gsang ba'i de kho na nyid rab tu gsal ba zhes bya ba
Guhyatattvaprakāśanāma
Text
ff. 354a–362a · 17 folio sides
- 354a
gsal bar bya ste blo gros dman pas go bar bya ba'i phyir/ dpyid kyi thig le zhes bya ba'i mtshon pa ste/ rdo rje phag mo dang dpyid dpal he ru ka'i bka' lung gis bstan pa lus dpyid kyi thig le zhes bya ba de brjod pa'i gzhung rdzogs so// //mkhas pa dam pa blo gros bzang/ /grags pa'i zhal snga nas dang ni/ /sgra bsgyur mar pa yid gzhungs blo/ /chos kyi dbang phyug ces byas bsgyur/ /rgyud rgyal bde mchog sgrub thabs kyi/ /gtsug gi nor bu ba dan+ta/ /zas gtsar sras po'i rigs byung la/ /grags mchog shes rab ces bya yi/ /sbyin bya'i chos yin de dgyes ni/ /'gro kun rab rib sang par shog /mya ngan gyis gdungs rims btab 'khrul pa yul la mngon phyogs rnam par nyam ngag nas/ /bsgom pa med cing srung ma med dang phra ma zhugs dang sgrub pa med pa yi/ /rgyal po sa ni yul du shes pa ji ltar rang don brjod pa mi 'dor ltar/ /sems kyi rgyal po mi khom brgyad dang 'brel pa tshul ni 'di nyid do// // */ (/gsang ba'i de kho na nyid gsal ba bzhugs//) // */ /rgya gar skad du/ gu hya tat+twa pra kA sha nA ma/ bod skad du/ gsang ba'i de kho na nyid rab tu gsal ba zhes bya ba/ bcom ldan 'das thugs rje chen po 'phags pa spyan ras gzigs dbang phyug la phyag 'tshal lo/ /thog ma tha ma la sogs rab tu dbye ba spangs shing dpe med kun 'gro nam mkha' i dngos/ /bsod nams ye shes bdag nyid sbyor ba gnyis kas rnam sras rang gi rang bzhin shar gang yin/ /rgyal ba khyu mchog sku rnam gsum po de la btung nas gsang ba'i de nyid rab gsal ba/ /spyod pa'i rdo rje rtogs pas sems can phung pos gsal bar rtogs par bya phyir bshad par bya/ /rgyud
- 354b
rnams kun tu gang gnas shing/ /mdo sde'i sde snod la sogs dang/ /gzhan yang rig bya'i bdag gis ngag /tshangs la sogs pa bshad pa dang/ /gang du 'ang 'di ni rnyed dka' ba/ /bstan bcos gang yang yod min te/ /chos kyi phung po brgyad khri dang/ bzhi stong nyid las gsungs pa yin/ /bzlas dang bsam gtan de bzhin du/ /sbyin sreg ston dang dkyil 'khor bri/ /spyod pa rnam pa sna tshogs dang/ /phyag rgya 'ching ba'ang de bzhin te/ /brtul zhugs cho ga sna tshogs dang/ /chos gos la sogs rnam 'dzin pa/ /mchod rten la sogs pa yi las/ /nges pas brdung bar gnas pa dang/ /bya dang byed pa'i dngos po yis/ /dngos po kun la bdag brten pas/ /sems can gang zhig ces 'dul ba/ /de rnams de yi gzugs bzung nas/ sems can bsam pa'i khyad par gyis/ /rdo rje 'dzin pas gang gsungs pa/ /gang zhig shes pas lus can rnams/ /'gyur ba med pa'i ngo bo yis/ /byang chub snying po bla med par/ /khyim na gnas zhing myur 'gro ba'o/ /bram ze rgyal rigs la sogs rigs/ /lha sogs skye gnas las byung ba/ /chags dang 'jig pa'i dus dag gis/ /skye dang gnas dang 'jig pa ste/ /rigs ngan smig ma mkhan la sogs/ /gang gzhan dman la 'jug pa rnams/ /ma rung srog ni gcod pa dang/ /gang yang brdzun pa la brtson pa/ /rtag tu gzhan gyi bud med bsten/ /de bzhin tshig rtsub smra ba dang/ /dman 'gro slongs mo byed pa dang/ /gzhan gyi nor la longs spyod cing/ /chags sogs nyon mongs dra ba yis/ /'khor ba'i dkon par bcings pa dag /des kyang gang dus mchog ni/ /ji ltar 'dod pa thob 'gyur ba/ /chos dang longs spyod sprul pa yis/ /sku gsum chos kyi rang bzhin can/ /yon tan skyon gyi don nges pa/ /de ni bdag gis bstan par bya/ /dpal ldan 'dus pa'i lam gyis
- 355a
