D1466MW23703_1466rgyud 'grelAll versions of this work

dpal 'khor lo sdom pa'i phyi rol gyi mchod pa'i cho ga

Text

ff. 45b–46b · 3 folio sides

  1. 45b

    བཅོམ་ལྡན་འདས་ཏེ་དེའི་གཟུགས་སུ་མོས་པར་བྱ་སྟེ་བསྒོམ་པར་བྱའོ་ཞེས་བྱ་བའི་དོན་ཏོ། །ཡང་ན་མྱ་ངན་ལས་འདས་པ་ནི་ཆོས་ཀྱི་དབྱིངས་ཏེ་ཉོན་མོངས་པ་ཞི་བས་སོ། །བྱུང་བ་ནི་སེམས་ཅན་གྱི་དོན་མཛད་པའི་ཡེ་ཤེས་ཀྱི་རང་བཞིན་གྱི་སྐུའོ། །དྲུག་ནི་ཆོས་ཀྱི་དབྱིངས་སོ། །པ་ ནི་འཇལ་བ་དང་ཡོངས་སུ་གཅོད་པས་ན་དེ་སྐད་ཅེས་བྱའོ། །སེམས་ཀྱི་སྤྲུལ་པ་ཞེས་བྱ་བ་ནི་གདུལ་བྱའི་སེམས་ཅན་ལ་ལྟོས་ནས་དེ་བཞིན་དུ་སོ་སོར་སྣང་བའོ། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ཞེས་བྱ་བ་ལ་དག་པའི་ཆོས་ནི་སྟོང་པ་ཉིད་དོ། ། དེའི་རང་བཞིན་ནི་རྡོ་རྗེ་ཕག་མོ་ཞེས་བྱ་བའི་དོན་ཏོ། །སེམས་ནི་ངལ་བས་སོ་ཞེས་བྱ་བ་ལ་སོགས་པ་ནི་མཐོང་བའི་ཆོས་ཀྱི་ཕན་ཡོན་ཏེ། །རྣལ་འབྱོར་ནི་རྣལ་འབྱོར་བས་སོ། །མྱ་ངན་ལས་འདས་པ་ནི་འཆི་བ་ཉིད་དོ། །མི་སྟོན་པ་ནི་དོན་དམ་པར་མེད་པ་སྟེ་ཁྱིམ་ནས་ཁྱིམ་གཞན་ དུ་འགྲོ་བ་ཉིད་བཞིན་དུ་སེམས་ངལ་སོ་བ་ཙམ་ཉིད་ལ་འཆི་བ་ཡིན་ནོ་ཞེས་དགོངས་སོ། །འཕོ་བའི་ཚེ་ནི་འཆི་བའི་དུས་སོ། །རྣལ་འབྱོར་རྣམས་ནི་རྣལ་འབྱོར་པའོ། །འཆི་བ་ཞེས་བྱ་རྣམ་རྟོག་སྟེ། །ཞེས་པ་ནི་འཇིག་རྟེན་པའི་རྣམ་པར་རྟོག་པའོ། །མཁའ་སྤྱོད་གནས་སུ་ཞེས་ པ་ནི་འོད་གསལ་བའི་གོ་འཕང་དུའོ། །འདི་སྐད་བརྗོད་པ་ཡིན་ཏེ་འཆི་བའི་དུས་ན་དཔལ་ཧེ་རུ་ཀ་དང་ཕག་མོ་ལ་སོགས་པ་རྡོ་རྗེ་རྣལ་འབྱོར་མ་རྣམས་ཀྱིས་སྣ་ཚོགས་པའི་སྤོས་དང་མེ་ཏོག་དང་རྒྱལ་མཚན་དང་། བ་དན་ལ་སོགས་པ་ལག་ན་ཐོགས་པས་འོད་གསལ་བའི་གོ་འཕང་ དུ་འཇུག་པར་བྱེད་དོ་ཞེས་བྱ་བའི་དོན་ཏོ། །དཔལ་མངོན་པར་རྟོགས་པའི་དཀའ་འགྲེལ། གྲུབ་ཐོབ་ཆེན་པོ་ལ་བའི་ན་བཟའ་ཅན་གྱི་རྗེས་སུ་འབྲངས་ནས་སློབ་དཔོན་ཆེན་པོ་པྲཛྙཱ་རཀྵི་ཏས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཔལ་སུ་མ་ཏི་ཀཱིརྟི་དང་། ལོ་ཙཱ་བ་ དགེ་སློང་བློ་ལྡན་ཤེས་རབ་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་ཙཀྲ་སམྦ་ར་པཱུ་ཛ་མེ་གྷ་བི་དྷིཿ། བོད་སྐད་དུ། དཔལ་འཁོར་ལོ་སྡོམ་པའི་ཕྱི་རོལ་གྱི་མཆོད་པའི་ཆོ་ག །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བླ་མ་དམ་པའི་ཞབས་པད་ལ། །

