rDzogs chen - Man ngag sde/sPyi ti'i skorAll versions of this work

bdud rtsi bcud thigs sgron ma rtsegs pa'i rgyud

Amritarasameladalakunratantra

Text

ff. 95a–110a · 31 folio sides

  1. 95a

    @gus ldan bsrung ba drang la bstan// de lta bu la rgyud 'di gtad// dper na seng ge'i 'o ma yang // rin chen gser gzor blugs pa las// snod ngan phal du blugs 'gyur kyang // snod kyang 'chag la bcud kyang 'bo// de bzhin thig le bcud spungs kyang // snong ngan rnams la gtad gyur na// chos kyang ma chong bka' chang 'ong // ces gsung so// thig le ye shes bcud spungs sgron ma 'od 'bar ba'i rgyud las// rgyud 'di gtang ba'i gnas bstan pa'i le'u ste bcu bdun pa'o// // thig le ye shes bcud spungs sgron ma 'bar ba'i rgyud rdzogaso// // skyon slob dpon pad+ma 'byung gnas dang / lo tsha ba kra ba dpal rtsegs kyis bsgyur nas/ rgyal po khri song lde btsan la gdams pa/ gter rgya/ sbas rgya/ gtang rgya/ oM// bdud rtsi bcud thig sgron ma brtsegs pa'i rgyud bzhugs// rgya gar skad du/ a mri ta ra sa me la da la kun rA tan tra/ bod skad du/ bdud rtsi bcud thigs sgron ma rdzogs pa'i rgyud// thog ma'i sangs rgyas 'od mi 'gyur ba la phyag 'tshalo// 'di skad bdag gis thos pa dus gcig na// rin po che ye gnas klong // chos nyid kyi dbyings/ 'od gsal gyis mkha'// rang byung gis gnas// kun gzhi'i phro brang // 'od gsal rnam dag/ bsam gyis mi khyab pa'i dkyil 'khor bsgrib pa med pa rang bzhin gyis 'od gsal ba// rgya gar yang ma chad pa/ phyogs gang du yang ma lhung ba// mtha' gar yang ma rig pa// rin po che rnam dag 'od gsal// dang dngas rang gsal gyis lha khang na//

  2. 95b

    dam pa rang bzhin dang po'i sangs rgyas// dbyer med sngon thogs ma'i sangs rgyas// rang bzhin kun tu bzang po bzhug so// de'i tshe sman pa chen po'i 'khor yang 'di lta ste// rang rtsal 'od gsal gyis 'khor dang / rang dngas rnam dag gis 'khor dang // rang dngas rang gsal gyis 'khor dang // rang byung rang brlag dbyer med pa'i 'khor ro// gzhan yang rtsal snang zer gyis 'khor dang // 'od gsal kun khyab kyis 'khor dang // yan lag bu'i 'khor dang // mtshan nyid rig pa'i 'khor dang // 'gyur pa yid kyis 'khor dang // rang sangs rnam dag rang bzhin rtogs pa'i 'khor ro// 'khor phun sum tshogs pa'o// 'das dang ma 'dod da ltar gyis// dus gsum gcig ste khyad par med// dus gsum phun sum tshogs pa'o// bstan pa'i rgyal po dgu rtse blo 'das gsungs// bstan pa phun sum tshogs pa'o// de'i tshe 'khor gyi nang nas/ dang dngas khye'u chung bstan las langs ste// phyag 'tshal nas gus pas 'di skad zhuso// bshad med byar med blo 'das don/ bsgrub tu med pa'i chos cig zhu// ces zhus pa dang // de nas dam pa dang po'i sangs rgyas de// rang bzhin yongs rdzogs dbyer meng blo 'das spos bral mtshon med kyis ting 'dzin gyi sa las bzhug so// de las gzhengs nas 'khor la 'di skad gsungs// byar med blo 'das chos gcig dgos// 'khor rnams ma yengs gus pas nyon// snying po'i rang bzhin skye 'gag gnyis med kyis// rang byung rtsal gyis dang dngas bu la bshad// chos nyid bcod 'dus mtshon du med pa la// bdud rtsi'i man ngag sgron ma brtsegs pas bshang// bshad pa'i chos ni tha snyad

  3. 96a

    yin mtshon du med pa'i chos cig bshad // byas pa'i chos ni 'dus byas yin// ma byas rang byung chos cig bshad// bya rtsal chos ni brtsol bsgrub yin// byur med brtsol bsgrub chos gcig dgos// blo thag chod la thar thugs med// blo 'das mthar thugs chos cig bshad// bsgrub pa'i chos ni re dogs yid smon yin// ye yin rang sar gnas pa'i chos cig dgos// zad zar zad la thug pas thug par bshad // gcig shes kun 'gro la chos cig nga yis bshad// brda' cig brda' kun khrol ba'i chos gcig bshad// gnad cig kun shes pa'i chos cig bshad// blo bzang thog pa/ sar bslab chos gcig bshad// bya bral ye bzhag snying po'i chos gcig bshad// ces gsungaso// bdud rtsi bcud bsdud sgron ma brtsegs pa'i rgyud las// phun sum tshogs pa dang gleng bzhi'i le'u ste dang po'o/ de nas dang dngas khye chung gis// ye thog sangs rgyas la zhus pa// dngos po bshad gyis 'dug tshul ji ltar lags// 'dug tshul ma rtog 'gro drug ji ltar lags// rtogs nas 'bras bu ji ltar thob par 'gyur/ thob nas mi 'gyur brtan pa ji ltar thob// 'og ma rnams la skyon ni ci zhig mchis// rim pa dgu las spyi ti gang gis spags// ma bskur dbang dang phyogs bral dkyil 'khor gang // 'phrin las spyan drangs lha tshogs mchod bstod gang // dngos grub dam tshig smon lam ji ltar lags// thams cad ma 'dres yongasu ji ltar rdzogs// ma byas rang 'byung byar med bshad med gang // mtshon med blo 'das theg pa

  4. 96b

    ji ltar gsungs// gcig shes kun grol chos gcig ji ltar lags// gnang cig shes pas gnad kun ji ltar khrol// gcig brda' kun brda' ji ltar shes par bya// bdag cag rnams la zab par bka' stsol cig/ ces gsung so// sgron ma brtsegs pa'i rgyud las/ 'khor gyi gleng bslang ba'i le'u ste gnyis pa'o// / de nas dang dngas khya chung gis/ dam pa dang po'i sangs rgyas la// dngos po gshis kyis gnas lugs gang // ces zhus pa dang / de nas dam pa dang po'i sangs rgyas la/ sna tshogs klong 'od gsal ba'i ting 'dzin la snyoms par bzhugaso// de nas bzhengs nas bka' stsal pa/ 'khor nas dang dngas khye'u chung nyon// dngos po gshis kyi 'dug tshul de/ mtshon brjod tshigs mtshon 'phebs kyang // dpal gyis mgur gyi sgron ma yin// 'khor rnams kun la gsal bar bshad// gnas lugs gshis kyi 'dug tshul ni// mtshon byed tshig gis mtshon las 'das// skye 'gaganyis med tha snyad grol// sangs med rgyas med sku ngos med// byang chub sems med rigs lnga med// bde sdug 'khor dang myang 'das med// rig 'gyur sems med dran rtogs med// nga gzhan phyogs med dgra gnyen med// yul sems bzang ngan spong len med// yin med dbye gsal phyogs mtshams med// shes 'khrul sgo gnyis rang bzhin med// gzhi yi rang bzhin yod mang mnyam// tshogs brgyad yul du ma gyur pa// rgya chang phyogs lhung kun las grol// gnyis 'dzin 'khor 'ongs ka nas dag/ 'khor 'das phyogs med

