'phags pa rin po che'i mtha' zhes bya ba theg pa chen po'i mdo
Āryaradnakotirnamamahāyanasūtra
Text
ff. 127b–139a · 24 folio sides
- 127b
/ 'phags pa klu'i rgyal po mtshos zhus pa zhes bya ba/ theg pa chen po'i mdo rdzogs s+ho// // rgya gar skad du/ Ar+ya rad na ko tir na ma ma hA ya na sU tra/ bod skad du/ 'phags pa rin po che'i mtha' zhes bya ba theg pa chen po'i mdo sangs rgyas dang / byang chub sems dpa' thams cad la phyag 'tshal lo// 'di skad bdag gis thos pa'i dus cig na/ bcom ldan 'das rgyal po'i khab na bya rgod phung po'i ri la/ dge slong lnga brgya tham pa'i dge slong gi dge 'dun chen po dang / thabs gcig tu bzhags te/ de nas 'jam dpal gzhon nur gyur pa mtshan mo srod la/ bcom ldan 'das kyi bzhugs khang ga la ba der dong ste phyin nas/ bzhugs khang gi sgo drung na 'dreng ste/ bcom ldan 'das la bstod do// de'i tshe bcom ldan 'das rin po che'i mtha' zhes bya ba'i ting nge 'dzin la snyoms par zhugs so// de nas bcom ldan 'das dran pa dang mkhyen bzhin du/ ting nge 'dzin de las bzhengs nas/ 'jam dpal gzhon nur gyur pa sgo na 'dug pa gzigs so// gzigs nas kyang 'jam dpal khyod nang du shog ces de skad ces bka' stsal to// bcom ldan 'das legs so legs so zhes gsol to// 'jam dpal gzhon nur gyur pas/ bcom ldan 'das kyi ltar mnyan nas/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ phyogs cig tu 'greng ngo // 'jam dpal gzhon
- 128a
nur gyur pa phyogs cig tu 'greng ba dang / bcom ldan 'das kyis stan la 'dug ces snang ba mdzad do// bcom ldan 'das kyis snang bas/ de nas 'jam dpal gzhon nur gyur pa/ bcom ldan 'das ga la ba de logs su thal mo sbyar ba btud nas phyogs gcig tu 'dug go/ phyogs gcig tu 'dug nas/ bcom ldan 'das la 'jam dpal gzhon nur gyur pas 'di skad ces gsol to// bcom ldan 'das nga gdod ting nge 'dzin gang gis bzhugs bzhugs pa las bzhengs lags de skad ces gsol pa dang / bcom ldan 'das kyis 'jam dpal gzhon nur gyur pa la 'di skad ces bka' stsal to// 'jam dpal rin po'i tshe'i mtha' zhes bya ba'i ting nge 'dzin yod do// ting nge 'dzin des ngad gdod gdod gnas pa las langs so// gsol pa/ bcom ldan 'das ci'i slad du/ de la rin po che'i mtha' bgyi lags/ bcom ldan 'das kyis bka' stsal pa/ 'jam dpal 'di lta ste dper na/ nor bu rin po che shin tu dag cing shin tu byi dor byas pa/ sa phyogs mnyam pa la bzhag na gang dang gang kho nar bzhag pa de dang der rin po che bye ba gnas par 'gyur ro// 'jam dpal de bzhin du nga ting nge 'dzin de la gnas nas/ shar phyogs su ltas te/ shar phyogs su bltas na/ ngas 'jig rten gyi khams dpag tu med pa grangs med pa dag na/ de bzhin gshegs pa dgra bcom pa yang dag par rdzogs pa'i sangs
- 128b
rgyas chos ston cing bzhugs pa dag mthong ngo // de bzhin du lho phyogs dang / nub phyogs dang / byang phyogs dang / 'og dang / steng nas phyogs bcu'i bar du ltas na/ ngas 'jig rten gyi khams dpag tu med pa dag na/ de bzhin gshegs pa dgra bcom pa yang dag par rdzogs pa'i sangs rgyas chos ston cing bzhugs pa dag mthong ngo // 'jam dpal ngas ting nge 'dzin 'di la gnas nas/ gang yang dag pa ma yin pa'i chos de gang yang / yang dag par rjes su ma mthong ngo // 'jam dpal yang dag pa'i phyag rgya 'di ngas phyag rgyar/ bzhag ste/ dad can gyi rigs kyi bu rnams dang / rigs kyi bu mo rnams kyi phyag rgya 'di la spyad na/ spobs pa mi chod par 'dzin par 'gyur ro// gsol pa/ bcom ldan 'das spobs lags so// bde bar gshegs pa bdag spobs lags so// bka' stsal pa/ 'jam dpal khyod spobs par gyis shig/ gsol pa/ bcom ldan 'das dper bgyi na/ nor bu rin po che de nyid ngos gang dang gang kho na phab ste/ bzhag pa ni rin po che'i ngos de dang de kho na 'bab cing gnas par 'gyur ba lags so// bcom ldan 'das de bzhin du chos thams cad ni yang dag pa'i mtha'i kho nas gnas lags so// bka' stsal pa/ 'jam dpal khyod kyis yang dag pa'i mtha' shes sam/ gsal pa/ bcom ldan 'das 'tshal lags so// bka' stsal pa/ 'jam dpal 'on yang dag pa'i mtha' gan 'dug/ gsol pa/ bcom ldan 'das yang dag pa'i mtha' ni