ni/ rim pa gnyis ka'i ngo bo las/ /dpal ldan 'dus pa lhag yid 'ong/ /rgyud rnams kun yon gtso bo yis/ /dus ni rnam bzhi'i dbye ba yis/ /rgyud ni rnam pa bzhir 'gyur te/ /bgang pa dang ni bltas pa dang// de bzhin gzhan ni lag bcangs dang/ /gnyis gnyis sprod pa bzhi pa ste/ /de dag rgyu ni rnam pa bzhi/ /'dus pa'ang rnam pa gnyis gsungs te/ /bskyed dang rdzogs byung rim pa'o/ /rnal 'byor bskyed par bstan pa ste/ /rdzogs pa rnal 'byor ma ru brjod/ /dbang po gnyis ka'i snyoms 'jug pa/ /'dus pa zhes byar rnam par brjod/ /sangs rgyas byang chub sems rnams dang/ /de bzhin mkha' 'gro ma rnams dang/ /A li kA lir ldan pa dag /mngon par brjod pas gang du 'jug /de nyid du ni ye shes kyi/ /rin chen mchog ni brtag par bya/ /bsreg dang bcad dang bdar ba yis/ /mkhas pa bdag gi gser bzhin du/ /yid ches rnam pa bzhi yis ni/ /lhan cig skyes pa brtan par gzung/ /sems can tha mal cig shos kyi/ /yid ches dag ni thams cad las/ /bla ma nyid ni byed par 'gro/ /bla ma rnam pa gnyis gsungs te/ /rgyu 'bras 'byung ba thob 'gyur ba'o/ /rgyu yi ngo bos mdor bstan pa/ /'bras bu rgyas par ston pa nyid/ / mdor bstan lus dang ngag yin te/ /rgyas ston byed pa sems nyid yin/ /dkyil 'khor slob dpon ngo bo yis/ /phyi dang bcas pa'i nang na bzhugs/ /'di ni sems can thams cad kyi/ /bla ma dam pa gnyis su brjod/ /'bad dang bcas pas rab mchod na/ /spyod dang grol ba'i 'bras rab gsol/ /yi ge de ni nang na oM/ /phyugs nang ri dags rgyal por mtshungs/ /rig byed nang na nges brjod yin/ /me tog ba ri dza tar mtshungs/ /mkhas pas dngos grub du ma ni/ /de yi
- 355b
bka' drin dag gis 'thob/ /bla ma dag ni ma gtogs pa/ /gzegs ma tsam yang 'grub mi 'gyur/ /mtho ris sa steng sa 'og gi /don kun bla ma nyid kyis bsgrub/ /mtshams med lnga'i las rnams ni/ /byas pa'i mis kyang 'grub par 'gyur/ /de la ma bus bskal pa yi/ /grangs med skye bar 'grub mi 'gyur/ /gsang ba de kho na nyid rab tu gsal ba las bdag dang gzhan gyi tshogs kyi chos kyi tshul rnam par gnon pa la 'jug pa dang rgyud dang sngags dang ye shes gsang ba dang de bzhin gshegs pa gsung rab ston pa po bla ma la mnyes par bya ba ste dang po'o// //de nas ches gsang bshad par bya/ /mdor bsdus sems las sprul pa ste/ /dbang po drug las rnam grol ba/ /byang chub sems ni rnyog pa med/ /dngos dang dngos med gnyis ka spangs/ /dang po'i sangs rgyas rjes 'gro med/ /brtan pa dang ni g.yo ba dag /spro zhing sdud par byed pa'o/ /'dus pa tshogs par gsungs pa ste/ /rdzogs pa'i rim pa'i rang bzhin te/ /mya ngan las la dmigs su med/ /'khor ba yi ni bde ba che/ /snying rje chen po thabs chen po/ /sems can don la 'jug par 'gyur/ /sku gsung thugs kyi tshul can gyis/ /dkyil 'khor gsum po rnams su ni/ /bskyed pa'i rim pa'i ngo bo yis/ /'di ni rdzogs par byed pa'i mchog /rnam pa de lta'i ye shes che/ /mdor bsdus nas de dag gis brjod/ /'di skad bdag gis zhes brjod dang/ /thos pa zhes bya'ang de ma thag /gzhan yang dus zhes bya ba ste/ /gcig ni zhes bya ba gsungs pa dang/ de bzhin gshegs pa thams cad ces/ /de ltar gzhan yang de 'og tu/ /sku gsung thugs dang rdo rje zhes/ /btsun mo'i b+ha ga rnams la 'dir/ /bcom ldan 'das ni bzhugs su zhes/ /rnal 'byor rgyud las rab tu grags/ /gsang ba'i
- 356a
mchog gi dbyings pa ni/ /thams cad bdag nyid rtag tu bzhugs/ /mkha' 'gro kun dngos sems dpa' ni/ /rdo rje sems dpa' bde ba mchog /zhes bya ba yang gzhan du bstan/ /thog mdza' yi yang tshig la gnas/ / rnal 'byor rnal 'byor ma rgyud kyi/ /'bags la 'di yi bshad bya ba/ /re zhig rnal 'byor rgyud las ni/ /ji ltar bstan de bdag gis bsnyad/ /e yig sa ru shes bya ste/ /las kyi phyag rgya spyan ma yin/ /brtse ba che dang phabs chen po/ /rang bzhin sna tshogs spyod yul no/ /lte bar sna tshogs 'dab skyes la/ /sprul pa'i 'khor lor gnas pa'o/ /baM yig chu ru shes