱུྃ་ཞེས་པའི་མཛུབ་མོ་དང་གུ་གུལ་གྱིས་བདུག་པ་ བྱས་ཏེ་བཟླས་ན། གལ་ཏེ་གཏེར་ཡོད་ན་ནི་ཆུ་དེ་ལུད་དོ། །དེ་སྟེ་མེད་ན་ནི་འཁྱིལ་ལོ། །དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་ཧཱུྃ་ཞེས་པ་བཟླས་ཏེ་བླང་ངོ་། །སྣང་བ་དགུག་པ་ནི། དོང་ཀའི་ལྗོན་པའི་ཡམ་ཤིང་གིས་མེ་བུས་ཏེ། ཞོ་དང་། སྦྲང་རྩི་དང་མར་ གྱིས་རཱ་ཛ་ཀོ་ཤཱ་ཏ་ཀའི་མེ་ཏོག་ལ་བསྐུས་ནས་སྟོང་ཕྲག་བརྒྱད་བསྲེགས་ན་སྣང་བ་ཐོབ་བོ། །འོག་གི་གནས་སུ་ནི་རྡོ་རྗེ་འོག་གི་ཕྱག་རྒྱས་འཁྲུལ་འཁོར་ཐམས་ཅད་བཅོམ་ནས་རྡོ་རྗེ་ཧཱུྃ་ཞེས་པ་བཟླས་ཏེ་ཞུགས་ན་དེ་ལ་སུས་ཀྱང་གཙེ་བར་མི་ནུས་སོ། །གཏོགས་འདོད་ཀྱི་འཁོར་ ལོས་ཀྱང་ཅི་ཡང་བྱེད་པར་མི་འགྱུར་རོ། །ཕྱག་ན་རྡོ་རྗེའི་སྤྱན་སྔར་རྡོ་རྗེའམ། ནོར་བུ་མརྒ་ཏིའམ། པདྨ་རཱ་ག་འམ། མུ་ཏིག་གམ། གསེར་རམ། དབྱིག་གམ། གཞན་ཅི་ཡང་རུང་བའམ། སྐྱེས་པའམ། བུད་མེད་དམ། །སངས་རྒྱས་ཀྱི་སྐུ་གཟུགས་ལ་ལོ་
- 21a
གཅིག་གི་བར་དུ་དུས་གསུམ་དུ་བརྒྱ་བརྒྱར་བཟླས་ནས་དེ་ནས་ལོ་གཅིག་ལོན་ན་བརྒྱ་འགྱུར་དུ་འགྱུར་རོ། །དེ་སྙེད་དུ་བརྒྱར་བཟླས་ན་དེ་སྙེད་ཀྱི་བརྒྱར་འགྱུར་རོ། །དེ་ནས་སྟོང་དུ་བཟླས་ན་ཡང་སྟོང་འགྱུར་དུ་འགྱུར་རོ། །ལོངས་སྤྱོད་དགུག་པ་ནི་སྟོང་ཕྲག་ བརྒྱར་བཟླས་སོ། །དགུག་པ་ནི་རྡོ་རྗེ་ཀྱོ་བ་ཏང་གི་ཕྱག་རྒྱས་ཟླ་བ་བཞིས་ཁུགས་སོ། །དབང་དུ་བྱ་བ་ནི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱས་སོ། །སེམས་ཅན་ཐམས་ཅད་གཏན་འཕོ་བ་ནི་རྡོ་རྗེ་ཧཱུྃ་ཞེས་པའི་ཕྱག་རྒྱ་བཅིངས་ཏེ། སྟོང་ཕྲག་བརྒྱར་བཟླས་ན་སེམས་ ཅན་ཐམས་ཅད་ཡིད་ཀྱིས་དམིགས་པ་བཞིན་གཏན་འཕོའོ། །ཆུ་གནོན་པ་ནི་རྡོ་རྗེའི་ཕྱག་རྒྱ་བཅིངས་ལ་ཆུའི་སྟེང་དུ་འགྲོར་རུང་བའི་བར་དུ་བཟླས་སོ། །མེ་གནོན་པ་ནི་ཐང་ཅིག་བཟླས་པས་སོ། །ལོ་ཏོག་བསྲུང་བ་ནི་རྡོ་རྗེ་ལྟ་བས་ཏེ། དེ་ལ་སྲོག་ཆགས་རྣམས་གང་ གིས་ཀྱང་གནོད་པར་མི་འགྱུར་ཞིང་བྱི་བ་ལ་སོགས་པ་ཡང་འདའ་བར་མི་བྱེད་དོ། །རྡེག་པ་སྤོ་བ་ནི་ཁྲོ་བོའི་ལྟ་བས་ཏེ། གང་དུ་བལྟས་པ་དེར་འཕོའོ། །བཟའ་བ་དང་བཏུང་བ་དང་ཐམས་ཅད་སྤོ་བ་ནི་འབར་བའི་ལྟ་བས་ནི་རང་གི་སྣོད་དུ་འཕོའོ། །སྡིག་པ་དང་སྦྲུལ་ཐམས་ཅད་མེད་ པར་བྱ་བ་ནི་ཐང་ཅིག་བརྗོད་པས་སོ། །གཅན་སྲིན་ཐམས་ཅད་ལ་ཐང་ཅིག་བཟླས་པས་མེད་པར་འགྱུར་རོ། །རྐུན་པོ་ཐམས་ཅད་འཕམ་པ་ནི་རྡོ་རྗེ་ཁུ་ཚུར་བཅིངས་པས་སོ། །དམག་ལས་སྒྲོལ་བ་ནི་རྡོ་རྗེ་འཛིན་མའི་ཕྱག་རྒྱས་སོ། །གཞུ་དང་མདའ་དང་མདུང་དང་རྒྱལ་མཚན་ མནན་ནས་འགུལ་གྱི་བར་དུ་བཟླས་ཏེ། དེ་ཐོགས་ན་དམག་ཐམས་ཅད་ལས་རྒྱལ་བར་འགྱུར་རོ། །ཞལ་ཆེ་ལ་ནི་ཐང་ཅིག་བརྗོད་པས་རྩོད་པའི་ལན་ཐེབས་པར་འགྱུར་རོ། །ཞི་བ་ཐམས་ཅད་ནི་ཏིལ་གྱི་སྦྱིན་སྲེག་གིས་སོ། །རྒྱས་པ་ཐམས་ཅད་ནི་ཡུངས་ཀར་གྱི་སྦྱིན་སྲེག་གིས་སོ། གཏན་འཕོ་བ་ཐམས་ཅད་ནི་ཚེར་མའི་སྦྱིན་སྲེག་གིས་སོ། །གསོ་བ་ཐམས་ཅད་ནི་དཱུར་བའི་ལོ་མའི་སྦྱིན་སྲེག་གིས་སོ། །འཚེ་བ་དང་གནམ་དལ་དང་རྨི་ལམ་ངན་པ་ཐམས་ཅད་གཞི་ལ་བ་ནི་ཏིལ་དང་འབྲས་ཀྱི་སྦྱིན་སྲེག་གིས་སོ། །གཞོམ་པ་ཐམས་ཅད་ནི་ཧཱུྃ་ཞེས་པས་སོ། །
- 21b
རྒོད་དུ་གཞུག་པ་དང་མྱོས་པར་བྱ་བ་ཐམས་ཅད་ལ་ཕཊ་ཅེས་བྱ་བས་སོ། །ཐམས་ཅད་གཉིད་ལོག་ཏུ་གཞུག་པ་ནི་བསྐུམས་ལ་མིག་བཙུམས་ཏེ་བརྒྱ་བཟླས་པས་ཐམས་ཅད་གཉིད་ལོག་པར་བྱས་པ་ཡིན་ནོ། །སེམས་ཅན་ཐམས་ཅད་རྒྱས་གདབ་པ་ནི་རྡོ་རྗེ་ཁྲོ་བོའི་ལྟ་བས་བལྟས་ན་ རྒྱས་བཏབ་པར་འགྱུར་ཏེ། ཉིན་བདུན་ལས་ལྷག་པར་མི་གསོན་ནོ། །ངག་འཕྲོག་པ་ནི་རང་གི་ལྕེ་སོས་བཟུང་ནས་ཧཱུྃ་ཞེས་བྱ་བའི་བར་དུ་སྦྱོར་བ་བྱའོ། །སྙིང་དྲང་བ་ནི་རྡོ་རྗེ་སོར་མོའི་ཕྱག་རྒྱས་དཔུང་པ་བསྣོལ་ཏེ། རང་གི་མཆན་ཁུང་དུ་གློང་ཞིང་སྙིང་པོ་བཟླས་ན་ནུབ་བདུན་ཚུན་ཆད་ འཕོ་བར་འགྱུར་རོ། །སྙིང་བཅད་པ་ནི་རྡོ་རྗེ་བླངས་ཏེ་གཅད་པར་བྱའོ། །སྙིང་དབྱེ་བ་ནི་རྡོ་རྗེ་ལྕགས་ཕུར་གྱིས་གདབ་སྟེ་མིང་ནས་སྨོས་ཤིང་གཟུགས་སོ། །སྙིང་སྦོ་བ་ནི་ལག་པ་གཉིས་ཀྱིས་རྡོ་རྗེ་བླངས་ཏེ་མཚན་བདུན་དུ་རབ་ཏུ་སྦྱོར་བ་བྱས་པས་འཕོ་བར་འགྱུར་རོ། །དེ་ནས་ཕྱག་རྒྱ་འདི་ རྣམས་ལས་ཐར་བར་བྱ་བ་བཤད་དེ། དེས་རྒྱས་འདེབས་པ་ལ་ནི་ཁུ་ཚུར་དམ་པོས་སོ། །ངག་འཕྲོག་པ་ལ་ནི་རྡོ་རྗེ་ངག་གི་བཟླས་པས་སོ། །སྙིང་འདྲེན་པ་ལ་ནི་རྡོ་རྗེ་ཁུ་ཚུར་གྱི་ཕྱག་རྒྱ་སྙིང་གར་དགྲོལ་ལོ། །བཅད་པ་ལ་ནི་རྡོ་རྗེ་ཧཱུྃ་ཞེས་པ་བཟླས་ནས་འོ་མས་ཁྲུས་ཤིག །ཕྱེ་བ་ ལ་ནི་ཕུར་བུ་ཕྱུང་ནས་རྡོ་རྗེ་དྲིས་སྐུས་ཤིག །སྙིང་སྤོབ་ལ་ནི་རྡོ་རྗེ་སྙིང་པོས་ཐར་བར་བྱའོ། །དེ་བཞིན་དུ་བྱད་མའི་ཕྱག་རྒྱ་ཡང་སྤོ་བར་བྱའོ། །སྙིང་བསྒྲུབ་པར་འདོད་ན་བུད་མེད་ཀྱི་སྙིང་གར་ལྟ་ཞིང་ལན་ཅིག་བཟླས་ན་དེའི་སྙིང་ག་ནས་སྒྲ་ཐོས་པར་འགྱུར་རོ། །སྐྱེས་པའི་སྙིང་གར་ ཡང་དེ་བཞིན་དུ་བྱས་ཏེ་སྙིང་ག་ཐམས་ཅད་དུ་ཡང་དེ་ལྟར་རོ། །དེ་ནས་ཕ་རོལ་གྱི་སེམས་ཤེས་པ་བསྒྲུབ་པར་འདོད་པས་ནི་རྡོ་རྗེ་ཧཱུྃ་ཞེས་པ་བརྒྱར་བཟླས་ན་ཕ་རོལ་གྱི་སེམས་ཤེས་སོ། །སྔོན་གྱི་གནས་ཤེས་པར་བྱ་བ་ནི་རྡོ་རྗེ་ཧཱུྃ་ཞེས་པ་བཟླས་པས་སོ། །རྨི་ལམ་མཐོང་བར་འདོད་ པས་ནི་རྡོ་རྗེ་ཧཱུྃ་ཞེས་པ་ལན་ཉི་ཤུ་རྩ་གཅིག་བཟླས་ཤིང་བདུག་པས་ཀ་པི་ཙས་བདུགས་ཏེ་གཉིད་ལོག་ན། དེ་ནས་བཅོམ་ལྡན་འདས་ཀྱིས་འདས་པ་དང་མ་འོངས་པ་དང་ད་ལྟར་གྱི་ཤེས་པ་སྟོན་ཏོ། །ཚིག་བསྒྲུབ་པར་འདོད་པས་རྡོ་རྗེ་ཚིག་གིས་སྟོང་ཕྲག་བརྒྱ་བཟླས་ན། རྡོ་རྗེ་ཚིག་
- 22a
གིས་རང་གི་ལྕེས་སྨྲས་པ། ཐམས་ཅད་བདེན་པར་འགྱུར་ཏེ་ཅི་བསླབས་པ་དེ་སྩོལ་ཏོ། །ཆོ་འཕྲུལ་སྟོན་པ་ནི་བཟླས་པའི་རྡོ་རྗེའི་ཚིག་གིས་བརྒྱད་བརྒྱ་བཟླས་ན་རང་གི་ལུས་ལ་ཆོ་འཕྲུལ་དུ་འགྱུར་བ་ནི། སངས་རྒྱས་ཐམས་ཅད་དང་། བྱང་ཆུབ་སེམས་ དཔའ་དང་། རྡོ་རྗེ་འཛིན་དང་། ལྷ་དང་། ཀླུ་དང་། གནོད་སྦྱིན་ལ་སོགས་པ་སེམས་ཅན་ཐམས་ཅད་ཀྱི་གཟུགས་བརྙན་གྱི་ཚུལ་དུ་སྟོན་ཏོ། །རང་གི་གཟུགས་ཅི་དགའ་བར་སྒྱུར་བར་བྱེད་འདོད་པས་རྡོ་རྗེ་ཚིག་གིས་རྡོ་རྗེ་བཟླས་པ་སྟོང་ཕྲག་བརྒྱ་བཟླས་ན། གཟུགས་གང་ དང་གང་འདོད་པ་དེ་དང་བདག་སངས་རྒྱས་ཀྱི་གཟུགས་སུ་ཡང་བྱེད་པར་འགྱུར་རོ། །མི་སྣང་བར་འདོད་པས་རྡོ་རྗེ་ཁུ་ཚུར་གྱིས་རྡོ་རྗེ་བཟུང་ལ་རྡོ་རྗེ་བཟུང་བས་མི་སྣང་བར་གྱུར་པ་དེ་སྲིད་ཀྱི་བར་དུ་བཟླས་སོ། །བཏང་བས་ནི་དགྲོལ་ལོ། །ཁྲིའུ་ལ་འདུག་ནས་རྡོ་རྗེ་ལག་ཏུ་བླངས་ ཏེ་ནམ་འཕར་གྱི་བར་དུ་བཟླས་སོ། །གདོན་གྱིས་འཛིན་དུ་གཞུག་ན་རྡོ་རྗེ་ཧཱུྃ་ཞེས་པས་སོ། །གདོན་གར་བྱེད་དུ་འཇུག་པ་ནི་ཧི་ཞེས་པས་སོ། །གདོན་བསྐྱོད་པ་ནི་ཧག་ཅེས་པས་སོ། །གདོན་གཞོམ་པ་ནི་ཕཊ་ཅེས་པས་སོ། །གཅེར་བར་བྱ་བ་ནི་མིའི་སྐྲའི་སྐུད་པས་རང་གི་ དཔུང་པ་བཅིངས་ན་གཅེར་བར་འགྱུར་ཏེ་གོས་བརྗེ་བར་འགྱུར་རོ། །སྡང་བར་བྱ་བ་ནི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་དྲལ་བས་སོ། །བསྐྲད་པ་ནི་རྡོ་རྗེ་ཁུ་ཚུར་གྱིས་འཕང་ངོ་། །དགོས་པ་བསྐྱེད་པ་ནི་མཚན་ཐོག་ཐག་ཤ་ཆེན་པོ་རང་གི་ཁྲག་གིས་བསྐུས་ཏེ་སྲེག་གོ། །གཞན་ གྱི་བུད་མེད་དགུག་པ་ནི་རྡོ་རྗེ་བཟུང་ནས་སྙིང་པོ་བཟླས་ཤིང་དགུག་གམ། ཡང་ན་ཐམས་ཅད་དུ་ཁྱབ་པ་ཧཱུྃ་ཞེས་པས་ཐམས་ཅད་བྱའོ། །བུད་མེད་ཐམས་ཅད་དང་དགའ་བར་སྤྱོད་པ་ནི་རང་གི་རྟགས་རྡོ་རྗེ་བཅིངས་པས་བཟུང་ལ་ཉིན་བདུན་དུས་གསུམ་དུ་ལངས་ཀྱི་བར་དུ་བཟླས་སོ། །དེ་ ནས་མཇུག་ཏུ་ནམ་ཕྱེད་ཀྱི་བར་དུ་བཟླས་ན་རྟག་ཏུ་ལྡང་ལ་མི་སྙོམས་ཞིང་བཅུད་མང་ལ་རྟགས་ཤུགས་དྲག་པོར་འགྱུར་རོ། །བུ་མོ་སྤྱད་པ་ནི་རྡོ་རྗེ་བཟུང་ནས་ཐམས་ཅད་དུ་ཁྱབ་པར་ཧཱུྃ་ཞེས་བྱ་བ་བྱས་ནས་སྤྱོད་དོ། །བུད་མེད་ཐམས་ཅད་དབང་དུ་བྱ་བ་ནི་རྡོ་རྗེ་ཧཱུྃ་ཞེས་པའི་ཕྱག་རྒྱ་བཅིངས་ལ་
- 22b
སྟོང་ཕྲག་བརྒྱ་བཟླས་ན་བུད་མེད་ཐམས་ཅད་མགུ་བར་འགྱུར་རོ། །ཕྱག་ན་རྡོ་རྗེའི་སྤྱན་སྔར་སྤྱན་རས་གཟིགས་དབང་པོའི་དམ་ཚིག་གི་ཕྱག་རྒྱ་བཅིངས་ལ་སྟོང་ཕྲག་བརྒྱ་བཟླས་ན་བུད་མེད་ཐམས་ཅད་མགུ་བར་འགྱུར་རོ། །སེམས་ཅན་ཐམས་ཅད་དབང་དུ་བྱ་བར་འདོད་ན་རྡོ་རྗེ་ ཁུ་ཚུར་གྱི་བཅིངས་པས་རྡོ་རྗེ་བཟུང་ལ་ནམ་འགུལ་གྱི་བར་དུ་བཟླས་སོ། །སྣང་བ་ལ་དབང་དུ་བྱ་བར་འདོད་ན་རྡོ་རྗེ་བླངས་ཏེ་རང་གི་སྤྱི་བོར་བཞག་ལ་རྡོ་རྗེ་སྤྱི་བོར་བརྟན་པར་གྱུར་གྱི་བར་དུ་བཟླས་སོ། །དེ་ནས་སྣང་བའི་མདུན་དུ་འདུག་ན་དེས་སྣང་བར་རང་གི་དབང་བསྐུར་བ་ཡང་སྩོལ་ཏོ། ། ནོར་དགུག་པ་ནི་རིན་པོ་ཆེའི་གཙོ་བོའི་ཕྱེ་མས་སྦྱིན་སྲེག་བྱས་པས་སོ། །ཆར་དབབ་པ་ནི་རྡོ་རྗེ་ཧཱུྃ་ཞེས་པ་སྟོང་བཟླས་པས་སོ། །ཆར་གཅད་པ་ནི་རྡོ་རྗེ་ཧཱུྃ་ཞེས་པས་སོ། །སེར་བ་གཅད་པ་ནི་རྡོ་རྗེ་གསོར་བའི་ཕྱག་རྒྱས་སོ། །གདོན་དགག་པ་ཡང་ཕྱག་རྒྱ་དེ་ཉིད་ཀྱིས་སོ། ། སྤྲིན་དགག་པ་ནི་རྡོ་རྗེ་ཧཱུྃ་ཞེས་བྱ་བ་བརྒྱར་བཟླས་པས་སོ། །བསལ་བ་ལ་ནི་རྡོ་རྗེ་ཧཱུྃ་ཞེས་པ་ལན་བརྒྱར་བཟླས་སོ། །རྡོ་རྗེ་དཀྱིལ་འཁོར་གྱི་སྟེང་དུ་བཞག་ནས་མེ་ཏོག་དང་བདུག་པས་མཆོད་དེ། རྡོ་རྗེ་འཛིན་མའི་ཕྱག་རྒྱས་མནན་ཏེ། རྡོ་རྗེ་ལངས་ཀྱི་བར་དུ་བཟླས་སོ། །དེ་ཐོགས་ ནས་ས་བསྐོར་ན་ཅི་འདོད་པ་བཞིན་དུ་སྒྱུ་མའི་ལས་རྣམས་སྟོན་ཏེ། རྡོ་རྗེ་བསྐོར་བས་དུས་མ་ཡིན་པར་ཤིང་ལ་འབྲས་བུ་དང་མེ་ཏོག་མཐོང་ངོ་། །ནམ་མཁའ་ལ་མེ་ཏོག་གི་ཕྲེང་བ་ཆགས་པར་བྱ་བ་ནི་དབུགས་བསྡམས་ལ་རྡོ་རྗེ་ཁུ་ཚུར་བཅིངས་ཏེ་གཏོར་ན་ཆགས་སོ། །ཆ་ལུགས་ བཞད་པར་བྱ་བ་ནི་རྡོ་རྗེའི་ཕྱག་རྒྱས་སོ། །གར་བྱེད་པར་བྱ་ན་རྡོ་རྗེ་འཛིན་མས་སོ། །སྨྲ་བར་བྱ་ན་ཧཱུྃ་ཞེས་པས་སོ། །རྒྱུག་པར་བྱ་ན་རྡོ་རྗེ་དགུག་པའི་ཕྱག་རྒྱས་སོ། །སྨིན་མ་འགུལ་བར་བྱ་ན་རྡོ་རྗེའི་ཕྱག་རྒྱ་འཛིན་པས་རྡོ་རྗེ་ཐོགས་ལ་རང་གི་སྨིན་མཚམས་སུ་བསྒུལ་བས་ སོ། །ས་གཡོ་བར་བྱ་ན་རྐང་པ་གཡོན་པ་བརྡབས་པས་སོ། །ཁྱིམ་བསྒུལ་བ་ནི་རྡོ་རྗེ་དབབ་པའི་ཕྱག་རྒྱས་སོ། །ཁང་པ་དགུག་ན་རྡོ་རྗེ་ཁྲོས་པའི་ཀྱོ་བ་ཏང་གི་ཕྱག་རྒྱ་བཅིངས་པས་སོ། །སྤྲིན་མེད་པར་ཆར་པ་དབབ་པ་ནི་རྡོ་རྗེ་ཧཱུྃ་ཞེས་བཟླས་པས་སོ། །སྐད་ཅིག་ཏུ་སྤྲིན་འདུ་ཞིང་
- 23a
སྟོན་པ་ནི་རྡོ་རྗེ་བསྐོར་བས་སོ། །ཟླ་བ་དང་ཉི་མ་དབབ་ཅིང་བསྟན་པ་ནི་རྡོ་རྗེ་བརྡབས་པས་སོ། །ཉི་མ་དང་ཟླ་བ་མང་པོ་བསྟན་ན་རྡོ་རྗེ་བཞིན་ནམ་མཁའ་ལ་གཏོར་བས་སོ། །དམག་རྣམ་བཞི་བསྟན་ན་རྡོ་རྗེ་བསྐོར་བས་སོ། མཚན་མོ་ཉིན་པར་དུ་བྱ་ན་རྡོ་རྗེ་ འབར་བ་བསྐོར་བས་སོ། །ཉིན་མོ་མཚན་མོར་བྱ་ན་མིག་བཙུམས་ལ་རྡོ་རྗེ་བསྐོར་བས་སོ། །ཐམས་ཅད་ནས་རྡོ་རྗེ་བསྟན་ནས་བརྒྱ་བཟླས་ཏེ་རྡོ་རྗེ་བསྐོར་བས་སོ། །ཐམས་ཅད་ནས་བྱང་ཆུབ་སེམས་དཔའ་བསྟན་ན་སྟོང་བཟླས་ཏེ་རྡོ་རྗེ་བསྐོར་བས་སོ། །ཕྱག་ན་རྡོ་རྗེ་ཐམས་ ཅད་པ་ལ་བསྟན་ན་སྟོང་ཕྲག་བརྒྱ་བཟླས་ཏེ་བསྐོར་བས་སོ། །ཐམས་ཅད་ནས་སངས་རྒྱས་བསྟན་ན་རྡོ་རྗེ་ལ་བྱེ་བ་བཟླས་པས་སོ། །འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་ལས་རྡོ་རྗེ་ཧཱུྃ་ཞེས་བྱ་བའི་རྟོག་པ་ཆེན་པོ་རྫོགས་སོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཕྱག་ན་རྡོ་རྗེ་ལ་འདི་སྐད་གསུངས་སོ། །ངས་ཀྱང་སེམས་ཅན་ཐམས་ཅད་ཀྱི་དོན་གྱི་ཕྱིར། གང་འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་འདིར་ བརྩོན་པར་འགྱུར་བ་ལ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་སྦྱིན་ནོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཙོག་ཙོག་པོར་འདུག་སྟེ་མནོས་པ། ཧཱུཾ་བཛྲ་བིད་སྭཱ་ཧཱ། །དེ་ནས་འདི་གསུངས་པ་ཙམ་གྱིས་སྟོང་གསུམ་གྱི་སྟོང་ ཆེན་པོའི་འཇིག་རྟེན་གྱི་ཁམས་འདི་རབ་ཏུ་གཡོས་སོ། །སེམས་ཅན་ཐམས་ཅད་ཀྱང་རབ་ཏུ་གཡོས་ནས་ཕྱག་འཚལ་ཞིང་དབང་དུ་གྱུར་ཏོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། རྡོ་རྗེ་རིག་པའི་དཀྱིལ་འཁོར་འདི་བཤད་དོ། །དཀྱིལ་འཁོར་ཆེན་པོའི་ཚུལ་དུ་དཀྱིལ་འཁོར་ཐམས་ཅད་བརྟགས་ཏེ། དེའི་དབུས་སུ་ནས་ཕུལ་བཞི་ལ་བཅོམ་ལྡན་འདས་བཞུགས་ཏེ། དེའི་སྤྱན་སྔར་ཕྱག་ན་རྡོ་རྗེ་ཡིད་ཀྱིས་ཀྱང་ཙོག་ཙོག་པོར་བཞག་གོ། །དེ་ནས་
- 23b
དེ་བཞིན་དུ་གཞུག་གོ། །ཞུགས་ནས་འདི་སྐད་དུ་ཁྱོད་དེང་ནས་དེ་བཞིན་གཤེགས་པ་ཉིད་དོ། །དེ་སྟེ་དང་ན་དེ་བཤད་དོ་ཞེས་བསྒོས་ཤིག །དེས་སྨྲས་པ་གསུངས་ཤིག་ཅེས་པ་དང་། དེ་ནས་ཁྱོད་དེང་ཕན་ཅད་དེ་བཞིན་གཤེགས་པར་གྱུར་ཏོ་ཞེས་སྨྲོས་ཤིག །དེས་སྨྲས་པ། ཅིའི་ཕྱིར་དཀྱིལ་འཁོར་མཐོང་བའི་ཕྱིར་རོ་ཞེས་དེས་སྨྲོས་ཤིག །གང་དཀྱིལ་འཁོར་འདིར་ཞུགས་པ་དེ་དེ་བཞིན་གཤེགས་པ་ཉིད་དུ་བལྟ་སྟེ། དེས་སངས་རྒྱས་ཀྱི་བྱང་ཆུབ་ཀྱང་ཚེ་འདི་ཉིད་དམ། ཕ་རོལ་ལ་འཐོབ་པར་འགྱུར་ཞེས་སྨྲས་ནས་ཕྱག་རྒྱ་སློབས་ཤིག །དེ་བཞིན་ གཤེགས་པའི་དཀྱིལ་འཁོར་རོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་རྡོ་རྗེའི་དཀྱིལ་འཁོར་བཤད་དོ། །དཀྱིལ་འཁོར་དེ་བཞིན་དུ་བྲིས་ནས་བཅུག་ལ་རྡོ་རྗེའི་སྒྲུབ་པ་བསླབ་བོ། །ལག་པ་གཉིས་ཀྱིས་རྡོ་རྗེ་བཟུང་ནས་རང་གི་ཕྱག་རྒྱ་བསྒོམ་མོ། ། རྡོ་རྗེ་ཞེས་བྱ་བ་འདི་ཅི་ཡིན་སྙིང་པོ་སྒོམ་པ་སྟེ། རྡོ་རྗེ་ཚིག་གིས་བཟླས་ན་དེས་དེ་བཞིན་གཤེགས་པའང་ཚེ་འདི་འམ་གཞན་ལ་ཐོབ་པར་འགྱུར་རོ། །རྡོ་རྗེའི་དཀྱིལ་འཁོར་རོ། །ཐམས་ཅད་དམ་ཚིག་ཆེན་པོའི་ཚུལ་དུ་བྱས་ལ་འདི་སྨྲོས་ཤིག །དད་བརྟན་ཕྱག་ན་རྡོ་རྗེ་ལ། དེ་བཞིན་ གཤེགས་རིགས་དེ་བཞིན་ནོ། །སེམས་ཅན་ཐམས་ཅད་མགུ་བ་རུ། །ཁྱོད་ཀྱིས་དེ་ལྟར་བརྟག་པར་བྱ། །དེང་ནས་ཁྱོད་ཀྱིས་དེ་ལྟར་མ་བྱས་ན་སེམས་ཅན་དམྱལ་བར་ལྟུང་བར་འགྱུར་རོ། །དམ་ཚིག་གི་དཀྱིལ་འཁོར་རོ། །ཡང་དཀྱིལ་འཁོར་དེ་བཞིན་དུ་བྲིས་ལ་སློབ་མ་ བཅུག་ནས་ལས་རྣམ་བཞིའང་བསླབ་བོ། །ལུས་ཐམས་ཅད་ཀྱིས་གཏུགས་ཏེ་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། དེ་ནས་ལངས་ཏེ་ཡན་ལག་ལྔས་ཕྱག་བྱས་ནས་སྡིག་པ་ཐམས་ཅད་ནི་བཤགས་སོ། །དེ་ནས་ལངས་ལ་ཐལ་མོ་སྦྱར་ཏེ་པུས་མོ་གཉིས་ ས་ལ་གཏུགས་ནས་བསོད་ནམས་ཐམས་ཅད་ཀྱི་རྗེས་སུ་ཡི་རང་ངོ་། །དེ་ནས་ལངས་ཏེ་པུས་མོ་གཡས་པའི་ལྷ་ང་ས་ལ་བཙུགས་ལ་རྡོ་རྗེ་འཛིན་མའི་ཕྱག་རྒྱ་བཅིངས་ནས་ཕྱག་འཚལ་ཏེ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཚིག་གིས་བཛྲ་བིད་བརྗོད་ཅིག །དེས་ནི་
- 24a
དེ་བཞིན་གཤེགས་པ་ཐམས་ཅད་དང་ཕྱག་ན་རྡོ་རྗེ་ལ་ཕྱག་བྱ་བ་དང་བཀུར་སྟི་དང་མཆོད་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་ཡོངས་སུ་རྫོགས་པར་འགྱུར་རོ། །མཆོད་པའི་ཆོ་གའོ། །དེ་ནས་ཕྱག་ན་རྡོ་རྗེ་རིག་པ་བསྒྲུབ་པ་འབྱུང་ སྟེ། དཀྱིལ་འཁོར་མཐོང་བས་རས་ལ་བཅོམ་ལྡན་འདས་དེ་བཞིན་གཤེགས་པ་བྲིས་ལ། དེའི་གཡས་སུ་སྤྱན་རས་གཟིགས་དབང་པོ་གཡོན་དུ་རྡོ་རྗེ་ཁུ་ཚུར་རྒྱན་ཐམས་ཅད་ཀྱིས་བརྒྱན་པར་བྱའོ། །དེ་ནས་གསོ་སྦྱོང་ཅན་དུས་གསུམ་དུ་ཁྲུས་བྱེད་པ། དུས་གསུམ་དུ་ བཀྲུས་པའི་གོས་གྱོན་ལ་སྟོང་ཕྲག་བརྒྱར་བཟླས་སོ། །དེའི་མཇུག་ཏུ་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་བཅིངས་ནས་མཚན་ཐལ་བྱུང་བཟླས་ན། ནང་པར་དུ་དེ་བཞིན་གཤེགས་པ་ཐམས་ཅད་གཤེགས་ཏེ་ཞལ་སྟོན་ཏོ། །མཆོག་ཅི་འདོད་པ་སྩོལ་ཏེ་ སངས་རྒྱས་པའི་བར་དུ་ཡང་སྩོལ་ཏོ། །དེ་ནས་ཡང་ཆོ་ག་གཞན་ཏེ། རས་ལ་བཅོམ་ལྡན་འདས་དེ་བཞིན་གཤེགས་པ་པདྨའི་སྟེང་དུ་བཞུགས་པར་བྱས་ལ། དེའི་སྤྱན་སྔར་ཕྱག་ན་རྡོ་རྗེ་ཐལ་མོ་སྦྱར་ཏེ་ཙོག་ཙོག་པོར་འདུག་ནས་བཅོམ་ལྡན་འདས་ལ་བལྟ་བར་བྱ། བཅོམ་ ལྡན་འདས་ཀྱི་གཡས་ཕྱོགས་སུ་ཕྱག་ན་རྡོ་རྗེ་ཡ་གཅིག་གིས་རྡོ་རྗེ་གསོར་གཡོན་པ་ན་པདྨོའོ། །བཅོམ་ལྡན་འདས་ཀྱི་གཡོན་ཕྱོགས་སུ་རྡོ་རྗེ་ཁུ་ཚུར་ཏེ། ཁུ་ཚུར་གཉིས་ཀྱིས་རྡོ་རྗེ་བསྣམས་པར་བྱས་ལ། དེ་ནས་ཚེས་གཅིག་ནས་བརྩམས་ཏེ་ཟླ་བ་གཅིག་དེ་བཞིན་ བཟླས་ལ། ཟླ་བ་ཚངས་ནས་མཚན་ཐལ་བྱུང་བཟླས་ན། དེ་ལྟར་དེ་བཞིན་གཤེགས་པ་བྱོན་ནས་མཆོག་ཅི་འདོད་པ་སྩོལ་ཏོ། །ཡང་ཆོ་ག་གཞན་ནི་རས་ལ་བཅོམ་ལྡན་འདས་དེ་བཞིན་གཤེགས་པ་བྲིས་ལ། དེའི་སྤྱན་སྔར་ཟླ་བ་དྲུག་དེ་བཞིན་དུ་བཟླས་པའི་མཇུག་ལ་ ཉིན་མཚན་གསུམ་དུ་སྨྱུང་བ་བྱ་སྟེ། ཕྱག་ན་རྡོ་རྗེ་བྱོན་ནས་ཕྱག་ན་རྡོ་རྗེ་འཛིན་པ་ཉིད་བྱིན་གྱི་བར་དུ་བཟླས་སོ། །དེ་བཞིན་གཤེགས་པའི་མཆོད་རྟེན་གྱི་དྲུང་དུ་སྟོང་ཕྲག་བརྒྱ་བཟླས་ན། མཇུག་ཏུ་དེ་བཞིན་གཤེགས་པ་མཐོང་ངོ་། །ནམ་མཁའ་ལ་བལྟས་ཏེ་སྟོང་ཕྲག་
- 24b
བརྒྱ་བཟླས་ན་ནམ་མཁའ་ལ་དེ་བཞིན་གཤེགས་པ་ཐམས་ཅད་མཐོང་ངོ་། །དེས་དེ་ལ་ཕུན་སུམ་ཚོགས་པ་ཐམས་ཅད་ཉིན་གཅིག་བཞིན་སྩོལ་ཏོ། །སངས་རྒྱས་ཀྱི་སྤྱན་སྔར་སྟོང་ཕྲག་བརྒྱ་བཟླས་ན་མཆོག་ཐོབ་བོ། །ཕྱག་ན་རྡོ་རྗེའི་སྤྱན་སྔར་སྟོང་ཕྲག་བརྒྱ་བཟླས་ན་ཕྱག་ ན་རྡོ་རྗེས་འདོད་པ་ཐམས་ཅད་སྩོལ་བར་འགྱུར་རོ། །འཕགས་པ་སྤྱན་རས་གཟིགས་ཀྱི་དབང་པོའི་སྤྱན་སྔར་སྟོང་ཕྲག་བརྒྱ་བཟླས་ན། སྤྱན་རས་གཟིགས་དབང་པོས་ལག་ནས་བཟུང་སྟེ། བདེ་བ་ཅན་གྱི་འཇིག་རྟེན་གྱི་ཁམས་སུ་ཁྲིད་ཅིང་སླར་ཡང་ཁྲིད་དེ་འོང་ངོ་། །འཇིག་ རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་དེ་བཞིན་གཤེགས་པའི་རྟོག་པ་རྫོགས་སོ།། །།དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་བྱང་ཆུབ་སེམས་དཔའ་ཆེན་པོས་ཡང་འདི་སྐད་གསོལ་ཏོ། །བཅོམ་ལྡན་འདས་བདག་གིས་ཀྱང་འཇིག་རྟེན་ གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་འདིར་སྙིང་པོ་གང་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་རྡོ་རྗེའི་རི་ལྟར་མི་གཡོ་བའང་བསྐྱོད་ཅིང་འདྲེན་ན་སེམས་ཅན་གཞན་ལྟ་ཅི་སྨོས། གང་དྲན་པ་ཙམ་གྱིས་ཀྱང་འཇིགས་པ་ཐམས་ཅད་ལས་རྣམ་པར་གྲོལ་བར་ འགྱུར་རོ། །གང་བརྗོད་པ་ཙམ་གྱིས་ཀྱང་མཚམས་མེད་པ་ཐམས་ཅད་ལྷག་མ་མ་ལུས་པར་འབྱང་བར་འགྱུར་བ་དང་། ཐམས་ཅད་ལ་སྲུང་བར་འགྱུར་བ་དང་། ཕྱག་ན་རྡོ་རྗེས་ཀྱང་འདོད་པ་ཐམས་ཅད་སྩོལ་བར་འགྱུར་བ་དང་། མཆོག་སྩོལ་བ་དང་། དོན་ཐམས་ཅད་སྒྲུབ་པ་ དང་། དགོས་པ་ཐམས་ཅད་བྱེད་ཅིང་རྟག་པར་ཕྱི་བཞིན་འབྲང་བར་འགྱུར་བ་དང་། གང་བསླབས་པ་ཙམ་གྱིས་གྲུབ་པ་ཐམས་ཅད་མངོན་པར་འགྱུར་བར་སྩལ་བར་བགྱིའོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་འདི་སྐད་ཅེས་ བཀའ་སྩལ་ཏོ། །ཕྱག་ན་རྡོ་རྗེ་ཁྱོད་ཀྱིས་ལེགས་པར་སྨྲོས་ཤིག །ངས་ཀྱང་བཟུང་ངོ་། །དེ་ནས་ཕྱག་ན་རྡོ་རྗེས་རྡོ་རྗེ་སྙེམས་པ་དང་བཅས་པས་རྡོ་རྗེ་གསོར་ཏེ། རང་གི་སྙིང་གར་བསྟོད་པའི་ཚུལ་གྱིས་བཟུང་ནས་རང་གི་སྙིང་པོ་འདི་གསུངས་སོ། །ཊཀྐི་ཧཱུྃ་ཛ། དེ་ནས་
- 25a
འདི་གསུངས་པ་ཙམ་གྱིས་འཇིག་རྟེན་གྱི་ཁམས་ཐམས་ཅད་རབ་ཏུ་གཡོས་སོ། །དེ་བཞིན་གཤེགས་པ་ཐམས་ཅད་གཡོས། །རབ་ཏུ་གཡོས། འཕར་རབ་ཏུ་འཕར། བྱང་ཆུབ་སེམས་དཔའ་རྣམས་རབ་ཏུ་བསྐྱོད་པར་གྱུར་ཏོ། །ཉན་ཐོས་དང་རང་ སངས་རྒྱས་ཐམས་ཅད་ཀྱང་མ་རུང་བར་གྱུར་ཏོ། །བྱང་ཆུབ་སེམས་དཔའ་སའི་སྙིང་པོར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱིས་བརྟན་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔའི་གྲུབ་པ་ཡང་སྲ་བར་གྱུར་ཏོ། །བདུད་དང་མི་བགྲུངས་ པའི་ཕྱོགས་ཐམས་ཅད་ཀྱང་བརླག་པར་བྱས་སོ། །གདོན་ཐམས་ཅད་བཅོས་བསད་བཅོམ་སྟེ་འདར་པད་པད་ནས། བཅོམ་ལྡན་འདས་ལ་སྐྱབས་སུ་དོང་ནས་བཅོམ་ལྡན་འདས་བདག་ཅག་སྐྱོབས། བདེ་བར་གཤེགས་པ་བདག་ཅག་སྐྱོབས་ཤིག་པ་དང་། བཅོམ་ལྡན་འདས་ ཀྱིས་དེ་དག་ལ་བཀའ་སྩལ་པ། ཕྱག་ན་རྡོ་རྗེ་འདི་ཉིད་ལ་སྐྱབས་སུ་དེང་ཤིག་དང་། འདི་ཉིད་ཁྱེད་ལ་སྐྱོབ་པར་བྱེད་དོ། །ཕྱག་ན་རྡོ་རྗེའི་སྙིང་ག་ནས་ཀུན་ཏུ་འབར་བས་བསྐོར་བ། དེ་བཞིན་གཤེགས་པ་ཐམས་ཅད་ཀྱི་ཕྲེང་བ་ལ་སོགས་པའི་རྒྱན་ཐམས་ཅད་ཀྱིས་བརྒྱན་པ་འཛུམ་ཞིང་ ཁྲོ་བ། ཕྱག་གཉིས་ཀྱིས་མེ་ཏོག་གི་གཞུ་འགེངས་པ། ཕྱག་གཉིས་ཀྱིས་རྡོ་རྗེ་ཧཱུྃ་ཞེས་པ་བཅོམ་ལྡན་འདས་རྡོ་རྗེ་འདོད་པའི་ཁྲོ་བོ་ཕྱུང་ནས། འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཀུན་འདོད་པའི་ཁྲོ་བོས་སྦྱངས་ནས། ཕྱག་ན་རྡོ་རྗེའི་སྤྱན་སྔར་འདུག་སྟེ་བཀའ་ནོད་དོ། ། བཅོམ་ལྡན་འདས་ཀྱིས་བཀའ་སྩལ་པ། ང་ཇི་ལྟ་བ་དེ་བཞིན་དུ་ཁྱོད་ཀྱིས་ཀྱང་སེམས་ཅན་ཐམས་ཅད་ཀྱི་དོན་གྱིས་ཤིག་ཅེས་སོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་འདི་སྐད་གསུངས་སོ། །ལག་ན་རྡོ་རྗེ་དེ་བས་ན་ཁྱོད་སྙིང་པོ་གང་གིས་སེམས་ཅན་འདི་དག་ཐམས་ཅད་ བརྒྱལ་བ་དང་། བཅོས་པ་དང་། བཅོམ་པ་ཀུན་འཚོ་བར་འགྱུར་བ་དང་། གཞན་དག་ཀྱང་རྡོ་རྗེའི་ལུས་ཐོབ་པར་འགྱུར་བ་དེ་སྨྲོས་ཤིག །ཨོྃ་ཊུྃ། རྡོ་རྗེ་གོ་ཆའི་ཕྱག་རྒྱ་འདིས་བདག་ཉིད་གོ་བགོས་ན། རྡོ་རྗེའི་ལུས་དང་། རྡོ་རྗེའི་ཚེ་ཐོབ་ཅིང་སྲུང་བར་ཡང་འགྱུར་ཏེ།
- 25b
ནམ་འཚོའི་བར་དུ་ཐམས་ཅད་ཀྱིས་མི་ཚུགས་པར་འགྱུར་རོ། །དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔས་རྡོ་རྗེ་འཁོར་ལོའི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་གཞན་ཡང་རབ་བཤད་པ། །རྡོ་རྗེ་འཁོར་ལོའི་དཀྱིལ་འཁོར་ཆེ། །གྲུ་བཞི་པ་སྟེ་སྒོ་བཞི་པའོ། །རྟ་ བབས་བཞི་དང་བཅས་པ་སྟེ། བཅུ་དྲུག་ཆ་དང་ལྡན་པར་རོ། །རྡོ་རྗེའི་ར་བས་མཛེས་པ་སྟེ། །གྲྭ་དང་སྒོ་ཡི་ཟུར་དག་དང་། །དེ་བཞིན་རྟ་བབས་མཚམས་རྣམས་སུ། །རྡོ་རྗེ་རིན་ཆེན་ལྡན་པར་བྱ། །བ་དན་ཕྲེང་བ་དྲིལ་བུས་བརྒྱན། །དང་པོར་ཕྱི་ཡི་དཀྱིལ་འཁོར་འདི། ། སྙིང་པོ་བཟླས་ཤིང་བྲི་བར་བྱ། །དེ་ཡི་ནང་གི་འཁོར་ལོ་ཡང་། །རྡོ་རྗེ་སྲད་བུ་མཉམ་ལྡན་པའོ། །རྡོ་རྗེའི་ཀ་བ་བརྒྱད་ལྡན་ཞིང་། །རྡོ་རྗེའི་ཀ་བ་བདུན་གནས་སུ། །དཀྱིལ་འཁོར་བརྒྱད་ཀྱི་ཚུལ་དུ་སྟེ། །འོད་ཀྱི་དཀྱིལ་འཁོར་བཞག་པའོ། །དེ་ཡི་དབུས་སུ་སེམས་དཔའ་ ཆེ། །ཕྱག་ན་རྡོ་རྗེ་གཞུག་པར་བྱ། །སངས་རྒྱས་རིན་ཆེན་ཐམས་ཅད་དག །དབུ་རྒྱན་དུ་ནི་བརྒྱན་ཐོགས་པ། །ཅུང་ཟད་ཙམ་དུ་བཞད་པའི་ཞལ། །རྡོ་རྗེ་སྙེམས་པར་མཛད་པ་སྟེ། །མེ་ཏོག་མདའ་གཞུ་འཆང་བ་པོ། །དེ་ལས་གཞན་པ་ཕྱག་བཞི་པ། །རྡོ་རྗེ་སེམས་ དཔའི་ཐུགས་ཉིད་དེ། །ཁྲོ་གཉེར་བཞད་པའི་ཞལ་ངོ་ཅན། །གཉིས་ཀྱིས་མེ་ཏོག་གཞུ་འགེངས་ཤིང་། །གཉིས་ཀྱིས་རྡོ་རྗེ་ཧཱུྃ་མཛད་པའོ། །རྡོ་རྗེ་ཅན་གྱི་གཡས་ཕྱོགས་སུ། །རྡོ་རྗེ་དགའ་བ་བྲི་བར་བྱ། །སྙིང་གར་རྡོ་རྗེ་བརྟན་འཛིན་ཅིང་། །འཁྱུད་པ་ལྟ་བུའི་སྦྱོར་བས་ སོ། །ཕྱག་ན་རྡོ་རྗེའི་རྒྱབ་ཏུ་ནི། །ཆུ་སྲིན་རྒྱལ་མཚན་འཆང་བ་སྟེ། །སེམས་དཔའ་རྡོ་རྗེ་དཔལ་ཅན་ཏེ། །རིན་ཆེན་ཆར་པ་རབ་ཏུ་འབེབས། །རྡོ་རྗེ་ཅན་གྱིས་གཡོན་བྲིས་པ། །རྡོ་རྗེ་སྙེམས་པ་དམར་པོ་སྟེ། །གཉིས་ཀྱིས་རྡོ་རྗེ་སྙེམས་པ་འཛིན། །སྒེག་པས་མཆོད་ ཅིང་འདུད་པའོ། །དཀྱིལ་འཁོར་གྲྭ་ཡི་གནས་རྣམས་སུ། །མཆོད་པའི་ལྷ་མོ་བྲི་བར་བྱ། །དཔྱིད་ཀྱི་རྡོ་རྗེ་རྡོ་རྗེའི་སྤྲིན། །སྟོན་ཀའི་རྡོ་རྗེ་ཁ་བ་མོ། །ཕྱི་ཡི་དཀྱིལ་འཁོར་གྲྭ་དག་ཏུ། །འདོད་པའི་གཟུགས་ལ་སོགས་པ་བྲི། །སྒོ་ཡི་དཔུང་རྣམས་ཐམས་ཅད་དུ། །རྡོ་རྗེ་
- 26a
འདོད་པའི་ཀྱོ་བ་སོགས། །དེ་ནས་དཀྱིལ་འཁོར་ཆེན་པོ་དེར། །རྡོ་རྗེ་སློབ་དཔོན་ཉིད་རྡོ་རྗེ་སྙིང་པོའི་ཕྱག་རྒྱ་བཅིངས་ལ་ཞུགས་ལ་འདི་སྐད་དུ་སྨྲོས་ཤིག །སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་ལ་བདེ་བ་སྩོལ། །སེམས་ཅན་ཀུན་གྱི་ཕར་ གྱུར་པའི། །རྡོ་རྗེ་སེམས་དཔའ་བདག་དེང་འགྲུབ། །ཊཀྐི་ཧཱུྃ་ཛཿ། དེ་ནས་དེ་སྐད་སྨྲས་པ་དང་འབབ་པར་འགྱུར་ཏེ། དེ་ལྟར་བབས་པ་ཙམ་གྱིས་ཕྱག་ན་རྡོ་རྗེའི་གཟུགས་མཐོང་ངོ་། །བཅོམ་ལྡན་འདས་མཐོང་བར་བསྟན་པས་གྲུབ་པ་ཐམས་ཅད་ཀྱང་སྩོལ་ཏེ། ལ་ལ་ནི་རྡོ་རྗེ་འཛིན་ ལ་ལ་ནི་འཚང་རྒྱ་བར་འགྱུར་རོ། །དེ་ནས་སློབ་མ་གཞུག་སྟེ། སྙིང་པོའི་ཕྱག་རྒྱ་བཅིངས་ལ། དེས་ཕྲེང་བ་བཟུང་ནས་གོས་དམར་པོས་ཡན་ལག་བཅིངས་ལ། རས་དམར་པོས་མིག་གཉིས་བཀབ་སྟེ་བཅུག་ནས་འདི་སྐད་ཅེས་སྨྲོས་ཤིག །ཁྱོད་ཀྱིས་དཀྱིལ་འཁོར་མ་མཐོང་ པའི་མི་མཁས་པ་སུ་ལ་ཡང་གསང་བ་འདི་དག་མི་བསྙད་པར་བྱོས་ཤིག །འབྱུང་པོའི་གདོན་དང་ཕྲ་མེན་མ་ལ་སོགས་པའི་གདོན་གྱིས་བསད་པར་གྱུར་ཏ་རེ། ཤི་ནས་ཀྱང་དམྱལ་བར་ལྟུང་བར་འགྱུར་རོ་ཞེས་བསྒོ་ནས་གདོང་ཁོལ་ཅིག །དེ་ནས་འདི་སྐད་ཅེས་སྨྲོས་ཤིག །གང་ དབུས་ན་བ་འདི་ནི་བཅོམ་ལྡན་འདས་ཕྱག་ན་རྡོ་རྗེ་སྟེ། འདི་ནི་དང་པོའི་སེམས་དཔའ་འདོད་པའི་བདག་པོ་འདོད་པའི་དབང་པོ་ཀུན་ཏུ་བཟང་པོ་རྡོ་རྗེ་སེམས་དཔའོ། །གང་མདུན་ན་བ་འདི་ནི་བཅོམ་ལྡན་འདས་འདིའི་ཐུགས་ཡིན་ཏེ། འདོད་པའི་ཁྲོ་བོའོ། །གང་གཡས་ན་བ་འདི་ནི་སེམས་ ཅན་ཐམས་ཅད་ཀྱི་རེག་པའི་བདེ་བ་སྟེ། རྡོ་རྗེ་དགའ་བ་ཞེས་བྱ་བའི་བྱང་ཆུབ་སེམས་དཔའོ། །གང་རྒྱབ་ན་བ་འདི་ནི་བཅོམ་ལྡན་འདས་བདག་ཉིད་ཆེ་བའི་རྒྱལ་མཚན་ཏེ། སེམས་དཔའ་ཐམས་ཅད་ཀྱི་བྱམས་པ་སློང་བ་དང་ནོར་སྦྱིན་པའོ། །གང་གཡོན་ཕྱོགས་ན་བ་འདི་ནི་བདག་ ཉིད་ཆེ་བའི་བདུད་དེ། སེམས་ཅན་ཐམས་ཅད་ཆགས་པར་བྱེད་པའོ། །གང་གྲྭའི་བཞི་པོ་འདི་རྣམས་ནི་དུས་ཀྱི་མཆོད་པ། མེ་ཏོག་དང་། བདུག་པ་དང་། མར་མེ་དང་དྲིའི་ལྷའོ། །གང་ཕྱིའི་གྲྭའི་གནས་ན་བ་དེ་དག་ནི་གཟུགས་ལ་སོགས་པ་འདོད་པའི་ཡོན་ཏན་ནོ། །གང་
- 26b
སྒོ་སྲུང་དེ་དག་ནི་མིག་དང་། འདོད་ཆགས་པ་དང་མཛའ་བ་སྟེ། ཀྱོ་བ་ཏང་བ་དང་། ཞགས་པ་དང་། སྒྲོག་དང་། འབེབས་པ་དག་ནི་རྒོལ་བར་མི་འགྱུར་རོ། །ཁྱོད་ཀྱིས་ཀྱང་བཅོམ་ལྡན་འདས་འདོད་པ་ཐམས་ཅད་ཀྱི་བདག་པོ་ལ་སྨོད་པར་མ་བྱེད་ཅིག །གང་སངས་རྒྱས་ཀྱི་ བསྟན་པ་ལ་སེམས་ཅན་ཐམས་ཅད་རྣམ་པར་དག་པར་བྱ་བའི་ཕྱིར་འདོད་ཆགས་དང་བྲལ་བ་འཆད་དེ། དེ་ཅིའི་ཕྱིར་ཞེ་ན། མུ་སྟེགས་ཅན་གྱི་རྣམས་འདོད་ཆགས་བྲལ་བའི་ཆོས་དེས་ཐར་པའོ། །དེ་བཞིན་གཤེགས་པ་རྣམས་ཆགས་པ་རྣམས་ནི། སེམས་ཅན་ཐམས་ཅད་ ལ་ཆགས་པས་ན་ཐར་པ་ནི་འདི་ལྟ་སྟེ། བྱང་ཆུབ་སེམས་དཔའ་རྣམས་བདག་གི་ཆུང་མས་ཀྱང་སེམས་ཅན་སྡུད་པར་བྱེད་དེ། འདོད་ཆགས་ནི་བྱང་ཆུབ་ཏུ་བསྟན་པའོ་ཞེས་སོ། །དེ་ནས་སྙིང་པོ་བྱིན་ཅིག །ཊཀྐི་ཧཱུྃ་ཛཿ། འདི་བསྒྲུབས་ན་བཅོམ་ལྡན་འདས་སེམས་དཔའི་ མཆོག་འགྲུབ་པར་འགྱུར་རོ། །བཅོམ་ལྡན་འདས་གྲུབ་པས་ན་འདོད་པའི་ཁྲོ་བོ་གྲུབ་པར་འགྱུར་རོ། །དེ་ཅིའི་ཕྱིར་ཞེ་ན། སྙིང་པོ་འདི་བདག་ཉིད་ཆེ་བ་སྟེ། ཊཀྐི་ཞེས་བྱ་བ་ནི་འདོད་པའོ། །ཧཱུྃ་ཞེས་པ་ནི་ཁྲོ་བོའོ། །དེ་གཉིས་དགུག་པའི་ཕྱིར་ཛཿཞེས་བྱ་བ་ནི་འདི་ཁྱོད་ཀྱིས་ བསྒྲུབ་པར་བྱའོ། །དེ་ནས་ཕྱག་རྒྱ་ཆེན་པོ་ཤེས་པར་སློབས་ཤིག །དེ་ནས་དམ་ཚིག་གི་ཕྱག་རྒྱ་བཅོམ་ལྡན་འདས་ཀྱི་རྡོ་རྗེའི་ཐུགས་བསླབས་ནས་ལག་པ་གཉིས་སུ་རྡོ་རྗེ་སྦྱིན་པའི་སྙིང་པོ་ནི་འདིའོ། །ཨོྃ་བཛྲ་དྷ་ར་བཛྲ་པྲ་ཏཾ་དྷཱ་ར་ཡ་སིང་དྷྱ་ཊཀྐི་ཧཱུྃ་ཛཿ། དེ་ནས་ཕྲེང་བ་ཕྱག་ན་རྡོ་རྗེ་ལ་ ཕུལ་བས་དེའི་མགོ་ལ་བསྐོན་ནོ། །དེ་ནས་རྡོ་རྗེ་མིང་གི་དབང་སྦྱིན་པ་སྙིང་པོ་འདིས་སོ། །ཨོྃ་བཛྲ་ཨ་བྷི་ཥིཉྩ་སརྦ་ཀཱ་མེ་ཤྭ་རེད་ཏྭེ་ཨི་དམ་བཛྲ་ནཱ་མ་ནཱ་མཱ་དྷི་ཥྛི་ཏེ་དྲི་ཌྷོ་སྱ་བྷ་བ་ཨོྃ་ཊཀྐི་ཧཱུྃ་ཛཿ། དེ་ནས་དེར་འདུག་སྟེ་ཕྱག་རྒྱ་ཆེན་པོ་བཅིངས་ནས་རྡོ་རྗེ་ཚིག་གིས་བརྒྱད་སྟོང་བཟླས་ན་དེ་ནས་ས་གཡོ་ སྟེ། གྲུབ་པ་ཐམས་ཅད་ལན་ཅིག་བཟླས་པས་འགྲུབ་བོ། །དེ་ནས་དམ་ཚིག་གི་ཕྱག་རྒྱ་བཅིངས་ལ་བརྒྱ་བཟླས་ན་དེའི་ཐུགས་དབང་དུ་འགྱུར་རོ། །དེ་ཕྱིན་ཅད་སེམས་ཅན་ཐམས་ཅད་ཀྱི་སྙིང་ཤེས་པ་དང་། སེམས་ཅན་ཐམས་ཅད་ཀྱི་སྙིང་ལ་དབང་བྱེད་དོ། །ཐམས་ཅད་ཀྱི་སྙིང་དུ་སྡུག་
- 27a
པར་འགྱུར་རོ། །ཐམས་ཅད་ཀྱི་བརྟན་པར་ཆགས་སོ། །སྙིང་ཐམས་ཅད་ལས་ཚིག་ཐོས་པར་འགྱུར་རོ། །གྱུར་པ་དང་འགྱུར་བ་དང་། ད་ལྟར་གྱི་ཚིག་བདེན་པར་འགྱུར་རོ། །བདག་གི་སྙིང་ལས་ཀྱང་ཆོ་འཕྲུལ་རྣམ་པ་བཞི་མཐོང་ཞིང་གཞན་ལ་ཡང་སྟོན་ཏོ། ། དེའི་སྙིང་ལས་རྡོ་རྗེ་འབྱུང་བར་འགྱུར་རོ། །དེས་ན་སེམས་ཅན་ཐམས་ཅད་ཀྱིས་མི་སོད་པ་དང་། མི་ཚུགས་པ་དང་། མི་གཅོད་པ་དང་། མི་ཕྱེད་པའི་རྡོ་རྗེའི་ལུས་སུ་འགྱུར་རོ་ཞེས་བཅོམ་ལྡན་འདས་ཕྱག་ན་རྡོ་རྗེས་གསུངས་སོ། །དེ་ནས་གསང་བའི་མཆོད་པ་བྱ་སྟེ། རྡོ་རྗེའི་ཐུགས་ བསྟོད་པའི་གླུས་བསྟོད་དོ། །དེ་ཕྱིན་ཅད་གྲུབ་པ་ཐམས་ཅད་རྫོགས་པར་འགྱུར་ཏེ། འདོད་པ་ཐམས་ཅད་དང་གསང་བའི་མཆོད་པ་ཐམས་ཅད་མྱུར་དུ་འགྲུབ་པར་འགྱུར་རོ། །དེ་ནས་མཆོད་པ་ཐམས་ཅད་ཀྱིས་འདྲ་བར་མཆོད་ནས། ཇི་སྙེད་པའི་ཟས་དང་རོ་དང་སྤྱད་པ་ཐམས་ཅད་ཀྱིས་ ཚིམ་པར་བྱས་ནས་འབྱུང་ངོ་། །རྡོ་རྗེ་འཁོར་ལོ་ཆེན་པོའི་ཆོ་ག་རྒྱས་པའོ།། །།དེ་ནས་རྡོ་རྗེའི་དཀྱིལ་འཁོར་དུ་རྡོ་རྗེ་འདོད་པ་ཁྲོ་བོ་ལ་སོགས་པའི་ཕྱག་རྒྱ་ཇི་ལྟ་བ་བཞིན་བྲིས་ཏེ་ཞུགས་ནས་མཆོད་པའི་ལྷ་རྣམས་ཀྱིས་གར་གྱི་མཆོད་པས་སྙིམ་པ་མ་སྟོངས་པར་བྱས་ཏེ། རྡོ་རྗེ་ སེམས་དཔའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ཀྱི་སྤྱན་སྔར་རྡོ་རྗེའི་གླུའི་རྡོ་རྗེའི་བཟླས་པས་འབུམ་བཟླས་སོ། །དེ་ནས་རྡོ་རྗེ་དེ་ལྕི་བར་འགྱུར་རོ། །དེ་ནས་སླར་ཡང་བར་འགྱུར་རོ། །དེ་ནས་དེ་ལྟར་མཚན་གཅིག་ཐལ་བྱུང་དུ་བཟླས་ན་ནང་པར་རྡོ་རྗེ་འཛིན་ཏམ། རྡོ་རྗེ་ ཁྲོ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་བདག་པོ་ལྷའི་གཟུགས་དང་། མདོག་དང་རྒྱན་དང་སྤྱན་གསུམ་པ་ལ་ཕྱག་བཞི་པ་རྡོ་རྗེ་འདོད་པའི་མདངས་དང་འདྲ་བར་འགྱུར་ཏེ། རྡོ་རྗེ་འཛིན་གྱི་ཚེར་འགྱུར་རོ། །རྡོ་རྗེ་དཀྱིལ་འཁོར་གྱི་ཆོ་ག་རྒྱས་པའོ། ། དེ་ནས་དམ་ཚིག་གི་དཀྱིལ་འཁོར་ཏེ། དཀྱིལ་འཁོར་ཆེན་པོའི་སྲད་བུས་ཐིག་བཏབ་སྟེ། དེ་ནས་ལྷ་མོ་རྣམས་བྲིས་ལ་དེའི་དབུས་སུ་བཅོམ་ལྡན་འདས་ཇི་ལྟ་བ་བཞིན་དུ་བཞག་ནས་འདི་སྐད་སྨྲོས་ཤིག །ཧོ་བཛྲ་ས་ཏྭ་སུ་ར་ཏ་སྟྭྃ། དེའི་སྤྱན་སྔར་རྡོ་རྗེ་གཞུ་འགེངས་པའི་གཞུ་བྲིས་ཏེ།
- 27b
དེའི་ཕྱག་རྒྱ་ནི་འདིའོ། །བཛྲ་ཨཤྟྲོ་ཧཱུྃ། གཡས་སུ་རྡོ་རྗེ་དགའ་མགུ་འཁྱུད་པར་བྱའོ། །དེའི་ཕྱག་རྒྱ་ནི་འདིའོ། །བཛྲ་ཀི་ལི་ཧཱུྃ། རྒྱབ་ཏུ་ཆུ་སྲིན་རྒྱལ་མཚན་འཆང་བ་བྱམས་མའི་རྡོ་རྗེ་བྲི་དེའི་ཕྱག་རྒྱ་ནི་འདིའོ། །བཛྲ་ཨ་གྲི་ཧོ། གཡོན་དུ་རྡོ་རྗེ་སྙེམས་མ་བྲིས་ཏེ། རྡོ་རྗེ་གཡོན་དུ་སྦྱོར་བར་བྱ། དེའི་ཕྱག་རྒྱ་ནི་འདིའོ། །བཛྲ་གརྦེ་ཧ་ནི། དེ་ནས་གྲྭ་དང་སྒོར་ཡང་རང་གི་ལྷ་མོ་བྲི། དེ་ནས་རྡོ་རྗེ་སློབ་དཔོན་ཉིད་ཤིན་ཏུ་ཆས་ལ་རྡོ་རྗེ་ལག་ཏུ་ཐོགས་བུད་མེད་ཀྱང་བརྒྱན་ཏེ། ལག་པ་གཉིས་རྡོ་རྗེ་ཁུ་ཚུར་བཅངས་ལ། དཔུང་པ་གཉིས་ཀྱིས་འཁྱུད་ དེ་ཞུགས་ལ་འདི་སྐད་བརྗོད་དོ། །ས་མ་ཡ་སྟྭྃ་ཨ་ཧཾ། སུ་ར་ཏ་ཧོ་ཊཀྐི་ཧཱུྃ་ཛཿ། དེ་ནས་བརྗོད་པ་ཙམ་གྱིས་བཅོམ་ལྡན་འདས་སྟོན་པར་མཛད་དེ། ཕྱག་རྒྱ་ཐམས་ཅད་འགྲུབ་པ་དང་དམ་ཚིག་ཐམས་ཅད་འགྲུབ་པ་ཡང་སྩོལ་ཏོ། །དེ་ནས་སློབ་མ་ཡང་དེ་བཞིན་དུ་སྙིང་པོའི་རྡོ་རྗེ་ དེ་ཉིད་ཀྱིས་བཙུད་ནས་འདི་ཞེས་སྨྲོས་ཤིག །ཁྱོད་ཀྱིས་དམ་ཚིག་འདི་ལས་མ་འདའ་ཤིག །མི་བདེ་བ་མ་སྤངས་པར་མྱུར་དུ་ཤི་ཞིང་ངུ་འབོད་ཆེན་པོར་སྐྱེ་བར་འགྱུར་ཏ་རེ། དེ་ནས་དམ་ཚིག་བརྗོད་དེ། བདག་ཆེ་ཀུན་གྱི་ཕྱག་རྒྱ་ནི། །འདོད་པ་བསམ་ལས་ཡང་དག་འབྱུང་། ། དེ་བས་ཁྱོད་ཀྱིས་སྡིག་མེད་པའི། །འདོད་དང་བསམ་པ་མ་བཏང་ཤིག །འདི་ནི་དམ་ཚིག་བསྲུང་བའི་སྔགས་སོ། །ཨོྃ་ཊཀྐི་ཧཱུྃ་ཕཊ། འདིས་རྡོ་རྗེའི་ཆུ་བླུད་དོ། །གང་དངོས་པོ་གཞན་ཐམས་ཅད་ཀྱི་ཕྱིར་ཡང་མནས་བསྒག་སྟེ། དེ་དག་ལ་ཡང་རྡོ་རྗེའི་ཕྱག་རྒྱ་འཛིན་པས་ བླུད་དོ། །གང་གིས་འདི་ལས་འདས་ན། ཟླ་བ་ཕྱེད་ཀྱིས་སྙིང་འགས་སོ་ཞེས་བཅོམ་ལྡན་འདས་ཕྱག་ན་རྡོ་རྗེ་དམ་ཚིག་ཆེན་པོས་གསུངས་སོ། །དེ་ནས་ཕྱག་རྒྱ་བཅིངས་པ་བསླབ་བོ། །དེ་ནས་དེ་བཞིན་དུ་འབྱུང་ངོ་། །ཤིན་ཏུ་དགའ་བའི་རྡོ་རྗེ་ཞེས་བྱ་བ་གསང་བའི་དཀྱིལ་ འཁོར་རོ། །དེ་ནས་ལས་ཀྱི་དཀྱིལ་འཁོར་དེ་བཞིན་དུ་བྲིས་ནས་ཉིད་ཀྱི་སྐུའམ་མཚན་མ་གཞག་གོ། །དེར་བཙུད་ནས་ལས་རྣམ་བཞི་བསླབ་པར་བྱའོ། །དེ་ལ་དང་པོ་ཉིད་དུ་འདོད་པ་ཐམས་ཅད་སྩོལ་བར་གྱུར་ཏེ། ཕྱག་ན་རྡོ་རྗེའི་ཕྱག་རྒྱ་ཆེན་པོ་བཅིངས་ནས་རྡོ་རྗེ་འཛིན་ཕྱག་བཞི་
- 28a
པ། དེ་བཞིན་གཤེགས་པ་ཐམས་ཅད་ཀྱི་ཕྲེང་བ་ལ་སོགས་པའི་རྒྱན་གྱིས་བརྒྱན་པའི་སྐུར་བདག་ཉིད་མཐོང་བ་དེ་སྲིད་ཀྱི་བར་དུ་བཟླས་སོ། །དེ་ཕྱིན་ཅད་འདོད་པ་ཐམས་ཅད་ནུས་པར་འགྱུར་རོ། །དེ་ནས་ཁྲོ་བོའི་ལས་བསླབ་སྟེ། རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་ བཅིངས་ལ་བཟླས་ན། དེ་བཞིན་གཤེགས་པ་ཐམས་ཅད་ཐང་ཅིག་བཟླས་ཏེ། ཧཱུྃ་ཞེས་པས་བསྡིགས་ན་དེ་བཞིན་གཤེགས་པ་ཡང་འགྱེལ་བར་འགྱུར་རོ། །དེ་ཕྱིན་ཅད་འགྲོ་བ་གནས་པ་ཐམས་ཅད་ཀྱང་འགྱེལ་ནུས་པར་འགྱུར་རོ། །དེ་ནས་ཕྱག་ན་རྡོ་རྗེའི་ལས་འབྱུང་སྟེ། སེམས་ཅན་ཐམས་ཅད་འདོད་པ་དང་ཁྲོ་བོ་གཉིས་ཀྱིས་འདུལ་བར་འདོད་ན། རྡོ་རྗེ་འཛིན་མའི་ཕྱག་རྒྱས་མེ་ཏོག་ལ་སོགས་པས་མཆོད་པ་བྱས་ཏེ། རྡོ་རྗེ་ཐུགས་ཀྱི་ཕྱག་རྒྱ་བདག་གི་སྙིང་གར་བཅིངས་ལ་ཕྱག་ན་རྡོ་རྗེའི་སྤྱན་སྔར་རྡོ་རྗེ་འཛིན་ཐོབ་པ་དེ་སྲིད་དུ་བཟླས་སོ། །དེ་བཞིན་ གཤེགས་པ་ཐམས་ཅད་ཀྱི་ལས་བྱེད་པར་འདོད་པས་ཕྱག་ན་རྡོ་རྗེའི་སྤྱན་སྔར་བྱང་ཆུབ་ཏུ་སེམས་བསྐྱེད་ལ་སྦྱིན་པ་སྦྱིན། ཚུལ་ཁྲིམས་བསྲུང་། བཟོད་པ་བསྒོམ། བརྩོན་འགྲུས་བརྩམ། བསམ་གཏན་ལ་སྙོམས་པར་འཇུག །ཤེས་རབ་ཡོངས་སུ་རྫོགས་པར་བྱ་སྟེ། ཅི་འདོད་ཅི་ ནུས་ཀྱིས་བྱ་ཞིང་རྟག་ཏུ་བཟླས་པ་ནི། ཕྱག་ན་རྡོ་རྗེའི་སྐུའམ། དེ་བཞིན་གཤེགས་པའི་སྐུར་མཐོང་གི་བར་དུ་བྱའོ། །དེ་ནས་ས་བཅུ་པོ་འཐོབ་སྟེ། དེ་བཞིན་གཤེགས་པའི་ལས་བྱེད་པའི་བྱང་ཆུབ་སེམས་དཔར་འགྱུར་རོ། །ལས་ཀྱི་དཀྱིལ་འཁོར་གྱི་ཆོ་གའོ།། །། དེ་ནས་སྒྲུབ་པ་འབྱུང་སྟེ། དཀྱིལ་འཁོར་དུ་ནི་མ་ཞུགས་པ། །དམ་ཚིག་ཤེས་པ་མ་ཡིན་དང་། །སློབ་མ་མ་ཡིན་གཞན་རྣམས་ལ། །མི་ཟད་སྙིང་པོ་འདི་མི་སྦྱིན། །དཀྱིལ་འཁོར་མཐོང་བས་སྒྲུབ་པ་ནི་ཕྱག་ན་རྡོ་རྗེའི་སྤྱན་སྔར་སྟོང་ཕྲག་བརྒྱ་བཟླས་ན་སྔར་བསྙེན་པ་བྱས་པར་འགྱུར་རོ། ། དེ་ནས་རས་ལ་བྲིས་ཏེ། རས་ཀྱི་དབུས་སུ་ནི་བཅོམ་ལྡན་འདས་དེ་བཞིན་གཤེགས་པ་བྲི། དེའི་གཡས་སུ་ཕྱག་ན་རྡོ་རྗེ་ཕྱག་བཞི་པའི་ཐུགས་ཀ་ནས་ཐུགས་འབྱུང་བ་དེ་བཞིན་དུ་བྲི། གཡོན་དུ་སྤྱན་རས་གཟིགས་ཀྱི་དབང་པོ་ཕྱག་བཞི་པ་སྟེ། གཉིས་ན་ནི་པདྨོའི་ཏིང་ངེ་འཛིན་འཆང་།
- 28b
གཉིས་ཀྱིས་ནི་མེ་ཏོག་གི་གཞུ་འགེངས་པ། ཁ་དོག་དམར་པོ་བྲི། སྤྱན་སྔར་དེ་བཞིན་དུ་རྡོ་རྗེ་འདོད་པའི་ཁྲོ་བོ་བྲིའོ། །སྟེང་དུ་ནམ་མཁའི་སྙིང་པོ་བྲི། གྲྭར་མཆོད་པའི་ལྷ་རང་གི་མཆོད་པས་བཀྲམ་པ་དང་མགོ་བོར་རོ། །དེ་ནས་རས་ལ་བྲིས་པའི་སྤྱན་སྔར་ཟླ་བ་བཞིན་དུས་བཞིར་སྟོང་ བཟླས་ཤིང་བསྒྲུབས་ན་དེ་ནས་ཟླ་བ་ཚང་བ་དང་དེ་བཞིན་གཤེགས་པའང་སྩོལ་བར་འགྱུར་རོ། །རས་ལ་བཅོམ་ལྡན་འདས་དཀྱིལ་འཁོར་གྱི་ཚུལ་དུ་བྲིས་ལ་སེམས་དཔའ་ཆེན་པོ་དང་། ལྷ་མོ་ཡང་དེ་བཞིན་དུ་བྱའོ། །དེའི་སྤྱན་སྔར་ཟླ་བ་གཅིག་ཏུ་གྲངས་མེད་པར་བཟླས་ཤིང་འདོད་པ་ ཐམས་ཅད་ཟོས་ལ་བསྒྲུབས་ཏེ། དེ་ནས་ཟླ་བ་གཅིག་ལོན་པ་དང་ཕྱག་ན་རྡོ་རྗེའི་ཕྱག་རྒྱ་ཆེན་པོ་བཅིངས་ལ་མཚན་ཐལ་བྱུང་བཟླས་ན་ནང་པར་རྡོ་རྗེ་འཛིན་འཐོབ་བོ། །རས་ལ་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་དུ་བྲིས་ལ། དེའི་སྤྱན་སྔར་ཟླ་བ་ཕྱེད་ཀྱི་བར་དུ་རྟག་པར་བཟླས་པ་ནི་ མི་ཉལ་མི་མནལ་བར་བཟླས་ཏེ། དེ་ནས་ཟླ་བ་ཕྱེད་ལོན་པ་དང་མཚན་མོ་ཡང་ཐལ་བྱུང་དུ་བཟླས་ན་ནང་པར་ཕྱག་ན་རྡོ་རྗེ་དང་མཚུངས་པ་དང་། འདོད་པའི་ལོངས་སྤྱོད་ཆེན་པོ་དང་། བདེ་བ་དང་། ཡིད་བདེ་བ་ཐམས་ཅད་ཀྱང་འཐོབ་ཅིང་ཐམས་ཅད་དུ་འགྲོ་བར་འགྱུར་རོ། །རས་ལ་ བཅོམ་ལྡན་འདས་ཁྲོ་བོ་དེ་བཞིན་དུ་བྲིས་ལ། དེའི་སྤྱན་སྔར་རྡོ་རྗེ་ཤུགས་ཀྱི་ཕྱག་རྒྱ་བཅིངས་ཏེ། སྟོང་ཕྲག་བརྒྱ་བཟླས་ན་དེས་འགྲུབ་པར་འགྱུར་ཏེ། བསྒོ་བ་བཞིན་ལས་ཐམས་ཅད་བྱེད་དོ། །སངས་རྒྱས་ཀྱི་ཞིང་ཐམས་ཅད་དུའང་ཁྱེར་ཞིང་སླར་ཡང་ཁྱེར་ཏེ་འོང་ངོ་། །སངས་ རྒྱས་ཀྱི་ཞིང་ཐམས་ཅད་ཀྱི་འདོད་པའི་བདེ་བ་ཐམས་ཅད་ཁྱེར་ཏེ་འོངས་ནས་དེ་ལ་སྦྱིན་ནོ། །དེས་ཀྱང་ལོངས་སྤྱོད་པར་ནུས་ན། ལྷའི་བུ་མོ་ཐམས་ཅད་ལྟ་ཅི་སྨོས་བརྒྱ་བྱིན་ཡང་སྩོལ་ཏོ། །ཕྱག་ན་རྡོ་རྗེ་འཛིན་པ་ནས་སངས་རྒྱས་ཀྱི་བར་དུ་བསྒོ་བས་སྩོལ་བར་འགྱུར་རོ། སངས་རྒྱས་ ཀྱི་སྤྱན་སྔར་འབུམ་བཟླས་ན་དེ་བཞིན་གཤེགས་པ་ཐམས་ཅད་བཀུག་སྟེ་དབང་དུ་བྱེད་དོ། །ཕྱག་ན་རྡོ་རྗེའི་སྤྱན་སྔར་རྡོ་རྗེ་ཐུགས་ཀྱི་ཕྱག་རྒྱ་བཅིངས་ནས་སྟོང་ཕྲག་བརྒྱ་བཟླས་ན། དེ་ནས་ཕྱག་ན་རྡོ་རྗེ་ཉིད་ཀྱིས་དཔལ་གྱི་ལྷ་མོ་ཁྲིད་དེ་བྱོན་ནས་སྒྲུབ་པ་པོའི་མདུན་དུ་འདོར་རོ། །དེ་ནས་
- 29a
སྒྲུབ་པ་པོས་བཅོམ་ལྡན་འདས་ཁྱོད་ཉིད་བདག་གིས་གྲུབ་པར་འཚལ་གྱི། འདི་ཅི་འཚལ་ཞེས་སྨྲོས་ཤིག །དེ་ནས་བཅོམ་ལྡན་འདས་དགྱེས་ཏེ་ཅི་འདོད་པའི་མཆོག་སྩོལ་བར་འགྱུར་རོ། །གྲུབ་པ་ཐམས་ཅད་ཀྱང་འགྲུབ་བོ། །སྤྱན་རས་གཟིགས་དབང་ པོའི་སྤྱན་སྔར་འབུམ་བཟླས་ན་སྤྱན་རས་གཟིགས་དབང་པོས་མཆོག་སྩོལ་བར་འགྱུར་རོ། །ནམ་མཁའི་སྙིང་པོའི་སྤྱན་སྔར་འབུམ་བཟླས་ན་དབང་སྩོལ་བར་འགྱུར་ཏེ། བསམ་པ་ཐམས་ཅད་ཡོངས་སུ་རྫོགས་པར་མཛད་དོ། །རྡོ་རྗེ་བཞག་སྟེ་དེའི་མདུན་དུ་འབུམ་བཟླས་ན་དེ་ནས་ ལས་ཐམས་ཅད་ཡིད་བཞིན་དུ་གྲུབ་པར་བྱེད་དོ། །ཕྱག་རྒྱ་ཆེན་པོ་བཅིངས་ནས་འབུམ་བཟླས་ན་ཕྱག་ན་རྡོ་རྗེ་འཛིན་གྱིས་མཆོག་སྩོལ་ཏོ། །དམ་ཚིག་གི་ཕྱག་རྒྱ་བཅིངས་ནས་འབུམ་བཟླས་ན་རྡོ་རྗེ་འཛིན་མངོན་དུ་མཐོང་ཞིང་ཕྱག་རྒྱའི་ལས་ཀུན་གྲུབ་པ་ཡང་སྩོལ་བར་ འགྱུར་རོ། །རྡོ་རྗེ་ལག་ཏུ་ཐོགས་ནས་འབུམ་བཟླས་ན་རྡོ་རྗེ་ཁུ་ཚུར་གྱིས་རྡོ་རྗེ་བཟུང་བཙམ་གྱིས་མི་སྣང་བར་འགྱུར་རོ། །འཁོར་ལོ་ཐོགས་ཏེ་འབུམ་བཟླས་ན་འཁོར་ལོའི་རིག་པ་འཛིན་པར་འགྱུར་རོ། །ཀྱོ་བ་ཏང་ཐོགས་ཏེ་འབུམ་བཟླས་ན། ཀྱོ་བ་ཏང་དེས་ཐམས་ཅད་འགུགས་ནུས་པར་ འགྱུར་རོ། །ཞགས་པ་ཐོགས་ཏེ་འབུམ་བཟླས་ན། ཞགས་པ་དེས་ཐམས་ཅད་དྲང་ནུས་པར་འགྱུར་རོ། །ལག་པ་གཉིས་རྡོ་རྗེ་བཅིངས་པ་བསྡམས་ཏེ་འབུམ་བཟླས་ན། སེམས་ཅན་ཐམས་ཅད་བཅིང་ནུས་པར་འགྱུར་རོ། །རྡོ་རྗེ་དབབ་པའི་ཕྱག་རྒྱ་བཅིངས་ནས་འབུམ་ བཟླས་ན་གནས་པ་དང་འགྲོ་བ་ཐམས་ཅད་དབབ་ནུས་པར་འགྱུར་རོ། །རྡོ་རྗེ་ཧཱུྃ་ཞེས་བྱ་བའི་ཕྱག་རྒྱ་བཅིངས་ནས་འབུམ་བཟླས་ན། ཧཱུྃ་ཞེས་བྱ་བ་གཅིག་གིས་གནས་པ་དང་། འགྲོ་བ་ཐམས་ཅད་སྐད་ཅིག་གིས་ལྟུང་བར་བྱེད་ནུས་པར་འགྱུར་རོ། །ལྷ་ཆེན་པོ་རྐང་པ་གཡོན་པས་མནན་ ལ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ནས་འབུམ་བཟླས་ན། ཟླ་བ་གཅིག་ཚུན་ཅད་ཀྱིས་དེར་འོངས་ཏེ་དབང་དུ་འགྱུར་རོ། །མཐུ་བོ་ཆེ་རྐང་པ་གཡོན་པས་མནན་ཏེ་འབུམ་བཟླས་ན་འཁོར་ལོ་ཐོབ་སྟེ། འཁོར་ལོ་དེ་ཐོགས་ན་འགྲུབ་པར་འགྱུར་རོ། །ཚངས་
- 29b
པ་མནན་ཏེ་འབུམ་བཟླས་ན་ཚངས་པར་སྤྱོད་པར་འགྱུར་རོ། །བརྒྱ་བྱིན་རྐང་པ་གཡོན་པས་མནན་ཏེ་འབུམ་བཟླས་ན་རྡོ་རྗེ་སྦྱིན་པར་འགྱུར་ཏེ། རྡོ་རྗེ་བསྐོར་བས་ཚར་གཅད་པ་དང་། དབབ་པ་དང་ཐང་ཅིག་གིས་ནི་གནམ་ལྕགས་དང་སེར་བ་འབེབས་སོ། །ས་ནད་གཞོན་ནུ་མནན་ཏེ་འབུམ་ བཟླས་ན། གཞོན་ནུ་མ་ཐམས་ཅད་ཀྱི་བདག་པོར་འགྱུར་རོ། །ལས་ཐམས་ཅད་ཀྱང་བྱེད་པར་འགྱུར་རོ། །ཉི་མ་ལ་བལྟས་ཏེ་འབུམ་བཟླས་ན། བདུད་རྩི་རྣ་ཆ་སྦྱིན་པར་འགྱུར་ཏེ། དེས་ན་ལྷའི་ལོ་སྟོང་འཚོ་བར་འགྱུར་རོ། །ཟླ་བ་ལ་འབར་བའི་ལྟ་བས་མགུ་བར་བལྟས་ཏེ་སྟོང་ ཕྲག་བརྒྱ་བཟླས་ན་ཟླ་བ་གཉིས་སུ་མཐོང་སྟེ། དེ་ཕྱིན་ཅད་ཟླ་བ་དང་མཚུངས་པའི་འོད་དང་མདངས་སུ་འགྱུར་ཏེ། སེམས་ཅན་ཐམས་ཅད་ཀྱི་མིག་ཏུ་མཛེས་ཤིང་སེམས་ཅན་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །གཟའ་ཆེན་པོའི་གཟུགས་ལ་བལྟས་ཏེ་འབུམ་བཟླས་ན་དེ་ ནས་བེ་ཅོན་ཐོབ་སྟེ། བེ་ཅོན་དེས་ནི་འཐབས་ན་དགྲ་ལས་རྒྱལ་ཏེ་ནོར་ཐམས་ཅད་འཐོབ་བོ། །སྐྱ་སླེང་གི་གནས་སུ་སོང་སྟེ་འབུམ་བཟླས་ན་སྐྱ་སླེང་ལས་ཀུན་བྱེད་དོ། །རྒུན་གྱིས་མྱོས་པ་མནན་ཏེ་འབུམ་བཟླས་ན། ཆང་གི་སྣོད་ཐམས་ཅད་ནམ་འཚོའི་བར་དུ་མི་ཟད་པར་འགྱུར་རོ། ། མ་དྷུ་ཀ་ར་ལ་བལྟས་ཏེ་སྟོང་ཕྲག་བརྒྱ་བཟླས་ན། དབང་བསྐུར་བ་ཐོབ་པར་འགྱུར་རོ། །རྒྱལ་བ་ལ་བལྟས་ཏེ་འབུམ་བཟླས་ན་འཐབ་མོ་དང་རྩོད་པའི་གཡུལ་ཐམས་ཅད་ལས་རྒྱལ་བར་འགྱུར་རོ། །རྒྱལ་བ་ཐོབ་པ་མནན་ཏེ་འབུམ་བཟླས་ན་ཐམས་ཅད་ལས་རྒྱལ་བར་འགྱུར་རོ། །མཛོད་ སྐྱོབ་རྐང་པ་གཡོན་པས་མནན་ཏེ་འབུམ་བཟླས་ན་བཟའ་བ་དང་བཏུང་བ་མི་ཟད་པར་འགྱུར་རོ། །འགྲོ་བ་ཐམས་ཅད་ཀྱིས་ཀྱང་འདི་ལ་ཟད་པར་མི་ནུས་སོ། །རླུང་མངོན་དུ་བྱས་ཏེ་སྟོང་ཕྲག་བརྒྱ་བཟླས་ན། རླུང་གིས་དེ་དང་མཐུན་པར་འདོད་པ་ཐམས་ཅད་བྱེད་པར་འགྱུར་རོ། །མེ་ ལ་བལྟས་ཏེ་འབུམ་བཟླས་ན་མེའི་དབུས་སུ་འདུག་པ་དང་། ཉལ་བ་དང་འགྲོ་ན་ཡང་མི་འཚིག་སྟེ། མེའི་གཟིར་གྱུར་ཅིང་ཉིན་གཅིག་ཀྱང་གསེར་སྲང་རེ་རེ་སྦྱིན་ནོ། །ངལ་བསོ་པོ་མནན་ཏེ་འབུམ་བཟླས་ན་གནོད་སྦྱིན་ཐམས་ཅད་ཀྱི་བདག་པོར་གྱུར་ནས་ནོར་ཐམས་ཅད་ཀྱང་སྦྱིན་
- 30a
པར་འགྱུར་རོ། །ཕག་མོ་མངོན་དུ་བྱས་ཏེ་སྟོང་ཕྲག་བརྒྱ་བཟླས་ན། ས་ལ་འདུག་པའི་གཏེར་འབྱིན་ནོ། །གཤིན་རྗེ་མནན་ཏེ་འབུམ་བཟླས་ན་མི་འཆི་བར་འགྱུར་རོ། །གནམ་འདྲེན་པའི་ཆ་ལུགས་ལ་བལྟས་ཏེ་སྟོང་ཕྲག་བརྒྱ་བཟླས་ན། དེ་ལས་ཐམས་ཅད་ པའི་གཡོག་ཏུ་འགྱུར་རོ། །ཀླུ་བ་རུ་ཎ་མནན་ཏེ་འབུམ་བཟླས་ན། ཀླུ་ཐམས་ཅད་ལས་ཀུན་བྱེད་པའི་གཡོག་ཏུ་འགྱུར་རོ། །མིའི་གནས་སུ་སོང་ནས་སྟོང་ནས་སྟོང་ཕྲག་བརྒྱ་བཟླས་ན། མི་ཐམས་ཅད་གཡོག་བྱེད་ཅིང་གདོན་ཐམས་ཅད་བྱེད་པར་འགྱུར་རོ། །ས་ལ་འདུག་སྟེ་འབུམ་ བཟླས་ན་སའི་དབང་པོར་འགྱུར་རོ། །ནམ་མཁའ་ལ་བལྟས་ཏེ་འབུམ་བཟླས་ན། ནམ་མཁའ་ལ་འགྲོ་བའི་སེམས་ཅན་ཐམས་ཅད་བསྒྱེལ་བ་དང་། དབང་བྱེད་པར་འགྱུར་ཞིང་ནམ་མཁའ་ལ་འགྲོ་བར་འགྱུར་རོ། །སའི་འོག་མངོན་དུ་བྱས་ཏེ་སྟོང་ཕྲག་བརྒྱ་བཟླས་ན། སའི་ འོག་ན་འཁོད་པ་ཀུན་ལ་དབང་དུ་འགྱུར་རོ། །རིན་པོ་ཆེ་ཐོགས་ཏེ་འབུམ་བཟླས་ན་སྟོང་ཕྲག་བརྒྱར་འཕེལ་བར་འགྱུར་རོ། །གསེར་གྱི་དོང་ཙེ་ལ་སོགས་པ་ཡང་དེ་བཞིན་ནོ། །སྐྱེས་པ་བཟུང་སྟེ་འབུམ་བཟླས་ན། སྟོང་ཕྲག་བརྒྱར་འཕེལ་བར་འགྱུར་རོ། །བུད་མེད་བཟུང་སྟེ་ སྟོང་ཕྲག་བརྒྱ་བཟླས་ན་སྟོང་ཕྲག་བརྒྱར་འཕེལ་བར་འགྱུར་རོ། །རྟ་ལ་ཞོན་ཏེ་འབུམ་བཟླས་ན་འབུམ་དུ་འཕེལ་བར་འགྱུར་རོ། །གླང་པོ་ལ་ཞོན་ཏེ་འབུམ་བཟླས་ན་འབུམ་དུ་འཕེལ་བར་འགྱུར་རོ། །བ་ལང་ལ་སོགས་པ་ཕྱུགས་ཀྱི་རྭ་གཉིས་བཟུང་སྟེ་འབུམ་བཟླས་ན། སྟོང་ ཕྲག་བརྒྱར་འཕེལ་བར་འགྱུར་རོ། །གོས་དང་རྒྱན་གྱིས་ཆས་ལ་སྟོང་ཕྲག་བརྒྱར་བཟླས་ན་སྟོང་ཕྲག་བརྒྱར་འཕེལ་བར་འགྱུར་རོ། །དཔལ་མོ་ལ་བལྟས་ཏེ་འབུམ་བཟླས་ན་དབང་དུ་འགྱུར་རོ། །མཚོ་དབྱངས་མ་ལ་བལྟས་ཏེ་འབུམ་བཟླས་ན་ཚིག་རྣམ་པར་དག་པར་འགྱུར་རོ། ། དེ་ནས་བསླངས་ན་ཅི་བསླངས་པ་དེ་ཀུན་སྟེར་བར་འགྱུར་རོ། །གཙུག་ལག་ཐམས་ཅད་དང་། རྣམ་པར་ཤེས་པ་ཐམས་ཅད་ཤེས་པར་འགྱུར་རོ། །གྲུབ་བྱེད་མ་བཟུང་ནས་འབུམ་བཟླས་ན། འདས་པ་དང་། ད་ལྟར་དང་། མ་འོངས་པ་ཀུན་ཀྱང་སྟོན་ཅིང་ཆེད་དུ་མ་བསླངས་
- 30b
པར་ནོར་སྦྱིན་པར་འགྱུར་རོ། །སཱ་ལ་བྷཉྩི་ཀ་མནན་ནས་འབུམ་བཟླས་ན་ཉིན་རེ་ཞིང་ཡང་གསེར་གྱི་དོང་ཙེ་བརྒྱད་བརྒྱད་སྟེར་བར་འགྱུར་རོ། །གོས་ཀྱི་སྒྲོག་མ་ལ་མནན་ཏེ་འབུམ་བཟླས་ན་མི་ཟད་པར་འགྱུར་རོ། །གང་དང་གང་གི་སྣོད་མནན་ཏེ་འབུམ་བཟླས་ན་དེ་དང་དེ་མི་ཟད་པར་ འགྱུར་རོ། །གནོད་སྦྱིན་གྱི་ཆ་ལུགས་མནན་ཏེ་འབུམ་བཟླས་ན། གནོད་སྦྱིན་གྱིས་ཅི་དང་ཅི་འདོད་པ་ཀུན་སྦྱིན་པར་འགྱུར་རོ། །སྲིན་པོ་མནན་ཏེ་འབུམ་བཟླས་ན་དེ་དེའི་གཡོག་ཏུ་འགྱུར་རོ། །འབྱུང་པོ་མནན་ཏེ་འབུམ་བཟླས་ན། འབྱུང་པོ་ཐམས་ཅད་ཀྱི་བདག་པོར་ འགྱུར་རོ། །ཤ་ཟའི་ཆ་ལུགས་བྲིས་པ་མནན་ཏེ་འབུམ་བཟླས་ན་དེ་དེའི་གཡོག་བྱེད་པར་འགྱུར་རོ། །དེ་བཞིན་དུ་གནོད་སྦྱིན་མ་ལ་སོགས་པ་ཡང་བསྒྲུབ་བོ། །རི་ལ་འཛེགས་ཏེ་འབུམ་བཟླས་ན་རི་ཐམས་ཅད་དབང་དུ་འགྱུར་རོ། །ཕྱུགས་ཀྱི་ལྷས་སུ་འདུག་སྟེ་འབུམ་བཟླས་ ན་ཕྱུགས་ཐམས་ཅད་ལ་དབང་དུ་འགྱུར་རོ། །ཤིང་ལྗོན་གྱི་དྲུང་དུ་འབུམ་བཟླས་ན། ཤིང་ལྗོན་པའི་ལྷ་རྣམས་མཆོག་སྦྱིན་པར་འགྱུར་རོ། །ཞིང་ལ་འདུག་སྟེ་འབུམ་བཟླས་ན། བཟའ་བ་འབུམ་དུ་འཕེལ་བར་འགྱུར་རོ། །ཚོང་པ་དང་བཅས་པའི་གྲོང་དུ་འབུམ་བཟླས་ ན་ནོར་ཐམས་ཅད་མ་བསླངས་པར་ཐོབ་པར་འགྱུར་རོ། །གནས་བྱིན་ཅན་དུ་འབུམ་བཟླས་ན་ཐམས་ཅད་ལ་དབང་དུ་འགྱུར་རོ། །གྲོང་དུ་འབུམ་བཟླས་ན་ཟླ་བ་གཅིག་ཚུན་ཅད་ཀྱིས་གྲོང་དེ་འཐོབ་བོ། །གཙུག་ལག་ཁང་དུ་འབུམ་བཟླས་ན། གཙུག་ལག་ཁང་ན་གནས་པས་ནོར་ ཐམས་ཅད་སྦྱིན་པར་འགྱུར་རོ། །ལྷའི་རྟེན་དུ་འབུམ་བཟླས་ན་ལྷས་ནོར་ཐམས་ཅད་སྦྱིན་པར་འགྱུར་རོ། །ཁང་པ་སྟོང་པར་འབུམ་བཟླས་ན་ཤ་ཟ་ཐམས་ཅད་དེའི་གཡོག་ཏུ་འགྱུར་ཏེ། དགོས་པ་ཐམས་ཅད་སྦྱོར་བར་འགྱུར་རོ། །སྣང་བའི་གནས་སུ་འབུམ་བཟླས་ན་སྣང་བ་དབང་ དུ་འགྱུར་རོ། །སྐྱེད་མོས་ཚལ་དུ་འབུམ་བཟླས་ན། སྐྱེད་མོས་ཚལ་གྱི་མེ་ཏོག་དང་འབྲས་བུ་ཐམས་ཅད་རྟག་ཏུ་འབྱུང་བར་འགྱུར་རོ། །མཚོར་འབུམ་བཟླས་ན་མཚོ་དེའི་ལྷ་ལ་དབང་བར་འགྱུར་རོ། །གཏེར་གྱི་གནས་སུ་འབུམ་བཟླས་ན་གཏེར་རང་འབྱུང་བར་འགྱུར་རོ། །དགོད་
- 31a
ཅིང་འབུམ་བཟླས་ན་རྟག་ཏུ་དགའ་བར་འགྱུར་ཏེ། བགད་པ་ཙམ་གྱིས་ལས་ཐམས་ཅད་བྱེད་པར་འགྱུར་རོ། །ཁྲོས་པས་འབུམ་བཟླས་ན་ཐམས་ཅད་གཏན་འཕོ་བར་ནུས་པར་འགྱུར་རོ། །ཅང་མི་ཟེར་བར་འབུམ་བཟླས་ན་སེམས་ཅན་ཐམས་ཅད་དབང་དུ་འགྱུར་རོ། ། ལྐུགས་པའི་བརྟུལ་ཞུགས་ཀྱིས་འབུམ་བཟླས་ན་ཚིག་ཐམས་ཅད་ཀྱི་དབང་དུ་འགྱུར་རོ། །བུད་མེད་ཀྱི་འཇོམ་པར་རྟགས་བཙུགས་ཏེ། འབུམ་བཟླས་ན་འདོད་པ་ཐམས་ཅད་ཀྱི་བདག་པོ་དང་ནམ་མཁའ་ལ་འགྲོ་བ་འགྲུབ་པར་འགྱུར་རོ། །འཇོམ་པ་ལ་མཛུབ་མོ་བཙུགས་ཏེ་ འབུམ་བཟླས་ན་དེ་བྱས་པས་གནས་པ་དང་འགྲོ་བ་ཐམས་ཅད་འདྲེན་ཅིང་འགུགས་པ་དང་། གཏོང་བ་དང་འགྱེལ་བ་དང་སློང་བར་འགྱུར་རོ། །འཇོམ་པ་ལྟ་ཞིང་འབུམ་བཟླས་ན། བུད་མེད་ཐམས་ཅད་དགའ་བར་འགྱུར་རོ། །འཇོམ་པར་ལིག་བུ་མིག་བཅུག་སྟེ་འབུམ་ བཟླས་ན་མི་སྣང་བར་འགྱུར་རོ། འཇོམ་པར་གུར་གུམ་བསྐུས་ཏེ་འབུམ་བཟླས་ན། དེས་བསྐུས་པས་འདོད་པའི་གཟུགས་སུ་འགྱུར་རོ། །འཇོམ་པར་བ་བླ་བཅུག་སྟེ་འབུམ་བཟླས་ན་ནམ་མཁའ་ལ་འགྲོ་བ་འགྲུབ་པར་འགྱུར་རོ། །འཇོམ་པར་ལྡོང་རོས་བཅུག་སྟེ་འབུམ་ བཟླས་ན་རིག་འཛིན་དུ་འགྱུར་རོ། །རལ་གྲི་ཐོགས་ཏེ་འབུམ་བཟླས་ན་རལ་གྲི་ཅན་གྱི་རིག་འཛིན་དུ་འགྱུར་རོ། །འཁོར་ལོ་ཐོགས་ཏེ་འབུམ་བཟླས་ན། འཁོར་ལོ་ཅན་གྱི་རིག་འཛིན་དུ་འགྱུར་རོ། །ཀྱོ་བ་ཏང་ཐོགས་ཏེ་འབུམ་བཟླས་ན་ཀྱོ་བ་ཏང་དེས་ཐམས་ཅད་འགུགས་ ནུས་པར་འགྱུར་རོ། །རྡོ་རྗེ་གསོར་ནས་སྟོང་ཕྲག་བརྒྱ་བཟླས་ན་རྡོ་རྗེ་རིག་འཛིན་དུ་འགྱུར་རོ། །ཕྱག་ན་རྡོ་རྗེ་ལག་གིས་བཟུང་ནས་འབུམ་བཟླས་ན་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཛིན་པའི་རིག་འཛིན་དུ་འགྱུར་རོ། །དེ་བཞིན་གཤེགས་པ་ལ་ལག་གིས་བཟུང་སྟེ་འབུམ་བཟླས་ན་ དེ་བཞིན་གཤེགས་པ་ཐམས་ཅད་ལ་མཆོད་པ་བྱེད་པའི་དམ་པའི་ཆོས་ཀྱི་རིག་འཛིན་དུ་འགྱུར་རོ། །སངས་རྒྱས་རྗེས་སུ་དྲན་ཞིང་འབུམ་བཟླས་ན། སངས་རྒྱས་ཐམས་ཅད་མཐོང་བས་འགྲུབ་པར་འགྱུར་རོ། །ཕྱག་ན་རྡོ་རྗེ་ལ་ཕྱག་འཚལ་ཞིང་འབུམ་བཟླས་ན་ཕྱག་ན་རྡོ་རྗེས་
- 31b
ཀྱང་དེ་མཆོད་ན་གཞན་གྱིས་ལྟ་ཅི་སྨོས། སྤྱན་རས་གཟིགས་དབང་ཕྱུག་གི་ཞབས་ལས་བཟུང་སྟེ་འབུམ་བཟླས་ན་ཏིང་ངེ་འཛིན་ཐོབ་བོ། །རྡོ་རྗེ་སྙིང་པོ་བཟུང་ནས་འབུམ་བཟླས་ན་ནོར་ཐམས་ཅད་སྦྱིན་པར་འགྱུར་རོ། །རྡོ་རྗེ་ཁུ་ཚུར་བཅངས་ལ་རྡོ་རྗེ་ཁུ་ཚུར་གྱི་སྤྱན་སྔར་འབུམ་ བཟླས་ན་ཁུ་ཚུར་བསྡམས་པ་ཙམ་གྱིས་ལས་ཀུན་བྱེད་ནུས་པར་འགྱུར་རོ། །འཇམ་དཔལ་གཞོན་ནུ་ལ་ལྟ་ཞིང་འབུམ་བཟླས་ན་ནམ་མཁའ་ལ་ཡི་གེ་སྣང་སྟེ། ཐམས་ཅད་སྨྲ་བ་དང་སྤོབས་པ་ཐོགས་པ་མེད་པ་ཐོབ་པར་འགྱུར་རོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་ བསྐོར་བའི་བྱང་ཆུབ་སེམས་དཔའ་ལ་བསྐོར་ཞིང་འབུམ་བཟླས་ན། དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །ནམ་མཁའི་མཛོད་ལ་བལྟས་ཏེ་འབུམ་བཟླས་ན་ནམ་མཁའ་ལ་རྒྱུ་བ་ཐམས་ཅད་དང་། དོན་ཐམས་ཅད་དང་། སངས་རྒྱས་དང་བྱང་ཆུབ་སེམས་དཔའ་ལ་ སོགས་པ་ཐམས་ཅད་ཀྱི་བར་དུ་སྟོན་ཏོ། །བྱམས་པའི་ཞབས་ལ་བཟུང་སྟེ་འབུམ་བཟླས་ན། མཐོ་རིས་ཀྱི་འདོད་པའི་བདེ་བ་ཐམས་ཅད་ཉམས་སུ་མྱོང་བར་འགྱུར་རོ། །དཀྱིལ་འཁོར་བྲིས་ནས་འབུམ་བཟླས་ན། དཀྱིལ་འཁོར་ཐམས་ཅད་ཀྱི་བདག་པོ་སློབ་དཔོན་དང་། ཡིད་ ཀྱིས་ཐམས་ཅད་འགྲུབ་པར་འགྱུར་རོ། །དཀྱིལ་འཁོར་ཆེན་པོར་བརྟགས་ཏེ་ཞུགས་ནས་འབུམ་བཟླས་ན། དེ་བཞིན་གཤེགས་པ་ཐམས་ཅད་རྡོ་རྗེ་འཛིན་དང་བཅས་པར་འགྱུར་རོ། །ཕྱག་ན་རྡོ་རྗེའི་སྤྱན་སྔར་ཕྱག་རྒྱ་ཆེན་པོ་བཅིངས་ལ་དཀྱིལ་འཁོར་ཆེན་པོར་འདུག་སྟེ། རྡོ་རྗེའི་ བཟླས་པས་སྟོང་ཕྲག་བརྒྱ་རྡོ་རྗེ་ཚིག་གིས་བཟླས་ན། དངོས་གྲུབ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་། བཤེས་གཉེན་ཐམས་ཅད་དང་། ལས་ཐམས་ཅད་ཀྱང་ནུས་པར་འགྱུར་རོ། །འདོད་པའི་བདག་པོ་དང་། དབང་ཕྱུག་དང་། བྱེད་པ་པོ་དང་། འབྱིན་པ་ དང་། མི་ཟད་མི་ཉམས་པ་དང་། འདོད་པ་ཐམས་ཅད་ཉམས་སུ་མྱོང་ཞིང་བདེ་བ་དང་། ཡིད་བདེ་བ་ཐམས་ཅད་རྙེད་ཅིང་འཐོབ་སྟེ། སེམས་ཅན་ཐམས་ཅད་ལ་ཕན་པ་དང་། བདེ་བ་འགྲུབ་པའི་སྦྱིན་པར་འགྱུར་བ་དང་། དེ་རང་གི་གཉེན་དང་། བཤེས་གཉེན་དང་། གྲོགས་
- 32a
ཐམས་ཅད་ཀྱིས་ཀྱང་མཐོང་ངོ་། །དེ་དག་ལ་ཡང་འགྲུབ་པར་བྱེད་དོ། །བསམས་པ་ཙམ་གྱིས་སྒྱུ་མ་ཐམས་ཅད་སྟོན་ཏེ། དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱང་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོ་འཕྲུལ་ཡང་སྟོན་ཏོ། །དེ་བཞིན་ གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཡང་སྟོན་ཏོ། །སྐད་ཅིག་གིས་གཟུགས་སྣ་ཚོགས་སུ་སྟོན་པར་འགྱུར་ཏེ། རྡོ་རྗེ་འཛིན་གྱི་ཚེ་དང་། སྟོབས་དང་། གཟུགས་དང་། ན་ཚོད་དང་། ཤེས་པ་ཅི་ཙམ་པ་དང་མཚུངས་པར་འགྱུར་རོ་ཞེས་བཅོམ་ལྡན་འདས་ཕྱག་ན་རྡོ་རྗེས་ གསུངས་སོ། །དཀྱིལ་འཁོར་ཆེན་པོར་འདུག་སྟེ། དམ་ཚིག་གི་ཕྱག་རྒྱ་བཅིངས་ནས། ཁྲོ་བོའི་ཚིག་གིས་བཅོམ་ལྡན་འདས་ལ་ལྟ་ཞིང་དོན་གྱིས་འབུམ་བཟླས་ན། དེས་རྡོ་རྗེ་ཁྲོ་བོ་ལྟ་བུར་བདག་གི་ལུས་འགྱུར་རོ། །ཧཱུྃ་ཞེས་པས་ཀྱང་དེ་བཞིན་གཤེགས་པ་ཐམས་ཅད་ཀྱང་ འཛིན་པ་དང་། ཁམས་གསུམ་གྱི་དབང་པོ་དང་། སྤྱན་གསུམ་པའི་ཁྲོ་བོ་ཆེན་པོར་གྱུར་ནས་མ་ལུས་པའི་དེ་བཞིན་གཤེགས་པ་ཐམས་ཅད་མཐོང་ཞིང་མཆོད་པ་དང་སེམས་ཅན་ཐམས་ཅད་གྲུབ་པ་གསོལ་ཏེ། དེ་ལྟར་མི་ཟད་མི་ཉམས་པར་འགྱུར་རོ་ཞེས་བཅོམ་ལྡན་འདས་ཕྱག་ན་རྡོ་རྗེས་ གསུངས་སོ། །འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་ལས་ཕྱག་ན་རྡོ་རྗེའི་རྟོག་པའོ།། །།དེ་ནས་བཅོམ་ལྡན་འདས་ལ་འཕགས་པ་སྤྱན་རས་གཟིགས་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གིས་ཀྱང་འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་འདི་སྩལ་ཏོ། །གང་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་མངོན་དུ་གྲུབ་པ་དང་། འཇིགས་པ་དང་། གནམ་དལ་དང་། འཚེ་བ་དང་། ནད་ཐམས་ཅད་འཇིག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཕགས་པ་སྤྱན་རས་གཟིགས་ཀྱི་དབང་པོ་བྱང་ཆུབ་སེམས་དཔའ་ལ་ལེགས་སོ་ཞེས་བྱ་བ་བྱིན་ཏེ་ལེགས་སོ་ལེགས་སོ། །སྤྱན་རས་གཟིགས་ཀྱི་དབང་པོ་ཁྱོད་ཀྱིས་སྨྲོས་ཤིག །དེ་
- 32b
ནས་འཕགས་པ་སྤྱན་རས་གཟིགས་ཀྱི་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་རང་གི་སྙིང་པོ་འདི་གསུངས་སོ། །ཨཱ་རོ་ལིཀ །དེ་ནས་འདི་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ལྷན་ཅིག་ཏུ་འདུས་ཏེ། རི་རབ་རིའི་རྩེ་མོར་བཅོམ་ལྡན་འདས་ རྣམ་པར་སྣང་མཛད་དེ་བཞིན་གཤེགས་པ་ག་ལ་བ་དེར་དོང་ནས། བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་དབང་པོའི་དཀྱིལ་འཁོར་དུ་གྱུར་ཏེ་ཞུགས་སོ། །དེ་ནས་འཕགས་པ་སྤྱན་རས་གཟིགས་ཀྱི་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་ རང་གི་སྙིང་པོའི་དཀྱིལ་འཁོར་འདི་གསུངས་སོ། །དེ་ནས་ཡང་དག་རབ་བཤད་པ། །དཀྱིལ་འཁོར་ཆེན་པོ་དམ་པ་སྟེ། །འཇིག་རྟེན་གསུམ་རྒྱལ་ཚུལ་བཞིན་དུ། །ཕྱི་ཡི་དཀྱིལ་འཁོར་བྲི་བར་བྱ། །དེ་དབུས་སྲད་བུ་མཉམ་པ་རུ། །གྲྭ་བཞི་པར་ནི་གདབ་པ་ རུ། །གཉིས་པའི་གྲྭ་ནི་སྒོར་བསྟན་ཏེ། །དཀྱིལ་འཁོར་མཆོག་ནི་བྲི་བར་བྱ། །དཀྱིལ་འཁོར་བརྒྱད་ཀྱི་ཚུལ་དུ་སྟེ། །དབུས་སུ་ཐིག་ནི་བཞི་ཡང་བྲི། །ཚོན་རྩི་དམར་པོ་དག་གིས་ནི། །པདྨ་འདབ་བརྒྱད་བྲི་བར་བྱ། །དེ་ཡི་སྙིང་པོའི་དབུས་སུ་ནི། །འཇིག་ རྟེན་མགོན་པོ་གཞུག་པར་བྱ། །འདབ་མ་ཀུན་གྱི་སྟེང་རྣམས་སུ། །སངས་རྒྱས་ཆ་ལུགས་བྲི་བར་བྱ། །པདྨ་ཆེ་མཆོག་ཕྱག་རྒྱ་ཡིས། །དེར་ནི་སློབ་དཔོན་བཞུགས་ནས་ཀྱང་། །དཀྱིལ་འཁོར་གནས་སུ་འཇུག་ནས་ནི། །རྣལ་འབྱོར་སྙོམས་པར་འཇུག་པར་བྱ། ། ཇི་ལྟར་པདྨ་ཆུ་རྣམས་དང་། །ཉེས་པའི་བག་ཆགས་མང་པོ་ཡིས། །ཆགས་པར་མི་འགྱུར་དེ་བཞིན་འདིར། །འགྲོ་བ་ཆགས་པས་དག་པར་གྱུར་པ་ཡིན། །འདི་ལན་ཅིག་བརྗོད་ནས་བསྒོམ་སྟེ། དེ་ནས་མཛུབ་མོ་གཉིས་ཀྱི་ཀྱོ་བ་ཏང་གིས་ཀུན་དྲངས་ལ་པདྨོ་ཆེན་པོ་དེ་སྤྱན་རས་ གཟིགས་ཀྱི་དབང་པོའི་སྤྱན་སྔར་དགྲོལ་ལོ། །དེ་ལ་པད་མོ་ཆེན་པོའི་ཀྱོ་བ་ཏང་ནི་འདིའོ། །ཨོྃ་མ་ཧཱ་པདྨ་ཧཱུྃ་ཛ་ཧྲཱིཿ། །དེ་ནས་བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་དབང་པོ་ཉིད་བྱོན་ཏེ། སློབ་དཔོན་ལ་ཞལ་སྟོན་པར་མཛད་ནས་ཡང་ན་འོད་ཟེར་ཡང་འགྱེད་དོ། །དེ་
- 33a
ནས་ཕྱག་རྒྱ་དེ་ཉིད་ཀྱིས་སློབ་མ་གཞུག་གོ། །དཀར་པོས་གཡོགས་ལ་གོས་དཀར་པོ་བགོས་ལ། ཐོད་དཀར་པོས་མགོ་ལ་གཙུག་ཏོར་བྱས་ནས་བཅུག་སྟེ། ཚིགས་སུ་བཅད་པ་འདི་བརྗོད་ནས་དོན་ཀྱང་བསྟན་པར་བྱའོ། །དེ་ནས་ལག་པ་གཡོན་པར་པད་མོ་ བྱིན། གཡས་པར་སྔགས་ཀྱི་ནོར་བུ་བསྐུར་ལ་འདི་སྐད་སྨྲོས་ཤིག །སངས་རྒྱས་ཐམས་ཅད་པད་མོ་ཆེ། །དཀྱིལ་འཁོར་ཆེན་པོ་དམ་པ་སྟེ། །རྟག་པ་རུ་ནི་བརྟག་པར་བྱ། །ཁྱོད་ནི་དེང་ནས་སྤྱན་རས་གཟིགས། །དེ་ནས་ཕྱག་རྒྱ་ཆེན་པོ་བཅིང་བ་དང་ཏིང་ངེ་འཛིན་ལ་སོགས་པ་ བསླབ་བོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོ་བད་མོ་ཞེས་བྱའོ། །དེ་ནས་བད་མོའི་དཀྱིལ་འཁོར་འབྱུང་སྟེ། །པད་མོའི་དཀྱིལ་འཁོར་དེ་བཞིན་དུ་བྲིས་ལ། དབུས་ཀྱི་སྙིང་པོ་ལ་འདུག་ནས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་ལ་པདྨ་འདབ་མ་ཁ་ འབྱེད་པའི་ཚུལ་གྱིས་བལྟ་ཞིང་སྟོང་ཕྲག་བརྒྱ་བཟླས་ན། འཕགས་པ་ཀུན་དུ་སྤྱན་རས་གཟིགས་ཀྱི་དབང་པོ་ཐོབ་བོ། །པད་མོའི་དཀྱིལ་འཁོར་རོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ། དཀྱིལ་འཁོར་དེ་བཞིན་དུ་བྱས་ལ་དེའི་དབུས་སུ་པད་མོ་སྟོང་བཞག་སྟེ། དེ་ནས་ པད་མོ་རེ་རེ་ཞིང་བཟང་པོ་ཐང་རེས་བཅོམ་ལྡན་འདས་ལ་པད་མོ་སྟོང་འབུལ་ལོ། །དེ་ནས་སློབ་མ་བཅུག་སྟེ་དམ་ཚིག་བརྗོད་དོ། །སློབ་མིན་བུ་མིན་མ་ཡིན་ཏེ། །དམ་ཚིག་ཅན་ལ་དམ་ཚིག་བསྟན། འདོད་པའི་འདོད་ཆགས་ཐམས་ཅད་ནི། །དག་པ་ཉིད་དེ་པདྨ་བཞིན། །དམ་ ཚིག་གི་དཀྱིལ་འཁོར་རོ། །དེ་ནས་ལས་ཀྱི་དཀྱིལ་འཁོར་དེ་བཞིན་བྲིས་ལ་མཆོད་པ་རྣམ་པ་བཞིས་མཆོད་དོ། །སངས་རྒྱས་ཐམས་ཅད་ཡིད་ཀྱིས་ཏེ། །ཕྱག་ན་རྡོ་རྗེའི་ཚིག་གིས་སོ། །ལུས་ཀྱིས་འཇིག་རྟེན་མགོན་པོ་སྟེ། །ནམ་མཁའི་སྙིང་པོ་ལས་ཀྱིས་སོ། །ལས་ཀྱི་ དཀྱིལ་འཁོར་རོ། །དེ་ནས་བཅོམ་ལྡན་འདས་སྤྱན་རས་གཟིགས་ཀྱི་དབང་པོས་སྒྲུབ་པའི་ཆོ་ག་འདི་གསུངས་སོ། །རས་ལ་བཅོམ་ལྡན་འདས་སྤྱན་རས་གཟིགས་ཀྱི་དབང་པོ་རི་རབ་རིའི་རྩེ་མོ་ན། རང་གི་ཏིང་ངེ་འཛིན་དུ་བཞུགས་ཤིང་དེ་བཞིན་གཤེགས་པ་བརྒྱད་མཐའ་ཀུན་ཏུ་བཞུགས་
- 33b
པར་བྲི། དེ་ནས་ཟླ་བ་ཡར་གྱི་ཚེས་ཞག་གཅིག་ནས་བརྩམས་ནས་རྟག་ཏུ་ཐམས་ཅད་དག་པའི་ཏིང་ངེ་འཛིན་གྱིས་རྒྱུན་དུ་བཟླས་ཏེ། ནམ་སྤྱན་རས་གཟིགས་ཀྱི་དབང་པོའི་ཞལ་ནས་དེ་བཞིན་གཤེགས་པའི་སྐུ་བྱུང་ནས་སྒྲུབ་པ་པོའི་པད་མོའི་དབུས་སུ་བཞུགས་ཏེ། ཡང་དེ་ལས་གཞན་ པའི་སྐུ་བྱུང་ནས་སྒྲུབ་པ་པོའི་དབང་བསྐུར་བའི་གནས་སུ་བརྟན་པར་འགྱུར་གྱི་བར་དུ་བཟླས་སོ། །དེ་ནས་སྤྱན་རས་གཟིགས་ཀྱི་སྐུར་ཀུན་གྱུར་ཏེ། སྐད་ཅིག་གཅིག་གིས་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་ཞིང་ལྡོག་གོ། །སེམས་ཅན་ཐམས་ཅད་ཀྱང་མཐོང་སྟེ། ཚེ་ དཔག་ཏུ་མེད་པར་འགྱུར་རོ། །དེ་ནས་སྒྲུབ་པ་འབྱུང་སྟེ། འབུམ་བཟླས་ན་སྒྲིབ་པ་ཐམས་ཅད་རྣམ་པར་དག་པར་འགྱུར་རོ། །ཉིས་འབུམ་བཟླས་ན་མཚམས་མེད་པ་ལ་སོགས་པའི་སྡིག་པ་ཐམས་ཅད་མ་ལུས་པར་བྱང་བར་འགྱུར་རོ། །སུམ་འབུམ་བཟླས་ན་བསོད་ནམས་ ཐམས་ཅད་མངོན་དུ་འགྱུར་རོ། །དེ་ནས་དངོས་གྲུབ་ཐམས་ཅད་དང་། དེ་བཞིན་གཤེགས་པ་ལ་སོགས་པ་དང་། ཕུན་སུམ་ཚོགས་པ་ཐམས་ཅད་དང་། བཤེས་གཉེན་ཐམས་ཅད་མངོན་དུ་འགྱུར་རོ། །དེ་ནས་ཕྱག་རྒྱ་ཆེན་པོ་བཅིངས་ཏེ་སྟོང་ཕྲག་བརྒྱ་བཟླས་པའི་མཇུག་ ཏུ་མཚན་ཐལ་བྱུང་བཟླས་ན། དེའི་ནང་པར་དེ་བཞིན་གཤེགས་པ་ཐམས་ཅད་བྱོན་ནས་དེའི་སྙིང་གར་ཞུགས་ཏེ། དེ་ནས་དེ་བཞིན་གཤེགས་པ་འཐོབ་བོ། །ཡང་ན་ཁར་ཞུགས་ན་སྤྱན་རས་གཟིགས་དབང་པོ་འཐོབ་བོ། །དེ་ནས་མ་བསྒྲུབས་ཀྱང་ལས་སུ་འགྱུར་བ་ནི་དང་པོ་བརྗོད་པས་ བདག་སྲུང་ངོ་། །གཉིས་བརྗོད་པས་ནི་གཞན་དང་གྲོང་དང་གྲོང་ཁྱེར་སྲུང་ངོ་། །གསུམ་པ་བརྗོད་པས་ནི་ལས་ཐམས་ཅད་བྱེད་དོ། །དབབ་པ་ནི་ཙན་དན་གྱི་བདུག་པས་སོ། །གདོན་ཐམས་ཅད་ཞི་བར་བྱ་བ་ནི་ཧྲཱི་ཞེས་བྱ་བས་སོ། །སེམས་ཅན་ཐམས་ཅད་དབང་དུ་བྱ་བ་ནི་རྡོ་རྗེ་མེ་ ཏོག་བཟླས་ཏེ་བྱིན་ནོ། །སེམས་ཅན་ཐམས་ཅད་གནོན་པས་ནི་ས་སེར་པོས་སོ། །བུད་མེད་དབང་དུ་བྱ་བ་ནི་སུ་མ་ནའི་མེ་ཏོག་ལ་བསྔགས་པས་སོ། །ཆོམ་རྐུན་གནོན་པ་ནི་ཡུངས་ཀར་གྱི་སྦྱིན་སྲེག་གིས་སོ། །རི་དགས་དང་བྱ་གནོན་པ་ནི་ཡུངས་ཀར་གཏོར་བས་སོ། །སྒྱུ་མ་
- 34a
གནོན་པ་ནི་རྨ་བྱའི་ཆང་བུས་སོ། །རྨི་ལམ་མཐོང་བར་བྱ་བ་ནི་དུས་གསུམ་དུ་བཟླས་པས་སོ། །རྨི་ལམ་ངན་པ་གཞིལ་བ་ནི་ཏིལ་གྱི་སྦྱིན་སྲེག་གིས་སོ། །སེམས་ཅན་ཐམས་ཅད་དབང་དུ་བྱ་བ་ནི་ཁྱིམ་བྱའི་སྒྲོའི་སྦྱིན་སྲེག་གིས་སོ། །བུ་མོ་ཐོར་བུ་དབང་དུ་བྱ་བ་ནི་ བུ་མོའི་སྐྲའི་སྦྱིན་སྲེག་གིས་སོ། །ཡུགས་ས་མོ་དབང་དུ་བྱ་བ་ནི་བུད་མེད་ཀྱི་མེ་ཏོག་གི་སྦྱིན་སྲེག་གིས་སོ། །བུད་མེད་ཐམས་ཅད་དབང་དུ་བྱ་བ་ནི་བུད་མེད་ཀྱི་དབང་པོའི་སྦྱིན་སྲེག་གིས་སོ། །འདོད་པ་ཐམས་ཅད་དབང་དུ་བྱ་བ་ནི་བཅོམ་ལྡན་འདས་སྤྱན་རས་གཟིགས་དབང་པོ་ལ་ མཆོད་པ་བྱས་ནས། ནུབ་གསུམ་རངས་པར་བཟླས་ན། དེ་ནས་འདོད་པ་ཐམས་ཅད་རྟག་ཏུ་འཐོབ་པར་འགྱུར་རོ། །སྤྱན་རས་གཟིགས་དབང་པོའི་སྤྱན་སྔར་ཉིན་རེ་ཞིང་དུས་གསུམ་དུ་ལན་གསུམ་བཟླས་ན། དེ་ནས་བཅོམ་ལྡན་འདས་ཀྱིས་ཟླ་བ་གསུམ་གྱིས་རེ་བ་ཅི་འདོད་པའི་ མཆོག་སྩོལ་བར་འགྱུར་རོ། །སངས་རྒྱས་ཀྱི་སྤྱན་སྔར་ཟླ་བ་གསུམ་གྱི་བར་དུ་ཉིན་མཚན་གསུམ་བཟླས་ན། དེ་བཞིན་གཤེགས་པས་མཆོག་སྩོལ་བར་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་ལས་སྤྱན་རས་གཟིགས་ཀྱི་དབང་པོའི་རྟོག་ པའོ།། །།དེ་ནས་བཅོམ་ལྡན་འདས་ལ་འཕགས་པ་ནམ་མཁའི་སྙིང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོར་རང་གི་སྙིང་པོ་ འབུལ་གྱིས། བཅོམ་ལྡན་འདས་ཀྱིས་བཞེས་སུ་གསོལ། འདིས་སེམས་ཅན་ཐམས་ཅད་དབང་བསྐུར་བ་ཐོབ་པ་ལ་སོགས་པ་བསམ་པ་ཐམས་ཅད་ཡོངས་སུ་རྫོགས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཕགས་པ་ནམ་མཁའི་སྙིང་པོ་བྱང་ཆུབ་སེམས་དཔའ་ ལ་སྐྱེས་བུ་ཆེན་པོ་སྨྲོས་ཤིག་ཅེས་བཀའ་སྩལ་ཏོ། །དེ་ནས་འཕགས་པ་ནམ་མཁའི་སྙིང་པོ་བྱང་ཆུབ་སེམས་དཔའ་ཆེན་པོས་རང་གི་སྙིང་པོ་འདི་གསུངས་སོ། །ཏྲྃ་བཱ་བཱ་ཊ་ཊ་ཧ་ཧ། དེ་ནས་འདི་བརྗོད་པས་ནམ་མཁའ་ལ་དབང་བསྐུར་བ་ཐམས་ཅད་ལ་སོགས་པ་རིན་པོ་ཆེའི་རྒྱན་
- 34b
ཐམས་ཅད་དང་། གོས་དང་། གསེར་དང་། ནོར་རིན་པོ་ཆེའི་དབྱིག་ལ་སོགས་པ་ཐམས་ཅད་ཀྱི་ཆར་བབ་པོ། །བཅོམ་ལྡན་འདས་ཀྱི་སྐུ་ཀུན་དུ་རྒྱན་ཐམས་ཅད་ཀྱིས་བརྒྱན་ཏེ་བཞུགས་སོ། །དེ་ནས་ནམ་མཁའི་སྙིང་པོ་བྱང་ཆུབ་སེམས་དཔས་དཀྱིལ་འཁོར་ཆེན་པོ་འདི་ གསུངས་སོ། །རྡོ་རྗེའི་དཀྱིལ་འཁོར་ཚུལ་བཞིན་ཏེ། །རྡོ་རྗེ་རིན་ཆེན་མཉམ་ལྡན་ཞིང་། །གྲྭ་བརྒྱད་ཤིན་ཏུ་མཉམ་པར་བྱ། །རིན་ཆེན་ཀུན་དང་ལྡན་པར་བྱ། །དེར་སློབ་དཔོན་ཞུགས་ཏེ་རྡོ་རྗེ་རིན་པོ་ཆེའི་ཕྱག་རྒྱ་དབང་བསྐུར་བའི་གནས་སུ་བཞག་ལ་ཞུགས་ནས་འདི་ཞེས་ བརྗོད་དོ། །རེ་བ་ཐམས་ཅད་གྲུབ་པ་ཡི། །ནམ་མཁའ་གྲུབ་པ་མཆོག་ཡིན་ཏེ། །གྲུབ་ཤིག་གྲུབ་ཤིག་སེམས་ཆེན་པོ། །བཅོམ་ལྡན་ཐམས་ཅད་གྲུབ་པར་རོ། །དེ་ནས་བཅོམ་ལྡན་འདས་ནམ་མཁའི་སྙིང་པོ་བྱང་ཆུབ་སེམས་དཔའ་བྱིན་གྱིས་རློབ་པར་མཛད་དོ། ། དེ་ནས་དཀྱིལ་འཁོར་གྱི་དབུས་སུ་ནམ་མཁའི་སྙིང་པོའི་ཆ་ལུགས་བཞག་ལ་དེའི་ཐད་འཁོར་ཀུན་དུ་ཕྱག་ན་རྡོ་རྗེ་ལ་སོགས་པ་སྐྱེས་བུ་དམ་པ་བརྒྱད་གཞག་པར་བྱའོ། །དེ་ནས་སློབ་མ་རྡོ་རྗེ་ཁུ་ཚུར་གྱིས་གཞུག་གོ། །བཅུག་ནས་འདི་སྐད་ཅེས་བརྗོད་དོ། །སེམས་ཅན་ཀུན་ལ་ ཕན་ཕྱིར་དང་། །བསམ་པ་ཐམས་ཅད་རྫོགས་བྱའི་ཕྱིར། །དོན་ཞེས་བསྟན་པ་གང་ཡིན་དེ། །བྱང་ཆུབ་སེམས་ནི་བརྟན་པ་ཡིན། །དེ་ནས་སྦྱིན་པ་རྣམ་པ་བཞི་བསླབ་བོ། །དེ་ལ་དབང་བསྐུར་བ་སྦྱིན་པ་དང་། ནོར་སྦྱིན་པ་དང་ཟས་སྦྱིན་པ་དང་ཆོས་སྦྱིན་པའོ། །དེ་ལ་དབང་ བསྐུར་བ་སྦྱིན་པ་ནི་དེ་བཞིན་གཤེགས་པ་རྣམས་ལའོ། །ནོར་སྦྱིན་པ་ནི་སེམས་ཅན་ཐམས་ཅད་ལའོ། །ཟས་སྦྱིན་པ་ནི་བྱོལ་སོང་ཐམས་ཅད་ལའོ། །ཆོས་སྦྱིན་པ་ནི་སེམས་ཅན་མི་སྣང་བ་ཐམས་ཅད་ལའོ། །དེ་ནས་སྙིང་པོ་བྱིན་ལ་རིན་པོ་ཆེ་ཐམས་ཅད་ཀྱིས་བྱིན་གྱིས་བརླབས་པའི་བུམ་ པའི་ཆུས་དབང་བསྐུར་ཏེ་འདི་ཞེས་བརྗོད་དོ། །ཨོྃ་བཛྲ་རཏྣཱ་བྷི་ཥེ་ཀཱ་བྷི་ཥིཉྩ་སརྦཱ་དྷི་པ་ཏི་ཧཱུྃ་བཱ་བཱ་ཊ་ཊ་ཧ་ཧ། དེ་ནས་རྡོ་རྗེ་ནོར་བུའི་ཁུ་ཚུར་གྱིས་ཕྱག་རྒྱ་བསླབ་སྟེ། སྔགས་ནི་འདིའོ། །ཧཱུྃ་བཱ་ཊ་ཧ། དེ་ནས་རྡོ་རྗེ་རིན་པོ་ཆེའི་ཕྱག་རྒྱ་བཅིངས་ཏེ་སྔགས་ནི་འདིའོ། །ཨོྃ་བཱ་བཱ་ཊ་མུ་བྃ།
- 35a
དེ་ནས་མཆོད་པ་རྣམ་བཞི་བྱ་སྟེ་འབྱུང་ངོ་། །དབང་ཐམས་ཅད་བསྐུར་བའི་དཀྱིལ་འཁོར་རོ། །དེ་ནས་རྡོ་རྗེ་རིན་པོ་ཆེའི་དཀྱིལ་འཁོར་འབྱུང་སྟེ། རྡོ་རྗེ་རིན་པོ་ཆེ་དབུས་སུ་བྲིས་ལ། ལག་ཏུ་ནོར་བུ་ཐོགས་ནས་རྡོ་རྗེ་རིན་པོ་ཆེ་ལངས་ཀྱི་བར་དུ་བཟླས་སོ། ། དེ་ནས་དེ་བཞིན་གཤེགས་པ་བྱོན་ཏེ་དབང་བསྐུར་བར་མཛད་དོ། །དབང་བསྐུར་བ་དེས་ན་ཐམས་ཅད་ཀྱི་དབང་པོར་འགྱུར་རོ། །རིན་པོ་ཆེའི་དཀྱིལ་འཁོར་རོ། །དེ་ནས་དམ་ཚིག་གི་དཀྱིལ་འཁོར་ཏེ། ནམ་མཁའི་སྙིང་པོའི་ཆ་ལུགས་བྲིས་ལ། སྤྱན་སྔར་ནོར་དང་། གསེར་ དང་། མུ་ཏིག་དང་། ནོར་བུ་རིན་པོ་ཆེ་ལ་སོགས་པ་གང་ཡང་རུང་བ་བཞག་ལ། དེ་ནས་དེ་བཙུད་དེ་ཐམས་ཅད་བསྟན་ནས། དམ་ཚིག་འདི་སྦྱིན་ནོ། །སངས་རྒྱས་ལ་སོགས་སེམས་དཔའ་དག །གལ་ཏེ་ཉིན་རེ་མཆོད་སྟོངས་ན། །ཁྱོད་ཀྱིས་ནོར་དང་དོན་བསགས་ པ། །ཚེ་རབས་ཀུན་དུ་འཇིག་པར་འགྱུར། །དེ་ལ་འདི་ནི་མནའི་སྙིང་པོའོ། །ཨོྃ་བཱ་བཱ་ཊ་ཊ་ཡ་སྭཱ་ཧཱ། དེ་ནས་ཆུས་དབང་བསྐུར་རོ། །དམ་ཚིག་གི་དཀྱིལ་འཁོར་རོ། །ལས་ཀྱི་དཀྱིལ་འཁོར་བྲིས་ལ་དེ་བཞིན་གཤེགས་པ་རྒྱན་ཐམས་ཅད་ཀྱིས་བརྒྱན་པར་བྱ་སྟེ། དེའི་དབུས་སུ་བཞག་ནས་དེར་བཙུད་དེ། དེ་ནས་ལས་རྣམ་པ་ལྔ་བསླབ་པ་ནི་འདི་ལྟ་སྟེ། དབང་སྦྱིན་པས་དེ་བཞིན་གཤེགས་པ་ཐམས་ཅད་ལ་མཆོད་པ་བྱའོ། །དེ་ནས་ནོར་སྦྱིན་པ་ནི་དགེ་སྦྱོང་དང་བྲམ་ཟེ་ལ་སོགས་པ་ལ་ཅི་ནུས་ཀྱིས་སྦྱིན་ནོ། །དེ་ནས་ཟས་སྦྱིན་པ་ནི་བྱོལ་སོང་རྣམས་ ལ་སྦྱིན་ནོ། །དེ་ནས་མི་འཇིགས་པའི་སྦྱིན་པ་ནི་གྱོད་ཁྲིད་ཐམས་ཅད་ལ་སྦྱིན་ནོ། །དེ་ནས་ཆོས་སྦྱིན་པ་ནི་མི་སྣང་བའི་སེམས་ཅན་རྣམས་ལ་སྦྱིན་ནོ། །ལས་ཀྱི་དཀྱིལ་འཁོར་རོ། །དེ་ནས་བསྒྲུབ་པ་འབྱུང་སྟེ་རས་ལ་བཅོམ་ལྡན་འདས་དེ་བཞིན་གཤེགས་པ་རྒྱན་ཐམས་ཅད་ཀྱིས་ བརྒྱན་པ། རྡོ་རྗེ་རིན་པོ་ཆེའི་དབང་བསྐུར་བས་དབང་བསྐུར་བ་བྲིས་ཏེ། དེའི་གཡས་ཕྱོགས་སུ་འཕགས་པ་ནམ་མཁའི་སྙིང་པོ་བཅོམ་ལྡན་འདས་ལ་དབང་བསྐུར་བའི་ཕྲེང་བས་དབང་བསྐུར་བའོ། །གཡོན་ཕྱོགས་སུ་བཅོམ་ལྡན་འདས་ཕྱག་ན་རྡོ་རྗེ་རྒྱན་ཐམས་ཅད་
- 35b
ཀྱིས་བརྒྱན་པའོ། །དེ་ནས་རས་ལ་བྲིས་པ་དེའི་སྤྱན་སྔར་འབུམ་བཟླས་པའི་མཇུག་ཏུ་ཉི་མ་ཤར་བ་ནས་བརྩམས་ཏེ། ཕྱི་དེ་ཉིན་གྱི་ཉི་མ་ཤར་གྱི་བར་དུ་བཟླས་ན་དེ་ནས་བཅོམ་ལྡན་འདས་ནམ་མཁའི་སྙིང་པོ་རས་ལ་བྲིས་པ་དེ་ལས་བྱུང་ནས་སྒྲུབ་པ་པོ་དེ་ལ་རྡོ་རྗེ་རིན་པོ་ཆེའི་དབང་ བསྐུར་བས་དབང་བསྐུར་རོ། །དབང་བསྐུར་བ་དེ་ནས་དེ་བཞིན་གཤེགས་པར་འགྱུར་རོ། །དེ་ནས་མ་བསྒྲུབས་པར་ཡང་ལས་སུ་འགྱུར་བ་ནི་འབུམ་བཟླས་ན་དོན་ཐམས་ཅད་ཕུན་སུམ་ཚོགས་པར་འགྱུར་རོ། །ཕྱག་ན་རྡོ་རྗེའི་སྤྱན་སྔར་འབུམ་བཟླས་ན། གཏེར་ཆེན་པོ་ རྙེད་དོ། །སྤྱན་རས་གཟིགས་དབང་ཕྱུག་གི་སྤྱན་སྔར་འབུམ་བཟླས་ན། སྤྱན་རས་གཟིགས་དབང་པོས་ཕུན་སུམ་ཚོགས་པ་ཐམས་ཅད་སྩོལ་བར་འགྱུར་རོ། །ནམ་མཁའི་སྙིང་པོའི་སྤྱན་སྔར་འབུམ་བཟླས་ན་རྒྱལ་སྲིད་འཐོབ་བོ། །རྡོ་རྗེ་ཁུ་ཚུར་གྱི་སྤྱན་སྔར་འབུམ་ བཟླས་ན། ནམ་མཁའ་ལ་ཁུ་ཚུར་བཅིངས་པས་གསེར་གྱི་དོང་ཙེ་འབྱུང་ངོ་། །འཇམ་དཔལ་གཞོན་ནུ་ལ་བལྟས་ཏེ་འབུམ་བཟླས་ན་ཆོས་ཀྱི་ནོར་དང་གཟུངས་ཐོབ་བོ། །དེས་ནོར་ཡང་སྐྱེ་བར་བྱེད་དོ། །རྡོ་རྗེ་འཁོར་ལོ་སྲིན་ལག་གི་སོར་མོས་མནན་ཏེ་འབུམ་བཟླས་ན་འཁོར་ ལོ་བསྐོར་བར་འགྱུར་རོ། །ནམ་མཁའི་མཛོད་ཀུན་ནས་འཁྱུད་དེ་འབུམ་བཟླས་པས་ནམ་མཁའ་ལས་ནོར་ཐམས་ཅད་དང་། ཟས་ཐམས་ཅད་ཀྱི་ཡོ་བྱད་ཟད་མི་ཤེས་པར་འགྱུར་རོ། །བྱམས་པ་ལ་བལྟས་ཏེ་འབུམ་བཟླས་ན། བཅོམ་ལྡན་འདས་བྱམས་པ་བྱང་ཆུབ་སེམས་ དཔའ་དགའ་ལྡན་གནམ་གྱི་དབང་མཆོག་བྱིན་ནས་སླར་ཡང་འོང་ངོ་། །དེ་ཕྱིན་ཅད་འདོད་པ་ཐམས་ཅད་ཀྱི་ནོར་གྱི་བདག་པོར་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བ་རྟོག་པ་ཆེན་པོའི་རྒྱལ་པོ་ལས་ནམ་མཁའི་སྙིང་པོའི་རྟོག་པའོ།། །།དེ་ནས་རྡོ་རྗེ་ཁུ་ ཚུར་གྱིས་བྱང་ཆུབ་སེམས་དཔའ་ཐམས་ཅད་འདུས་པའི་འཁོར་ཐམས་ཅད་བསྐྱོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གིས་ཀྱང་འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་དབུལ་བར་བགྱི་སྟེ།
- 36a
བདག་གིས་བསྐལ་པ་སྟོང་ཕྲག་དགུ་བཅུ་རྩ་གཅིག་པ་ལ་རྡོ་རྗེའི་རི་རབ་དེ་བཞིན་གཤེགས་པ་ལས་བླངས་ཏེ། དེས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་མོ་སྙེད་ཀྱི་སེམས་ཅན་རྣམས་འགྲུབ་པ་ཐམས་ཅད་གྲུབ་པར་བྱས་ཏེ། དེའི་བསྐྱེད་པ་ནས་དེ་བཞིན་ གཤེགས་པ་རྫོགས་ཀྱི་བར་དུའོ། །དེ་ནས་བཅོམ་ལྡན་འདས་ཀྱིས་རྡོ་རྗེ་ཁུ་ཚུར་བྱང་ཆུབ་སེམས་དཔའ་ཆེན་པོ་ལ་ལེགས་སོ་ཞེས་བྱ་བ་བྱིན་ཏེ་ལེགས་སོ་ལེགས་སོ། །རྡོ་རྗེ་ཁུ་ཚུར་ཁྱོད་ཀྱིས་སྨྲོས་ཤིག །དེ་ནས་རྡོ་རྗེ་ཁུ་ཚུར་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་ གྱི་ཁམས་ཐམས་ཅད་རབ་ཏུ་གཡོས་པར་བྱས་ནས་རང་གི་སྙིང་པོ་འདི་གསུངས་སོ། །ཨོྃ་རུ་ཊུ་རུ་ཊུ་ཧཱུྃ་མ་ཊ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་དང་། འཁོར་ཐམས་ཅད་དང་བཅས་ནས། རི་རབ་རིའི་རྩེ་མོར་བཅོམ་ལྡན་འདས་ ག་ལ་བ་དེར་ལྷགས་ཏེ། ལག་པ་གཉིས་ཀྱིས་རང་གི་ཁུ་ཚུར་གྱི་ཕྱག་རྒྱ་བཅིངས་ནས། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ལ་དམིགས་ཤིང་། བཅོམ་ལྡན་འདས་རྡོ་རྗེ་ཁུ་ཚུར་གྱི་དཀྱིལ་འཁོར་ཆེན་པོར་གྱུར་ནས་བཀོད་དོ། །དེ་ནས་རྡོ་རྗེ་ཁུ་ཚུར་གྱིས་དེ་བཞིན་གཤེགས་ པ་ཐམས་ཅད་ཕྱག་རྒྱས་བཏབ་ནས་དཀྱིལ་འཁོར་ཆེན་པོ་འདི་གསུངས་སོ། །དེ་ནས་གཞན་ཡང་རབ་བཤད་པ། །དཀྱིལ་འཁོར་ཆེན་པོ་དམ་པ་སྟེ། །རྡོ་རྗེའི་དཀྱིལ་འཁོར་འདྲ་བ་ནི། །རྡོ་རྗེ་ཁུ་ཚུར་ཞེས་གསུངས་སོ། །དེ་ཡི་དབུས་སུ་སེམས་ཆེན་པོ། །རྡོ་རྗེའི་ཁུ་ཚུར་ གཞག་པར་བྱ། །རྡོ་རྗེའི་ཁུ་ཚུར་རྡོ་རྗེར་བཅས། །ལག་པ་གཉིས་ནི་བཙིར་བར་བྱ། །དེ་ཡི་ངོས་ནི་ཐམས་ཅད་དུ། །སངས་རྒྱས་གཟུགས་རྣམས་གཞག་པར་བྱ། །དེ་དག་གི་ནི་གྲྭ་ཀུན་དུ། །བྱང་ཆུབ་སེམས་དཔའ་ཀུན་བྲིའོ། །དེ་ནས་རྡོ་རྗེ་ཁུ་ཚུར་གྱི་དཀྱིལ་འཁོར་འདིར་ རྡོ་རྗེ་སློབ་དཔོན་གྱིས་རྡོ་རྗེ་དང་བཅས་པའི་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ཏེ། །ཞུགས་ལ་འདི་བརྗོད་དོ། །ཧཱུྃ་དཀྵི་ཎི་སྨ་ར་ན་ཕཊ། དེ་ནས་བཅོམ་ལྡན་འདས་རྡོ་རྗེ་ཁུ་ཚུར་སློབ་དཔོན་ལ་གྲུབ་པར་འགྱུར་ཏེ། དེ་ལ་ཕྱག་རྒྱ་ཡང་བརྟན་པར་འགྱུར་ཞིང་སུས་ཀྱང་དབྱེ་བར་
- 36b
མི་ནུས་སོ། །དེ་ནས་སྙིང་པོ་འདིས་བདག་གི་སྙིང་གར་དགྲོལ་ལོ། །ཨོྃ་བཛྲ་མུཥྚི་མུ། དེ་ནས་སློབ་མ་གཞུག་པ་སྟེ་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་རྡོ་རྗེ་དང་བཅས་པ་ཕྲེང་བ་དང་བཅས་པར་བྱ་སྟེ། དེ་བཞིན་དུ་རས་དམར་པོས་མིག་གཉིས་བཀབ་སྟེ། དེ་ནས་འདི་ཞེས་བརྗོད་དོ། ། དེང་ཁྱེད་དེ་བཞིན་གཤེགས་པ་ཐམས་ཅད་ཀྱིས་ཕྱག་རྒྱས་བཏབ་པ་ནི་ཆོས་ཀྱི་ཕྱག་རྒྱ་དང་། རྡོ་རྗེ་འཛིན་གྱི་རྡོ་རྗེའི་ཕྱག་རྒྱས་ཀྱང་བཏབ་བོ། །ཁྱོད་ཆོས་དང་རྡོ་རྗེ་ལས་གང་འདོད། དེས་སྨྲས་པ་གཉིས་ཀའོ་ཞེ་ན། དེ་ནས་རྡོ་རྗེ་སློབ་དཔོན་གྱིས་རྡོ་རྗེ་དང་། དེ་བཞིན་གཤེགས་པའི་ ཆ་ལུགས་བླངས་ནས་ཕྲེང་བ་དེའི་མགོ་ལ་བཞག་སྟེ། དགྲོལ་བའི་སྙིང་པོ་དེ་ཉིད་ཀྱིས་ཕྱག་རྒྱ་སྙིང་གར་དགྲོལ་ལོ། །དེ་ནས་ལག་ཏུ་སྦྱིན་པ་ནི་ལག་པ་གཡོན་པར་རྡོ་རྗེའོ། །གཡས་པར་དེ་བཞིན་གཤེགས་པའོ། །དེ་སྟེ་དེ་བཞིན་གཤེགས་པའོ་ཞེས་ཟེར་ན་དེ་ནས་དེ་བཞིན་གཤེགས་པ་ ཉིད་སྦྱིན་ནོ། །དེ་སྟེ་རྡོ་རྗེའི་ཞེས་ཟེར་ན་དེའི་ལག་པ་གཡོན་པར་རྡོ་རྗེ་བྱིན་ལ་འདི་སྐད་བསྒོ་ཤིག །འདི་གཉིས་ནི་ཁྱོད་ཀྱི་གྲུབ་པར་དམིགས་ལ་རྟག་ཏུ་མཆོད་པ་གྱིས་ཤིག །དེ་ནས་གདོང་གཡོགས་པ་བཀྲོལ་ལ་དཀྱིལ་འཁོར་སྟོན་ལ་འདི་ཞེས་སྨྲོས་ཤིག །དེ་བཞིན་གཤེགས་ པ་ཐམས་ཅད་ཀྱི། །ལུས་དང་ངག་སེམས་རྡོ་རྗེ་རྣམས། །བསྡུས་པ་ཁུ་ཚུར་ཞེས་བྱ་སྟེ། །བཅིངས་ན་རྡོ་རྗེ་ཁུ་ཚུར་བཤད། །དེ་ནས་སྙིང་པོ་བྱིན་ལ་ཕྱག་རྒྱ་བཅིངས་པ་སློབས་ཤིག །དམ་ཚིག་གི་ཁུ་ཚུར་ཞེས་བྱ་བའི་དཀྱིལ་འཁོར་རོ། །དེ་ནས་ཕྱག་རྒྱའི་དཀྱིལ་འཁོར་འབྱུང་སྟེ། ། དཀྱིལ་འཁོར་ཆེན་པོའི་ཚུལ་བཞིན་དུ། །དཀྱིལ་འཁོར་ཐམས་ཅད་ཡང་དག་བྲི། །དེ་ཡི་དབུས་སུ་ཅི་རིགས་པར། །སངས་རྒྱས་སྐུ་ལུས་གཞག་པར་བྱ། །ཐམས་ཅད་རྒྱན་གྱིས་བརྒྱན་པ་ཡི། །རྡོ་རྗེ་ཁུ་ཚུར་ཀུན་འཛིན་པའོ། །དེ་ཡི་ངོས་ནི་ཐམས་ཅད་དུ། །ཕྱག་རྒྱ་བཞི་ ནི་བྲི་བར་བྱ། །ཟླ་བའི་དཀྱིལ་འཁོར་དབུས་རྣམས་སུ། །རྡོ་རྗེ་རིན་ཆེན་ཡང་དེ་བཞིན། །དེ་བཞིན་རྡོ་རྗེ་པད་མོའི་དབུས། །རྡོ་རྗེ་རྒྱ་གྲམ་བྲི་བར་བྱ། །གྲྭ་ཡི་ཕྱོགས་རྣམས་ཐམས་ཅད་དུ། །མཆོད་པ་རྣམ་བཞི་བྲི་བར་བྱ། །དེ་ནས་བཙུད་ནས་ཕྱག་རྒྱ་ཀུན། །བཅིང་བ་ཡང་ནི་
- 37a
བསླབ་པར་བྱ། །སྒྲུབ་པ་གསང་བ་དག་དང་ནི། །བསྐུལ་བ་གསང་བ་བསླབ་པར་བྱ། །འདི་རྣམས་ཐམས་ཅད་ཀུན་བྲིས་ནས། །སྒྲུབས་ཤིག་ཅེས་ནི་བརྗོད་པར་བྱ། །ཕྱག་རྒྱའི་དཀྱིལ་འཁོར་རོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ། དེ་ བཞིན་དུ་མཚན་མ་བཞག་ནས་འདི་ཞེས་བརྗོད་དོ། །ཅི་སྟེ་དཀྱིལ་འཁོར་མ་མཐོང་ན། །ཕྱག་རྒྱ་ཤེས་པར་བསྟན་ན་ནི། །རྡོ་རྗེ་རིན་ཆེན་རྒྱལ་བ་དང་། །སྣ་ཚོགས་པས་ཁྱོད་གསོད་པར་འགྱུར། །དམ་ཚིག་གི་དཀྱིལ་འཁོར་རོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ། དཀྱིལ་འཁོར་དེ་བཞིན་དུ་བྲིས་ལ་བཅོམ་ལྡན་འདས་རྡོ་རྗེ་ཁུ་ཚུར་གྱི་སྤྱན་སྔར་ཕྱག་རྒྱའི་ལས་བསླབ་བོ། །དེ་ལ་ཕྱག་རྒྱ་བཅིངས་པ་ནི་འདིའོ། །རྡོ་རྗེ་བཅིང་བ་ཀུན་བྱས་ལ། །སོར་མོ་ཐམས་ཅད་དགུག་བྱ་སྟེ། །རྡོ་རྗེ་འབེབས་པའི་ཕྱག་རྒྱ་དང་། །རྡོ་རྗེ་ཁུ་ཚུར་ཕྱག་རྒྱ་བཅིང་། ། དེ་ནས་ལག་པའི་ཕྱག་རྒྱ་བཅིང་ངོ་། །དེ་ལྟ་བུར་མི་ལྡན་ན་འདོད་པ་ཐམས་ཅད་ཀྱི་མཆོག་བསྒྲུབ་པས་ནི་དམ་ཚིག་ཆེན་པོ་ཡང་དག་པའི་ཡེ་ཤེས་ཀྱི་སྙིང་པོ་ཐང་ཅིག་བཟླས་པས་ཕྱག་རྒྱ་ཐམས་ཅད་བཅིང་བར་བྱ་སྟེ། ཐམས་ཅད་ཀྱི་ནི་མ་ཡིན་ནོ། །ལས་ཀྱི་དཀྱིལ་འཁོར་རོ། ། དེ་ནས་བཅོམ་ལྡན་འདས་རྡོ་རྗེ་ཁུ་ཚུར་གྱི་སྒྲུབ་པ་འབྱུང་སྟེ། འོ་མ་འཐུང་ཞིང་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ནས་འབུམ་བཟླས་ན། སྔར་བསྙེན་པ་བྱས་པར་འགྱུར་རོ། །དེ་ནས་རས་ལ་བྲི་བར་བྱ་སྟེ། རས་ལ་བཅོམ་ལྡན་འདས་འཕགས་པ་རྡོ་རྗེ་ཁུ་ཚུར་རྒྱན་ ཐམས་ཅད་ཀྱིས་བརྒྱན་པ་བྲིས་ལ་ཕྱག་གཉིས་ཀྱིས་རྡོ་རྗེ་དང་བཅས་པའི་རྡོ་རྗེ་ཁུ་ཚུར་བཅིངས་པ་རྡོ་རྗེ་དབང་བསྐུར་བའི་དར་གྱིས་བཅིངས་ལ། དེའི་ཐད་འཁོར་ཐམས་ཅད་དུ་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྣམས་བྱའོ། །དེ་བཞིན་གཤེགས་པ་དེ་དག་ཀྱང་ ཕྱག་གཉིས་ཀ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཁུ་ཚུར་དུ་བཅིང་བར་བྱའོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཏིང་ངེ་འཛིན་དུ་སྙོམས་པར་ཞུགས་པར་བྱའོ། །དེ་ནས་དེའི་སྤྱན་སྔར་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་བཅིངས་ལ་སྟོང་ཕྲག་བརྒྱ་བཟླས་པའི་
- 37b
མཇུག་ཏུ་ཞག་བདུན་སྨྱུངས་ནས་བདག་དེ་བཞིན་གཤེགས་པ་ཐམས་ཅད་ཀྱི་སྐུར་བསྒོམས་ལ། མཚན་ཐལ་བྱུང་དུ་བཟླས་སོ། །དེ་ནས་ནམ་ཕྱེད་ནས་བདུད་ཀྱི་ལས་སྣ་ཚོགས་སྣང་བར་འགྱུར་རོ། །དེ་ནས་འདི་བརྗོད་ཅིག །ཨོྃ་བཛྲ་མུཥྚི་ཧ་ན་ཧ་ན་སརྦ་མཱ་ར་ཎ་ཕཊ། དེ་ནས་ ནང་པར་གྱི་དུས་ན་བཅོམ་ལྡན་འདས་ཐམས་ཅད་བྱོན་ཏེ་ལུས་ཀུན་ཏུ་འཇུག་གོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །ཡང་རས་ཀྱི་ཆོ་ག་འབྱུང་སྟེ། རས་ལ་བཅོམ་ལྡན་འདས་དེ་བཞིན་གཤེགས་པ་རྒྱན་ཐམས་ཅད་ཀྱིས་བརྒྱན་ པ་བྲིས་ཏེ། དེའི་གཡས་སུ་བཅོམ་ལྡན་འདས་རྡོ་རྗེ་ཁུ་ཚུར་རྒྱན་ཐམས་ཅད་ཀྱིས་བརྒྱན་པ། །སྐུ་མདོག་སྡོ་བསངས་ཨུཏྤལ་སྔོན་པོ་ལྟ་བུ་རྡོ་རྗེ་ཁུ་ཚུར་གྱི་ཕྱག་རྒྱ་གཡོན་པའི་ཁུ་ཚུར་གྱིས་རྡོ་རྗེ་བསྣམས་པ། གཡས་པ་མཆོག་སྦྱིན་པ་སྟེ། དེའི་གཡས་སུ་བཅོམ་ལྡན་འདས་མ་རྡོ་རྗེའི་ དམ་ཚིག་གི་ཁུ་ཚུར་ཅན་རྒྱན་ཐམས་ཅད་ཀྱིས་བརྒྱན་པ་གཞོན་ནུ་མ་དམ་ཚིག་གི་ཁུ་ཚུར་གྱིས་རྡོ་རྗེ་དམ་དུ་འཚིར་བ་མདོག་དམར་པོར་བྱའོ། །དེའི་ཐད་དུ་རྡོ་རྗེའི་གསལ་ཕུར་མ་རྒྱན་ཐམས་ཅད་ཀྱིས་བརྒྱན་པ། སྤྱན་གསུམ་པ་ལག་པ་གཉིས་ཀྱིས་རྡོ་རྗེ་གསལ་ཕུར་ཐོགས་པའོ། ། བཅོམ་ལྡན་འདས་ཀྱི་གཡོན་ཕྱོགས་སུ་སྤྱན་རས་གཟིགས་ཀྱི་དབང་པོ་ཐོར་ཚུགས་ཀྱི་དབུ་རྒྱན་ཅན་རྒྱན་ཐམས་ཅད་ཀྱིས་བརྒྱན་པ། པདྨ་དང་མཆོག་སྦྱིན་གྱི་ཕྱག་ཏུ་བྱས་ལ། དེའི་གཡོན་དུ་པད་མོ་ཆེན་པོའི་རྡོ་རྗེ་བྱང་ཆུབ་སེམས་དཔའ་རྡོ་རྗེའི་སྡེ་ཞེས་བྱ་བའོ། །དེའི་གཡོན་དུ་རྡོ་རྗེའི་དཔལ་མོ་ དང་རྡོ་རྗེ་ཕོ་ཉ་མའོ། །རྡོ་རྗེ་དཔལ་མོ་ནི་གསེར་གྱི་སྐུ་མདོག་གོ། །དཔལ་གྱི་གཟུགས་འཆང་བ་ཕྱག་ན་རྡོ་རྗེ་འཛིན་པའོ། །རྡོ་རྗེ་ཕོ་ཉ་མོ་ནི་མདོག་སྔོན་མོ་ལ་རྡོ་རྗེ་འཁར་བ་འཆང་བའོ། །དེ་ནས་ཟླ་བ་ཡར་གྱི་ངོ་ཚེས་གཅིག་ནས་བརྩམས་ཏེ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ནས་ སྟོང་ཕྲག་བརྒྱ་བཟླས་ན། གཟུགས་ཀྱི་རས་དེ་ལས་ཕཊ་ཅེས་བྱ་བ་ཐོས་ན། དེ་ནས་བཅོམ་ལྡན་འདས་ཕྱག་ན་རྡོ་རྗེ་འགྲུབ་པར་འགྱུར་ཏེ། དེ་ཕྱིན་ཅད་ནམ་མཁའི་དཀྱིལ་ན་སྤྱོད་ཅིང་འདོད་ན་མི་སྣང་བར་ཡང་འགྱུར། དཔག་ཚད་སྟོང་དུ་ཕར་ཡང་འགྲོ་ཞིང་གྱེན་དུ་ཡང་འགྲོའོ། །ཅི་འདོད་པའི་
- 38a
གཟུགས་སུ་འགྱུར་རོ། །ཀུན་ཏུ་འཁྱིལ་པས་འཁྱིལ་པའི་སྐྲ་ཅན་ལོ་བཅུ་དྲུག་ལོན་པའི་ལུས་སུ་གྱུར་ནས། འདོད་པའི་ལོངས་སྤྱོད་ཐམས་ཅད་ལ་ཅི་འདོད་པ་བཞིན་ལོངས་སྤྱོད་པར་འགྱུར་རོ། །རྡོ་རྗེ་ཁུ་ཚུར་བཅིངས་པས་སེམས་ཅན་ཐམས་ཅད་ལ་ཕན་ གདགས་པ་དང་། ཆད་པས་གཅད་པ་ལ་སོགས་པ་ཐམས་ཅད་ནུས་པར་འགྱུར་རོ། །གཟུགས་བཟང་པོ་བསྐལ་པར་གནས་ཤིང་། རྒ་བ་དང་ཤི་བར་ཡང་མི་འགྱུར་རོ། །ཡང་ཆོ་ག་གཞན་ཏེ་རས་ལ་བཅོམ་ལྡན་འདས་དེ་བཞིན་གཤེགས་པ་བྲིས་ལ། དེའི་གཡས་ཕྱོགས་ སུ་ཕྱག་ན་རྡོ་རྗེ་རྒྱན་ཐམས་ཅད་ཀྱིས་བརྒྱན་པ་སྐུ་མདོག་ཨུཏྤལ་སྔོན་པོའི་ཁ་དོག་ཕྱག་ན་རྡོ་རྗེ་དང་བཅས་པས་རྡོ་རྗེ་ཁུ་ཚུར་བཅིངས་ཏེ་སྦྱར་ལ་བཅོམ་ལྡན་འདས་ལ་འདུད་པར་བྱ། དེའི་གཡོན་ཕྱོགས་སུ་བཅོམ་ལྡན་འདས་མ་དམ་ཚིག་གི་ཁུ་ཚུར་རྒྱན་ཐམས་ཅད་ཀྱིས་བརྒྱན་པ་ཡིད་ཙམ་ འདུད་པས་བཅོམ་ལྡན་འདས་ལ་ཕྱག་འཚལ་བ། ལག་པ་གཡས་པ་ན་ཨ་མྲའི་འབྲས་བུ་འབུལ་བ། གཡོན་པ་ན་རྡོ་རྗེ་ཁུ་ཚུར་གྱིས་རྡོ་རྗེ་འཛིན་ཏོ། །དེ་ནས་རས་ལ་བྲིས་པའི་སྤྱན་སྔར་ཞག་གསུམ་སྨྱངས་ལ། གུ་གུལ་གྱི་རིལ་བུ་སྲན་མ་ཙམ་དུ་རུ་སྐའི་འབྲུ་མར་ལ་ བསྙུགས་པ་བརྒྱད་སྟོང་དུ་བ་མེད་པའི་མདག་མ་ལ་བསྲེག་གོ། །དེ་ནས་གཟུགས་དེ་འགུལ་ཏེ་བཅོམ་ལྡན་འདས་ཀྱི་ཞལ་ནས་འོད་ཟེར་འབྱུང་ངོ་། །དེ་ནས་བཅོམ་ལྡན་འདས་རྡོ་རྗེ་ཁུ་ཚུར་གྱིས་མཆོག་སྩོལ་བ་ནི་རྒྱལ་པོའམ། འཁོར་ལོ་བསྐོར་བའམ། ལྷ་མ་ཡིན་པ་དབང་ བའམ། ས་བརྗོད་པའམ། སའི་འོག་བརྗོད་པའམ། ཁམས་བརྗོད་པའམ། འདོད་པའི་ཁམས་མི་སྣང་བའམ། ནམ་མཁའ་ལ་འགྲོ་བར་འགྱུར་རོ། །ཡང་བསྒྲུབ་པ་གཞན་གྱི་ཆོ་ག་སྟེ། རས་ལ་བཅོམ་ལྡན་འདས་རྡོ་རྗེ་ཁུ་ཚུར་རྒྱན་ཐམས་ཅད་ཀྱིས་བརྒྱན་པ་ བྲིས་ལ། དེ་བཞིན་དུ་རྡོ་རྗེ་དང་བཅས་པའི་ཕྱག་གཉིས་ཀྱིས་རྡོ་རྗེ་ཁུ་ཚུར་བཅིངས་པ་ཨུཏྤལ་སྔོན་པོའི་མདོག་ཏུ་བྱས་ལ་དེའི་སྤྱན་སྔར་དམ་ཚིག་གི་རྡོ་རྗེ་ཁུ་ཚུར་བཅིངས་ཏེ། སྟོང་ཕྲག་བརྒྱ་བཟླས་པའི་མཇུག་ཉིན་མཚན་གསུམ་ཐལ་བྱུང་བཟླས་ན། ནམ་ཕྱེད་ནས་བཅོམ་ལྡན་
- 38b
འདས་ཉིད་བྱོན་ཏེ་མཆོག་སྩོལ་བར་འགྱུར་རོ། །རས་སམ་ཤིང་ལེབ་བམ། རྩིག་ངོས་ལ་བཅོམ་ལྡན་འདས་མ་རྡོ་རྗེ་ཁུ་ཚུར་དེ་བཞིན་དུ་རྡོ་རྗེ་དང་ཨ་མྲའི་འབྲས་བུ་ཐོགས་པར་བྱས་ཏེ། དེའི་སྤྱན་སྔར་སྟོང་ཕྲག་བརྒྱ་བཟླས་ན། ཕྱག་རྒྱ་ཐམས་ཅད་བཅིངས་པ་ཙམ་གྱིས་ལས་ ཐམས་ཅད་གདོན་མི་ཟ་བར་བྱེད་པར་འགྱུར་རོ། །དེ་ནས་མ་བསྒྲུབས་པའི་ལས་རྣམས་འབྱུང་སྟེ། རྡོ་རྗེ་དམ་ཚིག་གི་ཁུ་ཚུར་བཅིངས་ནས་འབུམ་བཟླས་ན། ཁུ་ཚུར་བཅིངས་པས་ནམ་མཁའ་ལ་འགྲོ་བར་འགྱུར་རོ། །ལག་པ་གཡོན་པས་རྡོ་རྗེ་དང་བཅས་པའི་རྡོ་རྗེ་ཁུ་ཚུར་ བཅིངས་ན། ཕྱག་ན་རྡོ་རྗེ་ལ་སོགས་པའི་གཟུགས་འབྱུང་བར་འགྱུར་བ་ནི་འབུམ་བཟླས་པས་སོ། །ལག་པ་གཡོན་པས་རྡོ་རྗེ་ཁུ་ཚུར་བཅིངས་ཏེ་སྟོང་ཕྲག་བརྒྱ་བཟླས་ན། ཁུ་ཚུར་བཅིངས་པ་དེས་མི་སྣང་བར་འགྱུར་ཏེ། ཕྲལ་ན་སྣང་བར་འགྱུར་རོ། །རྡོ་རྗེ་བཅིངས་པའི་ ཁུ་ཚུར་བྱས་ལ་འབུམ་བཟླས་ན། ཁུ་ཚུར་བཅངས་བས་བཅིང་བ་དང་། རེངས་པར་བྱ་བ་དང་། གཉིད་ལོག་པར་བྱ་བ་ཐམས་ཅད་ནུས་པར་འགྱུར་རོ། །ནམ་མཁའ་ལ་རྡོ་རྗེ་ཁུ་ཚུར་བཅངས་ཏེ་འབུམ་བཟླས་ན། རྡོ་རྗེ་ཁུ་ཚུར་བྱ་བས་པ་ཙམ་གྱིས་ནམ་མཁའ་ལ་ནོར་ དང་། གསེར་དང་། མུ་ཏིག་དང་། རྒྱན་དང་། རིན་པོ་ཆེ་དང་། གོས་དང་། བཟའ་བ་དང་། བཏུང་བ་དང་། མེ་དང་། ཆུ་དང་། མེ་ཏོག་དང་། འབྲས་བུ་དང་། མྱུ་གུ་དང་། ཡི་གེ་དང་། འཐབ་ཆ་དང་། སྟོན་སྐྱོབས་དང་། མཚོན་ཆ་དང་། གླེགས་བམ་ དང་། རྟོག་པ་དང་། མདོ་སྡེ་དང་། སངས་རྒྱས་ཀྱི་སྐུ་ལ་སོགས་པ་དངོས་པོ་གནས་པ་དང་། འགྲོ་བ་ཅི་འདོད་པ་དགུག་པར་བྱེད་དོ། གཡས་པ་རྡོ་རྗེ་ཁུ་ཚུར་བཅངས་ལ་འབུམ་བཟླས་ན། རྡོ་རྗེ་ཁུ་ཚུར་བསྟན་པས་གནས་པ་དང་། འགྲོ་བ་ཐམས་ཅད་དགུག་པ་དང་། འདྲེན་པ་དང་འགྱེལ་བར་ནུས་པར་འགྱུར་རོ། །ཁུ་ཚུར་སྒྱུར་བས་ཐམས་ཅད་གཏན་འཕོ་ནུས་པར་འགྱུར་རོ། །གཡས་པས་རྡོ་རྗེ་ཁུ་ཚུར་བཅིངས་ལ་སྟོང་ཕྲག་བརྒྱུ་བཟླས་ན། རྡོ་རྗེ་ཁུ་ཚུར་བྱབས་པས་ཐམས་ཅད་ལས་ནོར་དང་། གསེར་དང་། རྒྱན་དང་། གོས་དང་།
- 39a
མཚོན་ཆ་དང་། མེ་ཏོག་དང་། འབྲས་བུ་ལ་སོགས་པ་དངོས་པོ་ཐམས་ཅད་འགུགས་སོ། །གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལས་དམ་པ་ཐམས་ཅད་ཀྱང་འགུགས་སོ། །བུད་མེད་ཀྱི་ནུ་མ་དང་། མངལ་ཕྱོགས་དང་། མིག་དང་། སྣ་དང་། མཆུ་དང་། རྣ་བ་དང་། མགོ་དང་། བརླ་དང་། སྐ་རགས་དང་། གསང་སྤུ་ལ་སོགས་པ་དངོས་པོ་ཐམས་ཅད་ཀྱང་འགུགས་སོ། །བཀྲོལ་ན་ཐར་བར་འགྱུར་རོ། །ཉིན་ཞག་གཅིག་སྨྱུངས་ལ་ལག་པ་གཉིས་རྡོ་རྗེ་ཁུ་ཚུར་བཅངས་ཏེ་སྟོང་ཕྲག་བརྒྱ་བཟླས་ན། དེ་ཕྱིན་ཅད་ཁུ་ཚུར་ བཅངས་པས་ལས་ཐམས་ཅད་བྱེད་དོ། །དེ་ལ་ལས་རྣམས་ནི་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བ་དང་། རེངས་པར་བྱ་བ་དང་། རྨུགས་པར་བྱ་བ་དང་། རྒྱས་གདབ་པ་དང་། གཉིད་ལོག་པ་དང་། བསླང་བ་དང་། དྲང་བ་དང་། བསྒྱེལ་ བ་དང་། བརྡབས་པ་དང་། བསྐྲད་པ་དང་། དབྱེ་བ་དང་། གོ་བཟློག་པ་དང་། གཏན་འཕོ་བ་དང་། གསོ་བ་དང་། སྒྱུ་མ་ཐམས་ཅད་བསྟན་པ་དང་། དུས་ཚིགས་བསྒྱུར་བ་དང་། ས་ལ་སོགས་པ་གཡོ་བ་དང་། ཐམས་ཅད་ལ་དབབ་པ་དང་། དཀྱིལ་འཁོར་དུ་གཞུག་ པ་དང་། གར་བྱེད་པ་དང་། གླུ་ལེན་པ་དང་། སྔོན་མ་བྱུང་བའི་སྦྱོར་བ་དང་། སོ་སོར་ལུང་སྟོན་པ་དང་། འཁྲུལ་འཁོར་ཐམས་ཅད་གཞོམ་པ་དང་། སྒོ་ཐམས་ཅད་དབྱེ་བ་དང་། གདོན་ཐམས་ཅད་འཇུག་པ་དང་། དུག་ཐམས་ཅད་བསླང་བ་དང་། མ་རུངས་པར་བྱ་བ་དང་། ཐམས་ཅད་སྤོ་བ་དང་། ཐམས་ཅད་ཀྱི་ཕྱག་རྒྱ་གཞོམ་པ་དང་། ཐམས་ཅད་འགེགས་པ་དང་། གས་པ་སྦྱར་བ་དང་། སྤྲུལ་བསྐྲད་པ་དང་། གཟུང་བ་དང་། གཏང་བ་དང་། སེར་བ་དང་། ཆར་དབབ་པ་དང་། གློག་དབྱུང་བ་དང་། ཐམས་ཅད་སླར་གཅད་པ་དང་། སྔན་ ཆད་མེད་པའི་གོས་དང་། རྒྱན་དང་། རིན་པོ་ཆེ་དང་། མེ་ཏོག་དང་། འབྲས་བུ་དང་། སྐྱེས་པ་དང་། བུད་མེད་དང་། བྱ་དང་རི་དགས་དགུག་པ་དང་། གཏོང་བ་དང་། གཟུགས་མང་པོ་སྟོན་པ་དང་། མི་སྣང་བ་དང་། ནམ་མཁའ་ལ་འགྲོ་བ་བསྟན་པ་ལ་སོགས་པ་འདོད་པ་
- 39b
བཞིན་ལས་ཐམས་ཅད་བྱེད་པར་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་རྡོ་རྗེ་ཁུ་ཚུར་གྱི་རྟོག་པའོ།། །།དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །བཅོམ་ ལྡན་འདས་བདག་གིས་ཀྱང་རང་གི་སྙིང་པོ་འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་འདིར་སྩལ་བར་བགྱི་སྟེ། གང་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་མཛོད་བརྗོད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་ པ་ལ་རིགས་ཀྱི་བུ་ཁྱོད་ཀྱིས་སྨྲོས་ཤིག་ཅེས་གསུངས་སོ། །དེ་ནས་འཇམ་དཔལ་གཞོན་ནུར་གྱུར་པས་སྨྲས་པ། ཨ་ར་པ་ཙ་ན། དེ་ནས་འདི་བརྗོད་མ་ཐག་ཏུ་དེ་བཞིན་གཤེགས་པ་ཐམས་ཅད་ཀྱི་ཆོས་ཐམས་ཅད་མཉམ་པ་ཉིད་ལས་ཡི་གེ་མཉམ་པ་ཉིད་སེམས་ཅན་ཐམས་ཅད་ ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་གྲུབ་པ་ཐོབ་པར་འགྱུར་བ་བཤད་དོ། །དེ་ནས་དཀྱིལ་འཁོར་འབྱུང་སྟེ། འཁོར་ལོའི་དཀྱིལ་འཁོར་ཡར་གྱི་ངོ་ཚེས་བཅུ་བཞིའམ་བཅོ་ལྔ་ལ་བྲིས་ཏེ། དེའི་དབུས་ཀྱི་ལྟེ་བར་འཇམ་དཔལ་བཞུགས་པར་བྱའོ། །རྡོ་རྗེ་རལ་གྲི་དང་གླེགས་ བམ་ཐོགས་པར་བྱས་ལ། དེའི་ཐད་འཁོར་ཐམས་ཅད་དུ་ཡི་གེ་ཨ་ར་པ་ཙ་ན་ལ་སོགས་པའི་ཕྲེང་བ་བྲི་བར་བྱའོ། །དེ་ནས་སློབ་དཔོན་གྱིས་རྡོ་རྗེ་རལ་གྲི་དམ་ཚིག་གི་ཕྱག་རྒྱ་བཅིངས་ལ་ཞུགས་ཏེ། །ནིཥྤྲ་པཉྩཱ་གྲ་ཞེས་བྱ་བའི་ཡི་གེ་འདི་ལྔ་བརྗོད་དོ། །དེ་ནས་བཅོམ་ལྡན་འདས་ཀྱིས་ སློབ་དཔོན་ལ་ཐོགས་པ་མེད་པའི་སྤོབས་པ་ཡང་སྩོལ་ཏེ། དེ་ཕྱིན་ཅད་བཅོམ་ལྡན་འདས་ཀྱིས་ནམ་མཁའ་ལ་ཡི་གེར་བྲིས་ཏེ་ཐམས་ཅད་གསུང་ངོ་། །དེ་བཞིན་དུ་སློབ་མ་བཅུག་སྟེ། འདི་ཞེས་སྨྲོས་ཤིག །དེང་ཁྱོད་ཀྱིས་དེ་བཞིན་གཤེགས་པའི་ཆོས་ཐོབ་པར་འགྱུར་གྱིས། །སྙིང་པོ་ འདི་ཁྱོད་ཀྱིས་སུ་ལ་ཡང་མ་སྨྲ་ཤིག །དེ་ལ་གསང་བའི་ཡི་གེ་འདི་རྣམས་སོ། །ཨ་ར་པ་ཙ་ན་ཞེས་བྱ་བ་སྟེ། འདོད་པ་ཐམས་ཅད་ཐོབ་བོ། །དེ་ཅིའི་ཕྱིར་ཞེ་ན། ཨ་ཞེས་བྱ་བ་ནི་འདོད་པའོ། །ར་ཞེས་བྱ་བ་ནི་ཆགས་པའོ། །པ་ཞེས་བྱ་བ་ནི་དོན་དམ་པའོ། །ཙ་ཞེས་བྱ་བ་
- 40a
ནི་སྤྱོད་པའོ། །ན་ཞེས་བྱ་བ་ནི་རང་བཞིན་མེད་པའོ། །དེ་ལྟར་འདོད་པ་དང་། ཆགས་པ་དང་། དོན་དམ་པ་དང་། སྤྱོད་པ་དང་། རང་བཞིན་མེད་པ་ཉིད་ཀྱི་སྙིང་པོ་འདི་བསྒོམས་ཏེ་བསྒྲུབས་ན། འདོད་པ་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ནི་ འདོད་པ་ཐམས་ཅད་ཀྱི་སྣོད་ཡིན་ཏེ་དེ་བས་ན་སྙིང་པོ་འདིས་དེ་བཞིན་གཤེགས་པ་དང་། རྡོ་རྗེ་འཛིན་ཀྱང་མྱུར་དུ་ཐོབ་པར་འགྱུར་རོ། །དེ་ནས་ཕྱག་རྒྱ་བཅིང་བ་བསླབ་བོ། །སྤྲོས་པ་མེད་པའི་མཆོག་ཅེས་བྱའོ། །དེ་ནས་རལ་གྲིའི་དཀྱིལ་འཁོར་འབྱུང་སྟེ། དེ་བཞིན་དུ་རྡོ་རྗེ་དཀྱིལ་འཁོར་ བྲིས་ལ་དེའི་དབུས་སུ་རལ་གྲི་བཞག་སྟེ། མདུན་དུ་སྙིང་པོ་འདི་བསྒྲུབས་ན། དེས་འཇམ་དཔལ་གཞོན་ནུར་གྱུར་པ་བསྒྲུབས་པར་འགྱུར་རོ། །རྡོ་རྗེ་རལ་གྲིའི་དཀྱིལ་འཁོར་རོ། །དམ་ཚིག་གི་དཀྱིལ་འཁོར་ནི་དཀྱིལ་འཁོར་ཆེན་པོ་ཚུལ་བཞིན་དུ་བྲིས་ལ་ཞུགས་ནས་འདི་ཞེས་བརྗོད་དོ། ། ཨ་ཀཱ་རོ་མུ་ཁྃ་སརྦ་དྷརྨྨཱ་ཏཱྃ། ཨཱདྱ་ནུ་ཏྤནྣ་ཏྭཱ་ཏ། །ཨ་ཞེས་བྱ་བ་ནི་ཆོས་ཐམས་ཅད་ཀྱི་སྒོ་སྟེ། ཐོག་མ་ནས་མ་སྐྱེས་པའི་ཕྱིར་རོ་ཞེས་ནང་པར་ལངས་ནས་ཉིན་རེ་ལན་རེ་བརྗོད་ན། མཚམས་མེད་པ་ཐམས་ཅད་ཀྱིས་མི་གོས་སོ། །དམ་ཚིག་གི་དཀྱིལ་འཁོར་རོ། །དེ་ནས་ལས་ཀྱི་དཀྱིལ་ འཁོར་འབྱུང་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དཀྱིལ་འཁོར་གྱི་དབུས་སུ་བཞག་ནས་མཆོད་པ་རྣམ་པ་བཞིས་མཆོད་པ་ནི་འདྲི་བ་དང་། ཀློག་པ་དང་། ཁ་ཏོན་བྱེད་པ་དང་། སྒོམ་པས་སོ། ལས་ཀྱི་དཀྱིལ་འཁོར་རོ། །དེ་ནས་བསྒྲུབ་པར་འདོད་པས་དཀྱིལ་འཁོར་ཆེན་པོའི་ཚུལ་ དུ་རས་ལ་བྲིས་ནས། ཡི་གེ་ཕྲེང་བ་ཐམས་ཅད་བརྗོད་དེ་འདི་སྐད་དུ་ཆོས་ཐམས་ཅད་ནི་རང་བཞིན་གྱི་བསྒྲུབ་པའོ་ཞེས་ཀྱང་བརྗོད་ནས་ཡི་གེ་འདི་འབུམ་བཟླས་ན། སྤོབས་པ་མི་ཟད་པར་འཇམ་དཔལ་དང་མཚུངས་པ་དང་། ནམ་མཁའ་ལ་འགྲོ་བར་འགྱུར་རོ། །དེ་ནས་མ་བསྒྲུབས་ ཀྱང་ལས་སུ་འགྱུར་བ་ནི། ལན་གཅིག་བཟླས་པས་སྡུག་བསྔལ་ཐམས་ཅད་ལས་གྲོལ་ལོ། །གཉིས་བཟླས་པས་མཚམས་མེད་པ་ཐམས་ཅད་ལྷག་མ་མ་ལུས་པར་ཟད་པར་འགྱུར་རོ། །གསུམ་བཟླས་པས་ཏིང་ངེ་འཛིན་མངོན་དུ་འགྱུར་རོ། །བཞི་བཟླས་པས་
- 40b
དྲན་པ་དང་ལྡན་པར་འགྱུར་རོ། །ལྔ་བཟླས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །སྐུ་གདུང་དང་བཅས་པའི་མཆོད་རྟེན་ལ། ཡི་གེ་ཕྲེང་བ་གཡས་ཕྱོགས་ནས་ཨ་ཞེས་བྱ་བའི་དྲུང་དུ་ན་ཞེས་བྱ་བ་ཕྱིན་གྱི་བར་དུ་བྲིའོ། །དེ་ནས་ བསྐོར་ཞིང་ཡི་གེ་འབུམ་བཟླས་ཏེ། ཡི་གེ་རེ་རེ་འབུམ་རྫོགས་ན། བཅོམ་ལྡན་འདས་དེ་བཞིན་གཤེགས་པ་དང་། འཇམ་དཔལ་དང་། ཕྱག་ན་རྡོ་རྗེ་ཅིག་ཆར་འགྲུབ་སྟེ། ཉིན་རེ་ཞིང་མཐོང་བར་བསྟན་ནས། ཆོས་བཤད་དེ་སླར་གཤེགས་སོ། །ཚེ་འདི་ཉིད་ ལས་སངས་རྒྱས་པ་མན་ཆད་ཀྱང་སྩོལ་ཏོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་འཇམ་དཔལ་གཞོན་ནུའི་རྟོག་པའོ།། །།དེ་ནས་བཅོམ་ལྡན་འདས་ལ་རྡོ་རྗེ་འཁོར་ལོ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་གིས་ཀྱང་འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་འདིར་སྙིང་པོ་འདི་སྩལ་བར་བགྱི་སྟེ། གང་བརྗོད་པ་ཙམ་གྱིས་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་རྡོ་རྗེ་འཁོར་ལོ་ བྱང་ཆུབ་སེམས་དཔའ་ལ་བསྐུལ་ལོ། །དེ་ནས་རྡོ་རྗེ་འཁོར་ལོ་བྱང་ཆུབ་སེམས་དཔས་བཅོམ་ལྡན་འདས་ལ་རང་གི་སྙིང་པོ་ཕུལ་བ། །ཨོྃ་བཛྲ་ཙཀྲ་ཧཱུྃ། དེ་ནས་འདི་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་དང་། སེམས་ཅན་ཐམས་ཅད་ ཀྱིས་དཀྱིལ་འཁོར་དེ་ཉིད་དུ་ཞུགས་སོ། །དེ་ནས་རྡོ་རྗེ་འཁོར་ལོ་བྱང་ཆུབ་སེམས་དཔས་དཀྱིལ་འཁོར་འདི་བཤད་དོ། །རྡོ་རྗེ་འཁོར་ལོ་བཞིན་བྲིས་ལ། །རྡོ་རྗེ་འཁོར་ལོ་བདག་ཆེ་བ། །རང་གི་ལག་ན་ཕྱག་རྒྱ་ཐོགས། །དེ་ཡི་དབུས་སུ་གཞག་པར་ བྱ། །དེ་ཡི་ཐད་འཁོར་ཐམས་ཅད་དུ། །རིགས་ཀྱི་དཀྱིལ་འཁོར་ཚོགས་རྣམས་བྲི། །དེ་ཡང་སེམས་ཅན་ཆེན་པོ་རྣམས། །དེ་དག་ཉིད་ནི་ལེགས་པར་བྲི། །དེ་ནས་བློ་ལྡན་ཐོག་མ་རུ། །རྡོ་རྗེ་འཁོར་ལོས་འཇུག་པར་བྱ། །
- 41a
ཞུགས་ནས་སྙིང་པོ་འདི་བཟླས་སོ། །ཛཿཧཱུྃ་བྃ་ཧོཿ། ཞེས་བརྗོད་ན། དེས་བཅོམ་ལྡན་འདས་དགྱེས་ཏེ། གྲུབ་པ་ཐམས་ཅད་དུ་སྩོལ་ཏོ། །དེ་བཞིན་དུ་སློབ་མ་བཅུག་ནས་དེ་ཉིད་དུ་བསྒྲུབ་པར་བྱའོ། །རྡོ་རྗེ་འཁོར་ལོའི་ཕྱག་ རྒྱ་བཅིངས་ནས་འབུམ་བཟླས་ན། དེ་བཞིན་གཤེགས་པའམ་རྡོ་རྗེ་འཛིན་ཐོབ་པར་འགྱུར་རོ། །རྡོ་རྗེ་འཁོར་ལོ་ཞེས་བྱའོ། །རྡོ་རྗེ་འཁོར་ལོའི་དབུས་སུ་རྡོ་རྗེ་བྲི་སྟེ། དེ་བཞིན་དུ་བཟླས་ན་རྡོ་རྗེ་འཛིན་དུ་འགྱུར་རོ། །རྡོ་རྗེ་དཀྱིལ་འཁོར་རོ། །དཀྱིལ་འཁོར་དེ་བཞིན་དུ་བྲིས་ ནས་མཚན་མ་བཞག་སྟེ་འདི་ཞེས་བརྗོད་དོ། །རྡོ་རྗེ་འཁོར་ལོ་འཇུག་པ་ཡིས། །མཐོང་དང་དེ་བཞིན་བསྒྲུབས་ན་ནི། །རྟོག་པ་ཐམས་ཅད་འགྲུབ་པར་རོ། །དེ་བས་བརྟགས་ཏེ་བསྒྲུབ་པར་བྱ། །དམ་ཚིག་གི་དཀྱིལ་འཁོར་རོ། །དཀྱིལ་འཁོར་བྲིས་པ་དེ་ཉིད་དུ། །ཕྱག་རྒྱ་ ཤེས་པ་བསྒྲུབ་པའི་ཕྱིར། །བརྩོན་འགྲུས་བརྟན་པས་ཐམས་ཅད་ཀྱི། །བླ་མེད་པས་ནི་བསླབ་པར་བྱ། །ལས་ཀྱི་དཀྱིལ་འཁོར་རོ། །དཀྱིལ་འཁོར་དུ་ཞུགས་པ་ཙམ་གྱིས་མ་བསྒྲུབས་པར་ལས་ཐམས་ཅད་བྱེད་དེ། ཇི་ལྟར་དགའ་བའི་ཆོ་གའམ་རྟོག་པ་ལས་བཤད་པ་ སྒྲུབས་ཤིག །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་རྡོ་རྗེ་འཁོར་ལོའི་རྟོག་པའོ།། །།དེ་ནས་བཅོམ་ལྡན་འདས་ལ་ནམ་མཁའི་མཛོད་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་འཇིག་རྟེན་ གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་སྩལ་བར་བགྱི་སྟེ། སྙིང་པོ་གང་བརྗོད་པ་ཙམ་གྱིས་མཆོད་པ་ཐམས་ཅད་ཀྱི་གནས་སུ་འགྱུར་བའོ། །བཅོམ་ལྡན་འདས་ཀྱིས་སྨྲོས་ཤིག་ཅེས་གསུངས་སོ། །དེ་ནས་ནམ་མཁའ་མཛོད་ཀྱིས་གསུངས་པ། ཨོྃ་ག་ག་ན་སྃ་བྷ་བ་བཛྲ་བཱ་ཙ་ཧོ། དེ་ནས་དེའི་དུས་ན་བཅོམ་ལྡན་འདས་ཀྱི་དཀྱིལ་འཁོར་ཐམས་ཅད་ལ་ནམ་མཁའ་ལས་མཆོད་པ་ཀུན་འབྱུང་བར་བྱས་སོ། །དེ་ནས་དཀྱིལ་འཁོར་འབྱུང་སྟེ། རྡོ་རྗེ་འཁོར་ལོ་བཞིན་དུ་བྲི། །དེ་ཡི་དབུས་སུ་ནོར་ཆེན་ཏེ། །ནམ་མཁའ་དང་པོར་བཞུགས་
- 41b
པར་བྱ། །རྒྱལ་བ་ཀུན་གྱིས་བསྐོར་བའོ། །དང་པོར་སློབ་དཔོན་འཇུག་པ་ནི། །མཆོད་པ་ཀུན་མཆོག་ཕྱག་རྒྱས་སོ། །དཀྱིལ་འཁོར་དེ་རུ་ཞུགས་ནས་ནི། །རྡོ་རྗེ་ཐམས་ཅད་བརྗོད་པར་བྱ། །དེ་ནས་བཅོམ་ལྡན་འདས་འགྲུབ་སྟེ། དེ་བཞིན་དུ་སློབ་མ་ཡང་ བཅུག་ནས་རྡོ་རྗེ་ཐམས་ཅད་ཀྱི་དམ་ཚིག་གི་སྙིང་པོ་འདི་བརྗོད་ལ་ཕྱག་རྒྱ་ཡང་སློབས་ཤིག །མཆོད་པ་ཐམས་ཅད་ཅེས་བྱ་བའི་དཀྱིལ་འཁོར་རོ། །དེ་ནས་ནམ་མཁའི་དཀྱིལ་འཁོར་ཏེ། ཡིད་ཀྱིས་དཀྱིལ་འཁོར་བྲིས་ལ་དེར་ཞུགས་ཤིག །ཞུགས་ནས་འདི་སྐད་ རྗོད་ཅིག །འདི་དག་ཐམས་ཅད་ནི་ནམ་མཁའ་ཉིད་དེ་བདེན་པ་གང་གིས་ནམ་མཁའ་གཟུགས་མེད་པ་ལས་གཟུགས་འབྱུང་བ་དེས་ན་དེ་བཞིན་གཤེགས་པ་ཐམས་ཅད་ལ་མཆོད་པ་དང་། ཡིད་ལ་འདོད་པའི་གྲུབ་པ་ཐམས་ཅད་ནམ་མཁའ་ལས་འབྱུང་བར་གྱུར་ཅིག་ཅེས་བྱས་ ནས་འདུག་སྟེ། རྡོ་རྗེ་ཀུན་གྱི་ཕྱག་རྒྱ་བཅིངས་ནས་འབུམ་བཟླས་ན། དེ་ནས་ནམ་མཁའ་ལས་མཆོད་པའི་རྣམ་པ་ཐམས་ཅད་དང་། དོན་ཐམས་ཅད་དང་། ཕུན་སུམ་ཚོགས་པ་ཐམས་ཅད་ཀྱང་འབྱུང་བར་འགྱུར་རོ། །རྡོ་རྗེའི་དཀྱིལ་འཁོར་རོ། །དཀྱིལ་འཁོར་བྲིས་ནས་ བཙུད་དེ་འདི་ནི་ཁྱོད་ཀྱི་དམ་ཚིག་གོ་ཞེས་རྗོད་ཅིག །འབྱུང་བ་ཀུན་ལས་ནམ་མཁའ་ནི། །འབྱུང་བ་ཆེན་པོ་ལྔ་པའོ། །ནམ་མཁའ་ནི་འདོད་པ་འབྱུང་། །འདོད་པའི་མཆོད་པ་གྲུབ་གྱུར་ཅིག །ཅེས་སྨྲས་ནས། འདིས་ཁྱོད་ཀྱིས་དེ་བཞིན་གཤེགས་པ་ཐམས་ཅད་ མཆོད་ཅིག་ཅེས་བསྒོ་ཤིག །དམ་ཚིག་གི་དཀྱིལ་འཁོར་རོ། །སློབ་མ་ནམ་མཁའ་ལ་ཡིད་ཀྱིས་དཀྱིལ་འཁོར་འདྲིར་བཅུག་ལ། དེར་སློབ་མ་ཡིད་ཀྱིས་མཆོད་པ་ཡང་སློབས་ཤིག །ཡིད་ཀྱིས་འདི་སྐད་རྗོད་ཅིག །ནམ་མཁའི་མཆོད་པས་དེ་བཞིན་གཤེགས་པ་ ཐམས་ཅད་ལ་མཆོད་དོ་ཞེས་ཉིན་རེ་ཞིང་བྱས་ན་འགྲུབ་བོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་ནམ་མཁའ་མཛོད་ཀྱི་རྟོག་པའོ།། །།དེ་ནས་བཅོམ་ལྡན་འདས་ལ་འཕགས་པ་བྱམས་པ་བྱང་ཆུབ་སེམས་དཔས་འདི་སྐད་ཅེས་
- 42a
གསོལ་ཏོ། །བཅོམ་ལྡན་འདས་བདག་གིས་ཀྱང་འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་སྩལ་བར་བགྱི་སྟེ། གང་བརྗོད་པ་ཙམ་གྱིས་སེམས་ཅན་ཐམས་ཅད་བྱམས་པའི་སེམས་སྐྱེ་བར་འགྱུར་བའོ། ། བཅོམ་ལྡན་འདས་ཀྱིས་རིགས་ཀྱི་བུ་སྨྲོས་ཤིག་ཅེས་གསུངས་སོ། །དེ་ནས་བཅོམ་ལྡན་འདས་བྱམས་པ་བྱང་ཆུབ་སེམས་དཔས་རང་གི་སྙིང་པོ་འདི་གསུངས་སོ། །ཨོྃ་མཻ་ཏྲི་དྲྀ་ཌྷ་ཙི་ཏེ་ཏིཥྛ་ཧོ། །དེ་ནས་འདི་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་བྱམས་པའི་ ཏིང་ངེ་འཛིན་ལ་སྙོམས་པར་ཞུགས་ཏེ་བཞུགས་སོ། །དེ་ནས་དཀྱིལ་འཁོར་འབྱུང་སྟེ། འཁོར་ལོའི་དཀྱིལ་འཁོར་བྲིས་པ་དེར་བྱམས་པ་བཞག་སྟེ། དེ་བཞིན་གཤེགས་པ་བཞི་དང་བྱང་ཆུབ་སེམས་དཔའ་བཞི་བྱ་སྟེ། གོ་ཆ་བརྟན་པའི་ཕྱག་རྒྱས་ཞུགས་ལ་འདི་ཞེས་བརྗོད་ དོ། །བཛྲ་དྲྀ་ཌྷ་ཏིཥྛ། དེ་ནས་བྱམས་པའི་ཏིང་ངེ་འཛིན་ལ་སྙོམས་པར་ཞུགས་ནས་སློབ་མ་དེ་བཞིན་དུ་དཀྱིལ་འཁོར་ཆེན་པོ་ཐམས་ཅད་དུ་འཇུག་པའི་ཚུལ་གྱིས་བཙུད་དོ། །བཙུད་ནས་བྱམས་པ་ཆེན་པོའི་ཕྱག་རྒྱ་བསླབ་སྟེ། དེ་ནས་གོ་ཆས་བསྐོན་ནོ། །བརྟན་ པ་ཆེན་པོ་ཞེས་བྱ་བའི་དཀྱིལ་འཁོར་རོ། །དེ་ནས་བྱམས་པའི་དཀྱིལ་འཁོར་འབྱུང་སྟེ། བྱམས་པས་ཞུགས་ལ་བྱམས་པའི་ཏིང་ངེ་འཛིན་སྒྲུབས་ཤིག །བྱམས་པའི་དཀྱིལ་འཁོར་རོ། །དཀྱིལ་འཁོར་དུ་བཅུག་ལ་འདི་ཞེས་བརྗོད་དོ། །རངས་སམ་ཡང་ན་ཁྲོས་ཀྱང་རུང་། ། མཛའ་དང་སྡང་བ་དེ་བཞིན་ཏེ། །འགྲོ་ལས་གལ་ཏེ་རྒྱལ་འདོད་ན། །བྱམས་པ་ཆེན་པོ་བསྒོམ་པར་གྱིས། །དམ་ཚིག་གི་དཀྱིལ་འཁོར་རོ། །དེ་ནས་དཀྱིལ་འཁོར་དུ་བཙུད་ལ་འདི་བསླབ་བོ། །སངས་རྒྱས་ཐམས་ཅད་ལ་ཕྱག་འཚལ་ལོ། །སེམས་ཅན་ཐམས་ཅད་དགེ་ བར་གྱུར་ཅིག །འབྱུང་པོ་ཐམས་ཅད་ལ་བྱམས་པ་དང་། བྱོལ་སོང་ཐམས་ཅད་ལ་མི་འཇིགས་པ་སྦྱིན་ནོ། །ལས་ཀྱི་དཀྱིལ་འཁོར་རོ། །བྱམས་པ་བསྒོམས་པས་གྲུབ་པ་ཐམས་ཅད་ཅི་འདོད་པའི་སྒྲུབ་པས་བསྒྲུབ་བོ། །ལས་རྣམས་ཀྱང་ཡིད་ཀྱིས་ཅི་དད་པའི་ཆོ་ག་དང་བྱམས་
- 42b
པས་སྒྲུབས་ཤིག །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་བྱམས་པའི་རྟོག་པའོ།། །།དེ་ནས་བཅོམ་ལྡན་འདས་ཀྱི་ཞབས་ལ་རྡོ་རྗེ་རིག་པའི་དམ་པ་ལ་སོགས་པས་མགོ་བོས་ཕྱག་འཚལ་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་ རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་ཕུལ་བ། །ཨོྃ་དྲི། ཨོྃ་བྷིནྡ་བཛྲ་ཤཱུ་ལ། ཨོྃ་ཙྪིན་དྷ་ཧཱུྃ་ཙཀྲ་ཕཊ། ཨོྃ་བྷུར་བྷུ་བ་སྭཿསྭཱ་ཧཱ། ཨོྃ་ཧ་ན་བྷིནྡ་བཛྲ་ཧཱུྃ་ཕཊ། ཨོྃ་ལ་ལ་ལ་ལ་ཨ་བྷི་ཥ་གྷཎྚ་ཊན། དེ་ནས་དེ་དག་གི་དཀྱིལ་འཁོར་འབྱུང་སྟེ། དཀྱིལ་འཁོར་ཟླུམ་པོའི་ དཀྱིལ་འཁོར་གྱི་གྲྭའི་སྲད་བུའི་དབུས་སུ་དབང་ཕྱུག་ཆེན་པོ་བྲི། དེར་གཞན་དག་ཀྱང་རིམ་གྱིས་ཐམས་ཅད་དུ་བྲི་བའམ། བཞག་པའམ་མཐར་ནི་ཚོན་གྱི་ཐིག་ལེ་ཡང་གཞག་གོ། །དེ་ནས་ཐོག་མར་སློབ་དཔོན་གྱིས་གསལ་ཕུར་གསུམ་པའི་རྟགས་ཀྱི་ཕྱག་རྒྱ་བཅིངས་ ལ་འདུག་གོ། །གཡོན་ལོགས་ནས་རྡོ་རྗེའི་སློབ་མ་ཡང་བཅུག་སྟེ། དེ་ནས་ཕྱག་རྒྱ་ཡང་བསླབ་བོ། །དེ་ཕྱིན་ཅད་ཐམས་ཅད་འགྲུབ་ཅིང་འཇིག་རྟེན་ཐམས་ཅད་ཀྱི་རིག་འཛིན་དུ་འགྱུར་རོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་རིག་པའི་བློན་ པོ་ཆེན་པོའི་རྟོག་པའོ།། །།དེ་ནས་རྡོ་རྗེ་འཁྱིལ་པ་ལ་སོགས་པ་རྡོ་རྗེ་ཁྲོ་བོས་འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་ཕུལ་བ། ཨོྃ་ཨ་མྲྀ་ཏ་ཀུཎྜ་ལི་ཁ་ཁ་ཁ་ཁ་ཀྲོདྷ་ཛྭཱ་ལཱ་མཱ་ལ་ཧཱུྃ་ཕཊ། ཨོྃ་མ་ཧཱ་པྲཱ་བ་སྥོ་ཊ་ཡ་ཧཱུྃ་ཕཊ། ཨོྃ་ཀཱ་ ལ་དཎྜ་ཧ་ན་ཧ་ན་ཧཱུྃ་ཕཊ། །ཨོྃ་ཀཱ་ལ་པྲ་ཤཱ་གྲ་ཨཱ་ཀཌྜྷ་ཧཱུྃ་ཕཊ། དེ་ནས་དེ་དག་གི་དཀྱིལ་འཁོར་འབྱུང་སྟེ། དཀྱིལ་འཁོར་གྲུ་བཞི་པ་བྲིས་ལ་དེའི་དབུས་སུ་རྡོ་རྗེ་གཞག་གོ། །ཕྱོགས་བཞིར་ནི་ཁྲོ་བོ་རྣམས་དེ་བཞིན་དུ་བར་བཅད་དུ་བྱས་ལ་འགོད་དོ། །དེ་ནས་སློབ་དཔོན་བདུད་རྩི་ འཁྱིལ་པའི་ཕྱག་རྒྱར་ཞུགས་ནས་ཕྱག་རྒྱ་བཅིང་བ་བསླབ་བོ། །དེ་ནས་ཐམས་ཅད་དགུག་པ་དང་། དབང་དུ་བྱ་བ་དང་། གཏན་འཕོ་བ་དང་སྲུང་བ་འགྲུབ་བོ། །རྡོ་རྗེ་ཁྲོ་བོའི་རྟོག་པའོ།། །།དེ་ནས་རྡོ་རྗེ་སྲིན་པོ་ལ་སོགས་པ་ཚོགས་ཀྱི་གཙོ་བོས་སྙིང་པོ་འདི་རྣམས་ཕུལ་
- 43a
ལོ། །ཨོྃ་མ་ཧཱ་བཱ་ལཱ་ཀ་མ་ཧཱ་ག་ཎ་དེ་བི་བ་པི་བ་རུ་ཧྲཱིཿརན་སརྦ་དུ་ཥྜཱ་ན་ནཱ་ཕཊ། ཨོྃ་མཱ་ལཱ་དྷ་ར་ཙ་ལ་ཙ་ལ་ཡ་ཧཱུྃ། ཨོྃ་དྷ་ནུར་དྷ་ར་བ་ཤཱི་ཀུ་རུ་སརྦ་སང་ཏྭཱ་ན་སྭཱ་ཧཱ། །ཨོྃ་ཛ་ཡ་བི་ཛ་ཡ་ཧཱུྃ་ཕཊ། དེ་ནས་དཀྱིལ་འཁོར་འབྱུང་སྟེ། གཞུ་ལྟ་བུར་དཀྱིལ་འཁོར་བྲིས་ ལ་དེར་རྡོ་རྗེ་གཞག་གོ། །གཡས་སུའང་གཉིས་གཡོན་དུའང་གཉིས་སོ། །དེ་ནས་རྡོ་རྗེ་སྲིན་པོའི་ཕྱག་རྒྱས་བཙུད་དེ། དེ་ནས་ཕྱག་རྒྱ་བསླབས་ནས་ཆོ་ག་བསླབ་པ་ནི། གང་དགེ་བ་དང་དྲིན་གཟོ་དང་། །ལྷ་ཡི་འཁོར་མཐོང་མ་གཏོགས་པར། །གཞན་རྣམས་དེ་དག་ཐམས་ ཅད་ཀུན། མི་དགེ་བ་རྣམས་གཏན་འཕོར་བྱ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་ཚོགས་ཀྱ་གཙོ་བོའི་རྟོག་པའོ།། །།དེ་ནས་རྡོ་རྗེ་གཏུན་ཤིང་ལ་སོགས་པའི་ཕོ་ཉས་རང་གི་སྙིང་པོ་སྨྲས་པ། ཨོྃ་ལཱྃ་ག་ལཱི་ཧཱུྃ། ཨོྃ་མ་ཧཱ་པ་ཏ་ ཧཱུྃ། ཨོྃ་བཛྲ་ཛྭཱ་ལཱ་ཡ་སྭཱ་ཧཱ། ཨོྃ་བི་ཀ་ཊ་བྷཻ་ར་བ་དེ་ཧི་མེ་སརྦྦན་ཧཱུྃ་ཕཊ། དེ་ནས་དེ་དག་གི་དཀྱིལ་འཁོར་འབྱུང་བ་ནི་ཤིང་རྟ་དང་འདྲ་བའི་དཀྱིལ་འཁོར་བྲིས་ཏེ། དབུས་སུ་རྡོ་རྗེ་གཞག་ནས་རྡོ་རྗེ་གཏུན་ཤིང་གི་ཕྱག་རྒྱས་བཅུག་ལ་ལས་འདི་བསླབ་བོ། །མི་དགེ་བའི་སེམས་ ཅན་ཐམས་ཅད་འཐུང་ཤིག །ཕྲོགས་ཤིག །སྲེགས་ཤིག །ཟོ་ཤིག །དེ་ནས་ཕྱག་རྒྱ་བཅིང་བ་བསླབ་བོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་ཕོ་ཉའི་ཚོགས་ཀྱི་རྟོག་པའོ།། །།དེ་ནས་བཅོམ་ལྡན་འདས་ལ་རྡོ་རྗེ་ཀྱོ་བ་ ཏང་ལ་སོགས་པ་བྲན་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་འདིར་རང་གི་སྙིང་པོ་འབུལ་ལོ། ཨོྃ་བཱ་རཱ་ཧ་དྃ་ཥྚོཏྐཊ་བི་ག་ཏོ་དྷ་ར་སརྦ་ན་ཁ་ན་ཁ་ན་ཧཱུྃ་ཕཊ། ཨོྃ་སརྦ་མཱ་ར་ ད་ཌ་ཧཱུྃ་ཕཊ། ཨོྃ་བྷི་ཀ་ཏཻ་ཀ་དྃ་ཤྚི་བྷིན་དྷ་ཧཱུྃ་ཕཊ། ཨོྃ་མ་ཧཱ་མ་ཎི་ཧ་ར་ཧ་ར་ཧཱུྃ་ཕཊ། དེ་ནས་དེ་དག་གི་དཀྱིལ་འཁོར་འདིའོ། །གྲུ་གསུམ་པར་བྲིས་ལ་མངོན་སུམ་པའི་ཕྱག་རྒྱས་ཞུགས་ནས་གར་གྱི་ཕྱག་རྒྱ་བཅིང་བ་བསླབ་སྟེ། གར་གྱི་མཆོད་པས་ནི་དབུས་ཀྱི་རྡོ་རྗེ་ལ་
- 43b
མཆོད་དོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་བྲན་གྱི་རྟོག་པའོ།། །།དེ་ནས་མ་ཐམས་ཅད་ཀྱིས་ཀུ་ཅོའི་སྒྲ་བཏོན་ཏེ། གར་གྱི་མཆོད་པ་ཆེན་པོས་བཅོམ་ལྡན་འདས་ལ་མཆོད་ནས་རང་རང་གི་སྙིང་པོ་ཕུལ་ལོ། །དེ་ནས་རྡོ་རྗེའི་ བློན་མོ་ཆེན་མོ་དག་གིས་སྨྲས་པ། །ཨོྃ་བཛྲ་ཀྲོ་དྷ་ར་ལི་ཧཱུྃ་ཕཊ། ཨོྃ་བཛྲ་ཙཀྲ་ཚིན་དྷ་ཧཱུྃ་ཕཊ། ཨོྃ་ཤཱ་ན་ཏི་ཧཱུྃ། ཨོྃ་བཛྲ་མུཥྚི་ཧ་ན་ཤིན་དྷ་ཧ་ན་ཧཱུྃ་ཕཊ། ཨོྃ་ཀུ་མཱ་ར་ཧ་བི་ཥ་གྷ་ཎ་ཏི་ཀེ་ར་ཎ་ར་ཎ་ཙ་ལཱ་ཡ་སརྦ་དུཥྚཱ་ན་ཧཱུྃ་ཕཊ། དེ་ནས་དེ་དག་གི་དཀྱིལ་འཁོར་གྲུ་བཞི་པ་དེའི་སྒོར་ འཁོར་ལོ་ལ་སོགས་པ་བྲིའོ། །དེའི་དབུས་སུ་རྡོ་རྗེ་ཁྲོ་མོའི་མེ་ལག་ན་རྡོ་རྗེའི་གསལ་ཕུར་ཅན་བཞག་གོ། །དམ་ཚིག་གི་ཆོ་ག་ནི་དེ་བཞིན་ནོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས། རིག་པའི་རྒྱལ་མོ་ཆེན་མོ་རྣམས་ཀྱི་རྟོག་པའོ། ། དེ་ནས་རྡོ་རྗེ་ཁྲོ་མོ་རྣམས་ཀྱིས་རང་གི་སྙིང་པོ་སྨྲས་པ། །ཨོྃ་ཨ་མྲྀ་ཏེ་ཧཱུྃ་ཕཊ། ཨོྃ་སཽ་མྱ་ཀྲོ་དྷེ་ཧཱུྃ་ཕཊཿ ཨོྃ་དཎྜ་དྷ་རི་ཎ་ཧ་ན་ཧཱུྃ་ཕཊ། ཨོྃ་པིཾ་ག་ལི་ཧཱུྃ་ཕཊ། དཀྱིལ་འཁོར་ཟུར་བརྒྱད་པ་བྲིས་ཏེ། དེའི་དབུས་སུ་རྡོ་རྗེ་གཞག་གོ། །ཆ་བཞིར་བགོས་པ་རྣམས་ལ་བཞི་པོ་རིམ་ གྱིས་གཞག་གོ། །འཇུག་པ་ལ་སོགས་པའི་ཆོ་ག་ནི་དེ་ཉིད་དོ། །འདི་ནི་ཁྲོ་མོའི་དཀྱིལ་འཁོར་རོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས། རྡོ་རྗེ་ཁྲོ་མོ་རྣམས་ཀྱི་རྟོག་པའོ།། །།དེ་ནས་ཚོགས་མ་མོ་རྣམས་ཀྱིས་སྨྲས་པ། ཨོྃ་ཁརྒ་མཱ་ རི་ཎི་ཧཱུྃ། ཨོྃ་ཨ་ཤ་སི་བ་དྷེ་ཧི་ར་མ་ཧོ། ཨོྃ་པཱ་ཤ་ས་མ་ཡེ་ཧཱུྃ། ཨོྃ་སརྦ་ར་མ་ཎི་ར་ཏི་བྲི་ཡེ་ཧོ། དེ་ནས་དེ་དག་གི་དཀྱིལ་འཁོར་ནི་ཟླུམ་པོ་སྟེ། སྒོ་བཞི་པ་དབུས་སུ་སེ་རལ་སྲད་བུ་བྱས་ཏེ་ཐིག་བཞི་བཏབ་ལ་རིམ་པ་བཞིར་བྲིའོ། །གཞན་ཡང་ཕྱིའི་དཀྱིལ་འཁོར་དེ་བཞིན་དུ་ཟླུམ་ པོར་ཐིག་བཞི་རིམ་དུ་བཏབ་ལ་དེའི་དབུས་སུ་གནོད་སྦྱིན་གྱི་གདོང་བྲིའོ། །ངོས་བཞིར་ནི་རིམ་གྱིས་ཏེ། ཤར་ཕྱོགས་ནས་བྲི་བའམ་གཞག་པར་བྱའོ། །སྒོ་བཞིར་རྡོ་རྗེའི་མངག་གཞུག་མ་བྲི་བའམ་གཞག་པར་བྱའོ། །དེའི་སྙིང་པོ་ནི་འདིའོ། །བྷི་ཙི་རི་ཊི་བྷྱོ་བྷྱོ། །དེ་ལྟར་རིག་
- 44a
པའི་བློན་མོ་ཆེན་མོ་ལ་སོགས་པ་ཐམས་ཅད་དུ་གྱིས་ཤིག །འདི་ཐང་ཅིག་བཟླས་པས་ཐམས་ཅད་ཁུགས་སོ། །དེ་ནས་གདོང་གཡོགས་ནས་ལག་པ་གཉིས་ཀྱིས་རྐང་པའི་མཐེ་བོང་བཟུང་སྟེ། ཕྱག་འཚལ་ནས་སྐྱིལ་མོ་ཀྲུང་གི་གར་བྱེད་ཅིང་ཞུགས་ལ་ དབབ་བོ། །བཅངས་ནས་དམ་ཚིག་བྱིན་ཅིག །སརྦ་མཱ་ར་ཁཱ་ད་པི་བ་དེ་ཧི་བ་ར་ས་མ་ཡ་ཧོ། །དེ་ནས་དེ་བཞིན་དུ་དམ་ཚིག་སྦྱིན་ནོ། །གླུ་གར་དང་། སིལ་སྙན་དང་། ཟས་དང་སྐོམ་གྱིས་ཐམས་ཅད་ཚིམ་པར་བྱས་ལ་དྲིལ་བུས་ཕབ་པ་སྟེ། དེ་ནས་དངོས་གྲུབ་ཐམས་ཅད་དང་བདེ་བ་ ཐམས་ཅད་དང་། ཕུན་སུམ་ཚོགས་པ་ཐམས་ཅད་རྙེད་ནས། རྣལ་འབྱོར་དང་ནམ་མཁའ་ལ་འགྲོ་བ་ལ་སོགས་པ་ཡང་ཐོབ་བོ་ཞེས་སྨྲོས་ཤིག །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་རྡོ་རྗེའི་ཚོགས་མ་མོའི་རྟོག་པའོ།། །།དེ་ནས་རྡོ་རྗེ་ ཕོ་ཉ་མོ་རྣམས་ཀྱིས་སྨྲས་པ། ཨོྃ་བྷྱོ། ཨོྃ་ཀ་ལི་མ་རཱ་ནི། བཛྲ་རཱཀྵ་སི་ཧ་ན་སརྦ་ན་ཊཱི་མ། །ཨོྃ་བཱུ་ཐ་ཎེ་ཐ། ཨོྃ་མ་ཧཱ་ཀ་ར་བཱ་ཀྟྲེ་ཧཱུྃ་ཕཊ། དཀྱིལ་འཁོར་གྲྭ་ལྔ་པར་བྲིས་ཏེ། རྡོ་རྗེ་ནི་གྲྭའི་དབུས་སུ་གཞག་གོ། །བཞིར་ནི་རྡོ་རྗེ་ཕོ་ཉ་མོ་བཞག་སྟེ་དེ་ཆོ་ག་དེ་བཞིན་དུ་བྱའོ། ། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ལས་རྡོ་རྗེ་ཕོ་ཉ་མོའི་རྟོག་པའོ།། །།དེ་ནས་རྡོ་རྗེ་བྲན་མོ་རྣམས་ཀྱིས་སྨྲས་པ། །ཨོྃ་བཱ་རཱ་ཧི་བཛྲ་མུ་ཁི་དྲི་ཏོཾ་ཏ་རཱ་པ་ཏ་ལ་ས་མ་ཡ་མ་ནུ་སྨ་ར་ཨཱ་བི་ཤ་ཧཱུྃ་ཕཊ། །ཨོྃ་ཀཱ་ལི་ཀཱ་པཱ་ལི་མཱ་ལ་དྷཱ་རི་ཎཱི་ཀ་ཊ་ཀ་ཊ་མ་ཊ་མ་ཊ་ བྷི་མཱ་ར་ཡ་སརྦ་མཱ་ར་ཎི་ཧཱུྃ་ཕཊ། ཨོྃ་པུ་ཏནི་ཨུ་ཙུ་སྨ་རུ་དྲཱ་ཁཱ་ད་སརྦ་ན་ཤོ་ཥ་ཡ་སྭཱ་ཧཱ། ཨོྃ་མ་ཀ་ར་མུ་ཁི་ཧ་ར་ཧ་ར་ཧཱུྃ། དཀྱིལ་འཁོར་གྲུ་བཞི་ལ་སྒོ་བཞིར་བྲིས་ནས། དེའི་དབུས་སུ་རྡོ་རྗེ་བྲིས་ཏེ་དེ་བཞིན་གར་གྱིས་མཆོད་དོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ ཆེན་པོའི་རྒྱལ་པོ་ལས་བྲན་མོའི་རྟོག་པ་སྟེ་རྩ་བའི་རྒྱུད་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པས་ཕྱག་ན་རྡོ་རྗེ་ལ་འདི་སྐད་ཅེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་གསང་བ་འཛིན་པ་ཁྱོད་ཡིན་ནོ། །དེ་བས་ན་རྟོག་པའི་
- 44b
རྒྱལ་པོ་འདིར་དོན་ཡོད་ཅིང་མྱུར་དུ་གྲུབ་པར་བྱ་བའི་ཕྱིར་གང་གིས་སེམས་ཅན་ཐམས་ཅད་དངོས་གྲུབ་དམ་པ་བདེ་བླག་ཏུ་ཐོབ་པར་འགྱུར་བའི་ཕྱི་མའི་རྒྱུད་ཤོད་ཅིག །དེ་ཅིའི་ཕྱིར་ཞེ་ན། སེམས་ཅན་འདི་རྣམས་ནི་བརྩོན་འགྲུས་ཀྱིས་འདུལ་ཏེ། དད་པ་དང་མི་ལྡན་པ་སྡིག་པ་བྱེད་པ། བརྫུན་སྨྲ་བ་ལེ་ལོ་ཅན་དཀའ་བ་སྤྱད་པ་མི་བཟོད་པ། འདོད་ཆགས་དང་བྲལ་བས་འདུལ་བ། རྟག་ཏུ་ཆགས་པ་དེ་དག་གི་དོན་གྱི་ཕྱིར་གང་གིས་སེམས་ཅན་དེ་དག་བྱ་བ་ཐམས་ཅད་བྱེད་བཞིན་པ་དང་། བརྩོན་འགྲུས་མེད་པ་དང་དཀའ་བ་སྤྱད་པ་ཡང་མེད་པར་བདེ་བླག་ཏུ་ཚེ་འདི་ཉིད་ ལ་མྱུར་དུ་འགྲུབ་པར་འགྱུར་བ་དེ་དེ་བཞིན་གཤེགས་པས་བྱིན་གྱིས་བརླབས་ཀྱིས་ཤོད་ཅིག །འཛམ་བུའི་གླིང་གི་མི་འདི་དག་ནི་ཡུལ་ལ་མངོན་པར་དགའ་ཞིང་བདག་གི་གྲོགས་པོ་དང་། ཕ་དང་། མ་དང་། བུ་དང་། ཆུང་མ་རྣམས་མཐོང་འདོད་ཅིང་དེ་ཡང་སྲེད་པས་འཁོལ་བ་སྟེ། ཕྱོགས་ནས་ཕྱོགས་སུ་ཡང་འགྲོ་མི་ནུས་ན། སངས་རྒྱས་ཀྱི་ཞིང་དང་རིག་འཛིན་གྱི་གནས་སུ་ལྟ་ཅི་སྨོས། དེ་ནས་བཅོམ་ལྡན་འདས་ཀྱི་ཞབས་གཉིས་ལ་ཕྱག་ན་རྡོ་རྗེས་ཕྱག་འཚལ་ཏེ། ཕྱི་མའི་རྒྱུད་བཤད་དོ། །དེ་ནས་བཅོམ་ལྡན་འདས། དེ་བཞིན་གཤེགས་པ་ག་ལས་བྱུང་། ཕྱག་ན་རྡོ་རྗེ་ག་ལས་སྐྱེས། །རྡོ་རྗེ་ཡང་ནི་ག་ལས་བྱུང་། །ཕྱག་རྒྱ་སྙིང་པོ་རིག་པ་དང་། །སྔགས་རྣམས་ཁྱད་པར་ཅི་ཞིག་ཡོད། །གསང་པ་སྒྲུབ་པ་ཇི་ལྟ་བུ། །ཕྱག་རྒྱ་བེ་ཅིང་བ་ཇི་ལྟ་བུ། །དེ་རྣམས་ཀྱི་ནི་དེ་ཉིས་གང་། །བྱིན་གྱིས་བརླབས་སོགས་ཇི་ལྟ་བུ། །སྒྲུབ་ པ་རྣམས་ཀྱང་ཇི་ལྟར་མཐོང་། །དངོས་གྲུབ་འདོད་པ་ཇི་ལྟ་བུ། །རས་ལ་རི་མོ་ཇི་ལྟར་བྲི། །སྐུ་གཟུགས་ཚད་ནི་ཇི་ཙམ་ཞིག །ཇི་ལྟར་བཟླས་པ་བྱ་བར་གསུངས། །ཅི་འདྲ་བ་ནི་མཆོད་པར་བགྱི། །བསོད་ནམས་མེད་པས་ཇི་ལྟར་འགྲུབ། །ཇི་ལྟར་གྲུབ་པ་མྱུར་ བར་འགྱུར། །སློབ་དཔོན་དུ་ཡང་ཇི་ལྟར་འགྱུར། །ལས་རྣམས་བསྒྲུབ་པ་ཇི་ལྟར་བྱ། །དེ་དག་གི་ནི་དེ་ཉིད་གང་། །ཐམས་ཅད་བདག་ལ་བཤད་པའི་རིགས། །དེ་ནས་དེ་བཞིན་གཤེགས་པ་འབྱུང་བ་བསྟན་ཏེ། སེམས་དཔའ་ཐོག་མ་ཐ་མ་མེད། །ནམ་
- 45a
མཁའ་སྐྱེ་བའི་མཚན་ཉིད་དོ། །ཀུན་དུ་བཟང་པོ་ཐམས་ཅད་བདག །འདོད་པ་འགྲོ་བ་བདག་པོ་ཡིན། སེམས་ཅན་ཀུན་སེམས་གང་ཡིན་པ། །བརྟན་པས་སེམས་དཔའ་ཞེས་བྱའོ། །མཉམ་པར་གཞག་པས་ཏིང་ངེས་འཛིན། །ངེས་པར་རྡོ་རྗེ་ཉིད་དུ་ འགྱུར། །དེ་ལ་སྨྲས་པ་སེམས་གཟུགས་མེད་པ་ལ་ཇི་ལྟར་ན་སྲ་བའི་རྡོ་རྗེར་འགྱུར། སྨྲས་པ། ཇི་ལྟར་རྣམ་པར་ཤེས་པ་ལ་སེམས་ཅན་སྐྱེ་བ་ན་ཤ་དང་། རུས་པ་འབྱུང་བར་འགྱུར་བ་བཞིན་ཏེ། སྡུག་པ་དང་། ཆགས་པ་དང་། བདེ་བ་དང་། རྣམ་པར་ཤེས་པ་གཟུགས་མེད་ པ་རྣམས་འདུས་པ་ལས་སེམས་ཅན་སྐྱེ་བ་དང་། ཇི་ལྟར་ཀླུ་རྣམས་ཁྲོས་པས་སེམས་ཀྱི་ཏིང་ངེ་འཛིན་ངེས་པས་ནམ་མཁའ་ལ་གནམ་ལྕགས་འབྱུང་བའམ། གློག་དང་བཅས་ཏེ་འབྱུང་བ་དེ་བཞིན་དུ་ངེས་པ་དག་ལས་རྡོ་རྗེ་ཉིད་དུ་འགྱུར་ཏེ། སེམས་དཔར་བྱིན་རླབས་སྦྱོར་བ་ཡིན། ། རྡོ་རྗེ་སེམས་དཔར་ཡང་འགྱུར་རོ། །བཅོམ་ལྡན་རྡོ་རྗེ་དེ་ཉིད་ནི། །བསྒོམས་པས་སེམས་དཔའ་ཉིད་དུ་འགྱུར། །དེ་ལ་སེམས་དཔར་བྱིན་གྱིས་རློབ་པའི་སྦྱོར་བ་གང་ཞེ་ན། སེམས་དཔའ་ཀུན་གྱི་བདག་ཆེ་ན། །བདག་ཉིད་ལ་ཡང་གནས་སོ་ཞེས། །བྱིན་གྱིས་བརླབས་ནས་ སེམས་དཔའ་བདག །ཡིན་ཞེས་ང་རྒྱལ་བསྒོམ་པར་བྱ། །དེ་ཉིད་བཅོམ་ལྡན་སེམས་དཔའ་སྟེ། །རྡོ་རྗེ་སེམས་དཔའ་འམ་རྒྱལ་བ་ཡིན། །རང་སེམས་སོ་སོར་བརྟགས་པ་ནི། །སངས་རྒྱས་བྱང་ཆུབ་དེ་ཉིད་ཡིན། །དེ་ཉིད་ཕྱག་ན་རྡོ་རྗེ་སྟེ། །རྡོ་རྗེ་འཛིན་པའི་ཚུལ་གྱིས་ སོ། །འཇིག་རྟེན་དབང་པོ་ནམ་མཁའ་སྙིང་། །དེ་ལྟར་གཞན་ཡང་དེ་ཉིད་དོ། །སངས་རྒྱས་རིགས་ཀྱང་དེ་ཉིད་དེ། །དེ་ནི་རྡོ་རྗེ་འཆང་བའི་རིགས། །དེ་ཉིད་སྤྱན་རས་གཟིགས་ཀྱི་རིགས། །དེ་ཉིད་ནོར་བུའི་རིགས་ཡིན་ཏེ། །ཁམས་གསུམ་དེ་ཉིད་ཡིན་ཞེས་གསུངས། ། འཇིག་རྟེན་གསུམ་པོའང་དེ་ཉིད་དོ། །དེ་ཉིད་བྱེད་དང་འབྱིན་པ་པོ། །སེམས་ཅན་ཀུན་གྱི་མེས་པོ་སྟེ། །དེ་ཉིད་སེམས་ཅན་གནས་ཡིན་ཏེ། །འབྱུང་བ་ཆེ་རྣམས་དེ་ཉིད་དོ། །དེ་ཉིད་འགྲོ་བའི་མགོན་པོ་སྟེ། །གནས་པ་དང་ནི་འགྲོ་བ་ཡིན། །ཞེས་བཅོམ་ལྡན་འདས་
- 45b
ཐོག་མ་དང་ཐ་མ་མེད་པའི་སེམས་དཔའ་ཕྱག་ན་རྡོ་རྗེས་གསུངས་སོ། །དེ་ཁོ་ན་ཆེན་པོ་ཞེས་བྱ་བའི་རབ་ཏུ་བྱེད་པ་དང་པོའོ།། །།དེ་ནས་སྙིང་པོ་དང་ཕྱག་རྒྱ་དང་སྔགས་དང་རིག་པའི་ཁྱད་པར་གྱི་བར་དུ་བྱ་བ་སྟེ། སྙིང་པོའི་ཁྱད་པར་ནི་གསང་བ་དང་ཏིང་ངེ་འཛིན་ཅེས་བྱའོ། ། དེ་ལ་སེམས་ཅན་གྱི་དོན་གྱི་ཕྱིར་གསང་བ་བརྗོད་པ་དང་། སྨྲ་བ་ནི་སྙིང་པོ་བརྗོད་པ་སྟེ། སྙིང་པོ་བརྗོད་པས་ནི་སྙིང་གིས་བསམ་པའི་གྲུབ་པ་ཐོབ་ཅེས་བྱ་བ་ནི་སྙིང་པོའི་ཁྱད་པར་རོ། །དེ་ནས་ཕྱག་རྒྱའི་ཁྱད་པར་ནི། །རྡོ་རྗེའི་སྐུ་གསུང་ཐུགས་རྣམས་ཀྱི། །གཟུགས་ བརྙན་སྦྱོར་བ་འདི་དག་ནི། །ཕྱག་རྒྱ་ཀུན་གྱི་ཁྱད་པར་ཏེ། །འབྱུང་བ་ཡང་ནི་དེ་ཡིས་བསྟན། །ཇི་ལྟར་ཇོ་བོའི་རྒྱ་མཐོང་ན། །བྲན་རྣམས་འགལ་བར་མི་བྱེད་པ། །དེ་བཞིན་རྒྱལ་བ་ཉིད་རྣམས་ཀྱང་། །ཕྱག་རྒྱ་འདའ་བར་ཡོང་མི་མཛད། །རྡོ་རྗེའི་སྐུ་དང་གསུང་དང་ ཐུགས། །ཇི་ལྟར་གནས་དང་མཐུན་བྱས་ལ། །མཚན་མའི་ཕྱག་རྒྱར་ལྡན་པ་ཡི། །སེམས་དཔའ་ཆེན་པོར་བདག་ཉིད་བསྒྱུར། །དེ་ནི་ཕྱག་རྒྱ་ཆེན་པོའོ། །ལུས་དང་ངག་སེམས་རྡོ་རྗེ་ཡི། །སོར་བསྣོལ་བརྟན་པ་དམ་ཚིག་སྟེ། །སེམས་ཀྱི་ཤེས་རབ་ལྡན་པ་ ལས། །གཉིས་ཕྱེ་ལས་ཀྱི་ཕྱག་རྒྱ་ཡིན། །དེ་དག་དམ་ཚིག་རྩ་བ་སྟེ། །རྩ་བྱུང་བཅིང་བ་རྒྱུ་ཡི་མཆོག །གང་གིས་ཐམས་ཅད་ལུས་བརྟན་འགྱུར། །དེ་ཕྱིར་ཕྱག་རྒྱ་བརྗོད་པ་ཡིན། །གང་གིས་ཐམས་ཅད་རྒྱས་བཏབ་པ། །ཆུད་མི་ཟ་ཞིང་རབ་སྦས་ཏེ། ། མངའ་བདག་གཟུགས་བརྙན་འཆང་བས་ན། །སྒྲུབ་པ་པོ་རྣམས་མྱུར་དུ་འགྲུབ། །གང་དག་མཐོང་ན་སངས་རྒྱས་དང་། །སེམས་དཔའ་ལ་སོགས་མཐོང་བར་འགྱུར། །དམ་ཚིག་ཉམས་པས་གཟིར་བས་ན། །འདའ་བར་མི་འགྱུར་འགྲུབ་པར་འགྱུར། །ཕྱག་ རྒྱའི་ཁྱད་པར་དེ་ཡིན་ཏེ། །དོན་དམ་པའི་དེ་ཁོ་ན་ཉིད་ཀྱང་ཕྱག་རྒྱ་ཆེན་པོ་ཞེས་བྱའོ། །དེ་ལ་སྔགས་ཀྱི་ཁྱད་པར་ནི་འདི་ཡིན་ཏེ། ངག་ཙམ་སྤྲོས་པ་མེད་པ་སྟེ། །སངས་རྒྱས་བཀའ་ཡིས་གྲུབ་པ་ཉིད། །ཆོས་ཀྱི་ཚིག་གིས་བསྐུལ་བ་སྟེ། །དེ་དག་སྔགས་ཞེས་བྱ་བ་
- 46a
ཡིན། །དེ་ལ་རིག་པའི་ཁྱད་པར་ནི་འདི་ལྟ་སྟེ། མ་རིག་པ་ནི་མེད་པར་བྱེད། །རིག་པ་དེ་བཞིན་ཆུད་པར་བྱེད། །དོན་རྣམས་རྟོགས་པར་གྱུར་པས་ན། །རིག་པ་ཞེས་ནི་དེ་ཕྱིར་བྱ། སྙིང་པོ་དང་ཕྱག་རྒྱ་དང་སྔགས་དང་རིག་པའི་རབ་ཏུ་བྱ་བ་གཉིས་ པའོ།། །།དེ་ནས་ཕྱག་རྒྱ་བཅིང་བའི་རབ་ཏུ་བྱ་བ་བཤད་དོ་ཞེས་བཅོམ་ལྡན་འདས་བླ་ན་མེད་པའི་ཕྱག་རྒྱ་ཐམས་ཅད་ཀྱི་ཡེ་ཤེས་རྡོ་རྗེ་འཛིན་པས་གསུངས་སོ། །དེ་ལ་ཕྱག་རྒྱ་ཆེན་པོ་ནི་དེ་ཉིད་བསྐུལ་བའི་སྙིང་པོས་བཅིང་ངོ་། །དམ་ཚིག་དང་ལས་ཀྱི་ཕྱག་རྒྱ་ནི་རྡོ་རྗེ་ བཅིང་བ་དང་བརྡབ་པ་ལ་སོགས་པ་བྱས་ནས་བཅིང་ངོ་། །དམ་ཚིག་ཆེན་པོའི་དེ་ཁོ་ན་ཉིད་བསྐུལ་བའི་སྙིང་པོས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིང་ངོ་། །དེ་ཡང་མ་ཆགས་པ་དང་སློབ་མ་མ་ཡིན་པ་དང་། སྣོད་མ་ཡིན་པ་དང་། དད་པ་མེད་པ་ལ་མི་སྦྱིན་ ནོ། །ཡུན་དུ་སྦྱངས་ན་དེ་དག་ཀྱང་འགྲུབ་པར་འགྱུར་རོ། །དེ་ལ་དེ་ཁོ་ན་ཉིད་བསྐུལ་བའི་སྙིང་པོ་འདིའོ། །ས་མ་ཡ་སྟྭྃ། དེ་ལ་དམ་ཚིག་ཆེན་པོའི་དེ་ཁོ་ན་ཉིད་བསྐུལ་བའི་སྙིང་པོ་ནི་འདི་ཡིན་ནོ། །ས་མ་ཡ་ཧོ་སུ་ར་ཏ་སྟྭྃ། རྡོ་རྗེ་ཁྲོ་བོས་ཕྱག་རྒྱ་ཐམས་ཅད་རང་གིས་ བཅིང་ངམ། གཞན་འཆིང་དུ་གཞུག་ན་ནི་ཧཱུྃ་ཞེས་བྱ་བ་ཐང་ཅིག་ཙམ་གྱིས་སོ། །དེ་ནས་རྡོ་རྗེ་བཅིང་བ་ལ་སོགས་པ་བཅིང་བ་འབྱུང་སྟེ། བཛྲ་བན་དྷ་ཞེས་བརྗོད་ལ་རྡོ་རྗེ་བཅིང་བ་སྙིང་གར་ཆིངས་ཤིག །དེ་ནས་སྙིང་པོ་འདིས་སོར་མོ་ཐམས་ཅད་བརྡབ་པར་བྱའོ། །ཨོྃ་བཛྲ་བ་ན་ དྷ་ཊཱ་ཐ། འདིས་ནི་ཕྱག་རྒྱ་ཐམས་ཅད་དགུག་ཅིང་དབང་དུ་བྱེད་དོ། །དེ་ནས་རྡོ་རྗེ་ཡེ་ཤེས་དབབ་པའི་དམ་ཚིག་གི་ཕྱག་རྒྱ་བཅིང་ངོ་། །བཛྲ་ཨཱ་བེ་ཤ་ཞེས་བརྗོད་ལ། སྙིང་པོ་འདིས་རྡོ་རྗེ་དབབ་པ་བསྐྱེད་པར་བྱའོ། །ཨཿཐམས་ཅད་དབབ་པའི་སྙིང་པོ་འདི་ནི་གདོན་མི་ཟ་བའོ། ། དེ་ནས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བ་ནི་བཛྲ་མུཥྚི་ཞེས་བརྗོད་ལ་བཅིང་ངོ་། །དེ་སྟེ་དེ་ལྟར་མ་བྱས་ན་ཡང་ས་མ་ཡ་སྟྭྃ་ཞེས་བརྗོད་ལ་ཕྱག་རྒྱ་ཆེན་པོ་ལ་སོགས་པ་རིགས་ཐམས་ཅད་ཀྱི་ཕྱག་རྒྱ་བཅིང་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་ལུས་དང་ངག་དང་།
- 46b
སེམས་ཀྱི་ཕྱག་རྒྱ་ཐམས་ཅད་ཀྱི་སྙིང་པོ་དོན་ཡོད་པ་འདའ་བར་བྱ་བ་མ་ཡིན་པ་སྟེ། སྟོང་བཟླས་པས་ཕྱག་རྒྱ་བཅིང་བ་ཐམས་ཅད་འགྲུབ་པར་འགྱུར་རོ། །དམ་ཚིག་ཆེན་པོའི་ཕྱག་རྒྱ་ལན་ཅིག་བཟླས་ན། གྲུབ་པ་ཐམས་ཅད་ལ་གཅེས་པར་འགྱུར་རོ། །དེ་ནས་ཕྱག་རྒྱ་ བཅིང་བ་འབྱུང་སྟེ། ཐལ་མོ་སྦྱར་ལ་སོར་མོ་ཕན་ཚུན་བསྣོལ་བ་ནི་རྡོ་རྗེའི་ཐལ་མོའོ། །དེ་ཉིད་སོར་མོའི་བར་རྣམས་སུ་ཤིན་ཏུ་བསྡམས་པ་ནི་རྡོ་རྗེ་བཅིང་བའོ། །དེ་ཉིད་ལས་མཐེ་བོ་གཉིས་ནང་དུ་བཅུག་སྟེ། མཐེའུ་ཆུང་དང་སྲིན་ལག་གི་བར་དུ་རབ་ཏུ་བཅུག་ལ་བཙུམ་པ་འདི་ ནི་རྡོ་རྗེ་དབབ་པའི་དམ་ཚིག་གི་ཕྱག་རྒྱའོ། །དེ་ཉིད་ལས་མཐེ་བོ་གཉིས་གཤིབས་ལ་ནང་དུ་བཅུག་ལ་དེ་བཞིན་དུ་མཐེའུ་ཆུང་དང་སྲིན་ལག་གི་བར་དུ་བཙུགས་ཏེ། །མཛུབ་མོ་ཤིན་ཏུ་བཀུག་པ་ནི་རྡོ་རྗེ་ཁུ་ཚུར་དམ་ཚིག་གི་ཕྱག་རྒྱའོ། །དེ་ཉིད་ལས་གཉིས་སུ་བྱས་པ་ནི་ལས་ཀྱི་ཕྱག་རྒྱ་གཞན་ དུ་འགྱུར་ཏེ། དམ་ཚིག་ཆེན་པོ་དེ་ཁོ་ན་ཉིད་ལན་ཅིག་བརྗོད་ལ་སྙིང་གའམ། ནམ་མཁའ་ལ་སོ་སོར་བཅིང་ངོ་། །ངག་གི་ཕྱག་རྒྱ་ཡང་བཛྲ་ཛི་ཧཱ་ཞེས་བརྗོད་ལ་ཕྱག་རྒྱ་བཅིང་ངོ་། །ལྟ་བའི་ཕྱག་རྒྱ་ནི་སྙིང་པོའི་དོན་གྱིས་བཅིང་ངོ་། །སོའི་ཕྱག་རྒྱ་དང་མཆུའི་ཕྱག་རྒྱ་དང་མིག་ བསྒུལ་བའི་ཕྱག་རྒྱ་དང་། སྙིང་དང་ལུས་གཡོ་བའི་ཕྱག་རྒྱ་ནི་ས་མ་ཡ་སྟྭྃ་ཞེས་བརྗོད་ན་བཅིང་བ་གྲུབ་པར་འགྱུར་རོ། །དེ་ནས་རྡོ་རྗེ་ཧཱུྃ་ཞེས་པའི་ཕྱག་རྒྱ་བཅིང་བ་འབྱུང་སྟེ། རྡོ་རྗེ་ཁྲོ་བོའི་མཛུབ་མོ་ནི་རྡོ་རྗེ་ཁུ་ཚུར་དུ་བྱས་ལ་མཛུབ་མོ་བརྐྱང་ན་རྡོ་རྗེ་ཁྲོ་བོ་ཞེས་བྱ་བ་ཡིན་ནོ། །རྡོ་རྗེ་ཁྲོ་བོའི་ མཛུབ་མོ་གཉིས། །ལག་ངར་བསྣོལ་ཏེ་བཅིངས་ནས་ཀྱང་། །མཐེའུ་ཆུང་ལྕགས་ཀྱུ་སྦྲེལ་བྱས་ལ། །ཧཱུྃ་ཞེས་པས་ནི་བསྡིགས་པར་བྱ། །དེ་ཉིད་གཡས་པ་ཀྱོ་བ་ཏང་དུ་བྱས་པ་ནི། རྡོ་རྗེ་ཁྲོ་བོའི་ཀྱོ་བ་ཏང་ངོ་། །དེ་ལ་འདི་ནི་དམ་ཚིག་གི་ཕྱག་རྒྱའོ། །ལག་མཐིལ་དག་ཏུ་རྡོ་རྗེ་བཅིང་། ། མཐེ་བོ་གཤིབས་པས་བཀབ་པ་ཡི། །ཁུ་ཚུར་བྱས་པ་དམ་ཚིག་གི། །ཕྱག་རྒྱ་རྡོ་རྗེ་ཁྲོ་བོ་སྟེ། །ཏི་རིན་ཏི་རི་ཞེས་བྱའོ། །ཧཱུྃ་ནི་ངག་གི་ཕྱག་རྒྱའོ། །ཡེ་ཤེས་ཀྱི་ཕྱག་རྒྱ་ནི་ཐམས་ཅད་གསོད་པའི་ཁྲོ་བོའོ། །རྡོ་རྗེའི་ས་གཞི་བཅིང་བ་ནི་རྡོ་རྗེ་བཅིང་བ་ས་ལ་བརྐྱང་སྟེ་བཞག་པ་འདིས་
- 47a
རྡོ་རྗེའི་ས་གཞིར་འགྱུར་ཏེ། དེ་ལ་སུས་ཀྱང་གླགས་མི་རྙེད་དོ། །དེ་ལ་འདི་ནི་རྡོ་རྗེ་འདོད་པའི་ཁྲོ་བོའི་ཕྱག་རྒྱའོ། །རྡོ་རྗེ་བཅིང་བ་བཅིངས་ལ་མཛུབ་མོ་རྡོ་རྗེ་ལྟར་བྱས་པ་ནི་ཐམས་ཅད་ལ་དབང་བྱེད་པའི་ཕྱག་རྒྱའོ། །རྡོ་རྗེའི་དམ་ཚིག་རྡོ་རྗེ་བཅིངས་ལ་མཛུབ་མོ་གཉིས་མཉམ་ པར་གཤིབས་པས་སྙིང་གར་གཏུགས་ཤིག །གལ་ཏེ་དེ་ལས་འདའ་བར་བྱས་ན་སྙིང་གས་ཏེ་འཆིའོ། །རྡོ་རྗེའི་ཕྱག་རྒྱ་གཉིས་བཅིངས་ལ། །མཛུབ་མོ་ཀྱོ་བ་ཏང་དུ་བཅིང་། །དཀྲི་ཞིང་ཕྱིར་དཀྲི་བྱས་པ་ནི། །ལྷ་རྣམས་དགུག་པའི་མཆོག་ཡིན་ནོ། །རྡོ་རྗེ་བཅིང་བ་བརྟན་བྱས་ ལ། །མཛུབ་མོ་བཀུག་པ་ཤིན་ཏུ་བཙིར། །མཐེ་བོ་གཉིས་ཀ་གཤིབས་པ་ཡིས། །དབུས་སུ་བཙིར་བ་བར་སྣང་གི། །རྡོ་རྗེ་ཁུ་ཚུར་གཉིས་བཅངས་ལ། །མཐེའུ་ཆུང་གཉིས་ཀ་སྦྲེལ་ནས་སུ། །མཛུབ་མོ་ཡི་ནི་རྒྱབ་སྦྱར་ཏེ། །བཟློག་པ་ནམ་མཁར་རྒྱུ་རྣམས་ཀྱིའོ། ། རྡོ་རྗེ་བཅིང་བ་བརྟན་བྱས་ནས། །ཁུ་ཚུར་གྱིས་ནི་ས་མནན་པ། །འདི་ནི་ས་པའི་དམ་ཚིག་སྟེ། །ཐམས་ཅད་བྱེད་པ་འདའ་བར་དཀའ། །རྡོ་རྗེ་ཁུ་ཚུར་གཉིས་བཅིངས་ཏེ། །གཡོན་པའི་མཛུབ་མོས་མཛུབ་མོ་བཙིར། །མཐེའུ་ཆུང་སོར་མོ་མཉམ་བརྡབ་པ། །འདི་ནི་འོག་མ་ རྣམས་དགུག་པའོ། །མཛུབ་མོ་གཉིས་ཀ་བརྟན་པོ་རུ། །རྡོ་རྗེ་བཅིངས་པ་སྦྲེལ་བར་བྱ། །གུང་མོ་མཐེ་བོ་རྡོ་རྗེར་བྱ། །རྒྱན་རྣམས་ཐམས་ཅད་འཇོམས་པའོ། །རྡོ་རྗེ་དཀྲི་བ་དང་། རྡོ་རྗེ་བཙིར་བ་དང་། རྡོ་རྗེ་ཕྲེང་བ་དང་། རྡོ་རྗེ་ས་དང་། རྡོ་རྗེ་སའི་འོག་དང་། རྡོ་རྗེ་ཧེ་རུ་ཀའོ། ། དེ་ལ་རྡོ་རྗེ་ཤུགས་ཀྱི་ཕྱག་རྒྱ་ནི་འདིའོ། །དཀྱིལ་འཁོར་དག་ནི་བྱེད་པ་ན། །སྲད་བུའམ་ཡང་ན་རི་མོ་ལ། །འཇུག་པ་དང་ནི་འབྱུང་བ་ན། །བསྒྲུབ་པས་ཡིད་ཀྱིས་བཏེག་ནས་སོ། །དེ་ལ་ཡེ་ཤེས་ཀྱི་ཕྱག་རྒྱའི་སྙིང་པོ་ནི་འདིའོ། །ཨོྃ་བཛྲ་བེ་ག་ཧཱུྃ། འདིས་ནི་དམ་ཚིག་མ་ ཉམས་པར་འགྱུར་རོ། །གཞན་དུ་དམ་ཚིག་ཉམས་པས་གྲུབ་པ་མེད་པར་འགྱུར་རོ། །དེ་ལ་དེ་བཞིན་གཤེགས་པ་ཐམས་ཅད་ལ་ཕྱག་འཚལ་བའི་ཕྱག་རྒྱ་ནི་འདིའོ། །དཔུང་པ་གཉིས་རྡོ་རྗེ་བཅིངས་ཏེ། རྡོ་རྗེའི་ཁུ་ཚུར་གཉིས་སུ་བྱས་ལ་པུས་མོ་བཙུགས་ཏེ་མགོ་བོ་ས་ལ་
- 47b
བཙུགས་ཏེ་ཕྱག་བྱའོ། །ཕྱག་ན་རྡོ་རྗེ་ལ་ནི་དེ་ཉིད་ཀྱིས་དད་པའི་སྟོབས་ཀྱིས་གནས་པར་བྱས་ལ། འཛུམ་ཞིང་བསྐྱོད་པ་དང་། སྨིན་མ་འགྱེད་པ་དང་བཅས་པའི་མིག་གིས་ཕྱག་བཙལ་ལོ། །གཞན་རྣམས་ལ་ནི་པུས་མོ་བཙུགས་པའོ། །དེ་ལ་རྡོ་རྗེ་འཛིན་མའི་དམ་ཚིག་ གི་ཕྱག་རྒྱ་བཅིང་བ་ནི་འདི་ཡིན་ཏེ། ལག་པ་གཉིས་ཀྱི་རྒྱབ་སྦྱར་ནས་མཐེ་བོ་མཐེའུ་ཆུང་སྦྲེལ་བར་བྱའོ། །རྡོ་རྗེ་འཛིན་མའི་ཕྱག་རྒྱ་འདི་སངས་རྒྱས་ཐམས་ཅད་དབང་དུ་བྱེད། པྲ་ཏཱི་ཙྪ་བཛྲ། སྙིང་པོ་འདིས་མེ་ཏོག་གཏོར་རོ། །རྡོ་རྗེ་ཀྱོ་བ་ཏང་གི་ཕྱག་རྒྱ་ནི་རྡོ་རྗེ་འཛིན་མའི་མཛུབ་ མོ་གཉིས་ཀྱོ་བ་ཏང་གི་ཚུལ་དུ་བྱའོ། །དེ་བཞིན་གཤེགས་པ་ཐམས་ཅད་ལ་སོགས་པ་དང་། སེམས་ཅན་ཐམས་ཅད་དགུག་པའི་དམ་ཚིག་འདའ་བར་མི་བྱ་བ་སྟེ། དམ་ཚིག་ལྕགས་ཀྱུ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་རྟོག་པའི་ཕྱག་རྒྱ་བཅིང་ བ་འབྱུང་སྟེ། རྡོ་རྗེའི་ཁུ་ཚུར་གཉིས་བཅིངས་ནས། །གཡས་པས་བསྡམ་པར་བྱ་བ་ནི། །རྡོ་རྗེ་ཁྲོ་བོའི་མཛུབ་མོ་གཡོན། །སངས་རྒྱས་བྱང་ཆུབ་མཆོག་བསམ་པའོ། །དེ་ལ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ཕྱག་རྒྱ་ནི་འདིའོ། །མཐེ་བོ་གཉིས་ཀའི་ སྐྱིལ་མོ་ཀྲུང་། །མཛུབ་མོ་གཉིས་ཀ་དགུག་པར་བྱ། །རྡོ་རྗེ་ཐལ་མོ་འོད་དཀྱིལ་འཁོར། །གུང་མོ་གཉིས་ཀ་ཁ་འབྱེད་པ། །འདི་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་སྟེ། དེ་བཞིན་གཤེགས་པ་ཐམས་ཅད་དགུག་པ་དང་། གཞུག་པ་དང་། དབང་དུ་བྱ་བ་ ལས ། འདའ་བར་མི་འགྱུར་ཞིང་། འདི་མཐོང་བས་དེ་བཞིན་གཤེགས་པ་ཐམས་ཅད་ཀྱི་སྐུ་མཐོང་བར་འགྱུར་རོ། །དེ་ནས་བཛྲ་བིད་ཀྱི་ཡེ་ཤེས་ཀྱི་ཕྱག་རྒྱ་སྟེ། སེམས་ནི་རྣམ་དག་ཤེས་བྱ་བ། །བརྟན་པས་སེམས་དཔའ་ཞེས་བྱའོ། །མཉམ་པར་གཞག་པས་ཏིང་ངེ་ འཛིན། །ངེས་པས་རྡོ་རྗེ་ཉིད་དུ་འགྱུར། །སངས་རྒྱས་ངོ་བོའི་བདག་ཉིད་དེ། །སེམས་ཉིད་སངས་རྒྱས་ཉིད་ཡིན་ནོ། །སངས་རྒྱས་ཀུན་གྱིས་བྱིན་བརླབས་པས། ངེས་པར་སངས་རྒྱས་ཉིད་དུ་འགྱུར། །ཕྱག་རྒྱ་ཆེན་པོ་བཅིངས་ནས་དེ་བསྒོམ་མོ། །དེ་ནས་དེ་བཞིན་
- 48a
གཤེགས་པ་ཐམས་ཅད་ཀྱིས་རང་གི་སེམས་སོ་སོར་བརྟགས་པ་ལ་སོགས་པས་སངས་རྒྱས་སུ་ཡོངས་སུ་སྦྱར་བར་བྱས་ནས། ཇི་ལྟར་ཚེ་འདི་ཉིད་ལ་སངས་རྒྱས་ཐོབ་པར་འགྱུར་ཏེ། དེ་ལྟར་བྱིན་གྱིས་རློབ་པར་མཛད་དོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ ནི་ལས་ཀྱི་ཕྱག་རྒྱའོ། །དེ་ནས་ཕྱག་ན་རྡོ་རྗེའི་ཕྱག་རྒྱ་ཆེན་པོ་ནི་འདི་ཡིན་ནོ། །ལུས་དང་ངག་སེམས་རྡོ་རྗེ་ཡིས། །ཕྱག་ན་རྡོ་རྗེ་བདག་ཉིད་འགྱུར། །རྡོ་རྗེ་འགྱིང་བ་རབ་བྱེད་ཅིང་། །འགྱིང་དང་བཅས་པས་རྡོ་རྗེ་གསོར། །འདི་ཡིས་ཀུན་འགྲོ་སྐད་ཅིག་གིས། །འོད་དང་ གྱེན་དུ་འགྲོ་བར་འགྱུར། །འདོད་པ་ཀུན་དབང་ཐམས་ཅད་པ། །ཕྱག་ན་རྡོ་རྗེ་འདྲ་བར་འགྱུར། །དེ་ནས་དམ་ཚིག་གི་ཕྱག་རྒྱའོ། །རྡོ་རྗེ་བཅིང་བ་བཅིངས་ནས་ཀྱང་། །གུང་མོ་ནང་བཅུག་སྙིང་གར་བཞག །མཐེ་བོ་མཐེའུ་ཆུང་ཁ་ཕྱེ་མཉམ། །རྡོ་རྗེ་ཆེན་པོ་དེ་ལྟར་བཅིང་། ། སེམས་དཔའ་ཀུན་གྱི་ཏིང་འཛིན་གྱིས། །འདི་ནི་སྙིང་གར་བཅིངས་པ་ཡིས། །ཕྱག་རྒྱ་ཀུན་གྱི་དངོས་གྲུབ་པ། །དམ་པ་དག་ཀྱང་ཐོབ་པར་འགྱུར། །དེ་ལ་ཡེ་ཤེས་ཀྱི་ཕྱག་རྒྱ་ནི་འདིའོ། །ཟླ་བའི་དཀྱིལ་འཁོར་དབུས་སུ་ནི། །ལུས་དང་ངག་སེམས་རྡོ་རྗེ་ཡིས། །ཕྱག་ ན་རྡོ་རྗེ་བདག་གི་ལུས། །བསྒོམས་ན་མྱུར་དུ་འགྲུབ་པར་འགྱུར། །རྡོ་རྗེ་ཁུ་ཚུར་གཉིས་བྱས་ལ། །འགྱིང་བཅས་རྡོ་རྗེ་གསོར་བྱས་ན། །འགྱིང་ཞིང་གྱེན་དུ་སྟོན་ཚུལ་གྱིས། །སྙིང་གར་བཟུང་ན་འགྲུབ་པར་འགྱུར། །དེ་ལ་བཅོམ་ལྡན་འདས་ཀྱི་སྐུའི་ཕྱག་རྒྱ་བཅིང་བ་ནི་འདི་ཡིན་ ནོ། །རྡོ་རྗེ་ཁུ་ཚུར་གཉིས་བཅིངས་ལ། །གཡས་པ་གཞུ་འདྲེན་སྦྱོར་བ་དང་། །མདའ་འཕེན་པ་ཡི་ཚུལ་གྱིས་སུ། །ཀུན་ལ་བསྣུན་ན་ཆགས་པར་བྱ། །དེ་ནས་བཅོམ་ལྡན་འདས་དབང་བསྐུར་བའི་ཕྲེང་བའི་ཕྱག་རྒྱ་བཅིང་བ་ནི་དེ་བཞིན་གཤེགས་པའི་སྐུའི་ཕྱག་རྒྱ་གཙུག་ཏོར་ དུ་གཞག་གོ། །དེ་ནས་ཕབ་སྟེ་གུང་མོ་རྡོ་རྗེར་བྱས་ཏེ། དེ་ལས་བསྐོར་ཏེ་གུང་མོ་ནོར་བུར་བྱས་ལ། གཡས་ཕྱོགས་སུ་གཞག་གོ། །ལྟག་པར་གུང་མོའི་རྡོ་རྗེའི་པདྨོ་གཞག་གོ། །དེ་ལས་བསྐོར་ཏེ་གུང་མོ་དང་མཐེའུ་ཆུང་གྱེས་པར་བྱས་ལ་གཡོན་དུ་གཞག་གོ། །དེ་ནས་མཛུབ་
- 48b
མོ་གཉིས་མདུད་པ་བྱས་ཏེ་ཕྲེང་བ་བཅིང་བའི་ཚུལ་དུ་ལྟག་པར་མདུད་པ་བྱས་ལ། སོར་མོ་ཐམས་ཅད་མཐེའུ་ཆུང་ནས་མཐར་གྱིས་འཇིག་པའི་ཚུལ་གྱིས་དགྲོལ་བ་ནི་ཅོད་པན་གྱི་ཚུལ་བཞིན་དགྲོལ་ལོ། །ཕྱག་ན་རྡོ་རྗེའི་ཕྱག་རྒྱའོ། །དེ་ནས་བཅོམ་ལྡན་འདས་ཐོག་མ་དང་ཐ་མ་ མེད་པའི་སེམས་དཔའ་བསྒྲུབ་པར་འདོད་པས་ལྷ་མོའི་དཀྱིལ་འཁོར་བྱས་ཏེ། དེ་ནས་ཉིན་གཅིག་ཅིང་བདག་ཉིད་བྱིན་གྱིས་བརླབས་ནས། ཇི་ལྟ་བུའི་དུས་སུ་ཅི་ནུས་པས་ཅི་འདོད་པ་བདེ་བར་བྱས་ལ། ཕྱག་རྒྱ་ཆེན་པོའི་ཚུལ་གྱི་གླུ་དབྱངས་ཀྱིས་རྡོ་རྗེའི་ཚིག་ཏུ་རྡོ་རྗེ་སེམས་ དཔའ་བཟླས་ཏེ་སྙིང་པོ་འདི་ཅི་འདོད་པས་བཟླས་སོ། །ཨོྃ་མ་ཧཱ་སུ་ཁ་བཛྲ་སཏྭ་ཛཿཧཱུྃ་བྃ་ཧོཿསུ་ར་ཏ་སྟྭྃ། དེ་ལྟར་ཟླ་བ་གཅིག་བཟླས་ཏེ་བསྒྲུབ་བོ། །ཟླ་བ་གཅིག་ལོན་པའི་མཇུག་ཏུ་ཚེས་བཅོ་ལྔ་ལ་ངལ་ན་ཕྱག་རྒྱ་བཀྲོལ་ལ། རྡོ་རྗེའི་ཐལ་མོ་བརྐྱང་ནས་ལུས་ཐམས་ཅད་ཀྱིས་ ཕྱག་བྱའོ། །ཅུང་ཟད་གནས་ནས་ཇི་ལྟར་ངལ་བར་མི་འགྱུར་བར་བྱས་ཏེ། དེ་ལྟར་མཚན་རངས་པར་བཟླས་ན། དེའི་ནང་པར་བཅོམ་ལྡན་འདས་ཟླ་བའི་ཁ་དོག་ཟླ་བའི་དཀྱིལ་འཁོར་དང་མཚུངས་པའི་འོད་ཅན་བྱོན་ཏེ། སྒྲུབ་པ་པོ་ལ་འཁྱུད་ནས་དེའི་ལུས་ཀུན་ཏུ་ཞུགས་སོ། །དེ་ ནས་སྒྲུབ་པ་པོ་ཡང་ཟླ་བའི་དཀྱིལ་འཁོར་འདྲ་བའི་འོད་ཅན་དང་། ཟླ་བའི་འོད་ཅན་དེ་བཞིན་གཤེགས་པ་ཐམས་ཅད་ཀྱི་ཕྲེང་བ་ལ་སོགས་པ་དང་། ལྷའི་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་འཛིན་གྱི་ལུས་དང་། ངག་དང་། སེམས་རྡོ་རྗེ་ཐམས་ཅད་དང་འདྲ་བར་འགྱུར་རོ། ། བདག་གི་རིགས་དང་། གཉེན་དང་། གྲོགས་པོ་དང་། གཉེན་བཤེས་ལ་སོགས་པ་དང་། སེམས་ཅན་ཐམས་ཅད་ཀྱིས་གཟུགས་བཟང་པོ་མཐོང་ན་ཡང་འཆི་བར་མི་འགྱུར་རོ། །ལྟ་བར་བྱེད་དོ། །མཆོད་པར་བྱེད་དོ། །སྟེན་པར་བྱེད་དོ། །དོན་ཐམས་ཅད་བྱེད་དོ། ། དེ་ཡང་རང་གི་ཁྱིམ་དེ་ཉིད་ན་གནས་བཞིན་དུ་ལྷའི་ཆོ་འཕྲུལ་བྱེད་དོ། །དེ་བཞིན་གཤེགས་པར་ཡང་གྱུར་ནས་རྫུ་འཕྲུལ་དང་ཆོ་འཕྲུལ་ཐམས་ཅད་བྱེད་དོ། །རྡོ་རྗེ་ཧཱུྃ་ཞེས་བྱ་བ་ལ་སོགས་པའི་གཟུགས་ཀྱིས་ཀྱང་འདུལ་བར་བྱེད་དོ། །སེམས་ཅན་དེ་དག་གིས་ཀྱང་མཐོང་ངོ་། །མ་
- 49a
བཏུལ་བ་རྣམས་ཀྱང་འདུལ་ལོ། །ཇི་ལྟར་འདོད་པའི་གཟུགས་སུ་འགྱུར་བ་དང་། ཐམས་ཅད་དུ་འགྲོ་བ་དང་། ཕྱིར་འོང་བ་དང་། གྱེན་དུ་འགྲོ་བར་འགྱུར་བ་དང་། འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་ཐམས་ཅད་ལ་མཆོད་པ་བྱས་ ནས་ཕྱིར་འོང་བའི་བར་དུའོ། །དོན་ཐམས་ཅད་ལ་ལོངས་སྤྱོད་པ་དང་། འདོད་པ་ཐམས་ཅད་ལ་དབང་བ་དང་། འདོད་པ་ཐམས་ཅད་སྤྱོད་པའི་ཚེ། ནམ་མཁའ་དང་མཚུངས་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་རྡོ་རྗེ་འདོད་པ་ ཁྲོ་བོའི་ཕྱག་རྒྱ་བཅིང་བ་ནི་རྡོ་རྗེའི་ཁུ་ཚུར་གཉིས་བཅངས་པ་ལས། མདའ་འཕེན་པའི་ཚུལ་གྱིས་མེ་ཏོག་གི་གཞུ་འདྲེན་པ་ནི་ཐམས་ཅད་དགའ་བར་བྱེད་པ་ཡིན་ནོ། །རྡོ་རྗེའི་ཁུ་ཚུར་གཉིས་ཀྱིས་སྙིང་གར་རྡོ་རྗེ་ཧཱུྃ་ཞེས་པ་སྟེ། གཡས་པའི་རྡོ་རྗེ་ཁུ་ཚུར་གྱིས་འཕེན་པས་ རྡོ་རྗེ་འཕངས་པས་ནི་ཐམས་ཅད་གཏན་འཕོའོ། །དེ་ནས་འདི་ནི་དམ་ཚིག་གི་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅངས་ཏེ། །དེ་ལྟར་ཀྱོ་བ་མཐེའུ་ཆུང་མཛུབ། །མདུད་ནས་མཐེ་བོ་གཤིབས་པ་ཡིས། །བསྡམས་ཏེ་སྙིང་གར་གཞག་པར་བྱ། །འདི་ནི་དེ་བཞིན་ གཤེགས་པ་ཐམས་ཅད་ལ་སོགས་པ་ངེས་པར་དགུག་པ་དང་གཞུག་པ་དང་། བཅིང་བ་དང་། དབང་དུ་བྱ་བ་དང་འདྲེན་པར་བྱེད་པའོ། །རྡོ་རྗེ་ཁུ་ཚུར་གྱིས་འཁྱུད་པ་ནི་རྡོ་རྗེ་དགའ་བའི་ཕྱག་རྒྱའོ། །དམ་ཚིག་གི་ཕྱག་རྒྱ་འབྱུང་སྟེ། རྡོ་རྗེ་བཅིང་བ་བསྡམ་བྱས་ནས། ། གཡོན་པའི་མཛུབ་མཐེབ་མོ་མཚན་དུ། །མཐེ་བོའི་རྟགས་ནི་བཙུད་ནས་སུ། །དེ་བསྐྱོད་བར་དུ་བསྡམ་པར་བྱ། །འདིས་ནི་བུད་མེད་ཐམས་ཅད་དགའ་བར་བྱེད་དོ། །རྡོ་རྗེའི་ཁུ་ཚུར་གཉིས་ཀྱིས་རྒྱལ་མཚན་འཛིན་པའི་ཚུལ་དུ་བྱའོ། །རྡོ་རྗེའི་རྒྱལ་མཚན་ནོ། །དམ་ ཚིག་གི་ཕྱག་རྒྱ་འབྱུང་སྟེ། རྡོ་རྗེ་བཅིང་བ་བསྡམ་བྱས་ནས། །མཛུབ་མོ་གཉིས་ནི་དགུག་པར་བྱ། །སྲིན་ལག་གཤིབས་ལ་མཐེའུ་ཆུང་བསྐྱེད། །དེ་ལྟར་མཐེ་བོ་གཉིས་ཀྱང་བསྐྱེད། །འདི་བསྟན་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱང་བྱམས་པ་བསྟན་པར་
- 49b
མཛད་ན་གཞན་ལྟ་ཅི་སྨོས། རྡོ་རྗེ་ཁུ་ཚུར་གཉིས་ཀྱིས་སྙེམས་པར་བྱེད་པ་ནི་རྡོ་རྗེ་སྙེམས་པའོ། །དམ་ཚིག་གི་ཕྱག་རྒྱ་འབྱུང་སྟེ། རྡོ་རྗེ་བཅིང་བ་ཀུན་བྱས་ནས། །རྩི་བ་ལོགས་གཉིས་སུ་བསྐོར་ནས་སུ། །འཛིན་པས་བསྐྱོད་པས་འདུད་པ་སྟེ། །ཁྲོ་བོ་ཐམས་ཅད་མགུ་ བར་བྱེད། །རྡོ་རྗེ་སེམས་དཔའ་མཆོག་བཅས་དང་། །རྡོ་རྗེ་གར་གྱི་རབ་སྦྱོར་བས། །མདོར་ན་མེ་ཏོག་ལ་སོགས་པའི། །གསང་བའི་མཆོད་པ་མྱུར་དུ་འགྲུབ། །རྟོག་པ་གཞན་གྱི་གསང་བའི་མཆོད་པ་དང་ཡང་སྦྱར་རོ། །དེ་ནས་རྡོ་རྗེ་གར་འབྱུང་སྟེ། །རྡོ་རྗེ་ཁུ་ཚུར་གཉིས་ བཅིངས་ནས། །འཛུམ་པས་མཐའ་ནས་བརྩམས་ཏེ་དགྲོལ། །གློག་བཞིན་བསྒྱུར་ཏེ་བསྐོར་ཞིང་དགྲོལ། །འགྲམ་པ་དང་ནི་གཙུག་ཏོར་བཞག །རྡོ་རྗེ་གར་ཞེས་བྱ་བ་སྟེ། །བདག་ཆེའི་མཆོད་པ་ཐམས་ཅད་དོ། །མཆོད་པ་འདི་ནི་གསོལ་བས་ན། །དངོས་མེད་ཉིད་ཀྱང་ མྱུར་དུ་འགྲུབ། །དེ་ནས་རྡོ་རྗེ་གཟུགས་ལ་སོགས་པའི་ཕྱག་རྒྱ་བཅིང་བ་ནི་རྡོ་རྗེ་བཅིང་བ་བརྐྱང་ལ་མཐིལ་དུ་བལྟའོ། །རྡོ་རྗེ་བཅིངས་པས་གཡོན་པའི་མཛུབ་མོ་ནི་པི་བང་གི་ཤིང་ངོ་། །གཡས་པ་བཀུག་པས་ནི་ལིན་ཏེ། བརྐྱང་བའི་ལག་མཐིལ་གྱིས་རང་གི་སྙིང་གར་བྱུག་གོ། ། མེ་ཏོག་གི་ཐལ་མོའི་ཚུལ་གྱིས་རྡོ་རྗེ་རོ་བཏུང་བར་བྱའོ། །རྡོ་རྗེའི་ཁུ་ཚུར་གཉིས་བཅངས་ཏེ། གཡོན་པའི་མཐེའུ་ཆུང་ནི་གཡས་པའི་ཀྱོ་བ་ཏང་གིས་བཟུང་ངོ་། །ཀྱོ་བ་ཏང་དེ་གཡས་པས་སེམས་དཔའི་དམ་ཚིག་ཐམས་ཅད་དང་། སེམས་ཅན་ཐམས་ཅད་ཀྱང་དགུག་གོ། །རྡོ་རྗེ་ བཅིངས་ལ་མཐེ་བོང་མདུད་པ་ནི་ཞགས་པའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱི་མཛུབ་མོ་སྦྲེལ་བ་ནི་ཐམས་ཅད་བཅིང་ངོ་། །རྡོ་རྗེ་འབེབས་པའི་ཕྱག་རྒྱས་ནི་ཐམས་ཅད་འབེབས་པར་བྱེད་དོ། །དེ་ནས་གོ་ཆའི་ཕྱག་རྒྱ་འབྱུང་སྟེ། ཁུ་ཚུར་བཅིངས་པ་གཉིས་ཀྱིས་སྙིང་གར་མདུད་པའི་ ཚུལ་དུ་བྱའོ། །སྤོས་ནས་ཡང་ལྟག་པར་ཡང་དེ་བཞིན་ནོ། །སྤོས་ནས་སྙིང་གར་ཡང་དེ་བཞིན་ནོ། །ཡང་བར་དུ་ཡང་མདུད་དོ། །ཡང་སྤོས་ནས་སྙིང་ག་དང་ལྟག་པར་ཡང་དེ་བཞིན་ནོ། །མགོ་ལ་ཡང་དེ་བཞིན་དུ་དབང་བསྐུར་བའི་གནས་སུའོ། །ཕྲེང་བ་བཅིང་པའི་མདུད་
- 50a
པའི་ཚུལ་གྱིས་མཐེའུ་ཆུང་ལ་སོགས་པའི་སོར་མོ་ཐམས་ཅད་དགྲོལ་བའི་ཅོད་པན་གྱི་ཚུལ་དུ་བྱའོ། །དེ་ནས་འཕགས་པ་སྤྱན་རས་གཟིགས་ཀྱི་དབང་པོའི་ཕྱག་རྒྱ་བཅིང་བ་ནི། པདྨོ་ཟུམས་པའི་ཐལ་མོ་སྦྱར། །པད་མོ་ཆེན་པོར་གྲགས་པ་སྟེ། །མཐེའུ་ ཆུང་མཐེ་བོ་གཉིས་འགྱེད་པ། །སྡིག་པ་རྣམས་ནི་སེལ་བའོ། །དེ་ཉིད་མཛུབ་མོ་ཀྱོ་བ་ཏང་དུ་བྱས་པ་ནི་ཐམས་ཅད་དགུག་པའོ། །དེ་ནས་པདྨོ་འབྱུང་སྟེ། རྡོ་རྗེ་བཅིངས་པའི་མཛུབ་མོ་གཉིས་བཀུག་ལ་མཐེ་བོ་མཉམ་པའི་སྟེང་དུ་གུང་མོ་གཉིས་བཞག་གོ། །དེ་གཉིས་སུ་ བྱས་ནས་གཡོན་པ་ལ་གཡས་པས་པད་མོ་འབྱེད་པར་བྱའོ། །དེ་ནས་པད་མོ་དག་གི་ཕྱག་རྒྱ་ནི་ཧྲཱིཿ། ཡེ་ཤེས་ཀྱི་ཕྱག་རྒྱ་ནི་པད་མོ་འབྱེད་པས་འདོད་ཆགས་ལ་སོགས་པའི་དྲི་མ་སྦྱོང་བར་གསུངས་པ་ཉིད་དོ། །དེ་ནས་ནམ་མཁའི་སྙིང་པོའི་ཕྱག་རྒྱ་བཅིང་བ་ནི་ནོར་བུའི་ཁུ་ཚུར་ གཉིས་ཀས་དབང་བསྐུར་བའི་ཕྲེང་བ་བཅིང་ངོ་། །དེ་ནས་རྡོ་རྗེ་རིན་པོ་ཆེའི་ཕྱག་རྒྱ་ནི། རྡོ་རྗེ་བཅིང་བ་ཀུན་བྱས་ནས། །མཛུབ་མོ་མཉམ་ནས་མཐེབ་དང་སྦྱར། །དེ་དག་ངོས་སུ་སྤྲད་པ་སྟེ། །དབང་བསྐུར་གནས་སུ་དབང་སྦྱིན་ནོ། །དེ་ཉིད་ཁ་ཡར་བསྟན་ལ་སྙིང་གར་བཞག་པ་ ནི་ནོར་བུའི་ཁུ་ཚུར་ཞེས་བཤད་དེ། དོན་ཐམས་ཅད་འཕྲོག་པའོ། །དེ་ཉིད་ལས་མཐེ་བོའི་རྡོ་རྗེས་མཛུབ་མོ་མཉམ་པ་མནན་ཏེ། རྒྱབ་བསྐུམ་པ་ནི་རྡོ་རྗེའི་ནོར་བུའོ། །ཏྲཱྃ། ཆོས་ཀྱི་ཕྱག་རྒྱའོ། །ཡེ་ཤེས་ཀྱི་ཕྱག་རྒྱ་ཐམས་ཅད་ནམ་མཁར་བསྒོམ་པའོ། །དེ་ནས་རྡོ་རྗེ་ཁུ་ཚུར་གྱི་ཕྱག་རྒྱ་ བཅིང་བ་ནི་དེ་ལྟར་སྔར་བཤད་པ་ཉིད་དོ། །བཱྃ། ངག་གི་ཕྱག་རྒྱའོ། །བྱམས་པའི་བཅིང་བ་ནི་བཅིང་བའི་ནང་ན་མཆོག་སྟེ། ཡེ་ཤེས་ཀྱི་ཕྱག་རྒྱའོ། །མདུན་དུ་ནི་རྡོ་རྗེ་ཆེན་པོའི་ཕྱག་རྒྱའོ། །གཡས་སུ་ནི་རྡོ་རྗེ་རིན་པོ་ཆེའི་ཕྱག་རྒྱ་བསྟན་པ་ཉིད་དོ། །རྒྱབ་ཏུ་ནི་རྡོ་རྗེ་བཅིང་བ་སྙིང་ གར་བཀན་ནས་མཐེ་བོ་སྦྱར་ཏེ། མཛུབ་མོ་གཉིས་དགུག་པར་བྱའོ། །རྡོ་རྗེ་པདྨ་མཆོག་གི་ཕྱག་རྒྱའོ། །རྡོ་རྗེ་བཅིང་བའི་མཐེ་བོ་དང་མཐེའུ་ཆུང་གཉིས་སྙིང་གར་བརྐྱང་བ་ནི་རྡོ་རྗེ་སྟེ། རྡོ་རྗེ་ཐམས་ཅད་དོ། །རིགས་ཐམས་ཅད་ཀྱི་དམ་ཚིག་གི་ཕྱག་རྒྱ་སྟེ། གྲུབ་པ་ཐམས་ཅད་
- 50b
སྩོལ་བ་ཕྱག་རྒྱའི་དཀྱིལ་འཁོར་དུ་བྲིའོ། །དེ་ནས་འཇམ་དཔལ་གྱི་ཕྱག་རྒྱ་བཅིང་བ་ནི་རྡོ་རྗེ་ཁུ་ཚུར་མཛུབ་མོའི་རྩེ་མོ་བཀུག་པ་འདི་ནི་རལ་གྲིའོ། །སྙིང་པོ་ནི་གླེགས་བམ་མོ། །དམ་ཚིག་གི་ཕྱག་རྒྱའོ། །གཡོན་པའི་གླེགས་བམ་བཅངས་པའི་མཐེའུ་ཆུང་ནི་གཡས་པའི་རལ་གྲི་ འཛིན་པས་གཟུང་ངོ་། །ཨཱ། ཆོས་ཀྱི་ཕྱག་རྒྱའོ། །ཆོས་ཐམས་ཅད་ལ་ཡི་གེ་མེད་ཅེས་བྱ་བ་ནི་ཡེ་ཤེས་ཀྱི་ཕྱག་རྒྱའོ། །དེ་ནས་རྡོ་རྗེ་འཁོར་ལོའི་ཕྱག་རྒྱ་བཅིང་བ་ནི། རྡོ་རྗེའི་ཁུ་ཚུར་གཉིས་བཅངས་ཏེ། །མཐེའུ་ཆུང་མཛུབ་མོའི་རྡོ་རྗེའི་བཅིང་། །རྡོ་རྗེ་འཁོར་ལོ་ཞེས་བཤད་ དེ། །དཀྱིལ་འཁོར་ཐམས་ཅད་སྒྲུབ་པའོ། །འདི་མཐོང་བས་དཀྱིལ་འཁོར་ཐམས་ཅད་མཐོང་བར་འགྱུར་རོ། །དེ་བཞིན་དུ་དབུས་སུ་ཁ་བཞག་སྟེ་བཟླས་ན། དཀྱིལ་འཁོར་ཐམས་ཅད་དུ་ཞུགས་པར་འགྱུར་ཞིང་དེ་བཞིན་དུ་སྒྲུབ་པར་འགྱུར་རོ། །ཧཱུྃ། ཆོས་ཀྱི་ཕྱག་རྒྱའོ། ། དེ་ནས་ནམ་མཁའ་མཛོད་ཀྱི་ཕྱག་རྒྱ་བཅིང་བ་ནི་རྡོ་རྗེ་ནོར་བུའི་ཕྱག་རྒྱ་ལས་མཐེའུ་ཆུང་དང་སྲིན་ལག་མཉམ་པའི་རྒྱལ་མཚན་བསྒྲེང་བའི་ཚུལ་དུ་བྱའོ། །ཆོས་ཀྱི་ཕྱག་རྒྱ་ནི་ཏྲཱྃ། འཕགས་པ་བྱམས་པ་བྱང་ཆུབ་སེམས་དཔའ་ཆེན་པོའི་ཕྱག་རྒྱ་བཅིང་བ་ནི་རྡོ་རྗེ་གོ་ཆའི་ཕྱག་རྒྱའོ། ། ངག་གི་ཕྱག་རྒྱ་ནི་ཨོྃ། དེ་ནས་རྟོག་པ་ཐམས་ཅད་སྤྱིའི་ཕྱག་རྒྱ་ཤེས་པ་འབྱུང་སྟེ། དེ་ལ་ལུས་ཀྱི་ཕྱག་རྒྱར་འགྱུར་བ་ནི་འདི་ལྟ་སྟེ། འགྲེང་ཡང་རུང་། འདུག་ཀྱང་རུང་། རྐང་པ་བསྙམས་ཏེ་བརྐྱང་བ་དང་། ལག་པ་བསྒྲེང་བ་ནི་རྡོ་རྗེའི་ཕྱག་རྒྱའོ། །མཆོག་བསྒྲུབ་པ་ལ་རྡོ་རྗེ་ དང་མཚུངས་པར་འགྱུར་རོ། །ལངས་ནས་གཡོན་པས་རྡོ་རྗེ་ཁུ་ཚུར་བཅངས་ནས་གཡས་པ་བཀུག་པས་དྲངས་པ་ནི་རྡོ་རྗེ་ལྕགས་ཀྱུའི་ཕྱག་རྒྱ་སྟེ། ཐམས་ཅད་འདྲེན་པའི་ཕྱག་རྒྱ་ཡིན་ནོ། །ལངས་ལ་པུས་མོ་བསྐྱེད་དེ་བཀུག་ནས་ལག་པ་གཉིས་བསྡམས་ཏེ་གྱེན་དུ་བརྐྱང་བ་ནི་ཐམས་ ཅད་གཏན་འཕོ་བའི་རལ་གྲིའོ། །དཔུང་པ་གཉིས་ཀྱིས་རང་གི་སྙིང་གར་འཁྱུད་པ་ནི་གོ་ཆ་སྟེ་མི་ཕྱེད་པའོ། །དེ་ནས་རང་གི་ཕྱག་རྒྱ་བཅིང་བ་ནི་ཨ་ཧོ་ཧྃ་ཧཱུྃ། དབབ་པ་དང་། དབང་དུ་བྱ་བ་དང་། བསྲུང་བ་དང་། གཏན་འཕོ་བའི་ཕྱག་རྒྱའོ། །དེ་ནས་ལྟ་བའི་ཕྱག་རྒྱ་འབྱུང་བ་
- 51a
ནི། །མྱུར་འགྱུར་རྡོ་རྗེའི་ལྟ་བ་སྟེ། །བགྲད་དེ་བཙུམས་པ་འདྲེན་པ་ཡིན། །ཁྲོ་བོའི་ལྟ་བ་ཁྲོ་གཉེར་ཏེ། །བརྟན་པར་ལྟ་བ་མི་གཡོ་བའོ། །དེ་ནས་འདི་དག་གི་ལས་འབྱུང་བ་ནི་རྡོ་རྗེའི་ལྟ་བས་སྐྱེ་འགྲོ་ཐམས་ཅད་མགུ་བར་བྱའོ། །བགྲད་པའི་ལྟ་བས་ནི་ཐམས་ ཅད་དགུག་པ་དང་། རིམས་དང་། གདོན་དང་། དུག་དང་། བྱད་མ་ལ་སོགས་པ་དང་། ནད་ཐམས་ཅད་སེལ་ཏོ། །ཁྲོ་བོའི་ལྟ་བས་ནི་ཐམས་ཅད་གཏན་འཕོའོ། །བརྟན་པར་ལྟ་བས་ནི་ཐམས་ཅད་བསྲུང་ངོ་། །དེ་ལ་སྙིང་པོ་ནི་འདི་རྣམས་ཡིན་ནོ། །བཛྲ་དྲྀཥྚི་མཊ། དཱི་པྟ་ དྲྀ་ཥྚི་ཨཾ་ཀུ་ཤ་ཛ། ཨོྃ་ཀྲོ་དྷ་དྲྀ་ཥྚི་ཕཊ། དྲྀཌྷ་དྲྀཥྚི་ཧྃ། སོའི་ཕྱག་རྒྱ་འབྱུང་སྟེ། སོ་བཅའ་བས་ནི་གཏན་འཕོའོ། །མུར་བས་ནི་དབང་དུ་བྱེད་དོ། །སྙིང་པོ་བཟླས་ཤིང་ཁྲོ་བོའི་ཏིང་ངེ་འཛིན་བཟླས་ཏེ་ཕྱག་རྒྱའི་ལས་བྱེད་དོ། །གཡས་ནས་གཅུ་བ་ནི་དགུག་པའོ། །གཡོན་ ནས་གཅུ་བ་ནི་དབང་དུ་བྱེད་པའོ། །མ་མཆུ་སོས་མནན་པས་ནི་གཏན་འཕོའོ། །མཆུ་གཉིས་ཀ་བསྡམས་པས་ནི་བསྲུང་ངོ་། །སངས་རྒྱས་རྗེས་སུ་དྲན་པ་དང་རྡོ་རྗེ་འཛིན་པ་རྗེས་སུ་དྲན་པ་དང་། རྡོ་རྗེ་ཁྲོ་བོ་རྗེས་སུ་དྲན་པ་ནི་ཐམས་ཅད་སྒྲུབ་པ་སྟེ་མཆུའི་ ཕྱག་རྒྱའོ། །མིག་གཡས་པ་བསྐྱོད་པས་དབང་དུ་བྱེད་དོ། །མིག་གཡོན་པ་བསྐྱོད་པས་རྗེས་སུ་ཆགས་སོ། །གཉིས་ཀ་བཙུམས་པས་ནི་གཏན་འཕོའོ། །གཉིས་ཀ་བགྲད་པས་ནི་སྲུང་ངོ་། །ཐམས་ཅད་ཀྱི་སྙིང་པོ་བཟླས་ཏེ་གྱེན་དུ་བལྟས་ན་ནམ་མཁའ་ལ་འགྲོ་བར་འགྱུར་ རོ། །ཐུར་དུ་བལྟས་ན་སའི་དབང་པོར་འགྱུར་རོ། །གཡས་ནས་བསྐོར་བ་ནི་དེ་བཞིན་གཤེགས་པ་ཐམས་ཅད་ལ་མཆོད་དོ། །གཡོན་ནས་བསྐོར་བས་ནི་ཕྱག་ན་རྡོ་རྗེ་ལ་མཆོད་དེ། ཐམས་ཅད་ཀྱི་སྙིང་པོ་སྟོང་བཟླས་ནས་བསྒྲུབ་བོ། །དེ་ནས་ཕྱི་རོལ་གྱི་རྡོ་རྗེ་རིགས་ཀྱི་ཕྱག་རྒྱ་བཅིང་ བ་འབྱུང་སྟེ། དེ་ལ་འཇིག་རྟེན་པའི་ཕྱག་རྒྱ་རྣམས་ནི་འཇིག་རྟེན་པའི་ཁུ་ཚུར་ལས་འབྱུང་སྟེ། རྡོ་རྗེ་ཁུ་ཚུར་ནི་རྡོ་རྗེ་བཅིང་བ་ལས། གཡོན་པའི་མཐེ་བོ་ནང་དུ་བཅུག་ནས་མཐེའུ་ཆུང་དང་སྲིན་ལག་གི་བར་དུ་བཙིར་ལ་བསྡམ་པར་བྱ་སྟེ། དེ་ཉིད་ལ་ཕྱག་རྒྱའི་སྙིང་པོ་འདི་འབུམ་བཟླས་ཏེ་བསྒྲུབ་
- 51b
བོ། །ཨོྃ་བཛྲ་མུ་དྲཱ་ཧཱུྃ། རྡོ་རྗེའི་ཁུ་ཚུར་གཉིས་སུ་བྱས་ཏེ། གཡས་པས་མཚན་མ་ཇི་ལྟར་བྱས་པ་བཞིན་དུ་གཟུང་ངོ་། །མ་རྣམས་ཐམས་ཅད་ཀྱི་ཕྱག་རྒྱ་བཅིང་བ་ནི་འདི་བཞིན་དུ་རྡོ་རྗེའི་ཁུ་ཚུར་ལས་གཡོན་པ་རྡོ་རྗེའི་ཁྲོ་བོའི་མཛུབ་མོ་བསྒྲེང་བ་སྟེ། དུར་ཁྲོད་དམ་ཚོགས་ ཀྱི་གནས་སུ་རྡོ་རྗེ་ཁྲོ་བོའི་མཛུབ་མོས་མི་ཁྲག་ཐིགས་པ་གསུམ་ཁར་བླངས་ཏེ་མྱངས་ནས་མི་རོ་མ་སྨས་ཤིང་མ་ཉམས་པ་རྐང་པ་གཡོན་པས་མནན་ཏེ་བརྒྱ་བཟླས་ན་ནམ་མཁའ་ལ་འགྲོ་བ་དང་། མི་སྣང་བར་འགྱུར་བ་དང་། བྱད་མ་ཐམས་ཅད་དབང་དུ་འགྱུར་རོ། །ཚོགས་དེ་དག་ ཐམས་ཅད་ཀྱི་དབང་པོར་འགྱུར་ཏེ། ཐག་འཇུག་པ་དང་། ཕན་འདོགས་ནུས་པར་འགྱུར་རོ། །མཁའ་འགྲོ་མའི་བདེ་བའི་མཆོག་ཐམས་ཅད་དང་། རྟོག་པ་ཐམས་ཅད་དང་། ལས་ཐམས་ཅད་དང་། ཕྱག་རྒྱ་ཐམས་ཅད་འགྲུབ་པར་འགྱུར་རོ། །དེ་ནས་ཁྲོ་བོའི་ཁུ་ ཚུར་སྒྲུབ་པའི་སྙིང་པོ་ནི་འདི་ཡིན་ནོ། །ཨོྃ་བཛྲ་ཨཱ་ར་ལི། ཕྱག་རྒྱ་བཅིང་བའི་རབ་ཏུ་བྱ་བའོ། །དེ་ནས་དེའི་རྗེས་ལ་ཕྱག་རྒྱ་ཐམས་ཅད་ཀྱི་གསང་བའི་སྒྲུབ་པའི་སྐབས་བཤད་པར་བྱ་སྟེ། དེ་ནས་དེ་བཞིན་གཤེགས་པའི་ཕྱག་རྒྱ་གསང་བ་སྒྲུབ་པ་ནི་དཀྱིལ་འཁོར་བྲི་སྟེ་དེར་ འདི་སྐད་བརྗོད་དོ། །བཅོམ་ལྡན་ཕྱག་རྒྱ་བཙུན་མོ་འདི། །རྟག་ཏུ་བདག་ལ་སྩལ་བར་སྩོལ། །སེམས་ཅན་ཀུན་གྱི་དོན་སྒྲུབ་ཕྱིར། །གྲུབ་པ་མཆོག་ནི་བསྒྲུབ་པར་བགྱི། །ཕྱག་ན་རྡོ་རྗེ་དཀྱིལ་འཁོར་ནས་འདི་ཞེས་བརྗོད་དོ། །སུ་ར་ཏེ་ས་མ་ཡ་སྟྭྃ་ཧོ། བཛྲ་སཏྭ་ཨ་དྱ་ སིད་དྷ་ནན། དེ་ནས་བྱང་ཆུབ་སེམས་དཔའ་གཞན་རྣམས་ཀྱི་གསང་བའི་ཕྱག་རྒྱ་སྒྲུབ་པ་ནི། བྱང་ཆུབ་སེམས་དཔའ་བདག་ཉིད་ཆེ། །རྟག་ཏུ་བདག་ལ་གྲུབ་པ་སྩོལ། །དེ་ནས་ཕྱི་རོལ་གྱི་རྡོ་རྗེ་རིགས་ཀྱི་གསང་བ་སྒྲུབ་པ་ནི་ཕྱག་ན་རྡོ་རྗེ་ཁྲོ་བོ་ནི་ཐམས་ཅད་བྱེད་པ་ཡིན་ནོ་ཞེས་དེ་སྐད་བརྗོད་ ལ་བསྒྲུབ་པར་བྱའོ། །མ་རྣམས་ཀྱི་གསང་བའི་ཕྱག་རྒྱ་སྒྲུབ་པ་ནི་དཀྱིལ་འཁོར་དུ་ཞུགས་ནས་བྷྱོ་བྷྱོ་ཞེས་རྗོད་ཅིག །གསང་བ་སྒྲུབ་པའི་རབ་ཏུ་བྱ་བའོ། །དེ་ནས་ཕྱག་རྒྱའི་དེ་ཁོ་ན་འབྱུང་སྟེ། དེ་བཞིན་གཤེགས་པའི་ཕྱག་རྒྱའི་དེ་ཁོ་ན་ནི་སེམས་ལས་སངས་རྒྱས་ཀྱི་ཆོས་འབྱུང་ངོ་། །
- 52a
ཡང་དག་པར་ན་འདི་དག་སྟེ། དེ་བཞིན་གཤེགས་པའི་བཙུན་མོའི་ཐུགས་ལ་གནས་པ་ཡིན་ནོ། །བདག་ཀྱང་དེ་བཞིན་གཤེགས་པ་ཡིན་པས་བདག་གི་ཆུང་མ་ཡིན་ནོ་ཞེས་སྔར་བསྒོམས་ལ་ཕྱག་རྒྱ་བསྒྲུབ་བོ། །ཕྱག་ན་རྡོ་རྗེའི་ཕྱག་རྒྱའི་དེ་ཁོ་ན་ནི། རབ་ དགའ་བཅིང་བ་ཀུན་གྱི་མཆོག །དེ་ལས་ཕྱག་རྒྱ་རྣམས་སུ་བྱས། །འདོད་པ་རྡོ་རྗེ་སེམས་དཔའ་ཡིས། །གྲུབ་བརྟན་མྱུར་དུ་སྩོལ་བར་མཛད། །དེ་ནས་གཞན་དག་ནི། བཅོམ་ལྡན་རྟག་པ་འདོད་པ་སྟེ། །དེ་ཉིད་དེ་བཞིན་གཤེགས་པའོ། །དེ་ལས་ཐམས་ཅད་བདག་ ཉིད་གཟུགས། །བདག་ཀྱང་ཕྱག་རྒྱ་གྲུབ་པར་ཤོག །དེ་ནས་ཕྱི་རོལ་གྱི་རྡོ་རྗེའི་རིགས་ཀྱི་ཕྱག་རྒྱའི་དེ་ཁོ་ན་ནི་ཕྱག་ན་རྡོ་རྗེས་ལྷ་ཐམས་ཅད་དབང་དུ་བྱས་ནས་རྡོ་རྗེར་བྱས་ཏེ། དེ་དག་གི་ཕྱག་རྒྱ་ཡང་རྡོ་རྗེའི་ཕྱག་རྒྱ་ཉིད་དོ། །དེ་ནས་མ་རྣམས་ཀྱི་ཕྱག་རྒྱའི་དེ་ཁོ་ན་ཉིད་ནི། མ་རུངས་ཐམས་ཅད་ཟ་བའི་ཕྱིར། །ལྷ་རྣམས་ཀུན་གྱིས་བྱས་པ་སྟེ། །ཕྱག་རྒྱ་འབེབས་པས་དེ་ཡི་ཕྱིར་བསྒོམས་ནས་ཀྱང་ནི་བསྒྲུབ་པར་བྱ། །དེ་བཞིན་གཤེགས་པའི་དེ་ཁོ་ན་རབ་ཏུ་སྦྱོར་བས་ཐོག་མར་བསྒོམས་ནས་བསྒྲུབ་བོ། །ཕྱག་རྒྱའི་དེ་ཁོ་ནའི་རབ་ཏུ་བྱ་བའོ། ། དེ་ནས་རྟོག་པ་ཐམས་ཅད་ཀྱི་བྱིན་གྱིས་བརླབ་པ་ལ་སོགས་པའི་ལས་བཤད་དོ་ཞེས་ནས་བཅོམ་ལྡན་འདས་ཕྱག་ན་རྡོ་རྗེས་གསུངས་པ། ཉིན་རེ་དང་པོ་དུས་བཞིན་དུ། །རྡོ་རྗེ་ཆེ་མཆོག་ཕྱག་རྒྱ་ཡིས། །སྙིང་ག་སྨིན་མཚམས་ལྐོག་མ་གཙུག །བདག་ཉིད་བྱིན་གྱིས་བརླབ་པར་བྱ། དེ་ལ་བྱིན་གྱིས་བརླབ་པའི་སྙིང་པོ་ནི་འདི་ཡིན་ནོ། །བཛྲ་སཏྭ། བཛྲ་རཏྣ། བཛྲ་དྷརྨ། བཛྲ་ཀརྨ། དེ་ལ་འདི་ནི་རྡོ་རྗེ་རིན་པོ་ཆེའི་དབང་བསྐུར་བའི་སྙིང་པོ་ཡིན་ནོ། །ཨོྃ་སརྦ་ཏ་ཐཱ་ག་ཏ་ཨ་བྷི་ཥིཉྩ། སྙིང་པོ་འདིས་རྡོ་རྗེ་རིན་པོ་ཆེའི་ཕྱག་རྒྱ་སྨིན་མཚམས་སུ་བཞག་སྟེ། མཛུབ་ མོ་གཉིས་ཀྱིས་ཕྲེང་བའི་ཚུལ་དུ་བཅིངས་ལ། ལྟག་པར་མདུད་པའི་ཚུལ་དུ་བྱས་ནས་བསྐོར་ཏེ། མཐེའུ་ཆུང་ནས་བརྩམས་ཏེ་བཀྲོལ་བས་སོར་མོ་ཐམས་ཅད་བཀྲོལ་ཏེ་དར་དཔྱངས་པ་ལྟར་བྱའོ། །དེ་ནས་ཏིང་ངེ་འཛིན་གྱི་ཡེ་ཤེས་བསྐྱོད་པ་ནི་རྡོ་རྗེ་བཅིང་བ་བཀན་ཏེ་པང་པར་བཞག་
- 52b
