nor bu phra bkod rang gi don thams cad gsal bar byed pa'i rgyud ces bya ba
Maṇicitritabyūhasvayamarthasarbaprakaṭatantranāma
Text
ff. 1b–31a · 60 folio sides
- 1b
rgya nag po'i skad du/ e ha d+ha swa ra du pa a/ u rgyan gyi skad du/ ma hA sin d+ha gu du ba/ saM s+the ta'i skad du/ ma hA rad na d+ha sing e ka ya d+hu/ b+ha ka ra Na'i skad du/ e dur sarba g+hu la ha/ kha che'i skad du/ sa hA ra du na hUM ka A/ ma ha si gaM la'i skad du/ os rad na d+hu pa ya ha hA ra// rgya gar skad du/ ma Ni tsi tri ta byA ha swa ya mar+tha sarba pra ka Ta tan+ta nA ma/ bod skad du/ nor bu phra bkod rang gi don thams cad gsal bar byed pa'i rgyud ces bya ba/ bcom ldan 'das kun 'dus rig pa'i klong la phyag 'tshal lo// 'di skad bdag gis bstan pa'i dus gcig na/ rang gi rig pa'i de bzhin nyid gang yin pa'i klong / ye shes rab tu gsal bas brgyan pa'i pho brang na/ rang gi ye shes kyi dkyil 'khor gnas te/ de'i
- 2a
don ngas bstan gyis/ kye thub pa chen po'i 'khor mkha' 'gro ma dang bcas pa nyon cig/ rang byung zabs kyi rgyud chen po 'di yis/ sems can gyi mun pa thams cad snang bar 'gyur gyis/ rigs kyi bu rnams kyis yid ma yengs pa'i tshul gyis zhus shig/ 'di skad bdag gis thos pa'i dus gcig na/ bcom ldan 'das tsit+ta rin po che'i 'od gsal ba'i gzhal yas na/ rig pa rang byung gi sku dang / chos nyid thig le'i dgongs pa la thabs cig tu bzhugs so// de'i tshe 'dus pa'i 'khor tshogs shin tu mang bar gyur te// de nas bcom ldan 'das dpal stobs ldan nyid la 'di skad ces zhus so// kye kye bcom ldan 'das rig pa'i stobs thun mong ma yin pa dang ldan pa/ bdag cag rnams la
- 2b
rgyud chen po 'di bka' bsgo bar mdzad du gsol// lung bstan du gsol// rtog par mdzad du gsol// thabs mdzad du gsol// bstan pa la gzud du gsol// snang ba bstan du gsol// zhes rang snang gi don ma nor bar zhus so// de nas bcom ldan 'das 'dus pa chen po'i sa ma ti la gnas nas/ 'khor chen po rnams la bka' stsal pa/ e ma ho// khyed kyis zhus pa de legs so// ngas don gyi dgongs pa thugs tsit+ta'i dkyil 'khor sgo phye nas/ gsang sngags kyi dgongs pa nyid/ ma nor bar bstan gyis legs par nyon cig/ gsang ba'i dkyil 'khor chen po nas/ shes rab rang byung gi lha mo lnga skye 'gag med par gsal ba yin pas na/ thugs rje lnga dbri bkol med par gnas pa ste/ ye shes kun khyab kyi snang ba yul kun la shar nas/ stong pa chen po rang byung gi klong du thim pa'i tshe/ ye shes kyi lha mo dbyings gsal bar byed pa'i sgron ma la brtag par bya'o// mkhas pas ye shes rang snang gi stobs la thugs rje'i sgron ma gsal bar mthong nas/ don la 'jug go/ thabs kyis rang rang gi don mthong bar 'gyur te/ kun tu mtha' yas so// de nas 'dus pa'i 'khor tshogs de rnams kyi nang nas/ ye shes kyi lha mo rgyan rab tu 'bar ma zhes bya bas/ 'di skad ces gsol to// kye kye bcom ldan 'das rnam grol bdag/ chos nyid
- 3a
rtogs par 'dod pa yi// sems can thugs rjes yang dag zung // ma rig mun khang gzhom du gsol// zhes zhus so// de nas thugs kyi dbyings nas bka' stsal pa// stobs ldan ye shes lha mo nyon// ngas bstan legs par yid la zung / khams gsum 'khor ba'i sems can nyid// dang po 'khrul pa'i dus nyid nas// da lta'i snang ba skyes tshul gnyis// lam la cig char 'jug pa dang // lam la mthong tshul skye ba'o// stong pa'i ye shes chen po ni// cir yang med pas cir yang 'khrul// tha ma cis kyang ldog par 'gyur// ci yang med pa'i dngos po ni// gang gi phyogs su ma lhung ba'o// cir yang 'khrul pa'i dngos po ni// mthun snang tsam du snang bar zad// 'od kyang de yi don mi skye// chos dbyings rgyan ltar snang ba'o// zhes gsungs so// de nas yang 'dus pa'i 'khor de rnams kyi nang nas/ ye shes kyi lha mo sna tshogs 'byung bas 'di skad ces gsol to// kye bcom ldan 'das thugs rje rig pa'i sku dang ldan pa/ snang ba'i dus ji lta bu lags/ gsung du gsol/ de nas yang bcom ldan 'das rang byung gi rgyal po des/ 'di skad ces gsungs so// kye 'dus pa'i lha mo khyod nyon cig/ rtogs byed kyi shes rab yul la 'jug pa'i dus su/ snang ba rang snang ste/ shes pa kha yan du gtang bar bya'o// snang ba'i ye shes kun tu mtha' yas te/
- 3b
don skye med rig pa'i snying po can du gnas so// ye shes 'gag med kyi klong nas rang byung rtags kyi dkyil 'khor lnga gsal ba ni/ don dam pa'i chos nyid ngang du kun tu bzang po'i klong du phyi nang gi chos thams cad gsal ba'o// de nas 'dus pa'i 'khor rnams kyi nang nas/ ye shes kyi lha mo 'od zer kun nas 'byung bas 'di skad ces gsol to// e ma bcom ldan 'das thugs rje dang thabs su ldan pa/ yang dag par rdzogs pa'i sang rgyas la rdzu 'phrul ni ji lta bu/ snang ba ni ji lta bu/ stobs ni ci lta bu/ rtsal ni ji lta bu/ yon tan ni ji lta bu/ ngo bo ni ji lta bu/ bzhugs tshul ni ji lta bu/ gsung du gsol/ bstan du gsol/ de nas bcom ldan 'das kyis bka' stsal pa/ kye ye shes kyi lha mo khyod nyon cig/ yang dag par rdzogs pa'i sangs rgyas kyi rdzu 'phrul ni/ tshad med do// dpag tu med do// gzung du med do// gzhal du med do// sangs rgyas kyi snang ba ni che chung gi mtha' las 'das te nam mkha' lta bu'o// sangs rgyas kyi stobs ni yin min gyi mtha' las 'das te glang po che lta bu'o// sangs rgyas kyi rtsal ni spang thob kyi mtha' las 'das te/ seng ge lta bu'o// sangs rgyas kyi yon tan ni// gang stongs kyi mtha' las 'das te/ yid bzhin gyi nor bu lta bu'o// sangs rgyas kyi ngo bo ni/ bdag rtog gi mtha' las 'das te/ kun khyab kyi ye shes
- 4a
nyid do// sangs rgyas kyi bzhugs tshul ni dbang po dang yul las 'das te/ rang snang nyid do// de ni rang byung gi dgongs pa nyid kyi tshig go/ de nas yang 'dus pa'i tshogs de rnams kyi nang nas// ye shes kyi lha mo 'od zer ston ma zhes bya ba des/ 'di skad ces gsol to// kye bcom ldan 'das thugs rje rig pa'i snang bas brgyan pa/ rang gi ye shes kyi gnas lugs ji lta bu lags gsung du gsol// zhes zhus so// de nas yang bcom ldan 'das kyis bka' stsal pa/ kye ma ye shes kyi lha mo khyod nyon cig/ ngas thabs kyi dkyil 'khor nyid ma nor bar bstan gyis/ legs par yid la zung zhig/ rang gi rig pa'i ye shes nyid la gzung 'dzin gyi rnam par rtog pa med kyang / snang tshul la rnam par rtog pa'i 'du 'phro mtshan ma dang bcas pa byung ste/ sems can gyi blo'i dri mar gyur nas/ lung du ma bstan par nyid las phyir snang ma nus te/ snang ba dang rkyen dang bcas pa'i phyir ro// nga'i thugs la g.yos pa med kyang / sku'i mtshan nyid cir yang snang ba ngo ma shes nas sems kyi yul la 'dzin pa'o// rang byung gi ye shes dmigs pa ma dag pas yul gyi shes pa rang snang ba'o// rdo rje ye shes 'gyur ba med par kun tu snang bas/ gzigs snang gi mtha' thams cad las 'das pa'o// rang byung gi ye shes thabs 'gag pa med par
- 4b
rang snang bas/ bdag tu rtog pa'i blo dang bral nas/ ye shes kyi yul snang bar 'gyur ro// shes rab rang byung gi ye shes gzung 'dzin gyi mtha' las 'das nas bsam bral dngos dag go/ de yang ye shes kyi rtsal ma 'gags pas rigs drug ltar snang ba'o// de nas yang ye shes kyi lha mo snang ba'i sgron mas 'di skad gsol to// kye thugs rje rang byung gi skra dang ldan pa/ khyad par gyi tshig gang lags gsung du gsol// zhes zhus so// de nas yang thugs rje chen po des 'di skad ces bka' stsal to// e ma ye shes kyi lha mo khyod nyon cig/ nga rang byung gi sangs rgyas la rnam rtog gi gnas med do// de ci'i phyir zhe na 'byung ba'i rkyen dang bral ba'i phyir ro// nga rang snang gi shes rab la the tshom gyi mtha' med do// de'i phyir zhe na/ rang snang gi spyod pa ma 'gags pa'i phyir ro// nga shes rig gi rgyal po la phyogs lhung gi mtha' med do// de ci'i phyir zhe na/ rig pa nyid rkyen dang bral ba'i phyir ro// nga rang rig gi lha mo rgyan ma bkod par gsal ba la/ gsal 'grib kyi phyogs med do// de ci'i phyir zhe na/ ye shes kyi snang ba nyid ye nas gsal ba'i phyir ro// de'i phyir rigs kyi bu mo rang gi snang ba rnam par dag pa dang 'grogs par bya'o// de nas yang 'dus pa'i tshogs kyi nang nas/ ye shes kyi lha mo dbyings rig gsal ba'i sgron mas 'di skad ces zhus
- 5a
so// kye bcom ldan 'das thugs rje'i dkyil 'khor dang ldan pa/ thun mong yul gyi chos gang lags/ zhes zhus so// de nas yang ston pa ye shes kyi skus bka' stsal pa/ kye ma ye shes kyi lha mo khyod nyon cig/ ngas thun mong gi snang ba'i chos nyid bstan gyis legs par nyon cig/ thun mong du snang ba'i chos nyid 'di lta ste/ phyi 'byung ba lnga nyid thun mong rang rgyud kyi chos yin te/ phyir snang ba'i 'byung ba thams cad rang gi rig pa nyid dang sbyor bas na/ thun mong gi chos yin te/ de la dbye ba 'di lta ste/ sa'i mtshan nyid sra bar byed pa nyid kyang rig pa'i ye shes skye 'jig dang bral bar sbyar ro// rlung gi mtshan nyid 'degs par byed pa nyid kyang / rig pa'i ye shes thogs pa med pa dang sbyar ro// me'i mtshan nyid bsreg par byed pa nyid kyang / rig pa'i ye shes nyon mongs pa'i dbang du ma song ba dang sbyar ro// chu'i mtshan nyid brlan par byed pa nyid kyang rig pa'i ye shes yul kun la 'jug pa dang sbyar ro// nam mkha'i mtshan nyid yangs pa nyid kyang rig pa'i dbyings rgya ma chad pa dang sbyar bar bya'o// de nas 'dus pa'i tshogs rnams kyis mgrin gcig tu 'di skad ces gsol to// kye bcom ldan 'das thugs rje dang thabs su ldan pa/ bdag cag rnams la thabs kyi dkyil 'khor gsung du gsol/ zhes zhus so// de nas yang bka'