bya ste/ /chos kyi phyag rgya mA ma kI/ /byams dang smon lam pa po ste/ /lha mo rdo rje'i rigs rjes 'gro/ /snying gar chu skyes 'dab brgyad pa'i/ /chos kyi 'khor lor yang dag gnas/ /ma yig me ru bstan pa ste/ /phyag rgya chen mo gos dkar mo/ /dga' dang stobs kyis lha mo pad+ma'i rigs byung yin/ /mgrin par chu skyes brgyad gnyis bdag /longs spyod 'khor lor gnas pa'o/ /a yig rlung gi gzugs can de/ /nyon mongs thams cad rab 'joms pa/ /dam tshig phyag rgya chen po ste/ /sgrol ma 'khor ba sgrol byed ma/ /btang snyoms ye shes sbyor ba yis/ /lha mo las kyi rigs las byung// sum cu rtsa gnyis 'dam skyes la/ /bde chen 'khor lo chen por ro/ /e dang baM zhes bya ba nyid/ /gnyis gnyis su ni brjod pa ste/ /'og dang steng du snyoms 'jug pas/ /shes rab thabs kyi rang bzhin no/ /e yig shes rab brjod pa ste// baM zhes bya ba thabs yin no/ /'dir ni baM gyis brgyan pa yis/ /e zhes bya ba nges par mdzes/ /baM ni snying ga mgrin pa yin/ /dbus na rgyan gyi mchog yin te/ /e ni mgo bo lte ba la/ /brgyan bya phyi rol yang dag gnas/ /sangs
- 356b
rgyas lnga'i bdag gnyis sku /baM yig rdo rjer brjod pa ste/ /lha mo lnga'i bdag nyid sku/ /e yig yin te pad+mar? brjod/ /e yi rnam pa lha rdzas gang/ /dbus su baM gyi rnam par brgyan/ /bde ba thams cad kyi ni gzhi/ /sangs rgyas rin chen za ma tog / khams gsum pa ni ma lus pa/ /'di skad rgyud du gsungs pa yin/ /de mthar bdag gis zhes gsungs pa/ /longs spyod rdzogs skur grags pa ste/ /de ni khams gsum gyi bde ba/ /thams cad myong ba'i rgyu ru 'gyur/ /yon tan gsum brgyan mtshan ma ni/ /mkha' dbyings steng du yang dag gnas/ /de nyid dngos po bsgrubs pa ste/ /mi yi sna rtser brjod pa yin/ /de yi dbus su gnas pa'i sems/ /rtog bcas zla ba lta bu ni/ /kun rdzob byang chub sems shes bya/ /sangs rgyas gzugs ni shin tu mdzes/ /dga' ba rang bzhin gang de ni/ /chags pa zhes byas mngon par brjod/ /longs spyod rdzogs pa'i sku de ni/ /bdag gi zhes byar rab tu grags/ /gzhan yang thos pa zhes gsungs pa/ /sprul pa'i sku ru brjod pa bsten/ /gang tshe zla ba lta bu yi/ /sems chen po ni nub gyur pa/ /b+ha ga'i dbus su son pa gang/ /de ni yungs kar zhes byar 'dod/ /chags bral gyi ni rang bzhin de/ /'di ni nyi ma lta bu'i 'od/ /de ni khrag tu shes bya ste/ /steng du 'od gsal 'phro ba'o/ /rig pa'i rna rtser gnas pa ni/ /pad+ma bzhi ni gsal byed pa/ /rgyal ba rnams kyi sprul sku ste/ /de ni thos pa zhes byar grags/ /shes rab thabs kyi bdag nyid sbyor/ /'dir ni bdag gis thob par brjod/ /shes rab bdag gis shes grags te/ /thos pa thabs/ kyi mtshan nyid do/ /dmigs bcas pa dang dmigs med pa'i/ /shes rab gnyis su brjod pa ste/ /dmigs med bdag gis shes bya la/ /dmigs dang bcas pa thos par 'dod/ /dmigs dang bcas pa 'khor ba ste/ /dmigs su
- 357a
med pa mya ngan 'das/ /rdo rje 'dzin pa dbugs dbyung che/ /mya ngan 'das par rgyal bas gsungs/ /de bzhin gshegs pa'i dbyugs dbyung che/ /de bzhin du yang 'khor bar ro/ /kha sbyor dang ni phye ba'i gzugs/ /bdag gis thos pa zhes bya yin/ /'dir ni mang du smos ci dgos/ /mdor bsdus nas de brjod bya ste/ /khu ba nyid dang de bzhin khrag/ /de bzhin zla ba nyi ma dang/ /nub pa dang ni 'char ba dang/ /de bzhin mtshan mo nyin mo dang/ /sdud pa dang ni spro ba nyid/ /de bzhin du yang steng dpa' o ga /bdag nyid dang ni gzhan nyid de/ /gcig dang du ma de bzhin no/ /bud med dang ni skyes pa'ang rung/ /chu dang me yang de bzhin te/ /bdag gis shes pa zhes bshad pa/ /bde ba dang ni sdug bsngal nyid/ /de ltar rgyal bas rab gsungs pa'i/ /tshig ni mdzes pa gnyis po dag/ ldog pa dang ni 'dzug pa ste/ /yon tan