'phags pa rin chen zla bas zhus pa zhes bya ba theg pa chen po'i mdo
Āryaradnacandraparipridchanāmamahāyānasūtra
Text
ff. 233a–247a · 29 folio sides
- 233a
mkha'i chu ltar dag cing rnam par dag/ chos rnams rnam pa sna tshogs brtags pa ste// brtags na de yang nams kyang yod ma yin// byis pa phung po 'di dag 'dra bar 'dzin// de yang de la nams kyang yod ma yin/ / shes ldan dngos dang dngos med rnam 'jig cing // chos nyid 'di dag thams cad zhi bar mthong // thams cad ma skyes gzung du med par mthong // de yi lus ni nams kyang yod ma yin/ / chos rnams 'od gsal grol zhing rab tu grol// zhi zhing mi gnas mya ngan 'das gyur la// de la nams kyang gzung du med pa ste// shes ldan de ltar rtogs na grol bar 'gyur// de nas nags khrod der byang chub sems dpa' 'jigs sgrol las chos mnyan pa'i phyir// lha'i bu bzhi khri nyis stong lhags par gyur pa de dag gis tshigs su bcad pa bstan pa de dag thos nas/ / mi skye ba'i chos la bzod pa thob par gyur to// dge slong dpas byin de yang kun nas bkris pa dang bral bar gyur te/ de bzhin gshegs pa'i sprul pa bkod pa de dag mthong nas/ byang chub/ kyi tshul dang ldan pa'i sems kyis chos kyi rang bzhin rab tu rnam par 'byed pas mi skye ba'i chos la bzod pa thob par gyur to// 'jam dpal khyed kyis de'i tshe de'i dus na/ byang chub sems dpa' 'jigs/ sgrol zhes bya ba de gzhan zhig yin pa snyam na de ltar mi blta'o// de ci'i phyir zhe na/ byang chub sems dpa' byams pa de'i tshe de'i dus na// byang chub sems dpa' 'jigs sgrol zhes bya bar gyur to//
- 233b
'jam dpal khyod kyis de'i tshe de'i dus na// dge slong dpas byin zhes bya ba gzhan zhig yin pa snyam na de ltar mi blta'o// de ci'i phyir zhe na/ de bzhin gshegs pa rin chen zla ba byang chub kyi spyad pa spyod pade/ de'i tshe de'i dus na/ dge slong dpas byin zhes bya bar gyur to// de nas bcom ldan 'das la/ 'jam dpal gzhon nur gyur pas 'di skad ces gsol to// bcom ldan 'dra dge slong dpas byin de byang chub tu mngon par rdzogs par sangs rgyas lags sam/ bcom ldan 'das kyis bka' stsal pa/ 'jam dpal mngon par rdzogs par sangs rgyas zin te/ de ni nub phyogs logs su sangs rgyas kyi zhing 'di nas/ sangs rgyas kyi zhing gang+gA'i klung gi bye ma snyed 'das pa na/ 'jig rten gyi khams 'od zer rtag pa zhes bya ba der de bzhin gshegs pa rin chen zla ba zhes bya bar gyur to/ / 'jam dpal chos 'di dag gi sgrib pa med pa dag ji tsam 'dod pa dag kyang yongs su longs spyad la/ srog gi bar chad kyang byas bzhin du mi skye ba'i chos la bzod pa thob par gyur pa la ltos/ / de ci'i phyir zhe na/ 'di ltar de'i khams gsum pa thams cad yang dag pa ma yin par shes shing / sems can thams cad mig yor dang 'dra bar shes pa'i phyir ro// 'jam dpal sgyum lta bu'i sems la gnas pa la ni chos gang la yang sgrib pa med do/ / 'jam dpal yang byis pa so so'i skye bo rnams ni rang gi rtog pas sems can dmyal ba dang / dud 'gro'i skye gnas dang / gshin
- 234a
rje'i 'jig rten du ltung bar 'gyur te/ med pa'i chos rnams la yongs su brtags pas/ sdug bsngal 'bum phrag mang po nyams su myong bar 'gyur ro// nas bcom ldan 'das la/ 'jam dpal gzhon nur gyur pas 'di skad ces gsol to// bcom ldan 'das byang chub sems dpa' gang / chos kyi rnam grangs 'di 'dzin pa dang / 'chang ba dang / kun chub par bgyid pa dang / bsti stang bgyid pa de/ tshe 'di nyid la yon tan ji snyed cig thob par 'gyur lags/ bcom ldan 'das kyis bka' stsal pa/ 'jam dpal 'di ji snyam du sems nyi ma'i dkyil 'khor shar ba na/ 'dzam bu gling pa'i mi rnams la/ yon tan gyi phan yon ji tsam du 'gyur/ 'jam dpal gyis gsol pa/ bcom ldan 'das yon tan gyi phan yon dpag tu ma mchis shing / snang ba tshad ma mchis par 'gyur te/ des ni mi rnams sug las dag bgyid par 'gyur lags so// bcom ldan 'das kyis bka' stsal pa/ 'jam dpal de bzhin du chos kyi rnam grangs 'dis ni/ byang chub sems dpa' de'i nyon mongs pa thams cad bsal nas/ shes rab kyi snang ba tshad med pa skyed par byed do// chos thams cad la yang sgrib pa med pa thob par 'gyur ro/ / yongs su gdung ba dang bral zhing kun nas dkris pa yang med par 'gyur ro// de la chags pa med pa'i spobs pa yang myur du mngon sum du 'gyur ro// bdud dang phyir rgol ba thams cad
- 234b
