'jig rten las 'das par bstod pa
Lokaatitastapa
Text
ff. 382b–384a · 4 folio sides
- 382b
/ rgya gar skad du/ lo ka a ti ta sta pa/ bod skad du// 'jig rten las 'das par bstod pa/ 'jam dpal gzhon nur gyur pa la phyag 'tshalo// dben pa'i ye shes rig gyur pa// 'jig rten 'das khyod phyag 'tshal 'dud// gang khyod 'gro la phan pa'i phyir// yun ring thugs rjes dal bar gyur// phung po tsam lnga grol ba yi// sems can med par khyod bzhed la// sems can don la'ang mchog gzhol bar// thub pa chen po khyod nyid zhugs/ blo ldan khyod kyis phung po de'ang // sgyu ma smig rgyu dri za yi// grong khyer rmi lam ji bzhin du// blo ldan rnams la rab tu bstan// gang dag rgyu las byung ba rnams// de med par ni yod min pas// gzugs brnyan nyid dang mtshungs pa ru// gsal bar ci'i phyir de mi 'dod// 'byung ba mig gi gzung min pas// de dngos mig gi ji ltar yin// gzugs nyid gzung bar rab bkag pa// gzugs nyid khyod kyis de ltar gsungs// tshor bya med par de med pas// tshor ba nyid ni bdag med pa// tshor ba de'ang rang bzhin gyis// yod pa min par khyod nyid bzhed// ming dang don dag tha dad min// me yis kha nyid tshig par 'gyur// gzhan na'ang rtogs pa med 'gyur zhes// bden pa gsung ba khyod kyis bstan// byed po rang dbang las nyid kyang // tha snyad du ni khyod kyis bstan// phan tshun ltos pa can nyid du// bsgrub par khyod ni bzhad pa lags// byed
- 383a
po yod min spyod po'ang med// bsod nams de min rten 'brel skyes// brten nas skyes gang ma skyes zhes// tshig gi bdag po/ khyod kyis gsungs// shes pa med par shes bya min// de med rnam pa shes pa'ang med// de phyir shes dang shes bya dag/ rang dngos med ces khyod kyis gsug// mtshan nyid mtshon bya gzhan nyid ni// mtshon bya mtshan nyid med par 'gyur// tha dad min mi'ang de med par// khyod kyis gsal po nyid du bstan// mtshan nyid mtshon bya rnams bral zhing // tshig gi brjod pa rnam spangs par// khyod kyi ye shes spyan nyid kyis// 'gro ba 'di dag zhi bar mthong // dngos po yod pa nyid mi skye// med pa'ang ma yin yod med min// bdag las ma yin gzhan las min// gnyis med skye ba ji lta bu// yod pa gnas par rigs 'gyur gyi// 'jigs par 'gyur ba ma yin no// med pa mi gnas par rig pas// 'jig par 'gyur ba ma yin no// re shig zhig pa'i rgyu las kyang // 'bras bu 'byung bar mi rigs la// ma zhig mas min rmi lam dang // 'dra ba'i skye ba khyod nyid bzhed// zhig dang ma zhig pa dag gi/ rgyu las 'bras bu 'byung ba dag/ sgyu ma 'byung ba bzhin du 'byung // kun kyang de bzhin khyod kyis gsungs// de bzhin khyod kyis 'gro 'di dag/ yongs su brtags pa las 'byung bar// kun tu shes
- 383b
bya byung na'ang // skye ba med cing 'gag med gsungs// rtag la'ang 'khor ba yod ma yin// mi rtag pa la 'khor ba med// de nyid rig pa'i mchog khyod kyis// 'khor ba rmi lam 'dra bar gsungs// sdug bsngal rang gis byas pa dang // gzhan gyis byas gnyi gas byas// rgyu med par ni rtog ge 'dod// khyod kyis ston cing 'byung bar gsungs// rten cing 'brel bar gang byung ba// de nyid khyod ni stong par bzhed// dngos po rang dbang yod min zhes// mnyam med khyod kyis seng ge'i sgra// kun rtog thams cad spang ba'i phyir// stong nyid bdud rtsi ston mdzad na// gang zhig de la zhan gyur pa// de nyid khyod kyis shin tu smad// bems po gzhan dbang stong pa nyid// sgyu ma bzhin du rkyen byung bar// mgon po khyod kyis chos kun gyi// dngos med goms par mdzad pa lags// khyod kyi cung zhig ma bskyed cing // 'ga' yang bkag pa ma mchis la// sngon gyi ji ltar phyis de bzhin// de bzhin nyid ni thugs su chud// 'phags pa rnams kyis bsten pa yi// bsgom pa zhugs par mtshan med 'di// rnam par shes pas 'gar 'gyur ram// mtshan ma med la ma zhugs par// thar pa med ces gsungs pa'i phyir// de phyir khyod kyis theg chen rnams// ma lus par ni de nyid bstan// bstod pa'i snod khyod bstod pa las// bdag gi bsod nams gang thob pa/
- 384a
des ni 'gro ba ma lus rnams// mtshan ma'i 'ching las grol gyur cig/ 'jig rten las 'das par bstod pa// slob dpon/ klu grub kyis mdzad pa rdzogs s+ho// / rgya gar gyi mkhan po kri sna ban bi da dang / lo tsa ba dge slong tshul khrims rgyal bas bsgyur cing zhus te gtan la phab pa// rgya gar skad du/ d+harma d+ha du sta ga/ bod skad du// chos kyi dbyings su bstod pa/ 'jam dpal gzhon nur gyur pa la phyag 'tshal lo// gang zhig kun tu ma shes na// srid pa gsum du rnam 'khor la// sems can kun la nges gnas pa'i// chos kyi dbyings la phyag 'tshal 'dud// gang zhig 'khor ba'i rgyur gyur pa// de nyid sbyang ba byas pa las// dag pa de nyid mya ngan 'das// chos kyi sku'ang de nyid do// ji ltar 'o ma dang 'dres pas// mar gyi snying po mi snang ba// de bzhin nyon mongs dang 'dres pas// chos kyi dbyings kyang mi mthong ngo // ji ltar 'o ma rnam sbyangs pas/ mar gyi snying po dri med 'gyur// de bzhin nyon mongs rnam sbyangs pas// chos dbyings shin tu dri med 'gyur// ji ltar mar me bum nang gnas// cung zhig snang bar mi 'gyur ba// de bzhin nyon mongs bum nang gnas// chos kyi dbyings kyang mi mthong ngo // phyogs ni gang dang gang dag nas// bum pa bug gtod gyur pa'i// deng /
Colophon
'jig rten las 'das par bstod pa/ slob dpon klu grub kyis mdzad pa rdzogs s+ho// rgya gar gyi mkhan po kri sna ban di da dang/ lo tsa ba dge slong tshul khrims rgyal bas bsgyur cing zhus te gtan la phab pa/