D1385MW23703_1385rgyud 'grelAll versions of this work

nyi zla 'dzin pa'i rtsis

Text

ff. 282b–283a · 2 folio sides

  1. 282b

    དེ་དང་མཚུངས། །གྲངས་ནི་འོག་མ་ཡིན་པར་འདོད། །སྐར་དང་སྦྱོར་བའི་ཆུ་ཚོད་སོགས། །འདས་པར་ཁོང་དུ་ཆུད་པར་བྱ། །དེ་ལྟར་གཟའ་དང་ཚེས་གྲངས་དང་། །སྐར་མའི་སྦྱོར་བ་བྱེད་པ་སྟེ། །ཡན་ལག་ལྔ་ཡི་རྩིས་ཡིན་ནོ། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་པཎྜི་ཏ་ཆེན་པོ་ ཤཱཀྱ་ཤྲཱི་བྷ་དྲས་མཛད་པ་རྫོགས་སོ།། ༄། །ཉི་ཟླ་འཛིན་པའི་རྩིས་བཞུགས།། ༄༅༅། །དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །ཉི་ཟླ་འཛིན་པའི་མན་ངག་ནི། །ཟླ་བ་དག་པར་ཀླུ་ཟླ་སྦྱིན། །དེ་ལ་མིག་གིས་བསྒྱུར་བར་བྱ། །ཟླ་བའི་དོན་དུ་གཅིག་སྦྱིན་ཏེ། །ཉི་མ་ལ་ནི་གཉིས་སྦྱིན་ནོ། །དེ་ལ་མཁའ་དུས་ཆུས་ ཐོབ་དོར། །དོར་རྒྱུ་མེད་ན་དེ་ཉིད་དམ། །ལྷག་མ་སྐར་མས་བསྒྱུར་བ་ལ། །མཁའ་དུས་ཆུ་བོས་བགོས་ཐོབ་པ། །སྐར་མའི་གནས་སུ་གཞག་པར་བྱ། །ལྷག་མ་དྲུག་ཅུས་བསྒྱུར་བ་ལ། །གོང་གི་འགོད་བྱེད་ཀྱིས་ཐོབ་པ། །ཆུ་ཚོད་དག་ཏུ་ཤེས་པར་བྱ། །ཆུ་སྲང་དབུགས་དག་རིམ་པས་ཤེས། །དེ་ལྟར་ ཐོབ་པ་དེ་རྣམས་ཀྱིས། །རྒྱུ་སྐར་རྣམས་ལ་སྦྱངས་བའི་ལྷག །སྒྲ་གཅན་གདོང་གི་སྐར་མ་ཡིན། །དེ་དང་ཉི་ཟླའི་སྐར་མ་གཉིས། །མཉམ་ན་སྒྲ་གཅན་གདོང་གིས་འཛིན། །མི་མཉམ་ན་ནི་རྒྱུ་སྐར་ཕྱེད། །བསྲེས་པས་སྒྲ་གཅན་མཇུག་སྐར་ཡིན། །དེ་དང་ཉི་ཟླའི་སྐར་མ་གཉིས། །མཉམ་ ན་སྒྲ་གཅན་མཇུག་མས་འཛིན། །དེ་ཡང་ཟླ་བ་འཛིན་པ་ནི། །སྒྲ་གཅན་ཕྱེད་ནི་དག་པ་དང་། །ཉི་མ་དག་པ་གཉིས་བསྲེས་པས། །རྒྱུ་སྐར་རྫོགས་སམ་ཕྱེད་ལྷག་དོར། །ཐིག་ལེ་ཤར་ན་ཟླ་བ་ནི། །འཛིན་པར་ཐེ་ཚོམ་མེད་པ་ཡིན། །མཉམ་པོ་གསུམ་དང་ཐིག་ལེ་ཤར། །ཉི་མ་ངེས་པར་ འཛིན་པ་ཡིན། །དུས་ཚོད་ཇི་ཙམ་དག་ན་འཛིན། །ཉིན་མཚན་རིང་ཐུང་ཤེས་བྱ་སྟེ། །གཟའ་ཡི་ཆུ་ཚོད་དག་དང་སྦྱར། །ཕྱོགས་ནི་སྐར་མའི་ཕྱོགས་དང་སྦྱོར། །ཆེ་ཆུང་ཇི་ཙམ་འཛིན་པ་ནི། །གཟའ་ཡི་ཆུ་ཚོད་མན་ཆད་དང་། །སྐར་མའི་ཆུ་ཚོད་མན་ཆད་རྣམས། །བསྲེས་ཏེ་སྐར་མར་ བཅས་པ་དང་། །སྒྲ་གཅན་སྐར་མར་བཅས་པ་རྣམས། །མཉམ་ན་ཟླ་བ་རིལ་པོ་འཛིན། །བཅོ་ལྔས་གང་རུང་མང་གྱུར་ན། །བཞི་གསུམ་དག་ནི་འཛིན་པར་འགྱུར། །སུམ་ཅུས་གང་མང་ཕྱེད་འཛིན་ནོ། །དེ་བཞིན་སུམ་ཆ་ལ་སོགས་པ། །ཞིབ་ཏུ་བརྩིས་ལ་ལེགས་པར་སྨྲ། །ཞེ་ལྔས་གང་