- 5b
stsal pa/ e ma rigs kyi bu rnams ma yengs par nyon cig/ gsang sngags thabs kyi ye shes ngas bshad kyis ma yengs par nyon cig/ ye shes kyi ngo bo rtog med du yod kyang rtsal rnam pa sna tshogs su snang bas// sems can gyi blo la dri ma dang bcas te/ rang snang gsal du ma ster bas thams cad bsgribs nas snang ba'i rjes su song ba'o// de yang shes rab kyi don chod na bsgrib phyogs kyis ma bsgribs par bstan pa'o// rang snang shes rab kyi sku ngo shes na/ chos thams can gyi mdo dang rgyas pa shes par 'gyur te/ nyon mongs pa ye shes kyi snang bar slong ba'o// de nas 'dus pa'i tshogs de rnams shin tu ngo mtshar bar gyur nas 'di skad ces bgros so// 'di skad bdag gis thos nas go zhing shes nas/ rtogs pa'i dus gcig na/ rang rig pa thams cad kyi de bzhin nyid du/ bcom ldan 'das dpal kun tu bzang po dang gnyis su med par snyoms par zhugs so// de nas yang cha yis ma bgos pa'i pho brang chen po thugs tsit+ta'i dkyil 'khor chen por gnas te/ gsung gi sprul pa grangs med pas 'gro ba'i don byed do// thugs kyi dgongs pa ni gcig las ma g.yos pa nyid do// sku'i cho 'phrul ni cir yang ston pa nyid do// rang byung gi thabs gcig gi ngo bo gang la thams cad du snang ba nyid do// cho 'phrul gyi ting nge 'dzin bsam gyis mi khyab pa nyid
- 6a
do// ye shes kyi dkyil 'khor kun tu ston pa nyid do// mdzes pa'i 'od zer phyogs bcur 'phro ba nyid do// snang ba'i 'du 'phro cir yang snang ba nyid do// ye shes kyi thabs gang la yang ma 'gags pa nyid do// thugs kyi klong nas dgongs pa'i 'od zer rang shar ba nyid do// sangs rgyas kyi zhing khams sku mngon par snang ba nyid do// gsang ba'i sgron ma phyogs gang la mi gnas pa nyid do// shes rab kyi ngo bo phyogs gar yang thogs pa med pa nyid do// sku gsum gyi snang ba mtha' rnam pa dag pa'i nyid do// chos nyid kyi dbyings rgya gar yang ma chad pa nyid do// chos sku'i snang ba phyogs gang du yang ma lhungs pa nyid do// ye shes kyi sgo bzhi skye 'gag med par gsal ba nyid do// thig le 'du 'phro 'byung 'jug med par rtogs pa nyid do// zhi ba'i sku la 'phel 'grib med par kun tu snang ba nyid do// gsang sngags kyi lam la thabs ma 'gags par snang ba nyid do// khro bo'i sku la rgyan med par sgeg pa nyid do// ye nas gnas pa'i thugs rje la 'gag pa med pa nyid do// blta ba rang byung gi ye shes la rtsis dang bral ba nyid do// chos can yul gyi snang ba kun tu mtha' yas pa nyid do// sku mi zad pa rgyan gyi 'khor lo rgyun du bskor ba nyid do// spyod pa rmad byung gi ye shes kun dang mthun pa nyid do// sgom pa rang gsal gyi ye shes ma g.yos pa
- 6b
nyid do// chos nyid mtha' bral gyi dgongs pa kun tu snang ba nyid do// yengs med rgyun gyi dam tshig sdom pa nyid do// bya bral gcig rdzogs kyi phrin las zin pa nyid do// mi 'dod rang byung gi yon tan rgyas pa nyid do// grag stong chos sku'i sgra dbyangs la thug pa med pa nyid do// chos sku'i mtshan nyid ni gar yang thogs pa med pa nyid do// ye shes dkyil 'khor la 'phel 'grib med pa nyid do// nga rang byung thabs kyi ye shes la tha dad med pa nyid do// sku'i dkyil 'khor kun nas 'byung ba nyid do// gnyis su snang ba med pa'i ye shes dri ma med pa nyid do// thugs rje rang byung gi snang ba kun tu yangs pa nyid do// thugs rje rang byung gi dkyil 'khor 'od gsal ba nyid do// mtha' gar yang mi 'byed pa nyid do// mtha' ma 'gags pa'i spyan gyis phyogs bcur gzigs pa nyid do// shes rab rang byung gi 'od zer phyogs ris med pa nyid do// gsang sngags thabs chen po yongs su rdzogs pa nyid do// stong pa kun khyab kyi ye shes mtha' rnam par 'byed pa nyid do// thugs kyi dgongs pa rtse gcig las ma g.yos pa nyid do// thugs rje'i sku rnam par 'byed pa nyid do// sangs rgyas kyi lam lnga la mkhas pa nyid do// sangs rgyas kyi dkyil 'khor lnga dang 'du 'bral med pa nyid do// thugs rje'i spyan lnga khong nas gsal ba nyid do// stong pa'i spyan drug mkha' la
- 7a
bskyod pa nyid do// thig le'i 'od lnga rang las 'byung ba nyid do// de bzhin gshegs pa thams cad kyi thugs rdo rje lta bu dang gnyis su med par thabs cig tu snyoms par bzhugs so// zhes nor bu phra bkod chen po'i rgyud las/ gleng gzhi'i le'u ste dang pa'o// // de nas rigs kyi lha mo yis// bcom ldan rang rig don ldan la// 'dun pa'i tshul gyis rab tu zhus// kye kye bcom ldan stobs ldan pa// rigs kyi lha mo'i tshogs rnams la// rang gi gtan tshigs thabs ldan gsungs// de skad zhu ba zhus gyur nas// nam mkha' dag la rab gnas so// de nas rang rig bcom ldan 'das// nye ba'i 'khor dang bcas pa yis// lha mo rnams la bka' stsal pa// e ma sangs rgyas rjes bzung phyir// khyod la nga yis legs par bstan// ma yengs gus pa'i tshul gyis nyon// gtan tshigs thabs kyi yan lag kyang // bsam gyis mi khyab grangs mang yang // gsang sngags nges don gtan tshigs 'di// 'byung bar 'gyur ba ma yin pas// gsang sngags gtan tshigs khyed kyis zung // yang dag nges pa'i lung 'di nyon// mdo don gtan tshigs rgyas bshad kyis// legs par nges pa'i don la nyon// drang ba'i theg pa rnam mang yang // nges pa don gyi mdo sde 'di// 'ga' yang 'byung bar ma bshad do// sangs rgyas ye shes lam 'dzin pas// nges
- 7b
pa'i lung 'di bka' stsal pa// sems can thar pa'i lam la nye// ye shes dkyil 'khor rab bstan pas// mi mthong bsal ba'i sgron mar 'gyur// snang mdzad sems kyi gzung 'dzin las// the tshom blo yi spyod yul 'char// rnam rtog rab tu spang bya'i phyir// nges pa'i lung 'di rab bshad pas// theg pa dma' ba'i gang zag rnams// shin tu bred cing dngangs par 'gyur// rnam rtog blo yi dri ma rnams// rab tu dag pas gsal phyir 'gyur// yongs su rdzogs pa'i lam rgyal 'grub// 'di nyid 'dod rgyal ma yin te// gsang sngags chen po'i dgongs pa nyid// rang gi don la che bar bshad// gzhi rdzogs lam gsal 'bras bu snang bar 'gyur// theg pa'i mtho dman thams cad kyang // rang rang don la mi mthun pas// gsang ba'i don ni rtogs mi 'gyur// de yang ngo bo mtshan nyid dang // rang bzhin kun khyab nges tshig go// thugs rje kun 'byung nyi zer la// gsang sngags thabs kyi lam nyid las// thabs kyi zhags pa lnga shar bas// 'dzin byed dbyings dang rig pa 'dzin// thogs med rnam grol rlung chen gyis// rang snang dag pa'i nam mkha' la// ma bskyod bzhin du de bzhin gshegs// rnam dag dbyings kyi pho brang na// ye shes rtogs pa'i me lnga yis// mtshan ma rtog 'dzin spar sbur bsregs// nyon mongs bzhi zhing bcu/ bcu thal bar brlag/ rnam
- 8a
rtog 'khor ba'i chu rgyun bcad// 'khor ba'i dri ma rab bsal nas// ye shes don la the tshom med// thar ma rgya las rnam par grol// 'dzin pa'i phur pa rang phyung bas// 'khor ba'i rtod zag chen po bcad// rang rig gsal ba'i mthongs phye nas// gti mug 'khor ba'i mun pa sangs// snang ba zug phrad don dgongs kyis// thad ka'i shes pa don ldan 'gyur// thig le spyi chings rang gnad kyis// snang ba skye 'gag phyogs dang bral// yul sems gnyis med ting 'dzin gyis// dri ma gnyis kyi mtha' las grol// thams cad rang gsal chos nyid kyis// nyon mongs 'ching ba'i mdud pa bkrol// gzhi rdzogs chos nyid dkyil 'khor gyis// sgo lnga'i yul las rnam par thar// tha dad thun mong ma yin pas// shes bya'i yul la rnam par 'byed// dkyil 'khor ye shes rnam lnga yis// yang dag don la rnam par rol// skye shi med pa'i chos sku yis// rtog 'dzin yul gyi dri ma sangs// gsang ba rgyun gyi thugs rje yis// gcong rong mun pa'i gting nas 'dren// shes rab yul gyi phyag rgya yis// 'dzin rtog gnyis kyi mtha' dang bral// yangs pa'i chos nyid gsal mthong bas// 'khor ba'i zhe 'dod thabs kyis spangs// rang rig thabs kyi glu chen 'dis// ye shes gsal ba'i nyams ldan 'gyur// snang srid ye rgya mthar thug gis// rig pa'i rang gdangs
- 8b
mthong bar 'gyur// e ma sangs rgyas don ldan pa// ye shes rang la 'char bar 'gyur// gzhi yi chos nyid rdzogs gyur nas// lam las 'bras bu thob par 'gyur// de yang ye shes lhun gnas pas// nges pa'i bden pa rab tu mthong // shes pa'i khyad kyis gang nas gsal// don ni gcig las ma g.yos kyang // rang snang dkyil 'khor lhun gyis grub// ye nas rang rig 'od gsal bas// rang snang 'ja' tshon rnam par 'phel// snang ba ye shes skur ldan pas// shes rab ye shes khong nas gsal// de nas snang dang gsal ba dang // rang bzhin kun tu khyab pa'o// gsang ba'i ye shes snang byung pas// 'khor ba'i mun pa rnam par gsal// tshig las shes rab rab gsal bas// 'bras bu'i dkyil 'khor nyag gcig gsal// theg pa gcig la don brjod pas// so so'i bshad gzhung bsam mi khyab// sems can mos pa go 'byed phyir// rang rang 'dod du bstan pa'o// de yang theg chen gsang ba las// yang dag nges pa'i lung bstan pas// a nus man chad theg pa rnams// rtsol sems blo yi chos su bstan// rang gi don la mtha' yas kyang // gzhi la gcig pas med par nges// theg pa theg pa zhes bya ba// gud na yod pa ma yin te// rig pa stobs dang ldan gyur na// theg pa zhes ni de la bya// rig pa stobs dang mi ldan na// sna tshogs theg pa
- 9a
