D1MW4CZ5369_0001'dul baAll versions of this work

'dul ba gzhi

Binayabastu

Text

ff. 1b–302a · 1,223 folio sides

This work spans more than one volume. Folios from its first and last volumes are shown.

  1. 1b

    ༄༅༅། །རྒྱ་གར་སྐད་དུ། བི་ན་ཡ་བསྟུ། བོད་སྐད་དུ། འདུལ་བ་གཞི། བམ་པོ་དང་པོ། དཀོན་མཆོག་གསུམ་ལ་ཕྱག་འཚལ་ལོ། །གང་གིས་འཆིང་ རྣམས་ཡང་དག་རབ་བཅད་ཅིང་། །མུ་སྟེགས་ཚོགས་རྣམས་ཐམས་ཅད་རབ་བཅོམ་སྟེ། །སྡེ་དང་བཅས་པའི་བདུད་རྣམས་ངེས་བཅོམ་ནས། །བྱང་ཆུབ་འདི་བརྙེས་དེ་ལ་ ཕྱག་འཚལ་ལོ། །ཁྱིམ་དོན་ཆེ་ཆུང་སྤངས་ཏེ་དང་པོར་རབ་འབྱུང་དཀའ། །རབ་བྱུང་ཐོབ་ནས་ཡུལ་སྤྱད་དག་གིས་དགའ་ཐོབ་དཀའ། །མངོན་དགའ་ཇི་བཞིན་དོན་བསྐྱེད་ཡང་ དག་བྱེད་པ་དཀའ། །ངུར་སྨྲིག་གོས་འཆང་མཁས་པ་ཚུལ་ལས་ཉམས་པ་དཀའ། །གཞི་རྣམས་ཀྱི་སྤྱི་སྡོམ་ལ། རབ་འབྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ ལྤགས་གཞི། །སྨན་དང་གོས་དང་སྲ་བརྐྱང་དང་། །ཀཽ་ཤཱམ་བཱི་དང་ལས་ཀྱི་གཞི། །དམར་སེར་ཅན་དང་གང་ཟག་དང་། །སྤོ་དང་གསོ་སྦྱོང་བཞག་པ་དང་། །གནས་མལ་དང་ནི་

  2. 2a

    རྩོད་པ་དང་། །དགེ་འདུན་དབྱེན་རྣམས་བསྡུས་པ་ཡིན། །རབ་ཏུ་འབྱུང་བའི་གཞིའི་སྤྱི་སྡོམ་ལ། ཤཱ་རིའི་བུ་དང་མུ་སྟེགས་ཅན། །དགེ་ཚུལ་གཉིས་དང་བྱ་རོག་སྐྲོད། །དགྲ་བཅོམ་བསད་དང་ལག་རྡུམ་གྱི། །སྡེ་ཚན་ ཡང་དག་བསྡུས་པ་ཡིན། །སྡོམ་ལ། ཤཱ་རིའི་བུ་དང་རབ་འབྱུང་དང་། །བསྙེན་པར་རྫོགས་པར་གནང་བ་དང་། །ཉེ་སྡེས་ཚོགས་ནི་བསྡུས་པ་དང་། །ལྔ་པའི་སྡེ་ཚན་བསྡུས་པ་ཡིན། །བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན། ཡུལ་ཨང་ག་དག་ན་ཨང་གའི་རྒྱལ་པོ་ཞེས་བྱ་བས་རྒྱལ་སྲིད་འབྱོར་པ། རྒྱས་པ་བདེ་བ་ལོ་ལེགས་པ་སྐྱེ་བོ་དང་མི་མང་པོས་གང་བ་བྱེད་དུ་བཅུག་གོ། །ཡུལ་མ་ག་དྷཱ་དག་ན་ཡང་རྒྱལ་པོ་པད་མ་ཆེན་པོ་ཞེས་བྱ་བས། རྒྱལ་སྲིད་འབྱོར་པ་རྒྱས་པ་བདེ་བ་ལོ་ ལེགས་པ་སྐྱེ་བོ་དང་མི་མང་པོས་གང་བ་བྱེད་དུ་བཅུག་གོ། །རེས་འགའ་ནི་ཨང་གའི་རྒྱལ་པོ་དཔུང་དང་མཐུ་ཆེ་བ་ཡིན་ལ། རེས་འགའ་ནི་རྒྱལ་པོ་པད་མ་ཆེན་པོ་དཔུང་དང་མཐུ་ཆེ་བ་ཡིན་ནོ། །གང་གི་ཚེ་ཨང་གའི་རྒྱལ་པོ་དཔུང་དང་མཐུ་ཆེ་བ་དེའི་ཚེ་ ན། དེས་དཔུང་གི་ཚོགས་ཡན་ལག་བཞི་པ། གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། ཡུལ་མ་ག་དྷཱ་རྒྱལ་པོའི་ཁབ་མ་གཏོགས་པ་བཅོམ་ནས་ཕྱིར་ལྡོག་པར་ བྱེད་དོ། །གང་གི་ཚེ་རྒྱལ་པོ་པད་མ་ཆེན་པོ་དཔུང་དང་མཐུ་ཆེ་བ་དེའི་ཚེ་ན། དེས་ཀྱང་དཔུང་གི་ཚོགས་ཡན་ལག་བཞི་པ། གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ།

  3. 2b

    ཡུལ་ཨང་ག་ཙམ་པ་མ་གཏོགས་པ་བཅོམ་ནས་ཕྱིར་ལྡོག་པར་བྱེད་དོ། །དེ་ནས་དུས་གཞན་ཞིག་ན་ཨང་གའི་རྒྱལ་པོ་དཔུང་དང་མཐུ་ཆེ་བར་གྱུར་ནས། དེས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་ བུ་ཆུང་གི་ཚོགས་གོ་བསྐོན་ཏེ། ཡུལ་མ་ག་དྷཱ་གཞོམ་པར་བརྩམས་པ་དང་། མ་ག་དྷཱ་ན་གནས་པའི་སྐྱེ་བོའི་ཚོགས་ཀྱིས་རྒྱལ་པོ་པད་མ་ཆེན་པོ་ལ་ལྷ་ཨང་གའི་རྒྱལ་པོས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། ཡུལ་མ་ག་དྷཱ་འཇོམས་པར་བགྱིད་དོ་ཞེས་སྦྲོན་པ་དག་བཏང་ངོ་། །རྒྱལ་པོ་པད་མ་ཆེན་པོས་ཀྱང་ཐོས་ནས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ། ཨང་གའི་རྒྱལ་པོ་དང་གཡུལ་སྤྲད་པའི་ཕྱིར་འཕགས་སོ། །དེ་ནས་ཨང་གའི་རྒྱལ་པོས་རྒྱལ་པོ་པད་མ་ཆེན་པོའི་གླང་པོ་ཆེ་པའི་ཚོགས་ཐམས་ཅད་ཕྲོགས་ཤིང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ ཚོགས་ཐམས་ཅད་ཀྱང་ཕྲོགས་སོ། །རྒྱལ་པོ་པད་མ་ཆེན་པོ་ཡང་ཕམ་པ་དང་། སྐྲག་པ་དང་། བཅོམ་པ་དང་། གཞན་རྒྱལ་བ་དང་། རྒྱབ་ཀྱིས་ཕྱོགས་པར་བྱས་ཏེ། རྒྱལ་པོའི་ཁབ་ཏུ་ཞུགས་ནས་སྒོ་བཅད་དེ། ར་བ་དག་གི་ཁར་སྦྲེངས་ནས་འདུག་གོ། །ཨང་གའི་རྒྱལ་ པོས་རྒྱལ་པོ་པད་མ་ཆེན་པོ་ལ་ཕོ་ཉ་བཏང་སྟེ། གལ་ཏེ་ཕྱིར་འབྱུང་ན་དེ་ལྟ་ན་ལེགས། གལ་ཏེ་ཕྱིར་མི་འབྱུང་ན་ཇི་སྟེ་སྟེང་གི་ནམ་མཁའ་ལ་འགྲོ་ན་ནི་མདའ་བརྒྱུད་པས་ཁྱོད་ལྟུང་བར་བྱའོ། །ཇི་སྟེ་སའི་འོག་ཏུ་འགྲོ་ན་ནི་མཆིལ་པ་དང་དྲང་བའི་ཚུལ་གྱིས་དྲང་བར་བྱའོ། །ཇི་སྟེ་རིའི་ རྩེ་མོར་འཛེག་ན་ནི་དེར་ཡང་ཁྱོད་ཐར་པ་མེད་དོ་ཞེས་སྤྲིང་ངོ་། །རྒྱལ་པོ་པད་མ་ཆེན་པོས་ཕྲིན་ཡིག་བཀླགས་ནས་དེ་མི་བདེ་བར་གྱུར་ཏེ། ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་འདུག་ནས། དེས་བློན་པོ་རྣམས་ལ་སྨྲས་པ། ཤེས་ལྡན་དག་ཨང་གའི་རྒྱལ་

  4. 3a

    པོ་འདི་ནི་གདུག་པ། ཕ་རོལ་གནོན་པ། དཔུང་དང་མཐུ་ཆེ་བར་གྱུར་ལ། དེས་ཡུ་བུ་ཅག་ལ་འདི་དང་འདི་སྐད་ཅེས་སྤྲིང་ན། དེ་ལ་ཡུ་བུ་ཅག་གིས་ཇི་ལྟར་བསྒྲུབ་པར་བྱ། དེ་དག་གིས་ཚིགས་སུ་བཅད་པ་སྨྲས་པ། ཡུལ་དང་སྲོག་ལ་གནོད་གྱུར་ན། ། སྐྱེས་བུས་ཀུན་དུ་སྲོག་བསྲུང་བྱ། །བློ་ཡིས་གཉིས་ཀ་དཔྱད་བྱས་ན། །ཡུལ་ནི་ཡང་རྙེད་སྲོག་རྣམས་མིན། །ལྷ་རྣམ་པ་ཐམས་ཅད་དུ་སླར་འབྱུང་བར་བགྱིའོ། །དེ་རལ་གྲི་མགུལ་དུ་ཐོགས་ཏེ་ཕྱིར་བྱུང་བ་དང་། ཨང་གའི་རྒྱལ་པོས་དེ་ལ་ལོ་ཐང་དང་དཔྱ་ཕབ་སྟེ་དེ་ཉིད་དུ་ བཞག་གོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པས་གཟིགས་པ་ལྔ་པོ་དག་ལ་གཟིགས་ནས་འདོད་པ་ན་སྤྱོད་པའི་ལྷ་དྲུག་པོ་དག་ལ་ལན་གསུམ་བསྒོ་བ་མཛད་དེ། གླང་པོ་ཆེ་ལྟར་སྣང་བར་བསྒྱུར་ཏེ། ཡུམ་གྱི་ལྷུམས་སུ་ ཞུགས་པ་དེའི་ཚེ་ན་ས་ཆེན་པོ་ཤིན་ཏུ་གཡོས་པར་གྱུར་ཅིང་འཇིག་རྟེན་འདི་ཐམས་ཅད་ཀྱང་སུམ་བཅུ་རྩ་གསུམ་པའི་ལྷ་རྣམས་ཀྱི་ཁ་དོག་གི་མཐུ་བས་ལྷག་པའི་སྣང་བ་རྒྱ་ཆེན་པོས་ཁྱབ་པར་གྱུར་ཅིང་། འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་གནག་མུན་པར་བྱེད་པས། གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ནས། སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་ མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་ཤེས་པར་གྱུར་ཏོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་ བལྟམ་པ་དེའི་ཚེ་ན་གྲོང་ཁྱེར་ཆེན་པོ་བཞི་པོ་དག་ཏུ་རྒྱལ་པོ་ཆེན་པོ་བཞི་དག་གི་བུ་ཡང་བཙས་པར་གྱུར་ཏེ། རྒྱལ་པོའི་ཁབ་ཏུ་རྒྱལ་པོ་པད་མ་ཆེན་པོའི་བུ་བཙས་སོ། །མཉན་ཡོད་དུ་ནི་རྒྱལ་པོ་རྩིབས་ཀྱིས་འཕུར་ཚངས་བྱིན་གྱི་བུ་བཙས་སོ། །འཕགས་རྒྱལ་དུ་ནི་རྒྱལ་པོ་མུ་

  5. 3b

    ཁྱུད་མཐའ་ཡས་ཀྱི་བུ་བཙས་སོ། །ཀཽ་ཤཱམ་བཱིར་ནི་རྒྱལ་པོ་དམག་བརྒྱ་པའི་བུ་བཙས་སོ། །བཅོམ་ལྡན་འདས་བྱང་ཆུབ་སེམས་དཔའ་བལྟམ་པ་ན་འཇིག་རྟེན་ཐམས་ཅད་སུམ་བཅུ་རྩ་གསུམ་པའི་ལྷ་རྣམས་ཀྱི་ཁ་དོག་གི་མཐུ་བས་ལྷག་པའི་སྣང་བ་རྒྱ་ཆེན་པོས་ཁྱབ་པར་གྱུར་ ཅིང་འཇིག་རྟེན་གྱི་འཇིག་རྟེན་གྱི་བར་གང་ན་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་འདི་གཉིས་ཀྱི་འོད་དག་ཉམས་སུ་མི་མྱོང་བའི་མུན་པ་མུན་གནག་མུན་པར་བྱེད་པས་གནག་པར་གྱུར་པ་གང་དག་ཡིན་པ་དེ་དག་ཀྱང་དེའི་ཚེ་ན་སྣང་བ་རྒྱ་ཆེན་པོས་ཁྱབ་པར་གྱུར་ ནས། སེམས་ཅན་གང་དག་དེར་སྐྱེས་པ་དག་གིས་རང་གི་ལག་པ་བརྐྱང་བ་ཡང་མི་མཐོང་བ་དེ་དག་གིས་ཀྱང་འོད་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ ཞེས་ཤེས་པར་གྱུར་ཏོ། །རྒྱལ་པོ་པད་མ་ཆེན་པོས་བསམས་པ། བདག་གི་བུ་བཙས་པ་ན་འཇིག་རྟེན་ཉི་མའི་གཟུགས་ཤར་བ་ལྟར་སྣང་ཞིང་འདི་བཙུན་མོ་གཟུགས་ཅན་གྱི་བུ་ཡིན་པས་གཞོན་ནུ་འདིའི་མིང་གཟུགས་ཅན་སྙིང་པོར་གདགས་སོ་སྙམ་ནས་བུ་དེའི་མིང་གཟུགས་ ཅན་སྙིང་པོ་ཞེས་བྱ་བར་བཏགས་སོ། །རྒྱལ་པོ་རྩིབས་ཀྱིས་འཕུར་ཚངས་བྱིན་གྱིས་བསམས་པ། བདག་གི་བུ་བཙས་པ་ན་འཇིག་རྟེན་གསལ་བ་གསལ་བ་ལྟར་སྣང་བས་གཞོན་ནུ་འདིའི་མིང་གསལ་རྒྱལ་དུ་གདགས་སོ་སྙམ་ནས་བུ་དེའི་མིང་གསལ་རྒྱལ་ཞེས་བྱ་བར་ བཏགས་སོ། །རྒྱལ་པོ་དམག་བརྒྱ་པས་བསམས་པ། བདག་གི་བུ་བཙས་པ་ན་འཇིག་རྟེན་ཉི་མ་ཤར་བ་ལྟར་སྣང་བར་གྱུར་པས་གཞོན་ནུ་འདིའི་མིང་ཤར་བར་གདགས་སོ་སྙམ་ནས་བུ་དེའི་མིང་ཤར་བ་ཞེས་བྱ་བར་བཏགས་སོ། །རྒྱལ་པོ་མུ་ཁྱུད་མཐའ་ཡས་ཀྱིས་ བསམས་པ། བདག་གི་བུ་བཙས་པ་ན་འཇིག་རྟེན་རབ་ཏུ་སྣང་བས་སྣང་བར་གྱུར་པས་གཞོན་ནུ་འདིའི་མིང་རབ་སྣང་ཞེས་བྱ་བར་གདགས་སོ་སྙམ་ནས་བུ་དེའི་མིང་རབ་སྣང་ཞེས་བྱ་བར་བཏགས་སོ། །རྒྱལ་པོ་རེ་རེས་བསམས་པ་ཡང་བདག་གི་བུ་འདིའི་མཐུ་ཡིན་ནོ། །བདག་

  6. 4a

    གི་བུ་འདིའི་མཐུ་ཡིན་ནོ་སྙམ་མོད་ཀྱི། དེ་ནི་དེ་ལྟ་མ་ཡིན་ཏེ། འདི་ལྟར་དེ་དག་ཐམས་ཅད་ནི་བྱང་ཆུབ་སེམས་དཔའི་མཐུ་ཡིན་པའི་ཕྱིར་རོ། །གང་གི་ཉིན་མོ་གཞོན་ནུ་གཟུགས་ཅན་སྙིང་པོ་བཙས་པ་དེ་ཉིད་ཀྱི་ཉིན་མོ་བློན་པོ་ལྔ་བརྒྱ་དག་གི་བུ་ལྔ་བརྒྱ་ཡང་ བཙས་ཏེ། དེ་དག་ཀྱང་རིགས་དང་མཐུན་པར་མིང་བཏགས་སོ། །གཞོན་ནུ་གཟུགས་ཅན་སྙིང་པོ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། ། དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་ པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ནས། དེ་ཡི་གེའི་མཐར་ཕྱིན་ཅིང་འབྱེད་པ་དང་། ཀློག་པ་དང་། མཁས་པ་དང་། སྐྱོད་པ་གསལ་བ་དང་། བརྟག་པ་བརྒྱད་ པོ་འདི་ལྟ་སྟེ། རིན་པོ་ཆེ་བརྟག་པ་དང་། གཞི་བརྟག་པ་དང་། གོས་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །རྒྱལ་པོ་རྒྱལ་རིགས་སྤྱི་བོར་དབང་ བསྐུར་བ་ལྗོངས་ཀྱི་དབང་ཕྱུག་མཐུ་དང་བརྩོན་འགྲུས་ཐོབ་པ། ས་ཆེན་པོའི་དཀྱིལ་འཁོར་མངོན་པར་རྒྱལ་བར་བྱས་ཏེ་གནས་པ་རྣམས་ཀྱི་བཟོའི་གནས་དང་། ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉར་བཞོན་པ་དང་། རྟ་བཞོན་ པ་དང་། ཤིང་རྟའི་ཐབས་དང་། རལ་གྲིའི་ཐབས་དང་། འཕོང་དང་། ཕྱིར་བསྣུར་བ་དང་། མདུན་དུ་བསྣུར་བ་དང་། ལྕགས་ཀྱི་བསྒྱུར་ཐབས་དང་། ཞགས་པ་གདབ་པ་དང་། མདའ་བོ་ཆེ་འཕེན་ཐབས་དང་། འཛིན་སྟངས་དང་། གོམ་སྟངས་དང་། ཐོར་ཚུགས་

  7. 4b

    དང་། གཅད་པ་དང་། དྲལ་བ་དང་། དབུག་པ་དང་། གནས་ལྔ་པོ་འདི་ལྟ་སྟེ། རྒྱང་ནས་འཕོག་པ་དང་། སྒྲ་གྲགས་པར་འཕོག་པ་དང་། གནད་དུ་འཕོག་པ་དང་། མི་འཆོར་བར་འཕོག་པ་དང་། ཚབས་ཆེ་བ་དེ་དག་ལ་ཡང་ཞུགས་ཤིང་བྱང་བར་གྱུར་ཏོ། །བློན་ པོའི་བུ་ལྔ་བརྒྱ་པོ་དེ་དག་ཀྱང་བཟོའི་གནས་དང་། ལས་ཀྱི་གནས་དག་ལ་བྱང་བར་གྱུར་ཏོ། །དེ་ཕས་བཟོ་སྦྱང་བ་བཅྭ་བརྒྱད་པོ་དག་ལ་བཅུག་ནས་དེའི་མིང་བཟོ་སྦྱངས་གཟུགས་ཅན་སྙིང་པོ། བཟོ་སྦྱངས་གཟུགས་ཅན་སྙིང་པོ་ཞེས་བྱ་བར་གྱུར་ཏོ། །དེ་ནས་དུས་གཞན་ ཞིག་ན་གཞོན་ནུ་གཟུགས་ཅན་སྙིང་པོ་གླང་པོ་ཆེ་ལ་ཞོན་ཏེ་ལྗོངས་སུ་བྱུང་བ་དང་། དེས་ཨང་གའི་རྒྱལ་པོའི་ཞོ་ཤས་འཚོ་བ་དག་ལོ་ཐང་དང་དཔྱ་སྡུད་པ་མཐོང་ནས། དེས་སྨྲས་པ། ཤེས་ལྡན་དག་ལོ་ཐང་དང་དཔྱ་སྡུད་པ་འདི་དག་སུའི་ཡིན། དེ་དག་གིས་སྨྲས་པ། ལྷ་ ཨང་གའི་རྒྱལ་པོའི་ལགས་སོ། །དེས་སྨྲས་པ། ཅི་ཡུ་བུ་ཅག་དེ་ལ་ལོ་ཐང་འབུལ་བ་ཡིན་ནམ། དེ་དག་གིས་སྨྲས་པ། ལྷ་ལོ་ཐང་འབུལ་བ་ལགས་སོ། །དེས་སྨྲས་པ། ཤེས་ལྡན་དག་ཞོ་ཤས་འཚོ་བ་དེ་དག་བོས་ཤིག །དེ་དག་གིས་བོས་པ་དང་། དེས་སྨྲས་ པ། ཤེས་ལྡན་དག་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ལ། ངེད་ཀྱང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ན། ཅིའི་ཕྱིར་ཁྱེད་ཅག་ལོ་ཐང་དང་དཔྱ་སྡུད་པར་བྱེད། དེང་ལ་ཕྱིན་ཆད་ལོ་ཐང་དང་དཔྱ་མ་སྡུད་ཅིག །དེ་དག་གིས་བསམས་ པ། གཞོན་ནུ་འདི་ནི་རྒྱུས་མི་ཤེས་པ་ཡིན་པས་བདག་ཅག་རྒྱལ་པོ་པད་མ་ཆེན་པོའི་གན་དུ་འདོང་ཞིང་སོང་ནས་བསྙད་པར་བྱའོ་སྙམ་ནས། དེ་དག་རྒྱལ་པོ་པད་མ་ཆེན་པོའི་གན་དུ་སོང་སྟེ་ཕྱིན་ནས་སྨྲས་པ། ལྷ་བདག་ཅག་ཨང་གའི་རྒྱལ་པོའི་ཞོ་ཤས་འཚོ་བ་ལོ་ཐང་དང་དཔྱ་ སྡུད་པ་ན་གཞོན་ནུ་གཟུགས་ཅན་སྙིང་པོས་བཀག་ན། ཅི་བསྡུ་བར་འཚལ་ལམ། འོན་ཏེ་སླར་མཆི་བར་འཚལ། དེས་སྨྲས་པ། ཤེས་ལྡན་དག་གཞོན་ནུ་དེ་ནི་རྒྱུས་མི་ཤེས་པ་ཡིན་པས་ཁྱེད་ཅག་སྔོན་ཇི་ལྟར་ལོ་ཐང་དང་དཔྱ་སྡུད་པ་དེ་བཞིན་དུ་སྡུས་ཤིག །དེ་དག་གིས་

  8. 5a

    ཡང་བསྡུ་བར་བརྩམས་ཏེ། དེ་དག་འོངས་ནས་ཕྱིར་ལྡོག་པ་གཞོན་ནུ་གཟུགས་ཅན་སྙིང་པོས་མཐོང་ནས་སྨྲས་པ། ཤེས་ལྡན་དག་ངས་ཁྱེད་ལ་ཕྱིན་ཆད་ལོ་ཐང་དང་དཔྱ་མ་སྡུད་ཅིག་ཅེས་མ་བཟློག་གམ། ཅིའི་ཕྱིར་ཡང་ཁྱེད་ལོ་ཐང་དང་དཔྱ་སྡུད། གལ་ ཏེ་རེ་ཞིག་འཁོད་ན་དེ་ལྟ་ན་ལེགས། གལ་ཏེ་མི་འཁོད་ན་མཚམས་ཆེན་པོ་གཅད་པར་བྱའོ། །དེ་དག་སྐྲག་ནས་བསམས་པ། གཞོན་ནུ་འདི་ནི་གདུག་པ་ཕ་རོལ་གནོན་པ་ཡིན་པས་བདག་ཅག་ལ་གནོད་པ་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས། བདག་ཅག་ཨང་གའི་རྒྱལ་པོའི་གན་དུ་དོང་སྟེ་སྦྲན་པར་བྱའོ་སྙམ་ནས་དེ་དག་ཨང་གའི་རྒྱལ་པོའི་གན་དུ་དོང་སྟེ་ཕྱིན་ནས་སྨྲས་པ། ལྷ་བདག་ཅག་ལྷའི་ཞོ་ཤས་འཚོ་བ་ལགས་ཏེ། བདག་ཅག་ལྷའི་ལོ་ཐང་དང་དཔྱ་སྡུད་པ་ན་རྒྱལ་པོ་པད་མ་ཆེན་པོའི་བུ་གཞོན་ནུ་གཟུགས་ཅན་སྙིང་ པོ་དེས་བཟློག་ལགས་ན། ད་གལ་ཏེ་ལྷས་བཏང་སྙོམས་མཛད་ན་སླད་ཀྱིས་གནོད་པ་ཆེན་པོ་བགྱིད་པར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ། །ཚིགས་སུ་བཅད་པ་ཡང་སྨྲས་པ། ཇི་སྲིད་ཤིང་ནི་གཞོན་པའི་ཚེ། །སེན་མོ་དག་གིས་གཅད་ནུས་པ། ། དེ་ཉིད་ཆེན་པོར་སྐྱེས་པ་ན། །སྟ་རེ་བརྒྱས་ཀྱང་གཅད་པར་དཀའ། །ཨང་གའི་རྒྱལ་པོས་རྒྱལ་པོ་པད་མ་ཆེན་པོ་ལ་གཞོན་ནུ་གཟུགས་ཅན་སྙིང་པོ་མགུལ་པ་ནས་ཐོགས་ལ་ཚུར་བཀྲི་བའམ། ཡང་ན་རྩྭ་དང་ཆས་སྟ་གོན་གྱིས་ཤིག་དང་། ང་ཉིད་འོ་ནིར་འོང་ངོ་ཞེས་ཕྲིན་ཡིག་ སྤྲིང་ངོ་། །རྒྱལ་པོ་པད་མ་ཆེན་པོས་ཕྲིན་ཡིག་བཀླགས་ནས་དེ་མི་བདེ་བར་གྱུར་ཏེ་ལག་པ་འགྲམ་པ་ལ་གཏད་ནས། སེམས་ཁོང་དུ་ཆུད་ཅིང་འདུག་འདུག་ནས། དེས་གཞོན་ནུ་གཟུགས་ཅན་སྙིང་པོ་བོས་ནས་སྨྲས་པ། ཅིའི་ཕྱིར་ཁྱོད་ཀྱིས་ཨང་གའི་རྒྱལ་པོའི་ཞོ་ཤས་འཚོ་བ་དག་ ལོ་ཐང་དང་དཔྱ་སྡུད་པ་ཟློག། དེས་ཁྲོས་ཏེ་ང་ལ་འདི་དང་འདི་སྐད་ཅེས་སྤྲིང་ངོ་། །དེས་སྨྲས་པ། ལྷ་ཅི་སྐོལ་དེ་ལ་ལོ་ཐང་འབུལ་བ་ལགས་སམ། བུ་ལོ་ཐང་འབུལ་བ་ཡིན་ནོ། །དེས་སྨྲས་པ། ལྷ་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ལགས་ལ། སྐོལ་ཀྱང་

  9. 5b

    རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ལགས་ན། ཅིའི་སླད་དུ་སྐོལ་དེ་ལ་ལོ་ཐང་དང་དཔྱ་འབུལ། ལྷས་བདག་ལ་དཔུང་གི་ཚོགས་ཡན་ལག་བཞི་པ་སྩལ་བ་འབའ་ཞིག་མཛོད་ཅིག་དང་། བདག་གིས་ཨང་གའི་རྒྱལ་པོ་དང་ལྷན་ཅིག་གཡུལ་ངོར་གཡུལ་སྤྲད་པར་ བགྱིའོ། །དེ་ནས་རྒྱལ་པོ་པད་མ་ཆེན་པོས་ཨང་གའི་རྒྱལ་པོ་ལ་ཁྱོད་ཀྱི་མཐུ་དང་། དཔུང་དང་། བརྩོན་འགྲུས་དང་། ཕ་རོལ་གནོན་པ་གང་དག་ཡིན་པ་དེ་དག་ཐམས་ཅད་མ་ཉམས་པར་གྱིས་ཤིག་ཅེས་ཕྲིན་ཡིག་སྤྲིང་ངོ་། །ཨང་གའི་རྒྱལ་པོས་ཐོས་ནས་མི་བཟོད་ པ་སྐྱེས་ཏེ་བློན་པོ་རྣམས་ལ་སྨྲས་པ། ཤེས་ལྡན་དག་དེའི་ཡུལ་འཁོར་གཞོམ་པར་བྱས། དཔུང་གི་ཚོགས་ཡན་ལག་བཞི་པ་གོ་སྐོན་ཅིག །དེས་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ ཚོགས་གོ་བསྐོན་ཏེ་ཡུལ་མ་ག་དྷཱ་གཞོམ་པར་བརྩམས་པ་དང་། མ་ག་དྷཱ་ན་གནས་པའི་སྐྱེ་བོའི་ཚོགས་ཀྱིས་རྒྱལ་པོ་པད་མ་ཆེན་པོ་ལ་ལྷ་ཨང་གའི་རྒྱལ་པོ་འདི་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ཏེ་ཡུལ་མ་ག་དྷཱ་འཇོམས་པར་བགྱིད་དོ་ཞེས་སྦྲོན་པ་དག་བཏང་ངོ་། །རྒྱལ་པོ་པད་མ་ཆེན་པོས་ཐོས་ནས་དེ་མི་བདེ་བར་གྱུར་ཏེ་ལག་པ་འགྲམ་པ་ལ་གཏད་ནས། སེམས་ཁོང་དུ་ཆུད་ཅིང་འདུག་འདུག་ནས། དེས་གཞོན་ནུ་གཟུགས་ཅན་སྙིང་པོ་བོས་ ཏེ། དེ་ལ་དཔུང་གི་ཚོགས་ཡན་ལག་བཞི་པ་བྱིན་ནོ། །གཞོན་ནུ་གཟུགས་ཅན་སྙིང་པོས་བློན་པོའི་བུ་ལྔ་བརྒྱ་བསྡུས་ཏེ་སྨྲས་པ། ཤེས་ལྡན་དག་ང་ནི་ཨང་གའི་རྒྱལ་པོ་དང་ལྷན་ཅིག་གཡུལ་ངོར་གཡུལ་སྤྲོད་པར་བྱེད་ན་ཤེས་ལྡན་དག་ཅི་བྱེད། དེ་དག་གིས་སྨྲས་པ། གཞོན་ནུ་ཁྱོད་ཀྱི་གནས་སྐབས་གང་ལགས་པ་དེ་བདག་ཅག་གི་ཡང་ལགས་སོ། །དེས་ཚིགས་སུ་བཅད་པ་སྨྲས་པ། མི་གང་ལ་ནི་ཁྱིམ་དཔལ་གནས། །དེ་ནི་ཀུན་གྱིས་ཡོངས་བསྲུང་བྱ། །དེ་ཉམས་ན་ནི་ཀུན་ཉམས་ཏེ། ལྟེ་བ་ཆག་པས་རྩིབས་རྣམས་བཞིན། །ད་ཁྱེད་

  10. 6a

    ཀྱིས་ཀུན་ནས་ཡོངས་སུ་བསྲུང་བར་བྱའོ། །དེ་དག་གིས་སྨྲས་པ། ལྷའི་གནས་སྐབས་གང་ལགས་པ་དེ་བདག་ཅག་གི་ཡང་ལགས་ལ། ལྷའི་ཞབས་གང་ན་བ་དེ་ན་བདག་ཅག་གི་མགོ་མཆིས་སོ། །དེ་ནས་དེས་དཔུང་གི་ཚོགས་ཡན་ལག་བཞི་པ་ གོ་བསྐོན་ཏེ། རྒྱལ་པོའི་ཁབ་ནས་བྱུང་ངོ་། །རྒྱལ་པོ་པད་མ་ཆེན་པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་བློན་པོའི་ཚོགས་ཀྱིས་བསྐོར་ཅིང་འདུག་པ་དེས་དེ་བྱུང་བ་མཐོང་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་དམག་འདི་སུའི་ཡིན། དེ་དག་གིས་སྨྲས་པ། ལྷ་གཞོན་ནུ་གཟུགས་ཅན་སྙིང་པོའི་ལགས་སོ། །དེས་སྨྲས་པ། ཤེས་ལྡན་དག་ཨེ་མ་འདི་དམག་མང་པོ་དང་ལྡན་ནོ་ཞེས་སྨྲས་པས། དེའི་མིང་དམག་ལྡན་གཟུགས་ཅན་སྙིང་པོ། དམག་ལྡན་གཟུགས་ཅན་སྙིང་པོ་ཞེས་བྱ་བར་གྱུར་ཏོ། །དེ་ན་ཁ་ཅིག་གིས་ནི་བཟོ་ སྦྱངས་གཟུགས་ཅན་སྙིང་པོ་ཞེས་བྱ་བར་ཤེས་སོ། །ཁ་ཅིག་གིས་ནི་དམག་ལྡན་གཟུགས་ཅན་སྙིང་པོ་ཞེས་བྱ་བར་ཤེས་སོ། །གཞོན་ནུ་གཟུགས་ཅན་སྙིང་པོས་བློན་པོའི་བུ་ལྔ་བརྒྱ་པོ་དག་ལ་སྨྲས་པ། ཤེས་ལྡན་དག་ཨང་གའི་རྒྱལ་པོ་འདི་ནི་གདུག་པ་ཕ་རོལ་གནོན་ པ་དཔུང་དང་མཐུ་ཆེ་བར་གྱུར་པ་ཡིན་པས་ཡུ་བུ་ཅག་གིས་འདི་དང་ལྷན་ཅིག་གཡུལ་སྤྲད་པར་ནི་མི་ནུས་ཀྱིས། འདི་ལྟར་དེ་བག་ཡངས་སུ་གོ་ཕུད་པའི་ཕྲུ་མ་བརྫི་ཞིང་བཞབས་ཏེ་གསད་པར་བྱའོ། །དེ་དག་གིས་དེ་བག་ཡངས་སུ་གོ་ཕུད་པའི་ཕྲུ་མ་བརྫིས་ནས་དེ་དག་གིས་ཨང་ གའི་རྒྱལ་པོ་བཞབས་ཏེ་བསད་དོ། །ཨང་གའི་རྒྱལ་པོའི་དཔུང་གི་ཚོགས་ཡན་ལག་བཞི་པ་ཕྱོགས་བཞིར་བྱེར་བ་དང་། གཞོན་ནུ་གཟུགས་ཅན་སྙིང་པོས་ཕྱོགས་བཞིར་ཕོ་ཉ་རྟ་པ་དག་བཀྱེ་སྟེ། ཤེས་ལྡན་དག་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་ བ་ཡིན་ལ། ངེད་ཀྱང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་གྱིས་ཕྱིར་ལོག་ཤིག་དང་། ཤེས་ལྡན་དག་ངས་ཤེས་ལྡན་དག་ལ་འཚོ་བའི་རྒྱུ་སྦྱིན་པར་བྱའོ་ཞེས་སྤྲིང་བ་དང་དེ་དག་ཕྱིར་ལོག་གོ། །དེ་ནས་ཨང་གའི་རྒྱལ་པོས་གྲོང་ཁྱེར་ཙམ་པ་བསྲུང་བ་བཞག་པ་དེས་