  2. 46a

    བཏུད་དེ་མན་ངག་ཇི་ལྟར་བར། །བདག་གིས་བདེ་མཆོག་རྒྱུད་བརྟེན་ནས། །ཕྱི་མཆོད་ཆོ་ག་གསལ་པོར་བསྡུ། །འདིར་རྣལ་འབྱོར་པ་དཔལ་འཁོར་ལོ་བདེ་མཆོག་གི་དཀྱིལ་འཁོར་ལ་མཆོད་པར་འདོད་པས་ནང་པར་སྔ་བར་ལངས་པའམ། སྐབས་ཇི་ལྟ་བ་ཡང་རུང་ སྟེ་བདེ་མཆོག་གི་རྣལ་འབྱོར་དང་ལྡན་པ་ཁོ་ནའི་སྔགས་པས་ས་ཕྱོགས་གཙང་མར་ལག་པ་བཞག་ལ་ཨོཾ་སུམྦྷ་ནི་སུམྦྷ་ཞེས་བྱ་བ་བརྗོད་དེ་བདུད་རྩི་རིལ་བུ་དྲི་ཞིམ་པོ་ལ་སོགས་པའམ་རྫས་གང་ཡང་རུང་། བ་ལང་གི་ལྕི་བའི་རིལ་བུས་དཀྱིལ་འཁོར་གྲུ་བཞི་པ་བྱུགས་ནས་དེའི་དབུས་སུ་ལག་པ་ བཞག་སྟེ་པུ་ཛཱ་ལ་སོགས་པའི་ཡི་གེ་ཉི་ཤུ་རྩ་བཞི་གནས་དང་ཉེ་བའི་གནས་ལ་སོགས་པ་ས་བཅུའི་རང་བཞིན་རྣམས་དེ་དང་དེའི་སར་ལྷག་པར་མོས་པ་སྔོན་དུ་འགྲོ་བས་བརྗོད་པར་བྱའོ། །དེ་ནས་དཀྱིལ་འཁོར་དེ་ཉིད་དུ་ཡུད་ཙམ་གྱིས་འབྱུང་བ་བཞི་ལ་གནས་པའི་རི་རབ་ཀྱི་སྟེང་གི་སྣ་ ཚོགས་པདྨ་ཟླ་བ་ལ་རང་གི་སྙིང་ག་ནས་བྱུང་བའི་ཧཱུྃ་དེ་ཉིད་བཞག་ནས་ས་བོན་དེའི་འོད་ཟེར་རྣམས་ཀྱིས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་ཡི་གེ་ཧཱུྃ་དེ་ལ་བཅུག་སྟེ་དེ་ཡོངས་སུ་གྱུར་པ་ལས་བཅོམ་ལྡན་འདས་འཁོར་དང་བཅས་པ་རྣམ་པ་ཐམས་ཅད་ཡོངས་སུ་རྫོགས་པར་བལྟ་བར་བྱའོ། ། དེ་ནས་སྙིང་གའི་ས་བོན་ལས་བྱུང་བའི་པི་ཝང་མ་ལ་སོགས་པའི་ལྷ་མོ་རྣམས་ཀྱིས་ཡང་དག་པར་མཆོད་ཅིང་དེ་ལས་བྱུང་བའི་རིན་པོ་ཆེ་སྣ་བདུན་ཡང་ཕུལ་ཏེ་ཆོ་ག་ཇི་ལྟ་བ་བཞིན་སྦྱངས་པའི་ལག་པ་གཡོན་པས་དཀྱིལ་འཁོར་གྱི་དབུས་སུ་ཡི་གེ་གསུམ་གྱིས་མེ་ཏོག་དགོད་དོ། །དེ་ནས་དེ་ཉིད་དུ་ བཅོམ་ལྡན་འདས་དང་བཅོམ་ལྡན་འདས་མའི་སྙིང་པོ་རྣམས་ཀྱིས་སོ། །དེ་ནས་མཁའ་འགྲོ་མ་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་རྣམས་ལ་རང་རང་གི་སྔགས་ཀྱིས་ཕྱོགས་རྣམས་སུ་གཡོན་སྐོར། མཚམས་སུ་གཡས་སྐོར་གྱིས་གནས་ཇི་ལྟ་བ་བཞིན་དུ་ མེ་ཏོག་དགོད་དོ། །དེ་ནས་ལག་པ་ལ་བཀོད་པའི་ལྷ་རྣམས་ལ་དེ་དང་དེའི་གནས་སུ་ཨོཾ་ཧ་ཞེས་བྱ་བ་ལ་སོགས་པ་དེ་དང་དེའི་སྔགས་རྣམས་ཀྱིས་མཆོད་པར་བྱའོ། །དེ་ནས་ལག་པ་གཡོན་པ་ན་གནས་པའི་མེ་ཏོག་དེ་རྐང་པ་བརྒྱད་པའི་སྔགས་བརྗོད་པ་སྔོན་དུ་འགྲོ་བས་དཀྱིལ་