- 129a
bdag gi mtha' ga na mchis pa de na mchis lags so// yang dag pa'i mtha' ni so so'i skye bo'i chos rnams gang na mchis pa de na mchis lags so// yang dag pa'i mtha' ni las sam/ rnam par smin pa yang ma lags la/ chos thams cad kyi mtha' yang de kho na lags so// bcom ldan 'das gang dag ni de ltar mos de dag gang las kyang rnam par grol ba ma mchis lags so// gang dag gang las kyang grol ba ma mchis pa de dag ni log pa las rnam par grol ba lags so// gang log pa las rnam par grol ba de dag ni yang dag par rnam par grol ba lags so// gang dag yang dag par rnam par grol ba de dag ni spyod yul ma lags pa la zhugs pa lags so// gang dag spyod yul ma lags pa la zhugs pa de dag ni yang dag par zhugs pa lags so// de ci'i slad du zhe na/ bcom ldan 'das spyod yul ma lags pa zhes bgyi ba ni/ spyod yul des bgyis pa ma lags pa ste/ de'i slad du spyod yul ma lags pa zhes 'dogs lag so// bka' sprul pa/ 'jam dpal spyod yul ma yin pa zhes bya ba de gang gi tshig bla dgas yin/ gsol pa/ bcom ldan 'das spyod yul ma lags pa zhes bgyi ba de ni yang dag pa'i mtha'i tshig bla dgas so// bka' stsal pa/ 'jam dpal lam sgom pa zhes bya ba de gang gi tshig bla dgas yon/ gsol pa bcom ldan 'das lan
- 129b
bsgom pa zhes bgyi ba de ni/ lam bsgom pa ma mchis pa'i tshig bla dgas lags so// bka' stsal pa/ 'jam dpal khyod las dang po pa'i rigs kyi bu rnams dang / rigs kyi bu mo rnams la chos ji ltar ston/ gsol pa/ bcom ldan 'das bdag ni las dang po pa'i rigs kyi bu rnams dang / rigs kyi bu mo rnams la 'jigs tshogs dor du ma mchis pa'i chos ston pa lags so// bdag ni 'dod chags dang / zhe sdang dang / gti mug rnams spangs du ma mchis par chos ston lags so// de ci'i slad du zhe na/ bcom ldan 'das chos 'di rnams kyi rang bzhin gang lags pa de ni spang ba rngo thog pa'i slad du lags so// bcom ldan 'das 'jig tshogs sam/ 'jig tshogs kun 'byung ba spong bar 'tshal ba de ni yang dag pa'i mtha' spong bar bas te/ bcom ldan 'das bdag ni las dang po pa'i rigs kyi bu rnas dang / rigs kyi bu mo rnams la mngon par zhen pa ma mchis pa'i tshul gyis sangs rgyas kyi chos rnams bzung bar mi bgyi ba'am/ mngon sum mi bgyi ba dang / so so skye bo'i chos rnams lhag par mi dmigs pa 'am/ spang bar mi bgyi ba de lta bur chos ston pa lags na/ gdul ba las dang po pa rnams la bcom ldan 'das ji ltar chos ston par mdzad lags/ bka' stsal pa/ 'jam dpal nga ni gzugs rnam par 'jig pa med pa dang / skye ba med par chos ston to// tshor ba dang 'du shes dang 'du
- 130a
byed rnams dang / rnam par shes pa rnam par 'jig pa med pa dang / skye ba med par chos ston to// 'dod chags dang zhe sdang dang gti mug rnams rnam par 'jig pa med pa dang / skye ba med pa dang / bsam gyis mi khyab pa'i chos rnams kyang thob pa med par chos ston to// ngas ni 'di ltar chos gang yang mi bshig ma skyed pa de ltar bla na med pa yang dag par rdzogs pa'i byang chub mngon par rdzogs par sangs rgyas so// 'jam dpal sangs rgyas nyid ces bya ba de ni chos kyi dbyings kyi tshig bla dgas so// stobs rnams dang / mi 'jigs pa rnams dang / ma 'dres pa la thug par sangs rgyas kyi chos rnams gang yin pa de dag kyang chos kyi dbyings kho na yin par khong du chud par bya'o// ngas ni chos kyi dbyings la 'di lta ste/ so so'i skye bo'i chos rnams sam/ dgra bcom pa'i chos rnams sam/ rang sangs rgyas kyi chos rnams sam/ sangs rgyas kyi chos rnams kyang rung ste/ de dag tha dad par yang dag par rjes su ma mthong ngo // de ci'i phyir zhe na/ 'jam dpal dbyings de la ni bye brag med de/ 'di lta ste chos kyi dbyings so// chos kyi dbyings ni ma 'dres pa'i dbyings so// 'jam dpal 'di lta ste dper na/ chu klung ming tha dad pa dang / kha dog tha dad pa dang / ro tha dad pa rgya mtsho'i nang du bab pa rnams la ni/ 'di lta ste 'di ni gang ga'o zhe 'am/ si ta'o zhe 'am/ ya mu na'o zhes bye brag tu dbye ba 'am/ tha dad du byar mi nus/