ནས་བསྒོམ་པའི་སྙིང་པོ་འདིས་རང་གི་སྙིང་གར་རྡོ་རྗེ་བསམ་མོ། །ཨོྃ་བཛྲ་ཨཱཏྨ་ཀཿ། རྡོ་རྗེའི་བཟླས་པས་ཅི་འདོད་པར་བཟླས་སོ། །དེ་ནས་རྡོ་རྗེའི་མཆོད་པའི་རབ་ཏུ་བྱ་བ་ནི། རྡོ་རྗེའི་ཁུ་ཚུར་གཉིས་བཅངས་ནས། །རྡོ་རྗེ་འགྱིང་བ་ལེགས་པར་བྱ། །རྡོ་རྗེ་ཕྲེང་བ་དེ་བཞིན་གླུ། ། རྡོ་རྗེ་གར་ཀྱང་སྤྱི་བོ་ནས། །དེར་བསྟོད་པའི་རྡོ་རྗེའི་གླུ་བླང་ཞིང་མཆོད་པར་བྱའོ། །རྡོ་རྗེ་སེམས་དཔའ་བསྡུས་པའོ། །རྡོ་རྗེ་རིན་ཆེན་བླ་མེད་དེ། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་ནི་མཛད་པར་གསོལ། །དགའ་བ་དང་། དབང་བསྐུར་བ་དང་། གླུ་དང་ མཆོད་པ་འདིས་དེ་བཞིན་གཤེགས་པ་ཉིད་ཀྱང་རྙེད་པར་མི་དཀའ་ན་གྲུབ་པ་གཞན་ལྟ་ཅི་སྨོས། དེ་ཅིའི་ཕྱིར་ཞེ་ན། དེ་ལྟར་སེམས་དཔའི་བདེ་བ་འདི་དང་མཚུངས་པ་མེད་དོ། །དེ་ནས་ཕྱག་ན་རྡོ་རྗེ་སའི་བྱིན་གྱིས་བརླབ་པ་ལ་སོགས་པ་འབྱུང་སྟེ། ཉིན་རེ་དང་པོར་དུས་བཞིན་དུ། རྡོ་རྗེའི་བྱིན་གྱིས་བརླབ་ཚུལ་གྱིས། །བདག་གིས་བདག་ཉིད་བྱིན་བརླབས་ནས། །སེམས་དཔར་བྱིན་རླབས་རྣལ་འབྱོར་ལྡན། །རྡོ་རྗེ་དང་བཅས་རྡོ་རྗེ་བཅིང་། །རྡོ་རྗེ་འབེབས་ལ་སོགས་ཚུལ་གྱིས། །རྡོ་རྗེ་ཁུ་ཚུར་རྡོ་རྗེ་བཅས། །གཉིས་བྱས་ཕྱག་རྒྱའི་མཆོག་གིས་སུ། ། བདག་ཉིད་བྱིན་གྱིས་བརླབ་པར་བྱ། །འདོད་པ་བདག་ཉིད་ཅེས་ཀྱང་བསྒོམ། །དེ་ནས་རྡོ་རྗེ་སེམས་དཔའི་གསང་བའི་སྙིང་པོ་བཟླས་པར་བྱའོ། །དེ་ལ་གསང་བའི་སྙིང་པོ་འདི་རྡོ་རྗེའི་གླུས་ཅི་འདོད་པར་བཟླས་སོ། །ཊཀྐི་ཛཿཧོ། དེ་ནས་བསྒྲུབ་པ་གཞན་ཡང་རྡོ་རྗེ་བཅིང་བས་ རྟགས་བཟུང་སྟེ་འབུམ་བཟླས་ན། འདོད་པ་ཐམས་ཅད་ཀྱི་དབང་ཕྱུག་དང་། འདོད་པའི་གཟུགས་དང་འདོད་པའི་ཚེ་དང་། འདོད་པའི་བདག་པོ་དང་། ཀུན་དུ་འགྲོ་བ་ཐམས་ཅད་གྲུབ་པར་འགྱུར་རོ། །དེ་ནས་ཕྱག་ན་རྡོ་རྗེའི་དབང་བསྐུར་བའི་རབ་ཏུ་བྱ་བ་འབྱུང་བ་ནི་དེ་བཞིན་ གཤེགས་པ་ཐམས་ཅད་ཀྱི་ཕྲེང་བའི་དབང་བསྐུར་བ་ཇི་ལྟ་བ་བཞིན་དུ་སྙིང་པོ་འདིས་སྦྱིན་ནོ། །ཨོྃ་སརྦ་ཏ་ཐཱ་ག་ཏ་རཏྣ་བྷི་ཥེ་ཀ་ཨ། དེ་ནས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་བསྐྱེད་པའི་ཏིང་ངེ་འཛིན་ལ་དམིགས་པ་ནི་ཇི་ལྟར་བཅོམ་ལྡན་འདས་སེམས་ཅན་ཐམས་ཅད་ཉིད་
- 53a
ཡིན་པ་དེ་བཞིན་དུ་བདག་ཀྱང་ཐམས་ཅད་ཉིད་དོ་ཞེས་ནས་སྙིང་པོ་འདིས་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ཏེ་བསྒོམ་མོ། །དེ་ལ་སྙིང་པོ་ནི་འདིའོ། །ཨོྃ་སཏྭ་ཛཿཧཱུྃ་བྃ་ཧོཿ། དེ་ནས་བཅོམ་ལྡན་འདས་ཀྱི་སྤྱན་སྔར་ གསང་བའི་མཆོད་པ་བྱ་བ་ནི་བྱིན་གྱིས་བརླབ་པ་ལ་སོགས་པ་ཐམས་ཅད་བྱེད་དེ། རྡོ་རྗེ་ཁུ་ཚུར་གཉིས་བཅངས་ལ། །རྡོ་རྗེ་གར་དང་སྦྱར་ནས་སུ། །མེ་ཏོག་ལ་སོགས་དབུལ་བ་ནི། །གསང་བའི་མཆོད་པ་ཕྱག་རྒྱས་དབུལ། །གཞུ་འདྲེན་པ་ཡི་ཚུལ་གྱིས་སུ། །རྡོ་རྗེ་ མདའ་ནི་འཕེན་པར་བྱ། །ཀུན་ནས་འཁྱུད་དང་རྒྱལ་མཚན་བསྒྲེང་། །གཉིས་སྙེམས་འཛིན་པས་འདུད་པའོ། །རྡོ་རྗེའི་བསྟོད་པ་འདིས་རྡོ་རྗེའི་གླུ་བླང་ཞིང་མཆོད་དོ། །གཟུགས་ལ་སོགས་པ་འདོད་པ་དག་གི་བདེ་བ་དང་། །ཤིན་ཏུ་ཡིད་བདེ་བཅོམ་ལྡན་རབ་དགའ་ཁྱོད་ལ་ འདུད། །ཁྱོད་ཀྱིས་བདག་ལ་དེང་དུ་དགའ་བདེ་ཀུན་མཆོད་ལ། །མཆོག་གི་བདག་ཉིད་གྲུབ་པའང་མྱུར་དུ་ཚུལ་བཞིན་སྩོལ། །བསྟོད་པའི་སྙིང་པོ་འདིས་ཐམས་ཅད་གྲུབ་པར་འགྱུར་རོ། །བཅོམ་ལྡན་འདས་ཕྱག་ན་རྡོ་རྗེ་ལ་ཉིན་རེར་ལན་རེ་བསྟོད་ན་བཅོམ་ལྡན་འདས་ ལས་ཐམས་ཅད་ཐོབ་པར་འགྱུར་རོ། །སློབ་དཔོན་དེ་རང་གི་ལྕེ་ལས་ཀྱང་འདས་པ་དང་། མ་འོངས་པ་དང་། ད་ལྟར་གྱི་ཐམས་ཅད་དང་། བཅོམ་ལྡན་འདས་ཀྱི་བཀའ་དང་། རྟོག་པ་ཐམས་ཅད་དང་། ཚིག་གི་རྒྱུད་ཐམས་ཅད་ཀྱང་སྨྲ་བར་འགྱུར་རོ། །ལྷའི་གླུ་སྔོན་མ་བྱུང་ བ་ཡང་ལེན་ཏོ། །རྡོ་རྗེའི་གླུས་འབུམ་བཟླས་ན་རྡོ་རྗེ་འཛིན་པར་འགྱུར་རོ། །དེ་ལྟར་ལན་ཅིག་བྱིན་གྱིས་བརླབས་ལ་དེ་ནས་ཕྱིས་སྒྲུབས་ཤིག །དེ་ནས་ཉིན་གཅིག་བཞིན་བྱིན་གྱིས་བརླབ་པ་ལ་སོགས་པ་ཉིན་རེར་ལན་རེ་བྱས་ན་གྲུབ་པ་ཐམས་ཅད་དང་། ཕུན་སུམ་ཚོགས་པ་ཐམས་ཅད་ དང་དབང་བསྐུར་བ་ལ་སོགས་པ་དང་། ཤེས་པ་ཐམས་ཅད་དང་། ལས་ཐམས་ཅད་འགྲུབ་བོ། །དེ་བཞིན་གཤེགས་པ་ཐམས་ཅད་ལ་སོགས་པ་དང་། སེམས་དཔའ་རྣམས་དེར་ལྷགས་ནས་ཕྲ་མོ་ལ་སོགས་པ་སྟོན་ཏེ་ཚིག་སྨྲའོ། །བྱམས་པར་བྱེད་དོ། །མཆོད་དོ། །
- 53b
དེ་ཡང་དེ་བཞིན་གཤེགས་པ་ཐམས་ཅད་ལ་མཆོད་པ་དང་། རིམ་གྲོ་ཐམས་ཅད་ཀྱིས་མཆོད་དོ། །སེམས་ཅན་ཐམས་ཅད་ལ་ཚར་གཅད་པ་དང་། ཕན་འདོགས་ནུས་པར་འགྱུར་རོ། །འཇིག་པ་མེད་པ་དང་། ཟད་པ་མེད་པ་དང་། འགོད་པ་མེད་པ་དང་། འཇིགས་ པ་མེད་པར་འགྱུར་རོ། །སེམས་ཅན་ཐམས་ཅད་ཀྱི་འཇིགས་པ་ཐམས་ཅད་དང་། ནད་ཐམས་ཅད་དང་། སྡུག་བསྔལ་ཐམས་ཅད་ཀྱང་སེལ་ཏོ། །ཆོ་འཕྲུལ་ཐམས་ཅད་སྟོན་ཏོ། །བདག་ཉིད་ཀྱིས་དེ་བཞིན་གཤེགས་པ་ཐམས་ཅད་ལ་སོགས་པ་སེམས་དཔའི་ གཟུགས་མན་ཅད་དང་། བདག་གི་ལུས་ཐམས་ཅད་དང་། ནམ་མཁའ་དང་། ས་དང་། ཤིང་དང་། རི་དང་། ཆུ་རྣམས་ལས་ཀྱང་དེ་བཞིན་གཤེགས་པ་ཐམས་ཅད་ལ་སོགས་པའི་གཟུགས་ཐམས་ཅད་སྟོན་པར་བྱེད་དོ། །འོད་ཟེར་སྟོན་པ་ལ་སོགས་པའི་ཆོ་འཕྲུལ་ ཐམས་ཅད་སྟོན་ཏོ། །རང་ཡང་སངས་རྒྱས་ཀྱི་གཟུགས་ལ་སོགས་པ་དང་། ཐམས་ཅད་ཀྱི་གཟུགས་སུ་འགྱུར་རོ། །མིག་གིས་འདས་པ་དང་མ་འོངས་པ་དང་ད་ལྟར་གྱི་ཤེས་པ་ཐམས་ཅད་ཡི་གེ་རྣམས་ལས་མཐོང་ངོ་། །ཐམས་ཅད་ལས་ཐོས་ཤིང་རང་གི་ལྕེས་སྨྲའོ། ། སྔོན་མ་བྱུང་བའི་རྟོག་པ་དང་། མདོ་སྡེ་ཐམས་ཅད་འཆད་དོ། །སྟོན་སྐྱོབ་ཐམས་ཅད་དང་། སིལ་སྙན་དང་། འཕོང་དང་། མཚོན་འདེབས་པ་དང་། ཤེས་ཉེན་དང་། བཟོ་དང་སྒྱུ་རྩལ་ཐམས་ཅད་ལྷུན་གྱིས་གྲུབ་པར་ཤེས་པར་འགྱུར་རོ། །ཉིན་གཅིག་བཞིན་དུ་གཟུགས་ ཆེན་པོ་དང་། མདོག་དང་། སྟོབས་དང་། དཔའ་བ་དང་། ཚེ་དང་། ནད་མེད་པ་དང་། དངོས་གྲུབ་ཐམས་ཅད་དང་ལྡན་པར་འགྱུར་རོ། །སེམས་ཅན་ཐམས་ཅད་ཀྱི་སེམས་དང་། སྤྱོད་པ་དང་། སྒྲ་སྐད་དང་། ཚིག་ཤེས་ཤིང་མཐོང་ངོ་། །ཉིན་གཅིག་བཞིན་ ཐམས་ཅད་མངོན་པར་ཤེས་པར་འགྱུར་རོ། །མདོར་ན་དེ་བཞིན་གཤེགས་པ་ཉིད་དང་། རྡོ་རྗེ་འཛིན་པ་ལ་སོགས་པ་དངོས་གྲུབ་ཐམས་ཅད་མ་བསྒྲུབས་པར་ཚེ་འདི་ཉིད་ལ་ཐོབ་པར་འགྱུར་རོ། །བྱིན་གྱིས་བརླབས་ལ་སོགས་པའི་རབ་ཏུ་བྱ་བའོ། །དེ་ལ་སྒྲུབ་པའི་རབ་ཏུ་བྱ་བ་
- 54a
འབྱུང་སྟེ། དེ་བཞིན་གཤེགས་པ་སྒྲུབ་པ་ནི་མདུན་དུ་བདག་ཉིད་སངས་རྒྱས་ཀྱི་སྐུ་རྗེས་སུ་དྲན་པ་བསྒོམ་ཞིང་སྙིང་པོ་དང་། ཕྱག་རྒྱ་དང་སྔགས་དང་རིག་པ་རྣམས་བསྒྲུབ་བོ། །ཕྱག་ན་རྡོ་རྗེ་སྒྲུབ་པ་ནི་སེམས་དཔར་བྱིན་གྱིས་བརླབ་པའི་ རྣལ་འབྱོར་རམ། འདོད་པར་སྒོམས་བའམ། །རྡོ་རྗེ་སེམས་དཔའ་རྗེས་སུ་དྲན་པའམ། བདག་གི་སྙིང་གར་རྡོ་རྗེ་བསྒོམ་པའམ། བདག་གི་མདུན་དུ་སངས་རྒྱས་རྗེས་སུ་དྲན་པར་བྱེད་བཞིན་དུ་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་བསྒྲུབ་བོ། ། སེམས་དཔའ་ཆེན་པོ་ཐམས་ཅད་ནི་བདག་ཉིད་ཀྱིས་རང་གི་སེམས་དཔའ་རྗེས་སུ་དྲན་པའམ། སྙིང་གར་རྡོ་རྗེ་ཆེན་པོ་བསྒོམ་ཞིང་སྙིང་པོ་དང་། ཕྱག་རྒྱ་དང་སྔགས་དང་རིག་པ་རྣམས་བསྒྲུབ་པར་བྱའོ། །ཕྱིའི་རྡོ་རྗེའི་རིགས་བསྒྲུབ་པ་ནི་ཁྲོ་བོའི་ཚུལ་གྱིས་སྙིང་པོ་ དང་ཕྱག་རྒྱ་དང་སྔགས་དང་རིག་པ་རྣམས་བསྒྲུབ་བོ། །རྡོ་རྗེ་མ་རྣམས་སྒྲུབ་པ་ནི་སེམས་ཅན་ཐམས་ཅད་ཟ་བའི་རྗེས་སུ་དྲན་པའམ་བདག་ཉིད་རྡོ་རྗེ་སྲིན་པོར་གྱུར་ཏེ། དེའི་ཕྱིར་བདག་ཉིད་ཀྱང་སེམས་ཅན་ཐམས་ཅད་བཟའོ་ཞེས་ཁྲོས་ཏེ། སྙིང་པོ་དང་། ཕྱག་རྒྱ་ དང་སྔགས་དང་། རིག་པ་རྣམས་བསྒྲུབ་པར་བྱའོ། །སྒྲུབ་པའི་རབ་ཏུ་བྱ་བའོ། །དེ་ནས་སྒྲུབ་པའི་ཐབས་ཀྱི་རབ་ཏུ་བྱ་བ་འབྱུང་སྟེ། ཇི་ལྟར་འཇིག་རྟེན་འདུལ་འགྱུར་བ། །དེ་ལྟར་སྒྲུབ་པར་གསུངས་པ་སྟེ། །གྲུབ་པ་ཐམས་ཅད་བྱེད་པའི་མཆོག །སྒྲུབ་ པའི་ཐབས་ཀྱི་རབ་ཏུ་བྱ་བའོ། །དེ་ནས་རས་ཀྱི་རབ་ཏུ་བྱ་བ་འབྱུང་སྟེ། དེ་ལ་དེ་བཞིན་གཤེགས་པའི་རས་ནི་སྐྲ་མེད་པར་བྱས་ལ་དཀྱིལ་འཁོར་ཟླུམ་པོར་ཐིག་གདབ་བོ། །ཕྱག་ན་རྡོ་རྗེའི་རས་ནི་ངོས་ཐམས་ཅད་པར་གྲུ་བཞི་པོ་དར་རམ་རས་ལ་བྲིའོ། །སེམས་ དཔའ་ཆེན་པོ་རྣམས་ཀྱི་ནི་ཇི་ལྟ་བུར་འདུས་པའི་འཁོར་བཞིན་དུའོ། །ཕྱིའི་རྡོ་རྗེའི་རིགས་རྣམས་ཀྱིས་མ་བསྡུས་པ་ལ་འདུས་པའི་འཁོར་ཇི་ལྟ་བ་བཞིན་དུ་དགོད་དོ། །རྡོ་རྗེ་མ་རྣམས་ཀྱི་མཉམས་པ་ལ་ཁ་ཚར་མ་བཅད་པ་སྟེ། རི་མོ་མཁན་གསོ་སྦྱོང་ཅན་གྱིས་སྦྱིན་
- 54b
མེད་པའི་ཚོན་རྩི་སྣོད་སར་པར་བཞག་པས་བྲི། རས་ཀྱི་རབ་ཏུ་བྱ་བའོ། །དེ་ལ་ཆ་ལུགས་ཀྱི་ཚད་རབ་ཏུ་བྱ་བ་ནི་དེ་བཞིན་གཤེགས་པ་ནི་དེ་བཞིན་གཤེགས་པའི་མཐོ་གང་ཙམ་དུ་བྱ་བའོ། །ཕྱག་ན་རྡོ་རྗེའི་ནི་མཐའ་མེད་པའི་ཕྱིར་ཇི་ལྟར་འདོད་པའི་ཚད་དུ་བྱའོ། ། དེ་ལ་རྡོ་རྗེའི་ཚད་ནི་ཇི་ཙམ་དུ་འགྱུར་ཞེ་ན། རང་གི་མཐེ་བོའི་ཚིགས་ཀྱི་སོར་མོ་བཅུ་དྲུག་ཏུ་བྱའོ། །དེ་ལ་རྡོ་རྗེའི་དབྱིབས་ཅི་འདྲ་བར་བྱ་ཞེ་ན། ཟུར་བཞི་ལ་རྩེ་ལྔ་པ་འོད་ཟེར་གྱི་ཕྲེང་བ་ཅན་སུམ་ཆར་བྱའོ། །སེམས་དཔའ་ཆེན་པོ་ཐམས་ཅད་ནི་མཐེ་བོའི་ཚིགས་ཀྱི་ སོར་བཅུ་དྲུག་གི་ཚད་དུ་བྱ་སྟེ། ཐམས་ཅད་ཀྱང་པདྨོ་ལ་བཞུགས་པར་བྱའོ། །དེ་བཞིན་དུ་སྐུ་གཟུགས་ཀྱི་ཚད་ལས་དཀྱིལ་འཁོར་གྱི་ཚད་ཀྱང་དེ་དང་འདྲ་བར་བྱའོ། །དེ་ལ་འདི་ནི་བཟླས་པའི་རབ་ཏུ་བྱ་བ་སྟེ། དེ་ལ་དེ་བཞིན་གཤེགས་པ་རྣམས་ཀྱི་ནི་དགོངས་པའི་ གསུང་ཏིང་ངེ་འཛིན་གྱི་ཚིག་སྟེ། །རྡོ་རྗེ་རྣམས་ཀྱིའང་དེ་བཞིན་ནོ། །དེ་ལ་རྟོག་པ་ཐམས་ཅད་ཀྱི་སྤྱིར་ནི་རྡོ་རྗེའི་ཚིག་གིས་བཟླས་ཏེ་བསྒྲུབ་བོ། །ཕྱག་ན་རྡོ་རྗེའི་ནི་རྡོ་རྗེ་ཚིག་གི་གླུ་དང་སྦྱར་ཏེ་བཟླས་སོ། །རྡོ་རྗེ་ཧཱུྃ་ཞེས་པ་ལ་སོགས་པ་རྡོ་རྗེའི་ཁྲོ་བོ་རྣམས་ནི་རྡོ་རྗེའི་ ཁྲོ་བོའི་ཚིག་གིས་བཟླས་སོ། །ཕྱིའི་རྡོ་རྗེའི་རིགས་རྣམས་ནི་ཆོས་ཀྱི་ཚིག་གིས་ཁྲོ་བོའི་སྒྲ་ཆེན་པོ་གསལ་བར་བྱས་ཏེ། ཁྲོ་བ་དང་བཅས་པས་བཟླས་སོ། །རྡོ་རྗེའི་མ་རྣམས་ནི་རྡོ་རྗེའི་ཚིག་ཕྲ་མོས་བཟླས་སོ། །དེ་ལ་ཏིང་ངེ་འཛིན་གྱི་ངག་ནི་ཡིད་ཀྱིས་བཟླས་སོ། །དེ་ལ་རྡོ་ རྗེའི་ངག་ནི། ལྕེ་ཐོག་རབ་ཏུ་མི་གཡོ་བར། །སོ་མཆུ་གཉིས་ཀ་སྦྱར་བ་སྟེ། །རྟོག་པ་ཀུན་ལ་རིག་པ་ནི། །རྡོ་རྗེའི་ངག་ནི་སྒྲ་སྤངས་པའོ། །དེ་ལ་རྡོ་རྗེའི་གླུ་ཚིག་ནི། །ཤ་ཊ་པ་ལ་སོགས་པའི་གླུ། །གྲོང་དགའ་བ་རྣམས་བླངས་པ་ཡི། །རྡོ་རྗེའི་ཚིག་བཟླས་རྟོག་པ་རུ། ། རྡོ་རྗེའི་གླུ་ཞེས་གྲགས་པའོ། །དེ་ལ་རྡོ་རྗེ་ཁྲོ་བོའི་ཚིག་ནི་འདིའོ། །ཧཱུྃ་ཞེས་པ་ཡི་འབྲུག་སྒྲ་འདྲ། །དེ་བཞིན་ཕྲ་ཞིང་སྒྲ་དང་ལྡན། །ཁྲོ་བོ་གསལ་བ་རྡོ་རྗེ་ཆེའོ། །ཁྲོ་བོའི་ཚིག་ཅེས་གྲགས་པའོ། །ཚིག་གི་རབ་ཏུ་བྱ་བའོ། །དེ་ལ་འདི་ནི་བཟླས་
- 55a
པའི་ཆོ་ག་རབ་ཏུ་བྱ་བ་ཡིན་ཏེ། རྟོག་པ་དག་ནི་ཀུན་ལ་ཡང་། །སེམས་དཔའ་གང་དང་གང་དག་གི། །སྙིང་པོ་ཕྱག་རྒྱ་སྔགས་བསྒྲུབ་པས། །དེ་ཡི་བདག་ཉིད་སྤྱན་དྲང་བསྒྲུབ། །གནས་དང་སྲོག་ཆགས་ཐམས་ཅད་ནི། །རང་གི་ ཚུལ་གྱིས་ཆོ་ག་ཐམས་ཅད་བསྒྲུབ་པའོ། །རྡོ་རྗེ་བཟླས་པ་ནི་རྟོག་པ་ཐམས་ཅད་བསྒྲུབ་པའོ། །རྡོ་རྗེ་སེམས་དཔའི་གསང་བའི་བཟླས་པ་འབྱུང་སྟེ། ཕྱག་ན་རྡོ་རྗེའི་སྙིང་པོ་དང་། །ཕྱག་རྒྱ་སྔགས་རིག་དེ་བཞིན་ཏེ། །བཟླས་པའི་དོན་གྱིས་མགོན་པོ་ བཟླས། །རྟོག་པ་ཀུན་ལའང་བསྒྲུབ་པར་བྱ། །ཕྱི་ཡི་རྡོ་རྗེ་རིགས་རྣམས་ཀྱི། །ཁྲོ་བོའི་མཉམ་པར་འཇོག་པའོ། །རྡོ་རྗེ་མ་རྣམས་ཐམས་ཅད་ཀྱི། །ཡིད་ཀྱིས་སུ་ནི་སྙིང་ཡང་གཟུང་། །བཟླས་པའི་དོན་ཞེས་བྱ་བ་ལ། །ཕྱག་ན་རྡོ་རྗེའི་ འདོད་པ་བསྒོམ་ཞིང་བཟླས་པ་སྟེ། འདི་ལྟར་ཨོྃ་ཞེས་བྱ་བ་ནི་འདོད་པ་སྟེ་བདེ་བ་ཆེན་པོའོ། །འདོད་པ་ནི་རྡོ་རྗེ་སེམས་དཔའ་ཞེས་བྱའོ། །འདོད་པ་ནི་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱེད་པའི་ཕྱིར་རོ། །ཛཿཧཱུྃ་བྃ་ཧོཿ། འདོད་པ་ནི་ཤིན་ཏུ་དགའ་བའོ། །འདོད་པ་ནི་བཟླས་པའི་དོན་ཏོ། །གསང་བའི་བཟླས་པ་འདི་བཟླས་ན་བསོད་ནམས་ཆུང་ངུས་ཀྱང་འགྲུབ་པར་འགྱུར་ཏེ། དེ་བཞིན་གཤེགས་པ་ཐམས་ཅད་ཀྱིས་ཀྱང་བསླུ་བར་མི་ནུས་སོ། །ཐལ་མོ་ཁོང་སྟོང་དུ་སྦྱར་ལ་མཆོད་པ་ བྱ་སྟེ། དེ་ལ་མེ་ཏོག་གི་མཆོད་པ་ནི་མེ་ཏོག་གི་ཐལ་མོ་གྱེན་དུ་ཕྱེ་བས་སོ། །བདུག་པའི་མཆོད་པ་ནི་ཐུར་དུ་བརྐྱང་བས་སོ། །མར་མེའི་མཆོད་པ་ནི་མཐེ་བོ་མཉམས་པས་གཡོགས་པའོ། །དྲིའི་མཆོད་པ་ནི་རབ་ཏུ་བརྐྱང་སྟེ་སྟོང་བའམ་གང་བས་སོ། །ཕྱག་ རྒྱ་འདི་རྣམས་ཀྱིས་ཡང་དག་པ་ཉིད་དུ་མཆོད་པར་འགྱུར་བ་ནི་སངས་རྒྱས་ཀྱི་ཞིང་ཐམས་ཅད་དང་། དཀྱིལ་འཁོར་ཐམས་ཅད་དང་། དམ་ཚིག་སེམས་དཔའ་ཐམས་ཅད་དང་། སྙིང་པོ་དང་ཕྱག་རྒྱ་དང་སྔགས་དང་རིག་པ་དང་ལྷ་ཐམས་ཅད་ལ་ཡང་ངོ་། །མཆོད་པའི་
- 55b
རབ་ཏུ་བྱ་བའོ། །དེ་ལ་བསོད་ནམས་མེད་པའི་སེམས་ཅན་གྱི་སྒྲུབ་པའི་རབ་ཏུ་བྱ་བ་འབྱུང་སྟེ། དཀྱིལ་འཁོར་གང་ཡང་རུང་བ་ཅིག་ཉིན་རེ་ཞིང་ཅི་ཙམ་འདོད་པའི་ཚད་དུ་ཉི་མ་བཞིར་བྲིས་ནས་ཇི་ལྟ་བ་བཞིན་དུ་དེར་ཞུགས་ལ་ཕྱག་རྒྱ་ཆེན་པོ་བཅིངས་ནས་རང་གི་ལྷག་པའི་ལྷ་ལན་ བརྒྱ་བཟླས་སོ། །བསོད་ནམས་མེད་པའི་སེམས་ཅན་གྱི་སྒྲུབ་པའི་རབ་ཏུ་བྱ་བའོ། །དེ་ལ་མྱུར་དུ་འགྲུབ་པར་འགྱུར་བའི་རབ་ཏུ་བྱ་བ་སྟེ། དེ་ལ་དེ་བཞིན་གཤེགས་པའི་མྱུར་དུ་འགྲུབ་པར་འགྱུར་བ་ནི། ཏིང་འཛིན་ཆོས་སྦྱིན་ལ་སོགས་དང་། །རྒྱ་ཆེན་ཚུལ་རྣམས་ ཀློག་པ་དང་། །དད་ལ་གནས་ཏེ་དེ་བཞིན་མཆོད། །དངོས་གྲུབ་མྱུར་སྦྱིན་ཆེན་པོ་ཡིན། །དེ་ལ་ཕྱག་ན་རྡོ་རྗེའི་མྱུར་དུ་འགྲུབ་པར་འགྱུར་བ་ནི། འདོད་ལ་ཆགས་དང་བྲལ་མིན་དང་། །འདོད་ལ་ཆགས་པའི་དམ་པས་མཆོད། །འདོད་ལ་ཅི་ནུས་ཆགས་བྱ་ བ། །མྱུར་དུ་དངོས་གྲུབ་སྦྱིན་པ་ཡིན། །དེ་ལ་འདི་ནི་སེམས་དཔའ་ཆེན་པོ་རྣམས་ཀྱི་མྱུར་དུ་འགྲུབ་པ་ནི། སྦྱིན་དང་ཚུལ་ཁྲིམས་དེ་བཞིན་བཟོད། །བརྩོན་འགྲུས་བསམ་གཏན་དེ་བཞིན་བློ། །ཅི་ནུས་ཀྱིས་ཀྱང་བྱ་བ་ནི། །ཉིན་གཅིག་བཞིན་དུ་ཅི་འདོད་ པར། །ཕྱིའི་རྡོ་རྗེའི་རིགས་ཀྱི་གྲུབ་པ་མྱུར་བ་ནི། སངས་རྒྱས་མཆོད་ཅིང་དེ་བཞིན་དང་། ཕྱག་ན་རྡོ་རྗེའི་བརྟུལ་ཞུགས་བརྟན། །རྡོ་རྗེ་རྟག་ཏུ་ལག་ན་བཟུང་། །མི་བགྲུངས་ཐམས་ཅད་ཚར་གཅོད་མཆོག །དེ་ནས་རྡོ་རྗེ་མ་རྣམས་ཀྱི་གྲུབ་པ་མྱུར་དུ་སྒྲུབ་པའི་ རབ་ཏུ་བྱ་བ་སྟེ། སེམས་ཅན་དགེ་ལ་དང་བ་དང་། །མཆོད་ཅིང་དམ་ཚིག་སྲུང་བ་སྟེ། །ཕྱག་རྒྱའི་གར་གྱི་མཆོད་པ་དང་། །སེམས་ཅན་མ་རུངས་དྲག་ཤུལ་བྱ། །གྲུབ་པ་མྱུར་བའི་རབ་ཏུ་བྱ་བའོ། །དེ་ལ་སློབ་དཔོན་གྱི་རབ་ཏུ་བྱ་བ་འབྱུང་སྟེ། དེ་ལ་འདི་ ནི་དེ་བཞིན་གཤེགས་པའི་དཀྱིལ་འཁོར་གྱི་སློབ་དཔོན་དུ་སྒྲུབ་པ་སྟེ། དཀྱིལ་འཁོར་དུ་དེ་བཞིན་གཤེགས་པའི་སྤྱན་སྔར་བཛྲ་བིད་ཅེས་བྱ་བའི་སྙིང་པོ་སྟོང་རྩ་བརྒྱད་བཟླས་ནས་སློབ་དཔོན་རང་གིས་དམ་ཚིག་གི་ཕྱག་རྒྱ་སྟོང་བཟླས་ཏེ། སློབ་མ་དབང་བསྐུར་བའི་སྙིང་པོ་ནི་
- 56a
འདིའོ། །བཛྲ་སཏྭ། བཛྲ་རཏྣ། བཛྲ་དྷརྨ། བཛྲ་ཀརྨ། ཨོྃ་ཨ་མུ་ཁ་མ་དྷི་ཏི་ཥྠ་སརྦ་ཏ་ཐཱ་ག་ཏ་ཨཱརྱ་ད་ཏྟེ་སྭཱ་ཧཱ། འདི་བརྒྱ་བཟླས་པ་ནི་སྙིང་ག་ལ་སོགས་པར་ཕྱག་རྒྱ་བཞག་ནས་སྤྱི་བོར་ཐམས་ཅད་བཟླས་སོ། །དེ་ནས་དེ་བཞིན་གཤེགས་ པའི་རིགས་ཀྱི་སློབ་དཔོན་སྦྱིན་ནོ། །ཕྱག་ན་རྡོ་རྗེའི་ཆ་ལུགས་སྤྱི་བོར་བཟུང་ནས་སྙིང་པོ་འདི་བརྒྱའམ་བརྒྱ་རྩ་བརྒྱད་དུ་ཟློས་ཤིག །བརྒྱ་བཟླས་པས་ནི་དེ་བཞིན་གཤེགས་པའི་རྡོ་རྗེའི་སློབ་དཔོན་དུ་འགྱུར་རོ། །བརྒྱ་རྩ་བརྒྱད་བཟླས་པས་ནི་ཏིང་ངེ་འཛིན་གྱི་རྡོ་རྗེ་སློབ་ དཔོན་དུ་འགྱུར་རོ། །དེ་ལ་སྙིང་པོ་ནི་འདིའོ། ཨོྃ་མ་ཧཱ་སུ་ཁ་བཛྲ་སཏྭ་ཛཿཧཱུྃ་བྃ་ཧོཿ། སུ་ར་ཏ་སྟྭྃ། དེ་ནས་དེའི་ལག་ཏུ་རྡོ་རྗེ་སྦྱིན་ནོ། །དེ་ནས་རྡོ་རྗེ་རིགས་ཀྱི་སྟེ། ལག་པ་གཉིས་སུ་རྡོ་རྗེ་བྱིན་ནས་རྡོ་རྗེ་རིགས་ཀྱི་རྡོ་རྗེའི་དྲི་ཆུས་བསྲེས་པའི་བུམ་པས་དབང་བསྐུར་ རོ། །སྙིང་པོ་འདིའོ། ཨོྃ་བཛྲ་ཨ་དྷི་པ་དྷི་ཏྭཾ་ཨ་བྷི་ཥིཉྩ་མི་དྲི་ཌྷོ་བྷ་བ་ཛཿཧཱུྃ་བྃ་ཧོཿཧཱུྃ་ཕཊ། དེ་ནས་པདྨོ་རིགས་ཀྱི་སློབ་དཔོན་དུ་སྒྲུབ་པ་ནི་པདྨོ་ལག་ཏུ་བྱིན་ནས་སྟོང་རྩ་བརྒྱད་བཟླས་ཏེ། པདྨའི་ཕྲེང་བས་མགོ་བཅིང་ངོ་། །སྙིང་པོ་འདི་བརྗོད་དོ། ཨོྃ་པདྨ་མཱ་ལེ་ཨ་བྷི་ ཥིཉྩ་ལོ་ཀེ་ཤྭ་ར་ར་ཏྭེ་སྭཱ་ཧཱ་ཧྲཱིཿ། རྡོ་རྗེ་རིན་པོ་ཆེའི་སློབ་དཔོན་དུ་བསྒྲུབ་པ་ནི། རྡོ་རྗེ་རིན་པོ་ཆེའི་ཕྱག་རྒྱ་སློབ་མ་དབང་བསྐུར་བའི་གནས་སུ་བཞག་ནས་སྙིང་པོ་འདི་སྟོང་བཟླས་སོ། ཨོྃ་བཛྲ་རཏྣ་ཨ་བྷི་ཥིཉྩ་རཏྣ་དྷི་བ་ཏི་ཏྭེ་བྷ་བ་ཊ་ཊ། སློབ་དཔོན་གྱིས་དཀྱིལ་འཁོར་ ཐམས་ཅད་དུ་བཙུད་དེ་དབང་བསྐུར་རོ། །ཕྱག་ན་རྡོ་རྗེ་སློབ་དཔོན་དུ་བྱ་སྟེ། ཡང་བདག་ཉིད་ཀྱིས་དཀྱིལ་འཁོར་བྲིས་ལ་བདག་ཉིད་ལ་བདག་གིས་སློབ་དཔོན་དུ་དབང་བསྐུར་རོ། །དེ་ལ་སློབ་དཔོན་གྱི་བརྟུལ་ཞུགས་ནི་འདི་ལྟ་སྟེ། དེ་བཞིན་གཤེགས་པའི་སློབ་དཔོན་ ནི་ཟླ་བ་གཅིག་གི་བར་དུ་རབ་ཏུ་བྱུང་ལ་བསླབ་པ་ཐམས་ཅད་བཟུང་སྟེ། རང་གི་ལྷག་པའི་ལྷ་དུས་གསུམ་དུ་བསྒྲུབ་བོ། །དེ་བཞིན་གཤེགས་པའི་རིགས་ཀྱི་སློབ་དཔོན་གྱི་བརྟུལ་ཞུགས་ནི་ཟླ་བ་ཕྱེད་ཀྱི་བར་དུ་ཉིན་རེ་ཞིང་བཅོམ་ལྡན་འདས་ཀྱི་སྤྱན་སྔར་བྱིན་གྱིས་བརླབ་
- 56b
པ་ལ་སོགས་པ་བྱས་ནས་ཕྱག་ན་རྡོ་རྗེའི་སྐུའམ། རང་གི་ལྷ་ཉིད་ལ་མཆོད་ནས་ཀྱོ་བ་ཏང་གིས་བཀུག་སྟེ། མི་སྐྱོ་བར་བཟླས་ཏེ་ལམ་དང་ལམ་མ་ཡིན་པའི་སྐབས་མི་དབྱེའོ། །དེ་ནས་ཕྱག་ན་རྡོ་རྗེའི་བརྟུལ་ཞུགས་འབྱུང་སྟེ། ཉིན་རེ་ཞིང་ནང་པར་ལངས་ནས་ བདག་ཉིད་བྱིན་གྱིས་བརླབ་པ་ལ་སོགས་པ་བྱས་ཏེ། བཀྲུས་ལ་དྲི་ཞིམ་པོ་དང་། གོས་འཚེར་བ་དང་། རྒྱན་གྱིས་ཆས་ཏེ་གླུ་དང་སིལ་སྙན་དང་། བཀོད་པ་དང་། སྒེག་པ་རྣམས་དང་ལྡན་པས་བཅོམ་ལྡན་འདས་ལ་མེ་ཏོག་ལ་སོགས་པ་གསང་བའི་མཆོད་ པ་རྣམས་ཀྱིས་ཡང་དག་པར་མཆོད་ནས་བཅོམ་ལྡན་འདས་དང་། བདག་ཉིད་ལ་འདོད་པའི་དངོས་པོས་མཆོད་པ་བྱ་སྟེ། དམ་ཚིག་ཆེན་པོའི་དེ་ཁོ་ན་ཉིད་ཅི་འདོད་པ་བཟླས་ཏེ། ཕྱེད་ཡོལ་གྱི་བར་དུ་འདོད་པའི་ཡོན་ཏན་ལྔ་སྤྱད་ནས། དེ་བཞིན་དུ་མཆོད་པ་བྱས་ཏེ་ ཅི་འདོད་པར་བཟླས་སོ། །དེ་ནས་ཡང་མཚན་རངས་པར་འདོད་པ་ལྔ་རྣམས་ལ་བརྟེན་ཅིང་བཟླས་པར་བྱ་སྟེ། དེ་ལྟར་ཞག་བཞིའི་བར་དུ་བྱའོ། །དེ་ནས་རྡོ་རྗེ་རིགས་ཀྱི་བརྟུལ་ཞུགས་ནི་ཟླ་བ་ཕྱེད་ཀྱི་བར་དུ་སྨྱོན་པར་བསྒྱུར་ནས་དེ་བཞིན་གཤེགས་པ་ཐམས་ཅད་ལ་ཕྱག་ འཚལ་ཞིང་ཕྱག་ན་རྡོ་རྗེ་མཆོད་དེ། མགོ་ས་ལ་གཏུགས་ནས་སྒྲེན་མོར་བྱུང་ངམ། གོས་གྱོན་ཡང་རུང་སྟེ། མགོ་བོ་རྡོབ་ཅིང་མིའོ་ཅོག་ལ་གཤེ་ཞིང་རྒྱལ་ཕྱག་རྒྱ་རྣམས་ཀྱིས་གར་བྱས་ཏེ། ཡིད་ཀྱིས་དེ་བཞིན་གཤེགས་པ་བསམས་ནས་མཚམས་བཅིང་བ་ལ་ སོགས་པ་བྱས་ནས་བཅོམ་ལྡན་འདས་ལ་ཇི་ལྟ་བ་བཞིན་དུ་མཆོད་པ་བྱས་ཏེ་བརྒྱ་རྩ་བརྒྱད་བཟླས་སོ། །དེ་ནས་པདྨོའི་རིགས་ཀྱི་བརྟུལ་ཞུགས་ནི་བཅོམ་ལྡན་འདས་ལ་མཆོད་པ་བྱས་ཏེ། བའི་གཅིན་ཧུབ་གང་འཐུངས་ལ་བའི་ལྕི་བ་ཅུང་ཟད་ཟོས་ན་དག་པའི་བརྟུལ་ཞུགས་ ཐམས་ཅད་འགྲུབ་བོ། །དེ་ནས་ཞག་བདུན་དུ་ཏིང་ངེ་འཛིན་ལ་མཉམ་པར་གཞག་ནས་སྟོང་རྩ་བརྒྱད་བཟླས་སོ། །དེ་ནས་ནོར་བུའི་རིགས་ཀྱི་བརྟུལ་ཞུགས་ནི་ཉིན་རེ་ཞིང་རང་ལ་དབང་བསྐུར་ནས་དེ་བཞིན་གཤེགས་པ་དང་། སེམས་དཔའ་ཆེན་པོ་རྣམས་མཆོད་
- 57a
དེ་རྒྱལ་པོ་ལྟ་བུར་སྒོམ་ཞིང་རྒྱལ་བོའི་ཕོ་བྲང་དུ་སོང་ནས། རྒྱལ་པོའི་མདུན་དུ་བརྒྱ་བརྒྱ་ཞག་བརྒྱད་ཀྱི་བར་དུ་བཟླས་སོ། །དེ་ལྟར་ན་སློབ་དཔོན་གྱིས་གྲུབ་པ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་། ཤེས་པ་ཐམས་ཅད་དང་། ཀུན་གྱིས་མཆོད་པ་ལ་སོགས་པ་དང་། ལས་ཐམས་ཅད་ཐོབ་པར་འགྱུར་རོ། །སློབ་དཔོན་གྱི་རབ་ཏུ་བྱ་བའོ། །དེ་ནས་ལས་གྲུབ་པ་ནི་སྙིང་པོ་བརྒྱ་རྩ་བརྒྱད་བཟླས་ཏེ། ལས་ཐམས་ཅད་བྱས་ན་ཐམས་ཅད་འགྲུབ་པར་འགྱུར་རོ། །རྡོ་རྗེའི་ཕྱག་རྒྱ་ཆེན་པོ་ བཅིངས་ནས་རྡོ་རྗེའི་བཟླས་པ་བརྒྱད་སྟོང་བཟླས་ན་འཇིག་རྟེན་པ་དང་། འཇིག་རྟེན་ལས་འདས་པའི་ལས་ཐམས་ཅད་ལ་ཕྱག་རྒྱ་ཐམས་ཅད་བཅིངས་པ་ཙམ་གྱིས་བདག་དང་ཕ་རོལ་གཉིས་ཀ་འགྲུབ་པར་འགྱུར་རོ། །སྔགས་ནི་རྡོ་རྗེ་ཚིག་གིས་སྟོང་ཕྲག་བརྒྱར་བཟླས་ན་ སྔགས་ཐམས་ཅད་ཐང་ཅིག་བཟླས་པས་ལས་ཀུན་བྱེད་དོ། །རིག་པ་སྟོང་ཕྲག་བརྒྱར་བཟླས་ན། དེ་ནས་རིག་པ་ཐམས་ཅད་ཐང་ཅིག་བཟླས་པས་ལས་ཐམས་ཅད་བྱེད་དོ། །དེ་ནས་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་འབྱུང་སྟེ། བཛྲ་སཏྭ་ནི་སྙིང་པོའོ། ། སཏྭ་བཛྲ་ནི་ཕྱག་རྒྱའོ། ཨོྃ་ནི་སྔགས་སོ། །ཁི་ཏི་ནི་རིག་པའོ། །དེ་ནས་སྙིང་པོ་དང་། ཕྱག་རྒྱ་དང་སྔགས་དང་རིག་པ་ཐམས་ཅད་སྒྲུབ་པའི་སྙིང་པོ་འབྱུང་སྟེ། ཨོྃ་མ་ཧཱ་སུ་ཁ་བཛྲ་སཏྭ་ཛཿཧཱུྃ་བྃ་ཧོཿསུ་ར་ཏ་སྟྭྃ། འདི་བཅོམ་ལྡན་འདས་ཀྱི་སྤྱན་སྔར་རྡོ་རྗེ་ སེམས་དཔས་བཟླས་པས་གླུ་དང་རྡོ་རྗེའི་ཚིག་གིས་སྟོང་རྩ་བརྒྱད་བཟླས་ན། སྙིང་པོ་དང་ཕྱག་རྒྱ་དང་སྔགས་དང་རིག་པའི་དངོས་གྲུབ་ཐམས་ཅད་འགྲུབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །འཇིག་རྟེན་གསུམ་ལས་རྣམ་པར་ རྒྱལ་བའི་རྟོག་པ་ཆེན་པོའི་རྒྱལ་པོ་ལས་ཕྱི་མའི་རྒྱུད་བཤད་པའོ།། །།དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་འཇིག་རྟེན་གསུམ་ལས་རྣམ་པར་རྒྱལ་བའི་ཆོས་ཀྱི་རྣམ་
- 57b
གྲངས་འདི་བཤད་ལགས་ན། དེ་བས་ན་བཅོམ་ལྡན་འདས་ཇི་ལྟར་དེ་བཞིན་གཤེགས་པ་རྣམས་གྲུབ་པ་དེ། སེམས་ཅན་འདུལ་བའི་སླད་དུ་ཡུལ་གཞན་དུ་མཆི་བའམ། དབུལ་པོར་འགྱུར་བའམ། འཁྲུག་པའམ། ཕྲག་དོག་གམ། སྨ་དབབ་ པའམ། སྡུག་བསྔལ་བའམ། འདོད་པ་ཆུང་བའམ། འདོད་པ་ལ་ཆགས་པའམ། རབ་ཏུ་འབྱུང་བར་སེམས་པའམ། གནོད་པ་མང་བའམ། ཉེས་པ་མང་བའམ། མྱ་ངན་ནམ། ནད་དམ། འཇིགས་པ་མང་པོ་ལ་སོགས་པ་གཞན་ ཡང་དད་པ་མེད་པར་འགྱུར་བ་དེ་ལྟ་བུར་མི་འགྱུར་བར་ལྷག་པའི་བསམ་པའི་ཆོས་སྐྱེ་བ་དང་། སྒྲིབ་པ་ཡོངས་སུ་བྱང་བར་འགྱུར་བ་དེ་ལྟར་བྱིན་གྱིས་བརླབ་པར་གསོལ། དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་གསུངས་སོ། །དམ་ཚིག་ ཆེན་པོ་དེ་ཁོ་ན་ཉིད་སྐུ་དང་གསུང་དང་ཐུགས་རྡོ་རྗེ་ཐམས་ཅད་པ། མ་ཐུལ་བ་འདུལ་བ་འདི་ཁྱོད་ཀྱིས་དེ་བཞིན་དུ་བཤད་པ་དེ་དག་གི་ཕྱིར་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་སོ། །དེ་ནས་སྒྲུབ་པ་པོ་དེ་དག་གིས་དང་པོར་རེ་ཞིག་དེ་བརྒྱད་སྟོང་ཇི་ལྟ་ བར་བཟླས་ནས་དེ་ཉིད་དམ་གཞན་དག་གི་ཡང་རུང་བསྒྲུབ་པར་བྱའོ། །གང་དག་འདོད་ཆགས་དང་བྲལ་བའི་ཆོས་ཀྱིས་འདུལ་བ་དེ་ལྟ་བུ་དག་ཀྱང་འབྱུང་བར་འགྱུར་ཏེ། དེ་དག་ལ་ཡང་སྙིང་པོ་འདི་སྦྱིན་ནོ། ཨོྃ་བྷུ་སརྦ་ཏ་ཐཱ་ག་ཏ་བཛྲ་སཏྭ་ཧོ། ས་མ་ཡ་སྟྭྃ། འདི་ཡང་བརྒྱ་སྟོང་དུ་བཟླས་ནས་དེ་ཉིད་དམ་གཞན་ཡང་བསྒྲུབ་པར་བྱའོ། །དེ་ནས་བཅོམ་ལྡན་འདས་ཀྱི་ཞབས་ལ་ཕྱག་ན་རྡོ་རྗེས་ཕྱག་འཚལ་ཏེ་ཚིགས་སུ་བཅད་པ་འདི་གསུངས་སོ། །སེམས་ཅན་ཀུན་ལ་ཕན་པའི་ཕྱིར། །རྟོག་པའི་དམ་པ་རབ་བཤད་པ། །འཇིག་རྟེན་ གསུམ་རྒྱལ་ཞེས་བྱ་བ། །གྲུབ་པ་ཐམས་ཅད་རབ་སྩོལ་མཆོག །གང་གིས་བརྗོད་པ་ཙམ་གྱིས་ན། །སྡིག་པ་ཀུན་ལས་རྣམ་པར་གྲོལ། །འཇིག་རྟེན་ཀུན་ན་མཆོད་པ་སྟེ། །གྲུབ་པ་ཐམས་ཅད་ཐོབ་པར་འགྱུར། །གང་དག་
- 58a
འདྲི་ཞིང་ཀློག་པ་དང་། །འཛིན་ཅིང་དད་པ་དེ་བཞིན་ཏེ། །དེ་ཡང་ཚེ་འདི་ཉིད་ལ་ནི། །གྲུབ་པ་ཐམས་ཅད་ཐོབ་འགྱུར་ན། དད་པ་བརྟུལ་ཞུགས་བརྟན་པ་ཡིས། །སྒྲུབ་པར་བྱེད་པ་ཅི་སྨོས་ཏེ། །སངས་རྒྱས་ཕྱག་ ན་རྡོ་རྗེ་ཉིད། །ཚེ་འདི་ཉིད་ལ་དེ་ཡིས་ཐོབ། །རྟོག་པ་ཀུན་ཀྱང་སྦྱར་ཡང་རུང་། །རང་གིས་བྱས་པའང་དེ་བཞིན་ཏེ། །རྟོག་པའི་རྒྱལ་པོ་ཉིད་བསྒྲུབས་ན། །དད་པ་མེད་ཀྱང་མྱུར་དུ་འགྲུབ། །བདག་གི་ཁྱིམ་དུ་གནས་པ་ཡང་། ། དེ་ལ་བདག་ཀྱང་ཀུན་འགྲུབ་ཕྱིར། །དེ་ལ་བདག་ནི་བསྲུང་བར་གནས། །དངོས་གྲུབ་དང་ནི་འདོད་ཀུན་དང་། །འཕེལ་བ་དང་ནི་འཚེ་མེད་དང་། །ཤེས་པ་རྣམས་དང་ཚེ་དང་སྟོབས། །གཟུགས་མཆོག་ངེས་པར་སྩོལ་བར་བགྱི། །དེ་ནས་བཅོམ་ ལྡན་འདས་གདན་ལས་བཞེངས་ཏེ། ཁམས་གསུམ་མཐའ་དག་ལུས་དང་། ངག་དང་། སེམས་རྡོ་རྗེའི་རྡུལ་ཕྲ་མོ་རྣམས་ཀྱིས་ཁྱབ་ནས། དེ་བཞིན་གཤེགས་པ་ཐམས་ཅད་དང་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །སེམས་ དཔའ་ཆེན་པོ་ཞེས་བྱས་ནས། བཅོམ་ལྡན་འདས་ཕྱག་ན་རྡོ་རྗེས་གསུངས་པ་ལ་མངོན་པར་དགྱེས་པར་གྱུར་ཏོ། །འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ཆེན་པོའི་རྒྱལ་པོ་ཀུན་རྫོགས་སོ།། །།འདིའི་འགྱུར་ལ་ལོ་ཆེན་རིན་ ཆེན་བཟང་པོས་བསྒྱུར་ཡང་ཟེར། རྣལ་འབྱོར་རྒྱུད་ལ་མཁས་པ་ཞ་ལུ་པ་ཡེ་ཤེས་རྒྱ་མཚོས་ཚིག་དོན་ལ་ལེགས་པར་དཔྱད་ནས་ཞུས་དག། ཡང་འགའ་ཞིག་རྨ་དགེ་བློས་བསྒྱུར་རོ་ཞེས་ཀྱང་འདོད་པ་ཡོད།། །། ཨོྃ་ཡེ་དྷརྨཱ་ཧེ་ཏུ་པྲེ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བྃ་བཱ་དཱི་མ་ཧཱ་ཤྲ་མ་ཎཿསྭཱ་ཧཱ། མངྒ་ལྃ།། །།
- 58b
༄༅། །རྒྱ་གར་སྐད་དུ། སརྦ་དུརྒ་ཏི་པ་རི་ཤོདྷ་ན་ཏེ་ཛོ་རཱ་ཛ་ཏ་ཐཱ་ག་ཏཱ་རྷ་ཏེ་སཾ་མྱཀྶཾ་བུདྡྷ་སྱ་ཀལྤ་ནཱ་མ། བོད་སྐད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་ རྒྱལ་པོའི་བརྟག་པ་ཞེས་བྱ་བ། བམ་པོ་དང་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷའི་ཚོགས་ཐམས་ཅད་ཀྱི་དགའ་བའི་ཚལ་མཆོག་ཏུ་ཡིད་དུ་འོང་བ་ན། ནོར་བུ་དང་། གསེར་དང་། གསེར་གྱི་ཤིང་ཡལ་ག་དང་། ལྕུག་མར་བཅས་པ་དང་། ཤིང་གེལ་པ་དང་། སྨན་དང་། མེ་ཏོག་ཀ་མ་ལ་དང་། ཨུཏྤལ་དང་། ཀརྞི་ཀ་དང་། བཀྐུ་ལ་དང་། ཏི་ལ་ཀ་དང་། ཨ་ཤོ་ཀ་དང་། མན་དཱ་ར་བ་དང་། མན་དཱ་ ར་བ་ཆེན་པོ་ལ་སོགས་པ་སྣ་ཚོགས་པ་དང་། དཔག་བསམ་གྱི་ཤིང་རྣམས་ཀྱིས་མཛེས་པར་བྱས་ཤིང་། །རྒྱ་སྣ་ཚོགས་ཀྱིས་བརྒྱན་པ། བྱ་སྣ་ཚོགས་མང་པོ་སྐད་སྙན་འབྱིན་པ། རྔ་དང་། ཅང་ཏེའུ་དང་། ཀེར་ཀོ་དང་། གླིང་བུ་དང་། རྔ་བོ་ཆེ་ལ་ སོགས་པའི་སྒྲ་གྲག་པ། བརྒྱ་བྱིན་དང་། ཚངས་པ་ལ་སོགས་པའི་ལྷ་དང་། ལྷའི་བུ་མོ་སྣ་ཚོགས་རྣམ་པར་རྩེན་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ན། བརྒྱ་བྱིན་དང་། ཚངས་པ་ལ་སོགས་པ་ལྷ་ དང་། རིག་པ་འཛིན་པ་དང་། ལྷའི་བུ་མོ་འཁོར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ཀླུ་ལ་སོགས་པ་འཁོར་དུ་མ་དང་། བྱང་ཆུབ་སེམས་ དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ལ། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཚད་མེད་པ་དང་། བློ་གྲོས་མི་གཡོ་བ་དང་། བློ་གྲོས་ཡངས་པ་དང་། ཀུན་ཏུ་བློ་གྲོས་དང་། བློ་གྲོས་མཐའ་ཡས་
- 59a
དང་། བློ་གྲོས་ཀ་མ་ལ་དང་། བློ་གྲོས་ཆེན་པོ་དང་། བློ་གྲོས་ལྷ་རྫས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་སྣ་ཚོགས་ལ་སོགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་འདུན་མཐའ་ ཐུག་པ་མེད་པ་རྣམས་ཀྱིས་བསྟི་སྟང་དུ་བྱེད། བླ་མར་བྱེད། མཆོད་ཅིང་རྗེད་ལ་རབ་ཏུ་མཆོད་ཅིང་སྤེལ་ཏེ། འཁོར་མང་པོའི་དབུས་ན་ཚངས་པ་ཆེན་པོ་པདྨའི་གདན་ལ་བཞུགས་ཏེ། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་ སྙོམས་པར་ཞུགས་ཏེ། ངན་སོང་གསུམ་གྱི་རྒྱུད་ལས་རྣམ་པར་གྲོལ་བ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་གྱི་འོད་ཟེར་འཕྲོ་བ་དང་སྡུད་པ་མང་པོའི་ཕྲེང་བ་ཉིད་ཀྱི་དཔྲལ་བའི་མཛོད་སྤུ་ནས་བྱུང་ནས། དེས་སྟོང་གསུམ་གྱི་སྟོང་ ཆེན་པོའི་འཇིག་རྟེན་གྱི་ཁམས་འདི་དག་ཐམས་ཅད་ཀུན་ཏུ་སྣང་བར་བྱས་སོ། །ཀུན་ཏུ་སྣང་བར་བྱས་ནས་སེམས་ཅན་ཐམས་ཅད་ཀྱི་སེམས་ཉོན་མོངས་པའི་འཆིང་བ་ལས་རྣམ་པར་གྲོལ་ཏེ། བདེ་བ་སོ་སོར་ཐོབ་ནས་དགའ་བའི་ཚལ་ཐམས་ཅད་ཀུན་ཏུ་སྣང་བར་ བྱས་པས་མཆོད་པའི་སྤྲིན་སྣ་ཚོགས་ཀྱིས་མངོན་པར་མཆོད་དེ། ལན་བརྒྱ་ཕྲག་སྟོང་དུ་བསྐོར་བ་བྱས་ནས་མགོ་བོས་ལན་བརྒྱ་ཕྲག་སྟོང་དུ་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔར་ནོར་བུ་དྲི་མ་མེད་པའི་སྟེང་དུ་འཁོད་དེ་འདི་སྐད་ཅེས་གསོལ་ཏོ། །ཀྱེ་མའོ་སངས་ རྒྱས་ཀྱེ་སངས་རྒྱས། །ཀྱེ་མའོ་སངས་རྒྱས་མཛད་པ་ལེགས། །གང་ཕྱིར་ངན་སོང་བདག་ཅག་སྦྱངས། བྱང་ཆུབ་སྤྱོད་པ་ཉིད་ལ་བཀོད། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ལན་བརྒྱ་ཕྲག་སྟོང་དུ་བསྐོར་བ་བྱས་ཏེ། ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་སངས་རྒྱས་ཀྱི་འོད་ཟེར་ཀུན་ཏུ་སྣང་བས་ངན་སོང་གི་རྒྱུད་ལས་རྣམ་པར་གྲོལ་ཞིང་། རྣམ་པར་གྲོལ་བའི་ལམ་ལ་བཀོད་པ་ནི་བཅོམ་ལྡན་འདས་ངོ་མཚར་ལགས་
- 59b
སོ། །བདེ་བར་གཤེགས་པ་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་འདི་ནི་ངོ་མཚར་མི་ཆེའོ། །ལྷའི་དབང་པོ་འདི་ནི་ངོ་མཚར་མི་ཆེ་སྟེ། སངས་རྒྱས་བཅོམ་ལྡན་འདས་ནི་ཚད་མེད་པའི་བསོད་ནམས་ཀྱི་ཚོགས་རྣམས་ ཡང་དག་པར་བསགས་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་རྣམས་ནི་ཚད་མེད་པའི་ཡོན་ཏན་རིན་པོ་ཆེའི་འབྱུང་ཁུངས་སུ་གྱུར་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་རྣམས་ནི་ཚད་མེད་པའི་ཐབས་ཡང་དག་པར་རྫོགས་ པའོ། །ལྷའི་དབང་པོ་སངས་རྒྱས་བཅོམ་ལྡན་འདས་རྣམས་ནི་ཤེས་རབ་ཚད་མེད་པ་བསགས་པའོ། །སངས་རྒྱས་བཅོམ་ལྡན་འདས་རྣམས་ཀྱི་སྤྱོད་པ་ནི་ཚད་མེད་པའོ། །སངས་རྒྱས་བཅོམ་ལྡན་འདས་རྣམས་ནི་གདུལ་བའི་སྐྱེ་བོ་ཚད་མེད་པ་རྣམས་སྣོད་དུ་ གྱུར་པར་མཛད་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་ཡེ་ཤེས་དང་ལྡན་པ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་རྫུ་འཕྲུལ་དང་ལྡན་པ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་ པ་དང་མཉམ་པའི་སྨོན་ལམ་གྱི་སྟོབས་དང་ལྡན་པ་སྟེ། ལྷའི་དབང་པོ་དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་ཀྱིས་སྣོད་ཇི་ལྟ་བ་བཞིན་དུ་སེམས་ཅན་གྱི་དོན་མཛད་པ་དང་། ཇི་ལྟར་འདུལ་བ་བཞིན་དུ་སེམས་ཅན་རྣམས་ཀྱི་དོན་མཛད་པ་དང་། མོས་པ་ཇི་ ལྟ་བ་བཞིན་དུ་སེམས་ཅན་རྣམས་ཀྱི་དོན་མཛད་པ་ཡིན་པར་རིག་པར་བྱ་སྟེ། འདི་ལ་ཐེ་ཚོམ་དང་། སོམ་ཉི་དང་། ཡིད་གཉིས་མ་བྱེད་ཅིག །གང་དེ་བཞིན་གཤེགས་པ་རྣམས་ཀྱིས་འདུལ་བར་མི་འགྱུར་བའི་གནས་ནི་མེད་དོ། །དེ་ནས་ལྷ་རྣམས་ཀྱི་དབང་པོ་ བརྒྱ་བྱིན་རང་གི་སྟན་ལས་ལངས་ནས་ཡང་བཅོམ་ལྡན་འདས་ལ་མཆོད་པ་ཆེ་བ་རྒྱ་ཆེ་བ་བྱས་ཏེ། ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སེམས་ཅན་ཐམས་ཅད་ལ་ཕན་པ་ཉིད་དུ་བགྱི་བ་དང་། སེམས་ཅན་ཐམས་ཅད་ལ་སྙིང་བརྩེ་
- 60a
བ་ཉིད་དུ་བགྱི་བ་དང་། སྙིང་བརྩེ་བ་ཅན་ཉིད་དུ་བགྱི་བ་དང་། སྙིང་བརྩེ་བ་ཅན་ཆེན་པོ་ཅན་དུ་བགྱི་བ་དང་། བསམ་པ་ཐམས་ཅད་ཡོངས་སུ་རྫོགས་པར་བགྱི་བར་བཅོམ་ལྡན་འདས་བདག་སྤོབས་པ་བསྐྱེད་པར་གསོལ། བདེ་བར་གཤེགས་པ་བདག་སྤོབས་ པ་བསྐྱེད་པར་གསོལ། བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་རིས་འདི་ཉིད་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བགྱི་བ་ཞིག་ཤི་འཕོས་ཏེ། དུས་ལས་འདས་ནས་དགུང་བདུན་ལོན་ལགས་ན། བཅོམ་ལྡན་འདས་དེ་གང་དུ་སྐྱེས། བདེ་བ་དང་སྡུག་བསྔལ་ནི་ཅི་ཞིག་མྱོང་བར་ འགྱུར། བཅོམ་ལྡན་འདས་ལུང་བསྟན་དུ་གསོལ། བདེ་བར་གཤེགས་པ་ལུང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ཅི་སྟེ་དེའི་དུས་ལ་བབ་པར་ཤེས་ན་ཉོན་ཅིག །ལྷའི་དབང་པོས་གསོལ་པ། བཅོམ་ལྡན་འདས་དུས་ནི་འདི་ལགས་སོ། །བདེ་ བར་གཤེགས་པ་དུས་དང་ཚོད་ནི་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་འདི་ནས་ཤི་འཕོས་ནས་མཚམས་མེད་པའི་སེམས་ཅན་དམྱལ་བ་ཆེན་པོར་སྐྱེས་ནས། དེས་དེར་ལོ་སྟོང་ཕྲག་བཅུ་གཉིས་ཀྱི་བར་དུ་སྡུག་ བསྔལ་མ་རུངས་ཤིང་མི་བཟད་པ་མྱོང་ནས་སེམས་ཅན་དམྱལ་བ་ཆུང་ངུ་རྣམས་སུ་ཡང་ལོ་བརྒྱ་ཕྲག་བརྒྱར་སྡུག་བསྔལ་མྱོང་ངོ་། །དེ་ནས་བྱོལ་སོང་དང་། ཡི་དགས་ཀྱི་གནས་སུ་ཡང་ལོ་བརྒྱ་ཕྲག་བརྒྱར་སྡུག་བསྔལ་མྱོང་ངོ་། །དེ་ནས་ཡུལ་མཐའ་འཁོབ་ཀྱི་མིར་སྐྱེས་ནས་ཀྱང་འོན་པ་དང་། དིག་པ་དང་། ལྐུགས་པའི་རང་བཞིན་ཅན་དང་། སྨྲ་བ་མི་གསལ་བར་ལོ་སྟོང་ཕྲག་དྲུག་ཅུའི་བར་དུ་སྡུག་བསྔལ་མྱོང་ངོ་། །ལོ་སྟོང་ཕྲག་བརྒྱད་ཅུ་རྩ་བཞིར་ནད་རྣག་ཁྲག་འཛག་པ་དང་། མཛེ་དང་ཕོལ་མིག་རྣམས་ཀྱིས་གཟིར་བ་དང་། སྐྱེ་བོ་མང་པོས་སྨད་པ་དང་། ཡོངས་ཀྱིས་སྤངས་པ་དང་། རིགས་དམན་པའི་རིགས་ཅན་རྗེས་སུ་མྱོང་ཞིང་སྡུག་བསྔལ་བ་དང་། སྡུག་བསྔལ་བརྒྱུད་པ་དང་། གཞན་ལ་གནོད་པ་བྱེད་པ་དང་། ལས་ཀྱི་སྒྲིབ་པ་བར་ཆད་མེད་པ་རྣམ་པ་སྣ་ཚོགས་བྱེད་པ་དང་། གཞན་ཡང་སྡུག་བསྔལ་གཅིག་ནས་གཅིག་ཏུ་བརྒྱུད་བ་མྱོང་ཞིང་མྱོང་བར་འགྱུར་རོ། །དེ་
- 60b
ནས་བརྒྱ་བྱིན་ལ་སོགས་པ་ལྷའི་བུ་ཐམས་ཅད་ཀྱིས་ཐོས་ནས་ཤིན་ཏུ་སྡངས་ཤིང་སྐྲག་སྟེ། སྐྱོ་ནས་ཁ་བུབ་ཏུ་འགྱེལ་བར་གྱུར་ཏོ། །དེ་ནས་ཡང་ལངས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་སྡུག་བསྔལ་ཆེན་པོ་བརྒྱུད་བ་འདི་ལས་ཇི་ལྟར་ན་འདི་ཐར་བར་འགྱུར། བདེ་བར་ གཤེགས་པ་ཇི་ལྟར་ཐར་བར་འགྱུར། བཅོམ་ལྡན་འདས་ཅི་ནས་ཀྱང་སྡུག་བསྔལ་གྱི་ཕུང་པོ་འདི་ལས་རྣམ་པར་གྲོལ་བར་འགྱུར་བར་འདི་བསྐྱབ་ཏུ་གསོལ། བདེ་བར་གཤེགས་པ་འདི་བསྐྱབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་བ། ལྷའི་དབང་པོ་སངས་རྒྱས་བྱེ་བ་ ཕྲག་བརྒྱད་ཅུ་རྩ་བཞིས་ཀྱང་བཤད་པ་འདི་ངས་ཀྱང་བཤད་ཀྱིས་ཉོན་ཅིག །དེ་ནས་ལྷའི་དབང་པོ་བརྒྱ་བྱིན་གྱིས་ཡང་བཅོམ་ལྡན་འདས་ལ་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མེ་ཏོག་རྣམ་པ་སྣ་ཚོགས་དང་། རིན་པོ་ཆེའི་དབུ་རྒྱན་དང་། ཕྱག་གདུབ་དང་། དཔུང་རྒྱན་ དང་། སྙན་ཆ་དང་། དོ་ཤལ་དང་། སེ་མོ་དོ་ལ་སོགས་པའི་རྒྱན་གྱི་ཁྱད་པར་རྣམ་པ་སྣ་ཚོགས་ཀྱིས་མངོན་པར་མཆོད་དེ། ལན་བརྒྱ་སྟོང་ཕྲག་དུ་མར་བསྐོར་བ་བྱས་ཤིང་ཕྱག་འཚལ་ཏེ། བཅོམ་ལྡན་འདས་ལེགས་སོ། །བདེ་བར་གཤེགས་པ་ལེགས་སོ་ཞེས་བྱ་བས་མཉེས་པར་བྱས་ ནས། བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཕན་པ་དང་། བདེ་བར་བགྱི་བ་དང་། མ་འོངས་པའི་སེམས་ཅན་རྣམས་ངན་སོང་གི་རྒྱུད་གསུམ་ལས་རྣམ་པར་ཐར་བར་བགྱི་བའི་སླད་དུ་ལེགས་པར་བཤད་དུ་གསོལ། དེ་ནས་ཡང་ཚངས་པ་ལ་སོགས་པ་ལྷ་མང་པོ་རྣམས་ ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ། །བདེ་བར་གཤེགས་པ་ལེགས་སོ། །ཅི་ནས་ཀྱང་མ་འོངས་པའི་སེམས་ཅན་རྣམས་ཀྱིས་མཚན་ཙམ་ཐོས་པས་ཀྱང་ངན་སོང་གསུམ་གྱི་ལམ་ལས་རྣམ་པར་གྲོལ་ཏེ། བདེ་འགྲོ་ལྷའི་འཇིག་རྟེན་ནམ། མིའི་འཇིག་རྟེན་ དུ་སྐྱེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་། ཚངས་པ་ལ་སོགས་པ་ལྷའི་བུ་དེ་དག་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདིས་བྱིན་གྱིས་བརླབ་པར་བྱ་བའི་ཕྱིར་དོན་ཡོད་གདོན་
- 61a
མི་ཟ་བའི་རྡོ་རྗེའི་བྱིན་གྱིས་བརླབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཡང་དེ་ཉིད་ཀྱི་ཐུགས་ཀ་ནས་སྔགས་འདི་ཕྱུང་ནས་ལྷ་དེ་དག་དམ་ཚིག་ཅན་དུ་བྱིན་གྱིས་བརླབས་སོ། ཨོྃ་སརྦ་བིདྱཱ་བཛྲ་ཨ་དྷཥྚཱི་ན་ཛྙཱ་ན་ས་མ་ཡ་ཧཱུྃ། དེ་ལྟར་ཏིང་ངེ་འཛིན་ ལ་སྙོམས་པར་ཞུགས་ནས་ཀྱང་གདོན་མི་ཟ་བར་མི་ཆོམས་པའི་རྡོ་རྗེའི་བྱིན་གྱི་རླབས་ཀྱིས་བྱིན་གྱིས་བརླབས་ནས་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་། ཨོྃ་ཤོདྷ་ནི་ཤོདྷ་ནི་སརྦ་བཱ་བཾ་བི་ཤོ་དྷ་ ནེ། ཤུད་དྷེ་བི་ཤུད་དྷེ། སརྦ་ཀརྨ་ཨཱ་བ་ར་ཎ་བི་ཤུད་དྷེ་སྭཱ་ཧཱ། རིག་པ་ཆེན་པོ་འདི་བཤད་མ་ཐག་ཏུ་སེམས་ཅན་ཐམས་ཅད་ཀྱི་ངན་སོང་གི་རྒྱུད་ཀྱི་འཆིང་བ་ཐམས་ཅད་རྣམ་པར་ཆད་དོ། །ངན་འགྲོ་ཐམས་ཅད་རྣམ་པར་སྦྱངས་སོ། སྡུག་བསྔལ་མི་བཟད་པ་རྣམས་རབ་ཏུ་ཞི་སྟེ། སྐྱེ་བོ་ མང་པོ་རྣམས་བདེ་བ་དང་ལྡན་པར་གྱུར་ཏོ། །དེ་ནས་གཞན་ཡང་གསང་བའི་སྙིང་པོ་འདི་གསུངས་སོ། ཨོྃ་ཤོདྷ་ནེ་ཤོ་དྷ་ནེ། ཨོྃ་སརྦ་ཨ་པཱ་ཡ་ན། སརྦ་སཏྭེ་བྷྱོ་ཧཱུྃ། ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོའོ། །ཨོྃ་སརྦ་ཨ་པཱ་ཡ་བི་ཤོདྷ་ནེ་ཧཱུྃ་ ཕཊ། ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་ཉེ་བའི་སྙིང་པོའོ། ཨོྃ་ཏྲཊ། ལྷའི་དབང་པོ་གཞན་ཡང་འདི་ནི་ངན་སོང་ཐམས་ཅད་རྣམ་པར་སྦྱོང་བའི་སྙིང་པོའོ། །ཧཱུྃ། ལྷའི་དབང་པོ་གཞན་ཡང་མདོར་ན་དྲན་པ་ཙམ་གྱིས་ཀྱང་བསོད་ནམས་ཆུང་བའི་ སེམས་ཅན་རྣམས་ངན་སོང་གི་རྒྱུད་ཐམས་ཅད་ལས་བདེ་བླག་ཏུ་རྣམ་པར་གྲོལ་བར་འགྱུར་བ་ནི་འདི་ཡིན་ནོ། །ན་མོ་བྷ་ག་བ་ཏེ་སརྦ་དུརྒ་ཏི་པ་རི་ཤོདྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀ་སཾ་བུད་དྷཱ་ཡ། ཏདྱ་ཐཱ། ཨོྃ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནེ། ཤུད་དྷེ་བི་ཤུད་དྷེ། སརྦ་ཀརྨ་ཨཱ་བར་ ཎ་བི་ཤུད་དྷེ་སྭཱ་ཧཱ། རྩ་བའི་རིག་པའོ། ཨོྃ་སརྦ་བིད་སརྦ་ཨཱ་བ་ར་ཎ་བི་ཤོ་དྷ་ཡ་ཧ་ན་ཧཱུྃ་ཕཊ། ཨོྃ་སརྦ་བིད་ཧཱུྃ། ཨོྃ་སརྦ་བིད་ཕཊ། ཨོྃ་སརྦ་བིད་ཨ། ཨོྃ་སརྦ་བིད་ཏྲཱ་ཐ། ཨོྃ་སརྦ་བིད་ཨོྃ། ཨོྃ་སརྦ་བིད་སྭ། ཨོྃ་སརྦ་བིད་ཨ། ཨོྃ་སརྦ་བིད་ཧཱུྃ། ཨོྃ་སརྦ་བིད་ཏྲཱེཊ། ཨོྃ་ཤ། ཨོྃ་བྷ།
- 61b
ལྷའི་དབང་པོ་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོའི་གསང་བའི་སྙིང་པོ་འདི་ནི་རིགས་ཀྱི་བུའམ། རིགས་ཀྱི་བུ་མོ་གང་ཡང་རུང་བས་མིང་ཙམ་ཡང་ཉན་ཏམ། བཅངས་སམ། བཀླགས་སམ། བྲིས་ནས་ཀྱང་མགོ་བོའམ། གཙུག་ ཕུད་དམ། དཔུང་པའམ། མགུལ་དུ་བཏགས་ཏེ་འཆང་ན་ཚེ་འདི་ཉིད་ལ་དུས་མ་ཡིན་པར་འཆི་བར་རྒྱད་དམ། དུས་མ་ཡིན་པར་འཆི་བ་བརྒྱད་དང་འབྲེལ་པའི་རྨི་ལམ་གྱི་རྣམ་པའམ། ངན་སོང་དང་འབྲེལ་བའི་མཚན་མ་དེ་དག་ཐམས་ཅད་རྨི་ལམ་ཙམ་དུ་ཡང་མི་འབྱུང་ན། དཀྱིལ་འཁོར་ དུ་ཇི་ལྟ་བ་བཞིན་དུ་ཞུགས་ལ། །ཞུགས་ནས་ཀྱང་དབང་བསྐུར་ལ་སྙིང་པོ་ཡང་བཟླས་བརྗོད་བྱེད་ཅིང་། སྔགས་ཀྱི་དོན་ཡང་སྒོམ་པ་གང་ཡིན་པ་ལྟ་སྨོས་ཀྱང་ཅི་དགོས་ཏེ། དེ་དག་ལ་ནི་སྡིག་པ་གང་ཡང་ཉེ་བར་མི་འགྱུར། ངན་སོང་དུ་འགྲོ་བར་ཡང་མི་འགྱུར་རོ། །སྐྱེས་པའམ། བུད་མེད་དམ། ལྷའམ། ཀླུའམ། གནོད་སྦྱིན་ནམ། སྲིན་པོའམ། བྱོལ་སོང་ངམ། ཡི་དགས་སམ། སེམས་ཅན་དམྱལ་བ་ལ་སོགས་ཏེ། གང་ཡང་རུང་བ་ཤི་བའི་ལུས་དཀྱིལ་འཁོར་དུ་བཅུག་སྟེ། དབང་བསྐུར་ན། དེ་སེམས་ཅན་དམྱལ་བར་སྐྱེས་ན་ཡང་དེ་མ་ཐག་ཏུ་རྣམ་པར་ཐར་ནས་ལྷའི་རིགས་ སུ་སྐྱེ་བར་འགྱུར་རོ། །ལྷའི་རིགས་དེར་སྐྱེས་ནས་ཀྱང་དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་མངོན་སུམ་དུ་བྱེད། དེ་བཞིན་གཤེགས་པ་ཐམས་ཅད་ལ་བསྙེན་བཀུར་ལ་སོགས་པ་ཡང་བྱེད། ཕྱིར་མི་ལྡོག་པར་ཡང་འགྱུར། རྒྱུད་ངེས་པ་ཅན་དུ་ཡང་འགྱུར། དེ་བཞིན་གཤེགས་ པའི་རིགས་སུ་ཡང་སྐྱེ། སྒྲིབ་པ་རྣམས་རབ་ཏུ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་སམ། ལྷའི་རིགས་སམ། གཞན་གང་ཡང་རུང་བར་བདེ་བ་མྱོང་བར་འགྱུར་རོ། ལྷའི་དབང་པོ་མདོར་ན་འཇིག་རྟེན་ནམ། འཇིག་རྟེན་ལས་འདས་པའི་ཕན་པ་དང་བདེ་བ་ཐམས་ཅད་མྱོང་ བར་འགྱུར་རོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་དེ་བཞིན་དུ་བསྐོར་བ་བྱས་ཏེ། ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ངན་སོང་ཐམས་ཅད་ཀྱི་དབང་དུ་གྱུར་པ་རྣམས་ལ་ཕན་པ་དང་བདེ་བར་བགྱི་བ་དང་། ཅི་ནས་ཀྱང་སེམས་ཅན་དེ་དག་
- 62a
ངན་སོང་ཐམས་ཅད་ལ་རྒྱབ་ཀྱིས་ཕྱོགས་པར་བགྱི་བ་དང་། བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་བདེ་བླག་ཏུ་རྟོགས་པར་བགྱི་བའི་སླད་དུ་བཤད་དུ་གསོལ། རྗེ་གཅིག་བཤད་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་དེ་བཞིན་གཤེགས་ པ་ཐམས་ཅད་ཀྱི་ངན་སོང་ཐམས་ཅད་ཡོངས་སུ་སྦྱོང་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །སངས་རྒྱས་ཀུན་གྱི་ བྱང་ཆུབ་སེམས། །བླ་ན་མེད་པ་རྟོགས་གྱུར་པ། རྒྱལ་བས་གསུངས་པའི་ཡེ་ཤེས་གང་། དེ་ནི་དཀྱིལ་འཁོར་སྙིང་པོར་གསུངས། །དེ་ནས་ཡང་བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཕྱིའི་དཀྱིལ་འཁོར་འདི་གསུངས་སོ། །གཙུག་ལག་ཁང་དང་ སྐྱེད་མོས་ཚལ། །མཆོད་རྟེན་ལྷ་ཁང་ཀུན་དགའ་སོགས། །ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །བྱིན་གྱིས་བརླབས་པའི་གནས་དེར་ནི། །ཕྱི་ཡི་དཀྱིལ་འཁོར་བྲི་བར་བྱ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ལྡན་པ་དང་། །ཐེམ་སྐས་བཞི་ ཡི་ཕྲེང་བ་དང་། །སེང་གེ་བན་གླང་རྣམས་ཀྱིས་བརྒྱན། །དར་དང་ལྡ་ལྡི་དོ་ཤལ་ཕྲེང་། །དྲིལ་བུ་དང་ནི་རྔ་མས་བརྒྱན། །རྡོ་རྗེ་རིན་ཆེན་པདྨ་དང་། །རྒྱ་གྲམ་པ་ཡི་ཕྱག་རྒྱས་བརྒྱན། །སྲད་བུ་བརྒྱད་དང་ལྡན་པ་དང་། །ཕྱི་ཡི་སྒོ་ཁྱུད་རྣམས་ཀྱིས་བརྒྱན། །དགུ་ཡི་ཆར་ནི་བགོས་པ་ལས། ། སྒོ་དང་སྒོ་ཁྱུད་སུམ་ཆར་བྱ། །རྡོ་རྗེ་སྲད་བུས་ཐིག་གདབ་བོ། །དབུས་ཀྱི་དཀྱིལ་འཁོར་ཐིག་གདབ་པ། །ཆོས་ཀྱི་འཁོར་ལོ་འདྲ་བ་ལ། །ལྟེ་བར་བཅས་ཤིང་རྩིབས་བཅུ་དྲུག །རིམ་པ་གསུམ་དང་ལྡན་པ་ལ། །རྩིབས་ནི་ཉིས་འགྱུར་ཉིད་དུ་བྱ། །དབུས་ཀྱི་ཕྱོགས་སུ་ཀུན་རིག་ནི། །དུང་དང་ ཀུན་ད་ཟླ་འདྲ་ལ། །ཞལ་བཞི་པ་ལ་རྡོ་རྗེ་ཡི། །སེང་གེའི་གདན་ལ་བཞུགས་པ་དང་། །ཏིང་འཛིན་ཕྱག་རྒྱར་ལྡན་པ་དང་། །རྒྱན་རྣམས་ཀུན་གྱིས་བརྒྱན་པར་བྲི། །དེ་ཡི་སྤྱན་སྔར་ངན་སོང་ཀུན། །སྦྱོང་བའི་རྒྱལ་པོ་བྲི་བྱ་སྟེ། །ཕྱག་གཉིས་ཏིང་འཛིན་ཚུལ་དུ་བསྣོལ། །ཟླ་བ་རྒྱས་
- 62b
དང་པདྨའི་མདོག །རྒྱན་རྣམས་ཀུན་གྱིས་ལེགས་རྫོགས་ལ། །རྒྱལ་མཆོག་སྐྱེས་བུས་གང་བར་བྲི། །རྒྱབ་ཏུ་ཤཱཀྱའི་རིགས་དབང་པོ། །གཙོ་བོ་ཐུབ་པ་བྲི་བར་བྱ། །གཡོན་དང་གཡས་ཀྱི་ཕྱོགས་ཆར་ནི། །རྒྱལ་མཆོག་རིན་ཆེན་མེ་ཏོག་གཉིས། །ལོ་ཙ་ནཱ་དང་མཱ་མ་ཀཱི། ། དེ་བཞིན་དཀར་མོ་སྒྲོལ་མ་རྣམས། །རང་གི་རིགས་ཀྱི་མཚན་མ་བཞིན། །གྲྭ་ཡི་ཕྱོགས་ནི་ཀུན་དུ་བྲི། །རྩིབས་ཀྱི་ནང་ནི་ཐམས་ཅད་དུ། །རྡོ་རྗེ་སེམས་སོགས་སེམས་དཔའ་མཆོག །རྫུ་འཕྲུལ་ཆེན་པོའི་སེམས་དཔའ་རྣམས། །གོ་རིམས་བཞིན་དུ་བྲི་བར་བྱ། །མཁས་པས་ལཱ་ སྱ་ལ་སོགས་པ། །མཆོད་པ་གྲྭ་ཡི་ཕྱོགས་སུ་བྲི། །སྒོ་ཡི་ཕྱོགས་རྣམས་ཐམས་ཅད་དུ། །སྒོ་བ་བཞི་ནི་བྲི་བར་བྱ། །རྟ་བབས་ཁྱམས་ནི་ཐམས་ཅད་དུ། །བྱམས་པ་ལ་སོགས་བྲི་བར་བྱ། །ཉན་ཐོས་རྒྱལ་བ་ཐམས་ཅད་དང་། །དེ་བཞིན་རང་རྒྱལ་གཙོ་བོ་རྣམས། །ཁྲོ་བོ་མངག་པ་ ཕོ་ཉ་སོགས། །བྲི་བྱ་ཡང་ན་མིང་ཡང་རུང་། །ཕྱི་ཡི་དཀྱིལ་འཁོར་ཕྱི་རོལ་དུ། །གླིང་བཞི་པོ་ནི་བྲི་བར་བྱ། །འཛམ་བུའི་གླིང་དུ་ཚངས་པ་བྲི། །བྱང་ཕྱོགས་སུ་ནི་དབང་ཕྱུག་ཆེ། །ཤར་དང་ནུབ་ཀྱི་གླིང་དུ་ནི། །བརྒྱ་བྱིན་གཏོགས་འདོད་ཐམས་ཅད་ནི། །འཁོར་དང་བཅས་པར་བྲི་བར་བྱ། །གཞན་ རྣམས་དག་ཀྱང་དེ་བཞིན་ཏེ། །ལྷ་མིན་དྲི་ཟ་ནམ་མཁའ་ལྡིང་། །གནོད་སྦྱིན་སྲིན་པོ་ལྟོ་འཕྱེ་ཆེ། །འབྱུང་པོ་ཡི་དགས་འདྲེ་རྣམས་དང་། །ཀླུ་དང་གྲུལ་བུམ་རི་རྣམས་དང་། །རྒྱལ་པོ་བཞི་རྣམས་བྲི་བར་བྱ། །གཟའ་དང་སྐར་མ་རྒྱུ་སྐར་དང་། །ཁྲོ་བོ་མ་རུངས་འཚེ་བ་ཡི། །བགེགས་དང་བི་ནཱ་ཡ་ཀ་རྣམས། ། སེམས་ཅན་ཀུན་ལ་ཕན་བྱེད་པའི། །དྲང་སྲོང་སྐལ་བ་ཆེན་པོ་རྣམས། །ཕྲ་མེན་མ་དང་བུད་མེད་བྲི། །དེ་བཞིན་སྲིང་མོ་རྣལ་འབྱོར་མ། །འབྱུང་བ་བཞི་ཡི་ལྷ་ཆེན་པོ། །ཁྱིམ་དང་རི་ལ་གནས་པ་དང་། །ཤིང་དང་ཀུན་དགའི་ནགས་ལ་སོགས། །དུར་ཁྲོད་གྲོང་ཁྱེར་གནས་པ་རྣམས། ། མིང་དང་བརྡ་འམ་ཡང་ན་ནི། །ཐིག་ལེ་རྣམས་ཀྱང་བྲི་བར་བྱ། །དེ་ནས་མཁས་པས་དཀྱིལ་འཁོར་ལ། །བླ་རེ་རྒྱལ་མཚན་ལྷབ་ལྷུབ་དང་། །གདུགས་དང་རྔ་མ་ལྔ་ལྡི་དང་། །འཕན་དང་སྣ་ཚོགས་ན་བཟས་མཆོད། །གསེར་ལས་བྱས་པའི་བྱ་རྣམས་ནི། །བརྒྱད་དམ་བཅུ་དྲུག་ལྷག་
- 63a
ཀྱང་རུང་། །དབང་བསྐུར་རིན་ཆེན་ཆུས་བཀང་བའི། །བུམ་པ་ལྔ་ནི་གཞག་པར་བྱ། །མར་མེ་གཏོར་མ་བུམ་པ་དང་། །མཛེས་པའི་བཤོས་རྣམས་གཞག་བྱ་སྟེ། །བཟའ་བ་བཏུང་བ་སྦྱར་ལེགས་དང་། །བཅའ་བ་སྣ་ཚོགས་གཞག་པར་བྱ། །གནོད་སྦྱིན་ སྲིན་པོའི་ཁ་ཟས་སུ། །གཏོར་མ་རྣམ་པ་སྣ་ཚོགས་གཞག །འབྱུང་པོ་དག་དང་ཀླུ་དག་དང་། །མི་དང་མི་མིན་དེ་བཞིན་ཏེ། །མེ་ཏོག་དྲི་རྣམས་སྣ་ཚོགས་དང་། །འོ་མ་མར་དང་ཁ་རར་བཅས། །རྣམ་རྒྱལ་བུམ་པ་དྲི་ཡི་ཆུས། །རབ་ཏུ་བཀང་བ་གཞག་པར་བྱ། །དེ་ནས་ཁྲུས་ལ་ སོགས་བྱས་ལ། །དྲི་དང་ཕྲེང་མཆོག་ཕྲེང་བ་ཅན། །དྲི་ཞིམ་ཁ་བཀང་མཆོག་མཛེས་པ། །རྡོ་རྗེ་འཛིན་མས་ཞུགས་ནས་ཀྱང་། །མེ་ཏོག་ཐོགས་ཏེ་སྒོ་ཕྱོགས་འདུག །གཙོ་བོ་རྒྱལ་བ་སྲས་ཀྱི་འཁོར། །མང་པོ་རྣམས་ནི་སྤྱན་དྲངས་ཏེ། །ཕྱག་རྒྱ་སྔགས་དང་བདག་ལྡན་ཞིང་། །ལྕགས་ ཀྱུ་ལ་སོགས་རྣལ་འབྱོར་གྱིས། །ཛཿཧཱུྃ་བྃ་ཧོཿཐུགས་རྗེའི་བདག །ཚུར་གཤེགས་ཞེས་ནི་བརྗོད་ནས་ཀྱང་། །གསང་བའི་བཅིང་བ་བཅིངས་ནས་ནི། །མཛུབ་གཉིས་ལྕགས་ཀྱུའི་ཚུལ་དུ་བྱ། །ཞགས་པ་བཞིན་དུ་སྦྱར་ནས་ཀྱང་། །དེ་ཉིད་ལྕགས་སྒྲོག་ཚུལ་དུ་བྱ། །མཐེབ་གཉིས་ནང་དུ་ བཀུག་ནས་ནི། །བསྐྱོད་པར་གྱུར་ན་དབང་དུ་འགྱུར། །དེ་ནས་མཚན་མ་སྐྱེས་ནས་མགུ་ནས་ནི། །ཐོག་མ་ཐ་མ་མེད་པ་མངོན་སུམ་མཐོང་། །ཨརྒྷ་མཆོག་བརྟགས་གསང་ལ་སོགས་པ་ཡི། །དབྱངས་སྙན་པ་ཡི་བསྟོད་དང་ལྷ་རྫས་ཀྱི། །མཆོག་གི་དམ་པ་རྣམས་ཀྱིས་ལེགས་པར་མཆོད། ། དེ་ནས་འབྱུང་པོ་ཀུན་གྱི་གཏོར་མ་བྱ། །སེམས་ཅན་བཀྲེས་ཤིང་སྐོམ་པས་གདུངས་པ་དང་། །ཕྱོགས་ན་གནས་པ་རྣམས་ལ་རྣམ་པར་བརྟག །དེ་ཡི་གཏོར་མ་ཇི་ལྟར་མཐུན་པར་བྱ། །དེ་ནས་སྔགས་པས་བླ་མེད་བྱང་ཆུབ་ཀྱི། གནས་སུ་སློབ་མ་ཡོངས་སུ་སྨིན་བྱ་བ། །འགྲོ་ལ་ཕན་ཕྱིར་ མྱུར་དུ་བྱང་ཆུབ་བར། །དེ་དག་བྱང་ཆུབ་སེམས་མཆོག་སྐྱེད་དུ་གཞུག །དེ་རྣམས་བྱིན་རླབས་བྱང་ཆུབ་སྨོན་ལམ་གདབ། །ཟབ་ཅིང་རྒྱ་ཆེ་བ་ཡི་ཆོས་བསྒྲགས་ལ། །བསྲུང་བར་བྱས་ནས་བརྟུལ་ཞུགས་སྡོམ་གནས་པ། །རབ་ཞི་ཁ་ནས་སྔགས་བརྗོད་གཞུག་པར་བྱ། །དར་ལ་སོགས་
- 63b
པས་མིག་གཉིས་གཡོགས་ནས་ནི། །རྡོ་རྗེ་འཛིན་དཔལ་པདྨར་ལག་གཉིས་བྱ། །མེ་ཏོག་རིན་ཆེན་ལ་སོགས་དེ་བརྒྱན་ལ། །ཡོན་གྱིས་ལག་པ་བཀང་སྟེ་གཞུག་པར་བྱ། །སྔགས་ནི་འདི་རྣམས་ཡིན་ནོ། ཨོྃ་བཛྲ་ཨ་དྷི་ཏིཥྛ་ཧཱུྃ། ཨོྃ་བཛྲ་ས་མ་ཡ་ཧཱུྃ། ཨོྃ་བཛྲ་པྲ་བེ་ཤ་ཧཱུྃ། ཨ་ ས་མེ་ཏྲི་ས་མེ་མ་ཧཱ་ས་མ་ཡེ་ཧཱུྃ། དེ་ནས་སྔགས་འདིས་མེ་ཏོག་ལ་སོགས་པ་དོར་བར་བྱའོ། །སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་པའི་གཙོ་ཆེན་གྱིས། །སྨན་པར་དགོངས་ནས་བཞེས་སུ་གསོལ། ཨོྃ་བཛྲ་པྲ་ཏི་གྲྀཧྷ་ཧཱུྃ། ཨོྃ་ བཛྲ་པྲ་ཏཱི་ཙྪ་བཛྲ་ས་མ་ཡ་སྟྭྃ། མེ་ཏོག་རིན་ཆེན་ལ་སོགས་གང་། །བབ་པར་གྱུར་པ་རིགས་ཀྱི་ལྷ། །གཙོ་བོའི་རིགས་དེ་བསྒྲུབས་ན་ནི། །དངོས་གྲུབ་འགྱུར་ཏེ་ཐེ་ཚོམ་མེད། །དེ་ནས་སྔགས་པ་མཁས་པ་ཡིས། །སྔགས་འདིས་དམ་ཚིག་སྦྱིན་པར་བྱ། །ཨོྃ་བཛྲ་སམ་ཡ་ཧཱུྃ་ཕཊ། དེ་ནས་ རིགས་ཀྱི་ཕྱག་རྒྱ་སྙིང་གར་བཅིངས་ཏེ་དམ་ཚིག་གི་ལྷ་སྙིང་ལ་གནས་པར་བྱ་བའི་སྔགས། །ཨོྃ་བཛྲ་ས་མ་ཡ་ཧྲྀ་ད་ཡཾ་མེ་པྲ་བེ་ཤ་དྲྀཌྷ་ཏིཥྛ་ཧཱུྃ། དེ་ནས་འདིས་དམ་ཚིག་བསྒྲག་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་ དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅི་སྟེ་དམ་ཚིག་འདས་ན་ནི། །དེ་མ་ཐག་ཏུ་བཀས་ནས་གཤེགས། །རྡོ་རྗེ་འཛིན་རྒྱལ་ཁྲོས་ནས་ཀྱང་། །བདུན་རྒྱུད་རིགས་ནི་བརླག་པར་མཛད། །དེ་བས་རྟག་ཏུ་བུ་ཁྱོད་ཀྱིས། །རྒྱལ་བས་གསུངས་པའི་དམ་ཚིག་དང་། །སྡོམ་ པ་དང་ནི་བླ་མའི་བཀའ། །ཤིན་ཏུ་མོས་པས་བསྲུང་བར་བྱ། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་བླང་མི་བྱ། །བརྫུན་དང་འདོད་ལ་སྤྱོད་པ་རྣམས། །དངོས་གྲུབ་འདོད་པས་བྱ་མ་ཡིན། །ཆང་ནི་བཏུང་བར་མི་བྱ་ཞིང་། །ཤ་ལ་སོགས་པ་བཟའ་མི་བྱ། །སེམས་ཅན་ གནོད་པའི་སྦྱོར་བ་ནི། །ནམས་ཀྱང་བྱ་བ་མ་ཡིན་ཏེ། །དཀོན་མཆོག་གསུམ་ནི་ཡོངས་མི་སྤང་། །དུས་ཀུན་ཏུ་ནི་བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང་། །ལྷ་དང་བླ་མ་དེ་བཞིན་ནོ། །སྡིག་ལ་སོགས་པ་གང་ཡིན་དང་། །བླ་མའི་བཀའ་ལས་འདའ་མི་བྱ། །ལྷ་ལ་ཕུལ་
- 64a
བའི་རྙིང་པ་དང་། །དེ་ཡི་གྲིབ་མ་འགོམ་མི་བྱ། །ཕྱག་རྒྱའི་གཟུགས་ལའང་དེ་བཞིན་ཏེ། །སྔགས་དང་ལྷ་ལའང་སྨད་མི་བྱ། །གདོན་གྱི་ལས་སོགས་བྱ་མ་ཡིན། །མུ་སྟེགས་ཅན་ལའང་སྨད་མི་བྱ། །མདོར་ན་ཡིད་གཉིས་སོམ་ཉི་ཐེ་ཚོམ་མི་བྱ་སྟེ། ། བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །མོས་པ་བརྟན་དང་ལྡན་པས་དམ་བཅས་ནས། །སརྦ་བིད་ཀྱིས་ཇི་བཞིན་དབང་བསྐུར་ཏེ། །བུམ་པ་ལ་སོགས་ཇི་སྙེད་མང་ཐོགས་པས། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །དེ་ནས་ལག་ཏུ་དྲིལ་བུ་རྡོ་རྗེ་བྱིན། །འཁོར་ལོ་ལ་ སོགས་རིན་ཆེན་བདུན་ཐོགས་ལ། །མི་དབང་དབང་ཕྱུག་འཁོར་ལོ་ཐོབ་པ་དང་། །སྡིག་པ་གཞོམ་ཕྱིར་དབང་ནི་བསྐུར་བར་བྱ། །སྔགས་བསྒྲུབ་ཕྱིར་ནི་མོས་ལྡན་སློབ་མ་ལ། །སྔགས་པས་བཀའ་ནི་རབ་ཏུ་བསྒོ་བར་བྱ། །དེས་ཀྱང་མོས་པས་སྤྱི་བོས་ཕྱག་འཚལ་ཏེ། །ཅི་སྟེ་ནོར་ཡོད་བླ་ མ་དབུལ་བར་བྱ། །ནོར་དང་གཏེར་དང་འབྲུ་དང་དབྱིག་དང་གསེར། །བཞོན་པ་ཁྱིམ་གདན་བུ་ཕོ་བུ་མོ་རྣམས། །སྐྱེས་པ་དག་དང་བུད་མེད་ཡང་ན་ནི། །གྲོང་དང་གྲོང་ཁྱེར་དེ་བཞིན་ཅི་བཞེད་རྣམས། །རང་གི་སེམས་ནི་རབ་ཏུ་དད་པ་ཡིས། །ཡོན་གྱི་མཆོག་ཉིད་དབུལ་བ་ཉིད་དུ་བྱ། ། མྱུར་དུ་འགྲུབ་ཕྱིར་མོས་པས་བླ་མ་ལ། །མདོར་ན་རང་གི་ལུས་ཀྱང་དབུལ་བར་བྱ། །ཚེ་འདིའི་བདེ་བ་མ་ལུས་དང་། །འཇིག་རྟེན་ཕྱི་མའི་བདེ་མཆོག་དང་། །སངས་རྒྱས་ཉིད་ཀྱང་ཐོབ་འགྱུར་ན། །ལྷ་ཡི་བདེ་བ་སྨོས་ཅི་དགོས། །སངས་རྒྱས་ཀུན་དང་བླ་མར་མཉམ། །རྡོ་རྗེ་སློབ་དཔོན་ བརྙས་ན་ནི། །རྟག་ཏུ་སྡུག་བསྔལ་ཐོབ་འགྱུར་བས། །ཅུང་ཟད་ཙམ་ཡང་བརྙས་མི་བྱ། །རྡོ་རྗེ་སྤུན་དང་སྲིང་མོ་དང་། །རྡོ་རྗེ་མ་རྣམས་ཉིད་ལ་ནི། །རྣལ་འབྱོར་ཅན་གྱིས་བརྙས་མ་ཡིན། །རྟག་ཏུ་འཁོན་གྱི་གཅུགས་མི་བྱ། །དཀོན་མཆོག་གསུམ་ལ་གནོད་བྱེད་དང་། །བླ་མ་སྨོད་བྱེད་མ་ རུངས་པ། །དམ་ཚིག་ལས་ནི་འདས་པ་དང་། །དེ་ལ་སོགས་པའི་གནོད་བྱེད་ལ། །བཟོད་པ་བསྒོམ་པར་མི་བྱ་སྟེ། །དེ་ལྟར་གྱུར་ན་ཀུན་རིག་གིས། །གསུངས་པའི་དངོས་གྲུབ་ཐོབ་པར་འགྱུར། །སེམས་ཅན་ཀུན་ལ་ཕན་པ་དང་། །བརྩེར་ལྡན་དངོས་གྲུབ་ཐོབ་པར་འགྱུར། །དེ་ནས་
- 64b
བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་དང་ལྷའི་འཇིག་རྟེན་དུ་བཅས་པ་རྣམས་ཀྱི་དོན་དང་། ཕན་པ་དང་བདེ་བའི་ཕྱིར་སྒྲུབ་པའི་ཆོ་ག་འདི་གསུངས་སོ། །རས་ལ་བཅོམ་ལྡན་འདས་ཐམས་ཅད་རིག་པ་དེ་བཞིན་དུ་བྲིས་ལ། གཡས་སུ་ནི་དེ་བཞིན་གཤེགས་པ་ངན་སོང་ ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ། གཡོན་ཕྱོགས་སུ་ནི་ཤཱཀྱ་ཐུབ་པ། ངན་སོང་ཐམས་ཅད་སྦྱོང་བའི་འོག་ཏུ་ནི་ཀུན་ཏུ་སྤྱན་རས་གཟིགས་དབང་ཕྱུག་མདོག་ཟླ་བ་ལྟ་བུ་ཕྱག་ན་པདྨ་བསྣམས་པའོ། །ཤཱཀྱ་ཐུབ་པའི་འོག་ཏུ་ནི་ཕྱག་ན་རྡོ་རྗེ་དེ་གཉིས་ཀྱི་བར་དུ་སྨན་གྱི་ བླ་མདོག་སྔོན་པོ་ཕྱག་གཅིག་ན་འབྲས་བུ་ཨ་རུ་ར་བསྣམས་པ། ཕྱག་གཅིག་ནི་མཆོག་སྦྱིན་དུ་བྱ། རྟ་མགྲིན་དང་། འཇིག་རྟེན་གསུམ་ལས་རྣམ་པར་རྒྱལ་བ། མ་རུངས་བ་འཇོམས་པ་ལ་བརྩོན་པ་གཉིས་ནི་རང་གི་ལྷ་ལ་བརྟེན་པར་བྲི། དེ་གཉིས་ཀྱི་དབུས་སུ་ལོ་ཙ་ནཱ་དང་། མཱ་ མ་ཀཱི་དང་། གོས་དཀར་མོ་དང་། སྒྲོལ་མ་རྣམས་རང་རང་གི་མཚན་མ། ཕྱག་ན་བསྣམས་པར་བྲི། དེ་དག་གི་འོག་ཏུ་པདྨའི་རྫིང་བུ་ཆུ་དང་། ཆུ་སྲིན་དང་། ཉ་དང་། རུས་སྦལ་དང་། སྦལ་པ་དཀར་པོ་དང་། ཉ་ཁར་བ་ལ་སོགས་པར་བཅས་པ་དང་། ཆུ་ལས་སྐྱེས་པའི་མེ་ཏོག་རྣམ་པ་ དུ་མས་ཡོངས་སུ་གང་བར་བྲི། བདུག་པ་དང་། མར་མེ་དང་། དྲི་དང་། ཕྲེང་བ་དང་། བཤོས་དང་། མེ་ཏོག་དང་། འབྲས་བུ་རྣམ་པ་སྣ་ཚོགས་པ་བྲི། དེའི་འོག་ཏུ་སྒྲུབ་པ་པོ་ཉིད་ཐལ་མོ་སྦྱར་ཏེ་ཕྱག་འཚལ་ཞིང་འདུག་པར་བྲི། དེ་ནས་རི་མོའི་སྐུ་གཟུགས་དེ་མངོན་པར་མཆོད་དེ། བདག་ ཉིད་ཀྱིས་སྤྱན་དབྱེ་བ་བྱ་ཞིང་བདེན་པ་ལ་བྱིན་གྱིས་བརླབས་པར་དམིགས་པར་བྱའོ། །དེ་ནས་ཅི་སྟེ་མཚན་མ་ཞིག་མཐོང་ན་ནི་མྱུར་དུ་དངོས་གྲུབ་ཐོབ་པར་འགྱུར་རོ། །འོན་ཏེ་མ་མཐོང་ན་ནི་རིང་མོ་ཞིག་ནས་དངོས་གྲུབ་ཏུ་འགྱུར་ཏེ། བཞད་པ་དང་ནི་རྔ་སྒྲ་དང་། །དྲིལ་བུའི་སྒྲ་དང་འབྲུག་སྒྲ་དང་། ། དགེ་སློང་བྲམ་ཟེ་ཕོ་མོ་དང་། །འབྲས་བུ་མཐོང་ན་མྱུར་དུ་ནི། །མཆོག་དང་བར་མ་ཐ་མ་འགྲུབ། །དེ་ནས་གཟུགས་དེ་གསང་སྔགས་དང་། །ཕྱག་རྒྱ་མངོན་པར་བྱིན་བརླབས་ནས། །ཅི་བདོག་པས་ནི་མཆོད་པར་བྱ། །རྟག་ཏུ་མངོན་སུམ་འདུག་ནས་ཀྱང་། །འཇིག་རྟེན་གསུམ་ལས་རྣམ་རྒྱལ་
- 65a
གྱིས། །བདག་སྲུང་ལ་སོགས་བྱས་ནས་ཀྱང་། །བདག་གི་དེ་ཉིད་བསམས་ནས་སུ། །དངོས་གྲུབ་མཚན་མ་བྱུང་བར་དུ། །འབུམ་ཕྲག་གསུམ་མམ་དྲུག་འབུམ་བཟླས། །དེ་ནས་དབེན་པའི་གནས་སུ་ནི། །བརྒྱད་བརྒྱ་ཉིད་དུ་ཚང་བར་བྱ། །སྔགས་ནི་ ཁྲལ་འཁྲུལ་མེད་པར་བཟླས། །དེ་ནས་བཟླས་པའི་མཇུག་ཏུ་ནི། །དཀྱིལ་འཁོར་སྔ་མ་བཞིན་བསམས་ལ། མཆོད་པ་རྒྱ་ཆེན་བྱས་ནས་ཀྱང་། །མཚན་གཅིག་ཐོག་ཐག་བཟླས་པར་བྱ། །ཅི་སྟེ་གཙོའམ་དེ་ཡི་སྲས། །ཡང་ན་ལྷ་རྣམས་མཐོང་གྱུར་ན། །བསོད་ནམས་སྣོད་ལ་ཅི་ དགའ་བར། །དངོས་གྲུབ་མཆོག་ནི་གསོལ་བར་བྱ། །ལྷ་ནི་དངོས་གྲུབ་འབྲས་བུ་ནི། །དེ་ལ་རྟག་ཏུ་དགྱེས་ནས་སྩོལ། །ཕྱག་འཚལ་དངོས་གྲུབ་ལ་སོགས་བླང་། །དཀོན་མཆོག་གསུམ་དང་བླ་མ་ལ། །སྐལ་བ་རེ་རེ་ཕུལ་ནས་ནི། །དེ་ནས་རྟག་ཏུ་བདག་སྤྱོད་ཅིང་། །མེད་ན་ མཁས་པ་བདག་ཉིད་ཀྱིས། །བླངས་ནས་བདག་ཉིད་སྤྱད་པར་བྱ། །སེམས་ཅན་ཀུན་ལ་ཕན་བརྩོན་པར། །བསྐལ་པ་དུ་མར་གནས་པར་འགྱུར། །ཅི་སྟེ་དངོས་གྲུབ་མ་གྱུར་ན། །ལས་རྣམས་ཐམས་ཅད་ནུས་པར་འགྱུར། །གནོད་སྦྱིན་སྐར་མདའི་གདོན་ལ་སོགས། །ཆད་པས་བཅད་ ཅིང་བཀའ་ཙམ་གྱིས། །ཞི་བ་ལ་སོགས་ལས་ཀུན་ནི། །བྲན་བཞིན་ཐམས་ཅད་བྱེད་པར་འགྱུར། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྡིག་པ་བགྱིས་པས་སེམས་ཅན་དམྱལ་བ་ལ་སོགས་པའི་དབང་དུ་གྱུར་པ་ རྣམས་ཇི་ལྟར་ན་སེམས་ཅན་དམྱལ་བ་ལ་སོགས་པའི་དབང་དུ་གྱུར་པའི་སྡུག་བསྔལ་སྤང་བའི་སླད་དུ་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ཉོན་ཅིག །སེམས་ཅན་དམྱལ་བ་ལ་སོགས་པའི་དབང་དུ་གྱུར་པའི་སེམས་ཅན་སྡིག་པ་བྱེད་པ། སྡིག་ པ་ཆེན་པོ་བྱེད་པ་དེ་དག་ཅི་ནས་ཀྱང་སེམས་ཅན་དམྱལ་བའི་སྡུག་བསྔལ་ལས་ཐབས་སླ་བས་གྲོལ་བར་འགྱུར་བ་ཉོན་ཅིག །དེ་བཞིན་དཀྱིལ་འཁོར་བྲིས་ནས་ནི། །སྔ་མ་བཞིན་དུ་བུམ་པ་ལ། །བརྒྱ་རྩ་བརྒྱད་དུ་བཟླས་ནས་ནི། །དབང་བསྐུར་བ་ནི་རབ་ཏུ་བརྟག །དེ་ནས་སྡིག་པ་ཀུན་སྦྱངས་
- 65b
ཏེ ། །དམྱལ་བ་ལ་སོགས་སྡུག་བསྔལ་ལ་ལས། །དེ་ནི་མྱུར་དུ་རྣམ་པར་ཐར། །སྡིག་ལས་རྣམ་གྲོལ་བདག་ཉིད་དེ། །དག་པར་གྱུར་པའི་ལྷ་རྣམས་ཀྱི། །རིགས་སུ་སྐྱེས་པར་གྱུར་ནས་ཀྱང་། །དེ་ནི་རྟག་ཏུ་སངས་རྒྱས་དང་། །ཆོས་འགྲོ་བ་ནི་ཐོས་པར་འགྱུར། །དེ་ཡི་གཟུགས་ བརྙན་བྲི་བའམ། །གུར་གུམ་གྱིས་ནི་མིང་ཡང་རུང་། །ངན་སོང་གསུམ་གྱི་སྡུག་བསྔལ་ལས། །སེམས་ཅན་རྣམས་ནི་དགྲོལ་བའི་ཕྱིར། །སྔགས་མཁན་གཞན་ལ་ཕན་བརྩོན་ཞིང་། །སྙིང་རྗེ་ཅན་གྱིས་དབང་བསྐུར་རོ། །དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དེ་ དབང་བསྐུར། །ལྷ་ཡི་གཟུགས་སུ་བརྟགས་ནས་ཀྱང་། །མཆོད་རྟེན་དབུས་སུ་གཞག་པར་བྱ། །རང་གི་ལྷ་འམ་ལྷ་གཞན་གྱི། །སྙིང་པོ་སྙིང་གར་བྲིས་ནས་ཀྱང་། །ལྷ་འདྲ་བར་ནི་སེམས་བསྐྱེད་དེ། །ཁྱིམ་གྱི་ནང་དུ་གཞག་པར་བྱ། །དེ་ཡི་མིང་ཡང་སྨོས་ནས་ནི། །གུར་གུམ་ བཟང་པོས་སྔགས་བྲིས་ལ། །རིམ་གྱིས་འབུམ་ནི་ཚང་ཙམ་དུ། །མཆོད་རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེ་ལྟར་བྱས་ན་ངེས་པར་ནི། །དམྱལ་བ་ལས་ནི་གྲོལ་བར་འགྱུར། །ཡི་དགས་བྱོལ་སོང་སྡུག་བསྔལ་ལས། །གྲོལ་ཏེ་ལྷ་ ཡི་གནས་སུ་སྐྱེ། །དེ་ཡི་མིང་ནས་བརྗོད་ནས་ནི། །ཇི་སྐད་གསུངས་པའི་སྔགས་བཟླས་ཞིང་། །འབུམ་ཕྲག་སྟོང་ངམ་ཡང་ན་ནི། །བརྒྱ་ཕྲག་སྟོང་དུ་ཚང་བ་དང་། །བྱེ་བ་སྙེད་དུ་རབ་བཟླས་ན། །ལྷ་ཡི་གནས་སུ་ངེས་པར་སྐྱེ། །དེ་ཡི་མིང་ནས་བརྗོད་ནས་ཀྱང་། །མཁས་པས་འབུམ་ ཕྲག་བརྒྱ་འམ་ནི། །ཡང་ན་བརྒྱ་ཕྲག་སྟོང་སྙེད་དུ། །སྦྱིན་སྲེག་བྱས་པར་གྱུར་ན་ནི། །དམྱལ་བ་ཆེན་པོར་གྱུར་བ་ཡི། །སྡིག་པ་དེ་ལས་ཐར་བར་འགྱུར། །ཇི་སྲིད་མཚན་མ་ཤིན་ཏུ་ནི། །འབར་བའི་གནས་ན་སྐྱེས་གྱུར་པར། །མཚན་མ་ཡང་དག་བྱུང་བར་དུ། །ཏིལ་དང་ཡུངས་ཀར་ འབྲས་རྣམས་དང་། །ར་ཡི་འོ་མར་ལྡན་པ་དང་། །དྲི་ཡིས་བསྐུས་པའི་ཡམ་ཤིང་གིས། །ཆོ་ག་བཞིན་དུ་སྦྱིན་སྲེག་བྱ། །དེ་ནས་དེ་ནི་ངེས་པར་ཡང་། །ལྷ་ཡི་གནས་སུ་སྐྱེས་གྱུར་ནས། །དེ་ཡི་མཚན་མ་སྟོན་པར་བྱེད། །ཡང་ན་ལྷ་ཡི་མཆོག་ཏུ་འགྱུར། །ཡང་ན་ཧོམ་ཁུང་ནང་དུ་
- 66a
ནི། །མེ་ཡི་ལྟས་ནི་སྟོན་བྱེད་ཅིང་། །ལྷ་ཡི་གནས་སུ་སྐྱེས་པ་དང་། །སྡིག་པ་བཅོམ་པའི་མཚན་མར་ནི། །དཀར་པོ་ཉིད་དང་གཡས་སུ་འབར། །གྱེན་དུ་འབར་ཞིང་དྲི་མ་མེད། །ཟླུམ་ཞིང་རྣམ་པར་མི་འཕྲོ་ལ། །བརྟན་ལ་གློག་བཞིན་དྲི་མ་མེད། །ཡང་ ན་མེ་ལྷ་ཉིད་ཀྱིས་ནི། །བདག་ཉིད་དེ་བཞིན་སྟོན་བྱེད་དེ། །ཟླ་བ་དྲི་མེད་དཀར་འདྲ་ལ། །བཞིན་མདོག་དཀར་ཞིང་ལམ་མེར་འབར། །དེ་ནི་མཚན་མ་འདི་དག་གིས། །དམྱལ་བ་ལ་སོགས་རྣམ་གྲོལ་ཞིང་། །སྡིག་པ་བཅོམ་ནས་བདེ་འགྲོར་ནི། །སྐྱེས་པ་ཡིན་པར་ཤེས་པར་བྱ། ། ཁྲུ་བཞི་པ་ཡི་ཚད་དུ་ནི། །ཆོ་ག་བཞིན་དུ་ཁུང་བརྐོས་ལ། །རྡོ་རྗེ་མཐའ་མ་བསྐོར་བ་ཡི། །འཁོར་ལོ་དབུས་སུ་བྲི་བར་བྱ། །རིགས་ལྔ་ཡི་ནི་ཕྱག་རྒྱ་རྣམས། །ཇི་བཞིན་པ་ཡི་ཕྱོགས་སུ་བྲི། །དེ་བཞིན་སེམས་དཔའ་རྣམས་དང་ནི། །འཇིག་རྟེན་གཙོ་ལ་སོགས་པ་བྲི། །བྱ་དང་བུམ་ པ་གང་བ་དང་། །གཏོར་མས་སྣོད་རྣམས་བཀང་བ་དང་། །བརྒྱད་སྙེད་ཙམ་དུ་བཞག་པའམ། །ཡང་ན་བཅུ་དྲུག་སྙེད་དུ་གཞག །བཟའ་བ་དང་ནི་བཅའ་བའི་བཤོས། །མེ་ཏོག་ཕྲེང་སོགས་དེ་བཞིན་ཏེ། །བླ་རེ་རྒྱལ་མཚན་དར་ལ་སོགས། །གདུགས་མཆོག་རྣམས་ཀྱིས་ལེགས་ པར་བརྒྱན། །སྦྱིན་སྲེག་དཀྱིལ་འཁོར་དམ་པར་ནི། །སྦྱིན་སྲེག་རབ་ཏུ་བྱ་བ་ཡིན། །ཆོ་ག་ཤེས་པས་བྲིས་ནས་ཀྱང་། །ལྷ་རྣམས་མང་པོ་སྤྱན་དྲངས་ལ། །སྔགས་ཤེས་པས་ནི་སྔགས་ཕྱག་རྒྱས། །ཨརྒྷ་དབུལ་བར་ཤེས་ནས་ཀྱང་། །མདོར་ན་མཆོད་པ་བྱས་ནས་ནི། །ལྷ་ཡི་སྦྱོར་བས་ རབ་གནས་ལ། །ག་བུར་གུར་གུམ་ལ་སོགས་པས། །མར་དང་འོ་མ་ཏིལ་བསྒོས་ལ། །ཏིལ་དང་ཡུངས་ཀར་འབྲས་རྣམས་དང་། །དྲི་ཡི་ཆུས་ནི་ལེགས་བཀང་སྟེ། །འབྲས་ཆན་ཡོས་དང་ལ་དུ་དང་། །སྦྲང་རྩི་ཤ་ཁ་རར་ལྡན་པ། །བརྒྱ་ཕྲག་དུ་མར་ཡོངས་བཟླས་ལ། །ཡམ་ཤིང་ ལ་ཡང་དེ་བཞིན་ཏེ། །རང་གི་སྔགས་ཀྱིས་བཏབ་པའི་ཤིང་། །ཁུང་བུའི་ནང་དུ་གཞག་པར་བྱ། །རོ་ལ་སྔགས་ཀྱིས་བཏབ་ནས་ཀྱང་། །ཆུ་མཆོག་གིས་ནི་བཀྲུས་ནས་སུ། །བཟླས་པའི་དྲི་ཡིས་བྱུག་པར་བྱ། །གོས་དང་རྒྱན་གྱིས་བཀླུབས་ནས་ཀྱང་། །སྔགས་ཀྱིས་བཏབ་པའི་བདུག་
- 66b
པས་བདུག །མེ་ཏོག་ཕྲེང་ལ་སོགས་པས་མཆོད། །གཙུག་ཕུད་དཔུང་པར་དེ་བཞིན་དུ། །སྔགས་བྲིས་ནས་ནི་གདགས་པར་བྱ། །སྙིང་ག་ལྐོག་མ་ཁ་ཕྱོགས་སུ། །སརྦ་བི་དྱཱས་བྱིན་གྱིས་བརླབ། །དཔྲལ་བ་མཛོད་སྤུ་རྣ་བ་གཉིས། །མགོ་བོ་གཙུག་ཕུད་དཔུང་པ་གཉིས། ། སྣ་དང་རྐེད་པ་པུས་མོ་བོ་ལ། །ལོང་བུ་སྣ་ཡི་རྩེ་མོ་དང་། །མིག་གཉིས་དང་ནི་གསང་བ་ཡི། །དབང་པོ་རྣམས་ཀྱི་གནས་ལ་ནི། །དེ་ལྟར་གཞན་དུ་ཡི་གེ་སྔགས། །མཆོག་ཏུ་དགེ་བ་རྣམ་གཞག་གོ། །དེ་ནས་ངན་སོང་སྦྱང་བའི་ཕྱིར། །སྟན་དང་བཅས་ཏེ་ཐབ་དབུས་སུ། །གཞག་ པ་ཉིད་དུ་བྱ་བ་ཡིན། །དེ་ནས་སྔགས་འཆང་སྔགས་ཀྱིས་ནི། །བཏབ་པའི་གོས་ཀྱིས་གཡོགས་པར་བྱ། །དེ་ནས་བྱིན་ཟ་དགེ་བ་རབ་སྦར་ལ། །མེ་ལྕེ་སྟོང་གིས་འཁྲིགས་ཤིང་འབར་བའི་ལུས། །ཟླ་དཀར་ཀུན་ད་ཞི་ཞལ་ཞི་བའི་ལུས། །མཐའ་ཡས་པ་ཡི་གཟུགས་ཀྱི་མེ་བཀུག་ལ། ། ཨརྒྷ་དབུལ་བར་བརྟགས་ནས་དེ་བཞིན་དུ། །བློ་མཆོག་ལྡན་པའི་མདུན་དུ་གཟུགས་སོགས་གཞག །ཇི་ལྟར་གསུངས་བཞིན་ཡོན་ཏན་འདོད་པ་ཡིས། །དེ་བཞིན་གཤེགས་ཚོགས་དེ་བཞིན་སྤྱན་དྲངས་ལ། །ཨརྒྷ་ལ་སོགས་བརྟགས་ཏེ་དེ་བཞིན་དུ། །བདེར་གཤེགས་གསུངས་ པའི་མཆོད་པ་ལ་སོགས་བྱ། །དེ་ནས་བྱིན་ཟ་ལ་ནི་བརྟག་བྱ་བ། །བསྲེག་བྱས་བཀང་སྟེ་དེ་ཡང་སྤར་བའི་ཕྱིར། །དེ་ནས་བསྲེག་བྱས་བཀང་སྟེ་རིམ་གྱིས་ནི། །རྒྱལ་ལ་སོགས་ལ་བརྒྱ་རྩ་བརྒྱད་དུ་བརྟག །དེ་ནས་སྦྱོང་བའི་སྔགས་ཀྱི་རྒྱལ་པོ་ལ། །བསྲེག་པར་བྱ་བ་ཉི་ཤུ་རྩ་གཅིག་ བརྟག །དེ་ནས་སྤྱན་དྲངས་ཡོ་བྱད་ལན་གསུམ་དང་། །ཨརྒྷ་ལ་སོགས་པདྨའི་དཀར་ཞལ་མཆོད། །ཕྱག་ན་རྡོ་རྗེ་པདྨ་ཞགས་བསྣམས་པའི། །འཇིག་རྟེན་གསུམ་ལས་རྣམ་པར་རྒྱལ་བའི་གཟུགས། །ཞབས་ཀྱི་པདྨས་སྡིག་མནན་ཅིང་། །རྒྱན་རྣམས་ཀུན་ནི་རབ་རྫོགས་ ལ། །རྫོགས་སངས་རྒྱས་ཀྱི་དབུ་རྒྱན་མཐོ། །བསམས་སམ་ཡང་ན་བྲིས་ཀྱང་རུང་། །དེ་ཡི་སྙིང་པོས་དེ་བཞིན་དུ། །བརྒྱ་ཕྲག་སྟོང་ངམ་ཡང་ན་ནི། །བྱེ་བའི་ཚད་དུ་སྦྱིན་སྲེག་བྱ། །ཅི་སྟེ་མཚན་མ་ལ་སོགས་འབྱུང་། །དེ་བཞིན་སྡིག་ཅན་རྒྱུད་ཅེས་བྱ། །དེ་ནས་ཐལ་བར་གྱུར་
- 67a
པ་དང་། །རྡོ་རྗེ་བསྡུ་བའི་སྔགས་ཀྱིས་ནི། །ཆོ་ག་བཞིན་དུ་བསྡུ་བར་བྱ། །ཐལ་བ་དེ་དང་རུས་པའི་རྡུལ། །སྔགས་ཀྱིས་བཏབ་པའི་དྲི་ཆུ་དང་། །བ་སྐྱེས་འོ་མ་ལ་སོགས་ལྔས། །སྦྱོང་བའི་སྔགས་ཀྱིས་བློ་ལྡན་གྱིས། །འབུམ་དུ་བཟླས་པས་བརྫིས་ ནས་ནི། །ག་པུར་དྲི་དང་བསྒོས་པ་ཡིས། །འཇིམ་པ་དང་ནི་བསྲེས་ནས་ཀྱང་། །གཟུགས་སུ་བྱ་བའམ་ཡང་ན་ནི། །མཆོད་རྟེན་གྱི་ནི་ལྟར་བྱས་ལ། །གཅིག་གམ་གཉིས་སམ་གསུམ་མམ་ལྔ། །ཡང་ན་བརྒྱ་རྩ་བརྒྱད་བར་དུ། །སྔགས་དང་ཕྱག་རྒྱས་བཏབ་ནས་སུ། །འབུམ་ཕྲག་ གཉིས་ཀྱི་བར་དུ་བཟླས། །དེ་ནས་མཆོད་རྟེན་འབར་གྱུར་ཏམ། །ཡང་ན་གཟུགས་ཀྱི་ཞལ་འཛུམ་མམ། །དྲི་དང་བདུག་པ་འོད་ཀྱང་རུང་། །སྣང་ངམ་ཡང་ན་ངད་ལྡང་ངམ། །ལྷ་ལ་སོགས་པའི་རྣམ་པ་ནི། །སྣ་ཚོགས་པར་ནི་སྣང་གྱུར་ཏམ། །རྫུ་འཕྲུལ་རྣམ་པར་འཕྲུལ་པ་དང་། ། མེ་ཏོག་ལ་སོགས་འདོར་བ་དང་། །དུང་དང་རྔ་ལ་སོགས་པའི་སྒྲ། །གླིང་བུ་པི་བང་ལ་སོགས་རྣམས། །ཅི་སྟེ་མཚན་མ་འདི་དག་ནི། །སྡིག་ཅན་བློས་ནི་མ་མཐོང་ན། །འབུམ་གྱི་ཕྲག་ནི་བརྒྱད་སྟོང་ངམ། །ཇི་སྲིད་མཚན་མ་བྱུང་བར་དུ། །དེ་བཞིན་གཤེགས་པ་མཆོད་ནས་ནི། །མཉམ་ པར་གཞག་པས་བཟླས་པར་བྱ། །དེ་ཡི་མཐར་ནི་མཁས་པས་ཀྱང་། །མཚན་གཅིག་ཐོག་ཐག་མི་ཉལ་བཟླས། །དེ་ནས་དེ་ཡི་སྡིག་པ་ནི། །དག་པ་ཉིད་དུ་ངེས་པར་མཐོང་། །ལྷ་ཡི་ལུས་ཀྱི་གཟུགས་གྱུར་ལ། །རང་གི་རྒྱུད་དུ་ངོ་ཤེས་འགྱུར། །མཚན་མ་འདི་དག་ཤེས་ནས་ནི། ། རྣམ་པར་མི་རྟོག་སེམས་ཀྱིས་ཀྱང་། །བྱམས་དང་སྙིང་རྗེར་ལྡན་པ་ཡིས། །ལས་རྣམས་ཐམས་ཅད་བྱེད་པར་འགྱུར། །ཡང་ན་མེད་པར་གྱུར་ན་ཡང་། །བཟླས་ཤིང་སྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ཀྱང་། །མཆོད་རྟེན་ཕྲེང་བ་བྱ་བ་དང་། །ཡང་ན་གཟུགས་སུ་བྲིས་ ཀྱང་རུང་། །སྦྱིན་སྲེག་མངོན་པར་དབང་བསྐུར་ན། །གདོན་མི་ཟ་བར་བདེ་འགྲོར་སྐྱེ། །ཐལ་བ་ཡུངས་ཀར་བྱེ་མ་སོགས། །རང་གི་མིང་སྨོས་སྔགས་བཏབ་ནས། །བཟླས་བ་བྱས་ཏེ་སོང་ནས་ཀྱང་། །རྒྱ་མཚོར་འབབ་པའི་ཀླུང་དུ་དོར། །དེ་ལྟར་ན་ནི་སྡིག་ཅན་ཡང་། །ངན་སོང་ལས་
- 67b
ནི་ཐར་འགྱུར་ན། །དགེ་བའི་མཆོག་ནི་བསྐྱེད་པ་དང་། །བྱང་ཆུབ་ས་བོན་བསྐྱེད་པའི་བདག །སངས་རྒྱས་འབྲས་བུའི་རྒྱུ་ལྡན་པ། །སྦྱིན་པའི་ཕ་རོལ་ཕྱིན་པར་ལྡན། །ཚུལ་ཁྲིམས་རྒྱུད་དང་རབ་ལྡན་པ། །བཟོད་པ་བརྩོན་འགྲུས་མཉམ་གཞག་དང་། །ཤེས་རབ་རྣམས་ཀྱིས་ རྒྱུ་བསྒོམས་པའི། །འཇིག་རྟེན་བསོད་ནམས་ལྡན་ཅི་སྨོས། །མྱུར་དུ་དེ་ཡི་ངན་སོང་ནི། །བཅོམ་པར་གྱུར་ཏེ་ཐེ་ཚོམ་མེད། །དགེ་བའི་རྩ་བ་མ་བསྐྱེད་ལ། །མེད་པར་ལྟ་བ་གང་ཡིན་དང་། །བྱང་ཆུབ་ལམ་ལས་རྣམ་ལོག་པས། །བསྟན་ལ་ཞེ་སྡང་གནོད་བྱེད་ཅིང་། །སྡིག་པའི་རང་ བཞིན་མཐོང་ལ། །མ་དང་ཕ་ལ་སྙིང་རིང་ཞིང་། །བྱང་ཆུབ་སེམས་ལ་བརྟེན་པ་དང་། །འདོད་ཆགས་བྲལ་བ་བསད་པ་རྣམས། །ཅི་སྟེ་ལྷ་རྣམས་མེད་གྱུར་ཏམ། །སངས་རྒྱས་དགེ་འདུན་ཆོས་དེ་བཞིན། །སྔགས་དང་ཕྱག་རྒྱའི་ཚོགས་ལ་སོགས། །ཤེས་རབ་ཐབས་རྣམས་ མེད་ན་ནི། །སྡིག་ཅན་དེ་དག་མི་ཐར་ཞེས། །བདེར་གཤེགས་རྒྱལ་བ་ཉིད་ཀྱིས་གསུངས། །།དེ་ནས་བརྒྱ་བྱིན་ལ་སོགས་ལྷ། །པདྨ་ལྟ་བུའི་མིག་ཕྱེ་ནས། །ལེགས་ཞེས་བྱ་བས་མཉེས་བྱས་ཏེ། །རབ་ཏུ་མགུ་བས་མཆོད་བྱས་ནས། །བརྒྱ་བྱིན་གཞན་ལ་ཕན་བརྩོན་པས། ། ཇི་སྐད་གསུངས་པའི་བཀའ་བཞིན་དུ། །ཤཱཀྱའི་གཙོ་བོས་བཀའ་སྩལ་པ། །བདེན་པ་ཉིད་དུ་བྱས་གྱུར་ནས། །དེ་ནས་དེ་ནི་དམྱལ་བ་ཡི། །སྡུག་བསྔལ་ལས་ནི་ཐར་ནས་ཀྱང་། །དགའ་ལྡན་གནས་སུ་སེམས་ཅན་ཀུན། །ཕན་ཕྱིར་བདེ་གཤེགས་འདྲ་བར་སྐྱེས། །དེ་ནས་ དབང་པོར་བཅས་པ་ཡི། །གྲགས་ཆེན་ལྷ་རྣམས་གར་བྱེད་ཅིང་། །མཆོད་པའི་སྤྲིན་ནི་མཐའ་ཡས་པས། །དེ་བཞིན་གཤེགས་ལ་མཆོད་བྱའི་ཕྱིར། །ལྷ་ཡི་ཚོགས་ཀྱིས་མདུན་བྱས་ཏེ། །ཚེ་འདི་ཉིད་ལ་མཆོད་པའི་ཕྱིར། །བྱང་ཆུབ་ཏུ་ཡང་སེམས་བསྐྱེད་ནས། །ལྷ་རྫས་ རྣམ་པ་སྣ་ཚོགས་ཀྱི། །མེ་ཏོག་བདུག་པ་བྱུག་པ་དང་། །གདུགས་དང་རྒྱལ་མཚན་འཕན་ལ་སོགས། །རྒྱན་ལ་སོགས་པ་རབ་མཛེས་དང་། །ན་བཟའ་རིན་ཆེན་ཆར་ལ་སོགས། །དགའ་བའི་ཚལ་ནི་གང་བར་བྱས། །དེ་ནས་ཡ་མཚན་ཆེར་གྱུར་ཏེ། །ལྷ་རྣམས་ཀྱིས་ཀྱང་
- 68a
ཕྱག་འཚལ་ནས། །དགའ་བའི་ཚལ་ནི་ཡིད་འོང་བ། །ཀུན་ནས་གང་བར་གྱུར་པ་ཡི། །སྣ་ཚོགས་འབྱུང་བ་འདི་ཅི་ལགས། །བཅོམ་ལྡན་འདས་ཀྱིས་བཀའ་སྩལ་པ། །གྲོགས་པོ་དག་ཤེས་པར་གྱིས་ཤིག །རྫུ་འཕྲུལ་རྣམ་པར་འཕྲུལ་པ་འདི་ནི་ ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་ཡིན་ནོ། །མཚམས་མེད་པའི་དབང་དུ་གྱུར་པ་ཡང་མྱོང་ཞིང་མཐོང་བའི་ཆོས་འདི་ཉིད་ལ་བདེ་འགྲོའི་དབང་དུ་གྱུར་པ་གང་ལགས་པ་དེ་ནི་བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་ངོ་མཚར་ལགས་སོ། །དེ་ནས་ བརྒྱ་བྱིན་ལ་སོགས་པ་ལྷའི་བུ་ཐམས་ཅད་ཀྱིས་མགྲིན་གཅིག་ཏུ་ཚིག་འདི་སྐད་ཅེས་སྨྲས་སོ། །སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་དགེ་བ་མེད། །དགེ་འདུན་འདྲ་བའི་སྣོད་མེད་དེ། །སྔགས་དང་འདྲ་བའི་འདྲེན་པ་མེད། །དེ་ནས་ལྷའི་བུ་དེ་དག་གིས་བཅོམ་ལྡན་ འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱི་བྱིན་གྱིས་བརླབས་ཀྱིས་དགའ་ལྡན་གྱི་ལྷའི་རིས་སུ་སྐྱེས་པའི་ལྷའི་བུ་དེ་ཅི་འདྲ་བ་ཞིག། དེའི་རྫུ་འཕྲུལ་དང་མཐུ་ནི་ཇི་ལྟ་བུ་ལགས། ལྷའི་བུ་ནོར་བུ་དྲི་མ་མེད་པའི་འོད་ཅེས་བགྱི་བ་དེ་བདག་ཅག་ལྟ་བར་ འཚལ་ལོ། །དེ་ནས་བཅོམ་ལྡན་འདས་ཀྱིས་ལྷ་ཐམས་ཅད་ཀྱི་སྙིང་སྐུལ་བར་བྱེད་པ་ཞེས་བྱ་བའི་འོད་ཟེར་གྱི་ཕྲེང་བ་ཉིད་ཀྱི་ཞབས་ཀྱི་མཐེ་བོ་གཉིས་ལས་ཕྱུང་ངོ་། །བྱུང་ནས་ཀྱང་ནོར་བུ་དྲི་མ་མེད་པའི་འོད་ཅེས་བྱ་བའི་ལུས་ཐམས་ཅད་སྣང་བར་བྱས་ནས་སྙིང་གར་ཞུགས་ཏེ་བསྐུལ་ནས་ ཡང་དེ་ཉིད་དུ་མི་སྣང་བར་གྱུར་ཏོ། །དེ་ནས་ལྷའི་བུ་དེ་ཉིད་རབ་ཏུ་དགའ་བར་གྱུར་ནས་ལུས་ཀྱི་འོད་ཟེར་གྱིས་དཔག་ཚད་བརྒྱ་ཕྲག་སྟོང་ཚུན་ཚད་ཀྱི་ནམ་མཁའི་ངོས་ཐམས་ཅད་གསལ་བར་བྱས་ཏེ། ལྷའི་བུ་སྟོང་ཕྲག་དུ་མའི་འཁོར་གྱིས་བསྐོར་ཅིང་མདུན་དུ་བྱས་ནས། ལྷའི་རྫུ་འཕྲུལ་ཆེན་ པོས་མི་སྣང་བར་བྱས་ཏེ་འོངས་ནས་དགའ་བའི་ཚལ་ཐམས་ཅད་གསལ་ཞིང་སྣང་བར་བྱས་ཏེ། བཅོམ་ལྡན་འདས་དང་། བརྒྱ་བྱིན་གཉིས་མ་གཏོགས་པ་ལྷ་རྣམས་ཀྱི་འོད་ཟིལ་གྱིས་མནན་ཏོ། །དེ་ནས་ལྷའི་བུ་དེས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་ཆེད་དུ་བརྗོད་པ་
- 68b
འདི་ཆེད་དུ་བརྗོད་དོ། །ཨེ་མ་ཤཱཀྱ་མགོན་པོ་ཡི། །སངས་རྒྱས་མཛད་པ་ཡ་མཚན་ཆེ། །གང་ཕྱིར་ངན་སོང་ལྷུང་བ་ཡི། །སེམས་ཅན་མྱུར་དུ་གློག་བཞིན་གྲོལ། །དེ་ནས་སྐད་ཅིག་མ་དེ་ཉིད་ཀྱི་ཚེ་ཤིང་རྟའི་འཕང་ལོ་ཙམ་གྱི་བད་མོ་ཐམས་ཅད་རིན་པོ་ཆེ་ལས་བྱས་པ། དཔག་ཚད་ བརྒྱ་ཕྲག་སྟོང་དུ་དྲིའི་ངད་ལྡང་བ། ལྷའི་གླུ་སྙན་པའི་སྒྲ་གྲག་པ། ཡ་མཚན་དུ་མ་ཡང་དག་པར་སྟོན་པ། ལྷ་རྫས་ཀྱི་གླུ་དང་། གར་དང་། བརྡུང་བ་དང་། གླིང་བུ་དང་། རྔ་དང་། ཀེར་ཀོ་རྣམས་ཀྱི་སྒྲ་སྙན་པ་འབྱིན་པ་ཞིག་བཅོམ་ལྡན་འདས་ཀྱི་སྤྱན་སྔར་བྱུང་སྟེ། དེ་མཐོང་ ནས་ཀྱང་ཤིན་ཏུ་ཡ་མཚན་སྐྱེས་ཏེ་འདི་སྐད་ཅེས་སྨྲས་སོ། །དེ་བཞིན་གཤེགས་པའི་ཆོས་ནི་བསམ་མི་ཁྱབ། །སྔགས་ཀྱི་ཡོན་ཏན་སྣ་ཚོགས་བསམ་མི་ཁྱབ། །བྱང་ཆུབ་རྟེན་པ་རྣམས་ཀྱང་བསམ་མི་ཁྱབ། །ཚངས་སྤྱོད་ཚུལ་ཁྲིམས་དྲི་མེད་སྐྱེ་བསམ་ཡས། །དེ་ནས་ལྷའི་བུ་དེ་ དག་གིས་དེ་བལྟ་བར་འདོད་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷའི་བུ་དེ་དང་། དེའི་འཁོར་གྱི་དཀྱིལ་འཁོར་རྣམས་བལྟ་བར་འཚལ་ལོ། །བཅོམ་ལྡན་འདས་བལྟ་བར་འཚལ་ལོ། །བདེ་བར་གཤེགས་པ་བལྟ་བར་འཚལ་ལོ། །དེ་ནས་བཅོམ་ལྡན་འདས་ ཀྱིས་ཡང་མཐེ་བོ་གཉིས་ནས་འོད་ཟེར་ཕྱུང་སྟེ། འོད་ཟེར་དྲི་མ་མེད་པ་དེས་ལྷའི་བུ་དེ་དང་ལྷའི་འཁོར་དེ་དག་ཀུན་དུ་སྣང་བར་བྱས་ཏེ་བསྐུལ་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་ནོར་བུ་དྲི་མ་མེད་པའི་འོད་ཅེས་བྱ་བ་དེ་ལ་སོགས་པ་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་བཅོམ་ ལྡན་འདས་དང་། བརྒྱ་བྱིན་གཉིས་ཀྱི་གདན་མ་གཏོགས་པར་དགའ་བའི་ཚལ་ཐམས་ཅད་གཡོས་པར་བྱས་ཏེ། ལན་བརྒྱ་སྟོང་དུ་མར་བསྐོར་བ་བྱས་ཤིང་བསྐོར་བ་བྱས་ནས་ཡང་དང་ཡང་དུ་འདི་སྐད་ཅེས་གསོལ་ཏོ། །ཨེ་མའོ་སངས་རྒྱས་རྣམས་ཀྱི་ནི། །སྔགས་ཀྱི་བྱིན་རླབས་ཡ་ མཚན་ཆེ། །གང་ཕྱིར་མཚམས་མེད་ལྷུང་བ་ཡི། །སེམས་ཅན་ལྷ་གནས་མྱུར་དུ་སྐྱེས། །དེ་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་ལ་སོགས་པའི་ལྷའི་བུ་དེ་དག་གིས་བཅོམ་ལྡན་འདས་ལ་ནོར་བུ་དང་། གསེར་དང་། དངུལ་དང་། དོ་ཤལ་དང་། སེ་མོ་དོ་དང་། གདུ་བུ་
- 69a
དང་། དཔུང་རྒྱན་དང་། སྙན་ཆ་ལ་སོགས་པ་རྒྱན་གྱི་ཁྱད་པར་རྣམ་པ་སྣ་ཚོགས་དུ་མ་དང་། གདུགས་དང་། རྒྱལ་མཚན་དང་། འཕན་དང་། ལྡ་ལྡི་དང་། རྔ་མ་ལ་སོགས་པ་ཡོ་བྱད་ཀྱི་ཁྱད་པར་སྣ་ཚོགས་པ་དང་སེང་གེའི་གདན་དང་གཟིམས་ཆ་དང་ཕོ་ བྲང་དང་། གཞལ་མེད་ཁང་དང་། ཁང་བུ་བརྩེགས་པ་ལ་སོགས་པ་གནས་ཀྱི་ཁྱད་པར་སྣ་ཚོགས་པ་དང་། མེ་ཏོག་དང་། སྤོས་ལ་སོགས་པ་མཆོད་པའི་ཁྱད་པར་སྣ་ཚོགས་པ་དང་། རང་གི་ལུས་དང་། ངག་དང་། སེམས་རྣམས་ཀྱང་ཕུལ་ཏེ། བ་ལང་དང་། རྟ་དང་། སེང་ གེ་དང་། སྟག་དང་། སྤྲེའུ་དང་། དགོ་བ་དང་། ཐུག་རེ་དང་། མ་ཧེ་དང་། བོང་བུ་དང་། རྔ་མོ་དང་། ཆུ་སྲིན་དང་། ཕག་དང་། ར་དང་། གླང་དང་། བ་དང་། འདོད་པའི་བ་བཞོན་ལ་སོགས་པ་བཞོན་པའི་ཁྱད་པར་དུ་མ་ཡང་ཕུལ་ནས། བཅོམ་ལྡན་འདས་ཀྱི་འཁོར་གྱི་དཀྱིལ་ འཁོར་རྣམས་ཀྱང་མངོན་པར་མཆོད། ལྷ་རྣམས་ཀྱི་དབང་པོ་བརྒྱ་བྱིན་གྱི་འཁོར་གྱི་དཀྱིལ་འཁོར་རྣམས་ཀྱང་མངོན་པར་མཆོད་དེ། ལེགས་སོ་ཞེས་བྱ་བ་གསོལ་ནས། བཅོམ་ལྡན་འདས་དང་། བརྒྱ་བྱིན་གཉིས་ལ་བླ་མ་དང་བསྟི་སྟང་དུ་བྱས་ཏེ་ཕྱག་འཚལ་ནས་དེ་བཞིན་དུ་སོང་ངོ་། །དེ་ནས་ བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་མཆོག་ཏུ་ཡ་མཚན་དུ་གྱུར་ཏེ། བཅོམ་ལྡན་འདས་ལ་ཡང་དང་ཡང་དུ་ལེགས་སོ་ཞེས་བྱ་བས་བསྟོད་ཅིང་མཆོད་དེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་མ་འོངས་པའི་བྱིས་པ་སོ་སོའི་སྐྱེ་བོ་རྣམས་ འཆང་བ་དང་ཀློག་པ་ལ་སྤྲོ་བར་བགྱི་བའི་སླད་དུ་དེ་བཞིན་གཤེགས་པའི་མཚན་བརྗོད་པའི་ཡོན་ཏན་བཤད་དུ་གསོལ། བརྒྱ་བྱིན་དང་ཚངས་པ་ལ་སོགས་པའི་ལྷའི་བུ་རྣམས་ངས་བཤད་ཀྱིས། ལེགས་པར་ཉོན་ལ་ཡིད་ལ་ཟུང་ཤིག །ལྷའི་བུ་རྣམས་དགེ་བ་བཅུ་དང་ལྡན་པའི་སེམས་ ཅན་རྣམས་ཀྱི་རྣ་ལམ་དུ་ཐོས་པར་འགྱུར་གྱི། སེམས་ཅན་མ་རབས་རྣམས་ཀྱིས་ནི་མ་ཡིན་ནོ། །ཕ་རོལ་ཏུ་ཕྱིན་པ་བཅུ་ལ་མོས་པའི་སེམས་ཅན་རྣམས་ཀྱི་རྣ་ལམ་དུ་ཉེ་བར་འགྲོ་བར་འགྱུར་གྱི། སེམས་ཅན་ཕལ་པ་མ་རབས་ཀྱིས་ནི་མ་ཡིན་ནོ། །སེམས་ཅན་བསམ་པ་ངེས་པ་རྣམས་
- 69b
དང་། ཕྱིར་མི་ལྡོག་པའི་ཡོན་ཏན་མང་པོ་ལ་མངོན་པར་འདོད་པའི་སེམས་ཅན་རྣམས་ཀྱི་རྣ་ལམ་དུ་འགྲོ་བར་འགྱུར་ཏེ། མདོར་ན་ཐམས་ཅད་མཁྱེན་པའི་ཡེ་ཤེས་ལ་བརྟེན་པའི་སེམས་ཅན་རྣམས་ཀྱི་རྣ་ལམ་དུ་འགྲོ་བར་འགྱུར་རོ། །དེ་ནས་བརྒྱ་བྱིན་དང་། ཚངས་པ་ལ་སོགས་ པའི་ལྷའི་བུ་དེ་དག་ཡང་དག་པར་དགའ་བ་སྐྱེས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་སྣོད་དུ་གྱུར་པའོ། །བདེ་བར་གཤེགས་པ་བདག་ཅག་ནི་སྣོད་དུ་གྱུར་པ་སྟེ། གང་གི་སླད་དུ་བདག་ཅག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་ཞེས་བགྱི་བའི་མཚན་བརྗོད་པ་འདི་བཅོམ་ལྡན་འདས་པདྨའི་ཞལ་ཉིད་ནས་ཐོས་པས་བདག་ཅག་ནི་ངན་སོང་གིས་འཇིགས་པར་མི་འགྱུར། དུས་མ་ལགས་པར་འཆི་བས་འཇིགས་པར་མི་འགྱུར། འཆི་བ་ དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པ་ལ་སོགས་པས་འཇིགས་པར་མི་འགྱུར་ཏེ། བཅོམ་ལྡན་འདས་བདག་ཅག་ནི་གདོན་མི་འཚལ་བར་སངས་རྒྱས་ཉིད་དུ་འགྲུབ་པའི་སྣོད་དུ་གྱུར་པ་ལགས་སོ། །བཅོམ་ལྡན་འདས་བརྟག་པའི་རྒྱལ་པོ་འདིས་སེམས་ ཅན་རྣམས་ཀྱི་དོན་བགྱིད་པ་གང་ལགས་པའི་སྐྱེས་བུ་དམ་པ་དེ་དག་གི་འབྲས་བུ་ནི་ཅིར་འགྱུར། རྣམ་པར་སྨིན་པ་ནི་ཅིར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་དེ་དག་ནི་སྐྱེས་བུ་དམ་པ་འབའ་ཞིག་ཏུ་མ་ཟད་ཀྱི། ཡང་དག་པར་རྫོགས་པའི་སངས་རྒྱས་ཉིད་ དུ་བལྟ་བར་བྱ་སྟེ། ལྷའི་དབང་པོ་གང་གི་ཕྱིར་འཇིག་རྟེན་ཕ་རོལ་དུ་སོང་ནས་མཚམས་མེད་པ་ལ་སོགས་པའི་སེམས་ཅན་དམྱལ་བ་ཆེན་པོར་སྐྱེས་པའི་སེམས་ཅན་རྣམས་ཀྱི་སྡུག་བསྔལ་རྣམ་པ་སྣ་ཚོགས་རབ་ཏུ་སྤོང་བར་བྱེད་པ་དང་། བྱང་ཆུབ་ལ་གདོན་མི་ཟ་བར་བརྟན་པར་བྱེད་པ་ དང་། བྱང་ཆུབ་སེམས་དཔའི་ས་ཕྱིར་མི་ལྡོག་པ་ལ་རབ་ཏུ་འཇོག་པའི་ཕྱིར་ཏེ། ལྷའི་དབང་པོ་དཔེར་ན་ཁྱོད་ཀྱིས་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་མཚམས་མེད་པའི་སེམས་ཅན་དམྱལ་བ་ཆེན་པོར་སྐྱེས་པའི་དོན་བྱས་པ་བཞིན་ནོ། །ལྷའི་དབང་པོ་དེ་ལྟར་གཞན་ཡང་མ་འོངས་
- 70a
པའི་སེམས་ཅན་རྣམས་ཀྱི་དོན་བྱེད་པའི་སེམས་ཅན་དེ་དག །ཅི་སོ་སོའི་སྐྱེ་བོ་ཡིན་སྙམ་སེམས་སམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །ལྷའི་དབང་པོ་སེམས་ཅན་དེ་དག་ནི་སྐྱེས་བུ་དམ་པ་ཆེན་ པོ། གཞན་ལ་ཕན་འདོགས་པ་སྟེ། དེ་བཞིན་གཤེགས་པ་རྣམས་ཀྱིས་ཀྱང་ཕྱག་བྱ་བ། མཆོད་པ། རྗེད་པ། བསྟི་སྟང་དུ་བྱ་བ། འཕྲག་ལ་བཀུར་བར་བྱ་བ་ཡིན་ན། ལྷར་བཅས་པའི་འཇིག་རྟེན་གྱིས་ལྷ་སྨོས་ཀྱང་ཅི་དགོས། དེ་ནས་བརྒྱ་བྱིན་དང་། ཚངས་པ་ལ་ སོགས་པ་ལྷའི་བུ་རྣམས་དང་། རྒྱལ་པོ་ཆེན་པོ་བཞི་དང་། ཕྱོགས་སྐྱོང་བ་བཅུ་དང་། གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དང་། གནོད་སྦྱིན་ཆེན་པོ་ནོར་བུ་བཟང་པོ་དང་། ནོར་བུ་བཟང་པོ་ཆེན་པོ་ལ་སོགས་པ་བྱང་ཆུབ་སེམས་དཔའི་ས་ལ་རབ་ཏུ་གནས་པ་རྣམས་དང་། ཀླུའི་རྒྱལ་ པོ་དགའ་བོ་དང་། བསྙེན་དགའ་བོ་གཉིས་དང་། འཕྲོག་མ་བུ་ལྔ་བརྒྱས་བསྐོར་བ་རྣམས་དང་། གནོད་སྦྱིན་གྱི་སྡེ་དཔོན་ཆེན་པོ་པཉྩི་ཀ་དང་། པཉྩི་ཀ་ཆེན་པོ་ལ་སོགས་པ་དང་། གང་གཞན་དག་ཀྱང་རྒྱ་ཆེ་ཞིང་རྒྱ་ཆེ་བའི་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ ཡིན་དང་། ནམ་མཁའི་ལྡིང་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། འབྱུང་པོ་དང་། ཡི་དགས་དང་། འདྲེ་དང་། རིམས་དང་། གདོན་དང་། དུག་དང་། སྐར་མ་ལ་སོགས་པ་ཐམས་ཅད་ཀྱིས་མགྲིན་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ ཅག་འདུས་ཤིང་ཚོགས་པ་ཐམས་ཅད་ཀྱིས་སྐྱེས་བུ་དམ་པ་ཆེན་པོ་དེའི་རྐང་པ་གཉིས་མགོ་བོས་བླང་བར་བགྱིའོ། །མདོར་ན་རྟག་པར་རྒྱུན་དུ་དུས་ཐམས་ཅད་དུ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །བཅོམ་ལྡན་འདས་གང་དུ་བརྟག་པའི་རྒྱལ་པོ་འདི་རིགས་ཀྱི་བུའམ། རིགས་ཀྱི་བུ་མོ་དད་པས་འཆང་ངམ། ཀློག་གམ། གཞན་ལ་རྒྱ་ཆེར་ཡང་དག་པར་འཆད་པར་འགྱུར་རམ། གདུགས་དང་། རྒྱལ་མཚན་དང་། བ་དན་ལ་སོགས་པས་མཆོད་པར་འགྱུར་རམ། རྒྱལ་རིགས་སམ། བྲམ་ཟེའི་རིགས་སམ། རྗེའུ་རིགས་སམ། དམངས་རིགས་
- 70b
སམ། གཞན་ཡང་རྒྱལ་པོའམ། རྒྱལ་པོའི་བུའམ། རྒྱལ་པོའི་བུ་མོའམ། རྒྱལ་པོའི་བཙུན་མོའམ། རྒྱལ་པོའི་འཁོར་ཕོའམ། རྒྱལ་པོའི་འཁོར་མོའམ། གང་སུ་ཡང་རུང་བས་འཆང་ཞིང་ཀློག་པ་དང་། གཞན་ལ་རྒྱ་ཆེར་ཡང་དག་པར་འཆད་ཅིང་སྟོན་པའི་བར་དུ་ བགྱིད་ན། བཅོམ་ལྡན་འདས་བདག་ཅག་འདུས་ཤིང་ཚོགས་པ་ཐམས་ཅད་དེའི་བྲན་དུ་གྱུར་པ་ལགས་སོ། །རང་གི་སྐྱེ་བོ་དང་། གཉེན་གྱི་སྐྱེ་བོ་དང་། ཡོངས་ཀྱི་སྐྱེ་བོ་དང་། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། རྒྱལ་པོའི་ཕོ་བྲང་འཁོར་རྣམས་ཡོངས་ སུ་བསྐྱང་བར་བགྱིའོ། །དུས་དུས་སུ་ཆར་དབབ་པར་བགྱིའོ། །འབྲུ་ལ་སོགས་པ་བསྐྱེད་པར་བགྱིའོ། །སྐྱེ་བོ་མང་པོ་ལ་ཕན་པ་དང་བདེ་བའི་སླད་དུ་བསྒྲུབ་པར་བགྱིའོ། །ཕ་རོལ་གྱི་ཕྲུ་མ་མང་པོ་གཞོམ་པར་བགྱིའོ། །སེམས་ཅན་མ་རུངས་པ་གནོད་ཅིང་འཚེ་བ་པོས་དེ་ལ་མི་ཕན་ པའི་སེམས་བསྐྱེད་པ་གང་ཡིན་པ་དེ་དག་བརླག་པར་བགྱི་བའི་སླད་དུ་བསྒྲུབ་པར་བགྱི། མ་རུངས་པར་བགྱི། དེ་ལ་བདུད་ཀྱི་ལས་ཀྱང་བགྱི། གནོད་པར་བགྱི་བ་ལ་ཡང་ཉེ་བར་གནས་པར་བགྱི་སྟེ། བཅོམ་ལྡན་འདས་མདོར་ན་མ་འོངས་པའི་སེམས་ཅན་རྣམས་ལ་བརྟག་པའི་རྒྱལ་ པོ་འདི་ནི་སངས་རྒྱས་ཀྱི་མཛད་པ་ལྟ་བུར་གནས་པ་ལགས་པས། བཅོམ་ལྡན་འདས་བདག་ཅག་གིས་བུ་བཞིན་དུ་བསྐྱང་བར་བགྱིའོ། །ལྷའི་དབང་པོ་ཁྱོད་ཀྱིས་ཇི་ལྟར་སྨྲས་པ་དེ་དེ་བཞིན་ཏེ། བརྟག་པའི་རྒྱལ་པོ་འདི་ནི་དེ་བཞིན་དུ་བལྟ་བར་བྱའོ། །ལྷའི་དབང་པོ་ལེགས་ཀྱིས། འཛམ་བུའི་གླིང་ན་གནས་པའི་སེམས་ཅན་སྡིག་པའི་ཆོས་ལ་ཀུན་ཏུ་སྤྱོད་པ། སེམས་ཅན་དམྱལ་བའི་དབང་དུ་གྱུར་པ། འཁོར་བ་མི་གཙང་བའི་དོང་དུ་བྱིང་བའི་སེམས་ཅན་རྣམས་ལ་ཕན་པ་དང་བདེ་བར་བྱ་བའི་ཕྱིར་ཡུན་རིང་པོར་བག་ཡོད་པར་བྱོས་ལ་སྒྲུབས་ཤིག །ངན་སོང་ཐམས་ ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོའི་བརྟག་པ་ལས་བརྟག་པ་དང་པོའོ།། །།བམ་པོ་གཉིས་པ། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་མཐུས་བརྟག་པའི་རྒྱལ་པོ་བརྟག་པ་ཕྱི་མ་
- 71a
འདི་བཤད་དོ། །དཔའ་བོ་གདན་ལས་བཞེངས་ནས་ནི། །དགྱེས་ཤིང་རྡོ་རྗེ་གསོར་ནས་ཀྱང་། །ཤཱཀྱའི་དབང་པོ་དགྱེས་མཛད་པ། །ཐུབ་པའི་གཙོ་ལ་ཕྱག་འཚལ་ནས། །སྒྲིབ་པ་ཐམས་ཅད་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ངན་སོང་ཐམས་ཅད་རྣམ་པར་སྦྱོང་བ་ཞེས་བྱ་བ་རང་གི་སྙིང་པོ་འདི་ཉིད་ཀྱི་ཐུགས་ཀ་ནས་ཕྱུང་ངོ་། ཨོྃ་སརྦ་པཱ་པཾ་ད་ཧ་ན་བཛྲ་ཧཱུྃ་ཕཊ། ཨོྃ་སརྦ་ཨ་བཱ་ཡ་བི་ཤོ་དྷ་ན་བཛྲ་ཧཱུྃ་ཕཊ། ཨོྃ་སརྦ་ཀརྨ་ཨཱ་བ་ར་ཎཱ་ནི་བྷཥྨིཾ་ཀུ་རུ་ཧཱུྃ་ཕཊ། ཨོྃ་བྲུཾ་བྷྲཱུཾ་བི་ནཱ་ཤ་ཡ་ཨཱ་བ་ར་ཎཱ་ནི་ཧཱུྃ་ཕཊ། ཨོྃ་བྲུཾ་བི་ཤོངྷ་ཡ་ཨཱ་བ་ར་ཎཱ་ནི་ ཧཱུྃ་ཕཊ། ཨོྃ་ཛྭ་ལ་ཛྭ་ལངྷ་ཀ་ངྷ་ཀ་ཧ་ན་ཧ་ན་སརྦ་ཨཱ་བ་རཎཱ་ནི་ཧཱུྃ་ཕཊ། ཨོྃ་སྲུཾ་ས་ར་ས་ར་པྲ་ས་ར་པྲ་ས་ར་སརྦ་ཨཱ་བ་ར་ཎཱི་ནི་ཧཱུྃ་ཕཊ། ཨོྃ་ཧཱུྃ་ཧ་ར་ཧ་ར་སརྦ་ཨཱ་པ་ར་ཎཱ་ནི་ཧཱུྃ་ཕཊ། ཨོྃ་ཧཱུྃ་ཕཊ་སརྦ་ཨཱ་བ་ར་ཎཱ་ནི་བི་སྥོ་ཊ་ཡ་ཧཱུྃ་ཕཊ། ཨོྃ་བྲྀ་ཏ་བྲྀ་ཏ་སརྦ་ཨཱ་བ་ར་ཎཱ་ནི་ཕཊ། ཨོྃ་ཏྲ་ཊ་ཏྲཊ་སརྦ་ཨཱ་བ་ར་ཎཱ་ནི་ ཧཱུྃ་ཕཊ། ཨོྃ་ཙྪིནྡ་ཙྪིནྡ་སརྦ་ཨཱ་བ་ར་ཎཱ་ནི་ཧཱུྃ་ཕཊ། ཨོྃ་ད་ཧ་ད་ཧ་སརྦ་ན་ར་ཀ་ག་ཏི་ཧེ་ཏུྃ་ཧཱུྃ་ཕཊ། ཨོྃ་པ་ཙ་པ་ཙ་སརྦ་པྲེ་ཏ་ཀ་ག་ཏ་ཧི་ཏུྃ་ཧཱུྃ་ཕཊ། ཨོྃ་མ་ཐ་མ་ཐ་སརྦ་ཏིརྱ་ཀ་ག་ཏི་ཧེ་ཏུྃ་ཧཱུྃ་ཕཊ། དེ་ནས་དེ་དག་རྣམས་ཀྱི་ཡོ་བྱད་བཤད་དོ། །ཨོྃ་སརྦ་ཨ་པཱ་ཡ་བི་ཤོ་དྷ་ནི། དྷ་མ་དྷ་མ་དྷུ་པ་ཡ་ཧཱུྃ་ ཕཊ། ཨོྃ་སརྦ་དུརྒ་ཏི་བི་ཤོ་དྷ་ནི་པུཥྤ་བི་ལོ་ཀི་ནི་ཧཱུྃ་ཕཊ། ཨོྃ་སརྦ་ཨ་པཱ་ཡ་བི་ཤོ་དྷ་ནི་ཛྙཱ་ན་ཨཱ་ལོ་ཀ་ཀ་རི་ཧཱུྃ་ཕཊ། ཨོྃ་སརྦ་ཨ་པཱ་ཡ་ག་ཏི་གན་དྷ་ནཱ་ཤ་ནི་གན་དྷ་བ་ཏི་ཧཱུྃ་ཕཊ། སྒོ་བ་རྣམས་ཀྱིས་སྔགས་ལ། ཨོྃ་སརྦ་ན་ར་ཀ་ག་ཏི་ཨཱ་ཀར་ཥ་ཎི་ཧཱུྃ་ཛཿཕཊ། ཨོྃ་སརྦ་ན་ར་ཀ་ག་ཏི་ཨ་བྷྱུ་དྡྷར་ ཎི་ཧཱུྃ་ཧཱུྃ་ཕཊ། ཨོྃ་སརྦ་ཨ་བཱ་ཡ་བན་དྷ་ན་བི་མོ་ཙ་ནི་ཧཱུྃ་བྃ་ཕཊ། ཨོྃ་སརྦ་ཨ་པཱ་ཡ་ག་ཏི་ག་ཧ་ན་བི་ནཱ་ཤ་ནི་ཧཱུྃ་ཧོཿཕཊ། དེ་ནས་དཀྱིལ་འཁོར་བཤད་དེ། འཁོར་ལོ་འདྲ་བའི་དཀྱིལ་འཁོར་ལ། །ཤིན་ཏུ་མཛེས་པའི་རྩིབས་བརྒྱད་ཅན། །ལྟེ་བར་བཅས་ཤིང་རྩིབས་རྟེན་ལྡན། །ནང་གི་རིམ་པ་ བྲིས་ནས་ནི། །ལྟེ་བའི་ནང་དུ་ཤཱཀྱ་ཡི། །བདག་པོ་ཐུབ་པ་གཞག་པར་བྱ། །ལག་ན་རྡོ་རྗེ་སྟོབས་ཆེན་ནི། །དཔའ་བོ་དེ་ཡི་སྤྱན་སྔར་བྲི། །རྒྱབ་ཏུ་འཁོར་ལོས་སྒྱུར་བ་བྲི། །གཡས་ཕྱོགས་རྒྱལ་བའི་གཙུག་ཏོར་ལ། །གཡོན་པར་རྣམ་པར་རྒྱལ་བ་བྲི། །གཟི་བརྗིད་ཕུང་པོ་མེ་
- 71b
ཡི་ཕྱོགས། །དབང་པོའི་ཕྱོགས་སུ་གདུགས་དཀར་པོ། །རྣམ་པར་འཐོར་བ་རླུང་གི་ཕྱོགས། །རྣམ་པར་འཇོམས་པ་ནཻ་རི་ཏྱར། །བྲིས་ནས་ཕྱི་རོལ་བྲི་བྱི་སྟེ། །གྲུ་བཞི་པ་ལ་སྒོ་བཞི་པ། །སེང་གེ་རྟ་བབས་བརྒྱན་པར་བྱ། །དཔའ་བོས་ལྕགས་ཀྱུ་ཞགས་པ་དང་། ། ལྕགས་སྒྲོག་དྲིལ་བུ་སྙན་རྣམས་གཞག །གྲྭ་ཡི་ཕྱོགས་ནི་ཐམས་ཅད་དུ། །བདུག་པ་ལ་སོགས་བྲི་བར་བྱ། །དེ་ནས་དྲི་ཞིམ་དྲི་ལ་སོགས། །རང་གི་ལུས་ནི་བསྐུས་ནས་ཀྱང་། །རྡོ་རྗེ་འཛིན་མས་ཞུགས་ནས་ནི། །ཨོྃ་ཛཿཧཱུྃ་བྃ་ཧོཿ བྷ་ག་བཱན། ཨེ་ཧྱེ་ཧི་མ་ཧཱ་ཀཱ་རུ་ཎི་ཀ་དྲྀ་ཤྱ་ ཧོཿས་མ་ཡ་སྟྭྃ་ཞེས་པས་ལྷ་རྣམས་ཐམས་ཅད་སྤྱན་དྲང་ངོ་། །དེ་ནས་གཤེགས་པར་མོས་པ་བསྐྱེད་དེ་མཆོད་པ་བྱས་ནས། དེ་བཞིན་དུ་བཅུག་སྟེ་དབང་བསྐུར་ན་ངན་སོང་ཐམས་ཅད་ལས་རྣམ་པར་གྲོལ་ཏེ། བདེ་འགྲོ་མཐོ་རིས་ཀྱི་འཇིག་རྟེན་དང་། གོང་ནས་གོང་དུ་ས་རྣམས་སུ་ ཡང་སྐྱེ་བར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་རོ། །སངས་རྒྱས་སུ་ཡང་གདོན་མི་ཟ་བར་འགྲུབ་པར་འགྱུར་རོ། །སྔ་མ་བཞིན་དུ་ལས་ཐམས་ཅད་ཀྱང་བྱེད་ཅིང་ཐམས་ཅད་ལ་ཐོགས་པ་མེད་པར་འགྱུར་རོ། །བྱ་བ་པ་བྱས་པས་ནི་རིམས་ནད་ཐམས་ཅད་དང་། གདོན་དང་དུག་ལ་སོགས་པ་ལས་ཐར་བར་འགྱུར་རོ། །ཕྱག་ན་རྡོ་རྗེའི་ཧཱུྃ་ཞེས་བྱ་བས་ལས་ཐམས་ཅད་ཕྱེད་པར་འགྱུར་རོ། །བརྟག་པ་གཞན་གྱི་ཆོ་ག་ཐམས་ཅད་ཀྱང་སྒྲུབ་པར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། སྲིན་པོ་ལ་སོགས་པ་ངན་སོང་གི་རྒྱུད་ཀྱི་དབང་དུ་ གྱུར་པ་རྣམས་ཀྱི་ཤི་བའི་རོའམ། གཟུགས་བརྙན་ནམ། མིང་ལ་སོགས་པ་བྲིས་ཏེ་བཟླས་པ་དང་། སྦྱིན་སྲེག་དང་། དབང་རྣམས་ཀྱིས་སྔ་མ་བཞིན་དུ་ངན་སོང་ཐམས་ཅད་ལས་ཡོངས་སུ་གྲོལ་བར་བྱེད་དོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སེང་གེའི་ལྟ་སྟངས་ཀྱིས་བཅོམ་ ལྡན་འདས་ཀྱི་ཞལ་དུ་བལྟས་ཏེ། ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་རྒྱ་དམ་པའི་མཚན་ཉིད་བཤད་པར་བགྱིའོ། །ཐུགས་རྗེས་བསྐུལ་བའི་ཐུགས་མངའ་བའི། །རྒྱལ་བ་ཀུན་གྱིས་བྱིན་གྱིས་རློབས། །མཉམ་པར་གཞག་པས་དཔྲལ་བར་ནི།
- 72a
ཕྱག་འཚལ་བ་ཡི་ཐལ་མོ་སྦྱར། །སངས་རྒྱས་བདེར་གཤེགས་སྐྱེས་རྣམས་ཀྱིས། །ཕྱག་འཚལ་བ་ཡི་ཕྱག་རྒྱར་བཤད། །རྣལ་འབྱོར་རིག་པས་མགྲིན་ཕྱོགས་སུ། །ཐལ་མོ་སྙིམ་པར་སྦྱར་བ་ནི། །རྟག་ཏུ་པདྨའི་རིགས་ཉིད་ཀྱི། པདྨའི་ཕྱག་རྒྱ་ཡིན་པར་ བཤད། །རྡོ་རྗེ་ཐལ་མོ་སྦྱར་ནས་ཀྱང་། །སྙིང་གར་གུང་མོའི་མཐའ་སྦྱར་བ། །རྡོ་རྗེ་རིགས་ཀྱི་ཕྱག་རྒྱ་འདི། །དམ་ཚིག་ཐམས་ཅད་འཛིན་བྱེད་པའོ། །ལག་པ་གཡོན་པའི་ཐལ་མོ་གན་རྐྱལ་དུ་པང་དུ་བཞག་ལ། །དེའི་སྟེང་དུ་གཡས་པ་བཞག་སྟེ། མཐེ་བོའི་ངོས་གཉིས་ སྤྲད་ལ་ཞི་བའི་ལྟ་བས་བལྟ་བ་འདི་ནི་དེ་བཞིན་གཤེགས་པའི་རིགས་ཀྱི་ཏིང་ངེ་འཛིན་གྱི་ཕྱག་རྒྱ་སྟེ། དམ་ཚིག་ཡིན་པར་བཤད་དོ། །དེ་ཉིད་ལས་བཟློག་སྟེ་ལྟག་འོག་བསྣོལ་ལ་མཐེ་བོ་དང་། མཐེའུ་ཆུང་གཉིས་གཅིག་ལ་གཅིག་ལུ་གུ་རྒྱུད་ཀྱི་ཚུལ་དུ་བསྣོལ་ཏེ་སྙིང་གར་གཞག་ པ་འདི་ནི་རྡོ་རྗེའི་རིགས་ཀྱི་དམ་ཚིག་གི་ཕྱག་རྒྱའོ། །ཐལ་མོ་རྫོགས་པར་སྦྱར་བ་ལས་མཐེ་བོ་དང་། མཐེའུ་ཆུང་གཉིས་བསྙམས་ལ་ལྷག་མ་རྣམས་བརྐྱང་བ་འདི་ནི་པདྨའི་རིགས་ཀྱི་དམ་ཚིག་གི་ཕྱག་རྒྱའོ། །རྡོ་རྗེ་བསྡམ་པ་བསྡམས་པ་ལས། གུང་མོ་གཉིས་རྡོ་རྗེ་འདྲ་བར་ བསྙམས་ལ། མཐེ་བོ་དང་མཐེའུ་ཆུང་གཉིས་བརྐྱང་བ་འདི་ནི་ཕྱག་ན་རྡོ་རྗེའི་ཕྱག་རྒྱའོ། །དེ་ཉིད་ལས་མཐེ་བོ་དང་མཐེའུ་ཆུང་གཉིས་དེ་བཞིན་དུ་བྱས་ལ། མཛུབ་མོ་གཉིས་དང་སྲིན་ལག་པདྨོ་འདྲ་བར་བཀུག་པ་ནི། ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོའི་ཐམས་ཅད་སྦྱོང་ བའི་ཕྱག་རྒྱའོ། །དེ་ཉིད་ལས་མཛུབ་མོ་དང་སྲིན་ལག་གཉིས་རིན་པོ་ཆེ་འདྲ་བར་བྱས་པ་ནི་དབང་བསྐུར་བའི་ཕྱག་རྒྱའོ། །མཐེའུ་ཆུང་དང་མཐེ་བོ་སོ་སོར་བསྡམས་ལ། ལྷག་མ་རྣམས་བརྐྱང་བ་ནི། སྡིག་པ་ཐམས་ཅད་སྲེག་པའི་ཕྱག་རྒྱའོ། །ལག་པ་གཡོན་པས་དེ་བཞིན་དུ་བསྒྱུར་ཞིང་ བྱ་བ་ནི་ལྷ་ཐམས་ཅད་ཀྱི་ཕྱག་རྒྱའོ། །སྙིམ་པ་བཟེད་ལ་གྱེན་དུ་འཐོར་བ་ནི་བདུག་པའི་ཕྱག་རྒྱའོ། །དེ་ལས་འོག་ནས་གྱེན་དུ་འཐོར་བ་ནི་མེ་ཏོག་གི་ཕྱག་རྒྱའོ། །དེ་ཉིད་ལས་མཐེ་བོ་གཉིས་གྱེན་དུ་བསྙམས་ལ་མདུན་དུ་འཛིན་པ་ནི་མར་མེའི་ཕྱག་རྒྱའོ། །དེ་ཉིད་ལས་དུང་འདྲ་བར་བྱས་པ་ནི་
- 72b
དྲིའི་ཕྱག་རྒྱའོ། །དེ་ཉིད་ལས་རབ་ཏུ་བརྐྱང་སྟེ་འཛིན་པ་ནི་གཏོར་མའི་ཕྱག་རྒྱའོ། །དེ་ཉིད་ལས་གུང་མོ་གཉིས་ནང་དུ་བཅུག་པ་ནི་ཨརྒྷའི་ཕྱག་རྒྱའོ། །རྡོ་རྗེ་བཅིངས་པ་ལས་གུང་མོ་གཉིས་བསྙམས་ཏེ། ཚིགས་དང་པོ་བཅག་ལ་སོར་མོ་ཐམས་ཅད་བརྐྱང་བ་ནི་རྣམ་པར་འཐོར་ བའི་ཕྱག་རྒྱའོ། །དེ་ཉིད་ལས་མཐེ་བོ་དང་མཐེའུ་ཆུང་གཉིས་བཀུག་པ་ནི་རྣམ་པར་འཇོམས་པའི་ཕྱག་རྒྱའོ། །དེ་ཉིད་ལས་འོད་ཟེར་འབར་བ་འདྲ་བ་ནི་གཟི་བརྗིད་ཕུང་པོའི་ཕྱག་རྒྱའོ། །དེ་ཉིད་ལས་སྤྱི་བོར་བསྐོར་བ་ནི་གདུགས་དཀར་པོའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ ལས་མཛུབ་མོ་གཉིས་དང་མཐེའུ་ཆུང་གཉིས་བསྣོལ་ཏེ། མདུད་ལ་གྱེན་དུ་བསྐོར་བ་ནི་འཁོར་ལོས་སྒྱུར་བའི་ཕྱག་རྒྱའོ། །རྡོ་རྗེ་བསྡམས་པ་ལས་གུང་མོ་གཉིས་རྡོ་རྗེར་བྱས་ལ་མཛུབ་མོ་གཉིས་རིན་པོ་ཆེ་ལྟ་བུར་བྱས་ཏེ། ལྷག་མ་རྣམས་འོད་ཟེར་འདྲ་བར་བྱས་པ་ནི་རྒྱལ་བའི་ གཙུག་ཏོར་གྱི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་རྡོ་རྗེར་བྱས་ལ། སོར་མོ་ལྷག་མ་རྣམས་བསྡམས་ནས་རྡོ་རྗེ་འདྲ་བར་བྱས་པ་ནི་རྣམ་པར་རྒྱལ་བའིའོ། །གཡས་པ་མཆོག་སྦྱིན་དུ་བྱས་ལ་གཡོན་པ་མི་འཇིགས་པ་སྦྱིན་པ་ནི་དེ་བཞིན་གཤེགས་པའི་ཡིན་ནོ། །རྡོ་རྗེ་བསྡམས་ པ་ལས་མཛུབ་མོ་གཉིས་བརྐྱང་སྟེ་རྡོ་རྗེ་འདྲ་བར་བྱས་པ་ནི་རྡོ་རྗེའི་ཕྱག་རྒྱའོ། །དེ་ཉིད་ལས་མཛུབ་མོ་གཡས་པ་བཀུག་པ་ནི་ལྕགས་ཀྱུའིའོ། །དེ་ཉིད་ལས་མེ་ཏོག་འདྲ་བར་བྱས་པ་ནི་མདའིའོ། །དེ་ཉིད་ལས་སླར་བཀུག་སྟེ། མཐེ་བོ་གཉིས་རྩེ་མོ་སྤྲད་པ་ནི་བློ་གྲོས་ལེགས་པའིའོ། ། དེ་ཉིད་ལས་ཚིགས་བར་མ་བཅག་པ་ནི་རིན་པོ་ཆེའིའོ། །དེ་ཉིད་ལས་སོར་མོ་རྣམས་འོད་ཟེར་འདྲ་བར་འགྱེད་པ་ནི་གཟི་བརྗིད་ཀྱིའོ། །དེ་ཉིད་ལས་སྤྱི་བོར་བཞག་པ་དཔལ་གྱིའོ། །དེ་ཉིད་ལས་མདུན་དུ་བཞག་པ་ནི་བཞད་པའིའོ། །དེ་ཉིད་ལས་པདྨ་འདྲ་བར་བྱས་པ་ནི་པདྨའིའོ། །དེ་ བཞིན་ཉིད་ལས་རྩེ་མོ་གཉིས་བཀུག་པ་ནི་རལ་གྲིའིའོ། །དེ་ཉིད་ལས་གདུ་བུ་འདྲ་བར་བྱས་པ་ནི་འཁོར་ལོའིའོ། །དེ་ཉིད་ལས་པདྨའི་འདབ་མ་འདྲ་བར་བྱས་པ་ནི་ལྕེའིའོ། །དེ་ཉིད་ལས་རྩེ་མོ་ཡིད་ཙམ་བསྐྱེད་པ་ནི་རྒྱ་གྲམ་མོ། །དེ་ཉིད་ལས་ཤིན་ཏུ་བསྐྱེད་པ་ནི་བསྲུང་བའིའོ། །དེ་ཉིད་
- 73a
ལས་རྩེ་མོ་གཉིས་སླར་བཀུག་པ་ནི་གནོད་སྦྱིན་གྱིའོ། །དམ་དུ་བཀུག་པ་ནི་བསྡམས་པའིའོ། །བསྡམས་པ་ཉིད་མདུན་དུ་བཞག་པ་ནི་བདུག་པའིའོ། །དེ་ཉིད་གྱེན་དུ་བསྟོད་པ་ནི་ཕྲེང་བའིའོ། །མདུན་དུ་མཐེ་བོ་གཉིས་བསྡམས་ཏེ། བསྐོར་བ་ནི་མར་ མེའིའོ། །དེ་ཉིད་བྱུག་པ་ལྟར་བྱས་པ་ནི་དྲིའིའོ། །དེ་ཉིད་ལས་མཛུབ་མོ་གཉིས་བཀུག་པ་ནི་ལྕགས་ཀྱུའིའོ། །དེ་ཉིད་ལས་རྩེ་མོ་གཉིས་སྤྲད་པ་ནི་ཞགས་པའིའོ། །དེ་ཉིད་ལས་གཅིག་ལ་གཅིག་མདུད་པ་ནི་ལྕགས་སྒྲོག་གིའོ། །དེ་ཉིད་ལས་བསྐྱོད་པ་ནི་མཉེས་པའིའོ། ། སྐུ་གཟུགས་ཀྱི་ཆོ་ག་ཡང་འདིར་དེ་བཞིན་དུ་བྱས་ཏེ། ཅུང་ཟད་དུ་ན་བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་བྲིའོ། །ཡང་ན་སྐུ་གཟུགས་ནི་དཀྱིལ་འཁོར་གྱི་ཚུལ་དུ་བྲིས་ལ་མེ་ཏོག་ལ་སོགས་པས་མཆོད་དེ། དེའི་སྤྱན་སྔར་འབུམ་ཙམ་ཞིག་སྔར་ བསྙེན་པ་བྱས་ནས་ལས་ཐམས་ཅད་བྱའོ། །དེ་ནས་ཚངས་པ་ལ་སོགས་པ་ལྷའི་ཚོགས་རྣམས་ཀྱིས་བཅོམ་ལྡན་འདས་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལས་ཀྱི་རྣམ་པར་སྨིན་པ་གང་གིས་ལྷའི་བུ་ནོར་བུ་དྲི་མ་མེད་པའི་འོད་ཅེས་བགྱི་བ་དེ་དམྱལ་བ་ལ་སོགས་ པའི་སྡུག་བསྔལ་གྱི་དབང་དུ་གྱུར། དེ་ནས་བཅོམ་ལྡན་འདས་ཕྱག་ན་རྡོ་རྗེས་བཅོམ་ལྡན་འདས་ཤཱཀྱ་ཐུབ་པའི་བྱིན་གྱིས་བརླབས་ཀྱིས་འདི་སྐད་ཅེས་བཀའ་སྩལ་ཏོ། །ལྷའི་དབང་པོ་ཉོན་ཅིག །འདི་ནི་སྔོན་གྱི་ལས་ཀྱི་སྒྲིབ་པ་ཡིན་ཏེ། འཛམ་བུའི་གླིང་གི་རིས་འདི་ཉིད་ན། མཐའ་འཁོབ་ པའི་རིགས་ངན་དུ་གཏོགས་པའི་རྒྱལ་པོ་ལུས་མི་བདེ་བ་ཞེས་བྱ་བ་ཞིག་ཏུ་གྱུར་ཏེ། དེས་མི་ཤེས་པའི་དབང་གིས་མི་དགེ་བའི་བཤེས་གཉེན་ལ་བརྟེན་པས་རྒྱལ་པོ་འདོད་པའི་ཕྱིར་རང་གི་ཕ་འཚོ་བ་དང་ཕྲལ་བར་གྱུར་པ་དང་། མ་དེའི་མྱ་ངན་གྱིས་གཟིར་བས་མ་ཡང་དུས་ལས་འདས་ སོ། །ལན་ཅིག་ཅི་ཞིག་གི་རྐྱེན་གྱིས་ནགས་ཚལ་སྟུག་པོ་གཞན་ཞིག་ཏུ་རྩེ་ཞིང་དགའ་བའི་ཕྱིར་ཉེ་བར་སོང་ངོ་། །དེ་ན་དྲང་སྲོང་དགོས་པ་མེད་པར་བྱམས་པ་ཞེས་བྱ་བ་ཞིག་གནས་ཏེ། དེ་མཐོང་བ་དང་རྒྱལ་པོ་ཤིན་ཏུ་ཡ་མཚན་སྐྱེས་ནས། ཀྱེ་མ་འདི་ལྟ་བུ་སེང་གེ་དང་། སྟག་
- 73b
དང་། རི་དགས་དང་། ཕག་རྒོད་དང་། བ་ལང་དང་། མ་ཧེ་ལ་སོགས་པ་དང་། སྦྲུལ་དང་། སྲེ་མོ་དང་། སྦྲང་བུ་དང་། སྦྲང་བུ་མཆུ་རིངས་དང་། སྦྲུལ་གདུག་པ་ཅན་རྣམས་ཀྱིས་གཙེ་བ། བཟའ་བ་དང་། བཏུང་བ་དང་། བགོ་བ་དང་། ལོངས་སྤྱོད་རྣམས་དང་ རྣམ་པར་བྲལ་བ། རླུང་དང་གྲང་བས་ཡོངས་སུ་གདུང་ཞིང་འཚེ་བ་དེ་ན་བདག་ཉིད་ཆེན་པོ་འདི་གནས་སོ་སྙམ་པར་སེམས་ཀྱིས་བརྟགས་ནས་དེའི་དྲུང་དུ་ཉེ་བར་སོང་སྟེ་ཕྱིན་པ་དང་། དེ་ལ་འདི་སྐད་ཅེས་སྨྲས་སོ། །དྲང་སྲོང་ཆེན་པོ་ཁྱོད་ཅིའི་ཕྱིར་ན་རླུང་དང་ཚ་བ་ལ་སོགས་པའི་སྡུག་ བསྔལ་གྱིས་བདག་ལ་གནོད་པར་བྱེད། དྲང་སྲོང་གིས་སྨྲས་པ། སྐྱེས་བུ་ཆེན་པོ་བསྐལ་པ་བརྒྱ་སྟོང་ཕྲག་དུ་མར་སྒྲིབ་པའི་སྡུག་བསྔལ་མྱོང་བར་འགྱུར་བ་ལས། སྡུག་བསྔལ་གྱི་ཁུར་བུ་ཅུང་ཟད་ཙམ་ཞིག་བླངས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་ རྫོགས་པར་འཚང་རྒྱ་བར་འགྱུར་བས་འདི་ནི་སྡུག་བསྔལ་མ་ཡིན་གྱི། སྐད་ཅིག་ཙམ་མམ། ཡུད་ཙམ་ཞིག་ཡུལ་གྱི་བདེ་བ་རྗེས་སུ་མྱོང་བས་བསྐལ་བ་བརྒྱ་སྟོང་ཕྲག་དུ་མ་མཐའ་ཐུག་པ་མེད་པར་དམྱལ་བ་ལ་སོགས་པའི་སྡུག་བསྔལ་རྗེས་སུ་མྱོང་བར་འགྱུར་རོ། །ཡུལ་གྱི་བདེ་བ་ འདོད་པའི་ཕྱིར་ཕ་མ་ལ་སོགས་པ་ཡང་གསོད་པར་འགྱུར་ན་སྲོག་ཆགས་གཞན་ལྟ་ཅི་སྨོས་ཏེ། སངས་རྒྱས་དང་། ཆོས་དང་། དགེ་འདུན་ཡོངས་སུ་མི་ཤེས་པའི་ཕྱིར་སྡིག་པ་ཐམས་ཅད་བྱེད་པར་འགྱུར་རོ། །དྲང་སྲོང་གིས་སྨྲས་པའི་ཚིག་དེ་སྐད་ཅེས་ཐོས་པ་དང་ཤིན་ཏུ་ འཇིགས་སྐྲག་སྐྱོ་སྟེ། སྡུག་བསྔལ་ཐམས་ཅད་ཀྱིས་གཟིར་ནས་འདི་སྐད་ཅེས་སྨྲས་སོ། །སངས་རྒྱས་དང་། ཆོས་དང་། དགེ་འདུན་ཞེས་བྱ་བ་དེ་ཅི་ཞིག །དེའི་རང་བཞིན་ཇི་ལྟ་བུ་ཡིན་པ་དཀའ་ཐུབ་ཆེན་པོ་སྨྲོས་ཤིག་དང་། དེ་ལ་ཁོ་བོ་ཡང་སྐྱབས་སུ་མཆིའོ། །ཕ་མ་ ལ་གཙེས་པ་དང་། སྲོག་ཆགས་རྣམས་ཀྱི་སྲོག་བཅད་ན་སྡིག་པ་ཇི་ལྟ་བུ་ཞིག་ཐོབ་པར་འགྱུར། སངས་རྒྱས་དང་། ཆོས་དང་། དགེ་འདུན་ཡོངས་སུ་ཤེས་ན་བསོད་ནམས་ཅི་འདྲ་བ་ཞིག་ཡོངས་སུ་འཐོབ། ཕ་མ་མ་བསད་པ་དང་། སྲོག་ཆགས་རྣམས་ཀྱང་མ་བསད་ན་བསོད་
- 74a
ནམས་ཅི་འདྲ་བ་ཅིག་འཐོབ། འབྲས་བུ་ཇི་ལྟ་བུ་ཞིག་འཐོབ། འདོད་པའི་ལོངས་སྤྱོད་སྤངས་ན་བསོད་ནམས་དང་འབྲས་བུ་ཅི་འདྲ་བ་ཞིག་འཐོབ། དེ་ནས་དྲང་སྲོང་དེས་དེ་ལ་འདི་སྐད་ཅེས་སྨྲས་སོ། །ཅི་སྟེ་སེམས་ཅན་ཆེན་པོ་ཁྱོད། །ང་ཡི་ཚིག་འདི་ཉན་འདོད་ན། ། ཐལ་མོ་སྦྱར་ཏེ་ཕྱག་འཚོལ་ལ། །གུས་པར་ཉོན་དང་བཤད་པར་བྱའོ། །དེ་བཞིན་བགྱི་ཞེས་བསྒྲུབས་ནས་ནི། ཅི་བདོག་པས་ནི་མཆོད་བྱས་ཏེ། །སངས་རྒྱས་སྤྱོད་ཡུལ་སངས་རྒྱས་ཀྱི། །ཟབ་མོའི་ཆོས་ནི་ཉན་པར་གྱུར། །སངས་རྒྱས་ཆོས་དང་ཚོགས་དག་པ། །ཐོས་ནས་ཀྱང་ ནི་སྐྱབས་སུ་སོང་། །སངས་རྒྱས་རྣམས་ཀྱི་སྒྲིབ་མེད་ཆོས། །རྒྱལ་པོས་ཐོས་ནས་དགའ་བར་གྱུར། །ཡི་དགས་བྱོལ་སོང་དམྱལ་བ་རྣམས། །སྡིག་པ་ཀུན་གྱི་འབྲས་བུ་སྟེ། །ཡུལ་སྤྱོད་པ་དང་སྲོག་ཆགས་རྣམས། །གསོད་ཅིང་ཤིན་ཏུ་མི་བཟད་པ། །ཕ་མ་གཙེས་ པའི་རྒྱུ་ལས་བྱུང་། །བསྐལ་པ་དུ་མར་རབ་སྡུག་བསྔལ། །དམྱལ་བའི་སྡུག་བསྔལ་མི་བཟད་པ། །མགོན་མེད་སྐྱབས་ཀྱང་མེད་པ་སྟེ། །ཐོས་ནས་མྱ་ངན་ཟུག་རྔུ་ཡིས། །རང་གི་ཡིད་ལ་གདུངས་པ་ན། ཇི་ལྟར་རླུང་གིས་མར་མེ་བཞིན། །དེ་ཉིད་དུ་ནི་དུས་ལས་འདས། །ལས་ ཀྱི་རྣམ་སྨིན་དེ་ཡིས་ནི། །དགའ་དང་ལྡན་པའི་ལྷར་སྐྱེས་ནས། །བརྒྱ་བྱིན་ལྷ་ཡི་དབང་པོ་ཡི། །བློན་པོ་གཟུགས་དང་ལྡན་པ་ལ། །ལྷ་རྣམས་ཀུན་དང་ཡིད་མཐུན་ཞིང་། །རབ་དགའ་བདེ་དང་ལྡན་པར་སྐྱེས། །བདེ་བའི་མཆོག་ནི་མྱོང་གྱུར་ནས། །ངན་སོང་དུ་ཡང་ལྟུང་བར་གྱུར། ། དེ་ནས་ད་ལྟར་ལྷ་དབང་པོ། །ཁྱོད་ཀྱི་མཐུས་ཀྱང་དེ་ཉིད་ནི། །དགའ་ལྡན་གནས་ནི་དགའ་བའི་མཆོག །བདེ་མང་ཀུན་གྱི་གནས་སུ་སྐྱེས། །ལྷ་ཡི་དབང་པོ་ཉོན་ཅིག་དང་། །གང་གི་ཚེ་སྔོན་བྱུང་བ་དེའི་དུས་ན་བྱུང་བའི་དྲང་སྲོང་དུ་གྱུར་པ་དེ་ནི་གཞན་ཡིན་པར་ཁྱེད་ཀྱིས་ཤེས་པར་མི་བྱའོ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ཉིད་དོ། །དེའི་ཕར་གྱུར་པ་གང་ཡིན་པ་དེ་ནི་གཞན་ཡིན་པར་ཁྱོད་ཀྱིས་བལྟ་བར་མི་བྱ་སྟེ། ལྷའི་དབང་པོ་དེའི་ཚེ་དེའི་དུས་ན་ཁྱོད་དེའི་ཕར་གྱུར་ཏོ། །མ་གང་ཡིན་པ་དེ་
- 74b
ནི་གཞན་ཡིན་པར་མི་བལྟ་སྟེ། དེའི་ཚེ་དེའི་དུས་ན་ཤ་ཙི་ཀ་ཉིད་ཡིན་ནོ། །འཁོར་གྱི་དཀྱིལ་འཁོར་གང་ཡིན་པ་དེ་ནི་གཞན་ཡིན་པར་མི་བལྟའི། ལྷའི་འཁོར་འདི་དག་ཉིད་ཡིན་ནོ། །དེ་ནས་བརྒྱ་བྱིན་དང་། ཚངས་པ་ལ་སོགས་པ་ལྷའི་བུ་རྣམས་ཡིད་རབ་ཏུ་མགུ་ཞིང་རངས་ ཏེ། བ་སྤུའི་བུ་ག་ནས་སྤུ་རྣམས་ལངས་ཤིང་རྒྱལ་བ་རྒྱལ་བ་ཞེས་སྐད་ཆེན་པོར་བོས་ནས་བཅོམ་ལྡན་འདས་ཕྱག་ན་རྡོ་རྗེ་ལ་མིང་བཅུ་པ་འདིས་མངོན་པར་བསྟོད་དེ་གསོལ་བ་བཏབ་བོ། །ཀོ་ཊ་ཀོ་ཊ་ཀྵ། ཀོ་ཊ་བ། ཀོ་ཊ་ཀོ་ཊ། ཀོ་ཊ་བཤྩ། ཀོ་ཊི་ཀ །ཀོ་ལ་ཀྵ། ཀོ་ལ་བ། ཀོ་ ལ་ཀོ་ལ་བཤྩ། ཀོ་ལ་སྟ་ཐཱ་ཨི་ཏི་ཞེས་བྱས་ནས། བརྒྱ་བྱིན་ལ་སོགས་ལྷ་མཆོག་རྣམས། །སེམས་ཅན་ཀུན་ལ་ཕན་པ་དང་། །ཚེ་དང་ནད་མེད་སྤེལ་བའི་ཕྱིར། །མགོན་པོ་ཁྱོད་ལ་གསོལ་བ་འདེབས། །བཅོམ་ལྡན་འདས་ཚེ་ཐུང་བ་དང་། །སྐལ་བ་ཆུང་བ་རྣམས་ཀྱི་དོན་ དང་། །ཕན་པ་དང་བདེ་བ་དང་། ཚེ་བསྲིང་བའི་སླད་དུ་བཤད་དུ་གསོལ། གསང་བའི་བདག་པོ་བཤད་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་བརྒྱ་བྱིན་དང་། ཚངས་པ་ལ་སོགས་པའི་ལྷའི་འཁོར་མང་པོ་དེ་དག་ལ་གཟིགས་ནས་ལེགས་སོ་ཞེས་བྱ་བས་མགུ་བར་བྱས་ ཏེ། ཚངས་པ་ལ་སོགས་པའི་ལྷའི་བུ་རྣམས་གང་ཁྱེད་ཀྱིས་འདི་ལྟ་བུའི་སྤོབས་པ་ཡང་དག་པ་ཡང་དག་པར་བསྐྱེད་པ་དེ་ནི་ལེགས་སོ་ལེགས་སོ། །ལེགས་པར་སྒྲུབས་ཤིག་དང་བཤད་པར་བྱའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སེམས་ཅན་ཐམས་ཅད་ཀྱི་ཚེ་དཔག་ཏུ་ མེད་པས་ཁྱབ་པར་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཚེ་དང་། བསོད་ནམས་དང་། ཡེ་ཤེས་ཀྱི་ཚོགས་དཔག་ཏུ་མེད་པར་འཕེལ་བ་ཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་པུ་ཎྱེ་པུ་ཎྱེ་མ་ཧཱ་པུ་ཎྱེ། ཨ་པ་རི་མི་ཏ་ཨཱ་ཡུར་པུ་ཎྱེ་ཛྙཱ་ན་སྃ་བྷ་རོ་པ་ཙི་ཏེ་ཀ་རི་ཎེ་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུངས་འདི་བཤད་མ་ཐག་ཏུ་ངན་སོང་ཐམས་ཅད་རབ་ཏུ་ཞི་སྟེ། སེམས་ཅན་དམྱལ་བ་དང་། བྱོལ་སོང་དང་། ཡི་དགས་རྣམས་སུ་སྐྱེས་པའི་སེམས་ཅན་ཐམས་ཅད་གྲོལ་
- 75a
བར་བདག་ཉིད་ཀྱིས་ཡང་དག་པར་ཤེས་སོ། །འཇིག་རྟེན་གྱི་ཁམས་ཐམས་ཅད་རབ་ཏུ་སྣང་བར་བྱས་ཏེ། སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་རྣམ་པ་བཅུ་གཉིས་ཀྱི་ཚུལ་དུ་བྱས་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་དེ་ཉིད་དུ་ ཞུགས་པར་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་ཚེ་དཔག་ཏུ་མེད་པའི་རྡོ་རྗེ་འོད་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཚེ་དཔག་ཏུ་མེད་པ་ཞེས་བྱ་བའི་སྙིང་པོའི་གཟུངས་འདི་བཤད་དོ། །ཨོྃ་ཨ་མི་ཏེ། ཨ་མི་ཏ་ཨུད་ བྷ་བེ། ཨ་མི་ཏ་ས་བྷ་བེ། ཨ་མི་ཏ་བི་ཀྲཱནྟེ། ཨ་མི་ཏ་བི་ཀྲཱནྟ། གཱ་མི་ནི། སརྦ་ཀརྨ་ཀླེ་ཤ་ཀྵ་ཡཾ་ཀ་རེ་སྭཱ་ཧཱ། དེ་ནས་འདི་བཤད་མ་ཐག་ཏུ་དེ་བཞིན་དུ་སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞིའོ། །དེ་ནས་ཡང་བཅོམ་ལྡན་འདས་ཀྱིས་གདོན་མི་ཟ་བར་སྒྲིབ་པ་རྣམ་ པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྒྲིབ་པ་གཅོད་པ་ཞེས་བྱ་བའི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། །ཏྲཱ་ས་ནི་ཏྲཱ་ས་ནི། པྲ་ཏི་ཧ་ ན་པྲ་ཏི་ཧ་ན། སརྦ་ཀརྨ་པ་རཾ་པ་རཱ་ཎི་མེ་སརྦ་ས་ཏྭ་ནཉྩ་སྭ་ཧཱ། འདི་བཤད་མ་ཐག་ཏུ་ཡང་ཐམས་ཅད་དེ་བཞིན་དུ་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་སྒྲིབ་པ་ཐམས་ཅད་དྲི་མ་མེད་ཅིང་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་ གཤེགས་པ་ཐམས་ཅད་ཀྱི་སྒྲིབ་པ་རྣམས་མ་ལུས་པར་འཇོམས་པ་ཞེས་བྱ་བའི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་རཏྣེ་རཏྣེ། མ་ཧཱ་རཏྣེ། རཏྣ་སྃ་བྷ་བེ། རཏྣ་ཀི་ར་ཎེ། རཏྣ་མཱ་ལེ། བི་ཤུད་དྷེ། ཤོ་དྷ་ཡ། སརྦ་པཱ་པཾ་ཧཱུྃ་ཏྲཱ་ཊ། དེ་ནས་འདི་བཤད་མ་ཐག་ཏུ་ བདུད་ཀྱི་གནས་ཐམས་ཅད་བཅོམ། རྣམ་པར་བཅོམ་པར་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་གདོན་མི་ཟ་བར་མི་ཆོམས་པའི་སྒྲིབ་པ་ཐམས་ཅད་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུངས་
- 75b
འདི་རང་གི་ཐུགས་ཀ་ནས་ཕྱུང་ངོ་། །ཨོྃ་ཨ་མོ་གྷ་ཨ་པྲ་ཏི་ཧ་ཏ། སརྦ་ཨཱ་བ་ར་ཎ། བི་ནཱ་ཤ་ནི། ཧ་ར་ཧ་ར་ཧཱུྃ་ཕཊ། གསང་སྔགས་འདི་བཤད་མ་ཐག་ཏུ་འཇིག་རྟེན་གྱི་ཁམས་ཐམས་ཅད་གཡོས། རབ་ཏུ་གཡོས། ཡང་དག་པར་རབ་ཏུ་གཡོས། །བསྐྱོད། རབ་ ཏུ་བསྐྱོད། ཡང་དག་པར་རབ་ཏུ་བསྐྱོད་དོ། །བསྐུལ། རབ་ཏུ་བསྐུལ། ཡང་དག་པར་རབ་ཏུ་བསྐུལ་ནས་རྨད་ཀྱི་ཡ་མཚན་དུ་མ་འཇིག་རྟེན་དུ་སྣང་བར་གྱུར་ཏོ། །དེ་ནས་དཀྱིལ་འཁོར་ནི་འདི་ཡིན་ཏེ། །གྲུ་བཞི་པ་ལ་སྒོ་བཞི་པ། །སྒོ་བ་རྣམས་དང་ལྡན་པ་སྟེ། །རྟ་ བབས་བཞི་དང་ལྡན་པར་བྱ། །ལྟེ་བ་དང་ནི་སྒོ་ཁྱུད་ལྡན། །དེ་ཡི་དབུས་སུ་འཁོར་ལོ་ཡི། །དཀྱིལ་འཁོར་དམ་པ་བྲི་བྱ་སྟེ། །རྩིབས་བཞི་དག་དང་ལྡན་པ་ལ། །ལྟེ་བའི་དཀྱིལ་འཁོར་ལྡན་པར་བྱ། དེ་ཡི་དབུས་སུ་གཙོ་བོ་ནི། །ཕྱག་ན་རྡོ་རྗེ་སྟོབས་ཆེན་པོ། །ཕྱག་ ན་རྡོ་རྗེ་དྲིལ་བསྣམས་ཤིང་། ཟླ་བ་རྒྱས་པའི་ཞལ་འཛུམ་བྲི། །ཤར་གྱི་རྩིབས་ཀྱི་སྟེང་དུ་ནི། །མགོན་པོ་མི་བསྐྱོད་བྲི་བར་བྱ། ལྷོ་ཡི་ཕྱོགས་སུ་རིན་ཆེན་བྲི། །ནུབ་ཕྱོགས་ཆུ་སྐྱེས་པདྨ་ལ། །བྱང་ཕྱོགས་སུ་ནི་གདོན་མི་ཟ། །དཔའ་བོ་སྟོབས་ཆེན་བྲི་བར་བྱ། །དེ་བཞིན་ གཤེགས་པ་ཐམས་ཅད་ནི། །འཁོར་ལོས་སྒྱུར་བ་ཆས་པ་དང་། །ཟླ་བའི་དཀྱིལ་འཁོར་མདོག་འདྲ་ཞིང་། །རྒྱན་རྣམས་ཀུན་གྱིས་བརྒྱན་པ་དང་། །ཕྱག་ནི་མཆོག་སྦྱིན་མི་འཇིགས་པ། །རྡོ་རྗེ་སྐྱིལ་མོ་ཀྲུང་བཞུགས་བྲི། །གྲྭ་ཡི་ཕྱོགས་ནི་ཐམས་ཅད་དུ། །དེ་བཞིན་བདུག་ སོགས་ཐམས་ཅད་བྲི། །སྒོ་བ་དག་ཀྱང་ཁྲོས་པ་ལ། །ཁྲོ་བའི་དབང་དུ་གྱུར་པ་བྲི། །དེ་ནས་རྣལ་འབྱོར་ཅན་ཉིད་ཞུགས། །སྔགས་ཀྱི་ལྷ་རྣམས་སྤྱན་དྲངས་ཏེ། ཛཿཧཱུྃ་བཾ་ཧོཿ། ཨོྃ་བྷ་ག་བཱན་ཨེ་ཧྱེ་ཧི་ས་མ་ཡ་སྟྭྃ། དེ་ནས་གཙོ་བོ་བྱོན་པ་དང་། །མདོར་ན་མཆོད་པ་བྱས་ནས་ཀྱང་། ། འཆི་བདག་སྦྲུལ་གྱིས་འཇིགས་ལྡན་རྣམས། །འཆི་བདག་གཞོམ་ཕྱིར་གཞུག་པར་བྱ། །ཨོྃ་བཛྲ་ས་མ་ཡ་ཧཱུྃ། རྡོ་རྗེ་ཏི་རིན་ཏི་རི་བཅིངས་ལ། །ལག་ན་རིན་ཆེན་ཐོགས་ཏེ་གཞུག །ཡང་ན་མེ་ཏོག་ཕྲེང་བ་སྟེ། །དེ་ནི་དཀྱིལ་འཁོར་ཉིད་དུ་དོར། །ཨོྃ་པྲ་ཏཱིཙྪ་བཛྲ་ཧཱུྃ། དེ་ནས་
- 76a
མནའི་དམ་ཚིག་སྦྱིན་པར་བྱ་སྟེ། ཨོྃ་བཛྲ་ས་མ་ས་ཧཱུྃ། དེ་ནས་འདིས་གདོང་གཡོགས་དགྲོལ་བར་བྱ་སྟེ། ཨོྃ་བཛྲ་ཧཱ་སྱ་ཨུད་གྷྱ་ཊ་ཡ་ཧཱུྃ། དེ་ནས་འདི་བསྟན་པར་བྱ་སྟེ། ཨོྃ་བཛྲ་པ་ཤྱ་ཧོ། །དེ་ནས་འདིས་དབང་བསྐུར་བར་བྱའོ། །ཨོྃ་བཛྲ་ཨ་བྷི་ཥིཉྩ་ཨོྃཧཱུྃ། ཨོྃ་ བུད་དྷ་ཨ་བྷི་ཥིཉྩ་ཨོྃ། ཨོྃ་རཏྣ་བྷི་ཥིཉྩ་ཏྲཱྃ། ཨོྃ་པདྨ་ཨ་བྷི་ཥིཉྩ་ཧྲཱིཿ། ཨོྃ་ཀརྨ་ཨ་བྷི་ཥིཉྩ་ཨཿ། དེ་ནས་བུམ་པའི་དབང་བསྐུར་བར་བྱའོ། །ཨོྃ་བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ། ཨོྃ་བུད་དྷ་ཀ་ལ་ཤ་ཨ་བྷི་ཥིནྩ་ཨོྃ། ཨོྃ་རཏྣ་ཀ་ལ་ཤ་ཨ་བྷི་ཥིཉྩ་ཏྲཱཾ། ཨོྃ་པདྨ་ཀ་ལ་ཤ་ཡ་ཨ་བྷི་ཥིཉྩ་ ཧྲཱིཿ། ཨོྃ་ཀརྨ་ཀ་ལ་ཤ་ཨ་བྷི་ཥིཉྩ་ཨཿ། དེ་ནས་ཕྲེང་བའི་དབང་བསྐུར་བར་བྱའོ། །ཨོྃ་རཏྣ་མཱ་ལ་ཨ་བྷི་ཥིཉྩ་ཏྲཱྃ་ཏྲཱྃ་ཏྲཱྃ་ཏྲཱྃ་ཏྲཱྃ། ཨོྃ་བཛྲ་པཊྚ་ཨ་བ་ལཾ་བ་ན་ཨ་བྷི་ཥིཉྩ་ཏྲཱྃ། ཨོྃ་བུད་དྷ་མུ་དྲཱ་ཨ་བྷི་ཥིཉྩ་ཨོྃ། ཨོྃ་བཛྲ་མུ་དྲཱ་ཨ་བྷི་ཥིཉྩ་ཧཱུྃ། ཨོྃ་རཏྣ་མུ་དྲཱ་ཨ་བྷི་ཥིཉྩ་ཏྲཱྃ། ཨོྃ་པདྨ་མུ་དྲཱ་ཨ་བྷི་ ཥིཉྩ་ཧྲཱིཿ། ཨོྃ་ཀརྨ་མུ་དྲཱ་ཨ་བྷི་ཥིཉྩ་ཨཿ། ཨོྃ་བཛྲ་ནཱ་མ་ཨ་བྷི་ཥིཉྩ་ཧཱུྃ་ཨོྃ་ཏྲཱྃ་ཧྲཱིཿཨཿ། ཨོྃ་བཛྲ་ཀརྨ་ཨ་བྷི་ཥིཉྩ་ཧཱུྃ་ཨཿ། ཨོྃ་བཛྲ་ཙཀྲ་ཨ་བྷི་ཥིཉྩ་ཧཱུྃ་བྷུྃ། ཨོྃ་བཛྲ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུྃ་ཧཱུྃ་ཧཱུྃ་ཨོྃ་ཨོྃ་ཨོྃ། ཏྲཱྃ་ཏྲཱྃ་ཏྲཱྃ། ཧྲཱིཿཧྲཱིཿཧྲཱིཿ། ཨཿཨཿཨཿ། ཨོྃ་བཛྲ་དྷཱ་ར་ཎི་ཨ་བྷི་ཥིཉྩ་ཧཱུྃ། ཨོྃ་ཏ་ཐཱ་ག་ཏ་དྷཱ་ར་ཎི་ཨ་བྷི་ཥིཉྩ་ཨོྃ། ཨོྃ་རཏྣ་དྷཱ་ར་ཎི་ཨ་བྷི་ཥིཉྩ་ཏྲཱཾ། ཨོྃ་པདྨ་དྷཱ་ར་ཎི་ཨ་བྷི་ཥིཉྩ་ཧྲཱི། ཨོྃ་ཀརྨ་དྷཱ་ར་ཎི་ཨ་བྷི་ཥིཉྩ་ཨཿ། ཨོྃ་ཏ་ཐཱ་ག་ཏ་གུ་ཧྱ་ཨ་བྷི་ཥིཉྩ་ཨོྃ། ཨོྃ་བཛྲ་གུ་ཧྱ་ཨ་བྷི་ཥིཉྩ་ཧཱུྃ། ཨོྃ་རཏྣ་གུ་ཧྱ་ཨ་བྷི་ཥིཉྩ་ཏྲཱྃ། ཨོྃ་པདྨ་གུ་ཧྱ་ཨ་བྷི་ཥིཉྩ་ཧྲཱིཿ། ཨོྃ་ཀརྨ་གུ་ཧྱ་ཨ་བྷི་ཥིཉྩ་ ཨཿ། ཨོྃ་པྲཛྙོ་པཱ་ཡ་ས་མ་ཡོ་ག་ཨ་བྷི་ཥིཉྩ་ཧཱུྃ་ཨཱཿ། དེ་ལྟར་དབང་བསྐུར་ནས་ཚེ་བསྲིང་བའི་རིག་པ་འདི་སྦྱིན་པར་བྱའོ། །ཨོྃ་བྷྲུྃ་བཛྲ་ཨཱ་ཡུ་ཥེ་ཧཱུྃ་ཨཱཿ། དེའི་སྒྲུབ་པ་ནི་འདི་ཡིན་ཏེ། བཅོམ་ལྡན་འདས་རྡོ་རྗེའི་ཚེ་ཟླ་བའི་འོད་ཅན་ཟླ་བའི་དཀྱིལ་འཁོར་ལ་བཞུགས་ཤིང་རྒྱན་ཐམས་ ཅད་ཀྱིས་བརྒྱན་པ། ཕྱག་གཉིས་མི་འཇིགས་པ་དང་མཆོག་སྦྱིན་དུ་མཛད་པ་ལས་བདུད་རྩི་འཛག་པ་བྲིའོ། །དེའི་འོག་ཏུ་སྒྲུབ་པ་པོའི་ལག་པ་ཐལ་མོ་བརྐྱང་ལ། གདོང་གྱེན་དུ་བཅོམ་ལྡན་འདས་ལ་ལྟ་བར་བྲིས་ལ་མཆོད་པ་རྣམ་པ་ལྔས་མཆོད་དེ། དེའི་སྤྱན་སྔར་འབུམ་
- 76b
བཟླས་པར་བྱའོ། །དེ་ནས་ཟླ་བ་ཉ་བ་དང་མཆོད་པ་ཆེན་པོ་བྱས་ཏེ་བ་དམར་སེར་གྱི་མར་སྣོད་སར་པར་བཅུག་ལ་རྡོ་རྗེ་གཡོན་པས་མནན་ཏེ། བཅོམ་ལྡན་འདས་རབ་ཏུ་སེམས་ཤིང་མཚན་ཐོག་ཐག་ཏུ་བཟླས་པར་བྱའོ། །དེ་ནས་དྲི་མ་མནམ་ཞིང་སྔོན་མ་བྱུང་བའི་དྲིའི་ངད་ལྡང་ལ་ རླངས་པའམ། དུ་བའམ། མེ་བྱུང་ངམ། འོད་ཟེར་རམ། མེ་སྒྲོན་ནམ། འོད་བྱུང་ངམ། དེ་ལ་སོགས་པའི་མཚན་མ་བྱུང་ན་མར་དེའམ། མར་སར་རམ། ཏིལ་མར་རམ། ཆུའམ། འོ་མའམ། ཞོའམ། ཆང་ངམ། ཁྲག་གམ། ཞག་གམ། ཀླད་པའམ། ཤའམ། གང་ཡང་རུང་བ་ལ་རབ་ཏུ་བསྒྲུབས་ཏེ། །ནང་བར་སྔར་བསྲུང་བ་ལ་སོགས་པ་བྱས་ནས་བདག་ཉིད་སྦྱངས་ཏེ་འཐུངས་སམ་ཟོས་ན་མཚན་མ་ཇི་ལྟ་བ་བཞིན་དུ་བྱུང་ན་ནི་ནམ་ཟླ་བ་དང་ཉི་མ་ཡོད་ཀྱི་བར་དུ་ཚེ་རིང་ཞིང་རྡོ་རྗེ་དང་མཚུངས་པར་འགྱུར་ཏེ། ཐ་མས་ནི་ཐ་མ་འགྲུབ་ པས་འདི་ལ་ཐེ་ཚོམ་ནི་མེད་དོ། །མཚན་མ་མ་བྱུང་ན་ཡང་འཇིག་རྟེན་ན་ནད་མེད། ལྡོབ་སྐྱེན། ལུས་ལ་སྐྲ་དཀར་དང་གཉེར་མ་མེད་པར་འགྱུར་རོ། །ལུས་བརྟན་ཞིང་ཚེ་ལོ་བརྒྱ་ཐུབ་པར་འགྱུར་རོ། །གཞན་ཡང་བཟླས་པ་བྱས་པ་ཙམ་གྱིས་ཞི་བ་དང་། རྒྱས་པ་དང་། དབང་ལ་སོགས་པའི་ ལས་རྣམས་བརྟག་མི་དགོས་པར་འགྱུར་ཏེ་ཐེ་ཚོམ་མེད་དོ། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་སེམས་ཅན་ཐམས་ཅད་ཀྱི་དོན་དང་། ཕན་པ་དང་བདེ་བའི་ སླད་དུ་རང་རང་གི་སྙིང་པོ་བཤད་པར་འཚལ་གྱིས། བཅོམ་ལྡན་འདས་ཀྱིས་བཀའ་སྩལ་དུ་གསོལ། རྡོ་རྗེ་འཛིན་པ་བཀའ་སྩལ་དུ་གསོལ། རྒྱལ་པོ་ཆེན་པོ་རྣམས་ལེགས་ཀྱིས་ཤོད་ཅིག་དང་། ངས་ཀྱང་རྗེས་སུ་ཡི་རང་ཞིང་བྱིན་གྱིས་བརླབ་པར་བྱའོ། །དེ་ནས་གནོད་སྦྱིན་གྱི་ རྒྱལ་པོ་རྣམ་ཐོས་ཀྱི་བུས་བཅོམ་ལྡན་འདས་ཀྱིས་གནང་ཞིང་རྗེས་སུ་ཡི་རངས་ཏེ། བྱིན་གྱིས་བརླབས་པས་རང་གི་སྙིང་པོ་འདི་བཤད་དོ། །ཨོྃ་བཻ། དེ་ནས་དྲི་ཟའི་རྒྱལ་པོ་ཡུལ་འཁོར་སྲུང་གིས་ཀྱང་རང་གི་སྙིང་པོ་འདི་བཤད་དོ། །ཨོྃ་ཌྷྲྀ། དེ་ནས་གྲུལ་བུམ་གྱི་རྒྱལ་པོ་འཕགས་
- 77a
སྐྱེས་པོས་ཀྱང་རང་གི་སྙིང་པོ་འདི་བཤད་དོ། །ཨོྃ་བི། དེ་ནས་ཀླུའི་རྒྱལ་པོ་མིག་མི་བཟང་གིས་ཀྱང་རང་གི་སྙིང་པོ་འདི་བཤད་དོ། །ཨོྃ་ཀྵ། དེ་ནས་དེ་དག་གི་དཀྱིལ་འཁོར་བཤད་དེ། གྲུ་བཞི་པ་ལ་སྒོ་བཞི་པ། །དཀྱིལ་འཁོར་ལྔས་ནི་བརྒྱན་པ་སྟེ། ། དེ་ཡི་དབུས་སུ་གཙོ་བོ་ནི། །ཕྱག་ན་རྡོ་རྗེ་འགྱིང་བཅས་བྲི། །དེ་ཡི་གཡོན་གྱི་ཕྱོགས་སུ་ནི། །རྣམ་ཐོས་བུ་དགེའི་ལག་པ་ན། །བེ་ཅོན་ནེའུ་ལེ་ཐོགས་པ་དང་། །རིན་ཆེན་རྒྱན་གྱིས་བརྒྱན་པ་དང་། །སྦོམ་ཞིང་སེང་གེའི་གདན་ལ་བཞུགས། །གསེར་མདོག་གཟི་ཅན་ ལྡན་པར་བྲི། །མཁས་པས་བུམ་པ་བཟང་ལ་སོགས། །རིན་ཆེན་ཆུ་བོ་འབབ་པར་བྲི། །མདུན་དུ་ཡུལ་འཁོར་སྲུང་ཉིད་ནི། །པི་བང་ལེན་པ་བརྩོན་པ་དང་། །མཛེས་ཤིང་ཁ་དོག་ལྗང་ཁུ་སྟེ། །རྒྱན་རྣམས་ཀུན་གྱིས་བརྒྱན་པ་བྲི། །གཡས་ཕྱོགས་དཔའ་བོ་ལུས་འཕགས་པོ། ། རལ་གྲི་ལག་ན་ཐོགས་པ་བྲི། །ནུབ་ཕྱོགས་སུ་ནི་མིག་མི་བཟང་། །རྡོ་རྗེ་ཞགས་པ་འཛིན་པའི་མཆོག །སྦྲུལ་མགོ་བདུན་གྱིས་བསྐོར་བ་ལ། །མིག་ཀྱང་དམར་ཞིང་ཤིན་ཏུ་འབར། །སྒོ་ཡི་ཕྱོགས་ནི་ཐམས་ཅད་དུ། །སྒོ་བ་རྣམས་ཀྱང་དེ་བཞིན་ནོ། །དེ་ནས། རྡོ་རྗེའི་ཕྱག་རྒྱ་ ཞེས་བྱ་བས། །སྔགས་མཁན་བདག་ཉིད་ཞུགས་ནས་ཀྱང་། །བཅོམ་ལྡན་འདས་ནི་སྤྱན་དྲངས་ཏེ། །དེ་ནས་རྒྱལ་པོ་སྤྱན་དྲང་ངོ་། །སྤྱན་དྲངས་ནས་ནི་མཁས་པས་མཆོད། །ཆོ་ག་བཞིན་དུ་ཨརྒྷ་དབུལ། །དེ་ནས་སྔགས་མཁན་སྔགས་འདི་དང་། །རྡོ་རྗེ་འཛིན་པའི་ཕྱག་རྒྱ་ འདིས། །སློབ་མ་རྒྱལ་རིགས་རྗེའུ་རིགས་དང་། །བྲམ་ཟེ་ལ་སོགས་དེ་བཞིན་ཏེ། །མེ་ཏོག་རིན་ཆེན་ཐོགས་ཏེ་ཞུགས། །ཨོྃ་བཛྲ་ས་མ་ཡ་ཧཱུྃ། དེ་ནས་མེ་ཏོག་གམ་རིན་པོ་ཆེ་འདིས་དོར་བར་བྱའོ། །ཨོྃ་བཛྲ་པྲ་ཏཱི་ཙྪ་ཏྭཾ་མ་ཧོཏྟ་མ། གང་ལ་བབ་པའི་རྒྱལ་པོ་ནི། །དེ་ནི་འདིས་ འགྲུབ་གཞན་དུ་མེད། །དེ་ནས་གྲྭ་ན་བཞག་པ་ཡི། །བུམ་པ་བཞིས་ནི་དབང་བསྐུར་ཏེ། །དང་པོ་ཕྱག་ན་རྡོ་རྗེ་ཡིས། །ཕྱག་རྒྱས་དབང་ནི་བསྐུར་བར་བྱ། །དེ་ལ་སོགས་པ་གོ་རིམས་ཀྱིས། །དཀྱིལ་འཁོར་ཉིད་དུ་དབང་བསྐུར་ན། །རྒྱལ་པོ་མ་ཡིན་རྒྱལ་པོར་འགྱུར། །རྒྱལ་པོ་
- 77b
ཡིན་ནི་ཆེ་བར་འགྱུར། །འཛམ་བུའི་གླིང་དབང་དཔལ་དང་ལྡན། །གླིང་བཞི་བ་ལ་དབང་བའི་མཆོག །ལན་བཞིར་དབང་ནི་བསྐུར་བ་དང་། །ལན་བཞིར་གཞུག་པར་བྱས་ན་ནི། །དེ་ལ་རྡོ་རྗེ་འཛིན་རྒྱལ་བདག །བུ་སྡུག་བཞིན་དུ་བསྐྱང་བར་བྱ། །བདག་ཅག་རྒྱལ་པོ་ ཆེན་པོ་བཞིས། །བྲན་དང་གཡོག་ཏུ་བཅས་པ་དང་། །ཕོ་བྲང་འཁོར་དུ་བཅས་པ་ཡི། །རྒྱལ་པོ་རྟག་ཏུ་བསྐྱང་བར་བགྱི། །དེ་གནོད་གཞན་གྱི་ཕྲུ་མ་དང་། །དེ་ཡི་ནད་དང་འཆི་བདག་གི། །འཇིགས་དང་མུ་གེ་ལ་སོགས་པའི། །གནོད་པ་རྣམས་ནི་གཞོམ་པར་བགྱི། ། རྣམ་ཐོས་བུས་ནི་རྒྱས་པར་བགྱི། །ཡུལ་འཁོར་སྲུང་གིས་ཞི་བར་བགྱི། །ཕྱུགས་དང་གཉེན་བཅས་དུས་མིན་པའི། །འཆི་བདག་ལུས་འཕགས་པོ་ཡིས་འཇོམས། །མིག་མི་བཟང་གིས་བཀྲ་ཤིས་ཤིང་། །མུ་གེ་ལ་སོགས་རྣམ་པར་འཇོམས། །མདོར་ན་བདག་གིས་དེ་ ཡི་ནི། །རེ་དང་བསམ་པ་ཀུན་བགྱི་སྟེ། །ཇི་སྟེ་ངེས་པ་མ་ལགས་ན། །ཕྱག་ན་རྡོ་རྗེ་ལ་འཁུས་འགྱུར། །དེ་ནས་ཕྱོགས་སྐྱོང་བ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་ཀྱང་སེམས་ཅན་ཐམས་ཅད་ ལ་ཕན་པ་དང་བདེ་བའི་སླད་དུ་རང་རང་གི་སྙིང་པོ་རྣམས་དབུལ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇིག་རྟེན་སྐྱོང་བ་རྣམས་ལེགས་སོ་ལེགས་སོ། །ལེགས་ཀྱིས་ཕུལ་ཅིག །དེ་ནས་འབྱུང་པོ་རྣམས་ཀྱི་བདག་པོ་དབང་ལྡན་ལ་སོགས་པས་རང་རང་གི་སྙིང་པོ་རྣམས་ ཕུལ་བ། ཨོྃ་ཨཱི། ཨོྃ་ཨིཾ། ཨོྃ་ཨ། ཨོྃ་ཡ། ཨོྃ་རི། ཨོྃ་བ། ཨོྃ་ཡ། ཨོྃ་ཀུ། ཨོྃ་ཨ། ཨོྃ་བྲ། དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །མགོན་པོ་དབུས་སུ་དེ་བཞིན་གཞག །ཕྱོགས་སྐྱོང་རང་གི་ཕྱོགས་གནས་སུ། ། གཞག་བྱ་སྤྱན་སྔར་ཉི་མ་དང་། །ཕག་གི་གཟུགས་དང་གཉིས་བཞག་སྟེ། །སྒོ་བ་རྣམས་ཀྱང་དེ་བཞིན་ནོ། །དེ་ནས་སྤྱན་དྲངས་དེ་ཀུན་ལ། །མཆོད་པ་ཀུན་གྱིས་མཆོད་པར་བྱ། །དེ་ནས་བདག་ཉིད་ཞུགས་ནས་ཀྱང་། །སློབ་མ་རྣམས་ནི་གཞུག་བྱ་ཞིང་། །ཕྱོགས་སྐྱོང་རང་གི་
- 78a
སྔགས་བཏབ་པའི། །བུམ་པ་རྣམས་ཀྱིས་དབང་བསྐུར་རོ། །དེ་ནས་ཕན་པར་འདོད་པ་ཡིས། །བསྒྲུབ་ཕྱིར་སྙིང་པོ་སྦྱིན་པར་བྱ། །ཕྱོགས་སྐྱོང་རང་གི་ཕྱོགས་གནས་རྣམས། །བརྟག་མི་དགོས་པར་འགྲུབ་པར་འགྱུར། །དེ་ནས་དེ་དག་མགུ་ནས་འདི་སྐད་ ཅེས་གསོལ་ཏོ། །བཅོམ་ལྡན་འདས་གང་རྒྱལ་རིགས་ཀྱི་སྤྱི་བོ་ནས་དབང་བསྐུར་ཞིང་རྒྱལ་པོའི་དཀྱིལ་འཁོར་འདིར་ཞུགས་ཏེ། དབང་བསྐུར་བ་ཐོབ་པའམ། གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དེ་དག །བཅོམ་ལྡན་འདས་བདག་ཅག་གིས་རྟག་པར་ དུས་ཐམས་ཅད་དུ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །ཕ་རོལ་གྱི་ཕྲུ་མ་ཀུན་གཞོམ་པར་བགྱི། དུས་དུས་སུ་ཆར་པ་དབབ་པར་བགྱི། འབྲུ་དང་། མེ་ཏོག་དང་། འབྲས་བུ་རྣམས་བསྐྱེད་པར་བགྱིའོ། །དེ་ནས་ཆོས་ཀྱི་རྒྱལ་པོ་ཆེན་པོ་གཤིན་རྗེས་བཅོམ་ ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་རྒྱལ་པོ་ཆེན་པོ་དེའི་ཚེ་བསྲིང་བར་བགྱིའོ། །དུས་མ་ལགས་པར་འཆི་བ་བརྒྱད་པོ་སོ་སོར་དགག་པར་བགྱིའོ། །སྲིན་པོ་རྣམས་ཀྱི་བདག་པོ་ཆེན་པོ་ནི་རི་ཏིས་ཀྱང་འདི་སྐད་ཅེས་ གསོལ་ཏོ། །བཅོམ་ལྡན་འདས་བདག་གིས་ཀྱང་རྒྱལ་པོ་དང་། རྒྱལ་པོའི་བུ་དང་། བྲམ་ཟེ་དང་། རྒྱལ་རིགས་དང་། མིའམ། གཞན་གང་ཡང་རུང་བ་དག་ལ་ནད་དང་། ཡི་དགས་དང་། འདྲེས་མི་འཇིགས་པར་བགྱི། སྲིན་པོ་ལ་སོགས་པས་འཇིགས་པར་མི་བགྱི། དུས་ མ་ལགས་པའི་འཆི་བདག་གིས་འཇིགས་པར་མི་བགྱི་སྟེ། །དུས་ཐམས་ཅད་དུ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །དེ་ནས་ཀླུའི་རྒྱལ་པོ་ཆེན་པོ་བ་རུ་ཎས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་རྟག་པར་དུས་ཐམས་ཅད་དུ་རྒྱལ་ པོ་དེ་དང་། ཡུལ་ཐམས་ཅད་སོ་སོར་བསྐྱང་བར་བགྱི། ཀུན་དུ་བསྲུང་བར་བགྱི། འབྲུ་རྣམས་བསྐྱེད་པར་བགྱི། ཀླུའི་ཉེས་པ་རྣམས་མི་འབྱུང་བར་བགྱི། ཐོག་དང་སེར་བ་རྣམས་མི་དབབ་པར་བགྱི། དུས་མ་ཡིན་པར་འཆི་བ་རྣམས་སོ་སོར་དགག་པར་བགྱིའོ། །དེ་
- 78b
ནས་རླུང་གི་བདག་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་སེམས་ཅན་ཆེན་པོ་དེ་ལ་དུས་ཐམས་ཅད་དུ་རླུང་གིས་འཇིགས་པ་མི་འབྱུང་བར་བགྱི། དུས་མ་ལགས་པའི་རླུང་མི་འབྱུང་བར་བགྱི། འབྲུ་དང་། མེ་ཏོག་དང་། འབྲས་བུ་ཐམས་ཅད་ བསྐྱེད་པར་བགྱི། འཇིགས་པ་ཐམས་ཅད་སོ་སོར་དགག་པར་བགྱིའོ། །དེ་ནས་གནོད་སྦྱིན་གྱི་རྒྱལ་པོ་ཆེན་པོ་ཀུ་བེ་རས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་ལྷན་ཅིག་ ཏུ་མཆིས་ཏེ། སྟོབས་དང་ལྡན་པས་སེམས་ཅན་ཆེན་པོ་དེ་ལ་དུས་ཐམས་ཅད་དུ་འཇིགས་པ་ཐམས་ཅད་སོ་སོར་དགག་པར་བགྱི། ནོར་དང་། འབྲུ་ཐམས་ཅད་ལེགས་པར་འབྱོར་བར་བགྱི། རང་གི་སྐྱེ་བོ་དང་། ཡོངས་ཀྱི་སྐྱེ་བོ་དང་། ཡུལ་དང་། གནས་དང་། བྲན་དང་། སྣག་གི་ གཉེན་དང་། རུས་ཀྱི་གཉེན་དང་། གྲོགས་དང་། བུ་དང་། བུ་མོ་དང་། ཆུང་མ་ལ་སོགས་པ་བསྲུང་བར་བགྱི། གླང་དང་། བ་ལང་དང་། བོང་བུ་དང་། རྔ་མོ་དང་། ལུག་དང་། མ་ཧེ་དང་། བལ་གླང་དང་། རྟ་དང་། ར་ལ་སོགས་པ་ལ་ཡང་བསྲུང་བར་བགྱིའོ། །དེ་ ནས་འབྱུང་པོ་ཐམས་ཅད་ཀྱི་བདག་པོ་དབང་ལྡན་གྱིས་ཀྱང་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་རྒྱལ་པོ་དེ་དང་། རྒྱལ་པོ་དེ་དག་གི་བུ་དང་། རྒྱལ་རིགས་དང་། བྲམ་ཟེ་རྣམས་འདི་དང་ཕ་རོལ་ཏུ་བསྐྱབ་པ་དང་། ཕན་གདགས་པ་དང་། ཡོངས་སུ་བསྐྱབ་པ་དང་། ཞི་བ་དང་། བཀྲ་ཤིས་པ་དང་། ཆད་པ་སྤང་བ་དང་། མཚོན་ཆ་སྤང་བ་དང་། དུག་གཞིལ་བ་དང་། དུག་གཞོམ་པ་དང་། མཚམས་གཅད་པ་དང་། སའི་འོག་གི་མཚམས་གཅད་པ་དང་། ཕྱོགས་ཀྱི་མཚམས་ གཅད་པ་དང་། རྡོ་རྡོ་ར་བས་བསྐོར་པ་དང་། རྡོ་རྗེ་ཕུར་བུས་གདབ་པ་དང་། རྡོ་རྗེ་དྲ་བ་རྣམས་བྲེ་བར་བགྱི། དགོས་པ་ཐམས་ཅད་ལ་ཉེ་བར་གནས་པར་བགྱི། དགོས་པ་དང་། དགོས་པ་མ་ལགས་པ་རྣམས་ཀྱི་མཚན་མ་ཉེ་བར་བསྟན་པར་བགྱི། དགེ་བ་དང་། མི་དགེ་བ་
- 79a
ཐམས་ཅད་རྨི་ལམ་དུ་ཡང་བསྒོ་བར་བགྱི། སྒྲུབ་ན་ཡང་བགེགས་མ་མཆིས་པར་བགྱི། དངོས་གྲུབ་ཐམས་ཅད་སྩལ་བར་བགྱིའོ། །དེ་ནས་ཡང་ནམ་མཁའ་ལྡིང་གི་བདག་པོ་ནམ་མཁའ་ལ་སྤྱོད་པ་རྣམས་ཀྱིས་ཀྱང་བཅོམ་ལྡན་འདས་ལ་ཕྱག་འཚལ་ནས་ འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་དུས་ཐམས་ཅད་དུ་རྒྱལ་པོ་དེ་དང་། རྒྱལ་པོའི་བུ་དང་། རྒྱལ་པོའི་བློན་པོ་དང་། བྲམ་ཟེ་དང་། རྒྱལ་རིགས་རྣམས་འཇིགས་པ་ཐམས་ཅད་ལས་བདག་ཉིད་འཁོར་ཐམས་ཅད་དང་བཅས་པར་མཆིས་ལ་ བསྲུང་བ་དང་། བསྐྱབ་པ་དང་། སྦ་བར་བགྱི། མཆོག་ཐམས་ཅད་རབ་ཏུ་བསྟབ་པར་བགྱི། ནད་ཐམས་ཅད་རབ་ཏུ་ཞི་བར་བགྱི། དུས་ཐམས་ཅད་དུ་ཕྱི་བཞིན་དུ་འབྲང་བར་བགྱིའོ། །དེ་ནས་ས་འོག་གི་བདག་པོ་ཕག་ཆེན་པོས་ཀྱང་བཅོམ་ལྡན་འདས་ལ་ཕྱག་འཚལ་ནས་འདི་སྐད་ ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་མིའི་བདག་པོ་དེ་དང་། མིའི་བདག་པོའི་བུ་དང་། ཡང་ན་ལན་གཉིས་སུ་བྱུང་བའམ། ལན་གཉིས་སུ་བྱུང་བའི་བུ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་སམ། གཞན་ཡང་རིགས་ཀྱི་ བུ་དང་། རིགས་ཀྱི་བུ་མོ་དད་པ་རྣམས་ཀྱིས་དུས་ཐམས་ཅད་དུ་དོན་ཐམས་ཅད་གྲུབ་པར་བགྱིའོ། །འཇིགས་པ་ཐམས་ཅད་ལས་དུས་ཐམས་ཅད་དུ་ཡང་བསྲུང་བར་བགྱིའོ། །བདག་ཉིད་ཀྱང་ཡོངས་སུ་བསྐྱབ་པར་བགྱིའོ། །དེ་ནས་གཟའ་ཆེན་པོ་བརྒྱད་དང་། འཁོར་རྒྱུ་སྐར་དུ་ བཅས་པ་རྣམས་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་འཁོར་དང་བཅས་པ་རྣམས་ཀྱིས་ཀྱང་རང་རང་གི་སྔགས་ཀྱི་སྙིང་པོ་རྣམས་འབུལ་བར་འཚལ་ན། དེ་དག་བཅོམ་ལྡན་འདས་ཀྱིས་བྱིན་གྱིས་བརླབ་པར་གསོལ། །ལེགས་སོ་ལེགས་སོ། །ངས་བྱིན་ གྱིས་བརླབས་ཀྱིས། གཟའ་ཆེན་པོ་རྣམས་ཤོད་ཅིག་དེ་ནས་ཉི་མ་ལ་སོགས་པ་གཟའ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །ཨོྃ་ཨཱ། ཨོྃ་སོ། ཨོྃ་ཨཾ། ཨོྃ་བུ། ཨོྃ་བྲྀ། ཨོྃ་ཤུ། ཨོྃ་ས། ཨོྃ་རཱ། དེ་ནས་དེ་དག་གི་དཀྱིལ་
- 79b
འཁོར་བཤད་དེ། དབུས་སུ་ནི་བཅོམ་ལྡན་འདས་ཕྱག་ན་རྡོ་རྗེ་ཉིད་འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་སུ་བྲིའོ། །ངོས་རྣམས་སུ་ཕྱག་རྒྱ་ཆེན་པོ་བཞི་བྲིའོ། །པ་བ་སངས་ནི་མདུན་དུ་ལ། །ཟླ་བ་རྒྱབ་ཏུ་བྲི་བར་བྱ། །གཡས་སུ་ཕུར་བུ་བྲི་བྱ་ཞིང་། གཡོན་ པར་གཟའ་ལྷག་བྲི་བར་བྱ། །མེ་ཡི་ཕྱོགས་སུ་མིག་དམར་དང་། །རླུང་གི་ཕྱོགས་སུ་ཉི་མ་སྟེ། །དབང་ལྡན་ཕྱོགས་སུ་སྤེན་པའོ། །སྲིན་པོའི་ཕྱོགས་སུ་སྒྲ་གཅན་བྲི། །དཀྱིལ་འཁོར་ཕྱི་རོལ་ཁོར་ཡུག་ཏུ། །རྒྱུ་སྐར་ཐམས་ཅད་བྲི་བར་བྱ། །སྒོ་སྒོར་དེ་བཞིན་སྒོ་བ་ རྣམས། །ཁྲོས་པའི་ཡིད་དུ་བྲི་བར་བྱ། །རྡོ་རྗེ་འཛིན་མས་ཞུགས་ནས་ནི། །རྡོ་རྗེ་ལྕགས་ཀྱུ་ལ་སོགས་པས། །ཐམས་ཅད་ཀྱང་ནི་སྤྱན་དྲང་ངོ་། །དེ་ནས་སློབ་མ་རྣམས་ཞུགས་ཏེ། །ཨོྃ་བཛྲ་ཧ་ན་ཧཱུྃ་ཕཊ། ཨོྃ་བཛྲ་གྲ་ཧ་ས་མ་ཡེ་ཧཱུྃ་ཕཊ། ཨོྃ་བཛྲ་གྲ་ཧ་པྲ་ཏཱིཙྪ་ས་མ་ ཡེ་ཧཱུྃ། དེ་ནས་གཟའ་བརྒྱད་སྔགས་བཏབ་པའི། །བུམ་པ་བརྒྱད་ཀྱིས་དབང་བསྐུར་རོ། །རྡོ་རྗེའི་ཕྱག་རྒྱས་དབང་བསྐུར་ཏེ། །གཟའ་རྣམས་ཐམས་ཅད་བསྒྲུབ་པར་བྱའོ། །དེ་ནས་གཟའ་ཆེན་པོ་དེ་དག་གིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། ། བཅོམ་ལྡན་འདས་བདག་ཅག་གཟའ་ཆེན་པོ་བརྒྱད་ཀྱིས་ཀྱང་རྒྱལ་པོ་ཆེན་པོ་དེ་དང་། རྒྱལ་པོའི་བུ་ལ་རྟག་པར་དུས་ཐམས་ཅད་དུ་དེ་བཞིན་དུ་ཐམས་ཅད་བགྱིའོ། །དེ་ནས་རྒྱུ་སྐར་དང་། སྐད་ཅིག་དང་། ཡུད་ཙམ་དང་། ཐང་ཅིག་དང་། དུས་དང་། ཟླ་ཚིགས་དང་། སྦྱོར་བ་ དང་། ཁྱིམ་དང་། དུས་སྦྱོར་དང་། ཆུ་ཚོད་ལ་སོགས་པའི་དཀྱིལ་འཁོར་གྱི་ལྷ་རྣམས་ཀྱིས་ཀྱང་དེ་བཞིན་དུ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་དུས་ཐམས་ཅད་དུ་སེམས་ཅན་ཆེན་པོ་དེ་དག་གི་བཀའ་མི་གཅོག་སྟེ། དཔོན་ པོ་བཞིན་དུ་བསྐྱང་བར་བགྱིའོ། །གྲོང་ཁྱེར་དང་། གྲོང་རྡལ་དང་། ལྗོངས་དང་། རྒྱལ་པོ་དང་། ཕོ་བྲང་འཁོར་དང་། རྒྱལ་པོའི་ཕོ་བྲང་འཁོར་གྱི་གནས་ཐམས་ཅད་སོ་སོར་བསྐྱང་བར་བགྱིའོ། །འཇིགས་པ་ཆེན་པོ་འབྱུང་བའི་ཚེ་ཡང་དེས་བདག་ཅག་མཆོད་ན་གདོན་མི་འཚལ་
- 80a
བར་འཇིགས་པ་མི་འབྱུང་ངོ་། །དེ་ནས་ཀླུ་ཆེན་པོ་བརྒྱད་ཀྱིས་ཕུད་ཅེས་བྱ་བའི་སྒྲས་བཅོམ་ལྡན་འདས་དེ་མཉེས་པར་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་དེ་དག་ཐམས་ཅད་ཀྱི་གསང་བའི་སྙིང་པོ་འདི་དབུལ་ལོ། །ཀླུ་ ཆེན་པོ་རྣམས་ལེགས་ཀྱིས་གསང་བའི་སྙིང་པོ་རྣམས་ཕུལ་ཅིག །དེ་ནས་དེ་དག་མགུ་ནས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །ཨོྃ་ཕུ། ཨོྃ་ཕ། ཨོྃ་ཕཱུ། ཨོྃ་ཕཱ། ཨོྃ་ཕཱི། ཨོྃ་ཕེ། ཨོྃ་ཕཻ། ཨོྃ་ཕཽ། དེ་ནས་དེ་དག་གི་དཀྱིལ་འཁོར་ བཤད་དེ། པདྨ་ཆེན་པོ་འདབ་བརྒྱད་ལ། །ཁ་དོག་དཀར་པོ་བྲི་བར་བྱ། །དེ་ཡི་དབུས་སུ་གཙོ་བོ་ནི། །ཕྱག་ན་རྡོ་རྗེ་རབ་གནས་པ། །སྦྲུལ་མགོ་མཐའ་ཡས་གདེངས་པ་ཡི། །ལྟོས་འགྲོ་ཆེན་པོ་སྡིགས་པ་བྲི། །མཐའ་ཡས་འཇོག་པོ་དེ་བཞིན་དུ། །ཀར་ཀོ་ཊ་དང་ ཀུ་ལི་ཀ །ནོར་རྒྱས་བུ་དང་དུང་སྐྱོང་དང་། །པདྨ་ཆུ་ལྷ་དེ་བཞིན་དུ། །མདོར་ན་འདབ་མ་རེ་རེ་ལ། །དེ་དག་སྦྲུལ་མགོ་འབར་བར་བྲི། །སྦྲུལ་མགོ་བདུན་བདུན་ཆུང་མ་ཡིས། །མགུལ་ནས་འཁྱུད་དང་བཅས་པར་བྲི། །བུམ་པ་བརྒྱད་དང་གཏོར་མ་དང་། །བཤོས་མཛེས་པ་ དང་འབྱུང་པོ་ཡི། །མར་དང་འོ་མ་སྦྲང་རྩིར་བཅས། །བྱས་པ་རྣམས་ནི་གཞག་པར་བྱ། །དེ་ནས་རྡོ་རྗེ་བདག་ཉིད་ཞུགས། །སྦྲུལ་མགོས་སྦྲུལ་མགོ་ཅན་རྣམས་དགུག །ཕུད་ཅེས་བྱ་དང་ལྷན་ཅིག་ཏུ། ཧཱུྃ་བྃ་ཧོཿཞེས་བརྗོད་དེ། །དེ་ནས་བུ་ནི་རྒྱལ་པོ་དང་། །རྒྱལ་ རིགས་ཐམས་ཅད་རབ་བཅུག་ནས། །དུག་གི་ཉེས་སྐྱོན་བསལ་བའི་ཕྱིར། །ཕུད་ཅེས་བྱ་བས་དབང་བསྐུར་རོ། །དེ་ནས་མིང་ཙམ་བརྗོད་པས་ཀྱང་། །ཀླུ་རྣམས་དེ་དག་ཐམས་ཅད་འགྲུབ། །དེ་ནས་དེ་དག་ཀུན་མགུ་ནས། །བཅོམ་ལྡན་འདས་ལ་ཕྱག་འཚལ་ཏེ། །སྤྱན་ སྔར་ཐལ་མོ་སྦྱར་འཁོད་ནས། །སྨོན་ལམ་རབ་ཏུ་འདེབས་པར་གྱུར། །བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་རྣམས་གལ་ཏེ་དཀྱིལ་འཁོར་འདིར་ཞུགས་པ་རྣམས་ལ་བསླུས་བར་གྱུར་ན། དེའི་ཚེ་བཅོམ་ལྡན་འདས་ཉིད་ལ་
- 80b
བསླུས་པར་གྱུར་ཅིག །དེའི་ཚེ་བདག་ཅག་གི་གནས་བྱེ་མས་བསྲེགས་པར་གྱུར་ཅིག །རྡོ་རྗེ་ཀུན་དུ་འབར་བས་བདག་ཅག་གི་མགོ་བཀས་པར་གྱུར་ཅིག །རྟག་པར་དུས་ཐམས་ཅད་དུ་སེམས་ཅན་ཆེན་པོ་དེ་བསྲུང་བ་དང་། བསྐྱབ་པ་དང་། སྦ་བར་བགྱི། བྱིན་ཆེན་པོ་ དང་། སྟོབས་དང་། བརྩོན་འགྲུས་བསྐྱེད་པར་བགྱི། དེའི་ཡུལ་དུ་དུག་མ་མཆིས་པར་བགྱི། དུས་དུས་སུ་ཆར་དབབ་པར་བགྱི། ཕ་རོལ་པོའི་གཡུལ་ཐམས་ཅད་ལ་དུས་དང་། དུས་མ་ཡིན་པའི་ཆར་དབབ་པར་བགྱི། འཇིགས་པ་ཐམས་ཅད་རྣམ་པར་གཞོམ་ པར་བགྱི། རྒྱལ་བའི་བཀའ་དང་། རྡོ་རྗེ་འཛིན་པའི་བཀའ་རབ་ཏུ་བསྒྲུབ་པར་བགྱིའོ། །དེ་ནས་སྒྲུབ་པ་བཤད་དེ། ལྷ་རྫས་འོད་ཕྲེང་དཀར་པོ་ཡིས། །དབུ་ལ་སྦྲུལ་མགོ་བཞིས་བསྐོར་བའི། །རྡོ་རྗེ་འཛིན་གཙོ་བསམས་ནས་སུ། །ཕུད་ཅེས་བྱ་བ་འབུམ་བཟླས་ ལ། །དེ་ནས་དུག་བླངས་ཕུད་ཅེས་ནི། །བྱ་བའི་དཀྱིལ་འཁོར་བསམས་ནས་ཀྱང་། །ལྷ་རྫས་འོད་ཟེར་ཕྲེང་བས་དགང་། །དེ་ལ་ཕུད་ཅེས་བྱ་བ་བསམ། །ལག་པ་སྦྲུལ་མགོ་ཞགས་འདྲ་དང་། །ཕུད་ཅེས་བྱ་བའི་རླུང་གིས་གཏོར། །པགས་པ་ཤ་དང་རུས་གནས་པའི། ། དུག་རྣམས་ཐམས་ཅད་མ་ལུས་པར། །ཕུད་ཅེས་བྱ་བའི་ལག་པས་དྲངས། །དེ་ནས་ལས་རྣམས་ཀུན་བྱེད་ཅིང་། །དུག་རིམས་དུག་སྦྱར་ལ་སོགས་པ། །ཁུ་ཚུར་གྱིས་ཀྱང་ཀུན་ཕྱིན་ན། །སྦྲུལ་མགོའི་ཕྱག་རྒྱས་སྨོས་ཅི་དགོས། །དེ་ནས་ལྷ་ཆེན་པོ་རྣམས་ཀྱི་བདག་པོ་འཇིགས་ པར་བྱེད་པ་ཆེན་པོ་བུད་མེད་ཆེན་མོ་བརྒྱད་ཀྱིས་བསྐོར་བས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སྐྲག་པ་དང་། བུད་མེད་རྣམས་ཀྱི་སྐྲག་པས་ལྷ་དང་ཀླུ་ལ་སོགས་པ་ཐམས་ཅད་སྐྲག །རྣམ་པར་སྐྲག །རབ་ཏུ་སྐྲག་ སྟེ། ཁ་སྦུབ་ཏུ་འགྱེལ་ནས་གོས་དང་བྲལ་ཏེ། སེམས་ཀྱང་སྟོར་ནས་ཀུན་དུ་འཕྱན་པ་དེ་དག་ལ་ཕན་གདགས་པའི་སླད་དུ་བདག་ཅག་སྙིང་པོ་འབུལ་བར་འཚལ་གྱིས། བཅོམ་ལྡན་འདས་ཀྱིས་དེ་ལེགས་པར་བྱིན་གྱིས་བརླབ་ཏུ་གསོལ། འཇིགས་པར་བྱེད་པ་ཆེན་པོ་ལེགས་སོ་
- 81a
ལེགས་སོ། །རབ་ཏུ་འཇིགས་པར་བྱེད་པ་བདག་ཉིད་དང་། ལྷའི་བུད་མེད་ཐམས་ཅད་ཀྱི་སྙིང་པོ་རྣམས་ཤོད་ཅིག །དེ་ནས་འཇིགས་པར་བྱེད་པ་ཆེན་པོས་འཇིགས་པར་བྱེད་པའི་སྒྲ་ཕྱུང་ནས་འདི་སྐད་ཅེས་གསོལ་ཏོ། །ཨོྃ་བྷཻ་ར་བ་བྷཱི་སྭཱ་ཧཱ། ཨོྃ་བྷཱ་སྭཱ་ཧཱ། ཨོྃ་བྷི་སྭཱ་ཧཱ། ཨོྃ་བྷཱུ་སྭཱ་ཧཱ། ཨོྃ་བྷེ་སྭཱ་ཧཱ། ཨོྃ་བྷཻ་སྭཱ་ཧཱ། ཨོྃ་བྷཽ་སྭཱ་ཧཱ། ཨོྃ་བྷཾ་སྭཱ་ཧཱ། ཨོྃ་བྷཿསྭཱ་ཧཱ། བཅོམ་ལྡན་འདས་འཇིགས་བྱེད་ཆེན་པོ་ནི་བརྒྱད་པོ་དེ་དག་བདག་གི་ངག་ཉན། དེ་ནས་དེ་དག་དཀྱིལ་འཁོར་བཤད། །འཁོར་ལོ་ཆེན་པོ་རྩིབས་བརྒྱད་པ། །བྲིས་ནས་དབུས་ སུ་རྡོ་རྗེ་འཛིན། །ཁྲོ་ཆེན་འཇིག་རྟེན་གསུམ་ལས་ནི། །རྣམ་རྒྱལ་ཞེས་བྱ་གཞག་པར་བྱ། །དེ་ཡི་ཞབས་དྲུང་འཇིགས་བྱེད་པའི། །དྲག་པོ་ཆེན་པོ་ཁྲོས་པ་ནི། །འཇིགས་བྱེད་མ་དང་བཅས་པར་བྲི། །རྩིབས་ཀྱི་ནང་ནི་ཐམས་ཅད་དུ། །གཞན་ཡང་འཇིགས་བྱེད་བརྒྱད་པོ་ནི། ། བུད་མེད་རྣམས་དང་ལྡན་པ་ལ། །ཁྲོས་པའི་བཞིན་དང་ཡིད་ཁྲོས་པར། །ཅི་བདེ་བར་ནི་བྲི་བར་བྱ། །འདིར་ནི་སྒོ་སྒོར་དེ་བཞིན་དུ། །སྒོ་བ་ཤིན་ཏུ་ཁྲོས་ལྡན་བྲི། །དེ་ནས་ལྕགས་ཀྱུ་ལ་སོགས་པས། །བཀུག་སྟེ་མགོ་ཡི་ཐོད་པ་ནི། །ཁྲག་གིས་བཀང་སྟེ་མཆོད་ནས་ཀྱང་། ། ཤ་ཆང་གཏོར་མ་བཟང་པོ་དང་། །སྣོད་རྣམས་ཁྲག་གིས་བཀང་བ་དང་། །མགོ་ཐོད་མགོ་ཡི་དུམ་བུ་དང་། །ཁྲག་གམ་ཆང་བཀང་བུམ་པ་བརྒྱད། །དཀྱིལ་འཁོར་དེར་ནི་གཞག་པར་བྱ། །དེ་ནས་འཇིག་རྟེན་གསུམ་རྒྱལ་བའི། །མཆོག་གིས་སློབ་མ་གཞུག་པར་བྱ། ། བུམ་པའམ་མགོ་ཡི་ཐོད་པ་ནི། །དེ་ལྟར་བརྒྱད་ཀྱིས་དབང་བསྐུར་རོ། །དེ་ནས་ལས་རྣམས་སྦྱིན་བྱ་སྟེ། །བུད་མེད་ཁྱིམ་མམ་མཚན་གཅིག་པར། །འཇིག་རྟེན་གསུམ་ནི་འདུལ་བའི་མཆོག །ཚུལ་བཞིན་དུ་ནི་མཆོད་ནས་ཀྱང་། །འབུམ་ཕྲག་བཞིར་ནི་བཟླས་པར་བྱ། །དེ་ནས་འཇིགས་ པར་བྱེད་པ་ཡི། །བདག་ཉིད་ཆེན་པོའི་སྒྲ་ཐོས་ནས། །མི་འཇིགས་པར་ནི་མགོ་ཐོད་པར། །ཁྲག་མཆོག་བཀང་སྟེ་ཨརྒྷ་དབུལ། །དེ་ནས་ཁྲོ་བོ་འཇིགས་བྱེད་པ། །མ་རུངས་ཡིད་ཅན་བུད་མེད་ཀྱི། །ཚོགས་ཀྱིས་བསྐོར་ཅིང་འཇིགས་བྱེད་པ། །བརྒྱད་ཀྱིས་བསྐོར་བ་མཐོང་བར་
- 81b
འགྱུར། །དེ་མཐོང་འཇིགས་པ་མེད་གྱུར་ལ། །ཧཱུྃ་ཞེས་བྱ་བ་དྲན་བྱེད་ཅིང་། །ཤའམ་ཡང་ན་ཆང་མཆོག་གིས། །ཐོད་པ་བཀང་སྟེ་དབུལ་བར་བྱ། །དེ་ནས་འཇིགས་བྱེད་མ་རུངས་འཇོམས། །མགུ་ནས་རབ་ཏུ་གྲུབ་འགྱུར་ནས། །ཅི་འདོད་ཅེས་ནི་སྨྲས་ནས་ཀྱང་། །མགུ་ བའི་ཡིད་ཀྱིས་དེ་སྦྱིན་བྱེད། །ས་རྣམས་སྦྱིན་པ་མ་གཏོགས་པར། །བདེ་ཆེན་ཧཱུྃ་གི་ཚུལ་གྱིས་གསོལ། །ཁུ་བ་བྲོ་བའི་བཏུང་བ་དང་། །རྫས་དང་རལ་གྲི་འཁོར་ལོ་དང་། །རྩེ་གསུམ་པ་དང་མཐོ་རིས་དང་། །མི་དང་ས་འོག་རྒྱལ་པོ་དང་། །གླིང་དང་གླིང་བཞི་བརྒྱ་བྱིན་ དང་། །གནོད་སྦྱིན་དབང་ཕྱུག་སྲིན་པོ་ཉིད། །རིག་འཛིན་ཉིད་དང་རིག་འཛིན་གྱི། །འཁོར་ལོས་སྒྱུར་དང་འཇིག་རྟེན་ནི། །གསུམ་གྱི་བདག་དང་བཀའ་ཉན་དང་། །རང་གི་འཁོར་དང་བུད་མེད་ཀྱི། །དངོས་གྲུབ་གང་ཡང་རུང་བ་ནི། །ཅི་དགའ་བར་ཡང་སྦྱིན་པར་བྱེད། །བྱིན་ ནས་དགོད་ཅིང་འགྲོ་བར་བྱེད། །སྐྲག་ན་དེ་མ་ཐག་ཏུ་གསོད། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་བཅོམ་ལྡན་འདས་ཀྱིས་བཀའ་སྩལ་ན་རང་གི་ བརྟག་པ་བཤད་པར་འཚལ་གྱིས། བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ་བྱིན་གྱིས་བརླབ་པར་གསོལ། དེ་ནས་ཚངས་པ་ལ་སོགས་པའི་ལྷ་རྣམས་ཀྱིས་རང་གི་སྙིང་པོ་རྣམས་བཤད་དོ། །ཨོྃ་ཨཱ། ཨོྃ་བྷི། ཨོྃ་རུ། ཨོྃ་ཨི། ཨོྃ་ཀྃ། ཨོྃ་ག །ཨོྃ་བྲི། ཨོྃ་ ཀ། དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །དབུས་སུ་འཇིག་རྟེན་གསུམ་འདུལ་བ། །དེ་ཡི་མདུན་དུ་དཔའ་བོ་ནི། །དབང་ཕྱུག་རྩེ་གསུམ་ལག་ཐོགས་བྲི། །རྒྱབ་ཏུ་ཚངས་པ་བྲི་བྱ་སྟེ། །གཡོན་པར་ལག་ན་འཁོར་ལོ་ཐོགས། ། གཡས་པར་དབང་པོ་རང་གི་ནི། །ཕྱག་རྒྱའི་མཚན་མ་ལག་ཐོགས་བྲི། །རང་གི་དཀྱིལ་འཁོར་ཆུང་མ་རྣམས། །འདིར་ཡང་སྒོ་བ་དེ་བཞིན་ཏེ། །བྱ་དང་བུམ་པ་གང་བར་གཞག །དཀྱིལ་འཁོར་གྱི་ནི་ཕྱི་རོལ་དུ། །སྟོབས་བཟང་ལ་སོགས་མཐུ་ཆེན་གཞག །དེ་ནས་ཞུགས་
- 82a
ནས་ལྷ་རྣམས་ནི། །མཁས་པས་ཀུན་ནས་དགུག་པར་བྱ། །ཛཿཧཱུྃ་བྃ་ཧོཿལྷ་ཐམས་ཅད། །དཀྱིལ་འཁོར་དམ་པར་བཞུགས་པར་མཛོད། །དེ་ནས་འོངས་པར་མཐོང་བ་དང་། །དགའ་བ་ཆེན་པོས་མཆོད་པར་བྱ། །དེ་ནས་རྡོ་རྗེ་འཛིན་པ་ཡི། །ཕྱག་རྒྱས་སློབ་ མ་རྣམས་གཞུག་སྟེ། །ཨོྃ་པྲ་ཏཱིཙྪ་ཏྭཱྃ་མ་ཧཱ་ས་ཏྭ་བཛྲ་དྷཱ་ར་ཨཱ་ཛྙཱ་པ་ཡ་ཨོྃཧཱུྃ་ཧ་ཧ་ཧ་ཧོ། །མེ་ཏོག་ཆོ་ག་བཞིན་དུ་དོར། །མིག་དབྱེ་ནས་ནི་བསྟན་པར་བྱ། །དེ་ནས་སྔགས་ཀྱིས་བཏབ་པ་ཡི། །བུམ་པའི་ཆུས་ནི་དབང་བསྐུར་རོ། །དེ་ནས་ལྷ་རྣམས་གང་དགའ་བའི། །དངོས་གྲུབ་རབ་ཏུ་ སྦྱིན་པར་བྱ། །འབུམ་གཅིག་གམ་ནི་འབུམ་གཉིས་སམ། །དང་པོ་བསྙེན་པ་བྱས་ནས་ཀྱང་། །དབང་ཕྱུག་ལ་སོགས་ལྷ་མཆོག་རྣམས། །དེ་དག་སྒྲུབ་བས་བསྒྲུབ་ཕྱ་སྟེ། །མཚན་གཅིག་ལ་སོགས་གནས་སམ་ནི། །ཕྱག་ན་རྡོ་རྗེའི་ཕོ་བྲང་ངམ། །ཡང་ན་དེ་བཞིན་གཤེགས་ པའམ། །རིང་བསྲེལ་ལྡན་པའི་མཆོད་རྟེན་དུ། །ལྷ་རྣམས་ཐམས་ཅད་ཆོ་ག་བཞིན། །སྒྲུབ་པས་རྟག་ཏུ་བསྒྲུབ་བྱས་ན། །ནམ་ཕྱེད་ན་ནི་ལྷ་བཞེངས་ནས། །ཁྱོད་ཀྱི་འདོད་པ་གང་ཡིན་པ། །དེ་ནི་ཅི་བདེར་སྦྱིན་བྱ་ཡིས། །བཟང་པོས་མྱུར་དུ་སོམས་ཏེ་སྨྲོས། །གང་ཕྱིར་མཆོག་ ནི་ཁྱོད་ལ་སྦྱིན། །དེ་ནས་སྔགས་ཤེས་དངོས་གྲུབ་ཕྱིར། །ལྷ་ལ་མཆོག་ནི་གསོལ་བ་གདབ། །ལྷ་རྫས་ཁུ་བ་བྲོ་བཏུང་དང་། །མི་སྣང་བ་དང་མཁའ་འགྲོ་དང་། །རིལ་བུ་རྫས་དང་རྒྱལ་ལ་སོགས། །ཡིད་འདོད་ཚད་མེད་གསོལ་བ་གདབ། །དེ་ནས་དབང་ཕྱུག་ཆེན་པོ་ལ་སོགས་པས་ བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་འདིར་ཞུགས་པ་གང་ལགས་པ་དེ་དག །བཅོམ་ལྡན་འདས་བདག་ཅག་ལྷ་ཐམས་ཅད་ཀྱིས་སྒྲིབ་པ་ཐམས་ཅད་རྣམ་པར་སྦྱོང་ངོ་། །མཐོ་ རིས་ཀྱི་ལམ་བསྟན་པར་བགྱིའོ། །ངན་སོང་མ་ལགས་པའི་ལམ་བསྟན་པར་བགྱིའོ། །སྒྲིབ་པ་མ་མཆིས་པའི་ལམ་བསྟན་པར་བགྱིའོ། །དབེན་པའི་ལམ་བསྟན་པར་བགྱིའོ། །རྣམ་པར་དབེན་པའི་ལམ་བསྟན་པར་བགྱིའོ། །འབྱུང་བའི་ལམ་བསྟན་པར་བགྱིའོ། །མྱ་ངན་
- 82b
ལས་འདས་པའི་ལམ་བསྟན་པར་བགྱིའོ། །དམ་པའི་ཆོས་ཀྱི་ལམ་བསྟན་པར་བགྱིའོ། །བདེ་འགྲོའི་ལམ་བསྟན་པར་བགྱིའོ། །སྤོང་བའི་ལམ་བསྟན་པར་བགྱིའོ། །ཉོན་མོངས་པ་མེད་པའི་ལམ་བསྟན་པར་བགྱིའོ། །སངས་རྒྱས་ཉིད་དུ་འགྲུབ་པའི་ལམ་བསྟན་པར་བགྱིའོ། ། བྱང་ཆུབ་སེམས་དཔའ་ཉིད་དུ་འགྲུབ་པའི་ལམ་བསྟན་པར་བགྱིའོ། །རྡོ་རྗེ་འཛིན་པ་ཉིད་དུ་འགྲུབ་པའི་ལམ་བསྟན་པར་བགྱིའོ། །དུས་ཐམས་ཅད་དུ་འཇིགས་པ་ཐམས་ཅད་ལས་བསྲུང་བ་དང་། བསྐྱབ་པ་དང་། སྦ་བར་བགྱིའོ། །བདག་ཉིད་ཀྱི་བུ་བཞིན་དུ་ཡོངས་སུ་བསྐྱང་བར་ བགྱིའོ། །དེའི་ཕ་རོལ་གྱི་དགྲ་ཀུན་གཞོམ་པར་བགྱིའོ། །གྲོང་དང་། གྲོང་འདབ་དང་། ལྗོངས་དང་། རྒྱལ་པོ་དང་། རྒྱལ་པོའི་ཕོ་བྲང་དང་། རྒྱལ་སྲིད་རྣམས་བསྲུང་བར་བགྱིའོ། །ཡུལ་དང་། ཕྱོགས་དང་། གྲོང་ཁྱེར་དང་། གྲོང་འཁོར་རྣམས་བསྲུང་བར་བགྱིའོ། རྒྱལ་སྲིད་ཀྱང་སྩལ་བར་བགྱིའོ། །རྒྱལ་སྲིད་ཐོབ་པ་རྣམས་ནི་རྒྱལ་སྲིད་རྒྱས་པར་བགྱིའོ། །གླིང་གཅིག་པ་དང་། གླིང་གཉིས་པ་དང་། གསུམ་པ་དང་། བཞི་པ་དང་། བདེ་འགྲོ་དང་། མིའི་གནས་དང་། སའི་འོག་དང་། འཁོར་ལོས་སྒྱུར་བ་རྣམས་སྩལ་བར་བགྱིའོ། ། མདོར་ན་བརྒྱ་བྱིན་ཉིད་དང་། ཚངས་པ་ཉིད་དང་། གཏོགས་འདོད་ཉིད་དང་། དབང་ཕྱུག་ཆེན་པོ་ཉིད་ཀྱང་སྩལ་བར་བགྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱི་འཁོར་གྱི་དཀྱིལ་འཁོར་ལ་ཀུན་ཏུ་གཟིགས་ནས་འཛུམ་པ་མཛད་པ་དང་། འཁོར་གྱི་དཀྱིལ་འཁོར་དེ་དག་གཡོས། རབ་ཏུ་གཡོས། །ཡང་དག་པར་རབ་ཏུ་གཡོས། །འགུལ། རབ་ཏུ་འགུལ། ཡང་དག་པར་རབ་ཏུ་འགུལ། འབར་རབ་ཏུ་འབར། ཡང་དག་པར་རབ་ཏུ་འབར། དགོད་རབ་ཏུ་དགོད། ཡང་དག་པར་རབ་ཏུ་དགོད། རྩེ་རབ་ཏུ་རྩེ། ཡང་དག་པར་རབ་ཏུ་རྩེ་ཞིང་རྨད་ཀྱི་ཡ་ མཚན་དུ་མ་འཇིག་རྟེན་དུ་ཡང་དག་པར་རབ་ཏུ་སྣང་བར་གྱུར་ཏོ། །དེ་ནས་ཚངས་པ་ལ་སོགས་པ་ལྷའི་ཚོགས་རྣམས་ཤིན་ཏུ་དམ་པར་གྱུར་ནས་བཅོམ་ལྡན་འདས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་
- 83a
དཔའ་རྣམས་ནི་རྒྱུ་མ་མཆིས་པར་འཛུམ་པ་མི་མཛད་ན། འཛུམ་པ་མཛད་པའི་རྒྱུ་གང་ལགས། བཅོམ་ལྡན་འདས་དེའི་སླད་དུ་འཛུམ་པ་མཛད་པའི་རྒྱུ་གང་ལགས་པ་ལུང་བསྟན་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་ལྷ་རྣམས་ ཀྱིས་གསོལ་བའི་ཚིག་གསན་ནས་འདི་སྐད་ཅེས་བཀའ་སྩལ་ཏོ། །ཚངས་པ་ལ་སོགས་པ་ལྷ་རྣམས་སྔོན་གྱི་སངས་རྒྱས་ཐམས་ཅད་ཀྱིས་བཤད་པའི་འཆི་བདག་ཞི་བར་བྱེད་པའི་རིག་པ་དང་། དུས་མ་ཡིན་པའི་འཆི་བདག་འཇོམས་པར་བྱེད་པའི་རིག་སྔགས་གཟི་བརྗིད་ ཆེན་པོ་གང་ཡིན་པ་ཐོས་སམ། དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་ཚངས་པ་ལ་སོགས་པའི་ལྷ་ཆེན་པོ་དེ་དག་ཡང་དག་པར་རབ་ཏུ་མགུ་སྟེ་བ་སྤུ་ལངས་ནས་ལེགས་སོ་ཞེས་བྱ་བ་འདི་དག་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །རྡོ་རྗེ་ འཛིན་པ་ལེགས་སོ་ལེགས་སོ། །གང་གི་སླད་དུ་ཚེ་ཐུང་བའི་སེམས་ཅན་རྣམས་ཚེ་བསྲིང་བར་བགྱི་བ་དང་། དུས་མ་ལགས་པའི་འཆི་བདག་གིས་ཉེན་པ་རྣམས་གང་གིས་དུས་མ་ལགས་པར་འཆི་བ་ལས་རྣམ་པར་གྲོལ་བར་བགྱི་བ་དང་། ངན་སོང་དུ་སྐྱེས་པ་རྣམས་ངན་སོང་གི་ རྒྱུད་ཐམས་ཅད་ལས་ཅི་ནས་ཀྱང་རྣམ་པར་གྲོལ་བར་བགྱི་བ་དང་། འཁོར་བའི་འཇིགས་པས་སྐྲག་པའི་སེམས་ཅན་རྣམས་བདེ་བླག་ཏུ་འཁོར་བ་ལ་རྒྱབ་ཀྱིས་ཕྱོགས་པར་བགྱིས་ནས་མྱུར་དུ་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱི་ བའི་སླད་དུ་གཟི་བརྗིད་ཆེན་པོའི་སྟོབས་དང་། མཐུ་ཆེན་པོའི་རིག་པ་བཤད་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཚངས་པ་ལ་སོགས་པ་ལྷ་རྣམས་ཀྱིས་གསོལ་བའི་ཚིག་གསན་ནས། དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་ཉིད་ཀྱི་སྐུ་དང་གསུང་དང་ ཐུགས་རྡོ་རྗེ་ལས་ཕྱུང་ངོ་། །ཨོྃ་པུ་ཎྱེ་པུ་ཎྱེ། མ་ཧཱ་བུ་ཎྱེ་ཨ་པ་རི་མི་ཏཱ་ཡུཿཔུ་ཎྱེ་ཛྙཱན་སཾ་བྷ་རོ་པ་ཙི་ཏེ་སྭཱ་ཧཱ། སྙིང་པོའི་རིག་པའོ། །ཨོྃ་ཧྲཱིཿསྭཱ་ཧཱ། ཉེ་བའི་སྙིང་པོའི་རིག་པའོ། ཨོྃ་བྷྲཱུྃ་སྭཱ་ཧཱ། ཏེ་བའི་སྙིང་པོའི་རིག་པའོ། ཨོྃ་ཀྲུྃ་སྭཱ་ཧཱ། །སྙིང་པོ་ཡང་དག་པར་བསྐུལ་བའི་
- 83b
རིག་པའོ། །ཨོྃ་ཏྲཱྃ་སྭཱ་ཧཱ། སྙིང་པོ་དམ་པའོ། །ཨོྃ་ཧྲཱིཾ་སྭཱ་ཧཱ། གསང་བའི་སྙིང་པོའོ། །དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་རྩིབས་བཞི་པར་བྱས་ལ། དེ་ཡི་དབུས་སུ་དེ་བཞིན་གཤེགས་པ་ཚེ་དང་། བསོད་ནམས་དང་། ཡེ་ཤེས་ཀྱི་ཚོགས་དང་། གཟི་བརྗིད་ཚད་མེད་པའི་རྒྱལ་པོ་ཞེས་བྱ་བ་གཞག་སྟེ། བྷྲུྃ་ཞེས་བྱ་བའི་སྙིང་པོའོ། །དེའི་སྤྱན་སྔར་ནི་ཕྱག་ན་རྡོ་རྗེ་སྟེ། ཧྲཱིཿཞེས་བྱ་བའི་སྙིང་པོའོ། །གཡོན་པར་ནི་ཁྲོ་བོ་སྟེ། ཀྲུྃ་ཞེས་བྱ་བའི་སྙིང་པོའོ། །གཡས་པར་ནི་ནམ་མཁའི་སྙིང་པོ་སྟེ། ཏྲཱྃ་ཞེས་བྱ་བའི་སྙིང་པོའོ། ། རྒྱབ་ཏུ་ནི་འཕགས་པ་ཀུན་ཏུ་སྤྱན་རས་གཟིགས་ཀྱི་དབང་པོ་མི་འཇིགས་པ་སྦྱིན་པ་ཞེས་བྱ་སྟེ། ཧྲཱིཾ་ཞེས་བྱ་བའི་སྙིང་པོའོ། །དེ་བཞིན་གཤེགས་པའི་འོད་ཀྱི་དཀྱིལ་འཁོར་ལ་རིག་པ་རྣམས་བྲིའོ། །བུམ་པ་ལྔ་དང་། བརྒྱད་འཁོར་ལོས་སྒྱུར་བའི་སྔགས་ཀྱིས་བཏབ་ལ་གཞག་གོ། ། བདུག་པ་ལ་སོགས་པ་ལས་ཐམས་ཅད་པའི་ཁྲོ་བོའི་སྔགས་ཀྱིས་བཏབ་པ་དང་། མཆོད་པ་ལ་སོགས་པ་གཞག་སྟེ། སྒོ་བ་ཐམས་ཅད་ཀྱང་དེ་བཞིན་ནོ། །དེ་ནས་སྔགས་མཁན་བདག་ཉིད་ཞུགས་ལ། །བདེ་བར་གཤེགས་པ་དམ་པ་སྲས་དང་འབངས་སུ་བཅས་ཤིང་འཁོར་གྱིས་ བསྐོར་ཏེ་རིག་པ་དང་ལྷན་ཅིག་སྤྱན་དྲང་ངོ་། །དེ་ནས་བདག་ཉིད་དབང་བསྐུར་ཏེ། སྐྱིལ་མོ་ཀྲུང་བཅས་ནས་འདུག་ལ་སྟོང་ཕྲག་བརྒྱ་བཟླས་ན། དེ་བཞིན་གཤེགས་པའམ། རྡོ་རྗེ་འཛིན་པའམ། འཕགས་པ་སྤྱན་རས་གཟིགས་ཀྱི་དབང་ཕྱུག་ཀྱང་རུང་སྟེ། མངོན་སུམ་དུ་མཐོང་ནས་ དེ་འདོད་པའི་མཆོག་སོ་སོར་ཐོབ་པར་འགྱུར་རོ། །ཅི་སྟེ་མཉམ་པར་གཞག་ན་དེའི་ཚེ་ཡིད་ཀྱིས་ལས་ཐམས་ཅད་ནུས་པར་འགྱུར་རོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ། ཨོྃ་བཛྲ་དྷ་ར། རཏྣ་དྷ་ར། པདྨ་དྷ་ར། བི་ཤྭ་དྷ་ར། ཏ་ཐཱ་ག་ཏ་ས་མ་ཡ། མཱ་ཏི་ཀྲ་མ་ཏ་ཐཱ་ག་ཏ་ས་མ་ཡ་དྷ་ ར་ཨཱ་ཏྨ་ཀོ་྅་ཧཾ་ཞེས་ང་རྒྱལ་བསྐྱེད་ལ་སློབ་མ་རྣམས་གཞུག་པར་བྱའོ། །དེ་ནས་འདིས་མེ་ཏོག་དོར་བར་བྱའོ། །ཨོྃ་སརྦ་ཏ་ཐཱ་ག་ཏ་པྲ་ཏཱིཙྪ་ཧོ་ས་མ་ཡ་སྟྭྃ། དེ་ནས་ཕྲེང་བ་དེ་ཉིད་ཀྱིས་མགོ་ལ་བཅིངས་ལ། དབང་བསྐུར་བར་བྱའོ། །ཨོྃ་སརྦ་ཏ་ཐཱ་ག་ཏ་ཨ་བྷི་ཥཉྩི་བཛྲ་དྷ་ར་ཨཱ་ཛྙཱ་པ་ཡ་ཧཱུྃ་
- 84a
བྷྲུྃ ། ཨོྃ་བཛྲ་བཛྲ་ཨ་བྷི་ཥིཉྩ་ཧཱུྃ་ཧཱུྃ། ཨོྃ་རཏྣ་རཏྣ་ཨ་བྷི་ཥིཉྩ་ཧཱུྃ་ཏྲཱྃ། ཨོྃ་པདྨ་པདྨ་ཨ་བྷི་ཥིཉྩ་ཧཱུྃ་ཧྲཱིཿ། ཨོྃ་ཀརྨ་ཀརྨ་ཨ་བྷི་ཥིཉྩ་ཧཱུྃ་ཀྲུཾ། དེ་ནས་དམ་ཚིག་དང་། བཀའི་དབང་བསྐུར་བར་བྱའོ། །དེ་ལ་དམ་ཚིག་ནི། དཀོན་མཆོག་གསུམ་དང་བྱང་ཆུབ་སེམས། ། བླ་མ་དམ་པ་རྣམས་མི་སྤང་། །སྲོག་ཆགས་རྣམས་ནི་གསད་མི་བྱ། །མ་བྱིན་པར་ཡང་མི་བླང་ཞིང་། །བརྫུན་དུ་སྨྲ་བར་བྱ་མ་ཡིན། །ཕ་རོལ་བུད་མེད་སྤྱད་མི་བྱ། །བླ་མ་སྨད་པར་མི་བྱ་སྟེ། །དེ་ཡི་གྲིབ་མ་མི་འགོམ་ཞིང་། །སློབ་དཔོན་མ་ཡིན་མི་གཟུང་ལ། །རྡོ་རྗེ་ སློབ་དཔོན་མཚན་མི་བརྗོད། །སྔགས་དང་ཕྱག་རྒྱ་མི་སྨད་དེ། །ལྷ་རྣམས་ལ་ལྟ་སྨོས་ཅི་དགོས། །ཇི་སྟེ་གླེན་པས་སྨད་ན་ནི། །ནད་ཀྱིས་ངེས་པར་འཆི་བར་འགྱུར། །རྙིང་དང་ལྷ་ཡི་གྲིབ་མ་དང་། །འཇིག་རྟེན་འཇིག་རྟེན་འདས་པ་ཡི། །ཕྱག་རྒྱ་ཡི་གེའི་མཚན་མ་རྣམས། ། གོམ་པས་འགོམ་པར་མི་བྱའོ། །གླེན་པས་དཀོན་མཆོག་གསུམ་སོགས་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་ལ་བརྩོན་པ་རྣམས། །མཁས་པས་བསྒྲིམས་ཏེ་གསད་པར་བྱ། །ཆོས་མིན་ལྡན་དང་སྡིག་སྤྱོད་དང་། །རྟག་ཏུ་སེམས་ཅན་གནོད་བརྩོན་ དང་། །དམ་ཚིག་སྡང་རྣམས་སྙིང་བརྩེ་བའི། །སྔགས་མཁན་གྱིས་ནི་སྔགས་ཀྱིས་བསད། །འཇུངས་པ་རྣམས་ཀྱི་ནོར་བླངས་ལ། །སེམས་ཅན་ཕོངས་ལ་སྦྱིན་པར་བྱ། །བླ་མ་ལ་ནི་མཆོད་པ་དང་། །དེ་ལྟར་དམ་ཚིག་བསྒྲུབ་པ་དང་། །དཀྱིལ་འཁོར་ཕྱིར་དང་དམ་ཚིག་ ཅན། །ཕན་ཕྱིར་རྒྱལ་བའི་སྲས་རྣམས་ལ། །མཆོད་ཕྱིར་མི་ཡི་དབང་པོའམ། །ཕྱུག་པོ་རྣམས་ཀྱི་ནོར་དབྲོག་གོ། །སེམས་ཅན་རྣམས་ལ་ཕན་སྤྱོད་པས། །རྟག་ཏུ་དམ་ཚིག་བླ་མའི་ནོར། །སྲོག་ཆགས་སྲོག་ནི་བསྲུང་བའི་ཕྱིར། །བརྫུན་དུ་ཡང་ནི་སྨྲ་བར་བྱ། ། སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །སྔགས་རིག་པས་ནི་བསྒྲུབ་པའི་ཕྱིར། །གཞན་གྱི་བུད་མེད་བསྟེན་པར་བྱ། །རྡོ་རྗེ་སེམས་དཔའི་གནས་འདུག་ནས། །ཐམས་ཅད་བྱས་ཤིང་ཀུན་ཟོས་ཀྱང་། །འགྲུབ་འགྱུར་ཉེས་པར་མི་འགྱུར་ན། །
- 84b
སྙིང་རྗེར་ལྡན་པས་སྨོས་ཅི་དགོས། །དེ་ནས་འདིས་བཀའི་དབང་བསྐུར་བར་བྱའོ། །ཨོྃ་སརྦ་ཏ་ཐཱ་ག་ཏ་ཨཱ་ཛྙཱ་ན་ཏེ་དྷཱ་སྱཱ་མི་གྲྀཧྣ་བཛྲ་སུ་སིད་དྷ་ཡེ། ཨོྃ་བཛྲ་ཏིཥྱ་ཧཱུྃ། འདིས་རྡོ་རྗེ་ལག་ཏུ་བྱིན་ལ་ལས་ཀྱི་དབང་བསྐུར་བར་བྱའོ། །ཨོྃ་སརྦ་ཀརྨ་ནི་ཀུ་རུ་བུད་དྷཱ་ནཱ་མ་ཧཱུྃ། དེ་ ནས་བླ་མ་བླ་མའི་ཕྱིར། །ཁྱོད་ཀྱིས་ལུས་མཆོག་སྦྱིན་པར་བྱ། །ནོར་དང་དབྱིག་དང་འབྲུ་རྣམས་དང་། །སྟན་དང་བཞོན་པ་དེ་བཞིན་ཏེ། །བྲན་གྱི་མཆོག་དང་ཁང་པ་དང་། །རྒྱལ་པོ་རྒྱལ་སྲིད་དེ་བཞིན་ཏེ། །བུ་དང་བུ་མོ་ཆུང་མ་དང་། །མ་དང་སྲིང་མོ་ཚ་མོ་དང་། ། གཞན་ཡང་ཅི་བཞེད་ཐམས་ཅད་ནི། །ཕན་པར་བསམས་ཕྱིར་བླ་མར་དབུལ། །དེ་ནས་བྱང་ཆུབ་བར་དུ་ནི། །སངས་རྒྱས་ཉིད་དང་གཞན་དག་དང་། །འཇིག་རྟེན་པ་ཡི་མཐུ་ཆེན་རྣམས། །གང་འདོད་པ་དག་བསྒྲུབ་འདོད་པས། །དངོས་གྲུབ་རྣམས་ནི་གསོལ་བར་བྱ། །དེ་ ནས་བུ་ལ་ཕན་པའི་ཕྱིར། །སྔགས་མཁན་སེར་སྣ་མེད་སེམས་དང་། །དད་པས་དད་པའི་སེམས་ལྡན་ལ། །དངོས་གྲུབ་རྣམས་ནི་སྦྱིན་པར་བྱ། །ཆོས་རྣམས་ཐམས་ཅད་དངོས་མེད་པར། །སེམས་ཀྱིས་བསྒོམ་པ་བྱས་ནས་ཀྱང་། །ཨ་ལས་ཟླ་བའི་དཀྱིལ་འཁོར་བསམ། ། རང་གི་ས་བོན་དེ་དབུས་སུ། །བསམས་ནས་དམ་ཚིག་ཕྱག་རྒྱ་ཡང་། །བསམ་ཞིང་དེ་བཞིན་དེ་ཉིད་དུ། །སྒྲུབ་པ་པོ་ནི་བསྒྱུར་བར་བྱ། །ལྷ་ཡི་རྣལ་འབྱོར་ཚུལ་དུ་བསྒྱུར། །དེ་ནས་རང་གི་ས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །ལྟག་འོག་གོ་རིམས་ཇི་བཞིན་དུ། ། སངས་རྒྱས་རྣམས་ཀྱིས་དབང་བསྐུར་རོ། །དེ་ནས་ང་རྒྱལ་བསྐྱེད་ནས་ཀྱང་། །མཁས་པ་ཡིས་ནི་བསྒྲུབ་བྱས་ན། །དེ་བཞིན་གཤེགས་ཀྱང་འགྲུབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་ འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་དང་། རྒྱལ་པོའི་བུ་དང་། རྒྱལ་པོའི་བློན་པོ་དང་། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དང་། གཞན་ཡང་དམན་ཞིང་ཁོ་རེ་ཆུང་བ་ཕྱག་དར་བ་དང་། མཐའ་འཁོབ་པའི་
- 85a
རིགས་ངན་གྱི་སྐྱེ་བོ་རྣམས་དཀྱིལ་འཁོར་གྱི་རྒྱལ་པོ་འདིར་ཞུགས་ན་དེ་དག་གི་རྣམ་པར་སྨིན་པ་ཇི་ལྟ་བུར་འགྱུར། བཅོམ་ལྡན་འདས་ཀྱིས་བཀའ་སྩལ་པ། གང་མ་འོངས་པའི་སེམས་ཅན་རྣམས་ལ་ཕན་པའི་ཕྱི་རང་ལ་ཞུས་པ་དེ་ནི་ལེགས་སོ་ལེགས་སོ། ། ལྷའི་བུ་རྣམས་དཀྱིལ་འཁོར་གྱི་རྒྱལ་པོ་འདིར་ཞུགས་པ་དང་། དབང་བསྐུར་བ་དང་། བྲིས་པ་དང་། འདྲིར་བཅུག་པ་དང་། རྗེས་སུ་ཡི་རང་བ་དང་། ཕྱག་བྱས་པ་དང་། མཆོད་པ་རྣམས་ཀྱི་འབྲས་བུ་དང་། རྣམ་པར་སྨིན་པ་ཉོན་ཅིག །ལྷའི་བུ་རྣམས་མདོར་ནང་ལ་ཡང་དེའི་ཡོན་ ཏན་བཤད་པར་སྤོབས་པ་མེད་དེ། ངའི་བསོད་ནམས་ཀྱི་ཕུང་པོ་གང་ཡིན་པ་དེ་བརྒྱ་ཕྲག་སྟོང་དུ་མར་བསྒྱུར་ཀྱང་གྲངས་སུ་ཡང་མི་ཆོག །བགྲང་བར་ཡང་མི་ཆོག །དཔེར་ཡང་མི་བཟོད་དེ། དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་བསོད་ནམས་ཀྱི་ཕུང་པོས་ཀྱང་མི་བཟོད་དོ། ། དཀྱིལ་འཁོར་འདིར་ཞུགས་པའི་སེམས་ཅན་རྣམས་ཀྱི་འབྲས་བུ་དང་། རྣམ་པར་སྨིན་པ་གང་ལགས་པ་དེ་ནི་བཅོམ་ལྡན་འདས་ངོ་མཚར་ཆེའོ། །རྡོ་རྗེ་འཛིན་པ་ངོ་མཚར་ཆེའོ། །བཅོམ་ལྡན་འདས་བདག་ཅག་གིས་དཀྱིལ་འཁོར་དུ་འདུག་པ་ལ་སོགས་པར་སྤྲོའོ། །བཅོམ་ལྡན་ འདས་རྡོ་རྗེ་འཛིན་པ་སྤྲོའོ། །དེ་ནས་ལྷ་དེ་དག་གིས་དེ་བཞིན་དུ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཛམ་བུའི་གླིང་གི་སེམས་ཅན་བསོད་ནམས་ཆུང་ཞིང་ཚེ་ཐུང་བ་དང་། ངན་སོང་གི་རྒྱུད་དང་ལྡན་པ་དང་། སེམས་ཅན་དམྱལ་བ་དང་། ཡི་དགས་དང་། བྱོལ་སོང་རྣམས་སུ་སྐྱེས་པ་དག་ཀྱང་མཆིས་ན། བཅོམ་ལྡན་འདས་དེ་དག་ལ་བདག་ཅག་གིས་ཇི་ལྟར་བསྒྲུབ་པར་བགྱི། ཀྱེ་ལྷའི་བུ་རྣམས་སེམས་ཅན་དེ་དག་ནི་དཀྱིལ་འཁོར་འདི་ཉིད་དུ་ཆུག་ཅིག །ཆོས་ཀྱི་ཡི་གེ་ཡང་ཟློས་སུ་ཆུག་ཅིག་དང་། དེས་སེམས་ཅན་དེ་དག་ཚེ་རིང་བར་འགྱུར། བསོད་ནམས་དང་བྲལ་བ་རྣམས་བསོད་ནམས་དང་ལྡན་པར་འགྱུར། ངན་སོང་ལས་ཀྱང་རྣམ་པར་གྲོལ་བར་འགྱུར་རོ། །ཀྱེ་ལྷའི་བུ་རྣམས་ངན་སོང་དུ་སྐྱེས་ཟིན་པ་གང་ཡིན་པ་དེ་དག་གི་མིང་ལ་ཡང་དབང་སྐུར་ཅིག །གཟུགས་བརྙན་ལ་ཡང་དབང་བསྐུར་བར་བྱོས་ཤིག །མཆོད་རྟེན་ལ་ཡང་