bsam yas 'gyur// ye shes gcig dang du bral bas// gsang ba'i ye shes tshig las 'das// 'dzin pa'i phur pas thams cad bzung // zhe 'dod 'khor ba'i sdug bsngal chos// bsam gyis mi khyab rgya cher snang // yul du snang ba'i chos sku dang // sems can mos pa'i mtshan sku gnyis// mtshan ma'i phyogs su ma lhung na// khyad med gcig tu nga yis bshad// sku gcig sems can kun la snang // sku gcig 'gro don mthar phyin pa'o// sku gcig snang ba kun tu ston// sku gcig mtha' la mi gnas pa'o// rdo rje snying po ye shes sku// bsam gtan snying po'i tshig las 'das// mngon par byang chub sku nyid gsal// ye shes tshig chod gnyis snang bral// rdo rje 'dzin sku don mi 'gyur// mtha' gnyis mi gnas rang sar che// phyag rgya'i rdo rje 'gyur ba med// mi bskyod dkyil 'khor las byung ba'i// yang dag gzhung nyid rab brtan sku// thig le sna tshogs sku yi dbyibs// mtshan ldan dkyil 'khor sku gsum rdzogs// bya ba med pas dbyings dang ldan// gcig las mi g.yo chos kyi sku// gnyis su ma yin rang snang yul// don dam kun rdzob gnyis las 'das// 'dzin pa'i mtha' gnyis rnam par spangs// dkyil 'khor rdo rje yid bzhin gter// mtha' las mi g.yo mnyam pa'i ngang // gol sgrib gnyis kyi rtog pa sangs// byas pas ma byung
- 9b
chos kyi sku// bzung bas mi zin chu zla 'dra// thugs rje'i thabs la rang snang bas// nyi ma dang ni zer bzhin no// shes rab rtsal gyis rab gnas pa// don gyi dkyil 'khor snang mtha' yas// sku yi sems nyid stong bdag med// ye shes phung po skye 'jig bral// bsam gtan chos nyid zhi ba ste// snang ba mtha' yas zhing du sgrol// rang byung sku gnyis rnam par dag/ stong pa nyid kyi dam tshig las// rim pa'i yul du rnams par snang // dper na sems can la la dag/ las la mngon par zhen pa ltar// chos nyid ngo bo ma mthong bas// chos spyod bcu la zhen par 'gyur// gsang ba'i theg pa rtogs mi 'gyur// gsang sngags rang byung theg chen 'di// nyon mongs ye shes gnyis las 'das// stong zhing bdag med yul snang bral// dri ma gsum las rab tu thar// yang dag gsang don rnyed pa'o// e ma ho// bde gshegs sangs rgyas spyod yul ni// dmigs med dkyil 'khor chen po la// dper na bzhin dang me long bzhin// gang rtogs pa la de ltar snang // ye shes rang gsal nyi shar ltar// snang ba'i dkyil 'khor 'od du gsal// shes rab ye shes las byung ba'i// snang ba'i sgron ma 'od 'bar zhing / khyab gad la 'ub chub ting 'dzin ni// gcig bzhin spros dang bsdu ba med// rig pa'i 'khor yug phyogs dang bral// ye shes 'khor yug 'od du
- 10a
gsal// sgron ma'i 'khor yug dmigs pa med// mtha' gnyis sangs byed mun sangs nas// rnam rtog nyid las ye shes gsal// sangs rgyas zhing sbyor 'dren sel zhing // stong pa'i yul las rnam par 'das// tshig dang yi ge ltar snang ste// btags par snang ba thams cad kun// dper na brag cha lta bur bstan// rkyen du snang ba thams cad kun// rang snang tshig las 'das pa'i yul// snang dang mi snang gnyis med kyang // rjes su snang ba gang yang med// dper na nam mkha'i bya lam bzhin// thig le nyag gcig rdzogs pa che// mig gi 'od du rab tu snang // rdo rje'i dkyil 'khor 'od nyid las// sgron ma'i rang 'od nyid du 'gyur// rang byung don gyi snying po nyid// yod de yod pa ma yin pas// dngos po nyid kyis mtha' dang bral// med de med pa ma yin te// til 'bru 'am ni yungs 'bru la// mar nyid ye nas lhun grub bzhin// sems can lus ltar snang ba la// de bzhin gshegs pa'i sa bon ni// mthun pa'i 'od dang rang chas su// gnas nas lam zhugs sgo dag tu// rnam par thon nas don la spyod// nam mkhas gar khyab sems can te// rig pa'i don yang de tsam mo// de yang mtha' yas thug med de// rang gi ngo bo gcig tu gnas// rdzogs sangs rgyas ni rang rig nyid// ngo bo dus gsum 'gyur ba med// rang bzhin rtag tu
- 10b
'gag pa med// thugs rje kun la rab snang ba'o// snang ba kun tu mtha' yas shing // dkyil 'byams rang snang thugs brdol nas// nyon mongs lnga yi dri ma rnams// tha dad nyid las rang rig sku// rgyun du snang bas rang 'byung zhing // gcig tu gsal bas 'pho 'gyur med// rang rang tsit+ta rin chen na// tshon gang 'od 'bar bum pa'i tshul// nang na ye shes me 'od 'bar// gzhal yas ye shes du mar snang // sku yi ngo bo re re las// gsung gi sprul pa grangs med cing // thugs kyi dgongs pa 'da' med cing // bsam pa med pa'i rig snang las// goms pa'i blo ni rab brtan na// snang mdzad chen po'i lta bar 'gyur// snang ba'i ye shes 'od 'bar zhing // mthun 'jug thabs kyi spyod pa las// rang snang yul ni ji snyed pa// rtogs pa'i lta ba de tsam mo// sems can bsam pa de tsam par// 'dul ba'i chos ni de tsam mo// sems can rtog pa ma zad par// theg pa nyid kyang zad mi 'gyur// gsang ba'i theg pa gcig yin kyang // sems can blo la tha dad snang // dper na rin chen gser nyid la// ser po rang bzhin lhun grub ltar// rang rig ye shes ngo bo la// 'od gsal dkyil 'khor lhun gyis grub// ye shes lam la rab gnas shing // chos nyid yul gyi snang ba las// sangs rgyas 'od ni mi 'gyur bas// dang po'i sangs rgyas 'od srung la// 'od snang don
- 11a
nyid rab tu zhus// 'od srung chen pos bka' stsal pa// e ma ho// yangs so che'o chos nyid rnam par dag/ che'o blta ba rmad po che// snang ngo rang snang dkyil 'khor nyid// yul dang yul med rnam par dag/ phyi dang nang med kun tu snang // stong dang mi stong tshig las 'das// 'od ni zug pa med par snang // sku ni gcig gcig tu med pas che/ yang byung bu bden pa che// yul ni stong khyab ye shes snang // lam ni kun snang 'gyur ba med// gsang ba'i lam nas rang byung nas// dngos bral stong pa'i ngang du thim// 'gyur med gcig pa'i ngo bor brtags// rang yul de las ma yengs na// chos can snang ba grangs med kyang // phyogs kyi snang ba gcig mthong na// thams cad skye med ngo bor rtogs// sems kyi 'du 'phro ji snyed pa// thams cad rang snang yin pa las// ma rig sgo nga'i sbubs dag nas// ye shes zon par ma gyur nas// rang snang chos nyid ngo bo bsgribs// sangs rgyas nyid kyi rtogs pa yang // rang snang nyid las ma 'das so// chos nyid yul gyi snang ba yang // 'od zer nyid las ma 'das te// rigs kyi yul las 'od du gsal// rdo rje sems dpa'i 'od nyid las// mthun pa'i phyogs la ltos pa med// sangs rgyas ye shes rang byung ni// lam dang chos nyid dkyil 'khor ldan// gcig las snang ba bsam mi khyab// rgyal ba'i sku
- 11b
nyid 'gag med pas// rgyal ba'i gsung la thug pa med// sku gsung thugs kyi snang ba ni// kun tu mtha' yas thug pa med// grangs dang tshig dang yid las 'das// chos dang chos min blta ba yang // mthun par snang ba tsam du zad// don gyi ye shes lnga ldan ni// yangs pa'i grong khyer rdo rje mtha' yas shing // dkyil 'khor pho brang gnyis la yangs pa'i bdag nyid 'dzin// phyogs dang ris su 'dzin na yang dag lta ba min// nga dang bdag tu 'dzin na yang dag mthong ba min// yin dang min par rtogs na dgongs pa nyid ma rnyed// stong dang gsal bar 'dzin na chos phyir tshig la 'brengs// gsang ba grangs su bgrangs na rig pa'i gnas ma rnyed// chos spyod lam du khyer na bden pa'i tshig ma mthong // mthong snang khyad du gsod na theg pa'i sgo ma mthong // bya byed 'bras bur 'dod na gsang sngags thabs ma rnyed// snang gsang ba'i yang byung/ ba tshig phyir 'brengs na dgongs pa'i lam ma rnyed// yul dang sems su 'dzin na ting 'dzin drod ma thob// 'jig rten chags phyir 'brengs na chos nyid don ma rtogs// 'jig rten bya ba'i chos dang ma bral g.yengs pa na// sangs rgyas dgongs pa rnyed pa nga yis yongs ma bshad// rkyen dang rkyen med snang ba dang // chos kyi sku dang lam nyid las// mthun pa'i phyogs nas phar bltas pas// rang snang gzugs brnyan
- 12a
dkyil 'khor mthong // dri ma'i the tshom nang du chod// sa yi snang ba grangs med kyang // ye shes don la gcig las med// sku dang ye shes phyogs nyid nas// mtshan ma'i yul la phar bltas pas// snang ba'i drod tshad nyams su myong // rkyen snang dag pa'i yul dag nas// dmigs rten yul la phar bltas pas// rang gi gdeng chen khong du chud// phyogs kyi dri ma nyid las kyang // snang ba'i sgron ma rab gsal bas// 'bar ba nyid kyang thugs la shar// sangs rgyas thig le nyag gcig la// yul gyi rtog pa rnam par bsal// dri ma'i skyon las rab tu grol// 'dus pa'i phyogs nas phar bltas pas// gcig mthong bden pa khong du chud// ye shes thabs la mkhas pa yis// phyag rgya 'da' med dam tshig las// 'gyur ba med pa'i lam du chud// gsang ba'i theg pa yul du snang // lam gyi theg pa 'byed 'gyur ba// des ni pha rol sgrol mi nus// thugs rje'i theg pa 'di nyid las// dgongs pa'i don las ma 'das na// sangs rgyas rdo rje rab brtan pas// mi shigs rdo rje nyid du 'gyur// spyod pa'i rdo rje 'gag med pas// tshad med rdo rje ngo mtshar che// yang gsang lta ba'i rdo rje bstan// rtog pa'i rdo rje gzi brjid che// me long rdo rje gsal ba che// sems can thams cad bsgral ba'i phyir// shes rab rnon po'i gri dag gis// ma rig thams
- 12b
cad bsgral bar bya// sangs rgyas zhing khams ma lus par// stong zhing bdag med yangs pa che// gsal 'tsher lhun sdug 'od 'bar ba// gsal 'byams klong yangs thig le'i ngang // gsal la bkod legs dpangs re mtho// sku brjid gsal bar rab tu snang // rtogs pa'i chos nyid mtha' yas shing // sems can las nyid ma zad kyang // gsang ba'i thabs 'di bstan byas na// ye shes rang chas rnyed mthong 'gyur// rdzogs chen man ngag gsang don 'di// yang dag med par snang du med// yang dag yod na snang ba mthong // stong gsum 'jig rten sa steng na// chos nyid lam du rab gnas pa// byang chub nyid las kun 'byung zhing // so so'i gnas nas rab sbags nas// 'dzin pa'i bsam pa don las 'das// don gyi ye shes tshad ma min// snang ba'i dkyil 'khor thig le che// gsang sngags thabs la rab gnas pa// chos nyid yul la rnam par 'phrul// bden pa'i dus na dkyil yangs shing // lam rgyal 'di ni ma bsgrubs bab kyis 'grub// gang zhig rtogs pa'i don 'tshol na// chos nyid rnal ma mthong bar 'gyur// las nyid rdo rjer bstan pas na// gcig gcig gis kyang thugs rje 'byung // ye nas rang bzhin 'od gsal bas// sku gsum rang bzhin snang ba shar// sku lnga ye nas rang dag pas// chos nyid ye nas mtha' dbus med// gsang
