ri'i kun dga' bo'i mdo
Giriābabdasūtra
Text
ff. 143a–147a · 9 folio sides
- 143a
@#/ skyes pa 'am bud med kyis tshul khrims srung bar mi byed pa dang / skom par mi byed na de'i lus zhi gnas shi ba'i pha rol tu ngan song ngan 'gro log par ltung bar skye bar 'gyur ro// gang su dag tshul khrims srung bar byed pa dang / sgom par byed pa rnams ni/ de'i lus zhig nas shi ba'i pha rol tu bde 'gro mtho ris dang lha'i 'jig rten du skye bar 'gyur ro// bcom ldan 'das kyis de skad ces bka' stsal pa dang / dge slong de rnams bcom ldan 'das kyis gsungs pa la mngon par bstod do// tshul khrims lnga'i phan yon bstan pa'i mdo rdzogs so// / paN+Di ta chen po A nan+da shrI'i zhal snga nas/ mang du thos pa'i lo tsa ba shAkya'i dge slong nyi ma rgyal mtshan dpal bzang pos// skang gnyis sba ba rnams kyi gdan sa gtsug lag khang chen po dpal thar pa gling du bsgyur cing zhus te gtan la phab pa'o/ / sa'i steng du nyi ma dang zla ba ltar gyur cig// rgya gar skad du/ gi ri A nan+da sU tra/ bod skad du/ ri'i kun dga' bo'i mdo/ 'phags pa dkon mchog gsum la gus pas phyag 'tshal lo// 'di skad bdag gis thos pa dus gcig na/ bcom ldan 'das mnyan yod rgyal byed tshal mgon med zas sbyin gyi kun dga' ra ba na bzhugs so/ / de'i tshe de'i dus na tshe dang ldan pa ri'i kun dga' bo nad dam po sdug bsngal bas gzir to// de nas
- 143b
tshe dang ldan pa kun dga' bos bcom ldan 'das ga la ba der song zhing nye bar song nas/ bcom ldan 'das la phyag byas nas phyogs gcig tu 'dug go// phyogs gcig tu 'dug nas/ yang tshe dang ldan pa kun dga' bos/ bcom ldan 'das la 'di skad ces gsol to// btsun pa tshe dang ldan pa ri'i kun dga' bo nad dam po sdug bsngal bas gzir to// btsun pa bcom ldan 'das legs par mdzad du gsol/ dge slong tshe dang ldan pa ri'i kun dga' bo ga la ba der gshegs la rjes su brtse bas gshegs par zhu/ de nas bcom ldan 'das kyis/ tshe dang ldan pa kun dga' bo la bka' stsal pa/ der yang kun dga' bo khyod dge slong ri'i kun dga' bo'i thad du song la 'du shes bcu bshad par gyis shig/ rnam par shes pa dang ldan pa'i gnas su smra bar gyis shig/ gzhan yang dge slong ri'i kun dga' bos 'du shes bcu thos nas nad kyis gzir ba'i gnas rnams la so sor rig par 'gyur ro// bcu gang zhe na/ mi rtag pa'i 'du shes dang bdag med pa'i 'du shes dang / mi gtsang ba'i 'du shes dang / bar du gcod pa'i 'du shes dang / spong ba'i 'du shes dang / 'dod chags dang bral ba'i 'du shes dang / 'gog pa'i 'du shes dang / 'jig rten thams cad la mngon par mi dga' ba'i 'du shes dang / 'du byed thams cad la mi rtag pa'i 'du shes dang / 'byung ba dang rngub pa rjes su dran pa'i
- 144a