- 85b
དབང་བསྐུར་བར་བྱོས་ཤིག །རང་གི་ལྷའི་སྐུ་ལ་ཡང་དབང་བསྐུར་བར་བྱོས་ཤིག །ཆུང་ངུ་ན་དེ་དང་རིགས་མཐུན་པ་དང་། དེའི་བུ་དང་། དེ་དང་རུས་མཐུན་པ་དང་། དེའི་མིང་འཛིན་པའམ། བྲན་ལ་ཡང་དབང་སྐུར་ཅིག་དང་ཞག་བདུན་དུ་དཀྱིལ་འཁོར་དུ་བཅུག་སྟེ་དབང་བསྐུར་ན་ གདོན་མི་ཟ་བར་ཞག་བདུན་གྱི་ས་ངན་སོང་གི་སྒྲིབ་པ་ལས་རྣམ་པར་གྲོལ་བར་འགྱུར་རོ། །ལྷའི་བུ་རྣམས་དེའི་མིང་ནས་སྨོས་ཏེ་འབུམ་ཕྲག་གཉིས་སམ། འབུམ་ཕྲག་གསུམ་མམ། འབུམ་ཕྲག་བཞི་ནས་འབུམ་ཕྲག་བརྒྱ་ཕྲག་སྟོང་གི་བར་དུ་བཟླས་པ་བྱས་ན་མཚམས་མེད་པ་ལྔ་བྱས་ པ་ཡང་རྣམ་པར་ཐར་བར་འགྱུར་ན། སྡིག་པ་ཆུང་ངུ་བྱས་པ་རྣམས་ལྟ་སྨོས་ཀྱང་ཅི་དགོས། ལྷ་ཡི་བུ་རྣམས་ཞི་བ་ཡི། །ཧོམ་ཁུང་ཐ་མ་བར་མ་མཆོག །ཁྲུ་གང་ཁྲུ་དོ་ཁྲུ་བཞི་པའི། །ཟླུམ་པོ་ཉིད་དུ་བྱས་ནས་ནི། །དེ་ཡི་མིང་ཡང་ཡུངས་ཀར་གྱིས། །བརྒྱ་ཕྲག་སྟོང་དུ་བསྲེགས་ བྱས་ན། །ངན་སོང་ཀུན་ལས་རྣམ་པར་ཐར། །དེ་ཡི་ཤ་དང་རུས་པ་དང་། །སྐྲ་དང་ཐལ་བ་ལ་སོགས་པས། །ཆོ་ག་དེ་དང་འདྲ་བར་ནི། །སྦྱིན་སྲེག་བྱས་ནས་ངན་སོང་ཡང་། །ཀུན་ལས་རྣམ་པར་ཐར་བར་འགྱུར། དེ་ཡི་དབུས་སུ་འཁོར་ལོ་ནི། །རྩིབས་བརྒྱད་འོད་ཟེར་དཀར་ འབར་བྲི། །ཁོར་ཡུག་རྡོ་རྗེ་རྩེ་ལྔ་པ། །འོད་ཟེར་དཀར་དང་ལྡན་པར་བྲི། །དེ་ནས་རྡོ་རྗེ་རྒྱ་གྲམ་དང་། །རྡོ་རྗེ་རིན་ཆེན་ཆུ་སྐྱེས་མཆོག །དེ་ནས་སྡིག་པ་གཞོམ་པའི་ཕྱིར། །ཕྱག་རྒྱ་སྣ་ཚོགས་གཞག་པར་བྱ། །ཕྱི་ཡི་རྡོ་རྗེ་རིགས་རྣམས་ཀྱི། །ཕྱག་རྒྱ་རྣམས་ནི་ཕྱི་རོལ་བྲི། །གཟའ་ དང་སྐར་མའི་མཚན་མ་དང་། །དེ་ལྟར་འཇིག་རྟེན་སྐྱོང་བ་རྣམས། །གཙོ་བོ་རི་མོ་ལུགས་མའང་རུང་། །རྡོ་རྗེ་ཅན་དང་ལྷན་ཅིག་གཞག །བྱ་དང་བུམ་པ་བཀང་བ་དང་། །གཏོར་མ་ལྷ་བཤོས་རབ་དཀར་གཞག །མདོར་ན་ཐིག་ནི་བཏབ་ནས་ཀྱང་། །ཆོ་ག་བཞིན་དུ་བྲི་བར་བྱ། །དཀར་ པོའི་གོས་ནི་བགོས་ནས་ཀྱང་། །སངས་རྒྱས་གཟུགས་ཅན་མི་འཇིགས་པས། །ངན་སོང་རྒྱུད་ན་གནས་པ་ཡི། །སེམས་ཅན་རྗེས་སུ་དྲན་བྱེད་ཅིང་། །སྡིག་པའི་སྒྲིབ་པ་ཞི་བའི་ཕྱིར། །སངས་རྒྱས་ཀུན་གྱི་སྦྱིན་སྲེག་ནི། །མར་དང་འོ་མ་སྦྲང་རྩི་ཅན། །འབྲས་ཡོས་ཡུངས་ཀར་བསྲེས་
- 86a
པ་དང་། །དེ་ཡི་རུས་པ་ཤ་ལ་སོགས། །ཡང་ན་མིང་ནས་སྨོས་ཏེ་བྱ། །དེ་ནི་བདེ་འགྲོར་སྐྱེས་ནས་ཀྱང་། །མཁས་པས་རྒྱས་པ་བྱ་དགོས་ཏེ། །ཁྲུ་དོ་པའམ་ཁྲུ་བཞི་པ། །དེ་ལྟར་མཆོག་ནི་ཁྲུ་བརྒྱད་པར། །བྱས་ནས་ཧོམ་ཁུང་གྲུ་བཞི་པ། །ཀུན་དུ་མུ་རན་ལྡན་པར་ བྱ། །དེ་དབུས་པད་མ་རིན་ཆེན་ཅན། །འོད་ཟེར་སེར་པོ་ལྡན་པར་བྲི། །ཁོར་ཡུག་ཏུ་ནི་རིན་ཆེན་དང་། །མུ་རན་རྣམས་ལ་ཆུ་སྐྱེས་བྲི། །ཕྱི་རོལ་དུ་ནི་རིགས་ལྔ་ཡི། །སོ་སོའི་ཕྱག་རྒྱ་བྲི་བར་བྱ། །དེ་ལྟར་ཕྱི་ཡི་ལྷ་རྣམས་དང་། །ལྕགས་ཀྱུ་ལ་སོགས་བྲི་བར་བྱ། །གོས་རྣམས་སེར་པོར་བསྒྱུར་ ནས་ཀྱང་། །མཐོ་རིས་གནས་པ་རྗེས་དྲན་ཞིང་། །དེ་ལ་ཕན་ཕྱིར་རྒྱས་པའི་ཕྱིར། །རྒྱས་པ་ཡི་ནི་ལས་བྱས་ན། །ལུས་ཅན་དེ་ཡི་ཚེ་དང་དཔལ། །གཟི་བརྗིད་བདེ་བའི་ལོངས་སྤྱོད་འཕེལ། །དེ་ནས་ཕན་ཕྱིར་ངེས་པར་ཡང་། །དབང་དུ་བྱ་བའི་ལས་བྱ་ན། །ཧོམ་ཁུང་གཞུ་ཡི་དབྱིབས་ འདྲ་ལ། །ཁྲུ་གང་པའམ་ཁྲུ་དོ་པ། །ཁྲུ་བཞིར་བྱས་ལ་དེའི་དབུས་སུ། །པད་མ་དམར་པོ་བྲིས་ནས་ཀྱང་། །དེ་ཡི་དབུས་སུ་མདའ་བཅས་པའི། །གཞུ་ཡང་དེ་བཞིན་བྲི་བར་བྱ། །ཁོར་ཡུག་ཏུ་ཡང་མདའ་བཅས་པའི། །གཞུ་ནི་ཁ་དོག་དམར་པོར་བྲི། །སྔགས་རྫོགས་པས་ནི་ རྟག་པར་ཡང་། །ཕྱི་རོལ་དེ་དང་འདྲ་བར་བྱ། །སེམས་ཅན་དེ་ཡང་དྲན་བྱས་ཏེ། །དམར་པོར་གྱུར་བའི་གོས་གྱོན་ལ། །མེ་ཏོག་དམར་རམ་པདྨའམ། །འབྲས་བུ་དམར་རམ་ཚོན་བསྐུས་བའི། །མར་དང་གུར་གུམ་བསྲེས་པ་དང་། །ཙནྡན་དམར་པོའི་ཕྱི་མ་ཡིས། །སྦྱིན་སྲེག་ བྱས་ན་ལྷ་ལ་སོགས། །ཐམས་ཅད་དེ་ཡི་དབང་དུ་འགྱུར། །དེ་ལ་གདོན་རྣམས་གཞོམ་པའི་ཕྱིར། །མངོན་སྤྱོད་ཀྱང་ནི་བརྩམ་བྱ་སྟེ། །ཕྱེད་དང་གསུམ་མམ་ཁྲུ་གསུམ་མམ། །དེ་ལྟར་དམ་པ་ཁྲུ་དགུར་བྱ། །གྲུ་གསུམ་པ་དང་ལྡན་པར་ནི། །དབུས་སུ་རྡོ་རྗེ་རྩེ་དགུ་བ། །རྩེ་གསུམ་ པ་དང་རྒྱ་གྲམ་པའི། །རྡོ་རྗེ་རྣམས་དང་དབྱིག་པ་དང་། །མགོ་ནི་རྡོ་རྗེ་རྩེ་གསུམ་དང་། །དགྲ་སྟ་རྩེ་གཅིག་མུ་ཁྱུད་བསྐོར། །ཕྱི་རོལ་དུ་ཡང་རིམ་གསུམ་དུ། །སྔ་མ་བཞིན་དུ་བརྒྱན་པར་བྱ། །བྱ་དང་གཏོར་མ་བུམ་པ་དང་། །བཤོས་ཆ་རྣམ་པ་མང་དུ་གཞག །ཤ་དང་ཁྲག་གིས་
- 86b
བཀང་བ་ཡི། །མགོ་ཡི་ཐོད་པ་ཀུན་ཏུ་གཞག །དེ་ཡི་ལུས་ཅན་སྡིག་སོགས་དང་། །བགེགས་རྣམས་གཞོམ་པར་བྱ་བའི་ཕྱིར། །གོས་ནག་བགོས་ཤིང་ཁྲོས་ནས་ཀྱང་། །འཇིག་རྟེན་གསུམ་རྒྱལ་བདག་ཉིད་བསམ། །དེ་ནས་དེ་ཡི་སྡིག་བཅོམ་ལུས། །བགེགས་དང་ ཕྲལ་ཏེ་ཅི་བདེ་བར། །མཐོ་རིས་འཇིག་རྟེན་མི་ཡི་ནང་། །ཁམས་གསུམ་པ་ན་ཅི་བདེར་སྤྱོད། །གོ་རིམས་འདི་དག་ཉིད་ཀྱིས་ནི། །ཚེ་འདིའི་གནས་ལའང་བྱ་བ་སྟེ། །དེ་ནས་གང་གི་ཕྱིར་བྱས་པ། །དེ་ཡི་ཕྱིར་ཡང་དེ་བཞིན་འགྱུར། །གཞན་དག་ཀྱང་ནི་ལས་རྣམས་ཀུན། །སྔ་ མ་ཇི་བཞིན་དེ་ལྟར་བྱ། །དེས་ནི་སེམས་ཅན་ཐམས་ཅད་ལའང་། །མྱུར་དུ་བདེ་སྐྱིད་མྱོང་བར་འགྱུར། །དེ་ནས་ཚངས་པ་ལ་སོགས་པ་ལྷ་རྣམས་ཡིད་མགུ་ནས་བཅོམ་ལྡན་འདས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་ངན་སོང་དུ་སྐྱེས་པའི་སེམས་ཅན་ རྣམས་ཀྱི་དོན་དང་། ཕན་པ་དང་བདེ་བའི་སླད་དུ་བརྟག་པའི་རྒྱལ་པོ་འདི་འདྲི་བ་དང་། འདྲིར་འཇུག་པའི་རིགས་ཀྱི་བུའམ། རིགས་ཀྱི་བུ་མོ་རྣམས་བདག་ཅག་ཚངས་པ་ལ་སོགས་པ་ལྷ་རྣམས་ཀྱིས་བུ་བཞིན་དུ་ཡོངས་སུ་བསྐྱང་བར་བགྱི། གང་རྒྱལ་པོ་དང་། རྒྱལ་པོའི་བུ་ དང་། རྒྱལ་པོའི་བློན་པོ་རྣམས་ཇི་ལྟར་གསུངས་པའི་རྗེས་སུ་སློབ་ན་དེའི་རྒྱལ་སྲིད་འཕེལ་བར་བགྱི། ཡུལ་དང་ཕྱོགས་དང་། རང་གི་སྐྱེ་བོ་དང་། ཡོངས་ཀྱི་སྐྱེ་བོ་དང་། བྲན་ལ་སོགས་པ་བསྲུང་བར་བགྱི། ནོར་དང་འབྲུ་རྣམས་མང་དུ་འབྱོར་པར་བགྱི། བུད་མེད་དང་། སྐྱེས་པ་དང་། ། བྱེའུ་དང་། བུ་མོ་རྣམས་དང་ལྡན་པར་བགྱི། འབྱོར་པ་དང་། རྒྱས་པ་དང་། ལོ་ལེགས་པ་དང་། ཞི་བ་རྣམས་སུ་བགྱི་ན། ཇི་ལྟར་བཤད་པ་ལ་མི་རྟོག་པར་བགྱི་བ་ལྟ་སྨོས་ཀྱང་ཅི་འཚལ་གང་གིས་བརྟག་པའི་རྒྱལ་པོ་འདི་དད་པས་རྒྱལ་མཚན་གྱི་རྩེ་མོ་ལ་བཏགས་ཏེ། གྲོང་དང་གྲོང་ ཁྱེར་དུ་བཙུགས་ལ། བདག་ཉིད་ཀྱིས་བསུ་བ་དང་། གླང་པོ་ཆེའི་སྟེང་དུ་བཞག་ལ་གྲོང་དང་གྲོང་ཁྱེར་ལ་སོགས་པ་ཐམས་ཅད་བསྐོར་ན། ནད་དང་། གནོད་པ་ཐམས་ཅད་མ་མཆིས་པར་འགྱུར་ལ་སེམས་ཅན་ཆེན་པོ་དེའི་དྲུང་ན་བདག་ཅག་བྲན་གྱི་ཚུལ་ལམ། བུའི་ཚུལ་དུ་གནས་པར་བགྱིའོ། །
- 87a
གང་དུ་འདི་རབ་ཏུ་སྤྱོད་པ་དེ་ན་བཅོམ་ལྡན་འདས་ཕྱག་ན་རྡོ་རྗེ་ཉིད་ལོངས་སྤྱོད་རྫོགས་པའི་སྐུས་རྡོ་རྗེ་སེམས་དཔའི་སྐུར་ཞུགས་པར་འཚལ་བར་བགྱི་སྟེ། བཅོམ་ལྡན་འདས་རྡོ་རྗེ་སེམས་དཔའ་ཀུན་ཏུ་བཟང་པོ་རེ་བ་ཐམས་ཅད་ཡོངས་སུ་སྐོང་བ་དེ་ཉིད་བརྟག་པའི་རྒྱལ་ པོའི་གཟུགས་སུ་བཞུགས་པར་འཚལ་བར་བགྱིའོ། །དེ་བཞིན་གཤེགས་པ་ཐམས་ཅད་འཁོར་དང་བཅས་ཏེ་བཞུགས་པར་འཚལ་བར་བགྱིའོ། །ས་ཕྱོགས་དེ་མཆོད་རྟེན་དུ་གྱུར་པར་འཚལ་བར་བགྱི་སྟེ། མཆོད་པར་བགྱི། ཕྱག་འཚལ་བར་བགྱི། ཀུན་ཏུ་བསྲུང་བར་ བགྱིའོ། །བདག་ཅག་ཚངས་པ་ལ་སོགས་པ་ལྷ་རྣམས་ཀྱིས་བརྟག་པའི་རྒྱལ་པོ་འདི་ཀུན་ལ་རྒྱས་པར་འཆད་པའི་རྡོ་རྗེ་སློབ་དཔོན་དཀའ་ཐུབ་ཆེན་པོ་དེའི་གཡོག་བགྱིའོ། །བྲན་གྱི་ཚུལ་དུ་གནས་པར་བགྱིའོ། །བཀའ་ཉན་པའི་ཚུལ་དུ་གནས་པར་བགྱིའོ། །བསྒོ་བ་ ཐམས་ཅད་མཉན་པར་བགྱིའོ། །ཕན་པ་དང་བདེ་བ་ཐམས་ཅད་བགྱིའོ། །དངོས་གྲུབ་ཐམས་ཅད་ཀྱང་སྩལ་བར་བགྱིའོ། །བཅོམ་ལྡན་འདས་མདོར་ན་དེའི་རྐང་པའི་རྡུལ་མགོ་བོས་བླང་བར་བགྱིའོ། །བཅོམ་ལྡན་འདས་ཕྱག་འཚལ་བར་བགྱིའོ། །བཅོམ་ལྡན་འདས་མཆོད་ པར་བགྱིའོ། །བདག་ཅག་དེའི་ཕྱི་བཞིན་དུ་རྗེས་སུ་འབྲང་ངོ་། །བཅོམ་ལྡན་འདས་དཀྱིལ་འཁོར་དུ་ཞུགས་ཏེ་དབང་བསྐུར་བ་གང་ལགས་པ་དེ་དག་ཀྱང་བདག་ཅག་གི་དཔོན་པོ་ལགས་པར་འཚལ་བར་བགྱིའོ། །ཕྱག་ན་རྡོ་རྗེ་ལགས་པར་འཚལ་བར་བགྱིའོ། །རྡོ་རྗེ་སེམས་ དཔའ་ལགས་པར་འཚལ་བར་བགྱིའོ། །བདེ་བ་ཆེན་པོ་ཀུན་ཏུ་བཟང་པོ་ལགས་པར་འཚལ་བར་བགྱིའོ། །དེ་བཞིན་གཤེགས་པ་ལགས་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཚངས་པ་ལ་སོགས་པ་ལྷ་རྣམས་ལ་འདི་སྐད་ཅེས་བཀའ་སྩལ་ཏོ། །ཚངས་ པ་ལ་སོགས་པ་ལྷ་རྣམས་ཆོས་ལ་རིམ་གྲོ་བྱ་བར་དེ་ལྟར་དམ་ཚིག་བཅས་པར་གྱུར་པ་གང་ཡིན་པ་དེ་ནི་ལེགས་སོ་ལེགས་སོ། །ལེགས་པར་སྒྲུབས་ཤིག། །།བམ་པོ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ཕྱག་ན་རྡོ་རྗེས་སྔགས་དང་། རིག་པ་དང་།
- 87b
སྙིང་པོ་ཐམས་ཅད་བརྟན་པར་བྱ་བའི་ཕྱིར་ཉིད་ཀྱི་སྙིང་པོ་འདི་བཤད་དོ། །ཨོྃ་བཛྲ་བྷྲུྃ་ཧཱུྃ་བཛྲ་པཱ་ཎི་དྲྀཌྷ་ཏིཥྛ་ཧཱུྃ་ཨོྃ་ཧཱུྃ་ཨ། ཨོྃ་བཛྲ་ཧཱུྃ་ཕཊ། ཨོྃ་དྲྀཌྷ་བཛྲ་ཧཱུྃ་ཕཊ། ཨོྃ་བཛྲ་ཧཱུྃ་ས། ཨོྃ་བཛྲ་ཧཱུྃ་ཨཿ། དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ ལ། དབུས་སུ་རྡོ་རྗེ་བྲི་བར་བྱ། །ཡང་ན་རྡོ་རྗེ་སེམས་དཔའ་འམ། །ཀུན་ཏུ་བཟང་ངམ་བདེ་བ་ཆེ། །སྤྱན་སྔར་ཕྱག་ན་རྡོ་རྗེ་ལ། །གཡས་སུ་ཕྱག་ན་རིན་ཆེན་བསྣམས། །ཕྱག་ན་པདྨ་ནུབ་ཕྱོགས་བྲི། །བྱང་ཕྱོགས་ཕྱག་ན་རྒྱ་གྲམ་བསྣམས། །ཕྱི་རོལ་དུ་ནི་ཀུན་བསྐོར་ ཅིང་། །སངས་རྒྱས་ཐམས་ཅད་གཞག་པར་བྱ། །དེ་ཡི་ཕྱི་རོལ་སེམས་དཔའ་རྣམས། །གོ་རིམས་བཞིན་དུ་བྲི་བར་བྱ། །དེ་ཡི་ཕྱི་རོལ་སེམས་དཔའ་རྣམས། །བྱམས་པ་ལ་སོགས་མཆོག་ཆེན་བྲི། །དེ་ལྟར་དགེ་སློང་ཀུན་དགའ་སོགས། །ཐུབ་རྣམས་དེ་ཡི་ཕྱི་རོལ་ བྲི། །རང་གི་ཆུང་མ་བུས་བསྐོར་བའི། །ཚངས་པ་ལ་སོགས་ཕྱི་རོལ་བྲི། །གཟའ་དང་སྐར་མའི་ལྷ་རྣམས་དང་། །རྒྱལ་པོ་བཞི་པོ་རྣམས་དང་ནི། །ཕྱོགས་སྐྱོང་འཇིག་རྟེན་སྐྱོང་བ་རྣམས། །དེ་ཡི་ཕྱི་རོལ་དམྱལ་ཀུན་དང་། །འདོད་ཆགས་ལ་སོགས་བྱོལ་སོང་འདྲི། །སྒོ་ སྒོར་གསུངས་པ་དེ་བཞིན་དུ། །སྒོ་བ་སྟོབས་ཀྱི་དམ་པ་རྣམས། །དྲི་རྣམས་ལྔ་ཡི་ཆུས་བཀང་བ། །གསེར་གྱི་བུམ་པ་འོད་ཅན་དང་། །གཏོར་མ་དང་ནི་ལྷ་བཤོས་དང་། །མེ་ཏོག་བདུག་པ་རབ་མཛེས་དང་། །གདུགས་དང་རྒྱལ་མཚན་འཕན་རྣམས་དང་། །བླ་རེ་དང་ ནི་རྔ་མཆོག་དང་། །དྲིལ་བུ་རྡོ་རྗེ་ནོར་བུ་དང་། །དོ་ཤལ་ཉི་ཟླ་ལ་སོགས་བརྒྱན། །འདོད་ཅན་རྣམས་ཀྱི་འབྲས་བུ་ནི། །འདོད་པའི་ཡོན་ཏན་ལྔས་དགང་ངོ་། །དེ་ནས་སྔགས་མཁན་ཉིད་ཀྱིས་ནི། །སྤྱན་དྲང་བདག་ཉིད་འཇུག་པར་བྱ། །བདག་ཉིད་ཀྱིས་ནི་དབང་ཡང་བསྐུར། ། སྡོམ་གནས་དམ་ཚིག་ལྡན་པ་དང་། །བླ་མ་མོས་ཤིང་མི་འཇིགས་ལ། །རིགས་སྐྱེས་སྐྱོན་དང་བྲལ་བ་དང་། །སེར་སྣ་མ་ལུས་སྤངས་གྱུར་ཅིང་། །ཡོན་ཏན་མང་པོར་ལྡན་གྱུར་པ། །གཏོང་དང་ཚུལ་ཁྲིམས་མང་དུ་ཐོས། །བྱམས་པ་དང་ནི་སྙིང་རྗེའི་སེམས། །དགའ་དང་བཏང་སྙོམས་
- 88a
གནས་པ་དང་། །སྟོང་པ་མཚན་མ་མེད་པའི་སེམས། །སྨོན་པ་མེད་པའི་ཡིད་ལྡན་པའི། །སློབ་མ་དམ་པ་སྔགས་འདི་ཡིས། །བྱང་ཆུབ་ཏུ་ནི་སེམས་བསྐྱེད་ལ། །སྔགས་མཁན་གྱིས་ནི་གཟུང་བར་བྱ། །ཨོྃ་བཛྲ་ཧཱུྃ་ཛཿ། ཨོྃ་བཛྲ་ས་མ་ཡ་པྲ་བེ་ཤ་ཧཱུྃ། ཨོྃ་བཛྲ་པཱ་ཎི་པྲ་ཏཱིཙྪ་བཛྲ་ས་ཏྭ་མ་ཧཱ་སུ་ཁ་ཧཱུྃ། ཧ་ཧ་ཧོ་ས་མ་ཡ་སྟྭྃ། མེ་ཏོག་གི་ཕྲེང་བ་དོར་ནས་གང་ལ་བབ་པའི་སྔགས་དང་ཕྱག་རྒྱས་མགོ་བོ་ལ་བཅིང་བར་བྱའོ། །དེ་ནས་དམ་ཚིག་སྦྱིན་པར་བྱ་སྟེ། ཨོྃ་ཅི་སྟེ་ཁྱོད་ཀྱིས་སུ་ཡང་རུང་བ་ལ་སྨྲས་ན་ནི་ཕྱག་ན་རྡོ་རྗེ་ཉིད་ཀྱིས་རྡོ་རྗེ་འབར་ཞིང་ རབ་ཏུ་འབར་བས་ཁྱོད་ཀྱི་མགོ་བཀས་པར་འགྱུར་རོ། །ཨོྃ་བཛྲ་ས་མ་ཡ་དྲྀ་ཌྷ་ཧཱུྃ་ཨ། དེ་ནས་འདིས་དམ་ཚིག་གི་ཆུ་བླུད་ལ་གདོང་གཡོགས་དགྲོལ་བར་བྱའོ། །ཨོྃ་བཛྲ་ཙཀྵུཿཔ་ཤྱ་ཧོ། །ཨཱ་ཛྙཱ་པ་ཡ་ཏི་པནྣ་མོ་ཀྵ་ཡ་མ་ནི་ཧཱུྃ་ཕཊ། དེ་ནས་ཕྱག་ན་རྡོ་རྗེ་ལ་སོགས་པ་སངས་རྒྱས་དང་བྱང་ ཆུབ་སེམས་དཔའ་ཐམས་ཅད་བསྟན་ཏེ། སངས་རྒྱས་ཀྱི་སྤྱན་སྔར་དབང་བསྐུར་བར་བྱའོ། །ཨོྃ་བཛྲ་པཱ་ཎི་སྭ་ཡཱནྟེ་ཨ་ནུ་རཀྟོ་ཨ་བྷི་ཥིཉྩ་ཧྲཱིཿ། ཨོྃ་བཛྲ་བཛྲ་ཨ་བྷི་ཥིཉྩ་སརྦ་བཛྲ་ཨ་བྷི་ཥེ་ཀ་ཏ་ཧཱུྃ་ཨཱཿ། ཨོྃ་བུད་དྷ་ཨ་བྷི་ཥིཉྩ་སརྦ་བུད་དྷཱ་ཨ་བྷི་ཥེ་ཀ་ཏ་ཨོྃ་ཧཱུྃ། ཨོྃ་རཏྣ་ཨ་བྷི་ཥིཉྩ་སརྦ་རཏྣ་ཨ་བྷི་ཥེ་ ཀ་ཏ་ཨོྃ་ཏྲཱྃ། ཨོྃ་པདྨ་ཨ་བྷི་ཥིཉྩ་སརྦ་པདྨ་ཨ་བྷི་ཥེ་ཀ་ཏ་ཨོྃ་ཧྲཱིཿ། ཨོྃ་ཀརྨ་ཨ་བྷི་ཥིཉྩ་སརྦ་ཀརྨ་ཨ་བྷི་ཥེ་ཀ་ཏ་ཨོྃ་ཨཱཿ། དེ་ནས་བདག་གི་ལུས་ལ་སོགས་པ་ཡོན་དུ་ཕུལ་ལ་བཀའ་མ་ནོད་པར་བྱའོ། ཨོྃ་སརྦ་ཏ་ཐཱ་ག་ཏ་ཨཱ་ཛྙཱ་ཨ་བྷི་ཥེ་ཀ་ཏ་ཨོ་ཀ་ན་ཏེ་དཱ་སྱཱ་མི་གྲྀཧྞ་བཛྲ་པྲ་སིད་དྷ་ཡེ་ཧཱུྃ། དེ་ནས་ལས་ ཐམས་ཅད་བྱེད་དུ་གཞུག་ཅིང་དངོས་གྲུབ་ཐམས་ཅད་ཀྱང་སྦྱིན་ནོ། །བདེ་བས་བདེ་བ་བསྐྱེད་ནས་ནི། །དཀྱིལ་འཁོར་བཞི་པོའི་དབུས་སུ་ནི། །ཀུན་དུ་བཟང་ངམ་བདེ་བ་ཆེ། །བདག་ཉིད་ཀྱིས་ནི་བསྒོམས་ནས་ཀྱང་། །སྙིང་གར་ཧཱུྃ་ཞེས་བྱ་བསམས་ན། །རྡོ་རྗེ་སེམས་དཔའ་མཉམ་པར་འགྱུར། ། དཔལ་ལྡན་ལས་རྣམས་ཀུན་བྱེད་ཅིང་། །ཀུན་ཏུ་བཟང་པོར་བདག་ཉིད་འགྱུར། །དེ་ལྟར་འགྱུར་བ་ཐེ་ཚོམ་མེད། །ཧཱུྃ་ལས་སངས་རྒྱས་གཟུགས་གྱུར་ན། །ཕྱག་ན་རྡོ་རྗེ་རབ་དག་ཉིད་འགྱུར། །སྙིང་གར་འཁོར་ལོ་རབ་བསྒོམས་ན། །ཕྱག་ན་རྡོ་རྗེ་འདྲ་བར་འགྱུར། །རྡོ་རྗེ་ཁྲོ་བོར་རྣམ་བསྒོམས་
- 88b
ཏེ། །སྙིང་གའི་དབུས་སུ་ཕཊ་ཅེས་པ། །ཧཱུྃ་ཞེས་བྱ་བས་བསྐོར་བསམས་ན། །ཁྲོ་བོ་སྟོབས་ཆེན་ཉིད་དུ་འགྱུར། །རྡོ་རྗེ་བརྟན་པར་བདག་བསྒྱུར་ལ། །སྙིང་གར་ཨོྃ་ཞེས་བྱ་བ་ཡིས། །བསྐོར་བའི་ཧཱུྃ་དང་ཏྲཱྃ་ལྡན་པའི། །བསམས་ན་རིན་ཆེན་འདྲ་བར་འགྱུར། །རྡོ་རྗེར་བསྒོམས་ལ་སྙིང་གི་ནི། ། དབུས་སུ་པདྨོ་ཞེས་བྱ་བ། ཨོྃ་ཞེས་བྱ་བས་བསྐོར་བསམས་ན། །ཕྱག་ན་པདྨོ་མཉམ་པ་འགྱུར། །འཁོར་ལོ་རྒྱ་གྲམ་ཧཱུྃ་ལྡན་པར། །ཨ་ཞེས་བྱ་བས་བསྐྱེད་ནས་ཀྱང་། །ཨོྃ་ཞེས་བྱ་བས་བསྐོར་བསམས་ན། །རྡོ་རྗེ་ལས་དང་མཉམ་པར་འགྱུར། །དེ་ནས་ལས་རྣམས་བཤད་བྱ་སྟེ། །ཞི་ བ་དང་ནི་རྒྱས་པའི་ལས། །དེ་ལྟར་དབང་དང་མངོན་སྤྱོད་རྣམས། །བཟླས་དང་སྦྱིན་སྲེག་ཆོ་ག་ཡིས། །ལས་རྣམས་ཐམས་ཅད་བྱ་བ་ཡིན། །རྡོ་རྗེ་སེམས་དཔར་བདག་བསྒྱུར་ལ། །ཞི་བའི་ལས་ནི་བརྩམ་བྱ་ཞིང་། །ཆོ་ག་ཤེས་པས་ནང་པར་ཉིད། །བཟླས་དང་སྦྱིན་སྲེག་ཉིད་བྱེད་ཅིང་། །འོད་ཟེར་ སྤྲིན་གྱིས་དེ་ལུས་ལ། །འཕྲོ་བར་གྱུར་པར་རྣམ་བསྒོམས་ཏེ། །རྟག་ཏུ་ཤར་བལྟས་འོད་ཟེར་གྱིས། །ཉེས་པ་ཐམས་ཅད་སེལ་བར་བསམ། །འདི་ནི་སེམས་ཅན་ཕན་དགའ་བས། །དེ་བཞིན་གཤེགས་པའི་རིགས་ལས་བྱ། །ཀུན་དུ་བཟང་པོའི་སྐུ་ཆེན་ནམ། །བདེ་བ་ཆེན་པོར་བསམས་ནས་ ཀྱང་། །ནང་པར་རེ་རེ་འོད་བྱེད་ན། །སྔ་མ་བཞིན་དུ་ལས་བྱས་ཏེ། །ནང་པར་སྔར་ནི་སེམས་ཅན་རྣམས། །སྡིག་ཅན་སེམས་ནི་ཞི་བར་འགྱུར། །གསེར་འོད་མཛེས་ཤིང་འབར་བ་ཡི། །རིན་ཆེན་འཛིན་དུ་བསམས་ནས་ནི། །བཟའ་བ་ལེགས་བྱས་ཉི་མ་ཡི། །གུང་ལ་རྒྱས་པའི་ལས་ཤིས་ ཏེ། །རིན་ཆེན་འདྲ་བར་ཁུང་བརྐོས་ལ། །བཟླས་དང་སྦྱིན་སྲེག་རབ་ཏུ་བྱ། །ཡང་ན་སྔགས་པས་སྔ་མ་བཞིན། །འོད་ཀྱིས་ལུས་ལ་རབ་ཏུ་དགང་། །སྦྱོར་དང་ལྡན་པས་ཁུང་བུ་ནི། །པདྨོ་འདྲ་བར་བྱས་ནས་ཀྱང་། །པདྨ་འཛིན་པར་བདག་བསྒྱུར་ལ། །བདག་དང་ཉེ་བའི་ཉི་མའི་མཐར། །བཟླས་ དང་སྦྱིན་སྲེག་ཉིད་བྱེད་ཅིང་། །འོད་ཟེར་སྤྲིན་གྱིས་ལུས་བཀང་ནས། །ཐམས་ཅད་མ་ལུས་དབང་དུ་འགྱུར། །འདྲེན་པ་ཀུན་དུ་བཟང་པོ་ཡིས། །ཞི་བའི་ལས་ནི་རབ་ཏུ་བྱ། །རྡོ་རྗེ་རིན་ཆེན་རྒྱས་པ་སྟེ། །དབང་བསྐུར་བ་ཡང་དེ་བཞིན་ནོ། །དཔལ་གྱི་རྣམ་རྒྱལ་དེ་བཞིན་དུ། །ལོངས་སྤྱོད་དབང་ཕྱུག་
- 89a
དཔལ་མཉམ་མེད། །རྡོ་རྗེ་ཉི་མ་གཟི་བརྗིད་དང་། །མདོག་སྡུག་ཤིན་ཏུ་འབར་བ་བྱ། །བཞད་ཅིང་རྨད་དུ་མཛད་པས་ནི། །དགའ་མགུ་རངས་པ་རྣམས་སུ་འགྱུར། །པདྨོ་བཞད་པས་ཆོས་ཀུན་ནི། །རྟོགས་མཛད་སངས་རྒྱས་ཐམས་ཅད་ཀྱང་། །མཉེས་འགྱུར་ ལྷ་བྲན་སྨོས་ཅི་དགོས། །གཞན་གྱི་རིགས་སོགས་ཚོགས་མཆོག་རྣམས། །རྣོན་པོས་གཅོད་པ་ཉིད་དུ་མཛད། །གདོན་དང་ཡི་དགས་འདྲེ་རྣམས་དང་། །གནོད་སྦྱིན་སྲིན་པོ་བཀའ་ཉན་དང་། །གཟའ་མཆོག་བརྒྱད་ནི་མ་རུངས་རྣམས། །འཁོར་ལོས་རྩ་ནས་འབྱིན་པར་མཛད། །ལྐུགས་ དང་ལྐུགས་པ་མ་ཡིན་དང་། །གླེན་རྣམས་མི་སྨྲ་སྨྲ་བར་མཛད། །ལྕེ་ལ་ཛཾ་ཞེས་བྱ་བ་ཡིས། །མ་རུངས་རྣམས་ཀྱང་ལྐུགས་པར་མཛད། །རྒྱ་གྲམ་གྱིས་ནི་མཆོད་པ་དང་། །སེམས་ཅན་དོན་མཛད་ཐམས་ཅད་སྟོན། །ཧཱྃ་ཞེས་བྱ་བས་འཕྲོ་མཛད་ཅིང་། །རྡོ་རྗེ་སྲུང་བས་སྲུང་བར་མཛད། ། ཧཱུྃ་ཞེས་བྱ་བའི་སོ་ཡིས་ནི། །རྡོ་རྗེ་གནོད་སྦྱིན་ཉིད་ཀྱིས་ཀྱང་། །མ་རུངས་རབ་ཏུ་མ་རུངས་ཀུན། །ཟ་བྱེད་སྡིག་སྤྱོད་སྨོས་ཅི་དགོས། །མ་རུངས་སྙིང་གར་དམ་དུ་ནི། །བཾ་ཞེས་བྱ་བ་བསམས་ནས་ཀྱང་། །དུག་དང་རིམས་དང་གདོན་ལ་སོགས། །རྡོ་རྗེ་བསྡམས་པས་བཅིང་བར་མཛད། ། བཟླས་དང་སྦྱིན་སྲེག་ལས་རྣམས་ཀྱིས། །དགོས་པ་ཐམས་ཅད་སྒྲུབ་པར་མཛད། །འོད་ཟེར་བསིལ་བས་དངོས་པོ་ལ། །རྒྱས་པར་གྱུར་པས་སྒོམ་བྱེད་ཅིང་། །ཞི་བའི་ལྷ་ཡི་རྣལ་འབྱོར་དང་། །ཞི་བའི་སེམས་ཀྱིས་ཞི་བར་བྱ། །རང་གི་ལུས་ནི་གསེར་བཅོས་དང་། །ཉི་མ་གསལ་ ཤར་དགེ་འདྲ་བར། །བསམས་ལ་རྒྱས་པར་བྱ་བའི་ཕྱིར། །འོད་ཟེར་སྤྲིན་གྱིས་དགང་བར་བྱ། །པདྨོ་སེམས་དཔའི་ཏིང་འཛིན་གྱིས། །ཧྲཱིཿའདྲ་འོད་ཟེར་བཏང་བ་ཡིས། །སྙིང་ལ་ཀུན་དུ་སྐོར་བྱེད་ཅིང་། །འདོད་པ་ཀུན་གྱི་དབང་དུ་བྱེད། །རྡོ་རྗེ་ཧཱུྃ་གི་ཏིང་འཛིན་གྱིས། །ཁྲོས་ནས་ རྡོ་རྗེ་མཚོན་ཆའི་ཆར། །སྡིག་སྤྱོད་ལུས་ལ་དབབ་བྱས་ན། །དེ་མ་ཐག་ཏུ་བརླག་པར་འགྱུར། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་ན་རྡོ་རྗེས་སེམས་ཅན་ཐམས་ཅད་ལ་ཕན་པའི་ཕྱིར་ཐེ་ཚོམ་ཐམས་ཅད་གཅོད་པ་
- 89b
ངན་སོང་ཐམས་ཅད་བཟློག་པའི་བརྟག་པ་དམ་པ་འདི་བཤད་པ་ལེགས་སོ་ལེགས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཕྱག་རྒྱའི་ལེའུ་འདི་བཤད་དོ། །ལག་པ་གཉིས་མདུན་དུ་བཞག་ལ། ཨ་ལས་ཟླ་བའི་དཀྱིལ་འཁོར་དུ་བྱིན་གྱིས་བརླབ་པར་བསམས་ཏེ། ཧཱུྃ་ཞེས་བྱ་བ་ དང་། ཨ་ཞེས་བྱ་བས་ཟླ་བའི་དཀྱིལ་འཁོར་དེ་གཉིས་ཀྱིས་བྱིན་གྱིས་བརླབས་ཏེ། ལག་པ་གཉིས་ཀྱི་ཐལ་མོ་གཉིས་ཀ་ལ་ཨ་ལ་སོགས་པའི་ཡི་གེ་བཅུ་དྲུག་གིས་བཀང་ཞིང་འཕྲོ་བར་བྱས་ཏེ། མཐེ་བོ་གཉིས་ལ་ཨོྃ་ཞེས་བྱ་བ་བསམ། མཛུབ་མོ་གཉིས་ལ་ཧཱུྃ་ཞེས་བྱ་བ་གཞག ། གུང་མོ་གཉིས་ལ་ཏྲཱྃ་ཞེས་བྱ་བ་གཞག །སྲིན་ལག་གཉིས་ལ་ཧྲཱིཿཞེས་བྱ་བ་གཞག །མཐེའུ་ཆུང་གཉིས་ལ་ཨ་ཞེས་བྱ་བ་གཞག། དེ་ལྟར་ཡི་གེ་རྣམས་གཞག་པ་བྱས་ནས་དེ་བཞིན་གཤེགས་པ་རྣམས་ཡིན་པར་མོས་པ་བསྐྱེད་དེ། ཆོས་ཐམས་ཅད་གཅིག་ལ་གཅིག་འདྲེས་པ་དང་། བདག་དང་ཡང་རྗེས་སུ་མཐུན་པར་དྲན་པར་བྱས་ཏེ། ལག་པ་གཉིས་པདྨ་ལྟ་བུར་སྦྱར་བ་བྱས་ནས་ཨོྃ་ཞེས་བྱ་བ་གཉིས་བརྐྱང་བ་དང་། ཨ་ཞེས་བྱ་བ་གཉིས་བཀུག་སྟེ། དེ་བཞིན་དུ་ཧཱུྃ་ཞེས་བྱ་བ་དང་། ཧྲཱིཿཞེས་བྱ་བ་གཉིས་པདྨའི་འདབ་མ་འདྲ་བར་བྱ། ཏྲཱྃ་ཞེས་བྱ་བ་གཉིས་གཤིབས་ ཏེ་བརྐྱང་བ་འདི་ནི་བཅོམ་ལྡན་འདས་ཀྱི་རྩ་བའི་ཕྱག་རྒྱ་ལས་ཐམས་ཅད་དང་ལྡན་པའི་དམ་ཚིག་གོ། །དེ་ཉིད་རྣོན་པོ་དང་ལྡན་པ་དང་། དེ་ལས་རབ་ཏུ་འཁོར་ལོ་འདྲ་བ་ནི་འཁོར་ལོའིའོ། །དེ་ཉིད་ལས་ཁར་བཞག་པ་ནི་སྒྲའི་སྟེ། འདི་ནི་ཕྱག་རྒྱའི་ཚོགས་སོ། །དེ་ཉིད་ལས་གཉིས་སུ་བྱས་ ནས་ལས་ཀྱིར་བྱས་ན་ལས་ཀྱིའོ། །གཡོན་པ་མགོ་ཐོད་ཐོགས་འདྲ་དང་། །གཡས་པ་མདུང་ཐུང་རྩེ་གསུམ་དང་། །གཡོན་པ་པདྨོ་ཁ་འཛུམས་དང་། །གཡས་པ་ཨོྃ་ཞེས་བྱ་བར་གཞག །གཡོན་པ་འཁོར་ལོ་བདེ་གསུམ་དང་། །ཨ་དང་ཨོྃ་གཉིས་རྩེ་སྤྲད་ལ། །ལྷག་མ་ གསུམ་ནི་རྡོ་རྗེ་ཅན། །ཨོྃ་དང་ཧཱུྃ་གཉིས་གཞུར་བྱས་ལ། །ལྷག་མ་མདར་བྱས་མདའ་ཅན་གྱིའོ། །ལག་པ་གཡས་གཡོན་འཁོར་ལོར་བྱ། །འོད་ནི་ཉི་མ་ཟླ་བའི་ཞལ། །ཐལ་མོ་དམ་སྦྱར་སོར་མོ་འཕྲོ། །གཟའ་ལྷག་རྟག་ཏུ་སེ་གོལ་གཏོགས། །དེ་ཉིད་ཚིག་དབང་གསུངས་
- 90a
པ་སྟེ། །མཆུ་ལ་ཚིག་འབྱུང་འདྲ་བར་གཞག །པ་བ་སངས་ནི་བདེ་ལྡན་པ། །སྤེན་པ་དབྱུག་པ་འཛིན་པར་བྱ། །བན་གླང་སྣ་ནི་ཆུ་སྲིན་འདྲ། །ཤེས་བྱ་རྒྱུ་སྐར་མེ་སྟག་འདྲ། །དེ་ཉིད་བསྐོར་ན་གློག་ཕྲེང་གི། །བླ་འོག་གཞག་ན་སྤྲིན་ཕྱག་རྒྱ། །འདི་དག་ ནི་སྙིང་པོའི་ཕྱག་རྒྱ་སྟེ། ལས་ཀྱི་ཕྱག་རྒྱ་ཡང་འདི་དག་ཉིད་དོ། །དེ་ཉིད་ལས་སྲིན་ལག་གཉིས་བཅིངས་པ་ནི་ཕྱག་ན་རྡོ་རྗེའི་ཕྱག་རྒྱའོ། །དེ་ཉིད་ལས་ཧཱུྃ་ཞེས་བྱ་བ་ཚིགས་བར་མ་བཅག་པ་ནི་དབང་བསྐུར་བ་སྦྱིན་པར་བྱེད་པ་སྟེ། ནམ་མཁའི་སྙིང་པོའི་ཕྱག་རྒྱའོ། །དེ་ཉིད་ལས་ཧཱུྃ་ཞེས་ བྱ་བ་བཅིངས་ཏེ། སྲིན་ལག་པདྨ་འདྲ་བར་བྱས་པ་འདི་ནི་པདྨ་ལས་བྱུང་བའི་ཕྱག་རྒྱའོ། །དེ་ཉིད་ལས་ཧཱུྃ་ཞེས་བྱ་བ་དང་། ཧྲཱིཿཞེས་བྱ་བ་གཉིས་གཤིབས་ཏེ་བསྒྲེང་བ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱའོ། །དེ་ཉིད་ལས་པདྨོ་འདྲ་བར་བྱས་པ་ནི་བདེ་བ་ཆེན་པོའི་ཕྱག་རྒྱའོ། ། དེ་ཉིད་ལས་འོད་ཟེར་འཕྲོ་བའི་ཚུལ་དུ་བྱས་པ་ནི་ཀུན་དུ་བཟང་པོའི་ཕྱག་རྒྱའོ། །དེ་ཉིད་ནང་དུ་བཀུག་པ་ནི་ཁྲོ་བོ་སྣ་ཚོགས་ཀྱི་ཕྱག་རྒྱ་གཟི་ཅན་ནོ། །དེ་ཉིད་ལས་ཤིན་ཏུ་བསྡམས་པ་ནི་རྡོ་རྗེ་བསྡམས་པའོ། །བརྐྱང་བ་ནི་གཟི་ཅན་ནོ། །ཧཱུྃ་ཞེས་བྱ་བའི་སོ་ནི་གནོད་སྦྱིན་གྱིའོ། །ཧཱུྃ་ཞེས་བྱ་ བ་གཉིས་ལྕགས་ཀྱུར་བྱས་པ་ནི་འགུགས་པའོ། །དེ་ཉིད་མདར་བྱས་པ་ནི་འདོད་པའོ། །ཧཱུྃ་དང་ཨོྃ་ཞེས་བྱ་བ་གཉིས་སྦྱར་བ་ནི་དགྱེས་པའིའོ། །དེ་ཉིད་དཀྱིལ་འཁོར་ལྟ་བུར་བྱས་པ་ནི་གཟི་བརྗིད་ཀྱིའོ། །དེ་ཉིད་ནོར་བུ་འདྲ་བར་བྱས་པ་ནི་རྒྱལ་མཚན་གྱིའོ། །བསྐོར་ན་བཞད་པའི་སྟེ། དེ་ ཉིད་ཁར་བཞག་ན་ནི་དགྱེས་ཤིང་འཛུམ་པར་མཛད་པའི་ཡ་མཚན་ནོ། །ཐལ་མོ་པདྨོ་འདྲ་བར་བཀུག་པ་ནི་པདྨའིའོ། །ཨཱཿཞེས་བྱ་བ་དང་། ཨོྃ་ཞེས་བྱ་བ་ནང་དུ་བཀུག་པ་ནི་རལ་གྲིའི་ཕྱག་རྒྱའོ། །གཅིག་ལ་གཅིག་སྦྱར་བ་ནི་འཁོར་ལོའིའོ། །སྔ་མ་ལས་ཨོྃ་ཞེས་བྱ་བ་གཉིས་ཁར་བཞག་ པ་ནི་ཚིག་འབྱུང་བ་སྟེ། མདོར་ན་ཕྱག་རྒྱ་འདི་དག་ནི་ལས་ཐམས་ཅད་སྦྱིན་པར་བྱེད་པའོ། །དེ་ཉིད་བསྡུས་མདུད་སྦྲུལ་མགོར་འགྱུར། །ཀུན་ཏུ་གནོད་སྦྱིན་མཆེ་བ་འདྲ། །སྲིན་པོ་ཡི་ནི་ཁྲག་འཕྲོག་པ། །ལག་པ་བསྐོར་བ་རླུང་གི་སྟེ། །དབྱུག་ཏོར་ལྡན་པ་གནོད་སྦྱིན་ནོ། །བུམ་པར་
- 90b
གཞག་པ་ནོར་གྱི་སྟེ། །མཐེ་བོ་སྲེ་མོའི་སྣ་འདྲར་བྱ། །མགོ་ཡི་ཐོད་པ་ནག་པོའི་སྟེ། །བྷྲིདྒི་རི་ཏི་ལག་བརྐྱང་བ། །པི་བང་གཡོན་ཐོགས་དྲི་ཟའིའོ། །ལག་གཉིས་འབར་བ་མེ་འབར་བ། །གུང་མོ་དབྱུག་འདྲ་གཤིན་རྗེའིའོ། །རྣོ་ལ་ཁྲོ་དང་དབང་བསྒྱུར་བ། །མཐེའུ་ཆུང་རལ་ གྲི་མཛུབ་ཞགས་པ། །རླུང་གི་ཕྱག་རྒྱ་རྒྱལ་མཚན་ཡིན། །དེ་ལ་སོགས་པའི་ཕྱག་རྒྱ་རྣམས། །ལག་ལས་སྐྱེ་བ་སྐྱེས་པར་འགྱུར། །ལྷ་རྣམས་ཀུན་གྱི་ཐུན་མོང་དུ། །པདྨོའི་ཕྱག་རྒྱ་བཀྲ་ཤིས་ཏེ། །ཀླུ་རྣམས་ཤེས་བྱ་ཨུཏྤལ། །དེ་ལྟར་སོ་ནི་གནོད་སྦྱིན་རྣམས། །སྲིན་པོ་རྣམས་ཀྱི་ མགོ་ཚལ་པ། །བུད་མེད་རྣམས་ཀྱི་སོར་བཅུ་བསྣོལ། །གཟའ་རྣམས་ཀྱི་ནི་དབྱུག་པ་སྟེ། །ཨརྒྷ་དབུལ་བ་རྒྱུ་སྐར་རྣམས། །དེ་དག་ཀུན་གྱི་སེམས་སྒྲུབ་པའོ། །མགོ་བོ་ཐོད་པ་ཁར་བཞག་པའི། །ཕྱག་རྒྱ་འདི་ནི་ཕྲ་མེན་མའི། །མགོ་ཐོད་ལྕེ་ཡི་ཕྱག་རྒྱ་ནི། །རྡོ་རྗེ་རྣལ་འབྱོར་མ་ཡིར་བཤད། ། དེ་དག་ཀུན་ཀྱང་ཐུན་མོང་དུ། །ཕྱག་རྒྱ་ཆེན་པོ་བཤད་པར་བྱ། །ཐལ་མོ་བརྐྱང་བར་བཤད་པ་སྟེ། །ཡང་ན་ཐལ་མོ་པདྨོར་བྱ། །རྡོ་རྗེ་ཁུ་ཚུར་བཅིངས་ནས་ནི། །ཨ་ཞེས་བྱ་བ་ལུ་གུ་རྒྱུད། །ཧཱུྃ་ཞེས་བྱ་བ་གཉིས་བསྒྲེང་ལ། །ཕྱག་ན་རྡོ་རྗེའི་ཕྱག་རྒྱ་ཡིན། །རྡོ་རྗེ་བསྡམ་པ་བསྡམས་ནས་ ཀྱང་། །ཧཱུྃ་དང་ཨ་གཉིས་གཤིབས་ཏེ་བསྒྲེང་། ཨོྃ་ཞེས་བྱ་བ་ངོས་བཅར་བའི། །ཕྱག་རྒྱ་སྣང་བ་བྱེད་པར་དགོངས། །དེ་ལས་ཨ་ཞེས་བྱ་བ་བཅིངས། །ཨོྃ་ཞེས་བྱ་བ་ནང་དུ་གཞུག །ཨོྃ་ཞེས་བྱ་བ་སྔོན་བཞིན་སྦྱར། །ཨོྃ་ཡང་ཨ་དང་འདྲ་བར་བྱ། །ཏྲཱྃ་ཞེས་བྱ་བ་གཤིབས་ནས་ནི། །ཨ་ དང་ཨོྃ་གཉིས་ལུ་གུ་རྒྱུད། །ཧཱུྃ་ཞེས་བྱ་བ་གཉིས་བསྒྲེང་ལ། །ལྷག་མ་གཤིབས་པའི་ཕྱག་རྒྱ་འདི། །བདུད་རྩི་འཁྱིལ་པར་ཤེས་པར་བྱ། །ཏྲཱྃ་ཞེས་བྱ་བ་གཤིབས་ནས་ནི། །ཧཱུྃ་ཞེས་བྱ་བའང་དེ་བཞིན་ནོ། །དེ་ལྟར་ཧཱུྃ་ཞེས་བྱ་བ་གཤིབས། །ལྷག་མ་འོད་ཟེར་འདྲ་བར་བྱ། །རྟ་མགྲིན་ཕྱག་ རྒྱ་གང་ཡིན་པ། །དེ་ཡང་ལས་རྣམས་ཀུན་ལ་གསུངས། །སྤྱན་གྱི་མིག་དང་འདྲ་བར་བཤད། །མཱ་མ་ཀཱི་ཡི་རྡོ་རྗེ་འདྲ། །དཀར་མོ་པདྨ་ཉིད་དུ་བཤད། །ཨུཏྤ་ལ་ནི་སྒྲོལ་མར་དགོངས། །ས་ས་ས་ས་ས་ས་ས་ས་ས་ས་ས་ས་ས་ས་ས་ས། བ་བ་བ་བ་བ་བ་བ་བ་བ་བ་བ་བ་བ་བ་བ་བ། ཛྲ་ཛྲ་ཛྲ་ཛྲ་ཛྲ་
- 91a
ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ། ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ་ཏྭ། ཧཱུྃ། ཛ། ཧོ། དྷུ། ཏྲཱྃ། རྱཾ། བྷྲི། ཧཱ། ཧྲཱིཿ། དྷཱིཿ། ཀྲུྃ། བྷྃ། ཀྃ། རྃ། ཀྵྃ། སྃ། ཨོྃ་བུད་དྷ་ལོ་ཙ་ནེ་ཧཱུྃ། ཨོྃ་བཛྲ་མཱ་མ་ཀཱི་ཏྲཱྃ། ཨོྃ་བཛྲ་པཎྜ་རེ་དེ་ཧི་དེ་ཧི་སིད་དྷི་བོ་དྷི་ན་ལོ་ཀོཏྟ་རམྦཱ་སྭཱ་ཧཱ། ཨོྃ་བཛྲ་ཏཱ་རེ་ཏུ་ཏྟཱ་རེ་ཏུ་རེ་ ཧཱུྃ་ཧཱུྃ་ཧཱུྃ་སྭཱ་སྭཱ་སྭཱ་སྭཱ་ཧཱ། ཞི་བའི་བརྡུང་བ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། ཤམྦ་ཏ། །རྒྱས་པའི་བརྡུང་བ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། གྷུཾ། དབང་གི་བརྡུང་བ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། ཧོ་དྷུ་མ། མངོན་སྤྱོད་ཀྱི་བརྡུང་བ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། ཁ་ཏྭྃ། དེ་ནས་ལྷ་རྣམས་ཀུན་དགའ་ནས། །ཕྱག་ན་རྡོ་རྗེ་ཕྱག་འཚལ་ཏེ། །ཁྲོ་བོའི་འཁོར་ལོ་བཤད་པའི་ཕྱིར། །གསོལ་བ་འདེབས་པ་ཉིད་དུ་གྱུར། །དེ་ནས་བཅོམ་ལྡན་འདས་ཕྱག་ན་རྡོ་རྗེས་རང་གི་སྐུ་བོར་ཏེ། རྡོ་རྗེ་སེམས་དཔའི་ སྐུར་ཞུགས་ནས་གཉིས་སུ་མེད་པར་མཉམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་སེམས་དཔའི་ཁྲོ་བོ་མེ་ཡི་རྡོ་རྗེ་ཉི་མ་ཞེས་བྱ་བའི་སྙིང་པོ་འདི་ཉིད་ཀྱི་ཐུགས་ཀ་ནས་ཕྱུང་ངོ་། ཨོྃ་བཛྲ་སཏྭ་ཀྲོ་དྷཱ་ན་ལཱ་རྐ་མ་ཧཱ་བཛྲ་ཀྲོ་དྷ་དྲ་བ་དྲ་བ། བི་དྲ་བ་བི་དྲ་བ། །སརྦཱ་པཱ་ཡ་ནཱ་ཤ་ཡ་ནཱ་ ཤ་ཡ། ཧ་ར་ཧ་ར་པྲཱ་ཎཱ་ན་ཧཱུྃ་ཕཊ། ཨོྃ་ཏྲཻ་ལོ་ཀྱཱ་ལོ་ཀ་ཀཱ་ར་ཡ་ཧཱུྃ་ཕཊ། ཨོྃ་ཏྲཻ་ལོ་ཀྱ་ད་མ་ཀ་ཧཱུྃ་ཕཊ། ཨོྃ་ཏྲཻ་ལོ་ཀྱ་ནཱ་ཤ་ན་ཧཱུྃ་ཕཊ། ཨོྃ་ཏྲཻ་ལོ་ཀྱ་བནྡྷ་ཀ་ཧཱུྃ་ཕཊ། ཨོྃ་ཨ་མྲྀ་ཏེ་ཧཱུྃ་ཕཊ། ཨོྃ་ཀཱ་ལ་དཎྜ་ཧཱུྃ་ཕཊ། ཨོྃ་ཀཱ་ནི་དྷུ་ནི་ཧཱུྃ་ཕཊ། ཨོྃ་ཧྲཱིཿཧཱུྃ་ཕཊ། ཨོྃ་ཀཱ་ལ་ཨྃ་ཀུ་ཤ་ཧཱུྃ་ཕཊ། ཨོྃ་ཀཱ་ལ་པཱ་ཤ་ཧཱུྃ་ཕཊ། ཨོྃ་ཀཱ་ལ་བནྡྷ་ཧཱུྃ་ཕཊ། ཨོྃ་ཀཱ་ལ་རཱཀྵ་ས་ཧཱུྃ་ཕཊ། ཨོྃ་ཀཱ་ལ་རཱཀྵ་སི་ཧཱུྃ་ཕཊ། ཨོྃ་ཀཱ་ལ་དཎྜི་ཧཱུྃ་ཕཊ། ཨོྃ་ཀཱ་ལ་རཱ་ཏྲི་ཧཱུྃ་ཕཊ། ཨོྃ་ཀཱ་ལ་ཡཀྵི་ཎི་ཧཱུྃ་ཕཊ། དེ་ནས་དཀྱིལ་འཁོར་མི་བཟད་པ། །ཆེ་བའི་མཆོག་སྟེ་རྩིབས་བཅུ་གཉིས། །ལྷ་རྫས་འབར་བའི་ཕྲེང་བས་དཀྲིགས། །ཤིན་ཏུ་
- 91b
འབར་ཞིང་ཆེར་འབར་བ། །དེ་ལྟར་དཀྱིལ་འཁོར་བྲིས་ནས་ཀྱང་། །རྡོ་རྗེ་སེམས་དཔའ་གཞག་པར་བྱ། །འཇིག་རྟེན་གསུམ་སྣང་ལ་སོགས་ཁྲོ་བོ་ཀུན། །མ་རུངས་སྙིང་གར་མནན་ནས་སྡིགས་བྱེད་ཅིང་། །ཞལ་ནི་ཤིན་ཏུ་འཇིགས་འཇིགས་ལྟ། །ཕྱག་ནི་བརྒྱ་ཕྲག་དུ་མར་ལྡན། ། སྦྲུལ་དང་མི་སྡུག་མགོས་བརྒྱན་ལ། །སྟག་ལྤགས་ཀྱི་ནི་སྨད་གཡོགས་བགོས། །རྒྱུ་མ་ཐོགས་ཤིང་དབུ་མཐའ་ཡས། །མགོ་ཐོད་ཤས་གང་ཕྱག་ན་ཐོགས། །དེ་ལྟར་བྲིས་ནས་ཕྱི་རོལ་དུ། །སྲིན་མོའི་ཚོགས་རྣམས་གཞག་པར་བྱ། །སྒོ་བ་རྣམས་ནི་ཇི་བཞིན་དུ། །རང་ གི་ཕྱག་རྒྱའི་ལག་མཚན་ཅན། །དེ་ནས་བདུད་རྩིས་གང་བ་ཡི། །བུམ་པ་བཅུ་དྲུག་གཞག་པར་བྱ། །བདུག་པ་མེ་ཏོག་དྲི་ཞིམ་དང་། །མར་མེ་དང་ནི་བྲོ་སྣོད་དང་། །ཁ་ཟས་བཀང་བའི་གཏོར་མ་དང་། །བཟའ་དང་བཅའ་དང་བདུད་རྩི་ཞེས། །མགོ་ཐོད་གང་བར་གྱུར་པ་རྣམས། ། དཀྱིལ་འཁོར་དུ་ནི་མང་དུ་གཞག །དེ་ནས་སློབ་དཔོན་བདག་ཉིད་ཀྱང་། །མགུ་ནས་མགོ་ཐོད་ཕྱག་རྒྱས་འཇུག །ཕྱག་རྒྱ་དེ་དང་དེ་ཡིས་ནི། །ཤ་རྣམས་ཀུན་གྱི་དམ་ཚིག་སྩོལ། །དེ་ནས་འདོད་ལྡན་རྙེད་ནས་ནི། །ཧཱུྃ་ཞེས་བྱ་བས་བསྒྲུབ་པར་བྱ། །དེ་ནས་སྔགས་མཁན་སྒོ་སྒོར་ཡང་། ། དེ་ཉིད་དྲན་བྱེད་བསྙེན་པར་བྱ། །དེ་ནི་ངེས་པར་དངོས་གྲུབ་སྟེ། །ཡུད་ཙམ་འཇིག་རྟེན་གསུམ་དབང་འགྱུར། །དཀྱིལ་འཁོར་དུ་ནི་ཚོགས་རྣམས་དང་། །རང་གི་ལྷ་ཡི་ཚོགས་རྣམས་ལ། །རྒྱུད་ལས་འབྱུང་བའི་དམ་ཚིག་བརྗོད། །དེ་ནས་མཆོད་དེ་ལངས་ནས་ཀྱང་། །ཚོགས་སྤྱན་རྡོ་རྗེ་ སེམས་དཔའ་ཡི། །ཚུལ་དུ་གནས་ནས་འབྱུང་བར་བྱ། །དེ་ནས་སློབ་མ་བསྡུས་ནས་ནི། །ལག་ན་རིན་ཆེན་ཐོགས་ཏེ་གཞུག །ཨོྃ་བཛྲ་ཀྲོདྷ་ས་མ་ཡ་ཧཱུྃ། ཨོྃ་བཛྲ་རཱཀྵ་སི་ཧཱུྃ་ཕཊ། ཨོྃ་བཛྲ་ཀྲོདྷཱ་ན་ལཱ་རྐ་སྥུ་ཊ་རཏཱ་པྲ་ཏཱིཙྪ་ཧཱུྃ་ཕཊ། ཨོྃ་བཛྲ་ཀྲོ་དྷ་ན་ནི་རཀྵ་ཧཱུྃ་ཕཊ། ཨོྃ་བཛྲ་ཀྲོ་དྷ་པཱ་ ཤ་ཧཱུྃ་ཕཊ། ཨོྃ་བཛྲ་ཀྲོ་དྷ་ས་མ་ཡ་ནི་བཱི་ར་ཧཱུྃ་ཕཊ། ཨོྃ་བཛྲ་ཀྲོ་དྷ་ས་མ་ཡ་མ་ཏི་ཀྲ་མ་ཧཱུྃ་ཕཊ། ཨོྃ་བཛྲ་ཀྲོ་དྷ་ར་ཏི་ས་མ་ཡ་ཨ་བྷི་ཥིཉྩ་ཧཱུྃ་ཕཊ། འདིས་དབང་བསྐུར་ལ་དེ་བཞིན་དུ་དབང་བསྐུར་བར་བྱའོ། །དེ་ནས་དེ་དག་གིས་སྒྲུབ་པ་བཤད་དེ། བདག་ཉིད་ཁྲོ་བོར་སྙོམས་ཞུགས་ལ། །དེ་ནས་
- 92a
སྙིང་གར་ཉི་མ་བསྒོམ། །རང་གི་ཆོས་ཀྱི་ཡི་གེ་ལས། །ཁྲོས་ནས་ཡང་དང་ཡང་འཕྲོ་ཞིང་། །དེ་གཉིས་གཅིག་ཏུ་བསྒོམ་པར་བྱ། །དེ་ནས་འགྲུབ་འགྱུར་གཞན་དུ་མིན། །ཁྲོ་བོའི་རྒྱལ་པོའི་ལས་དངོས་སུ། །གསོད་པ་ཡིན་པར་བཤད་མོད་ཀྱི། །ཞི་དང་དབང་དང་ རྒྱས་པ་རྣམས། །དེ་དག་བྱེད་འགྱུར་གདོན་མི་ཟ། །རྡོ་རྗེ་སེམས་དཔའི་ཏིང་འཛིན་གནས། །ཁྲོ་བོའི་དཀྱིལ་འཁོར་བསྒོམ་བྱས་ན། །གདུག་པའི་སེམས་ཅན་འཛིན་བྱེད་ཅིང་། །མདོར་ནི་དུག་རིམས་གདོན་ལ་སོགས། །དེ་བཞིན་དེ་དག་ཐམས་ཅད་ནི། །ཐབས་ལ་སོགས་པས་ འཇོམས་བྱེད་པ། །ཁྲོས་ནས་སྙིང་ལས་འབྱུང་འགྱུར་བར། །གསད་པའི་ལས་ལ་བསམ་པར་བྱ། །ཁྲོས་པར་གྱུར་པའི་རྒོད་མའི་ཁས། །ཤ་དང་ཁྲག་རྣམས་འཇིབ་བྱེད་ཅིང་། །དེ་དག་འཚོ་བ་འཕྲོག་བྱེད་པར། །བསམས་ན་ངེས་པར་བརླག་པར་འགྱུར། །ཁྲོ་བོ་འཇིག་རྟེན་གསུམ་ སྣང་མཛད། །ཟླ་བ་འདྲ་བའི་དགེ་བསམ་ཞིང་། །འོད་ཟེར་འབྱུང་བ་མང་པོ་ཡིས། །ཁྱབ་པར་གྱུར་པར་རྣམ་བསམས་ལ། །རིམས་དང་གདོན་དང་དུག་ལ་སོགས། །འོད་ཟེར་དེས་ནི་ཕྱུང་ནས་ཀྱང་། །དེ་ཡི་ནད་རྒས་གནོད་པ་རྣམས། །ཞི་བྱའི་ཕྱིར་ནི་རིང་དུ་དོར། །དེ་ནས་ཧཱུྃ་གི་ ཚིག་བཞག་ལ། །རྡོ་རྗེ་ལྟ་བུའི་ལུས་བསམ་ཞིང་། །ཧྃ་གི་འཁོར་ལོས་གོ་ཆར་བྱ། །འོད་ཟེར་ཆུ་ཡིས་དབང་བསྐུར་རོ། །དེ་ནས་དེ་ཡི་མིང་སྨོས་ཤིང་། །བཟླས་པས་ཚུལ་བཞིན་བསམ་པར་བྱ། །དེ་ནས་ཁུང་བུ་གསུམ་ལ་རྣམ་ཅིག་ནི། །ཟླ་བ་རྒྱས་ཤིང་འོད་ཟེར་འཕྲོ་འདྲ་ལ། ། ཁྲུ་གང་ཙམ་མམ་ཡང་ན་ཁྲུ་དོ་པ། །མི་རྒྱལ་མཆོག་རྣམས་ཀྱི་ནི་གཉིས་སུ་བསྒྱུར། །དེ་ཡི་ས་རྣམས་རྣམ་པར་སྦྱང་བྱས་ཏེ། །འཁོར་ལོའི་དཀྱིལ་ན་ཟླ་བའི་དཀྱིལ་འཁོར་གྱི། །དབུས་སུ་རྡོ་རྗེ་རྩེ་ལྟར་གྱུར་པ་གཅིག །འོད་ཟེར་དཀར་པོ་ཕྲེང་བསྐོར་གཟི་ཅན་གཞག །ཕྱག་རྒྱའི་ཚོགས་ རྣམས་ཐམས་ཅད་བྲི་བྱ་སྟེ། །རིགས་བརྒྱ་ལ་སོགས་ཕྱག་རྒྱ་ཟུར་ཕྱིན་ཅིང་། །རྒྱལ་པོ་བཞི་ཡི་ཇི་བཞིན་ཕྱག་མཚན་རྣམས། །ཕྱོགས་ཀྱི་བདག་པོ་རྣམས་ཀྱང་ཕྱོགས་ཕྱོགས་སུ། །ལྷ་ཆེན་ལ་སོགས་ཕྱག་རྒྱ་ཁྱབ་འཇུག་དང་། །འཁོར་ལོ་ལྟ་བུ་ཉིད་དུ་བྲི་བར་བྱ། །དྲི་ཞིམ་
- 92b
ཆུས་བཀང་མདོག་འོད་དཀར་འགྱུར་ལ། །དཀར་པོས་ཤིན་ཏུ་དཀྲིགས་པའི་བུམ་པ་བརྒྱད། །དཀར་གསུམ་གང་བའི་གཏོར་མ་ལྷ་བཤོས་དང་། །བདུག་པ་མར་མེ་མེ་ཏོག་རྣམས་ཀྱང་གཞག །མཆོད་པ་བྱ་བའི་ཕྱིར་ནི་བླ་རེ་དང་། །གདུགས་དང་རྒྱལ་མཚན་རྔ་མ་ལ་ སོགས་གཞག །ནང་རེ་ག་པུར་བཅས་པའི་དྲི་ཞིམ་པ། །ཙནྡན་ལ་སོགས་པ་ཡི་བྱུག་པས་བྱུག །ཁ་ནི་ཤར་ཕྱོགས་བལྟས་ཏེ་སྦྱིན་སྲེག་བྱ། །དེ་བཞིན་གཤེགས་པའི་གདན་ལ་འདུག་བྱའམ། །ཡང་ན་རྣལ་འབྱོར་ལྡན་ཞིང་སེམས་དཔའི་གདན། །གོས་ལ་སོགས་ དཀར་ཕྲེང་བ་དཀར་གྱིས་བརྒྱན། །མར་དང་སྦྲང་རྩི་འོ་མ་དང་། །ནས་ཀྱི་ཐུག་པ་ལ་སོགས་དང་། །ཏིལ་མར་དང་ནི་ཏིལ་ཉིད་དང་། །ཡུངས་ཀར་དང་ནི་འབྲས་ཡོས་དང་། །འབྲས་ཆན་ནས་དང་གྲོ་རྣམས་དང་། །མེ་ཏོག་ཤིན་ཏུ་དྲི་ཞིམ་རྣམས། །ག་པུར་དང་ནི་བསྲེས་ནས་ཀྱང་། ། ཙནྡན་དཀར་པོས་བསྒོས་པ་དང་། །འདབ་བདུན་མེ་ཏོག་འབྲས་བུ་རྣམས། །ཞོ་དང་ལྡན་པའི་ཡམ་ཤིང་ལ། །དེ་དག་ཁུང་བུའི་ཁྱད་པར་ལས། །རང་གི་སོར་གྱིས་གཞལ་བྱ་ཞིང་། །ཉི་ཤུ་རྩ་བཞི་ཡན་ཆད་མཆོག །སོར་བཅུ་དྲུག་ནི་བར་མ་སྟེ། །ཐ་མ་བཅུ་གཉིས་ཉིད་དུ་ཤེས། ། ཤིན་ཏུ་ཆུང་ན་སོར་བརྒྱད་དེ། །བུད་ཤིང་ཞོ་དང་ལྡན་པ་ལ། །དྲི་ཆུས་བསྐུས་པར་ཤེས་པར་བྱ། །བུད་ཤིང་དེ་ལས་བྱུང་བའི་མེ། །སྦྱར་ནས་དྲི་ཆུས་གཏོར་ནས་ནི། །པདྨ་དཀར་པོ་ཞལ་འདྲ་དགེ། །པདྨ་ནོར་བུ་རིལ་བ་ཐོགས། །ལག་ན་དབྱུག་པ་མཆོག་ཐོགས་པ། །པདྨ་དཀར་པོའི་ སྟན་སྟེང་འདུག །དེ་ལྟའི་མེ་ལྷ་བཀུག་ནས་ཀྱང་། །ཨརྒྷ་བླངས་ཏེ་དབུལ་བར་བྱ། །དེ་ནས་ཟླ་རྒྱས་དཀར་པོ་ལ། །བཞུགས་པའི་འགྲོ་ཕན་སྤྱན་དྲངས་ཏེ། །པདྨ་དཀར་པོ་ཤར་ཕྱོགས་སུ། །བསམས་ནས་སྟེང་དུ་གཞག་པར་བྱ། །དེ་ནས་དེ་ལྟར་བསམས་ནས་ཀྱང་། །བསྒྲུབ་བྱ་རྟག་ཏུ་ མདུན་བཞག་སྟེ། །དེ་ཡི་ཉེས་པ་དྲངས་ནས་ནི། །ཤིན་ཏུ་བསྲིངས་ཏེ་སྦ་བར་བྱ། །ནང་པར་སྔར་ནི་གཙང་འགྱུར་ཞིང་། །ཤིན་ཏུ་དྲི་ཞིམ་ལུས་བྱུགས་ལ། །བདུད་རྩི་བཞིན་བསམས་སྦྱིན་སྲེག་བྱ། །དམ་ཚིག་འདི་ནི་འདའ་བར་དཀའ། །ལྷ་རྫས་བདུད་རྩི་བྲོ་ལྔ་འདི། །དང་པོར་མེ་
- 93a
ལྷ་བརྟག་བྱས་ལ། །ཁྲོ་བོ་དེ་ནི་དེ་ལུས་སུ། །སྤྱན་དྲངས་ནས་ནི་བཞུགས་པར་བསམས། །དེ་ནས་དང་པོ་ཁྲོ་བོ་ལ། །བསྲེག་བྱ་ལན་གསུམ་དབུལ་བར་བྱ། །དེ་ནས་དཀོན་མཆོག་གསུམ་ལ་གསུམ། །དེ་ནས་མེ་ལྷ་ཉིད་ལ་གསུམ། །དེ་ནས་རྡོ་རྗེ་ སེམས་དཔའ་ལ། །དེ་ནས་ལྷ་རྣམས་རེ་རེ་ལ། །དེ་ནས་བགེགས་ལ་སོགས་ལ་དབུལ། །དེ་ཡིད་འོང་བའི་ལྷ་ཡང་རུང་། །དེ་ནས་དང་པོ་ཁྲོ་བོ་ཡི། །སྔགས་ཀྱིས་ཡམ་ཤིང་སྦྱིན་སྲེག་བྱ། །དེ་ནས་གཅིག་ཏུ་བསྲེས་ནས་ཀྱང་། །བདུད་རྩི་སྔགས་ཀྱིས་བཏབ་ནས་ནི། །དེ་ བཞིན་སྦྱིན་སྲེག་བྱས་འོག་ཏུ། །བརྒྱ་སྟོང་སྙེད་དམ་ཡང་ན་ནི། །བརྒྱ་རྩ་བརྒྱད་ཀྱི་བར་དུ་ནི། །ཁྲོ་བོ་ཉིད་ལ་དབུལ་བར་བྱ། །དེ་ཡི་ལུས་ལ་དབང་བསྐུར་ཞིང་། །མཉམ་པར་བཞག་པས་བསྲུངས་ནས་ཀྱང་། །མཇུག་ཏུ་མངོན་པར་མཆོད་ནས་ནི། །ལྷ་རྣམས་ཐམས་ཅད་གཤེགས་ པར་གསོལ། །འདིས་ནི་ཞི་བའི་ལས་རྣམས་ཀྱང་། །འགྲུབ་འགྱུར་འདི་ལ་ཐེ་ཚོམ་མེད། །ཅི་སྟེ་དེ་ནི་སྡིག་ཅན་ནམ། །གལ་ཏེ་མཉམ་པར་མ་བཞག་པས། །དེ་ཚེ་དངོས་གྲུབ་མ་གྱུར་ན། །སྟོང་པ་ཉིད་དུ་རྣམ་བསྒོམས་ལ། །དེ་ནས་དེ་བཞིན་བྱས་ནས་ནི། །གདོན་མི་ཟ་བར་དངོས་ གྲུབ་འགྱུར། །ཞི་བའི་ལས་སོ། །འབྲས་བུར་ལྡན་པའི་ནགས་ཚལ་ལམ། །ཡང་ན་ནགས་སམ་རྒྱལ་པོའམ། །རྒྱལ་རིགས་ཁྱིམ་དུ་རྒྱས་པ་ནི། །དགའ་བའི་སེམས་ཀྱིས་བྱ་བ་སྟེ། །ཁྲུ་དོ་ཡང་ན་ཁྲུ་བཞི་པའམ། །དེ་ལྟར་མཆོག་ནི་ཁྲུ་བརྒྱད་དེ། །ཆུང་མཆོག་བར་མ་རྣམས་ལས་ གཅིག །རྒྱས་པའི་ལས་ནི་བྱ་བ་ཡིན། །མདོར་ན་ཧོམ་ཁུང་བྱ་བ་ནི། །སྟེགས་བུ་བརྩིགས་ཏེ་དཀྱིལ་འཁོར་ནི། །ཆུང་ངུ་ལ་ནི་ཁྲུ་བརྒྱད་དེ། །བར་མ་ལ་ནི་བཅུ་གཉིས་ཉིད། །མཆོག་ལ་བཅུ་དྲུག་ཡང་ན་ནི། །ཉི་ཤུ་རྩ་བཞིར་ཤེས་པར་བྱ། །མུ་ཁྱུད་སོར་བརྒྱད་བཅུ་དྲུག་གམ། །སུམ་ཅུ་ གཉིས་སུ་བྱ་བ་ཡིན། །ཕྱི་ཡི་འཁོར་ལོ་དེ་ཡི་ཕྱེད། །པདྨ་རྣམས་ཀྱིས་བརྒྱན་པར་བྱ། །དཀྱིལ་འཁོར་དབུས་སུ་རིན་ཆེན་དང་། །པདྨ་སྣ་ཚོགས་བརྒྱན་པར་བྱ། །དེ་ཡི་དབུས་སུ་བརྐོ་བ་ནི། །ལེགས་པར་བལྟས་ཏེ་ཕྱེད་ཀྱི་ཚད། །ཁྲུ་བཞི་པའམ་ཁྲུ་བརྒྱད་པ། །ཡང་ན་དཔལ་
- 93b
བསྐྱེད་པདྨ་འདྲ། །མདོར་ན་འཇིམ་པ་སེར་པོ་ཡིས། །དེ་བཞིན་ཁུང་མཆོག་བརྐོས་ནས་ནི། །གུར་གུམ་ལ་སོགས་བསྐུས་ནས་ཀྱང་། །དེ་ཡི་དབུས་སུ་བྲིས་ནས་ནི། །ཚོན་མཆོག་སེར་པོས་བསྐུས་ནས་ཀྱང་། །གསེར་འོད་འདྲ་བར་བསྒོམ་པར་བྱ། །དེ་ནས་ཚོན་ནི་དམར་ སེར་གྱིས། །རིན་ཆེན་པདྨ་ལ་སོགས་པའི། །ཕྱག་རྒྱའི་དཀྱིལ་འཁོར་ཁོར་ཡུག་ཏུ། །གནས་པ་ཉིད་དུ་བྲི་བར་བྱ། །རིམ་གཉིས་ཡང་ན་རིམ་བཞི་འམ། །ཡང་ན་རིམ་པ་བརྒྱད་ལྡན་པར། །དེར་ནི་སྒོ་བ་དེ་དག་ཉིད། །ཕྱག་རྒྱའི་གཟུགས་སུ་བརྟག་པར་བྱ། །བུམ་པ་ཁ་དོག་ གསེར་འདྲ་ཞིང་། །དྲི་ཆུས་རབ་ཏུ་བཀང་བ་ལ། །ཤིན་ཏུ་མཛེས་བརྒྱད་བཅུ་གཉིས་སམ། །སུམ་ཅུ་གཉིས་སམ་བཅུ་དྲུག་སྟེ། །དཀྲི་བའི་དར་ནི་སེར་པོ་ལ། །ཁ་རྒྱན་ཡལ་ག་མེ་ཏོག་ཅན། །དྲི་ཞིམ་མེ་ཏོག་བདུག་པ་དང་། །ཕྲེང་བ་མར་མེ་རྒྱན་རྣམས་དང་། །རྒྱལ་མཚན་ འཕན་ལ་སོགས་པ་དང་། །བླ་རེ་གདུགས་རྣམས་སེར་པོས་བརྒྱན། །བདག་ཉིད་གོས་དང་རྒྱན་རྣམས་དང་། །མེ་ཏོག་ལ་སོགས་སེར་པོས་བརྒྱན། །བྱང་ཕྱོགས་ཁ་བལྟས་འདུག་ནས་ནི། །འཇིག་རྟེན་གསུམ་འདུལ་ཁྲོ་བོ་ཡི། །ཉིད་ཀྱི་རྣལ་འབྱོར་རྗེས་དྲན་ཞིང་། །ལྷ་ཡི་ ཡིད་བཞིན་ནོར་རྒྱལ་མཚན། །བཙོ་མ་གསེར་གྱི་འོད་དང་འདྲ། །དེ་བཞིན་ཉི་ཟླ་ཀུ་བེ་ར། །གནོད་སྦྱིན་དང་ནི་ཛམ་བྷ་ལ། །གསེར་གྱི་ཆར་ནི་རབ་འབེབས་ཤིང་། །ཡིད་ཀྱི་འདོད་པ་སྐོང་མཛད་པ། །མདོར་ན་དེ་ཡི་འོད་ཟེར་གྱིས། །ངེས་པར་དབང་ནི་བསྐུར་བར་བསམ། ། དེ་ནས་རྒྱལ་སྲིད་ཐོབ་འགྱུར་ན། །ལུས་རྒྱས་པ་ལྟ་སྨོས་ཅི་དགོས། །རྒྱས་པར་བྱ་ཕྱིར་དེ་མིང་ནས། །སྨོས་ཏེ་བརྒྱ་ཕྲག་བརྒྱ་རྩ་བརྒྱད། །ཡང་ན་དེ་བཞིན་སྟོང་ཕྲག་ནི། །བརྒྱ་རྩ་བརྒྱད་དུ་བཟླས་པར་བྱ། །དེ་ནས་སྦྱིན་སྲེག་རབ་བྱ་སྟེ། །བྱང་ཕྱོགས་སུ་ནི་སེང་གེ་ཡི། །གདན་གྱི་ སྟེང་ན་རིན་ཆེན་དང་། །པདྨ་ཉི་ཟླ་གདན་སྟེང་ན། །རྡོ་རྗེ་རིན་ཆེན་རིན་ཆེན་མཆོག །རིན་ཆེན་དཔལ་དང་གཟི་བརྗིད་མཆོག །རྡོ་རྗེ་བཞད་དང་རྒྱལ་བ་ཡང་། །རྒྱན་རྣམས་ཀུན་གྱིས་བརྒྱན་ནས་ནི། །ཕྱག་ནི་མཆོག་སྦྱིན་གཞོལ་བ་དང་། །རིན་ཆེན་ཆར་ཡང་འབེབས་བརྩོན་ཞིང་། །
- 94a
འོད་ཟེར་སེར་འཕྲོ་ཐམས་ཅད་ཀྱིས། །དེ་ལ་ཤིན་ཏུ་ཁྱབ་བྱེད་བསམ། །དུང་དང་པི་བང་ཅང་ཏེའུ་དང་། །སིལ་སྙན་གླུ་དང་གར་མཆོག་གིས། །མདོར་ན་མཆོད་པ་བྱས་ནས་ནི། །དེ་ཡི་འོག་ཏུ་ལས་བརྩམ་མོ། །ཁུང་བུའི་ཁྱད་པར་ཉིད་ལས་ཀྱང་། །ཡམ་ ཤིང་བུད་ཤིང་ཁྱད་པར་དབྱེ། །མཛུབ་གང་ཁུ་ཚུར་བཅངས་ཁྲུ་གང་། །ཆུང་ངུ་ཉིད་དུ་བཤད་པ་ཡིན། །བར་མ་ཁྲུ་དོར་ཤེས་པར་བྱ། །ཁྲུ་བཞི་པ་ནི་མཆོག་ཡིན་ཏེ། །མེ་ཏོག་འབྲས་བུར་བཅས་རིགས་ཀྱི། །ཡ་ཏོག་མ་ཏོག་སྦྲང་རྩིར་གཞུག །འབྲུ་རྣམས་ཐམས་ཅད་འབྱོར་པ་དང་། ། མེ་ཏོག་འབྲས་བུ་སེར་པོར་ལྡན། །མར་དང་སྦྲང་རྩི་བསྲེས་ནས་ནི། །ཕལ་ཆེར་དཔལ་གྱི་འབྲས་བུར་ལྡན། །མེ་ལྷ་གསེར་དང་འདྲ་བ་ལ། །ཕྱག་བཞི་པ་སྟེ་འདིར་དེ་བཞིན། །པདྨ་གདན་བཞུགས་རྣམ་བརྒྱན་པ། །སྤྱན་དྲངས་བསྲེག་བྱ་སྦྱིན་སྲེག་བྱ། །དེ་ཡི་ལུས་སུ་ཁྲོ་རྒྱལ་ པོ། །བྱིན་ཅན་ལེགས་པར་བཅུག་ནས་ནི། །སྔོན་བཞིན་དྲན་བྱེད་དེ་ཞལ་དུ། །སྦྱིན་སྲེག་ཡོངས་སུ་བརྟག་བྱ་སྟེ། །འབུམ་མམ་ཉིས་འབུམ་ཙམ་གྱིས་ཀྱང་། །དོན་ནི་ངེས་པར་རབ་ཏུ་འགྲུབ། །འབུམ་ཕྲག་བརྒྱས་ནི་རྒྱལ་སྲིད་དམ། །ལོངས་སྤྱོད་ཕུན་སུམ་ཚོགས་པ་འགྲུབ། ། དེ་ནས་མཇུག་ཏུ་འོད་ཟེར་གྱིས། །དེ་ལ་དབང་བསྐུར་བསྲུང་བར་བྱ། །དེ་ནས་དེ་ནི་རྒྱལ་འགྱུར་ཏེ། །ཕྱག་ན་རྡོ་རྗེའི་བཀའ་བཞིན་ནོ། །རྒྱས་པའི་ལས་སོ། །དབང་ནི་ཆགས་པའི་སེམས་ཀྱིས་ཀྱང་། །ཆགས་པའི་ཏིང་ངེ་འཛིན་གྱིས་བྱ། །ཆགས་པ་བཅོམ་ལྡན་རྡོ་རྗེ་ཅན། །རྡོ་རྗེ་ཆགས་པ་དེ་ལས་བྱུང་། ། ཁམས་གསུམ་ཆགས་པར་བྱེད་པའི་ཕྱིར། །པདྨ་སེམས་དཔའ་རྟག་ཏུ་ཆགས། །དེ་བས་འདིས་ནི་དེ་དག་ནི། །ལས་འགྲུབ་པར་ནི་བཤད་པ་ཡིན། །ཆགས་དང་མཐུན་པའི་ས་ཕྱོགས་སམ། །ཆགས་པར་བྱེད་པའི་ཁྱིམ་དུ་ཤིས། །བཙོ་བླག་ཅན་ནམ་ཟླ་མཚན་ཅན། །ཁྱིམ་དུ་ཆགས་པའི་ལས་རྣམས་བྱ། །ཡིད་དང་ མཐུན་པའི་ས་ཕྱོགས་སམ། །རྡོ་རྗེ་ཆགས་པའི་གནས་ཀྱང་རུང་། །ཕྱག་ན་པདྨའི་གནས་ཉིད་དུ། །རྟག་ཏུ་རྡོ་རྗེ་སེམས་དཔའི་གནས། །བདེ་ཆེན་གྱི་ནི་གནས་ཆེན་དང་། །པདྨ་ཨུཏྤལ་རྫིང་བུ་དང་། །བནྡུ་ཀ་ཡི་མེ་ཏོག་གནས། །མེ་ཏོག་འབྲས་བུ་དམར་ཚལ་ནི། །ཡིད་འོང་སེམས་ནི་ཆགས་བྱེད་པ། །
- 94b
དེར་ནི་སྟེགས་བུ་ཁྲུ་བརྒྱད་དམ། །དེ་ལྟར་བཅུ་གཉིས་བཅུ་དྲུག་རྣམས། །བྱས་ནས་དེ་ཡི་དབུས་སུ་ཡང་། །ཧོམ་ཁུང་དཀྱིལ་འཁོར་བྱ་བ་ནི། །ཁྲུ་གང་ཡང་ན་ཁྲུ་དོའམ། །དེ་ལྟར་ཁྲུ་ནི་བཞི་བར་བྱ། །གཞུ་འདྲ་བའམ་པདྨོ་འམ། །ཡང་ན་རྡོ་རྗེ་འདྲ་བར་བྱ། །མདའ་འདྲ་ཟླ་བ་ཁམ་འདྲ་ དང་། །དེ་ལྟར་པདྨའི་འདབ་མ་འདྲ། །ཞེང་དུ་ཆུ་ཡི་ཕྱེད་ཀྱི་ཚད། །ཞེང་གི་ཕྱེད་ཀྱི་ཚད་ཙམ་དུ། །ཧོམ་ཁུང་ཟབས་སུ་བརྐོ་བར་བྱ། །མུ་ཁྱུད་སོར་ནི་བཞི་པར་བྱ། །ཉིས་འགྱུར་བ་ནི་ཉིས་འགྱུར་བྱ། །ཐ་མ་མཆོག་གི་ཁྱད་པར་ལས། །ཡམ་ཤིང་སོ་སོར་ཤེས་པར་བྱ། །ཡང་ན་ཡམ་ཤིང་སྲེག་ཤིང་ནི། ། ཚད་ནི་ཞི་བའི་ལས་སུ་གསུངས། །ཤིན་ཏུ་དམར་བའི་ཙནྡན་ནམ། །ཡང་ན་ཤིང་དམར་གཞན་ཡང་རུང་། །མེ་ཏོག་འབྲས་བུ་དམར་པོའམ། །བཙག་དང་ཙནྡན་རྒྱ་སྐྱེགས་སོགས། །ལེ་བརྒན་རྩི་དང་གུར་གུམ་གྱིས། །མདོར་ན་བུད་པའི་ཤིང་དང་ནི། །ཡམ་ཤིང་ལ་ཡང་བསྐུས་ནས་ནི། ། ཡུངས་ཀར་ཁ་དོག་དམར་པོ་དང་། །བཙག་དང་མཚལ་ཡང་དེ་བཞིན་དུ། །ཟངས་ཀྱི་ཕྱེ་དང་ཡུངས་ཀར་དང་། །སྐྱེ་ཚེ་འབྲུ་དང་ལན་ཚྭ་དང་། །ཏིལ་དང་དྲི་ཞིམ་ཐིག་ལེའི་འབྲུ། །ལ་ཕུག་ཡུངས་རྡོག་དེ་བཞིན་ཏེ། །ཁྲག་དང་རྡུལ་ནི་ཆེན་པོ་རྣམས། །བསྲེག་བྱ་ཕྱིར་ནི་བསྡུས་ནས་ཀྱང་། །སྔར་ བཤད་འབྲས་བུ་ལ་སོགས་པའི། །ཁུ་བས་ཡང་དང་ཡང་བསྐུས་ནས། །ཁྲོ་བོའི་སྔགས་ཀྱིས་བྱིན་བརླབས་ཏེ། །བ་དང་ར་ལས་བཞོས་པ་ཡི། །བཤིགས་མ་ཐག་པའི་མར་སར་དང་། །མར་དང་ཏིལ་མར་རྣམས་ཀྱིས་དགང་། །ག་པུར་ལ་སོགས་བསྒོས་ནས་ཀྱང་། །བདུད་རྩིས་བཏབ་སྟེ་ གཞག་པར་བྱ། །དེ་ནས་ཧོམ་ཁུང་དམར་པོ་ལ། །བྱི་རུའི་སྡོང་པོ་འདྲ་བར་ཡང་། །བསམས་ནས་སྤོས་དམར་ལ་སོགས་དང་། །གུར་གུམ་དམར་པོས་བྱུག་པར་བྱ། །དེ་ནས་ཁ་དོག་དམར་པོ་ཡིས། །སྟུག་པོ་ཉིད་དུ་བསྐུ་བར་བྱ། །གུར་གུམ་སེར་པོས་བསྲེས་པ་ཡི། །ཚོན་གྱིས་རི་མོ་བྲི་བ་ནི། ། ཧོམ་ཁུང་ནང་དུ་པདྨ་བྲི། །དེ་ཡི་སྟེང་དུ་མདའ་བཅས་གཞུ། །རྟག་ཏུ་ཧོམ་ཁུང་ཁོར་ཡུག་ཏུ། །པདྨ་ཉིད་ནི་བྲི་བར་བྱ། །གཞུ་ཡི་དབུས་སུ་རྡོ་རྗེ་ཉིད། །ཁོར་ཡུག་ཏུ་ནི་མདའ་ཉིད་བྲི། །གཞུ་ཡི་ཕྱི་རོལ་པདྨ་ཉིད། །བྲིས་ནས་དེ་ཡི་སྟེང་དུ་མདའ། །དེ་ཡི་ཕྱི་རོལ་རྡོ་རྗེ་དང་། །ལྕགས་ཀྱུ་མདར་
- 95a
བཅས་གཞུ་བྲིས་ལ། །ལྷོ་ཕྱོགས་རྒྱལ་མཚན་རིན་ཆེན་དང་། །གཟི་བརྗིད་དཀྱིལ་འཁོར་བྲི་བར་བྱ། །པདྨ་རལ་གྲི་འཁོར་ལོ་རྣམས། །ནུབ་ཕྱོགས་ཉིད་དུ་བྲི་བར་བྱ། །རྡོ་རྗེ་མཆེ་བ་གོ་ཆ་མཆོག །བྱང་ཕྱོགས་སུ་ནི་བྲི་བར་བྱ། །གྲྭ་རྣམས་སུ་ནི་སྤོས་ལ་སོགས། ། ཕྱག་རྒྱའི་གཟུགས་སུ་བྲི་བྱ་ཞིང་། །མེ་ཏོག་དམར་པོ་ལ་སོགས་པས། །ཤིན་ཏུ་སྔ་མ་བཞིན་མཆོད་དེ། །དཔལ་ལྡན་གོས་དང་ཕྲེང་བ་དང་། །དམར་པོའི་དྲི་ནི་བསྐུས་ནས་ཀྱང་། །རྟག་ཏུ་ཐུབ་པ་ནུབ་བལྟས་ལ། །དམར་ཐག་མ་ཆད་ལས་བྱ་སྟེ། །པདྨ་དམར་པོའི་གདན་བསམས་ལ། ། རབ་ཆགས་ཕྱག་ན་པདྨ་བསྣམས། །གཡོན་དུ་རྡོ་རྗེ་ཆགས་པ་ལ། །གཡས་སུ་བདེ་བ་ཆེན་པོ་སྟེ། །བསམས་ན་དེ་ཡི་དབུས་སུ་ནི། །ཆུ་སྲིན་རྒྱལ་མཚན་འཛིན་པ་གཞག །རྡོ་རྗེ་གཞུ་དང་གཡོན་འགྱིང་མ། །མེ་ཏོག་དམར་རྒྱན་རབ་དགྱེས་མ། །དྲི་དམར་ལ་སོགས་རབ་མཆོད་དེ། ། མདའ་དང་གཞུ་ཐོགས་དེ་བཞིན་དུ། །པདྨ་དམར་དང་དབྱིག་བསྣམས་པའི། །མེ་ཡི་ལྷ་ནི་བཀུག་ནས་ཀྱང་། །དེ་ཡི་ལུས་སུ་ཁྲོ་རྒྱལ་པོ། །ལེགས་པར་བཅུག་སྟེ་གཞག་པར་བྱ། །འོད་ཟེར་ཆགས་པས་བསྒྱུར་ནས་ནི། །དེའི་ལུས་རྡོ་རྗེ་ལྕགས་ཀྱུ་དང་། །ཞགས་པ་བཅིངས་པས་བཀུག་ ནས་ནི། །སྤྱི་བོ་ཞབས་ཀྱི་དྲུང་དུ་གཞག །དེ་ལྟར་བསམས་ཏེ་སྙོམས་ཞུགས་པས། །ལས་བྱས་པ་ནི་གང་ཡིན་པ། །དེས་ནི་ལྷ་ཡང་དབང་འགྱུར་ན། །མི་དང་ལྷ་མིན་སྨོས་ཅི་དགོས། །ལས་རྣམས་ཟིན་པར་གྱུར་པ་དང་། །ཆགས་པའི་སེམས་སུ་བྱས་ནས་ནི། །དེ་ཡི་འོད་ཟེར་སྤྱི་བོར་དགང་། ། དེ་ནི་བསྲུངས་ནས་གཏང་བར་བྱ། །དེ་ནས་རྡོ་རྗེ་འདོད་པ་ཡིས། །ལྷ་རྣམས་མཆོད་དེ་གཤེགས་པར་གསོལ། །དེ་ནས་བསྲུང་བ་བྱས་ནས་ནི། །རྡོ་རྗེ་འདོད་པས་རྟག་ཏུ་བཟླས། །དབང་གི་ལས་སོ། །དེ་ནས་བརྒྱ་བྱིན་ཚངས་སོགས་ལྷ། །ཕྱག་འཚལ་ཡང་དང་ཡང་དུ་ནི། །རིན་ཆེན་གདུགས་ལ་སོགས་ མཆོག་གི། །མཆོད་པ་སྣ་ཚོགས་བྱས་ནས་ཀྱང་། །ཕྱག་ན་རྡོ་རྗེ་རྒྱལ་དབང་ལ། །དགའ་བའི་བསམ་པས་སྟོད་བྱེད་པ། །སངས་རྒྱས་ཀུན་པས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །རྡོ་རྗེ་རྡོ་རྗེ་འཛིན་རྒྱལ་པོ། །རྡོ་རྗེ་རྡོ་རྗེ་རྡོ་རྗེ་འཛིན། །རྡོ་རྗེ་སྐུ་སྟེ་སྐུ་ཆེ་བ། །ཕྱག་ན་རྡོ་རྗེ་ཕྱག་འཚལ་
- 95b
བསྟོད། །རྡོ་རྗེའི་ཡན་ལག་རྡོ་རྗེའི་མཆོག །རྡོ་རྗེ་འབར་བ་ཆེར་འབར་བ། །རྡོ་རྗེའི་ཤུགས་ཏེ་ཤུགས་ཆེ་བ། །རྡོ་རྗེ་མཚོན་ཆ་རྡོ་རྗེ་ཆེ། །ཕྱག་ན་རྡོ་རྗེ་ཕྱག་ཆེན་པོ། །རྡོ་རྗེ་མདའ་སྟེ་རབ་འབིགས་པ། །རྡོ་རྗེ་རྣོན་པོ་རྣོ་བ་ཆེ། །ཆེ་བའི་ཆེ་བ་རྒྱ་མཚོ་ཆེ། །རྡོ་རྗེ་པདྨ་བྱང་ཆུབ་ཆེ། །བྱང་ཆུབ་སེམས་རྒྱས་རང་བྱུང་བ། །རྡོ་ རྗེའི་རྒྱ་ཆེན་རྒྱ་ཆེན་ཏེ། །རྡོ་རྗེའི་སྒྱུ་མ་རྣམ་སྦྱོང་བ། །རྡོ་རྗེ་རྒྱུ་སྟེ་གནོད་སྦྱིན་ཆེ། །རྡོ་རྗེ་པདྨ་རྣམ་སྦྱོང་བ། །རྡོ་རྗེ་ཁྲོ་བོ་དྲག་པོ་ཆེ། །རྡོ་རྗེ་དགྲ་སྡང་འཇོམས་པའི་གཙོ། །རྡོ་རྗེ་འཇིགས་བྱེད་བསྲུང་བ་ཆེ། །རྡོ་རྗེ་ལྕགས་ཀྱུ་དོན་ཡོད་བྱེད། །རྡོ་རྗེ་རོ་ལངས་རོ་ལངས་ཆེ། །རྡོ་རྗེ་སྲིན་པོ་ཟབ་བོ། །རྡོ་རྗེ་གནོད་སྦྱིན་གནོད་ སྦྱིན་ཆེ། །རྡོ་རྗེ་གདོན་ཏེ་གདོན་ཆེའི་མཆོག །འཇིགས་བྱེད་དགའ་བྱེད་དྲག་པོ་ཆེ། །རྡོ་རྗེ་འཇིགས་བྱེད་སྔགས་བྱེད་པ། །བསྒྲུབ་དཀའ་བསྒྲུབ་པས་ལེགས་པ་སྟེ། །རྡོ་རྗེ་ལེགས་པ་དགྱེས་མཛད་པ། །རྡོ་རྗེ་དགའ་བ་དགའ་བ་ཆེ། །དགའ་བའི་རྡོ་རྗེ་དབང་བྱེད་པ། །རྡོ་རྗེ་གཟི་བརྗིད་གཟི་བརྗིད་ཆེ། །འབར་འོད་ གཤིན་རྗེ་མཐར་བྱེད་པ། །རྡོ་རྗེ་དྲག་པོ་དྲག་པོ་ཆེ། །འོད་སྟུག་པས་ན་སྟུག་པ་ཆེ། །ནམ་མཁའ་དང་ནི་མཉམ་པའོ། །རེ་བ་ཐམས་ཅད་རྫོགས་མཛད་པ། །རྡོ་རྗེ་དབང་བསྐུར་རིན་ཆེན་མཆོག །རྡོ་རྗེ་རྒྱལ་མཚན་ཡོན་ཏན་མཆོག །རྡོ་རྗེ་ཡེ་ཤེས་ཡེ་ཤེས་ཆེ། །རིག་པ་བྱེ་བའི་ཚོགས་ཀྱིས་བསྐོར། །ཧ་ལ་ཧ་ལ་ ནག་པོ་ཆེ། །སྒྲ་ཆེ་ཞིང་ནི་འཇོམས་པ་ཅན། །རྡོ་རྗེ་འདོད་པ་འདོད་པ་ཆེ། །རྙོག་པའི་དུས་ངན་རྣམ་སྦྱོང་བ། །སྐད་ཅིག་གཡོ་བ་ཐེ་ཚོམ་གཅོད། །གློག་བཞིན་ཞལ་གྱི་ལྗགས་ལས་འཕྲོ། །རྡོ་རྗེ་མེ་སྟེ་མ་རུངས་འདུལ། །དྲག་པོ་རབ་སྣང་སྣང་མཛད་པ། །ཉི་མ་སྟོང་གིས་གདུངས་བའི་ཞལ། །སྤྱན་དམར་འཇིགས་ པར་མཛད་པ་པོ། །ཁྲོ་བོ་དུ་མ་འོད་བཞིན་འཕྲོ། །ཕྱག་རྣམས་དུ་མ་མཚོན་ཆ་བརྒྱ། །དུ་མའི་ཞལ་ལ་སྐུ་ཡང་སྟོང་། །འཁྱིལ་ཅིང་རྒྱན་ཡང་འཁྱིལ་པ་ལ། །སེམས་ཀྱི་ཆོས་པས་སྐུ་མི་མངའ། །རྣམ་པར་རྟོག་པ་མ་ལུས་སྤངས། །མ་རིག་འཇོམས་པའི་ཚངས་པ་སྟེ། །འདོད་ཆགས་ཞེ་སྡང་དྲི་མཐར་མཛད། །སྒྱུ་མ་གཏོགས་ འདོད་རྡོ་རྗེ་ཅན། །རྩེ་གསུམ་རྩེ་གསུམ་འཆང་འཕྲོག་པ། །འདོད་ཆགས་ཞེ་སྡང་གཏི་མུག་ཆེ། །སྲིད་དང་སྲིད་མིན་རྣམ་སྦྱོང་བ། །ཞི་ཞིང་དུལ་ལ་དགའ་བ་སྟེ། །སངས་རྒྱས་སངས་རྒྱས་རབ་རྟོགས་པ། །སངས་རྒྱས་བདག་ཉིད་སངས་རྒྱས་སྐུ། །རྡོ་རྗེ་རབ་སྐྱེས་རྡོ་རྗེ་སེམས། །ཀུན་དུ་བཟང་པོ་ཆེར་བཟང་བ། །མཚན་རྣམས་
- 96a
དམ་པས་རྣམ་པར་བརྒྱན། །ཁམས་གསུམ་བདག་ཉིད་ཁྱབ་པ་པོ། །ཐམས་ཅད་རྡོ་རྗེ་བདག་ཉིད་གཙང་། །གང་གིས་འདི་བྲིས་བཀླགས་གྱུར་ཏམ། །རྟག་ཏུ་དེ་དོན་འཆང་བྱེད་དམ། །དྲན་ནམ་ཉན་པར་བྱེད་ཀྱང་རུང་། །ཕྱག་ན་རྡོ་རྗེ་འདྲ་བར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ ནས། བརྒྱ་བྱིན་དང་ཚངས་པ་ལ་སོགས་པ་ལྷ་དང་། མི་དང་། ལྷ་མ་ཡིན་དང་། དྲི་ཟ་དང་། གནོད་སྦྱིན་དང་། སྲིན་པོ་ལ་སོགས་པ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རང་ངོ་། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་རྫོགས་སོ།། །།རྒྱ་གར་གྱི་མཁན་པོ་ཤཱིནྟཾ་གརྦྷ་དང་། བོད་ཀྱི་ལོ་ཙྪ་བ་བནྡེ་ཛ་ཡ་རཀྵི་ཏས་བསྒྱུར་ཅིང་ཞུས། ཨཱ་ཙཱརྱ་རིན་ཆེན་མཆོག་གིས་སྐད་གསར་བཅད་ཀྱིས་བཅོས་ནས་གཏན་ལ་ཕབ་པ།། །།དུར་ཁྲོད་དག་དང་ཤན་པ་ཡི། །ཁྱིམ་དང་སྲིན་ པོའི་གནས་རྣམས་སུ། །མངོན་སྤྱོད་ཀྱི་ནི་ལས་བྱ་བ། །ཐབ་ཁུང་ཐ་མ་བར་མ་མཆོག །ཕྱེད་གསུམ་མམ་ཁྲུ་གསུམ་མམ། །རྐུ་དགུ་པ་ནི་བྱས་པ་ལས། །སྟེགས་བུ་དེ་ཡི་ཚད་བརྩིགས་ཏེ། །གྲུ་གསུམ་པའམ་མདུང་རྩེ་འདྲ། །ལུགས་ཕྱེ་སོལ་ཕྱེ་དུག་གིས་ནི། །བསྐུས་པས་ཐག་ཁུང་ནག་པོར་བྱ། །དབུས་སུ་རྡོ་རྗེ་རྩེ་དགུ་བ། །ནག་ པོ་ཤིན་ཏུ་འབར་བ་བྲི། །མུར་ན་སྟེང་དུ་རྩེ་གསུམ་དང་། །རྒྱ་གྲམ་པ་ཡི་རྡོ་རྗེས་མཚན། །དེ་ཡི་ཕྱི་རོལ་མུ་ཁྱུད་ལ། །དབྱུག་པ་དང་ནི་དགྲ་སྟ་དང་། །རལ་གྲི་ཤིན་ཏུ་འབར་བ་བྲི། །དེ་ཡི་ཕྱི་རོལ་ཀེང་རུས་ཏེ། །བདེ་གཤེགས་ལ་སོགས་ཕྱག་རྒྱས་མཚན། །དུད་སྤྲིན་མདོག་འདྲ་དྲང་སྲོག་མཆོག །མི་རོའི་སྟེང་བཞུགས་རྩེ་གསུམ་དང་། །གཟར་བུ་ཕྲེང་ བ་རིལ་བར་ལྡན། །དེ་ལྟའི་མེ་ལྷ་སྤྱན་དྲངས་ནས། །ལྷོར་བལྟས་ཁྲོས་པའི་སེམས་ཀྱིས་བསྲེག །ཤིན་ཏུ་གདུག་ཅིང་ཚེར་མར་བཅས། །སྲེག་ཤིང་ཡམ་ཤིང་བྱས་ནས་ཀྱང་། །ཤ་དང་ཁྲག་དང་ལྕགས་ཕྱེ་དང་། །རུས་བྱེ་དུག་དང་སྐེ་ཚེ་དང་། །དྲི་ཆེན་དྲི་ཆུ་ལ་སོགས་པའི། །རྫས་རྣམས་ཀུན་ལ་དུག་གིས་ནི། །བསྒོས་པས་ལན་གྲངས་འབུམ་བསྲེགས་ ནས། །དེ་ཡི་ལོངས་སྤྱོད་འབྱོར་པ་དང་། །གཉེན་དང་འཁོར་རང་བྲན་རྣམས་དང་། །བུ་དང་ཆུང་མར་བཅས་པ་རྣམས། །སྤངས་ཏེ་སྲོག་དང་བྲལ་ནས་ནི། །སྡུག་བསྔལ་མི་བཟད་མྱོང་བར་འགྱུར། །མངོན་སྤྱོད་ཀྱི་ལས་རྫོགས་སོ།། །།རྒྱ་གར་གྱི་མཁན་པོ་ཤཱིནྟཾ་གརྦྷ་དང་། །ལོཙྪ་བ་བནྡེ་ཛ་ཡ་རཀྵི་ཏས་བསྒྱུར་བའོ།། །།སྭ་པར་ཧི་ཏ་བྷ་བནྟུ།། །།
- 96b
༄༅༅། །རྒྱ་གར་སྐད་དུ། །སརྦ་དུརྒ་ཏི་པ་རི་ཤོདྷ་ན་ཏེ་ཛོ་རཱ་ཛ་སྱ་ཏ་ཐཱ་ག་ཏ་སྱཱ་རྷ་ཏེ་སཾ་མྱ་ཀྶཾ་བུདྡྷ་སྱ་ཀ་ལྤཻ་ཀ་དེ་ཤ་ནཱ་མ། །བོད་སྐད་དུ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་ཞེས་བྱ་བ། བཅོམ་ལྡན་འདས་དཔལ་ཤཱཀྱ་སེང་གེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྷ་ཐམས་ཅད་ཀྱི་མཆོག་དགའ་བའི་ཚལ་ན་བཞུགས་ཏེ། ནོར་བུ་དང་གསེར་གྱི་ཤིང་ལོ་མ་དང་། ཡལ་ག་དང་། ལྕུག་མར་བཅས་པའི་སྡོང་པོ་དང་། ཤིང་གེལ་པ་དང་། སྨན་ དང་། མེ་ཏོག་ཀ་མལ་དང་། མེ་ཏོག་ཨུཏྤ་ལ་དང་། མེ་ཏོག་ཀརྞི་ཀཱ་དང་། མེ་ཏོག་བཀྐུལ་དང་། མེ་ཏོག་ཏི་ལ་ཀ་དང་། མེ་ཏོག་ཨ་ཤོ་ཀ་དང་། མེ་ཏོག་མནྡཱ་ར་བ་དང་། མེ་ཏོག་མནྡཱ་ར་བ་ཆེན་པོ་ལ་སོགས་པ་མེ་ཏོག་རྣམ་པ་སྣ་ཚོགས་པས་ཉེ་བར་མཛེས་པ། དཔག་བསམ་གྱི་ཤིང་རྣམས་ཀྱིས་ཡང་དག་པར་ བརྒྱན་པ། རྒྱན་སྣ་ཚོགས་ཀྱིས་རྣམ་པར་སྤྲས་པ། བྱའི་ཚོགས་སྣ་ཚོགས་སྐད་སྙན་པ་འབྱིན་པ། རྔ་དང་། རྔ་མུ་ཀུནྡ་དང་། གླིང་བུ་དང་། རྔ་བྷི་རི་ལ་སོགས་པའི་སྒྲ་སྒྲོགས་པ། བརྒྱ་བྱིན་དང་། ཚངས་པ་ལ་སོགས་པ་དང་། ལྷའི་བུ་རྣམ་པ་སྣ་ཚོགས་པ་རྣམས་རྣམ་པར་རྩེ་བ། སངས་རྒྱས་ དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ནའོ། །བརྒྱ་བྱིན་དང་ཚངས་པ་ལ་སོགས་པའི་ལྷ་ཐམས་ཅད་དང་། རིག་པ་འཛིན་པ་དང་། ལྷའི་བུ་མོ་འཁོར་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱ་སྟོང་རྣམས་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། །མི་འམ་ཅི་དང་། ལྟོ་འཕྱེ་ཆེན་པོ་དང་། ཀླུ་ལ་སོགས་པ་འཁོར་རྣམ་པ་སྣ་ཚོགས་པ་དུ་མ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་རྣམས་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་སྤོབས་པ་དང་། བློ་གྲོས་མི་གཡོ་བ་དང་། བློ་གྲོས་ཡངས་པ་དང་། ཀུན་དུ་བློ་གྲོས་དང་། བློ་གྲོས་མཐའ་ཡས་པ་དང་། ཀུན་ནས་ལེགས་པའི་བློ་གྲོས་དང་། བློ་གྲོས་ཀ་མ་ལ་དང་། བློ་གྲོས་ཆེན་པོ་དང་། །བློ་གྲོས་ལྷ་རྫས་དང་། །བློ་གྲོས་སྣ་ཚོགས་པ་དང་། བློ་གྲོས་མ་ལུས་པ་དང་། ཀུན་དུ་བཟང་པོ་སྟེ། དེ་དག་ལ་སོགས་པ་ཕྱིར་མི་ལྡོག་པའི་བྱང་ཆུབ་
- 97a
སེམས་དཔའ་སེམས་དཔའ་ཆེན་པོའི་དགེ་འདུན་མཐའ་ཡས་ཤིང་མུ་མེད་པ་རྣམས་ཀྱིས་བསྟི་སྟང་དུ་བྱས། བླ་མར་བྱས། མཆོད་ཅིང་རྗེད་པར་བྱས། ཤིན་ཏུ་ཕུལ་དུ་བྱུང་བར་བྱས་ཏེ། འཁོར་གྱི་ཚོགས་ཆེན་པོའི་དབུས་སུ་ཚངས་པ་ཆེན་པོ་པདྨའི་གདན་ལ་བཞུགས་ཤིང་ངན་སོང་ ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་མ་ཐག་ཉིད་དུ་ངན་སོང་གསུམ་གྱི་རྒྱུད་རྣམ་པར་གྲོལ་བར་བྱེད་པ་ཞེས་བྱ་བ་བྱང་ཆུབ་སེམས་དཔའ་ཆེན་པོའི་འོད་ཟེར་འཕྲོ་བ་དང་སྡུད་པ་དུ་མའི་ཕྲེང་བ་རང་གི་མཛོད་སྤུ་ནས་ཕྱུང་སྟེ། དེས་སྟོང་གསུམ་གྱི་སྟོང་ཆེན་པོའི་ འཇིག་རྟེན་གྱི་ཁམས་ཀུན་དུ་སྣང་བར་བྱས་སོ། །ཀུན་དུ་སྣང་བར་བྱས་པ་དེས་སེམས་ཅན་ཐམས་ཅད་ཀྱི་སེམས་ཉོན་མོངས་པའི་འཆིང་བ་ལས་བཀྲོལ་ཏེ། ཡང་དག་པ་སོ་སོ་སོ་སོར་ཐོབ་པར་བྱས་ཤིང་དགའ་བའི་ཚལ་ཡང་ཀུན་དུ་སྣང་བར་བྱས་ཏེ། མཆོད་པའི་སྤྲིན་སྣ་ཚོགས་པ་རྣམས་ཀྱིས་མངོན་པར་ མཆོད་ནས་ལན་བརྒྱ་ཕྲག་སྟོང་དུ་བསྐོར་བ་བྱས་ཏེ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔར་ནོར་བུ་དྲི་མ་མེད་པའི་སྟེང་དུ་འཁོད་དེ་འདི་སྐད་ཅེས་གསོལ་ཏོ། །ཨེ་མ་ཧོ་སངས་རྒྱས་ཨེ་མ་ཧོ་སངས་རྒྱས་ཆོས། །ཨེ་མ་ཧོ་སངས་རྒྱས་མཛད་པ་ཤིན་ཏུ་ལེགས། །གང་ཕྱིར་བདག་ཅག་ངན་ སོང་ཡོངས་སུ་སྦྱངས། །བྱང་ཆུབ་སྤྱོད་པ་ཉིད་ལ་རབ་ཏུ་བཞག །དེ་ནས་ལྷའི་དབང་པོས་བཅོམ་ལྡན་འདས་ལ་ལན་བརྒྱ་ཕྲག་སྟོང་དུ་བསྐོར་བ་བྱས་ཏེ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་སངས་རྒྱས་ཀྱི་འོད་ཟེར་ཀུན་དུ་སྣང་བས་ངན་སོང་ཀུན་ ལས་རྣམ་པར་བཀྲོལ་ནས་རྣམ་པར་གྲོལ་བའི་ལམ་ལ་རབ་ཏུ་བཞག་པ་ནི་བཅོམ་ལྡན་འདས་ངོ་མཚར་ཆེའོ། །བདེ་བར་གཤེགས་པ་ངོ་མཚར་ཆེའོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་འདི་ནི་ངོ་མཚར་མི་ཆེ་སྟེ། སངས་རྒྱས་བཅོམ་ལྡན་འདས་རྣམས་ནི་ཚད་མེད་པའི་བསོད་ནམས་ ཀྱི་ཚོགས་རྣམས་ལེགས་པར་བསགས་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཡོན་ཏན་རིན་པོ་ཆེའི་འབྱུང་གནས་སུ་གྱུར་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་རྣམས་ནི་ཚད་མེད་པའི་ཐབས་ཡོངས་སུ་རྫོགས་པའོ། །ལྷའི་དབང་པོ་
- 97b
སངས་རྒྱས་བཅོམ་ལྡན་འདས་ནི་ཤེས་རབ་དཔག་ཏུ་མེད་པའོ། །སངས་རྒྱས་བཅོམ་ལྡན་འདས་རྣམས་ཀྱི་སྤྱོད་པ་ཚད་མེད་པའོ། །སངས་རྒྱས་བཅོམ་ལྡན་འདས་ཀྱིས་གདུལ་བྱའི་སྐྱེ་བོ་ཚད་མེད་པ་རྣམས་སྣོད་དུ་གྱུར་པར་མཛད་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་ པ་དང་མཉམ་པའི་ཡེ་ཤེས་གང་ཡིན་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་རྫུ་འཕྲུལ་དང་ཡང་དག་པར་ལྡན་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་སྨོན་ལམ་དང་ཡང་དག་པར་ལྡན་པའོ། །ལྷའི་དབང་པོ་དེའི་ ཕྱིར་སངས་རྒྱས་བཅོམ་ལྡན་འདས་རྣམས་ཀྱིས་སྣོད་ཇི་ལྟ་བ་དེ་ལྟར་སེམས་ཅན་རྣམས་ཀྱི་དོན་མཛད་པ་དང་། གདུལ་བྱ་ཇི་ལྟ་བ་དེ་ལྟར་སེམས་ཅན་རྣམས་ཀྱི་དོན་མཛད་པ་དང་། མོས་པ་ཇི་ལྟ་བ་བཞིན་དུ་སེམས་ཅན་རྣམས་ཀྱི་དོན་མཛད་པ་ཡིན་ནོ། །ཞེས་ཤེས་པར་བྱ་བ་འདི་ལ་འདིར་ ཐེ་ཚོམ་དང་སོམ་ཉི་དང་ཡིད་གཉིས་མི་བྱའོ། །གང་དེ་བཞིན་གཤེགས་པ་རྣམས་ཀྱིས་གདུལ་བར་མི་འགྱུར་བ་འདི་ནི་གནས་མ་ཡིན་ནོ། །དེ་ནས་ལྷའི་དབང་པོ་རང་གི་སྟན་ལས་ལངས་ནས་སླར་ཡང་བཅོམ་ལྡན་འདས་ལ་མཆོད་པ་རྒྱ་ཆེ་ཞིང་ཆེ་བ་བྱས་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ ཅེས་གསོལ་ཏོ། །སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། རྗེས་སུ་བརྩེ་བར་བྱ་བའི་ཕྱིར་དང་། སྙིང་རྗེ་དང་བཅས་པར་བྱ་བའི་ཕྱིར་དང་། བརྩེ་བ་ཆེན་པོ་དང་བཅས་པར་བྱ་བའི་ཕྱིར་དང་། བསམ་པ་ཐམས་ཅད་ཡོངས་སུ་རྫོགས་པར་བགྱི་བའི་ཕྱིར་བཅོམ་ལྡན་འདས་བདག་སྤོབས་ པ་བསྐྱེད་དུ་གསོལ། བདེ་བར་གཤེགས་པ་བདག་སྤོབས་པ་བསྐྱེད་དུ་གསོལ། བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་རིགས་འདི་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བགྱི་བ་ཞིག་ཤི་འཕོས་ཤིང་དུས་ལས་འདས་ནས་དགུང་བདུན་ལོན་ལགས་ན། བཅོམ་ལྡན་འདས་དེ་གང་དུ་སྐྱེས་ ཤིང་། བདེ་བའམ་སྡུག་བསྔལ་གང་མྱོང་བར་འགྱུར་བ་དེ་བཅོམ་ལྡན་འདས་ལུང་བསྟན་དུ་གསོལ། བདེ་བར་གཤེགས་པ་ལུང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་དེའི་དུས་དང་སྐབས་སུ་བབ་པར་ཤེས་ན་ཉོན་ཅིག །ལྷའི་དབང་པོས་གསོལ་པ།
- 98a
བཅོམ་ལྡན་འདས་འདི་ནི་དུས་ལགས་སོ། །བདེ་བར་གཤེགས་པ་འདི་ནི་སྐབས་སུ་བབ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་འདི་ནས་ཤི་འཕོས་ནས་མནར་མེད་པའི་སེམས་ཅན་དམྱལ་བ་ཆེན་ པོར་སྐྱེས་ཏེ། དེར་ལོ་སྟོང་ཕྲག་བཅུ་གཉིས་སུ་སྡུག་བསྔལ་དྲག་ཅིང་མི་བཟོད་པ་མྱོང་བར་འགྱུར་རོ། །སླར་ཡང་དམྱལ་བ་ཆུང་ངུ་རྣམས་སུ་ལོ་སྟོང་ཕྲག་བཅུར་སྡུག་བསྔལ་མྱོང་བར་འགྱུར་རོ། །སླར་ཡང་བྱོལ་སོང་དང་ཡི་དགས་རྣམས་སུ་སྐྱེས་ཏེ་ལོ་སྟོང་ཕྲག་བཅུར་སྡུག་བསྔལ་མྱོང་བར་འགྱུར་རོ། ། སླར་ཡང་མཐའ་འཁོབ་ཀྱི་སྐྱེ་བོའི་གནས་སུ་སྐྱེས་ནས། འོན་པ་དང་། དིག་པ་དང་། ལྐུགས་པའི་རང་བཞིན་ཅན་རྣམས་སུ་ལོ་སྟོང་ཕྲག་དྲུག་ཅུ་སྡུག་བསྔལ་མྱོང་བར་འགྱུར་རོ། །སླར་ཡང་ལོ་སྟོང་ཕྲག་བརྒྱད་ཅུ་རྩ་བཞིར་ནད་རྣག་ཁྲག་འཛག་པ་དང་། མཛེ་དང་ཕོལ་མིག་གིས་གཟིར་བ་དང་། སྐྱེ་བོ་མང་པོས་སྨད་པ་དང་། ཡོངས་ཀྱིས་སྤངས་པ་དང་། རིགས་དམན་པར་འགྱུར་ཞིང་སྡུག་བསྔལ་ནས་སྡུག་བསྔལ་དུ་བརྒྱུད་པ་རྒྱུན་མི་འཆད་པར་འགྱུར་ཏེ། གཞན་རྣམས་ལ་ཡང་གནོད་པ་བྱེད་ཅིང་ལས་ཀྱི་སྒྲིབ་པ་སྣ་ཚོགས་པ་ཡང་རྒྱུན་མི་འཆད་པར་བྱེད་པར་འགྱུར་རོ། །སླར་ཡང་སྡུག་བསྔལ་ རྒྱུད་པ་གཞན་དང་གཞན་མྱོང་བར་འགྱུར་རོ། །དེ་ནས་བརྒྱ་བྱིན་ལ་སོགས་པ་ལྷའི་བུ་རྣམས་དེ་ཐོས་ནས་དངངས་ཤིང་སྐྲག་སྟེ་སྐྱོ་ནས་ཁ་བུབ་ཏུ་འགྱེལ་ཏོ། །ཡང་ལངས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་སྡུག་བསྔལ་བརྒྱུད་མ་དེ་ལས་ཇི་ལྟར་ཐར་བར་འགྱུར། བདེ་བར་གཤེགས་ པ་ཇི་ལྟར་ཐར་བར་འགྱུར། བཅོམ་ལྡན་འདས་ཐབས་གང་གིས་སྡུག་བསྔལ་གྱི་ཕུང་པོ་ཆེན་པོ་དེ་ལས་གྲོལ་བར་འགྱུར་བ་དེས་ཡོངས་སུ་སྐྱོབས་མཛོད། །བདེ་བར་གཤེགས་པ་ཡོངས་སུ་སྐྱོབས་མཛོད། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་སངས་རྒྱས་བྱེ་བ་ཕྲག་བརྒྱད་ཅུ་ རྩ་བཞིས་བཤད་པ་འདི་ངས་ཀྱང་བཤད་ཀྱིས་ཉོན་ཅིག །དེ་ནས་ལྷའི་དབང་པོས་སླར་ཡང་བཅོམ་ལྡན་འདས་ལ་མེ་ཏོག་མནྡཱ་ར་བ་དང་། །མནྡཱར་བ་ཆེན་པོ་དང་། མེ་ཏོག་རྣམ་པ་སྣ་ཚོགས་པ་དང་། རིན་པོ་ཆེའི་དབུ་རྒྱན་དང་། ཕྱག་གདུབ་དང་། དཔུང་རྒྱན་དང་། སྙན་རྒྱན་དང་། དོ་ཤལ་
- 98b
དང་། དོ་ཤལ་ཕྱེད་པ་ལ་སོགས་པ་རྒྱན་གྱི་ཁྱད་པར་དུ་མས་མངོན་པར་མཆོད་དེ། ལན་བརྒྱ་སྟོང་ཕྲག་དུ་མར་བསྐོར་བ་བྱས་ཤིང་ཕྱག་འཚལ་ནས། བཅོམ་ལྡན་འདས་ལེགས་སོ། །བདེ་བར་གཤེགས་པ་ལེགས་སོ་ཞེས་བྱ་བ་ལེགས་སོའི་ཚིག་གིས་མཉེས་པར་བྱས་ནས། བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཕན་པ་དང་བདེ་བར་བགྱིད་བ་དང་། མ་འོངས་པའི་སེམས་ཅན་རྣམས་ངན་སོང་གསུམ་གྱི་རྒྱུད་ལས་རྣམ་པར་ཐར་བར་བགྱི་བའི་སླད་དུ་ལེགས་པར་བཤད་པའི་དོན་དུ་གསོལ་བ་འདེབས་ལགས་སོ། །དེ་ནས་སླར་ཚངས་པ་ལ་སོགས་པའི་ ལྷའི་ཚོགས་རྣམས་ཀྱིས་ཀྱང་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ། །བདེ་བར་གཤེགས་པ་ལེགས་སོ། །གང་གིས་མ་འོངས་པའི་སེམས་ཅན་རྣམས་ཀྱིས་མཚན་ཙམ་ཡང་ཐོས་པ་དང་ལྡན་ན་ངན་སོང་གསུམ་གྱི་ལམ་ལས་རྣམ་པར་གྲོལ་ཞིང་མཐོ་རིས་ལྷའི་འཇིག་ རྟེན་ནམ། མིའི་འཇིག་རྟེན་དུ་སྐྱེས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་ཚངས་པ་ལ་སོགས་པ་ལྷའི་བུ་དེ་རྣམས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདིས་བྱིན་གྱིས་ བརླབ་པའི་དོན་དུ་དོན་ཡོད་རྡོ་རྗེའི་བྱིན་རླབས་ཞེས་བྱཱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཨོྃ་བཛྲཱ་དྷཥྜཱི་ན་ཛྙཱ་ན་ས་མ་ཡེ་ཧཱུྃ། དེ་ལྟར་ཏིང་ངེ་འཛིན་ལ་སྙོམས་པར་ཞུགས་ནས་ཟིལ་གྱིས་མི་ནོན་པ་རྡོ་རྗེའི་བྱིན་གྱིས་རླབས་ཀྱི་བྱིན་གྱིས་བརླབས་ནས། ངན་སོང་ཐམས་ཅད་ཡོངས་སུ་ སྦྱོང་བའི་རྒྱལ་པོ་ཞེས་བྱ་བ་དེ་བཞིན་གཤེགས་པའི་སྙིང་པོ་འདི་ཕྱུང་ངོ་། །ཨོྃ་ཤོ་དྷ་ནེ་ཤོ་དྷ་ནེ་སརྦ་པཱ་པྃ་བི་ཤོ་དྷ་ནེ་ཤུདྡྷེ་བི་ཤུདྡྷེ་སརྦ་ཀརྨཱ་བ་ར་ཎ་བི་ཤུདྡྷེ་སྭཱ་ཧཱ། རིག་པ་འདི་གསུངས་མ་ཐག་ཉིད་དུ་སེམས་ཅན་ཐམས་ཅད་ངན་སོང་དུ་མི་ལྟུང་བར་བྱས་ཤིང་དམྱལ་བ་དང་། བྱོལ་སོང་དང་། ཡི་ དགས་ཀྱི་འགྲོ་བ་ཐམས་ཅད་སྦྱངས་ཏེ། སྡུག་བསྔལ་མི་བཟད་པ་རྣམ་པར་རབ་ཏུ་ཞི་ཞིང་སྐྱེ་བོ་མང་པོ་རྣམས་བདེ་བ་དང་ལྡན་པར་གྱུར་ཏོ། །དེ་ནས་གཞན་ཡང་སྲུང་བའི་སྙིང་པོ་འདི་གསུངས་སོ། །ཨོྃ་ཤོ་དྷ་ནེ་ཤོདྷ་ཡ་སརྦ་ཨ་པཱ་ཡན་སརྦ་སཏྭེ་བྷྱོ་ཧཱུྃ། ལྷའི་དབང་པོ་གཞན་ཡང་འདི་ནི་དེ་བཞིན་
- 99a
གཤེགས་པ་ཐམས་ཅད་ཀྱི་སྙིང་པོའོ། །ཨོྃ་སརྦ་ཨ་པཱ་ཡ་བི་ཤོ་དྷ་ནེ་ཧཱུྃ་ཕཊ། ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་ཉེ་བའི་སྙིང་པོའོ། །ཨོྃ་ཏྲཱ་ཊ། ལྷའི་དབང་པོ་གཞན་ཡང་འདི་ནི་ངན་སོང་ཐམས་ཅད་ཡོངས་སུ་སྦྱོང་བའི་ སྙིང་པོའོ། །ཧཱུྃ། ལྷའི་དབང་པོ་གཞན་ཡང་མདོར་ན་དྲན་པ་ཙམ་གྱིས་ཀྱང་བསོད་ནམས་ཆུང་བའི་སེམས་ཅན་རྣམས་ངན་སོང་གི་རྒྱུད་ཐམས་ཅད་ལས་བདེ་བླག་ཏུ་རྣམ་པར་གྲོལ་བར་བྱེད་པ་འདི་ཡིན་ཏེ། ན་མོ་བྷ་ག་བ་ཏེ་སརྦ་དུརྒ་ཏི་པ་རི་ཤོདྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶྃ་བུངྷཱ་ ཡ། ཏདྱ་ཐཱ། ཨོྃ་ཤོདྷ་ནཱེ་ཤོབྷ་ནེ། བི་ཤོ་དྷ་ནེ་བི་ཤོ་དྷ་ནེ། སརྦ་པཱ་བཾ་བི་ཤོ་དྷ་ནེ་ཤུདྡྷེ་བི་ཤུདྡྷེ། སརྦ་ཀརྨ་ཨཱ་བར་ཎ་བི་ཤུདྡྷེ་སྭཱ་ཧཱ། རྩ་བའི་རིག་པའོ། །ཨོྃ་སརྦ་བིཏྶ་རྦཱ་བར་ཎ་བི་ཤོ་དྷ་ཡ་ཧ་ན་ཧཱུྃ་ཕཊ། ཨོྃ་སརྦ་བིདྱ་སྭ་ཧཱུྃ། ཨོྃ་སརྦ་བིད་ཧྲཱི་ཕཊ། ཨོྃ་སརྦ་བིད་ཨཱ། ཨོྃ་སརྦ་བིད་ཏྲཊ། ཨོྃ་སརྦ་བདི་ ཨོྃ། ཨོྃ་སརྦ་བདི་ཧཱུྃ། ཨོྃ་སརྦ་བིད་ཀྲིཾ་ཏྲཊ། ཨོྃ་སརྦ་པདྨི་ཧཱ་བཛྲོ་དྦྷ་བ་དཱ་ན་པཱ་ར་མི་ཏཱ་པཱུ་ཛེ་ཧཱུྃ། སྒེག་མོའི་སྔགས་སོ། །ཨོྃ་སརྦ་པིདྨ་ཧཱ་བཛྲོདྦྷ་བ་ཤཱི་ལ་པཱ་ར་མི་ཏཱ་པཱུ་ཛེ་ཏྲཱྃ། ཕྲེང་བ་མའི་སྔགས་སོ། །ཨོྃ་སརྦ་བིདྨ་ཧཱ་བཛྲོདྷྦ་བ་ཀྵཱ་ན་ཏི་པཱ་ར་མི་ཏཱ་པཱུ་ཛེ་ཧྲཱི། གླུ་མའི་སྔགས་སོ། ། ཨོྃ་སརྦ་བདྨི་ཧཱ་བཛྲོ་དྦྷ་བ་བཱིརྱ་པཱ་ར་མི་ཏཱ་པཱུ་ཛེ་ཨཿ། གར་མའི་སྔགས་སོ། །ཨོྃ་སརྦ་བདྶི་རྦཱ་པཱ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་དྷྱན་པཱ་ར་མི་ཏཱ་བཱུ་ཛེ་ཧཱུྃ་ཧཱུྃ་ཕཊ། བདུག་པ་མའི་སྔགས་སོ། །ཨོྃ་སརྦ་བིདྶ་རྦ་དུརྒ་ཏི་པ་རི་ཤོ་དྷ་ནི་ཀླེ་ཤོ་བ་ཀླེ་ཤཙྪེ་ནི་བུཥྤ་བི་ལོ་ཀི་ནཱི་པྲཛྙཱ་པཱ་ར་མི་ཏཱ་པཱུ་ཛེ་ཏྲཱྃ་ཧཱུྃ་ཕཊ། མེ་ཏོག་མའི་སྔགས་སོ། ། ཨོྃ་སརྦ་བདྶི་རྦཱ་པཱ་ཡ་བི་ཤོདྷ་ནེ་ཛྙཱ་ནཱ་ལོ་ཀ་ཀཱ་རི་པྲ་ཎི་དྷཱ་ཎ་པཱ་ར་མི་ཏཱ་པཱུ་ཛེ་ཧྲཱིཿཧཱུྃ་ཕཊ། མར་མེ་མའི་སྔགས་སོ། །ཨོྃ་སརྦ་བིདྶ་རྦཱ་པཱ་ཡ་གནྡྷ་བི་ནཱ་ཤ་ནི། བཛྲ་གནྡྷོ་པཱ་ཡ་པཱ་ར་མི་ཏཱ་བཱུ་ཛེ་ཨཿཧཱུྃ་ཕཊ། དྲི་ཆབ་མའི་སྔགས་སོ། །ཨོྃ་སརྦ་བིདྶ་རྦ་ན་ར་ཀ་ག་ཏི་མྦ་ཀརྵ་ཎི་ཧཱུྃ་ཛཿལ་ཕཊ། རྡོ་རྗེ་ལྕགས་ཀྱུའི་སྔགས་སོ། །ཨོྃ་ སརྦ་བིདྶ་ན་ར་ཀོདྡྷ་ར་ཎཱི་ཧཱུྃ་ཧཱུྃ་ཕཊ། རྡོ་རྗེ་ཞགས་པའི་སྔགས་སོ། །ཨོྃ་སརྦ་བིདྱཱ་སརྦཱ་པཱ་ཡ་བྷནྡྷ་མོ་ཙ་ནི་ཧཱུྃ་བཾ་ཕཊ། རྡོ་རྗེ་ལྕགས་སྒྲོག་གི་སྔགས་སོ། །ཨོྃ་སརྦ་བྷིདྶ་རྦཱ་པཱ་ཡ་ག་ཏི་ག་ཧ་ན་བི་ཤོ་དྷ་ནེ་ཧཱུྃ་ཧོཿཕཊ། རྡོ་རྗེ་འབེབས་པའི་སྔགས་སོ། །ཨོྃ་མཻ་ཏྲཱི་ཧ་ར་ཎཱ་ཡ་སྭཱ་ཧཱ། བྱམས་པའིའོ། །ཨོྃ་ཨ་མོ་
- 99b
གྷཱ་མོ་གྷ་དརྴ་ནིཧཱུྃ། མཐོང་བ་དོན་ཡོད་ཀྱིའོ། །ཨོྃ་སརྦཱ་པཱ་ཡཾ་ཛཧ་སརྦཱ་པཱ་ཡ་བི་ཤོ་དྷ་ནི་ཧཱུྃ། ངན་སོང་ཀུན་འདྲེན་གྱིའོ། །ཨོྃ་སརྦ་ཤོ་ཀ་ཏ་མོ་ནི་རྒྷཱ་ཏ་ན་མ་ཏི་ཧཱུྃ། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་ཀྱིའོ། །ཨོྃ་གནྡྷ་ཧ་སྟི་ནི་ཧཱུྃ། སྦོས་ཀྱི་གླང་པོའིའོ། །ཨོྃ་ཤཱུ་རཾ་ག་མེ་ཧཱུྃ། དཔའ་བར་ འགྲོ་བའིའོ། །ཨོྃ་ག་ག་ནེ་ག་ག་ན་ལོ་ཙ་ནེ་ཧཱུྃ། ནམ་མཁའ་མཛོད་ཀྱིའོ། །ཨོྃ་ཛྙཱ་ན་ཀེ་ཏུ་ཛྙཱ་ན་བ་ཏི་ཧཱུྃ། ཡེ་ཤེས་ཏོག་གིའོ། །ཨོྃ་ཨ་མི་ཏ་པྲ་བྷེ་ཨ་མི་ཏ་བ་ཏི་ཧཱུྃ། འོད་དཔག་མེད་ཀྱིའོ། །ཨོྃ་ཙནྡྲ་སྠེ་ཙནྡྲ་བྱཱ་བ་ལོ་ཀི་ནི་ཧཱུྃ་སྭཱ་ཧཱ། ཟླ་འོད་ཀྱིའོ། །ཨོྃ་བྷ་དྲ་བ་ཏི་བྷ་དྲ་པཱ་ལེ་སྭཱ་ཧཱ། བཟང་སྐྱོང་ གིའོ། །ཨོྃ་ཛཱ་ལི་མ་ཧཱ་ཛཱ་ལི་ནི་ཧཱུྃ། དྲ་བ་ཅན་གྱི་འོད་ཀྱིའོ། །ཨོྃ་བཛྲ་གརྦྷེ་ཧཱུྃ། རྡོ་རྗེ་སྙིང་པོའིའོ། །ཨོྃ་ཨཀྵ་ཡེ་ཧཱུྃ་ཧཱུྃ། ཨཀྵ་ཡ་ཀརྨཱ་བར་ཎ་བི་ཤོ་དྷ་ནེ་སྭཱ་ཧཱ། །བློ་གྲོས་མི་ཟད་པའིའོ། །ཨོྃ་པྲ་ཏི་བྷཱ་ནེ་པྲ་ཏི་བྷཱ་ན་ཀཱུ་ཊེ་སྭཱ་ཧཱ། སྤོབས་པ་བརྩེགས་པའིའོ། །ཨོྃ་ས་མནྟ་བྷ་དྲེ་ཧཱུྃ། ཀུན་དུ་ བཟང་པོའིའོ། །བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོའི་སྔགས་འདི་དག་རིམ་པ་བཞིན་དུ་བརྗོད་དོ། །འདི་དག་གིས་རྒྱུད་དུ་ཇི་སྐད་གསུངས་པའི་རྗེས་སུ་འབྲང་བའི་ཆོ་གའི་རིམ་པས་ཉིན་རེ་ཞིང་སྔ་བའི་དུས་སུ་སྐྱེད་པའི་རིམ་པ་བསྒོམ་བཞིན་པས་ལྷའི་རྣལ་འབྱོར་ཏིང་ངེ་ འཛིན་གསུམ་མཆོག་འབད་པས་བསྒོམས་ཏེ། ངན་སོང་ཡོངས་སུ་སྦྱོང་བར་གྲུབ་པར་འགྱུར་རོ། །ལྷའི་དབང་པོ་གཞན་ཡང་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོའི་གསང་བའི་སྙིང་པོ་འདི་རིགས་ཀྱི་བུའམ། རིགས་ཀྱི་བུ་མོའམ། གང་འགའ་ ཞིག་མིང་ཙམ་ཉན་པ་དང་། འཆང་བ་དང་། ཀློག་པའམ། བྲིས་ནས་ཀྱང་མགོའམ། གཙུག་ཕུད་དམ། དཔུང་པའམ། མགུལ་བར་བཏགས་ཏེ་འཆང་བར་བྱེད་ན་དེའི་ཚེ་འདི་ཉིད་ལ་དུས་མ་ཡིན་པར་འཆི་བ་བརྒྱད་དང་། འཆི་བ་དང་འབྲེལ་པའི་རྨི་ལམ་འབྱུང་བའམ། ངན་སོང་དང་ འབྲེལ་པའི་མཚན་མ་དེ་དག་ཐམས་ཅད་རྨི་ལམ་ཙམ་དུ་ཡང་མི་འབྱུང་ངོ་། །གང་འགའ་ཞིག་དཀྱིལ་འཁོར་དུ་ཡང་ཇི་ལྟ་བ་བཞིན་དུ་ཞུགས་ནས་དབང་བསྐུར་ཏེ་སྙིང་པོ་ཡང་ཟློས་ཤིང་སྔགས་ཀྱི་དོན་སྒོམ་པར་བྱེད་ན་ལྟ་སྨོས་ཀྱང་ཅི་དགོས་ཏེ། དེ་དག་ལ་སྡིག་པ་གང་ཅུང་ཟད་ཀྱང་ཉེ་བར་མི་འགྱུར་ཞིང་
- 100a
ངན་སོང་དུ་འགྲོ་བར་མི་འགྱུར་རོ། །སྐྱེས་པ་དང་། བུད་མེད་དང་། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། བྱོལ་སོང་དང་། ཡི་དགས་དང་། དམྱལ་བ་ལ་སོགས་པ་གང་ཡང་རུང་བ་ཤི་བའི་ལུས་རྣམས་དཀྱིལ་འཁོར་དུ་བཅུག་སྟེ་དབང་བསྐུར་ན་དེ་དམྱལ་བར་ སྐྱེས་ན་ཡང་དེ་མ་ཐག་ཉིད་དུ་རྣམ་པར་ཐར་ནས་ལྷའི་རིགས་སུ་སྐྱེ་བར་འགྱུར་རོ། །ལྷའི་རིགས་དེར་སྐྱེས་པར་གྱུར་ནས་དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་མངོན་སུམ་དུ་བྱེད་ཅིང་ཕྱིར་མི་ལྡོག་པར་ཡང་འགྱུར་རོ། །རྒྱུད་ངེས་པ་ཅན་དུ་ཡང་འགྱུར་ཞིང་དེ་བཞིན་གཤེགས་པ་ཐམས་ཅད་ཀྱི་ རིགས་སུ་རབ་ཏུ་སྐྱེ་བར་འགྱུར་རོ། །སྒྲིབ་པ་རྣམས་རབ་ཏུ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་སམ། ལྷའི་རིགས་སམ། གཞན་དུ་ཡང་བདེ་བ་མྱོང་བར་འགྱུར་རོ། །ལྷའི་དབང་པོ་མདོར་ན་འཇིག་རྟེན་དང་འཇིག་རྟེན་ལས་འདས་པའི་ཕན་པ་དང་། བདེ་བ་ཐམས་ཅད་མྱོང་ བར་འགྱུར་རོ། །དེ་ནས་ལྷའི་དབང་པོས་བཅོམ་ལྡན་འདས་ལ་སྔ་མ་བཞིན་དུ་བསྐོར་བ་བྱས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ངན་སོང་ཐམས་ཅད་ཀྱི་དབང་དུ་གྱུར་པ་རྣམས་ལ་ཕན་པ་དང་བདེ་བར་བགྱི་བ་དང་། ཇི་ལྟར་སེམས་ཅན་རྣམས་ངན་སོང་ཐམས་ཅད་ལ་རྒྱབ་ ཀྱིས་ཕྱོགས་པར་བགྱི་བ་དང་། བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་བདེ་བླག་ཏུ་རྟོགས་པར་བགྱི་བའི་སླད་དུ་ཆོས་བཤད་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པས་ངན་སོང་ཐམས་ཅད་ཡོངས་སུ་སྦྱོང་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ ནས་དེ་བཞིན་གཤེགས་པ་ཐམས་ཅད་ཀྱིས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་གསུངས་ཏེ། དེ་མགོན་པོ་ཤཱཀྱ་ཐུབ་པ་ཉིད་ཀྱིས་གསུངས་པ་ནི། དང་པོ་རེ་ཞིག་རྣལ་འབྱོར་པས་སྐྱེ་བོས་དབེན་པའི་ཡིད་དང་རྗེས་སུ་མཐུན་པའི་ས་ཕྱོགས་སུ། འཇམ་ཞིང་ཤིན་ཏུ་འབོལ་བའི་གདན་ལ་འདུག་སྟེ། དྲི་བཟང་པོས་མཎྜལ་བྱས་ནས་ཉེ་བར་སྤྱོད་པ་ལྔའི་མཆོད་པ་བྱའོ། །དེ་ནས་ཆོས་ཐམས་ཅད་བདག་མེད་པར་བསྒོམས་ལ། བདག་ཉིད་ཡི་གེ་ཧཱུྃ་གིས་རྡོ་རྗེ་འབར་བ་མེ་ཉི་མར་བསྒོམས་ཏེ། དེའི་མགྲིན་པར་ཡི་གེ་ཧྲཱི་ལས་པདྨ་དང་དེའི་སྟེང་དུ་
- 100b
འདབ་མའི་རྩེ་མོར་ཡི་གེ་ཨ་ལས་ཟླ་བའི་དཀྱིལ་འཁོར་དང་། དེའི་སྟེང་དུ་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་དང་། རྡོ་རྗེ་དེ་ལྕེ་ལ་ཐིམ་པར་བྱ་ཞིང་བཛྲ་ཛི་ཧྭ་ཞེས་བྱའོ། །དེས་རྡོ་རྗེའི་ལྕེར་འགྱུར་ཞིང་སྔགས་ཟློས་པ་ནུས་པར་འགྱུར་རོ། །ལག་པ་གཉིས་ཀྱི་དབུས་སུ་ཡི་གེ་ཨ་དཀར་པོ་ལས་ཟླ་བའི་ དཀྱིལ་འཁོར་དང་དེའི་སྟེང་དུ་ཡི་གེ་ཧཱུྃ་ལས་རྡོ་རྗེ་རྩེ་ལྔ་པ་དང་དེ་གཉིས་ལག་པའི་མཐིལ་དུ་ཐིམ་པར་བྱ་སྟེ་རྡོ་རྗེའི་ལག་པར་འགྱུར་ཞིང་ཕྱག་རྒྱ་འཆིང་བར་ནུས་པར་འགྱུར་རོ། །དེ་ནས་བསྲུང་བའི་འཁོར་ལོ་བསྒོམ་པར་བྱ་སྟེ། ཨོྃ་གྲྀཧྞ་བཛྲ་ས་མ་ཡ་ཧཱུྃ་བྃ་ཞེས་བརྗོད་ཅིང་ཁྲོ་བོ་ཏི་རིན་ཏི་རི་བཅིང་ བར་བྱ་སྟེ། རྡོ་རྗེ་བསྡམས་པ་ནང་བྱས་ནས། །མཐེ་བོང་རྡོ་རྗེ་དམ་པོ་ཡིས། །ཁྲོ་བོའི་ཡིད་ཀྱིས་དགབ་བྱ་བ། །ཁྲོ་བོ་ཏི་རིན་ཏི་རི་བཅིང་། །དེ་ནས་རྡོ་རྗེ་ཕྱེད་པའི་གདན་གྱིས་འདུག་པས་རྡོ་རྗེ་ཏི་རིན་ཏི་རི་བཅིངས་ལ་རྡོ་རྗེ་ཕྲེང་བའི་དབང་བསྐུར་བ་གཟུང་བར་བྱ་སྟེ། ཨོྃ་བཛྲ་ཛྲ་ལཱ་ན་ལཱ་རྐ་ཧཱུྃ་ཨ་བྷི་ ཥིནྩ་ཏུ་མཱྃ་ཞེས་པས་སོ། །རྡོ་རྗེ་བསྡམས་པ་ལས། མཐེ་བོང་གཉིས་གཤིབས་ཏེ་བསྒྲེང་བ་རྡོ་རྗེ་བསྡམས་པའི་སྟེང་དུ་དགབ་པའི་ཚུལ་དུ་གཟུང་བ་ནི་རྡོ་རྗེ་ཏི་རིན་ཏི་རིའོ། །ཨོྃ་ཊུཾ་ཞེས་བྱ་བའི་ཡི་གེ་གཉིས་པོ་འདིའི་གོ་ཆས་གོ་ཆ་བགོས་ནས། ཨོྃ་བཛྲ་ཛྭ་ལཱ་ན་ལཱ་རྐ་ཧཱུྃ་ཞེས་བྱ་བ་སྒྲོགས་ཤིང་ གཡོན་པའི་རྡོ་རྗེ་ཁུ་ཚུར་སྙིང་གར་བྱ་སྟེ། གཡས་པའི་རྡོ་རྗེ་ཁུ་ཚུར་གསོར་ཞིང་བགེགས་ཐམས་ཅད་ལ་བསྣུན་ནོ། །དེ་ནས་རྡོ་རྗེ་མེའི་ཕྱག་རྒྱ་དང་བཅས་པས་བགེགས་བསྲེག་པར་བྱ་སྟེ། ཨོྃ་བཛྲ་ཛྭཱ་ལཱ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊ། ཞེས་བརྗོད་ཅིང་རྡོ་རྗེ་བསྡམས་པ་ནང་དུ་བཅིངས་ལ་སོར་མོ་ རྣམས་ནང་དུ་འབར་བ་ལ་མཐེ་བོ་རྡོ་རྗེ་བསྒྲེང་བ་འདི་ནི་རྡོ་རྗེ་མེའི་ཕྱག་རྒྱའོ། །དེའི་རྗེས་ལ་བཛྲ་ནེ་ཏྲཱི་བནྡྷ་སརྦ་བི་གྷྣ་དི་ན་ཞེས་པའི་ཕྱག་རྒྱ་དང་ལྡན་པས་བགེགས་ཐམས་ཅད་བཅིང་བར་བྱའོ། །རྡོ་རྗེ་བསྡམས་པ་བཅིངས་ལ་མཐེ་བོ་གཉིས་བརྐྱང་སྟེ་མཉམ་ལ་བཟུང་བ་ནི་རྡོ་རྗེ་སྤྱན་གྱི་ཕྱག་རྒྱའོ། །རྡོ་རྗེ་བསྡམས་ པ་བརྐྱང་བ་ས་ལ་བཞག་སྟེ་འོག་བཅིང་བར་བྱའོ། །ཨོྃ་བཛྲ་དྲྀ་ཌྷོ་མེ་བྷ་བ་རཀྵ་སརྦཱྃ་སྭཱ་ཧཱ་ཞེས་བྱའོ། །རྡོ་རྗེ་འཇིགས་བྱེད་སྤྱན་གྱི་ཕྱག་རྒྱ་དང་བཅས་པས་སྟེང་བཅིང་བར་བྱ་སྟེ། ཨོྃ་ཧུ་ལུ་ཧུ་ལུ་ཧཱུྃ་ཕཊ་ཅེས་པ་དང་། རྡོ་རྗེ་ཁུ་ཚུར་གཉིས་བཅིངས་ལ་མགལ་མེའི་འཁོར་ལོ་ལྟར་བསྐོར་ནས་མགོ་བོའི་སྟེང་དུ་
- 101a
བཟུང་བ་ནི་རྡོ་རྗེ་འཇིགས་བྱེད་སྤྱན་གྱི་ཕྱག་རྒྱའོ། །དེའི་འོག་ཏུ་རྡོ་རྗེ་གནོད་སྦྱིན་གྱི་ཕྱག་རྒྱ་དང་བཅས་པས་སླར་སྟེང་བཅིང་བར་བྱ་སྟེ། །ཨོྃ་བཛྲ་ཡཀྵ་ཧཱུྃ་ཞེས་པ་འདི་དང་རྡོ་རྗེ་ཐལ་མོ་མཐེ་བོ་གཉིས་བརྐྱང་ལ་མཛུབ་མོ་གཉིས་མཆེ་བ་ལྟ་བུར་བྱས་པ་ནི་རྡོ་རྗེ་གནོད་སྦྱིན་གྱི་ ཕྱག་རྒྱའོ། །རྡོ་རྗེ་གཙུག་ཏོར་གྱི་ཕྱག་རྒྱ་དང་བཅས་པས་ཤར་ཕྱོགས་བཅིང་བར་བྱ་སྟེ། །ཨོྃ་དྲུྃ་བྷནྡྷ་ཧྃ་ཞེས་པའོ། །དྲུྃ་ཞེས་པ་ཡང་ངོ་། །རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་ལུ་གུ་རྒྱུད་དུ་སྦྲེལ་ལ་མཛུབ་མོ་གཉིས་རྩེ་སྦྱར་ལ་བཟློག་ནས་སྤྱི་བོར་བཞག་པ་ནི་རྡོ་རྗེ་གཙུག་ཏོར་གྱི་ཕྱག་རྒྱའོ། ། ཡང་རྡོ་རྗེ་ཞགས་པས་ཤར་དེ་ཉིད་བཅིང་བར་བྱ་སྟེ། ཨོྃ་བཛྲ་པཱ་ཤ་ཧྲཱིཿཞེས་པ་དང་། རྡོ་རྗེ་ཁུ་ཚུར་གཉིས་ཀྱིས་མཁྲིག་མ་མདུད་པ་བྱས་པ་ནི་རྡོ་རྗེ་ཞགས་པའི་ཕྱག་རྒྱའོ། །རྡོ་རྗེ་བ་དན་གྱིས་ནུབ་ཕྱོགས་བཅིང་བར་བྱ་སྟེ། །ཨོྃ་བཛྲ་པཱ་ཏཱཾ་ཀེ་པ་ཏཱཾ་གི་ནི་ར་ཊ་ཞེས་པ་དང་། རྡོ་རྗེ་བསྡམས་པ་ལས་ མཐེ་བོང་གཉིས་སེམས་དཔའི་སྐྱིལ་ཀྲུང་བྱས་ལ་མཛུབ་མོ་གཉིས་མཉམ་པོར་གཤིབས་ཏེ་ཕྱེ་ལ་མཐེའུ་ཆུང་བ་དན་ལྟར་བྱས་པ་ནི་རྡོ་རྗེ་བ་དན་གྱིའོ། །ཕྱོགས་དང་མཚམས་དང་སྟེང་དང་འོག་གི་བགེགས་རྣམས་ཚར་གཅད་པར་བྱའོ། །རྡོ་རྗེ་དུས་ཀྱིས་བྱང་ཕྱོགས་བཅིངས་ཏེ་ཧྲཱིཿབཛྲ་ཀཱ་ལི་རུ་ཊ་མ་ཊ་ ཞེས་པ་དང་། རྡོ་རྗེ་གནོད་སྦྱིན་གྱི་ཕྱག་རྒྱ་སྙིང་གར་བསྟན་པར་བྱས་པ་ནི་རྡོ་རྗེ་དུས་ཀྱིའོ། །རྡོ་རྗེ་རྩེ་མོས་ལྷོ་བཅིངས་ཏེ། ཨོྃ་བཛྲ་ཤི་ཁ་རེ་རུ་ཊ་མ་ཊ་ཞེས་པ་དང་། རྡོ་རྗེ་ཁུ་ཚུར་གཉིས་ཀྱིས་རི་བོ་འདེགས་པའི་ཚུལ་ནི་རྡོ་རྗེ་རྩེ་མོའིའོ། །རྡོ་རྗེ་ལས་ཀྱིས་དཀྱིལ་འཁོར་བཅིང་བར་བྱས་ལ་ར་བ་བྱའོ། ། ཧཱུྃ་བཛྲ་ཀརྨ་ཞེས་པའོ། །ཡང་རྡོ་རྗེ་ཧཱུྃ་མཛད་ཀྱིས་ནང་དུ་རབ་བྱ་སྟེ་ཧཱུྃ་ཞེས་པ་དང་། རྡོ་རྗེ་ཁུ་ཚུར་གཉིས་བཅིངས་ལ་རྡོ་རྗེ་མཁྲིག་མ་གཉིས་བསྣོལ་ཏེ་མཐེའུ་ཆུང་གཉིས་ལྕགས་ཀྱུར་སྦྲེལ་ལ་མཛུབ་མོ་གཉིས་སྡིགས་མཛུབ་ཏུ་སྒྲེང་བ་ནི་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བ་རྡོ་རྗེ་ཧཱུྃ་མཛད་ ཀྱིའོ། །འདི་ཉིད་ལས་མཛུབ་མོ་དང་གུང་མོ་གཉིས་རྡོ་རྗེ་ལྟར་བྱས་པ་ནི་རྡོ་རྗེ་ལས་ཀྱིའོ། །རྡོ་རྗེ་བསྡམས་པས་རྡོ་རྗེའི་གུར་སྦྱིན་པར་བྱ་སྟེ། བཛྲ་བནྡྷ་པྃ་ཞེས་པ་འདིས་སོ། །དེ་ནས་རྡོ་རྗེ་འཁོར་ལོའི་ཕྱག་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་མདུན་དུ་རྫོགས་པར་བྱ་སྟེ། ཨོྃ་བཛྲ་
- 101b
བིརྦ་ཛྲ་ཙཀྲ་ཧཱུྃ་ཞེས་བྱའོ། །རྡོ་རྗེ་ཁུ་ཚུར་གཉིས་བཅིངས་ནས། །མཛུབ་མོ་མཐེའུ་ཆུང་རྡོ་རྗེ་བཅིང་། །རྡོ་རྗེ་འཁོར་ལོ་ཞེས་གྲགས་པ། །དཀྱིལ་འཁོར་ཐམས་ཅད་སྒྲུབ་བྱེད་ཡིན། །འདིས་ཕྱོགས་ཐམས་ཅད་དུ་གཡས་སྐོར་ཉིད་ཀྱིས་བསྐོར་བ་ལས་དཀྱིལ་འཁོར་ཐམས་ཅད་སྤྲུལ་པར་འགྱུར་རོ། ། འདི་ཉིད་ཁར་བཞག་ནས་ངེས་པར་བལྟ་བཞིན་དུ་རྡོ་རྗེ་འཁོར་ལོའི་སྔགས་ལན་བརྒྱད་བཟླས་སོ། །དེ་ཡིས་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །དེ་ནས་མངོན་སུམ་ལྟ་བུར་བློས་དམིགས་ལ་མེ་ཏོག་ལ་སོགས་པས་ཡང་དག་པར་མཆོད་དེ། ཕྱོགས་ཐམས་ཅད་དུ་ཡན་ལག་ལྔ་ པ་དང་། འདིས་ཕྱག་བྱའོ། །ཨོྃ་སརྦ་བིདྱ་ཀཱ་ཡ་བཱ་ཀྩིཏྟ་པྲ་ཎ་མེ་ན་བཛྲ་བནྡ་ནཾ་ཀ་རོ་མི་ཞེས་པའོ། །དེ་ནས་ཕྱག་བཞི་བྱ་བ་སྟེ་འདི་ལྟར་ལུས་ཐམས་ཅད་ཀྱིས་དང་། རྡོ་རྗེ་ཐལ་མོ་བརྐྱང་བས་ཤར་ཕྱོགས་སུ་ཕྱག་བྱས་ཏེ། ཨོྃ་སརྦ་བིཏྦཱུ་ཛོ་པ་སྠཱ་ནཱ་ཡཱ་ཏྨཱ་ནཾ་ནིཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ ས་ཏྭ་ཨ་དྷི་ཏིཥྛ་མཱྃ་ཞེས་པ་འདིས་སོ། །དེ་ནས་དེ་བཞིན་དུ་ལངས་ལ་རྡོ་རྗེ་ཐལ་མོ་སྙིང་གར་བྱས་ཏེ། ལྷོ་ཕྱོགས་སུ་དཔྲལ་བ་ས་ལ་རེག་ཅིང་ཕྱག་བྱ་སྟེ། ཨོྃ་སརྦ་བིདྦ་ཛྲཱ་བྷཱི་ཥེ་ཀཱ་ཡ། ཨཱ་ཏྨཱ་ནཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་རཏྣཱ་བྷི་ཥིཉྩ་མཱྃ་ཞེས་པ་འདིས་སོ། །དེ་ནས་དེ་བཞིན་དུ་ལངས་ ལ། རྡོ་རྗེ་ཐལ་མོ་སྤྱི་བོར་བཞག་སྟེ། ནུབ་ཕྱོགས་སུ་ཁས་ལ་རེག་ཅིང་ཕྱག་བྱ་སྟེ། ཨོྃ་སརྦ་བིཏྤཱུ་ཛཱ་པྲ་བརྟ་ནཱ་ནཾ་ནི་རྱཱ་ཏཱ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨ་པྲ་བརྟ་ཡ་མཱྃ་ཞེས་བྱ་བ་འདིས་སོ། །དེ་ནས་དེ་བཞིན་དུ་ལངས་ལ་རྡོ་རྗེ་ཐལ་མོ་སྤྱི་བོ་ནས་ཕབ་སྟེ། སྙིང་གར་བྱས་ལ་བྱང་ཕྱོགས་སུ་ སྤྱི་བོ་ས་ལ་རེག་ཅིང་ཕྱག་བྱ་སྟེ། ཨོྃ་སརྦ་བིཏྤཱུ་ཛཱ་ཀརྨ་ཎེ་ཨཱཏྨཱ་ནཾ། །ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱྃ་ཞེས་པ་འདིས་སོ། །དེ་ནས་པུས་མོའི་ལྷ་ང་གཉིས་ས་ལ་བཙུགས་ཏེ། རྡོ་རྗེ་ཐལ་མོ་སྙིང་གར་བྱས་ལ་སྡིག་པ་ཐམས་ཅད་སོ་སོར་བཤགས་པར་བྱ་སྟེ། ཕྱོགས་བཅུ་ན་སངས་རྒྱས་ དང་བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་དང་། རྡོ་རྗེ་དང་། ནོར་བུ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། སྔགས་དང་། རིག་པ་དང་། ལྷ་ཐམས་ཅད་བདག་ལ་དགོངས་སུ་གསོལ། བདག་
- 102a
ཆེ་གེ་མོ་ཞེས་བྱ་བ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔ་དང་། དེ་བཞིན་གཤེགས་པ་དང་། རྡོ་རྗེ་དང་། ནོར་བུ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། སྔགས་ དང་། རིག་པ་དང་། སྔགས་ཀྱི་ལྷ་ཐམས་ཅད་ཀྱི་ཡང་སྤྱན་སྔར་སྡིག་པ་ཐམས་ཅད་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་། རང་སངས་རྒྱས་དང་། འཕགས་པ་ ཉན་ཐོས་ཡང་དག་པར་སོང་བ་དང་། ཡང་དག་པར་ཞུགས་པ་རྣམས་དང་། སེམས་ཅན་གྱི་རིགས་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་མི་བསྐོར་བ་ཐམས་ཅད་ལ་ཆོས་ཀྱི་ འཁོར་ལོ་བསྐོར་བར་བྱ་བའི་ཕྱིར་བསྐུལ་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་ཐམས་ཅད་ལ་མྱ་ངན་ལས་མི་འདའ་བར་གསོལ་བ་འདེབས་སོ། །དེ་ནས་མེ་ཏོག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དོ། །ཨོྃ་སརྦ་ བིཏྦུ་ཥྤ་པཱུ་ཛཱ་མེ་གྷ་ས་མུ་དྲསྥ་ར་ཎ་ས་མ་ཡེ་ཧཱུྃ་ཞེས་པའོ། །བདུག་པའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། ཨོྃ་སརྦ་བིདྡྷཱུ་པ་པཱུ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུྃ་ཞེས་པའོ། །མར་མེའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། །ཨོྃ་སརྦ་བི་དཱ་ལོ་ཀེ་པཱུ་ཛཱ་མེ་གྷ་ས་མུ་དྲ་སྦར་ཎ་ ས་མ་ཡེ་ཧཱུྃ་ཞེས་པའོ། །དྲིའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། །ཨོྃ་སརྦ་བིངྒ་ནྡྷ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པའོ། །ཐལ་མོ་སྙིམ་པ་ཁོང་སྟོང་དུ་སྦྱར་བ་བཅིངས་ལ་འདི་སྐད་ཅེས་བརྗོད་དེ། །ཨོྃ་སརྦ་བིདཱོ་དྷྱྃ་ག་ར་ཏྣཱ་ལང་ཀཱ་ར་པཱུ་ཛཱ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུྃ་ཞེས་ པའོ། །ཨོྃ་བིདྡྷཱ་སྱ་ལཱ་སྱ་ར་ཏི་ཀྲཱི་ཌཱ་སཽ་ཁྱ་ཨ་ནུཏྟ་ར་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པ་དང་། ཨོྃ་སརྦ་བི་ད་ནུ་ཏྟ་ར་བོ་དྷྱ་ལང་ཀཱ་ར་ཝསྟྲ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པའོ། །དེ་ནས་འཁོར་བའི་སྡུག་བསྔལ་ཐམས་ཅད་རྗེས་སུ་དྲན་པར་བྱས་ནས། བཅོམ་ལྡན་
- 102b
འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། སྙིང་རྗེའི་དབང་གིས་སེམས་ཅན་ཐམས་ཅད་བསྒྲལ་བའི་ཕྱིར་བྱང་ཆུབ་ཀྱི་སེམས་བསྐྱེད་པར་བྱ་སྟེ། མ་བསྒྲལ་བ་རྣམས་བསྒྲལ་བའི་ཕྱིར་དང་། མ་གྲོལ་བ་རྣམས་གྲོལ་བར་བྱ་བའི་ཕྱིར་དང་། དབུགས་མ་ཕྱིན་པ་རྣམས་ དབུགས་དབྱུང་བའི་ཕྱིར་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བྱ་བའི་ཕྱིར་དང་། སེམས་ཅན་གྱི་ཁམས་མ་ལུས་པ་འཁོར་བའི་རྒྱ་མཚོ་ལས་ཡང་དག་པར་བསྒྲལ་བའི་ཕྱིར་བྱང་ཆུབ་ཏུ་སེམས་བསྐྱེད་པར་བགྱིའོ། །ཨོྃ་སརྦ་བིདྱཱ་བཛྲ་བོ་དྷི་ ཙིཏྟ་པཱུ་ཛཱ་མེ་གྷ་ས་མུ་དྲ་སྥར་ཎས་མ་ཡེ་ཧཱུྃ་ཞེས་པའོ། །དེ་ནས་སྒེག་མོའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་ཡོ་བྱད་ཐམས་ཅད་དང་ཡང་དག་པར་ལྡན་ཞིང་ཕུན་སུམ་ཚོགས་པ་རྣམས་འདོད་པ་ཙམ་ལ་སོ་སོར་འབྱོར་པར་གྱུར་ཅིག །ཨོྃ་སརྦ་བིདྨ་ཧཱ་ བཛྲོདྡྷ་བ་དཱ་ན་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲསྥ་ར་ཎ་ས་མ་ཡེ་ཧཱུྃ། ཕྲེང་བ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་མི་དགེ་བའི་ལུས་དང་། ངག་དང་། ཡིད་ཀྱི་ལས་ཀྱི་མཐའ་ཐམས་ཅད་དང་བྲལ་བར་གྱུར་ཅིག །དགེ་བའི་ལུས་དང་། ངག་དང་། ཡིད་ཀྱི་ལས་ ཀྱི་མཐའ་ཐམས་ཅད་དང་ཡང་དག་པར་ལྡན་པར་གྱུར་ཅིག །ཨོྃ་སརྦ་བི་ད་ནུཏྟ་ར་མ་ཧཱ་བོ་དྷྱ་ཧཱ་ར་ཤཱི་ལ་པཱ་ར་མི་ཏཱ་པུ་ཛ་མེ་གྷ་ས་མུ་དྲསྥ་ར་ཎ་ས་མ་ཡེ་ཧཱུྃ། གླུ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་མཚན་དང་དཔེ་བྱད་ཀྱིས་ཡང་དག་པར་བརྒྱན་པའི་ལུས་དང་ ལྡན་པ་དང་། རྟག་ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་ཞུགས་ཤིང་སྙིང་དང་མིག་མངོན་པར་དགའ་བ་དང་། ཆོས་ཟབ་མོ་ལ་བཟོད་པ་དང་ལྡན་པར་གྱུར་ཅིག །ཨོྃ་སརྦ་བི་ད་ནུཏྟ་ར་མ་ཧཱ་དྷ་རྨཱ་བ་བོ་དྷི་ཀྵཱ་ནྟི་པཱ་རཱ་མི་ཏཱ་པཱུ་ཛཱ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུྃ་ཞེས་པའོ། །གར་ མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་བྱང་ཆུབ་ཀྱི་སྤྱོད་པ་དང་མངོན་པར་ལྡན་ཞིང་སངས་རྒྱས་ཉིད་ལ་མཆོག་ཏུ་གཞོལ་ཞིང་འཁོར་བ་ཡོངས་སུ་སྤོང་བའི་བརྩོན་འགྲུས་དང་ལྡན་པར་གྱུར་ཅིག །ཨོྃ་སརྦ་བིཏྶཾ་སཱ་ར་པ་རི་དྱཱ་གཱ་ནུ་ཏྟ་ར་བཱིརྱ་པཱ་ར་མི་ཏཱ་པཱུ་ཛཱ་མེ་གྷ་ས་
- 103a
མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་པའོ། །མེ་ཏོག་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་དང་བྲལ་ཞིང་བསམ་གཏན་དང་། རྣམ་པར་ཐར་བ་དང་། ཏིང་ངེ་འཛིན་དང་། སྙོམས་པར་ འཇུག་པ་དང་། མངོན་པར་ཤེས་པ་དང་། རིག་པ་དང་། དབང་ཐམས་ཅད་ཕུན་སམ་ཚོགས་པར་འགྱུར་ཅིག །ཨོྃ་སརྦ་བི་ད་ནུཏྟ་ར་སཽ་ཁྱ་བི་ཧཱ་ར་དྷྱཱ་ན་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ་ཞེས་པའོ། །བདུག་པ་མའི་རྒྱ་བཅིངས་ལ་འདི་སྐད་ཅེས་བརྗོད་དེ། །སེམས་ཅན་ཐམས་ ཅད་འཇིགས་རྟེན་དང་འཇིག་རྟེན་ལས་འདས་པའི་ཤེས་རབ་དང་། ཡེ་ཤེས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཡང་དག་པར་ཐོབ་སྟེ་བཟོ་དང་བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་། སྦྱོར་བ་དང་། ཆོ་ག་ཤེས་པ་དང་། དེ་ཁོ་ན་ཉིད་མཐོང་བ་ དང་། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོྃ་སརྦ་བི་ད་ནུ་ཏྟ་ར་ཀླེ་ཤཙྪེ་ད་སརྦ་དྷ་རྨ་ས་མནྟ་ཛྙཱ་ན་མ་ཧཱ་པྲ་ཛྙ་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲ་སྤར་ཎ་ས་མ་ཡེ་ཧཱུྃ་ཞེས་པའོ། །མར་མེ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་ལོག་པར་ལྟུང་བ་ཐམས་ཅད་དང་བྲལ་བར་གྱུར་ཅིག །ཨོྃ་སརྦ་བི་ཏྶ་རྦཱ་པཱ་ཡ་བི་ཤོ་དྷ་ནི་ཛྙཱ་ནཱ་ལོ་ཀ་པྲ་ཎི་དྷཱ་ན་པཱ་ར་མ་ཏཱ་པཱུ་ཛཱ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུྃ་ཞེས་པའོ། །དྲི་ཆབ་མའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དེ། སེམས་ཅན་ཐམས་ཅད་མི་ཤེས་པ་དང་བྲལ་བར་ གྱུར་ཅིག །ཨོྃ་སརྦ་བིཏྶ་རྦཱ་ཡ་གནྡྷ་བི་ནཱ་ས་ནི་བཛྲ་གནྡྷོ་པཱ་ཡ་པཱ་ར་མི་ཏཱ་པཱུ་ཛཱ་མེ་གྷ་ས་མུ་དྲ་སྤྲ་ཎ་ས་མ་ཡེ་ཧཱུྃ་ཞེས་པའོ། །ལུས་ཀྱི་བསྙེན་བཀུར་བྱ་བའི་ཕྱིར་བདག་ཉིད་ཕྱོགས་བཅུའི་འཇིག་རྟེན་གྱི་ཁམས་མ་ལུས་པའི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་ལྷག་པར་ མོས་པ་བྱས་ལ། །ཨོྃ་སརྦ་བིདྐཱ་ཡ་ནི་རྱཱ་ཏ་ན་པཱུ་ཛཱ་མེ་གྷ་ས་མུ་དྲ་ས་ར་ཎ་ས་མ་ཡེ་ཧཱུྃ་ཞེས་བྱའོ། །ཐམས་ཅད་དུ་ལྕེ་བརྒྱ་པའི་ཁ་ཡིས་མཉམ་མེད་མི་གཡོ་ཞེས་བྱ་བ་ལ་སོགས་པའི་བསྟོད་པ་ཉེ་བར་སྤྱོད་པ་ལྷག་པར་མོས་པ་བྱས་ལ། །ཨོྃ་སརྦ་བིདྦཱ་གྣིརྱཱ་ཏ་ན་པཱུ་ཛཱ་མེ་གྷ་ས་མུ་དྲ་སྨ་ར་ཎ་ས་མ་ཡེ་ཧཱུྃ་
- 103b
ཞེས་བྱའོ། །བྱང་ཆུབ་སེམས་དཔའ་ཐམས་ཅད་དགོངས་པ་གཅིག་པའི་སྦྱོར་བ་ཉིད་ཀྱིས་ཆོས་མཉམ་པ་ཉིད་དུ་ལྷག་པར་མོས་པ་བྱ་སྟེ། །ཨོྃ་སརྦ་བིདྩི་ཏྟ་ནི་རྱཱ་ཏ་ན་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་ཞེས་བྱའོ། །ཆོས་ཐམས་ཅད་ནི་དངོས་པོ་མེད་པའི་ངོ་བོ་ཉིད་དང་། སྟོང་ པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པའོ་ཞེས་ལྷག་པར་མོས་པ་བྱས་ལ། །ཨོྃ་སརྦ་བིངྒུ་ཧྱ་པཱུ་ཛཱ་མེ་གྷ་སམུ་དྲསྥ་ར་ཎ་སམ་ཡེ་ཧཱུྃ་ཞེས་བྱའོ། །དེ་ལྟར་མཆོད་པ་རྣམ་པ་ཉི་ཤུས་དེ་བཞིན་གཤེགས་པ་ཐམས་ཅད་ཡང་དག་པར་མཆོད་ལ། བདག་ཉིད་དབུལ་ བར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་དབུལ་བར་བགྱིའོ། །བདག་དུས་ཐམས་ཅད་དང་རྣམ་པ་ཐམས་ཅད་དུ་སོ་སོར་བཞེས་སུ་གསོལ་ལོ། །ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས་དམ་ཚིག་ཆེན་པོའི་དངོས་གྲུབ་བདག་ལ་ སྩལ་དུ་གསོལ་ཞེས་བྱའོ། །དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱ་སྟེ། དགེ་བའི་རྩ་བ་འདི་དག་གིས་བདག་དང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་ འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པར་གྱུར་ཅིག །བདེ་བ་དང་ཡིད་བདེ་བ་ཉིད་ཀྱིས་མི་ཡི་མཆོག་སངས་རྒྱས་སུ་ཚེ་འདི་ཉིད་ལ་གྱུར་ཅིག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་ རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་སྒྲོལ། །ཞེས་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ལ། སྡོམ་པ་གཟུང་བར་བྱ་སྟེ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །བྱང་ཆུབ་ སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་བསླབ་པ་རྣམ་པ་གསུམ། །དགེ་བ་དང་ནི་ཆོས་སྡུད་དང་། སེམས་ཅན་དོན་བྱེད་ཚུལ་ཁྲིམས་ནི། །བདག་གིས་སོ་སོར་བརྟན་པོར་གཟུང་། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་མཆོག་
- 104a
བླ་མེད་པ། །སྡོམ་པ་སངས་རྒྱས་རྣལ་འབྱོར་བྱུང་། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་ཆེན་པོའི་རིགས་བསྡུས་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །དེ་ཉིད་ཀྱིས་ནི་རབ་ཏུ་གཟུང་། །སློབ་དཔོན་དག་ཀྱང་གཟུང་བར་བགྱི། །རིན་ཆེན་ཆེན་པོའི་རིགས་ མཆོག་གིས། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རབ་ཏུ་སྦྱིན། །པདྨ་ཆེན་པོའི་རིགས་དག་པ། །བྱང་ཆུབ་ཆེན་པོ་འབྱུང་བ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཆེན་རིགས་ནི་བསྡུས་ པ་ལ། །སྡོམ་པ་ཐམས་ཅད་ཡང་དག་ལྡན། །མཆོད་པའི་ལས་ནི་ཅི་ནུས་བཞིན། །ཀུན་ནས་སོ་སོར་གཟུང་བར་བགྱི། །སེམས་ཅན་ཀུན་གྱི་དོན་བགྱིད་ཕྱིར། །བྱང་ཆུབ་སེམས་ནི་བླ་མེད་པ། །དམ་པ་ཡང་དག་བསྐྱེད་བགྱིས་ཤིང་། །སྡོམ་པ་མ་ལུས་གཟུང་བགྱིས་ནས། །མ་བསྒྲལ་ བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་བགྱི། སེམས་ཅན་མྱ་ངན་འདས་ལ་དགོད། །ཅེས་བྱའོ། །དེ་ནས་ནམ་མཁའི་དཀྱིལ་འཁོར་ལ་ལྷ་ལ་སོགས་པ་རྣམས་ཀྱིས་མཆོད་པར་ལྷག་པར་མོས་ཏེ། ཉེ་བར་སྤྱོད་པ་ལྔ་ལ་ སོགས་པས་མཆོད་པར་བྱའོ། །ཡང་དག་པར་མཆོད་ནས་ནི་བཅོམ་ལྡན་འདས་ཀྱི་ཡོན་ཏན་བསྔགས་པར་བྱེད་དེ། ཨེ་མའོ་སངས་རྒྱས་ཨེ་སངས་རྒྱས། །སངས་རྒྱས་མཛད་པ་མཆོག་ལེགས་སོ། །ངན་སོང་ཐམས་ཅད་ལེགས་སྦྱངས་ནས། །སེམས་ཅན་བྱང་ཆུབ་ཐོབ་མཛད་ཕྱིར། །ཞེས་པའོ། ། དེ་ནས་བཛྲ་ཨཉྫ་ལི་ཞེས་པ་དང་། རྡོ་རྗེ་བསྡམས་པ་སྙིང་གར་དྲལ་བར་བྱ་སྟེ། །ཨོྃ་སརྦ་བིད་བཛྲ་བནྡྷ་ཏྲཱཊ་ཞེས་བརྗོད་ཅིང་། རྡོ་རྗེ་འབེབས་པའི་ཕྱག་རྒྱ་བཅིངས་ལ། །ཨོྃ་ཏིཥྵ་བཛྲ་དྲྀ་ཌྷོ་མེ་བྷ་བ་ཤཱ་ཤྭ་ཏོ་མེ་བྷ་བ་ཧྲྀ་ད་ཡྃ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུྃ་ཧ་ཧ་ཧ་ཧ་ཧོཿཞེས་བྱའོ། །ཨོྃ་ བཛྲ་མུཥྚི་བྃ། སེམས་མ་རྡོ་རྗེ་བཅིངས་ནས། །ཨོྃ་སརྦ་བིཏ་ཤོ་དྷ་ནེ་ཤོ་དྷ་ནེ་སརྦ་པཱ་བ་མ་བ་ན་ཡ་ཧཱུྃ། རྡོ་རྗེ་བསྡམས་པ་བརྟན་བཅིངས་ནས། །རྡོ་རྗེའི་ཕྱག་རྒྱ་གཉིས་པར་ནས། །མྱུར་དུ་གྱེན་དུ་ལེགས་འཕེན་ལ། །ལྟུང་བ་སློང་བར་བྱེད་པའི་མཆོག །ཅེས་པའོ། །ཨོྃ་སརྦ་
- 104b
བིཏ་སརྦཱ་པཱ་ཡ་བི་ཤོ་དྷ་ནེ་ཧཱུྃ་ཕཊ། སྡིག་པ་ཐམས་ཅད་རྣམ་པར་སྦྱོང་བའི་སྔགས་སོ། །རྡོ་རྗེ་བསྡམས་པ་བརྟན་བྱས་ནས། །གུང་མོ་དག་ནི་ཁ་སྦྱར་ཏེ། །མཐའ་མ་བཞི་པོ་ཁ་སྤྲད་པ། །མྱུར་དུ་སྡིག་པ་དྲལ་བར་འགྱུར། །ཨོྃ་སརྦ་བི་ཏ་ཏཱཊ་ཧཱུྃ། སེམས་མ་རྡོ་རྗེ་བཅིངས་ལ། ཨོྃ་སརྦ་བིཏ་སརྦཱ་བ་ར་ཎ་བི་ཤོ་དྷ་ནི་མུ་ནེ་ཧཱུྃ་ཕཊ། འདོན་པའི་མཚན་ཉིད་དོ། །དེ་ནས་དེའི་རྗེས་ལ་རྣལ་འབྱོར་པས་སྙིང་གའི་དབུས་སུ་ཡི་གེ་ཨ་ལས་ཟླ་བའི་དཀྱིལ་འཁོར་དང་དེའི་སྟེང་དུ་ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཨོྃ་ནམཿསརྦ་དུརྒ་ཏི་ཤོ་དྷ་ནེ་ཤོ་དྷ་ནེ་སརྦ་པཱ་པྃ་བི་ཤོ་དྷ་ནེ་ཤུདྡྷེ་བི་ཤུདྡྷེ་ སརྦ་ཀརྨཱ་བར་ཎ་བི་ཤུདྡྷེ་སྭཱ་ཧཱ། དེ་དག་གིས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་ཡོངས་སུ་རྫོགས་པར་འགྱུར་རོ། །དེ་ནས་རྡོ་རྗེ་ལྕགས་ཀྱུ་ལ་སོགས་པས་བཀུག་ནས་བཅུག་སྟེ་བཅིངས་ནས་དབང་དུ་བྱས་ལ། ནམ་མཁའི་དཀྱིལ་འཁོར་ལ་གཞུག་སྟེ་དཀྱིལ་འཁོར་གཉིས་ ཀྱིས་དཀྱིལ་འཁོར་གཅིག་ཏུ་འགྱུར་རོ། །རྫོགས་པའི་རྣལ་འབྱོར་དུ་གྱུར་པ་ལས་དམ་ཚིག་གི་དཀྱིལ་འཁོར་གྱི་ལྷ་ཡོངས་སུ་རྫོགས་པར་འགྱུར་རོ། །དེ་ལ་དཀྱིལ་འཁོར་གྱི་དབུས་སུ་བདག་ཉིད་ཀྱི་དངོས་པོ་འཁོར་ལོས་སྒྱུར་བའི་གཟུགས་ཤཱཀྱ་སེང་གེར་བསྒོམ་མོ། །དེ་ནས་ཤཱཀྱ་ཐུབ་པའི་ཐུགས་ཀར་ ཡི་གེ་ཨ་ལས་ཟླ་བའི་དཀྱིལ་འཁོར་བསྒོམ་ཞིང་ཟླ་བའི་དཀྱིལ་འཁོར་གྱི་དབུས་སུ། ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། །དེ་ནས་རྡོ་རྗེ་རྒྱུའི་ལས་ཀྱི་ཕྱག་རྒྱས་དཀྱིལ་འཁོར་སྤྲུལ་ཏེ། །ཨོྃ་སརྦ་བིད་བཛྲ་ཙཀྲ་ཧཱུྃ་ཞེས་པས་སོ། །སེམས་མ་རྡོ་རྗེ་བཅིངས་ནས་དེ་ཉིད་ཀྱི་སོར་མོ་དབུས་མ་གཉིས་ ཀྱིས་ཕྲེང་བ་ཐོགས་ལ་ས་མ་ཡ་ཧཱུྃ་ཞེས་པ་འདིས་ཡིད་ཀྱིས་འཇུག་གོ། །ཕྲེང་བ་དེ་ཡང་རང་གི་མགོ་བོར་བཞག་སྟེ། པྲ་ཏཱིཙྪ་བཛྲ་ཧོཿཞེས་པ་འདིས་སོ། །དེ་ནས་རང་གི་མགོ་བོར་བཅིངས་ཏེ། །ཨོྃ་པྲ་ཏི་གྲྀཧྞ་སྟྭ་མི་མྃ་ས་ཏྭ་མ་ཧཱ་བ་ལ་ཞེས་པ་འདིས་སོ། །གདོང་པ་བཅིངས་ལ་ཡང་འདིས་ དགྲོལ་ལོ། །ཨོྃ་རྡོ་རྗེ་སེམས་དཔའ་རང་ཉིད་དེ། །ཁྱེད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཐམས་ཅད་མིག་ནི་བྱེ་བར་འགྱུར། །ཞེས་པ་དང་། ཧེ་བཛྲ་པཱ་ཤྱ་ཞེས་པའོ། །དེ་ནས་དཀྱིལ་འཁོར་ཆེན་པོར་ཇི་སྲིད་བཅོམ་ལྡན་འདས་ཤཱཀྱ་ཐུབ་པ་དེ་སྲིད་དུ་བལྟའོ། །ཡང་
- 105a
སེམས་མ་རྡོ་རྗེ་བཅིངས་ལ་ཐུགས་ཀར་དགྲོལ་ཞིང་རྡོ་རྗེར་བྱིན་གྱིས་བརླབས་པའི་བུམ་པ་ནས་དབང་བསྐུར་བ་རྡོ་རྗེ་ཁུ་ཚུར་གྱིས་སྦྱིན་པའོ། །ཨོྃ་སརྦ་བིདྱཱ་བཛྲ་ཨ་བྷི་ཥིཉྩ་ཞེས་པའོ། །ཡང་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ཕྱག་རྒྱས་རྒྱས་གདབ་སྟེ། །ཨོྃ་སརྦ་བིདྱཱ་ བཛྲ་དྷ་ར་ཏིཥྛ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་སརྦ་བིདྱཱ་བཛྲ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་སརྦ་བིདྱཱ་རཏྣ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། །ཨོྃ་སརྦ་བིདྱཱ་དྷརྨ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་སརྦ་བིདྱཱ་ཀརྨ་བཛྲི་ཎི་ཧཱུྃ་ཨ་བྷི་ཥིཉྩ་མཱྃ། ཨོྃ་ཊུྃ་བཛྲ་ཏུ་ཥྱ་ཧོཿཡི་གེ་གཉིས་ཀྱི་གོ་ཆས་གོ་བགོས་ལ། དེ་ནས་རང་ཉིད་ རྡོ་རྗེའི་དབང་བསྐུར་བ་གཟུང་བར་བྱ་སྟེ། སངས་རྒྱས་རྣམས་ཀྱི་རྡོ་རྗེ་ཡི། །དབང་གིས་དེ་རིང་ཁྱོད་དབང་བསྐུར། །འདི་དེ་སངས་རྒྱས་ཐམས་ཅད་ཉིད། །རྡོ་རྗེ་རབ་ཏུ་གྲུབ་ཕྱིར་གཟུང་། །ཨོྃ་བཛྲ་ཨ་དྷི་པ་ཏི་སྟྭམ་བྷི་ཥིཉྩ་མི་ཏིཥྛ་བཛྲ་ས་མ་ཡ་སྟྭཾ། བཛྲ་ནཱ་མཱ་བྷི་ཥེ་ཀ་ཏ། །ཨོྃ་བཛྲ་ས་ཏྭ་སྟ་མ་བྷི་ ཥིཉྩ་མཱྃ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་གཟུང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོྃ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭྃ་དྷཱ་ར་ཡཱ་མི་བཛྲ་ས་ཏྭ་ཧི་ཧི་ཧི་ཧི་ཧཱུྃ་ཞེས་པའོ། །ཨོྃ་སརྦ་བིདྱཱ་བཛྲཱ་དྷིཥྛཱ་ན་ ས་མ་ཡེ་ཧཱུྃ། བདག་ཉིད་བྱིན་གྱིས་བརླབ་པའི་སྔགས་སོ། །རྡོ་རྗེ་ཁུ་ཚུར་གཉིས་བཅིངས་ནས་མཐེ་བོང་དང་གུང་མོ་དང་མཐེའུ་ཆུང་གྱེན་དུ་བསྒྲེང་སྟེ་ཁ་སྦྱར་ནས་མཛུབ་མོ་དང་མིང་མེད་སེམས་དཔའི་སྐྱིལ་ཀྲུང་བྱས་པ་ནི་རྡོ་རྗེའི་ཕྱག་རྒྱ་སྟེ། སྙིང་ག་དང་། མགྲིན་པ་དང་། དཔྲལ་བ་དང་། མཛོད་སྤུ་དང་། སྨིན་མཚམས་དང་། སྣ་དང་། རྣ་བ་དང་། དཀུ་དང་། པུས་མོ་དང་། རྐང་པ་དག་དང་། བྱིན་པ་དང་། མིག་གཉིས་དང་། གསང་བར་བྱིན་གྱིས་བརླབ་པ་ཡང་བྱའོ། །དེ་ནས་རང་གི་ལུས་ལ་ས་མ་ཡ་ཨཿཡི་གེ་ཨ་ལས་ཟླ་བའི་དཀྱིལ་འཁོར་ས་བོན་ལས་ བྱུང་བའི་མཚན་མ་ཐམས་ཅད་ཀྱི་སྙིང་པོའི་ང་རྒྱལ་བསྐྱེད་ཅིང་ཨོྃ་སརྦ་བིདྱཱ་དྲྀ་ཤྱ་ཛཿཧཱུྃ་བྃ་ཧོཿས་མ་ཡ་སྟྭྃ་ས་མ་ཡ་ཧོ། །ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ་ཞེས་ལན་གསུམ་བརྗོད་པར་བྱའོ། །ཐུན་མོང་བ་ཡང་ངོ་། །དེ་ནས་རང་གི་ལུས་ལ་རྡོ་རྗེ་བསྡུ་བའི་ཕྱག་རྒྱ་བཅིངས་ཏེ། ཛཿཧཱུྃ་བྃ་ཧོཿ
- 105b
བརྗོད་ཅིང་གནས་ཇི་ལྟ་བ་རྣམས་སུ་བཀུག་ནས་བཅུག་སྟེ་བཅིངས་ལ་དབང་དུ་བྱའོ། །རང་གི་ཐུགས་ཀར་ཧཱུྃ་ཡིག་ནི། །སྦྱོར་བས་རྡོ་རྗེ་རྩེ་ལྔ་པ། །ཤཱཀྱ་སེང་གེའི་དམ་ཚིག་གི། །ཕྱག་རྒྱ་རབ་ཏུ་བཤད་པར་བྱ། །དབུས་སུ་ཏིང་འཛིན་མཆོག་གིས་ནི། །བཞུགས་པ་དམ་ཚིག་ ཕྱག་རྒྱར་བཤད། །རྡོ་རྗེ་བཅིང་བ་དམ་བྱས་ལ། །གུང་མོ་གཉིས་ཀྱི་རྩེ་མོ་སྦྱར། །རྡོ་རྗེ་ཕྱག་རྒྱ་དམ་བཅས་པ། །རྡོ་རྗེ་གཙུག་ཏོར་ཕྱག་རྒྱའོ། །དེ་ཉིད་གུང་མོ་རིན་ཆེན་དང་། །གུང་མོ་པདྨའི་རྣམ་པ་དང་། །དེ་ཉིད་གུང་མོ་རྡོ་རྗེ་ལས། །སོར་མོ་ལྷག་མ་འབར་བྱས་ཉིད། །སོར་མོ་ དེ་ཉིད་འབར་བྱས་པ། །གཙུག་ཏོར་གཟི་བརྗིད་ཕྱག་རྒྱའོ། །དེ་ཉིད་ལས་ནི་སྲིན་ལག་དང་། །མཐེའུ་གཉིས་ནི་མཉམ་སྟེ་བསྒྲེང་། །མཛུབ་མོ་པདྨའི་འདབ་མ་ལས། །གུང་མོ་རྡོ་རྗེ་བསྒྲེང་བ་དང་། །དེ་ཉིད་མདུན་དུ་བཞག་ནས་ནི། །རྡོ་རྗེ་དྲ་བའི་ཚུལ་དུ་བྱ། །སྙིང་གར་ཡང་ནི་མཐེ་བོ་ མཉམ། །རབ་ཏུ་བརྐྱང་བ་ཕྲེང་བ་མ། །ཐལ་མོ་སྦྱར་བ་ཁ་ནས་དབྱུང་། །གར་བྱེད་སྤྱི་བོར་ཐལ་མོ་སྦྱར། །རྡོ་རྗེ་བསྡམས་པ་ཐུར་དུ་སྦྱིན། །ཐལ་མོ་ལེགས་སྦྱར་གྱེན་དུ་གཏོར། །མཐེ་བོ་མཉམ་སྟེ་རབ་ཏུ་བསྡམ། །རབ་ཏུ་བརྐྱང་བ་བྱུག་པའོ། །རྡོ་རྗེ་ཁུ་ཚུར་གཉིས་བཅིངས་ནས། ། མཛུབ་མོ་མཐེ་བོང་གུང་མོ་རྣམས། །རེ་རེ་ཞིང་ཡང་ཕན་ཚུན་དུ། །མངོན་དུ་ཕྱོགས་པ་གཟུང་བར་བྱ། །མཛུབ་མོ་གཅིག་ནི་ཅུང་ཟད་བཀུག །མཐེ་བོ་གཉིས་ནི་མདུད་པ་བཅིང་། །མཐེ་བོ་མཛུབ་མོ་བསྣོལ་བ་བཅིང་། །རྡོ་རྗེ་ཁུ་ཚུར་རྩེ་མོ་བསྡམ། །མགྲིན་པར་པད་ཟླའི་དཀྱིལ་འཁོར་དུ། །ཆོས་ ཀྱི་ཕྱག་རྒྱ་རྣམ་པར་བསྒོམ། །སྔར་གྱི་འབྱིན་པའི་སྔགས་ཀྱིས་ནི། །ཆོས་ཀྱི་ཕྱག་རྒྱ་ཡིན་པར་བཤད། །ཐུགས་ཀར་སྣ་ཚོགས་རྡོ་རྗེ་ནི། །བསམས་ཏེ་ལས་ཀྱི་ཕྱག་རྒྱ་བྱ། །ཇི་སྐད་བཤད་པའི་ཆོས་འཁོར་ལོ། །ཤཱཀྱའི་རྒྱལ་པོའི་ཕྱག་རྒྱའོ། །ས་གནོན་མཆོག་སྦྱིན་ཏིང་འཛིན་དང་། །མི་ འཇིགས་སྦྱིན་སོགས་རིམ་པ་བཞིན། །ཏིང་འཛིན་མཆོག་ཏུ་གནས་པ་ནི། །གཙུག་ཏོར་གཟི་བརྗིད་ཕྱག་རྒྱའོ། །གཡས་པའི་ལག་ངར་དབྱུག་པ་དང་། །གཡོན་པ་སྙིང་གར་རལ་གྲི་འཕྱར། །གཡོན་པ་སྡིགས་མཛུབ་བསྒྲེང་བྱ་སྟེ། །གཡས་པ་བཏེག་སྟེ་བརྐྱང་བར་བྱ། །ལུག་པ་
- 106a
གཉིས་ཀ་གར་བསྡོམས་ནས། །གདུགས་ཀྱི་རྣམ་པར་གཞག་པར་བྱ། །ཆོས་ཀྱི་ཕྱག་རྒྱའི་ཆོ་ག་གང་། །རྫོགས་སངས་རྒྱས་སྐྱོབ་མིན་པའི་ཡང་། །རྡོ་རྗེ་བསྒྱིངས་པའི་སྦྱོར་བ་ཡིས། །བཏགས་པའི་བསམ་པས་འདུད་པར་བྱ། །ཕྲེང་བ་བཅིང་དང་ཁ་ ནས་དབྱུང་། །གར་གྱིས་ཡོངས་སུ་བསྐོར་བ་ཉིད། །རྡོ་རྗེ་ཁུ་ཚུར་སྦྱོར་བ་ཡིས། །བདུག་པ་ལ་སོགས་དེ་བཞིན་སྦྱར། །མཛུབ་མོ་ལྕགས་ཀྱུ་བཅིང་བ་ཡིས། །མཐེ་ཆུང་ལ་ནི་ལྕགས་སྒྲོག་ཆེ། །མཁྲིག་མ་མདུད་ཅིང་མཛུབ་གཉིས་བསྣོལ། །རྒྱབ་དག་ཀྱང་ནི་ངེས་པར་ བསྡམ། །དེ་ནས་དེ་ཕྱིར་གོ་རིམས་བཞིན། །བྱང་ཆུབ་སེམས་དཔའ་བདག་ཉིད་ཆེའི། །ལས་ཀྱི་ཕྱག་རྒྱ་འཆང་བ་ཡི། །མཚན་ཉིད་ཡང་དག་རབ་ཏུ་བཤད། །རྡོ་རྗེ་ཁུ་ཚུར་གཉིས་བཅིངས་ནས། །ཕན་ཚུན་ལྷན་ཅིག་གཤིབས་ནས་ནི། །མཛུབ་མོ་དང་ནི་གུང་མོ་དགུག །མེ་ཏོག་ རྣམ་པར་གཟུང་བར་བྱ། །བྱམས་པ་ཡི་ནི་ཕྱག་རྒྱའོ། །གཡོན་པ་ཁུ་ཚུར་དཀུར་བཞག་ལ། །གཡས་པའི་དཔུང་པའི་ཐད་ཀར་ནི། །མཛུབ་མོ་གུང་མོ་བརྐྱང་ནས་ནི། །མིག་གི་ཚུལ་དུ་གཞག་པར་བྱ། །མཐོང་བ་དོན་ཡོད་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ནས། ། མཛུབ་མོ་དག་ནི་བརྐྱང་ནས་སུ། །གཡས་པ་ལྕགས་ཀྱུ་ལེགས་བཞག་པ། །ངན་སོང་ཐམས་ཅད་སྤོང་བའི་ཡིན། །གཡོན་པ་ཁུ་ཚུར་དཀུར་བཞག་ལ། །གཡས་པའི་དབྱིག་པ་ལྟ་བུར་ནི། །གྱེན་དུ་བསྒྲེང་ནས་གཞག་པར་བྱ། །མྱ་ངན་མུན་པ་ཀུན་འཇོམས་ཀྱིའོ། །གཡོན་པ་ཁུ་ ཚུར་ལྟེ་བར་གཞག །ལག་པ་གཡས་པ་གླང་པོ་ཆེའི། །སྣ་ཡི་ཚུལ་དུ་བཞག་པ་ནི། །སྤོས་ཀྱི་གླང་པོའི་ཕྱག་རྒྱའོ། །གཡོན་པ་ཁུ་ཚུར་དཀུར་བཞག་སྟེ། །གཡས་པ་རལ་གྲི་ཐོགས་པ་ཡི། །ཚུལ་དུ་འཇོག་པར་བྱེད་པ་ནི། །དཔའ་བར་འགྲོ་བའི་ཕྱག་རྒྱ་ཡིན། །གཡོན་ པ་ཁུ་ཚུར་སྙིང་གར་གཞག །གཡས་པ་སྟེང་སྐོར་མཁའ་མཛོད་ཀྱི། །རྡོ་རྗེ་ཁུ་ཚུར་གཉིས་བཅིངས་པ། །རྒྱལ་མཚན་འཛིན་པ་ལྟ་བུར་ནི། །གཡས་ཀྱི་ལོགས་སུ་འཇོག་བྱེད་པ། །ཡེ་ཤེས་ཏོག་གི་ཕྱག་རྒྱའོ། །ལག་པ་གཉིས་ཀྱིས་བུམ་འཛིན་ལྟར། །བཞག་པ་འོད་དཔག་
- 106b
མེད་པའིའོ། །གཡོན་པའི་ཁུ་ཚུར་བརླ་སྟེང་གཞག །གཡས་པའི་ཁུ་ཚུར་གཞོགས་སུ་ནི། །མཐེ་བོ་མཐེ་ཆུང་བརྐྱང་བྱས་ལ། །ཟླ་ཚེས་རྣམ་པ་ཟླ་འོད་ཀྱིའོ། །ལག་པ་གཉིས་ནི་སྙིང་ག་རུ། །པདྨའི་རྣམ་པར་རྣམ་ཕྱེ་ལ། །རྩེ་མོ་ཕན་ཚུན་སྦྱར་བ་ནི། །བཟང་སྐྱོང་གི་ནི་ཕྱག་ རྒྱ་ཡིན། །རྡོ་རྗེ་ཁུ་ཚུར་གཉིས་བཅིངས་ལ། །གོ་ཆ་འཛིན་པ་ལྟ་བུར་ནི། །ནུ་མ་གཉིས་སུ་ལེགས་བཞག་པ། །དྲ་བ་ཅན་འོད་ཕྱག་རྒྱ་ཡིན། །གཡོན་པའི་ཁུ་ཚུར་དཀུར་གཞག་ལ། །གཡས་པ་སྙིང་ཀར་བཞག་ནས་ནི། །སོར་མོ་དབུས་མ་བསྒྲེང་བྱས་ལ། །རྡོ་རྗེ་སྙིང་པོའི་ཕྱག་རྒྱ་ཡིན། ། གཡོན་པ་ཁུ་ཚུར་སྙིང་གར་གཞག །གཡས་པ་མི་འཇིགས་སྦྱིན་རྣམས་ལ། །བློ་གྲོས་མི་ཟད་པ་ཡིའོ། །གཡོན་པའི་ཁུ་ཚུར་ལྟེ་བར་གཞག །གཡས་པ་སེ་གོལ་གཏོགས་པ་ནི། །སྤོབས་པ་བརྩེགས་པའི་ཕྱག་རྒྱ་ཡིན། །གཡོན་པའི་ཁུ་ཚུར་དཀུར་བཞག་སྟེ། །གཡས་ པ་རིན་ཆེན་ཁུ་ཚུར་བྱ། །ཀུན་ཏུ་བཟང་པོའི་ཕྱག་རྒྱ་ཡིན། །མཚན་མ་དང་བྲལ་ཆོ་ག་ཡིས། །ལས་ཀྱི་ཕྱག་རྒྱར་བཤད་པ་ཡིན། །སྙིང་གར་རྡོ་རྗེ་རྩེ་ལྔ་པའི། །གཟུགས་ཅན་ཡང་དག་གཟུང་བྱ་ཞིང་། །འབྱིན་པ་རྣམས་སུ་ཇི་ལྟར་གཟུང་། །ཕྱག་རྒྱ་མཚན་མ་བསྣམས་པ་དག ། རྡོ་རྗེ་དྲིལ་བུ་བཟུང་ནས་ནི། །ཐུགས་ཀར་རྡོ་རྗེ་འཛིན་པ་ནི། །ཕྱག་རྒྱ་ཆེ་ཞེས་བྱང་ཆུབ་གང་། །བྱང་ཆུབ་སེམས་དཔའ་བདག་ཉིད་ཆེའི། །འབྱིན་པ་རྣམས་སུ་ཇི་ལྟར་གཟུང་། །ཕྱག་རྒྱ་མཚོན་ཆ་བསྣམས་པ་རྣམས། །བདག་ཉིད་ཆེན་པོ་གང་གང་གིས། །ཕྱག་རྒྱ་གང་དང་གང་ བཅིངས་ནས། །སྙིང་པོ་དོན་གྱི་བཟླས་པ་དང་། །རང་གི་བདག་ཉིད་བསྒོམ་པར་བྱ། །ཕྱག་རྒྱ་བཞི་རྣམས་སྒྲུབ་བྱེད་པ། །ལྷ་རྣམས་ཐམས་ཅད་རྒྱས་བཏབ་དང་། །ཀུན་མཁྱེན་ཡོན་ཏན་རྫོགས་པ་དང་། །སེམས་ཅན་ཀུན་གྱི་དོན་བྱའི་ཕྱིར། །ངན་སོང་ཐམས་ཅད་ལེགས་སྦྱངས་ ནས། །སེམས་ཅན་བྱང་ཆུབ་ཐོབ་བྱའི་ཕྱིར། །དེ་ནས་སྔགས་རབ་བཤད་བྱ་སྟེ། །ངན་སོང་ཀུན་སྦྱོང་དཀྱིལ་འཁོར་དུ། །ཕྱག་རྒྱ་སྔགས་ཀྱི་རབ་སྦྱོར་གྱིས། །བྱ་བ་ཐམས་ཅད་ནུས་པར་འགྱུར། །སོ་སོ་སོ་སོར་རྡོ་རྗེ་གར། །བྱས་ནས་སྔགས་རྣམས་བརྗོད་པར་བྱ། །ཨོྃ་ན་མོ་བྷ་ག་བ་
- 107a
ཏེ། སརྦ་དུརྒ་ཏི་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། །ཨརྷ་ཏེ་སཾ་མྱ་ཀྶྃ་བུདྡྷཱ་ཡ། ཏདྱ་ཐཱ། ཨོྃ་ཤོ་དྷ་ནེ་ཤོ་དྷ་ནེ། སརྦ་པཱ་པྃ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨཱ་བར་ཎ་བི་ཤུདྡྷེ་སྭཱ་ཧཱ། །གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་བླངས་ལ་ལག་པ་གཡས་པས་རྡོ་ རྗེ་འགྱིང་བ་དང་བཅས་པས་རྡོ་རྗེ་གསོར་ཞིང་འདི་སྐད་ཅེས་བརྗོད་དོ། །བཛྲ་བཱ་ཙ་ན་ཊཀྐི་ཧཱུྃ་ཛཿཛཿཛཿརང་གི་སྙིང་གར་བསྒྲེང་སྟེ་གསལ་བའི་སྦྱོར་བས་གཟུང་ཞིང་ཊཀྐི་ཛཿཧོཿཞེས་བརྗོད་དོ། །དེ་ནས་ཡི་གེ་བརྒྱ་པས་བརྟན་པར་བྱ་སྟེ། དེ་དག་གིས་བྱང་ཆུབ་སེམས་དཔའ་ས་བཅུ་པའི་དབང་ ཕྱུག་དང་འདྲ་བར་འགྱུར་རོ། །དེ་རྣམས་བལྟས་ལ་མཆོད་པ་ཐམས་ཅད་ཀྱིས་རབ་ཏུ་མཆོད་དོ། །དེ་ནས་དེ་རྣམས་ཀྱི་བསྟོད་པ་རྣམས་ཀྱིས་ཡང་དག་པར་མཆོད་པར་བྱ་སྟེ། ཆོས་ཀྱི་འཁོར་ལོ་བསྐོར་མཛད་པ། །ཁམས་གསུམ་པ་ཡི་འགྲོ་ཀུན་གྱི། །ངན་སོང་ཐམས་ཅད་སྦྱོང་མཛད་པ། ། ཤཱཀྱ་སེང་གེ་ཁྱོད་ཕྱག་འཚལ། །ཆོས་ཀྱི་དབྱིངས་ཀྱི་རང་བཞིན་ལས། །སེམས་ཅན་ཀུན་ལ་ཕན་པའི་ཕྱིར། །རང་གི་དེ་ཉིད་སྟོན་མཛད་པ། །རྡོ་རྗེ་གཙུག་ཏོར་ཁྱོད་ཕྱག་འཚལ། །མཉམ་ཉིད་དེ་ཉིད་བསྒོམས་པ་ཡིས། །ཁམས་གསུམ་ལ་གནས་ཐམས་ཅད་ལ། །དབང་བསྐུར་རབ་ ཏུ་གསོལ་མཛད་པ། །རིན་ཆེན་གཙུག་ཏོར་ཁྱོད་ཕྱག་འཚལ། །སོ་སོར་ཀུན་རྟོག་རང་བཞིན་ཅན། །ཆོས་ཀྱི་བདུད་རྩིའི་ཆར་འབེབས་པས། །སེམས་ཅན་དབུགས་འབྱིན་མཛད་པ་པོ། །པདྨའི་གཙུག་ཏོར་ཁྱོད་ཕྱག་འཚལ། །སེམས་ཅན་སྡུག་བསྔལ་ཞི་བྱའི་ཕྱིར། །བྱ་བ་རྗེས་སྒྲུབ་རང་ བཞིན་ཅན། །ཕྲིན་ལས་སྣ་ཚོགས་མཛད་པ་པོ། །སྣ་ཚོགས་གཙུག་ཏོར་ཁྱོད་ཕྱག་འཚལ། །ཁམས་གསུམ་འོད་ཀྱིས་གསལ་མཛད་ནས། །སེམས་ཅན་ཀུན་གྱིས་འཕགས་པ་ཡི། །བདེན་པ་མཐོང་བར་མཛད་པ་པོ། །གཙུག་ཏོར་གཟི་བརྗིད་ཁྱོད་ཕྱག་འཚལ། །ཡིད་བཞིན་ནོར་བུའི་ རྒྱལ་མཚན་བསྣམས། །སྦྱིན་པས་སེམས་ཅན་ཐམས་ཅད་ཀྱི། །བསམ་པ་ཐམས་ཅད་རྫོགས་མཛད་པ། །གཙུག་ཏོར་རྒྱལ་མཚན་ཁྱོད་ཕྱག་འཚལ། །ཉོན་མོངས་ཉེ་བའི་ཉོན་མོངས་དག །གཅོད་ཅིང་བདུད་བཞིའི་སྟོབས་བཅོམ་ནས། །སེམས་ཅན་བྱང་ཆུབ་ཐོབ་མཛད་པ། །གཙུག་
- 107b
ཏོར་རྣོན་པོ་ཁྱོད་ཕྱག་འཚལ། །ཁམས་གསུམ་འགྲོ་བ་ཐམས་ཅད་ཀྱིས། །གདུགས་དཀར་གྱིས་ནི་བརྒྱན་པ་ཡི། །ཆོས་ཀྱི་རྒྱལ་པོ་ཐོབ་མཛད་པ། །གཙུག་ཏོར་གདུགས་དཀར་ཁྱོད་ཕྱག་འཚལ། །སྒེག་མོ་ཕྲེང་བ་དེ་བཞིན་གླུ། །གར་མཁན་ལྷ་མོ་བཞི་པོ་དང་། །སྤོས་དང་མེ་ ཏོག་མར་མེ་མ། །དྲི་ཡི་ལྷ་མོ་ཁྱོད་ཕྱག་འཚལ། །དད་སོགས་ངོ་བོ་ལས་བྱུང་བ། །སྒོ་བཞིའི་དབུས་ན་གང་བཞུགས་པ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །སྒོ་སྐྱོང་ཁྱེད་རྣམས་ལ་ཕྱག་འཚལ། །སྒོ་བཞི་ཡི་ནི་ལོགས་དག་ན། །ཁྱམས་རྣམས་སུ་ནི་བཞུགས་མཛད་པ། ། རབ་དགའ་ལ་སོགས་བཅུ་གཉིས་གནས། །བྱང་ཆུབ་སེམས་དཔའ་ཁྱེད་ཕྱག་འཚལ། །ཚངས་དབང་དྲག་པོ་ཟླ་བ་སོགས། །ཕྱོགས་བཞིར་འཇིག་རྟེན་སྐྱོང་བ་རྣམས། །མེ་དང་སྲིན་པོ་རླུང་ལྷ་དང་། །འབྱུང་པོའི་བདག་པོ་ཁྱེད་ཕྱག་འཚལ། །བསྟོད་པའི་རྒྱལ་པོ་འདི་ཡིས་ནི། །དཀྱིལ་ འཁོར་མདུན་དུ་ཀུན་བསྟོད་ནས། །སྔགས་པ་རྡོ་རྗེ་དྲིལ་འཆང་བས། །བསྟོད་པ་འདི་དག་ཡང་དག་བརྗོད། །ཕྱི་ནས་རང་གི་ལུས་ལ་ནི། །བདག་ཉིད་དཀྱིལ་འཁོར་རབ་ཏུ་གཞུག །དེ་ལྟར་ངེས་པར་བསྒོམ་བཞིན་པའི། །དཀྱིལ་འཁོར་དང་པོ་སྦྱོར་བ་ཞེས་བྱ་བའི་ཏིང་ངེ་འཛིན་ཏོ། །དེ་ནས་ དཀྱིལ་འཁོར་རྒྱལ་མཆོག་ཅེས་བྱ་བ་རབ་ཏུ་བཤད་པར་བྱ་སྟེ། །ཨོྃ་ཨ་ཀཱ་རོ་མུ་ཁྃ་སརྦ་དྷ་རྨཱ་ཎཱ་མཱ་དྱ་ཏྤནྣ་ཏཱཏ། དེའི་དོན་ནི་རྣམ་པར་ཐར་པ་ལས་ཕྱོགས་བཅུའི་འཇིགས་རྟེན་གྱི་ཁམས་ཐམས་ཅད་སྟོང་པ་ཉིད་བཅུ་དྲུག་ཏུ་ལྷག་པར་མོས་པ་བྱ་སྟེ། ངར་འཛིན་པའི་བདག་ཉིད་སྟོང་པ་ཉིད་དུ་བལྟའོ། །དེ་ ནས་ཡི་གེ་ཧཱུྃ་ལས་རྫོགས་པའི་རྡོ་རྗེས་རླུང་གི་དཀྱིལ་འཁོར་དང་། དེའི་སྟེང་དུ་ཡི་གེ་རྃ་གྱིས་མེའི་དཀྱིལ་འཁོར་དང་། དེའི་སྟེང་དུ་ཡི་གེ་བྃ་ལས་ཆུ་གཏེར་ཆེན་པོ་དང་། དེའི་སྟེང་དུ་ཡི་གེ་ཀྃ་ལས་གསེར་གྱི་དཀྱིལ་འཁོར་དང་། དེའི་སྟེང་དུ་དབུས་སུ་ཧཱུྃ་སུྃ་ཧཱུྃ་ཞེས་བྱ་བ་སྟེ། དེ་ལས་རི་རབ་གྲུ་བཞི་ པ་རིན་པོ་ཆེའི་རང་བཞིན་རིན་པོ་ཆེ་ཐམས་ཅད་ཀྱིས་བརྒྱན་པ་བསྐྱེད་ལ། །ཨོྃ་བཛྲ་དྲྀ་ཌྷོ་ཞེས་པ་ལ་སོགས་པ་དང་རྡོ་རྗེ་བསྡམས་པས་བྱིན་གྱིས་བརླབ་བོ། །དེའི་སྟེང་དུ་རྡོ་རྗེའི་རྒྱུའི་ལས་ཀྱི་ཕྱག་རྒྱས་ཡི་གེ་བྷྲུྃ་དཀར་པོ་ལས་བྱུང་བའི་རྡོ་རྗེ་དང་ནོར་བུ་དང་རིན་པོ་ཆེའི་རྩེ་མོ་ཅན་གྱི་གཞལ་ཡས་ཁང་གྲུ་བཞི་
- 108a
བ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །གྲྭ་བཞི་རྣམས་ནི་ཐམས་ཅད་དུ། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་མཚན་མ་རྡོ་རྗེས་སྤྲས། །དྲ་བ་དྲ་ཕྱེད་ཀྱིས་བརྒྱན་ཅིང་། །ཐིག་ལེ་དང་ནི་ཡང་དག་ལྡན། །དར་དང་མེ་ཏོག་ཕྲེང་བས་བརྒྱན། ། ནང་གི་དཀྱིལ་འཁོར་ནི་འཁོར་ལོ་རྩིབས་བརྒྱད་པ་རྡོ་རྗེ་ཕྲེང་བས་ཡོངས་སུ་བསྐོར་བའོ། །དེའི་ལྟེ་བའི་སྟེང་དུ་སེང་གེའི་གདན་ནོ། །དེའི་སྟེང་དུ་ཟླ་བའི་དཀྱིལ་འཁོར་རོ། །འཁོར་ལོ་རྩིབས་བརྒྱད་པའི་ནང་རྣམས་སུ་ཟླ་བའི་དཀྱིལ་འཁོར་ཏེ་ལྷ་རྣམས་ཀྱི་གནས་སོ། །ཕྱིའི་དཀྱིལ་འཁོར་གྱི་ལྷ་རྣམས་ཀྱི་ གནས་ནི་སྣམ་བུ་རྣམས་ལ། ཟླ་བའི་དཀྱིལ་འཁོར་ཉི་ཤུ་རྩ་བརྒྱད་བལྟའོ། །སེང་གེའི་གདན་གྱི་སྟེང་གི་ཟླ་བའི་དཀྱིལ་འཁོར་ཡི་གེ་ཨ་ལ་སོགས་པ་དང་། ཡི་གེ་ཀ་ལ་སོགས་པ་ཤེས་རབ་དང་ཐབས་ཀྱི་ཡི་གེ་ཞུ་བར་གྱུར་པ་མཁའ་ཁྱབ་ཀྱི་ཏིང་ངེ་འཛིན་ལ་སྙོམས་པར་ཞུགས་པ་བྱང་ཆུབ་ཀྱི་སེམས་ ཀྱི་རང་བཞིན་གྱིས་སེམས་ཅན་གྱི་དོན་གྱི་རྒྱུ་རྫོགས་པའི་སྔགས་ཀྱི་གཟུགས་སུ་གྱུར་ཏེ། །ཨོྃ་མུ་ནེ་མུ་ནེ་མ་ཧཱ་མུན་ཡེ་སྭཱ་ཧཱ། སྔགས་འདིས་དཔལ་ཤཱཀྱའི་རྒྱལ་པོ་རྫོགས་པར་འགྱུར་ཏེ། སྒྲིབ་པ་ཐམས་ཅད་སེལ་བའི་ཏིང་ངེ་འཛིན་ལ་སྙོམས་པར་ཞུགས་པའོ། །དེ་ནས་ཏིང་ངེ་འཛིན་ལ་སྙོམས་ པར་ཞུགས་པའི་སངས་རྒྱས་བཅོམ་ལྡན་འདས་དེའི་ཕྱག་རྒྱ་དང་སྔགས་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ནས། །རིམ་གྱིས་རྣམ་པར་དབྱེ་བར་བྱ། །ཆོས་ཀྱི་འཁོར་ལོའི་ཕྱག་རྒྱ་ནི། །འཁོར་བ་ཐམས་ཅད་གཅོད་བྱེད་ཡིན། །དེ་ཡི་དཔེ་ནི་འདི་ལྟ་སྟེ། །ཇི་ལྟར་པདྨ་ལ་ཆགས་ པའི། །བུང་བ་ལ་སོགས་བསྡམས་པ་རྣམས། །པདྨའི་འདབ་མ་ཁ་ཕྱེ་ན། །བཅིངས་པའི་སྡུག་བསྔལ་ལས་ཐར་བྱེད། །དེ་བཞིན་འཁོར་བའི་སྡུག་བསྔལ་གྱི། །སྲིད་གསུམ་འཁོར་བར་བཅིངས་པ་འདི། །ཐུགས་རྗེའི་བདག་ཉིད་ཤཱཀྱ་ཡི། །སེང་གེས་བཅིངས་པ་ལས་གྲོལ་མཛད། ། དེ་ནས་དཔལ་ཤཱཀྱ་ཐུབ་པའི་ཐུགས་ཀར་ཡི་གེ་ཨ་ལས་ཟླ་བའི་དཀྱིལ་འཁོར་རོ། །དེ་ནས་ཟླ་བའི་དཀྱིལ་འཁོར་ལ་སྔགས་ཐམས་ཅད་ཀྱིས་བསྐྱེད་པར་བྱ་སྟེ། རྡོ་རྗེ་གཙུག་ཏོར་ནས་བརྩམས་ཏེ་ཇི་སྲིད་རྡོ་རྗེ་འབེབས་པའི་མཐར་ཐུག་པ་འབྱུང་བ་ཡིན་ནོ། །དེ་ནས་སྔགས་རྣམས་འབྱུང་སྟེ། །ཨོྃ་ན་མོ་བྷ་
- 108b
ག་བ་ཏེ་སརྦ་དུརྒ་ཏི་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶྃ་བུདྡྷ་ཡ། ཏདྱ་ཐཱ། །ཨོྃ་ཤོ་དྷ་ནི་ཤོ་དྷ་ནི། སརྦ་པཱ་པྃ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨཱ་བ་ར་ཎ་བི་ཤུདྡྷེ་སྭཱ་ཧཱ། སྔགས་འདི་ངེས་པར་བརྗོད་དོ། །དེ་ནས་དེའི་ཕྱིར་གོ་རིམས་ནི། །རིམ་བཞིན་ཡང་དག་རབ་བཤད་བྱ། ཨོྃ་ བཛྲ་ཧཱུྃ་ཕཊ། །བ་ཡི་སྒོ་ནས་ཕྱུང་ནས་ནི། །ཀུན་ནས་འོད་ཟེར་ལྔ་པར་འཐོན། །ཀུན་ནས་ཕྱོགས་བཅུར་སྣང་བྱས་ནས། །སེམས་ཅན་རྣམས་ནི་ཐམས་ཅད་ཀྱི། །སྡུག་བསྔལ་རྣམས་ནི་ཐར་མཛད་དེ། །འོད་ཟེར་རྣམས་ནི་སླར་ལོག་ནས། །ཐུགས་ཀར་ཞུགས་ཏེ་དེ་རྗེས་ལ། །སྔགས་དང་ འོད་ཟེར་གཉིས་འདྲེས་པ། །ལས་བྱུང་སྐུ་ནི་ཡོངས་རྫོགས་པ། །ནང་གི་དཀྱིལ་འཁོར་འཁོར་ལོའི་རྩིབས། །ཤར་ཕྱོགས་པདྨ་ཟླ་བར་བཞུགས། །རྡོ་རྗེ་གཙུག་ཏོར་དེ་བཞིན་གཤེགས། །སེམས་ཅན་ཀུན་ལ་ཕན་དོན་དུ། །ཐུགས་ཀ་ལས་བྱུང་བཞུགས་པ་ནི། །སྐུ་མདོག་དཀར་ཞིང་ འོད་ཟེར་འབར། །ས་གནོན་ཕྱག་རྒྱ་ཡང་དག་བཞུགས། །དེ་ལྟར་འོད་ཟེར་སྤྲོ་བསྡུ་ནི། །སྔར་བཤད་པ་ཡི་ཐམས་ཅད་ཀྱང་། །སྤྲོ་དང་བསྡུ་བའི་སྦྱོར་བ་ཡིས། །སྔགས་དང་འོད་ཟེར་ལེགས་འདྲེས་དང་། །སྐུ་ནི་བསྐྱེད་ཅིང་ཡང་དག་རྫོགས། །ཇི་བཞིན་གནས་སུ་བཞུགས་པར་བྱ། །ཨོྃ་ རཏྣོཏྣ་མ་ཏྲཱྃ་ཞེས་བྱ་བས་དབྱུང་བར་བྱའོ། །ལྷོ་ཡི་རྩིབས་སུ་ཡང་དག་བཞུགས། །པདྨ་ཟླ་བའི་དབུས་སུ་ནི། །རིན་ཆེན་གཙུག་ཏོར་དེ་བཞིན་གཤེགས། །ཐུགས་ཀ་ནས་ནི་དེས་བཏོན་ནས། །སངས་རྒྱས་མཚན་གྱིས་ཡང་དག་བརྒྱན། །སྐུ་མདོག་སྔོ་ཞིང་ཤིན་ཏུ་མཛེས། །འདི་ཡི་ཕྱག་རྒྱ་མཆོག་ སྦྱིན་ཉིད། །ཁམས་གསུམ་པ་ནི་མ་ལུས་པའི། །སེམས་ཅན་ཀུན་ལ་དབང་སྐུར་མཛོད། །སྔར་བཞིན་སྤྲོ་དང་བསྡུ་བ་དང་། །གཟུགས་བསྐྱེད་པ་ཡི་རིམ་པ་ཡིས། །ཨོྃ་པདྨོ་ཏྟ་མ་ཧྲཱིཿཞེས་དབྱུང་བར་བྱའོ། །དེ་ནས་ནུབ་ཀྱི་རྩིབས་གནས་པའི། །པད་སྟེངས་ཟླ་བའི་དཀྱིལ་འཁོར་ལ། །ས་ བོན་འོད་ཟེར་གྱིས་རྫོགས་པའི། །པདྨ་གཙུག་ཏོར་དེ་བཞིན་གཤེགས། །ཐུགས་ཀ་ལས་ནི་ཕྱུང་གྱུར་ནས། །རྗེས་སུ་སྟོན་མཛད་བཞུགས་པ་ནི། །པདྨ་རཱ་གའི་འོད་འབར་བ། །བསམ་གཏན་ཕྱག་རྒྱས་རྣམ་པར་བཞུགས། །ཨོྃ་བི་ཤྭོཏྟ་མ་ཨཿཞེས་དབྱུང་ངོ་། །བྱང་ཕྱོགས་རྩིབས་
- 109a
གནས་པདྨ་ཡི། །སྟེང་དུ་ཟླ་བའི་དཀྱིལ་འཁོར་ལ། །ཐུགས་ཀ་ནས་བཏོན་སངས་རྒྱས་ནི། །སྣ་ཚོགས་གཙུག་ཏོར་དེ་བཞིན་གཤེགས། །སྐུ་མདོག་ལྗང་གུ་འོད་འབར་བ། །འདི་ཡི་ཕྱག་རྒྱས་མི་འཇིགས་སྦྱིན། །ཕྱག་རྒྱས་ཕྲིན་ལས་སྣ་ཚོགས་མཛད། ། སེམས་ཅན་འཁོར་བ་ལས་སྒྲོལ་བའོ། །ཡི་གེ་ཨོྃ་གྱིས་སངས་རྒྱས་དབྱུང་། །གཙུག་ཏོར་གཟི་བརྗིད་དེ་བཞིན་གཤེགས། །མེ་ཡི་མཚམས་གནས་པདྨར་གནས། །ཡང་དག་ཟླ་བའི་དཀྱིལ་འཁོར་ལ། །གཡས་པས་ཉི་མ་ཡང་དག་བསྣམས། །ཕྱག་གཡོན་པ་ནི་དཀུ་ལ་གནས། །སྐུ་ མདོག་དཀར་དམར་འོད་ཀྱིས་ནི། །ཁམས་གསུམ་པོ་ནི་སྣང་བར་མཛད། །ཧཱུྃ་གི་ས་བོན་ལས་བྱུང་བ། །གཙུག་ཏོར་རྒྱལ་མཚན་དེ་བཞིན་གཤེགས། །ཐུགས་ཀ་ལས་བྱུང་ཕྱུང་ནས་ནི། །བདེན་བྲལ་རྩིབས་ལ་བཞུགས་ནས་ནི། །བདག་ནས་ཟླ་བའི་གཟུགས་ལ་ཡང་། །སྐུ་མདོག་ དམར་ཞིང་གནག་པ་ལ། །ཡིད་བཞིན་ནོར་བུའི་རྒྱལ་མཚན་བསྣམས། །སེམས་ཅན་སེར་སྣ་སྦྱོང་མཛད་པ། །དྷཱིཿཡིག་ས་བོན་ལས་རྫོགས་པའི། །གཙུག་ཏོར་རྣོན་པོ་དེ་བཞིན་གཤེགས། །ཉོན་མོངས་ཉེ་བའི་ཉོན་མོངས་རྣམས། །གཅོད་མཛད་རླུང་གི་རྩིབས་སུ་ཕྱུང་། །པདྨ་ཟླ་བ་ ལ་བཞུགས་ཤིང་། །འདི་ཡི་ཕྱག་མཚན་གཡས་རལ་གྲི། །གཡོན་ན་གླེགས་བམ་བསྣམས་པ་ནི། །སྐུ་མདོག་མཁའ་ལྟར་སྔོ་བའོ། །པདྨ་ལ་གནས་ཟླ་བར་བཞུགས། །ཏྲཱྃ་ཡིག་ས་བོན་ལས་བྱུང་བའི། །གཙུག་ཏོར་གདུགས་དཀར་དེ་བཞིན་གཤེགས། །སེམས་ཅན་རྣམས་ཀྱི་ ཆོས་ཀྱི་རྗེ། །དབང་ལྡན་རྩིབས་སུ་དབྱུང་བར་བྱ། །ཀུནྡ་ལྟ་བུའི་མདོག་ལྟ་བུ། །འདི་ཡི་ཕྱག་མཚན་གདུགས་བསྣམས་པ། །དེ་ཀུན་སྣ་ཚོགས་པདྨར་གནས། །ཟླ་བའི་དཀྱིལ་འཁོར་ལ་བཞུགས་པའི། །ཨོྃ་ཏྲཱྃ་ཧྲཱིཿཨཿ། སྔགས་དེ་རྣམས་སུ་བརྗོད་ནས་སུ། །ཐུགས་ཀ་ནས་ཀྱང་ དབྱུང་བ་དང་། །མཚམས་ཀྱི་གནས་ནི་བཞི་པོ་རུ། །པདྨ་ཟླ་བའི་དཀྱིལ་འཁོར་ལ། །སྒེག་མོ་ལ་སོགས་ལྷ་མོ་བཞི། །རིགས་ཀྱི་སྐུ་མདོག་འཛིན་པ་སྟེ། །དཀར་སེར་དམར་པོ་སྣ་ཚོགས་མདོག །དེ་ནས་ཕྱག་རྒྱ་བཅིང་བ་ནི། །སྔར་བཤད་ཇི་སྐད་བཤད་བཞིན་དུ། །སྔགས་དེ་ཉིད་ནི་
- 109b
བརྗོད་ནས་སུ། །ཐུགས་ཀ་ནས་ཀྱང་དབྱུང་བྱ་སྟེ། །བདུག་པ་ལ་སོགས་ལྷ་མོ་བཞི། །པདྨ་ལ་གནས་ཟླ་བ་ཡི། །དཀྱིལ་འཁོར་དུ་ནི་མཚམས་བཞི་པོ། །ཐམས་ཅད་དུ་ཡང་སྐུ་མདོག་ནི། །རིགས་ཀྱི་རིམ་པ་ཉིད་ཀྱིས་སོ། །ཨོྃ་སརྦ་སྃ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུཏྒ་ཏེ་ སྭ་བྷཱ་བ་བི་ཤུདྡྷེ་མ་ཧཱ་ན་ཡ་པ་རི་བཱ་རེ་སྭཱ་ཧཱ། །སྔགས་ཀྱིས་དབྱུང་སྟེ་ཤར་གྱི་སྒོའི། །གཞོགས་གཉིས་དག་ཏུ་གནས་པ་ནི། །བྱམས་པ་ལ་སོགས་གནས་བཞི་པོ། །པད་གནས་ཟླ་བའི་དཀྱིལ་འཁོར་ལ། །ཐམས་ཅད་སེམས་དཔའི་སྐྱིལ་ཀྲུང་ཅན། །ཕྱག་རྒྱ་སྐུ་མདོག་རིམ་པ་ཡང་། །བྱམས་ པ་ཐུགས་ནི་རྣམ་དག་པ། །སྐུ་མདོག་སེར་པོ་འོད་ཟེར་བཟང་། །གཡས་པ་ཀླུ་ཤིང་མེ་ཏོག་ཅན། །གཡོན་པས་སྤྱི་བླུགས་བསྣམས་པའོ། །གཉིས་པ་མཐོང་བ་དོན་ཡོད་ནི། །སྐུ་མདོག་སེར་པོ་འོད་ཟེར་འབར། །ཕྱག་གཡས་པདྨ་སྤྱན་ཅན་ཏེ། །གཡོན་པའི་ཕྱག་ནི་དཀུར་བཞག་ པའོ། །བྱང་ཆུབ་སེམས་དཔའ་གསུམ་པ་ཡང་། །མཚན་ནི་ངན་སོང་སྤོང་འཇོམས་པ། །སྐུ་མདོག་དཀར་པོ་འོད་འབར་ཞིང་། །ཕྱག་རྒྱ་ལྕགས་ཀྱུ་བསྣམས་པ་ཅན། །བཞི་པ་མྱ་ངན་མུན་པ་ཀུན། །ངེས་འཇོམས་བློ་གྲོས་དེ་བཞིན་ཏེ། །དཀར་སེར་འདྲེས་པའི་མདོག་ཏུ་སྣང་། །དེ་ཡི་ ཕྱག་རྒྱ་དབྱུག་བ་བསྣམས། །གཡོན་པ་ཁུ་ཚུར་དཀུར་བཞག་ཅིང་། །སེམས་དཔའི་སྐྱིལ་མོ་ཀྲུང་དུ་བཞུགས། །བྱང་ཆུབ་སེམས་དཔའ་བཞི་རྣམས་ཀྱང་། །ལྷོ་སྒོར་རབ་ཏུ་བཞུགས་པའོ། །དང་པོ་སྤོས་ཀྱི་གླང་པོ་ཡང་། །དཀར་པོ་སྔོ་བའི་སྐུ་མདོག་ཅན། །འདི་ཡི་ཕྱག་རྒྱ་ཕྱག་གཡས་ ན། །དྲི་ཡིས་དུང་ནི་རབ་ཏུ་བཀང་། །གཡོན་པ་ཁུ་ཚུར་དཀུར་བཞག་ལ། །སྒྲིབ་པ་ཐམས་ཅད་རྣམ་པར་སྦྱོང་། །གཉིས་པ་དཔའ་བར་འགྲོ་བ་མཚོན། །ཉོན་མོངས་ཐམས་ཅད་རབ་གྲོལ་མཛད། །ཤེལ་གྱི་མདོག་ཅན་འོད་བཟང་བ། །འདི་ཡི་ཕྱག་རྒྱ་རལ་གྲི་བསྣམས། །གཡོན་པའི་ཕྱག་ ནི་དཀུར་བཞག་ནས། །སེམས་ཅན་སྡུག་བསྔལ་ཞི་མཛད་པའོ། །གསུམ་པ་ནམ་མཁའ་མཛོད་ཉིད་དེ། །རྒྱན་ནི་ཐམས་ཅད་ཀྱིས་བརྒྱན་པ། །དཀར་སེར་བསྲེས་པའི་སྐུ་མདོག་འོད། །སྒྲིབ་པ་ཐམས་ཅད་རྣམ་པར་སྤངས། །འདི་ཡི་ཕྱག་རྒྱ་ཕྱག་གཡས་ན། །པདྨ་ལ་གནས་ཆོས་ཀྱི་མཛོད། །
- 110a
གཡོན་པའི་ཕྱག་ནི་དཀུར་བཞག་ལ། །ནམ་མཁའ་ནོར་ཀུན་འཆང་བ་པོ། །བཞི་པ་ཡང་ནི་ཡེ་ཤེས་ཏོག །བསམ་པ་ཐམས་ཅད་ཡོངས་རྫོགས་མཛད། །སྔོན་པོའི་མདོག་ཅན་ཡང་དག་གསལ། །ཡིད་སྦྱིན་ནོར་བུའི་རྒྱལ་མཚན་བསྣམས། །གཡོན་ པའི་ཁུ་ཚུར་དཀུར་འཇོག་ཅིང་། །དབུལ་བའི་སྡུག་བསྔལ་དགྲོལ་བར་མཛད། །ནུབ་སྒོའི་དྲུང་དུ་པདྨ་ལ། །གནས་པའི་ཟླ་བའི་དཀྱིལ་འཁོར་དུ། །དང་པོ་བདུད་རྩི་འོད་ཅེས་བྱ། །ཟླ་བའི་མདོག་གིས་རྣམ་པར་མཛེས། །བདུད་རྩིའི་བུམ་པ་ལེགས་པར་བསྣམས། །ཅོད་པན་རིན་ ཆེན་ཕྱག་གིས་སོ། །གཡོན་པ་ཁུ་ཚུར་དཀུར་འཇོག་ཅིང་། །རྒྱ་ཆེན་ཚེ་ནི་སྩོལ་བ་པོ། །གཉིས་པའི་མཚན་ནི་ཟླ་བའི་འོད། །མི་ཤེས་པ་ཡི་མུན་པ་བསལ། །སྐུ་མདོག་དཀར་པོ་མཛེས་པ་ནི། །ཕྱག་རྒྱ་གཡས་པའི་ཕྱག་ཉིད་ཀྱིས། །པདྨར་གནས་པའི་ཟླ་བའི་གཟུགས། ། གཡོན་པ་ཁུ་ཚུར་དཀུར་བཞག་པའོ། །གསུམ་པ་བཟང་སྐྱོང་ཞེས་བྱ་བ། །དཀར་ཞིང་དམར་བའི་མདོག་ཅན་ཉིད། །ཆོས་རྣམས་ཐམས་ཅད་རབ་གསལ་མཛད། །ཕྱག་རྒྱ་ཕྱག་ནི་གཡས་པ་ཡིས། །རིན་ཆེན་འབར་བ་ཡང་དག་བསྣམས། །གཡོན་པ་ཁུ་ཚུར་དཀུར་གནས་པའོ། ། བྱང་ཆུབ་སེམས་དཔའ་བཞི་པ་ཡང་། །དྲ་བ་ཅན་གྱི་འོད་མཚན་ཅན། །སྐུ་མདོག་དམར་པོ་འོད་འབར་བ། །རྡོ་རྗེའི་གུར་ནི་བསྣམས་པ་ཅན། །བྱང་སྒོའི་རྩ་བར་པདྨ་ལ། །གནས་པའི་ཟླ་བའི་དཀྱིལ་འཁོར་དུ། །སངས་རྒྱས་སྲས་པོ་དང་པོ་ཉིད། །མཚན་ནི་རྡོ་རྗེ་སྙིང་པོ་ཞེས། །དཀར་ཞིང་ སྔོ་བའི་མདོག་དང་ལྡན། །ཕྱག་རྒྱ་ཕྱག་ནི་གཡས་པ་ཡིས། །ཨུཏྤ་ལ་ནི་རྡོ་རྗེར་ལྡན། །གཡོན་པ་ཁུ་ཚུར་དཀུར་གནས་པའོ། །གཉིས་པ་བློ་གྲོས་ཞེས་པ་ཡི། །མི་ཟད་པ་ཐར་ཡང་དག་ལྡན། །ཀུན་དུ་ཟླ་བའི་མདོག་ལྟར་གསལ། །ཕྱག་རྒྱ་ཕྱག་ནི་གཉིས་པ་ཡིས། །ཡེ་ཤེས་བུམ་པ་ ཡང་དག་བསྣམས། །སེམས་ཅན་ཐམས་ཅད་རབ་ཚིམ་མཛད། །སངས་རྒྱས་སྲས་པོ་གསུམ་པ་ཡང་། །སྤོབས་པ་བརྩེགས་པའི་ཐ་སྙད་ཅན། །སྐུ་མདོག་དམར་ཞིང་འོད་འབར་བ། །ཕྱག་རྒྱ་ཕྱག་གཡས་པདྨ་ལ། །གནས་པའི་རིན་ཆེན་ཕུང་པོ་ཉིད། །གཡོན་པ་ཁུ་ཚུར་དཀུར་གནས་པའོ། །
- 110b
རྒྱལ་བའི་སྲས་པོ་བཞི་པ་ནི། །ཀུན་དུ་བཟང་པོ་ཞེས་བྱ་སྟེ། །སྐུ་མདོག་སེར་ཞིང་འོད་འབར་བ། །གཡས་པའི་ཕྱག་གི་ཕྱག་རྒྱ་ནི། །རིན་ཆེན་སྙེ་མ་བསྣམས་པ་ལ། །གཡོན་པ་ཁུ་ཚུར་དཀུར་བརྟེན་པའོ། །དེ་ལྟའི་གཟུགས་དང་ཡང་དག་ལྡན། །བྱང་ཆུབ་སེམས་དཔའ་བརྩེ་ བདག་ཉིད། །དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །ཨོྃ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། །ན་མ་སཿསརྦ་དུརྒ་ཏི་པ་རི་ཤོ་དྷ་ན་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾམྱ་ཀྶྃ་བུདྡྷཱ་ཡ། ཏདྱ་ཐཱ། ཨོྃ་ཤོ་དྷ་ནེ་ཤོ་དྷ་ནེ། སརྦ་པཱ་པྃ་བི་ཤོ་དྷ་ནེ། ཤུདྡྷེ་བི་ཤུདྡྷེ་སརྦ་ཀརྨཱ་བ་ར་ཎ་བི་ཤུདྡྷེ་ སྭཱ་ཧཱ། །སྔགས་འདིས་ཤཱཀྱའི་རྒྱལ་པོ་ལ་སོགས་པ་ལྷ་སུམ་ཅུ་རྩ་བདུན་ཡོངས་སུ་རྫོགས་པར་བསྒོམ་མོ། །དེ་ནས་དེའི་རྗེས་ལ་ཡེ་ཤེས་ཀྱི་དཀྱིལ་འཁོར་སྤྱན་དྲང་བར་བྱའོ། །སྔགས་དང་ཕྱག་རྒྱ་མཉམ་ལྡན་པས། །སྒོ་ནི་དབྱེ་བར་བྱས་ནས་སུ། །རྡོ་རྗེ་ཁུ་ཚུར་གཉིས་བཅིངས་ལ། ། མཛུབ་མོ་གཉིས་ནི་རབ་ཏུ་བརྐྱང་། །མཐེ་ཆུང་ལུ་གུ་རྒྱུད་བྱས་ལ། །སྒོ་དབྱེ་བ་ཡི་ཕྱག་རྒྱ་ཡིས། ཨོྃ་སརྦ་བིདྡྭཱ་རོདྒྷཱ་ཊ་ཡ་ཧཱུྃ། སྒོ་དབྱེ་བའི་སྔགས་དང་ཕྱག་རྒྱས་སྒོ་དབྱེའོ། །རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་ཡོངས་སུ་བཏེག་སྟེ། །ཨོྃ་སརྦ་བིདྦ་ཛྲ་ཙཀྲ་ཧཱུྃ། ལག་ངར་དག་ ནི་རྡོ་རྗེར་བཅིངས། །རྡོ་རྗེ་སེ་གོལ་རྣམ་གྲོལ་བས། །ཤཱཀྱའི་རྒྱལ་པོ་སྦྱོར་བདག་དཔལ། །སངས་རྒྱས་ཐམས་ཅད་བསྡུ་བར་བྱ། །གཡོན་པ་སེ་གོལ་བརྡབས་པ་ཡིས། །མཉམ་པར་བརྡབས་པར་གྲུབ་པར་འགྱུར། །གཡས་པ་ཡིས་ཀྱང་བརྡབ་པར་གསུངས། །གཉིས་ཀ་ཡང་ ནི་སྡུད་པ་ཡིན། །ཨོྃ་བཛྲ་ས་མཱ་ཛཿཛཿཧཱུྃ་བྃ་ཧོཿ། བཀའ་བསྒོ་བ་འདི་བསྒྲགས་ཙམ་གྱིས། །འཁོར་དང་བཅས་པའི་འཁོར་ལོའི་ཚོགས། །སངས་རྒྱས་ཐམས་ཅད་བྱོན་འགྱུར་ན། །གཞན་རྣམས་རབ་འཇུག་ལྟ་ཅི་སྨོས། །དེ་ནས་མདུན་གྱི་ནམ་མཁའ་དཀྱིལ་འཁོར་གྱི་འཁོར་ལོ་བལྟས་ལ། རྡོ་རྗེ་གནོད་སྦྱིན་གྱི་སྔགས་ཀྱིས་མཆོད་ཡོན་གྱི་སྣོད་ན་གནས་པའི་དྲིའི་ཆུ་ཡིས་ཡང་དག་པར་བསངས་ཏེ། ཞལ་བསིལ་དབུལ་ལོ། །དེ་ནས་མཆོད་ཡོན་གྱི་ཕྱག་རྒྱས་མཆོད་ཡོན་དབུལ་ལོ། །དེ་ནས་ཞབས་བསིལ་གྱི་ཕྱག་རྒྱས་ཞབས་བསིལ་དབུལ་ལོ། །དེ་ནས་བཛྲ་བུཥྤེ་ཧཱུྃ། བཛྲདྷཱུ་པེ་
- 111a
ཧཱུྃ། བཛྲ་དཱི་པེ་ཧཱུྃ། བཛྲ་གནྡྷེ་ཧཱུྃ། རྡོ་རྗེ་གནོད་སྦྱིན་གྱི་ཕྱག་རྒྱས་བགེགས་བསྐྲད་ལ། དཀྱིལ་འཁོར་དུ་གཞུག་གོ། །དེ་ནས་ཡང་ཕྱག་རྒྱ་དང་པོར་སྔར་བཤད་པའི་ཕྱག་རྒྱའི་ཚོགས་དམ་ཚིག་གི་ཕྱག་རྒྱ་རྣམས་བཅིང་ངོ་། །དེ་ནས་སྔར་བཤད་པའི་སྔགས་ཀྱིས་ ཆོས་ཀྱི་ཕྱག་རྒྱའི་ཆོ་ག་བྱའོ། །དེ་ནས་ལས་ཀྱི་ཕྱག་རྒྱའི་སྔགས་ཀྱིས་ལས་ཀྱི་ཕྱག་རྒྱ་བཅིང་ངོ་། །དེ་ནས་ཕྱག་རྒྱ་ཆེན་པོའི་སྔགས་ཀྱིས་ཕྱག་རྒྱ་ཆེན་པོ་བསྒྲུབ་པར་བྱའོ། །དེ་ནས་རྡོ་རྗེ་གཙུག་ཏོར་ལ་སོགས་པའི་དེ་བཞིན་གཤེགས་པ་རྣམས་ཀྱིས་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་ དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་སྤྲོས་ཏེ་དཀྱིལ་འཁོར་དང་བཅས་པའི་ལྷ་དཔལ་ཤཱཀྱའི་རྒྱལ་པོ་ནས་བརྩམས་པའི་རྡོ་རྗེ་འབེབས་པའི་མཐར་ཐུག་པ་ལ་དབང་བསྐུར་བ་སྦྱིན་པར་བྱ་སྟེ། དབང་བསྐུར་བ་ལྔ་དང་། བདག་པོ་སྟེ་ས་བཅུའི་མཐར་ཐུག་པ་སྦྱིན་ནོ། །དབང་བསྐུར་ མ་ཐག་ཏུ། །ཨོྃ་སརྦ་ཏ་ཐཱ་ག་ཏ་དྷཱུ་པེ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་སརྦ་ཏ་ཐཱ་ག་ཏ་པུཥྤ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་སརྦ་ཏ་ཐཱ་ག་ཏ་དཱི་པ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། ཨོྃ་སརྦ་ཏ་ཐཱ་ག་ཏ་གནྡྷེ་པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། དེ་ནས་སྒེག་ མོ་ལ་སོགས་པ་བཞི་ཡིས་མཆོད་དོ། །རྡོ་རྗེ་གསོར་ཞིང་རྡོ་རྗེའི་ཚིག་ཡི་གེ་བརྒྱ་པ་སྔོན་དུ་འགྲོ་བས་སྔར་བཞིན་བསྟོད་པ་བྱའོ། །དེ་ནས། མཉམ་མེད་མི་གཡོ་མཉམ་མེད་སྙིང་པོའི་ཆོས་ཅན་ནི། །ཐུགས་རྗེའི་བདག་ཉིད་ཅན་ཉིད་འགྲོ་བའི་སྡུག་བསྔལ་སེལ། །ཡོན་ཏན་དངོས་ གྲུབ་ཐམས་ཅད་མཐའ་ཡས་སྦྱིན་མཛད་པ། དྲི་མེད་མི་གཡོ་མཉམ་མེད་མཆོག་རབ་ཆོས་ཅན་རྣམས། །ཡོན་ཏན་མཆོག་ནི་ཕྲ་མོའི་ཆ་ལའང་མཚམས་མེད་དོ། །ནམ་མཁའ་དང་མཉམ་དཔེར་གྱུར་པ་ཉིད་ཡོད་མ་ཡིན། །སེམས་ཅན་ཁམས་ལ་གྲུབ་མཆོག་སྩོལ་བ་རྣམས་ལ་ གསོལ། །དངོས་གྲུབ་མཐའ་ཡས་རྣམས་ལ་དཔེ་དང་རྣམ་པར་བྲལ། །དྲི་མེད་ཐུགས་རྗེ་བརྒྱ་པ་ཉིད་ཀྱི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་ལྷུར་མཛད་མཐའ་ཡས་མངའ་བ་ཅན། །ཐུགས་རྗེ་ཆེན་པོའི་བདག་ཉིད་རྟག་ཏུ་
- 111b
རྣམ་པར་སྣང་། །འགག་མེད་ཉིད་ཀྱི་ཐུགས་རྗེའི་སྤྱོད་པ་མི་གཡོ་བ། །འཇིག་རྟེན་གསུམ་ལ་མཆོག་གི་དངོས་གྲུབ་སྩོལ་བ་འཇུག །དཔག་མེད་དཔག་བྲལ་རྣམས་ལ་ཤིན་ཏུ་རྫོགས་ཉིད་རྫོགས། །བདེ་བའི་གནས་སུ་གཤེགས་ཀྱང་ཨེ་མའོ་ཆོས་ཉིད་བཟང་། རྟག་ ཏུ་མཆོག་སྦྱིན་ཉིད་དེ་བདེ་འགྲོ་ཉིད་དུ་གཤེགས། །མཐའ་དག་འཇིག་གསུམ་ལ་གྲུབ་མཆོག་ནི་སྩལ་བ་པོ། །བདེ་གཤེགས་དུས་གསུམ་བསྒྲོད་ཉིད་སྒྲིབ་པ་མི་མངའ་ཉིད། དམ་ཚིག་གསུམ་མཆོག་དངོས་གྲུབ་མཆོག་སྦྱིན་བདག་ལ་སྩོལ། །ཅེས་པ་དང་། ཐམས་ཅད་ལ་ལྕེ་བརྒྱ་པའི་ ཁ་ཡིས་བསྟོད་པ་ཉེ་བར་སྤྱོད་པར་མོས་ཏེ་རྡོ་རྗེ་དང་དྲིལ་བུ་འཛིན་པས་བསྟོད་པར་བྱའོ། །དེ་ནས་ཕྱོགས་བཅུར་དེ་བཞིན་གཤེགས་པ་དང་བྱང་ཆུབ་སེམས་དཔའ་ཐམས་ཅད་དང་འཇིག་རྟེན་དང་འཇིག་རྟེན་ལས་འདས་པའི་ཕྱི་རོལ་གྱི་ལྷ་རྣམས་ལ་མཆོད་པ་ཐམས་ཅད་དང་གཏོར་མའི་ཆོ་ག་ཉེ་བར་མཁོ་ བ་དང་བཅས་པའི་གཏོར་མ་དབུལ་ལོ། །དཔུང་པ་བཟང་པོའི་ཚིགས་བཅད་བརྗོད་དོ། །དང་པོར་སེ་གོལ་ལ་སོགས་སྒྲས། །ཁམས་གསུམ་རྣམ་རྒྱལ་ཕྱག་རྒྱ་ཡིས། །སྡིག་པའི་ཕུང་པོ་དགུག་བྱ་ཞིང་། །ཡི་གེ་གསུམ་སོགས་ཡང་དག་ལྡན། །འཇིག་རྟེན་ཁམས་ནི་མ་ལུས་པའི། །སྡིག་ པ་ཐམས་ཅད་མཉམ་པོར་སྤོང་། །དགུག་དང་གདོན་དང་བཅིང་བ་རྣམ་པར་གཞོམ། །སྔགས་བཞི་པོ་རྣམས་ལེགས་པར་སྦྱར་བ་ནི། །བདག་སོགས་བསྔགས་ཏེ་ཡུངས་ཀར་དང་པོ་བརྡེག །ཤི་བའི་རུས་པ་གོས་ལ་རབ་བཀྲུ་བ། །ཨོྃ་ཤོ་དྷ་ནེ་ཞེས་སོགས་སྔགས་ཀྱིས་ནི། །སྲིད་གསུམ་ དྲི་མ་ཆུ་ཡིས་བཀྲུ་བར་བྱ། །ཨོྃ་ཀྃ་ཀ་ནི་ཞེས་སོགས་སྔགས་ཀྱིས་ནི། །བ་ཡི་རྣམ་པ་ལྔ་ཡིས་བཀྲུ་བར་བྱ། །ཨོྃ་རཏྣེ་རཏྣེ་ཞེས་སོགས་སྔགས་ཀྱིས་ནི། །དྲི་བཟངས་རྣམས་ནི་ཀུན་གྱིས་བཀྲུ་བར་བྱ། །ཨོྃ་ཨ་མོ་གྷ་ཨཱ་བ་ར་ཎ་སོགས། །སྔགས་ཀྱིས་བ་ཡི་འོ་མས་བཀྲུ་བར་བྱ། །ཨོྃ་ཨ་མི་ ཏེ་ཨ་མི་ཏེ་ཞེས་སོགས། །སྔགས་ཀྱིས་ཆང་མཆོག་གིས་ཀྱང་བཀྲུ་པར་བྱ། །ཨོྃ་པུ་ཎྱེ་སོགས་པའི་སྔགས་ཀྱིས་ནི། །བར་དང་བར་དུ་ཆུ་ཡིས་བཀྲུ་བར་བྱ། །ཡང་བཀྲ་ཤིས་ཀྱི་གླུ་བླང་ཞིང་དབང་བསྐུར་ཏེ། ལམ་སྦྱང་བ་བྱའོ། །བདུག་པ་ལ་སོགས་ལྷ་མོ་བཞིའི་སྔགས་སོ། །དེ་
- 112a
ནས་འདི་ཡི་ཐབ་ཁུང་ནི། །ཁྲུ་གང་ཙམ་ལ་སྦྱིན་སྲེག་བྱ། །ངན་འགྲོ་ཀུན་དུ་གནས་པ་ཡི། །སེམས་ཅན་དེ་རྗེས་དྲན་བྱས་ནས། །དགེ་བའི་རྒྱུད་ཕྱིར་སྡིག་པ་དང་། །སྒྲིབ་པ་ཞི་ཕྱིར་བསྲེག་བྱ་སྟེ། །མར་དང་འོ་མ་སྦྲང་རྩི་དང་། །འབྲས་ཡོས་ཉུངས་ཀར་ བསྲེས་པ་དང་། །ཏིལ་དང་འབྲུ་དང་འབྲས་ལ་སོགས། །བུད་ཤིང་རྣམས་སུ་ལག་གཉིས་ཀྱིས། །ལས་རྣམས་གཞན་དང་གཞན་དག་ཀྱང་། །སྔ་མ་ཇི་ལྟར་དེ་ལྟར་གྱིས། །དེ་ཡིས་མྱུར་དུ་སེམས་ཅན་རྣམས། །བདེ་བ་ཕུན་སུམ་ཚོགས་པ་འཐོབ། །ལས་ཀྱི་རྒྱལ་པོ་མཆོག་ ཅེས་བྱ་བའི་ཏིང་ངེ་འཛིན་ཏོ། །དེ་དག་ཀྱང་སེམས་ཅན་དེ་ལ་བྱས་པ་དེ་ནས་དེ་དམྱལ་བའི་སྡུག་བསྔལ་ལས་རྣམ་པར་གྲོལ་བར་འགྱུར་ཏེ། དགའ་ལྡན་གྱི་གནས་སུ་སེམས་ཅན་ཐམས་ཅད་ལ་ཕན་པར་མཛད་པ་བདེ་བར་གཤེགས་པ་དང་ལྡན་པར་སྐྱེས་སོ། །དེ་ནས་དབང་པོ་དང་བཅས་ པའི་ལྷ་རྣམས་སྙན་གྲགས་དང་བཅས་པས་གར་བྱེད་ཅིང་། སྔགས་ཀྱི་མཆོད་པའི་སྤྲིན་མཐའ་ཡས་པས་སྐྱེ་བ་འདི་ཉིད་ལ་དེ་བཞིན་གཤེགས་པ་ལ་མཆོད་པའི་ཕྱིར་ལྷའི་ཚོགས་རྣམས་མདུན་དུ་བྱ་སྟེ། བྱང་ཆུབ་ཀྱི་སེམས་བསྐྱེད་ནས་ལྷ་རྫས་ཀྱི་མེ་ཏོག་དང་། བདུག་པ་དང་། མར་མེ་དང་། དྲི་དང་། གདུགས་དང་། རྒྱལ་མཚན་དང་། བ་དན་ལ་སོགས་པ་སྣ་ཚོགས་པ་དང་། རྒྱན་དུ་མ་རྣམས་ཀྱིས་ཀྱང་མཛེས་ཤིང་ན་བཟའ་དང་རིན་པོ་ཆེའི་ཆར་ལ་སོགས་པས་ཀྱང་དགའ་བའི་ཚལ་ཡོངས་སུ་གང་བར་བྱས་སོ། །དེ་ནས་ངོ་མཚར་ཆེ་བར་གྱུར་ཏོ། །ངན་སོང་ཐམས་ཅད་ ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་ལས་བརྟག་པ་དང་པོའོ།། །།དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱིས་བྱིན་གྱིས་བརླབས་ཀྱིས་སྔགས་ཀྱི་བརྟག་པའི་རྒྱལ་པོ་ བརྟག་པ་ཕྱི་མ་གསུངས་ཏེ། དཔའ་བོ་གདན་ལས་བཞེངས་ནས་ནི། དགྱེས་པས་རྡོ་རྗེ་གསོར་ཞིང་ཤཱཀྱའི་བདག་པོ་དགྱེས་པ་ཐུབ་པའི་དབང་ཕྱུག་ལ་ཕྱག་འཚལ་ནས་སྒྲིབ་པ་ཐམས་ཅད་རྣམ་པར་སྦྱོང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ངན་སོང་ཐམས་ཅད་ཡོངས་
- 112b
སུ་སྦྱོང་བ་ཞེས་བྱ་བའི་སྙིང་པོ་འདི་ཉིད་རང་གི་ཐུགས་ཀ་ནས་ཕྱུང་ངོ་། །ཨོྃ་སརྦ་པཱ་པྃ་ད་ཧ་ན་བཛྲ་ཧཱུྃ་ཕཊ། ཨོྃ་སརྦ་པ་ཡ་བི་ཤོ་དྷ་ན་བཛྲ་ཧཱུྃ་ཕཊ། ཨོྃ་སརྦ་ཀརྨ་བར་ཎ་ནི་བྷ་སྨཱི་ཀུ་རུ་ཧཱུྃ་ཕཊ། །ཨོྃ་བྲུྃ་བི་ནཱ་ཤ་ཡ་སརྦཱ་བར་ཎཱ་ནཱི་བཛྲ་ཧཱུྃ་ཕཊ། ཨོྃ་དྲུྃ་བི་ཤོ་དྷ་ཡ་སརྦ་བར་ཎ་ནི་ཧཱུྃ་ཕཊ། ཨོྃ་ཛྭ་ལ་ ཛྭ་ལ་དྷ་ཀ་དྷ་ཀ་ཧ་ན་ཧ་ན་སརྦཱ་བར་ཎཱ་ནི་ཧཱུྃ་ཕཊ། ཨོྃ་སྲུྃ་ས་རས་ར་པྲ་ས་ར་པྲ་ས་ར་སརྦཱ་བ་ར་ཎཱ་ནི་ཧཱུྃ་ཕཊ། ཨོྃ་ཧཱུྃ་ཧ་ར་ཧ་ར་སརྦཱ་བ་ར་ཎཱ་ནི་ཧཱུཾ་ཕཊ། ཨོྃ་ཧཱུྃ་ཕཊ་སརྦཱ་བ་ར་ཎཱ་ནི་ཧཱུྃ་ཕཊ། ཨོྃ་བྲྀ་ཏ་བྲྀ་ཏ་སརྦཱ་བ་ར་ཎཱ་ནི་ཧཱུྃ་ཕཊ། ཨོྃ་ཏྲ་ཊ་ཏྲ་ཊ་སརྦཱ་བར་ཎཱ་ནི་ཧཱུྃ་ཕཊ། ཨོྃ་ཙྪིནྡ་ཙྪིནྡ་སརྦཱ་བར་ཎཱ་ནི་ཧཱུྃ་ཕཊ། ཨོྃ་ད་ཧ་ད་ཧ་སརྦ་ན་ར་ཀ་ག་ཏི་ཧེ་ཏུྃ་ཧཱུྃ་ཕཊ། ཨོྃ་པ་ཙ་པ་ཙ་སརྦ་བྲེ་ཏ་ག་ཏི་ཧེ་ཏུྃ་ཧཱུྃ་ཕཊ། ཨོྃ་མ་ཐ་མ་ཐ་སརྦ་ཏིར་ཡ་ཀ་ག་ཏི་ཧེ་ཏུྃ་ཧཱུྃ་ཕཊ། དེ་ནས་དེ་དག་གི་ཉེ་བར་མཁོ་བ་རྣམས་སྤྱད་དེ། ཨོྃ་སརྦ་པཱ་པྃ་བི་ཤོ་དྷ་ནེ་དྷ་མ་དྷ་མ་དྷཱུ་པ་ཡ་ཧཱུྃ་ཕཊ། ཨོྃ་སརྦ་དུརྒ་ཏི་བི་ཤོ་དྷ་ནེ་པུཥྤ་བི་ལོ་ཀི་ནི་ ཧཱུྃ་ཕཊ། ཨོྃ་སརྦཱ་པཱ་ཡ་བི་ཤོ་དྷ་ནི་ཛྙཱ་ནཱ་ལོ་ཀ་ཀ་རི་ཧཱུྃ་ཕཊ། ཨོྃ་སརྦཱ་པཱ་ཡ་ག་ཏི་གནྡྷ་ནཱ་ཤ་ནི་གནྡྷ་བ་ཏི་ཧཱུྃ་ཕཊ། ཨོྃ་སརྦ་ན་ར་ཀ་ག་ཏི་ཨཱ་ཀཪྵ་ནི་ཧཱུྃ་ཛཿཕཊ། ཨོྃ་སརྦ་ན་ར་ཀེདྡྷཱ་ར་ཎི་ཧཱུྃ་ཧཱུྃ་ཕཊ། ཨོྃ་སརྦ་པ་ཡ་བྷནྡྷ་ན་བི་མོ་ཙ་ནི་ཧཱུྃ་བྃ་ཕཊ། ཨོྃ་སརྦ་པ་ཡ་ག་ཏི་ག་ཧ་ན་བི་ནཱ་ས་ནི་ཧཱུྃ་ཧོཿཕཊ། དེ་ནས་དཀྱིལ་འཁོར་བཤད་པར་བྱ་སྟེ། ནང་གི་དཀྱིལ་འཁོར་འཁོར་ལོ་ནི། །རྩིབས་བརྒྱད་པ་ཡིས་ཤིན་ཏུ་མཛེས། །ལྟེ་བ་མུ་ཁྱུད་ཡང་དག་ལྡན། །ནང་གི་རིམ་པ་བྲིས་ནས་ནི། །ལྟེ་བར་ཤཱཀྱའི་དབང་པོ་ཡི། །བདག་པོ་ཐུབ་པ་བྲི་བར་བྱ། །ཕྱག་ན་རྡོ་རྗེ་སྟོབས་ཆེན་ནི། །དཔའ་བོ་དེ་ཡི་ སྤྱན་སྔར་བྲི། །རྒྱབ་ཏུ་འཁོར་ལོས་སྒྱུར་བ་ཡང་། །ལེགས་པར་མངོན་པར་བྲི་བར་བྱ། །གཡས་སུ་རྒྱལ་བའི་གཙུག་ཏོར་བྲི། །གཡོན་དུ་རྣམ་པར་རྒྱལ་བ་བྲི། །གཟི་བརྗིད་ཕུང་པོ་ཡང་ནི་མེར། །དབང་ལྡན་དུ་ནི་གདུགས་དཀར་པོ། །རྣམ་པར་འཐོར་བ་རླུང་ཉིད་དུ། །རྣམ་པར་འཇོམས་ པ་བདེན་བྲལ་བྲི། །དེ་ནས་ཕྱི་རོལ་ཡང་དག་བྲི། །གྲུ་བཞི་པ་ལ་སྒོ་བཞི་པ། །རྟ་བབས་བཞི་པ་ཤིན་ཏུ་མཛེས། །དཔའ་བོ་ལྕགས་ཀྱུ་ཞགས་པ་དང་། །ལྕགས་སྒྲོག་དྲིལ་བུ་སྙན་རྣམས་བཞག །གྲྭ་ཡི་ཕྱོགས་ནི་ཐམས་ཅད་དུ། །བདུག་པ་ལ་སོགས་བྲི་བར་བྱ། །དེ་ནས་མེ་ཏོག་
- 113a
ཕྲེང་བ་དང་། །དྲི་སོགས་རང་གི་ལུས་ལ་བྱུག །སློབ་དཔོན་འཇུག་པར་བྱ་བ་སྟེ། །ཛཿཧཱུྃ་བྃ་ཧོཿབྷ་ག་བཱན། ཨེ་ཧྱེ་ཧི་མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོཿ། ཞེས་བྱ་བས་ལྷ་ཐམས་ཅད་སྤྱན་དྲང་ངོ་། །དེ་བཞིན་དུ་བཅུག་སྟེ་དབང་བསྐུར་ན་ངན་སོང་ཐམས་ཅད་ལས་རྣ་པར་ གྲོལ་ཏེ་བདེ་འགྲོ་མཐོ་རིས་ཀྱི་འཇིག་རྟེན་དང་ས་གོང་མ་རྣམས་སུ་སྐྱེ་བར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ཀྱང་གདོན་མི་ཟ་བར་ཐོབ་པར་འགྱུར་རོ། །སྔ་མ་བཞིན་དུ་ལས་ཐམས་ཅད་ཀྱང་བྱེད་ཅིང་ཐམས་ཅད་ལ་ཐོགས་པ་མེད་ པར་འགྱུར་རོ། །བྱབ་པ་བྱས་པས་རིམས་ཐམས་ཅད་དང་གདོན་ལ་སོགས་པ་རྣམས་ལས་ཐར་བར་འགྱུར་རོ། །ཕྱག་ན་རྡོ་རྗེའི་ཧཱུྃ་ཞེས་བྱ་བས་ལས་ཐམས་ཅད་བྱེད་དོ། །བརྟག་པ་གཞན་གྱི་ཆོ་གས་ཀྱང་ལས་ཐམས་ཅད་འགྲུབ་པར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། སྲིན་པོ་ལ་སོགས་པ་ངན་སོང་གི་དབང་དུ་གྱུར་པ་རྣམས་འགྲོ་བ་ཐམས་ཅད་ཀྱི་གཟུགས་བརྙན་ལ་སོགས་པ་མངོན་པར་བྲིས་པ་ལས་བཟླས་པ་དང་སྦྱིན་སྲེག་དང་དབང་བསྐུར་བ་རྣམས་ཀྱིས་ངན་སོང་ཐམས་ཅད་ལས་ཡོངས་སུ་གྲོལ་བར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་འཛིན་པས་སེང་གེའི་ ལྟ་སྟངས་ཀྱིས་ཞལ་དུ་བལྟས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་རྒྱ་མཆོག་གི་མཚན་ཉིད་དམ་པ་བཤད་པར་བྱ་སྟེ། ཐུགས་རྗེའི་གདུང་བའི་དབང་དུ་གྱུར་པའི་སེམས་ཀྱི་རྒྱལ་བ་ཐམས་ཅད་ཀྱི་བྱིན་གྱིས་བརླབ་པར་བྱའོ། །ཏིང་ངེ་འཛིན་དུ་གནས་པས་ དཔྲལ་བར་ཐལ་མོ་སྦྱར་ཏེ་ཕྱག་འཚལ་ལོ། །སངས་རྒྱས་རྣམས་ཀྱི་ཕྱག་འཚལ་བའི་ཕྱག་རྒྱའོ། །རྣལ་འབྱོར་རིག་པས་མགྲིན་པའི་ཕྱོགས་སུ་ཐལ་མོ་ཁ་ཕྱེ་བ་པདྨའི་རྣམ་པར་བྱའོ། །ཐུགས་ཀར་རྡོ་རྗེ་ཐལ་མོ་བྱས་སོར་མོ་དབུས་མ་རྩེ་མོ་སྦྱར་བ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། ། ལག་པ་གཡོན་པ་གན་རྐྱལ་དུ་པང་པར་བཞག་ལ་དེའི་སྟེང་དུ་གཡས་པ་བཟློག་སྟེ་བཞག་ལ་མཐེ་བོང་གཉིས་སྦྱར་ཏེ་ཞི་བའི་ལྟ་བས་བལྟའོ། །འདི་ནི་དེ་བཞིན་གཤེགས་པའི་རིགས་ཀྱི་དམ་ཚིག་གི་ཏིང་ངེ་འཛིན་གྱི་ཕྱག་རྒྱའོ། །དེ་ཉིད་ཡོངས་སུ་བསྐོར་ཏེ་ཕན་ཚུན་སྦྱར་ཏེ་མཐེའུ་ཆུང་དག་དང་
- 113b
མཐེ་བོང་དག་ལུ་གུ་རྒྱུད་ཀྱི་རྣམ་པར་བཅིངས་ལ་སྙིང་གར་གཞག་གོ། །འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། །ཐལ་མོ་གང་བར་སྦྱར་ནས་མཐེའུ་ཆུང་དང་མཐེ་བོང་སྦྱར་ཏེ་བཟུང་ཞིང་ལྷག་མ་རྣམས་རབ་ཏུ་བརྐྱང་བའོ། །འདི་ནི་པདྨ་རིགས་ཀྱི་པདྨའི་ཕྱག་རྒྱའོ། །རྡོ་རྗེ་བསྡམས་པར་ བརྟན་པར་བྱས་ནས། གུང་མོ་གཉིས་རྡོ་རྗེ་རྩེ་མོར་བྱས་ལ། མཐེའུ་ཆུང་དང་མཐེ་བོ་རབ་ཏུ་བརྐྱང་བའོ། །འདི་ནི་ཕྱག་ན་རྡོ་རྗེའི་ཕྱག་རྒྱའོ། །དེ་ཉིད་ཀྱིས་མཐེའུ་ཆུང་དང་མཐེ་བོང་གཉིས་དེ་བཞིན་དུ་བྱས་ལ། མཛུབ་མོ་དང་མིང་མེད་པདྨའི་འདབ་མའི་རྣམ་པར་བྱའོ། །འདི་ནི་ངན་སོང་ཐམས་ཅད་ ཡོངས་སུ་སྦྱོང་བའི་རྒྱལ་པོའི་ཕྱག་རྒྱའོ། །དེ་ཉིད་ཀྱི་མཛུབ་མོ་དང་མིང་མེད་དག་རིན་པོ་ཆེའི་རྣམ་པར་བྱའོ། །འདི་ནི་དབང་བསྐུར་བའི་ཕྱག་རྒྱའོ། །མཐེའུ་ཆུང་དང་མཐེ་བོང་སོ་སོ་སོ་སོར་སྦྱར་ནས་ལྷག་མ་རྣམས་རབ་ཏུ་བརྐྱང་བ་ནི་མཚོན་ཆ་ཐམས་ཅད་ཀྱི་ཕྱག་རྒྱའོ། །ལག་པ་ གཡོན་པ་དེ་ཁོ་ན་བཞིན་དུ་རབ་ཏུ་འཇུག་པ་ནི་ལས་ཐམས་ཅད་པའི་ཕྱག་རྒྱའོ། །སྙིམ་པ་གྱེན་དུ་འཐོར་བ་ནི་བདུག་སྤོས་ཀྱི་ཕྱག་རྒྱའོ། །དེ་ཉིད་འོག་ནས་འཐོར་བ་ནི་མེ་ཏོག་གི་ཕྱག་རྒྱའོ། །དེ་ཉིད་མཐེ་བོང་གཉིས་གྱེན་དུ་བསྙམས་ལ་འཛིན་པ་ནི་མར་མེའི་ཕྱག་རྒྱའོ། །དེ་ཉིད་དུང་འདྲ་བར་ བྱས་པ་ནི་དྲིའི་ཕྱག་རྒྱའོ། །དེ་ཉིད་རབ་ཏུ་བརྐྱང་སྟེ་འཛིན་པ་ནི་གཏོར་མའི་ཕྱག་རྒྱའོ། །དེ་ཉིད་གུང་མོ་རྣམས་ནང་དུ་བཅུག་པ་ནི་ཨརྒྷའི་ཕྱག་རྒྱའོ། །རྡོ་རྗེ་བཅིངས་པ་ལས་གུང་མོ་གཉིས་བསྙམས་ཏེ་ཚིགས་བར་མ་བཅག་ནས་སོར་མོ་ཐམས་ཅད་བརྐྱང་བ་འདི་ནི་རྣམ་པར་འཐོར་བའི་ཕྱག་རྒྱའོ། །དེ་ ཉིད་མཐེ་བོ་དང་མཐེ་ཆུང་གཉིས་བཀུག་པ་ནི་རྣམ་པར་འཇོམས་པའི་ཕྱག་རྒྱའོ། །དེ་ཉིད་ཀྱི་སྙིམ་པ་འོད་ཟེར་གྱི་རྣམ་པ་ནི་གཟི་བརྗིད་ཕུང་པོའི་ཕྱག་རྒྱའོ། །དེ་ཉིད་སྤྱི་བོའི་གནས་སུ་བསྐོར་བ་ནི་གདུགས་དཀར་པོའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་མཐེ་བོང་དང་མཐེའུ་ཆུང་གཉིས་ལུ་གུ་རྒྱུད་དུ་ བཅིངས་ལ་བསྐོར་བ་འདི་ནི་འཁོར་ལོའི་ཕྱག་རྒྱའོ། །རྡོ་རྗེ་བསྡམས་པ་ལས་གུང་མོ་གཉིས་རྡོ་རྗེར་བྱས་ལ་མཛུབ་མོ་གཉིས་རིན་པོ་ཆེ་ལྟར་བྱ་སྟེ། ལྷག་མ་འོད་ཟེར་འདྲ་བར་བྱས་པ་ནི་རྒྱལ་བའི་གཙུག་ཏོར་གྱི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་རྡོ་རྗེར་བྱས་ལ་སོར་མོ་ལྷག་མ་རྣམས་བསྡམས་
- 114a
ནས་རྡོ་རྗེ་འདྲ་བར་བྱས་པ་ནི་རྣམ་པར་རྒྱལ་བའི་ཕྱག་རྒྱའོ། །གཡས་པ་མཆོག་སྦྱིན་དང་གཡོན་པ་མི་འཇིགས་པ་སྦྱིན་པ་ནི་དེ་བཞིན་གཤེགས་པའི་ཡིན་ནོ། །རྡོ་རྗེ་བསྡམས་པ་ལས་མཛུབ་མོ་གཉིས་རྡོ་རྗེ་འདྲ་བར་བྱས་པ་ནི་རྡོ་རྗེའི་ཕྱག་རྒྱའོ། །དེ་ཉིད་ལས་མཛུབ་མོ་ གཡས་པ་བཀུག་པ་ནི་ལྕགས་ཀྱུའི་ཕྱག་རྒྱའོ། །དེ་ཉིད་ལས་མདའ་འདྲ་བར་བྱས་པ་ནི་མདའི་ཕྱག་རྒྱའོ། །དེ་ཉིད་ཀྱི་ཕྱག་རྒྱ་དང་མཐེ་བོང་རྩེ་སྤྲད་པ་ནི་བློ་གྲོས་ལེགས་པའིའོ། །དེ་ཉིད་ཀྱི་ཚིགས་བར་མ་བཅག་པ་ནི་རིན་པོ་ཆེའིའོ། །དེ་ཉིད་སོར་མོ་རྣམས་འོད་ཟེར་འདྲ་བ་ནི་གཟི་བརྗིད་ཀྱིའོ། ། དེ་ཉིད་སྤྱི་བོར་བཞག་པ་ནི་རྒྱལ་མཚན་གྱི་ཕྱག་རྒྱའོ། །དེ་ཉིད་མདུན་དུ་བཞག་པ་ནི་བཞད་པའིའོ། །དེ་ཉིད་པདྨ་འདྲ་བར་བྱས་པ་ནི་པདྨའོ། །དེ་ཉིད་གུང་མོ་དང་མཛུབ་མོ་བཀུག་པ་ནི་རལ་གྲིའོ། །དེ་ཉིད་གདུ་བུ་འདྲ་བར་བྱས་པ་ནི་འཁོར་ལོའིའོ། །དེ་ཉིད་པདྨའི་འདབ་མ་འདྲ་བར་བྱས་པ་ ནི་ལྕེའིའོ། །དེ་ཉིད་རྩེ་མོ་ཡིད་ཙམ་བསྐྱེད་པ་ནི་སྣ་ཚོགས་ཀྱིའོ། །དེ་ཉིད་ཤིན་ཏུ་བསྐྱེད་པ་ནི་བསྲུང་བའིའོ། །དེ་ཉིད་རྩེ་མོ་གཉིས་སླར་བཀུག་པ་ནི་གནོད་སྦྱིན་གྱིའོ། །དེ་ཉིད་དམ་དུ་བཀུག་པ་ནི་བསྡམས་པའིའོ། །དེ་ཉིད་མཛུབ་མོ་གཉིས་བཀུག་པ་ནི་ལྕགས་ཀྱུའོ། །དེ་ཉིད་རྩེ་མོ་ གཉིས་སྤྲད་པ་ནི་ཞགས་པའིའོ། །དེ་ཉིད་ཕན་ཚུན་མདུད་པ་ནི་ལྕགས་སྒྲོག་གིའོ། །དེ་ཉིད་བསྐྱོད་པ་ནི་དྲིལ་བུའིའོ། །དེ་ནས་ཚངས་པ་དང་བརྒྱ་བྱིན་ལ་སོགས་པ་ལྷའི་བུ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚེ་ཐུང་བ་དང་། སྐལ་བ་ ཆུང་བ་རྣམས་ཀྱི་དོན་དང་། ཕན་པ་དང་། བདེ་བ་དང་། ཚེ་བསྲིང་བའི་སླད་དུ་བཤད་དུ་གསོལ། །བདག་ལ་གསང་བའི་བདག་པོ་བཤད་དུ་གསོལ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་བརྒྱ་བྱིན་དང་ཚངས་པ་ལ་སོགས་པ་འཁོར་གྱི་དཀྱིལ་འཁོར་ཆེན་པོ་དེ་དག་ལ་གཟིགས་ ནས་ལེགས་སོ་ཞེས་བྱ་བས་མགུ་བར་བྱ་སྟེ། བརྒྱ་བྱིན་ལ་སོགས་པ་ལྷའི་བུ་རྣམས་གང་ཁྱེད་ལ་འདི་ལྟ་བུའི་སྤོབས་པ་ཡང་དག་པར་སྐྱེས་པ་དེ་ནི་ལེགས་སོ་ལེགས་སོ། །ལེགས་པར་སྒྲུབས་ཤིག་དང་བཤད་པར་བྱའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཐམས་ཅད་ཚེ་དཔག་
- 114b
ཏུ་མེད་པར་ཁྱབ་པར་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཚེ་དང་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་འཕེལ་བ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་། ཨོྃ་པུ་ཎྱེ་པུ་ཎྱེ། མ་ ཧཱ་པུ་ཎྱེ་ཨ་པ་ར་མི་ཏཱ་ཡུཿཔུ་ཎྱེཛྙཱ་ན་སྃ་བྷ་རོ་པ་ཙི་ཏེ་ཀ་རི་ཎི་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུངས་འདི་བཤད་པ་ཙམ་གྱིས་ངན་སོང་ཐམས་ཅད་རབ་ཏུ་ཞི་སྟེ། སེམས་ཅན་དམྱལ་བ་དང་། ཡི་དགས་དང་བྱོལ་སོང་གི་འགྲོ་བ་རྣམས་སུ་སྐྱེས་པའི་སེམས་ ཅན་ཐམས་ཅད་གྲོལ་བར་བདག་ཉིད་ཀྱིས་རབ་ཏུ་ཤེས་སོ། །འཇིག་རྟེན་གྱི་ཁམས་ཐམས་ཅད་སྣང་བར་བྱས་ཤིང་སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་བཅུ་གཉིས་བྱས་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་ཆོས་ཀྱི་ཡི་གེ་དེ་ཉིད་དུ་ཞུགས་པར་གྱུར་ཏོ། །དེ་ ནས་སླར་ཡང་བཅོམ་ལྡན་འདས་ཀྱིས་ཚེ་དཔག་ཏུ་མེད་པའི་རྡོ་རྗེ་འོད་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་ཚེ་དཔག་ཏུ་མེད་པའི་རྡོ་རྗེ་ཞེས་བྱ་བའི་སྙིང་པོའི་གཟུངས་འདི་བཤད་དོ། །ཨོྃ་ཨ་མི་ཏེ་ཨ་མི་ཏཱ། ཨ་མི་ཏོདྡྷ་ བེ། ཨ་མི་ཏ་སྃ་བྷ་བེ། ཨ་མི་ཏ་བི་ཀྲཱནྟེ། ཨ་མི་ཏེ་བི་ཀྲྭནྟ་གཱ་མི་ནི་སརྦ་ཀརྨ་ཀླེ་ཤ་ཀྵ་ཡྃ་ཀ་རི་སྭཱ་ཧཱ། དེ་ནས་འདི་བཤད་པ་ཙམ་གྱིས་དེ་བཞིན་དུ་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རབ་ཏུ་ཞིའོ། །དེ་ནས་སླར་ཡང་བཅོམ་ལྡན་འདས་ཀྱིས་གདོན་མི་ཟ་བར་སྒྲིབ་པ་ཐམས་ ཅད་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྒྲིབ་པ་གཅོད་པ་ཞེས་བྱ་བའི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་ཀྃ་ཀ་ནི་ཀྃ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་ པྲ་ཏི་ཧ་ན་སརྦ་ཀརྨ་པ་རྃ་པ་རཱ་ཎི་མེ་སརྦ་བཏྲྭཱ་ནཱཉྩ་སྭཱ་ཧཱ། འདི་བཤད་པ་ཙམ་གྱིས་ཐམས་ཅད་དེ་ཁོ་ན་བཞིན་ད་འགྱུར་རོ། །དེ་ནས་སླར་ཡང་བཅོམ་ལྡན་འདས་ཀྱིས་སྒྲིབ་པ་ཐམས་ཅད་དྲི་མ་མེད་ཅིང་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལས་སྙོམས་པར་ཞུགས་ནས། དེ་བཞིན་
- 115a
གཤེགས་པ་ཐམས་ཅད་ཀྱི་སྒྲིབ་པ་མ་ལུས་པ་རྣམ་པར་འཇོམས་པ་ཞེས་བྱ་བའི་སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་རཏྣེ་རཏྣེ། མ་ཧཱ་རཏྣེ། རཏྣ་སཾ་བྷ་བེ། རཏྣ་ཀི་རཏྣེ། རཏྣ་མཱ་ལཱ་བི་ཤུདྡྷེ། ཤོདྷ་ཡ། སརྦ་པཱ་པཾ་ཧཱུྃ་ཏྲཊ། དེ་ནས་འདི་བཤད་མ་ ཐག་ཏུ་བདུད་ཀྱི་གནས་ཐམས་ཅད་བཅོམ་ཞིང་རྣམ་པར་བཅོམ་པར་གྱུར་ཏོ། །དེ་ནས་སླར་ཡང་བཅོམ་ལྡན་འདས་ཀྱིས་གདོན་མི་ཟ་བར་མི་ཆོམས་པར་སྒྲིབ་པ་ཐམས་ཅད་རྣམ་པར་འཇོསམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་ གཟུངས་འདི་རང་གི་ཐུགས་ཀ་ནས་ཕྱུང་ངོ་། །ཨོྃ་ཨ་མོ་གྷ་ཨ་པྲ་ཏི་ཧ་ཏ་སརྦཱ་བ་ར་ཎ་བི་ཤོ་དྷ་ནི་ཧ་ར་ཧ་ར་ཧཱུྃ་ཕཊ། འདི་བཤད་མ་ཐག་ཏུ་འཇིག་རྟེན་གྱི་ཁམས་འདི་ཐམས་ཅད་གཡོས་རབ་ཏུ་གཡོས་ཡང་དག་པར་རབ་ཏུ་གཡོས། བསྐྱོད་རབ་ཏུ་བསྐྱོད་ཡང་དག་པར་རབ་ཏུ་བསྐྱོད། བསྒུལ་རབ་ཏུ་བསྒུལ་ཡང་དག་པར་རབ་ཏུ་བསྒུལ་ཞིང་ངོ་མཚར་ཆེ་ཞིང་རྨད་དུ་བྱུང་བ་དུ་མ་འཇིག་རྟེན་དུ་སྣང་བར་འགྱུར་རོ། །དེ་ནས་དེ་དག་གི་དཀྱིལ་འཁོར་ནི་འདི་ཡིན་ཏེ། གྲུ་བཞི་པ་ལ་སྒོ་བཞི་པ། །ལོགས་བཞི་དང་ཡང་ཡང་དག་ལྡན། །རྟ་བབས་བཞི་དང་ཀུན་དུ་ལྡན། །ཁ་ ཁྱེར་དང་ནི་སྒོ་ཁྱུད་བཅས། །དེ་ཡི་དབུས་སུ་འཁོར་ལོ་ཡི། །དཀྱིལ་འཁོར་དམ་པ་བྲི་བར་བྱ། །རྩིབས་བཞི་དང་ནི་ཡང་དག་ལྡན། །ལྟེ་བའི་དཀྱིལ་འཁོར་མཆོག་ཡིན་ནོ། །དེ་ཡི་དབུས་སུ་མགོན་པོ་ནི། །ཕྱག་ན་རྡོ་རྗེ་སྟོབས་ཆེན་པོ། །ཕྱག་ན་རྡོ་རྗེ་དྲིལ་བུ་ཅན། །ཟླ་བ་རྒྱས་ཞལ་ འཛུམ་པ་བྲི། །ཤར་གྱི་རྩིབས་ཀྱི་དབུས་ཀྱི་ཆར། །གཙོ་བོ་མི་བསྐྱོད་པ་ཉིད་བྲི། །ལྷོར་ནི་རིན་ཆེན་བྲི་བྱ་ཞིང་། །ནུབ་ཏུ་ཆུ་སྐྱེས་པདྨ་སྟེ། །བྱང་དུ་གདོན་མི་ཟ་ཞེས་གྲགས། །དཔའ་བོ་སྟོབས་ཆེན་བྲི་བར་བྱ། །དེ་བཞིན་གཤེགས་པ་ཐམས་ཅད་ནི། །འཁོར་ལོས་སྒྱུར་བའི་ཆ་ལུགས་ མཛད། །ཟླ་བའི་དཀྱིལ་འཁོར་མདོག་འདྲ་ཞིང་། །རྒྱན་རྣམས་ཀུན་གྱིས་བརྒྱན་པ་རྣམས། །ཕྱག་ནི་མཆོག་སྦྱིན་མི་འཇིགས་པ། །རྡོ་རྗེ་སྐྱིལ་ཀྲུང་བཞུགས་པ་བྲི། །གྲྭ་ཡི་ཆ་རྣམས་ཐམས་ཅད་དུ། །དེ་བཞིན་བདུག་པ་ལ་སོགས་བྲི། །སྒོ་སྐྱོང་རྣམས་ཀྱང་ཁྲོ་བོ་དང་། །མཆོག་
- 115b