  5. 97a

    lhun gyis grub// gang yang ma 'gags 'di yin med// thog ma rgyu yin ma bskyod bas// mtha' bral dbyings kyi na mkha' 'dra// bar du rdzas med 'dus ma byas// nyi ma 'od 'phro 'ong zer 'dra// tha mar rkyen gyis 'jigs bral med// gnyis med mkha' ltar mnyam nyid gnyis// ngo bo stong pas btsal dang bral// 'di zhes gcig kyang bstan du med// ma bsgrib mtshon med gsal dag dang / rtogs med kun 'byung zad mi shes// gang yang phyogs med mtha' bzhi grol// yul snang bag dag sangs rgyas nyid// 'gyur med drang por rgyun par grol/ bcos med blo 'das ngo bo nyid// bslad phra mi bsgribs yang dag/ thams cad gzhi 'dzin byang chub sems// gzhan nas ma bci la ka nas dag/ gang yang ma bsgrub phyogs ris med// dgag bsgrubs cig 'dzin rgya chad med// 'khor 'das la sogs gnyis dbyer med// brtson 'grus lam gyis bcos dang bral// lta byed ming dang rang sangs rgyas// gnyis 'dzin blo btags grub mtha' stong // bsgom byed go yi rtsol ye grol bas// 'byung 'jug btang bzhag dbyings dngas// skyon yon spyod byed ming med pas// gnyis 'dzin blang dor las rnams zin// dge sdig mtshan ma'i chos 'das pas// dam tshigadon pa'i dgag bsgrub sangs// ka dag ye shes snang med pas// dngos med yul gyi bsgrib byeng sangs// chos nyid rnal ma yul med pas// stong nyid ngang las gnas sa stor// gnyis 'dzin mtshan ma dngos dag pas// gzung 'dzin dbye gsal chos las 'das// shes med rnal ma

  6. 97b

    tings pas// mdo rgyud chos rnams klong du sangs// mdor na gnyis 'dzin chos rnams kun// phyogasu lhung dang ma lhung dang // de ltar gnyis dang gnyis med kyis// mun 'da'i tshogs las bstan grol bas// ya grol chos las 'das pa las// rgya chad med pa'i ngo bo gnas// sa gser bang mdzod rgya mtsho bzhin// dngos po gshis kyis mthun pa'o// ces gsungaso// sgron ma rtsegs pa'i rgyud las// dngos po gshis kyi 'dug tshul bstan pa'i le'u ste gsum pa'o// / de nas dang dngas khye chung gis// ye thog rang bzhin kun bzang la// 'dug tshul ma rtogs ji ltar 'khrul// ces zhus pa dang / ston pas 'khor la bka' stsal pa/ gnas lugs ma rtogs 'khor bar bshad/ 'khor rnams ma yangs gus par nyon// mkha' klong rnam drag pho brang na// gzhi yi rang bzhin mnyam pa'i ngang // de nas kun 'byung mdzod po che// thog mar ye shes 'char sgo ni// mkha' las 'byung ba'i cho 'phrul ltar// dbyings nas rang byung dbyings la gnas// na mkha'i ngang las stong nyid dran// mtshungs med rgya chen zab don bsgrogs// brgyad khri bzhi stong la sogs pa// tshig tu brjod pa ma lus pa// dbyings las grags stong dbyingasu dngas// tshig brjod pa'i mtha' las 'das// brjod dang ma brjod gnyis ka dang // gnyis med 'dzin pa'i rgya ma chad// khams gsum la sogs ma lus pa'i// mtshan ma'i lus las rnam grol bas// snang stong gzung 'dzin phyogs ma chad// phyi grol nang ngag 'dzin pa brlab// lus dang sku yi mun mtha' sangs//

  7. 98a

    @#snang dang stong pa gnyis ka dang // gnyis med 'dzin pa'i rgyar ma chad// 'khor 'das bdag gzhan la sogs pa'i// gnyis 'dzin rtogs pa ma lus kun// dbyer med shes rab yis// med/ rgyu rkyen med par rang 'bar bas// spangs thob dgag sgrub kun las 'das// rnam rtog chos nyid gnyis ka dag/ gnyis med 'dzin pa'i rgyar ma chad // de ltar gcig gis gcig bkrol bas// mun mtha' ma lus rang sar grol// grol dang ma grol gnyis las 'das// dam pa dang por ya sangs rgyas// ngo bo rang bzhin thugs rje las// ka dag lhun grub kun khyab gsum// dang por sku gsum mchog gis// gsal dag ye shes 'char sgo yin// 'dug tshul ma rtogs 'khrul pa yang // gzhi'i rtsal la zer g.yos pas// mkha' la 'ja' ltar yal du chad// rang bzhin ngo bo ma theg pas// 'odi las zer shar shes par rig/ ye don ma shes gnyis 'dzin zhugs// gnas lugs ma rtogs sam zin// rig pas snying po ma gtog rgyu// rig pa yid dang sems gsum las// rang sa ma zin 'khor lo gsum// 'gyu ba rlung gi rgyu byas pas// bsgrib g.yogs mun pas bar bcad te// 'bras bu min par 'khor sgor chud// sna tshogs gzugs can sems can rnams// gcig 'dzin 'gyur ba'i yid las skyes// sna tshogs rnam ri gzugs don can// dngos po'i don rnams kun la chags// seMn kun gyis yid 'gyogs pas// khams gsum can gyi yid la 'jug/ phung po lnga po kun la rtogs// srid pa'i dra bar 'thun pa yis// ma rig sgo lnga'i sbubasu chud

  8. 98b

    gnyis 'dzin gzugs brnyan ma lus 'chang // dngos po kun la gzung 'dzin pas// srid rtsa'i yan lag bcu gnyis ston// rnam shes tshogs brgyad chags sdang bas// nyon mongs nye ba'i nyon mongs 'khrug khams gsum 'khor ba'i gnasu khyams// ma bsgrub bzhin du 'khrul snang ba'i// sdug bsngal brgyad khri bzhi stong myongs// ces gsung so// bdud rtsi bcud sdud sgron ma brtsegs pa'i rgyud las// gnas lugs ma rtogs 'khrul pa bstan pa'i le'u ste bzhi pa'o// / de nas dang dngas khye'u chung gis// kun bzang nyid la 'di skad zhus// 'dug tshul ma rtogs 'khrul pa de'i// 'khrul bzhi bcad nas ji ltar gcad// ces zhus pa dang / ston pas 'khor la bka' stsal pa// dngos po gshis kyis gnas lugs la// 'khrul dang ma 'khrul ming med/ gnyis 'dzin blo la 'khrul pa 'byung // ma rtogs rigs drug 'khrul bcad pa// rab 'bring tha ma gsum du bshad// skal ldan rab kyis yang rab na// 'khrul pa rtsad bcod mi dgos te// 'khrul par shes pas snang ba ldog/ ka dag rnal ma zang ka la// sgro skur chos rnams gA la yod// sems nyid mu med ting yangs 'di// shes shing rig pa'i yul las 'das// sus kyang sgra bsam bstan du med// re shig tsam du mtshon pa ni// rgyal zo'i pho brang me yi bsreg/ gling bzhi'i grong khyer dam gis gzhom// sems can kun srog dus gcig cad // ri bo chen po khyur ming bya// gsal ba'i nyi zla go su gyon// 'bang col chos sku chu la 'a'o//

