dpal drag sngags zla gsang nag po'i rgyud
Śrītragkhaṃcandraghuhyatantra
Text
ff. 183a–188b · 12 folio sides
- 183a
rgya gar skad du/ shrI trag khaM tsan+da g+hu h+ya tan+t+ra/ bod skad du/ dpal drag sngags zla gsang nag po'i rgyud/ dpal khro bo'i rgyal po ya man+ta ka la phyag 'tshal lo// 'di skad bdag gis zos pa dus gcig na/ lho phyogs dur khrod chen po gtum drag tshal// ro myags dur khrod stong gi gnas// rgya khyon dpag tu med pa ste// gser dang g.yu las grub pa ste// rab tu 'khor lo kha bcad can/ khrag gi rgya mtsho rab tu 'khrugs/ khrag dang zhag kyang rab tu 'dzag/ ro yi rnam pa bam dang rol// 'khums dang rab 'khums gan pa dang // 'gel dang rus pa 'brul ba dang // 'thor dang rab tu yal ba dang / mnam dang rab tu chu sel 'phro// dur khrod ro la 'dral ba dang / gshog dang mthu dang longs spyod che// rab tu rgod dang rgol ba dang // goms pa'i stabs kyis gar byed dang // ngu dang cho nges 'debs pa dang // rab tu ltas ngan sgra rnams ston// dpa' bo khro rgyal 'jam pa'i mgon/ khro bo rgyal po gdong drug dang // ha la ha la'i sgra sgrogs dang // sa yi dkyil 'khor bzhi yi khyon// rkang pa ya gcig mthil gyis gnon// rkang mtheb sen mo'i khyon gyis kyang // tshangs pa'i yul sa rtse nas gnon// o a kro te ka ya mAn+ta ka shri many+dzu ka la rU pa/ ya ma rA dza sa do me ya/ u u u/ u ne u ne u ne/ u ge u ge u ge/ bya tsa ye du ru hri ta ye sid+ha ye/ ha la ye/
- 183b
che ge mo myag thum ril rbad/ khrag gi rgya mtsho rab tu 'khrugs// ye shes rlung nag rab tu 'khrugs// dur khrod me lce rab tu mched// ri rab rnams kyang rab tu 'thor// snang srid 'byung ba 'khrugs pa yi// 'od dang nyi ma zla ba dang // skar ma la sogs rlung nag 'tshubs// dregs pa stong phrag brgyad cu'i dpon// rab tu bred de rang sngags 'don// shrI badz+ra kro ta/ oM ya ma ya/ ma ma ru lu ru lu ma/ dun ting kI la ya ta// ti ra ti ka du/ dun ting me/ de ba a/ rak+ka ra rak+Sho ra ru tra nr-i/ yak+Sha k+Sha/ yaka mo k+Sha/ shu la dza/ ga du ma ma/ haM shaM tri/ rA tsa tsa/ mun mun pa/ badz+ra sA du tri/ ru tri ru/ sa na ga phu/ ming trig nan/ hur thums dzaH mA rA ya rbad/ stong phrag brgyad cu'i sde dpon te// bco brgyad 'khor dang bcas pa yis// rab tu bred de rang sngags bton// dpal drag sngags zla gsang nag po'i rgyud las/ gleng gzhi bstan pa'i le'u ste dang po'o// // de nas lag na rdo rje yis// dpa' bo gshed la 'di skad zhus// e ma bde ba chen po yab// lnga brgya bstan pa 'jig kha ru// bstan pa bsrung ba'i drag sngags gang // 'jig rten dregs pa stong phrag dang // brgyad bcu'i sde dpon gang la bgyid// de la drag sngags ji ltar brdeg/ nyon cig zung zhig rdo rje 'dzin// bstan pa srung ba'i drag sngags la// bsgrub dang dmod pa'i nus pa yal// gdab pa'i
- 184a