skyon ni rab 'jug pa'o/ /dus gcig na zhes bya ba'i tshig/ de nyid las ni gzhan pa dag/ dus shes bya ba rjes 'gro ba'o/ /gzhan dag gis ni bstan pa yin/ /tshig gnyis ji ltar 'byung bzhin du/ yang dag ji bzhin bshad par bya/ /sa ma ya ni dus gsum ste/ /dus ni rnam pa gsum du 'dod/ /dus bzang dang ni dus ngan dang/ /bsam gyis mi khyab dus nyid do/ /sna yi bu ga'i sgo gnyis nas/ /'ong ba dus bzang zhes bya ste/ /'gro ba gnyis ni dus ngan no/ /de dag gcig tu brjod pa ste/ /gcig tu bla med par gyur pa/ /dus ni bsam gyis mi khyab 'gyur/ /srog dang rtsol ba bral ba ste/ /dbugs 'byung rdub pa rnams spangs pa'o/ /'gro dang 'ong pa las grol pa/ /dus gcig na zhes brjod pa yin/ /'dod chags ma yin chags bral min/ /dbu mar yang ni mi dmigs pa/ /'dod chags dang ni chags bral dag/ gnyis po 'dres pa mi dmigs pa/ /mar la mar blugs ji lta bar/ /'dres par gyur pa rnyog pa
- 357b
med/ /de bzhin 'dod chags chags bral dag/ gcig pur ro mnyam pa'i dus/ /'gog pa nyid du 'dod pa dang/ /dpyid nyid du dang bstan pa yin/ /dus gsum mnyam par sbyor ba lus/ /dus ni gcig ces brjod pa ste/ /'dis ni nyi ma zla ba dang/ /'char ba dang ni nub pa dang/ /snying stobs dang ni rdul log pa/ /mun pa me yi rang bzhin sa/ /byang chub sems ni brtan gyur pa/ /dus gcig na zhes brjod pa yin/ /dus gcig po ni de nyid duAng/ /bcom ldan 'das ni bzhugs so zhes/ /ji snyed gnyis med 'grub pa yis/ gdung rnams nyid ni bzhi po dang/ /chags sogs nyon mongs drang ba ni/ /'joms pas bcom pa zhes bya'o/ /mkha' dbyings gnas kyi rnam pa ste/ /e yig b+ha ga zhes kyang bya/ /su la de yod rtag pa ste/ /thog mdza' med par 'byung phyir ro/ /de las skye dang 'jig pa'i phyir/ /'debs pas kyang de phyag bya'o/ /byang sems rin po che gang yin/ /nam mkha' i dbyings ni ma gtogs par/ /gzhan du gnas ni ma mthong ste/ /des na de 'drar 'di ru brjod/ /sku dang gsung thugs gang yin nyid/ /spros pa rnams kyis ma spros pa/ /sangs rgyas thams cad bskyed pa'o/ /bcom ldan 'das su de la bshad/ /bzhugs pa zhes byar gang gsungs pa/ /gnas par gyur pa brjod pa yin/ /sangs rgyas byang chub sems dpa' dang/ dus gcig nyid du gyur pa na/ /rdo rje sems dpa' rang bzhin gyis/ /'jig rten rnams kyi re skong byed/ /sems can snod kyi tshul gyis ni/ /'jig rten rnam pa gnyis su gsungs/ /g.yo bar gyur pa sems can de/ /de bzhin gnas pa'i snod yin no/ /skal bzang dang ni skal ngan nyid/ /re re zhing yang gnyis su dbye/ /sa dang chu dang me rlung gis/ /rang bzhin rnam pa bzhi ru brjod/ /rdo rje sems
- 358a
dpa' rang bzhin gyis/ /de rnams nge ba skor bar mdzad/ /rdo rje sems su bstan pa ste/ /sems dpa' dga' bar brjod pa yin/ /skad cig bzhi las byung bas na/ /dga' ba rnam pa bzhi ru bstan/ /dga' ba dang ni mchog dga' dang/ /dga' bral gyi ni dga' ba dang/ /lhan cig skyes dga' i rang bzhin gyis/ /skad cig bzhi yis yang dag 'byung/ /rnam pa sna tshogs rnam par smin/ /rnam pa med dang mtshan nyid bral/ /de dag las ni skye ba gang/ /dga' ba bzhi ni dam pa bsten/ /dga' bar lhan cig gyur pa'i sems/ /rdo rje sems dpar 'di brjod do/ /'dod chags chags bral rnam par grol/ /rang bzhin dag cing dri ma med/ /'khor ba'i rgya mtsho pha rol son/ /bzhugs pa ces byar rnam par grags// thams cad dgra ru brjod pa yin/ /lha sogs 'gro ba srug rnams kyi/ /gzugs la sogs pa yul gyis dngos/ /'dod pa'i ngo bos yang dag gnas/ /'jig rten gsum du gang byung de/ /ma lus thams cad ces byar gsungs/ /de bzhin gshegs dgrar brjod pa ni/ /drug pa rnams ni der 'jug dang/ /dbang po rnams dang 'byung chen dang/ /phung po'i dngos po de ji ltar/ /gang gnas de ltar 'ongs