  9. 99a

    phyi nang grub mtha' kun gos bzlog/ sku gsum 'bras bu dur du bskyal// rgya chang chos sku mtha' las grol// pho brang phyi nang gsang ba gsum// phyi ltar yul gyi snang ba 'di// gnyis 'dzin rgyal po'i pho brang ste// mtshan ma rang grol me yis bsreg/ bzung 'dzin dbyer med ye nas grol// nang ltar zag bcas phung po bde// rang sems rgyal po'i pho brang ste// dngos mang zang ka ma yis bsreg/ lus sems dngos med gdod nas dag/ gsang bar rtsal gyis 'khor lo gsum// 'gyur pa rgyal po'i pho brang ste// 'gyur med blo las me yis bsreg/ brtags chags zhen gsum ming yang med// gling bzhi'i grong khyer la yang gsum// phyi yi grong khyer 'byung ba 'dra// dmyal ba'i gnas sogs rigs drug gnas// rang snang rang dag dmag gis gzhom// gdod nas rnam dag chos kyi dbyings// nang gis grong khyer 'gro drug lus// gsum dang brgyud sogs sdug bsngal rnams// sgra med bde chen dmag gis gzhom// ye nas sbyangs med ye shes klong // gsang ba'i grong khyer 'khor lo gsum// brtags chad zhes gsum grub mtha' rnams// mu med chos 'das dmag gis gzhom// gsang brjod rtogs tshogs mtha' las grol// kun srog dus gcig bcad la gsum// phyi yi tshogs drug ngar 'dzin yul// rang sangs dbyer med rab rtogs pas// gzhan min ngas rtogs nga rgyal te// bdag med phyogs bral mtshon gyis mchod// nang gi ngar 'dzin sems yid rig/ 'gyur med dang thims

  10. 99b

    don bsgoms pas// gzhan ming ngas sgoms nga rgyal te// bsam 'das ris med mtshon gyis bcad// gsang ba'i ngar 'dzin rang gnas don// ye yin re med dang grol bas// gzhan min nges thob rang rgyal med chos zad mu med mtshon gyis bcad// ri'u khyur mig bya lnga gsum// ji ltar ri bo snod 'jig rten// mi 'gyur rtag lha'i mngon zhen te// mtha' med na mkha'i klong du med// rtag lta'i mngon zhen rang sar dag/ nang ltar ri bo 'jig tshogs lta// ma rtog log lha'i bden 'dzin de// gnas lugs ka dag klong du med// log lta ming meng rang ngor bstor// gsang bar ri bo chos nyid don// lhun grub ka dag des med 'dzin// mtha' bzhi rgyal grol klong du med// bla ma'i chos dgu rtser phyin// nyi zla gosu gon pa gsum/ phyi'i nyi zla bstan pa ni// snang gsal 'od kyi dkyil 'khor du// sems nyid gsal gdangs nyi zla shar// bdag bsgrub ris med gosu gon// nang gi nyi zla bstan pa ni// 'gag med rang rtsa la bdakyor du// mu med dang dngas nyi zla shar// blang ngor 'dzin med gosu gon// gsang ba'i nyi zla bstan pa ni// snying po ka dag dkyil 'khor du// bla med spyi ti nyi zla shar// phyogs lhung mang par gosu gon// 'bad brtsol chos kun chu bo pa// phyi yis yul las 'bang brtsol yin// rgyu yis theg pa'i sgor zhugs nas// sa lam sbyangs bsgong byed pa ni// bsgong med rnam grol dbyingasu 'a'o// nang ltar lus ngag yid rtsol ni// gsang sngags theg pa'i dkyil 'khor dang // lha spyod dbang ngam bsnyen bsgrub sogs// ye yin sgrub med klong du'a'o// gsang ba sems la 'bad rtsol ni

  11. 100a

    blo byas lta sgoms spyod 'bras ste// ming med chos 'das ngang du 'pho// phyi nang grub mtha' go ma bzlog/ gang yang bzang ngan byed med pas// bla med dkon mchog gsum po skur// dge sdig gang yang ma spyad pas// chos spyod dge sbyong ma lus rdzogs// 'jug sgo gar yang ma zhugs pas// dbang rnams ma lus dus gcig thob// mtshon pa ci yang ma brjod pas// grub mtha'i thos pa ma lus rdzogs// bya ba gang yang ma byas pas// 'khor 'das bya ba tha~Md rdzogs// tshogs brgyad cir yang ma bsam pas// spros pa ma lus dbyingasu chod// 'khor ba gar yang ma bskyod pas// yang dag chos nyid byang chub sa// mtha' gzhi gang yang ma ltas pas// bla med spyi ti lta ba rtogs// chos kun gang yang ma bsgom pas// chos nyid rnal ma zang ka'i ngang // dus phyogs gang nas ma btsal bas// yang dge yon tan ma lus lhun gyis grub// sgra brjod ci yang ma 'das pas// rgyal bas ma lus kun sogs thon// gnyis 'dzin gang yang ma bsgrub pas// bsgrub bya'i don kun ma lus rdzogs// bla ma'i spyi ti'i don rtogs pas// re med rang gnas 'bras bur grol// sku gsum dur du bskyal pa ni// phyi ltar 'khor 'das chos rnams kun// stong dang snang dang gnyis med gsum// dbyer med dbyings kyis dur du bskyal// nang ltar sangs rgyas 'bras bu ni// chos sku longs sku sprul sku gsum// re med rang gnas dur du bskyal// gsang ba bla med sku gsum ni// snying po 'od gsal rang gdang gsum// chos med ting