'du shes so/ / mi rtag pa'i 'du shes pa zhe na/ 'di ni ma dang ldan pa kun dga' bo dgon pa'am/ shing d+hA ngas/ khang pa stong par song la 'dzin sa sor ga pa gzugs mi rtag pa dang / tshor ba mi rtag pa dang / 'du shes mi rtag pa dang / 'du byed mi rtag pa dang / rnam par shes pa mi rtag pa ste/ 'di rnams la nye bar len pa'i phung po lnga po mi rtag par blta bar bya'o/ / de la mi rtag pa'i 'du shes ston cig/ kun dga' bo bdag med pa'i 'du shes du zhe na/ 'di ni dge slong kun dga' bo/ dgon pa 'am/ shing drung ngam/ khang pa stong par song la 'di ni so sor rig par bya'o// mig bdag med pa dang / gzugs bdag med pa dang / rna ba bdag med pa dang / sgra bdag med pa dang / sna ba dag med pa dang / dri bdag med pa dang / lce bdag med pa dang / ro bdag med pa dang / lus bdag med pa dang / reg bya bdag med pa dang / yid bdag med pa dang / chos bdag med pa ste/ 'di rnams ni nang gi drug dang phyi'i skye mched drug bdag med pa'o// bdag med pa la blta zhing bsam par bya'o// kun dga' bo bdag med pa 'di rnams ston cig/ kun dga' bo mi gtsang ba'i 'du shes ni dge slong kun dga' bo 'di ni lus 'di nyid la spyi gtsug nas/ 'og gi rkang mthil gyi bar gyi lpags pa'i phyi shun gyi bar gang bar rnam pa sna tshogs pa'i mi
- 144b
gtsang ba so sor brtag par bya'o/ / lus 'di la sgra dang / ba spu dang / sen mo dang / so dang / lpags pa'i phyi shun dang / sha dang / chub dang / rus pa dang / rkang mar dang / mkhal ma dang / snying dang / mcher ba dang / glo ba dang / sul mang dang / pho ba dang / rgyu ma dang / rgyu ma'i gnyem dang / lgang pa dang / drug pa dang / mkhris pa dang / bad kan dang / tshigs dang / khrag dang / rdul dang / tshil dang / mchi ma dang / zhag dang / mchil ma dang / snabs dang / chu ser dang / gcin dang / grang pa ste/ mi gtsang ba'i rdzas sum cu gnyis so/ / lus 'di la mi gtsang bar blta bar bya'o// kun dga' bo mi gtsang ba 'di rnams bstan par gyis shig/ kun dga' bo bar du gcod pa rnams du zhe na/ dge slong kun dga' bo 'di ni dgon pa 'am/ shing drung ngam/ khang stong du song ste 'di rnams so sor brtag par bya'o// lus 'di ni sdug bsngal mang ba dang / bar du gcod pa mang ba ste/ lus 'di la rnams du ma'i nad 'byung ngo / / 'di lta ste/ mig gi nad dang / rna ba'i nang dang / sna'i nad dang / lce'i nad dang / lus kyi nang dang / mgo bo'i nang dang / rna ba'i nang gi nang dang / kha'i nang dang / so'i nad dang / tho dang / dbugs mi bde ba dang / pi na mo'i nang dang / tsha rims dang / lto ba'i nad dang / brgyal ba dang / gzhogs phyed na pa dang / gzer ba dang / gsung
- 145a
ba dang / mdze dang / sha 'bras dang / 'brum bu phra mo dang / gcong nad dang / brjed byed kyi nang dang / bas bldags dang / gsan pa dang / lus za ba dang / rak+Sha sa dang / bi tsar rtsi ka dang / khrag ma bris dang / sa d+hu ma ha dang / aM ga dang / si la ka dang / mtshan mar rdol ba dang / mkhris pa 'khrugs pa'i nang dang / bad kan 'khrugs pa'i nad dang / rlung 'khrugs pa'i nad dang / 'dus pa'i nad dang / dus su zas yi khar mi 'ong ba'i nad dang / mi mnyam pa'i nad 'khrugs pa dang / a u pa kasmi ka'i nang dang / las kyi rnam par smin pa'i nad dang / grang ba dang / dro ba dang / bkres rnga ba dang / skom pa dang / 'khru ba dang / chu nad de/ lus kyi nad 'di rnams ni bar du gcod par blta zhing bsgom par bya'o/ / kun dga' bo 'di ni bar du gcod par bstan par bya'o// kun dga' bo spong ba'i 'du shes rnams du zhe na/ dge slong kun dga' bo 'di ni 'dod pa las skyes pa ste/ mi gnas par dor bar bya'o// rnam par gzhig pa dang / goms par mi byed pa dang / mi bsgom par 'gro ba dang / rnam par 'tshe ba'i rnam rtog las skyes pa dang / mi gnas pa ste dor bar bya'o/ / rnam par gzhig pa dang / goms par mi byed pa dang / mi bsgom par 'gro ba ste/ skyes shing skyes pa'i sdig pa mi dge ba'i chos mi gnas pa ste dor bar bya'o//