kyis kyang mi brdzi bar 'gyur ro/ / chos kyang ston te/ spobs pa mthar thug pa med pas ston par 'gyur ro// 'jam dpal 'di lta ste/ dper na/ me byung na rA dang shing thams cad sreg par byed do// 'jam dpal de bzhin du chos kyi rnam grangs 'dis yang nyon mongs pa thams cad sreg par byed do// 'jam dpal 'di lta ste dper na/ ri'i rgyal po gangs kyis ri nag po thams cad zil gyis gnon to// 'jam dpal de bzhin du byang chub sems dpa' chos kyi rnam grangs 'di la mkhas pas ni pha rol rgol ba thams cad chos dang ldan pas tshar bcad nas/ zil gyis gnon par byed do// 'jam dpal 'di lta ste dper na/ 'khor los sgyur ba'i rgyal pos ni khams kyi rgyal po rnams zil gyis gnon to// 'jam dpal de bzhin du byang chub sems dpa' chos kyi rnam grangs 'di la gnas pas ni gang zag tshig dang yi ge 'bru sna tshogs thams cad la mkhas pa rnams zil gyis gnon to/ / 'jam dpal 'di lta ste dper na/ dge slong 'dul ba 'dzin pa ni ltung ba thams cad 'dul ba la mkhas pa yin no// 'jam dpal de bzhin du byang chub sems dpa' chos kyi rnam grangs 'di la mkhas pa ni/ phyogs bcu'i sems can thams cad kyi 'gyod pa sel bar byed do// 'jam dpal 'di lta ste dper na/ nyi ma'i dkyil 'khor shar na mun pa mun nag thams cad med par 'gyur ro/ / 'jam dpal de bzhin du byang chub sems dpa' chos kyi rnam grangs 'di la mkhas pas ni/ sems can thams cad kyi nyon mongs pa
- 235a
sel bar byed de/ ye shes kyi snang ba yang byed par 'gyur ro// de ci'i phyir zhe na/ 'jam dpal chos kyi rnam grangs 'di la slob pa gang yin pa de ni lhag pa'i shes rab la slob pa yin pa'i phyir ro/ / de nas bdud sdig can/ bcom ldan 'das ga la ba der song ste phyin nas/ bcom ldan 'das la 'di skad ces gsol to// bcom ldan 'das khyod ni thugs rje chen po dang ldan pa lags te/ sems can thams cad la sman pa dang / thugs brtse ba can lags na/ bcom ldan 'das bdud kyi gnas thams cad rab tu g.yos te/ bdag kyang mya ngan gyi zug rngus zug lags kyis/ bcom ldan 'das yang chos kyi rnam grangs 'di mi bshad par gsol/ bcom ldan 'das bdag gis kyang / chos kyi rnam grangs 'di ci nas 'dzam bu'i gling du spyod par mi 'gyur ba de ltar bgyi'o/ / ci nas chos kyi rnam grangs 'di su yang 'dzin par mi 'gyur/ 'chang bar mi 'gyur/ kun chub par bgyid par mi 'gyur ba de lta bur yang bgyi'o// ci nas chos kyi rnam grangs 'di la lam ngan par 'du shes par 'gyur bar yang bgyi'o/ / de dag shin tu rgyas pa'i mdo sde dag la log par lta ba'i 'du shes su 'gyur bar yang bgyi'o// dge slong de dag ci nas chos kyi rnam grangs 'di spong bar 'gyur ba'i kun nas dkris pa 'ga' 'byung bar yang bgyi'o/ / de nas sangs rgyas kyi mthus lha'i dbang po brgya byin bcom ldan 'das kyi spyan sngar 'dug nas/ des
- 235b
bcom ldan 'das kyi zhabs la mgo bos phyag 'tshal te/ bcom ldan 'das la me tog man+da ra ba dag gis gtor nas/ bcom ldan 'das la 'di skad ces gsol to// bcom ldan 'das gal te bdud sdig can chos kyi rnam grangs 'di nub par bgyid pa'i slad du rtsol bar gyur na/ bcom ldan 'das bdag gis chos kyi rnam grangs 'di gzung bar bgyi/ bcang bar bgyi/ kun chub par bgyi'o/ / bcom ldan 'das dang / btsun pa kun dga' bo yongs su mya ngan las 'das pa'i 'og tu yang / bdag gis chos kyi rnam grangs 'di 'dzam bu'i gling du spyod par 'gyur bar bgyi'o// chos smra ba de la yang rgyal po bzhi gnod sbyin gyi tshogs kyi 'khor dang bcas pa rnams bsrung ba dang / bskyab pa dang / sba ba bgyid du stsal bar 'tshal te/ chos kyi rnam grangs 'di 'dzin pa dang / 'chang ba dang / klog pa dang / kun chub par bgyid pa gang lags pa de la/ bdag gis kyang bsrung ba dang / bskyab pa dang / sba bar 'tshal lo// de nas bcom ldan 'das kyis/ tshe dang ldan pa kun dga' bo la bka' stsal pa/ kun dga' bo khyod kyis chos kyi rnam grangs 'di zung shig/ chongs shig lhogs shig/ kun chub par gyis shig/ gzhan dag la yang rgya cher ston cig/ de ci'i phyir zhe na/ kun dga' bo 'di ni chos thams cad kyi chos kyi me long yin pa'i phyir ro// gsol pa/ bcom ldan 'das de bzhin gshegs pas ji skad bka' stsal pa bzhin du chos kyi rnam grangs
- 236a
'di dag gis bzungs lags na/ bcom ldan 'das chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo de'i phyir khyod kyis chos kyi rnam grangs 'di las kyi sgrib pa rnam par dag pa zhes bya bar zungs shig/ sgrib pa med pa'i ye shes la 'jug pa zhes bya bar yang zung shig/ chos kyi rnam grangs 'di shad pa na/ dge slong drug cus len pa med par zag pa rnams las sems rnam par grol lo// byang chub sems dpa' brgyad cus ni mi skye ba'i chos la bzod pa thob par gyur to// bcom ldan 'das kyis de skad ces bka' stsal nas/ 'jam dpal gzhon nur gyur pa dang / tshe dang ldan pa kun dga' bo dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa mngon par bstod do// 'phags pa las kyi sgrib pa rnam par dag pa zhes bya ba theg pa chen po'i mdo rdzogs so// rgya gar gyis mkhan po 'dzin mi tra dang / pradz+nyA bar ma dang zhu chen gyi lo tsa ba ban+d+he ye shes sde la sogs pas bsgyur cing zhus te gtan la phab pa/ rgya gar skad du/ Ar+ya rat+na tsan+d+ra pa ri brid tsha nA ma ma hA yA sU tra/ bod skad du/ 'phags pa rin chen zla bas zhus pa zhes bya ba theg pa chen po'i mdo/ bam po
- 236b
