S444MW22083_0444rgyudAll versions of this work

rab tu gnas pa mdor bsdus pa'i rgyud

Saṅkṣepapratiṣṭhabidhitantra

Text

ff. 371b–376b · 11 folio sides

  1. 371b

    su sbyong ba gzi brjid kyi rgyal po'i brtag pa phyogs gcig pa rdzogs so/ / / rgya bar gyi mkhan po bla ma rje btsun chen po re ben dra de ba'i zhabs dang / bla ma pa chen skyes bu chen po mA Ni ka shrI dz+nyAna'i/ zhal snga nas gus par mnyan te/ chag lo tsa ba shAkya'i dge slong chos rje dpal gyis bsgyur cing zhus te gtan la phab pa/ spre'u lo dbyug gu zla ba'i mar ngo'i tshes bcu gsum la/ gtsug lag khang chen po dpal thang po cher dbu btsugs nas/ smin drug zla ba'i yar ngo'i tshes bcu gnyis kyi snga dro'i bar zhag bco lngar 'gro ba'i tshe dpal 'dren gyi lha'i sdings su tshar bar bgyis so// dpal ldan rgyud rgyal ngan song sbyong ba yi// brtag pa phyogs gcig sngar grags kha che nas/ / chos rgyal sku drin paN chen sgra bsgyur mchog/ skyes chen rnams kyis legs par dar bar mdzad// 'di ni dpal ldan kun dga' snying po dang // rje btsun 'jigs med 'byung gnas sbas pa yi/ / man ngag la brten rgya gar bal po na// yongs grags bla ma'i drin las kho bos bsgyur// sgra gzhung bla ma'i gsung bzhin du// gus bsgyur nongs pa mkhas chen rnams// bzod mdzod de dges 'gro ba kun/ / 'gro mgon thub chen nyid gyur cig/ bkra shis par gyur cig// / rgya gar skad du/ saM k+She pa pra tiSh+Tha bi d+hi tan+t+ra/ bod skad du/ rab tu gnas pa mdor bsdus pa'i cho ga'i rgyud/ dpal rdo rje sems dpa' la phyag 'tshal lo// 'di skad bdag gis thos pa dus gcig na/ bcom ldan 'das de bzhin gshegs pa thams cad kyi dam tshig rdo rje byin gyis

  2. 372a

    rlob pa zhes bya ba'i ting nge 'dzin la snyoms par zhugs nas/ brdungs pa dang / bris pa dang / 'bur du byas pa la sogs pa'i rab tu gnas pa'i cho ga gsungs pa/ slob dpon de nyid bcu shes shing / / mtshan nyid kun dang yang dag ldan// phyag rgya sngags dang cho ga shes// las rnams kun la mkhas pas so// sku gzugs mtshan nyid ldan pa ste// zhi ba la sogs ro yis ldan// tshad kyis tshad la phab cing bzang / / de 'dra rab tu gnas par 'gyur// yang thog mchod rten sogs gnas dang // khyim dang lha yi gnas rnams su// sangs rgyas la sogs rab gnas ni// cho ga dag dang ldan pas bya/ / cho ga dman pas mi bya ste// rab gnas rtag par bkra mi shis// 'jig rten 'dir yang sdug bsngal la// 'jig rten pha rol 'jigs pa che// de bas 'bad pa thams cad kyis// dngos grub 'dod pas nan tan bya/ / cho ga bdag nyid nus pa yis// brtag pa las gsungs tshul legs pas// de byas bsod nams che ba ni// mthong dang mi mthong rnams su skye// sku gzugs sngags kyi mtshan nyid kyis/ / de la byin rlabs 'jug par 'gyur// gang du sku gzugs rdzogs pa la// byin ma brlabs par ring gnas na// de la bkra mi shis 'gyur zhing // de srid mchod par de mi 'os// dper na skyes bu la la zhig/ rig pa'i mtshan nyid spangs pa na// 'jig rten kun gyis mchod mi byed// de de bzhin du gzugs brnyan de// rab gnas ma byas gzugs brnyan la// gang gis mchod cing phyag byed