  11. 6b

    ཨང་གའི་རྒྱལ་པོ་ཇི་ལྟར་བསད་པ་ཐོས་ནས་དེས་སྒོ་བཅད་དེ་ར་བ་དག་གི་ཁར་སྦྲེངས་ནས་འདུག་གོ། །གཞོན་ནུ་གཟུགས་ཅན་སྙིང་པོ་ཡང་མཐར་གྱིས་གྲོང་ཁྱེར་ཙམ་པར་ཕྱིན་ནས་དེས་ཤིང་རིང་པོ་ལ་ཨང་གའི་རྒྱལ་པོའི་མགོ་བཏགས་ཏེ་བསྟན་ནས་སྨྲས་པ། ངས་ཁྱོད་ཀྱི་ཇོ་བོ་གང་ ཡིན་པ་དེ་གནས་སྐབས་འདི་ལྟ་བུར་བྱས་ཀྱིས། གལ་ཏེ་ཇེ་ཕྱིར་འབྱུང་ན་དེ་ལྟ་ན་ལེགས། གལ་ཏེ་ཕྱིར་མི་འབྱུང་ན་ཁྱོད་ཀྱང་གནས་སྐབས་འདི་ལྟ་བུར་བྱས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །དེས་ཐོས་ནས་མི་བདེ་བར་གྱུར་ཏེ། དེས་བསམས་ པ། ཡུལ་དང་སྲོག་ལ་གནོད་གྱུར་ན། །སྐྱེས་བུས་ཀུན་དུ་སྲོག་བསྲུང་བྱ། །བློ་ཡིས་གཉིས་ཀ་དཔྱད་བྱས་ན། །ཡུལ་ནི་ཡང་རྙེད་སྲོག་རྣམས་མིན། །སྙམ་ནས་དེ་རལ་གྲི་མགུལ་དུ་ཐོགས་ཏེ་ཕྱིར་བྱུང་ངོ་། །དེ་ན་གཞོན་ནུ་གཟུགས་ཅན་སྙིང་པོས་ཨང་གའི་རྒྱལ་པོ་ བསད་དེ་གྲོང་ཁྱེར་ཙམ་པ་རང་གི་ལག་ཏུ་ཐོབ་ནས་དེས་རྒྱལ་པོ་པད་མ་ཆེན་པོ་ལ་ལྷ་བདག་གིས་ཨང་གའི་རྒྱལ་པོ་བཀུམ་སྟེ་གྲོང་ཁྱེར་ཙམ་པ་རང་གི་སུག་པར་ཐོབ་ལགས་ན། ལྷ་ཡོངས་སུ་མ་གྲུབ་པ་གཞན་ཅི་མཆིས་བཀའ་སྩོལ་ཅིག་དང་ཡོངས་སུ་བསྒྲུབ་པར་བགྱིའོ་ཞེས་ཕྲིན་ཡིག་ སྤྲིང་ངོ་། །དེ་མགུ་ནས་དེས་དེ་ལ་གདུགས་དང་། ཅོད་པན་དང་། ཐོད་བསྐུར་ཏེ། བུ་ཁྱོད་ཀྱིས་འོ་ནི་ཉིད་དུ་རྒྱལ་སྲིད་བྱེད་དུ་ཆུག་ཤིག །ངས་ཀྱང་འདི་ཉིད་དུ་རྒྱལ་སྲིད་བྱེད་དུ་གཞུག་གོ་ཞེས་སྤྲིང་ངོ་། །དེ་ནས་གཞོན་ནུ་གཟུགས་ཅན་སྙིང་པོས་ཡུལ་ཨང་ག་དག་ཏུ་རྒྱལ་ སྲིད་འབྱོར་པ་རྒྱས་པ་བདེ་བ་ལོ་ལེགས་པ་སྐྱེ་བོ་དང་མི་མང་པོས་གང་བ་བྱེད་དུ་བཅུག་གོ། །དུས་གཞན་ཞིག་ན་རྒྱལ་པོ་པད་མ་ཆེན་པོ་དུས་ལ་བབ་ནས་རྒྱལ་པོའི་ཁབ་ཀྱི་བློན་པོ་རྣམས་ཀྱིས་རྒྱལ་པོ་གཟུགས་ཅན་སྙིང་པོ་ལ་ལྷ་ཁྱོད་ཀྱི་ཡབ་དུས་ལ་བབ་པོ་ཞེས་སྤྲིང་ནས། དེ་ཨང་ག་ དང་མ་ག་དྷཱ་པའི་བློན་པོ་རྣམས་ཀྱིས་རྒྱལ་སྲིད་ལ་དབང་བསྐུར་བ་ཆེན་པོས་དབང་བསྐུར་ཏོ། །དེ་ནས་རྒྱལ་པོ་གཟུགས་ཅན་སྙིང་པོས་ཡུལ་ཨང་ག་དང་མ་ག་དྷཱ་དག་ཏུ་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། ཐ་

  12. 7a

    བ་དང་། ཕྱི་དགྲ་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་ བྱེད་དུ་བཅུག་གོ། །དེ་ནས་བྲམ་ཟེའི་ཁྱེའུ་གསང་ཚིག་འདོད་པ་གསང་ཚིག་ཚོལ་བ་ཞིག་ཡུལ་དབུས་ནས་ལྷོ་ཕྱོགས་སུ་སོང་ངོ་། །དེ་ན་བྲམ་ཟེ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་དུ་སོན་པ་ཡུལ་ཐ་དད་པ་ན་གནས་པའི་བྲམ་ཟེ་རྣམས་ཀྱི་སྟོན་པར་གྱུར་པ་ཞིག་འདུག་ ནས། བྲམ་ཟེའི་ཁྱེའུ་དེ་བྲམ་ཟེ་དེའི་དྲུང་དུ་སོང་སྟེ་ཕྱིན་ནས་ཞི་བ་དང་སྤྱོད་ལམ་ཞི་བས་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །དེ་ནས་བྲམ་ཟེ་དེས་བྲམ་ཟེའི་ཁྱེའུ་དེ་ལ་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་ནས་སྨྲས་པ། ཀྱེ་བྲམ་ཟེའི་ཁྱེའུ་ཁྱོད་ ག་ལས་འོངས་ཅི་ཞིག་འདོད། བྲམ་ཟེའི་ཁྱེའུས་སྨྲས་པ། བདག་ཡུལ་དབུས་ནས་མཆིས་ཏེ། མཁན་པོའི་ཞབས་ལ་སྲི་ཞུ་བགྱིད་པར་འཚལ་ལོ། །ཅི་ཞིག་གི་ཕྱིར། རིག་བྱེད་བཀླག་པའི་སླད་དུའོ། །བུ་ལེགས་ཀྱིས་དེ་བཞིན་དུ་གྱིས་ཤིག །དེ་ནི་བྲམ་ཟེས་བྱ་བ་ ཡིན་ནོ། །བྲམ་ཟེའི་ཁྱེའུ་དེས་བྲམ་ཟེ་དེའི་དྲུང་དུ་རིག་བྱེད་བཀླག་པར་བྱ་བར་བརྩམས་སོ། །བྲམ་ཟེའི་ཁྱེའུ་རྣམས་ཀྱི་ཀུན་དུ་སྤྱོད་པ་ནི་འདི་ཡིན་ཏེ། གང་གི་ཚེ་མི་ཀློག་པར་གྱུར་པ་དེའི་ཚེ་ན་ལན་འགའ་ནི་ཆུ་ངོགས་སུ་ཉེ་རེག་བྱེད་དུ་འདོང་ངོ་། །ལན་འགའ་ནི་གྲོང་ཁྱེར་ལྟར་ འདོང་ངོ་། །ལན་འགའ་ནི་ཡམ་སྲེག་ཤིང་ཐུར་འདོང་ངོ་། །ཇི་ཙམ་དུས་གཞན་ཞིག་ན་དེ་དག་མི་ཀློག་པར་གྱུར་ནས་དེའི་ཚེ་དེ་དག་ཡམ་སྲེག་ཤིང་ཐུར་དོང་བ་དང་། དེ་དག་ལ་ལམ་གྱི་བར་དུ་བར་སྐབས་ཀྱི་གཏམ་བརྗོད་པ་འདི་ལྟ་བུ་འདི་བྱུང་སྟེ། ཀྱེ་ཀུད་སའི་བུ་དག །བད་ སའི་བུ་དག །ཤན་དི་ལིའི་བུ་དག །བ་ར་དྭ་ཛའི་བུ་དག །ལྔ་པའི་བུ་དག །ཉེ་ལྔའི་བུ་དག །ཇེ་ཁྱེད་ཅག་ལས་གང་ནི་ཡུལ་ག་ལས་འོངས་པ་དྲི་བར་ོ། །དེ་ན་བྲམ་ཟེའི་ཁྱེའུ་གཅིག་གིས་སྨྲས་པ། ཁོ་བོ་ནི་ཡུལ་ཤར་ནས་སོ། །གཞན་ཞིག་གིས་སྨྲས་པ། ཁོ་

  13. 7b

    བོ་ནི་ལྷོ་ཕྱོགས་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་ནུབ་ཕྱོགས་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་བྱང་ཕྱོགས་ནས་སོ། །བྲམ་ཟེའི་ཁྱེའུ་དེས་སྨྲས་པ། ཁོ་བོ་ནི་ཡུལ་དབུས་ནས་སོ། །དེ་དག་གིས་སྨྲས་པ། ཤེས་ལྡན་དག་བདག་ ཅག་གིས་ཡུལ་ཐམས་ཅད་མཐོང་ཞིང་ཐོས་ན་ཡུལ་དབུས་ནི་མ་མཐོང་མ་ཐོས་སོ། །ཤར་ན་བློ་ཅན་གནས་པ་སྟེ། །ལྷོ་ཕྱོགས་ན་ནི་གཡོན་བྱེད་འདུག །ནུབ་ཀྱི་ཡུལ་ན་ཕྲ་མ་ཅན། །བྱང་ཕྱོགས་ན་ནི་ཚིག་རྩུབ་བོ། །ཞེས་ཚིགས་སུ་བཅད་པ་ཡང་སྨྲས་སོ། །དེ་ནས་ དྲིས་པ། བྲམ་ཟེའི་ཁྱེའུ་ཡུལ་དབུས་ཅི་འདྲ། ཤེས་ལྡན་དག་ཡུལ་དབུས་ནི་ཡུལ་རྣམས་ཀྱི་མཆོག་ཡིན་ཏེ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ། སློང་མོ་པ་བརྒྱས་ཁྱབ་པ། དབུས་པའི་སྐྱེ་བོས་གང་བ། མཐའ་ འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པ། དེ་ན་ཆུ་ཀླུང་གང་གཱ་ཁ་རྗེ་དང་། བསོད་ནམས་དང་། བཀྲ་ཤིས་དང་། གཙང་བ་དང་། གཙང་བ་ཉིད་ཀྱི་གནས་སུ་གྲགས་པ། འགྲམ་གཉིས་ནས་རླན་འཕྱོ་བ། དྲང་སྲོང་རྣམས་ཀྱི་བསྟི་གནས་ཞེས་བྱ་བ་ ཆུ་དགུར་བཅྭ་བརྒྱད་འབབ་པ་ཡོད་དེ། དེར་དྲང་སྲོང་རྣམས་ཀྱིས་དཀའ་ཐུབ་སྤྱད་ན་རང་གི་ལུས་ཉིད་ཀྱིས་མཐོ་རིས་སུ་འདོང་བ་ཡིན་ནོ། །ཀྱེ་བྲམ་ཟེའི་ཁྱེའུ་དེ་ནི་མཇལ་གྱིས་གཞན་འདི་འདྲིའོ། །ཡུལ་དབུས་ན་མཁས་པར་བགྲང་བ་དག་ཡོད་དམ། ཤེས་ལྡན་དག་ཁོ་བོས་དང་ པོ་ཉིད་ནས་ཤེས་ལྡན་དག་ཡུལ་དབུས་ནི་དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པའོ་ཞེས་མ་སྨྲས་སམ། བྲམ་ཟེའི་ཁྱེའུ་ཁྱོད་ཀྱིས་དེ་སྐད་སྨྲས་སོ། །བྲམ་ཟེའི་ཁྱེའུ་ཡུལ་དབུས་ན་འདི་ལྟ་སྟེ་དཔེར་ན་བདག་ཅག་གི་མཁན་པོ་ དང་འདྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དམ། ཤེས་ལྡན་དག་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་ཡོད་དོ། །བྲམ་ཟེའི་ཁྱེའུ་དེས་དེ་དག་ལ་དེ་ལྟ་དེ་ལྟར་ཡུལ་དབུས་ཀྱི་

  14. 8a

    བསྔགས་པ་བརྗོད་པ་དང་། འདི་ལྟར་དེ་དག་ཐམས་ཅད་ཡུལ་དབུས་སུ་འདོང་འདོད་པར་གྱུར་ཏོ། །དེ་ནས་བྲམ་ཟེའི་ཁྱེའུ་དེ་དག་ཡམ་སྲེག་ཤིང་དག་བཙལ་ཏེ། ཡམ་སྲེག་ཤིང་གི་ཁུར་ཐོགས་ནས་བྲམ་ཟེའི་ཁྱིམ་ག་ལ་བ་དེར་དོང་སྟེ་ཕྱིན་ནས་ཡམ་སྲེག་ ཤིང་གི་ཁུར་དག་མཐའ་གཅིག་ཏུ་བཞག་སྟེ། བྲམ་ཟེ་དེ་ག་ལ་བ་དེར་དོང་ནས་ཕྱིན་པ་དང་། བྲམ་ཟེ་དེ་ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག །བྲམ་ཟེའི་ཁྱེའུ་འདིས་ཅི་ནས་ཀྱང་བདག་ཅག་ཐམས་ཅད་ཡུལ་དབུས་སུ་མཆི་འཚལ་བར་གྱུར་པ་དེ་ལྟར་ཡུལ་ དབུས་ཀྱི་བསྔགས་པ་བརྗོད་དོ། །བྲམ་ཟེ་དེས་སྨྲས་པ། བུ་དག་ཇི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། འདི་ལྟར་ཡུལ་དག་ནི་ཐོས་ན་དགའ་བར་འགྱུར་བ་ཡིན་པས་མཉན་པར་བྱའི་བགྲོད་པར་ནི་མི་བྱའོ། །མཁན་པོ་བྲམ་ཟེའི་ཁྱེའུ་འདིའི་མཆིད་ནས་ཡུལ་དབུས་ན་ བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་མཆིས་སོ་ཞེས་མཆིའོ། །བུ་དག་ཅི་ཁོ་བོ་ན་རེ་སའི་སྟེང་ན་ཁོ་བོ་གཅིག་པུ་ཁོ་ན་སྨྲ་བ་ཡིན་གྱི། སྨྲ་བ་གཞན་འགའ་ཡང་མེད་དོ་ཞེས་ཟེར་རམ། ས་ནི་རིན་ པོ་ཆེ་མང་པོ་འཛིན་པ་ཡིན་པས་ས་གཞི་ནི་མཛེས་པ་མཛེས་པ་དག་གིས་གང་བ་ཡིན་ནོ། །མཁན་པོ་རེ་ཞིག་ཡུལ་དེ་ཡང་མཐོང་བར་འགྱུར་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལ་ཡང་བསྙེན་བཀུར་བགྱི། རྒོལ་བ་དག་ཀྱང་ཚར་གཅད་པར་བགྱི། རང་གི་ གྲགས་པ་ཡང་བསྒྲག་པར་བགྱི། རྙེད་པ་ཡང་བསྒྲུབ་པར་བགྱིས། བདག་ཅག་ཡུལ་དབུས་སུ་མཆིའོ། །བྲམ་ཟེ་དེ་སློབ་མ་ལ་རྗེས་སུ་ཆགས་པ་དང་བཅས་པ་དང་། འཁོར་ཉུང་བ་ཡིན་པས་དེས་བྲམ་ཟེའི་ཁྱེའུ་དེ་དག་ལ་འདི་སྐད་ཅེས་སྨྲས་སོ། །བུ་དག་གལ་ཏེ་དེ་ལྟ་ན་ གཡང་གཞི་དག་དང་། ཤིང་ཤུན་དག་དང་། དབྱུ་གུ་དག་དང་། བླུགས་གཟར་དག་དང་། དགང་གཟར་དག་དང་། རིལ་བ་དག་ལོང་ཤིག་དང་ཡུལ་དབུས་སུ་འདོང་ངོ་། །དེ་དག་གིས་དེ་དག་བླངས་ནས་བྲམ་ཟེ་དེ་བྲམ་ཟེའི་ཁྱེའུ་དེ་དག་དང་ལྷན་ཅིག་ཡུལ་དབུས་སུ་

  15. 8b

    འཕགས་པ་དང་། དེས་རྒོལ་བ་ཁ་ཅིག་ནི་ཚར་བཅད་དེ་རྒོལ་བའི་ཤིང་རྟ་ལ་སྦྱོར་བར་བྱེད། ཁ་ཅིག་ནི་མགོར་ཐལ་བའི་བུམ་པ་དག་གིས་བསྣུན། ཁ་ཅིག་ནི་འཕོང་གི་དཔོང་སར་ཁྭ་བཞིན་དུ་ཐག་རིང་པོ་ནས་ཡོངས་སུ་སྤོང་བར་བྱེད། ཁ་ཅིག་ནི་གདུགས་དང་། རྒྱལ་མཚན་ དང་། བ་དན་དག་གིས་བསུ་བར་བྱེད། ཁ་ཅིག་ནི་སློབ་མ་ཉིད་དུ་ཁས་ལེན་པར་བྱེད་ཅིང་དེ་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་དང་། དབྱེ་ཚོངས་དང་། ཚོང་རྡལ་དག་ཏུ་རྒོལ་བ་འདུལ་ཞིང་རྒྱལ་པོའི་ཁབ་ཏུ་ཕྱིན་ཏོ། །བྲམ་ཟེ་དེས་བསམས་པ། བདག་ གིས་ཅིའི་ཕྱིར་རྩ་བ་སྤངས་ཏེ་ཡལ་ག་དང་། འདབ་མ་དང་། ལོ་མ་ལ་ཉུག་པར་བྱ། རྒོལ་བ་གང་དག་དང་། མཁས་པར་བགྲང་བ་གང་ཇི་སྙེད་པ་དེ་དག་ཐམས་ཅད་ཀྱང་རྒྱལ་པོ་དང་ཉེ་བ་ཡིན་གྱིས། བདག་ཀྱང་རྒྱལ་པོའི་གན་དུ་འགྲོའོ་སྙམ་ནས་བྲམ་ཟེ་དེ་རྒྱལ་པོ་གཟུགས་ ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ་བདག་ལ་བླ་མ་ལས་ཡི་གེ་ཉུང་ཤས་ཤིག་ བླངས་པ་མཆིས་ཏེ། དེའི་སླད་དུ་ལྷའི་སྤྱན་སྔར་རྒོལ་བ་དག་དང་ལྷན་ཅིག་བཀའ་མཆིད་རྣམ་པར་གཏན་ལ་དབབ་པར་འཚལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཡུལ་ན་བྲམ་ཟེ་འདི་དང་ལྷན་ཅིག་གཏམ་རྣམ་པར་གཏན་ལ་འབེབས་པར་བྱེད་པའི་ རྒོལ་བ་འགའ་ཡོད་དམ། བློན་པོ་རྣམས་ཀྱིས་སྨྲས་པ། ལྷ་གྲོང་ན་ལ་ད་ན་བྲམ་ཟེ་གནས་ལེན་གྱི་བུ་ཞེས་བགྱི་བ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་མཆིས་པ་ཞུགས་ལྟ་བུའི་ཤེས་པས་རང་གི་སྨྲ་བ་གསལ་བར་བགྱིད། གཞན་གྱི་སྨྲ་བ་ཚར་གཅོད་པར་རྔོ་ཐོག་པ་ ཞིག་མཆིས་ཏེ། དེས་བསྟན་བཅོས་གནས་ལེན་གྱི་བུ་ཞེས་བགྱི་བ་ཉེ་བར་སྦྱར་ཏོ། །མཁན་པོ་གནས་ལེན་གྱི་བུ་དེ་བོས་ཤིག །ལྷ་བོད་པར་བགྱིའོ་ཞེས་དེ་དག་གིས་དེ་བོས་ནས་དེ་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང་

  16. 9a

    ཚེ་སྤེལ་བ་བྱས་ཏེ་ཕྱོགས་གཅིག་ཏུ་འདུག་པ་དང་། བློན་པོ་རྣམས་ཀྱིས་སྨྲས་པ། ལྷ་མཁན་པོ་དེ་འདི་ལགས་སོ། །རྒྱལ་པོས་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། མཁན་པོ་ཁྱོད་ཁོ་བོའི་མདུན་དུ་བྲམ་ཟེ་འདི་དང་ལྷན་ཅིག་གཏམ་རྣམ་ པར་གཏན་ལ་དབབ་པར་བྱེད་ནུས་སམ། གནས་ལེན་གྱི་བུས་སྨྲས་པ། བདག་གིས་རྔོ་ཐོག་པས། རྒྱལ་པོ་དགྱེས་པར་བགྱིའོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒོལ་བའི་དཀྱིལ་འཁོར་ཤོམས་ཤིག །ཕྱོགས་དང་གཞན་གྱི་ཕྱོགས་དག་རྣམ་པར་ཞོག་ ཤིག །བློན་པོ་རྣམས་ཀྱིས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་དག་རྣམ་པར་བཞག་གོ། །དེ་ནས་བློན་པོ་རྣམས་ཀྱིས་རྒྱལ་པོའི་རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཕྱོགས་སྔ་མ་གང་བགྱིད་དུ་སྩལ། རྒྱལ་པོས་སྨྲས་པ། བྲམ་ཟེ་ འདི་འགྲོན་པ་ཡིན་གྱིས་འདི་ཕྱོགས་སྔ་མ་བྱེད་དུ་ཆུག་ཤིག །བྲམ་ཟེ་དེ་ཕྱོགས་སྔ་མ་བྱེད་དུ་བཅུག་ནས་དེས་རྒྱུད་ཆགས་ལྔ་བརྒྱ་བཟླས་སོ། །གནས་ལེན་གྱི་བུས་ཕྱིར་བཟླས་ཏེ། ཁྱོད་ཀྱི་འདི་ནི་རིགས་པ་མེད་པ་ཡིན་ནོ། །འདི་ནི་མི་མཐུན་པ་ཡིན་ནོ། །འདི་ནི་མི་འཐད་པ་ ཡིན་ནོ་ཞེས་སྐྱོན་བཏགས་པ་དང་བྲམ་ཟེ་དེ་ཅང་མི་སྨྲ་བར་འདུག་གོ། །ཚར་གཅད་པའི་གནས་རྣམས་ཀྱི་ནང་ན་འདི་ལྟ་སྟེ་ལན་ལ་སྤོབས་པ་མེད་པ་འདི་ནི་ཐ་ཆད་ཡིན་ནོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་སུ་རྒྱལ། ལྷ་མཁན་པོ་གནས་ལེན་གྱི་བུའོ། །དེ་ནས་ རྒྱལ་པོ་ཡིད་དགའ་ཞིང་ཡིད་དགའ་ནས་རོ་སྟོད་བསྲང་སྟེ། ལག་པ་གཡས་པ་བརྐྱང་ནས་བདག་གི་ཡུལ་ན་སྨྲ་བའི་ཁྱུ་མཆོག་འདི་ལྟ་བུ་དག་ཡོད་པ་ནི་བདག་གིས་རྙེད་པ་ལེགས་པར་རྙེད་དོ་ཞེས་ཆེད་དུ་བརྗོད་པ་ཆེད་དུ་བརྗོད་ནས་སྨྲས་པ། མཁན་པོ་ཁྱོད་གནས་གང་ན་གནས། གནས་ ལེན་གྱི་བུས་སྨྲས་པ། ལྷ་གྲོང་ན་ལ་ད་ནའོ། །ཁྱོད་སོང་ལ་གྲོང་དེ་ཁྱོད་ཀྱིས་རྒོལ་བའི་ལོངས་སྤྱོད་གྱིས་ཤིག །གནས་ལེན་གྱི་བུ་རངས་པ་དང་དགའ་བ་དང་མཆོག་ཏུ་དགའ་བར་གྱུར་ནས་སྐྱེ་བོ་མཁས་པ་རྣམས་ཀྱིས་ཡོངས་སུ་བསྐོར་ཏེ། གྲོང་དེར་སོང་ངོ་། །འཇིག་རྟེན་ནི་འབྱོར་པ་

  17. 9b

    འདོད་ཅིང་རྒུད་པ་ལ་མ་དད་པ་ཡིན་པས་དེ་ལ་བྲམ་ཟེ་དུ་མ་ཞིག་གིས་བུ་མོ་ཆུང་མར་ལེན་དུ་བཅུག་པ་དང་། དེ་ནས་གནས་ལེན་གྱི་བུ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་ བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་བུ་རོ་སྟོད་རིང་བ་རིང་བ་ཞིག་བཙས་ནས་དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ཏེ། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་ སྨྲས་པ། ཁྱེའུ་འདི་རོ་སྟོད་རིང་བ་རིང་བར་གྱུར་པས་ཁྱེའུ་འདིའི་མིང་སྟོད་རིངས་སུ་གདགས་སོ་ཞེས་དེའི་མིང་སྟོད་རིངས་སུ་བཏགས་སོ། །བྲམ་ཟེའི་ཁྱེའུ་སྟོད་རིངས་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་ མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་དང་། འབྱེད་པ་དང་། ཀློག་པའི་ཕ་རོལ་ཏུ་སོན་ཅིང་། དེའི་ཚེ་ན་བྲམ་ཟེའི་སྤྱོད་ཚུལ་དང་། སྤྱོད་པ་དང་། གཙང་སྦྲ་ དང་། ཀུན་དུ་སྤྱོད་པ་དང་། ཐལ་བ་བླང་བ་དང་། བྱ་མ་བུམ་བླང་བ་དང་། ས་བླང་བ་དང་། ལག་སྟངས་དང་། ཐོར་ཚུགས་དང་། རབ་བསྔགས་བྱ་བ་དང་། ཀྱེ་ཞེས་བྱ་བ་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྙན་ཚིག་གི་རིག་བྱེད་དང་། སྲིད་སྲུང་ གི་རིག་བྱེད་དང་། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང་། མཆོད་སྦྱིན་བྱེད་དུ་འཇུག་པ་དང་། ཀློག་པ་དང་། ཀློག་ཏུ་འཇུག་པ་དང་། སྦྱིན་པ་དང་། ལེན་པ་ལ་མཁས་པའི་བྲམ་ཟེ་རིག་བྱེད་དང་། རིག་བྱེད་ཀྱི་ཡན་ལག་གི་ཕ་རོལ་ཏུ་སོན་པ་མེ་ལྟ་བུའི་ཤེས་པས་རང་གི་སྨྲ་བ་གསལ་བར་

  18. 10a

    བྱེད་པ། གཞན་གྱི་སྨྲ་བ་ཚར་གཅོད་པར་བྱེད་ནུས་པར་གྱུར་ཏོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པའི་ཆུང་མ་ལ་བུ་མོ་མིག་གཉིས་བྱ་ཤཱ་རི་ཀཱ་འདྲ་བ་ཞིག་བཙས་ནས་དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ཏེ། བུ་མོའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། བུ་མོ་འདིའི་མིག་གཉིས་བྱ་ཤཱ་རི་ཀཱ་འདྲ་བས་བུ་མོ་འདིའི་མིང་ཤཱ་རི་ཀཱར་གདགས་སོ་ཞེས་དེའི་མིང་ཤཱ་རི་ཀཱར་བཏགས་སོ། ། བུ་མོ་ཤཱ་རི་ཀཱ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །དེ་ཕས་ཡིག་འབྲུའི་ཡི་གེ་ལ་ཉེ་བར་སྦྱར་ནས་དེས་ཡིག་འབྲུའི་ཡི་གེ་དག་ལོབས་སོ། །དུས་གཞན་ཞིག་ན་བྲམ་ཟེའི་ཁྱེའུ་སྟོད་རིངས་ཤཱ་རི་ཀཱ་དང་ལྷན་ཅིག་འགྱེད་པར་བྱེད་པ་ན་ཤཱ་རི་ཀཱས་དེ་ཚར་བཅད་ནས། ཕས་སྟོད་རིངས་ ལ་སྨྲས་པ། བུ་ཁྱོད་སྐྱེས་པ་ཡིན་ན་བུད་མེད་ཀྱིས་ཚར་བཅད་དམ། ང་འདས་ནས་རྒོལ་བའི་ལོངས་སྤྱོད་དག་ཕྲོགས་པར་འགྱུར་རོ། །དེ་ནས་ཡང་བྲམ་ཟེའི་ཁྱེའུ་གསང་ཚིག་འདོད་པ་གསང་ཚིག་ཚོལ་བ་ཞིག་ཡུལ་དབུས་ནས་ལྷོ་ཕྱོགས་སུ་སོང་ངོ་། །དེ་ན་བྲམ་ཟེ་སྐར་རྒྱལ་ཞེས་ བྱ་བ་འཇིག་རྟེན་རྒྱང་འཕེན་ལ་མཁས་པ། རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་ཏུ་སོན་པ་ཡུལ་ཐ་དད་པ་ན་གནས་པའི་བྲམ་ཟེ་རྣམས་ཀྱི་སྟོན་པར་གྱུར་པ་ཞིག་འདུག་ནས། བྲམ་ཟེའི་ཁྱེའུ་དེ་བྲམ་ཟེ་དེའི་དྲུང་དུ་སོང་སྟེ་ཕྱིན་ནས་ཞི་བ་དང་སྤྱོད་ལམ་ཞི་བས་མགོ་བོས་ཕྱག་འཚལ་ཏེ་ ཕྱོགས་གཅིག་ཏུ་འདུག་གོ། །དེ་ནས་བྲམ་ཟེ་སྐར་རྒྱལ་གྱིས་བྲམ་ཟེའི་ཁྱེའུ་དེ་ལ་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་ནས་སྨྲས་པ། ཀྱེ་བྲམ་ཟེའི་ཁྱེའུ་ཁྱོད་ག་ལས་འོངས་ཅི་ཞིག་འདོད། བྲམ་ཟེའི་ཁྱེའུས་སྨྲས་པ། བདག་ཡུལ་དབུས་ནས་མཆིས་ཏེ། མཁན་ པོའི་ཞབས་ལ་སྲི་ཞུ་བགྱིད་པར་འཚལ་ལོ། །ཅི་ཞིག་གི་ཕྱིར། འཇིག་རྟེན་རྒྱང་འཕེན་གཟུང་བའི་སླད་དུའོ། །བྲམ་ཟེའི་ཁྱེའུ་ལེགས་ཀྱིས་དེ་བཞིན་གྱིས་ཤིག །དེ་ནི་བྲམ་ཟེས་བྱ་བ་ཡིན་ནོ། །བྲམ་ཟེའི་ཁྱེའུ་དེས་བྲམ་ཟེ་སྐར་རྒྱལ་གྱི་དྲུང་དུ་འཇིག་རྟེན་རྒྱང་འཕེན་གཟུང་བར་བརྩམས་སོ། །

  19. 10b

    བྲམ་ཟེའི་ཁྱེའུ་རྣམས་ཀྱི་ཀུན་དུ་སྤྱོད་པ་ནི་འདི་ཡིན་ཏེ། གང་གི་ཚེ་མི་ཀློག་པར་གྱུར་པ་དེའི་ཚེ་ན་ལན་འགའ་ནི་ཆུའི་ངོགས་སུ་ཉེ་རེག་བྱེད་དུ་འདོང་ངོ་། །ལན་འགའ་ནི་གྲོང་ཁྱེར་ལྟར་འདོང་ངོ་། །ལན་འགའ་ནི་ཡམ་སྲེག་ཤིང་ཐུར་འདོང་ངོ་། །ཇི་ཙམ་དུས་གཞན་ཞིག་ན་དེ་དག་མ་ཀློག་ པར་གྱུར་ནས་དེའི་ཚེ་དེ་དག་ཡམ་སྲེག་ཤིང་ཐུར་དོང་བ་དང་། དེ་དག་ལ་ལམ་གྱི་བར་དུ་བར་སྐབས་ཀྱི་གཏམ་བརྗོད་པ་འདི་ལྟ་བུ་འདི་དག་བྱུང་སྟེ། ཀྱེ་ཀུད་སའི་བུ་དག །བད་སའི་བུ་དག །ཤན་དི་ལའི་བུ་དག །བ་ར་དྭ་ཛའི་བུ་དག །ལྔ་པའི་བུ་དག །ཉེ་ལྔ་པའི་བུ་དག་ཇེ་ཁྱེད་ ཅག་ལས་གང་ནི་ཡུལ་ག་ལས་འོངས་པ་དྲི་བར་བྱའོ། །དེ་ན་བྲམ་ཟེའི་ཁྱེའུ་གཅིག་གིས་སྨྲས་པ། ཁོ་བོ་ནི་ཡུལ་ཤར་ནས་སོ། །གཞན་ཞིག་གིས་སྨྲས་པ། ཁོ་བོ་ནི་ལྷོ་ཕྱོགས་ནས་སོ། །ཡང་གཞན་ཞིག་གིས་སྨྲས་པ། ཁོ་བོ་ནི་ནུབ་ཕྱོགས་ནས་སོ། །ཡང་གཞན་ ཞིག་གིས་སྨྲས་པ། ཁོ་བོ་ནི་བྱང་ཕྱོགས་ནས་སོ། །བྲམ་ཟེའི་ཁྱེའུ་དེས་སྨྲས་པ། ཁོ་བོ་ནི་ཡུལ་དབུས་ནས་སོ། །དེ་དག་གིས་སྨྲས་པ། ཤེས་ལྡན་དག་བདག་ཅག་གིས་ཡུལ་ཐམས་ཅད་མཐོང་ཞིང་ཐོས་ན་ཡུལ་དབུས་ནི་མ་མཐོང་མ་ཐོས་སོ། །ཤར་ན་བློ་ཅན་གནས་པ་ སྟེ། །ལྷོ་ཕྱོགས་ན་ནི་གཡོན་བྱེད་འདུག །ནུབ་ཀྱི་ཡུལ་ན་ཕྲ་མ་ཅན། །བྱང་ཕྱོགས་ན་ནི་ཚིག་རྩུབ་བོ། །ཞེས་ཚིགས་སུ་བཅད་པ་ཡང་སྨྲས་སོ། །དེ་ནས་དྲིས་པ། བྲམ་ཟེའི་ཁྱེའུ་ཡུལ་དབུས་ཅི་འདྲ། ཤེས་ལྡན་དག་ཡུལ་དབུས་ནི་ཡུལ་རྣམས་ཀྱི་མཆོག་ཡིན་ཏེ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ། སློང་མོ་པ་བརྒྱས་ཁྱབ་པ། དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པ། དེ་ན་ཆུ་ཀླུང་གང་གཱ་ཁ་རྗེ་དང་། བསོད་ནམས་དང་། བཀྲ་ཤིས་དང་། གཙང་ བ་དང་། གཙང་བ་ཉིད་ཀྱི་གནས་སུ་གྲགས་པ། འགྲམ་གཉིས་ནས་རླན་འཕྱོ་བ། དྲང་སྲོང་རྣམས་ཀྱི་བསྟི་གནས་ཞེས་བྱ་བ་ཆུ་དགུར་བཅྭ་བརྒྱད་འབབ་པ་ཡོད་དེ། དེར་དྲང་སྲོང་རྣམས་ཀྱི་དཀའ་ཐུབ་སྤྱད་ན་རང་གི་ལུས་ཉིད་ཀྱིས་མཐོ་རིས་སུ་འདོང་བ་ཡིན་ནོ། །ཀྱེ་བྲམ་ཟེའི་ཁྱེའུ་དེ་ནི་

  20. 11a

    མཇལ་གྱིས་གཞན་འདི་འདྲིའོ། །ཡུལ་དབུས་ན་མཁས་པར་བགྲང་བ་དག་ཡོད་དམ། ཤེས་ལྡན་དག་ཁོ་བོས་དང་པོ་ཉིད་ནས་ཤེས་ལྡན་དག་ཡུལ་དབུས་ནི་དབུས་པའི་སྐྱེ་བོས་གང་བ། མཐའ་འཁོབ་པའི་སྐྱེ་བོས་སྤངས་པ། སྐྱེ་བོ་མཁས་པས་བསྟེན་པའོ་ ཞེས་མ་སྨྲས་སམ། བྲམ་ཟེའི་ཁྱེའུ་ཁྱོད་ཀྱིས་དེ་སྐད་སྨྲས་སོ། །བྲམ་ཟེའི་ཁྱེའུ་ཡུལ་དབུས་ན་འདི་ལྟ་སྟེ་དཔེར་ན། བདག་ཅག་གི་མཁན་པོ་དང་འདྲ་བ་སྨྲ་བའི་ཁྱུ་མཆོག་དེ་ལྟ་བུ་དག་ཡོད་དམ། ཤེས་ལྡན་དག་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ ལྟ་བར་ཡང་མི་ནུས་པ་སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་ཡོད་དོ། །བྲམ་ཟེའི་ཁྱེའུ་དེས་དེ་དག་ལ་དེ་ལྟ་དེ་ལྟར་ཡུལ་དབུས་ཀྱི་བསྔགས་པ་བརྗོད་པ་དང་། འདི་ལྟར་དེ་དག་ཐམས་ཅད་ཡུལ་དབུས་སུ་འདོང་འདོད་པར་གྱུར་ཏོ། །དེ་ནས་བྲམ་ཟེའི་ཁྱེའུ་དེ་དག་གིས་ ཡམ་སྲེག་ཤིང་དག་བཙལ་ཏེ། ཡམ་སྲེག་ཤིང་གི་ཁུར་ཐོགས་ནས་བྲམ་ཟེ་དེའི་ཁྱིམ་ག་ལ་བ་དེར་དོང་སྟེ་ཕྱིན་ནས་ཡམ་སྲེག་ཤིང་གི་ཁུར་མཐའ་གཅིག་ཏུ་བཞག་སྟེ། བྲམ་ཟེ་དེ་ག་ལ་བ་དེར་དོང་ནས་ཕྱིན་པ་དང་། བྲམ་ཟེ་དེ་ལ་འདི་སྐད་ཅེས་སྨྲས་སོ། །མཁན་པོ་མཁྱེན་ པར་མཛོད་ཅིག །བྲམ་ཟེའི་ཁྱེའུ་འདིས་ཅི་ནས་ཀྱང་བདག་ཅག་ཐམས་ཅད་ཡུལ་དབུས་སུ་མཆི་འཚལ་བར་གྱུར་པ་དེ་ལྟར་ཡུལ་དབུས་ཀྱི་བསྔགས་པ་བརྗོད་དོ། །བྲམ་ཟེ་སྐར་རྒྱལ་གྱིས་སྨྲས་པ། བུ་དག་ཇི་སྙེད་ཐོས་པ་དེ་སྙེད་བགྲོད་པར་བྱ་བ་ཡིན་ནམ། འདི་ལྟར་ ཡུལ་དག་ནི་ཐོས་ན་དགའ་བར་འགྱུར་བ་ཡིན་པས་མཉན་པར་བྱའི་བགྲོད་པར་ནི་མི་བྱའོ། །མཁན་པོ་བྲམ་ཟེའི་ཁྱེའུ་འདིའི་མཆིད་ནས་ཡུལ་དབུས་ན་བདག་ཅག་གི་མཁན་པོས་གང་དག་གི་གདོང་དུ་ལྟ་བར་ཡང་མི་ནུས་པ། སྙན་པར་སྨྲ་བ། སྨྲ་བའི་ཁྱུ་མཆོག་དེ་ལྟ་བུ་དག་ མཆིས་སོ་ཞེས་མཆིའོ། །བུ་དག་ཅི་ཁོ་བོ་ན་རེ་སའི་སྟེང་ན་ཁོ་བོ་གཅིག་པུ་སྨྲ་བ་ཁོ་ན་ཡིན་གྱི་སྨྲ་བ་གཞན་འགའ་ཡང་མེད་དོ་ཞེས་ཟེར་རམ། ས་ནི་རིན་པོ་ཆེ་མང་པོ་འཛིན་པ་ཡིན་པས་ས་གཞི་ནི་མཛེས་པ་མཛེས་པ་དག་གིས་གང་བ་ཡིན་ནོ། །མཁན་པོ་རེ་ཞིག་ཡུལ་དེ་