  12. 100b

    yang ngur du bskyal// rgya chang chos kun mtha' grol ba// de ltar bstan pa ma lus kun// nga yis bla med spyi ti 'dir// snang dang stong dang gnyis ka dang // gnyis med phyogasu rgya ma chad // de yang ci gas cig dkrol bla// bden pa mtha' mnyam phyogs las grol// gdod nas rnam dag chos kyi sku// sgom du med ye sangs rgyas// byung tshor rgyu med bsam dang bral// bde chen klong brdal 'dzin pa brlab// yid la mi byed snang ba dag/ matsam ma bcos rang byung bas// dang dngas bral ma bral blo las 'das// sna tshogs blo bral rgyal ba'i thugs// rang byung rang dngas spros gcod pas// bya brtsol brtsol bsgrub mtha' las 'das// dper na hA la nAg po'i dug/ dug tu ngo shes za mi srid// sngags ldan zos kyang sman du 'gyur// de bzhin 'khrul snang 'khor ba yang // rtogs ldan mi 'ching grogasu 'gyur// dbang po yang rab bcod lugaso// dbang po 'bring gis gang zag la// du gsum dag tu ngos gzung la// 'phrang gsum nang du nan bor te// mtshan nyid gsum gyis rgyas 'deb po// bco brgyad don gyis man ngag yin// the tshom med pa'i don gsum blos// dus gsum kun tu phung po lnga// don kun ye nas ngag shes pas// dngos po kun gyi don sangs shing // 'das dang ma 'ong da lta'i dus// sems dang sems 'byung chos skur shes// de yis bde sdug mtha' sel bas// chags bral phyi nang yul sems med// sdug bsngal gsum po ma lus zhi// nyon mongs ma lus rang sar dngas// snang ba gsum sel grol gsum rtogs// nga bdag 'dzin pa'i rtsa ba chod// gnyis med dang las mu med ston//

  13. 101a

    @yang dag chos 'das mtha' la gnas// ma rtsal dngos med ye shes 'chang // rtog bral zang ka lhun gyis grub// gol bsgrib 'khrul pa kun las grol// bdag nyid de bzhin nyid dag/ mnyam nyid phyogs bral mtha' ltar dngas// dus gsum mtshon brjod med par rtogs// 'phrang gsum nang du nan bor bas// sgo lnga yul lngar gsal ba la// ma bkag bsgrib bral zad thal shes// snang srid dgag bsgrubs dbye gsal med// yul lnga ma bkag rang snang la// shes rab chen po'i skad cig gis// snang zhes 'dzin med rang sar dngas// 'gyur pa dran rtogs yid gnyis la// dbyer med snying rje'i go cha gyon// spros gcod shes rab gri dang // thabs rgyal byar med mnga' gzhu yis// ma rig nyon mongs g.yul ngo bzlog/ yid gnyis dran rtogs btsal nas bcas// sems can kun gyis chags sdang gcod// mkha' ltar gnyis 'dzin yul las 'das// bla med bde chen sdug bsngal gcod// 'gyu ba dran rtog 'phrag bcad pa'o// / kun gyis chos nyid 'phrang du ni// de bzhin ma nor chos gnyis dang // cis gdab yod med mtha' las 'das// snying po'i bcud bdud bstan du med// rtsis gdab gnyis med brjod mtha' 'das// so so rang rig mi g.yo bas// phyi grol nang mdangs yid gnyis brlag/ mkhas pas rnam grol gsum du mchod// mtshan nyid gsum du gtan la dbab// snang ba'i mtshan nyid rang snang yin// gnas lugs mtshan nyid skye ba med// rig pa yid gnyis 'dzin pa ni// 'khrul pa'i mtshan

  14. 101b

    nyid shes par bya// snang ba ma 'gag rang sor bzhag/ gnas lugs skye 'gaganyisu med// ri 'gyur sems med spros pa mchod// dkyor gsum du ngo sprod pas// snang mchog kyi dkyor du// rang grol rang sangs rang ngo sprad// 'gyu ba rig pa dran pa sems rnams// thol byung dang dngas 'dzin pa med// rig med ngag gsal dal du spangs// kun gzhi'i 'od gsal chos nyid 'di// rnam dag bsam gyis mi khyab pa'i dkyor chen por rang ngo sprang // dus gsum dus las bzlog pa ni// 'das pa'i dus las bzlog pa yis// sngar zhes bag chags gnas sa med// da lta'i yid las bzlog pa yis// de la de 'dzin dmigs ba med// ma 'ongs cha las bzlog pa yis// tha mal btang snyoms mun pa med// bzlog thabs gsum gyis nyams blangs pa'o// med pa gsum gyi rgyas gdab pa// gzhi ni skye ba med pa yin// yid ni ngan sems 'gyur ba med// yid rig dran sems 'gyu ba med// snang sring chos rnams dbye gsal med// chos rnams kun la des rgyas gdab// ka dag ye shes snang gsal che// sangs rgyas kun gyis mngon sum pa// 'gro ba'i ma rig mun pa sel// yang dag ye shes dang dngas pas// bla med yais chen po gsal// ma rig sgo lnga'i sbubs nas thon// srid pa'i bya ba btan bcos pas// rnam grol zhi ba mchog gis// 'khor ba'i mtha' las pha rol phyin// bya ba kun rdzogs zang sar skyob// gzugs sogs dbyer med chos kyi glu// snang yang dngos med me long bzhin// yul sems gnyis med rang sor gzhag/

  15. 102a

    @#/ de ltar sus rtogs mya ngan 'das// re med rang gnas bla med sa// dbang po tha ma'i gang zag la// thams cad 'khrul zhing bslu ba'i chos// mi bden dang gis stong pas na// chags sdang gnyis 'dzin ma byed cig/ ces bstan thams nyams blangs pas// 'khrul snang 'gag nas ye shes skye// srid pa bar ngor rtog thob rdzogs// bsgron ma rtsegs pa'i rgyud las/ 'khrul rtsad nas bcad ba'i le'u ste lnga pa'o// / de nas dang dngas khye'u chung gis// ye thog kun bzang la zhus pa// bla ba'i spyi ti'i rang ngo 'di// rtogs thabs gang gis ji ltar rtogs// ces zhus pa dang / ston pas 'khor la bka' stsal pa// rtogs dang ma rtogs gnyis med kyang // blo dman rtogs thabs man ngag bshad// thog pa dgu rtse'i man ngag 'di// gzhan nas mi 'byung 'byung mi srid// bya bral bsam 'das dang gzhag ste// cir yang mi bsam mi 'da' bas// grang yang mi dmigs mi rtogs la// ci byung rang 'byung dang dngas bde// ci skyes zhen med rang sangs klong // cir snang dgag sgrub dbye gsal med rig pa thol byung byung sar thim// bde chen mi rtogs 'gyur ba medaka/ rig pa ma 'gag zung thal la/ yid la mo byad snang ba dag/ dbang po rang snang rgyal ba'i thugs// mthong ba log pas 'khrul pa yang / 'khrul pas sangs pas mya ngan 'das// rtogs pa sangs rgyas kho na ste// ma rtogs pa ni sems ca no// ye ni ka dag rnal me'i sku// dngos med ye shes zang ka ma// bya bral med par dgongs par shes//