- 130b
'jam dpal de bzhin du ming tha dad pa'i chos rnams chos kyi dbyings la 'di ni so so skye bos chos rnams so zhe 'am/ nyan thos dang rang sangs rgyas dang / byang chub sems dpa' dang / sangs rgyas kyi chos rnams so zhes tha dad par gdags par mi nus so// 'jam dpal 'di lta ste dper na/ 'bru'i phung po sna tshogs la 'di ni che ge mo zhig gi phung po'o// 'di ni che ge mo zhig go zhes gdags su yod pa bzhin/ chos kyi dbyings la ni 'di dag so so'i skye bo'i chos rnams so zhe'am/ nyan thos dang / rang sangs rgyas dang / byang chub sems dpa' dang / sangs rgyas kyi chos rnams so zhes tha dad par gdags par mi nus so// 'jam dpal 'di lta ste dper na/ 'bru'i phung po sna tshogs la ni 'di ni che ge mo zhig go zhes gdags su yod pa bzhin du/ chos kyi dbyings la ni 'di dag so so skye bo'i chos rnams so// 'di dag ni dgra bcom pa chos rnams so// 'di dag ni rang sangs rgyas kyi chos rnams so// 'di dag ni byang chub sems dpa'i chos rnams so// 'di dag ni rang sangs rgyas kyi chos rnams so zhes tha dad par gdags par mi nus so// 'di ni chos kyi dbyings te/ de ni 'di na 'dug go zhe 'am/ ga ge zhig na 'dug go zhes de ltar bstan pa 'am/ gdags par mi nus/ so// de ci'i phyir zhe na/ 'di ltar chos kyi dbyings ni bltar mi mthong zhing bstan du med de/ gdags par bya ba ma yin zhing gdags pa las yang dag par 'das pa'i phyir ro// /
- 131a
'gro ba 'di de lta bu'i dbyings yin par ngas ji skad bstan pa la gal te mtshams med pa byed pa de ltar mos te/ mtshams med pa yang de lta bu'i dbyings yin par shes nas de kun nas nyon mongs pa can du mi 'gyur ro// de ci'i phyir zhe na/ 'jam dpal mtshams med pa ni chos kyi dbyings dang mtshungs mnyam pa'i phyir te/ 'di ltar mtshams med pa'i dbyings dang / chos kyi dbyings ni gnyis su med cing gnyis su dbyer med de/ 'di la 'ong ba 'am 'gro ba 'am/ kun nas ldang ba mi dmigs so// bcom ldan 'das kyis de skad ces bka' stsal pa dang / 'jam dpal gzhon nur gyur pas bcom ldan 'das la 'di skad ces gsol to// bcom ldan 'das bdag gis kyang chos kyi dbyings ngan song du 'chi ba 'am/ mtho ris su 'chi ba 'am/ mya ngan las 'das par 'chi bar ma mthong lags so// bka' stsal pa/ 'jam dpal gal te la la zhig khyod la 'di skad du 'dri ste/ khyod kyi ston pa 'gro ba drug dang ldan pa'i 'khor ba ji ltar 'dogs shes de skad dris/ 'jam dpal khyod kyis ji skad lan gdab/ gsol pa/ bcom ldan 'das de skad smras na/ bdag gis 'di skad du lan gdab par bgyi ste/ dper na mi gnyid kyis log pa'i rmi lam du sems can dmyal ba 'am/ dud 'gro'i skye gnas sam/ yi dgas kyi yul lam/ lha ma yin gyi ris so//
- 131b
lha rnams sam/ mi rnams mthong na/ bcom ldan 'das ji ltar g.yar lam rmi ba'i mis sna tshogs mthong yang / g.yar lam sna tshogs ma mchis pa de bzhin du/ bdag gis 'gro ba tha dad pa bstan kyang chos kyi dbyings kyi ngo bo nyid ni tha dad par gdags par rngo mi thog ste/ de lta lags pas bcom ldan 'das bdag gis ni de skad ces lan gdab par dgyi lags so// bcom ldan 'das de bzhin du sangs rgyas rnams dang / byang chub sems dpa' rnams dang / rang sangs rgyas rnams/ dang / nyan thos rnams kyi yongs su mya ngan las 'das pa yang tha dad par gdags par rngo mi thog lags so// bcom ldan 'das de dag gi gnas pa dag kyang tha dad par gdags par rngo mi thog lags so// de ci'i slad du zhe na/ 'di ltar chos kyi dbyings la tha mi dad pa'i slad du lags so// bcom ldan 'das dper bgyi na// rgya mtsho chen po'i rin po che sna tshogs dang dang / man shel dang / byi ru la sogs pa tha ma dang / 'bring dang / mchog rnams la 'di ni rin po che che ge mo zhig go// 'di ni rin po che che ge mo zhig go zhes tha dad par gdags su mchi lags kyi/ chos kyi dbyings la ni de ltar tha dad par gdags pa rngo mi thog la/ gdags pa de la yang tha dad par dbyer ma mchis lags so// de la 'chi 'pho dang skye ba tha dad gdags pa rngo mi thog lags so// de ci'i slad du zhe na/ chos kyi dbyings la ni 'chi 'pho 'am/