- 13a
sngags tshig dang ye bral bas// dgongs pa'i bzhag thabs don la zug/ rnam rtog mtshan ma ye med pas// gsal dang drod dang bsil snang ba'o// rkyen med ye shes rang snang yul la rnam par rol// yang dag gsang sngags tshig gi bden pa nyid// rang gi blo yi snang ba'i the tshom thams cad sel// 'khor ba'i sdug bsngal lam las grol ba'o// zhes nor bu phra bkod chen po'i rgyud las/ thabs kyi 'dul thabs bstan pa'i le'u ste gnyis pa'o// // de nas yang rigs kyi lha mo 'od kyi phreng ba can gyis 'di skad ces gsol to// kye kye bcom ldan rdo rje sems// khams gsum 'khor ba'i sems can la// rigs phye gdams ngag bstan pa'i gnas// nye ba'i 'khor la gsung du gsol// de skad rab tu zhus nas kyang // bde ba'i stan la rab tu 'dug/ 'dzum pa'i gar dang rol mo yis// gtso bo nyid la rab tu mchod// de nas bcom ldan sku nyid kyis// lha mo mdzes pa'i tshogs rnams la// gsang ba'i nges don chos rnams bstan// kye ho rigs kyi sems ma nyon// nga yis gang zag rigs bshad kyis// khyod kyis sdom pa'i dkyil 'khor zung // don gyi snying po ye shes ni// mtha' gnyis la yang mi gnas te// don gcig kun tu ston par 'jug/ dkyil yangs ye shes dkyil 'khor ldan// chos nyid ming las rab snang
- 13b
phyir// 'jig rten blta ba grangs mang yang // don 'di rtogs pa shin tu dka'// gsang sngags nyid las thabs spyod pa// gzhan 'byung chos la ltos pa med// rang snang chos nyid dkyil yangs pas// mthun pa'i yul snang lam du snang // chos dbyings rgyan dang ldan byas nas// gsang sngags lam du yang dag su spyod pa// dmigs med yul gyi snang ba chos sku'i ngang // 'das dang ma 'das tshig gi lam// chos kyi sku ni mtshan ma'i tshig las 'das// dmigs pa'i rkyen las chos spyod kun tu snang // rdo rje dbyangs mkhan ma nyid rab tu chos nyid zhi// kun 'byung snang ba chos nyid gzhi las rol// rtogs dang ma rtogs tshig gi mtha' dpyod pa// 'das pa'i sku ni yul la snang 'byung bas// mtshon byed chos sku'i snang ba las// mtha' yas tshig tu med pa'i don nyid kun tu snang // spyod pa nyid la spyod rgyu ga la yod// gsang ba'i ye shes 'od gsal kun tu snang // chos sku 'gyur med thig le'i klong gnas pas// rtog med bsam gtan nyid la bsam du med// sangs rgyas sku ni kun tu gsal mdzes ldan// ming yang sna tshogs mtshan ma'i yul med cing // chos dang chos min snang ba 'dres shing mtshungs// thugs kyi dkyil 'khor rnam pa kun rtogs pas// sems can kun gyi snang ba dag pa ni// snang dang snang bar byed pa'i yul ma yin// min snang ma yin
- 14a
klu na shAsu tha gas/ nga da s+t+wa dang @ #dang / rna la shA na pas da sa dang thal/ gsang sa ngan 'a 'ang ba'o// rang rang gang dan @/ da nga / 'ad da u
- 14b
'gyur// rtsol bral dgongs pa rang gnas pas// phyi med nang med dbyings su med// ci yang yod pa ma yin te// cir yang grub pa nyid du bstan// gsang ba'i sku nyid kun tu khyab// snang ba med pa'i chos sku ni// yin min gnyis kyi mtha' las 'das// kye ma 'od gsal dkyil 'khor na// bsam med rang snang sku lngar gsal// sku gsum rang bzhin rnam dag pa// sangs rgyas ye shes rgyan bzang bas// sku yi 'od ni ma 'gags kun la rol// gsung gi zer la thug med 'phro// thugs kyis dgongs pa nyag gcig go/ e ma rdo rje 'dzin pa'i sku// bsam yas lhun grub thug med cing // gang zag rnam gsum rdzogs chen snod du gsungs// rigs kyi bye brag bsam gyis mi khyab kyang // chos kyi dbyings la spyod dang mi spyod med// nam mkha'i mtshan nyid ye nas ka dag pas// chos sku nyid la dngos po bsam pa med// phyi dang nang med yangs pa chen po la// yangs pa'i chos nyid mtha' bral dngos po med// rdzogs chen lta ba gsang 'dus dam pa 'di// theg pa'i skabs la grangs mang yang // gsang ba'i nges don gcig las med// chos nyid dkyil 'khor yangs pa na// gnas pa med pa'i sku gsung thugs// stong pa chen po chos kyi sku// 'das pas dmigs su ga la yod// rgyu dang rkyen du med pas na// stong dang mi stong gnyis las 'das// rdo rje
- 15a
sems dpa'i mtshon dpe ni// dri med dkar po zla ba'i mdog/ mun dang snang ba'i mtshams nas brtag/ nor bu 'od gsal dri med pas// snang ba kha dog lnga dang ldan// sku lnga so sor ma rtse bas// mdun dang rgyab tu dbyer mi 'byed// snang gsal chos nyid 'od po che// gsal ba'i chos nyid kun tu 'bar// snang byed sgron ma kun gyi mchog/ stong pa chen po'i mkha' klong du// snang ba thams cad 'od du shar// shar ba de nyid dpog pa med// sus kyang bzung bar nus ma yin// gal te shes rab mi ldan pas// rang snang dri med zla rgyas bzhin// bzhin bzang dkyil 'khor mthong 'gyur te// yengs med rdzogs chen bsgom pa'o// brjod med chos sku bsam 'das nyid// rig pa'i don la skyel mi nus// thabs mkhas chos sku rtog med pas// mkha' la 'ja' tshon mdzes shar ba// rgya mtsho'i gting dkyil rab 'byams zhing // rang snang zhing du 'od gsal mnyam// rdzogs chen rtse la rab sang bas// dma' ba'i rigs la grang med cing // rdzogs chen phyogs su rnam par dag/ gsang sngags thabs mkhas nges rdzogs 'di// rdzogs dang ma rdzogs gnyis las 'das// gcig dang gnyis su bgrang du med// du ma rten dang dngos po bral// dri ma bzhi dang phra rags sangs// stong zhing bdag med mtshan ma med// stong pa'i yul la
- 15b
mi gnas pas// spyod pa'i dus na rang snang zhing // sa dang lam la mi gnas te// don gcig la yang gnas pa min// rdzogs lam byang chub ye gnas pas// thams cad gcig tu rab 'dus te// kun gyis go ba yod pa min// gal te go ba rdzogs srid na// mtha' yas med de don gcig gnas// gsang ba'i gsang sngags gab pa'i gnas// rigs sngags gzungs sngags gtan tshigs rnams// rdzogs pa'i gsang don 'di la 'dus// de yang ngo bo rang gnas pas// bya byed med pas rang sar dag/ 'dzin chags med pas cig char rdzogs// gsal ba ma yin mngon gnas pas// rang rdzogs nyid du rnam par dag pa'o// zhes nor bu phra bkod chen po'i rgyud las// mtshon dpe'i dkyil 'khor gyi le'u ste gsum pa'o// // de nas yang lha mo mnyam pa'i blo gros zhes bya ba des/ 'di skad ces gsol to// kye kye bcom ldan rdo rje sems// yang dag gsang ba'i lung ston cig/ de skad rab tu zhus pa dang // bcom ldan rdo rje sems dpa' yis// nye ba'i 'khor la bka' stsal pa// kye ma nye ba'i 'khor rnams nyon// gsang sngags gtan tshigs grangs mang yang // legs pa'i don ni gcig las med// rang gi rig pa'i gnas lugs ni// mdo nyid 'gag pa ma yin pas// ye gzhi lam gyi/ shes ma bu'i tshul du rab tu gnas// sems dang ye shes
- 16a
dngos po'i don mi rtog/ sems ni bag chags kun gyi rtsa ba ste// sems can kun gyi dri ma dang por bstan// yid ni rlung dang 'dra ste bag chags sdud// sems can kun gyi dri ma gnyis par bshad// dbugs ni chu dang 'dra ste bag chags kun gyi gnas// sems can kun gyi dri ma gsum pa'o// dug lnga me dang 'dra ste snang ba yul la mched// sems can kun gyi dri ma bzhi pa'o// 'gro ba kun la de bzhin rab tu gnas// chos kyi sku nyid dri ma ye dag pas// mtshan ma blo yi dri ma ga la yod// dri med dag pa'i rig pa ye shes sku// rang rig byang chub mtshan ma dngos bral bas// rig pa'i ye shes cir yang ma yin no// snang ba blo yi the tshom rab bsal na// chos nyid dngos bral ting 'dzin thob par gsungs// chos sku rig pa'i ye shes rang snang 'od gsal bas// bya bral snying po dri med chos sku'i don// nyams su blangs na bde chen ye shes 'byung // skye med rang snang chos nyid rang rig ni// tha snyad gcig tu brjod pa ma yin te// rig pa'i dkyil 'khor rnam dag 'od gsal ba'o// e ma rang gsal chos nyid 'od gsal bas// mtha' la mi gnas dbyings la spyod// ci yang ma yin snying po che// 'gyur ba ma yin drang por gnas// stong pa ma yin 'od gsal zhing // gsal ba mtshan ma ka dag pas// dngos por 'dzin pa'i yul
- 16b
las 'das// yod pa ma yin 'dzin chags bral// med pa ma yin snying po gsum// gzhi nas rnam dag 'od re gsal// gsal ba zang thal lhun re sdug/ lta ba rmad byung ngo mtshar che// 'gag med rang shar dang re spro// rdzogs pa kun khyab gsal snang che// dmigs med bsam bral dkyil 'khor che// rdzogs chen don rtogs blo re bde// sangs rgyas nyag gcig thig le che// mtshan ma dngos bral yangs pa che// skye med rang byung sku lnga dag/ chos nyid klong yangs khod re snyoms// thig le stong pa nyams re dga'// rdo rje rgyas 'debs bde ba che// gsang ba'i chos nyid klong re yangs// stong pa'i sku lnga 'od re gsal// bya ba rdzogs pa'i dkyil 'khor che// dmigs med bsam yas lhun grub pa'o// kye ma snying po rdo rje brjod las 'das// stong pa kun snang chos sku ni// tha snyad dri ma rab tu sangs// mthun snang chos sku rang snang zhing // rig pa'i sku la 'gyur med pas// bya ba rdzogs pa'i 'od lnga yang // ye nas lhun khyab chen por snang // 'od lnga'i rang gdangs ma 'gags pas// mtshan mar 'dzin pa'i rnam rtog rgyu// spyod lam thabs mkhas 'dzin chags bral// rdzogs pa'i klong du kun 'dus shar// rtog med gsal ba'i chos sku rdzogs// yang dag chos nyid gcig min pas// sems can rdo la thug pa med// rang byung ye shes stongs pa yangs// chos sku'i ye shes