gyur na/ /de ni de ltar 'gro bas na/ /de ltar de bzhin gshegs te dag /gcig nas gcig tu de bzhin 'ongs/ /lha sogs 'gro ba'i rang bzhin dag /yul rnam dag ni thams cad kyi/ /yul la'ang ro myangs yod pas na/ /dbang po dag ni de bzhin gshegs/ /'gro ba rnams dang yul rnams la/ /dngos su ji bzhin 'gro 'gyur ba/ /de bzhin dngos po de yis ni/ /de nyid du ni slar 'gro bas/ /de bzhin gshegs pa'i rang bzhin can/ /de dag nyid ni thams cad kyi/ /de ltar sku dang gsung dang thugs/ /rdul dang snying stobs mun pa gsum/ /bde dang sdug bsngal
- 358b
de bzhin rmongs/ /de rnams rdo rje de nyid de/ /byang chub sems ni rin po che/ /mi phyed pas na rdo rjer brjod/ /zos dang skye med ngo bo yis/ /de ni mi phyed pa ru grags/ /nyon mongs dra bas 'chir ba'i phyir/ /dbang po rnams dang sangs rgyas 'jig /sbyor pa dang ? ba yis/ /rdo rje sems dpa' ? 'dzoms pa min/ /de ni skye ba med pa nyid/ /de ni gang na gnas pa min te/ de yi btsun mo shes bab gnas/ /lha sogs bu mo'i 'gro bar brgyud/ /sangs rgyas thams cad bskyed ma ste/ /sems can kun gyi dge 'byung ma/ /sems can bsam pa'i khyad par gyis/ /sna tshogs gsal por yang dag bsten/ /shes rab rdo rje'i btsun mor brjod/ /brtan pa dang ni g.yo bar gnas/ /rdo rje btsun mo spyan ma dang/ /rdo rje btsun mo mA ma kI/ /rdo rje btsun mo gos dkar mo/ /rdo rje btsun mo sgrol ma ste/ /'dzin cing spel bar byed pas na/ /rdo rje btsun mor de dag brjod/ /ga rdung zhing spel bar bya bas na/ /rang nyid rdo rje de bzhin ni/ /rdo rje 'dod pa'i ngo bo yis/ /rdo rje btsun mo de dag gnas/ /de yi b+ha ga zhes gsungs pa/ /yi ge e yi cha byad nyid/ /rigs lnga yi ni rang bzhin dang/ /sangs rgyas dag ni gdan bzhi yin/ /mtshan ni sum cu rtsa gnyis dang/ /de bzhin dpe byad brgyad cu dang/ /ldan pa'i rdo rje sems dpa' ni/ /dpal ldan bde bas dpa' ba ste/ /'khor ba'i pha rol mthar gnas pa/ /'byor pa rang gi rang bzhin skyes/ /spyod cing dra ba'i lta ba yis/ /bcings las grol ba khyab bdag ste/ /sgo sham 'phrog po 'byin po dang/ /'dzin po nyid dang yid 'gro ba'i/ /b+ha ga nyid ni gnas yin te/ /de na 'di ni rtag tu bzhugs/ /pa zhes bya ba'i tshig ni 'dir/ /nam mkha' i khams la yongs su brjod/ /bcom ldan 'das kyi tshig gis kyang/ /byang chub sems su yongs brjod de/ /lus kyi dkyil 'khor zhes gsungs dang/ /b+ha ga'i
- 359a
dkyil 'khor gnas pa dang/ /byang chub sems kyi dkyil 'khor te/ /gsum pa 'di dag dbye ba med/ /'di skad la sogs ngag gis ni/ /rang gi ngo bor rab tu bstan/ /'gro kun rnam pa gsum dang 'brel/ /sangs rgyas chos dang dge 'dun te/ /sku gsung thugs kyi ngo bo yis/ /de dag dkon mchog dam pa gsum/ /de las rin chen lnga nyid de/ /rin chen lnga yi rang bzhin lus/ /sangs rgyas rnams kyi gnas shes brjod/ /sku gsung thugs kyi dkon mchog rnams// 'di skad ces bya sogs par bshad/ /gsang ba de nyid rab gsal ba/ /de ltar mchog tu mkhyen nas ni/ /sangs rgyas byang chub sems dpa' rgyal/ /skrag pa dang ni 'jigs par 'gyur/ /'di de dkon mchog nyams dga' mchog /mi phyed pas ni rtag tu gnas/ /'dod dang gzugs dang gzugs med dang/ /sna tshogs khyab ste rnam par bzhugs/ /'di skad ces sogs ngo bo yis/ /dag mchog shin tu mdzes pas so/ /'khor ba 'khor lo bzlog bya ste/ /mya ngan 'das pa'i dbyings la brten/ /gsang ba de kho na nyid rab tu gsal ba las/ sku dang gsung dang thugs kyi mtshan nyid longs spyod dang sprul pa dang chos kyi rang bzhin dkon mchog gsum du mtshon pa sngon du 'gro ba'i 'di skad bdag gis/ zhes bya ba la sogs pa'i bshad pa bstan pa ste gnyis pa'o// //de nas gzhan yang bshad bya ba/ /kun rdzob ji bzhin de bzhin du'o/ /yang na e yi thig le ste/ /baM zhes bya ba sgra ru brjod/ /bdag gis chags pa'i sems kyis ni/ /thos pa zhes bya bsten par gsungs/ /gcig na zhes bya mdor bstan pa/ /de bzhin du ni rgyas bstan te/ /mdor bstan pa yi mtshan nyid ni/ /thabs shes bya bar yongs su brjod/ /rgyas bstan mtshan nyid de yang ni/ /shes rab tu yang yongs su bsgrags/ /mdor
