chos kyi dbyings su bstod pa
Dharmadhatustapa
Text
ff. 384a–389b · 12 folio sides
- 384a
des ni 'gro ba ma lus rnams// mtshan ma'i 'ching las grol gyur cig/ 'jig rten las 'das par bstod pa// slob dpon/ klu grub kyis mdzad pa rdzogs s+ho// / rgya gar gyi mkhan po kri sna ban bi da dang / lo tsa ba dge slong tshul khrims rgyal bas bsgyur cing zhus te gtan la phab pa// rgya gar skad du/ d+harma d+ha du sta ga/ bod skad du// chos kyi dbyings su bstod pa/ 'jam dpal gzhon nur gyur pa la phyag 'tshal lo// gang zhig kun tu ma shes na// srid pa gsum du rnam 'khor la// sems can kun la nges gnas pa'i// chos kyi dbyings la phyag 'tshal 'dud// gang zhig 'khor ba'i rgyur gyur pa// de nyid sbyang ba byas pa las// dag pa de nyid mya ngan 'das// chos kyi sku'ang de nyid do// ji ltar 'o ma dang 'dres pas// mar gyi snying po mi snang ba// de bzhin nyon mongs dang 'dres pas// chos kyi dbyings kyang mi mthong ngo // ji ltar 'o ma rnam sbyangs pas/ mar gyi snying po dri med 'gyur// de bzhin nyon mongs rnam sbyangs pas// chos dbyings shin tu dri med 'gyur// ji ltar mar me bum nang gnas// cung zhig snang bar mi 'gyur ba// de bzhin nyon mongs bum nang gnas// chos kyi dbyings kyang mi mthong ngo // phyogs ni gang dang gang dag nas// bum pa bug gtod gyur pa'i// deng /
- 384b
de'i phyogs nyid nas/ 'od kyi rang bzhin 'byung bar gyur// gang tshe ting 'dzin rdo rje yis// bum pa de ni bcag gyur pa// de tshe de ni nam mkha' yi// mthar thug bar du snang bar byed// chos kyi dbyings ni skye ma yin// nam yang 'gag par 'gyur ba med// dus rnams kun tu nyon mongs med// thog ma par mthar dri ma bral// ji ltar rin chen bai DUr+ya// dus rnams kun tu 'od gsal yang // rdo'i nang na gnas gyur no// de'i 'od ni gsal ma yin// de bzhin nyon mongs kyis bsgribs pa'i// chos dbyings shin du dri med pa'ang // 'khor bar 'od ni gsal ma yin// mya ngan 'das na 'od gsal 'gyur// khams yod pa ni las byas pas// sa le sbram dag mthong bar 'gyur// khams med par ni las byas na'ang // nyon mongs 'ba' zhig skyed par byed// ji lta na spun mas g.yogs gyur pas// so ba 'bras bu mi 'dod ltar// de bzhin nyon mongs kyis g.yogs pas// de ni sangs rgyas zhes mi brtag/ ji ltar sbran pa las grol na// 'bras nyid snang bar gyur pa ltar/ de bzhin nyon mongs las grol na// chos kyi sku nyid rab tu gsal// chu shing dngos po med do zhes// 'jig rten na ni dper byed kyang // de'i 'bras bu snying po nyid// dngar po za bar byed pa ltar// snying po med pa'i 'khor ba las// nyon mongs gzeb dang bral gyur na// de'i 'bras bu sangs rgyas nyid // lus can kun gyi
- 385a
bdud rtsir 'gyur// de bzhin sa bon thams cad las// rgyu dang 'dra ba'i 'bras bu 'byung // sa bon med par 'bras yod par// shes ldan gang gis bsgrubs par nus// sa bon 'gyur khams de bzhin nyid// chos rnams kun gyi rten du 'dod// rims kyis spangs par gyur pa las// sangs rgyas go 'phang 'thob par 'gyur// dri med nyi ma zla ba yang // sprin dang khug rna du ba dang // sgra gcan gdong dang rdul la stsogs// bsgrib pa lnga yis bsgribs par gyur de bzhin 