mtshon cha drag po ste// dgod kyi snying po dag la yin// de la drag sngags sdeb pa'i lus// dgod dang thems dang spu gri'o// dpal drag sngags zla gsang nag po'i rgyud las/ le'u ste gnyis pa'o// // de nas yang dag nges gsungs pa// chos sku'i rang bzhin ye nas lhun gyis grub// de nyid rig pa'i dbyings las ma 'gags pas// ye shes dkyil 'khor snang la rang bzhin med// ye shes rig pa'i thugs rje'i rtsal shar bas// sbrul sku sna tshogs gdug pa 'dul la mkhas// tha snyad rtog tshogs don gyis yang dag stong // ye shes lhun gyis grub pa'i lha yin pas// de la gsad cing gnan par bya ba med// bden pa'i don de ma rtogs pas// sdug bsngal dag gi phung po lnga ru smin// lus ngag sems kyi 'du byed kyis// gzhan las lhag pa'i don rnyed pas// dregs pa'i lus dang sems su smin// de la ldog dang drag sngags sdeb pa yis// phan bya gnod bya gnyis ka 'grub par bshad// dpal drag sngags zla gsang nag po'i rgyud las/ lha 'dre'i lus grub tshul gyi le'u ste gsum pa'o// // de nas yang dag nges gsungs pa// sngags kyi sdeb lugs 'di lta ste// srog gi snying po bsdeb pa dang // las kyi ma bu bsdeb pa dang // bsgyur ba spu gri bsdeb pa dang // las mkhan gang yin bsdeb pa dang // rang gshed gang
- 184b
yin bsdeb pa dang // las sngags gang yin bsdeb pa'o// dpal drag sngags zla gsang nag po'i rgyud las/ rang sngags bsdeb pa'i le'u ste bzhi pa'o// // de nas bde ba chen po yis// srog gi rnam grangs bshad bya ba// bod pa ming gi srog gi snying po dang // gzir byed rang gnad srog gi snying po dang // dbrog bya rnam shes srog gi snying po dang // 'phrog byed sbyor ba srog gi snying po dang // gcod byed mtshon cha srog gi snying po dang // rgyu la rtsa dbugs srog gi snying po dang // drangs ma lnga 'dus srog gi snying po dang // dam tshig rjes su dran pa srog gi snying po'o// de la drag sngags bshad bya ba// oM badz+ra dun b+h+yoHar+ya si trig rma dza dzA/ sa ma ya s+t+waM/ e badz+ra pa ni ro sha na ya hUM phaT/ drag sngags rgyal po 'go 'dren rgyal po 'dra// badz+ra sarba duSh+TAn/ trig na na ya/ hur thums dza/ mA ra ya rbad/ bka' yi dmar len chen po ste/ shrI badz+ra kro d+ha/ oM ya ma ya/ ru lu ru lu ma/ dun ting ki la ya ta/ tir ti ka du/ ru du ti ru tra d+ha/ dun ting me/ de ba a/ rak+Sha ra/ rak+Sho ra/ ru tra nAM/ yak+ka k+She/ yak+ko k+She/ shu la dza/ ga du ma ma/ ra tsa tsa/ mun mun pa/ badz+ra swA d+hUd+hAd+ha tri haM shaM tri/ ru ti ru sa nA ga phu/ rtsa ba dag dang rgyal po 'dra// rno myur drag po'i mtshon cha yin/ dpal drag sngags zla gsang nag po'i rgyud las/ srog snying bsdeb pa'i le'u ste lnga pa'o// // de nas bde
- 185a
chen dpa' bo yis// drag sngags bsgrub pa gsungs pa ni// drag po las kyi maN+Dal ni// phung shul dag gi 'jim pa la// gru gsum sum brtseg dpangs su brtsig/ rtse mo lhor bstan zabs su bru/ kha steng nag po rtsang gis bskor// 'di dag las kyi maN+Dal te// bdag nyid ya mAn ta ka yi// spyi bor bya khyung snying gar dpal// lte bar rdo rje gzhon nu bsgom// mgrin par pad+ma dbang chen bsgom// sngags nyid lha ste lha nyid sngags// lha nyid dngos med snang stong la// ngag ni grag stong mtshon char 'phro// lus nyid dregs 'joms sha za'i tshul// 'od zer bsnol ma tsha tsha 'phro// tshogs brgyad 'joms pa'i sgra gri yin// chu drug gcod pa'i ral gri yin// dug lnga 'dral ba'i dgra sta yin// dug gsum 'joms pa'i drag sngags yin// bsnyen dang bsgrub