- 359b
bstan pa dang rgyas bstan pa/ /de nas gnyis su brjod par byas/ /rgyas bstan bsrub bya srub byed ni/ /mdor bstan so so'i gdan yin no/ /bcom ldan sems kyi rdo rje ste/ /bzhugs pa'i tshig ni gnas pa'o/ /de kun 'byung ba ngo bo ste/ /'byung ba bzhi po rnams ni yul/ /sangs rgyas phung po la sogs kun/ /sras bcas dbang po dang lhan cig /sku gsung zla ba nyi ma ste/ /thugs rdo rje ni dbyer med pa/ /brten pa'i ngo bos gnas pa ste/ /rten ni bud med b+ha gar brjod/ /rten dang brten pa'i ngo bo yis// tshig ni gnyis gnyis dag gis kyang/ /phan tshun brel nas de dag ni/ /brgyud nas rims ba bzhin du rtogs/ /de dag rang 'byung ngo bo yin/ /shes dang shes bya rab dbye bas/ /bdag la min gzhan las kyang min/ /gnyis min rgyu med las kyang min// dngos po skyes pa'i ngo bo dang/ /dngos po med pa rang bzhin min/ /rtag min mi rtag pa'ang min/ /'di ni chad dang gzhan ma yin/ /rten cing 'brel 'byung ngo bo yis/ /brtan pa dang ni mi g.yo ba/ /dma' dang mtho ba thang dang chu/ /sna tshogs khyab ste rnam par bzhugs/ /e yig dang ni baM yig dang/ /bdag gis shes dang thos pa zhes/ /de bzhin gshegs pa thams cad dang/ /sku dang gsung ni de bzhin te/ /thugs kyi rdo rje btsun mo yi/ /b+ha ga rnams la zhes bya gzhan/ /bcom ldan 'das ni bzhugs shes pa/ /sgra dang sgra nyams spangs pa ste/ /mdza' dag dags nges par grol/ /da ltar byung ba'i rang bzhin phyir/ /byis pa lkugs la sogs shes pa'i/ /shes bya lta bur de rab grags/ /gzung du med cing brjod du med// kun rdzob ji bzhin de bzhin de/ /dri za'i grong khyer rnam pa dang/ /sgyu ma smig rgyu 'dra ba ste/ /seng ge zla ba'i grong khyer mtshungs/ /rmi lam rtse mo bzhin du snang/ /de dag la sogs ngo bo ni/ /khams gsum ma lus rang bzhin no/ /de nyid kyi phyir ji
- 360a
ltar na/ /bdag gis thos zhes nges pa ru/ /rang rig pa yi ngo bo yis/ /sangs rgyas gyis kyang mkhyen pa min/ /'dus par sems dang phrad pa ni/ /rmi lam sad pa lta bu ste/ /ji ltar gzhon nu'i ngo bo yis/ / dbang po gnyis ni 'dus pa bzhin/ /b+ha gar ling ga rab bzhag nas/ /sangs rgyas rjes su dran pa bsgom/ /thog ma dbus mthar dri med pa'i/ /ye shes ci zhig skye 'gyur te/ /ye shes de ni rang rig pas/ /gzhan gyis brjod par nus ma yin/ nam mkha' i khams kyi dbus gnas pa'i/ /zla ba'i dkyil 'khor bsgom par bya/ /de la sogs pas de nyid gsungs/ /rjes su dran pa bcu drug gnas/ /bde chen nam mkha' i khams gnas pa/ /bde ba can zhes mngon par brjod/ /phung po dang ni khams dang ni/ /skye mched thams cad de las byung/ /'jig rten skyong ba thams cad dang/ /tshangs sogs lha yi skye gnas dang/ /khams gsum par ni gyur pa kun/ /de nyid las ni nges par byung/ /sangs rgyas byang chub sems dpa' dang/ /de bzhin khro bo'i rgyal po dag /de nyid las ni byung nas su/ /de nyid du yang mya ngan 'das/ /rig byed grub mdza' mdza' dag tu/ /snying po gcig bu rab tu grags/ /bde ba can de lha rdzas mchog /sangs rgyas rnams kyi lhag pa'i gnas/ /sangs rgyas lnga yi bdag nyid kun/ /lha tshogs 'gro drug gnas pa rnams/ /de nyid las ni byung ba ste/ /ma lus sangs rgyas gar mkhan no/ /'di de rnal 'byor rgyud du ni/ /de nyid ngo bo mi shig par/ /sangs rgyas bye ba snyed rnams kyis/ /bzhengs pa gcig gi dus su gsungs/ /ri rab lhun po'i rdul mnyam dang/ /gang+gA'i bye ma lta bur ni/ /kun nas til gyi gang bu ltar/ /mkha' dbyings shes grags 'di na snang/ /gangA'i bye ma'i grangs snyed kyis/ /yongs