'od gsal ba yi sems// 'dod dang gnod sems le lo dang // rgod pa dang ni the tsom ste// bsgrib pa lnga yis bsgribs par 'gyur// ji ltar me yis dag pa'i gos// sna tshogs dri mas dri ma can// ji ltar me yi nang bcug na// dri ma tshig gyur gos min ltar// de bzhin 'od gsal ba yi sems// 'dod chags las skyes dri ma can// ye shes me yis dri ma sreg/ de nyid 'od gsal ma yin no// stong pa nyid ni ston pa'i mdo// rgyal bas ci snyed gsungs pa de// de dag kun gyis nyon mong ldog/ khams de nyams par byed ma yin// sa yi dkyil na yod pa'i chu// dri ma med par gnas pa ltar// nyon mongs nang na ye shes kyang // de bzhin dri ma med par gnas// chos dbyings gang phyir bdag ma yin// bud med ma yin skyes pa min// gzung ba kun las rnam grol ba// ji ltar bdag ces brtag par bya// chags
- 385b
pa med pa'i chos sku la// bud med skyes pa dmigs ma yin// 'dod chags kyis mdongs 'dul bya'i phyir// bud med skyes pa zhes rab bstan// mi rtag sdug bsngal stong pa zhes// bya ba gsum pos sems sbyong byed// mchog tu sems ni sbyong byed pa'i// chos ni rang bzhin med pa yin// ji ltar sbrum ma'i lto na bu// yod kyang mthong ba ma yin pa// de bzhin nyon mongs kyis g.yogs pa'i// chos kyi dbyings kyang mthong ma yin// bdag dang bdag gi rnam rtog dang / ming gi 'du shes rgyu mtshan gyis// rnam rtog bzhi po 'byung ba yang // 'byung dang 'byung las gyur las so// sangs rgyas rnams kyi smon las yang // snang ba med cing mtshan nyid med// so so rang rig spong ltar nyid// sangs rgyas rtag pa'i chos nyid can// ji ltar ri bong 'go yi rA// brtags pa nyid de med pa ltar// de bzhin chos rnams thams cad kyang // brtags pa nyid de yod ma yin// phra rab rdul gyi ngo bo yis// glang gi rwarA yang dmigs ma yin// ji ltar sngon bzhin phyis de bzhin// de la ci zhig rtag par bya// brten nas 'byung bar 'gyur ba dang // brten nas 'gag par gyur pas na// gcig kyang yod pa ma yin na// byis pa ji ltar rtog par byed// ri bong ba lang rwa mi dpes// ji ltar bde gshegs chos rnams nyid// dbu ma nyid du sgrub par byed// ji ltar nizla skar ma'i gzugs// dang ba'i snod kyi chu nang du/
- 386a
gzugs brnyan mthong bar gyur pa ltar// mtshan nyid rdzogs pa'ang de dang 'dra// thog ma bar dang mthar dge ba// slub med cing brtan pa yi// gang zhig de ltar bdag med la// ji ltar bdag dang bdag rig brtan// ji ltar sos ga'i dus su chu// dro'o zhes ni brjod par byed// de nyid drang ba'i dus su ni// grang ngo zhes ni brjod pa yin// nyon mongs dra bas g.yogs pa na// sems zhes brjod par bya ba yin// de nyid nyon mongs bral gyur na/ sangs rgyas zhes ni brjod par bya// mig dang gzugs la brten nas ni// dri ma med pa'i snang ba 'byung // skye med 'gag pa med nyid las// chos kyi dbyings ni rang du shes// sgra dang rna ba la brten nas// rnam par dag pa'i shes pa gsum// mtshan nyid med pa'i chos kyi dbyings// rtog dang bcas pas thos par 'gyur// sna dang dri la brten nas snom// de ni gzugs su med pa'i dpes// de bzhin sna'i rnam shes kyis// chos kyi dbyings la rtog par byed// lce'i rang bzhin stong pa nyid// ro'i khams kyang bden pa ste// chos kyi dbyings kyi ngo bo yis// rnam par shes pa gnas med pa// dag pa'i lus kyi ngo bo dang // reg bya rkyen gyi mtshan nyid dag/ rkyen dag las ni grol gyur pa// chos kyi dbyings zhes brjod par bya// yid gtsor gyur pa'i chos rnams la// rtog dang brtog
