D1384MW23703_1384rgyud 'grelAll versions of this work

dpal dus kyi 'khor lo'i rtsis kyi man ngag ces bya ba

Śraikālacakragaṇopadeśanāma

Text

ff. 281a–282b · 4 folio sides

  1. 281a

    ལ་སོགས་པའི་ཟླ་བ་དགུའི་ལུགས་ལ་སོགས་པའི་ཁྱིམ་དགུ་ལ། རྒྱུ་སྐར་གྱི་གནས་སུ་ཉི་ཤུ་དང་། དབྱུ་གུའི་གནས་སུ་བཅོ་ལྔའོ་ཞེས་བྱ་བ་ནི་རྩ་བའི་དྷྲུ་བ་ཀའོ། །དྷྲུ་བ་ཀ་དེ་ལ་ཉིན་རེ་ཞིང་དབྱུ་གུ་བཞི་དང་། ཆུ་སྲང་ཉི་ཤུ་རྩ་དྲུག་བཅུག་ལ། ཉི་མའི་རྐང་པ་རྣམས་དག་པར་བྱ་སྟེ། སྔར་ བརྗོད་པའི་རྐང་པ་གསུམ་དང་བཅས་པའི་རྒྱུ་སྐར་དྲུག་སྦྱང་བར་བྱའོ་ཞེས་པ་ལ་སོགས་པའི་ཆོ་གས་སོ། །དེ་སྐད་དུ་ཡང་རྩ་བའི་རྒྱུད་དུ། བགྲོད་ཐོག་ནས་བརྩམས་ཉིན་རེ་ཞིང་། །སླར་ཡང་བགྲོད་འགྱུར་བར་དུ་སྦྱིན། །གསུངས་པའི་ལས་ཀྱི་ཆོ་ག་ཡིས། །ཉི་མའི་རྐང་པ་དག་པར་བྱ། །ཞེས་གསུངས་སོ། ། གཟའ་དང་། ཚེས་དང་། རྒྱུ་སྐར་དང་། སྦྱོར་བ་དང་། བྱེད་པ་དང་། ཁྱིམ་དང་། ཞིང་ཅན་དང་། འཕོ་བ་དང་། གཟའ་འདི་རྣམས་ཀྱི་འབྲས་བུ་ནི་གཞན་དུ་གོ་སླ་བས་འདིར་མ་དགྲོལ་ལོ། །གཟའ་སྐར་རྒྱ་ཆེན་འདི་དག་བཤད་ཅིང་དེ་རྣམས་འབྲས་བུ་ནི། དུས་ཀྱི་འཁོར་ལོའི་རྒྱུད་ལ་འཇུག་པ་ འདིར་ནི་མ་བཤད་དེ། ཚིག་གི་འབྲེལ་པ་གེགས་མེད་བློ་བཟང་རྣམས་ཀྱིས་བདེ་བླག་ཏུ། །རྟོགས་ཕྱིར་འདི་ལ་དམ་པ་རྣམས་ཀྱིས་བཟོད་མཛད་རིགས། །འཇིགས་མེད་ཀྱིས་བརྩམས་འདི་ཡི་སྙིང་གི་ནི། །རབ་ཏུ་རྣམ་པར་འབྱེད་པའི་གནས་རྒྱས་ཤིང་། །ལེགས་བྱས་ཤར་བ་འདི་ལས་འགྲོ་ གསུམ་ལ། །རྒྱལ་བའི་ཕུན་སུམ་ཚོགས་པའི་འབྲས་བུར་ཤོག། །།དཔལ་དུས་ཀྱི་འཁོར་ལོ་ལ་འཇུག་པ་ཞེས་བྱ་བ། སློབ་དཔོན་མཁས་པ་ཆེན་པོ་འཇིགས་མེད་འབྱུང་གནས་སྦས་པས་མཛད་པ་རྫོགས་སོ།། །།པཎྜི་ཏ་ཆེན་པོ་དེ་ཉིད་དང་། བོད་ཀྱི་ལོ་ཙཱ་བ་ཤྲཱི་དྷརྨྨཱ་ཀཱི་རྟིས་ བསྒྱུར་བའོ། །སླད་ཀྱིས་ཡུལ་མ་ག་དྷཱའི་པཎྜི་ཏ་ཆེན་པོ་མཁས་བཙུན་གྲུབ་པ་བརྙེས་པ་རཱ་ཧུ་ལ་ཤྲཱི་བྷ་དྲའི་ཞལ་སྔ་ནས། ཆག་ལོ་ཙཱ་བ་ཤཱཀྱའི་དགེ་སློང་དཔལ་གྱི་མཐའ་ཅན་གྱིས་དག་པར་བཅོས་ཤིང་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཤྲཱི་ཀཱ་ལ་ཙཀྲ་གཎོ་པ་ དེ་ཤ་ནཱ་མ། བོད་སྐད་དུ། དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཅེས་བྱ་བ། དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །སྟོང་པ་རབ་སྐྱེས་ནས་བཟུང་སྟེ། །འདས་ལོ་བྱིན་པས་ལོ་དག་པའོ། །ཉི་མས་བསྒྱུར་བས་ཟླ་བར་འགྱུར། །དགུན་ཟླ་འབྲིང་སོགས་འདས་ཟླ་སྦྱིན། །གནས་གཉིས་