par phye ba med// dpal drag sngags zla gsang nag po'i rgyud las/ dkyil 'khor bstan pa'i le'u ste drug pa'o// // de nas 'khor gyis 'di skad zhus// rnal 'byor dam tshig ldan pa la// lnga brgya dus kyi snyigs ma la// sngags pa nang rgyas byung ba na// bgegs rigs bsrung bzlog ci bya// lnga brgya snyigs ma byung ba na// bsrung dang bsad pa'i las bya ste// rang bzhin drag po btsan thabs dang // dug lnga shed la bskor ba dang // dug gsum rang la bzlog pa dang // 'byung ba gshed la bzlog pa
- 185b
dang // mtshon cha rang la bsnun pa dang // sngags thun gzer la dbab pa dang // tshogs brgyad phung sri bzlas pa bya// phung po lnga po rtsad bcad de// rgyu drug 'khor ba rtsad nas bcad// oM a kro te ka hrIHSh+T+r-iHdang / u u dag ni sna la drang / Ar+ya hri ba tik+Sh+Na e badz+ra pA ni ro Sha na hUM phaT/ badz+ra sarba duSh+TAn/ ming trig nan/ srog hur thums dza/ ming srog mA ra ya rbad/ e rang ga te bar sha mo ha/ na ma e ri sha b+h+yo/ badz+ra sarba duSh+TAn/ ming trig nan/ srog hur thums dza/ ming srog mA ra ya rbad/ e yaM baM laM raM badz+ra sarba duSh+TAn/ ming trig nan/ srog hur thums dza/ ming srog mA ra ya rbad/ ya ma ra ni ts+tsha ye k+Sha ya/ yak+She ya ra ni yo da ya/ ya da yo Na ru do me ya/ ya me do sa tsa ra ma ya/ badz+ra sarba duSh+TAn/ ming trig nan/ srog hur thums dza/ ming srog mA ra ya rbad/ zor kha drag pos bsad pa ni/ e ka srog myags bruM rbad/ bruM ri li li/ rgyud drug 'joms pa'i rgod/ ra ni tsa ya k+She ya/ ya ra ni yo da ya/ yo ni ru do me ya/ do sa rA dza ra ma ya/ stong srog gcig tu ma 'dus na/ yungs kar spang la gtor ba 'dra// sarba sha truM ya ma ya/ e hur thums dza/ sarba sha truM e mA ra ya rbad/ dpal drag sngags zla gsang nag po'i rgyud las/ zab mo rnam grangs srung bzlog gi le'u ste bdun pa'o// // de nas yang dag nges gsungs pa'i// gsod pa'i sbyor ba bshad bya ste// 'khor lo bri ba
- 186a
dregs pa'i gzugs// ro ras shing shun rgya shog la// gru bzhi mtho yi tshad du byas// 'khor lo bco brgyad nyid dang sbyar// dbus su rnam par gnas pa la// zla gam re cha 'phrog pa la/ khyud 'khor gnyis dang ldan pa la// de la rtsibs brgyad bcas la bsad// dbus su rnam par shes pa la// zla gam 'phrog bye yi ge bri// rtsibs bzhi spyi srog rten 'brel drag/ bzhi la mtshon cha lnga bzhi bri// phyi rim rgod kyi yi ge bri// gzugs brnyan rang rang bri bar bya// ling+ga dag la bstim pa ni// snying gar srog gnas mgrin par hur// lte bar thums dang gsang bar dzaH// klad par trig nan mgo steng du// rbad ces mdud pa gru bzhir bcas// de dag bsad la brda' yi drags sngags 'di/ e ra ga de ba sha mo i ri sha b+h+yo/ ya ma trig nan/ nr-i hur thums dzaHdgra bo che ge mo nr-i mA ra ya rbad/ de dag gang mos gang byed gdab// mnan pa'i drag sngags 'di lta ste// e yaM baM laM raM/ ming trig nan srog hur nan hur bruM/ ming srog stam+b+ha ya nan/ de dag bsreg pa'i las byed na/ ming trig nan/ srog hur thums dzaHming srog ag ne sha truM/ dza la raM/ dgug pa glad du brgya brgya ste/ ming trig nan/ srog hur thums dzaHming srog aM gu sha dzaHdzaHdpal drag sngags zla gsang nag po'i rgyud las/ bsad pa'i le'u ste brgyad pa'o// // de nas yang dag nges