- 386b
pa rnam spangs nas// chos rnams rang bzhin med pa nyid// chos kyi dbyings su bsgom par bya// mthong dang thos dang bsnams pa dang // myangs dang reg par gyur pa dang // chos rnams de ltar rnal 'byor pas// shes nas mtshan nyid rdzogs pa yin// mig dang rna ba sna dag dang // lce dang lus dang de bzhin yid// skye mched drug po rnam dag pa// 'di nyid de nyid mtshan nyid do// sems nyid rnam pa gnyis su mthong // ji ltar 'jig rten 'jig rten 'das// bdag tu 'dzin las 'khor ba ste// so sor rig na de nyid de// 'dod chags zad pas mya ngan 'das// zhe sdang gti mug zad pa dang // de dag 'gags pas sangs rgyas nyid// lus can kun gyi skyabs nyid do// shes dang mi shes pa dag las// lus 'di nyid la thams cad de// rang gi rnam par rtog pas bcings// bdag nyid shes nas grol bar 'gyur// byang chub ring min nye ba min// 'gro min 'ong ba ma yin zhing // nyon mongs gzeb gyur pa'i nyid la// mthong ba dang ni ma mthong yin// shes rab mar me la gnas nas// mchog tu zhi bar 'gyur ba yis// bdag la rtags pas gnas bya zhe// mdo sde'i tshogs las gsungs pa lags// stobs bcu'i stobs kyis byis pa rnams// byin brlabs zla ba tshos pa bzhin// nyon mongs can gyi sems can gyis/
- 387a
de bzhin gshegs pa mi mthong ngo // ji ltar yi dwags rnams kyis ni// rgya mtsho skams par mthong ba ltar// de bzhin mi shes/ pas bsregs pas// sangs rgyas rnams ni med par brtags// dman dang bsod nams dman pa la// bcom ldan 'das kyis ci bgyir mchis// ji ltar dmus long lag pa ru// rin chen mchog ni gzhag pa 'dra// sems can bsod nams byas rnams la// 'od kyis gsal zhing dbang ldan pa'i// sum cu rtsa gnyis mtshan 'bar ba// sangs rgyas de'i mdun na gnas// mgon po de'i gzugs kyi skus// bskal pa mang por bzhugs nas kyang // gdul bya rnams ni gdul ba'i phyir// dbyings nyid tha dad gyur pa lags// sems kyis yul ni nges rtogs nas// des ni shes pa 'jug par 'gyur// so so rang rig rnam dag na// / sa rnams de'i bdag nyid gnas// dbang phyug chen po gnas mchog dang // 'og min nyid de rnam mdzes pa// shes pa gsum po cig nyid du// 'dres par gyur pa bdag smra'o// byis pa'i nang na yongs mkhyen dang // 'phags pa'i nang na sna tshogs nyid// dbang phyug chen po'i tshe dpag med// bskal pa tshe'i rgyud gang yin// phyi rol sems can khams kyi yang // dpag tu med pa'i bskal par ni// tshe yang gang gis bsrung gyur cing // srog chags rnams kyi srog gnas pa'i// rgyu'ang mi zad pa
- 387b