  3. 372b

    pa/ dam tshig bral zhing sngags dman pas// sbyin sreg thal ba 'bras med mtshungs// de bzhin du yang sngags gnas pas// chos ldan mchod pa byed pa gang // de yi las kyi rnam smin gyis// skye ba du ni mchod par 'gyur/ / byang chub sems dpa' rnams kyis gsol pa/ bcom ldan 'das chos thams cad rab tu mi gnas pa lags na/ ji ltar na rgyal ba rnams kyis rab tu gnas pa lags/ bcom ldan 'das kyis bka' stsal pa/ sangs rgyas kun ni rab tu bzhugs// rab tu gnas pa gang na'ang med// kun tu mkha' ltar gnas pa la// cig shos kyis ni rab tu brtags// 'jig rten kun rdzob la brten nas/ / rab tu gnas pa rab tu brtags// dam pa'i don du dpyad pa na// gang zhig gang gi gang du brlab// gzod ma nas zhi skye med pa// ci 'dras ji ltar rab tu gnas// dang po'i las can sems can rnams/ rtogs pa'i rgyu ru bshad par zad// dang por re zhig yongs su brtag pa'i gnas yongs su sbyangs pa dang / gdugs dang / rgyal mtshan dang / bla re dang / ba dan bsgreng ba rnams su mchog tu gsol ba 'debs pas/ gsol ba btab pa'i bla ma spos dang me tog la sogs pa dang ldan pas/ tshes dang rgyu skar shis pa la slob dpon legs par mnyam par bzhag pas rab tu gnas pa'i sar 'khod de/ sangs rgyas dang byang chub sems dpa' la sogs pa rigs lnga dang rab tu 'brel ba yin la/ de bzhin du rab tu 'brel ba'i dkyil 'khor gyi tshogs sa yongs su bzung zhing rdul tshon gyi las dang / thig gdab pa dang /

  4. 373a

    gsol ba gdab pa la sogs pa byas la/ rtsa ba'i sngags sam rgyud kyi dgongs pas sa'i gter du nor bu 'am sor gdub bcug la/ de nas lha'i khang par rang gi slob ma bcug ste rnam pa kun gyi mchog dang ldan pa'i de bzhin gshegs pa la sogs pa'i skur bltas la/ lha la mngon par phyogs te phyag 'tshal zhing / ji ltar 'byor pa'i me tog thal mo dang // dri chu gtsang mas cho ga bzhin brtag la/ ting nge 'dzin la legs gnas pas// zhabs bsil me tog spos sogs ldan// rnam par mi rtog sems kyis ni// mchod yon rnams ni phul byas la// mnyam par bzhag pas sngags 'di yis// lan gsum bar du brjod par bya'o/ / oM sa ma ya s+t+waM/ sa ma ya ho/ sa ma ya haM/ ji ltar sangs rgyas thams cad ni// dga' ldan du ni gnas pa ni// lha mo sgyu 'phrul lhums zhugs ltar// de bzhin gzugs brnyan 'dir zhugs shig/ 'di ru mgon po rtag bzhugs nas// byang chub sems ni bskyed pa dang // 'di zhes bya ba'i don slad du// bdag gi 'byor pa nyid kyis ni// ci 'byor pa yi mchod pa rnams// me tog la sogs 'di bzhes shig/ bdag dang slob mar bcas pa la// rjes su brtse bas dgongs su gsol// kun gyis 'di la byin brlabs shing // de nyin du ni bzhugs par rigs// sku gzugs sta gon legs byas la// de nas brtag pa mnyam par brtsam/ / slob ma smyung bar gnas pa yis// de ltar thams cad dbang bas la// sngags pas mchod pa'i cho ga sogs// bla ma yis ni gang bsgo ba// ma 'tshogs pa kun bsgrub