dang po/ / thams cad mkhyen pa la phyag 'tshal lo// 'di skad bdag gis thos pa dus gcig na/ bcom ldan 'das rgyal po'i khab na/ bya rgod phung po'i ri la/ shA ri bu dang / mo'u 'gal gyi bu chen po la sogs pa dge slong 'bum phrag bdun cu rtsa gnyis kyi dge slong gi dge 'dun chen po rnams dang / thabs gcig tu bzhugs so// byang chub sems dpa' dgu khri la 'di lta ste/ byang chub sems dpa' sems dpa' chen po byams pa dang / byang chub sems dpa' sems dpa' chen po 'jam dpal dang / byang chub sems dpa' sems dpa' chen po blo gros mi zad pa dang / byang chub sems dpa' sems dpa' chen po blo gros rgya mtsho dang / byang chub sems dpa' sems dpa' chen po blo gros mtha' yas dang / byang chub sems dpa' sems dpa' chen po blo gros brtan pa dang / byang chub sems dpa' sems dpa' chen po khams gsum rnam par gnon pa dang / byang chub sems dpa' sems dpa' chen po lag na rin po che dang / byang chub sems dpa' sems dpa' chen po sman gyi rgyal po dang / byang chub sems dpa' sems dpa' chen po rin chen 'byung gnas dang / byang chub sems dpa' sems dpa' chen po dga' sdug dang / de dag la sogs pa byang chub sems dpa' dgu khri dang / lha'i bu bye ba khrag khrig 'bum phrag du ma dag dang rgyal po chen po bzhi dang / lha rnams kyi dbang po brgya byin g.yog 'khor lha'i bu 'bum phrag du ma dang bcas pa dang / mi mjed kyi
- 237a
bdag po tshangs pa g.yog 'khor tshangs ris kyi lha'i bu 'bum phrag du ma dang bcas pa dang / klu'i rgyal po rgya mtsho dang / klu'i rgyal po ma dros pa dang / klu'i rgyal po e la'i 'dab dang / klu'i rgyal po kun tu grags dang / de dag la sogs pa klu 'bum phrag du ma dang / gnod sbyin gyi sde dpon chen po 'brog gnas dang / kha spu can dang / rtsi sman dang / bong bu dang / de dag la sogs pa gnod sbyin gyi sde dpon 'bum phrag du ma dang thabs gcig tu bzhugs so/ / de nas bcom ldan 'das snga dro'i dus kyi tshe/ sham thabs dang chos gos gsol te/ lhung bzed bsnams nas/ rgyal po'i khab kyi grong khyer chen por bsod snyoms la gshegs so// de'i tshe rgyal po gzugs can snying po'i sras khye'u rin chen zla ba zhes bya ba/ glang po che lta ba brgyad pa zhes bya ba/ rin po che sna bdun gyis brgyan cing gser gyi dra bas g.yogs pa/ dril bu g.yer ka sbyangs pa/ gser gyis spras pa'i dar gyi lda ldi mang pos mdzes par byas pa/ bdug pas bdugs pa/ me tog sil mas gtor ba/ rgyal mtshan dang / ba dan bsgrengs pa/ gdugs dang dra bas brgyan pa/ rin po che'i shing ljon pas mdzes par byas pa/ stegs bu bdun gyis kho ra khor yug nas bskor ba la zhon nas/ rgyal po'i 'byor pa chen po dang / rgyal po'i mthu chen po dang ldan pas/ rgyal po'i khab kyi grong khyer chen po nas byung ste/ sems can tham
- 237b
cad la sbyin pa dag sbyin zhing song ba las/ gzhon nu rin chen zla bas thag ring po zhig nas bcom ldan 'das mdzes pa/ dad par bya ba/ dbang po dul ba/ thugs dul ba/ kha dog bzang po/ rgyas pa mchog dang ldan pa/ dul ba dang / zhi ba'i mchog/ dul ba dang zhi ba dam pa'i pha rol tu phyin pa/ gtso bo chen po// dbang po bsrungs pa/ dbang po thul pa/ mtsho ltar dngas zhing gsal la/ rnyog pa med pa// skyes bu chen po'i mtshan sum cu rtsa gnyis mnga' ba/ dpe byad bzang po brgyad cus brgyan pa'i sku gser gyi mchod sdong ltar 'phags la/ dpal gyi mchog gis lam me/ lhan ne/ lhang nge ste/ gshegs pa mthong ngo // mthong nas kyang sems dad par gyur to// sems dad par gyur nas/ glang po che'i steng nas skyen par babs te/ bcom ldan 'das kyi zhabs la phyag 'tshal te/ bcom ldan 'das la lan gsum bskor ba byas nas phyogs gcig tu 'dug go/ bcom ldan 'das la zhe sa dang bcas/ gus pa dang bcas pas phyogs gcig tu 'dug nas/ rgyal po gzugs can snying po'i sras khye'u rin chen zla bas/ bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to/ / bcom ldan 'das rigs kyi bu 'am/ rigs kyi bu mo dad pa can gang dag gis phyogs bcu'i de bzhin gshegs pa dgra bcom pa yang dag par rdzogs pa'i
- 238a
sangs rgyas bcu po dag gi mtshan thos na/ bla na med pa yang dag par rdzogs pa'i byang chub las phyir mi ldog par 'gyur ba de lta bu bcom ldan 'das kyis bshad du gsol/ bde bar gshegs pas bshad du gsol/ de skad ces gsol ba dang / bcom ldan 'das kyis rgyal po gzugs can snying po'i sras khye'u rin chen zla ba la 'di// skad ces bka' stsal to// gzhon nu legs so legs so// gzhon nu khyod 'di ltar skye bo mang po la phan pa dang / skye bo mang po la bde ba'i phyir dang / 'jig rten la snying brtse ba dang / skye bo'i tshogs phal po che'i don dang / lha dang mi rnams la phan pa dang / bde ba'i phyir zhugs pa dang / da ltar dang / ma 'ongs pa'i byang chub sems dpa' sems dpa' chen po rnams yongs su gzung ba'i phyir zhugs te/ gzhon nu khyod de bzhin gshegs pa dgra bcom pa yang dag par rdzogs pa'i sangs rgyas la don 'di zhu bar sems pa legs so// gzhon nu khyod kyi zhu ba bzang ste/ spobs pa dge'o// de'i phyir gzhon nu khyod legs par rab tu nyon la yid la zung shig dang bshad do// sems rtse gcig tu rna blags te sems sdus la som shig dang / don de ngas khyod la bshad do/ / de nas rgyal po gzugs can snying po'i sras khye'u rin chen zla bas bcom ldan 'das la legs so zhes gsol nas/ bcom ldan 'das kyi ltar nyan pa dang /