ཏུ་ཁྲོ་བར་གཞོལ་བ་བྲི། །དེ་ནས་རྣལ་འབྱོར་རང་ཉིད་ཞུགས། །སྔགས་ཀྱི་ལྷ་རྣམས་སྤྱན་དྲངས་ཏེ། །ཛཿཧཱུྃ་བྃ་ཧོཿབྷ་ག་བཱན། བཛྲ་ཨེ་ཧྱེ་ཧི་ས་མ་ཡ་སྟྭྃ། དེ་ནས་མགོན་པོ་བྱོན་པ་ལ། །མདོར་ན་མཆོད་པ་བྱས་ནས་ནི། །འཆི་བདག་ཉིད་དང་སྦྲུལ་འཇིགས་པའི། །འཆི་ བདག་གཞོམ་ཕྱིར་གཞུག་པར་བྱ། །ཨོྃ་བཛྲ་ས་མ་ཡེ་ཧཱུྃ། རྡོ་རྗེ་ཏི་རིནྟི་རི་བཅིང་། །ལག་ན་རིན་ཆེན་ཐོགས་པ་གཞུག །ཡང་ན་མེ་ཏོག་ཕྲེང་ལྡན་པ། །དེ་དག་དཀྱིལ་འཁོར་ཉིད་དུ་དོར། །ཨོྃ་པྲ་ཏཱི་ཙྪ་བཛྲ་ཧཱུྃ། དེ་ནས་དམ་ཚིག་སྦྱིན་ཏེ། ཨོྃ་བཛྲ་ས་མ་ཡ་ཧཱུྃ། དེ་ནས་ འདིས་གདོང་གཡོགས་དགྲོལ་བར་བྱའོ། །ཨོྃ་བཛྲ་ཧཱ་སྱོ་ཏྒྷ་ཊཱ་ཡ་ཧཱུྃ། དེ་ནས་འདིས་དཀྱིལ་འཁོར་བསྟན་པར་བྱའོ། །ཨོྃ་བཛྲ་དྲྀ་ཤྱ་ཧོ། །དེ་ནས་དབང་བསྐུར་བ་སྦྱིན་ཏེ། ཨོྃ་བཛྲཱ་བྷི་ཥིཉྩ་ཧཱུྃ། ཨོྃ་བུདྡྷཱ་བྱི་ཥིཉྩ་ཨོྃ། ཨོྃ་རཏྣ་བྷི་ཥིཉྩ་ཏྲཱྃ། ཨོྃ་པདྨ་བྷི་ཥིཉྩ་ཧྲཱིཿ། ཨོྃ་ཀརྨ་བྷི་ཥིཉྩ་ ཨཿ། དེ་ནས་བུམ་པའི་དབང་བསྐུར་སྦྱིན་ཏེ། ཨོྃ་བཛྲ་ཀ་ལ་ཤཱ་བྷི་ཥིཉྩ་ཧཱུྃ། ཨོྃ་བུདྡྷ་ཀ་ལ་ཤ་བྷི་ཥིཉྩ་ཨོྃ། ཨོྃ་རཏྣ་ཀ་ལ་ཤཱ་བྷི་ཥིཉྩ་ཏྲཱྃ། ཨོྃ་པདྨ་ཀ་ལ་ཤཱ་བྷི་ཥིཉྩཱ་ཧྲཱིཿ། ཨོྃ་ཀརྨ་ཀ་ལ་ཤཱ་བྷི་ཥིཉྩྀ་ཨཿ། དེ་ནས་ཕྲེང་བའི་དབང་བསྐུར་བར་བྱའོ། །ཨོྃ་རཏྣ་མཱ་ལཱ་བྷི་ཥིཉྩ་ཏྲཱྃ་ཏྲཱྃ་ཏྲཱྃ་ཏྲཱྃ་ཏྲཱྃ་ ཨོྃ་བཛྲ་པཊྚཱ་བ་ལྃ་བ་ནཱ་བྷི་ཥིཉྩ་ཏྲཱྃ། ཨོྃ་བཛྲ་མུ་དྲཱ་བྷི་ཥིཉྩ་ཧཱུྃ། ཨོྃ་བུདྡྷ་མུ་དྲཱ་བྷི་ཥིཉྩ་ཨོྃ། ཨོྃ་རཏྣ་མུ་དྲཱ་བྷི་ཥིཉྩ་ཏྲཱྃ། ཨོྃ་པདྨ་མུ་དྲཱ་བྷི་ཥིཉྩ་ཧྲཱིཿ། ཨོྃ་ཀརྨ་མུ་དྲཱ་བྷི་ཥིཉྩ་ཨཿ། ཨོྃ་བཛྲ་ནཱ་མཱ་བྷི་ཥིཉྩ་ཧཱུྃ། ཨོྃ་ཧཱུྃ་ཏྲཱྃ་ཧྲཱིཿཨཿ། ཨོྃ་བཛྲ་ཀརྨཱ་བྷི་ཥིཉྩ་ཧཱུྃ་ཨཿ། ཨོྃ་བཛྲ་ཙཀྲཱ་བྷི་ཥིཉྩ་ཧཱུཾ་བྷྲུཾ། ཨོྃ་བཛྲ་ཙཀྲཱ་དྷི་ པ་དྷི་སྟྭ་མ་བྷི་ཥིཉྩ་ཧཱུྃ་ཧཱུྃ་ཧཱུྃ། ཨོྃ་ཨོྃ་ཨོྃ། ཏྲཱྃ་ཏྲཱྃ་ཏྲཱྃ། ཧྲཱིཿཧྲཱིཿཧྲཱིཿ། ཨཿ། ཨཿ། ཨཿ། ཨོྃ་བཛྲ་དྷཱ་ར་ཎྱ་བྷི་ཥཉྩི་ཧཱུྃ། ཨོྃ་ཏ་ཐཱ་ག་ཏ་དྷཱ་ར་ཎྱ་བྷི་ཥིཉྩ་ཨོྃ། ཨོྃ་རཏྣ་དྷ་ར་ཎྱ་བྷི་ཥིཉྩ་ཏྲཱྃ། ཨོྃ་པདྨ་དྷཱ་ར་ཎྱ་བྷི་ཥིཉྩ་ཧྲཱིཿ། ཨོྃ་ཀརྨ་དྷཱ་ར་ཎྱ་བྷི་ཥིཉྩ་ཨཿ། ཨོྃ་སརྦ་ཏ་ཐཱ་ག་ཏ་གུ་ཧྱཱ་བྷི་ཥིཉྩ་ཨོྃ། ཨོྃ་བཛྲ་གུ་ ཧྱཱ་བྷི་ཥིཉྩ་ཧཱུཾ། ཨོྃ་རཏྣ་གུ་ཧྱཱ་བྷི་ཥིཉྩ་ཏྲཱཾ། ཨོྃ་པདྨ་གུ་ཧྱཱ་བྷིཥིཉྩ་ཧྲཱིཿ། ཨོྃ་ཀརྨ་གུ་ཧྱཱ་བྷི་ཥིཉྩ་ཨཿ། ཨོྃ་པྲ་ཛྙོ་པཱ་ཡ་ས་མ་ཡོ་གཱ་བྷི་ཥིཉྩ་ཧཱུྃ་ཨཿ། དེ་ལྟར་དབང་བསྐུར་ནས་ཚེ་འཕེལ་བའི་རིག་པ་འདི་སྦྱིན་ནོ།།ཨོྃ་བྷྲུྃ་བཛྲ་ཨཱ་ཡུ་ཥེ་ཧཱུྃ་ཨཿ། འདིའི་སྒྲུབ་པ་ནི་འདི་ཡིན་ཏེ། བཅོམ་ལྡན་འདས་
- 116a
རྡོ་རྗེ་ཚེ་དཔག་མེད་ཟླ་བའི་འོད་ཅན་ཟླ་བའི་དཀྱིལ་འཁོར་ལ་བཞུགས་ཤིང་རྒྱན་ཐམས་ཅད་ཀྱིས་བརྒྱན་པ། ཕྱག་གཉིས་མི་འཇིགས་པ་དང་མཆོག་སྦྱིན་མཛད་པ་ལས་བདུད་རྩི་འཛག་པ་བྲིའོ། །དེའི་འོག་ཏུ་སྒྲུབ་པ་པོ་ལག་པ་ཐལ་མོ་སྦྱར་བ་བརྐྱང་བ་ གདོང་གྱེན་དུ་བཅོམ་ལྡན་འདས་ལ་བལྟ་བ་བྲིས་ལ་མཆོད་པ་རྣམ་པ་ལྔས་མཆོད་པ་བྱ་སྟེ་དེའི་སྤྱན་སྔར་སྟོང་ཕྲག་བརྒྱ་བཟླས་སོ། །དེ་ནས་ཟླ་བ་ཉ་ལ་མཆོད་པ་ཆེན་པོ་བྱས་ལ་བ་དམར་སེར་གྱི་མར་སྣོད་སར་པར་བཅུག་ལ་གཡོན་པའི་རྡོ་རྗེས་མནན་ཏེ། བཅོམ་ལྡན་འདས་ལ་རབ་ཏུ་སེམས་ ཤིང་མཚན་ཐོག་ཐག་བཟླས་པ་བྱའོ། །དེ་ནས་དྲི་མནམ་ཞིང་སྔོན་མ་བྱུང་བའི་དྲིའི་ངད་ཀྱང་ལྡང་ངོ་། །དྲོ་བ་དང་དུ་བ་དང་མེ་ཡང་འབྱུང་ངོ་། །འོད་ཟེར་གྱི་སྣང་བ་རབ་ཏུ་འཕྲོས་ཏེ་དེ་ལ་སོགས་པའི་མཚན་མ་བྱུང་ན་མར་དེའམ་མར་གསར་པའམ། ཏིལ་མར་རམ། ཆུའམ། འོ་མའམ། ཞོའམ། ཆང་ངམ། ཁྲག་གམ། ཞག་གམ། ཀླད་པའམ། ཤའམ། གང་ཡང་རུང་བ་དང་ལྷན་ཅིག་ཏུ་རབ་ཏུ་བསྒྲུབས་ཏེ་ནང་པར་སྔར་སྲུང་བ་ལ་སོགས་པ་བྱས་ནས་བདག་ཉིད་སྦྱངས་ཏེ་འཐུངས་སམ་ཟོས་ན་མཚན་མ་ཇི་ལྟ་བ་བཞིན་དུ་བྱུང་ན་ནི་ནམ་ཟླ་བ་དང་ཉི་མ་ཇི་སྲིད་པའི་ཚེར་ འགྱུར་ཞིང་རྡོ་རྗེ་སེམས་དཔའི་ཚེར་ཡང་འགྱུར་རོ། །ཐ་མས་ནི་དངོས་གྲུབ་ཐ་མར་འགྱུར་ཏེ་འདི་ལ་ཐེ་ཚོམ་མེད་དོ། །མཚན་མ་མ་བྱུང་ན་ཡང་འཇིག་རྟེན་ན་ནད་མེད་པ་དང་ཡིད་གཞུངས་པ་དང་ལྡན་ཞིང་སྐྲ་དཀར་དང་གཉེར་མ་མེད་པ་དང་ལུས་བརྟན་ཞིང་ཚེ་ལོ་བརྒྱ་ཐུབ་པར་འགྱུར་རོ། ། གཞན་ཡང་བཟླས་པ་བྱས་པ་ཙམ་གྱིས་ཞི་བ་དང་རྒྱས་པ་དང་དབང་ལ་སོགས་པའི་ལས་རྣམས་བརྟག་མི་དགོས་པར་འགྲུབ་སྟེ་ཐེ་ཚོམ་མེད་དོ། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་ སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བའི་སླད་དུ་རང་རང་གི་སྙིང་པོ་བཤད་པར་འཚལ་གྱིས། བཅོམ་ལྡན་འདས་ཀྱིས་བཀའ་གནང་བར་ཞུ། རྡོ་རྗེ་འཛིན་པས་བཀའ་གནང་བར་ཞུ། རྒྱལ་པོ་ཆེན་པོ་དག་ལེགས་སོ་ལེགས་སོ་ཤོད་ཅིག་དང་། ངས་རྗེས་སུ་ཡི་
- 116b
རང་ཞིང་རང་གི་དམ་ཚིག་བྱིན་གྱིས་བརླབ་པར་བྱའོ། །དེ་ནས་གནོད་སྦྱིན་གྱི་རྒྱལ་པོ་རྣམ་ཐོས་ཀྱི་བུ་ངལ་བསོ་པོས། བཅོམ་ལྡན་འདས་ཀྱིས་གནང་ཞིང་རྗེས་སུ་ཡི་རངས་ཏེ་བྱིན་གྱིས་བརླབས་པས་རང་གི་སྙིང་པོ་རང་གི་སྙིང་ག་ནས་ཕྱུང་ལ། ཨོྃ་བཻ། དེ་ནས་དྲི་ཟའི་རྒྱལ་པོ་ ཆེན་པོ་ཡུལ་འཁོར་སྲུང་གིས་དེ་ཁོ་ན་བཞིན་རང་གི་སྙིང་པོ་བཤད་པ། །ཨོྃ་ཌྷྲྀ། དེ་ནས་གྲུལ་བུམ་གྱི་རྒྱལ་པོ་ཆེན་པོ་འཕགས་སྐྱེས་པོས་དེ་ཁོ་ན་བཞིན་དུ་རང་གི་སྙིང་པོ་བཤད་པ། ཨོྃ་བྷི། དེ་ནས་ཀླུའི་རྒྱལ་པོ་ཆེན་པོ་མིག་མི་བཟང་གིས་དེ་ཁོ་ན་བཞིན་དུ་རང་གི་སྙིང་པོ་བཤད་པ། ཨོྃ་ཀྵ། དེ་ནས་དེ་དག་གིས་དཀྱིལ་འཁོར་བཤད་དེ། གྲུ་བཞི་པ་ལ་སྒོ་བཞི་པ། །དཀྱིལ་འཁོར་ལྔས་ནི་བརྒྱན་པ་སྟེ། །དེ་ཡི་དབུས་སུ་མགོན་པོ་ནི། །ཕྱག་ན་རྡོ་རྗེ་འགྱིང་བཅས་བྲི། །དེ་ཡི་གཡོན་པའི་ལོགས་སུ་ནི། །ངལ་བསོ་རྣམ་ཐོས་བུ་དགེ་ཡི། །ལག་ན་ བེ་ཅོན་ནེའུ་ལེ། །རིན་པོ་ཆེ་ཡི་རྒྱན་གྱིས་བརྒྱན། །སྦོམ་ཞིང་སེང་གེའི་གདན་ལ་བཞུགས། །གསེར་མདོག་གཟི་བརྗིད་ལྡན་པ་བྲི། །མཁས་པས་བུམ་པ་བཟང་ལ་སོགས། །རིན་ཆེན་ཚོགས་ཆར་འབབ་པ་བྲི། །མདུན་དུ་ཡུལ་འཁོར་སྐྱོང་ཉིད་ནི། །པི་ཝང་སྒྲོགས་ པར་ཡང་དག་བརྩོན། །མཛེས་ཤིང་ཁ་དོག་ལྗང་གུ་ཉིད། །རྒྱན་རྣམས་ཀུན་གྱིས་བརྒྱན་པ་བྲི། །གཡས་སུ་དཔའ་བོ་ལུས་འཕགས་པོ། །རལ་གྲི་ཕྱག་ན་བསྣམས་པ་བྲི། །ནུབ་ཏུ་ཡང་ནི་མིག་མི་བཟང་། །རྡོ་རྗེ་ཞགས་པ་འཛིན་ཅིང་མཆོག །སྦྲུལ་མགོ་བདུན་གྱིས་ ཡོངས་སུ་བསྐོར། །མིག་ནི་དམར་ཞིང་ཤིན་ཏུ་འབུར། །སྒོ་ཡི་ཕྱོགས་ནི་ཐམས་ཅད་དུ། །སྒོ་སྐྱོང་རྣམས་ཀྱང་དེ་བཞིན་ནོ། །དེ་ནས་སྔགས་པ་རང་ཉིད་འཇུག །འཁོར་ལོའི་ཕྱག་རྒྱ་ཞེས་གྲགས་པའི། །བཅོམ་ལྡན་འདས་ཉིད་སྤྱན་དྲང་ཞིང་། །དེ་ནས་རྒྱལ་པོ་སྤྱན་དྲང་ངོ་། ། སྤྱན་དྲངས་ནས་ནི་མཁས་པས་མཆོད། །མཆོད་ཡོན་ཞབས་བསིལ་ཆོ་ག་བཞིན། །དེ་ནས་སློབ་མ་རྒྱལ་རིགས་སམ། །རྗེ་རིགས་བྲམ་ཟེ་ལ་སོགས་ཀྱང་། །མེ་ཏོག་ཕྲེང་བས་རྣམ་བརྒྱན་པ། །སྔགས་ཤེས་པ་ཡི་སྔགས་འདི་དང་། །རྡོ་རྗེ་འཛིན་མའི་ཕྱག་རྒྱས་གཞུག །
- 117a
ཨོྃ་བཛྲ་ས་མ་ཡེ་ཧཱུྃ། དེ་ནས་མེ་ཏོག་གམ་རིན་པོ་ཆེ་འདིས་ཀྱང་དོར་བར་བྱའོ། །ཨོྃ་བཛྲ་པྲ་ཏཱིཙྪ་དྷཱྃ་མ་ཧོ་ཏྟ་མ། གང་ལ་ལྷུང་བའི་རྒྱལ་པོ་དེ། །འདི་ཡིས་འགྲུབ་འགྱུར་གཞན་དུ་མིན། །དེ་ནས་གྲྭ་ན་གནས་པ་ཡི། །བུམ་པ་བཞིས་ཀྱང་དབང་བསྐུར་ཏེ། ། ལྔ་པ་ཕྱག་ན་རྡོ་རྗེའིའོ། །ཕྱག་རྒྱ་ཉིད་ཀྱིས་དབང་བསྐུར་བྱ། །དེ་ལ་སོགས་པའི་གོ་རིམས་བཞིན། །དཀྱིལ་འཁོར་བྲིས་ནས་དབང་བསྐུར་བས། །རྒྱལ་པོ་མ་ཡིན་རྒྱལ་པོར་འགྱུར། །རྒྱལ་པོ་ཡིན་ན་ཆེན་པོར་འགྱུར། །འཛམ་བུ་གླིང་དབང་དཔལ་དང་ལྡན། །གླིང་བཞི་ པོ་ཡི་བདག་པོ་མཆོག །ལན་བཞིར་དབང་ནི་བསྐུར་བ་དང་། །ལན་བཞིར་རབ་ཏུ་ཞུགས་ན་ནི། །དེ་ལ་རྡོ་རྗེ་འཛིན་རྒྱལ་བདག །རང་གི་བུ་བཞིན་བསྲུང་བར་བྱ། །བདག་ཅག་རྒྱལ་ཆེན་བཞི་པོས་ཀྱང་། །འབངས་དང་འཁོར་དུ་བཅས་པ་དང་། །ཡུལ་འཁོར་ཕོ་བྲང་ བཅས་པ་ཡི། །རྒྱལ་པོས་རྟག་ཏུ་བསྐྱང་བགྱི་སྟེ། །དེ་ཡི་མ་རུངས་པ་རྣམས་དང་། །དེ་ཡི་ཕ་རོལ་སྡེ་དང་ནང་། །འཆི་བདག་འཇིགས་པ་མུ་གེ་དང་། །ཡམས་དང་ཉེར་འཚེ་གཞོམ་པར་བགྱི། །ངལ་བསོ་པོས་ནི་རྒྱས་པར་བགྱིད། །ཡུལ་འཁོར་སྲུང་གིས་ཞི་བ་ཉིད། ། ཕྱུགས་དང་གཉེན་བཅས་དུས་མིན་པའི། །འཆི་བདག་ལུས་འཕགས་པོ་ཡིས་འཇོམས། །མིག་མི་བཟང་གིས་བདེ་བར་བྱེད། །མུ་གེ་ལ་སོགས་རྣམ་པར་འཇོམས། །མདོར་ན་བདག་གིས་དེ་ཡི་ནི། །རེ་བ་ཀུན་དང་བསམ་པ་ཀུན། །བགྱི་སྟེ་གལ་ཏེ་མ་ངེས་ན། །ཕྱག་ན་རྡོ་རྗེ་ བསླུས་པ་ཡིན། །དེ་ནས་ཕྱོགས་སྐྱོང་བཅུས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་སླད་དུ་རང་རང་གི་སྙིང་པོ་རབ་ཏུ་དབུལ་ལོ། །འཇིག་རྟེན་སྐྱོང་བ་རྣམས་ལེགས་སོ་ལེགས་ སོ། །དེ་ལེགས་པར་སྨྲོས་ཤིག །དེ་ནས་འབྱུང་པོའི་བདག་པོ་དབང་ལྡན་ལ་སོགས་པས་རང་རང་གི་སྙིང་པོ་རྣམས་ཕུལ་བ། ཨོྃ་ཨཱི། ཨོྃ་ཨིཾ། ཨོྃ་ཨ། ཨོྃ་ཡ། ཨོྃ་རྀ། ཨོྃ་བཾ། ཨོྃ་ཡཾ། ཨོྃ་ཀུ། ཨོྃ་ཨཾ། ཨོྃ་བཱ། དེ་ནས་དེ་དག་གི་དཀྱིལ་འཁོར་བཤད་དེ།
- 117b
དཀྱིལ་འཁོར་སྔ་མ་བཞིན་བྲིས་ལ། །མགོན་པོ་དབུས་སུ་དེ་བཞིན་གཞག །ཕྱོགས་སྐྱོང་རང་གི་ཕྱོགས་ཀྱི་ཆར། །གཞག་བྱ་སྤྱན་སྔར་རྣམ་པ་གཉིས། །ཉི་མ་དང་ནི་ཕག་གི་གཟུགས། །སྒོ་སྐྱོང་རྣམས་ཀྱང་དེ་བཞིན་ནོ། །དེ་ནས་དེ་ཀུན་སྤྱན་དྲངས་ལ། །མཆོད་པ་ ཀུན་གྱིས་མཆོད་པར་བྱ། །དེ་ནས་རང་ཉིད་ཞུགས་ནས་ཀྱང་། །སློབ་མ་རྣམས་ནི་གཞུག་བྱ་ཞིང་། །ཕྱོགས་སྐྱོང་ལ་སོགས་སྔགས་བཟླས་པའི། །བུམ་པ་རྣམས་ཀྱིས་དབང་བསྐུར་རོ། །དེ་ནས་ཕན་པར་འདོད་པ་ཡིས། །སྒྲུབ་ཕྱིར་སྙིང་པོ་སྦྱིན་པར་བྱ། །ཕྱོགས་སྐྱོང་རང་གི་ ཕྱོགས་གནས་རྣམས། །བརྟག་མི་དགོས་པར་འགྲུབ་པར་འགྱུར། །དེ་ནས་དེ་དག་མགུ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་སུ་ཞིག་རྒྱལ་པོ་རྒྱལ་རིགས་སྤྱི་བོར་དབང་བསྐུར་བས་དཀྱིལ་འཁོར་འདིར་ཞུགས་ཏེ་དབང་བསྐུར་བ་འཛིན་པ་དང་། གཞན་ཡང་རིགས་ཀྱི་ བུའམ་རིགས་ཀྱི་བུ་མོ་དད་པ་དེ་དག་བཅོམ་ལྡན་འདས་བདག་ཅག་གིས་ཀུན་ནས་བསྲུང་བ་དང་། བསྐྱབ་པ་དང་། སྦ་བར་བགྱིའོ། །ཕ་རོལ་གྱི་སྡེ་རྣམས་གཞོམ་པར་བགྱིའོ། །དུས་དང་དུས་སུ་ཆར་དབབ་པར་བགྱིའོ། །འབྲུ་དང་། མེ་ཏོག་དང་། འབྲས་བུ་རྣམས་བསྐྱེད་པར་བགྱིའོ། །དེ་ ནས་ཆོས་ཀྱི་རྒྱལ་པོ་གཤིན་རྗེས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཆེན་པོ་དེའི་ཚེ་བསྲིང་བར་བགྱིའོ། །དུས་མ་ཡིན་པའི་འཆི་བ་བརྒྱད་པོ་སོ་སོར་དགག་པར་བགྱིའོ། །སྲིན་པོ་རྣམས་ཀྱི་བདག་པོ་ཆེན་པོ་བདེན་ བྲལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཆེན་པོ་དེ་དང་། རྒྱལ་པོ་ཆེན་པོའི་བུ་དང་། བྲམ་ཟེའམ། རྗེ་རིགས་སམ། མི་གཞན་གང་ཡང་རུང་བ་དག་ལ་ནད་མེད་པ་དང་། ཡི་དགས་དང་། འདྲེས་འཇིགས་པ་མེད་པ་དང་། སྲིན་པོ་ལ་སོགས་པའི་ འཇིགས་པ་མེད་པ་དང་། དུས་མ་ཡིན་པར་འཆི་བའི་འཇིགས་པ་མེད་པར་བགྱིའོ། །དུས་ཐམས་ཅད་དུ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །དེ་ནས་ཀླུའི་རྒྱལ་པོ་ཆེན་པོ་ཆུ་བདག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དུས་ཐམས་ཅད་དུ་རྒྱལ་པོ་
- 118a
དེ་དང་། ཡུལ་ཐམས་ཅད་ཀུན་ནས་སོ་སོར་བསྲུང་བར་བགྱིའོ། །ཀུན་དུ་བསྲུང་བར་བགྱིའོ། །འབྲུ་རྣམས་ཀྱང་བསྐྱེད་པར་བགྱིའོ། །ཀླུའི་ཉེས་པ་རྣམས་པ་མི་འབྱུང་བར་བགྱིའོ། །དུག་དང་ཐོག་ཀྱང་མི་འབྱུང་བར་བགྱིའོ། །མེ་ཏོག་དང་འབྲས་བུ་ ཐམས་ཅད་ཀྱང་ཡོངས་སུ་རྫོགས་པར་བགྱིའོ། །འཇིགས་པ་ཐམས་ཅད་ཀྱང་སོ་སོར་དགག་པར་བགྱིའོ། །དེ་ནས་རླུང་གི་བདག་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་སེམས་ཅན་ཆེན་པོ་དེ་ལ་དུས་ཐམས་ཅད་དུ་རླུང་གི་འཇིགས་པ་མི་འབྱུང་བར་ བགྱི། དུས་མ་ལགས་པའི་རླུང་མི་འབྱུང་བར་བགྱི། འབྲུ་དང་མེ་ཏོག་དང་འབྲས་བུ་ཐམས་ཅད་ཀྱང་ཡོངས་སུ་བསྐྱེད་པར་བགྱིའོ། །དེ་ནས་གནོད་སྦྱིན་གྱི་རྒྱལ་པོ་ཆེན་པོ་ལུས་ངན་པོས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་ འདས་བདག་གིས་གནོད་སྦྱིན་གྱི་སྡེ་དཔོན་ཆེན་པོ་བརྒྱད་ཅུ་དང་ལྷན་ཅིག་ཏུ་མཆིས་ཏེ། སྟོབས་དང་ལྡན་པས་སེམས་ཅན་ཆེན་པོ་དེ་ལ་དུས་ཐམས་ཅད་དུ་འཇིགས་པ་ཐམས་ཅད་སོ་སོར་དགག་པར་བགྱིའོ། །ནོར་དང་འབྲུ་ཐམས་ཅད་ལེགས་པར་འབྱོར་པར་བགྱིའོ། །རང་ གི་སྐྱེ་བོ་དང་། ཡོངས་ཀྱི་སྐྱེ་བོ་དང་། ཡུལ་དང་། གནས་དང་། བྲན་དང་། སྣག་གི་གཉེན་དང་། གྲོགས་དང་། བུ་དང་། བུ་མོ་དང་། ཆུང་མ་ལ་སོགས་པ་ཡང་བསྲུང་བར་བགྱིའོ། །གླང་དང་། བ་དང་། བོང་བུ་དང་། རྔ་མོ་དང་། ལུག་དང་། མ་ཧེ་དང་། གླང་པོ་ ཆེ་དང་། རྟ་དང་། ར་ལ་སོགས་པ་ཡང་བསྲུང་བར་བགྱིའོ། །དེ་ནས་འབྱུང་པོ་ཐམས་ཅད་ཀྱི་བདག་པོ་དབང་ལྡན་གྱིས་ཀྱང་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་དེ་དང་། རྒྱལ་པོའི་བུ་དང་། རྒྱལ་རིགས་ དང་། བྲམ་ཟེ་རྣམས་འདི་དང་ཕ་རོལ་དུ་ཡོངས་སུ་བསྐྱབ་པ་དང་། ཡོངས་སུ་གཟུང་བ་དང་། ཡོངས་སུ་བསྐྱང་བ་དང་། ཞི་བ་དང་། བཀྲ་ཤིས་པ་དང་། ཆད་པ་ཡོངས་སུ་སྤང་བ་དང་། དུག་གཞིལ་བ་དང་། དུག་གཞོམ་པ་དང་། མཚམས་བཅིང་བ་དང་། ས་གཞི་
- 118b
བཅིང་བ་དང་། ཕྱོགས་བཅིང་བ་དང་། རྡོ་རྗེའི་ར་བ་དང་། རྡོ་རྗེའི་ཕུར་བུས་གདབ་པ་དང་། རྡོ་རྗེའི་གུར་ཡང་བགྱིའོ། །དགོས་པ་ཐམས་ཅད་ལ་ཉེ་བར་གནས་པར་བགྱིའོ། །བྱ་བ་དང་བྱ་བ་མ་ཡིན་པ་རྣམས་ཀྱི་མཚན་མ་ཉེ་བར་བསྟན་པར་བགྱིའོ། །དགེ་བ་དང་ མི་དགེ་བ་མ་ཡིན་པ་ཐམས་ཅད་རྨི་ལམ་དུ་ཡང་བསྒོ་བར་བགྱིའོ། །བསྒྲུབ་པ་ཐམས་ཅད་ལ་བགེགས་མ་མཆིས་པར་དངོས་གྲུབ་ཐམས་ཅད་ཀྱང་སྩལ་བར་བགྱིའོ། །དེ་ནས་ཡང་ནམ་མཁའ་ལ་སྤྱོད་ཅིང་ནམ་མཁའ་ལ་འགྲོ་བའི་བདག་པོས་བཅོམ་ལྡན་འདས་ལ་ཕྱག་འཚལ་ ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དུས་ཐམས་ཅད་དུ་རྒྱལ་པོ་དང་། རྒྱལ་པོའི་བུ་དང་། རྒྱལ་པོའི་བློན་པོ་དང་། བྲམ་ཟེའམ། རྒྱལ་རིགས་ལམ་ལ་གནས་པ་ཐམས་ཅད་ལ་བདག་ཉིད་འཁོར་ཐམས་ཅད་དང་བཅས་པ་མཆིས་ཏེ། བསྲུང་ བ་དང་། བསྐྱབ་པ་དང་། སྦ་བ་ཀུན་ནས་བསྒྲུབ་པར་བགྱིའོ། །བགེགས་ཀྱི་གནས་ཐམས་ཅད་སོ་སོར་བཟློག་པར་བགྱིའོ། །ནད་ཐམས་ཅད་བསལ་བར་བགྱིའོ། །དུས་ཐམས་ཅད་དུ་ཕྱི་བཞིན་དུ་འབྲང་བར་བགྱིའོ། །དེ་ནས་སའི་འོག་གི་བདག་པོ་ཕག་ཆེན་པོས་ ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་མིའི་བདག་པོ་དང་། རྗེ་རིགས་དང་། བྲམ་ཟེ་དང་། དམངས་རིགས་སམ། །གཞན་ཡང་རིགས་ཀྱི་བུ་དང་། །རིགས་ཀྱི་བུ་མོ་དང་པ་རྣམས་ཀྱི་དུས་ཐམས་ཅད་དུ་དོན་བསྒྲུབ་པར་བགྱིའོ། ། འཇིགས་པ་ཐམས་ཅད་ལས་ཀྱང་བསྲུང་བར་བགྱིའོ། །གཞན་ཡང་ཡོངས་སུ་བསྐྱབ་པར་བགྱིའོ། །དེ་ནས་གཟའ་ཆེན་པོ་བརྒྱད་འཁོར་རྒྱུ་སྐར་དང་བཅས་པ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་འཁོར་དང་བཅས་པ་རྣམས་ཀྱིས་ཀྱང་རང་རང་གི་སྙིང་ པོ་རྣམས་འབུལ་བར་འཚལ་ན་དེ་ལ་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ལེགས་སོ་ལེགས་སོ། །ངས་བྱིན་གྱིས་བརླབས་ཀྱིས་གཟའ་ཆེན་པོ་རྣམས་ཤོད་ཅིག །དེ་ནས་ཉི་མ་ལ་སོགས་པའི་གཟའ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་སྨྲས་པ།
- 119a
ཨོྃ་ཨཱ། ཨོྃ་སོ། ཨོྃ་ཨཾ། ཨོྃ་བུ། ཨོྃ་བྲྀ། ཨོྃ་ཤུ། ཨོྃ་ས། ཨོྃ་རཱ། དེ་ནས་དེ་དག་གི་དཀྱིལ་འཁོར་འབྱུང་སྟེ། དབུས་སུ་བཅོམ་ལྡན་འདས་ཕྱག་ན་རྡོ་རྗེ་ཉིད་འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་སུ་བྲིའོ། །མཐའ་རྣམས་སུ་ནི་རྒྱ་མཚོ་ ཆེན་པོ་བཞི་བྲིའོ། །དེ་ཡི་མདུན་དུ་པ་བ་སངས། །ཟླ་བ་རྒྱབ་ཏུ་བྲི་བར་བྱ། །གཡས་སུ་ཕུར་བུ་བྲི་བྱ་ཞིང་། །གཡོན་དུ་ལྷག་པ་བྲི་བར་བྱ། །མེ་ཡི་གནས་སུ་མིག་དམར་ཉིད། །རླུང་གི་ཕྱོགས་སུ་ཉི་མ་སྟེ། །དབང་ལྡན་དུ་ནི་སྤེན་པ་ཉིད། །སྲིན་པོའི་ཕྱོགས་སུ་སྒྲ་གཅན་བྲི། ། དཀྱིལ་འཁོར་ཕྱི་རོལ་ཁོར་ཡུག་ཏུ། །རྒྱུ་སྐར་ཐམས་ཅད་བྲི་བར་བྱ། །སྒོ་སྒོར་དེ་བཞིན་སྒོ་བ་རྣམས། །ཁྲོས་པའི་ཡིད་དུ་བྲི་བར་བྱ། །རྡོ་རྗེ་འཛིན་པས་འཇུག་བྱ་སྟེ། །རྡོ་རྗེ་ལྕགས་ཀྱུ་ལ་སོགས་པས། །ཐམས་ཅད་ཀྱང་ནི་སྤྱན་དྲང་ངོ་། །དེ་ནས་སློབ་མ་རྣམས་གཞུག་སྟེ། ། ཨོྃ་བཛྲ་ཧ་ན་ཧཱུྃ་ཕཊ། ཨོྃ་བཛྲ་གྲ་ཧེ་ས་མ་ཡེ་ཧཱུྃ། ཨོྃ་བཛྲ་གྲ་ཧ་པྲ་ཏཱིཙྪ་ཧཱུྃ། དེ་ནས་གཟའ་བརྒྱད་སྔགས་ནི་སྔགས་པ་ཡིས། བུམ་པ་བརྒྱད་པོ་རྣམས་ཀྱིས་དབང་བསྐུར་རོ། །དེ་ནས་རྡོ་རྗེ་ཕྱག་རྒྱས་དབང་བསྐུར་ཏེ། དེ་ནས་གཟའ་རྣམས་ཐམས་ཅད་བསྒྲུབ་པར་བྱའོ། །དེ་ནས་ གཟའ་ཆེན་པོ་དག་གིས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གཟའ་ཆེན་པོ་བརྒྱད་ཀྱིས་རྒྱལ་པོ་ཆེན་པོ་དེ་དང་། རྒྱལ་པོའི་བུ་ལ་ཀུན་དུ་དུས་ཐམས་ཅད་དུ་དེ་ཁོ་ན་བཞིན་དུ་ཐམས་ཅད་བགྱིའོ། །དེ་ནས་ རྒྱུ་སྐར་དང་། སྐད་ཅིག་དང་། ཐང་ཅིག་དང་། ཡུད་ཙམ་རྣམས་སོ། །ཚེས་དང་། སྦྱོར་བ་དང་། ཁྱིམ་དང་། དུས་སྦྱོར་དང་། འཇུག་ཕོད་ལ་སོགས་པའི་དཀྱིལ་འཁོར་གྱི་ལྷ་རྣམས་ཀྱིས་དེ་བཞིན་དུ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ ཀྱང་དུས་ཐམས་ཅད་དུ་སེམས་ཅན་ཆེན་པོའི་བཀའ་མི་བཅག་ཅིང་དཔོན་པོ་བཞིན་དུ་བསྐྱང་བར་བགྱིའོ། །གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་གི་གནས་ཐམས་ཅད་སོ་སོར་བསྐྱབ་པར་བགྱིའོ། །འཇིགས་པ་ཆེན་པོ་འབྱུང་བའི་
- 119b
ཚེ་ན་ཡང་དེས་བདག་ཅག་མཆོད་ན་གདོན་མི་འཚལ་བར་འཇིགས་པ་དེ་མི་འབྱུང་ངོ་། །དེ་ནས་ཀླུ་ཆེན་པོ་བརྒྱད་ཀྱིས་ཕུད་ཅེས་བྱ་བའི་སྒྲས་བཅོམ་ལྡན་འདས་མཉེས་པར་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་གསང་བའི་སྙིང་པོ་རྣམས་ འབུལ་ལོ། །ཀླུ་ཆེན་པོ་རྣམས་ལེགས་སོ་ལེགས་སོ། །གསང་བའི་སྙིང་པོ་རྣམས་ཕུལ་ཅིག །དེ་ནས་དེ་དག་མགུ་ནས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །ཨོྃ་ཕུཿ། ཨོྃ་ཕུཿ། ཨོྃ་ཕྃ། ཨོྃ་ཕུཿ། ཨོྃ་ཕཱི། ཨོྃ་ཕཻ། ཨོྃ་ཕོ། ཨོྃ་ཕཽ། ། དེ་ནས་དེ་དག་གི་དཀྱིལ་འཁོར་བཤད་དེ། པདྨ་ཆེན་པོ་འདབ་བརྒྱད་པ། །ཁ་དོག་དཀར་པོ་ལེགས་པར་བྲི། །དཀྱིལ་འཁོར་དེ་ཡི་དབུས་བཞུགས་པ། །ཕྱག་ན་རྡོ་རྗེ་རབ་ཏུ་ནག །སྦྲུལ་མགོ་མཐའ་ཡས་གདེངས་ཀ་བདུན། །ལྟོས་འགྲོ་ཆེན་པོ་སྡིགས་པ་བྲི། །མཐའ་ཡས་ འཇོག་པ་དེ་བཞིན་དུ། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་བུ་དང་དུང་སྐྱོང་དང་། །པདྨ་ཆུ་བདག་དེ་བཞིན་དུ། །མདོར་ན་འདབ་མ་རེ་རེ་ལ། །དེ་དག་སྦྲུལ་མགོ་འབར་བ་བྲི། །སྦྲུལ་མགོ་བདུན་བདུན་ཆུང་མ་ཡི། །མགུལ་ནས་འཁྱུད་དང་བཅས་པ་བྲི། །བུམ་པ་བརྒྱད་ རྣམས་གཞག་བྱ་སྟེ། །གཏོར་མ་ལྷ་བཤོས་མཛེས་པ་དང་། །མར་དང་འོ་མ་སྦྲང་རྩིར་བཅས། །བཅོས་པའི་དབྱེ་བ་རྣམས་ཀྱང་ངོ་། །རྡོ་རྗེའི་བདག་ཉིད་བཞུགས་པ་ནི། །སྦྲུལ་མགོས་སྦྲུལ་མགོ་ཅན་རྣམས་དགུག །ཕུད་ཅེས་བྱ་བ་ལྷན་ཅིག་སྟེ། །ཛཿཧཱུྃ་བྃ་ཧོཿཞེས་བརྗོད་དོ། ། དེ་ནས་རྒྱལ་པོའམ་རྒྱལ་རིགས་ནི། །དེ་དག་ཐམས་ཅད་བཅུག་ནས་སུ། །དུག་གི་ཉེས་སྐྱོན་བསལ་བའི་ཕྱིར། །ཕུད་ཅེས་བྱ་བས་དབང་བསྐུར་རོ། །དེ་ནས་མིང་ཙམ་བཟུང་བས་ཀྱང་། །ཀླུ་རྣམས་དེ་དག་ཐམས་ཅད་འགྲུབ། །དེ་ནས་དེ་དག་ཀུན་མགུ་ནས། །བཅོམ་ལྡན་འདས་ ལ་ཕྱག་འཚལ་ཏེ། །སྤྱན་སྔར་ཐལ་མོ་སྦྱར་འཁོད་ནས། །སྨོན་ལམ་རབ་ཏུ་འདེབས་པར་འགྱུར། །བཅོམ་ལྡན་འདས་བདག་ཅག་གིས་བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་གང་དག་དཀྱིལ་འཁོར་འདིར་ཞུགས་པ་དེ་དག་བསླུས་པར་གྱུར་ན་དེའི་ཚེ་བཅོམ་ལྡན་འདས་འདི་ཉིད་
- 120a
ལ་བསླུས་པར་གྱུར་ཅིག །དེའི་ཚེ་བདག་བྱེ་ཚན་གྱིས་སྲེགས་པར་གྱུར་ཅིག །རྡོ་རྗེ་ཀུན་དུ་འབར་བས་བདག་ཅག་གི་མགོ་འགེམས་པར་གྱུར་ཅིག །རྟག་པར་དུས་ཐམས་ཅད་དུ་སེམས་ཅན་ཆེན་པོ་དེ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །གཟི་ བྱིན་ཆེན་པོ་དང་། སྟོབས་དང་། བརྩོན་འགྲུས་བསྐྱེད་པར་བགྱིའོ། །དེའི་དུག་རྣམས་དུག་མ་མཆིས་པར་བགྱིའོ། །དུས་དང་དུས་སུ་ཆར་དབབ་པར་བགྱིའོ། །མེ་ཏོག་ཐམས་ཅད་ཡོངས་སུ་རྫོགས་པར་བགྱིའོ། །ཕ་རོལ་གྱི་གཡུལ་ཐམས་ཅད་ལ་དུས་དང་དུས་མ་ཡིན་ པའི་ཆར་དབབ་པར་བགྱིའོ། །འཇིག་རྟེན་པ་ཐམས་ཅད་བསྐྱེད་པར་བགྱིའོ། །རྒྱལ་བའི་བཀའ་དང་རྡོ་རྗེ་འཛིན་པའི་བཀའ་རབ་ཏུ་བསྒྲུབ་པར་བགྱིའོ། །དེ་ནས་སྒྲུབ་པ་བཤད་དེ། ལྷ་རྫས་འོད་འཕྲོ་དཀར་པོ་ཅན། །ཀླུ་རྣམས་འདུད་པས་གནས་པ་ཡི། །རྡོ་རྗེ་འཛིན་ གཙོ་བསམས་ནས་ནི། །ཕུད་ཅེས་བྱ་བ་འབུམ་དུ་བཟླས། །དེ་ནས་དུག་གིས་ཟིན་པ་ལ། །ཕུད་ཅེས་བྱ་བའི་དཀྱིལ་འཁོར་ནི། །ལྷ་རྫས་འོད་ཟེར་ཕྲེང་བ་འཁྲིགས། །བསམས་ནས་དེ་ལ་ཕུད་ཡིག་བསམ། །ལག་པ་སྦྲུལ་མགོ་ཞགས་འདྲ་དང་། །ཕུད་ཀྱི་རླུང་གིས་ པགས་པ་ཤ། །རུས་གནས་ཕུད་ཀྱི་རྣམ་པའི་དུག །མཐའ་དག་དྲངས་ཏེ་གསོ་བར་བྱ། །དེ་ནས་ལས་རྣམས་ཀུན་བྱེད་ཅིང་། །དུག་རིམས་དུག་སྦྱར་ལ་སོགས་པ། །ཁུ་ཚུར་གྱིས་ཀྱང་ཀུན་སེལ་ན། །སྦྲུལ་མགོའི་ཕྱག་རྒྱས་སྨོས་ཅི་དགོས། །དེ་ནས་ལྟོ་འཕྱེ་ཆེན་པོའི་ བདག་པོ་འཇིགས་བྱེད་ཆེན་པོའི་མ་མོ་ཆེན་མོ་བརྒྱད་ཀྱིས་བསྐོར་བས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་འཇིགས་པ་དང་མ་མོ་རྣམས་ཀྱིས་འཇིགས་པས་ལྷ་དང་ཀླུ་ལ་སོགས་པ་ཀུན་དུ་སྐྲག་རྣམ་པར་སྐྲག་སྟེ་ཁ་བུབ་ཏུ་ འགྱེལ་ནས་གོས་དང་བྲལ་ཏེ་སེམས་སྟོར་ནས་ཀུན་དུ་འཕྱན་པ་དག་ལ་ཕན་གདགས་པའི་སླད་དུ་བདག་ཅག་གི་སྙིང་པོ་འབུལ་བར་འཚལ་གྱིས་བཅོམ་ལྡན་འདས་ཀྱིས་དེ་ལེགས་པར་བྱིན་གྱིས་བརླབ་ཏུ་གསོལ། འཇིགས་བྱེད་ཆེན་པོ་ལེགས་སོ་ལེགས་སོ། །རབ་ཏུ་འཇིགས་པར་བྱེད་
- 120b
པས་རང་ཉིད་དང་ལྷའི་བུ་མོ་ཐམས་ཅད་ཀྱི་སྙིང་པོ་རྣམས་ཤོད་ཅིག །དེ་ནས་འཇིགས་བྱེད་ཆེན་པོས་འཇིགས་པར་བྱེད་པའི་སྒྲ་ཕྱུང་ནས་འདི་སྐད་ཅེས་གསོལ་ཏོ། །ཨོྃ་བྷཻ་ར་བ་བྷཻ་ར་སྭཱ་ཧཱ། ཨོྃ་བྷ་སྭཱ་ཧཱ། ཨོྃ་བྷི་སྭཱ་ཧཱ། ཨོྃ་བྷུ་སྭཱ་ཧཱ། ཨོྃ་བྷེ་སྭཱ་ཧཱ། ཨོྃ་བྷཻ་སྭཱ་ཧཱ། ཨོྃ་བྷཽ་སྭཱ་ཧཱ། །ཨོྃ་ བྷཱྃ་སྭཱ་ཧཱ། ཨོྃ་བྷཿསྭཱ་ཧཱ། །བཅོམ་ལྡན་འཇིགས་བྱེད་ཆེན་པོ་ནི། །བརྒྱད་པོ་དེ་དག་གདམས་ངག་ཉན། །དེ་ནས་དེ་དག་དཀྱིལ་འཁོར་བཤད། །འཁོར་ལོ་ཆེན་པོ་རྩིབས་བརྒྱད་བྲི། །དབུས་སུ་ཕྱག་ན་རྡོ་རྗེ་ནི། །ཁྲོ་བོ་ཆེན་པོ་འཇིག་རྟེན་གསུམ། །རྣམ་པར་རྒྱལ་བ་ ཞེས་བྱ་གཞག །དེ་ཡི་ཞབས་འོག་མ་རུངས་པ། །འཇིགས་བྱེད་རྣམས་ཀྱི་བདག་པོ་ཆེ། །འཇིགས་བྱེད་མ་དང་བཅས་པ་བྲི། །རྩིབས་ཀྱི་ནང་རྣམས་ཐམས་ཅད་དུ། །གཞན་ཡང་འཇིགས་བྱེད་བརྒྱད་པོ་ནི། །མ་མོ་རྣམས་དང་ལྡན་པ་ནི། །ཁྲོས་པའི་བཞིན་དང་ཡིད་ཁྲོས་པར། ། ཅི་བདེ་བར་ནི་བྲི་བར་བྱ། །འདིར་ནི་སྒོ་སྒོར་དེ་བཞིན་དུ། །སྒོ་བ་ཤིན་ཏུ་ཁྲོས་ལྡན་བྲི། །དེ་ནས་ལྕགས་ཀྱུ་ལ་སོགས་པས། །བཀུག་སྟེ་མགོ་བོའི་ཐོད་པ་ནི། །ཁྲག་གིས་གང་བས་མཆོད་ནས་སུ། །ཤ་ཆང་གཏོར་མ་བཟང་པོ་དང་། །སྣོད་རྣམས་ཁྲག་གིས་བཀང་བ་དང་། ། མགོ་ཐོད་མགོ་ཡི་དུམ་བུ་དང་། །ཁྲག་གམ་ཆང་བཀང་བུམ་པ་བརྒྱད། །དཀྱིལ་འཁོར་འདིར་ནི་གཞག་པར་བྱ། །དེ་ནས་འཇིག་རྟེན་གསུམ་རྣམ་རྒྱལ། །མཆོག་གིས་སློབ་མ་རྣམ་གཞུག་བྱ། །ཐོད་པ་དང་ནི་བུམ་པ་ཡང་། །བརྒྱད་པོ་རྣམས་ཀྱིས་དབང་བསྐུར་རོ། །དེ་ནས་ ལས་རྣམས་སྦྱིན་པར་བྱ། །མ་མོའི་ཁྱིམ་མམ་མཚན་གཅིག་པར། །འཇིག་རྟེན་གསུམ་ནི་འདུལ་བའི་མཆོག །ཚུལ་བཞིན་དུ་ནི་མཆོད་བྱས་ནས། །འབུམ་ཕྲག་བཞིར་ནི་བཟླས་པར་བྱ། །དེ་ནས་འཇིགས་པར་བྱེད་པའི་སྒྲས། །བདག་ཉིད་ཆེན་པོས་ཐོས་གྱུར་ཏེ། །མི་ འཇིགས་པ་ནི་ཐོད་པ་རུ། །ཁྲག་མཆོག་བཀང་བའི་ཨརྒྷ་དབུལ། །དེ་ནས་ཁྲོ་བོ་འཇིགས་བྱེད་པ། །མ་རུངས་ཡིད་ཅན་མ་མོ་ནི། །ཚོགས་ཀྱིས་བསྐོར་ཅིང་འཇིགས་བྱེད་ནི། །བརྒྱད་ཀྱིས་བསྐོར་བ་མཐོང་བར་འགྱུར། །དེ་མཐོང་འཇིགས་པ་མེད་བྱས་ལ། །ཧཱུྃ་ཞེས་བྱ་བ་
- 121a
དྲན་བྱེད་ཅིང་། །ཤའམ་ཡང་ན་ཆང་མཆོག་གིས། །ཐོད་པ་བཀང་སྟེ་དབུལ་བར་བྱ། །དེ་ནས་འཇིགས་བྱེད་མ་རུངས་འཇོམས། །མགུ་ཞིང་རབ་ཏུ་འགྲུབ་གྱུར་ནས། །ཅི་འདོད་སྨྲོས་ཤིག་ཅེས་བྱ་བ། །མགུ་བའི་ཡིད་ཀྱིས་དེ་སྦྱིན་བྱེད། །ས་རྣམས་ སྦྱིན་པ་མ་གཏོགས་པར། །རོ་དང་བཅུད་ལེན་རྫས་དང་ནི། །རལ་གྲི་འཁོར་ལོ་རྩེ་གསུམ་དང་། །མཐོ་རིས་ས་སྟེངས་ས་འོག་དང་། །གླིང་དང་གླིང་བཞིའི་རྒྱལ་སྲིད་དང་། །བརྒྱ་བྱིན་ཉིད་དང་གནོད་སྦྱིན་དབང་། །སྲིན་པོ་ཉིད་དང་རིག་འཛིན་ཉིད། །རིག་འཛིན་འཁོར་ལོས་ སྒྱུར་བ་ཉིད། །འཇིག་རྟེན་གསུམ་གྱི་བདག་པོ་ཉིད། །བཀའ་ཉན་ཉིད་ཀྱང་རང་ཉིད་དམ། །མ་མོའི་ཚོགས་རྣམས་སྟེར་བར་འགྱུར། །དངོས་གྲུབ་གང་ཡང་རུང་བ་ནི། །ཇི་ལྟར་འདོད་པ་བླང་བར་བྱ། །ཧཱུྃ་གི་རྣམ་པར་མངོན་ཕྱོགས་ཤིང་། །བྱིན་ནས་དགོད་ཅིང་འགྲོ་བར་ བྱེད། །སྐྲག་ན་དེ་མ་ཐག་ཏུ་གསོད། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་བཅོམ་ལྡན་འདས་ཀྱིས་བཀའ་གནང་ན་རང་གི་རྟོགས་པ་བཤད་པར་འཚལ་གྱིས། དེ་ནས་བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ་བྱིན་གྱིས་བརླབ་པར་གསོལ། དེ་ནས་ཚངས་པ་ལ་སོགས་པ་ལྷ་རྣམས་ཀྱིས་རང་རང་གི་སྙིང་པོ་རྣམས་བཤད་དོ། །ཨོྃ་ཨཱྃ། ཨོྃ་བི། ཨོྃ་རུ། ཨོྃ་ཨི། ཨོྃ་ཀྃ། ཨོྃ་ག །ཨོྃ་བྲྀ། ཨོྃ་ཀ །དེ་ནས་དེ་དག་གི་ དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །དབུས་སུ་འཇིག་རྟེན་གསུམ་འདུལ་བ། །དེ་ཡི་མདུན་དུ་དཔའ་བོ་ནི། །དབང་ཕྱུག་ལག་ན་རྩེ་གསུམ་བྲི། །རྒྱབ་ཏུ་ཚངས་པའི་རྣམ་པར་བྲི། །གཡོན་དུ་ལག་ན་འཁོར་ལོ་ཅན། །གཡས་ན་དབང་པོ་རང་ཉིད་ཀྱི། ། ཕྱག་རྒྱའི་མཚན་མ་ལག་ཐོགས་བྲི། །སྒོ་སྐྱོང་རང་བཞིན་འདིར་དེ་རྣམས། །ཆུང་མ་རང་གི་དཀྱིལ་འཁོར་དུ། །བུམ་པ་བུམ་པ་བཀང་བ་ཡང་། །ཕྱི་རོལ་དཀྱིལ་འཁོར་དུ་ནི་གཞག །སྟོབས་བཟང་ལ་སོགས་མཐུ་ཆེན་ཡང་། །དེ་ནས་འཇུག་བྱ་ལྷ་རྣམས་ཡིན། །མཁས་
- 121b
པས་ཀུན་ནས་སྤྱན་དྲང་ཞིང་། །ཛཿཧཱུྃ་བྃ་ཧོས་ལྷ་ཐམས་ཅད། །ཕོ་བྲང་དམ་པར་འཇུག་པར་མཛོད། །དེ་ནས་དེ་རྣམས་གཤེགས་བལྟས་ནས། །དགའ་བ་ཆེན་པོ་མཆོད་པར་བྱ། །དེ་ནས་རྡོ་རྗེ་འཛིན་པ་ཡིས། །ཕྱག་རྒྱ་སློབ་མ་རྣམས་གཞུག་སྟེ། ཨོྃ་པྲ་ཏཱིཙྪ་དྷཱྃ་མ་ཧཱ་ས་ཏྭྃ་ བཛྲ་དྷ་རཱ་ཛྙཱ་པ་ཡ་ཧཱུྃ་ཧ་ཧ་ཧ་ཧ་ཧོ། མེ་ཏོག་ཇི་ལྟ་བཞིན་དུ་དོར། །མིག་ཕྱེ་ནས་ནི་བསྟན་པར་བྱ། །དེ་ནས་མངོན་པར་བསྔགས་པ་ཡི། །བུམ་པའི་ཆུ་ཡིས་དབང་བསྐུར་རོ། །དེ་ནས་ལྷ་རྣམས་གང་འདོད་པའི། །དངོས་གྲུབ་རབ་ཏུ་སྦྱིན་པར་བྱ། །འབུམ་ཕྲག་གཅིག་གམ་འབུམ་ ཕྲག་གཉིས། །སྔོན་དུ་བསྙེན་པ་བྱས་ནས་ནི། །དབང་ཕྱུག་ལ་སོགས་ལྷ་མཆོག་ནི། །དེ་རྣམས་སྒྲུབ་པ་པོ་ཡིས་འགྲུབ། །མཚན་མ་གཅིག་པ་ལ་སོགས་སུའམ། །ཡང་ན་ཕྱག་ན་རྡོ་རྗེའི་གནས། །དེ་བཞིན་གཤེགས་པའི་ཕོ་བྲང་ངམ། །རིང་བསྲེལ་ལྡན་པའི་མཆོད་རྟེན་དུ། ། ལྷ་རྣམས་ཐམས་ཅད་ཆོ་ག་བཞིན། །སྒྲུབ་པ་པོ་ཡིས་རྟག་ཏུ་བསྒྲུབ། །དེ་ནས་ནམ་ཕྱེད་ན་ནི་ལྷ། །འོངས་ནས་ཁྱོད་ཀྱི་འདོད་པ་ཅི། །ཇི་ལྟར་བདེ་ཞིང་ཕན་པ་ནི། །སྦྱིན་ཞེས་ངེས་པར་གོ་བར་བྱེད། །བཟང་པོ་མྱུར་དུ་སོམས་ཏེ་སྨྲོས། །གང་ཕྱིར་མཆོག་ནི་ཁྱོད་ལ་སྦྱིན། །དེ་ནས་ སྔགས་ཤེས་དངོས་གྲུབ་དང་། །མཆོག་གི་ལྷ་ལ་གསོལ་བ་གདབ། །ལྷ་རྫས་བཅུད་དང་བཅུད་ལེན་དང་། །མི་སྣང་བ་དང་མཁའ་འགྲོ་དང་། །རིལ་བུ་རྒྱལ་སྲིད་རྫས་ལ་སོགས། །ཡིད་འདོད་ཚད་མེད་གསོལ་བ་གདབ། །དེ་ནས་དབང་ཕྱུག་ཆེན་པོ་ལ་སོགས་པས་བཅོམ་ལྡན་ འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་ཞུགས་པ་བདེ་དག་གིས་བཅོམ་ལྡན་འདས་བདག་ཅག་ལྷ་རྣམས་ཀྱི་སྒྲིབ་པ་ཐམས་ཅད་རྣམ་པར་སྦྱང་ངོ་། །མཐོ་རིས་ཀྱི་ལམ་བསྟན་པར་ བགྱིའོ། །བདེ་འགྲོའི་ལམ་བསྟན་པར་བགྱིའོ། །དམ་པའི་ཆོས་ཀྱི་ལམ་བསྟན་པར་བགྱིའོ། །སྒྲིབ་པ་མ་མཆིས་པའི་ལམ་བསྟན་པར་བགྱིའོ། །རྣམ་པར་འབྱེད་པའི་ལམ་བསྟན་པར་བགྱིའོ། །ངེས་པར་འབྱུང་བའི་ལམ་བསྟན་པར་བགྱིའོ། །མྱ་ངན་འདས་པའི་ལམ་བསྟན་པར་
- 122a
བགྱིའོ། །སྤོང་བའི་ལམ་བསྟན་པར་བགྱིའོ། །ཉོན་མོངས་པ་མེད་པའི་ལམ་བསྟན་པར་བགྱིའོ། །སངས་རྒྱས་ཉིད་དུ་འགྲུབ་པའི་ལམ་བསྟན་པར་བགྱིའོ། །བྱང་ཆུབ་སེམས་དཔའ་ཉིད་དུ་འགྲུབ་པའི་ལམ་བསྟན་པར་བགྱིའོ། །རྡོ་རྗེ་འཛིན་པ་ ཉིད་དུ་འགྲུབ་པའི་ལམ་བསྟན་པར་བགྱིའོ། །དུས་ཐམས་ཅད་དུ་འཇིགས་པ་ཐམས་ཅད་ལས་བསྲུང་བ་དང་བསྐྱབ་པ་དང་སྦ་བར་བགྱིའོ། །གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་བསྲུང་བར་བགྱིའོ། །ཡུལ་ དང་ཕྱོགས་དང་གྲོང་འཁོར་རྣམས་ཀྱང་བསྲུང་བར་བགྱིའོ། །རྒྱལ་པོ་ཡང་སྩལ་བར་བགྱིའོ། །རྒྱལ་པོ་ཐོབ་པའི་རྒྱལ་པོ་ཆེ་བར་བགྱིའོ། གླིང་གཅིག་དང་གླིང་གཉིས་དང་གླིང་གསུམ་དང་། གླིང་བཞི་པ་དང་། བདེ་འགྲོ་དང་། ས་སྟེངས་དང་། ས་འོག་གི་འཁོར་ལོས་སྒྱུར་ བའི་རྒྱལ་པོ་རྣམས་སྩལ་བར་བགྱིའོ། །མདོར་ན་བརྒྱ་བྱིན་ཉིད་དང་། ཚངས་པ་ཉིད་དང་། ཁྱབ་འཇུག་ཉིད་དང་། དབང་ཕྱུག་ཆེན་པོ་ཉིད་ཀྱང་སྩལ་བར་བགྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་ཉིད་ཀྱི་དཀྱིལ་འཁོར་ལ་གཟིགས་ནས་འཛུམ་པ་མཛད་དོ། ། དེ་ནས་འཁོར་གྱི་དཀྱིལ་འཁོར་དེ་དག་གཡོས། རབ་ཏུ་གཡོས་ཡང་དག་པར་རབ་ཏུ་གཡོས། འགུལ་རབ་ཏུ་འགུལ། ཡང་དག་པར་རབ་ཏུ་འགུལ། འབར་རབ་ཏུ་འབར། ཡང་དག་པར་རབ་ཏུ་འབར། དགའ་རབ་ཏུ་དགའ། ཡང་དག་པར་རབ་ཏུ་དགའ། རྩེ་རབ་ཏུ་རྩེ། ཡང་ དག་པར་རབ་ཏུ་རྩེ་ཞིང་ངོ་མཚར་རྨད་དུ་བྱུང་བ་དུ་མ་ཡང་འཇིག་རྟེན་དུ་ཡང་དག་པར་རབ་ཏུ་མཐོང་ངོ་། །དེ་ནས་ཚངས་པ་ལ་སོགས་པའི་ལྷ་རྣམས་ཤིན་ཏུ་ཡ་མཚན་སྐྱེས་ནས། བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཛུམ་པ་མཛད་ པ་འདིའི་རྒྱུ་གང་ལགས། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་རྣམས་ནི་རྒྱུ་མ་མཆིས་པར་འཛུམ་པ་མི་མཛད་དོ། །བཅོམ་ལྡན་འདས་དེའི་ཕྱིར་འཛུམ་པ་མཛད་པའི་རྒྱུ་ལུང་བསྟན་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་ལྷ་རྣམས་ཀྱིས་གསོལ་བའི་ཚིག་
- 122b
གསན་ནས་འདི་སྐད་ཅེས་བཀའ་སྩལ་ཏོ། །ཚངས་པ་ལ་སོགས་པ་ལྷ་རྣམས་གང་སྔོན་སངས་རྒྱས་ཐམས་ཅད་ཀྱིས་བཤད་པ་འཆི་བདག་གཞི་བར་བྱེད་པའི་རིག་པ་དང་། དུས་མ་ཡིན་པར་འཆི་བ་འཇོམས་པར་བྱེད་པའི་རིག་པའི་སྔགས་གཟི་བརྗིད་ཆེན་པོ་ཉོན་ཅིག །དེ་ནས་ བཅོམ་ལྡན་འདས་ཕྱག་ན་རྡོ་རྗེ་ལ་ཚངས་པ་ལ་སོགས་པའི་ལྷ་རྣམས་ཀུན་དུ་དགའ་ཞིང་བ་སྤུ་ལངས་ཤིང་ཕྱག་བཙལ་ནས་ལེགས་སོ་ཞེས་བྱ་བ་རབ་ཏུ་ཕུལ་ཏེ། བཅོམ་ལྡན་འདས་ལེགས་སོ་ལེགས་སོ། །རྡོ་རྗེ་འཛིན་པ་ལེགས་སོ་ལེགས་སོ། །གང་གིས་ཚེ་ཐུང་བའི་སེམས་ཅན་ རྣམས་ཚེ་རིང་བར་འགྱུར་བ་དང་། དུས་མ་ཡིན་པའི་འཆི་བདག་གིས་ཟིན་པ་རྣམས་དུས་མ་ཡིན་པར་འཆི་བ་ལས་རྣམ་པར་གྲོལ་བ་དང་། ངན་སོང་དུ་སྐྱེས་པའི་སེམས་ཅན་རྣམས་ངན་སོང་ལས་ཇི་ལྟར་གྲོལ་བ་དང་། འཁོར་བའི་འཇིགས་པས་སྐྲག་པའི་སེམས་ཅན་རྣམས་བདེ་བའི་ ཐབས་ཀྱིས་འཁོར་བ་ལ་རྒྱབ་ཀྱིས་ཕྱོགས་པར་འགྱུར་ཞིང་མྱུར་བ་ཉིད་དུ་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ་གཟི་བརྗིད་ཆེ་ཞིང་སྟོབས་ཆེ་བ་ཕ་རོལ་གནོན་པའི་རིག་པ་བཤད་དུ་གསོལ། དེ་ནས་བཅོམ་ལྡན་འདས་ཕྱག་ན་རྡོ་རྗེས་ ཚངས་པ་ལ་སོགས་པ་ལྷ་རྣམས་ཀྱིས་གསོལ་བ་འདེབས་པའི་ཚིག་གསན་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རིག་པ་འདི་རང་གི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོྃ་པུ་ཎྱེ་པུ་ཎྱེ་མ་ཧཱ་པུ་ཎྱེ་ཨ་བ་རི་མི་ཧཱ་ཡུཿཔུ་ཎྱེ་ཛྙཱ་ན་སཾ་བྷཱ་རོ་པ་ཙི་ཏེ་སྭཱ་ཧཱ། སྙིང་པོའི་རིག་པའོ། །ཨོྃ་བཛྲིཾ་ སྭཱ་ཧཱ། ཉེ་བའི་སྙིང་པོའི་རིག་པའོ། །ཨོྃ་བྷྲཱུྃ་སྭཱ་ཧཱ། སྙིང་པོའི་ཉེ་བའི་སྙིང་པོའི་རིག་པའོ། །ཨོྃ་ཀྲཱྃ་སྭཱ་ཧཱ། སྙིང་པོ་ཡང་དག་པར་བསྐུལ་བའི་རིག་པའོ། །ཏྲཱྃ་སྭཱ་ཧཱ། སྙིང་པོ་དམ་པའོ། །ཨོྃ་ཧྲཱིཿསྭཱ་ཧཱ། གསང་བའི་སྙིང་བོའོ། །དེ་ནས་དེ་དག་གི་དཀྱིལ་འཁོར་བཤད་དེ། །དཀྱིལ་ འཁོར་རྩིབས་བཞི་པར་བྱས་ལ་དེའི་དབུས་སུ་དེ་བཞིན་གཤེགས་པ་ཚེ་དང་བསོད་ནམས་དང་། ཡེ་ཤེས་ཀྱི་ཚོགས་དཔག་ཏུ་མེད་པ་གཟི་བརྗིད་ཀྱི་རྒྱལ་པོ་ཞེས་བྱ་བ་བཞག་སྟེ། བྷྲཱུྃ་ཞེས་བྱ་བའི་སྙིང་པོའོ། །དེའི་སྤྱན་སྔར་ཕྱག་ན་རྡོ་རྗེ་སྟེ། བཛྲིཾ་ཞེས་བྱ་བའི་སྙིང་བོའོ། །གཡོན་དུ་ནི་ཁྲོ་བོ་སྟེ། །
- 123a
ཀྲཱྃ་ཞེས་བྱ་བའི་སྙིང་པོའོ། །གཡས་སུ་ནམ་མཁའི་སྙིང་པོ་སྟེ། ཏྲཱཾ་ཞེས་བྱ་བའི་སྙིང་པོའོ། །རྒྱབ་ཏུ་འཕགས་པ་སྤྱན་རས་གཟིགས་དབང་ཕྱུག་མི་འཇིགས་པ་སྦྱིན་པ་ཞེས་བྱ་བ་སྟེ། ཧྲཱིཿཞེས་བྱ་བའི་སྙིང་པོའོ། །དེ་བཞིན་གཤེགས་པའི་འོད་ཀྱི་དཀྱིལ་ འཁོར་ལ་རེག་པར་བྲིའོ། །བུམ་པ་ལྔ་དང་བརྒྱད་འཁོར་ལོས་སྒྱུར་བའི་སྔགས་ཀྱིས་བཏབ་ལ་གཞག་གོ། །ལས་ཐམས་ཅད་པས་མངོན་པར་བསྔགས་པ་ཡང་ངོ་། བདུག་པ་ལ་སོགས་གཞག་གོ། །མཆོད་པའི་དང་པོ་ཅན་སྒོ་སྐྱོང་ཐམས་ཅད་ཉིད་ཀྱང་ངོ་། །དེ་ནས་སྔགས་ པ་ཡང་དག་པར་འཇུག་པའི་ཕྱིར་བདེ་བར་གཤེགས་པ་དམ་པ་སྲས་དང་བཅས་པ་འཁོར་གྱི་ཚོགས་ཀྱིས་བསྐོར་བ་རིག་པ་དང་ལྷན་ཅིག་སྤྱན་དྲང་ངོ་། །རིག་པ་ཡང་བདེ་བར་གཤེགས་པའི་གཡོན་གྱི་ལོགས་སུ་བྲིའོ། །དེ་ནས་བདག་ཉིད་དབང་བསྐུར་ཏེ། སྐྱིལ་མོ་ཀྲུང་གིས་འདུག་ ལ་སྟོང་ཕྲག་བརྒྱར་བཟླས་སོ། །དེ་ནས་དེ་བཞིན་གཤེགས་པ་མངོན་སུམ་དུ་མཐོང་བར་འགྱུར་ཞིང་རྡོ་རྗེ་འཛིན་པའམ། འཕགས་པ་སྤྱན་རས་གཟིགས་དབང་ཕྱུག་གམ། ཇི་ལྟར་འདོད་པའི་མཆོག་སོ་སོར་འཐོབ་བོ། །གང་གི་ཚེ་མཉམ་པར་གཞག་པ་དེའི་ཚེ་ཡིད་ཀྱིས་ལས་ཐམས་ཅད་ ནུས་པར་འགྱུར་རོ། །དེ་ནས་སློབ་མ་རྣམས་གཞུག་སྟེ་རྡོ་རྗེ་འཛིན་པའི་ཕྱག་རྒྱས་ང་རྒྱལ་འདི་བསྐྱེད་པར་བྱ་སྟེ། ཨོྃ་བཛྲ་དྷ་ར། རཏྣ་དྷ་ར། པདྨ་དྷ་ར། བི་ཤྭ་དྷ་ར། ཏ་ཐཱ་ག་ཏ་ས་མ་ཡ་མཱ་ཏི་ཀྲམ། ཏ་ཐཱ་ག་ཏ་ས་མ་ཡ་དྷཱ་རཱ་ཏྨ་ཀོ྅་ཧྃ་ཞེས་པའོ། །དེ་ནས་འདིས་མེ་ཏོག་དོར་བར་བྱའོ། །ཨོྃ་ སརྦ་ཏ་ཐཱ་ག་ཏ་པྲ་ཏཱིཙྪ་ཧོ་ས་མ་ཡ་སྟྭྃ། དེ་ནས་ཕྲེང་བ་དེ་མགོ་ལ་བཅིངས་ལ་དབང་བསྐུར། ཨོྃ་སརྦ་ཏ་ཐཱ་ག་ཏཱ་བྷི་ཥིཉྩ་དྷཱ་རཱ་ཛྙཱ་པ་ཡ་ཧཱུྃ་བྷཱུྃ། ཨོྃ་བཛྲཱ་བྷི་ཥིཉྩ་ཧཱུྃ་བྷཱུྃ། ཨོྃ་རཏྣ་བྷི་ཥིཉྩ་ཧཱུྃ་ཏྲཱྃ། ཨོྃ་པདྨ་བྷི་ཥིཉྩ་ཧཱུྃ་ཧྲཱིཿ། ཨོྃ་ཀརྨ་བྷི་ཥིཉྩ་ཧཱུྃ་ཨཿ། དེ་ནས་དམ་ཚིག་དང་བཀའི་དབང་བསྐུར་བ་སྦྱིན་ནོ། །དེ་ ལ་དམ་ཚིག་ནི། དཀོན་མཆོག་གསུམ་དང་བྱང་ཆུབ་སེམས། །བླ་མ་དམ་པ་ཡོང་མི་སྤོང་། །སྲོག་ཆགས་རྣམས་ནི་གསད་མི་བྱ། །མ་བྱིན་པར་ཡང་མི་བླང་ཉིད། །བརྫུན་ཡང་སྨྲ་བར་མི་བྱའོ། །ཕ་རོལ་བུད་མེད་སྤྱད་མི་བྱ། །བླ་མ་སྨད་པར་མི་བྱ་ཞིང་། །གྲིབ་མའང་འགོམ་པར་
- 123b
མི་བྱའོ། །སློབ་དཔོན་མ་ཡིན་མི་གཟུང་ཞིང་། །མཚན་མ་སློབ་དཔོན་སྤངས་པ་ཡང་། །སྔགས་དང་ཕྱག་རྒྱ་མི་སྨད་དེ། །ལྷ་རྣམས་ལ་ཡང་ག་ལ་ཞིག །གལ་ཏེ་རྨོངས་པས་སྨད་ན་ནི། །ནད་ཀྱིས་ངེས་པར་འཆི་བར་འགྱུར། །མཆོད་རྙིང་ལྷ་ཡི་གྲིབ་མ་དང་། །འཇིག་རྟེན་ འཇིག་རྟེན་ལས་འདས་པའི། །ཕྱག་རྒྱ་ཡི་གེ་མཚན་མ་ཡང་། །གོམ་པས་བགོམ་པར་མི་བྱའོ། །བླུན་པོ་དཀོན་མཆོག་གསུམ་སོགས་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་ལ་བརྩོན་པ་རྣམས། །མཁས་པས་བསྒྲིམས་ཏེ་གསད་པར་བྱ། །ཆོས་མི་ལྡན་ དང་བསྲེག་པ་དག །རྟག་ཏུ་སེམས་ཅན་གནོད་བརྩོན་དང་། །དམ་ཚིག་སྡང་རྣམས་སྙིང་བརྩེ་བས། །སྔགས་པས་སྔགས་ཀྱིས་གཞོམ་པར་བྱ། །འཇུངས་པའི་ནོར་ཡང་ཡང་དག་བླང་། །སེམས་ཅན་སྡུག་བསྔལ་ཅན་ལ་སྦྱིན། །བླ་མ་མཆོད་པའི་རྒྱུ་མཚན་དང་། །དེ་བཞིན་དམ་ ཚིག་སྒྲུབ་པ་དང་། །དཀྱིལ་འཁོར་དོན་དང་རྒྱལ་སྲས་ལ། །མཆོད་པའི་དོན་ཕྱིར་བསམས་པ་ཡིས། །ནོར་འཕྲོག་འཇུངས་པའི་ནོར་ཡང་འོང་། །སེམས་ཅན་རྣམས་ལ་ཕན་དགའ་བས། །དམ་ཚིག་དང་ནི་བླ་མའི་རྫས། །སེམས་ཅན་རྣམས་ཀྱི་སྲོག་བསྲུང་ཕྱིར། །རྟག་ཏུ་བརྫུན་ནི་སྨྲ་ བར་བྱ། །སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །སྔགས་རིག་པ་ཡི་བསྒྲུབ་པའི་ཕྱིར། །གཞན་གྱི་བུད་མེད་ཀྱང་བསྟེན་བྱ། །རྡོ་རྗེ་སེམས་དཔའི་གནས་འདུག་པས། །ཐམས་ཅད་སྤྱོད་ཅིང་ཀུན་བྱས་ཀྱང་། །འགྲུབ་འགྱུར་ཉེས་པར་མི་འགྱུར་ན། །སྙིང་ རྗེ་ལྡན་པས་སྨོས་ཅི་དགོས། །དེ་ནས་འདིས་བཀའི་དབང་བསྐུར་རོ། །ཨོྃ་སརྦ་ཏ་ཐཱ་ག་ཏཱ་ཛྙཱ་ཏེ་དཱ་སྱཱ་མི་གྲྀཧྞ་བཛྲ་སུ་སིདྡྷ་ཡེ། ཨོྃ་བཛྲ་ཏིཥྵ་ཧཱུྃ། འདིས་རྡོ་རྗེ་ལག་ཏུ་བྱིན་ལ་ཕྲིན་ལས་ཀྱི་དབང་བསྐུར་སྦྱིན་ནོ། །ཨོྃ་སརྦ་ཀརྨ་ཎི་ཀུ་རུ་བུ་དྡྷཱ་ནཱཾ་ཧཱུྃ། དེ་ནས་བླ་མ་བླ་མར་བྱ་བའི་ཕྱིར། །ཁྱོད་ཀྱི་ ལུས་མཆོག་སྦྱིན་པར་བྱ། །རྫས་དང་ནོར་དང་འབྲུ་རྣམས་དང་། །རྟ་དང་བཞོན་པ་ཉིད་དང་ནི། །བྲན་གྱི་མཆོག་དང་ཁང་པ་དང་། །རྒྱལ་སྲིད་དབང་ཕྱུག་དེ་བཞིན་ཏེ། །བུ་དང་བུ་མོ་ཆུང་མ་དང་། །མ་དང་སྲིང་མོ་ཚ་མོ་དང་། །གཞན་ཡང་ཅི་བཞེད་ཐམས་ཅད་ནི། །ཕན་པའི་བསམ་
- 124a
པས་བླ་མར་དབུལ། །དེ་ནས་དངོས་གྲུབ་སངས་རྒྱས་དང་། །བྱང་ཆུབ་སྒྲུབ་དང་གཞན་ཡང་ནི། །འཇིག་རྟེན་པ་ཡི་མཐུ་ཆེན་རྣམས། །ཇི་ལྟར་འདོད་པས་གསོལ་བ་གདབ། །དེ་ནས་བུ་ལ་ཕན་པའི་ཕྱིར། །སྔགས་རིག་སེར་སྣ་མེད་སེམས་དང་། །དད་པས་དད་པའི་ སེམས་ལྡན་ལ། །དངོས་གྲུབ་རྣམས་ནི་སྦྱིན་པར་བྱ། །ཆོས་རྣམས་རང་བཞིན་མེད་པར་ནི། །སེམས་ཀྱིས་བསྒོམ་པར་བྱས་ནས་ཀྱང་། །ཨ་ལས་ཟླ་བའི་དཀྱིལ་འཁོར་བསམ། །རང་གིས་བོན་དེ་དབུས་སུ། །བསམས་ནས་དམ་ཚིག་ཕྱག་རྒྱ་ཡང་། །བསམ་བཞིན་དེ་བཞིན་ དེ་ཉིད་ཀྱང་། །ལྷ་ཡི་རྣམ་པའི་རྣལ་འབྱོར་དུ། །སྒྲུབ་པ་པོ་ཡིས་ཡོངས་སུ་བསྒྱུར། །དེ་ནས་རང་གིས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །གོང་འོག་གོ་རིམས་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །དེ་ལྟར་ང་རྒྱལ་བསྐྱེད་ནས་ནི། །མཁས་པ་ཡིས་ནི་ བསྒྲུབ་བྱ་སྟེ། །དེ་བཞིན་གཤེགས་ཀྱང་འགྲུབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་དང་། རྒྱལ་ པོའི་བུ་དང་། རྒྱལ་པོའི་བློན་པོ་དང་། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་དང་། གཞན་ཡང་དམན་པ་ཕྱག་དར་པ་དང་། མཐའ་འཁོབ་ཀྱི་སྐྱེ་བོའི་གནས་དང་། སྐྱེ་བོའི་གནས་ཀྱི་རིགས་སུ་སྐྱེས་པ་དཀྱིལ་འཁོར་གྱི་རྒྱལ་པོ་འདིར་ཞུགས་པ་དེ་དག་གི་རྣམ་པར་སྨིན་པ་ ཇི་ལྟ་བུར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཚངས་པ་ལ་སོགས་པ་ལྷའི་ཚོགས་རྣམས་གང་མ་འོངས་པའི་སེམས་ཅན་རྣམས་ལ་ཕན་པའི་ཕྱིར་ཞུས་པ་ནི་ལེགས་སོ་ལེགས་སོ། །ལྷའི་ཚོགས་རྣམས་དཀྱིལ་འཁོར་གྱི་རྒྱལ་པོ་འདིར་ཞུགས་ཤིང་དབང་བསྐུར་བ་དང་། བྲིས་ པ་དང་། འདྲིར་བཅུག་པ་དང་། རྗེས་སུ་ཡི་རང་བ་དང་། ཕྱག་བྱས་པ་དང་། མཆོད་པ་བྱས་པའི་འབྲས་བུ་རྣམ་པར་སྨིན་པ་ཉོན་ཅིག །ལྷའི་བུ་རྣམས་མདོར་ན་ངལ་ཡང་དེའི་ཕན་ཡོན་བཤད་པར་སྤྲོ་བ་མེད་དེ། གང་ང་ལ་བསོད་ནམས་ཀྱི་ཕུང་པོ་དེ་བརྒྱ་ཕྲག་སྟོང་དུ་མར་བསྒྱུར་ཡང་
- 124b
གྲངས་སུ་ཡང་། བགྲང་བར་ཡང་། དཔེར་ཡང་མི་བཟོད་དེ། དེ་བཞིན་གཤེགས་པ་ཐམས་ཅད་ལ་བསོད་ནམས་ཀྱི་ཕུང་པོའི་བར་གྱིས་ཀྱང་མི་བཟོད་དོ། །གང་དཀྱིལ་འཁོར་དུ་ཞུགས་པའི་སེམས་ཅན་རྣམས་ཀྱི་འབྲས་བུ་རྣམ་པར་སྨིན་པ་འདི་ནི་བཅོམ་ལྡན་འདས་ངོ་མཚར་ཆེའོ། ། རྡོ་རྗེ་འཛིན་པ་ངོ་མཚར་ཆེའོ། །བཅོམ་ལྡན་འདས་བདག་ཅག་རྡོ་རྗེ་འཛིན་པའི་དཀྱིལ་འཁོར་ལ་སོགས་པར་ཞུགས་པ་སྤྲོའོ། །བཅོམ་ལྡན་འདས་རྡོ་རྗེ་འཛིན་པ་སྤྲོའོ། །དེ་ནས་ལྷ་དེ་དག་གིས་དེ་བཞིན་དུ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཛམ་བུའི་གླིང་ པའི་སེམས་ཅན་རྣམས་བསོད་ནམས་ཆུང་ཞིང་ཚེ་ཐུང་བ་དང་། ངན་སོང་གི་རྒྱུད་དང་ལྡན་པ་དང་། དམྱལ་བ་དང་། ཡི་དགས་དང་། བྱོལ་སོང་རྣམས་སུ་སྐྱེས་པ་དག་ཀྱང་མཆིས་ན། །བཅོམ་ལྡན་འདས་དེ་དག་ལ་བདག་གིས་ཇི་ལྟར་བསྒྲུབ་པར་བྱ། ཀྱེ་ལྷའི་བུ་དག་དེ་དག་ནི་ དཀྱིལ་འཁོར་འདི་ཉིད་དུ་ཆུག་ཅིག །བཅུག་ནས་ཀྱང་དབང་སྐུར་ཅིག །ཆོས་ཀྱི་ཡི་གེ་ཡང་ཟློས་སུ་ཆུག་ཅིག །དེ་ནས་སེམས་ཅན་དེ་དག་ཚེ་རིང་བར་འགྱུར། བསོད་ནམས་དང་བྲལ་བ་བསོད་ནམས་དང་ལྡན་པར་འགྱུར། ངན་སོང་ལས་རྣམ་པར་གྲོལ་བར་འགྱུར་རོ། །ལྷའི་བུ་ རྣམས་གང་ངན་སོང་དུ་སྐྱེས་པ་དེ་དག་གི་མིང་ལ་དབང་བསྐུར་བ་མཛོད་ཅིག །གཟུགས་བརྙན་ལ་ཡང་དབང་བསྐུར་བར་བྱོས་ཤིག །རང་གི་ལྷའི་སྐུ་ལ་ཡང་དབང་བསྐུར་བར་བྱོས་ཤིག །ཐ་ན་དེ་དང་རིགས་མཐུན་པ་དང་། དེའི་བུ་དང་དེ་དང་རུས་མཐུན་པ་དང་། དེའི་མིང་འཛིན་པ་དང་། བྲན་ ལ་ཡང་དབང་སྐུར་ཅིག །ཞག་བདུན་ལན་བདུན་དཀྱིལ་འཁོར་དུ་བཅུག་སྟེ་དབང་བསྐུར་བས། ངེས་པར་ངན་སོང་གི་སྒྲིབ་པ་ལས་རྣམ་པར་གྲོལ་བར་འགྱུར་རོ། །ལྷའི་བུ་རྣམས་དེའི་མིང་ནས་སྨོས་ཏེ། འབུམ་ཕྲག་གཉིས་དང་། འབུམ་ཕྲག་གསུམ་དང་། འབུམ་ཕྲག་བཞི་དང་། འབུམ་ ཕྲག་བརྒྱ་སྟོང་གི་བར་དུ་བཟླས་ན། མཚམས་མེད་པ་ལྔ་བྱས་པ་ཡང་རྣམ་པར་གྲོལ་བར་འགྱུར་ན། སྡིག་པ་ཆུང་ངུ་བྱས་པ་རྣམས་ལྟ་ཅི་སྨོས། ལྷའི་བུ་རྣམས་ཞི་བའི་ཐབ་ཁུང་ཟླུམ་པོ་ཐ་མ་དང་བར་མ་དང་མཆོག་ཁྲུ་གང་དང་ཁྲུ་དོའམ། ཁྲུ་བཞི་པ་བྱས་ནས་དེའི་མིང་གིས་ཡུངས་ཀར་དཀར་
- 125a
པོ་རྣམས་བརྒྱ་ཕྲག་སྟོང་དུ་བསྲེགས་ན་ངན་སོང་ཀུན་ལས་ཐར་བར་འགྱུར་རོ། །དེའི་ཤ་དང་། རུས་པ་དང་། སྐྲ་དང་། ཐལ་བ་ལ་སོགས་པ་ལ་ཆོ་ག་དེ་བཞིན་ཉིད་ཀྱིས་སྡིག་པ་ཀུན་ལས་རྣམ་པར་གྲོལ་བར་འགྱུར་རོ། །དེ་ཡི་དབུས་སུ་འཁོར་ལོ་ནི། །རྩིབས་ བརྒྱད་དཀར་པོ་འོད་ཟེར་འབར། །ཁོར་ཡུག་རྡོ་རྗེ་རྩེ་ལྔ་པ། །འོད་ཟེར་དཀར་པོ་དང་ལྡན་བྲི། །དེ་ནས་སྣ་ཚོགས་རྡོ་རྗེ་བྱ། །རྡོ་རྗེ་རིན་ཆེན་ཆུ་སྐྱེས་མཆོག །དེ་ནས་སྡིག་པ་གཞོམ་པའི་ཕྱིར། །ཕྱག་རྒྱ་རྣམ་པ་སྣ་ཚོགས་བྱ། །ཕྱི་རོལ་རྡོ་རྗེ་རིགས་རྣམས་ཀྱི། །ཕྱག་རྒྱ་རྣམས་ནི་ཕྱི་ རོལ་བྲི། །གཟའ་དང་སྐར་མའི་མཚན་མ་དང་། །དེ་ལྟར་འཇིག་རྟེན་འཁོར་རྣམས་ཀྱང་། །གཙོ་བོའི་རི་མོ་ལུགས་མ་དང་། །རྡོ་རྗེ་ཅན་དང་ལྷན་ཅིག་གཞག །བུམ་པ་བུམ་པ་གང་བ་དང་། །གཏོར་མ་ལྷ་བཤོས་ཤིན་ཏུ་དཀར། །མདོར་ན་ཐིག་ནི་བཏབ་ནས་ཀྱང་། །ཆོ་ག་བཞིན་དུ་ བྲི་བར་བྱ། །དཀར་པོའི་གོས་ནི་གྱོན་ནས་སུ། །སངས་རྒྱས་གཟུགས་ཅན་མི་འཇིགས་པས། །ངན་སོང་འགྲོ་བར་གནས་པ་ཡི། །སེམས་ཅན་དེ་རྗེས་དྲན་བྱེད་ཅིང་། །སྡིག་པ་སྒྲིབ་པ་ཞི་བའི་ཕྱིར། །རྒྱུད་དག་པ་ཡི་སྦྱིན་སྲེག་ནི། །མར་དང་འོ་མ་སྦྲང་རྩིར་བཅས། །འབྲས་ཡོས་ ཡུངས་ཀར་བསྲེས་པ་དང་། །དེ་ཡི་རུས་པ་ཤ་ལ་སོགས། །ཡང་ན་མིང་ཙམ་གྱིས་ཀྱང་བྱ། །དེ་ནས་བདེ་འགྲོར་སྐྱེས་ནས་སུ། །མཁས་པས་རྒྱས་པར་བྱ་བ་ནི། །ཁྲུ་དོ་པའམ་ཁྲུ་བཞི་པ། །དེ་བཞིན་མཆོག་ནི་ཁྲུ་བརྒྱད་པར། །བྱས་ནས་ཐབ་ཁུང་ཁྲུ་བཞི་པ། །ཀུན་དུ་མུ་རན་དང་ལྡན་པ། ། དེ་དབུས་པདྨ་རིན་ཆེན་ཅན། །འོད་ཟེར་སེར་པོ་ཅན་བྲི་ཞིང་། །ཁོར་ཡུག་ཏུ་ནི་རིན་ཆེན་དང་། །མུ་རན་ལ་ནི་ཆུ་སྐྱེས་བྲི། །ཕྱི་རོལ་དུ་ནི་རིགས་ལྔ་ཡི། །དབྱེ་བས་ཕྱག་རྒྱ་བྲི་བར་བྱ། །དེ་བཞིན་ཕྱི་ཡི་ལྷ་རྣམས་དང་། །ལྕགས་ཀྱུ་ལ་སོགས་བྲི་བར་བྱ། །ན་བཟའ་སེར་པོར་གྱོན་བྱས་ནས། ། མཐོ་རིས་གནས་པ་རྗེས་དྲན་ཞིང་། །དེ་ལ་ཕན་ཕྱིར་རྒྱས་པ་ཡི། །དོན་དུ་རྒྱས་པའི་ལས་བྱས་ན། །ལུས་ཅན་དེ་ཡི་ཚེ་དང་དཔལ། །གཟི་བརྗིད་སྐལ་བ་བཟང་པོ་འཕེལ། །དེ་ནས་དེ་ལ་ཕན་པ་ཡི། །དབང་དུ་བྱ་བའི་ལས་བྱ་སྟེ། །ཐབ་ཁུང་གཞུ་ཡི་དབྱིབས་འདྲ་བ། །ཁྲུ་གང་བའམ་
- 125b
ཁྲུ་དོ་པ། །ཁྲུ་བཞི་བྱས་ལ་དེ་དབུས་སུ། །ཆུ་སྐྱེས་དམར་པོ་ཡང་དག་བྲི། །དེ་ཡི་དབུས་སུ་མདར་བཅས་པའི། །གཞུ་ཉིད་ཀྱང་ནི་བྲི་བར་བྱ། །ཁོར་ཡུག་ཏུ་ནི་མདར་བཅས་པའི། །གཞུ་ནི་ཁ་དོག་དམར་པོ་བྲི། །སྔགས་འཛིན་པ་ཡིས་རྟག་པར་ཡང་། །ཕྱི་རོལ་དེ་ཡི་ ལྷ་ཡི་བྱ། །སེམས་ཅན་དེ་ནི་དྲན་བྱས་ལ། །ན་བཟའ་དམར་པོ་གྱོན་པ་ཡི། །མེ་ཏོག་དམར་ཞིང་པདྨ་ཡང་། །འབྲས་བུ་དམར་དང་ཁམས་བཅས་པ། །མར་དང་གུར་གུམ་བསྲེས་པ་དང་། །ཙནྡན་དམར་པོའི་ཕྱེ་མ་དང་། །སྦྱིན་སྲེག་བྱས་ནས་ལྷ་ལ་སོགས། །ཐམས་ ཅད་དེ་ཡི་དབང་དུ་འགྱུར། །དེ་ཡི་གདོན་རྣམས་རྣམ་གཞོམ་ཕྱིར། །མངོན་སྤྱོད་ཡང་དག་བརྩམ་པར་བྱ། །ཁྲུ་དོ་ཕྱེད་བཅས་ཁྲུ་གསུམ་མམ། །དེ་བཞིན་མཆོག་ནི་ཁྲུ་དགུ་པ། །ཟུར་གསུམ་དང་ནི་ལྡན་པར་བྱ། །དབུས་སུ་རྡོ་རྗེ་རྩེ་དགུ་པ། །རྩེ་གསུམ་པ་ཡིས་མུ་རན་བྱ། ། སྣ་ཚོགས་རྡོ་རྗེ་ཡང་བྱས་ལ། །དབྱུག་པ་མགོ་དང་རྩེ་གསུམ་རྣམས། །རྡོ་རྗེ་དགྲ་སྟ་རྩེ་གཅིག་གིས། །ཕྱི་རོལ་དུ་ཡང་མཚན་པར་བྱ། །རིག་པ་གསུམ་པ་སྔར་བཞིན་བརྒྱན། །བུམ་པ་གཏོར་མ་བུམ་པ་ཡང་། །ཞལ་ཟས་མང་པོ་གཞག་པར་བྱ། །ཤ་དང་ཁྲག་གིས་བཀང་བ་ཡི། ། ཐོད་པ་རྣམས་ཀྱང་ཀུན་དུ་ཡང་། །དེ་ནས་གོས་ནག་བགོས་ཤིང་ཁྲོས། །རང་ཉིད་འཇིག་རྟེན་གསུམ་རྣམ་རྒྱལ། །ལུས་ཅན་དེ་ཡི་སྡིག་ལས་སོགས། །དེ་ནས་དེ་ཡི་སྡིག་བཅོམ་ཞིང་། །བགེགས་དང་བྲལ་ཏེ་ཅི་བདེ་བར། །མཐོ་རིས་འཇིག་རྟེན་མི་རྣམས་ཉིད། །ཇི་སྙེད་ཁམས་ གསུམ་འཇིག་རྟེན་སྤྱོད། །མྱུར་དུ་གོ་རིམས་འདི་ཉིད་ཀྱིས། །ཚེ་འདིར་གནས་པ་རྣམས་ལ་བྱ། །དེ་ནས་གང་གི་ཕྱིར་བྱས་པ། །དེ་ཡི་ཕྱིར་ནི་དེ་བཞིན་འགྱུར། །གཞན་དག་ཀྱང་ནི་ལས་རྣམས་ཀྱང་། །སྔ་མ་ཇི་བཞིན་དེ་བཞིན་བྱ། །དེས་ནི་སེམས་ཅན་རྣམས་ལ་ཡང་། །མྱུར་དུ་ བདེ་སྐྱིད་འགྲུབ་པར་འགྱུར། །དེ་ནས་ཚངས་པ་ལ་སོགས་པའི་ལྷ་རྣམས་ཡང་དག་པར་དགའ་བས་བཅོམ་ལྡན་འདས་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ངན་སོང་དུ་སྐྱེས་པའི་སེམས་ཅན་རྣམས་ཀྱི་དོན་དང་ཕན་ཡོན་དང་བདེ་བའི་སླད་དུ་བརྟག་པའི་རྒྱལ་
- 126a
པོ་འདི་འདྲི་བ་དང་འདྲིར་འཇུག་པའི་རིགས་ཀྱི་བུའམ་རིགས་ཀྱི་བུ་མོ་དེ་བདག་ཅག་ཚངས་པ་ལ་སོགས་པ་ལྷ་རྣམས་ཀྱིས་བུ་བཞིན་དུ་ཡོངས་སུ་བསྐྱང་བར་བགྱི་སྟེ། ཡང་ཇི་ལྟར་བཤད་པ་མ་ཚང་བ་མེད་པར་བགྱིད་པ་ལྟ་ཅི་སྨོས། གང་ཡང་རྒྱལ་པོ་དང་རྒྱལ་པོའི་བུ་ དང་རྒྱལ་པོའི་བློན་པོ་ཇི་ལྟར་གསུངས་པའི་སྔགས་རྗེས་སུ་སློབ་པ་དེའི་རྒྱལ་སྲིད་འཕེལ་བར་བགྱིའོ། །ཡུལ་དང་། ཕྱོགས་དང་། སྐྱེ་བོའི་གནས་དང་། འཁོར་གྱི་སྐྱེ་བོའི་ལོ་ཐོག་ལ་སོགས་པ་ཡང་བསྲུང་བར་བགྱིའོ། །ནོར་དང་འབྲུ་རྣམས་མང་དུ་འབྱོར་བར་བགྱིའོ། །བུད་མེད་ དང་། སྐྱེས་པ་དང་། ཁྱེའུ་དང་། བུ་མོ་རྣམས་ཕུན་སུམ་ཚོགས་པར་ཡང་བགྱིའོ། །འབྱོར་པ་དང་། རྒྱས་པ་དང་། ལོ་ལེགས་པ་དང་། བདེ་བར་བགྱིའོ། །གང་ཞིག་བརྟག་པའི་རྒྱལ་པོ་འདི་ལ་དད་པས་རྒྱལ་མཚན་གྱི་རྩེ་མོ་ལ་བཏགས་ཏེ་གྲོང་དང་གྲོང་ཁྱེར་ལ་སོགས་པར་འཇུག་པ་ བདག་ཉིད་ཀྱིས་བསྡུ་བར་ཡང་བགྱིའོ། །གླང་པོ་ཆེའི་སྟེང་དུ་བཞག་ལ་གྲོང་དང་གྲོང་ཁྱེར་ལ་སོགས་པ་ཐམས་ཅད་དུ་བསྐོར་བར་བྱ་སྟེ། དུས་མ་ཡིན་པར་འཆི་བ་དང་ཉེ་བར་འཚེ་བ་ཐམས་ཅད་ཞི་བར་འགྱུར་རོ། །སེམས་ཅན་ཆེན་པོ་དེའི་དྲུང་ན་བདག་ཅག་བྲན་གྱི་ཚུལ་ལམ་བུའི་ཚུལ་དུ་གནས་པར་ཤེས་ པར་བགྱིའོ། །གང་ན་འདི་རབ་ཏུ་སྤྱོད་པ་དེ་ན་བཅོམ་ལྡན་འདས་ཕྱག་ན་རྡོ་རྗེ་རང་ཉིད་ལོངས་སྤྱོད་རྫོགས་པའི་སྐུས་རྡོ་རྗེ་སེམས་དཔའི་སྐུར་བཞུགས་པར་འཚལ་བར་བགྱིའོ། །བཅོམ་ལྡན་འདས་རྡོ་རྗེ་སེམས་དཔའ་ཀུན་དུ་བཟང་པོ་རེ་བ་ཐམས་ཅད་ཡོངས་སུ་སྐོང་བ་དེ་ཉིད་བརྟག་པའི་རྒྱལ་པོའི་གཟུགས་སུ་ བཞུགས་པར་འཚལ་བར་བགྱིའོ། །ས་ཕྱོགས་དེ་ཡང་མཆོད་རྟེན་དུ་གྱུར་པར་འཚལ་བར་བགྱི་སྟེ། མཆོད་པར་བགྱི། ཕྱག་འཚལ་བར་བགྱིའོ། །ཀུན་དུ་བསྲུང་བར་བགྱིའོ། །གང་ཡང་བརྟག་པའི་རྒྱལ་པོ་འདིར་རབ་ཏ་སྤྱོད་པའི་རྡོ་རྗེ་སློབ་དཔོན་དཀའ་ཐུབ་ཆེན་པོ་དེའི་བདག་ཅག་ཚངས་པ་ལ་ སོགས་པའི་ལྷ་རྣམས་ཀྱིས་གཡོག་བགྱིའོ། །བྲན་གྱི་ཚུལ་དུ་གནས་པར་བགྱིའོ། །མངག་གཞུག་པ་ཉིད་དུ་གནས་པར་བགྱིའོ། །བསྒོ་བ་ཐམས་ཅད་མཉན་པར་བགྱིའོ། །ཕན་པ་དང་བདེ་བ་ཐམས་ཅད་བགྱིའོ། །དངོས་གྲུབ་ཐམས་ཅད་སྩལ་བར་བགྱི་སྟེ། བཅོམ་ལྡན་འདས་མདོར་
- 126b
ན་དེའི་རྐང་པའི་རྡུལ་མགོ་བོས་གཟུང་བར་བགྱིའོ། །བཅོམ་ལྡན་འདས་ཕྱག་འཚལ་བར་བགྱིའོ། །དེའི་ཕྱི་བཞིན་དུ་རྗེས་སུ་འབྲང་བར་བགྱིའོ། །བཅོམ་ལྡན་འདས་གང་དཀྱིལ་འཁོར་དུ་ཞུགས་ཏེ་དབང་བསྐུར་བ་དེ་ཁོ་བོ་ཅག་གིས་མངའ་བདག་ཏུ་འཚལ་བར་བགྱིའོ། །ཕྱག་ ན་རྡོ་རྗེར་འཚལ་བར་བགྱིའོ། །རྡོ་རྗེ་སེམས་དཔའ་ལགས་པར་འཚལ་བར་བགྱིའོ། །བདེ་བ་ཆེན་པོ་ཀུན་དུ་བཟང་པོ་ལགས་པར་འཚལ་བར་བགྱིའོ། །དེ་བཞིན་གཤེགས་པ་ལགས་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཚངས་པ་ལ་སོགས་པའི་ལྷ་ རྣམས་ལ་འདི་སྐད་ཅེས་བཀའ་སྩལ་ཏོ། །ཚངས་པ་ལ་སོགས་པ་ལྷ་རྣམས་གང་ཆོས་ལ་རིམ་གྲོ་གཅིག་གཉིས་བྱས་པས་དེ་ལྟར་ཡང་དག་པའི་དམ་བཅའ་ནི་ལེགས་སོ་ལེགས་པར་སྒྲུབས་ཤིག །དེ་ནས་བཅོམ་ལྡན་འདས་ཕྱག་ན་རྡོ་རྗེས་སྔགས་དང་རིག་པ་དང་། སྙིང་པོ་ཐམས་ཅད་བརྟན་ པར་བྱ་བའི་ཕྱིར་རང་གི་སྙིང་པོ་འདི་བཤད་དོ། །ཨོྃ་བྷྲཱུྃ་དྲུྃ་བཛྲ་པཱ་ཎི་དྲྀ་ཌྷི་ཏིཥྛ་ཧཱུྃ། ཨོྃ་ཧཱུྃ་ཕཊ། ཨོྃ་བཛྲ་ཧཱུྃ་ཕཊ། ཨོྃ་དྲྀ་ཌྷ་བཛྲ་ཧཱུྃ། ཨོྃ་བཛྲ་ཧཱུྃ་ས། ཨོྃ་བཛྲ་ཧཱུྃ་ཨཿ། དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །དབུས་སུ་རྡོ་རྗེ་བྲི་བར་བྱ། །ཡང་ན་རྡོ་ རྗེ་སེམས་དཔའ་འམ། །ཀུན་ཏུ་བཟང་པོ་བདེ་བ་ཆེ། །སྤྱན་སྔར་ཕྱག་ན་རྡོ་རྗེ་ཉིད། །གཡས་སུ་ཕྱག་ན་རིན་ཆེན་སྤྱན། །ཕྱག་ན་པདྨ་ནུབ་ཕྱོགས་བྲི། །བྱང་དུ་ཕྱག་ན་སྣ་ཚོགས་བྲི། །ཕྱི་རོལ་དུ་ནི་ཟླུམ་པོར་བསྐོར། །སངས་རྒྱས་ཐམས་ཅད་དགོད་པར་བྱ། །དེ་ཡི་ཕྱི་རོལ་སེམས་དཔའ་རྣམས། ། གོ་རིམས་བཞིན་དུ་བྲི་བར་བྱ། །དེ་ཡི་ཕྱི་རོལ་སེམས་དཔའ་ཡང་། །བྱམས་པ་ལ་སོགས་མཆོག་ཆེན་བྲི། །དེ་ཕྱིར་དེ་བཞིན་དགེ་སློང་ནི། །ཀུན་དགའ་བོ་སོགས་ཐུབ་པ་བྲི། །རང་གི་ཆུང་མ་བུས་བསྐོར་བའི། །ཚངས་པ་ལ་སོགས་ཕྱི་རོལ་བྲི། །གཟའ་དང་རྒྱུ་སྐར་ཉི་ཟླ་དང་། །རྒྱལ་པོ་ བཞི་པོ་རྣམས་དང་ནི། །ཕྱོགས་སྐྱོང་འཇིག་རྟེན་སྐྱོང་བ་རྣམས། །དཀྱིལ་འཁོར་འདིར་ནི་ཡང་དག་བྲི། །ཕྱི་རོལ་དུ་ནི་དམྱལ་བ་སོགས། །ཀླུ་ལ་སོགས་པ་དུད་འགྲོའི་དཔེ། །སྒོ་དང་སྒོར་ནི་དེ་བཞིན་དུ། །སྒོ་སྐྱོང་སྟོབས་ཀྱི་དམ་པ་རྣམས། །དཀར་པོ་འདོད་པའི་ཉི་མ་ལ། །རབ་ཏུ་འབད་
- 127a
པས་དཀྱིལ་འཁོར་བྲི། །གང་བསྔགས་ནག་པོའི་ཕྱོགས་ལ་ཡང་། །དཀྱིལ་འཁོར་འགལ་བ་མ་ཡིན་ནོ། །ལྔ་པ་དེ་རྗེས་བདུན་པ་དང་། །ཉ་གང་བ་ནི་ཁྱད་པར་དུ། །བསྔགས་ཏེ་ཕྱག་ན་པདྨ་ཡི། །དཀྱིལ་འཁོར་བྱ་བའི་ཆོ་ག་ལའོ། །གང་ཡང་དྲག་པོའི་ལས་རྣམས་ལ། ། དེ་ནི་ནག་པོ་ལ་ཡང་བྲི། །ཁྲོ་བོ་རྣམས་ཀྱི་དཀྱིལ་འཁོར་ཡང་། །ཟླ་བ་ཉ་བ་ཁྱད་པར་དུ། །རྒྱལ་པོ་རྣམས་ཀྱིས་དཀྱིལ་འཁོར་བསྔགས། །གཞན་ཡང་རང་གིས་འདུས་བྱས་པའི། །དཀྱིལ་འཁོར་ལ་བརྩོན་གདབ་བྱ་ཞིང་། །ཤར་ནས་འཆར་བའི་དབང་བྱ་སྟེ། །ཕྱོགས་ཀྱི་ཆ་ནི་ བརྟག་པར་བྱ། །དེ་ནས་དཀྱིལ་འཁོར་དགོད་པ་ནི། །ཡིད་ཀྱིས་ཡོངས་སུ་བརྟག་པར་བྱ། །སྔགས་དང་རྒྱུད་ནི་དང་པོར་བྱས། །འཇམ་ཞིང་སྔགས་གཟུགས་དགེ་ཞིང་ཞི། །རྗེས་མཐུན་རང་གི་སློབ་ཉིད་ཀྱི། །སློབ་མ་ལྷན་ཅིག་ཙམ་གྱིས་སྤྱད། །དེ་ནས་ནང་པར་རབ་སྔར་ལངས། ། ལེགས་བཀྲུས་གོས་དཀར་འཆང་ཞིང་གཙང་། །བློ་ལྡན་བླ་མ་སློབ་མར་བཅས། །དཀྱིལ་འཁོར་དྲུང་དུ་ཀུན་ནས་འགྲོ། །དཀྱིལ་འཁོར་ཕྱོགས་ཉིད་ཤིན་ཏུ་ཡང་། །ཉེ་བར་བྱུགས་ཤིང་ལེགས་པར་མཉེས། །ཁྲོ་བོ་ཆེན་པོ་བཟླས་པ་ཡི། །དྲི་ཡི་ཆུ་ཡིས་བསངས་པ་ཡི། །དབུས་སུ་ རིགས་རྣམས་སྙིང་པོ་ཡིས། །ལྷག་པར་གནས་པར་བྱ་བ་ཉིད། །དཀྱིལ་འཁོར་གྱི་ནི་གཙོ་བོ་ཡི། །སྔགས་ཀྱི་ལས་རྣམས་ཐམས་ཅད་བྱ། །ས་ལ་སོར་ནི་བཅུ་གཉིས་པའི། །དཀྱིལ་འཁོར་དྲི་ཡིས་བྱས་ནས་སུ། །དཀྱིལ་འཁོར་རིག་པས་ལན་བདུན་དུ། །ལྷག་པ་དེ་ནས་བཟླས་ པར་བྱ། །དེ་རྗེས་ལྷ་རྣམས་ཉིད་ཀྱི་ཡང་། །བྱང་ཆུབ་ཆེན་པོ་ཞེས་བྱ་བའི། །སྙིང་པོས་སྐལ་བ་ཇི་ལྟ་བ། །དྲི་དང་མེ་ཏོག་སོགས་མཆོད་པ། །བྱས་ནས་གཏོར་མ་དབུལ་བྱ་ཞིང་། །མངོན་པར་བསྔགས་པའི་སྤོས་ཀྱང་ངོ་། །དེ་ནས་ཙནྡན་ལ་སོགས་པ། །བསྲེས་པའི་ཆུ་ལ་ མངོན་པར་བསྔགས། །དེ་ལ་དབུལ་བའི་མེ་ཏོག་དང་། །བདུག་པ་ལ་ཡང་ཆོ་ག་བཞིན། །སོ་ཤིང་ཨུ་དུམ་བཱ་ར་དང་། །ཨ་ཤྭཏྠ་སོགས་རྨ་མེད་ཅིང་། །ཤིན་ཏུ་ཕྲ་མིན་སྦོམ་པ་མིན། །སོར་མོ་བཅུ་གཉིས་ཚད་ཙམ་ནི། །དྲི་ཡི་ཆུ་ཡིས་རབ་བཀྲུས་ཤིང་། །མེ་ཏོག་ཕྲེང་བ་ཡིས་ཀྱང་
- 127b
བཅིང་། །དྲི་བཟངས་ལ་སོགས་བྱུགས་ཤིང་བདུག །ལག་པས་རེག་ན་སྙིང་པོ་ནི། །མང་པོ་ཡང་ནི་བཟླས་བྱ་ཞིང་། །རིགས་ཉིད་ཀྱིས་ནི་ལན་བདུན་ནམ། །སློབ་མ་རྣམས་ཀྱིས་ཚད་གཞལ་བས། །སོ་ཤིང་ལ་སོགས་ཡང་དག་གཟུང་། །གཅིག་ལ་སོགས་པས་གོ་རིམས་བཞིན། །རྩེ་ མོ་ཉིད་ནས་བཅའ་བར་བྱ། །དེ་ནས་མཁས་པས་བདག་ཉིད་ཀྱིས། །སློབ་མ་སྲུང་བ་བརྟན་བྱས་ནས། །སྦྱིན་སྲེག་ལས་ནི་མར་བྱུགས་པའི། །ཡམ་ཤིང་རྣམས་ནི་མར་དང་བཅས། །སྦྲང་རྩི་མར་དང་བསྲེས་པ་དང་། །མར་གྱི་སྲེག་བླུགས་བསྲེག་བྱ་ཞིང་། །ཞོ་ཟན་གྱི་ཡང་སྦྱིན་ སྲེག་བྱ། །དང་པོར་བགེགས་ནི་ཞི་བྱའི་ཕྱིར། །དེ་ནས་ཐུགས་ཀྱིས་རྗེས་འཛིན་ཕྱིར། །དེ་ནས་ཞི་བའི་སྦྱིན་སྲེག་ཅིང་། །སྡིག་པ་ཞི་བར་བྱ་ཕྱིར་རམ། །དེ་ནས་སློབ་མ་རྣམ་བརྟགས་ནས། །ཆོ་ག་ཡི་ནི་ལྷག་གནས་བྱ། །དེ་ཡིས་ཇི་ལྟར་ནུས་པ་ཡིས། །དེ་བཞིན་སྡོམ་པ་གཟུང་བར་ བྱ། །དེ་རྣམས་ཆོ་ག་འདི་ཡིན་ཏེ། །གཙང་ཞིང་དཀར་བའི་གོས་ཅན་ནི། །མདུན་དུ་བལྟས་ཏེ་འདུག་པ་ལ། །ལྷག་པར་གནས་པར་བརྩམ་པར་བྱ། །བླ་མས་དང་པོར་སྐྱབས་གསུམ་སྦྱིན། །དེ་ཡི་རྗེས་ལ་བྱང་ཆུབ་སེམས། །མ་བསྐྱེད་པ་ནི་བསྐྱེད་བྱ་ཞིང་། །བསྐྱེད་པ་སླར་ཡང་ རྗེས་དྲན་བྱ། །དེ་ནས་ཁྲོ་བོ་མངོན་བཟླས་པའི། །ཆུ་ཡིས་སྤྱི་བོར་བསང་གཏོར་བྱ། །མགོ་བོར་ཀུན་ཏུ་རེག་ནས་ནི། །མཉམ་པར་གཞག་པར་ལན་བདུན་བཟླས། །རིག་པའི་རྒྱལ་པོའི་སྙིང་པོ་ནི། །ལག་པས་དྲི་བཟངས་སྦགས་པ་ལ། །འཇིགས་པ་བཟློག་ལ་མཁས་པ་ཡིས། ། ལན་བདུན་རྟག་ཏུ་བཟླས་པར་བྱ། །འཁོར་ལོས་སྒྱུར་བའི་རྒྱལ་པོ་ཡིས། །རིག་པའི་རྒྱལ་པོ་ཡི་གེ་གཅིག །རྟ་མགྲིན་ཆུ་སྐྱེས་རིགས་ལ་ནི། །རིག་པའི་རྒྱལ་པོའི་ཡི་གེ་བཅུ། །སུམྦྷ་ཞེས་བྱ་རྡོ་རྗེའི་རིགས། །རིག་པའི་རྒྱལ་པོ་རྫུ་འཕྲུལ་ཆེ། །ཡི་གེ་ཧཱུྃ་བཞི་རྣམས་དང་ ལྡན། །ལས་ཀུན་རབ་ཏུ་སྤྲོས་པ་ལའོ། །རིགས་གསུམ་རྣམས་ལ་ཐུན་མོང་བ། །ཁྲོ་བོ་བདུད་རྩི་འཁྱིལ་པ་ཉིད། །བགེགས་ཀུན་རྣམ་པར་གཞོམ་པའི་ཕྱིར། །གསང་བ་པ་ཡི་བདག་པོས་གསུངས། །ལས་ནི་ཐམས་ཅད་པ་ཡི་སྔགས། །སྤྱི་བོར་རེག་ཅིང་བཟླས་དེ་ནས། །
- 128a
བསང་གཏོར་ཡང་བྱ་དེ་ཉིད་ཀྱིས། །བདུག་པ་ཡིས་ཀྱང་བདུག་པར་བྱ། །དབང་བསྐུར་བ་ནི་བུམ་པ་བཅས། །འབྲུ་ལ་སོགས་པ་ཐམས་ཅད་ལྡན། །ཅུང་ཟད་ཅུང་ཟད་གང་དུ་བླུགས། །རིག་པའི་རྒྱལ་པོས་མངོན་པར་བསྔགས། །ཆོ་ག་བཞིན་དུ་ལྷག་གནས་བྱ། ། དྲི་ཡི་ཆུ་ཡིས་མཆོད་ཡོན་སྦྱིན། །མེ་ཏོག་ཀྱང་ནི་གཞུག་པར་བྱ། །བདུག་པ་ཡིས་ཀྱང་བདུག་པར་བྱ། །དབང་བསྐུར་བ་ནི་བུམ་པ་བཅས། །མཁས་པས་ཡང་དག་ཡོངས་སུ་བཟླས། །དེ་ཡིས་དབང་བསྐུར་བྱ་བ་ཡིན། །སླར་ཡང་བཟླས་པ་དཀྱིལ་འཁོར་དུ། །སློབ་མ་དམ་ ཚིག་ཅན་རྣམས་ནི། །ཐལ་མོ་སྦྱར་ཞིང་མངོན་ཕྱོགས་ལ། །དེ་ནས་སོ་ཤིང་སྦྱིན་པར་བྱ། །སློབ་མ་རྣམས་ནི་གོ་རིམས་བཞིན། །གཟུང་ཞིང་ཤར་དུ་ཁ་བལྟས་ཏེ། །ཕྱི་རོལ་ཉིད་དུ་སོ་ཤིང་བཅའ། །མ་གས་པར་ནི་འཆོས་ནས་སུ། །ལོགས་མ་ཡིན་པར་འདོར་བྱ་སྟེ། །སོ་ ཤིང་མདུན་དུ་དོར་བྱས་པ། །གང་ཚེ་མདུན་དུ་རྩེ་མོ་ལྷུང་། །དེ་ཚེ་དངོས་གྲུབ་མཆོག་ཤེས་བྱ། །གང་ཞིག་སྟེང་དུ་བལྟས་པ་ཡང་། །དེ་བཞིན་ཤར་དུ་རྩེ་མོ་བསྟན། །དངོས་གྲུབ་འབྲིང་དུ་ཡོངས་སུ་གྲགས། །བྱང་དུ་བསྟན་ན་ཐད་ཀ་ཉིད། །རིག་པའི་དངོས་གྲུབ་འཇིག་རྟེན་པ། ། སོ་ཤིང་དོར་བ་བརྒྱ་ལམ་ན། །གང་ཚེ་འོག་ཏུ་ཁ་བལྟས་པ། །དེ་ཚེས་འོག་དངོས་གྲུབ་ནི། །འབྱུང་བ་འདི་ལ་ཐེ་ཚོམ་མེད། །སློབ་མ་ཉེ་བར་རེག་པ་ནི། །སྔ་མ་བཞིན་དུ་གཟུང་བྱས་ལ། །ཐམས་ཅད་ལས་བྱེད་སྔགས་ཀྱིས་ནི། །བླ་མས་དྲི་བཟངས་ཆུ་སྦྱིན་ནོ། །རེ་རེ་ལ་ཡང་བཏུང་བའི་ ཕྱིར། །ཁྱོར་བ་གསུམ་ནི་སྦྱིན་པར་བྱ། །དེ་ནས་བློ་ལྡན་ལངས་ནས་སུ། །འདི་དག་ཀུན་དུ་སྤྱད་པར་བྱ། །དེ་ནས་མཆོད་པ་ཡང་བྱས་ནས། །ལག་པས་སྤོས་ནི་བཏེག་ནས་སུ། །བློ་ལྡན་གུས་པས་ལྷ་རྣམས་ལ། །གསོལ་བ་གདབ་ཅིང་གུས་གནས་བྱ། །དང་པོར་སྔགས་ནི་སྙན་ གསན་དབབ། །དེ་ཡི་དཀྱིལ་འཁོར་གང་ཡིན་པ། །དེ་ཡི་རིམ་པའི་སྦྱོར་བ་ཡིས། །ལྷ་རྣམས་སྤྱན་འདྲེན་པ་ཡིན་ནོ། །བཅོམ་ལྡན་ཆེ་གེ་མོ་ཞེས་བྱ། །རིག་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་བརྩེ་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །ཉིད་ཀྱི་དཀྱིལ་
- 128b
འཁོར་ཐུགས་རྗེ་ཡི། །བདག་ཉིད་ཀྱང་ནི་བྲི་བར་འཚལ། །བཅོམ་ལྡན་དེ་ནི་བདག་གུས་ལ། །བཀའ་དྲིན་མཛད་པར་རིགས་ལགས་སོ། །འཇིག་རྟེན་མགོན་པོ་བརྩེ་བ་ཅན། །སངས་རྒྱས་བྱང་ཆུབ་སེམས་དཔའ་དང་། །དགྲ་བཅོམ་གང་གཞན་སྔགས་ཀྱི་ལྷ། །ལྷ་དང་ འཇིག་རྟེན་སྐྱོང་རྣམས་དང་། །འབྱུང་པོ་རྫུ་འཕྲུལ་ཆེ་གང་དང་། །སངས་རྒྱས་བསྟན་ལ་མངོན་དགའ་རྣམས། །བདག་ལ་ཡང་དག་དགོངས་སུ་གསོལ། །ཆེ་གེ་མོ་ཞེས་བྱ་བ་དང་། །ཆེ་གེ་མོ་ཡི་དཀྱིལ་འཁོར་ནི། །རང་ཉིད་འབྱུང་བ་བགྱིད་པར་འཚལ། །ཇི་ལྟར་གུས་པའི་ཉེར་སྤྱོད་ ཀྱིས། །སློབ་མ་དང་བཅས་བདག་ལ་ནི། །རྗེས་སུ་བརྩེ་བ་ཉེར་བཟུང་ནས། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་བྱོན་པར་མཛད་པར་རིགས། །དེ་སྐད་སྨྲས་ཏེ་ཚིག་གང་ཞིག །བཅོམ་ལྡན་འདས་ལ་ཕྱག་འཚལ་ནས། །བསྟོད་པའི་ཉེར་སྤྱོད་ཀྱང་བྱས་ནས། ། དེ་དག་གཤེགས་སུ་གསོལ་བར་བྱ། །ཆགས་བྲལ་སོ་སོར་ལྡན་པ་ཡི། །སློབ་མ་རྣམས་ལ་ཆོས་བཤད་བྱ། །བློ་ལྡན་ཤར་དུ་མགོ་བསྟན་ཏེ། །དགེ་བའི་གཉིད་ཀྱིས་ཉལ་དུ་གཞུག །དེ་ནས་སྔ་དྲོ་ཉིད་དུ་ནི། །མཚན་མོའི་རྨི་ལམ་མཐོང་བ་དྲི། །གང་ཚེ་དགེ་བའམ་མི་དགེ་བ། ། དོགས་མེད་ཉིན་པར་ཐོས་ནས་སུ། །སངས་རྒྱས་རྡོ་རྗེ་འཛིན་པས་ནི། །རིགས་བདུན་རྣམས་ཀྱི་དམ་ཚིག་བསྐྱང་། །དེ་ནས་བུ་ཁྱོད་དམ་ཚིག་དང་། །སྡོམ་པ་རྒྱལ་བ་ཡིས་གསུངས་པ། །དད་པས་བླ་མའི་བཀའ་ཡང་བསྐྱང་། །ཁྱེད་ཀྱིས་སྲོག་ཆགས་གསད་མི་བྱ། །མ་བྱིན་མི་བླང་ འདོད་ལོག་དང་། །དངོས་གྲུབ་འདོད་པས་མི་བྱའོ། །ཆང་མི་བཏུང་ཞིང་ཤ་ལ་སོགས། །བཟའ་བ་ནམ་ཡང་མ་ཡིན་ཉིད། །སེམས་ཅན་ཀུན་ལ་གནོད་མི་བྱ། །དཀོན་མཆོག་གསུམ་ཡང་མི་སྤང་ཞིང་། །དུས་རྣམས་ཀུན་དུ་བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང་། །བླ་ མ་ལྷ་རྣམས་དེ་བཞིན་ཉིད། །བླ་མའི་བཀའ་ལས་འདའ་མི་བྱ། །གང་ལས་སྡིག་འགྱུར་དེ་ལས་འདའ། །དེ་ལ་ཕུལ་བའི་རྙིང་པ་དང་། །གྲིབ་མ་ལ་ཡང་འགོམ་མི་བྱ། །ཕྱག་རྒྱའི་རྣམ་པའང་དེ་བཞིན་ཉིད། །སྔགས་དང་ལྷ་ལ་མི་སྨད་ཅིང་། །གདོན་གྱི་ལས་རྣམས་མི་བྱའོ། །
- 129a
མུ་སྟེགས་པ་ཡང་སྨད་མི་བྱ། །མདོར་ན་བདག་ཉིད་ཐེ་ཚོམ་དང་། །སོམ་ཉི་ཡིད་གཉིས་མི་བྱ་སྟེ། །རྒྱུད་དང་ལྷ་སོགས་ལ་དེ་བཞིན། །དད་པ་བརྟན་པས་དམ་བཅས་ནས། །སརྦ་བིད་ཀྱིས་དབང་དེ་བཞིན། །བུམ་པ་ལ་སོགས་མཆོག་རྣམས་ཀྱིས། །དབང་ བསྐུར་བཅུ་པོ་འདོད་ཇི་བཞིན། །དེ་ནས་ལག་ཏུ་རྡོ་རྗེ་དང་། །དྲིལ་བུ་སྦྱིན་བྱ་དེ་རྗེས་ལ། །འཁོར་ལོ་ལ་སོགས་རིན་ཆེན་བདུན། །བཟུང་ནས་འཁོར་ལོས་སྒྱུར་བ་ཡི། །རྒྱལ་པོ་དབང་ཕྱུག་ཐོབ་ཕྱིར་དང་། །སྡིག་པ་གཞོམ་ཕྱིར་དབང་བསྐུར་ཞིང་། །སྔགས་བསྒྲུབ་འདོད་པའི་སློབ་ མ་ལ། །རྗེས་སུ་གནང་བ་ཉན་དུ་གཞུག །དེ་ནས་བསྟོད་པས་མགོ་བོ་ཡིས། །ཕྱག་འཚལ་ཇི་ལྟར་འདོད་པའི་རྫས། །བླ་མ་ལ་ནི་དབུལ་བྱ་སྟེ། །རིན་ཆེན་གཏེར་དང་འབྲུ་དང་དབྱིག །གསེར་དང་བཞོན་པ་ཁྱིམ་དང་གདན། །བུ་དང་བུ་མོ་སྐྱེས་པ་དང་། །བུད་མེད་རྣམས་ནི་ དབུལ་བྱ་ཞིང་། །གྲོང་དང་གྲང་ཁྱེར་ཅི་བཞེད་རྣམས། །རང་གི་སེམས་ནི་རབ་དང་བས། །ཡོན་རྣམས་ངེས་པར་དབུལ་བྱ་ཞིང་། །དངོས་གྲུབ་མྱུར་ཕྱིར་བླ་མ་ལ། །མདོར་ན་བདག་ཉིད་ཀྱང་འབུལ་བྱ། །ཚེ་འདིའི་བདེ་བ་མ་ལུས་དང་། །འཇིག་རྟེན་ཕ་རོལ་བདེ་བའི་མཆོག །སངས་ རྒྱས་ཉིད་ཀྱང་འཐོབ་འགྱུར་ཏེ། །ལྷ་ཡི་བདེ་བ་ལྟ་ཅི་སྨས། །བླ་མ་སངས་རྒྱས་ཀུན་དང་མཉམ། །རྡོ་རྗེ་སློབ་དཔོན་སྨོད་པ་གང་། །དེ་ཡིས་རྟག་ཏུ་སྡུག་བསྔལ་འཐོབ། །དེ་ཕྱིར་སློབ་དཔོན་སྨད་མི་བྱ། །རྡོ་རྗེ་སྤུན་དང་སྲིང་མོ་དང་། །གང་ཡང་སྨད་པར་མི་བྱ་ཞིང་། །ཁོན་པར་ཡང་ནི་མི་ བྱའོ། །དཀོན་མཆོག་གསུམ་ལ་གནོད་བྱེད་དང་། །བླ་མ་སྨོད་བྱེད་མ་རུངས་རྣམས། །དམ་ཚིག་འདས་ལ་བཟོད་མི་བྱ། །དེ་ལྟ་བུ་སོགས་གནོད་བྱེད་ལའང་། །དེ་ལྟ་ཉིད་དོ་དེ་བྱས་ན། །ཀུན་རིག་གིས་གསུངས་དངོས་གྲུབ་འཐོབ། །སེམས་ཅན་ཀུན་ལ་རྗེས་བརྩེ་བས། །དངོས་ གྲུབ་མྱུར་དུ་འབྱུང་བ་འཐོབ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་དང་། ལྷ་དང་བཅས་པའི་འཇིག་རྟེན་ལ་ཕན་པ་དང་བདེ་བའི་དོན་དུ་སྒྲུབ་པའི་ཆོ་ག་གསུངས་ཏེ། །བྲི་གཞི་ལ་བཅོམ་ལྡན་འདས་ཐམས་ཅད་རིག་པ་དེ་ཁོ་ན་བཞིན་དུ་བྲི་ཞིང་གཡས་སུ་དེ་བཞིན་གཤེགས་པ་ངན་
- 129b
སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་དང་། གཡོན་དུ་ཤཱཀྱ་ཐུབ་པ་དང་། ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོའི་འོག་ཏུ་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་ཟླ་བ་ལྟ་བུ་ཕྱག་ན་པདྨ་ཅན་དང་། ཤཱཀྱ་ཐུབ་པའི་འོག་ན་ཕྱག་ན་རྡོ་རྗེ་དང་། དེ་དག་གི་ དབུས་སུ་སྨན་པའི་རྒྱལ་པོ་ཕྱག་གཅིག་གིས་ཨ་རུ་རའི་འབྲས་བུ་བསྣམས་ཤིང་དེ་ལས་གཞན་ནི་མཆོག་སྦྱིན་དུ་བྱའོ། །རྟ་མགྲིན་དང་འཇིག་རྟེན་གསུམ་ལས་རྣམ་པར་རྒྱལ་བ་མ་རུངས་པ་འཇོམས་པ་ལ་བརྩོན་པ་དག་ནི་རང་གི་ལྷ་ལ་མངོན་པར་ཕྱོགས་པར་བྲི་ཞིང་དེ་དག་གི་དབུས་སུ་ལོ་ཙ་ ནཱ་དང་། །མཱ་མ་ཀཱི་དང་། གོས་དཀར་མོ་དང་། སྒྲོལ་མ་དག་ཕྱག་ན་རང་གི་མཚན་མ་ཅན་བྲིའོ། །དེ་རྣམས་ཀྱི་འོག་ཏུ་རྫིང་བུ་ཆུ་སྲིན་དང་། ཉ་དང་། རུས་སྦལ་དང་། སྦལ་པ་དཀར་པོ་ལ་སོགས་པ་དང་བཅས་པ་དང་ཆུ་ལས་སྐྱེས་པའི་མེ་ཏོག་དུ་མས་ཡོངས་སུ་གང་བར་བྲི་ཞིང་བདུག་པ་ དང་། མར་མེ་དང་། དྲི་དང་། ཕྲེང་བ་དང་། ཞལ་ཟས་དང་། མེ་ཏོག་དང་། འབྲས་བུ་རྣམ་པ་སྣ་ཚོགས་པ་བྲི་བར་བྱའོ། །འོག་ཉིད་དུ་སྒྲུབ་པ་པོ་ཐལ་མོ་སྦྱར་ཏེ་རབ་ཏུ་འདུག་ཅིང་འདུད་པར་བྲིའོ། །དེ་ནས་དེ་རྫོགས་པ་ལ་བྱིན་གྱིས་བརླབ་པ་དམིགས་པར་བྱ་སྟེ། སྤྱན་དབྱེ་བ་བྱས་ནས་ མཆོད་པས་མཆོད་པར་བྱའོ། །དེ་ནས་གལ་ཏེ་མཚན་མ་མཐོང་ན་མྱུར་དུ་འགྲུབ་བོ། །གལ་ཏེ་མ་མཐོང་ན་རིང་མོ་ཞིག་ན་འགྲུབ་པའོ། །བཞད་པ་དང་ནི་རྔ་སྒྲ་དང་། །དྲིལ་བུའི་སྒྲ་དང་འབྲུག་སྒྲ་ཉིད། །དགེ་སློང་བྲམ་ཟེ་བུ་མོ་དང་། །འབྲས་བུ་མཐོང་ན་དངོས་གྲུབ་ནི། །མཆོག་འབྲིང་ཐ་མ་ མྱུར་དུ་འགྲུབ། །དེ་ནས་སྐུ་གཟུགས་ཕྱག་རྒྱ་དང་། །སྔགས་རྣམས་ཀྱིས་ནི་བྱིན་གྱིས་བརླབ། །ཇི་ལྟར་བསྐྱེད་པས་ཐོབ་བྱ་ཞིང་། །འཇིག་རྟེན་གསུམ་ནི་རྣམ་རྒྱལ་གྱིས། །བདག་བསྲུང་ལ་སོགས་བྱས་ནས་སུ། །བདག་གི་དེ་ཉིད་ཀྱང་བསྒོམས་ནས། །ཇི་སྲིད་དངོས་གྲུབ་རྟགས་འབྱུང་ བ། །འབུམ་ཕྲག་གསུམ་མམ་དྲུག་འབུམ་བཟླས། །དེ་ནས་དབེན་པའི་གནས་སུ་ནི། །སྔགས་ཀྱང་ཆད་ལྷག་བསྐང་བྱ་སྟེ། །བརྒྱ་ཕྲག་བརྒྱད་རྣམས་བཟླས་པར་བྱ། །དེ་ནས་བཟླས་པ་དེ་ཡི་མཐར། །དཀྱིལ་འཁོར་སྔ་མ་བཞིན་བསམས་ལ། །མཆོད་པ་རྒྱ་ཆེན་ཡང་བྱས་ནས། །
- 130a
མཚན་མོ་གཅིག་ནི་བཟླས་པར་བྱ། །དེ་ནས་གལ་ཏེ་གཙོ་བོ་འམ། སྲས་སམ་ལྷ་རྣམས་མཐོང་གྱུར་ན། །དེ་ཚེ་སྣོད་འདོད་ཇི་ལྟ་བར། །དངོས་གྲུབ་མཆོག་ནི་གསོལ་བ་གདབ། །ལྷ་རྣམས་རྟག་ཏུ་དགྱེས་པ་ཡིས། །དངོས་གྲུབ་འབྲས་བུ་དེ་ལ་སྩོལ། །ཕྱག་བྱས་ ནས་ནི་དངོས་གྲུབ་ནི། །མཆོག་ལ་སོགས་པ་བླང་བར་བྱ། །བླ་མ་དཀོན་མཆོག་གསུམ་པོ་ལ། །རང་རང་སྐལ་བ་ཕུལ་ནས་སུ། །དེ་ནས་རྟག་ཏུ་བདག་ཉིད་སྤྱད། །དེ་རྣམས་མེད་ན་ཤེས་རབ་ཅན། །བླངས་ནས་རང་ཉིད་སྤྱད་པར་བྱ། །སེམས་ཅན་ཀུན་ལ་ཕན་བརྩོན་ཞིང་། །བསྐལ་ པ་དུ་མར་གནས་པར་འགྱུར། །ལེགས་པར་བསྒྲུབས་ན་ཐམས་ཅད་བྱེད། །གནོད་སྦྱིན་རྒྱུ་སྐར་གདོང་ལ་སོགས། །ཚིག་ཙམ་གྱིས་ནི་བྲན་བཞིན་དུ། །ཞི་བའི་ལས་ལ་སོགས་པ་ནི། །ཐམས་ཅད་བྱེད་པར་འགྱུར་བ་ཡིན། །དེ་ནས་བཅོམ་ལྡན་འདས་ལ་ལྷའི་དབང་པོས་འདི་སྐད་ཅེས་ གསོལ་ཏོ། །བཅོམ་ལྡན་འདས་སེམས་ཅན་སྡིག་པ་བགྱིས་པ་དམྱལ་བ་ལ་སོགས་པའི་དབང་དུ་གྱུར་པ་རྣམས་ཀྱིས་དམྱལ་བ་ལ་སོགས་པའི་སྡུག་བསྔལ་རབ་ཏུ་སྤང་བའི་ཕྱིར་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་དམྱལ་བ་ལ་སོགས་པའི་ དབང་དུ་གྱུར་པའི་སེམས་ཅན་སྡིག་པ་ཆེན་པོ་བྱེད་པ་དེ་རྣམས་དམྱལ་བ་ལ་སོགས་པའི་སྡུག་བསྔལ་རྣམས་ལས་ཚེགས་མེད་པར་གྲོལ་བར་འགྱུར་བ་དེ་བཞིན་དུ་ཉོན་ཅིག །དེ་བཞིན་དཀྱིལ་འཁོར་བྲིས་ནས་ནི། །བརྒྱ་རྩ་བརྒྱད་ནི་བཟླས་པ་ཡི། །བུམ་པ་རྣམས་ཀྱིས་སྔ་མ་བཞིན། ། དབང་བསྐུར་བ་ནི་བརྟག་པར་བྱ། །དེ་ནས་སྔོན་གྱི་སྡིག་བྱང་ཞིང་། །དམྱལ་བ་ལ་སོགས་སྡུག་བསྔལ་ནི། །ཀུན་ལས་མྱུར་དུ་རྣམ་གྲོལ་འགྱུར། །སྡིག་ལས་རྣམ་གྲོལ་བདག་ཉིད་ཆེ། །དེ་ཡང་གནས་གཙང་ལྷར་སྐྱེས་ནས། །རྟག་ཏུ་སངས་རྒྱས་ཆོས་བགྲོ་ཐོས། །ཕྱིར་མི་བཟློག་ པའི་ས་ལ་གནས། །རིམ་གྱིས་བྱང་ཆུབ་མངོན་སུམ་བྱེད། །དེ་ཡི་གཟུགས་བརྙན་དང་ནི་མིང་། །གུར་གུམ་གྱིས་ནི་བྲིས་ནས་སུ། །ངན་སོང་གསུམ་གྱི་འཇིག་ཆེན་ལས། །སེམས་ཅན་རྣམས་ནི་ཐར་བའི་ཕྱིར། །སྔགས་པ་གཞན་ལ་ཕན་བརྩོན་ཞིང་། །བརྩེ་བས་མངོན་པར་
- 130b
དབང་བསྐུར་རོ། །དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དབང་བསྐུར་ཏེ། །ལྷ་ཡི་གཟུགས་སུ་བརྟགས་ནས་སུ། །མཆོད་རྟེན་དབུས་སུ་གཞག་པར་བྱ། །རང་གཞན་ལྷ་ཡི་སྙིང་པོ་ནི། །སྙིང་ག་དེ་ཡི་ཕྱོགས་བྲིས་ནས། །ལྷ་མཉམ་པར་ནི་ སེམས་བསྐྱེད་དེ། །ཁྱིམ་དུ་ཡང་ནི་གཞག་པར་བྱ། །དེ་ཡི་མིང་དང་སྤེལ་བའི་སྔགས། །གུར་གུམ་བཟང་པོས་བྲིས་ནས་ནི། །འབུམ་ནི་ཡོངས་སུ་རྫོགས་པར་བྱ། །མཆོད་རྟེན་ལས་ནི་རབ་ཏུ་བྱ། །སྡིག་ཆེན་སྡིག་ནི་ཟད་བྱའི་ཕྱིར། །བྱེ་བ་ཡང་ནི་རྫོགས་པར་བྱ། །དེ་ ལྟར་བྱས་ན་དེ་ངེས་པར། །དམྱལ་བ་ལས་ནི་གྲོལ་བར་འགྱུར། །དེ་བཞིན་ཡི་དགས་བྱོལ་སོང་ལས། །གྲོལ་ཏེ་ལྷ་རིགས་རྣམས་སུ་སྐྱེས། །དེ་ཡི་མིང་དང་སྤེལ་ནས་ནི། །ཇི་ལྟར་གསུངས་པའི་སྔགས་སྟོང་བཟླས། །གལ་ཏེ་བརྒྱ་ཕྲག་སྟོང་ཡང་ཚང་། །བྱེ་བའི་བར་དུ་ རྫོགས་པར་བྱ། །ལྷ་རིགས་རྣམས་སུ་སྐྱེ་བར་འགྱུར། །དེ་ཡི་མིང་ནས་སྤེལ་བ་ཡི། །མཁས་པས་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་སྙེད་དུ། །སྦྱིན་སྲེག་བྱས་ན་དམྱལ་བ་ནི། །ཆེན་པོའི་སྡིག་པ་ལས་གྲོལ་འགྱུར། །ཇི་སྲིད་མཚན་མ་འབར་བ་ཡི། །གནས་ སུ་ཡང་དག་སྐྱེ་བར་འགྱུར། །ཡུངས་ཀར་དཀར་པོའི་ཏིལ་དང་འབྲས། །ར་ཡི་འོ་མ་ཡང་དག་ལྡན། །དེ་བསྐུས་ཡམ་ཤིང་དེ་སྲིད་དུ། །ཆོ་གི་ཇི་བཞིན་སྦྱིན་སྲེག་བྱ། །དེ་ནས་དེ་ནི་ངེས་པར་ཡང་། །ལྷ་རིགས་རྣམས་སུ་སྐྱེས་པ་ཡི། །མཚན་མ་ཉེ་བར་མཐོང་བར་འགྱུར། ། གལ་ཏེ་ལྷ་ཡི་མཆོག་སྐྱེས་དང་། །ཡང་ན་ཐབ་ཁུང་ནང་དུ་ནི། །དཀར་པོ་གཡས་བསྐོར་འབར་བ་དང་། །གྱེན་དུ་འགྲེང་ཞིང་དྲི་མ་མེད། །འཕྲོ་བ་བསྡོམས་བཞིན་འབར་བ་དང་། །གློག་བཞིན་དྲི་མ་མེད་འོད་བརྟན། །མེ་རྟགས་འདི་རྣམས་མཐོང་བར་འགྱུར། །ཡང་ན་མེ་ལྷ་བདག་ཉིད་ ནི། །དེ་བཞིན་ཁོ་ནར་སྟོན་འགྱུར་ཏེ། །ཟླ་བ་བཞིན་དུ་དྲི་མ་མེད། །དཀར་པོ་བཞིན་དུ་འབར་བའོ། །མཚན་མ་འདི་དག་མཐོང་བ་ལ། །དེ་ནས་དམྱལ་སོགས་རྣམ་གྲོལ་ཞིང་། །སྡིག་པ་བཅོམ་ནས་བདེ་འགྲོར་ནི། །སྐྱེས་པ་ཡིན་པར་ཤེས་པར་བྱ། །ཁྲུ་བཞི་པ་ཡི་ཚད་
- 131a
དུ་ནི། །ཆོ་ག་ཇི་བཞིན་ཐབ་ཁུང་རྐོ། །རྡོ་རྗེས་མཐའ་མ་བསྐོར་བ་ཡི། །འཁོར་ལོ་དབུས་སུ་བྲི་བར་བྱ། །རིགས་ལྔ་ཡི་ནི་ཕྱག་རྒྱ་རྣམས། །ཇི་བཞིན་རང་གི་ཕྱོགས་སུ་བྲི། །ཇི་བཞིན་སེམས་དཔའ་རྣམས་དང་ནི། །འཇིག་རྟེན་ལ་སོགས་ཕྱི་ནས་ བྲི། །དེ་ནས་བུམ་པ་གང་བ་དང་། །གཏོར་མས་སྣོད་རྣམས་བཀང་བ་ནི། །བརྒྱད་དམ་བཅུ་དྲུག་དག་ཏུ་གཞག །བཟའ་དང་བཅའ་བ་ཞལ་ཟས་དང་། །མེ་ཏོག་ཕྲེང་སོགས་དེ་བཞིན་ཏེ། །བླ་རེ་རྒྱལ་མཚན་དར་ལ་སོགས། །གདུགས་མཆོག་རྣམས་ཀྱིས་ལེགས་ པར་བརྒྱན། །དེ་ལྟར་སྦྱིན་སྲེག་ཐབ་ཁུང་ནི། །མཆོག་ཏུ་ཡང་དག་སྦྱིན་སྲེག་བྱ། །ཆོ་ག་ཤེས་པས་དེ་བྲིས་ནས། །ལྷ་ཡི་ཚོགས་ནི་སྤྱན་དྲངས་ཏེ། །སྔགས་ཤེས་པས་སྔགས་ཕྱག་རྒྱ་ཡིས། །ཨརྒྷ་ལ་སོགས་ཕུལ་ནས་ནི། །མདོར་བསྡུས་མཆོད་པ་བྱས་ནས་སུ། ། ལྷ་ཡི་སྦྱོར་བས་རབ་གནས་ལ། །ག་པུར་གུར་གུམ་ལ་སོགས་པས། །མར་དང་འོ་མ་ཏིལ་བསྒོས་ལ། །ཏིལ་དང་ཡུངས་ཀར་འབྲས་རྣམས་དང་། །དྲི་ཡི་ཆུས་ནི་ལེགས་བཀང་སྟེ། །འབྲས་ཆན་སྤོས་དང་ལ་དུ་དང་། །སྦྲང་རྩི་ཤ་ཀ་རར་ལྡན་ལ། །བརྒྱ་ཕྲག་དུ་མར་ཡོངས་སུ་ བཟླས། །ཡམ་ཤིང་ལ་ཡང་དེ་བཞིན་ཏེ། །རང་གིས་སྔགས་ཀྱིས་བཏབ་པའི་ཤིང་། །ཁུང་བུའི་ནང་དུ་གཞག་པར་བྱ། །ལྷ་དང་ཀླུ་དང་གནོད་སྦྱིན་དང་། །དྲི་ཟ་ལ་སོགས་སུ་གནས་པའི། །རོ་ལ་སྔགས་ཀྱིས་བཏབ་ནས་སུ། །ཆུ་མཆོག་གིས་ནི་བཀྲུས་ནས་ནི། །སྔགས་བཟླས་དྲི་ཡིས་བྱུག་པར་བྱ། །གོས་ དང་རྒྱན་གྱིས་བརྒྱན་བྱ་ཞིང་། །སྔགས་ཀྱིས་བཏབ་པའི་བདུག་པས་བདུག །མེ་ཏོག་ཕྲེང་བ་ལ་སོགས་མཆོད། །གཙུག་ཕུད་དཔུང་པར་དེ་བཞིན་དུ། །སྔགས་བྲིས་ནས་ནི་གདགས་པར་བྱ། །སྙིང་ག་མགྲིན་པ་ཁ་ཕྱོགས་སུ། །སརྦ་བིདྱཱས་བྱིན་གྱིས་བརླབས། །དཔྲལ་བ་མཛོད་སྤུ་རྣ་བ་གཉིས། །མགོ་བོ་སྤྱི་གཙུག་ དཔུང་པ་གཉིས། །རྣ་བ་དཀུ་དང་པུས་མོ་བོལ། །སྣ་ཡི་རྩེ་མོ་ལོང་བུ་དང་། །མིག་གཉིས་དང་ནི་གསང་བ་ཡི། །དབང་པོ་རྣམས་ཀྱི་གནས་དང་ནི། །དེ་ལྟར་གཞན་དུའང་གནས་ཡི་གེ། །མཆོག་ཏུ་དགེ་བ་དེ་དག་གཞག །དེ་དག་ངན་སོང་ཡོངས་སྦྱང་ཕྱིར། །སྟན་དང་བཅས་ཏེ་ཐེབ་དབུས་གཞག །དེ་ནས་སྔགས་པས་
- 131b
སྔགས་ཀྱིས་ནི། །མངོན་པར་བསྔགས་པའི་གོས་ཀྱིས་གཡོགས། །དེ་ནས་བྱིན་ཟ་ཡང་དག་རབ་སྦར་ལ། །མེ་ལྕེ་སྟོང་གིས་དཀྲིགས་ཤིང་འབར་བའི་ལུས། །ཟླ་བ་ཀུནྡ་བཞིན་དུ་ཞི་བའི་ཡིད། །དཔག་མེད་ཀུན་ལ་མཆོད་ཡོན་ཡོངས་སུ་བརྟག །དེ་བཞིན་ཇི་ལྟར་གསུངས་བའི་མཆོད་པ་བྱ། །དེ་ནས་དང་པོ་དེ་ཡི་ སྦྱིན་སྲེག་ནི། །རྫོགས་པར་བྱས་ཤིང་འབར་བ་ཉིད་ལ་ནི། །ཡོངས་བརྟགས་ནས་ནི་རྒྱལ་བ་ལས། །སོགས་པ་རྣམས་ཀྱི་བརྒྱད་ནི་ལྷག་པ་དང་། །བཅས་པའི་བརྒྱ་ནི་ཡོངས་སུ་བརྟག་པར་བྱ། །དེ་ནས་སྦྱོང་བའི་སྔགས་ཀྱི་རྒྱལ་པོ་ཡི། །བསྲེག་བྱ་ཉི་ཤུ་རྩ་གཅིག་ཡོངས་སུ་བརྟག །དེ་ནས་ཞལ་རས་དཀར་པོ་སྤྱན་དྲངས་ལ། ། ཡོ་བྱད་རྣམས་སམ་མཆོད་ཡོན་སོགས་གསུམ་མཆོད། །ཕྱག་ན་རྡོ་རྗེ་པདྨ་ཞགས་པ་བསྣམས། །རྒྱན་རྣམས་ཐམས་ཅད་ཀྱིས་ནི་རབ་བརྒྱན་ཅིང་། །རྫོགས་པའི་སངས་རྒྱས་ཉིད་ཀྱི་དབུ་རྒྱན་ཅན། །བསམ་པར་བྱ་ཞིང་ཡང་དག་བྲི་བར་བྱ། །དེ་ཡི་སྙིང་པོ་བརྒྱ་ཕྲག་སྟོང་ངམ་ནི། ། ཇི་སྲིད་བྱེ་བའི་བར་དུ་སྦྱིན་སྲེག་བྱ། །ཡང་ན་མཚན་མ་ཡང་དག་བྱུང་ན་ནི། །དེ་བཞིན་སྡིག་རྒྱུན་སྤངས་པར་ཤེས་པར་བྱ། །དེ་ནས་ཐལ་བར་འགྱུར་བ་ཆོ་ག་བཞིན། །རྡོ་རྗེ་བསྡུ་བས་ཐལ་བ་རུས་པ་བསྡུ། །རྡོ་རྗེ་བདུད་རྩིའི་དྲི་ཆུ་དང་། །བ་ཡི་རྣམ་ལྔ་དང་བཅས་ལ། །སྦྱོང་བའི་སྔགས་ ནི་འབུམ་བཟླས་ཏེ། །གོང་བུ་བྱས་ནས་ག་པུར་དྲིར། །ས་དང་ལེགས་པར་བསྲེས་བྱས་ལ། །སྐུ་གཟུགས་མཆོད་རྟེན་ལྷར་བསམ་ཞིང་། །ལན་གཅིག་གཉིས་གསུམ་བཞི་ལྔའམ། །ཡང་ན་ལན་གྲངས་བརྒྱ་རྩ་བརྒྱད། །སྔགས་དང་ཕྱག་རྒྱས་བྱིན་བརླབས་ལ། །འབུམ་ ཕྲག་གཉིས་ནི་བཟླས་པར་བྱ། །དེ་ནས་མཆོད་རྟེན་འབར་གྱུར་ཏམ། །ཡང་ན་སྐུ་གཟུགས་ཞལ་འཛུམ་མམ། །དྲི་སྤོས་ངད་ལྡན་འོད་སྣང་ངམ། །ལྷ་ལ་སོགས་པ་སྣ་ཚོགས་པ། །རྫུ་འཕྲུལ་རྣམ་པར་འཕྲུལ་པ་དང་། །མེ་ཏོག་ལ་སོགས་འདོར་བ་དང་། །དུང་དང་རྔ་དང་གླིང་བུ་དང་། །པི་བང་ལ་ སོགས་སྒྲ་ཐོས་འགྱུར། །གལ་ཏེ་ལྷ་ཡི་མཚན་མ་དེ། །སྡིག་མང་ཉིད་ཀྱིས་མ་མཐོང་པ། །དེ་ཚེ་འབུམ་ཕྲག་བརྒྱ་སྟོང་བཟླས། །ཇི་སྲིད་མཚན་མ་བྱུང་བར་དུ། །དེ་བཞིན་གཤེགས་པ་མཆོད་ནས་ནི། །མཉམ་པར་གཞག་པས་བཟླས་པར་བྱ། །དེ་མཐར་ཆོ་ག་ཤེས་པ་ཡིས། །མཚན་གཅིག་
- 132a
ཐོག་ཐག་མི་ཉལ་བཟླས། །དེ་ནས་དེ་ཡི་སྡིག་པ་ནི། །རྣམ་དག་བདག་ཉིད་ངེས་པར་མཐོང་། །ལྷ་ཡི་ལུས་ཀྱིས་གཟུགས་དང་ནི། །དེ་ཡི་རྒྱུད་དུ་ངོ་ཤེས་འགྱུར། །མཚན་མ་འདི་དག་ཤེས་ནས་སུ། །རྣམ་པར་མི་རྟོག་སེམས་ཀྱིས་ནི། །བྱམས་དང་ སྙིང་རྗེ་ལྡན་པ་ཡིས། །ལས་རྣམས་ཐམས་ཅད་རབ་ཏུ་བྱ། །གལ་ཏེ་དེ་ཡང་མེད་གྱུར་ན། །དེ་ཚེ་བཟླས་བསྒོམ་ཚུལ་གྱིས་བྱ། །དེ་ཡི་མིང་ཙམ་བྲིས་ནས་སུ། །མཆོད་རྟེན་ཕྲེང་བ་བྱ་བ་དང་། །སྐུ་གཟུགས་ཀྱང་ནི་བྱས་ནས་སུ། །སྦྱིན་སྲེག་དབང་བསྐུར་བྱས་གྱུར་ན། །གདོན་ མི་ཟ་བར་བདེ་འགྲོར་སྐྱེ། །ཐལ་བ་ཡུངས་ཀར་བྱེ་མ་སོགས། །མིང་སྤེལ་སྔགས་ནི་མངོན་བཏབ་ནས། །རྒྱ་མཚོར་འབབ་པའི་ཆུ་ཀླུང་དོར། །དེ་ལྟར་བྱས་ན་སྡིག་པ་ཅན། །ཡིན་ཡང་ངན་སོང་རྣམས་ལས་ནི། །རྣམ་པར་ཐར་བར་གྱུར་ནས་ཀྱང་། །དགེ་བ་མཆོག་གི་ས་བོན་ནི། ། བསྐྱེད་དང་ལྡན་པས་སངས་རྒྱས་ཉིད། །འབྲས་བུར་ཡང་དག་ལྡན་པ་ཡི། །སྦྱིན་པ་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་ཤེས་རབ་རྒྱུ། །རབ་ཏུ་བསྒོམས་པའི་བསོད་ནམས་ལྡན། །འཇིག་རྟེན་ངན་སོང་བཅོམ་པ་ནི། །འདི་ལྟར་ལྷ་ཡང་ཅི་ཞིག་སྨོས། །འདི་ལ་ ཐེ་ཚོམ་མེད་པ་ཡིན། །གང་ཡང་དགེ་བའི་རྩ་བ་མ་བསྐྱེད་པ་དང་། གང་ཡང་མེད་པའི་ལྟ་བ་ཅན་དང་། གང་བྱང་ཆུབ་ཀྱི་ལམ་ལས་རྣམ་པར་འདས་པས་བསྟན་པ་ལ་ཞེ་སྡང་གི་གནོད་པ་བྱེད་པ་དང་། སྡིག་པའི་རང་བཞིན་མི་ཤེས་པ་ཕ་དང་མ་ལ་སེམས་མི་བརྩེ་བ་དང་། བྱང་ཆུབ་ཀྱི་སེམས་ ལ་མི་བརྟེན་པ་དང་། །འདོད་ཆགས་དང་བྲལ་བ་བསད་པ་དང་། ལྷ་དང་། སངས་རྒྱས་དང་། ཆོས་དང་། དགེ་འདུན་དང་། སྔགས་དང་། ཕྱག་རྒྱའི་ཚོགས་ལ་སོགས་པ་རྣམས་ལ་མེད་པ་ཉིད་དུ་ལྟ་བ་ལ་སོགས་པའི་སྡིག་པ་ཅན་རྣམས་ལ་དེ་ལྟ་བུའི་ཤེས་རབ་དང་ཐབས་མེད་ན་གྲོལ་བ་མེད་ དོ་ཞེས་པ། བདེ་བར་གཤེགས་པ་རྒྱལ་བ་རྣམས་ཀྱིས་གསུངས་སོ། །དེ་ནས་བརྒྱ་བྱིན་ལ་སོགས་པ་སྤྱན་པདྨ་རྒྱས་པ་རྣམས་ལེགས་སོ་ཞེས་བྱ་བས་མཉེས་པར་མཛད་དོ། །མཉེས་པར་མཛད་ནས་མཆོད་པ་མཛད་དོ། །བརྒྱ་བྱིན་གཞན་ལ་ཕན་པར་བརྩོན་པས་ཀྱང་ཇི་ལྟར་བཀའ་སྩལ་པ་
- 132b
བཞིན་དུ་བྱས་སོ། །འབྲས་བུ་དེ་བཞིན་དུ་ཐོབ་པར་གྱུར་ཏོ། །དབང་ལྡན་དུ་མགྲིན་པ་སྔོན་པོ་གླང་ཁྱུ་མཆོག་ལ་ཞོན་པ། སྐུ་མདོག་དཀར་པོ་ཕྱག་བཞི་པ། གཡས་པའི་དང་པོ་དང་གཉིས་པ་རྡོ་རྗེ་རྩེ་གསུམ་པ་དང་མཆོག་སྦྱིན་དུ་བཅས་པ། གཡོན་པའི་གཅིག་གིས་རྩེ་གསུམ་པ་འཛིན་ཅིང་ གཉིས་པས་རལ་གྲི་འཛིན་པ་སྦྲུལ་གྱི་མཆོད་ཕྱིར་ཐོགས་པ་ཅན་བྲིས་ཏེ། ཨོྃ་པ་ཤུ་པ་ཏི་ནཱི་ལ་ཀཎྜ་ཨུ་མཱ་པྲཱི་ཡ་སྭཱ་ཧཱ་ཞེས་པ་འདིས་སོ། །དེ་ནས་ཕྱག་རྒྱ་འདི་ཡིན་ཏེ། ལག་པ་རྡོ་རྗེ་ཁུ་ཚུར་བྱས་ལ་མཐེའུ་ཆུང་མཐེ་བོང་གིས་མནན་ཏེ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱས་ཤིང་མིང་མེད་ དང་མཛུབ་མོའང་རྡོ་རྗེའི་རྣམ་པར་ཅུང་ཟད་འདུད་པར་བྱའོ། །འདི་ནི་ཕྱུགས་བདག་གི་ཕྱག་རྒྱའོ། །ཁྱབ་འཇུག་ཁྱུང་ལ་ཞོན་པ། མདོག་ནག་པོ་ཕྱག་བཞི་པ། ཕྱག་གཡས་པ་དག་ན་དབྱུག་ཏོ་དང་རྡོ་རྗེ་འཛིན་ཅིང་། གཡོན་པ་དག་ན་དུང་དང་འཁོར་ལོ་འཛིན་པའོ། །གསེར་གྱི་རྡོ་རྗེ་མ་ ཁྱབ་འཇུག་ལྟ་བུ་གསེར་གྱི་མདོག་ཅན་དུ་ཤེས་པར་བྱའོ། །རྡོ་རྗེ་དྲིལ་བུ་མ་རྨ་བྱ་ལ་ཞོན་པ། ཞལ་དྲུག་པ། དམར་པོ་གཡས་པ་དག་ན་ཤཀྟི་དང་རྡོ་རྗེ། གཡོན་པ་དག་ན་ཁྱིམ་བྱ་དང་དྲིལ་བུ་འཛིན་པའོ། །རྡོ་རྗེ་གཞོན་ནུ་མ་རྡོ་རྗེ་དྲིལ་བུ་ལྟ་བུར་ཤེས་པར་བྱའོ། །མི་སྨྲ་བ་རྡོ་རྗེ་དང་པ་ལ་ ལ་ཞོན་པ། གསེར་མདོག་ཅན་ཞལ་བཞི་པ། ཕྱག་བཞི་པ་ཕྱག་གཡས་པ་དག་ན་རྡོ་རྗེ་དང་བགྲང་ཕྲེང་འཛིན་ཅིང་། གཡོན་པ་དག་ན་དབྱུག་ཐོ་དང་སྤྱི་བླུགས་འཛིན་པའོ། །རྡོ་རྗེ་ཞི་བ་མ་ཚངས་པ་ལྟ་བུར་ཤེས་པར་བྱའོ། །རྡོ་རྗེ་མཚོན་ཆ་གླང་པོ་ཆེ་དཀར་པོ་ལ་ཞོན་པ། ཕྱག་གཡོན་ པས་རང་གི་རྡོ་རྗེ་འཛིན་ཅིང་གཡས་པས་འཇིག་རྟེན་ལས་འདས་པའི་རྡོ་རྗེ་འཛིན་པའོ། །རྡོ་རྗེ་ཁུ་ཚུར་རྡོ་རྗེ་མཚོན་ཆ་ལྟར་ཤེས་པར་བྱའོ། །རྡོ་རྗེ་འཁྱིལ་བ་ཁྲོ་བོ་ཡང་ཤིང་རྟ་ལ་ཞོན་པ། མདོག་དམར་པོ། གཡས་པ་དང་གཡོན་པ་ན་པདྨ་དང་། ཉི་མའི་དཀྱིལ་འཁོར་འཛིན་པའོ། ། རྡོ་རྗེ་བདུད་རྩི་མ་དང་རྡོ་རྗེ་འཁྱིལ་པ་ཁྲོ་བོ་ལྟ་བུ་ཉིད་དོ། །རྡོ་རྗེ་འོད་ཟེར་ཁྲོ་བོ་དཀར་པོ་ངང་པ་ལ་ཞོན་པ་གཡས་པས་རྡོ་རྗེ་འཛིན་ཅིང་། གཡོན་པས་པདྨ་དང་ཟླ་བ་འཛིན་པའོ། །རྡོ་རྗེ་འོད་ཟེར་མ་རྡོ་རྗེ་ཁྲོ་བོ་ལྟ་བུའོ། །རྡོ་རྗེ་དབྱུག་པ་ཁྲོ་བོ་རུས་སྦལ་ལ་ཞོན་པ་མདོག་སྔོན་པོ་ཕྱག་གཡས་ན་རྡོ་རྗེ་འཛིན་
- 133a
ཅིང་། གཡོན་པས་དབྱུག་པ་འཛིན་པའོ། །དབྱུག་པ་རྡོ་རྗེ་མཆོག་མ་རྡོ་རྗེ་དབྱུག་པ་ཁྲོ་བོ་ལྟ་བུའོ། །རྡོ་རྗེ་དམར་སེར་ཁྲོ་བོ་གླང་པོ་ཆེ་ལ་ཞོན་པ་མདོག་དམར་པོ། ཕྱག་གཡས་ན་རྡོ་རྗེ་འཛིན་ཅིང་། གཡོན་པས་མི་བཟུང་ནས་ཟ་ཞིང་གནས་པའོ། ། རྡོ་རྗེ་སྐ་རགས་མ་རྡོ་རྗེ་དམར་སེར་ཁྲོ་བོ་ལྟ་བུའོ། །རྡོ་རྗེ་ཚོགས་བདག་གླང་སྣ་གླང་པོ་ཆེ་ལ་ཞོན་པ་ཅན། ཕྱག་གཡས་པས་རྡོ་རྗེ་འཛིན་ཅིང་། གཡོན་པས་གཤོལ་འཛིན་ཅིང་གནས་པ་མདོག་དཀར་པོའོ། །རྡོ་རྗེ་འདུལ་བ་མ་རྡོ་རྗེ་གླང་སྣ་ལྟ་བུའོ། །འདི་ནི་ཁྱད་པར་ཏེ་གང་ཞེ་ ན། ཕྱག་གཡོན་གྱིས་ཁ་ཊྭཱྃ་ག་འཛིན་པའོ། །རྡོ་རྗེ་ཕྲེང་བ་ཚོགས་ཀྱི་བདག་པོ་མདོག་ལྗང་གུ། བྱ་ཀུ་ལི་ཀའི་ཤིང་རྟ་ལ་ཞོན་པ། ཕྱག་གཡས་ཀྱིས་རྡོ་རྗེ་འཛིན་པ། གཡོན་པས་མེ་ཏོག་གི་ཕྲེང་བ་འཛིན་པའོ། །རྡོ་རྗེ་གདན་མ་རྡོ་རྗེ་ཕྲེང་བ་ལྟ་བུའོ། །འདི་ནི་ཁྱད་པར་ ཏེ་གང་ཞེ་ན། ཕྱག་གཡོན་གྱིས་ཤཀྟི་འཛིན་པའོ། །རྡོ་རྗེ་དབང་ཅན་ནེ་ཙོའི་ཤིང་རྟ་ལ་ཞོན་པ་མདོག་དཀར་སེར། ཕྱག་གཡས་པས་རྡོ་རྗེ་འཛིན་པ། གཡོན་པས་ཆུ་སྲིན་གྱི་རྒྱལ་མཚན་བསྣམས་པའོ། །རྡོ་རྗེ་དབང་ཅན་མ་རྡོ་རྗེ་དབང་ཅན་ལྟ་བུ་སྟེ་འདི་ནི་ཁྱད་པར་རོ། །གང་ ཞེ་ན། མདོག་དམར་པོའོ། །རྣམ་རྒྱལ་རྡོ་རྗེ་ཚོགས་ཀྱི་བདག་པོ་སྦལ་པ་ལ་ཞོན་པ། མདོག་དཀར་པོའོ། །ཕྱག་གཡས་པས་རྡོ་རྗེ་འཛིན་པ། གཡོན་པས་རལ་གྲི་འཛིན་པའོ། །རྡོ་རྗེ་གདེངས་པ་མ་རྣམ་རྒྱལ་རྡོ་རྗེ་ལྟ་བུའོ། །རྡོ་རྗེ་གཏུན་ཤིང་ཕོ་ཉ་མོ་མེ་ཏོག་གི་ཤིང་རྟའི་ཁར་བུ་ ཞོན་པ་མདོག་དཀར་སེར། ཕྱག་གཡས་པས་རྡོ་རྗེ་འཛིན་པ། གཡོན་པས་གཏུན་ཤིང་འཛིན་པའོ། །རྡོ་རྗེ་གཏུན་ཤིང་ཕོ་ཉ་མོ་རྡོ་རྗེ་གཏུན་ཤིང་ལྟ་བུ་སྟེ་འདི་ནི་ཁྱད་པར་རོ། །གང་ཞེ་ན། གཡོན་གྱིས་ཁ་ཊྭཱྃ་ག་འཛིན་པའོ། །རྡོ་རྗེ་རླུང་གི་ཕོ་ཉ་མདོག་སྔོན་པོ་རི་དགས་ལ་ཞོན་པ་ཕྱག་ གཡས་པས་རྡོ་རྗེ་འཛིན་པ། གཡོན་པས་དར་འཛིན་པའོ། །མགྱོགས་པའི་རྡོ་རྗེ་མ་རྡོ་རྗེ་རླུང་གི་ཕོ་ཉ་ལྟ་བུའོ། །རྡོ་རྗེ་མེའི་ཕོ་ཉ་མོར་སྐྱེས་ལ་ཞོན་པ་མདོག་དམར་པོ་གྱེན་དུ་འབར་བའི་འོད་རྩེ་གསུམ་པ་འབར་བའི་ཕྱག་གཡས་དག་ན་རྡོ་རྗེ་དང་གོ་ཆ་འཛིན་པ། གཡོན་པ་དག་ན་དབྱུག་པ་
- 133b
དང་སྤྱི་བླུགས་འཛིན་པའོ། །རྡོ་རྗེ་འབར་མ་རྡོ་རྗེ་མེ་ལྟ་བུའོ། །རྡོ་རྗེ་འཇིགས་བྱེད་ཕོ་ཉ་མ་སྔོན་པོ་རོ་ལངས་ལ་ཞོན་པ་ཕྱག་གཡས་པས་རྡོ་རྗེ་འཛིན་པ། གཡོན་པས་རྩེ་གསུམ་འཛིན་པའོ། །རྡོ་རྗེ་གཙིགས་པ་ཕོ་ཉ་མོ་རྡོ་རྗེ་འཇིགས་བྱེད་ལྟ་བུ་སྟེ། འདི་ནི་ཁྱད་པར་རོ། །གང་ཞེ་ན། གཡོན་པས་ཞགས་པ་འཛིན་པའོ། །རྡོ་རྗེ་ལྕགས་ཀྱུ་བྲན་ཀླུ་ལྷག་པ་ལ་ཞོན་པ། སྔོན་པོ་ཕག་གི་གདོང་པ་ཅན། གཡས་པས་རྡོ་རྗེ་འཛིན་པ། གཡོན་པས་ལྕགས་ཀྱུ་འཛིན་པའོ། །རྡོ་རྗེ་ནག་མོ་བྲན་མོ་རོ་ལངས་ཀྱི་བཞོན་པ་ཅན། ཕྱག་གཡོན་གྱིས་ཁ་ཊྭཱྃ་ག་འཛིན་པ། ཕྱག་གཡས་ཀྱིས་རྡོ་རྗེ་འཛིན་པ་མདོག་ནག་མོའོ། །རྡོ་རྗེ་ལོག་འདྲེན་ཕྲན་བྲ་བ་བྱི་བ་ཞོན་པ། མདོག་དཀར་པོ། གླང་པོ་ཆེའི་གདོང་པ་ཅན། ཕྱག་གཡས་དག་ན་རྡོ་རྗེ་དང་དགྲ་སྟ་འཛིན་པ། གཡོན་དག་ན་རྩེ་གསུམ་དང་ནི་དབྱུག་པ་འཛིན་པ། སྦྲུལ་གྱི་མཆོད་ཕྱིར་ཐོགས་ པའོ། །རྡོ་རྗེ་སྲུལ་མོ་བྲན་མོ་མདོག་སྔོན་མོ་གཡས་ན་རྡོ་རྗེ་འཛིན་པ་གཡོན་པ་ཕྱགས་མ་འཛིན་པ་བྲ་བ་བྱི་བ་ཞོན་པའོ། །ཀླུ་རྡོ་རྗེའི་ཆུ་སྲིན་ཞོན་པ་གདེངས་ཀ་བརྒྱད་པ། མདོག་དཀར་པོ་གཡས་པས་རྡོ་རྗེ་འཛིན་པ། གཡོན་པས་ཀླུའི་ཞགས་པ་འཛིན་པའོ། །རྡོ་རྗེ་ཆུ་སྲིན་ མ་བྲན་མོ་ཆུ་སྲིན་ལ་ཞོན་པ། མདོག་དཀར་མོ། གདེངས་ཀ་བརྒྱད་མ། གཡས་པས་རྡོ་རྗེ་འཛིན་པ། གཡོན་པས་རྡོ་རྗེས་མཚན་པའི་ཆུ་སྲིན་འཛིན་པའོ། །འཇིགས་མདོག་མ་ལྗང་གུ་གཡས་པས་རྡོ་རྗེ་འཛིན་ཅིང་། གཡོན་པས་རལ་གྲི་ཕེ་ཊ་ཀ་འཛིན་པའོ། །དཔལ་མོ་ མདོག་དཀར་སེར་གཡས་པས་རྡོ་རྗེ་འཛིན་ཅིང་། གཡོན་པས་པདྨ་འཛིན་པའོ། །དབྱངས་ཅན་མ་མདོག་དཀར་མོ། ཕྱག་གཡོན་པས་པི་བང་གཡས་པས་རྡོ་རྗེ་མའོ། །བགྲོད་ཀ་མདོག་ལྗང་གུ་སེང་གེ་ལ་ཞོན་པ། ཕྱག་གཡས་པ་དག་ན་རྡོ་རྗེ་དང་འཁོར་ལོ་འཛིན་པ། གཡོན་ པ་དག་ན་ལྡེ་མེན་དང་རལ་གྲི་འཛིན་པའོ། །མ་མོ་ཐམས་ཅད་དང་། དྲག་པོ་ལ་སོགས་པ་དང་། ཆུ་བདག་གི་མཐར་ཐུག་པ་རྣམས་ཀྱི་དང་། གང་ཕྱག་གཡས་སུ་རྡོ་རྗེ་གསུངས་པ་དེ་ནི་རྡོ་རྗེ་རྩེ་གསུམ་པར་ཤེས་པར་བྱའོ། །འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་
- 134a
ཅད་རྣམ་པར་སྣང་མཛད་ལ་མངོན་དུ་བལྟས་པའོ། །དེ་ནས་ཐུན་མཚམས་ཀྱི་དུས་སུ་རྡོ་རྗེ་ཏི་རིནྟི་རིས་དག་པར་བཅིངས་ཏེ་མེ་ཏོག་སྔོན་པོའི་ཕྲེང་བ་བཟུང་ལ་དཀྱིལ་འཁོར་དུ་འཇུག་གོ། །ཡི་གེ་ཧཱུྃ་བཞི་པ་བརྗོད་ཅིང་རྡོ་རྗེ་རྣམ་པར་སྣང་མཛད་ལ་བསྐོར་བ་བདུན་ དང་དུང་དང་དྲིལ་བུའི་སྒྲ་བསྒྲག་པར་བྱའོ། །དཀྱིལ་འཁོར་ཐམས་ཅད་ཀྱི་ཡང་ལྷག་པ་དང་ཆད་པའི་ཉེས་པ་ཞི་བར་བྱ་བའི་ངེས་པར་བལྟས་ཏེ་ཕྲེང་བ་བཅོམ་ལྡན་འདས་ལ་ཕུལ་ནས་རྡོ་རྗེའི་གར་བྱས་ལ་བླངས་ཏེ་ཡི་གེ་ཧཱུྃ་བཞི་པ་ཉིད་ཀྱིས་རང་གི་མགོ་བོར་བཅིང་ངོ་། །ཇི་ལྟར་ཆོ་ག་ བཞིན་དུ་ཡང་། །གང་ཞིག་ཆད་པ་ཡོངས་སུ་བསྐང་། །མཁས་པས་ལྷག་པ་རྣམས་སྤང་ཕྱིར། །རྡོ་རྗེ་དྲིལ་བུ་ཀུན་རྟོག་བྱ། །འགྲུབ་འགྱུར་ཉེས་པ་སྤང་མི་བྱ། །ཞེས་གསུངས་སོ། །དེ་ནས་འདུག་པར་གྱུར་པ་ཡི། །རྡོ་རྗེ་སློབ་དཔོན་མཉམ་གཞག་པས། །རྡོ་ རྗེ་སྒོ་ནི་བཞི་པོ་རྣམས། །ཡིད་ཀྱིས་དབྱེ་བར་བྱ་བ་ཉིད། །ཨོྃ་བཛྲོ་ཏྒྷ་ཊ་ཡ་ས་མ་ཡ་པྲ་བེ་ཤ་ཧཱུྃ་ཞེས་བྱའོ། །ཕྱག་རྒྱ་ཡང་འདི་ཡིན་ཏེ། རྡོ་རྗེ་ཁུ་ཚུར་གཉིས་གཤིབས་ཏེ། །མཛུབ་མོ་གན་རྐྱལ་ཡང་དག་གཟུང་། །ལེགས་པར་དྲག་ཏུ་རྣམ་པར་དབྱེ། །སྒོ་དབྱེ་བ་ཡི་ཆོ་ག་ ཡི། །ཞེས་པའོ། །དེ་ནས་ལྕགས་ཀྱུ་ལ་སོགས་པས་ལས་རྣམས་བྱས་ལ་རིན་པོ་ཆེ་བདུན་ལས་བྱས་པའམ་ས་ལས་བྱས་པའི་བུམ་པ་ནག་པོ་ལ་སོགས་པ་མེད་པ། མགྲིན་པ་རིང་བ། མཆུ་འཕྱང་བ། ལྟོ་བ་ཆེ་བ། ལྷ་རྫས་ཀྱི་དྲིའི་ཆུ་དང་། རིན་པོ་ཆེ་དང་། སྨན་ཐམས་ ཅད་དང་། འབྲུ་ཐམས་ཅད་ཀྱིས་ཡོངས་སུ་རྫོགས་པ། ཡལ་འདབ་དང་བཅས་པ། མགྲིན་པ་ལ་གོས་དམ་པས་ལེགས་པར་བཅིངས་ལ་བསྲུང་བ་བྱས་པ། ཕྱི་རོལ་ཀུན་དུ་ལྷ་རྫས་ཀྱི་དྲི་རྗེས་སུ་བྱུགས་པ་མེ་ཏོག་གི་ཕྲེང་བ་བཏགས་པའི་རྡོ་རྗེས་སྟེང་དུ་མཚན་པ། རྡོ་རྗེ་ཆེན་པོའི་ བྱིན་གྱིས་བརླབས་པ། ཁྲོ་བོ་ཏི་རིནྟི་རིས་ཡོངས་སུ་བཟུང་བའི་རྡོ་རྗེ་དང་མེ་ཏོག་གི་ཡལ་འདབ་ཀྱིས། །ཨོྃ་བཛྲོ་ད་ཀ་ཧཱུྃ་ཞེས་བྱ་བ་འདི་སྟོང་རྩ་བརྒྱད་མངོན་པར་བསྔགས་པའི་ཡི་གེ་ཧཱུྃ་བཞི་པ་བརྒྱ་རྩ་བརྒྱད་མངོན་པར་བསྔགས་པ་བྱས་ལ། བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་སྤྱན་སྔར་
- 134b
ལེགས་པར་བཞག་གོ། །འཇུག་པའི་སྒོ་ལ་མངོན་པར་ཕྱོགས་པའི་ཕྱི་རོལ་དུ་བུམ་པ་གཉིས་པ་ལ་ཡི་གེ་ཧཱུྃ་བཞི་པ་བརྒྱ་རྩ་བརྒྱད་བཟླས་པ་བཞག་གོ། །དེའི་ཆུས་བདག་ཉིད་དང་སློབ་མ་དབང་བསྐུར་བ་བྱ་སྟེ་གཞུག་པའི་ཕྱག་རྒྱ་བཅིངས་ནས་སམ་མ་བཅིངས་པ་ཡང་ངོ་། །བྱི་ རུ་དེ་བཞིན་ས་ལེ་སྦྲམ། །དུང་དང་དེ་བཞིན་ནོར་བུ་ནི། །རིན་ཆེན་ཀུན་ཏེ་སིང་གྷྲི་དང་། །བྱཱ་གྷྲི་གི་རི་བེ་བེ་རེ། །སྨན་ཀུན་ཏིལ་ནས་སྲན་མ་ཤ། །འབྲས་དང་གྲོ་ནི་ལྔ་པ་སྟེ། །སྨན་ལྔ་འབྲུ་ཀུན་སྒྲས་མཚོན་པའོ། །དེའི་རྗེས་ལ་ཕྱག་བཞི་ལ་སོགས་པ་སྔོན་དུ་འགྲོ་བའི་སྡོམ་ པ་འཛིན་དུ་བཅུག་ནས་རྡོ་རྗེ་གནོད་སྦྱིན་གྱི་གོས་སྔོན་པོ་ལ་ཡང་ཡོངས་སུ་བཟླས་ཏེ་སེམས་དཔའི་གཙུག་ཏོར་གྱིས་གཙུག་ཏོར་བཅིང་བ་དང་། སྒོ་སྐྱོང་གིས་གདོང་བཅིང་བ་དང་། རྡོ་རྗེ་གོ་ཆས་སྟོད་གཡོགས་དང་། གཙུག་ཏོར་ལ་སོགས་པ་ཅན་གྱིས་སློབ་དཔོན་གྱིས་ཁྲོ་བོ་ཏི་རིནྟི་རིས་མེ་ ཏོག་སྔོན་པོའི་ཕྲེང་བ་བཟུང་ནས། ཨོྃ་བཛྲ་ས་མ་ཡ་པྲ་བེ་ཤཱ་མི་ཞེས་བརྗོད་ཅིང་ཞུགས་ལ། །དེ་བཞིན་གཤེགས་པ་ཐམས་ཅད་ལ་གསོལ་བ་གདབ་སྟེ། བཅོམ་ལྡན་འདས་ཞེས་བྱ་བ་ལ་སོགས་པས་སོ། །དེ་ནས་རྡོ་རྗེའི་ཆུ་འཐུངས་ནས་བདག་ཉིད་འཇུག་པར་བྱས་ལ། ཕྲེང་བ་དེ་ དཀྱིལ་འཁོར་ཆེན་པོར་དོར་ལ་རང་རང་གི་མགོ་ལ་བཅིངས་ཏེ་གདོང་བཅིངས་པ་བཀྲོལ་ལ། ཇི་ལྟ་བ་བཞིན་དུ་དཀྱིལ་འཁོར་ལ་བལྟས་ཏེ། །ཏིཥྛ་བཛྲ་ཞེས་པ་ལ་སོགས་པས་གཞུག་པའི་ཕྱག་རྒྱ་དགྲོལ་བ་ཡང་བྱས་ལ་ཆུའི་དབང་བསྐུར་བ་དང་། སངས་རྒྱས་ལྔའི་ཅོད་པན་དང་དར་ དཔྱངས་དང་། རྡོ་རྗེ་དང་། ཕྲེང་བ་དང་། བདག་པོ་ལ་སོགས་པས་དབང་བསྐུར་བ་དགུ་བཅོམ་ལྡན་འདས་ཀྱི་སྤྱན་སྔ་ནས་བཅོམ་ལྡན་འདས་ལ་ཕྱག་འཚལ་ནས་བླངས་པ་དེ་ཁོ་ན་ཉིད་དང་། ཆོས་དང་། དམ་ཚིག་དང་། དངོས་གྲུབ་དང་། རྡོ་རྗེ་བརྟུལ་ཞུགས་ཀྱང་བཟུང་ལ། མེ་ཏོག་ ལ་སོགས་པས་ཀྱང་བདག་ཉིད་ལེགས་པར་མཆོད་དེ་ཚིགས་སུ་བཅད་པ་ལྔ་པས་རྗེས་སུ་གནང་བ་དང་། ཡི་གེ་ཧཱུྃ་གིས་གཟེངས་བསྟོད་པ་དང་། ལུང་བསྟན་པ་ཡང་སྨོས་ལ། སླར་ཡང་བྱིན་གྱིས་བརླབ་པ་ལ་སོགས་པ་བྱས་ལ་ཇི་ལྟར་མངོན་པར་འདོད་པའི་བཟླས་པ་ཡང་སྟེ། ཧཱུྃ་ཀཱ་ར་
- 135a
བཛྲ་ཧྃ་ཞེས་པའོ། །རང་གི་མཚན་བརྗོད་པར་བྱ་ཞིང་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ་དེའི་སྔགས་ཨཿའི་རྣམ་པའི་མཐའ་ཅན་གྱི་རྣམ་པར་སྣང་མཛད་ཀྱི་གནས་སུ་དེ་བཞིན་གཤེགས་པ་རྡོ་རྗེའི་བདག་ཉིད་དབབ་བོ། །བཛྲོ་ཧྃ་ཞེས་བྱ་བ་ ཡིས་རྡོ་རྗེའི་ང་རྒྱལ་རྣམ་པར་བསྒོམས་ལ་དེ་རྡོ་རྗེ་རྣམ་པར་སྣང་མཛད་དུ་བསྒོམས་ཏེ། བཛྲ་དྷཱ་ཏུ་ཨ་ཧྃ་ཞེས་པའོ། །དེ་ལྟར་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ་བྱང་གི་སྒོར་དེའི་སྔགས་ཨཿའི་རྣམ་པའི་མཐའ་ཅན་གྱི་རྡོ་རྗེ་རྡོ་རྗེ་དྲིལ་བུའི་བདག་ཉིད་དབབ་པའོ། ། བཛྲ་གྷ་ཎྜོ་ཧྃ་ཞེས་པའི་ང་རྒྱལ་བསྐྱེད་ལ་དེ་བཛྲ་ཨཱ་བེ་ཤ་ཀྲོ་དྷོ་ཧྃ་ཞེས་བསྒོམ་མོ། །དེ་ལྟ་བུས་རྡོ་རྗེ་རེ་བསྒྲུབ་པ་ཡིན་ནོ། །དེ་ནས་ཡང་རྡོ་རྗེ་སློབ་དཔོན་གྱིས་སེམས་དཔའ་རྡོ་རྗེ་ལྕགས་ཀྱུས་བཅིངས་ལ་སེ་གོལ་ལེགས་པར་གཏོགས་པར་བྱེད་ཅིང་སངས་རྒྱས་ཐམས་ཅད་འདུས་པར་བྱ་སྟེ། །ཨོྃ་ བཛྲ་ས་མཱ་ཡ་ཛཿ། ཛཿཧཱུྃ་བྃ་ཧོཿཞེས་པ་ལན་ཉི་ཤུ་རྩ་གཅིག་རབ་ཏུ་བརྗོད་དོ། །དེ་ནས་མྱུར་དུ་ཕྱག་རྒྱ་ཆེན་པོ་དང་། རྡོ་རྗེ་ཁྲོ་བོའི་དམ་ཚིག་བརྗོད་དོ། །དེ་མ་ཐག་ཏུ་མཚན་བརྒྱ་རྩ་བརྒྱད་པ་མཆོག་གོ། །དེ་ནས་རྡོ་རྗེ་ལྕགས་ཀྱུ་ལ་སོགས་པས་རང་གི་སྒོ་ནས་སྤྱན་དྲངས་ལ་བཅུག་སྟེ། བཅིངས་ནས་དབང་དུ་བྱས་ལ་ཇི་ལྟ་བ་བཞིན་དུ་ཡི་གེ་ཧཱུྃ་བཞི་པས་མཆོད་ཡོན་ཕུལ་ཏེ་དཔལ་རྣམ་པར་སྣང་མཛད་ལ་སོགས་པའི་དམ་ཚིག་གི་ཕྱག་རྒྱ་རྣམས་དང་། བསྐལ་བ་བཟང་པོའི་མཐར་ཐུག་པ་རྣམས་བསྒྲུབས་ཏེ་རང་གི་སྔགས་བརྗོད་པ་ཇི་ལྟ་བུར་བརྗོད་ཅིང་ཛཿཧཱུྃ་བཾ་ཧོཿས་མ་ ཡ་སྟྭྃ་ཨ་ཧྃ། དེ་ནས་རང་གི་སྔགས་བརྗོད་དོ། །དེ་ལྟ་བུས་འགྲུབ་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་རྣམས་དབྱུང་སྟེ། རྡོ་རྗེ་ལས་གསང་དམ་པ་བྱུང་། །དམ་ཚིག་མཆོག་རྣམས་ཉིད་དུ་གྲགས། །ཁྲོ་བོའི་བཅིང་བ་བླ་མེད་པ། །དེ་རྣམས་བཅིང་བར་རབ་བཤད་བྱ། ། ལག་ངར་རྡོ་རྗེ་ཀུན་དུ་བསྣོལ། །མཐེ་ཆུང་ལྕགས་ཀྱུ་བཅིང་བ་ཉིད། །མཛུབ་མོ་དག་ནི་རབ་ཏུ་བརྐྱང་། །འཇིག་རྟེན་གསུམ་པོ་རྣམ་རྒྱལ་ཞེས། །དེ་བཞིན་མཛུབ་མོ་ཁ་སྤྲད་ཅིང་། །ནོར་བུ་ཉིད་ནི་བར་མ་བསྐུམ། །བསྙམས་ལ་དབུ་མ་པདྨ་ཉིད། །གུང་མོ་མཛུབ་མོ་གཉིས་
- 135b
སྡིགས་མཛུབ། །སྡིགས་མཛུབ་གཉིས་ནི་རྡོ་རྗེ་ཡང་། །གཡས་པ་བཀུག་པ་ལྕགས་ཀྱུའོ། །དེ་དག་ཉིད་སྦྱར་ཡི་གེ་ཧཱུྃ། ལེགས་པའི་རྣམ་པ་དེ་བཞིན་ཡང་། །མཛུབ་གཉིས་ལོགས་གནས་ཁྲོ་གཉེར་དུ། །སྙིང་གར་ཉི་མ་མཛུབ་གཉིས་ཟླུམ། །ལག་པ་མགོ་ བོར་རབ་ཏུ་བརྐྱང་། །མཛུབ་མོ་ཁ་རུ་དགོད་པ་ཅན། །མཛུབ་མོ་སེན་མོ་ཀུན་དུ་རིག །གཡས་པ་མཛོད་ཀྱི་ཁུ་ཚུར་ཡང་། །གུང་མོའི་མགོ་བཅས་འཁོར་ལོ་ཉིད། །ཁ་ལས་རབ་མཆོག་ཐོན་པ་ཡི། །མཛུབ་མོ་དབུ་མ་རྡོ་རྗེ་ཡང་། །མཛུབ་མོ་མགྲིན་པ་བསྐོར་བ་དང་། ། མཛུབ་མོ་ལྷག་མ་མཆེ་བ་ཆེ། །རྡོ་རྗེ་ཁུ་ཚུར་མཐེ་བོང་བསྡམ། །སྒེག་མོ་ལ་སོགས་པ་རྣམས་ནི་རྡོ་རྗེ་དབྱིངས་སུ་བཤད་པ་བཞིན་དུ་བྱ་བ་འདི་ལྟ་སྟེ། །རྡོ་རྗེ་བསྡམས་པ་བཅིངས་ནས་སུ། །སྙིང་གར་ཡང་ན་མཐེ་བོང་མཉམ། །ལེགས་པར་རབ་བརྐྱང་ཕྲེང་བ་མ། །ཐལ་ མོ་སྦྱར་མཆོག་ཁ་ནས་དབྱུང་། །གར་ལས་སྤྱི་བོར་ཐལ་མོ་སྦྱར། །རྡོ་རྗེ་བསྡམས་པ་ཐུར་དུ་སྦྱིན། །ཐལ་མོ་ལེགས་སྦྱར་གྱེན་དུ་གཏོར། །མཐེ་བོང་བསྙམས་ཏེ་ངེས་པར་བསྡམས། །རབ་ཏུ་བརྐྱང་བ་བྱུག་པ་ཡི། །མཛུབ་མོ་གཅིག་ནི་བཀུག་པ་དང་། །མཐེ་བོང་གཉིས་ནི་མདུད་ པ་བཅིངས། །མཐེ་བོང་མཛུབ་མོ་བསྣོལ་བ་བཅིང་། །རྡོ་རྗེ་ཁུ་ཚུར་མཆོག་བསྡམས་ཉིད། །ཅེས་པའོ། །སྙིང་པོའི་དཀྱིལ་འཁོར་ལ་རྡོ་རྗེ་རྩེ་ལྔ་པ་རྣམ་པར་བསམས་ལ་ཧཱུྃ་གི་རྣམ་པ་ཉིད་བརྗོད་ཅིང་ཕྱག་རྒྱ་ཐམས་ཅད་བཅིང་བར་བྱའོ། །དེ་ནས་ཕྱག་རྒྱའི་ངེས་པར་འབྱུང་བ་སྟེ། རྡོ་རྗེ་ཧཱུྃ་མཛད་ཀྱི་ཕྱག་རྒྱ་ནི། རྣམ་པར་སྣང་མཛད། རྡོ་རྗེ་ཧཱུྃ་མཛད་རིན་ཆེན་ཧཱུྃ་མཛད། ཆོས་ཀྱི་ཧཱུྃ་མཛད། ལས་ཀྱི་ཧཱུྃ་མཛད་ཀྱི་གནས་སུ་ཡང་ངོ་། །དེ་ནས་རིན་ཆེན་ཧཱུྃ་མཛད་ལ་སོགས་པ་རྣམས་ཀྱི་སྔགས་རྣམས་འབྱུང་སྟེ། །ཨོྃ་བཛྲ་བྷྲྀ་ཀུ་ཊི་ཀྲོ་དྷཱ་ན་ཡ་སརྦ་རཏྣཱ་ནི་ཧྲཱིཿཧཱུྃ་ཕཊ། ཨོྃ་བཛྲ་ ཏྭཱིཿཋྚཱིཿཀྲོ་དྷ་དུཥྚ་མཱ་ར་ཡ་ཧཱུྃ་ཕཊ། ཨོྃ་བཛྲ་བི་ཤྭ་ཀྲོ་དྷ་ཀུ་རུ་སརྦ་བི་ཤྭ་རཱུ་པཱ་ཡ་སཱ་དྷ་ཡ་ཧཱུྃ་ཕཊ། ཕྱག་རྒྱ་གཞན་རྣམས་ནི་སེམས་དཔའ་རྡོ་རྗེ་མ་ནས་བརྩམས་པར་བལྟའོ། །དེ་ཉིད་ཀྱི་ཕྱིར་རིག་པ་ཐམས་ཅད་ཀྱི་མཆོག་རྣམས་ཀྱིས་རྣམ་པར་རྒྱལ་བའི་སྔགས་སུ་བཤད་དོ། །རྡོ་རྗེ་ཧཱུྃ་
- 136a
མཛད་དང་བཅས་པའི་ཕྱག་རྒྱ་བསྡུ་བས་ཡང་བཅོམ་ལྡན་འདས་རྡོ་རྗེ་ཧཱུྃ་མཛད་བཀླག་པར་བྱའོ། །གཞན་རྣམས་རྡོ་རྗེ་ཧཱུྃ་མཛད་དུ་འགྱུར་བ་རིགས་པ་ཡང་མ་ཡིན་ཏེ། རྒྱུད་ཐམས་ཅད་དུ་ཧཱུྃ་མཛད་ངེས་པར་བསྟན་པར་ཡང་མ་ཡིན་ནོ། །དེའི་རྗེས་སུ་དེ་ཁོ་ན་བཞིན་ ལྕེ་ལ་རྡོ་རྗེ་བཀོད་དེ་རིམ་པ་བཞིན་དུ་སངས་རྒྱས་རྡོ་རྗེ་འཆང་ལ་སོགས་པའི་ཆོས་ཀྱི་ཡི་གེ་རྣམས་དགོད་དོ། །དེ་རྣམས་ཀྱང་ཧཱུྃ་ཡིག་སངས་རྒྱས་རྡོ་རྗེ་ཅན། ཏྲྭྃ་ཡིག་རྡོ་རྗེའི་སྙིང་པོ་ཡི། །ཧྲཱིཿཡི་རྣམ་པར་རྡོ་རྗེའི་སྡེའི། །ཨཿཡིག་རྡོ་རྗེ་སྣ་ཚོགས་ཀྱི། །ཧཱུྃ་སེམས་དཔའ་རྡོ་རྗེ་མ་ཡི། ། ཏྭཱྃ་རིན་ཆེན་རྡོ་རྗེ་མ་ཡི། །ཧྲཱིཿཆོས་ཀྱི་རྡོ་རྗེ་མ་ཡི། །ཨཿལས་ཀྱི་རྡོ་རྗེ་མ་ཡི། །ཧཱུྃ་ཧཱུྃ། ཏྲཱྃ་ཏྲཱྃ། ཧྲཱིཿཧྲཱིཿ། ཨཿཨཿཞེས་བྱའོ། །རྡོ་རྗེ་སེམས་དཔའ་ལ་སོགས་པ་དགའ་བ་ཆེན་པོ་ལ་ཧཱུྃ། གཟུགས་མཛེས་པ་ལ་ཧཱུྃ། མཆོད་པ་ཐམས་ཅད་ལ་ཧཱུྃ། རབ་ཏུ་ དགའ་བ་ལ་ཧཱུྃ། དབུས་སུ་བགྲོད་པ་ལ་ཧཱུྃ། ལེགས་པར་གཟི་མཆོག་ལ་ཧཱུྃ། དྲི་བཟངས་མཆོག་ལ་ཧཱུྃ། ཨཱ་ཡཱ་ཧི་ཛ་ཧཱུྃ། ཨཱ་ཧི་ཧཱུྃ་ཧཱུྃ་ཧཱུྃ་ཧི་སྤོ་ཊ་བཾ་ཧཱུྃ་གྷ་ཎྚ་ཨ་ཨཿཧཱུྃ། རྡོ་རྗེ་སྒེག་མོ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་རྣམས་ཀྱིའོ། །དེ་མ་ཐག་ཏུ་ཨའི་ཡི་གེ་ ལས་སྙིང་གར་སྣ་ཚོགས་རྡོ་རྗེ་བསྐྱེད་པ་ལས་ཀྱི་ཕྱག་རྒྱ་བཅིང་ངོ་། །དེ་ལ་ཁྲོ་བོའི་ཁུ་ཚུར་རྣམ་པ་གཉིས་བྱས་ལ་གཡོན་པའི་རྡོ་རྗེ་སོར་མོ་གཡས་པས་བཟུང་ཞིང་བསྒྲེང་བ་བྱང་ཆུབ་མཆོག་ཅེས་བྱ་བའི་ཕྱག་རྒྱ་འདི་ནི་སངས་རྒྱས་ཀྱི་བྱང་ཆུབ་རབ་ཏུ་སྟེར་རོ། །གཉིས་པོ་དེ་དག་གིས་འགྱིང་ བ་དང་བཅས་པས་གསལ་བར་བྱེད་པ་ནི་རྡོ་རྗེ་ཧཱུྃ་མཛད་དང་རྡོ་རྗེ་སེམས་དཔའ་དང་སེམས་དཔའ་རྡོ་རྗེ་མ་རྣམས་ཀྱིའོ། །ལྕགས་ཀྱུ་འཛིན་པར་ཡང་དག་གནས། །མདའ་གསོར་བ་ཡི་སྦྱོར་བ་དང་། །ལེགས་སོ་ཞེས་བྱ་སྙིང་གར་གནས། །རྡོ་རྗེ་གཉིས་ཉིད་དབང་བསྐུར་བ། །རིན་ཆེན་ ཧཱུྃ་མཛད་དང་། རྡོ་རྗེ་ཁྲོ་གཉེར་དང་། ཁྲོ་བོ་དང་། རིན་ཆེན་རྡོ་རྗེ་མ་རྣམས་ཀྱིའོ། །སྙིང་གར་ཉི་མ་རབ་ཏུ་བལྟ། །གཡོན་གནས་ལག་ངར་དབྱུག་པ་དང་། །དེ་བཞིན་འདི་ནི་ཡོངས་སུ་བཟློག །གཡས་དང་གཡས་མིན་རྣམ་པར་བསྣོལ། །ཆོས་ཀྱི་ཧཱུྃ་མཛད་དང་། རྡོ་རྗེ་
- 136b
ཆོས་དང་། ཆོས་ཀྱི་རྡོ་རྗེ་མ་རྣམས་ཀྱིའོ། །སྙིང་གར་ཉི་མ་ལ་རལ་གྲིའོ། །མགལ་མེའི་འཁོར་ལོ་བསྐོར་བ་ཉིད། །རྡོ་རྗེ་གཉིས་ནི་ཁར་གནས་ཤིང་། །རྡོ་རྗེའི་གར་ནི་བཀྲོལ་བས་ནི། །འགྲམ་པ་སྤྱི་གཙུག་ཡང་དག་གནས། །ལས་ཀྱི་ཧཱུྃ་མཛད་དང་། རྡོ་རྗེ་ ལས་དང་། ལས་ཀྱི་རྡོ་རྗེ་མ་རྣམས་ཀྱིའོ། །གོ་ཆ་མཐེ་ཆུང་མཆེ་བ་མཆོག །ཁུ་ཚུར་གཉིས་ནི་ངེས་པར་བཅིང་། །རྡོ་རྗེ་བགྱིངས་པའི་རབ་སྦྱོར་བས། །བསམ་པ་གཡོས་པས་འདུད་པར་བྱ། །ཕྲེང་བ་བཅིངས་ཏེ་ཁ་ནས་དབྱུང་། །གར་ལས་སྤྱི་བོར་ཐལ་མོ་སྦྱར། ། འོག་ཏུ་འཕྱང་དང་གྱེན་དུ་འཐོར། །མཐེ་བོ་བསྙམས་ཏེ་ངེས་པར་གཤིབས། །དྲི་བྱུག་པ་ཡི་སྦྱོར་བ་ལས། །མཆོད་པའི་ཕྱག་རྒྱ་རབ་ཏུ་གྲགས། །མཛུབ་མོ་ལྕགས་ཀྱུ་བཅིངས་པ་ཡིས། །མཐེ་ཆུང་ལས་ནི་ལྕགས་ཀྱུ་ཆེ། །མཁྲིག་མ་མདུད་པ་མཆོག་དག་བསྣོལ། ། རྒྱབ་དག་ཀྱང་ནི་ངེས་པར་གཤིབས། །ཞེས་སྒོ་སྐྱོང་རྣམས་ཀྱི་ཕྱག་རྒྱའོ། །ལས་ཀྱི་ཕྱག་རྒྱ་ཐམས་ཅད་ཀྱང་གར་ལས་འབྱུང་བ་ཡིན་ནོ། །དེ་ནས་རྣམ་པར་སྣང་མཛད་ལ་སོགས་པ་རྣམས་ཀྱི་བཅིང་བར་བྱའོ། །རྡོ་རྗེ་སེམས་མ་དང་། རིན་ཆེན་དང་། ཆོས་དང་། ལས་ཀྱི་རྡོ་རྗེ་ མ་རྣམས་ཀྱི་ཡང་སྟེ་རྡོ་རྗེ་དང་པོ་དང་། །མཐར་གནས་པ་ཡི་སྐྱེས་པ་དང་། བུད་མེད་ཀྱི་གཟུགས་འཛིན་པ་དེ་རྣམས་ཀྱི་བདག་ཉིད་ཆེན་པོ་གང་དང་གང་གི་ཕྱག་རྒྱ་གང་དང་གང་ཡིན་པ་རྣམས་བཅིང་ངོ་། །ཐམས་ཅད་ཀྱི་ཕྱག་རྒྱ་དམ་ཚིག་ཕྱག་རྒྱ་ཡང་ཡིན་ཏེ། གཡོན་པ་དེ་བཞིན་ གཤེགས་པའི་ཁུ་ཚུར་གན་རྐྱལ་དུ་བྱས་ལ་ལག་པ་གཡས་པའི་མཛུབ་མོ་དང་མཐེ་བོང་དག་དང་མཐེ་ཆུང་ནས་བརྩམས་ཏེ་ཁ་ཕྱེ་བའི་ཐལ་མོ་ཁ་སྦྱར་བའོ། །འདི་ནི་བྱམས་པའི་དམ་ཚིག་གི་ཕྱག་རྒྱའོ། །དེ་རྣམས་ཀྱི་རིག་པ་ནི་སྔར་བཤད་པ་ཉིད་དེ། དེ་རྣམས་ཀྱི་རིག་པ་ལྗགས་ རྣམས་ལ་དགོད་དོ། །འདི་ནི་དེ་རྣམས་ཀྱི་ཆོས་ཀྱི་ཕྱག་རྒྱའོ། །ཡི་གེ་ཨ་ལས་རང་གི་ཐུགས་ཀར་སྣ་ཚོགས་རྡོ་རྗེ་བསྐྱེད་ལ་དེ་རྣམས་འདྲི་བྱའི་རྗེས་སུ་འབྲངས་ནས་ཕྱག་རྒྱ་ཆེན་པོ་བཅིངས་པ་ནི་ལས་ཀྱི་ཕྱག་རྒྱར་འགྱུར་རོ། །རང་གི་ཐུགས་ཀར་རྡོ་རྗེ་རྩེ་ལྔ་པ་བསམས་ལ་བྲི་བྱའི་རྗེས་སུ་
- 137a
འབྲངས་པ་ཉིད་ལས་དེ་རྣམས་ཀྱི་ཕྱག་རྒྱ་ཆེན་པོ་བཅིང་ངོ་། །དེ་ཉིད་ཀྱིས་ཡང་རིག་པའི་ཐུན་མོང་བའོ། །མཐེའུ་ཆུང་དང་། མཐེ་བོང་བཅིངས་ནས་ཀྱང་གཡོན་པའི་སོར་མོ་དབུས་མ་གསུམ་པོ་རྩེ་གསུམ་པ་ལ་དབུས་མ་རྩེ་མོ་ཡང་རྡོ་རྗེའི་ཕྱག་རྒྱ་ཡོངས་སུ་བཟུང་ཞིང་རྡོ་རྗེའི་རིག་པ་ མཆོག་འདི་ནི་རྡོ་རྗེའི་དཔལ་ཞེས་གྲགས་སོ། །དེ་ལས་གཞན་ནི་རབ་བཤད་བྱ། །སྒྱུ་མ་རྡོ་རྗེ་སོགས་མིང་ཅན། །རྡོ་རྗེ་བསྡམས་པ་བརྟན་བྱས་ལ། །གཡོན་པ་རྡོ་རྗེ་ཡང་བཅིང་བྱ། །རྡོ་རྗེ་ཁུ་ཚུར་ཞེས་གྲགས་པ། །རྡོ་རྗེའི་རིགས་རྣམས་ཀུན་ལ་འདི། །རྡོ་རྗེ་རྣམ་གཉིས་དང་ཡང་ བྱས། །མཚན་མ་ཐམས་ཅད་བཀོད་པ་ནི། །རྡོ་རྗེའི་རིགས་ནི་ཐམས་ཅད་ཀྱི། །ཕྱག་རྒྱ་རྣམས་སུའང་དགོད་པར་བྱ། །མདུན་དང་རྒྱབ་གནས་རབ་ཏུ་བརྐྱང་། །མཐེ་བོང་རྒན་པོ་འཛིན་པ་ཆོས། །ཨོྃ་གྱི་རྣམ་པ་སྤྱི་བོར་གནས། །རྡོ་རྗེ་ཤུགས་ཀྱི་རབ་ཏུ་གནས། །རིག་ པའི་རྒྱལ་པོའམ་ཕྱག་རྒྱ་ཆེན་པོའི་ཚོགས་སོ། །ལག་པའི་མདུན་ཉིད་རབ་ཏུ་བརྐྱང་། །ལག་པའི་མདུན་ཡང་དེ་བཞིན་དུ། །ལག་པ་གཉིས་ཀྱང་ཁུ་ཚུར་གནས། །ཁ་ལས་ཡོངས་སུ་བསྐོར་བ་ཉིད། །རྡོ་རྗེ་ཁྲོ་བོའི་ཕྱག་རྒྱའི་ཚོགས་སོ། །གཡོན་པའི་མཐེ་བོ་ལེགས་གནས་ཀྱང་། ། ཕྲེང་བ་འཛིན་པ་ངེས་རྒྱལ་ཉིད། །གཡས་པས་ནོར་ནི་སྦྱིན་པ་དང་། །རལ་གྲིའི་ཕྱག་རྒྱ་ཁུ་ཚུར་སོན། །ཚོགས་ཀྱི་བདག་པོ་ཆེན་པོའི་ཕྱག་རྒྱའི་ཚོགས་སོ། །གཡས་པ་གཤོལ་ནི་གཟུང་བ་དང་། །དེ་བཞིན་ལག་པ་རབ་ཏུ་བརྐྱང་། །གཡས་པས་འབར་བ་ཀུན་དུ་སྟོན། །རྡོ་རྗེ་ཁུ་ ཚུར་རབ་ཏུ་འདར། །ཕོ་ཉ་ཆེན་པོའི་ཕྱག་རྒྱའི་ཚོགས་སོ། །བསྙེམས་བཅས་ཁ་དང་མཆེ་བ་རྩེ། །བྱུགས་པས་འཇོམས་པ་རབ་ཏུ་སྦྱོར། །ལག་པ་བསྐུམ་པ་སྦྱར་བ་དང་། །རྡོ་རྗེ་གཡས་པ་འཕྲོག་པའོ། །བྲན་གྱི་ཕྱག་རྒྱའི་ཚོགས་སོ། །དེ་ནས་ཨུ་མ་ལ་སོགས་པ་མ་མོའི་ ཚོགས་ཀྱི་ཕྱག་རྒྱ་འབྱུང་སྟེ། གཡོན་པ་རྡོ་རྗེ་བསྡམས་པ་ཡིས། །རྩེ་གསུམ་མཚན་མ་བཅིང་བར་བྱ། །འདི་བཅིང་བ་ཡི་ཡང་དག་པའི། །དངོས་གྲུབ་རིག་པ་མཆོག་རང་ཉིད། །རྡོ་རྗེའི་རིགས་རྣམས་ཐམས་ཅད་ཀྱི། །གཡོན་པ་རྡོ་རྗེ་མཆོག་བསྲུངས་པ། །ཆོ་ག་ཇི་བཞིན་དམ་ཚིག་
- 137b
གི། །ཕྱག་རྒྱ་བཅིང་བར་རབ་བཤད་བྱ། །འཁོར་ལོ་ཐམས་ཅད་མཆོག་ཀུན་བསྡམ། །དེ་བཞིན་བུ་ཡི་ཕྱག་རྒྱ་དང་། །ཨོྃ་ཡིག་ཕྱག་རྒྱའང་དེ་བཞིན་ཉིད། །ཡི་གེ་རྣ་ཅན་ཡོངས་སུ་གཟུང་། །ཕྱག་རྒྱ་མཛེས་པ་ཅན་དང་ནི། །འབར་བ་ཡོངས་སུ་གཟུང་བ་ཉིད། །འོད་ཟེར་བསྡུས་ པ་ཁོ་ན་ཡང་། །དབྱུག་པ་ཁུ་ཚུར་གཟུང་བ་ཉིད། །ཁ་ལས་ཡོངས་སུ་བསྐོར་བ་དང་། །ཁྲོ་བོའི་དམ་ཚིག་གདེངས་ཀ་ཡིས། །ཕྱག་རྒྱ་ཕྲེང་བ་རྡོ་རྗེ་བཅིངས། །མིང་མེད་སྤྱི་བོར་གནས་པ་ཉིད། །རྩིབས་ཅན་དཀྱིལ་འཁོར་བཞིན་དུ་བཟའ། །འོད་ཅན་རྩིབས་ཅན་དམ་ཚིག་རྣམས། ། ལག་ངར་བསྐུམ་ཞིང་ཁ་ཕྱོགས་དང་། །རྒྱབ་ནས་ཡོངས་སུ་བསྐོར་བ་ཉིད། །འོད་ཟེར་འབར་བ་གྲོལ་བ་དང་། །མདུན་དུ་དུལ་བར་གནས་པ་ཉིད། །ཕོ་ཉའི་དམ་ཚིག་རྣམས་སོ། །གཉིས་མཐར་ཞུགས་པ་རྩེ་མོ་སྦྱར། །བཅིངས་པ་ཉིད་དང་རབ་ལྟུང་བྱེད། །ལག་ངར་བསྣོལ་དང་མ་ བསྣོལ་དང་། །དེ་བཞིན་སྟོབས་ནི་འཕྲོག་པའོ། །བྲན་མོ་རྣམས་ཀྱི་དམ་ཚིག་ཡིན་ནོ། །དེ་ནས་ལྷ་ཆེན་པོ་ལ་སོགས་པའི་ལྗགས་རྣམས་ལ་སྔགས་བཀོད་ལ་ཡི་གེ་ཨ་ལས་རང་གི་སྙིང་གར་དེ་བཞིན་དུ་རྡོ་རྗེ་བསྐྱེད་ལ་དེ་རྣམས་ཀྱི་ཕྱག་རྒྱ་བཅིངས་ཏེ་ལས་ཀྱི་ཕྱག་རྒྱར་འགྱུར་རོ། །རང་གི་ སྙིང་གར་རྡོ་རྗེ་རྩེ་ལྔ་པ་བསྒོམས་ལ་ཕྱག་རྒྱ་ཆེན་པོ་བྲི་བྱའི་རྗེས་སུ་འབྲངས་ཏེ་བཅིང་བར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་དང་། བསྐལ་པ་བཟང་པོ་པ་དང་ཕྱི་རོལ་རྡོ་རྗེའི་རིགས་རྣམས་ལ་རྡོ་རྗེ་རིན་པོ་ཆེའི་དབང་བསྐུར་མ་དཔལ་རྡོ་རྗེ་ཧཱུྃ་མཛད་ལ་སོགས་སངས་རྒྱས་ལྔའི་ཅོད་པན་ དང་ཕྲེང་བ་དང་། དར་དཔྱངས་ཀྱི་དབང་བསྐུར་བས་དབང་བསྐུར་རོ། །དེ་ནས་མཆོད་ཡོན་ཕུལ་ལ་མཆོད་པ་བྱའོ། །དེ་ནས་རིན་པོ་ཆེའི་རང་བཞིན་གྱི་བུམ་པ་སྔར་བཤད་པའི་མཚན་ཉིད་ཅན་རྡོ་རྗེ་ལ་སོགས་རང་གི་མཚན་མས་མཚན་པ་རྣམ་པར་སྣང་མཛད་ལ་སོགས་པའི་སྔགས་བརྒྱ་རྩ་བརྒྱད་ བཟླས་པ་རྣམས་ཕྱིའི་དཀྱིལ་འཁོར་གྱི་ཕྱི་རོལ་དུ་དགོད་པར་བྱའོ། །བུམ་པ་གང་བ་རྣམས་དང་། གོས་ཟུང་འབུམ་དང་། སྟོང་ཕྲག་བཅུ་དང་། སྟོང་དང་། བརྒྱའམ། རེ་རེ་ལ་རེ་རེའམ། ཐུན་མོང་བའམ། རྣམ་པ་སྣ་ཚོགས་པའི་བླ་རེ་དང་། ཟུར་བཞིར་རྣམ་པར་བཀྲ་བའི་བ་དན་
- 138a
བཅིངས་པའི་གདུགས་དང་། རྒྱལ་མཚན་དང་། བ་དན་རྣམས་ཀྱང་ཡི་གེ་ཨོྃ་དང་། དཔལ་རྡོ་རྗེ་ཧཱུྃ་མཛད་ཡོངས་སུ་བཟླས་ལ། བཛྲ་སྥ་ར་ཎ་ཁྃ་ཞེས་པ་འདིས་ལྷ་ཐམས་ཅད་ལ་ངེས་པར་དབུལ་ལོ། །མེ་ཏོག་གི་ཤིང་བརྒྱ་དང་། བཞིའམ་ལྗོན་ ཤིང་རྣམས་དང་མེ་ཏོག་ཐམས་ཅད་ལ་རྡོ་རྗེ་མེའི་ཕྱག་རྒྱ་དང་བཅས་པ་དང་། །ཨོྃ་བཛྲ་པུཥྤེ་ཧཱུྃ། ཞེས་པས་མེ་ཏོག་གི་ཕྱག་རྒྱ་མངོན་པར་བསྔགས་སོ། །དྲི་ཐམས་ཅད་དང་། ངད་ཞིམ་པ་རྣམས་དང་། དྲི་མ་མེད་པའི་དྲི་བཟང་པོ་རྣམས་ལ་དེ་ཁོ་ན་བཞིན་དུ་རྡོ་རྗེ་མེ་དང་། །ཨོྃ་བཛྲ་གནྡྷེ་ཧཱུྃ། ཞེས་པ་འདི་དྲིའི་ཕྱག་རྒྱ་དང་བཅས་པ་ཡིས་སོ། །ག་བུར་དང་། ཨ་ཀ་རུ་དང་། དུ་རུ་སྐ་དང་། ཙནྡན་ལ་སོགས་པ་ལེགས་པར་བསྲེས་ལ། དེ་ཁོ་ན་བཞིན་དུ་རྡོ་རྗེ་མེ་དང་། །ཨོྃ་བཛྲ་དྷཱུ་བེ་ཧཱུྃ། ཞེས་པ་འདིས་བདུག་པའི་ཕྱག་རྒྱ་དང་བཅས་པས་སྤོས་ཕོར་འབུམ་དང་། སྟོང་ཕྲག་ བཅུ་དང་སྟོང་དང་བརྒྱའམ། ཇི་ལྟར་རྙེད་པ་ལའོ། །སྒྲོན་མ་འབུམ་དང་། སྟོང་ཕྲག་བཅུ་དང་། སྟོང་དང་། བརྒྱའམ། སྒྲོན་མ་ཐམས་ཅད་སྒྲོན་མའི་སྡོང་བུ་འབར་བ་དང་ལྡན་པའི་ཀོང་བུ་སྟོང་དང་། བཅུའམ་བཅུ་གཅིག་ལ་དེ་ཁོ་ན་བཞིན་དུ་རྡོ་རྗེ་མེ་དང་། །ཨོྃ་བཛྲ་ཨཱ་ལོ་ཀེ་ཧཱུྃ་ཞེས་པ་ འདི་མར་མེའི་ཕྱག་རྒྱ་དང་ལྡན་པས་ཡོངས་སུ་བཟླས་ལ། །ཨོྃ་སྥཱ་ར་ཎ་ཁྃ་ཞེས་པ་བརྗོད་ཅིང་དབུལ་བར་བྱའོ། །གཏོར་མའི་ཉེ་བར་སྤྱོད་པ་འབུམ་དང་། སྟོང་ཕྲག་བཅུ་དང་། སྟོང་དང་། བརྒྱའམ། །བཅུའི་གྲངས་སམ། བཀྲ་ཤིས་ཅན་དང་པོར་བྱ་སྟེ། རྣམ་པ་སྣ་ཚོགས་པའི་བཟའ་ བ་རྣམས་ལ་དེ་བཞིན་དུ་རྡོ་རྗེ་མེ་ཡོངས་སུ་བཟླས་ཏེ། ཨ་ཀཱ་རོ་མུ་ཁྃ་སརྦ་དྷ་རྨཱ་ཎཱ་མཱ་དྱ་ནུ་ཏྤ་ནྣ་ཏྭཱ་ཏ་ཞེས་པ་བརྗོད་ཅིང་དབུལ་བར་བྱའོ། །རོལ་མོ་བཅུ་དང་། བརྒྱ་དང་། སྟོང་དང་། སྟོང་ཕྲག་བཅུ་དང་། རོལ་མོ་འབུམ་དང་གང་ཡང་རུང་བ་ལ་ཡི་གེ་ཧཱུྃ་དང་། རོལ་མོའི་ཕྱག་རྒྱ་རྡོ་རྗེ་ཁུ་ཚུར་ དག་གི་ལག་པའི་སོར་མོ་རྣམས་ཀྱིས་རོལ་མོའི་སྟང་སྟབས་རྣམ་པ་བཅུ་བཞི་འདི་ལྟ་སྟེ། པི་བང་དང་། གླིང་བུ་དང་། རྔ་མུ་ར་ཛ་དང་། རྔ་མུ་ཀུནྡ་དང་། འཁར་རྔ་དང་། རྔ་བྷི་རི་དང་། རྔ་པ་ཊ་ཧ་དང་། རྔ་ཀུན་ཛཱ་དང་། རྔ་ཏི་མི་ལ་ཡི་སྟང་སྟབས་སོ། །རོལ་མོ་དང་། ཟློས་གར་དང་།
- 138b
གར་དང་། རྣ་རྒྱན་དང་། ཅོད་པན་ལ་སོགས་པའི་མཆོད་པ་རྣམས་ཀྱང་ཡི་གེ་ཨོྃ་གྱིས་མངོན་པར་བསྔགས་ཏེའོ། །དེ་བཞིན་དུ་དར་དཔྱངས་འཕྱང་བར་བྱ་ཞིང་མེ་ཏོག་གི་ཕྲེང་བ་དང་། རྔ་ཡབ་ཀྱིས་རྣམ་པར་བརྒྱན་པ་དང་། དྲ་བ་དང་དྲ་བ་ཕྱེད་པས་སྤྲས་པ་དང་། ཟླ་བ་ཕྱེད་པས་ ཉེ་བར་མཛེས་པ་དང་། རྟ་དང་གླང་པོ་ཆེ་དང་། བ་ལང་དང་། ཤིང་རྟ་རྣམས་འབུལ་ཏེ། བརྟགས་པ་དང་བཅས་པ་ཡང་ངོ་། །རྟ་བབས་ཉམས་དགའ་བའི་དྲིལ་བུ་དང་། བཅས་པ་རྣམས་ཀྱང་བཛྲ་སྥ་ར་ཎ་ཁྃ་ཞེས་པ་འདིས་སོ། །ཨོྃ་བཛྲ་ས་ཏྭ་སུ་སྃ་གྲ་ཧཱ་ཏ་དང་། བཛྲ་རཏྣམ་ ནུཏྟ་རྃ། བཛྲ་དྷརྨ་གཱ་ཡ་ནཻཿ། བཛྲ་ཀརྨ་ཀ་རོདྦྷ་བེ་ཞེས་བརྗོད་ཅིང་གར་བྱས་ལ། རྡོ་རྗེ་སྒེག་མོ་ལ་སོགས་པ་མཆོད་པ་རྣམ་པ་བརྒྱད་པོ་རྣམས་ཀྱིས་ཁྲོ་བོའི་ཁུ་ཚུར་གཉིས་དང་ལྡན་པའི་ལས་ཀྱི་ཕྱག་རྒྱ་རྣམས་ཀྱིས་དཀྱིལ་འཁོར་ཐམས་ཅད་མཆོད་པར་བྱའོ། །རྡོ་རྗེ་ཁུ་ཚུར་གཉིས་ བཅིངས་ནས། མཛུབ་མོ་གཉིས་རབ་ཏུ་བརྐྱང་བ་ཁྲོ་བོའི་ཁུ་ཚུར་གཉིས་ཡིན་ནོ། །སླར་རྡོ་རྗེ་རིགས་ཀྱི་དཀྱིལ་འཁོར་དུ་བཤད་པའི་ལས་ཀྱི་ཕྱག་རྒྱ་བཅུ་དྲུག་པ་རྣམས་ཀྱིས་ཀྱང་ལེགས་པར་མཆོད་ལ། །ཁྲོ་བོའི་རིགས་ཐམས་ཅད་ལ་གསོལ་བ་གདབ་པར་བྱ་སྟེ། སེམས་ཅན་ཐམས་ཅད་ ཀྱི་དོན་དུ་དངོས་གྲུབ་ཐམས་ཅད་འགྲུབ་པར་མཛད་དུ་གསོལ་ཞེས་པའོ། །དེ་ནས་ཕྱི་རོལ་གྱི་མཆོད་པ་དབུལ་ཏེ། སྒྲུབ་པའི་གྲོགས་མཆོག་དཀྱིལ་འཁོར་དུ་བཞག་ལ། །འབྲས་ཡོས་བཅས་ཤིང་ཏིལ་དང་བཅས། །ཆུ་བཅས་ཟས་བཅས་མེ་ཏོག་བཅས། །སྲན་ཆན་བཅས་ཤིང་ སྣུམ་ཁུ་ཚུར་ལ། །སོགས་པའི་བཟའ་བ་རྣམས་ལ་ནི། །ཡང་ཨ་ཀཱ་རོ་མུ་ཁྃ་ཞེས་པ་ལ་སོགས་བཟླས་ནས་ཤར་ཕྱོགས་ཀྱི་ཆ་ནས་བརྩམས་ཏེ་གསུམ་གསུམ་གཏོར་བར་བྱས་ཏེ། དྲི་དང་། མེ་ཏོག་དང་། བདུག་པ་དང་། མར་མེ་དང་། མཆོད་ཡོན་རྣམས་ཀྱང་ཐོག་མ་དང་ཐ་ མར་དབུལ་བར་བྱའོ། །དེ་ལ་དང་པོ་རེ་ཞིག་མཎྜལ་རྣམས་བྱེད་དུ་གཞུག་པར་བྱའོ། །དེ་ནས་སྤྱན་དྲང་ངོ་། །དེ་ནས་དམ་ཚིག་བསྟན་ནོ། །དེ་ནས་མཆོད་ཡོན་ཡང་ཕུལ་ཏེ་དྲི་ལ་སོགས་པས་ལེགས་པར་མཆོད་ལ། གཏོར་མ་དབུལ་ལོ། །དེ་ནས་གཤེགས་སུ་གསོལ་ལོ། །
- 139a
དེ་ལ་སྔགས་དང་ཕྱག་རྒྱ་ནི་འདི་ཡིན་ཏེ། ཤར་ཕྱོགས་སུ་ཁ་བལྟས་ཏེ་གཡས་བརྐྱང་གི་གོམ་པས་འདུག་ཅིང་། ལག་པ་གཡོན་པས་རྡོ་རྗེ་བསྟན་ལ། གཡས་པ་དཀུའི་ཕྱོགས་སུ་བཞག་སྟེ། གཡས་པའི་མཛུབ་མོ་ལྕགས་ཀྱུས་སྤྱན་དྲང་ངོ་། །དེའི་ མཛུབ་མོ་ལྕགས་ཀྱུ་དང་བྲལ་བ་ནི་བརྒྱ་བྱིན་གྱི་དམ་ཚིག་གི་ཕྱག་རྒྱའོ། །གཡོན་བརྐྱང་གི་གོམ་པས་འདུག་ལ་སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེ་ནས་དེའི་སྔགས་ནི། ན་མོ་བཛྲ་སྱ་དི་ཤི་དི་ཤི་བཛྲ་པཱ་ཎི་རོཀྵ་རཀྵ་སྭཱ་ཧཱ། མེའི་ ཕྱོགས་སུ་བལྟས་ཏེ་ལག་པ་གཡས་པའི་མཛུབ་མོ་ཟླུམ་པོའི་རྣམ་པར་བཀུག་སྟེ་གུང་མོ་བསྒྲེང་བའི་ཚིགས་གསུམ་པར་བཙུགས་ལ་མཐེ་བོང་ལག་མཐིལ་དུ་བཞག་པ་ནི་མེ་ལྷ་སྤྱན་དྲང་བའི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཐེ་བོང་མཛུབ་མོའི་གཞོགས་ལ་བསྟན་པ་ནི་མེ་ལྷའི་དམ་ ཚིག་གི་ཕྱག་རྒྱའོ། །ཕྱག་རྒྱ་དེ་ཉིད་ལག་པའི་དབུས་སུ་མངོན་དུ་ཕྱོགས་ཏེ། གཅིག་ཏུ་སྦྱར་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཨགྣ་ཨེ་ཧི་ཨེ་ཧྱོ་ཧི་ཀ་པི་ལ་ཛྭ་ལ་ཛྭ་ལ་ད་ཧ་ད་ཧ་ཤི་ཁི་ཏོ་ལི་བི་རཱུ་པཱ་ཀྵ་སྭཱ་ཧཱ། གཤིན་རྗེར་བལྟས་ཏེ་ལག་པ་མདུན་དུ་ཕྱོགས་པར་ བྱས་ལ་ནང་དུ་རྡོ་རྗེ་བསྡམས་པའི་དབུས་སུ་མཐེ་བོང་གཉིས་དང་ཕྱི་རུ་མིང་མེད་གཉིས་སྦྱར་ཞིང་བསྒྲེང་སྟེ་སླར་ནང་དུ་བཟུང་བ་ནི་གཤིན་རྗེ་སྤྱན་དྲང་བའི་ཕྱག་རྒྱའོ། །སྲིན་ལག་གཉིས་ཡང་ཕྱི་རོལ་དུ་གཤིབས་ཏེ་བསྒྲེང་བ་སྙིང་གར་བཟུང་བ་ནི་དམ་ཚིག་གི་ཕྱག་རྒྱའོ། །དེ་ཉིད་ལས་སྲིན་ ལག་སྦྱར་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཡ་མཱ་ཡ་སྭཱ་ཧཱ། བདེན་བྲལ་དུ་བལྟས་ཏེ་མཉམ་པའི་གོམ་པས་འདུག་ལ་ལག་པ་གཡས་པའི་ཁུ་ཚུར་བཅངས་པ་མཛུབ་མོ་དང་གུང་མོ་བཀུག་སྟེ་བཟུང་ཞིང་དྲིའི་རྣམ་པར་བཞག་ལ། ལག་པ་གཡོན་པ་སྟ་ཟུར་ཕྱོགས་ སུ་གཡོན་པའི་མཛུབ་མོ་བཀུག་ནས་གཞག་པ་ནི་བདེན་བྲལ་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ལག་པ་གཡོན་པ་སྟ་ཟུར་ཕྱོགས་སུ་གནས་པར་རལ་གྲིའི་ཕྱག་རྒྱ་ནི་བདེན་བྲལ་གྱི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་གཤེགས་སུ་གསོལ་བའི་
- 139b
ཕྱག་རྒྱའོ། །དེའི་སྔགས་ནི་སརྦ་བྷཱུ་ཏ་བྷ་ཡཾ་ཀ་ར་ཀུ་རུ་ཀུ་རུ་སྭཱ་ཧཱ། ཆུ་ལྷའི་ཕྱོགས་སུ་མཉམ་པའི་གོམ་པས་འདུག་ལ་ལག་པ་གཡས་པའི་ཁུ་ཚུར་བཅངས་ནས་མཐེ་བོང་དང་མཛུབ་མོ་གཅིག་ཏུ་སྦྱར་ཏེ་གཡོན་པའི་ཁུ་ཚུར་སྙིང་གར་བཞག་ལ་གཡོན་པའི་མཛུབ་མོ་ལྕགས་ཀྱུས་སྤྱན་ དྲང་བ་ནི་ཆུ་བདག་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་གཡོན་པའི་མཛུབ་མོ་ཁུ་ཚུར་ལ་སྦྱར་ཏེ་བཟུང་བ་ཞགས་པའི་ཕྱག་རྒྱ་ཆུ་བདག་གི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཏྲྀ་ཏྲྀ་ཕུ་ཊ་ཏྲྀ་ཏྲྀ་ཤི་ ཁི་ཏོ་ལི་བི་རཱུ་པཱ་ཀྵ་སྭཱ་ཧཱ། རླུང་ལྷའི་ཕྱོགས་སུ་བལྟས་ཏེ་འདུག་པ་གཡོན་པའི་ཁུ་ཚུར་བཅངས་ཏེ་གུང་མོ་བསྒྲེང་བའི་ཚིགས་གསུམ་བར་མཛུབ་མོ་བཀུག་པའི་རྩེ་མོ་བཙུགས་ལ་མངོན་དུ་ཕྱོགས་ཏེ་བརྐྱང་ངོ་། །ལག་པ་གཡས་པ་ཡང་དེ་བཞིན་དུ་བྱས་ཏེ་སྟ་ཟུར་ལོགས་སུ་བཞག་ཅིང་མཐེ་ བོས་བསྐུལ་བ་ནི་རླུང་ལྷ་སྤྱན་དྲང་བའི་ཕྱག་རྒྱའོ། །དེ་ཉིད་མཐེ་བོང་སྔ་མ་བཞིན་དུ་བཞག་པ་ནི་རླུང་ལྷའི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཐེ་བོང་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །སྔགས་ནི་ཨོྃ་སྭཱ་ས་ཁཱ་ཁ་ཁ་ཁ་སྭཱ་ཧཱ། ཀུ་བེ་རལ་མངོན་དུ་ བལྟས་ཏེ་འདུག་ནས་ལག་པ་གཉིས་ཁ་སྦྱར་ལ་རྡོ་རྗེ་བཅིང་བ་ནང་དུ་བྱས་ལ་མཐེ་ཆུང་གཉིས་གཤིབས་ཏེ་བརྐྱང་། དེའི་རྒྱབ་ཏུ་སྲིན་ལག་གཉིས་སོ་སོར་བཞག་ནས་གུང་མོ་དག་བསྒྲེང་བ་རྡོ་རྗེའི་མདུད་པ་བྱ་བ་ནི་ཀུ་བེ་ར་སྤྱན་དྲང་བའི་ཕྱག་རྒྱའོ། །ཕྱག་རྒྱ་དེ་ཉིད་ཀྱིས་གུང་མོ་གཉིས་ནང་དུ་རྡོ་རྗེ་གུང་མོ་ བཅིང་བའི་སྦྱོར་བས་གཞག་པ་ནི་ཀུ་བེ་རའི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་གུང་མོ་གཉིས་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེའི་སྔགས་ནི་ཨོྃ་ཀུ་བེ་རཱ་ཡ་སྭཱ་ཧཱ། དབང་ལྡན་གྱི་ཕྱོགས་སུ་བལྟས་ཏེ་འདུག་ལ་ལག་པ་དག་གཅིག་ཏུ་སྦྱར་ཏེ་ཐལ་མོ་ སྦྱར་བ་བྱ་སྟེ་སྲིན་ལག་དང་མཐེའུ་ཆུང་ལག་མཐིལ་དུ་རྡོ་རྗེ་བཅིང་བ་བྱས་ཏེ་མཐེ་བོ་ཟུང་དག་གཞན་ལ་བརྟེན་ཅིང་ནང་དུ་བཀུག་སྟེ་བསྣོལ་ལ་གུང་མོ་གཤིབས་ཏེ་བསྒྲེང་བའི་རྒྱབ་ཏུ་མཛུབ་མོ་གཉིས་རྡོ་རྗེའི་རྣམ་པར་གཞག་ལ་དེ་ཉིད་བཀུག་སྟེ་སྟེང་དུ་ཕན་ཚུན་སེན་མོ་སྤྲད་པར་བྱ་བ་ནི་དབང་ལྡན་
- 140a
སྤྱན་དང་པའི་ཕྱག་རྒྱའོ། །དེ་ཉིད་ཀྱི་མཛུབ་མོ་སྔར་བཞིན་རྡོ་རྗེའི་རྣམ་པར་བཟུང་བ་ནི་དབང་ལྡན་གྱི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་མཛུབ་མོ་གཉིས་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །སྔགས་ནི་ཛུཾ་ཛུཾ་ཤི་བ་སྭཱ་ཧཱ། གཡོན་ བརྒྱད་བའི་གནས་པས་འདུག་ལ་ལག་པ་ཐལ་མོ་ཁོང་སྟོང་དུ་སྦྱར་ཏེ་བཞག་ལ་སྟེང་དུ་བལྟས་ཏེ་མཛུབ་མོ་གཉིས་ཀྱི་ལྕགས་ཀྱུ་ནི་ཚངས་པ་ལ་སོགས་པ་སྤྱན་དྲག་བའི་ཕྱག་རྒྱའོ། །དེ་ཉིད་ཀྱི་མཛུབ་མོ་གཉིས་སྔ་མ་ལྟར་གཞག་པ་ནི་དམ་ཚིག་གི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་ མཛུབ་མོ་གཉིས་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །དེ་རྣམས་ཀྱི་སྔགས་ནི་ཨོྃ་ཨཱུརྡྷཱཾ་བྲཧྨ་ཎེ་སྭཱ་ཧཱ། སཱུཪྻ་གྲ་ཧཱ་དྷི་པ་ཏ་ཡེ་སྭཱ་ཧཱ། ཨོྃ་ཙནྡྲ་ནཀྵ་ཏྲཱ་དྷི་པ་ཏ་ཡེ་སྭཱ་ཧཱ། མཉམ་པའི་གོམ་པའི་གནས་པས་འདུག་ལ་ལག་པ་གཉིས་གཅིག་ཏུ་སྦྱར་བ་སྟེ་སོར་མོའི་རྩེ་མོ་རྣམས་ བར་མཚམས་མེད་པར་ཕན་ཚུན་སྦྱར་ཏེ། མཐེ་བོང་ཟླུམ་པོ་བྱས་ལ་འོག་ཏུ་བལྟས་ཏེ་སའི་ལྷ་མོ་ལ་སོགས་པ་མཛུབ་མོ་ལྕགས་ཀྱུས་སྤྱན་དྲང་བ་ནི་འོག་གི་ལྷ་མོ་སྤྱན་དྲང་བའི་ཕྱག་རྒྱའོ། །སྤྱན་དྲང་བའི་ཕྱག་རྒྱ་ལས་སྔར་བཞིན་དུ་མཛུབ་མོ་དག་གཞག་པ་ནི་དམ་ཚིག་གི་ཕྱག་རྒྱའོ། །མཛུབ་ མོ་དག་བརྐྱང་བ་ནི་གཤེགས་སུ་གསོལ་བའི་ཕྱག་རྒྱའོ། །སྔགས་རྣམས་ནི་ཨ་དྷོ་པྲྀ་ཐི་བྱེ་སྭཱ་ཧཱ། ཨ་སུ་རེ་བྷྱཿསྭཱ་ཧཱ། ནཱ་གེ་བྷྱཿསྭཱ་ཧཱ། དེ་ནས་རང་གི་སྔགས་ཀྱིས་ཐམས་ཅད་ལ་འཐོར་འཐུང་ཕུལ་ལ། བདག་དང་སློབ་མའི་ཚོགས་སུ་བཅས་པ་ལ་བགེགས་མེད་པར་མཛོད་ཅིག །ལས་ ཀྱི་དངོས་གྲུབ་ཀྱང་བདག་ལ་སྩོལ་ཅིག་ཅེས་བརྗོད་ལ། ཐམས་ཅད་གཤེགས་སུ་གསོལ་ལོ། །ཡང་ན་དཔུང་བཟང་གི་ཆེད་དུ་གསུངས་པའི་ཚིགས་བཅད་རྣམས་ཀྱིས་གཏོར་མ་དབུལ་ཏེ། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའི་ལྡིང་དང་འདབ་བཟང་ལུས་སྲུལ་པོ། ། དྲི་ཟ་སྲིན་པོ་གདོན་གྱི་ཚོགས་རྣམས་དང་། །གང་སུ་ས་ལ་གནས་པའི་རྫུ་འཕྲུལ་ཅན། །བུ་སྨད་བཅས་ཤིང་གཡོག་འཁོར་བཅས་པ་ལ། །བདག་གི་པུས་མོ་ས་སྟེངས་འདིར་བཙུགས་ནས། །ཐལ་མོ་སྦྱར་ནས་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་སླད་
- 140b
དུ་འདིར་སྤྱོན་ཅིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་གནས་དང་། །རི་བོ་ཀུན་ལ་གང་དག་གནས་པ་དང་། །ཆུ་བོ་ཀུན་དང་ཆུ་བོའི་མདོ་རྣམས་དང་། །རིན་ཆེན་གནས་ན་ལྷག་ པར་གནས་པ་དང་། །མཚོ་དང་རྫིང་བུ་ལྟེང་ཀ་ཆུ་ངོགས་དང་། །གཡའ་ཆུ་སིལ་མ་ཅན་དང་ཁྲོན་པར་གནས། །གྲོང་དང་ཕྱུགས་ལྷས་གྲོང་ཁྱེར་སྟོང་པ་དང་། །ཁང་སྟོང་དང་ནི་ལྷ་ཡི་ཁང་པར་ཡང་། །གཙུག་ལག་ཁང་དང་མཆོད་རྟེན་གནས་དག་དང་། །དཀའ་ཐུབ་གནས་དང་གླང་ ཆེན་བྲེས་དང་ནི། །རྒྱལ་པོའི་དཀོར་ཁང་དག་ན་གང་གནས་དང་། །ལམ་སྲང་བཞི་མདོ་དག་དང་སུམ་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་གཟན་གནས་དག་དང་། །འབྲོག་ཆེན་འཇིགས་སུ་ རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གང་གནས་རྣམས། །དགྱེས་ཤིང་མགུ་བས་ཕྲེང་བ་བྱུག་པ་དྲི། །བདུག་པ་གཏོར་མ་མར་མེ་བསྟོད་པ་འདིས། །གུས་འབུལ་སྣོམས་མཛོད་གསོལ་མཛོད་འཐུང་མཛོད་ཅིག ། ལས་འདི་རྣམས་ཀྱི་འབྲས་བུ་མཆིས་པར་མཛོད། །དེ་ལྟར་གདོན་ལ་མཆོད་པ་བྱས་ནས་ནི། །རྩེ་གཅིག་ཡིད་ཀྱིས་ཕྱོགས་སྐྱོང་མཆོད་པར་བྱ། །དབང་པོ་རྡོ་རྗེ་ཅན་གྱི་ལྷ་ཚོགས་འཁོར་དང་བཅས། །གཏོར་མ་ཁྱད་འཕགས་འདི་དག་བཞེས་སུ་གསོལ། །མེ་དང་གཤིན་རྗེ་བདེན་ བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་དང་། །དབང་ལྡན་ལྷ་སྟེ་འབྱུང་པོའི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་ཀུན་དང་ས་ཡི་ཀླུ་རྣམས་དང་། །རི་ཡི་ལྷ་དང་གསང་བའི་ཚོགས་འདུས་རྣམས། །དཔུང་བཅས་སྡེ་བཅས་བུ་དང་ བཤེས་གཉེན་བཅས། །རང་གི་སྐྱེ་བོའི་ཚོགས་ཤིང་མཉེས་པ་རྣམས། །སོ་སོར་སོ་སོའི་ཐུགས་དགོངས་གཅིག་མཛད་ནས། །རང་རང་ཕྱོགས་སུ་ལེགས་པར་བྱོན་ནས་ནི། །རང་གི་བུ་སྨད་མཛའ་བཤེས་གཉེན་འདུན་དང་། །ནང་མི་དམག་དང་དཔུང་བཅས་ཐབས་ཅིག་ཏུ། །མེ་
- 141a
ཏོག་དྲི་དང་བྱུག་པ་མར་མེ་དང་། །ཞལ་ཟས་གཏོར་མ་འདི་དག་བཞེས་ནས་ཀྱང་། །གསོལ་མཛོད་སྣོམས་མཛོད་ལེགས་པར་འཐུང་མཛོད་ཅིག །ལས་འདི་རྣམས་ཀྱི་འབྲས་བུ་མཆིས་པར་མཛོད། །དེ་ལ་འདི་ནི་ཕྱི་དང་ནང་ཐམས་ཅད་དུ་གཏོར་མ་རབ་ཏུ་ དབུལ་བའི་སྔགས་ཏེ། ཨ་ཀཱ་རོ་མུ་ཁྃ་ས་རྦ་དྷ་རྨཱ་ཎཱ་མཱ་དྱ་ནུ་ཏྭན་ཏྭཱ་ཏ་ཞེས་པའོ། །དེ་ནས་ཉེ་རེག་བྱ་སྟེ་ཤར་སྒོར་མངོན་པར་ཕྱོགས་ཏེ་གནས་པ་ལ། ལས་ཐམས་ཅད་པའི་ཐབ་ཁུང་གི་དབུས་སུ་དཔལ་འཇིག་རྟེན་གསུམ་རྣམ་པར་རྒྱལ་བའི་དཀྱིལ་འཁོར་གྱི་ལྷ་ཐམས་ཅད་ཀྱི་སྔགས་ བརྗོད་ཅིང་མེ་ཏོག་དམར་པོས་ངེས་པར་བཀོད་ལ་སྦྱིན་སྲེག་གི་ཚོགས་དཔལ་རྡོ་རྗེ་ཧཱུྃ་མཛད་ཀྱི་སྔགས་ཀྱིས་བའི་མར་གྱིས་སྲེག་བླུགས་བརྒྱ་རྩ་བརྒྱད་དབུལ་ལོ། །དཔལ་རྣམ་པར་སྣང་མཛད་ལ་སོགས་པའི་སྔགས་ནས་རྡོ་རྗེ་འབེབས་པ་ཁྲོ་བོའི་མཐར་ཐུག་པར་ཀྱང་སྲེག་བླུགས་བདུན་བདུན་ སླར་ཡང་ངོ་། །དེ་ནས་ཇི་ལྟ་བ་བཞིན་དུ་ཐབ་ཁུང་གི་རྣམ་པར་སྣང་མཛད་ལ་སོགས་པ་རྣམས་མེ་ཏོག་ཁོ་ནས་སྤྱན་དྲངས་ལ་རྣམ་པར་སྣང་མཛད་ལ་སོགས་པའི་སྔགས་ཀྱིས་བྲིས་པའི་དཀྱིལ་འཁོར་གྱི་རང་གི་གནས་སུ་དགོད་དོ། །དེ་ནས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ་ བདག་མིང་ཆེ་གེ་ཞེས་བགྱི་བའི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །འདིར་ཡང་དཀྱིལ་འཁོར་ཆེན་པོར་འཇུག་པ་ལ་སྣོད་དང་སྣོད་མ་ཡིན་པ་བརྟག་པར་མི་བྱ་སྟེ། དེ་ཅིའི་སླད་དུ་ཞེ་ན། བཙུན་པ་བཅོམ་ ལྡན་འདས་སེམས་ཅན་ཁ་ཅིག་ནི་སྡིག་པ་ཆེན་པོ་བགྱིད་པ་དེ་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་ཆེན་པོ་འདི་མཐོང་སྟེ་ཞུགས་ནས་ངན་སོང་ཐམས་ཅད་དང་བྲལ་བར་འགྱུར་རོ། །བཅོམ་ལྡན་འདས་ནོར་དང་བཟའ་བ་དང་། བཏུང་བ་དང་། འདོད་པའི་ཡོན་ཏན་ཐམས་ཅད་ལ་ཆགས་པ་དང་། དམ་ཚིག་ལ་མི་འདའ་བ་དང་། སྔགས་སྤྱོད་པ་ལ་སོགས་པ་འདོད་ཅིང་མི་ནུས་པའི་སེམས་ཅན་དག་མཆིས་ཏེ། དེ་དག་ཀྱང་འདིར་ཇི་ལྟར་བྱ་བར་འདོད་པ་བྱ་བའི་ཕྱིར་ཞུགས་པ་རྣམས་ཀྱི་བསམ་པ་ཐམས་ཅད་རྫོགས་པར་འགྱུར་རོ། །བཅོམ་ལྡན་འདས་སེམས་ཅན་ཁ་ཅིག་ནི་གར་དང་།
- 141b
གླུ་དང་། གད་མོ་དང་། རྩེད་མོ་དང་། ཁ་ཟས་ལ་སྤྱོད་པ་ལ་དགའ་བ་ཉིད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་ཆོས་ཉིད་ཁོང་དུ་མ་ཆུད་པས་ལྷའི་རིགས་དང་དཀྱིལ་འཁོར་གཞན་དུ་འཇུག་པར་འགྱུར་གྱི། དེ་བཞིན་དུ་རིགས་ཐམས་ཅད་ཀྱི་དཀྱིལ་འཁོར་རེ་བ་ ཐམས་ཅད་ཡང་དག་པར་རྫོགས་པར་འགྱུར་བ་བླ་ན་མེད་པའི་དགའ་བ་དང་། མགུ་བ་དང་། རངས་པ་རྣམས་འབྱུང་བར་མཛད་པ་དེར་ནི་བསླབ་པའི་གནས་ལ་འཇིགས་ཤིང་སྐྲག་ནས་མི་འཇུག་པ་དག་ཀྱང་མཆིས་ཏེ། ངན་སོང་གི་དཀྱིལ་འཁོར་གྱི་ལམ་དུ་ཇི་ལྟར་གནས་པའི་བདེ་བའི་ བདག་ཉིད་ཀྱི་གནས་སྐབས་ཅན་དེ་དག་ཀྱང་དགའ་བ་དང་། མགུ་བ་དམ་པ་དང་། བདེ་བ་དང་། ཡིད་བདེ་བ་མྱོང་བར་བགྱི་བ་དང་། ངན་སོང་གི་རྒྱུད་ཐམས་ཅད་དུ་འཇུག་པར་ཁ་བལྟས་པའི་ལམ་ལས་བཟློག་པར་བགྱི་བའི་སླད་དུ་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་དུ་འཇུག་ཏུ་རུང་ངོ་། ། བཅོམ་ལྡན་འདས་ཆོས་ལྡན་གྱི་སེམས་ཅན་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དམ་པ་འགྲུབ་པའི་ཐབས་ཀྱིས་སངས་རྒྱས་ཀྱི་བྱང་ཆུབ་འཚོལ་བ་ན། བསམ་གཏན་དང་རྣམ་པར་ཐར་པ་ལ་སོགས་པ་དང་། ས་རྣམས་ལ་འབད་པས་ཉོན་ མོངས་པར་འགྱུར་བདག་ཀྱང་མཆིས་ཏེ། དེ་དག་ཀྱང་རྡོ་རྗེ་ཧཱུྃ་མཛད་ཀྱི་དཀྱིལ་འཁོར་འདི་ཉིད་དུ་ཞུགས་མ་ཐག་ཏུ་དེ་བཞིན་གཤེགས་པ་ཉིད་ཐམས་ཅད་ཀྱང་རྙེད་པར་དཀའ་བ་ཡང་མ་ལགས་ན། དངོས་གྲུབ་གཞན་ལྟ་སྨོས་ཀྱང་ཅི་འཚལ་ཞེས་གསོལ་བར་བྱའོ། །དེ་ནས་སློབ་མ་གཞུག་པར་ བྱ་སྟེ། དེ་ལ་བསླབ་པའི་གཞི་ལྔ་ཡོངས་སུ་བཟུང་བའི་དགེ་བསྙེན་ནམ། དགེ་སློང་ངམ་དགེ་སློང་གི་སྡོམ་པ་ཡོངས་སུ་གཟུང་ཞིང་སློབ་དཔོན་དུ་དབང་བསྐུར་བར་འོས་པ། སློབ་དཔོན་གྱི་ཞབས་དག་ལ་ཕྱག་བྱས་ཏེ། འདི་སྐད་ཅེས་བརྗོད་དེ། བདག་གི་སྟོན་པ་དགའ་ཆེན་ཁྱོད། །བྱང་ཆུབ་ ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སྐྱབས་གསུམ་དག་ཀྱང་བདག་ལ་སྩོལ། །ཞེས་པའོ། །དེ་ནས་སློབ་མ་ལ་རྡོ་རྗེ་གནོད་སྦྱིན་ཡོངས་སུ་བཟླས་པའི་གོས་དམར་པོའི་སྟོད་
- 142a
གཡོགས་སྨད་གཡོགས་དང་། རྡོ་རྗེ་ལྕགས་ཀྱུ་ལ་སོགས་པའི་སྒོ་སྐྱོང་བཞི་བཟླས་པའི་གདོང་གཡོགས་བཅིང་བར་བྱས་ལ་ཕྱག་བཞི་བྱེད་དུ་གཞུག་གོ། །ཡང་ལག་ན་མེ་ཏོག་ཐོགས་པའི་སློབ་མས་སློབ་དཔོན་ལ་ཕྱག་བྱས་ལ་ལག་ན་མེ་ཏོག་ཐོགས་པ་ཉིད་ཀྱིས་ བཤགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་གདབ་པ་བྱས་ལ་འདི་སྐད་ཅེས་བརྗོད་དོ། །གཙོ་བོ་བདག་ལ་སྡོམ་པ་སྩོལ། །ཐུབ་པ་ཉི་མ་མ་ལུས་པའི། །སངས་རྒྱས་རྣམས་ནི་བདག་ལ་དགོངས། །བདག་མིང་ཆེ་གེ་ཞེས་བགྱི་བ། །སློབ་དཔོན་ དབང་དུ་གནས་པ་ལ། །སངས་རྒྱས་རོལ་མོ་འབྱུང་བ་ཡི། །ཕྱིར་མི་ལྡོག་པའི་དགེ་འདུན་ཅན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱིའོ། །གསང་བ་ཐམས་ཅད་རིགས་བསྡུས་པ། །སློབ་དཔོན་ཆེན་པོ་བདག་འཇུག་མཛོད། །ཕྱིར་མི་ལྡོག་པའི་ དབང་བསྐུར་བ། །སྐལ་བ་ཆེན་པོ་བདག་ལ་སྩོལ། །མཚན་རྣམས་རྗེས་སུ་གསོལ་བཏབ་པ། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་བ་ནི་རྨད་བྱུང་ཆེ། །སེམས་ཅན་ཀུན་གྱི་དོན་བགྱིད་ཕྱིར། །བདག་ ནི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་གསོལ། །དེ་ནས་སློབ་དཔོན་གྱི་རིགས་ཐམས་ཅད་ལ་གསོལ་བ་གདབ་པར་བྱ་སྟེ། ཆེ་གེ་མོ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །གསང་བ་ཡིས་ནི་འཁོར་ལོ་འདིར། །འཇུག་ཅིང་བྱང་ཆུབ་སྡོམ་པ་འཚལ། ། དེ་ནས་སློབ་དཔོན་གྱིས་འདི་སྐད་ཅེས་བརྗོད་དོ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །དམ་ཚིག་སྡོམ་པ་བརྟན་པོར་གྱུར། །རྡོ་རྗེ་དྲིལ་བུ་ཕྱག་རྒྱ་ཡང་། །བློ་གྲོས་ཆེན་པོ་ཁྱོད་ཀྱིས་ཟུང་། །བྱང་ཆུབ་ སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །སློབ་དཔོན་དག་ཀྱང་གཟུང་བར་གྱིས། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་ནི་བསྡུས་པ་ནི། །ཉིན་མོ་གསུམ་དང་མཚན་མོ་
- 142b
གསུམ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རབ་སྦྱིན་བྱ། །ཕྱི་དང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཆེན་རིགས་ནི་བསྡུས་པ་ལ། ། སྡོམ་པ་གསུམ་པོ་ཡང་དག་ལྡན། །མཆོད་པའི་ལས་ཀྱང་ཅི་ནུས་བཞིན། །ཡང་དག་ཉིད་དུ་ངེས་གཟུང་གྱིས། །དེ་ལས་གཞན་པ་བཞི་པོ་ཡང་། །འདི་དག་ཕས་ཕམ་པར་ནི་བཤད། །མི་སྤང་དོར་བར་ཡང་མི་བྱ། །རྩ་བའི་ལྟུང་བར་འདི་བཤད་དོ། །ཉིན་མོ་གསུམ་དང་ མཚན་གསུམ་དུ། ཉིན་རེ་ཞིང་ནི་བརྗོད་པར་བྱ། །གང་ཚེ་ཉམས་ན་རྣལ་འབྱོར་པ། །ལྟུང་བ་སྦོམ་པོ་དག་ཏུ་འགྱུར། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱད་ཅིང་། །བརྫུན་ཡང་སྨྲ་བར་མི་བྱའོ། །ཕུང་ཁྲོལ་ཀུན་ གྱི་རྩ་བ་ཡི། །ཆང་ནི་བཏུང་བ་རྣམ་པར་སྤང་། །སེམས་ཅན་གདུལ་ཕྱིར་མ་གཏོགས་པ། །བྱ་བ་མ་ཡིན་ཐམས་ཅད་སྤང་། །དམ་པའི་དྲུང་དུ་གནས་བྱ་ཞིང་། །རྣལ་འབྱོར་པ་རྣམས་བསྙེན་བཀུར་བྱ། །ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་རྣམས་དང་། །ཡིད་ཀྱི་ རྣམ་པ་གསུམ་དག་ནི། །ཅི་ནུས་པས་ནི་རྗེས་སུ་བསྐྱང་། །ཐེག་པ་དམན་ལ་དགའ་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡོངས་མི་སྤང་། །རྟག་ཏུ་མྱ་ངན་འདས་མི་ཆགས། །ལྷ་དང་ལྷ་མིན་གསང་བ་པ། །ཁྱེད་ཀྱིས་བརྙས་པ་མི་བྱ་ཞིང་། །ཕྱག་རྒྱ་ བཞོན་པ་མཚོན་ཆ་དང་། །མཚན་མ་འགོམ་པ་ཡང་མི་བྱ། །འདི་དག་དམ་ཚིག་ཞེས་བཤད་དོ། །དེ་དག་ནི། །བློ་གྲོས་ཁྱེད་ཀྱིས་བསྲུང་བར་བྱ། །དེས་ཀྱང་འདི་སྐད་བརྗོད་པར་བྱ། །སློབ་དཔོན་ཁྱོད་ནི་བདག་ལ་གསོན། །གཙོ་བོ་ཇི་ལྟར་བཀའ་བསྒོ་བ། །དེ་ལྟར་བདག་ནི་བགྱིད་ པར་འཚལ། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །ཞེས་པ་ནས་སེམས་ཅན་མྱ་ངན་འདས་ལ་དགོད་ཅེས་བྱ་བའི་བར་དུ་བརྗོད་པར་བྱའོ། །གང་ཞིག་སྡོམ་པ་མི་འཛིན་པ་དེ་ལ་ནི་གཞུག་པ་ཙམ་སྦྱིན་པར་བྱ་ཞིང་དེང་ཁྱོད་བྱ་བ་ལ་སོགས་པ་བརྗོད་པར་མི་
- 143a
བྱ་སྟེ། སློབ་དཔོན་དུ་དབང་བསྐུར་བ་ཡང་མི་བྱའོ། །དེ་ནས་ཨོྃ་སརྦ་ཡོ་ག་ཙི་ཏ་མུཏྤཱ་ད་ཡཱ་མི་ཞེས་པ་འདིས། བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །དེ་ཡི་སྙིང་གར་སྙིང་པོས་ནི། །རྡོ་རྗེ་རབ་ཏུ་གཞག་པར་བྱ། །སུ་ར་ཏ་ས་ མ་ཡ་སྟྭྃ་ཧོཿབཛྲ་སིདྡྷི་ཡ་ཐཱ་སུ་ཁྃ་ཞེས་པ་འདིས་སོ། །དེ་ནས་རྡོ་རྗེ་ཧཱུྃ་མཛད་དུ་བྱིན་གྱིས་བརླབས་ལ་དྲི་དང་མེ་ཏོག་ལ་སོགས་པས་མཆོད་དེ་མེ་ཏོག་གི་ཕྲེང་བ་གདགས་ཤིང་། གདོང་དྲི་ཞིམ་པོས་བྱུགས་ལ་ཡོན་གྱི་མཆོག་བཟུང་སྟེ། ཕྱི་རོལ་ན་གནས་པ་ལ་བུམ་པའི་ཆུས་དབང་བསྐུར་ལ། ཨོྃ་གྲྀཧྞ་བཛྲ་ས་མ་ཡ་ཧཱུྃ་བྃ་ཞེས་པ་འདིས་ཁྲོ་ཏི་རིནྟི་རི་རང་ཉིད་བཅིངས་ལ་སློབ་མ་འཆིང་དུ་གཞུག་གོ། །རྡོ་རྗེ་བསྡམས་པ་ན་ང་བྱས་ལ། །མཐེ་བོང་རྡོ་རྗེ་དམ་པོ་ཡིས། །ཡིད་ཀྱི་ཁྲོ་བས་དགའ་བྱ་བས། །ཁྲོ་བོ་ཏི་རིནྟི་རི་དྲན། །དེ་ནས་དེ་ཉིད་ཀྱི་མཐེ་བོང་དག་གིས་མེ་ཏོག་གི་ཕྲེང་བ་འཛིན་ དུ་བཅུག་ལ་སྙིང་པོ་འདིས་གཞུག་པར་བྱ་སྟེ། བཛྲས་མ་ཡྃ་བྲ་ཏི་ཤྱཱ་མི་ཞེས་པའོ། །ཤར་གྱི་སྒོར་ཡང་རྡོ་རྗེ་ལྕགས་ཀྱུས་དེ་དགུག་ཅིང་ལྷོར་ཞགས་པས་གཞུག་གོ། །ནུབ་ཏུ་ལྕགས་སྒྲོག་གིས་བཅིང་ཞིང་། བྱང་དུ་རྡོ་རྗེ་འབེབས་པས་དབབ་བོ། །ཡང་ཤར་གྱི་སྒོ་ནས་དེ་བཞིན་དུ་བཅུག་ལ་འདི་ སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་ཀྱིས་དེང་ནས་ངས་ཁྱོད་ལ་རྡོ་རྗེའི་ཡེ་ཤེས་བསྐྱེད་པར་བྱའི། ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྱུར་ན། དངོས་གྲུབ་གཞན་རྣམས་ལྟ་ཅི་སྨོས། ཁྱོད་ཀྱིས་དཀྱིལ་ འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱའོ། །ཁྱོད་དམ་ཚིག་ཉམས་པར་འགྱུར་ཏ་རེ། དེ་ནས་རྡོ་རྗེ་སློབ་དཔོན་རང་ཉིད་ཁྲོ་བོ་ཏི་རིནྟི་རི་ཁ་གྱེན་དུ་བལྟ་བ་དང་བཅས་པས་བཅིངས་ལ། རྡོ་རྗེ་སློབ་མའི་སྤྱི་བོར་བཞག་སྟེ་འདི་སྐད་ཅེས་སྨྲས་ཏེ། འདི་ནི་ཁྱོད་ཀྱི་དམ་ཚིག་གི་རྡོ་རྗེ་ཡིན་ཏེ། གལ་ ཏེ་ཁྱེད་འགའ་ཞིག་ལ་སྨྲས་ན་སྤྱི་བོ་འགེམས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་། མནའི་སྙིང་པོ་ལན་ཅིག་བཟླས་པའི་ཆུ་རྡོ་རྗེ་སློབ་མ་དེ་འཐུང་དུ་གཞུག་གོ། །དེ་ལ་མནའི་སྙིང་པོ་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛོད། །
- 143b
གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བཛྲ་ཨུངྐ་ཋཿཞེས་བྱའོ། །དེ་ནས་སློབ་མ་ལ་འདི་སྐད་ཅེས་སྨྲའོ། །དེང་ནས་བརྩམས་ནས་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི། ངས་འདི་གྱིས་ཤིག་ཅེས་གང་བསྒོ་བ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་ བྱེད་ཅིག །ཁྱོད་ཡ་ང་བ་མ་སྤངས་པར་ཚེའི་དུས་བྱས་ནས་དམྱལ་བར་ལྟུང་བར་འགྱུར་ཏ་རེ་ཞེས་པའོ། །དེའི་རྗེས་ལ་རང་གི་སྙིང་གར་ཡི་གེ་ཨ་རྡོ་རྗེའི་འོད་ཟེར་གྱི་ཕྲེང་བ་དང་ལྡན་པར་བསམ་མོ། །དེ་ནས་སློབ་མའི་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་ཟླ་ བའི་དཀྱིལ་འཁོར་ལ་གནས་པའི་རྡོ་རྗེ་རྩེ་ལྔ་པ་འབར་བ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་བསམས་ཏེ། ཧཱུྃ་ཏྲཱྃ་ཧྲཱིཿཨཿཞེས་པ་འདི་དག་གི་གོ་རིམས་བཞིན་དུའོ། །སྒོ་དབྱེ་བའི་ཕྱག་རྒྱས་རང་དང་སློབ་མའི་སྙིང་གར་ཕྱེ་ལ་རང་གི་སྙིང་གར་ཡི་གེ་ཡྃ་ལས་ཡི་གེ་ཕྱུང་ལ་སློབ་ མའི་སྙིང་གར་གནས་པའི་རྡོ་རྗེ་དབུས་སུ་བློས་བཅུག་ལ་ལུས་ཐམས་ཅད་གང་བར་བསམ་མོ། །འདི་སྐད་ཅེས་བརྗོད་དོ། །དེ་བཞིན་གཤེགས་པ་ཐམས་ཅད་ཀྱིས་ཀྱང་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་ཏུ་གསོལ་ཞེས་སྨྲོས་ཤིག །དེ་ནས་མྱུར་དུ་རྡོ་ རྗེ་སློབ་དཔོན་གྱིས་ཁྲོ་བོ་ཏི་རིནྟི་རི་བཅིངས་ལ་འདི་སྐད་བརྗོད་པར་བྱ་སྟེ། འདི་དེ་དམ་ཚིག་རྡོ་རྗེ་ཡིན། །རྡོ་རྗེ་སེམས་དཔའ་ཞེས་བྱར་གྲགས། །རྡོ་རྗེ་ཡེ་ཤེས་བླ་ན་མེད། །ཁྱོད་ལ་དེ་ཉིད་འབབ་གྱུར་ཅིག །བཛྲ་ཨཱ་བེ་ཤ་ཨཱཿཞེས་པ་བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། དྲུག་ཅུ་དང་། བདུན་ཅུ་དང་། བརྒྱད་ཅུ་དང་། དགུ་བཅུ་དང་། ལན་བརྒྱར་བརྗོད་དེ་ངེས་པར་འབབ་པར་འགྱུར་རོ། །དེ་ནས་རྡོ་རྗེའི་ཁུ་ཚུར་བཅིངས་ལ་སེམས་མ་རྡོ་རྗེ་མའི་ཕྱག་རྒྱ་དྲལ་བར་བྱ་ཞིང་འདི་དག་བརྗོད་དེ། ཨོྃ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀཧྞ་ཧཱུྃ། གྲྀ་ཧྞཱ་པ་ཡ་གྲྀཧྞཱ་ བ་ཡ་ཧཱུྃ། ཨཱ་ན་ཡ་ཧོ་བྷ་ག་བཱ་ན་བཛྲ་བི་དྱཱ་རཱ་ཛ་ཧཱུྃ་ཕཊ། ཨཿཨཿཨཿཨཿཨཿ། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། དྲུག་ཅུ་དང་། བདུན་ཅུ་དང་། བརྒྱད་ཅུ་དང་། དགུ་བཅུ་དང་། ལན་བརྒྱར་བརྗོད་པར་བྱའོ། །བཅོམ་ལྡན་འདས་ཀྱིས་ཀྱང་རྡོ་རྗེ་རླུང་
- 144a
གི་དཀྱིལ་འཁོར་ལ་རྡོ་རྗེ་ཧཱུྃ་གི་རྣམ་པའི་འོད་ཟེར་གྱི་མདོག་དམར་པོ་འབར་བ་གང་བཞིན་པར་བསམ་མོ། །སླར་ཡང་གལ་ཏེ་འབབ་པར་མ་གྱུར་ན། དེའི་ཚེ་དྲིལ་བུ་དང་བཅས་པས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ་རྐང་པ་གཡོན་པས་དེའི་རྐང་པ་ མནན་ལ་སྟེང་གི་ནམ་མཁའི་ཕྱོགས་སུ་རྣམ་པར་སྣང་མཛད་དཔལ་རྡོ་རྗེ་ཧཱུྃ་མཛད་ཀྱི་སྟེང་དུ་དེ་ཉིད་ལ་དབབ་པའི་ཕྱིར་ཁྲོ་བོ་ཧཱུྃ་གི་རྣམ་པའི་འོད་ཟེར་གྱི་ཚོགས་ཀྱིས་མནན་བཞིན་པ་དང་། འོག་ནས་ཀྱང་རྡོ་རྗེ་རླུང་གི་དཀྱིལ་འཁོར་དང་། ཧཱུྃ་གི་རྣམ་པས་བརྡེག་བཞིན་པ་དང་། དེ་བཞིན་ དུ་ཤར་ལ་སོགས་པའི་ཕྱོགས་སུ་བཞུགས་པའི་མི་བསྐྱོད་པ་ལ་སོགས་པ་རྣམས་ཀྱིས་ཧཱུྃ་ཏྲཱྃ་ཧྲཱིཿཨཿཞེས་བྱ་བ་རང་གི་ས་བོན་གྱི་འོད་ཟེར་གྱི་ཚོགས་ཀྱིས་ཡང་དག་པར་འབེབས་པར་མཛད་པར་བསམ་ཞིང་དེ་ལ་དབབ་སྟེ། ཧཱུྃ་བཛྲ་ཨཱ་བེ་ཤ་ཡ་ཨཿཞེས་རྣམ་པ་བརྒྱར་བརྗོད་པར་བྱའོ། །གལ་ ཏེ་སྡིག་པ་མང་བ་ཉིད་ཀྱིས་འབབ་པར་མ་གྱུར་ན་དེའི་ཚེ་སྡིག་པ་དྲལ་བའི་ཕྱག་རྒྱས་དེའི་སྡིག་པ་རྣམས་ཡང་དང་ཡང་དུ་དྲལ་བར་བྱའོ། །ཡམ་ཤིང་འཇག་མ་རྣམས་ཀྱི་མེ། །རབ་འབར་རྡོ་རྗེ་ཁྲོ་བོ་ཡི། །མཉམ་པར་བཞག་པས་དབུལ་བ་ཡིས། །དེ་ཡི་སྡིག་པ་ཐམས་ཅད་ནི། ། ཏིལ་གྱི་སྦྱིན་སྲེག་དེས་ངེས་བསྲེག །ཨོྃ་སརྦ་པཱ་པྃ་ད་ཧ་ན་བཛྲཱ་ཡ་སྭཱ་ཧཱ་ཞེས་བྱ་བ་དང་། ལག་པ་གཡས་པའི་མཐིལ་དུ་ཏིལ་ནག་པོ་ལས་སྡིག་པའི་གཟུགས་བརྙན་བྱས་ལ། ཡི་གེ་ཧཱུྃ་དབུས་སུ་བསམས་ཏེ། མཛུབ་མོ་དང་མཐེ་བོང་དག་གིས་སྦྱིན་སྲེག་བྱའོ། །དེ་ནས་སྦྱིན་སྲེག་ གི་ཐབ་ཁུང་ལས་འབྱུང་བའི་འབར་བའི་ཕྲེང་བ་ཀུན་དུ་འཁྲུགས་པའི་རྡོ་རྗེ་རྣམས་ཀྱིས་དེའི་ལུས་ཀྱི་སྡིག་པ་སྲེག་བཞིན་པར་བསམས་ལ་དེ་ནས་ཡང་རྡོ་རྗེ་བབས་པ་དེ་ཁོ་ན་བཞིན་དུ་བཅིངས་ལ་དབབ་པར་བྱ་སྟེ། ངེས་པར་འབེབས་པར་འགྱུར། དེ་ལྟ་བུས་ཀྱང་གང་ལ་བབ་པར་མ་གྱུར་པ་དེ་ ལ་དབང་བསྐུར་བར་མི་བྱའོ། །བབས་ན་སྐད་ཅིག་མ་དེ་ཉིད་དེའི་མངོན་པར་ཤེས་པ་ལྔ་ལ་སོགས་པ་རྫོགས་པར་འགྱུར་རོ། །དེ་ནས་ཡང་དག་པར་བབས་པར་ཤེས་ནས་ཡང་ཨོྃ་བཛྲ་ས་ཏྭ་སུ་སྃ་གྲ་ཧཱ་ཏ་ཞེས་པ་ལ་སོགས་པའི་གླུ་བརྗོད་ལ། ཁྲོ་བོའི་ཁུ་ཚུར་དང་དེ་བཞིན་གཤེགས་པ་རྡོ་རྗེ་
- 144b
མེའི་ཕྱག་རྒྱ་དྲལ་བར་བྱའོ། །དེ་ཕེབས་ན་རྡོ་རྗེ་སེམས་དཔའ་ཁྲོ་བོའི་ཕྱག་རྒྱ་བཅིང་བར་བྱའོ། །དེའི་ཚེ་སློབ་དཔོན་གྱིས་རྡོ་རྗེ་ཁུ་ཚུར་ཁྲོ་བོའི་ཕྱག་རྒྱས་བཅིང་བར་བྱའོ། །དེ་བཞིན་དུ་ཇི་སྲིད་དུ་གྱུར་ན་དེའི་ཚེ་རྡོ་རྗེ་བཞད་པའི་ཕྱག་རྒྱ་བཅིང་ངོ་། །དེའི་ཚེ་རྡོ་རྗེ་ཆོས་ཁྲོ་བོའི་ཕྱག་རྒྱ་བཅིང་ངོ་། །དེ་ལྟ་ བུས་ཉེ་བར་བྱོན་ཅིང་དགོངས་པར་འགྱུར་རོ། །དེ་ནས་དེའི་ལྕེ་ལ་རྡོ་རྗེ་བསམས་ལ་བྲུ་ཧི་བཛྲ་ཞེས་པ་བརྗོད་དོ། །དེ་ནས་ཐམས་ཅད་སྨྲ་བར་འགྱུར། དེ་ནས་ཕྲེང་བ་དེ་དཀྱིལ་འཁོར་ཆེན་པོར་དོར་ཏེ། །བྲ་ཏཱི་ཙྪ་ཧོཿཞེས་བྱའོ། །དེ་ནས་གང་དུ་བབས་པ་དེ་འདིས་འགྲུབ་བོ། །དེ་ནས་ཨོྃ་པྲ་ཏི་གྲྀཧྞ་ཏྭྃ་ཨི་མྃ་ས་ཏྭ་ མ་ཧཱ་བ་ལ་ཞེས་བྱ་བས་ཕྲེང་བ་དེ་ཉིད་ཀྱི་མགོ་བོར་བཅིང་ངོ་། །དེ་ནས་ཨོྃ་དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེའི་མིག་ནི་བླ་ན་མེད། །ཐམས་ཅད་མིག་ནི་བྱེ་བར་འགྱུར། །ཧེ་བཛྲ་པཱ་ཤྱ་ཞེས་པ་འདིས་གདོང་གཡོགས་དགྲོལ་ལོ། །དེ་ནས་དཀྱིལ་འཁོར་ཆེན་པོའི་རྡོ་རྗེ་ ལྕགས་ཀྱུ་ནས་བརྩམས་ཏེ་ཇི་སྲིད་རྣམ་པར་སྣང་མཛད་ཀྱི་མཐར་ཐུག་པར་བསྟན་ནོ། །དེ་ནས་ཏིཥྛ་བཛྲ་ཞེས་པ་ལ་སོགས་པས་སློབ་མ་སྙིང་གར་གཞུག་པའི་ཕྱག་རྒྱ་དགྲོལ་ལོ། །དེ་ནས་ཕྱི་རོལ་གྱི་དཀྱིལ་འཁོར་དུའམ། ཕྱི་རོལ་དུ་ཟླ་བའི་དཀྱིལ་འཁོར་ཤར་སྒོ་ལ་མངོན་པར་ཕྱོགས་པ་ལེགས་པར་བྲིས་ལ་སློབ་མ་དཔལ་རྡོ་རྗེ་ ཧཱུྃ་མཛད་ཀྱི་ཕྱག་རྒྱ་སེམས་མ་རྡོ་རྗེ་ལ་སོགས་པས་ཀྱང་བྱིན་གྱིས་བརླབས་ལ། ཕྱག་རྒྱ་ཆེན་པོ་དེ་ལ་བཞག་སྟེ་དབང་བསྐུར་རོ། །དྲི་དང་མེ་ཏོག་ལ་སོགས་པས་མཆོད་དེ། མཆོད་ཡོན་དབུལ། གདུགས་དང་། རྒྱལ་མཚན་དང་། བ་དན་ལ་སོགས་པ་དང་། དུང་དང་རོལ་མོ་ལ་སོགས་པའི་སྒྲ་བསྒྲག་པ་དང་། དེ་ནས་བཀྲ་ ཤིས་ཀྱི་ཚིགས་བཅད་རྣམས་ཀྱིས་མངོན་པར་དགའ་བས་དང་པོ་རེ་ཞིག་ཆུའི་དབང་བསྐུར་བ་དང་། ཅོད་པན་དང་། དར་དཔྱངས་དང་། རྡོ་རྗེ་དང་། བདག་པོ་དང་། མིང་གིས་དབང་བསྐུར་བདག་གིས་དབང་བསྐུར་ལ་ཡང་མེ་ཏོག་ལ་སོགས་པ་དང་སྒེག་མོ་ལ་སོགས་པ་མཆོད་པ་རྣམ་པ་བརྒྱད་ཀྱིས་མཆོད་དོ། །སློབ་མ་རྣམས་ ཀྱིས་རྡོ་རྗེ་ཐལ་མོ་སྦྱར་བས་སློབ་དཔོན་ལ་རབ་ཏུ་བཏུད་ལ་ཡོན་གྱི་མཆོག་ཕུལ་ལ་མེ་ཏོག་ལ་སོགས་པའི་དབང་བསྐུར་བ་ཡང་གཟུང་བར་བྱའོ། །སློབ་དཔོན་གྱིས་དབང་བསྐུར་བ་ནི་དཔལ་རྡོ་རྗེ་ཧཱུྃ་མཛད་ཀྱི་ཕྱག་རྒྱས་དེ་ཁོ་ན་བཞིན་དུ་ཇི་ལྟར་ངེས་པར་བསྟན་པའི་གནས་སུ་བཞག་ལ་དེ་ཚིག་གི་ཕྱག་རྒྱ་རྣམས་ཀྱིས་དེའི་ལུས་
- 145a
ལ་དཔལ་རྡོ་རྗེ་ཧཱུྃ་མཛད་ལ་སོགས་པ་བཀོད་དེ་སླར་ཡང་། ཨོྃ་བཛྲ་ཨ་དྷི་པ་ཏི་སྟྭྃ་ཨ་བྷི་ཥིཉྩཱ་མི་དྲྀ་ཌྷོ་མེ་བྷྱ་བ་ཛཿཧཱུྃ་བྃ་ཧོཿཧཱུྃ་ཕཊ་ཞེས་པ་འདི་རྣམ་པར་རྒྱལ་བའི་བུམ་པ་ལ་བརྒྱ་རྩ་བརྒྱད་དམ་སྟོང་ཡོངས་སུ་བཟླས་པ་བྱས་ལ། དེ་ནས་ཨོྃ་བཛྲ་ཨ་བྷི་ཥིཉྩ་ཞེས་པ་འདི་བརྗོད་ཅིང་རྡོ་རྗེ་ཁུ་ཚུར་གྱིས་ རྣམ་པར་རྒྱལ་བའི་བུམ་པ་ནས་ཆུ་བླངས་ལ་ཆུའི་དབང་བསྐུར་བ་བྱིན་ནོ། །འདི་ཡང་བརྗོད་དེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུས་འགྲུབ་བོ། །རྡོ་རྗེ་དྲིལ་བུའི་ཕྱག་རྒྱ་ཡང་། །དཀྱིལ་འཁོར་ཅན་མིན་ན་མི་སྨྲ། །སྐྱེ་བོ་ འདུས་པ་གནས་པ་ནི། །དགོད་དང་མ་དད་པ་ལ་མིན། །དེ་ནས་ཆོ་ག་ཐམས་ཅད་ཉམས་སུ་བླངས་ལ་མཚན་བརྒྱ་རྩ་བརྒྱད་པས་ལེགས་པར་བསྟོད་དེ་ཚིགས་བཅད་ལྔས་རྗེས་སུ་གནང་བ་བྱིན་ནས་གཟེངས་བསྟོད་པ་དང་ལུང་བསྟན་པས་སློབ་མ་ཐམས་ཅད་ལུང་བསྟན་ནོ། །དེ་ནས་གསང་བའི་དབང་བསྐུར་བ་འབྱུང་སྟེ། སློབ་དཔོན་དུ་དབང་བསྐུར་བར་འོས་པ་དཀྱིལ་འཁོར་ཐམས་ཅད་དུ་བཅུག་པ་དེ་ལྟར་མཛོད་ཅིག་ཅེས་བྱའོ། །འདི་ཡི་ལས་ཀྱི་དངོས་གྲུབ་ནི། །ཇི་ལྟར་འདོད་པའི་དངོས་གྲུབ་ཀྱང་། །ཐ་མ་འབྲིང་དང་མཆོག་རྣམས་ནི། །མ་ལུས་ངེས་པར་འཐོབ་པར་འགྱུར། །མཆོག་གི་ས་རྣམས་བགེགས་མེད་འགྲུབ། །དངོས་གྲུབ་ཕྲན་ཚེགས་ སླར་ཅི་ཞིག །སངས་རྒྱས་ཉིད་ཀྱང་སེམས་ཅན་ཉིད། །རྡོ་རྗེ་སེམས་ཉིད་རྙེད་མི་དཀའ། །གང་ལ་དངོས་གྲུབ་ངེས་འབྱུང་དང་། །གང་ལ་སྡིག་པ་གདོན་ཆེན་དང་། །བགེགས་དང་ལོག་འདྲེན་རྣམས་དང་ཡང་། །འཆི་བདག་དང་ནི་བདུད་སྡེ་རྣམས། །འཇིགས་པ་སྣ་ཚོགས་བསྟན་བཅོས་རྣོ། །དངོས་གྲུབ་ལས་འཇོམས་དེ་དག་ནི། །བདག་ ཉིད་ཆེན་པོ་དེ་ལ་ནི། །མི་འབྱུང་སྐྱེ་བར་མི་འགྱུར་རོ། །སྦྱིན་སྲེག་ལས་ཀྱི་ཆོ་ག་ཡིས། །ངེས་པར་དངོས་གྲུབ་མྱུར་རབ་འབྱུང་། །ལྷ་རྣམས་ཀྱང་ནི་ཆེར་མཉེས་ཤིང་། །སྐད་ཅིག་གིས་ཀྱང་རབ་རྙེད་འགྱུར། །ཡམས་དང་ཉེར་འཚེ་སྐྱོན་ལ་སོགས། །ཆེས་ལྕི་ངེས་པར་རིང་དུ་འགྱུར། །དེ་ཡི་ཡུལ་དུ་ནད་དང་གདོན། །རིམས་ལ་སོགས་པ་ མི་འབྱུང་ཞིང་། །མུ་གེ་ཅ་ཅོ་ཆེ་རྣམས་དང་། །ཕ་རོལ་དམག་ཚོགས་ཉམས་པར་འགྱུར། །ལྷ་དང་ཀླུ་རྣམས་སྤྲོ་ཆེན་གྱིས། །བདེ་བར་ཡང་ནི་སྐྱོང་བར་འགྱུར། །རྒྱལ་པོ་ཆེན་པོ་བཞི་རྣམས་དང་། །འཇིག་རྟེན་སྐྱོང་བ་རྒྱུ་སྐར་བཅས། །གནོད་སྦྱིན་རྣམས་དང་གཟའ་ལ་སོགས། །རྫུ་འཕྲུལ་ཆེན་པོ་རྣམས་ཀྱིས་སྐྱོང་། །དེ་ནས་བརྒྱ་
- 145b
བྱིན་ལ་སོགས་ལྷས། །ཡང་དང་ཡང་དུ་ཕྱག་བཙལ་ནས། །རིན་ཆེན་གདུགས་སོགས་མཆོག་རྣམས་ནི། །རྣམ་པ་སྣ་ཚོགས་མཆོད་བྱས་ཏེ། །ཕྱག་ན་རྡོ་རྗེ་རྒྱལ་དབང་ལ། །དག་པའི་བསམ་པས་ཡང་དག་བསྟོད། །སངས་རྒྱས་ཀུན་པས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །རྡོ་རྗེ་རྡོ་རྗེ་འཛིན་རྒྱལ་པོ། །རྡོ་རྗེ་ རྡོ་རྗེ་རྡོ་རྗེ་འཛིན། །རྡོ་རྗེའི་སྐུ་སྟེ་སྐུ་ཆེ་བ། །ཕྱག་ན་རྡོ་རྗེ་ཕྱག་འཚལ་འདུད། །རྡོ་རྗེ་ཡན་ལག་རྡོ་རྗེ་མཆོག །རྡོ་རྗེ་འབར་བ་ཆེར་འབར་བ། །རྡོ་རྗེ་ཤུགས་ཏེ་ཤུགས་ཆེ་བ། །རྡོ་རྗེ་མཚོན་ཆ་མཚོན་ཆ་ཆེ། །ཕྱག་ན་རྡོ་རྗེ་ཕྱག་ཆེན་པོ། །རྡོ་རྗེ་མདའ་སྟེ་རབ་འབིགས་པ། །རྡོ་རྗེ་རྣོན་པོ་རྣོན་པོ་ཆེ། །ཆེ་བའི་ཆེ་བ་རྒྱ་མཚོ་ཆེ། །རྡོ་རྗེ་པདྨ་ བྱང་ཆུབ་ཆེ། །བྱང་ཆུབ་སངས་རྒྱས་རང་བྱུང་བ། །རྡོ་རྗེ་རྒྱ་ཆེན་རྒྱ་ཆེན་ཆེ། །རྡོ་རྗེ་སྒྱུ་མ་རྣམ་སྦྱོང་བ། །རྡོ་རྗེ་རྒྱུ་སྟེ་གནོད་སྦྱིན་ཆེ། །རྡོ་རྗེ་པདྨ་རྣམ་སྦྱོང་བ། །རྡོ་རྗེ་ཁྲོ་བོ་གཏུམ་པོ་ཆེ། །རྡོ་རྗེ་དགྲ་སྡང་འཇོམས་པའི་གཙོ། །རྡོ་རྗེ་འཇིགས་བྱེད་སྲུང་བ་ཆེ། །རྡོ་རྗེ་ལྕགས་ཀྱུ་དོན་ཡོད་བྱེད། །རྡོ་རྗེ་རོ་ལངས་རོ་ལངས་ཆེ། །རྡོ་རྗེ་སྲིན་པོ་ཟ་བ་ པོ། །རྡོ་རྗེ་གནོད་སྦྱིན་གནོད་སྦྱིན་ཆེ། །རྡོ་རྗེ་གདོན་ཏེ་གདོན་གྱི་མཆོག །འཇིགས་རུང་སྐྲག་བྱེད་མ་རུངས་པ། །དྲག་པོ་འཇིགས་བྱེད་རྔམ་བྱེད་པ། །བསྒྲུབ་དཀའ་སྒྲུབ་པ་ལེགས་པ་སྟེ། །རྡོ་རྗེ་ལེགས་པ་དགྱེས་མཛད་པ། །རྡོ་རྗེ་དགའ་བ་དགའ་བ་ཆེ། །དགའ་བའི་རྡོ་རྗེ་དབང་བྱེད་པ། །རྡོ་རྗེ་གཟི་བརྗིད་གཟི་བརྗིད་ཆེ། །འབར་འོད་གཤིན་རྗེ་ མཐར་བྱེད་པ། །རྡོ་རྗེ་དྲག་པོ་དྲག་པོ་ཆེ། །འོད་མཐུག་པ་ནི་མཐུག་པ་ཆེ། །ནམ་མཁའ་དང་ནི་མཉམ་པ་ཡི། །རེ་བ་ཐམས་ཅད་རྫོགས་མཛད་པ། །རྡོ་རྗེ་དབང་བསྐུར་རིན་ཆེན་མཆོག །རྡོ་རྗེ་རྒྱལ་མཚན་ཡོན་ཏན་མཚོ། །རྡོ་རྗེ་ཡེ་ཤེས་ཡེ་ཤེས་ཆེ། །རིག་པ་བྱེ་བའི་ཚོགས་ཀྱིས་མཆོད། །ཧ་ལ་ཧ་ལ་ནག་པོ་ཆེ། །སྒྲ་ཆེན་རྣམ་པར་སྒེག་པ་པོ། ། རྡོ་རྗེ་འདོད་པ་འདོད་པ་ཆེ། །སྙིགས་མའི་རྙོག་མ་འཇོམས་པ་པོ། །དུས་ཀྱི་གཡོ་བ་གཅོད་པའི་མཆོག །ཞལ་ནི་ལྗགས་ཀྱི་གློག་འཕྲོ་མ། །རྡོ་རྗེ་མེ་སྟེ་རབ་ཏུ་གཏུམ། །གཏུམ་པའི་རབ་སྣང་འཇོམས་པ་པོ། །ཉི་མ་སྟོང་གི་འོད་ཟེར་ཞལ། །སྤྱན་དམར་འཇིགས་པར་མཛད་པ་པོ། །ཁྲོ་བོ་དུ་མའི་འོད་འཕྲོ་བ། །ཕྱག་ནི་དུ་མའི་མཚོན་ཆ་བརྒྱ། །དུ་མའི་ཞལ་ ཏེ་སྐུ་ཡང་སྟོང་། །འཁྱིལ་ཞིང་སྐུ་ཡང་འཁྱིལ་པ་ལགས། །ཐུགས་ཆོས་བདག་ཉིད་སྐུ་མི་མངའ། །རྣམ་པར་རྟོག་པ་མ་ལུས་སྤངས། །མ་རིག་འཇོམས་པ་ཚངས་པ་སྟེ། །འདོད་ཆགས་ཞེ་སྡང་དྲི་མཐར་མཛད། །སྒྱུ་མ་ཁྱབ་འཇུག་རྡོ་རྗེ་ཅན། །མདུང་ཅན་རྩེ་གསུམ་འཆང་འཕྲོག་བྱེད། །འདོད་ཆགས་ཞེ་སྡང་གཏི་མུག་ཆེ། །སྲིད་དང་སྲིད་མིན་
- 146a
རྣམ་སྦྱོང་བ། །ཞི་ཞིང་དུལ་ལ་དག་པ་ཆེ། །སངས་རྒྱས་སངས་རྒྱས་རབ་རྟོགས་མཛད། །སངས་རྒྱས་བདག་ཉིད་སངས་རྒྱས་སྐུ། །རྡོ་རྗེ་ལེགས་སྐྱེས་རྡོ་རྗེ་སེམས། །ཀུན་དུ་བཟང་པོ་ཆེར་བཟང་བ། །མཚན་རྣམས་ཀུན་གྱིས་མཚན་པ་པོ། །ཁམས་ཀུན་བདག་ཉིད་ཁྱབ་པ་པོ། །ཐམས་ཅད་རྡོ་རྗེའི་བདག་ཉིད་གཙང་། ། གང་གིས་འདི་བྲིས་ཀློག་པ་དང་། །རྟག་ཏུ་དོན་ནི་འཆང་བྱེད་དམ། །དྲན་ནམ་ཉན་པར་བྱེད་ཀྱང་རུང་། །ཕྱག་ན་རྡོ་རྗེ་མཉམ་པར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བརྒྱ་བྱིན་དང་ཚངས་པ་ལ་སོགས་པ་ལྷའི་འཁོར་དང་བཅས་པའི་ལྷ་དང་མི་དང་། ལྷ་མ་ཡིན་དང་། དྲི་ཟ་དང་། གནོད་སྦྱིན་དང་། སྲིན་པོ་ལ་སོགས་པ་ ཕན་པ་དང་བདེ་བ་ཐོབ་པའི་ཕྱིར་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཕྱོགས་གཅིག་པ་རྫོགས་སོ།། །།རྒྱ་གར་གྱི་མཁན་པོ་ བླ་མ་རྗེ་བཙུན་ཆེན་པོ་དེ་བེནྡྲ་དེ་བའི་ཞབས་དང་། བླ་མ་པཎ་ཆེན་སྐྱེས་བུ་ཆེན་པོ་མཱ་ཎི་ཀ་ཤྲཱི་ཛྙཱ་ནའི་ཞལ་སྔ་ནས་གུས་པར་མཉན་ཏེ་ཆག་ལོ་ཙཱ་བ་ཤཱཀྱའི་དགེ་སློང་ཆོས་རྗེ་དཔལ་གྱིས་བསྒྱུར་ཞིང་ཞུས་ཏེ་གཏན་ལ་ཕབ་པ།། །།སྤྲེའུ་ལོ་དབྱུག་གུ་ཟླ་བའི་མར་ངོའི་ཚེས་ བཅུ་གསུམ་ལ། གཙུག་ལག་ཁང་ཆེན་པོ་དཔལ་ཐང་པོ་ཆེར་དབུ་བཙུགས་ནས། སྨིན་དྲུག་ཟླ་བའི་ཡར་ངོའི་ཚེས་བཅུ་གཉིས་ཀྱི་སྔ་དྲོའི་བར་ཞག་བཅོ་ལྔར་འགྲོ་བའི་ཚེ་དཔལ་འདྲེན་གྱི་ལྷའི་གདིངས་སུ་ཚར་བར་བགྱིས་སོ། །དཔལ་ལྡན་རྒྱུད་རྒྱལ་ངན་སོང་སྦྱོང་བ་ཡི། །བརྟག་པ་ཕྱོགས་ གཅིག་སྔར་གྲགས་ཁ་ཆེ་ནས། །ཆོས་རྒྱལ་སྐུ་དྲིན་པཎ་ཆེན་སྒྲ་བསྒྱུར་མཆོག །སྐྱེས་ཆེན་རྣམས་ཀྱིས་ལེགས་པར་དར་བར་མཛད། །འདི་ནི་དཔལ་ལྡན་ཀུན་དགའ་སྙིང་པོ་དང་། རྗེ་བཙུན་འཇིགས་མེད་འབྱུང་གནས་སྦས་པ་ཡི། །མན་ངག་ལ་བརྟེན་རྒྱ་གར་བལ་པོ་ན། །ཡོངས་གྲགས་བླ་ མའི་དྲིན་ལས་ཁོ་བོས་བསྒྱུར། །སྒྲ་གཞུང་བླ་མའི་གསུང་བཞིན་དུ། །གུས་བསྒྱུར་ནོངས་པ་མཁས་ཆེན་རྣམས། །བཟོད་མཛད་དེ་དགེས་འགྲོ་བ་ཀུན། །འགྲོ་མགོན་ཐུབ་ཆེན་ཉིད་གྱུར་ཅིག། །།
- 146b
༄༅༅། །རྒྱ་གར་སྐད་དུ། སུ་པྲ་ཏིཥྛ་ཏནྟྲ་སྃ་གྲ་ཧ། བོད་སྐད་དུ། རབ་ཏུ་གནས་པ་མདོར་བསྡུས་པའི་རྒྱུད། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ ཚིག་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བརྡུངས་པ་དང་། བྲིས་པ་དང་། འབུར་དུ་བྱས་པ་ལ་སོགས་པ་རབ་ཏུ་གནས་པའི་ཆོ་ག་གསུངས་པ། སློབ་དཔོན་དེ་ཉིད་བཅུ་ཤེས་ཤིང་། །མཚན་ཉིད་ཀུན་དང་ཡང་དག་ལྡན། །ཕྱག་རྒྱ་སྔགས་དང་ཆོ་ག་ཤེས། ། ལས་རྣམས་ཀུན་ལ་མཁས་པས་སོ། །སྐུ་གཟུགས་མཚན་ཉིད་ལྡན་པ་སྟེ། །ཞི་བ་ལ་སོགས་རོ་ཡིས་ལྡན། །ཚད་ཀྱིས་ཚད་ལ་བབ་ཅིང་བཟང་། །དེ་འདྲ་རབ་ཏུ་གནས་པར་འགྱུར། །ཡང་ཐོག་མཆོད་རྟེན་སོགས་གནས་དང་། །ཁྱིམ་དང་ལྷ་ཡི་གནས་རྣམས་སུ། །སངས་རྒྱས་ ལ་སོགས་རབ་གནས་ནི། །ཆོ་ག་དག་དང་ལྡན་བྱས་ལ། །ཆོ་ག་དམན་པས་མི་བྱ་སྟེ། །རབ་གནས་རྟག་པར་བཀྲ་མི་ཤིས། །འཇིག་རྟེན་འདིར་ཡང་སྡུག་བསྔལ་ལ། །འཇིག་རྟེན་ཕ་རོལ་འཇིགས་པ་ཆེ། །དེ་བས་འབད་པ་ཐམས་ཅད་ཀྱིས། །དངོས་གྲུབ་འདོད་པས་ནན་ཏན་བྱ། ། ཆོ་ག་བདག་ཉིད་ནུས་པ་ཡིས། །བརྟག་པ་ལས་གསུངས་ཚུལ་ལེགས་པ། །དེས་བྱས་བསོད་ནམས་ཆེ་བ་ཡིན། །མཐོང་དང་མི་མཐོང་རྣམས་སུ་སྐྱེ། །སྐུ་གཟུགས་སྔགས་ཀྱི་མཚན་ཉིད་ཀྱིས། །དེ་ལ་བྱིན་རླབས་འཇུག་པར་འགྱུར། །གང་དུ་སྐུ་གཟུགས་རྫོགས་པ་ལ། །བྱིན་མ་ བརླབས་པར་རིང་གནས་ན། །དེ་ལ་བཀྲ་མི་ཤིས་འབྱུང་ཞིང་། །ཇི་སྲིད་མཆོད་པ་དེར་མི་འོས། །དཔེར་ན་སྐྱེས་བུ་ལ་ལ་ཞིག །རིག་པའི་མཚན་ཉིད་སྤངས་པ་ན། །འཇིག་རྟེན་ཀུན་གྱིས་མཆོད་མི་བྱེད། །དེ་དེ་བཞིན་དུ་གཟུགས་བརྙན་དེ། །རབ་གནས་མ་བྱས་གཟུགས་བརྙན་ལ། ། གང་གིས་མཆོད་ཅིང་ཕྱག་བྱེད་པ། །དམ་ཚིག་བྲལ་ཞིང་སྔགས་དམན་པས། །སྦྱིན་སྲེག་ཐལ་བ་འབྲས་མེད་མཚུངས། །དེ་བཞིན་དུ་ཡང་སྔགས་གནས་པས། །ཆོས་ལྡན་མཆོད་པ་བྱེད་པ་གང་། །དེ་ཡི་ལས་ཀྱི་རྣམ་སྨིན་གྱིས། །སྐྱེ་བ་རུ་ནི་མཆོད་པར་འགྱུར། །བྱང་ཆུབ་སེམས་
- 147a