- 17a
rdzogs sangs rgyas// rdzogs chen sgron ma 'od gsal bas// stong pa nyid kyi lam du 'gyur// sgron ma de nyid mngon rdzogs pas// gsang sngags lam la nye ring med// rang gi tsit+ta'i dkyil 'khor gyi// thig le nyag gcig rang rdzogs pas// ye nas gnas pa'i rdzogs chen don// gsang don rdzogs pa rig pa'i klong // thig le stong pa'i sgron ma dang // rang byung dbyings kyi sgron ma gnyis// stong dang mi stong mtha' las 'das// rtsol ba med par mngon gnas pa'i// snang ba rdzogs phyir rang gnas pa// chos nyid de mi 'bral dbyings nyid las// rig pa'i ye shes sku mnga' ba// rang snang 'od kyi dkyil yangs nas// 'dzin chags bral ba'i rang snang yul// chos kyi bsam pa rab spangs nas// rdzong du rdo rje'i mkhar brtsigs pas// cis kyang mi shigs rdo rje che// rdo rje'i mkhar la skye 'jig med// stong pa dngos po'i yul dang bral// rdzogs pa'i don las mi 'da' zhing // phyogs med rnam par dag pas na// don dam kun rdzob gnyis su med// don ni rang gi rig pa la// rtags ni mngon snang sku dang bcas// snying po don dam 'gyur ba med// gsal 'tsher lhun sdug 'od gsal ba// bde ba chen po'i dngos nyid las// sa bon rdo rje rgyu rkyen bral// rdzogs pa'i don las mi 'da' zhing // thabs mkhas stong pa'i dkyil na gnas// rig
- 17b
pa'i ye shes dngos po yang // sems can kun la rab gnas pas// kun gyis mthong bar dka' ba'i don// nga yis rab tu bshad par bya'o// e ma rig pa'i gnas lugs ni// rang rang tsit+ta'i dkyil na gnas// yab yum gnyis kyi cha 'dzin pa'i// thabs dang shes rab tshul du gnas// yab kyi cha 'dzin thabs kyi sku// yum gyi cha 'dzin shes rab sku// 'od dang 'od zer tshul du gnas// dbyings dang rig pas rab brgyan te// ldum rdzogs thig le chen por gnas// lta ba'i dngos po 'gyur med sku ltar gnas// bsgom pa'i dngos po rtog med 'od gsal gnas// spyod pa'i dngos po stong gsal byar med gnas// 'bras bu'i dngos po gzhi rdzogs ka dag gnas// rang gsal rig pa 'od gsal mnyam pa'i ngang // 'dzin chags bral ba'i rdzogs chen gsang sngags che// de ni gnas lugs gzhi yi bzhugs tshul lo// thig le bzhugs tshul bstan pa 'di lta ste// rtsa rnams nang na thig le sku ltar gnas// che ba'i tshad ni nam mkha'i mtha' dang mnyam// chung ba'i tshad ni rta rnga bcur gshegs tsam// gsal ba'i tshad ni nyi zla'i dkyil 'khor 'dra// de yang gsal 'tsher gzi brjid ldan// 'gro dang 'ong dang gnas pa'o// bya ba byed pa'i 'gro 'ong can// rdzogs pa'i gzhi la rang rdzogs la// lam du thig le mngon par snang // lta ba 'od gsal
- 18a
ngang la rol// sgom pa nyi zla'i zer ltar 'phro// spyod pa rnam dag 'od gsal lo// rang rang dung khang khro bor gnas// yab dang yum du mngon par snang / khro dang khro mo'i tshul 'char zhing // ye shes lnga lnga dag dang ldan// sku yi ye shes re re la// dbu yi ye shes lnga lnga'o// lta ba 'gag med zang thal la// sgom pa rtog med mnyam par gnas// spyod pa 'gag med rol par 'char// 'bras bu dbyings dang rig par ldan// de nas sgo la thon pa'i tshe// dbyings kyi rang bzhin shes rab sku// rig pa'i rang bzhin thabs kyi sku// 'du 'bral med par mngon snang ba'o// ma 'gags 'gag med snying po che// brjid pa'i sku ltar mi gnas te// ngo bo rnam dag ye shes brdal ba nyid// stong pa chen po'i chos nyid yul la rol// gsal ba zang thal chos sku ngo bos stong // stong pa'i dus na rang bzhin ma nges te// sku dang ye shes dkyil 'khor rtog pa med// thabs dang shes rab don la 'gyur ba med// stong pa'i sgron ma bya btsal gnyis dang bral// thugs rje 'byung ba sgron ma nyi zer bzhin// sgron ma'i 'od zer gting la thug pa med// gsang ba'i 'od ni tsit+ta'i nang du gsal// rang bzhin 'od ni nam mkha'i mthongs na gsal// dkyil 'khor rang rdzogs 'od ni de bzhin no// zhes nor bu phra bkod chen po'i rgyud las/ snang ba'i ye shes ngos 'dzin pa'i le'u ste
- 18b
bzhi pa'o// // de nas lha mo dbyangs mkhan ma zhes bya ba des 'di skad ces gsol to// kye kye bcom ldan rdo rje sems// dmigs pa med pa'i phyogs dag nas// chos nyid rang snang don spyod pa// bdag cag rnams la gsung du gsol// de nas bcom ldan rdo rje sems dpa' yis// mos pa'i 'khor la bka' stsal pa// kye ma mos pa'i 'khor rnams nyon// nga yis rang rig chos bstan gyis// khyod kyis rtog med yid kyis nyon// sems kyi sdug bsngal ji snyed pa// bskal pa'i bar du thar pa med// de nyid spang bar bya ba'i phyir// sangs rgyas 'od dpag med pa yis// don dam rig pa'i klong yangs nas// brjod med tshig/ bstan ngo mtshar che// nga yi sku la 'gyur med kyang // nga yi snang ba phyogs bcur snang // nga yi chos nyid rang snang yang // mun pa'i phyogs kyis yongs mi brlag/ sems can snang ba bsam mi khyab// rnam drug ldan pa'i yul dag nas// rkyen lnga rnam par 'phros pa yis// sems kyi grogs ni bzhi dag las// blo yi rnam pa drug tu shar// rnam pa'i yul lnga rab tu bzung // bcu drug gam ni gsum dag gis// dri ma stong kha yas pa'am// yang na stong phrag brgyad cu'o// snang ba'i dri ma gnyis dag las// ngar 'dzin dri ma gnyis su snang // chos kyi dri ma bzhi dag las// rnam pa'i dri ma lngar snang ba'o// mthun pa'i mun pa sum 'gyur ro// snang
- 19a
ba las ni mun pa 'byung // mun las snang ba nyid kyang bstan// blo yi spyod pa drug dag las// rkyen ni dgu 'am brgyad du bstan// dang po 'byung bzhi gcig pa la// de nas rnam pa bzhi dag las// 'dra ba'i gzhi las gol sa gnyis// de nas gsum mam lnga dag byung // mun pa'i chos rnams bsam yas te// stong pa mun pa lnga nyid kyang // nyi zer sprin bsgribs ji bzhin no// dngos po'i mun pa drug rnams ni// dper na mig mdzes rol mo bzhin// de nyid la yang rab tu chags// 'khor ba'i lam ni lnga nyid do// e ma de yang mun pa'i spyod pa rnams// nga yis snang ba 'di bstan pas// thams cad skye med mig dang nye// gol bar snang ba blo yin te// blo yi theg pa bsam mi khyab// snang ba'i ye shes skur 'bar ba// rig pa'i spyod pa ji snyed pa// snang ba rnam pa lnga dag gis// mun pa'i tshogs dag sel bar 'gyur// rdzogs pa'i lta ba rnam drug gis// dri ma'i phyogs dag med par 'gyur// dkyil yangs dbyings ldan rnam gnyis kyis// gol sa rnam gsum sel bar 'gyur// rang byung bzhag thabs rnam gsum gyis// sgrib pa'i phyogs rnams sel bar 'gyur// rtog pa'i rgyal po rnam dgu yis// rkyen lnga'i phyogs rnams sel bar 'gyur// stong gsal lam nyid lnga yis kyang // gsang ba'i mun gsum sel bar
- 19b
'gyur// mun pa'i phyogs nyid thams cad kun// sgron ma 'bar ba gcig gam ni// shes rab dag pa'i sku gcig gis// thams cad ma lus sel bar 'gyur// chos nyid rang gi ngo bo ni// gnas lugs rnam pa gsum la thug/ thugs kyi dgongs pa rtse gcig kyang // byung sa chen po gcig la thug/ don gyi ye shes chen po yang // bskul sa chen po gnyis la thug/ dri med rang snang chos sku yang // shar sa chen po gsum la thug/ 'dzin chags bral ba'i rang gdangs kyang // stong pa chen po'i lam la thug/ rdo rje sems dpa'i gsang don yang // dri ma dag pa gcig la thug/ rang bzhin dag pa'i chos sku yang // chags bral 'bras bu lnga la thug/ dngos las 'das pa'i thig le nyag gcig kyang // chos sku'i gnas sa gsum la thug/ ye nas gnas pa'i rang gsal yang // bcud kyi snying po gsum la thug/ rang rig gsal ba'i sgron ma yang // lta stangs chen po gsum la zug/ gsang ba'i ye shes rnam lnga yang // rdo rje gsang ba'i tshig la zug/ gsang ba'i chos sku chen po yang // chos sku'i snang ba gnyis la zug/ rtags kyi ye shes tshon gang yang // rang byung bstan pa gcig la thug/ sangs rgyas dgongs pa rang gnas de bzhin no// e ma ho// rgyu rkyen bral ba'i skad cig ma// de ma thag tu rang las byung // mtshon pa'i ye shes ngo bo yang // 'byung ba'i
- 20a
rkyen bral rang las byung // brtags pa gnyis kyi chos rnams kun// gzung dang 'dzin pa gnyis med pas// gnyis snang yul du med pas na// bsam 'das ngo bo brjod las 'das// sku yi snang ba ye nas 'gyur med kyang // ye shes thugs la 'khrul rtog ye nas med// gsang sngags thabs kyi ye shes kun yangs pa// thig le nyag gcig dgongs pa brjod las 'das// gsang sngags rgyal po rdo rje a yi bdag/ nang med nang nas rin chen mdzod snang ba// yengs med rgyun gyi dam tshig bsam las 'das// snang mdzad 'phrul gyi me long dkyil 'khor nyid// blta bar 'dod na sgron ma'i snang ba ltos// 'khor lo'i gzhal yas skye dang 'bri med pas// rang gsal thugs kyi rig pa nyid la ltos// rang bzhin chos kyi sku yi snang ba las// gzugs brnyan mtshan ma sku yi cho 'phrul ltos// ston pa rdo rje 'od dpag med pa yis// sangs rgyas kun gyi ye shes gdung bzung bas// skye med 'od gsal snang ba'i rang lus thob// kye ma gsang sngags nyid kyi blta ba'i gnas lugs las// rang bzhin nyid kyi snang ba rang snang ba// sems dpa'i me long 'di bstan pas// ye shes spyan gyis 'gro ba 'dren par 'gyur// sems kyi cho 'phrul bsam 'das brjod med pas// thabs dang shes rab 'du 'bral med pas na// gsang sngags thig le
- 20b