de nyid// gang gi 'bras bu mi zad gang // snang ba med pa'i bye brag gis// shes rab don du rab tu 'jug/ byang chub ring bar mi bsam zhing // nye bar yang ni bsam/ mi bya// yul drug snang ba med par na// yang dag ci bzhin rig gyur pa// ji ltar 'o ma dang 'dres chu// snod cig la ni gnas pa las// ngang pas 'o ma 'thung byed cing // tshu ni ma yin de bzhin gnas// de bzhin nyon mongs kyis g.yogs nas// ye shes lus 'dir ci nas kyang // rnal 'byor pa yis ye shes len// mi shes pa ni 'dor bar byed// bdag dang bdag gi zhes 'dzin pas// ji srid phyi rol rnams rtags pa// bdag med rnam pa gnyis mthong na// srid pa'i sa bon 'gag par 'gyur// gang phyir sangs rgyas mya ngan 'das// gtsang ba rtag pa dge ba'i gzhi// gang phyir gnyis ni byis pas brtags// de'i gnyis med rnal 'byor gnas// dka' spyod sna tshogs sbyin pa dang // tshul khrims sems can don bsdud dang // sems can phan byed bzod pa ste// gsum po 'dis ni khams rgyas 'gyur// chos rnams kun la brtson 'grus dang // bsam gtan la sems 'jug pa dang // rtag tu shes rab brten pa ste// 'di yang byang chub rgyas byed yin// thabs dang bcas pa'i shes rab dang // smon lam rnam par sbyangs pa dang // stobs la nges gnas ye shes de// khams rgyas byed pa'i chos bzhi yi// byang chub sems phyag mi bya zhes// smra ba ngan
- 388a
par smra ba ste// byang chub sems dpa' ma byung bar// chos kyi sku ni 'byung ma yin// bur shing sa bon la sdang gang // khar spyad par 'dod/ pa des// bu shing sa bon med par ni// kha ri 'byung bar 'gyur ma yin// bur shing sa bon gang bsrungs nas// nye bar gnas shing bsrungs pa las// bu ram kha ra sa rnams ni// de las 'byung bar 'gyur ba ltar// byang chub sems 'di rab bsrungs nas// nye bar gnas shing bsrungs pa las// dgra bcom rkyen rtogs sangs rgyas rnams// de las skye zhing 'byung bar 'gyur// ji ltar sa lu'i sa bon stsogs// zhing las bsrung ba byed pa ltar// de bzhin theg mchog mos rnams la'ang // 'dren pa rnams kyis bsrung bar mdzad// ji ltar mar ngo'i bcu bzhi la// zla ba cung zad mthong ba ltar// de bzhin theg mchog mos rnams la'ang // sangs rgyas sku ni cung zhig mthong // ji ltar ches pa'i zla ba la// skad cig skad cig rgyas par mthong // de bzhin sa la zhugs rnams kyang // rim gyis rim gyis 'phel bar mthong // ji ltar yang ngo'i bco lnga la// zla ba rdzogs par 'gyur ba ltar// de bzhin sa'i mthar thug na// chos kyi sku yang rdzogs shing gsal// sangs rgyas chos dang dge 'dun la// rtag tu mos pa brtan po yis// sems de yang dag bskyed byas nas// phyir mi ldog pa yang yang 'byung // nag po'i gzhi ni
- 388b
yongs spangs nas// dkar po'i gzhi ni rab bzung bas// de tshe de ni nges rtogs pa// dga' ba zhes ni mngon par brjod// 'dod chags la sogs sna tshog/ pa'i// dri mas rab tu dri la can// dri ma med pas gang dag pa// dri ma med ces brjod pa yin// nyon mongs dra ba rab 'gags nas// dri med shes rab rab gsal bas// tshad med pa yi mun pa dag/ sel bar byed pas 'od byed pa'o// rtag tu dag pa'i 'od kyis gsal// 'du 'dzi rnam par spangs pa yi// ye shes 'od kyis rab bskor bas// sa de 'od 'phro can du 'dod// rig dang rgyu rtsal bzo gnas kun// bsam gtan rnam pa sna tshogs nyid// nyon mongs shin tu spyad dka' las// rnam par rgyal bas spyadra dkar 'dod// byang chub rnam pa gsum po dang // phun sum tshogs kun bsdu ba dang // skye dang 'jig pa zab pa la// sa de mngon du gyur par 'dod// 'khor lo'i bkod pas rnam kun du// 'od kyi dra ba rtse ba dang // 'khor ba'i mtsho'i 'dam rgal bas// de la ring du song zhes/ bya// sangs rgyas kyis nges 'di bzung zhing // ye shes rgya mtshor zhugs pa dang // 'bad med lhun gyis grub 'gyur bas// bdud kyi 'khor gyis mi g.yos pa'o// so so// yang dag rig kun la// chos ston pa yi 'brel pa'i gtam// rnal 'byor pa de mthar song bas// sa de legs pa'i blo gros 'dod// ye shes rang bzhin 'di yi sku// dri/