དཔའ་རྣམས་ཀྱིས་གསོལ་པ། བཅོམ་ལྡན་འདས་ཆོས་ཐམས་ཅད་རབ་ཏུ་མི་གནས་པ་ལ་ཇི་ལྟར་ན་རྒྱལ་བ་རྣམས་ཀྱིས་རབ་ཏུ་གནས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་ཀུན་ནི་རབ་ཏུ་བཞུགས། །རབ་ཏུ་གནས་པ་གང་ནའང་ མེད། །ཀུན་དུ་མཁའ་ལྟར་གནས་པ་ལ། །ཅིག་ཤོས་ཀྱིས་ནི་རབ་ཏུ་བརྟགས། །འཇིག་རྟེན་ཀུན་རྫོབ་ལ་བརྟེན་ནས། །རབ་ཏུ་གནས་པ་རབ་ཏུ་བརྟག །དམ་པའི་དོན་དུ་དཔྱད་པ་ན། །གང་ཞིག་གང་གིས་གང་དུ་བརླབ། །གཟོད་མ་ནས་ནི་སྐྱེ་མེད་ལ། །ཅི་འདྲ་ཇི་ལྟར་རབ་ཏུ་གནས། ། དང་པོའི་ལས་ཅན་སེམས་ཅན་རྣམས། །རྟོགས་པའི་རྒྱུ་རུ་མཛད་པར་ཟད། །དང་པོ་རེ་ཞིག་ཡོངས་སུ་བརྟགས་པའི་གནས་ཡོངས་སུ་སྦྱངས་པར་གདུགས་དང་། རྒྱལ་མཚན་དང་། བླ་རེ་དང་། བ་དན་བསྒྲེང་བ་རྣམས་སུ་མཆོག་ཏུ་གསོལ་བ་འདེབས་པས་གསོལ་བ་བཏབ་པའི་བླ་མ་སྤོས་ དང་མེ་ཏོག་ལ་སོགས་པ་དང་ལྡན་པས་ཚེས་དང་རྒྱུ་སྐར་ཤིས་པ་ལ་སློབ་དཔོན་ལེགས་པར་མཉམ་པར་གཞག་པས་རབ་ཏུ་གནས་པའི་སར་འཁོད་དོ། །སངས་རྒྱས་དང་བྱང་ཆུབ་སེམས་དཔའ་ལ་སོགས་པ་རིགས་ལྔ་དང་རབ་ཏུ་འབྲེལ་པ་ཡིན་ལ། དེ་དང་རབ་ཏུ་འབྲེལ་བའི་དཀྱིལ་འཁོར་གྱི་ཆོ་གས་ ས་ཡོངས་སུ་གཟུང་ཞིང་ཐིག་གདབ་པ་དང་། རྡུལ་ཚོན་གྱི་ལས་དང་། གསོལ་བ་གདབ་པ་ལ་སོགས་པ་བྱས་ལ་རྩ་བའི་སྔགས་སམ། རྒྱུད་ཀྱི་དགོངས་པས་སའི་གཏེར་དུ་ནོར་བུའམ། སོར་གདུབ་བཅུག་ལ། དེ་ནས་ལྷའི་ཁང་པར་རང་གི་སློབ་མ་དང་པོར་བཅུག་ལ། རྣམ་པ་ཀུན་གྱི་མཆོག་ དང་ལྡན་པའི་དེ་བཞིན་གཤེགས་པ་ལ་སོགས་པའི་སྐུར་བལྟས་ལ། ལྷ་ལ་མངོན་པར་ཕྱོགས་ཏེ་ཕྱག་འཚལ་ཞིང་། ཇི་ལྟར་འབྱོར་པའི་མེ་ཏོག་གི་ཐལ་མོ་དང་དྲི་ཆུ་གཙང་མས་ཆོ་ག་བཞིན་དུ་བརྟགས་ལ། ཏིང་ངེ་འཛིན་ལ་ལེགས་གནས་པས། །ཞལ་བསིལ་མེ་ཏོག་སྤོས་སོགས་ལྡན། ། རྣམ་པར་མི་རྟོག་སེམས་ཀྱིས་ནི། །མཆོད་ཡོན་རྣམས་ནི་ཕུལ་བྱས་ལ། །མཉམ་པར་གཞག་པས་སྔགས་འདི་ཡིས། །ལན་གསུམ་བར་དུ་བརྗོད་པར་བྱའོ། །ཨོྃ་ས་མ་ཡ་སྟྭྃ་ས་མ་ཡ་ཧོ་ཨ་ཧྃ། ཇི་ལྟར་སངས་རྒྱས་ཐམས་ཅད་ནི། །དགའ་ལྡན་དུ་ནི་གནས་པ་ལས། །ལྷ་མོ་སྒྱུ་
- 147b
འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་འདིར་བཞུགས་ཤིག །འདི་རུ་མགོན་པོ་རྟག་བཞུགས་ནས། །བྱང་ཆུབ་སེམས་ནི་བསྐྱེད་པ་དང་། །ཆེ་གེ་མོ་ཡི་དོན་སླད་དུ། །བདག་གི་འབྱོར་པ་ཉིད་ཀྱིས་ནི། །ཅི་འབྱོར་པ་ཡི་མཆོད་པ་རྣམས། །མེ་ཏོག་ལ་སོགས་འདི་ བཞེས་ཤིག །བདག་དང་སློབ་མར་བཅས་པ་ལ། །རྗེས་སུ་བརྩེ་བར་དགོངས་སུ་གསོལ། །ཀུན་གྱིས་འདི་ལ་བྱིན་བརླབ་ཅིང་། །དེ་ཉིད་དུ་ནི་བཞུགས་པར་རིགས། །སྐུ་གཟུགས་སྟ་གོན་ལེགས་བྱས་ལ། །དེ་ནས་རྟག་པར་མཉམ་པར་བརྩམ། །སློབ་མ་སྨྱུང་བར་གནས་པ་ ཡིས། །དེ་ལྟར་ཐམས་ཅད་སྤྱད་བྱས་ལ། །སྔགས་པས་མཆོད་པའི་ཆོ་ག་སོགས། །བླ་མ་ཡིས་ནི་གང་བསྒོ་བ། །མ་ཚོགས་པ་ཀུན་བསྒྲུབ་པར་བྱ། །མཆོད་སྦྱིན་འབྲས་བུ་ཆེན་པོར་འགྱུར། །དེ་ནས་སྔགས་པས་སྙན་གསན་དབབ། །གདན་ལ་བསྟིམ་བྱས་མཆོད་ཡོན་དང་། ། མཆོད་པ་གཏོར་མ་སྤོས་མེ་ཏོག །དེ་བཞིན་དུ་ནི་མར་མེ་དག །སྔགས་དང་ལྡན་པས་དབུལ་བར་བྱ། །སྐུ་གཟུགས་མདུན་དུ་ཕྱག་བྱས་ལ། །ན་བཟའ་སེར་པོས་གཡོག་བྱ་ཞིང་། །དེ་ནས་སྔགས་པས་འདུ་བྱ་བ། །ཁྱད་པར་དུ་ནི་བདུག་པར་བྱ། །དེ་དག་བསྒྲུབ་ཕྱིར་དེ་ལ་ནི། །དེ་ ལ་ལན་ཅིག་གཏོར་བྱ་བ། །དེ་དང་དེ་ལ་སྔགས་འདིས་ནི། །མེ་དང་དེ་ནས་ཆུ་ལ་གཏོར། ཨོྃ་སརྦ་པ་པྃ་ད་ཧ་ན་བཛྲཱ་ཡ་སྭཱ་ཧཱ་ཞེས་བྱ་བས་སོ། །དེ་ནས། རྣམ་པ་ཀུན་གྱི་མཆོག་ལྡན་པའི། །དོན་བཞིན་དུ་ནི་བསྒོམ་བྱ་སྟེ། །དེ་ནས་གནས་གསུམ་རྣམས་སུ་བསྟིམ། །ཨོྃ་ཧཱུྃ་ཨཱཿཡི་ཡི་ གེ་གསུམ། ཨོྃ་ནི་སྤྱི་བོར་བསྟིམ་བྱ་ཞིང་། །སྙིང་གར་ཧཱུྃ་གི་ཡི་གེར་འགྱུར། །ངག་གི་ཕྱོགས་སུ་ཨཱཿཡིག་གོ། །སྐུ་གསུང་ཐུགས་ནི་བསྒྲུབ་པར་བྱ། །ཡང་ན། གང་གི་ས་བོན་གང་ཡིན་པ། །དེ་ཡི་ཐུགས་ཀར་དེ་དགོད་དོ། །ཕྱག་རྒྱ་སྔགས་ཀྱིས་རབ་བསྐུལ་ཞིང་། །ཅི་རིགས་པར་ནི་སྙན་ གསན་དབབ། །གསེར་རམ་དངུལ་ལམ་ཟངས་མའམ། །རྡོ་དང་དེ་བཞིན་ཤིང་དང་ནི། །སའམ་དུང་ཆོས་དེ་བཞིན་ཏེ། །ཡང་ན་ཤིང་ལོའི་འདབ་མ་རྣམས། །མཆོད་ཡོན་སྣོད་དུ་སྦྱར་བར་བྱ། །དེ་བཞིན་བུམ་པ་གསེར་ལ་སོགས། །ཟངས་མའི་སྣོད་ཀྱི་མཆོད་ཡོན་ནི། །མཆོད་ཡོན་སྣོད་ལ་རབ་
- 148a
ཏུ་ཤིས། །གལ་ཏེ་ནུས་པས་མ་རྙེད་ན། །ཇི་ལྟར་རྙེད་པས་ཀུན་དུ་བྱ། །དེ་ནས་དྲི་ཡི་ཏིལ་མར་སོགས། །དཱུ་ར་བའི་ཕོན་གྱི་པིར་གྱིས་སྦྱང་། །བཀྲ་ཤིས་རྔ་ལ་སོགས་པའི་སྒྲ། །ན་ཆུང་རྣམས་ཀྱིས་དེ་བཞིན་བརྗོད། །ཏིལ་མར་ལ་སོགས་སྔགས་ཀྱིས་ནི། ། ཨོྃ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། བུམ་པ་ལྔའམ་ཡང་ན་བརྒྱད། །ཙནྡན་ལ་སོགས་རྣམས་ཀྱིས་བྱུག །སྣ་ཚོགས་དྲི་ཆུས་དགང་བ་དང་། །འཁོར་ལོར་བྱས་ལ་མངོན་པར་བསྔགས། །བུ་མོས་བཀལ་བའི་སྲད་བུའམ། །ཡང་ན་རས་བལ་སྐུད་པའང་རུང་། །ཚོན་ཆེན་ པོས་ནི་བསྒྱུར་བྱས་ལ། །དེ་ལ་སྔགས་ཀྱིས་དཀྲི་བར་བྱ། །སྨན་ལྔ་རིན་ཆེན་ལྔ་དང་ནི། །མེ་ཏོག་འབྲས་བུར་ལྡན་པ་དེ། །མེ་ཏོག་ཡུངས་ཀར་དང་ལྡན་ཞིང་། །བུམ་པ་མངོན་པར་བསྔགས་པར་བྱ། །གཙུག་ཏོར་རྣམ་རྒྱལ་ཞེས་བྱ་དང་། །གཟི་བརྗིད་གཞན་གྱིས་མི་རྫི་དང་། །བཀྲ་ཤིས་ ཞི་རྣམས་སྔགས་ཀྱིས་ནི། །ཁྲུས་ཀྱི་ཆེད་དུ་མངོན་པར་བསྔགས། །འཇམ་པའི་ཏིལ་མར་དག་དང་ནི། །ཨུ་དུམ་བཱ་རའི་ལྕུག་མ་བཟང་། །འཁར་བའི་སྣོད་ཀྱི་ནང་དག་ཏུ། །བཀོད་ལ་རབ་ཏུ་དབུལ་བར་བྱ། །དྲི་ལྔ་ཡིས་ནི་དེ་དག་བྱུག །ས་བོན་གྱིས་ནི་དེ་དག་བྱུག །སློབ་མ་ཚོགས་དང་ བཅས་པ་ཡིས། །སྔགས་ཀྱི་གཙང་སྦྲས་བཀྲུ་བར་བྱ། །བཀྲ་ཤིས་ཞེས་བྱ་ཡིད་འོང་བའི། །བློ་དང་ལྡན་པས་ཚིགས་བཅད་བརྗོད། །ཆོ་ག་བཞིན་དུ་མངོན་དབང་བསྐུར། །སྔགས་ནི། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་ པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཞེས་བྱ་བ་ལ་སོགས་པས་སོ། །ཨོྃ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ལུགས་མ་རྣམས་ནི་དངོས་སུ་བཀྲུ། །རི་མོ་རྣམས་ནི་མེ་ལོང་ལའོ། །ངག་བྱེད་ལྔས་ནི་སྔོན་དུ་བསྒོ། །དཱུར་པ་ཡིས་ནི་མཉེ་བར་བྱ། །རས་སམ་ ལག་པ་དག་གིས་ནི། །བློ་དང་ལྡན་པས་སྐུ་ལུས་ཕྱི། །གུར་གུམ་མར་དང་བཅས་པས་བསྐུ། །གོས་ཟུང་དག་ཀྱང་སྐུ་ལ་གསོལ། །བློ་དང་ལྡན་པས་སྔགས་འདི་ཡིས། །དཀྱིལ་འཁོར་དབུས་སུ་བཞུགས་སུ་གསོལ། །ཨོྃ་བཛྲ་དྷི་བ་ས་སེ་སྭཱ་ཧཱ། ཨོྃ་བཛྲ་གནྡྷེ་སྭཱ་ཧཱ། ཨོྃ་བཛྲ་ཨཱ་བ་
- 148b
ར་ཎ་བི་ཤུདྡྷེ་སྭཱ་ཧཱ། །བློ་ལྡན་གྱིས་རང་དམ་ཚིག་བསྐུལ། །ཕྱག་རྒྱ་སྔགས་ཀྱིས་དབང་བསྐུར་ལ། །ཇི་ལྟར་འོས་པར་མངོན་དབང་བསྐུར། །ཨོྃ་ཧཱུྃ་ཨྃ་ཛྲཱིྃ་ཁྃ། དེ་ལྟར་ཅོད་པན་བཅིང་བྱས་ལ། །གདན་ལ་ལེགས་པར་བཞུགས་གསོལ་ཏེ། །བརྟག་པ་ལས་གསུངས་ ཚུལ་གྱིས་སོ། །མདུན་ཕྱོགས་སུ་ནི་མ་བུ་བཅིང་། །ཡོབ་མིན་ཞིང་དྲང་བ་ཡིས། །དེ་ལྟར་སྐུ་གཟུགས་མཛེས་པར་དགོད། །དེ་ལྟར་མིན་ན་སྐྱོན་འབྱུང་འགྱུར། །མེ་ཏོག་སྤོས་དང་དེ་བཞིན་དྲི། །མར་མེ་ན་བཟའ་སོགས་འབྱོར་དྲི། །དེ་ཀུན་སྔགས་དང་ལྡན་པ་ཡིས། །ལྷ་ རྣམས་ལ་ནི་དབུལ་བར་བྱ། །ཨོྃ་བཛྲ་པུཥྤེ་ཨཱཿཧཱུྃ་ཞེས་བྱ་བ་འདི་ལ་སོགས་པས་སོ། །མཆོག་གི་མེ་ཏོག་འདི་དེ་ནི། །ཆུ་དང་ཐང་ལས་དེ་བཞིན་སྐྱེས། །མཆོག་ཏུ་དད་པས་ཁྱེད་ལ་འབུལ། །ཅི་བདེ་བར་ནི་སོ་སོར་བཞེས། །ལྷན་ཅིག་སྐྱེས་དང་སྦྱར་ལས་བྱུང་། །མཆོག་ཏུ་བདུག་ པ་འདི་དེ་ནི། །བདག་གི་དད་པས་འབུལ་ལགས་ཀྱིས། །ཅི་བདེ་བར་ནི་བཞེས་སུ་གསོལ། །ལྷན་ཅིག་སྐྱེས་དང་སྦྱར་ལས་བྱུང་། །མཆོག་ཏུ་གྱུར་པའི་དྲི་འདི་ནི། །བདག་གི་དད་པས་འབུལ་ལགས་ཀྱིས། །ཅི་བདེ་བར་ནི་བཞེས་སུ་གསོལ། །མུན་པ་འཇོམས་བྱེད་སྣང་བའི་ མཆོག །མར་དང་ཏིལ་གྱི་མར་མེ་འདི། །ཡང་དག་ཡེ་ཤེས་སྤེལ་བྱའི་ཕྱིར། །དད་པས་བདག་གིས་དབུལ་བར་བགྱི། །བཟའ་དང་བཅའ་བ་ཕུན་སུམ་ཚོགས། །ཁ་དོག་དྲི་རོ་རྣམས་དང་ལྡན། །ཐམས་ཅད་ལྡན་པའི་ལྷ་ཡི་བཤོས། །བདག་གིས་དབུལ་གྱིས་སོ་སོར་བཞེས། །དེ་ ལ་སོགས་པ་གང་ཡང་རུང་། །ཅུང་ཟད་ཅི་འབྱོར་སྐུ་གཟུགས་ལ། །དེ་དག་ཐམས་ཅད་འདི་ཉིད་ཀྱིས། །རིམ་པ་ཡིས་ནི་དབུལ་བར་བྱ། །སྔགས་ཀྱི་གཙང་སྦྲ་ཙཱ་རུ་བྱ། །དེར་ནི་གསེར་གྱི་རང་བཞིན་གྱི། །ཐུར་མས་སྤྱན་ནི་དབྱེ་བར་བྱ། །ཞལ་ཟས་དེར་དབུལ་བློ་ལྡན་པས། །ཨོྃ་ ཙཀྵུ་ཤྩཀྵུཿས་མནྟ་ཙཀྵུ་བི་ཤོ་དྷ་ནི་སྭཱ་ཧཱ། ཨོྃ་དྷྱཱ་ན་ས་མཱ་དྷི་པྲཱི་ཎ་ནེ་སྭཱ་ཧཱ། །དེ་ལྟར་བཟླས་ནས་དེ་ནས་ཡང་། །སློབ་མ་རབ་ཏུ་བཅུག་བྱས་ལ། །ཁྱོད་ཀྱིས་ང་ལ་གང་གསོལ་བའི། །སྐུ་གཟུགས་དག་ནི་ཁྱད་པར་དུ། །ཇི་ལྟར་གསུངས་པའི་རབ་གནས་པར། །དེ་དག་དོན་ནི་ངས་བྱས་ཏེ། །
- 149a
དེ་རྣམས་དོན་ནི་གྲུབ་ཟིན་གྱིས། །ཅི་བདེ་བར་ནི་མཆོད་པར་བྱོས། །དེ་ནས་དམ་ཚིག་དབང་བསྐུར་བར། །ཁྱོད་ལ་བྱས་ཀྱིས་སྲེག་བླུགས་ནི། །སྟོང་ངམ་ཡང་ན་དེ་ཡི་ཕྱེད། །སྔར་གསུངས་བར་མས་འབྲུ་རྣམས་ཀྱིས། །འོ་མ་ཅན་གྱི་བུད་ཤིང་ལ། །སྲེག་ཁུང་ གྲུ་བཞིར་སྲེག་བླུགས་བྱ། །དེ་ཉིད་མར་དང་འོ་མ་ཡིས། །ལྷག་མ་ཙཱ་རུར་ཕུལ་བྱས་ལ། །བདག་དང་སློབ་མ་ཐམས་ཅད་ནི། །ཞི་དང་རྒྱས་པ་འཕེལ་བར་བྱ། །ཨོྃ་བཛྲ་ཨཱ་ཡུ་ཥེ་སྭཱ་ཧཱ། །ཨཱ་གཙྪ་ཧ་རི་པིངྒ་ལེ་ཏེ་ཛ་ཏེ་ཛ་ཧ་ལོ་ཧི་ཏ་ཀྵ་དེ་ཧི་ད་པ་ཡ་ཨི་དཾ་ཙ་ལྱེ་ཀཱརྱན་ཀུ་རུ་སྭཱ་ཧཱ། ཨོྃ་བཛྲ་པུཥྚཱ་ཡ་སྭཱ་ཧཱ། །དེ་ལྟར་བྱས་ལ་འབད་པ་ཡིས། །ཁྲི་ཡི་སྟེང་དུ་བཞུགས་པར་བྱ། །སྐུ་གཟུགས་ཀྱི་ནི་སུམ་འགྱུར་ཆའི། །ཚད་ཙམ་དུ་ནི་རབ་ཏུ་བརྟག །ཨོྃ་སུ་པྲ་ཏིཥྛ་བཛྲ་སྭཱ་ཧཱ། །མེ་ཏོག་སྤོས་སོགས་སྔོན་འགྲོ་བའི། །ཕྱོགས་སྐྱོང་རྣམས་ཀྱང་མཆོད་པར་བྱ། །ཨོྃ་ཨིནྡྲཱ་ཡ་ སྭཱ་ཧཱ་ཞེས་བྱ་བས་དབང་ལྡན་ལ་ཐུག་གི་བར་དུ་རོལ་མོའི་སྒྲ་བྱས་ལ་ཡང་དག་པར་མཆོད་དེ། གཤེགས་སུ་གསོལ་བར་བྱ་བ་ནི། །རྫོགས་སངས་རྒྱས་དང་དེ་ཡི་སྲས། །ཚངས་སོགས་ལྷ་ཡི་ཚོགས་རྣམས་ལ། །གང་དག་ཆོ་ག་མ་ཚང་བ། །དེ་དག་བཟོད་པ་མཛད་པར་རིགས། །ཀུན་ དུ་ཞི་དང་རྒྱས་པ་རུ། །ཡོན་བདག་ཚེ་ལ་རབ་མཛད་ནས། །སངས་རྒྱས་ཡུལ་དུ་གཤེགས་ནས་ནི། །སླར་ཡང་འབྱོན་པར་མཛད་དུ་གསོལ། །ས་དང་ཆུ་དང་མེ་རླུང་གི། །ལྷ་རྣམས་ཀུན་གྱིས་སྐུ་གཟུགས་ལ། །བསྐལ་པ་བརྒྱ་རུ་བསྲུང་གནས་མཛོད། །དགྱེས་ཤིང་ཡིད་ བཟང་གྱུར་ནས་སུ། །སློབ་དཔོན་སློབ་མར་བཅས་པ་ཡི། །བུ་དང་ཚ་བོ་བསྲུང་མཛད་ནས། །རང་གནས་བདེ་བར་གཤེགས་སུ་གསོལ། །དཔྱིད་ཟླ་ར་བའམ་དཔྱིད་ཟླ་འབྲིང་། །དགུན་དང་དཔྱིད་ཀྱི་ཐ་ཆུངས་ལ། །དབྱར་ར་དེ་བཞིན་དབྱར་འབྲིང་པོ། །ཉི་མ་བྱང་དུ་བལྟས་པ་ཡི། ། དཀར་པོའི་ཕྱོགས་ནི་གཉིས་པའོ། །རིམ་བཞིན་དེ་ལྟར་གསུམ་པའམ། །གང་ཚེ་གཟའ་དང་རྗེས་མཐུན་ན། །ནག་པོའི་ཕྱོགས་ལའང་བརྩམ་པར་བྱ། །གང་ཚེ་ཐམས་ཅད་མཐུན་གྱུར་ན། །མི་རྣམས་ཡུན་དུ་འཕེལ་བར་བྱེད། །བཅོ་ལྔ་དེ་བཞིན་བརྒྱད་དང་ལྡན། །བཅུ་གསུམ་
- 149b
པ་ཡང་དེ་བཞིན་ནོ། །གནམ་སྟོང་དང་ནི་དེ་བཞིན་དུ། །བཅུ་བཞི་པ་ལའང་བྱ་བ་མིན། །ཐམས་ཅད་དུ་ནི་ཆུ་སྨད་དང་། །སྣར་མ་གྲོ་བཞིན་དེ་བཞིན་ཏེ། །ལག་པ་སྣྲུབས་དང་སྣྲོན་དང་ནི། །རྒྱལ་དང་ཆུ་སྨད་དེ་བཞིན་ནོ། །ཁྲུམས་སྨད་ཀྱང་ནི་དེ་བཞིན་ཏེ། །རྒྱུ་སྐར་འདི་རྣམས་ ཐམས་ཅད་དུ། །སྐྱེ་དགུ་འཕེལ་ཞིང་དེ་ཡིས་ནི། །རབ་ཏུ་གནས་པའི་མཆོག་ཏུ་བྱེད། །སྐར་མ་དབོ་ལ་རབ་གནས་བྱ། །དེས་ནི་ཤེས་རབ་ཆེན་པོར་འགྱུར། །ཡིད་ལ་འདོད་པ་གང་ཅིའང་རུང་། །དངོས་གྲུབ་མེ་བཞིས་སྟེར་བར་འགྱུར། །ལུས་ལས་ཤེས་པ་ཡང་དག་པ། །སྣྲུབས་ སམ་ཡང་ན་གྲོ་བཞིན་གྱིས། །ལག་གིས་སྐལ་བཟང་སྣར་མས་ནི། །གཞན་དག་ལས་ནི་རྒྱལ་བར་བྱེད། །མགོ་ཡིས་ཞི་བ་ཉེ་བར་སྟོན། །ཆུ་སྟོད་ཀྱིས་ནི་བུ་དག་གསོན། །རྟག་པར་དངོས་གྲུབ་ཁྲུམས་སྨད་ཀྱིས། །རྒྱལ་གྱིས་རྟག་པར་ཚེ་རིང་འགྱུར། །སྣྲོན་གྱིས་མཆོག་ཏུ་བདེ་བར་བྱེད། །ལྷ་མཚམས་ ཀྱིས་ནི་མཆོག་སྟེར་འགྱུར། །ཕུར་བུ་ལག་དང་པ་བ་སངས། །ཟླ་བ་གཟའ་སོགས་ཤེས་བྱ་སྟེ། །འདི་རྣམས་གཟའ་ལྡན་ལས་བྱས་ན། །རབ་ཏུ་གནས་པ་མཆོག་ཏུ་དགེ། །གསུམ་པ་དྲུག་པ་བདུན་པ་དང་། །བཅུ་དང་བཅུ་གཅིག་ལ་ཟླ་བ། །གཉིས་པ་བཞི་པ་དེ་བཞིན་བརྒྱད། །བཅུ་དང་བཅུ་གཅིག་ རྣམས་ལ་ལག །གཉིས་དང་དེ་བཞིན་བདུན་པ་དགུ། །དེ་བཞིན་ཕུར་བུ་བཅུ་གཅིག་ལ། །དུས་སྦྱོར་ཞི་བ་ལ་བརྟེན་ནས། །དེ་ལ་ལྷག་པར་གནས་པར་བྱ། །དྲུག་བདུན་བཅུ་པ་དོར་བ་ཡིས། །པ་བ་སངས་ཉིད་དགེ་བ་ཡིན། །དེ་ལྟར་གཟའ་རྣམས་ཐམས་ཅད་ཀྱི། །སྟོབས་ལྡན་མི་ལྡན་དེར་ ཤེས་བྱ། །གང་ཚེ་ཞི་བའི་གཟའ་རྣམས་དང་། །ཞིང་རྣམས་དགེ་བ་གང་ཡིན་པ། །དང་པོ་ལྔ་པ་གསུམ་དེ་ཡིན། །ནོར་འཇོམས་རྣམས་ནི་སྤང་བར་བྱ། །རྗེས་སུ་མཐུན་པར་བྱེད་པ་པོས། །སྐད་ཅིག་དེ་ལ་ཡོངས་འགྲུབ་ཅིང་། །ཇི་ལྟར་གསུངས་བཞིན་ཀུན་བྱས་ན། །རབ་ཏུ་གནས་པ་མཆོག་ འགྱུར་ཞིང་། །འཁོར་ལོས་སྒྱུར་རྒྱལ་དབང་ཕྱུག་ནི། །ཐོབ་འགྱུར་དེ་ལ་ཐེ་ཚོམ་མེད། །གཟའ་དང་རྒྱུ་སྐར་དེར་མེད་དེ། །བགེགས་དང་ལོག་པར་འདྲེན་པའང་མེད། །གཟའ་རྣམས་ཐམས་ཅད་རྗེས་མཐུན་ཞིང་། །བགེགས་དང་རྒྱུ་སྐར་ལྷ་རྣམས་ཉིད། །དེ་རུ་གྲུབ་པར་ཀུན་གནས་ཤིང་། །
- 150a
གཟུགས་བརྙན་མཆོད་རྟེན་ལ་སོགས་ཀྱི། །དངོས་གྲུབ་དག་ནི་སྟེར་བར་བྱེད། །ཡིད་ཀྱིས་ཅུང་ཟད་གང་བསམས་པ། །སྐྱེ་དང་སྐྱེ་བར་འགྲུབ་པར་འགྱུར། །རྒྱན་རྣམས་མ་ལུས་པ་ཡིས་ནི། །ཕྱི་ནས་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་ པ། །གཞན་དག་ཀྱང་ནི་མཆོད་པར་བྱ། །དེ་ནས་དེ་དག་ཐམས་ཅད་ལ། །དགའ་བས་འདི་དག་བརྗོད་པར་བྱ། །ཇི་ལྟར་གསུངས་པའི་མཆོད་པ་རྣམས། །བདག་ལ་མཐུན་པའི་ནུས་པ་མེད། །དེ་ཕྱིར་བདག་ལ་ཁྱེད་བཟོད་མཛོད། །སྔགས་ཀྱི་གཙང་སྦྲ་བཟའ་བཅའ་དག ། གཟུགས་བརྙན་དག་ལ་སྦྱིན་པར་བྱ། །བདེ་གཤེགས་ལྷག་མ་འདི་དག་ནི། །ཟོ་ཞིག་སྡིག་པ་འབྱང་བར་འགྱུར། །ཞེས་བྱ་བས་སོ། །གླང་པོ་རྟ་གླང་ཤིང་རྟ་ནོར། །ཡོན་གྱི་དམ་པ་དབུལ་བར་བྱ། །དེ་ནས་དེ་ལ་ནན་ཏན་གྱིས། །ལོངས་སྤྱོད་གཡོ་བ་དབུལ་བར་བྱ། ། གལ་ཏེ་ལྷ་ཉིད་དགྱེས་འདོད་ན། །བླ་མ་གུས་པས་དགྱེས་བྱ་ཞིང་། །དེ་ལྟར་རྣམ་པ་ཐམས་ཅད་དུ། །བླ་མ་ཡང་དག་མཉེས་པར་བྱ། །དེ་ནས་ཡང་དག་བརྟུལ་ཞུགས་ཅན། །དགེ་སློང་དགེ་བསྙེན་དགེ་སློང་མ། །མཆོག་ཏུ་གུས་པས་མཆོད་བྱས་ལ། །ཇི་ལྟར་འོས་པའི་ ཡོན་ཡང་དབུལ། །དུང་དང་རོལ་མོའི་སྒྲ་ལ་སོགས། །བཟང་པོའི་གླུ་དང་གར་རྣམས་ཀྱིས། །གཉེན་དང་རིགས་རྒྱུད་འཁོར་རྣམས་ཀྱིས། །རོལ་མོ་ཆེན་པོ་མཚན་མོ་དབུལ། །དེ་ལྟར་ཐམས་ཅད་བྱས་ཟིན་ནས། །གང་རུང་མཆོད་སྦྱིན་དཀྱིལ་འཁོར་ལ། །ཕུལ་ལམ་འབུལ་ བར་བྱེད་པ་རྣམས། །སློབ་དཔོན་ལ་ནི་དབུལ་བྱ་ཡི། །བཟོ་བོ་ལ་ནི་མི་སྦྱིན་ཞིང་། །དགེ་སློང་རྣམས་ལའང་སྦྱིན་མི་བྱ། །སློབ་དཔོན་མཆོག་གི་ལྷ་ཡིན་ཏེ། །ནོར་རྣམས་ཐམས་ཅད་དེ་ལ་དབུལ། །དེ་ནས་དཀྱིལ་འཁོར་བྱུག་བྱ་སྟེ། །བ་ཡི་ལྕི་བས་བྱུག་བྱ་ཞིང་། །རྡུལ་ཚོན་ཆུ་བོར་ དོར་བར་བྱ། །དྲི་ཡིས་ཡང་དག་ལེགས་པར་བྱུག །རབ་ཏུ་གནས་པ་མདོར་བསྡུས་པའི་ཆོ་གའི་རྒྱུད་རྫོགས་སོ།། །།ཁ་ཆེའི་པཎྜི་ཏ་ཆེན་པོ་ཛྙཱ་ན་བཛྲ་དང་། ལོ་ཙཱ་བ་འབྲོ་དགེ་སློང་ཤེས་རབ་གྲགས་པས་བསྒྱུར་བའོ།། །།
- 150b
༄༅༅། །རྒྱ་གར་སྐད་དུ། ཤྲཱི་པ་ར་མཱ་དི་ནཱ་མ་མ་ཧཱ་ཡཱ་ན་ཀ་ལཱ་རཱ་ཛཱ། བོད་སྐད་དུ། དཔལ་མཆོག་དང་པོ་ཞེས་བྱ་བ་ཐེག་པ་ཆེན་པོའི་རྟོག་པའི་རྒྱལ་པོ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་ དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱིས་བརླབས་དང་། དམ་ཚིག་དང་མཁྱེན་པའི་བྱེ་བྲག་རྣམ་པ་ཐ་དད་པ་ཐམས་ཅད་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེ་ཐམས་ཅད་ཀྱི་ཅོད་པན་གྱིས་ཁམས་གསུམ་དུ་དབང་བསྐུར་བ་བརྙེས་པ། དེ་བཞིན་ གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་དང་ལྡན་པ། རྣལ་འབྱོར་ཅན་ཆེན་པོའི་དབང་ཕྱུག །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ཀྱི་མཉམ་པ་ཉིད་ཐུགས་སུ་ཆུད་པ་སྣ་ཚོགས་ཀྱི་བྱ་བ་མཛད་དེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་ཀྱི་རེ་ བ་ཐམས་ཅད་ཡོངས་སུ་སྐོང་བའི་ཕྲིན་ལས་མཛད་པ་ཐུགས་རྗེ་ཆེ་བ། རྣམ་པར་སྣང་མཛད་ཆེན་པོ་རྟག་པ། དུས་གསུམ་གྱི་མཉམ་པ་ཉིད་ལ་བཞུགས་པ། སྐུ་དང་གསུང་དང་ཐུགས་ཐམས་ཅད་རྡོ་རྗེ་དེ་བཞིན་གཤེགས་པ་ཐམས་ཅད་བཞུགས་ཤིང་། བསྔགས་པ། བསྟོད་པ། ནོར་བུ་ཆེན་ པོ་དང་། རིན་པོ་ཆེས་སྤྲས་པ། ཁ་དོག་སྣ་ཚོགས་པའི་དྲིལ་བུ་བཏགས་པ། དར་གྱི་བ་དན་དང་མེ་ཏོག་གི་ཕྲེང་བ་དང་རྔ་མ་དང་དྲ་བ་དང་དྲ་བ་ཕྱེད་པ་དང་། ཟླ་བ་རླུང་གིས་བསྐྱོད་པ་རྣམས་ཀྱིས་ཉེ་བར་མཛེས་པར་བྱས་པའི་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་ པོའི་གནས་ན། བྱང་ཆུབ་སེམས་དཔའ་བྱེ་བ་ཕྲག་བརྒྱད་དང་། ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་ པོ་ནམ་མཁའི་སྙིང་པོ་དང་། བྱང་ཆུབ་སེམས་སེམས་དཔའ་ཆེན་པོ་རྡོ་རྗེ་ཁུ་ཚུར་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། བྱང་ཆུབ་སེམས་དཔའ་སེམས་
- 151a
དཔའ་ཆེན་པོ་ནམ་མཁའི་མཛོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་བརྒྱད་དང་ཐབས་ཅིག་སྟེ། ཡོངས་སུ་བསྐོར་ཅིང་ མདུན་གྱིས་བལྟས་ནས་ཆོས་སྟོན་ཏེ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་སྒོ་ཞེས་བྱ་བ་ ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཡང་དག་པར་སྟོན་ཏེ། འདི་ལྟར་རབ་ཏུ་དགའ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །འདོད་ཆགས་ཀྱི་མདའ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རེག་ པ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྡུག་པའི་འཆིང་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ཐམས་ཅད་ལ་དབང་ཕྱུག་དང་དབང་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་ དཔའི་གནས་སོ། །ལྟ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དགའ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྲེད་པ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། ། བསྙེམས་པ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རྒྱན་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ཡིད་ཚིམ་པར་བྱེད་པ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྣང་ བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ལུས་བདེ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །གཟུགས་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྒྲ་རྣམ་པར་དག་
- 151b
པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དྲི་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རོ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དེ་ཅིའི་ཕྱིར་ཞེ་ན། འདི་ལྟར་ཆོས་ ཐམས་ཅད་ནི་ངོ་བོ་ཉིད་ཀྱིས་རྣམ་པར་དག་པ་སྟེ། ཆོས་ཐམས་ཅད་ངོ་བོ་ཉིད་ཀྱིས་སྟོང་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །བཛྲ་ཧཱུྃ། ལག་ན་རྡོ་རྗེ་སུ་ལ་ལས་ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་གནས་བསྒྲུབ་པ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ འདི་ལན་ཅིག་ཐོས་ན་ཡང་། དེ་བྱང་ཆུབ་ཀྱི་སྙིང་པོའི་བར་དུ་ཤེས་བྱའི་སྒྲིབ་པ་ཐམས་ཅད་ཆོད་པ་དང་། ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་དང་། ལས་ཀྱི་སྒྲིབ་པ་ཆེན་པོ་བསགས་ཀྱང་། སེམས་ཅན་དམྱལ་བ་ལ་སོགས་པ་ངན་སོང་རྣམས་སུ་ནམ་ཡང་སྐྱེ་བར་མི་འགྱུར་རོ། །སྡིག་པ་ཡང་ བྱས་མ་ཐག་ཏུ་སྡུག་བསྔལ་མེད་པར་བྱང་བར་འགྱུར་རོ། །སུ་ཞིག་འཛིན་པའམ་ཉིན་རེ་བཞིན་ཀློག་པ་དང་། ཁ་ཏོན་དུ་བྱེད་པ་དང་། ཚུལ་བཞིན་ཡིད་ལ་བྱེད་པ་དེ་ཚེ་འདི་ཉིད་ལ་ཆོས་ཐམས་ཅད་ཀྱི་མཉམ་པ་ཉིད་རྡོ་རྗེའི་ཏིང་ངེ་འཛིན་ཐོབ་པས་ཆོས་ཐམས་ཅད་ལ་དབང་ཕྱུག་ཏུ་འགྱུར་རོ། །ཆོས་ ཐམས་ཅད་ལ་དགའ་བ་དང་། མགུ་བ་དང་། མཆོག་ཏུ་དགའ་བ་མྱོང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་བཅུ་དྲུག་གིས་དེ་བཞིན་གཤེགས་པ་ཉིད་དམ། རྡོ་རྗེ་འཛིན་པ་ཉིད་འཐོབ་པར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེ་དེ་བཞིན་ གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་དཀྱིལ་འཁོར་ཐམས་ཅད་པ། རྡོ་རྗེ་དབྱིངས་མཐའ་དག་གིས་སེམས་པའི་མཆོག །ཁམས་གསུམ་པོ་མཐའ་དག་ན་འཇིག་རྟེན་གསུམ་པོ་མ་ལུས་པ་ལས་རྣམ་པར་རྒྱལ་བ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ འདུལ་བར་སྤྱོད་པ། དོན་ཐམས་ཅད་གྲུབ་པ། ལག་ན་རྡོ་རྗེ་མཐའ་ཡས་པ་ཐམས་ཅད་པ་དམ་ཚིག་ཆེན་པོ་བ། །རྡོ་རྗེ་གསང་བའི་སེམས་ཅན་ཆེན་པོ་དུ་མས་གཡོག་བྱས་པ་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་དོན་འདི་སྟོན་ཏེ། བཞིན་རབ་ཏུ་འཛུམ་ཞིང་ལག་པ་གཡོན་པ་རྡོ་རྗེ་བསྒྱིངས་ཏེ་
- 152a
ཐོག་མའི་རྡོ་རྗེ་ཆེན་པོ་གསོར་ནས་རང་གི་སྙིང་གར་སྟོད་པའི་ཚུལ་གྱིས་འཛིན་ཅིང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ་རང་གི་དེ་ཁོ་ན་ཉིད་ཀྱི་སྙིང་པོ་འདི་སྨྲས་སོ། །ཧཱུྃ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཛིན་པ་ དང་བཅས་པ་འཇིག་རྟེན་གྱི་ཁམས་ཐམས་ཅད་ནས་རྗེས་སུ་མཉེས་པ་བརྟན་པོས་མཉེས་པར་བྱས་ཏེ་བཀུག་ནས་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་ཆེན་པོར་བཅུག་སྟེ། དམ་ཚིག་གིས་བཅིངས་ནས་དབང་དུ་བྱས་ཏེ་དངོས་གྲུབ་ཐམས་ཅད་གྲུབ་བོ། ། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བདེ་བ་ཆེན་པོའི་བསྙེམས་པའི་ཕྱག་རྒྱ་བཅིངས་ནས་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པས་བཞུགས་སོ། །དེ་ནས་ཕྱག་ན་རྡོ་རྗེ་གསང་བ་ཆེན་པོ་རྡོ་རྗེའི་དམ་ཚིག་འབྱུང་ བ་དཀྱིལ་འཁོར་བྱིན་གྱིས་རློབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་དབྱིངས་ཀྱི་བྱིན་གྱིས་བརླབས་པ་ཆེན་པོ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་ པོ་དམ་པ་སྟེ། །དེ་ཉིད་དང་པོ་དམ་ཚིག་ཆེ། །རྡོ་རྗེ་བྱིན་བརླབས་ཞེས་བྱའོ། །གྲུ་བཞིར་བགྱི་ཞིང་སྒོ་བཞི་དང་། །ཁྱམས་རྣམས་ཀྱིས་ནི་ཡོངས་བསྐོར་བ། །རྟ་བབས་བཞི་དང་ཡང་དག་ལྡན། །འོད་ཟེར་འབར་བ་འཁྲིགས་པའི་འོད། །དཀྱིལ་འཁོར་གྱི་ནི་གྲྭ་རྣམས་དང་། །སྒོ་ཁྱུད་ ཀྱི་ནི་མཚམས་རྣམས་སུ། །ཟླ་བ་ཕྱེད་ལ་རབ་གནས་པའི། །རིན་ཆེན་ཀུན་གྱིས་ཉེ་བར་མཛེས། །རྩེ་མོ་སྣ་ཚོགས་བ་དན་ནི། །དྲིལ་བུ་མཆོག་བཏགས་རླུང་གིས་བསྐྱོད། །མེ་ཏོག་ཆུན་འཕྱང་མེ་ལོང་སྤྲས། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་དུ་འཁོར་ལོ་ནི། །དཀྱིལ་ འཁོར་བརྒྱད་དང་མཉམ་པ་རུ། །རྡོ་རྗེ་ཐིག་གིས་ཐིག་བཏབ་ལ། །རྡོ་རྗེ་འཁོར་ལོ་ཞེས་བྱར་བཤད། །དེ་ཡི་དབུས་སུ་ཅི་རིགས་པར། །སངས་རྒྱས་སྐུ་ནི་གཞག་བྱ་སྟེ། །འཛུམ་བཅས་ཟླ་བའི་མདོག་ཅན་ལ། །རྡོ་རྗེ་བསྙེམས་པ་འཛིན་པའི་མཆོག །རྡོ་རྗེ་ཕྲེང་སོགས་ཀྱིས་སྤྲས་
- 152b
ཤིང་། །སྣ་ཚོགས་འབར་བ་འཁྲིགས་པའི་འོད། །པདྨའི་གདན་ལ་བཞུགས་པར་ནི། །ལུགས་མའམ་མངོན་པར་འདུས་བྱས་པའོ། །རང་གི་སྙིང་པོ་ཀུན་བཟླས་ཏེ། །དེ་ཚེ་དཀྱིལ་འཁོར་བརྟག་པར་བྱ། །རྡོ་རྗེ་སེམས་སོགས་སེམས་དཔའ་རྣམས། །སྙིང་པོ་ཉིད་ཀྱིས་ ཡང་དག་དགོད། །རྡོ་རྗེ་ཤུགས་ཀྱིས་རྒལ་ནས་ནི། །དཀྱིལ་འཁོར་ཐམས་ཅད་ཡང་དག་བསྡུས། །གཞག་གམ་ཡང་ན་བྲི་བར་བྱ། །ཚོགས་རྣམས་ཀུན་དུ་སྟོན་པའོ། །མདུན་དུ་རྡོ་རྗེ་སེམས་དཔའ་ནི། །སངས་རྒྱས་ཀུན་གྱི་དབུ་རྒྱན་ཅན། །རྡོ་རྗེ་མཚོན་ནི་གསོར་བར་བརྩོན། ། དམར་སྐྱ་དག་ནི་ངེས་པར་དགོད། །སངས་རྒྱས་ཀྱི་ནི་གཡས་ལོགས་སུ། །རྡོ་རྗེ་ཀཱི་ལི་ཀཱི་ལ་ནི། །ཡན་ལག་ཀུན་གྱིས་ཡོངས་འཁྱུད་པ། །རྡོ་རྗེའི་གཟུགས་ཅན་ཉི་མའི་འོད། །རྒྱབ་ཏུ་རྡོ་རྗེ་འདོད་པ་ནི། །ཆུ་སྲིན་གྱི་ནི་རྒྱལ་མཚན་ཐོགས། །སྔོ་སྐྱའི་མདོག་ཅན་ཅི་རིགས་པར། །བློ་ དང་ལྡན་པས་གཞག་པར་བྱ། །གཡོན་དུ་རྡོ་རྗེ་བསྙེམས་པ་ནི། །བསྙེམས་པའི་རྡོ་རྗེ་གཉིས་ཀྱིས་ནི། །རྡོ་རྗེ་བསྙེམས་པ་གཉིས་འཛིན་པ། །བཙོ་མའི་གསེར་དང་འདྲ་བར་དགོད། །སངས་རྒྱས་ཀྱི་ནི་མཚམས་རྣམས་སུ། །མེ་ཏོག་ལ་སོགས་ཀྱིས་མཚན་ཅིང་། །ཐལ་མོ་སྤྱི་བོར་ལེགས་ འཇོག་པའི། །མཆོད་པ་ཆེན་པོ་གཞག་པར་བྱ། །ཕྱི་ཡི་དཀྱིལ་འཁོར་མཚམས་རྣམས་སུ། །ལྷ་མོའི་ཚོགས་རྣམས་དགོད་པར་བྱ། །སྒོ་ཡི་དབུས་ནི་ཐམས་ཅད་དུ། །གཟུགས་མཚན་ལ་སོགས་བསྡུས་པ་དགོད། །སངས་རྒྱས་དཀྱིལ་འཁོར་ཅན་བརྒྱད་ནི། །རྡོ་རྗེ་འཛིན་སོགས་བྲི་ བར་བྱ། །རྡོ་རྗེ་འཁོར་ལོ་ཐམས་ཅད་དུ། །སངས་རྒྱས་རྡོ་རྗེ་འཛིན་གྱིས་བསྐོར། །ཕྱི་ཡི་དཀྱིལ་འཁོར་གནས་རྣམས་སུ། །འདོད་པའི་དབང་ཕྱུག་བྲི་བྱ་སྟེ། །མདུན་དུ་འཇིག་རྟེན་གསུམ་རྒྱལ་པོ། །འདོད་པའི་ཚངས་པ་ཞི་བྱེད་མཆོག །དེ་ནས་དཀྱིལ་འཁོར་ཆེན་པོ་འདིར་འཇུག་པ་ལ་ སོགས་པའི་ཆོ་ག་རྒྱས་པ་འབྱུང་སྟེ། དེ་ལ་དང་པོ་ཉིད་དུ་ཅི་སྐད་བཤད་པའི་ཆོ་ག་འདིར་ཞུགས་པའི་སློབ་དཔོན་ནི། རྡོ་རྗེ་ཆེན་པོའི་སློབ་དཔོན་དང་། དཀྱིལ་འཁོར་ཐམས་ཅད་ཀྱི་སློབ་དཔོན་དང་། དམ་ཚིག་ཐམས་ཅད་ཤེས་པ་དང་། ཆོས་ཐམས་ཅད་རིག་པ་དང་། ལས་ཐམས་ཅད་སྒྲུབ་
- 153a
པ་དང་། དངོས་གྲུབ་ཐམས་ཅད་གྲུབ་པ་དང་། བཅོམ་ལྡན་འདས་རྡོ་རྗེ་སེམས་དཔས་བྱིན་གྱིས་བརླབས་པ་དང་། དབང་བསྐུར་བ་ཐམས་ཅད་ཐོབ་པ་དང་། ཐམས་ཅད་ཤེས་པ་དང་ལྡན་པ་དང་། མཆོད་པ་ཐམས་ཅད་དང་འཇིག་རྟེན་དང་འཇིག་རྟེན་ལས་ འདས་པའི་དཀྱིལ་འཁོར་ཐམས་ཅད་འདིའི་དབང་དུ་འགྱུར་བ་དང་། འགྲུབ་པར་འགྱུར་བ་དང་། འདིའི་ཕྱག་རྒྱ་ཐམས་ཅད་ཀྱང་རང་ཉིད་ཀྱིས་བཅིངས་པས་འགྲུབ་པར་འགྱུར་རོ། །དམ་ཚིག་ཐམས་ཅད་ཀྱི་ལམ་ལ་ཉེས་པ་དང་བཅས་ཀྱང་ཉམས་པར་མི་འགྱུར་ཞིང་། བྱིན་གྱིས་བརླབ་ པར་རྟོག་པར་འགྱུར་རོ། །མ་བསླབས་པར་ཡང་ཐམས་ཅད་ཤེས་པར་འགྱུར་རོ། །མཆོད་པ་ལ་སོགས་པའི་བྱ་བ་ཐམས་ཅད་འགྲུབ་པར་འགྱུར་རོ། །མདོར་བསྡུས་ན་ཚེ་འདི་ཉིད་ལ་དངོས་གྲུབ་ཀྱི་མཆོག་ཅི་ལྟར་མངོན་པར་འདོད་པ་དེ་ལྟ་བུར་སངས་རྒྱས་ཉིད་དམ། རྡོ་རྗེ་འཛིན་པ་ཉིད་ འཐོབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བཅོམ་ལྡན་འདས་རྡོ་རྗེ་སེམས་དཔའ་འདིའི་སྙིང་ལ་བཞུགས་ཤིང་དོན་ཡོད་པའི་ཕྱིར་བཀུག་ཅིང་དམ་ཚིག་གིས་བཅིངས་ལ་དབང་དུ་བྱས་ཏེ། རྗེས་སུ་མཉེས་པས་བདག་ཉིད་སློབ་དཔོན་དུ་གྱུར་ནས་འཇུག་ཅིང་བསྒྲུབས་ན་འགྲུབ་པར་ འགྱུར་རོ། །དེ་ནས་རྡོ་རྗེའི་ཕྱག་རྒྱ་བཅིངས་ལ། དང་པོའི་རྡོ་རྗེའི་ལྟ་བས་བལྟས་ཏེ་སྙིང་པོ་ལན་ཅིག་བརྗོད་ནས་དཀྱིལ་འཁོར་ཆེན་པོ་བསྒྲུབ་པར་བྱའོ། །དེ་ནས་རྡོ་རྗེ་རྣམ་པར་སྒེག་པའི་ཕྱག་རྒྱས་བཟླས་བརྗོད་ལན་ཅིག་བྱས་ལ་ཕྱག་བྱས་ནས་གོས་དམར་པོ་གྱོན་ལ། མེ་ཏོག་གི་ཕྲེང་ བ་ཐོགས་ཏེ་གདོང་དྲིས་བྱུགས་པ་དང་རྡོ་རྗེ་ཐལ་མོས་རྡོ་རྗེའི་གར་བྱེད་ཅིང་སྐོར་བས་སྙིང་གར་མེ་ཏོག་ཐོགས་ཏེ་བདག་ཉིད་འཇུག་པར་བྱའོ། །ཞུགས་ནས་ཀྱང་ཡང་རྣམ་པར་སྒེག་པ་དང་སྐོར་བས་གདུང་ཅིང་སྙིང་པོ་ཡང་བཟླས་བརྗོད་བྱའོ། །དེ་ནས་བཅོམ་ལྡན་འདས་ལ་རྡོ་རྗེའི་ལྟ་བས་ བལྟས་ཏེ་དེ་བཞིན་དུ་འདུག་ནས་བཅོམ་ལྡན་འདས་བསྒྲུབ་པར་བྱའོ། །དེ་ནས་བཅོམ་ལྡན་འདས་རྡོ་རྗེ་འཛིན་པ་བདག་ཉིད་ལ་དགྱེས་པས་མཐོང་བ་སྩོལ་བར་འགྱུར་ཞིང་སྨིན་མ་བསྐྱོད་ལ་སྐུ་ཐམས་ཅད་དམ་ཡན་ལག་རྣམས་བསྐྱོད་ཅིང་ཁ་དོག་དམར་པོར་འགྱུར་རོ། །འོད་ཟེར་གྱི་རང་
- 153b
བཞིན་གྱི་ཞལ་ལམ། སྐུ་ཐམས་ཅད་སྟོན་པར་འགྱུར་རོ། །ཆོ་འཕྲུལ་དཔག་ཏུ་མེད་པ་ཡང་སྟོན་པར་འགྱུར་རོ། །དེ་ནས་བཅོམ་ལྡན་འདས་བདག་ཉིད་མཐོང་བ་སྩོལ་བའམ་དངོས་གྲུབ་མཆོག་ཀྱང་སྩོལ་བར་འགྱུར་རོ། །དེ་ནས་བརྩམས་ཏེ་ཉིན་རེ་ཞིང་དངོས་གྲུབ་ཐམས་ཅད་འཐོབ་ པར་འགྱུར་རོ། །གང་དུ་ཞུགས་པ་ཙམ་ཉིད་ཀྱིས་མི་ཚུགས་པ་དང་། མི་གསོད་པར་འགྱུར་རོ། །དངོས་གྲུབ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་། ཡེ་ཤེས་ཐམས་ཅད་དང་། བྱ་བ་ཐམས་ཅད་བཅོམ་ལྡན་འདས་ཕྱག་ན་རྡོ་རྗེས་སྒྲུབ་པར་མཛད་དོ། །དེ་ ནས་དེ་ཡང་དག་པར་མཆོད་དེ་རྡོ་རྗེའི་མིང་གིས་དབང་བསྐུར་ཞིང་། དཔའ་བོའི་རྡོ་རྗེ་བཅོམ་ལྡན་འདས་ལ་མནོས་ལ། སྙིང་པོ་བཟླས་ན་བཅོམ་ལྡན་འདས་མཐོང་བ་སྩལ་ནས། རང་ཉིད་ཀྱིས་སྩོལ་ཅིག་ཅེས་བརྗོད་ལ་རང་གིས་བླང་བར་བྱའོ། །དེ་ནས་སྐད་ཅིག་དེ་ཉིད་ལ་དངོས་གྲུབ་ མཆོག་ཡིད་ལ་འདོད་པ་འགྲུབ་པར་འགྱུར་རོ། །ཡང་ན་བདག་ཉིད་ཀྱིས་ཟླ་བ་དྲུག་གིས་ཡིད་ལ་འདོད་པའི་དངོས་གྲུབ་མཆོག་འགྲུབ་པར་འགྱུར་རོ། །ཞེས་བཅོམ་ལྡན་འདས་ཕྱག་ན་རྡོ་རྗེས་གསུངས་སོ། །དེ་ནས་རྡོ་རྗེ་མིང་གི་དབང་བསྐུར་བ་ལ་སོགས་པ་ཡང་དེ་བཞིན་ནོ། །དེ་ནས་ བྱིན་གྱིས་བརླབ་པ་ལ་སོགས་པ་ཡང་བྱས་ནས་ཡང་ཇི་ལྟར་འདོད་པའི་ཆོ་གས་བསྒྲུབས་ལ་འབྱུང་བར་བྱ་ཞིང་དཀྱིལ་འཁོར་ཆེན་པོའི་གསང་བ་བསྒྲུབ་པ་ལན་ཅིག་བྱའོ། །དེ་ནས་སློབ་མ་གཞུག་པར་བྱ་སྟེ། དེ་ལ་དང་པོར་རྡོ་རྗེ་སློབ་དཔོན་གྱིས་དང་པོའི་རབ་ཏུ་དགའ་བའི་རྡོ་རྗེའི་ཕྱག་རྒྱ་ བཅིངས་ལ་འཇུག་པར་བྱའོ། །ཞུགས་ནས་དེ་བཞིན་དུ་ཕྱག་བྱས་ལ་སྙིང་པོས་ཅི་ལྟར་མངོན་པར་འདོད་པའི་ཚིག་དང་། བཅོམ་ལྡན་འདས་བསྒྲུབས་པས་ཕྱག་རྒྱ་ཆེན་པོས་བསྒྲུབ་པར་བྱའོ། །དེ་ནས་བཅོམ་ལྡན་འདས་བསྒྲུབས་པས་མཚན་མ་དེ་ཉིད་འབྱུང་སྟེ་ཤེས་ནས་ཕྱག་རྒྱ་ ཆེན་པོ་ཉིད་འགྲུབ་པར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་ཏེ། ཞུགས་པ་འདིས་ནི་རྡོ་རྗེ་སློབ་དཔོན་བདག་ཉིད་དེ་བཞིན་དུ་འགྲུབ་པར་འགྱུར་རོ། །དེ་ནས་དེ་བཞིན་དུ་རྡོ་རྗེ་བླང་བ་ལ་སོགས་པ་བྱས་ནས། རྡོ་རྗེ་སློབ་མ་ལ་ཆོ་ག་རྒྱས་པ་འདི་བཞིན་དུ་བྱས་ཏེ།
- 154a
ཕྱག་རྒྱ་བཅིང་བ་ཡང་བསླབ་པར་བྱའོ། །གང་ཡང་དེ་བཞིན་གཤེགས་པ་ཐམས་ཅད་ལ་སོགས་པའི་དམ་ཚིག་ལ་མོས་པ་དེ་རྣམས་ལ་ཡང་རང་གི་ལྷག་པའི་ལྷའི་འཇུག་པའི་ཆོ་ག་རྒྱས་པ་དང་། དེ་བཞིན་དུ་ཡིད་ལ་འདོད་པའི་དངོས་གྲུབ་ཐམས་ཅད་འགྲུབ་ པར་འགྱུར་རོ། །དེ་ནས་ལྷ་གཞན་དག་ལ་དད་པ་རྣམས་ལ་དེ་བཞིན་དུ་འཇུག་པའི་ཆོ་ག་རྒྱས་པར་བྱས་ནས་དེ་བཞིན་དུ་འགྲུབ་པར་འགྱུར་རོ། །དེ་ནས་ཅི་ལྟར་ཞུགས་པ་རྣམས་ཟས་དང་། རོ་བཅུད་དང་གནས་པ་ལ་སོགས་པ་ཐམས་ཅད་ཀྱིས་ཡང་དག་པར་ཚིམ་པར་བྱས་ལ་ཅི་ ལྟར་ཤེས་པའི་གར་དང་གླུ་དང་དགོད་པ་དང་བུ་དང་བུ་མོ་དང་མཛའ་བཤེས་དང་ཉེ་དུ་དང་གཉེན་མཚམས་དང་བཅས་པས་ཀྱང་མཆོད་པར་བྱའོ། །དེ་ལ་འདིར་ནི་སྣོད་དང་སྣོད་མ་ཡིན་པ་བརྟག་པར་མི་བྱ་སྟེ་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་བདེ་བ་ཆེན་པོ་རྡོ་རྗེའི་དམ་ ཚིག་འདི་དང་། འདོད་པའི་བསམ་པ་ཡོངས་སུ་རྫོགས་པར་བྱེད་པའི་རྡོ་རྗེ་སྦྱོར་བས་རྡོ་རྗེ་ཆོས་ཀྱི་མཉམ་པ་ཉིད་ཀྱི་ཕྱག་རྒྱས་རྒྱས་བཏབ་པ་ཡིན་པའི་ཕྱིར་རོ། །དཀྱིལ་འཁོར་ཆེན་པོའོ། །དེ་ནས་ཆོ་ག་འབྱུང་སྟེ། ཟླ་བ་ཉ་ནས་བརྩམས་ནས་ཕྱག་ན་རྡོ་རྗེའི་སྤྱན་སྔར་རབ་ཏུ་དགའ་བའི་རྡོ་ རྗེའི་ཕྱག་རྒྱ་བཅིངས་ལ་ཅི་ལྟར་སྐྱོ་བར་མ་གྱུར་པར་དང་པོ་བྱིན་གྱིས་བརླབ་པ་ལ་སོགས་པ་བྱས་ལ་རྡོ་རྗེའི་ཚིག་གིས་བརྗོད་ཅིང་ཅི་སྲིད་ཟླ་བ་གཅིག་གི་བར་དེ་སྲིད་དུ་བཟླས་བརྗོད་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་བརྩམས་ཏེ་ཕྱག་ན་རྡོ་རྗེའི་བཀའ་ཅི་ལྟ་བ་བཞིན་དུ་དངོས་གྲུབ་ ཐམས་ཅད་འགྲུབ་པར་འགྱུར་རོ། །དེ་ནས་རས་རིས་འདྲི་བའམ་འདྲིར་གཞུག་པར་འདོད་ན། དང་པོར་རྡོ་རྗེ་བྲི་བའི་ཕྱག་རྒྱས་བྲིས་ལ་དེའི་འོག་ཏུ་ནི་ཅི་བདེར་བྱའོ། །དཀྱིལ་འཁོར་ཐམས་ཅད་དུ་ཡང་དེ་ཉིད་ཀྱིས་དང་པོ་བརྩམ་པར་བྱ་སྟེ། དབུས་སུ་བཅོམ་ལྡན་འདས་ཆོ་ག་ཅི་ལྟ་བ་བཞིན་དུ་ བྲི་ཞིང་། དཀྱིལ་འཁོར་ཆེན་པོའི་ཚུལ་གྱིས་སེམས་དཔའ་ཆེན་པོ་བརྒྱད་བྲི་བར་བྱའོ། །དེ་ནས་ཟླ་བ་ཉ་ནས་བརྩམས་ཏེ་ཕྱག་རྒྱ་ཆེན་པོ་བཅིངས་ལ། དེ་བཞིན་དུ་སྔོན་དུ་བསྙེན་པའི་ཚུལ་ལྟར་བཟླས་ནས་ཟླ་བ་ཉའི་མཚན་མོ་ཐོག་ཐག་ཏུ་ཅི་ལྟ་བ་བཞིན་དུ་སྐྱོ་བར་མ་གྱུར་པས་ཕྱག་རྒྱ་མ་བཀྲོལ་
- 154b
པར་བཟླས་བརྗོད་བྱའོ། །དེ་ནས་ནང་པར་བཅོམ་ལྡན་འདས་ཀྱི་ཞལ་འཛུམ་ཞིང་ཟླ་བ་དང་མཉམ་པའི་མདངས་ཅན་མཐོང་བ་སྩོལ་ཅིང་། སངས་རྒྱས་ཉིད་དང་རྡོ་རྗེ་འཛིན་པ་ཉིད་ལ་སོགས་པའི་དངོས་གྲུབ་མཆོག་རྣམས་སྩོལ་བར་འགྱུར་རོ། །ཆོ་ག་གཞན་ཡང་བཅོམ་ལྡན་ འདས་དེ་བཞིན་གཤེགས་པ་བྱང་ཆུབ་སེམས་དཔའ་ཆེན་པོ་བརྒྱད་ཀྱིས་ཡོངས་སུ་བསྐོར་བ་དང་། ཕྱོགས་ཐམས་ཅད་དུ་དེ་བཞིན་གཤེགས་པ་རྣམས་དང་། རྡོ་རྗེ་འཆང་ཐམས་ཅད་བྲི་བར་བྱའོ། །དེ་ནས་དེ་བཞིན་དུ་བསྒྲུབས་པས་སངས་རྒྱས་ཉིད་ལ་སོགས་པ་དངོས་གྲུབ་ ཐམས་ཅད་འགྲུབ་བོ། །རས་ལ་བཅོམ་ལྡན་འདས་ཕྱག་ན་རྡོ་རྗེ་བསྙེམས་པ་དང་བཅས་པ་བྲིས་ལ། དེའི་སྤྱན་སྔར་དང་པོའི་ཕྱག་རྒྱ་ཆེན་པོས་གནས་ནས་བཟླས་བརྗོད་འབུམ་བྱས་ཏེ། འབུམ་རྫོགས་ན་ཕྱག་ན་རྡོ་རྗེ་ཉིད་ཐོབ་པར་འགྱུར་རོ། །དེ་བཞིན་གཤེགས་པ་དཔའ་བོ་ གཅིག་པུ་བྲིས་ནས་ཡང་མཐར་འཚང་རྒྱ་བར་འགྱུར་རོ། །དེ་ནས་བཀླགས་པ་ཙམ་གྱིས་འགྲུབ་པའི་ལས་རྣམས་དཀྱིལ་འཁོར་དུ་ཞུགས་པ་ཙམ་གྱིས་འགྲུབ་པར་འགྱུར་བ་ནི་འདི་ལྟ་སྟེ། དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱ་བ་ལ་ནི་འདོད་ཆགས་ལ་སོགས་ པ་བདེ་བ་ཐམས་ཅད་ཕུལ་བས་སོ། །རྡོ་རྗེ་འཛིན་པ་ཆེན་པོ་མཉེས་པར་བྱ་བ་ལ་ནི་རྡོ་རྗེ་སེམས་དཔའ་དང་འཁྱུད་ཅིང་འོ་བྱེད་པས་སོ། །བྱང་ཆུབ་སེམས་དཔའ་ཐམས་ཅད་རྗེས་སུ་མཉེས་པར་བྱ་བ་ལ་ནི་དཔག་ཏུ་མེད་པའི་བཟླས་པས་སོ། །རྡོ་རྗེ་ཐམས་ཅད་རྗེས་སུ་མཉེས་པར་བྱ་བ་ ལ་ནི་རང་གི་སྙིང་པོ་བཟླས་པས་སོ། །ལྷ་ལ་སོགས་པ་སེམས་ཅན་ཐམས་ཅད་རྗེས་སུ་ཆགས་པར་བྱ་བ་ལ་ནི་ཐམས་ཅད་དུ་འབུམ་བཟླས་པས་སོ། །བདག་བསྲུང་བ་ལ་ནི་ཡུངས་ཀར་ལ་ལན་ཅིག་བཟླས་པས་སོ། །གཞན་བསྲུང་བ་ལ་ནི་རྡོ་རྗེ་སྐོར་བས་སོ། །ཐམས་ཅད་བསྲུང་བ་ལ་ ནི་ཡིད་ཀྱིས་ལན་ཅིག་གོ། །མཚམས་དང་ཕྱོགས་དང་དཀྱིལ་འཁོར་ཐམས་ཅད་བཅིང་བ་ལ་ནི་བལྟ་བའམ་ཡུངས་ཀར་ལ་སོགས་པས་སོ། །སེམས་ཅན་ཐམས་ཅད་རེངས་པར་བྱ་བ་ལ་ནི་དབུགས་མི་འབྱིན་པར་བཟླས་པས་སོ། །སེམས་ཅན་ཐམས་ཅད་རྨུགས་པར་བྱ་བ་ལ་ནི་
- 155a
རྡོ་རྗེ་བཙིར་བས་སོ། །སེམས་ཅན་ཐམས་ཅད་རྨོངས་པར་བྱ་བ་ལ་ནི་མིག་བཙུམས་ནས་བཟླས་པས་སོ། །ཐམས་ཅད་གསད་པ་ལ་ནི་རྡོ་རྗེ་དྲལ་བས་སོ། །སེམས་ཅན་ཐམས་ཅད་རྒྱས་གདབ་པ་ལ་ནི་རྡོ་རྗེ་མཁའ་འགྲོ་མའི་ཕྱག་རྒྱས་སོ། །སྙིང་ཐམས་ ཅད་འདྲེན་ཅིང་འབྱིན་པ་ལ་ནི་ཡིད་ཀྱིས་བཟླས་པས་སོ། །སེམས་ཅན་ཐམས་ཅད་ཟ་བ་ལ་ནི་ལྡང་ཞིང་མྱུར་བར་ཟློས་པས་སོ། །སེམས་ཅན་ཐམས་ཅད་སྐྲག་པར་བྱ་བ་ལ་ནི་རྡོ་རྗེ་འཇིགས་བྱེད་ཀྱི་ཕྱག་རྒྱས་སོ། །ནོར་ཐམས་ཅད་དགུག་པ་ལ་ནི་གསེར་གྱིས་བཟླས་པས་སོ། །ནོར་ དང་འབྲུ་ཐམས་ཅད་དགུག་པ་ལ་ནི་རྡོ་རྗེ་རྣལ་འབྱོར་མའི་ཕྱག་རྒྱས་སོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་པི་བང་བརྡུང་བ་དང་བཅས་པའི་ཀ་ཀ་ལའི་གླུ་ལེན་པས་བཟླས་བརྗོད་བྱའོ། །ཐམས་ཅད་འབིགས་པ་དང་རྗེས་སུ་ཆགས་པར་བྱ་བ་ལ་ནི་རྡོ་རྗེ་མདའི་ཕྱག་རྒྱས་སོ། །ཐམས་ ཅད་ཕྱགས་པར་བྱ་བ་ལ་ནི་ཕྱོགས་ཐམས་ཅད་ཀྱི་དེ་བཞིན་གཤེགས་པ་མཉེས་པས་སོ། །གདུག་པའི་འཆིང་བ་བརྟན་པར་བྱ་བ་ལ་ནི་སྙིང་བརྟན་པོར་ངེས་པར་འཚིར་བས་སོ། །མ་རུངས་པ་རབ་ཏུ་བསྒྲུབ་པ་ལ་ནི་རྡོ་རྗེ་བསྙེམས་པས་སོ། །རྒྱན་ཐམས་ཅད་དབྲོག་པ་ལ་ནི་འབར་བའི་ བལྟ་བས་དབྲོག་པས་སོ། །ཐམས་ཅད་ཡིད་ཚིམ་པ་ལ་ནི་རྡོ་རྗེ་ཁུ་ཚུར་སྙིང་གར་བཞག་པས་སོ། །མུན་པ་སྣང་བར་བྱ་བ་ལ་ནི་རྡོ་རྗེ་ཁ་ཤར་དུ་བལྟས་ཏེ་བསྐོར་བས་སོ། །ལུས་བདེ་བར་བྱ་བ་ལ་ནི་རང་གི་མཚན་གྱི་བཟླས་པས་སོ། །གཟུགས་ཐམས་ཅད་སྣང་བར་བྱ་བ་ལ་ནི་རྡོ་རྗེ་གཟུགས་ ཀྱི་མཆོག་གི་ཕྱག་རྒྱས་སོ། །སྒྲ་ཐམས་ཅད་ཐོས་པར་བྱ་བ་ལ་ནི་རྡོ་རྗེ་པི་བང་གིས་སོ། །དྲི་ཞིམ་པོ་སྣ་ཚོགས་པའི་ཕྱིར་ནི་སྣའི་དབུགས་འབྱིན་པའི་གླུ་ཡིས་སོ། །ཟས་དང་སྐོམ་ཐམས་ཅད་དང་བཅུད་ཐམས་ཅད་སྤོ་བ་ལ་ནི་རྡོ་རྗེ་སྤོ་བར་བྱའོ། །དབབ་པ་ཐམས་ཅད་ལ་ནི་མཉམ་པའི་ཐལ་མོ་ དང་སེ་གོལ་དང་གླུའི་བཟླས་པས་སོ། །ཐམས་ཅད་གར་བྱེད་དུ་གཞུག་པ་ལ་ནི་བདག་ཉིད་གར་བྱེད་ཅིང་བཟླས་པས་སོ། །ཐམས་ཅད་གླུ་ལེན་དུ་གཞུག་པ་ལ་ནི་ལྕེ་བསྐྱོད་ཅིང་བཟླས་པས་སོ། །ཐམས་ཅད་སྨྲར་གཞུག་པ་ལ་ནི་རྡོ་རྗེ་མཆུ་ཡིས་སོ། །ཐམས་ཅད་བབས་ནས་ལན་
- 155b
སྟོན་པ་ལ་ནི་རྡོ་རྗེ་འབེབས་པས་སོ། །གདོན་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་མྱུ་གུའི་ཕྱག་རྒྱས་སོ། །གདོན་ཐམས་ཅད་འཛིན་དུ་གཞུག་པ་ལ་ནི་ཚོགས་ཀྱི་བདག་པོ་རབ་ཏུ་དགའ་བའི་ཁྲོ་བོས་བཟླས་པས་སོ། །རིམས་ནད་ཐམས་ཅད་འཛིན་དུ་གཞུག་པ་ལ་ནི་རྡོ་རྗེའི་ རིགས་ཀྱི་གདོན་གྱིས་སོ། །རིམས་ཐམས་ཅད་བསལ་བ་ལ་ནི་རྡོ་རྗེའི་ལྟ་བས་བསལ་བས་སོ། །དུག་ཐམས་ཅད་སྤར་བ་ལ་ནི་རྡོ་རྗེ་ལྟ་བའི་དུག་གི་ཕྱག་རྒྱས་སོ། །དུག་ཐམས་ཅད་གཞིག་པ་ལ་ནི་རྨ་བྱའི་ཆུན་པོས་སོ། །དུག་ཐམས་ཅད་བཟའ་བ་ལ་ནི་རྡོ་རྗེ་བདུད་རྩིས་ཕྱག་རྒྱས་སོ། ། བདུད་ལ་སོགས་པ་མ་རུངས་པ་ཐམས་ཅད་བརླག་པ་ལ་ནི་འཁྲུགས་པས་དཔག་ཏུ་མེད་པར་བཟླས་པས་སོ། །མཁའ་འགྲོ་མའི་གདོན་ཐམས་ཅད་ལས་གྲོལ་བར་བྱ་བ་ལ་ནི་རྡོ་རྗེ་ཆེན་པོ་གསོར་བའི་ཕྱག་རྒྱས་སོ། །ཕྱག་རྒྱ་ཐམས་ཅད་གཞིག་པ་ལ་ནི་རྡོ་རྗེ་འཕེན་པས་སོ། །མཁའ་འགྲོ་མ་ ཐམས་ཅད་དགུག་པ་དང་། གཞུག་པ་དང་། གདུལ་བ་ལ་ནི་རྡོ་རྗེ་ཁ་ཊྭཱྃ་གའི་ཕྱག་རྒྱ་འཛིན་པས་སོ། །མ་མོ་ཐམས་ཅད་ཀྱི་དཀྱིལ་འཁོར་དང་། དམ་ཚིག་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་པ་དང་། གསང་བ་གཞིག་པ་ལ་ནི་རྡོ་རྗེ་ཁྲོ་བོའི་ཡི་གེ་ཕཊ་ཀྱིས་ སོ། །མ་མོ་དང་མཁའ་འགྲོ་མ་ཐམས་ཅད་མངག་གཞུག་མར་བྱ་བ་ལ་ནི་མ་མོའི་གནས་སུ་ཁྲོས་པས་བཟླས་བརྗོད་འབུམ་བྱའོ། །བདུད་ཐམས་ཅད་ཀྱི་སྟོབས་གཞོམ་པ་ལ་ནི་རྡོ་རྗེ་དྲག་པོའི་ཧ་ཧ་ཞེས་བྱ་བའི་གད་རྒྱངས་ཀྱིས་སོ། །གཞན་གྱི་དཔུང་ཐམས་ཅད་གཞོམ་པ་ལ་ནི་རྡོ་རྗེ་ལ་ཡོངས་ སུ་བཟླས་ལ་འཕང་ངོ་། །འཐབ་པ་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་རྒྱལ་མཚན་གྱི་ཕྱག་རྒྱས་སོ། །ཐམས་ཅད་བཅིང་བ་ལ་ནི་གོས་ལ་མདུད་པ་བྱའོ། །ཐམས་ཅད་དགྲོལ་བ་ལ་ནི་ཡི་གེ་མུ་ཡིས་སོ། །རོ་ལངས་དང་འཁྲུལ་འཁོར་ཐམས་ཅད་གཞིག་པ་ལ་ནི་རྡོ་རྗེ་འཇིགས་བྱེད་ ཀྱིས་སོ། །ལྕགས་སྒྲོག་ཐམས་ཅད་དགྲོལ་བ་ལ་ནི་རྡོ་རྗེ་ཁབ་ལོང་གིས་སོ། །མེ་ཡང་དག་པར་བསྐྱེད་པ་ལ་ནི་རྡོ་རྗེ་མེ་ཤེལ་གྱིས་སོ། །ཆུ་མེད་པར་ཆུ་ཡང་དག་པར་བསྐྱེད་པ་ལ་ནི་རྡོ་རྗེ་ཆུ་ཤེལ་གྱིས་སོ། །ནམ་མཁའ་ལས་ཟས་དང་སྐོམ་དང་གོས་དང་རྒྱན་ཐམས་ཅད་ལ་སོགས་པ་ཡོ་བྱད་
- 156a
མང་པོ་འབྱུང་བ་ལ་ནི་ནམ་མཁའ་ལ་ལྟ་ཞིང་བཟླས་བརྗོད་འབུམ་བྱའོ། །ནམ་མཁའ་ལས་སངས་རྒྱས་ཀྱི་སྐུ་ལ་སོགས་པ་གཟུགས་ཐམས་ཅད་སྟོན་པ་ལ་ནི་སངས་རྒྱས་རྗེས་སུ་དྲན་པ་ལ་ནམ་མཁར་ལྟ་ཞིང་བཟླས་པས་སོ། །ནམ་མཁའ་ལས་ཡི་གེས་འདས་ པ་དང་མ་འོངས་པ་དང་ད་ལྟར་བྱུང་བའི་ལུང་བསྒོ་བའི་བདེན་པར་སྟོན་པ་ལ་ནི་ཡི་གེ་ཨ་བྲིས་ལ་བཟླས་བརྗོད་འབུམ་བྱས་པས་སོ། །པྲ་སེ་ན་ཐམས་ཅད་ལས་འདས་པ་དང་། མ་འོངས་པ་དང་། ད་ལྟར་བྱུང་བའི་ལུང་བསྒོ་བ་བདེན་པར་སྟོན་པ་ལ་ནི་རྡོ་རྗེ་པྲ་སེན་ཐམས་ཅད་དབབ་པས་སོ། །དེ་ བཞིན་དུ་མིག་གིས་བདེན་པ་ཐམས་ཅད་མཐོང་བ་ལ་ནི་རང་གི་མིག་ལ་བཟླས་པ་འབུམ་བྱས་པས་སོ། །རྣ་བས་ཐོས་པར་བྱ་བ་ལ་ནི་རང་གི་རྣ་བ་ལ་བཟླས་པ་འབུམ་བྱས་པས་སོ། །སྣས་མནམ་པར་བྱ་བ་ལ་ནི་སྣལ་བཟླས་པས་སོ། །ལྕེས་རང་ཉིད་སྨྲ་བ་ལ་ནི་ལྕེ་ལ་བཟླས་པས་སོ། །ལུས་ཀྱིས་ རེག་པར་བྱ་བ་ལ་ནི་ལུས་ལ་བཟླས་པས་སོ། །ཡིད་ཀྱིས་ཤེས་པར་བྱ་བ་ལ་ནི་ཡིད་ལ་འབུམ་བཟླས་པས་སོ། །རྨད་དུ་བྱུང་བ་ཐམས་ཅད་བསྟན་པ་ལ་ནི་སངས་རྒྱས་ཀྱི་སྐུ་བསྒྲུབས་པས་སོ། །སྒྱུ་མ་ཐམས་ཅད་བསྟན་པ་ལ་ནི་རྨ་བྱའི་སྒྲོའི་ཆུན་པོ་ལ་འབུམ་བཟླས་པས་སོ། །ཐམས་ཅད་ གཡོག་པར་བྱ་བ་ལ་ནི་ཞི་བའི་གནས་སུ་འབུམ་བཟླས་པས་སོ། །ཐམས་ཅད་ལ་ལན་ལྡོན་པར་བྱ་བ་ལ་ནི་རྡོ་རྗེ་ཧཱུྃ་མཛད་ཀྱི་རྡོ་རྗེས་སོ། །རྫུ་འཕྲུལ་ཐམས་ཅད་བསྟན་པ་ལ་ནི་རྡོ་རྗེ་རྫུ་འཕྲུལ་གྱི་ཕྱག་རྒྱས་སོ། །ཆོ་འཕྲུལ་ཐམས་ཅད་བསྟན་པ་ལ་ནི་རྡོ་རྗེ་ཏིང་ངེ་འཛིན་གྱི་ཕྱག་རྒྱས་སོ། །རང་གི་ ལུས་ལ་སོགས་པ་དངོས་པོ་ཐམས་ཅད་ལས་སངས་རྒྱས་དང་། རྡོ་རྗེ་སེམས་དཔའ་ལ་སོགས་པ་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བསྟན་པ་ལ་ནི་རྡོ་རྗེ་རྫུ་འཕྲུལ་རྣམ་པར་འཕྲུལ་པས་སོ། །ལྷ་ཐམས་ཅད་དབབ་པ་ལ་ནི་རྡོ་རྗེ་སྐོར་བས་སོ། །ཀླུ་ཐམས་ཅད་རྗེས་སུ་འབྲང་བར་བྱ་བ་ལ་ནི་ཀླུའི་ རྒྱལ་པོའི་མཚོར་བཟླས་བརྗོད་བྱའོ། །གནོད་སྦྱིན་ཐམས་ཅད་མངག་གཞུག་པར་བྱ་བ་ལ་ནི་རྡོ་རྗེའི་བཀའ་བསྒོ་བས་སོ། །འབྱུང་པོ་ཐམས་ཅད་གདུལ་བ་ལ་ནི་ལྷ་ཆེན་པོ་མནན་ནས་ཁྲོས་པས་བཟླས་བརྗོད་བྱའོ། །སེར་བ་ཐམས་ཅད་བཟློག་པ་ལ་ནི་རྡོ་རྗེ་སྲིད་སྲུང་གི་ཕྱག་རྒྱས་སོ། །གློག་
- 156b
འབབ་པ་ཐམས་ཅད་བཟློག་པ་ལ་ནི་རྡོ་རྗེ་ཁྲོ་གཉེར་ཅན་གྱི་ཕྱག་རྒྱས་སོ། །ཆར་དབབ་པ་ལ་ནི་ཀླུའི་མཚོར་བཟླས་བརྗོད་བྱའོ། །ཆར་གཅད་པ་ལ་ནི་དྲི་མ་མེད་པའི་ཆུའི་སྦྱིན་བླུག་བྱའོ། །སྤྲིན་བསྐྱེད་པ་ལ་ནི་ཀླུ་བྲིས་ནས་བདུག་པས་བདུག་པར་བྱའོ། །སྤྲིན་བཤིག་པ་ལ་ནི་ རྡོ་རྗེ་ནམ་མཁའི་སྤྱན་གྱིས་སོ། །ཆུ་མེད་པའི་ཕྱོགས་སུ་ཤིན་ཏུ་བསིལ་བའི་ཆུའི་ཚོགས་རྟག་ཏུ་འབྱུང་བ་ལ་ནི་རྡོ་རྗེ་ཀླུའི་ཕྱག་རྒྱས་སོ། །གཏེར་ཐམས་ཅད་ཤེས་པར་བྱ་བ་ལ་ནི་སྣོད་དུ་ཆུ་བླུག་པར་བྱའོ། །གཏེར་ཐམས་ཅད་བརྐོ་བ་ལ་ནི་རྡོ་རྗེ་འཇོར་གྱིས་སོ། །གཏེར་ཐམས་ཅད་རྙེད་པ་ ལ་ནི་རྡོ་རྗེ་ནོར་གྱིས་སོ། །རྒྱལ་སྲིད་ཐམས་ཅད་ཐོབ་པར་བྱ་བ་ལ་ནི་རྡོ་རྗེ་དབང་བསྐུར་བའི་ཕྱག་རྒྱས་སོ། །སའི་བདག་པོར་བྱ་བ་ལ་ནི་རྡོ་རྗེ་སེམས་དཔའི་དབང་བསྐུར་བའི་ཕྱག་རྒྱས་སོ། །དཀྱིལ་འཁོར་ཐམས་ཅད་བསྒྲུབ་པ་ལ་ནི་རྡོ་རྗེ་འཁོར་ལོའི་ཕྱག་རྒྱས་སོ། །ཕྱག་རྒྱ་ཐམས་ཅད་བསྒྲུབ་པ་ ལ་ནི་བདེ་བ་ཆེན་པོའི་དམ་ཚིག་གི་ཕྱག་རྒྱས་སོ། །དམ་ཚིག་ཐམས་ཅད་བསྒྲུབ་པ་ལ་ནི་རབ་ཏུ་དགའ་བའི་རྡོ་རྗེའི་ཕྱག་རྒྱས་སོ། །དངོས་གྲུབ་ཐམས་ཅད་བསྒྲུབ་པ་ལ་ནི་རྡོ་རྗེ་བསྙེམས་པའི་ལྕགས་ཀྱུའི་ཕྱག་རྒྱས་སོ། །མ་གྲུབ་པ་ཐམས་ཅད་གྲུབ་པར་སྟོན་པ་ལ་ནི་རྡོ་རྗེ་གྲུབ་པའི་ཕྱག་ རྒྱས་སོ། །རྡོ་རྗེ་རིག་པ་འཛིན་པ་ཐམས་ཅད་བསྒྲུབ་པ་ལ་ནི་རྡོ་རྗེ་རིག་པ་འཛིན་གྱི་ཕྱག་རྒྱས་སོ། །རྡོ་རྗེ་ཐམས་ཅད་བསྒྲུབ་པ་ལ་ནི་རྡོ་རྗེ་ཐམས་ཅད་ཀྱི་མཆོག་གི་ཕྱག་རྒྱས་སོ། །བྱང་ཆུབ་སེམས་དཔའ་ཐམས་ཅད་བསྒྲུབ་པ་ལ་ནི་ཐུགས་ཀྱི་རྡོ་རྗེས་སོ། །རྡོ་རྗེ་འཛིན་པ་ཉིད་བསྒྲུབ་པ་ལ་ནི་རྡོ་རྗེ་ སེམས་དཔའི་ཕྱག་རྒྱས་སོ། །སངས་རྒྱས་ཉིད་བསྒྲུབ་པ་ལ་ནི་རྡོ་རྗེ་ཡེ་ཤེས་ཀྱི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཐམས་ཅད་ཀྱི་རྟོག་པའི་རྒྱལ་པོ་ཆེན་པོ་ལས་དམ་ཚིག་ཆེན་པོའི་དེ་ཁོ་ན་ཉིད་རྡོ་རྗེ་ཞེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །རྡོ་རྗེ་སེམས་དཔའི་ རྟོག་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས། ཡང་དེ་བཞིན་གཤེགས་པ་ཐམས་ཅད་ཀྱིས་ཞི་བའི་ཆོས་ཉིད་མངོན་པར་རྫོགས་པར་བྱང་ཆུབ་པར་བསྒྲུབ་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་ཏེ། རྡོ་རྗེ་སྲ་བ་ཉིད་ཀྱི་ཕྱིར་རྡོ་རྗེ་
- 157a
མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །དོན་གཅིག་པ་ཉིད་ཀྱི་ཕྱིར་དོན་གྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ངོ་བོ་ཉིད་རྣམ་པར་དག་པ་ཉིད་ཀྱི་ཕྱིར་ཆོས་ཀྱི་མཉམ་པ་ཉིད་མངོན་པར་རྫོགས་པར་ བྱང་ཆུབ་པ་ནི་བྱང་ཆུབ་ཆེན་པོའོ། །ཐམས་ཅད་ལ་རྣམ་པར་མི་རྟོག་པ་ཉིད་ཀྱི་ཕྱིར་ཐམས་ཅད་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ལག་ན་རྡོ་རྗེ་གང་ལ་ལ་ཆོས་མངོན་པར་བསྒྲུབ་པ་བཞི་པོ་འདི་དག་ཉན་པ་དང་འཛིན་པ་དང་ཀློག་པ་དང་། སྒོམ་པ་དེ་སྡིག་པ་ཐམས་ཅད་ལ་སྤྱོད་ཀྱང་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ངན་སོང་ཐམས་ཅད་ལས་ཡང་དག་པར་འདས་པར་འགྱུར་རོ། །དེ་ནས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཡེ་ཤེས་ཀྱི་ཁུ་ཚུར་ཡོངས་སུ་འཛིན་པའི་དོན་གྱི་གནས་འདི་ཉིད་རྒྱ་ཆེར་ སྟོན་ཅིང་བཞིན་འཛུམ་པ་དང་བཅས་ཏེ་ཆོས་ཐམས་ཅད་ཀྱི་མཉམ་པ་ཉིད་ཀྱི་སྙིང་པོ་འདི་གསུངས་སོ། །ཨཿ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ཡང་དག་པར་འདུས་པར་མཛད་ནས། བཅོམ་ལྡན་འདས་ཀྱི་ཕྱོགས་ཐམས་ཅད་དུ་རྡོ་རྗེ་ སེམས་དཔའི་དཀྱིལ་འཁོར་ཆེན་པོའི་ཚུལ་གྱིས་བཞུགས་པ་དང་། སེམས་དཔའ་ཆེན་པོ་བརྒྱད་ཕྱིའི་དཀྱིལ་འཁོར་དུ་ཕྱོགས་བརྒྱད་དུ་བཞད་པ་ཆེན་པོས་བཞད་ཅིང་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དེ་བཞིན་གཤེགས་པ་ ཐམས་ཅད་ཀྱིས་རྡོ་རྗེའི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྡོ་རྗེ་ཞེས་བྱ་བའི་དམ་ཚིག་ཆེན་པོའི་དཀྱིལ་འཁོར་ཆེན་པོ་འདི་གསུངས་སོ། །རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ ཚུལ་དུ་ཕྱིའི་དཀྱིལ་འཁོར་བྲིས་ལ་དེའི་དབུས་སུ་ཐིག་གསུམ་གྱི་འཁོར་ལོ་བྲིས་ནས་བཅོམ་ལྡན་འདས་ཀྱི་ཐད་ཀར་སྣ་ཚོགས་པདྨ་རབ་ཏུ་གནས་པ་དེའི་འཁོར་ལོའི་ལྟེ་བ་ལ་བཅོམ་ལྡན་འདས་དེ་བཞིན་གཤེགས་པ་རྟག་པ་ཆེན་པོ་ས་ལ་སོགས་པ་ལས་བྱས་པ་གཞག་པར་བྱའོ། །
- 157b
དེའི་ཕྱོགས་ཐམས་ཅད་དུས་ལ་སོགས་པ་ལས་བྱས་པའི་དེ་བཞིན་གཤེགས་པ་བརྒྱད་གཞག་གམ་བྲི་བར་བྱའོ། །དེ་ནས་ཚོན་གྱི་ཐིག་ལེ་རྣམས་ཀྱིས་དཀྱིལ་འཁོར་གྱི་འཁོར་ལོ་ལ་བཞུགས་པའི་དེ་བཞིན་གཤེགས་པ་རྣམས་རྡོ་རྗེ་འཛིན་པ་དང་བཅས་པ་བྲི་བར་བྱའོ། །ཕྱིའི་དཀྱིལ་ འཁོར་གྱི་ཕྱོགས་བཞི་དང་མཚམས་རྣམས་སུ་བྱང་ཆུབ་སེམས་དཔའ་བརྒྱད་ཅི་ལྟ་བ་བཞིན་བཞག་ནས། བུམ་པ་གང་བ་བཞི་སྒོ་རྣམས་སུ་དགོད་པར་བྱ་ཞིང་། བྱང་ཆུབ་ཀྱི་མཚན་མ་རྣམས་གཞག་པར་བྱ་སྟེ། ཤར་ནས་བརྩམས་ཏེ་ནེའུ་གསིངས་དང་བཅས་པའི་དུམ་བུ་དང་། རོ་ དྲུག་གིས་ཡོངས་སུ་གང་ཞིང་དབྱིག་དང་གསེར་དང་རིན་པོ་ཆེ་དང་། གོས་ལ་སོགས་པས་ཡོངས་སུ་བཀང་བའི་སྣོད་དང་། འཇམ་ཞིང་ཤིན་ཏུ་བདེ་བའི་སྟན་དང་། སངས་རྒྱས་ཀྱི་སྐུ་གཟུགས་དགོད་དོ། །དེ་ནས་དེ་བཞིན་དུ་གོས་གྱོན་ལ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ ཕྱག་རྒྱ་བཅིངས་ནས་ཞུགས་ན་བདག་ཉིད་སློབ་དཔོན་མེད་པར་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་རོ། །དེ་ནས་བརྩམས་ཏེ་དེ་བཞིན་གཤེགས་པ་ཐམས་ཅད་ཀྱི་རྟོག་པ་དང་དངོས་གྲུབ་ཐམས་ཅད་ལ་མི་ཚུགས་པ་དང་། མི་སོད་ པ་དང་། སྒྲིབ་པ་ཐམས་ཅད་དང་བྲལ་བ་འཐོབ་པར་འགྱུར་རོ། །དེ་ནས་སློབ་མ་ཡང་དེ་བཞིན་དུ་གཞུག་གོ། །ཞུགས་ནས་རྡོ་རྗེ་རྩེ་ལྔ་པ་བྱིན་ལ་རྡོ་རྗེ་མིང་གིས་དབང་བསྐུར་བ་ཡང་སྦྱིན་པར་བྱའོ། །དེ་ནས་དམ་ཚིག་འདི་དག་བྱ་བར་བསྒོ་བར་བྱའོ། །སེམས་ཅན་ཀུན་ལ་ ཕན་ཕྱིར་དང་། བསྟན་པ་ཐམས་ཅད་བསྲུང་བའི་ཕྱིར། །རྣམ་པར་མི་རྟོག་སྦྱོར་བ་ཡིས། །ཅི་བདེ་བར་ནི་ཐམས་ཅད་ཀྱིས། །ཞེས་བྱའོ། །དེ་ནས་མཚན་མ་བཞི་འབྱོར་པ་ཅི་ལྟ་བས་སྐལ་བ་ཅི་ལྟ་བ་བཞིན་དུ་སྦྱིན་པར་བྱའོ། །དམ་ཚིག་ཆེན་པོའི་དཀྱིལ་འཁོར་རོ། །དེ་ནས་ སྒྲུབ་པ་ནི། རས་ལ་བཅོམ་ལྡན་འདས་རྣམ་པར་སྣང་མཛད་འཛུམ་པ་དང་བཅས་ཤིང་། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱི་ཕྱག་རྒྱ་ཡོངས་སུ་འཛིན་པར་བྱའོ། །གཞན་ཐམས་ཅད་ནི་དམ་ཚིག་ཆེན་པོའི་དཀྱིལ་འཁོར་གྱི་ཚུལ་དུ་བྱའོ། །དེ་ནས་དེ་བཞིན་དུ་སེམས་
- 158a
དཔའ་མཆོག་བསྒྲུབ་པ་དང་། དངོས་གྲུབ་མཆོག་རྣམས་ཀྱང་དེ་བཞིན་ནོ། །གཞན་ཡང་རས་ལ་བཅོམ་ལྡན་འདས་དཔའ་བོ་གཅིག་པུ་བྲིས་ཏེ། འདིའི་མདུན་དུ་རྡོ་རྗེ་ཚིག་གིས་བཟླས་བརྗོད་འབུམ་བྱས་ནས་ཡེ་ཤེས་ཀྱི་ཁུ་ཚུར་ཡོངས་སུ་འཛིན་པས་མཚན་ མོ་ཐོག་ཐག་བཟླས་ན། ཤེས་རབ་ཀྱི་ཕ་རོལ་ཏུ་ཕྱིན་པ་འཐོབ་ཅིང་དངོས་གྲུབ་ཐམས་ཅད་གྲུབ་པའི་བྱང་ཆུབ་སེམས་དཔར་འགྱུར་ལ། དེ་ནས་དེ་བཞིན་གཤེགས་པར་འགྱུར་རོ། །དེ་ནས་མ་བསྒྲུབས་པས་ཀྱང་དཀྱིལ་འཁོར་དུ་ཞུགས་པ་ཙམ་ཉིད་ཀྱིས་ལས་རྣམས་འགྲུབ་པར་ འགྱུར་ཏེ། འདི་ལྟ་སྟེ། དེ་བཞིན་གཤེགས་པ་ཐམས་ཅད་མཆོད་པ་ལ་ནི། ཅི་སྙེད་པའི་དེ་བཞིན་གཤེགས་པའི་བདེ་བ་ཐམས་ཅད་ཕུལ་བས་སོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པ་ལ་ནི། བདག་ཕུལ་བས་སོ། །དཀོན་ མཆོག་གསུམ་མཆོད་པ་ལ་ནི། མེ་ཏོག་ལ་སོགས་པ་ལ་བཟླས་པས་སོ། །སེམས་ཅན་ཐམས་ཅད་མཆོད་པ་ལ་ནི། ཐམས་ཅད་ལ་བྱམས་པའི་བཟླས་པས་སོ། །ཆོས་ཐམས་ཅད་བསྡུ་བ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་བཞི་པོ་གདོན་པས་སོ། ། བདུད་ཐམས་ཅད་འདུལ་བ་ལ་ནི་བརྟན་ཞིང་ངེས་པའི་བཟླས་པས་སོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ཐོབ་པ་ལ་ནི་རྒྱན་ཐམས་ཅད་ཕུལ་ཞིང་རང་ཉིད་བཅིངས་པས་སོ། །ཆོས་ཉིད་ཐམས་ཅད་ཐོབ་པ་ལ་ནི་རྡོ་རྗེ་པདྨ་ལ་བལྟ་བས་སོ། །དེ་བཞིན་གཤེགས་པ་ཐམས་ ཅད་ཀྱི་ལས་ཀྱི་དངོས་གྲུབ་ཐོབ་པ་ལ་ནི་ཐམས་ཅད་རྡོ་རྗེའི་ལས་ཀྱི་མཆོག་གིས་སོ། །སངས་རྒྱས་ཉིད་རབ་ཏུ་འཐོབ་པ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱི་དེ་ཁོ་ན་ཉིད་ཀྱི་ཕྱག་རྒྱ་ཆེན་པོས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། དེ་བཞིན་གཤེགས་ པ་ཐམས་ཅད་ཀྱི་དེ་ཁོ་ན་ཉིད་ཀྱི་རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་རྫོགས་སོ། །དེ་བཞིན་གཤེགས་པའི་རྟོག་པའོ།། །།དེ་ནས་མ་རུངས་པ་ཐམས་ཅད་འདུལ་བ་དེ་བཞིན་གཤེགས་པ་ཤཱཀྱ་ཐུབ་པས་ཀྱང་ཡང་ཆོས་ཐམས་ཅད་ཀྱི་མཉམ་པ་ཉིད་ཀྱིས་རྣམ་
- 158b
པར་རྒྱལ་བ་བསྡུ་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒྲུབ་པ་འདི་གསུངས་སོ། །འདོད་ཆགས་ཀྱི་སྤྲོས་པ་མེད་པ་ཉིད་ཀྱིས་ཞེ་སྡང་གི་སྤྲོས་པ་མེད་པ་ཉིད་དོ། །ཞེ་སྡང་གི་སྤྲོས་པ་མེད་པ་ཉིད་ཀྱིས་གཏི་མུག་གི་སྤྲོས་པ་མེད་པ་ཉིད་དོ། །གཏི་མུག་གི་སྤྲོས་པ་ མེད་པ་ཉིད་ཀྱིས་ཆོས་ཐམས་ཅད་ཀྱི་སྤྲོས་པ་མེད་པ་ཉིད་དོ། །ཆོས་ཐམས་ཅད་སྤྲོས་པ་མེད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་དུ་རིག་པར་བྱའོ། །ལག་ན་རྡོ་རྗེ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཛིན་པ་དང་ཀློག་པ་དང་སྒོམ་པ་ དེས་འདུལ་བའི་དབང་གི་ཕྱིར་ཁམས་གསུམ་དུ་སྐྱེས་པའི་སེམས་ཅན་ཐམས་ཅད་བསད་ཀྱང་ངན་སོང་དུ་སྐྱེ་བར་མི་འགྱུར་ཏེ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཆོས་ཉིད་འདིའི་དོན་རྒྱ་ ཆེར་སྟོན་ཅིང་། འཇིག་རྟེན་གསུམ་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་གྱི་ཕྱག་རྒྱ་བཅིངས་ནས། ཁྲོ་གཉེར་དང་བཅས་ཤིང་སྨིན་མ་བཏེག་སྟེ་འབར་བར་བལྟ་ལ་པདྨའི་གདོང་ཁྲོ་ཞིང་དགོད་དེ། མཆེ་བ་གཙིགས་ནས་རྐང་པ་གཡས་པ་བསྐུམ་པའི་ཚུལ་དུ་གནས་པས་གནས་ ནས་རྡོ་རྗེ་ཧཱུྃ་ཞེས་བྱ་བའི་སྙིང་པོ་འདི་གསུངས་སོ། །ཧཱུྃ། དེ་ནས་འདི་གསུངས་པ་ཙམ་གྱིས་འཇིག་རྟེན་གསུམ་པོ་ཐམས་ཅད་ཀྱི་འདོད་པའི་དབང་ཕྱུག་ལ་སོགས་པ་འཇིག་རྟེན་གསུམ་གྱི་བདག་པོ་རྣམས་ཡང་དག་པར་བཀུག་སྟེ་ལྷུང་བར་མཛད་ནས་དཀྱིལ་འཁོར་དུ་བཅུག་ནས་རྣམ་པར་རྒྱལ་བར་ མཛད་ལ་བཅིངས་ཏེ། དབང་དུ་བྱས་ནས་བཏུལ་ཞིང་རྗེས་སུ་བཏུལ་ཏེ། བསླད་ནས་ཡང་དམ་ཚིག་གིས་བཅིངས་ནས་འཇིག་རྟེན་གསུམ་གྱི་བདག་པོ་དབང་ཕྱུག་ཆེན་པོ་ཆུང་མ་དང་བཅས་པ་ཞབས་གཉིས་སུ་ཕབ་ནས་མནན་པར་མཛད་དོ། །དེ་ནས་དེ་རྣམས་ཀྱིས་འཇིག་རྟེན་གསུམ་པོ་ཐམས་ ཅད་དུ་སྒྲ་ཆེན་པོ་བསྒྲགས་ཏེ། ཀྱེ་རྡོ་རྗེ་འཆང་ཆེན་པོ་ཡོངས་སུ་སྐྱོབ་པར་མཛོད་ཅིག །བདག་ཅག་རྣམས་མ་གཟིར་ཅིག །འདིར་ཁྱོད་ལ་བདག་ཅག་སྐྱབས་སུ་མཆིའོ། །དམ་ཚིག་དང་བཀའ་བསྒོ་བ་ཡང་བསྒྲུབ་པར་བགྱིའོ། །མ་མོ་ཐམས་ཅད་ཀྱང་བཏུལ་ཞིང་དམ་ལ་བཏགས་ནས་
- 159a
དཀྱིལ་འཁོར་ཡང་རྣམ་པར་བཤིག་སྟེ། ཕྱག་རྒྱ་ཐམས་ཅད་དང་དམ་ཚིག་ཀྱང་དྲལ་ཞིང་རྣམ་པར་བཤིགས་པ་དང་། གདོན་ཐམས་ཅད་ཀྱང་བཟློག་ཅིང་། །ནད་ཐམས་ཅད་དང་རིམས་དང་གནོད་པ་དང་དུག་དང་ངན་འགྲོ་རྣམས་དྲལ་ཞིང་རྣམ་པར་བཤིགས་པས་སྒྲ་ཆེན་ པོ་སྒྲོགས་ཤིང་འཇིགས་པ་ཆེན་པོས་འཇིགས་པར་བྱེད་པའི་ཚིག་རྣམས་ཀྱིས་བཅོམ་ལྡན་འདས་ཉིད་ལ་སྐྱབས་སུ་སོང་ངོ་། །བཅོམ་ལྡན་འདས་ཀྱིས་ཀྱང་ཞལ་རྣམ་པར་བཞད་ནས། དེ་རྣམས་དཀྱིལ་འཁོར་དུ་བཅུག་སྟེ། དམ་ཚིག་གིས་བཅིངས་ནས། རྡོ་རྗེ་རིན་ཆེན་གྱིས་དབང་ བསྐུར་ནས་རང་གི་མཚན་མ་རྣམས་རྡོ་རྗེས་བྱིན་གྱིས་བརླབས་ཏེ། རྡོ་རྗེ་མིང་གི་དབང་བསྐུར་བ་ཡང་རྗེས་སུ་སྩལ་ནས། སེམས་ཅན་མ་ལུས་པའི་དོན་དུ་ཕྱིའི་རྡོ་རྗེའི་རིགས་སུ་རབ་ཏུ་བཞག་གོ། །དེ་ནས་རྡོ་རྗེ་ཁྲོ་བོའི་རྡོ་རྗེ་ལས་ཕྱག་ན་རྡོ་རྗེ་དང་འདྲ་བའི་དངོས་པོའི་བདག་ཉིད་ཅན་ཁ་དོག་དང་རྒྱན་ དང་མཚོན་ཆ་རྣམ་པ་སྣ་ཚོགས་བསྣམས་པ། རྣམ་པར་འགྱུར་བའི་རྡོ་རྗེའི་མཆེ་བ་གཙིགས་པ། ཚེམས་ཀྱིས་སྒྲོས་གནོན་པ་སྨིན་མ་མི་བཟད་ཅིང་ཁྲོ་གཉེར་བསྙེར་བ། སྤྱན་དང་དབུ་སྐྲ་དང་ཨག་ཙོམ་འབར་བ་ཞལ་འཇིགས་པ། རྡོ་རྗེ་དང་ལྕགས་ཀྱུ་དང་ཞགས་པ་དང་མཚོན་ཆ་ མདའ་དང་དབྱིག་པ་དང་རལ་གྲི་དང་ཁ་ཊྭཱྃ་ག་དང་གྲི་རིང་དང་ཆུ་གྲི་ཕྱག་ན་བསྣམས་པ། ཁྲོ་བོ་ཆེན་པོ་ཧཱུྃ་མཛད་ལས་ཕྱུང་སྟེ། བཅོམ་ལྡན་འདས་ཕྱག་ན་རྡོ་རྗེའི་དང་པོའི་དཀྱིལ་འཁོར་གྱི་ཚུལ་གྱིས་བཞུགས་སོ། །ལྷ་ལ་སོགས་པ་དེ་རྣམས་ཀྱང་རང་གི་དཀྱིལ་འཁོར་གྱིས་བྱིན་གྱིས་བརླབས་ནས། ། ཕྱིའི་དཀྱིལ་འཁོར་དུ་བཞག་གོ། །གདོན་ལ་སོགས་པ་དེ་དག་ཀྱང་དཀྱིལ་འཁོར་གྱི་ཕྱི་རིམ་ན་གནས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཐུགས་རྗེ་ཆེན་པོའི་ཐབས་ཀྱི་ཁྲོ་བོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཁམས་གསུམ་པོ་མཐའ་ དག་ལས་རྣམ་པར་རྒྱལ་པ་རྡོ་རྗེའི་བྱིན་གྱིས་བརླབས་པ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །དེ་ནས་ཡང་དག་བཤད་བྱ་བ། །རྡོ་རྗེའི་དཀྱིལ་འཁོར་དམ་པ་སྟེ། །ཁམས་གསུམ་རྣམ་པར་རྒྱལ་ཞེས་བྱ། །འདུལ་བ་ཆེན་པོ་འདུལ་བྱེད་པ། །དཀྱིལ་འཁོར་དང་པོའི་སྦྱོར་བ་
- 159b
ཡིས། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་གི་འཁོར་ལོ་ནི། །དཀྱིལ་འཁོར་བརྒྱད་པ་དག་དང་མཚུངས། །དེ་ཡི་དབུས་སུ་ཁྲོ་བོ་ཆེ། །ཕྱག་ན་རྡོ་རྗེ་གཞག་པར་བྱ། །སངས་རྒྱས་ཕྲེང་ལ་སོགས་པས་སྤྲས། །ཨུཏྤལ་སྔོན་པོའི་མདོག་འདྲ་བ། །ཞལ་ནི་ཅུང་ཟད་མཆེ་ བ་གཙིགས། །ཁྲོ་བཅས་བཞད་པའི་ཞལ་མངའ་བ། །གཡོན་བརྐྱང་བ་ཡིས་ལེགས་བཞུགས་ལ། །རྡོ་རྗེ་ཧཱུྃ་མཛད་བསྡུས་པས་སོ། །གཡོན་གྱི་ཞབས་ཀྱིས་ལེགས་གནོན་པ། །དེ་ཡི་བྱ་བ་དབང་ཕྱུག་ཆེ། །གཡས་ནི་དཀའ་ཐུབ་ཟློག་མ་ཡི། །ནུ་མའི་སྟེང་དུ་རབ་ཏུ་འཇོག ། འབར་ཕྲེང་འཁྲིགས་པའི་འོད་ལྡན་པ། །ས་སོགས་བཅས་པའི་ཁམས་རྣམས་ཀྱིས། །ཁྲོ་བོ་ཀུན་དུ་གཞག་པར་བྱ། །འབར་ཕྲེང་འཁྲིགས་པའི་འོད་ལྡན་པའི། །འཁོར་ལོ་དེ་ཡང་མཁས་པ་ཡིས། །འབར་ཕྲེང་འཁྲིགས་པའི་འོད་ཅན་བྲི། །ཕྱི་ཡི་དཀྱིལ་འཁོར་གནས་རྣམས་ སུ། །ཕྱི་ཡི་དཀྱིལ་འཁོར་ཚོགས་རྣམས་སུ། །ཁྲོ་བོའི་མཚན་མ་བཞི་པོ་ནི། །གཞུ་དང་མདའ་དང་རལ་གྲི་དང་། །འཁོར་ལོ་དེ་བཞིན་རྩེ་གསུམ་བསྒྲེང་། །སྒོ་རྣམས་ཀུན་དུ་བྲི་བར་བྱ། །ཕྱི་རོལ་གནས་པའི་གདོན་རྣམས་ཀྱི། །སྣ་ཚོགས་གཏོར་མས་བཀང་བ་དང་། །བ་དན་ སྔོན་པོ་དྲིལ་བཏགས་ཤིང་། །རྩེ་མོ་ཁ་དོག་སྣ་ཚོགས་པའོ། །དེ་ནས་འདིར་འཇུག་པ་ལ་ནི་ཡན་ལག་ཐམས་ཅད་རས་སྔོན་པོ་ཟུང་གིས་གཡོགས་ཤིང་ཁྲོས་པས་རྡོ་རྗེ་དམ་ཚིག་གི་ཕྱག་རྒྱ་དང་བཅས་པས་འཛིན་པར་གྱུར་པས་ཞུགས་ན། བཅོམ་ལྡན་འདས་ཀྱིས་རྡོ་རྗེའི་རིགས་ཀྱི་སློབ་དཔོན་དུ་ བྱིན་གྱིས་རློབ་པ་མཛད་དོ། །དེ་ནས་བརྩམས་ཏེ་སྡིག་པ་ལ་སོགས་པ་རྣམ་པར་གྲོལ་ཞིང་། མི་སོད་པ་དང་མི་ཚུགས་པ་དང་མུ་སྟེགས་ཐམས་ཅད་ལ་ཚར་གཅོད་པ་དང་ཕན་འདོགས་ནུས་ཤིང་ཐམས་ཅད་ལས་རྒྱལ་བ་དང་དངོས་གྲུབ་ཐམས་ཅད་འགྲུབ་པར་འགྱུར་རོ། །དེ་ནས་སློབ་མ་དེ་བཞིན་དུ་ བཅུག་ལ་སྙིང་པོ་བྱིན་ཏེ་དཀྱིལ་འཁོར་ཐམས་ཅད་དུའང་བྱའོ། །དེ་ནས་རྡོ་རྗེ་རྣོན་པོ་རྩེ་བཞི་པ་འབར་བ་བྱིན་ལ་རྡོ་རྗེ་མིང་གི་དབང་བསྐུར་བས་དབང་བསྐུར་ནས་རྡོ་རྗེའི་བརྟུལ་ཞུགས་སྦྱིན་པར་བྱ་སྟེ། འདི་ནི་གདུག་པ་འདུལ་བྱེད་བའི། །ལག་ན་རྡོ་རྗེའི་རྡོ་རྗེ་སྟེ། །མ་རུངས་ཐམས་ཅད་འདུལ་བ་
- 160a
ལ། །ཁྱོད་ཀྱིས་ཀྱང་ནི་རྟག་ཏུ་བཅང་། །དེ་ནས་དེ་བཞིན་དུ་འབྱུང་བར་བྱའོ། །རྡོ་རྗེའི་དཀྱིལ་འཁོར་རོ། །དེ་ནས་སྒྲུབ་པ་ལ་ནི་རས་ལ་བཅོམ་ལྡན་འདས་ཁྲོ་བོའི་དབང་ཕྱུག་བྱས་ལ། རྡོ་རྗེའི་དཀྱིལ་འཁོར་གྱི་ཆོ་གས་ཀྱང་སེམས་དཔའ་ཆེན་པོ་ཐམས་ ཅད་བྱའོ། །ཕྱོགས་ཐམས་ཅད་དུ་ནི་ལྷ་ལ་སོགས་པ་དང་མ་མོ་རྣམས་བྲི་བར་བྱ་སྟེ། དེ་ནས་བསྒྲུབ་པ་ཆེན་པོ་ལ་ཡང་དེ་བཞིན་ཏེ། དེ་བཞིན་དུ་དངོས་གྲུབ་མཆོག་རྣམས་ལ་ནི་རས་ལ་བཅོམ་ལྡན་འདས་ཅི་ལྟ་བ་བཞིན་དུ་བྱས་ནས། དེའི་མདུན་དུ་ལག་པ་གཉིས་ཀྱིས་ཕྱག་རྒྱ་ བཅིངས་ཏེ་བཟླས་བརྗོད་འབུམ་བྱའོ། །དེ་ནས་ཡི་གེ་ཧཱུྃ་ཙམ་གྱིས་འཇིག་རྟེན་དང་འཇིག་རྟེན་ལས་འདས་པའི་ལས་ཐམས་ཅད་བྱེད་པར་འགྱུར་རོ། །མ་བསྒྲུབས་པར་ཡང་ལས་ཐམས་ཅད་དང་། དེ་བཞིན་དུ་ཐམས་ཅད་རྗེས་སུ་ཆགས་པར་བྱ་བ་དང་། དགུག་པ་དང་། གཞུག་པ་དང་། བཅིང་བ་དང་། དགྲོལ་བ་དང་། དབང་དུ་བྱ་བ་དང་། ལྐུགས་པར་བྱ་བ་དང་། རེངས་པར་བྱ་བ་དང་། རྨོངས་པར་བྱ་བ་དང་། གཉིད་མེད་པར་བྱ་བ་དང་། རྒྱས་གདབ་པ་དང་། ལྟུང་བ་དང་། བརྡེག་པ་དང་། །གསང་པ་དང་། གསོ་བར་བྱ་བ་ལ་སོགས་པ་ཡང་ལན་ཅིག་ བཟླས་པས་བྱེད་པར་འགྱུར་རོ། །ཐམས་ཅད་གསད་པ་ལ་ནི་རྡོ་རྗེ་ཁྲོ་བོ་མཐར་བྱེད་ཀྱིས་སོ། །ཐམས་ཅད་རྒྱས་གདབ་པ་ལ་ནི་ཁྲོ་བོའི་ལྟ་བའི་བཟླས་པས་སོ། །ཐམས་ཅད་གཞིག་པ་ལ་ནི་རྡོ་རྗེ་ཁྲོས་པས་གཞིག་པར་བྱའོ། །ཐམས་ཅད་ངེས་པར་གནོན་པ་ལ་ནི་རྡོ་རྗེ་དང་ཁྲོས་པས་ ཕྱོགས་དེར་བརྡེག་པར་བྱའོ། །ནད་ཐམས་ཅད་དབུག་པ་ལ་ནི་རྡོ་རྗེ་ཕྲ་མོ་འབིགས་བྱེད་ཀྱིས་སོ། །ཐམས་ཅད་ཀྱི་སྙིང་འབྱིན་པ་ལ་ནི་ཁྲོས་པའི་ཡིད་ཀྱིས་དབྱུང་བར་བྱའོ། །གདུག་པ་ཐམས་ཅད་ཚར་གཅད་པ་ལ་ནི་ཁྲོས་པས་རྡོ་རྗེ་བསྐོར་བར་བྱའོ། །གདུག་ཅིང་ཁྲོས་པ་དགོས་པ་ལ་ནི་ཁྲོས་པས་ ལྕགས་ཕྱེའི་སྦྱིན་སྲེག་གིས་སོ། །བདུད་ཐམས་ཅད་བརླག་པ་ལ་ནི་རང་གི་ས་བོན་གྱི་སྦྱིན་སྲེག་གིས་སོ། །གནོད་སྦྱིན་ཐམས་ཅད་བསྐྲད་པ་ལ་ནི་ཧ་ཧ་ཞེས་དགོད་ཅིང་བཟླས་པས་སོ། །ཀླུ་ཐམས་ཅད་གདོན་པ་ལ་ནི་རྡོ་རྗེས་ལ་བརྡེབས་ཤིང་བཟླས་པས་སོ། །ལྷ་ཐམས་ཅད་ལྟུང་བར་
- 160b
བྱ་བ་ལ་ནི་ལྷ་མོ་རྡོ་རྗེ་ལྟུང་བྱེད་ཀྱིས་སོ། །ལྷའི་བདག་པོ་ཐམས་ཅད་དབང་དུ་བྱ་བ་དང་། གདུལ་བ་དང་། བསྣུན་པ་དང་། གསོད་པ་དང་། གདུལ་བར་བྱ་བ་ལ་ནི་རྡོ་རྗེ་སྲིད་པ་གསུམ་པོ་གདུལ་བར་བྱེད་པས་སོ། །རྣམ་ཐོས་སྲས་རྗེས་སུ་འབྲང་བར་བྱ་བ་ལ་ནི་རྣམ་ཐོས་སྲས་མནན་ ནས་ཁྲོས་པས་བཟླས་བརྗོད་བྱའོ། །ལུས་ངན་པོ་མནན་ནས་དཔལ་དབྲོག་པར་བྱ་བ་ལ་ནི་རྡོ་རྗེ་སྐྱེས་བུས་སོ། །འདོད་པའི་ལྷ་དབང་དུ་བྱ་བ་ལ་ནི་འདོད་པའི་ལྷའི་མདུན་དུ་ཁྲོས་པས་བཟླས་བརྗོད་བྱའོ། །ཚངས་པ་ལྟུང་བར་བྱ་བ་ལ་ནི་རྡོ་རྗེ་རབ་ཏུ་དགའ་བའི་ཕྱག་རྒྱས་སོ། །ཁྱབ་འཇུག་ གཞིག་པ་ལ་ནི་རྡོ་རྗེ་འཁོར་ལོ་དྲལ་བས་སོ། །དབང་ཕྱུག་ཆེན་པོ་གདུལ་བར་བྱ་བ་ལ་ནི་རྡོ་རྗེ་ཏྲི་ཤཱུ་ལ་དྲལ་བས་སོ། །མ་མོ་ཐམས་ཅད་གསད་པ་ལ་ནི་རྡོ་རྗེ་ཁྲོ་བོའི་ཚོགས་ཀྱི་སྲིན་མོས་སོ། །ཕྱིའི་དཀྱིལ་འཁོར་ཐམས་ཅད་ཀྱི་ཕྱག་རྒྱ་དང་དམ་ཚིག་དང་ཆོས་དང་གསང་བའི་དངོས་གྲུབ་རྣམ་ པར་གཏོར་ཞིང་རྣམ་པར་གཞིག་པ་ལ་ནི་རྡོ་རྗེ་ཁྲོ་བོའི་གདུག་པའི་དམ་ཚིག་འཇིགས་པར་བྱེད་པས་སོ། །རི་དང་ཤིང་དང་ཁྱིམ་དང་གཙུག་ལག་ཁང་དང་གྲོང་ཁྱེར་དང་མཆོད་རྟེན་དང་ལྷའི་ཁང་པ་དང་། སྐྱེས་པ་དང་བུད་མེད་དང་གླང་པོ་དང་བཅས་པའི་རྟ་ལ་སོགས་པ་ཐམས་ཅད་གཞོམ་པ་ལ་ ནི་རྡོ་རྗེ་ཁྲོ་བོའི་ལྟ་བས་མིག་ལ་རེག་པས་སོ། །ལྟུང་བ་ཐམས་ཅད་བསླང་བ་ལ་ནི་རྡོ་རྗེ་ཁྲོ་བོ་བསླང་བས་སོ། །ཐམས་ཅད་སྤོ་བ་ལ་ནི་རྡོ་རྗེ་ཁྲོས་པའི་རྣལ་འབྱོར་མས་སོ། །ཐམས་ཅད་དབྲོག་པ་ལ་ནི་རྡོ་རྗེ་ཁྲོ་བོའི་ཁུ་ཚུར་དང་དབྲོག་པས་སོ། །འཇིགས་པ་ཐམས་ཅད་བསྐྱེད་པ་ལ་ནི་རྡོ་རྗེ་ཁྲོ་ བོའི་ལྟ་བས་སོ། །དཔུང་ཐམས་ཅད་གསད་པ་ལ་ནི་རྡོ་རྗེ་ཁྲོ་བོའི་གནོད་སྦྱིན་མོས་སོ། །གཞན་གྱི་དཔུང་ཐམས་ཅད་གཞོམ་པ་དང་གནོན་པ་དང་རྨོངས་པར་བྱ་བ་དང་ལོང་བར་བྱ་བ་དང་རྒྱས་གདབ་པ་དང་གསད་པ་ལ་ནི་རྡོ་རྗེ་ཁྲོ་བོ་མ་རུངས་པའི་སྲིན་མོས་སོ། །རྒྱལ་པོ་ལ་སོགས་པ་མི་ཆེན་པོ་ ཐམས་ཅད་གསད་པ་ལ་ནི་དོང་ཀའི་ཤིང་ལ་རང་གི་ཁྲག་གིས་སྦྱིན་སྲེག་བྱས་པས་སོ། །ལྷ་ཐམས་ཅད་རྣམ་པར་གཞིག་པ་ལ་ནི་ལྷ་ཐམས་ཅད་ཀྱི་གཟུགས་བརྙན་ཕུར་བུས་གདབ་པས་སོ། །ལྷའི་བདག་པོ་ཐམས་ཅད་བསྲེག་པ་ལ་ནི་ལྷ་ཐམས་ཅད་ཀྱི་གཟུགས་བརྙན་གྱི་ཡམ་ཤིང་གིས་
- 161a
སོ། །རང་གི་ཁྲག་གི་རྒྱུན་དབབ་པས་ས་ཐམས་ཅད་ནུབ་པར་བྱ་བ་ལ་ནི་རྡོ་རྗེ་ཁྲོ་བོས་འོག་གི་ཕྱག་རྒྱས་སོ། །ཁམས་གསུམ་ཐམས་ཅད་གསད་པ་ལ་ནི་རྡོ་རྗེ་འཇིགས་པའི་ཕྱག་རྒྱས་སོ། །འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བ་ལ་ནི་འཇིག་ རྟེན་གསུམ་ལས་རྣམ་པར་རྒྱལ་བའི་མཆོག་གི་རྡོ་རྗེ་ཁྲོ་བོས་སོ། །ཁམས་གསུམ་ཐམས་ཅད་དབབ་པ་དང་དགུག་པ་དང་གཞུག་པ་དང་། དབང་དུ་བྱ་བ་དང་། ངེས་པར་གནོན་པ་ལ་ནི་རྡོ་རྗེ་སེམས་དཔའི་ཁྲོ་བོའི་ཕྱག་རྒྱས་སོ། །ཁམས་གསུམ་པོ་ཐམས་ཅད་རྗེས་སུ་ཆགས་པར་བྱ་ བ་དང་དགུག་པ་དང་གཞུག་པ་དང་བཅིང་བ་དང་རྒྱས་གདབ་པ་དང་དབང་དུ་བྱ་བ་དང་གནོན་པར་བྱ་བ་དང་བསྒྲུབ་པ་ལ་ནི་བདེ་བ་ཆེན་པོའི་རྡོ་རྗེ་ཁྲོ་བོ་རྡོ་རྗེའི་དམ་ཚིག་གི་ཁྲོ་བོས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས་ཁམས་གསུམ་རྣམ་པར་རྒྱལ་བའི་རྡོ་ རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །འཇིག་རྟེན་གསུམ་རྒྱལ་གྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ངོ་བོ་ཉིད་དག་པའི་ཆོས་ཉིད་ཐོབ་པས་ཡང་ཆོས་ཐམས་ཅད་ཀྱི་མཉམ་པ་ཉིད་སྤྱན་རས་གཟིགས་དབང་ཕྱུག་གི་ཡེ་ཤེས་ཀྱི་ ཕྱག་རྒྱ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་གསུངས་ཏེ། འདོད་ཆགས་ཐམས་ཅད་རྣམ་པར་དག་པ་ཉིད་ཀྱིས་ཀྱང་འཇིག་རྟེན་ན་ཞེ་སྡང་ཐམས་ཅད་རྣམ་པར་དག་པར་འགྱུར་རོ། །དྲི་མ་ཐམས་ཅད་རྣམ་པར་དག་པ་ཉིད་ཀྱིས་འཇིག་རྟེན་ན་སྡིག་པ་ཐམས་ཅད་རྣམ་པར་དག་པར་འགྱུར་ རོ། །ཆོས་ཐམས་ཅད་རྣམ་པར་དག་པས་འཇིག་རྟེན་ན་སེམས་ཅན་ཐམས་ཅད་རྣམ་པར་དག་པར་འགྱུར་རོ། །ཤེས་པ་ཐམས་ཅད་རྣམ་པར་དག་པས་འཇིག་རྟེན་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་འགྱུར་རོ། །ལག་ན་རྡོ་རྗེ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ ཉན་པ་དང་འཛིན་པ་དང་ཀློག་པ་དང་སྒོམ་པ་དེ་འདོད་ཆགས་དང་དྲི་མ་ཐམས་ཅད་ཀྱི་ནང་ན་འདུག་ཀྱང་པདྨོ་ལྟ་བུར་འདོད་ཆགས་ཀྱི་ཉེས་པ་རྣམས་དང་དྲི་མ་རྣམས་དང་གློ་བུར་གྱི་ཉོན་མོངས་པ་རྣམས་ཀྱིས་གོས་པར་མི་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་
- 161b
རྫོགས་པར་འཚང་རྒྱ་བར་ཡང་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དོན་གྱི་གནས་འདི་ཉིད་ཡང་རྒྱ་ཆེར་སྟོན་ཅིང་བཞིན་རབ་ཏུ་འཛུམ་དམུལ་ཏེ། པདྨའི་འདབ་མ་ཁ་འབྱེད་པས་འདོད་ཆགས་ལ་སོགས་པའི་དྲི་མས་མི་ གོས་པ་ལ་བལྟ་ཞིང་འགྲོ་བ་ཐམས་ཅད་ཀྱི་ཕྱིར་པདྨའི་གཟུགས་སྣ་ཚོགས་ཞེས་བྱ་བའི་སྙིང་པོ་འདི་གསུངས་སོ། །ཧྲཱིཿ། དེ་ནས་འདི་གསུངས་པ་ཙམ་གྱིས་པདྨ་ཆེན་པོ་དེ་ལས་དེ་བཞིན་གཤེགས་པ་ལ་སོགས་པའི་གཟུགས་བརྙན་ཐམས་ཅད་བཅོམ་ལྡན་འདས་དང་འདྲ་བའི། པདྨས་མཚན་པའི་གཟུགས་ཅན་ངེས་པར་བྱུང་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་རིམ་པ་དང་པོའི་དཀྱིལ་འཁོར་གྱི་ཚུལ་དུ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་ཆོས་ཐམས་ཅད་ལ་གཟིགས་པའི་ཡེ་ཤེས་ཀྱི་དབང་ ཕྱུག་གི་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འགྲོ་བ་ཐམས་ཅད་འདུལ་བ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །ཕྱིའི་དཀྱིལ་འཁོར་ཅི་ལྟ་བའི་ནང་དུ་གཉིས་པ་ནི་ཟུར་བཞི་པ་ལ་དེ་བཞིན་དུ་སྒོ་དང་མཚམས་སུ་བཅས་པར་བྲིའོ། ། དེ་ནས་དཀྱིལ་འཁོར་བརྒྱད་པའི་ཚུལ་དུ་ཐིག་བཞིས་ཐིག་བཏབ་པ་ལ་ཚོན་དམར་པོས་པདྨ་འདབ་མ་བརྒྱད་པ་བྲི་བར་བྱའོ། །དེའི་དབུས་སུ་བཅོམ་ལྡན་འདས་དགོད་པར་བྱའོ། །དེའི་མདུན་དུ་བཅོམ་ལྡན་འདས་པདྨ་ཆེན་པོ་ཆགས་པ་སྐུ་མདོག་དམར་པོ་པདྨའི་གཟུགས་འཛིན་པ། པདྨ་ ཆེན་པོ་དང་མདའ་དང་གཞུ་བསྣམས་པ། གཡས་སུ་བཅོམ་ལྡན་འདས་པདྨ་ཆེན་པོའི་གཏུམ་པོའི་དབང་ཕྱུག་དབང་ཕྱུག་ཆེན་པོའི་གཟུགས་འཛིན་པ་གཞག་པར་བྱའོ། །རྒྱབ་ཏུ་པདྨ་ཆེན་པོ་ཁྱབ་འཇུག་གི་གཟུགས་འཛིན་པ་སྐུ་མདོག་ནག་པོ་གཞག་པར་བྱའོ། །གཡོན་དུ་ པདྨ་ཆེན་པོ་མི་མཇེད་ཀྱི་བདག་པོ་ཚངས་པའི་གཟུགས་འཛིན་པ་སྐུ་མདོག་དཀར་པོ་གཞག་པར་བྱའོ། །གཡས་ཀྱི་མཚམས་སུ་པདྨ་ཆེན་པོ་ས་འཛིན་པ་གཞག་པར་བྱའོ། །མཚམས་གཉིས་པར་པདྨ་ཆེན་པོ་རྒྱ་མཚོ་ཆུ་ལྷའི་གཟུགས་འཛིན་པ་གཞག་པར་བྱའོ། །གསུམ་
- 162a
པར་པདྨ་ཆེན་པོ་ཉི་མའི་གཟུགས་ཅན་གཞག་པར་བྱའོ། །བཞི་པར་པདྨ་ཆེན་པོ་རླུང་གི་གཟུགས་འཛིན་པ་གཞག་པར་བྱའོ། །ཕྱིའི་དཀྱིལ་འཁོར་གྱི་མཚམས་རྣམས་སུ་ཤྲཱི་ཧཱི་གཱིདྷཱི་ལྷ་མོ་བཞི་གཞག་པར་བྱ་སྟེ་ཐམས་ཅད་ཀྱང་གཡས་ན་རང་གི་མཚན་མ་ འཛིན་པ་གཡོན་པ་པདྨ་འཛིན་པར་བྱའོ། །སྒོ་རྣམས་སུ་ནི་འདོད་ཆགས་དང་ཞེ་སྡང་དང་གཏི་མུག་དང་མྱ་ངན་ལས་འདས་པའི་མཚན་མ་རྣམས་གཞག་པར་བྱ་སྟེ་འདི་ལྟ་སྟེ་བུད་མེད་ཀྱི་གཟུགས་དང་སྦྲུལ་གྱི་གཟུགས་དང་། ཕག་གི་གཟུགས་དང་། པདྨའི་གཟུགས་ཞེས་བྱའོ། །དེ་ ནས་གོས་དཀར་པོ་བགོས་ཏེ་གོས་དཀར་པོས་གདོང་གཡོགས་ལ། པདྨ་ཆེན་པོའི་ཕྱག་རྒྱ་ཆེན་པོ་མེ་ཏོག་དང་བཅས་པ་བཅིངས་ཏེ་ཞུགས་ལ་མེ་ཏོག་དོར་བར་བྱ་སྟེ་གང་དུ་བབས་པ་དེ་དེས་བསྒྲུབ་པར་བྱའོ། །དེ་ནས་པདྨ་བླངས་ལ་པདྨའི་མིང་གིས་དབང་བསྐུར་བས་དབང་བསྐུར་ལ་འདི་སྐད་ ཅེས་བརྗོད་པར་བྱ་ཞིང་། པདྨའི་འདབ་མ་ལ་བལྟ་བར་བྱ་སྟེ། ཅི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་ཏེ། །འདམ་གྱི་ནང་ན་དག་པ་ལྟར། །འདོད་ཆགས་ཞེ་སྡང་སོགས་དེ་བཞིན། །དེ་ལྟར་ཆོས་རྣམས་བསྒོམས་ན་ནི། །བློ་ལྡན་ཉོན་མོངས་བཅས་གྱུར་ཀྱང་། ། ཉོན་མོངས་ཀུན་ལས་རྣམ་གྲོལ་ནས། །མྱུར་དུ་སངས་རྒྱས་ཉིད་འཐོབ་འགྱུར། །ཞེས་བྱ་བའི་ཏིང་ངེ་འཛིན་འདི་ལ་གཟིགས་པས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་ཉིད་ཐོབ་པར་འགྱུར་ཏེ། དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་ཅེས་མཚན་བཏགས་སོ། །དེ་ ནས་བརྩམས་ཏེ་བདག་ཉིད་ཀྱི་དངོས་པོ་ཐམས་ཅད་ཤིན་ཏུ་ཡོངས་སུ་དག་པ་དང་བཀྲ་ཤིས་ཤིང་དངོས་གྲུབ་ཐམས་ཅད་བྱང་ཆུབ་ཀྱི་སྙིང་པོའི་བར་དུ་རྗེས་སུ་མྱོང་བར་འགྱུར་ཞིང་། མྱུར་དུ་སངས་རྒྱས་ཉིད་ཐོབ་པར་འགྱུར་ཏེ། སློབ་མ་གཞུག་པའི་ཆོ་ག་རྒྱས་པ་ཡང་དེ་བཞིན་ནོ། །ཡེ་ཤེས་ ཀྱི་དཀྱིལ་འཁོར་རོ། །བསྒྲུབ་པ་ལ་ནི་དེ་བཞིན་དུ་རས་ཀྱི་རི་མོ་གཉིས་ཀྱིས་དངོས་གྲུབ་ཐམས་ཅད་ཐོབ་པར་འགྱུར་རོ། །དེ་ནས་མ་བསྒྲུབས་ཀྱང་ཐམས་ཅད་རྗེས་སུ་ཆགས་པར་བྱ་བ་ལ་ནི་པདྨ་ལ་ལན་སྟོང་བཟླས་ཏེ་སྦྱིན་པར་བྱའོ། །ཐམས་ཅད་གསད་པ་ལ་ནི་པདྨ་ཆེན་པོའི་ཁྲོ་
- 162b
བོའི་ཕྱག་རྒྱས་སོ། །ཐམས་ཅད་རྨོངས་པར་བྱ་བ་ལ་ནི་པདྨ་ཆེན་པོ་ཕག་གིས་སོ། །ཉོན་མོངས་པ་ཐམས་ཅད་རྣམ་པར་དག་པར་བྱ་བ་ལ་ནི་པདྨ་ཆེན་པོ་རྣམ་པར་གཟིགས་པའི་ཏིང་ངེ་འཛིན་གྱི་ཕྱག་རྒྱས་སོ། །ས་ཐམས་ཅད་ཀྱི་བདག་པོ་ཉིད་དུ་བྱ་བ་ལ་ནི་ས་ལ་སྐྱིལ་མོ་ ཀྲུང་བཅས་པས་བཟླས་བརྗོད་འབུམ་བྱས་ནས་མཐར་མཚན་མོ་ཐོག་ཐག་བཟླས་བརྗོད་བྱའོ། །ཆུ་ཐམས་ཅད་དབབ་པ་ལ་ནི་ཀླུ་བྲིས་ནས་དེའི་སྟེང་དུ་འདུག་སྟེ་བཟླས་བརྗོད་འབུམ་བྱའོ། །ཐམས་ཅད་སྣང་བར་བྱ་བ་ལ་ནི་མུན་པར་ཉི་མ་ཆེན་པོའི་འོད་ཀྱིས་སོ། །རླུང་ཐམས་ཅད་དགུག་ པ་དང་། གཞུག་པ་དང་། བཅིང་བ་དང་དབང་དུ་བྱ་བ་ལ་ནི། པདྨ་ཆེན་པོ་རླུང་གི་མཆོག་གིས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཉོན་མོངས་པ་ཐམས་ཅད་རྣམ་པར་དག་པའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་ རྫོགས་སོ། །འགྲོ་བ་འདུལ་བའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཁམས་གསུམ་ཐམས་ཅད་ཀྱི་དབང་པོས་ཡང་། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ལས་བྱུང་བ། ཡེ་ཤེས་ཀྱི་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ ཏུ་ཕྱིན་པའི་ཚུལ་འདི་བཤད་དེ། དབང་བསྐུར་བ་སྦྱིན་པ་ནི་ཁམས་གསུམ་ཐམས་ཅད་ཀྱི་རྒྱལ་སྲིད་ཐོབ་པར་འགྱུར་རོ། །ནོར་སྦྱིན་པ་ནི་རེ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཆོས་སྦྱིན་པ་ནི་ཆོས་ཐམས་ཅད་ཀྱི་མཉམ་པ་ཉིད་ཐོབ་པར་འགྱུར་རོ། །ཟང་ཟིང་སྦྱིན་པ་ ནི་ལུས་དང་ངག་དང་། སེམས་ཀྱི་བདེ་བ་ཐམས་ཅད་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་བཞིན་རབ་ཏུ་འཛུམ་པ་དང་བཅས་ཏེ། རང་གི་མགོ་ལ་རྡོ་རྗེ་རིན་པོ་ཆེས་དབང་བསྐུར་བའི་ཕྲེང་བ་འཆིང་ཞིང་དོན་ཡོད་པ་འདི་ཉིད་རྒྱ་ཆེར་ སྟོན་ཏེ། དབང་བསྐུར་བ་ཐམས་ཅད་ཀྱི་དམ་ཚིག་རིན་པོ་ཆེ་ཞེས་བྱ་བའི་སྙིང་པོ་འདི་སྨྲས་སོ། །ཏྲཱྃ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་ཀྱི་རིན་པོ་ཆེ་དེ་ལས་ཐམས་ཅད་དབང་བསྐུར་བ་ལ་སོགས་པ་ཡོ་བྱད་དང་གཏེར་ཐམས་ཅད་བྱུང་སྟེ། བཅོམ་ལྡན་འདས་དང་
- 163a
པོའི་དཀྱིལ་འཁོར་གྱི་ཚུལ་གྱིས་བྱང་ཆུབ་སེམས་དཔའི་གཟུགས་ཉིད་ཀྱིས་བཞུགས་སོ། །དེ་ནས་བཅོམ་ལྡན་འདས་ནམ་མཁའི་སྙིང་པོ་དབང་བསྐུར་བ་ཐམས་ཅད་ཀྱི་རིན་པོ་ཆེ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། བསམ་པ་ ཐམས་ཅད་ཡོངས་སུ་རྫོགས་པར་བྱེད་པ། ནོར་བུ་རིན་པོ་ཆེའི་དམ་ཚིག་ཅེས་བྱ་བའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ནི་དང་པོའི་དཀྱིལ་འཁོར་གྱི་ཚུལ་དུ་བྱས་པའི་ནང་དུ་རིན་པོ་ཆེ་ཟུར་བརྒྱད་པ་རིན་པོ་ཆེའི་ཀ་བ་བརྒྱད་ལ་གནས་པ་དཀྱིལ་འཁོར་བརྒྱད་པའི་ཚུལ་ ལས། རིན་པོ་ཆེའི་ལྕུག་མས་ཡོངས་སུ་བསྐོར་བ་རྡོ་རྗེ་རིན་པོ་ཆེའི་ར་བ་དང་ལྕོག་དང་། མེ་ཏོག་གི་ཕྲེང་བ་དང་བ་དན་དང་གདུགས་དང་རྔ་ཡབ་ཀྱིས་ཉེ་བར་མཛེས་པ་བྲི་བར་བྱའོ། །དེའི་དབུས་སུ་བཅོམ་ལྡན་འདས་རྟའི་ཁྲི་ལ་བཞུགས་པ་དབང་བསྐུར་བའི་ཕྲེང་བ་རང་ཉིད་འཆིང་ བར་མཛད་ཅིང་ཞལ་རྣམ་པར་བཞད་པ་མ་རྒད་ཀྱི་མདོག་ཅན་གཞག་པར་བྱའོ། །དེའི་མདུན་དུ་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རིན་པོ་ཆེ་ཞེས་བྱ་བ་རྡོ་རྗེ་རིན་པོ་ཆེའི་ཅོད་པན་འཛིན་པ་གཞག་པར་བྱའོ། །གཡས་སུ་རིན་པོ་ཆེ་ཆེན་པོའི་ནོར་ སྦྱིན་པ་དབྱིག་གི་གཏེར་འཛིན་པ་གཞག་པར་བྱའོ། །རྒྱབ་ཏུ་ཆོས་ཆེན་པོའི་རིན་པོ་ཆེའི་གླེགས་བམ་འཛིན་པ་གཞག་པར་བྱའོ། །གཡོན་དུ་རིན་པོ་ཆེ་ཆེན་པོ་རོ་མྱོང་བ་ཟས་དང་སྐོམ་ཐམས་ཅད་འཛིན་པ་གཞག་པར་བྱའོ། །མཚམས་རྣམས་སུ་མཆོད་པའི་ལྷ་མོ་རྣམས་རིན་པོ་ཆེའི་ གདུགས་དང་རྒྱལ་མཚན་དང་རྔ་དང་སྲོག་ཤིང་རྣམས་འཛིན་པ་གཞག་པར་བྱའོ། །ཕྱི་རོལ་གྱིམཚམས་སུ་བུམ་པ་གང་བ་རྣམས་སོ། །སྒོ་རྣམས་སུ་ནི་དབང་བསྐུར་བ་ལ་སོགས་པའི་མཚན་མ་རྣམས་གཞག་པར་བྱའོ། །ཕྱི་རོལ་དུ་ནི་གདུགས་དང་རྒྱལ་མཚན་དང་བ་དན་དང་བླ་རེ་རྣམས་ ཀྱིས་ཀུན་དུ་ཁྱབ་པར་བྱའོ། །དེ་ནས་དེ་བཞིན་དུ་རྡོ་རྗེ་རིན་ཆེན་གྱི་ཕྱག་རྒྱ་འཛིན་པས་ཞུགས་ནས། དེ་ནས་བརྩམས་ཏེ་ནོར་ཐམས་ཅད་འགྲུབ་པ་ལ་སོགས་པའི་དངོས་གྲུབ་ཐམས་ཅད་ཐོབ་པར་འགྱུར་རོ། །དེ་ནས་ཞུགས་ནས་ཀྱང་དབང་བསྐུར་བའི་ཕྲེང་བ་བཅིངས་ཏེ། རིན་པོ་ཆེ་
- 163b
བླངས་ནས་རིན་པོ་ཆེའི་མིང་གི་དབང་བསྐུར་བས་དབང་བསྐུར་ལ་སྦྱིན་པ་ཐམས་ཅད་ཕུལ་ནས་སླར་དབྱུང་བར་བྱའོ། །སློབ་མ་གཞུག་པའི་ཆོ་ག་རྒྱས་པ་ཡང་དེ་བཞིན་ནོ། །རྡོ་རྗེ་རིན་པོ་ཆེའི་དཀྱིལ་འཁོར་རོ། །སྒྲུབ་པ་དང་དངོས་གྲུབ་རྣམས་ཀྱང་དེ་བཞིན་ནོ། །དེ་ནས་མ་ བསྒྲུབས་པར་ཡང་དབང་བསྐུར་བ་ཐམས་ཅད་ཐོབ་པ་ལ་ནི་རྡོ་རྗེ་རིན་པོ་ཆེའི་དབང་བསྐུར་བའི་ཕྲེང་བས་སོ། །བསམ་པ་ཐམས་ཅད་ཡོངས་སུ་རྫོགས་པ་ལ་ནི་ཉིན་རེ་ཞིང་ཉི་མ་འཆར་ཀར་བཟླས་བརྗོད་དཔག་ཏུ་མེད་པ་བྱས་པས་སོ། །ཆོས་ཐམས་ཅད་ཀྱི་དོན་ཤེས་པ་ལ་ནི་དྲི་མ་མེད་པའི་ ནམ་མཁའ་ལ་བལྟ་ཞིང་བཟླས་བརྗོད་བྱའོ། །ཟས་དང་སྐོམ་ཐམས་ཅད་ལ་སོགས་པ་དང་། རོ་ཐམས་ཅད་ཐོབ་པར་བྱ་བ་ལ་ནི་ནམ་མཁའ་ལས་ཡིད་ལ་འདོད་པ་བཞིན་དུ་ཉིན་རེ་ཞིང་། བཅོམ་ལྡན་འདས་ཀྱིས་བཟླས་བརྗོད་སྟོང་བྱས་པས་སོ། །ཤིན་ཏུ་མཐོན་པོ་ཐོབ་པར་བྱ་ བ་ལ་ནི་གདུགས་བཟུང་ནས་བཟླས་བརྗོད་འབུམ་བྱའོ། །རྣམ་པར་རྒྱལ་བ་ཆེན་པོ་ཐོབ་པ་ལ་ནི། རིན་ཆེན་རྒྱལ་མཚན་མཆོག་གིས་སོ། །གྲགས་པ་དང་སྙན་པ་ཆེན་པོ་དང་། མིང་ཐོབ་པར་བྱ་བ་ལ་ནི་ཉིན་རེ་ཞིང་ཁ་ཐམས་ཅད་དུ་བལྟས་ནས་བཟླས་བརྗོད་བྱའོ། །བདག་པོ་ ཆེན་པོ་ཐོབ་པ་ལ་ནི་རིན་པོ་ཆེའི་སྲོག་ཤིང་གི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། དབང་བསྐུར་བ་ཐམས་ཅད་ཀྱི་རིན་པོ་ཆེའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །རིན་པོ་ཆེའི་རིགས་ཀྱི་རྟོག་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་འཛིན་པ། དེ་བཞིན་གཤེགས་པ་རྟག་པས་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་བྱིན་གྱིས་རློབ་པ་རྡོ་རྗེ་ཞེས་བྱ་བའི་ ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་ཡོངས་སུ་འཛིན་པ་ནི་དེ་བཞིན་གཤེགས་པ་ཐམས་ཅད་ཉིད་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསུང་གི་ཕྱག་རྒྱ་ཡོངས་སུ་འཛིན་པ་ནི་ཆོས་ཐམས་ཅད་ཐོབ་པར་
- 164a
འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཕྱག་རྒྱ་ཡོངས་སུ་འཛིན་པ་ནི་ཏིང་ངེ་འཛིན་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་ཡོངས་སུ་འཛིན་པ་ནི་ལུས་དང་ངག་དང་སེམས་ཐམས་ཅད་རྡོ་རྗེར་ རྡོ་རྗེའི་དངོས་གྲུབ་དམ་པ་ཐོབ་པར་འགྱུར་རོ། །སུ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཆང་བ་དང་ཀློག་པ་དང་ལུང་དབོག་པ་དང་སྒོམ་པ་དེས་དངོས་གྲུབ་ཐམས་ཅད་དང་ཕུན་སུམ་ཚོགས་པ་ཐམས་ཅད་དང་ཤེས་པ་ཐམས་ཅད་དང་དགོས་པ་ཐམས་ཅད་ དང་ལུས་དང་ངག་དང་སེམས་ཐམས་ཅད་རྡོ་རྗེར་རྡོ་རྗེའི་དངོས་གྲུབ་དམ་པ་ཐོབ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཁུ་ཚུར་དམ་ཚིག་ཆེན་པོའི་རྡོ་རྗེའི་ཕྱག་རྒྱ་ ཡོངས་སུ་འཛིན་པས་དོན་གྱི་གནས་འདི་རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་རྡོ་རྗེ་སྲ་བའི་ཕྱག་རྒྱ་ཐམས་ཅད་ཀྱི་དངོས་གྲུབ་ཀྱི་དམ་ཚིག་ཅེས་བྱ་བའི་སྙིང་པོ་འདི་གསུངས་སོ། །ཨཿ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་སེམས་ཅན་ ཐམས་ཅད་བཅོམ་ལྡན་འདས་རྡོ་རྗེ་སེམས་དཔས་ཕྱག་རྒྱ་ཐམས་ཅད་ཀྱིས་རྡོ་རྗེ་སེམས་དཔའ་ཉིད་དུ་དེ་བཞིན་གཤེགས་པ་ཐམས་ཅད་ལ་སོགས་པ་དངོས་གྲུབ་མཆོག་གི་རྒྱུས་རྒྱས་གདབ་བོ། །བཅོམ་ལྡན་འདས་རྡོ་རྗེ་ཁུ་ཚུར་གྱིས་ཀྱང་སྐུ་དང་གསུང་དང་ཐུགས་རྡོ་རྗེ་ཐམས་ཅད་ལས་ཕྱག་རྒྱ་ ཆེན་པོ་ལ་སོགས་པ་ཕྱག་རྒྱ་ཐམས་ཅད་ཀྱི་དམ་ཚིག་གི་སེམས་དཔའ་ཕྱུང་ནས་ཀྱང་། །དང་པོའི་དཀྱིལ་འཁོར་གྱི་ཚུལ་གྱིས་བཞུགས་པར་གྱུར་ཏོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེ་ཁུ་ཚུར། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་རྡོ་རྗེ་ཞེས་ བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཕྱག་རྒྱ་ཐམས་ཅད་ཀྱི་རྡོ་རྗེ་དམ་ཚིག་ཅེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །ཕྱི་ཡི་དཀྱིལ་འཁོར་དང་པོའི་སྦྱོར་བས་བྲིས་ལ། ནང་དུ་རྡོ་རྗེའི་ཐིག་གིས་འཁོར་ལོ་བྲིའོ། །དེ་བཞིན་དུ་དེའི་དབུས་སུ་དཀྱིལ་འཁོར་བརྒྱད་
- 164b
པར་ཐིག་བཏབ་ལ། དབུས་སུ་བཅོམ་ལྡན་འདས་རྡོ་རྗེ་ཁུ་ཚུར་ཕྱག་གཉིས་དམ་ཚིག་གི་ཕྱག་རྒྱ་བཅིངས་པ། ཞལ་རྣམ་པར་བཞད་པ་གཞག་པར་བྱའོ། །དེའི་མདུན་དུ་རྡོ་རྗེའི་སྐུའི་མཆོག་ཅེས་བྱ་བ་རྡོ་རྗེ་བསྙེམས་པར་འཛིན་པའོ། །གཡས་སུ་རྡོ་རྗེ་ལྗགས་ཞེས་བྱ་བ་རྡོ་རྗེ་ ལྕེའི་མཆོག་འཛིན་པའོ། །རྒྱབ་ཏུ་ཏིང་ངེ་འཛིན་རྡོ་རྗེ་ཞེས་བྱ་བ་རྡོ་རྗེ་འཛིན་པའོ། །གཡོན་དུ་རྡོ་རྗེ་རྡོ་རྗེ་ཞེས་བྱ་བ་བསྙེམས་པར་འཛིན་པའོ། །ཤར་ལྷོའི་མཚམས་སུ་ཕྱག་རྒྱའི་ཁུ་ཚུར་ཞེས་བྱ་བ་དང་། གཉིས་པ་ལ་ནི་ནོར་གྱི་ཁུ་ཚུར་ཞེས་བྱ་བ་དང་། གསུམ་པ་ལ་ནི་ཆོས་ཀྱི་ཁུ་ཚུར་ ཞེས་བྱ་བ་དང་། བཞི་པ་ལ་ནི་ལས་ཀྱི་ཁུ་ཚུར་ཞེས་བྱ་བ་དང་། རང་གི་ཕྱག་རྒྱ་དང་ཕྱག་མཚན་ཡང་འཛིན་པར་བྱའོ། །སྒོ་རྣམས་སུ་ནི་རྡོ་རྗེ་བསྙེམས་མ་ལ་སོགས་པའི་ཕྱག་རྒྱའི་ལྷ་མོ་རྣམས་བྲི་བར་བྱའོ། །དེ་ནས་དམ་ཚིག་གི་ཕྱག་རྒྱ་ཡོངས་སུ་བཟུང་ལ་རང་ཉིད་ཞུགས་ནས་ ཕྱག་རྒྱ་ཐམས་ཅད་ཀྱི་སློབ་དཔོན་དུ་འགྱུར་རོ། །དེ་ནས་བརྩམས་ཏེ་དངོས་གྲུབ་ཐམས་ཅད་དོན་ཡོད་པས་ཐོབ་པར་འགྱུར་རོ། །ཕྱག་རྒྱ་ཐམས་ཅད་ཀྱི་ཡེ་ཤེས་ཀྱི་དབང་ཕྱུག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་བ་མྱུར་བར་མངོན་པར་རྫོགས་པར་འཚང་རྒྱ་བར་འགྱུར་རོ། ། དེར་ཞུགས་ནས་ཕྱག་རྒྱ་བཅིངས་པ་བཅོམ་ལྡན་འདས་ལས་བསླེབ་པར་བྱ་ཞིང་། རྡོ་རྗེ་མིང་གི་དབང་བསྐུར་བས་དབང་བསྐུར་ལ་འདི་སྐད་ཅེས་བརྗོད་པར་བྱའོ། །སྐུ་གསུང་ཐུགས་ཀྱི་རྡོ་རྗེ་ཡི། །གཟུགས་བརྙན་ལྟ་བུར་སྦྱོར་བ་ཡིས། །ཕྱག་རྒྱ་ཀུན་ཞེས་བྱ་བར་བསྒྲགས། །དམ་ ཚིག་དངོས་གྲུབ་ཀུན་སྟེར་བའོ། །སློབ་མ་བཞུགས་པ་ཡང་དེ་བཞིན་ནོ། །ཕྱག་རྒྱ་ཐམས་ཅད་ཀྱི་དཀྱིལ་འཁོར་རོ། །སྒྲུབ་པ་དང་དངོས་གྲུབ་རྣམས་ཀྱང་དེ་བཞིན་ནོ། །དེ་ནས་མ་བསྒྲུབས་པའི་ལས་རྣམས་ཀྱང་དེ་བཞིན་ནོ། །ཕྱག་རྒྱ་ཐམས་ཅད་བཅིང་བ་བསྒྲུབ་པ་ལ་ནི་སྙིང་གར་ རྡོ་རྗེ་ཁུ་ཚུར་གྱིས་སོ། །ཕྱག་རྒྱ་ཐམས་ཅད་བསྒྲུབ་པ་ལ་ནི་རྡོ་རྗེ་ཆེན་པོའི་ཁུ་ཚུར་གྱིས་སོ། །དམ་ཚིག་ཐམས་ཅད་བསྒྲུབ་པ་ལ་ནི་རྡོ་རྗེ་འདོད་པའི་ཁུ་ཚུར་གྱིས་སོ། །སེམས་ཅན་ཐམས་ཅད་རྗེས་སུ་ཆགས་པར་བྱ་བ་ལ་ནི་རྡོ་རྗེ་ཆགས་པ་ཆེན་པོའི་ཁུ་ཚུར་གྱིས་སོ། །ཐམས་ཅད་
- 165a
དབང་དུ་བྱ་བ་ལ་ནི་རྡོ་རྗེ་བཞད་པའི་ཁུ་ཚུར་གྱིས་སོ། །ཐམས་ཅད་བཅིང་བ་ལ་ནི་རྡོ་རྗེ་བསྡམས་པའི་ཁུ་ཚུར་གྱིས་སོ། །ཐམས་ཅད་བསྡམ་པར་བྱ་བ་ལ་ནི་རྡོ་རྗེ་ལུ་གུ་རྒྱུད་ཀྱི་ཁུ་ཚུར་གྱིས་སོ། །ཐམས་ཅད་ལྐུགས་པར་བྱ་བ་ལ་ནི་རྡོ་རྗེ་ཞལ་ཞལ་གྱི་ཁུ་ཚུར་གྱིས་སོ། ། ཐམས་ཅད་བཙིར་བ་ལ་ནི་རྡོ་རྗེ་བསྡམས་པའི་ཁུ་ཚུར་གྱིས་སོ། །ཐམས་ཅད་གསད་པ་ལ་ནི་རྡོ་རྗེ་ཁྲོ་བོའི་ཁུ་ཚུར་གྱིས་སོ། །ཐམས་ཅད་བཟའ་བ་ལ་ནི་རྡོ་རྗེ་གནོད་སྦྱིན་གྱི་ཁུ་ཚུར་གྱིས་སོ། །ཐམས་ཅད་གཞིག་པ་ལ་ནི་རྡོ་རྗེ་ངེས་པར་བཙིར་བའི་ཁུ་ཚུར་གྱིས་སོ། །ཐམས་ཅད་དྲལ་བ་ ལ་ནི་རྡོ་རྗེ་དྲལ་བའི་ཁུ་ཚུར་གྱིས་སོ། །ཐམས་ཅད་དབབ་པ་ལ་ནི་རྡོ་རྗེ་འབེབས་པའི་ཁུ་ཚུར་གྱིས་སོ། །ཐམས་ཅད་གར་བྱེད་དུ་གཞུག་པ་ལ་ནི་རྡོ་རྗེ་གར་གྱི་ཁུ་ཚུར་གྱིས་སོ། །ཐམས་ཅད་སྨྲར་གཞུག་པ་ལ་ནི་རྡོ་རྗེ་བརྡུང་བའི་ཁུ་ཚུར་གྱིས་སོ། །ཐམས་ཅད་རེངས་པར་བྱ་བ་ལ་ནི་རྡོ་རྗེ་དམིགས་ པའི་ཁུ་ཚུར་གྱིས་སོ། །གཞན་གྱི་དཔུང་ཐམས་ཅད་ལྐུགས་པ་དང་འཕྱེ་བོར་བྱ་བ་ལ་ནི་རྡོ་རྗེ་ཆེན་པོ་འཕྱེ་བོའི་ཁུ་ཚུར་གྱིས་སོ། །ཕྱག་རྒྱ་ཐམས་ཅད་དགྲོལ་བ་ལ་ནི་རྡོ་རྗེ་ཐར་པའི་ཁུ་ཚུར་གྱིས་སོ། །རྡོ་རྗེ་མཁའ་འགྲོ་མ་ཐམས་ཅད་ཀྱི་ཕྱག་རྒྱས་གཞིག་པ་ལ་ནི་རྡོ་རྗེ་ཧཱུྃ་མཛད་ཀྱི་རྡོ་རྗེ་ཁུ་ ཚུར་གྱིས་སོ། །གདུག་པ་ཐམས་ཅད་ཀྱི་ཕྱག་རྒྱ་དབྱེ་བ་ལ་ནི་ཧཱུྃ་མཛད་ཀྱི་རྡོ་རྗེ་ཁུ་ཚུར་གྱིས་སོ། །ཕྱག་རྒྱ་ཐམས་ཅད་བཅིང་བ་ལ་ནི་རྡོ་རྗེ་ཁུ་ཚུར་གྱིས་སོ། །ཕྱག་རྒྱ་ཐམས་ཅད་རྡོ་རྗེར་བྱ་བ་ལ་ནི་རྡོ་རྗེ་ཁུ་ཚུར་གྱིས་སོ། །ཐམས་ཅད་རྒྱས་གདབ་པ་ལ་ནི་རྡོ་རྗེ་མ་མོའི་ཁུ་ཚུར་གྱིས་སོ། ། ཐམས་ཅད་ཕྱེ་མར་བྱ་བ་ལ་ནི་རྡོ་རྗེ་བཟང་པོའི་ཁུ་ཚུར་གྱིས་སོ། །ཐམས་ཅད་རྣམ་པར་གཞིག་པར་བྱ་བ་ལ་ནི་རྡོ་རྗེ་གདུག་པའི་ཁུ་ཚུར་གིས་སོ། །ཐམས་ཅད་གཞིག་པ་དང་རྣམ་པར་གཞོམ་པ་ལ་ནི་དབང་པོའི་རྡོ་རྗེ་ཁུ་ཚུར་གྱིས་སོ། །ཆུའི་ནང་དུ་གནས་ཤིང་ཆགས་པ་ལ་ནི་རྡོ་རྗེ་གནོན་པོའི་ཁུ་ཚུར་ གྱིས་སོ། །གཟུགས་མང་པོར་སྟོན་པ་ལ་ནི་རྡོ་རྗེ་སྣ་ཚོགས་པའི་རྡོ་རྗེ་ཁུ་ཚུར་གྱིས་སོ། །མི་སྣང་བའི་དངོས་གྲུབ་ལ་ནི་མི་སྣང་བའི་རྡོ་རྗེ་ཁུ་ཚུར་གྱིས་སོ། །རྒྱུ་བ་དང་མི་རྒྱུ་བའི་དངོས་པོ་རྣམས་འབྱུང་བ་ལ་ནི་རྡོ་རྗེ་ནམ་མཁའི་ཁུ་ཚུར་གྱིས་སོ། །ནམ་མཁའ་ལ་འགྲོ་བའི་དངོས་གྲུབ་
- 165b
ལ་ནི་རྡོ་རྗེ་བསྡམས་པའི་ཁུ་ཚུར་གྱིས་སོ། །རིག་པ་འཛིན་པའི་དངོས་གྲུབ་ལ་ནི་རྡོ་རྗེ་རལ་གྲིའི་ཁུ་ཚུར་གྱིས་སོ། །དེ་བཞིན་གཤེགས་པ་ཐམས་ཅད་མཆོད་པའི་དངོས་གྲུབ་ལ་ནི་རྡོ་རྗེ་ལས་ཀྱི་ཁུ་ཚུར་གྱིས་སོ། །ཐམས་ཅད་མཁྱེན་པ་གྲུབ་པ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱིས་སོ། །ནོར་ ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་ནོར་གྱི་ཁུ་ཚུར་གྱིས་སོ། །ཕྱག་རྒྱ་ཐམས་ཅད་ཀྱི་བདག་པོ་ཉིད་ལ་ནི་རྡོ་རྗེ་ཕྱག་རྒྱའི་ཁུ་ཚུར་གྱིས་སོ། །ལས་ཐམས་ཅད་ཀྱི་དངོས་གྲུབ་ལ་ནི་རྡོ་རྗེ་ཐམས་ཅད་ཀྱི་ཁུ་ཚུར་གྱིས་སོ། །དཀྱིལ་འཁོར་ཐམས་ཅད་གྲུབ་པ་ལ་ནི་རྡོ་རྗེ་འཛིན་པའི་ཁུ་ཚུར་གྱིས་སོ། ། རང་ཉིད་འདས་པ་དང་མ་འོངས་པ་དང་ད་ལྟར་གྱི་དངོས་གྲུབ་རྣམས་སྟོན་པ་ལ་ནི་རྡོ་རྗེ་ལྕགས་ཀྱུའི་མཆོག་གི་ཁུ་ཚུར་གྱིས་སོ། །རྡོ་རྗེ་འཛིན་པ་ཉིད་ལ་ནི་རྡོ་རྗེ་བསྙེམས་པའི་ཁུ་ཚུར་གྱིས་སོ། །སངས་རྒྱས་ཉིད་ལ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཁུ་ཚུར་གྱིས་སོ། །བདེ་བ་ཆེན་ པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཕྱག་རྒྱ་ཐམས་ཅད་ཀྱི་ཁུ་ཚུར་གྱི་དམ་ཚིག་ཅེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །ཁུ་ཚུར་གྱི་རྟོག་པའོ།། །།དེ་ནས་བཅོམ་ལྡན་འདས་ཆོས་ཐམས་ཅད་སྤྲོས་པ་མེད་པའི་དེ་བཞིན་གཤེགས་པས་ཡང་ འཁོར་ལོ་ལྟར་ཡི་གེ་བསྐོར་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ངོ་བོ་ཉིད་མེད་པའི་ཚུལ་གྱིས་ཆོས་ཐམས་ཅད་སྟོང་པའོ། །མཚན་མ་མེད་པའི་ཚུལ་གྱིས་ཆོས་ཐམས་ཅད་མཚན་མ་མེད་པའོ། །སྨོན་པ་མེད་པའི་ཚུལ་གྱིས་ཆོས་ཐམས་ཅད་སྨོན་པ་མེད་པའོ། ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་ཆོས་ཐམས་ཅད་རང་བཞིན་གྱིས་འོད་གསལ་བའོ། །དེ་ནས་བཅོམ་ལྡན་འདས་འཇམ་དཔལ་གཞོན་ནུར་གྱུར་པས་དོན་འདི་ཉིད་རྒྱ་ཆེར་སྟོན་ཏེ། བཞིན་འཛུམ་བཞིན་དུ་རལ་གྲི་དེས་དེ་བཞིན་གཤེགས་པ་ཐམས་ཅད་ལ་འདེབས་ཤིང་། ཤེས་ རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མཆོག་འདི་གསུངས་སོ། །ཨ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་འདུས་པར་མཛད་ནས། དང་པོའི་དཀྱིལ་འཁོར་གྱི་ཚུལ་གྱིས་བཞུགས་སོ། །དེ་ནས་འཇམ་དཔལ་གཞོན་ནུར་གྱུར་པ་ཆོས་ཐམས་ཅད་ངོ་
- 166a
བོ་ཉིད་མེད་པས་སྤྲོས་པ་མེད་པའི་རལ་གྲི་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་ནས་འཁོར་ལོ་ལྟར་ཡི་གེ་བསྐོར་བ་ཞེས་བྱ་བའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ཅི་ལྟ་བའི་ནང་དུ་འཁོར་ལོ་བྲིས་ལ། ཨ་ལ་སོགས་པའི་ཡི་གེའི་ ཕྲེང་བ་གོ་རིམས་བཞིན་དུ་བྲི་བར་བྱའོ། །དེ་ནས་དཀྱིལ་འཁོར་བརྒྱད་པའི་ཚུལ་གྱིས་ཐིག་བཏབ་ལ། དེའི་ལྟེ་བ་ལ་བཅོམ་ལྡན་འདས་འཇམ་དཔལ་གཞོན་ནུ་གཞོན་ནུའི་ཆ་ལུགས་འཆང་ཞིང་འཛུམ་པ་དང་བཅས་པ་ནམ་མཁའི་མདོག་ཅན་ཕྱག་བཞི་དང་རལ་གྲིས་དེ་བཞིན་གཤེགས་ པ་ཐམས་ཅད་ལ་འདེབས་པར་གཞག་པར་བྱའོ། །དེའི་མདུན་ལ་སོགས་པར་དེ་བཞིན་གཤེགས་པའི་སྐུ་རྣམས་གཞག་པར་བྱའོ། །ཕྱིའི་མཚམས་རྣམས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་བཞི་ལུང་ཇི་ལྟར་ཐོབ་པ་བཞིན་དུ་གཞག་པར་བྱའོ། །སྒོ་རྣམས་སུ་ནི་མཚན་མ་བཞི་གཞག་ པར་བྱའོ། །འདི་ལྟ་སྟེ་རལ་གྲི་དང་མདུང་དང་ལྷུང་བཟེད་དང་གླེགས་བམ་རྣམས་སོ། །དེ་ནས་རལ་གྲི་དང་གླེགས་བམ་གྱི་ཕྱག་རྒྱ་དེ་བཞིན་དུ་ཆོས་ཀྱི་སློབ་དཔོན་དུ་བྱིན་གྱིས་བརླབ་པོ། །དེ་ནས་རལ་གྲི་བླངས་ཏེ་རལ་གྲིའི་མིང་གིས་དབང་བསྐུར་བས་དབང་བསྐུར་ལ་འདི་ སྐད་ཅེས་ཆོས་འདི་བཤད་པར་བྱ་སྟེ། རལ་གྲི་འདི་ནི་རྟག་ཟུང་ལ། །ཤེས་རབ་ཚུལ་འདི་བཀར་སྨྲ་ཞིང་། །ནམ་མཁར་སངས་རྒྱས་སྦྱོར་བ་ཡིས། །འདེབས་ན་མྱུར་དུ་འགྲུབ་པར་འགྱུར། །སངས་རྒྱས་བསྟན་པ་བསྲུང་ཕྱིར་དང་། །སེམས་ཅན་མང་པོ་བསྲུང་བའི་ཕྱིར། །འདིས་བསད་ སྡིག་པར་མི་འགྱུར་ཞིང་། །བསོད་ནམས་དག་ཀྱང་ཐོབ་པར་འགྱུར། །སློབ་མ་རྣམས་ལའང་དེ་བཞིན་ཏེ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་དངོས་གྲུབ་རྣམས་ཀྱིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་ བར་འགྱུར་རོ། །ཆོས་ཀྱི་དཀྱིལ་འཁོར་རོ། །སྒྲུབ་པ་ཡང་དེ་བཞིན་ནོ། །མ་བསྒྲུབས་པར་ཡང་དེ་བཞིན་དུ་ལས་རྣམས་འགྲུབ་པར་འགྱུར་བ་ནི། སྟོང་པ་ཉིད་ཀྱི་ཏིང་ངེ་འཛིན་ཐོབ་པ་ལ་ནི་ཐམས་ཅད་ནམ་མཁའ་བསྒོམས་པས་སོ། །མཚན་མ་མེད་པའི་ཏིང་ངེ་འཛིན་ཐོབ་པ་
- 166b
ལ་ནི་མཚན་མ་དང་བྲལ་བའི་ཏིང་ངེ་འཛིན་བསྒོམས་པས་སོ། །སྨོན་པ་མེད་པའི་ཏིང་ངེ་འཛིན་ཐོབ་པ་ལ་ནི་སྨོན་པ་མེད་པ་བསྒོམས་པས་སོ། །རང་བཞིན་གྱིས་འོད་གསལ་བ་ཆོས་ཀྱི་ཡེ་ཤེས་ཐོབ་པ་ལ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་སོ། །ཉོན་མོངས་པ་ཐམས་ཅད་ གཅོད་པ་ལ་ནི་ཆོས་བསྒོམས་པས་སོ། །ཡི་གེ་ཐམས་ཅད་ཀྱི་ངེས་པའི་ཚིག་གི་ཡེ་ཤེས་ལ་ནི་སྤྲོས་པ་མེད་པའི་ཡེ་ཤེས་བསྒོམས་པས་སོ། །གནས་ཐམས་ཅད་དུ་ཡི་གེས་ཆོས་ཀྱི་བྱ་བ་མཐོང་བ་ལ་ནི་ཨ་ལ་སོགས་པའི་ཡི་གེའི་ངོ་བོ་ཉིད་བསྒོམས་པས་སོ། །དེ་བཞིན་གཤེགས་པ་ ཐམས་ཅད་ཀྱི་བྱང་ཆུབ་ཐོབ་པ་ལ་ནི་རྡོ་རྗེའི་རལ་གྲིའི་ཕྱག་རྒྱས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། འཁོར་ལོ་ཆེན་པོ་ལྟར་ཡི་གེ་བསྐོར་བའི་དམ་ཚིག་ཅེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །འཇམ་དཔལ་གྱི་རྟོག་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་ནང་དུ་འདུས་པའི་དེ་བཞིན་གཤེགས་པས་ཡང་འཁོར་ལོ་ཆེན་པོ་ལ་འཇུག་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །རྡོ་རྗེ་མཉམ་པ་ཉིད་ལ་འཇུག་པ་ནི་དེ་བཞིན་གཤེགས་པ་ཐམས་ཅད་ཀྱི་ འཁོར་ལོ་ལ་འཇུག་པར་འགྱུར་རོ། །དོན་གྱི་མཉམ་པ་ཉིད་ལ་འཇུག་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་ལ་འཇུག་པར་འགྱུར་རོ། །ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པ་ནི་དམ་པའི་ཆོས་ཀྱི་འཁོར་ལོ་ལ་འཇུག་པར་འགྱུར་རོ། །ཐམས་ཅད་ཀྱི་ མཉམ་པ་ཉིད་ལ་འཇུག་པ་ནི་འཁོར་ལོ་ཐམས་ཅད་ལ་འཇུག་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཆོས་ཉིད་ཀྱི་དོན་འདི་རྒྱ་ཆེར་སྟོན་ཅིང་། བཞིན་རབ་ཏུ་འཛུམ་ནས་རྡོ་རྗེའི་འཁོར་ལོ་བསྐོར་ཞིང་རྡོ་རྗེ་འཁོར་ལོ་ཐམས་ཅད་ལ་འཇུག་ པའི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཧཱུྃ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཅན་ཁམས་གསུམ་དུ་གཏོགས་པའི་སེམས་ཅན་ཐམས་ཅད་དཀྱིལ་འཁོར་ཐམས་ཅད་དུ་ཞུགས་ནས། བཅོམ་ལྡན་འདས་ཀྱི་ཐུགས་ལས་དཀྱིལ་འཁོར་
- 167a
ཐམས་ཅད་ཀྱི་དམ་ཚིག་གི་སེམས་དཔའ་རྣམས་ངེས་པར་བྱུང་ནས་དཀྱིལ་འཁོར་གྱི་ཚུལ་གྱིས་ཅི་ལྟ་བ་བཞིན་དུ་བཞུགས་སོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེ་ཁྲོ་བོའི་འཁོར་ལོ་ཐམས་ཅད་ལ་རབ་ཏུ་འཇུག་པའི་ཕྱག་རྒྱ་ཞེས་བྱ་བའི་ཏིང་ ངེ་འཛིན་ལ་སྙོམས་པར་ཞུགས་ནས། དཀྱིལ་འཁོར་ཆེན་པོ་ཐམས་ཅད་དུ་འཇུག་པའི་དམ་ཚིག་ཅེས་བྱ་བའི་འཁོར་ལོའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ཇི་ལྟ་བ་བཞིན་དུ་བྱས་ཏེ། ནང་གི་དཀྱིལ་འཁོར་དུ་རྡོ་རྗེ་འཁོར་ལོ་བྲིས་ལ། དབུས་སུ་རྡོ་རྗེའི་འཁོར་ལོ་ བསྐོར་བ་གཞག་པར་བྱའོ། །ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་ཐམས་ཅད་རྣམ་པ་ཐམས་ཅད་དུ་དཀྱིལ་འཁོར་དང་པོའི་ཚུལ་དུ་གཞག་པར་བྱའོ། །ཕྱིའི་མཚམས་རྣམས་སུ་རྡོ་རྗེའི་རིགས་ཀྱི་དཀྱིལ་འཁོར་བཞི་བྲི་བར་བྱའོ། །སྒོ་རྣམས་སུ་མཚན་མ་བཞི་གཞག་ པར་བྱ་སྟེ་འདི་ལྟ་སྟེ། རྡོ་རྗེ་སེམས་དཔའི་སྐུ་དང་རྡོ་རྗེ་ཁྲོ་བོའི་སྐུ་དང་སྤྱན་རས་གཟིགས་དབང་ཕྱུག་གི་སྐུ་དང་ནམ་མཁའི་སྙིང་པོའི་སྐུ་རྣམས་སོ། །དེ་ནས་རྡོ་རྗེ་འཁོར་ལོའི་ཕྱག་རྒྱས་ཇི་ལྟ་བ་བཞིན་དུ་དཀྱིལ་འཁོར་ཐམས་ཅད་དུ་སངས་རྒྱས་ཉིད་དང་། རྡོ་རྗེ་འཛིན་པ་ཉིད་དུ་འགྲུབ་པར་འགྱུར་རོ། ། དེ་ནས་འཁོར་ལོ་བླངས་ལ་འཁོར་ལོའི་མིང་གི་དབང་བསྐུར་བ་བླང་བར་བྱ་ཞིང་། གསང་བའི་དཀྱིལ་འཁོར་བཞིའི་ཐིག་བཏབ་པའི་རིགས་རྣམས་སུ་འཇུག་པར་བྱའོ། །སློབ་མ་གཞུག་པ་ཡང་དེ་བཞིན་ནོ། །རྡོ་རྗེ་འཁོར་ལོའི་དཀྱིལ་འཁོར་རོ། །སྒྲུབ་པ་ཡང་དེ་བཞིན་ནོ། །མ་བསྒྲུབས་པར་ ཡང་དཀྱིལ་འཁོར་ཐམས་ཅད་དུ་འཇུག་པ་ལ་ནི་རྡོ་རྗེ་འཁོར་ལོས་ཏེ། རང་གི་ཁར་བཅུག་ལ་གཞག་པར་བྱའོ། །དཀྱིལ་འཁོར་ཆེན་པོར་འཇུག་པ་ལ་ནི་རྡོ་རྗེ་འཁོར་ལོ་ཆེན་པོས་སོ། །དེ་བཞིན་དུ་ཕྱག་རྒྱའི་དཀྱིལ་འཁོར་དུ་འཇུག་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་ཕྱག་ རྒྱས་སོ། །དེ་བཞིན་དུ་དམ་ཚིག་གི་དཀྱིལ་འཁོར་དུ་འཇུག་པ་ལ་ནི་དམ་ཚིག་ཆེན་པོའི་འཁོར་ལོས་སོ། །ལས་ཀྱི་དཀྱིལ་འཁོར་དུ་འཇུག་པ་ལ་ནི་རྡོ་རྗེ་ཐམས་ཅད་ཀྱི་འཁོར་ལོས་སོ། །དེ་བཞིན་དུ་རྗེས་སུ་ཆགས་པར་བྱ་བ་དང་དབང་དུ་བྱ་བ་དང་དོན་ཐོབ་པ་དང་རྒྱས་གདབ་པ་དང་གཅད་པ་དང་
- 167b
འཇུག་པ་དང་མཆོད་པ་དང་གདུག་པ་འདུལ་བའི་ལས་རྣམས་ལ་ནི་སེམས་དཔའ་ཆེན་པོ་བརྒྱད་ཀྱི་ཕྱག་རྒྱ་གཡོན་ན་འཁོར་ལོ་དང་བཅས་པ་རྣམས་ཀྱིས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། དཀྱིལ་འཁོར་ཐམས་ཅད་ཀྱི་རྡོ་རྗེའི་དམ་ཚིག་ ཅེས་བྱ་བ་རྟོག་པའི་རྒྱལ་པོ་ཆེན་པོ་རྫོགས་སོ། །རྡོ་རྗེ་འཁོར་ལོའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ལ་མཆོད་པ་ཐམས་ཅད་ཀྱི་ཆོ་ག་རྒྱས་པ་སྣོད་ཀྱི་མཆོད་པ་ཐམས་ཅད་ཀྱི་མཆོག་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་ དོ། །བྱང་ཆུབ་ཀྱི་སེམས་བསྐྱེད་པ་ཉིད་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་ཉིད་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །དམ་པའི་ཆོས་ཡོངས་སུ་འཛིན་པ་ནི་དེ་བཞིན་ གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འདྲི་བ་དང་ཡི་གེར་འདྲིར་འཇུག་པ་དང་འཛིན་པ་དང་ཀློག་པ་དང་རྗོད་པ་དང་སྟོན་པ་དང་མཉན་པ་དང་སེམས་པ་དང་སྒོམ་པ་དང་མཆོད་པ་བྱེད་པ་ནི་དེ་བཞིན་གཤེགས་པ་ཐམས་ཅད་ལ་མཆོད་ པའི་ཆོ་ག་རྒྱས་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་མཛོད་དོན་དེ་ཉིད་རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་ལས་ཐམས་ཅད་དོན་ཡོད་པའི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཨོྃ། དེ་ནས་འདི་གསུངས་པ་ཙམ་གྱིས་ནམ་མཁའ་ཐམས་ ཅད་ལས་མཆོད་པ་ཐམས་ཅད་ཀྱི་ཆོ་ག་རྒྱས་པ་ནམ་མཁའི་ཁམས་མ་ལུས་པར་སྤྲོས་པར་གྱུར་ནས། བཅོམ་ལྡན་འདས་ནམ་མཁའི་མཛོད་ཀྱི་བྱང་ཆུབ་སེམས་དཔའི་ཚུལ་གྱིས་དཀྱིལ་འཁོར་ཆེན་པོའི་ཚུལ་དུ་བཞུགས་སོ། །དེ་ནས་བྱང་ཆུབ་སེམས་དཔའ་ནམ་མཁའི་མཛོད་མཆོད་ པ་ཐམས་ཅད་ཀྱི་ཆོ་ག་རྒྱས་པར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེའི་མཆོད་པའི་མཆོག་དོན་ཡོད་པའི་དམ་ཚིག་ཅེས་བྱ་བའི་དཀྱིལ་འཁོར་འདི་གསུངས་སོ། །ཕྱིའི་དཀྱིལ་འཁོར་ཅི་ལྟ་བ་དེ་བཞིན་དུ་ནང་དུ་རིན་པོ་ཆེའི་ཀ་བ་བརྒྱད་བྱས་ལ་
- 168a
དབུས་སུ་བཅོམ་ལྡན་འདས་མཚོན་ཆ་སྣ་ཚོགས་འཛིན་པ། ཞལ་འཛུམ་པ་སྐུ་དང་ཡན་ལག་ཟླ་བའི་མདོག་ལ་སོགས་པའི་ཁ་དོག་ལྔ་པའི་མདོག་ཅན་གཞག་པར་བྱའོ། །དེའི་ཕྱོགས་ཐམས་ཅད་དུ་དམ་ཚིག་སེམས་དཔའ་རྣམས་གཞག་པར་བྱའོ། །འདི་ ལྟ་སྟེ་ཕྱག་ན་རྡོ་རྗེ་དང་འཇིག་རྟེན་དབང་ཕྱུག་ལ་སོགས་པ་བྱང་ཆུབ་སེམས་དཔའ་བརྒྱད་པོ་བྱང་ཆུབ་ཀྱི་སེམས་དང་ཏིང་ངེ་འཛིན་དང་དབང་བསྐུར་བ་དང་ཕྱག་རྒྱ་ཡོངས་སུ་འཛིན་པ་དང་སྟོང་པ་ཉིད་དུ་སྨྲ་བ་དང་དཀྱིལ་འཁོར་འདྲི་བ་དང་མཆོད་པ་ཐམས་ཅད་དང་སེམས་ཅན་ཐམས་ཅད་ཡོངས་སུ་སྐྱོབ་ པ་ནི་བླ་ན་མེད་པའི་མཆོད་པའི་ཆོ་ག་རྒྱས་པ་ཕྱག་ན་འཛིན་པའི་ཚུལ་གྱིས་ཅི་ལྟ་བ་བཞིན་དུ་གཞག་གོ། །ཕྱིའི་མཚམས་རྣམས་སུ་ནི་མེ་ཏོག་ལ་སོགས་པ་རྣམས་དང་། སྒོ་རྣམས་སུ་ནི་དབྱིག་དང་གསེར་དང་མུ་ཏིག་དང་རིན་པོ་ཆེ་སྟེ་མཚན་མ་བཞི་གཞག་པར་བྱའོ། །དེ་ནས་དེ་བཞིན་དུ་རྡོ་ རྗེ་ཐམས་ཅད་ཀྱིས་མཆོད་པ་ཐམས་ཅད་འཐོབ་པར་འགྱུར་རོ། །ཞུགས་ནས་སྣ་ཚོགས་རྡོ་རྗེ་བླངས་ལ་སྣ་ཚོགས་རྡོ་རྗེའི་མིང་གིས་དབང་བསྐུར་བས་དབང་བསྐུར་ནས་མཆོད་པ་རྣམ་པ་བཞི་བྱས་ཏེ། འདི་ལྟ་སྟེ་ལུས་ཀྱི་ལས་ཐམས་ཅད་དང་ཕྱག་བྱ་བ་དང་ངག་དང་ཡིད་དང་སེམས་ཀྱིས་ཆོས་ཀྱི་དབྱིངས་ སུ་སྤྲོས་པས་མཆོད་པའི་ཆོ་ག་རྒྱས་པ་ཐམས་ཅད་ཀྱིས་མཆོད་པར་བྱ་ཞིང་རྡོ་རྗེ་དང་ཕྱག་རྒྱས་མཆོད་པ་གཅིག་ཏུ་བྱས་པའོ། །སློབ་མ་རྣམས་ཀྱི་གཞུག་པའི་ལས་ཀྱང་དེ་བཞིན་ནོ། །ལས་ཀྱི་དཀྱིལ་འཁོར་རོ། །དེ་ནས་སྒྲུབ་པ་དང་དངོས་གྲུབ་དག་ཀྱང་དེ་བཞིན་ནོ། །དེ་ནས་མ་བསྒྲུབས་པར་ཡང་ བྱང་ཆུབ་ཀྱི་སེམས་ཀྱི་མཆོད་པ་ལ་ནི་རང་གི་སྙིང་གར་རྡོ་རྗེ་བསྒོམས་པས་སོ། །ཏིང་ངེ་འཛིན་གྱི་མཆོད་པ་ལ་ནི་ཐམས་ཅད་དག་པར་བསྒོམས་པས་སོ། །དབང་བསྐུར་བའི་མཆོད་པ་ལ་ནི་རྡོ་རྗེ་དབང་བསྐུར་བ་སྣ་ཚོགས་ཀྱིས་སོ། །ཕྱག་རྒྱའི་མཆོད་པ་ལ་ནི་སྣ་ཚོགས་རྡོ་རྗེ་ཐམས་ཅད་ཀྱིས་སོ། །སྟོང་ པ་ཉིད་ཀྱི་མཆོད་པ་ལ་ནི་ཨ་ལ་སོགས་པའི་ཡི་གེའི་ལུང་བསྟན་པས་སོ། །དཀྱིལ་འཁོར་གྱི་མཆོད་པ་ལ་ནི་རྡོ་རྗེ་འཁོར་ལོ་སྣ་ཚོགས་ཀྱིས་སོ། །མཆོད་པ་ཐམས་ཅད་ལ་ནི་སྣ་ཚོགས་རྡོ་རྗེས་སོ། །གདུག་པ་འདུལ་བའི་མཆོད་པ་ལ་ནི་ཁྲོ་བོས་སོ། །མེ་ཏོག་ལ་སོགས་པ་དོར་བ་ལ་ནི་བཟླས་
- 168b
པས་སོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། སྣ་ཚོགས་རྡོ་རྗེ་དོན་ཡོད་པའི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །ནམ་མཁའི་མཛོད་ཀྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ གདུག་པ་ཐམས་ཅད་འདུལ་ནུས་པས་ཡང་། ཡེ་ཤེས་ཀྱི་ཁུ་ཚུར་ཡོངས་སུ་འཛིན་པས་སེམས་ཅན་ཐམས་ཅད་འདུལ་བ་ཡེ་ཤེས་ཀྱི་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །སེམས་ཅན་ཐམས་ཅད་མཉམ་པ་ཉིད་པས་ཁྲོ་བ་མཉམ་པ་ཉིད་དོ། །སེམས་ ཅན་ཐམས་ཅད་དུལ་བ་ཉིད་པས་ཁྲོ་བ་དུལ་བ་ཉིད་དོ། །སེམས་ཅན་ཐམས་ཅད་ཆོས་ཉིད་པས་ཁྲོ་བ་ཆོས་ཉིད་དོ། །སེམས་ཅན་ཐམས་ཅད་རྡོ་རྗེ་ཉིད་པས་ཁྲོ་བ་རྡོ་རྗེ་ཉིད་དོ། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་ཐམས་ཅད་འདུལ་བ་ནི་བྱང་ཆུབ་བོ།། །།དེ་ནས་བྱང་ཆུབ་སེམས་དཔའ་ བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དོན་དེ་ཉིད་རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་རྡོ་རྗེ་མཆེ་བའི་ཕྱག་རྒྱ་དང་། རྡོ་རྗེ་གནོད་སྦྱིན་གྱི་གཟུགས་ཀྱིས་རྡོ་རྗེ་ཁྲོ་བོའི་གད་མོ་ཞེས་བྱ་བའི་སྙིང་པོ་འདི་སྨྲས་སོ། །ཉ། དེ་ནས་འདི་གསུངས་པ་ཙམ་གྱིས་གདུག་པ་ཐམས་ཅད་འདུལ་ བའི་སེམས་དཔའ་རྣམས་བཅོམ་ལྡན་འདས་རྡོ་རྗེ་གནོད་སྦྱིན་གྱི་ཐུགས་ལས་བྱུང་སྟེ། དང་པོའི་དཀྱིལ་འཁོར་གྱི་ཚུལ་དུ་བཞུགས་སོ། །དེ་ནས་བྱང་ཆུབ་སེམས་དཔའ་རྡོ་རྗེ་གནོད་སྦྱིན་ཐབས་ཐམས་ཅད་ཀྱིས་འདུལ་བ་ཁྲོ་བོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། གདུག་པ་ ཐམས་ཅད་འདུལ་ཞིང་བྱིན་གྱིས་རློབ་པ་རྡོ་རྗེ་ཞེས་བྱ་བའི་གནོད་སྦྱིན་གྱི་དཀྱིལ་འཁོར་འདི་གསུངས་སོ། །ཕྱི་ཡི་དཀྱིལ་འཁོར་ཚུལ་དུ་ནི། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་རིམ་ཉིད་དུ་ནི། །དཀྱིལ་འཁོར་བཟང་པོ་གྲུ་བཞི་པ། །སྒོ་བཞི་པ་ལ་ཐིག་བཞིར་ལྡན། །ཚོན་སྣ་ལྔས་ ནི་རྣམ་པར་བྲི། །ཀ་བ་བརྒྱད་ནི་མདུན་གནས་པར། །འབར་བའི་དཀྱིལ་འཁོར་ཡང་དག་ལྡན། །དེ་ཡི་དབུས་སུ་ཅི་རིགས་པར། །རྡོ་རྗེ་གནོད་སྦྱིན་གཞག་བྱ་སྟེ། །རྡོ་རྗེ་མཆེ་བ་གཙིགས་པ་དང་། །འབར་བའི་ཕྲེང་བ་འཁྲིགས་པའི་འོད། །འཇིགས་བྱེད་ཁ་དོག་སྔོ་བ་དང་། །ཧ་ཧ་ཞེས་
- 169a
བཞད་གསལ་བའི་ཞལ། །དེ་ཡི་ཀུན་དུ་གནོད་སྦྱིན་ནི། །ཤིན་ཏུ་འཇིགས་པ་གཞག་པར་བྱ། །དེ་ཉིད་དང་པོ་ལ་སོགས་མཆོག །ཕྱག་ན་རྡོ་རྗེ་སོགས་མཚན་འཆང་། །ཕྱི་ཡི་དཀྱིལ་འཁོར་མཚམས་རྣམས་སུ། །མཆེ་བའི་ཕྱག་རྒྱ་བྲི་བར་བྱ། །སྒོ་ཡི་ གནས་ནི་ཐམས་ཅད་དུ། །རྡོ་རྗེའི་མཚན་མ་གཞག་པར་བྱ། །དེ་ནས་འཇུག་པ་ལ་སོགས་པ་འབྱུང་སྟེ། རྡོ་རྗེ་མཆེ་བའི་ཕྱག་རྒྱ་དང་། ཧ་ཧ་ཞེས་བཞད་པ་དང་བཅས་པས་ཞུགས་ནས་གདུག་པ་ཐམས་ཅད་འདུལ་ནུས་ཤིང་མྱུར་དུ་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །དེ་ནས་ཞུགས་ ནས་རྡོ་རྗེ་མཆེ་བ་བླངས་ནས་རྡོ་རྗེ་མིང་གིས་དབང་བསྐུར་ལ་རྡོ་རྗེས་གནོད་སྦྱིན་ཉིད་ལ་བསྣུན་ནོ། །དེ་ནས་རྡོ་རྗེ་གནོད་སྦྱིན་གྱི་ཞལ་ནས་ཧ་ཧ་ཞེས་བྱ་བའི་སྒྲ་འབྱུང་བར་འགྱུར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྲུང་བ་པོ་གནོད་སྦྱིན་གྱི་བདག་པོ་ཕྱག་ན་རྡོ་རྗེ་གཏུམ་ པོར་བདག་གྲུབ་པ་ཡིན་ནོ་ཞེས་ཤེས་པར་བྱའོ། །དེ་ནས་ཕྱག་རྒྱ་ཐམས་ཅད་བཅིང་བར་བྱ་ཞིང་བསྒྲུབ་པར་བྱའོ། །དེ་ནས་མཆོད་ལ་དེ་བཞིན་དུ་ཡང་དག་པར་ཚིམ་པར་བྱས་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ལན་ཅིག་བརྗོད་ལ་སླར་དབྱུང་བར་བྱའོ། །དེ་བཞིན་དུ་ཕྱག་རྒྱ་ བཅིང་བ་ལ་སོགས་པའི་ཆོ་ག་རྒྱས་པ་ནི་དང་པོ་ལ་སོགས་པའི་དཀྱིལ་འཁོར་ཐམས་ཅད་དུ་བྱའོ། །ཕྱག་ན་རྡོ་རྗེའི་དཀྱིལ་འཁོར་རོ། །སྒྲུབ་པ་དང་དངོས་གྲུབ་ཀྱང་དེ་བཞིན་ནོ། །མ་བསྒྲུབས་པར་ཡང་དང་པོ་ཅི་ལྟ་བ་བཞིན་ནོ། །གདུག་པ་ཐམས་ཅད་འདུལ་བ་ལ་ནི་རྡོ་རྗེ་མཆེ་བའི་ཕྱག་ རྒྱས་སོ། །སེམས་ཅན་ཐམས་ཅད་གདུལ་བ་ལ་ནི་ཁྲོ་བས་ཧ་ཧ་ཞེས་དགོད་ཅིང་འདུལ་བས་སོ། །ཉན་ཐོས་དང་རང་སངས་རྒྱས་ཀྱི་འདོད་ཆགས་དང་བྲལ་བ་ལས་ལྟུང་བར་བྱ་བ་ལ་ནི་ཆོས་གོས་དང་སྣམ་སྦྱར་གྱི་སྦྱིན་སྲེག་གིས་སོ། །དབང་བསྐུར་བ་ཐམས་ཅད་དབྲོག་པ་ལ་ནི་ཁམས་ཐམས་ ཅད་ཀྱི་ཕྱེ་མའི་སྦྱིན་སྲེག་གིས་སོ། །ཐམས་ཅད་རྒྱས་གདབ་པ་ལ་ནི་རྡོ་རྗེ་ཁུ་ཚུར་གྱི་ཕྱག་རྒྱས་སོ། །ཐམས་ཅད་བཅད་པ་ལ་ནི་གཟུགས་བརྙན་བྱས་ནས་གཏུབ་པས་སོ། །མ་རུངས་པ་ཐམས་ཅད་ཀྱི་དཀྱིལ་འཁོར་རྣམ་པར་གཞིག་པ་ལ་ནི་རྡོ་རྗེ་བཟུང་ནས་འཇུག་པར་བྱའོ། །མཆོད་པ་
- 169b
ཐམས་ཅད་རྣམ་པར་གཞིག་པ་ལ་ནི་ཁྲོས་ནས་བཟླས་བརྗོད་བྱའོ། །ཐམས་ཅད་སྐྲག་པར་བྱ་བ་ལ་ནི་འཇིགས་བྱེད་ཀྱི་ལྟ་བས་བལྟ་བར་བྱའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། རྡོ་རྗེ་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་ པོ་རྫོགས་སོ། །རྡོ་རྗེ་གནོད་སྦྱིན་གྱི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཐམས་ཅད་ཀྱི་མཉམ་པ་ཉིད་ལ་གནས་པས་ཡང་ཆོས་ཐམས་ཅད་ཀྱི་མཆོག་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ཆོས་ཐམས་ཅད་མཉམ་ པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཐམས་ཅད་དོན་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཐམས་ཅད་དོན་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དོན་ཉིད་དོ། །ཐམས་ཅད་ལས་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཉིད་དུ་རིག་པར་བྱའོ། ། དེ་ནས་བཅོམ་ལྡན་འདས་ལག་ན་རྡོ་རྗེ་དེ་བཞིན་གཤེགས་པ་དང་བྱང་ཆུབ་སེམས་དཔའ་ཐམས་ཅད་ཀྱི་དོན་ཡོད་པའི་དམ་ཚིག་གི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དོན་ཡོད་པ་ཐམས་ཅད་ཀྱི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཧཱུྃ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་དཀྱིལ་འཁོར་ཐམས་ཅད་ཐུགས་ལས་བྱུང་སྟེ། དམ་ཚིག་གི་དེ་ཁོ་ན་ཉིད་ཀྱི་རྡོ་རྗེའི་དཀྱིལ་འཁོར་ཆེན་པོ་དེར་ཞུགས་པར་གྱུར་ཏོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་ངེས་པར་བཏུད་ དེ། དམ་ཚིག་ཆེན་པོའི་དཀྱིལ་འཁོར་འདི་གསུངས་སོ། །དཀྱིལ་འཁོར་ཆེན་པོ་བྲིས་ལ། དཀྱིལ་འཁོར་གྱི་གནས་བརྒྱད་དུ་རྡོ་རྗེ་ཁམས་གསུམ་རྣམ་པར་རྒྱལ་བ་ལ་སོགས་པའི་དཀྱིལ་འཁོར་སོ་སོར་གཞག་གོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དམ་ཚིག་ཐམས་ཅད་ཀྱི་རྡོ་རྗེ་ བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དམ་ཚིག་ཐམས་ཅད་ཀྱི་རྡོ་རྗེ་ཞེས་བྱ་བའི་དཀྱིལ་འཁོར་འདི་གསུངས་སོ། །དཀྱིལ་འཁོར་ཆེན་པོའི་ཚུལ་དུ་ཕྱིའི་དཀྱིལ་འཁོར་བྲིས་ལ། དེའི་དབུས་སུ་རྡོ་རྗེའི་འཁོར་ལོ་བྲིས་ནས། འཁོར་ལོའི་གནས་རྣམས་སུ་
- 170a
དཀྱིལ་འཁོར་ཆེན་པོ་ལ་སོགས་པ་བྲི་པར་བྱའོ། །ཐམས་ཅད་ཀྱང་དཀྱིལ་འཁོར་བརྒྱད་པའི་ཐིག་བཏབ་ཅིང་། སེམས་དཔའ་ཆེན་པོ་གཞག་པར་བྱའོ། །ཕྱིའི་དཀྱིལ་འཁོར་དུ་ཕྱི་རོལ་གྱི་རྡོ་རྗེའི་རིགས་ཅི་ལྟར་རྗེས་སུ་མཐུན་པར་བྲི་བར་བྱའོ། །སྒོ་ རྣམས་སུ་ནི་རིགས་བཞིའི་མཚན་མ་རྣམས་གཞག་པར་བྱའོ། །དེ་ནས་དམ་ཚིག་ཆེན་པོའི་དེ་ཁོ་ན་ཉིད་ཀྱི་རྡོ་རྗེའི་དཀྱིལ་འཁོར་ཆེན་པོའི་ཚུལ་གྱིས་དཀྱིལ་འཁོར་གྱི་ཆོ་ག་ཐམས་ཅད་རྒྱས་པར་བྱའོ། །དམ་ཚིག་ཆེན་པོའི་རྡོ་རྗེའི་དེ་ཁོ་ན་ཉིད་ཀྱི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་ པོ་ལས། བདེ་བ་ཐམས་ཅད་ཀྱི་དམ་ཚིག་ཅེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སོ། །རིགས་བསྡུས་པའི་རྟོག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྣམ་པར་སྣང་མཛད་ཀྱིས་ཡང་སེམས་ཅན་ཐམས་ཅད་བྱིན་གྱིས་རློབ་པ་ཞེས་བྱ་བ་ཤེས་ རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ཐམས་ཅད་ཀྱི་རང་བཞིན་ཡིན་པས་སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཐམས་ཅད་རྡོ་རྗེའི་སྙིང་པོས་དབང་བསྐུར་བ་ཉིད་པས། སེམས་ཅན་ཐམས་ ཅད་ནི་རྡོ་རྗེའི་སྙིང་པོ་ཅན་ནོ། །ངག་ཐམས་ཅད་རབ་ཏུ་བྱུང་བས་སེམས་ཅན་ཐམས་ཅད་ནི་ཆོས་ཀྱི་སྙིང་པོ་ཅན་ནོ། །སེམས་ཅན་ཐམས་ཅད་ཀྱི་བྱ་བ་བྱེད་པ་ལ་སྦྱོར་བས་སེམས་ཅན་ཐམས་ཅད་ནི་ལས་ཀྱི་སྙིང་པོ་ཅན་ནོ། །དེ་ནས་ཕྱི་རོལ་གྱི་རྡོ་རྗེའི་རིགས་རྣམས་ཀྱིས་ཅ་ཅོའི་སྒྲ་ཕྱུང་ནས། ཆོས་ཉིད་ ཀྱི་དོན་རྒྱ་ཆེར་སྟོན་ཅིང་སྙིང་པོ་ཕུལ་ཏེ། དེ་ནས་རྡོ་རྗེའི་དབང་ཕྱུག་ཆེན་པོས་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །ཏྲི། དེ་ནས་དཀྱིལ་འཁོར་བཤད་པར་བྱ་སྟེ། ཀུན་ནས་ཟླུམ་པོ་ཐིག་གསུམ་པ་དཀྱིལ་འཁོར་ཆེན་པོ་སྒོ་བཞི་པ། མཚམས་རྣམས་སུ་མདུང་རྩེ་གསུམ་པ་བྲི་བར་བྱའོ། ། དེའི་དབུས་སུ་དབང་ཕྱུག་ཆེན་པོ་བྲི་བར་བྱའོ། །དེའི་ལོགས་ཐམས་ཅད་དུ་ཚོགས་བརྒྱད་པོ་བྲི་བར་བྱ་སྟེ། འདི་ལྟ་སྟེ་ནག་པོ་ཆེན་པོ་དང་། དགའ་བྱེད་དབང་ཕྱུག་དང་། དྲིལ་ཆེན་དང་། གར་གྱི་དབང་ཕྱུག་རྣམས་ནི་ཕྱོགས་རྣམས་སུའོ། །མཚམས་རྣམས་སུ་ནི་ཐོད་པ་བཟང་པོ་དང་། གཏུམ་
- 170b
པོའི་དབང་ཕྱུག་དང་། ལག་ན་ཁ་ཊྭཱྃ་ག་དང་། བ་གླང་རྣ་བའི་དབང་ཕྱུག་གོ། །ཐིག་གི་མཚམས་རྣམས་སུ་ནི། མ་མོའི་ཚོགས་ཐམས་ཅད་གནས་ཇི་ལྟ་བ་བཞིན་དུ་བྲི་བར་བྱའོ། །སྒོ་རྣམས་སུ་ནི་དབྱུག་པའི་དབང་ཕྱུག་དང་། མགོའི་དབང་ཕྱུག་དང་། དྲིལ་རྣ་དང་། དྲག་ པོ་ཆེན་པོའོ། །ཕྱི་རོལ་དུ་ནི་འབྱུང་པོ་རྣམས་དང་། ཡི་གེ་རྣམས་བྲི་བར་བྱའོ། །དེ་ནས་སློབ་དཔོན་ཐལ་བ་གཙང་མས་ལུས་བསྐུས་ཤིང་གོས་གཙང་མ་བགོས་ཏེ། མདུང་རྩེ་གསུམ་གྱི་མཚན་མ་གཞག་པར་བྱའོ། །ཞུགས་ནས་ཀྱང་སྙིང་པོ་བཟླས་པར་བྱའོ། །དེ་ནས་ སློབ་མ་དེ་བཞིན་དུ་བཅུག་ལ་ལག་པར་མདུང་རྩེ་གསུམ་པ་བྱིན་ནས་ཆོས་བཤད་པར་བྱའོ། །སེམས་ཅན་ཀུན་ལ་ཕན་ཕྱིར་དང་། །བསྟན་པ་ཐམས་ཅད་བསྲུང་ཕྱིར་དང་། །འདོད་ཀུན་བདག་པོ་ཉིད་ཀྱི་ཕྱིར། །དྲག་པོའི་ལས་ལ་གནས་པར་གྱིས། །དེ་ནས་ཕྱག་རྒྱའི་ཡེ་ཤེས་བསླབས་ ཏེ་གཏོར་མ་སྦྱིན་པར་བྱའོ། །དེ་ནས་བརྩམས་ཏེ་འཇིགས་པ་མེད་པར་དངོས་གྲུབ་ཐམས་ཅད་དང་། ཕུན་སུམ་ཚོགས་པ་ཐམས་ཅད་ཀྱི་བདེ་བ་དང་། ཡིད་བདེ་བ་ཐམས་ཅད་རྗེས་སུ་མྱོང་ནས། དྲག་པོའི་འཇིག་རྟེན་དུ་མཆོད་པར་འགྱུར་རོ། །དཀྱིལ་འཁོར་ཆེན་པོ་ཞི་བའི་མདུང་ཐུང་གིས་ མཚན་མ་ཞེས་བྱའོ། །དེ་ནས་མ་མོ་ཐམས་ཅད་ཀྱིས་བཅོམ་ལྡན་འདས་ལ་ཕྱག་འཚལ་ཏེ། དང་པོ་མགྲིན་གཅིག་ཏུ་ཐམས་ཅད་དགུག་པ་དང་། གཞུག་པ་དང་གསད་པ་དང་བསྒྲུབ་པའི་དམ་ཚིག་ཅེས་བྱ་བ་རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །བྷྱོ། དེ་ནས་འདིའི་དཀྱིལ་འཁོར་ བཤད་པར་བྱ་སྟེ། ཟུར་བཞི་པ་བྱང་གི་སྒོ་ཅན་གྱི་དཀྱིལ་འཁོར་ཐིག་བཏབ་ལ། དབུས་སུ་ནག་པོ་ཆེན་པོ་གར་བྱེད་བཞིན་པ་གཞག་པར་བྱའོ། །དེའི་ཕྱོགས་དང་མཚམས་སུ་མ་མོ་བརྒྱད་བྲི་བར་བྱ་སྟེ། འདི་ལྟ་སྟེ་དྲག་མོ་དང་། ཚངས་པ་མོ་དང་། ཁྱབ་འཇུག་མོ་དང་། གཞོན་ ནུ་མོ་དང་། ནག་མོ་དང་། ནག་མོ་ཆེན་མོ་དང་། ཤ་ཟ་མོ་དང་སྲིན་མོའོ། །དཀྱིལ་འཁོར་གྱི་ཕྱིའི་མཚམས་རྣམས་སུ་ནི་དྲག་པོའི་མཁའ་འགྲོ་མ་བཞི་བྲི་བར་བྱ་སྟེ། ཞི་བ་མོ་དང་། བེ་རུཎྚ་དང་། གཏུམ་མོ་དང་། འཇིགས་བྱེད་མ་རྣམས་སོ། །དེ་རྣམས་ཀྱི་མཚན་མ་ནི་མདུང་
- 171a
རྩེ་གསུམ་པ་དང་། ཕྲེང་བ་དང་། འཁོར་ལོ་དང་། དྲིལ་བུ་དང་ཐོད་པ་ཁྲག་དང་བཅས་པ་དང་། འཁར་གསིལ་དང་། མཆེ་བ་དང་། ཁ་ཊྭཱྃ་གའོ། །སྒོ་སྲུང་རྣམས་ཀྱི་ནི་ཐོད་པ་དང་། རུས་པའི་ལུ་གུ་རྒྱུད་དང་བྱ་རྒོད་དང་བྱི་ལའོ། །དེ་ནས་ཕྱག་རྒྱའི་སློབ་ དཔོན་ཆོས་སྤྱོད་པ་གཙང་བ་གོས་གཙང་མ་བགོས་པ། ཐམས་ཅད་ཟ་བའམ་ཐམས་ཅད་སྤྱད་པ་ལ་ཡང་སྨད་པ་མེད་དེ། ཞི་བའི་ཕོ་ཉའི་ཕྱག་རྒྱས་ཞུགས་ལ་སྙིང་པོ་བཟླས་པར་བྱའོ། །དེ་ནས་དཀྱིལ་འཁོར་གྱི་དབུས་ནས་བྷྱོ་ཆེན་པོ་ཐོས་པར་འགྱུར་རོ། །དེ་ནས་སློབ་དཔོན་མ་གཏོགས་ པ་གཞན་ཐམས་ཅད་ཅི་ལྟར་འོངས་པ་ཞུགས་པར་འགྱུར་ཞིང་ཐོབ་པར་འགྱུར་ཏེ། གདུག་པའི་དམ་ཚིག་ནི་མ་གཏོགས་སོ། །དེ་ནས་སློབ་མ་ལག་ན་མེ་ཏོག་ཐོགས་པས་རས་ཀྱིས་མིག་བཀབ་ལ། ནག་པོ་ཆེན་པོའི་ཕྱག་རྒྱས་བཅུག་སྟེ། རྣ་བར་དམ་ཚིག་ཆེན་པོ་བྷྱོ་ཞེས་བྱ་བ་དང་ སྦྱར་རོ། །དེ་ནས་སྐྲག་ནས་མེ་ཏོག་དོར་རོ། །དེ་ནས་གང་དུ་ལྷུང་བ་དེ་ལྷག་པའི་ལྷར་བསྒྲུབ་པར་བྱའོ། །གལ་ཏེ་ལྷུང་བར་མ་གྱུར་ན་ཡང་དོར་དུ་གཞུག་གོ། །དེ་ནས་ནི་འཇིགས་པར་བྱེད་ནུས་ཤིང་རྣལ་འབྱོར་ཡང་སོ་སོར་ཐོབ་པར་འགྱུར་རོ། །དེ་ནས་གདོང་གཡོགས་བཀྲོལ་ལ་དཀྱིལ་ འཁོར་བསྟན་པར་བྱའོ། །བདུག་པ་ལ་སོགས་པའི་ཕྱག་རྒྱས་མཆོད་ནས་སྙིང་པོ་དང་རང་རང་གི་མཚན་མ་སྦྱིན་པར་བྱའོ། །དེ་ནས་དམ་ཚིག་བསྟན་པར་བྱ་སྟེ། སེམས་ཅན་ཐམས་ཅད་རྒྱས་བཏབ་ཅིང་། །དམ་ཚིག་སྡང་རྣམས་བཟའ་བར་བྱ། །སྔགས་རྣམས་བསྟན་པར་མི་བྱ་སྟེ། །དམ་ ཚིག་རྣལ་འབྱོར་གྲུབ་སྟེར་བྱའོ། །དྲག་པོའི་དམ་ཚིག་མདུང་རྩེ་དང་། །མ་མོ་རྣམས་ཀྱི་རྒྱས་འདེབས་པས། །གལ་ཏེ་འདས་ན་ཁྱོད་ཀྱི་སྙིང་། །རྟག་ཏུ་འཇིག་པར་བྱེད་པར་འགྱུར། །དེ་ནས་བརྩམས་ཏེ་གང་ཤ་ཆེན་པོ་ཟ་བ་ནི་དེ་རིང་པོ་མི་ཐོགས་པར་རྣལ་འབྱོར་འགྲུབ་པར་འགྱུར་རོ། ། གང་ཟ་བར་མི་འགྱུར་བ་དེའི་དངོས་གྲུབ་མེད་དོ། །གལ་ཏེ་དམ་ཚིག་ལས་འདས་པར་མ་གྱུར་ན་ཚོགས་ཐམས་ཅད་ཀྱིས་ཀྱང་མི་གསོད་པར་འགྱུར་རོ། །ཕྱག་རྒྱའི་ཡེ་ཤེས་བསླབ་པར་བྱ་སྟེ། ཕྱག་རྒྱའི་གར་དང་མཆོད་པ་བྱས་ནས་གཏོར་མ་བྱིན་ཞིང་། བཟའ་བ་དང་བཏུང་བ་དང་ལོངས་སྤྱོད་
- 171b
ལ་སོགས་པས་ཚིམ་པར་བྱས་ནས་ཕྱིར་འབྱུང་བར་བྱའོ། །དངོས་གྲུབ་ཐམས་ཅད་ཀྱི་དམ་ཚིག་ཅེས་བྱ་བའི་ཕྱག་རྒྱའི་དཀྱིལ་འཁོར་རོ། །དེ་ནས་སྦྲང་རྩིར་བྱེད་པ་ལ་སོགས་པ་མིང་པོ་གསུམ་གྱིས་བཅོམ་ལྡན་འདས་ལ་ཕྱག་འཚལ་ཏེ། མགྲིན་གཅིག་ཏུ་རང་གི་དེ་ཁོ་ན་ཉིད་ཀྱི་སྙིང་པོ་ འདི་ཕུལ་ལོ། །སྭ། དེ་ནས་འདིའི་དཀྱིལ་འཁོར་བཤད་པར་བྱ་སྟེ། ཟུར་བཞི་པ་དང་སྒོ་བཞི་པར། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་དུ་དཀྱིལ་འཁོར་ནི། །གཞུ་ཡི་དབྱིབས་ཅན་བྲི་བར་བྱ། །དེ་ཡི་དབུས་སུ་མིང་པོ་ནི། །མཆོག་གསུམ་དག་ནི་གཞག་པར་བྱ། ། སྦྲང་རྩི་བྱེད་དང་རྒྱལ་བྱེད་དང་། །དེ་བཞིན་དོན་རྣམས་ཐམས་ཅད་ནི། །འགྲུབ་པར་བྱེད་ཅེས་བྱ་བའོ། །གོ་ཆ་ཡ་ལད་བགོས་པ་དང་། །དེ་བཞིན་ཐོད་པ་མཚན་མ་འཛིན། །ལྷ་མོའི་གོས་དང་ཕྲེང་བ་འཆང་། །ཅུང་ཟད་དགོད་ཅིང་ཁྲོ་བ་དང་། །སེང་གེའི་ཁྲི་ལ་འདུག་པ་དང་། །འོད་ ཀྱི་དཀྱིལ་འཁོར་གྱིས་མཛེས་པའོ། །དངོས་གྲུབ་ཀུན་སྟེར་དག་པ་སྟེ། །གསུམ་ནི་སྲིད་གསུམ་དག་དང་མཚུངས། །སྒོ་དང་མཚམས་ནི་ཐམས་ཅད་དུ། །ཚོགས་ལ་སོགས་པ་ལེགས་པར་བཞག །གྲུབ་དང་འཕེལ་ཆེན་གནོད་སྦྱིན་དང་། །གཏུམ་དང་ཁྲོ་མཆོག་གསོད་པའོ། ། ཕྱི་རོལ་བ་དན་རྩེ་མོ་ལ། །དྲིལ་བུ་ཕྲེང་བཅས་ཐམས་ཅད་དུ། །བུམ་པ་གང་བ་རོ་མཆོག་བཅས། །འབྱུང་པོ་མ་ལུས་གཏོར་མར་བཅས། །གླུ་རྣམས་གླུ་རུ་ལེན་པ་དང་། །རོལ་མོ་རྡུང་བར་བྱེད་པ་དང་། །དེ་བཞིན་སློབ་དཔོན་གར་བྱེད་པས། །ཕྱག་རྒྱ་ཀུན་གྱིས་འཇུག་པར་བྱ། ། ཞུགས་ནས་སྒྲུབ་ལ་དད་པ་ཡིས། །ཡང་ནས་ཡང་དུ་འདུད་བྱ་ཞིང་། །མེ་ཏོག་ཀུན་གྱིས་མཆོད་པ་ཡིས། །བསྒྲུབ་དང་དེ་ཉིད་དག་ཀྱང་བརྗོད། །འཇིག་རྟེན་གསུམ་པོ་སྲིད་གསུམ་མཆོག །ངན་སོང་གསུམ་མཆོད་གསུམ་རྣམ་གསུམ། །ལེགས་ལྡན་སྦས་པས་གྲུབ་པ་ནི། ། དངོས་གྲུབ་ཀུན་ལ་རྟག་ཏུའོ། །དེ་ནས་སྙིང་པོ་ལན་ཅིག་བརྗོད་ཅིང་ཕྱག་རྒྱ་ཐམས་ཅད་ཀྱི་གཡས་པའི་མཛུབ་མོ་ལྕགས་ཀྱུར་བྱས་ལ་དགུག་པར་བྱའོ། །དེ་ནས་དྲིལ་བུ་དང་བཅས་པའི་ཕྲེང་བ་རྣམས་གཡོའོ། །ཐམས་ཅད་ཕབ་ནས་དེ་བཞིན་དུ་གཞུག་པར་བྱའོ། །དེ་ནས་དམ་ཚིག་འདི་བརྗོད་
- 172a
པར་བྱའོ། །གལ་ཏེ་དམ་ཚིག་འདས་གྱུར་ན། །ཕ་གསོད་འགྲོ་བ་གང་ཡིན་དང་། །མ་གསོད་པ་ཡི་འགྲོ་བ་གང་། །འགྲོ་བ་དེར་ནི་འགྲོ་བར་འགྱུར། །རྟག་ཏུ་དམ་པ་བསྟེན་པར་བྱ། །དམ་པ་མིན་པ་ཡོངས་སུ་སྤང་། །གཞན་ལ་དེ་ཉིད་བསྟན་མི་བྱ། ། རྟག་ཏུ་མིང་པོ་གསུམ་པོ་བསྒྲུབ། །འདི་ནི་དམ་ཚིག་གོ། །དེ་ནས་གླུ་དང་གར་དང་། རོལ་མོ་དང་། དགོད་པ་དང་། དགའ་བ་དང་། ཟ་བ་དང་མགུ་བས་མེལ་ཚེ་བྱའོ། །ཕྱག་རྒྱ་དང་གར་ཕྱི་རོལ་མོའི་མཆོད་པ་ཡང་བྱས་ལ་སློབ་དཔོན་གྱིས་ཀྱང་ཕྱག་རྒྱ་དེ་དང་བཅས་པས་བྱུང་བ་དང་། འབྱུང་བར་འགྱུར་བའི་ཡེ་ཤེས་བརྗོད་པར་བྱའོ། །དེ་ནས་བརྩམས་ཏེ་དངོས་གྲུབ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་། འབྱོར་པ་ཐམས་ཅད་འགྲུབ་པར་འགྱུར་རོ། །དམ་ཚིག་གི་དཀྱིལ་འཁོར་རོ། །དེ་ནས་སྲིང་མོ་བཞེས་བཅོམ་ལྡན་འདས་ལ་ཕྱག་འཚལ་ཏེ། རང་གི་དེ་ཁོ་ན་ཉིད་ཀྱི་སྙིང་པོ་འདི་ཕུལ་ལོ། །ཧཱུྃ། དེ་ནས་འདིའི་དཀྱིལ་འཁོར་བཤད་པར་བྱ་སྟེ། །དཀྱིལ་འཁོར་ཀུན་ནས་ཟླུམ་པོར་ཐིག་བཏབ་ལ། ཐིག་བཞི་ལ་འཁོར་ལོ་བཞི་པ་བྱས་ལ་དཀྱིལ་འཁོར་དེ་རྣམས་སུ་སྒོ་བཞིར་བལྟ་བའི་ལྷ་མོ་བཞིའི་གཟུགས་བརྙན་གཞག་པར་བྱ་སྟེ། འདི་ལྟ་སྟེ་དགའ་བ་མོ་ནི་ཤར་དུ་ལྟ་བ། མདའ་དང་གཞུ་ཐོགས་པ་ལ་བརྩོན་པ། སྒེག་མོ་མདོག་དམར་བའོ། །གསོད་མ་ལྷོ་ཕྱོགས་སུ་ལྟ་བ་ལག་ན་རལ་གྲི་དང་ཕུབ་ཐོགས་པ་མདོག་ནག་པོའོ། །ཕག་མོ་ནུབ་ཏུ་ལྟ་བ་ལག་ན་གསེར་གྱི་གཏེར་ཐོགས་པ། གསེར་གྱི་མདོག་ཅན་ནོ། ། གྲུབ་པ་མོ་ཞི་བ་མོ་ཞེས་བྱ་བ་བྱང་དུ་ལྟ་བ། ལག་ན་གྲི་དང་། ཤ་ཁར་ཐོགས་པ་མདོག་དཀར་མོའོ། །ཕྱི་རོལ་གྱི་སྒོ་བཞིར་མཚན་མ་དགོད་པ་གཞག་པར་བྱའོ། །དེ་ནས་སློབ་དཔོན་དྲིལ་བུ་དཀྲོལ་ཞིང་། ལག་པ་གཡོན་པ་ཁ་ཊྭཱྃ་ག་དང་བཅས་པས་འཇུག་པར་བྱའོ། །ཞུགས་ ནས་སྙིང་པོ་བཟླས་པར་བྱའོ། །དེ་ནས་ཕྱག་རྒྱ་དང་གར་གྱི་མཆོད་པ་བསྟབ་པར་བྱའོ། །དེ་ནས་ཡིད་ལ་འདོད་པའི་དངོས་གྲུབ་ཐམས་ཅད་སྟེར་བར་འགྱུར་རོ། །ཐམས་ཅད་ཀྱིས་མཆོད་པར་འགྱུར་རོ། །མཁའ་འགྲོ་མ་ལ་སོགས་པ་གདོན་ཐམས་ཅད་ཀྱིས་མི་ཚུགས་པ་དང་། འདི་
- 172b
ནི་ནོར་རྣམས་ཀྱང་བསྐྱེད་པར་འགྱུར་རོ། །ཅི་ལྟར་མངོན་པར་འདོད་པ་ཐམས་ཅད་ཀྱིས་མཉེས་པར་བྱེད་པ་དང་། གཏེར་ཐམས་ཅད་འབྱིན་པ་དང་། དངོས་གྲུབ་ཐམས་ཅད་བསྒྲུབ་པར་ནུས་པར་འགྱུར་རོ། །སློབ་མ་གཞུག་པ་ཡང་དེ་བཞིན་ནོ། །དེ་རྣམས་དང་འདི་དག་ ཐམས་ཅད་འགྲུབ་པར་འགྱུར་རོ། །ལས་ཀྱི་དཀྱིལ་འཁོར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས། ཕྱི་རོལ་གྱི་རྡོ་རྗེ་རིགས་ཀྱི་རྟོག་པ་རྫོགས་སོ། །ཕྱི་རོལ་རྡོ་རྗེ་རིགས་ཀྱི་དཀྱིལ་འཁོར་བཞིའི་རྟོག་པའོ།། །།དེ་ནས་བཅོམ་ ལྡན་འདས་དེ་བཞིན་གཤེགས་པ་མཐའ་ཡས་མུ་མེད་པས་མཐར་ཐུག་ཅིང་མུ་མེད་པའི་ཆོས་དང་ལྡན་པས་ཡང་ཆོ་ག་འདི་མཐར་ཐུག་པར་བྱིན་གྱིས་བརླབ་པའི་ཕྱིར། ཆོས་ཐམས་ཅད་མཉམ་པ་ཉིད་ཀྱི་མཐར་ཐུག་པ། བྱིན་གྱིས་བརླབ་པ་རྡོ་རྗེ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་ པའི་ཚུལ་འདི་བཤད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་ཡས་པ་ཉིད་པས་དེ་བཞིན་གཤེགས་པ་ཐམས་ཅད་མཐའ་ཡས་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་པས་རྡོ་རྗེ་ཐམས་ཅད་མུ་མེད་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་པས་ཆོས་ ཐམས་ཅད་དུ་མ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མཐར་ཐུག་པ་མེད་པ་ཉིད་པས་ལས་ཐམས་ཅད་མཐར་ཐུག་པ་མེད་པ་ཉིད་དོ། །གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཆང་བ་དང་ཀློག་པ་དང་སྟོན་པ་དང་རྗོད་པ་དང་སྒོམ་པ་དེས་སངས་རྒྱས་དང་ བྱང་ཆུབ་སེམས་དཔའི་སྤྱོད་པ་མཐར་ཐུག་པ་མེད་པའི་མཐར་ཕྱིན་ཏེ། སྒྲིབ་པ་ཐམས་ཅད་ཟད་ནས་དེ་བཞིན་གཤེགས་པའམ་རྡོ་རྗེ་འཛིན་པར་མྱུར་དུ་འགྱུར་རོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ། ཆོས་ཀྱི་རྣམ་གྲངས་འདི་དོན་ཡོད་པ་དང་ཐོགས་པ་མེད་པར་མྱུར་དུ་འགྲུབ་ པར་བྱ་བའི་ཕྱིར། ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ནོ། །སེམས་ཅན་ཆེན་པོ་ལེགས་སོ་ལེགས། །བདེ་བ་ཆེན་པོ་ལེགས་སོ་ལེགས། །ཐེག་པ་ཆེན་པོ་ལེགས་སོ་ལེགས། །བློ་གྲོས་ཆེན་པོ་ལེགས་སོ་ལེགས། །ཆོ་ག་འདི་ནི་ལེགས་པར་སྨྲས། །སངས་རྒྱས་
- 173a
རྡོ་རྗེ་འཛིན་ཀུན་གྱིས། །འབྲས་བུ་ཡོད་ལ་འདུལ་བའི་མཆོག །རྡོ་རྗེའི་མདོ་འདི་བྱིན་གྱིས་བརླབས། །ཆོ་གའི་རྒྱལ་པོ་བླ་ན་མེད། །གང་རྣམས་འདི་དག་འཛིན་པ་ནི། །བདུད་ལ་སོགས་པ་ཐམས་ཅད་ཀྱིས། །དེ་དག་མི་སོད་མི་ཚུགས་སོ། ། སངས་རྒྱས་བྱང་ཆུབ་སེམས་དཔའ་དང་། །དངོས་གྲུབ་དམ་པ་ཐམས་ཅད་ཀྱང་། །སངས་རྒྱས་ཀུན་གྱིས་གསུངས་པ་བཞིན། རིང་པོར་མི་ཐོགས་འཐོབ་པར་འགྱུར། །དེ་སྐད་གསུངས་ནས་གསང་གྲུབ་ཕྱིར། །རྡོ་རྗེ་ཅན་གྱིས་བཤད་པ་ལ། །ཀུན་མཆོག་སངས་རྒྱས་ མཁའ་བཅས་པ། །ཐམས་ཅད་ཀྱིས་ནི་མངོན་པར་བསྟོད། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་རྟོག་པའི་རྒྱལ་པོ་ཆེན་པོ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཱརྱ་ཤྲད་དྷཱ་ཀ་ར་བ་རྨ་དང་། ཞུ་ཆེན་ གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ། །ཤྲཱི་བ་ར་མཱ་དྱ་མནྟྲ་ཀ་ལྤ་ཁཎྜ་ནཱ་མ། བོད་སྐད་དུ། དཔལ་མཆོག་དང་པོའི་སྔགས་ཀྱི་ རྟོག་པའི་དུམ་བུ་ཞེས་བྱ་བ། བཅོམ་ལྡན་འདས་བདེ་བ་ཆེན་པོ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་གསང་བའི་ཆོས་ཉིད་བརྙེས་པ། ཆོས་ཐམས་ཅད་སྤྲོས་པ་མེད་པས། ཡང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ ཚིག་ཅེས་བྱ་བ། རྡོ་རྗེ་ཆོས་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དཔལ་མཆོག་དང་པོ་ཐོག་མ་དང་ཐ་མ་དང་དབུས་མེད་པའི་དམ་པ་འདི་གསུངས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་འདོད་ཆགས་ཆེན་པོའི་དངོས་གྲུབ་དམ་པ་ནི་བདེ་བ་ཆེན་པོའི་དངོས་གྲུབ་དམ་པར་འགྱུར་རོ། །བྱང་ ཆུབ་སེམས་དཔའ་ཆེན་པོ་རྣམས་ཀྱི་བདེ་བ་ཆེན་པོའི་དངོས་གྲུབ་དམ་པ་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་དངོས་གྲུབ་དམ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་དངོས་གྲུབ་དམ་པ་ནི་བདུད་ཆེན་པོའི་སྟོབས་ཐམས་ཅད་རབ་ཏུ་འཇོམས་པར་
- 173b
བྱེད་པའི་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་བདུད་ཆེན་པོའི་སྟོབས་རབ་ཏུ་འཇོམས་པའི་དངོས་གྲུབ་དམ་པ་ནི་ཁམས་གསུམ་ཐམས་ཅད་ཀྱི་དབང་ཕྱུག་ཆེན་པོའི་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ཁམས་གསུམ་པ་ཐམས་ ཅད་ཀྱི་དབང་ཕྱུག་གི་དངོས་གྲུབ་དམ་པ་ནི་སེམས་ཅན་གྱི་ཁམས་མ་ལུས་ཤིང་ལུས་པ་མེད་པར་ཡོངས་སུ་སྦྱོང་བར་འདོད་པའི་རྒྱུའི་ཕྱིར། འཁོར་བ་ལ་ཡང་མ་ཆགས་ཤིང་། བརྩོན་འགྲུས་ཆེན་པོའི་བྱང་ཆུབ་སེམས་དཔའ་རྣམས་ཀྱིས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ རྣམས་ཡོངས་སུ་བསྐྱབ་པ་དང་། སེམས་ཅན་ཐམས་ཅད་ལ་ཕན་པ་དང་བདེ་བའི་མཆོག་ཤིན་ཏུ་བདེ་བ་ཆེན་པོའི་དངོས་གྲུབ་དམ་པར་འགྱུར་རོ། །དེ་ཅིའི་ཕྱིར་ཞེ་ན། ཅི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་འགྱུར་བའི་ཚེ། །དེ་སྲིད་མཚུངས་མེད་སེམས་ཅན་དོན། ། མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་ཐབས་དང་། །ཡེ་ཤེས་གནས་སུ་བསྒྲུབས་པས་ནི། །ཆོས་ཀུན་རྣམ་པར་དག་པའི་ཕྱིར། །འཁོར་བ་ཡོངས་སུ་དག་པར་འགྱུར། །ཆགས་ལ་སོགས་པས་འདུལ་ན་ནི། །འཁོར་བའི་བར་དུ་རྟག་པར་ཡང་། །འཇིག་རྟེན་ སྡིག་བྱེད་དེ་སྦྱང་ཕྱིར། །འཁོར་བ་སྲིད་དུ་བདག་ཉིད་འདུལ། །ཅི་ལྟར་པདྨ་རབ་དམར་བ། །འདམ་གྱིས་ཉེས་པས་མི་གོས་པ། །དེ་བཞིན་གནས་ཀྱི་ཉེས་པ་ཡིས། །འགྲོ་ཕན་རྣམས་ལ་མི་གོས་སོ། །འདོད་ཆགས་ཆེན་པོ་རྣམ་པར་དག །བདེ་བ་ཆེན་པོ་ནོར་ཆེ་ལ། །ཁམས་ གསུམ་དབང་ཕྱུག་ཐོབ་པས་ན། །སེམས་ཅན་དོན་རྣམས་སྟོན་པར་བྱེད། །གང་ལ་ལ་ཞིག་ནང་པར་ལངས་ནས་དཔལ་མཆོག་དང་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་འདི་ཉིན་རེ་ཞིང་འདོན་པ་དང་། ཉན་པ་དང་འཛིན་པ་དང་ཀློག་པ་དང་སྒོམ་པ་དེ་ཡིས་བདེ་བ་དང་ ཡིད་བདེ་བ་ཐམས་ཅད་ཀྱང་ཐོབ་པར་འགྱུར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་དངོས་གྲུབ་ཀྱི་མཆོག་ཀྱང་ཚེ་འདི་ལ་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བ་མཆོག་ཀྱང་འགྲུབ་སྟེ། རྡོ་རྗེ་འཛིན་པ་ཆེན་པོ་ཐམས་ཅད་དམ། དེ་བཞིན་གཤེགས་པར་
- 174a
འགྱུར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་དཔལ་མཆོག་དང་པོ་ལས། དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོ་རྡོ་རྗེ་གསང་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ ཐམས་ཅད་ཀྱི་རྡོ་རྗེ་སེམས་དཔའ་བྱིན་གྱིས་བརླབས་པའི་རྡོ་རྗེ་གསང་བ་མཆོག་གི་དངོས་གྲུབ་ཀྱི་ཆོ་ག་རྒྱས་པའི་རྒྱལ་པོ་ཆེན་པོ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་གསང་བའི་དོན་ཡོད་ཅིང་བསྟན་པའི་ཆོ་ག་ཕྱག་རྒྱས་བཏབ་པའི་སྐུ་གསུང་ཐུགས་ཐམས་ཅད་ཀྱི་ རྡོ་རྗེ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་ཐམས་ཅད་ལ་རབ་ཏུ་ཞུགས་ནས། ཆོས་ཉིད་རྟོགས་པའི་ཡེ་ཤེས་ལ་རབ་ཏུ་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་པའི་ཕྲིན་ལས་ཀྱིས་དུས་གསུམ་དུ་འཇིག་རྟེན་གྱི་ཁམས་མ་ལུས་པར་སྤྲོས་པ་ལས་ཀྱི་ མཐའ་ཅན་དེ་བཞིན་གཤེགས་པ་རྣམ་པར་སྣང་མཛད་ཆེན་པོ། ཟླ་བ་ཕྱེད་པ་དུ་མ་ལ་རབ་ཏུ་གནས་པའི་རྡོ་རྗེ་རིན་པོ་ཆེ་རྣམས་ཀྱི་འོད་ཟེར་སྣ་ཚོགས་པ་རྣམ་པར་འབར་བའི་འོད་ཀྱིས་གསལ་བ། གསེར་གྱི་དྲིལ་བུ་བཏགས་པ་དང་། སྣ་ཚོགས་པའི་བ་དན་རླུང་གིས་བསྐྱོད་པ་རྣམས་ཀྱིས་ཉེ་ བར་མཛེས་པར་བྱས་པ། མེ་ཏོག་སྣ་ཚོགས་ཀྱི་ཕྲེང་བ་དང་། ན་བཟའ་དང་མེ་ལོང་དང་མུ་ཏིག་གི་ཕྲེང་བ་རབ་ཏུ་འཕྱང་བས་མཛེས་ཤིང་བརྒྱན་པ། སྣ་ཚོགས་པའི་ཁ་ཁྱེར་ལ་གནས་པ་མཆོག་ཏུ་གྱུར་པའི་ལྷའི་བུ་མོ་དགོད་པ་དང་། སྒེག་པ་དང་གར་དང་གླུ་ཡིས་རབ་ཏུ་བརྒྱན་པ་དང་། བསྟོད་ པས་སད་པར་བྱེད་པ། བདེ་བ་ཆེན་པོ་རྡོ་རྗེ་སེམས་དཔའི་གནས་གཞལ་ཡས་ཁང་པ་ལ་བཞུགས་སོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་རྡོ་རྗེས་བྱིན་གྱིས་བརླབས་པའི་དམ་ཚིག་སེམས་དཔའ་ཐམས་ཅད་དང་། དབང་ བསྐུར་བ་ཐམས་ཅད་དང་། ཐམས་ཅད་མཁྱེན་པའི་ཏིང་ངེ་འཛིན་ལས་ཐམས་ཅད་མཆོག་ཏུ་གྱུར་པ། ཁམས་གསུམ་ཐམས་ཅད་འདུལ་བར་མཛད་པ། ཐམས་ཅད་དབང་དུ་བྱེད་པ་པོ། འཛིན་པ་པོ། འདོད་པ་ཐམས་ཅད་པ་རྒྱ་ཆེ་བའི་དངོས་གྲུབ་ཀྱི་ཆོ་ག་ཐམས་ཅད་པ་རྟག་པའི་དེ་བཞིན་གཤེགས་
- 174b
པ་ལ་གསོལ་བ་བཏབ་པ། ཅི་སྲིད་སྲིད་པའི་བར་གནས་པ། །དེ་སྲིད་སེམས་ཅན་དོན་མཆོག་མཛོད། །སེམས་ཅན་ཁམས་ནི་མཐའ་ཡས་དང་། །རྒྱལ་སྲས་སྲིད་པ་འདོད་པའི་ཕྱིར། །སྲིད་པའི་སྐྱོན་རྣམས་འཇོམས་ཕྱིར་དང་། །བདེ་བ་ཆེན་པོ་འཕེལ་བྱའི་ཕྱིར། ། གསང་བའི་རྟོག་པ་མཆོག་གསུངས་པའི། །རྗེས་སུ་གནང་བ་བདག་ལ་སྩོལ། །དེ་ནས་བཅོམ་ལྡན་འདས་དེ་བཞིན་གཤེགས་པས་ཆོས་ཐམས་ཅད་སྒྲིབ་པ་མེད་པ་ཉིད་ལ་ལྷག་པར་དགོངས་ནས་གདུལ་བྱ་ཐམས་ཅད་ཐུགས་རྗེ་ཆེན་པོའི་སྣ་ཚོགས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་ པར་ཞུགས་ཏེ། མ་ལུས་ཤིང་ལུས་པ་མེད་པའི་སེམས་ཅན་གྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང་། ཐམས་ཅད་ཡོངས་སུ་བསྐྱང་བ་དང་། ཕན་པ་དང་བདེ་བ་དང་དངོས་གྲུབ་ཐམས་ཅད་ཕུན་སུམ་ཚོགས་པ་དང་། ཡེ་ཤེས་དང་ལས་དང་མཆོག་གི་དངོས་གྲུབ་ཀྱི་ རྒྱུར་འགྱུར་བའི་བར་དུ་དེ་བཞིན་གཤེགས་པ་ཐམས་ཅད་ཉིད་དང་རྡོ་རྗེ་འཆང་ཆེན་པོ་ཐོབ་པ། མཆོག་གི་དངོས་གྲུབ་ཀྱི་དོན་བདེ་བ་ཆེན་པོའི་རྡོ་རྗེ་དང་པོ་དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་སྐུའི་ཕྲེང་བའི་ཅོད་པན་གྱིས་དབང་ བསྐུར་བས་དབང་བསྐུར་བ་ཡིན་ནོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་མ་ལུས་ཤིང་ལུས་པ་མེད་པའི་བདེ་བ་ཆེན་པོ་མཆོག་གི་དངོས་གྲུབ་ལ་སོགས་པ་དངོས་གྲུབ་ཐམས་ཅད་ཐོབ་པར་བྱ་བའི་ཕྱིར། སེམས་དཔའི་སྐྱིལ་མོ་ཀྲུང་བཅས་ཏེ། སྐུ་དྲང་པོར་བསྲང་སྟེ། གཡོན་པ་ བསྙེམས་པའི་ཚུལ་དུ་མཛད་ནས་གཡས་པ་རྡོ་རྗེ་གསོར་བས་རང་གི་ཐུགས་ཀར་དང་པོའི་རྡོ་རྗེ་མཆོག་གི་སྦྱོར་བ་འཛིན་ཅིང་བདེ་བ་ཆེན་པོའི་རྡོ་རྗེ་ཞེས་བྱ་བ་ཐམས་ཅད་ཀྱི་ཕྱག་རྒྱ་འདི་ཉིད་ཀྱི་སྐུ་དང་གསུང་དང་ཐུགས་ལས་འབྱུང་ངོ་། །ཨོྃ་མ་ཧཱ་སུ་ཁ་བཛྲ་ས་ཏྭ་ཛཿཧཱུྃ་བྃ་ཧོཿསུ་ར་ཏ་སྟྭྃ། དེ་ནས་ཕྱུང་བ་ ཙམ་གྱིས་དེ་བཞིན་གཤེགས་པ་ཐམས་ཅད་བྱོན་ནས་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་བཟུང་བ་རྣམས་སླར་ཡང་བྱང་ཆུབ་ཆེན་པོ་མངོན་པར་རྫོགས་ནས་དེ་རྣམས་ཀྱིས་བཞད་པ་ཆེན་པོ་མངོན་པར་མཛད་དོ། །འཇིག་རྟེན་གྱི་ཁམས་ཐམས་ཅད་གཡོས་པ་དང་བཅས་པས་ཡོངས་སུ་
- 175a
དག་པར་འགྱུར་རོ། །ཁམས་གསུམ་རྒྱས་པར་སྤྲོས་པ་ཐམས་ཅད་ཀྱང་བཅོམ་ལྡན་འདས་ཀྱི་དཀྱིལ་འཁོར་ཆེན་པོར་གྱུར་ཏོ། །གང་གིས་སེམས་ཅན་ཐམས་ཅད་བདེ་བ་དང་། ཡིད་བདེ་བ་ཐོབ་པར་གྱུར་ཏོ། །དེ་ནས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ ཐམས་ཅད་ཀྱི་དོན་ཡོད་ཅིང་ཐོགས་པ་མེད་པ་ལས་མངོན་པར་བྱུང་བ། རྡོ་རྗེ་ཆེན་པོ་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བདེ་བ་ཆེན་པོ་རྡོ་རྗེའི་དམ་ཚིག་ཅེས་བྱ་བ་རྣམ་པར་གནོན་པར་མཛད་ནས། དེའི་སྐུ་ཐམས་ཅད་ལས་དངོས་གྲུབ་ཐམས་ཅད་དང་། བདེ་བ་དང་ཡིད་ བདེ་བ་སྟེར་བ་རྟག་ཏུ་རྗེས་སུ་འབྲེལ་པ་ཅན་ལྷན་ཅིག་ཏུ་སྤྱོད་པ། བདེ་བ་ཆེན་པོ་རྡོ་རྗེའི་དམ་ཚིག་གི་སེམས་དཔའ་རྣམས་ཕྱུང་ནས་ཕྱོགས་ཐམས་ཅད་དུ་ཕྱུང་སྟེ། མདུན་དུ་རྡོ་རྗེ་གསང་བ་ཡིད་ལས་བྱུང་བ། གཡས་སུ་རྡོ་རྗེ་ཀི་ལི་ཀི་ལི། རྒྱབ་ཏུ་འདོད་པའི་རྡོ་རྗེ། གཡོན་དུ་རྡོ་རྗེ་བསྒྱིངས་པའོ། ། མཚམས་རྣམས་སུ་མཆོད་པའི་ལྷ་མོ་རྣམས་སོ། །ཕྱི་རོལ་གྱི་ཁ་ཁྱེར་མཚམས་སུ་ལྷའི་བུ་མོ་རྣམས་སོ། །སྒོ་སྲུང་བ་རྣམས་ནི་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་འཛིན་པའོ། །ཕྱི་རོལ་དུ་རྡོ་རྗེ་སྒོ་སྲུང་གི་ཚོགས་དང་། ཕོ་ཉ་དང་བྲན་རྣམས་སོ། །དེ་ ནས་བཅོམ་ལྡན་འདས་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་བཅིངས་ཏེ། དེ་བཞིན་གཤེགས་པ་ཐམས་ཅད་བྱང་ཆུབ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་འཆང་ཆེན་པོ་ལ་གསོལ་བ་བཏབ་སྟེ། སེམས་ཅན་ཀུན་ལ་བདེ་དོན་དུ། །རྒྱལ་བ་ཆེན་པོ་འབྱུང་བ་སྟེ། །ཆགས་བྲལ་དེ་རྣམས་ཆགས་ལྡན་ཡང་། །རང་གི་བཙུན་མོའང་གསོལ་མཛད་པས། །དེའི་ཕྱིར་བདག་གིས་ཁྱོད་ལ་གསོལ། །བདེ་བ་ཆེན་པོ་རྡོ་རྗེ་ཆེ། །གསང་བའི་རྟོག་པའི་དངོས་གྲུབ་སྟེ། །འདུལ་བ་མཆོག་ ནི་བཤད་དུ་གསོལ། །དེ་ནས་བཅོམ་ལྡན་འདས་དོན་ཡོད་ཅིང་ཐོགས་པ་མེད་པའི་བཀའ་བདེ་བ་ཆེན་པོ་ཐམས་ཅད་ཀྱི་དངོས་གྲུབ་འདུལ་བ་རྡོ་རྗེ་འདོད་པའི་མཆོག་ཅེས་བྱ་བའི་རྣམ་པར་གནོན་པར་མཛད་ནས། རྡོ་རྗེ་གསང་བ་ཆེན་པོའི་དམ་ཚིག་ཅེས་བྱ་བའི་དཀྱིལ་འཁོར་ཆེན་པོ་འདི་གསུངས་
- 175b
སོ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །བདེ་བ་ཆེན་པོ་རྡོ་རྗེ་མཆོག །དམ་ཚིག་དམ་པའི་མིང་ཅན་ཡིན། །དཀྱིལ་འཁོར་གནས་ནི་འདུས་བྱས་ནས། །དེ་དབུས་ཆོ་ག་བཞིན་དུ་ནི། །ཕྱག་རྒྱ་ཆེན་པོ་མཉམ་གཞག་ནས། །དེར་ནི་དཀྱིལ་འཁོར་ བསྒྲུབ་པར་བྱ། །གསར་ཞིང་ལེགས་པར་བསྒྲིལ་བ་དང་། །མདུད་པ་དག་ནི་མེད་པ་ཡི། །ཐིག་སྐུད་དམར་པོས་ཐིག་བཏབ་ནས། །ཚོན་གྱི་ཕྱེ་མས་བྲི་བར་བྱ། །ཟུར་བཞི་པ་ལ་སྒོ་བཞི་པ། །སྒོ་ཁྱུད་བཞིས་ནི་མཛེས་པ་དང་། །ཁ་ཁྱེར་གྱིས་ནི་ཡོངས་སུ་བསྐོར། །མཚམས་སུ་ ལྷ་ཡི་བུ་མོས་མཛེས། །དཀྱིལ་འཁོར་གྱི་ནི་མཚམས་རྣམས་དང་། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་ཕྱེད་ལ་གནས་པ་ཡི། །རྡོ་རྗེ་རིན་ཆེན་འོད་ཟེར་འབར། །རླུང་གིས་བསྐྱོད་པའི་དྲིལ་བུ་མཆོག །བ་དན་སྣ་ཚོགས་མཛེས་པ་ཡིན། །མེ་ལོང་དྲ་བ་མེ་ཏོག་ཕྲེང་། །ལྡན་པའི་ཕྱི་རོལ་དཀྱིལ་འཁོར་བྲི། ། དེ་ཡི་ནང་དུ་འཁོར་ལོ་ནི། །དཀྱིལ་འཁོར་བརྒྱད་པ་དང་འདྲ་བ། །རྡོ་རྗེ་ཐིག་གིས་ཡོངས་བསྐོར་བའི། །རྡོ་རྗེ་འཁོར་ལོ་ཡང་དག་བྲི། །དེ་དབུས་ཆོ་ག་བཞིན་དུ་ནི། །རྡོ་རྗེ་སེམས་དཔའ་དགོད་པར་བྱ། །བླུགས་སམ་ཡང་ན་བྱས་པའམ། །བརྡུངས་པའམ་ཡང་ན་བྲིས་པ་ཡི། །བཞད་ པ་དང་བཅས་ཟླ་བའི་འོད། །འབར་བའི་འོད་ཟེར་དམར་པོས་ཁྱབ། །སངས་རྒྱས་ཕྲེང་བས་རྣམ་པར་མཛེས། །སྐུ་ལ་ཚོན་གྱིས་ཡང་དག་བྱུགས། །སེམས་དཔའི་སྐྱིལ་མོ་ཀྲུང་གིས་བཞུགས། །རྡོ་རྗེ་བསྙེམས་པ་འཛིན་པའི་མཆོག །ས་མ་ཡ་སྟྭཾ་ཞེས་བརྗོད་ནས། །སྙིང་གར་རྣམ་ པར་དགོད་པར་བྱ། །དེ་ཡི་ལོགས་ནི་ཐམས་ཅད་དུ། །སེམས་དཔའ་ཆེན་པོ་རྣམས་བྲི་སྟེ། །ཚོན་ནམ་ཡང་ན་རྡུལ་ཚོན་གྱིས། །གོ་རིམ་ཇི་བཞིན་བྲི་བར་བྱ། །མདུན་དུ་སྐུ་མདོག་དམར་པོ་ནི། །རྡོ་རྗེ་མཚོན་ཆ་ལ་བརྩོན་པ། །གཡས་སུ་དག་པའི་དཀར་པོ་སྟེ། །ལེགས་པར་ འཁྱུད་པའི་རྡོ་རྗེ་ཅན། །རྒྱབ་ཏུ་སྐུ་མདོག་སེར་པོ་སྟེ། །ཆུ་སྲིན་གྱི་ནི་རྒྱལ་མཚན་འཛིན། །གཡོན་དུ་སྐུ་མདོག་སྔོན་པོ་སྟེ། །ཕྱག་གཉིས་བསྙེམས་པ་འཛིན་ལ་སོགས། །མཆོད་པའི་སྣོད་རྣམས་འཛིན་པའོ། །མཆོད་པའི་ལྷ་མོ་བྲི་བར་བྱ། །སྒེག་མོ་བཞད་མ་གླུ་མ་དང་། །གར་མ་
- 176a
ལྷ་ཡི་བུ་མོའི་ཚོགས། །རྡོ་རྗེ་ལྕགས་ཀྱུ་ཞགས་པ་དང་། །རྡོ་རྗེ་ལྕགས་སྒྲོག་དྲིལ་བུ་རྣམས། །སྒོ་ནི་བཞི་པོ་རྣམས་ལ་ནི། །སྒོ་སྲུང་བཞི་པོ་དགོད་པར་བྱ། །དེ་ནས་དེ་དག་གི་སྙིང་པོ་རྣམས་ནི་འདི་ཡིན་ཏེ། ཧཱུྃ་བཛྲ་དྲི་ཥྚ་སཱ་མ་ཀེ་མཊ། ཧཱུྃ་བཛྲ་ཀི་ལི་ཀི་ལཱ་ཡ་ཧཱུྃ། ཧཱུྃ་ སྨ་ར་བཛྲ་བནྡྷ་ཧཱུྃ། ཧཱུྃ་ཏུ་ཥྚ་བཛྲི་ཎི་ཧཱུྃ། །རྡོ་རྗེ་བྲན་ནོ། །དེ་ནས་མཆོད་པའི་ལྷ་མོ་རྣམས་ཀྱི་ནི། ཧཱུྃ་མ་དྷུ་ར་བཛྲི་ཧཱུྃ། ཧཱུྃ་བཛྲ་མི་གྷེ་ཧཱུྃ། ཧཱུྃ་ཤཱ་རད་བཛྲི་ཧཱུྃ། ཧཱུྃ་བཛྲ་ཤི་ཤི་རི་ཧཱུྃ། དེ་ནས་ལྷའི་བུ་མོ་རྣམས་ཀྱི་ནི། ཧཱུྃ་བཛྲ་ལཱ་སྱཻ། མ་ཧཱ་བར་བཛྲི་ཎི། ཨོྃ་བཛྲ་ནྲི་ཏྱཻ། དེ་ནས་ སྒོ་སྲུང་རྣམས་ཀྱི་ནི། ཛཿབཛྲ་ཨྃ་ཀུ་ཤི་པྲ་ཏི་ཧ་ར། ཧཱུྃ་བཛྲ་པཱ་ཤ་ག་ན། བྃ་བཛྲ་སྥོ་ཊ་དུ་ཧ། ཨཿབཛྲ་གྷ་ནྜ་ཙྪེ་ད། དེ་ལྟར་ལྷ་མོའི་དཀྱིལ་འཁོར་དུ། །བུད་མེད་གྲགས་པ་དེ་ཉིད་དགོད། །བཀོད་ན་དེ་དག་རྣམས་ཀྱིས་ནི། །བྱིན་གྱིས་བརླབས་པ་ཉིད་དུ་འགྱུར། །དེ་ནས་ཕྱག་ན་རྡོ་རྗེ་འཛིན། ། དཀྱིལ་འཁོར་ཀུན་མཆོག་བྲི་བྱས་ནས། །བུམ་པ་གང་བ་ཅི་སྙེད་དང་། །མེ་ཏོག་ལ་སོགས་ཀུན་གྱིས་མཆོད། །དྲིལ་བུ་བཏགས་པའི་བ་དན་རྣམས། །མཚམས་རྣམས་སུ་ནི་གཞག་པར་བྱ། །ལྕུག་མ་དང་བཅས་བུམ་པ་རྣམས། །སྒོ་ཡི་ཕྱི་རོལ་དག་ཏུ་གཞག །རྡོ་རྗེ་དང་བཅས་བཞི་དང་ བཅས། །ལྕུག་མོ་ཡོངས་སུ་བཟླས་ནས་ནི། །དྲི་ཆུས་གང་བའི་བུམ་པ་སྟེ། །ཕྱག་ན་རྡོ་རྗེའི་མདུན་གཞག་བྱ། །དེ་ལ་འདི་ལྟར་བདེ་བ་ཆེན་པོའི་དམ་ཚིག་གི་བདུད་རྩིའི་ཆུ་བྱིན་གྱིས་བརླབ་པའི་སྙིང་པོ་ནི། ཨོྃ་མ་ཧཱ་སུ་ཁ་བཛྲ་ས་མ་ཡ། ཨ་བྷི་ཥེ་ཀ་ཛཿཧཱུྃ་བྃ་ཧོཿ། ལན་ཉི་ཤུ་རྩ་གཅིག་ བཟླས་སོ། །ཆུ་འདི་གཏོར་བའམ། འཐུངས་ན་སྡུག་བསྔལ་ཐམས་ཅད་རབ་ཏུ་འབྱང་བ་དང་། བདེ་བ་ཐམས་ཅད་རབ་ཏུ་འཕེལ་བར་འགྱུར་བ་ཡིན་ནོ། །དེ་ནས་རང་གི་དམ་ཚིག་རྣམས་ཀྱིས་རྡོ་རྗེ་འཆང་ལ་སོགས་པ་བསྒྲུབ་པར་བྱའོ། །ཛཿཧཱུྃ་བྃ་ཧོཿཞེས་བརྗོད་ནས། དགུག་པ་དང་ནི་གཞུག་ པ་དང་། །བཅིངས་ནས་སྐད་ཅིག་དབང་དུ་འགྱུར། །ཕྱག་རྒྱ་ཆེན་པོ་མཉམ་གཞག་སྟེ། །དེ་བཞིན་གཡས་མཛུབ་ལྕགས་ཀྱུར་བྱ། །དགུག་པ་འདི་ནི་ལན་ཅིག་གིས། །འགྲུབ་སྟེ་རབ་ཏུ་གཞུག་པར་བྱ། །ཨོྃ་མ་ཧཱ་སུ་ཁ་བཛྲ་ས་ཏྭ། ཨ་ཨ་ཧི་ཤཱི་གྷྲཾ་མ་ཧཱ་སུ་ཁ་བཛྲ་གུ་ཧྱ་ས་མ་ཡ་མ་ནུ་སྨ་ར་
- 176b
ཕྲ་བྷུ་ཏ་ས་མ་ཡ་སྟཾ་ཧྲྀ་ད་ཡཾ་སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷེ་བ། ཨ་དྷི་ཏིཥྛ་བྷ་ག་བཱ་ན་ཨ་ན་ཏི་ནཾ་ད་ན་སིད་དྷྱཾ་ཏུ་མེ་མནྟྲ་པ་དཻཿཛཿཧཱུྃ་བྃ་ཧོཿ། དེ་ནས་རྟག་ཏུ་བཅོམ་ལྡན་འདས། །དཀྱིལ་འཁོར་དུ་ནི་རང་ཉིད་བྱོན། །དགུག་ཅིང་བཅུག་ནས་བརྟན་པ་དང་། །དབང་དུ་ འགྱུར་ཞིང་འགྲུབ་པ་ཡིན། །རྨད་དུ་བྱུང་བའི་རྫུ་འཕྲུལ་དུ་མ་རྣམས་མཐོང་བའམ། ཡང་ན་བཅོམ་ལྡན་འདས་རང་ཉིད་ཀྱིས་མཐོང་བར་འགྱུར་རོ། །དེ་ནས་རང་ཉིད་རྡོ་རྗེ་འཛིན། ཀུན་གྱི་སློབ་དཔོན་ནི་ཕྱག་རྒྱ་ཐམས་ཅད་གྲུབ་པ། དམ་ཚིག་ཐམས་ཅད་ཤེས་པ། ལས་ཐམས་ཅད་ནུས་པ། བཅོམ་ལྡན་འདས་ཀྱིས་བྱིན་གྱིས་བརླབས་པ་ཡིན་ནོ། །འཇུག་པའི་ཆོ་ག་འདི་ཡིས་རྡོ་རྗེ་སློབ་དཔོན་རང་ཉིད་ཅི་སྙེད་པའི་དྲིས་བྱུགས་ཤིང་བསྒོས་པ་རྒྱན་དང་བཅས་པའི་མེ་ཏོག་གི་ཕྲེང་བས་ལུས་ཤིན་ཏུ་བརྒྱན་པ། གོས་དམར་པོ་གཉིས་བགོས་པ། རང་ཉིད་ཀྱིས་བཅོམ་ལྡན་འདས་ལ་ བསྟོད་ཅིང་རྡོ་རྗེ་དང་བཅས་པའི་རྡོ་རྗེ་བསྙེམས་པས་རང་ཉིད་འཇུག་པར་བྱའོ། །བསྟོད་པ་ནི་དྲུག་ལྡན་ལ་སོགས་པ་གླུ་ཡིས་བྱའོ། །འདོད་ཆགས་ལ་སོགས་བདེ་ཀུན་ཡིད་ཁྱོད་ནི། །ཀུན་འདུས་བདག་ལ་བདེ་བ་སྩོལ་མཛོད་ཅིག །རྡོ་རྗེ་སེམས་དགོངས་མྱུར་དུ་བདག་སྟོན་མཛོད། །བདག་ དགྱེས་མཛད་དང་བདེ་མཆོག་གྲུབ་ལ་འདུད། །དེ་ནས་རབ་ཏུ་ཞུགས་ནས་དགོངས་སུ་གསོལ་བར་བྱ་སྟེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་བདེ་བ་ཆེ། །ཀུན་ཏུ་བཟང་པོ་ཁྱོད་ཡིན་ཏེ། །རྡོ་རྗེ་བསྙེམས་བདག་ཁྱབ་བདག་ཡིན། །སེམས་ཀྱི་སེམས་དཔའི་ཏིང་ངེ་འཛིན། ། དེ་བཞིན་རྡོ་རྗེ་རྡོ་རྗེ་འཛིན། །ཀུན་མཆོག་དམ་ཚིག་དངོས་གྲུབ་ཅན། །རྡོ་རྗེ་སེམས་བདག་དེང་གྲུབ་མཛོད། །དེ་ནས་བཅོམ་ལྡན་འདས་དེ་ཉིད་ཀྱིས། །རྡོ་རྗེ་སློབ་དཔོན་བྱིན་བརླབ་འགྱུར། དེ་སྔར་མ་བྱུང་བའི་སོ་སོར་རང་རིག་པའི་བདེ་བ་གཉིས་ཀ་ལ་སྐྱེ་བར་འགྱུར་རོ། །ཕྲ་མོ་དབབ་པར་ཡང་ འགྱུར་རོ། །དེ་ནས་བདག་ལ་བཅོམ་ལྡན་འདས་གྲུབ་པར་གྱུར་ཏོ་ཞེས་ཤེས་པར་བྱའོ། །དེ་ནས་དེ་བཞིན་དུ་འདུག་ལ་ཅི་འདོད་པའི་བཟླས་བརྗོད་བྱའོ། །དེ་ནས་དེ་བཞིན་དུ་འདུག་ལ་རང་གི་བསོད་ནམས་ཀྱི་བྱིན་གྱི་རླབས་ཀྱིས་འདོད་པའི་དངོས་གྲུབ་ཐོབ་པར་འགྱུར་རོ། །དེ་ནས་བརྩམས་ཏེ་སེམས་དཔའ་
- 177a
ཆེན་པོ་ཐམས་ཅད་འགྲུབ་པར་འགྱུར་ཞིང་མཐོང་བར་འགྱུར་རོ། །དེ་རྣམས་ཀྱིས་ཀྱང་དེ་ལ་དངོས་གྲུབ་ཐམས་ཅད་སྩོལ་བར་མཛད་དོ། །ཕྱག་རྒྱ་ཐམས་ཅད་ཀྱང་བདག་རང་ཉིད་ཀྱིས་བཅིངས་ན་ལས་ཐམས་ཅད་འགྲུབ་པར་འགྱུར་རོ། །དམ་ཚིག་ཐམས་ཅད་ ཀྱང་འདི་ལ་བསྟན་པར་འགྱུར་རོ། །ཡིད་ཀྱི་འདོད་པའི་ལས་རྣམས་ཀྱང་བྱེད་པ་ཡིན་ནོ། །བདེ་བ་དང་ཡིད་བདེ་བ་ཐམས་ཅད་ཉམས་སུ་མྱོང་ཞིང་གཞན་གྱིས་མི་ཐུབ་པ་དང་མི་སོད་པས་ལོ་གཅིག་འདས་ནས་སངས་རྒྱས་ཉིད་ལ་སོགས་པའི་མཆོག་གི་དངོས་གྲུབ་ཐོབ་པ་ཡིན་ནོ། །དེ་ ནས་སེམས་ཅན་ཐམས་ཅད་གཞུག་པའི་དོན་དུ་བརྟག་པར་བྱ་བ་ཡིན་ནོ། །རྡོ་རྗེ་སློབ་དཔོན་རང་ཉིད་སྔ་མ་བཞིན་དུ་ལུས་ལ་བརྒྱན་ནས། རབ་ཏུ་བདེ་བའི་རྡོ་རྗེའི་དམ་ཚིག་གི་ཕྱག་རྒྱ་རབ་ཏུ་བཅུག་སྟེ་དེ་བཞིན་དུ་དེ་ཁོ་ན་ཉིད་ཆེན་པོ་བསྐུལ་བས་ཡང་དག་པར་བསྐུལ་ལ་དགུག་པར་བྱའོ། །འདི་ སྐད་ཅེས་བརྗོད་དོ། །སྲིད་པའི་བདེ་བ་རྣམ་དག་ཕྱིར། །སྔར་གྱི་སྲིད་པ་ལ་ཁྱོད་དགའ། །འདོད་པ་ཀུན་གྱི་དངོས་གྲུབ་ཆེ། །འགྲོ་བ་ཀུན་ལའང་འགྲུབ་པར་གྱིས། །དེ་ནས་མཆོད་པ་བྱས་ལ་རང་གི་ལྷག་པའི་ལྷ་གང་ཡིན་པ་དེའི་དམ་ཚིག་ཕྱག་རྒྱ་མེ་ཏོག་དང་བཅས་པ་གཞུག་པར་བྱ་ སྟེ། བཅུག་ནས་རྣ་བར་འདི་སྐད་ཅེས་བརྗོད་པར་བྱའོ། །ཆགས་བྲལ་འདུལ་བའི་འཇིག་རྟེན་ནི། ཆགས་བྲལ་ཉིད་ཀྱིས་འདུལ་བར་འགྱུར། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔའ་སྦས་པ་ཡིན། །འདོད་ཆགས་བྲལ་བ་ལྟ་བུ་ཡི། །སྡུག་བསྔལ་གཞན་ནི་རང་བཞིན་མེད། ། དེ་བས་སེམས་ཅན་ཆགས་བྲལ་ལ། །སླར་ཡང་ཡིད་ནི་མ་བྱེད་ཅིག །དེ་ནས་མེ་ཏོག་ལ་སོགས་པ་སྙིང་པོ་འདིས་འདོར་དུ་གཞུག་གོ། །ཨོྃ་མ་ཧཱ་སུ་ཁ་བཛྲ་ས་ཏྭ་བྲ་ཏི་གྲི་ཧྞ་ས་མ་ཡ་སྟྭཾ། དེ་ནས་གང་དུ་བབས་པ་དེ་ནི་དེའི་ལྷ་ཡིན་ནོ། །དེ་ནས་དེ་ཁོ་ན་ཉིད་ཆེན་པོ་བརྗོད་པར་བྱའོ། །གང་ འདོད་པའི་སྙིང་པོ་བྱིན་ལ་སྒྲུབ་ཏུ་བཅུག་ལ་རང་ཉིད་ལྷག་པའི་ལྷའི་དབང་བསྐུར་བས་དབང་བསྐུར་ནས། དེའི་མཚན་མ་ལག་པ་གཉིས་སུ་བྱིན་ཏེ་དེའི་རིགས་ཀྱི་མིང་གི་དབང་བསྐུར་ལ་སྙིང་པོ་འདིས་དབང་བསྐུར་བར་བྱའོ། །ཨོྃ་སརྦ་ཏ་ཐཱ་ག་ཏ་ཨཱཏྨ་ཀི་྅་ཧྃ་བཛྲ་དྷཱ་ར་ས་མཱུ་ཁེ་བྷ་ཨ་བྷི་ཥེ་ག་ཏྭཱྃ་ཨ་བྷི་
- 177b
ཥིཉྩཱ་མི་གྲྀཧྞ་སིདྡྷི་བཛྲི་ཏི་ཨ་མོ་གྷ་སིདྡྷི་སྟྭཾ། དེ་ནས་ཕྱག་རྒྱ་བཅིངས་པ་བསླབ་པར་བྱའོ། །དེ་ནས་ཅི་འདོད་པའི་མཆོད་པ་བྱས་ཤིང་བྱེད་དུ་བཅུག་ནས་ཅི་འདོད་པ་བཟའ་བ་དང་བཏུང་བས་སློབ་མ་རྣམས་ཚིམ་པར་བྱས་ལ་ཕྱག་རྒྱ་དང་། ཕྱག་རྒྱའི་ལན་དང་གར་དང་དགོད་པ་བྱེད་དུ་བཅུག་ཅིང་རང་ ཉིད་ཀྱིས་ཀྱང་བྱའོ། །དེ་ནས་ཐམས་ཅད་བསྐྲད་ནས་འདི་སྐད་བརྗོད་པར་བྱའོ། །ཐོག་མཐར་རྒྱུ་བའི་འགྲོ་བ་འདི། །དགའ་བ་མཆོག་ལ་རག་ལུས་ཏེ། །སེམས་དཔའ་ཆེན་པོ་རྡོ་རྗེར་འགྱུར། །སླར་ཡང་གཤེགས་པར་མཛད་དུ་གསོལ། །དེ་ནས་སྙིམ་པའི་མེ་ཏོག་དོར་ནས་དབྱུང་བར་ བྱའོ། །དཀྱིལ་འཁོར་ཡང་རང་ཉིད་ཀྱིས་ཕྱགས་ལ་རྡུལ་ཚོན་དེ་དག་གིས་རིལ་བུ་བྱས་ལ་བཞག་ན་ལས་ཐམས་ཅད་འགྲུབ་པར་འགྱུར་རོ། །དེ་ནས་བདེ་བ་ཆེན་པོ་རྡོ་རྗེ་དམ་ཚིག་གི་བདུད་རྩིའི་ཚུལ་དེ་ཡང་བཅུག་ན་ཚེ་འཕེལ་བ་ལ་སོགས་པའི་ལས་ཐམས་ཅད་དགོངས་པ་ཡིན་ནོ། །དེ་ཉིད་ཀྱིས་ དབང་བསྐུར་ན་ཡང་དཀྱིལ་འཁོར་དུ་དབང་བསྐུར་བ་ཐོབ་པ་དང་། མཆོག་གི་དངོས་གྲུབ་ཀྱང་ཐོབ་པར་འགྱུར་རོ། །གལ་ཏེ་སྐུ་བྲི་བའི་རི་མོ་མཁན་མ་རྙེད་ན་རང་རང་གི་ཕྱག་མཚན་གྱི་ཕྱག་རྒྱ་རྣམས་ཀྱིས་དཀྱིལ་འཁོར་བྲི་བར་བྱའོ། །གལ་ཏེ་དེ་ཡང་མི་ཤེས་ན་ཕྱག་མཚན་གཞག་པར་བྱའོ། ། ཕྱག་རྒྱའི་ཆོ་ག་རྒྱས་པའོ། །དེ་ནས་བཅོམ་ལྡན་འདས་དོན་ཡོད་པ་ཐོགས་པ་མེད་པ་མྱུར་དུ་འགྲུབ་པའི་ཆོ་ག་རྒྱ་ཆེ་བའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་རྣམ་པར་གནོན་པར་མཛད་ནས་རྡོ་རྗེ་འཆང་ཆེན་པོས་འདི་གསུངས་སོ། །བདེ་བ་ཆེན་པོ་རབ་སྒྲུབ་དང་། ། འདོད་པ་ཆེན་པོ་རྣམ་དག་ཕྱིར། །རྡོ་རྗེ་སེམས་དཔའ་གྲུབ་པ་ནི། །རྟག་པར་མྱུར་དུ་བཤད་པར་བྱ། །ཅི་སྲིད་འཁོར་བའི་གནས་སུ་ནི། །དེ་སྲིད་སེམས་ཅན་གདོན་པར་བྱ། །མྱ་ངན་འདས་པ་བྱང་ཆུབ་སྒྲིབ། །དེ་ཉིད་ཀྱིས་ནི་དམ་ཚིག་རྣམས། །ཅི་སྲིད་སྲིད་པ་ལ་གནས་པ། །དེ་ སྲིད་སེམས་ཅན་དོན་ཉིད་བྱེད། །ཐམས་ཅད་དག་པའི་མཆོག་ཆོས་ཅན། །ཅི་ལྟར་སེམས་ཅན་ཀུན་གྱི་དོན། །དངོས་གྲུབ་ཐམས་ཅད་རབ་སྒྲུབ་པ། །དེ་ལྟར་སྦྱིན་སོགས་ཕ་རོལ་ཕྱིན། །བྱང་ཆུབ་སྤྱོད་པ་མཆོག་གིས་མིན། །དེ་བཞིན་གཤེགས་ནི་གདུལ་མིན་ལ། །སེམས་
- 178a
ཅན་རྣམས་ཀྱི་དོན་མཛད་པ། །འདི་ནི་དངོས་གྲུབ་རབ་བསྒྲུབས་ན། །དུས་ཀུན་དུ་ནི་ཐམས་ཅད་མཛད། །དེས་ན་བསྒྲུབ་འདི་བཤད་བྱ་སྟེ། །དངོས་གྲུབ་ཤིན་ཏུ་རྟག་པ་ཡིན། །གང་གིས་སྲིད་པ་འདི་ཉིད་དུ། །ཤིན་ཏུ་རྟག་པའི་དངོས་གྲུབ་ཐོབ། ། དཀྱིལ་འཁོར་དག་ཏུ་མ་ཞུགས་ཀྱང་། །དམ་ཚིག་རྣམ་པར་སྤངས་པའམ། །བསོད་ནམས་མེད་ཀྱང་ཐམས་ཅད་དུ། །སྲིད་པ་འདི་ལ་མྱུར་དུ་འགྲུབ། །གལ་ཏེ་དངོས་གྲུབ་སྒྲུབ་འདོད་ན། །རྟག་ཏུ་ཡུལ་དང་ལྡན་གྱུར་ན། །གསང་བའི་མཆོད་པས་མཆོད་ནས་ནི། །རང་རང་ ཕྱག་རྒྱས་འགྲུབ་པར་འགྱུར། །དྲུག་ལྡན་ལ་སོགས་སྙན་པའི་གླུ། །ཆགས་པ་ཀུན་ཀྱང་ཅི་འདོད་པར། །བཟླས་པའི་དོན་ནི་ཅི་ནུས་པས། །རྡོ་རྗེ་སེམས་དཔའ་བསྒྲུབ་པར་བྱ། །འདི་ཡིས་འདོད་པའི་ཀུན་དབང་ཕྱུག །ཅི་འདོད་འགྲོ་འོང་མཁའ་ལ་རྒྱུ། །དངོས་གྲུབ་ཀུན་གྱི་ དབང་ཕྱུག་གྲུབ། །རྒ་ཤི་མེད་ཅིང་གཙོ་བོར་འགྱུར། །རྒྱལ་བ་ཀུན་གྱིས་མཆོད་བྱས་ལ། །རང་གཞན་ཀུན་གྱིས་བསྙེན་བཀུར་ཞིང་། །རྡོ་རྗེ་འཆང་ཆེན་དང་མཚུངས་ཤིང་། །དོན་ཡོད་ཀུན་མཆོག་སྤྱོད་པ་ཡིན། །བདེ་བ་ཆེན་པོ་རྡོ་རྗེ་གྲུབ་པའི་རྒྱལ་པོ་དེ་བཞིན་གཤེགས་པ་ལ་ སོགས་པའི་དངོས་གྲུབ་ཐམས་ཅད་རབ་ཏུ་སྟེར་བ། །རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ཡིན་ན། གལ་ཏེ་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་མངོན་པར་འདོད་ན་དེས་བཅོམ་ལྡན་འདས་དེ་བཞིན་གཤེགས་པ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་ ཁུ་ཚུར་ཡོངས་སུ་འཛིན་པ་རས་རིས་ལ་བྲི་བར་བྱའོ། །བཞད་པ་དང་བཅས་པ་དངོས་པོ་ཐམས་ཅད་དུ་དེ་བཞིན་གཤེགས་པ་རྣམས་ཀྱིས་ཡོངས་སུ་བསྐོར་བའོ། །དེའི་མདུན་དུ་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་འཛིན་པས་རྡོ་རྗེའི་ཚིག་གིས་སྟོང་ཕྲག་བརྒྱ་བཟླས་པར་ བྱའོ། །འབུམ་རྫོགས་པ་ན་མཚན་ཕྱེད་ན་བདུད་ཀྱི་ཚོགས་རྣམས་འོང་བར་འགྱུར་རོ། །དེ་ནས་བདུད་ཐམས་ཅད་ཀྱི་སྟོབས་གཞོམ་པས་བཅོམ་པར་བྱའོ། །དེ་ནས་ཐོ་རངས་ཀྱི་དུས་སུ་དེ་བཞིན་གཤེགས་པ་ཐམས་ཅད་ཉིད་དམ་བྱང་ཆུབ་སེམས་དཔའ་ཉིད་ཐོབ་པར་འགྱུར་རོ། །གལ་ཏེ་རྡོ་
- 178b