- 186b
gsungs pa// bstan pa lnga brgya byung ba'i tshe// sbyin thang khrag tu dbab par bya// sde dpon dregs pa bco brgyad la// mnan rdzas mi mthun bco brgyad bsag/ dmigs pa'i yul nyid gsal bar bya// thod pa dag tu dug khrag dang // sngo dang 'bru rnams zas su bsngo// bdag nyid sku lnga'i rang bzhin las// yul nyid gshed mas gang ba la// dam rdzas mkha' 'gro chu rlung 'khrugs// e yaM baM laM raM/ ming trig nan/ srog hur thums dzaHming srog phreM phreM hril hril shar shar phob/ che ge mo'i lo thog mA ra ya rbad/ sde dpon dregs pa bco brgyad dkrug/ 'byung ba'i drag sngags bzlas pa yis// chu 'khyags thog ser sbyin zang dbab// 'byung ba dkrugs pas srid pa 'jig/ ces gsungs so// dpal drag sngags zla gsang nag po'i rgyud las/ ser ba dbab pa'i le'u ste dgu pa'o// // de nas yang dag nges gsungs pa// bgegs dang log 'dren gnan pa na// shog bu dag la gzugs bris la// g.yag ru rtse mo bcad par gzhug/ rgya gram lam du pus gang brko la gnan// gro ga dag la gzugs bris la// gan bur them bcug skud dkris la// gong gsum 'dus pa'i lam du mnan// glang rur ming bcug phye them 'og tu mnan// ra khyi'i sog par ming bris la// ra khyi thod pa sbrel byas la// phyi yi them pa'i 'og tu mnan// phag
- 187a
pa'i thod par ming bcug la// nang gi them pa'i 'og tu mnan// yugs sa'i zhabs mar gtum la spyang blun gyis byug ste// mdzo rtol thod pa rta bon dud pas bdug khyi dkar thod par sgog pas bdug/ sngon la 'gram gyi 'og tu mnan// gu gul btsong sgog phag thod mnan// gtibs grir shi ba'i thod par ming bcug la// rdzas dud bdug la mchod rten 'og tu mnan// mdze thod nang du gu gul la// bdug la tshang bang nang du mnan// 'khor lo gnas su mnan la rgya gram bcad// yang na srin po gdug pa'i thod par mnan// dpal drag sngags zla gsang nag po'i rgyud las/ mnan pa'i le'u ste bcu pa'o// // de nas yang dag nges gsungs pa// rbod gtong 'gran dus rtags bstan pa// ri nyil mkhar bshig rang gis nyes// bshags la las 'di brtsam par bya// mon dang zhu ba can mdze btsun gshin rje ste// g.yag dang mun pa sros pa bdud yin no// rta dang btsan dang rje dang ban+de dge bsnyen yin// btsun pa bu chung rta bong dang // btsun pa mi ring btsad po ra dza'o// na chung rgyan ldan chags spyod bdag khrid ma// bud med chang dang ra g.yag mi mang po// lci 'thibs mi spro yid yid mkha' 'gro yin// mun sros rgya mtsho 'khyil pa ma bdud de// ban+de mang po khro bo la// skya bshar mang po phur pa'i rtags// bon
- 187b
po ma hA ka la yin// ra lug rdo rje legs pa yin// long sbrang mang po dam sri mo// nya lcibs klu la ba glang sa bdag yin// g.yag dang khyi dmar gnyen gyi rtags// sku dang lha khang chos 'khor dpe dkar the'u grang ste// rigs 'dzin dngos po 'ong bar bshad// de dag rmi lam gang byung gzugs bris la// de yang dang po bzlog dang bsad dang bshig/ las mjug nan pa bya ba yin// sems kyang gzengs mtho lus kyang khro shugs che// rngams dang nyams dga' las rnams 'grub par bshad// dpal drag