  5. 373b

    par bya/ / mchod yon 'bras bu chen por 'gyur// de nas sngags pas snyan gsan dbab// gdan la bstim byas mchod yon dang // mchod pa spos dang me tog dang // de bzhin du ni mar me dang // sngags dang ldan pas dbul bar bya sku gzugs mdun du phyogs byas la/ / na bza' ser pos g.yogs bya zhing // de nas sngags pas 'du bya ba// khyad par du ni bdug par bya// de nas grub phyir de la ni// de la lan cig gtor bya ba// de nas de la sngags 'di ni/ / me dang de nas chu la ni// oM sarba pA paM da ha na badz+ra ya swA hA/ zhes bya bas so// de nas/ rnam pa kun gyi mchog ldan pa'i// don bzhin du ni bsgom bya ste// de nas gsum gnas rnams su bstim// oM hUM AH yi ge gsum/ / oM yig spyi bor bstim bya zhing // snying khar hUM gi yi ger 'gyur// ngag gi phyogs su AHyig go/ sku gsung thugs ni bsgrub par bya// yang na gang gi sa bon gang yin pa// de yi thugs kar de dgod do/ / phyag rgya sngags kyis rab bskul zhing // ci rigs par ni snyan gsan dbab// gser ram dngul lam zangs ma 'am// rdo dang de bzhin shing dang ni// yang na shing lo'i 'dab ma rnams// mchod yon du ni sbyar bar bya// de bzhin bum pa gser la sogs// zangs ma'i snod kyi mchod yon ni// mchod yon snod la rab tu shis// gal te nus pas ma rnyed na// ji ltar rnyed pas kun tu bya// de nas de yi til mar sogs// dur ba'i bon gyi pir gyis sbyang / / bkra shis rnga la sogs pa'i sgras// na chung rnams kyis de bzhin brjod// til mar la sogs pa'i sngags ni// oM sarba ta thA ga ta kA ya bi sho d+ha ni swAhA/ bum pa lnga 'am yang na brgyad//

  6. 374a

    tsan dan la sogs rnams kyis byugs// sna tshogs dri chus dgang ba dang // 'khor lo byas la mngon par bsngags// bu mos bkal ba'i srad bu 'am// yang na gso ma'i skud pa'ang rung / tshon chen po yis bsgyur byas la// de la sngags kyis dkri bar bya// sman lnga rin chen lnga dang ni// me tog 'bras bur ldan pa ste// sku gsum pa dang yungs kar ldan// bum pa mngon par bsngags par bya// gtsu tor rnam rgyal zhes bya ba/ / gzi brjid gzhan gyis mi brdzi dang // bkra shis zhi rnams sngags kyis ni// khrus kyi ched du mngon par bsngags// 'jam pa'i til mar dag dang ni// u dum ba ra'i lcug ma bzang / 'khar ba'i snod kyi nang dag tu// bkod la rab tu dbul bar bya// dri lnga yis ni de nas byugs// sa bon lnga ni gtor bar bya// slob ma tshogs dang bcas pa yi// sngags kyi gtsang sbras bkru bar bya// bkra shis zhes bya yid 'ong ba'i/ / blo dang ldan pas tshigs bcad brjod// rig ma spyan ma ji bzhin du// cho ga bzhin du mngon dbang bskur// sngags ni/ ji ltar bltams pa tsam gyis ni// lha yi chu ni dag pa yis// de bzhin gshegs kun khrus gsol ltar/ / de bzhin bdag gis khrus gsol lo// zhes bya ba la sogs pas so// oM sarba ta thA ga ta a b+hi She ka ta sa ma ya shri hUM/ lugs ma la ni dngos su bkru// ri mo rnams ni me long la'o// dag byed lngas ni sngon du bsgo// dur ba yis ni med par bya// ras sam lag pa dag gis ni// blo dang ldan pas sku lus phyi// gur kum mar dang bcas pa bsku// gos bzang dag kyang sku la

  7. 374b

    gsol/ / blo dang ldan pas sngags 'di yis// dkyil 'khor dbus su bzhugs su gsol// oM d+hi badz+ra bA sa se swAhA/ oM badz+ra gan+d+he swAhA/ oM badz+ra A ba ra Na ba su Sha Ne swAhA/ blo ldan gyis rang dam tshig bskul/ phyag rgya sngags kyis dbang bskur la// ji ltar 'os par mngon dbang bskur// oM hUM aM dz+riM khaM/ de ltar cod pan bcing ba byas la bzhugs su gsol te/ brtag pa las gsungs pa'i tshul gyis so// mdun gyi phyogs ni ma nub cing / / yo ba min zhing drang ba yis// de lngar sku gzugs mdzes par dgod// de ltar min na skyon 'byung 'gyur// me tog sogs dang de bzhin dri// mar me na bza' sogs sbyor gang // de kun sngags dang ldan pa yis/ / lha rnams la ni dbul bar bya// oM badz+ra puSh+pe AHhUM/ zhes bya ba 'di dag la sogs pas so// mchog gi me tog 'di dag ni// chu dang thang las de bzhin skyes// mchog tu dang pas khyed la 'bul/ / ci bde bar ni so sor bzhes// lhan cig skyes dang sbyar las byung // mchog gi bdug pa 'di dag ni// bdag gis dad pas 'bul lags kyis// ci bde bar ni banas su gsol/ lhaldan cig skyes dang sbyar las byung // mchog tu gyur pa'i dri 'di ni// mchog gi dad pas 'bul lags kyis// ci bde bar ni so sor bzhes// mun pa 'joms byed snang ba'i mchog/ mar dang til gyi mar me 'di/ / yang dag ye shes spyan dbye phyir// dad pas bdag gis 'bul bar bgyi// bza' dang bca' ba phun sum tshogs// kha dog dri ro rnams dang ldan// thams cad ldan pa lnga yi bshos// bdag gis dngul gyis so sor