རྗེ་འཆང་ཆེན་པོ་ཉིད་མངོན་པར་འདོད་ན། དེས་ལུགས་མའམ། འདུས་བྱས་པའམ། བརྡུངས་པའམ། རས་རིས་ལ་སོགས་པར་ལེགས་པར་བྲིས་པའི་ཕྱག་ན་རྡོ་རྗེའི་དཀྱིལ་འཁོར་བཞིན་དུ་སྔར་སྒྲུབ་པ་ལ་སྐུ་གཟུགས་ཀྱི་ཁྱད་པར་ཅི་ལྟར་ཐོབ་པ་ལྟར་རྡོ་རྗེ་སེམས་དཔའི་བསྒྲུབ་པ་བཤད་དོ། ། ཟླ་བ་དྲུག་གིས་རྡོ་རྗེ་འཆང་ཆེན་པོའི་དངོས་གྲུབ་ཆེན་པོ་འགྲུབ་བོ། །གལ་ཏེ་རྡོ་རྗེ་འཆང་ཆེན་པོ་དགུག་ན་བདེ་བ་ཆེན་པོའི་རྡོ་རྗེ་ལྕགས་ཀྱུས་དགུག་ཅིང་ཅི་འདོད་པ་བསྒྲུབ་པར་བྱའོ། །ཟླ་བ་གཅིག་འདས་ནས་ཐམས་ཅད་གསོལ་བར་བྱའོ། །གལ་ཏེ་རང་གི་ཕྱག་རྒྱས་བདག་ཉིད་བསྒྲུབ་ན་རང་གི་ ལྷའི་ཕྱག་རྒྱ་ཆེན་པོ་བཅིངས་ཏེ་བསྒོམས་པས་བདག་རྡོ་རྗེ་སེམས་དཔའ་ཡིན་ནོ་ཞེས་བསྒོམས་ལ་བསྒྲུབ་པར་བྱའོ། །དེ་ཅི་ལྟར་མངོན་པར་འདོད་པའི་བཟླས་པས་བདག་ཉིད་བསྒྲུབ་པར་བྱའོ། །ཡང་དང་ཡང་དུ་སྒོམ་ཞིང་བཟླས་པ་དེ་སྲིད་བདག་གིས་བྱའོ། །ཅི་སྲིད་རྡོ་རྗེ་འཆང་ཉིད་ཟླ་བ་ཕྱེད་ འདས་ནས་ཐོབ་པར་འགྱུར་རོ། །དེ་ནས་འདོད་པ་ཐམས་ཅད་ཀྱི་དབང་ཕྱུག་བསྒྲུབ་པར་འདོད་ན་དེ་བཞིན་དུ་རང་ཡིད་དུ་འོང་བ་དང་བཅས་པར་རབ་ཏུ་ཞུགས་ཏེ། ཕྱག་རྒྱ་བཅིངས་ལ་དེ་སྲིད་བཟླས་པར་བྱའོ། །ཅི་སྲིད་བདག་འདོད་པ་ཀུན་གྱི་དབང་ཕྱུག་དང་། ཁམས་གསུམ་པ་མ་ལུས་པའི་ བདག་པོར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་འཆང་ཁམས་གསུམ་པ་མ་ལུས་པའི་རྡོ་རྗེའི་རྒྱུན་གྱི་རང་བཞིན་ཐམས་ཅད་གྲུབ་པའི་ཆོས་ཉིད་ཀྱི་ཡེ་ཤེས་རྣམ་པར་རོལ་པར་མཛད་ནས་མ་བསྒྲུབས་པའི་ཕྱག་རྒྱའི་ལས་ཀྱི་རྒྱུན་རྡོ་རྗེའི་ཆོ་ག་རྒྱས་པ་འདི་གསུངས་སོ། །མ་བསྒྲུབས་པའི་ སྙིང་པོའི་ལས་རྣམས་འདི་ལྟ་སྟེ། བདག་ཉིད་བསྲུང་བ་ནི་བདེ་བ་ཆེན་པོའི་རྡོ་རྗེས་གསང་བའི་གཙུག་ཏོར་གྱིས་སོ། །ཐམས་ཅད་བསྲུང་བ་ནི་བདེ་བ་ཆེན་པོ་རྡོ་རྗེ་གསང་བའི་མཛོད་སྤུས་སོ། །ཕྱོགས་ཐམས་ཅད་དང་། མཚམས་དང་དཀྱིལ་འཁོར་བཅིང་བ་ནི་བདེ་བ་ཆེན་པོ་རྡོ་རྗེ་གསང་བ་ འབར་བའི་ཕྲེང་བས་སོ། །བདུད་ཐམས་ཅད་ཀྱི་སྟོབས་གཞོམ་པ་ནི་བདེ་བ་ཆེན་པོའི་རྡོ་རྗེ་གསང་བ་མི་བསྐྱོད་པས་སོ། །ཚེ་འཕེལ་བར་བྱ་བ་ནི་བདེ་བ་ཆེན་པོ་རྡོ་རྗེ་གསང་བའི་བདུད་རྩིས་སོ། །གཟུགས་ཆེན་པོ་ཕུན་སུམ་ཚོགས་པ་ནི་བདེ་བ་ཆེན་པོ་རྡོ་རྗེ་གསང་བའི་གཟུགས་ཅན་གྱིས་སོ། །གཟི་
- 179a
བརྗིད་དང་ན་ཚོད་ཤིན་ཏུ་བཟང་པོ་རབ་ཏུ་འཕེལ་བ་ལ་ནི་བདེ་བ་ཆེན་པོ་རྡོ་རྗེ་གསང་བའི་བཅུད་ཀྱིས་ལེན་གྱིས་སོ། །སྟོབས་དང་མདོག་འཕེལ་བ་ལ་ནི་བདེ་བ་ཆེན་པོ་རྡོ་རྗེ་གསང་བའི་མཐུ་ཡིས་སོ། །དབང་བསྐུར་བ་ཐམས་ཅད་ལ་རྡོ་རྗེ་གསང་བའི་ཅོད་པན་ཅན་གྱིས་སོ། ། ནོར་ཐམས་ཅད་ཐོབ་པར་བྱ་བ་ལ་ནི་རྡོ་རྗེ་གསང་བའི་དབྱིག་གིས་སོ། །རྒྱལ་སྲིད་ཐོབ་པ་ལ་ནི་རྡོ་རྗེ་གསང་བའི་རྒྱལ་པོའི་ཕྱག་རྒྱས་སོ། །ས་མ་ལུས་པ་ཐོབ་པ་ལ་ནི་རྡོ་རྗེ་གསང་བའི་རྩལ་གྱིས་སོ། །ཐམས་ཅད་དབབ་པ་དང་གཡོ་བར་བྱ་བ་དང་གར་བྱེད་དུ་གཞུག་པ་དང་། དུས་གསུམ་ བདེན་པ་ཉིད་དུ་སྨྲར་གཞུག་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་དོན་དུ་གཞུག་པས་སོ། །པྲ་སེན་ཐམས་ཅད་སྒྲུབ་པ་ལ་ནི་རྡོ་རྗེ་གསང་བའི་པྲ་སེན་དབབ་པས་སོ། །གདོན་ཐམས་ཅད་ལས་ཐར་བ་ལ་ནི་རྡོ་རྗེ་གསང་བའི་གདོན་ལས་ཐར་བས་སོ། །གདུག་པ་ཐམས་ཅད་གཞིག་པ་ལ་ ནི་རྡོ་རྗེ་གསང་བའི་བགེགས་འཇོམས་པས་སོ། །ཐམས་ཅད་རེངས་པར་བྱ་བ་ལ་ནི་རྡོ་རྗེ་གསང་བའི་རེངས་པས་སོ། །ཐམས་ཅད་གཉིད་ལོག་པར་བྱ་བ་ལ་ནི་རྡོ་རྗེ་གསང་བའི་གཉིད་ཀྱིས་སོ། །ཐམས་ཅད་རྒྱས་གདབ་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་མཁའ་འགྲོ་མས་སོ། ། ཐམས་ཅད་དུ་གསང་བ་ལ་ནི་རྡོ་རྗེ་གསང་བའི་མཐར་བྱེད་ཀྱིས་སོ། །ཐམས་ཅད་བསྒྱེལ་བ་ལ་ནི་རྡོ་རྗེ་གསང་བའི་ཧཱུྃ་མཛད་ཀྱིས་སོ། །ཐམས་ཅད་བསླང་བ་ལ་ནི་རྡོ་རྗེ་གསང་བའི་དམ་ཚིག་གིས་བསླང་བས་སོ། །ཐམས་ཅད་བཅིང་བ་ལ་ནི་རྡོ་རྗེ་གསང་བའི་བཅིངས་པས་སོ། །ཐམས་ཅད་ཐར་བར་བྱ་ བ་ལ་ནི་རྡོ་རྗེ་གསང་བའི་ཡི་གེ་མུས་སོ། །ཕར་མེན་མ་ཐམས་ཅད་ལས་ཐར་བར་བྱ་བ་དང་། སྔོན་གྱི་གནས་སྐབས་རྗེས་སུ་སྦྱིན་པ་ལ་ནི་གསང་བ་ཆེན་པོ་ཧེ་རུ་ཀའི་རྡོ་རྗེས་སོ། །མ་མོའི་གདོན་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་གསང་བའི་དྲག་མོས་སོ། །ཕྲ་མེན་མ་ཐམས་ཅད་ཀྱིས་རྒྱས་ བཏབ་པ་ལ་ཐར་བར་བྱ་བ་དང་། སྙིང་ཟོས་པ་ལས་སྙིང་གཞན་འབྱུང་བར་འཇུག་པ་དང་། ཤི་བ་གསོ་བ་ལ་ནི་དམ་ཚིག་ཆེན་པོ་གསང་བའི་ཧེ་རུ་ཀའི་རྡོ་རྗེ་དབང་བསྐུར་བས་སོ། །གདུག་པ་ཐམས་ཅད་ཀྱི་ཕྱག་རྒྱ་གཞིག་པ་ལ་ནི་རྡོ་རྗེ་གསང་བའི་རྡོ་རྗེས་སོ། །རིམས་ཐམས་ཅད་རབ་ཏུ་ཞིབ་ལ་
- 179b
ནི་རྡོ་རྗེ་གསང་བའི་འབར་བའི་ལྟ་བས་སོ། །དུག་ཐམས་ཅད་གཞིག་པ་དང་བཟའ་བ་དང་འབབ་པ་དང་འཆི་བ་གསོ་བ་ལ་ནི་གསང་བ་ཆེན་པོ་རྡོ་རྗེ་ནོར་བུའི་ཕྱག་རྒྱས་སོ། །དུག་ཐམས་ཅད་དང་སྦྱར་བའི་དུག་ཐམས་ཅད་བདུད་རྩིར་བྱ་བ་ལ་ནི་རྡོ་རྗེ་གསང་བའི་དུག་མེད་པས་སོ། །གཤེད་བྱེད་ ཐམས་ཅད་དང་བྱད་དང་རོ་ལངས་དང་བྱུར་དང་གནོད་སྦྱིན་མོ་རྣམས་ཀྱི་གཞིག་པ་ལ་ནི་རྡོ་རྗེ་གསང་བའི་སྦྱིན་སྲེག་གིས་སོ། །རྩོད་པ་ཐམས་ཅད་དང་འཐབ་པ་དང་འཐབ་མོ་དང་རྩོད་པ་གཞིག་པ་ལ་ནི་རྡོ་རྗེ་གསང་བའི་ཞལ་རབ་ཏུ་གདངས་པས་སོ། །ཡམས་དང་འཚེ་བ་ཐམས་ཅད་དང་སྡིག་པ་ དང་རྨི་ལམ་ངན་པ་གཞིག་པ་ལ་ནི་རྡོ་རྗེ་གསང་བའི་ཞི་བས་སོ། །གཞན་གྱི་དཔུང་ཐམས་ཅད་རེངས་པར་བྱ་བ་དང་། གཉིད་ལོག་པར་བྱ་བ་དང་རྨོངས་པར་བྱ་བ་དང་ལྐུགས་པར་བྱ་བ་དང་། རྒྱས་གདབ་པ་དང་གསད་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་གཤེད་བྱེད་ཀྱིས་སོ། །འཐབ་མོ་ཐམས་ ཅད་ལས་རྒྱལ་བ་ཐོབ་པ་ལ་ནི་རྡོ་རྗེ་གསང་བའི་རྒྱལ་མཚན་གྱི་དཔུང་རྒྱན་གྱིས་སོ། །གདུག་པ་ཐམས་ཅད་གཞིག་པ་ལ་ནི་རྡོ་རྗེ་གསང་བའི་རྡོ་རྗེ་ལེགས་པས་སོ། །བགེགས་ཐམས་ཅད་ཞི་བར་བྱ་བ་ལ་ནི་རྡོ་རྗེ་གསང་བའི་ཐབས་སྦྱོར་གྱིས་སོ། །དགྲ་བོ་ཐམས་ཅད་རྣམ་པར་གཞིག་པ་ལ་ནི་རྡོ་རྗེ་ གསང་བའི་རྣམ་པར་འཐོར་བས་སོ། །བདུད་ཀྱི་སྟོབས་ཐམས་ཅད་གཞོམ་པ་ལ་ནི་རྡོ་རྗེ་གསང་བའི་རབ་ཏུ་འདུལ་བས་སོ། །སྤྲིན་བསྐྱེད་པ་ལ་ནི་རྡོ་རྗེ་གསང་བའི་སྤྲིན་ཆེན་པོས་སོ། །ཆར་དབབ་པ་ལ་ནི་རྡོ་རྗེ་གསང་བའི་སྡིགས་མཛུབ་ཀྱིས་སོ། །ཐོག་དབབ་པ་དང་། གློག་དང་། རླུང་དང་། ཆར་ཞི་བར་བྱ་བ་ལ་ནི། རྡོ་རྗེ་གསང་བའི་སྤྲིན་སྲུང་གིས་སོ། །སྤྲིན་དང་མུན་པ་དང་། ཁུག་རྣ་ཞི་བར་བྱ་བ་ལ་ནི། རྡོ་རྗེ་གསང་བའི་བདེ་བ་ཆེན་པོའི་སྤྱན་གྱིས་སོ། །ཀླུ་ཐམས་ཅད་དགུག་པ་ལ་ནི་རྡོ་རྗེ་གསང་བའི་ཕྱག་རྒྱས་སོ། །ཀླུ་ཐམས་ཅད་དབང་དུ་བྱ་བ་ལ་ནི་གསང་བ་ཐམས་ཅད་ཀྱི་ ནོར་བུའི་ཕྱག་རྒྱས་སོ། །ཀླུ་ཐམས་ཅད་རྗེས་སུ་འབྲང་བར་བྱ་བ་ལ་ནི་རྡོ་རྗེ་གསང་བའི་ཀླུ་འདུལ་བས་སོ། །ཀླུ་ཐམས་ཅད་འབྱིན་པ་ལ་ནི་རྡོ་རྗེ་གསང་བའི་ཀླུ་འདོན་པས་སོ། །ས་མ་ལུས་པ་གཡོ་ཞིང་འགུལ་བར་བྱ་བ་ལ་ནི་རྡོ་རྗེ་གསང་བའི་ཐར་པས་སོ། །ཆུ་མེད་པར་ཆུའི་ཕུང་པོ་ཆར་ཆེར་
- 180a
བསིལ་ཞིང་དྲི་མ་མེད་པར་བསྐྱེད་པ་ལ་ནི་བདེ་བ་ཆེན་པོ་རྡོ་རྗེ་ཀླུའི་ཕྱག་རྒྱས་སོ། །མུན་པར་ཉི་མའི་སྣང་བ་ཆེན་པོ་བསྐྱེད་པ་ལ་ནི་རྡོ་རྗེ་ཉི་མའི་ཕྱག་རྒྱས་སོ། །རླུང་ཐམས་ཅད་དབང་དུ་བྱ་བ་ལ་ནི་རྡོ་རྗེ་རླུང་ཐམས་ཅད་ཀྱིས་སོ། །ནམ་མཁའ་ལ་གཟུགས་ཐམས་ཅད་ ཀུན་དུ་སྟོན་པ་ལ་ནི་རྡོ་རྗེ་གསང་བའི་འཛིན་པས་སོ། །ནམ་མཁའ་ལས་དངོས་པོ་ཐམས་ཅད་འབྱུང་བར་བྱ་བ་ལ་ནི་རྡོ་རྗེ་གསང་བའི་འབྱུང་བས་སོ། །ནམ་མཁའ་ལ་རང་གི་བདག་ཉིད་ཀྱི་དངོས་པོ་ཀུན་དུ་བསྟན་པར་བྱ་བ་ལ་ནི་རྡོ་རྗེ་གསང་བའི་རྫུ་འཕྲུལ་གྱིས་སོ། །ནམ་མཁའ་ལ་དེ་བཞིན་ གཤེགས་པ་དང་རྡོ་རྗེ་འཛིན་པ་ལ་སོགས་པ་བྱང་ཆུབ་སེམས་དཔའ་ཐམས་ཅད་དང་། འཇིག་རྟེན་གྱི་ཁམས་ཐམས་ཅད་བསྟན་པ་ལ་ནི་རྡོ་རྗེ་གསང་བའི་རྣམ་པར་འཕྲུལ་པས་སོ། །ནམ་མཁར་ཤིང་ཐམས་ཅད་ལ་ལོ་མ་དང་མེ་ཏོག་དང་། འབྲས་བུ་ཐམས་ཅད་འབྱུང་བ་ལ་ནི་རྡོ་རྗེ་གསང་བའི་ དུས་ཀྱི་ཕྱག་རྒྱས་སོ། །སའི་ཆ་ཐམས་ཅད་ལ་འབྲུའི་ཆ་ཐམས་ཅད་སྨིན་པར་འབྱུང་བ་ལ་ནི་རྡོ་རྗེ་གསང་བའི་གཤོལ་གྱི་ཕྱག་རྒྱས་སོ། །ཐམས་ཅད་ལས་ལྷའི་ཁ་ཟས་དང་། །བཏུང་བ་དང་། གོས་དང་། རྒྱན་དང་། གནས་སར་པ་དང་། བུ་མོ་གཞོན་ནུ་འབྱུང་བ་དང་། སྐྱེས་པ་དང་བུད་ མེད་དང་། བྲན་ཕོ་དང་། བྲན་མོ་ཐམས་ཅད་འབྱུང་བར་བྱ་བ་ལ་ནི། བདེ་བ་ཆེན་པོ་རྡོ་རྗེ་དམ་ཚིག་གི་བསོད་ནམས་ཀྱི་ཆུ་ཡིས་སོ། །གཡུལ་དུ་དཔུང་གི་ཚོགས་ཡན་ལག་བཞི་བསྟན་ཅིང་གཡུལ་འགྱེད་པ་ལ་ནི་རྡོ་རྗེ་བདེ་བ་ཆེན་པོའི་སྡོམ་པས་སོ། །སྒྱུ་མ་ཐམས་ཅད་བསྟན་པ་ལ་ནི། རྡོ་རྗེ་བདེ་ མཆོག་གིས་སོ། །བདེ་མཆོག་གི་བྱ་བ་ཐམས་ཅད་ལ་ནི་རྡོ་རྗེ་སྒྱུ་མའི་བྱ་བས་སོ། །རྨད་དུ་འབྱུང་བ་དང་ཆོ་འཕྲུལ་ཐམས་ཅད་བསྟན་པ་ལ་ནི་རྡོ་རྗེ་རྨད་དུ་འབྱུང་བའི་རྫུ་འཕྲུལ་གྱི་རྣམ་པར་འཕྲུལ་པས་སོ། །ལན་ཐམས་ཅད་གདབ་པར་བྱ་བ་ལ་ནི་རྡོ་རྗེ་ལན་བསྟན་པས་སོ། །མེ་རེངས་པར་བྱ་བ་ ལ་ནི་རྡོ་རྗེ་ཤིན་ཏུ་གྲང་བས་སོ། །ཆུ་དབབ་པར་བྱ་བ་ལ་ནི་རྡོ་རྗེ་ཟླ་བའི་ཆུ་ཤེལ་གྱིས་སོ། །དགོན་པ་དང་། གྲོང་དང་། ནགས་དང་། ཆུ་བོ་དང་། རྫིང་བུ་དང་། སྐྱེད་མོས་ཚལ་དང་། ཟས་དང་སྐོམ་དང་། གཙུག་ལག་ཁང་བསྲུང་བ་ལ་ནི་རྡོ་རྗེ་གྲུབ་པས་སོ། །ཆུའི་སྟེང་དུ་བཞག་པ་
- 180b
དང་། བདག་ཉིད་གཟུགས་མང་པོའི་དངོས་པོ་སྟོན་པ་དང་། མི་སྣང་བ་དང་། ནམ་མཁའ་ལ་འགྲོ་བའི་དངོས་གྲུབ་ལ་ནི་རྡོ་རྗེ་གསང་བའི་དངོས་གྲུབ་ཀྱི་ཕྱག་རྒྱས་སོ། །ལྷ་ལ་སོགས་པ་ཐམས་ཅད་མངག་གཞུག་པར་བྱ་བ་ལ་ནི་རྡོ་རྗེ་གསང་བའི་བཀའ་བསྒོ་བས་སོ། །སེམས་ཅན་ཐམས་ཅད་དབང་ དུ་བྱ་བ་ལ་ནི་རྡོ་རྗེ་གསང་བའི་དབང་གིས་སོ། །མི་རྒྱུ་བ་ཐམས་ཅད་དྲང་བ་དང་དབབ་པ་དང་། བདེན་པར་སྨྲར་གཞུག་པ་ལ་ནི་རྡོ་རྗེ་གསང་བའི་དངོས་གྲུབ་ཆེན་པོའི་ཕྱག་རྒྱས་སོ། །གཟུགས་བརྙན་ཐམས་ཅད་དབབ་པ་དང་། དགུག་པ་དང་། དགོད་པར་བྱ་བ་དང་། གར་བྱེད་ དུ་གཞུག་པ་དང་། ཀུན་དུ་རོལ་པར་བྱ་བ་དང་། བསྒོ་བ་ཐམས་ཅད་བྱེད་དུ་གཞུག་པ་དང་། ཐམས་ཅད་ཁྱེར་ཏེ་འོང་བ་དང་། ལས་ཐམས་ཅད་བྱེད་དུ་གཞུག་པ་ལ་ནི་བདེ་བ་ཆེན་པོ་རྡོ་རྗེའི་དམ་ཚིག་བསྒྲུབས་པས་སོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་བདེ་བ་ཆེན་པོའི་ རྡོ་རྗེ་ཡིད་ལས་བྱུང་བས་སོ། །རྒྱུ་བ་དང་མི་རྒྱུ་བ་ཐམས་ཅད་རྩེར་གཞུག་པ་ལ་ནི་རྡོ་རྗེ་ཀི་ལི་ཀི་ལའི་གསང་བས་སོ། །ཐམས་ཅད་བརྟན་པར་བྱ་བ་ལ་ནི་རྡོ་རྗེ་ཆུ་སྲིན་གྱི་ཕྱག་རྒྱས་སོ། །ཐམས་ཅད་དཔའ་བར་བྱ་བ་ལ་ནི་རྡོ་རྗེ་བསྙེམས་པས་སོ། །རྨི་ལམ་ངན་པ་བཟློག་པ་ལ་ནི་རྡོ་རྗེ་ ངག་གིས་སོ། །གཞན་དག་གིས་རང་འདོད་པའི་རྨི་ལམ་མཐོང་བར་བྱ་བ་ལ་ནི་རྡོ་རྗེ་རྨི་ལམ་མཐོང་བས་སོ། །རྨི་ལམ་ངན་པ་ཐམས་ཅད་གཞིག་པ་ལ་ནི་རྡོ་རྗེ་སྲེག་བླུགས་ཀྱིས་སོ། །རྨི་ལམ་བཟང་བ་ཐམས་ཅད་བསྒྲུབ་པ་དང་བརྟན་པར་བྱ་བ་ལ་ནི་རྡོ་རྗེ་རྨི་ལམ་གྲུབ་པས་སོ། ནད་དང་ གནོད་པ་ཐམས་ཅད་བསལ་བ་ལ་ནི་རྡོ་རྗེ་སྨན་གྱིས་སོ། །རིམས་ནད་ཐམས་ཅད་གཞིག་པ་ལ་ནི་རྡོ་རྗེ་བཅུད་ལེན་གྱིས་སོ། །དུས་མ་ཡིན་པར་འཆི་བ་གཞིག་པ་ལ་ནི་རྡོ་རྗེ་དཱུར་བས་སོ། །དམྱལ་བ་ལ་སོགས་པའི་ངན་འགྲོ་ཐམས་ཅད་གཞིག་པ་ལ་ནི་རྡོ་རྗེ་སྡིག་པ་དྲལ་བས་སོ། །སྐུ་ཐམས་ ཅད་བསྒྲུབ་པ་ལ་ནི་རྡོ་རྗེ་སྐུའི་མཆོག་གིས་སོ། །གསུང་ཐམས་ཅད་བསྒྲུབ་པ་ལ་ནི་རང་གི་ལྕེས་འདས་པ་དང་། མ་འོངས་པ་དང་། ད་ལྟར་གྱི་དངོས་པོ་ཐམས་ཅད་བདེན་པར་སྟོན་པའི་རྡོ་རྗེ་གསང་བའི་ལྗགས་ཀྱི་མཆོག་གིས་སོ། །ཐུགས་ཐམས་ཅད་བསྒྲུབ་པ་ལ་ནི་རྡོ་རྗེ་ཐུགས་ཐམས་
- 181a
ཅད་བསྐྱེད་པས་སོ། །རྡོ་རྗེ་ཐམས་ཅད་ཀྱི་དངོས་གྲུབ་ལ་ནི་རབ་ཏུ་དག་པའི་རྡོ་རྗེས་སོ། །དཀྱིལ་འཁོར་ཐམས་ཅད་རབ་ཏུ་འཇུག་པ་ལ་ནི་རྡོ་རྗེ་འཁོར་ལོས་སོ། །ཕྱག་རྒྱས་ཐམས་ཅད་བཅིང་བའི་དངོས་གྲུབ་ལ་ནི་རྡོ་རྗེ་གསང་བའི་དམ་ཚིག་གི་ཕྱག་རྒྱ་ཆེན་པོས་སོ། །ཐམས་ ཅད་དམ་ཚིག་ཐམས་ཅད་སྒྲུབ་པ་ལ་ནི་རྡོ་རྗེ་དམ་ཚིག་གི་ཕྱག་རྒྱས་སོ། །ལས་ཐམས་ཅད་བསྒྲུབ་པ་ལ་ནི་རྡོ་རྗེ་གསང་བའི་མཆོད་པས་སོ། །དངོས་གྲུབ་ཐམས་ཅད་ལ་ནི་རྡོ་རྗེ་གསང་བའི་བདེ་བ་ཆེན་པོ་གྲུབ་པས་སོ། །ཕུན་སུམ་ཚོགས་པ་ཐམས་ཅད་ལ་ནི་རྡོ་རྗེ་ལྟུང་བ་ལས་གདོན་པའི་ཕྱག་ རྒྱས་སོ། །ཐམས་ཅད་མཁྱེན་པའི་ཡེ་ཤེས་ཐོབ་པ་ལ་ནི་རྡོ་རྗེ་ཡེ་ཤེས་ཀྱི་ཕྱག་རྒྱས་སོ། །ཐམས་ཅད་ཀྱི་མཆོད་པ་བྱ་བ་ཉིད་ལ་ནི་རྡོ་རྗེ་གསང་བའི་གར་གྱིས་སོ། །རྡོ་རྗེ་ཐམས་ཅད་ཀྱི་དངོས་གྲུབ་དམ་པ་ལ་ནི་རྡོ་རྗེ་བདེ་བ་ཆེན་པོའི་རྡོ་རྗེས་སོ། །སེམས་དཔའ་ཆེན་པོ་ཐམས་ཅད་ཀྱི་དངོས་གྲུབ་ དམ་པ་ལ་ནི་རྡོ་རྗེ་སེམས་དཔའི་བདེ་བ་ཆེན་པོས་སོ། །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་དམ་པ་ལ་ནི་རྡོ་རྗེ་སེམས་དཔའ་གསང་བ་མཆོག་གི་བདེ་བ་ཆེན་པོས་སོ། །རྡོ་རྗེ་འཛིན་པ་ཐམས་ཅད་ཀྱི་དངོས་གྲུབ་དམ་པ་ལ་ནི་བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་ཕྱག་རྒྱས་ སོ། །བདེ་བ་ཆེན་པོ་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོ་ལས་རབ་ཏུ་དགའ་བའི་རྡོ་རྗེ་གསང་བའི་མཆོད་པའི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་བདེ་བ་ཆེན་པོ་རྡོ་རྗེའི་དམ་ཚིག་གི་སེམས་དཔའི་བྱིན་གྱིས་བརླབས་པ་གསང་བའི་ཆོས་ཅན་རྣམ་པར་སྣང་མཛད་ ཆེན་པོ་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་འཛིན་པས་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་བྱིན་གྱིས་རློབ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་དང་། ། འདོད་ཆགས་ཆེན་པོ་རྣམ་དག་ཕྱིར། །དེ་བཞིན་གཤེགས་པ་མཐའ་ཡས་ཉིད། །དམ་པའི་རིགས་ནི་བསྐྱེད་དུ་གསོལ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བདེ་བ་ཆེན་པོ་མི་ཕྱེད་པའི་རྣམ་པར་གནོན་པ་མཛད་ནས། བཅོམ་
- 181b
ལྡན་འདས་ཀྱི་སྐུ་དང་གསུང་དང་ཐུགས་རྡོ་རྗེ་ཐམས་ཅད་ལ་རབ་ཏུ་བཞུགས་ནས་ཐམས་ཅད་ཀྱི་བདག་ཉིད་མཉམ་པར་སྤྲོས་ནས་བདེ་བ་ཆེན་པོའི་རྡོ་རྗེའི་ཕྱག་རྒྱའི་གཟུངས་འདི་གསུངས་སོ། །ཨོྃ་དྷཾ། དེ་ནས་འདི་ནི་གསུངས་ཙམ་གྱིས། །རྣམ་པ་དྲུག་ཏུ་གཡོས་གྱུར་ཏེ། །སངས་རྒྱས་སྲས་དང་ བཅས་པ་ཀུན། །ཀུན་ནས་འདུས་ཤིང་བསྟན་པར་འགྱུར། །དཀྱིལ་འཁོར་ཆེན་པོའི་སྦྱོར་བ་ཡིས། །ཐམས་ཅད་གྲུབ་ཕྱིར་ཀུན་ནས་བཞུགས། །བཞད་པ་ཆེན་པོའི་ཁྱད་པར་གྱིས། །རྨད་བྱུང་ཆེན་པོར་རབ་ཏུ་བཞད། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་སེམས་ དཔའ་དེ་བཞིན་དུ་རྡོ་རྗེ་ལ་སྙོམས་པར་ཞུགས་ཏེ། བདེ་བ་ཆེན་པོའི་དམ་ཚིག་རྡོ་རྗེ་གསང་བ་ཞེས་བྱ་བའི་གཟུངས་ཀྱི་དཀྱིལ་འཁོར་འདི་གསུངས་སོ། །འདི་ལྟར་ཆོས་ཀྱིས་བྲིས་ནས་ནི། །རྒྱལ་བ་གཡོན་དུ་བསྙེམས་འཛིན་པ། །དམ་ཚིག་མཆོག་གི་མཆོག་བཀོད་ནས། །ས་མ་ཡ་ སྟྃ་ཞེས་བརྗོད་དོ། །དེ་བཞིན་གཤེགས་པ་སྲས་དང་བཅས། །རྡོ་རྗེ་མཚོན་ཆ་ལ་སོགས་གཟུང་། །བྱང་ཆུབ་སེམས་དཔའ་སེམས་དཔའ་ཆེ། །མེ་ཏོག་ལ་སོགས་སྤྱིར་ཐལ་སྦྱར། །དེ་ལ་འཇུག་པ་ལ་སོགས་པའི་ཆོ་ག་རྒྱས་པའི་ཁྱད་པར་ནི་འདི་ཡིན་ཏེ། དེ་བཞིན་གཤེགས་ པ་ཐམས་ཅད་ལ་ཕྱག་བྱ་བའི་ཕྱག་རྒྱ་དང་རྡོ་རྗེའི་གླུ་འདིས་འཇུག་པར་བྱའོ། །རྡོ་རྗེ་སེམས་དཔའ་བསྡུས་པ་ཡིས། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུར་བླངས་པས། །རྡོ་རྗེ་ལས་ནི་བྱེད་པར་འགྱུར། །དེ་ནས་རབ་ཏུ་བཞུགས་ནས་དེ་བཞིན་གཤེགས་པ་ཐམས་ཅད་ཀྱི་ ཡེ་ཤེས་ཀྱི་གཟུངས་བདེ་བ་ཆེན་པོ་རྡོ་རྗེ་གསང་བའི་ལྕགས་ཀྱུས་དགུག་པར་བྱའོ། །ཨོྃ་བཛྲ་དྷཱ་ར་སུ་ར་མ་ཧཱ་སུ་ཁེ་སརྦ་ཧཱ་ར་རྨ་པ་མ་ཏ་ཡ། སརྦ་ཏ་ཐཱ་ག་ཏ་ཛཱ་ན་མཻ་མནྟྲ་པཱ་དཻཿཛཿཧཱུྃ་བྃ་ཧོཿ། དེ་ནས་དེ་བཞིན་གཤེགས་པ་ཐམས་ཅད་འཛིན་པ་དང་བཅས་པ་ཡང་དག་པར་བྱོན་པར་འགྱུར་ རོ། །ཡིད་བདེ་བ་ལ་སོགས་པའི་མཚན་མ་འབྱུང་ངོ་། །ཆོ་འཕྲུལ་དུ་མ་དག་མཐོང་བ་ཡིན་ནོ། །དེ་ནས་ཆོ་ག་རྒྱས་པ་དང་། བསྒྲུབ་པ་དང་། ཡིད་ཀྱིས་འདོད་པའི་དངོས་གྲུབ་ཐམས་ཅད་དང་། དོན་ཡོད་པ་དང་། ཐོགས་པ་མེད་པར་མྱུར་དུ་དམ་པ་གྲུབ་པ་ཡིན་ནོ་དེ་བཞིན་དུ་བྱའོ ། །
- 182a
དེ་ནས་མ་བསྒྲུབས་པར་ལན་ཅིག་བཟླས་པས་ལས་རྣམས་བྱེད་པར་འགྱུར་རོ། །ཐམས་ཅད་བསྲུང་བ་ལ་ནི་རྡོ་རྗེ་གཙུག་ཏོར་གྱིས་སོ། །སེམས་ཅན་ཐམས་ཅད་དབང་དུ་བྱ་བ་ལ་ནི་རྡོ་རྗེ་མཛོད་སྤུས་སོ། །ཆོས་ཉིད་ཐམས་ཅད་ཐོབ་པ་ལ་ནི་རྡོ་རྗེ་ཆོས་ཉིད་ཀྱིས་སོ། ། དེ་བཞིན་གཤེགས་པ་ཐམས་ཅད་ཀྱི་མཆོད་པའི་དངོས་གྲུབ་ནི་རྡོ་རྗེ་མཆོད་པས་སོ། །གདུག་པ་ཐམས་ཅད་འདུལ་བ་ལ་ནི་རྡོ་རྗེ་ཁྲོ་བོས་སོ། །བྱང་ཆུབ་ཀྱི་སྤྱོད་པ་མ་ལུས་པར་རྫོགས་པར་བྱ་བ་ལ་ནི་རྡོ་རྗེ་སྤྱོད་པའི་ཕྱག་རྒྱས་སོ། །བདུད་ཐམས་ཅད་གཞོམ་པ་ལ་ནི་བདུད་ ཐམས་ཅད་འཇོམས་པར་བྱེད་པས་སོ། །དེ་བཞིན་གཤེགས་པ་ཐམས་ཅད་ཀྱི་བདག་ཉིད་དུ་བྱ་བ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱིས་སོ། །བདེ་བ་ཆེན་པོ་རྡོ་རྗེ་གསང་བ་ལས། དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོའི་ཆོ་ག་རྒྱས་པའོ། །དེ་བཞིན་གཤེགས་ པའི་དཀྱིལ་འཁོར་གསུངས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་ཅིང་ཐོགས་པ་མེད་པའི་བཀའ་བསྟན་པ། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་ཆེན་པོའི་ཐབས་བདེ་བ་ཆེན་པོའི་ཁྲོ་བོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ ཞུགས་ཏེ། རང་གི་རྡོ་རྗེ་སེམས་དཔའ་ལ་སོགས་པ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་དང་། །ཆགས་པ་ཆེན་པོ་རྣམ་དག་ཕྱིར། །གདུག་པ་ཐམས་ཅད་གཞོམ་པའི་ཕྱིར། །རང་རིགས་སྤྲུལ་མཛོད་རྡོ་རྗེ་འཛིན། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་ དེ་བཞིན་གཤེགས་པ་ཐམས་ཅད་ཀྱི་བཀའ་རྡོ་རྗེའི་དམ་ཚིག་ཅེས་བྱ་བའི་རབ་ཏུ་དགའ་བའི་རྡོ་རྗེ་ཁྲོ་བོ་འདི་གསུངས་ཏེ། ཧཱུྃ་རཀྟ་ཛྭ་ལ་མཱ་ལཱ་པྲ་ལ་ཡ་ཨ་གྣི་པྲ་ཏི་པ་ཏ་ཏེ་ཛ་མ་ཧཱ་སུ་ར་ཏ་བཛྲ་ཀྲོ་དྷ་ཛཿཧཱུྃ་བཾ་ཧོཿཕཊ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་ཕྱག་ན་རྡོ་ རྗེའི་རྡོ་རྗེ་ལས་ཀུན་ནས་འོད་ཟེར་དམར་པོ་འབར་བའི་སྙིང་པོ་ཅན་སྨིན་མ་འགྱུར་ཞིང་ཁྲོ་གཉེར་བསྡུས་པ། སྨ་ར་སེར་ཞིང་སྤྱན་འབར་བ། རྡོ་རྗེ་མཆེ་བ་གཙིགས་པས་མ་མཆུའི་སྒྲོས་རྣམ་པར་གནོན་པའི་ཞལ་མངའ་བ། དབུ་སྐྲ་གྱེན་དུ་འབར་བ་དང་རྡོ་རྗེ་དང་གཞུ་ལ་སོགས་པ་
- 182b
ཡོངས་སུ་འཛིན་པ་བཅོམ་ལྡན་འདས་ཀྱི་དཀྱིལ་འཁོར་ཆེན་པོའི་ཚུལ་དུ་བཞུགས་སོ། །བཅོམ་ལྡན་འདས་ཀྱིས་ཀྱང་ཁམས་གསུམ་པའི་གདུག་པ་ཐམས་ཅད་འདུལ་བར་མཛད་ནས་རྡོ་རྗེ་དམ་ཚིག་ཆེན་པོའི་བྱིན་གྱིས་བརླབས་སོ། །དཀྱིལ་འཁོར་ཆེན་པོ་ཐིག་གདབ་བྱ། །དེ་ ལ་དང་པོ་ཁྲོས་པ་གཞག །སུ་ར་ཏོད་བྷ་བ་ཧཱུྃ་ཞེས་ཟློས། །ཨུཏྤལ་སྔོན་པོའི་འོད་འབར་བ། །རྡོ་རྗེ་བསྙེམས་པ་འཛིན་པའི་མཆོག །མཆེ་བ་ཅུང་ཟད་གཙིགས་པའི་ཞལ། །ཁྲོ་དང་བཅས་པས་བཞད་པའི་ཞལ། །རྡོ་རྗེ་སྐྱིལ་མོ་ཀྲུང་གིས་བཞུགས། །འོད་ཟེར་འབར་བ་ འཁྲུགས་པའི་འོད། །དཀྱིལ་འཁོར་ཆེན་པོའི་ཚུལ་གྱིས་ནི། །ཐམས་ཅད་དུ་ནི་ཁྲོ་བོ་བྲི། །རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོས་དང་པོར་སློབ་དཔོན་གྱིས་འཇུག་པར་བྱ་སྟེ། སློབ་མ་རྣམས་ཀྱང་དེ་བཞིན་ནོ། །སློབ་དཔོན་ཞུགས་ནས་ཁྲོས་པས་ལྕགས་ཀྱུ་དེ་ཉིད་ཀྱིས་ དགུག་པར་བྱའོ། །ཧཱུྃ་སུ་ར་ཏ་བཛྲ་ཀྲོཎྷ་ཨ་ཡ་ཏེ། མ་ཧཱ་སུ་ཁ་བཛྲ་སཏྭ་ཛ། སརྦ་བཛྲ་ཀུ་ལ་ནེ་ཏྲ་པྲ་བི་ཤ་ཡ་ཧཱུྃ། སརྦ་མུ་དྲཱ་ག་ཎ་བན་དྷ་ཡ་བྃ། སརྦ་མ་ཡཱ་མ་བི་ཤྭ་ཀུ་རུ་ཧོ། །སརྦ་ཀརྨ་ནེ་ཏྲ་སཏྭ་ཡ་ཨ། དེ་ནས་རྡོ་རྗེའི་རིགས་ཐམས་ཅད་བཅོམ་ལྡན་འདས་དང་བཅས་ པ་བྱོན་ཞིང་གྲུབ་པ་ཡིན་ནོ། །སློབ་དཔོན་དང་སློབ་མ་རྣམས་ལ་དགྱེས་པ་དང་། ཁྲོ་བོ་འབབ་པའི་མཚན་མ་ཡང་དག་པར་འབྱུང་བར་འགྱུར་རོ། །གཞན་ཡང་ཅུང་ཟད་འབྱུང་བ་ཡིན་ན། དེ་གྲུབ་པ་དང་། དངོས་གྲུབ་དང་། ཆོ་ག་རྒྱས་པ་ཡང་དེ་བཞིན་དུའོ། །གལ་ཏེ་ མ་གྲུབ་ན་ལན་ཅིག་བཟླའོ། །ཁམས་གསུམ་པ་མ་ལུས་པ་ལས་རྒྱལ་བར་བྱ་བ་ལ་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱས་སོ། །སེམས་ཅན་གྱི་ཁམས་ཐམས་ཅད་འདུལ་བ་ལ་ནི་རྡོ་རྗེ་ཁྲོ་བོའི་གསང་བས་སོ། །འཇིག་རྟེན་གསུམ་པོ་ལས་རྣམ་པར་རྒྱལ་བ་ལ་ནི་འཇིག་རྟེན་གསུམ་ ལས་རྣམ་པར་རྒྱལ་བའི་ཕྱག་རྒྱས་སོ། །ཐམས་ཅད་དགུག་པ་དང་། གཞུག་པ་དང་། དབབ་པ་དང་། བཅིང་བ་དང་། དབང་དུ་བྱ་བ་དང་། གཞིག་པ་དང་། རེངས་པ་དང་། གཉིད་ལོག་པར་བྱ་བ་དང་། རྒྱས་གདབ་པ་དང་། བསྒྱེལ་བ་དང་། གསད་
- 183a
པར་བྱ་བ་ལ་ནི་བདེ་བ་ཆེན་པོ་རྡོ་རྗེ་ཁྲོ་བོས་སོ། །ཐམས་ཅད་ལྟུང་བར་བྱ་བ་ལ་ནི་རྡོ་རྗེ་ཕྲ་མོའི་ཁྲོ་བོས་སོ། །ཐམས་ཅད་དབབ་པ་ལ་ནི་རྡོ་རྗེ་འབེབས་པའི་ཁྲོ་བོས་སོ། །ཐམས་ཅད་ངེས་པར་གནོན་པ་ལ་ནི་རྡོ་རྗེ་གད་རྒྱངས་ཀྱིས་སོ། །ལས་ཐམས་ཅད་ལ་ཉེ་བར་ དགོད་པ་ལ་ནི་བདེ་བ་ཆེན་པོ་རྡོ་རྗེ་དམ་ཚིག་གི་ཁྲོ་བོས་སོ། །བདེ་བ་ཆེན་པོ་རྡོ་རྗེའི་གསང་བ་ལས་རབ་ཏུ་དགའ་བ་ལས་བྱུང་བ་རྡོ་རྗེ་གསང་བ་རྣམ་པར་རྒྱལ་བའི་དམ་ཚིག་གི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དོན་ཡོད་ཅིང་ ཐོགས་པ་མེད་པ་ཐམས་ཅད་དག་པའི་ཆོས་སྒྲིབ་པ་མེད་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་དང་། །འདོད་ཆགས་ཆེན་པོ་རྣམ་ དག་ཕྱིར། །པདྨའི་རིགས་ཆེན་དག་པ་ནི། །མཆོག་ཆེན་ཁྱོད་ཀྱིས་བསྐྱེད་པར་མཛོད། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་ཆོས་ཐམས་ཅད་ལ་གཟིགས་པ་རྡོ་རྗེ་ཞེས་བྱ་བའི་རྣམ་པར་གནོན་པར་མཛད་ནས་བདེ་བ་ཆེན་པོ་རྡོ་རྗེ་གསང་བའི་པདྨ་ཞེས་བྱ་བའི་སྔགས་འདི་ གསུངས་སོ། །ཨོྃ་ཧྲཱི་བཾ་ཧོ། འདི་གསུངས་པ་ཙམ་གྱིས་བཅོམ་ལྡན་འདས་ཀྱི་ཞལ་ནས་པདྨའི་མདོག་གི་མདངས་ཅན། ཟླ་བའི་དཀྱིལ་འཁོར་གྱི་འོད་ལྟ་བུ་པདྨའི་འདབ་མ་ལ་སོགས་པ་ཡོངས་སུ་འཛིན་པ། དེ་བཞིན་གཤེགས་པའི་དབང་བསྐུར་བ་དང་། རལ་བའི་ཅོད་ པན་དང་། ན་བཟའ་དམར་པོ་འཆང་བ་དང་། པདྨ་ཆེན་པོའི་སེམས་དཔའ་རྣམས་བྱུང་ནས་དཀྱིལ་འཁོར་ཆེན་པོའི་ཚུལ་གྱིས་བཞུགས་སོ། །བཅོམ་ལྡན་འདས་ཞལ་རབ་ཏུ་བཞད་པས་གཡས་པས་རྡོ་རྗེ་གཡོན་པས་པདྨ་འཛིན་ཅིང་དེ་བཞིན་དུ་རྡོ་རྗེ་བསྙེམས་པས་རྡོ་རྗེ་སྐྱིལ་མོ་ ཀྲུང་གིས་བཞུགས་སོ། །དེ་ནས་དཀྱིལ་འཁོར་ནི། དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཐིག་གདབ་བོ། །རྡོ་རྗེ་འཇིག་རྟེན་དབང་ཕྱུག་གཞག །པདྨའི་མཚན་མའི་ཚོགས་རྣམས་བྲི། །དེ་ནས་རྡོ་རྗེ་པདྨས་ཞུགས་ལ་མཛུབ་མོའི་ལྕགས་ཀྱུ་གཉིས་
- 183b
ཀྱིས་དགུག་པར་བྱའོ། །ཨོྃ་ཧྲཱི་བྃ་ཧོཿ། ཨོྃ་ཧྲཱིཿམ་ཧཱ་སུ་ཁ་བཛྲ་ཨཱ་ལོ་ཀེ་ཤྭ་རཱ་ཡ་མེ། ཨཱ་ཨཱ་ཧེ་པྲ་བེ་ཤ་དྷི་དྷི་མེ་བྷ་བ། སིད་དྷི་མ་མེ་ར་མུ་དྲཱ་པཱ་དཻཿཛཿཧཱུྃ་བྃ་ཧོཿ། དེ་ནས་བཅོམ་ལྡན་འདས་སྤྱན་རས་གཟིགས་དབང་ཕྱུག་བྱོན་ཏེ་མཆོག་ཐམས་ཅད་སྩོལ་བར་འགྱུར་རོ། །སྣང་བའི་མཚན་ མ་འབྱུང་བར་འགྱུར་རོ། །ཆོ་ག་རྒྱས་པ་ཐམས་ཅད་དང་། སྒྲུབ་པ་དང་། དངོས་གྲུབ་ཐམས་ཅད་ཀྱང་དེ་བཞིན་ནོ། །མ་བསྒྲུབས་ཀྱང་ལན་ཅིག་བཟླས་པ་ལས་ཐམས་ཅད་བྱེད་དོ། །སྒྲིབ་པ་ཐམས་ཅད་སྦྱང་བ་ལ་ནི་པདྨ་ཆེན་པོས་སོ། །ཐམས་ཅད་བསྲུང་བ་ལ་ནི་པདྨའི་གཙུག་ ཏོར་གྱིས་སོ། །ཐམས་ཅད་རྗེས་སུ་ཆགས་པ་ལ་ནི་པདྨ་ལ་ལྟ་བས་སོ། །ཐམས་ཅད་དག་པའི་ཏིང་ངེ་འཛིན་ཐོབ་པ་ལ་ནི་པདྨ་ཁ་འབྱེད་པས་སོ། །བུད་མེད་ཐམས་ཅད་དབང་དུ་བྱ་བ་ལ་ནི་པདྨ་ཆེན་པོའི་འདོད་ཆགས་ཀྱིས་སོ། །སྐྱེས་པ་ཐམས་ཅད་དབང་དུ་བྱ་བ་ལ་ནི་པདྨ་ཆེན་པོའི་དབང་ ཕྱུག་གིས་སོ། །རྨི་ལམ་གདབ་པ་ལ་ནི་པདྨ་ཆེན་པོ་དམར་པོས་སོ། །བཅོམ་ལྡན་འདས་ཀྱིས་མཆོག་ཐོབ་པར་བྱ་བ་ལ་ནི་རྡོ་རྗེ་གསང་བའི་པདྨ་རྨོངས་པ་མེད་པས་སོ། །བདེ་བ་ཆེན་པོ་པདྨ་གསང་བ་ལས་བདེ་བ་ཆེན་པོ་པདྨའི་རིགས་ཀྱི་ཆོ་ག་རྒྱས་པའོ།། །།དེ་ནས་བཅོམ་ ལྡན་འདས་ཁམས་གསུམ་པ་ཐམས་ཅད་ཀྱི་བདག་པོ་དབང་ཕྱུག་དེ་བཞིན་གཤེགས་པས་བསམ་པ་ཐམས་ཅད་ཡོངས་སུ་རྫོགས་པའི་རིན་པོ་ཆེའི་དབང་བསྐུར་བའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རང་གི་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་ བ་ཆེན་པོ་རབ་གྲུབ་དང་། ཆགས་པ་ཆེན་པོ་རྣམ་དག་ཕྱིར། །ནོར་བུ་ཆེན་པོའི་རིགས་མཆོག་ནི། །མགྲིན་འབྱོར་ཕྱིར་ནི་སྐྱེད་པར་མཛོད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དམ་ཚིག་རབ་ཏུ་བཞག་པ་ཞེས་བྱ་བའི་རྣམ་པར་ གནོན་པར་མཛད་ནས་བདེ་བ་ཆེན་པོའི་རྡོ་རྗེ་རིན་པོ་ཆེ་ཞེས་བྱ་བའི་རིག་སྔགས་འདི་གསུངས་སོ། །ཨོྃ་ལི་ཏི་དྷ་བྷཎྚ་ཊ་ཏེ་ཏྲཱཾ། དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་ཀྱི་དབང་བསྐུར་བའི་བདེ་བ་ཆེན་པོའི་རྡོ་རྗེ་ལས་ནོར་བུ་རིན་པོ་ཆེ་རབ་ཏུ་ཕྱུང་ནས་ཕྱག་གཡོན་པ་ལ་
- 184a
རབ་ཏུ་གནས་སོ། །ནོར་བུ་རིན་པོ་ཆེ་དག་པ་དེ་ཡང་མ་རྒད་རྙོག་པ་མེད་པའི་མདོག་ཅན་རྡོ་རྗེ་རིན་པོ་ཆེ་རང་གི་འོད་ཟེར་གྱིས་དབང་བསྐུར་བ་ཅན་ནོར་བུ་རིན་པོ་ཆེའི་མདའ་ལ་སོགས་པའི་མཚན་མ་ཡོངས་སུ་བསྣམས་པ། བཅོམ་ལྡན་འདས་ཀྱི་དཀྱིལ་འཁོར་ཆེན་པོའི་ཚུལ་གྱིས་ ཞུགས་སོ། །དེ་ནས་དཀྱིལ་འཁོར་བྲི་བ་ནི། །དཀྱིལ་འཁོར་ཐམས་ཅད་ཐིག་གདབ་བྱ། །རྡོ་རྗེ་རིན་ཆེན་བདག་པོ་བཞག །ནོར་བུའི་རིགས་ནི་ཆེན་པོ་བྲི། །རྡོ་རྗེ་རིན་ཆེན་གྱི་ཕྱག་རྒྱས་ཞུགས་ཏེ། དེ་བཞིན་དུ་མཛུབ་མོ་གཉིས་ཀྱི་རྡོ་རྗེ་ལྕགས་ཀྱུས་དགུག་པར་བྱའོ། །ཨོྃ་མ་ཧཱ་སུ་ཁ་བཛྲ་ བི་བྷཱུ་ཏེ་ར་ཡ་བྷ་ག་བཱ་ན་ཏྃ་ཨཱ་ཀརྵ་ཡ་གི་ར་བཾ་སརྦ་ཏ་ཐཱ་ག་ཏ་ཨ་གཾ་སཾ་ཏྲ་ས་མ་བེ་ན་ནཱ་མ་བྷེ་ར་མ་ཏྲ་བྷེ། །ཏྲྃ་པ་ཌ་ཌ་སྭཱ་ཧཱ། །དེ་ནས་བཅོམ་ལྡན་འདས་ནམ་མཁའི་སྙིང་པོའི་ནོར་བུ་ཐམས་ཅད་དང་བཅས་པ་བྱོན་པ་ཡིན་ནོ། །སྤྱི་བོ་ནས་སྤུ་ལྡང་བའི་མཚན་མ་འབྱུང་བར་འགྱུར་རོ། །བཅོམ་ལྡན་ འདས་ཀྱིས་བདག་ལ་དབང་བསྐུར་བ་ལ་ནི་ཞེས་ཤེས་པར་བྱའོ། །དེ་ནས་སློབ་མ་རྣམས་གཞུག་པར་བྱ་སྟེ། ཆོ་ག་རྒྱས་པ་ཐམས་ཅད་དེ་བཞིན་དུ་བྱའོ། །དེ་ནས་མ་བསྒྲུབས་པའི་ལས་རྣམས་ལན་ཅིག་བཟླས་པས་འགྲུབ་པར་འགྱུར་རོ། །དབང་བསྐུར་བ་ཐམས་ཅད་ཐོབ་པ་ལ་ནི་ རྡོ་རྗེ་རིན་པོ་ཆེའི་མྱུ་གུས་སོ། །དོན་ཐམས་ཅད་ཐོབ་པ་ལ་ནི་རྡོ་རྗེ་རིན་ཆེན་གྱི་རྒྱལ་མཚན་གྱི་རྩེ་མོས་སོ། །བསམ་པ་ཐམས་ཅད་ཡོངས་སུ་རྫོགས་པར་བྱ་བ་ལ་ནི་རྡོ་རྗེ་ནོར་བུ་ཆེན་པོའི་མཚན་མའི་ཕྱག་རྒྱས་སོ། །གཏེར་ཆེན་པོ་ཐོབ་པར་བྱ་བ་ལ་ནི་རྡོ་རྗེ་རིན་ཆེན་གྱིས་འོག་གི་ཕྱག་རྒྱས་སོ། ། རྡོ་རྗེའི་དབང་བསྐུར་བའི་ཕྱག་རྒྱ་ཐོབ་པར་བྱ་བ་ལ་ནི་རྡོ་རྗེ་རིན་ཆེན་ཆེན་པོའི་ས་འོག་གི་ཕྱག་རྒྱས་སོ། །རྡོ་རྗེ་དབང་བསྐུར་བ་ཐོབ་པ་ལ་ནི་རྡོ་རྗེ་ཆེན་པོའི་ཕྲེང་བས་སོ། །བྱང་ཆུབ་སེམས་དཔའ་ཆེན་པོའི་དབང་བསྐུར་བ་ཐོབ་པ་ལ་ནི་རྡོ་རྗེ་རིན་པོ་ཆེ་ཆེན་པོའི་ཕྲེང་བས་སོ། །དེ་བཞིན་གཤེགས་ པའི་དབང་བསྐུར་བ་ཐོབ་པ་ལ་ནི་རྡོ་རྗེ་རིན་ཆེན་གྱི་དབང་བསྐུར་བ་དམ་པའི་ཕྲེང་བས་སོ། །རྡོ་རྗེ་འཛིན་པ་ཆེན་པོར་དབང་བསྐུར་བ་ཐོབ་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་རྡོ་རྗེ་རིན་ཆེན་གྱི་ཅོད་པན་གྱི་ཕྲེང་བས་སོ། །བདེ་བ་ཆེན་པོའི་རྡོ་རྗེ་གསང་བ་ལས་བདེ་བ་དང་
- 184b
ཡིད་བདེ་བ་ཐམས་ཅད་ཀྱི་ནོར་བུའི་རིགས་ཀྱི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རིགས་ཐམས་ཅད་བསྡུས་པའི་རྡོ་རྗེ་བྱིན་གྱིས་བརླབས་པའི་ཡེ་ཤེས་ཐོབ་པས་སེམས་ཅན་ཐམས་ཅད་གཞུག་པའི་འཁོར་ལོ་རྡོ་རྗེའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ ཞུགས་ཏེ། ཐོག་མ་ཐ་མ་མེད་པའི་བཅོམ་ལྡན་འདས་རྡོ་རྗེ་སེམས་དཔའ་ལ་གསོལ་བ་བཏབ་བོ། །བདེ་བ་ཆེན་པོ་རབ་གྲུབ་པ། །ཆགས་པ་ཆེན་པོ་རྣམ་དག་ཕྱིར། །བདེ་བ་ཆེན་པོའི་དོན་གྱི་ཕྱིར། །འགྲོ་རྣམས་ཅི་བདེ་གཞུག་ཏུ་གསོལ། །དེ་ནས་བཅོམ་ལྡན་འདས་ཐམས་ཅད་ལས་ རྣམ་པར་རྒྱལ་བའི་འགྲོ་བ་ཀུན་འདུལ་བ། དམ་ཚིག་ཐམས་ཅད་དང་དངོས་གྲུབ་ཐམས་ཅད་སྩོལ་བ། རྡོ་རྗེ་འཆང་ཆེན་པོ་སྟོན་པ་པོ་སྒྲུབ་པ་པོ་སྟོབས་དང་ཕ་རོལ་གནོན་པ་ཐོགས་པ་མེད་པ། ཐམས་ཅད་ལ་རྗེས་སུ་སྟོན་པས་དོན་ཡོད་པར་གྲུབ་པ་དམ་ཚིག་རྡོ་རྗེ་འཛིན་པ་ཞེས་བྱ་བའི་ རྣམ་པར་གནོན་པ་མཛད་ནས་བདེ་བ་ཆེན་པོ་དངོས་གྲུབ་ཐམས་ཅད་ཀྱི་དམ་ཚིག་ཅེས་བྱ་བའི་དོན་ཡོད་པ་མཚུངས་པ་མེད་པ་ཐམས་ཅད་ཀྱི་སྙིང་པོ་འདི་གསུངས་སོ། །ཧོཿཨཱཿཧཱུྃ་ཧྲཱིཿཏྲཱྃ། དེ་ནས་འདི་གསུངས་པ་ཙམ་གྱིས་དེ་བཞིན་གཤེགས་པ་ཐམས་ཅད་ལ་སོགས་པ་འཇིག་རྟེན་པ་ དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་དཀྱིལ་འཁོར་ཆེན་པོ་དེར་ཡང་དག་པར་གནས་ཏེ། དཀྱིལ་འཁོར་གཅིག་ཉིད་དུ་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་སེམས་ཅན་ཐམས་ཅད་རྗེས་སུ་གཞུག་བ་བདེ་བ་ཆེན་པོའི་རྡོ་རྗེ་དམ་ཚིག་གི་ གསང་བ་གསུངས་པ། དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཀུན་དུ་བྲི། །དཀྱིལ་འཁོར་ཆེན་པོ་དང་པོ་ནི། །དེ་ཡི་དབུས་སུ་བརྟག་པར་བྱ། །དེ་ཡི་ལོགས་སུ་རིགས་རྣམས་ཀྱི། །དཀྱིལ་འཁོར་བཞི་པོ་བྲི་བར་བྱ། །ཕྱི་ཡི་མཚམས་ཀྱི་ མཐའ་རུ་ནི། །ཕྱི་རོལ་དཀྱིལ་འཁོར་ཚོགས་རྣམས་བྲི། །སྒོ་རྣམས་ཀུན་ཏུ་འཇུག་པར་ནི། །རང་གི་ཕྱག་རྒྱར་རབ་ཏུ་གནས། །དཀྱིལ་འཁོར་དམ་པ་ལྔ་སྡུད་ཅིང་། །རྡོ་རྗེ་ཤུགས་ཀྱིས་འཇུག་པར་བྱ། །ཆོ་ག་རྒྱས་པ་ཐམས་ཅད་དང་། དངོས་གྲུབ་ཐམས་ཅད་དང་།
- 185a
ལས་ཐམས་ཅད་ཀྱང་དེ་བཞིན་ནོ། །རིགས་བསྡུས་པའི་ཆོ་ག་རྒྱས་པའོ།། །།དེ་ནས་ལྷ་ལ་སོགས་པ་དམ་ཚིག་སེམས་དཔའ་ཐམས་ཅད་བཅོམ་ལྡན་འདས་ལས་རང་རང་གི་རྗེས་སུ་གནང་བ་མནོས་ནས་སེམས་ཅན་ཐམས་ཅད་ལ་བདེ་བའི་དོན་ཡོད་པ་བཅོམ་ ལྡན་འདས་རྡོ་རྗེ་འཆང་ཆེན་པོའི་ཞབས་ལ་ཕྱག་བྱས་ནས། རང་རང་གི་གསང་བའི་སྙིང་པོ་འདི་རྣམས་ཕུལ་ལོ། །དེ་ནས་འཇིག་རྟེན་གསུམ་པོས་གསོལ་བ་ནི། ཨོྃ་བྷྲཱུྃ་ཏྲཱྃ། དེ་ནས་དཀྱིལ་འཁོར་བྲི་བ་ནི། །ཟུར་བཞི་པ་ལ་སྒོ་བཞི་པ། །ཕྱི་ཡི་དཀྱིལ་འཁོར་མཆོག་ཡིན་ནོ། །དེ་ཡི་ དབུས་སུ་དངོས་གྲུབ་ཕྱིར། །གཞུ་ཡི་སེ་རལ་ཁར་ལྡན་ཞིང་། །མདའ་དང་ཙ་ཤ་ག་ཐོགས་བྲི། །སྦྲང་རྩིར་བྱེད་དང་རྒྱལ་བར་བྱེད། །བསྒྲུབ་པ་ཐམས་ཅད་སྒྲུབ་པ་པོ། །རྩེ་གསུམ་མཚན་མའི་ཕྱག་རྒྱ་ཡིས། །པུས་མོ་ལྷང་བཙུགས་བྱས་ཏེ། །ཞུགས་ནས་དམ་ཚིག་བཅིངས་ ནས་ནི། །ཡང་དག་དགུག་པ་ཉིད་དུ་བྱ། །ཨོྃ་བྷཱུར་བྷུ་བ་སྭཱ་ཧཱ། །ཉི་ཤུ་རྩ་གཅིག་བཟླས་པ་ཡིས། །ཐམས་ཅད་ཀུན་གྱིས་ཡོངས་བསྐོར་བ། །དངོས་གྲུབ་ཀུན་དོན་འོངས་པ་ལ། །ཅི་ལྟར་རྙེད་པའི་གཏོར་མ་སྦྱིན། །སློབ་དཔོན་གྱིས་ནི་འཇུག་པ་ཡིས། །སློབ་མ་ཐམས་ ཅད་གཞུག་པར་བྱ། །དམ་ཚིག་མཆོག་གི་དེ་ཉིད་དང་། །གསང་བའི་དེ་ཉིད་བརྗོད་པར་བྱ། །གལ་ཏེ་མ་བརྟགས་ལ་སྨྲས་དང་། །འོན་ཏེ་ཅི་སྐད་བཤད་པའི་ཆོས། །འདིར་ནི་ཀུན་དུ་མ་སྤྱད་ན། །རྩེ་གསུམ་གྱིས་ནི་ཁྱོད་སྙིང་འཇོམས། །སྙིང་སྟོབས་རྡུལ་དང་མུན་པ་དང་། ། ཚངས་པ་ཁྱབ་འཇུག་དབང་ཕྱུག་ཆེ། །མིང་པོ་གསུམ་པོ་འདི་དག་སྟེ། །ནམ་ཡང་བརྙས་པར་མི་བྱའོ། །གང་ཞིག་འདི་དག་ལ་བརྙས་པས། །ཡང་དང་ཡང་དུ་རབ་ཞུགས་ནས། །དཀྱིལ་འཁོར་མཆོད་པ་བྱེད་པ་དེ། །དངོས་གྲུབ་ཐམས་ཅད་ཐོབ་པ་ནི། །ཕྱག་རྒྱ་དག་ཀྱང་ བསྟན་བྱས་ནས། །དེ་ཡིས་གར་གྱི་མཆོད་པ་བྱ། །འདོད་པའི་ཡོན་ཏན་ལྔ་པོ་ཡིས། །རྟག་ཏུ་དཀྱིལ་འཁོར་མཆོད་པར་བྱ། །དེ་ནས་གསང་བའི་ལྷ་མོ་རྣམས་ཀྱིས་རང་གི་ཕྱག་རྒྱ་ཕུལ་ལོ། །ཧྲཱིཿཧཱུྃ་ཤྲཱི་བྷྱོ། དཀྱིལ་འཁོར་ཐམས་ཅད་བྱ་བ་ནི། །གྲུ་བཞི་པ་ལ་སྒོ་བཞི་པ ། །
- 185b
ཐིག་བཞི་པ་དང་ཡང་དག་ལྡན། །ཀ་བ་ཆེན་པོ་བཞི་དང་བཅས། །གྲུ་ཆད་བཞི་ཡིས་རྣམ་པར་མཛེས། །དེ་ཡི་དབུས་སུ་དེ་བཞིན་དུ། །དཀྱིལ་འཁོར་བཞི་པོ་བྲི་བར་བྱ། །སྒོ་རུ་མངོན་ཕྱོགས་བཞི་པོ་ནི། །སྙིང་པོ་དང་བཅས་གཞག་པར་བྱ། །དགའ་བོ་ལག་ན་མཚོན་ཆ་ཐོགས། ། དངོས་གྲུབ་བྱ་བ་བསྙེམས་དང་བཅས། །དེ་ནས་དང་པོ་དཀྱིལ་འཁོར་དུ། །དེ་བཞིན་ཀུན་ནས་འཇུག་པར་བྱ། །སྲིང་མོ་རང་གི་ཕྱག་རྒྱ་ཡིས། །གོ་རིམས་བཞིན་དུ་འཇུག་པར་བྱའོ། །ཞུགས་ནས་བདུག་པ་ལ་སོགས་ཀྱིས། །ཆོ་ག་བཞིན་དུ་མཆོད་བྱས་ནས། །གསང་བ་དེ་ཉིད་ རབ་གྲུབ་པས། །དགུག་པ་ཡང་དག་བྱ་བ་ཡིན། །ཨོྃ་ཀཱ་ལི་མ་ནི་ར་དེ་པྲོ་ཏ་ལ་མེ་བྷཱུ་རཱ་ཀཱ་སི་པ་ར་སྟཱ་མ་ཡ་ཧེ་བ་ཧོ་བ། བར་ཧེ་བི་དྱེ་ཏཱི་མ་ཡ་སྭཱ་ཧཱ། སིད་དྷི་ཀེ་སིད་དྷི་སྟཱ་མ་ཨ་ཧེ། ཕྱག་རྒྱ་འདི་རྣམས་ཀྱིས་སོ། །ཧྲཱིཿཧཱུྃ་ཤྲཱི་བྷྱོ། །དེ་ནས་ཐམས་ཅད་དབབ་པར་འགྱུར་རོ། །བབས་ ནས་གཞུག་པར་བྱའོ། །དེ་ནས་དེ་བཞིན་དུ་ཕྱག་རྒྱ་བཅིང་བ་བསླབས་ལ། མནའ་བསྒགས་ནས་གསང་བ་བརྗོད་པར་བྱའོ། །སེམས་ཅན་དོན་ལ་གང་བཞུགས་པ། །གང་དུ་དཀྱིལ་འཁོར་སྟོན་པ་རྣམས། །གལ་ཏེ་གསང་བ་མི་སྲུང་ན། །ཁྱོད་ཀྱིས་དེ་དག་གསད་པ་ཡིན། ། འདོད་ཆགས་ཞེ་སྡང་གཏི་མུག་དང་། །དེ་བཞིན་ཟས་དང་སྐོམ་དང་རོ། །ཆོས་ཀྱིས་འཇིག་རྟེན་བདེ་བ་དང་། །ཆོས་མིན་པས་ནི་སྡུག་བསྔལ་སྟེར། །ཕྱག་རྒྱ་གར་གྱི་མཆོད་པ་ཡིས། །ཅི་འདོད་པར་ནི་མཆོད་པར་བྱ། །ཅི་སྙེད་པ་དང་ཅི་འདོད་བཞིན། །ཡུལ་རྣམས་ ལ་ནི་བརྟེན་པར་བྱ། །དེ་ནས་ལྷ་མ་ཡིན་ཐམས་ཅད་ཀྱིས་རང་གི་སྙིང་པོ་ཕུལ་ལོ། །ཨོྃ་སརྦ་མ་ཧཱ་ཙ་ཀྲོ་པྲ་བརྟ་ཡ་ད་ཪྴ་ཡ་བྃ་ཧཱུྃ་ཕཊ། ཟུར་བཞི་པ་ཡི་དཀྱིལ་འཁོར་ནི། །ཁྲུ་གང་ཙམ་དུ་བརྐོས་བྱས་ནས། །གྱེན་དུ་ཁ་བལྟས་སྒོ་བྲི་བྱ། །བདེ་མཆོག་ལ་སོགས་བྲི་བར་བྱ། །འཁོར་ ལོ་རབ་ཏུ་ཞུགས་བྱས་ལ། །ཡང་དག་དགུག་པས་དགུག་པར་བྱ། །མེ་ཏོག་ལ་སོགས་མཆོད་པ་དང་། །ཤ་ལ་སོགས་པས་གཏོར་མ་བྱ། །ཨོྃ་བི་ལྕུ་ཙཀྲ་ཨཱ་ན་ཡ་ཤ་མ་བར་ཙི་མ་ཙི་ཏ་ཏྲཾ་སུ་ར་ཨ་དྷི་པན་ཧེ་ཤོ་ཧྃ། སརྦ་མཱ་ཡཱ་གྷྲྀ་ཏཾ་དྷ་པ་མེ་སིད་དྷྱ་ཧཱ་ཧཱ་སྭཱ་ཧཱ། དེ་ནས་ཡིད་
- 186a
ཀྱིས་འདོད་པའི་སྒྱུ་མ་ཐམས་ཅད་གྲུབ་པ་ཡིན་ནོ། །སློབ་མ་གཞུག་པ་ཡང་དེ་བཞིན་དུ་བྱའོ། །དེ་ནས་ཀླུའི་རིགས་བཞིས་སྙིང་པོ་ཕུལ་ལོ། །ཕུཿ། དེ་ནས་དེ་ཡི་དཀྱིལ་འཁོར་ནི། །ཟུར་བཞི་པ་ལ་སྒོ་བཞི་པ། །སྦྲུལ་གྱི་ཐིག་གིས་ཀུན་ཏུ་བྲི། །ཀླུ་ཡི་གདེངས་ཀའི་རྩེ་ མོས་འཁྱུད། །མཚམས་ཀྱི་ཆར་ནི་མཇུག་རྩེ་མདུད། །དེ་ཡི་དབུས་སུ་ས་འཛིན་པ། །ཀླུ་ཡི་རྒྱལ་པོ་ཤེ་ཥ་བྲི། །ཤེས་རབ་ཅན་གྱི་ཀླུ་ཆེན་གྱི། །རིགས་རྣམས་ཐམས་ཅད་བྲི་བར་བྱ། །དེ་ནས་ཏིང་འཛིན་ཤུགས་ཀྱིས་ནི། །ཁྲོས་ཤིང་རྒྱུག་པས་འཇུག་པར་བྱ། །དཀྱིལ་ འཁོར་དེར་ནི་རབ་ཞུགས་ནས། །གདེངས་ཀའི་ཕྱག་རྒྱས་དགུག་པར་བྱ། །ཨོྃ་ཧྲཱིཿཨ་ནཱི་ལ་ཛ་བ་བེ་ག་པྲྀ་ཐྭཱི་བྷིནད་དྷར་ཤེ་ཥ་ཎ། ཨཱ་ཡ་ཧྲཱིཿནུ་ཡ་ནཱ་ག་ཀུ་ལ་ཨ་ན་ཡ་ཧཱུྃ་ཕུཿ། ས་མ་ཡ་པྲ་བེ་ཤ་ཡ་ཕུཿ། སརྦཾ་སཱ་དྷ་ཡ་ཕུཿཕུཿཕུཿཕུཿ། དེ་ནས་ཀླུ་ཐམས་ཅད་ཕུཿཞེས་བྱ་བ་ཟློས་ ཤིང་དཀྱིལ་འཁོར་དུ་ཞུགས་ནས་འབབས་པར་འགྱུར་ཞིང་འཐོབ་བོ། །དེ་ནས་སློབ་དཔོན་གྱིས་རི་མོའི་ཕྱག་རྒྱས་དུག་མེད་པར་བྱའོ། །དེ་ནས་བརྩམས་ཏེ་ཐམས་ཅད་ཟོས་ན་ཡང་བདུད་རྩི་བཞིན་དུ་འཇུ་བར་བྱེད་དོ། །འདི་རྣམས་དང་ལྷན་ཅིག་ཏུ་གར་བྱེད་པ་དང་། །དུག་ཐམས་ ཅད་སྲེག་པ་དང་འཇིག་པ་དང་ཟ་བ་ནུས་པར་འགྱུར་རོ། །དེ་ནས་ཅི་འདོད་པའི་དམ་ཚིག་སྦྱིན་པར་བྱ་སྟེ། འདོད་ཆགས་ཞེ་སྡང་གཏི་མུག་སྟེ། །འདི་དག་འཇིག་རྟེན་དུག་གསུམ་མོ། །གལ་ཏེ་བདེན་ལས་འདས་གྱུར་ན། །འཚོ་བའི་འཇིག་རྟེན་འདི་རྟག་གནས། །གལ་ཏེ་ དངོས་གྲུབ་ཐོབ་འདོད་ན། །གློག་ལ་བརྙས་པར་མི་བྱའོ། །སེར་བ་བཟློག་པར་མི་བྱའོ། །སྦྲུལ་ནི་གང་ཡང་གསད་མི་བྱ། །བདེ་བ་ཆེན་པོ་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོ་ལས་བདེ་བ་ཆེན་པོའི་དམ་ཚིག་ཆེན་པོའི་རྡོ་རྗེ་གསང་བ་ལ་སོགས་པའི་ཆོ་ག་རྒྱས་པའོ། ། དུམ་བུ་གཉིས་པ་རྩ་བའི་རྒྱུད་ལས་དཀྱིལ་འཁོར་བཅུའི་རྟོག་པའོ།། །།དེ་ནས་རྡོ་རྗེ་ཆེན་པོ་ཡི། །རི་རབ་རི་ཡི་རྩེ་མོ་ནི། །རྡོ་རྗེ་རིན་ཆེན་འོད་གསལ་བས། །དྲི་མེད་གཟི་བརྗིད་མཛེས་པ་ལ། །ཟུར་བཞི་པ་ལ་སྒོ་བཞི་པ། །སྒོ་ཁྱུད་ཀྱིས་ནི་རྣམ་པར་མཛེས། །
- 186b
ཁ་ཁྱེར་རྣམས་ལ་གནས་པ་ཡི། །རྡོ་རྗེ་ལྷ་མོའི་ཚོགས་ཀྱིས་མཆོད། །ཟླ་བ་ཕྱེད་ལ་གནས་པ་ཡི། །རྡོ་རྗེ་རིན་ཆེན་རྣམས་ཀྱིས་མཛེས། །རླུང་གིས་བསྐྱོད་པའི་དར་དཔྱངས་ཀྱི། །བ་དན་དྲིལ་བུའི་སྒྲ་སྒྲོགས་པ། །དྲ་བ་མེ་ལོང་མེ་ཏོག་གི། །ཕྲེང་བ་ཆེན་པོ་བཏགས་པས་བརྒྱན། ། བདེ་བ་ཆེན་པོ་རྡོ་རྗེ་ཆེ། །རྡོ་རྗེ་ཀུན་གྱིས་མངོན་འདུས་བྱས། །རྡོ་རྗེ་སེམས་དཔའ་གནས་ཆེན་པོ། །སངས་རྒྱས་ཀུན་གྱིས་ངེས་བསྟན་པ། །བྱང་ཆུབ་སེམས་དཔའི་གནས་པ་མཆོག །རྡོ་རྗེ་འཆང་བ་ཀུན་གྱི་གནས། །བདེ་བ་ཆེན་པོ་རྡོ་རྗེ་ཆེ། །ནོར་བུ་ཆེ་མཆོག་ཅེས་བྱ་ བ། །རྡོ་རྗེ་ཆེན་པོའི་ཁང་པ་ན། །བདེ་བ་ཆེན་པོ་བཞུགས་པ་ཡིན། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །སེམས་ཅན་ཀུན་གྱི་སེམས་གང་ཡིན། ། བརྟན་ཕྱིར་སེམས་དཔར་བཤད་པ་ཡིན། །མཉམ་པར་གཞག་པས་ཏིང་འཛིན་ཏེ། །ངེས་པའི་ཕྱིར་ནི་རྡོ་རྗེར་འགྱུར། །སེམས་དཔའི་བྱིན་རླབས་སྦྱོར་བ་ཡིས། །སླར་ཡང་རྡོ་རྗེ་སེམས་དཔར་འགྱུར། །དེ་ཉིད་རྟག་པ་བཅོམ་ལྡན་འདས། །བྱང་ཆུབ་སྤྱོད་པའི་རྗེས་ འགྲོ་ཡིན། །རང་སེམས་སོ་སོར་རྟོགས་སོགས་ན། །སངས་རྒྱས་བྱང་ཆུབ་ཆོ་ག་བཞིན། །བདུད་ནི་སངས་རྒྱས་རྡོ་རྗེ་ཆེ། །རྡོ་རྗེ་འཆང་ཆེན་དེ་ཉིད་ཡིན། །དེ་ཉིད་དེ་བཞིན་གཤེགས་པའི་རིགས། །དེ་ཉིད་རྡོ་རྗེ་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ ནོར་བུའི་རིགས་དམ་པ། །དེ་ཉིད་ཆགས་དང་ཆགས་བྲལ་བའི། །འདོད་དང་ཐར་པ་དེ་ཉིད་ཡིན། །དུས་གསུམ་སྲིད་གསུམ་མཆོག་གསུམ་དང་། །འཇིག་རྟེན་གསུམ་དང་ཁམས་གསུམ་པ། །མི་གཡོ་ཐམས་ཅད་མཆོག་དེ་ཉིད། །བརྟན་ཞིང་སྙིང་པོ་ནོར་བུ་ཆེ། ། རྒྱུ་བ་སེམས་ཀྱི་འདུ་བྱེད་ཐབས། །ཐམས་ཅད་བྱེད་པ་ཐམས་ཅད་ཉིད། །དང་པོའི་སེམས་དཔའ་སེམས་དཔའ་ཆེ། །བྱང་ཆུབ་སེམས་དཔའ་བདེ་རབ་སོགས། །སེམས་དཔའི་སྐྱིལ་མོ་ཀྲུང་བཅས་ནས། །པདྨའི་ལྟེ་བར་ཞུགས་པ་ཡིན། །བཙུན་མོའི་ཚོགས་བཅས་
- 187a
སྣ་ཚོགས་པའི། །རྡོ་རྗེ་ལྷ་མོ་རྣམས་ཀྱིས་བསྐོར། །བདེ་བ་ཆེན་པོ་རབ་གྲུབ་དང་། །འདོད་ཆགས་ཆེན་པོ་རྣམ་དག་ཕྱིར། །མ་ལུས་གདུལ་བྱའི་དོན་དུ་ནི། །དངོས་གྲུབ་ཐམས་ཅད་རབ་གྲུབ་ཕྱིར། །བདག་ཉིད་ལ་སོགས་སེམས་དཔའ་ཆེ། །དངོས་གྲུབ་ ཐམས་ཅད་རབ་གྲུབ་ཕྱིར། །དམ་ཚིག་མཆོག་གི་དམ་ཚིག་རྣམས། །རྒྱལ་བས་ཀྱང་ནི་སྲུང་བར་མཛད། །བསྙེམས་བཅས་རྡོ་རྗེ་གསོར་བ་དང་། །རྡོ་རྗེ་བསྙེམས་པ་ཡང་དག་འཆང་། །ཕྱག་རྒྱ་ཐམས་ཅད་རྣམ་དག་དང་། །རྡོ་རྗེ་སེམས་དཔའ་མཆོག་གྲུབ་ཕྱིར། །བདེ་བ་ ཆེན་པོ་རྡོ་རྗེ་ཆེ། །དངོས་གྲུབ་ཐམས་ཅད་སྒྲུབ་པ་ལ། །ཡེ་ཤེས་ཕྱག་རྒྱར་ཡང་དག་ལྡན། །སྙིང་པོ་ཆེན་པོ་དམ་པ་ཡིན། །གང་གིས་བསོད་ནམས་མི་ལྡན་དང་། །དེ་བཞིན་དཀྱིལ་འཁོར་མ་ལུས་ཞུགས། །དོན་ཡོད་ཐོགས་མེད་ཉིད་མཆོག་གི། །དངོས་གྲུབ་ཐམས་ཅད་རྙེད་ མི་དཀའ། །བདེ་བ་ཆེན་པོ་རྡོ་རྗེ་ཆེ། །གསང་བའི་མཆོག་སྟེ་དམ་ཚིག་བརྟན། །དངོས་གྲུབ་ཐམས་ཅད་སྒྲུབ་པ་ཡིན། །རྟོག་པ་ཐམས་ཅད་མྱུར་འགྲུབ་བྱེད། །ཐོག་མཐར་མེད་ཅིང་དང་པོར་བྱུང་། །བསོད་ནམས་ཐམས་ཅད་ཆེར་མཐོ་བ། །གཟི་ཅན་རྣམས་ཀྱི་བདེ་མཆོག་ དང་། །འདོད་ཆགས་ཆེན་པོ་རྣམ་དག་ཕྱིར། །རྗེས་སུ་ཆགས་པ་སྒོམ་པ་ཞེས། །ཇི་བཞིན་ཡེ་ཤེས་རབ་འཇུག་པ། །ཉེ་བའི་སྙིང་པོ་བཅས་སྙིང་པོ། །བསྐལ་པ་དང་པོར་བཅོམ་ལྡན་གསུངས། །ཧཱུྃ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཐམས་ཅད་ སྲས་དང་བཅས། །ཉེ་བར་འདུས་པ་མཛད་ནས་ནི། །འགྲོ་བ་ཐམས་ཅད་སྐྱེད་པར་མཛད། །སྣ་ཚོགས་འགྲོ་བ་ཀུན་བསྐྱེད་ནས། །གཙོ་བོས་དངོས་གྲུབ་དྲིས་གྱུར་པས། །ཅི་ལྟར་སྐད་ཅིག་གིས་འདིར་གྲུབ། །སེམས་དཔའ་ཆེན་པོ་མྱུར་དུ་སྨྲོས། །དེ་ནས་དཀྱིལ་འཁོར་ དང་པོ་ནི། །ཐོག་མར་དཀྱིལ་འཁོར་བྱིན་བརླབས་ནས། །རྡོ་རྗེ་ཀུན་མཆོག་དམ་ཚིག་ནི། །ཆོ་ག་བཞིན་དུ་བསྒྲུབས་ནས་ནི། །དེ་ནས་ཕན་ཆད་སེམས་ཅན་འབྱུང་། །ཅི་བཞིན་ལས་ཀྱི་རྗེས་འགྲོ་བ། །རྟག་པར་སྡིག་པ་ཀུན་ལ་སྤྱོད། །ངན་ཞེན་དང་ནི་ལེ་ལོ་ཅན། །དེ་ནི་
- 187b
སྐྱེ་བོ་གསུམ་གཟིགས་ནས། །འཇིག་རྟེན་གཙོ་བོ་རྣམས་ཀྱིས་དྲིས། །བཅོམ་ལྡན་འོ་ན་ཅི་ལྟར་ནི། །བྱིས་པ་དགེ་བ་ཀུན་དུ་སྐྱེད། །དེ་རྣམས་ཀྱི་ནི་ཚིག་གསན་ནས། །ཚིག་ནི་འདི་སྐད་གསུངས་པ་ཡིན། །རྡོ་རྗེ་འཛིན་ཀུན་བྱེད་པ་པོས། །ལས་ཀྱིས་འཆི་བ་ལྟོས་གྱུར་པ། །དེ་ཡི་ ཚིག་དེ་ཐོས་ནས་ནི། །རྡོ་རྗེ་སེམས་དཔའ་རྡོ་རྗེ་འཛིན། །སྲས་བཅས་སངས་རྒྱས་ཐམས་ཅད་ཀྱིས། །ཐུགས་རྗེ་ཆེན་པོས་འདི་སྐད་གསུངས། །བདེ་བ་ཆེན་པོ་རབ་གྲུབ་དང་། །ཤིན་ཏུ་ཆགས་པ་རྣམ་དག་ཕྱིར། །ཀུན་མཆོག་ཆོ་ག་རྒྱས་པ་ཡི། །སྙིང་པོ་དེ་ནི་བཤད་དུ་གསོལ། ། དེ་ནས་སྟོན་པ་རྡོ་རྗེ་འཛིན། །དངོས་གྲུབ་ཐམས་ཅད་སྩོལ་བ་ཡིན། །རྟོག་པ་ཀུན་གྱི་བདེ་བ་ཆེ། །རྡོ་རྗེ་གསང་བ་དང་པོ་མཆོག །གཞན་ཡང་སྙིང་པོ་བསྟན་པ་དང་། །དཀྱིལ་འཁོར་ལ་སོགས་ཆོ་ག་ཆེ། །སྣ་ཚོགས་ཕྱི་མའི་རྒྱུད་དང་བཅས། །དངོས་གྲུབ་ཐམས་ཅད་རབ་གྲུབ་ བྱེད། །འཇིག་རྟེན་ཐམས་ཅད་ཁམས་ཆེན་པོ། །ཕྲ་རབ་རྡུལ་རྣམས་དང་མཉམ་པ། །སྙིང་པོ་ཆེན་པོ་འདི་ཉིད་ཀྱིས། །གྲུབ་པའི་བདེ་བ་དམ་པར་གྱུར། །དེ་ནས་བདེ་གཤེགས་དེ་རྣམས་ནི། །དེ་ཡི་ཚིག་མཆོག་གསན་གྱུར་ནས། །དང་པོའི་དཀྱིལ་འཁོར་གྲུབ་སྩོལ་བ། །དེ་ཚེ་ དེ་ལ་གསོལ་བ་བཏབ། །ཆགས་པ་དང་བྲལ་འདུལ་བའི་ཕྱིར། །ཆགས་བྲལ་བསྟན་པར་བྱ་བའམ། །འདོད་ཆགས་ཐམས་ཅད་རྣམ་དག་ཕྱིར། །ཉིད་ཀྱི་ཐུགས་ཀྱི་ཆོ་ག་གསུངས། །དེ་ནས་བཅོམ་ལྡན་འདས་ཀྱིས་རྡོ་རྗེའི་གླུ་ཆེན་པོ་གསུང་ཞིང་དཀྱིལ་འཁོར་བརྟག་པར་མཛད་དོ། ། ཐམས་ཅད་རྗེས་སུ་ཆགས་པ་བདེ་བ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ཏུ་བྱུང་བ་ཡིན། །རབ་ཏུ་དགའ་བ་འགྲོ་བ་ཀུན་གྱི་བདེ་ཆེན་པོ། །བརྟན་མཐོ་དེ་རིང་བདག་ལ་མྱུར་གྲུབ་མངོན་ཕྱོགས་མཛོད། །ཅེས་བྱ་བའི་དཀྱིལ་འཁོར་གླུ་ལེན་ཅིང་བརྟག་པར་མཛད་དོ། །དཀྱིལ་ འཁོར་ཆེན་པོའི་སྦྱོར་བ་ཡིས། །དང་པོའི་དཀྱིལ་འཁོར་བརྟག་པར་བྱ། །ཕྱག་ན་རྡོ་རྗེའི་ཐམས་ཅད་དུ། །རྡོ་རྗེ་ལྷ་མོ་ལ་སོགས་ཚོགས། །ཅི་ལྟར་ཆོ་ག་བཞིན་དུ་ནི། །བརྒྱན་པར་བྱ་སྟེ་རབ་འཇུག་བྱ། །གཡོན་དུ་བུ་མོ་རྡོ་རྗེ་འཛིན། །བསྡུས་ཏེ་རྣལ་འབྱོར་བཅང་བར་བྱ། །རྡོ་རྗེ་དང་
- 188a
བཅས་བསྙེམས་པ་ཡི། །ཕྱག་རྒྱ་མཆོག་གིས་རང་ཉིད་འཇུག །དཀྱིལ་འཁོར་དེ་རུ་ཞུགས་ནས་ཀྱང་། །ལན་གསུམ་དུ་ནི་བསྐོར་བར་བྱ། །རྡོ་རྗེ་སེམས་དཔའི་མདུན་འདུག་སྟེ། །དེ་ཉིད་གསང་བའང་བརྗོད་པར་བྱ། །ཧཱུྃ་ཧཱུྃ་མ་ཧཱ་སུ་ཁ་བཛྲ་ས་ཏྭ་ཛཿཧཱུྃ་བྃ་ཧོཿས་ མ་ཡ་སྟྭྃ་ཨ་ནུ་རཀྟོ་མེ་བྷ་བ། སུ་ཏོ་ཥྱོ་མེ་བྷ་བ། དྲི་ཌྷོ་མེ་བྷ་བ། སུ་པོ་ཥྱོ་མེ་བྷ་བ། ཨ་དྷི་ཏིཥྚ་བྷ་ག་བཱ་བ་ན་དི་ནི་དྷེ་ན་སྭཱ་ཧཱ། མ་ཧཱ་སུ་ཁ་བཛྲ་ས་སྟྭ་ས་མ་ཡ་གུ་ཧྱ་ས་མ་ཡ། སིད་དྷི་མ་མེ་པྲ་ཡཙྪ་ཨོྃཨོྃ་ཧ་ཧ་ཧ་ཧ་ཨ། དེ་ནས་རབ་ཏུ་དགའ་བས་རྡོ་རྗེ་ལྷ་མོ་དགའ་བའི་གཏམ་བྱའོ། །ཨོྃ་བཛྲ་ དྲིཥྚི་ས་མ་ཡ་ཀེ་མ་ཊ་བཛྲ་ཀི་ལི་ཀི་ལི་ཧོ། །ཧཱུྃ་སྨ་ར་བཛྲི་ཎེ་བ་ན་དྷ་ཧཱུྃ་ཧཱུྃ་ཏུཥྚ་བཛྲ་ཎྀ་ཧཱུྃ། དེ་ནས་བཅོམ་ལྡན་འདས་ཀྱི་མདུན་དུ་ཉེ་བར་འདུག་སྟེ། དེ་བཞིན་དུ་བཅོམ་ལྡན་འདས་བདག་ལ་གྲུབ་པར་མཛོད་ཅིག་ཅེས་བཅོམ་ལྡན་འདས་ལ་གསོལ་བ་བརྗོད་པར་བྱའོ། །མྱུར་དུ་ཐམས་ ཅད་རྗེས་ཆགས་པར། །ཀི་ལི་ཀི་ལས་ཐམས་ཅད་ནུས། །ཐམས་ཅད་རྗེས་སུ་ཆགས་དྲན་དང་། །རྟག་ཏུ་ལེགས་པར་མཉེས་གྱུར་བདག །ཨོྃ་མ་ཧཱ་སུ་ཁ་སིད་དྷི་བཛྲ་ས་ཏྭ་ཛཿཧཱུྃ་བྃ་ཧོཿསིད་དྷཾ་ས་མ་ཡ་སྟྭཾ་སིད་དྷི་ཧཱུྃ། དེ་ནས་བདེ་བ་ཆེན་པོ་རྡོ་རྗེའི་ཆུས་དབང་བསྐུར་ཞིང་འཐུངས་ ལ་རྡོ་རྗེ་རྩེ་ལྔ་པ་བཟུང་སྟེ། །བདག་རྡོ་རྗེ་སེམས་དཔའ་ཡིན་ནོ་ཞེས་རང་གི་མིང་བརྗོད་ལ། སྔ་མ་བཞིན་དུ་གར་གྱི་མཆོད་པས་མཆོད་པ་བྱ་སྟེ། །ཅི་ལྟར་རྙེད་པའི་ཡུལ་དང་ལྡན་པས་སློབ་མ་དང་ལྷན་ཅིག་མཆོད་པ་བྱས་ནས་འབྱུང་བར་བྱའོ། །སློབ་མ་གཞུག་པར་བྱ་ཞིང་རང་ཉིད་ཀྱང་ དེར་ཞུགས་པས་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །རྡོ་རྗེ་སློབ་དཔོན་ཐམས་ཅད་ཕྱག་རྒྱ་ཐམས་ཅད་ཀྱི་བདག་པོ་དམ་ཚིག་ཐམས་ཅད་ཤེས་པ། ཐམས་ཅད་ལ་ཚར་གཅོད་པ་དང་། །ཕན་འདོགས་ནུས་པ་དངོས་གྲུབ་ཐམས་ཅད་ཕུན་སུམ་ཚོགས་པའི་ཡེ་ཤེས་ ཀྱི་ལས་བྱེད་པས་རང་ཉིད་འཇུག་པ་ཙམ་ཉིད་ཀྱིས་སློབ་དཔོན་མ་ཡིན་པ་དང་། དཀྱིལ་འཁོར་དུ་མ་ཞུགས་པར་སྐད་ཅིག་ཉིད་ཀྱིས་བཅོམ་ལྡན་འདས་ཀྱིས་བྱིན་གྱིས་རློབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བཅོམ་ལྡན་འདས་ཉིད་ངེས་པར་རང་ཉིད་རང་གི་དམ་ཚིག་གིས་རྡོ་རྗེ་
- 188b
སློབ་དཔོན་དུ་གྱུར་ནས་འཇུག་པར་མཛད་དོ། །ལས་ཐམས་ཅད་ཀྱི་ཆོ་ག་རྒྱས་པ་ཡང་མཛད་པ་ཡིན་ནོ། །སྙིང་པོ་འདིའི་བྱིན་གྱི་རླབས་ཀྱིས་དཀྱིལ་འཁོར་དུ་མ་ཞུགས་ན་ཡང་དཀྱིལ་འཁོར་ཐམས་ཅད་དུ་ཞུགས་པ་དང་། ཐམས་ཅད་ཀྱི་སློབ་དཔོན་དུ་འགྱུར་རོ། །ལན་ཅིག་བཟླས་བརྗོད་ བྱས་པས་མི་སོད་པ་དང་། མི་ཚུགས་པ་དང་། ཐམས་ཅད་དུ་སྣ་ཚོགས་པའི་ཡི་གེ་རྣམས་ཀྱིས་མཐོང་བ་དང་། ཐོས་པ་དང་། རིག་པ་དང་། ཤེས་པ་ཡིན་ནོ། །རྡོ་རྗེ་འཆང་ཆེན་པོ་དང་བཅས་པའི་དེ་བཞིན་གཤེགས་པ་ཐམས་ཅད་མ་ལུས་པར་མཛད་ནས་དངོས་གྲུབ་ཐམས་ཅད་དེ་ལ་ སྩོལ་བ་ཡིན་ནོ། །ཡོངས་སུ་སྦྱང་བ་དང་བརྟེན་པའི་དོན་དུ་མ་ཡིན་ནོ། །བགེགས་བྱེད་པ་རྣམས་ཀྱང་སྡུག་བསྔལ་སྟེར་བར་འགྱུར་བ་མ་ཡིན་ནོ། །བཅོམ་ལྡན་འདས་བདེ་བ་ཆེན་པོ་རྡོ་རྗེ་འཆང་ཤིན་ཏུ་བརྟན་ཞིང་ཤིན་ཏུ་དགྱེས་པ་རྗེས་སུ་ཆགས་པ། ཤིན་ཏུ་རྒྱས་པ། དངོས་གྲུབ་ཐམས་ ཅད་དང་། ཕུན་སུམ་ཚོགས་པ་ཐམས་ཅད་དང་། ཡེ་ཤེས་ཐམས་ཅད་དང་། ལས་ཐམས་ཅད་གདོན་མི་ཟ་བའི་གྲུབ་པས་མྱུར་དུ་སྒྲུབ་པར་མཛད་པ་ཡིན་ནོ། །འོན་ཀྱང་གང་གིས་བྲིས་སམ། འདྲིར་བཅུག་གམ། ལན་ཅིག་བརྗོད་པའམ། འཛིན་པ་དེས་མ་བསྒྲུབས་ཤིང་ དཀྱིལ་འཁོར་དུ་མ་ཞུགས་ན་ཡང་ཚེ་འདི་ཉིད་ལ་ཅི་ལྟར་མངོན་པར་འདོད་པའི་མཆོག་གི་དངོས་གྲུབ་ཐམས་ཅད་འགྲུབ་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དོན་ཡོད་ཅིང་ཐོགས་པ་མེད་པ་དེ་བཞིན་གཤེགས་པ་ཐམས་ཅད་ཀྱི་བདག་པོའི་བདག་དང་དེ་བཞིན་གཤེགས་པ་ཐམས་ཅད་ ཀྱིས་ཀྱང་བར་ཆད་བྱེད་པར་མི་ནུས་ཏེ་ཐམས་ཅད་རྗེས་སུ་ཆགས་པ་ཉིད་ཀྱི་ཕྱིར་རོ། །སངས་རྒྱས་ཀྱི་བྱང་ཆུབ་ཀྱང་རྗེས་སུ་ཆགས་པ་ལས་བྱུང་བ་ཡིན་ནོ། །འདོད་པ་བརྟེན་པས་རྗེས་སུ་ཆགས་པ་སྟེ། དེ་མི་འདོད་པ་ཅི་ལྟར་མཆོག་གི་བདེ་བ་ཆེན་པོ་ལ་སོགས་པའི་གོ་འཕང་ཐམས་ ཅད་དུ་འགྱུར་རོ་ཞེས་བྱ་བ་ཐོགས་པ་མེད་པའི་བཅོམ་ལྡན་འདས་ཆགས་པ་ཆེན་པོའི་བདེ་བ་ཆེན་པོས་གསུངས་སོ། །གྲུབ་ན་བདེ་བ་ཆེན་པོ་ནི། །རྡོ་རྗེ་ཆགས་པས་སྐད་ཅིག་སྟེར། །སྒྲུབ་པའི་དམ་ཚིག་འདི་ཡིན་ཏེ། །འདི་ནི་ཀུན་གྱིས་འདའ་བར་དཀའ། །སྡིག་པ་ཆེན་པོ་བྱེད་
- 189a
པའམ། །དེ་བཞིན་དཀྱིལ་འཁོར་མ་མཐོང་བ། །ལན་ཅིག་བཟླས་པས་སྡིག་སྦྱངས་པས། །མཆོག་གྲུབ་པས་ནི་གྲུབ་པར་འགྱུར། །རྟོག་པར་གསུངས་པའམ་འདོད་པ་ཡིས། །གཟུགས་བརྙན་རྗེས་སུ་དྲན་བསྒོམས་ན། །སྙིང་པོ་ཡང་ན་གླེགས་བམ་དུ། ། ཐམས་ཅད་ཉིད་ཕྱིར་བདག་པོ་གྲུབ། །གང་ལ་གཟུགས་བརྙན་མེད་པ་དང་། །གླེགས་བམ་མེད་པར་འགྱུར་ན་ཡང་། །ཡི་གེ་ཧཱུྃ་ནི་ཐམས་ཅད་དུ། །བྲིས་ཏེ་བདག་སྒྲུབ་བསྒྲུབ་པར་བྱ། །ཞེས་བྱ་བ་དོན་ཡོད་ཅིང་ཐོགས་པ་མེད་པའི་དངོས་གྲུབ་ཅན་རྡོ་རྗེ་འཆང་ཆེན་པོས་གསུངས་སོ། ། དེ་ནས་རྟོག་པའི་རྒྱལ་པོ་འདིའི། །ལས་ཀུན་སྒྲུབ་པར་འདོད་པ་ན། །དཀྱིལ་འཁོར་ཐམས་ཅད་ཐིག་བཏབ་ནས། །མཚན་མའི་ཕྱག་རྒྱ་བྲི་བར་བྱ། །དང་པོའི་རྡོ་རྗེས་ཞུགས་ནས་བརྗོད་པར་བྱ་སྟེ། ཆགས་པ་ཆེ་ལས་ཐོགས་པ་ཆེ། །ཐོགས་པ་ཆེ་ལས་བདེ་བ་ཆེ། །བདེ་ བ་ཆེ་ལས་རྡོ་རྗེ་བསྟན། །རྡོ་རྗེ་ལས་ནི་ཕྱག་རྒྱ་འབྱུང་། །སྐུ་གསུང་ཐུགས་ཀྱི་རྡོ་རྗེ་ཡི། །གཟུགས་བརྙན་རབ་ཏུ་སྦྱོར་བ་ཡིས། །ཕྱག་རྒྱ་ཐམས་ཅད་བཤད་པ་སྟེ། །དམ་ཚིག་འདའ་བར་དཀའ་བའོ། །ཕྱག་རྒྱ་བཅིངས་པ་ཙམ་གྱིས་ནི། །སངས་རྒྱས་རྡོ་རྗེ་འཆང་ལ་ སོགས། །ཡང་དག་བསྡུས་པར་གྱུར་ན་ནི། །མཉམ་པའི་འཇིག་རྟེན་གྲུབ་པར་འགྱུར། །ཇི་ལྟར་རྒྱལ་པོའི་ཕྱག་རྒྱ་ཡི། །བཀའ་ནི་འདའ་བར་དཀའ་བ་སྟེ། །དེ་བཞིན་རྒྱལ་བ་ཀུན་གྱིས་ཀྱང་། །ཕྱག་རྒྱ་འདའ་བར་ནུས་པ་མིན། །སངས་རྒྱས་ཉིད་དམ་རྡོ་རྗེ་འཆང་། །དེ་ ལྟར་བསྐལ་བ་བྱེ་བ་ཡིས། །ཐོབ་མིན་ཅི་ལྟར་ཕྱག་རྒྱ་མཆོག །བསྡུས་པ་ཚེ་འདི་ཉིད་ལ་འཐོབ། །ཅི་ལྟར་གདུལ་བྱའི་འཇིག་རྟེན་ནི། །དེ་བཞིན་དངོས་གྲུབ་གསུངས་པ་ཡིན། །དེ་ཡི་ཐབས་ནི་ཕྱག་རྒྱ་སྟེ། །དངོས་གྲུབ་ཐམས་ཅད་བྱེད་པ་མཆོག །དེ་བཞིན་ཆོ་ག་རྒྱས་པ་ དང་། །དངོས་གྲུབ་ཐམས་ཅད་གདོན་མི་ཟའོ། །དེ་ནས་དང་པོའི་དཀྱིལ་འཁོར་གྱི་གསང་བའི་དམ་ཚིག་གི་ཕྱག་རྒྱ་བཅིང་བ་འདི་ཡིན་ཏེ། སོར་མོ་ཐམས་ཅད་ཀུན་སྦྱར་ནས། །རྡོ་རྗེ་ཐལ་མོ་ཞེས་བརྗོད་དོ། །སོར་མོ་ནང་དུ་བཅིངས་པ་ལས། །རྡོ་རྗེ་བསྡམས་པར་ཡང་དག་བཤད ། །
- 189b
རྡོ་རྗེ་བསྡམས་པའི་ནང་དུ་ནི། །མཛུབ་མོ་མཐེ་བོ་ཡང་དག་སྦྱར། །གཡས་པ་ཡི་ནི་མཐེ་བོ་བཏེག །བཅུག་སྟེ་བཙིར་བའི་ལྕགས་ཀྱུ་འཛིན། །མདའ་ལྔ་བསྡུས་པ་བཅིངས་ནས་ནི། །དབུས་མའི་བཅིངས་པ་ནང་དུ་གནས། །མཐེ་བོང་བསྙམས་པའི་མཐའ་རྡོ་རྗེ། །དང་པོའི་ བདེ་བ་དམ་པ་བརྟན། །མཐེབ་མཛུབ་རྩེ་སྦྱར་དབུས་མའི་རྩེ། །མིག་འབྲས་ལྟར་སྦྱར་འཛིན་པའོ། །དབུས་མའི་རྡོ་རྗེ་འོག་ཏུ་ནི། །མཐེ་བོང་གིས་མནན་བཙིར་བར་བྱ། །རྡོ་རྗེ་འདྲེན་མ་དང་འདྲ་བ། །སྲིན་ལག་མཐེའུ་ཆུང་ཁ་ཕྱེ་བ། །བསྐོར་ནས་པུས་མོར་བཞག་པ་ནི། །དང་ པོའི་རྡོ་རྗེ་ལས་བྱུང་བའོ། །གྱེན་དུ་གཏོར་དང་ཐུར་དུ་བླུགས། །མཐེ་བོ་སྦྱར་ནས་བསྐོར་བ་དང་། །རབ་ཏུ་བརྐྱང་ཞིང་བྱུག་པ་དང་། །བསྐོར་ཞིང་སྤྱི་བོར་གནས་པ་དང་། །བསྐོར་ནས་སྙིང་གར་བཞག་པ་དང་། །ཡོངས་སུ་བསྐོར་ཞིང་དགོད་པའོ། །ཁ་ལས་གྱེན་དུ་འབྱུང་བ་དང་། ། དེ་བཞིན་གར་གྱིས་བསྐོར་བ་དང་། །མཛུབ་མོའི་སོར་མོ་གཉིས་ཀྱིས་དང་། །གཡོན་པའི་མཛུབ་མོའི་གཡས་ཀྱིས་བཟུང་། །མཛུབ་མོའི་མཐེ་བོ་བཅིང་བ་དང་། །མཐེ་བོ་ཐ་མའི་ནང་དུ་གཞག །ཁུ་ཚུར་གྱི་ཕྱག་རྒྱ་རྣམས་སོ། །དེ་ནས་དོན་ཡོད་ཅིང་ཐོགས་པ་མེད་པ་ འདི་རྣམས་ཁོ་ནའི་ལས་ཀྱི་ཕྱག་རྒྱ་བཅིང་བ། མཆོག་ཏུ་གསང་བ། བླ་ན་མེད་ཅིང་། བླ་མའི་ལས་ཀྱི་ཚོགས་སྒྲུབ་པར་བྱེད་པ། དེ་བཞིན་གཤེགས་པ་ཐམས་ཅད་དང་བཅས་པའི་བདག་གིས་ཀྱང་གནོན་པར་མི་ནུས་སོ། །དེ་ལ་བདེ་བ་ཆེན་པོའི་རྡོ་རྗེ་དབུས་མ་ལས་ རྡོ་རྗེ་སེན་མོའི་རྩེ་མོ་མཆུ་ལ་སོགས་པར་གཞག་པ་དང་། འཁོར་ལོ་རབ་ཏུ་བསྐོར་བ་དང་། རྡོ་རྗེ་ནོར་བུ་དང་ཅི་ལྟར་འདོད་པའི་དངོས་གྲུབ་ཀུན་དུ་བྱེད་པ་རྣམས་ཀྱི་རྡོ་རྗེ་འཆང་ཆེན་པོ་དང་། །སངས་རྒྱས་དང་བྱང་ཆུབ་སེམས་དཔའ་དང་རྡོ་རྗེ་རིན་པོ་ཆེ་དང་མཆོག་གི་དངོས་གྲུབ་བོ། །རྡོ་རྗེ་ འདྲེན་མས་ནི་མིག་འབྲས་ཀྱི་ལས་སོ། །གཡས་པ་དང་གཡོན་པའི་མིག་གིས་བལྟས་པས་ཐམས་ཅད་རྗེས་སུ་ཆགས་པའོ། །མིག་འབྲས་ཚུར་འདྲེན་པས་ནི་དགུག་པའོ། །གཞུག་པས་ཐམས་ཅད་གཞུག་པའོ། །བཙིར་བས་འཆིང་བའོ། །བཙུམས་པ་མེད་པས་
- 190a
དབང་དུ་བྱའོ། །རྡོ་རྗེ་ཀི་ལི་ཀི་ལས་དབུས་མ་ལ་ཙུམ་པ་ན་དང་། འཁྱུད་པ་དང་། བཙིར་བ་དང་། རོལ་པ་དང་། དབུས་མ་དང་། མཐེ་བོའི་རྩེ་མོར་བདེ་བར་བརྡེག་པས་མཐོང་བ་དང་། རོལ་པ་དང་། བཙིར་བ་རྣམས་ཀྱིས་ཐམས་ཅད་ལ་རོལ་པ་སྟེ། རྒྱུ་བ་ དང་མི་རྒྱུ་བ་ཐམས་ཅད་དུ་ལྷའི་གཟུགས་ཀྱི་བུད་མེད་རྣམས་འབྱུང་བ་ཡིན་ནོ། །ཅི་སྲིད་འདི་རྣམས་དང་རོལ་ཅིང་རྡོ་རྗེ་སེམས་དཔའི་བཙུན་མོ་ལ་ཡང་རོལ་པར་བྱེད་དོ། །རྡོ་རྗེ་ཆུ་སྲིན་མས་བཙིར་བ་དང་། གྱེན་དུ་བཏེག་པ་དང་། མྱང་བ་དང་། དྲུང་དུ་འགྲོ་བ་དང་། མྱུར་དུ་ཟ་པ་རྣམས་ ཀྱིས་བརྟན་པའི་ཆགས་པས་བཅིང་བ་དང་། ཐམས་ཅད་ལས་རྣམ་པར་རྒྱལ་བ་དང་། ཆུའི་ནང་དུ་གནས་པ་དང་། འཆག་པ་དང་། ཐམས་ཅད་ཟ་བ་གྲུབ་པའོ། །རྡོ་རྗེ་བསྐོར་བས་གཡོ་ཞིང་གཡོ་བ་དང་། ལྷོད་པར་བྱེད་པ་དང་། བཙིར་བ་དང་། དབུས་མ་ཕན་ཚུན་ ལྷན་ཅིག་དགུག་པ་དང་། མགྱོགས་པར་དབུས་མའི་རྡོ་རྗེ་དྲལ་བ་རྣམས་ཀྱིས་ཁྲོ་བོ་ཐམས་ཅད་འབར་བ་དང་། རབ་ཏུ་ཞི་བ་དང་། ཐམས་ཅད་ལ་རྒྱས་བཏབ་པ་དང་། ལྟུང་བ་དང་། གསོད་པ་རྣམས་མྱུར་དུ་འགྲུབ་བོ། །མཐེ་བོ་རྡོ་རྗེའི་ནང་དུ་ཞུགས་པའི་མཆོད་པ་རྣམས་ ཀྱིས་མཆོད་ན་རྡོ་རྗེ་འཆང་ཆེན་པོས་ཀྱང་མཆོད་པར་འགྱུར་རོ། །དེ་བཞིན་དུ་ལྷའི་བུ་མོ་རྣམས་ཀྱི་མཐེ་བོ་རྡོ་རྗེའི་ནང་དུ་ཞུགས་པའི་ལས་རྣམས་ཀྱིས་ལྷའི་བུ་མོ་ཐམས་ཅད་ཀྱང་བཀུག་ནས་རོལ་པ་ལ་སོགས་པའི་ལས་ཐམས་ཅད་ལ་ཉེ་བར་སྦྱར་བའོ། །རྡོ་རྗེ་ལྕགས་ཀྱུ་མ་ལ་ སོགས་པའི་ནང་གི་ཁུ་ཚུར་གྱི་ལས་རྣམས་ཀྱིས་ཡིད་ཀྱིས་འདོད་པའི་དངོས་གྲུབ་ཐམས་ཅད་དོ། །དེ་ནས་དངོས་གྲུབ་ཐམས་ཅད་ཀྱི་རྒྱུད་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོས་དངོས་གྲུབ་དང་། དམ་ཚིག་དང་། ཡེ་ཤེས་དང་། ལས་ཀྱི་དངོས་གྲུབ་གྲུབ་པའོ། །དོན་ཡོད་ པས་གྲུབ་པ་མྱུར་དུ་ཐམས་ཅད་ཀྱི་བདག་ཉིད་བཅོམ་ལྡན་འདས་ཀྱིས་བྱིན་གྱིས་བརླབས་པས་ཡིད་ཀྱིས་འདོད་པ་གྲུབ་པའོ། །རབ་ཏུ་དགའ་བའི་རྡོ་རྗེས་རྟགས་ཀྱི་རྩེ་མོ་གཡོ་བ་ལས་ཐམས་ཅད་དོ། །སྐྱེ་གནས་གཡོ་བས་ཀྱང་དེ་བཞིན་ནོ། །བདེ་བ་ཆེན་པོའི་རྡོ་རྗེ་དབུས་མའི་
- 190b
ལས་བྱེད་པས་དངོས་གྲུབ་ཐམས་ཅད་སྒེག་མོ་དགའ་བའི་རྡོ་རྗེ་མིག་མི་གཡོ་བར་བྱེད་པས་ལས་ཐམས་ཅད་བསྒྲུབ་པར་བྱས་ན་ཐོགས་པ་མེད་པའི་དངོས་གྲུབ་པར་འགྱུར་རོ། །དེ་བཞིན་དུ་རང་གི་ཕྱག་མཚན་རྣམས་ཀྱིས་དངོས་གྲུབ་ཐམས་ཅད་གྲུབ་པར་འགྱུར་རོ། །དང་ པོ་ཉིན་རེ་ལན་ཅིག་དུ། །ཕྱག་རྒྱ་ཆེན་པོའི་སྙིང་པོ་བཟླ། །རྡོ་རྗེ་ཉེ་བའི་སྙིང་པོ་ཡིས། །ཕྱག་རྒྱ་ཐམས་ཅད་ངེས་སྦྱར་བྱ། །ཐམས་ཅད་དོན་ཡོད་གྲུབ་པའོ། །བདེ་བ་ཆེན་པོ་རྡོ་རྗེ་ཆེ། །གསང་བའི་རྟོག་པ་མཆོག་ཕྱིར་མ། །སྒྲུབ་པའི་དོན་ཡོད་དམ་ཚིག་ནི། །སྙིང་པོས་སྐད་ ཅིག་དངོས་གྲུབ་སྟེར། །རྩ་རྒྱུད་ཕྱི་མའི་རྒྱུད་དང་བཅས། །ཕྱག་རྒྱའི་རྒྱུད་ནི་བླ་ན་མེད། །དངོས་གྲུབ་མཆོག་ནི་དེ་བཞིན་དུ། །བླ་མེད་ཡེ་ཤེས་གྲུབ་པའོ། །དེ་ནས་དང་པོའི་དཀྱིལ་འཁོར་ལ་སོགས་པའི་ཕྱག་རྒྱ་ཐམས་ཅད་ཀྱི་རྒྱུད་ཀྱི་ཆོ་ག་རྒྱས་པའོ།། །།དེ་ནས་བཅོམ་ ལྡན་འདས་ཀྱི་ཕྱག་རྒྱ་ཆེན་པོའི་རྒྱུད་ནི། པང་པ་གཡོན་དུ་དགོད་བྱ་བ། །ཞབས་ཀྱི་པདྨ་ཅི་བདེར་བྲི། །རྡོ་རྗེ་སྐྱིལ་མོ་ཀྲུང་བཅས་ནས། །སྐུ་ནི་དྲང་པོར་འཛིན་པ་བདེ། །བསྙེམས་བཅས་རྡོ་རྗེ་གསོར་ནས་ནི། །རྡོ་རྗེ་བསྙེམས་པ་ཡང་དག་འཆང་། །སྐུ་གསུང་ཐུགས་ཀྱི་རྡོ་ རྗེ་ཡིས། །རྡོ་རྗེ་སེམས་དཔའ་རང་ཉིད་འགྱུར། །འདིས་ནི་རྡོ་རྗེ་སེམས་དཔའ་ཉིད། །སངས་རྒྱས་ཉིད་དམ་སྲས་ཉིད་དང་། །དངོས་གྲུབ་ཀུན་གྱི་དབང་ཕྱུག་ཉིད། །ཚེ་འདི་ཉིད་ལ་འགྲུབ་པར་འགྱུར། །སྐུ་གསུང་ཐུགས་ཀྱི་རྡོ་རྗེ་ཡིས། །ཅི་བཞིན་ཕྱག་རྒྱའི་རྗེས་འབྲངས་ནས། ། མཚན་མའི་ཕྱག་རྒྱ་ལྡན་པ་ཡི། །སེམས་དཔའ་ཆེན་པོར་རང་ཉིད་འགྱུར། །ཕྱག་རྒྱ་ཆེན་པོའོ། །དེ་ནས་དམ་ཚིག་གི་ཕྱག་རྒྱ་བཅིང་བ་ནི་བདེ་བ་ཆེན་པོའི་རྡོ་རྗེ་བཤད་དོ། །རྡོ་རྗེ་མདའ་ལ་སོགས་པའི་བཞི་པོ་འདི་ལས་བྱུང་ངོ་། །མཛུབ་མོ་གཉིས་ཀྱི་ལྕགས་ཀྱུའི་ཕྱི་རོལ་དུ་མངོན་པར་ ཕྱོགས་པའོ། །མཐེ་བོས་འཁྱུད་པའོ། །མཐེ་བོ་གཉིས་ཁ་ཕྱེ་ལ་མཛུབ་མོ་གཉིས་ཀྱིས་དབུས་མའི་རྩེ་མོ་འདྲེན་ཅིང་སྲིན་ལག་དང་མཐེའུ་ཆུང་མཉམ་པོར་སྦྱར་ལ་རྩེ་མོ་སོ་སོར་ཁ་ཕྱེ་བས་ཆུ་སྲིན་གྱི་རྒྱལ་མཚན་གྱི་བསྒྲེང་བའོ། །བརླ་གཉིས་ལ་བསྐོར་ཞིང་གནས་པའོ། །དེ་བཞིན་དུ་
- 191a
མཚམས་རྣམས་ལ་རྡོ་རྗེ་ཐལ་མོ་བསྐོར་བས་སོ། །སྒོའི་ཕྱག་རྒྱ་རྣམས་ནི་རྡོ་རྗེ་བསྙེམས་པའི་ཁུ་ཚུར་གྱིས་སོ། །བདེ་ཆེན་མཆོག་གི་ཕྱག་རྒྱ་ཆེ། །དེ་བཞིན་དངོས་གྲུབ་རབ་སྩོལ་བ། །མདའ་སོགས་དམ་ཚིག་སྣ་ཚོགས་བའི། །དངོས་གྲུབ་ཆེན་པོ་མཆོག་སྟེར་བའོ། ། དེ་ནས་ཆོས་ཀྱི་ཕྱག་རྒྱ་ནི། །ཧོ་བིད་ཧཱུྃ་དྷྲྀཀ་ཧཱུྃ། དེ་རྣམས་ཀྱང་དངོས་གྲུབ་ཐམས་ཅད་སྩོལ་བའོ། །དེ་ནས་ལས་ཀྱི་ཕྱག་རྒྱ་ནི། རྡོ་རྗེ་ཁུ་ཚུར་རྡོ་རྗེ་མེད་པ་རྣམས་ཀྱིས་རྟོགས་པར་བྱའོ། །གཡོན་པའི་རྡོ་རྗེ་བསྙེམས་པས་གཡས་པའི་ཁུ་ཚུར་སྟོད་པའི་ཚུལ་གྱིས་སྙིང་གར་བཟུང་བར་བྱས་ པ་རྡོ་རྗེ་བསྙེམས་པ་སྟེ། རབ་ཏུ་དགའ་བ་བརྟན་པར་བྱེད་ཅིང་དངོས་གྲུབ་ཐམས་ཅད་སྩལ་བའོ། །མདའ་གཞུ་སྟོད་པས་རྡོ་རྗེ་མཚོན་ཆ་མའོ། །འོག་ཏུ་འཁྱུད་པའོ། །རྒྱལ་མཚན་བསྒྲེང་བའོ། །བསྙེམས་པ་གཉིས་སྟོད་པའོ། །སྒེག་པ་དང་བཅས་མཐའ་མ་ལ་སོགས་པས་ བཀྲོལ་བས་གློག་འགྱུ་བའི་གར་གཡས་སུ་ཡོངས་སུ་བསྐོར་བས་མེ་ཏོག་ལ་སོགས་པའི་ཀ་པུ་ཏའི་ཐལ་མོ་སྤྱི་བོ་ནས་ཕབ། རྡོ་རྗེ་ཐལ་མོ་བཀྲོལ་བས་དེ་བཞིན་དུ་སྒེག་པ་དང་བཅས་པས་མཆོད་པ་དོར་བར་བྱའོ། །རྡོ་རྗེ་གར་ནི་ནང་གི་མཚམས་ལའོ། །རྫོགས་པའམ་ནི་མ་ཚང་ བ། །ཡང་ན་ཅི་ལྟར་རྙེད་པ་བཞིན། །མེ་ཏོག་མཆོད་ལ་སོགས་མ་ཡིས། །དངོས་གྲུབ་མཆོག་སྩོལ་ཐུན་མོང་ཡིན། །དམ་ཚིག་གི་ཕྱག་རྒྱའི་སྦྱོར་བའི་མཚན་མ་ཡོངས་སུ་གཟུང་བའོ། །འདི་རྣམས་ཀྱང་དོན་ཡོད་པའི་ལས་སྒྲུབ་པ་རྣམས་སོ། །རྡོ་རྗེ་ཁུ་ཚུར་གྱིས་བདུད་རྩིའི་ཆུ་ བཟླའོ། །འཇུག་པའི་ཆོ་གའི་ཕྱག་རྒྱ་བཤད་པ་ནི། དཀྱིལ་འཁོར་ཆེན་པོ་ཐམས་ཅད་ཀྱི་རྡོ་རྗེ་སློབ་དཔོན་གྱིས་བྱིན་གྱིས་བརླབས་པའི་གསང་བའི་དམ་ཚིག་ཅེས་བྱ་བའི། འཇུག་པའི་ཕྱག་རྒྱ་གཉིས་པ་ནི། །རྡོ་རྗེ་བསྡམས་པ་བཅིངས་ནས་ནི། །གཡོན་མཐེབ་མཛུབ་མོའི་སྐྱེ་གནས་སུ། ། གཡས་པའི་མཐེ་བོའི་རྟགས་བཅུག་ལ། །བཙིར་ན་བདེ་བ་སྟེར་བའོ། །མཛུབ་མོ་ལྕགས་ཀྱུ་བཅིངས་པ་དེས། །དཀྱིལ་འཁོར་མཆོག་ཏུ་འཇུག་པར་བྱ། །ཡང་ན་སེམས་དཔའ་གང་ལ་འཇུག །དེ་དེར་མྱུར་དུ་འགྲུབ་པར་འགྱུར། །རབ་ཏུ་དགའ་བའི་རྡོ་རྗེ་མའོ། །རང་གི་ཁུ་
- 191b
ཚུར་གྱིས་རྡོ་རྗེ་རྡོ་རྗེའི་བདུད་རྩིའི་ཆུ་བླངས་ནས་ཆུའི་རྒྱུན་དེས། དབང་བསྐུར་ཏེ་འཐུང་དུ་བཅུག་ན་དབང་བསྐུར་བར་འགྱུར་རོ། །དབང་བསྐུར་བ་ཐམས་ཅད་ཀྱིས་ན་ཚོད་དར་ལ་བབ་པ་དང་། ནད་མེད་པ་དང་། དངོས་གྲུབ་ཐམས་ཅད་དང་ལྡན་པར་འགྱུར་རོ། །འདི་ལ་རིམས་དང་། གདོན་དང་། དུག་དང་། སྦྱར་དུག་དང་། མཁའ་འགྲོ་མ་དང་། ཕྱག་རྒྱ་ལ་སོགས་པས་གནོད་པ་བྱེད་པར་མི་ནུས་སོ། །སྐྱིལ་མོ་ཀྲུང་གིས་ནི་གར་དང་མཆོད་པ་འབུལ་བར་བྱའོ། །དེ་ནས་མཆོད་པ་ནི་རྡོ་རྗེ་གར་གྱིས་སོ། །རྡོ་རྗེ་གླུ་བླངས་པས་རྡོ་རྗེ་གར་དབུལ་བ་ནི་འཁོར་ ལོས་སྒྱུར་བའི་གར་གྱིས་སོ། །རྡོ་རྗེ་ཁུ་ཚུར་ཡོངས་སུ་བཟུང་བ། །རྡོ་རྗེ་བསྟོད་པས་རྡོ་རྗེ་མཚོན་ཆ་ལ་སོགས་པ་བསྒྲེང་བར་བྱ་སྟེ། མཐར་སྒེག་མོ་དགའ་བའི་རྡོ་རྗེ་གསང་བའི་བཞད་པ་དང་བཅས་པའི་ཞལ་དང་སྤྱན་གཡོ་བས་ཕྱག་འཚལ་བའོ། །བཅོམ་ལྡན་འདས་རྡོ་རྗེ་འཆང་དགྱེས་ པས་དགའ་བ་ཐམས་ཅད་ལ་སོགས་པའི་བདེ་བ་དང་ཡིད་བདེ་བ་ཐམས་ཅད་ཀྱི་དངོས་གྲུབ་སྩོལ་བ་ཡིན་ནོ། །རྡོ་རྗེ་བསྡམས་པ་བཙིར་ལ་རང་གི་སྙིང་གར་བདེ་བ་དགྲོལ་ན་དཀྱིལ་འཁོར་དགྲོལ་བ་ལ་རྡོ་རྗེ་སེམས་དཔའི་སྒོམ་པས་རེ་ཁཱ་དང་རྡོ་རྗེ་ཡིད་ཀྱིས་གྱེན་དུ་བཏེག་ལ་རིམ་པས་ནང་གི་དཀྱིལ་ འཁོར་དུ་ཞུགས་ན་དམ་ཚིག་ཉམས་པར་མི་འགྱུར་རོ། །རྡོ་རྗེ་སེམས་དཔའི་སྒོམ་པས་དཀྱིལ་འཁོར་ལ་ཕྱོགས་ན་དམ་ཚིག་ཉམས་པར་མི་འགྱུར་རོ།། །།དེ་ནས་ལས་ཀྱི་ཕྱག་རྒྱའི་རྒྱུད་ནི། བདེ་བ་ཆེན་པོ་རྡོ་རྗེ་སྤྱི་བོ་དང་དཔྲལ་བ་དང་། སྙིང་གར་བཞག་པ་ཕུབ་སྟེ། ཕྱོགས་ ཐམས་ཅད་དུ་འབར་བའི་ར་བ་འབྱུང་བར་འགྱུར་ཏེ། རྡོ་རྗེ་ཁྲོ་བོའི་རྒྱལ་པོ་ཆེན་པོ་རྣམས་ཀྱིས་ཀྱང་འཇུག་པར་མི་ནུས་སོ། །སྙིང་གར་སྒོམ་པ་རྡོ་རྗེ་དང་བཅས་པའོ། །གྱེན་དུ་ཁ་བལྟ་བས་བཏུང་བར་བྱའོ། །རང་གི་གདོང་ཡོངས་སུ་སྦྱངས་ནས་གདོང་པར་དགྲོལ་བར་བྱའོ། །དབུས་ མའི་རྡོ་རྗེ་ལྡེག་པར་བྱའོ། །དཔུང་མགོ་གཉིས་སུ་བཞག་ཅིང་སྙིང་གར་གཞག་པར་བྱའོ། །དར་དཔྱངས་ཀྱི་དབང་བསྐུར་བ་མཐོང་བའོ། །སྐྱེ་གནས་ལས་དང་ཚེ་འབྱིན་པའོ། །སྤྱི་བོར་གཞག་པར་བྱའོ། །ས་ལ་རེག་པར་བྱའོ། །རབ་ཏུ་དགའ་བའི་རྡོ་རྗེའི་རྟགས་ཀྱི་ལྕགས་
- 192a
ཀྱུས་སོ། །རྩེ་མོ་སྟོད་པའི་སྐྱེ་གནས་བཀྲོལ་བ་ལག་པ་གཡོན་པའི་མཐིལ་ཉེད་ཅིང་བསྣུན་པར་བྱའོ། །དེ་བཙིར་བར་བྱའོ། །མིག་བཙུམ་པར་བྱའོ། །བསྐོར་ཞིང་བཙིར་ནས་ཁྲོ་བོའི་ལྟ་བས་བལྟ་བར་བྱའོ། །ཡོངས་སུ་བསྐོར་ནས་ཁའི་མཐར་མཆེ་བ་བསྟན་པའི་ གཡས་པའི་མཛུབ་མོས་སྡིགས་མཛུབ་བོ། །མཛུབ་མོ་ལ་ལྡང་བར་བྱའོ། །མཐེ་བོང་བཙིར་བར་བྱའོ། །ཡི་གེ་མུས་ཕྱག་རྒྱ་དགྲོལ་བའོ། །དང་པོ་མཐེའུ་ཆུང་གི་རྡོ་རྗེས་བསྣུན་པར་བྱའོ། །དེ་ཉིད་རྣམ་པར་འགྱུར་བའི་གདོང་པས་སོ། །དེ་ཉིད་ཡོངས་སུ་བསྐོར་ནས་དཔྲལ་བར་གྱེན་དུ་ ཁ་བལྟ་བས་གནས་པའོ། །དེ་ཉིད་ཀྱིས་ནམ་མཁའ་ལ་རྡེག་པའོ། །གཡོ་ཞིང་བཙུམས་པའི་མིག་གིས་ཕྱག་རྒྱ་བཅིངས་པ་དགྲོལ་བའོ། །མཐེའུ་ཆུང་གི་ནོར་བུས་རེག་པར་བྱའོ། །མཛུབ་མོ་མཉམ་པོས་ཞབས་ཀྱི་སོར་མོ་བརྗེ་བར་བྱ་སྟེ་བཟའ་བའམ་ཡིད་ཀྱིས་གཞག་པར་བྱའོ། །མཛུབ་ མོས་སྦྱིན་སྲེག་བྱེད་པའོ། །རབ་ཏུ་དགའ་བའི་རྡོ་རྗེ་གདོང་པར་དགྲོལ་བར་བྱའོ། །སྦྱིན་སྲེག་བྱེད་པའོ། །མཐེའུ་ཆུང་གཉིས་སྐྱེ་གནས་ལ་སྦྱར་ཏེ་ཕྱག་རྒྱ་དྲལ་བར་བྱའོ། །སྲིན་ལག་དང་ཐ་མ་མཉམ་པར་སྦྱར་སོར་མོ་བ་དན་གྱི་ཚུལ་དུ་བསྒྲེང་བར་བྱའོ། །རྡོ་རྗེ་བསྡམས་པས་ལེགས་པར་བྱེད་ པ་མཛུབ་མོ་མཐེ་བོང་མཉམ་པོར་ཕྱེ་བ་དང་བཀུག་པ་བསྐོར་ནས་དྲལ་བར་བྱའོ། །རྡོ་རྗེ་བསྡམས་པ་རབ་ཏུ་བརྐྱང་བའི་མཐིལ་ས་ལ་རེག་པར་བྱའོ། །དང་པོའི་རྡོ་རྗེ་སྤྲིན་སྐྱེད་པའོ། །མཛུབ་མོས་ཆར་བསྐྱེད་པར་བྱའོ། །མཛུབ་མོས་བཟློག་པར་བྱའོ། །རྡོ་རྗེ་བལྟ་བས་འཕྲོག་པར་བྱའོ། ། རབ་ཏུ་དགའ་བའི་རྡོ་རྗེ་བཤད་དོ། །མཛུབ་མོ་གཅིག་གི་ནོར་བུའོ། །མཐེའུ་ཆུང་རྡོ་རྗེ་སྡིགས་མཛུབ་བོ། །མཛུབ་མོས་ས་འོག་ནས་ཆུ་མིག་བཀུག་ལ་བསྟན་པའོ། །བདེ་བ་ཆེན་པོ་རྡོ་རྗེས་ལ་བཟུང་ནས་གཡོ་བར་བྱའོ། །མཛུབ་མོ་གཉིས་ཀྱིས་གདེངས་ཀའི་ཚུལ་བསྟན་པའོ། ། རྩེ་མོ་བཞིའི་འོད་ཟེར་གྱིས་མེ་སྟག་སྟོན་པའོ། །མཛུབ་མོས་རླུང་སྐྱེད་པའོ། །རབ་ཏུ་དགའ་བའི་རྡོ་རྗེས་མཛུབ་མོའི་རྩེ་མོས་མེ་ལོང་དང་། རོལ་པ་དང་། ནམ་མཁའ་ལ་རྡོ་རྗེ་བལྟ་བ་དང་། སྟེང་དུ་བསྐོར་བར་བྱའོ། །རྡོ་རྗེའི་མདངས་ཤིང་དྲུང་ཐམས་ཅད་དང་། ནགས་དང་།
- 192b
སྐྱེད་མོས་ཚལ་དང་། འབྲུ་ཐམས་ཅད་ལ་གཞག་པར་བྱའོ། །མཛུབ་མོ་རྣོན་པོས་ཀློག་པར་བྱའོ། །བདག་ཉིད་ཀྱིས་ཐམས་ཅད་ལ་དྲང་པར་བྱའོ། །ཕྱི་རོལ་གྱི་དཔུང་མདུན་དུ་བསྐོར་བར་བྱའོ། །རྡོ་རྗེ་ཁུ་ཚུར་གཉིས་ཀྱིས་གློག་འགྱུ་བས་བསྐོར་བར་བྱའོ། །གློག་འགུ་བས་ནམ་མཁའ་ལ་ བསྐོར་བར་བྱའོ། །གཡས་པས་གཡོན་པ་ལ་བརྡེག་པར་བྱའོ། །རྡོ་རྗེ་ཁུ་ཚུར་གཉིས་གཡོ་ཞིང་གཡོ་བ་མེད་པ་ལ་གཞག་པར་བྱའོ། །མཛུབ་མོ་མཉམ་པའི་དཀྱིལ་འཁོར་ནི་ནོར་བུའོ། །མཛུབ་མོའི་རྡོ་རྗེའི་གཡོན་པའི་མཐེ་བོང་གི་བུ་གར་གཡས་པའི་མཛུབ་མོ་གཞུག་པར་བྱའོ། །རབ་ཏུ་དགའ་ བའི་རྡོ་རྗེས་སྟེང་དུ་ནམ་མཁའ་ལ་དཀའ་བ་བསྐྱོད་པ་དང་། སྐྱེ་གནས་གཡོ་བ་དང་། དབུས་མའི་རྡོ་རྗེ་བསྐྱོད་ཅིར་བཙིང་བའོ། །རྡོ་རྗེ་ཡིད་ལས་བྱུང་བ་དང་། རྡོ་རྗེ་ཀཱི་ལི་ཀཱི་ལ་དང་། །རྡོ་རྗེ་ཆུ་སྲིན་དང་། རྡོ་རྗེ་བསྙེམས་མ་ནི་བཤད་པའོ། །རྡོ་རྗེ་བསྡམས་པའི་མཛུབ་མོས་གསོལ་ བ་འདེབས་པར་བྱེད་པས་མཛུབ་མོ་གཉིས་ཀྱིས་རང་གི་མིག་བཀབ་ལ་ཡིད་ཀྱིས་ཅི་ལྟར་མངོན་པར་འདོད་པ་བསྒོམ་པར་བྱའོ། །སྦྱིན་སྲེག་བྱེད་པའོ། །མཛུབ་མོས་རང་མིག་བཙུམ་པར་བྱའོ། །སོས་གཟུང་བར་བྱའོ། །བཏུང་བར་བྱའོ། །རྩེ་མོ་བསྐྱོད་ཅིང་སྦྱིན་སྲེག་བྱའོ། མཐེ་བོའི་འོག་ཏུ་རབ་ཏུ་བརྐྱང་ལ་སྦྱིན་པར་བྱའོ། །རྡོ་རྗེ་སྐུའི་ཕྱག་རྒྱ་མཆོག་ནི་མཐེ་བོ་སེམས་དཔའི་སྐྱིལ་མོ་ཀྲུང་གི་མཛུབ་མོ་རྡོ་རྗེ་ནི་རྡོ་རྗེའི་སྐུ་མཆོག་གོ། །དབུས་མའི་མཉམ་པའི་མགོ་ལྕོགས་ཀྱིས་ངག་འབྱིན་པའོ། །སྙིང་གར་བཞག་ནས། ཨོྃ་བོ་དྷི་ཙིཏྟ་ཨུ་ཏ་པཱ་ད་ཡཱ་མི་ཞེས་བྱ་བ་བསྒོམ་ མོ། །མཐེ་བོའི་རྟགས་གཡོན་པའི་མཐེ་བོའི་བུ་གར་གཞུག་པར་བྱའོ། །རྡོ་རྗེ་ཁུ་ཚུར་གཉིས་གློག་འགྱུ་བ་ལྟར་བསྐོར་བས་རྡོ་རྗེ་འཁོར་ལོའོ། །རྡོ་རྗེ་བསྙེམས་མ་རྡོ་རྗེ་དང་བཅས་པའོ། །ཡི་གེ་ཧཱུྃ་གིས་སྡིགས་མཛུབ་བོ། །རབ་ཏུ་དགའ་བའི་རྡོ་རྗེ་གར་གྱིས་སོ། །རྡོ་རྗེ་བསྙེམས་ མ་བཤད་དོ། །མཐེའུ་ཆུང་ཟུར་གྱིས་མདུད་པའི་རྩེ་མོ་མཉམ་པ་ཡོངས་སུ་བསྐོར། །འོག་ནས་བཏེག་པ་མཛུབ་མོ་མཉམ་པའི་རྩེ་མོ་དང་དབང་བསྐུར་བའི་གནས་སུ་གཞག་ན་རྡོ་རྗེ་མཛོད་སྤུའོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནི་འོག་ནས་བཤད་པར་བྱའོ། །
- 193a
རྡོ་རྗེ་གར་གྱི་བཤད་པ་ཡིན་ནོ། །མཛུབ་མོ་ཕྱིར་ཕྱོགས་པ་བསླང་བའི་རྡོ་རྗེ་སྙིང་གར་བཛྲོ་ཏ་ཧྃ་ཞེས་བྱ་བ་ནི་ཕྱག་རྒྱ་ཆེན་པོའོ། །དེ་བཞིན་དུ་སྙིང་གར་རྡོ་རྗེ་སྒོམ་ཞིང་མ་ཧཱ་ས་ཧ་ཧྃ་ཞེས་བྱའོ། །ཡེ་ཤེས་ཀྱི་ཁུ་ཚུར་གྱིས་ཏ་ཐཱ་ག་ཏོ྅ཧྃ་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཤད་དོ། ། དེ་ནས་རྡོ་རྗེ་ཁུ་ཚུར་བཅིང་བ་ནི། མཛུབ་མོ་རྡོ་རྗེ་བསྡམས་པ་བཅིང་། མཛུབ་མོ་བཀུག་པ་གཉིས་ཀྱིས་བརྒྱན། །མཐའ་མ་གཉིས་ཀྱི་ནང་དུ་ནི། །མཐེ་བོང་གཉིས་ཀྱི་ཁ་སྦྱར་བ། །དམ་ཚིག་ཆེན་པོ་རྡོ་རྗེ་མཆོག །ཁུ་ཚུར་དངོས་གྲུབ་མཆོག་ཀུན་སྩོལ། །རྡོ་རྗེ་ཁུ་ཚུར་རབ་ཏུ་ བརྟགས།། །།དེ་ནས་དེ་བཞིན་གཤེགས་པའི་རིགས་ཀྱི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་ནི། ཕྱག་རྒྱ་ཆེན་པོ་རྣམས་ནི་ཏ་ཐཱ་ག་ཏོ྅ཧྃ་ཞེས་བྱ་བས་བཅིང་བར་བྱའོ། །དམ་ཚིག་ཆོ་ག་མཆོག་ནི་མཐེ་བོང་མཐེའུ་ཆུང་མཉམ་པའོ། །རྡོ་རྗེ་སྣ་ཚོགས་རྡོ་རྗེའོ། །མདའ་ལ་སོགས་པ་ བཅིང་བ་ནི་དེ་བཞིན་ནོ། །ལས་ཀྱི་ཕྱག་རྒྱ་རྣམས་ནི་དེ་ཉིད་དོ། །དེ་བཞིན་གཤེགས་པའི་ཁུ་ཚུར་གྱིས་དེ་བཞིན་དུ་བཅིང་བའོ། །ལྕགས་ཀྱུ་མ་བཞིན་ནོ། །ཁུ་ཚུར་གྱི་ཁྱད་པར་རྡོ་རྗེ་བསྡམས་པའི་ཁུ་ཚུར་མཐེ་བོང་གཉིས་ལ་གནས་པ་དམ་ཚིག་གི་ཁུ་ཚུར་ཏེ། དེ་གཉིས་སུ་བྱས་པ་དེ་ བཞིན་གཤེགས་པའི་ཁུ་ཚུར་རོ། །དེ་བཞིན་གཤེགས་པའི་ཁུ་ཚུར་གཉིས་དང་། དཀྱིལ་འཁོར་ལྔས་ཕྱག་འཚལ་ཞིང་འཇུག་པར་བྱའོ། །འདི་དག་ཀྱང་དངོས་གྲུབ་ཐམས་ཅད་སྩོལ་བའོ། །དེ་ནས་ལས་ཀྱི་ཕྱག་རྒྱ་བཅིང་བ་ནི། རྡོ་རྗེ་སྐུ་མཆོག་གིས་སྤྱི་གཙུག་དང་མཛོད་ སྤུ་དང་སྙིང་གར་བཞག་སྟེ་བསྐོར་ཞིང་བསྐོར་བས་མཁུར་ཚོས་དང་། གཙུག་ཏོར་དུ་གཟུང་བར་བྱའོ། །དེ་བཞིན་གཤེགས་པའི་ཁུ་ཚུར་གཉིས་ཀྱི་མཛུབ་མོ་གཉིས་ཀྱིས་སྡིགས་མཛུབ་བྱ་བ་དང་སྦྱིན་པའི་ཚུལ་བྱའོ། །གཡོན་པ་སྙིང་གར་བཟུང་སྟེ་གཡས་པའི་མཛུབ་མོ་གཅིག་གིས་ ས་ལ་རེག་པའོ། །གཡོན་པའི་ཁྲོ་བོའི་མཛུབ་མོ་གཡས་པའི་ཁུ་ཚུར་གྱིས་ནང་དུ་མངོན་པར་ཕྱོགས་པས་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་སངས་རྒྱས་ཉིད་དུ་མྱུར་དུ་ཐོབ་པའོ། །རྡོ་རྗེ་བསྡམས་པའི་འོག་ཏུ་བཅིང་བས་བརྟན་པའི་སྐྱིལ་མོ་ཀྲུང་ངོ་།། །།དེ་ནས་རྡོ་རྗེ་
- 193b
རིགས་ཀྱི་ཕྱག་རྒྱའི་ཆོ་ག་རྒྱས་པའི་རྒྱུད་ནི། འཇུག་པའི་ཕྱག་རྒྱ་རབ་ཏུ་དགའ་བའི་རྡོ་རྗེ་ཁྲོ་བོའི་དགུག་པའི་ཕྱག་རྒྱ་དེ་ཉིད་དོ། །ཕྱག་རྒྱ་ཆེན་པོ་རྣམས་ཀྱང་དེ་བཞིན་ནོ། །དམ་ཚིག་ནི་འོག་ཏུ་རྡོ་རྗེ་བསྡམས་པའི་སོར་མོ་ཐམས་ཅད་འབར་བའི་ནང་དུ་མཐེ་བོང་རྡོ་རྗེ་ནི་རྡོ་རྗེ་ཁྲོ་བོ་ཏི་རིནྟི་རི་སྟེ་རྡོ་རྗེ་ འཆང་ཆེན་པོ་སྒྲུབ་པར་བྱེད་པའོ། །གཞན་དག་ཀྱང་དེ་བཞིན་ནོ། །ཆོས་ཀྱི་རྣམས་ནི་དེ་བཞིན་ཏེ། ལས་ཀྱི་ཕྱག་རྒྱ་རྣམས་ནི་དེ་བཞིན་ནོ། །ཁུ་ཚུར་གྱི་ཁྱད་པར་རོ། །རྡོ་རྗེ་ཁུ་ཚུར་གྱིས་མཛུབ་མོ་སྡིགས་མཛུབ་བོ། །དམ་ཚིག་ལས་བྱུང་བ་ནི་དེ་བཞིན་ནོ། །དེ་ནས་ལས་ཀྱི་ཕྱག་ རྒྱ་རྣམས་ནི་རྡོ་རྗེ་ཧཱུྃ་མཛད་ལས་བྱུང་བའོ། །ལག་པ་རྡོ་རྗེའི་མཐེའུ་ཆུང་གདུ་བུར་བཅིངས་པའི་སྡིགས་མཛུབ་ནི་རྡོ་རྗེ་ཧཱུྃ་མཛད་དེ་གཡོན་བརྐྱང་བས་གནས་པའོ། །གཡོན་པའི་མཛུབ་མོའི་རྡོ་རྗེ་སྡིགས་མཛུབ་བོ། །སྣའི་དབུགས་དང་ཡི་གེ་ཧཱུྃ་གིས་སོ། །ཁྲོས་པས་ཡི་གེ་ཨ་སྦྱར་ བར་བྱའོ། །ཧ་ཧར་དགོད་པས་བཞད་པར་བྱའོ། །སྙིང་གར་རྡོ་རྗེ་བསྒོམས་པས་རྡོ་རྗེའི་ཕྱག་རྒྱ་ཆེན་པོའོ།། །།དེ་ནས་པདྨའི་རིགས་ཀྱི་ཕྱག་རྒྱའི་ཆོ་ག་རྒྱས་པའི་རྒྱུད་ནི། དེ་བཞིན་གཤེགས་པའི་རྡོ་རྗེའི་མཛུབ་མོ་གཉིས་བཀུག་ལ་དེའི་སྙིང་གར་གཞག་པ་ནི་རྡོ་རྗེ་པདྨའོ། ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་ནི་དེ་བཞིན་ནོ། །དམ་ཚིག་གི་ཁྱད་པར་དང་ཁུ་ཚུར་གྱི་ཁྱད་པར་རོ། །ཁ་འབུས་པའི་ཐལ་མོ་ལས་མཐེ་བོ་དང་མཐེའུ་ཆུང་ཁ་ཕྱེ་བས་འདབ་མ་བཞི་པའི་པདྨ་ཆེན་པོའོ། །ཐམས་ཅད་བཅིང་བ་ནི་ཅི་ལྟ་བ་བཞིན་ནོ། །ཁུ་ཚུར་གྱི་ ཁྱད་པར་ནི། རྡོ་རྗེ་བསྡམས་པའི་མཛུབ་མོ་གཉིས་བཀུག་ལ་མཐེ་བོང་མཉམ་པར་བརྐྱང་ལ་དབུས་མ་གཉིས་ཕྱི་རོལ་དུ་གཤིབས་པ་དང་བཅས་པ་བཞག་པ་སྟེ་དེ་གཉིས་སུ་བྱས་པ་པདྨའི་ཁུ་ཚུར་རོ། །དེ་ནས་ལས་ཀྱི་ཕྱག་རྒྱ་རྣམས་ནི། པདྨ་ཆེན་པོའི་བཤད་པའོ། །དེ་ ཉིད་སྤྱི་བོ་ལའོ། །དེ་ཉིད་རྡོ་རྗེ་ལྟ་བས་བལྟ་བར་བྱའོ། །དེ་ཉིད་སོར་མོ་ཐམས་ཅད་ཁ་ཕྱེ་བས་སོ། །དེ་ཉིད་རྡོ་རྗེ་གཉིས་གཉིས་ཀྱི་མིག་གོ། །དེ་ཉིད་ལེགས་པར་བྱེད་པའོ། །དེ་ཉིད་དཔྲལ་བར་བྱས་ནས་གསོལ་བ་གདབ་པར་བྱའོ། །དེ་ཉིད་གཡོན་པའི་སྐྱེ་
- 194a
གནས་སུ་མཐེ་བོའི་རྟགས་བཅུག་པའོ།། །།དེ་ནས་ནོར་བུའི་རིགས་ཀྱི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་ནི། རྡོ་རྗེ་ཐལ་མོ་རབ་ཏུ་བརྐྱང་ཞིང་མཐེ་བོང་མཉམ་པོ་ལ་མཛུབ་མོ་བཀུག་པ་བཞག་སྟེ་དཔྲལ་བའི་མཛོད་སྤུའི་ཕྱོགས་སུ་བཞག་ན་དབང་བསྐུར བ་ཐམས་ཅད་གསོལ་བའོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བ་དེ་བཞིན་ནོ། །དམ་ཚིག་གི་རྡོ་རྗེ་བསྡམས་པའི་མཛུབ་མོ་གཉིས་ཕྱིར་བཀུག་པའི་སོར་མོ་མཉམ་པོར་ནོར་བུ་མཐེ་བོ་རྡོ་རྗེས་བཀག་པ་རྡོ་རྗེ་ནོར་བུའོ། །གཞན་རྣམས་ནི་དེ་ལས་བྱུང་ བའི་རྡོ་རྗེ་རིན་པོ་ཆེའི་ཁུ་ཚུར་རོ། །དེ་གཉིས་སུ་བྱས་ནས་རིན་པོ་ཆེའི་ཁུ་ཚུར་རོ། །དེ་ནས་ལས་ཀྱི་ཕྱག་རྒྱ་རྣམས་ནི་རྡོ་རྗེ་རིན་པོ་ཆེ་བསྒྲེང་བ་བསྒྲུབ་པར་བྱ་བའི་མྱུ་གུའོ། །ཁ་སྦྱར་ནས་སྲིན་ལག་དང་མཐེའུ་ཆུང་མཉམ་པོ་ཁ་ཕྱེ་བས་མཆོག་གི་དར་དཔྱངས་འཛིན་པའོ། །དབུས་ མའི་ནོར་བུའོ། །མཐེའུ་ཆུང་གི་རྩེ་མོའོ། །འོག་ཏུ་གཏོར་བའོ། །རྡོ་རྗེ་བསྡམས་པ་ལས་ནི་མཛུབ་མོའི་ནོར་བུ་བརྐྱང་བའི་ཕྲེང་བའོ། །རྡོ་རྗེ་རིན་པོ་ཆེ་གསུམ་མདུན་དང་ལོགས་གཉིས་སུ་བཅིང་བར་བྱའོ། །རྡོ་རྗེ་རིན་པོ་ཆེའི་མཛོད་སྤུའི་ཕྱོགས་སུ་བཞག་སྟེ། མཛུབ་ མོའི་རྩེ་མོས་སྟེང་དུ་མདུད་པ་དར་དཔྱངས་ཀྱི་ཚུལ་དུ་བྱའོ། །མཐེ་བོ་གཉིས་བརྟན་པའི་སྐྱིལ་མོ་ཀྲུང་བྱས་ལ་མཛུབ་མོ་གཉིས་བཀུག་ནས་མཉམ་པའི་ཁ་འབུས་པའི་མཆོག་གི་ལུས་ཅན་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གོ། །དེས་སྤྱི་བོ་ནས་བརྩམས་ཏེ་མདུན་དང་ གཡས་དང་གཡོན་དང་རྒྱབ་ཏུ་བྱ་བ་བྱས་ནས་དེ་བཞིན་དུ་མདུན་དང་རྒྱབ་དང་ལོགས་གཉིས་སུ་སྒེག་པ་དང་བཅས་པས་ཐ་མ་ལ་སོགས་པ་བཀྲོལ་བར་བྱས་ནས། ཕྲེང་བ་བཅིང་བའི་མདུད་པ་བྱ་ཞིང་དར་དཔྱངས་ཀྱི་ཚུལ་དུ་བྱ་སྟེ། རྡོ་རྗེ་སེམས་དཔའི་དབང་བསྐུར་བ་དང་སྲིད་པ་གསུམ་ གྱི་དབང་ཕྱུག་ཐམས་ཅད་ཀྱི་མཆོག་རྡོ་རྗེ་སེམས་དཔའ་ཉིད་ཐོབ་པ་ཡིན་ནོ། །རྡོ་རྗེ་ཐམས་ཅད་ཀྱི་རྟོག་པ་ཐམས་ཅད་ནི་གོང་དུ་ཅི་ལྟ་བ་བཞིན་ནོ། །དེ་ནས་ཕྱིའི་ཕྱག་རྒྱ་ཤེས་པར་བྱ་བ་ནི་འདི་ཡིན་ཏེ། ཕྱག་རྒྱ་ཆེན་པོ་ནི་གཡོན་པར་ཁམ་ཕོར་དང་གཡས་སུ་མདའ་གཏོང་བའི་ཕྱག་རྒྱའོ། །
- 194b
དམ་ཚིག་གི་འཇུག་པ་ནི་མཛུབ་མོ་དང་གུང་མོ་དང་སྲིན་ལག་མཉམ་པོར་ལེགས་པར་སྦྱར་ལ་རྩེ་གསུམ་པར་བྱས་ལ་མཐེ་བོང་དང་མཐེའུ་ཆུང་གཉིས་ལུ་གུ་རྒྱུད་ནི་མགོན་པོ་རྣམས་ཀྱིའོ། །ཅི་ནས་ལྟར་བཟུང་བ་བཞིན་དུ་ལྷ་མོ་རྣམས་ཀྱི་ཕྱག་རྒྱའོ། །དམ་ཚིག་ནི་གུང་མོ་དང་ སྲིན་ལག་རྡོ་རྗེ་བསྡམས་པས་མཛུབ་མོ་དང་གུང་མོ་དང་མཐེའུ་ཆུང་དང་སྲིན་ལག་མཐེ་བོའི་སོར་མོའི་རྩ་བར་བསྡུས་པ་ནི་སྲིང་མོ་བཞིའི་དཀྱིལ་འཁོར་གྱི་ཕྱག་རྒྱའོ། །གལ་ཏེ་དཀྱིལ་འཁོར་བརྟག་པར་མི་ནུས་ན་དེའི་ཚེ་འདི་བཅིངས་པས་དཀྱིལ་འཁོར་ཤིན་ཏུ་བརྟག་པར་འགྱུར་ཏེ། དངོས་གྲུབ་ཀྱང་ཤིན་ཏུ་གསོལ་བ་ཡིན་ནོ། །ལྷ་མོ་རྣམས་འདི་ཉིད་ཀྱིས་སྤྱན་དྲང་བ་དང་འཇུག་པར་བྱའོ།། །།དེ་ནས་སྒྱུ་མའི་འཁོར་ལོ་ནི་གཡོན་པའི་སྟེང་དུ་སོར་མོ་ཐམས་ཅད་ཤིན་ཏུ་བརྐྱང་། དམ་ཚིག་དཀྱིལ་འཁོར་གྱི་འཁོར་ལོ་སྟེ་ལྷ་མ་ཡིན་ཐམས་ཅད་ཀྱི་སྒྱུ་མ་ཐམས་ ཅད་དོན་ཡོད་པར་བསྒྲུབ་པའོ། །གདེངས་ཀ་ཅན་གྱི་དབང་པོའི་མཐེ་བོ་གཉིས་པས་རྩེ་མོ་ཕྱི་རོལ་དུ་ཕྱོགས་པའི་སོར་མོ་བརྒྱད་ཀྱིས་གདེངས་ཀའི་ཚོགས་ཀྱིས་ཀླུ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བའི་དམ་ཚིག་སྟེ་ལྟོ་འཕྱེ་ཆེན་པོའི་ལག་པའོ། །གལ་ཏེ་ འདའ་བར་བྱེད་ན་འཆི་བར་འགྱུར་རོ། །གུང་མོ་དང་སྲིན་ལག་བཞི་པོས་མདུད་པ་བྱས་ལ་མགུ་བའི་ཚུལ་གྱིས་སྟེང་དུ་སྒྲེང་སྟེ་བསྡུས་ནས་མཐེའུ་ཆུང་གཉིས་ཀྱིས་རྩེ་མོས་བརྡེག་པར་བྱས་ན་དུག་ཐམས་ཅད་འབར་བ་དང་། དུག་ཐམས་ཅད་བཅིང་བ་དང་ཀུན་ལས་བསྡུས་ཏེ་བརྡེག་ པས་དུག་ཐམས་ཅད་འཇིག་པའོ། །འདི་ཉིད་ཀྱི་དུག་ཐམས་ཅད་ཟ་བ་དང་འཕོ་བ་དུག་མེད་པར་བྱའོ། །ཕྱི་རོལ་གྱི་ཕྱག་རྒྱའི་ཆོ་ག་རྒྱས་པའི་རྒྱུད་དོ།། །།དེ་ནས་རྟོག་པ་ཐམས་ཅད་བསྒྲུབ་པའི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་བཤད་པར་བྱའོ་ཞེས་བཅོམ་ལྡན་འདས་བདེ་བ་ ཆེན་པོའི་རྡོ་རྗེ་གསང་བ་དམ་ཚིག་ཆེན་པོ་རྡོ་རྗེ་སེམས་དཔས་གསུངས་སོ། །དེ་ལ་སྐུའི་ཕྱག་རྒྱ་ལྔ་ནི། ཕྱག་རྒྱ་ཆེན་པོ་རྡོ་རྗེ་འཆང་ཆེན་པོའི་རིགས་ལའོ། །དམ་ཚིག་གི་ཕྱག་རྒྱ་དེ་བཞིན་གཤེགས་པའི་རིགས་ལའོ། །རྡོ་རྗེ་ཧཱུྃ་མཛད་ནི་རྡོ་རྗེའི་རིགས་ལའོ། །པདྨ་ཆེན་པོ་ནི་པདྨའི་རིགས་ལའོ། །རྡོ་རྗེ་ནོར་བུ་ཆེན་པོ་
- 195a
ནི་ནོར་བུའི་རིགས་ལའོ། །དེ་ནས་གསུང་གི་ཕྱག་རྒྱ་ལྔ་ནི། སྙན་པའི་གླུའི་ཡུལ་ཐམས་ཅད་ཀྱི་ཚུལ་རྣམས་ནུས་པ་ཅི་ལྟ་བུའི་གླུའི་རྒྱུན་ཐམས་ཅད་ཀྱིས་གླུ་བླངས་ཏེ་བཟླས་པ་ནི་རྡོ་རྗེ་སེམས་དཔའི་རིགས་ལ་རབ་ཏུ་དགའ་བའི་རྡོ་རྗེའི་ངག་གོ། །ལྕེ་དང་མཆུ་ གཉིས་ཤིན་ཏུ་གཡོ་བ་མེད་ཅིང་ངོས་ཤིན་ཏུ་མ་འབྱར་བ་དབྱངས་དང་བྲལ་བའི་རྡོ་རྗེའི་ངག་དེ་ནི་དེ་བཞིན་གཤེགས་པའི་རིགས་ལ་སྟེ། རིགས་ཐམས་ཅད་དགོས་པའོ། །སྤྲིན་གྱི་འབྲུག་སྒྲ་ཡི་གེ་ཧཱུྃ་གི་སྒྲ་ཕྲ་མོ་དང་ལྡན་པ་ནི་རྡོ་རྗེ་ཁྲོ་བོའི་རྡོ་རྗེ་ཞེས་བྱ་བའི་ངག་རྡོ་རྗེའི་རིགས་སོ། །ཏིང་ངེ་ འཛིན་གྱི་ངག་པདྨའི་རིགས་ལ་སྟེ་ཐམས་ཅད་དག་པའི་པདྨ་ཞེས་བྱ་བའོ། །ཆོས་ཀྱི་ངག་ནོར་བུའི་རིགས་ལ་སྟེ་མཆོད་པའི་ནོར་བུའོ། །དེ་ནས་ཐུགས་ཀྱི་ཕྱག་རྒྱ་ལྔ་སྟེ། ཐམས་ཅད་བསྒྲུབ་པར་བྱ་བ་ལ་ནི་རྡོ་རྗེ་སེམས་དཔའི་དངོས་པོས་སོ། །སངས་རྒྱས་རྗེས་སུ་དྲན་པས་དེ་བཞིན་ གཤེགས་པའི་རིགས་ལའོ། །བདག་གམ་བདག་གི་མདུན་དུ་གསད་པར་བྱའོ་ཞེས་བྱ་བ་ནི་རྡོ་རྗེ་རིགས་ལའོ། །སྦྱང་བར་བྱའོ་ཞེས་བྱ་བ་ནི་པདྨའི་རིགས་ལའོ། །ནམ་མཁའ་ཐམས་ཅད་བསྒོམས་པས་ནོར་བུའི་རིགས་ལའོ།། །།དེ་ནས་རྡོ་རྗེའི་ཕྱག་རྒྱ་ལྔ་ནི། རྡོ་རྗེ་རྩེ་མོ་ལྔ་ འོད་ཟེར་གྱི་ཕྲེང་བས་རྩེ་མོ་ཡོངས་སུ་ཁྱབ་པ་དང་བདེ་བ་ཆེན་པོའི་རྡོ་རྗེ་ཁུ་ཚུར་གྱིས་རྡོ་རྗེ་སེམས་དཔའི་རིགས་ལའོ། །རྡོ་རྗེ་རྩེ་ལྔ་པ་འོད་ཟེར་དང་བཅས་པ་དེ་བཞིན་གཤེགས་པའི་ཁུ་ཚུར་གྱིས་དེ་བཞིན་གཤེགས་པའི་རིགས་ལའོ། །འབར་བའི་རང་བཞིན་རྡོ་རྗེ་རྩེ་བཞི་པ་རྡོ་རྗེ་ཁྲོ་བོའི་ ཁུ་ཚུར་གྱིས་རྡོ་རྗེའི་རིགས་ལའོ། །པདྨའི་སྟེང་གི་དེ་བཞིན་གཤེགས་པའི་རྡོ་རྗེ་པདྨའི་ཁུ་ཚུར་གྱིས་པདྨའི་རིགས་ལའོ། །རྡོ་རྗེ་ཕྱེད་པ་རྡོ་རྗེ་རིན་པོ་ཆེ་ནོར་བུའི་ཁུ་ཚུར་གྱིས་ནོར་བུའི་རིགས་ལའོ།། །།དེ་ནས་རིགས་ཐམས་ཅད་རྟོགས་པའི་གསང་བ་ཐོགས་པ་མེད་ཅིང་གདོན་ མི་ཟ་བའི་དེ་ཁོ་ན་ཉིད་ཀྱི་བདེན་པ་མྱུར་དུ་མཆོག་གི་དངོས་གྲུབ་ཀྱི་ཆོ་ག་རྒྱས་པ་བསྒྲུབ་པ་ཐམས་ཅད་ཀྱི་རྒྱུད་བཤད་པར་བྱའོ་ཞེས་བཅོམ་ལྡན་འདས་དོན་ཡོད་ཅིང་ཐོགས་པ་མེད་པ་མྱུར་བའི་མཆོག་གི་དངོས་གྲུབ་ཅན་རྡོ་རྗེ་སེམས་དཔས་གསུངས་སོ། །རྡོ་རྗེ་སེམས་དཔའི་ཕྱག་རྒྱ་ཆེན་པོ་
- 195b
ནི་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་གོ། །གསུང་གི་ཕྱག་རྒྱ་ནི་སྙིང་པོའོ། །ཐུགས་ཀྱི་ཕྱག་རྒྱ་ནི་ཉེ་བའི་སྙིང་པོའོ། །རྡོ་རྗེའི་ཕྱག་རྒྱ་ནི་རྡོ་རྗེ་སྙེམས་མའིའོ།། །།དེ་ནས་ཕྲ་མོའི་ལས་ཀྱི་ཕྱག་རྒྱའི་རྒྱུད་དོན་ཡོད་ཅིང་ཐོགས་པ་མེད་པ་འདི་ཡིན་ཏེ། མ་མཆུའི་སྒྲོས་སོ་རྣམས་ཀྱིས་བཟུང་ནས་རྡོ་རྗེའི་ལྟ་བས་བལྟ་ཞིང་ཐམས་ཅད་རྗེས་སུ་ཆགས་པ་དང་། དབང་དུ་བྱེད་པ་དང་། རོལ་པ་དང་། བརྟན་པར་བྱེད་པའི་དངོས་གྲུབ་སྐད་ཅིག་གིས་སོ་སོར་ཉམས་སུ་མྱོང་བ་ནི་རྡོ་རྗེ་སེམས་དཔའི་རིགས་ལའོ། །རྡོ་རྗེ་ཕྲ་མོས་བྱིན་ གྱིས་བརླབས་ཏེ། དམ་ཚིག་ཙམ་དུ་ལྟ་བ་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བའི་དངོས་གྲུབ་ཐོབ་པར་འགྱུར་བ་ནི་དེ་བཞིན་གཤེགས་པའི་རིགས་ལས་བྱུང་ངོ་། །ཁྲོ་གཉེར་དང་ བཅས་པའི་ཁྲོ་བོས་མི་བཟད་པའི་ལྟ་བ་བྱས་ནས་ཤིན་ཏུ་མ་འགལ་བསྡམས་ནས་ཐམས་ཅད་ལྟུང་བ་དང་། དབབ་པ་དང་། རེངས་པ་དང་། ཉལ་དུ་བཅུག་པ་དང་། རྒྱས་བཏབ་པ་དང་། གསོད་པ་དང་། གཞན་གྱི་དཔུང་རྨུགས་པ་དང་། ཐམས་ཅད་ལས་རྣམ་པར་རྒྱལ་བའི་ དངོས་གྲུབ་སྐད་ཅིག་མས་འབྱུང་བར་འགྱུར་བ་ནི་ཁྲོ་བོའི་རྡོ་རྗེ་ཁུ་ཚུར་རིགས་ལའོ། །བཙུམས་པ་མེད་པས་བརྟན་པའི་རྡོ་རྗེའི་ལྟ་བས་མཆུ་མཉམ་པ་ནི་སྒྲིབ་པ་ཐམས་ཅད་རྣམ་པར་སྦྱང་བ་དང་བསྲུང་བ་དང་། ཏིང་ངེ་འཛིན་མངོན་དུ་གྱུར་པའི་དངོས་གྲུབ་འབྱུང་བ་ནི་པདྨའི་རིགས་ལའོ། ། འབར་བའི་ལྟ་བས་ཞལ་རྣམ་པར་བཞད་པས་དབང་བསྐུར་བ་ཐམས་ཅད་དང་ཕུན་སུམ་ཚོགས་པ་ཐམས་ཅད་དང་མཆོད་པའི་ཆོ་ག་རྒྱས་པའི་དངོས་གྲུབ་མྱུར་དུ་ཐོབ་པར་འགྱུར་རོ།། །།དེ་ནས་ཕྱག་རྒྱ་ཐམས་ཅད་བཅིང་བ་སྒྲུབ་པ་ནི། ཉིན་རེ་མངོན་དུ་ལན་ཅིག་ཏུ། །སྙིང་ པོ་རང་ཉིད་བསྒྲུབ་པ་སྟེ། །རང་གིས་བཅིངས་ནས་མདོར་བསྡུས་པས། །ཕྱག་རྒྱ་ཐམས་ཅད་གྲུབ་པར་འགྱུར། །དེ་ནས་ཕྱག་རྒྱ་ཐམས་ཅད་ཀྱི་གསང་བ་སྒྲུབ་པ་ནི། སྙིང་པོའི་ཕྱག་རྒྱ་སྔགས་རིག་པའི། །སྒྲུབ་པ་འདི་ནི་རྨད་དུ་བྱུང་། །ཅི་ནུས་ཅི་འདོད་བཟླས་པ་ཡིས། །
- 196a
ཉེ་བའི་སྙིང་པོ་གསང་བའོ། །དོན་ཡོད་ཐོགས་མེད་གསང་བ་དང་། །རང་བཞིན་གྲུབ་པ་དེ་བཞིན་དུ། །བསོད་ནམས་མེད་པ་རྣམས་ལ་ཡང་། །དངོས་གྲུབ་ཀུན་ལ་གྲུབ་པར་འགྱུར། །དཀྱིལ་འཁོར་མ་ཞུགས་པ་རྣམས་ལ། །སྙིང་པོ་མཆོག་ འདི་སྦྱིན་མི་བྱ། །གསང་བའམ་གསང་རྒྱུད་དམ་པ་ནི། །གལ་ཏེ་དངོས་གྲུབ་ཡིད་འོང་འདོད། །གང་གི་ཁྱིམ་དུ་གནས་གྱུར་པའི། །ཕྱག་རྒྱ་སྔགས་འདི་དགེ་བ་སྟེ། །གཞན་གྱིས་མི་ཐུབ་མི་སོད་ཅིང་། །དངོས་གྲུབ་ཐམས་ཅད་ཐོབ་པར་འགྱུར། །དུམ་བུ་གཉིས་པ་ སྔགས་དུམ་གྱི་རྩ་རྒྱུད་རྫོགས་སོ།། །།སེམས་ཅན་ཐམས་ཅད་བདེ་དོན་དང་། །བསྒྲུབ་པ་ཐམས་ཅད་སྒྲུབ་པའི་ཕྱིར། །སྲས་བཅས་སངས་རྒྱས་ཐམས་ཅད་ཀྱིས། །རྡོ་རྗེ་མཆོག་འཛིན་དེ་ལ་ཞུས། །བདེ་བ་ཆེན་པོ་རབ་སྒྲུབ་དང་། །ཆགས་པ་ཆེན་པོ་ རྣམ་དགེ་ཕྱིར། །རྟོགས་པ་ཐམས་ཅད་བསྡུས་པའི་རྒྱུད། །སེམས་དཔའ་ཆེན་པོ་བཤད་དུ་གསོལ། །རྣམ་རྟོག་མེད་པའི་ཆོས་རྣམས་ལ། །འདིར་ནི་རྟོག་པར་གང་ཞིག་བརྗོད། །སྙིང་བོ་ཞེས་ནི་གང་བཤད་པའི། །ཡེ་ཤེས་རྒྱུད་ནི་ཇི་ལྟར་ཡིན། །དཀྱིལ་འཁོར་ ཞེས་ནི་བརྗོད་པ་ཅི། །དེར་འཇུག་ཡོན་ཏན་ཅི་དང་ལྡན། །རིགས་ཀྱི་འཁོར་ལོའི་ཁྱད་པར་དང་། །གཞན་ཡང་སྒྲུབ་པ་ཇི་ལྟ་བུ། །རྡོ་རྗེ་སེམས་དཔའ་སེམས་དཔའ་ཉིད། །འདི་ཡང་ཅི་ལྟར་དེ་ཉིད་གང་། །ཐོག་མ་ཐ་མ་མེད་ཉིད་དང་། །རབ་ཏུ་དགའ་བ་ཇི་ལྟར་ འགྱུར། །དང་པོའི་སྙིང་པོ་འདི་ཡི་ཡིན། །དེ་བཞིན་ཉིད་ནི་གང་ཞིག་ཡིན། ཧཱུྃ་གི་གླུ་ནི་གང་གིས་གསུངས། །འདི་ཡི་དོན་ནི་ཇི་ལྟར་བརྗོད། །སེམས་ནི་རྡོ་རྗེ་ཉིད་དང་ནི། །དེ་བཞིན་ཕྱག་རྒྱ་རྡོ་རྗེ་ཉིད། །སངས་རྒྱས་རྣམས་ནི་འབྱུང་བ་དང་། །རིགས་རྣམས་ཀྱང་ནི་ དེ་བཞིན་དུ། །སངས་རྒྱས་བྱང་ཆུབ་བསྒྲུབ་པ་དང་། །སངས་རྒྱས་བདུད་དུ་ཇི་ལྟར་འགྱུར། །རྟོག་པ་རྣམས་ཀྱང་བསྒྲུབ་པ་དང་། །དང་པོའི་སྙིང་པོའི་དེ་ཉིད་དང་། །སྙིང་པོ་ཕྱག་རྒྱ་སྔགས་རིག་པའི། །སྒྲུབ་པ་དེ་བཞིན་དངོས་གྲུབ་རྣམས། །བསོད་ནམས་མེད་པས་
- 196b
ཅི་ལྟར་འགྲུབ། །སློབ་དཔོན་ཉིད་དུ་ཇི་ལྟར་འགྱུར། །མེ་ཏོག་སྤོས་དང་མར་མེ་དང་། །དྲི་རྣམས་ཅི་ཡིན་ཇི་ལྟར་འགྱུར། །མཆོད་པ་ཡང་ནི་ཇི་ལྟར་བྱ། །གསང་བའི་མཆོད་པ་ཇི་ལྟར་ཡིན། །ཀུན་བྱེད་ཀུན་ཟ་སྡིག་པ་ཅན། །ཤིན་ཏུ་སྡིག་ཅན་ཇི་ ལྟར་གྲུབ། །དོན་ཡོད་ཐོག་མེད་དངོས་གྲུབ་ཀྱིས། །དེ་རྣམས་ཇི་ལྟར་གྲུབ་པར་འགྱུར། །གསང་བ་དེ་ཡང་གང་ཞིག་ཡིན། །འདི་ཉིད་དུ་ནི་གང་གིས་འགྲུབ། །བདེ་བ་ཆེན་པོ་རབ་གྲུབ་དང་། །ཆགས་པ་ཆེན་པོ་རྣམ་དག་ཕྱིར། །གསང་བའི་དེ་ཉིད་གསང་བ་ནི། ། བདག་ཅག་རྣམས་ལ་ཀུན་བཤད་གསོལ།། །།དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་གསན་ནས། ཞལ་རབ་ཏུ་བཞད་དེ་བཞད་པ་ཆེན་པོས་དམ་ཚིག་ཆེན་པོ་ཐམས་ཅད་ཀྱི་དེ་ཁོ་ན་ཉིད་ཀྱི་རྡོ་རྗེ་ཞེས་ བྱ་བའི་རྣམ་པར་གནོན་པ་མཛད་ནས་རྟོག་པ་ཐམས་ཅད་ཀྱི་རྒྱུད་ཕྱི་མ་འདི་གསུངས་སོ། །དེ་ལ་རྣམ་པར་མི་རྟོག་པ་ཁྱབ་པའི་རྒྱུད་ནི། རྣམ་རྟོག་མེད་པའི་ཏིང་འཛིན་ལས། །སེམས་ཅན་དོན་ནི་ཡོངས་སུ་བརྟག །དེས་ན་བརྟག་པར་བཤད་པ་སྟེ། །རྟོག་པ་ཡོངས་སུ་དག་ཕྱིར་ རོ། །དེ་ལ་བདེ་བ་ཆེན་པོ་རྡོ་རྗེ་གསང་བའི་དཀྱིལ་འཁོར་རྒྱུད་ནི་འདི་ཡིན་ཏེ། ས་ལ་ཡི་གེའི་གནས་བྲིས་ནས། །བདེ་བ་ཆེན་པོ་ཞེས་བརྗོད་པ། །དེ་ཡི་དམ་ཚིག་རྡོ་རྗེ་སྟེ། །སྙིང་པོ་ཐམས་ཅད་སྒྲུབ་བྱེད་པའོ། །དེ་ལ་དཀྱིལ་འཁོར་གྱི་བཤད་པའི་རྒྱུད་ནི། ཅི་ལྟར་གནས་དང་ ཅི་ལྟར་དུས། །ཅི་ལྟར་འཇིག་རྟེན་ཅི་ལྟ་བུ། །འཁོར་ནི་དགོད་པར་བྱ་བ་སྟེ། །དེ་ལྟ་བུ་ཡི་དཀྱིལ་འཁོར་འདྲི། །དེ་ནས་དཀྱིལ་འཁོར་ཐམས་ཅད་དུ་ཞུགས་པའི་རྣམ་པར་སྨིན་པའི་རྒྱུད་ནི། རྡོ་རྗེ་སེམས་སོགས་སེམས་དཔའ་ཡི། །འཁོར་བཅས་དེ་ཚེ་དཀྱིལ་འཁོར་དུ། །ཞུགས་ པའི་བསོད་ནམས་ཅི་འདྲ་བ། །དེ་ལྟར་བྲིས་པའང་དེ་དང་འདྲ། དེ་ནས་རིགས་ཐམས་ཅད་ཀྱི་འཁོར་ལོའི་ཁྱད་པར་གྱི་རྒྱུད་ནི། རྡོ་རྗེ་འཁོར་ལོ་བསྟན་པ་བཞིན། །ལྕགས་ཀྱི་འཁོར་ལོ་དམ་པ་སྟེ། །འབར་བའི་འཁོར་ལོ་དེ་བཞིན་དུ། །པདྨ་འདབ་བརྒྱད་ནོར་བུ་ཆེ། །དེ་ནས་དཀྱིལ་འཁོར་
- 197a
ཐམས་ཅད་སྒྲུབ་པའི་རྒྱུད་ནི། དཀྱིལ་འཁོར་བརྟག་པ་བྱས་ནས་ནི། །ནང་གི་རིམ་པར་ཞུགས་བྱ་སྟེ། །དཀྱིལ་འཁོར་དག་ལ་ཛཿཧཱུྃ་བཾ། །ཧོཿཔྲ་སིད་དྷྱ་མྃ་བརྗོད་བྱ། །དེ་ནས་རྡོ་རྗེ་སེམས་དཔའ་ཉིད་རྒྱུད་ནི། །སངས་རྒྱས་ལ་སོགས་འགྲོ་ཀུན་གྱི། །ཐམས་ ཅད་བདག་ཉིད་བཅོམ་ལྡན་མཆོག །སེམས་ཅན་འབྱུང་ཕྱིར་སེམས་དཔའ་སྟེ། །རྡོ་རྗེ་སེམས་དཔའ་རབ་ཏུ་གྲགས། །དེ་ནས་དམ་ཚིག་ཆེན་པོའི་དེ་ཁོ་ན་ཉིད་བཤད་པའི་རྒྱུད་ནི། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་ བདག་ཉིད། །འཁོར་བ་མྱ་ངན་འདས་དེ་བཞིན། །དེ་ནས་ཐོག་མ་དང་ཐ་མ་མེད་པའི་དེ་ཁོ་ན་ཉིད་བཤད་པའི་རྒྱུད་ནི། ཐོག་མཐའ་མེད་པ་ཐམས་ཅད་ནི། །ནམ་མཁའ་འབྱུང་བ་ཆེན་པོའི་གནས། །ནམ་མཁའ་སྐྱེ་བ་སྐྱེ་མེད་ཕྱིར། །རྡོ་རྗེ་སེམས་དཔའ་དེ་བཞིན་ནོ། །དེ་ནས་ བཅོམ་ལྡན་འདས་རབ་ཏུ་དགའ་བའི་བཤད་པའི་རྒྱུད་ནི། རབ་ཏུ་དགའ་ཕྱིར་ཉོན་མོངས་ཏེ། །འགྲོ་བ་ཐམས་ཅད་བདེ་འདོད་པ། །དེ་ལ་བདེ་བ་རྣམ་དག་ཕྱིར། །སྲིད་གསུམ་སྔ་རོལ་བཅོམ་ལྡན་བྱུང་། །དེ་ནས་དང་པོའི་སྙིང་པོའི་དེ་ཁོ་ན་ཉིད་བཤད་པའི་རྒྱུད་ནི། ཆགས་པ་ཀུན་ ལ་ཆགས་པ་ཆེ། །འདོད་ལྡན་ཐམས་ཅད་སད་པར་བྱེད། །ཆགས་པ་འབར་བ་དྲི་ཟ་ཡི། །སྙིང་པོ་ཕྱག་ན་རྡོ་རྗེའོ། །དེ་ནས་ཡི་གེ་ཧཱུྃ་གི་གླུ་བླང་བའི་རྒྱུད་ནི། གླུ་ལས་ཆགས་པ་དགའ་ལས་འདོད། །རབ་ཏུ་དགའ་ལས་ཐམས་ཅད་འབྱུང་། །ཐམས་ཅད་འབྱུང་བར་གྲུབ་པའི་ཕྱིར། ། བསྐལ་པ་དང་པོར་བཅོམ་ལྡན་གསུངས། །དེ་ནས་ཡི་གེ་ཧཱུྃ་གེ་བཟླས་པའི་དོན་གྱི་བཤད་པའི་རྒྱུད་ནི། །མྱུར་དུ་ཐམས་ཅད་རྗེས་ཆགས་པས། །དངོས་གྲུབ་ཐམས་ཅད་རྗེས་སུ་ཆགས། །རྗེས་སུ་ཆགས་པར་བྱེད་མཆོག་ནི། །སྙིང་པོའི་བཟླས་པའི་དོན་ཡིན་ནོ། །དེ་ནས་རྡོ་རྗེ་ སེམས་རྒྱུད་ནི། །གླུ་རྣམས་ཅི་ལྟར་ཁྲོ་བོ་ནི། །བསྡུས་ནས་ཀུན་དུ་འཇུག་པ་ན། །རྡོ་རྗེ་ཐོག་ནི་བརྟན་གྱུར་པ། །དེ་བཞིན་རྡོ་རྗེ་བསྡུས་པའོ། །དེ་ནས་རྡོ་རྗེ་སེམས་དཔའ་འབྱུང་བ་ཤེས་པའི་རྒྱུད་ནི། ཐམས་ཅད་བདག་ཉིད་སེམས་དཔའ་ནི། །བདག་གི་བདག་ཉིད་ལ་ཡང་
- 197b
གནས། །རྡོ་རྗེ་སེམས་དཔའ་དངོས་སུ་ནི། །མྱུར་དུ་ཐམས་ཅད་ལ་ཡང་ཞུགས། །དེ་ནས་དེ་བཞིན་གཤེགས་པ་འབྱུང་བ་ཤེས་པའི་རྒྱུད་ནི། འདོད་ལས་ཆགས་པ་དགའ་ལས་བདེ། །བདེ་ལས་སྡིག་པ་སྡིག་ལས་སྡུག །སྡུག་ལས་ཏིང་འཛིན་ཤིན་ཏུ་བརྟན། ། རྡོ་རྗེ་ཉིད་ལས་སངས་རྒྱས་འབྱུང་། །དེ་ནས་དེ་བཞིན་གཤེགས་པའི་རིགས་ལ་སོགས་པ་འབྱུང་བ་ཤེས་པའི་རྒྱུད་ནི། དེ་བཞིན་གཤེགས་པའི་རིགས་དེ་ཉིད། །དེ་ཉིད་རྡོ་རྗེ་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ནོར་བུའི་རིགས་མཆོག་བཤད། །དེ་ནས་ མངོན་པར་བྱང་ཆུབ་པ་ཤེས་པའི་རྒྱུད་ནི། རང་སེམས་སོ་སོར་རྟོགས་པ་ནི། །བྱང་ཆུབ་སེམས་ནི་ཡང་དག་འབྱུང་། །རྡོ་རྗེ་ཉིད་ཕྱིར་སངས་རྒྱས་ཉིད། །བདག་ཉིད་སངས་རྒྱས་རབ་ཏུ་བསྒོམ། །དེ་བཞིན་གཤེགས་པ་བདུད་ཉིད་དུ་ཤེས་པའི་རྒྱུད་ནི། །རང་སེམས་ཉིད་ནི་བདུད་ ཉིད་དེ། །སེམས་ཉིད་དེ་བཞིན་གཤེགས་པ་ཡིན། །རང་གི་སེམས་ནི་འདུལ་བའི་ཕྱིར། །སངས་རྒྱས་བདུད་ཉིད་དུ་ནི་འབྱུང་། །དེ་ནས་རྟོག་པ་ཐམས་ཅད་སྒྲུབ་པ་ཤེས་པའི་རྒྱུད་ནི། །རྟོག་པ་ཀུན་ལ་གྲུབ་བྱ་གང་། །རྒྱུ་བ་དང་ནི་མི་རྒྱུ་ཡིན། །རང་གི་ལྷ་ཡི་རྣལ་འབྱོར་གྱིས། ། དེ་དག་ཐམས་ཅད་བསྒྲུབ་པར་བྱ། །དེ་ནས་དང་པོའི་སྙིང་པོ་སྒྲུབ་པ་ཤེས་པའི་རྒྱུད་ནི། བཟླས་པའི་དོན་ཤེས་ནུས་པ་ཡིས། །རྡོ་རྗེ་སེམས་དཔའ་རབ་བསྒྲུབ་སྟེ། །ཅི་སྲིད་འདོད་པའི་བཟླས་པ་མཆོག །དངོས་གྲུབ་ཆེན་པོའི་བདེ་བ་སྟེར། དེ་ནས་སྙིང་པོ་དང་། ཕྱག་རྒྱ་དང་ སྔགས་དང་། རིག་པ་ཤེས་པ་སྒྲུབ་པའི་རྒྱུད་ནི། སེམས་དཔའ་གང་གི་སྙིང་པོ་དང་། །ཕྱག་རྒྱ་སྔགས་དང་རིག་པ་དང་། །བཟླས་པའི་དོན་དུ་སེམས་དཔའ་ཆེ། །བདག་ཉིད་དམ་ནི་བསྒྲུབ་བྱ་བ། །དེ་ནས་དངོས་གྲུབ་ཤེས་པའི་རྒྱུད་ནི། རྡོ་རྗེ་སེམས་དཔའི་དངོས་གྲུབ་ ཆེ། །དེ་བཞིན་དེ་བཞིན་གཤེགས་ཀུན་གྱི། །རྡོ་རྗེ་སེམས་དཔའ་སེམས་དཔའ་ཉིད། །ལས་ཀུན་མཆོག་གི་དངོས་གྲུབ་ཕྱིར། །དེ་ནས་བསོད་ནམས་མེད་པ་རྣམས་ཀྱི་དངོས་གྲུབ་གྲུབ་པ་ཤེས་པའི་རྒྱུད་ནི། ཅི་འདོད་འཁོར་ལོ་བྲིས་ནས་ནི། །ཅི་ཡང་རུང་བའང་ཐལ་
- 198a
བས་ཀྱང་། །སེམས་དཔའ་ཆེན་པོ་བཞག་ནས་ནི། །ཉིན་ཞག་བཞིར་ནི་བསྒྲུབ་པར་བྱ། །དེ་ནས་སློབ་དཔོན་ཉིད་ཀྱི་གྲུབ་པ་ཤེས་པའི་རྒྱུད་ནི། །བདེ་བ་ཆེན་པོ་རྡོ་རྗེ་ཡི། །གསང་མཆོག་དམ་ཚིག་གྲོང་ཁྱེར་དུ། །ཅི་བཞིན་རང་ཉིད་རབ་ཞུགས་ ཏེ། །བདུད་རྩིའི་ཆུ་ཡིས་དབང་བསྐུར་བྱ། །དེ་ནས་མེ་ཏོག་ལ་སོགས་པའི་མཆོད་པ་འབུལ་བའི་ཤེས་པའི་རྒྱུད་ནི། རྡོ་རྗེ་ཅན་ལ་མཆོད་པ་ཀུན། །དེ་བཞིན་གཤེགས་པའི་རིགས་ལ་དཀར། །རྡོ་རྗེ་བདག་ཉིད་ནག་པོ་སྟེ། །དམར་པོ་པདྨ་ནོར་བུ་སེར། །དེ་ནས་ དབུལ་བ་ཤེས་པའི་རྒྱུད་ནི། །རྫོགས་པ་འམ་ནི་མ་ཚང་བ། །ཡང་ན་ཇི་ལྟར་རྙེད་པ་ནི། །རྡོ་རྗེ་གར་སོགས་མཆོད་པ་ཡིས། །རྟག་ཏུ་ཐམས་ཅད་འགྲུབ་པར་འགྱུར། །དེ་ནས་དུས་ཀྱི་མཆོད་པ་ཤེས་པའི་རྒྱུད་ནི། །དྲུག་ལྡན་ལ་སོགས་སྙན་པའི་གླུ། །གླུ་ནི་ཐམས་ཅད་ ཅི་འདོད་པས། །རྡོ་རྗེ་འབྱེད་མ་ལ་སོགས་འགྲོལ། །མཆོད་པ་དག་ནི་རབ་ཏུ་བྱ། །དེ་ནས་གསང་བའི་མཆོད་པ་ཤེས་པའི་རྒྱུད་ནི། རྡོ་རྗེ་གར་བཅས་མཆོད་པ་ནི། །གོ་རིམས་ཇི་ལྟ་བ་བཞིན་དུ། །བཟླས་པའི་དོན་གྱིས་མ་བརྗོད་ཀྱང་། །མཆོག་གི་གྲུབ་པ་འགྲུབ་པར་ འགྱུར། །དེ་ནས་སྡིག་པ་ཆེན་པོ་བྱེད་པའང་གྲུབ་པ་ཤེས་པའི་རྒྱུད་ནི། །དཀྱིལ་འཁོར་ལ་ནི་མ་ཞུགས་ཀྱང་། །ཚུལ་ཁྲིམས་འཆལ་པ་ལ་སོགས་ཀྱི། །ཏིང་ངེ་འཛིན་གྱི་སྟོབས་ཀྱིས་ནི། །སྡིག་པ་ཀུན་ལས་གྲོལ་བར་འགྱུར། །དེ་ནས་དངོས་གྲུབ་མི་ཐོབ་པའི་རྒྱུ་ཤེས་ པའི་རྒྱུད་ནི། ཆགས་པ་སྨད་པར་མི་བྱ་སྟེ། །རྣམ་དག་དེ་བཞིན་བདེ་བ་སྟེ། །བཅོམ་ལྡན་འདས་ཀྱང་ཆགས་པ་ཆེ། །འདི་མ་དག་པས་འགྲུབ་མི་འགྱུར། །དེ་ནས་མཆོག་གི་དངོས་གྲུབ་སྒྲུབ་པ་ཤེས་པའི་རྒྱུད་ནི། ཇི་བཞིན་ཡུལ་དང་ལྡན་གྱུར་ནས། །མཆོག་གི་དངོས་ གྲུབ་བསྒྲུབ་པར་བྱ། །རྟོག་པ་ཀུན་ལ་རྣལ་འབྱོར་འདི། །ཚེ་འདི་ཉིད་ལ་སྒྲུབ་པར་བྱེད། །བདེ་བ་ཆེན་པོ་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོའི་རྡོ་རྗེ་རིན་པོ་ཆེ་རིན་པོ་ཆེ་ལས་རྟོག་པ་ཐམས་ཅད་ཀྱི་རྒྱུད་ཕྱི་མའི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རྟོག་པ་དེ་
- 198b
བཞིན་གཤེགས་པ་ཐམས་ཅད་ཀྱི་རྡོ་རྗེ་གསང་བ་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་རྡོ་རྗེ་རིན་པོ་ཆེ་དེ་བཞིན་གཤེགས་པ་ཐམས་ཅད་ཀྱི་ཆོ་ག་གཟིགས་པའི་ཡེ་ཤེས་ཀྱི་དབང་ཕྱུག་གི་རྡོ་རྗེའི་པདྨ་དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་པའི་མཛད་པས་ ཕྲིན་ལས་དམ་པའི་ཆོ་ག་རྒྱས་པའི་རྡོ་རྗེས་ཐམས་ཅད་ལ་ཁྱབ་པ་མ་ལུས་ཤིང་ལུས་པ་མེད་པའི་རྡོ་རྗེའི་ཁམས་བརྟན་པའི་དངོས་གྲུབ་ཀྱི་ཆོ་ག་རྒྱས་པ་ནམ་མཁའི་ཁམས་ཀྱི་མཐར་ཐུག་པར་ཆོས་ཀྱི་དབྱིངས་སྤྲོ་བ་ཐམས་ཅད་ཁྱབ་པའི་དེ་བཞིན་གཤེགས་པ་ཐམས་ཅད་ཀྱིས་འཁོར་ ལོ་མངོན་པར་མཁྱེན་པར་མཛད་ནས་དང་པོའི་སྙིང་པོའི་གསང་བའི་དེ་ཁོ་ན་ཉིད་ཀྱི་རྡོ་རྗེའི་སྒྲུབ་པའི་རྒྱུད་འདི་གསུངས་སོ། །ཅི་སྲིད་འཁོར་བའི་གནས་ལ་ཞུགས། །དེ་སྲིད་སེམས་ཅན་གདོན་པར་མཛད། །མྱ་ངན་འདས་བཞུགས་གཟི་བརྗིད་ཅན། །སེམས་ཅན་དོན་ནི་ནུས་ པ་མིན། །དེ་ཕྱིར་སེམས་དཔའ་དམ་པ་རྣམས། །འཁོར་བ་སྲིད་དུ་འཁོར་བར་ཞུགས། །སེམས་ཅན་དོན་ནི་མངོན་པར་བཞེད། །ཐམས་ཅད་དག་པའི་མཆོག་ཆོས་ཅན། །དེ་བཞིན་གཤེགས་པས་མི་འདུལ་བས། །སེམས་ཅན་དོན་མི་མཛད་པ་སྟེ། །འདིར་ནི་རབ་ གྲུབ་དངོས་གྲུབ་མཆོག །དུས་ཀུན་དུ་ནི་ཐམས་ཅད་དུ། །རྡོ་རྗེ་འཆང་ཆེན་ལ་སོགས་པ། །འདི་ལྟར་བསོད་ནམས་རྣམ་སྨིན་གྱིས། །ཀུན་ལ་མཐོང་བ་ལ་སོགས་ཀྱིས། །རང་གི་ལས་ཀྱིས་མཛད་མི་སྤྱོད། །དཀྱིལ་འཁོར་ལ་ནི་མ་ཞུགས་ཀྱང་། །སྲིད་པ་འདི་ལ་མྱུར་ འགྲུབ་འགྱུར། །ཤིན་ཏུ་མཐོང་བ་ལ་སོགས་ཀྱིས། །སེམས་ཅན་ཐམས་ཅད་རབ་སྩོལ་མཛད། །ཀུན་ནས་དུས་ཀུན་ཐམས་ཅད་ལ། །དངོས་གྲུབ་ཐམས་ཅད་རབ་སྩོལ་འགྱུར། །རྒྱལ་པོ་རྡོ་རྗེ་འཆང་ཆེན་པོ། །སྲིད་པའི་དབང་ཕྱུག་ཀུན་གྱི་གཙོ། །དེ་ཕྱིར་བསྒྲུབ་བྱ་ འདི་བཤད་བྱ། །དངོས་གྲུབ་ཤིན་ཏུ་རྟག་པའོ། །གང་གིས་སྲིད་པ་འདི་ཉིད་དུ། །ཤིན་ཏུ་རྟག་པའི་དངོས་གྲུབ་ཐོབ། །ལུགས་མ་འམ་ནི་བརྡུངས་པའམ། །རི་མོར་བྲིས་པའམ་འདུས་བྱས་པའི། །ཕྱག་ན་རྡོ་རྗེའི་སྐུ་གཟུགས་ནི། །ཅི་བཞིན་བཤད་པར་རབ་གཞུག་
- 199a
བྱའོ། །བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་དེ་ཁོ་ན་ཉིད་སྒྲུབ་པའི་དངོས་གྲུབ་ཀྱི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་ཕྱག་རྒྱའི་ཡེ་ཤེས་ཀྱི་སླར་ཡང་ཕྱག་རྒྱ་ཐམས་ཅད་སྒྲུབ་པའི་དངོས་གྲུབ་ཀྱི་རྒྱུད་འདི་ གསུངས་སོ། །ཉིན་རེ་སྔ་རོལ་དུས་ཅི་བཞིན། །དང་པོའི་རྡོ་རྗེ་བདེ་བ་ཆེ། །འདིས་ནི་རྟག་པ་ཐམས་ཅད་ལ། །ཕྱག་རྒྱ་ཐམས་ཅད་མདོར་བསྡུས་པས། །དམ་ཚིག་ཡང་དག་བཅིངས་ནས་གྲུབ། །ཕྱི་ནས་མ་བསྒྲུབས་གྲུབ་པར་འགྱུར། །དེ་ནས་བཅོམ་ལྡན་འདས་ཀྱིས་རྡོ་རྗེ་ ཆོས་ཀྱི་དེ་ཁོ་ན་ཉིད་ཀྱི་གསང་བའི་སྔགས་སྒྲུབ་པ་འདི་གསུངས་སོ། །ལངས་པའམ་ནི་འདུག་པའམ། །གང་དང་དེར་ནི་གནས་པའམ། །ཐམས་ཅད་རྗེས་ཆགས་རྣལ་འབྱོར་གྱིས། །དངོས་གྲུབ་ཐམས་ཅད་ཐོབ་པར་འགྱུར། །དེ་ནས་བཅོམ་ལྡན་འདས་ཀྱིས་ལས་ཀྱི་ གསང་བའི་དེ་ཁོ་ན་ཉིད་ཀྱི་རྒྱུད་འདི་གསུངས་སོ། །གསང་བའི་གར་མཆོག་མཆོད་པའམ། །ཡང་ན་མཆོད་པ་ཅི་བདེ་བར། །བྱས་ཏེ་མགོན་པོ་བསྒྲུབ་བྱས་ན། །མཆོག་གི་དངོས་གྲུབ་མྱུར་དུ་འཐོབ། །དེ་ནས་རང་གི་ཕྱག་རྒྱས་བདག་ཉིད་བསྒྲུབ་པའི་རྒྱུད་ནི། ཕྱག་རྒྱ་ ཆེན་པོ་མཉམ་གཞག་སྟེ། །རང་གི་སྙིང་པོས་ལན་ཅིག་བསྒྲུབ། །བརྟན་ཞིང་ཤིན་ཏུ་དགྱེས་ཀུན་ཆགས། །ཤིན་ཏུ་དགྱེས་གྱུར་བདག་པོ་གྲུབ། །དེ་ནས་ཡི་གེ་ཧཱུྃ་གི་གླུ་བླང་བའི་གྲུབ་པའི་རྒྱུད་ནི། རི་བྷི་ད་སོགས་རྒྱན་དང་ལྡན། །ཅི་ནུས་པ་དག་ཅི་འདོད་པ། །དྲི་ཟ་དང་ པོ་བླངས་ནས་ནི། །ཡི་གེ་ཧཱུྃ་གིས་གྲུབ་པར་འགྱུར། །ཞེས་བཅོམ་ལྡན་འདས་ཆགས་པ་ཆེན་པོ་དང་པོའི་རྡོ་རྗེ་སེམས་དཔའ་རྡོ་རྗེ་འཆང་ཆེན་པོས་གསུངས་སོ། །དེ་ཁོ་ན་ཉིད་ཆེན་པོའི་གསང་བའི་དངོས་གྲུབ་བསྒྲུབ་པའི་རྒྱུད་དོ།། །།དེ་ནས་རྟོག་པ་ཐམས་ཅད་ཀྱི་ལས་ཀྱི་ཕྱག་ རྒྱ་བཤད་པར་བྱའོ་ཞེས་བྱ་བ་བཅོམ་ལྡན་འདས་ཐོག་མ་དང་ཐ་མ་མེད་པའི་ཕྲིན་ལས་ཅན་རྡོ་རྗེ་སེམས་དཔས་གསུངས་སོ། །ཤིན་ཏུ་རིང་བའི་ཚེ་འཕེལ་བ་ནི་བདེ་བ་ཆེན་པོའི་རྡོ་རྗེ་ཆོས་སོ། །ཤིན་ཏུ་གཞོན་པའི་ན་ཚོད་འཕེལ་བ་ནི་བདེ་བ་ཆེན་པོའི་རྡོ་རྗེ་བཅུད་ཀྱིས་ལེན་གྱིས་སོ། །གཟུགས་
- 199b
ཆེན་པོ་དང་གཟི་བརྗིད་ཆེན་པོ་འཕེལ་བ་ནི་བདེ་བ་ཆེན་པོའི་རྡོ་རྗེའི་གཟུགས་ཀྱི་གཟི་བརྗིད་ཀྱིས་སོ། །འདུ་བྱེད་ཆེན་པོ་ཐམས་ཅད་འཕེལ་བ་ནི་བདེ་བ་ཆེན་པོ་རྡོ་རྗེ་འདུ་བྱེད་ཆེན་པོས་སོ། །སེམས་ཅན་ཐམས་ཅད་ཀྱི་བདག་ཉིད་ཐམས་ཅད་བསྲུང་བ་ནི་བདེ་བ་ཆེན་པོ་རྡོ་རྗེ་བསྲུང་ བས་སོ། །ཕྱོགས་ཐམས་ཅད་དང་མཚམས་དང་དཀྱིལ་འཁོར་བཅིང་བ་ནི་བདེ་བ་ཆེན་པོ་རྡོ་རྗེ་བསྐོར་བས་ཏེ། ཐམས་ཅད་རྡོ་རྗེ་ཆེན་པོའི་ངོ་བོ་ཉིད་ཁྲོ་བོའི་རྒྱལ་པོ་ཆེན་པོ་རྡོ་རྗེས་ཀྱང་འཇུག་པར་མི་ནུས་ཤིང་མི་ཕྱེད་པར་འགྱུར་རོ། །སྡིག་པ་ཐམས་ཅད་སྲུང་བ་ནི་བདེ་བ་ཆེན་པོའི་ རྡོ་རྗེ་བྱིན་གྱིས་བརླབས་པས་སོ། །བདག་ཉིད་ཀྱི་དངོས་གྲུབ་ཐམས་ཅད་དམ་གཞན་དག་རྡོ་རྗེར་བྱེད་པ་ནི་བདེ་བ་ཆེན་པོའི་རྡོ་རྗེ་གོ་ཆས་སོ། །འཐབ་མོ་ཐམས་ཅད་ལས་རྣམ་པར་རྒྱལ་བ་ནི་བདེ་བ་ཆེན་པོའི་རྡོ་རྗེ་རྒྱལ་མཚན་མཆོག་གི་དཔུང་རྒྱན་གྱིས་སོ། །འཐབ་མོ་སྲུང་བ་ནི་ བདེ་བ་ཆེན་པོའི་གཞན་གྱིས་མི་ཐུབ་པས་སོ། །གཞན་གྱི་དཔུང་ཐམས་ཅད་གཞིག་པ་ནི་རྡོ་རྗེ་བདེ་བ་ཆེན་པོའི་རྡོ་རྗེ་འཛིན་པར་བྱེད་པས་སོ། །གཞན་གྱི་དཔུང་ཉམས་པ་དང་ལྡང་བ་དང་ལྟུང་བ་དང་གསོད་པ་ནི་བདེ་བ་ཆེན་པོའི་རྡོ་རྗེ་གློག་བསྐོར་བས་སོ། །རིམས་ཐམས་ཅད་ལ་ སོགས་པའི་ནད་ཐམས་ཅད་དང་ནད་ཆེན་པོ་ཞི་བ་ནི་བདེ་བ་ཆེན་པོའི་རྡོ་རྗེ་འཕྲོག་པས་སོ། །དུག་ཐམས་ཅད་གཞིག་པ་དང་། དུག་མེད་པར་བྱ་བ་ནི་བདེ་བ་ཆེན་པོའི་རྡོ་རྗེ་ཕྱག་རྒྱའི་ལས་ཀྱིས་སོ། །གདོན་ཐམས་ཅད་ལས་དགྲོལ་བ་ནི་བདེ་བ་ཆེན་པོ་རྡོ་རྗེའི་འབྱུང་པོ་བསྐྲད་པས་སོ། ། མ་མོ་དང་མཁའ་འགྲོ་མ་དང་གདོན་ཐམས་ཅད་དགྲོལ་བ་ཆེན་པོ་དང་གཞོམ་པ་དང་སྙིང་གཞན་དབྱུང་བ་དང་ཤི་བ་གསོ་བ་དང་། ཚེ་འཕེལ་བ་དེ་ཤིན་ཏུ་སྲུང་བ་རྣམས་ནི་བདེ་བ་ཆེན་པོའི་རྡོ་རྗེ་ཕྱག་རྒྱའི་ལན་གྱིས་སོ། །ཐམས་ཅད་དབབ་པ་དང་གཡོ་བ་དང་འཆིང་བ་དང་གར་བྱེད་དུ་གཞུག་ པ་དང་གླུ་ལེན་དུ་གཞུག་པ་དང་སྔ་མ་འབྱུང་བ་སོ་སོར་བརྟན་པ་དང་རྨད་དུ་བྱུང་བ་དང་ཆོ་འཕྲུལ་བསྟན་པ་དང་། བདེན་པ་ཐམས་ཅད་པ་ཐམས་ཅད་སྨྲར་གཞུག་པ་དང་དགྲོལ་བ་དང་། བསྲུང་བ་དང་། སོས་སུ་བཅུག་པ་རྣམས་ནི་བདེ་བ་ཆེན་པོའི་རྡོ་རྗེ་དབབ་པས་སོ། །རྒྱུ་བ་དང་མི་
- 200a
རྒྱུ་བའི་དངོས་པོ་ཐམས་ཅད་ལ་ཡིད་ཀྱིས་འདོད་པའི་པྲ་དབབ་པ་ཐམས་ཅད་གྲུབ་པ་ནི་བདེ་བ་ཆེན་པོ་རྡོ་རྗེ་བྲ་དབབ་པས་སོ། །རང་གི་ལུས་དང་ངག་དང་ཡིད་རྡོ་རྗེས་མཐོང་བ་དང་ཐོས་པ་དང་སྨྲ་བ་དང་སྟོན་པའི་ཤེས་པ་གྲུབ་པ་ནི་བདེ་བ་ཆེན་པོའི་རྡོ་རྗེའི་བདག་ཉིད་ བསྒོམས་པས་སོ། །ཐམས་ཅད་ལས་འདས་པ་དང་། མ་འོངས་པ་དང་། ད་ལྟར་བྱུང་བ་ཐམས་ཅད་བཀའ་མཐོང་བའི་ཡི་གེ་སྣ་ཚོགས་པའམ། དངོས་པོ་སྣ་ཚོགས་པ་ཐམས་ཅད་ཀྱིས་རྣ་བའི་ཤེས་པ་རབ་ཏུ་འཇུག་པ་ནི་བདེ་བ་ཆེན་པོའི་རྡོ་རྗེ་ཐམས་ཅད་མཁྱེན་པས་སོ། ། གློག་དང་ཆར་པ་དང་ཐོག་དབབ་པ་ཐམས་ཅད་བཟློག་པ་དང་། སྤྲིན་གཞིག་པ་ནི་བདེ་བ་ཆེན་པོའི་རྡོ་རྗེ་ཁྲོ་བོའི་ལྟ་བས་སོ། །སའི་འོག་ཐམས་ཅད་ལས་སྔར་མ་བྱུང་བའི་འབྲུ་ལ་སོགས་པའི་འབྲས་བུ་འབྱུང་བ་དང་། ཉེ་བར་ལེན་པ་དང་། ཆུ་མེད་པའི་གནས་ལས་ཆུའི་དངོས་པོ་ འབྱུང་བ་དང་ཉེ་བར་ལེན་པ་དང་། མུན་པ་ཆེན་པོར་སྣང་བ་ཆེན་པོ་བསྐྱེད་པ་དང་ཉེ་བར་ལེན་པ་དང་རླུང་ཐམས་ཅད་ལ་བཀའ་བསྒོ་བ་དང་ཉེ་བར་ལེན་པ་དང་ནམ་མཁའ་ཐམས་ཅད་ལས་ཡིད་ཀྱིས་འདོད་པའི་དངོས་པོ་ཐམས་ཅད་མཐོང་བ་དང་ཉེ་བར་ལེན་པ་ནི་བདེ་བ་ཆེན་པོའི་རྡོ་རྗེ་དབྱིངས་ཀྱི་ དབང་ཕྱུག་མས་སོ། །ཐམས་ཅད་གཞོམ་པ་དང་རེངས་པ་དང་དྲལ་བ་དང་རྨུགས་པ་དང་གཉིད་ལོག་པར་བྱ་བ་དང་རྒྱས་གདབ་པ་དང་ལྟུང་བ་དང་རྨོངས་པ་དང་གསད་པ་དང་ཕྱིར་ལྡོག་པ་ནི་བདེ་བ་ཆེན་པོའི་གདུག་པའི་རྡོ་རྗེའི་ཕྱག་རྒྱས་སོ། །ཐམས་ཅད་རྗེས་སུ་ཆགས་པ་དང་དགུག་ པ་དང་གཞུག་པ་དང་དབབ་པ་དང་བཅིང་བ་དང་བཀྲོལ་བ་དང་དྲལ་བ་དང་ལྟུང་བ་དང་ལྟུང་བ་བསླང་བ་དང་འདྲེན་པ་དང་བྲན་དུ་བྱེད་པ་དང་མངག་གཞུག་བཀའ་བསྒོ་བ་བྱེད་པ་དང་ཐམས་ཅད་ཚུར་དྲང་བ་དང་ཕར་བཏང་བ་དང་གསད་པ་དང་སླར་གསོ་བ་ལ་སོགས་པའི་ལས་ཐམས་ཅད་བྱེད་པ་དང་དབང་དུ་ བྱེད་པའི་སྒྲུབ་པ་ནི་བདེ་བ་ཆེན་པོའི་རྡོ་རྗེ་ཐམས་ཅད་སྒྲུབ་པས་སོ། །རིགས་ཐམས་ཅད་ཀྱི་མཆོག་གི་དངོས་གྲུབ་ལ་སོགས་པའི་མཆོག་གི་དངོས་གྲུབ་ཐམས་ཅད་དང་། མཆོག་གི་དབང་བསྐུར་བ་ལ་སོགས་པ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་ཐམས་ཅད་
- 200b
རྗེས་སུ་ཆགས་པ་ལ་སོགས་པའི་བདེ་བ་དང་། ཡིད་བདེ་བ་ཐམས་ཅད་རབ་ཏུ་གཞུག་པ་དང་། མཆོད་པ་ཆེན་པོ་ཐམས་ཅད་ལ་སོགས་པའི་ལས་ཐམས་ཅད་མྱུར་དུ་གྲུབ་པའི་ཆོ་ག་རྒྱས་པ་ནི་བདེ་བ་ཆེན་པོའི་རྡོ་རྗེ་མཆོག་གི་དངོས་གྲུབ་ཀྱིས་སོ། །དེ་ལ་བདེ་བ་ཆེན་པོའི་རྡོ་རྗེ་ གསང་བའི་དམ་ཚིག་གི་དང་པོའི་མཆོག་གི་དམ་ཚིག་གི་ལས་ཀྱི་ཕྱག་རྒྱའི་རྒྱུད་ནི་འདི་ཡིན་ཏེ་བདེ་བ་ཆེན་པོའི་རྡོ་རྗེ་ནི་རྡོ་རྗེ་སེམས་དཔའི་ཚེ་སྟེར་བའོ། །འདིའི་ལས་ཀྱི་ཕྱག་རྒྱ་ཐམས་ཅད་བཅིང་བའོ། །དབུས་མའི་རྡོ་རྗེ་བཏུང་བར་བྱ། རྩེ་མོའི་འོད་ཟེར་བྱས་པས་གདོང་པ་ཡོངས་སུ་ སྦྱངས་ཏེ་གདོང་པར་དགྲོལ་བར་བྱའོ། །བདག་ཉིད་ལ་ཀུན་དུ་བསྐོར་ནས་སྙིང་གར་དགྲོལ་བར་བྱའོ། །གཙུག་ཏོར་དང་ཕྱོགས་ཐམས་ཅད་དང་དཀྱིལ་འཁོར་བསྐོར་བའོ། །སྙིང་ག་དང་ཡིད་ཀྱིས་རྒྱབ་དང་ཕྲག་པ་དང་། སྤྱི་བོ་དང་དཔྲལ་བར་བཞག་ལ་རྡོ་རྗེ་ཁུ་ཚུར་གཉིས་ཀྱིས་ཕྲེང་བ་ བཅིངས་ལ་གོ་ཆ་བྱ་སྟེ། མདུད་པ་བྱས་ནས་རྡོ་རྗེའི་གནས་རྣམས་སུ་སླར་ཡང་ཕྲེང་བ་བྱས་པས་རྒྱབ་ཏུ་མདུད་པ་བྱས་ཏེ་དར་དཔྱངས་བྱའོ། །སྙིང་ག་དང་དཔྲལ་བ་དང་མགྲིན་པ་དང་སྤྱི་བོར་གཞག་པར་བྱའོ། །དབུས་མའི་དར་མཆོག་གོ། །བྱ་བ་པའི་གྱེན་དུ་ཁ་བལྟས་པའི་དབུག་པ་དང་ འཇིག་པའི་གདོང་གིས་ལྟ་བའོ། །འབར་བ་བཞིའི་ཚུལ་གྱིས་འདོར་ཞིང་ཁྲོས་པའི་རང་གི་སྙིང་གར་བཅིངས་ཏེ་ཞི་བའི་ལྟ་བས་རྩེ་མོ་འཕྲོག་པར་བྱའོ། །ལྟ་བས་འཕྲོག་པར་བྱའོ། །ལྟ་བས་འཕྲོག་པར་བྱའོ། །དབབ་པས་མྱུར་དུ་དགྲོལ་བར་བྱའོ། །ཡོངས་སུ་བསྐོར་ནས་དཔྲལ་བར་བཞག་སྟེ། དབུས་མའི་ རྡོ་རྗེ་སོར་མོའི་རྩེ་མོ་གཉིས་བསྐྱོད་པར་བྱས་ན་ཅི་ལྟ་བ་བཞིན་དུ་ལས་བྱེད་པའི་སྙིང་གར་བཞག་སྟེ་དབུས་མ་རྡོ་རྗེའི་ལས་ནི་འདི་ལྟ་སྟེ། སྙིང་གར་སྟོད་པ་དང་སྐྱེད་པ་དང་འཆིང་བ་དང་གར་བྱེད་དུ་བཅུག་པ་དང་མགྲིན་པ་གསལ་བ་དང་རྡོ་རྗེ་རྩེ་མོ་བཙིར་བ་དང་ཁ་དབུབ་པ་དང་མགྲིན་པ་གསལ་ བ་དང་བཅིངས་པ་མྱུར་དུ་དགྲོལ་བ་དང་བསྲུང་བ་དང་བྱ་བ་པའི་ལས་སོ། །སྙིང་ག་ཁ་སྦྱོར་བསྐྱེད་པའོ། །ཉིན་རེ་ཞིང་སྔ་རོལ་དུ་ལན་ཅིག་ལུས་ཡོངས་སུ་སྦྱང་བ་དང་། མགྲིན་པ་གསལ་བའི་ངག་དང་སྙིང་གར་གཞག་པ་དང་ཕྱག་རྒྱ་ལ་ལྟ་བ་སྟེ། ཉིན་རེ་སྔ་རོལ་དུ་ལན་ཅིག་དབང་པོ་
- 201a
ཐམས་ཅད་ལ་ཀུན་དུ་བསྐོར་བར་བྱའོ། །དབུས་མ་རྡོ་རྗེས་བྱེད་པ་ནི་ཁྲོ་བོའི་རྡོ་རྗེའི་ལྟ་བས་སོ། །དབུས་མའི་རྡོ་རྗེའི་ལས་ནི་འོག་ནས་འབྱུང་སྟེ་ཉེ་བར་ལོངས་སྤྱོད་པ་དང་། ཐམས་ཅད་ལ་དགུག་པར་བྱེད་པ་དང་དབབ་པ་སྦྱིན་པ་དང་འབར་བའི་མེ་སྟག་བྱེད་པ་དང་ཉེ་བར་ལེན་ པ་དང་རླུང་གི་ཚུལ་དང་ནམ་མཁར་སྒོམ་པ་ལས་དུ་མའོ། །དབུས་མའི་རྡོ་རྗེའི་ལུས་ནི་ཕྱག་རྒྱས་གཞོམ་པ་དང་རྩེ་མོ་གཉིས་སྙིང་གར་བཙིར་བ་དང་སེན་མོ་བྲུད་པ་དང་མིག་འདེགས་པ་དང་བཙུམ་པ་དང་། སོར་མོ་མཉམ་པོས་སྙིང་གར་བཏེག་པ་དང་ལྟུང་བ་དང་སློང་བར་བྱེད་པ་དང་། ཕན་ ཚུན་རྡེག་པ་དང་རང་གི་སྙིང་གར་རང་བཞིན་དུ་གཞག་པའི་ལས་སོ། །དབུས་མའི་རྡོ་རྗེ་ལས་ནི་མདའ་སྟོད་པ་དང་ལྕགས་སྒྲོག་གཉིས་ཀྱིས་དགུག་པ་དང་གཡོན་པ་ལ་གཡས་པ་བཅུག་པ་དང་རྩེ་མོ་བསྐྱོད་པ་དང་གདུ་བུར་བཅིང་བ་དང་མྱུར་དུ་དགྲོལ་བ་དང་སོར་མོ་མཉམ་པོར་མྱུར་དུ་དྲལ་ བ་དང་ལྟུང་བར་བྱེད་པ་དང་འོག་ནས་བཏེག་པ་དང་གཡོན་པ་གཡས་པས་དྲང་བ་དང་། ལས་ཐམས་ཅད་ལ་སྦྱར་བར་བྱེད་པ་དང་འོག་ནས་བསྐྱོད་ཅིང་གྱེན་དུ་དྲང་བ་དང་ཚུར་འདྲེན་པ་དང་ཕར་གཏང་བ་དང་གཡོན་དང་གཡས་ཀྱིས་དྲག་པོར་འདེགས་པ་དང་རང་གི་སྙིང་གར་རྩེ་མོ་འདྲེན་པ་དང་། ལས་ཐམས་ཅད་ལ་ངེས་པར་སྦྱོར་བ་བྱེད་པའི་ལས་དང་སྙིང་གར་འཁོར་ལོ་གཞུག་པ་དང་དབང་བསྐུར་བའི་ཕྲེང་བ་དང་དར་དཔྱངས་འཆིང་བར་བྱེད་པ་དང་སྙིང་གར་ལས་དྲངས་ཏེ་བདེ་བ་ཚུར་འདྲེན་པ་ཐམས་ཅད་ཡོངས་སུ་སྦྱང་བ་དང་གར་གྱིས་བླངས་ཏེ་སྤྱི་བོར་དགྲོལ་བའི་ལས་སོ། །བདེ་བ་ ཆེན་པོ་རབ་གྲུབ་དང་། །ཆགས་པ་ཆེན་པོ་རྣམ་དག་ཕྱིར། །དོན་ཡོད་ཐོགས་མེད་སྣ་ཚོགས་པའི། །ཕྱག་རྒྱའི་རྒྱུད་ནི་རབ་ཏུ་བཤད། །རྡོ་རྗེ་འཛིན་པ་ཆེན་པོ་ཡིས། །སངས་རྒྱས་སྲས་བཅས་བདག་ཉིད་ཀུན། །སེམས་ཅན་ཐམས་ཅད་མྱུར་འགྲུབ་ཕྱིར། །དོན་ཡོད་དངོས་ གྲུབ་ཀུན་སྩོལ་བའོ། །དཀྱིལ་འཁོར་དག་ཏུ་མ་ཞུགས་པ། །སྡིག་པའི་ལས་ནི་ཀུན་དང་ལྡན། །དེ་དག་ཀྱང་ནི་གྲུབ་འགྱུར་ཏེ། །བཅིངས་པ་ཙམ་གྱིས་སྡིག་བྱང་ཕྱིར། །གང་ཞིག་ལེ་ལོ་ཉིད་ཀྱིས་སམ། །བརྩོན་འགྲུས་ལྡན་ཡང་མ་ཚང་བ། །དཀྱིལ་འཁོར་མེད་པའི་སེམས་
- 201b
ཅན་གང་། །སློབ་དཔོན་ཉིད་བྱིན་མ་བརླབས་དང་། །དེ་དག་གྲུབ་མཆོག་རྡོ་རྗེ་ཆེ། །རྡོ་རྗེ་སློབ་དཔོན་ཉིད་དུ་འགྱུར། །དོན་ཡོད་མཆོག་དང་སྣ་ཚོགས་པའི། །བཅིངས་པ་ཙམ་གྱིས་མྱུར་གྲུབ་བྱེད། །བསམ་པ་ཐམས་ཅད་ཡོངས་རྫོགས་པའི། །མཆོག་གི་དངོས་གྲུབ་ཀུན་ལ་ འཇུག །དང་པོ་འབྱུང་བའི་རྡོ་རྗེ་མཆོག །བདེ་བ་ཆེ་ལས་ཡང་དག་འབྱུང་། །དག་ཅིང་ཤིན་ཏུ་གྲུབ་པ་དང་། །འགྲོ་བ་ཐམས་ཅད་ལ་ཡང་ངོ་། །དེ་ནས་ཕྱག་རྒྱ་ཐམས་ཅད་སྒྲུབ་པའི་གསང་བའི་རྒྱུད་ནི། ལས་འདོད་ཐོག་མར་ཕྱག་རྒྱ་ནི། །སྐལ་བ་ཅི་བཞིན་སྙིང་ པོས་གྲུབ། །རང་གི་བདག་ཉིད་ངེས་སྦྱར་བྱ། །བདེ་བ་ཆེན་པོའི་རྡོ་རྗེ་གསང་བའི་རྟོག་པའི་རྒྱལ་པོ་ཆེན་པོ་ལས། བདེ་བ་ཆེན་པོ་ཐམས་ཅད་ཀྱི་རྡོ་རྗེའི་དམ་ཚིག་དོན་ཡོད་པའི་དངོས་གྲུབ་ཀྱི་མཆོག་ཅེས་བྱ་བརྒྱུད་ཕྱི་མའི་ཆོ་ག་རྒྱས་པ་ཡོངས་སུ་རྫོགས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡོངས་སུ་མཐར་ཐུག་པ་མེད་པའི་སྐུ་དང་གསུང་དང་ཐུགས་རྡོ་རྗེ་ཐམས་ཅད་ཀྱི་ལས་ཀྱི་སྦྱོར་བ་ནི། རྡོ་རྗེ་འཆང་བ་དང་བཅས་པ་རྣམས་ཀྱིས་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་རྟོག་པའི་རྒྱལ་པོ་ཆེན་པོ་འདིས་ སེམས་ཅན་གྱི་ཁམས་མ་ལུས་པ་ཀུན་དུ་ཁྱབ་ཅིང་སྤྲོ་བ་དང་དངོས་གྲུབ་ཐམས་ཅད་ཀྱི་ཆོ་ག་རྒྱས་པ། སྲིད་པ་ཐམས་ཅད་ཀྱི་རྩེ་མོའི་ཡོངས་སུ་མཐར་ཐུག་པའི་གསུང་རབ་ཡོངས་སུ་མཐར་ཐུག་པའི་དོན་དུ་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ལ་གསོལ་བ་བཏབ་པ་ཡིན་ནོ། ། རྡོ་རྗེའི་ནམ་མཁའ་ཆེན་པོ་ཡིས། །ཆོས་ཀྱི་དབྱིངས་ནི་སྤྲོ་བ་མཆོག །རྡོ་རྗེའི་ནམ་མཁའ་ཆེན་པོ་ཡི། །ཆོས་དབྱིངས་སྤྲོ་བའི་དངོས་གྲུབ་སྟེར། །རྟག་ཏུ་སངས་རྒྱས་ཐམས་ཅད་ནི། །རྡོ་རྗེ་འཆང་ཆེན་བཅས་པ་དང་། །རྡོ་རྗེ་འཆང་གི་ཐེག་པ་ནི། །ཡོངས་སུ་མཐར་ཐུག་ ནུས་པ་མིན། །ཨེ་མའོ་མངོན་ཞེན་སེམས་ཅན་དང་། །ལེ་ལོ་ཅན་དང་ལས་ཀུན་ལྡན། །ཐུགས་རྗེ་དམ་པའི་རྡོ་རྗེ་ཁྱོད། །བྱང་ཆུབ་སེམས་ནི་བླ་ན་མེད། །བདེ་བ་ཆེན་པོ་རབ་སྒྲུབ་དང་། །ཆགས་པ་ཆེན་པོ་རྣམ་དག་ཕྱིར། །རྟོག་པ་འདི་ནི་མཐར་ཐུག་པ། །རབ་ཏུ་སྒྲུབ་
- 202a
ཕྱིར་མཐར་ཐུག་བརྗོད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་གསན་ནས། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་རྡོ་རྗེ་སེམས་དཔའ་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ ལ་སྙོམས་པར་ཞུགས་ནས་འདི་གསུངས་སོ། །བདེ་བ་ཆེན་པོ་རབ་སྒྲུབ་དང་། །ཆགས་པ་ཆེན་པོ་རྣམ་དག་ཕྱིར། །ཐམས་ཅད་དགོངས་གྲུབ་དོན་དུ་ནི། །ཡོངས་སུ་མཐར་ཐུག་བྱིན་བརླབས་པའོ། །གང་གིས་ཚུལ་མཆོག་འདི་ནི་ཉན་འགྱུར་དང་། །གང་གིས་ཁྱིམ་ན་གསང་བ་ ཐམས་ཅད་གནས། །བདེ་ཆེན་མཆོག་གི་རྡོ་རྗེ་མཆོག་གསང་བའི། །དངོས་གྲུབ་ཚེ་འདིར་དེ་དག་རྣམས་ལ་བསྟན། །བརྟན་པ་ཉིད་ཕྱིར་འདུལ་བ་རང་མི་བྱེད། །སེམས་ཅན་དོན་དུ་རྒྱལ་བ་ལས་དག་ཕྱིར། །རྣམ་པར་སྦྱང་བར་མཛད་པ་འདི་ཡིན་ཏེ། །རྟོག་པ་འདི་ནི་བགེགས་མེད་ བདུད་རྣམས་མེད། །དངོས་གྲུབ་འཕེལ་མེད་མིན་པ་བྱིན་གྱིས་བརླབས། །བདུད་དང་བརྟན་མེད་ཉིད་ནི་བདག་མི་བྱེད། །བརྟན་པ་ཉིད་ཕྱིར་འདུལ་བ་རང་མི་བྱེད། །རྟོག་པ་ཆེན་པོའི་མཆོག་འདི་གང་བསྒྲུབ་པ། །མྱུར་དུ་དངོས་གྲུབ་མཆོག་ཕྱིན་བདག་བརྟན་འགྱུར། །བརྟན་ཞིང་རབ་བགྱིས་ བརྟན་པས་རྗེས་སུ་ཆགས། །བདེ་བ་ཆེན་པོ་ཀུན་བྱེད་ཤིན་ཏུ་རྒྱས། །ང་ཡི་དང་པོའི་སྙིང་པོ་གང་སྒྲུབ་པ། །དེ་ལ་ང་ནི་རྟག་ཏུ་དངོས་གྲུབ་སྟེར། །དེ་ནས་དེ་བཞིན་གཤེགས་པ་ཐམས་ཅད་འདུས་ནས་ལེགས་སོ་ཞེས་བྱ་བ་བྱིན་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། ། བདེ་བ་ཆེན་པོ་རྡོ་རྗེ་གསང་བ་ཞེས་བྱ་བའི་རྟོག་པའི་རྒྱལ་པོ་མཆོག་ཏུ་གྲུབ་པའི་རྒྱུད་ཕྱི་མ་ཡོངས་སུ་རྫོགས་སོ།། །།དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་འདི་ཉིད་སླར་ཡང་སྟོན་པར་མཛད་ཅིང་ཞལ་རབ་ཏུ་འཛུམ་པ་དང་། མཆོག་དང་པོའི་རྡོ་རྗེ་བདེ་ བ་ཆེན་པོ་རྡོ་རྗེ་བསྙེམས་པས་གསོར་ནས་རང་གི་ཐུགས་ཀར་བསྟོད་པའི་ཚུལ་དུ་འཛིན་ཅིང་མཆོག་ཏུ་གསང་ཞིང་མཆོག་ཏུ་གྲུབ་པ་དོན་ཡོད་ཅིང་ཐོགས་པ་མེད་པ་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་འདི་རྟོག་པ་ཐམས་ཅད་ཀྱི་སྡིག་པ་དང་སྒྲིབ་པ་དང་བདུད་ཐམས་ཅད་འདུལ་བར་བྱིན་གྱིས་བརླབ་པའི་
- 202b
དབང་གིས་མ་གྲུབ་པ་རྣམས་ཀྱང་མཆོག་དམ་པ་གྲུབ་པར་བྱེད་པ་དང་མཆོག་ཏུ་གསང་བ་དང་ཐོག་མ་དང་ཐ་མ་མེད་པའི་མཚོན་ཆ་མཆོག་དང་པོ་ཞེས་བྱ་བའི་རྟོག་པའི་རྒྱལ་པོ་དབང་ཕྱུག་ཆེན་པོའི་ཆེན་པོ་རྒྱུད་ཕྱི་མ་གསུངས་པ། དེ་ནས་ཐོག་མའི་གནས་ཉམས་དགའ། །ནམ་མཁའ་ཀུན་ལ་རབ་ ཏུ་གནས། །རིན་ཆེན་འོད་མཛེས་རབ་ཏུ་གསལ། །དྲི་མ་མེད་པའི་མདངས་ཀྱིས་བརྒྱན། །ཟུར་བཞི་པ་ལ་སྒོ་བཞི་པ། །སྒོ་ཁྱུད་རྣམས་ཀྱིས་རབ་ཏུ་བརྒྱན། །ཁ་ཁྱེར་གྱིས་ནི་ཡོངས་སུ་བསྐོར། །རྡོ་རྗེ་ལྷ་མོའི་ཚོགས་ཀྱིས་མཆོད། །གྲྭ་ཡི་ཕྱོགས་ནི་ཐམས་ཅད་དང་། །སྒོ་ ཁྱུད་ཀྱི་ནི་མཚམས་རྣམས་སུ། །ཟླ་བ་ཕྱེད་ནི་རབ་ཏུ་གནས། །རྡོ་རྗེ་རིན་ཆེན་འབར་བྱེད་པ། །རླུང་གིས་བསྐྱོད་པའི་རྩེ་མོ་མཆོག །དར་འཕན་དྲིལ་བུ་སྒྲ་སྒྲོགས་པ། །དྲ་བ་མེ་ལོང་ཏོག་མེ་ཏོག །མེ་ཏོག་ཆུན་པོའི་རྒྱན་གྱིས་བསྐོར། །བདེ་བ་ཆེན་པོ་རྡོ་རྗེ་ཆེ། །རྡོ་རྗེ་ཀུན་གྱིས་ ལེགས་སྦྱར་བ། །རྡོ་རྗེ་སེམས་དཔའི་བཞུགས་གནས་ཆེ། །སངས་རྒྱས་ཀུན་གྱིས་རྗེས་བསྟེན་པ། །བྱང་ཆུབ་སེམས་དཔའི་གནས་ཀྱི་མཆོག །རྡོ་རྗེ་འཛིན་པ་ཀུན་གྱི་གནས། །བདེ་བ་ཆེན་པོའི་རྡོ་རྗེ་ཆེ། །རྡོ་རྗེ་རིན་ཆེན་མཆོག་བྱ་བའི། །རྡོ་རྗེ་འཆང་ཆེན་བཞུགས་ནས་ནི། །བདེ་བ་ ཆེན་པོ་རྣམ་པར་བཞུགས། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །སེམས་ཅན་ཀུན་གྱི་སེམས་གང་ནི། །བརྟན་པའི་ཕྱིར་ནི་དཔའ་ཞེས་བྱ། །བརྟན་པར་ བཞག་པས་ཏིང་འཛིན་ཏེ། །ངེས་པ་ལས་ནི་རྡོ་རྗེར་གྱུར། །སེམས་དཔར་བྱིན་བརླབས་སྦྱོར་བ་ཡིས། །རྡོ་རྗེ་སེམས་དཔའ་ཉིད་དུ་འགྱུར། །དེ་ཉིད་བཅོམ་ལྡན་སྣ་ཚོགས་པ། །བྱང་ཆུབ་སྤྱོད་པའི་རྗེས་མཐུན་པ། །བདུད་དང་བདུད་ལས་རྒྱལ་བ་ཉིད། །བྱང་ཆུབ་སངས་རྒྱས་དེ་ཉིད་དོ། ། རྡོ་རྗེ་དྲག་པོ་མཐར་བྱེད་ཉིད། །ཕྱག་ན་རྡོ་རྗེ་ཉིད་ཀྱང་སྟེ། །དེ་ཉིད་དེ་བཞིན་གཤེགས་པའི་རིགས། །དེ་ཉིད་རྡོ་རྗེའི་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ནོར་བུའི་རིགས་བཟང་བཤད། །དེ་ཉིད་འདོད་ཆགས་བྲལ་བ་ཉིད། །འདོད་དང་གྲོལ་བ་དེ་ཉིད་དེ། །
- 203a
དུས་གསུམ་སྲིད་གསུམ་མཆོག་གསུམ་སྟེ། །འཇིག་རྟེན་གསུམ་མཆོག་ཁམས་གསུམ་པ། །མི་གཡོ་ཐམས་ཅད་མཆོག་དེ་ཉིད། །བསྟན་པ་སྲ་བ་ནོར་ཆེན་པོ། །རྒྱུ་བ་སེམས་ཀྱིས་འདུས་བྱས་པ། །ཐམས་ཅད་བྱེད་པ་ཐམས་ཅད་ཉིད། །དང་པོའི་སེམས་དཔའ་ སེམས་དཔའ་ཆེ། །བྱང་ཆུབ་སེམས་དཔའ་བདེ་རབ་སྩོལ། །སེམས་དཔའི་སྐྱིལ་ཀྲུང་བཅས་ནས་ནི། །པདྨའི་སྟེང་དུ་བཞུགས་པ་ནི། །བཙུན་མོའི་ཚོགས་བཅས་སྣ་ཚོགས་པ། །རྡོ་རྗེ་ལྷ་མོས་ཡོངས་སུ་བསྐོར། །བདེ་བ་ཆེན་པོ་གྲུབ་དོན་དུ། །འདོད་ཆགས་ཆེན་པོ་རྣམ་དག་ཕྱིར། ། མ་ལུས་འདུལ་བྱའི་དོན་དུ་ནི། །དངོས་གྲུབ་ཐམས་ཅད་རབ་གྲུབ་ཕྱིར། །དམ་ཚིག་མཆོག་ནི་མ་ལུས་པ། །རྒྱལ་བས་ཀྱང་ནི་བསྲུང་བར་བྱ། །བསྙེམས་བཅས་རྡོ་རྗེ་གསོར་བ་དང་། །རྡོ་རྗེ་བསྙེམས་པའི་ཚུལ་འཆང་ཞིང་། །ཕྱག་རྒྱ་ཀུན་མྱུར་གྲུབ་མངོན་དུ། །རྡོ་རྗེ་སེམས་དཔའ་ མཆོག་གྲུབ་ཕྱིར། །དངོས་གྲུབ་ཀུན་གྱི་ཐབས་ཆེན་པོ། །བསོད་ནམས་ཀུན་གྱིས་ཆེར་མཐོང་བ། །ཡེ་ཤེས་ཕྱག་རྒྱ་ཡང་དག་ལྡན། །སྙིང་པོ་ཆེན་པོ་དམ་ཡིན་ཏེ། །གང་གིས་བསོད་ནམས་མི་ལྡན་པའམ། །དེ་བཞིན་དཀྱིལ་འཁོར་མ་ཞུགས་པའང་། །དོན་ཡོད་ཐོགས་པ་མེད་མཆོག་ འགྱུར། །དངོས་གྲུབ་ཐམས་ཅད་རྙེད་དཀའ་ཡིན། །བདེ་བ་ཆེན་པོ་རྡོ་རྗེ་ཆེ། །གསང་བ་མཆོག་གི་དམ་ཚིག་བརྟན། །དངོས་པོ་ཐམས་ཅད་སྒྲུབ་པ་སྟེར། །རྟོག་པ་ཐམས་ཅད་མྱུར་གྲུབ་བྱེད། །ཐོག་མཐའ་མེད་ཕྱིར་དང་པོར་འབྱུང་། །མཆོག་དང་དང་པོ་ཞེས་བྱར་བཤད། །ཚིག་ཀུན་ གྱིས་ནི་ཅི་འདོད་དང་། །ཆགས་པ་ཀུན་གྱིས་ཅི་དགའ་བར། །རྗེས་སུ་ཆགས་པར་བགྱིའོ་ཞེས། །ཅི་བཞིན་འབབ་པའི་ཡེ་ཤེས་འཇུག །ཉེ་བའི་སྙིང་པོ་བཅས་སྙིང་པོ། །བསྐལ་པ་དང་པོར་བཅོམ་ལྡན་གསུངས། །ཧཱུྃ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཐམས་ཅད་སྲས་ བཅས་པ། །རྡོ་རྗེ་འཛིན་བཅས་སྣ་ཚོགས་པ། །སྐད་ཅིག་གིས་ནི་འདུས་པར་འགྱུར། །རྡོ་རྗེ་འཛིན་ཆེན་གྱིས་ཐོག་མར། །ཡུད་ཀྱི་འཇིག་རྟེན་གསུམ་པོ་འབྱུང་། །ཅི་ལྟར་འགྲོ་བ་རབ་གྲུབ་ཅེས། །བདེ་གཤེགས་རྣམས་ཀྱིས་དངོས་གྲུབ་དྲིས། །དེ་རྣམས་ཀྱི་ནི་བཀའ་གསན་ནས། །རྡོ་རྗེ་
- 203b
འཛིན་རང་གྲོལ་བ་ནི། །འབྱིན་དང་སྩོལ་དང་སྟོན་པ་པོ། །བྱེད་པས་ཚིག་ནི་འདི་སྐད་གསོལ། །ཆགས་བྲལ་གྱིས་འདུལ་འཇིག་རྟེན་རྣམས། །ཆགས་བྲལ་ཉིད་ཀྱིས་དག་པར་འགྱུར། །འདོད་ཆགས་ཆེན་པོ་བདེ་བ་ཆེ། །འདི་ནི་ཇི་ལྟར་གྲུབ་པར་འགྱུར། །དེ་ཡི་ཚིག་དེ་གསན་ནས་ ནི། །རྒྱལ་བ་རང་ཉིད་ཀྱིས་གསུངས་པ། །བྱང་ཆུབ་སེམས་དེ་ཐོག་མའི་ལྷ། །ཁྱོད་ནི་ཐབས་ཆེན་ཉིད་ཡིན་ནོ། །ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཅི་སྲིད་སེམས་ ཅན་རྣམ་རྟོག་པ། །དེ་སྲིད་བྱང་ཆུབ་སྲིད་པ་ཆེ། །བྱང་ཆུབ་སེམས་ཅན་ལ་ཕན་ཕྱིར། །རྡོ་རྗེ་ཅན་གྱིས་ཅི་བདེར་གྱིས། །དེ་ནས་ཐོག་མ་དང་དཀྱིལ་འཁོར། །དང་པོའི་དཀྱིལ་འཁོར་བྱིན་གྱིས་བརླབས། །རྡོ་རྗེ་ཀུན་གྱི་དམ་ཚིག་མཆོག །ཅི་བཞིན་ཆོ་གས་བསྒྲུབས་པ་ཉིད། །དེ་ནས་བཅོམ་ ལྡན་འདས་དེ་ནི། །བདེ་བ་ཆེན་པོ་གྲུབ་ཕྱིར་དང་། །འདོད་ཆགས་ཆེན་པོ་རྣམ་དག་ཕྱིར། །གཙོ་བོས་མགོན་ལ་གསོལ་བ་བཏབ། །བཅོམ་ལྡན་ཁྱོད་ལ་གསོལ་བ་ནི། །འདོད་ཆགས་ཆེན་པོ་བདེ་བ་ཆེ། །སྙིང་པོ་འདི་ནི་རྟོག་པ་མཆོག །བདེ་ཆེན་མྱུར་དུ་གྲུབ་བྱེད་པའོ། །དེ་རྣམས་ཀྱི་ནི་ བཀའ་གསན་ནས། །རྡོ་རྗེ་སེམས་དཔའ་བདེ་ཆེན་པོ། །བདེ་བ་ཆེན་པོ་རྡོ་རྗེ་ཆེ། །དཀྱིལ་འཁོར་ཆེན་པོ་བཀའ་སྩལ་ཏོ། །དེ་ནས་རབ་ཏུ་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །བདེ་བ་ཆེན་པོ་རྡོ་རྗེ་མཆོག །གསང་བ་དམ་པ་ཞེས་བཤད་པའོ། །ཐོག་མར་དམ་ཚིག་གསུམ་ཐོབ་ པའི། །རྡོ་རྗེ་སློབ་དཔོན་རང་ཕྱག་རྒྱས། །འཁོར་ལོ་ཀུན་གྱི་ཆོ་ག་ལ། །རྟག་ཏུ་རྡོ་རྗེ་དྲིལ་འཆང་བྱ། །རྟོག་པ་ཐམས་ཅད་ཡང་དག་འབེབས། །དཀྱིལ་འཁོར་ཐམས་ཅད་སྒྲུབ་བྱེད་ཡིན། །དམ་ཚིག་ཆེ་གསུམ་ཞེས་བྱ་བའི། །རྒྱ་འདི་ཐམས་ཅད་སྒྲུབ་བྱེད་ཡིན། །དངོས་གྲུབ་ཆོ་ག་ ཐམས་ཅད་ལ། །རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་གམ་མ་ཚང་ཡང་། །འགྲུབ་འགྱུར་སྨད་པར་མི་བྱའོ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །མཆོག་གི་དང་པོ་མཐའ་ཡས་མཆོག །བླ་ན་མེད་ཅིང་མཉམ་མེད་པ། །ནམ་མཁའ་ཀུན་ལ་རབ་ཏུ་གནས། །
- 204a
མཆོག་སྟེ་ཡི་གེ་དམ་པ་ཡིན། །དཀྱིལ་འཁོར་གནས་ནི་སྦྱང་བྱས་ལ། །དེ་ཡི་དབུས་སུ་ཆོ་ག་བཞིན། །དངོས་གྲུབ་བྱིན་རླབས་ཆོ་ག་ཡིས། །དཀྱིལ་འཁོར་དེ་ནི་གྲུབ་པར་བྱ། །གླུ་དང་རོལ་མོའི་ཆོ་ག་དང་། །མེ་ཏོག་སྤོས་སོགས་མཆོད་པ་ཡིས། །ཇི་སྙེད་པ་དང་ཅི་འདོད་པར། ། མཆོག་དང་པོར་ནི་རྟག་པར་བྱའོ། །མཆོག་གི་དང་པོར་མཐའ་ཡས་མཆོག །བླ་ན་མེད་ཅིང་དཔེ་མེད་པ། །ནམ་མཁའ་ཀུན་ལ་རབ་ཏུ་གནས། །གྲོང་ཁྱེར་དག་ནི་མི་འགྱུར་མཆོག །ཐོག་མ་མེད་མཆོག་རྟག་པ་སྟེ། །སངས་རྒྱས་འབྱུང་བའང་རབ་ཏུ་བཞུགས། །ཀུན་མཆོག་མཉམ་པ་ཉིད་ རྟེན་པས། །ལྷག་དང་མ་ཚང་མེད་ཀུན་གང་། །མཐའ་དང་དབུས་མེད་ནམ་མཁའ་ནི། །འདི་ནི་དབུ་མར་རྣམ་བརྟགས་པས། །ཕྱག་རྒྱའི་སྦྱོར་བའི་ཏིང་འཛིན་གྱིས། །དེ་ཡིས་དབུས་མར་རྣམ་བརྟག་ཉིད། །དེ་ཡི་དབུས་སུ་པདྨའི་གཟུགས། །ཡུ་བར་བཅས་པ་རབ་ཏུ་གཞག །སྣ་ཚོགས་ པདྨས་ཡང་དག་ཁེབས། །ཐམས་ཅད་དག་པའི་གདན་དེ་ཡིན། །དེ་ནས་སྲད་བུ་གཉིས་འགྱུར་དུ། །བྱས་པའི་ཐིག་ནི་གདབ་བྱ་སྟེ། །ནམ་མཁའ་ཀུན་གྱི་ཚད་ཡིན་ཕྱིར། །གདུལ་བྱའི་བློ་ནི་མཐའ་ཡས་པས། །ཚད་ནི་ཚད་མེད་པ་ཉིད་ཡིན། །མི་མཉམ་མེད་པས་ཟུར་བཞི་པ། ། དྲན་དང་དབང་པོ་སྒོ་བཞི་སྟེ། །བསམ་གཏན་རྣམས་ཀྱི་རྟ་བབས་བཞི། །ཏིང་འཛིན་ཁྱམས་སུ་བཤད་པ་ཡིན། །ཁྱམས་ལ་བརྟེན་པའི་རྡོ་རྗེའི་བདག །གཟུགས་རྣམས་ལྷ་མོས་མཆོད་པའོ། །རྒྱན་རྣམས་ཀུན་གྱིས་བཀྲ་བ་ནི། །བསམ་པ་ཐམས་ཅད་རྫོགས་བྱེད་པའོ། །གདུལ་བས་ བསྐྱོད་པ་སྣ་ཚོགས་མཆོག །དམ་ཆོས་མཆོག་སྟེ་ཀུན་དུ་འགྲོ། །རླུང་གིས་བསྐྱོད་པ་སྣ་ཚོགས་པའི། །བ་དན་རྩེར་བཏགས་དྲིལ་སྒྲ་སྒྲོགས། །མེ་ལོང་ཡེ་ཤེས་རྟག་མེ་ཏོག །བྱང་ཆུབ་ཡན་ལག་མེ་ཏོག་ཕྲེང་། །དྲ་བ་མེ་ལོང་མེ་ཏོག་ཆེ། །མེ་ཏོག་ཕྲེང་བའི་རྒྱན་གྱིས་བསྐོར། །ཀུན་གྲུབ་ མི་འགྱུར་བདེ་བ་ནི། །བདེ་བ་ཆེན་པོ་ཞེས་བཤད་དོ། །བདེ་བ་ཆེན་པོའི་གཞལ་ཡས་ཁང་། །དང་པོའི་གནས་སུ་བྲི་བར་བྱ། །ཐར་པ་ཆེན་པོའི་གྲོང་ཁྱེར་མཆོག །ཀུན་མཆོག་དེ་ནི་ལེགས་བྲིས་ནས། །ཐོག་མ་ཐ་མ་མེད་པའི་དབྱིངས། །ཕྱོགས་ཀུན་མཉམ་པ་ཉིད་དུ་བསམ། །དེ་
- 204b
ནི་ཕྱི་ཡི་དཀྱིལ་འཁོར་རོ། །དེ་ཡི་ནང་གི་འཁོར་ལོ་ནི། །དཀྱིལ་འཁོར་བརྒྱད་པ་ལྟ་བུ་ཡིན། །འདི་ནི་རྣམ་ཐར་བརྒྱད་པོ་སྟེ། །དངོས་གྲུབ་ཀུན་གྱི་བདེ་བ་སྟེར། །བྱང་སེམས་ཐེག་པ་ཆེན་པོ་ཡི། །མདོ་སྡེའི་འཁོར་ལོ་རབ་བསྐོར་བས། །རྡོ་རྗེ་ཐིག་གིས་ཡོངས་བསྐོར་བ། །རྡོ་རྗེ་འཁོར་ལོ་ཡང་དག་བྲི། །དེར་ནི་ སྣ་ཚོགས་པདྨ་ཆེར། །རྡོ་རྗེ་སེམས་དཔའ་དགོད་པར་བྱ། །ལུགས་མའམ་ཡང་ན་བརྐོས་པའམ། །བྱས་པའམ་ཡང་ན་བྲིས་པ་སྟེ། །འཛུམ་བཅས་ཟླ་བའི་མདོག་ཅན་ལ། །དམར་ཞིང་སྣ་ཚོགས་འོད་འབར་བ། །སངས་རྒྱས་ཀུན་གྱི་དབང་ལ་སོགས། །རྒྱན་དང་ན་བཟའ་སྣ་ཚོགས་པ། ། སེམས་དཔའི་སྐྱིལ་ཀྲུང་དག་གིས་བཞུགས། །རྡོ་རྗེ་བསྙེམས་ཚུལ་འཆང་བའི་མཆོག །སུ་ར་ཏ་སྟྭྃ་ཞེས་བརྗོད་ཅིང་། །རང་སྙིང་པོས་ཀྱང་གཞག་པར་བྱ། །དེ་ཡི་ཕྱོགས་ནི་ཐམས་ཅད་དུ། །ཚོན་ནམ་དེ་བཞིན་ཕྱེ་མ་ཡིས། །གོ་རིམས་དག་ནི་ཅི་བཞིན་དུ། །རྡོ་རྗེ་ལྷ་མོ་ཡང་དག་བྲི། ། རྡོ་རྗེ་མཆོད་བསྟོད་ལ་བརྩོན་བྱ། །རྡོ་རྗེ་ཆགས་མ་མདུན་དུ་བྲི། །ལྷ་མོ་རྡོ་རྗེ་རོལ་པ་ནི། །རྡོ་རྗེ་ཅན་ལ་རབ་འཁྱུད་པ། །རྒྱབ་ཏུ་རྡོ་རྗེ་དྲན་མ་ནི། །ཆུ་སྲིན་རྒྱལ་མཚན་འཛིན་པའོ། །རྡོ་རྗེ་འདོད་པའི་དབང་ཕྱུག་མ། །རྡོ་རྗེ་ཁུ་ཚུར་གཉིས་བསྙེམས་བྲི། །དེ་ནས་འདི་རྣམས་དགོད་པའི་ཕྱག་རྒྱ་ ནི། ཛཿབཛྲ་དྲིཥྚི་སམ་ཀེ་མ་ཊ་ཧཱུྃ། ཨོྃ་བཛྲ་ཀི་ལི་ཀི་ལི་ཧཱུྃ། བྃ་བཛྲི་ཎི་སྨ་ར་ར་ཊ། ཧོ་བཛྲ་ཀཱ་མེ་ཤྭ་རི་སྟྭྃ། མཚམས་སུ་རྡོ་རྗེ་སེམས་མ་སོགས། །དུས་ཀྱི་མཆོད་པ་ཡང་དག་བྲི། །རྡོ་རྗེ་སྦྲང་རྩི་མ་དང་སྤྲིན། །སྟོན་དང་དགུན་ནི་རྡོ་རྗེ་མ། །མེ་ཏོག་བདུག་པ་མར་མེ་ཆེ། །དྲི་སྟེ་སྤྱི་བོར་ ཐལ་སྦྱར་བ། །རྡོ་རྗེ་རྒྱལ་པོའི་ལྷ་མོ་སྟེ། །དེ་ནས་ཕྱག་རྒྱ་རབ་བཤད་བྱ། །ཨོྃ་མ་དྷུ་བཛྲི་གྷུྃ་གྷུྃ། ཨོྃ་བཛྲ་མེ་གྷེ་གུ་ལུ་གུ་ལུ། ཨོྃ་ཨོྃ་ཤ་ར་ད་བཛྲི། ཨོྃ་ཨོྃ། ཨོྃ་བཛྲ་ཤི་ཤི་རི་ཧཱུྃ་ཧཱུྃ། །སྒེག་མོ་བཞད་མ་གླུ་ཆེན་མ། །གར་མཛད་མ་ཡི་ལྷ་མོའི་ཚོགས། །རྡོ་རྗེ་རོལ་མོ་འདི་དག་ནི། །ཕྱི་ རོལ་གྱི་ནི་མཚམས་སུ་བྱ། །ཧེ་ར་ཏི་བཛྲ་མ་གྷ་བི་ལ་སི་ནི་ཏྲ་ཧ། ཧེ་ར་ཏི་བཛྲ་ནྲྀ་ཏྱཻ། བེ་བ་བེ་བ། སྒོ་ཡི་གནས་ནི་ཐམས་ཅད་དུ། །གསོལ་ཀ་བ་ནི་བཞི་པོ་སྟེ། །རྡོ་རྗེ་ལྕགས་ཀྱུ་ཞགས་པ་དང་། །ལྕགས་སྒྲོག་དེ་བཞིན་དྲིལ་མ་ཡི། བཛྲ་ཨྃ་གུ་ཤ་ཛཿ། བཛྲ་པཱ་ཤེ་ཧཱུྃ། བཛྲ་ཤྲིཾ་ཁ་ལེ་བྃ།
- 205a
བཛྲ་གྷཎྜེ་ཧོཿ། དམ་ཚིག་འདི་ནི་ཐམས་ཅད་ཀྱིས། །དགོངས་ཤིང་བརྟག་པ་ཉིད་དུ་འགྱུར། །རྡོ་རྗེ་ལྷ་མོ་ལ་སོགས་ཚོགས། །དངོས་གྲུབ་ཀུན་ལ་འབྱུང་བར་འགྱུར། །གསོལ་ཀ་བ་དང་གཡོག་མོ་ཡི། །གཙོ་མོ་ཕོ་ཉ་བྲན་མོའོ ། །དེ་ནས་ཀུན་ མཆོག་ལ་སོགས་པ། །མངོན་བྲིས་ཡང་དག་བསྒྲུབ་པར་བྱ། །དམ་ཚིག་མཆོག་ནི་བཅིངས་ནས་སུ། །ཛཿཧཱུྃ་བཾཧོཿཞེས་བརྗོད་བྱ། །སེམས་དཔའི་སྐྱིལ་ཀྲུང་བཅས་ནས་ནི། །རྡོ་རྗེ་ཅན་གྱི་སྤྱན་སྔར་འདུག །བདེ་བ་ཆེན་པོའི་རྡོ་རྗེ་མཆོག །བདག་པོ་ལན་ཅིག་ཡང་དག་དགུག ། ཧཱུྃ་མ་ཧཱ་སུ་ཁ་བཛྲ་ས་ཏྭ། ཡ་ཧི་ཤཱི་གྷྲཾ། མ་ཧཱ་སུ་ཁ་བཛྲ་ཨ་མོ་གྷཱ་ཡ། ཨ་ནུ་པཱ་ལ་ཡ། པྲ་བུད་དྷ་སུ་ར་ཏ་སྟྭཾ་ཨ་ནུ་རཀྟོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། བྷ་ག་བཱ་ན་ནཱ་དི་ནས་ཏྭ། སརྦ་སིད་དྷི་མྨེ་པྲ་ཡ་ཙྪ། ཨ་ཤེ་ཏ་མ་ཏྲི་ཥ་ཨཱ་བེ་ཤ་ཡ་སམ་ཡེར་བད་དྷ། བཤཱི་ཀ་ རོ་མེ། ཨི་མེར་མུ་དྲཱ་པ་ངཻཿཛཿཧཱུྃ་བཾ་ཧོཿ། འདི་ཡིས་བཅོམ་ལྡན་འདས་རྟག་པར། །དཀྱིལ་འཁོར་དུ་ནི་རང་ཉིད་གཤེགས། །བཀུག་ཅིང་བཅུག་ལ་ཤིན་ཏུ་བརྟན། །དབང་དུ་གྱུར་ནས་རབ་ཏུ་ཐུབ། །ཅེས་བཅོམ་ལྡན་འདས་དམ་ཚིག་ཆེན་པོས་གསུངས་སོ། །རྡོ་རྗེ་སློབ་ དཔོན་རང་ལྷ་ནི། །འོད་ཟེར་ཀུན་དུ་སྟོན་ལ་སོགས། །མཚན་མ་རྣམ་པ་མང་པོ་ནི། །ངོ་མཚར་གྱུར་པ་མཐོང་བར་འགྱུར། །དེ་ནས་རྡོ་རྗེ་མཆོད་ཡོན་ནི། །རྡོ་རྗེ་ཐལ་མོ་ཁ་དབྱེས་དབུལ། །བུམ་པ་གང་དག་ཅི་སྙེད་པའི། །མེ་ཏོག་ལ་སོགས་ཀྱིས་ཀྱང་མཆོད། །བ་དན་ རྩེ་མོར་དྲིལ་བཏགས་པ། །མཚམས་ཀྱི་ཆར་ནི་གཞག་པར་བྱ། །བུམ་པ་སྤོས་ཆུས་གང་བ་ལ། །རྡོ་རྗེར་བཅས་པས་བྱིན་བརླབས་པ། །ལྕུག་མ་ལ་ནི་ཡོངས་སུ་བཟླས། །དེ་ལ་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་ཆུར་བསྒྲུབ་པ་ནི་འདི་ཡིན་ཏེ། །ཧཱུྃ་མ་ཧཱ་སུ་ཁ་བཛྲ་ ཨ་མོ་གྷ་ས་མ་ཡོ་ད་ཀ་སད་དྷ་ཨ་བྷི་ཥིཉྩ། སརྦ་སུ་ཁ་སཽ་མ་ན་སྱཱ་ནྱཱ་ད་ད་ཀུ་རུ་ཀུ་རུ། ཛཿཧཱུྃ་བཾ་ཧོཿ། འདི་ལན་ཉི་ཤུ་རྩ་གཅིག་ཡོངས་སུ་བཟླས་ལ། བདག་ཉིད་ལ་རྡོ་རྗེས་དབང་བསྐུར་བར་བྱའོ། །བསང་གཏོར་བྱ་བ་དང་། འཐུངས་པས་ཀྱང་སྡུག་བསྔལ་ཐམས་ཅད་བསལ་བ་
- 205b
དང་བདེ་བ་ཆེན་པོ་ཐམས་ཅད་འཕེལ་བར་འགྱུར་རོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་འཁོར་ལོར་མ་ཞུགས་ཀྱང་། །རང་ཉིད་ཐོག་མར་བྱུང་ཞུགས་ཤིང་། །རྡོ་རྗེ་ཀུན་གྱི་སློབ་དཔོན་ཆེ། །རྡོ་རྗེ་ཅན་གྱིས་རང་བྱིན་རློབ། །དེ་ནས་རྡོ་རྗེ་འཛིན་སློབ་དཔོན། ། རང་ཉིད་ཁྲུས་བྱས་དྲིས་ལེགས་བྱུགས། །ཅི་སྙེད་པ་ཡི་རྒྱན་གྱིས་བརྒྱན། །ཤིན་ཏུ་དམར་བའི་གོས་བགོ་ཞིང་། །མེ་ཏོག་ཕྲེང་བཏགས་ཁ་དྲིས་བསྒོ། །རྣམ་སྒེག་དགའ་བའི་རྡོ་རྗེ་དང་། །རྡོ་རྗེ་གར་གྱི་སྦྱོར་བ་ཡིས། །སྤྱི་བོར་མེ་ཏོག་ཐལ་སྦྱར་ནས། །གནས་དེ་མགོན་ལ་ཕྱག་བྱའོ། ། ཞུགས་ནས་དཀྱིལ་འཁོར་དེ་ལ་ནི། །བསྐོར་བ་དག་ནི་ལན་གསུམ་བྱ། །དེ་ནས་མདུན་དུ་འདུག་ནས་ནི། །དེ་ཁོ་ན་ཉིད་ལན་ཅིག་བརྗོད། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་བ། །ཡེ་ཤེས་ཆེན་པོ་ལས་ཆེན་པོ། །དེ་དག་རྡོ་རྗེ་སེམས་གྲུབ་བརྗོད། །དེ་ནས་མེ་ ཏོག་སིལ་མ་ནི། །མགོན་ལ་གཏོར་ཏེ་ཆོ་ག་བཞིན། །དང་པོ་ཤ་ར་ལ་སོགས་པ། །བསྟོད་པ་གླུ་རུ་ལན་ཅིག་བླང་། །དེ་ནས་བཅོམ་ལྡན་འདས་ཀྱི་བསྟོད་པའི་རྒྱལ་པོ་མཚན་བརྒྱ་རྩ་བརྒྱད་པ་དེ་ཁོ་ན་ཉིད་ཆེན་པོ་ནི་འདི་ཡིན་ཏེ། དཔལ་མཆོག་དང་པོ་སེམས་དཔའ་ཆེ། །དགའ་བ་ ཆེན་པོའི་དགའ་ཆེན་པོ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །སེམས་དང་སེམས་དཔའི་ཏིང་འཛིན་མཆོག །རྡོ་རྗེ་རྡོ་རྗེ་མཆོག་ཆེན་པོ། །ཀུན་ཏུ་བཟང་པོའི་སྤྱོད་པ་མཆོག །བདུད་དང་བདུད་ནི་རབ་འཇོམས་པ། །ཐམས་ཅད་ཐམས་ ཅད་བྱང་ཆུབ་ཆེ། །སངས་རྒྱས་སངས་རྒྱས་སྐྱེས་མཆོག་སྐྱེས། །རྡོ་རྗེ་ཧཱུྃ་མཛད་ཡི་གེ་ཧཱུྃ། །འཇིག་རྟེན་དབང་ཕྱུག་ནོར་རབ་གསལ། །འདོད་ཆགས་ཆེན་པོ་བདེ་ཆེན་ཉིད། །འདོད་དང་ཐར་པ་ནོར་ཆེ་བ། །དུས་གསུམ་སྲིད་གསུམ་མཆོག་གསུམ་དང་། །འཇིག་རྟེན་ གསུམ་མཆོག་ཁམས་གསུམ་པ། །བརྟན་པར་རང་བྱུང་གསལ་བ་སྟེ། །རབ་ཕྲ་སྦོམ་དང་ལེགས་བསགས་པ། །རྒྱུ་བ་རབ་མཆོག་ཐོབ་མཛད་པ། །སྲིད་པ་འཁོར་བ་སྦྱོང་མཛད་པ། །ཐོག་མཐའ་མེད་ཅིང་ཐོག་མཐའ་ཅན། །མདངས་ལྡན་དང་པོར་ཐམས་ཅད་གནས། །
- 206a
སྙིང་པོ་ཕྱག་རྒྱ་སྦྱོར་དམ་ཚིག །དེ་ཉིད་བདེན་པ་མཆོག་པ་སྟེ། །དེ་བཞིན་གཤེགས་པའི་དངོས་གྲུབ་ཆེ། །ཆོས་དང་ལས་ནི་ཁམས་ཆེན་པོ། །དམ་པའི་ཆོས་ཏེ་ལས་མཆོག་བདག །བྱང་ཆུབ་སེམས་ནི་རབ་སྦྱོང་མཛད། །རྡོ་རྗེ་ཁྲོ་བོ་ཁྲོ་བོ་ཆེ། །དུས་མཐའ་ ལྟར་འབར་འདུལ་བ་པོ། །འདུལ་མཛད་ཆེན་པོ་གདུག་པའི་མཆོག །དྲག་པོ་དྲག་ཉིད་ཟད་མཛད་པ། །ཐམས་ཅད་དག་པ་པདྨ་ཆེ། །ཤེས་རབ་ཐབས་ཏེ་ཚུལ་ཆེན་པོ། །འདོད་ཆགས་དག་པའི་ཏིང་འཛིན་མཆོག །སྣ་ཚོགས་ཆགས་པ་དབང་ཕྱུག་ཆེ། །ནམ་མཁའ་མཐའ་ཡས་ རྟག་པའི་དོན། །འབྱུང་པོ་ཐམས་ཅད་གནས་ཆེན་པོ། །འབྱོར་བ་ཐམས་ཅད་གནས་འབྱོར་བ། །དཔལ་དང་གཙོ་བོ་རྒྱལ་པོ་སྟེ། །བསམ་པ་ཐམས་ཅད་རྫོགས་མཛད་པ། །ཕྱག་འཚལ་ཁྱོད་ལ་ཕྱག་འཚལ་ལོ། །ཕྱག་འཚལ་འདུད་ཅིང་ཕྱག་འཚལ་ལོ། །དད་པས་ཁྱེད་ལ་བདག་ བརྟེན་བགྱིད། །རྡོ་རྗེ་སེམས་དཔའ་བདག་གྲུབ་མཛོད། །གང་ཞིག་བསྟོད་པའི་རྒྱལ་པོ་འདི། །ཉིན་རེ་ནང་པར་རྗོད་བྱེད་དམ། །ཆོས་ཀྱི་ཚིག་གིས་ལན་ཅིག་བརྗོད། །དངོས་གྲུབ་ཤིན་ཏུ་མྱུར་བར་འགྱུར། །གལ་ཏེ་འདིར་གྲུབ་མི་འདོད་ན། །དང་པོར་ཉིན་རེ་དུས་གསུམ་དུ། །བསྟོད་ ན་སྡིག་པ་ལས་ངེས་གྲོལ། །ཞིང་དག་པ་ནི་གྲུབ་པར་བྱེད། །རྟག་ཏུ་སྡུག་བསྔལ་ཐམས་ཅད་སེལ། །ལན་ཅིག་རབ་ཏུ་བརྗོད་པ་ཡིས། །དངོས་གྲུབ་ཐམས་ཅད་སྐལ་བཟང་བྱེད། །ཕུན་སུམ་ཚོགས་དཔལ་འཕེལ་བར་བྱེད། །དངོས་གྲུབ་དོན་ཡོད་ཡོན་ཏན་ཅན། །མཚན་བརྒྱ་རྩ་བརྒྱད་ དམ་པའོ། །དེ་ནས་གསང་བའི་མཆོད་པས་ནི། །རབ་ཏུ་དགའ་བས་མགོན་ལ་མཆོད། །རང་གིས་ཕྱག་རྒྱས་ལན་ཅིག་ནི། །རང་གི་ཕྱག་རྒྱས་བཅིངས་ཏེ་གྲུབ། །དེ་ནས་ལྷ་ཡི་ཆུ་དང་ནི། །དེ་བཞིན་སྐུ་མཆོག་གིས་དབང་བསྐུར། །རང་ཉིད་རྡོ་རྗེ་ཕྱག་རྒྱ་ལ། །སྙིང་པོ་འདི་ནི་བླང་བར་བྱ། །དེ་ལ་ རྡོ་རྗེ་སེམས་དཔར་དབང་བསྐུར་བའི་སྙིང་པོ་ནི་འདི་ཡིན་ཏེ། ཧཱུྃ་མ་ཧཱ་སུ་ཁ་བཛྲ་སཏྭ་ཨ་བྷི་ཥྚེ་ཀེ་ན་ཧྲཱིཿཨ་བྷི་ཥིཉྩཱ་མི། སརྦ་བཛྲ་ཨ་དྷི་པ་ཇི་སྟྭི་དྲྀ་ཌྷོ་མེ་བྷ་བ་མི་དྷ་ནཱ་མ་མ་སྟེ་བྷ་ག་བཱ་ན། མ་ཧཱ་བཛྲ་དྷ་ར་སུ་ར་ཏ་སྟྭྃ། མ་ཧཱ་བཛྲ་སཏྭ། ཨོྃ་བྷུར་བྷུ་བ་སྭ། དེ་ནས་རྡོ་རྗེ་དབང་བསྐུར་བ། །ཕྱག་ན་རྡོ་རྗེ་མིག་འཛིན་པ། །རྡོ་
- 206b
རྗེ་འཛིན་ཆེན་སློབ་དཔོན་དུ། །འདི་ཉིད་དུ་ནི་རབ་འགྲུབ་འགྱུར། །དེ་ནས་ཀྱང་ནི་ཅི་འདོད་པར། །ཆོ་གའི་དམ་པ་བསྒྲུབས་ནས་ནི། །རྡོ་རྗེ་གར་གྱི་མཆོད་པ་ཡིས། །ལེགས་པར་མཆོད་ལ་ཕྱིར་བྱུང་བྱ། །དེ་ནས་བརྩམས་ཏེ་རྡོ་རྗེའི་བདག །རྡོ་རྗེ་ཀུན་གྱི་གསུང་རབ་འཛིན། །རྡོ་རྗེ་ཐམས་ཅད་ འཛིན་སློབ་དཔོན། །དངོས་གྲུབ་ཐམས་ཅད་གྲུབ་པར་འགྱུར། །རྡོ་རྗེ་སེམས་དཔའ་དངོས་གྲུབ་ཆེ། །ཕྱག་རྒྱ་ཀུན་བདག་དབང་ཕྱུག་ཆེ། །དྷཱིཿ། ཐམས་ཅད་མཁྱེན་པའི་རྡོ་རྗེ་ཆེ། །ལས་རྣམས་ཐམས་ཅད་དབུས་ལ་བརྟག །མི་ཚུགས་པ་དང་མི་སོད་པ། །ཀུན་བྱེད་དངོས་གྲུབ་ཐམས་ ཅད་སྟེར། །སེམས་ཅན་ཀུན་གྱི་རྒྱལ་པོ་ཆེ། །ཚར་གཅོད་པ་དང་ཕན་འདོགས་ནུས། །ཐམས་ཅད་རྗེས་ཆགས་བྱེད་ཀུན་མཆོག །ཀུན་རིག་པ་དང་ཀུན་གྱི་གནས། །འདོད་པ་ཐམས་ཅད་ལ་རབ་སྦྱོར། །ཕུན་ཚོགས་ཀུན་གྱི་དབང་ཕྱུག་ཆེ། །ལྷ་ལ་སོགས་པའི་སེམས་ཅན་ཀུན། །བསྒོ་བ་ཐམས་ ཅད་རྟག་ཏུ་བྱེད། །སེམས་དཔའ་ཀུན་ནི་རྟག་ཏུ་མཐོང་། །ཚེ་འདི་ཉིད་ལ་འགྲུབ་པར་འགྱུར། །དེ་ཉིད་ཀྱིས་ནི་འདོད་པར་ལྡན། །དགའ་ཞིང་རང་ཉིད་དེ་བདག་པོར། །རྡོ་རྗེ་སློབ་དཔོན་འགྱུར་བ་ཡིན། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །བདེ་བ་ཆེན་པོ་རྡོ་རྗེ་སློབ་དཔོན་ བྱིན་གྱིས་བརླབ་ཅིང་འཇུག་པའི་ཆོ་ག་རྒྱས་པའི་རྒྱུད་དོ།། །།དེ་ནས་སློབ་མ་འཇུག་པའི་ཆོ་ག་རྒྱས་པའི་རྒྱུད་རྗེས་སུ་བཤད་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྡོ་རྗེ་མཆོད་ཡོན་སྙིང་གར་བསྐོར། །བཅིངས་ནས་བསམ་གཡོས་བཞིན་གྱིས་ནི། །མགོ་ བོས་ཡང་དག་ཕྱག་བྱ་བ། །དངོས་གྲུབ་ཐམས་ཅད་གྲུབ་བྱེད་ཡིན། །དཀྱིལ་འཁོར་དུ་ནི་རབ་ཞུགས་ལ། །བསྐོར་བ་ལན་གསུམ་བྱས་ནས་ནི། །འདོད་ཆགས་ཆེན་པོ་བདེ་བ་ཆེ། །འགྲོ་བ་ཀུན་ལའང་གྲུབ་མཛད་བརྗོད། །དེ་ནས་དུས་ཀྱི་མཆོད་པ་ཡིས། །བདེ་བ་ཆེན་པོ་ཡང་དག་མཆོད། ། དེ་བཞིན་དུ་ནི་དབང་བསྐུར་བར། །རྡོ་རྗེ་གསང་བའི་སློབ་མ་གཞུག །དེ་ནས་ཅི་བཞིན་བརྒྱན་ནས་ནི། །རྡོ་རྗེ་སློབ་དཔོན་གྱིས་རབ་གཞུག །སློབ་མའི་ཚོགས་རྣམས་བཅུག་ནས་ནི། །ཅི་འདོད་པ་ཡི་དངོས་གྲུབ་འཐོབ། །དེ་ནས་སློབ་མ་བཅུག་ནས་ནི། །དགའ་བ་ཆེན་པོ་འདི་བརྗོད་བྱ། །རབ་དགྱེས་
- 207a
རབ་བདེ་བསྟན་པ་ཡི། །རྡོ་རྗེ་སེམས་བདག་དེང་གྲུབ་མཛོད། །དེ་ནས་མེ་ཏོག་ཕྲེང་བ་ནི། །སྤྱི་བོ་ནས་ནི་མྱུར་དུ་འདོར། །གང་དུ་མེ་ཏོག་བབས་གྱུར་ཏེ། །ལྷག་པའི་ལྷར་ནི་རབ་འགྲུབ་འགྱུར། །དེ་ནས་ལྷ་ཡི་ཆུ་ཡིས་ནི། །རྡོ་རྗེ་འཛིན་དང་རང་དབང་བསྐུར། ། རྡོ་རྗེ་ཆེན་པོ་རྡོ་རྗེ་ལྔ། །བྱིན་ལ་རྡོ་རྗེ་བོ་དྷི་བརྗོད། ཨོྃ་མ་ཧཱ་སུ་ཁ་བཛྲ། བཛྲ་ཨ་བྷི་ཥེ་ཀེ་ན་སྟྃ། ཨ་བྷི་ཤིཉྩཱ་མི། མ་ཧཱ་བཛྲ་དྷཱ་ར། ཧེ་བཛྲ་ནཱ་མ་སིད་དྷ་ནཱ་མཿ། གང་ལ་རྡོ་རྗེ་མིང་གང་ཞིག་ཡིན་པ་དེ་ལ་ཀྱེ་ཞེས་བྱ་བའི་སྒྲ་དང་སྦྱར་བར་བྱའོ། །དེ་ནས་སྙིང་པོ་བྱིན་ལ་ཕྱག་རྒྱ་བཅིང་བ་ བསླབས་ནས། ཅི་ལྟར་མངོན་པར་འདོད་པ་བསྒྲུབ་པར་བྱའོ། །རྡོ་རྗེ་སེམས་དཔའི་ཆོ་ག་འམ། །གང་འདོད་རང་གྲུབ་པ་དེ་ལ། །དེ་ཉིད་ཀྱིས་ནི་དམ་ཚིག་ཉིད། །འཇུག་ལ་སོགས་པའི་ཆོ་ག་བཤད། །འཇིག་རྟེན་པ་ནི་སྣ་ཚོགས་དང་། །དེ་བཞིན་འཇིག་རྟེན་འདས་པ་རྣམས། ། ཐམས་ཅད་རང་གི་གོ་རིམས་ནི། །རྒྱས་པར་བསྒྲུབས་ན་རབ་ཏུ་འགྲུབ། །འདི་ལ་རབ་ཏུ་འཇུག་ཙམ་གྱིས། །མི་ཚུགས་པ་དང་མི་ལྡོག་པ། །ཉིད་དུ་རྒྱལ་བའི་སྲས་འགྱུར་ཞིང་། །བདེ་བ་ཆེན་པོ་རབ་གྲུབ་སྟེར། །དེ་ནས་རྡོ་རྗེ་འཛིན་སློབ་དཔོན། །མནའ་ནི་དམ་དུ་བསྒགས་ནས་ཀྱང་། །དེ་ ཉིད་ཆོས་དང་དམ་ཚིག་ནི། །རང་ཉིད་དང་ནི་གཞན་གྱིས་བསླབ། །དེ་ལ་འདི་ནི་མནའ་གྲུབ་པའི་རྡོ་རྗེ་ཆུས་དབང་བསྐུར་ནས་བརྗོད་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་འགྲུབ་པར་འགྱུར། །དངོས་གྲུབ་རྡོ་རྗེ་བདུད་རྩི་ཆུ། ། དེ་ཉིད་ཆོས་དང་དམ་ཚིག་ནི། །གལ་ཏེ་དཀྱིལ་འཁོར་མ་མཐོང་སྨྲས། །སྐྱེ་བོ་འདུ་གནང་གནས་པ་འགའ། །དད་པ་མེད་པས་བགད་པར་འགྱུར། །དེ་ལ་འདི་ནི་དེ་ཁོ་ན་ཉིད་དང་དམ་ཚིག་གི་གསང་བའི་ཆོ་ག་རབ་ཏུ་སྦྱིན་པ་ཡིན་ཏེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་ དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །དེ་ཁོ་ན་ཉིད་མཆོག་གི་གསང་བ་ལྔའི་དེ་ཁོ་ན་ཉིད་ཆེན་པོ་བཤད་པར་བརྗོད་པར་བྱའོ། །བཅོམ་ལྡན་འདས་དེ་ཉིད་ཆོས་ཀྱི་མཆོག་བཀའ་སྩལ་པར་མཛད། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་
- 207b
བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ནི་བྱེད་པ་ཡིན། །དེ་ལ་སྲིད་པ་རྣམ་པར་དག་པའི་ཐབས་རྟོག་པ་ཐམས་ཅད་ཀྱི་གསང་བའི་མཆོག་དམ་ཚིག་ཆེན་པོ་བསྟེན་པར་བྱ་བ་ནི་འདི་ཡིན་ཏེ། སྲིད་པའི་བདེ་བ་ཤིན་ཏུ་ཆུང་། །སྡུག་བསྔལ་ཆེན་ པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་རྟག་ཏུ་བསྟེན་པར་བྱ། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷག་པའི་ལྷར་སྦྱོར་བས། །བདག་དང་གཞན་ལ་མཆོད་པར་བྱ། །དེ་ལ་རྟོག་པ་ཐམས་ཅད་ཀྱི་གསང་བའི་མཆོག་གི་དམ་ ཚིག་ཆེན་པོ་འདི་བརྗོད་པར་བྱ་སྟེ། ཅི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །གསང་བ་མཆོག་གི་དམ་ཚིག་ཐབས། །བསོད་ནམས་བྱིན་རླབས་སྒྲུབ་བྱེད་པ། །དངོས་གྲུབ་ཀུན་གྱི་ དབང་ཕྱུག་མཆོག །རྒྱུན་དུ་སེམས་ཅན་དོན་བྱེད་པའོ། །དེ་ལྟར་སེམས་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་སྐྱིད་བསྟེན་པར་གྱིས། །དེ་ནི་འགྲོ་ལ་མྱུར་དུ་བདེ་བ་སངས་རྒྱས་ཐམས་ཅད་དང་། །རབ་ཏུ་མཚུངས་ཤིང་རྟག་པ་ཉིད་དུ་རྟོགས་པར་འགྱུར། །དེ་ནས་ཁྱེད་ཀྱིས་བཅུད་དང་། ཁ་ཟས་དང་གནས་པ་དང་གླུ་དང་རོལ་མོ་ལ་སོགས་པའི་མཆོད་པ་རྣམས་ལེགས་པར་བསྟབས་པ་བས་བདག་ཉིད་གང་ལ་སྲིད་པས་ཀྱང་རྡོ་རྗེ་སློབ་དཔོན་ཆེན་པོ་མཆོད་པར་བྱའོ། །རྡོ་རྗེ་སློབ་དཔོན་མེ་ཏོག་སོགས། །ཅི་འདོད་པར་ནི་ལེགས་མཆོད་ཅིང་། །རྡོ་རྗེ་གར་གྱི་མཆོད་པ་ཡིས། །ཡང་དག་པར་ནི་མཆོད་དེ་བྱུང་། ། དེ་ནས་རྡོ་རྗེ་འཛིན་སློབ་དཔོན། །གར་གྱི་མཆོད་པས་མཆོད་ནས་ནི། །རྡོ་རྗེ་ཐལ་མོའི་སྦྱོར་བ་ཡིས། །སློབ་མ་ཀུན་གྱིས་རབ་ཏུ་མཆོད། །རོ་དང་ཁ་ཟས་གནས་པ་དང་། །གླུ་དང་རོལ་མོ་ཅི་འདོད་པས། །རྡོ་རྗེ་སེམས་དཔའ་དེ་བཞིན་བདག ། ཡང་དག་མཆོད་ནས་ཕྱིར་བྱུང་བྱ། །དཔལ་མཆོག་དང་པོ་ཞེས་བྱ་བའི་དཀྱིལ་ འཁོར་མཆོག་ཏུ་གསང་བའོ།། །།དེ་ནས་བསྒྲུབ་པ་བཤད་བྱ་བ། །དངོས་གྲུབ་ཤིན་ཏུ་རྟག་པ་སྟེ། །གང་གིས་སྲིད་པ་འདི་ཉིད་ལ། །དངོས་གྲུབ་རྟག་པ་ཐོབ་བྱེད་པའོ། །འདི་ཡིས་བྱང་ཆུབ་སེམས་དཔའ་ནི། །སྲིད་པར་གནས་ཤིང་སྲིད་པར་སངས། །དངོས་གྲུབ་ཀུན་གྱི་དབང་ཕྱུག་གྲུབ། །
- 208a
རྟག་ཏུ་སེམས་ཅན་ཀུན་དོན་བྱེད། །འདི་ཡི་ཅི་ལྟར་མཆོག་གྲུབ་པ། །དེ་ལྟར་བྱང་ཆུབ་སྤྱོད་སོགས་པས། །དགེ་བའི་ཚུལ་ནི་གཞན་གྱིས་ཀྱང་། །སངས་རྒྱས་ཀུན་སོགས་ཐོབ་མི་འགྱུར། །འདུལ་བྱ་མིན་པ་བསོད་ནམས་མེད། །སངས་རྒྱས་རྡོ་རྗེ་འཛིན་པ་ནི། །རྣམ་པ་ ཀུན་དུ་མཐོང་སོགས་ཀྱིས། །སེམས་ཅན་དོན་བྱེད་མི་ནུས་སོ། །དེ་བས་རྒྱུད་ཆེན་ལས་གྲུབ་པ། །སངས་རྒྱས་སམ་ནི་རྡོ་རྗེ་འཛིན། །མཐོང་ལ་སོགས་པ་སེམས་ཅན་དོན། །ནམ་མཁའ་མཉམ་པར་བྱེད་པ་ཡིན། །འདོད་ཆགས་ཆེན་པོ་བདེ་བ་ཆེ། །སྲིད་པའི་ངེས་པ་དྲི་མ་མེད། །ནམ་མཁའ་མཐའ་ ཡས་སེམས་ཅན་དོན། །མྱ་ངན་མི་འདའ་བྱེད་པ་ཡིན། །དཀྱིལ་འཁོར་དག་ཏུ་མ་ཞུགས་པའམ། །བསོད་ནམས་མེད་པའམ་ལེ་ལོ་ཅན། །དེ་ཡང་ཀུན་མཆོག་གྲུབ་པ་ཡིས། །ཚེ་འདི་ཉིད་ལ་འགྲུབ་པར་འགྱུར། །ཞེས་བཅོམ་ལྡན་འདས་དོན་ཡོད་གྲུབ་པ་རྡོ་རྗེ་སེམས་དཔས་གསུངས་སོ། །དེ་ནས་དོན་ཡོད་ ཅིང་ཐོགས་པ་མེད་པ་མྱུར་དུ་སྒྲུབ་པའི་མཆོག་རྗེས་སུ་བཤད་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ལུགས་མའམ་ནི་བརྐོས་པའམ། །བྱས་པའམ་ནི་བྲིས་པ་ཡི། །དང་པོའི་སེམས་དཔའ་བརྟགས་ནས་ནི། །མདུན་དུ་དེ་ནི་བསྒྲུབ་པར་བྱ། །ཉིན་རེ་ཞིང་ནི་དང་པོ་རུ། །དེ་བཞིན་ཡུལ་ དང་ལྡན་གྱུར་པས། །དང་པོའི་གསང་མཆོག་གིས་བཀུག་སྟེ། །ཕྱག་རྒྱ་ཆེན་པོ་རབ་བྱིན་བརླབ། །རྡོ་རྗེ་མིག་གིས་དེ་བཞིན་བལྟས། །རྡོ་རྗེ་བསྙེམས་ཚུལ་བདག་པོ་རང་། །རྡོ་རྗེ་ཧཱུྃ་ནི་གླུར་བླངས་པས། །རྡོ་རྗེ་སེམས་དཔའ་བསྒྲུབ་པར་བྱ། །རྡོ་རྗེ་ཆ་ལུགས་ཅི་བཞིན་དུ། །མཆོག་གི་དང་པོ་རབ་ཏུ་ དགྱེས། །གཟུགས་བརྙན་ལ་སོགས་དང་པོར་ནི། །ཅི་འདོད་པར་ནི་རབ་ཏུ་བསྒྲུབ། །འདི་ཡིས་འདོད་པ་ཀུན་དབང་ཕྱུག །འདོད་པ་ཙམ་གྱིས་འགྲོ་འོང་ལྡིང་། །དངོས་གྲུབ་ཀུན་གྱིས་དབང་ཕྱུག་གྲུབ། །ཀུན་མཆོག་དམ་པའི་དབང་ཕྱུག་ཡིན། །ཕུན་སུམ་ཚོགས་ཀུན་བདག་ཐམས་ཅད། །འདོད་ཆགས་ ཆེན་པོ་བདེ་བ་ཆེ། །ཐམས་ཅད་འཇུག་མཛད་སྣ་ཚོགས་པ། །རྟག་པར་ཀུན་དུ་འདུལ་བའོ། །དངོས་གྲུབ་ཀུན་གྱི་བདེ་བ་མཆོག །ཕྱག་རྒྱ་ཀུན་བདག་དབང་ཕྱུག་ཡིན། །རྡོ་རྗེ་ཀུན་གྱི་དངོས་གྲུབ་ཆེ། །ཐམས་ཅད་མཁྱེན་པའི་འབྱུང་གནས་ཆེ། །མི་ཚུགས་པ་དང་མི་སོད་པ། །ཐམས་ཅད་བྱེད་ཅིང་ཀུན་གྱི་གནས། །
- 208b
ཁམས་གསུམ་ལས་རྒྱལ་སྣ་ཚོགས་པ། །ཚར་གཅོད་པ་དང་ཕན་འདོགས་པ། །ཀུན་ལ་རྗེས་ཆགས་ཀུན་གྱི་མཆོག །ཀུན་རིག་དངོས་གྲུབ་ཐམས་ཅད་སྟེར། །འཇིག་རྟེན་ཁམས་ནི་ཐམས་ཅད་དུ། །རང་གི་རྣམ་འཕྲུལ་རབ་སྟོན་བྱེད། །ཀུན་མཆོག་དངོས་གྲུབ་ཆེན་པོ་སྟེ། །དབང་ ཕྱུག་ཆེན་པོའི་དབང་ཕྱུག་ཆེ། །གཟུགས་དང་ཚེ་སྟོབས་རྡོ་རྗེ་མཆོག །རྡོ་རྗེ་སེམས་དཔའ་གཉིས་པ་བཞིན། །འགྲོ་བ་རྣམས་ཀྱིས་མཆོད་ཅིང་བརྗོད། །རང་གི་གཉེན་རྣམས་ཀྱིས་བརྟེན་པ། །རྒྱལ་པོ་རྡོ་རྗེ་འཆང་ཆེན་ལྟར། །རྒ་དང་འཆི་བ་མེད་པར་འགྱུར། །གལ་ཏེ་རྡོ་རྗེ་སེམས་དཔའ་འམ། །སངས་རྒྱས་ བྱང་ཆུབ་སེམས་ཉིད་འདོད། །དངོས་གྲུབ་ཅི་ལྟར་འདོད་པ་ཉིད། །ཚེ་འདི་ཉིད་ལ་འགྲུབ་པར་འགྱུར། །ཕྱི་མའམ་ནི་འཇིག་རྟེན་པ། །རྟོག་པ་ཀུན་བཤད་ཆོ་ག་འམ། །རང་ཉིད་ཀྱིས་མཛད་ཀྱིས་རྟག་ཏུ། །དངོས་གྲུབ་ཐམས་ཅད་འགྲུབ་འགྱུར་ཞེས། །བཅོམ་ལྡན་རྡོ་རྗེ་དངོས་གྲུབ་ཀྱི། །དབང་ཕྱུག་བདེ་བ་ཆེན་པོ་ནི། ། རྡོ་རྗེ་འཆང་བ་ཆེ་རྒྱལ་པོ། །ཀུན་མཆོག་ས་ཡི་དབང་པོས་གསུངས། །དེ་ལ་ཅི་ལྟར་ན་རང་གི་ཕྱག་རྒྱ་སྒྲུབ་པའི་རྒྱུད་ཡིན་ཞེ་ན། །ཕྱག་རྒྱ་ཆེན་པོར་མཉམ་གཞག་ལ། །རང་གི་སྙིང་པོས་ལན་ཅིག་སྒྲུབ། །དྲྀ་ཌྷ་སུ་ཏོ་ཥྱ་སྃ་རཀྟ། སུ་པོ་སིདྡྷ་ཏ་ལ་གུ། དེ་ལ་ཅི་ལྟར་ཡི་གེ་ཧཱུྃ་གི་གླུ་བླངས་པའི་རྒྱུད་ཡིན་ཞེ་ན། རི་དྷི་ཏ་ སོགས་ཀྱིས་བརྒྱན་ལྡན། །ཅི་ནུས་པ་དང་ཅི་དགའ་དང་། །གཎྜེ་ལ་སོགས་གླུ་བླངས་པའི། །ཡི་གེ་ཧཱུྃ་གིས་འགྲུབ་པར་འགྱུར། །དེ་ནས་ཕྱག་རྒྱ་ཐམས་ཅད་ཀྱི། །མཆོག་དེ་སྒྲུབ་པའི་རྒྱུད་བཤད་དེ། །གལ་ཏེ་ཕྱག་རྒྱ་སྒྲུབ་འདོད་ན། །དེ་བཞིན་ཡུལ་དང་ལྡན་གྱུར་པས། །རང་ཉིད་ཀྱིས་ནི་རྒྱ་བཅིངས་ལ། །ཡོངས་སུ་མི་སྐྱོའི་བར་ དུ་བསྒྲུབ། །དེ་ལ་ཅི་ལྟར་ན་དམ་ཚིག་ཐམས་ཅད་གྲུབ་པའི་རྒྱུད་ཡིན་ཞེ་ན། དམ་ཚིག་ཕྱག་རྒྱ་བཅིངས་ནས་ནི། སེམས་སྟྭཾ་ཞེས་བརྗོད་ལ། །རང་གི་སྙིང་གར་རིམ་བཞིན་དུ། །ཕྱག་རྒྱའི་མཆོག་དེ་བསྒྲུབ་པར་བྱ། །དེ་ནས་ལས་ཀྱི་ཕྱག་རྒྱའི་མཆོག་སྒྲུབ་པའི་རྒྱུད་ནི། །རྡོ་རྗེ་གར་གྱི་མཆོད་པ་ཡིས། །ཡོངས་སུ་མི་སྐྱོའི་བར་བསྒྲུབས་ན། ། མཆོད་པ་ཀུན་སོགས་ལས་རྣམས་ནི། །ཚེ་འདི་ཉིད་ལ་འགྲུབ་པར་འགྱུར། །རྡོ་རྗེ་འཆང་ཆེན་ཉིད་དང་ནི། །སངས་རྒྱས་བྱང་ཆུབ་སེམས་དཔའ་ཉིད། །གཞན་ཡང་དངོས་གྲུབ་ཐམས་ཅད་ནི། །དམ་པ་མྱུར་དུ་འགྲུབ་པར་འགྱུར། །རྟོག་པ་ཐམས་ཅད་ཀྱི་སྒྲུབ་པ་ཆེན་པོ་དོན་ཡོད་པར་འགྲུབ་པའི་ཆོ་ག་རྒྱས་པའི་རྒྱུད་དོ།།
- 209a
དེ་ནས་རྟོག་པ་ཐམས་ཅད་སྒྲུབ་པའི་དངོས་གྲུབ་ཀྱི་རྒྱུད་ནི། ཉིན་རེ་ཞིག་དག་པོར་ལན་ཅིག་ཕྱག་རྒྱ་བསྒྲུབ་པར་དོན་ཡོད་པ་དངོས་གྲུབ་ཐོགས་པ་མེད་པར་བཤད་པར་བྱའོ་ཞེས་བཅོམ་ལྡན་འདས་ཀྱིས་གསུངས་སོ། །ཐམས་ཅད་རྗེས་སུ་མཉེས་པར་བྱ་བ་དང་། །དགུག་ པ་དག་བཅིང་བ་དང་དབང་དུ་བྱ་བ་བསྒྲུབ་པ་ལ་ནི་བདེ་བ་ཆེན་པོའི་རྡོ་རྗེ་ལྟ་བས་སོ། །བདེ་བ་དང་ཡིད་བདེ་བ་དང་ཕུན་སུམ་ཚོགས་པ་དང་དངོས་གྲུབ་ཐམས་ཅད་མངོན་པར་འཕེལ་བར་བྱ་བ་ལ་ནི་བདེ་བ་ཆེན་པོའི་རྡོ་རྗེ་ཆོས་སོ། །ཚེ་དང་ལང་ཚོ་དང་གཟུགས་དང་གཟི་བྱིན་ཆེན་པོ་མངོན་པར་འཕེལ་ བར་བྱ་བ་ལ་ནི་དང་པོའི་རྡོ་རྗེ་བཅུད་ཀྱིས་ལེན་གྱིས་སོ། །དཔལ་ཆེན་པོ་དང་སྐལ་བ་བཟང་པོ་དང་། གྲགས་པ་དང་། སྙན་པ་འཕེལ་བར་བྱ་བ་ལ་ནི་དང་པོའི་རྡོ་རྗེ་གྲུབ་པས་སོ། །སྟོབས་ཆེན་པོ་དང་། ཡེ་ཤེས་དང་། ཆོས་དང་ལས་བསྒྲུབ་པར་བྱ་བ་ལ་ནི་དང་པོའི་རྡོ་རྗེ་སྙིང་སྟོབས་ ཆེ་བས་སོ། །རྫུ་འཕྲུལ་དང་ཆོ་འཕྲུལ་དང་རྨད་དུ་བྱུང་བ་དང་། རྣམ་པར་འཕྲུལ་པ་ཐམས་ཅད་སྟོན་པ་ལ་ནི་དང་པོའི་རྡོ་རྗེའི་རྣམ་པར་འཕྲུལ་པས་སོ། །ཐམས་ཅད་དུ་ཡི་གེ་དང་གཟུགས་ཀྱི་བདེན་པ་ཐམས་ཅད་མཐོང་བ་དང་ཐོས་པ་དང་སྨྲ་བ་དང་འདྲི་བ་གྲུབ་པར་བྱ་བ་ལ་ནི་དང་པོའི་རྡོ་རྗེ་དོན་ཡོད་ པའི་བདེན་པས་སོ། །དབང་པོ་ཐམས་ཅད་ཀྱིས་བདེན་པ་ཐམས་ཅད་མཐོང་བ་དང་ཐོས་པ་དང་སྨྲ་བ་དང་ཟིལ་གྱིས་གནོན་པར་བྱ་བ་ལ་ནི་དང་པོའི་རྡོ་རྗེ་དོན་ཡོད་པའི་བདེན་པས་སོ། །སྒྱུ་མ་ཐམས་ཅད་དང་བདེ་བའི་མཆོག་དང་ལུང་བསྒོ་བ་དང་ལན་ཐོབ་པ་གྲུབ་པ་ལ་དང་པོའི་རྡོ་རྗེ་རྨད་དུ་བྱུང་ བས་སོ། །གཏེར་ཐམས་ཅད་དབྱུང་བ་དང་ནོར་དབྲོག་པ་དང་རྒྱལ་སྲིད་ཐོབ་པ་དང་། ས་ལ་ཉེ་བར་ལོངས་སྤྱོད་པ་ལ་ནི་དང་པོའི་རྡོ་རྗེས་དབང་བསྐུར་བས་སོ། །ཡུལ་ཐམས་ཅད་དང་སྐྱེ་བོ་དང་གྲོང་ཁྱེར་དང་། ནགས་དང་ཆུ་བོར་ཉེ་བར་ལོངས་སྤྱོད་པ་སྤྲུལ་པ་ལ་ནི་དང་པོའི་རྡོ་རྗེ་གྲུབ་པས་སོ། ། ཐམས་ཅད་ལས་སྔོན་མ་བྱུང་བའི་ལྷ་ཡུལ་དང་རིན་པོ་ཆེ་དང་ཁ་ཟས་དང་བཏུང་བ་དང་གཡོག་འཁོར་ལ་སོགས་པ་སྤྲུལ་ཏེ། ཉེ་བར་ལོངས་སྤྱོད་པ་ལ་ནི་དང་པོའི་རྡོ་རྗེ་སྤྲུལ་པས་སོ། །སྐད་ཅིག་གིས་ས་གཞི་ཐམས་ཅད་འབྲུ་ལ་སོགས་པ་སྨིན་པར་བསྐྱེད་པ་དང་། ཆུའི་ཕུང་པོ་ཆེན་པོ་འབྱུང་བ་དང་།
- 209b