stong dang mi stong med// kye ma sangs rgyas sku ni sna tshogs ma yin pas// ye shes snang ba gcig dang du mar med// che chung yul min shin tu rtogs par dka'// yang dag chen po'i gnas lugs de bzhin no// zhes nor bu phra bkod chen po'i rgyud las/ rang bzhin snang ba'i thugs bstan pa'i le'u ste lnga pa'o// // de nas yang ye shes kyi lha mo gsal ba'i rgyan zhes bya bas 'di skad ces gsol to// kye kye bcom ldan rdo rje sems// rang snang chen po'i lta stangs gsungs// sangs rgyas kun gyi ye shes ni// don dam dang ni kun rdzob bo// spyi dang 'dren pa'i khyad par las// gsang sngags bzhugs tshul gsung du gsol// de nas bcom ldan rdo rje sems// zhi ba'i gdan las langs nas ni// las kyi snang ba'i cho 'phrul bstan// nges pa'i rgyud chen le'u 'di gsungs so// e ma lha mo rgyan ldan nyon// ngas bstan legs par yid la zung // sems kyi snang ba ji snyed pa// las gyi spyod pa chen pos spyad// rnam rtog las ni ji tsam par// rang snang chen po'i klong du bsgom// bsam byed 'du 'phro ji snyed pa// thabs kyi 'dren sgo chen por byung // chos nyid dag pa'i sku nyid kyang // snang mdzes sems kyi me long ltos// e ma dri ma gnyis su snang ba yang / ming tsam don la yod ma yin// nyon mongs yid drug spyod pa bzhi// mngon sum nyid la
- 21a
yod ma yin// sangs rgyas sku ni longs spyod kyang // rang snang nyid la yod ma yin// thig le'i rang 'od rnam lnga yang // rgyun tu snang ba yod ma yin// yan lag drug ltar bshad pa yang // don dam nyid la yod ma yin// sems can 'khrul pa'i snang ba yang // gzhi snang nyid la yod ma yin// thabs kyi gsang ba chen po las// sku ni rab tu skye med pas// rang snang chen por snang ba'o// zhes nor bu phra bkod chen po'i rgyud las/ 'khrul snang zhing khams su sbyar ba'i le'u ste drug pa'o// // de nas yang bcom ldan 'das rdo rje sems dpa' de nyid kyis ting nge 'dzin las langs te/ snang ba chen pos phyogs bcu thams cad kun tu khyab par mdzad do// chos kyi sku'i rol pa bsam gyis mi khyab pa mdzad do// de nas ye shes kyi lha mo dbyangs mkhan mas 'di skad ces gsol to// kye ma yang dag par rdzogs pa'i sangs rgyas bcom ldan 'das/ thugs rje chen po dang ldan pa/ rtsol ba can du grol ba'i gdams ngag ni gang lags/ mi grol ba'i gdams ngag ni gang lags/ sems can rnams gang gis grol bar 'gyur/ bshad du gsol// gsung du gsol// lung bstan du gsol// thabs dam pa bstan du gsol// zhes zhus so// de nas yang bka' stsal pa/ kye ma ye shes kyi lha mo khyod nyon cig/ ngas thabs kyi sgo ma 'gags par bstan
- 21b
gyis/ legs par nyon cig/ yang dag par rdzogs pa'i sangs rgyas la rtsol ba mi mnga' 'o// rig pa'i sku nyid la rtsol ba mi mnga' bas// bya byed dang bcas pa thams cad kyis mi grol bar ngas bstan to// bya btsal 'das pa'i chos rnams kyis grol bar bstan to// yang dag pa'i gdams ngag gis rig pa mtshon par byed pa ni/ chos kyi sku rig pa'i ye shes mtha' gang la yang rag ma lus pa'o// rig pa ston par byed pa'i thabs kun gyi thun mong ma yin pa 'dis yang dag pa'i sku mtshon pa'o// kye ma rigs kyi lha mo// rang gi mig gi de kho na nyid snying po rdo rje'i sku/ lu gu rgyud du bstan pa ni/ mig gi de bzhin nyid sku gsum 'du 'bral med pa'i don rig pa rang gsal gyi dgongs pa/ ma bcos pa'i ye shes mkhas pas blta bar bya'o// rgyang zhags chu'i sgron ma la yang dag pa'i sangs rgyas rig pa lu gu rgyud kyi sku yongs su gsal ba'o// de yang dbyings dang rig pa 'du 'bral med par gnas te/ don gyis ma bsgribs pa rang snang ba'i mig gis de kho na nyid kyi rang bzhin ni de nyid la gzung bar bya'o// de'i tshe rig pa'i snang ba'i ngo bo dang bcas pa de nyid rig pa cog bzhag gi blta ba dran par bya'o// rig pa de nyid rang gi 'dug tshul gyi dngos po de nyid las ma g.yos pas/ de yang de nyid la mig gi zur gyis blta bar bya'o// de nas rang gi
- 22a
dbyings kyi snang ba sku dang bcas pa gsal lo// sangs rgyas thig le nyag gcig gi dgongs pa rang byung gi ye shes kyi ngang las ma g.yos na/ sangs rgyas thams cad kyi sku'i de bzhin nyid mthong bar 'gyur ro// de'i tshe glang po che'i lta stangs kyi dgongs pa la gnas shing / seng ge'i mchongs stangs kyis ngo bo 'bru tshugs su gzung bar bya'o// khyung nam mkha' la ldings pa'i 'gros kyis rjes bcad nas/ sangs rgyas thams cad kyi sku'i ngo bo de bzhin nyid mthong bar 'gyur ro// de'i tshe snang ba ye shes la slong ba'i gdams ngag la gnas par bya'o// de nas yang bcom ldan rdo rje sems dpa' nyid la/ snang ba'i lha mo kun nas 'od zer zhes bya bas// 'di skad ces gsol to// kye bcom ldan 'das yang dag par rdzogs pa'i sangs rgyas kyi dgongs pa la ngo sprad pas chog gam/ ngo sprad pa la dgos pa ci yod/ des grol ba lags sam zhes zhus so// de nas yang bka' stsal pa// kye 'khor gyi lha dang klu dang byang chub sems dpa' rnams nyon cig/ yang dag par rdzogs pa'i sangs rgyas la ngo skad du med do// sprad pa'i yul med do// ngos bzung thams cad dang bral bas ngo sprad pa'i rgyu rkyen dang bral ba'o// ngo sprad pa la dgos pa ni gang yang med par bstan pa'o// rigs kyi bu rig pa'i de bzhin nyid mig gi de kho na nyid cog bzhag gis
- 22b
blta shes na chos thams cad kyi spyi dang rang gi mtshan nyid shes par 'gyur ro// kye ma rigs kyi bu/ nga yongs su mya ngan las 'das pa'i 'og tu dus kyi mtha' ma lnga brgya tha ma'i dus su/ bslu brid byis pa'i ngang tshul can dag gis sangs rgyas kyi dgongs pa dpe la yid ches byed pa'i dus 'byung ste/ de'i tshe nga'i rgyud gsang ba 'di 'byung ba yin no// yang dag pa'i rig pa nyid la dpes mtshon du med do// rang bzhin gyis 'od lnga rang chas su yod pa la gzugs brnyan gyi 'od lnga bstan kyang sangs rgya bar mi 'gyur ro// ma chags pa'i chags pa chen pos ma spyad na/ rtsol ba dang bcas pa'i dpes ma byas pa'i chos nyid rnyed par mi 'gyur ro// rtsol bsgrub thams cad dang bral ba'i cog bzhag gcig gi ngang du bzhag ma shes na/ rtog pa dang bcas pa'i yid kyis yang dag pa'i don rnyed par mi 'gyur ro// de nas yang zhus pa/ kye ma ston pa chen po/ rig pa'i ngo bo thabs gang gis mthong bar 'gyur/ lung bstan du gsol/ snang ba bstan du gsol/ de nas yang bka' stsal pa/ kye ma snang ba ston pa'i lha mo rnams nyon cig/ yang dag pa'i man ngag rtsol bsgrub thams cad dang bral ba ni/ mi snang ba'i snang ba chen po la mkhas par bya'o// rig pa'i sku rnam par dag pa la blta bar bya ste/ sku med pa'i sku'i klong du thams cad 'ub chub par 'gyur ro// sangs
- 23a
rgyas kyi sku gzigs snang thams cad dang bral kyang / rig pa'i sku mngon sum du gsal bas ye shes 'char nub med par bstan par bya'o// rang snang chos nyid kyi snang ba dbyings rnam par dag pa'i sgron ma la gnas par bya ste/ de'i tshe sangs rgyas kyi zhing khams mngon par dga' ba mthong bar 'gyur ro// snang ba chos nyid la byar med pas bya mi dgos/ btsal du med rtsol ba las 'das so// rig pa'i gnas lugs la mkhas pas bstan par bya'o// rig pa'i 'gro sa nyid la phugs gtad do// rig pa'i 'byung sa nyid la gtsun par bya'o// rig pa'i gnas sa la gzer gdab par bya'o// rig pa'i bskyal sa chen po gcig gis la bzla bar bya'o// mthong sa'i sku'i snang ba la bstan pa'i tshig gis gzer gdab par bya'o// rig pa'i rtsal gsum lus la 'byongs par bya'o// snang sa'i 'char lugs gcig gi de bzhin nyid shes na/ chos thams cad kyi de bzhin nyid shes par 'gyur ro// rig pa'i lta stangs chen po gcig gi de bzhin nyid shes na/ chos thams cad kyi de bzhin nyid shes par 'gyur ro// sku'i gnas lugs gcig mthong na/ sku thams cad kyi gnas lugs mthong bar 'gyur ro// ye shes kyi 'char sa gcig gi don shes na/ chos sku'i de bzhin nyid shes par 'gyur ro// rang rig pa'i sku gcig mthong na rig pa'i sku thams
- 23b
cad mthong bar 'gyur ro// rig pa'i sku'i snang ba thams cad rang sar grol zhing / rang sar gnas rang sa las gzhan du ma g.yos pa nyid do// sangs rgyas kyi ye shes kun tu snang zhing / gzhi snang chen po las ma bskyod pa'o// rig pa cog bzhag ni blta ba kun gyi bcud phyung ba'o// de yang mig gi de bzhin nyid kyi 'dug stangs la gnas par bya'o// zhes nor bu phra bkod chen po'i rgyud las/ shin tu gsang ba'i gdams ngag gi le'u ste bdun pa'o// // de nas yang 'khor rnams kyis bcom ldan 'das la 'di skad ces gsal to// kye kye bcom ldan rdo rje 'chang // gsang sngags gsang ba'i gdams ngag 'di// bstan pa'i snod ni gang gang lags// bstan du mi rung gang dag lags// dpa' bo chen pos bka' stsol cig/ de nas rdo rje 'chang chen des// 'di skad rab tu bka' stsal to// kye ma nyon cig lha mo'i rigs// ngas bstan legs par yid la bzung // snang ba'i dkyil 'khor chen po 'di// kun la bstan pa ma yin te// gsang ba thub pa 'ga' la bstan// gsang sngags gsang ba'i gdams pa 'di// bstan pa'i rigs ni 'di lta ste// gsang ba gnyer gtad thub par byed// gsang ba'i don la 'grus pa dang // shes rab blo rtsal che ba dang // dam tshig sdom pa ldan la bstan// de nas khyad par 'khor rnams kyis// rdo rje 'chang la yang zhus
- 24a