  2. 281b

    འོག་མ་མིག་གིས་བསྒྱུར། །མདའ་རོས་ཐོབ་ལ་གཅིག་བསྲེས་ཏེ། །སྟེང་ལ་བྱིན་པས་ཟླ་དག་འགྱུར། །ཟླ་དག་གནས་གསུམ་བར་མ་ལ། །སོ་ཡིས་བསྒྱུར་ཏེ་མིག་གིས་བསྲེ། །འོག་ལ་རོས་ཐོབ་བར་མ་སྦྱང་། །ལྷག་ལ་མཁའ་སྦྱིན་བར་ནས་གཅིག །འོག་ཏུ་ཕབ་ལ་དྲུག་ཅུས་བསྒྱུར། །མཁའ་ བྱིན་དེས་ཕྲི་ལྷག་ཆུ་སྲང་། །བར་མ་དྲུག་ཅུས་བགོས་ཐོབ་རྣམས། །སྟེང་བྱིན་ལྷག་མ་ཆུ་ཚོད་གནས། །དེ་ལ་རིས་བགོས་ལྷག་གཟའ་གནས། །གནས་གཉིས་འོག་མར་ཀླུ་མིག་སྦྱིན། །དུས་གཉིས་བགོས་ལྷག་ཆ་ཤས་གནས། །ནོར་ལ་རི་དང་ཟླ་བསྲེས་ཏེ། །སྟེང་མ་ལག་པས་བསྒྱུར་ ལ་གཞུག །ཀླུ་ལག་བགོས་ལྷག་རིལ་པོའི་གནས། །ཟླ་བ་དག་པར་གདེངས་ཀ་སྦྱིན། །གནས་གསུམ་བར་མ་དྲག་པོས་བསྒྱུར། །འོག་མ་བུ་ག་ཡོན་ཏན་གྱིས། །ཐོབ་པས་བར་སྦྱང་ལྷག་མ་ལ། །མཁའ་དུས་བསྒྱུར་ཏེ་ཐོབ་པ་དང་། །ལྷག་མ་དྲུག་གིས་བསྒྱུར་ཏེ་ཐོབ། །བར་ནས་ འོག་ཕབ་རིམ་སྦྱངས་པའི། །ལྷག་མ་ཆུ་སྲང་དབུགས་སུ་གནས། །དབུས་མ་དྲུག་ཅུས་བགོས་པའི་ལྷག །ཆུ་ཚོད་ཡིན་ཏེ་ཐོབ་པ་ལ། །གཅིག་བསྲེས་སྟེང་མ་ལྷག་བསྒྱུར་གཞུག །དེ་ལྟར་བགོས་ལྷག་སྐར་མའི་གནས། །གཟའ་ལ་ཚེས་སྦྱིན་དབྱུ་གུར་དབྲི། །རིལ་པོར་སྦྱིན་ཏེ་ ཆུ་ཟླ་ཡིས། །བགོས་པའི་ལྷག་མས་རྐང་པ་གཟུང་། །བགོར་མེད་ན་ནི་དེ་ཉིད་གཟུང་། །ཐོབ་པ་མཉམ་སྦྱིན་མི་མཉམ་དོར། །རྐང་བཟུང་སྔོན་མས་ཆ་ཤས་བསྒྱུར། །འབྱུང་དང་འབྱུང་དང་མདའ་རིག་བྱེད། །མེ་དང་མིག་དང་ཟླ་བ་སྟེ། །ཕྱི་མ་ལ་ནི་དེ་ཉིད་བཟློག །ཟླ་བའི་རྐང་པར་ ཤེས་པར་བྱ། །རྐང་པ་མ་ཟིན་དང་པོས་བསྒྱུར། །དེ་ལ་དུས་དང་ཉི་མ་ཡིས། །བགོས་པས་ཐོབ་པ་ཆུ་ཚོད་ཡིན། །ལྷག་མ་དྲུག་ཅུས་བསྒྱུར་བ་ལ། །གོང་གི་འགོད་བྱེད་ཀྱིས་ཐོབ་པ། །ཆུ་སྲང་ཡིན་ཏེ་ལྷག་མ་ལ། །དྲུག་གིས་བསྒྱུར་ལས་ཐོབ་པ་དབུགས། །དེ་ལྟར་ཐོབ་པ་དེ་རྣམས་ཀྱིས། །རྐང་ པ་སྔོན་མ་ཟོས་དང་སྡོམ། །ཕྱི་མ་མ་ཟོས་ལ་ཕྲི་ལ། །གཟའི་ལོངས་སྤྱོད་གནས་སུ་ནི། །སྦྱིན་དོར་སྔར་གྱི་མཚན་མས་ཤེས། །ཚེས་གྲངས་གནས་གཉིས་སྟེང་ཆུས་བསྒྱུར། །འོག་གི་སུམ་ཆ་སྟེང་ལ་སྦྱིན། །དེ་ལ་མཁའ་དུས་བགོས་ཐོབ་རྣམས། །སྐར་མའི་གནས་སུ་སྦྱིན་པར་བྱ། །ལྷག་

