S54MW22083_0054mdo sdeAll versions of this work

kun tu rgyu pa sen rings kyis zhus pa zhes bya ba'i mdo

Dīrghanakhaparibrājakaparipridchānāmasūtra

Text

ff. 136a–138a · 5 folio sides

  1. 136a

    dang spun gyi gsos sman dang / yo byad rnams kyis mgron du gnyer te/ bcom ldan 'das des zla ba gnyis bshos gsol to// chags zung zhig kyang phul lo// bla na med pa/ yang dag par rdzogs pa'i byang chub 'di nyid 'dod pas de bzhin gshegs pa 'od srung la gser gyi phreng bas gtor te/ 'di skad ces bdag bla na med pa yang dag par rdzogs pa'i byang chub tu lung bstan par ma gyur gyi bar du bud med kyi dngos po las ma gyur cig ces smras te/ / ma pham pa 'di yang bram ze mo dpal ldan ma'i sngon gyi dge ba'i rtsa ba yin no// bcom ldan 'das kyis de skad ces bka' stsal nas/ byang chub sems dpa' sems dpa' chen po ma pham pa dang / bram ze mo dpal ldan ma dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ / 'phags pa bram ze mo dpal ldan mas zhus pa zhes bya ba theg pa chen po'i mdo rdzogs so// // rgya gar gyi mkhan po dzi na mi tra dang / zhu chen gyi lo tsa ba ban+d+he ye shes sdes bsgyur cing zhus te gtan la phab pa/ / rgya gar skad du/ dIr+m+man kha pa ri brA dza ka ba ri brid tshA nA ma sU tra/ bod skad du/ kun du rgyu ba sen rings kyis zhus pa zhes bya ba'i mdo// sangs rgyas dang / byang chub sems dpa' thams cad la phyag 'tshal lo// 'di skad bdag gis thos pa dus cig na/ bcom ldan

  2. 136b

    'das rgyal po'i khab na/ bya rgod kyi phung po'i ril/ dge slong stong nyis brgya lnga bcu'i dge slong gi dge 'dun chen po dang thabs gcig tu bzhugs so// de nas bcom ldan 'das 'khor bzhi po dag la chos ston te/ tshangs par spyod pa/ thog mar dge ba/ bar du dge ba/ tha mar dge ba/ don bzang po// tshig 'bru bzang po// ma 'dres pa/ yongs su rdzogs pa/ yongs su dag pa yongs su byang ba/ yang dag par rab tu ston to// de'i tshe kun tu rgyu sen rings/ bcom ldan 'das ga la ba der song ste/ phyin nas/ bcom ldan 'das kyi spyan sngar/ 'khar ba la tshugs bcas te/ cang mi smra bar 'dug nas/ bltas te/ bcom ldan 'das la 'di skad ces gsol to// kye go'u ta ma 'jig rten ni las bdag gir bya bar/ las kyi bsgo skal spyod pa/ las kyi 'ching ba can/ las brtan par bya'o zhes de skad smras pa ni bden na/ dge sbyong go'u ta mas sngon las ci zhig byas shing bsags na/ nges dge sbyong go'u ta ma rdo rje'i lus dang ldan par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar srog gcod pa spangs pa'i las de'i 'bras bu yin no// dge sbyong go'u tams sngon las ci zhig byas shing bsags na/ des dge sbyong go'u ta ma sor mo ring zhing sor mo'i bar dra bas 'brel par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar ma byin par len pa spangs pa'i las dzan