  21. 11b

    ཡང་མཐོང་བར་འགྱུར་ཞིང་ཆུ་ངོགས་སུ་ཉེ་རེག་ཀྱང་བགྱི། སྨྲ་བའི་ཁྱུ་མཆོག་དེ་དག་ལ་ཡང་བསྙེན་བཀུར་བགྱི། རྒོལ་བ་དག་ཀྱང་ཚར་གཅད་པར་བགྱི། རང་གི་གྲགས་པ་ཡང་བསྒྲག་པར་བགྱི། རྙེད་པ་ཡང་བསྒྲུབ་པར་བགྱིས། བདག་ཅག་ཡུལ་དབུས་སུ་ མཆིའོ། །བྲམ་ཟེ་དེ་སློབ་མ་ལ་རྗེས་སུ་ཆགས་པ་དང་བཅས་པ་དང་། འཁོར་ཉུང་བ་ཡིན་པས་དེས་བྲམ་ཟེའི་ཁྱེའུ་དེ་དག་ལ་འདི་སྐད་ཅེས་སྨྲས་སོ། །བུ་དག་གལ་ཏེ་དེ་ལྟ་ན་གཡང་གཞི་དག་དང་། ཤིང་ཤུན་དག་དང་། དབྱུ་གུ་དག་དང་། བླུགས་གཟར་དག་དང་། དགང་གཟར་དག་དང་། རིལ་བ་དག་ལོང་ཤིག་དང་ཡུལ་དབུས་སུ་འདོང་ངོ་། །དེ་དག་གིས་དེ་དག་བླངས་ནས་བྲམ་ཟེ་དེ་བྲམ་ཟེའི་ཁྱེའུ་དེ་དག་དང་ལྷན་ཅིག་ཡུལ་དབུས་སུ་འཕགས་པ་དང་། དེས་རྒོལ་བ་ཁ་ཅིག་ནི་ཚར་བཅད་དེ་རྒོལ་བའི་ཤིང་རྟ་ལ་སྦྱོར་བར་བྱེད། ཁ་ ཅིག་ནི་མགོར་ཐལ་བའི་བུམ་པ་དག་གིས་བསྣུན། ཁ་ཅིག་ནི་འཕོང་གི་དཔོང་སར་ཁྭ་བཞིན་དུ་ཐག་རིང་པོ་ནས་ཡོངས་སུ་སྤོང་བར་བྱེད། ཁ་ཅིག་ནི་གདུགས་དང་། རྒྱལ་མཚན་དང་། བ་དན་དག་གིས་བསུ་བར་བྱེད། ཁ་ཅིག་ནི་སློབ་མ་ཉིད་དུ་ཁས་ལེན་པར་བྱེད་ ཅིང་དེ་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་དང་། དབྱེ་ཚོངས་དང་། ཚོང་རྡལ་དག་ཏུ་རྒོལ་བ་འདུལ་ཞིང་རྒྱལ་པོའི་ཁབ་ཏུ་ཕྱིན་ཏོ། །བྲམ་ཟེ་སྐར་རྒྱལ་གྱིས་བསམས་པ། བདག་གིས་ཅིའི་ཕྱིར་རྩ་བ་སྤངས་ཏེ་ཡལ་ག་དང་། འདབ་མ་དང་། ལོ་མ་ ལ་ཉུག་པར་བྱ། རྒོལ་བ་གང་དག་དང་། མཁས་པར་བགྲང་བ་གང་ཇི་སྙེད་པ་དེ་དག་ཐམས་ཅད་ཀྱང་རྒྱལ་པོ་དང་ཉེ་བ་ཡིན་གྱིས། བདག་ཀྱང་རྒྱལ་པོའི་གན་དུ་འགྲོའོ་སྙམ་ནས་བྲམ་ཟེ་སྐར་རྒྱལ་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས། རྒྱལ་པོ་གཟུགས་ ཅན་སྙིང་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ་བདག་ལ་བླ་མ་ལས་ཡི་གེ་ཉུང་ཤས་ཤིག་བླངས་པ་མཆིས་ཏེ། དེའི་སླད་དུ་ལྷའི་སྤྱན་སྔར་རྒོལ་བ་དག་དང་ལྷན་

  22. 12a

    ཅིག་བཀའ་མཆིད་རྣམ་པར་གཏན་ལ་དབབ་པར་འཚལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་མཁན་པོ་གནས་ལེན་གྱི་བུ་དེ་གང་ན་འདུག །ལྷ་གྲོང་ན་ལ་ད་ནའོ། །མཁན་པོ་གནས་ལེན་གྱི་བུ་དེ་བོས་ཤིག །ལྷ་བོད་པར་བགྱིའོ་ ཞེས་དེ་དག་གིས་དེ་བོས་ནས་དེ་རྒྱལ་པོ་གཟུགས་ཅན་སྙིང་པོ་ག་ལ་བ་དེར་སོང་སྟེ་ཕྱིན་ནས། རྒྱལ་པོ་གཟུགས་ཅན་སྙིང་པོ་ལ་རྒྱལ་བ་དང་ཚེ་སྤེལ་བ་བྱས་ཏེ་ཕྱོགས་གཅིག་ཏུ་འདུག་པ་དང་བློན་པོ་རྣམས་ཀྱིས་སྨྲས་པ། ལྷ་མཁན་པོ་དེ་འདི་ལགས་སོ། །རྒྱལ་པོས་ འོངས་པ་ལེགས་སོ། །ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། མཁན་པོ་ཁྱོད་ཁོ་བོའི་མདུན་དུ་བྲམ་ཟེ་སྐར་རྒྱལ་དང་ལྷན་ཅིག་གཏམ་རྣམ་པར་གཏན་ལ་དབབ་པ་བྱེད་ནུས་སམ། གནས་ལེན་གྱི་བུས་སྨྲས་པ། བདག་གིས་རྔོ་ཐོག་གིས་རྒྱལ་པོ་དགྱེས་པར་ བགྱིའོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒོལ་བའི་དཀྱིལ་འཁོར་ཤོམས་ཤིག །ཕྱོགས་དང་གཞན་གྱི་ཕྱོགས་དག་རྣམ་པར་ཞོག་ཤིག །བློན་པོ་རྣམས་ཀྱིས་རྒོལ་བའི་དཀྱིལ་འཁོར་བཤམས་ཤིང་ཕྱོགས་དང་གཞན་གྱི་ཕྱོགས་དག་རྣམ་པར་ བཞག་གོ། །དེ་ནས་བློན་པོ་རྣམས་ཀྱིས་རྒྱལ་པོའི་རྐང་པ་གཉིས་ལ་ཕྱག་འཚལ་ཏེ་སྨྲས་པ། ལྷ་ཕྱོགས་སྔ་མ་གང་བགྱིད་དུ་སྩལ། རྒྱལ་པོས་སྨྲས་པ། བྲམ་ཟེ་སྐར་རྒྱལ་འདི་འགྲོན་པ་ཡིན་གྱིས། འདི་ཕྱོགས་སྔ་མ་བྱེད་དུ་ཆུག་ཤིག །བྲམ་ཟེ་སྐར་རྒྱལ་གྱིས་སྨྲས་པ། ལྷ་བྲམ་ཟེ་གནས་ལེན་གྱི་བུ་འདི་རྒན་པ་ལགས་པས་འདི་ཕྱོགས་སྔ་མ་བགྱིད་དུ་སྩལ་པར་གསོལ། བྲམ་ཟེ་གནས་ལེན་གྱི་བུས་བསམས་པ། བྲམ་ཟེ་སྐར་རྒྱལ་འདི་གཞུང་གསར་ལ་བྱེད་པ་གསལ་བས་བདག་གིས་འདི་དང་ལྷན་ཅིག་སྨྲ་བར་མི་ནུས་ཀྱིས། ཇེ་འདི་དང་ལྷན་ཅིག་ཚིག་ འགྲེད་པ་ཞིག་བྱའོ་སྙམ་ནས་དེས་རྒྱུད་ཆགས་ལྔ་བརྒྱ་བཟླས་སོ། །བྲམ་ཟེ་སྐར་རྒྱལ་གྱིས་ཕྱིར་བཟླས་ཏེ། ཁྱོད་ཀྱི་འདི་ནི་རིགས་པ་མེད་པ་ཡིན་ནོ། །འདི་ནི་མི་མཐུན་པ་ཡིན་ནོ། །འདི་ནི་མི་འཐད་པ་ཡིན་ནོ་ཞེས་སྐྱོན་བཏགས་པ་དང་། བྲམ་ཟེ་གནས་ལེན་གྱི་བུ་ཅང་མི་སྨྲ་བར་

  23. 12b

    འདུག་གོ། །ཚར་བཅད་པའི་གནས་རྣམས་ཀྱི་ནང་ན་འདི་ལྟ་སྟེ་ལེན་ལ་སྤོབས་པ་མེད་པ་འདི་ནི་ཐ་ཆད་ཡིན་ནོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་སུ་རྒྱལ། བྲམ་ཟེ་སྐར་རྒྱལ་རྒྱལ་ལོ། །ཤེས་ལྡན་དག་བྲམ་ཟེ་སྐར་རྒྱལ་ལ་རྒོལ་བའི་ལོངས་སྤྱོད་བྱིན་ ཅིག །དེ་དག་གིས་སྨྲས་པ། ལྷ་གལ་ཏེ་སྐོལ་གྱིས་རྒོལ་བ་མཆིས་ཤིང་ལྷགས་དགུ་ལ་རྒོལ་བའི་ལོངས་སྤྱོད་སྩལ་བར་གྱུར་ན་རིང་པོ་མི་ཐོགས་པར་སྐོལ་གྱི་ཡུལ་ཨང་ག་དང་མ་ག་དྷཱ་དག་རྒོལ་བའི་ལོངས་སྤྱོད་དུ་འགྱུར་བས། འདི་ལྟར་གྲོང་ན་ལ་ད་འདི་ཉིད་རྒོལ་བའི་ལོངས་ སྤྱོད་ཀྱི་བ་དན་དུ་བགྱིས་ལ་བྲམ་ཟེ་གནས་ལེན་གྱི་བུ་ལས་ཕྲོགས་ཏེ། བྲམ་ཟེ་འདི་ལ་སྩལ་ཅིང་འདི་བས་ཀྱང་ཆེས་རྒྱལ་བ་གཞན་འགའ་ཞིག་མཆིས་ན་ཡང་སྐོལ་གྱིས་དེ་ལ་སྩལ་བར་བགྱིའོ། །རྒྱལ་པོས་སྨྲས་པ། ཤེས་ལྡན་དག་དེ་བཞིན་གྱིས་ཤིག །དེ་དག་གིས་དེ་གནས་ ལེན་གྱི་བུ་ལས་ཕྲོགས་ཏེ་བྲམ་ཟེ་སྐར་རྒྱལ་ལ་བྱིན་ནོ། །གནས་ལེན་གྱི་བུས་བསམས་པ། བདག་གིས་རྒྱལ་པོ་འདི་ལ་ཕན་མང་དུ་བཏགས་ན་རྒྱལ་པོ་འདིས་བདག་རྗེས་སུ་མ་བསྲུངས་ཀྱིས། བདག་གཞན་དུ་འགྲོའོ་སྙམ་ནས་དེས་ཆུང་མ་ལ་སྨྲས་པ། བཟང་མོ་ཁོ་བོས་རྒྱལ་ པོ་འདི་ལ་ཕན་མང་དུ་བཏགས་ན་རྒྱལ་པོ་འདིས་ཁོ་བོ་རྗེས་སུ་མ་བསྲུངས་ཀྱིས་ཁོ་བོ་གཞན་དུ་འགྲོས་ཁྱིམ་གྱི་སོ་ནམ་དག་སྡུས་ཤིག །དེས་ཁྱིམ་གྱི་སོ་ནམ་དག་བསྡུ་བར་བརྩམས་པ་དང་། དེའི་ཉེ་དུ་དག་གིས་མཁན་པོ་གནས་ལེན་གྱི་བུ་གཞན་དུ་འགྲོའོ། །ཞེས་ཐོས་ནས་དེ་དག་ དེའི་གན་དུ་སོང་སྟེ་ཕྱིན་ནས་སྨྲས་པ། མཁན་པོ་ཅིའི་སླད་དུ་ཁྱིམ་གྱི་སོ་ནམ་དག་སྡུད། དེས་སྨྲས་པ། ཤེས་ལྡན་དག་ཁོ་བོས་རྒྱལ་པོ་འདི་ལ་ཕན་མང་དུ་བཏགས་ན་རྒྱལ་པོ་འདིས་ཁོ་བོ་རྗེས་སུ་མ་བསྲུངས་ཀྱིས་ཁོ་བོ་གཞན་དུ་འགྲོའོ། །དེ་དག་གིས་སྨྲས་པ། མཁན་པོ་ཁྱོད་ གཞན་དུ་མ་བཞུད་པར་རེ་ཞིག་ཉེ་དུའི་ནང་འདི་ཉིད་དུ་བདེ་བར་བཞུགས་ཤིག །དེས་ཚིགས་སུ་བཅད་པ་སྨྲས་པ། མི་ནི་གཞན་གྱི་ཡུལ་ན་གནས་བླ་ཡི། །རང་གི་ཡུལ་ན་ཟིལ་གནོན་གནས་པ་མིན། །མི་ནི་གང་ན་ཟིལ་གནོན་མེད་གནས་པ། །དེ་ཉིད་རང་ཡུལ་དེ་ན་གཉེན་ཡང་

  24. 13a

    ཡོད། །བྲམ་ཟེ་སྐར་རྒྱལ་གྱིས་མཁན་པོ་གནས་ལེན་གྱི་བུ་གཞན་དུ་འགྲོའོ་ཞེས་ཐོས་ནས་དེ་དེའི་གན་དུ་སོང་སྟེ་ཕྱིན་ནས་སྨྲས་པ། བདག་ནི་བློ་བུར་དུ་འོངས་པ་ཡིན་པས་རིང་པོ་མི་ཐོགས་པ་ཁོ་ནར་འགྲོ་སྟེ། འདི་ཁྱོད་ཉིད་ཀྱི་རྒོལ་བའི་ལོངས་སྤྱོད་དུ་འགྱུར་ གྱིས་གཞན་དུ་མ་འགྲོ་བར་འདུག་ཤིག །དེས་སྨྲས་པ། བྲམ་ཟེའི་ཁྱེའུ་འགྲོའོ། །མཁན་པོ་གལ་ཏེ་དེ་ལྟ་ན་གྲོང་འདི་ཕྱེད་ཁྱོད་སྣོམས་ཤིག །ཕྱེད་བདག་འཚལ་ལོ། །བྲམ་ཟེ་གནས་ལེན་གྱི་བུས་བསམས་པ། བདག་གིས་རྒྱལ་པོ་འདི་ལ་ཕན་མང་དུ་བཏགས་ན་ རྒྱལ་པོ་འདིས་བདག་རྗེས་སུ་མ་བསྲུངས་ཏེ། འདི་ལྟར་བྲམ་ཟེ་སྐར་རྒྱལ་འདིས་བདག་ལ་འདི་ལྟ་སྟེ། ལོངས་སྤྱོད་དག་གིས་ལོངས་སྤྱོད་ཀྱི་བགོ་བཤའ་བྱས་པ་ནི་ཕན་མང་དུ་བཏགས་པ་ཡིན་གྱིས། འདི་ལ་ཤཱ་རི་ཀཱ་དེ་ཆུང་མའི་དོན་དུ་སྦྱིན་ནོ་སྙམ་ནས་དེས་ཆུང་མ་ལ་སྨྲས་ པ། བཟང་མོ་ཁོ་བོས་རྒྱལ་པོ་འདི་ལ་ཕན་མང་དུ་བཏགས་ན་རྒྱལ་པོ་འདིས་ཁོ་བོ་རྗེས་སུ་མ་བསྲུངས་ཏེ། འདི་ལྟར་བྲམ་ཟེ་སྐར་རྒྱལ་འདིས་ཁོ་བོ་ལ་འདི་ལྟ་སྟེ། ལོངས་སྤྱོད་དག་གིས་ལོངས་སྤྱོད་ཀྱི་བགོ་བཤའ་བྱས་པ་ནི་ཕན་མང་དུ་བཏགས་པ་ཡིན་གྱིས། འདི་ལ་ཤཱ་རི་ཀཱ་དེ་ ཆུང་མའི་དོན་དུ་སྦྱིན་ནོ། །དེས་སྨྲས་པ། བྲམ་ཟེའི་ཁྱེའུ་སྟོད་རིངས་ལ་དྲིའོ། །དེ་གཉིས་ཀྱིས་དེ་བོས་ཏེ་སྨྲས་པ། བུ་བདག་ཅག་གིས་རྒྱལ་པོ་འདི་ལ་ཕན་མང་དུ་བཏགས་ན་རྒྱལ་པོ་འདིས་བདག་ཅག་རྗེས་སུ་མ་བསྲུངས་ཏེ། འདི་ལྟར་བྲམ་ཟེ་སྐར་རྒྱལ་འདིས་བདག་ཅག་ལ་ འདི་ལྟ་སྟེ། ལོངས་སྤྱོད་དག་གིས་ལོངས་སྤྱོད་ཀྱི་བགོ་བཤའ་བྱས་པ་ནི་ཕན་མང་དུ་བཏགས་པ་ཡིན་གྱིས། འདི་ལ་ཤཱ་རི་ཀཱ་དེ་ཆུང་མའི་དོན་དུ་སྦྱིན་པར་བྱའོ། །དེས་སྨྲས་པ། ཡབ་ཡུམ་དེ་ལྟར་དགྲ་བོ་ལ་མཛའ་བཤེས་སུ་བགྱིས་ན་འདི་ལྟ་སྟེ། དེས་ལོངས་སྤྱོད་རྣམས་ ལས་ཉམས་པར་བགྱིད་པའམ། ཐམས་ཅད་ཀྱི་ཐམས་ཅད་དུ་སྲོག་དང་འབྲལ་བར་བགྱིད་པར་ཡང་འགྱུར་ལ། དེས་བདག་ཅག་ལོངས་སྤྱོད་དག་ལས་ཉམས་པར་བགྱིས་ན། ཅིའི་སླད་དུ་སྐོལ་གྱིས་འདི་ལ་ཤཱ་རི་ཀཱ་མཆིས་བྲང་གི་དོན་དུ་སྩལ་བར་བགྱི། དེ་གཉིས་

  25. 13b

    ཀྱིས་སྨྲས་པ། བླུན་པོ་ཁྱོད་ཅི་ཤེས་ཞེས་དེ་གཉིས་ཀྱིས་དེའི་ཚིག་ཚིག་མ་ཡིན་པར་བྱས་ཏེ་ཤཱ་རི་ཀཱ་བྲམ་ཟེ་སྐར་རྒྱལ་ལ་ཆུང་མའི་དོན་དུ་བྱིན་ནོ། །དེས་དེ་དཔལ་གྱི་འབྱོར་པ་ཆེན་པོས་བག་མར་བླངས་སོ། །བྲམ་ཟེའི་ཁྱེའུ་སྟོད་རིངས་ཀྱིས་བསམས་པ། འདི་དག་ གིས་བདག་བརྙས་པར་གྱུར་པ་གང་ཡིན་པ་དེ་ཐམས་ཅད་ནི་ཐོས་པ་ཉུང་བ་ལས་གྱུར་པ་ཡིན་ནོ་སྙམ་ནས་འདི་ལྟར་བྲམ་ཟེ་སྐར་རྒྱལ་ཅི་ཞིག་ཤེས་སྙམ་ན། འཇིག་རྟེན་རྒྱང་འཕེན་ཤེས་སོ་སྙམ་ནས་དེས་སྨྲས་པ། ཤེས་ལྡན་དག་འཇིག་རྟེན་རྒྱང་འཕེན་ཤེས་པ་ག་ལ་ཡོད། ལྷོ་ཕྱོགས་ ནའོ། །དེ་འཇིག་རྟེན་རྒྱང་འཕེན་གྱི་དོན་དུ་ལྷོ་ཕྱོགས་སུ་འཕགས་ནས་དེ་མཐར་གྱིས་ལྷོ་ཕྱོགས་སུ་ཕྱིན་པ་དང་། དེ་དེར་སོང་སྟེ་དྲིས་པ། ཤེས་ལྡན་དག་འཇིག་རྟེན་རྒྱང་འཕེན་ཤེས་པ་སུ་དག་ཡིན། ཀུན་དུ་རྒྱུ་དག་གོ། །དེ་དེ་དག་གི་གན་དུ་སོང་སྟེ་ཕྱིན་ནས་སྨྲས་པ། བདག་ ཤེས་ལྡན་དག་གི་ཞབས་ལ་སྲི་ཞུ་བགྱིད་པར་འཚལ་ལོ། །ཅི་ཞིག་གི་ཕྱིར། འཇིག་རྟེན་རྒྱང་འཕེན་གཟུང་བའི་སླད་དུའོ། །དེ་དག་གིས་སྨྲས་པ། ཁོ་བོ་ཅག་ནི་ཁྱིམ་པ་ལ་འཇིག་རྟེན་རྒྱང་འཕེན་མི་སྟོན་ཏོ། །དེས་སྨྲས་པ། གལ་ཏེ་དེ་ལྟ་ན་རབ་ཏུ་འབྱུང་ངོ་། །དེ་དག་གིས་ དེ་རབ་ཏུ་ཕྱུང་ནས་དེས་བདག་གིས་ཇི་སྲིད་དུ་འཇིག་རྟེན་རྒྱང་འཕེན་མ་བཟུང་བ་དེ་སྲིད་དུ་བདག་གིས་སེན་མོ་མི་གཅད་དོ་ཞེས་དེས་སེན་མོ་རིང་པོ་རིང་པོར་བཞག་ནས་དེའི་སེན་མོ་རིང་བ་རིང་བར་གྱུར་པས་དེའི་མིང་ཀུན་དུ་རྒྱུ་སེན་རིངས་ཀུན་དུ་རྒྱུ་སེན་རིངས་ཞེས་བྱ་བར་གྱུར་ཏོ། །ཤཱ་རི་ཀཱ་ཡང་ བྲམ་ཟེ་སྐར་རྒྱལ་དང་ལྷན་ཅིག་འགྱེད་པར་བྱེད་པ་ན་སྐར་རྒྱལ་གྱིས་དེ་ཚར་བཅད་དོ། །བྲམ་ཟེ་སྐར་རྒྱལ་ཤཱ་རི་ཀཱ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་སེམས་ཅན་སྲིད་པ་ཐ་མ་པ་སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ཐམས་ཅད་དུ་འཆི་འཕོ་དང་སྐྱེ་བ་དོན་དུ་མི་གཉེར་བ། ལུས་ཐ་མ་འཛིན་པ་ཞིག་ཀྱང་ལྷའི་རིས་བཟང་པོ་ཞིག་ནས་ཤི་འཕོས་ཏེ་ཤཱ་རི་ཀཱའི་མངལ་དུ་ཞུགས་སོ། །ཤཱ་རི་ཀཱས་རྨི་ལམ་དུ་མི་ལག་ན་སྒྲོན་མ་

  26. 14a

    ཐོགས་པ་ཞིག་གིས་བདག་གི་དཀུ་དྲལ་ཏེ་ཞུགས་ཤིང་བདག་རི་ཆེན་པོའི་སྤོ་ལ་འཛེག་གོ། །བདག་སྟེང་གི་ནམ་མཁའ་ལ་འགྲོའོ། །བདག་ལ་སྐྱེ་བོ་ཕལ་པོ་ཆེའི་ཚོགས་ཕྱག་འཚལ་ལོ་ཞེས་ཟེར་བ་རྨིས་སོ། །རྨིས་ནས་དེས་བྲམ་ཟེ་སྐར་རྒྱལ་ལ་ སྨྲས་པ། བདག་གིས་རྨི་ལམ་འདི་དང་འདི་ལྟ་བུ་ཞིག་རྨིས་སོ། །འདི་ལྟར་བྲམ་ཟེ་སྐར་རྒྱལ་ཉིད་རྨི་ལྟས་ཀྱི་དཔྱད་ལ་མཁས་པ་ཡིན་མོད་ཀྱི། དེས་བྲམ་ཟེ་རྨི་ལྟས་ཀྱི་དཔྱད་འདོན་པ་གཞན་དག་ལ་སྨྲས་པ། བདག་གི་བྲམ་ཟེ་མོས་རྨི་ལམ་འདི་དང་འདི་ལྟ་བུ་ཞིག་རྨིས་ ན་ཅི་ལ་ལྟ། དེ་དག་གིས་སྨྲས་པ། མཁན་པོ་གཡར་ལམ་དེ་བཟང་སྟེ། མི་ལག་ན་སྒྲོན་མ་ཐོགས་པ་ཞིག་གིས་བདག་གི་དཀུ་དྲལ་ཏེ་ཞུགས་ཞེས་མཆི་བ་ནི་བུ་བཙའ་བར་འགྱུར་ཞིང་དེས་ལོ་བརྒྱད་གཉིས་ཀྱིས་དབང་པོའི་བརྡ་སྤྲོད་པ་བཀླགས་ནས་རྒོལ་བ་ཐམས་ཅད་ཚར་ གཅོད་པར་འགྱུར་བ་ལ་ལྟའོ། །བདག་རི་ཆེན་པོའི་སྤོ་ལ་འཛེག་གོ། །བདག་སྟེང་གི་ནམ་མཁའ་ལ་འགྲོའོ། །བདག་ལ་སྐྱེ་བོ་ཕལ་པོ་ཆེའི་ཚོགས་ཕྱག་འཚལ་ལོ་ཞེས་མཆི་བ་གང་ལགས་པ་ནི་རབ་ཏུ་བྱུང་ནས་བརྟུལ་ཞུགས་གྲུབ་པའི་བདག་ཉིད་ཆེན་པོར་འགྱུར་བ་ལ་ ལྟའོ། །དུས་གཞན་ཞིག་ན་བྲམ་ཟེ་སྐར་རྒྱལ་ཤཱ་རི་ཀཱ་དང་ལྷན་ཅིག་འགྱེད་པར་བྱེད་པ་ན་ཤཱ་རི་ཀཱས་དེ་ཚར་བཅད་ནས། དེས་བསམས་པ། སྔོན་བདག་གིས་འདི་ཚར་བཅད་ན་ད་འདིས་བདག་ཚར་བཅད་པའི་སྦྱོར་བ་གང་ཡིན་སྙམ་ནས་དེས་བསམས་པ། དེ་ནི་འདིའི་མཐུ་མ་ཡིན་གྱི། འདི་ལྟར་འདིའི་མངལ་དུ་སེམས་ཅན་ཞུགས་པ་གང་ཡིན་པ་དེའི་མཐུ་ཡིན་ནོ་སྙམ་མོ། །དེ་ནས་ཟླ་བ་བརྒྱད་དམ་དགུ་འདས་ཏེ་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་ བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟེངས་མཐོ་བ་ཞིག་བཙས་སོ། །བཙས་ནས་དེས་བྲམ་ཟེ་སྐར་རྒྱལ་ལ་སྨྲས་པ། བྲམ་ཟེའི་ཁྱེའུ་འདི་མེས་པོའི་གན་དུ་ཕུལ་ན་དེ་འདིའི་མིང་འདོགས་པར་འགྱུར་རོ། །དེས་མེས་པོའི་གན་དུ་ཁྲིད་པ་དང་དེས་

  27. 14b

    ཁྱེའུའི་མིང་ཅིར་གདགས་ཞེས་བསམས་ན། བྲམ་ཟེའི་ཁྱེའུ་འདི་བྲམ་ཟེ་སྐར་རྒྱལ་གྱི་བུ་ཡིན་པས། བྲམ་ཟེའི་ཁྱེའུ་འདིའི་མིང་ཉེ་རྒྱལ་དུ་གདགས་སོ་སྙམ་ནས་དེའི་མིང་ཉེ་རྒྱལ་ཞེས་བྱ་བར་བཏགས་སོ། །བྲམ་ཟེ་སྐར་རྒྱལ་གྱིས་སྨྲས་པ། མེས་པོས་བྲམ་ཟེའི་ཁྱེའུ་འདིའི་ མིང་ཅིར་བཏགས་ཉེ་རྒྱལ་ཞེས་བྱ་བར་བཏགས་སོ། །དེས་བསམས་པ། མེས་པོས་བྲམ་ཟེའི་ཁྱེའུ་འདིའི་མིང་ཕ་ལས་དྲས་ཏེ་བཏགས་ཀྱིས། བདག་གིས་འདིའི་མིང་མ་ལས་དྲས་ཏེ་གདགས་སོ་སྙམ་ནས་བྲམ་ཟེའི་ཁྱེའུ་འདི་མ་ཤཱ་རི་ཀཱའི་བུ་ཡིན་པས་འདིའི་མིང་ཤཱ་རིའི་བུར་ གདགས་སོ་སྙམ་ནས་དེའི་མིང་ཤཱ་རིའི་བུ་ཞེས་བྱ་བར་བཏགས་སོ། །དེ་ན་ཁ་ཅིག་གིས་ནི་བྲམ་ཟེའི་ཁྱེའུ་ཤཱ་རིའི་བུ་ཞེས་བྱ་བར་ཤེས་སོ། །ཁ་ཅིག་གིས་ནི་བྲམ་ཟེའི་ཁྱེའུ་ཉེ་རྒྱལ་ཞེས་བྱ་བར་ཤེས་སོ། །བྲམ་ཟེའི་ཁྱེའུ་ཉེ་རྒྱལ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་ གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་དང་། འབྱེད་པ་ དང་། ཀློག་པའི་ཕ་རོལ་དུ་སོན་ཅིང་། དེའི་ཚེ་ན་བྲམ་ཟེའི་སྤྱོད་ཚུལ་དང་། སྤྱོད་པ་དང་། གཙང་སྦྲ་དང་། ཀུན་དུ་སྤྱོད་པ་དང་། ཐལ་བ་བླང་བ་དང་། བྱ་མ་བུམ་བླང་བ་དང་། ས་བླང་བ་དང་། ལག་སྟངས་དང་། ཐོར་ཚུགས་དང་། རབ་བསྔགས་བྱ་བ་དང་། ཀྱེ་ཞེས་བྱ་བ་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྙན་ཚིག་གི་རིག་བྱེད་དང་། སྲིད་སྲུང་གི་རིག་བྱེད་དང་། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང་། མཆོད་སྦྱིན་བྱེད་དུ་འཇུག་པ་དང་། ཀློག་པ་དང་། ཀློག་ཏུ་འཇུག་པ་དང་།

  28. 15a

    སྦྱིན་པ་དང་། ལེན་པ་ལ་མཁས་པའི་བྲམ་ཟེ་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་དུ་སོན་པ། མེ་ལྟ་བུའི་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེས་ཕས་རིག་པའི་གནས་ཐམས་ ཅད་སློབ་ཏུ་བཅུག་ནས་དེས་ལོ་བརྒྱད་གཉིས་ཀྱིས་དབང་པོའི་བརྡ་སྤྲོད་པ་བཀླགས་ནས་རྒོལ་བ་ཐམས་ཅད་ཚར་བཅད་པར་གྱུར་ཏོ། །དེ་དུས་གཞན་ཞིག་ན་ཕ་དང་ལྷན་ཅིག་རིག་བྱེད་འདོན་པར་བྱེད་པ་ན་སྨྲས་པ། ཡབ་སྨྲས་པ་འདིའི་དོན་ཅི་ལགས། བུ་ཁོ་བོས་ཀྱང་སྨྲས་ པ་འདིའི་དོན་མི་ཤེས་ཏེ་འདི་ལྟར་གསང་ཚིག་གི་གཞི་འདི་དག་ནི་སྔོན་གྱི་དྲང་སྲོང་རྣམས་ཀྱིས་བསྟོད་པ་བསྒྲགས་པ་ཡང་དག་པར་སྦྱར་བ་སྟེ། དེ་དག་ནི་ད་ལྟར་བྲམ་ཟེ་རྣམས་ཀྱང་རྗེས་སུ་སྒྲོགས་ཤིང་རྗེས་སུ་རྗོད་པར་བྱེད་དོ། །ཡབ་གསང་ཚིག་གི་གཞི་སྔོན་གྱི་དྲང་སྲོང་དེ་ རྣམས་ཀྱིས་བསྟོད་པ་བསྒྲགས་པ་ཡང་དག་པར་སྦྱར་བ་གང་དག་ད་ལྟར་བྲམ་ཟེ་རྣམས་རྗེས་སུ་སྒྲོགས་ཤིང་རྗེས་སུ་རྗོད་པ་དེ་དག་དོན་མ་མཆིས་ལགས་སྙམ་མམ། ཅི་འདི་ལྟར་སྨྲས་པ་འདིའི་དོན་ནི་འདི་ལགས་སོ། །སྨྲས་པ། འདིའི་དོན་ནི་འདི་ལགས་སོ། །བྲམ་ཟེ་ སྐར་རྒྱལ་ཡིད་དགའ་ཞིང་ཡིད་དགའ་ནས་བསམས་པ། བུས་བྱ་བ་ནི་འདི་ལྟ་སྟེ། ཕའི་གཞུང་སྲོངས་པར་བྱ་བའམ། ཁྱད་པར་ལྷག་པར་རྟོགས་པར་བྱ་བ་དེ་ཙམ་དུ་ཟད་ན་བྲམ་ཟེའི་ཁྱེའུ་འདིས་ནི་བདག་པས་ཁྱད་པར་ལྷག་པར་རྟོགས་སོ་སྙམ་ནས། དེ་བྲམ་ཟེའི་ཁྱེའུ་ལྔ་ བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུག་པ་དེ་དག་ཀྱང་དེས་ཡིད་དགའ་ཞིང་དགའ་བས་དེ་ཉིད་ལ་གཏད་དོ། །བྲམ་ཟེའི་ཁྱེའུ་ཉེ་རྒྱལ་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུག་པ་ན་དེས་རིག་བྱེད་རིང་པོ་རིང་པོ་གང་དག་ཡིན་པ་དེ་དག་ནི་ཐུང་ངུར་ རྣམ་པར་བཞག་གོ། །རིག་བྱེད་ཐུང་ངུ་ཐུང་ངུ་གང་དག་ཡིན་པ་དེ་དག་ནི་རིང་པོར་རྣམ་པར་བཞག་སྟེ་ཚིག་དང་ཡི་གེ་ཕྲི་ཞིང་དོན་དང་ངེས་པའི་ཚིག་ཏུ་རྣམ་པར་བཞག་གོ།། །།འདུལ་བ་གཞི། བམ་པོ་གཉིས་པ། གྲོང་ཤིང་ཐགས་ཅན་ན་བྲམ་ཟེ་མདུན་ན་འདོན་

  29. 15b

    གྲུ་འཛིན་ཅེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ། ཡོངས་སུ་བཟུང་བ། ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་ཡང་མེད་བུ་མོ་ཡང་མེད་ནས། དེ་བུ་མེད་ཅིང་བུ་མངོན་པར་འདོད་པས་ཞི་བ་དང་། ཆུ་ལྷ་དང་། ལུས་ངན་དང་། བརྒྱ་བྱིན་དང་། ཚངས་པ་ལ་སོགས་པ་དག་ལ་གསོལ་བ་འདེབས་ཤིང་། ལྷའི་བྱེ་བྲག་གཞན་འདི་ལྟ་སྟེ། ཀུན་དགའ་ར་བའི་ལྷ་དག་དང་། ཚལ་གྱི་ལྷ་དག་དང་། བཞི་མདོའི་ལྷ་དག་དང་། སུམ་མདོའི་ལྷ་དག་དང་། གཏོར་མ་ལེན་པའི་ལྷ་དག་དང་། ལྷན་ཅིག་སྐྱེས་པ་དག་དང་། ཆོས་མཐུན་པ་དག་དང་། རྟག་ཏུ་རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་ རྟེན་ན་གང་གསོལ་བ་འདེབས་པའི་རྒྱུ་ལས་བུ་དང་བུ་མོ་དག་སྐྱེའོ་ཞེས་བྱ་བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་མ་ཡིན་ཏེ་གལ་ཏེ་དེ་ལྟར་འགྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་ མངོན་དུ་གྱུར་པ་ལས་བུ་དང་བུ་མོ་དག་སྐྱེ་བར་འགྱུར་ཏེ། གསུམ་པོ་དེ་དག་གང་ཞེ་ན། ཕ་དང་མ་གཉིས་ཆགས་པར་གྱུར་ཅིང་འདུས་པ་དང་། མ་དུས་ལ་བབ་ཅིང་ཟླ་མཚན་དང་ལྡན་པ་དང་། དྲི་ཟ་ཉེ་བར་གནས་ཤིང་འཇུག་པར་འདོད་པ་སྟེ། གནས་གསུམ་པོ་དེ་དག་མངོན་དུ་ གྱུར་པ་ལས་བུ་དང་བུ་མོ་དག་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ན། སེམས་ཅན་སྲིད་པ་ཐ་མ་པ་སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ལས་འདས་པ་ལ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པའི་འགྲོ་བ་ ཐམས་ཅད་དུ་འཆི་འཕོ་དང་། སྐྱེ་བ་དོན་དུ་མི་གཉེར་བ། ལུས་ཐ་མ་འཛིན་པ་ཞིག་ཀྱང་ལྷའི་རིས་བཟང་པོ་ཞིག་ནས་ཤི་འཕོས་ཏེ་དེའི་སྐྱེ་དགུའི་བདག་མོའི་མངལ་དུ་ཞུགས་སོ། །བུད་མེད་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་