  2. 283a

    རུང་མང་གྱུར་ན། །མཉམ་པོར་འགྲོགས་ཏེ་འཛིན་མི་འགྱུར། །ཆུ་ཚོད་ཇི་ཙམ་འཛིན་པ་ནི། །ཟླ་བ་རིལ་བོར་འཛིན་འགྱུར་རམ། །སུམ་གཉིས་ཕྱེད་སོགས་འཛིན་པ་ནི། །ཆུ་ཚོད་བཅུ་ཡི་བར་དུ་འཛིན། །བཞི་ཆ་ལ་སོགས་ཆུང་འཛིན་ན། །ཆུ་ཚོད་ལྔ་དང་དྲུག་ལ་སོགས། ། མཁས་པས་བརྩིས་ལ་ལེགས་པར་སྨྲ། །སྤྱིར་ནི་ཟླ་བ་དྲུག་དྲུག་ན། །ཟླ་བ་ཕལ་ཆེར་འཛིན་པར་འགྱུར། །རེས་ནི་ལྔ་ནའང་འཛིན་པ་སྲིད། །གལ་ཏེ་བཅུ་གཉིས་བར་དག་ཏུ། །མི་འཛིན་པའང་སྲིད་པ་ཡིན། །ཟླ་བ་ཉ་ལ་བཟུང་བ་ཡི། །སྟོང་ལ་ཉི་མ་འཛིན་ཡིན་པས། །ཐམས་ཅད་དུ་ནི་ བརྩི་བར་བྱ། །ཉི་མ་ཆེ་ཆུང་འཛིན་པ་རྣམས། །ཐིག་ལེ་ཤར་བའི་སྐབས་སུ་ཤེས། །དེ་ལ་ཟླ་བ་ཉ་དང་ནི། །བཅུ་དྲུག་མཚམས་སུ་འཛིན་པ་དང་། །ཉི་མ་སྟོང་དང་ཚེས་གཅིག་གི། །མཚམས་སུ་འཛིན་པར་ཐུབ་པས་གསུངས། །དཔལ་དུས་ཀྱི་འཁོར་ལོའི་རྩིས་ཀྱི་མན་ངག་ཅེས་བྱ་ བ། རྒྱ་གར་ཁ་ཆེའི་པཎྜི་ཏ་ཆེན་པོ། །ཤཱཀྱ་ཤྲཱི་བྷ་དྲས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། པཉྩ་གྲ་ཧ་པྲ་ཏི་ག་ཎོ་པ་དེ་ཤ་ནཱ་མ། བོད་སྐད་དུ། གཟའ་ལྔ་སོ་སོའི་རྩིས་ཀྱི་མན་ངག་ཅེས་བྱ་བ། དཔལ་དུས་ཀྱི་འཁོར་ལོ་ལ་ཕྱག་འཚལ་ལོ། །དག་ཟླར་ཀླུ་ སྦྱིན་མཁའ་མེས་བསྒྱུར། །ཚེས་བསྲེས་གནས་གསུམ་འོག་མ་ལ། །ཐུབ་མཁའ་རིས་བགོས་དབུས་མར་གཞུག །སྟེང་འོག་མིག་དང་སུམ་ཅུ་བསྲེ། །འོག་མ་ཆུ་དུས་ཀྱིས་ཐོབ་པས། །སྟེང་ལ་ཕྲི་བའི་ལྷག་མ་ལ། །རི་ཡིས་བགོས་པའི་ལྷག་མ་དང་། །ཚེས་དེའི་གཟའ་ནི་མཐུན་ནམ་ བལྟ། །མི་མཐུན་གྱུར་ན་གཅིག་ལ་སོགས། །བསྣོན་འབྲིད་བྱས་ལ་མཐུན་པར་བྱ། །དེ་ནི་དག་པའི་ཉིན་ཞག་སྟེ། །གཟའ་ལྔ་ཀུན་གྱི་ཐུན་མོང་ངོ་། །མིག་དམར་དག་པའི་ཞག་མཆོག་ལ། །དུས་ཆུ་དོར་བའི་ལྷག་མ་ལ། །རི་ཀླུ་དུས་ཀྱིས་བགོས་ཐོབ་དོར། །དོར་བའི་ལྷག་མ་སྐར་མས་ བསྒྱུར། །དེ་ལ་རི་ཀླུ་དུས་ཐོབ་རྣམས། །སྐར་མ་ཡིན་ཏེ་ལྷག་མ་ལ། །མཁའ་དུས་བསྒྱུར་ལ་ཐོབ་ཆུ་ཚོད། །ཆུ་སྲང་དབུགས་དག་རིམ་པས་ཤེས། །དེ་ལྟར་ཐོབ་པ་དེ་རྣམས་ནི། །གནས་གཉིས་བཞག་པའི་གཅིག་ལ་ནི། །སྐར་མའི་གནས་ནས་དགུ་དང་ནི། །ཆུ་ཚོད་གནས་ནས་སུམ་ཅུ་

Colophon

dpal dus kyi 'khor lo'i rtsis kyi man ngag ces bya pa; /rgya gar kha che'i paN+Di ta chen po/ /shAkya shra'i bha dras mdzad pa rdzogs so//