Gpb017.011MW1KG14783_0017_011All versions of this work

yi dam gyi gsang rgyud bka'i tha ram zhes bya ba

Text

ff. 216b–220b · 9 folio sides

  1. 216b

    @#/ u rgyan gsang ba brda'i skad du/ an r+thardza ma h+yaMH/ khAswa/ bod skad du/ yi dam gyi gsang rgyud bka'i tha ram zhes bya ba/ bcom ldan 'das dpal zhi ba dang / khro bo dang / rngam pa dang / yab dang / yum dang / sras dang / 'khor dang / sprul pa dang / yang sbrul du bcas pa la phyag 'tshal lo// dkar ser dmar ldang 'khrigs pa'i klong // dpal chen rngam pa'i dkyil 'khor nas// zhi ba'i ngang las khro skur bzhengs// rnam 'gyur cha lugs sprul pa can// bzhad pa'i nga ros stong khams gang // brtse ba'i thugs rje cher 'gyed pa// dpal chen stobs kyi rgyal po yis// nyid kyi sku yi dkyil 'khor nas// rang byung sprul pa'i 'khor shar zhing // mdun du rnam par bkod pa las// gsang chen tha ram 'di gsungs pa// a la la ho// snang srid 'khor 'das spyi dpal gtso// spyi gtsug dbyings kyi dkyil 'khor du// rab tu gsal ba'i 'od shar ba// gcig tu bzlum dang dum bur 'thor// zlum po nyid kyi klong du thim// de kun rang rtsal rdzogs pa'i mgon// dum bur 'thor ba kun tu khyab// nam mkha'i khams kun rab snang byas// mi mngon dbyings nas rnam par snang // me las me dang chu las chu// rlung las rlung dang sa las sa// nam mkha' g.yo med yongs la khyab// khyab bdag rang bzhin dkyil 'khor can// ral pa'i cod pan rab gzeng

  2. 217a

    pas// sa 'og sa steng sa blar khyab// sprug cing rnam par sprugs pas kyang // 'gro ba'i lo tog smin mdzad de// s+thi phud dang por gyur pa'o// yi dam gsang rgyud bka'i tha ram las/ spyi gtsug rnam par blta ba'i le'u zhes bya ba ste dang po'o// // a la la ho// snang srid 'khor 'das spyi dpal gtso// mgrin snang gsung gi dkyil 'khor du// sgra yi bkod pa rab snang ba// smra ba'i dbyangs dang yang dag ldan// lha dang lha min mi dang ni// dud 'gro yi dwags dmyal ba'i mthar// nyid kyi gsung gi dbang po yis// khyab cing so so'i mthun snang du// skad dang sgra don bcas pa mdzad// sa dang rdo dang shing bu dang // me chu rlung la sogs pa yi// skad dang sgra las mngon pa'i tshig/ gsung dang bcas te yang dag snang // pad+ma'i ljags dang dung gi tshems// bum pa'i dkyil du dril ba yang // rnam par bkra ba'i le brgan las// ma 'dres snying po'i tshig tu gsal// de kun yang dag gsang ba'i mgon// mang po gcig tu dril ba dang // gcig las rnam pa du ma spros// rigs drug 'gro ba'i snang ba yang // so so pa la so so yi// lus ngag yid rgyud smin pa dang // yang dag de bzhin nyid bstan te// rnam grol ye shes bde chen bstan// rang la rang snang nyid brdal bas// lha mi la sogs 'gro ba yi// rang snang snang ba'i dal rgyas nas// rnam par blta

  3. 217b

    dang rnam par smra// bsags pa thams cad zad pa ste// de nas bsag pa mi mnga' la// bsags 'bras myur du 'jig pa'o// snying po sngags spyod gsang bstan pa// gsang zhing rnam par gsang ba yi// gsang ba'i snying po mchog la reg/ kun rdzob mtha' yang de bzhin stong // de yang ljags kyi dbang po yi// longs spyod mgrin pa'i dkyil 'khor las// gsang sngags dkyil 'khor rab 'khrugs pas// stobs kyi nus pa rnam par smin// bkrol ba med kyang rang grol dang // bcing ba med kyang zhig pa'o// rab tu 'khrugs par gyur rnams kyang // 'khrugs pa med la de bzhin gshegs// sa lam bkod pa dus gcig rdzogs// spyi phud gnyis par gyur pa'o// yi dam gsang rgyud bka'i tha ram las/ mgrin pa rnam par blta ba'i le'u ste gnyis pa'o// // a la la ho/ snang srid 'khor 'das spyi dpal gtso// gsang gter thugs kyi dkyil 'khor du// mkhyen brtse'i bkod pa rab snang ba// 'gyur med za ram nyag gcig don// rgyan gyi bkod pa du ma dang // cho 'phrul rnam pa sna tshogs dang // rab tu 'khrugs pa'i sems dpa' dang // rnam par brtse ba'i sems ma dang // gnyis med rol pa'i ye shes te// nam mkha' yangs pa'i dkyil 'khor du// rnam pa sna tshogs rab 'char ba// rang byung rang la rnam par thim// sbrul dang bsgyur dang stabs pa dang // rnam

