kun byed rgyal po'i skabs sbyor
Text
ff. 97b–100a · 6 folio sides
- 97b
gsum phun sum tshogs par phyung nas bstan// de nyid rang sems ston par 'das pa'i phyir// rang sems ston par sngon du phyung bar bstan// rang sems ston pas gnyis med de yi phyir// gtan tshigs mngon du phyung ba'i lung yang bstan// de yis rtsa ba sems su gcig rig pas// rtsa ba sems su gcig pa mngon phyung bstan// de ltar mngon phyung mdo lung bcu po la// gdams ngag phog pas chos nyid mthong ba'i phyir// gdams ngag phog pas dgos pa dang po bstan// mngon phyung ba yi don la nges rnyed pas// nges par bstan pa'i mdo lung bcu po la// chos kun kun byed de nyid nges rtogs phyir// mtshan nyid nges par bstan pa'i lung yang bstan// de yi rgyud dang mngon sum thabs rtogs pa// lung gnyis nges par bstan pa'i lung yang bstan// lung de nges par rtogs par bya ba'i phyir// sems nyid nges par bshad pa'i lung yang bstan// ba shad pa de nyid yid ches bya ba'i phyir// lung khungs nges par bstan pa'i lung yang bstan// de yis don nyid gtan la nges 'bebs pas// don 'grel nges par bstan pa'i lung yang bstan// don 'grel gtan phab nges pa'i gdeng rnyed pas// tshig bzhi nges par bstan pa'i lung yang bstan// nges pa sku gsung thugs su
- 98a
'dus pa'i phyir// sku gsung thugs su nges pa'i lung yang bstan// sku gsum dgongs pa gcig tu brdal ba'i phyir// dgongs pa nges par bstan pa'i sung yang bstan// dgongs 'dus ngan la ma btsam rang gzhag byer// dgongs pa nges pa gzhag pa'i lung yang bstan// nges par bstan pa'i don la mi 'da' bas/ sku gsum nges 'chang lung 'di nges par bstan// nges par bstan pa'i lung bcu brjod pas ni// ma nor yid ches nges pa'i dgos yod pas// thams cad byang chub sems las med par bstan// nges par rang 'byung gcig las med pa'i phyir// rgyu 'bras gnyis kyi zhen pa bzlog pa'i phyir// rgyu 'bras 'das pa'i lung bcu bshad pa ni// nges par rang byung rig pa kun gcig pas// ngo bo gcig pas rgyu 'bras 'das par bstan// gcig la rang 'byung rdzogs par rtogs dka' ba// skal med gsang ba rgyu 'bras 'das mi rtogs// ma rtogs de nyid lta spyod gol sgrib pas// gol sgrib rgyu 'bras sgrib pa'i lung yang bstan// de nyid sems nyid la bzla rgyu 'bras 'das// rgyu 'bras gol sgrib skyon yon sel bar bstan// gol sgrib skyon med rdzogs chen sems rtog phyir// rgyu 'bras 'das pa'i rdzogs chen nges par bstan// rdzogs chen
- 98b
gzhung rtogs ma btsal lhun grub pas// ma btsal lhun grub rgyu 'bras 'das par bstan// ma btsal btsal bas grub par mi 'gyur phyir// chos nyid btsal bas mi grub 'das pab bstan// btsal med rang bzhin yongs la bkod pa'i phyir// rgyu 'bras kun 'das chos nyid bkod pa bstan// chos nyid byang chub sems su bstan pa'i phyir// rgyu 'bras 'das pa'i sems kyi rang bzhin bstan// de nyid ma btsal lhun grub rgyu 'bras 'das// ma g.yos 'dod pa med pa'i rang bzhin bstan// rdzogs chen rgyu 'bras 'das pa'i lung bcu yis// rtsol bsgrub bya mi dgos pa'i dgos yod pas// rnam grangs gcig tu bsdus te btsal med bstan// btsal med rgyu 'bras 'das pa'i rang bzhin la// bya med lhun gyis rdzogs pa'i lung bcu ni// sems kyi rang bzhin mi gnas yul med pas// bya med rdzogs pa mi gnas yul med bstan/ de nyid ma 'dres yongs rdzogs kun khyab pas// mi nub rgyal mtshan bya med rdzogs pa bstan// de nyid ye shes phyag rgya mi 'da' bas// bya med rdzogs pa phyag rgya 'gyur med bstan// de nub rgyal mtshan bya med rdzogs pa bstan// de nyid btsal bas 'bras bu mi rnyed pas// bya med rdzogs pa btsa la mi rnyed pa bstan// btsal