  16. 102b

    ces gsungaso// sgron ma rtsegs pa'i rgyud las/ rtogs thabs man ngag bstan pa'i le'u ste drug pa'o// // de nas dang dngas khye'u chung gis/ ya thogs rang bzhin kun bzang la// rtogs na 'bras bu ji ltar thob/ ces zhus pa dang / ston pas 'khor la bka' stsal pa// 'bras bu thob ma thob med kyang // blo dman brod pa bskyed phyir bshad// 'khor rnams ma yengs gus pas nyon// snying po bcud thig ma yis dbyings// mkha' gsal 'od gsal bu yis mdangs// snying po'i klong du rang byung bu// rtsal zer ma 'phros rang grol yongs la thim/ ma bu ngo 'phrong ye sangs rgyas// rang bzhin skye med chos kyi sku// ngo bo 'gag med longs spyod sku// thugs rje gnyis med sprul pa'i sku// yon tan dbyer med ngo bo'i sku// 'phrin las rang grol yongs rdzogs sku// ye yin ngo shes thob zhes bshad// ye nas yod pa ma rtogs par// gzhan nas thob ces re dogs yin// gzhi zhes thogs ma'i sar bslab mchog/ rang bzhin ngo bo thugs rje las// brtsol med lhan bsgrub thugs rjes 'byung // las mi rigs rnams zad par byas// nyon mongs ma gsal rnam par dag/ 'khor ba'i rgya mtsho che las rgal/ srid pa'i dra ba rang sar chod// khams gsum rang dag skye gnas medado/ skye 'gag las 'gro'i rdo rje'i bdag/ bla mang shes rab skad cig gis / chos sku la 'dres yongs rdzogs lhas/ skad cig nyid la rdzogs sangs rgyas// mi gnas mya ngan 'das don bsgrub// ces gsung sa// sgron ma brtsegs pa'i rgyud las/ 'bras bu khob tshul bstan pa'i le'u ste

  17. 103a

    bdun pa'o// // de nas dang dngas khye'u chung gis// thog ma'i sangs rgyas kun bzang la// 'bras bu de ltar thob na yang // mi 'gyur bstan pa ji ltar thob// ces zhus pa dang // ston pas// 'khor la bka' stsal pa// bsam brjod blo yis yul ma thob// dngos med chos sku zang ka ma// rgyu rkyen skye 'jigs med pa yis// 'pho 'gyur med pa bstan pa thob// rtsal zer yan lag 'od gsal dang // dang dngas rang grol bstan pa thob// sna tshogs snang la ngos gzud med// dran med yid la byar med pas// dbyer med ngo bo nyid kyis sku// ma phye ma bkol brtan pa thob// don dam bde ba chen po'i sku// rtsis gdabs shun bsgrol brtan pa thob// chos za ba mthar phyin 'khrul pa med// nor ba'i gnyis 'dzin ka nas dag/ ye thog sangs rgyas dgongs par rig/ bdag med rnam dag phyogs bral chos// ma byas rang byung blo 'das bston// rgya chang med par bstan pa thob// ces gsung so// sgron ma rtsegs pa'i rgyud las// 'bras bu mi 'gyur bstan pa thob pa'i le'u ste brgyad pa'o// / de nas dang dngas khye'u chung gis// rang bzhin kun tu bzang po la// 'og ma rnams la skyon ci mchis// zhes zhus pa dang // ston pas 'khor la bka' stsal pa// spyi ti snying po'i ngang nyid las// skyon dang yon tan gnyis med kyang // ma rtogs blo la skyon du byung gang zag dbang po'i khyad par las// sems zang theg pa rim pa dgu// mthun 'jug go lha bsgoms 'bras/ de yis smon la thug pa med// mdor bsdus skyon bshang 'khor rnams nyon// a te kha 'jam/

  18. 103b

    phyogs la bskyon// a nu dbyings dang ye shes skyon// ma hA snang stong gnyis kyis skyon// yo ga skye 'gaganyis kyis skyon// u pa yar lha mar spyod skyon// kri ya dag pa rnam gsum skyon// um bden pa gnyis kyis skyon// sems tsam rang rig rang gsal skyon// rang rgyal rten 'brel rig byed skyon// nyan thos yul sems bdag med skyon// bya ru bzhin du gnyis gzung bas// bim pa ra yi 'bru bzhin du// smin yang 'bras bu mi 'byung // lta bsgoms spyod 'bras sa lam dam// de rnams skyon bzang mtha' yas so// ma dngos na mkha' snyed pa 'dra// ces gsungaso// sgron ma rtsegs pa'i rgyud las/ theg pa 'og ma pa'i skyon bstan pa'i le'u ste dgu pa'o// / de nas dang dngas khye'u chung gis// thog ma'i sangs rgyas kun bzang la/ theg pa rim pa dgu po las/ spyi ti khyab par gang gis sbags// ces zhus pa dang / ston pas 'khor la bka' stsal pa// nga yi spyi ti bla med spyi ti la// sngags dang ma spags gnyis med kyang // rtsal gyis rig pas tshigs phye bas// theg pa dgu rtse'i spyi ti 'di// gdod nas dag pa'i chos sku la// bya btsal brtsol bsgrub mi byed de// mtshon 'das blo 'das bsgrub med 'di// bden pa gnyi su mi lta ste// gnyis gzung chos rnams spros pa gcod// de nas rtsi rgyal sbyi ti sngags// dran pa'i 'khor lo la 'das pa'o// 'dzin tog bro las khyad par 'phags/ dran med bsam pa las 'das pas// bem po rig med rnams spags// skye med tsam du'ang ma grub pas/ kye ba'i 'khor mo rnams las spags// yid kyi 'gyur ba rang dag pas/

  19. 104a

    sems kyis brtags zhen rnams las spags// nyon mongs ma lus kun 'das pas// mngon zhes mtha' dang yul las grags// tshigs mtshon brjod yul 'das pas// theg pa'i grub mtha' rnams las spags// shes rtog sbyor yul ma yin pas// yid spyod byas bcos chos la spags// nang stong phyogs 'dzin mtha' 'das pas// rtag chad log lha'i yul las spags// nyon mongs mtha' las rang grol bas// blang dor bka' spyod rnams las spags// las dang bgo chags mtha' spangs pas// rgyu rkyen rnam smin chos las spags// spyod pa'i shes rab las 'das pas// rang rig rang gsal sems las spags// sa lam bden gnyis dngos dag pas// spangs thob rgyu yis chos las spags// sku dang ye shes las grol bas// bzang ngan re dog chos la spags// ma byas ma bcos de kho na/ mi 'jug mi lta sgom mi byed// dkyil 'khor lha bong mchod bstod med// dbang dang dngos grub smon 'bras med// brtsol bsgrub bya byed las 'das pas// phyi nang 'bras bu'i chos las 'das// ka dag lhun grub nges med kyis// gzhi yis phyogs cha ming med pas// a ti kha 'byams chos las spags// rang byung ye shes dngos stong pas// sems sde dgongs pa'i chos las sbags// kun bzang klong chen mu med pas// klong bde rab 'byams don las sngags// lus ngag gnas la mi ltos pas// man lag sde yis thabs la spags// de ltar ci yang snang ngus na// de dag gang yang ma bkag la// grangs can dum bu bsgrub pas ni//