pa// kye kye bcom ldan rdo rje 'chang // rdzogs chen man ngag gsang don 'di// rang dgar bstan pa ma yin te// nges pa'i lung rgyal khu byug mchog/ 'di nyid bstan pa'i gang zag rnams// rigs dang spyod lam chen po dang / kha dog mtshan nyid gsung du gsol// de nas bcom ldan rdo rje 'chang // ting nge 'dzin las bzhengs nas ni// khyad par 'khor la bka' stsal pa// kye ma khyad par 'khor tshogs nyon// nga yis bstan gyis legs par nyon// rigs kyi khyad par 'di lta ste// rgyal rigs dang ni bram ze'i rigs// de bzhin rje rigs chen po dang // khyad par chen po'i mi rnams la// gsang sngags nges don bstan par bya// yang na rigs med kha dog brtags// pho mo gnyis ni gang yang rung / kha dog 'di dang ldan pa ni// rdzogs pa chen po'i snod du gsungs// yan lag rags shing kha dog gnag/ so nyid thags bzang dkar la 'grig/ mig rtsa yid tsam dmar ba dang // skra yi mtshan nyid chen po yang // g.yas su 'khyil zhing kham nag mdog/ lus la bkur sti chung ba dang // phyi yi spyod yul tha mal mdog/ tshig rnams shugs 'byung smra ba dang // yang na tshig gi rnam pa kun// gcig gis gang ltar smra ba ltar// skyes bu de yang de ltar smra// rdzogs chen gdams ngag bstan par bya// de rnams gcig la rdzogs pa na// shan pa'i
- 24b
rigs sam smad 'tshong rigs// phyag dar khrod pa'i rigs kyang rung // rigs ngan gang dag su yin kyang // gsang ba'i man ngag bcud 'di gtad// rgyu chung yo byad med pa na// rang gis yo byad sbyar nas kyang // lhag ma med par rab tu sbyin// gsang ba'i bcud gsum man ngag 'di// rigs dang kha dog brtags thabs rnams// nga ni mya ngan 'das 'og tu// gsang ba'i man ngag yang bcud 'di// nges pa'i rgyal po 'di ltar bstan// de rnams ldan pa'i skyes bu la// gong gi gdams ngag bstan par bya'o// zhes nor bu phra bkod chen po'i rgyud gsang ba chen po las/ gsang sngags sbyin pa'i snod bstan pa'i le'u ste brgyad pa'o// // de nas yang 'khor chen po rnams kyis 'di skad ces gsol to// kye kye bcom ldan rdo rje 'chang chen po// yang dag par rdzogs pa'i sangs rgyas kyi dgongs pa'i don ci lta bu lags lung bstan du gsol/ zhes zhus so// de nas yang bka' stsal pa/ e ma ho/ 'dus pa'i 'khor chen po rnams/ yang dag par rdzogs pa'i sangs rgyas kyi blta ba rang byung gi ye shes ni dngos po gang gi yang phyogs su ma lhung bar snang ba'i dus na/ gang ltar yang blta zhing snang ba'o// rang snang gi sku bsam pa las 'das te/ mngon sum gyi yul snang ba ma bkod par snang ba'o// rgyan dam pa ye shes kyi sku 'od dang zer du snang
- 25a
ba'o// de'i tshe sku'i snang ba rgya chen po dag mthong bar 'gyur ro// rig pa'i sku yul med pa las yul ltar snang ba 'byung ste/ de'i tshe rdo rje 'dzin med kyi sku mthong bar 'gyur ro// de nas yang 'dus pa'i 'khor rnams kyis 'di skad ces gsol to// kye kye bcom ldan 'das thugs rje chen po dang ldan pa/ yang dag pa'i blta ba rig pa'i ye shes sku rdo rje'i gnas lugs gsung du gsol/ de nas yang bka' stsal pa/ kye 'dus pa'i 'khor rnams nyon/ yul las 'das pa'i dbyings ngo ma shes na/ rig pa'i gnas stong par 'gyur ro// de yang yul las 'das pa'i dbyings/ 'byung ba las 'das pa'i rang gdangs// mtshon pa las 'das pa'i rang snang ngo // sems las 'das pa'i rig pa ngo ma shes na/ chos thams cad kyi 'bras bu brlag par 'gyur ro// de yang rig pa rang snang gis ye shes tshig las 'das pa/ stong pa kun khyab kyi ye shes snang ba las 'das pa/ rang byung stobs kyi rig pa 'dzin pa las 'das pa'o// rig pa ye shes kyi sku la mtshan ma'i yul med pas// rang snang zhing rang gis don las ma 'das pa'o// kye ma rig pa'i sku la 'gyur byed med kyang / bzung bar dka' ba ni smig rgyu lta bur snang ngo // gsang ba'i gnas na gnas pa'i rig pa ngo bo snying po rdo rje'i lus can mthong ba'i tshe/ sangs rgyas thams cad kyi sku'i snang ba
- 25b
'char te/ mthong ba'i yul rnam par dag na/ dmigs pa can ye shes su 'char ba zhes bya'o// de yang sku'i snang ba nyid du mar med cing du ma dang bral ba'o// zhes nor bu phra bkod chen po'i rgyud las/ rang bzhin kun snang du bstan pa'i le'u ste dgu pa'o// // de nas yang 'dus pa'i 'khor rnams kyis 'di skad ces gsol to// kye kye bcom ldan rdo rje 'chang // rang snang chen po'i lta stangs rnams// mos pa'i 'khor la gsung du gsol// de nas rdo rje 'chang chen des// ting nge 'dzin las langs nas ni// nye ba'i 'khor la bka' stsal pa// kye ma nyon cig rang bzhin lha mo rnams// yang dag nges pa'i lung rgyal 'di// kun gyi spyod yul ma yin te// gsang sngags blta ba'i gnas lugs ni// gcig dang du mar med pa ni// gsang ba'i rig pa rang snang ni// rang rig rgyun gyi blta ba'i sku// thig le nyag gcig brtags dka' bas// gsang sngags ye shes yongs su rdzogs// lta ba'i snang ba cig char bas// gsang ba'i sku las 'od 'byung bas// 'gro ba'i rig pa'i mig gsal bas// dri ma med pa'i dbyings rig ni// 'du 'bral med pa'i ngang du rdzogs// yongs rdzogs sku ni 'od du 'bar// chos kyi sku yi snang ba las// sku gsum snang ba dus gcig rdzogs// rang gsal thabs kyi ye shes sku// rang rig cog bzhag blta ba ni// ma yengs
- 26a
ngang la cir yang gsal// du ma cig char rdzogs pas bde// rang snang thabs kyi rgyan du snang // sku gsung thugs kyi ye shes ni// mtshon byed spros pa med pas na// gnas pa'i dus na sku ltar gnas// 'char ba'i dus na ye shes te// rgyun du snang lugs de bzhin no// de yang snang lugs sku yi dbyibs// gcig dang gnyis su blta ba la// rang rdzogs snang ba chen po ni// bdag gzhan gnyis kyi mtha' 'das nas// rig pa ma dang phrad pa'i rtags// ye shes rgyun gyi dam tshig ni// rtag par snang ba thams cad kun// ma bcos chos kyi dbyings su blta// ka dag dri ma med pa'i rig pa ni// sku las yang dag dbyings su thim// rig pa'i me long blta shes na// chos nyid dbyings snang ma 'gags gsal// rig pa'i sku nyid blta 'dod na// dri ma sangs pa'i nam mkhar ltos// rkyen nyid rang du blta 'dod na// mtha' yas sku yi klong du ltos// 'phro zhing 'du med blta 'dod na// chos kyi dbyings kyi rgyan la ltos// rang bzhin gzugs brnyan blta 'dod na// dri med dbyings rig gnyis la ltos// sku yi 'od zer blta 'dod na// bya byed med pa'i ngang du ltos// de ni rdzogs chen lta stangs so// de nas yang dag nges pa'i lung // 'di nyid don gyis bkrol te gsungs// rang bzhin nyid kyi snang ba las// ngo bo nyid kyi skur shar
- 26b
ba// 'dzin med ngang du rang rig gsal// spros pa med pa'i chos dbyings las// 'dzin chags med pa'i 'od snang bas// blta ba med pa'i lta ba yis// phyogs ris med pa'i ngang du 'ub// rang byung dgongs pa'i bzhag pas ni/ du ma rang grol dang du 'ub// rdzogs pa chen po'i rig pa ni// mgon po dri ma med pa las// mtha' yi mun pa rang rig sangs// chos nyid gsung gi rol pa las// rdul med dri ma rang sar grol// sku ni sna tshogs dag pas na// sku gsung thugs kyi dkyil 'khor rdzogs// don dam bsam yas lhun grub pas// chos kyi sku yi rgyu nyid las// sems can kun gyi rang lus rdzogs// chos nyid gsal ba'i gsal lam las// rig pa'i sku la 'du 'bral med// byed pa'i rgyu ni gnyis ltar snang // snang ba'i rgyu ni gcig las med// dri med dag pa'i sangs rgyas la// rgyu mthun nyid du bya ba min// spros med tshig ni sna tshogs rdzogs// seng ge rtsal rdzogs chen po yi// lta stangs chen por bshad pa'o// zhes nor bu phra bkod chen po'i rgyud gsang ba las/ rdzogs chen lta stangs bstan pa'i le'u ste bcwa pa'o// // de nas yang lha mo rma bya'i mgrin can gyis 'di skad ces gsol to// kye kye ston pa bcom ldan rdo rje 'chang // rang rig gnas lugs gsung du gsol// de skad rab tu zhus pa
- 27a
dang // bcom ldan nyid kyis bka' stsal pa// nyon cig ye shes lha mo khyod// nga yis snang ba'i don bstan gyis// som nyi yid gnyis rab spangs la// ma yengs gus pa'i tshul gyis nyon// gsang sngags kun gyi lta ba ni// byed pa ma yin bya ba med// gsang ba'i ngang du kun rdzogs pas/ rgyun du byed pa yongs kyis med// nang med nang gi dngos po las// phyi nang gnyis ka'i phyi nyid nang // yod med stong pa nyid yin pas// rang bzhin snang ba thad ka las// chos kyi sku ni mun pa sangs// chos kyi sku ni gcig yin pas// bya byed dri ma gnyis las 'das// rig pa'i snang ba rang rdzogs pas// chos kyi me long bzhin snang bas// gsal ba'i 'od ni sna tshogs 'byung // dri ma gsum las rab 'das pas// dper na nam mkha' sprin med bzhin// snang dang mi snang mtha' las 'das// sangs rgyas chos la mi gnas pas// rnam rtog dri ma'i skyon dang bral// sku gsum rang rdzogs chos nyid ni// byed pa ma yin rang sar grol// chos sku dri ma mi gnas pas// 'dzin med thig le rnam par dag/ thig le nyag gcig snang ba la// rtog pa'i yid ni ga la yod// dbyings kyi sgron ma'i brgyan bzang la// chos nyid yul gyis snang ba shar// sna tshogs snang ba bsam mi khyab// kye kye rang snang lha mo nyon// nga yi chos la tshig med pas// stong pa'i phyogs la rab gnas
- 27b
shing // nyi tshe byang chad ma yin pas// dngos por yod pa nyid las 'das// nga la chos dang sems med pas// stong pa nyid du bdag mi blta// 'dzin chags spyod pa'i yul las 'das// sems las sangs rgyas mi 'byung bas// 'khor ba'i rtsa ba nga mi bsgrub// chos kyi sku la yul med pas/ kha dog lnga pos su zhig bya// rig pa'i sku la rang snang bas// ngo sprod nyi shus su zhig grol// rang rig sku la bltar med pas// dri med dag pa chen po'o// zhes nor bu phra bkod chen po'i rgyud las/ snang ba ye shes su snang ba'i le'u ste bcu gcig pa'o// // de nas yang gsang ba'i rigs rdo rje mkha' 'gro mas/ rdo rje 'chang chen po la 'di skad ces gsol to// kye kye bcom ldan rdo rje 'chang // rdzogs pa'i sku ni bsam yas la// gcig tu bsdu ba gsung du gsol// de nas rdo rje 'chang chen des// nye ba'i 'khor la bka' stsal pa// rdo rje rigs kyi mkha' 'gro ma// blta ba gsang ba'i sngags brjod kyis// ma yengs yid kyis gus pas nyon// kye kye rdo rje 'dzin ma'i tshogs// bya ba mi byed byed pa spang // bsgrub pa mi bya sngags kyi tshig mi bzlas// chos la mi spyad dran pa'i rjes su min// yid la mi bya rtog pa rnam spangs te// rang snang gcig las med par gsungs// sna tshogs sku ni bsam yas kyang // ye shes sku gcig bstan pa yis// thams cad rang rig grogs