- 99a
bral byang chub sems su rnam dag pas// bya med rdzogs pa rnam dag dbyings su bstan// rnam dag dbyings la btsal ba'i nad med pas// bya med rdzogs pa rdo rje tshig drug bstan// rtsol bral ji bzhin mkha' ltar gnas pa'i phyir// bya med rdzogs pa nam mkha'i dgongs pa bstan// nam mkha'i dgongs pas dgongs pa kun las 'das// bya med rdzogs pa bsgom du med pa bstan// bsgom med sgom pas grub par mi 'gyur phyir// bya med rdzogs pa skal med don med bkod// rdzogs chen skal ldan 'bras bu rang gnas pa// kun byed rtogs bsgrags bya med rdzogs par bstan// bya med rdzogs pa'i lung bcu bstan pa la// ma byas rang bzhin rdzogs pa'i dgos yod pas// mi phyed rang bzhin rdzogs par zhal gyis bzhes// ma bcos de nyid gtan la dbab pa'i phyir// gtan la 'bebs pa'i mdo lung bcu bstan pa// chos kun gzhi ma gtan la dbab pa'i phyir// gzhi ma kun byed gtan la 'bebs par bstan// de nyid dus gsum rgyal ba'i snying po bas// rgyal ba'i snying po gtan la 'bebs par bstan// rgyal ba'i snying po bsam brjod yul las 'das// lta ba bsgom med gtan la 'bebs par bstan// ltar med bsgom bral nyid ni ma yengs/
- 99b
pas/ bsgom du med par gtan la phab ste bstan// bsgom bral bde chen dbyings las mi 'da' bas// dam tshig bsrung du med par gtan la phab// mi 'da' chos nyid ma/ btsal lhun grub pas// 'phrin las btsal du med par gtan la phab// btsal med nyid la dus gcig 'jug pa'i phyir// sa la 'jug tu med par gtan la phab// ma sbyangs 'od gsal ye shes lam mchog pas// lam la bgrod du med par gtan la phab// da phyir rgyu rkyen ma btsal rang byung bas// rang byung ye shes sgrib med gtan la phab// ye shes ma btsal rang la lhun grub pas// ma g.yos 'dod med 'bras bur gtan la phab// gtan la 'bebs pa'i lung bcu bstan pa la// ma bcos gtan la 'bebs pa'i dgos yod pas// bcos su med pa'i don gyi dgos pa bstan// de rnams skal ldan don du bstan pa'i phyir// tha mas rgyud de gtad cing gdams pa bstan// dang pos rgyu bstan gnyis pas ngo bo bstan// tha mas der gnas gdams pa 'bras bu bstan// dang por lhun grub gzhi yi don nyid las// gdul bya'i dbye ba lnga bcu lnga 'byung bas// mngon du phyung ba'i lha yul thig les btab// don la nges pa'i gtan tshigs nges bskyed pas// nges par bstan pa'i mdo lung bcu ru
- 100a
bstan// nges rnyed grub mtha' rgyu 'bras kun 'das pas// rgyu 'bras 'das pa'i mdo lung bcu ru bstan// de nyid ma byas rang bzhin rdzogs 'jog pas// bya med rdzogs pa sgom pa'i lung bcu bstan// rang byung gtan la 'bebs pas 'bras rdzogs pas// gtan la 'bebs pa'i 'bras bu bcu bstan to// gzhi lam 'bras bu klong dgu bstan pa bkram// gdams ngag lung gi dngos po gtan la 'bebs// ma yengs gnas pas lhun grub rang la 'char// skal ldan lung bstan rgyal sras sems la thums// kun byed rgyal po'i skabs sbyor lnga bcu rtsa bdun bshad pa rdzogs so// // de nas byang chub kyi sems kun byed rgyal po des/ rang byung ye shes skye ba med par rtogs nas cang mi gsung bar bzhugs so// de nas sems dpa' rdo rje dam pa des 'di skad ces zhus so// kyeston pa'i ston pa kun byed rgyal po lags// legs par gsungs pa'i mdo dag mthar phyin na// ston pa gsum po nyid kyis ji ltar rtogs// bstan pa gsum po nyid kyis ji ltar rtogs// 'khor gnas dus kyi rang bzhin ji ltar rtogs// nyid kyis ji ltar rtogs pa'i dgongs pa'i don// bdag cag rnams la legs par bstan du gsol//