  20. 104b

    kun gyis mun mtha' rang sar grol// rang phyogasu brgya ma mtshang // gnyis ka'i phyogs brgya ma chang // gnyis med phyogasu rgya ma chad// ma grol ba ni grol bas bkrol// grol bas ma grol ba yis bkrol// gnyis ka gnyisu med par bkrol// gnyis ka med par gnyis ka bkrol// de ltar gcig gis gcig bkrol bas// rang grol ye grol yongs grol dang // ci grol mtha' grol bla na med// dgu N+DI ts+tsha yang ti sbags// ces gsungaso// sgron ma brtsegs pa'i rgyud las/ spyi ti chos thaMd las sbags par bstan pa'i le'u ste bcu pa'o// // de nas dang dngas khye'u chung gis// dam pa dang po'i sangs rgyas la// spyi ti'i dkyil 'khor ji ltar sbags// ces zhus pa dang // ston pas 'khor la bka' stsal pa// ma bris khyab brdal dkyil 'khor ni// na mkha' dbyings rnams ngag phyogs bral dang // brdal khyab rtag changs gzhi la// mi 'gyur drang po'i thig btab nas// dkar ser dmar ljang ye nas bkod// phyogs gzhi mtshams bzhi ye nas dag/ skye bzhi rtsa chod sgo bzhi la// byams dang snying rje'i dkyor ste/ tshad las 'das pas yang ba che// nang stong sku yis dkyil 'khor ste// grags stong gsung gis dkyil 'khor yin// dran stong thugs kyis dkyil 'khor yin// sku yis dkyil 'khor yang dag pas// chos nyid byang chub sems la gnas// gsung gi dkyil 'khor yang dag pa// chos nyid byang chub sems la gnas// thugs kyi dkyil 'khor yang dag pa// chos nyid byang chub sems la gnas// rang bzhin ngo bo thuT rje

  21. 105a

    #gsum// 'dod nas ma bcos dkyil 'khor yin// dkyor dkyil 'khor ces bya ba// dkyil ni mngon thogs ye gnas yin// 'khor ni rgya chang phyogs lhung med// dkyil ni snying po'i ga yin te// rtsal zer yan lag 'khor yin no// dkyil ni kun gzhi'i klong yin te// 'od zer rig shes 'khor yino// rang bzhin ngo bo thugs kyis dkyil// sgo gsum sgo gnyis 'khor yino// 'khrul lugs rnam gsum dkyil yin te// bcod lugs rnams gsum 'khor yi no// rig yid sems gsum dkyil yin te// dang dngas rtsa bcod 'khor yin// snying po chos nyid dkyil yin te// thag chos nges ldan 'khor yin/ ye nas rang gnas dkyil yin te// skye med don rtogs 'khor yin// phyi nang snang srid dkyil yin te// phyogs med dbyer med 'khor yino// yod med skye 'gul dkyil yin te// sor gzhag rjes brdal med pa 'khor @bla med spyi ti'i dkyil 'khor te/ dkyil 'khor gzhan las khyad par 'phags// ces gsung so// sgron ma rtsegs pa'i rgyud las// s+thi ti'i dkyil 'khor bstan pa'i le'u ste bcu gcig pa'o// / de nas dang dngas khye'u chung gis// dam pa dang po'i sangs rgyas la// lha tshogs spyan drangs mtshad bstod gang // ces zhus pa dang / ston pas 'khor la bka' stsal pa// lha yi dbang po lha yi lha// lha dang lha min kun gyis bdag/ gnas lugs skye med ka dag te// ji bzhin ma bcos snying po'i lho// 'dod nas dngos meng zang ka ste// me bsgrubs yi nas lha tshogs la/ spyan drangs ming med ye nas gnas// bcos bslang bsgrib

  22. 105b

    med rang sar bstan// skye med mtshon bral chos 'das la// gnyis bral 'gyur med mchod med// phung po lnga nyid ye dag pas// 'khrul pa'i lus gnyis ye sangs rgyas// 'byung lnga ye nas rang dngas pas// yul snang gsal dag dang du grol// dbang po lnga nyid ces grol bas// sdug bsngal 'dod nas ye shes pas// gnas bsgyur mi dgos rnal ma'i dang // re med rang la ye gnas pas// spyan drangs mchod stod yul las 'das/ gang nas ma bsgrubs rang nyid pas// che ba'i yon tan btsal dang bral// tshogs gnyis ma bsags yongs rdzogs pas// khams kyis btsal zhing bsgrub las grol// dri med dang dngas ye gsal la// bsgrib gnyis ma sbyongs ka nas dag/ skye med rdo rje rang khrungs pas// lha dang mchod bstod mun mtha' sangs// brtsol bsgrubs blo las khyad par 'phags/ ces gsungaso// sgron ma rtsegs pa'i rgyud las lha tshogs mchod bstod kyi le'u ste bcu gnyis pa'o// / de nas dang dngas khye'u chung gis// dam pa dang po'i sangs bzang la// ma bskur dbang ni ji ltar thob// ces zhus pa dang // ston pas 'khor la bka' stsal pa theg pa gzhan nas 'phags pa yis// rtse dgu dbang gi rgyal por bshad// mkha' klong chos dbyings yang ba'i dbang // ma phye ma bkrol snying pos bskur// chos nyid sgyu 'gag gnyis med dbang // rtsa la zar thig la'i klong 'dus bskur ka/ snang sring ma bkag rol pa'i dbang // dgag sgrub 'byed pa med pas bskur// gnyis med rang sa gzhag pa'i dbang // chos nyid gsal ngag ngang du bskur// rgyal thabs phyi blug tshangs pa'i dbang /

  23. 106a

    @#bya rtsal g.yo 'tshal med par bskur// bum pa'i rgyal po snying po'i bcung // thig le bcud 'dus bum pas bskor// rdo rje rgyal po bka' yis dbang // dus gsum 'pho 'gyur med par bskur u rgyan bla med rigs lnga'i dbang // 'dod na spyi blugs klong du bskur// cod pan theg dgu las rgyal dbang // grub mtha'i 'dzin zhen med par bskur// shes brjod las 'das gsang ba'i dbang // cir yang brten du/ med par bskur// rang snang rang dngas thabs shes dbang // rnam rtog ye shes chen por bskur// rang rta rang rtog chos 'das dbang // tshigs dbang mtshan du med par bskur// snying po ka dag rnal ma'i dbang // g.yo rtsol 'jigs bral med par bskur// rtsis 'debs phyogs lhung med par thob// snang sring sems can dang dngas dbang // gnyis 'dzin dgag bsgrub med par bskur// dbye gsal rgya chad med par thob// rang byung dri med rig pa'i dbang // rang brlab rang thims dang du bskur// gtsang chong 'khrul sangs ting yangs thob// yid bzhin dgongs pa yi rdzogs dbang // rtsal med yongs rdzogs klong du bsgyur// bsgrub med smon pa med par bskur// bskyod med sa la mtshig tshod dbang // bsgrod med rnam grol dbyingasu bskur// chos zad mu med mtha' stong dbang // ya thogs mkha' klong dbyingasu bskur// bskur thob mtshan pa mtha' stong ba'i// ye dog dbang gis spyi rgyal 'di// thob bya thob byed gnyis 'dzin pa'i// blo btabs gzung 'dzin dbang las spags// ces gsung so// sgron ma rtsegs pa'i rgyud las/ yongs rdzogs spyi ti'i dbang