སྣང་བ་ཆེན་པོ་བསྐྱེད་པ་དང་རླུང་ཐམས་ཅད་དབང་དུ་བྱ་བ་ལ་ནི་དང་པོའི་རྡོ་རྗེ་དབྱིངས་ཀྱི་དབང་ཕྱུག་གིས་སོ། །རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བཟའ་བ་དང་བཏུང་བ་དང་རང་རྩེར་གཞུག་པ་དང་ལས་ཐམས་ཅད་ལ་སྦྱར་བ་ལ་ནི། དང་པོའི་རྡོ་རྗེ་དོན་ཡོད་པའི་ཐམས་ཅད་དབང་དུ་བྱེད་པས་སོ། །དངོས་ གྲུབ་ཐམས་ཅད་ལས་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་རྡོ་རྗེ་འཛིན་པ་དང་རྡོ་རྗེ་ལ་སོགས་པ་མཐོང་བ་ལ་ནི་དང་པོའི་རྡོ་རྗེའི་བསྙེམས་པས་སོ། །རང་གི་བདག་ཉིད་རྡོ་རྗེ་སེམས་དཔའ་ལ་སོགས་པའི་གཟུགས་ཐམས་ཅད་སྤྲུལ་ཅིང་སྟོན་པ། མི་སྣང་བ་དང་ནམ་མཁར་འགྲོ་ བ་གྲུབ་པ་དང་། ཤིན་ཏུ་ཕྲ་བ་དང་སྦོམ་པ་དང་དུ་མར་སྟོན་པ་ལ་ནི་དང་པོའི་རྡོ་རྗེ་གཟུགས་སྣ་ཚོགས་པས་སོ། །འཇིག་རྟེན་གསུམ་གྱི་བདག་པོར་གྱུར་པ་ཐམས་ཅད་དབབ་པ་དང་། དབང་དུ་བྱ་བ་དང་བཅིང་བ་དང་། ལས་ཐམས་ཅད་ལ་སྦྱར་བ་ལ་ནི་དང་པོའི་རྡོ་རྗེ་ཧཱུྃ་མཛད་ཀྱིས་སོ། །ལྷ་ཐམས་ ཅད་དབབ་པ་དང་བཅིང་བ་དང་དབང་དུ་བྱ་བ་དང་ལས་ཐམས་ཅད་ལ་ངེས་པར་སྦྱར་བ་ལ་ནི་དང་པོའི་རྡོ་རྗེ་ལྷའི་བདག་པོས་སོ། །ཀླུ་ཐམས་ཅད་གདོན་པ་དང་། འདུལ་བ་དང་དབང་དུ་བྱ་བ་དང་ལས་ཐམས་ཅད་ལ་ངེས་པར་སྦྱར་བར་བྱ་བ་ལ་ནི་དང་པོའི་རྡོ་རྗེ་འབར་བའི་རྡོ་རྗེས་སོ། །གནོད་སྦྱིན་ལ་ སོགས་པ་ཐམས་ཅད་དགུག་པ་དང་དབང་དུ་བྱ་བ་དང་ལས་ཐམས་ཅད་ལ་ངེས་པར་སྦྱར་བར་བྱ་བ་དང་སྐྲག་པར་བྱ་བ་ལ་ནི་དང་པོའི་རྡོ་རྗེ་གདོན་འདུལ་བས་སོ། །དཀྱིལ་འཁོར་ཐམས་ཅད་བརྟག་པ་དང་འཇུག་པ་དང་མཆོད་པ་དང་བསྒྲུབ་པ་དང་ལས་ཐམས་ཅད་ལ་ངེས་པར་སྦྱར་བར་བྱ་བ་ལ་ནི་དང་པོའི་ རྡོ་རྗེ་འཁོར་ལོས་སོ། །ཕྱག་རྒྱ་ཐམས་ཅད་དགུག་པ་དང་བཅིང་བ་དང་དབང་དུ་བྱ་བ་དང་བརྟན་པར་བྱ་བ་དང་བསྒྲུབ་པ་ལ་ནི་དང་པོའི་རྡོ་རྗེ་ཕྱག་རྒྱ་གྲུབ་པས་སོ། །དམ་ཚིག་ཐམས་ཅད་དགུག་པ་དང་གཞུག་པ་དང་བཅིང་བ་དང་བསྒྲུབ་པ་ལ་ནི་དང་པོའི་རྡོ་རྗེ་དམ་ཚིག་མཆོག་གིས་སོ། །ལས་ཐམས་ཅད་རབ་ ཏུ་བསྒྲུབ་པ་ལ། རྣམ་པར་མི་འཇིགས་པར་བྱ་བ་དང་བརྟན་པར་བྱ་བ་དང་གྲགས་པ་ཆེན་པོ་རབ་ཏུ་བསྒྲགས་པ་ལ་ནི་དང་པོའི་རྡོ་རྗེ་ལས་ཀྱིས་སོ། །རྡོ་རྗེ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་བསྒྲུབ་པ་ལ་ནི་དང་པོའི་རྡོ་རྗེས་སོ། །སེམས་དཔའ་ཆེན་པོ་ཐམས་ཅད་དགུག་
- 210a
པ་དང་གཞུག་པ་དང་བཅིང་བ་དང་དབང་དུ་བྱ་བ་བསྒྲུབ་པ་ལ་ནི་དང་པོའི་རྡོ་རྗེ་སེམས་དཔས་སོ། །དེ་བཞིན་གཤེགས་པ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་བསྒྲུབ་པ་ལ་ནི་དང་པོའི་དེ་བཞིན་གཤེགས་པས་སོ། །རྡོ་རྗེ་འཛིན་པ་ཆེན་པོ་དགུག་པ་དང་ གཞུག་པ་དང་བཅིང་བ་དང་དབང་དུ་བྱ་བ་ལ་ནི་དང་པོའི་རྡོ་རྗེ་འཛིན་པས་སོ་ཞེས་ཀྱང་གསུངས་སོ། །དཀྱིལ་འཁོར་དག་ཏུ་མ་ཞུགས་པའམ། །སྡིག་པ་ཐམས་ཅད་བྱས་པའམ། །རང་གི་སྙིང་པོ་མ་བསྒྲུབས་པའམ། །དངོས་གྲུབ་ཐམས་ཅད་གྲུབ་པར་འགྱུར། །མ་བསྒྲུབས་པར་ཐམས་ཅད་ འགྲུབ་བོ། །དོན་ཡོད་པར་གྲུབ་པ་ཕྱག་རྒྱ་ཆེན་པོ་མཆོག་ཏུ་གྲུབ་པའོ།། །།དེ་ནས་དང་པོའི་སྙིང་པོ་མ་བསྒྲུབས་པའི་ཐམས་ཅད་དོན་ཡོད་པ་ཐོགས་པ་མེད་པ་ལས་ཐམས་ཅད་ཀྱི་རྒྱུ་སྐད་ཅིག་ལ་བསྒྲུབ་པ་རྗེས་སུ་བཤད་པར་བྱའོ། །ཞེས་བཅོམ་ལྡན་འདས་རྡོ་རྗེ་ཐམས་ཅད་ཀྱི་སྣ་ ཚོགས་པའི་ཕྲིན་ལས་རྡོ་རྗེ་འཆང་ཆེན་པོས་གསུངས་སོ། །དོན་ཡོད་པ་དང་ཐོགས་མེད་པ། །བདག་ཀྱང་བདེ་གཤེགས་ལྷན་ཅིག་ཏུ། །ལས་ཀྱི་རབ་འབྱམ་འདི་དག་ནི། །དངོས་གྲུབ་སྐད་ཅིག་གིས་གྲུབ་བྱེད། །འདི་ལྟ་སྟེ་ཐམས་ཅད་ཤིན་ཏུ་བསྲུང་བ་དང་། ཡོངས་སུ་བསྐྱང་བ་དང་ ཞི་བ་དང་བདེ་ལེགས་སུ་བྱ་བ་དང་ཚེ་མངོན་པར་འཕེལ་བར་བྱ་བ་ལ་ནི་རྡོ་རྗེ་གར་གྱི་སེམས་དཔའི་ཚུལ་གཙུག་ཏོར་གྱི་ཕྱག་རྒྱས་སོ། །དཀྱིལ་འཁོར་ཐམས་ཅད་མཚམས་དང་ཕྱོགས་དང་དམ་ཚིག་དང་དངོས་གྲུབ་བཅིང་ཞིང་བསྲུང་བ་ལ་ནི་རྡོ་རྗེ་གར་གྱི་སོ་སོར་འབྲང་བ་ཆེན་པོས་སོ། །ཉིན་གསུམ་པ་ དང་ཉིན་བཞི་པ་དང་སླར་ཟློས་པ་དང་རྟག་པ་ཅན་དང་ཁྱབ་འཇུག་གི་རིམས་ཐམས་ཅད་བསལ་བ་ལ་ནི་རྡོ་རྗེ་གར་གྱི་རིམས་ནད་མེད་པས་སོ། །གདུང་བ་ཐམས་ཅད་དང་གནོད་བྱེད་དང་ནད་དང་མྱ་ངན་དང་སྡུག་བསྔལ་ཐམས་ཅད་གཞིག་པ་ལ་ནི་རྡོ་རྗེ་གར་གྱི་སྡུག་བསྔལ་ཉེ་བར་ཞི་བས་སོ། །དུག་དང་ སྦྱར་བའི་དུག་ལས་ཉེ་བར་ཐར་བ་དང་དབབ་པ་དང་བཅིང་བ་དང་བཟའ་བ་དང་བདུད་རྩིར་བྱ་བ་ལ་ནི་རྡོ་རྗེ་གར་གྱི་ཉེ་བའི་དུག་གིས་སོ། །གདོན་ཐམས་ཅད་དབབ་པ་དང་བཅིང་བ་དང་དམ་ཚིག་འཛིན་དུ་གཞུག་པ་དང་རབ་ཏུ་གདུལ་བ་དང་། བསྲུང་བ་ལ་ནི་རྡོ་རྗེ་གར་གྱི་གདོན་ལས་ཐར་བའོ། །
- 210b
ཐམས་ཅད་ལ་བཅིང་བ་དང་ཐར་བ་དང་དྲལ་བ་དང་ལྟུང་བ་དང་ལྡང་བ་ལ་ནི་རྡོ་རྗེ་གར་གྱི་རྡོ་རྗེ་ཆེན་པོའི་ཁྲོ་བོས་སོ། །མཁའ་འགྲོ་མ་ཐམས་ཅད་ཀྱི་ཕྱག་རྒྱ་གཞིག་པ་དང་གདོན་ལས་ཐར་བར་བྱ་བ་དང་ཤི་བ་བསླང་བར་བྱ་བ་དང་ཚེ་མངོན་པར་འཕེལ་བ་དང་ཤིན་ཏུ་བསྲུང་བ་ལ་ནི་རྡོ་རྗེ་གར་གྱི་ཕྱག་རྒྱའི་ ལན་གྱིས་སོ། །སྒྲིབ་པ་ཐམས་ཅད་དང་། སྡིག་པ་ཐམས་ཅད་དང་། རྨི་ལམ་ངན་པ་དང་། ལྟས་ངན་པ་དང་བྱུར་གཞིག་པ་ལ་ནི་རྡོ་རྗེ་གར་གྱི་ཞི་བས་སོ། །ཐམས་ཅད་དབབ་པ་དང་། བསྐྱོད་པ་དང་གར་བྱེད་དུ་གཞུག་པ་དང་ཐམས་ཅད་བདེན་པར་སྨྲར་གཞུག་པ་དང་། པྲ་སེན་ ཐམས་ཅད་བསྒྲུབ་པ་ལ་ནི་རྡོ་རྗེ་གར་གྱི་ཐམས་ཅད་འབེབས་པའི་ཕྱག་རྒྱས་སོ། །ཐམས་ཅད་རྒྱས་གདབ་པ་དང་གསད་པ་དང་ལྟུང་བར་བྱ་བ་དང་བསླང་བ་དང་། སླར་གསོ་བ་ལ་ནི་དོན་ཡོད་གྲུབ་པའི་རྡོ་རྗེ་གར་གྱི་མཁའ་འགྲོ་མ་ཆེན་མོས་སོ། །ཐམས་ཅད་རེངས་པར་བྱ་བ་དང་རྨོངས་པར་བྱ་བ་ དང་གཉིད་ལོག་པར་བྱ་བ་དང་གསད་པ་དང་བཟའ་བར་བྱ་བ་ལ་ནི་རྡོ་རྗེ་གར་གྱི་གདུག་པའི་སྲིན་པོས་སོ། །གཞན་གྱི་དཔུང་ཐམས་ཅད་སྐྲག་པར་བྱ་བ་དང་གཞིག་པར་བྱ་བ་དང་དབང་དུ་བྱ་བ་དང་ལྟུང་བར་བྱ་བ་དང་གསད་པར་བྱ་བ་ལ་ནི་རྡོ་རྗེ་གར་གྱི་གཤེད་བྱེད་ཀྱིས་སོ། །ཁྲོ་བོ་ཐམས་ཅད་ གསལ་བ་དང་བཞིན་རས་དང་བར་བྱ་བ་དང་རྩོད་པ་ལས་རྒྱལ་བ་དང་འཇིགས་པ་ལས་ཐར་བ་དང་གཡུལ་འགྱེད་པ་ལས་རྒྱལ་བ་བསྒྲུབ་པ་ལ་ནི་རྡོ་རྗེ་གར་གྱི་རྒྱལ་མཚན་མཆོག་གི་དཔུང་རྒྱན་གྱིས་སོ། །སྤྲིན་ཐམས་ཅད་ཡང་དག་པར་བཟུང་ཞིང་མི་གཡོ་བར་བྱ་བ་དང་ཆར་ཆེན་པོ་དབབ་ པ་དང་རླུང་དང་ཆར་པ་དང་གློག་དང་སེར་བ་བཟློག་པ་དང་དྲོ་བ་དང་གྲང་བ་བསལ་བ་ལ་ནི། རྡོ་རྗེ་གར་གྱི་དབང་པོའི་རྡོ་རྗེས་སོ། །གཟུགས་དང་སྒྲ་དང་དྲི་དང་རོ་དང་རེག་བྱ་ཐམས་ཅད་ཤིན་ཏུ་གྲུབ་པ་ལ་ནི། རྡོ་རྗེ་གར་གྱི་འདོད་པའི་དབང་ཕྱུག་གིས་སོ། །རྒྱུ་བ་དང་མི་རྒྱུ་བ་ཐམས་ཅད་རྗེས་ སུ་ཆགས་པ་དང་དགུག་པ་དང་དབང་དུ་བྱ་བ་དང་རྩེ་བ་དང་ལས་ཐམས་ཅད་ལ་ངེས་པར་སྦྱར་བ་ལ་ནི། རྡོ་རྗེ་གར་གྱི་དངོས་གྲུབ་ཐམས་ཅད་ཀྱིས་སོ། །ལྷ་ཐམས་ཅད་དབབ་པ་དང་ཀླུ་ཐམས་ཅད་དབང་དུ་བྱ་བ་དང་། གནོད་སྦྱིན་དང་འབྱུང་པོ་དང་མ་མོ་ཐམས་ཅད་ལས་ལ་ངེས་པར་སྦྱར་བ་ལ་
- 211a
ནི། རྡོ་རྗེ་གར་གྱི་རྡོ་རྗེ་སྐུའི་མཆོག་གིས་སོ། །རྣམ་ཐོས་སྲས་མནན་ནས་དཔལ་དྲང་བ་དང་། ལྷའི་བུ་མོ་ཐམས་ཅད་རབ་ཏུ་དབྲོག་པ་དང་། ལྷ་དང་ལྷ་མ་ཡིན་གྱི་བུད་མེད་ཐམས་ཅད་དང་རྩེ་བ་དང་འཇིག་རྟེན་གསུམ་མ་ལུས་པ་ལས་རྒྱལ་བ་དང་འདོད་པའི་དབང་ཕྱུག་ ཐམས་ཅད་ལས་རྒྱལ་བ་དང་དབང་ཕྱུག་ཆེན་པོ་ཐམས་ཅད་དབྲོག་པ་ལ་ནི་རྡོ་རྗེ་གར་གྱི་སྐྱེས་བུ་བྱེད་པ་ཆེན་པོས་སོ། །མཆོད་པ་ཐམས་ཅད་སྒྲུབ་པ་དང་། ཐམས་ཅད་རྡོ་རྗེར་བྱ་བ་དང་བདུད་ལ་སོགས་པ་ཐམས་ཅད་རབ་ཏུ་གཞོམ་པ་དང་། ཕྱག་རྒྱ་ཐམས་ཅད་བཅིང་བ་དང་དངོས་ གྲུབ་ཀྱི་མཆོག་ལ་སོགས་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་རྒྱུ་མྱུར་དུ་གྲུབ་པར་བྱ་བ་ལ་ནི། རྡོ་རྗེ་གར་གྱི་དོན་ཡོད་ཅིང་། ཐོགས་པ་མེད་པ་མྱུར་བའི་ལས་སྣ་ཚོགས་ཀྱི་དངོས་གྲུབ་དམ་པས་སོ།། །།དེ་ནས་ཕྱག་རྒྱ་ཐམས་ཅད་བསྒྲུབ་པའི་ ཆོ་ག་རྒྱས་པའི་རྒྱུད་ནི། ཉིན་རེ་དང་པོ་ལན་ཅིག་ནི། །ཕྱག་རྒྱ་ཐམས་ཅད་རབ་སྒྲུབ་བྱེད། །སྙིང་མཆོག་ལན་ཅིག་བཟླས་ནས་ནི། །ཕྱག་རྒྱ་ཆེན་པོ་རབ་གྲུབ་བྱ། །དེ་ཡི་རྗེས་ལ་ཉེ་སྙིང་པོ། །ལས་རྣམས་ཀུན་ལ་ངེས་སྦྱར་བས། །དོན་ཡོད་གྲུབ་པས་ལས་རྣམས་ ནི ། །ཀུན་ལ་ཤིན་ཏུ་འགྲུབ་པར་འགྱུར། །ཕྱག་རྒྱ་ཐམས་ཅད་རབ་བྱིན་རློབ། ཕྱག་ན་རྡོ་རྗེའི་ཕྱག་རྒྱ་ནི། །དཀྱིལ་འཁོར་དག་ཀྱང་མ་མཐོང་བ། །མ་བཤད་པ་ལའང་རབ་འགྲུབ་འགྱུར། །རྟོག་འདིར་འཇིགས་པ་ཡོད་མིན་ཏེ། །འཁོར་ལོ་མེད་ལ་བརྒྱ་བྱིན་ ལ། །གང་ཕྱིར་བདག་ལ་བྱིན་རློབ་པས། །རང་སྲས་རྒྱུ་ནི་འགྱུར་བ་ཡིན། །སྡིག་པ་ཆེན་པོ་བྱེད་པ་ཡང་། །བསམ་པ་ཤེས་ནས་སྦྱིན་པར་བྱ། །འདི་དག་བཅིངས་ཙམ་ཉིད་དག་བྱེད། །དངོས་གྲུབ་ཐམས་ཅད་འགྲུབ་པར་འགྱུར། །དཔལ་མཆོག་དང་པོའི་རྟོག་པ་ཆེན་པོའི་རྒྱལ་ པོ་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་ཆོ་ག་རྒྱས་པའི་རྟོག་པའོ།། །།དེ་ནས་སྟོན་པ་རྡོ་རྗེ་འཛིན། །འབྱིན་པ་བྱེད་པ་བདེ་བ་ཆེ། །བདེ་ཆེན་ཅན་དུ་བརྟན་ཕྱིར་དང་། །སེམས་ཅན་ཐམས་ཅད་རྣམ་དག་ཕྱིར། །ཁམས་ཀུན་དང་མཉམ་ཟད་པ་མེད། །
- 211b
ཀུན་གྱི་བདག་ཉིད་ལ་ཞུགས་ཏེ། །མཉམ་པའི་དངོས་གྲུབ་མཆོག་སྤྲོས་ནས། །དེ་བཞིན་གཤེགས་པའི་རིགས་ཕྱུང་ངོ་། །མཐའ་ཡས་པ་ཡི་ཞིང་ཐམས་ཅད། །འཇིག་རྟེན་ཀུན་གྱི་ཁམས་བཅས་པས། །དེ་ཚེ་སངས་རྒྱས་ཐམས་ཅད་ཀྱིས། །ཏིལ་གྱི་གང་བུ་བཞིན་མྱུར་གང་། ། འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་མདུན་ཡང་དག་བཞུགས། །སེམས་ཅན་ཐམས་ཅད་མ་དག་པས། །རང་རིག་ལས་ཀྱིས་དག་མ་འགྱུར། །དེ་ཚེ་སེམས་ཅན་ཁམས་རྣམས་ནི། །རང་བཞིན་གྱིས་ནི་གསོ་དཀའི་ཕྱིར། །རང་གི་ལས་ནི་སྦྱང་དོན་དུ། ། བཏང་སྙོམས་ཆེན་པོ་མཛད་པ་ཡིན། །དེ་ནས་བཅོམ་ལྡན་རྡོ་རྗེ་ཅན། །སེམས་དཔའ་ཆེན་པོ་བདེ་བ་ཆེ། །བྱང་ཆུབ་ཆེན་པོར་ཐུགས་བརྟན་པས། །སྐད་ཅིག་གིས་ནི་ཡང་དག་བསྐུལ། །སེམས་ཅན་ལ་ཕན་བསོད་ནམས་ཅན། །བྱང་ཆུབ་སེམས་ནི་བརྟན་པ་དག །སེམས་ ཅན་ཁམས་ནི་རྒུད་འགྱུར་བས། །ཤིན་ཏུ་བཏང་སྙོམས་མ་མཛད་ཅིག །དེ་ནས་སངས་རྒྱས་ཀྱིས་གསུངས་པ། །སྐུ་གསུང་ཐུགས་ཀྱི་རྡོ་རྗེ་ཅན། །ཐུགས་རྗེའི་བདག་ཉིད་ཅན་གྱི་ཐབས། །བྱང་ཆུབ་སེམས་མཆོག་ཁྱོད་སྨྲོས་ཤིག །དེ་ནས་སྟོན་པ་རྡོ་རྗེ་འཛིན། ། དེ་ཚེ་ཀུན་ནས་བྱིན་གྱིས་བརླབས། །བདེ་བ་ཆེན་པོ་རྡོ་རྗེ་ཆེ། །དཀྱིལ་འཁོར་ཆེན་པོ་དམ་པ་ཡིན། །ཁམས་གསུམ་འཁོར་བའི་རྒྱ་ཁྱོན་གྱིས། །འཁོར་ལོ་ཆེན་པོ་གདོད་ནས་བྱུང་། །དེ་ཡི་ཁམས་གསུམ་གནས་པ་ཡིས། །སེམས་ཅན་ཐམས་ཅད་ཡང་དག་བསྒྲུབས། ། སངས་རྒྱས་ཀུན་སོགས་དངོས་གྲུབ་ལ། །དེ་ཚེ་དག་པ་འགྲུབ་པར་འགྱུར། །དེ་ནས་སངས་རྒྱས་ཐམས་ཅད་ནི། །འདུས་ནས་གསོལ་བ་འདེབས་མཛད་པ། །དེ་བཞིན་གཤེགས་པའི་རིགས་ཆེན་པོ། །སངས་རྒྱས་ཀུན་མཆོག་བཤད་དུ་གསོལ། །དེ་ནི་སངས་རྒྱས་ ཐམས་ཅད་ཀྱི། །སྐུ་གསུང་ཐུགས་ལ་ཡང་དག་གནས། །སྐུ་གསུང་ཐུགས་ནི་རྡོ་རྗེ་ལ། །ཡང་དག་སྤྲོས་ཏེ་འདི་གསུངས་སོ། །ཨོྃ་བྷཱུ་ཁྃ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཐམས་ཅད་འདུས་ནས་ནི། །བདུད་བཅོམ་ལ་སོགས་མཛད་ནས་ནི། །བྱང་
- 212a
ཆུབ་སྙིང་པོར་བྱིན་གྱིས་བརླབས། །དེ་ནས་སྟོན་པ་རྡོ་རྗེ་འཛིན། །དཀྱིལ་འཁོར་གྱི་ནི་མཆོག་གསུངས་པ། །སེམས་ཅན་ཀུན་ལ་བདེ་དོན་ཕྱིར། །རྟོག་པ་ཀུན་གྱི་བདེ་བ་ཆེ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །དཀྱིལ་ འཁོར་ཆེན་པོའི་ཕྱི་རོལ་མཆོག །རྡོ་རྗེ་འཁོར་ལོ་ཡང་དག་བྲི། །འཁོར་ལོ་ལྟེ་བར་སངས་རྒྱས་ཉིད། །འཛུམ་པའི་ཚེམས་ནི་མི་སྣང་བ། །སུ་ར་ཏེ་ས་མ་ཡ་སྟྭཾ། །ཨོྃ་སིད་དྷ་མཱཾ་ཞེས་བརྗོད་དགོད། །མདུན་དུ་བདུད་ལས་རྣམ་རྒྱལ་བར། །མཛད་པའི་སངས་རྒྱས་ཡང་དག་བྲི། ། གཡས་སུ་བྱང་ཆུབ་སེམས་དཔའ་ཡི། །ནོར་ཆེན་པོས་ནི་དབང་བསྐུར་བ། །རྒྱབ་ཏུ་བྱང་ཆུབ་སེམས་དཔའ་དང་། །མཉམ་དུ་ཆོས་ཀྱི་འཁོར་ལོ་བསྐོར། །གཡོན་དུ་ལོག་པར་རྣམ་དྲེགས་པ། །སྡིག་པ་བསྡུས་པ་ཀུན་འབྱིན་པའོ། །དེ་ནས་འདི་རྣམས་ཀྱི་སྙིང་པོ་ནི། །བཛྲ་སཏྭ། བཛྲ་རཏྣ། བཛྲ་དྷརྨ། བཛྲ་ཀརྨ། དེ་ནས་ཕྱག་རྒྱ་རྣམས་ཏེ། སཏྭ་བཛྲཱི། རཏྣ་བཛྲཱི། པདྨ་བཛྲཱི། བི་ཤྭ་བཛྲཱི། །མཚམས་ཀྱི་ཆར་ནི་རྡོ་རྗེ་དང་། །རིན་ཆེན་སྡོང་བུ་ནོར་བུ་བྲིའོ། །མཚམས་རྣམས་སུ་ཡང་ལྷ་མོ་སྟེ། །ལྕགས་ཀྱུ་ལ་སོགས་སྒོ་རྣམས་སུའོ། །དེ་ བཞིན་སྔ་མ་ཅི་ལྟ་བར། །འཁོར་ལོ་དེ་ནི་བརྟག་པར་བྱ། །མཆོད་པའི་ཐལ་མོ་སྙིང་གར་བཅིང་། གཡོན་དུ་དེ་བཞིན་བསྐོར་བར་བྱ། །མེ་ཏོག་དང་བཅས་ཕྱག་རྒྱ་འདི། །སངས་རྒྱས་ཀུན་གྱི་དམ་ཚིག་རིམ། །མེ་ཏོག་བཅས་ཏེ་སྙིང་གར་བཅིང་། །བསམ་པ་གཡོས་པས་གདུང་བར་ བྱ། །མགོན་ལ་མགོ་བོས་ཕྱག་བྱས་ལ། །བསྐོར་བ་ལན་གསུམ་བྱས་ནས་ནི། །ཞུགས་ནས་མེ་ཏོག་འདོར་བར་བྱ། །ཤིན་ཏུ་གསང་བ་ཡང་དག་དགུག །དེ་ལ་དེ་བཞིན་གཤེགས་པ་ཐམས་ཅད་མཉེས་པར་བྱ་བ་དང་། དབང་དུ་བྱ་བ་དང་དགུག་པ་དང་བསྒྲུབ་པར་བྱ་བའི་སྙིང་པོ་ནི་ འདི་ཡིན་ཏེ། ཨོྃ་ཨ་ཀཱ་རོ་མུ་ཁྃ་སརྦ་དྷ་རྨཱ་ཎཱྃ་ཨཱདྱཱ་ནུ་ཏྦ་ནྣ་ཏྭཱ་ད། དེ་ནས་ཆོ་ག་ཇི་བཞིན་དུ། །སྟོན་ལ་མེ་ཏོག་སིལ་མ་དོར། །སངས་རྒྱས་བྱང་ཆུབ་རབ་བསྒྲུབ་ཕྱིར། །འགྲོ་བའི་མགོན་ལ་དེ་ཉིད་བརྗོད། །དེ་ཡིས་ཀུན་ནས་སངས་རྒྱས་ནི། །ཐམས་ཅད་འདུས་པ་ཉིད་དུ་འགྱུར། །
- 212b
ཐམས་ཅད་མི་དམིགས་སྦྱོར་བ་ཡིས། །དངོས་གྲུབ་ཐམས་ཅད་སྩོལ་བར་མཛད། །དཀྱིལ་འཁོར་དེར་ཞུགས་པ་ལ་ནི། །དངོས་གྲུབ་ཐམས་ཅད་འགྲུབ་པར་འགྱུར། །དགའ་བ་ལ་སོགས་མཚན་མ་མཆོག །སྣ་ཚོགས་པ་ནི་འབྱུང་བར་འགྱུར། །དེ་ནས་དེ་བཞིན་ཆོ་ག་ནི། །རྒྱས་པས་སློབ་མ་ མཆོག་ཏུ་གཞུག །མཆོད་པའི་ཐལ་མོས་འཁོར་ལོ་ཆེ། །མཆོད་པ་བྱས་ནས་སླར་དབྱུང་བྱ། །སྒྲུབ་པ་བྱས་ནས་དངོས་གྲུབ་ཀྱང་། །ཆོ་ག་ཅི་བཞིན་རབ་བཤད་བྱ། །རས་ལ་བཅོམ་ལྡན་བདུད་ལ་སོགས། །རྣམ་པར་རྒྱལ་བ་བརྙེས་པར་བྲི། །སྒྲུབ་འདི་ལན་ཅིག་ཙམ་གྱིས་ནི། །དེ་ འདྲའི་སྒྲུབ་པས་འགྲུབ་པར་འགྱུར། །སྐུ་གཟུགས་སོགས་མདུན་ཡང་དག་པར། །ཡེ་ཤེས་ཁུ་ཚུར་ཡོངས་བཟུང་ལ། །རྡོ་རྗེའི་ཚིག་གིས་ཆོ་ག་བཞིན། །བཟླས་བརྗོད་སྟོང་ཕྲག་བརྒྱ་བྱའོ། །མདོར་ན་འབུམ་ནི་རྫོགས་པ་ན། ཅི་འདོད་དངོས་གྲུབ་ཐམས་ཅད་དང་། །ཚེ་མཆོག་ འདི་ལ་སངས་རྒྱས་ཉིད། །ཐོབ་འགྱུར་འདི་ལ་ཐེ་ཚོམ་མ་མེད། །དེ་ནས་དེ་བཞིན་གཤེགས་པའི་ཕྱག་རྒྱ་ཆེན་པོའི་སྒྲུབ་པ་ཆེན་པོའི་རྒྱུད་ནི། ཕྱག་རྒྱ་གང་རུང་གཅིག་བཅིངས་ནས། །བདག་ནི་སངས་རྒྱས་ཡིན་བསྒོམས་ན། །ཕྱག་རྒྱ་ཆེན་པོའི་དངོས་གྲུབ་ཆེ། །བརྟན་པ་མྱུར་དུ་ ཐོབ་པར་འགྱུར། །དེ་ནས་དམ་ཚིག་སྒྲུབ་པའི་རྒྱུད་ནི། སྙིང་གར་རྡོ་རྗེ་གཟུགས་བཞག་སྟེ། །ས་མ་ཡ་སྟྭྃ་ཞེས་བརྗོད་ལ། །བཟླས་བརྗོད་འབུམ་གྱིས་བསྒྲུབས་ནས་ནི། །དངོས་གྲུབ་ཐམས་ཅད་ཐོབ་པར་འགྱུར། །དེ་ནས་ལས་ཀྱི་ཕྱག་རྒྱ་ཐམས་ཅད་སྒྲུབ་པའི་རྒྱུད་ནི། བདུད་ལས་ རྒྱལ་བའི་མཆོག་བཅིངས་ཏེ། །ཆོས་ཀྱི་འཁོར་ལོ་རབ་ཏུ་བསྐོར། །མཚུངས་མེད་སེམས་ཅན་དོན་བྱས་ནས། །ལས་ཀྱི་ཕྱག་རྒྱ་རྟག་ཏུ་འགྲུབ། །ཅེས་བཅོམ་ལྡན་འདས་ཀྱིས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་མཆོག་སྒྲུབ་པའི་ཆོ་ག་རྒྱས་པའི་རྒྱུད་དོ།། །།དེ་ ནས་མ་བསྒྲུབས་དངོས་གྲུབ་མཆོག །ལས་རྣམས་རབ་འབྱམ་དམ་པ་སྟེ། །སྡིག་པ་ཀུན་སེལ་སྣ་ཚོགས་པ། །གོ་རིམས་བཞིན་དུ་རབ་བཤད་བྱ། །འདི་ལྟ་སྟེ་ནད་ཐམས་ཅད་དང་མྱ་ངན་དང་གནོད་པ་དང་གནོད་བྱེད་དང་དུག་ཐམས་ཅད་དང་སྦྱར་བའི་དུག་དང་གཤེད་བྱེད་དང་། གཡེངས་བྱེད་
- 213a
དང་རོ་ལངས་དང་སྔགས་དང་སྨན་དང་བགེགས་དང་ལོག་འདྲེན་དང་སྡིག་པ་དང་རྨི་ལམ་ངན་པ་དང་དུས་མ་ཡིན་པར་འཆི་བ་དང་རིམས་དང་གདོན་དང་མཁའ་འགྲོ་མ་དང་ཉེ་བར་འཚེ་བ་དང་འགོ་བའི་ནད་དང་ཉེས་པ་དང་ཉོན་མོངས་པ་དང་ལུས་དང་ངག་དང་སེམས་ཀྱི་སྡུག་བསྔལ་ཐམས་ཅད་རྣམ་པར་ བཤིག་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་སྡུག་བསྔལ་འཕྲོག་པར་བྱེད་པས་སོ། །ཚེ་དང་ལང་ཚོ་དང་གཟུགས་དང་ཁ་དོག་དང་གཟི་བྱིན་ཆེན་པོ་དང་མདངས་དང་སྟོབས་དང་སྤྲོ་བ་དང་བརྩོན་འགྲུས་དང་དཔལ་དང་སྐལ་བ་བཟང་པོ་དང་བསོད་ནམས་དང་མིང་དང་སྙན་པ་དང་གྲགས་པ་དང་དྲན་པ་དང་བློ་གྲོས་དང་ བརྟན་པ་དང་རྟོགས་པ་དང་སྟོབས་དང་ཏིང་ངེ་འཛིན་དང་ཕུང་པོ་དང་འདུ་བྱེད་དང་སྐུ་དང་གསུང་དང་ཐུགས་འཕེལ་བ་ལ་ནི། །དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོས་སོ། །དེ་བཞིན་གཤེགས་པ་ཐམས་ཅད་ཀྱི་སྦྱིན་པ་དང་ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་ དང་ཤེས་རབ་དང་ཡེ་ཤེས་དང་སྟོབས་དང་ཐབས་དང་རྡོ་རྗེ་དང་བསྒྲུབ་པ་དང་གཟུངས་དང་ས་དང་སྤྱོད་པ་དང་སོ་སོ་ཡང་དག་པར་རིག་པ་དང་སངས་རྒྱས་ཀྱི་ཆོས་མ་འདྲེས་པ་དང་ཆོས་དང་ལས་དང་སྣ་ཚོགས་པའི་བྱ་བ་དང་སེམས་ཅན་གྱི་དོན་དང་སངས་རྒྱས་ཀྱི་མཛད་པའི་དོན་དང་སྐུ་དང་གསུང་དང་ཐུགས་དང་རྡོ་རྗེ་ཆེན་པོ་ གྲུབ་པ་ལ་ནི། དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐམས་ཅད་ཀྱིས་སོ། །དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་ཏུ་སེམས་བསྐྱེད་པ་དང་། ཀུན་ཏུ་བཟང་པོའི་ཆོ་ག་སྤྱོད་པ་རྫོགས་པར་བྱ་བ་དང་། སེམས་ཅན་ཐམས་ཅད་ཀྱི་དོན་དང་འཕོ་བ་དང་སྐྱེ་བའི་ས་དང་གཞོན་ ནུའི་རོལ་པ་སྟོན་པ་དང་མངོན་པར་བྱུང་བ་དང་དཀའ་བ་སྤྱོད་པ་སྟོན་པ་དང་བྱང་ཆུབ་ཀྱི་སྙིང་པོར་གཤེགས་པ་དང་བདུད་ཐམས་ཅད་འདུལ་བ་དང་། བྱང་ཆུབ་ཆེན་པོར་མངོན་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། མུ་སྟེགས་ཐམས་ཅད་ཚར་གཅོད་པ་དང་། འཇིག་རྟེན་ གསུམ་ལས་རྣམ་པར་རྒྱལ་བ་དང་། ལྷ་ལས་བབས་པ་དང་། འདུས་པ་ཆེན་པོའི་བྱིན་གྱིས་བརླབ་པ་དང་གདུག་པ་ཐམས་ཅད་འདུལ་བ་དང་འདུལ་བ་ལ་རབ་ཏུ་བཞག་པ་དང་། ངན་འགྲོ་ཐམས་ཅད་ལས་འདོན་པ་དང་མདོ་སྡེ་ཐམས་ཅད་སྟོན་པར་མཛད་པ་དང་རྟོག་པ་ཐམས་ཅད་བྱིན་གྱིས་བརླབ་
- 213b
པ་དང་དངོས་གྲུབ་ཐམས་ཅད་སྩོལ་བ་དང་དེ་བཞིན་གཤེགས་ཐམས་ཅད་ཀྱི་སྐུ་དང་གསུང་དང་ཐུགས་ལ་དམིགས་པའི་རྫུ་འཕྲུལ་དང་ཆོ་འཕྲུལ་བསྒྲུབ་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་ཀྱི་རྡོ་རྗེས་སོ། །ཅི་ལྟར་ཕྱག་རྒྱ་འདི་དག་གིས། །བྱང་ཆུབ་སེམས་ལ་མངོན་བརྟེན་པ། །དེ་ ལྟར་བྱང་ཆུབ་སྤྱོད་སོགས་ཀྱིས། །བྱང་ཆུབ་དམ་པ་ཐོབ་མི་འགྱུར། །དོན་ཡོད་བསོད་ནམས་དམ་པ་ཡི། །ལས་ཀྱི་རབ་འབྱམ་སྒྲུབ་བྱེད་པ། །ཆོ་ག་མ་གྲུབ་པ་རྣམས་གྲུབ། །སངས་རྒྱས་ཆོས་ནི་རབ་སྟེར་བྱེད། །རྣམ་པ་ཀུན་ཏུ་དང་ལྡན་པའི། །སེམས་ཅན་ཀུན་ལ་སྦྱིན་པར་བྱ། །དཀྱིལ་ འཁོར་དག་ཏུ་མ་ཞུགས་པ། །སྐད་ཅིག་གིས་ནི་སྦྱོར་བར་བྱེད། །དཔལ་མཆོག་དང་པོའི་རྟོག་པའི་རྒྱལ་པོ་ཆེན་པོ་ལས་དེ་བཞིན་གཤེགས་པ་ཐམས་ཅད་ཀྱི། བྱང་ཆུབ་རྡོ་རྗེ་བྱིན་གྱིས་བརླབས་པའི་རྡོ་རྗེའི་རྟོག་པ་རྒྱས་པའོ།། །།དེ་ནས་སྣ་ཚོགས་ལས་ཆེན་པོ། །ཁྱབ་བདག་རྡོ་རྗེ་འཛིན་ཆེན་ པོ། །གདུག་པ་ཐམས་ཅད་འདུལ་བའི་མཆོག །སེམས་ཅན་ཀུན་ལ་རྗེས་སྟོན་མཛད། །དེ་བཞིན་གཤེགས་པའི་རིགས་བསྐྱེད་པས། །གང་ཕྱིར་ཉེས་བྱས་ཀྱིས་གདུག་པའི། །རང་གི་རང་སེམས་སྤྱོད་པ་ཡིས། །ཞི་བས་སེམས་ཅན་ཀུན་གྱི་དོན། །གདུལ་བ་རབ་ཏུ་བསྒྲུབ་མི་ནུས། །སངས་རྒྱས་ ཀུན་གྱིས་བསྒྲུབ་བྱ་བ། །འགྲོ་བ་འདི་དག་ཐམས་ཅད་ཡིན། །གང་ཚེ་བདེ་གཤེགས་སེམས་ཅན་དོན། །དམ་པ་མཛད་པར་མི་སྤྱོད་པ། །དེ་ཚེ་ཉིད་ཀྱི་དངོས་པོ་ཀུན། །གཙོ་བོས་རྡོ་རྗེ་གསོལ་བ་བཏབ། །སེམས་ཅན་ཐམས་ཅད་འདུལ་མཛད་པ། །བཅོམ་ལྡན་འདས་ལ་གསོལ་བ་བཏབ། ། ཨུཏྟིཥྛ་ས་མ་ཡ་ཀྲོ་དྷ་ནི་སུམ་བྷ་ཛྭཱ་ལ་བཛྲ་ཧཱུྃ། དེ་ནས་སྔགས་འདི་གསུངས་ཙམ་གྱིས། །ཕྱག་ན་རྡོ་རྗེ་རང་ཉིད་གཙོ། །སྐུ་གསུང་ཐུགས་ཀྱི་རྡོ་རྗེ་ལས། །སླར་བྱུང་ནས་ནི་མདུན་ན་གནས། །ཁྲོ་ཆེན་རྒྱལ་པོའི་སྐུ་ཡིས་ནི། །སེམས་དཔའི་སྐྱིལ་ཀྲུང་གིས་ལེགས་བཞུགས། །འབར་བའི་ཕྲེང་ འོད་ཀྱིས་གསལ་བ། །སྲེག་པའི་བསྐལ་པ་གཞན་འདྲ་བ། །གཡོན་པའི་རྡོ་རྗེ་བསྙེམས་པ་ཆེ། །དྲག་ཏུ་གསོར་བས་བསྐྱོད་མཛད་ཅིང་། །འབར་བའི་རྡོ་རྗེ་ཆེར་འབར་བ། །རྣམ་པར་འཕྲོ་བས་སྲེག་པ་འདྲ། །འབར་བ་ཆེན་པོས་གསོད་པ་ནི། །བསྐལ་པའི་མེ་ཡི་ཕུང་པོ་འདྲ། །དང་
- 214a
པོའི་རྡོ་རྗེ་ཁྲོ་གཉེར་བཅས། །རྡོ་རྗེ་མཆོག་འཛིན་པས་གསུངས་པ། དེ་ལ་རྡོ་རྗེ་ཆེན་པོ་མེ་དང་ཉི་མ་ལྟར་འབར་བཞེས་བྱ་བའི་སྙིང་པོ་འདི་ཡིན་ཏེ་ཧཱུྃ། དེ་ནས་འདི་ནི་གསུངས་ཙམ་གྱིས། །སྡིག་པ་ཀུན་གྱི་བུད་ཤིང་ཟད། །འཇིག་རྟེན་ཁམས་ཀྱི་འཇིག་རྟེན་གསུམ། །ཐམས་ཅད་ གཡོས་ཤིང་འགུལ་བར་འགྱུར། །ལྷ་ཆེན་ལ་སོགས་ལྷ་རྣམས་ནི། །གཡོ་བ་མེད་ཅིང་རྨོངས་པར་འགྱུར། །རྡོ་རྗེ་འབར་བ་འཁྲུགས་པ་ཀུན། །དེ་བཞིན་འཇིག་པ་ལྟ་བུར་འགྱུར། །ཉན་ཐོས་དང་ནི་རང་རྒྱལ་རྣམས། །མྱ་ངན་འདས་པར་ཉེ་བར་འགྲོ། །ལྷ་ལ་སོགས་པའི་སྲིད་གསུམ་ ཀུན། །དེ་ཚེ་ཀུན་ཏུ་རྨོངས་པར་འགྱུར། །སངས་རྒྱས་ཐམས་ཅད་འདུས་པ་ཡིས། །སངས་རྒྱས་བྱང་ཆུབ་ཡང་བསྟན་མཛད། །སེམས་དཔའ་ཀུན་གྱི་ཐབས་ཆེན་པོ། །དམ་པ་ཡང་ནི་ཐུགས་སུ་ཆུད། །དེ་ནས་རྡོ་རྗེ་འབར་བའི་མཆོག །འབར་བའི་ཕྲེང་བ་འཁྲུགས་པའི་འོད། ། རྡོ་རྗེ་མཆེ་བ་གཙིགས་པའི་ཞལ། །ཞལ་རས་ཁྲོ་དང་བཅས་པ་ཡིན། །གཡོན་བརྐྱང་བས་ནི་ལེགས་པར་བཞུགས། །སྤྱན་འབར་འཇིགས་སུ་རུང་བ་སྟེ། །དབུ་སྐྲ་གྱེན་དུ་བརྗེས་ཤིང་གཡོ། །ཀུན་ནས་འཁྱིལ་ཅིང་འབར་བ་ཆེ། །རྡོ་རྗེ་གསང་བའི་རྣལ་འབྱོར་ཆེ། །མཁའ་ འགྲོའི་ཚོགས་ཀྱི་ལུས་ཅན་རྣམས། །ཕྱུང་ནས་ཀུན་ཏུ་འགྲོ་བ་རྣམས། །ཐམས་ཅད་དུ་ནི་འབར་བ་འཁྲུག །རླུང་བསྐྱོད་བསྐལ་པའི་མེ་ལྟ་བུར། །འབར་བའི་ཕྲེང་བ་ཀུན་ཏུ་འཁྲུགས། །འཇིག་རྟེན་ཁམས་ནི་མ་ལུས་ན། །སངས་རྒྱས་ཐམས་ཅད་སྲས་བཅས་པ། །ཡང་དག་ བཞུགས་པ་ལེགས་བསྐུལ་ཏེ། །འཇིག་རྟེན་ཐམས་ཅད་ཡོངས་སུ་བསྐོར། །བཀུག་ནས་སེམས་ཅན་ཀུན་དོན་དང་། །བསྟན་པ་ཐམས་ཅད་འགྲུབ་པའི་ཕྱིར། །འཇིག་རྟེན་གསུམ་བདག་དེ་རྣམས་དང་། །རྒྱུ་དང་མི་རྒྱུའི་སེམས་མེད་བྱས། །དེ་ནས་རྡོ་རྗེ་འཛིན་རྒྱལ་པོས། ། ཀུན་མཆོག་ས་ཡི་དབང་ཕྱུག་ནི། །དེ་རྣམས་ལ་ནི་ཐུགས་རྗེ་ཡིས། །འཆི་བ་སླར་གསོ་བརྟན་པོར་གསུངས། །ཨོྃ་ཨུཏྟིཥྛ་མ་ཧཱ་ཨ་དྷི་པ་ཏི་བཛྲི་ཎི། ཤཱི་གྷྲཾ་ཨུ་ཏ་ཐཱ་པ་ཡ་ཧཱུྃ། རྒྱུ་བ་དང་མི་རྒྱུ་བ་ཐམས་ཅད་བསླང་བའོ། །དེ་ནས་ས་གསུམ་བསླང་བ་ནི། །ཐམས་ཅད་དུ་ནི་ཤི་བ་གསོ། །
- 214b
སངས་རྒྱས་དཔའ་བོས་བཏུལ་གྱུར་ཅིང་། །རྡོ་རྗེ་ཅན་གྱིས་ཀྱང་རྗེས་བཏུལ། །དེ་ནས་རྡོ་རྗེ་འཛིན་ཁྲོ་བོས། །འབར་བའི་རྡོ་རྗེ་གསོར་བྱེད་ཅིང་། །ང་ཡི་དམ་ཚིག་ལ་གནས་ཞེས། །སྣ་ཚོགས་པ་ལ་བཀའ་རབ་བསྒོ། །དེ་རྣམས་ཀྱིས་གསོལ་བ། འདི་སུ་ཞིག་ལགས། བཅོམ་ ལྡན་འདས་ནི་ཞི་བ་ལ། །གནོད་སྦྱིན་གཟུགས་ཅན་གང་ལགས་གསུངས། །ཁྱེད་ཀྱིས་དམ་ཚིག་ཅི་འདྲ་བ། །ཞུས་པ་བདེན་པའི་ཚིག་ཏུ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །འདི་ནི་སངས་རྒྱས་རྣམ་གྲོལ་བ། །གདོད་སྐྱེས་རྡོ་རྗེ་གནོད་སྦྱིན་ཆེ། །དཀོན་མཆོག་ གསུམ་དང་དེ་བཞིན་དུ། །ང་ལ་སྐྱབས་སུ་འགྲོ་བར་གྱིས། །འཇིག་རྟེན་གསུམ་པོས་འདི་ཐོས་ནས། །ཚོགས་བདག་ཚོགས་ཀྱི་དབང་ཕྱུག་བཅས། །བསྐལ་པའི་མེ་དཔུང་ལྟ་བུ་ཡི། །འབར་བའི་མཚོན་གྱིས་འཐབ་པར་བརྩམས། །དེ་རྣམས་ཀྱིས་སྨྲས་པ། བདག་ཅག་ གིས་ནི་སངས་རྒྱས་རིགས། །རྡོ་རྗེ་གནོད་སྦྱིན་ཤེས་མ་ཡིན། །བདག་ཅག་འཇིག་རྟེན་གསུམ་པོ་གཅིག །གནོད་སྦྱིན་བསྒོ་བས་ཅི་ཞིག་བྱ། །དེ་ནས་རྡོ་རྗེ་འཛིན་ཁྲོས་ནས། །ཁྲོ་གཉེར་དཔྲལ་བར་བསྡུས་ཏེ་གནས། །དེ་ནས་ཁྲོ་གཉེར་ཐམས་ཅད་ནི། །རྡོ་རྗེ་འཛིན་པའི་རྗེས་སུ་སྤྱོད། ། གཡོན་པ་བསྙེམས་པ་རྒྱ་བཅས་པས། །སྨིན་མ་སྤྱན་བསྡུས་པས་དགོད་ཅིང་། །ནམ་མཁའ་ཁྱབ་པའི་དབྱངས་ཀྱིས་ནི། །དྲག་དུ་ཁྲོས་བཅས་པས་སྨྲས་སོ། །དེ་ལ་ཁམས་གསུམ་རྣམ་པར་རྒྱལ་བའི་ཉེ་བའི་སྙིང་པོ་སེམས་ཅན་མ་ལུས་པ་ལས་རྒྱལ་བ་ནི་འདི་ཡིན་ཏེ། ཧི། དེ་ནས་སྙིང་ པོ་འདི་ཕྱུང་བས། །ངེས་རྒྱལ་བཅུ་གཅིག་བཅིངས་པ་དང་། །དམ་ཚིག་བརྟན་པ་འཛིན་དུ་བཅུག །རྡོ་རྗེ་མིང་གིས་དབང་བསྐུར་ནས། །ལག་ན་རྡོ་རྗེ་འཛིན་མཆོག་བྱས། །རྡོ་རྗེ་མིང་ནི་བྱིན་ནས་སུ། །འཇིག་རྟེན་གསུམ་པོའི་ཏིང་འཛིན་བཞག །དེ་ནས་རྡོ་རྗེ་ཆེན་པོ་མཆོག །མགོན་ པོ་ཡིས་ནི་གསོལ་བཏབ་པ། །སེམས་ཅན་ཀུན་ལ་རྗེས་སྟོན་པས། །རྟོག་པ་འདི་ནི་བཤད་དུ་གསོལ། །རྡོ་རྗེ་འཛིན་པས་གསུངས་པ་ཡི། །དཀྱིལ་འཁོར་ཆེན་པོའི་ཕྱི་རོལ་ཏུ། །འབར་བའི་འཁོར་ལོ་ཡང་དག་བྲི། །དེ་ཡི་དབུས་སུ་གཞག་བྱ་བ། །སྔོན་པོ་འབར་བའི་
- 215a
གཟུགས་བཟང་བ། །ཞལ་གྱི་མཆེ་བ་ཅུང་ཟད་གཙིགས། །ཞལ་ནི་ཁྲོ་དང་བཅས་པས་བཞད། །སེམས་དཔའི་སྐྱིལ་ཀྲུང་གིས་ལེགས་བཞུགས། །བསྙེམས་བཅས་ཤས་ཆེར་འབར་བ་ལ། །འོད་ཟེར་འབར་བའི་འོད་འཁྲུགས་པའི། །རྡོ་རྗེ་གསོལ་བར་མཛད་ལ་ བརྩོན། །དེ་ཡི་དངོས་ནི་ཐམས་ཅད་དུ། །རྡོ་རྗེ་རྣལ་འབྱོར་མ་ཡི་གཟུགས། །རྡོ་རྗེ་མཚོན་ཆ་མདུང་ཆེན་དང་། །རལ་གྲི་ཞགས་པ་མཚོན་འཛིན་པ། །མཚམས་སུ་མདའ་དང་ཁ་ཊྭཱྃ་བ། །འཁོར་ལོ་བ་དན་སྣ་ཚོགས་འཛིན། །རྡོ་རྗེའི་རིགས་ནི་སྣ་ཚོགས་པ། །འབར་ བའི་འཁོར་ལོས་ཡོངས་སུ་བསྐོར། །དཀྱིལ་འཁོར་དགོད་པར་བྱ་བ་ནི། །ཐིག་བདུན་གྱིས་ནི་ཡང་དག་ཏུ། །དང་པོ་རྡོ་རྗེ་ཕྱག་རྒྱ་བདག །གཉིས་པ་སྔགས་ཀྱི་ལྷ་མོ་སྟེ། །གསུམ་པར་རྡོ་རྗེ་རྒྱལ་པོ་ནི། །རྡོ་རྗེ་ལྷ་མོས་ཡང་དག་བསྐོར། །རྡོ་རྗེ་ཆེན་མོ་སྒེག་མོ་ཆེ། །བཞི་པར་ཀླུ་ མཁན་མ་ལ་སོགས། །རྒྱལ་རིགས་གསོལ་ཀ་བྲན་རྣམས་ཀྱི། །ཁྲོ་བོ་རྣམས་ནི་ལྔ་པ་ལ། །དྲུག་པར་རྡོ་རྗེ་ཕོ་ཉ་མཆོག །གནོད་སྦྱིན་སྲིན་པོ་ཀིང་ཀ་ར། །དབང་ཕྱུག་དམ་པ་དྲག་པོ་སོགས། །གཏུམ་པོ་ཆེན་པོ་འདུལ་བར་མཛད། །ཕྱི་ཡི་དཀྱིལ་འཁོར་དབྱིབས་རྣམས་སུ། །མདོར་ ན་མིང་པོ་གསུམ་ལ་སོགས། །ལྷ་ལ་སོགས་པའི་ཚོགས་ཐམས་ཅད། །ལེགས་པར་བྲི་བའམ་གཞག་པར་བྱ། །མཚམས་སུ་ལྷ་མོར་རབ་བཤད་པ། །དེ་རྣམས་ཀྱི་ནི་སྒོ་དབུས་སུའམ། །རྡོ་རྗེ་ལྕགས་ཀྱུ་སོགས་ཁྲོ་བཅས། །དཀྱིལ་འཁོར་ཆེན་པོའི་ཚུལ་གྱིས་ནི། །གོ་རིམས་དག་ནི་ཇི་ བཞིན་དང་། །ཆོ་ག་རྒྱས་པ་ཇི་བཞིན་བྱ། །ཁྲོས་པས་རྡོ་རྗེ་གསོར་བ་དང་། །ཁྲོ་གཉེར་འཛུམ་དང་བཅས་པས་འདུད། །དེ་ནས་ཁྲོ་ཞིང་སློབ་དཔོན་ཆེ། །རྡོ་རྗེ་ཅན་མཆོག་རབ་ཞུ་གསལ། །རྡོ་རྗེ་ཧཱུྃ་མཛད་ཀྱིས་སྡིགས་མཛུབ། །ཧཱུྃ་མདད་རབ་ཏུ་སྦྱར་བར་བྱ། །བསྙེམས་དང་བཅས་པས་རྒྱས་གདབ་ ཉིད། །དེ་བཞིན་ཁྲོ་བས་འདུལ་བ་ལ། །རྡོ་རྗེ་འཆང་ཆེན་དགྱེས་པ་ཡིས། །གདུག་པ་ཉིད་ལ་རབ་ཏུ་དགྱེས། །དེ་ནས་མེ་ཏོག་བླངས་ནས་ནི། །ཁྲོས་པས་བདག་པོ་ཆེ་ལ་གཏོར། །རྡོ་རྗེ་འབར་བའི་ལྕགས་ཀྱུ་ཆེས། །ཡང་དག་པར་ནི་དགུག་པར་བྱ། །ཨོྃ་མ་ཧཱ་བཛྲ་ཛྭཱ་ལ་ཡཱ་ན་ལཱ་རྐ་ཡ་ཧི་
- 215b
ཛཿ། སརྦ་བཛྲ་ཀུ་ལ་པྲ་བེ་ཤ་ཡ་ཧཱུྃ། སརྦ་མུ་དྲཱྃ་ག་ནཱ་བན་དྷ་ན་ཏྲཱ་ཊ། སརྦ་ས་མ་ཡཾ་སཱ་དྷ་ཡ་ཕཊ། སརྦ་དུ་ཥྚ་ན་ད་ཧ་པ་ཙ་བྷ་སྨྭིཾ་ཀུ་རུ་མ་ཧཱ་ཀྲོ་དྷ་ཨ་ཀ་ནི་བཛྲེ་ཎ་ཧཱུྃ་ཕཊ། ཨ་ཨ་ཨ་ཨ། དེ་ནས་བཅོམ་ལྡན་འདས་ཁྲོ་བོའི། །རྒྱལ་པོ་བརྟན་པ་ཆེ་བྱོན་འགྱུར། །རྡོ་རྗེ་རིགས་ལ་སོགས་པ་ཀུན། །དངོས་གྲུབ་ ཐམས་ཅད་གསོལ་བར་མཛད། །དེ་ནས་ཧཱུྃ་ལ་སོགས་པའི་སྒྲའི། །མཚན་མ་རྣམས་ཀྱང་འབྱུང་བར་འགྱུར། །གལ་ཏེ་སློབ་མ་ལ་སོགས་ལ། །སྙིང་གར་དབབ་པ་ཕྲ་བ་སྐྱེ། །དེ་ནས་རྡོ་རྗེ་ཧཱུྃ་མཛད་ཀྱི། །ཕྱག་རྒྱས་སློབ་མ་གཞུག་པར་བྱ། །བཅུག་ནས་དང་པོའི་སེམས་དཔའ་ཡི། །རང་གི་ སྙིང་པོ་བརྗོད་པར་བྱ། ཧཱུྃ་ཧཱུྃ་བཛྲ་པྲ་ཧ་ར་ཎི་ཕཊ། ཧཱུྃ་བཛྲ་ཤཱུ་ལ་ཡཱ་གྲི་ཎི་ཏྲི་ཏི། མ་ཏ་ས་ཧཱུྃ་བཛྲ་ཀོ་ཥེ་ཙྪི་ནྡྡ་ཧྃ། །ཨོྃ་བཛྲ་ཨ་མ་ལ་པཱ་ཤེ་མ་ཊ། རྡོ་རྗེ་འགུགས་པ་དང་རྡོ་རྗེ་མདུང་དང་རྡོ་རྗེ་རལ་གྲི་དང་རྡོ་རྗེ་ཞགས་པ་སྟེ། རྡོ་རྗེ་ཁྲོ་བོའི་སྲུང་བའོ། །དེ་ནས་འདི་རྣམས་ཀྱི་ཕྱག་རྒྱ་རྡོ་རྗེ་དོན་ཡོད་པའི་ཐོགས་པ་ མེད་པ། ཤིན་ཏུ་གྲུབ་པ་སྟོབས་དང་ཕ་རོལ་གནོན་པ་རྣམས་སེམས་ཅན་མངོན་པར་རྒྱས་གདབ་པར་ནུས་པ་རྣམས་བསྐུལ་བར་བྱའོ། །ཨོྃ་བཛྲ་གུ་ཧྱ་སིད་དྷ་པ་ར་མ་ཡོ་གཱི་ཤྭ་རི་ཧི། ཧཱུྃ་བཛྲ་ཙཎྜ་ཧོ་ཁ་ཊྭཱྃ་ག་མ་ཧཱ་བཛྲ་ཀ་པཱ་ལ་ཡམ་ཀུ་ཏེ་རུ་ལུ་རུ་ལུ་ཎྚི་ཧཱུྃ་བཛྲ་ནཱ་རཱ་ཡ་ཎི་ཛི། ཧཱུྃ་བཛྲ་བ་ཊ་ཀེ་ཛི། རྡོ་རྗེ་ཁྲོ་བོའི་མཁའ་ འགྲོ་མ་ལན་ཅིག་བཟླས་ཏེ་དགོད་པའམ་བྲི་བར་བྱའོ། །བཅོམ་ལྡན་འདས་དེ་ཁོ་ན་ཉིད་ཀྱི་སྙིང་པོས་བཞུགས་སུ་གསོལ་ན། །དངོས་གྲུབ་ཐམས་ཅད་ལ་དོན་ཡོད་པའི་དངོས་གྲུབ་འགྲུབ་པར་འགྱུར་རོ། །དེ་ནས་དམ་ཚིག་བརྗོད་པར་བྱ་སྟེ། སེམས་ཅན་མང་ལ་བདེ་ཕྱིར་དང་། །བསྟན་པ་ཐམས་ ཅད་འགྲུབ་པའི་ཕྱིར། །གདུག་པ་འདུལ་ལས་བསོད་ནམས་ནི། །འགྱུར་ཞེས་རྡོ་རྗེ་འཛིན་གྱིས་གསུངས། །དེ་ནས་བཅོམ་ལྡན་འདས་རྡོ་རྗེ་ཧཱུྃ་མཛད་ཀྱི་ཕྱག་རྒྱ་དང་བཅས་པའི་མཛུབ་མོ་སྦྱར་བར་བྱའོ། །དེ་ནས་བཅོམ་ལྡན་འདས་གདུག་པ་ཐམས་ཅད་དང་། བདུད་ཐམས་ཅད་དང་། འཇིག་རྟེན་ གསུམ་པོ་ཐམས་ཅད་ཡང་དག་པར་འདུལ་བ་ཉིད་དུ་བྱིན་གྱིས་རློབ་པར་མཛད་དོ། །དེ་ནས་དབང་བསྐུར་བ་རྒྱས་པ་ལ་སོགས་པ་དེ་བཞིན་དུ་བྱས་ལ། རྡོ་རྗེ་ཁྲོ་བོའི་ལས་བཞི་པ་ལ་བསླབ་པར་བྱ་སྟེ། ཕྱག་རྒྱ་རྣམས་ཀྱིས་སེམས་ཅན་རྣམས་རྒྱས་གདབ་པ་དང་། ཕྱག་རྒྱ་གཞིག་པ་དང་གསད་པ་དང་སླར་
- 216a
འཚོ་བར་བྱའོ། །གང་ལ་ཕྱག་རྒྱ་སྦྱར་བ་ནི་འཆི་བར་འགྱུར་ན་དེ་ནི་གདུག་པ་ཡིན་པར་ཤེས་པར་བྱའོ། །དེ་ནས་འཚོ་བར་བྱེད་པའི་ཕྱག་རྒྱས་འཚོ་བར་བྱས་ལ། ཤིན་ཏུ་བསྲུང་བ་རབ་ཏུ་སྦྱར་བ་བྱས་ན་ཤིན་ཏུ་བསྲུང་བ་ཡིན་པའི་ཕྱིར། །གདུག་པ་རྣམས་སླར་ཡང་གནོད་པར་མི་ བྱེད་དོ། །དེ་ནས་བརྩམས་ཏེ་སློབ་མ་བཟང་། །རྡོ་རྗེ་ཚོགས་ནི་ཀུན་གྱིས་ཀྱང་། །མི་ཚུགས་པ་དང་མི་སོད་པར། །ཚེ་འདི་ཉིད་ལ་འགྲུབ་པར་འགྱུར། །དེ་ནས་འདིར་སྒྲུབ་བཤད་བྱ་སྟེ། །ཅི་བཞིན་སྐུ་ནི་དགེ་འདུན་དུ། །རྡོ་རྗེ་གསོར་ཞིང་དང་པོར་ནི། །བཟླས་བརྗོད་སྟོང་ཕྲག་བརྒྱ་བྱའོ། །འབུམ་ ཚང་ནས་ནི་སེམས་དཔའ་ཆེ། །རྡོ་རྗེ་སེམས་དཔའ་དང་མཉམ་མཆོག །རྡོ་རྗེ་ཁྲོ་བོ་རྒྱལ་པོ་མཆོག །རྒས་དང་འཆི་བ་མེད་པར་འགྱུར། །གདུག་པ་རྣམས་ནི་རྗེས་འདུལ་ཞིང་། །སངས་རྒྱས་ཀུན་ལ་རབ་མཆོད་པར། །འཇིག་རྟེན་གསུམ་ན་ལེགས་སྣང་ཞིང་། །ཅིས་ཀྱང་འཇིགས་པ་མེད་པར་ འགྱུར། །དེ་ནས་དེ་ཁོ་ན་ཉིད་ཀྱི་སྙིང་པོ་སྒྲུབ་པ་ནི། འགྲེང་ངམ་ཡང་ན་འདུག་པའམ། །འགྲོ་འམ་ཉལ་བར་བྱེད་པ་ན། །ཅི་ལྟ་དེ་ལྟར་འབུམ་བཟླས་ན། །ཚེ་འདི་ཉིད་ལ་འགྲུབ་པར་འགྱུར། །འདི་ཡིས་འདོད་པའི་དབང་ཕྱུག་ཀུན། །འདོད་པ་ཙམ་གྱིས་འགྲོ་འོང་ལྡིང་། །དངོས་གྲུབ་ཀུན་ གྱི་དབང་ཕྱུག་གྲུབ། །རྒ་དང་འཆི་བ་མེད་པར་འགྱུར། །འགྲོ་བ་རྣམས་ཀྱིས་མཆོད་པ་དང་། །རང་གི་ཉེ་དུ་རྣམས་ཀྱིས་བསྟེན། །གདུག་པ་ཐམས་ཅད་རྗེས་འདུལ་ཞིང་། །གང་ལ་འཇིགས་པ་མེད་པར་རྒྱུ། །ཞེས་བཅོམ་ལྡན་འདས་ཁྲོ་བོའི་རྒྱལ་པོ་ཆེན་པོས་གསུངས་སོ། །དེ་ནས་ཕྱག་རྒྱའི་ དམ་པ་སྒྲུབ་པ་ནི། ཅི་བཞིན་དུས་སུ་ཕྱག་རྒྱ་བཅིང་། །བདག་ཉིད་ངེས་པར་བསྲེགས་ནས་ནི། །ཅི་སྲིད་ཉིད་དུ་ཁྲོ་ཆེན་པོའི། །དངོས་གྲུབ་ཐམས་ཅད་འགྲུབ་པར་འགྱུར། །དེ་ནས་དམ་ཚིག་སྒྲུབ་པ་ནི། །བདག་ནི་ཐམས་ཅད་གསད་བྱ་ཞེས། །བརྗོད་ཅིང་ཕྱག་ན་རྡོ་རྗེ་ཡིས། །དམ་ཚིག་ཕྱག་རྒྱ་ བཅིངས་ནས་ནི། །བཟླས་ན་རྡོ་རྗེ་འཛིན་འགྲུབ་འགྱུར། །དེ་ནས་ལས་རྣམས་སྒྲུབ་པ་ནི། །ལས་རྣམས་དམ་པ་སྒྲུབ་པ་ནི། །རྣམ་པ་བཞིར་ནི་རབ་བྱེད་ཅིང་། །ཐམས་ཅད་བདེ་བའི་ཕྱིར་ཟོས་ན། །རྡོ་རྗེ་ལས་ཉིད་ཐོབ་པར་འགྱུར། །སྒྲུབ་པ་ཆེན་པོ་ཆོ་ག་རྒྱས་པའི་རྒྱུད་དོ།། །།དེ་ནས་དངོས་
- 216b
གྲུབ་སྒྲུབ་པ་ནི། །རྡོ་རྗེ་ཁྲོ་མཆོག་རྒྱལ་པོ་ཡི། །ལས་ཀྱི་རྒྱུད་ནི་དམ་པ་རྣམས། །གོ་རིམས་བཞིན་དུ་བཤད་པར་བྱ། །འདི་ལྟ་སྟེ། ཐམས་ཅད་བསྲེག་པ་དང་། བསྐྲད་པ་དང་། གཞིག་པ་དང་། རེངས་པར་བྱ་བ་དང་། གཉིད་ལོག་པར་བྱ་བ་དང་། རྒྱས་གདབ་པ་དང་། རྨོངས་པ་དང་། གཞིག་པ་དང་། བཅིང་བ་དང་། གཟིར་བ་དང་། དྲལ་བ་དང་། བརྡེག་པ་དང་། འབར་བ་དང་། བསྒྱེལ་བ་དང་། བཙོ་བ་དང་། གཅད་པ་དང་། དབུག་པ་དང་། ཕྱེ་མར་བྱ་བ་དང་། གཏོར་བ་དང་། རྣམ་པར་གཞོམ་པ་དང་། རིམས་དང་། དུག་དང་། གདོན་གྱིས་ཟིན་དུ་གཞུག་ པ་དང་། སྨྱོ་བར་བྱ་བ་དང་། གསད་པར་བྱ་བ་ལ་ནི་རྡོ་རྗེ་ཧཱུྃ་མཛད་ཀྱིས་སོ། །ཐམས་ཅད་དགུག་པར་བྱ་བ་དང་། ངེས་པར་བཀོད་པ་དང་། །བསྐྱོད་པ་དང་། གར་བྱེད་དུ་གཞུག་པ་དང་། གླུ་ལེན་དུ་གཞུག་པ་དང་། བརྒྱལ་དུ་གཞུག་པ་དང་། རྩེར་གཞུག་པ་དང་། ཧ་ཧ་ཞེས་དགོད་དུ་གཞུག་པ་ དང་། འཁོར་བ་དང་། དྲང་བ་དང་། འོད་དུ་གཞུག་པ་དང་། བསྒོམ་པ་དང་། ནུབ་པར་བྱ་བ་དང་། དབྱུང་བ་དང་། འཕང་བ་དང་། ཉེ་བར་འདེགས་པར་བྱ་བ་དང་། བསྐུར་བ་དང་། ང་རོ་འདོན་པར་བྱ་བ་དང་། ངུར་གཞུག་པ་དང་། རང་ཉིད་བརྡེག་པར་བྱ་བ་དང་། འཆིང་བར་བྱ་བ་དང་། སྐྲ་ འབལ་བར་བྱ་བ་དང་། ཞེ་འགྲས་པར་བྱ་བ་དང་། གོས་བཤུ་བ་དང་། ཁྲོ་བ་འབར་བར་བྱ་བ་ལ་ནི་ཁྲོ་བོའི་གདན་གྱི་ཕྱག་རྒྱས་སོ། །ཐམས་ཅད་དགུག་པ་དང་། གཞུག་པ་དང་། དབབ་པ་དང་། པྲ་སེན་བསྒྲུབ་པ་དང་། བདེན་པར་སྨྲ་བར་བྱ་བ་དང་། སྒྱུ་མ་སྟོན་པ་དང་། ལན་སྟོན་པ་དང་། དུས་ ཚིགས་ཀྱི་འཁོར་ལོ་ཡོངས་སུ་བཟློག་པ་དང་། དུས་མ་ཡིན་པར་ཤིང་ལས་མེ་ཏོག་དང་འབྲས་བུ་སྨིན་པར་བྱེད་པར་སྟོན་པ་དང་། འབྲུ་ཐམས་ཅད་ཡང་དག་པར་སྟོན་པར་བྱ་བ་དང་། རིམས་དང་། སྦྱར་དུག་དང་། གདོན་དང་། དུག་དང་། མཁའ་འགྲོ་མ་ལས་ཐར་བར་བྱ་བ་དང་། གཡུལ་འགྱེད་པ་ ཐམས་ཅད་ལས་ཐར་བར་བྱ་བ་དང་། གཞན་གྱི་དཔུང་གཞོམ་པ་དང་། ཕྱོགས་དང་། མཚམས་དང་། དཀྱིལ་འཁོར་བཅིང་བ་དང་། ཤིན་ཏུ་བསྲུང་བ་དང་། ཡོངས་སུ་སྐྱོབ་པར་བྱ་བ་དང་། ཐར་བར་བྱ་བ་དང་། བསླང་བ་དང་། དབང་དུ་བྱ་བ་ལ་ནི་ཁྲོ་བོ་ཆེན་པོ་སྣ་ཚོགས་གྲུབ་པས་སོ། །ལྷ་ལ་སོགས་
- 217a
པ་ཐམས་ཅད་ལྟུང་བར་བྱ་བ་དང་། ཀླུ་གདོན་པར་བྱ་བ་དང་། གནོད་སྦྱིན་རྗེས་སུ་འབྲང་བར་བྱ་བ་དང་། སྲིན་པོ་སྐྲག་པ་དང་། མཁའ་འགྲོ་མ་ལ་སོགས་པའི་གདོན་ཐམས་ཅད་བཏུལ་བ་དང་། བདུད་ཀྱི་དཔུང་ཐམས་ཅད་གཞོམ་པ་དང་། མ་མོ་རྣམས་འདུལ་བ་དང་། གདུག་ པའི་ཚོགས་རྣམ་པར་གཏོར་བ་དང་། གདུག་པ་རྣམས་ཚར་གཅད་པ་དང་། འདུམ་པ་དང་། འཇིགས་པ་མེད་པ་ཡང་དག་པར་བསྐྱེད་པ་དང་། ནོར་བུ་བཟང་པོ་དབང་དུ་བྱ་བ་དང་། ནོར་སྦྱིན་ལས་ནོར་ཐམས་ཅད་དབྲོག་པ་དང་། རྣམ་ཐོས་སྲས་མནན་ནས་དཔལ་དྲང་བ་དང་། ལྷའི་བུ་མོ་གཞོན་ནུ་མ་ ཐམས་ཅད་དང་རྩེ་འཇོ་བྱ་བ་དང་། བརྒྱ་བྱིན་མནན་ནས་བདེ་སོགས་མ་དབྲོག་པ་དང་། སྐེམ་བྱེད་ཚར་གཅད་པ་དང་། ཚངས་པ་ལྟུང་བར་བྱ་བ་དང་། ཁྱབ་འཇུག་གདུལ་བ་དང་། དབང་ཕྱུག་ཆེན་པོ་ལས་རྣམ་པར་རྒྱལ་བ་དང་། འདོད་པའི་དབང་ཕྱུག་མནན་ནས་དགའ་བ་མོ་དབྲོག་པ་དང་། རྡོ་རྗེ་བསྒྲུབ་པ་ དང་། བྱང་ཆུབ་ཆེན་པོ་བསྒྲུབ་པ་དང་། དེ་བཞིན་གཤེགས་པ་ཐམས་ཅད་མཉེས་པར་བྱ་བ་དང་། དགུག་པ་དང་། གཞུག་པ་དང་། དམ་ཚིག་གིས་བཅིང་བ་དང་། དབང་དུ་བྱ་བ་བསྒྲུབ་པ་ལ་ནི་རྡོ་རྗེ་ཁྲོ་བོ་ཆེན་པོ་རྒྱལ་པོ་དམ་པའི་དངོས་གྲུབ་ཀྱིས་སོ་ཞེས་ཀྱང་གསུངས་སོ། །ལན་ཅིག་ བཟླས་པས་མཆོག་གྲུབ་པ། །ཐོག་མའི་རྩ་སྙིང་བཟང་ལན་ཅིག །དེ་ཡི་འོག་དུ་ཁྲོ་གཉེར་གྱིས། །བསྒྲུབ་བྱ་ཐམས་ཅད་དགུག་པ་ཡིན། །དཔལ་མཆོག་དང་པོའི་རྟོག་པ་ཆེན་པོའི་རྒྱལ་པོ་ལས་རྡོ་རྗེ་མེ་དང་ཉི་མ་ལྟར་རབ་ཏུ་འབར་བའི་རྟོག་པའི་ཆོ་ག་རྒྱས་པའོ།། །།དེ་ནས་ཏིང་འཛིན་ ཐམས་ཅད་ནི། །རྣམ་དག་མཆོག་གི་ཆོས་ཉིད་ལས། །སྤྱན་རས་གཟིགས་དབང་ཆེན་པོ་ནི། །རྡོ་རྗེ་སེམས་དཔའི་གཙོ་ཆེན་ཡིན། །གདུག་པ་ཐམས་ཅད་འདུལ་དོན་དུ། །རང་རིག་རིན་པོ་ཆེ་བསྐྱེད་ན། །སངས་རྒྱས་ཀུན་གྱི་ཁྲོ་བོ་ཆེ། །ཐབས་མེད་པས་ནི་ཐབས་ཡིན་ནོ། །འདོད་ཆགས་ ལ་སོགས་ཀུན་བསགས་པས། །མ་དག་སེམས་ཅན་ཁམས་རྣམས་ནི། །དེ་རྣམས་ལ་ནི་རབ་སྤྱོད་པར། །སྐྱེས་བུ་མཆོག་ནི་རྣམ་པར་མཁྱེན། །མཆོག་ཏུ་མི་འདུལ་བ་ཉིད་ཀྱིས། །སངས་རྒྱས་ཀྱང་ནི་མངའ་མི་མཛད། །འཇིག་རྟེན་ཀུན་ན་འཇིག་རྟེན་མཆོག །རང་ཉིད་བཟང་པོ་ལ་སྙོམས་
- 217b
ཞུགས ། །དེ་ལ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་རྒྱལ་པོ་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཆོས་ཉིད་ཀྱི་ཡེ་ཤེས་ཀྱི་རྡོ་རྗེ་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ཏེ་གང་ལ་གཟིགས་པས་དེ་བཞིན་གཤེགས་པ་ཐམས་ཅད་ཁམས་གསུམ་པ་ཐམས་ཅད་ཀྱི་དབང་ ཕྱུག་ཐམས་ཅད་ཉིད་ཐུགས་སུ་ཆུད་པར་གྱུར་པའོ། །བསྙེམས་པས་པདྨ་གཡོན་པ་ནི། །བཟུང་སྟེ་འདབ་མ་འབྱེད་མཛད་པས། །ཅི་ནུས་པ་ཡི་ཏིང་འཛིན་གྱིས། །རང་བཞིན་གྱིས་ནི་གཟིགས་པར་མཛད། །ཅི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་པ། །གནས་ཀྱི་ཉེས་པ་སྣ་ཚོགས་ པའི། །ཁམས་གསུམ་པ་ནི་དེ་བཞིན་དག །འདི་ལ་གཟིགས་པ་ལ་སོགས་པས། །རྒྱལ་བ་རྣམས་ནི་དབང་པོར་གྱུར། །དེ་ཡིས་རྡོ་རྗེ་སེམས་དཔའ་ནི། །སྤྱན་རས་གཟིགས་ཀྱི་དབང་ཕྱུག་གྱུར། །དེ་ནས་སྒོམ་པའི་སྙིང་པོ་འདི། །དག་པར་བསྒོམས་པས་སྒོམ་པ་ན། །རྡོ་རྗེ་འཆང་བ་ཆེན་ པོ་ནི། །པདྨ་ཆེན་པོ་འཆང་བར་འགྱུར། །གསེར་སྦྱངས་རི་ཡི་དབང་པོ་ནི། །རྒྱལ་པོ་ཆེ་དང་མདངས་མཉམ་པ། །བསྙེམས་པ་གཡོན་པའི་པད་མཆོག་གི། །གཡས་པ་མཆོག་ལ་རྣམ་པར་གཟིགས། །དེ་ནས་པདྨའི་འདབ་མ་ལ། །པདྨ་ཆེན་པོ་མཆོག་འཛིན་པ། །སངས་རྒྱས་ལ་ སོགས་འབྱུང་བ་ཡི། །འཁོར་ལོ་རྣམས་ནི་འདུལ་བའི་མཆོག །འགྲོ་བ་སྣ་ཚོགས་འདུལ་མཛད་པ། །བཞུགས་པ་རབ་ཏུ་བྲི་བར་བྱ། །དཀྱིལ་འཁོར་ཆེན་པོའི་ཚུལ་གྱིས་ནི། །དེ་ལ་པདྨ་དགེ་བ་དེར། །འགྲོ་བ་ཐམས་ཅད་རྣམ་སྦྱོང་བའི། །ཚུལ་གྱིས་འདུལ་བར་མཛད་པ་ན། །པདྨའི་ རིགས་མཆོག་སྟོན་པའི་ཕྱིར། །རྒྱལ་རྣམས་ཀྱིས་གསོལ་བ་བཏབ། །དེ་ནས་ཐམས་ཅད་འདུལ་མཛད་ཅིང་། །ཤིན་ཏུ་དཀར་བའི་ཆོས་འཛིན་པ། །རྡོ་རྗེ་ཆོས་ཏེ་རང་རྒྱལ་པོ། །འཇིག་རྟེན་དབང་པོས་བཀའ་སྩལ་པ། །ཕྱི་ནི་དཀྱིལ་འཁོར་ཆེན་པོ་ལ། །པདྨ་འདབ་མ་བརྒྱད་ པ་བྲི། །དེ་ཡི་དབུས་སུ་སྤྱན་འཛུམ་པ། །འཇིག་རྟེན་དབང་ཕྱུག་དགོད་པར་བྱ། །གསེར་སྦྱངས་ལྟ་བུའི་པདྨ་ནི། །གཡོན་བསྙེམས་ཚུལ་གྱིས་གཟིགས་མཛད་པ། །རྒྱལ་མཚན་ཀུན་གྱིས་རྣམ་པར་སྤྲས། །སངས་རྒྱས་སྐུ་མཆོག་སྤྱི་བོར་བཞུགས། །དེ་ཡི་ངོས་ནི་ཐམས་ཅད་དུ། །
- 218a
སངས་རྒྱས་སྐྲ་ནི་བརྒྱད་པོ་བྲི། །རང་གི་ཏིང་འཛིན་པདྨ་ཆེའི། །ཏིང་ངེ་འཛིན་ལ་རྣམ་པར་གཟིགས། །འཇིག་རྟེན་དབང་པོའི་གཟུགས་ལོགས་སུ། །སངས་རྒྱས་ལ་སོགས་རིགས་ཀྱི་ལྷ། །ཞི་བ་སྲེད་མེད་བུ་ཚངས་པ། །འདོད་པའི་གཟུགས་ནི་པདྨ་ཅན། །སྤྱི་བོར་འཚེར་ ཞིང་མགྲིན་འདེགས་པ། །རྟ་མགྲིན་ལྕགས་ཀྱུ་བཅིངས་ནས་ནི། །ཆོས་ཀྱི་ཚིག་གིས་སྤྱན་དྲང་བྱ། །དེ་ནས་པདྨའི་སྙིང་པོ་ནི། །སརྦ་ཏ་ཐཱ་ག་ཏ་པདྨ་ཛཿཧཱུྃ་བཛྲ་པདྨ། ཧེ་པདྨ། པདྨ་བྃ། ཧོ་པདྨ་ནི་རཱ་ཛ། དེ་ནས་མཚམས་རྣམས་སུ་ནི། ཧཱུྃ་པདྨེ་ཙ་ཎྜེ་ཤྭ་ར་ཧཱུྃ། ཧེ་མ་ཧཱ་བི་ཤཱ་པདྨ་ཙཱུ་རྞེ་སིདྡྷ་ཧཱུྃ། མ་ཊ་ཧྲཱིཿཔདྨ་པདྨོ་ཧཱུྃ་ཨ་ཧོ་པདྨ་ཨ་ཤྭ། ཀྲ་མ་ཀྲ་མ་ཧཱུྃ་ཛཿ། དཀྱིལ་འཁོར་ཆེན་པོའི་ཚུལ་གྱིས་ནི། །ཆོ་ག་རྒྱས་པ་བྱས་ནས་ནི། །པདྨ་ཆེན་པོ་མེ་ཏོག་བཅས། །མ་ཡེངས་ཡིད་ཀྱིས་ཕྱག་བྱའོ། །དཀྱིལ་འཁོར་ཞུགས་ནས་ཏིང་ངེ་འཛིན། །ལས་བྱུང་གཟུངས་འདི་བརྗོད་པར་བྱ། །ཨོྃ་བི་ཤོདྷ་ ཡ། མ་ནུ་ས་ནི་ཤུདྡྷ་མ་ཧཱ་ས་ཏྭ། དྷཱ་ཏུ་ས་མ་ཡ་ས་ཏྭ། དཱ་གདཱི་པཉྩ་ཡི། ཙིཏྟ་མེ་སརྦ་དྷ་མེ་ཥྚྱེ་བཛྲི་ཎི་ཙིཏྟ་མེ་སརྦ་དྷ་མེ་ཤྱ་ཛི་ནི། གཟུངས་ཀྱི་ཕྱག་རྒྱ་གསན་ནས་ནི། །དགྱེས་པས་པདྨ་འཛིན་པ་འགྲུབ། །དེ་ནས་མཛུབ་མོ་ལྕགས་ཀྱུར་བཅིང་། །ཆོས་ཀྱི་ཚིག་གིས་ལེགས་སྤྱན་དྲང་། །ཨོྃ་ སརྦ་ཏ་ཐཱ་ག་ཏ་ཨ་བ་ལོ་ཀི་ཤྭ་ར་པདྨ་ཧ་སྟ། ཡ་ཧི་ཤཱི་གྷྲྃ་མ་མེ་བཛྲ་མུ་དྲཱ་ཨ་གྲི་ཤྱ་ས་བེ་ས་མ་ཡེར་བ་དྷ་བི་ཤི་ཀོ་མི། ཛཿཧཱུྃ་བཾ་ཧོཿ ཤོ་དྷ་ཡ་སརྦ་སཱ་དྷ་ཡ་བ་མ་མེ། མ་ཧཱ་བཛྲ་དྟར་སྟཱྃ། དེ་ནས་འཇིག་རྟེན་མགོན་པོ་མཆོག །འཇིག་རྟེན་འཛིན་པ་རང་ཉིད་བྱོན། །འཇིག་རྟེན་ཀུན་མཆོག་འགྲུབ་འགྱུར་བའི། ། ཏིང་འཛིན་ཆོ་ག་ངེས་པར་མཛད། །དེ་ནས་དེ་བཞིན་སློབ་མ་རྣམས། །གཞུག་པའི་ཆོ་ག་རྒྱས་པ་ནི། །དངོས་གྲུབ་ཐམས་ཅད་སྦྱིན་པ་ཡི། །ཡེ་ཤེས་དག་ནི་བསླབ་པར་བྱ། །ཏིང་འཛིན་སྙིང་པོ་འདི་ཡི་ནི། །སྒྲུབ་པ་ཆེན་པོ་གདོད་ནས་བྱུང་། །འཇིག་རྟེན་ཀུན་གྱི་དབང་ཕྱུག་ཉིད། །གོ་རིམས་ བཞིན་དུ་བཤད་པར་བྱ། །བུད་མེད་རྣམས་ཀྱི་ནང་ཞུགས་པའམ། །གདུག་པ་རྣམས་ཀྱི་ནང་ཆུད་པའམ། །གང་ཡང་རུང་བར་འདུག་ནས་ནི། །པདྨ་ཆེན་པོ་ཡོངས་སུ་བཟུང་། །དུས་དང་སྟོབས་ནི་ཇི་བཞིན་དུ། །ཉིན་རེ་ཅི་ནུས་བསྒྲུབ་པར་བྱ། །ཆོ་ག་འདི་ཡིས་ཚེ་འདི་ལ། །
- 218b
མྱུར་དུ་མཆོག་ནི་འགྲུབ་པར་འགྱུར། །འདོད་ཆགས་ཀུན་གྱི་བདེ་མྱུར་བར། །འདོད་པ་ཙམ་གྱིས་འགྲོ་འོང་ལྡིང་། །འཇིག་རྟེན་ཀུན་གྱི་དབང་ཕྱུག་རྒྱལ། །རྒ་དང་འཆི་བ་མེད་པར་འགྱུར། །སངས་རྒྱས་བྱང་ཆུབ་སེམས་དཔའ་ཉིད། །ཕྱག་ན་རྡོ་རྗེ་ཉིད་དང་ནི། །དངོས་གྲུབ་ ཀུན་གྱི་མཐའ་ཡས་མཆོག །ཚེ་འདི་ཉིད་ལ་ཐོབ་པར་འགྱུར། །དེ་ནས་ཕྱག་རྒྱ་བསྒྲུབ་པ་ནི། །ཕྱག་རྒྱ་བཅིངས་ཏེ་ཏིང་འཛིན་གནས། །དངོས་གྲུབ་ཆེན་པོ་ཉིད་ཐོབ་བོ། །དམ་ཚིག་དམ་ཚིག་མཆོག་གིས་ཏེ། །ལས་ནི་ལས་མཆོག་ཕྱག་རྒྱས་སོ། །སྒྲུབ་པ་ཆེན་པོ་ཆོ་གའི་རྒྱུད་དོ།། །། དེ་ནས་དངོས་གྲུབ་མ་གྲུབ་པའི། །ཏིང་འཛིན་ལས་ནི་འདྲེན་མ་དག །དང་པོར་ཏིང་འཛིན་གྲུབ་པ་ནི། །གོ་རིམས་བཞིན་དུ་རབ་བཤད་བྱ། །འདི་ལྟ་སྟེ་སྒྲིབ་པ་ཐམས་ཅད་དང་སྡིག་པ་དང་རྨི་ལམ་ངན་པ་དང་ལྟས་ངན་པ་དང་ཡམས་དང་འཚེ་བ་དང་ནད་འགོ་བ་དང་ཉོན་མོངས་པ་དང་དུས་མ་ཡིན་པར་འཆི་བ་དང་ འཇིགས་པ་དང་སྐྲག་པ་དང་རྩོད་པ་དང་འཐབ་པ་དང་བྱིས་པའི་གདོན་དང་དམུ་རྒོད་དང་ཉོན་མོངས་པ་དང་ངལ་བ་དང་སྡུག་བསྔལ་བ་དང་ཡིད་མི་བདེ་བ་དང་དབུལ་བ་དང་རྒྱགས་པ་དང་རེག་ན་མི་བདེ་བ་དང་སྐལ་བ་ངན་པ་དང་ནད་མེད་པ་མ་ཡིན་པ་དང་ནོར་བརླག་པ་རྣམས་ལ་ནི་པདྨ་ཆེན་པོ་ཞི་བས་སོ། །རླུང་དང་མཁྲིས་པ་ དང་ཁྲག་དང་བད་ཀན་དང་འདུས་པ་དང་མ་ཞུ་བ་དང་རིམས་དང་སྦྱར་བའི་དུག་དང་དུག་དང་མཛེ་དང་འབྲུམ་བུ་ཕྲ་མོ་དང་གཡན་པ་དང་རྐང་ཤུ་དང་། སྐྲན་དང་ཆུའི་དམུ་རྫིང་དང་མཚན་བར་རྡོལ་བ་དང་ཤ་བཀྲ་དང་ཟད་བྱེད་དང་ཁྲག་ཟད་པ་དང་ཁུ་བཟད་པ་དང་། ནད་ཐམས་ཅད་དང་གནོད་པ་དང་གནོད་བྱེད་དང་གདོན་དང་ཕྲ་ མེན་རྣམས་གསོ་བ་ལ་ནི། པདྨ་ཆེན་པོ་སྨན་གྱི་ཕྱག་རྒྱ་འཛིན་པས་སོ། །ཐམས་ཅད་རྡོ་རྗེར་བྱས་པ་དང་ཆོས་དང་གོ་ཆ་དང་། གཙུག་ཏོར་དང་གཙུག་ཕུད་དང་མཚམས་དང་ཕྱོགས་དང་དཀྱིལ་འཁོར་དང་ས་དང་ནམ་མཁའ་དང་རྡོ་རྗེའི་གདན་དང་ཁང་པ་ཆེན་པོ་དང་རྡོ་རྗེར་བ་དང་མེ་འབར་བ་དང་ཐལ་བའི་ར་བ་ དང་རྡོ་རྗེ་དང་རི་བོ་དོན་ཡོད་པ་ལ་སོགས་པ་དང་སྲད་བུས་ཡོངས་སུ་བསྐོར་བ་དང་ཕུར་བུས་གདབ་པ་དང་ཟས་དང་བཏུང་བ་དང་གོས་དང་རྒྱན་དང་ཕྱག་རྒྱ་དང་བསྲུང་བ་ལ་ནི་པདྨ་ཆེན་པོ་ཐམས་ཅད་སྲུང་བས་སོ། །ཚེ་ཐམས་ཅད་དང་སྟོབས་དང་ཁ་དོག་དང་གཟི་བརྗིད་དང་མདངས་དང་ལང་ཚོ་དང་བརྩོན་འགྲུས་
- 219a
དང་སྤྲོ་བ་དང་ནད་མེད་པ་དང་དཔལ་དང་སྐལ་བ་བཟང་པོ་དང་ནོར་དང་འབྲུ་དང་དབང་ཕྱུག་དང་འབྱོར་པ་དང་དངོས་གྲུབ་དང་བློ་དང་རྙེད་པ་དང་བཀྲ་ཤིས་པ་དང་མིང་དང་གྲགས་པ་དང་སྙན་པ་དང་ཏིང་ངེ་འཛིན་དང་ཤེས་རབ་དམ་པ་འགྲུབ་པ་ལ་ནི་པདྨ་ཆེན་པོ་མཆོག་གྲུབ་པས་སོ། །དཔལ་ མཆོག་དང་པོའི་རྟོག་པ་ཆེན་པོའི་རྒྱལ་པོ་ལས། ཆོས་ཐམས་ཅད་སྒྲིབ་པ་མེད་པའི་ཡེ་ཤེས་ཀྱི་རྡོ་རྗེའི་ཆོ་ག་རྒྱས་པའོ།། །།དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་མི་འགྱུར་ནམ་མཁའ་ཆེ། །ཐམས་ཅད་དབང་བསྐུར་ཀུན་གྱི་དོན། །ཀུན་དབང་རིན་ཆེན་ཐམས་ཅད་འཛིན། །ཏིང་ ངེ་འཛིན་གྱིས་བྱིན་གྱིས་བརླབས། །དྲག་པོ་ཆེན་པོ་རབ་སད་མཛད། །ཆོས་རྣམས་ལ་ནི་རྣམ་གཟིགས་པས། །ཀུན་དོན་དབང་ཕྱུག་གདོད་ནས་བྱུང་། །ཉི་ཟླ་དང་ནི་གཟའ་སྐར་ཅན། །ནམ་མཁའ་ཉིད་དུ་གྱུར་པ་ཡིན། །དེ་ནས་རིན་ཆེན་ཏིང་འཛིན་ནི། །ངེས་པར་རྡོ་རྗེ་ཅན་དུ་བརྗོད། །དེ་ ནས་ནམ་མཁའ་རྡོ་རྗེ་ཉིད། །ལྗང་སྔོན་བཻ་ཌཱུརྱ་མཉམ་མདངས། །རྡོ་རྗེ་རིན་ཆེན་བསྣམས་དགེ་བ། །ནམ་མཁའི་སྙིང་པོར་ཡང་དག་གྱུར། །དེ་ནས་བཅོམ་ལྡན་ཐོག་མ་འདི། །མཛོད་སྤུ་ཀུན་གྱི་གནས་ན་བཞུགས། །ཏིང་འཛིན་ལ་ནི་རྣམ་གཟིགས་པས། །འཇིག་རྟེན་དབང་ཕྱུག་བདག་ པོ་ཉིད། །སངས་རྒྱས་ཐམས་ཅད་སྲས་བཅས་དང་། །དེ་བཞིན་རྡོ་རྗེ་འཛིན་པ་མཆོག །རྡོ་རྗེ་རིན་ཆེན་དེ་ཡིས་ནི། །ཀུན་རིག་ཀུན་གྱིས་དབང་བསྐུར་དང་། །བསམ་པ་ཐམས་ཅད་རྫོགས་བྱའི་ཕྱིར། །ཀུན་མཆོག་ཀུན་ལ་དབང་བསྐུར་ནས། །ཤིས་པ་བརྗོད་པ་འདི་གསུངས་སོ། ། ཨོྃ་སརྦ་བཛྲ་ས་ཏྭ་ཨ་ཏི་པ་ཏི་སྟྭྃ་ཨ་བྷི་ཥིཉྩཱ་མི་བྷུར་བྷུ་བ་སྭཿ། དེ་ནས་བཟང་པོས་འདི་གསུངས་ཤིང་། །ལེགས་པར་ཤིས་བརྗོད་དབང་བསྐུར་བས། །རྡོ་རྗེ་རིན་ཆེན་ཆེ་དེ་ལས། །ཆོས་ཀྱི་གཙོ་བོར་བྱུང་བར་གྱུར། །བྱུང་ནས་འགྲོ་བ་ཐམས་ཅད་ནི། །ཅི་རིགས་པར་ནི་ཀུན་དབང་བསྐུར། ། རྡོ་རྗེ་ཀུན་གྱིས་དབང་བསྐུར་ནས། །སླར་ཡང་དཀྱིལ་འཁོར་ཚུལ་གྱིས་བཞུགས། །བདེ་གཤེགས་ཀུན་གྱིས་བྱིན་བརླབས་པས། །རྡོ་རྗེ་རིན་ཆེན་བླ་ན་མེད། །ཤིན་ཏུ་དབང་ཕྱུག་ཆེན་པོའི་མཆོག །དངོས་གྲུབ་གསོལ་བའི་རྟོག་པ་གསུངས། །དཀྱིལ་འཁོར་ཆེན་པོའི་ཕྱི་རོལ་ནི། །
- 219b
ནམ་མཁའི་འཁོར་ལོ་ནམ་མཁའི་མདོག །ཉི་མ་ཟླ་བ་སྐར་མ་དང་། །གཟའ་རྣམས་ཀྱིས་ནི་བརྒྱན་པ་བྲི། །དེ་དབུས་ནམ་མཁའི་སྙིང་པོ་ནི། །བདག་ཉིད་ཐམས་ཅད་དགྱེས་པ་གཞག །དག་པའི་བཻ་ཌཱུརྱ་མདོག་འདྲ། །འོད་ཟེར་འབར་བ་སྣ་ཚོགས་འཁྲུག །གཡོན་པ་ རིན་ཆེན་ཐུགས་ཀར་སྟོད། །གཡས་པས་ནོར་ཆེན་རབ་སྩོལ་བ། །དེ་ཡི་ངོས་སུ་སེམས་དཔའ་མཆོག །བཞི་པོ་གཟུངས་བཅས་དམ་པ་ཡིན། །དབང་བསྐུར་བ་དང་གཏེར་ཉིད་དང་། །ནོར་བུ་ཆེན་པོ་བླ་མེད་དང་། །འབྱོར་པ་དཔལ་ནི་ཕུན་སུམ་ཚོགས། །རང་གི་མཚན་མས་ མཆོད་པས་ནི། །དེ་ལ་དེ་དག་གི་སྙིང་པོ་འདི་ཡིན་ཏེ། བཛྲ་ས་ཏྭ་ཛཿ། བཛྲ་རཏྣ་ཧཱུྃ། བཛྲ་དྷ་རྨ་བྃ། བཛྲ་ཀ་རྨ་ཧོཿ། དེ་ནས་གཟུངས་རྣམས་ཀྱི་སྙིང་པོ་བཤད་དོ། ཨོྃ་པྲ་ཏི་བཛྲི་ཎི་ཕཊ། ཨོྃ་བཛྲ་བྲཱི་ཏི་ཧི་ཧི། ཨོྃ་ཙིནྟཱ་མ་ཎི་ཧོཿ། ཨོྃ་བཛྲ་མ་ཧཱ་མ་ཧེ་ཧྃ། དཀྱིལ་འཁོར་ཆེན་པོའི་ཚུལ་གྱིས་ ནི། །ཆོ་ག་རྒྱས་པ་ཅི་བཞིན་བྱ། །ནོར་བུའི་ཁུ་ཚུར་གྱིས་བཞུ་གསལ། །མཁའ་སྐྱེས་ལ་ནི་མགོས་ཕྱག་བྱ། །བཞུགས་ནས་ནམ་མཁའ་མཁས་པ་ཡི། །དམ་ཚིག་དམ་པ་བརྗོད་པར་བྱ། །ཁྱེད་ནི་ནམ་མཁའ་ལས་བྱུང་བའི། །ཐམས་ཅད་ཀྱི་ནི་ལྔ་པ་ཡིན། ཨོྃ་ཨི་སིད་དྷ་བྷུར་བྷུ་ག་ སིད་དྷ་སིད་དྷ་སྭཿ། སིད་དྷ་མ་ཧཱ་བཛྲ་རཏྣ། བ་བ་ཏྲ་ཊྭཱ་ཏྲཱྃ། འདི་ནི་བཟླས་པ་ཙམ་གྱིས་ནི། །མཁའ་སྙིང་དངོས་གྲུབ་ཐམས་ཅད་དང་། །ཕུན་ཚོགས་ཀུན་ལ་ཤིན་ཏུ་ནི། །འགྲུབ་འགྱུར་འདི་ལ་ཐེ་ཙོམ་མེད། །ཅེས་བཅོམ་ལྡན་འདས་རྡོ་རྗེ་རིན་ཆེན་བླ་ན་མེད་པས་གསུངས་སོ། །དེ་ ནས་ནོར་བུ་ཁུ་ཚུར་ཅན་གྱི་ལྕགས་ཀྱུས་དགུག་པར་བྱའོ། ཨོྃ་བྷཱུ་རཱ་ཡ་ཧཱི་ཛཱ། བྷུ་བ་བྲ་བི་ཤ་ཧཱུྃ་སྭ། གྲྀ་ཧྞ་བྃ་བ་པ་ཊ་ཊ་སིད་དྷ་ཧོ་ཏྲཱྃ། དེ་ནས་བཅོམ་ལྡན་མྱུར་དུ་ནི། །བྱོན་ནས་དངོས་གྲུབ་ཐམས་ཅད་ནི། །འབྱོར་བ་ཤིན་ཏུ་གཡོ་བ་ལ། །དོན་ནི་རབ་ཏུ་འགྲུབ་པར་འགྱུར། །དེ་ནས་སློབ་མས་ཕྱག་ རྒྱ་ནི། །མེ་ཏོག་བཅས་པ་མཆོག་གིས་གཞུག །བཅུག་ནས་དེ་ཉིད་མཆོག་སྙིང་པོ། །བདེན་པ་ལན་ཅིག་བརྗོད་དུ་གཞུག །དེ་ནས་འབྱོར་པའི་མཆོག་བརྟག་པ། །དཔལ་གྱི་ཕུན་ཚོགས་མཆོད་པ་ཆེ། །འཇིག་རྟེན་མཆོག་གི་དངོས་གྲུབ་རྣམས། །བདེ་བར་གཤེགས་པ་དེ་བཞིན་
- 220a
ཐོབ། །དེ་ནས་དེ་ཕྱིར་སྒྲུབ་པ་བཤད། །རྡོ་རྗེ་རིན་ཆེན་རྒྱལ་མཆོག་གིས། །དཔག་མེད་ཟློས་པས་བསྒྲུབ་བྱ་ཞིང་། །འདི་ཡིས་སྐྱེས་མཆོག་འདི་ཉིད་ལ། །འདོད་ཆགས་འགྲོ་དང་འོང་བར་འགྱུར། །རིན་ཆེན་ཀུན་གྱི་དབང་ཕྱུག་རྒྱལ། །རྒ་དང་འཆི་བ་མེད་པར་འགྱུར། ། དངོས་གྲུབ་ཀྱི་དམ་པ་ཐམས་ཅད་ཀྱང་དེ་བཞིན་ནོ། །ཕྱག་རྒྱ་བསྒྲུབ་པ་ནི་དགའ་བ་ཉིད་ཀྱིས་སོ། །དམ་ཚིག་གི་ཕྱག་རྒྱ་བསྒྲུབ་པ་ནི་དམ་ཚིག་གི་ཁུ་ཚུར་གྱིས་སོ། །དེ་བཞིན་དུ་ལས་བསྒྲུབ་པ་ནི་དངོས་གྲུབ་བླ་ན་མེད་པ་ཡིན་ནོ་ཕྱག་རྒྱ་ཆེན་པོ་བསྒྲུབ་པ་ཉིད་དེའི་རྒྱུད་དོ།། །།དེ་ནས་དེ་ཕྱིར་ལས་རྣམས་ ཀྱི། །རབ་འབྱམ་རྒྱུ་ནི་དམ་པ་དང་། །དངོས་གྲུབ་ཆེན་པོ་ཀུན་གྲུབ་པ། །གོ་རིམས་ཅི་བཞིན་རབ་བཤད་བྱ། །འདི་ལྟ་སྟེ་འབྱོར་པ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་དང་དབྲོག་པ་དང་བསག་པ་དང་ལེན་པ་དང་འདྲེན་པ་དང་འགུགས་པ་དང་གཏོད་པ་དང་གཞིག་པ་ དང་འཕེན་པ་དང་འདེགས་པ་དང་འབེབས་པ་དང་བརྡེག་པ་དང་སྦྱང་བ་དང་རྙེད་པ་དང་ཉོ་བ་དང་བཙོང་བ་དང་ཀུན་ཏུ་འགྱེད་པ་དང་ཉེ་བར་དགོད་པ་དང་བརྟན་པར་བྱ་བ་དང་རྡོ་རྗེར་བྱ་བ་དང་འབྱོར་པ་ཐམས་ཅད་བསྒྲུབ་པ་དང་འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་གྱི་དབང་བསྐུར་བས་སོ། ། དཔལ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་དང་དབྲོག་པ་དང་བསག་པ་དང་ལེན་པ་དང་འདྲེན་པ་དང་འགུགས་པ་དང་གཏོད་པ་དང་གཞིག་པ་དང་འཕེན་པ་དང་འདེགས་པ་དང་འབེབས་པ་དང་བརྡེག་པ་དང་སྦྱང་བ་དང་རྙེད་པ་དང་ཉོ་བ་དང་བཙོང་བ་དང་ཀུན་ཏུ་འགྱེད་ པ་དང་ཉེ་བར་དགོད་པ་དང་བརྟན་པར་བྱ་བ་དང་རྡོ་རྗེར་བྱ་བ་དང་འབྱོར་པ་ཐམས་ཅད་བསྒྲུབ་པ་དང་འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་དཔལ་གྱིས་སོ། །ཕུན་སུམ་ཚོགས་པ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་དང་དབྲོག་པ་དང་བསག་ པ་དང་ལེན་པ་དང་འདྲེན་པ་དང་འགུགས་པ་དང་གཏོད་པ་དང་གཞིག་པ་དང་འཕེན་པ་དང་འདེགས་པ་དང་འབེབས་པ་དང་བརྡེག་པ་དང་སྦྱང་བ་དང་རྙེད་པ་དང་ཉོ་བ་དང་བཙོང་བ་དང་ཀུན་ཏུ་འགྱེད་པ་དང་ཉེ་བར་དགོད་པ་དང་བརྟན་པར་བྱ་བ་དང་རྡོ་རྗེར་བྱ་བ་དང་འབྱོར་པ་ཐམས་ཅད་བསྒྲུབ་པ་དང་འབྱོར་པ་
- 220b
ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་ཕུན་སུམ་ཚོགས་པས་སོ། །མཆོད་པ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་དང་དབྲོག་པ་དང་བསག་པ་དང་ལེན་པ་དང་འདྲེན་པ་དང་འགུགས་པ་དང་གཏོད་པ་དང་གཞིག་པ་དང་འཕེན་པ་དང་། འདེགས་པ་དང་ འབེབས་པ་དང་བརྡེག་པ་དང་སྦྱང་བ་དང་རྙེད་པ་དང་ཉོ་བ་དང་བཙོང་བ་དང་ཀུན་ཏུ་འགྱེད་པ་དང་ཉེ་བར་དགོད་པ་དང་བརྟན་པར་བྱ་བ་དང་རྡོ་རྗེར་བྱ་བ་དང་འབྱོར་པ་ཐམས་ཅད་བསྒྲུབ་པ་དང་འབྱོར་པ་ཐམས་ཅད་ཀྱི་མཆོག་བསྒྲུབ་པ་ལ་ནི་རྡོ་རྗེ་རིན་ཆེན་གྱི་མཆོད་པ་སྒྲུབ་པས་སོ་ཞེས་ཀྱང་གསུངས་སོ། །སེམས་ ཅན་ཐམས་ཅད་བདེ་དོན་དུ། །རྡོ་རྗེ་སེམས་དཔའ་ནོར་ཆེ་བ། །རང་གི་རྒྱལ་མཆོག་ལན་ཅིག་བསྒྲུབ། །ཡི་གེ་ཏྲྃ་ནི་སྦྱར་བར་བྱ། །དཔལ་མཆོག་དང་པོའི་རྟོག་པའི་རྒྱལ་པོ་ཆེན་པོ་ལས། བསམ་པ་ཡོངས་སུ་རྫོགས་པར་བྱེད་པ་རྡོ་རྗེ་རིན་ཆེན་གྱི་རྟོག་པའི་ཆོ་ག་རྒྱས་པའོ།། །། དེ་ནས་རྒྱལ་བ་རྡོ་རྗེ་འཛིན། །འཇིག་རྟེན་གསུམ་པོ་ཁམས་གསུམ་པ། །འཇིག་རྟེན་གསུམ་བདག་ཐམས་ཅད་ལ། །འཇིག་རྟེན་གསུམ་མཆོག་འདུལ་མཛད་པ། །ཆོ་ག་བཞིན་དུ་བསྒོམས་གྱུར་ཞིང་། །སེམས་ཅན་དོན་ཕྱིར་ཆོ་གས་བཞུགས། །འདོད་ཆགས་ཞེ་སྡང་གཏི་མུག་རྣམས། ། རྟག་ཏུ་རྣམ་པར་གནས་པ་ཡིན། །མི་མཉམ་པ་ཡིས་བསྟེན་གྱུར་ན། །དུག་ཉིད་དུ་ནི་ཉེ་བར་འགྲོ། །བདུད་རྩི་ཉིད་ཀྱིས་བསྟེན་གྱུར་ན། །བདུད་རྩི་ཉིད་དུའང་འགྱུར་བ་ཡིན། །འདོད་ཆགས་ཚངས་པ་མཆོག་འབྱིན་པ། །ཞེ་སྡང་དྲག་པོའི་ཏིང་འཛིན་གྱིས། །གཏི་མུག་ཁྱབ་ འཇུག་བརྟན་མཛད་ནས། །འཇིག་རྟེན་གསུམ་པོ་བྱིན་གྱིས་བརླབས། །འདོད་ཆགས་ཞེ་སྡང་གཏི་མུག་རྣམས། །རྟག་ཏུ་གནས་པས་སྲིད་གསུམ་གནས། །ཆོས་ཀྱིས་བསྟེན་ནས་གསུམ་མཆོག་སྟེ། །ཆོས་མིན་བསྟེན་པས་ངན་སོང་གསུམ། །འདོད་ཆགས་སྦྲང་ རྩིར་བྱེད་པར་བཤད། །ཞེ་སྡང་རྒྱལ་བར་བྱེད་པར་བཤད། །གཏི་མུག་དོན་ནི་སྒྲུབ་བྱེད་ཅེས། །ཀུན་ཏུ་གསང་བའི་མིང་ཡིན་ནོ། །ང་ནི་འཇིག་རྟེན་གཅིག་པུ་ཉིད། །འཇིག་རྟེན་གསུམ་དུ་རབ་ཏུ་བཤད། །ང་ནི་འདོད་པ་གཅིག་པུ་ཉིད། །ཚངས་པ་དྲག་པོ་གཡུང་དྲུང་ཡིན ། །
- 221a
དེ་ནས་གསུམ་པོ་འདི་ཡི་མཆོག །སྦྱང་ཕྱིར་རྡོ་རྗེ་སྦྱང་འཛིན་པ། །གཟུགས་ནི་གསུམ་པོ་འདི་དག་ཉིད། །བདག་ཉིད་ཁོ་ན་བྱུང་བ་ཡིན། །གང་ཕྱིར་འཇིག་རྟེན་འདི་དག་ནི། །རྟག་ཏུ་ཡང་ནི་འདི་སྐད་སྨྲ། །ཚངས་སོགས་ཀྱིས་འདུལ་ཡང་དག་པའི། །སངས་ རྒྱས་བྱང་ཆུབ་སྣོད་མ་ཡིན། །དེ་རྣམས་སྦྱང་ཕྱིར་བཅོམ་ལྡན་འདས། །རྡོ་རྗེ་འཆང་ཆེན་རང་ཉིད་ནི། །གཟུགས་ནི་གསུམ་པོ་འདི་མཛད་ནས། །ཕྱིས་ནི་སངས་རྒྱས་ཉིད་མི་འགྱུར། །དེ་ནས་ཚངས་པ་ལྷ་སོགས་ལྷ། །འཇིག་རྟེན་གསུམ་མཆོག་དབང་ཕྱུག་ཆེ། །དཀྱིལ་ འཁོར་དེ་ནི་གསང་སྙིང་པོ། །རང་གི་རང་གྲུབ་ཕྱིར་རབ་ཕུལ། །ཨོྃ་བྷཱུར་བྷུ་བ་སྭཿ། ཟུར་བཞི་པ་ལ་སྒོ་བཞི་པ། །སྒོ་སྲུངས་བཞིས་ནི་རབ་བསྲུངས་པ། །ཁ་ཁྱེར་གྱིས་ནི་ལེགས་བསྐོར་བ། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་མ་ཉིད་དང་ནི། །དཀྱིལ་འཁོར་གཞུ་ ཡི་དབྱིབས་ཅན་ལ། །སྦྲང་རྩིར་བྱེད་དང་རྒྱལ་བྱེད་ཉིད། །བསྒྲུབ་པ་ཐམས་ཅད་སྒྲུབ་པ་ནི། །གོ་རིམས་དག་ནི་ཇི་བཞིན་དུ། །ལེགས་པར་བྲིའམ་གཞག་པར་བྱ། །པུས་མོ་གཉིས་ཀྱིས་བཞུ་གསལ་དེར། །རྩེ་གསུམ་དམ་ཚིག་གིས་མཚན་པས། །ཞུགས་ཏེ་ དམ་ཚིག་བཅིངས་ནས་ནི། །ཡང་དག་པར་ནི་དགུག་པར་བྱ། །ཨོྃ་བྷཱུར་བྷུ་བ་སྭཿ། སྭ་སྟི་ནཱ་མ་སྭཱ་ཧཱ། ཉི་ཤུ་རྩ་གཅིག་བཟླས་པ་ཡིས། །ཐམས་ཅད་ཐམས་ཅད་ཀྱིས་བསྐོར་བ། །ཐམས་ཅད་གྲུབ་ཕྱིར་འོངས་པ་ལ། །དེ་སྙེད་པ་ཡི་གཏོར་མ་སྦྱིན། །སློབ་དཔོན་རབ་ ཏུ་ཞུགས་པ་ཡིས། །སློབ་མ་ཐམས་ཅད་གཞུག་པར་བྱ། །དེ་ཉིད་གསང་བ་བརྗོད་ནས་ནི། །དམ་ཚིག་མཆོག་ནི་སྦྱིན་པར་བྱ། །གལ་ཏེ་ཁྱོད་ཀྱིས་རྩེ་གསུམ་བཅག །སྙིང་པོ་སྣོད་མིན་ལ་སྨྲས་སམ། །ཇི་སྐད་སྨྲས་པའི་ཆོས་རྣམས་ནི། །གལ་ཏེ་འདིར་ནི་མ་ སྤྱད་དམ། །སྙིང་སྟོབས་རྡུལ་དང་མུན་པ་ཉིད། །ཚངས་པ་དྲག་པོ་གཡུང་དྲུང་སྟེ། །མིང་པོ་གསུམ་པོ་འདི་ཉིད་ནི། །ནམ་ཡང་བརྙས་པར་མི་བྱའོ། །གང་ཞིག་འདི་རྣམས་སྒོམ་པ་སློབ། །ཡང་དང་ཡང་དུ་ཞུགས་ནས་ནི། །དཀྱིལ་འཁོར་མཆོད་པར་བྱ་བ་དང་། །
- 221b
དངོས་གྲུབ་ཐམས་ཅད་ཐོབ་པར་འགྱུར། །རང་གི་ཕྱག་རྒྱ་བསླབས་ནས་ནི། །དེ་ལ་གར་གྱི་མཆོད་པ་དང་། །འདོད་ཡོན་དམ་པ་ལྔ་རྣམས་ཀྱིས། །རྟག་ཏུ་དཀྱིལ་འཁོར་མཆོད་པར་བྱ། །འཇིག་རྟེན་གསུམ་འབྱིན་པའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། ། སེམས་ཅན་ཀུན་རྗེ་སྟོན་མཛད་པ། །འཇིག་རྟེན་གསུམ་ཕྱུང་དོན་གྲུབ་ཏུ། །སླར་ཡང་སྲིང་མོ་རྣམས་འབྱིན་མཛད། །ཀུན་ཏུ་ཆགས་དང་ཞེ་སྡང་རྨོངས། །བརྟན་པར་བྱེད་པའི་རྒྱུ་ཡིན་ནོ། །དགའ་དང་ཕྲག་དོག་བུད་མེད་ནི། །རབ་ཏུ་གྲགས་པའི་དངོས་གྲུབ་སྟེར། །གང་ཞིག་ འཇིག་རྟེན་ཀུན་ཏུ་བཤད། །ཚོགས་ཀུན་གྱིས་མཆོད་ལྷ་མོ་རྣམས། །ཞི་དང་འཇིགས་མ་དེ་བཞིན་གསེར། །གྲུབ་པ་དང་ནི་ཞི་བར་བཤད། །ཕྱི་རོལ་སེམས་ཅན་ཕན་ཕྱིར་དང་། །རྟོགས་དོན་ཁོང་དུ་ཆུད་བྱའི་ཕྱིར། །དེ་རྣམས་ཀྱི་ནི་སྙིང་པོ་དང་། །དཀྱིལ་འཁོར་དེ་བཞིན་དམ་ ཚིག་བཤད། །ཧྲཱི་ཧཱུྃ་ཤྲཱི་བྷྱོ། དཀྱིལ་འཁོར་བཟང་པོ་སྒོ་བཞི་པ། །སྲད་བུ་གསུམ་གྱིས་དཀྱིལ་འཁོར་བྱ། །མཚམས་ཀྱི་ཐིག་ནི་ཀ་བ་ཆེ། །བཞི་པོ་ངག་ནི་རིམ་པ་བཞིན། །དེ་ཡི་དབུས་སུ་དཀྱིལ་འཁོར་ནི། །བཞི་པོ་དག་ནི་དེ་བཞིན་བྱ། །རང་གི་སྙིང་པོ་བཞི་པོ་ནི། །རང་གི་སྒོར་ ནི་ཕྱོགས་པར་གཞག །སྐལ་བཟང་ལག་ན་རལ་གྲི་མཚོན། །སྲིང་མོ་ཕུབ་ཅན་ཞི་བ་མོ། །ཕག་མོ་ལག་ན་གཏེར་ཉིད་དེ། །གྲུབ་པ་མོ་ནི་བསྙེམས་དང་བཅས། །དེ་ནས་དང་པོའི་དཀྱིལ་འཁོར་དུ། །ཀུན་ནས་དེ་བཞིན་ཞུགས་ནས་ནི། །སྲིང་མོ་རྣམས་ཀྱི་རང་གི་རྒྱས། །གོ་རིམས་ དག་ནི་ཇི་བཞིན་དུ། །ཞུགས་ནས་དེ་བཞིན་ཆོ་ག་བཞིན། །སྤོས་ལ་སོགས་པས་མཆོད་པར་བྱ། །དེ་ཉིད་གསང་བ་རབ་བསྒྲུབ་པས། །ཀུན་ནས་དགུག་པ་དག་ཏུ་བྱ། །ཨོྃ་སུ་མ་བྷ་ག་ར་ཏིཥྛ་མ་ཡ་ཧི་བྷཱུར། རཀྵ་ས་མཱ་ཏིཥྵཱ་མ་ཡ་ཧི་བྷཱུར་དྷུ་བ། བརཱ་ཧཱ་ཨ་མིརྱཱ་ཏ་མ་ཡ་སྭཱ་ཧཱ། །སིད་ དྷི་ཀེ་སིད་དྷི་ས་མ་ཡ་ཧི་ཨཱི་མཱྃ་ཀེ་མུ་དྲཱ་བྷིཿ། ཧྲཱིཿཧཱུྃ་ཤྲཱི་བྷྱོ། དེ་ནས་ལུས་ནི་ཐམས་ཅད་ཀྱིས། །དེ་བཞིན་དུ་ནི་ལེགས་བཞུགས་ལ། །དེ་ནས་ཕྱག་རྒྱ་བཅིངས་བསྟན་ཏེ། །གསང་བ་མཆོག་འདི་བརྗོད་པར་བྱ། །གལ་ཏེ་གསང་ཉིད་མ་བསྲུངས་ན། །གང་ཞིག་སེམས་ཅན་དོན་
- 222a
ཞུགས་དང་། །གང་ཡང་དཀྱིལ་འཁོར་སྒྲུབ་བྱེད་པ། །དེ་རྣམས་ཁྱེད་ཀྱིས་བསད་པར་འགྱུར། །ཆོས་དང་ལྡན་ལ་བདུད་རྩི་ཉིད། །ཆོས་མིན་པས་ནི་དུག་པས་ལྷག །ཅི་སྙེད་པ་དང་དུས་ཅི་བཞིན། །ཡུལ་རྣམས་ཉེ་བར་བསྟེན་པ་དང་། །ཕྱག་རྒྱ་གར་གྱི་ མཆོད་པ་ཡིས། །ཅི་བདེ་བར་ནི་རྟག་ཏུ་མཆོད། སྲིང་མོ་བཞིའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །ས་ཡི་དབང་ཕྱུག་ཀུན་གྱི་མཆོག །འདོད་ཆགས་ཞེ་སྡང་གཏི་མུག་ཆེ། །སྒྲུབ་པ་དང་ནི་རབ་སྒྲུབ་ཉིད། །འདོད་ཆགས་སོགས་དུག་གཞིག་ཕྱིར་དང་། ། ཀུན་ནས་བདུད་རྩི་ཉིད་བྱའི་ཕྱིར། །ཞེ་སྡང་ལས་བྱུང་ཀླུ་ཡི་ནི། །དཀྱིལ་འཁོར་དམ་པ་འབྱུང་བར་འགྱུར། །དེ་ལ་སྙིང་པོ་ནི་འདི་ཡིན་ཏེ། །ཕུཿ། །ཟུར་བཞི་པ་ལ་སྒོ་བཞི་པ། །སྲད་བུ་ཐམས་ཅད་ཡང་དག་བྲི། །སྒོ་ཁྱུད་ཀླུ་ཡི་གདེངས་ཀ་མཆོག །མཚམས་ཀྱི་རྩེ་མཆོག་ མཇུག་མ་མདུད། །དེ་ཡི་དབུས་སུ་ཀླུ་རྒྱལ་ནི། །མཐའ་ཡས་གདེངས་ཀ་བཅས་པ་ནི། །ཀླུ་ཡི་རིགས་ནི་བརྒྱད་པོ་དག །ཤེས་རབ་ཅན་གྱིས་ཀུན་ཏུ་བྲི། །དེ་ནས་ཁྲོས་ནས་ཞུགས་ནས་ནི། །ཀླུ་འཛིན་པ་ཡི་ཤུགས་ཀྱིས་ནི། །ཞུགས་ནས་དཀྱིལ་འཁོར་དེ་ཉིད་དུ། །སྦྲུལ་གྱི་ གདེངས་ཀས་དགུག་པར་བྱ། །ཨོྃ་ཧྲཱིཿཨ་ནཱི་ལ་ཛ་བ་བེ་ག་པྲྀ་ཐི་བྷི་ན་ད་རྀ་ཥེ་ཤཱ་ཡ་ཧི་ཕུཿ། སརྦ་ནཱ་ག་ཀུ་ལཱ་ནྱཱ་ན་ཡ་ཕུཿ། ས་མ་ཡ་པྲ་བེ་ཤ་ཡ་ཕུཿ། སརྦཱ་ན་སཱ་དྷ་ཡ་ཕུཿ། ཏ་ཏ་ས་སརྦ་ནཱ་ག་པུ་ཏྲ་ཀ་ཕུཿ། དེ་ལྟར་བྱས་ན་ལེགས་པར་བཞུགས་ཤིང་དགའ་བར་འགྱུར་རོ། །དེ་ནས་སློབ་དཔོན་ གྱིས་དུག་མེད་པར་བསམ་པར་བྱའོ། །དེ་ནས་བརྩམས་ཏེ་དུག་ཐམས་ཅད་ཟོས་ཀྱང་བདུད་རྩིར་འགྱུར་རོ། །ནོར་རྒྱས་དང་རྩེ་བར་བྱེད་དོ། །དུག་ཐམས་ཅད་སྦར་བ་དང་། །གཞིག་ནུས་པར་འགྱུར་རོ། །དེ་ནས་མནའི་སྙིང་པོ་སྦྱིན་པར་བྱ་སྟེ། འདོད་ཆགས་ཞེ་སྡང་གཏི་མུག་རྣམས། ། འཇིག་རྟེན་ན་ནི་འདི་གསུམ་དུག །གལ་ཏེ་བདེན་པ་ལས་འདས་ན། །དེ་དག་གིས་ནི་རྟག་གསོད་འགྱུར། །ཁྱོད་ཀྱིས་གློག་ལ་བརྙས་མི་བྱ། །སེར་བ་བཟློག་པར་མི་བྱ་ཞིང་། །གལ་ཏེ་དངོས་གྲུབ་ལ་དགའ་ན། །ཅི་ནས་སྦྲུལ་ནི་གསད་མི་བྱ། །ཀླུའི་དཀྱིལ་འཁོར་རོ།། །།དེ་ནས་སྟོན་
- 222b
པ་རྡོ་རྗེ་འཛིན། །སྡུག་བསྔལ་ཐམས་ཅད་སེལ་བའི་མཆོག །སེམས་ཅན་ཀུན་ལ་བདེ་བའི་ཕྱིར། །གདོན་གྱི་དཀྱིལ་འཁོར་ཕྱུང་བ་ཡིན། །འདོད་ཆགས་ཞེ་སྡང་གཏི་མུག་རྣམས། །ཉེས་བྱས་ཀྱིས་ནི་དུག་ཉིད་འགྱུར། །གདོན་དང་རིམས་དང་སྡིག་པ་དང་། །དམྱལ་བར་ ཡང་ནི་འགྱུར་བ་ཡིན། །དེ་ནས་གདུག་པའི་སྙིང་པོ་ནི། །ཧྃ། ཟུར་བཞི་པ་ལ་སྒོ་བཞི་པ། །གདོན་གྱི་དཀྱིལ་འཁོར་ཀུན་ཏུ་བྲི། །དེ་དབུས་དང་པོར་གདོན་ལ་སོགས། །ཆོ་ག་རྒྱས་པ་གདོན་པར་བྱ། །དེ་ནས་བཤད་པ་བཞིན་ཞུགས་ནས། །དགོད་ཅིང་མྱུར་བར་དཀྱིལ་འཁོར་ དུ། །རྡོ་རྗེ་འཛིན་པ་ཞུགས་ནས་ནི། །ཁྲོས་པས་རྐང་པ་གཡོན་པས་མཉེ། །དེ་ནས་གདོན་དང་རིམས་སྡིག་པ། །དམྱལ་བ་ཐམས་ཅད་རྟག་ཏུ་ནི། །སྡིག་པ་ཆེན་པོ་བྱེད་པ་ཡང་། །རྡོ་རྗེས་རབ་ཏུ་འཇིག་པར་འགྱུར། །ཞེས་བཅོམ་ལྡན་འདས་རྡོ་རྗེ་སེམས་དཔས་ གསུངས་སོ། །སྡུག་བསྔལ་ཐམས་ཅད་ལས་འདོན་པའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །ཀུན་མཆོག་དབང་ཕྱུག་དམ་པ་ཡིས། །སེམས་ཅན་ཀུན་དོན་རབ་བསྒྲུབ་ཕྱིར། །དཀྱིལ་འཁོར་ཐམས་ཅད་གསུངས་པ་ཡིན། །དེ་ལ་སྙིང་པོ་ནི་འདི་ཡིན་ཏེ། ཨོྃ་སཱཿཧཱུྃ་ ཧྲཱིཿཏྲཱྃ། །དེ་ནས་འདི་ནི་གསུངས་ཙམ་གྱིས། །ཀུན་མཆོག་དབང་ཕྱུག་དམ་པ་ནི། །གཟུགས་ཀུན་གྱིས་ནི་ཀུན་མཆོག་གི། །དབང་ཕྱུག་དམ་པ་མཛད་པ་ཡིན། །གསང་བ་ཆེན་པོ་ལྔ་ཡིས་ནི། །གང་ཚེ་འདུལ་བར་མ་གྱུར་པ། །དེ་ཚེ་སྣ་ཚོགས་ཆེར་མཛད་པ། །འགྲོ་བ་ འདུལ་བའི་དམ་པ་ཡིན། །དེ་ནས་གང་ཕྱིར་དཀྱིལ་འཁོར་ཆེ། །དམ་པ་ཡང་དག་བཤད་བྱ་སྟེ། །ཀུན་མཆོག་སྣ་ཚོགས་རྣམ་པར་རྒྱལ། །ཀུན་མཆོག་དབང་ཕྱུག་དམ་པ་ཡི། །དཀྱིལ་འཁོར་ཆེན་པོ་བྲིས་ནས་ནི། །དེ་ཡི་དབུས་སུ་ཆོ་ག་བཞིན། །རྡོ་རྗེ་སེམས་དཔའ་རབ་བཞག་ལ། །རྡོ་རྗེ་ ལྷ་མོ་ཚོགས་དཀྱིལ་འཁོར། །དེ་ཡི་ངོས་ནི་ཐམས་ཅད་དུ། །ཀུན་མཆོག་བདག་པོའི་སྐུ་རྣམས་སོ། །རྡོ་རྗེ་མཆོག་བཅས་མཚན་མ་ནི། །རང་གི་རིགས་ཀྱིས་བསྐོར་བ་གཞག །རྒྱལ་པོ་རྡོ་རྗེ་སྲེད་མེད་བུའི། །གཟུགས་འཛིན་འཁོར་ལོ་བསྣམས་པ་བྲི། །ཁྱབ་བདག་རྡོ་རྗེ་ཅན་རྡོ་རྗེ། །
- 223a
གཏུམ་དབང་རྡོ་རྗེ་མདུང་བསྣམས་པ། །རྡོ་རྗེ་པད་བྱུང་པདྨ་ཅན། །རྡོ་རྗེ་འཛིན་པ་ཚངས་གཟུགས་ལྡན། །ནམ་མཁའི་སྙིང་པོ་འདོད་པའི་གཟུགས། །རྡོ་རྗེ་དང་བཅས་མེ་ཏོག་མཚོན། །དཀྱིལ་འཁོར་གྱི་ནི་མཚམས་རྣམས་སུ། །རིགས་ཀྱི་ལྷ་མོ་བྲི་བར་བྱ། ། རྡོ་རྗེ་དཔལ་མོ་དཀར་མོ་དང་། །རྡོ་རྗེ་སྒྲོལ་མ་མཁའ་རྡོ་རྗེ། །དེ་ནས་དཀྱིལ་འཁོར་གྱི་བདག་པོ་འདི་རྣམས་ཀྱི་སྙིང་པོ་འདི་བཤད་པར་བྱ་སྟེ། ཨོྃ་བཛྲ་ནཱ་རཱ་ཡ་ཎ་ཙྪིནྡ་པྲ་ཏི་ཧ་ན་བཛྲ་ཙཀྲ་ཏེ་ན་ཧོ། བྷ་ག་བཱ་ན་བཛྲ་ཏ་ཐཱ་ག་ཏ། ཛཿཧཱུྃ་བྃ་ཧོཿ། བཛྲ་དྷཱ་ར་ཏྃ། བཛྲ་ཏ་ཐཱ་ག་ཏ་ཧཱུྃ། བཛྲ་ཀྲོ་དྷ་ མ་ཧཱ་ཡོ་གི་ནི་ག་ཎེ་ཤྭ་ར། མ་ཧཱ་བཛྲ་ཀུ་ལོ་གྲ་པ་ནེ་ཧོ། བྷ་ག་བཱ་ན་བཛྲ་ཙཎྜེ་ཤྭ་རཱ་ཡ། ཧ་ཧ་ཧ་ཧ་ཧྲཱིཿ། བཛྲ་པདྨོ་ད་བྷ་བ་ཧོ། བྷ་ག་བཱ་ན་བཛྲ་ལོ་ཀེ་ཤྭ་རེ། མ་ཧཱ་པྲ་མེ་སིད་དྷྱ། ཨོྃ་བྷཱུ་ར་བྷུ་བ་སྭཿ། སྭ་སྟི་ན་མཿསྭཱ་ཧཱ། ཧེ་བཛྲ་ཀུ་སུ་མཱ་ཡུ་དྷ། སརྦ་ཀཱ་མ་མེ་སཱ་དྷ་ཡ་ཧོ། བྷ་ག་བཱ་ན་བཛྲ་ཨཱ་ཀཱ་ཤ་གརྦྷ། བ་བ་ཊ་ཊ་ཏྲྃ། བཛྲ་ཨཱ་ཀཱ་ཤ་གརྦྷ་ཨ་ཤེ་ཥྃ་མུ་དྲཱ། ན་མོ་ཡེ་ན་སཱ་དྷེ་ན། བྷ་ག་བ་ཏེ་པྲཛྙཱ་པཱ་ར་མི་ཏཱ་ཡུ་དྷ། ཙྪིནྡ་བཛྲ་ཎི་ཙཀྲེ་ཎ་ཏེ་ནས་ཏྱེན་པཱ་པ་ཀ་ན། ཨོྃ་དྷཱིཿ། ཤྲཱི་ཤྲུ་ཏི་སྨྲྀ་ཏི་བི་ཛ་ཡེ་སྭཱ་ཧཱ། བཛྲ་པར་མི། ཨོྃ་བཛྲ་གཽ་རི་མ་ཧཱ་བི་དྱ་ཏྲཻ་ལོ་ཀྱ་བི་ཛ་ཡེ་ཤྭ་རི་བཛྲ་ཀྲོ་ དྷ་ཨ་ག་ནི་ས་མ་ཡེ། བཛྲ་དྷ་རི་ན་མོ་སྟུ་ཏེ། ཏད་ཡ་ཐཱ། ཨོྃ་ཧི་ལི་མི་ལི་ལེ་ལི་ཏཱ་ལི་བཛྲ་ཀ་མུ་ཀ་ཡེ་སྭཱ་ཧཱ། བཛྲ་ས་མ་ཡ་ན་མོ་ཡེ་ན་སཱ་དྷྱེ་ན་བྷ་ག་བ་ཏི། །བུདྡྷ་བོ་དྷི་རྦུད་དྷ་དྷ་ར། བཛྲ་དྷརྨ་པྲ་ཡོ་གེ་ན། ཏེ་ནས་ཏྱེ་ན་སིདྷ་མཱྃ། ཨོྃ་ཏཱ་རེ་ཏུ་ཏྟ་རེ་ཏུ་རེ་སྭཱ་ཧཱ། བཛྲ་དྷ་མོ་ཏ། ཨོྃ་ཀརྨ་བཛྲི་ཎི་སིདྦྷྱ་ སིདྦྷྱ་བི་ཤུདྡྷ་སཱ་དྷྱ་བ་ཧ། ག་ག་ནོད་བྷ་བེ། ཡོ་གེ་ན་སིདྡྷ་མཱྃ་པ་ར་མ་ཀ་རེ། ཏདྱ་ཐཱ། ག་ག་ན་བི་ཤུད་དྷེ། སརྦ་མ་བ་པྲི་ཡ་པ་རི་པཱུར་ནི་སྭཱ་ཧཱ། །ཕྱི་ཡི་དཀྱིལ་འཁོར་གནས་རྣམས་སུ། །རྡོ་རྗེ་འཛིན་པ་རང་ཕྱོགས་གནས། །ལྷ་དབང་དང་ནི་མ་མོ་ཉིད། །འཇིག་རྟེན་སྐྱོང་རྣམས་ དགོད་པར་བྱ། །ཚོགས་ཀྱི་དབང་ཕྱུག་རྡོ་རྗེ་ཡི། །རོལ་མོ་ཆེ་བཅུ་རྡུང་བྱེད་པ། །ཕྱི་ཡི་དཀྱིལ་འཁོར་ཁ་ཁྱེར་དང་། །སྒོ་དང་མཚམས་སུའང་དེ་བྲིའོ། །སྒོ་རྣམས་ཀུན་ཏུ་འཇུག་པ་ནི། །རང་གི་ཕྱག་རྒྱ་རབ་ཏུ་གཞུག །དཀྱིལ་འཁོར་དམ་པ་ལྔ་པར་ནི། །དང་པོའི་
- 223b
སྦྱོར་བས་འཇུག་པར་བྱའོ། །དེ་ནས་དབུས་སུ་འདུག་ནས་ནི། །དང་པོ་ལྕགས་ཀྱུ་ཆེ་དེ་ཉིད། །སྙིང་པོ་འདི་ནི་རྗོད་བྱེད་ཅིང་། །འགུགས་པ་འདི་ནི་བརྗོད་པར་བྱ། །ཨོྃ་མ་ཧཱ་སུ་ཁ་བཛྲ་ས་ཏྭ་སིདྡྷི་ཧཱུྃ། །སརྦ་ཏ་ཐཱ་ག་ཏན། ས་མ་ཡ་ཨཱ་ཀ་རྵ་ཡ་ཛཿ། བཛྲ་ཀུ་ལ་དི་པྃ། ད་མ་ཡེ་ཏྭ་པྲ་བེ་ཤ་ཡ་ཧཱུྃ། སརྦ་ལོ་ཀེ་ཤྭ་རྃ་པྲ་བེ་ཤ་ཡ་ས་མ་ཡ་བ་ན་དྷ་ན་བྃ། ས་མ་ཡ་སརྦ་རཏྣ་དཱི་པྃ་མ་ཧཱ་མ་ཎི་རཱ་ཛཱ་ནཱྃ། བ་ཤཱི་ཀུ་རུ་ཧོཿ། ཧཱུྃ་ཨཱཿཧཱུྃ་ཧྲཱིཿཏྲཱྃ། དེ་ནས་གསང་བ་ཆེན་པོ་ཡི། །སྙིང་པོ་བཟང་པོ་འདི་བརྗོད་པས། །རྡོ་རྗེ་འཆང་ཆེན་རྒྱལ་པོ་ནི། །འཁོར་ལོ་ ཐམས་ཅད་དང་བཅས་པར། །བཀུག་ཅིང་རབ་ཏུ་བཅུག་པ་དང་། །བདེན་པས་བཅིངས་ཏེ་དབང་དུ་བྱས། །དཀྱིལ་འཁོར་རྒྱལ་པོ་མཆོག་ཐམས་ཅད། །དངོས་གྲུབ་ཀུན་གྱིས་འགྲུབ་པར་འགྱུར། །དེ་ནས་གོ་རིམས་ཇི་བཞིན་དུ། །དཀྱིལ་འཁོར་ཐམས་ཅད་སྒྲུབ་པ་ དང་། །དངོས་གྲུབ་དེ་རྣམས་ཉིད་ཀྱང་ནི། །ཐམས་ཅད་ཀྱང་ནི་བསྒྲུབ་པར་བྱ། །བདེ་བ་ཐམས་ཅད་མི་འགྱུར་གནས། །བདེ་བ་ཆེན་པོ་ཞེས་བརྗོད་དོ། །རྡོ་རྗེ་འདི་ནི་བསྒྲུབ་ལ་སོགས། །འདི་ནི་ཚེ་འདིར་འགྲུབ་པར་འགྱུར། །དེ་ལྟར་སྣ་ཚོགས་པའི་དོན་སྦྱང་བའི་དོན་གྱི་ ཆོ་ག་འགྲོ་བ་དཔག་ཏུ་མེད་པ་འདུལ་བ། མཐའ་མེད་ཅིང་སྣ་ཚོགས་པ་མཉམ་པ་མེད་པའི་ཕུལ་དུ་བྱུང་བ་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་འཛིན་པའི་བདེ་བའི་མཆོག་བྱེད་པ་རྒྱལ་བ་ཐམས་ཅད་ཀྱི་བྱིན་གྱིས་བརླབས་པ་སྲིད་པའི་བདེ་བ་མཆོག་བྱེད་པ་གསུངས་ པ་ཡིན་ནོ། །དཔལ་མཆོག་དང་པོའི་རྟོག་པའི་རྒྱལ་པོ་ལས། རྟོག་པ་ཐམས་ཅད་ཀྱི་རྒྱུད་ཕྱི་མའི་རྩ་བའི་རྒྱུད་ཀུན་གྱི་མཆོག་དབང་ཕྱུག་དམ་པའི་དཀྱིལ་འཁོར་གྱི་ཆོ་ག་རྒྱས་པ་རྫོགས་སྷོ།། །།དེ་ནས་གསང་བ་རས་བྲིས་ཀྱི་ཆོ་ག་གསུངས་པ་ནི། སངས་རྒྱས་ཀུན་ ཀྱི་གསང་བ་ཆེ། །དམ་ཚིག་མཆོག་གི་སྒྲུབ་པ་དང་། །བདེ་བ་ཆེན་པོའི་གཞལ་ཡས་ཁང་། །དངོས་གྲུབ་ཀུན་གྱིས་ལུས་བྱས་པ། །དེ་བཞིན་གཤེགས་མཆོག་ཆེན་པོ་ཡི། །རིན་ཆེན་རྒྱལ་པོ་སོགས་ཀྱིས་བརྒྱན། །བདེ་བ་ཆེན་པོ་ཆགས་པ་ཡི། །གླུ་དང་རོལ་
- 224a
མོ་རྗེས་ཆགས་པ། །བླ་མེད་དགའ་བ་ཆེན་པོ་ཡི། །མཆོད་པ་ཀུན་གྱིས་རབ་ཏུ་མཆོད། །དགའ་བ་ཆེན་པོ་དཔལ་གྱི་གནས། །རང་གི་བཞུགས་གནས་མཆོག་དེ་ལ། །རབ་ཏུ་དགའ་བའི་རྒྱལ་པོ་མཆོག །མི་འགྱུར་མཆོག་ནི་ཡང་དག་བཞུགས། ། རྡོ་རྗེ་སེམས་དཔའ་བདག་རང་ཉིད། །རབ་ཏུ་དགའ་བ་མི་འགྱུར་མཆོག །ཀུན་ཏུ་བཟང་པོ་འཁོར་བ་དང་། །བྱང་ཆུབ་སེམས་དཔའ་དེ་བཞིན་གཤེགས། །དངོས་གྲུབ་ཆེན་པོ་ཀུན་གྱི་མཆོག །རྡོ་རྗེ་བསྙེམས་པ་བདག་པོའི་བདག །ཀུན་མཆོག་ཆགས་པ་ཆེན་པོ་ཡི། །དངོས་ གྲུབ་དབང་ཕྱུག་རྗེས་གྲུབ་པ། །གླུ་དང་རོལ་མོ་ཐོག་མཐའ་མེད། །མཆོག་ནི་བཅོམ་ལྡན་འདས་ཀྱིས་གསུངས། །ཧཱུྃ། དེ་ནས་འདི་ནི་གསུངས་ཙམ་གྱིས། །རྡོ་རྗེ་ཐམས་ཅད་འཛིན་པ་ནི། །གསང་བ་ལྔ་ཡི་དེ་ཉིད་ཆེ། །ཕྱག་རྒྱའི་ལྷ་མོ་བྱུང་བར་གྱུར། །རྟག་ཏུ་ཆགས་དང་ དངོས་གྲུབ་ཆེ། །རྣམ་རྒྱལ་དབང་ཕྱུག་ལྷག་པའི་ལྷ། །ཕྱག་རྒྱ་དམ་པ་བཞི་པ་སྟེ། །སེམས་དཔའ་བྱིན་གྱིས་བརླབས་པའི་སྐུ། །དེ་ནས་དེ་རྣམས་ཀྱི་སྙིང་པོ་འདི་ཡིན་ཏེ། ཀུན་མཆོག་སོ་སོར་རྟོག་པ་དང་། །དངོས་གྲུབ་ཀུན་གྱི་བདེ་བའི་མཆོག །ཀུན་མཆོག་རྣམ་རྒྱལ་ མཐོང་བའམ། །ཐམས་ཅད་དབང་ཕྱུག་མཆོད་པ་ཆེ། །དངོས་གྲུབ་རྣམས་དང་ཕུན་ཚོགས་དང་། །དགའ་བ་དག་དང་བདག་པོ་རྣམས། །རྡོ་རྗེ་ལྷ་མོ་ཐོག་མཐའ་མེད། །རྡོ་རྗེ་སེམས་དཔའི་སྐུ་ཡི་མཆོག །ཅེས་བྱའོ། །དེ་ནས་མཆོག་ཏུ་གསང་བའི་མི་རྣམས་ནི་དགའ་བ་ ཆེན་པོ་དཔལ་རྡོ་རྗེ་དོན་ཡོད་དགའ་བའི་དམ་ཚིག་གི་འདོད་པའི་རྡོ་རྗེ་མ་དང་། དགའ་བ་ཆེན་པོ་དཔལ་དོན་ཡོད་ལ་ཆགས་པའི་དམ་ཚིག་གི་རྡོ་རྗེ་ཀི་ལི་ཀི་ལི་དང་། དགའ་བ་ཆེན་པོ་དཔལ་རྡོ་རྗེ་དོན་ཡོད་ལ་ཆགས་པའི་དམ་ཚིག་རྣམ་པར་རྒྱལ་བའི་རྡོ་རྗེ་མ་དང་། དགའ་བ་ཆེན་པོ་དཔལ་རྡོ་རྗེ་དོན་ ཡོད་ལ་ཆགས་པའི་དམ་ཚིག་རྡོ་རྗེ་འདོད་པའི་དབང་ཕྱུག་མའོ། །འདི་རྣམས་གསང་བའི་མཚན་དག་ནི། །མཁས་པས་གང་ཞིག་དད་པས་བརྗོད། །དེ་ནི་ཕྱག་རྒྱ་ཐམས་ཅད་ཀྱི། །དངོས་གྲུབ་ཀུན་བདག་བདག་པོར་འགྱུར། །ཞེས་བཅོམ་ལྡན་འདས་རྡོ་རྗེ་སེམས་དཔའ་མཆོག་
- 224b
ཏུ་གསང་བས་གསུངས་པ་ཡིན་ནོ། །དེ་ནས་འདི་སྒྲུབ་བཤད་བྱ་བ། །དངོས་གྲུབ་ཤིན་ཏུ་བརྟག་པ་སྟེ། །སྡིག་པ་ཆེ་ལ་དགའ་བ་དང་། །སྒྲུབ་པ་གང་ཞིག་མ་གྲུབ་ཀྱང་། །རྡོ་རྗེ་སེམས་དཔས་གསུངས་པ་བཞིན། །དེ་དག་ཀྱང་ནི་མྱུར་འགྲུབ་འགྱུར། །ཉིན་རེ་འམ་ནི་ཟླ་རེ་ འམ། །དེ་བཞིན་ལོ་ནི་རེ་རེ་ལ། །ཅི་མངོན་མངོན་འདོད་འགྲུབ་པར་བྱ། །ཅི་རྙེད་པ་དང་ཅི་བདེ་བས། །རས་ལ་བཅོམ་ལྡན་བྲི་བར་བྱ། །ཀུན་བདག་དམ་ཚིག་དབང་ཕྱུག་སྟེ། །གང་ཞིག་བྲིས་པར་གྱུར་ན་ནི། །མཆོག་ཏུ་རྟག་པའི་ཐར་པ་ཐོབ། །བཞད་པ་དང་ བཅས་ཟླ་བའི་འོད། །སྣ་ཚོགས་པདྨའི་འོད་འབར་བ། །སངས་རྒྱས་ཀུན་གྱི་དབང་བསྐུར་སོགས། །སྣ་ཚོགས་རྒྱན་དང་ན་བཟའ་ལྡན། །སེམས་དཔའི་སྐྱིལ་མོ་ཀྲུང་གིས་བཞུགས། །རྡོ་རྗེ་བསྙེམས་པའི་མཆོག་འཆང་བ། །གཡོན་པ་དྲིལ་བུ་མཆོག་བསྙེམས་པ། ། རྡོ་རྗེ་སེམས་དཔའ་རབ་ཏུ་བརྟག །དེ་ཡི་ལོགས་ན་བཞུགས་པ་རྣམས། །དེ་ཡི་འོད་ཀྱི་དཀྱིལ་འཁོར་བརྟེན། །རབ་ཏུ་དགའ་དང་བདེ་བའི་སྐུ། །གསང་བ་ཆེན་པོ་དགོད་པར་བྱ། །དང་པོ་པདྨ་ལྟར་དཀར་དམར། །གཞན་ནི་པ་ལ་ཤ་ལྟར་དཀར། །གཞན་ནི་ཨུཏྤལ་འདབ་ ལྟར་སྔོ། །རྡོ་རྗེ་བསྙེམས་མ་སེར་པོ་འཛིན། །དང་པོ་དང་ནི་གཉིས་པ་དག །གཡས་ཀྱི་ལོགས་ལ་བརྟེན་པ་སྟེ། །གསུམ་པ་དང་ནི་བཞི་པ་དག །གཡོན་གྱི་ལོགས་སུ་བཞུགས་པ་ཡིན། །རྡོ་རྗེ་ཀི་ལི་ཀི་ལི་མ། །དབུས་ཀྱི་རང་ལྷ་དགྱེས་པར་སྤྲོ། །དེ་ཡི་ལོགས་ ལ་རྡོ་རྗེ་ཆེའི། །མདའ་ནི་གསོར་བ་ལ་བརྩོན་པ། །བསྙེམས་པའི་ཕྱག་གིས་ཡོངས་འཁྱུད་པའི། །ཆུ་སྲིན་རྒྱལ་མཚན་བསྒྲེང་དང་བཅས། །དེ་ཡི་ལོགས་ན་བཞད་དང་བཅས། །མཆོད་པས་བདག་པོ་ལ་ལྟ་བ། །སངས་རྒྱས་རིན་ཆེན་དབང་བསྐུར་མཚན། །ཐམས་ ཅད་སྤྱན་གྱི་ཕྱག་རྒྱ་གཟིགས། །རང་ལ་བདག་ནི་ཐུགས་གཏད་པ། །ཟུར་དུ་བལྟ་ཞིང་བཞུགས་པའོ། །རས་རིས་འདི་ནི་མཐོང་བ་ཡིས། །རྟག་པའི་བསོད་ནམས་ཐོབ་པར་འགྱུར། །མཆོད་པ་དང་ནི་བརྟགས་པ་ཡིས། །མཆོག་ཏུ་དགའ་བའི་ཐར་པ་ཐོབ། །ཅེས་བྱ་བ་
- 225a
བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལྟར་མཆོག་ཏུ་དགའ་བ་རབ་ཏུ་འདོད་པ་ནི། །མཆོག་ཏུ་དགའ་བ་དག་པ་དམ་པའི་དངོས་གྲུབ་འགྲུབ། །གསལ་ཞིང་རྣམ་པར་རྒྱལ་བ་ཡི། །རྒྱལ་བའི་རས་རིས་ཆེན་པོ་འདི། །ཐམས་ཅད་ གཟིགས་པ་རྣམས་མཆོད་པ། །ཆེན་པོ་ཡིས་ནི་དཔལ་འདིར་རོལ། །འཁོར་ལོ་དེ་ནི་བརྟགས་བྱས་ནས། །མཆོག་ཏུ་གསང་བའི་དཀྱིལ་འཁོར་ནི། །རྣམ་པར་དབེན་པའི་ཁང་པར་རམ། །ཡང་ན་སྐྱེད་མོས་ཚལ་སོགས་སུ། །དེ་བཞིན་གཤེགས་མཆོག་ཆེན་པོ་ ཡི། །རས་རིས་རྒྱལ་པོ་སོགས་ཀྱིས་བརྒྱན། །དྲིལ་བུ་དང་བཅས་ཡིད་དགའ་བའི། །བླ་རེ་ཕུལ་བས་མཆོག་གྱུར་པའི། །རྡོ་རྗེ་གླུ་ཡི་མཆོད་སོགས་དང་། །གླུ་དང་རོལ་མོ་རྣམ་འཕྲུལ་བ། །མེ་ཏོག་སྤོས་སོགས་རབ་སྦྱོར་བ། །མར་མེའི་སྦྱོར་བས་ཡང་དག་ མཆོད། །ཁང་པ་སུམ་བརྩེགས་དཀྱིལ་འཁོར་དུ། །མཆོག་གི་གསང་བ་བསྒྲུབ་པར་བྱ། །ཡང་ན་བདག་ཉིད་ཁོ་ན་མཆོག །རང་གི་ལྷག་པའི་ལྷར་བསྒོམ་བྱ། །དེ་ནས་འཁོར་ལོར་མ་ཞུགས་ཀྱང་། །རང་ཉིད་ཀྱིས་ནི་རྟག་ཞུགས་ནས། །རྡོ་རྗེ་ཀུན་འཆང་སློབ་དཔོན་ནི། ། དངོས་གྲུབ་ཀུན་ལ་འགྲུབ་པར་འགྱུར། །རང་ཉིད་ཁྲུས་བྱས་དྲི་ཞིམ་བསྒོས། །ཇི་སྙེད་རྒྱན་དང་གོས་དང་ལྡན། །སྣ་ཚོགས་གོས་ཀྱིས་ཡང་དག་བཀླུབས། །ཕྲེང་བཅས་ཁ་ནི་དྲི་ཞིམ་པ། །རྡོ་རྗེ་སེམས་དཔའི་སྦྱོར་བ་ཡིས། །མེ་ཏོག་སྤོས་དང་དྲི་སྣོད་བཅས། །རྡོ་རྗེ་གླུ་ནི་འདི་ དག་གིས། །གར་བྱེད་གྲོང་ཁྱེར་འཇུག་པར་བྱ། །དེ་ལ་མཆོག་ཏུ་གསང་བའི་དཔལ་དམ་ཚིག་གསུམ་འཇུག་ལ་མཆོག་ཏུ་གསང་བའི་གླུའི་མཆོད་པ་མཆོག་ཏུ་གྲུབ་པ་འདི་ཡིན་ཏེ། དངོས་གྲུབ་ཀུན་གྱི་བདེ་བ་ཉམས་དགའ་བའི། །ཐར་པའི་གྲོང་དུ་བཅོམ་ལྡན་བདེ་ཆེན་འཇུག ། མཆོག་ཏུ་བདེ་བ་དམ་པའི་དངོས་གྲུབ་ཀྱིས། །ཛཿཧཱུྃ་བྃ་ཧོཿརབ་ཏུ་གྲུབ་པར་མཛོད། །རབ་ཏུ་ཞུགས་ཏེ་གཡོན་པ་ཡིས། །རྡོ་རྗེའི་མིག་གིས་མགོན་ལ་འདུད། །གཡོན་པ་བསྙེམས་པ་ཅུང་ཟད་བཞད། །བསྟོད་ཅིང་མཛེས་པའི་མིག་བཙུམས་པ། །དེ་ལ་མཆོག་ཏུ་གསང་བ་
- 225b
དམ་པ་དཔལ་དམ་ཚིག་གསུམ་གྱི་ཕྱག་འཚལ་བའི་མེ་ཏོག་གི་སིལ་མ་དོར་བའི་མཆོག་ཏུ་གསང་བ་རྡོ་རྗེ་གླུའི་མཆོད་པ་མཆོག་ཏུ་གྲུབ་པ་འདི་ཡིན་ཏེ། མཆོག་ཏུ་བདེ་བའི་སེམས་ནི་རོལ་པར་ལྡན། །སྒེག་པའི་ཕྱག་གིས་བཅོམ་ལྡན་འདས་ལ་འདུད། །ཛཿཧཱུྃ་བྃ་ཧོཿཧི་ཧི་ཧི་ཧི་ཧི། ། མགོན་པོ་སྙིམ་པའི་མེ་ཏོག་བཞེས་སུ་གསོལ། །དེ་ནས་མེ་ཏོག་སིལ་མ་དོར། །རྡོ་རྗེ་སེམས་དཔའི་དབང་བསྐུར་བས། །རྡོ་རྗེ་དྲིལ་བུའི་ཕྱག་རྒྱ་དང་། །ལྡན་པའི་དོན་གསལ་སྦྱིན་པར་བྱ། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་རྡོ་རྗེ་སེམས་དཔའི་ དབང་བསྐུར་བའི་མཆོག་ཏུ་གསང་བའི་རྡོ་རྗེའི་གླུའི་མཆོད་པ་མཆོག་ཏུ་གྲུབ་པ་འདི་ཡིན་ཏེ། ཨོྃ། སངས་རྒྱས་ཀུན་ལྡན་རིན་ཆེན་མཆོག་གིས་བརྒྱན། །ལྷ་ཡི་ཅོད་པན་དང་བཅས་ཁྱོད་ལ་འདུད། །རྡོ་རྗེ་འཆང་བདག་རིན་ཆེན་དབང་བསྐུར་བས། །རྡོ་རྗེ་སེམས་དཔའ་ས་མ་ཡ་སྟྭྃ་ཧྃ། ། དེ་ཉིད་ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །རྡོ་རྗེ་ལ་སོགས་ཐོབ་བཟུང་བས། །རྡོ་རྗེ་སེམས་དཔའ་གཉིས་པ་འདྲ། །རྡོ་རྗེ་ཐམས་ཅད་འཛིན་རྒྱལ་པོ། །རྡོ་རྗེ་ཅན་གྱིས་བྱིན་ བརླབས་འགྱུར། །ཞེས་བྱ་བ་མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱིས་བདག་ལ་བྱིན་གྱིས་བརླབ་པའི་སྒྲུབ་པ་གཅིག་པུའི་ཆོ་ག་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་འདིར་བསྒྲུབ་བཤད་བྱ་བ། །དངོས་གྲུབ་ཤིན་ཏུ་རྟག་པ་ ཡང་། །གང་གིས་སྒྲུབ་པོ་དམ་པ་དང་། །སྡིག་ཆེན་བྱེད་པ་རྣམས་ཀྱང་ནི། །རྡོ་རྗེ་སེམས་དཔས་གསུངས་པ་བཞིན། །མ་གྲུབ་རྣམས་ཀྱང་གྲུབ་པར་འགྱུར། །ལུགས་མའམ་ནི་བརྡུངས་མའམ། །འདུས་བྱས་པའམ་བྲིས་པའམ། །དང་པོའི་སེམས་དཔའ་ བཞུགས་གསོལ་ནས། །དེ་ཡི་མདུན་དུ་ཆོ་ག་བཞིན། །རྟག་ཏུ་རྡོ་རྗེ་དྲིལ་འཆང་ཞིང་། །དངོས་གྲུབ་མཆོག་ནི་བསྒྲུབ་པར་བྱ། །ཐམས་ཅད་དགུག་དང་མཆོད་པ་ཆེ། །བདག་བྱིན་རླབས་སོགས་བསྒྲུབ་རྣམས་སོ། །དེ་ལ་ཇི་ལྟར་མཆོག་ཏུ་གསང་བ་དམ་པའི་དཔལ་དམ་ཚིག་
- 226a
གསུམ་གྱི་དངོས་གྲུབ་ཐམས་ཅད་དགུག་པའི་རྒྱུད་ནི་འདི་ཡིན་ཏེ། རང་ལྷག་ལྷ་ཡི་སྦྱོར་བ་ལས། །ཐམས་ཅད་དགུག་པའི་སྦྱོར་བ་ཡིས། །ཡན་ལག་མཆོག་གིས་རོལ་བཅས་པས། །གར་བྱ་ཞིང་ནི་དགུག་པར་བྱ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ མཆོག་གི་དངོས་གྲུབ་མཆོག་ཏུ་གསང་བའི་དམ་ཚིག་གི་གླུའི་མཆོད་པ་ནི་འདི་ཡིན་ཏེ། ཛཿམཆོག་དང་པོའི་རྡོ་རྗེ་འཆང་བ་རྡོ་རྗེ་སེམས་དཔའ་བདེ་བ་རབ་རྟོགས་རབ་ཏུ་དགའ་བ་ཁྱོད་བདག་སངས་རྒྱས་སོ་སོར་རྟོགས། ཧཱུྃ་མཆོག་རྡོ་རྗེ་ལས་ནི་མཆོག་ཏུ་མི་འགྱུར་ཟད་མེད་སྲིད་པ་རབ་བསྒྲུབ་བདེ་དང་ཡིད་ བདེ་དམ་ཚིག་བདག་ལ་དེང་གྲུབ་མཛོད། །བྃ་མཆོག་བདག་གི་སྐུ་འཛིན་རྣལ་འབྱོར་ཐམས་ཅད་རྣམ་རྒྱལ་བསྒྲེང་བ་རབ་མཆོག་དག་པ་བདེ་བར་འགྱུར་བའི་པདྨའི་རྒྱལ་པོ་ཀྱེ། །ཧོཿརབ་མཆོག་ནི་མཆོག་གི་དངོས་གྲུབ་དམ་པ་ཐམས་ཅད་དབང་ཕྱུག་དམ་པར་བདག་གྱུར་ཅིག །རྟག་པར་ བདག་འཕེལ་ནམ་མཁའི་སྙིང་པོ་ཁྱོད། །ཧུ་ལུ་ཧུ་ལུའི་སྒྲུབ་པས་དབབ་པར་མཛོད། །དམ་ཚིག་ཆེན་པོས་ཡང་དག་དགུག་པ་ཁྱོད། །དེ་བཞིན་གཤེགས་པ་ཀུན་གྱི་དམ་ཚིག་སྟེ། །རབ་ཏུ་དགའ་བ་མཆོག་བདག་པོ། །དེ་ལ་མཆོག་ཏུ་གསང་བ་དམ་པའི་དཔལ་དམ་ཚིག་ གསུམ་གྱི་དངོས་གྲུབ་ཐམས་ཅད་ཀྱི་མཆོད་པ་ཆེན་པོའི་ཆོ་ག་ཅི་ལྟར་ཡིན། རང་ལྷའི་རྣལ་འབྱོར་ཇི་བཞིན་དུ། །མཆོད་པ་ཀུན་མཆོག་སྐུ་རྣམས་ཀྱི། །མཆོད་དེ་སྔགས་པས་གླུ་རྣམས་ཀྱི། །རོལ་མོའི་རྣམ་འཕྲུལ་གྱིས་རྗེས་མཆོད། །དེ་ནས་དེ་བཞིན་གཤེགས་པ་ཐམས་ ཅད་ཀྱིས་མཆོག་གི་དངོས་གྲུབ་ཀྱི་མཆོད་པ་ཆེན་པོའི་ཆོ་གའི་མཆོག་ཏུ་གསང་བའི་དམ་ཚིག་གི་རྡོ་རྗེའི་གླུའི་མཆོད་པ་ནི་འདི་ཡིན་ཏེ། ཐམས་ཅད་རྗེས་སུ་ཆགས་པ་བདེ་བ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ཏུ་དགའ་བ་ཡིན། །བདེ་བ་ཆེན་པོ་གསལ་མཐོང་བདག་ལ་ བརྟན་གྱུར་ཅིག །མྱུར་དུ་སོ་སོར་མཁྱེན་ནས་རབ་ཏུ་འདོད་པ་བསྒྲུབས། །དེ་ལ་མཆོག་ཏུ་གསང་བ་དམ་པའི་དཔལ། །དམ་ཚིག་གསུམ་གྱི་དངོས་གྲུབ་ཐམས་ཅད་བྱིན་གྱིས་བརླབས་པའི་སྒྲུབ་པ་ཆེན་པོ་ཅི་ལྟར་ཡིན། རང་ལྷའི་སྦྱོར་བ་ཇི་བཞིན་དུ། །ཕྱག་རྒྱ་ཀུན་གྱིས་
- 226b
བྱིན་བརླབས་པ། །དེ་ཉིད་ཆེན་པོའི་མཆོག་གིས་ནི། །རང་ཉིད་བསྒྲུབས་ཏེ་སྙིང་པོ་བཟླ། །དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་བྱིན་གྱིས་བརླབས་པའི་གསང་བ་ཆེན་པོ་དམ་པའི་དམ་ཚིག་གི །རྡོ་རྗེ་གླུའི་མཆོད་པ་མཆོག་ཏུ་གྲུབ་པ་འདི་ཡིན་ ཏེ། ཨོྃ་ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔའ་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། ། མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀྱིས་ནི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། ། ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །གྲུབ་པའི་རྡོ་རྗེ་ཆེར་བསྟོད་པས། །རྡོ་རྗེ་བསྙེམས་བདག་བདག་མཛོད་ཅིག །དཔལ་མཆོག་དང་པོའི་བཅོམ་ལྡན་ཁྱོད། །གང་ གིས་དོན་དང་གླུ་ཡིས་བསྟོད། །དེ་ནི་དངོས་གྲུབ་ཀུན་གྱི་མཆོག །དབང་ཕྱུག་ཆེན་པོ་ཉིད་གྲུབ་འགྱུར། །ཞེས་བྱ་བ་མཆོག་གི་དེ་ཁོ་ན་ཉིད་ཀྱི་མཆོག་ཏུ་གསང་བའི་གླུ་ཆེན་པོ་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་འཆང་གིས་གསུངས་སོ། །དངོས་གྲུབ་ཆོ་ག་འདི་ཡིས་ནི། །རྡོ་རྗེ་སེམས་ དཔའ་ཡང་དག་རྟོགས། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཉིད་ནི་རབ་བསྒྲུབ་པའོ། །ཀུན་ནས་འོད་ཟེར་སྟོན་སོགས་དང་། །སོ་སོར་སྟོན་པའི་རྨད་བྱུང་རྣམས། །རྡོ་རྗེའི་ཚིག་གིས་རང་ལྷ་ལས། །ངོ་མཚར་གྱུར་རྣམས་མཐོང་བར་འགྱུར། །རྟོག་པ་ཀུན་གྱི་སྣ་ཚོགས་ ཆེ། །དངོས་གྲུབ་དབང་ཕྱུག་བདེ་རྣམས་ཀྱི། །མྱུར་དུ་རང་གིས་བྱིན་བརླབས་པས། །རྡོ་རྗེ་སློབ་དཔོན་གྱིས་ཐོབ་བོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་མཆོག་གི་དང་པོས་གསུངས་སོ། །དེ་ལ་མཆོག་ཏུ་གསང་བའི་དཔལ་དམ་ཚིག་གསུམ་གྱི་ལྷ་ཐམས་ཅད་ཀྱི་
- 227a
བདག་ལ་བྱིན་གྱིས་བརླབས་པའི་སྒྲུབ་པ་ཆེན་པོའི་རྒྱུད་ཅི་ལྟར་ཡིན། རང་ལྷ་རྣལ་འབྱོར་ཇི་བཞིན་དུ། །ལྷ་ཀུན་བདག་ཉིད་སྐུ་རྣམས་ཀྱིས། །རང་ལྷའི་རྣལ་འབྱོར་བདག་ཉིད་ཀྱིས། །རང་ལྷག་ལྷ་ཉིད་བསྒྲུབ་པར་བྱ། །དེ་ནས་མཆོག་ཏུ་གསང་བ་དམ་ པའི་དཔལ་དམ་ཚིག་གསུམ་གྱི་ཀུན་མཆོག་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་མི་འགྱུར་བ་དམ་པ་བླ་ན་མེད་པའི་དགའ་བ་དང་། རབ་ཏུ་དགའ་བ་དང་བདེ་བ་དང་ཡིད་བདེ་བ་ཐམས་ཅད་ཀྱི་དངོས་གྲུབ་དམ་ པའི་ཆོ་ག་རྒྱས་པ་རྗེས་སུ་གྲུབ་པ་ནི་འདི་ཡིན་ཏེ། རང་ལྷའི་སྦྱོར་བ་ཇི་བཞིན་དུ། །རྡོ་རྗེ་ཀུན་མཆོག་སྐུ་རྣམས་ཀྱིས། །གླུ་དང་རོལ་མོའི་ཆོ་ག་ནི། །རྡོ་རྗེ་ཉིད་ཀྱིས་རྗེས་ཆགས་འགྱུར། །རང་ལྷའི་སྦྱོར་བ་ཇི་བཞིན་དུ། །དབྱངས་ཀྱི་རྩ་བ་རྣམ་སད་པས། །གླུ་དང་ རོལ་མོའི་ཆོ་ག་ནི། །དྲིལ་བུ་ཉིད་ཀྱིས་རྗེས་སུ་བརྗོད། །རང་ལྷའི་སྦྱོར་བ་ཇི་བཞིན་དུ། །སྣ་ཚོགས་ཕྱག་རྒྱའི་བདག་པོ་མཆོག །གླུ་དང་རོལ་མོའི་ཆོ་ག་ནི། །དམ་ཚིག་གིས་ནི་རྗེས་བསྒྲུབ་བྱ། །འདི་ཡིས་རྟོག་པ་ཐམས་ཅད་ལ། །རྡོ་རྗེ་འབེབས་པས་རབ་སད་པས། ། རང་གི་ལྷ་ཡི་དམ་ཚིག་ནི། །ཐམས་ཅད་བཞི་འགྱུར་འགྲུབ་པར་འགྱུར། །མཆོག་ཏུ་གསང་བ་དམ་པའི་དཔལ། །དམ་ཚིག་གསུམ་གྱི་གླུ་ཆེན་པོ་དང་། རོལ་མོའི་ཆོ་ག་མཆོག་ཏུ་གསང་བ་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་དེ་རྗེས་ གནས་ཅི་བཞིན། །ཇི་སྙེད་པ་དང་ཅི་བདེ་བས། །མེ་ཏོག་སྤོས་ཀྱིས་མཆོད་ནས་ནི། །ཁང་པའམ་སྐྱེད་མོས་ཚལ་སོགས་སུ། །བདག་ཉིད་ཅི་འདོད་རབ་བསྒྲུབས་ནས། །ཇི་སྙེད་རྒྱན་དང་གོས་དང་ལྡན། །སྣ་ཚོགས་གོས་ཀྱིས་ཡང་དག་བཀླུབས། །མེ་ཏོག་ཕྲེང་བཅས་ཁ་དྲི་ཞིམ། ། ལུགས་མ་འམ་ནི་བརྡུངས་པའམ། །འདུས་པའམ་ནི་རི་མོར་བྲིས། །དང་པོའི་འཁོར་ལོ་དེ་མདུན་དུ། །ཆོ་ག་བཞིན་དུ་བཞུགས་གསོལ་ནས། །རང་ལྷའི་རྣལ་འབྱོར་ཇི་བཞིན་དུ། །རྡོ་རྗེ་དྲིལ་བུ་རབ་སད་པས། །ཐམས་ཅད་དགུག་དང་མཆོད་པ་ཆེ། །བདག་བྱིན་རླབས་སོགས་
- 227b
འགྲུབ་པར་བྱ། །སྔོན་དུ་ལན་ཅིག་བསྒྲུབ་བྱས་ནས། །དེ་ནས་དེ་རྗེས་ཅི་འདོད་པར། །ཅི་འདོད་པ་དང་ཅི་སྨྲ་བ། །ཐམས་ཅད་བཟའ་ཞིང་ཐམས་ཅད་བྱེད། །ལངས་པའམ་ནི་འདུག་པའམ། །རབ་ཏུ་དགོད་དམ་སྨྲ་བའམ། །ཇི་བཞིན་དེ་བཞིན་དེ་དང་དེར། །ཇི་འདོད་ པར་ནི་དེ་བཞིན་གཞག །གསང་བ་མཆོག་གི་འཁོར་ལོ་ནི། །མེ་ཏོག་སོགས་ཀྱིས་མཆོད་ནས་ནི། །ཇི་བཞིན་དུ་ནི་རྗེས་བསྒྲུབ་བྱ། །འདིས་ནི་འདོད་པ་ཀུན་དབང་ཕྱུག །འགྲོ་དང་འོང་དང་འདོད་ན་ཕུར། །དངོས་གྲུབ་ཀུན་གྱི་དབང་ཕྱུག་འགྲུབ། །རྒ་ཤི་མེད་པའི་གཙོ་ བོར་འགྱུར། །རྡོ་རྗེ་སེམས་དཔའ་གྲུབ་ཆེན་པོ། །ཕྱག་རྒྱ་ཀུན་གྱི་དབང་ཕྱུག་བདག །རྡོ་རྗེ་ཀུན་འཛིན་རྒྱལ་པོ་ནི། །རྡོ་རྗེ་མཚོན་ཆ་ཐམས་ཅད་འཛིན། །མི་ཐུབ་པ་དང་མི་སོད་ཅིང་། །ཐམས་ཅད་བྱེད་ཅིང་ཀུན་གྱི་རྟེན། །སེམས་ཅན་ཀུན་གྱི་རྒྱལ་པོ་ཆེ། །ཚར་གཅོད་རྗེས་ སུ་བཟུང་བར་ནུས། །ཀུན་མཆོག་རྗེས་སུ་ཆགས་པ་ཆེ། །འདོད་པ་འགྲུབ་པ་བདེ་བའི་མཆོག །ཀུན་ལས་རྣམ་རྒྱལ་གྲུབ་འགྱུར་ཏེ། །ཀུན་མཆོག་དབང་ཕྱུག་དམ་པ་ཡིན། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོའི་གོ་འཕང་གནས། །རྒྱལ་པོ་ རྡོ་རྗེ་ཀུན་འཛིན་པ། །སངས་རྒྱས་ཐམས་ཅད་རབ་འགྲུབ་འགྱུར། །དེ་ལྟར་མཆོག་ཏུ་རྗེས་ཆགས་དགའ་བ་པདྨའི་ར་བ་ཆེ། །མཆོག་ཏུ་གསང་བ་གྲུབ་པའི་བླ་ན་མེད་པའི་དངོས་གྲུབ་སྩོལ། །མཆོག་གི་རྒྱལ་མཚན་བསྒྲེང་བས་གང་ཞིག་རྗེས་སུ་བསྟེན་པ་སྟེ། །མཆོག་གི་ དངོས་གྲུབ་དབང་ཕྱུག་ཆེན་པོ་ཉིད་དེས་ཉམས་མྱོང་བ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས་གསང་བ་ཆེན་པོ་དམ་པའི་དཔལ་དམ་ཚིག་གསུམ་དང་དངོས་གྲུབ་ཐམས་ཅད་དགུག་པ་དང་། མཆོད་པ་ཆེན་པོ་དང་། བདག་ ལ་བྱིན་གྱིས་བརླབ་པ་ལ་སོགས་པའི་ཆོ་ག་རྒྱས་པའོ།། །།གསང་བ་མཆོག་ནི་དགྱེས་པ་དང་། །སངས་རྒྱས་ཀུན་གྱི་རྗེས་བསྟན་པ། །རྡོ་རྗེ་སེམས་དཔའ་རང་གི་གནས། །ཐམས་ཅད་བདག་ཉིད་རྟག་ཏུ་བཞུགས། ཐོག་མཐའ་མེད་པའི་སེམས་དཔའ་ནི། །རྡོ་
- 228a
རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །འདི་ནི་རང་བྱུང་བཅོམ་ལྡན་འདས། །ལྷག་པའི་ལྷ་ནི་གཅིག་པུ་ཉིད། །ཅེས་བྱ་བ་འགྲུབ་པར་འགྱུར་རོ། །དེ་ལྟར་མཆོག་ཏུ་རྗེས་ཆགས་ དགའ་བ་པདྨ་ར་བ་ཆེ། །མཆོག་ཏུ་གསང་བ་བླ་ན་མེད་པའི་དངོས་གྲུབ་སྩོལ། །མཆོག་གི་རྒྱལ་མཚན་བསྒྲེང་བ་གང་ཞིག་རྗེས་སུ་བསྟེན་པ་སྟེ། །མཆོག་གི་དངོས་གྲུབ་བདེ་བ་ཆེན་པོ་ཉིད་དེ་ཉམས་མྱོང་བ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་ མཆོག་དང་པོ་ལས། དགའ་བ་ཆེན་པོའི་དཔལ་རྡོ་རྗེ་དོན་ཡོད་པའི་དགའ་བའི་དམ་ཚིག་རྣལ་འབྱོར་ཐམས་ཅད་ཀྱི་དབང་ཕྱུག་དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་དཀྱིལ་འཁོར་མཆོག་ཏུ་གསང་བ་ཡོངས་སུ་རྫོགས་སོ།། །།དེ་ནས་དེ་བཞིན་གཤེགས་པ་ ཐམས་ཅད་ཀྱི་དམ་ཚིག་ཆེན་པོའི་སློབ་མའི་ཆོ་ག་རྒྱས་པ་རྗེས་སུ་གཟུང་བ་བཤད་པར་བྱའོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་དང་པོ་ཁོ་ནར་རེ་ཞིག་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་དམ་པའི་སྔགས་འདི་ལན་ཅིག་བརྗོད་པས་ སེམས་བསྐྱེད་དུ་བཅུག་སྟེ། ཨོྃ་སརྦ་ཡོ་ག་ཙིཏྟཾ་ཨུད་པཱ་ད་ཡཱ་མི། འདི་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་དང་མི་འབྲལ་ཞིང་ཕྱིར་མི་ལྡོག་པ་དང་བདུད་ཐམས་ཅད་ཟིལ་གྱིས་གནོན་པའི་ཕྱག་རྒྱ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་ཉིད་དུ་ཡང་ རྟོགས་པར་བྱའོ་ཞེས་བྱ་བ་ཡང་གསུངས་སོ། །བྱང་ཆུབ་སེམས་ནི་བླ་མེད་པ། །མཆོག་ཏུ་བསྐྱེད་པར་བྱས་ནས་ནི། །སྙིང་གར་རྡོ་རྗེ་རབ་བཞག་ནས། །སུ་ར་ཏ་ས་མ་ཡ་སྟྭྃ་ཧོ། སྙིང་པོས་རྡོ་རྗེ་ཅི་བདེར་བསྒྲུབ། །འདི་ཡིས་རྡོ་རྗེ་བསྐུལ་བ་ན། །འདོད་པ་ཀུན་ལས་འགྲུབ་པར་ འགྱུར། །དེ་ཉིད་བསྐུལ་བས་མྱུར་དུ་ནི། །བྱང་ཆུབ་སེམས་ནི་བླ་མེད་པ། །ཀུན་མཆོག་དངོས་གྲུབ་ཆེན་པོའི་ཕྱིར། །རྡོ་རྗེ་སེམས་དཔའ་ཉིད་དུ་འགྱུར། །ཞེས་བྱ་བའི་མཆོག་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །གར་བྱས་སྤྱི་བོར་ཐལ་མོ་སྦྱར། །གོས་ཀྱིས་གདོང་ནི་
- 228b
གཡོགས་པ་རྣམས། །ཅི་འདོད་དངོས་གྲུབ་འདོད་པ་ཡིས། །སློབ་མ་ཐམས་ཅད་གཞུག་པར་བྱ། །ཅི་འདོད་དངོས་གྲུབ་སེམས་དཔའ་ཡིས། །སློབ་མ་མེ་ཏོག་འདོར་དུ་གཞུག །ཕྱག་རྒྱ་གང་ལ་དེ་བབས་པའོ། །དེ་དེའི་ལྷ་མོ་བསྒྲུབ་པར་བྱ། །དེ་ནས་གདོང་གཡོགས་ དགྲོལ་བྱས་ལ། །རྣམ་པ་ཀུན་གྱི་ཡོན་བླངས་ནས། །སངས་རྒྱས་རིན་ཆེན་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །དེ་ལ་རྡོ་རྗེ་ཆེན་པོའི་མནའི་ཆུས་དབང་བསྐུར་ཏེ། །འདི་ལྟར་བརྗོད་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་ པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །རྡོ་རྗེ་དྲིལ་བུའི་ཕྱག་རྒྱ་ནི། །གལ་ཏེ་དཀྱིལ་འཁོར་མ་མཐོང་སྨྲས། །སྐྱེ་བོ་འདུས་པའི་ནང་ན་གནས། །དད་པ་མེད་པས་བཞད་གད་སྨོད། །ཞེས་བྱ་བས་མནའ་བསྒག་གོ། །དེ་ལ་སངས་ རྒྱས་ཀྱི་རིན་པོ་ཆེའི་དབང་བསྐུར་བའི་ཆོ་ག་ནི་འདི་ཡིན་ཏེ། །རྡོ་རྗེ་ཆུ་ཡིས་དབང་བསྐུར་ནས། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་དབང་བསྐུར་བའི་གནས་སུ་བཞག་སྟེ། ཨོྃ་སརྦ་ཏ་ཐཱ་ག་ཏ་མ་ཧཱ་ས་མ་ཡ་ཨ་དྷི་པ་ཏི་སྟྭྃ་ཨ་བྷི་ཥྭིཉྩཱ་མི་མ་ཧཱ་བཛྲ་དྷ་ར་ཞེས་བྱ་བའི་སྔགས་འདིས་རྡོ་རྗེ་ལག་ཏུ་ སྦྱིན་པར་བྱའོ། །འདི་ནི་སངས་རྒྱས་ཐམས་ཅད་ཉིད། །རྡོ་རྗེ་འཆང་གི་རྡོ་རྗེ་སྟེ། །རྡོ་རྗེ་འཆང་གི་བརྟུལ་ཞུགས་ཆེ། །ཁྱོད་ཀྱིས་ཀྱང་ནི་རྟག་ཏུ་བཅང་། །དེ་བཞིན་གཤེགས་པ་ཐམས་ཅད་ཀྱི། །བྱང་ཆུབ་མཆོག་གི་སེམས་ཆེན་པོ། །ཡོངས་སུ་མི་སྤང་རྟག་ཏུ་བསྒྲུབས། །ཤིན་ ཏུ་གསང་བདེ་འདི་ཡིན་ཏེ། ཨོྃ་བཛྲ་ཀརྨྨ་བཱ་དྷི་དྷི་ཤྲཱི་བཛྲ་ནཱ་མ་སིད་དྷི་ས་མ་ཡ་སྟྭྃ་བྷཱུར་བྷུ་བ་སྭཿ། གང་ལ་རྡོ་རྗེའི་མིང་བཏགས་པ་དེ་ལ་ཀྱེའི་སྒྲ་དང་པོར་སྦྱར་བར་བྱའོ། །དེའི་མིང་དེ་ཡང་ཇི་སྲིད་བྱང་ཆུབ་སྙིང་པོའི་མཐར་ཐུག་པའི་བར་གྱི་དེ་བཞིན་གཤེགས་པའི་ཡང་མིང་དུ་འགྱུར་རོ། །དེ་ལ་ མཆོག་ཏུ་གསང་བ་དམ་པའི་དཔལ་དམ་ཚིག་གསུམ་སྦྱིན་པ་ནི་འདི་ཡིན་ཏེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །ཞེས་བྱ་བ་བཅོམ་ལྡན་འདས་དཔལ་མཆོག་དང་པོའི་
- 229a
སྐྱེས་བུ་མཆོག་གི་དེ་ཁོ་ན་ཉིད་ཀྱི་གསང་བ་ལྔའི་དེ་ཁོ་ན་ཉིད་བཤད་པར་བྱས་ནས་རྡོ་རྗེ་སྦྱིན་པར་བྱའོ། །འདི་བཅོམ་ལྡན་འདས་སྲིད་པའི་བདག་པོ་དམ་པ་ཀུན་གྱི་མཆོག་དབང་ཕྱུག་གི་དམ་པ་དེ་བཞིན་གཤེགས་པ་དེ་ཉིད་ཆོས་ཀྱི་མཆོག་གི་བཀའ་ཡང་དག་པར་སྩོལ་བར་མཛད་པ་ནི། སྲིད་པ་རང་བཞིན་ཉིད་ཀྱིས་དག །རང་བཞིན་གྱིས་ནི་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ནི་མཛད་པ་ཡིན། །མཆོག་ཏུ་གསང་བའི་ཆོས་ཉིད་འབེབས་པ་ནི་དྲིལ་བུའོ། །དེ་བཞིན་གཤེགས་པ་ཐམས་ཅད་ལ་མཆོད་པར་བྱ་བའམ་ལྷ་སྒྲུབ་པའི་ ཚེ་དཀྲོལ་བར་བྱའོ། །དེ་ནས་ཆོས་ཐམས་ཅད་ཀྱི་དེ་ཁོ་ན་ཉིད་རབ་ཏུ་སད་པའི་ཕབ་པ་རྣམས་ཀྱིས་སྒྲིབ་པ་ཐམས་ཅད་རྣམ་པར་དག་པར་བྱེད་པ་ཡིན་ནོ། །རྡོ་རྗེ་ཐམས་ཅད་འབེབས་པར་བྱེད་པ་དང་རབ་ཏུ་སྒྲུབ་པར་བྱེད་པ་དང་། དབང་དུ་བྱེད་པ་དང་རབ་ཏུ་དང་བར་བྱེད་པ་ཞེས་བྱ་བར་བསྒྲུབ་པར་འགྱུར་རོ། ། དེ་ནས་སྲིད་པ་དག་པའི་ཐབས་ཀྱི་མཆོག་རྟོག་པ་ཐམས་ཅད་ཀྱི་གསང་བ་ཆེན་པོ་དམ་ཚིག་ལ་རྟག་ཏུ་བསྟེན་པར་བྱའོ་ཞེས་བྱའོ། །དེ་ལ་འདི་ནི་དེང་ཁྱོད་ཀྱི། །སྲིད་བདེ་ཤིན་ཏུ་མྱུར་བར་ནི། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་རྟག་ཏུ་ བསྐྱེད། །འདོད་པའི་ལོངས་སྤྱོད་ཐམས་ཅད་ལ། །ཅི་འདོད་པར་ནི་བརྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་མཆོག་ཏུ་གསང་བའི་ཐེག་པ་ཆེན་པོའི་ཡང་ཆེན་པོ་དམ་ཚིག་གི་སྦྱོར་བ་ནི་བཅོམ་ལྡན་ འདས་ཀྱི་དམ་ཚིག་གོ། །འདི་ལྟར་དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱའི་དམ་ཚིག་ཅེས་ནི་བསྒྲགས། །ཡིད་ཀྱི་སྐུ་ནི་བརྟན་ཕྱིར་རོ། །ཞེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་འདི་བརྗོད་ པར་བྱ་སྟེ། ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །ཇི་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །གསང་བ་དམ་པ་དམ་ཚིག་ཐབས། །བསོད་ནམས་བྱིན་གྱིས་བརླབས་བསྒྲུབས་པ། །རྟག་ཏུ་དངོས་གྲུབ་ཀུན་དབང་
- 229b
ཕྱུག །སེམས་ཅན་དོན་ནི་བྱེད་པ་ཡིན། །དམ་ཚིག་འདིས་ནི་མཆོག་སྒྲུབ་ཅིང་། །ཅི་བདེ་བར་ནི་སྒྲུབ་བྱེད་པ། །ཉེས་པ་སྤྱད་ཀྱང་སྡིག་ཀུན་གྱིས། །རྣམ་པ་ཀུན་ཏུ་གནོད་མི་འགྱུར། །འདོད་པ་ཆེན་པོ་གྲུབ་པར་འགྱུར། །ཀུན་བདག་དམ་ཚིག་དབང་ཕྱུག་དང་། །ཐམས་ཅད་ རྡོ་རྗེ་འཛིན་རྒྱལ་པོ། །ཀུན་མཆོག་དབང་ཕྱུག་དམ་པའོ། །ལས་ཀྱི་ཚོགས་ཀྱི་དངོས་གྲུབ་ཀྱིས། །མ་ལུས་བསྒྲུབས་པས་འགྲུབ་པར་འགྱུར། །བདག་གཞན་ཐམས་ཅད་རྒྱས་བཏབ་པས། །ཡང་ན་བསྒྲུབ་བྱ་ཀུན་ལ་ཡང་། །དོན་ཡོད་མཆོག་ཏུ་གྲུབ་པ་དང་། །རྣལ་ འབྱོར་ཐམས་ཅད་རྗེས་སྒྲུབ་བྱེད། །དཔལ་ལྡན་སྡུག་བསྔལ་ཀུན་འཕྲོག་བྱེད། །དམ་ཚིག་འདའ་བར་དཀའ་བའོ། །ཞེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྡོ་རྗེ་ལ་སོགས་ཐོབ་འཛིན་པས། །དངོས་གྲུབ་ཀུན་གྱི་བདེ་བ་ཀུན། །ཕབ་ པས་རྡོ་རྗེ་སློབ་མ་ཡིས། །དཀྱིལ་འཁོར་དུ་ནི་ཉམས་སུ་མྱོང་། །དེ་ནས་ཐམས་ཅད་གཟེངས་བསྟོད་པས། །སངས་རྒྱས་ཀུན་གྱི་བདག་ཉིད་དངོས། །རྡོ་རྗེའི་མིང་གིས་དབང་བསྐུར་བས། །དེ་བཞིན་གཤེགས་ནི་ལུང་བསྟན་བྱ། །དེ་ལ་དེ་བཞིན་གཤེགས་པ་ཐམས་ཅད་ཀྱི་ལུང་ བསྟན་པའི་རྡོ་རྗེ་སེམས་དཔའི་ཆོ་ག་འདི་ཡིན་ཏེ། སངས་རྒྱས་ཀུན་གྱི་ཕྱག་རྒྱ་ཆེ། །གཟེངས་བསྟོད་པ་ཡི་གང་ལུང་བསྟན། །དེ་ནི་སངས་རྒྱས་ཐམས་ཅད་ཉིད། །རྡོ་རྗེ་མིང་གིས་དབང་བསྐུར་བའོ། །ཨོྃ་འདི་ནི་ངས་ཁྱོད་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། ། སྲིད་པ་ཤིན་ཏུ་གྲུབ་པའི་ཕྱིར། །སྲིད་པའི་ངན་འགྲོ་ལས་ཁྱོད་སྟོན། །ཧེ་བཛྲ་ན་མཿཏཐཱ་ག་ཏ་སིད་དྷི་ས་མ་ཡ་སྟྭྃ་བྷཱུར་བྷུ་བ་སྭཿ། གང་ལ་གཟེངས་བསྟོད་པ་འདི་དང་ཕྱག་རྒྱ་ཆེན་པོར་ལུང་བསྟན་པ་མཆོག་ཏུ་གསང་བའི་ཆོ་གས་བྱས་པ་དེ་ལ་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་ པ་ཐམས་ཅད་དང་རྡོ་རྗེ་འཆང་དང་བཅས་པའི་བྱང་ཆུབ་སེམས་དཔའི་དཀྱིལ་འཁོར་དང་བཅས་པ་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་གི་སློབ་དཔོན་རྣམས་དང་མགྲིན་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་མཛད་དོ། །འདི་ལྟ་སྟེ་གཟེངས་བསྟོད་
- 230a
པ་འདི་ཉིད་ཀྱི་ཕྱག་རྒྱ་ཆེན་པོ་དང་མཆོག་ཏུ་གསང་བ་དམ་པའི་དངོས་གྲུབ་ཀྱིས་བྱིན་གྱིས་བརླབས་པ་འདི་དང་སྔགས་ཀྱི་སྟོབས་ལ་དད་པར་བྱའོ། །དེ་ནས་ཅི་ལྟ་བ་བཞིན་དུ་ཞུགས་པ་རྣམས་ལ། དེ་བཞིན་གཤེགས་པ་ཐམས་ཅད་འདུས་པ་ལ་སོགས་པའི་དབུགས་དབྱུང་བ་སྦྱིན་ པར་བྱའོ། །དེ་བཞིན་གཤེགས་པ་ཐམས་ཅད་རྡོ་རྗེ་འཆང་དང་བཅས་པ་ཅི་སྙེད་པ་བྱང་ཆུབ་སེམས་དཔའི་དཀྱིལ་འཁོར་དང་བཅས་པ་གང་ཡིན་པ་དེ་དག་ཐམས་ཅད་རང་གི་དམ་ཚིག་ལ་རྗེས་སུ་ཆགས་པས་འདིར་དགུག་པ་དང་རབ་ཏུ་གཞུག་པ་དང་དབང་དུ་བྱ་བ་དང་བསྒྲུབ་པ་དང་རྗེས་སུ་བསྒྲུབ་པ་རྣམས་ཀྱི་རྡོ་རྗེའི་ དབྱིངས་ཐམས་ཅད་བརྟན་པར་གྱུར་པ་ཉིད་ཀྱིས། འདི་བརྟན་པར་འགྱུར་བ་ཆོས་ཀྱི་དབྱིངས་ཐམས་ཅད་ཀུན་ཏུ་ཁྱབ་པ་ཉིད་ཀྱིས་ཀུན་ཏུ་ཞུགས་པ། ནམ་མཁའི་ཁམས་ཐམས་ཅད་ཀྱི་རྒྱ་ཆེ་བ་ཉིད་ཀྱིས་འདིར་རབ་ཏུ་བཞུགས་ཤིང་། ལེགས་པར་རབ་ཏུ་བཞུགས་པ་གང་ཡིན་པ་དེ་དང་དེ་དག་དེ་བཞིན་གཤེགས་ པ་ཐམས་ཅད་ཀྱི་རང་གི་དམ་ཚིག་ལ་རག་ལས་པའི་དེ་བཞིན་གཤེགས་པ་ཉིད་ལ་ལྷག་པར་དམིགས་ནས་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་གི་སློབ་དཔོན་དེ་བཞིན་གཤེགས་པ་ཐམས་ཅད་འདི་ཡིན་ནོ་ཞེས་བྱ་བས་བྱིན་གྱིས་བརླབས་ནས། །དེ་བཞིན་གཤེགས་པ་ཐམས་ཅད་ཀྱིས་རང་གི་ དམ་ཚིག་གི་སློབ་དཔོན་གྱིས་དམ་ཚིག་གི་མགྲིན་གཅིག་ཏུ་ཁྱེད་རྣམས་ལ་དབུགས་དབྱུང་བ་མཛད་པ་ཡིན་ཏེ་དད་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དབུགས་དབྱུང་བ་འདི་ཡིན་ཏེ། གསང་བའི་དཀྱིལ་འཁོར་དམ་པ་ནི། །མཐོང་བ་དང་ནི་ཞུགས་ པས་ཀྱང་། །སྡིག་པ་ཀུན་ལས་ངེས་གྲོལ་ཞིང་། །ཁྱེད་རྣམས་དེར་ཉིད་ལེགས་པར་གནས། །བདེ་ཆེན་ཐེག་པ་འདི་ལས་ནི། །སླར་འཆི་བ་ནི་ཡོད་མིན་ཏེ། །མི་ཚུགས་པ་དང་མི་སོད་པས། །ཅིས་ཀྱང་མི་འཇིགས་རོལ་པར་གྱིས། །སྲིད་པའི་སྡུག་བསྔལ་ལྡོག་པ་ནི། །སྲིད་པ་ ཤིན་ཏུ་གྲུབ་པའི་ཕྱིར། །སྟོན་པ་མཆོག་ཏུ་གྱུར་པ་ཁྱོད། །སྲིད་པ་ཤིན་ཏུ་གྲུབ་པ་ཡིན། །དམ་ཚིག་སྡོམ་པ་གྲུབ་པ་འདི། །ཁྱོད་ཀྱིས་རྟག་ཏུ་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་རྟག་པའི་བཀའ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །
- 230b
སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་གཏང་མི་བྱ། །ཕྱག་རྒྱ་རྡོ་རྗེ་གང་ཡིན་པ། །དམ་པའི་ཆོས་ནི་མི་སྨོད་ཅིང་། །ནམ་ཡང་བཏང་བར་མི་བྱའོ། །མི་ཤེས་པའམ་རྨོངས་པ་ཡིས། །དེས་ནི་སྨད་པར་མི་བྱའོ། །རང་གི་བདག་ཉིད་ཡོངས་སྤངས་ ནས། །དཀའ་ཐུབ་རྣམས་ཀྱིས་གདུང་མི་བྱ། །ཅི་བདེ་བར་ནི་བདེ་བར་གཟུང་། །འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་ཡོངས་སུ་སྤང་མི་བྱ། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ ཀུན་མཚུངས་བླ་མ་ཡིས། །སློབ་དཔོན་ལ་ནི་གང་སྨད་པ། །དེ་ནི་སངས་རྒྱས་ཀུན་སྨད་པས། །རྟག་ཏུ་སྡུག་བསྔལ་ཐོབ་འགྱུར་ཏེ། །རིམས་དང་དུག་དང་སྦྱར་དུག་དང་། །མཁའ་འགྲོ་རྣམས་ཀྱིས་གཙེས་པ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་ ཅན་དམྱལ་བར་ལྟུང་། །དེ་བས་འབད་པ་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་སྤྱོམས་པ། །ནམ་ཡང་སྨད་པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་ འབྱུང་བར་མི་འགྱུར་རོ། །རང་གི་དམ་ཚིག་སློབ་དཔོན་ནི། །སྦྱིན་མིན་བུ་དང་ཆུང་མ་དང་། །རང་སྲོག་གིས་རྟག་བསྟེན་བྱ་ན། །ལོངས་སྤྱོད་གཡོ་བས་སྨོས་ཅི་དགོས། །གང་གིས་བསྐལ་པ་བྱེ་བར་ནི། །གྲངས་མེད་པ་ནི་རྙེད་དཀའ་བའི། །སངས་རྒྱས་ཉིད་ཀྱང་བརྩོན་ལྡན་ ལ། །ཚེ་འདི་ཉིད་ལ་སྟེར་བར་བྱེད། །རྟག་ཏུ་རང་གི་དམ་ཚིག་བསྲུང་། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་སྦྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །དེ་ཕྱིར་འདི་ནི་ལེགས་གནས་པས། །དེང་ཁྱོད་སྐྱེ་བ་འབྲས་བུར་བཅས། །རང་བྱུང་དམ་ཚིག་ལྷ་དང་མཉམ། །དེང་ཁྱོད་འགྱུར་བར་ཐེ་ཙོམ་མེད། །སངས་རྒྱས་རྡོ་རྗེ་འཛིན་བཅས་པས། །ཀུན་གྱི་དེང་ཁྱོད་དབང་བསྐུར་བས། །
- 231a
ཁམས་གསུམ་གྱི་ནི་རྒྱལ་པོ་ཆེ། །རྒྱལ་པོའི་བདག་པོར་བསྟན་པ་ཡིན། །དེ་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱིས་ནི་སངས་རྒྱས་ཉིད། །དེང་འདིར་ཐོབ་པར་ཐེ་ཚོམ་མེད། །ཅེས་བྱ་བ་དེ་བཞིན་གཤེགས་པ་ཐམས་ཅད་ དང་རྡོ་རྗེ་འཆང་དང་། བྱང་ཆུབ་སེམས་དཔའ་ཆེན་པོའི་འཁོར་གྱི་དཀྱིལ་འཁོར་དང་བཅས་པའི་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་བདེན་པས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་སློབ་ དཔོན་དང་། སློབ་མའི་ཚོགས་རྣམས་ཀྱིས་དབུགས་དབྱུང་བ་ནི་འདི་ཡིན་ཏེ། ཕྱིར་མི་ལྡོག་པའི་ཕྱག་རྒྱ་ཡིས། །བྱང་ཆུབ་སེམས་དང་ལྷན་ཅིག་བསྐྱེད། །སངས་རྒྱས་ཉིད་ཀྱང་རྟོགས་བྱ་སྟེ། །ཞེས་བྱའོ། །དེའི་རྒྱུ་གང་ཡིན་ཞེ་ན། གང་ཕྱིར་ཁྱེད་རྣམས་ཀྱི་བདག་ཉིད་ཐམས་ ཅད་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་ཆེན་པོ་བསྐྱེད་པ་ཙམ་གྱི་མཐུ་ཉིད་ཀྱིས་ཕྱིར་མི་ལྡོག་པར་འགྱུར་བ་ཡིན་ནོ། །ཕྱིར་མི་ལྡོག་པ་ཉིད་ཀྱི་ཕྱིར་ངེས་པའི་ཕུང་པོ་ལ་རྣམ་པར་གནས་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ཉིད། བླ་ན་མེད་པ་ཡང་དག་པར་ རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་རྗེས་སུ་རྟོགས་པར་བྱའོ། །ཞེས་བྱའོ། །དེ་ནས་ཐམས་ཅད་ཀྱི་དཔལ་དམ་ཚིག་གི་སློབ་དཔོན་གྱི་མཆོག་ཏུ་གསང་བའི་དབུགས་དབྱུང་བ་འདི་ཡིན་ཏེ། རྡོ་རྗེ་སེམས་དཔའི་བདག་སྦྱོར་བ། །རྣལ་འབྱོར་ཀུན་དང་རྗེས་སྤྱོད་ལྡན། ། སངས་རྒྱས་ཉིད་དུ་རྟོགས་བྱ་སྟེ། །མཁས་པས་མཆོག་ཏུ་བརྟག་པའོ། །ཞེས་བྱའོ། །དེའི་རྒྱུ་གང་ཡིན་ཞེ་ན། གང་གི་ཕྱིར་ཁྱེད་རྣམས་ཀྱི་བདག་ཉིད་ཐམས་ཅད་འདི་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་ཡོངས་སུ་བཟུང་བ་གདོན་མི་ཟ་བ་ཉིད་ཀྱི་ཕྱིར། དེ་བཞིན་གཤེགས་པ་བླ་ན་མེད་ པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པ་ཉིད་དུ་རྟོགས་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་རྗེས་སུ་སྒྲུབ་པས་མཆོག་གི་དངོས་གྲུབ་རྣམས་དེ་བཞིན་གཤེགས་པ་ཐམས་ཅད་ཉིད་དུ་དེ་དག་རྟོགས་པར་བྱའོ། །དེའི་ཕྱིར་གནས་སྐབས་
- 231b
ཐམས་ཅད་དུ་ཡང་ཅི་ནུས་པས་སྡུག་བསྔལ་དང་ཡིད་མི་བདེ་བ་ཐམས་ཅད་ཀྱི་སྐབས་མི་འབྱེད་པ་ཁྱེད་རྣམས་ཀྱིས་རང་གི་བདག་ཉིད་ཐམས་ཅད་ཁོ་ན་རྗེས་སུ་བསྲུང་ཞིང་གསད་པར་མི་བྱའོ། །ཅི་སྙེད་པའི་ལོངས་སྤྱོད་དང་ཉེ་བར་སྤྱོད་པ་ཐམས་ཅད་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་ བ་བླ་ན་མེད་པའི་ཐེག་པ་ཆེན་པོའི་དམ་ཚིག་གི་སྦྱོར་བས་ཡང་དག་པར་མཆོད་ལ་བདེ་བར་གཟུང་བ་དང་ཡང་དག་པར་འཕེལ་བར་བྱའོ། །བདག་ཉིད་ལ་ཅི་ལྟ་བ་བཞིན་དུ་མངོན་པར་བརྩོན་པ་དེ་བཞིན་དུ་གཞན་རྣམས་ལན་ཚོད་བསྐྱེད་པ་ཡིན་ནོ། །ལྟ་བ་ལོག་པ་དང་ཕྱི་རོལ་མུ་སྟེགས་པ་དང་། ཉན་ཐོས་པ་ ཐམས་ཅད་དང་རང་སངས་རྒྱས་ཀྱི་སར་ལྟུང་བས་ལུས་འདི་ཤིན་ཏུ་གསང་བ་ཡིན་ནོ། །ངག་ནི་ཤིན་ཏུ་མི་སྨྲ་བས་སོ། །སེམས་ནི་ཤིན་ཏུ་འགོག་པས་སོ། །གང་གིས་ཀྱང་ཁྱེད་ཀྱི་ལུས་ངག་ཡིད་ཀྱི་རྡོ་རྗེ་རྣམས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་དཔལ་རང་གི་དམ་ཚིག་གི་བླ་ན་མེད་ པའི་དངོས་གྲུབ་མཆོག་ཏུ་རྟག་པར་འབྱུང་བར་འགྱུར་ཞེས་བྱ་བ་ཡང་གསུངས་སོ། །འདོད་པའི་ལོངས་སྤྱོད་ཐམས་ཅད་ཀྱིས། །ཅིས་ཀྱང་མི་འཇིགས་རོལ་པར་གྱིས། །དམ་ཚིག་འདི་ནི་འདའ་དཀའ་སྟེ། །སྡིག་པ་མེད་ཀྱིས་མ་འཇིགས་ཤིག །ཅེས་བཅོམ་ལྡན་འདས་རྡོ་རྗེ་སེམས་ དཔས་མཆོག་ཏུ་བདེན་པས་གསུངས་ཏེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་དགོངས་པ་ཡིན་ནོ། །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་བདེ་སྟེར་བསྟན་པར་གྱིས། །དེ་ནི་འགྲོ་ ལ་མྱུར་བདེ་རྡོ་རྗེ་སེམས་དཔའ་དང་། །རབ་ཏུ་མཉམ་ཞིང་རྟག་ཏུ་ཉིད་དུ་རྟོགས་པར་གྱིས། །དེ་ནས་རོ་དང་བཟའ་དང་སྤྱོད་པ་གར་དང་གླུ། །རོལ་མོའི་མཆོད་སོགས་ཀྱིས་ནི་མགོན་མཆོད་པ། །རྡོ་རྗེ་བླ་མ་ཆེན་པོས་དེ་ཕུལ་ནས། །རང་དང་གཞན་དག་ཅི་འདོད་མཆོད་པར་བྱ། །མྱོས་བྱེད་མྱོས་ བྲལ་བཏུང་བ་ནི། །ཅི་འདོད་པར་ནི་བསྟེན་པ་ཡིས། །གླུ་དང་རོལ་མོའི་ཆོ་ག་སོགས། །ཅི་བཞིན་རྗེས་འགྲོའི་བཟླས་པ་བྱ། །རང་གསང་ཆོ་གས་བླངས་པ་ཡི། །གླུ་དང་རོལ་མོ་གར་རྣམས་ཀྱིས། །སྣ་ཚོགས་ཕྱག་རྒྱའི་མཆོད་པ་དང་། །རྡོ་རྗེ་སེམས་དཔའི་རོལ་མོ་སོགས། །
- 232a
བུད་མེད་སོགས་དང་ལྡན་པའམ། །རང་གི་སློབ་མ་དང་བཅས་པ། །ཅི་འདོད་པ་ཡི་ལོངས་སྤྱོད་ཀྱིས། །མཆོད་པ་བྱས་པས་མྱུར་དུ་འགྲུབ། །ཞེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་གསང་བའི་ཆོ་གའི་གླུའི་ཁྱད་ པར་ནི་འདི་ཡིན་ཏེ། །ཧཱུྃ་བཅོམ་ལྡན་འདས་མཆོག་དང་པོའི་རྡོ་རྗེ་སེམས་དཔའིའོ། །ཨ་དེ་བཞིན་གཤེགས་པ་རྣམས་ཀྱིའོ། །ཧི་དཔལ་འཇིག་རྟེན་གསུམ་ལས་རྣམ་པར་རྒྱལ་བའིའོ། །ཨོྃ་པདྨའི་སྙིང་པོའིའོ། །ཧ་ནམ་མཁའི་སྙིང་པོ་སྟེ། བྱང་ཆུབ་སེམས་དཔའ་ཆེན་པོའི་རྒྱལ་པོ་ནམ་ མཁའི་སྙིང་པོ་ཡིན་ནོ། །ཞེས་བྱ་བ་གསུངས་སོ། །རང་གསང་སྙིང་པོའི་གླུ་དག་ནི། །ཡི་གེ་ལྔ་པོས་བྱ་བ་སྟེ། །རང་གསང་ཆོ་གས་བླངས་པ་འདི། །མཆོག་ཏུ་གཤེགས་པ་ཀུན་གྱི་ཡིན། །དེ་ནས་མཆོག་ཏུ་གསང་བ་རྡོ་རྗེ་གླུའི་མཆོད་པ་ནི། རྡོ་རྗེ་དྲིལ་བུ་མཉམ་སོགས་བཅས། ། རྣམ་པར་དབེན་པར་རོལ་མོ་དཀྲོལ། །རང་གསང་ཆོ་གས་གླུ་བླངས་པ། །གསང་བའི་རོལ་མོས་རབ་ཏུ་བསྒྲུབ། །དེ་ནས་མཆོག་ཏུ་ཤིན་ཏུ་གསང་བའི་རྡོ་རྗེ་གར་གྱི་མཆོད་པ་ནི། འཛིན་པ་དང་བཅས་གཟུང་བ་ཆེའི། །གར་ནི་རབ་ཏུ་བྱས་ནས་ཀྱང་། །དཀྱིལ་འཁོར་འདྲ་བའི་གར་བྱས་ ནས། །ཡོངས་སུ་བསྐོར་བས་རང་མཆོད་བྱ། །དེ་ནས་མཆོག་ཏུ་གསང་བའི་ཕྱག་རྒྱ་སྣ་ཚོགས་པའི་མཆོད་པ་ནི། རྡོ་རྗེ་སེམས་དཔའ་ལ་སོགས་ལྷའི། །རྟོག་པ་ཐམས་ཅད་རྣམ་འཕྲུལ་པ། །གཏམ་རྒྱུད་ཕྱག་མཚན་ཕྱག་རྒྱ་ཡིས། །གང་ཞིག་གར་དེ་རོལ་མོ་ཡིན། །གསེར་ རམ་ཡང་ན་དངུལ་དང་ནི། །དེ་བཞིན་ཤིང་ལས་བྱས་པ་ཡི། །རང་གི་ལྷ་ཡི་གདོང་རྣམས་ཀྱིས། །གྲུབ་པའི་ཕྱག་རྒྱས་གར་རྣམས་བྱ། །དཀྱིལ་འཁོར་གང་དང་གང་བསྟེན་པ། །ཕྱག་རྒྱ་སྣ་ཚོགས་མཆོད་པ་ཡིས། །སློབ་མའི་ཚོགས་ནི་དེ་དང་དེ། །བཟླ་ཞིང་ཐམས་ཅད་མཆོག་ ཏུ་གཞུག །སྣ་ཚོགས་ཆོ་ག་འདི་ཡིས་ནི། །སྡིག་པ་ཀུན་ལས་རྣམ་གྲོལ་འགྱུར། །བསོད་ནམས་ཀུན་ཀྱང་འཕེལ་འགྱུར་ཏེ། །རྟག་ཏུ་སྲུང་བར་གྱུར་པ་ཡིན། །རིམས་དང་གདོན་དང་དུག་དང་ནད། །སྦྱར་དུག་མཁའ་འགྲོའི་འཚེ་བ་དང་། །བདུད་དང་གསོད་པར་བྱེད་པ་རྣམས། །
- 232b
འདིས་ནི་རབ་ཏུ་ཞི་བར་འགྱུར། །དངོས་གྲུབ་དག་ནི་ཕུན་ཚོགས་འགྱུར། །དགའ་བ་དེ་བཞིན་བདག་པོ་རྣམས། །སངས་རྒྱས་ཀུན་གྱི་བདག་ཉིད་ཀྱི། །རྣལ་འབྱོར་དམ་པ་ཐོབ་པར་འགྱུར། །ཞེས་བྱ་བ་ཤིན་ཏུ་གསང་བའི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་ ཕྱག་རྒྱ་སྣ་ཚོགས་པའི་མཆོད་པའི་ཆོ་ག་རྒྱས་པ་ལྷག་པའི་ལྷ་ཐམས་ཅད་རེ་རེའི་མཆོག་གསང་བ་འཇུག་པའི་རྡོ་རྗེ་གླུའི་མཆོད་པའི་ཆོ་ག་རྒྱས་པ་མངོན་པར་བརྗོད་ནས། རྡོ་རྗེ་སློབ་དཔོན་གྱིས་བྱས་པའམ་དེ་ལས་གཞན་ཅི་འདོད་པའི་གླུ་དང་རོལ་མོ་རྣམས་ཀྱིས་རྟོག་པ་ཐམས་ཅད་ཀྱི་སྣ་ཚོགས་པའི་དམ་ ཚིག་ཆེན་པོའི་མཆོག་ཏུ་གྲུབ་པ་ཞེས་བྱ་བ་སྟེ། དེ་རེ་ཞིག་ཐོག་མ་ཁོ་ནར་བཅོམ་ལྡན་འདས་དཔལ་མཆོག་དང་པོའི་རྡོ་རྗེ་སེམས་དཔའ་མཆོག་ཏུ་གསང་བའི་དམ་ཚིག་གི་འཇུག་པའི་གླུའི་མཆོད་པ་ནི། ཐམས་ཅད་རྗེས་སུ་ཆགས་པ་བདེ་བ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ དགའ་དམ་ཚིག་སྟེ། །བདེ་བ་ཆེན་པོ་བརྟན་ཞིང་མཐོ་བ་གསལ་གྱུར་ཅིག །སོ་སོར་རྟོགས་ནས་མངོན་དུ་ཕྱོགས་ཤིང་མྱུར་སྒྲུབས་ཤིག །དེ་ནས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མཆོག་ཏུ་གསང་བའི་དམ་ཚིག་གི་འཇུག་པའི་རྡོ་རྗེ་གླུའི་མཆོད་པ་ནི། རྡོ་རྗེ་སེམས་དཔའ་ བསྡུས་པས་ན། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུ་བླངས་པས། །རྡོ་རྗེ་ལས་ནི་བྱེད་པར་འགྱུར། །དེ་ནས་རྡོ་རྗེ་རིགས་ཐམས་ཅད་ཀྱི་མཆོག་ཏུ་གསང་བའི་དམ་ཚིག་གི་འཇུག་པའི་རྡོ་རྗེ་གླུའི་མཆོད་པ་ནི། །ཧཱུྃ་རྡོ་རྗེ་མདའ་གཞུ་དང་བཅས་ཁྱོད་ལ་འདུད། །རྡོ་རྗེ་ཆགས་པའི་དམ་ ཚིག་དཔལ་ཁྱོད་འདུད། །ཁ་ཊྭཱྃ་འཇིག་དུས་རྡོ་རྗེ་ཁྱོད་ལ་འདུད། །རྡོ་རྗེ་དྲིལ་བུ་བསྐྱོད་པའི་དཔལ་ཁྱོད་འདུད། །དེ་ནས་པདྨའི་རིགས་ཐམས་ཅད་ཀྱི་མཆོག་ཏུ་གསང་བའི་དམ་ཚིག་གི་འཇུག་པའི་རྡོ་རྗེ་གླུའི་མཆོད་པ་ནི། ལ་ལར་སྐྱེ་བོ་མ་རུངས་པ་ཡི་སྲོག་འཕྲོག་བྱེད་པ་ཤིན་ཏུ་དྲག་པོའི་ སྐུ། །ལ་ལར་འགྲོ་བ་མཐའ་ཡས་འདུལ་ཕྱིར་ཤིན་ཏུ་རྣོ་བའི་འཁོར་ལོ་འཛིན་པའི་སྐུ། །ལ་ལར་པདྨའི་གདན་གྱི་ཤིན་ཏུ་ཞི་བའི་སྐུ་སྟེ་འགྱུར་བ་མེད་པ་སྟེ། །ལ་ལར་ཤིན་ཏུ་འབར་བའི་འདོད་པའི་དམ་ཚིག་པདྨའི་རྒྱལ་པོ་བདག་སྒྲུབས་ཤིག །དེ་ནས་ནོར་བུའི་རིགས་ཐམས་ཅད་ཀྱི་མཆོག་ཏུ་
- 233a
གསང་བའི་དམ་ཚིག་གི་འཇུག་པའི་རྡོ་རྗེའི་གླུའི་མཆོད་པ་ནི། དབང་བསྐུར་ཐམས་ཅད་དབང་ཕྱུག་དམ་པ་ལས། །ཡང་དག་བསྒྲུབས་ཤིང་མི་ཟད་གཏེར་གྱི་མཆོག །ཀུན་མཆོག་རྒྱལ་མཚན་རྣམ་རྒྱལ་བསྒྲེང་བ་ལས། །རྡོ་རྗེ་རིན་ཆེན་དཔལ་བདག་ལེགས་མཆོད་གྱུར། །དེ་ ནས་མིང་པོ་གསུམ་གྱི་ནི་བྷཱུར་བྷུ་བ་སྭཿ། དེ་ནས་སྲིང་མོ་བཞི་རྣམས་ཀྱི། ཧྲཱི་ཧཱུྃ་ཤྲཱི་བྷྱོ། དེ་ནས་ཀླུའི་རིགས་ཐམས་ཅད་ཀྱི་དཀྱིལ་འཁོར་གྱི་ནི། ཕུ་ཕུ། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཕྱག་ན་རྡོ་རྗེའི་སྡིག་པ་ཐམས་ཅད་ཀྱི་དཀྱིལ་འཁོར་གྱི་རྡོ་རྗེ་གླུའི་མཆོད་པ་ནི། སརྦ་མཾ་ག་མཎྜལ་ མི་དྃ་བཛྲ་ངྷ་རཱ་ཀྲ་མ་བི་མར་ད་བི་ཀིར་བྷནྫ་ཨུད་སཱ་ད་ཡ། ནཱ་ཤ་ཡ། ཧ་ན་ད་ཧ། པ་ཙ་བྷ་སྨི་ཀུཾ་རུ་ཀྲོ་ད་ཧཱུྃ་ཀཱ་ར་མནྟྲི་ཎ། དེ་ནས་ཐམས་ཅད་ཀྱི་མཆོག་དབང་ཕྱུག་དམ་པའི་དཀྱིལ་འཁོར་ཆེན་པོའི་མཆོག་ཏུ་གསང་བའི་དམ་ཚིག་གི་རྡོ་རྗེ་གླུའི་མཆོད་པ་ནི། ལ་ལར་དྲི་མེད་ཟླ་བའི་དཀྱིལ་འཁོར་སྟོང་གི་ འོད་ཀྱིས་སྐུ་ནི་རྣམ་པར་མཛེས། །ལ་ལར་འཇིག་དུས་ཉི་མ་འཆར་ཀ་བྱེ་བའི་འོད་ཟེར་ཚོགས་ནི་འཇིགས་ཆེར་འབར། །ལ་ལར་མདངས་དང་འོད་ཟེར་དང་ལྡན་བདེ་ཞིང་ཞི་བའི་རྒྱལ་བའི་སྐུ་འཛིན་པ། །ལ་ལར་ཤིན་ཏུ་མཛེས་པའི་གཟུགས་འཆང་མཆོག་གི་མདའ་དང་བཅས་པའི་གཞུ་འཛིན་ པ། །ལ་ལར་གདུལ་བྱ་རྣམ་པར་སྦྱང་ཕྱིར་བརྩོན་པའི་རྡོ་རྗེ་སེམས་ཁྱོད་མཁའ་བཞིན་བཞུགས། །མ་ལུས་འདུལ་བ་མཁས་པའི་བདེ་བ་དམ་པ་ཉིད་ཕྱིར་བདག་ལ་གྲུབ་གྱུར་ཅིག །དེ་ནས་མཆོག་ཏུ་གསང་བའི་མཆོག་དམ་པའི་གསང་བའི་མཆོག་དཔལ་དམ་ཚིག་གསུམ་གྱི་འཇུག་པའི་རྡོ་རྗེ་གླུའི་ མཆོད་པ་མཆོག་ཏུ་གྲུབ་པ་ནི་འདི་ཡིན་ཏེ། །དངོས་གྲུབ་ཀུན་གྱི་བདེ་བ་ཉམས་དགའ་བའི། །ཐར་པའི་གྲོང་ཁྱེར་བཅོམ་ལྡན་བདེ་ཆེན་འཇུག །མཆོག་ཏུ་བདེ་བ་དམ་པའི་དངོས་གྲུབ་ཀྱིས། །ཛཿཧཱུྃ་བྃ་ཧོཿརབ་ཏུ་གྲུབ་པར་མཛོད། །དེ་ནས་ཤིན་ཏུ་མཆོག་ཏུ་གསང་བའི་ཆོ་ག་མཆོག་ཏུ་གསང་བ་བླ་ན་ མེད་པའི་དམ་པ་དཔལ་དམ་ཚིག་བླ་ན་མེད་པའི་མཆོག་ཏུ་ཤིན་ཏུ་གསང་བའི་རྡོ་རྗེ་གླུའི་མཆོད་པ་མཆོག་ཏུ་ཤིན་ཏུ་གྲུབ་པ་ཞེས་བྱ་བ་མངོན་པར་བརྗོད་ནས། ཤིན་ཏུ་མཆོག་གི་དེ་ཁོ་ན་ཉིད་ཀྱི་རྡོ་རྗེ་གླུའི་མཆོད་པའི་གླུ་དང་གར་གྱི་ཆོ་གས་ཅི་ལྟ་བ་བཞིན་དུ་རྗེས་སུ་བསྒྲུབས་ནས། སོ་སོར་རྗེས་སུ་བསྒྲུབ་
- 233b
པར་བྱའོ་ཞེས་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་ཤིན་ཏུ་གསང་བ་བླ་ན་མེད་པའི་རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་ཆེན་པོའི་མཆོད་པ་མཆོག་ཏུ་ཤིན་ཏུ་གྲུབ་པ་ཡིན་ནོ་ཞེས་བྱ་བ་ཡང་གསུངས་སོ། །སྣ་ཚོགས་ཆོ་ག་འདི་ཡིས་ནི། །རྡོ་རྗེ་སེམས་དཔའ་བསྡུས་པ་ཡིན། ། ཀུན་མཆོག་སྣ་ཚོགས་ཆེན་པོ་ཡི། །རྣལ་འབྱོར་དབང་ཕྱུག་རབ་ཏུ་གྲུབ། །ཞེས་བྱ་བ་ཤིན་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལྟར་དཔལ་མཆོག་དང་པོའི་རྟོག་པའི་ཆོ་ག་རྒྱས་པ་གཏམ་རྒྱུད་སྣ་ཚོགས་ཅན། །མཆོག་ཏུ་གསང་བའི་རོལ་མོ་བླ་ན་མེད་པའི་དངོས་གྲུབ་ ཉམས་དང་ལྡན་པ་སྟེ། །གང་གིས་སྣ་ཚོགས་པ་ཡི་རྒྱལ་མཚན་མཐོན་པོ་དང་ལྡན་ཀུན་ཏུ་རྗེས་བསྟེན་པ། །མཆོག་གི་དངོས་གྲུབ་བདེ་བ་ཆེན་པོ་ཉིད་ནི་དེ་ཡིས་ཡང་དག་ཉམས་སུ་མྱོང་། །དོན་ཡོད་མཆོག་ཏུ་བསོད་ནམས་ལྡན། །ཆོ་ག་མཆོག་ཏུ་རྟག་པ་སྟེ། །ཀུན་མཆོག་གསང་བ་ཆེན་པོ་ནི། ། དངོས་གྲུབ་ཐམས་ཅད་མྱུར་སྒྲུབ་བྱེད། །གང་ཞིག་གྲོང་ཁྱེར་མཆོག་དགྱེས་པར། །ཞུགས་ཏེ་སྒྲུབ་པར་བྱེད་རྣམས་ནི། །ཤིན་ཏུ་མཆོག་གི་འདོད་པ་ཡི། །དངོས་གྲུབ་དབང་ཕྱུག་བདེ་དེས་ཐོབ། །གང་གིས་དངོས་གྲུབ་མ་ཐོབ་དང་། །བསོད་ནམས་ཕུན་ཚོགས་བྱེད་པ་རྣམས། ། དཀྱིལ་འཁོར་མཆོག་ཏུ་རབ་ཞུགས་ན། །སྒྲུབ་པོ་འདིར་ནི་རབ་གྲུབ་འགྱུར། །གལ་ཏེ་རྡོ་རྗེ་སེམས་དཔའ་མཆོག །སྙིང་པོ་སོགས་ཀྱིས་མ་གྲུབ་དང་། །ཉེ་བའི་སྙིང་པོས་བསྒྲུབ་བྱས་ཀྱང་། །མ་གྲུབ་འདིར་ཞུགས་འགྲུབ་པར་འགྱུར། །དཔལ་མཆོག་དང་པོའི་རྩ་རྒྱུད་དུ། །དེ་ བཞིན་མྱུར་དུ་གྲུབ་པ་ཡིན། །ཇི་ལྟར་དང་པོའི་ཁྱིམ་བཞུགས་ནས། །རྡོ་རྗེའི་དཀྱིལ་འཁོར་གྲུབ་པ་ལྟར། །དཀྱིལ་འཁོར་ཐམས་ཅད་གྲུབ་པ་ཡིས། །དེ་ལྟར་ཐམས་ཅད་གྲུབ་པ་མིན། །ཇི་ལྟར་མཆོག་ཏུ་གསང་བ་ཡི། །ཁང་བཟངས་དམ་པ་མཐོང་བ་ཡིས། །དམ་ཚིག་ རྣམས་ལ་ཉམས་པ་དང་། །སྒྲིབ་པ་ཀུན་གྱིས་བསྒྲིབས་པ་དང་། །བདུད་སོགས་གདོན་གྱིས་རེག་པ་ཡང་། །རྟག་པའི་ཐར་པ་ཐོབ་པར་འགྱུར། །དཀྱིལ་འཁོར་དུ་ནི་མ་ཞུགས་པའམ། །ཡང་ན་དཀྱིལ་འཁོར་མ་གྲུབ་པ། །སླར་ཡང་མཆོག་ཏུ་རབ་ཞུགས་ན། །དེ་དག་མྱུར་
- 234a
དུ་གྲུབ་པར་འགྱུར། །གྲུབ་མིན་ཡང་འདིར་ཅུང་ཟད་མེད། །དངོས་གྲུབ་ལས་དང་བདེ་དེ་བཞིན། །དངོས་གྲུབ་ཐམས་ཅད་བཞི་འགྱུར་དུ། །རྟོག་པ་ཀུན་ལས་བསྒྲུབ་པར་བྱ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་ དང་པོ་ལས་དེ་བཞིན་གཤེགས་པ་ཐམས་ཅད་ཀྱི་དཔལ་དམ་ཚིག་ཆེན་པོའི་དཀྱིལ་འཁོར་གྱི་ཆོ་ག་ཤིན་ཏུ་གསང་བ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་འཇིག་རྟེན་གསུམ་གྱི་དམ་ཚིག་མཆོག་གི་གསང་བའི་ཆོ་གའི་མཆོག་ནི་འདི་ཡིན་ཏེ། སངས་རྒྱས་ཆོས་ དང་དགེ་འདུན་ཏེ། །དམ་ཚིག་ཆེན་པོ་གསུམ་འདི་ཡིན། །བྱང་ཆུབ་སེམས་དཔའ་མཆོག་འཛིན་པའི། །རས་ལ་དཀོན་མཆོག་གསུམ་བྲི་བྱ། །གོ་ཆ་དང་བཅས་རྡོ་རྗེ་མཆོག །གོ་ཆ་སོགས་ཀྱིས་ལེགས་པར་བརྒྱན། །རྡོ་རྗེ་མཚོན་ཆ་བརྗོད་པ་དང་། །པདྨ་རིན་ཆེན་འཆང་བའོ། ། འཁོར་ལོ་དེ་ནི་བརྟགས་ནས་སུ། །གསང་བའི་དཀྱིལ་འཁོར་དམ་པའོ། །ཅི་རིགས་པར་ནི་བསྒྲུབ་བྱས་ན། །སུམ་འགྱུར་དུ་ནི་འགྲུབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་ཞེས་བྱ་བའི་སྙིང་པོ་མཆོག་གི་དངོས་གྲུབ་མ་ལུས་པ་སྟེར་བ་འདི་ཡིན་ཏེ། ཨོྃ་བྷཱུ་ཁྃ། ཁྱིམ་མམ་ཡང་ན་ནགས་ཚལ་ལམ། །སྔ་མ་བཞིན་དུ་བརྒྱན་ནས་ནི། །མཚོན་ཆ་མཆོག་གི་ཆོ་ག་ཡིས། །ཐམས་ཅད་བྱས་ནས་འདི་བརྗོད་བྱ། །དེ་ཉིད་ཀྱིས་ནི་བཅོམ་ལྡན་འདས། །བྱང་ཆུབ་སེམས་དཔའ་དེ་བཞིན་གཤེགས། །ལྟ་ངན་རྣམས་ལ་ཕན་པའི་ཕྱིར། །འདི་དག་མྱ་ ངན་འདས་པ་སྟོན། །མ་ལུས་འདུལ་བ་ལ་བརྩོན་པས། །བརྟན་ཞིང་ངེས་པའི་གོ་ཆ་བགོས། །ཤིན་ཏུ་སྲིད་པ་ལ་གནས་མཆོག །གོ་ཆ་ལ་སོགས་བགོས་པ་ཡིན། །སངས་རྒྱས་ཆོས་དང་དགེ་འདུན་ཞེས། །དཀོན་མཆོག་གསུམ་དུ་གྱུར་པ་ཡིན། །སྲིད་བ་ཤིན་ཏུ་གྲུབ་པ་ཡི། ། རྣམ་པར་དག་པའི་དཔལ་མཛད་མཆོག །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་རྡོ་རྗེའོ། །དེ་ནས་མཆོག་ཏུ་གསང་བའི་ཆོས་ཉིད་ཀྱི་དྲིལ་བུ་ནི། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་
- 234b
མཉམ་སྦྱོར་བ་ཡིས། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ནས་དམ་ཚིག་ཆེན་པོ་གསུམ་གྱི་སྡོམ་པ་ཞེས་བྱ་བ་ནི། ལོངས་སྤྱོད་ཀུན་ལ་ལོངས་སྤྱོད་པ། །རང་ལྷ་བདག་ཉིད་ཀྱིས་བསྟེན་ན། །དཀོན་མཆོག་གསུམ་ལ་མཆོད་ པའི་མཆོག །བདག་གིས་བྱ་ཞེས་བརྗོད་ཅིང་མཆོད། །ཅེས་བྱ་བ་ནི་དེ་བཞིན་གཤེགས་པའི་རྣལ་འབྱོར་བསྒྲུབ་པའོ། །ཐབས་ཀྱི་ཆོ་ག་འདི་ཡིས་ནི། །འདོད་པའི་ཡོན་ཏན་ལྔ་རྣམས་ཀྱང་། །བཟའ་མིན་པ་ཡང་བཟའ་བྱས་ན། །རྟག་པའི་དངོས་གྲུབ་འཐོབ་པར་འགྱུར། །ཞེས་བྱ་ བ་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དམ་ཚིག་ཆེན་པོ་གསུམ་མོ། །དེ་ལྟར་བརྗོད་ནས་སྙིང་པོ་བྱིན་ལ་ཕྱག་རྒྱ་བཅིང་བ་སློབ་ཏུ་བཅུག་ནས་ཅི་ལྟར་མངོན་པར་འདོད་པ་བསྒྲུབ་པར་བྱའོ། །དེ་ནས་རྡོར་འཛིན་སློབ་དཔོན་གྱིས། །རྡོ་རྗེ་མཆོད་པས་མཆོད་ནས་ནི། །ཅི་ འདོད་པ་ཡི་མཆོད་པ་ཡིས། །སློབ་མ་ཐམས་ཅད་མཆོག་ཏུ་གཞུག །ལོངས་སྤྱོད་ཀུན་ལ་ལོངས་སྤྱོད་ཀྱང་། །དཀོན་མཆོག་གསུམ་པོ་ལ་ཕུལ་བ། །འདོད་པས་བདག་དང་གཞན་རྣམས་ལ། །མཆོད་པ་ཉིད་དུ་འགྲུབ་པར་འགྱུར། །དཔལ་མཆོག་དང་པོ་ལས་མཆོག་ཏུ་ གསང་བའི་ཆོ་གའོ།། །།དེ་ནས་རྡོ་རྗེ་ཆེན་པོ་ཁྲོ་བོའི་རྒྱལ་པོའི་མཆོག་ཏུ་གསང་བའི་ཆོ་ག་ནི། རས་ལ་བཅོམ་ལྡན་བྲི་བྱ་སྟེ། །རྡོ་རྗེའི་རིགས་ཀུན་བདག་པོ་ནི། །རྡོ་རྗེ་ཉི་མ་མེ་ལྟར་འབར། །ཆོ་ག་ཇི་བཞིན་མཆོག་ཏུའོ། །དེ་ཡི་པད་འདབ་གཅིག་བཞུགས་པ། །དེ་ཡི་ འོད་ཀྱིས་འཁོར་ལོར་སྟེན། །གསང་བའི་རྡོ་རྗེ་རྣལ་འབྱོར་ཆེའི། །མཁའ་འགྲོ་མ་རྣམས་ལོགས་ལ་བྲི། །དང་པོར་དམར་དང་དཀར་བ་དང་། །གཞན་ནི་ཐལ་བ་ལྟར་དཀར་བ། །གསུམ་པོ་དཀར་དང་ལྟ་བ་སྟེ། །བཞི་པ་གསེར་ལྟར་དྲི་མེད་པའོ། །རྡོ་རྗེ་གཏུམ་པོའི་དབང་ཕྱུག་གྲུབ། ། རྡོ་རྗེ་ཁ་ཊྭཱྃ་བསྒྲེང་དང་བཅས། །རྡོ་རྗེ་འདོད་པ་མེ་ལྟར་འབར། །དེ་ཡི་ལོགས་ལ་མཚན་མ་གཏོད། །རྡོ་རྗེ་ཁྱབ་འཇུག་མ་རྡོ་རྗེའི། །འཁོར་ལོ་གཏོད་པ་དེ་བཞིན་གཞན། །རྡོ་རྗེ་དྲིལ་བུ་བ་དན་ནམ། །དེ་ཡི་ལོགས་ན་གཡོན་བསྙེམས་མ། །ཅུང་ཟད་མཆེ་བ་གཙིགས་པ་ཡིས། །ཁྲོ་
- 235a
དང་བཅས་པས་ཞལ་བཞད་པ། །རང་བདག་ལ་ནི་ཐུགས་གཏང་ཅིང་། །སྐུ་ནི་ཟུར་གྱི་ཕྱོགས་པ་བཞུགས། །དེ་ནས་འདི་ཡི་སྙིང་པོ་ནི། །ཧཱུྃ། དེ་ནས་ཉེ་བའི་སྙིང་པོ་ནི། །རྡོ་རྗེ་དྲིལ་སོགས་ལྷན་ཅིག་ཏུ། །རྣམ་དབེན་རོལ་མོ་བརྡུངས་པ་ཡིས། །ཧི་ཡི་གླུ་དང་རོལ་ མོ་ནི། །བརྡུང་ཞིང་ཟུར་བཞི་རབ་ཏུ་བསྒྲུབ། །ཅེས་བྱ་བ་ནི་འདིར་བཟླས་པའི་ཆོ་གའོ། །འཁོར་ལོ་དེར་ནི་བསྟན་བྱས་ནས། །གསང་བའི་དཀྱིལ་འཁོར་དམ་པ་ནི། །མཚོན་ཆ་མཆོག་གི་ཆོ་ག་ཡིས། །ཆོ་ག་ཐམས་ཅད་རྒྱས་པའོ། །དེ་ནས་དེ་ཁོ་ན་ཉིད་དང་ཆོས་དང་། དམ་ ཚིག་གི་ཆོ་ག་སྦྱིན་པ་ནི། རྟག་ཏུ་ཆགས་པ་ལས་བྱུང་ཁྲོ། །རྡོ་རྗེ་མེ་ཡི་ཕུང་པོའི་སྐུ། །འབར་བའི་རྡོ་རྗེ་ཁྲོ་བོ་ཆེ། །རབ་འབར་བ་ཡི་ཚོགས་ཀྱི་སྐུ། །རྡོ་རྗེ་འབར་བའི་རྣལ་འབྱོར་ཆེ། །མཁའ་འགྲོ་མ་རྣམས་ཀུན་ཏུ་འབར། །ཞེས་བྱ་བ་ནི་རྡོ་རྗེའོ། །དེ་ནས་ཆོས་ནི། ཐམས་ཅད་ནམ་ མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་རྣལ་འབྱོར་པས། །ཐམས་ཅད་མྱུར་བ་ཉིད་དུ་སྒྲུབ། །ནམ་མཁའ་ཀུན་མཆོག་སྦྱོར་བ་ཡིས། །ཐམས་ཅད་ནམ་མཁའ་ཞེས་བརྗོད་ཅིང་། །རྡོ་རྗེའི་ཕྱག་རྒྱས་རྒྱས་བཏབ་པས། །འཇིག་ རྟེན་གསུམ་ཡང་ཟ་བར་བྱེད། །ཅེས་བྱ་བ་ནི་རྡོ་རྗེ་རྣལ་འབྱོར་གྱི་མཁའ་འགྲོ་མའི་མཆོག་ཏུ་གསང་བའི་དམ་ཚིག་གོ། །ཆོ་ག་འདི་ཡིས་ཐམས་ཅད་དུ། །མཉམ་པར་གཞག་པས་བསྒྲུབ་པར་བྱ། །ཀུན་མཆོག་དངོས་གྲུབ་ཆེན་པོ་ཡིས། །ལས་ཀྱི་ཚོགས་རྣམས་མི་ཟད་པའོ། །ཞེས་ བྱ་བའོ། །དེ་ནས་ཅི་ལྟ་བ་བཞིན་དུ་དེ་བཞིན་གཤེགས་པའི་ཆོ་གས་རང་གི་ཕྱག་རྒྱ་རྣམས་ཀྱིས་གར་གྱི་མཆོད་པ་བྱས་ནས་འགྲུབ་པར་འགྱུར་རོ། །དཔལ་མཆོག་དང་པོ་ལས་རྡོ་རྗེ་རྣལ་འབྱོར་གྱི་ཆོ་གའོ།། །།དེ་ནས་མཆོག་ཏུ་ཕྲ་བ་དང་། །ཤིན་ཏུ་བཟང་བའི་རྡོ་རྗེ་ཡི། །གྲུབ་ཆེན་ གསང་བའི་རྣལ་འབྱོར་གྱི། །མཁའ་འགྲོ་མ་ཡི་འཁོར་ལོར་བཤད། །གྲོང་ཁྱེར་སྐྱེད་མོས་ཚལ་སོགས་ནི། །ཅི་ལྟ་བ་བཞིན་རྒྱས་བྱས་ནས། །རྡོ་རྗེ་འཛིན་ཀུན་སློབ་དཔོན་གྱིས། །ཇི་བཞིན་དུ་ནི་བསྒྲུབས་པ་ཡིས། །ཡིད་འོང་བཞི་དང་ལྷན་ཅིག་ཏུ། །རང་གི་ཕྱག་རྒྱས་མེ་ཏོག་གཏོར། །
- 235b
ཅི་ལྟ་བ་བཞིན་གྲོང་ཁྱེར་འཇུག །གཡོན་པའི་ཁ་ནི་གྱེན་དུ་གཏོད། །རྡོ་རྗེ་དྲག་པོ་བཞད་ཆེན་པོ། །སྒྲ་སྒྲོགས་མཆོག་གི་ཕྱག་རྒྱ་ཡིས། །འཇུག་སྟེ་མགོན་ལ་ཕྱག་འཚལ་བྱ། །དེ་ལ་ཕྱག་ནི་འདི་ཡིན་ཏེ། །ཨོྃ་ཞེས་བྱ་བ་བརྗོད་བྱས་ལ། །ཤིན་ཏུ་དགའ་བའི་དབུགས་རླུང་ གིས། །རུ་ལུ་རུ་ལུ་ལླྃ་དྲུག་ལྡན་བར་མའི་རུ་ལུ་རུ་ལུ་ལླྃ་སྟེ། འདི་ནི་རྡོ་རྗེ་དྲག་པོའི་ཕྱག་འཚལ་བའི་སྒྲ་སྒྲོགས་པའི་མཆོག་ཅེས་བྱ་བ་འདིར་རྡོ་རྗེ་ཕྱག་གི་ཕྱག་རྒྱ་སྟེ། ཕྱག་རྒྱ་ཐམས་ཅད་དང་གཞན་རྨོངས་པ་དང་ཐོགས་པ་མེད་པའི་དངོས་གྲུབ་ཐམས་ཅད་དང་ལས་ཐམས་ཅད་ལ་དགོངས་ ཤིང་མཆོག་ཏུ་གྲུབ་པ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་མཆོག་ཏུ་ཤིན་ཏུ་གསང་བ་འདི་གསུངས་སོ། །དེ་ནས་ཡིད་འོང་དམ་བཅས་པས། །མེ་ཏོག་སིལ་མ་དོར་ནས་ནི། །རྡོ་རྗེ་པདྨའི་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །དེ་ལ་རྡོ་རྗེ་སེམས་ དཔའི་ཕྱག་རྒྱ་ནི་འདི་ཡིན་ཏེ། པདྨའི་ཐོད་པ་ལས་བྱ་སྟེ། དེ་ཡང་རྡོ་རྗེ་བྱིན་གྱིས་བརླབས་པས་ན། རྡོ་རྗེ་པདྨ་ཞེས་བྱ་བའོ། །དེ་ནས་འདིར་ཕྱག་རྒྱ་བཅིང་བ་ནི། སོར་མོ་ཐམས་ཅད་ཕན་ཚུན་སྦྱར། །ཀུན་མཆོག་རྩེ་མོ་དང་བཅས་པ། །མཐེ་བོ་རྡོ་རྗེས་བཀབ་པ་ནི། །རྡོ་ རྗེ་པདྨ་ཞེས་འགྲུབ་བོ། །རྡོ་རྗེ་པདྨའི་ཕྱག་རྒྱ་འདིས། །རྡོ་རྗེ་སེམས་དཔའི་དབང་བསྐུར་བའི་སྦྱོར་བ་དང་། རྡོ་རྗེ་པདྨའི་རིན་པོ་ཆེའི་ཅོད་པན་གྱིས་དབང་བསྐུར་བར་བྱའོ། །འདིས་དབང་བསྐུར་བ་ཙམ་གྱིས་དེ་བཞིན་གཤེགས་པ་རྣམས་ཀྱིས་ཤིན་ཏུ་གདུག་པ་དང་དྲག་པོ་དང་རབ་ཏུ་ གཏུམ་པ་དང་མ་རུངས་པའི་སེམས་ཅན་ཐལ་བར་བརླག་ནས་ཐམས་ཅད་ལས་རྣམ་པར་རྒྱལ་བ་ཁམས་གསུམ་མ་ལུས་པའི་སྟོབས་ཆེན་པོ་དང་ལྡན་པའི་འཁོར་ལོས་སྒྱུར་བའི་དེ་བཞིན་གཤེགས་པ་ཐམས་ཅད་ཅེས་བྱ་བར་བྱིན་གྱིས་རློབ་པར་འགྱུར་བ་དང་། མཆོག་ཏུ་རྟག་པའི་སྲུང་བར་ཡང་ འགྱུར་རོ་ཞེས་མཆོག་ཏུ་ཤིན་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །རྡོ་རྗེ་ལ་སོགས་ཐོབ་པར་གཟུང་། །རྡོ་རྗེ་སེམས་
- 236a
དཔའ་གཉིས་པ་འདྲ། །རྡོ་རྗེ་རྣལ་འབྱོར་དབང་ཕྱུག་གྲུབ། །རྡོ་རྗེ་ཅན་གྱིས་བྱིན་རླབས་འགྱུར། །བུད་མེད་རྣམས་ཀྱང་འབེབས་གྱུར་ནས། །སྟོན་པའི་རྡོ་རྗེ་ཕབ་པ་ཡིས། །རྡོ་རྗེ་དང་བཅས་ཕྱག་མཚན་འཛིན། །རྣལ་འབྱོར་མ་རྣམས་རབ་ཏུ་འགྱུར། །དེ་ལ་ཐོག་ མར་རེ་ཞིག་རྡོ་རྗེ་ཉི་མ་མེ་ལྟར་འབར་བ་ཆེན་པོ་ཐལ་བར་རབ་ཏུ་རློག་པ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆེན་པོའི་ཁྲོ་བོའི་རྒྱལ་པོའི་བདག་པོ་མཆོག་དང་པོ་ཡང་དག་འབེབས་པར་བྱེད་པ་སྟེ། དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོའི་ཐབས་ ཀྱིས་འཁོན་དུ་འཛིན་པའི་ཁྲོ་བོའི་མེ་འབར་བའི་རྡོ་རྗེ་རྡོ་རྗེ་དང་བཅས་པའི་ཁ་ཊྭཱྃ་གའི་རྒྱལ་མཚན་དང་ངེས་པ་སྦྱོར་བ་བ་དན་དང་བཅས་པའི་དྲིལ་བུ་འཆང་བ་རྡོ་རྗེ་བསྙེམས་པའི་བདག་པོ་ཤིན་ཏུ་ཁྲོ་བ་འབེབས་པས་སྒེག་པ་དང་བཅས་པའི་སྨིན་མཚམས་ཀྱི་ཁྲོ་གཉེར་ཤིན་ཏུ་འཇིགས་ཤིང་འཇིགས་ པར་བྱེད་པའི་སྤྱན་སེར་པོ་དང་ལྡན་པའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་འཇིགས་པ་ཆེན་པོས་འཇིགས་པར་བྱེད་པའི་སྤྱན་གྱི་ལྟ་བའི་ཕྱག་རྒྱ་འདིས་སྟོང་ཕྲག་བརྒྱ་བཟླས་པས་འགྲུབ་པར་མཛད་དོ། །དེ་བཞིན་གཤེགས་པ་ཐམས་ཅད་རྗེས་སུ་ཆགས་པ་དང་དགུག་པ་དང་ གཞུག་པ་དང་དབང་དུ་བྱ་བ་དང་འབེབས་པར་ནུས་པའོ། །ཐམས་ཅད་ནམ་མཁར་སྦྱོར་བའི་ཏིང་ངེ་འཛིན་དང་། ལན་ཅིག་བརྗོད་པ་ཙམ་གྱིས་ཁམས་གསུམ་མ་ལུས་པའི་རྡོ་རྗེ་བདུད་རྩི་ལ་སོགས་པའི་བདུད་ཐམས་ཅད་དང་། དེ་བཞིན་གཤེགས་པ་ཐམས་ཅད་ལ་གདུག་པ་དང་དྲག་པོ་དང་ རབ་ཏུ་གཏུམ་པ་དང་མ་རུངས་པའི་སེམས་ཅན་རྣམས་དང་། མཁའ་འགྲོ་མ་དྲག་པོ་ཐམས་ཅད་དང་གང་ཞིག་ཉན་ཐོས་དང་རང་སངས་རྒྱས་རྣམས་ཏེ། དེ་དག་ཀྱང་ཐལ་བར་རློག་པར་འགྱུར་ན། དགྲ་བོ་ལ་སོགས་པ་གཞན་རྣམས་ལྟ་སྨོས་ཀྱང་ཅི་དགོས། དོན་ཡོད་ཅིང་ཐོགས་པ་མེད་ པ་དང་དངོས་གྲུབ་ཐམས་ཅད་དང་ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཐུགས་རྗེ་ཆེན་པོའི་ཐབས་ཤིན་ཏུ་དྲག་པོ་འདིའི་མན་ངག་གི་བཟླས་པ་ནི། སྣའི་དབུགས་ཕྲ་བ་ཉིད་ཀྱིས་བདེན་པའི་རྡོ་རྗེ་ཚིག་གིས་གྲུབ་པའི་ཡིད་ཀྱི་འདོད་པའི་
- 236b
ལས་ཐམས་ཅད་ཀྱི་དངོས་གྲུབ་ཀྱི་ཚོགས་རྣམས་ལ་དམ་པའི་མཆོག་ཏུ་གྲུབ་པའོ། །ཧཱུྃ་དེ་ནས་མཆོག་ཏུ་གསང་བའི་རྡོ་རྗེ་རྣལ་འབྱོར་གྱི་དབང་ཕྱུག་མའི་ལྷ་ཆེན་པོ་རྣམས་ཀྱིས་བཤད་པར་བྱ་སྟེ། དེ་ལ་ཐོག་མར་རེ་ཞིག་རྡོ་རྗེ་ཆེན་པོ་འདོད་པའི་མེ་འབར་བ་ཞེས་བྱ་བའི་ལྷ་མོ་ཆེན་མོ་རྡོ་རྗེ་གཞུ་དང་ མདའ་སྟོད་པའི་སྤྱན་གཡོན་པ་སྟེ། རྡོ་རྗེ་སྤྱན་གྱི་ལྟ་བའི་ཕྱག་རྒྱ་འདིས་ཐམས་ཅད་སྒྲུབ་པར་མཛད་པ་དང་སྒེག་པ་དང་བཅས་ཤིང་གཡོ་བའི་སྤྱན་གྱི་ཟུར་གྱིས་གཟིགས་པའི་ཕྱག་རྒྱས་བཏབ་པ་ཙམ་གྱིས་ཐམས་ཅད་ལ་རྒྱས་འདེབས་པར་མཛད་པ་དང་། དོན་ཡོད་པ་ཐོགས་པ་མེད་པ་དངོས་ པོ་ཐམས་ཅད་ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཡུམ་འདིའི་བྱ་རོག་གི་མགྲིན་པའི་དབྱངས་ཀྱིས་རྡོ་རྗེ་ངག་གི་ཁྲོ་བོའི་བཟླས་པ་ནི་ཡིད་ཀྱི་འདོད་པས་དངོས་གྲུབ་ཐམས་ཅད་དང་། ལས་ཀྱི་ཚོགས་རྣམས་ལ་མཆོག་ཏུ་གྲུབ་པའོ། །ཧྲཱིཿགཉིས་པ་ནི་རྡོ་རྗེ་ཆེན་པོ་འདོད་ པའི་མེ་འབར་བའི་དམ་ཚིག་ལན་ཞེས་བྱ་བའི་ལྷ་མོ་སྟེ། དབུས་སུ་རང་གི་ལྷག་པའི་ལྷ་བསྟོད་པའི་ཞལ་འཛུམ་པའི་སྤྱན་ཆུང་ཞིག་འཛུམས་ཤིང་། དགའ་བ་ཆེན་པོ་རྡོ་རྗེའི་སྤྱན་གྱི་ལྟ་བའི་ཕྱག་རྒྱ་འདིས་ཐམས་ཅད་སྒྲུབ་པར་མཛད་པ་དང་ཙུམ་པ་ན་དང་། འཁྱུད་པ་ལ་སོགས་པའི་རེག་ པའི་ཕྱག་རྒྱས་རྒྱས་བཏབ་པ་ཙམ་གྱིས་ཐམས་ཅད་ལ་རྒྱས་འདེབས་པར་མཛད་པ་དང་། ཕྱག་རྒྱ་ཐམས་ཐམས་ཅད་འཛེམས་པར་མཛད་པ་དང་། ཐམས་ཅད་ཀྱིས་གསོད་པར་མཛད་པ་དང་། དོན་ཡོད་ཅིང་ཐོགས་པ་མེད་པར་དངོས་གྲུབ་ཐམས་ཅད་དང་། ལས་ཀྱི་ཚོགས་རྣམས་ལ་དགོངས་ ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཡུམ་འདིའི་བྱ་རོག་གི་མགྲིན་པའི་དབྱངས་ཀྱིས་རྡོ་རྗེ་ངག་གི་ཁྲོ་བོའི་བཟླས་པ་ནི་ཡིད་ཀྱི་འདོད་པས་དངོས་གྲུབ་ཐམས་ཅད་དང་། ལས་ཀྱི་ཚོགས་རྣམས་ལ་མཆོག་ཏུ་གྲུབ་པའོ། །ཧཱུྃ། གསུམ་པ་ནི་རྡོ་རྗེ་ཆེན་པོའི་འདོད་པའི་མེ་འབར་བ་ཐལ་བར་ རློག་པ་ཞེས་བྱ་བའི་ལྷ་མོ་ཆེན་མོ་སྟེ། བཅོམ་ལྡན་འདས་ཀྱི་རྡོ་རྗེ་ཆེན་པོ་དང་ཁ་ཊྭཱྃ་གའི་རྒྱལ་མཚན་འཆང་བ་སྒེག་པ་དང་བཅས་པའི་བཞད་པས་སྨིན་མཚམས་ཀྱི་ཁྲོ་གཉེར་གྱི་ཁྲོ་བོའི་སྤྱན་ཏེ། རྡོ་རྗེ་ཆེན་པོའི་ཁྲོ་བོ་ཀི་ལི་ཀི་ལ་ཁྲོ་བོའི་སྤྱན་གྱི་ལྟ་བའི་ཕྱག་རྒྱ་འདིས་ཐམས་ཅད་སྒྲུབ་པར་མཛད་པའོ། །
- 237a
བཛྲ་ཞེས་བྱ་བ་དང་། རུ་ལུ་རུ་ལུ་རུ་ལུ་ཧྣི་ཞེས་བྱ་བ་ཙམ་གྱིས་བདུད་ཐམས་ཅད་འཇོམས་པ་དང་། དོན་ཡོད་ཅིང་ཐོགས་པ་མེད་པ་དངོས་གྲུབ་ཐམས་ཅད་དང་། ལས་ཀྱི་ཚོགས་རྣམས་ལ་དགོངས་ཤིང་མཆོག་ཏུ་གྲུབ་པའོ། །ཧི། བཞི་པ་ནི་རྡོ་རྗེ་ཆེན་པོ་འདོད་པའི་མེ་འབར་བ་ཐལ་ བར་རློག་པ་འཆི་བ་སློང་བ་ཞེས་བྱ་བ་གཡོན་བསྙེམས་པ་གཡས་པས་རང་གི་སྤྱི་བོར་རྡོ་རྗེ་དྲིལ་བུ་སྐྱོད་པར་མཛད་པ་སྒེག་པ་དང་བཅས་པའི་སྤྱན་ཤིན་ཏུ་གདངས་པ་སྟེ། རྡོ་རྗེ་རྒྱལ་པོ་དྲིན་གྱི་སྤྱན་གྱི་ལྟ་བའི་ཕྱག་རྒྱས་ཐམས་ཅད་སྒྲུབ་པར་མཛད་པ། ཐལ་ལྕག་ལ་སོགས་དང་བཞད་གད་དང་རྡེག་པ་དང་ ཕྱག་རྒྱས་རྒྱས་བཏབ་པས་འཆི་བ་ཐམས་ཅད་སློང་བར་མཛད་པ། དོན་ཡོད་ཅིང་ཐོགས་པ་མེད་པ་དངོས་གྲུབ་ཐམས་ཅད་དང་། ལས་ཀྱི་ཚོགས་ལ་དགོངས་ཤིང་མཆོག་ཏུ་གྲུབ་པའོ། །དེ་ནས་བཅོམ་ལྡན་འདས་ཡུམ་འདིའི་དྲིལ་བུའི་དབྱངས་ཀྱི་རྡོ་རྗེ་ཁྲོ་བོའི་བཟླས་པ་ནི་ཡིད་ཀྱི་འདོད་པས་དངོས་ གྲུབ་ཐམས་ཅད་དང་ལས་ཀྱི་ཚོགས་ཐམས་ཅད་ལ་མཆོག་ཏུ་གྲུབ་པའོ། །ཥྚ། དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ནམ་མཁའི་ཁམས་ལྟར་གྲངས་མེད་ཅིང་། །རྡོ་རྗེ་ཉི་མ་ལས་བྱུང་བ། །ནམ་མཁའ་ཀུན་གྱི་གནས་སྐབས་ཀྱི། ། དཀྱིལ་འཁོར་འདི་ལ་རབ་ཞུགས་པ། །རྡོ་རྗེ་མཆོག་གི་རྣལ་འབྱོར་གྱི། །དབང་ཕྱུག་མ་ལུས་ཀུན་ནས་འབེབས། །དེ་ནས་རྡོ་རྗེ་རྣལ་འབྱོར་པ་སྟོན་པ་དེས་རྣལ་འབྱོར་པ་རང་གི་ལོགས་དག་ཏུ་འགོད་པ་ཡིན་ཏེ། ཟླ་ཚེས་དཀྱིལ་འཁོར་རྣམ་པ་ཡིས། །དཀྱིལ་འཁོར་དུ་ནི་ དགོད་པར་བྱ། །བཀོད་ནས་ཐམས་ཅད་ཀུན་མཆོག་གི། །དངོས་གྲུབ་དམ་པ་བསྒྲུབ་པར་བྱ། །ཐམས་ཅད་དགུག་དང་མཆོད་པ་ཆེ། །བདག་བྱིན་བརླབ་སོགས་གྲུབ་པ་ཡིས། །ཤིན་ཏུ་གསང་བའི་དཀྱིལ་འཁོར་དེ། །བརྟག་པ་དང་ནི་བསྒྲུབས་ནས་ཀྱང་། །རྡོ་རྗེ་འཛིན་ཀུན་སློབ་དཔོན་ གྱིས། །རྡོ་རྗེ་སློབ་མ་རྣམས་གཞུག་བྱ། །དེ་ལ་རེ་ཞིག་ཐོག་མ་ཁོ་ནར་སློབ་དཔོན་གྱིས་བཅུག་སྟེ་ཚོགས་ཀྱི་དཀྱིལ་འཁོར་དུ་དམ་ཚིག་གསུམ་གྱི་བྱིན་གྱི་རླབས་ཀྱིས་རྡོ་རྗེ་རྣལ་འབྱོར་མ་རྣམས་ལོགས་དག་ཏུ་བཞག་ནས། སྐྱེས་པ་རྣམས་ཀྱང་གཞུག་ཅིང་བྱང་ཆུབ་ཀྱི་སེམས་ཀྱིས་རྡོ་རྗེ་
- 237b
ཆེན་པོའི་ཁྲོ་བོའི་དམ་ཚིག་དང་དམ་ཚིག་སྡོམ་པ་དག་ལེན་དུ་གཞུག་པར་བྱའོ། །ཁྱེའུ་དང་བུ་མོ་རྣམས་རབ་ཏུ་བཞག་ལ་ཚོགས་དང་བཅས་པའི་རང་ཉིད་ཀྱིས་ཞུགས་ཏེ། བསྲུང་བ་དང་བསྐྱབ་པ་དང་སྦ་བ་ཐམས་ཅད་བྱའོ། །དེ་ནས་འདིར་སློབ་མ་གཞུག་པའི་ཆོ་ག་རྒྱས་པ་ནི། བྱང་ ཆུབ་སེམས་ནི་བླ་མེད་པ། །མཆོག་ཏུ་བསྐྱེད་པར་བྱས་ནས་ནི། །གར་བྱས་སྤྱི་བོར་ཐལ་སྦྱར་མཆོད། །སློབ་མ་ཐམས་ཅད་གཞུག་པར་བྱ། །ཅི་འདོད་པ་ཡི་དངོས་གྲུབ་བསྐྱེད། །སློབ་མ་མེ་ཏོག་དོར་དུ་གཞུག །རྣལ་འབྱོར་མ་ནི་གང་ལ་བབས། །དེ་དང་དེ་ཡི་ལྷ་མོ་འགྲུབ། །དེ་ ནས་གདོང་གཡོགས་བཀྲོལ་ནས་ནི། །རྣམ་པ་ཀུན་ཏུ་ཡོན་བླངས་ནས། །རྡོ་རྗེ་པདྨའི་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །འདིར་མནའ་བསྒག་པ་དང་དབང་བསྐུར་བ་ནི་དེ་ཉིད་དོ། །དེ་ལ་འདིར་དམ་ཚིག་གསུམ་སྦྱིན་པ་ནི་འདི་ཡིན་ཏེ། མི་བྱེད་པ་དང་སོ་སོར་རྟོག ། གདུག་པ་ཐམས་ཅད་གནོན་པ་དང་། །སངས་རྒྱས་ཀུན་དངོས་རྡོ་རྗེ་སྟེ། །བྱང་ཆུབ་སེམས་ནི་ཆེ་ཞིང་བརྟན། །མཚོན་ཆ་དེ་ནི་རྒྱལ་ཀུན་གྱིས། །ཀུན་ཏུ་བཟང་པོའི་ལག་ཏུ་སྦྱིན། །བསྟན་པ་ཐམས་ཅད་གྲུབ་པའི་ཕྱིར། །དེ་ཕྱིར་ཕྱག་ན་རྡོ་རྗེ་ཡིན། །དེ་ནས་རྡོ་རྗེ་ཉི་མ་མེ་ལྟར་འབར་བའི་ མཆོག་ཏུ་གསང་བ་ནི། རྟག་ཏུ་ཆགས་པ་ལས་བྱུང་ཁྲོ། །རྡོ་རྗེ་སེམས་དཔའ་གདུལ་བྱའི་ཕྱིར། །རྡོ་རྗེ་ཉི་མ་མེ་ལྟར་འབར། །མཆོག་ཏུ་འཇིགས་པར་བྱེད་པ་ཡིན། །དེ་ནས་མཆོག་ཏུ་གསང་བའི་རྡོ་རྗེ་རྣལ་འབྱོར་གྱི་མཁའ་འགྲོ་མ་རྣམས་ཀྱི་གསང་བ་མཆོག་གི་དེ་ཁོ་ན་ཉིད་ནི། རྡོ་རྗེ་ ཉི་མ་འཆར་ལས་བྱུང་། །དེ་བཞིན་གཤེགས་པའི་གྲིབ་མ་འདི། །སྤྲུལ་ཏེ་མ་ལུས་བདུད་ལ་སོགས། །གདུག་པའི་ཁྲག་ནི་གསོལ་བར་སྤྱོད། །ཅེས་བྱ་བ་ནི་གསང་བ་མཆོག་གི་དེ་ཁོ་ན་ཉིད་དོ། །དེ་ནས་འདིར་མཆོག་ཏུ་གསང་བའི་ཆོས་ཉིད་འབེབས་པའི་དྲིལ་བུ་ནི། ཤིན་ཏུ་གདུག་ ཅིང་དྲག་པ་དང་། །བདག་པོ་དྲག་པོའི་བུ་རྣམས་དང་། །ཤིན་ཏུ་གཉིད་ནི་ལོག་པ་དག །རྡོ་རྗེ་མཆོག་ནི་འཛིན་པས་གསུངས། །ཞེས་བྱ་བ་ནི་བཅོམ་ལྡན་འདས་ཀྱིས་གསུངས་སོ། །མཆོག་ཏུ་གསང་བའི་ཆོས་ཉིད་འབེབས་པའི་རྡོ་རྗེ་ཁ་ཊྭཱྃ་གའི་རྒྱལ་མཚན་དང་བ་དན་གྱིས་དྲིལ་བུ་ཐམས་
- 238a
ཅད་འབེབས་པ་དང་། རབ་ཏུ་གྲུབ་པར་བྱེད་པ་དང་། ཐམས་ཅད་ལྟུང་བར་བྱེད་པ་དང་། སློང་བར་བྱེད་པའོ། །དེ་ནས་རྣལ་འབྱོར་མཆོག་གི་དམ་ཚིག་ནི། ཁྲག་ཆེན་ག་བུར་དང་བཅས་པ། །ཙནྡན་དམར་དང་སྦྱར་བ་ནི། །ཚོགས་ཀྱི་ནང་དུ་རབ་ཞུགས་ནས། །རྡོ་ རྗེ་དང་བཅས་རྡོ་རྗེ་འཛིན། །སྲིན་ལག་མཐེ་བོ་རྩེ་མོ་ཡིས། །ནམ་མཁའ་ཐམས་ཅད་སྦྱོར་མཆོག་ལྡན། །ཟླ་བའི་བཏུང་བ་བཞིན་མྱངས་ན། །རྟག་པའི་དངོས་གྲུབ་ཐོབ་པར་འགྱུར། །འདོད་པ་ཀུན་ལ་ལོངས་སྤྱོད་ཅིང་། །ཅི་འདོད་པ་ནི་བསྟེན་བཞིན་དུ། །ནམ་མཁའ་ཀུན་མཆོག་སྦྱོར་ བ་ཡིས། །དངོས་གྲུབ་ཐམས་ཅད་ཐོབ་པར་འགྱུར། །ནམ་མཁའ་ཀུན་མཆོག་སྦྱོར་བ་ཡིས། །ནམ་མཁའ་ཐམས་ཅད་ཅེས་བརྗོད་ཅིང་། །རྡོ་རྗེའི་ཕྱག་རྒྱས་བཏབ་པ་ཡི། །འཇིག་རྟེན་གསུམ་ཡང་བཟའ་བར་བྱ། །དངོས་གྲུབ་ལས་དང་དེ་བཞིན་བདེ། །འདི་ལ་ཅུང་ཟད་མི་འགྲུབ་ མེད། །ལས་ཀྱི་ཚོགས་ཀྱི་དངོས་གྲུབ་ཀྱིས། །དངོས་གྲུབ་མ་ལུས་སྒྲུབ་པར་འགྱུར། །དོན་ཡོད་མཆོག་ཏུ་གྲུབ་པ་དང་། །གདུག་པ་ཐམས་ཅད་གནོན་པར་བྱེད། །སྡུག་བསྔལ་ཀུན་འཕྲོག་དཔལ་དང་ལྡན། །རྣལ་འབྱོར་འདི་ནི་ལས་ཀུན་བྱེད། །ཅེས་བྱ་བ་མཆོག་ཏུ་ གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་རོ་དང་བཟའ་དང་སྤྱོད་པ་གར་དང་གླུ། །རོལ་མོའི་མཆོད་པ་སོགས་ཀྱིས་མགོན་ལ་མཆོད། །ཕུལ་བ་དེ་ཡིས་རྡོ་རྗེ་བླ་མ་ཆེ། །དད་པས་བདག་དང་གཞན་རྣམས་མཆོད་པར་བྱ། །མྱོས་བཅས་མྱོས་བྱེད་ བཏུང་བ་ནི། །ཅི་འདོད་པར་ནི་བསྟེན་པ་ཡིས། །རྡོ་རྗེ་ཉི་མ་མེ་འབར་སོགས། །ཇི་བཞིན་རྗེས་འགྲོའི་བཟླས་པ་བཟླ། །རང་གསང་ཆོ་གས་བླངས་པ་ཡི། །གླུ་དང་རོལ་མོ་གར་རྣམས་དང་། །སྣ་ཚོགས་ཕྱག་རྒྱའི་མཆོད་པ་དང་། །ཁམས་གསུམ་རྣམ་རྒྱལ་ལ་ སོགས་པ། །བུད་མེད་ཚོགས་དང་བཅས་པ་ཡི། །མཆོད་པ་རྒྱ་ཆེན་ཐམས་ཅད་དང་། །ཅི་འདོད་པ་ཡི་ལོངས་སྤྱོད་ཀྱིས། །མཆོད་པ་བྱས་ནས་རབ་ཏུ་བསྒྲུབ། །ཅེས་བྱ་བ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་དེ་བཞིན་
- 238b
གཤེགས་པ་ཐམས་ཅད་འདུས་པ་ལ་སོགས་པའི་དབུགས་དབྱུང་བ་སྦྱིན་པར་བྱ་སྟེ། འགྲོ་བ་ཀུན་གྱི་ཁམས་རྣམས་ཀྱི། །ཕྲ་རབ་རྡུལ་དང་མཉམ་པ་ཉིད། །རྟོག་པའི་རྒྱལ་པོ་གྲུབ་པ་སྟེ། །སངས་རྒྱས་ལ་སོགས་མཆོག་གྲུབ་པའོ། །གང་ཞིག་བློ་ནི་དཔག་མེད་པའི། ། ཁྱད་པར་དུ་ནི་དམིགས་མི་འགྱུར། །དེ་བཞིན་གཤེགས་པས་བདེ་བ་ནི། །དམ་པ་ཐམས་ཅད་བསྡུས་པའོ། །ཟད་པ་ཐམས་ཅད་ཟད་འགྱུར་དང་། །འཕེལ་བ་ཐམས་ཅད་འཕེལ་བར་འགྱུར། །གང་ཞིང་མཐོང་བས་མི་སྣང་འགྱུར། །གང་ནས་ཀྱང་ནི་འཇིགས་མེད་བྱེད། ། དྲག་པོ་དབང་པོ་ཉེ་དབང་ཟླ། །ཉི་མ་མཁའ་འགྲོ་ཚོགས་དཀྱིལ་འཁོར། །ཁྲོས་ནས་ཡི་གེ་ཧཱུྃ་ཙམ་གྱིས། །མ་ལུས་པ་ནི་ཐལ་བར་བྱེད། །རྣལ་འབྱོར་མཁའ་འགྲོ་མའི་དཀྱིལ་འཁོར། །མཆོག་ཏུ་ཞུགས་ཏེ་མཐོང་ནས་ནི། །སྡིག་པ་ཀུན་ལས་རྣམ་གྲོལ་ཏེ། །ཁྱེད་རྣམས་ དང་ནི་རབ་ཏུ་གནས། །སླར་ཁྱོད་འཆི་བ་ཡོད་མིན་ཏེ། །ཁྱད་པར་དུ་ནི་ངན་འགྲོ་མེད། །གཞན་གྱིས་མི་ཐུབ་མི་སོད་ཅིང་། །ཅིས་ཀྱང་མི་འཇིགས་དགའ་བར་གྱིས། །ཤིན་ཏུ་སྲིད་པའི་དངོས་གྲུབ་རྣམས། །སྟོན་པའི་མཆོག་ཏུ་གྱུར་པ་ཡིན། །དམ་ཚིག་སྡོམ་པ་གྲུབ་པ་འདི། ། རྟག་ཏུ་ཡང་ནི་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་བརྟག་པའི་བཀའ་ཡིན་ནོ། །བྱང་ཆུབ་སེམས་ནི་སྤང་མི་བྱ། །དམ་ཆོས་དེ་བཞིན་དམ་ཚིག་དང་། །སློབ་དཔོན་སྨད་པར་མི་བྱ་སྟེ། །གང་ཕྱིར་རྡོ་རྗེ་འཛིན་ཀུན་དེ། །སེམས་ཅན་ ཀུན་ལ་ཕན་ཕྱིར་དང་། །ཐེག་པ་ཐམས་ཅད་འགྲུབ་པའི་ཕྱིར། །གདུག་པ་འདུལ་བ་དག་པ་ཞེས། །རྡོ་རྗེ་མཆོག་ནི་འཛིན་པས་གསུངས། །ཤིན་ཏུ་གདུག་ཅིང་གཏུམ་པ་དང་། །བདག་པོའི་གྲོགས་པོ་བུ་རྣམས་ཀྱང་། །ཕྱག་རྒྱའི་རྣལ་འབྱོར་མངོན་སྤྱོད་ཀྱིས། །ཤིན་ཏུ་ གཉིད་ནི་ལོག་ཏུ་གཞུག །རྟག་ཏུ་རང་གི་དམ་ཚིག་བསྲུང་། །རྟག་ཏུ་དེ་བཞིན་གཤེགས་རྣམས་མཆོད། །རྟག་ཏུ་བླ་མ་ལ་ཡང་དབུལ། །དེ་ལ་ཕུལ་ན་འབྲས་བུ་ཆེ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་
- 239a
ཚོགས་ཡིན་ཏེ། །ཚོགས་ལས་དངོས་གྲུབ་མཆོག་ཏུ་འགྱུར། །དེང་ཁྱོད་སྐྱེ་བ་འབྲས་བུར་བཅས། །གང་ཕྱིར་འདི་ལ་རབ་ཏུ་གནས། །དམ་ཚིག་རྒྱལ་པོ་དང་མཉམ་པར། །སངས་རྒྱས་ཀུན་གྱིས་བྱིན་གྱིས་བརླབས། །སངས་རྒྱས་རྡོ་རྗེ་འཛིན་ཀུན་ གྱིས། །དེ་རིང་ཁྱེད་ལ་དབང་བསྐུར་བས། །ཁམས་གསུམ་གྱི་ནི་རྒྱལ་སྲིད་ཆེ། །སྟོབས་དཔལ་འཁོར་ལོས་སྒྱུར་བ་ཡིན། །རྡོ་རྗེ་དམ་པའི་གསང་མཆོག་རྣལ་འབྱོར་མའི། །མཆོག་གི་དམ་ཚིག་གསང་བ་མཐོང་ནས་ནི། །བདུད་ལ་སོགས་པའི་ཤ་ཡང་ཟོས་ནས་ནི། །དེ་ བཞིན་གཤེགས་སྦྱོར་ཐོབ་ནས་ཁྱོད་གྲུབ་ཡིན། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས་མཆོག་ཏུ་གསང་བའི་རྡོ་རྗེ་རྣལ་འབྱོར་གྱི་མཁའ་འགྲོ་མའི་དཀྱིལ་འཁོར་གྱི་ཆོ་ག་མཆོག་ཏུ་གྲུབ་པའོ།། །།དེ་ནས་འཕགས་པ་སྤྱན་རས་གཟིགས་ དབང་ཕྱུག་གི་མཆོག་ཏུ་གསང་བ་འགྲོ་བ་འདུལ་བའི་ཆོ་ག་ནི། རས་ལ་བཅོམ་ལྡན་བྲི་བར་བྱ། །པདྨ་གར་གྱི་དབང་ཕྱུག་གཙོ། །གློག་གི་འཁོར་ལོ་ཡོངས་འགྱུར་བའི། །འཁོར་བའི་རྣམ་འཕྲུལ་གར་རྣམས་ཀྱིས། །པདྨ་ལ་སོགས་ཕྱག་མཚན་བྲི། །ཕྱག་རྒྱ་འཁོར་ལོ་ལྟར་ མཛད་པ། །དེ་ཡི་ལོགས་ནི་ཐམས་ཅད་ལ། །ཁྲོ་གཉེར་མ་སོགས་བྲི་བར་བྱ། །དྲག་མོ་ལ་སོགས་ཕྱག་མཚན་གཟུགས། །པདྨའི་ལྷ་མོ་པདྨར་བཅས། །དཀྱིལ་འཁོར་དེར་ནི་བརྟག་བྱས་ན། །གསང་བའི་དཀྱིལ་འཁོར་དམ་པ་ནི། །མཚོན་ཆ་མཆོག་གི་ གང་གང་གིས། །ཐམས་ཅད་བྱས་ནས་འདི་བརྗོད་བྱ། །དེ་ཉིད་སངས་རྒྱས་བཅོམ་ལྡན་འདས། །སྤྱན་རས་གཟིགས་ཀྱི་དབང་ཕྱུག་སྟེ། །འདུལ་བའི་ཐབས་ཀྱིས་དག་པ་ཡིས། །རོལ་པའི་གར་ནི་མཛད་པ་ཡིན། །ཞེས་བྱ་བ་ནི་མཆོག་གི་རྡོ་རྗེ་སྟེ། ཅི་ལྟར་ པདྨ་དམར་པོ་ནི། །གནས་ཀྱི་ཉེས་པ་སྣ་ཚོགས་ཀྱི། །ཚོན་གྱི་ཉེས་པས་མི་གོས་པ། །དེ་བཞིན་ཁམས་གསུམ་དག་པའོ། །ཞེས་བྱ་བ་ནི་མཆོག་ཏུ་གསང་བའི་ཆོས་ཉིད་ཀྱི་དྲིལ་བུའོ། །ཆོ་ག་གང་དང་གང་དག་གིས། །འགྲོ་བ་རྣམས་ནི་འདུལ་འགྱུར་བ། །པདྨ་
- 239b
དག་མཆོག་རྣལ་འབྱོར་བདག །དེ་དང་དེ་ཡིས་དག་པར་བྱ། །ཞེས་བྱ་བ་ནི་རྡོ་རྗེ་ཐམས་ཅད་ཀྱི་ཆོས་ཀྱི་དམ་ཚིག་གོ། །དེ་ནས་ཅི་ལྟ་བ་བཞིན་དུ་པདྨ་གར་གྱི་མཆོད་པས་མཆོད་ལ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་ནས་བཅོམ་ལྡན་འདས་ནམ་མཁའི་སྙིང་པོ་དོན་ ཐམས་ཅད་གྲུབ་པའི་ཆོ་ག་སྟེ། ཉི་མའི་དཀྱིལ་འཁོར་བྲིས་ནས་ནི། །རས་རིས་དེ་ནི་བློ་གྲོས་ཆེ། །ལྗང་གུ་བཻཌཱུརྱ་དང་མཚུངས། །ནམ་མཁའི་སྙིང་པོ་བྲི་བར་བྱ། །དེ་ཡི་པདྨ་གཅིག་ལག་གནས། །དེ་ཡི་འོད་ཀྱི་འཁོར་ལོར་བརྟེན། །དབང་བསྐུར་མ་དང་གཏེར་མ་དང་། ། རྒྱལ་མཆོག་མངའ་བདག་མཆོད་ཆེན་པོ། །གསང་བའི་དཀྱིལ་འཁོར་དམ་པ་དེའི། །འཁོར་ལོ་བརྟག་པར་བྱས་ནས་ནི། །མཚོན་ཆ་མཆོག་གི་སྦྱོར་བ་ཡིས། །ཆོ་ག་རྒྱས་པ་ཇི་བཞིན་པའོ། །དེ་ནས་རྡོ་རྗེ་མཆོག་གི་ནི། །ཉི་མ་འདི་ནི་དམ་པ་སྟེ། །དེ་བཞིན་ གཤེགས་པ་ཐམས་ཅད་མཐོང་། །ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་ཡོངས་རྫོགས་མཛད། །དེ་ནས་ཆོས་ཀྱི་རིན་པོ་ཆེའི་དྲིལ་བུ་ནི། །བསམ་པ་གྲུབ་པ་ཐམས་ཅད་ཀྱི། །ནོར་གྱི་བསམ་པ་གྲུབ་པ་མཆོག །དེ་ཡང་འདོད་པར་རབ་གྲུབ་ཕྱིར། ། འདོད་ལས་ཐར་པ་བདེ་བ་ཆེ། །ཞེས་བྱ་བའོ། །སྦྱིན་མིན་རྣམས་ནི་སྦྱིན་བྱའོ། །འདོད་པ་ཀུན་གྱི་བདེ་བ་རྣམས། །བདག་ཉིད་དང་ནི་གཞན་རྣམས་ལ། །བསམ་པ་ཐམས་ཅད་རྫོགས་ཕྱིར་རོ། །ཞེས་བྱ་བ་ནི་དམ་ཚིག་གི་མཆོག་གོ། །དམ་ཚིག་འདི་ཡིས་མཆོག་ཏུ་ནི། །རྡོ་ རྗེ་སེམས་དཔའ་བདེ་བ་ཆེ། །མྱུར་དུ་ཡང་དག་དམ་པ་མཆོག །མི་འགྱུར་མཆོག་ནི་གྲུབ་པར་མཛོད། །དེ་ལྟར་གསང་བ་མཆོག་གི་ཚུལ་དག་ནི། །ཇི་བཞིན་ཆོ་ག་མཆོག་ཏུ་རྒྱས་པ་སྟེ། །མཆོག་ཆེན་དེ་ནི་རྟོག་པ་ཐམས་ཅད་ཀྱི། །སྙིང་པོ་ཁྱད་པར་དངོས་གྲུབ་འགྲུབ་པར་འགྱུར། ། དཔལ་མཆོག་དང་པོ་ལས་རྟོག་པ་ཐམས་ཅད་ཀྱི་བསྒྲུབ་པའི་ཆོ་གའོ།། །།དེ་ནས་གྲུབ་ཆེན་ཐམས་ཅད་ཀྱི། །སྒྲུབ་པའི་མཆོག་ནི་བདེ་བ་ཆེ། །རྡོ་རྗེ་སེམས་དཔའ་ཕྱག་རྒྱ་ཆེ། །རྟོག་པ་ཀུན་མཆོག་གྲུབ་པའི་ཕྱིར། །སྣོད་མ་ཡིན་པའི་སེམས་ཅན་ནི། །སྡིག་པ་ཐམས་ཅད་
- 240a
བྱེད་རྣམས་ལ། །མཐོང་བ་ལ་སོགས་སེམས་ཅན་དོན། །སེམས་དཔའ་ཆེན་པོས་མཛད་པ་ཡིན། །མཐོང་མེད་ལོང་བ་དེ་རྣམས་ནི། །བསོད་ནམས་མེད་སོགས་རྟགས་ལྡན་ལ། །རྡོ་རྗེ་སེམས་སོགས་སེམས་དཔའ་མཆོག །མཐོང་བའི་ཐབས་ཀྱི་རྒྱུ་རྣམས་ ནི། །རྡོ་རྗེ་སེམས་སོགས་སེམས་མཆོག་གི། །སྐུ་གསུང་ཐུགས་ཀྱི་རྡོ་རྗེ་ཡིས། །དམ་ཚིག་མཆོག་ནི་བཅིང་བ་སྟེ། །དམ་ཚིག་འདའ་བར་དཀའ་བའོ། །རྡོ་རྗེ་སེམས་སོགས་སེམས་དཔའ་ཡི། །གང་ཕྱིར་སྐུ་རྣམས་བརྟན་པ་ནི། །དེ་ཡི་ཕྱག་རྒྱར་གྲགས་པ་སྟེ། ། དངོས་གྲུབ་ཀུན་ཕྱིར་དེ་དག་སྤྲུལ། །གང་དག་བཟུང་བ་ཙམ་གྱིས་ནི། །རྡོ་རྗེ་སེམས་དཔའ་ལ་སོགས་མཆོག །མཐོང་ཞིང་མངོན་པར་མཐོང་བ་ཉིད། །མཆོག་ཏུ་བསྡུས་པར་གྱུར་པ་ཡིན། །ཕྱག་རྒྱ་བཅིངས་པ་ཙམ་གྱིས་ནི། །གང་ཕྱིར་བསྡུས་པར་འགྱུར་བ་སྟེ། ། རྡོ་རྗེ་སེམས་སོགས་སེམས་དཔའ་རྣམས། །ཉམས་པས་འཇིགས་པས་གྲུབ་པར་འགྱུར། །ཅི་ལྟར་རྒྱལ་པོ་རྣམས་ཀྱི་བཀའི། །རྟགས་ཀྱི་ཕྱག་རྒྱ་འདའ་དཀའ་བ། །ཕྱག་རྒྱ་གསལ་བ་ཀུན་གྱིས་ཀྱང་། །འདའ་བར་ནུས་པ་མ་ཡིན་ནོ། །སངས་རྒྱས་ཉིད་དམ་རྡོ་རྗེ་ འཛིན། །དེ་ལྟར་བསྐལ་པ་བྱེ་བས་ཀྱང་། །ཐོབ་པར་མི་འགྱུར་མྱུར་དུ་ནི། །ཅི་ལྟར་ཕྱག་རྒྱ་མཆོག་བཟུང་བའོ། །ཇི་ལྟར་འདུལ་ལྡན་འཇིག་རྟེན་ནི། །དེ་ལྟར་དངོས་གྲུབ་གསུངས་པ་ཡིན། །དེ་ཡི་ཐབས་ནི་ཕྱག་རྒྱ་སྟེ། །དངོས་གྲུབ་ཐམས་ཅད་མཆོག་ཏུ་བྱེད། ། གང་ཞིག་བཅིངས་པ་ཙམ་གྱིས་ནི། །འདུས་པ་བདེ་བ་ཆེན་པོ་རྣམས། །རྡོ་རྗེ་སེམས་སོགས་སྐད་ཅིག་གིས། །བྱིན་གྱིས་བརླབ་པ་བརྟན་པར་མཛད། །ཞེས་བྱའོ། །དེ་ནས་འདི་གསུངས་ནས་བཅོམ་ལྡན་འདས་ཀྱི་མཁས་ཤིང་མཆོག་ཏུ་ཕྲ་བ་དང་། ཟབ་པ་དང་རྒྱ་ཆེ་བ་བསམ་ གྱིས་མི་ཁྱབ་པ་མཆོག་ཏུ་དག་པ། ཐོག་མ་དང་ཐ་མ་མེད་པ། མི་ཟད་ཅིང་ཟད་པ་མེད་པ། དོན་ཡོད་ཅིང་ཐོགས་པ་མེད་པ། ཤིན་ཏུ་མཆོག་ཏུ་དགའ་བ་མ་ལུས་པའི་བདེ་བ་ཆེན་པོ་དང་ཡིད་བདེ་བ་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་ཀྱི་དངོས་གྲུབ་ཆེན་པོའི་དབང་ཕྱུག་ཆེན་
- 240b
པོ་མཆོག་ཏུ་མི་འགྱུར་བའི་དངོས་གྲུབ་ཐམས་ཅད་ཀྱི་མཆོག་རྡོ་རྗེ་དབབ་པ་རྣམས་ཀྱིས་རབ་ཏུ་སད་པར་མཛད་ནས། བདེ་བ་ཆེན་པོའི་རྡོ་རྗེ་གསང་བའི་དོན་ཡོད་པའི་མཆོག་གི་གསང་བ་ཞེས་བྱ་བའི་མཚོན་ཆ་མཆོག་འདི་མཆོག་ཏུ་གསང་བའི་ཆོ་ག་རྒྱུད་ཕྱི་མའི་མཆོག་བྱིན་གྱིས་རློབ་པར་ མཛད་པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གིས་བདག་ལ་བྱིན་གྱིས་བརླབ་པ་བསྒྲུབ་པ་གཅིག་པུའི་ཆོ་ག་བཤད་པར་བྱའོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཉིན་རེ་སྔོན་དུ་ལན་ཅིག་ཏུ། །ཕྱག་རྒྱ་ཆེ་དང་སྙིང་པོ་བཟླས། ། ཀུན་གྱི་ཕྱག་རྒྱ་རབ་གྲུབ་པའི། །བདག་བྱིན་བརླབ་པ་གཅིག་པུས་འགྲུབ། །ཅེས་བྱ་བ་ནི་མཆོག་ཏུ་གྲུབ་པའོ། །དེ་ནས་མཆོག་ཏུ་གསང་བ་བདག་ལ་བྱིན་གྱིས་བརླབ་པ་གཅིག་པུ་བསྒྲུབ་པའི་ཆོ་ག་མཆོག་ཏུ་གྲུབ་པ་ནི། ལན་ཅིག་དམ་ཚིག་གསུམ་མཆོག་ཏུ། །གསང་ བ་དམ་པའི་ཁང་པར་ནི། །རྡོ་རྗེ་ལ་སོགས་ཐོབ་བཟུང་ནས། །རྡོ་རྗེ་ཅན་གྱིས་བྱིན་བརླབ་འགྱུར། །དེ་ནས་ཤན་ཏུ་མཆོག་ཏུ་གསང་བའི་བདག་ལ་བྱིན་གྱིས་བརླབ་པ་གཅིག་པུ་བསྒྲུབ་པ་འི་ཆོ་ག་རྒྱས་པའི་ཁྱད་པར་ཤིན་ཏུ་གྲུབ་པ་ནི། རྡོ་རྗེ་དྲིལ་བུ་ཀུན་བདག་ཉིད། ། སྣ་ཚོགས་ཕྱག་རྒྱའི་སྐུར་བདག་ལྡན། །ཕྱག་རྒྱ་ཀུན་གྱི་རྣལ་འབྱོར་བདག །རྡོ་རྗེ་སེམས་དཔའ་ཉིད་དུ་འགྱུར། །གྲུབ་པའི་ཆོ་ག་འདི་ཡིས་ནི། །རྡོ་རྗེ་སེམས་དཔའ་ཡང་དག་བསྡུས། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ཉིད་བྱིན་བརླབས། ། དོན་ཡོད་རབ་ཏུ་བདག་བྱིན་བརླབས། །རང་བཞིན་ཉིད་ཀྱིས་ཐམས་ཅད་དུ། །མདོར་ན་ཕྱག་རྒྱ་ཐམས་ཅད་ནི། །རང་ཉིད་བཅིངས་ནས་གྲུབ་པར་འགྱུར། །བདག་བྱིན་བརླབས་དང་དོན་ཡོད་ཕྱིར། །མྱུར་དུ་འབད་མེད་དངོས་གྲུབ་རྣམས། །ལས་ཀྱི་ཚོགས་ཀྱིས་བསྒྲུབས་ པ་ཡིས། །དངོས་གྲུབ་ཀུན་མྱུར་འགྲུབ་པར་འགྱུར། །འདི་ཡིས་ཅུང་ཟད་མི་འགྲུབ་མེད། །དངོས་གྲུབ་ལས་དང་དེ་བཞིན་བདེ། །ཐམས་ཅད་བྱིན་བརླབ་བསྒྲུབས་པ་ཡིས། །མི་འགྱུར་བ་ནི་ཀུན་གྲུབ་བྱེད། །ཅེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་
- 241a
སོ། །དཔལ་མཆོག་དང་པོ་ལས་དངོས་གྲུབ་ཐམས་ཅད་བྱིན་གྱིས་བརླབ་པའི་ཆོ་ག་མཆོག་ཏུ་གསང་བ་ཞེས་བྱའོ།། །།དེ་ནས་མཆོག་ཏུ་གསང་བའི་རྣལ་འབྱོར་ཐམས་ཅད་ཀྱི་ཆོ་ག་རྗེས་སུ་བཤད་པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་ དཔས་གསུངས་སོ། །དེ་ལ་ཐོག་མ་ཁོ་ནར་རེ་ཞིག་དོན་ཡོད་པའི་ཕྱིར་ནི་རྣལ་འབྱོར་གྱི་སྐད་ཀྱི་དབྱིངས་སོ། །འདི་ཡང་བརྩོན་པ་ཡིན་ནོ་ཞེས་བྱ་བ་ནི་སྐད་ཀྱི་དབྱིངས་ཀྱི་དོན་ཏོ། །གང་གིར་བརྩོན་པ་ཡིན་ཞེ་ན། སྨྲས་པ་རང་གི་ལྷག་པའི་ལྷ་རྗེས་སུ་དྲན་པར་སྦྱོར་བས་ན་རྣལ་འབྱོར་ རོ། །སླར་ཡང་གཞན་ནི་ཡང་དག་པར་བསྡུ་བ་དང་ཡང་དག་པར་ཀུན་ཏུ་སྦྱོར་བ་དང་ཡང་དག་པར་སྦྱོར་བ་ཞེས་བྱ་བ་ནི་རྣལ་འབྱོར་བརྗོད་པའི་རྣམ་གྲངས་སོ། །གང་ཡང་དག་པར་ཀུན་ཏུ་སྦྱོར་བ་ཡིན་ཞེ་ན། རང་གི་ལྷག་པའི་ལྷ་རྗེས་སུ་དྲན་པའི་རྣལ་འབྱོར་རྗེས་སུ་བསྒྲུབས་པས་ རང་གི་ལྷག་པའི་ལྷའི་རྣལ་འབྱོར་བསྒྲུབ་པའི་སྦྱོར་བ་ཞེས་བྱའོ། །དེ་ལ་ཅི་ལྟར་ཐམས་ཅད་ཀྱི་རྣལ་འབྱོར་ཡིན་ཞེ་ན། དམ་ཚིག་གི་རྣལ་འབྱོར་ནི་ཐམས་ཅད་ཀྱི་རྣལ་འབྱོར་ཞེས་བྱ་བ་ཡིན་ནོ། །དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་ རྒྱ་དམ་ཚིག་རྗེས་སུ་བསྒྲགས། །ཡིད་ཀྱི་གཟུགས་ནི་བརྟན་ཕྱིར་རོ། །ཞེས་བྱ་བ་ནི་དམ་ཚིག་གི་དོན་ཏོ། །དེ་ལ་རྗེས་སུ་བསྒྲུབ་པའི་རྣལ་འབྱོར་ནི་དམ་ཚིག་གི་རྣལ་འབྱོར་ཏེ་ཐམས་ཅད་ཀྱི་རྣལ་འབྱོར་ཞེས་བྱའོ། །འདི་ལྟ་སྟེ་རྫས་མང་པོ་ཡང་དག་པར་སྦྱར་བས་སྦྱོར་བ་ཞེས་བྱ་བ་ གྲུབ་པ་དེ་བཞིན་དུ། ཐམས་ཅད་ཀྱི་བདག་ཉིད་ཀྱི་ཕྱག་རྒྱའི་སྦྱོར་བའི་ཡང་དག་པར་ཀུན་ཏུ་སྦྱོར་བས་ན་ཐམས་ཅད་ཀྱི་རྣལ་འབྱོར་ནི་དམ་ཚིག་གི་རྣལ་འབྱོར་རོ། །དེ་ལ་ཅི་ལྟར་ན་ཐམས་ཅད་ཀྱི་བདག་ཉིད་ཀྱི་རྣལ་འབྱོར་ཡིན་ཞེ་ན། སངས་རྒྱས་ཀུན་བདག་ཡང་དག་སྦྱོར། །ཅི་ལྟའི་དབྱིབས་ དང་སྐུ་དང་ལྡན། །བདག་ཉིད་བདག་ཉིད་ཉིད་ལ་ནི། །བཀོད་ནས་རྗེས་སུ་བསྒྲུབ་པར་བྱ། །ཞེས་བྱ་བ་ནི་རང་གི་དམ་ཚིག་གི་རྣལ་འབྱོར་ཐམས་ཅད་ཀྱི་རྣལ་འབྱོར་ཞེས་བྱའོ། །དེ་ལ་རྗེས་སུ་བསྒྲུབ་པ་ནི། །ལྷག་པའི་ལྷ་ནི་གང་གང་གིས། །ཕྱག་རྒྱ་གང་དང་གང་འཆིང་བ། །