  30. 16a

    པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་། མངལ་ན་གནས་པ་ཞུགས་པར་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་ཁྱིམ་ཐབ་ལ་སྨྲས་པ། རྗེའི་སྲས་བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གིས་དཀུ་གཡས་པར་ རྟེན་ཅིང་མཆིས་པས་ངེས་པར་ཁྱེའུར་འགྱུར་གྱིས་དགྱེས་པ་བསྐྱེད་དུ་གསོལ། དེ་ཡང་ཡིད་དགའ་ཞིང་ཡིད་དགའ་ནས་རོ་སྟོད་བསྲང་སྟེ་ལག་པ་གཡས་པ་བརྐྱང་ནས་འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང་། ཁོ་བོ་དང་མཐུན་པར་སྐྱེ་ཞིང་མི་ མཐུན་པར་མི་སྐྱེ་བ་དང་། ཁོ་བོའི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། ཁོ་བོའི་རིགས་རྒྱུད་རིང་དུ་གནས་པར་སྒྲུབ་པ་དང་། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུའམ། མང་པོ་ཡང་རུང་བའི་སྦྱིན་པ་དག་བྱིན་ ཞིང་བསོད་ནམས་དག་བྱས་ནས་འདི་དེ་གཉིས་གང་དུ་སྐྱེས་ཤིང་འགྲོ་བའི་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་སྔོ་བ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་ པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གྲང་བ་ན་གྲང་བའི་ཡོ་བྱད་དག་དང་། དྲོ་བ་ན་དྲོ་བའི་ཡོ་བྱད་དག་དང་། སྨན་པས་བཅས་པའི་ཟས་ཧ་ཅང་ཡང་མི་ཁ་བ་དང་། ཧ་ཅང་ཡང་མི་སྐྱུར་བ་དང་། ཧ་ཅང་ཡང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་ མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་རྣམ་པར་སྤངས་པའི་ཟས་དག་དང་། དོ་ཤལ་དང་། སེ་མོ་དོ་དང་། རྒྱན་གྱིས་བཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་

  31. 16b

    བུ་དང་། ཁྲི་ནས་ཁྲིར་དང་། ཁྲིའུ་ནས་ཁྲིའུར་རྒྱུ་ཞིང་ཤོད་ཀྱིས་གཞིར་མི་འབབ་པ་དང་། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཛུད་དོ། །དེ་ཟླ་བ་བརྒྱད་དམ་དགུ་འདས་ཏེ་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ་གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟེངས་མཐོ་བ་ཞིག་བཙས་སོ། །བཙས་ནས་དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཁྱེའུ་འདི་ལྷ་པང་དུ་བླངས་ནས་ཐོབ་པས། བྲམ་ཟེའི་ཁྱེའུ་འདིའི་མིང་པང་ནས་སྐྱེས་སུ་གདགས་སོ་སྙམ་ནས་དེའི་མིང་པང་ནས་སྐྱེས་ཞེས་བྱ་བར་བཏགས་ སོ། །གཞན་ཡང་མཽད་གལ་གྱི་རིགས་ཡིན་པས་བྲམ་ཟེའི་ཁྱེའུ་འདིའི་མིང་མཽད་གལ་གྱི་བུར་གདགས་སོ་སྙམ་ནས་དེའི་མིང་མཽད་གལ་གྱི་བུ་ཞེས་བྱ་བར་ཡང་བཏགས་སོ། །དེ་ན་ཁ་ཅིག་གིས་ནི་བྲམ་ཟེའི་ཁྱེའུ་མཽད་གལ་གྱི་བུ་ཞེས་བྱ་བར་ཤེས་སོ། །ཁ་ཅིག་གིས་ནི་ བྲམ་ཟེའི་ཁྱེའུ་པང་ནས་སྐྱེས་ཞེས་བྱ་བར་ཤེས་སོ། །བྲམ་ཟེའི་ཁྱེའུ་པང་ནས་སྐྱེས་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་ བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་ པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་དང་། འབྱེད་པ་དང་། ཀློག་པའི་ཕ་རོལ་དུ་སོན་ཅིང་། དེའི་ཚེ་ན་བྲམ་ཟེའི་སྤྱོད་ཚུལ་དང་། སྤྱོད་པ་དང་། གཙང་སྦྲ་དང་། ཀུན་དུ་སྤྱོད་པ་དང་།

  32. 17a

    ཐལ་བ་བླང་བ་དང་། བྱ་མ་བུམ་བླང་བ་དང་། ས་བླང་བ་དང་། ལག་སྟངས་དང་། ཐོར་ཚུགས་དང་། རབ་བསྔགས་བྱ་བ་དང་། ཀྱེ་ཞེས་བྱ་བ་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྙན་ཚིག་གི་རིག་བྱེད་དང་། སྲིད་སྲུང་གི་རིག་བྱེད་དང་། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང་། མཆོད་སྦྱིན་བྱེད་དུ་འཇུག་པ་དང་། ཀློག་པ་དང་། ཀློག་ཏུ་འཇུག་པ་དང་། སྦྱིན་པ་དང་། ལེན་པ་ལ་མཁས་པའི་བྲམ་ཟེའི་རིག་བྱེད་དང་རིག་བྱེད་ཀྱི་ཡན་ལག་གི་ཕ་རོལ་དུ་སོན་པ་མེ་ལྟ་བུའི་ ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེ་ཕས་རིག་པའི་གནས་ཐམས་ཅད་སློབ་ཏུ་བཅུག་གོ། །དེ་དུས་གཞན་ཞིག་ན་ཕ་དང་ལྷན་ཅིག་རིག་བྱེད་འདོན་པར་བྱེད་པ་ན་སྨྲས་པ། ཡབ་སྨྲས་པ་འདིའི་དོན་ཅི་ལགས། བུ་ ཁོ་བོས་ཀྱང་སྨྲས་པ་འདིའི་དོན་མི་ཤེས་ཏེ། འདི་ལྟར་གསང་ཚིག་གི་གཞི་འདི་དག་ནི་སྔོན་གྱི་དྲང་སྲོང་རྣམས་ཀྱིས་བསྟོད་པ་བསྒྲགས་པ་ཡང་དག་པར་སྦྱར་བ་སྟེ། དེ་དག་ནི་ད་ལྟར་བྲམ་ཟེ་རྣམས་ཀྱང་རྗེས་སུ་སྒྲོགས་ཤིང་རྗེས་སུ་རྗོད་པར་བྱེད་དོ། །ཡབ་གསང་ཚིག་གི་ གཞི་སྔོན་གྱི་དྲང་སྲོང་དེ་རྣམས་ཀྱིས་བསྟོད་པ་བསྒྲགས་པ། ཡང་དག་པར་སྦྱར་བ་གང་དག་ད་ལྟར་བྲམ་ཟེ་རྣམས་རྗེས་སུ་སྒྲོགས་ཤིང་རྗེས་སུ་བརྗོད་པ་དེ་དག་དོན་མ་མཆིས་པ་ལགས་སྙམ་མམ་ཅི། འདི་ལྟར་སྨྲས་པ་འདིའི་དོན་ནི་འདི་ལགས་སོ། །བྲམ་ཟེ་གྲུ་འཛིན་ ཡིད་དགའ་ཞིང་ཡིད་དགའ་ནས་བསམས་པ། བུས་བྱ་བ་ནི་འདི་ལྟ་སྟེ། ཕའི་གཞུང་སྲོངས་པར་བྱ་བའམ། ཁྱད་པར་ལྷག་པར་རྟོགས་པར་བྱ་བ་དེ་ཙམ་དུ་ཟད་ན། བྲམ་ཟེའི་ཁྱེའུ་འདིས་ནི་བདག་པས་ཁྱད་པར་ལྷག་པར་རྟོགས་སོ་སྙམ་ནས་བྲམ་ཟེའི་ཁྱེའུ་ལྔ་བརྒྱ་ ཙམ་བྲམ་ཟེའི་གསང་ཚིག་དག་ཀློག་ཏུ་འཇུག་པ་དེ་དག་ཀྱང་དེས་ཡིད་དགའ་ཞིང་ཡིད་དགའ་བས་དེ་ཉིད་ལ་གཏད་དོ། །བྲམ་ཟེའི་ཁྱེའུ་པང་ནས་སྐྱེས་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུག་གོ། །བྲམ་ཟེའི་ཁྱེའུ་རྣམས་ཀྱི་ཀུན་དུ་སྤྱོད་པ་ནི་

  33. 17b

    འདི་ཡིན་ཏེ། གང་གི་ཚེ་མི་ཀློག་པར་གྱུར་པ་དེའི་ཚེ་ན་ལན་འགའ་ནི་ཆུ་ངོགས་སུ་ཉེ་རེག་བྱེད་དུ་འདོང་ངོ་། །ལན་འགའ་ནི་གྲོང་ཁྱེར་ལྟར་འདོང་ངོ་། །ལན་འགའ་ནི་ཡམ་སྲེག་ཤིང་ཐུར་འདོང་ངོ་། །ཇི་ཙམ་དུས་གཞན་ཞིག་ན་དེ་དག་མི་ཀློག་པར་གྱུར་ནས། དེའི་ཚེ་དེ་ དག་གྲོང་ཁྱེར་ལྟར་དོང་བ་དང་། བྲམ་ཟེའི་ཁྱེའུ་ཉེ་རྒྱལ་གྱི་བྲམ་ཟེའི་ཁྱེའུ་དག་གསང་ཚིག་དག་ཀློག་ཅིང་མདུན་དུ་འདོང་ངོ་། །བྲམ་ཟེའི་ཁྱེའུ་པང་ནས་སྐྱེས་ཀྱི་བྲམ་ཟེའི་ཁྱེའུ་དག་ཀྱང་གསང་ཚིག་དག་ཀློག་ཅིང་ཕྱི་བཞིན་འབྲང་ཞིང་འདོང་ངོ་། །བྲམ་ཟེའི་ཁྱེའུ་པང་ནས་ སྐྱེས་ཀྱི་བྲམ་ཟེའི་ཁྱེའུ་དེ་དག་གིས་བྲམ་ཟེའི་ཁྱེའུ་ཉེ་རྒྱལ་གྱི་བྲམ་ཟེའི་ཁྱེའུ་དེ་དག་གསང་ཚིག་གི་གཞི་དག་ཀློག་པ་ཐོས་ནས་དེ་དག་གིས་སྨྲས་པ། ཅིའི་ཕྱིར་ཁྱེད་ཅག་གསང་ཚིག་གི་གཞི་དག་ཉམས་པར་བྱས་ཏེ་ཀློག །དེ་དག་གིས་སྨྲས་པ། ཇི་ལྟར་བཀླག་པར་ བྱ། གསང་ཚིག་གི་གཞི་འདི་དག་ནི་འདི་དང་འདི་སྐད་ཅེས་བཀླག་པར་བྱའོ། །དེ་དག་གིས་སྨྲས་པ། ཁྱེད་ཅག་གིས་སུ་ལས་གསང་ཚིག་གི་གཞི་འདི་དག་བཀླགས། དེ་དག་གིས་སྨྲས་པ། གང་གིས་དེ་མི་ཤེས་པ་དེས་ནི་ཉི་མ་དང་ཟླ་བ་གཉིས་མི་ཤེས་པ་ཡིན་ནོ། ། གྲོང་ན་ལ་ད་ན་བྲམ་ཟེ་སྐར་རྒྱལ་ཞེས་བྱ་བ་ཞིག་འདུག་པ་དེའི་བུ་བྲམ་ཟེའི་ཁྱེའུ་ཉེ་རྒྱལ་ཞེས་བྱ་བ་དེ་ལས་བདག་ཅག་གིས་བཀླགས་སོ། །ཁྱེད་ཅག་གིས་ཀྱང་སུ་ལས་གསང་ཚིག་གི་གཞི་འདི་དག་བཀླགས། དེ་དག་གིས་སྨྲས་པ། གང་གིས་དེ་མི་ཤེས་པ་དེས་ཀྱང་ཉི་མ་ དང་ཟླ་བ་གཉིས་མི་ཤེས་པ་ཡིན་ནོ། །གྲོང་ཤིང་ཐགས་ཅན་ན་བྲམ་ཟེ་མདུན་ན་འདོན་གྲུ་འཛིན་ཅེས་བྱ་བ་ཞིག་འདུག་པ་དེའི་བུ་བྲམ་ཟེའི་ཁྱེའུ་པང་ནས་སྐྱེས་ཞེས་བྱ་བ་དེ་ལས་བདག་ཅག་གིས་བཀླགས་སོ། །དེ་ནས་བྲམ་ཟེའི་ཁྱེའུ་ཉེ་རྒྱལ་གྱི་བྲམ་ཟེའི་ཁྱེའུ་རྣམས་སྤ་གོང་ ཞིང་མི་དགའ་བ་དང་། མི་འཇིགས་པ་མེད་པར་གྱུར་ཏེ། བྲམ་ཟེའི་ཁྱེའུ་ཉེ་རྒྱལ་ག་ལ་བ་དེར་དོང་བ་དང་དེས་ཐག་རིང་པོ་ཁོ་ན་ནས་མཐོང་ནས་སྨྲས་པ། བྲམ་ཟེའི་ཁྱེའུ་དག་འདི་ལྟ་ཅི་ཉེས། མཁན་པོ་ཅང་མ་ནོངས་སོ། །དེས་ཚིགས་སུ་བཅད་པ་སྨྲས་པ།

  34. 18a

    བསམ་པ་ནང་ན་ཡོད་པ་ཀུན། །ཕྱི་རོལ་ནས་ནི་ཉེ་བར་དམིགས། །སྐད་མདོག་དབང་པོའི་རྣམ་པ་དག །རྣམ་པར་སྦ་བར་མི་ནུས་སོ། །བྲམ་ཟེའི་ཁྱེའུ་དག་གོར་མ་ཆག་པར་ཅི་ཞིག་ཉེས་སོ། །དེ་དག་གིས་སྐབས་དེ་རྒྱས་པར་བརྗོད་པ་དང་དེས་ སྨྲས་པ། བྲམ་ཟེའི་ཁྱེའུ་དག་དེ་དེ་བཞིན་ཏེ། ཇི་ལྟར་བྲམ་ཟེའི་ཁྱེའུ་དེ་དག་གསང་ཚིག་གི་གཞི་དེ་དག་ཀློག་པ་བཞིན་དུ་དེ་དག་བཀླག་པར་བྱ་བ་ཡིན་མོད་ཀྱི། ཁོ་བོས་རིག་བྱེད་རིང་པོ་རིང་པོ་གང་དག་ཡིན་པ་དེ་དག་ནི་ཐུང་ངུར་རྣམ་པར་བཞག་གོ། །རིག་བྱེད་ཐུང་ ངུ་ཐུང་ངུ་གང་དག་ཡིན་པ་དེ་དག་ནི་རིང་པོར་རྣམ་པར་བཞག་སྟེ། ཚིག་དང་ཡི་གེ་ཕྲི་ཞིང་དོན་དང་ངེས་པའི་ཚིག་ཏུ་རྣམ་པར་བཞག་གོ། །བྲམ་ཟེའི་ཁྱེའུ་པང་ནས་སྐྱེས་ཀྱི་བྲམ་ཟེའི་ཁྱེའུ་རྣམས་ཀྱང་སྤ་གོང་ཞིང་མི་དགའ་བ་དང་མི་འཇིགས་པ་མེད་པར་གྱུར་ཏེ། བྲམ་ ཟེའི་ཁྱེའུ་པང་ནས་སྐྱེས་ག་ལ་བ་དེར་དོང་བ་དང་དེས་ཀྱང་ཐག་རིང་པོ་ཁོ་ན་ནས་མཐོང་ནས་སྨྲས་པ། བྲམ་ཟེའི་ཁྱེའུ་དག་འདི་ལྟ་ཅི་ཉེས། མཁན་པོ་ཅང་མ་ནོངས་སོ། །དེས་ཀྱང་ཚིགས་སུ་བཅད་པ་སྨྲས་པ། བསམ་པ་ནང་ན་ཡོད་པ་ཀུན། །ཕྱི་རོལ་ནས་ ནི་ཉེ་བར་དམིགས། །སྐད་མདོག་དབང་པོའི་རྣམ་པ་དག །རྣམ་པར་སྦ་བར་མི་ནུས་སོ། །བྲམ་ཟེའི་ཁྱེའུ་དག་གོར་མ་ཆག་པར་ཅི་ཞིག་ཉེས་སོ། །དེ་དག་གིས་སྐབས་དེ་རྒྱས་པར་བརྗོད་པ་དང་དེས་སྨྲས་པ། བྲམ་ཟེའི་ཁྱེའུ་དག་དེ་དེ་བཞིན་ཏེ། ཇི་ལྟར་ བདག་ཅག་གསང་ཚིག་གི་གཞི་དེ་དག་ཀློག་པ་དེ་བཞིན་དུ་དེ་དག་བཀླག་པར་བྱ་བ་ཡིན་མོད་ཀྱི། བྲམ་ཟེའི་ཁྱེའུ་དེ་ཤེས་རབ་ཅན་ཡིན་པས་དེས་རིག་བྱེད་རིང་པོ་རིང་པོ་གང་དག་ཡིན་པ་དེ་དག་ནི་ཐུང་ངུར་རྣམ་པར་བཞག་གོ། །རིག་བྱེད་ཐུང་ངུ་ཐུང་ངུ་གང་དག་ཡིན་ པ་དེ་དག་ནི་རིང་པོར་རྣམ་པར་བཞག་སྟེ། ཚིག་དང་ཡི་གེ་ཕྲི་ཞིང་དོན་དང་ངེས་པའི་ཚིག་ཏུ་རྣམ་པར་བཞག་གོ། །དེ་གཉིས་གཅིག་གིས་གཅིག་ཐོས་མ་ཐག་ཁོ་ནར་མཐོང་འདོད་པར་གྱུར་ནས་བྲམ་ཟེའི་ཁྱེའུ་ཉེ་རྒྱལ་ཕའི་གན་དུ་སོང་སྟེ་ཕྱིན་ནས་སྨྲས་པ། ཡབ་བདག་

  35. 18b

    གྲོང་ཤིང་ཐགས་ཅན་དུ་མཆི་འཚལ་ལོ། །ཅི་ཞིག་གི་ཕྱིར་བྲམ་ཟེ་མདུན་ན་འདོན་གྲུ་འཛིན་ཅེས་བགྱི་བ་ཞིག་མཆིས་པ་དེའི་བུ་བྲམ་ཟེའི་ཁྱེའུ་པང་ནས་སྐྱེས་ཞེས་བགྱི་བ་དེ་བལྟ་བའི་སླད་དུའོ། །བུ་དེ་ཁྱོད་པས་ཆེས་ཤེས་རབ་ཅན་ཞིག་ཡིན་ནམ་ཅི། ཡབ་དེ་ནི་བདག་པས་ ཆེས་ཤེས་རབ་ཅན་མ་ལགས་ཏེ། འདི་ལྟར་དེ་ནི་ཆེས་ཕྱུག་པ་ལགས་སོ། །དེས་ཚིགས་སུ་བཅད་པ་སྨྲས་པ། མི་གང་རིགས་ཀྱིས་རྒན་པ་དང་། །ན་ཚོད་རྒན་དང་ནོར་གྱིས་རྒན། །དེ་ཀུན་ཐོས་པས་རྒན་པ་ཡི། །སྒོ་ན་དོན་ཀུན་གཉེར་བས་སྡོད། །བུ་གལ་ཏེ་དེ་ འོང་ན་ཐོས་པས་བགོ་བཤའ་བྱའི་བགྲོད་པར་ནི་མི་བྱའོ། །བྲམ་ཟེའི་ཁྱེའུ་པང་ནས་སྐྱེས་ཀྱང་ཕའི་གན་དུ་སོང་སྟེ་ཕྱིན་ནས་སྨྲས་པ། ཡབ་བདག་གྲོང་ན་ལ་དར་མཆི་འཚལ་ལོ། །ཅི་ཞིག་གི་ཕྱིར་དེ་ན་བྲམ་ཟེ་སྐར་རྒྱལ་ཞེས་བགྱི་བ་ཞིག་མཆིས་པ་དེའི་བུ་བྲམ་ཟེའི་ཁྱེའུ་ ཉེ་རྒྱལ་ཞེས་བགྱི་བ་དེ་བལྟ་བའི་སླད་དུ་མཆིའོ། །བུ་དེ་ཁྱོད་པས་ཆེས་ཕྱུག་པ་ཞིག་ཡིན་ནམ་ཅི། ཡབ་དེ་ནི་བདག་པས་ཆེས་ཕྱུག་པ་མ་ལགས་ཏེ། འདི་ལྟར་དེ་ནི་ཆེས་ཤེས་རབ་ཅན་ལགས་སོ། །དེས་ཀྱང་ཚིགས་སུ་བཅད་པ་སྨྲས་པ། མི་གང་རིགས་ཀྱིས་རྒན་པ་ དང་། །ན་ཚོད་རྒན་དང་ཐོས་པས་རྒན། །དེ་ཀུན་ནོར་གྱིས་རྒན་པ་ཡི། །སྒོ་ན་ཅི་བྱ་སྙམ་པ་སྡོད། །བུ་གལ་ཏེ་འོང་ན་ནོར་གྱིས་བགོ་བཤའ་བྱའི་བགྲོད་པར་ནི་མི་བྱའོ། །ཇི་ཙམ་དུས་གཞན་ཞིག་ན་རྒྱལ་པོའི་ཁབ་ཏུ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་ སྟོན་ལ་བབ་བོ། །རྒྱལ་པོ་གཟུགས་ཅན་སྙིང་པོའི་ཀུན་དུ་སྤྱོད་པ་ནི་གང་གི་ཚེ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་ལ་བབ་པ་དེའི་ཚེ་ན་བདག་ཉིད་ཀྱིས་ཉམས་སུ་མྱོང་བར་བྱེད་པའམ། ཡང་ན་གཞོན་ནུ་མ་སྐྱེས་དགྲ་གཏོང་བར་བྱེད་དོ། །ཅི་ཙམ་ དུས་གཞན་ཞིག་ན་རྒྱལ་པོ་གཟུགས་ཅན་སྙིང་པོ་ལ་བྱ་བ་ཆུང་ཞིག་བྱུང་ནས་དེས་གཞོན་ནུ་མ་སྐྱེས་དགྲ་ལ་སྨྲས་པ། བུ་སོང་ལ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་ཉམས་སུ་མྱོང་བར་གྱིས་ཤིག །བྲམ་ཟེ་གྲུ་འཛིན་གྱིས་རྒྱལ་པོ་གཟུགས་ཅན་སྙིང་པོས་

  36. 19a

    གཞོན་ནུ་མ་སྐྱེས་དགྲ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་ཉམས་སུ་མྱོང་བར་བྱེད་དུ་བཏང་བ། ཐོས་ནས་དེས་བསམས་པ། གཞོན་ནུ་མ་སྐྱེས་དགྲ་འདི་ཕ་འདས་ནས་རྒྱལ་པོར་འགྱུར་ལ། བྲམ་ཟེའི་ཁྱེའུ་པང་ནས་སྐྱེས་འདི་ ཡང་བདག་འདས་ནས་མདུན་ན་འདོན་དུ་འགྱུར་བས། དེ་བསྟེན་ན་དུས་སུ་འབྲས་བུ་སྟེར་བར་འགྱུར་རོ་སྙམ་ནས་དེས་བྲམ་ཟེའི་ཁྱེའུ་པང་ནས་སྐྱེས་ལ་སྨྲས་པ། བུ་སོང་ལ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་ཉམས་སུ་མྱོང་བར་གྱིས་ལ་དེ་ན་ སྟན་བཞི་པོ་རྒྱལ་པོའི་སྟན་དང་། མདུན་ན་འདོན་གྱི་སྟན་དང་། རྒོལ་བའི་སྟན་དང་། མཆོག་ཐོབ་པའི་སྟན་བཤམས་པ་ལས་ཁྱོད་ཀྱིས་རྒྱལ་པོའི་གདན་གཅིག་པུ་ཞོག་ལ་མདུན་ན་འདོན་གྱི་སྟན་ལ་འདུག་ཤིག །དེ་དེར་སོང་ནས་རྒྱལ་པོའི་སྟན་གཅིག་པུ་ བཞག་སྟེ་མདུན་ན་འདོན་གྱི་སྟན་ལ་འདུག་གོ། །བྲམ་ཟེ་སྐར་རྒྱལ་གྱིས་ཀྱང་རྒྱལ་པོ་གཟུགས་ཅན་སྙིང་པོས་གཞོན་ནུ་མ་སྐྱེས་དགྲ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་ཉམས་སུ་མྱོང་བར་བྱེད་དུ་བཏང་བ་ཐོས་ནས་དེས་ཀྱང་བྲམ་ཟེའི་ཁྱེའུ་ཉེ་རྒྱལ་ ལ་སྨྲས་པ། བུ་སོང་ལ་ཀླུའི་རྒྱལ་པོ་རི་བོ་དང་། ཡིད་འོང་གཉིས་ཀྱི་དུས་སྟོན་ཉམས་སུ་མྱོང་བར་གྱིས་ལ། དེ་ན་སྟན་བཞི་པོ་རྒྱལ་པོའི་གདན་དང་། མདུན་ན་འདོན་གྱི་སྟན་དང་། རྒོལ་བའི་སྟན་དང་། མཆོག་ཐོབ་པའི་སྟན་བཤམས་པ་ལས་ཁྱོད་ ཀྱིས་རྒྱལ་པོའི་གདན་དང་། མདུན་ན་འདོན་གྱི་སྟན་ཞོག་ལ་མཆོག་ཐོབ་པའི་སྟན་ལ་དབྱི་གུ་དང་རིལ་བ་ཞོག་སྟེ་རྒོལ་བའི་སྟན་ལ་འདུག་ཤིག །ཇི་ཙམ་ན་ཉི་མ་འཆར་བ་ནས་ཇི་ཙམ་ན་ནུབ་པར་འགྱུར་བ་དེའི་བར་དུ་ཁྱོད་དང་འདྲ་བའི་རྒོལ་བ་གཞན་མེད་དོ། །དེ་ཡང་ སོང་སྟེ་རྒྱལ་པོའི་སྟན་དང་། མདུན་ན་འདོན་གྱི་སྟན་བཞག་སྟེ། མཆོག་ཐོབ་པའི་སྟན་ལ་དབྱི་གུ་དང་རིལ་བ་བཞག་སྟེ་རྒོལ་བའི་སྟན་ལ་འདུག་གོ། །རོལ་མོའི་སྒྲ་དག་བྱུང་བ་ན་གར་མཁན་དག་གིས་ཏོ་ཊ་ཀའི་རྒྱུད་དུ་གླུ་བླངས་པ་དང་། མི་དག་གིས་བྲོ་བརྡུང་བ་དང་།

  37. 19b

    གླུ་བླང་བར་བརྩམས་པ་དང་བྲམ་ཟེའི་ཁྱེའུ་དེ་གཉིས་དབང་པོ་དག་ཕྱིར་བླན་ཏེ། འཁོད་པ་སྐྱེ་བོ་ཕལ་པོ་ཆེའི་ཚོགས་ཀྱིས་མཐོང་ནས་དེ་དག་གིས་སྨྲས་པ། བྲམ་ཟེའི་ཁྱེའུ་འདི་གཉིས་ཡང་ན་ནི་བླུན་པོ་གཉིས་ཤིག་གོ། །ཡང་ན་ནི་ཤེས་པས་མི་འཁྲུག་པ་གཉིས་ཤིག་གོ། ། རོལ་མོའི་སྒྲ་དག་ཞི་ཞིང་མི་དག་གིས་བྲོ་བརྡུང་ཞིང་གླུ་བླངས་ཏེ་དོང་བ་དང་། བྲམ་ཟེའི་ཁྱེའུ་པང་ནས་སྐྱེས་ཀྱིས་བྲམ་ཟེའི་ཁྱེའུ་ཉེ་རྒྱལ་ལ་སྨྲས་པ། ཇི་ལྟར་ཁྱོད་ལ་བྲོ་ལེགས་པར་བརྡུངས་པ་དང་། གླུ་ལེགས་པར་བླངས་པ་དང་། རོལ་མོའི་སྒྲ་ལེགས་པར་བསྒྲགས་ པར་སྣང་ངམ། དེས་སྨྲས་པ། གང་གིས་མཐོང་བའམ། ཐོས་པ་ལ་སྣང་ངོ་། །དེས་སྨྲས་པ། དབང་པོ་ནང་དུ་བསྡུས་པ་དག་གིས་མ་མཐོང་བ་ནི་བདེན་ན་ཇི་ལྟར་མ་ཐོས། དེས་ཚིགས་སུ་བཅད་པ་སྨྲས་པ། ཤི་ལྤགས་ཤི་བའི་རྒྱུས་པ་དང་། །འཆིར་འགྱུར་ བཞད་གད་འཇོ་སྒེག་གི། །འཆི་བའི་སྐྱེ་བོ་འདུས་པ་ལ། །མཁས་པ་སུ་ཞིག་བག་མེད་བྱེད། །དེས་སྨྲས་པ། ཁྱོད་ཉེ་རྒྱལ་ཡིན་ནམ། ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །བྲམ་ཟེའི་ཁྱེའུ་ཉེ་རྒྱལ་གྱིས་ཀྱང་བྲམ་ཟེའི་ཁྱེའུ་པང་ནས་སྐྱེས་ལ་སྨྲས་པ། ཇི་ལྟར་ ཁྱོད་ལ་ཡང་བྲོ་ལེགས་པར་བརྡུངས་པ་དང་། གླུ་ལེགས་པར་བླངས་པ་དང་། རོལ་མོའི་སྒྲ་ལེགས་པར་བསྒྲགས་པར་སྣང་ངམ། དེས་ཀྱང་སྨྲས་པ། གང་གིས་མཐོང་བའམ། ཐོས་པ་ལ་སྣང་ངོ་། །དེས་སྨྲས་པ། དབང་པོ་ནང་དུ་བསྡུས་པ་དག་གིས་མ་ མཐོང་བ་ནི་བདེན་ན་ཇི་ལྟར་མ་ཐོས། དེས་ཀྱང་ཚིགས་སུ་བཅད་པ་སྨྲས་པ། རྒྱན་རྣམས་ཐམས་ཅད་ཁུར་ཡིན་ཏེ། །གར་རྣམས་ཐམས་ཅད་མཐོ་འཚམ་པ། །གླུ་རྣམས་ཐམས་ཅད་ཀྱལ་བ་སྟེ། །གཟུགས་ཀུན་མི་རྟག་ཉིད་ཡིན་ནོ། །དེས་སྨྲས་པ། ཁྱོད་ པང་ནས་སྐྱེས་ཡིན་ནམ། ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །བྲམ་ཟེའི་ཁྱེའུ་ཉེ་རྒྱལ་གྱིས་བྲམ་ཟེའི་ཁྱེའུ་པང་ནས་སྐྱེས་ལ་སྨྲས་པ། ཚུར་ཤོག་བདག་ཅག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་། །དེས་སྨྲས་པ། བྲམ་ཟེའི་ཁྱེའུ་

  38. 20a

    གང་གི་དོན་དུ་མཆོད་སྦྱིན་སྦྱིན་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་མདུན་ན་འདོན་དེ་བདག་གི་ལག་མཐིལ་དུ་འོངས་ཤིང་གླང་པོ་ཆེས་འགྲོ་བའི་རིགས་སུ་སྐྱེས་ན་ཅིའི་ཕྱིར་རབ་ཏུ་འབྱུང་། དེས་ཚིགས་སུ་ བཅད་པ་སྨྲས་པ། ལྗོན་ཤིང་རྡིབ་པར་གྱུར་པའི་ཚེ། །ཡལ་ག་འདབ་མས་ཅི་ཞིག་བྱེད། །དེ་བཞིན་སྐྱེས་བུ་འཆི་བའི་ཚེ། །ཡོངས་སུ་བཟུང་བས་ཅི་ཞིག་བྱེད། །ཚུར་ཤོག་བདག་ཅག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ ངོ་། །དེས་སྨྲས་པ། ཇེ་ཕ་མ་ལ་དྲི་བར་བྱའོ། །བྲམ་ཟེའི་ཁྱེའུ་པང་ནས་སྐྱེས་ཕ་མ་གཉིས་ག་ལ་བ་དེར་སོང་སྟེ་ཕྱིན་ནས་སྨྲས་པ། ཡབ་ཡུམ་མཁྱེན་པར་མཛོད་ཅིག །བདག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་། །བུ་ གང་གི་དོན་དུ་མཆོད་སྦྱིན་སྦྱིན་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་མདུན་ན་འདོན་དེ་ཁྱོད་ཀྱི་ལག་མཐིལ་དུ་འོངས་ཤིང་གླང་པོ་ཆེས་འགྲོ་བའི་རིགས་སུ་སྐྱེས་ན་ཅིའི་ཕྱིར་རབ་ཏུ་འབྱུང་། དེས་ཚིགས་སུ་བཅད་པ་སྨྲས་པ། ནགས་ ན་ཤིང་ཤུན་རྩྭ་གྱོན་ཞིང་། །རྩ་བ་འབྲས་བུ་འཆའ་བ་དང་། །རི་དགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིགས་བྱེད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་བཅིང་དང་རྡེག་པ་དག ། བགྱིད་པ་དེ་ལྟ་མ་ལགས་སོ། །དེ་གཉིས་ཀྱིས་སྨྲས་པ། བུ་ཁྱོད་ངེད་ཀྱི་བུ་གཅིག་པ་སྡུག་པ། ཡིད་དུ་འོང་བ། བཟོད་པ། མཐོང་ན་མི་མཐུན་པ་མེད་པ་ཡིན་པས་ཁྱོད་ཤི་བར་གྱུར་ན་ངེད་མི་འདོད་བཞིན་དུ་འབྲལ་གྲང་། གསོན་བཞིན་དུ་གཏང་བ་ལྟ་སྨོས་ཀྱང་ཅི་དགོས། ཡབ་ཡུམ་གལ་ཏེ་གནང་ན་དེ་ལྟ་ན་ལེགས། གལ་ཏེ་མི་གནང་ན་དེང་སླན་ཆད་བདག་འཚལ་མ་ཡང་མི་འཚལ། ཕྱག་ལ་ཡང་མི་འཚལ་ལོ། །བུ་གཞོན་ནུ་མི་གནང་གིས་ཇི་སྲིད་ངེད་གསོན་གྱི་བར་དུ་ཁྱོད་ངེད་ཀྱི་མིག་ལམ་ན་འདུག་ལ་བྱ་བ་གཞན་མ་སེམས་ཤིག །དེ་

  39. 20b

    ནས་བྲམ་ཟེའི་ཁྱེའུ་པང་ནས་སྐྱེས་ཀྱིས་ཉི་མ་གཅིག་ཀྱང་ཟན་གཅད་པ་བྱས་སོ། །གཉིས་དང་། གསུམ་ནས་དྲུག་གི་བར་དུ་ཡང་ཟན་གཅད་པ་བྱས་སོ། །དེ་ནས་བྲམ་ཟེའི་ཁྱེའུ་པང་ནས་སྐྱེས་ཀྱི་ཕ་མ་གཉིས་བྲམ་ཟེའི་ཁྱེའུ་པང་ནས་སྐྱེས་ག་ལ་བ་དེར་དོང་སྟེ་ཕྱིན་ནས་ བྲམ་ཟེའི་ཁྱེའུ་པང་ནས་སྐྱེས་ལ་འདི་སྐད་ཅེས་སྨྲས་སོ། །བུ་གཞོན་ནུ་ཤེས་པར་གྱིས་ཤིག །ཁྱོད་ནི་ཤིན་ཏུ་གཞོན་པ་བདེ་བ་འདོད་པ་ཡིན་པས་ཁྱོད་ཀྱིས་སྡུག་བསྔལ་མི་ཤེས་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པ་བྱ་དཀའོ། །གཅིག་པུ་ཉིད་ལ་ མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ཏུ་གནས་པར་མནགས་པར་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་རྩེད་མོ་དག་ལས་དབེན་ པར་བྱ་དགོས་སོ། །བུ་གཞོན་ནུ་པང་ནས་སྐྱེས་ཚུར་ཤོག་འདི་ཉིད་དུ་འདུག་ལ་འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་བྱིན་ཅིག །བསོད་ནམས་དག་ཀྱང་གྱིས་ཤིག །དེ་སྐད་སྨྲས་ཀྱང་བྲམ་ཟེའི་ཁྱེའུ་པང་ནས་སྐྱེས་ཅང་མི་སྨྲའོ། །བྲམ་ཟེའི་ ཁྱེའུ་པང་ནས་སྐྱེས་ཀྱི་ཕ་མ་གཉིས་ཀྱིས་བྲམ་ཟེའི་ཁྱེའུ་པང་ནས་སྐྱེས་ལ་ལན་གཉིས་ལན་གསུམ་གྱི་བར་དུ་འདི་སྐད་ཅེས་སྨྲས་སོ། །བུ་གཞོན་ནུ་ཤེས་པར་གྱིས་ཤིག །ཁྱོད་ནི་ཤིན་ཏུ་གཞོན་པ་བདེ་བ་འདོད་པ་ཡིན་པས་ཁྱོད་ཀྱིས་སྡུག་བསྔལ་མི་ཤེས་ཏེ། ཚངས་ པར་སྤྱོད་པ་སྤྱད་དཀའོ། །རབ་ཏུ་དབེན་པ་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །

  40. 21a

    ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་། ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་ བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་རྩེད་མོ་དག་ལས་དབེན་པར་བྱ་དགོས་སོ། །བུ་གཞོན་ནུ་པང་ནས་སྐྱེས་ཚུར་ཤོག་ཁྱོད་འདི་ཉིད་དུ་འདུག་ལ་འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་བྱིན་ཅིག །བསོད་ནམས་ དག་ཀྱང་གྱིས་ཤིག །དེ་སྐད་ལན་གཉིས་ལན་གསུམ་གྱི་བར་དུ་སྨྲས་ཀྱང་བྲམ་ཟེའི་ཁྱེའུ་པང་ནས་སྐྱེས་ཅང་མི་སྨྲའོ། །དེ་ནས་བྲམ་ཟེའི་ཁྱེའུ་པང་ནས་སྐྱེས་ཀྱི་ཕ་མ་གཉིས་ཀྱིས་བྲམ་ཟེའི་ཁྱེའུ་པང་ནས་སྐྱེས་ཀྱི་ཉེ་དུ་རྣམས་ལ་བསྒོ་བ། ཀྱེ་ཉེ་དུ་དག་ཚུར་ཤོག་བུ་ གཞོན་ནུ་པང་ནས་སྐྱེས་སློང་ཤིག །དེ་ནས་བྲམ་ཟེའི་ཁྱེའུ་པང་ནས་སྐྱེས་ཀྱི་ཉེ་དུ་དག་བྲམ་ཟེའི་ཁྱེའུ་པང་ནས་སྐྱེས་ག་ལ་བ་དེར་དོང་སྟེ་ཕྱིན་ནས་བྲམ་ཟེའི་ཁྱེའུ་པང་ནས་སྐྱེས་ལ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་ བདེ་བ་བཞེད་པ་ལགས་པས་ཁྱོད་ཀྱིས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པ་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ཏུ་ གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་། ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་པང་ནས་སྐྱེས་ཚུར་སྤྱོན་ཁྱོད་འདི་ཉིད་དུ་བཞུགས་ལ་འདོད་

  41. 21b

    པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་མཛོད་ཅིག །དེ་སྐད་སྨྲས་ཀྱང་བྲམ་ཟེའི་ཁྱེའུ་པང་ནས་སྐྱེས་ཅང་མི་སྨྲའོ། །བྲམ་ཟེའི་ཁྱེའུ་པང་ནས་སྐྱེས་ཀྱི་ཉེ་དུ་དག་གིས་བྲམ་ཟེའི་ཁྱེའུ་པང་ནས་སྐྱེས་ལ་ལན་གཉིས་ལན་ གསུམ་གྱི་བར་དུ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པ་ལགས་པས་ཁྱོད་ཀྱིས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་། རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་པང་ནས་སྐྱེས་ཚུར་སྤྱོན་ཁྱོད་འདི་ཉིད་དུ་བཞུགས་ལ་འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་མཛོད་ཅིག །དེ་སྐད་ལན་གཉིས་ལན་གསུམ་ གྱི་བར་དུ་སྨྲས་ཀྱང་བྲམ་ཟེའི་ཁྱེའུ་པང་ནས་སྐྱེས་ཅང་མི་སྨྲའོ། །དེ་ནས་བྲམ་ཟེའི་ཁྱེའུ་པང་ནས་སྐྱེས་ཀྱི་ཕ་མ་གཉིས་ཀྱིས་བྲམ་ཟེའི་ཁྱེའུ་པང་ནས་སྐྱེས་ཀྱི་ནེའུ་ལྡངས་རྣམས་ལ་བསྒོ་བ། ཀྱེ་གཞོན་ནུ་དག་ཚུར་ཤེག་བུ་གཞོན་ནུ་པང་ནས་སྐྱེས་སློང་ཤིག །དེ་ནས་བྲམ་ ཟེའི་ཁྱེའུ་པང་ནས་སྐྱེས་ཀྱི་ནེའུ་ལྡངས་དག་བྲམ་ཟེའི་ཁྱེའུ་པང་ནས་སྐྱེས་ག་ལ་བ་དེར་དོང་སྟེ་ཕྱིན་ནས་བྲམ་ཟེའི་ཁྱེའུ་པང་ནས་སྐྱེས་ལ་འདི་སྐད་ཅེས་སྨྲས་སོ། །སྲས་ཞི་བ་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པ་ལགས་པས་ཁྱོད་ཀྱིས་སྡུག་

  42. 22a

    བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། ། གཅིག་པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་ དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་པང་ནས་སྐྱེས་ཚུར་སྤྱོན་ཁྱོད་འདི་ཉིད་དུ་བཞུགས་ལ་འདོད་པ་དག་ལ་ཡང་ཡོངས་སུ་སྤྱོད་ཅིག ། སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་མཛོད་ཅིག །དེ་སྐད་སྨྲས་ཀྱང་བྲམ་ཟེའི་ཁྱེའུ་པང་ནས་སྐྱེས་ཅང་མི་སྨྲའོ། །བྲམ་ཟེའི་ཁྱེའུ་པང་ནས་སྐྱེས་ཀྱི་ནེའུ་ལྡངས་རྣམས་ཀྱིས་བྲམ་ཟེའི་ཁྱེའུ་པང་ནས་སྐྱེས་ལ་ལན་གཉིས་ལན་གསུམ་གྱི་བར་དུ་འདི་སྐད་ཅེས་ སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པ་ལགས་པས་ཁྱོད་ཀྱིས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་ མལ་དགོན་པ་ནགས་ཁྲོད་དང་། རི་དྲུང་དང་། བས་མཐའ་དག་ཏུ་གནས་པ་ཁོང་དུ་ཆུད་པར་དཀའོ། །གཅིག་པུ་དགོན་པར་གནས་པ་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་ སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་པང་

  43. 22b

    ནས་སྐྱེས་ཚུར་སྤྱོན་ཁྱོད་འདི་ཉིད་དུ་བཞུགས་ལ་འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་མཛོད་ཅིག །དེ་སྐད་ལན་གཉིས་ལན་གསུམ་གྱི་བར་དུ་སྨྲས་ཀྱང་བྲམ་ཟེའི་ཁྱེའུ་པང་ནས་སྐྱེས་ཅང་མི་སྨྲའོ། །དེ་ནས་བྲམ་ཟེའི་ ཁྱེའུ་པང་ནས་སྐྱེས་ཀྱི་ནེའུ་ལྡངས་རྣམས་བྲམ་ཟེའི་ཁྱེའུ་པང་ནས་སྐྱེས་ཀྱི་ཕ་མ་གཉིས་ག་ལ་བ་དེར་དོང་སྟེ་ཕྱིན་ནས་བྲམ་ཟེའི་ཁྱེའུ་པང་ནས་སྐྱེས་ཀྱི་ཕ་མ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་དག་མཁྱེན་པར་མཛོད་ཅིག །ཞི་བ་གཞོན་ནུ་པང་ནས་སྐྱེས་གུམ་ པས་ཅི་ཞིག་བགྱི་རབ་ཏུ་འབྱུང་བ་ནི་མཁས་པས་བསྔགས་པ་ལགས་པས་གལ་ཏེ་རབ་ཏུ་བྱུང་ནས་མངོན་པར་དགའ་བར་གྱུར་ན་ཡང་དེ་གསོན་པོ་ཉིད་དུ་གཟིགས་པར་འགྱུར་ལ། མངོན་པར་དགའ་བར་མ་གྱུར་ན་ཡང་དྲང་སྲོང་དག་ནི་སླར་ལྡོག་པ་ལགས་པས་བུའི་གནས་ཕ་ མ་གཉིས་ལས་མ་གཏོགས་པ་གཞན་སུ་ཞིག་མཆིས་པར་འགྱུར་གྱིས་རབ་ཏུ་བྱུང་ན་ལེགས་སོ། །དེ་ནས་བྲམ་ཟེའི་ཁྱེའུ་པང་ནས་སྐྱེས་ཀྱི་ཕ་མ་གཉིས་ཀྱིས་བྲམ་ཟེའི་ཁྱེའུ་པང་ནས་སྐྱེས་ལ་འདི་སྐད་ཅེས་སྨྲས་སོ། །བུ་གཞོན་ནུ་པང་ནས་སྐྱེས་ཁྱོད་ལ་རབ་ཏུ་འབྱུང་བ་ ལེགས་པ་བྱེད་པ་ཡིན་ལ། ཁྱིམ་ན་གནས་པ་ལེགས་པ་བྱེད་པ་མ་ཡིན་ནམ། ཡབ་ཡུམ་བདག་ལ་རབ་ཏུ་འབྱུང་བ་ལེགས་པ་བགྱིད་པ་ལགས་ལ། ཁྱིམ་ན་གནས་པ་ལེགས་པ་བགྱིད་པ་མ་ལགས་སོ། །བུ་གཞོན་ནུ་པང་ནས་སྐྱེས་འོ་ན་ད་དེའི་དུས་ལ་བབ་པར་ ཤེས་པར་གྱིས་ཤིག །དེ་ནས་བྲམ་ཟེའི་ཁྱེའུ་པང་ནས་སྐྱེས་ཕ་མ་གཉིས་ཀྱིས་གནང་ནས་འབྲས་ཁུའི་རིམ་གྱིས་ལུས་ཀྱི་མཐུ་དང་། སྟོབས་དང་། བརྩོན་འགྲུས་བསྐྱེད་དེ། གྲོང་ཤིང་ཐགས་ཅན་ནས་ཕྱིར་བྱུང་ནས། གྲོང་ན་ལ་དག་ལ་བ་དེར་འཕགས་སོ། ། བྲམ་ཟེའི་ཁྱེའུ་ཉེ་རྒྱལ་དབེན་པ་ལ་དགའ་བས་གནས་མལ་དགོན་པར་སོང་སྟེ། བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུག་གོ། །བྲམ་ཟེའི་ཁྱེའུ་པང་ནས་སྐྱེས་མཐར་གྱིས་གྲོང་ན་ལ་དར་ཕྱིན་ནས་བྲམ་ཟེའི་ཁྱེའུ་ཉེ་རྒྱལ་གྱི་ཕ་མ་གཉིས་ལ་སྨྲས་

  44. 23a

    པ། ཡབ་ཡུམ་བྲམ་ཟེའི་ཁྱེའུ་ཉེ་རྒྱལ་གར་མཆིས། དེ་གཉིས་ཀྱིས་སྨྲས་པ། བྲམ་ཟེའི་ཁྱེའུ་ཉེ་རྒྱལ་དབེན་པ་ལ་དགའ་བས་གནས་མལ་དགོན་པར་སོང་སྟེ། བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུག་གོ། ། བྲམ་ཟེའི་ཁྱེའུ་པང་ནས་སྐྱེས་བྲམ་ཟེའི་ཁྱེའུ་ཉེ་རྒྱལ་ག་ལ་བ་དེར་སོང་སྟེ་ཕྱིན་ནས་སྨྲས་པ། ཉེ་རྒྱལ་ཚུར་ཤོག་བདག་ཅག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་། །དེས་སྨྲས་པ། ཁྱོད་ཕ་མ་གཉིས་ཀྱིས་གནང་ངམ། གནང་ངོ་། ། དེས་སྨྲས་པ། བྲམ་ཟེའི་ཁྱེའུ་ཁོ་བོས་ཕ་མ་གཉིས་ལ་དྲིས་ཏེ་འོང་གི་བར་དུ་རེ་ཞིག་སྡོད་ཅིག །དེས་སྨྲས་པ། ཉེ་རྒྱལ་ཁོ་བོ་ནི་དུས་དེ་སྲིད་ཀྱིས་ཕ་མས་གནང་ན་ཁྱོད་ད་ཇི་སྲིད་ཀྱིས་གནང་བར་འགྱུར། དེས་སྨྲས་པ། བྲམ་ཟེའི་ཁྱེའུ་ཁོ་བོ་ད་ཁོ་ན་གནང་བར་ བྱས་ཏེ་འོང་ངོ་། །དེ་ནས་བྲམ་ཟེའི་ཁྱེའུ་ཉེ་རྒྱལ་ཕ་མ་གཉིས་ག་ལ་བ་དེར་སོང་སྟེ་ཕྱིན་ནས་ཕ་མ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་མཁྱེན་པར་མཛོད་ཅིག །བདག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་། །དེ་གཉིས་ ཀྱིས་སྨྲས་པ། བུ་ཁྱོད་ལ་རབ་ཏུ་འབྱུང་བ་ལེགས་པ་བྱེད་པ་ཡིན་ནམ། ཡབ་ཡུམ་བདག་ལ་རབ་ཏུ་འབྱུང་བ་ལེགས་པ་བགྱིད་པ་ལགས་སོ། །བུ་འོ་ན་སོང་ལ་རབ་ཏུ་བྱུང་ཤིག །དེ་ནས་བྲམ་ཟེའི་ཁྱེའུ་ཉེ་རྒྱལ་བྲམ་ཟེའི་ཁྱེའུ་པང་ནས་སྐྱེས་ཀྱི་གན་དུ་སོང་སྟེ་སྨྲས་ པ། པང་ནས་སྐྱེས་ཚུར་ཤོག་བདག་ཅག་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་། །དེས་སྨྲས་པ། བྲམ་ཟེའི་ཁྱེའུ་ཁྱོད་ཕ་མ་གཉིས་ཀྱིས་གནང་ངམ། གནང་ངོ་། །ཉེ་རྒྱལ་ཁོ་བོ་ནི་དུས་དེ་སྲིད་ཀྱིས་ཕ་མ་གཉིས་ཀྱིས་གནང་ན་ཁྱོད་ཕ་མ་ གཉིས་ཀྱིས་མྱུར་དུ་གནང་བའི་སྦྱོར་བ་གང་ཡིན། འདི་ལྟར་ཁྱོད་ནི་འཆིང་བ་དམ་པ་དང་། འཆིང་བ་བརྟན་པ་དང་། འཆིང་བ་མ་རུལ་བ་དང་། གགས་ཤིང་སྦོམ་པ་ཡིན་གྱི། ཁོ་བོ་ནི་འཆིང་བ་སྟོབས་མེད་པ་དང་། འཆིང་བ་སྟོབས་ཆུང་བ་དང་། འཆིང་བ་རུལ་

  45. 23b

    བ་དང་། གགས་ཤིང་ཕྲ་བ་ཡིན་ནོ། །འདི་ལྟར་ཚེ་དང་ལྡན་པ་ཤཱ་རིའི་བུ་ནི་ཚེ་རབས་ལྔ་བརྒྱར་རབ་ཏུ་བྱུང་བར་གྱུར་ཅིང་འདི་ལྟར་ཚེ་དང་ལྡན་པ་ཤཱ་རིའི་བུས་སྨོན་ལམ་འདི་སྐད་ཅེས། ཧ་ཅང་ཕྱུག་པའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་ སྐྱེ་འགྱུར་ཞིང་། །རྟག་ཏུ་རབ་བྱུང་མང་བར་ཤོག །ཅེས་བཏབ་པའི་ཕྱིར་རོ། །བྲམ་ཟེའི་ཁྱེའུ་པང་ནས་སྐྱེས་ཀྱིས་བྲམ་ཟེའི་ཁྱེའུ་ཉེ་རྒྱལ་ལ་སྨྲས་པ། བྲམ་ཟེའི་ཁྱེའུ་བདག་ཅག་ནི་བྲམ་ཟེ་རབ་ཏུ་གྲགས་པ་དག་ཡིན་པས་བདག་ཅག་གང་ཡང་རུང་བ་རབ་ཏུ་འབྱུང་བར་ མི་ནུས་ཀྱིས། འདི་ལྟར་ལེགས་པར་བརྟག་པར་བྱ་སྟེ་རབ་ཏུ་འབྱུང་བར་བྱའོ་ཞེས་དེ་གཉིས་མཐར་གྱིས་རྒྱལ་པོའི་ཁབ་ཏུ་ཕྱིན་ཏོ། །དེའི་ཚེ་ན་རྫོགས་བྱེད་ལ་སོགས་པ་སྟོན་པ་དྲུག་པོ་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་མངོན་པའི་ང་རྒྱལ་ཅན་ འདི་ལྟ་སྟེ། འདྲོབ་སྐྱོང་གི་བུ་རྫོགས་བྱེད་དང་། གནག་ལྷས་ཀྱི་བུ་ཀུན་དུ་རྒྱུ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་། གཉེན་གྱི་བུ་གཅེར་བུ་དག་རྒྱལ་པོའི་ཁབ་ན་ཉེ་བར་རྟེན་ཅིང་གནས་སོ། ། དེ་ནས་བྲམ་ཟེའི་ཁྱེའུ་ཉེ་རྒྱལ་དང་། པང་ནས་སྐྱེས་གཉིས་འདྲོབ་སྐྱོང་གི་བུ་རྫོགས་བྱེད་ག་ལ་བ་དེར་དོང་སྟེ་ཕྱིན་ནས་འདྲོབ་སྐྱོང་གི་བུ་རྫོགས་བྱེད་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། རྫོགས་བྱེད་ཀྱིས་སྨྲས་པ། བྲམ་ཟེའི་ཁྱེའུ་དག་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་ སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་སྤྱད་པའི་ལས་རྣམས་ཀྱི་འབྲས་བུ་དང་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་རྫུས་ཏེ་སྐྱེ་བ་མེད་དོ། །འཇིག་རྟེན་ན་དགྲ་བཅོམ་པ་

  46. 24a

    ཡང་དག་པར་སོང་བ་ཡང་དག་པར་ཞུགས་པ་གང་དག་ཚེ་འདི་ཉིད་ལ་རང་གི་མངོན་པར་ཤེས་པས་འཇིག་རྟེན་འདི་དང་འཇིག་རྟེན་ཕ་རོལ་མངོན་སུམ་དུ་བྱས་ནས་བསྒྲུབས་ཏེ་བདག་ཅག་ནི་སྐྱེ་བ་ཟད་དོ། །ཚངས་པར་སྤྱད་པ་བསྟེན་ཏོ། །བྱ་བ་བྱས་སོ། ། སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་པ་དག་མེད་དོ། །སྲོག་ནི་འདི་ཉིད་ལ་འཚོ་ཞིང་དེ་ཕྱིས་ཆད་པར་འགྱུར། ཞིག་པར་འགྱུར་ཏེ་ཤི་བའི་འོག་ཏུ་མི་འབྱུང་ངོ་། །སྐྱེས་བུའི་ལུས་ནི་འབྱུང་བ་ཆེན་པོ་བཞི་ལས་གྱུར་པ་ཡིན་ཏེ། དེ་ནི་གང་གི་ཚེ་དུས་ བྱེད་པ་ན་དེའི་སའི་ལུས་ནི་སའི་བག་ལ་ཞ། ཆུའི་ལུས་ནི་ཆུའི། མེའི་ལུས་ནི་མེའི། རླུང་གི་ལུས་ནི་རླུང་གི་བག་ལ་ཞ་བར་འགྱུར་རོ། །དབང་པོ་རྣམས་ནི་ནམ་མཁའི་རྗེས་སུ་འགྲོ་བར་འགྱུར་རོ། །སྐྱེས་བུའི་རོ་ནི་ཁྲི་དང་ལྔའི་མི་དག་གིས་ཁྱེར་ཏེ་དུར་ཁྲོད་དུ་ འགྲོ་ཞིང་བསྲེགས་ཕན་ཆད་མི་མངོན་པར་འགྱུར་རོ། །བསྲེག་བྱ་དག་ནི་ཐལ་བར་འགྱུར་རོ། །རུས་པ་དག་ནི་ཐི་བའི་མདོག་འདྲ་བར་གནས་སོ། །འདི་ལྟར་རྨོངས་པས་ཉེ་བར་བསྟེན་པ་ནི་སྦྱིན་ལ། མཁས་པས་ཉེ་བར་བསྟེན་པ་ནི་ལེན་ཏོ། །དེ་ལ་གང་དག་ཡོད་ པར་སྨྲ་བ་དེ་དག་ཐམས་ཅད་ནི་གསོབ་གསོག་བརྫུན་དུ་གདོལ་པ་དག་ཡིན་ནོ། །འདི་ལྟར་བྱིས་པ་དང་མཁས་པ་དེ་གཉིས་ནི་ཕྱིས་ཆད་པར་འགྱུར། ཞིག་པར་འགྱུར་ཏེ་ཤི་བའི་འོག་ཏུ་མི་འབྱུང་ངོ་། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་། པང་ནས་སྐྱེས་གཉིས་འདི་སྙམ་ དུ་སེམས་ཏེ། སྟོན་པ་ཤེས་ལྡན་འདི་ནི་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་ པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་ནི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་དོང་ངོ་། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་གནག་ལྷས་ཀྱི་བུ་ཀུན་དུ་རྒྱུ་ག་ལ་བ་དེར་

  47. 24b

    དོང་སྟེ་ཕྱིན་ནས་གནག་ལྷས་ཀྱི་བུ་ཀུན་དུ་རྒྱུ་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ཀུན་དུ་རྒྱུས་སྨྲས་པ། བྲམ་ཟེའི་ཁྱེའུ་ དག་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སེམས་ཅན་རྣམས་ཀུན་ནས་ཉོན་མོངས་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཀུན་ནས་ཉོན་མོངས་པར་འགྱུར་རོ། །སེམས་ཅན་རྣམས་རྣམ་པར་དག་པར་འགྱུར་བ་ལ་རྒྱུ་མེད་ རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་རྣམ་པར་དག་པར་འགྱུར་རོ། །སེམས་ཅན་རྣམས་ཤེས་པ་མེད་པར་འགྱུར་བ་དང་། མཐོང་བ་མེད་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་མེད་པ་དང་། མཐོང་ བ་མེད་པར་འགྱུར་རོ། །སེམས་ཅན་རྣམས་ཤེས་པར་འགྱུར་བ་དང་། མཐོང་བར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་དང་། མཐོང་བར་འགྱུར་རོ། །སྟོབས་མེད་དོ། །བརྩོན་འགྲུས་མེད་དོ། །སྟོབས་དང་བརྩོན་ འགྲུས་མེད་དོ། །སྐྱེས་བུའི་རྩལ་མེད་དོ། །ཕ་རོལ་གནོན་པ་མེད་དོ། །སྐྱེས་བུའི་རྩལ་དང་ཕ་རོལ་གནོན་པ་མེད་དོ། །བདག་གི་རྩལ་མེད་དོ། །གཞན་གྱི་རྩལ་མེད་དོ། །བདག་གི་རྩལ་དང་གཞན་གྱི་རྩལ་མེད་དོ། །སེམས་ཅན་ཐམས་ཅད་དང་། སྲོག་ཐམས་ ཅད་དང་། འབྱུང་པོ་ཐམས་ཅད་མཐུ་མེད། སྟོབས་མེད་དོ། །དབང་མེད་དོ། །བརྩོན་འགྲུས་མེད་དོ། །ཕ་རོལ་གནོན་པ་མེད་དོ། །འགྲོ་བ་མཚམས་སྦྱོར་བའི་སྲིད་པ་དག་ངེས་པར་གྱུར་ཏོ། །འདི་ལྟར་འགྲོ་བ་དྲུག་པོ་དག་ཏུ་བདེ་བ་དང་སྡུག་བསྔལ་སོ་སོར་མྱོང་ བར་འགྱུར་རོ། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་། པང་ནས་སྐྱེས་གཉིས་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་

  48. 25a

    རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་ནི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་ དུ་བརྡབས་ཏེ་དོང་ངོ་།། །།འདུལ་བ་གཞི། བམ་པོ་གསུམ་པ། དེ་ནས་བྲམ་ཟེའི་ཁྱེའུ་ཉེ་རྒྱལ་དང་། པང་ནས་སྐྱེས་གཉིས་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ག་ལ་བ་དེར་དོང་སྟེ་ཕྱིན་ནས་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལ་འདི་ སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ཡང་དག་རྒྱལ་བ་ཅན་གྱིས་སྨྲས་པ། བྲམ་ཟེའི་ཁྱེའུ་དག་ཁོ་བོ་ནི་འདི་ལྟར་ ལྟ་ཞིང་འདི་སྐད་སྨྲ་སྟེ། བྱེད་པ་དང་བྱེད་དུ་འཇུག་པ་དང་། གཅོད་པ་དང་གཅོད་དུ་འཇུག་པ་དང་། སྲེག་པ་དང་སྲེག་ཏུ་འཇུག་པ་དང་། རྡེག་པ་དང་རྡེག་ཏུ་འཇུག་པ་དང་། སྲོག་ཆགས་ལ་འཚེ་བ་དང་། མ་བྱིན་པར་ལེན་པ་དང་། འདོད་པ་དག་ལ་ལོག་པར་སྤྱོད་ པ་དང་། ཤེས་བཞིན་དུ་བརྫུན་སྨྲ་བ་དང་། མྱོས་པར་འགྱུར་བའི་བཏུང་བ་འཐུང་བ་དང་། ཁྱིམ་འབིགས་པ་དང་། མདུད་པ་དགྲོལ་བ་དང་། རིལ་གྱིས་འཕྲོག་པ་དང་། ལམ་འགོག་ཅིང་འདུག་པ་དང་། གྲོང་འཇོམས་པར་བྱེད་པ་དང་། གྲོང་ཁྱེར་འཇོམས་ པར་བྱེད་པ་དང་། ཡུལ་འཇོམས་པར་བྱེད་པ་དང་། ས་གཞི་ཆེན་པོ་འདི་ལ་སེམས་ཅན་གང་དག་ཡོད་པ་དེ་དག་ཐམས་ཅད་འཁོར་ལོའི་མཐའ་སྤུ་གྲི་ལས་བྱས་པས་ཀུན་དུ་གཅོད་པར་བྱེད། ཀུན་དུ་གཤེག་པར་བྱེད། ཀུན་དུ་རྡུང་བར་བྱེད། ཀུན་དུ་འདྲལ་བར་བྱེད་ ཅིང་སེམས་ཅན་དེ་དག་ཐམས་ཅད་ཀུན་དུ་བཅད། ཀུན་དུ་གཤེགས། ཀུན་དུ་བརྡུངས། ཀུན་དུ་དྲལ་ནས་ཤའི་ཐང་མ་གཅིག་ཏུ་བྱེད། ཤའི་ཚོམས་གཅིག་ཏུ་བྱེད། ཤའི་བུངས་གཅིག་ཏུ་བྱེད། ཤའི་ཕུང་པོ་གཅིག་ཏུ་བྱེད་ཅིང་ཤའི་ཐང་མ་གཅིག་ཏུ་

  49. 25b

    བྱས། ཤའི་ཚོམས་གཅིག་ཏུ་བྱས། ཤའི་བུངས་གཅིག་ཏུ་བྱས། ཤའི་ཕུང་པོ་གཅིག་ཏུ་བྱས་ནས་དེ་ལྟར་ཀུན་དུ་སྒྲུབ་པར་བྱེད་པ་ལ་གཞི་དེ་ལས་སྡིག་པ་ཡང་མེད། གཞི་དེ་ལས་སྡིག་པར་འགྱུར་བ་ཡང་མེད་དོ། །ཆུ་ཀླུང་གང་གཱའི་ལྷོ་ནས་ཀུན་དུ་གཅོད་པར་ བྱེད། ཀུན་དུ་གཤེག་པར་བྱེད། ཀུན་དུ་རྡུང་བར་བྱེད། ཀུན་དུ་འདྲལ་བར་བྱེད་ཅིང་འགྲོ་ལ། ཆུ་ཀླུང་གང་གཱའི་བྱང་ནས་སྦྱིན་པ་བྱེད། མཆོད་སྦྱིན་བྱེད་ཅིང་འགྲོ་བར་གྱུར་ན། གཞི་དེ་ལས་སྡིག་པ་དང་བསོད་ནམས་ཀྱང་མེད། གཞི་དེ་ལས་སྡིག་པ་དང་བསོད་ ནམས་སུ་འགྱུར་བ་ཡང་མེད་དོ། །སྦྱིན་པ་དང་། དུལ་བ་དང་། ཡང་དག་པར་སྡོམ་པ་དང་། དོན་སྤྱོད་པ་དང་། དོན་མཐུན་པས་དེ་ལྟར་བྱེད་པ་ཡང་བསོད་ནམས་མི་བྱེད་པ་ཁོ་ན་ཡིན་ནོ། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་འདི་སྙམ་དུ་ སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ཡང་དག་པར་སྒྲུབ་པ་ཡིན་ཏེ། འཇིགས་པ་དང་བཅས་པའི་ལམ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་དོང་ངོ་། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་མི་ཕམ་སྐྲའི་ལ་བ་ ཅན་ག་ལ་བ་དེར་དོང་སྟེ་ཕྱིན་ནས་མི་ཕམ་སྐྲའི་ལ་བ་ཅན་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། མི་ཕམ་གྱིས་སྨྲས་པ། བྲམ་ཟེའི་ཁྱེའུ་དག་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། ལུས་བདུན་པོ་འདི་དག་ནི་མ་བྱས་པ། བྱས་པས་མ་བྱས་པ། མ་སྤྲུལ་པ། སྤྲུལ་པས་མ་བྱས་པ། གནོད་པར་བྱ་བ་མ་ཡིན་པ། ཐེར་ཟུག་ཏུ་གནས་པ། ཀ་བ་བཞིན་དུ་གནས་པ་དག་ཡིན་ཏེ།

  50. 26a

    བདུན་གང་ཞེ་ན། འདི་ལྟ་སྟེ་སའི་ལུས་དང་། ཆུའི་ལུས་དང་། མེའི་ལུས་དང་། རླུང་གི་ལུས་དང་། བདེ་བ་དང་། སྡུག་བསྔལ་བ་དང་། སྲོག་གསོན་པ་ཉིད་ནི་བདུན་པ་སྟེ། ལུས་བདུན་པོ་དེ་དག་ནི་མ་བྱས་པ། བྱས་པས་མ་བྱས་པ། མ་ སྤྲུལ་པ། སྤྲུལ་པས་མ་བྱས་པ། གནོད་པར་བྱ་བ་མ་ཡིན་པ། ཐེར་ཟུག་ཏུ་གནས་པ། ཀ་བ་བཞིན་དུ་གནས་པ་དག་ཡིན་ནོ། །དེ་དག་ནི་འདི་ལྟ་སྟེ། བསོད་ནམས་སུ་འགྱུར་བའི་ཕྱིར་རམ། སྡིག་པར་འགྱུར་བའི་ཕྱིར་རམ། བསོད་ནམས་དང་སྡིག་པར་ འགྱུར་བའི་ཕྱིར་རམ། བདེ་བར་འགྱུར་བའི་ཕྱིར་རམ། སྡུག་བསྔལ་བར་འགྱུར་བའི་ཕྱིར་རམ། བདེ་བ་དང་། སྡུག་བསྔལ་བར་འགྱུར་བའི་ཕྱིར་གཡོ་བར་མི་བྱེད། རྣམ་པར་འགྱུར་བར་མི་བྱེད། གཅིག་ལ་གཅིག་གནོད་པར་མི་བྱེད་དོ། །སྐྱེས་བུ་གང་ གིས་སྐྱེས་བུའི་མགོ་གཅོད་པར་བྱེད་པ་དེས་ཀྱང་འཇིག་རྟེན་ན་གཡོ་བའམ། གནས་པ་ལ་གནོད་པ་ཆུང་ཟད་ཀྱང་མི་བྱེད་དེ། ལུས་བདུན་པོ་དག་ལ་བར་མེད་པར་མཚོན་ཐལ་བྱུང་དུ་འགྲོ་ཞིང་དེར་སྲོག་ལ་གནོད་པའང་མེད་དོ། །དེ་ལ་གསོད་པར་བྱེད་པའམ། གསོད་དུ་བཅུག་པའམ། སྐུལ་བར་བྱེད་པའམ། སྐུལ་དུ་བཅུག་པའམ། དྲན་པར་བྱེད་པའམ། དྲན་པར་བྱེད་དུ་བཅུག་པའམ། རྣམ་པར་རིག་པར་བྱེད་པའམ། རྣམ་པར་རིག་པར་བྱེད་དུ་བཅུག་པ་འགའ་ཡང་མེད་དོ། །བྱིས་པའམ་མཁས་པ་གང་ དག་ཡིན་པ་དག་ནི་སྐྱེ་གནས་གཙོ་བོ་དང་ལྡན་པ་ཁྲི་བཞི་སྟོང་དང་། རྟོག་པ་ཆེན་པོ་དྲུག་ཁྲི་དང་དྲུག་བརྒྱ་དང་། ལས་ལྔ་དང་། ལས་གསུམ་དང་། ལས་གཉིས་དང་ལས་དང་། ལས་ཕྱེད་དང་། ལམ་དྲུག་བཅུ་རྩ་གཉིས་དང་། རྟོག་པ་བར་མ་དྲུག་བཅུ་ རྩ་གཉིས་དང་། སེམས་ཅན་དམྱལ་བ་སུམ་བཅུ་རྩ་དྲུག་དང་། དབང་པོ་བརྒྱ་ཉི་ཤུ་དང་། རྡུལ་གྱི་ཁམས་དྲུག་བཅུ་རྩ་གཉིས་དང་། ཀླུའི་རིགས་བཞི་ཁྲི་དགུ་སྟོང་དང་། ནམ་མཁའ་ལྡིང་གི་རིགས་བཞི་ཁྲི་དགུ་སྟོང་དང་། ཀུན་དུ་རྒྱུའི་རིགས་བཞི་ཁྲི་

  51. 26b

    དགུ་སྟོང་དང་། ཀུན་དུ་འཚོའི་རིགས་བཞི་ཁྲི་དགུ་སྟོང་དང་། གཅེར་བུ་པའི་རིགས་བཞི་ཁྲི་དགུ་སྟོང་དང་། འདུ་ཤེས་ཅན་གྱི་གནས་བདུན་དང་། འདུ་ཤེས་མེད་པའི་གནས་བདུན་དང་། གཅེར་བུ་པའི་གནས་བདུན་དང་། ལྷ་མ་ཡིན་བདུན་དང་། ཤ་ཟ་བདུན་ དང་། ལྷ་བདུན་དང་། མི་བདུན་དང་། མཚོ་ཆེན་པོ་བདུན་དང་། མཚོ་བདུན་བརྒྱ་དང་། རྨི་ལམ་ཆེན་པོ་བདུན་དང་། རྨི་ལམ་བདུན་བརྒྱ་དང་། འབྲི་བ་ཆེན་པོ་བདུན་དང་། འབྲི་བ་བདུན་བརྒྱ་དང་། འཕེལ་བ་ཆེན་པོ་བདུན་དང་། འཕེལ་བ་བདུན་བརྒྱ་དང་། སད་པ་ཆེན་པོ་བདུན་དང་། སད་པ་བདུན་བརྒྱ་དང་། གཡང་ས་ཆེན་པོ་བདུན་དང་། གཡང་ས་བདུན་བརྒྱ་དང་། རིགས་བཙུན་པ་དྲུག་དང་། མངོན་པར་མཐོ་བ་བཅུ་དང་། སྐྱེས་བུ་ཆེན་པོའི་ས་བརྒྱད་པོ་དེ་དག་ཏུ་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་ སྦྱར་ཅིང་འཁོར་ནས་སྡུག་བསྔལ་མཐར་བྱེད་དོ། །འདི་ལྟ་སྟེ། དཔེར་ན་སྐུད་པའི་དྲུ་བུ་ཡང་བ་སྟེང་གི་ནམ་མཁའ་ལས་འཕངས་པ་གཟངས་པ་ནས་ལ་འབབ་པ་དེ་བཞིན་དུ་བྱིས་པའམ་མཁས་པ་གང་དག་ཡིན་པ་དག་ཀྱང་དེ་དག་ཏུ་བསྐལ་པ་ཆེན་པོ་བརྒྱད་ཁྲི་བཞི་ སྟོང་དུ་མཚམས་སྦྱར་ཅིང་འཁོར་ནས་སྡུག་བསྔལ་མཐར་བྱེད་དོ། །དེ་ལ་དགེ་སྦྱོང་དང་། བྲམ་ཟེ་གང་འདི་སྐད་ཅེས། བདག་ཚུལ་ཁྲིམས་སམ། བརྟུལ་ཞུགས་སམ། དཀའ་ཐུབ་བམ། ཚངས་པར་སྤྱོད་པ་ལ་གནས་པ་འདིས་ལས་ཡོངས་སུ་མ་ སྨིན་པ་ནི་ཡོངས་སུ་སྨིན་པར་བྱ་ཞིང་ཡོངས་སུ་སྨིན་པ་ནི་རེག་པར་བྱས་ནས་བྱང་བར་བྱའོ་ཞེས་ཟེར་བ་འགའ་ཡང་མེད་དོ། །བདེ་བ་དང་སྡུག་བསྔལ་འདི་ངེས་པ་ཡིན་ནོ། །ཡར་སྐྱེ་བ་དང་མར་འགྲིབ་པ་ནི་མི་སྲིད་དོ། །འདི་ལྟ་བུ་འདི་ཉིད་དང་གཞན་མ་ཡིན་པས་འཁོར་ བ་གཞལ་ལོ། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཅི་ལྟ་བ་བཞིན་དུ་མཁས་པ་