- 132a
// skye ba 'am/ kun nas nyon mongs pa 'am/ rnam par byang ba ma mchis pa'i slad du lags so// chos kyi dbyings ni kun nas nyon mongs pa can ma lags/ chos kyi dbyings ni 'dres pa lags te/ chos kyi dbyings la gang dag spangs par bgyi ba 'am/ bskyed par bgyi ba'i chos de dag ma mchis lags so// de nas bcom ldan 'das kyis mkhyen bzhin du 'jam dpal gzhon nur gyur pa la 'di skad ces bka' stsal to// 'jam dpal khyod kyis chos kyi dbyings shes sam/ gsol pa/ gal te dmigs na bdag gis 'tshal lags so// bka' stsal pa/ 'jam dpal 'jig rten gang la spyod shes sam/ gsol pa/ bcom ldan 'das 'jig rten ni sgyu ma sprul pa'i mi gang kho na la spyod pa de/ de la spyod lags so// bcom ldan 'das 'jig rten zhes bgyi ba de ni ming tsam du bas te/ bdag gis ni gang bstan par bgyi 'jig rten gyi dngos po dang / 'jig rten gang la spyod pa yang dag par rjes su ma mthong lags so// bdag gis chos kyi dbyings las tha dad par yang dag par rjes su mthong lags so// de ci'i slad du zhe na/ ma mchis pa'i slad du lags so// bcom ldan 'das kyis 'jig rten gang la spyod ces bka' stsal pa/ gzugs kyi ngo bo nyid gang lags pa de la ni 'chi 'pho ba dang skye ba'ang ma mchis/ de la 'jigs pa 'am rab tu 'jig pa yang ma
- 132b
mchis na gang spyod par 'gyur lags/ de bzhin du tshor ba dang / 'du shes dang / 'du byed dang / rnam par shes pa rnams kyi ngo bo nyid gang lags pa de ni brtan ma mchis pa'i slad du skye ba 'am 'gag pa ma mchis la mtshan nyid gcig las mi 'da' ste/ 'di lta ste mtshan nyid gcig pa lags so// bka' stsal pa/ 'jam dpal 'di ji snyam du sems/ nga da ltar de bzhin gshegs pa dgra bcom pa yang dag par rdzogs pa'i sangs rgyas su gyur pa 'di la khyod 'di snyam du 'di yongs su mya ngan las 'da' bar 'gyur ba 'am/ mi snang bar 'gyur ro snyam du sems sam/ gsol pa/ bcom ldan 'das de ni ma lags so// de ci'i slad du zhe na/ chos kyi dbyings ni yang dag par grub pa ma mchis pa'i slad du lags so// bcom ldan 'das gal te chos kyi dbyings yang dag par grub pa zhig lags na ni/ de'i slad du de mi gda' bar yang 'gyur ba zhig na/ de la ni yang dag par grub pa mi dmigs pa ste/ de mi gda' ba 'am/ yongs su mya ngan las 'da' ba lta ga la 'gyur lags/ de bzhin gshegs pa ni de lta bu'i dbyings te/ de'i slad du bcom ldan 'das ni skyes pa yang ma lags/ yongs su mya ngan las 'da' yang mi 'gyur lags so// bcom ldan 'das kyis bka' stsal pa/ 'jam dpal 'o na khyod 'das pa'i de bzhin gshegs pa/ gang ga'i klung gi bye ma snyed po de dag yongs su mya ngan las 'das so zhes de la khyod ji ltar mos/ gsol pa/ gal
- 133a
te de dag gi skye ba yang dag par rjes su mthong na ni bdag mos lags so// bka' stsal pa/ khyod so so'i skye bo shi ba rnams nyid mtshams sbyor bar 'dod dam/ gsol pa/ bcom ldan 'das so so'i skye bo nyid kyang bdag gis yang dag par rjes su ma mthong ba ste/ mi dmigs na de'i nying mtsham sbyor ba lta ga la dmigs lags bka' stsal pa/ 'jam dpal de bzhin gshegs pa chos gnas par bzhed kyis// khyod spobs par gyis shig/ gsol pa/ ji zhig las brtsams te spobs par bgyi lags/ bka' stsal pa/ chos kyi dbyings las rtsoms shig/ gsol pa/ bcom ldan 'das gang chos kyi dbyings ma lags pa'i chos de bdag gis yang dag par rjes su ma mthong lags so// bka' stsal pa/ 'jam dpal mngon pa'i nga rgyal can skrag par 'gyuraro// gsol ba/ bcom ldan 'das gal te/ yang dag pa'i mtha' skrag par 'gyur na ni/ de'i slad du mngon pa'i nga rgyal can rnams kyang skrag par 'gyur lags so// de ci'i slad du zhe na/ bcom ldan 'das yang dag pa'i mtha' yang gzhan la/ mngon pa'i nga rgyal ba yang gzhan pa ni ma lags kyi/ mngon pa'i nga rgyal rnams kyi mtha gang lags pa'i de nyid yang dag pa'i mtha' lags la/ yang dag pa'i mtha' gang lags pa de yang chos thams cad kyi mtha' lags te/ de'i slad du mi skrag