  4. 218a

    par rab tu 'khrugs pa yang // nyid las ma g.yos nyid kyi rtsal// 'di bdag yangs pa'i dpa' shugs gsal// 'phro dang 'du dang 'khyil pa dang // dgag pa dang ni stsal ba dang // rnam par rab tu g.yo ba can// gti mug las kyang gti mug dang // zhe sdang las kyang zhe sdang nyid// nga rgyal las kyang nga rgyal ba// 'dod chags nyid kyang 'dod chags pa// phrag dog nyid kyang dbang byed pa// las kyi las te las kyis las// lcags kyis lcags rnams gcod pa dang // de bzhin shing gi shing bsreg pa// rdo yis rdo gcog rang rang mthus// rang rtsal rang gi nus pa 'jig/ bdag gis bdag po nyid 'joms byed// bdag gis bdag nyid yang dag bstod// byas pa yis ni byas pa 'jig/ sems kyi sems sun sems kyis 'byin// las kyis las ni 'joms pa'o// las kyis las kyang sog pa ste// rigs mthun nang gis rigs mthun 'joms// dpa' shugs bskyed pa de bzhin ltar// rgyal ba'i thugs la thugs rje yi// rol pa rnam par rol spros pas// gdul bya gdul bya dag gis 'dul// ye shes rgyas pa'i dkyil 'khor ni// ye shes rgyas pa nyid kyis mthong // rang byung dag pa rang byung gis// yang dag mthong nas yang dag ston// de mthong rgyun mar mthong bas mthong // rig pas rig pa rtogs pas rtogs// dkar pos

  5. 218b

    dkar po nyid byed la// nag pos nag po nyid byed do// nga las nga byung nga yis shes// nga las nga byung nga yis bsgribs// nga las nga byung nga yis bsal// thams cad nga yi dkyil 'khor du// 'du dang 'phro bar byed shes pas// shes dang shes pa nyid shes byas// mkhyen pas yang dag mkhyen pa la// rtsal gyis rtsal yang 'byin par byed// ji ltar nam mkha'i dkyil 'khor du// nam mkha' nyid du rab snang ba// rab rib rab rib nyid la ste// rab rib rab rib nyid kyis so// de ltar rnam par bkod pa'i dpal// spyi phud gsum par gyur pa'o// yi dam gsang rgyud bka'i tha ram las/ thugs ka rnam par blta ba'i le'u ste gsum pa'o// // a la la ho// snang srid 'khor 'das spyi dpal gtso// srid pa'i bdag po nyid bdag dpal// srid las srid pa'i lugs 'byung ba// bdag gis srid pa 'dir ston byed// las kyis 'phen pa'i las rnams kun// las kyis 'ching ba'i dra ba gcod// ma dag pa dang dag pa dang // shin tu dag dang yang dag dag/ dag pa gsum gyi dag pa yis// las kyi sgri ba pa rnam par bcing // bcings pa rnam par grol ba yi// ye shes gzigs pa'i phung po yis// rnam par nges pa rnyed par 'gyur// phung po khams dang skye mched dang // bsags pa'i las kun yang dag pas// srid pa'i mtsho las rnam par grol// bdag dang

  6. 219a

    bdag gir 'dzin pa dang // bdag gi snang ba rab rgyas pas// de kun bdag las grol ba yang // srid pa'i 'ching las grol ba ste// bdag dbang rkyen gyis rnam bskyod pas// srid pa nyid 'khrul 'khor lo ni// yang nas yang du yang bskor bas// de dag zag pa gcod pa yang // srid pa'i 'ching las grol ba ste// 'dam las skyes pa'i pad+ma ni// 'dam gyi skyon gyis ma gos pa// 'dam med pad+ma mi 'byung yang // pad+ma nyid las pad+ma yi// sa bon 'dam gyis bskyed nas byung // 'khor bar gnas pa'i mi gang dag/ 'khor ba'i 'jigs pa grol byed pa// 'khor bar nyid du rang gnas pas// 'khor skyon ma gos de dag kyang // srid pa'i dra ba chod las so// de ltar srid pa'i dra ba dag/ gcod par byed pa'i sa mkhan ni// dngos can gsal ba'i rang 'od kyis// rang snang 'od du rab 'bar ba// rang rig rang byung chen po'i rtsal// 'gro 'dul thabs kyi rgyal po yis// sna tshogs rtsal gyis snang bar byed// rol pa'i cho 'phrul 'bar ba las// thabs kyi cho 'phrul rab snang ba// mdzad pa'i rnam sbrul rtsal shar zhing // ye shes snang bar rab rgyas byed// bdag rtog 'ching ba'i srid pa dang // gzhan 'dzin dbang yul srid pas bcings// gzung dang 'dzin pa rab spangs nas// srid pa'i dra ba kun las grol// yar dang mar du zang thal bas// de