  3. 282a

    མ་ཆུ་ཚོད་གནས་སུ་བསྲེ། །འོག་གི་ལྷག་མ་ཉི་ཤུས་བསྒྱུར། །ཆུ་སྲང་གནས་སུ་གཞུག་པར་བྱ། །དེ་ཉིད་གནས་གཉིས་གཅིག་ལ་ནི། །སྐར་མའི་གནས་ནས་དྲུག་དང་ནི། །ཆུ་ཚོད་གནས་ནས་ཞེ་ལྔ་དོར། །དོར་བས་འཁོར་ཕྱེད་ལྷག་ནའང་དོར། །མེད་ན་འཁོར་ཕྱེད་ བསྲེས་ལ་དོར། །དོར་བའི་ལྷག་མ་དྲུག་ཅུས་བསྒྱུར། །འོག་གི་ཆུ་ཚོད་ཡར་ལ་བླང་། །མདའ་ཡོན་ཟླས་ཐོབ་ཉི་རྐང་གཟུང་། །རོ་ཟུང་ཟླ་བ་དེ་བཟློག་ཕྱི། །ཉི་མའི་རྐང་པར་ཤེས་པར་བྱ། །རྐང་པ་བཟུང་བའི་སྔོན་མ་ཡིས། །སྐར་མའི་གནས་ལ་སོགས་པ་བསྒྱུར། །དེ་ལ་མདའ་ ཡོན་ཟླ་བ་ཡིས། །བགོས་པས་ཐོབ་པ་ཆུ་ཚོད་ཡིན། །ལྷག་མ་དྲུག་ཅུས་བསྒྱུར་བ་ལ། །འོག་གི་ཆུ་སྲང་ཡར་ལ་བླང་། །དེ་ལས་ཐོབ་པ་ཆུ་སྲང་ཡིན། །ལྷག་མ་དྲུག་གིས་བསྒྱུར་བ་ལ། །འོག་གི་དབུགས་ནི་ཡར་ལ་བླང་། །དེ་ལས་ཐོབ་པ་དབུགས་ཡིན་ནོ། །དེ་ལྟར་ཐོབ་པ་དེ་རྣམས་ ཀྱིས། །ཉི་རྐང་སྔོན་མ་ཟོས་དང་བསྡོམ། །ཕྱི་མ་མ་ཟོས་ལ་ཕྲི་ལ། །གཟའ་དང་ཉི་མའི་ལོངས་སྤྱོད་དུ། །སྦྱིན་དང་དོར་བར་བྱ་བ་ནི། །ཉི་མ་བྱང་བགྲོད་དུས་སུ་སྦྱིན། །ལྷོ་རུ་བགྲོད་ཚེ་དོར་བར་བྱ། །དེ་ཉིད་གཟའ་དང་ཉི་སྐར་ཡིན། །ཉི་མའི་སྐར་མར་ཚེས་གྲངས་སྦྱིན། །འོག་ཏུ་ཚེས་ལ་རོ་ ཡིས་བསྒྱུར། །དེ་ལ་གཟའ་ཡི་ལོངས་སྤྱོད་བསྲེ། །དེ་ལ་དྲུག་ཅུས་བགོས་ཐོབ་པས། །སྐར་མའི་གནས་ལ་སྦྱང་བར་བྱ། །ལྷག་མས་ཆུ་ཚོད་ལ་སོགས་སྦྱང་། །སྦྱངས་པའི་ལྷག་མ་ཟླ་སྐར་ཡིན། །ཉི་ཟླ་གཉིས་བསྲེས་སྦྱོར་བར་འགྱུར། །ཚེས་ལ་མིག་གིས་བསྒྱུར་བ་ལ། །གཅིག་ ཕྲི་རིས་བགོས་ལྷག་མ་ནི། །བྱེད་པ་ཡིན་ཏེ་བགོར་མེད་ན། །དེ་ཉིད་ཡིན་པར་ཤེས་པར་བྱ། །གཟའ་གནས་རི་བགོས་ལྷག་མ་གཟའ། །བགོར་མེད་ན་ནི་དེ་ཉིད་གཟའ། །དེ་ཡི་ཆུ་ཚོད་ཆུ་སྲང་དབུགས། །ཚེས་དེའི་མ་འོངས་པར་ཤེས་བྱ། །གཟའ་གཅིག་ལན་གཉིས་བྱུང་གྱུར་ན། ། ཞག་གཅིག་ཚེས་གྲངས་གཉིས་དོར་འགྲོ། །གལ་ཏེ་གཟའ་དེ་མཆོངས་གྱུར་ན། །ཚེས་གྲངས་དེ་ཉིད་ལན་གཉིས་འོང་། །ཚེས་གྲངས་ཆད་ལྷག་དེས་ཤེས་བྱ། །སྐར་མའི་གནས་ལ་ཐུབ་ལག་གིས། །བགོས་པའི་ལྷག་མ་སྐར་མ་ཡིན། །བགོར་མེད་ན་ནི་དེ་ཉིད་ཡིན། །སྦྱོར་བ་ཡང་ནི་