- 133b
lags so// chos thams cad yang dag pa ma sbubs pa zhes bgyi ba 'di ni rdo rje'i gzhi lags so// bcom ldan 'das kyis bka' stsal pa/ 'jam dpal ci'i phyir na/ 'di rdo rje'i gzhi zhes bya/ gsol pa/ bcom ldan 'das chos thams cad ni mi phyed pa lags te/ de'i slad du 'di rdo rje'i gzhi lags so// de bzhin gshegs pa bsam gyis mi khyab pa'i slad du/ chos thams cad bsam gyis mi khyab pa 'di ni rdo rje'i gzhi lags te/ ci'i slad du rdo rje'i gzhi zhes bgyi zhe na/ chos thams cad sems ma mchis pa'i slad du lags so// chos thams cad byang chub ces bya ba 'di ni rdo rje'i gzhi lags te/ de ci'i slad du zhe na/ chos thams cad ni brjod du ma mchis pa'i slad du ste/ 'di ni ming gang dang gang gis/ chos gang dang gang brjod pa'i chos de dang de/ chos de dang de la ma mchis lags so// gang ma mchis pa de ni stong pa lags so// gang stong pa de ni med pa lags so// gang med pa de ni brjod pa'i rngo mi thogs lags so// brjod du ma mchis pa ni byang chub lags te/ de'i slad du 'di ni rdo rje'i gzhi lags so// chos thams cad ni de bzhin gshegs pa'i yul lags te/ 'di ni rdo rje'i gzhi lags so// bka' stsal pa/ ci dzi rje gzhi zhes bya/ gsol pa/ bcom ldan 'das chos thams cad ni rang gi yul las dben pa lags te/ rtsa'i slad du 'di rdo// jig ga lags so//
- 134a
bka' stsal pa/ 'jam dpal dge slong kun dga' bo de yang chos kyi rnam grangs 'di kun 'dzin par 'gyur na/ 'dir 'ong mtshan ma ngas bya 'am/ gsol pa/ bcom ldan 'das 'di ni chos brjod pa 'am/ bstan pa mchis lags sam/ bdag gis ni yi ge cig kyang bstan par yang dag par rjes su ma mthong lags na/ mang po lta ga la mthong lags/ bka' stsal pa/ 'jam dpal legs so legs so// 'jam dpal khyod kyis 'di skad du/ 'chad pa ni khyod kyi tshig 'di legs par smras pa yin te/ 'jam dpal khyod legs so// 'jam dpal ngas ni phyogs bcu'i 'jig rten gyi khams dpag tu med// grangs med pa dag na/ de bzhin gshegs pa dgra bcom pa yang dag par rdzogs pa'i sangs rgyas rnams chos nyid 'di kho na ston cing bzhags pa dag mthong ngo // de nas tshe dang ldan pa sha ri'i bu rang gi gnas khang nas byung nas/ 'jam dpal gzhon nur gyur pa'i gnas khang ga la ba der song ste phyin nas/ 'jam dpal gzhon nur gyur pa ma mthong ste/ bcom ldan 'das kyi bzhugs khang ga la ba der song nas/ bzhugs khang gi phyi sgo na 'greng ba dang / gsung ba'i gsung thos so// de nas bcom ldan 'ad kyis 'jam dpal gzhon nur gyur pa la 'di skad ces bka' stsal to// 'jam dpal dge slong sha ri'i bu 'di gnas khang gi sgo phyin 'greng ba dang / chos nyan par
- 134b
'dod na/ 'jam dpal sha ri'i bu chos nyan par nang du 'ong bar gyis shig/ gsol pa/ mtha' 'di ni yang dag pa'i mtha' lags na/ gang gi slad rol dang / nang dang gnyi ga ma mchis par gda' lags sam bka' stsal pa/ 'jam dpal de ni ma yin no// gsol pa/ bcom ldan 'das de lta lags pas yang dag pa'i mtha' ni mtha' ma mchis pa lags te/ de lta bu'i mtha' gang lags pa de la ni tshur mchi ba 'am/ phar mchi ba ma mchis te/ bcom ldan 'das de lta bu'i mtha' can gyi btsun pa sha ri'i bu de ni tshur mchi ba 'am/ nang du mchi ba mi rigs lags so// bka' stsal pa/ 'jam dpal gal te nga gnas khang gi nang na nyan thos dag dang lhan cig tu gtam zer zhing 'dag la/ khyod ni phyi rol na 'dug te/ nang du yang mi dbang na/ ci khyod sdug bsngal bar mi 'gyur ram/ gsol pa/ bcom ldan 'das de ni ma lags te/ de ci'i slad du zhe na/ chos thams cad ni chos kyi dbyings su yang dag par 'du ba'i slad du ste/ 'di ni de bzhin gshegs pa zhes brjod pa gang lags pa 'di yang chos kyi dbyings lags te mtshan nyid gcig pa'i slad du/ de bzhin gshegs pa yang gzhan la/ chos kyi dbyings kyang gzhan ma lags so// chos sam/ chos bstan pa zhes bgyi ba 'am/ chos nyan pa zhes bgyi ba'i chos 'di dag kyang gnyis su ma mchis pa'i slad
- 135a