  52. 27a

    རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་ བཞིན་དུ་བརྡབས་ཏེ་དོང་ངོ་། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་ཀ་ཏྱའི་བུ་ནོག་ཅན་ག་ལ་བ་དེར་དོང་སྟེ་ཕྱིན་ནས། ཀ་ཏྱའི་བུ་ནོག་ཅན་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་ གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ནོག་ཅན་གྱིས་སྨྲས་པ། བྲམ་ཟེའི་ཁྱེའུ་དག་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། གལ་ཏེ་འགའ་ཞིག་ཁོ་བོའི་གན་དུ་འོངས་ཏེ་འདི་སྐད་ཅེས་འཇིག་རྟེན་ཕ་རོལ་ཡོད་དམ་ ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་ཡོད་དོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་མེད་དམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་མེད་དོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་ཡོད་ པ་དང་མེད་པ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་ཡོད་པ་དང་མེད་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་ཡོད་པ་ཡང་མ་ཡིན་མེད་པ་ཡང་མ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་ ཡོད་པ་ཡང་མ་ཡིན་མེད་པ་ཡང་མ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །དེ་བཞིན་དུ་གལ་ཏེ་འགའ་ཞིག་ཁོ་བོའི་གན་དུ་འོངས་ཏེ་འདི་སྐད་ཅེས་འཇིག་རྟེན་ཕ་རོལ་འདི་ལྟ་བུ་ཉིད་དང་། འདི་ལྟ་བུ་ཉིད་མ་ཡིན་པ་ཡིན་ནམ་དྲི་བ་འདྲི་ན། དེ་ལ་ཁོ་བོ་ འཇིག་རྟེན་ཕ་རོལ་འདི་ལྟ་བུ་དང་འདི་ལྟ་བུ་ཉིད་མ་ཡིན་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་གཞན་ཉིད་དང་གཞན་ཉིད་མ་ཡིན་པ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་གཞན་ཉིད་དང་གཞན་ཉིད་མ་ཡིན་

  53. 27b

    པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་པ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་གཞན་མ་ཡིན་པ་ཉིད་དང་། གཞན་མ་ཡིན་པ་ཉིད་མ་ཡིན་པ་ཡིན་ནོ་ཞེས་ དྲི་བ་དྲིས་པའི་ལན་འདེབས་པར་བྱེད་དོ། །འཇིག་རྟེན་ཕ་རོལ་དེ་ཉིད་དང་དེ་ཉིད་མ་ཡིན་པ་ཡིན་ནམ་ཞེས་དྲི་བ་འདྲི་ན། དེ་ལ་ཁོ་བོ་འཇིག་རྟེན་ཕ་རོལ་དེ་ཉིད་དང་དེ་ཉིད་མ་ཡིན་པ་ཡིན་ནོ་ཞེས་དྲི་བ་དྲིས་པའི་ལན་འདེབས་པར་བྱེད་དོ། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་ པང་ནས་སྐྱེས་གཉིས་འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ། ལམ་ངན་པ་ལེགས་པར་སྒྲུབ་པ་ཡིན་ཏེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་ བཅད་པ་སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་ནི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་དོང་ངོ་། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་ གཉེན་གྱི་བུ་གཅེར་བུ་ག་ལ་བ་དེར་དོང་སྟེ་ཕྱིན་ནས་གཉེན་གྱི་བུ་ལ་འདི་སྐད་ཅེས་སྨྲས་སོ། །ཤེས་ལྡན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། གཅེར་བུས་ སྨྲས་པ། བྲམ་ཟེའི་ཁྱེའུ་དག་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྐྱེས་བུ་གང་ཟག་འདིས་སོ་སོར་མྱོང་བ་གང་ཡིན་པ་ཅི་ཡང་རུང་སྟེ་དེ་ཐམས་ཅད་སྔོན་བྱས་པའི་རྒྱུ་ལས་བྱུང་བ་ཡིན་ནོ། །ལས་རྙིང་པ་རྣམས་ནི་དཀའ་ཐུབ་ཀྱིས་འབྱང་བར་འགྱུར་ལ་ལས་སར་པ་རྣམས་ ནི་མི་བྱ་བའི་ཆུ་ལོན་གྱིས་ལྡོག་པར་བྱའོ། །དེ་ལྟར་ན་ཕྱིན་ཆད་ཟག་པ་མེད་དོ། །ཟག་པ་མེད་ན་ལས་ཟད་དོ། །ལས་ཟད་ན་སྡུག་བསྔལ་ཟད་དོ། །སྡུག་བསྔལ་ཟད་ན་སྡུག་བསྔལ་མཐར་བྱེད་པར་འགྱུར་རོ། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་

  54. 28a

    འདི་སྙམ་དུ་སེམས་ཏེ། སྟོན་པ་ཤེས་ལྡན་འདི་ཡང་ལམ་གོལ་བར་ཞུགས་པ་ལམ་ངན་པ་ལེགས་པར་སྒྲུབ་པ་སྟེ། ལམ་འཇིགས་པ་དང་བཅས་པ་ཇི་ལྟ་བ་བཞིན་དུ་མཁས་པ་རྣམས་ཀྱིས་སྤང་བར་བྱ་བ་ཡིན་ནོ་སྙམ་དུ་རིག་ནས་ཚིགས་སུ་བཅད་པ་ སྨྲས་པ། བློ་ངན་ལོག་པར་སྟོན་བྱེད་པ། །དམན་པ་སྟོན་པར་གྲགས་པ་སྟེ། །གང་གི་ཆོས་འདི་དེ་འདྲ་བ། །དེ་ཡི་ཆོས་མིན་ཅི་ཞིག་འདྲ། །ཞེས་སྨྲས་ནས་སྣོད་སྟོང་པ་བཞིན་དུ་བརྡབས་ཏེ་དོང་ངོ་། །དེའི་ཚེ་ན་མུ་སྟེགས་ཅན་གྱི་གནས་ཡང་དག་རྒྱལ་བ་ཅན་ཞེས་བྱ་ བ་ཞིག་བྱུང་ནས་རིང་པོ་མ་ལོན་པར་གྱུར་ཏོ། །དེ་ནས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་སྟོན་པ་ཡང་དག་རྒྱལ་བ་ཅན་ག་ལ་བ་དེར་དོང་སྟེ་ཕྱིན་ནས་དྲིས་པ། ཤེས་ལྡན་དག་སྟོན་པ་ཡང་དག་རྒྱལ་བ་ཅན་གང་ན། ནང་དུ་ཡང་དག་འཇོག་ལའོ། །ཀྱེ་མ་ བདག་ཅག་གིས་ཡུན་རིང་མོ་ཞིག་ནས་ནང་དུ་ཡང་དག་འཇོག་གི་སྒྲ་གདོད་ཐོས་སོ། །དེ་གཉིས་འདི་སྙམ་དུ་སེམས་ཏེ། བདག་ཅག་གིས་སྟོན་པ་ནང་དུ་ཡང་དག་འཇོག་ལས་བསླང་བ་ནི་བདག་ཅག་གི་ཚུལ་དང་མཐུན་པ་མ་ཡིན་གྱིས། གང་གི་ཚེ་ནང་དུ་ཡང་དག་ འཇོག་ལས་ལངས་པར་གྱུར་པ་དེའི་ཚེ་ན་དྲུང་དུ་འདོང་བར་བྱའོ་སྙམ་ནས། དེ་གཉིས་ཕྱོགས་གཅིག་ཏུ་དོང་སྟེ་འཁོད་དོ། །དེ་ནས་སྟོན་པ་ཡང་དག་རྒྱལ་བ་ཅན་ནང་དུ་ཡང་དག་འཇོག་ལས་ལངས་པ་དང་དེ་བསམ་གཏན་དག་གིས་དབང་པོ་རྣམས་ཚིམ་པར་གྱུར་ཏོ། ། དེ་གཉིས་ཀྱིས་བསམས་པ། གང་ལ་བྱད་བཞིན་ཡོད་པ་དེ་དག་ལ་ཡོན་ཏན་དག་ཀྱང་ཡོད་དོ་སྙམ་ནས་དེ་གཉིས་དེའི་གན་དུ་དོང་སྟེ་ཕྱིན་ནས་སྨྲས་པ། ཤེས་ལྡན་ཡང་དག་རྒྱལ་བ་ཅན་ཁྱོད་ཀྱི་ཆོས་ཀྱི་ཚུལ་ནི་གང་ཡིན། སློབ་མ་ལ་གདམས་པ་ནི་གང་ཡིན། ཚངས་པར་ སྤྱོད་པའི་འབྲས་བུ་ནི་གང་ཡིན། ཕན་ཡོན་ནི་གང་ཡིན། ཡང་དག་རྒྱལ་བ་ཅན་གྱིས་སྨྲས་པ། བྲམ་ཟེའི་ཁྱེའུ་དག་ཁོ་བོ་ནི་འདི་ལྟར་ལྟ་ཞིང་འདི་སྐད་སྨྲ་སྟེ། བདེན་པ་དང་མི་འཚེ་བ་ནི་ཆོས་སོ་ཞི་བ་དང་། རྒ་བ་མེད་པ་དང་། འཆི་བ་མེད་པ་དང་། ཉམས་པ་མེད་པའི་

  55. 28b

    གནས་དེ་ནི་ཚངས་པའོ། །དེ་གཉིས་ཀྱིས་སྨྲས་པ། མཁན་པོ་སྨྲས་པ་དེའི་དོན་ཅི་ལགས། བདེན་པ་ཞེས་བྱ་བ་ནི་བདེན་པའི་བསམ་པས་རབ་ཏུ་འབྱུང་བའོ། །མི་འཚེ་བ་ཞེས་བྱ་བ་ནི་ཆོས་ཐམས་ཅད་མི་འཚེ་བའི་གཞི་ལས་བྱུང་བའོ། །ཞི་བ་དང་། རྒ་བ་མེད་པ་ དང་། འཆི་བ་མེད་པ་དང་། ཉམས་པ་མེད་པའི་གནས་ཞེས་བྱ་བ་དེ་དག་ནི་མྱ་ངན་ལས་འདས་པའི་རྣམ་གྲངས་ཀྱི་ཚིག་དག་ཡིན་ནོ། །དེ་ནི་ཚངས་པའོ་ཞེས་བྱ་བ་ནི་གལ་ཏེ་རེ་ཞིག་ཚེ་འདི་ཉིད་ལ་མྱ་ངན་ལས་འདས་པ་སྒྲུབ་པར་བྱེད་ན་དེ་ལྟ་ན་ལེགས། གལ་ཏེ་སྒྲུབ་པར་མི་ བྱེད་ན་ཡང་ཚངས་པའི་འཇིག་རྟེན་དུ་ཉེ་བར་འགྲོ་བར་འགྱུར་ཏེ། དེ་ལྟ་ན་ཡང་བྲམ་ཟེ་དག་ནི་ཚངས་པའི་འཇིག་རྟེན་དུ་གཞོལ་བ་དང་། ཚངས་པའི་འཇིག་རྟེན་དུ་འབབ་པ་དང་། ཚངས་པའི་འཇིག་རྟེན་དུ་བབ་པ་ཡིན་ནོ། །ཚངས་པའི་འཇིག་རྟེན་ཡང་དེ་ལྟ་བུ་ཡིན་ཞིང་། ཚངས་པའི་འཇིག་རྟེན་ཡང་དེ་འདྲ་བ་ཡིན་ཏེ། ཚངས་པའི་འཇིག་རྟེན་དང་སྐལ་བ་མཉམ་པར་སྒྲུབ་པ་ནི་མྱ་ངན་ལས་འདས་པ་ལ་གཞོལ་བ་ཡིན་ནོ། །མཁན་པོ་བདག་ཅག་རབ་ཏུ་འབྱུང་བར་གནང་ན་བདག་ཅག་མཁན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། ། དེས་དེ་གཉིས་རབ་ཏུ་ཕྱུང་ངོ་། །གང་གི་ཚེ་སྟོན་པ་ཡང་དག་རྒྱལ་བ་ཅན་གྱིས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་རབ་ཏུ་ཕྱུང་བ་དེའི་ཚེ་ན་ཐམས་ཅད་དུ་སྟོན་པ་ཡང་དག་རྒྱལ་བ་ཅན་གྱིས་བྲམ་ཟེའི་ཁྱེའུ་ཉེ་རྒྱལ་དང་པང་ནས་སྐྱེས་གཉིས་རབ་ཏུ་ཕྱུང་ངོ་ཞེས་སྒྲ་གྲགས་ ཤིང་དེ་ལ་རྙེད་པ་དང་བཀུར་སྟི་མང་པོ་བྱུང་བར་གྱུར་ཏོ། །དེས་བསམས་པ། སྔོན་ཡང་བདག་ཤཎ་ཌི་ལའི་རིགས་ཡིན་ལ་ད་ལྟར་ཡང་བདག་ཤཎ་ཌི་ལའི་རིགས་ཡིན་ན་ད་ལྟར་བདག་ལ་རྙེད་པ་དང་བཀུར་སྟི་མང་པོ་བྱུང་བར་གྱུར་པའི་སྦྱོར་བ་གང་ཡིན་སྙམ་མོ། །དེས་བསམས་ པ། འདི་ནི་བདག་གི་མཐུ་མ་ཡིན་ཏེ། འདི་ལྟར་བྲམ་ཟེའི་ཁྱེའུ་འདི་གཉིས་ཀྱི་མཐུ་ཡིན་ནོ་སྙམ་ནས་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་དག་ཀློག་ཏུ་འཇུད་པ་ན་དེས་གཅིག་ལ་ཉིས་བརྒྱ་ལྔ་བཅུ་གཏད་ཅིང་ཅིག་ཤོས་ལ་ཡང་ཉིས་བརྒྱ་ལྔ་བཅུ་གཏད་དོ། །

  56. 29a

    དུས་གཞན་ཞིག་ན་སྟོན་པ་ཡང་དག་རྒྱལ་བ་ཅན་ན་བར་གྱུར་ནས་ཉེ་རྒྱལ་གྱིས་པང་ནས་སྐྱེས་ལ་སྨྲས་པ། པང་ནས་སྐྱེས་ཅི་ཁྱོད་མཁན་པོའི་གཡོག་བྱེད་དམ་འོན་ཏེ་སྨན་ཚོལ་བར་བྱེད། དེས་བསམས་པ། འདི་ནི་ཤེས་རབ་ཅན་ཡིན་པས་འདི་ཉིད་གཡོག་ བྱེད་དུ་བཅུག་ལ་བདག་གིས་ནི་སྨན་བཙལ་བར་བྱའོ་སྙམ་ནས་དེས་སྨྲས་པ། ཁྱོད་མཁན་པོའི་གཡོག་བྱོས་ཤིག་དང་ཁོ་བོས་སྨན་བཙལ་ལོ། །ཉེ་རྒྱལ་གྱིས་གཡོག་བྱ་བར་བརྩམས་ནས་པང་ནས་སྐྱེས་སྨན་ཚོལ་བར་བྱེད་དོ། །དེ་ལ་རྩ་བ་དང་། སྡོང་བུ་དང་། འདབ་ མ་དང་། མེ་ཏོག་དང་། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ནད་དེ་ཉེ་བར་ཞི་བར་མ་གྱུར་ཅིང་ཉམ་དམས་ནས་དེས་འཛུམ་པ་བསྟན་པ་དང་བྲམ་ཟེའི་ཁྱེའུ་ཉེ་རྒྱལ་གྱིས་སྨྲས་པ། མཁན་པོ་ཁྱོད་ལྟ་བུའི་སྐྱེས་བུ་གཙོ་བོ་དག་ནི་རྒྱུ་མ་མཆིས་རྐྱེན་མ་མཆིས་ པར་འཛུམ་པ་མི་མཛད་ན། མཁན་པོ་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། དེས་སྨྲས་པ། ཉེ་རྒྱལ་དེ་དེ་བཞིན་ནོ། །དེ་དེ་བཞིན་ཏེ། ཁོ་བོ་ལྟ་བུ་སྐྱེས་བུ་གཙོ་བོ་དག་ནི་རྒྱུ་མེད་རྐྱེན་མེད་པར་འཛུམ་པ་མི་སྟོན་ཏེ། འདི་ལྟར་གསེར་གླིང་ན་ རྒྱལ་པོ་གསེར་བདག་ཅེས་བྱ་བ་དུས་ལ་བབ་པ་དེའི་ཆུང་མ་མེའི་ཕུང་པོར་མཆོངས་པ་ན་དེ་ལ་ཁོ་བོ་འདི་སྙམ་དུ་སེམས་ཏེ། སེམས་ཅན་འདི་དག་ནི་འདོད་པའི་རྒྱུ་དང་། འདོད་པའི་གཞི་དང་། འདོད་པའི་གནས་ཀྱི་རྒྱུས་འདི་ལྟར་སྡུག་བསྔལ་ཉམས་སུ་མྱོང་བར་བྱེད་ དོ་སྙམ་མོ། །མཁན་པོ་དུས་གང་གི་ཚེ། དུས་མང་གེ་མོ་ཞིག་གི་ཚེའོ། །ཟླ་བ་གང་ལ། ཟླ་བ་མང་གེ་མོ་ཞིག་ལའོ། །ཉི་མ་གང་ལ། ཉི་མ་མང་གེ་མོ་ཞིག་ལའོ། །དེས་དྲིས་པ་དེ་གླེགས་བུ་ལ་བྲིས་ཏེ་བཞག་གོ། །དེས་སྨྲས་པ། མཁན་པོ་བདག་ཅག་ཅུང་ ཟད་རབ་ཏུ་ཕྱུང་བ་གང་ལགས་པ་དེ་དག་ཐམས་ཅད་བདུད་རྩི་དོན་དུ་གཉེར་ཞིང་བདུད་རྩི་ཚོལ་བ་ལགས་ན། གལ་ཏེ་མཁན་པོས་བདུད་རྩི་ཅུང་ཟད་བརྙེས་པ་ལྟ་ན། ཀྱེ་མ་མཁན་པོས་བདག་ཅག་ལ་ཡང་བདུད་རྩི་བགོ་བཤའ་མཛད་དུ་གསོལ། བུ་ཁོ་བོ་ཡང་ཅུང་

  57. 29b

    ཟད་རབ་ཏུ་བྱུང་བ་དེ་ཐམས་ཅད་བདུད་རྩི་དོན་དུ་གཉེར་ཞིང་བདུད་རྩི་ཚོལ་བ་ཡིན་ན་ཁོ་བོས་བདུད་རྩི་ཅུང་ཟད་ཀྱང་མ་རྙེད་དེ། འདི་ལྟར་འདི་ཉིད་ཀྱི་གསོ་སྦྱོང་བཅྭ་ལྔ་པ་ལ་ལྷ་དག་སྟེང་གི་ནམ་མཁའ་ལ་རྒྱུ་བ་རྣམས་ཀྱི་སྒྲ་ཐོས་ནས་གངས་ཀྱི་ངོས་དང་ཉེ་བ་ཆུ་ཀླུང་སྐལ་ལྡན་ ཤིང་རྟ་པའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་སྟེ། དེ་བྲམ་ཟེ་ལྟས་པ་དང་མཚན་མཁན་དག་གིས་གཞོན་ནུ་དེ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་ པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་ བདག་རིན་པོ་ཆེ་དང་། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ ལུས་པ་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ་ཞེས་ལུང་བསྟན་ཏོ་ཞེས་ཟེར་བའི་སྒྲ་ཐོས་ཀྱིས། ཁྱེད་གཉིས་དེའི་བསྟན་པ་ལ་རབ་ཏུ་བྱུང་ལ་རིགས་ སྨྲ་བར་མི་བྱ། རུས་སྨྲ་བར་མི་བྱ། བྲམ་ཟེའི་ཁྱེའུར་སྨྲ་བ་མི་བྱ་བར་རྒྱགས་པ་དང་ང་རྒྱལ་ངེས་པར་བཅོམ་པ་དག་གིས་དེའི་སྤྱན་སྔར་ཚངས་པར་སྤྱད་པ་སྤྱོད་ཅིག་དང་། དེ་ལས་ཁྱེད་གཉིས་ཀྱིས་བདུད་རྩི་ཆེན་པོ་ཐོབ་པར་འགྱུར་རོ་ཞེས་སྨྲས་ནས། བསགས་པ་ཀུན་གྱི་མཐའ་ཟད་

  58. 30a

    ཅིང་། མཐོན་པོ་རྣམས་ནི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །དེ་དེ་རྣམས་ཀྱི་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་ གི་ཕྱོགས་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ། དེའི་འོག་ཏུ་མྱ་ངན་བསང་བདག་བྱས་ནས་འཁོད་དོ། །གསེར་གླིང་ནས་བྲམ་ཟེའི་ཁྱེའུ་རལ་པ་གསེར་འདྲ་ཞེས་བྱ་བ་ཞིག་མཐར་གྱིས་རྒྱལ་པོའི་ཁབ་ཏུ་ཕྱིན་ནས་དེ་དེ་རྣམས་ཀྱི་འདུག་གནས་སུ་ཞུགས་པ་དང་ཉེ་རྒྱལ་གྱིས་སྨྲས་པ། བྲམ་ཟེའི་ཁྱེའུ་ཁྱོད་དེ་བར་ག་ལས་འོངས། དེས་སྨྲས་པ། གསེར་གླིང་ནས་སོ། །བྲམ་ཟེའི་ཁྱེའུ་ཁྱོད་ཀྱིས་གསེར་གླིང་ན་ངོ་མཚར་དང་རྨད་དུ་བྱུང་བའི་ཆོས་ཅུང་ཟད་ཅི་མཐོང་། དེས་སྨྲས་པ། བདག་གིས་ངོ་མཚར་དང་རྨད་དུ་བྱུང་བའི་ཆོས་ཆེན་པོ་མ་མཐོང་སྟེ། འདི་ལྟར་བདག་ གིས་གསེར་གླིང་ན་ངོ་མཚར་དང་རྨད་དུ་བྱུང་བའི་ཆོས་ཅུང་ཟད་ཅི་མཐོང་བ་དེ་ཉོན་ཅིག །གསེར་གླིང་ན་རྒྱལ་པོ་གསེར་བདག་ཅེས་བྱ་བ་དུས་ལ་བབ་པ་དེའི་ཆུང་མ་མེའི་ཕུང་པོར་མཆོངས་སོ། །དུས་གང་གི་ཚེ། དུས་མང་གེ་མོ་ཞིག་གི་ཚེའོ། །ཟླ་བ་གང་ལ། ཟླ་བ་མང་གེ་མོ་ ཞིག་ལའོ། །ཉི་མ་གང་ལ། ཉི་མ་མང་གེ་མོ་ཞིག་ལའོ། །དེས་དྲིས་པ་གླེགས་བུ་ལ་བྲིས་པ་བལྟས་ན་ཇི་ཙམ་ན་ཐམས་ཅད་དེ་ཁོ་ན་བཞིན་དུ་མཐོང་ནས་ཉེ་རྒྱལ་གྱིས་པང་ནས་སྐྱེས་ལ་སྨྲས་པ། མཁན་པོས་སློབ་དཔོན་གྱི་དཔེ་མཁྱུད་བྱས་ཏེ། དེས་ཤིན་ཏུ་བདུད་རྩི་རྙེད་ ན་བདག་ཅག་ལ་བདུད་རྩིའི་བགོ་བཤའ་མ་བྱས་ཏེ། འདི་ལྟར་ལྷའི་མིག་གིས་ཡུལ་གཞན་ན་འདུག་པའི་གཟུགས་དག་མཐོང་བ་དང་། ལྷའི་རྣ་བས་སྒྲ་ཡིད་དུ་འོང་བ་དག་ཐོས་པ་ལས་ན། དེས་བདུད་རྩི་མ་རྙེད་དོ་ཞེས་བྱ་བ་ནི་ཆོས་མེད་དོ། །པང་ནས་སྐྱེས་ཀྱིས་བསམས་ པ། ཉེ་རྒྱལ་འདི་ནི་ཤེས་རབ་ཅན་ཡིན་པས་འདིས་ཀྱང་བདུད་རྩི་རྙེད་ན་བདག་ལ་མི་རྗོད་པ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་དེས་སྨྲས་པ། ཉེ་རྒྱལ་ཚུར་ཤོག་ཁྲིམས་སུ་བྱ་བ་བཅས། བདག་ཅག་གཉིས་ལས་གང་གིས་དང་པོར་བདུད་རྩི་རྙེད་པ་དེས་

  59. 30b

    ཕན་ཚུན་བསྙད་པར་བྱའོ་ཞེས་དེ་གཉིས་ཀྱིས་ཁྲིམས་སུ་བྱ་བ་དེ་ལྟ་བུ་བཅས་ཏེ་ལྗོངས་རྒྱུར་དོང་ངོ་། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔའ་ལོ་ཉི་ཤུ་རྩ་དགུ་པ་ཞེས་ཀྱང་འདོད་པ་དག་ལ་མ་རོལ་ཏེ་རྒན་པོ་དང་། ན་བ་དང་། ཤི་བ་གཟིགས་པས་ཐུགས་བྱུང་ནས་ མཚན་མོ་ནམ་ཕྱེད་ན། ནགས་སུ་གཤེགས་ནས་ལོ་དྲུག་ཏུ་དཀའ་བ་སྤྱད་དེ་དཀའ་བ་བྱེད་པ་ཅི་ཡང་མེད་པར་རིག་ནས་ཅི་བདེར་དབུགས་རྔུབ་པར་མཛད། ཅི་བདེར་དབུགས་འབྱིན་པར་མཛད་ཅིང་འབྲས་ཆན་དང་ཟན་དྲོན་ལ་སོགས་པ་ཞལ་ཟས་རྒྱ་ཆེན་པོ་དག་ཀྱང་གསོལ་ བར་མཛད། ཞུན་མར་དང་། འབྲུ་མར་དག་གིས་སྐུ་དག་ཀྱང་སྐུད་པར་མཛད། ཆུ་དྲོན་པོས་ཀྱང་སྐུ་བསིལ་བར་མཛད་ཅིང་གྲོང་སྡེ་འདོད་དུ་གཤེགས་ནས་གྲོང་པའི་བུ་མོ་དགའ་མོ་དང་། དགའ་སྟོབས་མ་གཉིས་ལས་ལན་བཅུ་དྲུག་བཟླས་པའི་འོ་མ་སྦྲང་རྩི་དང་ བསྲེས་པ་གསོལ་ཏེ། ཀླུའི་རྒྱལ་པོ་ནག་པོས་མངོན་པར་བསྟོད་པ་ན་རྩྭ་བཀྲ་ཤིས་འཚོང་བ་ལས་རྩྭ་གསེར་གྱི་མདོག་ལྟ་བུ་དག་བཞེས་ནས་བྱང་ཆུབ་ཀྱི་གཞི་ག་ལ་བ་དེར་གཤེགས་ཏེ་བྱོན་ནས་ཉིད་ཀྱིས་རྩྭ་མ་འཁྲུགས་ཤིང་ཀུན་དུ་མ་འཁྲུགས་པའི་གདན་བཤམས་ནས་ སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲང་ནས་དྲན་པ་ཕྱོགས་པར་བཞག་སྟེ་བཞུགས་ནས། ཇི་སྲིད་ཟག་མེད་མ་ཐོབ་པ། །དེ་སྲིད་སྐྱིལ་ཀྲུང་གཞིག་མི་བྱ། །ཞེས་ཐུགས་བསྐྱེད་ཅིང་གསུང་བརྗོད་དེ། དེ་ཡིས་ཇི་སྲིད་ཟག་མེད་པ། །མ་བརྙེས་སྐྱིལ་ཀྲུང་འཇིག་མི་ མཛད། །ཅེས་བྱ་བ་དང་། གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང་། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་པར་བཏུལ་ཏེ་བླ་ན་མེད་པའི་མཁྱེན་པ་ཐུགས་སུ་ཆུད་ནས་ཚངས་ པས་གསོལ་ཏེ་བཱ་རཱ་ཎ་སཱིར་གཤེགས་ནས་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་དང་ལྡན་པ་ཆོས་ཀྱི་འཁོར་ལོ་བསྐོར་བ་དེའི་ཚེ་ལྔ་པ་དང་། ཉེ་ལྔ་དག་དང་། གྲོང་པའི་ཁྱེའུ་མཐོ་བ་མཐོ་བ་ལྔ་བཅུ་བཏུལ་ཏེ་རབ་ཏུ་བྱུང་ཞིང་བསྙེན་པར་རྫོགས་པར་མཛད་དོ། །རས་

  60. 31a

    བལ་ཅན་གྱི་ཚལ་གསེབ་ཏུ་གཤེགས་ནས་བཟང་སྡེའི་ཚོགས་དྲུག་བཅུ་བདེན་པ་དག་ལ་བཀོད་དོ། །གྲོང་སྡེ་འདོང་དུ་གཤེགས་ནས་གྲོང་པའི་བུ་མོ་དགའ་མོ་དང་། དགའ་སྟོབས་མ་གཉིས་བདེན་པ་དག་ལ་བཀོད་དོ། །ལྟེང་རྒྱས་སུ་གཤེགས་ནས་ རལ་པ་ཅན་སྟོང་རབ་ཏུ་ཕྱུང་ཞིང་བསྙེན་པར་རྫོགས་པར་མཛད་དོ། །ག་ཡཱ་མགོའི་མཆོད་རྟེན་དུ་གཤེགས་ནས་དགེ་སློང་སྟོང་པོ་དེ་དག་ཆོ་འཕྲུལ་གསུམ་གྱི་གདམས་པ་མཛད་ནས་འཁོར་བའི་དགོན་པ་ལས་བསྒྲལ་ཏེ་ཤིན་ཏུ་མཐར་ཐུག་པ་གྲུབ་པ་དང་བདེ་བ་བླ་ན་མེད་ པས་མྱ་ངན་ལས་འདས་པ་ལ་བཀོད་དོ། །ལྟང་བྲང་གི་ཚལ་གསེབ་ཏུ་གཤེགས་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་མ་ག་དྷཱ་པའི་བྲམ་ཟེ་དང་། ཁྱིམ་བདག་འབུམ་ཕྲག་དུ་མ་དང་ལྷན་ཅིག་བདེན་པ་དག་ལ་བཞག་གོ། །རྒྱལ་ པོའི་ཁབ་ཏུ་གཤེགས་ནས་འོད་མའི་ཚལ་བཞེས་ཏེ། དེ་ན་སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །ཉེ་རྒྱལ་དང་པང་ནས་སྐྱེས་གཉིས་ཀྱང་ལྗོངས་རྒྱུ་ཞིང་དོང་བ་ན་རྒྱལ་པོའི་ཁབ་ཏུ་ཕྱིན་པ་དང་དེ་ན་གྲོང་ཁྱེར་ རྒྱལ་པོའི་ཁབ་ཆེམ་མེ་ཆེམས་སེ་འདུག་པ་མཐོང་ནས། དེ་གཉིས་ཀྱིས་བསམས་པ། རྒྱུ་གཉིས་ཀྱིས་གྲོང་ཁྱེར་ཆེན་པོ་འདི་ལྟ་བུ་ཆེམ་མེ་ཆེམས་སེར་གྱུར་ཏེ། ཕ་རོལ་གྱི་དམག་ཚོགས་ཀྱིས་འཇིགས་པ་དང་། དགེ་སྦྱོང་ངམ་བྲམ་ཟེ་བསོད་ནམས་དང་དབང་ཆེ་བར་ གྲགས་པ་འགའ་ཞིག་གནས་པ་ལས་འགྱུར་རོ་སྙམ་ནས། དེ་གཉིས་ཀྱི་རྒྱུ་སྐར་དག་ལ་བལྟ་བར་བརྩམས་ནས་དེ་གཉིས་ཀྱིས་བསམས་པ། རེ་ཞིག་ཕ་རོལ་གྱི་དམག་ཚོགས་ཀྱིས་འཇིགས་པ་ནི་མེད་པས་སང་ཤེས་པར་བྱའོ་སྙམ་མོ། །དེ་གཉིས་ཀྱི་ཀུན་དུ་སྤྱོད་པ་ནི་གང་གི་ཚེ་དེ་ གཉིས་འཕྲལ་རིས་གསུམ་བྱས་ཏེ་སྤྱོད་ཡུལ་དུ་འདོང་བ་དེའི་ཚེ་ན་སྲོག་ཆགས་འབུམ་ཕྲག་དུ་མ་དག་ཕྱི་བཞིན་ཕྱི་བཞིན་རྗེས་སུ་འབྲང་བར་འགྱུར་བ་ཡིན་ནོ། །དེ་གཉིས་ཕྱི་དེ་ཉིན་པར་འཕྲལ་རིས་གསུམ་བྱས་ཏེ། སྤྱོད་ཡུལ་དུ་དོང་བ་དང་དེའི་ཉིན་པར་སེམས་ཅན་གཅིག་ཀྱང་ཕྱི་

  61. 31b

    བཞིན་ཕྱི་བཞིན་རྗེས་སུ་མི་འབྲང་ངོ་། །དེ་གཉིས་ཕྱིར་བྱུང་སྟེ་བལྟས་ན། ཇི་ཙམ་ན་སེམས་ཅན་གཅིག་ཀྱང་ཕྱི་བཞིན་ཕྱི་བཞིན་རྗེས་སུ་མི་འབྲང་བར་མཐོང་ནས་དེ་གཉིས་ཀྱིས་བསམས་པ། བདག་ཅག་གཉིས་སྔོན་ཆད་སྤྱོད་ཡུལ་དུ་འདོང་བ་དེའི་ཚེ་ན་སྲོག་ཆགས་འབུམ་ཕྲག་དུ་ མ་དག་ཕྱི་བཞིན་ཕྱི་བཞིན་རྗེས་སུ་འབྲང་བར་གྱུར་ན། ད་ལྟར་སེམས་ཅན་གཅིག་ཀྱང་ཕྱི་བཞིན་ཕྱི་བཞིན་རྗེས་སུ་མི་འབྲང་བ་འདི་ལ་རྒྱུ་གང་ཡིན་སྙམ་མོ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང་། མ་གཟིགས་པ་དང་། མ་རིག་པ་དང་། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས། སངས་རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ་རྫུ་འཕྲུལ་གྱི་རྐང་པ་བཞིས་སྤྱོད་ པས་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱངས་པ་མཛད་པ། འཕགས་པའི་བདེན་པ་བཞི་སྟོན་པ། མི་འཇིགས་པ་བཞིས་བསྙེངས་པ་མི་མངའ་བ་ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་ འདས་པ། ཕུང་པོ་ལྔ་བདག་མེད་པར་སྟོན་པ། ཡན་ལག་དྲུག་དང་ལྡན་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། དབང་པོ་དྲུག་གི་སྒོ་བསྡམས་པ། ཡང་དག་པར་དགའ་བར་བྱ་བའི་ཆོས་དྲུག་ལ་གོམས་པར་མཛད་ པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། འཕགས་པའི་ནོར་བདུན་སྟོན་པ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ། ཀུན་ནས་མནར་སེམས་ཀྱི་དངོས་པོ་དགུ་ལ་མཁས་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་

  62. 32a

    པར་འཇུག་པ་དགུ་ལ་མཁས་པ། སྟོབས་ི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ་མཚན་ལན་གསུམ་དུ་སངས་རྒྱས་ ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས། གང་ན་ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ན་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་། མི་བདེ་བར་གྱུར། གང་ནི་ངན་སོང་ལ་ གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ལས་བསློང་སྟེ་མཐོ་རིས་དང་། ཐར་པ་དང་འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་ གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་ སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་ལ་འཇུག་གོ། །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་ གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡིས། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་ དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །དེ་ལྟར་བཅོམ་ལྡན་འདས་ཀྱིས་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ན་ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་རྒྱུད་ཡོངས་སུ་སྨིན་པ། སྔོན་གྱི་སངས་རྒྱས་

  63. 32b

    རྣམས་ལ་བྱ་བ་ལྷག་པར་བྱས་པ། དགེ་བའི་རྩ་བའི་ཚོགས་བསགས་པ་ཡིན་ཏེ། དེ་གཉིས་གདུལ་བའི་དུས་ནི་འབྲས་ཡོངས་སུ་སྨིན་པ་མཚོན་གྱིས་བརྟོལ་པ་ལ་སྡོད་པ་ལྟ་བུ་ཡིན་པར་གཟིགས་ནས། བཅོམ་ལྡན་འདས་འདི་སྙམ་དུ་དགོངས་ཏེ། ཅི་འདི་གཉིས་རེ་ཞིག་ སྟོན་པས་གདུལ་བ་ཡིན་ནམ། འོན་ཏེ་ཉན་ཐོས་ཀྱིས་གདུལ་བ་ཡིན་སྙམ་དུ་དགོངས་ན། ཉན་ཐོས་ཀྱིས་གདུལ་བ་ཡིན་པར་གཟིགས་སོ། །སྒོ་གང་ནས་འཇུག་པར་འགྱུར། ཅི་རྫུ་འཕྲུལ་གྱིས་གདུལ་བ་ཡིན་ནམ། འོན་ཏེ་སྤྱོད་ལམ་གྱིས་གདུལ་བ་ཡིན་སྙམ་དུ་ དགོངས་ན། སྤྱོད་ལམ་གྱིས་གདུལ་བ་ཡིན་པར་གཟིགས་སོ། །བཅོམ་ལྡན་འདས་ནི་གང་ལ་སྤྱོད་ལམ་གྱིས་གདུལ་བ་དེ་ལ་ཚེ་དང་ལྡན་པ་རྟ་ཐུལ་གཏོང་བར་མཛད་དེ། འདི་ལྟར་དེའི་སྤྱོད་ལམ་གྱིས་ནི་ལྷ་དང་མིའི་ཡིད་སྡུད་པར་བྱེད་པ་ཡིན་པའི་ཕྱིར་རོ། །དེ་ནས་བཅོམ་ ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་བཀའ་སྩལ་པ། རྟ་ཐུལ་ཁྱོད་ཀྱིས་ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་ལ་སོམས་ཤིག །ཚེ་དང་ལྡན་པ་རྟ་ཐུལ་གྱིས་ཅང་མི་སྨྲ་བས་བཅོམ་ལྡན་འདས་ཀྱིས་བཀའ་སྩལ་པ་དང་དུ་བླངས་སོ། །དེ་ནས་ཚེ་དང་ལྡན་པ་རྟ་ ཐུལ་བཅོམ་ལྡན་འདས་ཀྱིས་བཀའ་ལ་ལྷག་པར་བྱ་བ་བྱེད་པ་ཡིན་པས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་པ་དང་རྗེས་སུ་ཡི་རང་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ ནས་སོང་ངོ་། །དེ་ནས་ཚེ་དང་ལྡན་པ་རྟ་ཐུལ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། འགྲོ་བ་དང་། ལྡོག་པ་དང་། ཆུང་ཟད་བལྟ་བ་དང་། རྣམ་པར་བལྟ་བ་དང་། བསྐུམ་པ་དང་། བརྐྱང་བ་དང་། སྣམ་ སྦྱར་དང་། ཆོས་གོས་དང་ལྷུང་བཟེད་ཐོགས་པ་མཛེས་པས་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །དེའི་ཚེ་ན་ཀུན་དུ་རྒྱུ་ཉེ་རྒྱལ་རྒྱལ་པོའི་ཁབ་ཏུ་བྱ་བ་ཞིག་གི་ཕྱིར་སྤྱོད་ཡུལ་དུ་ཞུགས་པས་ཚེ་དང་ལྡན་པ་རྟ་ཐུལ་འགྲོ་བ་དང་། ལྡོག་པ་དང་། ཆུང་ཟད་བལྟ་