- 360b
gang ba'i de bzhin gshegs/ /mdza' dag rnams kyi rigs pa 'dis/ /der ni 'di skad gsungs pa yin/ /dper na yungs mar nub pa'i sdong bu ni/ /mar me'i rtse mo'i rgyun ni rab tu 'jug /de ni yungs mar sdong bu zad dus 'gyur/ /zhi bar 'gyur te rnam shes 'di de bzhin/ /yungs mar sdong bu gang zhig rtse rgyun gang/ /mar me'i lus gong me'i dngos po gang/ /snang ba'i ngo bo'am yang na mun pa ste/ /de la sogs pa'i legs par rtogs par gyi/ /dper na gtsub shing gtsub gtan lag pa yi// rtsol ba thob pas me yi rtse dmigs la/ /brtags na gtsub shing de dag la yod mi/ /de bzhin 'gro ba g.yo ba la sogs pa'i/ /'gro ba mdza' dag so sor snang ba tsam/ /bde sogs ngo bo ma brtags nyams dga' ba/ /'di skad bdag gis zhes bya ba la sogs/ /bsam mi khyab ste ji lta de lta bu'o/ /de dag ni gsang ba'i de kho na nyid rab tu gsal ba las rnam par shes pa'i ngo bo kun rdzob pa rkyen las 'brel te 'byung ba so sor snang ba tsam bsam gyis mi khyab pa'i rnam par shes pa'i ngo bo 'di skad bdag gis zhes bya ba la sogs pa rnam par bshad pa bstan pa ste gsum pa'o// //de nas rnal 'byor ma rgyud kyi/ /rim pa gzhan yang bshad par bya/ /rnal 'byor gyi ni rgyud dag tu/ /'di skad ces sogs gsungs pa gang/ de nyid rnal 'byor ma rgyud ma/ /mdo gzhan dag sogs ma 'dra/ /rang bzhin dbye ba yod min shes/ /thugs kyi rdo rjes de skad gsungs/ /sh+rI ni gnyis su med par gnas/ /he ni rgyu dang bral ba ste/ /ru ni ngo bo nyams pas so/ /ka ni gang du 'di ma gnas/ / sh+rI zhes bya ba d+ha gang de rjod/ /he ru ka zhes bya ba'i sems/ /mkha' dbyings gnas pa de nyid de/ /he ru ka dpal zhes byar brjod/ /rgyud byed pa ni ye shes te/ /de la skye ba zhes kyang bya/ /rnal 'byor rnams ni legs 'dug pa/ /dzA landa ra'i dpal gnas su'o//?
- 361a
rkang mthil gzhu yi rnam pa yi/ /rlung gi dkyil 'khor yang dag gnas/ /lte ba'i phyogs 'dir me nyid ni/ /gru gsum rnam par 'bar ba'o/ /lto bar chu zhes grags pa yin/ /dkyil 'khor zlum po'i rnam pa'o/ /snying ga ru ni sa nyid de/ /kun nas gru bzhi pa yin no/ /de steng mgrin pa'i phyogs su ni/ /ri rab ri yi rgyal po yang/ /ri brgyad rim pa bdun yin te/ /rin po che dang ldan pa'o/ /de yi rtse mo mgor gsungs te/ /'dab skyes 'dab ma sum cu gnyis/ / de'i dbus su haM yin te/ /A li kA li las sprul pa/ /mi shigs mgo 'phang nyams dga' ba/ /bde ba chen po zhes byar brjod/ /bde chen 'khor lo chen po ni/ /sde tshan tha ma'i ming spangs pa'o/ /he ru ka dpal rgyud chen du/ /me zhes bya bar mngon par brjod/ /chags sogs nyon mongs pa yis ni/ /rtsa nyid la ni za phyir ro/ /'khor lo gsum gyi rnal 'byor ma/ /de yang me zhes bya bar brjod/ /rnal 'byor ma rtsa sum cu drug /rtse ni mgo las skyes zhes brjod/ /de yis bskul ba'i ye shes ni/ /mchog tu dga' ba'i ngo bo ste/ /'di de bcom ldan zhes su gsungs/ /'di de rang 'byung gcig pu nyid/ /kun zhes rnam par bshad pa ste/ /sangs rgyas phung po de bzhin de/ /bde ba'i mkha' 'gro ma de dag /rtsa ni sum cu rtsa drug nyid/ te ni nam mkhar 'gro ma zhes/ /sangs rgyas khams dang rnam par rtog /nam mkha' kun tu rgyu grub pas/ /nam mkha' 'gro ma zhes byar brjod/ /sangs rgyas phung po la sogs dang/ /de yi 'byung ba khams zhes brtags/ /bud med mi sogs rnam rtag pas/ /rnam par rtog pa gnyis su gsungs/ /mkha' 'gro ma ni kun gyis te/ /rang bzhin nyid phyir de nyid dngos/ /sems dpa' zhes pa'ang 'khor ba ni/ /mchog tu dga' ba'i ngo bo yin/ /byang chub sems na mi phyed
- 361b