du tha dad pa ma mchis te/ de ci'i slad du yang chos kyi dbyings las tha dad pa ma lags so// 'jam dpal zhes bgyi ba'i yi ge gang lags pa 'di dag nyid kyang chos dbyings su gtogs te/ bcom ldan 'das rnam grangs des na bdag chud zad kyang gdung ba ma mchis lags so// bcom ldan 'das bskal pa gang ga'i klung gi bye ma snyed du chos stan du lags kyang / bdag der mchi yang mi mchi/ der mchir dga' ba 'am/ yongs su gdung ba yang mi skye lags so// de ci'i slad du zhe na/ bcom ldan 'das gnyis shig mchis na ni mi dga' ba 'am/ yongs su gdung ba skye bar 'gyur na/ chos kyi dbyings de ni gnyis su ma mchis te/ de'i slad du bdag dga' ba 'am/ yongs su gdung ba mi 'gyur lags so// bcom ldan 'das chos ston pa mdzad pa// chos bstan pa des kyang / chos gang yang sogs pa'am/ 'bri ba 'am/ 'phel ba 'am/ 'grib pa mi bgyid de/ 'di ltar chos bstan pa de ni gang yang dmigs pas nye bar gnas pa ma lags te/ bcom ldan 'das de'i slad du yang bdag dga' bar mi 'gyur zhing / yongs su gdung bar mi 'gyur lags so// de nas bco ldan 'das kyis tshe dang ldan pa sha ri'i bu la bka' stsal pa/ sha ri'i bu khyod kyis 'jam dpal gzhon nur gyur pa'i spobs pa thos sam/ gsol pa/ bcom ldan
- 135b
'das thos lags te/ bcom ldan 'das ni bcom ldan 'das dang / 'jam dpal gzhon nur gyur pa'i spobs pa thos kyang ci ma rung snyam ste/ de'i slad du bdag 'di na mchis lags so// de nas 'jam dpal gzhon nur gyur pas 'di skad ces gsol to// bcom ldan 'das tshe dang ldan pa sha ri'i bu nang du mchi bar mdzad du gsol/ de nas bcom ldan 'das kyis tshe dang ldan pa sha ri'i bu la 'di skad du/ sha ri'i bu khyod gnas khang gi nang du shog ces bka' stsal to// de nas tshe dang ldan pa sha ri'i bu gnas khang du 'ongs na/ bcom ldan 'das kyi zhabs la phyag 'tshal te/ phyogs gcig tu 'dug go// phyogs gcig tu 'dug pa dang / tshe dang ldan pa sha ri'i bu la 'jam dpal gzhon nur gyur pas 'di skad ces smras so// btsun pa sha ri'i bu khyod don gyi dbang gang mthong bas 'dir 'ongs/ smras pa/ 'jam dpal kho bo ni chos nyan par 'dod pa'i phyir 'dir 'ongs te/ 'di ltar gang na bcom ldan 'das dang / skyes bu dam pa khyod lta bu gnas pa de na bstan pa zab mo yang dag phul du byung ba yod de/ de'i phyir kho bo 'ongs so// smras pa/ btsun pa sha ri'i bu de ni de bzhin te/ bstan pa 'di ni zab po// smras pa/ bcom ldan 'das nyid dang thabs cig tu brtsam pa'i chos bsta/ pa de tsam du zab/ smras pa/ de ni btsun pa sha ri'i bus rtogs par mi 'gyur te/ dgra bcom pa zag pa zad pa ni chos bstan pa 'di'i snod ma yin no// de ci'i phyir zhe na/ 'di
- 136a
ltar chos bstan pa 'di ni so so skye bo'i chos la zhugs pa ma yin/ dgra bcom pa nyid kyi chos la zhugs pa ma yin/ rang sangs rgyas kyi chos la zhugs pa ma yin/ de bzhin gshegs pa'i chos la zhugs pa yin pa'i phyir ro// 'di ni chos gang dmigs pa'i phyir yang zhugs pa ma yin no// 'di ni gang du yang zhugs pa 'am/ ldog pa yang med de/ chos thams cad shin tu dben pa'i phyir ro// smras pa/ 'jam dpal khyod kyi ci las bsams te/ dgra bcom pa zag pa zad pa/ chos bstan pa 'di'i snod ma yin zhes de skad smra/ smras pa/ btsun pa sha ri'i bu dgra bcom pa nyid ni 'dod chags dang / zhe sdang dang / gti mug zad pa yin na/ de gang gi snod yin zhing de gang de gang ji lta bu zhig gi snod du 'gyur snyam ste/ de las bsams nas/ dgra bcom pa zag pa zad pa/ chos bstan pa 'di'i snod ma yin no zhes kho bo de skad smra'o// smras pa/ 'jam dpal kho bo ni chos bstan pa 'di'i don du gtsug lag khang nas gtsug lag khang dang / gnas khang nas gnas khang dang / phug nas phug tu khyod tshol te/ bdag gis khyod la zab la zab pa yang dag pa'i spobs pa 'di lta bu dag thob kyang ci ma rung snyam ste/ 'jam dpal kho bo ni bcom ldan 'das dang / khyod kyis chos bstan pa la chog mi shes so// smras pa/ btsun pa sha ri'i bu khyod chos bstan pas chog mi shes sam/ smras pa/ kho bo tshig mi shes so// smras pa/