- 238b
bcom ldan 'das kyis de la 'di skad ces bka' stsal to// gzhon nu sangs rgyas kyi zhing 'di nas/ shar phyogs su sangs rgyas kyi zhing bye ba khrag khrig 'bum phrag dpag tu med/ grangs med/ bsam gyis mi khyab/ gzhal du med pa snyed 'das pa na/ 'jig rten gyi khams mya ngan med pa zhes bya ba zhig yod de/ 'jig rten gyi khams mya ngan med pa zhes bya ba de sangs rgyas kyi zhing dpag tu med pa ji snyed cig 'das pa na yod ce na/ gzhon nu dper na/ stong gsum gyi stong chen po'i 'jig rten gyi khams 'di srid pa'i rtse mo'i bar du bye mas yongs su gang bar gyur la/ nas mi la la zhig gis bye ma de las 'bru re re nas blangs shing / shar phyogs kyi sangs rgyas kyi zhing re rer bye ma 'bru re 'jog par byed pa de lta bu tshul gyis bye ma de thams cad shar phyogs su yongs su zad cing yongs su gtugs par gyur kyang / sangs rgyas kyi zhing de dag gi tshad dam/ mtha' rtogs par mi nus pa'i sangs rgyas kyi zhing bye ba khrag khrig 'bum phrag dpag tu med/ grangs med pa de snyed 'das pa na/ 'jig rten gyi khams mya ngan med pa zhes bya ba yod de/ 'jig rten gyi khams de yang lag mthil ltar mnyam par gyur pa rin po che sna bdun gyis leg par brgyan pa gser gyi sa gzhir 'dug cing mig mangs ris su bris pa/ rin po che'i shing ljon pas brgyan pa/ sems can dmyal ba dang / dud 'gro'i skye gnas dang / yi dgas dang
- 239a
lha ma yin gyi tshogs rnams med pa/ rtswa dang / shing skam dang / tsher ma dang / rdo dang / gseg ma dang / gyo ma dag med pa/ ngam grog dang / g.yang sa med pa/ me tog sil ma dag bkram pa yin te/ de na de bzhin gshegs pa dgra bcom pa yang dag par rdzogs pa'i sangs rgyas dpal bzang po zhes bya ba da ltar bzhugs shing 'tsho la gzhes te/ byang chub sems dpa'i tshogs kyis bskor cing byang chub sems dpas mdun gyis bltas pa/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu gdul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das skyes bu chen po'i mtshan sum cu rtsa gnyis kyis brgyan pa'i sku/ gser legs par btsos shing / legs par dul ba lta bu/ rin po che'i rgyun legs par bkod pa bzhin du/ 'khor gyi nang na mdzes par bzhugs shing / thog mar dge ba/ bar du dge ba/ tha mar dge ba'i chos ston to/ / 'di skad ces kyang ston te/ 'di ltar sa'i khams ni med par mi 'gyur ro// de bzhin du chu'i khams dang / me'i khams dang / rlung gi khams dang / skye dgu'i bdag po tshang papa dang / gzugs dang / tshor ba dang / 'du shes dang / 'du byed dang / rnam par shes pa med par mi 'gyur ro zhes ston to// gzhon nu gzhan yang de bzhin gshegs pa dgra bcom pa yang dag
- 239b
par rdzogs pa'i sangs rgyas dpal bzang po bla na med pa yang dag par rdzogs pa'i byang chub mngon par rdzogs par sangs rgyas nas ni bskal pa bye ba phrag drug cu lon no/ / gzhon nu gzhan yang sangs rgyas kyi zhing de na nyin mo dang / mtshan mo'i ming yang med de/ 'dzam bu'i gling gi brtsi ba'i thabs 'dis dper bya ba ni ma gtogs so// sangs rgyas kyi zhing de thams cad kyang rtag tu de bzhin gshegs pa de'i 'od kyis snang bar 'dug go/ gzhon nu gzhan yang de bzhin gshegs pa de chos bstan pa re res kyang sems can bye ba khrag khrig phrag 'bum dpag tu med pa dag mi skye ba'i chos la bgod par mdzad do/ / bzod pa dang po dang / bzod pa gnyis pa dang / bzod pa gsum pa la ni de'i nyis 'gyur nyis 'gyur 'god par mdzad do// gzhon nu gzhan yang de bzhin gshegs pa dgra bcom pa yang dag par rdzogs pa'i sangs rgyas de'i sngon gyi smon lam gyi stobs bskyed pas/ sangs rgyas kyi zhing gzhan dag na gang dag sngon gyi rgyal ba rnams la lhag par bya ba byas shing / dge ba'i rtsa ba bskyed pa'i sems can dag gi lus la bod kyis reg pa de dag kyang mi skye ba'i chos la bzod pa thob bo// gzhon nu gzhan yang rigs kyi bu 'am/ rigs kyi bu mo yang rung / de bzhin gshegs pa dgra bcom pa yang dag par rdzogs pa'i sangs rgyas dpal bzang po de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur ro// gzhon nu 'di/
- 240a