- 241b
དེ་དང་དེ་ཡི་རྣལ་འབྱོར་གྱིས། །ཕྱག་རྒྱ་དེ་དང་དེ་སྦྱོར་བྱ། །ཞེས་བྱའོ། །དེ་ནས་མཆོག་ཏུ་གསང་བའི་རབ་མཆོག་གི་རྗེས་སུ་སྒྲུབ་པའི་ཆོ་ག་རྒྱས་པ་མཆོག་ཏུ་ཤིན་ཏུ་གྲུབ་པ་ནི། བདག་ནི་སངས་རྒྱས་ཐམས་ཅད་ཉིད། །གཟི་བརྗིད་ཅན་ནི་ཉིད་ཀྱང་ཡིན། །རང་གི་ ལྷ་ཡི་རྣལ་འབྱོར་གྱིས། །དེ་ཕྱིར་བདག་ཉིད་བརྟག་པར་བྱ། །ཕྱག་རྒྱ་ཐམས་ཅད་ཀྱི་རྣལ་འབྱོར་ཆེན་པོ་མཆོག་ཏུ་གསང་བ་ཞེས་བྱའོ། །དེ་ནས་མཆོག་ཏུ་ཤིན་ཏུ་གསང་བའི་མཆོག་གི་རྗེས་སུ་སྒྲུབ་པའི་ཆོ་ག་རྒྱས་པའི་ཁྱད་པར་ཤིན་ཏུ་མཆོག་ཏུ་གྲུབ་པ་ནི། རང་ ལྷའི་སྦྱོར་བ་ཇི་བཞིན་དུ། །སྣ་ཚོགས་ཕྱག་རྒྱའི་དབང་བསྐུར་ལྡན། །ཕྱག་རྒྱ་ཀུན་བདག་རྣལ་འབྱོར་བདག །མི་འགྱུར་མཆོག་ཏུ་གྲུབ་པར་འགྱུར། །རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་མཆོག་གི་རྣལ་འབྱོར་ནི་ཡང་དག་པར་ཀུན་ཏུ་སྦྱོར་བ་ཞེས་བྱ་ བའོ། །དེ་ནས་གཞན་ཡང་སླར་མཆོག་ཏུ་ཤིན་ཏུ་གསང་བ་མཆོག་གི་རྗེས་སུ་སྒྲུབ་པའི་ཆོ་ག་རྒྱས་པའི་ཁྱད་པར་མཆོག་ཏུ་གྲུབ་པ་ལས་ཀྱང་ཤིན་ཏུ་མཆོག་ཏུ་གྲུབ་པ་ཞེས་བྱ་བ་ནི། རྡོ་རྗེ་སེམས་དཔར་བདག་སྦྱོར་བའི། །ཇི་བཞིན་དབྱངས་དང་སྐུར་ལྡན་པ། །ཀུན་བདག་ ཕྱག་རྒྱའི་རྣལ་འབྱོར་བདག །མི་འགྱུར་མཆོག་ནི་གྲུབ་པར་འགྱུར། །འདི་ནི་སངས་རྒྱས་ཐམས་ཅད་ཀྱི། དམ་ཚིག་གསལ་བའི་རྗེས་འགྲོ་བ། །རྣལ་འབྱོར་ཀུན་བདག་གྲུབ་པ་སྟེ། །གསལ་ཞིང་ཤིན་ཏུ་གྲུབ་མཆོག་ཡིན། །འདི་ཡིས་མི་འགྲུབ་ཅུང་ཟད་མེད། ། དངོས་གྲུབ་ལས་དང་དེ་བཞིན་བདེ། །ལས་ཀྱི་ཚོགས་ཀྱི་དངོས་གྲུབ་དང་། །དངོས་གྲུབ་མ་ལུས་མྱུར་དུ་འགྲུབ། །ཅེས་བྱ་བ་ནི་གསང་བའི་དམ་ཚིག་གི་རྣལ་འབྱོར་ཏེ་ཤིན་ཏུ་མཆོག་ཏུ་རབ་ཏུ་གྲུབ་པའོ། །འདོད་པ་ཀུན་ལ་ལོངས་སྤྱོད་ཅིང་། །ཅི་འདོད་པར་ནི་བསྟེན་པ་ ཡིས། །རྣལ་འབྱོར་དག་ནི་འདི་དག་གིས། །རང་གི་བདག་ཉིད་རབ་མཆོད་བྱ། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཤིན་ཏུ་གསང་བ་བླ་ན་མེད་པ་ཐེག་པ་ཆེན་པོའི་དམ་ཚིག་ཆེན་པོའི་རྣལ་འབྱོར་དེ་བཞིན་གཤེགས་པ་ཐམས་ཅད་ཀྱི་དཔལ་གྱི་རང་གི་དམ་ཚིག་
- 242a
གི་རྣལ་འབྱོར་དགའ་བ་ཆེན་པོའི་དཔལ་རྡོ་རྗེ་དོན་ཡོད་པའི་དགའ་བའི་དམ་ཚིག་རྣལ་འབྱོར་ཐམས་ཅད་ཀྱི་བླ་ན་མེད་པའི་བཅུད་ཀྱིས་ལེན་གྱི་མཆོག་གི་དངོས་གྲུབ་ཀྱི་རྣལ་འབྱོར་གྱི་རྒྱལ་པོ་དེ་བཞིན་གཤེགས་པ་བཅོམ་ལྡན་འདས་དཔལ་རྡོ་རྗེ་སེམས་དཔའོ། །རྡོ་རྗེ་ སེམས་དཔའི་མཆོག་གི་ཚེ་དང་ན་ཚོད་གཞོན་པ་དང་ནད་མེད་པ་དང་གཟུགས་དང་ཁ་དོག་དང་གཟི་བརྗིད་དང་མཐུ་དང་སྟོབས་དང་སྤྲོ་བ་དང་དངོས་གྲུབ་མཆོག་ཐམས་ཅད་དང་དཔལ་དང་། སྐལ་བ་བཟང་པོ་དང་དགའ་བ་ཆེན་པོ་དང་ཤིན་ཏུ་བདེ་བ་དང་ཡིད་བདེ་བ་ཐམས་ཅད་ལ་དམ་པ་མཆོག་ ཏུ་གྲུབ་པའོ། །ཅི་སྲིད་མ་ལུས་ཤིང་ལུས་པ་མེད་པ་ལ་མ་ལུས་པའི་དངོས་གྲུབ་ཆེན་པོ་དམ་པ་ཐམས་ཅད་ཀྱི་དབང་ཕྱུག་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་གྲུབ་པ་བ་སྟེ་རྒྱས་བཏབ་པ་ཙམ་གྱིས་སྐད་ཅིག་གིས་རབ་ཏུ་གྲུབ་པ་ཡིན་ ནོ། །དེ་རྒྱུ་གང་གི་ཕྱིར་ཞེ་ན་འདི་ལྟ་སྟེ། སྤྱོད་པ་ཕྱག་རྒྱ་ལ་རག་ལུས། །ཕྱག་རྒྱ་རྣལ་འབྱོར་ལ་གནས་པ། །རྣལ་འབྱོར་ཁྱད་པར་གྱིས་བསྒྲུབ་བྱ། །རྣལ་འབྱོར་དམ་ཚིག་གིས་སྒྲུབ་བྱེད། །སེམས་ནི་སྟོང་པ་སྒྱུ་མར་མཚུངས། །ལུས་དང་བྲལ་བར་མ་གྲུབ་ སྟེ། །ལུས་དེ་ཡང་ནི་རྩིག་པ་འདྲ། །བྱ་བ་མེད་ཅིང་སེམས་དང་བྲལ། །ལུས་ཀྱང་སེམས་དང་བྲལ་བ་སྟེ། །སེམས་ཀྱང་ལུས་དང་བྲལ་བ་ནི། །གྲུབ་པ་མ་ཡིན་དེ་བཞིན་འདི། །ཕྱག་རྒྱ་རྣལ་འབྱོར་ཆོ་གར་བརྗོད། །ཅི་ལྟར་ལུས་ནི་སེམས་ཀྱིས་དང་། ། སེམས་ཀྱང་ལུས་ཀྱིས་འགྲུབ་འགྱུར་བ། །དེ་བཞིན་ཕྱག་རྒྱ་རྣལ་འབྱོར་གྱིས། །རྣལ་འབྱོར་དམ་ཚིག་བསྒྲུབས་པས་སོ། །དེ་ལྟར་དམ་ཚིག་རྣལ་འབྱོར་དག །ཕན་ཚུན་དུ་ནི་བསྒྲུབ་པའི་ཕྱིར། །ཕན་ཚུན་ནི་ཡང་རྟག་བདག་ཉིད། །དེ་བཞིན་གཤེགས་པར་གྲུབ་ པར་འགྱུར། །ཞེས་བྱ་བ་ནི་ཤིན་ཏུ་མཆོག་ཏུ་གསང་བ་མཆོག་ཏུ་གྲུབ་པ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཅི་ལྟར་ཕྱག་རྒྱ་ཐམས་ཅད་དང་རྣལ་འབྱོར་དག་རྗེས་སུ་སྒྲུབ་པ་ཡིན་ཞེ་ན། ཕྱག་རྒྱ་སྐུ་ནི་བརྟན་པའི་ཕྱིར། །དེ་ཡང་བདེ་བས་བརྟན་པར་
- 242b
འགྱུར། །སྡུག་བསྔལ་གྱིས་ནི་གཡོ་བར་འགྱུར། །ཡང་ན་འཆི་བ་ཐོབ་པར་འགྱུར། །དེ་ནི་རྣལ་འབྱོར་སེམས་ལས་བྱུང་། །ཡིད་བདེ་བ་ཡིས་རབ་ཏུ་བསྒྲུབ། །ཡིད་མི་བདེ་བས་གཡོ་བའམ། །ཡང་ན་འགོག་པ་ཐོབ་པར་འགྱུར། །དེ་ཕྱིར་འབད་པ་ཐམས་ ཅད་ཀྱིས། །ཕྱག་རྒྱ་རྣལ་འབྱོར་རྗེས་གྲུབ་བྱེད། །དཀའ་ཐུབ་མེད་ཅིང་ངེས་པ་མེད། །བདེ་བ་དགའ་བས་བསྒྲུབ་པར་བྱ། །ཞེས་བྱ་བ་ཤིན་ཏུ་མཆོག་ཏུ་གསང་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་དམ་ཚིག་ཐམས་ཅད་ཀྱི་རྣལ་འབྱོར་རྗེས་སུ་ སྒྲུབ་པའི་བདེ་བ་གང་ཡིན་ཞེ་ན། འདོད་པ་ཀུན་ལ་ལོངས་སྤྱོད་ཅིང་། །ཅི་འདོད་པར་ནི་བསྟེན་པ་ཡིས། །རང་གི་ལྷ་ཡི་རྣལ་འབྱོར་གྱིས། །བདག་དང་གཞན་རྣམས་མཆོད་པར་བྱ། །ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བླ་ ན་མེད་པའི་ཐེག་པ་ཆེན་པོའི་ཡང་དག་པར་རྫོགས་པའི་བྱང་ཆུབ་ཐེག་པ་ཆེན་པོའི་ཡང་ཆེན་པོའི་རྣལ་འབྱོར་བཅོམ་ལྡན་འདས་རྡོ་རྗེ་སེམས་དཔའ་མཆོག་ཏུ་བདེ་བ་ཞེས་བྱ་བའོ། །དེ་ལ་དམ་ཚིག་ཐམས་ཅད་ཀྱི་རྣལ་འབྱོར་རྗེས་སུ་སྒྲུབ་པ་གང་ཡིན་ཞེ་ན། དཀའ་ཐུབ་ཉེས་པ་མི་ བཟད་པས། །སྡུག་བསྔལ་ལྡན་པས་མྱུར་དུ་བསྐམ། །སྡུག་བསྔལ་གྱིས་ནི་སེམས་གཡེང་འགྱུར། །རྣལ་འབྱོར་ལ་ནི་སྦྱོར་བ་མིན། །དེ་ཕྱིར་ཅི་འདོད་ལ་སྤྱོད་པ། །ཀུན་ཟ་དེ་བཞིན་ཐམས་ཅད་བྱེད། །ཅི་འདོད་བྱ་བ་ལ་སྤྱོད་པ། །ཅི་འདོད་པར་ནི་སྤྱོད་པ་སྤྱོད། ། གང་དང་གང་དུ་འཆག་པ་དང་། །དགོད་པའམ་ནི་སྨྲ་བའམ། །གང་དང་དེ་རུ་ཇི་བཞིན་དེ། །དཀྱིལ་འཁོར་དུ་ནི་མ་ཞུགས་སམ། །སྒྲིབ་པ་རྣམས་དང་ལྡན་པའམ། །རང་གི་ལྷ་ཡི་རྣལ་འབྱོར་བདག །ཚིག་གིས་ཀྱང་ནི་དེ་བཞིན་འགྱུར། །དེ་ཉིད་རྣལ་འབྱོར་འདི་ ཡིས་ནི། །ཐམས་ཅད་ཉིད་ནི་བསྒྲུབ་པར་བྱ། །ངན་སྤྱོད་སྡིག་པ་ཐམས་ཅད་ཀྱིས། །རྣམ་པ་ཀུན་དུ་གནོད་མི་འགྱུར། །འདོད་པ་ཆེན་པོ་ཀུན་བདག་ཉིད། །དབང་ཕྱུག་དམ་པ་འགྲུབ་པར་འགྱུར། །ཐམས་ཅད་རྡོ་རྗེ་འཛིན་རྒྱལ་པོ། །ཀུན་མཆོག་དབང་ཕྱུག་དམ་
- 243a
པའོ། །སངས་རྒྱས་བྱང་ཆུབ་སེམས་དཔའ་ཉིད། །རྣལ་འབྱོར་འདི་ཡིས་རྙེད་སླ་ན། །དངོས་གྲུབ་རྣམས་དང་ལས་མཆོག་གི། །ཚོགས་རྣམས་གཞན་ལྟ་སྨོས་ཅི་དགོས། །དོན་ཡོད་མཆོག་ཏུ་གྲུབ་པ་དང་། །ཕྱག་རྒྱ་ཐམས་ཅད་རྗེས་གྲུབ་ བྱེད། །དཔལ་ལྡན་སྡུག་བསྔལ་ཀུན་འཕྲོག་པའི། །རྣལ་འབྱོར་འདི་ནི་མི་འགྱུར་མཆོག །ཅེས་བྱ་བ་མཆོག་ཏུ་ཡིད་བདེ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་རྣལ་འབྱོར་ཐམས་ཅད་བཅིང་བ་ཅི་ལྟར་ཡིན་ཞེ་ན། བསམ་པ་མེད་ཅིང་ཐམས་ ཅད་སྨྲ། །དེ་བཞིན་ཐམས་ཅད་བསམས་ནས་ཀྱང་། །ཡེ་ཤེས་ཙམ་ལ་སྙོམས་འཇུག་པ། །རང་བཞིན་ཉིད་དུ་སྙོམས་པར་ཞུགས། །དེ་ལ་ཅི་ལྟར་རྣལ་འབྱོར་ཐམས་ཅད་བཅིང་བ་དང་ལུང་བསྟན་པ་ཡིན་ཞེ་ན། རང་གི་ལྷ་ཡི་སྦྱོར་བ་ཡིས། །དངོས་གྲུབ་ཐམས་ ཅད་རབ་སྦྱོར་བས། །ཡེ་ཤེས་ཙམ་ལ་སྦྱོར་བ་འདིར། །རྣལ་འབྱོར་ཞེས་ནི་བརྗོད་པ་ཡིན། །ཞེས་བྱ་བ་ནི་ཕྱག་རྒྱ་ཐམས་ཅད་ཀྱི་རྣལ་འབྱོར་གྱི་ཆོ་ག་མཆོག་ཏུ་ཤིན་ཏུ་གསང་བ་ཞེས་བྱ་བའོ། །དེ་ནས་བཅོམ་ལྡན་འདས་ཀྱིས་ཐམས་ཅད་རྣལ་འབྱོར་དང་རྣལ་འབྱོར་ ཆེན་པོ་དང་ཤིན་ཏུ་རྣལ་འབྱོར་བཅིང་བ་དང་ལུང་བསྟན་པ་གསུངས་ཏེ། རྡོ་རྗེ་སེམས་དཔའ་བདག་སྦྱོར་བས། །མཆོད་པ་ཀུན་གྱི་རྗེས་སྦྱོར་བ། །རྣལ་འབྱོར་ཐམས་ཅད་རབ་སྦྱོར་འདི། །རྣལ་འབྱོར་ཞེས་ནི་བརྗོད་པར་བྱ། །དེ་ལ་འདི་ལྟར་བརྗོད་བྱ་སྟེ། །དེ་ཉིད་ ཆེན་པོ་འདི་གྲུབ་སྟེ། །མཆོག་ཏུ་མཆོག་གི་བདག་ཉིད་ནི། །ཤིན་ཏུ་མཆོག་ཏུ་གསང་བ་སྟེ། །སོ་སོའི་སྐྱེ་བོ་ལ་བརྗོད་མིན། །རྡོ་རྗེ་སློབ་དཔོན་སློབ་མ་མཆོག །དེ་ཉིད་དད་པའི་རྗེས་འབྲང་ལ། །ཐམས་ཅད་རྣལ་འབྱོར་ཆོ་ག་སྦྱོར། །གཞན་རྣམས་ལ་ནི་ རིམས་ཀྱིས་སོ། །འདི་ལ་སྒྲུབ་མེད་ཅུང་ཟད་མེད། །དངོས་གྲུབ་ལས་དང་བདེ་བ་དང་། །ཐམས་ཅད་རྣལ་འབྱོར་རྗེས་བསྒྲུབས་པས། །མི་འགྱུར་ཐམས་ཅད་སྒྲུབ་པར་བྱེད། །རྣལ་འབྱོར་ཆོ་ག་གསལ་བ་འདི། །གཅིག་པུའང་གང་ལ་ཡོད་གྱུར་ན། །གཞན་གྱིས་
- 243b
མི་ཐུབ་མི་སོད་ཅིང་། །བདུད་ལ་སོགས་པས་ནོན་མི་འགྱུར། །དེ་ལ་རྒྱལ་པོ་རྡོ་རྗེ་འཛིན། །རྡོ་རྗེ་སེམས་དཔའ་དེ་བཞིན་གཤེགས། །ཀུན་མཆོག་དངོས་གྲུབ་ཆེན་པོ་ཡི། །རྣལ་འབྱོར་དབང་ཕྱུག་རབ་གྲུབ་འགྱུར། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་ སོ། །དཔལ་མཆོག་དང་པོ་ལས་ཤིན་ཏུ་གསང་བའི་རྣལ་འབྱོར་ཐམས་ཅད་ཀྱི་ཆོ་ག་མཆོག་ཏུ་གསང་བའོ།། །།དེ་ནས་རྟོག་པ་ཐམས་ཅད་དོན་ཡོད་ཅིང་ཐོགས་པ་མེད་པ་མཆོག་ཏུ་མཁས་ཤིང་ཕྲ་ལ་རྒྱ་ཆེ་ཞིང་ཟབ་པ་བསམ་གྱིས་མི་ཁྱབ་ཅིང་ཤིན་ཏུ་ཚད་མེད་པ་མ་ལུས་ ཤིང་ལུས་པ་མེད་པའི་མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པ་མཆོག་ཏུ་གྲུབ་པའི་ཕྱག་རྒྱའི་རྒྱུད་བཤད་པར་བྱའོ། །ཞེས་བྱ་བ་ཕྱག་རྒྱ་ཐམས་ཅད་ཀྱི་ཡེ་ཤེས་ཀྱི་རྒྱུད་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །གཡོན་ པའི་པང་པར་བཀོད་པ་ཡི། །ཞབས་ཀྱི་པདྨ་ཅི་བདེ་བར། །སེམས་དཔའི་སྐྱིལ་མོ་ཀྲུང་བཅིངས་ཏེ། །རང་ཉིད་ལུས་ནི་དྲང་པོར་འཛིན། །རྡོ་རྗེ་གསོར་བས་ཀུན་ལས་རྒྱལ། །མཆོག་གི་དངོས་གྲུབ་ཀུན་གྱི་ཕྱིར། །སྐུ་གསུང་ཐུགས་ཀྱི་རྡོ་རྗེ་ཡིས། །རྡོ་རྗེ་སེམས་ དཔའ་ཉིད་དུ་འགྱུར། །འདིས་ནི་རྡོ་རྗེ་སེམས་དཔའ་འམ། །སངས་རྒྱས་ཉིད་ནི་གཟི་ཅན་ཉིད། །དངོས་གྲུབ་ཀུན་གྱི་དབང་ཕྱུག་ཡིན། །ཚེ་འདི་ཉིད་ལ་འགྲུབ་པར་འགྱུར། །ཞེས་བྱ་བ་ཐམས་ཅད་ཀྱི་བདག་ཉིད་བརྟན་པའི་བཅོམ་ལྡན་འདས་རྡོ་རྗེ་སེམས་དཔས་གསུངས་ སོ། །དཀྱིལ་འཁོར་དུ་ནི་མ་ཞུགས་ཀྱང་། །ཕྱག་རྒྱ་ཆེན་པོ་ཡོངས་བཟུང་བར། །བདེ་བར་གཤེགས་པ་རྣམས་ཀྱིས་ཀྱང་། །ཕྱག་རྒྱས་མཆོད་ཅིང་བཀུར་བར་འགྱུར། །གང་གིས་འདི་མཐོང་ཕྱག་བྱེད་དང་། །བསྟོད་པ་དང་ནི་མཆོད་པར་བྱེད། །སྟོན་པ་མཐོང་ དང་ཕྱག་བྱེད་དང་། །དེ་ཡིས་བདག་པོ་མཆོད་པར་འགྱུར། །དངོས་གྲུབ་ཀུན་གྱི་ཆགས་ཆེན་པོའི། །བདེ་བ་ཕུན་ཚོགས་དབང་ཕྱུག་ཆེ། །ཕྱག་རྒྱ་ཆེན་པོས་གྲུབ་འགྱུར་ཏེ། །རྡོ་རྗེ་སེམས་དཔའ་གཉིས་པ་འདྲ། །ལྷ་ལ་སོགས་པའི་དངོས་གྲུབ་ཀུན། །ལས་ཀུན་
- 244a
གྱིས་ནི་བདེ་བ་ཡང་། །ཕྱག་རྒྱ་ཆེན་པོའི་བྱིན་རླབས་ཀྱིས། །ཁྱད་པར་དུ་ནི་རབ་ཏུ་འཇུག །དེ་ཡིས་མི་འགྲུབ་གང་ཡང་མེད། །དངོས་གྲུབ་ལས་དང་དེ་བཞིན་བདེ། །ཕྱག་རྒྱ་ཆེན་པོའི་བྱིན་རླབས་པས། །བསྒྲུབས་པའི་སྟོབས་ཀྱིས་མཆོག་ཀུན་ འབྱུང་། །དེ་ནས་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ལ་སོགས་པའི་སེམས་དཔའ་ཆེན་པོ་ཀུན་གྱི་དཀྱིལ་འཁོར་ཆེན་པོ་ཐམས་ཅད་ཀྱི་དམ་ཚིག་དང་ཆོས་དང་ལས་དང་། གདོན་མི་ཟ་བར་དགུག་པ་དང་གཟུག་པ་དང་འབེབས་པ་དང་རྗེས་སུ་ཆགས་པ་དང་དབང་དུ་བྱེད་ པ་དང་བསྒྲུབ་པ་ཐམས་ཅད་མཆོག་གི་སྒྲུབ་པ་ཐམས་ཅད་ཀྱི་དམ་ཚིག་ཆེན་པོའི་ཕྱག་རྒྱ་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་ཅེས་བྱ་བའོ། །དེ་བཅིང་བ་ནི་འདི་ཡིན་ཏེ། །སོར་མོ་ཐམས་ཅད་མཉམ་སྦྱར་བས། །རྡོ་རྗེ་ཐལ་མོ་ཞེས་བརྗོད་དོ། །ཀུན་མཆོག་ནང་དུ་བསྡམས་ པ་ཡིས། །རྡོ་རྗེ་བསྡམས་པ་བཤད་པ་ཡིན། །རྡོ་རྗེ་བསྡམས་པའི་ནང་དུ་ནི། །མཛུབ་མོ་མཐེ་བོ་ཡང་དག་སྦྱར། །གཡས་པའི་མཐེ་བོང་རྟགས་ཀྱིས་ནི། །རྩེ་མོ་བཀུག་ནས་བཙིར་བར་བྱ། །མདའ་ལྔ་བསྡུས་པ་བཅིངས་ནས་ནི། །དབུས་མ་བཅིངས་པའི་ནང་དུ་ གནས། །མཐེ་བོང་མཐེའུ་ཆུང་རྡོ་རྗེར་བསྡམས། །དེ་ཡི་དང་པོའི་རྡོ་རྗེ་མཆོག །རྡོ་རྗེ་བསྡམས་པ་དེ་བཅིངས་ནས། །དབུས་མའི་རྡོ་རྗེ་ལྕགས་ཀྱུ་གཉིས། །དགུག་པའི་ཚུལ་ནི་དེ་ཉིད་ཀྱིས། །རང་གི་སྙིང་ཀར་ལྕགས་ཀྱུས་བརྡེག །ལྕགས་ཀྱུའི་རྒྱལ་པོ་འདི་ཡིས་ ནི། །རྡོ་རྗེ་སེམས་དཔའ་རྒྱལ་པོ་ཆེ། །དགའ་བའི་རྡོ་རྗེ་ལྕགས་ཀྱུས་དགུག །སླར་ཡང་ཉེ་བའི་སྙིང་པོ་སྒྲུབ། །སྙིང་ཀར་བརྡེག་པ་དྲག་པོ་ནི། །རྗེས་སུ་ཆགས་པའི་མེ་ཡིས་གདུངས། །སྙིང་པོ་འཕྲོག་པས་དབང་གྱུར་དགྱེས། །མྱུར་དུ་བྱོན་ནས་གྲུབ་པར་འགྱུར། ། ཞེས་བཅོམ་ལྡན་འདས་ཆགས་པ་ཆེན་པོ་དང་བདེ་བ་ཆེན་པོ་རྡོ་རྗེ་ཆེན་པོ་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །དེ་བཞིན་དུ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའི་རྡོ་རྗེ་ལ་སོགས་པ་དང་བརྟན་པ་དང་གཡོ་བའི་དངོས་པོ་ཐམས་ཅད་
- 244b
རྒྱས་བཏབ་པས་འོངས་ཏེ་མྱུར་དུ་འགྲུབ་པར་འགྱུར་རོ། །གལ་ཏེ་མ་འོངས་ན་འཇིག་པར་འགྱུར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བའི་སྙིང་པོ་མཆོག་གི་ཕྱག་རྒྱའོ། །རྡོ་རྗེ་མཆོད་ཡོན་རྡོ་རྗེ་ཐལ་མོ་ཤིན་ཏུ་རབ་ཏུ་བརྐྱང་བའི་ཐལ་མོའོ། །དེ་ནས་དང་པོའི་ རྡོ་རྗེའི་ཕྱག་རྒྱ་དབུས་མའི་རྡོ་རྗེ་བཟུང་བའི་མེ་ཏོག་གི་ལྕུག་མས་བཟླ་བར་བྱའོ། །རྡོ་རྗེའི་ཆུ་དང་རྡོ་རྗེ་ཁུ་ཚུར་གྱིས་དབང་བསྐུར་ན། ཐམས་ཅད་ཀྱི་བདག་པོ་ཉིད་དང་ཚེ་འཕེལ་བ་ལ་སོགས་པའི་དངོས་གྲུབ་ཐམས་ཅད་ལ་དགོས་པ་ཡིན་པས་བཏུང་བ་བྱས་ན་སྡུག་བསྔལ་ཐམས་ཅད་ འཇོམས་པ་ཡིན་ནོ། །དེ་ནས་དང་པོའི་དཀྱིལ་འཁོར་དུ་འཇུག་པའི་ཕྱག་རྒྱ་ནི། བ་དན་གསུམ་དང་ཁ་ཊྭཱྃ་ག། །བཅིངས་ན་ཅི་ནུས་པར་ནི་དགའ། །རྡོ་རྗེ་གར་བསྐོར་དགྲོལ་བ་ཡི། །ཡོངས་སུ་བསྐོར་བར་འཛིན་པ་ཆེ། །ཀ་པུ་ཏ་ཁའི་སྦྱོར་བ་ནི། །སྤྱི་བོར་བཞག་སྟེ་ ཕབ་ནས་ཀྱང་། །སྒེག་བཅས་མཛུབ་མོ་མཐེའུ་ཆུང་སོགས། །བཀྲོལ་ནས་རྡོ་རྗེ་ཅན་ལ་དབུལ། །འདི་ཡིས་དཀྱིལ་འཁོར་མ་ཞུགས་ཀྱང་། །རྡོ་རྗེ་སློབ་དཔོན་ཉིད་ཐོབ་འགྱུར། །རང་ཉིད་ཞུགས་པ་ཙམ་གྱིས་ནི། །མཆོད་པས་དོན་ཡོད་གྲུབ་ཕྱིར་རོ། །ཡོངས་ སུ་རྫོགས་པའམ་མ་ཚང་བ། །ཡང་ན་སླར་ཡང་ཅི་སྙེད་པའི། །མེ་ཏོག་ལ་སོགས་མཆོད་མཚན་ནས། །ཐུན་མོང་དངོས་གྲུབ་ཀུན་སྩོལ་བའི། །བ་དན་གསུམ་མཆོག་ཁ་ཊྭཱྃ་ག །སྒེག་བཅས་མཐའ་མ་ལ་སོགས་བཀྲོལ། །གློག་འགྱུ་མཆོག་ཏུ་བསྐོར་བ་ ཡིས། །རྡོ་རྗེ་གར་ཞེས་དེ་བཤད་དོ། །སྒེག་མོ་དགའ་བའི་རྡོ་རྗེ་ནི། །རྡོ་རྗེ་གར་གྱི་མཆོད་པས་མཆོད། །སྒེག་པ་དང་བཅས་པའི་འཛུམ་པའི་མིག་གིས་ཕྱག་འཚལ་བས་རྡོ་རྗེ་སེམས་དཔའ་དང་དེ་བཞིན་གཤེགས་པ་ཐམས་ཅད་ཀྱང་རྗེས་སུ་ཆགས་པར་བྱས་ ནས་ཕྱག་བྱེད་དུ་གཞུག་པའོ། །རྡོ་རྗེ་ཐལ་མོ་བསྐོར་བས་མ་ལུས་པར་བྱས་ནས་ཐམས་ཅད་ལ་བསྟོད་པའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་ལྕགས་ཀྱུ་མཆོག་ནི་རྡོ་རྗེ་བསྡམས་པའི་མཐེ་བོ་བསྟན་པའི་སྐྱིལ་མོ་ཀྲུང་མཛུབ་མོ་གཉིས་བཀུག་པའི་ལུས་ཅན་
- 245a
དབུས་མ་མཉམ་པའི་ཁ་འབུས་པའི་མཆོག་གི་ཡན་ལག་སྤྱི་བོར་བཞག་ལ་གཡས་ལོགས་སུ་ཐམས་ཅད་ལ་ཅོད་པན་བཅིངས་ལ་མདུན་ལོགས་རྡོ་རྗེ་ཁུ་ཚུར་གཉིས་ཀྱིས་མདུད་པའི་ཚུལ་བྱ་སྟེ། །ཕྲེང་བ་བཅིངས་པ་བྱས་ལ་སྒེག་པ་དང་བཅས་པས་མཐེའུ་ ཆུང་ལ་སོགས་པ་བཀྲོལ་ཏེ་ལོགས་གཉིས་ལ་དར་དཔྱངས་འཆིང་བའི་ཚུལ་དུ་བྱས་ལ་མཉམ་པའི་ཐལ་མོས་རྒྱས་བཏབ་པས། རྡོ་རྗེ་སེམས་དཔའི་དབང་བསྐུར་བར་འགྱུར་བ་ཡིན་ནོ། །དེ་ནས་བདེ་བ་ཆེན་པོའི་རྡོ་རྗེ་བདུད་རྩིའི་ཆུས་དབང་བསྐུར་བར་བྱས་ཏེ། ཐམས་ཅད་ ཀྱི་རྡོ་རྗེ་སློབ་དཔོན་ཉིད་དང་རྡོ་རྗེ་འཆང་ཆེན་པོ་ཉིད་དུ་འགྱུར་བ་ཡིན་ནོ། །རྡོ་རྗེའི་ཁུ་ཚུར་གྱིས་རྡོ་རྗེ་རྩེ་ལྔ་པ་རྡོ་རྗེའི་འོད་ཟེར་འབར་བའི་རྩེ་མོ་ཅན་ཁ་དོག་དམར་པོ་སྦྱིན་པར་བྱའོ། །སློབ་མས་ཀྱང་སློབ་དཔོན་ལ་ཡོན་ཕུལ་ལ་དེ་ནས་མེ་ཏོག་ལ་སོགས་པའི་དབང་བསྐུར་བ་ཐམས་ ཅད་ཐམས་ཅད་ཀྱི་སློབ་དཔོན་ལས་རྡོ་རྗེ་ཐལ་མོ་བསྐོར་བའི་ཕྱག་འཚལ་བའི་ཕྱག་རྒྱས་བླང་བར་བྱ་སྟེ་དེ་ལྟར་ན་དཀྱིལ་འཁོར་ཐམས་ཅད་ཀྱི་ཆོ་གའོ།། །།དེ་ནས་དངོས་གྲུབ་ཐམས་ཅད་ཀྱི་དབང་ཕྱུག་གྲུབ་པའི་རྡོ་རྗེ་འཆང་ཆེན་པོ་རྒྱལ་པོ་སྒྲུབ་པའི་ཕྱག་རྒྱའི་རྒྱུད་ནི། བདེ་ བ་ཆེན་པོའི་གསང་བ་ཆེན་པོའི་ལྕགས་ཀྱུ་རང་གི་སྙིང་པོའི་སྔགས་ལན་ཅིག་བརྗོད་པས་རྡོ་རྗེ་སེམས་དཔའ་སྤྱན་དྲང་བའོ། །སེམས་དཔའི་སྐྱིལ་མོ་ཀྲུང་དང་ལྡན་པས། རྡོ་རྗེ་གར་གྱི་མཆོད་པ་དབུལ་བས་གློག་འགྱུ་བའི་གར་དང་རྡོ་རྗེ་ཁུ་ཚུར་ཡོངས་སུ་བཟུང་བས་བསྙེམས་པ་ དང་བཅས་པའི་རྡོ་རྗེ་མཚོན་ཆ་མ་ལ་སོགས་པ་བསྒྲེང་བར་བྱས་ལ་སྒེག་མོ་དགའ་བའི་རྡོ་རྗེ་མས་ཕྱག་བྱའོ། །རྡོ་རྗེ་གླུས་ནི་གླུ་ལེན་ཅིང་། །བཟླས་པའི་དོན་ནི་ཅི་བདེ་བར། །རྡོ་རྗེ་གར་གྱི་མཆོད་པ་ཡིས། །ཡང་དག་མཆོད་ནས་མྱུར་དུ་གྲུབ། །དེ་ལས་དང་པོའི་རྡོ་རྗེའི་ གསང་བའི་གླུ་འདི་དང་པོ་ལ་སོགས་པ་རྣམས་ཀྱིས་བླང་བར་བྱ་སྟེ། ཐམས་ཅད་བདེ་བ་དམ་པ་རྗེས་སུ་ཆགས་པའི་ཐུགས། །རྡོ་རྗེ་སེམས་དཔའ་ཁྱེད་ནི་རབ་ཏུ་དགའ་བ་ཡིན། །བདེ་བ་ཆེན་པོ་བརྟན་ཞིང་འཐོར་བར་བདག་གྱུར་ཅིག །སོ་སོར་རྟོགས་ཤིང་མྱུར་དུ་བསྒྲུབས་
- 245b
ཤིང་ཕྱག་འཚལ་ལོ། །རྡོ་རྗེའི་གླུ་ནི་འདི་ཉིད་ཀྱིས། །བདེ་ཆེན་ལ་ནི་ལན་ཅིག་བསྟོད། །རྗེས་སུ་ཆགས་ནས་ཤིན་ཏུ་དགྱེས། །བརྟན་པར་གྱུར་ནས་སྒྲུབ་པར་འགྱུར། །ཕྱག་རྒྱ་ཆེན་པོ་ལན་ཅིག་ཏུ་སྙིང་པོས་བདག་ཉིད་ལ་བྱིན་གྱིས་བརླབ་པར་བྱའོ། །ཤིན་ཏུ་གཡོ་ མེད་ལྕེ་རྩེ་དང་། །སོ་དང་མཆུ་གཉིས་ཡང་དག་ལྡན། །རྡོ་རྗེ་ངག་ནི་དབྱངས་དང་བྲལ། །རིགས་ཀུན་རབ་ཏུ་གྲུབ་པར་བྱེད། །རི་བི་ཏ་སོགས་ཧཱུྃ་གི་གླུ། །རྒྱན་ལྡན་ཅི་འདོད་ཅི་ནུས་པར། །དྲུག་ལྡན་ལ་སོགས་སྙན་པའི་གླུ། །ཅི་འདོད་གྲ་མ་རཱ་གའི་གླུ། །རབ་ དགའ་རྡོ་རྗེ་གར་གྱིས་ནི། །གན་དར་བ་ཡི་གླུ་མཆོག་བླང་། །ངག་འདི་ནི་མཆོག་ཏུ་གྲུབ་པ་ཡིན་ཏེ། བཟླས་པ་ཐམས་ཅད་ལ་དགོས་པ་ཅི་སྲིད་མངོན་པར་འདོད་པའི་བཟླས་པའོ། །བཟླས་པའི་དོན་ནི་ཉེ་བའི་སྙིང་པོ་ཤེས་པ་ཡིན་ཏེ། རྡོ་རྗེ་སེམས་དཔའ་སྒྲུབ་པའོ། ། ཕྱག་རྒྱ་ཆེན་པོས་རང་ལ་བྱིན་གྱིས་བརླབས་ནས། རྡོ་རྗེའི་ལྟ་བས་དེ་བཞིན་དུ་བལྟ་ཞིང་། རྡོ་རྗེ་བསྙེམས་པས་འཛིན་ཅིང་ཡི་གེ་ཧཱུྃ་དང་གླུའི་བཟླས་པས་བཅོམ་ལྡན་འདས་བསྒྲུབ་པར་བྱའོ། །ལན་ཅིག་བསྒྲུབ་པ་ནི་ཇི་ལྟ་བ་བཞིན་མངོན་པར་འདོད་པའི་བཟླས་པས་སོ། །དེ་ ནས་དེའི་འོག་ཏུ་ཇི་ལྟར་མངོན་པར་བརྩོན་པ་དང་ཇི་ལྟར་འདོད་པ་དང་ཇི་ལྟར་མངོན་པར་འདོད་པ་དང་ཇི་ལྟར་བྱིན་གྱིས་བརླབས་ནས་ཡི་གེ་ཧཱུྃ་གི་གླུའི་བཟླས་པ་དགའ་བ་ཆེན་པོ་རྡོ་རྗེ་དོན་ཡོད་པའི་དགའ་བའི་ཤུགས་ཀྱིས་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་ཅི་ ལྟ་བ་བཞིན་དུ་འདོད་པ་དང་ཇི་ལྟར་དགའ་བ་བསྒྲུབ་པའོ། །དེ་ནས་ཕྱག་རྒྱ་ཆེན་པོ་ནི། །སྐུ་གསུང་ཐུགས་ཀྱི་རྡོ་རྗེ་ཡིས། །ཇི་བཞིན་གཟུགས་ཀྱི་རྗེས་འབྲང་བས། །མཚན་མའི་ཕྱག་རྒྱ་ཡང་དག་ལྡན། །སེམས་དཔའ་ཆེན་པོ་རང་ཉིད་འགྱུར། །དེ་ནས་དམ་ ཚིག་གི་ཕྱག་རྒྱ་ནི་བདེ་བ་ཆེན་པོའི་རྡོ་རྗེ་བཤད་པའོ། །འདི་ལས་རྡོ་རྗེ་མདའ་ལ་སོགས་པ་འབྱུང་བ་ཡིན་ནོ། །འདི་ལྟ་སྟེ་ཕྱི་རོལ་དུ་ཁ་བལྟས་པའི་མཛུབ་མོ་གཉིས་བཀུག་པ་ཙམ་ནི་རྡོ་རྗེའི་མདའོ། །མཐེ་བོ་ཡོངས་སུ་བཅིང་བ་ནི་རྡོ་རྗེ་ཀི་ལི་ཀི་ལའོ། །མཐེ་བོ་གཉིས་ཁ་
- 246a
ཕྱེ་ནས་མཛུབ་མོ་གཉིས་ཀྱི་རྩེ་མོས་དབུས་མ་འདྲེས་པའི་སྲིན་ལག་དང་མཐེའུ་ཆུང་མཉམ་པའི་ཁ་ཕྱེ་བ་ནི་རྡོ་རྗེ་ཆུ་སྲིན་ནོ། །བརླ་གཉིས་ལ་བསྐོར་ཞིང་གནས་པ་ནི་རྡོ་རྗེ་འདོད་པའི་དབང་ཕྱུག་མའོ། །རྡོ་རྗེ་ཐལ་མོ་རང་གི་སྙིང་གར་བསྐོར་བས་སྒེག་པ་དང་བཅས་པའི་མིག་ གིས་བལྟ་ཞིང་མགོ་བོས་ཕྱག་བྱས་ལ་སྤྱི་བོར་བཞག་ལ་ཕབ་སྟེ་གྱེན་དུ་གཏོར་བ་དང་འོག་ཏུ་བླུགས་པ་དང་མཐེ་བོང་སྦྱར་ནས་བསྐོར་བ་དང་རབ་ཏུ་བརྐྱང་ཞིང་བྱུག་པ་ནི་མེ་ཏོག་དང་སྤོས་དང་མར་མེ་དང་དྲི་དབུལ་བའི་རྡོ་རྗེ་མཆོད་པ་རྣམས་སུ་བརྗོད་པ་ཡིན་ནོ། །ཕྱིའི་མཚམས་རྣམས་སུ་ རྡོ་རྗེ་ཐལ་མོ་སྙིང་གར་བསྐོར་བས་སྒེག་པའོ། །ཁ་ལ་ཡོངས་སུ་བསྐོར་ནས་སྤྱི་བོར་འཇོག་པའོ། །གཡོན་པའི་མཛུབ་མོ་བཀུག་པའི་གཡོན་པ་གཡས་པས་བཀུག་པས། རྡོ་རྗེ་པི་བང་བརྡུང་ཞིང་རྡོ་རྗེ་གླུའི་མངོན་པར་བསྟོད་པའོ། །རྡོ་རྗེ་ཁུ་ཚུར་གཉིས་ཀྱིས་གར་བྱས་ ལ་སྤྱི་བོར་རྡོ་རྗེ་ཐལ་མོ་བཅིང་བའོ། །རྡོ་རྗེ་བསྡམས་པ་ནང་དུ་བཅིངས་པའི་གཡས་པའི་མཛུབ་མོ་ལྕགས་ཀྱུའོ། །མཐེ་བོང་གཉིས་ཀྱིས་མདུད་པའོ། །མཛུབ་མོ་དང་མཐེ་བོང་རྣམས་ཀྱི་མདུད་པའོ། །གཉིས་ཀྱི་ནང་དུ་མཐེ་བོང་བཅིངས་པའོ། །དེ་ནས་གསང་ བའི་དམ་ཚིག་རྣམས་ནི་བདེ་བ་ཆེན་པོ་རྡོ་རྗེ་དམ་ཚིག་གི་གསང་བའི་ལྕགས་ཀྱུ་སྟེ་དེ་ལས་བྱུང་བ་ནི། མཐེ་བ་མཛུབ་རྩེ་སྦྱར་དབུས་མའི་རྩེ། །མིག་འབྲས་ལྟར་བྱས་འཛིན་པའོ། །དབུས་མའི་རྡོ་རྗེའི་འོག་ཏུ་ནི། །མཐེ་བོང་གིས་མནན་བཙིར་བར་བྱ། །རྡོ་རྗེ་འདྲེན་པ་དང་ འདྲ་བ། །སྲིན་ལག་མཐེའུ་ཆུང་ཁ་ཕྱེ་བ། །བསྐོར་ནས་པུས་མོར་བཞག་པ་སྟེ། །གཞན་རྣམས་ཐམས་ཅད་ཇི་བཞིན་བཤད། །དམ་ཚིག་གི་རྡོ་རྗེ་འབེབས་པ་མཛུབ་མོ་གཉིས་བཀུག་པ་གཉིས་སུ་བྱས་ན་རྡོ་རྗེ་ཁུ་ཚུར་རོ། །དེ་ནས་ལས་དང་དམ་ཚིག་གི་ཕྱག་རྒྱ་ ནི། རྡོ་རྗེ་དང་བཅས་པའི་ཁུ་ཚུར་གཉིས་ཀྱིས་སོ། །འདི་ལྟ་སྟེ་གཡོན་པ་བསྙེམས་པས་གཡས་པ་སྟོད་པའི་ཚུལ་གྱིས་སྙིང་གར་གཟུང་བ་སྟེ། རྡོ་རྗེ་བསྙེམས་པའོ། །སྟོད་པ་དང་བཅས་པའི་སྙིང་གར་འཛིན་པའོ། །རྡོ་རྗེ་སྟོད་པའི་ཚུལ་ནི་ཀི་ལི་ཀི་ལའོ། །
- 246b
རྒྱལ་མཚན་སྒྲེང་བའོ། །བསྙེམས་པ་གཉིས་སྟོད་པ་ནི་འདོད་པ་ཐམས་ཅད་ཀྱི་རྡོ་རྗེ་དབང་ཕྱུག་མའོ། །མཚམས་རྣམས་སུ་ནི་རྡོ་རྗེ་གར་མ་བཤད་པའོ། །སྒེག་མོ་ལ་སོགས་པ་ཡང་དེ་བཞིན་ནོ། །རྡོ་རྗེ་སྒོ་བ་རྣམས་ཀྱི་ནི་གཡོན་པའི་མདུད་པ་ལག་པ་གཡས་པ་ སྟེང་དུ་བྱུང་བས་རྡོ་རྗེ་བཀའ་བསྒོ་བ་བྱེད་པའོ། །དེས་གཡས་པ་བསྟོད་པའོ། །མཛུབ་མོ་དང་མཐེ་བོང་མཁྲིག་མར་བཟུང་སྟེ་མདུད་དེ་བཙིར་རོ། །རང་གི་སྙིང་གར་དྲིལ་བུ་དཀྲོལ་བའི་ཚུལ་ལོ། །འདི་རྣམས་ཀྱིས་ཐམས་ཅད་དགུག་པ་དང་བཅིང་བ་དང་གཞུག་པ་ དང་། དོན་ཡོད་པར་བསྒྲུབ་པར་བྱའོ་ཞེས་བྱ་བ་ཡང་གསུངས་སོ། །ཇི་བཞིན་གྲུབ་མཆོག་མཚན་མ་རྣམས། །དངོས་གྲུབ་ཆེན་པོ་མྱུར་དུ་སྩོལ། །དང་པོའི་ཕྱག་རྒྱ་དགེ་འདི་དག །དཀྱིལ་འཁོར་མེད་པ་རྣམས་ཀྱང་འགྲུབ། །དེ་ནས་དངོས་གྲུབ་མེད་པ་སྒྲུབ་པའི་ ཕྱག་རྒྱ་ཆེན་པོ་བཅིང་བ་ནི། །དང་པོའི་རྡོ་རྗེ་ཕྱག་རྒྱ་བཞིའི་ཕྲེང་བའི་ཚུལ་དུ་བསྒྲུབ་པར་བྱའོ། །གཞུག་པ་དང་དགུག་པ་དང་བརྟན་པ་དང་ལས་རྣམས་ལྟ་བས་སོ། །རྟགས་དང་ལྟེ་བ་དང་སྙིང་ག་དང་དབང་བསྐུར་བ་དང་སྤྱི་བོར་གཞག་པར་བྱའོ། །དབུས་མའི་རྡོ་རྗེ་སྙིང་ག་ དང་རྟགས་དང་ཁ་དང་དབང་བསྐུར་བའི་གནས་སུ་བཞག་ནས་བཏུང་བར་བྱའོ། །མཛུབ་མོ་དང་དབུས་མ་དང་སྲིན་ལག་དང་མཐེའུ་ཆུང་གི་རྡོ་རྗེའོ། །དཔུང་པ་དང་སྙིང་ག་དང་ལྕེ་དང་སྤྱི་བོར་བསྟོད་པའོ། །ནམ་མཁར་བསྐྱེད་པ་དང་མཛུབ་མོ་དང་སྲིན་ལག་འབར་བ་དང་སྙིང་གར་ དགའ་བ་དང་རང་གི་ལུས་ལ་བསྐོར་བའོ། །ཐམས་ཅད་བསྐོར་ནས་དབང་པོ་ཀུན་ལ་གཞག་པར་བྱའོ། །དབུས་མའི་རྡོ་རྗེ་དབང་པོ་ཐམས་ཅད་ལ་རེག་པའོ། །རང་གི་ལས་བྱེད་པས་སོ། །དབང་བསྐུར་བར་བཞག་ནས་དེ་བཞིན་དུ་དངོས་གྲུབ་བྱེད་པའོ། །ས་ལ་བཞག་ ནས་བྱའོ། །ཐམས་ཅད་དུ་བསྐོར་ནས་ཡིད་ཀྱིས་སྤྲུལ་པར་བྱའོ། །འཛུམས་པ་མེད་པའི་ཁྲོ་ཞིང་འབར་ལ་གཡོ་བ་ནི་ལྟ་བས་བལྟ་བའོ། །བཟའ་བ་དང་བཏུང་བ་དང་རྐེད་པ་བསྐྱོད་པ་དང་སྤྱི་བོས་བཀའ་བསྒོ་བའོ། །ཐམས་ཅད་དུ་བསྐོར་ཞིང་ཐམས་ཅད་དུ་དྲན་པས་སོ། །མཐེའུ་
- 247a
ཆུང་དང་མཐེ་བོང་དང་དབུས་མའི་རྡོ་རྗེ་བཞི་སྙིང་གར་བྱའོ། །མཛུབ་མོ་གཉིས་ཀྱིས་ཡི་གེ་ཧཱུྃ་དང་བཅས་པས་དགུག་པར་བྱའོ། །དབུས་མའི་རྡོ་རྗེས་དཔྲལ་བར་འཕྲེད་ལ་མིག་བྱེད་པས་སོ། །རང་གི་སྙིང་གར་བཅིངས་ལ་གཡོ་བ་མེད་ཅིང་མ་བཙུམས་ པའི་ལྟ་བས་ས་འོག་ཏུ་བལྟ་ཞིང་ཧ་ཧཱུྃ་དྷྃ་ཞེས་བརྗོད་པར་བྱའོ། །གནོད་སྦྱིན་ལ་སོགས་པའི་གདོང་པ་བྲིས་ནས་རྡོ་རྗེས་དགུག་པའོ། །འོག་གི་ཕྱོགས་སུ་བཞག་ན་རྟག་པར་འགྱུར་རོ། །ཁའི་དབུས་སུ་བཞག་ན་རབ་ཏུ་ཞུགས་པར་འགྱུར་རོ། །ཕྱག་བྱས་ན་མཆོད་ པར་འགྱུར་རོ། །སྙིང་གས་གྲུབ་པར་འགྱུར་རོ། །ཅིག་ཆར་དུ་སོར་མོ་ཐམས་ཅད་དྲལ་བ་ནི་ཡིད་ཀྱི་ལས་སོ། །བཅིངས་ནས་ཛཿཧཱུྃ་བྃ་ཧོཿ། དབུས་མའི་ཕྱི་རོལ་དུ་བཅིངས་པས་སྤྱི་བོ་དང་སྙིང་ག་དང་ཁ་དང་ཕྱོགས་རྣམས་བསྐོར་བའོ། །སྙིང་གར་བཞག་ནས་རང་གི་ རྡོ་རྗེར་བསྒོམ་པའོ། །རང་ཉིད་བྱང་ཆུབ་སེམས་དཔའ་བསྒོམ་པའོ། །རང་ཉིད་དེ་བཞིན་གཤེགས་པ་རྗེས་སུ་དྲན་པའོ། །རང་ཉིད་རྡོ་རྗེ་འཆང་ཆེན་པོར་རྗེས་སུ་དྲན་པའོ། །དེ་ནས་ལས་ཀྱི་ཚོགས་རྣམས་བསྒྲུབ་པའི་ཕྱག་རྒྱའི་རྒྱུད་ནི། །རྡོ་རྗེ་གར་ལས་བྱུང་བའི་ ཕྱག་རྒྱ་རྡོ་རྗེ་འཆང་བདག་དང་དེ་བཞིན་གཤེགས་པ་ཐམས་ཅད་ཀྱིས་ཀྱང་དོན་ཡོད་ཅིང་ཐོགས་པ་མེད་པའོ། །རྡོ་རྗེ་སྐུ་མཆོག་གི་གཙུག་ཏོར་གྱི་ལས་ནི། རྡོ་རྗེ་བསྡམས་པ་བཙིར་བ་དང་དབུས་མའི་ནོར་བུ་དང་བསྐོར་བ་དང་སོར་མོ་ཐམས་ཅད་ཀྱི་རྡོ་རྗེ་དང་སོར་མོ་ལྷག་མའི་འོད་ ཟེར་གྱི་འཁོར་ལོའོ། །ཁྲོ་བོ་རྡོ་རྗེ་ཁུ་ཚུར་གཉིས་ཀྱིས་ཕྱོགས་ཀྱི་འཁོར་ལོ་བསྐོར་ཞིང་བསྐོར་བའོ། །ཁར་བསྐོར་བའོ། །སྙིང་གར་ཕབ་ཅིང་འབར་བར་བྱེད་པས་ཕྱོགས་ཐམས་ཅད་དུ་རྡོ་རྗེ་འབར་བའི་ར་བ་སྟེ་ཁྲོ་བོ་ཆེན་པོ་འབར་བའི་རྡོ་རྗེ་བདག་གིས་ཀྱང་འཇུག་པར་ནུས་སོ། ། དམ་ཚིག་བརྗོད་པར་བྱའོ། །བསྒྲུབ་པ་ལ་བརྩམ་མོ། །རྡོ་རྗེ་སེམས་དཔའི་རྡོ་རྗེ་ལྟ་བའི་འཕྲོག་པ་རྣམས་ཀྱིས་གསུམ་དང་བཞི་དང་ཕྱིར་ལྡོག་པ་དང་རྟག་ཏུ་འབྱུང་བ་དང་དཔག་ཏུ་མེད་པ་ནི་བསྐོར་ཞིང་བཙུམ་པ་མེད་པའི་མིག་གིས་རབ་ཏུ་ཞི་བའོ། །རྡོ་རྗེ་ཁུ་ཚུར་གཉིས་ཀྱིས་
- 247b
མཐེའུ་ཆུང་གི་ལྕགས་ཀྱུའི་མདུད་པ་དང་མཛུབ་མོ་གཉིས་མཉམ་པའི་ལས་ནི་སྙིང་གར་རབ་ཏུ་བཞག་པའོ། །བྱ་བ་པའོ། །མཛུབ་མོའི་རྩེ་མོས་གནན་པར་བྱའོ། །དགོད་པས་རབ་ཏུ་བཞིན་པའོ། །ཡོངས་སུ་བསྐོར་ནས་དེ་བཞིན་དུ་མཛོད་སྤུར་གཞག་པར་བྱའོ། །ཁ་ ཊྭཱྃ་ག་གཉིས་ཀྱིས་རྡོ་རྗེ་བཅིངས་པས་མཐེའུ་ཆུང་རྡོ་རྗེའི་ལེགས་པར་བྱེད་པའི་ཚུལ་གྱིས་ཉེ་བར་འཕེལ་བའོ། །བསྡུས་པའི་དོན་གྱི་ཚུལ་ལོ། །རྡོ་རྗེས་བཏེག་པའོ། །ཐལ་མོས་འཕྲོག་པའོ། །རྡོ་རྗེས་བརྡུང་བའོ། །རྡོ་རྗེ་བསྡམས་པའི་མཛུབ་མོ་གཉིས་བཀུག་ཅིང་ བསྙམས་ལ་ནང་དུ་བཞག་སྟེ་མཐེ་བོང་གཉིས་ཁ་ཕྱེ་བའི་མཆེ་བ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །དེས་མཐིལ་དཔྲལ་བར་བརྡབ་པའོ། །མཛུབ་མོའི་སེན་མོ་བྲུད་པའོ། །དབུས་མའི་རྡོ་རྗེ་བསྟན་པའོ། །བྱ་བས་ནས་མྱུར་དུ་ཕྱག་རྒྱ་བཀྲོལ་བའོ། །སོར་མོ་སྦྱར་ནས་རྡོ་རྗེ་ གཙུག་ཏོར་རོ། །བ་དན་གསུམ་པ་གཉིས་ཁ་གྱེན་དུ་ཁ་བལྟས་པ་དང་འོག་ཏུ་ཁ་ལྟ་བའི་མཛུབ་མོ་དང་དབུས་མའི་མདུད་པ་བྱས་ལ་མཛུབ་མོ་དང་དབུས་མ་དེ་དག་འདུས་པའོ། །རྡོ་རྗེ་ཧཱུྃ་མཛད་ཀྱི་ལས་སོ། །མདུད་པ་བཙིར་བའོ། །ཅིག་ཆར་དུ་ཕྱག་རྒྱ་བཀྲོལ་བའོ། །བཙིར་ ནས་དྲལ་བའོ། །དབུས་མས་བསྣུན་ཏེ་ནམ་མཁའ་ལས་ལྟུང་བའི་ཚུལ་ལོ། །སློང་བའི་ཚུལ་ཡང་ངོ་། །བ་དན་གསུམ་པ་གཉིས་མཉམ་པའི་མཐེའུ་ཆུང་རྩེ་མོའི་རྡོ་རྗེ་དབུས་མ་མདུད་པས་ཡོངས་སུ་བསྐོར་ལ་དབང་བསྐུར་བའི་གནས་སུ་མཛུབ་མོའི་རྩེ་མོ་བཞག་པའོ། །དབྱེ་ བ་ནི་ཡི་གེ་ཧཱུྃ་གིས་སོ། །གདོན་ལས་དགྲོལ་བ་ནི་ཡི་གེ་ཧཱུྃ་མུ་ཡིས་སོ། །འཆི་བ་སློང་བ་ནི་ཡི་གེ་ཨ་ཡིས་སོ། །ཚེ་འཕེལ་བ་ནི་ཡི་གེ་ཧཱུྃ་གི་གླུས་སོ། །ཤིན་ཏུ་བསྲུང་བ་ནི་ཡི་གེ་ཧྃ་གི་ཆོས་ཀྱི་ངག་གིས་སོ། །པདྨ་ཆེན་པོ་བཅིངས་ནས་ཅི་སྲིད་འདོད་པའི་བཟླས་པའམ། ཡང་ན་པདྨའི་ཁུ་ཚུར་གཡོན་པ་བསྙེམས་པར་མར་དང་ཏིལ་མར་དང་ཏིལ་དང་འབྲས་དང་ཁམས་ཀྱི་ཕྱེ་མ་སྦྱིན་སྲེག་མཆོག་ཏུ་གྲུབ་པ་སྟེ། ཨོྃ་ནི་བར་ཎ་སརྦ་དྷརྨ་ཏཱ་བཛྲ་ཧ་ནི་ཧྃ། ཨོྃ་བི་ར་ཛོ་བི་ག་ཏ། སརྦ་དྷ་རྨ་བཛྲ་ཧ་རི་ཎི་ཧྃ། ཨོྃ་སྃ་ནོ་པས་རྦ་དྷརྨ་པྲ་ཏི་བི་དྷ་བཛྲ་ཧ་རི་ཎི་ཧྃ།
- 248a
ཨོྃ་ནི་རི་ཏི་མི་ཏ་སརྦ་དྷ་རྨ་ཏཱ་བཛྲ་ཧ་ར་ཎི་ཧྃ། ཨོྃ་སྭ་བྷཱ་བ་བྷ་ས་ར་སརྦ་དྷ་རྨ་ཧ་རི་ཎི་ཧྃ། ཀ་ཏ་ཀ་གཉིས་ཀྱི་རྡོ་རྗེ་བསྡམས་པ་ལེགས་པར་བྱེད་པའི་ཚུལ་གྱིས་སེན་མོ་བྲུད་པའོ། །འོག་དང་སྟེང་དུ་རྡོ་རྗེ་བསྡམས་པས་བསྐྱོད་པའོ། །རྡོ་རྗེ་བསྡམས་པའི་མཐེའུ་ ཆུང་ལ་སོགས་པ་བཀྲོལ་བས་གར་རོ། །རྡོ་རྗེ་བསྡམས་པའི་མཛུབ་མོའི་རྡོ་རྗེ་ངག་འབྱིན་པའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་ལྕགས་ཀྱུས་བརྟན་པ་དང་གཡོ་བའི་དངོས་པོ་ཐམས་ཅད་ལ་རྡོ་རྗེ་སེམས་དཔའ་ལ་སོགས་པ་རྣམས་གཟུགས་བརྙན་གྱི། ཚུལ་ གྱིས་གསལ་བར་སྟོན་པ་དང་། སྒྲ་བརྙན་གྱི་ཚུལ་གྱིས་སེམས་ཅན་ཐམས་ཅད་དང་བདག་ཉིད་ལ་བདེན་པ་ཐོས་སུ་གཞུག་པའོ། །རྡོ་རྗེ་ཁྲོ་བོའི་ཁུ་ཚུར་གཉིས་བཅིངས་ནས་རྡོ་རྗེ་ལྟ་བའི་ལས་སོ། །འདི་ལྟ་སྟེ་འཛུམས་པ་མེད་པའི་ལྟ་བ་སྦྱིན་པའོ། །མིག་འབྲས་སྟེང་དུ་ ཡོངས་སུ་བསྐོར་བའོ། །བཙུམས་པས་མྱུར་དུ་ལྟུང་བའོ། །འོག་ནས་བསླང་བའོ། །བྱབ་པ་ཡང་ངོ་། །རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་བཀུག་ཅིང་ཡོངས་སུ་བསྐོར་ཏེ་མཆེ་བ་རྣམ་པར་གཙིགས་པའི་འཇིགས་པའི་གདོང་གིས་གཡོ་བ་མེད་པ་ཉིད་དོ། །ཡན་ལག་ ཐམས་ཅད་གློད་པར་འགྱུར་བའོ། །རབ་ཏུ་གཉིད་ལོག་ཅིང་ཁ་གདངས་པའོ། །རང་གི་སྙིང་གར་བརྡེག་པའོ། །མྱུར་དུ་མྱང་བའོ། །རྡོ་རྗེ་ཁུ་ཚུར་གཉིས་བཅིངས་ནས་ཁ་གདངས་ཏེ་འཇིགས་པར་བྱེད་པའི་ཁ་དང་ལྡན་པས་སྐྲ་གྱེན་དུ་བརྗེས་པའི་སྤྱི་བོས་འོག་ནས་གྱེན་དུ་བསླང་ བར་བྱ་བའི་ལས་ནི་ཡི་གེ་བྷོ་དང་། །རྡོ་རྗེ་ཁུ་ཚུར་མནན་པ་དང་ཡི་གེ་ཧཱུྃ་དང་བཅས་པའི་ཡན་ལག་གི་མཆོག་གི་སྡིགས་མཛུབ་དང་། རང་ཉིད་མྱུར་དུ་ཁྲོས་པས་ལྟུང་བའོ། །རྡོ་རྗེ་གནོད་སྦྱིན་གྱི་ཕྱག་རྒྱ་སྲིན་ལག་དང་མཐེའུ་ཆུང་མཉམ་པ་ཁ་ཕྱེ་བའི་བ་དན་རྒྱལ་མཚན་མཆོག་གི་དཔུང་ རྒྱན་གྱི་ལས་ནི་ཕྱག་འཚལ་བ་དང་དགོད་པ་དང་ལྕེ་སྐྱོང་བ་དང་དཔུང་པ་གཉིས་བསྙེམས་པས་སྟོད་པ་དང་རྒྱལ་མཚན་བསྒྲེང་བའོ། །སེམས་དཔའི་སྐྱིལ་མོ་ཀྲུང་གིས་གནས་ཤིང་རྡོ་རྗེ་གསོར་བ་ཉིད་ཀྱིས་ནི་ནམ་མཁའ་དབུགས་གཏོར་བ་དང་ཀུན་ཏུ་གཡོ་ཞིང་བཙུམས་པའི་ལྟ་བས་
- 248b
ཆར་འབེབས་པའི་ཚུལ་དང་ཁྲོ་བོ་རྡོ་རྗེ་ཉི་མ་མེ་ལྟར་འབར་བའི་བཟླས་པ་དང་ལྟ་བ་དབྲོག་པ་དང་གྲང་བས་ཡན་ལག་བསྐོར་ཞིང་ཐམས་ཅད་རབ་ཏུ་འབར་བར་བྱེད་པ་འབེབས་པའོ། །རྡོ་རྗེ་བསྡམས་པའི་རྡོ་རྗེ་དྲན་མའོ། །རྡོ་རྗེ་བསྡམས་པའི་གཡོན་པའི་མཛུབ་མོ་བཀུག་པའི་ཤིང་བུ་གཡས་པའི་ མཛུབ་མོས་བསྡུས་པ་ནི་རྡོ་རྗེ་པི་དབང་ངོ་། །རྡོ་རྗེ་བསྡམས་པའི་ལག་མཐིལ་དག་མཉེ་བའོ། །ཁ་འབུས་མཉམ་པའི་དབུས་མ་ལྕེའོ། །རབ་ཏུ་དགའ་བའི་རྡོ་རྗེའི་ཕྱག་རྒྱའོ། །བདེ་བ་ཆེན་པོ་རྡོ་རྗེ་མཆོད་པའི་ལས་ནི་དང་པོའི་གླུའི་བཟླས་པ་ཅི་སྲིད་མངོན་པར་འདོད་པའོ། །གཡོ་བ་མེད་ཅིང་དགོད་པ་དང་ དགུག་པ་ནི་རབ་ཏུ་དགའ་བའི་རྡོ་རྗེའི་ལྟ་བའི་ལྕགས་ཀྱུ་མས་སོ། །རང་གི་མ་མཆུ་སོ་དག་གིས་ནང་དུ་ཡོངས་སུ་བཟུང་བའོ། །རང་གི་དབང་པོ་བསྐྱོད་པའོ། །རབ་ཏུ་དགའ་བའི་རྡོ་རྗེའི་གར་གྱིས་ཡིད་ཀྱིས་འདོད་པའི་བཀའ་བསྒོ་བ་ཡང་སྟེ་བཅོམ་ལྡན་འདས་རྡོ་རྗེ་སེམས་དཔའ་ ལ་སྦྱོར་བ་དེས་ཀྱང་འདའ་བར་མི་ནུས་ན་བརྟན་པ་དང་གཡོ་བའི་དངོས་པོ་གཞན་ལྟ་སྨོས་ཀྱང་ཅི་དགོས། །རྡོ་རྗེ་ཐལ་མོའི་མཐེ་བོ་གཉིས་སེམས་དཔའི་སྐྱིལ་མོ་ཀྲུང་གི་མཛུབ་མོ་སྒྲེང་བ་ནི་བཅོམ་ལྡན་འདས་རྡོ་རྗེ་སེམས་དཔའི་སྐུ་མཆོག་སྟེ་འདི་སྐད་ཅིག་གཅིག་ཙམ་བཟུང་བས་ཤིན་ ཏུ་བྱིན་གྱིས་བརླབས་ནས་བཅོམ་ལྡན་འདས་བཟུང་ཞིང་མཆོད་ནས་སྒྲུབ་པར་འགྱུར་བ་དང་། དངོས་གྲུབ་ཐམས་ཅད་ལ་གྲུབ་པ་དང་དགོས་པ་ཡིན་ནོ། །སྤྱི་བོར་བཞག་སྟེ་སྟེང་ནས་གཡས་སུ་བསྐོར་བར་བྱའོ། །ས་ལ་བཞག་ནས་ཁྲོ་གཉེར་གྱིས་གྱེན་དུ་དྲང་བར་བྱའོ། །གནོད་ སྦྱིན་གྱི་གཟུགས་བརྙན་བྲིས་ལ་དེའི་སྙིང་གར་གཞག་པར་བྱས་ན་མངག་གཞུག་ཏུ་འགྱུར་རོ། །དབང་ཕྱུག་ཆེན་པོའི་གནས་སུ་ཁྲོ་ཞིང་བཟླས་པར་བྱའོ། །མ་མོའི་གནས་སུ་བཅིང་བ་ལ་ཡི་གེ་བྷྱོ་སྦྱར་བར་བྱ་སྟེ་མ་མོ་འཁོར་དང་བཅས་པ་ཐམས་ཅད་བསྙེན་བཀུར་བ་དང་རོལ་མོ་ལ་སོགས་ པའི་བཀའ་བསྒོ་བ་ཐམས་ཅད་བྱེད་པར་འགྱུར་རོ། །རྡོ་རྗེ་གསོར་བའི་ཕྱག་རྒྱས་ཁྲོ་བ་དང་བཅས་པའི་བཞད་པའི་གདོང་གིས་ལས་འདི་ལྟར་བྱ་བ་ཡིན་ཏེ་འདུས་ན་རྐང་པ་གཡོན་པས་མནན་ནས་བསྒྲུབ་པར་བྱའོ། །མདུན་དུ་གཞོན་ནུ་མ་བསྒྲུབ་ཅིང་མིག་གཉིས་ཀྱིས་འཕྲོག་པར་སྦྱར་བར་
- 249a
བྱའོ། །བྷ་ག་བྲིས་ནས་བལྟས་ཏེ་བསྒྲུབ་པར་བྱའོ། །དབང་ཕྱུག་ཆེན་པོ་རྐང་པ་གཡོན་པས་མནན་ལ་ཡི་གེ་ཧཱུྃ་སྦྱར་བར་བྱའོ། །འདོད་པའི་དབང་ཕྱུག་རྡོ་རྗེའི་མདས་བསྣུན་ཏེ་དེ་ནས་འོག་ཏུ་ཁ་བལྟ་བར་བཞག་སྟེ་གསོར་བར་བྱེད་པའོ། །རྡོ་རྗེ་གསང་བའི་མཆོད་ པས་བདེ་བ་ཆེན་པོའི་དམ་ཚིག་ཅེས་བྱ་བའི་བཤད་པའོ། །ཐམས་ཅད་རྡོ་རྗེར་བྱེད་པ་ནི་རྡོ་རྗེ་ཁུ་ཚུར་གཉིས་ཀྱིས་གོ་ཆ་བཅིང་བར་བྱས་ལ་སྤྱི་བོ་དང་དབང་བསྐུར་བའི་གནས་སུ་གཉིས་གཉིས་བཞག་ལ་ལོགས་གཉིས་ལ་གཉིས་དང་ཕྲེང་བའི་ཚུལ་གྱིས་དེ་བཞིན་དུ་དར་དཔྱངས་བཅིངས་ པས་སོ། །གཡོན་དུ་རྡོ་རྗེའི་མདའ་འཕང་བའོ། །རྡོ་རྗེ་བསྙེམས་མའོ་ཕྱག་རྒྱ་ཆེན་པོ་ཡང་ངོ་། །དཔལ་མཆོག་དང་པོ་ལས་ཕྱག་རྒྱ་ཐམས་ཅད་ཀྱི་རྒྱུད་ཀྱི་ཆོ་ག་རྒྱས་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་རྒྱུད་ནི་སེམས་དཔའི་རྡོ་རྗེ་མའོ། །དེ་ བཞིན་གཤེགས་པ་ཐམས་ཅད་ཀྱི་ཁུ་ཚུར་རོ། །རྡོ་རྗེ་རིན་ཆེན་གྱིས་དབང་བསྐུར་བ་བྱས་ན་རྡོ་རྗེ་རྩེ་ལྔ་པ་འོད་ཟེར་དང་བཅས་པ་སྦྱིན་པར་བྱའོ། །མཆོད་པ་ནི་མཉམ་པའི་ཐལ་མོ་ཅི་ལྟ་བ་བཞིན་དུ་གྱེན་དུ་གཏོར་བ་ལ་སོགས་པ་རྣམས་ཀྱིས་སོ། །དེ་བཞིན་གཤེགས་པའི་ཁུ་ཚུར་གཉིས་ བཅིངས་པ་ནི་གཡོན་པའི་མཛུབ་མོ་ཕྱི་རོལ་དུ་ཁ་བལྟས་པ་གཡས་པའི་ཁུ་ཚུར་ཁ་བལྟས་པས་བཟུང་སྟེ། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་མངོན་པར་རྫོགས་པའི་བྱང་ཆུབ་མཆོག་གི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཞེས་བྱ་བར་བརྗོད་པ་སྟེ། དོན་ཡོད་ཅིང་ ཐོགས་པ་མེད་པ་འདི་བཅིངས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དང་འབྲས་བུ་དང་ལྡན་པ་དང་བདུད་ལ་སོགས་པ་གཞན་གྱིས་ཐུབ་པར་མི་འགྱུར་རོ། །ཕྱག་རྒྱ་འདི་གང་གིས་བཅིངས་པ་དེ་ནི་དེ་བཞིན་གཤེགས་པ་ཉིད་དུ་རྟོགས་པར་ བྱེད་པའོ། །དེ་མཆོད་ན་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །དེ་ལ་ཕྱག་རྒྱ་ཆེན་པོ་ཐམས་ཅད་ཀྱི་ཆོ་ག་རྒྱས་པའོ། །དམ་ཚིག་གི་ཕྱག་རྒྱ་ནི་པདྨ་ཆེན་པོའོ། །རྡོ་རྗེའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་དུ་རྟོགས་པར་བྱེད་པའོ། །དེ་
- 249b
མཆོད་ན་དེ་བཞིན་གཤེགས་པ་ཐམས་ཅད་མཆོད་པར་འགྱུར་རོ། །སྐུ་མཆོག་ནི་བཤད་དོ། །རྡོ་རྗེ་ལས་ཀྱི་ཕྱག་རྒྱ་བཤད་པའོ། །རྡོ་རྗེ་ཐལ་མོ་འོག་ཏུ་བརྐྱང་ལ་མཐེ་བོ་དང་མཛུབ་མོ་རྩེ་མོ་བཅིངས་པ་སྙིང་ག་ལས་བཏེག་སྟེ་དབང་བསྐུར་བའི་གནས་སུ་རྩེ་མོ་རབ་ཏུ་བཞག་པ་ ནི་རིན་ཆེན་མའོ། །དེ་ཉིད་གྱེན་དུ་ཁ་ལྟ་བའི་མཛུབ་མོ་གཉིས་ཕྱིར་བཀུག་པས་རྡོ་རྗེ་པདྨའོ། །སེམས་མ་རྡོ་རྗེ་མ་ནི་ཕྱི་རོལ་དུ་དབུས་མ་བཅིངས་པའོ། །ཆོས་ཀྱི་ཕྱག་རྒྱའོ། །དེ་ནས་ལས་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་ཞེས་བཤད་དོ། །གཡོན་པ་ཆོས་གོས་དང་བཅས་ པ་རང་གི་སྙིང་གར་སྟོད་པའི་ཚུལ་གྱིས་བཟུང་སྟེ། གཡས་པས་ས་གནོན་ཞིང་རབ་ཏུ་རྒྱལ་བར་བྱེད་པ་ཞེས་བྱ་བ་སྟེ་དེས་བདུད་ཀྱི་སྟོབས་རྣམས་འཇོམས་པའོ། །དེ་ཉིད་ཡོངས་སུ་བསྐོར་ཏེ་གྱེན་དུ་ཁ་ལྟོ་བར་བཟུང་ནས་གཟེངས་བསྟོད་པ་ཞེས་བྱ་བ་ལྟུང་བ་སློང་བར་བྱེད་ཅིང་ལུང་སྟོན་པར་ བྱེད་པའོ། །དེ་ཉིད་ཆོས་གོས་མཐའ་མར་པདྨའི་འདབ་མ་ཁ་འབྱེད་པར་བྱེད་པ་ཆོས་འབྱུང་སྟེ། ཆོས་ཐམས་ཅད་སྦྱོང་བར་བྱེད་པའོ། །དེ་ཉིད་བ་དན་གསུམ་གྱིས་བཟུང་བ་སློང་བར་བྱེད་པ་སྟེ་གདོན་མི་ཟ་བར་དངོས་གྲུབ་སྩོལ་བའོ། །འདི་རྣམས་གཡས་པས་ལས་བྱེད་ཅིང་ དོན་ཡོད་པ་དང་བཅིངས་པ་ཙམ་གྱིས་འགྲུབ་པའོ། །ལྷག་མ་ནི་ཅི་ལྟ་བ་བཞིན་དུ་བཟུང་བས་སོ། །དེ་ནས་ལས་ཀྱི་ཕྱག་རྒྱ་རྣམས་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནད་གཟིར་བའོ། །མིག་ཡོངས་སུ་སྦྱོང་བའོ། །སྙིང་གར་གཞག་པའོ། །བྱབ་པའོ། །ཁུ་ ཚུར་གྱིས་འཕྲོག་པའོ། །བཟའ་བའོ། །ཁྲོས་ནས་གཏོར་བར་བྱའོ། །ཕུར་བུ་གདོན་པའོ། །རྟིང་པ་ལ་བརྡེག་པའོ། །ཡི་གེ་ཨོྃ་བྲིས་ནས་དབྱི་བར་བྱའོ། །སོ་རྣམས་ཀྱིས་གཟུང་བར་བྱའོ། །ཡི་གེ་ཧཱུྃ་དང་བཅས་པས་བརྡེག་པར་བྱའོ། །མཚོན་ཆ་བྲིས་ནས་དབྱི་ བར་བྱའོ། །ཀུན་ཏུ་སྦྱིན་སྲེག་བྱའོ། །དཱུར་བའི་སྦྱིན་སྲེག་བྱའོ། །སྤྱི་བོར་བཞག་ལ་ལྟ་བས་བྱ་བ་པར་བྱའོ། །སྟེང་དུ་ཁ་ཊྭཱྃ་ག་གཟུང་བའོ། །རང་གི་ཁྱིམ་དུ་བསྐོར་བར་བྱའོ། །རང་གི་ཁྱིམ་དུ་གཞག་པར་བྱའོ། །འཇུག་པར་བྱའོ། །སྙིང་ག་ལས་གདོན་པར་བྱའོ། །
- 250a
ལུས་ལ་བསྐོར་བར་བྱའོ། །ངག་འབྱིན་པའོ། །སྙིང་གར་བཙིར་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་ནི་སྐུ་མཆོག་གོ། །བརྟན་པར་བྱའོ། །དབང་པོ་ལ་གཞག་པར་བྱའོ། །ཁ་ལའོ། །དེ་ཉིད་དུ་བསྐོར་བར་བྱའོ། །དཔྲལ་བར་གཞག་ པར་བྱའོ། །སྙིང་གར་རོ། །དཔུང་པ་གཉིས་ལའོ། །བརླ་གཉིས་ལའོ། །ཕྲེང་བ་བཅིང་བའོ། །དབང་པོ་རྣམས་ལའོ། །སྤྱི་བོ་ལའོ། །གདོང་པ་ལའོ། །ཁ་ལས་བཏོན་ནས་སོ། །ཐམས་ཅད་དུ་བསྐོར་བར་བྱའོ། །ཕྱོགས་རྣམས་སུ་བསྐོར་བར་བྱའོ། །རང་དང་གཞན་ དག་དེ་བཞིན་གཤེགས་པ་རྗེས་སུ་དྲན་པའོ། །སྙིང་ག་ལས་རྗེས་སུ་དྲན་པའོ། །སྙིང་གར་བཞག་ནས་དགའ་བ་བསྐྱེད་པར་བྱའོ། །སངས་རྒྱས་ཉིད་བསྐྱེད་པར་བྱའོ། །སངས་རྒྱས་ཐམས་ཅད་ཉིད་བསྒོམ་པའོ། །ཕུང་པོ་ལྔ་ལ་གཞག་པར་བྱའོ། །རྫ་མཁན་གྱི་འཁོར་ལོ་ལྟར་ བསྐོར་བར་བྱའོ། །ལུས་རྗེས་སུ་དྲན་པའོ། །ལྕེ་གཞག་པར་བྱའོ། །ཡིད་ཀྱིས་མངོན་པར་གདུང་བར་བྱའོ། །གཏོང་བ་རྗེས་སུ་དྲན་པའོ། །ཚུལ་ཁྲིམས་སོ། །བྱམས་པའོ། །བརྩོན་འགྲུས་སོ། །ཏིང་ངེ་འཛིན་ནོ། །ཤེས་རབ་བོ། །ཡེ་ཤེས་སོ། །སྟོབས་སོ། །ཐབས་སོ། ། ངེས་པར་བརྗོད་པའོ། །གཟུངས་སོ། །སའོ། །སྤྱོད་པའོ། །སོ་སོ་ཡང་དག་པར་རིག་པའོ། །མ་འདྲེས་པའོ། །ཆོས་སོ། །ལས་སོ། །ལུས་སྣ་ཚོགས་སོ། །སེམས་ཅན་གྱི་དོན་ནོ། །སངས་རྒྱས་ཀྱང་དོན་ནོ། །ལུས་སོ། །ངག་གོ། །ཡིད་དོ། །རྡོ་རྗེ་ཆེན་པོའོ། ། ཨོྃ་བོ་དྷི་ཙིཏྟ་བཛྲེ། ཨོྃ་ས་མནྟ་བྷ་ཏྲེ་ཙཱརྱེ་བི། ཨོྃ་ཙིནྟཱ་མ་ཎི། ཨོྃ་ཨ་ནི་རོ་དྷེ། ཨོྃ་ཛི་ཏི་བི་ར་བར་ཏེ། ཨོྃ་སརྦ་ཛྙཱ་ནེ། ཨོྃ་མ་ཧཱ་རཱ་ག་དྷརྨ་ཏེ། ཨོྃ་བི་དྱཱ་ཀ་བ་ཙེ། །ཨོྃ་བཛྲ་དྲྀ་ཌྷ་ཙིཏྟེ་ཧཱུྃ། ཨོྃ་སརྦ་ཏ་ཐཱ་ག་ཏ། ཨོྃ་སཱ་བྷཱ་བ་བི་ཤུད་དྷཱ་དྷ་རྨ་ཏཱ་ཛྣཱ་ན་བི་ཤུད་དྷེ། ཨོྃ་ཀརྨ་བི་ཤུད་དྷེ། ཧཱུྃ་སུམ་བྷ་ བཛྲི་ཎི་ཕཊ། ཨོྃ་ཀརྨ་རཱ་གེ། ཨོྃ་བཛྲ་བཛྲི་ཎི། ཨོྃ་ཧཱུྃ་སརྦ་དྷརྨ་ནི། ཨོྃ་ཧྲཱིཿ ཨོྃ་ཨ་ཀཱ་རོ་མུ་ཁྃ། ཨོྃ་པྲཛྙཱ་པཱ་ར་མི་ཏཱ་ཡཻ། བྃ་ཧཱུྃ། ཨོྃ་ཨྃ། ཨོྃ་སརྦ་ཏ་ཐཱ་ག་ཏེ་ཀཱ་ཡཱ་གྲེ། ཨོྃ་སརྦ་ཏ་ཐཱ་ག་ཏ་བྷ་བི་ཤུད་དྷེ། ཨོྃ་སརྦ་ཏ་ཐཱ་ག་ཏ་ཙིཏྟ་བཛྲ། ཨ། དེ་ནས་དེ་བཞིན་གཤེགས་པ་ཐམས་ཅད་ཀྱི་ངག་གི་ཕྱག་རྒྱ་
- 250b
ནི་དབྱངས་ཤིན་ཏུ་ཟབ་པའི་སྒྲ་དང་ལྡན་པའི་ཕྱག་རྒྱའི་ཆོས་ཀྱི་ངག་སྟེ་དེ་བཞིན་གཤེགས་པ་ཐམས་ཅད་ཀྱི་ངག་ཐོགས་པ་མེད་པར་འགྲུབ་པའོ། །དེ་ནས་བཟླས་པ་ནི་རྗེས་སུ་དྲན་པས་སོ། །བསྒྲུབ་པ་ལ་དེ་བཞིན་ནོ། །ལས་ལ་ཉེ་བར་སྦྱོར་བ་ནི་དེ་བཞིན་གཤེགས་པ་ཐམས་ཅད་རྗེས་སུ་དྲན་ པས་སོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བཅིང་བའོ། །དེ་ནས་རྡོ་རྗེ་ཉི་མ་མེ་ལྟར་འབར་བའི་ཕྱག་རྒྱ་བཅིང་བ་ནི་དེ་ལ་ཕྱག་རྒྱ་ཆེན་པོ་ནི་བདག་ཉིད་ཐམས་ཅད་ཀྱི་རྗེས་སོ། །དམ་ཚིག་གི་ཕྱག་རྒྱའི་རྒྱུད་ནི་རྡོ་རྗེ་བསྡམས་པ་ནང་དུ་བཅིངས་ལ་སོར་མོ་ཐམས་ཅད་ཀྱི་འབར་བའི་དཀྱིལ་ འཁོར་གྱི་ནང་མཐེ་བོང་གི་རྡོ་རྗེ་བཞག་ལ་ཁམས་གསུམ་པ་ཐམས་ཅད་བསྲེག་པ་དང་། འཚེད་པ་དང་། ཐལ་བར་བྱེད་པར་ནུས་ཏེ་བཅོམ་ལྡན་འདས་ཀྱིས་ཀྱང་དབང་དུ་བྱེད་པར་འགྱུར་རོ། དེ་ཉིད་ཀྱི་གཡོན་པའི་སོར་མོ་སྡིགས་མཛུབ་བྱ་ཞིང་གཡས་པའི་ལྕགས་ཀྱུས་དགུག་པར་བྱས་ན་ ཐམས་ཅད་དགུག་པའོ། །རྡོ་རྗེ་ཧཱུྃ་མཛད་ཀྱི་ཕྱག་རྒྱ་ནི་ཁྲོ་བོའི་རྡོ་རྗེ་ཁུ་ཚུར་གཉིས་པའི་རྡོ་རྗེས་མཐེའུ་ཆུང་གི་ལྕགས་ཀྱུ་བཅིངས་ཏེ། དེས་སྡིགས་མཛུབ་བྱ་ཞིང་ལས་ཐམས་ཅད་དང་དངོས་གྲུབ་ཐམས་ཅད་ཉམས་སུ་མྱོང་བ་ཡིན་ནོ། །རྡོ་རྗེ་ཐལ་མོས་མཛུབ་མོ་བཅིངས་ལ་ཁྲོ་ གཉེར་ཐུར་དུ་གཞག་པར་བྱ་ཞིང་མེ་སྟག་ཏུ་མྱུར་དུ་འཕྲོ་ཞིང་གཡོ་བ་ནི་རྡོ་རྗེ་ཁྲོ་གཉེར་རོ། །ཐམས་ཅད་སྲེག་པར་བྱེད་པ་དང་། ཐམས་ཅད་འདུལ་བར་བྱེད་པ་དང་། རབ་ཏུ་འདུལ་བར་བྱེད་པ་ནི་ཁྲོ་གཉེར་གྱི་ཕྱག་རྒྱའོ། །རྡོ་རྗེ་ཐལ་མོ་ལེགས་པར་བསྐོར་བས་གཡོན་པའི་མཛུབ་མོ་ ལྕགས་ཀྱུ་སྟེ། དགུག་པ་དང་གཞུག་པ་དང་བསྒྲུབ་པ་ཐམས་ཅད་ལ་དོན་ཡོད་པའོ། །རྡོ་རྗེ་པདྨ་དབུས་མཉམ་པའི་ཁ་འབུས་ཀྱི་མཛོད་དོ། །རྡོ་རྗེ་པདྨ་ནི་ཐམས་ཅད་གཅོད་པར་བྱེད་པའོ། །རྡོ་རྗེ་བསྡམས་པ་ནི་མཐེ་བོ་དང་མཛུབ་མོའི་གདུ་བུས་གཡས་པའི་ཧཱུྃ་གིས་མཛུབ་མོ་བཟུང་སྟེ་ ཐམས་ཅད་དགུག་པ་དང་གཞུག་པ་དང་མཆོག་ཏུ་གྲུབ་པའོ། །རྡོ་རྗེ་ཧཱུྃ་མཛད་ལས་བྱུང་བ་ནི་གཡས་པའི་མཛུབ་མོས་གཡོན་པའི་ཡི་གེ་ཧཱུྃ་བཟུང་བ་སྟེ་གཞུ་རྒྱུད་འདྲེན་པ་ཞེས་བྱ་བ་ཐམས་ཅད་རྗེས་སུ་ཆགས་པར་བྱེད་པ་དང་འབིགས་པར་བྱེད་པའོ། །རྡོ་རྗེ་བསྡམས་པ་ལས་རྡོ་རྗེ་ཧཱུྃ་མཛད་ཀྱི་
- 251a
མཆོག་གོ། །རྡོ་རྗེ་བསྡམས་པའི་གཡོན་པའི་རྡོ་རྗེ་ཁུ་ཚུར་གཡས་པའི་རྩེ་གསུམ་གྱིས་མཚན་པས་ཡོངས་སུ་བཟུང་བ་སྟེ་ཐམས་ཅད་དྲལ་བར་བྱེད་པའོ། །རྡོ་རྗེ་ཧཱུྃ་མཛད་ཀྱི་གཡས་པའི་ཁུ་ཚུར་གྱི་མཐེའུ་ཆུང་ཡང་དག་པར་བརྐྱང་བ་གཡོན་ལག་པའི་སྟེང་དུ་བཞག་པ་ནི་ཁ་ཊྭཱྃ་ ག་སྒྲེང་བ་སྟེ། གདུག་པ་ཐམས་ཅད་ཀྱི་ཕྱག་རྒྱ་ཕྱེ་ཞིང་དྲལ་བར་བྱེད་པ་དང་། རྒྱས་འདེབས་པ་དང་། གསོད་པ་དང་། ཟ་བ་ལ་སོགས་པའི་ཡོ་བྱད་ཐམས་ཅད་གཡས་པས་འཁོར་ལོ་བཟུང་བའི་ཚུལ་གྱིས་སྟོད་ཅིང་དོར་བ་སྟེ། ཐམས་ཅད་གཅོད་པ་དང་། གཅོད་པར་བྱེད་པའོ། །རྡོ་རྗེ་ཆེན་ པོའི་ཁྲོ་བོའི་རྡོ་རྗེའོ། །གཡས་པའི་རྡོ་རྗེ་འབེབས་པ་དང་སྦྱོར་བ་སྤྲོ་ཞིང་གཡོ་བའི་འདབ་མ་ཅན་གྱི་བ་དན་གསུམ་པའོ། །རྡོ་རྗེ་བསྡམས་པའི་མཐེ་བོང་དང་མཛུབ་མོ་གཉིས་ཀྱིས་རྡོ་རྗེ་ལས་བྱུང་བའི་སྲིན་ལག་མཉམ་པར་སྦྱར་ཞིང་མཐེའུ་ཆུང་ཁ་ཕྱེའོ། །དཔལ་ཐམས་ཅད་བྱེད་པ་དང་། རྣམ་པར་ རྒྱལ་བར་བྱེད་པ་དང་། གདུག་པ་ཐམས་ཅད་འཇོམས་པར་བྱེད་པ་དང་། ཐམས་ཅད་འབེབས་པར་བྱེད་པའོ། །རྡོ་རྗེ་སེམས་དཔའི་དབང་བསྐུར་བཤད་པའོ། །རྡོ་རྗེའི་རིགས་ཐམས་ཅད་ཀྱི་ནི། རྡོ་རྗེ་ཐལ་མོ་མཉམ་བྱས་ལ། །མཛུབ་མོ་གཉིས་ཀྱིས་དར་དཔྱངས་ཅིང་། །མཐེ་བོ་སྲིན་ ལག་རྡོ་རྗེ་ནི། །ཡོངས་སུ་བསྐོར་ཏེ་དབང་བསྐུར་རོ། །འབར་བའི་རྡོ་རྗེ་རྩེ་ལྔ་པ་ཕྱག་ནས་གཟུང་བར་བྱའོ། །ཅི་འབྱོར་པས་སློབ་དཔོན་ལ་ཡོན་ཕུལ་ཏེ་དངོས་གྲུབ་ཐམས་ཅད་ཀྱི་མཆོག་ཕུན་སུམ་ཚོགས་པ་རྣམས་འགྲུབ་པར་འགྱུར་རོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་ གསུངས་སོ། །རྡོ་རྗེ་ཕྱག་རྒྱ་རྡོ་རྗེ་ཏི་རིནྟི་རི་ལས་འབྱུང་བ་སྟེ་དོན་ཡོད་ཐམས་ཅད་སྒྲུབ་པར་བྱེད་པའོ། །དེ་ནས་ལས་ཀྱི་ཕྱག་རྒྱ་བཞི་ནི་དམ་ཚིག་ཕྱག་རྒྱའི་ལྷ་མོ་རྣམས་སོ། །དེ་ནས་བཅོམ་ལྡན་འདས་ཀྱི་ལས་ཀྱི་དམ་ཚིག་ནི་རྡོ་རྗེ་ཁུ་ཚུར་གཡོན་པས་བསྙེམས་པ་ཐམས་ཅད་སྒྲུབ་པ་ དང་། གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་གསོར་བ་སྟེ་འདིས་ཐམས་ཅད་བརྒྱལ་བ་དང་། འབར་བ་དང་། སྲེག་པ་དང་། ལྟུང་བ་དང་། རྒྱས་བཏབ་པ་དང་། གསད་པ་དང་། སློང་བ་དང་། ཁམས་གསུམ་ལས་རྣམ་པར་རྒྱལ་བ་དང་། བརྟན་པ་དང་། གཡོ་བ་ཐམས་ཅད་ལ་
- 251b
ངེས་པར་སྦྱོར་བ་དང་། དངོས་གྲུབ་དང་། མཆོག་ཐམས་ཅད་བསྒྲུབ་པའོ། །དེ་ནས་ལས་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་སྡིགས་མཛུབ་དང་བཅས་པའི་མཛུབ་མོ་ནི་ཁྲོ་བོའི་རྡོ་རྗེ་ཁུ་ཚུར་རོ། །དེ་དག་གི་ལས་དམ་ཚིག་གི་ཕྱག་རྒྱའོ། །མཛུབ་མོའི་སོར་མོ་གཉིས་ཀྱིས་ཐམས་ཅད་དགུག་པའོ། ། སྙིང་གར་ཅིག་ཤོས་དང་གཡས་པས་གདུག་པ་ཐམས་ཅད་གཅོད་པའོ། །མཁྲིག་མའི་མདུད་པས་གཡས་པའི་ཁྲོ་བོ་འགུགས་པས་ཐམས་ཅད་དགུག་པ་དང་རབ་ཏུ་གཞུག་པའོ། །སྟོད་པ་དང་བཅས་པའི་མདའ་འཕངས་པའོ། །དེ་བཞིན་དུ་རྡོ་རྗེ་རྩེ་གསུམ་པ་ལ་སོགས་པའི་རྡོ་རྗེ་གར་གྱི་ སྦྱོར་བས་རང་གི་ཕྱག་རྒྱ་གྱེན་དུ་འཕངས་པའོ། །ལས་ཀྱི་དམ་ཚིག་གི་ཕྱག་རྒྱ་གྱེན་དུ་འཕངས་པའོ། །ལས་ཀྱི་དམ་ཚིག་གི་ཕྱག་རྒྱ་གཉིས་སུ་བྱས་ལ་རྡོ་རྗེ་ཐལ་མོ་རྣམས་ཀྱི་ལས་ཀྱི་ཕྱག་རྒྱ་སྟེ་རྡོ་རྗེ་གར་གྱི་སྦྱོར་བ་རང་གི་དམ་ཚིག་གི་ཕྱག་རྒྱ་སྟེང་དུ་དོར་བ་སྟེ་ཐམས་ཅད་ལ་རྒྱས་གདབ་པ་དང་། བསྒྲུབ་པ་དང་། གསོད་པ་དང་། འབེབས་པ་དང་། འཚོ་བར་བྱེད་པ་ནི་རྡོ་རྗེ་གར་གྱི་མཆོད་པའོ། །དེ་ནས་ངག་གི་ཕྱག་རྒྱ་ནི་སྤྲིན་གྱིས་སྒྲ་སྒྲོགས་པའི་ཧཱུྃ་ཡི་གེ་ཧཱུྃ་ཕྲ་བའི་སྒྲ་དང་བཅས་པ་ཁྲོ་ཞིང་གསལ་བའི་ཁྲོ་བོའི་རྡོ་རྗེ་ངག་གོ། །སྒྲུབ་པའི་དོན་བསྒྲུབ་པར་བྱའོ། །དེ་ནས་མ་གྲུབ་ན་ལས་ཀྱི་ ཕྱག་རྒྱ་བཅིང་བའོ། །སྒྲུབ་པ་ནི་དེ་བཞིན་དུ་ཕྱག་རྒྱ་ཆེན་པོ་ལན་ཅིག་ཏུ་བྱ་བའོ། །ལས་ལ་ངེས་པར་སྦྱོར་བ་ནི་ཁྲོ་གཉེར་གྱིས་སོ། །རྡོ་རྗེ་ཧཱུྃ་མཛད་ལས་བྱུང་བའོ། །སྐེ་ཚེ་དང་བཅས་པའི་ཏིལ་མར་རྣོན་པོའི་སྦྱིན་སྲེག་ནི་གཡས་པས་སོ། །དེ་ཉིད་ཀྱིས་གཏང་བའོ། །དེ་ཉིད་ཀྱིས་ ཐམས་ཅད་འཆིང་བའོ། །གཡོ་བ་མེད་པ་ཉིད་དོ། །གཉིད་ལོག་པ་བསྟན་པའོ། །ཁྲོ་བོའི་རྡོ་རྗེ་ལྟ་བའི་སྡིགས་མཛུབ་བོ། །ཕྱག་རྒྱ་གློད་པར་འགྱུར་བའོ། །མཛུབ་མོ་གཉིས་ཡང་དག་པར་སྦྱར་ནས་ཕྱེ་བའོ། །དེ་དག་ཉིད་ཀྱིས་གདུ་བུ་བཅིང་བའོ། །མཆེ་བས་བཙིར་བའོ། །དེ་ ནས་དྲལ་བའོ། །གཡས་པས་བརྡེག་པའོ། །མཛུབ་མོ་གཉིས་ཀྱིས་འབར་བའོ། །གཡས་པའི་མཛུབ་མོ་གཡོན་པ་ལྟུང་བའི་ཚུལ་ལོ། །མཛུབ་མོ་གཉིས་ཀྱིས་འབར་བར་ཕྱེ་བའོ། །གཅོད་པའོ། །མཛུབ་མོ་གཉིས་ཀྱིས་སོར་མོ་སྦྱར་བའི་རྩེ་མོ་གཅོད་པའོ། །ལག་པ་
- 252a
གཉིས་དྲག་ཏུ་མཉེ་བའོ། །ཐམས་ཅད་དུ་སོར་མོ་ཐམས་ཅད་དོར་བའོ། །ཅིག་ཆར་དུ་ཕྱག་རྒྱ་དགྲོལ་བའོ། །དྲང་ཞིང་གཡོ་བས་སྡིགས་མཛུབ་བོ། །གཡས་པའི་མཛུབ་མོ་གདེངས་ཀ་བསྐྱོད་པས་སྡིགས་མཛུབ་པོ། །གཡས་པའི་མཛུབ་མོ་མཆེ་བས་བཟུང་བའོ། ། ངུ་བ་དང་། དགོད་པ་དང་། རྒྱུག་པ་ལ་སོགས་པས་བསྟན་པའོ། །མཛུབ་མོ་གཉིས་ཀྱིས་སེ་གོལ་རྡེབས་པའོ། །གཡོན་པའི་སྟེང་དུ་གཡས་པ་ཉེ་བར་གཞག་པའོ། །ས་ལ་རབ་ཏུ་གཞག་པའོ། །བསྐྱོད་པར་བྱའོ། །གར་བྱ་བའོ། །འབྱིན་པའོ། །བརླབ་པར་བྱའོ། ། ཐམས་ཅད་དུ་བརླབ་པར་བྱའོ། །ཧ་ཧར་དགོད་པའོ། །བསྐོར་བའི་དགུག་པར་བྱའོ། །དྲང་བར་བྱའོ། །གཏང་བར་བྱའོ། །ཡོངས་སུ་བསྐོར་ནས་ནུབ་པར་བྱའོ། །དེ་ནས་དོར་བའོ། །མྱུར་དུ་དོར་བའོ། །དེ་བཞིན་དུ་ཀུན་ནས་འདྲེན་པའོ། །དེ་བཞིན་དུ་གྱེན་དུ་དྲང་བའོ། །རང་ཉིད་ ཀྱིས་ང་རོ་བྱའོ། །ངུ་བར་བྱའོ། །བདག་ཉིད་ལ་བརྡེག་པར་བྱའོ། །སྙིང་གར་བརྡེག་པར་སྦྱིན་པར་བྱའོ། །རང་ཉིད་ཀྱིས་རང་གི་སྐྲ་འབལ་བར་བྱའོ། །སྡང་བར་སྡོམ་པའོ། །རང་གི་གོས་བསྟོད་པར་བྱའོ། །ཁྲོ་བས་དེ་བཞིན་དུ་འབར་བ་སྟོན་པའོ། །གཡས་པའི་མཛུབ་མོ་ལྕགས་ ཀྱུའོ། །དེ་ཉིད་ཀྱིས་རབ་ཏུ་གཞུག་པའོ། །གཡས་པའི་སེ་གོལ་ལོ། །གཡོན་པའི་སེ་གོལ་ལོ། །ལྕེ་རེག་པ་ནི་མཛུབ་མོ་གཉིས་ཀྱིས་སོ། །ཡན་ལག་ལ་བ་སྤུ་གཡས་སུ་བསྐོར་བས་འཁྱིལ་པའོ། །ལྟུང་བ་ལ་སོགས་པ་བྱེད་པའོ། །དུས་སུ་བསྒོམ་པའོ། །ཁྲོ་བོའི་ལྟ་བས་ ཤིང་དྲུང་རྣམས་ལ་ཡིད་ཀྱིས་འདོད་པའོ། །དེ་བཞིན་དུ་ས་ལའོ། །ལྟེ་བའོ། །སྨིན་མའོ། །སོའོ། །ཕུའོ། །ཕྱག་རྒྱས་བརྡེག་པའོ། །རྒྱལ་མཚན་བསྒྲེང་བའོ། །ཁྲོ་བ་དང་བཅས་པའི་འཇིགས་བྱེད་ཀྱི་ལྟ་བས་སོ། །འཛུམས་པ་མེད་པའི་ལྟ་བས་སོ། །དེ་བཞིན་དུ་འབར་བ་ འཆིང་བས་སོ། །ཕྱག་རྒྱ་བསྐོར་བའོ། །གཙུག་ཏོར་ལས་མཛུབ་མོའི་རྡོ་རྗེ་གཞག་པར་བྱའོ། །དེ་བཞིན་དུ་སྙིང་གར་རོ། །ཕྱག་རྒྱ་དེ་དགྲོལ་བའོ། །ཕྱག་རྒྱ་ཟུར་དུ་བསླང་བའོ། །མཛུབ་མོའི་རྩེ་མོ་བརྟན་པར་སྦྱར་བའོ། །ལྟ་བས་སྟེང་ནས་འོག་ཏུ་ལྟུང་བའོ། །འོག་ནས་གྱེན་དུ་
- 252b
འདྲེན་པའོ། །ཡི་གེ་ཧཱུྃ་ཁྲོས་པའོ། །འཇིགས་བྱེད་ཀྱི་ལྟ་བས་སོ། །རྡོ་རྗེ་ཁ་ཊྭཱྃ་དྲལ་བ་ཁྲོ་བས་སོ། །རྡོ་རྗེ་སྙིང་གར་བསྒོམ་པའོ། །རྡོ་རྗེ་རྩེ་གསུམ་དྲལ་བའོ། །གདུག་པའི་དཀྱིལ་འཁོར་གཞིག་པར་བྱའོ། །ཡི་གེ་ཧཱུྃ་གིས་སོ། །ཧའོ། །གཡས་སུ་དབུགས་དབྱུང་བའོ། །དེ་ ཉིད་ཀྱིས་དོང་ཙེ་གསོར་བའོ། །ཁྲོ་བོའི་ལྟ་བ་དེ་བཞིན་དུའོ། །ཁུ་ཚུར་གཡས་པས་མནན་ཏེ་གཡོན་པས་སོ་བཟུང་ནས་དགུག་པར་བྱའོ། །དོང་ཙེ་གསོར་བ་ནི་གཉིས་ཀྱིས་སོ། །གཡོན་པའི་དྲིལ་བུ་དྲལ་བའོ། །དེ་བཞིན་དུ་རྡོ་རྗེ་ཧཱུྃ་མཛད་ཀྱི་གཡས་པའི་ཁུ་ཚུར་གཡོན་པའི་རྡོ་རྗེ་ཁྲོ་བོས་མནན་ ཏེ། མཐེའུ་ཆུང་གི་གདུ་བུ་བཀྲོལ་བའི་ཁུ་ཚུར་གྱིས་འཕྲོག་པར་བྱའོ། །གཡས་པའི་དྲིལ་བུ་དྲལ་བའོ། །ཚེགས་དང་བྲལ་བ་ལྟུང་བ་ནི་ཡིད་ཀྱིས་སོ། །འཁོར་ལོ་དྲལ་བའོ། །རྩེ་གསུམ་དྲལ་བའོ། །རྡོ་རྗེ་ཧཱུྃ་མཛད་ཀྱི་གཡོན་པ་གཡས་པའི་རྡོ་རྗེ་ཁུ་ཚུར་གྱིས་མནན་ཏེ་དེ་བཞིན་དུ་ གདུ་བུ་བཀྲོལ་བས་འཕྲོག་པར་བྱའོ། །རྡོ་རྗེ་དང་བྱང་ཆུབ་སེམས་དཔའ་དང་། དེ་བཞིན་གཤེགས་པ་ཐམས་ཅད་དང་། རྡོ་རྗེ་འཆང་ཆེན་པོ་རྗེས་སུ་དྲན་པས་མདུན་དུ་བསྒྲུབ་པར་བྱའོ། །རྡོ་རྗེ་ཁྲོ་བོ་རྒྱལ་པོའི་ཕྱག་རྒྱའི་རྒྱུད་དོ།། །།དེ་ནས་འཕགས་པ་སྤྱན་རས་གཟིགས་ དབང་ཕྱུག་གི་ཕྱག་རྒྱའི་རྒྱུད་ནི་པདྨ་ཆེན་པོ་རྡོ་རྗེའི་ཐལ་མོ་ཁ་སྦུབ་པ་དབུ་མ་དང་མཐེ་བོང་དང་མཐེའུ་ཆུང་ཁ་ཕྱེ་བའི་འདབ་མ་བཞི་པ་ཆོས་ཉིད་ཐམས་ཅད་ཐོབ་པ་དང་ཐམས་ཅད་རྗེས་སུ་ཆགས་པར་བྱེད་པའོ། །ཕྱག་རྒྱ་ཆེན་པོ་རྣམས་ནི་དེ་བཞིན་ནོ། །དམ་ཚིག་ཕྱག་རྒྱ་རྡོ་རྗེ་པདྨ་བཤད་པའོ། ། པདྨའི་རིགས་རྣམས་ཀྱི་རྡོ་རྗེ་བསྡམས་པ་ལས་བྱུང་བའོ། །དེ་ལ་པདྨ་དེ་བཞིན་གཤེགས་པ་རྣམས་ནི་ནང་གི་རྡོ་རྗེ་བསྡམས་པ་ལས་བྱུང་བའོ། །དེ་བཞིན་གཤེགས་པའི་པདྨ་པང་བར་གྱེན་དུ་ཁ་ཕྱེ་བ་ལྟ་བུའི་ཏིང་ངེ་འཛིན་གྱི་མིང་ཅན་གྱི་ཕྱག་རྒྱ་པདྨའི་སྤྱན་ཞེས་བྱའོ། །རྡོ་རྗེ་པདྨ་ཆེན་པོའི་རྡོ་རྗེ་པདྨ་ སྙིང་གར་རྡོ་རྗེ་བཅིང་བ་རྡོ་རྗེ་པདྨ་རི་ཆགས་པ་ཞེས་བྱའོ། །པདྨ་ཆེན་པོའི་བདག་པོའི་མཛུབ་མོ་མཉམ་པ་འོག་ཏུ་ཁ་ལྟ་བ་པང་པར་བཟུང་བ་པདྨའི་སྒྲོལ་མ་ཞེས་བྱ་བའི་ཕྱག་རྒྱའོ། །པདྨ་ཆེན་པོའི་བ་དན་རིན་པོ་ཆེ་གཉིས་བཟུང་ཞིང་དེས་པདྨ་སྦྱིན་པའོ། །འདི་རྣམས་ཀྱི་ཆོས་ཉིད་ཐམས་ཅད་
- 253a
ལས་ཐོབ་པ་དག་ཐམས་ཅད་རྗེས་སུ་ཆགས་པ་དང་སྲིད་པའི་སྡུག་བསྔལ་གྱི་ཚོགས་ཐམས་ཅད་ལས་སྒྲོལ་བ་དང་། །བསམ་པ་ཐམས་ཅད་ཡོངས་སུ་རྫོགས་པའི་ཤིན་ཏུ་གྲུབ་པ་ཞེས་བྱའོ། །རྡོ་རྗེ་རྩེ་གསུམ་དྲལ་བའོ། །དེ་ནས་པདྨའི་ལྷའི་བདག་པོ་རྣམས་ཀྱི་ཕྱི་རོལ་ གྱི་བསྡམས་པ་ལས་བྱུང་བའོ། །དེ་ལ་དོན་ཡོད་པའི་རྒྱལ་པོ་ནི་འོག་ཏུ་མཛུབ་མོ་གཉིས་ཀྱི་ཁ་འབུས་པ་ཁྲོ་གཉེར་ལ་གཞག་པར་བྱ་སྟེ་པད་མོའི་ཁྲོ་གཉེར་གྱི་སྤྱན་ནོ། །རྡོ་རྗེ་བསྡམས་པ་ཁ་གྱེན་དུ་འབར་བ་ནི་མགྲིན་སྔོན་གྱིའོ། །གཡོན་པའི་མཛུབ་མོ་བཀུག་པ་མཐེ་བོས་ཡོངས་སུ་ བཟུང་སྟེ་དུང་གི་དབྱིབས་དེ་གཡས་པའི་མཐེ་བོང་བསྒྲེང་བ་བཏེག་སྟེ། མཐེའུ་ཆུང་མཉམ་པའི་ཁ་འབུས་པའི་པདྨ་དང་། སོར་མོ་ལྷག་པ་ཡང་དག་པར་བརྐྱང་བའི་འཁོར་ལོ་ནི་པདྨའི་ཁྱབ་འཇུག་མའོ། །པདྨ་ལས་བྱུང་བའི་མཛུབ་མོ་གཉིས་བཀུག་པའི་ལྕགས་ཀྱུ་དང་སོར་མོ་ལྷག་མ་ ཁ་ཕྱེ་བའི་པདྨ་ལས་བྱུང་བའི་ཞེས་བྱའོ། །རྟ་མགྲིན་གྱི་ནི་མཛུབ་མོ་གཉིས་ཤིན་ཏུ་སྦྱར་བའི་ལྕགས་ཀྱུ་རྒོད་མའི་ཁ་ཤིན་ཏུ་རབ་ཏུ་བརྐྱང་བའི་སྲིན་ལག་གི་རྩེ་མོ་དང་། མཐེའུ་ཆུང་དང་གཉིས་རབ་ཏུ་བརྐྱང་བ་སོ་སོར་ཕྱེ་ལ་གཡོན་གཡོ་ཞིང་བཟུང་བ་ནི་པདྨའི་ལྕགས་ཀྱུ་ཞེས་བྱ་བའོ། །འདི་ རྣམས་ཀྱིས་དབང་བསྐུར་བ་ཐམས་ཅད་དང་། ལས་ཐམས་ཅད་དང་། གྲོལ་བ་ཐམས་ཅད་དང་། དགུག་པ་ཐམས་ཅད་ཀྱི་དངོས་གྲུབ་དོན་ཡོད་པའོ། །དེ་བཞིན་གཤེགས་པའི་སྐུ་མཆོག་གི་ཏིང་ངེ་འཛིན་གྱི་ཕྱག་རྒྱ་བཤད་པའོ། དེ་ནས་ལས་ཀྱི་ཕྱག་རྒྱ་མི་བ་ཊྭཱྃ་ག་བཅིངས་ནས་པདྨའི་ རིགས་ཐམས་ཅད་ཀྱི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་བཟུང་བས་སོ། །ངག་གི་ཏིང་ངེ་འཛིན་གྱིས་གཟུངས་དགུག་པ་ནི་ཆོས་ཀྱི་ངག་གིས་བཟླས་པའི་དོན་ཤེས་པའོ། །པདྨ་ཆེན་པོ་བཅིངས་ནས་ཡིད་ཀྱིས་སྦྱིན་སྲེག་བྱའོ། །སེམས་ཀྱིས་ཞི་བར་བྱའོ། །དངོས་པོ་བསྲུང་བར་བྱའོ། །རྣམ་ པར་སྦྱང་བར་བྱའོ་ཞེས་བྱ་བ་བསྒྲུབ་པར་བྱའོ། །ལས་ཐམས་ཅད་ཕྱག་རྒྱའི་ཚོགས་སོ། །འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་དོ།། །།དེ་ནས་ནམ་མཁའི་སྙིང་པོའི་ཕྱག་རྒྱ་ཆེན་པོ་དེ་བཞིན་ནོ། །དམ་ཚིག་གི་ནི་ཕྱག་རྒྱ་རྡོ་རྗེ་རིན་ཆེན་ཏེ། མཐེ་བོང་དང་མཛུབ་
- 253b
མོའི་སོར་བཞིའི་རྩེ་མོ་བསྙམས་ནས་འོག་ཏུ་རབ་ཏུ་བསྡུས་ཏེ། དབང་བསྐུར་བའི་རྡོ་རྗེ་ཐལ་མོས་དབང་བསྐུར་བ་ཐམས་ཅད་ཐོབ་པའོ། །དེས་ཅི་ལྟ་བ་བཞིན་དུ་དབང་བསྐུར་བའོ། །རྡོ་རྗེ་དེ་ཉིད་སྙིང་གར་རོ། །གྱེན་དུ་ཁ་བལྟ་བའོ། །དེ་ཉིད་ཁུ་ཚུར་རོ། །ཁུ་ཚུར་སྤྱི་བོར་བཞག་ལ་མེ་ཏོག་ལ་སོགས་ པའི་མཆོད་པ་དབུལ་བར་བྱའོ། །འདི་ཉིད་གཉིས་སུ་བཞག་ནས་ལས་ཀྱི་ཕྱག་རྒྱར་གཟུང་བའོ། །དབང་བསྐུར་བ་ཐམས་ཅད་ཀྱི་རིན་པོ་ཆེའི་གཏེར་གྱི་མཆོད་པ་ཐོབ་པའི་དོན་དུ་ཡང་དག་པར་རྫོགས་པའོ། །བཅོམ་ལྡན་འདས་ཀྱི་ལས་ཀྱི་དམ་ཚིག་ནི་གསལ་བ་ཡོངས་སུ་རྫོགས་པར་བྱེད་པའོ། ། གཡོན་པའི་ཁུ་ཚུར་སྙིང་གར་བསྟོད་ནས་གཡས་པ་ནོར་སྦྱིན་པ་བཀྲོལ་བའོ། །ནོར་བུའི་ཁུ་ཚུར་གྱི་ཕྱག་རྒྱ་ཉིད་ཀྱིས་སོ། །སྙིང་པོའི་ངག་ཀླུའི་རྒྱལ་པོས་བཟླ་བ་སྟེ་བཀའ་བསྒོ་ཞིང་དེ་བཞིན་དུ་ལས་ལ་ཉེ་བར་སྦྱོར་བའོ། །གལ་ཏེ་མ་གྲུབ་ན་དབང་བསྐུར་བར་གནས་པའི་རྡོ་རྗེ་རིན་ཆེན་གྱིས་ནམ་ མཁའ་ལས་ཐམས་ཅད་ཀྱི་བཀའ་བསྒོ་བའོ། །ཆོས་ཀྱི་ཕྱག་རྒྱ་ཐམས་ཅད་ཀྱི་ཚོགས་ནི་འདིའོ། །དོན་ཡོད་ཐོགས་མེད་གྲུབ་པ་དང་། ལས་ཀྱི་ཚོགས་ནི་སྒྲུབ་པ་དང་། །ངག་གི་ཕྱག་རྒྱའི་བཀའ་བསྒོ་བ། །ཐམས་ཅད་མྱུར་དུ་མཁའ་ལས་བྱུང་། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་ དཔས་གསུངས་སོ། །དབང་བསྐུར་བ་ཐམས་ཅད་ཀྱི་ཆོ་ག་རྒྱས་པའོ།། །།དེ་ནས་ཕྱིའི་རྒྱུད་ནི་ཕྱག་རྒྱ་ཆེན་པོ་ནི་གཡོན་པར་ཁམ་ཕོར་དང་གཡས་ན་མདའ་གཏོད་པའོ། །དེ་རྣམས་ཀྱི་དམ་ཚིག་ནི་འཇུག་པ་ལ་བྱ་སྟེ། ལག་པ་གཉིས་ཀྱི་མཐེ་བོ་དང་མཐེ་ཆུང་གི་གདུ་བུས་ལུ་གུ་རྒྱུད་བཅིང་ བར་བྱས་ལ་མཛུབ་མོ་དང་དབུས་མ་དང་། སྲིན་ལག་བསྙམས་ཏེ་རྩེ་གསུམ་པས་མཚན་པ་ནི་མིང་པོ་རྣམས་ཀྱིའོ། །ཇི་ལྟ་བ་བཞིན་དུ་བཟུང་བས་ལྷ་མོ་རྣམས་ཀྱིའོ། །རྡོ་རྗེ་བསྡམས་པའི་དབུས་མ་དང་སྲིན་ལག་གིས་སོར་མོའི་རྩེ་མོ་བཞི་ལ་མཛུབ་མོ་དང་མཐེའུ་ཆུང་བཞིའི་རྩེ་མོ་འདུས་པ་ནི་ལྷ་མོ་ རྣམས་ཀྱིས་འདའ་བར་དཀའ་བའི་དམ་ཚིག་གོ། །སྲིང་མོ་བཞིའི་དཀྱིལ་འཁོར་གྱི་ཕྱག་རྒྱའོ། །གང་གི་ཚེ་དཀྱིལ་འཁོར་གྱི་བརྟག་པར་མ་ནུས་ན་དེའི་ཚེ་འདི་བཅིངས་ཏེ་བལྟས་ན་དཀྱིལ་འཁོར་བརྟག་པ་དང་མཐོང་བ་དང་མཆོད་པ་ཅི་དགར་འགྲུབ་པར་འགྱུར་རོ། །གདེངས་ཀ་ཅན་གྱི་དབང་པོ་རྣམས་
- 254a
ཀྱི་ནི་མཐེ་བོང་བཅིངས་ནས་ཕྱི་རོལ་དུ་ཁ་བལྟས་པའི་སོར་མོའི་གདེངས་ཀ་སྒྲེང་བསྟེ། །ཀླུ་ཐམས་ཅད་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བའི་དམ་ཚིག་སྟེ། གལ་ཏེ་འདའ་བར་བྱེད་ན་འཆི་བར་འགྱུར་རོ། །ལྟོ་འཕྱེ་ལག་པ་སྟེ་ཐམས་ཅད་སྒྲུབ་ པར་བྱེད་པའོ། །དབུས་མ་སྲིན་ལག་བཞིའི་མདུད་པ་ལེགས་པར་བྱེད་པའི་སྦྱོར་བས་ཉེ་བར་སྟོད་ཅིང་བསྡུས་ལ་མཐེའུ་ཆུང་གཉིས་ཀྱི་རྩེ་མོ་གཉིས་ཀྱིས་བརྡེག་པར་བྱ་སྟེ་ཉེ་བར་འཕེལ་བ་དུག་ཐམས་ཅད་འབར་བའོ། །ཀུན་ནས་བསྡུས་ན་དུག་ཐམས་ཅད་འཆིང་བའོ། །འདི་ཉིད་ཀྱིས་དུག་ ཐམས་ཅད་བཟའ་བ་དང་འཕོ་བ་དང་དུག་མེད་པར་བྱ་བའོ། །གདུག་པའི་དཀྱིལ་འཁོར་ནི་རྡོ་རྗེ་ཁུ་ཚུར་གྱིས་བཟུང་བའི་རྡོ་རྗེ་ཁྲོས་ནས་མྱུར་དུ་གཞིག་པར་བྱའོ། །ཕྱིའི་ཕྱག་རྒྱའི་རྒྱུད་དོ།། །།དེ་ནས་བཅོམ་ལྡན་འདས་ཐམས་ཅད་མཆོག་དབང་ཕྱུག་དམ་པ་སྣ་ཚོགས་པའི་ཕྱག་རྒྱ་ནི་རྡོ་རྗེ་ ཐལ་མོ་མཉམ་གཞག་ནས། བ་དན་གསུམ་ནི་ཡོངས་སུ་བཟུང་། །རྡོ་རྗེ་ཁྱབ་འཇུག་ཅེས་བྱ་བ། །དོར་ན་ཐམས་ཅད་གཅོད་པར་བྱེད། །རྡོ་རྗེ་འཁོར་ལོའི་ཕྱག་རྒྱས་ཉོན་མོངས་པའི་དགྲ་ཐམས་ཅད་ཀྱི་མགོ་རྣམས་བཅད་ནས་མཆོག་ཏུ་བྱུང་བ་ཐམས་ཅད་གྲུབ་བོ། །མཐེའུ་ཆུང་མཐེ་བོང་དང་སྦྲེལ་བའི། ། ལག་གཉིས་སྟེང་དང་འོག་ཏུ་ནི། །དབུས་མ་གསུམ་གྱི་རྩེ་གསུམ་མཚན། །རྡོ་རྗེ་འཛིན་མ་ཞེས་སྒྲུབ་པའོ། །རྡོ་རྗེ་དམ་ཚིག་ཕྱག་རྒྱ་རྡོ་རྗེ་གཏུམ་པའི་དབང་ཕྱུག་མ་ཞེས་བྱ་བ་དོན་ཡོད་པའི་དམ་ཚིག་གོ། །རྡོ་རྗེ་པདྨ་མཉམ་གཞག་ནས། །གང་དོར་ཅི་བཞིན་དེ་བཞིན་དུ། །ཤིན་ཏུ་ཐོབ་དཀའི་ སངས་རྒྱས་ཀྱང་། །བསྒྲུབ་པ་བཟླས་པས་སྒྲུབ་པར་བྱེད། །རྡོ་རྗེ་ཆོས་ཉིད་ཅེས་བྱ་བའི་ཕྱག་རྒྱ་སྒྲོལ་མའོ། །མཛུབ་མོ་བསྡམས་པའི་ཕྱི་རོལ་དགུག །མཐེ་བོ་རྡོ་རྗེ་བཀབ་པ་སྟེ། །རྡོ་རྗེ་ཆེན་པོའི་ནོར་བུ་སྟེར། །ཞེས་བྱ་བ་ནི་རྡོ་རྗེ་ནོར་བུ་ཞེས་བྱ་བའི་ཕྱག་རྒྱའོ། །དེ་ནས་ཐམས་ཅད་ཀྱི་དབང་ ཕྱུག་དམ་པས་བསྒྲུབས་པའི་དངོས་གྲུབ་ཐམས་ཅད་ཀྱི་ཚོགས་ཀྱི་ཕྱག་རྒྱའི་རྒྱུད་ནི་འདི་ཡིན་ཏེ། དེ་ལ་དང་པོར་རེ་ཞིག་དང་པོའི་དངོས་གྲུབ་བརྒྱ་རབ་ཏུ་སྒྲུབ་པར་བྱེད་པའི་ཕྱག་རྒྱ་རབ་ཏུ་སྒྲུབ་པར་བྱེད་པའི་ཕྱག་རྒྱ་ཆེན་པོ་སྟོང་དུ་འགྱུར་ཏེ། ཅི་ལྟ་བ་བཞིན་དུ་དམ་ཚིག་ཕྱག་རྒྱ་མཚན་རྣམས་ཀྱིས་ལག་པ་
- 254b
གཡས་པ་དང་། གཡོན་པ་དག་གི་རྡོ་རྗེ་ཆེན་པོའི་སྦྱོར་བས་ལས་ཐམས་ཅད་ཀྱི་དངོས་གྲུབ་སྒྲུབ་པར་བྱེད་པའི་སྟོང་ཉིད་དུ་འགྱུར་ཏེ་རྡོ་རྗེ་བསྡམས་པ་ནང་དུ་བཅིངས་པས་སོ། །དེ་ལྟར་རང་གི་ཕྱག་མཚན་གྱི་ཁུ་ཚུར་རྡོ་རྗེ་གར་ལས་བྱུང་བའི་ཕྱག་རྒྱ་སྟོང་དང་པོའི་ལས་ཀྱི་ཚོགས་བརྒྱ་སྒྲུབ་པར་བྱེད་ པའི་རྡོ་རྗེ་ལས་བྱེད་པ་གསུམ་མོ། །དེ་ལྟར་ལག་པ་གཡས་པ་དང་། གཡོན་པའི་ཅིག་ཤོས་ཀྱིས་ལས་ཐམས་ཅད་རབ་ཏུ་སྒྲུབ་པར་བྱེད་པའི་ལས་ཀྱི་ཕྱག་རྒྱ་སྟོང་བཞི་པའོ། །དེ་ལྟར་མ་ལུས་པའི་ཕྱག་རྒྱ་བཅིང་བ་ནི་ལག་པ་གཅིག་གིས་ཕྱག་རྒྱ་ཐམས་ཅད་བཅིང་བ་རབ་ཏུ་སྒྲུབ་པའོ། །དེ་ ལྟར་འགྲོ་བ་ཀུན་དོན་དུ། །འཁོར་དང་དམ་ཚིག་ལས་དང་བཅས། །ཀུན་མཆོག་དབང་ཕྱུག་དམ་པ་ནི། །རྡོ་རྗེ་སེམས་དཔས་སྒྲུབ་པར་མཛད། །དེ་ལྟར་གསང་བ་རྒྱ་ཆེན་རྨད་དུ་བྱུང་། །མཆོག་ཏུ་འགྲོ་བ་ཐམས་ཅད་སྦྱོར་བྱེད་པ། །མཆོག་དང་པོ་ཡི་བླ་མ་བླ་ན་མེད། །གསལ་བའི་ རྒྱུད་ནི་ང་ཡིས་ཡང་དག་བཤད། །དཔལ་མཆོག་དང་པོ་རྟོག་པའི་རྒྱལ་པོ་ལས་རིགས་ཐམས་ཅད་ཀྱི་ཕྱག་རྒྱའི་རྒྱུད་དོ།། །།དེ་ནས་སྟོན་པ་རྡོ་རྗེ་འཛིན། །གསང་བ་ཀུན་གྱི་བདག་བརྟན་པས། །དེ་ཉིད་ཕྱག་རྒྱའི་རྒྱུད་ཆེན་པོའི། །མཚོན་ཆ་དམ་པ་འདི་གསུངས་སོ། །དེ་ནས་ བཅོམ་ལྡན་འདས་རྡོ་རྗེ་སེམས་དཔའི་རྟོག་པ་ཐམས་ཅད་ཀྱི་གསང་བའི་དཀྱིལ་འཁོར་གྱི་རྟོག་པའི་ཚོགས་མཆོག་ཏུ་མཁས་ཤིང་ཕྲ་བ། རྒྱ་ཆེ་ལ་ཟབ་པ། བསམ་གྱིས་མི་ཁྱབ་པ་ཚད་མེད་པ། གསལ་ཞིང་མཉམ་པ་མེད་པ། བླ་ན་མེད་པའི་བླ་མ་མཐར་ཐུག་པ་མེད་པའི་དངོས་གྲུབ་ཀྱི་ གསང་བ་བསྒྲུབ་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་རྣམས་སྒྲུབ་པ་པོ་དོན་ཡོད་ཅིང་ཐོགས་པ་མེད་པ་བཤད་པར་བྱའོ་ཞེས་བྱ་བ་བཅོམ་ལྡན་འདས་མཆོག་ཏུ་གསང་བས་གསུངས་སོ། །མ་མཆུ་སོ་རྣམས་ཀྱིས་བཟུང་ལ་དགའ་བ་ཆེན་པོས་དང་པོའི་རྡོ་རྗེའི་ལྟ་ བས་བལྟ་ཞིང་བྱེད་པ་དག་གིས་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་སྒྲུབ་པར་བྱེད་པའོ། །བདེ་བ་ཆེན་པོའི་གསང་བ་ཆེན་པོའི་རྡོ་རྗེ་རྡོ་རྗེ་སྤྱན་ཞེས་བྱ་བའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་ཀྱི་བཞད་པ་ཆེན་པོས་དགོད་ཅིང་བརྟན་པའི་རྡོ་རྗེ་
- 255a
ལྟ་བུའི་བྱེད་པ་དག་གིས་དེ་བཞིན་གཤེགས་པ་ཐམས་ཅད་ཀྱི་ལས་རྣམས་སྒྲུབ་པར་བྱེད་པ་སྟ། དེ་བཞིན་གཤེགས་པ་ཐམས་ཅད་ཀྱི་སྤྱན་ཞེས་བྱ་བའི་ཕྱག་རྒྱའོ། །ཁྲོ་གཉེར་དང་བཅས་པ། ཁྲོ་བོའི་རྡོ་རྗེ་ལྟ་བ་དང་བས་པའི་བྱེད་བདག །སྣའི་དབུགས་ཆེན་པོའི་ཡི་གེ་ཧཱུྃ་ གིས་རྡོ་རྗེ་ཐམས་ཅད་ཀྱི་དངོས་གྲུབ་སྟེ། རྡོ་རྗེ་ཉི་མ་ལྟར་མེ་འབར་བའི་ལྟ་བའི་སྤྱན་ཞེས་བྱ་བའི་ཕྱག་རྒྱའོ། །དེ་བས་ཅུང་ཟད་འཛུམ་པས་དངོས་གྲུབ་ཐམས་ཅད་ཀྱི་ལས་ཀྱི་ཡེ་ཤེས་ཀྱི་རྡོ་རྗེ་ལྟ་བའི་བྱེད་པ་རྣམས་ཀྱིས་མཆུ་མཉམ་པའི་ཏིང་ངེ་འཛིན་རྡོ་རྗེ་ལ་སོགས་པའི་དངོས་གྲུབ་ཐམས་ཅད་ཀྱི་ལས་ ཀྱི་ཡེ་ཤེས་ཀྱི་ཚོགས་རྣམས་སྒྲུབ་པར་བྱེད་པ་སྟེ་པདྨ་ཆེན་པོའི་སྤྱན་ཞེས་བྱ་བའི་ཕྱག་རྒྱའོ། །བསྙེམས་པ་དང་བཅས་པའི་ཏིང་ངེ་འཛིན་གྱིས་ཕྲ་བར་འཛུམས་པའི་ལྟ་བའི་བྱེད་པ་རྣམས་དང་། བཞིན་འཛུམ་པ་དང་། བཞད་པས་ནམ་མཁའ་ལ་དངོས་གྲུབ་ཐམས་ཅད་ཀྱི་ལས་ཀྱི་ཚོགས་སྒྲུབ་ པར་བྱེད་པ་སྟེ་རྡོ་རྗེ་ཆེན་པོ་ནི་ནོར་བུའི་སྤྱན་ཞེས་བྱ་བའི་ཕྱག་རྒྱའོ། །དོན་ཡོད་ཐོགས་མེད་གྲུབ་པ་དང་། །བདེན་པའི་བདག་ཉིད་འཇིགས་པ་མེད། །སངས་རྒྱས་ཀུན་དང་བདག་གིས་ཀྱང་། །གསང་བའི་ཕྱག་རྒྱ་ལེགས་གྲུབ་སྩོལ། །དཀྱིལ་འཁོར་དུ་ནི་མ་ཞུགས་ཀྱང་། །དེ་ནས་དེ་ཕྱིར་ མཆོག་དང་པོ། །བཅོམ་ལྡན་རྡོ་རྗེ་སེམས་དཔའ་མཆོག །དང་པོ་ཤིན་ཏུ་མཁས་ཤིང་ཕྲ་ལ་ཟབ་ཅིང་རྒྱ་ཆེ་བ་བསམ་གྱིས་མི་ཁྱབ་པ་སྟེ། མཆོག་གི་མཆོག་ནི་དང་པོ་དང་། །མཆོག་ཏུ་གསང་བ་དམ་པ་སྟེ། །འཛུམ་པའི་ཕྱག་རྒྱ་ལ་སོགས་ཚོགས། །རྡོ་རྗེ་སེམས་དཔས་གསུངས་ པ་ཡིན། །རྡོ་རྗེ་འཆང་ཆེན་སློབ་དཔོན་ནི། །མཆོག་ཏུ་དང་ཞིང་རབ་དགའ་བས། །སྙིང་པོ་ལ་སོགས་རྣམས་མེད་ཀྱང་། །མྱུར་དུ་ཐམས་ཅད་སྒྲུབ་པར་བྱེད། །སྙིང་པོ་ཕྱག་རྒྱ་སྔགས་རིག་པ། །སྒྲུབ་པ་འདི་ནི་རྨད་བྱུང་སྟེ། །དངོས་གྲུབ་ཐམས་ཅད་རབ་སྒྲུབ་པས། །མ་གྲུབ་ རྣམས་ཀྱང་འགྲུབ་པར་འགྱུར། །གང་ཞིག་གྲུབ་པར་མ་གྱུར་དང་། །བསོད་ནམས་ཕུན་ཚོགས་མི་ལྡན་ན། །བདག་ཉིད་དམ་ནི་རྡོ་རྗེ་སེམས། །བསྒྲུབས་ན་དེ་ནི་མྱུར་དུ་འགྲུབ། །གལ་ཏེ་རྡོ་རྗེ་སེམས་དཔའ་མཆོག །སྙིང་པོ་སོགས་དང་ཉེ་སྙིང་པོས། །བསྒྲུབ་པར་བྱས་ཀྱང་མ་
- 255b
གྲུབ་ན། །འཛུམ་པའི་ཕྱག་རྒྱས་བསྒྲུབ་པར་བྱ། །དེ་ཕྱིར་གསང་བའི་བཙུན་མོ་འདི། །རྡོ་རྗེ་སེམས་དཔས་རབ་དགའ་བྱེད། །རྡོ་རྗེ་སེམས་དཔའ་དགའ་བ་ཆེ། །དགྱེས་པ་དེ་ཡིས་མྱུར་དུ་འགྲུབ། །དེ་ཉིད་ཆེན་པོ་འདི་གྲུབ་པ། །དམ་པ་མཆོག་གི་བདག་ཉིད་ནི། །གསང་ བ་མཆོག་ཏུ་བསོད་ནམས་ལྡན། །སོ་སོའི་སྐྱེ་བོ་ལ་བརྗོད་མིན། །དེ་ཉིད་གྲུབ་པའི་རྗེས་འབྲང་བའི། །རྡོ་རྗེ་སེམས་དཔའི་གྲུབ་པ་གང་། །གལ་ཏེ་དངོས་གྲུབ་མཆོག་འདོད་ན། །དེ་བཞིན་གཞན་ལ་སྦྱིན་མི་བྱ། །གང་གིས་གྲུབ་པར་མ་གྱུར་ན། །དེ་ལ་དེ་ཉིད་སྦྱིན་པར་བྱ། ། དེ་ཉིད་འཛུམ་པས་མྱུར་དུ་ནི། །བདག་བྱིན་བརླབས་པས་འགྲུབ་པར་འགྱུར། །དེ་ཉིད་ཆེན་པོ་དག་པ་འདི། །རྡོ་རྗེ་ཅན་གྱི་མཚོན་ཆ་མཆོག །ཕྱག་རྒྱའི་རྒྱུད་ནི་བླ་མེད་པ། །མཆོག་ཏུ་གསང་བ་བཤད་པ་ཡིན། །དེ་ཉིད་དད་པའི་རྗེས་འབྲང་བའི། །རྡོ་རྗེ་སློབ་དཔོན་ཀུན་མཆོག་ལ། ། གལ་ཏེ་དངོས་གྲུབ་མཆོག་འདོད་ན། །གཞན་རྣམས་ལ་ཡང་དེ་བཞིན་སྦྱིན། །ཕྱག་རྒྱའི་རྒྱུད་ནི་གཅིག་པུ་འདི། །བདག་ཉིད་གང་ལ་ཡོད་གྱུར་ན། །བདུད་ལ་སོགས་པ་རྣམས་ཀྱིས་ནི། །མི་ཐུབ་པ་དང་མི་སོད་འགྱུར། །དེ་ལ་རྒྱལ་བ་རྡོ་རྗེ་འཛིན། །ཀུན་མཆོག་དངོས་གྲུབ་ཀུན་ གསོལ་བ། །ཀུན་གསོལ་ཀུན་བྱེད་ཐམས་ཅད་དུ། །བཀའ་བསྒོ་བ་ཀུན་གྲུབ་པར་འགྱུར། །དཔལ་མཆོག་དང་པོ་གསང་བའི་བླ་མ་དམ་པའི་དཔལ་རང་གི་དམ་ཚིག་གི་བླ་ན་མེད་པའི་མཆོག་ཏུ་གསང་བའི་ཕྱག་རྒྱའི་ཆོ་གའོ།། །།དེ་ནས་བཅོམ་ལྡན་འདས་དཔལ་མཆོག་དང་པོ་རྡོ་རྗེ་ སེམས་དཔའི་མཆོག་དང་པོ་མཆོག་ཏུ་མཁས་ཤིང་ཕྲ་ལ་ཟབ་ཅིང་རྒྱ་ཆེ་བ་བསམ་གྱིས་མི་ཁྱབ་ལ་མཐའ་མེད་ཅིང་ཤིན་ཏུ་མཐའ་ཡས་པ་ཚད་མེད་ཅིང་གཞལ་དུ་མེད་པ། བླ་ན་མེད་པ། དོན་ཡོད་ཅིང་ཐོགས་པ་མེད་པའི་མཆོག་གི་དེ་ཁོ་ན་ཉིད་ཀྱི་སྙིང་པོ་མཆོག་ཏུ་གསང་བའི་སྙིང་པོ་མཆོག་ཏུ་གསང་བ་ ཞེས་བྱ་བ་ཐམས་ཅད་ཀྱི་མཆོག་གི་དངོས་གྲུབ་ཆེན་པོའི་བདག་པོ་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་མི་འགྱུར་བའི་དམ་པ་བླ་ན་མེད་པའི་གསང་བ་དང་། རབ་ཏུ་དགའ་བ་ཐམས་ཅད་དང་། བདེ་བ་དང་ཡིད་བདེ་བའི་དངོས་གྲུབ་ཀྱི་མཆོག་སྒྲུབ་
- 256a
པར་བྱེད་པ་དང་། མཆོག་གི་ཕྱག་རྒྱའི་རྒྱུད་བཤད་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཙུམ་བ་ན་དང་། །འཁྱུད་པ་ལ་སོགས་པའི་བཅོམ་ལྡན་འདས་མཆོག་དང་རྡོ་རྗེ་སེམས་དཔའི་ཕྱག་རྒྱ་ཐམས་ཅད་ནི་དགའ་བ་ཆེན་པོ་དཔལ་རྡོ་རྗེ་དོན་ཡོད་པའི་ དགའ་བའི་དམ་ཚིག་རྣལ་འབྱོར་ཞེས་བྱ་བ་སྟེ་ཐམས་ཅད་རྣལ་འབྱོར་ཞེས་བྱ་བ་གང་བརྗོད་པའོ། །དེ་གང་དང་གང་ལ་ཉེ་བར་སྦྱོར་བ་དེ་དང་དེར་བཅོམ་ལྡན་འདས་ནི། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ལྷག་པའི་ལྷ། །བྱིན་རླབས་མཆོག་ནི་རྟགས་མཛད་ནས། །རྡོ་རྗེ་ སེམས་དཔའ་མྱུར་དུ་གྲུབ། །ཙུམ་བ་ན་དང་འཁྱུད་པ་ལ་སོགས་པའི་རེག་བྱའི་རྒྱས་བཏབ་པ་ཙམ་གྱིས་ཀྱང་མ་ལུས་ཤིང་ལུས་པ་མེད་པ་དང་། ལྷག་མ་མེད་པ་ཐམས་ཅད་ཀྱི་མཆོག་དབང་ཕྱུག་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཡིད་ཀྱི་ འདོད་པ་གྲུབ་པར་བྱེད་པ་ཡིན་ནོ་ཞེས་བྱ་བ་ཤིན་ཏུ་མཆོག་ཏུ་གསང་བའི་ཕྱག་རྒྱའོ། །རྣམ་པར་འཕྲུལ་བ་དང་བཅས་པའི་འཛུམ་ཞིང་གཡོ་བའི་མིག་གི་ཟུར་གྱིས་ལྟ་བའི་ཕྱག་རྒྱ་སྟེ། །བཅོམ་ལྡན་འདས་ཀྱི་དགའ་བ་ཆེན་པོའི་རྡོ་རྗེ་དོན་ཡོད་པའི་མདའ་ཞེས་བྱ་བའི་རྒྱས་བཏབ་པས་ཐམས་ ཅད་རྗེས་སུ་ཆགས་པ་དང་། །དགུག་པ་དང་། །དབང་དུ་བྱ་བ་དང་། དངོས་གྲུབ་མཆོག་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཡིད་ཀྱིས་འདོད་པ་རྣམས་སྒྲུབ་པར་བྱེད་པའོ། །འཛུམ་ཞིང་ཅུང་ཟད་ཕྱེ་བའི་མིག་གི་ལྟ་བ་ནི་མཆོག་ཏུ་དགའ་བའི་དཔལ་རྡོ་རྗེ་སྤྱན་ ཞེས་བྱ་བའི་ཕྱག་རྒྱ་ཐམས་ཅད་སྒྲུབ་པར་བྱེད་པ་སྟེ་འདིས་ལྟ་ཞིང་བཏུང་བར་བྱའོ། །འདི་ནི་བཅོམ་ལྡན་འདས་ཀྱི་རབ་ཏུ་དགའ་བ་ཆེན་པོ་དཔལ་རྡོ་རྗེ་དོན་ཡོད་དགའ་བའི་བཅུད་ཀྱིས་ལེན་གྱི་མཆོག་གི་དངོས་གྲུབ་ཅེས་བྱ་བའི་ཕྱག་རྒྱ་སྟེ་ཚེ་ཟད་པ་ཐམས་ཅད་ཀྱང་འདིས་རྡོ་རྗེ་སེམས་དཔའི་ན་ ཚོད་གཞོན་པ་དང་། ནད་མེད་པ་དང་། གཟུགས་དང་། སྟོབས་དང་། གཟི་བརྗིད་ཀྱི་སྟོབས་དང་། སྤྲོ་བ་དང་། དངོས་གྲུབ་ཀྱི་མཆོག་ཐམས་ཅད་དང་། དཔལ་དང་སྐལ་བ་བཟང་པོ་དང་། དགའ་བ་ཆེན་པོ་དང་། ཤིན་ཏུ་བདེ་བ་ཐམས་ཅད་དང་། ཡིད་བདེ་བ་དང་། དངོས་
- 256b
གྲུབ་ཀྱི་མཆོག་ཐོབ་པ་སྟེ། ཇི་སྲིད་དངོས་གྲུབ་ཀྱི་མཆོག་ཐམས་ཅད་ཀྱི་ལས་ཀྱི་ཚོགས་མཆོག་ཏུ་དམ་པ་གྲུབ་པ་སྟེ། བཅོམ་ལྡན་འདས་ཡུམ་གྱི་རྒྱས་བཏབ་པ་ཙམ་གྱིས་སྐད་ཅིག་མ་གཅིག་གིས་གྲུབ་པའོ། །བསྙེམས་པ་དང་བཅས་པའི་གཡོན་པའི་མིག་དགོད་ཅིང་སྟོད་པ་ནི་བཅོམ་ ལྡན་འདས་དགྱེས་པ་ཆེན་པོའི་དཔལ་རྡོ་རྗེ་དོན་ཡོད་པའི་དགའ་བའི་རྒྱལ་མཚན་མཆོག་གི་དཔུང་རྒྱན་ཞེས་བྱ་བའི་ཕྱག་རྒྱ་སྟེ། འདིས་རྒྱས་བཏབ་པས་ཐམས་ཅད་ལས་རྣམ་པར་རྒྱལ་བར་བྱེད་པ་དང་། ཕྱག་བྱེད་དུ་བཅུག་པ་དང་། རབ་ཏུ་སྒྲུབ་པར་བྱེད་པ་དང་། ཇི་སྲིད་མཆོག་ ཐམས་ཅད་གྲུབ་ཅིང་དངོས་གྲུབ་ཆེན་པོའི་དབང་ཕྱུག་ཉིད་རབ་ཏུ་སྒྲུབ་པར་བྱེད་པའོ། །སྒེག་པ་དང་བཅས་པའི་ལྟ་བ་དང་། འཛུམ་པ་དང་གསོང་ཞིང་ཕྱག་འཚལ་བ་དང་ལྡན་པ་ནི་བཅོམ་ལྡན་འདས་ཕྱག་རྒྱ་ཕྱག་འཚལ་བའི་ཕྱག་རྒྱ་སྟེ། དགའ་བ་ཆེན་པོ་དཔལ་དོན་ཡོད་པའི་ དབང་ཕྱུག་གི་ཀི་ལི་ཀི་ལ་ཞེས་བྱ་བའི་ཕྱག་རྒྱ་སྟེ། འདིས་རྡོ་རྗེ་སེམས་དཔའ་ལ་སོགས་པའི་བརྟན་པ་དང་གཡོ་བའི་དངོས་པོ་ཐམས་ཅད་ལ་རྒྱས་བཏབ་པས་འདུད་པར་གྱུར་ནས་དངོས་གྲུབ་མཆོག་ཐམས་ཅད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཀྱི་མཆོག་གི་ དམ་པའི་དངོས་གྲུབ་ཀྱིས་འགྲུབ་པར་འགྱུར་རོ། །རྣམ་པར་འཕྲུལ་པ་དང་། སྒེག་པ་དང་བཅས་པའི་འཛུམ་པའི་ཞལ་ཉིད་ནི་བཅོམ་ལྡན་འདས་མཆོག་དང་པོ་རྡོ་རྗེ་སེམས་དཔའི་དགའ་བ་ཆེན་པོའི་དཔལ་རྡོ་རྗེ་དོན་ཡོད་དགའ་བས་བརྩོན་པ་ཞེས་བྱ་བ་མཆོག་ཏུ་གསང་ བའི་རྡོ་རྗེ་འཛུམ་པའི་ཕྱག་རྒྱ་སྟེ། །འདིས་བཅོམ་ལྡན་འདས་རྡོ་རྗེ་འཛིན་པ་ཐམས་ཅད་ཀྱི་སློབ་དཔོན་མཆོག་དང་པོའི་གླུ་ནི། །ཀུན་མཆོག་དངོས་གྲུབ་ཆེན་པོ་ནི། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་ཀུན་རྒྱལ་པོ་སྟེ། །མི་འགྱུར་མཆོག་ནི་འགྲུབ་པར་འགྱུར། །རྣམ་པར་ འཕྲུལ་པ་དང་བཅས་པའི་སྒེག་པའི་འཛུམ་པའི་ཕྱག་རྒྱས་རྒྱས་བཏབ་པ་ཙམ་གྱིས་ཐམས་ཅད་ཀྱི་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་པོ་ཉིད་ལ་སོགས་པའི་དངོས་གྲུབ་ཐམས་ཅད་ལས་ཀྱི་ཚོགས་ཡིད་ཀྱི་འདོད་པ་རྣམས་གྲུབ་པར་བྱེད་དོ། །སརྦ་ཀུ་རུ་ཡ་ཐཱ་སུ་ཁྃ་ཞེས་
- 257a
བྱ་བ་བརྗོད་དེ། དེ་བཞིན་གཤེགས་པ་ཐམས་ཅད་ཀྱི་གསང་བ་ཐེག་པ་ཆེན་པོའི་མདོ་སྡེའི་དབང་པོའི་རྒྱལ་པོ་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་སྟེ། དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་ པར་རྟོགས་པའི་གསང་བའི་རྡོ་རྗེ་བྱིན་གྱིས་བརླབས་པ་ཞེས་བྱ་བ་འདི་རང་བཞིན་གྱིས་འོད་གསལ་བའི་ཕྱིར་ཆོས་ཐམས་ཅད་རྣམ་པར་དག་པ་ལ་སོགས་པ་མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་ཐོབ་པའི་ཡེ་ཤེས་དང་། མངོན་པར་ཤེས་ པ་དང་། མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཚོགས་རྣམས་སྒྲུབ་པར་བྱེད་པའོ། །རྣམ་པར་འཕྲུལ་པ་དང་བཅས་པའི་འཛུམ་ཞིང་སྨིན་མའི་ཁྲོ་གཉེར་རྡོ་རྗེ་ལྟ་བའི་ཕྱག་རྒྱ་ནི་བཅོམ་ལྡན་འདས་ཀྱི་ཁྲོ་བོ་ཀི་ལི་ཀི་ལ་ཞེས་བྱ་བའི་ཕྱག་རྒྱ་སྟེ། འདིས་རྒྱས་བཏབ་པས་རྡོ་རྗེ་སེམས་དཔའ་ལ་སོགས་པའི་བརྟན་པ་དང་གཡོ་བའི་དངོས་པོ་ཐམས་ཅད་རྗེས་སུ་ཆགས་པ་དང་། དགུག་པ་དང་། དབང་དུ་བྱ་བ་དང་། འབེབས་པ་དང་། གཞུག་པ་དང་། གར་དང་། གླུ་དང་། རྣམ་པར་འཕྲུལ་པ་སྟོན་པ་དང་། བདེན་ངག་ཐམས་ ཅད་དང་། གྲོལ་བ་དང་པྲ་དབབ་པ་ཐམས་ཅད་བསྒྲུབ་པ་དང་སྒྱུ་མ་ཐམས་ཅད་དང་རྨད་དུ་བྱུང་བ་ཐམས་ཅད་སོ་སོར་སྟོན་པ་དང་སྣ་ཚོགས་པའི་གཟུགས་ཐམས་ཅད་ཀྱིས་བྱ་བ་སྟོན་པ་དང་། ཐམས་ཅད་ལ་རྒྱས་བཏབ་པ་དང་། གནོད་པ་དང་། འདུལ་བ་དང་། གསད་པ་དང་། ཐམས་ཅད་ ཕྱིར་འདྲེན་པ་དང་། ཐམས་ཅད་སྒྲུབ་པ་དང་། མཆོག་གི་དངོས་གྲུབ་ལ་སོགས་པ་གཞོམ་དུ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་སྒྲུབ་པར་བྱེད་པའོ། །ཐམས་ཅད་དག་པའི་ཏིང་འཛིན་གྱིས། །ཐམས་ཅད་མཉམ་པ་ཉིད་ཀྱི་གཟུགས། །སྣ་ཚོགས་པ་ཡི་བྱ་བ་ལ། ། རབ་འཇུག་མཆོད་པ་བྱིན་གྱིས་བརླབ། །རྡོ་རྗེ་པདྨ་ཞེས་བྱ་བ་ནི་བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་དབང་ཕྱུག་གི་ཕྱག་རྒྱ་སྟེ། ཐམས་ཅད་རྣམ་པར་སྦྱོང་བ་དང་། སྲུང་བ་དང་། ཡོངས་སུ་སྦྱོང་བ་དང་། རིམས་ཐམས་ཅད་དང་། དུག་དང་། སྦྱར་བའི་དུག་དང་།
- 257b
གདོན་དང་། ནད་དང་། མཁའ་འགྲོ་མའི་ཕྱག་རྒྱ་ཉེ་བར་ཞི་བ་དང་། ཤི་བ་ཡང་དག་པར་གསོ་བ་དང་། དབང་ཕྱུག་ཐམས་ཅད་ཐོབ་པ་དང་། གཟུགས་སྣ་ཚོགས་པའི་བྱ་བ་ཐམས་ཅད་ལ་རབ་ཏུ་འཇུག་པ་ལ་སོགས་པའི་དོན་གྲུབ་པའི་དངོས་གྲུབ་མཐའ་ཡས་པ་དེ་བཞིན་གཤེགས་པ་ ཐམས་ཅད་ཀྱི་ཏིང་ངེ་འཛིན་གྱིས་རབ་ཏུ་བྱེད་པའོ། །ནམ་མཁའ་ཕྲ་བར་བསྐྱོད་པ་དག་གིས་རོལ་ཞིང་རྣལ་འབྱོར་ཐམས་ཅད་ཀྱིས་རྗེས་སུ་ཆགས་པར་བྱ་སྟེ། འདི་ལ་བཅོམ་ལྡན་འདས་ནམ་མཁའི་སྙིང་པོའི་རྡོ་རྗེ་བྱིན་གྱིས་བརླབས་པ་ཞེས་བྱ་བའི་ཕྱག་བྱ་བའི་ཕྱག་རྒྱ་སྟེ། འདིས་རྒྱས་ བཏབ་པས་བཅོམ་ལྡན་འདས་རྗེས་སུ་ཆགས་ཤིང་དགྱེས་པ་དང་། བརྟན་པར་རྗེས་སུ་ཆགས་ནས་ནམ་མཁའ་ཐམས་ཅད་ཀྱི་བདག་ཉིད་ཀུན་གྱི་དངོས་པོ་ཉིད་ཀྱི་ཕྱིར་བསམ་པ་ཐམས་ཅད་ཡོངས་སུ་རྫོགས་པ་དང་། མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ ཚོགས་ཡིད་ལ་འདོད་པ་རྣམས་སྒྲུབ་པར་བྱེད་པའོ་ཞེས་བྱ་བ་ཡང་གསུངས་སོ། །མཆོག་དང་པོ་ནི་མཆོག་ཉིད་དུ། །གསང་བ་དམ་པ་གསུངས་པ་ཡིན། །མིག་སོགས་ཕྱག་རྒྱས་རྒྱས་བཏབ་པའོ། །རྡོ་རྗེ་སེམས་དཔས་གསུངས་པ་ཡིན། །རྡོ་རྗེ་ཀུན་འཛིན་སློབ་དཔོན་གྱི། །ཙུམ་ བ་ན་དང་འཁྱུད་སོགས་ཀྱིས། །ཐམས་ཅད་རྣལ་འབྱོར་རྗེས་བསྒྲུབ་སྟེ། །མྱུར་དུ་ཀུན་ལ་རྒྱས་གདབ་བྱ། །སྙིང་པོ་ཕྱག་རྒྱ་སྔགས་རིག་པའི། །སྒྲུབ་པ་འདི་ནི་རྨད་བྱུང་སྟེ། །གྲུབ་པ་མེད་པ་རྣམས་ལ་ཡང་། །དངོས་གྲུབ་ཐམས་ཅད་རབ་སྒྲུབ་བྱེད། །གང་ལ་དངོས་གྲུབ་མེད་གྱུར་ དང་། །བསོད་ནམས་ཕུན་ཚོགས་མེད་པ་ཡང་། །བདག་ཉིད་རྡོ་རྗེ་སེམས་དཔའ་འམ། །རྒྱས་བཏབ་མྱུར་དུ་འགྲུབ་པར་འགྱུར། །གལ་ཏེ་རྡོ་རྗེ་སེམས་དཔའ་མཆོག །སྙིང་པོ་ལ་སོགས་ཉེ་སྙིང་པོས། །བསྒྲུབ་བྱ་གྲུབ་པར་མ་གྱུར་ན། །ཙུམ་བ་སོགས་ཀྱིས་རྒྱས་གདབ་ བྱ། །གང་ཕྱིར་གསང་བའི་ཕྱག་རྒྱ་ནི། །དངོས་གྲུབ་ཀུན་གྱི་བདེ་དམ་པ། །རྡོ་རྗེ་སེམས་དཔའི་མཆོད་པ་མཆོག །དེ་ཡིས་མྱུར་དུ་འགྲུབ་པར་འགྱུར། །དེ་ཉིད་ཆེན་པོ་འདི་གྲུབ་པ། །མཆོག་གི་བདག་ཉིད་དམ་པ་སྟེ། །མཆོག་ཏུ་གསང་བ་བསོད་ནམས་ལྡན། །སོ་སོའི་སྐྱེ་བོ་ལ་
- 258a
བརྗོད་མིན། །རྡོ་རྗེ་སློབ་དཔོན་སློབ་མ་མཆོག །དེ་ཉིད་དད་པའི་རྗེས་འབྲང་ལ། །གལ་ཏེ་དངོས་གྲུབ་མཆོག་འདོད་ན། །སྦྱིན་ཏེ་གཞན་ལ་སྦྱིན་མི་བྱ། །ཕྱག་རྒྱའི་རྒྱུད་འདི་འབའ་ཞིག་གི། །བདག་ཉིད་གང་ལ་ཡོད་གྱུར་ན། །བདུད་ལ་སོགས་པ་ཐམས་ཅད་ཀྱིས། ། མི་ཐུབ་པ་དང་སོད་མི་འགྱུར། །དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་དངོས་གྲུབ་ཀུན་སྩོལ་བ། །ཐམས་ཅད་མཛད་ཅིང་ཐམས་ཅད་མཁྱེན། །ཐམས་ཅད་སྒྲུབ་པར་མཛད་པ་ཡིན། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དཔལ་མཆོག་དང་པོ་ལས་མཆོག་ཏུ་ གསང་བ་ཞེས་བྱ་བའི་ཕྱག་རྒྱའི་རྒྱུད་ཕྱག་རྒྱ་བཅུ་པ་རྫོགས་སོ།། །།དེ་ནས་མཆོག་ཏུ་མཁས་ཤིང་ཕྲ་ལ་ཟབ་ཅིང་རྒྱ་ཆེ་བ་བསམ་གྱིས་མི་ཁྱབ་པ་ཤིན་ཏུ་མཐའ་ཡས་པ་ཚད་མེད་ཅིང་གཞལ་དུ་མེད་ཅིང་བརྗོད་ཀྱིས་མི་ལང་ཞིང་རབ་ཏུ་ཁྱབ་པ་མཆོག་ཏུ་གྲུབ་པ་ཞེས་བྱ་བའི་ཕྱག་རྒྱའི་རྒྱུད་བཤད་ པའོ་ཞེས་བྱ་བ་བཅོམ་ལྡན་འདས་མཆོག་ཏུ་གྲུབ་པའི་རྡོ་རྗེ་སེམས་དཔས་གསུངས་སོ། །དེ་ལ་ཕྱག་རྒྱ་བཅུ་ནི་བདག་ཉིད་ཐམས་ཅད་སྐྱེད་པར་བྱེད་པའོ། །རྡོ་རྗེ་སེམས་དཔའི་ཕྱག་རྒྱ་ཆེན་པོ་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་ལས་བྱུང་བའོ། །སྔོན་དུ་དང་པོའི་དངོས་གྲུབ་ཐམས་ཅད་ མཆོག་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མྱུར་དུ་སྒྲུབ་པར་བྱེད་པ་སྟེ། དེ་ལ་འདི་ནི་སྐུའི་ཕྱག་རྒྱ་སྟེ་བ་དན་གསུམ་པ་དང་ཁ་ཊྭཱྃ་གའི་ཕྱག་རྒྱ་བཅིངས་ནས་གཡོན་པ་དྲིལ་བུ་དང་བཅས་ཤིང་གཡས་པ་བསླང་བའི་ཚུལ་དུ་བྱེད་པ་སྟེ། སྒེག་པ་དང་བཅས་པའི་མཛུབ་མོ་ ལ་སོགས་པ་བཀྲོལ་བའི་གར་གྱིས་རྡོ་རྗེ་འདོད་པའི་དབང་ཕྱུག་མ་བསྟོད་པ་སྟེ་ཐམས་ཅད་ཀྱི་མཆོག་དངོས་གྲུབ་ཆེན་པོ་དབང་ཕྱུག་ཆེན་པོའི་མཆོག་གི་ཕྱག་རྒྱས་དགའ་བ་ཆེན་པོའི་དཔལ་རྡོ་རྗེ་དོན་ཡོད་པའི་དགྱེས་པའི་དམ་ཚིག་དངོས་གྲུབ་ཀྱི་རྣལ་འབྱོར་གྱི་དབང་ཕྱུག་མ་ཞེས་བྱ་བ་སྟེ། དེས་རྡོ་རྗེ་བསྙེམས་མ་ཡོངས་སུ་བཏང་བར་བྱས་ན་དངོས་གྲུབ་བཞིར་འགྱུར་རོ། །རྡོ་རྗེ་བསྙེམས་མ་དེ་ཉིད་ཀྱིས་རྒྱས་བཏབ་ན་ཐམས་ཅད་ཀྱི་མཆོག་གི་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་ཉིད་མི་འགྱུར་བའི་མཆོག་གོ། །མདའ་གསོར་བས་རྒྱས་བཏབ་ན་རྡོ་རྗེ་ལྷ་མོ་རྣམས་ཀྱང་རྗེས་
- 258b
སུ་ཆགས་པར་བྱེད་ན་བུད་མེད་གཞན་རྣམས་ལྟ་སྨོས་ཀྱང་ཅི་དགོས། རྡོ་རྗེ་ཀི་ལི་ཀི་ལས་རྒྱས་བཏབ་ན་ལྷ་དང་ལྷ་མ་ཡིན་གྱི་བུད་མེད་ཐམས་ཅད་ཀྱི་བུད་མེད་ཐམས་ཅད་རོལ་པར་བྱེད་ཅིང་མ་གྲུབ་ན་ཡང་ཐམས་ཅད་སྒྲུབ་པར་ནུས་པ་ཡིན་ནོ། །ཆུ་སྲིན་གྱི་རྒྱལ་མཚན་སྒྲེང་བའི་ཕྱག་རྒྱ་འདིས་ ཐམས་ཅད་ལས་རྣམ་པར་རྒྱལ་བ་དང་གསོད་པའོ། །རྡོ་རྗེ་འདོད་པའི་དབང་ཕྱུག་མས་ཡོངས་སུ་དགོད་ཅིང་ཕྲེང་བ་དོར་བའི་སྔགས་དང་ཕྱག་རྒྱས་བཏབ་པ་ཙམ་གྱིས་འདོད་པ་ཐམས་ཅད་ཀྱི་དབང་ཕྱུག་ཐོབ་པའོ། །མཆོག་ཏུ་གསང་བའི་རས་རིས་ཀྱི་ཕྱག་རྒྱ་ཅི་ལྟ་བ་བཞིན་དུ་བརྗོད་པར་ བྱའོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་མཆོད་པས་རབ་ཏུ་དགའ་བ་ལ་སོགས་པའི་མཆོད་པ་ཐམས་ཅད་ཐོབ་པ་མི་ཟད་པའོ། །རྡོ་རྗེ་སྟོད་པའི་ཕྱག་རྒྱས་སྲིད་པ་གསུམ་ཐམས་ཅད་སྐྱོད་པ་དང་དབང་དུ་བྱེད་པའོ། །རྡོ་རྗེ་ཧཱུྃ་མཛད་ཀྱི་ཕྱག་རྒྱ་དང་རྐང་པས་ལྷའི་གཟུགས་ བརྙན་མནན་ཅིང་རྒྱས་བཏབ་ནས་སྡིགས་མཛུབ་བྱས་ཏེ། ལྷ་ལ་སོགས་པའི་སེམས་ཅན་དེ་དང་དེ་རིང་པོར་མི་ཐོགས་པར་རྒྱས་བཏབ་པས་བཀའ་བསྒོ་བ་ཐམས་ཅད་དང་ལས་རྣམས་བྱེད་པར་འགྱུར་རོ། །སྟན་མཐོན་པོ་ལ་སྐྱིལ་ཀྲུང་ཕྱེད་པས་འདུག་སྟེ། རྐང་པ་གཡོན་པས་རྡོ་རྗེ་ སེམས་དཔའི་གཟུགས་བརྙན་ཡང་མནན་ནས་རྡོ་རྗེ་གསོར་ཞིང་རྡོ་རྗེ་སེམས་དཔའ་མནན་ནས། དངོས་གྲུབ་ཡིད་དུ་འོང་བ་ཐམས་ཅད་དང་ཕུན་སུམ་ཚོགས་པ་རྣམས་ཉམས་སུ་མྱོང་ན་ལྷ་ལ་སོགས་པའི་སེམས་ཅན་རྣམས་ལྟ་སྨོས་ཀྱང་ཅི་དགོས། གཡོན་པའི་རྡོ་རྗེ་ཁུ་ཚུར་གྱིས་རང་གི་ རྟགས་བཟུང་ནས་གཡས་པ་རྡོ་རྗེ་ལ་སོགས་པ་སྟོད་པའི་ཚུལ་གྱིས་འཛིན་ཅིང་། ཡིད་ལ་འདོད་པའི་ལྷའི་བུ་མོ་ཐམས་ཅད་ལ་རྒྱས་འདེབས་ཤིང་སྟོབས་ཀྱིས་རོལ་བར་བྱེད་པའམ་སྒྲུབ་པར་བྱེད་པ་སྟེ་རྡོ་རྗེ་སེམས་དཔའི་ཕྱག་རྒྱ་ཆེན་པོའོ། །དེ་ནས་དམ་ཚིག་གི་ཕྱག་རྒྱ་ནི་བདེ་བ་ཆེན་པོ་རྡོ་རྗེ་ དོན་ཡོད་པའི་དམ་ཚིག་ལས་བྱུང་བ་ནི་བཅུ་སྟེ་སྙིང་གར་སེན་མོ་འདྲུད་པའོ། །ལྕགས་ཀྱུ་བརྡེག་པའོ། །གཡོན་པའི་ལྕགས་ཀྱུ་ལ་གཡས་པ་དེ་གཞུག་པའོ། །ལྕགས་ཀྱུའི་རྩེ་མོ་བཙིར་བའོ། །ཕན་ཚུན་སེམས་བྲུད་པའི་སྙིང་གར་བྱས་པའོ། །ལྕེ་མཉམ་པར་བྱིན་པའོ། །སྙིང་གར་
- 259a
རྡོ་རྗེ་བརྟན་པར་རབ་ཏུ་བཞག་པའོ། །རྡོ་རྗེས་བྱ་བ་པའོ། །རྩེ་བའི་ཕྱག་རྒྱ་ཡང་ངོ་། །འདི་རྣམས་ཀྱིས་དངོས་གྲུབ་དང་། ཕུན་སུམ་ཚོགས་པ་དང་། བདེ་བ་དང་། ཕྱག་རྒྱ་དང་། དམ་ཚིག་དང་། དཀྱིལ་འཁོར་དང་། ཆོས་དང་། ཡེ་ཤེས་དང་། ལས་དང་། བདེ་བ་ཆེན་ པོ་ཐམས་ཅད་ཀྱི་དངོས་གྲུབ་རྣམས་དོན་ཡོད་པ་ཐོབ་པར་འགྱུར་རོ། །དེ་ནས་གསང་བའི་དམ་ཚིག་གི་རྡོ་རྗེ་བསྡམས་པ་ལས་བྱུང་བའི་ལས་བཅུ་ནི་དབུས་མའི་ལྕགས་ཀྱུས་སོ། །ཁ་སྦྱོར་གྱི་ནང་དུ་རྡོ་རྗེ་སོར་མོ་རྣམས་ཐམས་ཅད་ཀྱི་ལས་སོ། །མཐེ་བོང་རྡོ་རྗེའོ། །དེ་ཉིད་ཀྱིས་མཐིལ་གཉིས་ སུ་བྲུད་པའོ། །མཛུབ་མོ་རྡོ་རྗེའོ། །དེ་ཉིད་ཀྱི་ལྕགས་ཀྱུ་གཉིས་སོ། །དབུས་མའི་རྡོ་རྗེའོ། །དེ་ཉིད་ཀྱིས་སོར་མོའི་རྩེ་མོ་བཅིང་བར་བྱའོ། །སྲིན་ལག་གི་རྡོ་རྗེའོ། །དེ་ཉིད་ཀྱིས་སོར་མོའི་རྩེ་མོ་དག་གི་རོལ་མོའོ། །མཐེའུ་ཆུང་གི་རྡོ་རྗེའོ། །དེ་ཉིད་ཀྱིས་མཐེ་བོ་གཉིས་ཀྱི་སེན་མོ་བཙིར་ བའོ། །འདི་རྣམས་ཀྱིས་བཏབ་པས་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་སྒྲུབ་པ་དང་། རྗེས་སུ་ཆགས་པ་དང་། དབང་དུ་བྱེད་པ་དང་། དགུག་པ་དང་། རོལ་པ་དང་། ཆགས་པས་བཅིང་བ་དང་། ཐམས་ཅད་སྨྲར་གཞུག་པ་དང་། གར་བྱེད་དུ་གཞུག་པ་ དང་། དགོད་དུ་གཞུག་པ་དང་། གསོད་པའོ། །དེ་ནས་ལས་ཀྱི་དམ་ཚིག་གི་ཕྱག་རྒྱ་བཅུ་ནི་རྡོ་རྗེ་གར་གྱི་མཆོད་པ་ལྷ་དང་ལྷ་མ་ཡིན་གྱི་བུ་མོ་ཐམས་ཅད་དང་། བུ་མོ་གཞོན་ནུ་མ་ཐམས་ཅད་བརྟན་པར་རྗེས་སུ་ཆགས་པ་ནི་རྡོ་རྗེ་ལྟ་བས་སོ། །རབ་ཏུ་དགའ་བའི་སྒྲུབ་པ་ནི་མ་མཆུ་ནང་དུ་གཡོ་ བར་བྱེད་པས་མྱང་བ་དང་བཏུང་བའོ། །ཆགས་པ་བརྟན་ཞིང་ལྟུང་བ་ནི་དབུགས་རིང་པོར་གཏོང་བས་སོ། །དེ་ནས་ལས་འདོད་པ་ཐམས་ཅད་ཀྱི་དབང་ཕྱུག་ཐོབ་པ་ནི་དཔུང་པ་གཉིས་པ་སྟོད་པས་སོ། །ཐམས་ཅད་ཀྱིས་མཆོད་པར་འགྱུར་བ་ནི་སྙིང་གར་གཞུག་པས་སོ། །ཡོད་པ་ཐམས་ཅད་ རྙེད་པ་ནི་མིག་དགུག་པས་སོ། །འདོད་པའི་ཆགས་པ་བསྐྱེད་པ་ནི་དབུས་དང་བཅས་པའི་དམན་པའི་གདོང་གིས་བལྟ་བས་སོ། །ཐམས་ཅད་འབེབས་པའི་ཆོ་ག་ནི་རང་གི་སྙིང་ཕྲ་བར་བསྐྱོད་པའི་ལས་རྣམས་ཀྱིས་སོ། །འདོད་པའི་ཆགས་པ་གསད་པ་ནི་དབུགས་བཏང་བས་རང་ཉིད་ལྡང་
- 259b
བར་བྱེད་པས་སོ། །འདོད་པ་ཐམས་ཅད་ཀྱི་རྗེས་སུ་སྤྱོད་པ་ལ་སོགས་པའི་ལས་ཐམས་ཅད་ཀྱི་བྱེད་པ་ནི་བཀའ་བསྒོ་བས་སོ། །དེ་རྣམས་རྡོ་རྗེ་སེམས་དཔའ་ལ་སོགས་པའི་བརྟན་པ་དང་གཡོ་བའི་དངོས་པོ་ཐམས་ཅད་ལ་ཡང་ཉེ་བར་སྦྱོར་ན་དོན་ཡོད་གྲུབ་པས་སྐད་ཅིག་ཉིད་ཀྱིས་བརྟན་ ཞིང་མི་འགྱུར་བའི་དངོས་གྲུབ་ཀྱིས་རྒྱས་བཏབ་ན་འགྲུབ་པར་འགྱུར་རོ། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་ལས་ཀྱི་ཕྱག་རྒྱ་བཅུ་ནི་རྡོ་རྗེ་བསྙེམས་མའི་ཕྱག་རྒྱས་ཐམས་ཅད་བསྒྲུབ་པའོ། །རྡོ་རྗེ་མཚོན་ཆ་མས་ཐམས་ཅད་ལས་རྣམ་པར་རྒྱལ་བ་དང་ རྗེས་སུ་ཆགས་པའོ། །རྡོ་རྗེ་ཀི་ལི་ཀི་ལས་རབ་ཏུ་དགའ་བའི་རེག་བྱ་དང་དངོས་གྲུབ་ཐམས་ཅད་བདེ་བར་གྲུབ་པའོ། །རྒྱལ་མཚན་སྒྲེང་བས་འཐབ་མོ་ཐམས་ཅད་ལས་རྣམ་པར་རྒྱལ་བའོ། །རྡོ་རྗེ་འདོད་པའི་དབང་ཕྱུག་མས་བདག་པོ་ཆེན་པོ་ཉིད་དོ། །དུས་ཀྱི་མཆོད་པས་ མཆོད་པར་འགྱུར་བ་ཉིད་དོ། །རྡོ་རྗེ་གསོར་བས་ཐམས་ཅད་འདུལ་བའོ། །རྡོ་རྗེ་དོར་བས་ཐམས་ཅད་གསོད་པ་དང་། ཐམས་ཅད་འཕྲོག་པའོ། །གཡོན་པ་བསྙེམས་ཤིང་གཡས་པའི་རྡོ་རྗེ་ཁུ་ཚུར་གྱི་ལས་རྣམས་ཀྱིས་སྒྱུ་མ་དང་། རྫུ་འཕྲུལ་ཐམས་ཅད་དང་། སོ་སོར་སྟོན་པ་དང་། རྨུགས་པ་དང་། རེངས་པ་དང་། གཉིད་ལོག་ཏུ་གཞུག་པ་དང་། བསྐོར་བ་དང་། བསྐྲད་པ་དང་། འབྲུ་དང་། ལྟུང་བ་འཕོག་པ་དང་། དབང་དུ་བྱེད་པ་ལ་སོགས་པའི་ལས་ཐམས་ཅད་སྒྲུབ་པར་བྱེད་པའོ། །རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་བཅུ་ནི་རྡོ་རྗེ་ཐལ་མོ་ལས་བྱུང་བའོ། ། རྡོ་རྗེ་སྐུ་མཆོག་གི་དངོས་གྲུབ་ཐམས་ཅད་དོ། །མཛུབ་མོ་གཉིས་ཀྱི་ལྕགས་ཀྱུས་དངོས་གྲུབ་ཐམས་ཅད་དོ། །རྡོ་རྗེ་གནོད་སྦྱིན་གྱིས་བདུད་ཐམས་ཅད་ལ་སོགས་པའི་གདུག་པ་འདུལ་བའི་དེ་ཉིད་ཀྱིས་མཐེ་བོའི་རྡོ་རྗེས་བཀབ་པས་ཐམས་ཅད་རྙེད་པའོ། །དེ་ཉིད་ཀྱི་མཐེ་བོ་གཉིས་བཅུག་པའི་གཙུག་ ཏོར་རྡོ་རྗེས་ཐམས་ཅད་བསྲུང་བའི་མཐེ་བོ་རྡོ་རྗེ་ནང་དུ་བཅུག་པ་དེ་ཉིད་ཀྱིས་རྡོ་རྗེ་སེམས་དཔའ་ལ་སོགས་པའི་སེམས་ཅན་ཐམས་ཅད་རྗེས་སུ་ཆགས་པ་དང་། དགུག་པ་དང་། དབང་དུ་བྱེད་པ་བསྒྲུབ་པའོ། །མཐེའུ་ཆུང་རྡོ་རྗེ་སོར་མོ་གཉིས་ཀྱི་རྩེ་མོ་གཉིས་མཛུབ་མོ་གཉིས་ཀྱིས་
- 260a
ལེགས་པར་བཟུང་བས་མཐེ་བོ་ནི་དཔལ་དགུག་པ་དང་དབང་དུ་བྱེད་པའོ། །རྡོ་རྗེ་གནོད་སྦྱིན་གྱི་རྒྱལ་མོ་དེ་ཉིད་ཀྱིས་ནོར་ཐམས་ཅད་དང་དཔལ་དབྲོག་པའོ། །དེ་ཉིད་ཀྱི་དབུས་མ་གཉིས་ཀྱིས་སྲིན་ལག་གཉིས་ཀྱི་རྩེ་མོ་ཡོངས་སུ་བཙིར་བས་བདུད་ལ་སོགས་པའི་གདོན་ ལས་གྲོལ་བ་དང་། དབང་དུ་བྱས་ནས་ལས་ཐམས་ཅད་ལ་སྦྱོར་བའོ། །རབ་ཏུ་དགའ་བའི་རྡོ་རྗེས་ཡུལ་ཐམས་ཅད་ཀྱི་མཆོག་བསྒྲུབ་པའོ། །དེ་ནས་གསང་བའི་ཕྱག་རྒྱ་རབ་ཏུ་དགའ་བའི་རྡོ་རྗེ་ལས་བྱུང་བའོ། །སེམས་དཔའ་མནན་ནས་རྡོ་རྗེ་ལྷ་མོ་རོལ་དུ་གཞུག་པའོ། །དེ་ཡང་ རབ་ཏུ་དགའ་བའི་རྡོ་རྗེ་ཆེན་པོས་རྒྱས་བཏབ་པས་སོ། །རྡོ་རྗེ་དང་བཅས་པའི་རབ་ཏུ་དགའ་བའི་རྡོ་རྗེས་སོ། །དེ་བཞིན་གཤེགས་པ་ཐམས་ཅད་ཀྱི་ཆགས་པ་དང་བྲལ་བའི་འཁོར་ལོས་སོ། །མཛུབ་མོ་དང་། དབུས་མ་དང་། སྲིན་ལག་གི་འཁོར་ལོ་བསྒྲེང་བར་བྱས་ལ་མཐེ་བོ་ དང་། མཐེའུ་ཆུང་མཉམ་ལ་དྲལ་བར་བྱ་སྟེ། རབ་ཏུ་དགའ་བའི་རྡོ་རྗེ་བསྒྲུབ་པ་དེ་ཁོ་ན་ཉིད་ཀྱིས་རྒྱས་བཏབ་ཅིང་བསྒྲུབ་པར་འགྱུར་རོ། །བཙིར་བས་འདོད་པ་ཐམས་ཅད་རབ་ཏུ་སྒྲུབ་པར་བྱེད་པའོ། །མཛུབ་མོ་ལྕགས་ཀྱུས་འདོད་པ་ཐམས་ཅད་ཀྱི་བདེ་བ་དགུག་པའོ། །མཛུབ་ མོས་ཕྲག་དོག་ལ་སོགས་པའི་འདོད་པ་ཐམས་ཅད་ཀྱི་སྡུག་བསྔལ་རབ་ཏུ་ཞི་བའོ། །རྟག་ཏུ་བསྐྱོད་པས་རབ་ཏུ་དགའ་བ་འབེབས་ཤིང་དེ་ནས་བསྒྲུབ་པའོ། །སྐྱེ་གནས་གཡོ་བས་བུད་མེད་དང་སྐྱེས་པ་དག་གིས་རབ་ཏུ་དགའ་བ་ལ་འཇིག་རྟེན་ལས་འདས་པའི་འདོད་པ་ཐམས་ཅད་ཀྱི་ བདེ་བ་ཆེན་པོ་ཤིན་ཏུ་མཐའ་ཡས་པའོ། །ཁ་སྦྱོར་བཙིར་བས་ཅི་སྲིད་འཚོ་བའི་བར་དུ་འདུས་པ་དང་བྲལ་བ་ཡང་ངོ་། །རྟགས་ཀྱི་སེན་མོ་གཡོན་པའི་མཐིལ་བྲུད་པས་ཤིན་ཏུ་བརྟན་པའི་འདོད་པ་ལ་ཆགས་པ་ཉིད་དུ་འགྱུར་རོ། །གཞན་གྱི་འདོད་པ་ལ་མི་ལྟ་ཞིང་གཞན་ལ་མི་ འགྲོ་བར་ཤིན་ཏུ་བདེ་བ་དང་ཡིད་བདེ་བ་སྟེར་བའི་བུད་མེད་ཐམས་ཅད་འགྲུབ་པར་འགྱུར་རོ། །སྐྱེ་གནས་སུ་སེན་མོ་བྲུང་པས་སྐྱེས་བུ་རྣམས་སོ། །དེ་ནས་ཐམས་ཅད་ཀྱི་བདག་ཉིད་ཀྱི་གསང་བའི་ཕྱག་རྒྱ་བཅུ་སྟེ། །དེ་ལ་ལུས་ཐམས་ཅད་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་གཉིས་ཀྱིས་
- 260b
འཁྱུད་ལམ་མཆུ་སོ་རྣམས་ཀྱིས་བཟུང་སྟེ། །རྨོངས་པས་བདེ་བ་སྟེར་དུ་གཞུག །བསྲུབ་པས་རབ་ཏུ་དགའ་བའི་དངོས་གྲུབ་ཀྱིས་རྡོ་རྗེ་སེམས་དཔའ་ཤིན་ཏུ་འགྲུབ་པར་འགྱུར་རོ། །མཆོག་དང་པོའི་དངོས་གྲུབ་ཀྱིས་སུ་ར་ཏ་སྟཱྃ་ཞེས་བཅོམ་ལྡན་འདས་ལ་བརྗོད་ཅིང་དེ་ཁོ་ན་ཉིད་བསྐུལ་བས་ འགྲུབ་པར་འགྱུར་རོ། །རབ་ཏུ་དགའ་བའི་ཡེ་ཤེས་ཀྱིས་ཐམས་ཅད་བསྒྲུབ་པའོ། །ལག་པ་གཡོན་པའི་ཁུ་ཚུར་གསང་བར་རེག་ན་ཐམས་ཅད་བསྒྲུབ་པའོ། །བདེ་བ་ཆེན་པོ་རྡོ་རྗེ་ལས་བྱུང་བའི་རྡོ་རྗེ་ཆེན་པོའི་ལྟ་བས་ཐམས་ཅད་གྲུབ་པའོ། །སྨིན་མ་གྱེན་དུ་བཏེག་པས་ལྟུང་བ་སློང་བའོ། ། རང་གི་མ་མཆུ་ནང་དུ་མྱང་བས་སྐལ་བ་བཟང་པོ་ཆེན་པོ་བསྒྲུབ་པའོ། །རང་གི་ལྕེ་བསྐྱོད་པས་རང་ཉིད་ཀྱི་བདེན་པ་ཐམས་ཅད་དང་དེ་ཁོ་ན་ཉིད་གསལ་ཞིང་མི་སླུ་བར་སྨྲ་བའོ། །རང་གི་ལུས་ལ་འབེབས་པས་གཟུགས་ཐམས་ཅད་ཡོངས་སུ་བསྒྱུར་བ་སྟེ། རྡོ་རྗེ་སེམས་དཔའ་འམ་སངས་རྒྱས་ སུ་ཡང་འགྱུར་བ་ཡིན་ནོ། །རང་གི་བདག་ཉིད་རྡོ་རྗེ་བསྒོམས་པས་ནམ་མཁའ་ལ་འགྲོ་བའོ། །དེ་ནས་དང་པོ་ལས་ཐམས་ཅད་ཀྱི་ཕྱག་རྒྱ་བཅུ་ནི་རྡོ་རྗེ་ཐལ་མོ་ཁ་ཊྭཱྃ་གིས་སོ། །དངོས་གྲུབ་ཐམས་ཅད་རྡོ་རྗེ་ཁུ་ཚུར་དག་གིས་སོ། །དེ་བཞིན་གཤེགས་པའི་ཁུ་ཚུར་དག་གིས་དངོས་གྲུབ་ ཐམས་ཅད་དོ། །ཐམས་ཅད་གསོད་པ་ནི་ཁྲོ་བོའི་ཁུ་ཚུར་དག་གིས་སོ། །ཐམས་ཅད་སྦྱར་བ་ནི་པདྨའི་ཁུ་ཚུར་དག་གིས་སོ། །ནོར་ཐམས་ཅད་འབྲོག་པ་ནི་ནོར་བུའི་ཁུ་ཚུར་གྱིས་སོ། །ཐམས་ཅད་འབེབས་པ་ནི་ཐམས་ཅད་འབེབས་པའི་ཁུ་ཚུར་གྱིས་སོ། །ཐམས་ཅད་གར་བྱེད་དུ་ གཞུག་པ་ནི་ཁ་ཊྭཱྃ་ག་གཏོར་བའི་ཁུ་ཚུར་དག་གིས་སོ། །ཐམས་ཅད་སྨྲར་གཞུག་པ་ནི་མཛུབ་མོ་མཉམ་པའི་ལྕེའི་ཁུ་ཚུར་དག་གིས་སོ། །ཐམས་ཅད་བསྐྱོད་པ་ནི་བརྟན་པའི་ཁུ་ཚུར་དག་གིས་སོ། །ཐམས་ཅད་གཞུག་ཅིང་དོན་ཡོད་པར་བསྒྲུབ་པ་ནི་རྡོ་རྗེ་ལྕགས་ཀྱུའི་ཁུ་ཚུར་གྱིས་སོ། །དེ་ ནས་རྡོ་རྗེ་ཁུ་ཚུར་གཉིས་ཀྱིས་ཅི་འདོད་པའི་ལག་པའི་སོར་མོའི་ཕྱག་རྒྱ་བཅུ་སྟེ། དོན་ཡོད་ཅིང་ཐོགས་པ་མེད་པར་སྐད་ཅིག་མས་མྱུར་དུ་གྲུབ་པར་བྱེད་པ་འདི་ལྟ་སྟེ། པི་བང་དང་། གླིང་བུ་དང་། རྫ་རྔ་དང་། མུ་ཀུཎྜ་དང་། ཆ་ལང་དང་། རྔ་བོ་ཆེ་དང་། རྔ་ཟླུམ་དང་། རྔ་པ་ཊ་ཧ་དང་།
- 261a
གུཉྫ་དང་། ཏི་མི་ལི་སྟེ། འདི་རྣམས་ཀྱིས་རྒྱས་བཏབ་ན་ཐམས་ཅད་དུ་རྗེས་སུ་ཆགས་པ་དང་། དབང་དུ་བྱེད་པ་དང་། འབེབས་པ་དང་། རིམས་དང་། དུག་དང་། སྦྱར་དུག་དང་། གདོན་ལས་གྲོལ་བ་དང་། གསོད་པ་དང་། འཐབ་མོ་ལས་རྣམ་པར་ རྒྱལ་བ་དང་། ཕུན་སུམ་ཚོགས་པ་ཐམས་ཅད་ཐོབ་པ་ཡིན་ནོ་ཞེས་བྱ་བ་གསུངས་སོ། །འདོད་ཆགས་ཆེན་པོ་རྣམ་དག་ཕྱིར། །རྡོ་རྗེ་སེམས་དཔའ་ཆེན་པོ་ཡིན། །ཕྱག་རྒྱའི་རྟོག་པ་རབ་ཏུ་བརྟགས། །རྡོ་རྗེ་སློབ་དཔོན་སློབ་མ་མཆོག །དེ་ཉིད་དད་པའི་རྗེས་འབྲངས་ལ། ། རྟོགས་པ་ཙམ་གྱིས་སྐད་ཅིག་གིས། །དོན་ཡོད་ཀུན་གྲུབ་བདེ་བར་གསོལ། །ཞེས་བྱའོ། །དཔལ་མཆོག་དང་པོ་ལས་མཆོག་ཏུ་གྲུབ་པ་ཞེས་བྱ་བའི་ཕྱག་རྒྱའི་རྒྱུད་རྫོགས་སྷོ།། །།དེ་ནས་མཆོག་ཏུ་མཁས་ཤིང་མཐའ་ལས་འདས་པ་ཚད་མེད་ཅིང་གཞལ་དུ་མེད་པ་མ་ ལུས་ཤིང་ལུས་པ་མེད་པའི་མཆོག་གི་དངོས་གྲུབ་ཆེན་པོའི་བདག་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་མཆོག་ཏུ་དམ་པ་གྲུབ་པ་ཞེས་བྱ་བ་རྡོ་རྗེ་གར་ལས་བྱུང་བའི་ཚོགས་ཐམས་ཅད་ཀྱི་ཕྱག་རྒྱ་སྟོང་བཤད་པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་ དཔས་གསུངས་སོ། །ཕྱག་རྒྱ་ཆེན་པོ་མཉམ་གཞག་ནས། །སྒེག་བཅས་འཛུམ་སོགས་བཀྲོལ་བ་ཡིས། །ལས་ཀྱི་ཕྱག་རྒྱ་ཆེན་པོ་བརྒྱ། །ཐམས་ཅད་གར་གྱིས་བསྒྲུབ་པར་བྱ། །བདེ་བ་ཆེན་པོ་རྡོ་རྗེ་གསང་བའི་ལྕགས་ཀྱུས་ཁྱད་པར་དུ་ལས་ཀྱི་ཕྱག་རྒྱ་བཅིང་བ་སྟེ་བརྒྱ་ཕྲག་ དང་པོ་མཆོག་ཏུ་བསྒྲུབས་ཏེ་རྡོ་རྗེ་དམ་ཚིག་ལྷ་མོ་རྣམས་ཀྱི་ཕྱག་རྒྱའོ། །རྡོ་རྗེ་བསྡམས་པ་བཅིངས་ནས་ནི། །ཁ་སྦྱོར་ནང་དུ་གསལ་བ་སྟེ། །མཆོག་དང་པོ་ཡི་གསང་ཆེན་གྱི། །ལས་ཀྱི་ཕྱག་རྒྱ་རྒྱ་གཞན་ཡིན། །ཞེས་བྱ་བ་རྡོ་རྗེ་ལྷ་མོ་གསང་བ་ཐམས་ཅད་ཀྱི་ཕྱག་རྒྱའོ། ། རྡོ་རྗེ་ལས་ཀྱི་མཆོད་པ་ཆེའི། །ཐལ་མོས་སྤྱི་བོར་བཟུང་ནས་ནི། །ལས་ཀྱི་ཕྱག་རྒྱ་གྲུབ་པས་ན། །དབང་པོ་རྣམས་དང་སྦྱར་བར་བྱ། །ཞེས་བྱ་བ་རྡོ་རྗེ་ཐམས་ཅད་ཀྱི་མཆོད་པ་ཆེན་པོའི་ལྷ་མོ་རྣམས་ཀྱི་ཕྱག་རྒྱའོ། །རྡོ་རྗེ་བསྙེམས་མས་གར་བྱ་ཞིང་། །སྒེག་བཅས་མཐེའུ་
- 261b
ཆུང་སོགས་བཀྲོལ་བས། །དེ་ཉིད་བཅིངས་ནས་གར་བྱ་ཞིང་། །ཕྱི་མ་འདི་ནི་འབྱུང་བ་ཡིན། །ཞེས་བྱ་བ་རྡོ་རྗེ་ཐམས་ཅད་ཀྱི་ལས་དོན་ཡོད་པའི་དམ་ཚིག་གྲུབ་པའི་དབང་ཕྱུག་ཆེན་པོའི་མཆོག་གི་ཕྱག་རྒྱ་བརྒྱའོ། །རྡོ་རྗེ་ཐལ་མོ་མཉམ་གཞག་ནས། །ཐམས་ཅད་ཀྱིས་ནི་ བསྒྲུབ་པར་བྱ། །མཆོག་དང་པོའི་ལས་ཆེན་པོའི་ཕྱག་རྒྱ་མཆོག་གཞན་ཡིན་ནོ་ཞེས་བྱ་བ་རྒྱལ་མོ་ཐམས་ཅད་ཀྱི་ཕྱག་རྒྱ། མདའ་ལྔ་བསྡུས་པ་བཅིངས་ནས་ནི། །ལས་ཀྱི་ཕྱག་རྒྱ་བདེ་བ་བརྒྱ། །རབ་ཏུ་དགའ་མཆོག་མ་བཀྲོལ་བར། །བདེ་བ་ཉིད་དུ་མངོན་པར་སྦྱར། ། ཞེས་བྱ་བ་རྡོ་རྗེ་ཐམས་ཅད་ཀྱི་མཆོག་ཏུ་གསང་བའི་འདོད་པ་མའི་ཕྱག་རྒྱའོ། །སྐུ་གསུང་ཐུགས་ཀྱི་རྡོ་རྗེ་ཡིས། །ཇི་བཞིན་ཕྱག་རྒྱ་མཆོག་སྦྱོར་བས། །ལས་ཀྱི་ཕྱག་རྒྱ་སྣ་ཚོགས་བརྒྱ། །མཆོག་དང་པོ་ནི་རབ་ཏུ་བརྟག །ཅེས་བྱ་བ་རྡོ་རྗེ་ཐམས་ཅད་ཀྱི་སྐུ་གསུང་ཐུགས་ཀྱི་ རྡོ་རྗེ་ལྷ་མོའི་ཕྱག་རྒྱའོ། །རྡོ་རྗེ་ལྷ་མོའི་ཁ་ཊྭཱྃ་ག། །ལུས་ཀུན་གྱིས་ནི་གར་བྱ་ཞིང་། །རྡོ་རྗེ་གར་མཆོག་གླུ་བླང་ཞིང་། །དང་པོའི་ཕྱག་རྒྱ་ཆེན་པོ་ཞེས་བྱ་བའོ། །ཅི་ལྟར་གོང་དུ་རྒྱས་གསུངས་པ། །རོལ་མོ་མཆོག་གི་ཕྱག་རྒྱའི་ཚོགས། །རོལ་མོ་བརྡུང་ཞིང་གླུ་ལེན་པ། ། ཕྱག་རྒྱ་ཀུན་གྱི་གསལ་བ་བརྒྱ། །ཞེས་བྱ་བར་རྡོ་རྗེ་ཐམས་ཅད་ཀྱི་ལྷའི་བུ་མོའི་ཚོགས་ཀྱི་ཕྱག་རྒྱ་སྟེ་ཕྱག་རྒྱ་སྟོང་མཆོག་ཏུ་གྲུབ་པའོ། །དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ནམ་མཁའི་མཐའ་ལྟར་གྲངས་མེད་པའི། །ཕྱག་རྒྱའི་རྒྱལ་ མོ་གྲུབ་མཆོག་སྟེར། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་མཆོག་གྲུབ་ཕྱིར། །ནམ་མཁའ་ཀུན་གྱི་གོ་སྐབས་ཀྱིས། །དཀྱིལ་འཁོར་འདིར་ནི་རབ་ཏུ་ཞུགས། །དམ་པ་མཆོག་ཏུ་གྲུབ་པར་བྱེད། །མཆོག་གི་དམ་པ་རྒྱུད་ཆེན་པོ། །དམ་པ་མཆོག་གི་ དངོས་གྲུབ་སྟེར། །རྡོ་རྗེ་སློབ་དཔོན་སློབ་མ་མཆོག །དེ་ཉིད་དད་པའི་རྗེས་འབྲངས་ལ། །ཕྱག་རྒྱ་ཀུན་གྱི་ཚུལ་འདི་ནི། །བསྟན་པར་བྱ་སྟེ་གཞན་ལ་མིན། །དེ་ལྟར་མཆོག་ཏུ་མི་འགྱུར་དམ་པའི་དངོས་གྲུབ་བདེ་བ་ཡི། །མཆོག་ཏུ་རྣམ་དག་རྡོ་རྗེ་བདེ་གྲུབ་མཐའ་ཡས་འབྲས་
- 262a
བུར་ལྡན། །དཔལ་མཆོག་དང་པོའི་གསང་བའི་དེ་ཉིད་མཆོག་གི་སྐུའི་ཚུལ་ལོ། །མཆོག་ཏུ་རྟག་པའི་རྟོག་པའི་ཚུལ་འདི་ཡོངས་སུ་མཐར་ཐུག་པའོ། །དཔལ་མཆོག་དང་པོ་ལས་དམ་པ་མཆོག་ཏུ་གྲུབ་པ་ཞེས་བྱ་བའི་ཕྱག་རྒྱའི་རྒྱུད་རྫོགས་སྷོ།། །།དེ་ནས་ སེམས་དཔའ་ཆེན་པོ་ཀུན། །རྡོ་རྗེ་འཛིན་དང་བཅས་པའི་མཆོག །རྡོ་རྗེ་འཆང་ཆེན་གཙོ་བོ་ནི། །མགོན་ལ་བདེ་གཤེགས་རྣམས་ཀྱིས་གསོལ། །ཀུན་མཆོག་ནམ་མཁའ་ཆེན་པོ་ཡི། །དངོས་གྲུབ་དབང་ཕྱུག་རབ་གྲུབ་ཕྱིར། །རྟོག་པ་ཐམས་ཅད་ཀུན་བསྡུས་པའི། །དེ་ ཉིད་སེམས་དཔའ་ཆེན་པོས་གསུངས། །རྣམ་རྟོག་མེད་པའི་ཆོས་རྣམས་ལ། །རྟོག་པའི་དོན་འདི་གང་བརྗོད་པ། །གང་གིས་རྒྱུད་འདི་ཕྱི་མ་ལ། །དང་པོའི་གནས་མཆོག་ཅི་ལྟར་ལགས། །དེ་བཞིན་རྡོ་རྗེ་སེམས་དཔའ་ཉིད། །རབ་དགའ་ཉིད་དང་བཟང་བ་ཉིད། །རྡོ་རྗེ་བསྙེམས་ བདག་ཇི་ལྟར་ལགས། །སེམས་དང་སེམས་དཔའ་ཏིང་འཛིན་དང་། །དེ་བཞིན་རྡོ་རྗེ་རྡོ་རྗེ་འཛིན། །རྡོ་རྗེ་འཆང་ཆེན་ཉིད་དང་ནི། །བྱང་ཆུབ་སྤྱོད་པ་ཇི་ལྟར་ལགས། །བདུད་དང་བདུད་ལས་རྒྱལ་བ་ཉིད། །བྱང་ཆུབ་སངས་རྒྱས་ཇི་ལྟར་ལགས། །རྡོ་རྗེ་གཏུམ་པོ་མཐར་བྱེད་ཉིད། ། ཕྱག་ན་རྡོ་རྗེ་ཇི་ལྟར་ལགས། །ཇི་ལྟར་དང་པོའི་རིགས་བྱུང་དང་། །འདོད་པ་ཐར་པ་ཇི་ལྟར་ལགས། །ཇི་ལྟར་མགོན་པོ་རྣམ་གསུམ་དང་། །ཁྱོད་ནི་ཇི་ལྟར་ཐམས་ཅད་ཉིད། །དང་པོའི་སྙིང་པོ་ཇི་ལྟར་བྱུང་། །དེ་ཅི་ཉེ་སྙིང་ཇི་ལྟར་ལགས། །བདེ་ཆེན་རྡོ་རྗེ་ཆེན་པོ་ཡི། །དོན་ ཡོད་དམ་ཚིག་ཇི་ལྟར་ལགས། །དཀྱིལ་འཁོར་ཞེས་བྱ་ཇི་སྐད་གསུངས། །དེ་ཡི་རྣམ་སྨིན་ཇི་ལྟ་བུ། །ཐིག་གདབ་པ་དང་བརྟག་པ་ཡིས། །དངོས་གྲུབ་ཇི་ལྟར་གསུངས་པ་ལགས། །གསང་བ་ལྔ་ཡི་དེ་བདེ་བ། །ཇི་ལྟར་གྱུར་པ་ཇི་ལྟ་བུ། །དཀྱིལ་འཁོར་བདག་པོ་ རྣམས་དང་ནི། །རིགས་རྣམས་གསལ་བ་ཇི་ལྟར་ལགས། །ཐམས་ཅད་དབང་བསྐུར་དེ་ཉིད་དང་། །ཕྱག་མཚན་ཚོགས་ཀྱི་དེ་ཉིད་དང་། །ཐམས་ཅད་དགུག་གཞུག་མཆོད་པ་ཆེ། །བདག་བྱིན་བརླབས་སོགས་སྒྲུབ་པ་ཆེ། །དེ་ནི་དེ་ཉིད་གསང་བ་དང་། །དོན་ཡོད་པ་
- 262b
ནི་མཆོག་ཉིད་དེ། །མི་འགྱུར་དམ་པ་འགྲུབ་པའི་ཕྱིར། །ཐམས་ཅད་བདག་ཅག་རྣམས་ལ་གསུངས། །ཞེས་བྱ་བ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་མཆོག་གི་མདོ་གསུངས་སོ། །དེ་ནས་སྟོན་པ་རྡོ་རྗེ་འཛིན། །རྟོག་པ་ཀུན་གྱི་བདག་པོ་ནི། ། ཐེ་ཙོམ་ཚོགས་རྣམས་གསན་ནས་སུ། །འདི་ཡི་ལན་ནི་གསུངས་པ་ཡིན། །དེ་ལ་རྟོག་པའི་དོན་གྱི་རྒྱུད་ཅི་ལྟར་ཡིན་ཞེ་ན། རྣམ་རྟོག་མེད་པའི་ཆོས་རྣམས་ལས། །སེམས་ཅན་དོན་ནི་ཡོངས་བརྟགས་པས། །དེས་ནི་རྟོག་པར་གསུངས་པ་སྟེ། །རྟོག་པ་ཡོངས་སུ་དག་ ཕྱིར་རོ། །དེ་ནས་རྒྱུད་ཕྱི་མ་ཇི་ལྟར་ཡིན་ཞེ་ན། རྒྱུད་ནི་རྒྱུན་ཞེས་བྱ་བར་བཤད། །ཕྱི་མ་སྔར་དང་ཡང་དག་བྱུང་། །དེ་ཉིད་གསང་བའི་གསང་བ་དང་། །ཕྱི་མ་དང་བཅས་རྒྱུད་དུ་འདོད། །དེ་ལ་དང་པོ་གནས་ཞེས་བྱ་བའི་རྒྱུད་ཇི་ལྟར་ཡིན་ཞེ་ན། ནམ་མཁའ་ཀུན་ལ་རབ་ཏུ་ གནས། །རྡོ་རྗེ་ཀུན་མཆོག་རང་བཞིན་མཆོག །བདེ་བ་ཆེན་པོ་དགའ་བ་ཆེའི། །གྲོང་ཁྱེར་དེར་ནི་མི་འགྱུར་མཆོག །ཅེས་བྱ་བ་བཅོམ་ལྡན་འདས་རྡོ་རྗེ་སེམས་དཔའ་རྟོག་པ་ཐམས་ཅད་ཀྱི་རྟོག་པའི་དེ་ཁོ་ན་ཉིད་ཅེས་བྱ་བ་འདི་གསུངས་སོ། །དེ་ལ་ཐོག་མ་ཐ་མ་མེད་པའི་རྡོ་རྗེ་ སེམས་དཔའ་ཇི་ལྟར་ཡིན་ཞེ་ན། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔའ་ཞེས་བྱར་བརྗོད། །དེ་ནས་བཅོམ་ལྡན་འདས་དེ་གང་ཡིན་ཞེ་ན། ཀུན་མཆོག་དངོས་གྲུབ་ཆེན་པོ་ཡི། །དབང་ ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །རབ་ཏུ་དགའ་བ་མི་འགྱུར་མཆོག །དེ་ལ་བཅོམ་ལྡན་འདས་དགའ་བ་ཆེན་པོ་ཉིད་ཇི་ལྟར་ཡིན་ཞེ་ན། ཉེས་པ་མེད་ཅིང་ཤིན་ཏུ་རྟག །འདོད་ཆགས་ཀུན་གྱི་རྗེས་ཆགས་པ། །དེ་ཉིད་འདི་ཡིས་གསང་བ་འདི། །འདོད་ ཆགས་ཆེན་པོ་དགའ་བ་ཆེ། །དེ་ལ་ཅི་ཀུན་ཏུ་བཟང་པོ་ཉིད་ཇི་ལྟར་ཡིན་ཞེ་ན། ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའི་ཆོ་ག་མཆོག །དེ་ལ་རྡོ་རྗེ་བསྙེམས་པའི་བདག་པོ་བཅོམ་ལྡན་
- 263a
འདས་ཇི་ལྟར་ཡིན་ཞེ་ན། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་ཕྱག་རྒྱའི་མཆོག །རྡོ་རྗེ་དབང་ཕྱུག་ཆེར་བསྟོད་པས། །རྡོ་རྗེ་བསྙེམས་པའི་བདག་པོའི་བདག །ཅེས་བྱ་བ་ནི་བཅོམ་ལྡན་འདས་མཆོག་དང་པོའི་སྐྱེས་བུའོ། །མཆོག་དང་པོ་ཡི་དེ་ཉིད་འདི། ། རྡོ་རྗེ་སེམས་དཔའ་གང་གང་བརྗོད། །དངོས་གྲུབ་ཀུན་གྱི་འབྱོར་པ་རྣམས། །དེ་ལ་ཐམས་ཅད་འགྲུབ་པར་འགྱུར། །ཞེས་བྱ་བ་མཆོག་གི་དེ་ཁོ་ན་ཉིད་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་དེའི་འོག་ཏུ་ལས་ཀྱི་བྱ་བས་བཅོམ་ལྡན་འདས་ཐམས་ཅད་ཀྱི་མཆོག་ཉིད་དུ་བཤད་ པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་བཅོམ་ལྡན་འདས་ཐམས་ཅད་ཀྱི་སེམས་ཅན་ཇི་ལྟར་ཡིན་ཞེ་ན། བསམ་གྱིས་མི་ཁྱབ་རྒྱ་ཆེ་བ། །ཟབ་དངོས་ཀུན་བདེ་མི་འགྱུར་བ། །ཐམས་ཅད་ཁྱབ་ཅིང་དྲི་མ་མེད། །བྱང་ཆུབ་སེམས་ནི་བདག་བརྟན་པ། །དེ་ནས་འདིའི་ ལས་ཀྱི་ཁྱད་པར་ནི། སེམས་ཉིད་བརྟན་པ་ཉིད་སེམས་པས། །ཏིང་འཛིན་དེ་ལ་མཉམ་པར་གཞག །རྣམ་ཤེས་ལས་ནི་རྡོ་རྗེ་ཀུན། །རྡོ་རྗེ་ལས་ནི་འཛིན་འགྱུར་ཏེ། །བཅོམ་ལྡན་འདས་རྡོ་རྗེ་འཛིན་ཇི་ལྟར་ཡིན་ཞེ་ན། སེམས་དཔའི་བྱིན་རླབས་སྦྱོར་བ་ནི། །བདག་ལ་བྱིན་རླབས་མཆོག་བསྒྲུབ་ པ། །ཉིན་རེ་སྒྲུབ་པར་བྱེད་ན་དེས། །རྡོ་རྗེ་སེམས་དཔའ་ཉིད་ཐོབ་འགྱུར། །དེ་ལ་བཅོམ་ལྡན་འདས་ཀུན་ཏུ་བཟང་པོའི་སྤྱོད་པ་ཇི་ལྟར་ཡིན་ཞེ་ན། སྙིང་སྟོབས་རྡུལ་དང་མུན་པས་ཀྱང་། །གང་ཕྱིར་སེམས་ཅན་དོན་གྱུར་པས། །དེ་ཕྱིར་ང་ནི་ཀུན་ཏུ་བཟང་། །བྱང་ཆུབ་སྤྱོད་པའི་རྗེས་འཇུག་ པའོ། །དེ་ལ་ཇི་ལྟར་བཅོམ་ལྡན་འདས་བདུད་ཉིད་དང་འདུལ་བས་རྒྱལ་བ་ཇི་ལྟར་ཡིན་ཞེ་ན། སེམས་ཉིད་ཁོ་ན་བདུད་ཉིད་དེ། །སེམས་ཉིད་དེ་བཞིན་གཤེགས་པའོ། །རང་སེམས་གདུལ་བར་བྱ་བའི་ཕྱིར། །བདག་ནི་བདུད་ཉིད་གྱུར་པ་ཡིན། །དེ་ལ་ཇི་ལྟར་བཅོམ་ལྡན་འདས་མངོན་པར་རྫོགས་ པའི་བྱང་ཆུབ་དང་སངས་རྒྱས་ཡིན་ཞེ་ན། རང་སེམས་སོ་སོར་རྟོག་པའི་ཕྱིར། །བྱང་ཆུབ་སེམས་མཆོག་རྡོ་རྗེ་ཉིད། །དེ་ཕྱིར་དེ་ཉིད་སངས་རྒྱས་ཉིད། །བདག་བྱིན་རླབས་མཆོག་གྲུབ་ཕྱིར་རོ། །དེ་ལ་ཇི་ལྟར་བཅོམ་ལྡན་འདས་ཕྱག་ན་རྡོ་རྗེ་ཡིན་ཞེ་ན། མི་ཕྱེད་སོ་སོར་རྟོགས་པ་དང་། །གདུག་
- 263b
པ་ཐམས་ཅད་ངེས་པར་གནོན། །སངས་རྒྱས་ཀུན་དངོས་རྡོ་རྗེ་སྟེ། །བྱང་ཆུབ་སེམས་ནི་བརྟན་པ་བདག །ཀུན་ཏུ་བཟང་པོའི་ལག་ཏུ་ནི། །མཚོན་ཆ་དེ་ནི་རྒྱལ་བས་བྱིན། །བརྟན་པ་ཐམས་ཅད་གྲུབ་པའི་ཕྱིར། །དེས་ན་ཕྱག་ན་རྡོ་རྗེ་དེས། །དེ་ལ་ཇི་ལྟར་དང་པོའི་རིགས་ལས་བྱུང་བ་ཤེས་པའི་རྒྱུད་ ཡིན་ཞེ་ན། ཤེས་རབ་ཕ་རོལ་ཕྱིན་པ་ཡུམ། །ཡབ་ནི་ཐབས་ལ་མཁས་པ་སྟེ། །རྡོ་རྗེ་སེམས་དཔའ་གདུལ་བྱའི་ཕྱིར། །རིག་རྣམས་རབ་ཏུ་བྱུང་བའོ། །དེ་ལ་ཇི་ལྟར་བཅོམ་ལྡན་འདས་འདོད་དང་ཐར་པ་ཡིན་ཞེ་ན། བཅོམ་ལྡན་འདས་ནི་ཆགས་པ་ཆེ། །དངོས་གྲུབ་ཐམས་ཅད་རྗེས་ཆགས་ ཕྱིར། །དངོས་གྲུབ་ཐམས་ཅད་མི་འགྱུར་བདེ། །བདེ་བ་ཆེན་པོ་ཞེས་བརྗོད་པའོ། །དེ་ལ་ཇི་ལྟར་བཅོམ་ལྡན་འདས་རྣམ་པ་གསུམ་ཡིན་ཞེ་ན། བདག་ནི་དུས་གསུམ་མཐའ་ཡས་ཕྱིར། །ང་ནི་སྲིད་གསུམ་གདུལ་བྱའི་ཕྱིར། །གསུམ་མཆོག་འཇིག་རྟེན་གསུམ་ཀུན་ཕྱིར། །འཇིག་རྟེན་གསུམ་ང་ཁམས་ གསུམ་ང་། །དེ་ལ་ཇི་ལྟར་བཅོམ་ལྡན་འདས་ཐམས་ཅད་ཉིད་ཡིན་ཞེ་ན། ང་ཉིད་བརྟན་པ་ཐམས་ཅད་བདེ། །བསོད་ནམས་ཀུན་མཆོག་ཆེ་བའི་ཕྱིར། །གཡོ་བ་སེམས་ཀྱིས་འདུས་བྱས་ཕྱིར། །སྒྱུ་མ་ཐམས་ཅད་ང་ཡིན་ནོ། །ཞེས་བྱ་བ་རང་གི་ལས་ཀྱི་བྱ་བའི་དེ་ཁོ་ན་ཉིད་རྡོ་རྗེ་སེམས་དཔས་གསུངས་ སོ། །དེ་ལ་ཇི་ལྟར་དང་པོའི་གླུ་བྱུང་བ་ཤེས་པ་ཡིན་ཞེ་ན། སྲིད་པ་ཤིན་ཏུ་གྲུབ་པ་ཡི། །དབང་ཕྱུག་ཆེན་པོ་མཆོག་གྲུབ་ཕྱིར། །གཟི་ཅན་སེམས་ཅན་དོན་མཛད་ཕྱིར། །བསྐལ་པ་ཐོག་མར་བཅོམ་ལྡན་གསུངས། །དེ་ནས་དེ་གང་ཡིན་ཞེ་ན། འདོད་ཆགས་ཆེན་པོ་བཅོམ་ལྡན་འདས། ། རབ་ཏུ་དགའ་བ་མི་འགྱུར་མཆོག །གསང་བའི་ཕྱིར་ནི་སྙིང་པོར་བརྗོད། །ཡི་གེ་ཧཱུྃ་ནི་མི་འགྱུར་མཆོག །དེ་ནས་ཉེ་བའི་སྙིང་པོ་ཡི། །དེ་ཁོ་ན་ཉིད་ཤེས་པ་ནི། །དེ་ཉིད་གསང་ཞིང་གསང་བ་དང་། །སྙིང་པོ་རབ་ཏུ་བརྗོད་པར་བྱ། །སྙིང་པོའི་རྗེས་སུ་སྒྲུབ་པར་འགྲུབ། །ཉེ་བའི་སྙིང་པོ་ཉིད་དུ་བརྗོད། ། དེ་ལ་ཇི་ལྟར་བདེ་བ་ཆེན་པོའི་རྡོ་རྗེ་དོན་ཡོད་པ་དམ་ཚིག་གི་བཤད་པའི་རྒྱུད་ཡིན་ཞེ་ན། དངོས་གྲུབ་ཀུན་གྱི་མི་འགྱུར་བདེ། །བདེ་བ་ཆེན་པོ་ཞེས་བརྗོད་དོ། །རྡོ་རྗེ་དེ་ཉིད་དོན་ཡོད་གྲུབ། །དམ་ཚིག་འདའ་བར་དཀའ་བའོ། །ཞེས་བྱ་བའི་མཆོག་གི་དམ་པའི་གླུ་བཅོམ་ལྡན་འདས་རྡོ་རྗེ་
- 264a
སེམས་དཔས་གསུངས་སོ། །དེ་ལ་ཇི་ལྟར་དཀྱིལ་འཁོར་གྱི་དོན་ཤེས་པ་ཡིན་ཞེ་ན། ཇི་ལྟར་གནས་དང་འཁོར་ལོ་དང་། །ཇི་ལྟར་དགོད་པར་འགྲོ་བ་དང་། །འཁོར་དང་བཅས་པ་དགོད་པ་གང་། །དེ་འདྲའི་འཁོར་ལོ་མཆོག་གིས་སྤྲུལ། །དེ་ནས་རྣམ་པར་ཤེས་པ་ནི། །རྡོ་རྗེ་སེམས་སོགས་ལྷ་རྣམས་ཀྱི། །འཁོར་ལོ་མངོན་ སུམ་མཐོང་བ་ཡིས། །རྟག་པའི་བསོད་ནམས་ཅི་འདྲ་བ། །ཕྱིར་ན་བྲིས་ནའང་དེ་བཞིན་ནོ། །དེ་ནས་ཐིག་གདབ་པའི་ཆོ་ག་ནི། ཤེས་རབ་ཅན་གྱིས་དཀྱིལ་འཁོར་བྲིས། །ཕྱོགས་ཀུན་མཉམ་པ་ཉིད་དམིགས་ལ། །ཤར་དང་ནུབ་དང་བྱང་དང་ལྷོར། །ཐིག་བཞི་བཏབ་པས་དཀྱིལ་འཁོར་བརྒྱད། །རྡོ་རྗེ་ཐིག་གིས་ཡོངས་བསྐོར་བར། ། ཀ་བ་བརྒྱད་ཀྱིས་ཉེར་མཛེས་ཤིང་། །སྒོ་བཞི་རྟ་བབས་ཁ་ཁྱེར་དང་། །དྲ་བ་དྲ་ཕྱེད་ལ་སོགས་བརྒྱན། །དེར་བདག་པོའི་དོན་ཤེས་པ་ནི་རྡོ་རྗེ་སེམས་དཔའ་ཇི་ལྟ་བུ་ཞེ་ན། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །རྡོ་རྗེ་སེམས་དཔའ་ཆེ་རང་བཞིན། །དཔལ་མཆོག་དང་པོ་ཞེས་བྱར་བརྗོད། །དེ་ནས་བཅོམ་ ལྡན་འདས་དེ་གང་ཞེ་ན། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །རབ་ཏུ་དགའ་བ་མི་འགྱུར་མཆོག །ཅེས་བྱ་བ་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །དེ་ནས་སྤྱན་རས་གཟིགས་དབང་གིས། །པདྨ་རཱ་ག་དང་མཚུངས་པ། །ཐམས་ཅད་དག་པ་བླ་ན་ མེད། །རྡོ་རྗེ་སེམས་དཔའ་རང་བདག་ཉིད། སྤྱན་རས་གཟིགས་ཀྱི་དབང་ཕྱུག་ཉིད། །དེ་ནས་པདྨའི་རིགས་ཀྱི་དེ་ཁོ་ན་ཉིད་ནི། རྡོ་རྗེ་ཆོས་ནི་རབ་གྲུབ་ཕྱིར། །སེམས་ཅན་ཐམས་ཅད་རྣམ་དག་ཕྱིར། །པདྨ་ཆེན་པོའི་རིགས་དག་པའི། །ཏིང་འཛིན་ཡེ་ཤེས་ཀུན་ནས་བསྡུས། །ཞེས་བྱའོ། །དེ་ལ་ཇི་ལྟར་ནམ་མཁའི་སྙིང་པོ་ ཡིན་ཞེ་ན། ཐམས་ཅད་ནམ་མཁའ་བཅོམ་ལྡན་འདས། །སེམས་ཅན་བསོད་ནམས་མཐོང་ཞིང་ཆེ། །ནམ་མཁའི་སྙིང་པོ་སེམས་དཔའ་དང་། །དེ་ནས་ནོར་བུ་རིགས་ཀྱི་ནི། །དབང་བསྐུར་བ་དང་གཏེར་དང་ནི། །རྡོ་རྗེ་རྒྱལ་མཚན་མཆོད་པ་ཆེ། །ནོར་བུ་ཆེན་པོའི་རིགས་གྲུབ་པ། །བསམ་པ་ཐམས་ཅད་ཡོངས་རྫོགས་ པའོ། །ཞེས་བྱ་བ་དཀྱིལ་འཁོར་ཐམས་ཅད་ཀྱི་དེ་ཁོ་ན་ཉིད་ཆེན་པོ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རྡོ་རྗེ་རིགས་ཐམས་ཅད་ཀྱི་དབང་བསྐུར་བ་ཤེས་པ་ནི། སངས་རྒྱས་རིན་ཆེན་རྡོ་རྗེ་ཕྱེད། །རྡོ་རྗེ་རིན་ཆེན་རྡོ་རྗེ་ལ། །སྤྱན་རས་གཟིགས་ལ་རྡོ་རྗེ་སྐུ། །ནོར་བུ་ནོར་བུ་འཛིན་པའོ། །དེ་ནས་མཆོག་དང་པོའི་
- 264b
ཕྱག་མཚན་གྱི་དེ་ཁོ་ན་ཉིད་དོ། །ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་མཚོན་ཆ་ཆེ། །གསང་བ་ལྔ་ཡི་དེ་ཉིད་ཆེ། །རྡོ་རྗེ་རྩེ་ལྔ་ཞེས་བརྗོད་དོ། །དེ་ནས་རིགས་ཐམས་ཅད་ཀྱི་ཕྱག་མཚན་གྱི་དེ་ཁོ་ན་ཉིད་ཤེས་པ་ནི། སངས་རྒྱས་ཐམས་ཅད་སངས་རྒྱས་ཉིད། །སྣ་ཚོགས་བྱ་བར་རྡོ་རྗེ་ཅན། །འཇིག་རྟེན་དབང་ཕྱུག་རྡོ་རྗེ་ ཆོས། །ནོར་བུ་ནོར་བུ་བསགས་པའོ། །ཞེས་བྱ་བ་དབང་བསྐུར་བ་ཐམས་ཅད་ཀྱི་ཕྱག་མཚན་གྱི་དེ་ཁོ་ན་ཉིད་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཇི་ལྟར་ཐམས་ཅད་དགུག་པའི་རྒྱུད་ཡིན་ཞེ་ན། །རྟོག་པ་ཐམས་ཅད་གསང་ཆེན་གྱི། །རྡོ་རྗེ་ལྕགས་ཀྱུ་དྲིལ་བཅས་པས། །བཀུག་སྟེ་དེ་ནས་རྗེས་བསྒྲུབ་པ། ། དྲིལ་བུ་ཉིད་ཀྱིས་བྱ་བ་ཡིན། །ཇི་ལྟར་མཆོད་པ་ཐམས་ཅད་ཀྱི་ཆོ་ག་ཡིན་ཞེ་ན། རྟོག་པ་ཀུན་གྱི་གསང་ཆེན་གྱིས། །རབ་ཏུ་དགའ་བས་མཆོད་ནས་ནི། །གླུ་དང་རོལ་མོ་རྣམ་འཕྲུལ་བས། །མཆོད་དེ་སླར་ཡང་རྣལ་འབྱོར་མཆོད། །དེ་ལ་ཇི་ལྟར་དངོས་གྲུབ་ཐམས་ཅད་ཀྱི་བྱིན་གྱིས་བརླབས་པའི་དམ་ཚིག་ཆེན་པོའི་དེ་ཁོ་ན་ ཉིད་ཡིན་ཞེ་ན། རྟོག་པ་ཀུན་གྱི་གསང་ཆེན་གྱིས། །ཕྱག་རྒྱ་ཀུན་གྱིས་ལེགས་བྱིན་བརླབས། །དམ་ཚིག་ཆེན་པོ་འདི་ཉིད་ཀྱིས། །རང་ཉིད་བསྒྲུབས་ནས་སྙིང་པོ་བཟླས། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་པའི་བདག་པོའི་བདག ། ཅེས་བྱ་བ་མཆོག་དང་པོའི་སྐྱེས་བུའོ། །དེ་ལ་ཇི་ལྟར་རང་ལྷག་པའི་ལྷ་ཐམས་ཅད་ཀྱི་སྒྲུབ་པ་ཆེན་པོའི་རྒྱུད་ཡིན་ཞེ་ན། བརྟན་པ་དང་ནི་གཡོ་བ་དང་། །རྟོག་པ་ཀུན་ལས་བསྒྲུབ་བྱ་གང་། །རང་གི་ལྷག་པའི་ལྷ་སྦྱོར་བས། །དེ་དག་ཐམས་ཅད་བསྒྲུབ་པར་བྱ། །དེ་ནས་ཐམས་ཅད་རྗེས་སུ་སྒྲུབ་པའི་རྒྱུད་ནི། རྡོ་རྗེ་དྲིལ་བུ་འཛིན་ གྱུར་ནས། །རྡོ་རྗེ་དྲིལ་བུ་རབ་སད་ཅིང་། །རྟོག་པ་ཐམས་ཅད་རྗེས་བསྒྲུབས་པས། །མཆོག་དང་ལས་སོགས་འགྲུབ་པར་འགྱུར། །དེ་ལ་ཇི་ལྟར་འབད་པ་མེད་པ་ཐམས་ཅད་སྒྲུབ་པའི་རྒྱུད་ཡིན་ཞེ་ན། བསྒྲུབ་བྱ་ཅི་འདོད་བསྒྲུབས་ནས་ནི། །ཕྱི་ནས་ཇི་ལྟར་འདོད་པ་ཡིས། །ཅི་འདོད་སྤྱོད་པ་ལ་སྤྱོད་ཅིང་། །ཐམས་ཅད་བྱེད་ ཅིང་ཐམས་ཅད་བཟའ། །ལངས་པའམ་ནི་འདུག་པའམ། །གང་དང་དེ་རུ་འཆག་པའམ། །དགོད་པ་དང་ནི་སྨྲ་བའམ། །གང་དེར་ཇི་བཞིན་དེ་བཞིན་ནོ། །དབང་པོ་གང་དང་གང་ལམ་གྱུར། །དེ་དང་དེ་ཡི་ངོ་བོར་བྱ། །མཉམ་པར་བཞག་ནས་རྣལ་འབྱོར་གྱིས། །རང་གི་ལྷག་པའི་ལྷ་སྦྱོར་བྱ། །དེ་ཉིད་རྣལ་འབྱོར་འདི་ཡིས་
- 265a
ནི། །ཐམས་ཅད་ཉིད་ནི་བསྒྲུབ་པར་བྱ། །སངས་རྒྱས་ཀུན་དངོས་ཐམས་ཅད་ནི། །རྟག་ཏུ་མཐོང་ཞིང་གྲུབ་པར་འགྱུར། །དམ་ཚིག་ཆེན་པོ་དེ་ཉིད་ནི། །མཁས་པ་གང་ཞིག་དད་པས་ཀློག །དེ་ནི་སྡིག་ཀུན་དང་བྲལ་བས། །དངོས་གྲུབ་ཀུན་གྱི་དབང་ཕྱུག་འགྱུར། །ཞེས་བྱ་བ་དམ་ཚིག་ཆེན་པོའི་དེ་ཁོ་ན་ ཉིད་དོ། །དེ་ལྟར་དཔལ་མཆོག་དང་པོའི་ཆོ་ག་མཉམས་མཆོག་གི་བླ་མ་གསལ། །མཆོག་ཏུ་གསང་བསྒྲུབ་པའི་ཆོ་ག་བདེ་མཆོག་མྱུར་དུ་གྲུབ་ཕྱིར་གསོལ། །རྡོ་རྗེ་མཆོག་འཛིན་དང་བཅས་བདེ་གཤེགས་སྲས་བཅས་རྣམས་ཀྱིས་བྱིན་བརླབས་པ། །བདེ་ཆེན་དམ་པ་རྡོ་རྗེ་འཛིན་པ་དགའ་ཆེན་མཆོག་གིས་དེ་ གསུངས་སོ། །དཔལ་མཆོག་དང་པོ་ལས་མཆོག་ཏུ་གསང་བའི་ཆོ་ག །དེ་ནས་སྟོན་པ་རྡོ་རྗེ་འཛིན། །མཁའ་ལྟར་ཐུག་མེད་ཀུན་ཏུ་འགྲོ། །སངས་རྒྱས་ཀུན་གྱིས་བསྟོད་ནས་ནི། །རྟོག་པའི་མཐར་ཐུག་དོན་གསུངས་སོ། །བདག་གི་སྙིང་པོ་དང་འདི་མཆོག་ཆེན་པོའོ། །བདེ་ཆེན་མཆོག་གི་མཆོག་དང་རྗེས་སུ་ ཆགས་པ་ཆེ། །ཀུན་མཆོག་སེམས་དཔའ་རྣམས་ཀྱི་རྟག་ཏུ་འབྱུང་གནས་ནི། །ཀུན་མཆོག་འབྱོར་པའི་དབང་ཕྱུག་འདི་ནི་གསོ་བ་ཡིན། །མཐའ་ཡས་པ་དང་ཐོག་མེད་མཐར་ཐུག་མེད་པ་ནི། །མཆོད་བྱ་ཆེན་པོ་ཐམས་ཅད་རྣམས་ཀྱི་ཚུལ་ཆེན་པོ། །ནམ་མཁའ་དང་མཚུངས་མཆོག་གི་དངོས་འཕེལ་གསོལ། ། དེ་ནི་སུས་ཀྱང་མཐར་ཐུག་བྱེད་པར་ནུས་པ་མིན། །སེམས་ཅན་རྣམས་ནི་དམན་ལ་ཞེན་ཅིང་ཉུང་ལ་དགའ། །དད་པ་མེད་ཅིང་སླུ་བ་བྱེད་ལ་མ་སྦྱངས་པ། །རྟག་ཏུ་རྗེས་སུ་ཆགས་ཤིང་ཆགས་བྲལ་ལ་ཆགས་པ། །དེ་རྣམས་ལ་ནི་ཕན་ཕྱིར་འདི་ནི་མཐར་ཐུག་པའོ། །གང་གི་ཁྱིམ་ན་འདི་གནས་གང་གིས་རབ་ཏུ་བསྒྲུབ་ པའམ། །ཡང་ན་ཇི་བཞིན་གསུངས་པ་རྟག་ཏུ་འདིར་སྒྲུབ་བྱེད། །སོ་སོར་ཉམས་སུ་མྱོང་བའི་མཐུ་ཡིས་ཐམས་ཅད་དུ། །བདུད་ཀྱི་ལས་ཚོགས་རྣམས་ཀྱིས་དེ་ནི་གནོད་མི་ནུས། །རྡོ་རྗེ་འཆང་སོགས་སྐུ་ནི་གང་གིས་སྒྲུབ་བྱེད་པ། །གཟུགས་བརྙན་ལ་སོགས་ཐམས་ཅད་འདིར་ནི་ཇི་བཞིན་གསུངས། །དེས་ ནི་ཐམས་ཅད་སོ་སོར་ཉམས་མྱོང་ནུས་པར་ལྡན། །བདུད་ཀྱི་ལས་ཚོགས་རྣམས་ཀྱིས་དེ་ནི་གནོད་མི་ནུས། །གང་ཞིག་རྡོ་རྗེ་ལ་སོགས་གཟུགས་བརྙན་ལ་སོགས་པ། །ཇི་ལྟར་འདོད་པ་འདི་དག་ཐམས་ཅད་སྒྲུབ་པར་བྱེད། །རབ་ཏུ་འདོད་པས་ཡི་གེ་ཧཱུྃ་ལས་བྲིས་ནས་ནི། །འདོད་པའི་དངོས་གྲུབ་དེ་ཡིས་
- 265b
སྟེར་ཞིང་ཐོབ་པར་འགྱུར། །རྒྱལ་པོ་རྣམས་ཀྱིས་རྣམ་པར་སྦྱང་བར་མཛད་པ་ནི། །གང་ལ་དོན་ཀུན་དག་ཕྱིར་མཛད་པར་མི་འགྱུར་མིན། །འདི་ནི་བགེགས་བྱེད་བདུད་རྣམས་ཀྱང་ནི་ཡོད་མ་ཡིན། །རྟོགས་པས་དངོས་གྲུབ་འཕེལ་ཞིང་བྱིན་གྱིས་བརླབས་པ་ཡིན། །ང་ནི་བདུད་ཉིད་མི་འགྱུར་བརྟན་ མེད་ཉིད་མི་འགྱུར། །བརྟན་པ་ཉིད་ཕྱིར་ང་ནི་བརྟན་པར་མཛད་པ་ཡིན། །རྟག་པ་འདི་ནི་མཆོག་ཆེན་གང་གིས་སྒྲུབ་བྱེད་པ། །དེ་ལ་ང་ནི་དངོས་གྲུབ་མྱུར་དུ་སྒྲུབ་པར་བྱེད། །དངོས་གྲུབ་ཆེན་པོ་ལ་ཐམས་ཅད་རྗེས་སུ་ཆགས་ཤིང་ཤིན་ཏུ་མཉེས་པ་དང་། ཤིན་ཏུ་བརྟན་པ་དང་། ཤིན་ཏུ་རྒྱས་པ་དང་། རྟག་ཏུ་རྒྱ་ཆེ་བར་འགྱུར་བ་ཡིན་ནོ། །གང་ཞིག་མཆོག་གི་རྒྱལ་པོ་སྙིང་པོ་སྒྲུབ་བྱེད་པ། །རྒྱལ་བ་ཐམས་ཅད་དགྱེས་ཤིང་རྒྱལ་བ་དགྱེས་པར་མཛད། །དེ་དག་གྲགས་པ་ཆེན་པོ་ཐོབ་ནས་བདེ་བའང་ཐོབ། །དེ་ཕྱིར་འདི་ལ་དད་ཅིང་གུས་པར་བྱ་བ་ཡིན། །དེ་ནས་རྒྱལ་བ་རྣམས་ཀྱིས་བཅོམ་ལྡན་འདས་ ལ་ལེགས་སོ་ཞེས་བྱ་བ་བྱིན་ཏེ། ཡབ་མཆོག་སངས་རྒྱས་སྲས་ནི་ལེགས་སོ་ལེགས། །སྲས་མཆོག་སངས་རྒྱས་སྲས་ནི་ལེགས་སོ་ལེགས། །རྡོ་རྗེ་མཆོག་ནི་རྡོ་རྗེ་འབྱུང་བ་ལེགས། །དམ་པའི་ཆོས་ཀྱི་བདག་ཉིད་ལེགས་སོ་ལེགས། །སངས་རྒྱས་རྣམས་ཀྱིས་ཡང་དག་བྱིན་ བརླབ་པ། །རྟག་ཏུ་མི་འགྱུར་དོན་ཡོད་གྲུབ་པ་ཆེ། །ཇི་ལྟར་དང་པོའི་གྲུབ་པ་དེ་བཞིན་དུ། །ཕྱི་ནས་ཀྱང་ནི་དེ་བཞིན་གྲུབ་པར་འགྱུར། །དེ་ལྟར་ངག་ཆེན་གསུངས་ནས་ནི། །སྲས་དང་བཅས་པའི་སངས་རྒྱས་རྣམས། །རྡོ་རྗེ་སེམས་དཔའ་ཆེན་པོ་ཡི། །གསུང་ལ་རྗེས་ སུ་ཡི་རང་མཛད། །དཔལ་མཆོག་དང་པོ་ལས་རྟོག་པའི་རྒྱལ་པོ་ཐམས་ཅད་ཀྱི་མཆོག་རྫོགས་སོ།། །།ཐུགས་དམ་སའི་སྙིང་པོ་ཐོ་ལྡིང་དུ། རྒྱ་གར་གྱི་མཁན་པོ་པཎྜི་ཏ་མཁས་པ་ཆེན་པོ་མནྟྲ་ཀཱ་ལ་ཤ་དང་། སྒྲ་བསྒྱུར་གྱི་ལོ་ཙཱ་བ་ལྷ་བཙན་པོ་དགེ་སློང་བླ་མ་ཞི་བའི་འོད་ཀྱི་ཞལ་སྔ་ ནས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།ལོ་ཙཱ་ཆེན་པོ་རིན་ཆེན་བཟང་པོ་ཡིས། །དཔལ་མཆོག་དང་པོའི་རྒྱུད་འདི་བསྒྱུར་བ་ལ། །བར་བར་དཔེ་མ་རྙེད་པས་མ་འགྱུར་ནས། །བདག་གིས་འབད་པས་དཔེ་བཙལ་རྙེད་པས་བསྒྱུར།། །།
- 266a
༄༅༅། །རྒྱ་གར་སྐད་དུ། །ཨཱཪྻ་པྲཛྙཱ་པཱ་ར་མི་ཏཱ་ན་ཡ་ཤ་ཏ་པཉྩཱ་ཤ་ཏི་ཀཱ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བརྒྱ་ལྔ་བཅུ་པ། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་མཁྱེན་པའི་བྱེ་བྲག་རྣམ་པ་ཐ་དད་པ་དང་ལྡན་པ། དེ་བཞིན་གཤེགས་པ་རིན་པོ་ཆེ་ཐམས་ཅད་ཀྱི་ཅོད་པན་གྱིས་ཁམས་གསུམ་དུ་དབང་བཅུ་རྫོགས་པ། དེ་བཞིན་གཤེགས་པ་ཐམས་ཅད་ཀྱི་མ། ཐམས་ཅད་མཁྱེན་པའི་ཡེ་ཤེས་ དང་ལྡན་པ། རྣལ་འབྱོར་ཅན་ཆེན་པོའི་དབང་ཕྱུག །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱས་ཆོས་ཐམས་ཅད་ཀྱི་མཉམ་པ་ཉིད་ཐུགས་སུ་ཆུད་པ། སྣ་ཚོགས་ཀྱི་བྱ་བ་མཛད་དེ། མ་ལུས་པ་ན་སེམས་ཅན་གྱི་ཁམས་ལུས་པ་མེད་པ་ཐམས་ཅད་ཀྱི་རེ་བ་ཐམས་ཅད་ཡོངས་སུ་བསྐང་བའི་ ཕྲིན་ལས་མཛད་པ། ཐུགས་རྗེ་ཆེན་པོ་རྣམ་པར་སྣང་མཛད་ཆེན་པོ། རྟག་པ་ཁམས་གསུམ་གྱི་མཉམ་པ་ཉིད་ལ་བཞུགས་པ་སྐུ་དང་། གསུང་དང་། ཐུགས་ཐམས་ཅད་རྡོ་རྗེ་དེ་བཞིན་གཤེགས་པ། ལྷའི་རྒྱལ་པོ་གཞན་འཕྲུལ་དབང་བྱེད་ཀྱི་གནས། འདོད་པའི་ཁམས་ཐམས་ཅད་ན། ནོར་བུ་རིན་པོ་ཆེ་ཆེན་པོས་རབ་ཏུ་སྤྲས་པ་དང་། བ་དན་ཁ་དོག་སྣ་ཚོགས་དྲིལ་བུ་བརྒྱུས་པ་རླུང་གིས་བསྐྱོད་པ་དང་། མེ་ཏོག་གི་ཕྲེང་བ་དང་། རྔ་མ་དང་། རྒྱན་ཕྲེང་དང་། ཆུན་འཕྱང་དང་། ཟླ་བ་ལྟ་བུས་མཛེས་པར་བྱས་པ། དེ་བཞིན་གཤེགས་པ་ཐམས་ཅད་བཞུགས་པ། ཤིས་པ་ ཐམས་ཅད་བསྟོད་པ་ན། བྱང་ཆུབ་སེམས་དཔའ་བྱེ་བ་ཕྲག་བརྒྱ་དང་ཐབས་ཅིག་ཏུ་བཞུགས་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། རྡོ་རྗེ་ཁུ་ཚུར་དང་། འཇམ་དཔལ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། ནམ་མཁའ་མཛོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དང་། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཕྲག་བརྒྱ་དང་ཐབས་ཅིག་སྟེ། ཡོངས་སུ་བསྐོར་ཅིང་
- 266b
མདུན་གྱིས་བལྟས་ནས་ཆོས་སྟོན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་སྒོ་ཞེས་བྱ་བ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏེ། འདི་ལྟར་རབ་ཏུ་དགའ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །འདོད་ཆགས་ཀྱི་མཐའ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རེག་པ་རྣམ་པར་དག་པའི་གནས་དེ་ནི་འདི་ ལྟ་སྟེ། བྱང་ཆུབ་སེམས་དཔའི་གནས་སོ། །སྡུག་པའི་འཆིང་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ཐམས་ཅད་ལ་དབང་ཕྱུག་དང་། དབང་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ལྟ་བ་རྣམ་པར་དག་པའི་ གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དགའ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྲེད་པ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྙེམས་པ་རྣམ་པར་དག་པའི་གནས་དེ་ནི་འདི་ལྟ་སྟེ། ། བྱང་ཆུབ་སེམས་དཔའི་གནས་སོ། །རྒྱན་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ཡི་ཚིམ་པར་བྱེད་པ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྣང་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་ དཔའི་གནས་སོ། །ལུས་བདེ་བ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །གཟུགས་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །སྒྲ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དྲི་ རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རོ་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །རེག་རྣམ་པར་དག་པའི་གནས་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་
- 267a
ཅད་ནི་ངོ་བོ་ཉིད་ཀྱིས་རྣམ་པར་དག་པ་སྟེ། ཆོས་ཐམས་ཅད་ཀྱི་ངོ་བོ་ཉིད་ཀྱིས་སྟོང་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །ལག་ན་རྡོ་རྗེ་སུ་ལ་ལས་ཆོས་ཐམས་ཅད་ཀྱི་ངོ་བོ་ཉིད་རྣམ་པར་དག་པའི་སྒོ་སྒྲུབ་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ལན་ཅིག་ ཐོས་ན་ཡང་དེ་བྱང་ཆུབ་ཀྱི་སྙིང་པོའི་བར་དུ་སྒྲིབ་པ་ཐམས་ཅད་དང་ཆོད་པ་དང་། ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་དང་། ལས་ཀྱི་སྒྲིབ་པ་ཆེན་པོ་བསགས་ཀྱང་སེམས་ཅན་དམྱལ་བ་ལ་སོགས་པ་ངན་སོང་དུ་ནམ་ཡང་སྐྱེ་བར་མི་འགྱུར། སྡིག་པ་ཡང་བྱས་མ་ཐག་ཏུ་སྡུག་བསྔལ་ མེད་པར་འབྱང་བར་འགྱུར་རོ། །སུ་ཞིག་འཛིན་པ་དང་། ཉིན་རེ་ཞིང་ཀློག་པ་དང་། ཁ་ཏོན་བྱེད་པ་དང་། ཚུལ་བཞིན་ཡིད་ལ་བྱེད་པ་དེ་ཚེ་འདི་ཉིད་ལ་ཆོས་ཐམས་ཅད་ཀྱི་མཉམ་པ་ཉིད་རྡོ་རྗེའི་ཏིང་ངེ་འཛིན་ཐོབ་པས་ཆོས་ཐམས་ཅད་ལ་དབང་བསྒྱུར་བར་འགྱུར་རོ། །ཆོས་ཐམས་ཅད་ལ་དགའ་བ་དང་། མགུ་བ་དང་། མཆོག་ཏུ་དགའ་བ་མྱོང་པར་འགྱུར་རོ། །བྱང་ཆུབ་སེམས་དཔའ་ཆེན་པོའི་ཚེ་བཅུ་དྲུག་གིས་དེ་བཞིན་གཤེགས་པའམ། རྡོ་རྗེ་འཛིན་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེ་དེ་བཞིན་གཤེགས་པ་ཐམས་ཅད་པ། ཐེག་པ་ཆེན་པོ་མངོན་པར་རྟོགས་པ། དཀྱིལ་འཁོར་ ཐམས་ཅད་པ། རྡོ་རྗེ་འཛིན་མཐའ་དག་གི་སེམས་ཅན་གྱི་མཆོག་ཁམས་གསུམ་མ་ལུས་པ་མཐའ་དག་ན་འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བ། སེམས་ཅན་གྱི་ཁམས་ལུས་པ་མེད་པ་འདུལ་བ། དོན་ཐམས་ཅད་གྲུབ་པ། དམ་ཚིག་ཆེན་པོ་པ། རྡོ་རྗེ་གསང་བའི་སེམས་ཅན་ ཆེན་པོ་དུ་མས་གཡོག་བྱས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་དོན་འདི་སྟོན་ཏེ། བཞིན་རབ་ཏུ་འཛུམ་ཞིང་ལག་པ་གཡོན་པ་རྡོ་རྗེ་བསྒྱིངས་ཏེ་ཐོག་མའི་རྡོ་རྗེ་ཆེན་པོ་གསོར་ནས་རང་གི་སྙིང་གར་བསྟོད་པའི་ཚུལ་གྱིས་འཛིན་ཅིང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ་རང་གི་དེ་ཁོ་ན་ཉིད་ ཀྱི་སྙིང་པོ་འདི་སྨྲས་སོ། །ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱིས་ཡང་དེ་བཞིན་གཤེགས་པ་ཐམས་ཅད་ཞི་བའི་ཆོས་ཉིད་མངོན་པར་རྫོགས་པར་བྱང་ཆུབ་པར་སྒྲུབ་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །རྡོ་རྗེ་སྲ་བ་ཉིད་ཀྱི་ཕྱིར་རྡོ་
- 267b
རྗེ་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །དོན་གཅིག་པའི་ཕྱིར་དོན་གྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ངོ་བོ་ཉིད་ཀྱིས་རྣམ་པར་དག་པའི་ཕྱིར་ཆོས་ཀྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ཐམས་ ཅད་ལ་རྣམ་པར་མི་རྟོག་པའི་ཕྱིར་ཐམས་ཅད་ཀྱི་མཉམ་པ་ཉིད་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་ཆེན་པོའོ། །ལག་ན་རྡོ་རྗེ་སུ་ལ་ལ་ཆོས་མངོན་པར་སྒྲུབ་པ་བཞི་པོ་འདི་དག་ཉན་པ་དང་། འཛིན་པ་དང་། ཀློག་པ་དང་། སྒོམ་པ་དེ་སྡིག་པ་ཐམས་ཅད་སྤྱོད་ཀྱང་བྱང་ཆུབ་ཀྱི་སྙིང་པོ་ལ་འདུག་ གི་བར་དུ་ངན་སོང་ཐམས་ཅད་ལས་ཡང་དག་པར་འདས་པར་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །དེ་ནས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཡེ་ཤེས་ཀྱི་ཁུ་ཚུར་ཡོངས་སུ་འཛིན་པ་དོན་གནས་ འདི་ཉིད་རྒྱ་ཆེར་སྟོན་ཅིང་བཞིན་རབ་ཏུ་འཛུམ་དམུལ་ཏེ་ཆོས་ཐམས་ཅད་ཀྱི་མཉམ་པ་ཉིད་ཀྱི་སྙིང་པོ་འདི་རབ་ཏུ་སྨྲས་སོ། །ཨ། དེ་ནས་མ་རུངས་པ་ཐམས་ཅད་འདུལ་བ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་ཀྱང་ཡང་ཆོས་ཐམས་ཅད་ཀྱི་མཉམ་པ་ཉིད་ཀྱིས་རྣམ་པར་རྒྱལ་བ་བསྡུ་བ་ཞེས་ བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་སྒྲུབ་པ་འདི་བཤད་དེ། འདོད་ཆགས་ཀྱི་སྤྲོས་པ་མེད་པ་ཉིད་ཀྱིས་ཞེ་སྡང་གི་སྤྲོས་པ་མེད་པ་ཉིད་དོ། །ཞེ་སྡང་གི་སྤྲོས་པ་མེད་པ་ཉིད་ཀྱིས་གཏི་མུག་གི་སྤྲོས་པ་མེད་པ་ཉིད་དོ། །གཏི་མུག་གི་སྤྲོས་པ་མེད་པ་ཉིད་ཀྱིས་ཆོས་ཐམས་ཅད་སྤྲོས་པ་མེད་པ་ཉིད་དོ། །ཆོས་ཐམས་ཅད་ ཀྱི་སྤྲོས་པ་མེད་པ་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་དུ་རིག་པར་བྱའོ། །ལག་ན་རྡོ་རྗེ་སུ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཛིན་པ་དང་། ཀློག་པ་དང་། སྒོམ་པ་དེས་འདུལ་བའི་དབང་གི་ཕྱིར་ཁམས་གསུམ་དུ་སྐྱེས་པའི་སེམས་ཅན་ཐམས་ཅད་བསད་ཀྱང་ངན་སོང་དུ་འགྲོ་ བར་མི་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །དེ་ནས་བཅོམ་ལྡན་འདས་ལག་ན་རྡོ་རྗེ་ཆོས་ཉིད་འདིའི་དོན་རྒྱ་ཆེར་སྟོན་ཏེ། འཇིག་རྟེན་གསུམ་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཕྱག་རྒྱ་བཅིངས་ནས་ཁྲོ་གཉེར་དང་བཅས་ཤིང་སྨིན་
- 268a
མ་བཏེག་སྟེ་འབར་བར་ལྟ་ལ་པདྨའི་གདོང་ཁྲོ་ཞིང་དགོད་དེ། མཆེ་བ་གཙིགས་ནས། རྐང་པ་གཡོན་པ་བརྐྱང་བའི་ཚུལ་དུ་གནས་པས་གནས་ནས་རྡོ་རྗེ་ཧཱུྃ་ཞེས་བྱ་བའི་སྙིང་པོ་འདི་སྨྲས་སོ། །ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ངོ་བོ་ཉིད་དག་པའི་ཆོས་ཉིད་ཐོབ་པས་ཡང་ཆོས་ཐམས་ ཅད་ཀྱི་མཉམ་པ་ཉིད་སྤྱན་རས་གཟིགས་དབང་ཕྱུག་གི་ཡེ་ཤེས་ཀྱི་ཕྱག་རྒྱ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དེ། འདོད་ཆགས་ཐམས་ཅད་རྣམ་པར་དག་པས་འཇིག་རྟེན་ན་ཞེ་སྡང་ཐམས་ཅད་རྣམ་པར་དག་པར་འགྱུར་རོ། །དྲི་མ་ཐམས་ཅད་རྣམ་པར་དག་པས་འཇིག་རྟེན་ན་སྡིག་པ་ཐམས་ཅད་ རྣམ་པར་དག་པར་འགྱུར་རོ། །ཆོས་ཐམས་ཅད་རྣམ་པར་དག་པས་འཇིག་རྟེན་ན་སེམས་ཅན་ཐམས་ཅད་རྣམ་པར་དག་པར་འགྱུར་རོ། །ཤེས་པ་ཐམས་ཅད་རྣམ་པར་དག་པས་འཇིག་རྟེན་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་འགྱུར་རོ། །ལག་ན་རྡོ་རྗེ་སུ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ འདི་ཉན་པ་དང་། འཛིན་པ་དང་། ཀློག་པ་དང་། སྒོམ་པ་དེ་འདོད་ཆགས་དང་། དྲི་མ་ཐམས་ཅད་ཀྱི་ནང་ན་འདུག་ཀྱང་པདྨ་ལྟ་བུར་འདོད་ཆགས་ཀྱི་ཉེས་པ་རྣམས་དང་། དྲི་མ་རྣམས་དང་། གློ་བུར་གྱི་ཉོན་མོངས་པ་རྣམས་ཀྱིས་གོས་པར་མི་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དོན་གྱི་གནས་འདི་ཉིད་རྒྱ་ཆེར་སྟོན་ཅིང་བཞིན་རབ་ཏུ་འཛུམ་དམུལ་ཏེ། པདྨའི་འདབ་མ་ཁ་འབྱེད་པས་འདོད་ཆགས་ལ་སོགས་པའི་དྲི་མས་མི་གོས་པ་ ལ་ལྟ་ཞིང་འགྲོ་བ་ཐམས་ཅད་ཀྱི་ཕྱིར་པདྨ་གཟུགས་སྣ་ཚོགས་ཞེས་བྱ་བའི་སྙིང་པོ་འདི་སྨྲས་སོ། །ཧྲཱིཿ། དེ་ནས་བཅོམ་ལྡན་འདས་དེ་བཞིན་གཤེགས་པ་ཁམས་གསུམ་ཐམས་ཅད་ཀྱི་དབང་པོས་ཡང་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ལས་བྱུང་བའི་ཡེ་ཤེས་ཀྱི་སྙིང་པོ་ཞེས་བྱ་བ་ཤེས་རབ་ཀྱི་ ཕ་རོལ་ཏུ་ཕྱིན་པའི་ཚུལ་འདི་བཤད་དེ། དབང་བསྐུར་བ་སྦྱིན་པ་ནི་ཁམས་གསུམ་ཐམས་ཅད་ཀྱི་རྒྱལ་སྲིད་ཐོབ་པར་འགྱུར་རོ། །ནོར་སྦྱིན་པ་ནི་རེ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཆོས་སྦྱིན་པ་ནི་ཆོས་ཐམས་ཅད་ཀྱི་མཉམ་པ་ཉིད་ཐོབ་པར་འགྱུར་རོ། །ཟང་ཟིང་སྦྱིན་པ་ནི་ལུས་དང་ངག་དང་སེམས་ཀྱི་
- 268b
བདེ་བ་ཐམས་ཅད་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་བཞིན་རབ་ཏུ་འཛུམ་སྟེ། རང་གི་མགོ་ལ་རྡོ་རྗེ་རིན་པོ་ཆེའི་དབང་བསྐུར་བའི་ཕྲེང་བ་འཆིང་ཞིང་དོན་འདི་ཉིད་རྒྱ་ཆེར་སྟོན་ཏེ། དབང་བསྐུར་བ་ཐམས་ཅད་ཀྱི་དམ་ཚིག་རིན་པོ་ཆེ་ཞེས་བྱ་བའི་སྙིང་པོ་འདི་སྨྲས་སོ།། ཏྲཱྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཐོབ་པ་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་འཛིན་པ། དེ་བཞིན་གཤེགས་པ་རྟག་པས་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་གནས་རྡོ་རྗེ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་ དེ། དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་ཡོངས་སུ་འཛིན་པ་ནི་དེ་བཞིན་གཤེགས་པ་ཐམས་ཅད་ཉིད་དུ་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསུང་གི་ཕྱག་རྒྱ་ཡོངས་སུ་འཛིན་པ་ནི་ཆོས་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཕྱག་རྒྱ་ཡོངས་སུ་འཛིན་ པ་ནི་ཏིང་ངེ་འཛིན་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་ཡོངས་སུ་འཛིན་པ་ནི་ལུས་དང་། ངག་དང་། སེམས་ཐམས་ཅད་རྡོ་རྗེར་རྡོ་རྗེའི་དངོས་གྲུབ་དམ་པ་ཐོབ་པར་འགྱུར་རོ། །སུ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཆང་བ་དང་། ཀློག་པ་དང་ ལུང་འབོགས་པ་དང་། སྒོམ་པ་དེས་དངོས་གྲུབ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་། ཤེས་པ་ཐམས་ཅད་དང་། དགོས་པ་ཐམས་ཅད་དང་། ལུས་དང་། ངག་དང་། སེམས་ཐམས་ཅད་རྡོ་རྗེར་རྡོ་རྗེའི་དངོས་གྲུབ་དམ་པ་ཐོབ་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་ པར་རྫོགས་པར་འཚང་རྒྱ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ཁུ་ཚུར་དམ་ཚིག་ཆེན་པོའི་རྡོ་རྗེའི་ཕྱག་རྒྱ་ཡོངས་སུ་འཛིན་པས་དོན་གནས་འདི་རྒྱ་ཆེར་བསྟན་ཏེ། དེ་བཞིན་རབ་ཏུ་འཛུམ་ཞིང་རྡོ་རྗེ་སྲ་བའི་ཕྱག་རྒྱ་དངོས་གྲུབ་ཐམས་ཅད་ཀྱི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། ། ཨཿ། དེ་ནས་བཅོམ་ལྡན་འདས་ཆོས་ཐམས་ཅད་སྤྲོས་པ་མེད་པའི་དེ་བཞིན་གཤེགས་པས་ཡང་འཁོར་ལོ་ལྟར་ཡི་གེ་བསྐོར་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དེ། ངོ་བོ་ཉིད་མེད་པའི་ཚུལ་གྱིས་ཆོས་ཐམས་ཅད་སྟོང་པ་ཉིད་དོ། །མཚན་མ་མེད་པའི་ཚུལ་གྱིས་ཆོས་ཐམས་ཅད་
- 269a
མཚན་མ་མེད་པའོ། །སྨོན་པ་མེད་པའི་ཚུལ་གྱིས་ཆོས་ཐམས་ཅད་སྨོན་པ་མེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པས་ཆོས་ཐམས་ཅད་རང་བཞིན་གྱིས་འོད་གསལ་བའོ། །དེ་ནས་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དོན་འདི་ཉིད་རྒྱ་ཆེར་སྟོན་ཏེ། བཞིན་ རབ་ཏུ་འཛུམ་བཞིན་དུ་བདག་གི་རལ་གྲི་དེས་དེ་བཞིན་གཤེགས་པ་ཐམས་ཅད་ལ་འདེབས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་མཆོག་འདི་སྨྲས་སོ། །ཨ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་དེར་འདུས་པའི་དེ་བཞིན་གཤེགས་པས་འཁོར་ལོ་ཆེན་པོ་ལ་འཇུག་པ་ ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །རྡོ་རྗེ་མཉམ་པ་ཉིད་ལ་འཇུག་པ་ནི་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ལ་འཇུག་པར་འགྱུར་རོ། །དོན་གྱི་མཉམ་པ་ཉིད་ལ་འཇུག་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་ལ་འཇུག་པར་འགྱུར་རོ། །ཆོས་ཐམས་ ཅད་ཀྱི་མཉམ་པ་ཉིད་ལ་འཇུག་པ་ནི་དམ་པའི་ཆོས་ཀྱི་འཁོར་ལོ་ལ་འཇུག་པར་འགྱུར་རོ། །ཐམས་ཅད་ཀྱི་མཉམ་པ་ཉིད་ལ་འཇུག་པ་ནི་འཁོར་ལོ་ཐམས་ཅད་ལ་འཇུག་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཆོས་ཉིད་ཀྱི་དོན་འདི་རྒྱ་ཆེར་སྟོན་ཅིང་ འཛུམ་དམུལ་ནས་རྡོ་རྗེའི་འཁོར་ལོ་བསྐོར་ཞིང་རྡོ་རྗེའི་འཁོར་ལོ་ཐམས་ཅད་ལ་འཇུག་པ་ཞེས་བྱ་བའི་སྙིང་པོ་འདི་སྨྲས་སོ། །ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ལ་མཆོད་པ་ཐམས་ཅད་ཀྱི་ཆོ་ག་རྒྱས་པའི་སྣོད་ཀྱིས་མཆོད་པ་ཐམས་ཅད་ཀྱི་མཆོག་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ ཚུལ་འདི་བཤད་དོ། །བྱང་ཆུབ་ཀྱི་སེམས་བསྐྱེད་པ་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་ནི་དེ་བཞིན་གཤེགས་པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །དམ་པའི་ཆོས་ཡོངས་སུ་འཛིན་པ་ནི་དེ་བཞིན་གཤེགས་ པ་ཐམས་ཅད་ལ་མཆོད་པའི་ཆོ་ག་རྒྱས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེར་འདྲི་བ་དང་། ཡི་གེར་འདྲིར་འཇུག་པ་དང་། འཛིན་པ་དང་། ཀློག་པ་དང་། བརྗོད་པ་དང་། སྟོན་པ་དང་། ཉན་པ་དང་། སེམས་པ་དང་། སྒོམ་པ་དང་། མཆོད་པ་བྱེད་པ་ནི་དེ་བཞིན་གཤེས་པ་ཐམས་ཅད་ལ་མཆོད་
- 269b
པའི་ཆོ་ག་རྒྱས་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམས་བའི་མཛོད་དོན་དེ་ཉིད་རྒྱ་ཆེར་སྟོན་ཏེ། བཞིན་རང་དུ་འཛུམ་ཞིང་ལས་ཐམས་ཅད་དོན་ཡོད་པའི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཨོྃ། དེ་ནས་བཅོམ་ལྡན་འདས་དེ་བཞིན་གཤེགས་པ་སེམས་ཅན་ཐམས་ ཅད་འདུལ་ནུས་པ་ཡང་ཡེ་ཤེས་ཀྱི་ཁུ་ཚུར་ཡོངས་སུ་འཛིན་པ་སེམས་ཅན་ཐམས་ཅད་འདུལ་བ་ཤེས་པའི་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །སེམས་ཅན་ཐམས་ཅད་མཉམ་པ་ཉིད་པས་ཁྲོ་བ་མཉམ་པ་ཉིད་དོ། །སེམས་ཅན་ཐམས་ཅད་འདུལ་བ་ཉིད་པས་ཁྲོ་བ་འདུལ་བ་ ཉིད་དོ། །སེམས་ཅན་ཐམས་ཅད་ཆོས་ཉིད་པས་ཁྲོ་བ་ཆོས་ཉིད་དོ། །སེམས་ཅན་ཐམས་ཅད་རྡོ་རྗེ་ཉིད་པས་ཁྲོ་བ་རྡོ་རྗེ་ཉིད་དོ། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་ཐམས་ཅད་འདུལ་བ་ནི་བྱང་ཆུབ་པོ། །དེ་ནས་བྱང་ཆུབ་སེམས་དཔའ་བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དོན་དེ་ཉིད་ རྒྱ་ཆེར་སྟོན་ཏེ། བཞིན་རབ་ཏུ་འཛུམ་ཞིང་རྡོ་རྗེ་མཆེ་བའི་ཕྱག་རྒྱ་དང་། རྡོ་རྗེ་གནོད་སྦྱིན་གྱི་གཟུགས་ཀྱིས་རྡོ་རྗེ་ཁྲོ་བོའི་གད་མོ་ཞེས་བྱ་བའི་སྙིང་པོ་འདི་སྨྲས་སོ། །ཧ། དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཐམས་ཅད་ཀྱི་མཉམ་པ་ཉིད་ལ་གནས་པས་ཡང་ཆོས་ཐམས་ཅད་ཀྱི་མཆོག་ཅེས་བྱ་ བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཐམས་ཅད་དོན་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་དོན་ཉིད་དོ། །ཐམས་ཅད་ཆོས་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཉིད་དོ། །ཐམས་ཅད་ལས་ཉིད་ པས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཉིད་དུ་རིག་པར་བྱའོ། །དེ་ནས་བཅོམ་ལྡན་འདས་ལག་ན་རྡོ་རྗེ་དེ་བཞིན་གཤེགས་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དོན་ཡོད་པའི་དམ་ཚིག་གི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དོན་ཡོད་པ་ ཐམས་ཅད་ཀྱི་དམ་ཚིག་ཅེས་བྱ་བའི་སྙིང་པོ་འདི་སྨྲས་སོ། །ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་པ་རྣམ་པར་སྣང་མཛད་ཀྱིས་ཡང་སེམས་ཅན་ཐམས་ཅད་བྱིན་གྱིས་རློབ་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །བྱང་ཆུབ་སེམས་དཔའ་སེམས་
- 270a
དཔའ་ཆེན་པོ་ཀུན་ཏུ་བཟང་པོ་ཐམས་ཅད་ཀྱི་རང་བཞིན་ཡིན་པས་སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཐམས་ཅད་རྡོ་རྗེའི་སྙིང་པོས་དབང་བསྐུར་བ་ཉིད་པས་སེམས་ཅན་ཐམས་ཅད་ནི་རྡོ་རྗེའི་སྙིང་པོ་ཅན་ནོ། །ངག་ཐམས་ཅད་རབ་ཏུ་འབྱུང་བས་སེམས་ཅན་ ཐམས་ཅད་ནི་ཆོས་ཀྱི་སྙིང་པོ་ཅན་ནོ། །སེམས་ཅན་ཐམས་ཅད་ཀྱི་བྱ་བ་བྱེད་པ་ལ་སྦྱོར་བས་སེམས་ཅན་ཐམས་ཅད་ནི་ལས་ཀྱི་སྙིང་པོ་ཅན་ནོ། །དེ་ནས་ཕྱི་རོལ་གྱི་རྡོ་རྗེའི་རིགས་རྣམས་ཀྱིས་ཅ་ཅོའི་སྒྲ་ཕྱུང་ནས། ཆོས་ཉིད་ཀྱི་དོན་རྒྱ་ཆེར་སྟོན་ཅིང་སྙིང་པོ་ཕུལ་ཏེ། དེ་ནས་རྡོ་རྗེའི་དབང་ཕྱུག་ཆེན་པོས་ རང་གི་དེ་ཁོ་ནའི་སྙིང་པོ་འདི་ཕུལ་ལོ། །དྲཱི། དེ་ནས་མ་མོ་ཐམས་ཅད་ཀྱིས་བཅོམ་ལྡན་འདས་ལ་ཕྱག་འཚལ་ཏེ་ཚིག་མཐུན་པར་ཐམས་ཅད་དགུག་པ་དང་། གཟུང་བ་དང་། གཞིག་པ་དང་། སྒྲུབ་པའི་དམ་ཚིག་ཅེས་བྱ་བ་རང་གི་དེ་ཁོ་ནའི་སྙིང་པོ་འདི་ཕུལ་ལོ། །བྷྱོཿ། དེ་ནས་སྦྲང་རྩིར་བྱེད་ པ་ལ་སོགས་པ་མིང་པོ་གསུམ་གྱིས་བཅོམ་ལྡན་འདས་ལ་ཕྱག་འཚལ་ཏེ། ཚིག་མཐུན་པར་རང་གི་དེ་ཁོ་ནའི་སྙིང་པོ་འདི་ཕུལ་ལོ། །སྭཱ། དེ་ནས་སྲིང་མོ་བཞིས་བཅོམ་ལྡན་འདས་ལ་ཕྱག་འཚལ་ཏེ། རང་གི་དེ་ཁོ་ནའི་སྙིང་པོ་འདི་ཕུལ་ལོ། །ཧཱ། དེ་ནས་བཅོམ་ལྡན་འདས་དེ་བཞིན་གཤེགས་ པ་མཐའ་ཡས་མུ་མེད་ལ་མཐར་ཐུག་ཅིང་མུ་མེད་པའི་ཆོས་དང་ལྡན་པས་ཡང་ཆོས་འདི་མཐར་ཐུག་པར་བྱིན་གྱིས་བརླབ་པའི་ཕྱིར་ཆོས་ཐམས་ཅད་ཀྱི་མཉམ་པ་ཉིད་ཀྱི་མཐར་ཐུག་པས་བྱིན་གྱིས་བརླབས་པ་རྡོ་རྗེ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཤད་དོ། །ཤེས་རབ་ཀྱི་ཕ་ རོལ་ཏུ་ཕྱིན་པ་མཐའ་ཡས་པ་ཉིད་པས་དེ་བཞིན་གཤེགས་པ་ཐམས་ཅད་མཐའ་ཡས་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་ཉིད་པས་རྡོ་རྗེ་ཐམས་ཅད་མུ་མེད་པ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་དུ་མ་ཉིད་པས་ཆོས་ཐམས་ཅད་དུ་མ་ཉིད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་མཐར་ ཐུག་པ་མེད་པ་ཉིད་པས་ཆོས་ཐམས་ཅད་མཐར་ཐུག་པ་མེད་པ་ཉིད་ཡིན་ནོ། །སུ་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་། འཛིན་པ་དང་། འཆང་བ་དང་། ཀློག་པ་དང་། སྟོན་པ་དང་། རྗོད་པ་དང་། སྒོམ་པ་དེས་སངས་རྒྱས་དང་། བྱང་ཆུབ་སེམས་དཔའི་སྤྱོད་
- 270b
པ་ཐུག་པ་མེད་པའི་མཐར་ཕྱིན་ཏེ། སྒྲིབ་པ་ཐམས་ཅད་ཟད་ནས་དེ་བཞིན་གཤེགས་པའམ། རྡོ་རྗེ་འཛིན་པར་མྱུར་དུ་འགྱུར་རོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ། ཆོས་ཀྱི་རྣམ་གྲངས་འདི་དོན་ཡོད་པ་དང་། ཐོགས་པ་མེད་པར་མྱུར་དུ་འགྲུབ་པར་བྱ་བའི་ཕྱིར། ལག་ན་རྡོ་རྗེ་ ལ་ལེགས་སོ་ཞེས་བྱ་བ་བྱིན་ནོ། །སེམས་ཅན་ཆེན་པོ་ལེགས་སོ་ལེགས། །བདེ་བ་ཆེན་པོ་ལེགས་སོ་ལེགས། །ཐེག་པ་ཆེན་པོ་ལེགས་སོ་ལེགས། །བློ་གྲོས་ཆེན་པོ་ལེགས་ས་ལེགས། །ཆོ་ག་འདི་ནི་ལེགས་པར་སྨྲས། །སངས་རྒྱས་རྡོ་རྗེ་འཛིན་ཀུན་གྱིས། །འབྲས་བུ་ཡོད་པ་ འདུལ་བའི་མཆོག །རྡོ་རྗེ་མདོ་སྡེ་བྱིན་གྱིས་བརླབས། །ཆོ་གའི་རྒྱལ་པོ་བླ་ན་མེད། །གང་རྣམས་འདི་དག་འཛིན་པ་ནི། །བདུད་ལ་སོགས་པ་ཐམས་ཅད་ཀྱིས། །དེ་དག་མི་སོད་མི་ཚུགས་སོ། །སངས་རྒྱས་བྱང་ཆུབ་སེམས་དཔའ་དང་། །དངོས་གྲུབ་དམ་པ་ཐམས་ཅད་ཀྱང་། །སངས་ རྒྱས་ཀུན་གྱིས་གསུངས་པ་བཞིན། །རིང་པོར་མི་ཐོགས་ཐོབ་པར་འགྱུར། །དེ་སྐད་གསུངས་ནས་གསང་གྲུབ་ཕྱིར། །རྡོ་རྗེ་ཅན་གྱིས་བཤད་པ་ལ། །ཀུན་མཆོག་སངས་རྒྱས་མཁས་བཅས་པ། །ཐམས་ཅད་ཀྱིས་ནི་མངོན་པར་བསྟོད། །དེ་ནས་བཅོམ་ལྡན་འདས་དེ་བཞིན་གཤེགས་པ་ རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་གསང་བའི་ཆོས་ཉིད་བརྙེས་པ་ཆོས་ཐམས་ཅད་སྤྲོས་པ་མེད་པས་ཡང་བདེ་བ་ཆེན་པོ་རྡོ་རྗེའི་དོན་ཡོད་པའི་དམ་ཚིག་ཅེས་བྱ་བ་རྡོ་རྗེ་དོན་ཡོད་པའི་ཆོས་མཉམ་པ་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་མཆོག་དང་པོ་ཐོག་མ་དང་། ཐ་མ་དང་། དབུས་མེད་པའི་དམ་པ་འདི་གསུངས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་འདོད་ཆགས་ཆེན་པོ་དངོས་གྲུབ་དམ་པ་ནི་དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོ་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་བདེ་བ་ཆེན་པོ་དངོས་ གྲུབ་དམ་པ་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོ་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོ་དངོས་གྲུབ་དམ་པ་ནི་བདུད་ཆེན་པོའི་སྟོབས་ཐམས་ཅད་རབ་ཏུ་འཇོམས་པ་དངོས་གྲུབ་དམ་
- 271a
པར་འགྱུར་རོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་བདུད་ཆེན་པོའི་སྟོབས་ཐམས་ཅད་རབ་ཏུ་འཇོམས་པ་དངོས་གྲུབ་དམ་པ་ནི་ཁམས་གསུམ་པ་ཐམས་ཅད་ཀྱི་དབང་ཕྱུག་ཆེན་པོ་དངོས་གྲུབ་དམ་པར་འགྱུར་རོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་ཁམས་ གསུམ་པ་ཐམས་ཅད་ཀྱི་དབང་ཕྱུག་ཆེན་པོའི་དངོས་གྲུབ་དམ་པ་ནི་འཇིག་རྟེན་གྱི་ཁམས་མ་ལུས་པ་ན་སེམས་ཅན་གྱི་ཁམས་ལུས་པ་མེད་པ་ཡོངས་སུ་སྦྱོང་བར་འདོད་པའི་རྒྱུའི་ཕྱིར་འཁོར་བ་ལ་ཡང་ཆགས་ཤིང་བརྩོན་འགྲུས་ཆེ་བའི་བྱང་ཆུབ་སེམས་དཔའ་ཆེན་པོ་རྣམས་ཀྱི་འཇིག་རྟེན་གྱི་ཁམས་མ་ ལུས་པ་ན་སེམས་ཅན་གྱི་ཁམས་ལུས་པ་མེད་པ་ཡོངས་སུ་བསྐྱབ་པ་དང་། སེམས་ཅན་ཐམས་ཅད་ལ་ཕན་པ་དང་། བདེ་བ་དང་། མཆོག་ཏུ་ཤིན་ཏུ་བདེ་བ་ཆེན་པོའི་དངོས་གྲུབ་དམ་པར་འགྱུར་རོ། །དེ་ཅིའི་ཕྱིར་ཞེ་ན། ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་འགྱུར་བའི་ ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་ཐབས་དང་། །ཡེ་ཤེས་གནས་སུ་བསྒྲུབས་པས་ནི། །ཆོས་ཀུན་རྣམ་པར་དག་པའི་ཕྱིར། །འཁོར་བ་ཡོངས་སུ་དག་པར་འགྱུར། །ཆགས་ལ་སོགས་པས་འདུལ་ན་ནི། འཁོར་ བའི་བར་དུ་རྟག་པར་ཡང་། །འཇིག་རྟེན་སྡིག་བྱེད་དེ་སྦྱང་ཕྱིར། །འཁོར་བའི་སྲིད་དུ་བདག་ཉིད་འདུལ། །ཇི་ལྟར་པདྨ་རབ་དམར་ཡང་། །ཚོན་གྱི་ཉེས་པས་མི་གོས་པ། །དེ་བཞིན་གནས་པའི་ཉེས་པ་ཡིས། །འགྲོ་ཕན་རྣམས་ལ་མི་གོས་སོ། །འདོད་ཆགས་ཆེན་པོ་རྣམ་པར་དག །བདེ་ བ་ཆེ་ཞིང་ནོར་ཆེ་ལ། །ཁམས་གསུམ་དབང་ཕྱུག་ཐོབ་པས་ན། །སེམས་ཅན་དོན་རྣམས་བརྟན་པར་བྱེད། །ལག་ན་རྡོ་རྗེ་སུ་ལ་ལ་ནང་པར་ལངས་ནས་མཆོག་དང་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་འདི་ཉིན་རེ་ཞིང་འདོན་པ་དང་། ཉན་པ་དང་། འཛིན་པ་དང་། ཀློག་པ་དང་། སྒོམ་པ་དེ་ཡིད་བདེ་བ་དང་། བདེ་བ་ཐམས་ཅད་ཐོབ་པར་འགྱུར་རོ། །བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་དངོས་གྲུབ་ཀྱི་མཆོག་ཀྱང་ཚེ་འདི་ལ་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བ་མཆོག་ཀྱང་འགྲུབ་སྟེ། རྡོ་རྗེ་འཛིན་ཐམས་ཅད་ཀྱི་ཆེན་
- 271b
པོའམ་དེ་བཞིན་གཤེགས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གསང་བའི་བདག་པོ་ལག་ན་རྡོ་རྗེ་ལ་བཀའ་སྩལ་པ། གསང་བའི་བདག་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་སྔགས་ཀྱི་ཚིག་ཉི་ཤུ་རྩ་ལྔ་པོ་འདི་རྣམས་སོ། །ཨོྃ་བྱང་ཆུབ་ཀྱི་སེམས་རྡོ་རྗེ། ཨོྃ་ཀུན་ཏུ་ བཟང་པོའི་སྤྱོད་པ། ཨོྃ་ཡིད་བཞིན་གྱི་ནོར་བུ། ཨོྃ་འགོག་པ་མེད་པ། ཨོྃ་སྐྱེ་བ་བཟློག་པ། ཨོྃ་རྣམ་པར་ཤེས་པ་ཐམས་ཅད། ཨོྃ་འདོད་ཆགས་དང་བྲལ་བའི་ཆོས་ཉིད་ཆེན་པོ། ཨོྃ་བརྩོན་འགྲུས་ཀྱི་གོ་ཆ། ཨོྃ་ཀུན་ཏུ་འགྲོ་བ། ཨོྃ་རྡོ་རྗེ་སྲ་བའི་སེམས་ཧཱུྃ་ཕཊ། ཨོྃ་དེ་བཞིན་གཤེགས་ པ་ཐམས་ཅད། ཨོྃ་ངོ་བོ་ཉིད་རྣམ་པར་དག་པ། ཨོྃ་ཆོས་ཉིད་ཤེས་པ་རྣམ་པར་དག་པ། ཨོྃ་དེ་བཞིན་ལས་རྣམ་པར་སྦྱོང་བ། ཧཱུྃ་ཨོྃ་ངེས་པར་གནོད་མཛེས་རྡོ་རྗེ་ཅན་ཕཊ། ཨོྃ་འདོད་པ་ལ་འདོད་ཆགས་པ། ཨོྃ་སྤོང་བའི་རྡོ་རྗེ་ཅན། ཨོྃ་ཧཱུྃ་ཐམས་ཅད་འདུལ་བ། ཨོྃ་ཧྲཱིཿ། ཨོྃ་ཨ་ཞེས་བྱ་ བའི་སྒོ། ཨོྃ་ཤེས་རབ་ཀྱི་ཕ་རོལ་ཏུ་ཕྱིན་པ། །ཨཱཾ་བྃ་ཧཱུྃ་ཡ། ཨོྃ། ཨོྃ་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག །ཨོྃ་དེ་བཞིན་གཤེགས་པ་ཐམས་ཅད་ཀྱི་གསུང་རྣམ་པར་དག་པ། ཨོྃ་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་ཨཿ། ཨོྃ་ཨ། སྡིག་པའི་བཅིངས་པ་ཐམས་ཅད་ ཆོམས་ཤིག །ངན་སོང་གི་རྒྱུད་ཐམས་ཅད་ལས་ཐར་བར་གྱིས་ཤིག། ཨོྃ་དམ་ཚིག་ཐམས་ཅད་ཀྱི་རྡོ་རྗེ། ཧཱུྃ་ཏྲཊ། སྡིག་པ་གཞོམ་པའི་ཕྱག་རྒྱ་དང་སྔགས་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བའི་དངོས་གྲུབ་དམ་པ་རྡོ་རྗེ་འཛིན་ཆེན་པོ་དང་དེ་བཞིན་གཤེགས་པར་འགྱུར་རོ། །ལག་ན་ རྡོ་རྗེ་འདི་ནི་སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་ཐོས་པར་མི་འགྱུར་རོ། །འདི་ནི་སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱིས་མཉན་པའམ། ཡི་གེར་འདྲི་བའམ། ཡི་གེ་འདྲིར་གཞུག་པའམ། བཀླག་པའམ། འཆང་བའམ། བསྒོམ་པའམ། བསྟི་སྟང་ དུ་བྱ་བའམ། རི་མོར་བྱ་བའམ། མཆོད་པར་མི་ནུས་སོ། །གང་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་ཆོས་ཀྱི་རྣམ་གྲངས་འདི་ལས་ཐ་ན་ཡི་གེ་འབྲུ་གཅིག་ཙམ་ཐོས་ན་ཡང་སེམས་ཅན་དེ་དག་ནི་གཞན་ན་སངས་རྒྱས་མང་པོ་ལ་དགེ་བའི་རྩ་བ་བསྐྱེད་པ་ཡིན་ན་མཐའ་དག་རྫོགས་
- 272a
པ་ལྟ་ཅི་སྨོས། ལག་ན་རྡོ་རྗེ་གང་ལ་ལ་དག་སངས་རྒྱས་བྱེ་བ་ཁྲག་ཁྲིག་གང་གཱའི་ཀླུང་བརྒྱད་ཅུའི་བྱེ་མ་སྙེད་ལ་བཀུར་སྟི་མ་བྱས་པ་དང་། བླ་མར་མ་བྱས་པ་དང་། བསྟི་སྟང་མ་བྱས་པ་དང་། མཆོད་པ་མ་བྱས་པ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་ སྒོའི་ཆོས་ཀྱི་རྣམ་གྲངས་འདི་ཐོས་པར་མི་ནུས་སོ། །ཆོས་ཀྱི་རྣམ་གྲངས་འདི་གང་ན་སྤྱོད་པའི་ས་ཕྱོགས་དེ་མཆོད་རྟེན་དུ་འགྱུར་རོ། །ཆོས་ཀྱི་རྣམ་གྲངས་འདི་གང་གི་ལུས་ལ་ཐོགས་སམ། གླེགས་བམ་ལ་བྲིས་ཏེ་སྤྱོད་པའི་གང་ཟག་དེ་ཕྱག་བྱ་བའི་གནས་སུ་འགྱུར་རོ། ། དེ་བསྐལ་པ་བྱེ་བ་མང་པོར་སྐྱེ་བ་དྲན་པར་འགྱུར་རོ། །དེ་ལ་བདུད་སྡིག་ཏོ་ཅན་བར་ཆད་བྱེད་པར་མི་འགྱུར་རོ། །རྒྱལ་པོ་ཆེན་པོ་བཞི་དང་། ལྷ་གཞན་རྣམས་ཀྱང་དེ་ལ་བསྲུང་བ་དང་། བསྐྱབ་པ་དང་། སྦ་བའི་ཕྱིར་རྟག་ཏུ་ཕྱི་བཞིན་འབྲང་བར་འགྱུར་རོ། །ཡ་ ང་བ་མ་སྤངས་པར་འཆི་བར་མི་འགྱུར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་དགོངས་པར་འགྱུར་རོ། །མདོར་ན་སངས་རྒྱས་ཀྱི་ཞིང་གང་དང་གང་དུ་འདོད་པ་དེ་དང་དེར་སྐྱེའོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ ཆོས་ཀྱི་རྣམ་གྲངས་འདི་ཕན་ཡོན་མང་མོད་ཀྱི་ངས་ཕྱོགས་ཙམ་ཞིག་བརྗོད་དོ། །བཅོམ་ལྡན་འདས་ཀྱིས་དེ་སྐད་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་དེ་དག་དང་། ཐམས་ཅད་ དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ ཚུལ་བརྒྱ་ལྔ་བཅུ་པ་རྫོགས་སྷོ།། །།མངྒ་ལཾ།། །།