- 145b
rnam par gzhig pa dang / goms par mi byed pa dang / mi bsgom par mi 'gro ba ste/ kun dga' bo 'don spong ba'i 'du shes so// kun dga' bo 'dod chags dang bral ba'i 'du shes bu zhe na/ dge slong kun dga' bo 'di ni dgon pa 'am/ shing drung ngam/ khang stong du song ste so sor brtag par bya'o// 'di ni zhi ba dang / gya nom par gang 'di ni 'dus byas thams cad gnas pa dang / skye ba dang / bsgyur ba dang / sred pa zad pa dang / 'gog pa dang / mya ngan las 'das pa'o// kun dga' bo 'di ni 'gog pa'i 'du shes so// kun dga' bo 'jig rten thams cad la mngon par mi dga' ba'i 'du shes du zhe na/ dge slong kun dga' bo 'di ni gang zhig 'jig rten pa thabs dang / nye bar skye ba dang / rtog pa dang / gnas pa dang / bag la nyal ba bor te/ dga' ba mi bskyed par ro// kun dga' bo 'di ni 'jig rten thams cad la mngon par mi dga' ba'i 'du shes su bstan par bya'o// kun dga' bo 'du byed thams cad mi rtag pa'i 'du shes du zhe na/ dge slong kun dga' bo 'di ni 'du byed thams cad la zhen pa med pa dang / spong ba dang / skyug bro ba ste/ kun dga' bo 'di ni 'du byed thams cad mi rtag pa'i 'du shes su bstan par bya'o// kun dga' bo dbugs rngub pa dang dbyung ba rjes su dran pa du zhe na/ dge slong kun dga' bo dgon pa'am/ shing drung ngam/ khang stong du song ste 'dug la skyil krung bcas te lus drang por bsrangs la
- 146a
gyen du bltas pa rjes su dran cing gnas par bya'o/ / de na dbugs thung ngu phyung na dbugs thung du byung ngo snyam du yang dag par shes so// dbugs ring du rngubs pa 'am thung ngu rngug/ na rngubs so snyam du yang dag par shes so// dbugs ring du phyung na dbugs ring du mthong ngo snyam du yang dag par shes so// dbugs thung ba ba ma thung ngu phyung na dbugs thung du phyung ngo snyam du yang dag par shes so/ / dbugs thung ba'am thung ngu rgyus na thung ngu blta ba dang yang dag par shes so// lus kyi thams cad yang dag par myong zhing dbugs thung ngu rgyus so zhes bslab par byas te/ lus kyi yang dag par myong zhing blta zhing bslab par bya'o/ / lus kyi 'du byed shin tu sbyangs nas dbugs thung ngu rngubs na rngubs pa la blta zhing bslab par bya'o snyam du yang dag par shes so// gnyis ka mthong zhing lus kyi 'du byed yang dag par sbyangs shing rlung thung ngu phyung ngo zhes gnas shing bslab par bya'o/ / gnyis ka mthong zhing lus kyi 'du byed la blta zhing gnas par bslab par bya'o// dga' ba yang dag par myong zhing dbugs thung ngu rgyus so snyam du bslab par bya'o// dga' ba yang dag par myong zhing blta zhing bslab par bya'o// bde ba yang dag par myong zhing dbugs thung ngu rgyus so snyam du bslab par bya'o/ / bde ba yang dag par myong zhing blta ba zhing bslab par bya'o// sems kyi 'du byed yang dag par myong zhing dbugs thung ngu rgyus so snyam du bslab par bya'o// sems kyi 'du