- 28a
su 'gyur// e ma ho rab tu snang ba'i snang ba yi// sku yi don ni brjod las 'das// mtshan ma'i yul ni ka dag pas// dri ma'i phyogs kyis nga mi bsgrib// nga la skye dang 'chi med pas// dge ba'i phyogs kyis nga mi skyobs// nga la lus sems gnyis med pas// sdig pas nga yi sku mi bsgrib// rang rig ye shes 'od gsal bas// 'khor ba'i mun pas nga mi bsgrib// nga la zhe sdang sems med pas// zhi gnas lhag mthong su zhig 'dod// nga la 'dzin pa'i phyogs med pas// rtog pa'i bsam pas mtha' mi rnyed// ha ha chos med pa la chos nyid byung // yul med pa la yul ltar snang // chos min shes rab 'khor gsal bas// dran byed yul du med pa'o// e ma ho// chos las 'das pa'i sku ma shes na/ rig pa lu gu rgyud kyi sku la ltos shig/ chos thams cad kyi ye shes ngo shes par 'dod na/ yid rang byung gi ye shes la dris shig/ sangs rgyas thams cad kyi sku'i snang ba blta bar 'dod na/ rig pa mi 'byed pa'i sku ngos zung zhig/ chos nyid yul gyi snang ba la gtan tshigs kyi gzer thebs par 'dod na// ye shes mkha' gsal gyi snang ba la ltos shig/ de bzhin du sku'i snang ba la rtag tu ltos shig/ ces nor bu phra bkod chen po'i rgyud las/ chos las sangs rgyas mi 'byung ba'i le'u ste bcu gnyis pa'o// // de nas yang rin chen
- 28b
rigs kyi mkha' 'gro mas 'di skad ces gsol to// kye kye bcom ldan rdo rje 'chang chen po/ rig pa'i sku dang mtshan nyid ji lta bu gsung du gsol// de nas yang bka' stsal pa/ kye rin chen rigs kyi mkha' 'gro ma 'khor bye ba dang bcas pa nyon cig/ yang dag pa'i rig pa spyan lnga'i de bzhin nyid thob par 'dod na/ rig pa rdo rje lu gu rgyud kyi sku la ltos shig/ de yang rig pa'i sku de mngon sum du snang zhing / mngon sum la rab tu gnas pas/ sha'i spyan gyis mngon sum du mthong byed ma 'gags so// de'i don las phyi nang gi dngos po thams cad rtogs pa ni/ shes rab kyi spyan thob pa'o// de la phyi nang gi chos rdzogs shing shar ba ni// chos kyi spyan gyis thams cad sdud par shes pa'o// de'i don ma 'gags pas chos thams cad kyi de bzhin nyid shes pa ni/ thams cad mkhyen pa'i spyan gyis thams cad mkhyen cing thams cad gzigs pa'o// de la yang mi gnas par rig pa'i sku de nyid las gzhan du ma yengs pa ni/ rnam par grol ba'i ye shes mthong ba'i spyan rnam par dag pa'o// de'i phyir na spyan lnga'i de bzhin nyid rig pa rdo rje lu gu rgyud kyi sku la thug pa'o// skye shi med par srog 'dzin par 'dod na/ rdo rje lu gu rgyud kyi lta stangs la thug go/ 'gag pa med par rang sar grol bar 'dod na/ lu gu rgyud kyi snang ba la thug go/ dmigs pa med par mtshan
- 29a
ma'i chos zil gyis gnan par 'dod na/ lu gu rgyud kyi ye shes la ltos shig/ du ma med par gcig la blta bar 'dod na/ lu gu rgyud kyi snang ba la ltos shig/ dran pa med par chos kyi sku la blta bar 'dod na/ lu gu rgyud dngos la ltos shig/ phyi nang gi chos thams cad shes par 'dod na/ lu gu rgyud kyi rlung rgyu ba la ltos shig gnas pa med pa'i sku la blta bar 'dod na/ rdo rje lu gu rgyud kyi snang ba la ltos shig/ mtshan ma'i chos nyid rang snang du blta bar 'dod na/ chos nyid lu gu rgyud kyi sku la ltos shig/ gsang sngags thams cad kyi thugs la blta bar 'dod na/ rdo rje lu gu rgyud kyi sku la ltos shig/ sangs rgyas thams cad kyi dgongs pa thugs su chud par 'dod na/ rdo rje lu gu rgyud kyi sku dang ma bral bar gyis shig/ chos thamasas cad kyi mdo dang rgyas pa shes par 'dod na/ rdo rje lu gu rgyud kyi sku 'dug tshul la ltos shig/ gsang ba'i ye shes thams cad la mkhas par 'dod na// rdo rje lu gu rgyud kyi zer la ltos shig/ lta ba dang spyod pa dang / sgom pa gsum 'du 'bral med par 'dod na/ rdo rje lu gu rgyud kyi sgra las ma yengs shig chos thams cad kyi gzhal yas khang 'dzin par 'dod na/ dbyings dang rig pa'i don khong du chug cig/ rdo rje sems dpa'i gdung 'dzin par 'dod na/ rig pa rdo rje lu gu rgyud dang ma bral bar gyis
- 29b
shig/ snang ba thams cad 'od du gsal bar 'dod na/ rdo rje lu gu rgyud kyi ye shes la mkhas par gyis shig/ kye ma yang dag par rdzogs pa'i sangs rgyas thams cad kyi mnga' bdag kyang / rdo rje lu gu rgyud la zug go/ rang byung gi ye shes thams cad kyi de bzhin nyid kyi snang ba'i 'gro sa ni/ rdo rje lu gu rgyud dang nam mkha' rnam par dag pa la thug go/ zhes nor bu phra bkod chen po'i rgyud las/ sku thams cad kyi 'dus pas bstan pa'i le'u ste bcu gsum pa'o// // de nas yang pad+ma'i rigs kyi mkha' 'gro ma rnams kyis 'di skad ces gsol to// kye kye bcom ldan rdo rje 'chang // gsang sngags kun gyi gnas pa'i sa// mos pa'i 'khor la snang bar mdzod// de nas rdo rje 'chang ba yis// nye ba'i 'khor la bka' stsal pa// kye ma nyon cig pad+ma'i rigs// nga yis don chen rab bstan gyis// khyed kyis nges pa'i yid kyis zung // gsang sngags kun gyi gnas tshul ni// rin chen zur brgyad gzhal yas dang // 'gyu byed rtsa yi gzhal yas dang // dung khang b+han d+ha'i gzhal yas dang // lta byed mig gi gzhal yas so// gzhal yas chen po de bzhin/ gsang sngags kun gyi gsang chen gnas// rang rig sku la g.yo ba med// sgo nas lam du rab byung nas// mkha' mnyam stong pa'i ngang du thim// don gyis ye shes cir snang yang // ngang du rdzogs shing
- 30a
ngang las byung // gnas tshul chen po de nyid la// blta ba'i don nyid lu gu rgyud// chos can snang ba grangs med kyang // chos nyid don la gcig las med// e ma blta ba rgyun gyi rnal 'byor gyis// de yi don la 'gyur med blta// de yang lu gu rgyud kyi sku// mngon du snang zhing bzung bar dka'// rig pa'i ngo bo de nyid la// 'gag med zang thal gnas pa'i dpe// dper na rgya mtsho dngas pa la// gza' dang skar ma gsal ba bzhin// bag la nyal ba'i dus med par// sna tshogs zang thal chen por gnas// blta ba rgyun gyi rnal 'byor gyis// de yi don la ma yengs na// bag la nyal dang ma nyal med// nyin mo snang dang mtshan mo nub// gnyis su snang ba yod ma yin// spyod pa rgyun gyi rnal 'byor gyis// lu gu rgyud kyi ngo bo dang // dus bzhi nyid du ma bral na// spyod pa rgyun gyi rnal 'byor yin// rang rig bsgom pa'i rgyun med kyang // bsgom pa rgyun gyi rnal 'byor 'byung // dus dang dus med thams cad du// lu gu rgyud dang ma bral na// bsgom pa rgyun gyi rnal 'byor yin// de ni rang rig 'khyer sor bstan// e ma ho// blta ba rgyun gyi rnal 'byor la// gol sa rnam pa gsum yod ste// stong pa nyid la bltas pa na// gzugs med skye mched mu bzhir gol// dngos po nyid du bltas pa na// gzugs khams gnas rigs bcu
- 30b
bdun dang // bems po nyid du gol bar 'gyur// lu gu rgyud kyi snang ba la// rtag pa nyid du rab bltas na// chags pa chen pos bcings gyur nas// 'gro drug gnas su gol bar 'gyur// spyod pa rgyun gyi rnal 'byor la// gol sa rnam pa gsum yod de// 'di ltar snang ba thams cad la// smyon pa lta bur spyad byas na// lha// nam mkha' lta bur mtha' yas gol/ yang byung ma yin du gol bar 'gyur// don med tshig rengs spyad byas na/ 'jig tshogs blta bar gol bar 'gyur// tshogs drug yul snang thams cad la// bu chung lta bur sprad byas na// lung ma bstan pa'i gnas su go la// bsgom pa rgyun gyi rnal 'byor la// gol sa rnam pa gsum yod de// btang snyoms bdag med bsgom byas na// stong ltengs nas kyang pa'i mun snang nyid du gol// ting 'dzin yig 'bru bsgom byas na// chags nas 'khor ba'i gnas su gol// mi rtog stong par bsgom byas na// chad pa mu med nyid du gol// gol ba'i rgyu ni bsam yas kyang // gol sa chen po de las med// lu gu rgyud la gol sa med// lam pa'i rgyud las gol par snang // don la gol sa gcig kyang med// rgyu dang 'bras bur btags pa yang // gol sa bcad phyir gsungs pa'o// zhes nor bu phra bkod chen po'i rgyud las/ rnal 'byor rgyun du byed pa'i le'u ste bcu bzhi pa'o// // bcom ldan 'das kyis de skad ces
- 31a
bka' stsal pa dang / rigs kyi lha mo la sogs pa'i 'khor thams cad yi rang ste mngon par bstod do// nor bu phra bkod chen po'i rgyud gsang ba zhes bya ba rdzogs so// sngags kyi srung mas srungs shig/ nor bu phra bkod rgyud la 'grel pa rin chen bkod pa zhes bya yod do// nor bu phra bkod nyid la ma bu bdun// / @#// rgya gar skad du/ tan+ta gar+b+ha tsit+ta sh+le Sha Na/ bod skad du/ rgud kyi khog snying sdeb pa// rdo rje gsal stong che la phyag 'tshal lo// lung dang rigs pa rgyud don gsal phyes nas// man ngag nges pa'i don 'di bstan par gyis/ 'di dag rnams kyi don snying phyung don sdeb// gang zag gcig gi rgyud la goms par bya/ kye ma rigs kyi bu rnams kyi 'di ltar goms shing bsten par gyis// 'di dag rnams theg pa chen po'i rigs la gnas shing / theg pa chen po'i gzhan don mthar phyin par byas nas/ de nas gsang ba'i man ngag la 'jug par byas nas/ sgra thal 'gyur gyi rgyud kyi don gyi man ngag gis sprul pa'i sku bsgrubs te/ gzhan don rdzogs par byas nas/ rang gi dgongs pa la gnas par bya dang mi bya dang / rtags bkod pa yi ge'i don gyi sgra grag stong dbyer med du shes par byas nas/ 'gro ba rigs drug gi rang sgras pha rol don bya dang mi bya dang / mngon par shes pa rgyud la smin par byas/ de la