  64. 33a

    བ་དང་། རྣམ་པར་བལྟ་བ་དང་། བསྐུམ་པ་དང་། བརྐྱང་བ་དང་། སྣམ་སྦྱར་དང་། ཆོས་གོས་དང་ལྷུང་བཟེད་ཐོགས་པ་མཛེས་པས་རྒྱལ་པོའི་ཁབ་ན་བསོད་སྙོམས་ལ་རྒྱུ་བ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ ཏེ། རྒྱལ་པོའི་ཁབ་འདིར་རབ་ཏུ་བྱུང་བ་ཇི་སྙེད་ཅིག་ལྷགས་ཤིང་གནས་པ་དག་ལས་འདི་ལྟ་སྟེ། རབ་ཏུ་བྱུང་བ་འདིའི་སྤྱོད་ལམ་ལྟ་བུ་ནི་བདག་གིས་སྔན་ཆད་འགའ་ཡང་མ་མཐོང་བས་བདག་དེའི་གན་དུ་སོང་སྟེ། དགེ་སློང་ཁྱོད་ཀྱི་སྟོན་པ་ནི་གང་ཡིན། གང་གི་ ཕྱིར་ནི་རབ་ཏུ་བྱུང་། སུའི་ཆོས་ལ་ནི་དགའ་ཞེས་དྲིའོ་སྙམ་དུ་རིག་ནས་ལམ་པོ་ཆེ་རུབ་པ་ཞིག་ན་འགྲོ་བ་དང་ལྡོག་པས་ཤས་ཆེར་སྡོད་ཅིང་འདུག་གོ། །དེ་ནས་ཚེ་དང་ལྡན་པ་རྟ་ཐུལ་ཀུན་དུ་རྒྱུ་ཉེ་རྒྱལ་ག་ལ་བ་དེར་སོང་ངོ་། །དེ་ནས་ཀུན་དུ་རྒྱུ་ཉེ་རྒྱལ་གྱིས་ཚེ་དང་ལྡན་པ་ རྟ་ཐུལ་ལ་འདི་སྐད་ཅེས་སྨྲས་སོ། །དགེ་སློང་ཁྱོད་ཀྱི་སྟོན་པ་ནི་གང་ཡིན། གང་གི་ཕྱིར་ནི་རབ་ཏུ་བྱུང་། སུའི་ཆོས་ལ་ནི་དགའ། ཚེ་དང་ལྡན་པ་ཤཱཀྱའི་སྲས་ཀྱི་དགེ་སྦྱོང་གཽ་ཏ་མ་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་དག་བགོས་ཏེ་ཡང་དག་པ་ ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ཞིག་ཡོད་དེ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པས་ཁོ་བོའི་སྟོན་པ་ནི་བཅོམ་ལྡན་འདས་དེ་ཡིན་ནོ། །ཁོ་བོ་དེའི་ཕྱིར་རབ་ཏུ་བྱུང་ངོ་། །ཁོ་བོ་དེའི་ཆོས་ལ་དགའོ། ། དགེ་སློང་དེའི་ཕྱིར་ཆོས་སྟོན་ཅིག །ཚེ་དང་ལྡན་པ་ཁོ་བོ་ནི་ན་གཞོན་པ་དང་རབ་ཏུ་བྱུང་བ་གསར་པས་དེའི་ཕྱིར་ཁོ་བོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་བསྟན་པ་རྒྱ་ཆེར་ཡང་དག་པར་རབ་ཏུ་བསྟན་པར་ སླ་བ་མ་ཡིན་ཏེ། འདི་ལྟར་དེའི་དོན་བསྟན་པར་བྱའོ། །དགེ་སློང་ཁོ་བོ་ལ་ནི་དོན་དགོས་ཀྱི་ཚིག་ནི་ཤིན་དུ་མང་པོས་ཀྱང་ཅི་བྱ་སྟེ། ཁྱོད་ཀྱིས་དོན་མང་ཡང་རུང་ཉུང་ཡང་རུང་སྟོན་ཅིག །དེ་ནས་ཚེ་དང་ལྡན་པ་རྟ་ཐུལ་གྱིས་དེའི་ཚེ་ཚིགས་སུ་བཅད་པ་སྨྲས་པ། ཆོས་

  65. 33b

    རྣམས་གང་དག་རྒྱུ་ལས་བྱུང་བ་དང་། །དེ་ཡི་རྒྱུ་དང་དེ་འགོག་གང་ཡིན་པའང་། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་བའི་ཚུལ་ཅན་དགེ་སྦྱོང་ཆེ། །ཆོས་ཀྱི་རྣམ་གྲངས་འདི་བཤད་པ་ན་ཀུན་དུ་རྒྱུ་ཉེ་རྒྱལ་ཆོས་རྣམས་ལ་ཆོས་ཀྱི་མིག་རྡུལ་མེད་ ཅིང་དྲི་མ་དང་བྲལ་བ་སྐྱེས་སོ། །དེ་ནས་ཀུན་དུ་རྒྱུ་ཉེ་རྒྱལ་ཆོས་མཐོང་བ་དང་། ཆོས་ཐོས་པ་དང་། ཆོས་རིག་པ་དང་། ཆོས་ཀྱི་གཏིང་སླེབ་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་ བ་དང་། སྟོན་པའི་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཚེ་དང་ལྡན་པ་རྟ་ཐུལ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་དེའི་ཚེ་ཚིགས་སུ་བཅད་པ་སྨྲས་པ། སྐྱོབ་པ་རྣམས་ཀྱི་ཆོས་འདི་ ཡིན། །བསྐལ་མང་བྱེ་བ་ཁྲག་ཁྲིག་ཏུ། །སྔན་ཆད་མ་མཐོང་མ་ཐོས་པ། །འཆི་མེད་མྱ་ངན་མེད་པ་ཡི། །གོ་འཕང་འདི་ལ་རྗེས་སུ་རྟོགས། །ཚེ་དང་ལྡན་པ་བཅོམ་ལྡན་འདས་དེ་ད་ལྟར་ག་ལ་བཞུགས། ཚེ་དང་ལྡན་པ་རྒྱལ་པོའི་ཁབ་འོད་མའི་ཚལ་བྱ་ཀ་ ལན་ད་ཀའི་གནས་འདི་ཉིད་ནའོ། །དེ་ནས་ཀུན་དུ་རྒྱུ་ཉེ་རྒྱལ་ཚེ་དང་ལྡན་པ་རྟ་ཐུལ་གྱིས་སྨྲས་པ་ལ་མངོན་པར་བསྟོད་པ་དང་རྗེས་སུ་ཡི་རང་བ་བྱས་ཏེ། ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ནས། ཚེ་དང་ལྡན་པ་རྟ་ཐུལ་ལ་ལན་གསུམ་བསྐོར་བ་ བྱས་ཏེ་སོང་ནས་ཀུན་དུ་རྒྱུ་པང་ནས་སྐྱེས་ག་ལ་བ་དེར་སོང་ངོ་། །ཀུན་དུ་རྒྱུ་པང་ནས་སྐྱེས་ཀྱིས་ཀུན་དུ་རྒྱུ་ཉེ་རྒྱལ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཀུན་དུ་རྒྱུ་ཉེ་རྒྱལ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཁྱོད་ཀྱི་དབང་པོ་རྣམས་ནི་རྣམ་པར་རང་བཞིན་གྱི་ མདོག་ནི་ཡོངས་སུ་དག །པགས་པའི་མདོག་ནི་ཤིན་དུ་དཀར་ན་ཁྱོད་ཀྱིས་བདུད་རྩི་རྙེད་དམ། ཚེ་དང་ལྡན་པ་རྙེད་དོ། །ཚེ་དང་ལྡན་པ་དེའི་ཕྱིར་ཆོས་སྟོན་ཅིག །དེ་ནས་ཀུན་དུ་རྒྱུ་ཉེ་རྒྱལ་གྱིས་དེའི་ཚེ་ཚིགས་སུ་བཅད་པ་སྨྲས་པ། ཆོས་རྣམས་གང་དག་རྒྱུ་ལས་བྱུང་བ་དང་། །

  66. 34a

    དེ་ཡི་རྒྱུ་དང་དེ་འགོག་གང་ཡིན་པའང་། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་བའི་ཚུལ་ཅན་དགེ་སྦྱོང་ཆེ། །ཚེ་དང་ལྡན་པ་ད་དུང་ཡང་ལན་གཅིག་བརྗོད་ཅིག །ཚེ་དང་ལྡན་པ་བརྗོད་པར་བྱའོ། །ཆོས་རྣམས་གང་ དག་རྒྱུ་ལས་བྱུང་བ་དང་། །དེ་ཡི་རྒྱུ་དང་དེ་འགོག་གང་ཡིན་པའང་། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུང་བའི་ཚུལ་ཅན་དགེ་སྦྱོང་ཆེ། །ཆོས་ཀྱི་རྣམ་གྲངས་འདི་བཤད་པ་ན་ཀུན་དུ་རྒྱུ་པང་ནས་སྐྱེས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་ མ་དང་བྲལ་བ་སྐྱེས་སོ། །དེ་ནས་ཀུན་དུ་རྒྱུ་པང་ནས་སྐྱེས་ཆོས་མཐོང་བ་དང་། ཆོས་ཐོས་པ་དང་། ཆོས་རིག་པ་དང་། ཆོས་ཀྱི་གཏིང་སླེབ་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་ བ་དང་། སྟོན་པའི་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཀུན་དུ་རྒྱུ་ཉེ་རྒྱལ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། དེའི་ཚེ་ཚིགས་སུ་བཅད་པ་སྨྲས་པ། སྐྱོབ་པ་རྣམས་ཀྱི་ཆོས་འདི་ཡིན། །བསྐལ་ མང་བྱེ་བ་ཁྲག་ཁྲིག་ཏུ། །སྔན་ཆད་མ་མཐོང་མ་ཐོས་པ། །འཆི་མེད་མྱ་ངན་མེད་པ་ཡི། །གོ་འཕང་འདི་ལ་རྗེས་སུ་རྟོགས། །ཚེ་དང་ལྡན་པ་བཅོམ་ལྡན་འདས་དེ་ད་ལྟར་ག་ལ་བཞུགས། ཚེ་དང་ལྡན་པ་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀའི་གནས་འདི་ཉིད་ནའོ། ། ཚེ་དང་ལྡན་པ་ཚུར་ཤོག་བཅོམ་ལྡན་འདས་དེའི་སྤྱན་སྔར་ཚངས་པར་སྤྱོད་པ་སྤྱད་པར་བྱའོ། །ཚེ་དང་ལྡན་པ་དེའི་ཕྱིར་ཇེ་འཁོར་ལ་བལྟ་བར་བྱ་སྟེ། བདག་ཅག་ལྟ་བུའི་མི་གྲགས་པ་དང་ལྡན་པ་ཤེས་པར་གྱུར་པ་དག་གིས་འཁོར་ལ་བལྟ་བ་ནི་ལེགས་པ་ཡིན་ནོ། །དེ་ནས་ཀུན་ དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་ཀྱིས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་རྣམས་ཤེས་པར་གྱིས་ཤིག །ཁོ་བོ་ཅག་གཉིས་ནི་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་པར་བྱེད་ན་ཁྱེད་ཅག་ཇི་ལྟར་བྱེད། མཁན་པོ་གཉིས་བདག་ཅག་

  67. 34b

    ཅུང་ཟད་ཅི་འཚལ་བ་གང་ལགས་པ་དེ་དག་ཐམས་ཅད་མཁན་པོ་གཉིས་ལས་བརྟེན་ནས་འཚལ་བ་ལགས་ན། གལ་ཏེ་མཁན་པོ་གཉིས་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་ན་བདག་ཅག་ཀྱང་མཁན་པོ་གཉིས་རབ་ཏུ་བྱུང་བའི་རྗེས་སུ་རབ་ཏུ་འབྱུང་བར་བགྱིའོ། ། བྲམ་ཟེའི་ཁྱེའུ་རྣམས་ད་དེའི་དུས་ལ་བབ་པར་ཤེས་པར་གྱིས་ཤིག །དེ་ནས་ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་འཁོར་ཉིས་བརྒྱ་ལྔ་བཅུ་ལྔ་བཅུ་དང་འོད་མའི་ཚལ་བྱ་ཀ་ལན་ད་ཀའི་གནས་ག་ལ་བ་དེར་དོང་ངོ་། །དེའི་ཚེ་ན་ཚེ་དང་ལྡན་པ་རྟ་ཐུལ་ཉིན་མོ་སྤྱོད་པའི་ཕྱིར་ཤིང་ ལྗོན་པ་ཞིག་གི་དྲུང་ན་རྟེན་ཅིང་འདུག་གོ། །ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་ཀྱིས་ཚེ་དང་ལྡན་པ་རྟ་ཐུལ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཉེ་རྒྱལ་གྱིས་པང་ནས་སྐྱེས་ལ་སྨྲས་པ། པང་ནས་སྐྱེས་ཅི་ཇེ་བཅོམ་ལྡན་འདས་ལ་བསྙེན་བཀུར་བྱའམ། འོན་ ཏེ་གང་ལས་ཆོས་ཐོས་པ་དེ་ལ་བྱ། དེས་སྨྲས་པ། ཇེ་གང་ལས་ཆོས་ཐོས་པ་དེ་ལ་བསྙེན་བཀུར་བྱའོ། །དེ་གཉིས་ཚེ་དང་ལྡན་པ་རྟ་ཐུལ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེའི་ཚེ་ན་བྲམ་ཟེ་ ཟླ་བ་ལ་དགའ་བ་ཞིག་ཟླ་བ་ལ་བསྙེན་བཀུར་བྱེད་ཅིང་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་བཀའ་སྩལ་པ། རྒན་པ་དང་ནི་གཞོན་པའང་རུང་། །གང་ལས་ཆོས་ནི་རྣམ་ཤེས་པ། །དེ་ལ་གུས་པར་ཕྱག་བྱ་སྟེ། །ཟླ་བ་ཚེས་ ལ་ཇི་བཞིན་ནོ། །བྲམ་ཟེ་མེ་ལ་དགའ་བ་ཞིག་ཀྱང་མེ་ལ་བསྙེན་བཀུར་བྱེད་ཅིང་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་སྨྲས་པ། རྒན་པ་དང་ནི་གཞོན་པའང་རུང་། །གང་ལས་ཆོས་ནི་རྣམ་ཤེས་པ། །དེ་ལ་གུས་པར་ ཕྱག་བྱ་སྟེ། །མེ་ལ་བྲམ་ཟེ་གཙང་མ་བཞིན།། །།འདུལ་བ་གཞི། བམ་པོ་བཞི་པ། དེ་ནས་ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་ཚེ་དང་ལྡན་པ་རྟ་ཐུལ་གྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་དོང་ནས་བཅོམ་ལྡན་འདས་ག་ལ་བ་དེར་དོང་

  68. 35a

    ངོ་། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་གུང་ལ་ཆོས་སྟོན་ཅིང་བཞུགས་སོ། །བཅོམ་ལྡན་འདས་ཀྱིས་ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་ བཀའ་སྩལ་པ། དགེ་སློང་དག་ཁྱེད་ཀྱིས་གྲོགས་ཡོངས་སུ་སྡུད་པ། ཚོགས་ཡོངས་སུ་འདྲེན་པ། ཚོགས་ཀྱི་མདུན་ནས་འོང་བ་འདི་ལྟ་སྟེ། ཉེ་རྒྱལ་དང་པང་ནས་སྐྱེས་གཉིས་མཐོང་ངམ། བཙུན་པ་མཐོང་ངོ་། །འདི་གཉིས་ནི་ངའི་ཉན་ཐོས་ཟུང་དང་། ཟུང་གི་མཆོག་དང་། ཟུང་བཟང་བོར་འགྱུར་ཏེ། གཅིག་ནི་རྫུ་འཕྲུལ་དང་ལྡན་པ་རྣམས་ཀྱི་མཆོག་ཏུ་འགྱུར་ལ། ཅིག་ཤོས་ནི་ཤེས་རབ་དང་ལྡན་པ་རྣམས་ཀྱི་མཆོག་ཏུ་འགྱུར་རོ། །དེ་ནས་དགེ་སློང་ཞིག་གིས་དེའི་ཚེ་ཚིགས་སུ་བཅད་པ་སྨྲས་པ། སྟོན་པ་དགོངས་ཡུལ་མཐའ་ཡས་པ། །སྐྱེས་བུའི་ དབང་པོ་མཁྱེན་མཐར་བྱོན། །བཅོམ་ལྡན་སྲིད་པའི་མཐར་མཛད་པས། །གྲོགས་པོ་ཉེ་རྒྱལ་པང་ནས་སྐྱེས། །འོད་མའི་ཚལ་དུ་མ་ཕྱིན་པར། །དེ་ལྟར་མཆི་བ་གཟིགས་གྱུར་ནས། །ཚོགས་མཆོག་དབུས་སུ་དེ་གཉིས་ནི། །འདི་གཉིས་ང་ཡི་ཉན་ཐོས་ཀྱི། །ཟུང་མཆོག་འགྱུར་ ཞེས་ངེས་བསྟན་ཏེ། །གཅིག་ནི་རྫུ་འཕྲུལ་ལྡན་པའི་མཆོག །ཅིག་ཤོས་ཤེས་རབ་ལྡན་པ་ཡི། །མཆོག་ཏུ་འགྱུར་བར་ལུང་བསྟན་མཛད། །དེ་ནས་ཀུན་དུ་རྒྱུ་ཉེ་རྒྱལ་དང་པང་ནས་སྐྱེས་གཉིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན། བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་ པར་སྤྱོད་པ་སྤྱད་པར་བགྱིའོ། །བཅོམ་ལྡན་འདས་ཀྱིས་དེ་གཉིས་ལ་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་ཞིང་དགེ་སློང་དག་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང་། དེ་དག་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་

  69. 35b

    ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ན་ལྷུང་བཟེད་དང་། བྱ་མ་བུམ་ཐོགས་པ་དང་། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་ བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་ སྙོམས་ལ་ཞུགས་པ་དང་། དེ་ན་རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་རབ་ཏུ་ཕྱུང་ཞིང་བསྙེན་པར་རྫོགས་ནས་རིང་པོ་མ་ལོན་པས་ཡི་མ་རངས་ཤིང་མངོན་པར་མི་དགའ་བ་དེ་དག་གིས་དགེ་སློང་དེ་དང་དེ་དག་མཐོང་ནས་ཅོ་འདྲི་ཞིང་ཚིགས་སུ་བཅད་པ་ སྨྲས་པ། སངས་རྒྱས་མ་ག་དྷཱ་དག་གི། །གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །དེས་དགེ་སློང་རྣམས་སྤ་གོང་ཞིང་མི་དགའ་བ་དང་མི་འཇིགས་པ་མེད་པར་གྱུར་ཏོ། །དེ་ནས་དགེ་སློང་རབ་ཏུ་མང་པོ་དག་རྒྱལ་ པོའི་ཁབ་ཏུ་བསོད་སྙོམས་ཀྱི་ཕྱིར་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་དྲོ་བསོད་སྙོམས་མི་ལེན་པས་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་པ་གཉིས་བཀྲུས་ཏེ་སྡུག་བསྔལ་ཞིང་མི་བདེ་བས་བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་ མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཅག་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་འཚལ། ལྷུང་བཟེད་དང་ཆོས་གོས་ཐོགས་ ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང་། དེ་ན་རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་རབ་ཏུ་ཕྱུང་ཞིང་བསྙེན་པར་རྫོགས་ནས་རིང་པོ་མ་ལགས་པས་ཡི་མ་རངས་ཤིང་མངོན་པར་མི་དགའ་བ་དེ་དག་གིས་དགེ་སློང་དེ་དང་དེ་དག་མཐོང་ནས་

  70. 36a

    ཅོ་འདྲི་ཞིང་ཚིགས་སུ་བཅད་པ། སངས་རྒྱས་མ་ག་དྷཱ་དག་གི། །གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །ཞེས་མཆི་ནས་དེས་བདག་ཅག་རྣམས་སྤ་གོང་ཞིང་མི་དགའ་བ་དང་། མི་ འཇིགས་པ་མ་མཆིས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོའི་ཁབ་ཀྱི་མི་དེ་སྐད་ཟེར་བ་རྣམས་ལ་འདི་སྐད་ཅེས། འདི་ལ་དཔའ་ཆེན་བདེ་གཤེགས་དག །དམ་པའི་ཆོས་ཀྱིས་ཁྲིད་མཛད་དེ། །དེ་དག་ཆོས་ཀྱིས་ཁྲིད་མཛད་ལ། ། མཁས་པ་སུ་ཞིག་མི་བཟོད་བྱེད། །ཅེས་བརྗོད་ན་རྒྱལ་པོའི་ཁབ་ཀྱི་མི་དེ་སྐད་ཟེར་བ་རྣམས་ཀྱི་རློམ་པ་ཙམ་མམ་སྤོབས་པ་ཙམ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་མེད་པར་འགྱུར་རོ། །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ རྒྱལ་པོའི་ཁབ་ཏུ་བསོད་སྙོམས་ལ་ཞུགས་པ་དང་། དེ་ན་རྒྱལ་པོའི་ཁབ་ཀྱི་མི་གང་དག་ཡང་དག་རྒྱལ་བ་ཅན་གྱི་མུ་སྟེགས་ཅན་གྱི་གནས་རབ་ཏུ་ཕྱུང་ཞིང་བསྙེན་པར་རྫོགས་ནས་རིང་པོ་མ་ལོན་པས་ཡི་མ་རངས་ཤིང་མངོན་པར་མི་དགའ་བ་དེ་དག་གིས་དགེ་སློང་དེ་དང་དེ་དག་མཐོང་ནས་ཅོ་འདྲི་ ཞིང་ཚིགས་སུ་བཅད་པ་སྨྲས་པ། སངས་རྒྱས་མ་ག་དྷཱ་དག་གི། །གྲོང་མཆོག་རྒྱལ་པོའི་ཁབ་གཤེགས་པས། །ཡང་དག་རྒྱལ་བའི་ཀུན་ཁྲིད་ན། །ཕྱིན་ཆད་ཅི་ཞིག་བཀྲི་བར་བྱ། །དེ་ནས་དགེ་སློང་ཞིག་གིས་དེའི་ཚེ་ཚིགས་སུ་བཅད་པ་སྨྲས་པ། འདི་ན་དཔའ་ཆེན་བདེ་གཤེགས་ དག །དམ་པའི་ཆོས་ཀྱིས་ཁྲིད་མཛད་དེ། །དེ་དག་ཆོས་ཀྱིས་ཁྲིད་མཛད་ལ། །མཁས་པ་སུ་ཞིག་བཟོད་མི་བྱེད། །དེ་སྐད་ཅེས་སྨྲས་པ་དང་། རྒྱལ་པོའི་ཁབ་ཀྱི་མི་དེ་སྐད་ཟེར་བ་རྣམས་ཀྱི་རློམ་པ་ཙམ་མམ་སྤོབས་པ་ཙམ་གང་ཡིན་པ་དེ་ཐམས་ཅད་ཀྱི་ཐམས་ཅད་དུ་མེད་པར་གྱུར་ ཏོ། །ཇི་ཙམ་དུས་གཞན་ཞིག་ན་བྲམ་ཟེ་གནས་ལེན་གྱི་བུ་དུས་ལ་བབ་ཅིང་དེའི་ཆུང་མ་ཡང་དུས་ལ་བབ། བྲམ་ཟེ་སྐར་རྒྱལ་ཡང་དུས་ལ་བབ། ཤཱ་རི་ཀཱ་ཡང་དུས་ལ་བབ་བོ། །བྲམ་ཟེའི་བུ་ཁྱེའུ་སྟོད་རིངས་ཀྱང་ལྷོ་ཕྱོགས་ནས་འཇིག་རྟེན་རྒྱང་འཕེན་བཟུང་ནས་གྲོང་ན་ལ་དར་ཕྱིན་པ་དང་།

  71. 36b

    དེ་སྒོ་བས་བཞིན་གྱི་གཟུགས་ལས་ངོ་ཤེས་ནས་སྨྲས་པ། ཤེས་ལྡན་ཁྱོད་སྟོད་རིངས་ཡིན་ནམ། ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །བྲམ་ཟེ་གནས་ལེན་གྱི་བུ་དེ་ག་རེ། དུས་ལ་བབ་བོ། །དེའི་ཆུང་མ་དེ་ག་རེ། དེ་ཡང་དུས་ལ་བབ་བོ། །བྲམ་ཟེ་སྐར་རྒྱལ་ག་རེ། དེ་ཡང་དུས་ ལ་བབ་བོ། །ཤཱ་རི་ཀཱ་ག་རེ། དེ་ཡང་དུས་ལ་བབ་བོ། །ཤཱ་རིའི་བུ་དེ་ག་རེ། རྒྱལ་པོའི་ཁབ་ཏུ་སྟོན་པ་ཡང་དག་རྒྱལ་བ་ཅན་ཞེས་བྱ་བ་བྱུང་ནས་རིང་པོ་མ་ལོན་པ་དེའི་གན་དུ་རབ་ཏུ་བྱུང་ངོ་། །འདི་ལྟ་སྟེ་རེ་ཞིག་རབ་ཏུ་འབྱུང་བར་བྱ་བ་དེ་ནི་བྲམ་ཟེས་བྱ་བ་ཡིན་ནོ། །དེ་མཐར་གྱིས་རྒྱལ་པོའི་ ཁབ་ཏུ་ཕྱིན་ནས་དེ་དེར་སོང་སྟེ་དྲིས་པ། སྟོན་པ་ཡང་དག་རྒྱལ་བ་ཅན་ག་རེ། དུས་ལ་བབ་བོ། །དེའི་མུ་སྟེགས་ཀྱི་གནས་ག་རེ། ཐམས་ཅད་དགེ་སྦྱོང་གཽ་ཏ་མའི་དྲུང་དུ་རབ་ཏུ་བྱུང་ངོ་། །དགེ་སྦྱོང་གཽ་ཏ་མ་ནི་འཁོར་ལོས་སྒྱུར་བའི་རྒྱལ་པོར་ལུང་བསྟན་པས་དེ་ཡང་དེའི་མདུན་ན་འདོན་དུ་འགྱུར་བས་ལེགས་སོ། །དེ་ནས་ཀུན་ དུ་རྒྱུ་སེན་རིངས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དང་ཐབས་ཅིག་ཕན་ཚུན་མངོན་དུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ བཅོམ་ལྡན་འདས་ལ་ཀུན་དུ་རྒྱུ་སེན་རིངས་ཀྱིས་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་བདག་ནི་ཐམས་ཅད་མི་བཟོད་དོ། །མེར་འཇུག་གི་བུ་ཁྱོད་ཀྱིས་བདག་ཐམས་ཅད་མི་བཟོད་པར་ལྟ་བ་གང་ཡིན་པའི་ལྟ་བ་དེ་ཡང་མི་བཟོད་དོ། །ཀྱེ་གཽ་ཏ་མ་བདག་ནི་ཐམས་ཅད་མི་བཟོད་པར་ལྟ་བ་གང་ ཡིན་པའི་ལྟ་བ་དེ་ཡང་མི་བཟོད་དོ། །མེར་འཇུག་གི་བུ་འོ་ན་ཁྱོད་ཀྱིས་དེ་ལྟར་ཤེས་ཤིང་དེ་ལྟར་མཐོང་ན་ལྟ་བ་དེ་ཡང་སྤོང་བ་དང་། འདོར་བ་དང་། མེད་པར་འགྱུར་ལ། ལྟ་བ་གཞན་ཡང་མཚམས་མི་སྦྱོར་བ་དང་། ཉེ་བར་མི་ལེན་པ་དང་། མི་འབྱུང་བར་འགྱུར་རོ། །ཀྱེ་གཽ་ཏ་མ་བདག་ གིས་དེ་ལྟར་ཤེས་ཤིང་དེ་ལྟར་མཐོང་ན་ལྟ་བ་དེ་ཡང་སྤོང་བ་དང་། འདོར་བ་དང་། མེད་པར་འགྱུར་ལ། ལྟ་བ་གཞན་ཡང་མཚམས་མི་སྦྱོར་བ་དང་། ཉེ་བར་མི་ལེན་པ་དང་། མི་འབྱུང་བར་འགྱུར་རོ། །མེར་འཇུག་གི་བུ་ཁྱོད་ནི་སྐྱེ་བོ་ཕལ་པོ་ཆེ་དང་ལྷན་ཅིག་མཚུངས་ཤིང་འདྲ་བར་འགྱུར་ཏེ། སྐྱེ་

  72. 37a

    བོ་ཕལ་པོ་ཆེ་ཡང་དེ་ལྟར་ལྟ་ཞིང་དེ་སྐད་སྨྲ་བས་ཁྱོད་ཀྱང་དེ་དང་འདྲ་བ་ཁོ་ནར་འགྱུར་རོ། །མེར་འཇུག་གི་བུ་འཇིག་རྟེན་ན་དགེ་སྦྱོང་ངམ་བྲམ་ཟེ་གང་ལ་ལ་དག་ལྟ་བ་འདི་ཡང་འདོར་ཞིང་ལྟ་བ་གཞན་ཡང་ཉེ་བར་མི་ལེན་པའི་དགེ་སྦྱོང་ངམ་བྲམ་ཟེ་དེ་དག་ནི་ཉུང་བ་བས་ཀྱང་ ཆེས་ཉུང་བ་ཞེས་བྱའོ། །མེར་འཇུག་གི་བུ་གསུམ་པོ་འདི་དག་ནི་ལྟ་བའི་གནས་ཡིན་ཏེ། གསུམ་གང་ཞེ་ན། མེར་འཇུག་གི་བུ་འདི་ལ་ལ་ལ་བདག་ནི་ཐམས་ཅད་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་དང་། གཞན་ཡང་འདི་ལ་ལ་ལ་བདག་ནི་ཐམས་ཅད་མི་བཟོད་དོ་ཞེས་དེ་ ལྟར་ལྟ་ཞིང་དེ་སྐད་སྨྲ་བ་དང་། གཞན་ཡང་འདི་ལ་ལ་ལ་བདག་ནི་ཁ་ཅིག་བཟོད་ལ་ཁ་ཅིག་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བའོ། །མེར་འཇུག་གི་བུ་དེ་ལ་བདག་ནི་ཐམས་ཅད་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་ཀུན་དུ་འདོད་ཆགས་པར་འགྱུར་གྱི། ཀུན་དུ་འདོད་ཆགས་ པ་མེད་པར་མི་འགྱུར་བ་དང་། ཀུན་དུ་ཞེ་སྡང་བར་འགྱུར་གྱི། ཀུན་དུ་ཞེ་སྡང་བ་མེད་པར་མི་འགྱུར་བ་དང་། ཀུན་དུ་གཏི་མུག་པར་འགྱུར་གྱི། ཀུན་དུ་གཏི་མུག་པ་མེད་པར་མི་འགྱུར་བ་དང་། ཀུན་དུ་སྩོགས་པར་འགྱུར་གྱི། ཀུན་དུ་སྩོགས་པ་མེད་པར་མི་འགྱུར་བ་དང་། ཀུན་དུ་སྦྱོར་བར་ འགྱུར་གྱི། ཀུན་དུ་སྦྱོར་བ་དང་བྲལ་བར་མི་འགྱུར་བ་དང་། ཀུན་ནས་ཉོན་མོངས་པར་འགྱུར་གྱི། རྣམ་པར་བྱང་བར་མི་འགྱུར་བ་དང་། བདག་ནི་ཐམས་ཅད་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་མངོན་པར་དགའ་བ་དང་། ཉེ་བར་ལེན་པ་དང་ལྷག་པར་ཆགས་པར་འགྱུར་བ་ཡིན་ ནོ། །མེར་འཇུག་གི་བུ་དེ་ལ་བདག་ནི་ཐམས་ཅད་མི་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་ཀུན་དུ་འདོད་ཆགས་པ་མེད་པར་འགྱུར་གྱི། ཀུན་དུ་འདོད་ཆགས་པར་མི་འགྱུར་བ་དང་། ཀུན་དུ་ཞེ་སྡང་བ་མེད་པར་འགྱུར་གྱི། ཀུན་དུ་ཞེ་སྡང་བར་མི་འགྱུར་བ་དང་། ཀུན་དུ་གཏི་མུག་པ་ མེད་པར་འགྱུར་གྱི། ཀུན་དུ་གཏི་མུག་པར་མི་འགྱུར་བ་དང་། ཀུན་དུ་སྩོགས་པ་མེད་པར་འགྱུར་གྱི། ཀུན་དུ་སྩོགས་པར་མི་འགྱུར་བ་དང་། ཀུན་དུ་སྦྱོར་བ་དང་བྲལ་བར་འགྱུར་གྱི། ཀུན་དུ་སྦྱོར་བར་མི་འགྱུར་བ་དང་། རྣམ་པར་བྱང་བར་འགྱུར་གྱི། ཀུན་ནས་ཉོན་མོངས་པར་མི་

  73. 37b

    འགྱུར་བ་དང་། བདག་ནི་ཐམས་ཅད་མི་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་མངོན་པར་མི་དགའ་བ་དང་། ཉེ་བར་ལེན་པ་མེད་པ་དང་། ལྷག་པར་ཆགས་པ་མེད་པར་འགྱུར་བ་ཡིན་ནོ། །མེར་འཇུག་གི་བུ་དེ་ལ་བདག་ནི་ཁ་ཅིག་བཟོད་ལ་ཁ་ཅིག་མི་བཟོད་དོ་ཞེས་ལྟ་བའི་ ལྟ་བ་གང་ཡིན་པ་འདི་ལ་ནི་རེ་ཞིག་བདག་ནི་ཁ་ཅིག་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་ཀུན་དུ་འདོད་ཆགས་པར་འགྱུར་གྱི། ཀུན་དུ་འདོད་ཆགས་པ་མེད་པར་མི་འགྱུར་བ་དང་། ཀུན་དུ་ཞེ་སྡང་བར་འགྱུར་གྱི། ཀུན་དུ་ཞེ་སྡང་བ་མེད་པར་མི་འགྱུར་བ་དང་། ཀུན་དུ་གཏི་ མུག་པར་འགྱུར་གྱི། ཀུན་དུ་གཏི་མུག་པ་མེད་པར་མི་འགྱུར་བ་དང་། ཀུན་དུ་སྩོགས་པར་འགྱུར་གྱི། ཀུན་དུ་སྩོགས་པ་མེད་པར་མི་འགྱུར་བ་དང་། ཀུན་དུ་སྦྱོར་བར་འགྱུར་གྱི། ཀུན་དུ་སྦྱོར་བ་དང་བྲལ་བར་མི་འགྱུར་བ་དང་། ཀུན་ནས་ཉོན་མོངས་པར་འགྱུར་གྱི། རྣམ་པར་བྱང་ བར་མི་འགྱུར་བ་དང་། བདག་ནི་ཁ་ཅིག་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་མངོན་པར་དགའ་བ་དང་། ཉེ་བར་ལེན་པ་དང་། ལྷག་པར་ཆགས་པར་འགྱུར་བ་ཡིན་ནོ། །བདག་ནི་ཁ་ཅིག་མི་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་ཀུན་དུ་འདོད་ཆགས་པ་མེད་ པར་འགྱུར་གྱི། ཀུན་དུ་འདོད་ཆགས་པར་མི་འགྱུར་བ་དང་། ཀུན་དུ་ཞེ་སྡང་བ་མེད་པར་འགྱུར་གྱི། ཀུན་དུ་ཞེ་སྡང་བར་མི་འགྱུར་བ་དང་། ཀུན་དུ་གཏི་མུག་པ་མེད་པར་འགྱུར་གྱི། ཀུན་དུ་གཏི་མུག་པར་མི་འགྱུར་བ་དང་། ཀུན་དུ་སྩོགས་པ་མེད་པར་འགྱུར་གྱི། ཀུན་དུ་སྩོགས་ པར་མི་འགྱུར་བ་དང་། ཀུན་དུ་སྦྱོར་བ་དང་བྲལ་བར་འགྱུར་གྱི། ཀུན་དུ་སྦྱོར་བར་མི་འགྱུར་བ་དང་། རྣམ་པར་བྱང་བར་འགྱུར་གྱི། ཀུན་ནས་ཉོན་མོངས་པར་མི་འགྱུར་བ་དང་། བདག་ནི་ཁ་ཅིག་མི་བཟོད་དོ་ཞེས་ལྟ་བའི་ལྟ་བ་གང་ཡིན་པ་འདི་ནི་མངོན་པར་མི་དགའ་བ་དང་། ཉེ་བར་ ལེན་པ་མེད་པ་དང་། ལྷག་པར་ཆགས་པ་མེད་པར་འགྱུར་བ་ཡིན་ནོ། །དེ་ལ་འཕགས་པ་ཉན་ཐོས་ཐོས་པ་དང་ལྡན་པ་ནི་འདི་ལྟར་སོ་སོར་རྟོག་པར་བྱེད་དེ། གལ་ཏེ་བདག་ཐམས་ཅད་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་ན་བདག་ནི་ཐམས་ཅད་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་