- 146b
byed yang dag par myong zhing blta zhing bslab par bya'o/ / gnyis ka mthong zhing sems kyi 'du byed yang dag par myong zhing dbugs thung ngu rgyus na rgyus so snyam du bslab par bya'o// gnyis ka mthong zhing sems kyi 'du byed yang dag par sbyangs so snyam du bslab par bya'o/ / sems yang dag par myong na dbugs thung ngu rngubs so zhes bslab par bya'o// sems yang dag par myong zhing yang dag bar sbyangs so snyam du bsgrub par bya'o/ / sems mngon par dga' ba bskyed pa dang dbugs thung ngu rgyas na rgyas so zhes bslab par bya'o// sems mngon par dga' ba bskyed pa dang shem rgya so snyam du bslab par bya'o/ / sems zhi gnas pas dbugs thung ngu rgyus so snyam du bslab par bya'o// sems zhi gnas la gnas pas lhag mthong du gnas par bslab par bya'o// sems rnam par grol bas dbugs thung ngu rgyus na rgyus so snyam bslab par bya'o// sems rnam par grol bas lhag mthong la gnas par bslab par bya'o// mi rtag par rjes su blta bas dbugs thung ngu rgyus na rgyus so snyam du bslab par bya'o/ / mi rtag par rjes su blta bas lhag mthong la gnas par bslab par bya'o// 'dod chags dang bral bar rjes su blta bas dbugs thung ngu rgyus na rgyus so snyam du bslab par bya'o/ / 'dod chags dang bral bar rjes su blta bas lhag mthong la gnas par bslab par bya'o// 'gog pa la rjes su blta bas dbugs thung ngu rgyus na rgyus so snyam du bsgra
- 147a
par bya'o/ / 'gog pa la rjes su blta bas lhag mthong la gnas par bslab par bya'o// so sor spong ba rjes su blta bas dbugs thung ngu rgyus so snyam du bslab par bya'o// so sor spong bar rjes su blta bas lhag mthong la gnas par bslab par bya'o/ / kun dga' bo dbugs rngubs pa dang dbyung ba rjes su dran pa 'di bshad par bya'o// der yang kun dga' bo khyed ri'i kun dga' po'i gnas su song la/ 'du shes bcu po 'di bshad par bya'o// gnas gzhan yang yod de/ dge slong ri'i kun dga' bos 'du shes bcu po 'di thos na de'i nad thams cad zhi bar 'gyur ro// de nas yang tshe dang ldan pa kun dga' bos bcom ldan 'das las mnyan te/ tshe dang ldan pa ri'i kun dga' bo'i gnas su song nas/ tshe dang ldan pa ri'i kun dga' bo la 'du shes bcu so sor bshad do/ / de nas tshe dang ldan pa ri'i kun dga' bos 'du shes bcu po 'di rnams thos nas de'i nad thams cad zhi bar gyur to// de'i nad thams cad zhi nas tshe dang ldan pa ri'i kun dga' bo las te/ tshe dang ldan pa ri'i kun dga' bo'i nang byis med par gyur to// tshe dang ldan pa ri'i kun dga' bo'i mdo rdzogs so// paN+Di ta chen po A nan+da shrI'i zhal snga nas/ mang du thos pa'i lo tsa ba shAkya'i dge slong nyi ma rgyal mtshan dpal bzang pos skad gnyis smra ba rnams kyi gdan sa gtsug lag khang chen po dpal thar pa gling du bsgyur cing zhus te gtan la phab
Colophon
tshe dang ldan pa ri'i kun dga' bo'i mdo rdzogs so/ /paN+Di ta chen po A nan+da shrI'i zhal snga nas/ mang du thos pa'i lo tsa ba shAkya'i dge slong nyi ma rgyal mtshan dpal bzang pos/ skad gnyis smra ba rnams kyi gdan sa/ gtsug lag khang chen po dpal thar pa gling du bsgyur cing zhus te gtan la phab pa'o