nas lho phyogs su sangs rgyas kyi zhing bye ba khrag khrig 'bum phrag grangs med pa snga ma ji snyed pa de snyed 'das pa na/ 'jig rten gyi khams dga' pa zhes bya ba gzhig yod de/ la mthil ltar mnyam pa zhes bya ba nas snga ma bzhin du sbyar ro/ / de nas de bzhin gshegs pa dgra bcom pa yang dag par rdzogs pa'i sangs rgyas tsan dan dpal zhes bya ba da ltar bzhugs shing 'tsho la gzhes te/ byang chub sems dpas bskor cing / byang chub sems dpas mdun gyis bltas pa la thog mar dge ba/ bar du dge ba tha mar dge ba'i chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro/ / gzhon nu de la ji snyam du sems/ ci'i phyir de bzhin gshegs pa de tsan dan dpal zhes bya zhe na/ gzhon nu de bzhin gshegs pa de'i sangs rgyas kyi zhing de thams cad tsan dan gyi khang pa brtsegs pa yongs su khyab pas na/ de'i phyir de bzhin gshegs pa de'i mtshan tsan dan dpal zhes bya'o// gzhan yang rigs kyi bu'am/ rigs kyi bu mo yang rung / de bzhin gshegs pa dgra bcom pa yang dag par rdzogs pa'i sangs rgyas de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur ro/ / gzhon nu 'di nas nub phyogs su sangs rgyas kyi zhing bye ba khrag khrig 'bum phrag grangs med pa snga ma ji snyed pa de snyed 'das pa na/ 'jig rten gyi khams bzang po zhes bya ba zhig
- 240b
yod de/ lag mthil ltar mnyam par gyur pa zhes bya ba nas/ snga ma bzhin du sbyar te/ ji ltar gong du bstan pa bzhin no// de na de bzhin gshegs pa dgra bcom pa yang dag par rdzogs pa'i sangs rgyas snang ba mtha' yas zhes bya ba da ltar bzhugs shing 'tsho la gzhes te/ byang chub sems dpas yongs su bskor cing / byang chub sems dpas mdun gyis ltas pa la/ thog mar dge ba/ bar du dge ba/ tha mar dge ba'i chos ston to// 'di skad ces kyang chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro// gzhon nu gzhan yang rigs kyi bu 'am/ rigs kyi bu mo yang rung / de bzhin gshegs pa dgra bcom pa yang dag par rdzogs pa'i sangs rgyas de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing / 'od de yang nyams su myong ngo // gzhon nu 'di nas byang phyogs su sangs rgyas kyi zhing bye ba khrag khrig 'bum phrag grangs med pa snga ma ji snyed pa de snyed 'das pa na/ 'jig rten gyi khams 'khrug med ces bya ba zhig yod de/ lag mthil ltar mnyam par gyur pa zhes bya ba nas/ thams cad snga ma bzhin du sbyar ro// de na de bzhin gshegs pa dgra bcom pa yang dag par rdzogs pa'i sangs rgyas tog gi dpal zhes pa da ltar bzhugs shing 'tsho la gzhes te/ byang chub sems dpas yongs su bskor cing / byang chub sems dpas mdun gyis bltas
- 241a
pa la chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro// gzhon nu gzhan yang rigs kyi bu 'am/ rigs kyi bu mo yang rung / de bzhin gshegs pa dgra bcom pa yang dag par rdzogs pa'i sangs rgyas de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing lha dang bcas pa'i 'jig rten gyi rgyal mtshan lta bur 'gyur ro/ / gzhon nu 'di nas shar lho'i phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na/ 'jig rten gyi khams zla ba snang ba zhes bya ba zhig yod de/ lag mthil ltar mnyam pa zhes bya ba nas snga ma bzhin du sbyar ro// gzhon nu de la ji snyam du sems/ ci'i phyir 'jig rten gyi khams zla ba snang ba zhes bya zhe na/ 'jig rten gyi khams de thams cad de bzhin gshegs pa de'i 'od kyis snang bar byas pas na/ de'i phyir 'jig rten gyi khams de zla ba snang ba zhes bya'o// de na de bzhin gshegs pa dgra bcom pa yang dag par rdzogs pa'i sangs rgyas mya ngan med pa'i dpal zhes bya ba da ltar bzhugs shing 'tsho la gzhes te/ byang chub sems dpas yongs su bskor cing / byang chub sems dpas mdun gyis bltas pa la/ chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro// rigs kyi bu 'am/ rigs kyi bu mo yang rung /
- 241b
de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur ro// gzhon nu 'di nas lho nub kyi phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na/ 'jig rten gyi khams tog dang ldan pa zhes bya ba zhig yod de/ lag mthil ltar mnyam par gyur pa zhes bya ba nas/ snga ma bzhin du sbyar ro// de na de bzhin gshegs pa dgra bcom pa yang dag par rdzogs pa'i sangs rgyas rin po che'i mchod sdong zhes bya ba da ltar bzhugs shing 'tsho la gzhes te/ byang chub sems dpas yongs su bskor cing / byang chub sems dpas mdun gyis bltas pa la chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro// rigs kyi bu 'am/ rigs kyi bu mo yang rung de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing / 'jig rten gyi khams na rin po che ltar mngon par 'phags par 'gyur ro// gzhon nu 'di nas nub byang gi phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na/ 'jig rten gyi khams sgra ldan zhes bya ba zhig yod de/ lag mthil ltar mnyam par gyur pa zhes bya ba nas/ snga ma bzhin du sbyar ro// gzhon nu de la ji snyam du sems/ ci'i phyir 'jig rten gyi khams de sgra ldan zhes bya zhe na/ 'jig rten gyi khams de sgra 'di lta bu dag dang ldan te/
- 242a