  8. 375a

    bzhes de la sogs pa gang yang rung / / cung zad ci 'byor sku gzugs la// de dag thams cad 'di nyid kyis// rim pa yis ni dbul bar bya// sngags kyi gtsang sbra tsA ru bya// der ni gser gyi rang bzhin gyi/ / thur mas spyan ni dbye bar bya// zhal zas der dbul blo ldan pas// oM tsak+ShuHtsak+ShaHsa man+ta tsak+Shu ra bi sho d+ha ni swAhA/ oM d+hi bya a ne sa mA d+hi d+h+yA na pri Na me swA hA/ de ltar byas te de nas yang // slob ma rab tu bcug byas la/ khyod kyis nga la gong gsol ba'i// sku gzugs dag ni khyad par du// ji ltar gsungs par rab gnas par// de dag don ni ngas byas te// de rnams don ni grub zin gyis// ci bde bar ni mchod par byos// de nas dam tshig dbang bskur bas/ / khyod la byas kyis sreg blugs ni// stong ngam yang na de yi phyed// mngar gsum btags la 'bru rnams kyis// 'o ma can gyi bud shing la// sregs khung gru bzhir sreg blugs bya/ / de nyid mar dang 'o ma yis// lhag pa'i tsA ru phul byas pas// bdag dang slob ma thams cad ni// zhi dang rgyas pa 'phel bar bya// oM badz+ra A yu She swAhA/ A gats+tsha ha ri ping ga la dIp+ta k+Sha de hi de hi dA pa ya i dan tsa me kAr+yaM ku ru swA hA/ oM badz+ra puSh+pa ye swA hA/ de ltar byas la 'bad pa yis// khri yi steng du bzhugs par bya// sku gzugs kyi ni sum 'gyur cha'i// tshad tsam du ni rab tu bsgrags// oM su pra tiSh+Tha badz+re swA hA/ me tog spos sogs sngon 'gro bas// phyogs skyong rnams kyang mchod par bya// oM in+d+ra ya swA hA/ zhes bya ba dbang ldan la thug gi bar du rol mo'i sgra la sogs pas yang dag par mchod de/ gshegs su gsol

  9. 375b

    bar bya ba ni/ / rdzogs sangs rgyas dang de yi sras// tshangs sogs lnga yi tshogs rnams dang // gang dag cho ga ma tshang bas// de dag bzod pa mdzad par rigs// kun tu zhi dang rgyas pa ru// yon bdag tshe la rab mdzad nas/ sangs rgyas yul du gshegs nas ni// slar yang 'byon par mdzad du gsol// sa dang chu dang me rlung gi/ lha rnams kun gyi sku gzugs la// bskal pa brgya ru srung gnas mdzod// dgyes shing yid bzang 'gyur ba yis/ / slob dpon bla mar bcas pa yi// bu dang tsha bo bsrung mdzad nas// rang gnas dge bar gshegs su gsol// dpyid bla ra ba'am dpyid zla 'bring // dgun dang dpyid kyi tha chung ngam/ dbyar zla de bzhin dbyar 'bring ngo po// nyi ma byang du gnas pa yi// dkar po phyogs kyi gnyis pa 'am// rim bzhin de ltar gsum pa 'am// gang tshe gza' dang rjes mthun na// nag po'i phyogs la'ang brtsams par bya/ / gang tshe thams cad mthun gyur na// mi rnams yun du 'phel bar byed// bco lnga de bzhin brgyad pa dang // bcu gsum pa yang de bzhin no// gnam stong dang ni de bzhin du// bcu bzhi pa la'ang bya ba min/ / thams cad du ni chu smang dang // snar ma gro bzhin de bzhin te// lag pa snrubs dang sngon dang ni// rgyal dang chu smad de bzhin no// khrums sbrang dag kyang de bzhin du// rgyu skar 'di rnams thams cad du// skye dgu 'phel zhing de yi ni/ / rab tu gnas pa mchog tu byed// yid la 'dod pa ci yang rung // dngos grub mo bzhis ster bar 'gyur// lung las shes pa'i yang dag pa// khrums sam yang na gro bzhin gyis// lag gis