- 136b
btsun pa sha ri'i bu ci chos kyi dbyings chos tshol bar byed dam/ smras pa/ 'jam dpal mi byed do// smras pa/ chos kyi dbyings kyang gzhan la/ tshe dang ldan pa sha ri'i bu ni gzhan pa ni ma yin na/ ci'i phyir tshe dang ldan pa sha ri'i bu chos nyan pa la chog mi shes/ de ci'i phyir zhe na/ btsun pa sha ri'i bu chos kyi dbyings ni chos tshol bar mi byed pa'i phyir ro// gal te de tshol bar byed na ni/ de'i phyir de chog shes par 'gyur ba zhig na/ gang gi phyir tshol bar mi byed pa de'i phyir chog mi shes so// smras pa/ 'jam dpal de bzhin gshegs pa ma gtogs par kho bo lta bu chos nyan pa de lta bu khyod kyi ga la rnyed/ smras pa/ btsun pa sha ri'i bu khyod sha ri'i bu yongs su mya ngan las 'da' ba'i chos can yin par mos sam/ smras pa/ mos so// smras pa/ ji ltar mos/ smras pa/ chos thams cad yongs su ma grub pas na/ kho bo yang yongs su mya ngan las mi ba'i chos can yin no snyam du de ltar mos so// smras pa/ btsun pa sha ri'i bu khyod shi 'phos pa med pa dang / skye ba med pa'i chos can yin par mos sam/ smras pa mos so// smras pa/ ji ltar mos/ smras pa/ chos kyi dbyings su rtogs pa'i phyir te/ chos kyi dbyings la 'chi 'pho 'am/ skye ba med pa de ltar mos so// btsun pa sha ri'i bu khyod dgra bcom pa zag pa zad pa/ mi shes pa dang ldan par mos sam/ smras pa/ mos so// ji ltar mos/ smras pa/ shes
- 137a
pa dang / mi shes pa mnyam pa nyid kyi phyir/ dgra bcom pa zag pa zad pa/ mi shes pa dang ldan te/ 'di ltar mi shes pa dang / shes pa ni mi shes pa'i chos can yin pa'i phyir dben pa ste/ de bas na mi shes pa dang / shes pa rnam par mi rtog pa'i phyir/ dgra bcom pa/ zag pa zad pa/ mi shes pa dang ldan par mos so// smras pa/ btsun pa sha ri'i bu khyod dgra bcom pa/ zag pa zad pa/ shes pa dang bral bar mos sam/ smras pa/ mos so// smras pa ji ltar mos/ smras pa/ 'di ltar chos thams cad ni ngo bo nyid dang bral ba ste/ de bas na dgra bcom pa zag pa zad/ shes pa dang bral bar mos so// smras pa/ btsun ba sha ri'i bu khyod dgra bcom pa zag pa zad pa/ rnam par grol ba'i chos can mos sam/ smras pa/ mos so// smras pa ji ltar mos/ smras pa/ nyon mongs pa med pa'i phyir te/ 'di ltar nyon mongs pa med na gang dag las rnam par grol bar 'gyur te/ de ltar mos so so// smras pa/ btsun pa sha ri'i bu khyod sngon gyi de bzhin gshegs pa rnams ma byung zhing yongs su mya ngan las 'das par mos sam/ smras pa/ mos so// smras pa ji ltar mos/ smras pa/ 'jam dpal bsams kyis mi khyab pa'i dbyings la ni skye ba med de/ gang mi skye ba de la ni mi snang bar 'gyur ba 'am/ yongs su mya ngan las 'da' bar 'gyur ba ga la yod de/ de ltar mos so//
- 137b
smras pa/ btsun pa sha ri'i bu khyod sangs rgyas nyid thams cad gcig yin par mos sam/ smras pa mos so// smras pa ji ltar mos/ smras pa/ 'jam dpal chos kyi dbyings la ni tha dad pa med de de lta mos so// smras pa/ btsun pa sha ri'i bu khyod sangs rgyas kyi zhing thams cad/ sangs rgyas kyi zhing gcig yin par mos sam/ smras pa/ mos so// smras pa/ ji ltar mos/ smras pa/ 'jam dpal sangs rgyas kyi zhing thams cad ni mi zad pa/ nyid kyi zhing yin te/ de ltar mos so// smras pa/ btsun pa sha ri'i bu khyod chos thams cad yongs su shes par bya ba ma yin pa dang / spang bar bya ba ma yin pa dang / mngon sum du bya ba ma yin pa dang / bsgom par bya ba ma yin pa dang / mos sam/ smras pa/ mos so// smras pa/ ji ltar mos/ smras pa/ 'jam dpal ngo bo nyid kyis ngo bo nyid yongs su mi shes pa dang / rang bzhin gyis rang bzhin spong ba dang / mngon sum du mi byed pa dang / bsgom par mi byed pa dang / 'gag par mi byed pa dang / len par mi byed pa dang / 'dor bar mi byed pa dang / mtha' de ni mi gnas pa nyid de/ de ltar mos so// smras pa/ btsun pa sha ri'i bu khyod chos kyi dbyings ni phung por mi 'dug pa'i dbyings yin pa dang / chos gang yang skye ba 'am/ 'gag pa med pa dang / chos gang yang phur por 'dug par mos sam/ smras pa/ mos so// smras pa/