  3. 137a

    'bras bu yin no/ / dge sbyong go'u ta mas/ sngon las ci zhig byas shing bsags na/ des dge sbyong go'u tams dbang po yongs su tshang shing lus rab tu rgyas par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar 'dod pa la log par g.yem pa spangs pa'i las de'i 'bras bu yin no// dge sbyong go'u ta mas sngon las zhig byas shing bsags na/ des dge sbyong go'u ta ma lce gdong gis dkyil 'khor thams cad khebs/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar brdzun du smra ba spangs pa'i las de'i 'bras bu yin no/ / dge sbyong go'u ta mas sngon las ci zhig byas shing bsags na/ des dge sbyong go'u ta ma seng ge'i stabs su 'gro bar gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar 'bru'i chang dang / sbyar ba'i chang myos pa bag med pa'i gnas spangs pa'i las de'i 'bras bu yin no// dge sbyong go'u ta mas sngon las ci zhig byas shing bsags na/ des dge sbyong go'u ta ma so bzhi bcu dang ldan zhing so mnyam la so dkar bar gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar dus ma yin pa'i zas spangs pa'i las de'i 'bras bu yin no/ / dge sbyong go'u tams sngon las ci zhig byas shing bsags na/ des dge sbyong go'u

  4. 137b

    mas tshul khrims kyi spos kyis lus byugs par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar phreng ba dang / spos dang / byugs pa dang k ha dog 'chang ba dang / spangs pa'i las de'i 'bras bu yin no// dge sbyong go'u ta mas sngon las ci zhig byas shing bsags na/ des dge sbyong go'u ta ma lus mtshan thams cad kyis brgyan par gyur bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar glu dang gar dang / rgyan rnams spangs pas las de'i 'bras bu yin no// dge sbyong go'u ta mas sngon las ci zhig byas shing bsags na/ des dge sbyong go'u ta ma stan gsum la yongs su spyod/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar khri stan mthon po dang khri stan chen po spangs pa'i las de'i 'bras bu yin no/ / dge sbyong go'u ta mas sngon las ci zhig byas shing bsags na/ des dge sbyong go'u ta ma mgo'i gtsug tor 'phags par gyur/ bcom ldan 'ang kyis bka' stsal pa/ bram ze chen po 'di ni ngas tshe rabs snga ma'i skye bar/ sangs rgyas dang / chos dang / dge 'dun dang / pha ma dang / slob dpon dang / mkhan po dang / bla ma dang / sbyin kan+da rnams la yan lag lngas gtugs te mgo bos phyag 'tshal lo/ / mchod pa'i las de'i 'bras bu yin no// kun du rgyu sen rings kyis 'khar ba sa la bor nas/ bcom ldan 'das kyis zhabs la mgo

  5. 138a

    bos phyag 'tshal te/ bcom ldan 'das ga la ba der logs su thal mo sbyar ba btud nas/ bcom ldan 'das la 'di skad ces gsol to// bcom ldan 'das bdag ji srid 'tsho'i bar du sangs rgyas la skyabs su mchi'o/ / ji srid 'tsho'i bar du chos la skyabs su mchi'o// ji srid 'tsho'i bar du dge 'dun la skyabs su mchi'o// ji srid mtsho'i bar du yan lag brgyad pa'i bsnyen gnas la nye bar gnas par bgyi'o/ / srog chags thams cad gsod dang gzhan nor rku dang mi tshangs spyod pa dang / ngag gi dbye ba brdzun dang myos skyed dus min za ba dang / phreng ba kha dog glu dang gar dang rtse 'jo mal stan mthon po rnams deng nas bdag gis spangs te yon tan brgyad kyis dgra bcom tshul du bgyi/ de bzhin du lan gnyis lan gsum du'o// bdag gis gso sbyong gi tshul khrims kyi sdom pa yang dag par 'dzin pa 'di sems kyi rgyan dang / sems kyi yo byad dang / byang chub kyi tshogs su 'gyur ba dang / don gyi dam pa thams cad mkhyen pa'i ye shes dang mya ngan las 'das pa'i bde ba bla na med pa la gnas par gyur cig/ bcom ldan 'das kyis bka' stsal pa/ bram ze chen po khyod de ltar byed pa legs so legs so// bcom ldan 'das kyis de skad ces bka' stsal nas/ dge slong de dag dang lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do// kun tu rgyu sen rings kyis zhus pa'i mdo rdzogs so// /

Colophon

kun tu rgyu ba sen rings kyis zhus pa'i mdo rdzogs so/ /bka' dang por gtogs so/