  7. 219b

    dag srid las rnam grol ba// mar du thal ba rab 'gags nas// snang byed rab tu thal bar 'gyur// bar du rnam par lding byed kyang // srid las rnam grol lding las grol// de dang de sogs dkar nag chos// srid las grol dang ma grol dbang // las kyi 'ching ba dag ma dag/ 'ching ba dag pas srid las grol// 'ching ba ma dag srid par 'khor// des na srid pa'i 'khor lo ni// bshig pa'i rten 'brel zab mo ni// thabs kyi sbyor ba rnams las 'byung // thabs ni thabs ldan chen pos gsungs// de la yang dag brten nas byas// bla ma dang ni 'brel pa yis// ye shes rtsal las 'byung bar 'gyur// de ni dpal dang ldan par 'gyur// sbri phud bzhi par gyur pa'o// yi dam gsang rgyud bka'i tha ram las/ srid pa'i 'khor lo rnam par blta ba'i le'u ste bzhi pa'o// // a la la ho// snang srid 'khor 'das spyi dpal gtso// gsang ba mchog las legs byung zhing // gsang las yang dag gsang bar ldan// gsang ba'i dkyil 'khor las byung zhing // 'khor ba rnams kyang gsang ba las// byung zhing 'khor ba'i 'khor bar 'khor// de bzhin mya ngan 'das pa yang // gsang ba'i dkyil 'khor las byung zhing // mya ngan 'das dang mya ngan 'da'// gsang ba'i 'khrul 'khor 'dzin kyang 'jig pa can// gsang ba'i gnas la rnam par

  8. 220a

    gnas// bde ba'i ye shes gang bskyed pa// gsang chen sgo yi rnam rol las// 'byung ldog gnas pa rnam par byed// steng dang 'og dang bar dag dang // sdong po gsum dang yal ga dang // 'khor lo lnga la sogs pa yi// stong phrag bdun cu rtsa gnyis kyang // bkra shis gang ba'i rdzu 'phrul gyis// rnam par g.yo dang mi g.yo ba'i// ting 'dzin yang dag 'phel 'gyur zhing // de la rnam par rgyu ba yi// rtsa ba lnga dang yan lag rnams// rnam par gyes pa'i rnam grangs su// nyi khri chig stong drug brgya dag/ las dag byang chub nyid gyur nas// yang dag ye shes zla 'od bzang // zla ba rnam par dkar bar 'phel// nyi ma'i stobs kyang rab 'bar bas// 'bar 'dzag stobs mnyam sbyor ba yis// rnam grol 'bras bu mchog la reg/ g.yas g.yon steng 'og rnam bcings pas// gang gi thigs pas rgya mtsho dkrug/ rlangs pa'i 'od zer stong khams khengs// 'dzag pa med pas 'dzag pa 'phel// 'og nas bcings te steng du bskyod// sgra gcan dag gis mnyam gnas pa// yongs khyab ngos bzung bral ba yi// mchog don rnam par bsgyings bltas pas// yang dag mchog la yang dag par// gnas pa'i stobs kyang de las 'byung // mdor na gnas dang spyod pa dang // 'gro dang 'ong dang 'dug pa dang // khyim dang bdag po nor byas par// ro mnyam gcig

  9. 220b

    dang khang mnyam pas// gsang ba'i gnas las legs par 'byung // las grub mchog dang thun mong ba// mthar thug las kyang mthar thug nyid// gnas skabs las kyang gnas skabs kyi// 'dod 'byung dpal dang gsang bar ldan// 'bras bu de las ye shes lnga// sku gsum mchog la rnam par gnas// ye nas gnas pa'i bdag nyid la// gnas par shes shing gnas par 'gyur// gsang mchog yid bzhin mchog gi gter// de las shul mtshon gzhal du med// yang dag bcud du gsang ba smin// de phyir gsang ba yang dag pas// la lar dbang med thabs kyis gsang // la lar go med ye gsang ste// la lar rmad du byung bas gsang // la lar sgom phye bas gsang // dam med log par lta byed la// gsang ba gnyen phyir yang dag gsang // de ltar gsang ba rnam bkra ba'i// thabs dang shes rab mchog la reg/ spyi phud lnga par gyur pa'o// yi dam gsang rgyud bka'i tha ram las/ gsang ba mchog gi dkyil 'khor rnam par blta ba'i le'u ste lnga pa'o// // a la la ho// dngos grub yid bzhin gsang ba mchog gi rgyud/ bka'i tha ram zhes bya ba rdzogs so// // sa ma yA/ rgya rgya rgya/ sbas rgya/ gtad rgya/ gter rgya/ kha za ma/ d+ha thim/ rgya rgya rgya/ bdag 'dra gar gyi dbang phyug rol pa ye shes kyis dza dkar dung gi sgo mo nas gdan drangs pa'o//