- 138a
ji ltar mos/ smras pa/ 'jam dpal chos gang la skye ba 'am/ 'gag pa 'am/ phung por 'dug te mi dmigs te/ de ltar mos so// smras pa/ btsun pa sha ri'i bu khyod shes rab gang yin pa de chos kyi dbyings yin la/ chos kyi dbyings gang yin pa de shes rab yin te/ chos dbyings shes bya ba'i ming yang thob pa dang / de'i phyir dgra bcom pa zhes bya bar mos sam/ smras pa/ mos so// smras pa/ ji ltar mos/ smras pa/ 'jam dpal rtogs par 'gyur ba'i shes rab kyis dgra bcom pa nyid du 'gyur ba de bzhin du/ chos kyi dbyings yongs su shes par zad kyi/ chos kyi dbyings ni 'dod chags kyi bdag nyid dam/ zhe sdang gi bdag nyid dam/ gti mug gi bdag nyid kyang ma yin la/ chos kyi dbyings las kyang dgra bcom pa gud na med de/ de ltar mos so// smras pa/ btsun pa sha ri'i bu khyod chos thams cad sangs rgyas kyi khyu mchog dang mnyam par mos sam/ smras pa/ mos so// smras pa/ ji ltar mos/ smras pa/ 'jam dpal 'di ltar bcom ldan 'das kyis ni/ chos thams cad rang bzhin gyis dben par mngon par rdzogs par sangs rgyas te/ de ltar mos so// smras pa/ btsun pa sha ri'i bu khyod kyi yul ji tsam du khyod kyis lan btab pa legs so// legs so// de tsam zhig khyod la
- 138b
dris kyis da ni rang gi gnas su song shig/ sha ri bus smras pa/ 'jam dpal 'di ltar 'di nyid ni ji srid mtsho'i bar gyi gnas yin no// de nas bcom ldan 'das kyis tshe dang ldan pa sha ri'i bu la bka' stsal pa/ sha ri'i bu rigs kyi bu 'am/ rigs kyi bu mo gang la la chos kyi rnam grangs 'di 'dzin pa 'am/ 'chang ba 'am/ klog pa'am/ kun chub par byed pa des ni/ spobs pa myur du thob par 'gyur ro// gsol pa/ bcom ldan 'das de ni de lta lags te/ ji skad bka' stsal pa bzhin du/ rigs kyi bu 'am/ rigs kyi bu mo gang dag gi slad du/ chos kyi phyag rgya 'di bzhag pa de dag ni/ sngon gyi rgyal ba rnams la bgyi ba bgyis pa lags te/ de dag de ltar rigs par bgyi'o// de nas bcom ldan 'das la tshe dang ldan pa sha ri'i bus 'di skad ces gsol to// bcom ldan 'das chos kyi rnam grangs 'di'i ming ci lags/ 'di ji ltar bzung bar bgyid/ de skad ces gsol pa dang / bcom ldan 'das kyis tshe dang ldan pa sha ri'i bu la 'di skad ces bka' stsal to// sha ri'i bu de'i phyir khyod kyi chos rnam grangs 'di/ 'jam dpal gzhon nur gyur pas zhus nas/ ngas lan btab pa zhes bya bar zung shig/ chos kyi dbyings zhes bya bar yang zung shig/ yang dag pa'i mtha' zhes bya ba dang / rin po che'i mtha' shes bya bar yang zung shig/
- 139a
sha ri'i bu rigs kyi bu 'am/ rigs kyi bu mo gang dag chos kyi rnams grangs 'di 'dzin pa dang / 'chang ba dang / klog pa dang / kun chub par byed pa dang / sgom par sbyor ba la brtson par gnas pa de dag ni/ rin po che dang 'dra ba yin te/ mi skye ba'i chos rnams la bzod pa myur du thob par 'gyur ro// gzhan dag la yang dge ba'i rtsa ba rnams yang dag par bskyed par 'gyur ro// chos nyung ngu kun chub par byas pas kyang / chos mang po ston par 'gyur ro// spobs pa mi chod par yang 'gyur ro// bcom ldan 'das kyis de skad ces bka' stsal nas/ 'jam dpal gzhon nur gyur pa dang / tshe dang ldan pa sha ri'i bu dang / lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do// / / 'phags pa rin po che'i mtha' zhes bya ba theg pa chen po'i mdo// rdzogs s+ho// rgya gar gyi mkhan po prang nye bar ba ma dang / zhu chen gyi lo tsa ba ban de ye shes sde la sogs pas/ sgyur zhing zhus te gtan la phab pa// rgya gar skad du/ ar+ya shrI ba su pa ri brid cha na ma ma hA ya na su tra/ bod skad du/ 'phags pa dpal dbyig gis zhus pa zhes bya ba theg pa chen po'i mdo/ sangs rgyas dang /
Colophon
'phags pa rin po che'i mtha' zhes bya ba theg pa chen po'i mdo// rdzogs s+ho// rgya gar gyi mkhan po prad nya bar ba ma dang/ zhu chen gyi lo tsa ba ban de ye shes sde la sogs pas/ sgyur zhing zhus te gtan la phab pa/