sngags zla gsang nag po'i rgyud las/ rtags kyi le'u ste bcu gcig pa'o// // de nas yang dag nges gsungs pa// sngags kyi sdebs ni rnam pa gsum// klad du che ba rgyal po 'dra// bar du thebs pa ri dwags rgyar tshud 'dra// tha mar bsad pa spu gri'i so yis thabs pa 'dra// ming nas bod de gzir la srog snying dbrog/ grangs ni 'bum tsho gcig tu bya// dus ni zla gcig yang na bdun gsum nyi shu gcig/ dus ni mtshan rtags nges la bya// dang po nang dme dbyung ba la// nus pa bzlog pa bshig dang bsad// bsten pa'i lha de gshed du dbab// gshin rje las la mi 'gro na// gshin rje rang srog rang gis gcod// de nas yang dag bshad par bya// rang lus lhar bsgom rdo rje la// dregs pa'i srog shes lha srin 'du// sbyor bar tshe
- 188a
phul go mtshon ltar// gzas po bkug ste lus sems dpral// rnam shes phrog la spu gris gdab// 'ben btsugs srog la gzir ba rgyu// gzas po rtsa rgyud dam rgyug za// rang lus khro bor dur pug 'grub// 'byung ba dkrugs pas srid pa phung // me rlung sbyor bas srid pa chags// bsrung ba las kyi phan bya bsgrub// bsad pas dgra bo kha phung byed// dpal drag sngags zla gsang nag po'i rgyud las/ las kha bstan pa'i le'u ste bcu gnyis pa'o// // de nas yang dag bshad bya ba// las kyi drag sngags bsdeb pa yis// bstan pa bsrung ba yang dag yin// bsad pa'i las kha 'di la zug/ dgra bo klu la gtod pa na// klu ming gzir la klu srog dbrog/ sgro spyod rgyal po khram la bsdu// dregs pa bco brgyad lta ru bsgrub// bsrung ba byed na gang gnod gzir// nad kyi rim pa gang yang thub// sngags pa/ nang rgyas/ nang 'gres// byung ba'i tshe// tshe srog 'joms pa'i spu gri 'di// mkha' 'gro dgra la spo ba yis// ming dang snying po 'brel bas bsad// sna 'dren stong bzlas grogs dang dbral// sngags dang rdzas dang ting 'dzin gsum// sbyor ba gsum du bsdeb pas gcod// ye shes lha dang las kyi 'dre// mi mthun log 'dren kun kyang sgrol// mtshan ma lha yi ting 'dzin kyang // 'dus byas yin pas shig la thong // des na theg pa brgyad
- 188b
man chad// blo yi yul chos ma brtags par// srog dang lha 'dre zhes su brtags// de nas yang dag bshad bya ba// rtags rnams rab tu rdzogs tsam na// byang chub sems dang ldan pa yis// sbyangs la mnyam pa nyid la zhi// zhes gsungs so// dpal drag sngags zla gsang nag po'i rgyud las// le'u ste bcu gsum pa'o// // de nas dpa' bo 'jigs byed che// dus gsum sangs rgyas ngo bo nyid// ya mAn+ta ka chen po des// gsang bdag lag na rdo rje la// byin gyis brlab pa'i tshul gyis gtad// dur khrod ro myags chen po ru// dregs pa bco brgyad sde la gtad// de dag mkha' 'gro rig 'dzin pas// dur khrod chen por rang rgyas btab// rin chen gser gyi glegs bam la// bai DUR+Ya ni zhun mar bris// rang nan hUM chen rgyas btab nas// de rnams ci yang mi snang gyur// dpal drag sngags zla gsang nag po'i rgyud las/ rgyud gtad pa'i le'u ste bcu bzhi pa rdzogs so// // dpal drag sngags bzla gsang nag po'i rgyud bal po'i rgyal po ba su d+ha ra dang / ban chung gnubs kyi ban+de yang dbang gter gyis/ b+ha ra sa'i brag phrag tu mkha' 'gro ma dang bka' bgros te bsgyur ba'o//