lta ste/ sangs rgyas kyi sgra dang / chos kyi sgra dang / dge 'dun gyi sgra dang / stong pa nyid kyi sgra dang / mtshan ma med pa'i sgra dang / smon pa med pa'i sgra dang / sbyin pa dang / tshul khrims dang / bzod pa dang / brtson 'grus dang / bsam gtan dang / shes rab kyi sgra dang / rnam par shes pa'i sgra dang / rnam par grol ba'i sgra dang / rnam par grol ba'i ye shes gzigs pa'i sgra rnams dang ldan no/ / gzhon nu 'jig rten gyi khams de sgra de lta bu dag dang ldan pas na/ de'i phyir 'jig rten gyi khams de sgra ldan zhes bya'o// de na de bzhin gshegs pa dgra bcom pa yang dag par rdzogs pa'i sangs rgyas me tog dpal zhes bya ba da ltar bzhugs shing 'tsho la gzhes te/ byang chub sems dpas bskor cing / byang chub sems dpas mdun gyis bltas pa la chos ston to zhes bya ba nas/ rnam par shes pa med par mi 'gyur zhes bya ba'i bar du snga ma bzhin du sbyar ro// rigs kyi bu 'am/ rigs kyi bu mo yang rung / de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing / me tog ltar mi dge ba'i chos rnams kyis kyang gos par mi 'gyur ro// gzhon nu 'di nas byang shar gyi phyogs mtshams su sangs rgyas kyi zhing bye ba khrag khrig 'bum phrag grangs med pa de snyed 'das pa na/ 'jig rten gyi khams bde ldan zhes bya ba zhig yod de/ 'byor pa dang / rgyas pa dang / bde ba dang / lo legs pa
- 242b
dang / skye bo dang / mi mang pos gang zhing / lag mthil ltar mnyam par gyur pa zhes bya ba nas/ snga ma bzhin du sbyar ro// de na de bzhin gshegs pa dgra bcom pa yang dag par rdzogs pa'i sangs rgyas mngon par shes pa chung ngu dang / 'bring dang / chen pos rnam par rol pa zhes bya ba da ltar bzhugs shing 'tsho la gzhes te/ byang chub sems dpas bskor cing / byang chub sems dpas mdun gyis bltas pa la chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro// rigs kyi bu 'am/ rigs kyi bu mo yang rung / de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing / byang chub sems dpa'i spyod pa dang / tshul thams cad la mkhas shing pha rol tu phyin pa'i shes pa yang yongs su 'dzin par 'gyur ro/ / gzhon nu 'di nas 'og gi phyogs su sangs rgyas kyi zhing bye ba khrag khrig 'bum phrag grangs med pa de snyed 'das pa na/ 'jig rten gyi khams/ yangs pa dang ldan pa zhes bya ba zhig yod do// gzhon de la ji snyam du sems/ ci'i phyir 'jig rten gyi khams de yangs pa dang ldan pa zhes bya zhe na/ 'jig rten gyi khams de lag mthil ltar mnyam par gyur la/ ri med cing khor yug dang / khor yug chen po med de/ sangs rgyas kyi zhing de na ri zhes bya ba'i ming yang ye med pas na/ de'i phyir 'jig rten gyi khams de yangs pa dang
- 243a
ldan pa zhes bya'o/ / de na de bzhin gshegs pa dgra bcom pa yang dag par rdzogs pa'i sangs rgyas snang ba'i dpal zhes bya ba da ltar bzhugs shing 'tsho la gzhes te/ byang chub sems dpas bskor cing / byang chub sems dpas mdun gyis bltas pa la chos ston to zhes bya ba nas/ rnam par shes pa med par mi 'gyur ro zhes bya ba'i bar du snga ma bzhin du sbyar ro/ / rigs kyi bu 'am/ rigs kyi bu mo yang rung / de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing / nye bar len pa'i nyon mongs pa thams cad zad pa yang rjes su 'dzin par 'gyur ro/ / gzhon nu sangs rgyas kyi zhing 'di nas steng gi phyogs su sangs rgyas kyi zhing bye ba khrag khrig 'bum phrag grangs med dpag tu med/ bsam gyis mi khyab gzhal du med pa de snyed 'das pa na/ 'jig rten gyi khams zla ba can zhes bya ba zhig yod de/ 'jig rten gyi khams zla ba can zhes bya ba de sangs rgyas kyi zhing dpag tu med pa ji snyed cig 'das pa na yod ce na/ gzhon nu 'di lta ste/ stong gsum gyi stong chen po'i 'jig rten gyi khams 'di srid pa'i rtse mo'i bar du bye mas yongs su gang bar gyur la/ nas mi la la zhig gis bye ma de las 'bru re re nas blangs shing / steng gi phyogs kyi sangs rgyas kyi zhing re rer bye ma 'bru re re 'jog par byed pa de lta bu'i tshul gyis bye ma de thams cad steng gi phyog
- 243b
su yongs su zad cing yongs su gtugs par gyur kyang / sangs rgyas kyi zhing de dag gi tshad dam/ mtha' rtogs par mi nus pa'i sangs rgyas kyi zhing bye ba khrag khrig 'bum phrag dpag tu med/ grangs med pa de snyed 'das pa na/ 'jig rten gyi khams zla ba can zhes bya ba de yod de/ 'jig rten gyi khams de yang lag mthil ltar mnyam par gyur pa/ rin po che sna bdun gyis legs par brgyan pa/ gser gyi sa gzhir 'dug cing mig mangs ris su bris pa/ rin po che shing ljon pas legs par brgyan pa/ sems can dmyal ba dang / dud 'gro'i skye gnas dang / yi dgas dang / lha ma yin gyi tshogs rnams med pa/ rtswa dang / shing skam dang / tsher ma dang / rdo dang / gseg ma dang / gyo mo dag med pa/ ngam grog dang / g.yang sa med pa/ me tog sil ma dag bkram pa yin te/ de na de bzhin gshegs pa dgra bcom pa yang dag par rdzogs pa'i sangs rgyas nor dpal zhes bya ba da ltar bzhugs shing 'tsho la gzhes te/ byang chub sems dpas bskor cing / byang chub sems dpas mdun gyis bltas pa/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur pa/ bla na med pa/ lha dang mi rnams kyi ston pa/ sangs rgyas bcom ldan 'das skyes bu chen po'i mtshan sum cu rtsa gnyis kyis brgyan pa'i sku/ gser legs par btsos shing