- 389a
med nam mkha' dang mnyam pa// sangs rgyas rnams kyi 'dzin pa las// chos kyi sprin gyi kun tu 'byung // sangs rgyas rnams kyi chos kyi gnas// spyod pa'i 'bras bu yongs 'dzin pa// gnas ni yongs su gyur pa de// chos kyi sku zhes brjod pa yin// bag chags las grol bsam mi bya/ 'khor ba'i bag chags bsam du yod// khyod ni kun tu bsam mi khyab// gang gis khyod ni shes rab nus// gang gi spyod yul kun las 'das// dbang po kun gyi spyod yul min// yid kyi shes pas rtogs bya ba// gang yang rung la phyag 'tshal bstod// rim gyis 'jug pa'i lus nyid kyis// sangs rgyas sras po grags chen rnams// chos kyi sprin gyi ye shes kyis// chos nyid stong pa mthong gyur nas// gang tshe sems ni rab bkrus pas// 'khor ba'i gzeb las 'das gyur nas// pad+ma chen po'i rang bzhin gyi// stan la de ni rab gnas 'gyur// mdab ma rin chen du ma'i 'od// 'dod par bya ba'i ze'u 'bru can// pad+ma bye ba du ma yis// rnam pa kun tu yongs su bskor// stobs bcu po yis yongs su gang // mi 'jigs pa yisra yang dag ngoms// bsam mi khyab pa'i sangs rgyas chos// spros med rnams las nyams mi mnga'// legs par spyad pa'i las kun gyis// bsod nams ye shes rab bsags pa'i// zla ba nya la skar ma yis// 'khor du rnam pa
- 389b
kun gyis bskor// sangs rgyas phyag gi nyi mas der// dri med rin chen 'bar gyur te// sras kyi thu bor dbang skur bas// dbang skur ba ni kun du gsol// rnal 'byor chen po der gnas nas// rmongs pas dman pa'i 'jig rten rnams// sdug bsngal gyis g.yengs 'jigs pa la// lha'i spyan gyis gzigs gyur nas// / de'i sku las 'od zer rnams// 'bad pa med par 'byung 'gyur te// rmongs pa'i mun par zhugs pa de'i// sgo rnams 'byed par mdzad pa yin// lhag bcas mya ngan 'das pa rnams// lhag med mya ngan 'das pa 'dod// 'dir ni mya ngan 'das pa nyid// dri ma med par sems gyur pa'o// sems can kun gyi dngos med pa'i// / ngo bo de yang de spyod yul// de mthong byang chub sems dbang po// shin tu dri med chos kyi sku// dri ma med pa'i chos sku la// ye shes rgya mtsho gnas gyur nas// sna tshogs nor bu ji bzhin du// de las sems can don rnam mdzad// chos kyi dbyings su bstod pa// / slob dpon klu grub kyis mdzad pa rdzogs sgo// / rgya gar gyi mkhan po kri sna pan bi ta dang / lo tsa ba dge slong tshul khrims rgyal bas bsgyur cing zhus te gtan la phab pa/ / rgya gar skad du/ a tsin ta sta ba/ bod skad du/ bsam gyis mi khyab par bstod pa// 'jam dpal gzhon nur gyur pa la phyag 'tshal lo//
Colophon
chos kyi dbyings su bstod pa/ slob dpon klu grub kyis mdzad pa rdzogs s+ho// rgya gar gyi mkhan po kri sna ban di ta dang/ lo tsa ba dge slong tshul khrims rgyal bas bsgyur cing zhus te gtan la phab pa/