  24. 106b

    bskur bstan pa'i le'u ste bcu gsum pa'o// / de nas dang dngas khye'u chung gis// rang bzhin kun tu bzang po la// dngos bsgrub dam tshig smon glang // ces zhus pas/ ston pas 'khor la bka' stsal pa// dngos grub dngos grub zhes bya ba/ gzhan nas blang ba'i yul med do// rad la ye nas 'dod nas bsgrub// grub zin don las ma 'das na// thun mongs bsgrub pa bye mi dgos// dngos ni chos nyid skye med// bsgrub pa rtogs pa'i ye shes te// thob ni chos sku med thob// dngos ni rang gsal rin po che// grub pa re rtogs shes rab yin// dngos ni dngos med chos kyi sku// skye 'chi 'pho 'gyur med par grub// dngos ni snying po don gyis klong // gnas gzhi gtan la phabs pa yin// 'khrul pa rtsad nas bcod pas bsgrub// dngos ni spyi ti'i gnas lugs te// grub mtha'i rgya las grol bas grub// yang dag don gyis dam tshig ni// dbyer med gdeng las mi 'anga' dang // snying po don las mi 'da' dang // rtog pa'i don la mi mnga' dang // ma bu ngo sprod nyams len las// rtag tu mi 'da' dam tshig yin// bla mang mchog gi smon lam ni// ma bsgod thogs ma'i gzhir phyin dang // rang gnas smon pa'i sar bskyol dang // chos dbyings bla ma'i klong mkhyil du// rtsal zer rig pa rang sar thims// thims dang ma thims mu mtha' stong // smon pa'i sangs rgyas rang las steng // smon lam zhes bya tha snyad btab// bsam med bya bral mtha' grol ste// ma bcol rang gnas rtogs pa la// smon lam zhes byar brtags pa yin// tshe 'dir btab nas phyi ma la// thob tu re ba'i ltos med par//

  25. 107a

    snying po chos sku rang la rnyed// rnyed dang ma rnyed gnyis ka dang // gnyis med mun mtha' rang sar grol// yang rtse spyi ti'i smon lam yin// ces gsung so// sgron ma rtsegs pa'i rgyud las dngos grub dam tshig bstan pa'i le'u ste bcu bzhi pa'o// // de nas dang dngas khye'u chung gis// rang bzhin kun bzang la zhus pa// dgu rtse sems nyid spyi ti 'dir// ma 'dres yongs dwa sa/ zhus pa// skye sa / du@sa/ // g+sa stong rdzogs// ma bu gnyis med gnas gnyisu// gdams ngag thams cad 'ub bsdus rdzogs// rang sangs rang rgyas rang grol du// rtog lugs brgyad khri bzhi stong rdzogs// na mkhar 'byung lnga ma 'dres rdzogs// bad+yA swA dAT+Te tha bAn sgyur rdzogs// gnas sa'i grong du sgyu 'amadzugs// drikyil 'khyer grong du mtshan lnga rdzogs// ratsho ba sdus zu ngan su rdzogs// yid bzhin no bu rim rten rdzogs// de sems nyid spyi ti'i 'dir// phyi nang theg pa ma lus rdzogs// yoM dag bya bral chos kyi sku// rdzogs chen lta ba ma 'dres rdzogs// dbyings dang ye shes gnyis med pas// a nu'i lta ba ma 'dras rdzogs// snang stong thabs dang shes rab med// ma hA'i lta ba ma 'dres rdzogs// sum cu rtsa bdun skye 'gag med// yo ga'i lta ba ma 'dres rdzogs// ma bcos yar lha'i rtse gnyis med// u pa'i lta ba ma 'dres

  26. 107b

    rdzogs// ngag gsum rig sum dgon med pas// kri ya'i lta ba ma lus rdzogs// bden pa gnyisu mi lta bas// dbu ma'i lta ba ma 'dres rdzogs// yul sems gnyisu mi lta bas// sems tsam lta ba ma 'dres rdzogs// rten 'brel bcu gnyis mi lta bas// rang rgyas lta ba ma 'dres rdzogs// bdag med phyogs cha mi 'dod pas// nyan thos lta ba ma 'dres rdzogs// rtag chad gnyisu ma lhung bas// mu stegs lta ba ma 'dres rdzogs// de ltar gang du'ang mi lta la// gang yang ma 'dres 'dir rdzogs shing // 'dras dang ma 'dres rdzogs ma rdzogs// gnyis ka gnyis med rang grol bas// chos rnams ma 'dres spyi tir rdzogs// 'jug sgo 'phrin las lha dbang rdzogs// nA ma d+ha la tshA tshwa bshags// dge rtsa smon lam rgyas 'debs rdzogs// gcig rdzogs gnyis rdzogs gsum rdzogs shing // g.yo med ma lus snang stong rdzogs// yongs rdzogs skad cig bye brag phyed// skad cig nyid la mngon sangs rgyas// ces gsungaso// sgron ma rtsegs pa'i rgyud las// ma 'dres pa yongs rdzogasu bstan pa'i le'u ste bco lnga pa'o// / de nas dang dngas khye'u chung gis// dam pa dang po'i kun bzang la// ma byas rang byung mtshon med pas// byar mang blo 'das theg pa gang / zhes zhus pa dang // ston pas 'khor la bka' stsal pa// ma byas rang byung rtsol med sems gdod nas dag pas chos sku nyid// khong nus 'byung bas skye ba med// ngag tu brjod pas kun las grol// mtshon du med par brjod pa'i mchog/ ma skyes chos nyid sems las 'das// dngos po med 'dod bral

  27. 108a

    blo 'das yin// rang byung dang pas blo las 'das// snying po chos nyid blo las 'das// byar med bshad med mtshon du med// brtsod med bsam bral ka las dag/ de nas mtshon med blo las 'das// byas pa'i chos ni 'dus byas yin// 'dus byas chos kyi sangs mi rgyas// bshad pa'i ni tha snyad yin// bla dgas tshig gis sangs mi rgya// blo btags chos ni 'khrul pa yin// 'khrul pa'i chos kyi sangs mi rgya bsgrub chos brtsol bsgrubs yid smon yin// yid smon chos kyi sangs mi rgya// brtsol bsgrub med pa'i chos gcig dgos// ces gsung so// sgron ma rtsegs pa'i rgyud las/ byar med mtshon med blo las 'das pa'i le'u ste bcu drug pa'o// // de nas dang dngas khye'u chung gis// dam pa dang po'i sangs rgyas la// gcig shes kun grol ji ltar lags// ces zhus pa dang // ston pas 'khor la bka' stsal ga/ chos cig bya ba'i rang bzhin ni// gzhi yis klong la mtshon med kyang // chos cig de bzhin nyid shes na// chos rnams thams cad grol bar 'gyur// ces bka' stsal pa dang // de nas dang dngas khye'u chung gis chos gcig de ni ji ltar lags// gcig la dngos po ji ltar yongs lags sam// ces zhus pa dang / ston pas 'khor la bka' stsal pa// chos cig bya ba'i rang bzhin ni// gzhi yis klong la mtshon med kyang // rtsal zer shes ri gcig zhes brjod// rin chen gsal dngas dang dngas de/ g.yos pa ma yin dngos po meng // med pa ma yin gsal zhing rig/ dngos med ye shes zang kha ma// mi snang gsal ba'i rang bzhin can//