- 244a
legs par dul ba lta bu rin po che'i rgyan legs par bkod pa bzhin du 'khor gyi nang na mdzes par bzhugs shing / thog mar dge ba/ bar du dge ba/ tha mar dge ba'i chos ston to/ / 'di skad ces kyang ston te/ 'di ltar sa'i khams med par mi 'gyur ro// de bzhin du chu'i khams dang / me'i khams dang / rlung gi khams dang / skye dgu'i bdag po tshangs pa dang / gzugs dang / tshor ba dang / 'du shes dang / 'du byed dang / rnam par shes pa med par mi 'gyur ro zhes ston to// rigs kyi bu 'am/ rigs kyi bu mo yang rung / de'i mtshan thos na/ bla na med pa yang dag par rdzogs pa'i byang chub las phyir mi ldog par 'gyur zhing / chos rin po che bla na med pa yang thob par 'gyur ro// gzhon nu de ltar na rigs kyi bu 'am/ rigs kyi bu mo yang rung / de bzhin gshegs pa dgra bcom pa yang dag par rdzogs pa'i sangs rgyas spyod pa dang / yon tan phun sum tshogs pa dang / ye shes phun sum tshog pa dang / tshul khrim dang / ting nge 'dzin dang / shes rab dang / rnam par grol ba dang / rnam par grol ba'i ye shes gzigs pa phun sum tshogs pa dang ldan pa de dag gi mtshan thos na/ bla na med pa yang dag par rdzogs pa'i byang chub las phyir mi ldog par 'gyur ro/ / gzhon nu sngon byung ba 'das pa'i dus na/ bskal pa grangs med pas kyang ches grangs med pa yun ring po tshad
- 244b
med pa 'das pa de'i tshe/ rin chen 'byung zhes bya ba'i bskal pa zhig byung ste/ der de bzhin gshegs pa dgra bcom pa yang dag par rdzogs pa'i sangs rgyas rigs pa dang zhabs su ldan pa bde bar gshegs pa/ 'jig rten mkhyen pa/ skyes bu gdul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das rgya mtsho'i dpal zhes bya ba zhig 'jig rten du byung ste/ / der de bzhin gshegs pa dgra bcom pa yang dag par rdzogs pa'i sangs rgyas bcu po 'di dag thams cad lhan cig tu mthun par dge ba'i rtsa ba bskyed de/ zas dang / skom dang / bza' ba dang / bca' pa rnam pa sna tshogs dang / me tog dang / spos dang / me tog 'phreng dang / byug pa dang / gdugs dang / rgyal mtshan dang / ba dan gyi rnam pa dpag tu med grangs med pas bcom ldan 'das de la mchod pa rgya chen po byas nas/ thams cad kyi lhan cig tu mthun par bla na med pa yang dag par rdzogs pa'i byang chub tu sems bskyed de/ thams cad kyis nyi ma gcig tu skad cig thang cig yud tsam gcig la mi skye ba'i chos la bzod pa thob par gyur to/ / de nas de dag gis rim gyis byang chub sems dpa'i spyod pa la spyad nas/ byang chub kyi phyogs dang mthun pa'i chos rnams yongs su rdzogs par byas te/ skad cig thang cig yud tsam gcig la rang rang gi sangs rgyas kyi zhing rnams su/ bla na med pa yang dag par rdzogs pa'i byang
- 245a
chub tu mngon par rdzogs par sangs rgyas so/ / skad cig thang cig yud tsam gcig la de dag gis chos kyi 'khor lo bskor to// thams cad kyi tshe'i tshad kyang mnyam mo// gzhon nu de bzhin gshegs pa dgra bcom pa yang dag par rdzogs pa'i sangs rgyas de dag thams cad kyang nyi ma gcig tu/ skad cig thang gcig yud tsam gcig la yongs su mya ngan las 'da' bar 'gyur ro/ / de skad ces bka' stsal pa dang bcom ldan 'das la rgyal po gzugs can snying po'i sras khye'u rin chen zla bas 'di skad ces gsol to// bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de dag gi sku tshe'i tshad ni ngo mtshar lags te/ bcom ldan 'das de bzhin gshegs pa de dag gis ni sems can rnams la thugs brtse ba'i slad du/ sku tshe'i tshad tsam du ring ba bzhes lags so// bcom ldan 'das gzhan yang rigs kyi bu 'am/ rigs kyi bu mo gang de bzhin gshegs pa de rnams kyi sku tshe'i tshad 'di la de bzhin du 'dzin cing yid ches la spong bar mi 'gyid/ 'dor bar mi bgyid pa de la bsod nams ji tsam skye bar 'gyur lags/ bcom ldan 'das kyis bka' stsal pa/ gzhon nu stong gsum gyi stong chen po'i 'jig rten gyi khams 'di dang de bzhin gshegs pa bcu po de dag gis sangs rgyas kyi zhing de dag dang / sangs rgyas kyi zhing bcu gcig po rnams lha'i rin po che sna bdun
- 245b
gyis yongs su bkang nas/ de bzhin gshegs pa dgra bcom pa yang dag par rdzogs pa'i sangs rgyas rnams la nyin gcig bzhin du sbyin pa byin te/ de lta bur bskal pa grangs med par sbyin pa sbyin par byed la/ rigs kyi bu 'am/ rigs kyi bu mo gang gis mtshan 'di rnams dang / sku tshe'i tshad 'di rnams thos na/ de bzhin du 'dzin cing yid ches la spong bar mi byed smod par mi byed de/ mos par byed cing mthun par byed na/ bsod nams kyi phung po snga ma des bsod nams kyi phung po de'i brgya'i char yang mi phod/ stong gi cha dang / dpe'i bar du yang mi bzod do// de nas lha rnams kyi dbang po brgya byin dang / mi mjed kyi bdag po tshangs pa dang / rgyal po chen po bzhi dang / lha'i bu dbang po dang / dbang phyug chen po dang / dpal ldan legs dang / dga' ldan dang / lha'i bu yongs su dga' ldan gyis 'di ltar chos kyi rnam grangs 'di dang / de bzhin gshegs pa bcu po de rnams la mchod pa bya ba'i phyir/ de bzhin gshegs pa la lha'i me tog dang / tsan dan gyi phye mas gtor/ mngon par gtor/ rab tu gtor to// tshig 'di skad ces kyang smras te/ bcom ldan 'das rigs kyi bu 'am/ rigs kyi bu mo gang dag chos kyi rnam grangs 'di 'dzin pa dang / 'chang ba dang / klog pa dang / rjod par bgyid pa de dag ni phyag bgyi ba'i 'os lags so// bcom ldan 'das tha na chos kyi rnam grangs 'di gang