phyir/ /'di la rdo rje sems dpar brjod/ /de yi phyir ni de 'og tu/ /bde ba mchog ces rgyud las gsungs/ /nam mkha' i khams su gnas pas kyang/ /de ni bde ba mchog tu brjod/ /gsang ba sa yi khams yin te/ /de bzhin mchog ni chu yin no/ / dgyes pa zhes bya me yin no/ /rlung ni thams cad bdag nyid gnas/ /rtag tu bzhugs 'dir mkha' yin te/ /bde ba chen po'i rang bzhin no/ /bshad ba gsang ba zhes gsungs te/ /lci ba mchog ces bya bar brjod/ /dgyes pa khu ba zhes gsungs te/ /khrag ni thams cad bdag nyid gyur/ /rtag tu bzhugs pa sha yin te/ /de yi ngo bo rtag tu gnas/ /rtag tu bzhugs par 'di gsungs pa/ /mkha' 'gro ma rnams rang bzhin te/ /bde ba chen po'i ye shes mchog /mi shigs haM zhes bya bar 'gyur/ /'di nyid mchog gi de nyid de/ /bde ba chen por brjod pa yin/ /rnal 'byor rgyud du de bzhin gshegs/ /'di skad bdag gi zhes gsungs te/ /de nyid rnal 'byor ma rgyud du/ /bde ba mchog tu brjod pa yin/ /'di ni rnal 'byor rgyud dang ni/ /rnal 'byor ma rgyud ces byar yang/ /bde ba chen po'i ye shes mchog /me zhes bya bar mngon par brjod/ /shes rab thabs kyi rang bzhin gyis/ /tshogs gnyis dag ni bsags pa yin/ /de dag nyid ni ye shes mchog /phyi dang bcas pa'i nang na gnas/ /khams gsum rgyu mi rgyur bcas nas/ /'di de spangs nas gzhan med de/ /dngos po kun gyi rang bzhin gyis/ /sgrub pa'i tshul gyis yod pa yin/ /gsang ba de kho na nyid rab tu gsal ba las rnal 'byor ma'i rgyud du gsungs pa'i rdzogs pa'i rim pa'i rang bzhin bstan pa ste bzhi pa'o// //bla ma'i man ngag la brten nas/ /mkhas pa rnams kyis legs gsungs pa'i/ /gsang ba'i de nyid rab gsal ba/ /sdom brtson nag pos byas pa
- 362a
yin/ /gsang ba de nyid rab gsal ni/ /byas las bsod nams gang bsgrubs pa/ /de yis skye bo yang dag sgrubs/ /sangs rgyas yul sar 'gro par shog /rnal 'byor ma'i rgyud kyi rdzogs pa'i rim pa'i bshad pa de kho na nyid rab tu gsal ba zhes bya ba/ slob dpon chen po spyod pa'i brtul zhugs nag pos mdzag pa rdzogs so// //rgya gar gyi mkhan po ga ya d+ha ra dang la gos lhas btsas kyis bsgyur ba las/ slad kyis dpal su mi ti ni kIr ti dang/ mar pa chos kyi dbang phyug gis gtan la phab pa'o// //bcom ldan 'das 'jam dpal rdo rje la phyag 'tshal lo/ /e baM ma yA/ e las kyi phyag rgya'o/ /ma phyag rgya chen po'o/ /yA ram dam tshig gi phyag rgya'o/ /e shes rab baM thabs so/ /sprul pa'i 'khor lo dang/ chos kyi 'khor lo dang/ longs spyod kyi 'khor lo dang/ bde ba chen po'i 'khor lo dang/ A li dang kA li ni g.yon dang g.yas dag tu'o/ /A a'i a'u e aau aM a:ka tsa Ta ta pa ya sha rnams dang/ oM sprul pa'i 'khor lo la'o/ /oM traM dzri baM hUM laM maM paM hUM chos kyi 'khor lo la'o/ /oM A a'i a'u i longs spyod kyi 'khor lo la'o/ /haM bde ba chen po'i 'khor lo la'o/ /'og tu bsrung ba ni yi ge k+Sha'o/ /zla ba dang nyi ma dag ni 'og dang steng gi sgo gnyis so/ /gnad byed pa dang gser gyi sgo ste 'gro ba dang 'ong ba'o/ /rnal 'byor bzhi ni myur ba dang/ rlangs pa dang/ rnam par 'ching ba dang/ sna tshogs gnas pa ste/ steng dang 'og tu'o/ /thang ka dang/ 'og tu'o/ /ting nge 'dzin gsum ni dang po sbyor ba dang/ dkyil 'khor rgyal mchog dang/ las rgyal po mchog go /las gsum ni spyan drang ba dang/ gshegs su gsol ba dang bzhugs pa'o/ /yan lag bzhi ni bsnyen pa dang/ sgrub pa dang/
Colophon
rnal 'byor ma'i rgyud kyi rdzogs pa'i rim pa'i bshad pa de kho na nyid rab tu gsal ba zhes bya ba/_slob dpon chen po spyod pa'i brtul zhugs nag pos mdzad pa rdzogs so/_/rgya gar gyi mkhan po ga ya d+ha ra dang 'gos lhas btsas kyis bsgyur ba las/_/slad kyis dpal su ma ti ni kIrti dang /_/mar pa chos kyi dbang phyug gis gtan la phab pa'o