  28. 108b

    de ka gnyis las grol zhes bshad// de nas gcig shes kun grolo// ces gsung so// sgron ma brtsegs pa'i rgyud las// gcig shes kun grol bstan pa'i le'u ste bcu bdun pa'o// / de nas dang dngas khye'u chung gis// dam pa dang po'i sangs rgyas la// gnas rnams khrol ba gcig kun ni// ji ltar rang sar grol bar 'gyur// ces zhus pas/ ston pas 'khor la bka' stsal pa/ ming med phyogs bral kun khyab thog ma gnas// yan lag rtsal zer mi 'dogs tha ma'i gnas// rtsal zer thog ma'i klong 'dus gnyis med gnas// sngon rol cad med thog ma'i gnas// g.yo ba rtsal khyab mtha' ma'i gnas// sngon rol gsal thims gnyi med gnas// snying po chos kyi thogs ma'i gnas// 'di ni rtsa la lags mtha' ma'i gnas// snying por rtsal thims gnyis med gnas// kun gyi mkha' klong thog ma'i gnas// rig shes yid sems tha ma'i gnas// de dag klong thim gnyis med gnas// ma bu gnyis med dbyer mi shes// gnas rnams ma lus khrol bar bshad// bya gnas namakha' nya gnas chu// srog gnas snying la bde gnas rtse// snang gnas nyi zla sems gnas don// rin chen dngos med kun gyis gzhi// mi snang gsal ba'i bdag nyid can// don cig cang med cir yang gsal// mi snang rang bzhin yod pa'o// de nas dngos med kun gyis gzhi// gnas rnams thams cad de yis khrol// ces gsung so// sgron ma brtsegs pa'i rgyud las// gnas bstan pa'i le'u ste bco brgyad pa'o// / de nas dang dngas khye'u chung gis// dam pa bzang po'i kun bzang la/

  29. 109a

    brda' cig shes pas brda' kun khrol// bda' yis gnas de ji ltar lags// ces zhus pa dang / ston pas 'khor la bka' stsal pa// ming ma thogs kyi sngon rol na// cang med tha snyad gang gis kyang // ma dgongs pa yi brda' cig yod// kun gzhi'i rtsal zer bar shes na/ thaMd bskyed sdug brda' cig yod// 'od rlung shes rig par shes na// gyur ma gyur gyis brda' cig yod// 'char sgo 'khrul spro bar shes na// lkog thabs gnyis kyis brda' cig yod// sangs rgyas sems can par shes na// bar chad me yis brda' cig yod// ma rig ye shes par shes na// bar bar byed pa'i brda' cig yod// dbyings dang yis par shes na// bar bar byed pa'i brda' cig yod// 'khor ba myang 'das par shes na// bar bar byed pa'i brda' cig yod// a sangs sa ka ri// // kun 'byung bsam yas kyi lha khang na// bar brlag dngos med 'dod med bya bral las zino// a d+ha thims si d+ha thims a/ brda' de shes na brda' kun shes par 'gyur// rnam dag 'od gsal chen po'i lha khang na// bya bral 'dod med/ brlab pa po// brda' de shes na brda' kun shes par 'gyur// dngos med zang ka kun mkhyen lha khang na// cir yang mi snang gsal ba'i me long can// brda' de shes na brda' kun 'ashes par 'gyur// mkha' klong spyi khyab rin chen 'od khang na// brtsan bral me klong phyogs mu mtha' rang brlag po// brda' de shes na brda' kun shes par 'gyur// 'phel 'grib med pa'i rnam dag lha khang na// dngos med kun gsal nyi zla

  30. 109b

    me long can// ma lus brlab byed kun gyis spyi mes po// mun sel me bsod mtsho skems rdza bar la// rang gcig po 'dud 'khrol phyogs 'debs kun 'dud 'ub chub bo// dngos med zang ka gsal gdangs spyi yi rje// brda' de shes na brda' kun shes par 'gyur// 'khrul chos mdo med bcol chung ba ngo bo che// ces gsung so// sgron ma brtsegs pa'i rgyud las brda' gcig shes na brda' kun grol bar bstan pa'i le'u ste bcu dgu pa'o// / de nas dang dngas khye'u chung gis// dam pa dang po'i sangs rgyas la// rgyud 'di'i mtshan ni ji ltar gzung // ces zhus pa dang // ston pas 'khor lnga bka' stsal pa// 'di la mtshon med brjod med kyang // 'khor gyi mtshan ni gzung phyir bshad// bya brtsal chags sdang blo chos bdud// byar med blo 'das zhen bcod ci// der ni bdud rtsi'i rgyu du gzung // sangs rgyas kun gyis thugs kyis bcung // bka' rgyud kun gyis bcud 'dus pas// bcung bsdus chen po'i rgyud du gzung // ma rig 'khor ba'i mun ru ma re// sgron ma rtsegs pas sel bar byed// sgron ma rtsegs pa'i rgyud du gzung // theg pa ma lus gnya bcog phyir// gnya' bcog sbyi ti zhes byar gzung // thag pa kun las la 'di'i phyir// la 'od chen po'i rgyu du gzung // ces gsung so// smon ma rtsegs pa'i rgyud las// mtshan bstan pa'i le'u ste nyi shu pa'o// de nas dang dngas khye'u chung gis// rgyud 'di gtang ba'i gang zag gang // zhus pas/ ston pas 'khor la bka' stsal pa// dang dang dam tshig shes rab dang // brtson 'grus rtse gdung gtod phod che// rgyud bzang brtson

  31. 110a

    ldan blo che myur// bla ma snying la sems dpa' dang // man ngag srog bzhin mtsho ba la// dgu rtse spyi ti'i rgyud 'di gtad// nyon mongs ma rig ser sna dang // le lo log lnga nga rgyal che// dam med rgyud ngan grogs mched bslu// che dag dge slong g.yo rgyu can// de lta bu la byin pa na// be'u sbrel g.yang la bsgyur ba bzhin/ gnyis ka rdo rje dmyal bar 'gro// de bas snod ldan dam pa'i rgya// ces gsungaso// sgron ma brtsegs pa'i rgyud las/ snod bzang ngan gyi khyad par bstan pas rgyud gtad pa'i gnas bstan pa ni le'u ste nyi shu rtsa gcig pa'o// / de nas dang dngas khye'u chung gis// dam pa dang po'i sangs rgyas la// rgyud 'di'i 'byung dus gang gis tshe// ces zhus pa dang / ston pas 'khor la bka' stsal pa// rgyud 'di 'byung ba'i dus su ni// dus ngan yul dbus bstan pa dmas// bdud dang log lha mu stegs/ dar // sde 'khrugs gzhi 'thab ras bskor// na nga rgyas che btsun dug la sbyor// btsun chen chung ma len pa dang // btsun mas bu chung gso ba dang // dge slong tshong khye byed pa dang // mi thub rnam gsum byung dus na// de dus nga yi rgyud 'di 'byung // ces gsung so// sgron ma rtsegs pa'i rgyud las// bstan pa 'byung dus bstan pa'i le'u ste nyi shu rtsa gnyis pa'o// / rgyud thams cad kyi rtsa rgyal bdud rtsi bdud bsdus sgron ma brtsegs pa'i rdzog so// / skyon pad+mas bshang // lots+tsha bka ba dpal rtsegs kyis bsgyur/ rgyal po khri song lnga btsan la gdam so// gtor rgya/ zab rgya/ sbas rgya/ gtang rgya