- 246a
dag gi sdug pa na mchis pa de dag ni/ bla na med pa yang dag par rdzogs pa'i byang chub las phyir mi ldog par 'gyur ba lags so// bcom ldan 'das chos kyi rnam grangs 'di rigs kyi bu 'am/ rigs kyi bu mo gang dag gis rna lam du grag par 'gyur ba de dag ni bdud sdig can gyi dbang du mchi bar mi 'gyur lags so// de nas bcom ldan 'das la rgyal po gzugs can snying po'i sras khye'u rin chen zla bas tshigs su bcad pas gsol pa/ / phung po med pa bcom ldan 'das// khyo kyi legs gsungs dpag tu med// bdag dang lhar bcas 'jig rten rnams/ / khyod kyi 'di la yi rang ngo // 'jig rten mgon po 'das pa dang // gang dag da dung ma byon dang // phyogs rnams ma lus gang bzhugs pa'i// sangs rgyas rnams la/ skyabs su mchi// sangs rgyas kun gyi yul gcig pa// chos dang dge 'dun zhi ba'i mchog/ yon tan legs pa bsam mi khyab// dge 'dun la yang skyabs su mchi// byang chub sems dpa' 'jigs med pa/ / gang dag bzod la rab gnas shing // gang dag gzungs la gnas pa dang // gang dag mtshungs med stong nyid tshul// mtshan nyid kyi ni mdo sde dang // byang chub rgyur 'gyur sde sdod dang / / mthun par 'jug pa'i mdo sde la// legs bslabs byang chub sems rnams ltar// thub pa bdag ni byang chub kyi// spyod pa spyod cing slob par 'tshal// rang byung de dag ji bzhin du//
- 246b
zhing gi bkod pa rnam dag dang // spyod dang spyod yul ting 'dzin dang // de dag gi ni yon tan dang // drang srong mchog rnams sku tshe'i tshad// gsungs pa gang lags rdzogs par bgyi// de nas bcom ldan 'das kyis lha'i bu de dag dang / rin chen zla ba gzhon nur gyur pa la legs so zhes bya ba byin nas/ tshigs su bcad pa 'di dag bka' stsal to// 'jig rten mgon po de rnams kyi/ / mtshan ni gang zhig 'dzin byed pa// ma 'ongs dus na de dag kun// rkang gnyis rnams kyi mchog tu 'gyur// nga yis ji skad gsungs pa bzhin// drang srong mchog bzhugs de dag ltar/ / de dag tshe yang bskal pa ni// bye ba bsam yas snyad du 'gyur// gang zhig skyob pa de dag gi/ mtshan 'di dag ni 'dzin de la// me dang chom rkun dug rnams dang // mtshon gyi tshugs par mi 'gyur ro// mtshan 'di dag ni 'dzin byed na// chu chen dag gis de mi 'chi// rgyal po'i gnod pas ma yin te// de ni nams kyang chos mi spong // mtshan mo thun tshod dang po dang / / gung dang tha ma'ang de bzhin te// dus gsum dag tu mtshan spogs dang // drang srong mchog ni de dag gi/ mtshan rnam snga dro sgrogs byed cing // nyi ma'i gung la sgrogs byed dang / mkhas pa nug par sgrogs byed pa// rmi lam bzang po mthong bar 'gyur// mtshan rnams bzung nas de'i 'og tu// bskal pa bye ba stong rnams su// sngon chad sdig pa ci bsags pa//
- 247a
mi dge thams cad bshags par bya// de yis lus ngag yid kyi las// mi dge gang dag byas gyur na// mtshan rnams gzung nas de'i 'og tu// nyes byas dag kyang bshags par bya/ / yan lag lnga yi gtugs nas ni// rgyal rnams byang chub sngon rol du// dug gsum dge ba ci bsags pa// de kun rjes su yi rang bya// 'jig rten rtsa lag rnams kyis ni/ / byang chub brnyes nas chos gsungs dang // lus can gang dag 'jig rten gyi// mgon po rnams la mchod byed pa// de la rgyal ba'i sras rnams kyis// nyin mtshan dus gsum yi rang bya/ / des na bdag gzhan don byed pa'i// pha rol phyin pa rdzogs par 'gyur// bcom ldan 'das kyis de skad ces bka' stsal nas/ rgyal po gzugs can snying po'i sras khye'u rin chen zla ba dang / byang chub sems dpa' de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten bcom ldan 'das kyis gsungs pa la yid rangs te/ mngon par bstod do// 'phags pa rin chen zla bas zhus pa zhes bya ba theg pa chen po'i mdo rdzogs so// / rgya gar gyi mkhan po bi shud+d+ha sing ha dang / lo tsa ba ban d+he dge ba dpal gyis bsgyur/ rgya gar gyi mkhan po bid+ya ka ra si ma ha dang / zhu chen gyi lo tsa ba ban d+he de wa tsan tras zhus te gtan la phab pa// @#rgya gar
Colophon
'phags pa rin chen zla bas zhus pa zhes bya ba theg pa chen po'i mdo rdzogs so/ /rgya gar gyi mkhan po bi shud+d+ha sing ha dang / lo tsa ba ban d+he dge slong dpal gyis bsgyur/ rgya gar gyi mkhan po bi d+ya ka ra sing ha dang / zhu chen gyi lo tsa ba ban d+he de wa tsan tras zhus te gtan la phab pa/