  3. 46b

    འཁོར་དུ་དོར་ཏེ་མགོ་བོར་ཐལ་མོ་སྦྱར་བ་སྔོན་དུ་འགྲོ་བས་ལྷའི་དཀྱིལ་འཁོར་དེ་བདག་ཉིད་ལ་གཞུག་པར་བྱའོ། །དེ་ནས་སྙིང་པོ་ནས་བརྩམས་ཏེ་རྐང་པ་བརྒྱད་པའི་མཐར་ཐུག་པའི་སྔགས་ཀྱི་བསྟོད་པ་སྔོན་དུ་འགྲོ་བ་ཅན་ཇི་ལྟར་བསྟན་པའི་བསྟོད་པ་རྣམས་ཀྱིས་ཡང་དག་པར་བསྟོད་ ནས་ནུས་པ་ཇི་ལྟ་བར་སྡིག་པ་བཤགས་པ་ལ་སོགས་པ་དང་བསམ་གཏན་དང་སྔགས་བཟླས་པ་དང་སྨོན་ལམ་གདབ་པ་ལ་སོགས་པ་བྱས་ཏེ་ཡི་གེ་བརྒྱ་པ་བཏོན་ནས་ཨོཾ་ཡོ་ག་ཤུདྡྷཿསརྦྦ་དྷརྨཱ་ཡོ་ག་ཤུདྡྷོ྅ཧཾ་ཞེས་བྱ་བའི་སྔགས་དང་བཅས་པས་བཛྲ་མུཿཞེས་བྱ་བས་གཤེགས་སུ་གསོལ་ཏེ་འཁོར་ ལོ་དེ་བདག་ཉིད་ལ་གཞུག་པར་བྱའོ། །དེ་ནས་དཀྱིལ་འཁོར་གྱི་རི་མོ་བྲི་བར་བྱའོ། །ཕྱི་རོལ་མཆོད་ཚུལ་ལེགས་པར་བསྡུས། །བདག་གིས་བསོད་ནམས་གང་བསགས་པ། །དེས་ནི་འགྲོ་བ་མ་ལུས་ཀུན། །སངས་རྒྱས་མཆོད་པའི་རྗེས་གཞོལ་ཤོག །དཔལ་འཁོར་ལོ་སྡོམ་ པའི་ཕྱི་རོལ་མཆོད་པའི་ཆོ་ག་དཔལ་པྲཛྙཱ་རཀྵི་ཏས་མཛད་པ་རྫོགས་སོ།། །།དཔལ་སུ་མ་ཏི་ཀཱིརྟི་དང་སྒྲ་བསྒྱུར་གྱི་ལོ་ཙཱ་བ་བློ་ལྡན་ཤེས་རབ་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་ཙཀྲ་སམྦ་ར་བ་ལིཾ་བྷི་དྷིཿ། བོད་སྐད་དུ། དཔལ་འཁོར་ལོ་སྡོམ་ པའི་གཏོར་མའི་ཆོ་ག །དངོས་ཀུན་གཅིག་ཏུ་སྡོམ་པ་ཡི། །དཔའ་བོ་སྡོམ་པ་ལ་བཏུད་དེ། །གཏོར་མའི་དེ་ཉིད་མདོར་བསྡུས་ནས། །མན་ངག་ཇི་བཞིན་བྲི་བར་བྱ། །དང་པོར་སློབ་དཔོན་རྣལ་འབྱོར་ཆེན་པོས་གནས་པ་ལས་ལངས་ཏེ། དཔལ་འཁོར་ལོ་སྡོམ་པའི་རྣལ་འབྱོར་དང་ ལྡན་པའི་སྔགས་པས་བཟའ་བ་ལ་སོགས་པ་མདུན་དུ་བྱས་ནས་སྦྱང་བར་བྱའོ། །དེ་ལ་མདུན་དུ་ཡི་གེ་ཡཾ་ལས་རླུང་གི་དཀྱིལ་འཁོར་དེའི་སྟེང་དུ་ཡི་གེ་རཾ་ལས་མེའི་དཀྱིལ་འཁོར། དེའི་སྟེང་དུ་ཡི་གེ་གསུམ་ལས་སྐྱེས་པའི་མགོ་བོ་གསུམ་གྱིས་བྱས་པའི་སྒྱེད་པོའི་སྟེང་དུ་ཡི་གེ་ཨ་དཀར་པོ་ ལས་སྐྱེས་པའི་པདྨ་ནང་དམར་བ་ཕྱི་དཀར་པོ། དེའི་ནང་དུ་ཟན་ལ་སོགས་པ་ལ་ཨོཾ་ཏྲཱཾ་ཨཱཾ་ཁཾ་ཧཱུྃ། ལཱཾ་མཱཾ་པཱཾ་ཏཱཾ་བཾ་གྱི་ཡི་གེ་ལས་བསྐྱེད་ཅིང་དེས་བྱིན་གྱིས་བརླབས་པའི་བདུད་རྩི་ལྔ་དང་། སྒྲོན་མ་ལྔའི་རང་བཞིན་དུ་བསྐྱེད་ལ། ས་བོན་གྱི་ཡི་གེ་ལ་སོགས་པ་རླུང་གིས་བསྐྱོད་

Colophon

dpal 'khor lo sngom pa'i phyi rol mchod pa'i cho ga dpal pradz+nyA rakshi tas mdzad pa rdzogs so// //dpal su ma ti k'i rti dang sgra bsgyur gyi lo tsA ba blo ldan shes rab kyis bsgyur ba'o//