  10. 376a

    skal bzang snar mas ni/ / gzhan dag las ni rgyal bar byed// mgo yis zhi ba nye bar ston// chu stod kyis ni bu dag gson// rtag par dngos grub khrums smad kyis// rgyal gyis rtag par tshe ring 'gyur/ / snron gyis mchog tu bde bar byed// lha mtshams kyis ni mchog sngar 'gyur// phur bu lag dang pa wa sangs// zla ba'i gza' sogs shes bya ste// 'di rnams bzang ldan la byas na// rab tu gnas pa mchog tu dge/ gsum pa drug pa bdun pa la/ / bcu dang bcu gcig la zla ba// gnyis pa bzhi pa de bzhin brgyad// bcu dang bcu gcig rnams la lag/ gnyis dang bdun dang de bzhin dgu// de bzhin phur bu bcu gcig pa// dus sbyor bzhi pa la brten nas/ / de la lhag par gnas par bya// drug bdun bcu pa dor ba yi// pa wa sangs nyid dge ba yin// de ltar gza' rnams thams cad kyis// stobs ldan mi ldan der shes bya// gang tshe zhi ba'i gza' rnams dang / / zhing rnams zhi ba dge ba yin// dang po lnga pa gsum de bzhin// nor rnams 'joms pa spang bar bya// rjes su mthun par byed pa pos// skad cig de la yongs grub cing // ji ltar gsungs bzhin kun byas na/ / rab tu gnas pa mchog 'gyur zhing // 'khor los sgyur rgyal dbang phyug ni// thob 'gyur 'di la the tshom med// gza' dang rgyu skar 'dir med de// bgegs dang log par 'dren pa'ang med// gza' rnams thams cad rjes mthun phyir/ / bgegs dang rgyu skar lha rnams nyid// de ru sgrub par kun gnas shing // gzugs brnyan mchod rten la sogs kyis// dngos grub dag ni ster bar mdzad// yid kyis cung zad gang bsams pa// skye dang skye ba 'grub par

  11. 376b

    'gyur/ / rgyan rnams ma lus pa yis ni// phyi nas bzo bo rnams la mchod// gang dag de la grogs byed pa// gzhan dag kyang ni mchod par bya// de nas de dag thams cad la// dga' bas 'di skad brjod par bya// ji ltar gsungs pa'i mchod pa rnams/ / bdag la mthun pa'i nus pa med// de phyir khyod la bdag bzod gsol// sngags kyi gtsang sbra'i bza' bya dag/ gzugs brnyan dag la bzhin bya ste// bder gshegs lhag ma 'di dag ni/ / zos shing sdig pa byang bar 'gyur// zhes bya bas so// glang po rta glang shing rnga nor// yon gyi dam pa dbul bar bya// de nas de la nan tan gyis// longs spyod g.yo ba dbul bar bya// gal te lha nyid dgyes 'dod ma bla ma gus pas dgyes bya zhing / / de ltar rnam pa thams cad du// bla ma yang dag mnyes par bya// de nas gang dag brtul zhugs can// dge slong dge bsnyem dge slong ma// mchog tu grub pas mchod byas la// ji ltar 'os pa'i yon yang dbul/ / dung ngam rol mo sgra la sogs// bzang ba'i glu dang gar rnams kyis// gnyen dang rigs brgyud 'khor rnams kyis// rol mo chen po mtshan mo dbul// de ltar thams cad phul zin nas// gang rung mchod sbyin dkyil 'khor la/ / phul lam dbul bar byed pa rnams// slob dpon la ni dbul bya yi// bzo bo la ni mi sbyim zhing // dge slong rnams la'ang sbyin mi bya// slob dpon mchog gi lha yin te// nor rnams thams cad de la dbul// de nas dkyil 'khor byugs byas te/ / ba yi lci bas byugs byas shing // rdul tshon chu bor rab dor ro// de yis yang dag legs par 'gyur// rab tu gnas pa mdor bsdus pa'i rgyud rdzogs so//

Colophon

rab tu gnas pa mdor bsdus pa'i rgyud rdzogs so/