  4. 282b

    དེ་དང་མཚུངས། །གྲངས་ནི་འོག་མ་ཡིན་པར་འདོད། །སྐར་དང་སྦྱོར་བའི་ཆུ་ཚོད་སོགས། །འདས་པར་ཁོང་དུ་ཆུད་པར་བྱ། །དེ་ལྟར་གཟའ་དང་ཚེས་གྲངས་དང་། །སྐར་མའི་སྦྱོར་བ་བྱེད་པ་སྟེ། །ཡན་ལག་ལྔ་ཡི་རྩིས་ཡིན་ནོ། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་པཎྜི་ཏ་ཆེན་པོ་ ཤཱཀྱ་ཤྲཱི་བྷ་དྲས་མཛད་པ་རྫོགས་སོ།། ༄། །ཉི་ཟླ་འཛིན་པའི་རྩིས་བཞུགས།། ༄༅༅། །དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །ཉི་ཟླ་འཛིན་པའི་མན་ངག་ནི། །ཟླ་བ་དག་པར་ཀླུ་ཟླ་སྦྱིན། །དེ་ལ་མིག་གིས་བསྒྱུར་བར་བྱ། །ཟླ་བའི་དོན་དུ་གཅིག་སྦྱིན་ཏེ། །ཉི་མ་ལ་ནི་གཉིས་སྦྱིན་ནོ། །དེ་ལ་མཁའ་དུས་ཆུས་ ཐོབ་དོར། །དོར་རྒྱུ་མེད་ན་དེ་ཉིད་དམ། །ལྷག་མ་སྐར་མས་བསྒྱུར་བ་ལ། །མཁའ་དུས་ཆུ་བོས་བགོས་ཐོབ་པ། །སྐར་མའི་གནས་སུ་གཞག་པར་བྱ། །ལྷག་མ་དྲུག་ཅུས་བསྒྱུར་བ་ལ། །གོང་གི་འགོད་བྱེད་ཀྱིས་ཐོབ་པ། །ཆུ་ཚོད་དག་ཏུ་ཤེས་པར་བྱ། །ཆུ་སྲང་དབུགས་དག་རིམ་པས་ཤེས། །དེ་ལྟར་ ཐོབ་པ་དེ་རྣམས་ཀྱིས། །རྒྱུ་སྐར་རྣམས་ལ་སྦྱངས་བའི་ལྷག །སྒྲ་གཅན་གདོང་གི་སྐར་མ་ཡིན། །དེ་དང་ཉི་ཟླའི་སྐར་མ་གཉིས། །མཉམ་ན་སྒྲ་གཅན་གདོང་གིས་འཛིན། །མི་མཉམ་ན་ནི་རྒྱུ་སྐར་ཕྱེད། །བསྲེས་པས་སྒྲ་གཅན་མཇུག་སྐར་ཡིན། །དེ་དང་ཉི་ཟླའི་སྐར་མ་གཉིས། །མཉམ་ ན་སྒྲ་གཅན་མཇུག་མས་འཛིན། །དེ་ཡང་ཟླ་བ་འཛིན་པ་ནི། །སྒྲ་གཅན་ཕྱེད་ནི་དག་པ་དང་། །ཉི་མ་དག་པ་གཉིས་བསྲེས་པས། །རྒྱུ་སྐར་རྫོགས་སམ་ཕྱེད་ལྷག་དོར། །ཐིག་ལེ་ཤར་ན་ཟླ་བ་ནི། །འཛིན་པར་ཐེ་ཚོམ་མེད་པ་ཡིན། །མཉམ་པོ་གསུམ་དང་ཐིག་ལེ་ཤར། །ཉི་མ་ངེས་པར་ འཛིན་པ་ཡིན། །དུས་ཚོད་ཇི་ཙམ་དག་ན་འཛིན། །ཉིན་མཚན་རིང་ཐུང་ཤེས་བྱ་སྟེ། །གཟའ་ཡི་ཆུ་ཚོད་དག་དང་སྦྱར། །ཕྱོགས་ནི་སྐར་མའི་ཕྱོགས་དང་སྦྱོར། །ཆེ་ཆུང་ཇི་ཙམ་འཛིན་པ་ནི། །གཟའ་ཡི་ཆུ་ཚོད་མན་ཆད་དང་། །སྐར་མའི་ཆུ་ཚོད་མན་ཆད་རྣམས། །བསྲེས་ཏེ་སྐར་མར་ བཅས་པ་དང་། །སྒྲ་གཅན་སྐར་མར་བཅས་པ་རྣམས། །མཉམ་ན་ཟླ་བ་རིལ་པོ་འཛིན། །བཅོ་ལྔས་གང་རུང་མང་གྱུར་ན། །བཞི་གསུམ་དག་ནི་འཛིན་པར་འགྱུར། །སུམ་ཅུས་གང་མང་ཕྱེད་འཛིན་ནོ། །དེ་བཞིན་སུམ་ཆ་ལ་སོགས་པ། །ཞིབ་ཏུ་བརྩིས་ལ་ལེགས་པར་སྨྲ། །ཞེ་ལྔས་གང་

Colophon

dpal dus kyi 'khor le'i rtsis kyi man ngag paN+Di ta chen po shAkya shra'i bha dras mdzad pa rdzogs so//