  74. 38a

    གང་ཡིན་པ་དང་། བདག་ནི་ཁ་ཅིག་བཟོད་ལ་ཁ་ཅིག་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་གང་ཡིན་པ་གཉིས་དང་བདག་ལྷན་ཅིག་རྩོད་པར་འགྱུར། འགྱེད་པར་འགྱུར་ཏེ། རྩོད་ན་འགྱེད་པར་འགྱུར། འགྱེད་ན་རྣམ་པར་འཚེ་བར་འགྱུར་རོ། །དེ་ལྟར་རྩོད་པ་དང་། འགྱེད་པ་དང་། རྣམ་པར་འཚེ་བ་ཡང་དག་པར་མཐོང་ནས་ལྟ་བ་འདིའང་དོར་ཞིང་ལྟ་བ་གཞན་ཉེ་བར་མི་བླང་སྟེ། དེ་ལྟར་ན་བདག་ལ་ལྟ་བ་དེ་ཡང་སྤོང་བ་དང་། འདོར་བ་དང་། མེད་པར་འགྱུར་ལ། ལྟ་བ་གཞན་ཡང་མཚམས་མི་སྦྱོར་བ་དང་། ཉེ་བར་མི་ལེན་པ་དང་། མི་འབྱུང་ བར་འགྱུར་རོ་སྙམ་མོ། །དེ་ལ་འཕགས་པ་ཉན་ཐོས་ཐོས་པ་དང་ལྡན་པ་ནི་འདི་ལྟར་སོ་སོར་རྟོག་པར་བྱེད་དེ། གལ་ཏེ་བདག་ཐམས་ཅད་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་ན་དེ་བདག་ནི་ཐམས་ཅད་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་གང་ཡིན་པ་དང་། བདག་ནི་ཁ་ཅིག་བཟོད་ལ་ ཁ་ཅིག་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་གང་ཡིན་པ་གཉིས་དང་བདག་ལྷན་ཅིག་རྩོད་པར་འགྱུར། འགྱེད་པར་འགྱུར་ཏེ། རྩོད་ན་འགྱེད་པར་འགྱུར། འགྱེད་ན་རྣམ་པར་འཚེ་བར་འགྱུར་རོ། །དེ་ལྟར་རྩོད་པ་དང་། འགྱེད་པ་དང་། རྣམ་པར་འཚེ་བ་ཡང་དག་པར་མཐོང་ནས་ ལྟ་བ་འདི་ཡང་དོར་ཞིང་ལྟ་བ་གཞན་ཉེ་བར་མི་བླང་སྟེ། དེ་ལྟར་ན་བདག་ལ་ལྟ་བ་དེ་ཡང་སྤོང་བ་དང་། འདོར་བ་དང་། མེད་པར་འགྱུར་ལ། ལྟ་བ་གཞན་ཡང་མཚམས་མི་སྦྱོར་བ་དང་། ཉེ་བར་མི་ལེན་པ་དང་། མི་འབྱུང་བར་འགྱུར་རོ་སྙམ་མོ། །དེ་ལ་འཕགས་པ་ཉན་ཐོས་ཐོས་པ་དང་ ལྡན་པ་ནི་འདི་ལྟར་སོ་སོར་རྟོག་པར་བྱེད་དེ་གལ་ཏེ་བདག་ཁ་ཅིག་བཟོད་ལ་ཁ་ཅིག་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་ན་བདག་ནི་ཐམས་ཅད་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་གང་ཡིན་པ་དང་། བདག་ནི་ཁ་ཅིག་བཟོད་ལ་ཁ་ཅིག་མི་བཟོད་དོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་ གང་ཡིན་པ་གཉིས་དང་བདག་ལྷན་ཅིག་རྩོད་པར་འགྱུར། འགྱེད་པར་འགྱུར་ཏེ། རྩོད་ན་འགྱེད་པར་འགྱུར། འགྱེད་ན་རྣམ་པར་འཚེ་བར་འགྱུར་རོ། །དེ་ལྟར་རྩོད་པ་དང་། འགྱེད་པ་དང་། རྣམ་པར་འཚེ་བ་ཡང་དག་པར་མཐོང་ནས་ལྟ་བ་འདི་ཡང་དོར་ཞིང་ལྟ་བ་གཞན་

  75. 38b

    ཡང་ཉེ་བར་མི་བླང་སྟེ། དེ་ལྟར་ན་བདག་ལ་ལྟ་བ་དེ་ཡང་སྤོང་བ་དང་། འདོར་བ་དང་། མེད་པར་འགྱུར་ལ། ལྟ་བ་གཞན་ཡང་མཚམས་མི་སྦྱོར་བ་དང་། ཉེ་བར་མི་ལེན་པ་དང་། མི་འབྱུང་བར་འགྱུར་རོ་སྙམ་མོ། །མེར་འཇུག་གི་བུ་ལུས་འདི་ནི་གཟུགས་ཅན་རགས་པ་འབྱུང་ བ་ཆེན་པོ་བཞི་ལས་གྱུར་པ་ཡིན་ཏེ། དེ་ལ་འཕགས་པའི་ཉན་ཐོས་ཀྱིས་ཡང་དང་ཡང་དུ་འབྱུང་བ་དང་འཇིག་པ་རྗེས་སུ་བལྟ་ཞིང་གནས་པར་བྱའོ། །དེ་ལ་འཕགས་པའི་ཉན་ཐོས་ཡང་དང་ཡང་དུ་འབྱུང་བ་དང་འཇིག་པར་རྗེས་སུ་ལྟ་ཞིང་གནས་ན། དེ་ལ་ལུས་ལ་འདུན་པ་དང་། ལུས་ལ་ཆགས་པ་དང་། ལུས་ལ་དགའ་བ་དང་། ལུས་ལ་ཞེན་པ་དང་། ལུས་ལ་ཆུམས་པ་དང་། ལུས་ལ་ལྷག་པར་ཆགས་པ་འབྱུང་བ་གང་ཡིན་པ་དེས་དེའི་སེམས་ཡོངས་སུ་གཏུགས་ཏེ་མི་གནས་སོ། །མེར་འཇུག་གི་བུ་གསུམ་པོ་འདི་དག་ནི་ཚོར་བ་ཡིན་ཏེ། གསུམ་གང་ ཞེ་ན། བདེ་བ་དང་། སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའོ། །མེར་འཇུག་གི་བུ་གང་གི་ཚེ་འཕགས་པའི་ཉན་ཐོས་བདེ་བའི་ཚོར་བ་མྱོང་བར་བྱེད་པ་དེའི་ཚེ་ན་དེ་ལ་སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་གཉིས་ འགག་པར་འགྱུར་ཏེ། དེའི་ཚེ་ན་འཕགས་པའི་ཉན་ཐོས་བདེ་བའི་ཚོར་བ་འབའ་ཞིག་མྱོང་བར་བྱེད་དེ། བདེ་བའི་ཚོར་བ་ཡང་མི་རྟག་པ་དང་། སྡུག་བསྔལ་བ་དང་། འགོག་པའི་ཆོས་ཅན་ཡིན་ནོ། །གང་གི་ཚེ་འཕགས་པའི་ཉན་ཐོས་སྡུག་བསྔལ་གྱི་ཚོར་བ་མྱོང་བར་བྱེད་པ་ དེའི་ཚེ་ན་དེ་ལ་བདེ་བ་དང་། སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་གཉིས་འགག་པར་འགྱུར་ཏེ། དེའི་ཚེ་ན་འཕགས་པའི་ཉན་ཐོས་སྡུག་བསྔལ་གྱི་ཚོར་བ་འབའ་ཞིག་མྱོང་བར་བྱེད་དེ། སྡུག་བསྔལ་གྱི་ཚོར་བ་ཡང་མི་རྟག་པ་དང་། སྡུག་བསྔལ་བ་དང་། འགོག་ པས་ཆོས་ཅན་ཡིན་ནོ། །གང་གི་ཚེ་འཕགས་པའི་ཉན་ཐོས་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་མྱོང་བར་བྱེད་པ་དེའི་ཚེ་ན་དེ་ལ་བདེ་བ་དང་སྡུག་བསྔལ་གྱི་ཚོར་བ་གཉིས་འགག་པར་འགྱུར་ཏེ། དེའི་ཚེ་ན་འཕགས་པའི་ཉན་ཐོས་སྡུག་བསྔལ་ཡང་མ་ཡིན་བདེ་བ་

  76. 39a

    ཡང་མ་ཡིན་པའི་ཚོར་བ་འབའ་ཞིག་མྱོང་བར་བྱེད་དེ། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ཡང་མི་རྟག་པ་དང་། སྡུག་བསྔལ་བ་དང་། འགོག་པའི་ཆོས་ཅན་ནོ། །དེ་འདི་སྙམ་དུ་སེམས་ཏེ་ཚོར་བ་འདི་དག་གི་གཞི་ནི་གང་ཡིན། ཀུན་འབྱུང་ བ་ནི་གང་ཡིན། རིགས་མཐུན་པ་ནི་གང་ཡིན། རབ་ཏུ་སྐྱེད་པ་ནི་གང་ཡིན་སྙམ་ན། དེ་འདི་སྙམ་དུ་སེམས་ཏེ། ཚོར་བ་འདི་དག་གི་གཞི་ནི་རེག་པ་ཡིན། ཀུན་འབྱུང་བ་ནི་རེག་པ་ཡིན། རིགས་མཐུན་པ་ནི་རེག་པ་ཡིན། རབ་ཏུ་སྐྱེད་པ་ནི་རེག་པ་ཡིན་ཏེ། རེག་པ་ དེ་དང་དེ་ཀུན་འབྱུང་བ་ལས་ཚོར་བ་དེ་དང་དེ་དག་ཀུན་འབྱུང་ངོ་། །རེག་པ་དེ་དང་དེ་འགགས་པ་ལས་ཚོར་བ་དེ་དང་དེ་དག་འགག་པར་འགྱུར། ཉེ་བར་ཞི་བར་འགྱུར། བསིལ་བར་འགྱུར། ནུབ་པར་འགྱུར་རོ་སྙམ་མོ། །དེ་བདེ་བའམ། སྡུག་བསྔལ་བའམ། སྡུག་བསྔལ་ཡང་ མ་ཡིན་བདེ་བ་ཡང་མ་ཡིན་པའི་ཚོར་བ་གང་ཡང་རུང་བ་མྱོང་བར་བྱེད་པ་ན་དེས་དེ་དག་གི་ཀུན་འབྱུང་བ་དང་། ནུབ་པ་དང་། རོ་མྱང་བ་དང་། ཉེས་དམིགས་དང་། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །དེ་ཚོར་བ་དེ་དག་གི་ཀུན་འབྱུང་བ་དང་། ནུབ་པ་ དང་། རོ་མྱང་བ་དང་། ཉེས་དམིགས་དང་། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་ན་ཚོར་བ་བྱུང་ངོ་ཅོག་ལ་མི་རྟག་པར་རྗེས་སུ་ལྟ་ཞིང་གནས། ཟད་པར་རྗེས་སུ་ལྟ་བ་དང་། འཇིག་པར་རྗེས་སུ་ལྟ་བ་དང་། འདོད་ཆགས་དང་བྲལ་བར་རྗེས་སུ་ལྟ་བ་དང་། འགོག་ པར་རྗེས་སུ་ལྟ་བ་དང་། རབ་ཏུ་སྤོང་བར་རྗེས་སུ་ལྟ་ཞིང་གནས་སོ། །དེ་ཚོར་བ་བྱུང་ངོ་ཅོག་ལ་མི་རྟག་པར་རྗེས་སུ་ལྟ་ཞིང་གནས་པ་དང་། ཟད་པར་རྗེས་སུ་ལྟ་བ་དང་། འཇིག་པར་རྗེས་སུ་ལྟ་བ་དང་། འདོད་ཆགས་དང་བྲལ་བར་རྗེས་སུ་ལྟ་བ་དང་། འགོག་པར་རྗེས་སུ་ལྟ་བ་དང་། རབ་ཏུ་སྤོང་བར་རྗེས་སུ་ལྟ་ཞིང་གནས་པ་ན་འཇིག་རྟེན་ལ་ཅུང་ཟད་ཀྱང་ཉེ་བར་ལེན་པར་མི་བྱེད་དོ། །ཉེ་བར་ལེན་པར་མི་བྱེད་ན་ཡོངས་སུ་གདུང་བར་མི་འགྱུར་རོ། །ཡོངས་སུ་མི་གདུང་ན་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་

  77. 39b

    མི་ཤེས་སོ་ཞེས་གོ་བར་བྱེད་ཅིང་བདག་ཉིད་ཁོ་ནས་ཡོངས་སུ་མྱ་ངན་ལས་འདའ་བར་བྱེད་དོ། །དེ་ལུས་ཀྱི་མཐའ་པའི་ཚོར་བ་མྱོང་བར་བྱེད་པ་ན་ལུས་ཀྱི་མཐའ་པའི་ཚོར་བ་མྱོང་ངོ་སྙམ་དུ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །སྲོག་གི་མཐའ་པའི་ཚོར་བ་མྱོང་བར་བྱེད་པ་ན་སྲོག་གི་ མཐའ་པའི་ཚོར་བ་མྱོང་ངོ་སྙམ་དུ་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ལུས་ཞིག་པའི་འོག་ཏུ་སྲོག་ཡོངས་སུ་གཏུགས་པས་འདི་ཉིད་དུ་དེའི་ཚོར་བ་ཐམས་ཅད་མ་ལུས་པར་འགག་པར་འགྱུར། མ་ལུས་པར་ནུབ་པར་འགྱུར། མ་ལུས་པར་ཟད་པར་འགྱུར། མ་ལུས་པར་ཡོངས་ སུ་གཏུགས་པར་འགྱུར་རོ། །དེ་འདི་སྙམ་དུ་སེམས་ཏེ། བདག་བདེ་བའི་ཚོར་བ་མྱོང་བར་བྱེད་པ་ན་ལུས་ཞིག་པར་གྱུར་ན་དེ་ཉིད་སྡུག་བསྔལ་གྱི་མཐའ་ཡིན་ནོ། །བདག་སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་མྱོང་བར་བྱེད་པ་ན་ལུས་ཞིག་པར་གྱུར་ ན་དེ་ཉིད་སྡུག་བསྔལ་གྱི་མཐའ་ཡིན་ནོ་སྙམ་མོ། །དེ་བདེ་བའི་ཚོར་བ་མྱོང་བར་བྱེད་པ་ན་མི་ལྡན་པ་མྱོང་བར་བྱེད་ཀྱི་ལྡན་པ་ནི་མ་ཡིན་ནོ། །དེ་སྡུག་བསྔལ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་མྱོང་བར་བྱེད་པ་ན་མི་ལྡན་པ་མྱོང་བར་བྱེད་ཀྱི་ལྡན་པ་ནི་མ་ཡིན་ནོ། ། ཇི་ཞིག་དང་མི་ལྡན་ཞེ་ན། འདོད་ཆགས་དང་། ཞེ་སྡང་དང་། གཏི་མུག་དང་མི་ལྡན་པ་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་དང་མི་ལྡན་པ་དང་། སྡུག་བསྔལ་ དང་མི་ལྡན་པ་རང་སྨྲའོ། །དེའི་ཚེ་ན་ཚེ་དང་ལྡན་པ་ཤཱ་རིའི་བུ་བསྙེན་པར་རྫོགས་ནས་ཟླ་བ་ཕྱེད་ལོན་པ། བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ་བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། བཅོམ་ལྡན་འདས་ཆོས་དེ་དང་ དེ་དག་གི་སྤོང་བ་ཉིད་ཀྱི་བསྔགས་པ་བརྗོད་པ་མཛད་ཅིང་འདོད་ཆགས་དང་བྲལ་བ་ཉིད་དང་། འགོག་པ་ཉིད་དང་། རབ་ཏུ་སྤོང་བ་ཉིད་ཀྱི་བསྔགས་པ་བརྗོད་པར་མཛད་ཀྱིས། བདག་གིས་ཀྱང་ཆོས་དེ་དང་དེ་དག་ལ་སྤོང་བ་རྗེས་སུ་ལྟ་ཞིང་གནས་པར་བྱ། འདོད་ཆགས་དང་བྲལ་བར་རྗེས་སུ་ལྟ་བ་དང་། འགོག་

  78. 40a

    པར་རྗེས་སུ་ལྟ་བ་དང་། རབ་ཏུ་སྤོང་བར་རྗེས་སུ་ལྟ་ཞིང་གནས་པར་བྱའོ་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུ་ཆོས་དེ་དང་དེ་དག་ལ་སྤོང་བར་རྗེས་སུ་ལྟ་ཞིང་གནས། འདོད་ཆགས་དང་བྲལ་བར་རྗེས་སུ་ལྟ་བ་དང་། འགོག་པར་རྗེས་སུ་ལྟ་བ་དང་། རབ་ཏུ་སྤོང་བར་ རྗེས་སུ་ལྟ་ཞིང་གནས་སོ། །དེ་ནས་ཚེ་དང་ལྡན་པ་ཤཱ་རིའི་བུ་ཆོས་དེ་དང་དེ་དག་ལ་སྤོང་བར་རྗེས་སུ་ལྟ་ཞིང་གནས་པ་དང་། འདོད་ཆགས་དང་བྲལ་བར་རྗེས་སུ་ལྟ་བ་དང་། འགོག་པར་རྗེས་སུ་ལྟ་བ་དང་། རབ་ཏུ་སྤོང་བར་རྗེས་སུ་ལྟ་ཞིང་གནས་པ་ན་ལེན་པ་མེད་པར་ཟག་པ་རྣམས་ལས་སེམས་ རྣམ་པར་གྲོལ་ལོ། །ཀུན་དུ་རྒྱུ་སེན་རིངས་ཀྱང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཀུན་དུ་རྒྱུ་སེན་རིངས་ཆོས་མཐོང་བ་དང་། ཆོས་ཐོས་པ་དང་། ཆོས་རིག་པ་དང་། ཆོས་ཀྱི་གཏིང་སླེབ་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་ རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པའི་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་ སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན། བཅོམ་ལྡན་འདས་ཀྱི་སྤྱན་སྔར་བདག་ཚངས་པར་སྤྱོད་པ་སྤྱད་པར་བགྱིའོ། །བཅོམ་ལྡན་འདས་ཀྱིས་དེ་ལ་དགེ་སློང་ཚུར་ ཤོག་ཅེས་བྱ་བས་རབ་ཏུ་ཕྱུང་ཞིང་དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང་། དེ་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་ཏེ་སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ན་ལྷུང་བཟེད་དང་བྱ་མ་བུམ་ཐོགས་ཤིང་དགེ་ སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་

  79. 40b

    བཀབ་པར་གྱུར། །དེ་དེ་ལྟར་རབ་ཏུ་བྱུང་ནས་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་བཏང་བར་གནས་སོ། །གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་བཏང་བར་གནས་པ་ན་རིགས་ཀྱི་བུ་གང་དག་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་ འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་ཚེ་དང་ལྡན་པ་དེ་ཀུན་ཤེས་པ་དང་ལྡན་པའི་དགྲ་བཅོམ་པ་སེམས་ཤིན་ཏུ་རྣམ་པར་གྲོལ་བར་གྱུར་ཏོ།། །།བར་སྡོམ་ལ། བདག་ནི་ཐམས་ཅད་མི་བཟོད་དང་། །འོ་ན་ཁྱོད་ཀྱིས་དེ་ལྟར་ཤེས། །ཁྱོད་ནི་སྐྱེ་བོ་ཕལ་ཆེན་མཚུངས། ། འཇིག་རྟེན་དགེ་སྦྱོང་བྲམ་ཟེ་དང་། །ལྟ་བའི་གནས་ནི་གསུམ་པོ་དང་། །འཕགས་པའི་ཉན་ཐོས་ཐོས་ལྡན་དང་། །ལུས་དང་ཚོར་དང་ཚོར་གཞི་འགག །ཀུན་འབྱུང་ལ་སོགས་ཤེས་པ་དང་། །མྱ་ངན་འདས་དང་ལུས་སྲོག་མཐའ། །ལུས་ཞིག་སྲོག་ནི་ཡོངས་གཏུགས་དང་། ། སྡུག་བསྔལ་མཐའ་དང་མི་ལྡན་དང་། །ཤཱ་རིའི་བུ་ནི་ཐ་མ་ཡིན། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་ནང་ན་འདི་ལྟ་སྟེ། དགེ་སློང་སྟོད་རིངས་མཆོག་ཡིན་ནོ། །དགེ་ སློང་རྣམས་ཐེ་ཙོམ་སྐྱེས་ནས་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཤཱ་རིའི་བུས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཤེས་རབ་རྣོ་བ་དང་། ཤེས་རབ་ཟབ་པ་དང་། ངེས་པར་འབྱེད་པའི་ཤེས་རབ་ཅན་དུ་གྱུར། བཅོམ་ལྡན་ འདས་ཀྱིས་བཀའ་སྩལ་པ། དགེ་སློང་དག་ཤཱ་རིའི་བུ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། ཤཱ་རིའི་བུ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་

  80. 41a

    སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་ བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་ རི་བྲགས་ཤིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེའི་བུ་བྱུང་ནས་དེས་དེའི་མིང་ཞིབ་མ་ཞེས་བྱ་བར་ བཏགས་སོ། །ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་མོ་ཞིག་བྱུང་ནས་དེས་དེའི་མིང་ཞིབ་མ་མོ་ཞེས་བྱ་བར་བཏགས་སོ། །ཇི་ཙམ་དུས་གཞན་ཞིག་ན་དེ་གཉིས་ཀྱི་ཕ་བྲམ་ཟེ་དེ་ཆུང་མ་དང་བཅས་ཏེ་དུས་ལ་བབ་བོ། །བྲམ་ཟེའི་ཁྱེའུ་ཞིབ་མ་ དེ་ཡང་དབེན་པ་ལ་དགའ་བའི་ཕྱིར་སྲིང་མོ་ཁྲིད་ནས་དགོན་པའི་ནགས་སུ་སོང་སྟེ་འདུག་གོ། །གང་གི་ཚེ་བུ་མོ་ཞིབ་མ་མོ་ཆེན་མོར་གྱུར་པ་དེའི་ཚེ་ན་ཉོན་མོངས་པ་དག་གིས་གནོད་པར་གྱུར་ནས་དེས་སྨྲས་པ། མིང་པོ་བདག་ནི་དགོན་པའི་སྨན་དག་གིས་འཚོ་བར་མི་ནུས་ཀྱིས་བདག་ཅག་གྲོང་ མཐར་འདོང་ངོ་། །དེས་སྲིང་མོ་ཁྲིད་དེ་གྲོང་མཐར་སོང་ནས་དེ་གཉིས་ཅིག་ཅར་ཁྱིམ་གཅིག་ཏུ་སློང་མོ་ལ་ཞུགས་པ་དང་བྲམ་ཟེ་ནང་ན་འདུག་པས་བུད་མེད་དང་སྐྱེས་པའི་ཚིག་བརྗོད་པ་ཐོས་སོ། །ཐོས་ནས་དེ་ཕྱིར་བྱུང་སྟེ་སྨྲས་པ། ཅི་དྲང་སྲོང་ཡང་ཆུང་མ་དང་ལྷན་ཅིག་ཡོངས་སུ་རྒྱུའམ། དེས་སྨྲས་པ། འདི་ནི་ཁོ་བོའི་ཆུང་མ་མ་ཡིན་གྱི། འདི་ནི་ཁོ་བོའི་སྲིང་མོ་ཡིན་ནོ། །ཅི་འགའ་ཞིག་ལ་བྱིན་ནམ། དེས་སྨྲས་པ། མ་བྱིན་ནོ། །གལ་ཏེ་མ་བྱིན་ན་འདི་ཁོ་བོའི་ཆུང་མར་བྱིན་ཅིག །དེས་སྨྲས་པ། འདིས་ནི་སྡིག་པ་ཅན་དམ་པ་མ་ཡིན་པའི་ཆོས་དེ་སྤངས་སོ། །ཞིབ་

  81. 41b

    མ་མོས་སྨྲས་པ། མིང་པོ་བདག་ནི་དགོན་པའི་སྨན་དག་གིས་འཚོ་བར་མི་ནུས་ཀྱིས་བདག་ཅག་གྲོང་མཐར་འདོང་ངོ་ཞེས་སྨྲས་པ། དེ་ཇི་སྙམ་དུ་སེམས། འདི་ལྟར་བདག་ནི་ཉོན་མོངས་པ་དག་གིས་གནོད་པར་གྱུར་ཏོ། །གལ་ཏེ་དེ་ལྟ་ན་ཁྱོད་ཉིད་ཤེས་སོ། །བྲམ་ཟེ་དེས་དེ་དཔལ་གྱི་འབྱོར་ པ་ཆེན་པོས་བག་མར་བླངས་སོ། །ཞིབ་མ་མོས་སྨྲས་པ་མིང་པོ་ཚུར་ཤོག་དང་ལྷན་ཅིག་འཁོད་དོ། །དེས་སྨྲས་པ། ཁོ་བོ་ནི་འདོད་པ་དག་དོན་དུ་མི་གཉེར་བས་ཁོ་བོ་དགོན་པར་འགྲོའོ། །མིང་པོ་གལ་ཏེ་དེ་ལྟ་ན་ཇི་སྟེ་ཁྱོད་ཀྱིས་ཡོན་ཏན་གྱི་ཚོགས་ཆུང་ཟད་ཐོབ་ན་བདག་ལ་རྗོད་ཅིག །ཞིབ་ མ་མཐའ་གཅིག་ཏུ་སོང་སྟེ་མཁན་པོ་མེད་པ་དང་སློབ་དཔོན་མེད་པར་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་བཅུ་རྩ་བདུན་བསྐྱེད་ནས་རང་བྱང་ཆུབ་མངོན་སུམ་དུ་བྱས་སོ། །དེས་བསམས་པ། བདག་གིས་སྲིང་མོ་དེ་ལ་ཁས་བླངས་པས་སོང་སྟེ་ཉེ་བར་བསྟན་པར་བྱའོ་སྙམ་མོ། །བདག་ ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ཚིག་གིས་མི་སྟོན་པས་དེ་དེ་ལ་སྙིང་བརྩེ་བའི་ཕྱིར་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་ བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཞིབ་མ་མོས་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། ། འཕགས་པ་ཁྱོད་ནི་བསོད་སྙོམས་བཞེས་པ་ལགས་ལ། བདག་ནི་བསོད་ནམས་འཚལ་བ་ལགས་པས་འདི་ཉིད་དུ་བཞུགས་ཤིག་དང་། བདག་གིས་ཁྱོད་ལ་བསོད་སྙོམས་ཀྱི་མཁོ་བ་བསྟབ་པར་བགྱིའོ། །སྲིང་མོ་ཇེ་ཁྱིམ་ཐབ་ལ་དྲིས་ཤིག །དེ་ཁྱིམ་ཐབ་ཀྱི་གན་དུ་སོང་སྟེ་སྨྲས་པ། རྗེའི་སྲས་བདག་གི་མིང་པོ་རབ་ཏུ་བྱུང་བ་བརྟུལ་ཞུགས་གྲུབ་པ་བདག་ཉིད་ཆེན་པོར་གྱུར་གྱིས་གནང་བར་མཛོད་ཅིག་དང་། བདག་གིས་དེ་ལ་བསོད་སྙོམས་ཀྱི་མཁོ་བ་བསྟབ་པར་བགྱིའོ། །དེས་སྨྲས་པ། གལ་ཏེ་རབ་ཏུ་མ་བྱུང་ན་ཡང་མི་འདོད་བཞིན་དུ་སྦྱིན་པར་བྱ་བ་ཡིན་ན། རབ་ཏུ་བྱུང་བ་

  82. 42a

    བརྟུལ་ཞུགས་གྲུབ་པ་བདག་ཉིད་ཆེན་པོར་གྱུར་ན་ལྟ་སྨོས་ཀྱང་ཅི་དགོས་ཀྱིས་སོང་ལ་ཅི་བདེར་བསོད་སྙོམས་ཀྱི་མཁོ་བ་སྟོབས་ཤིག །དེས་རང་སངས་རྒྱས་དེ་ལ་ཟླ་བ་གསུམ་དུ་བསོད་སྙོམས་ཀྱི་མཁོ་བ་བསྟབས་ནས་རས་ཡུག་ཆེན་ཆེན་པོ་ལ་འོས་པ་བསྐོན་ཏེ་ཁབ་དང་། གྲི་དང་། སྐུད་པ་ཡང་ཕུལ་ལོ། །དེས་རས་ཡུག་ཆེན་དང་། གྲི་དང་། ཁབ་དང་། སྐུད་པ་དེ་བླངས་ཏེ། དེ་ཉིད་ཀྱི་མདུན་དུ་དྲ་བར་བརྩམས་པ་དང་གྲི་དེ་རྣོ་བ་རྣོ་བར་གཅོད་ནས་ཞིབ་མ་མོས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། ཇི་ལྟར་གྲི་འདི་རྣོ་བ་རྣོ་བར་གཅོད་ པ་དེ་ལྟར་བདག་ཀྱང་དགེ་བའི་རྩ་བ་འདིས་ཤེས་རབ་རྣོ་བར་གྱུར་ཅིག་ཅེས་བཏབ་བོ། །རང་སངས་རྒྱས་དེས་ཁབ་ཀྱིས་དབུག་པར་བརྩམས་པ་དང་ཁབ་དེ་ཟབ་མོ་ཟབ་མོར་འབིགས་ནས་ཞིབ་མ་མོ་དེས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། ཇི་ལྟར་ཁབ་འདི་ཟབ་ མོ་ཟབ་མོར་འབིགས་པ་དེ་ལྟར་བདག་ཀྱང་དགེ་བའི་རྩ་བ་འདིས་ཤེས་རབ་ཟབ་མོར་གྱུར་ཅིག་ཅེས་བཏབ་བོ། །རང་སངས་རྒྱས་དེས་སྐུད་པས་དྲུབ་པར་བརྩམས་པ་དང་སྐུད་པ་དེ་ཐལ་བྱུང་ཐལ་བྱུང་དུ་འགྲོ་ནས་ཞིབ་མ་མོ་དེས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། ཇི་ལྟར་ སྐུད་པ་འདི་ཐལ་བྱུང་ཐལ་བྱུང་དུ་འགྲོ་བ་དེ་ལྟར་བདག་ཀྱང་དགེ་བའི་རྩ་བ་འདིས་ངེས་པར་འབྱེད་པའི་ཤེས་རབ་ཅན་དུ་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་བྲམ་ཟེའི་བུ་མོ་ཞིབ་མ་མོ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེས་རང་སངས་རྒྱས་ལ་ མཆོད་པ་བྱས་ནས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ད་ལྟར་ཤེས་རབ་རྣོ་བ་དང་། ཤེས་རབ་ཟབ་པ་དང་། ངེས་པར་འབྱེད་པའི་ཤེས་རབ་ཅན་དུ་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་

  83. 42b

    བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཡང་དགེ་སློང་རྣམས་ཐེ་ཙོམ་སྐྱེས་ནས་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཤཱ་རིའི་བུས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཁྱིམ་ཧ་ཅང་ཕྱུག་ པར་ཡང་མ་སྐྱེས། ཁྱིམ་ཧ་ཅང་དབུལ་བར་ཡང་མ་སྐྱེས། ཁྱིམ་འབྲིང་པོར་སྐྱེས་ཤིང་རབ་ཏུ་འབྱུང་བ་མང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཤཱ་རིའི་བུ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་ པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། ཤཱ་རིའི་བུ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་རྒྱལ་པོ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་ པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་བྱུང་ནས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དེས་ཕ་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་པ་མཐོང་ནས་དེས་བསམས་པ། བདག་ཀྱང་ཡབ་འདས་ནས་རྒྱལ་པོར་འགྱུར་ལ། བདག་གིས་ཀྱང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ན་སེམས་ཅན་དམྱལ་བར་འགྲོ་བར་འགྱུར་རོ་སྙམ་ནས། དེ་རྒྱལ་པོའི་གན་དུ་སོང་སྟེ་ཕྱིན་ནས་སྨྲས་པ། ཡབ་གནང་བར་མཛོད་ཅིག་དང་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངོ་། །རྒྱལ་པོས་

  84. 43a

    སྨྲས་པ། བུ་གང་གི་དོན་དུ་མཆོད་སྦྱིན་སྦྱིན་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་རྒྱལ་སྲིད་དེ་ཁྱོད་ཀྱི་ལག་མཐིལ་དུ་འོངས་ཤིང་གླང་པོ་ཆེས་འགྲོ་བའི་རིགས་སུ་སྐྱེས་ན་ཅིའི་ཕྱིར་རབ་ཏུ་འབྱུང་ཞེས་སྤྱོས་ཏེ་དེ་ཕས་རབ་ཏུ་འབྱུང་ བར་མ་སྟེར་ཏོ། །དེ་དུས་གཞན་ཞིག་ན་གླང་པོ་ཆེའི་གཤུལ་དུ་ཞོན་ཏེ་ཕྱིར་བྱུང་བ་དང་། དེས་མི་དབུལ་པོ་ཞིག་ཁར་བ་དང་སློང་ཕོར་ཆག་པ་ཐོགས་ཏེ་སློང་མོ་ལ་རྒྱུ་བ་མཐོང་ངོ་། །མཐོང་ནས་ཀྱང་རྒྱལ་བུ་དེ་དེའི་གན་དུ་སོང་སྟེ་སྨྲས་པ། ཀྭའེ་ནང་རྗེ་ཁོ་བོ་ནི་འདི་ལྟ་བུའི་ཁྱིམ་དུ་ སྐྱེས་པ་དེས་རབ་ཏུ་འབྱུང་བ་མ་ཐོབ་ན་ཁྱོད་ཅིའི་ཕྱིར་རབ་ཏུ་མི་འབྱུང་། དེས་སྨྲས་པ། རྒྱལ་པོའི་སྲས་བདག་ལ་ལྷུང་བཟེད་མ་མཆིས་ཤིང་ཆོས་གོས་མ་མཆིས་ན་ཇི་ལྟར་རབ་ཏུ་འབྱུང་བར་བགྱི། རྒྱལ་བུས་སྨྲས་པ། བཞིན་བཟངས་ཚུར་ཤོག་ངས་ཁྱོད་ལ་ལྷུང་བཟེད་དང་ ཆོས་གོས་སྦྱིན་པར་བྱའོ་ཞེས་རྒྱལ་བུ་དེས་དེ་ཁྲིད་དེ་སོང་ནས་བསྟི་གནས་ཤིག་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ཞིག་འདུག་པ་དེའི་གན་དུ་སོང་སྟེ་ཕྱིན་ནས་གླང་པོ་ཆེའི་གཤུལ་ནས་བབས་ཏེ་དུལ་བ་དང་བཅས་པས་སྨྲས་པ། ཤེས་ལྡན་རིགས་ཀྱི་བུ་འདི་ཁྱོད་ལས་ རབ་ཏུ་འབྱུང་བར་འདོད་ཀྱིས། འདི་རབ་ཏུ་ཕྱུང་ཤིག་དང་བདག་གིས་འདི་ལ་ལྷུང་བཟེད་དང་ཆོས་གོས་སྦྱིན་པར་བྱའོ། །དྲང་སྲོང་དེས་དེ་རབ་ཏུ་ཕྱུང་ངོ་། །རྒྱལ་བུ་དེས་དེའི་ལྷུང་བཟེད་དང་ཆོས་གོས་དག་བཀྲུས་ཤིང་དྲུབས་ཏེ་ཁ་བསྒྱུར་ནས་བྱིན་ཏེ་སྨྲས་པ། འཕགས་པ་གལ་ཏེ་ ཁྱོད་ཀྱིས་ཡོན་ཏན་གྱི་ཚོགས་ཅུང་ཟད་ཐོབ་ན་བདག་ལ་རྗོད་ཅིག །དེས་རྒྱལ་བུ་དེ་ལ་དེ་ལྟར་བྱའོ་ཞེས་ཁས་བླངས་སོ། །དེ་ཕྱོགས་གཅིག་ཏུ་སོང་སྟེ་མཁན་པོ་མེད་པ་དང་སློབ་དཔོན་མེད་པར་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་བཅུ་རྩ་བདུན་བསྐྱེད་ནས་རང་བྱང་ཆུབ་མངོན་ སུམ་དུ་བྱས་སོ། །དེས་བསམས་པ། བདག་གིས་ཡོན་ཏན་གྱི་ཚོགས་གང་ཅུང་ཟད་ཐོབ་པ་གང་ཡིན་པ་དེ་ཐམས་ཅད་རྒྱལ་པོའི་བུ་དེ་ལ་བརྟེན་ནས་ཐོབ་པ་ཡིན་ལ། བདག་གིས་དེ་ལ་ཁས་བླངས་པས་སོང་ལ་དེ་ལ་ཉེ་བར་བསྟན་པར་བྱའོ་སྙམ་མོ། །བདག་ཉིད་ཆེན་པོ་དེ་དག་ནི་

  85. 43b

    ལུས་ཀྱིས་ཆོས་སྟོན་གྱི། ཚིག་གིས་མི་སྟོན་པས་དེ་ལ་སྙིང་བརྩེ་བའི་ཕྱིར་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་ སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས། རྒྱལ་བུ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱི་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་ བསམས་པ། འཕགས་པ་འདིས་ཡོན་ཏན་གྱི་ཚོགས་གང་ཅུང་ཟད་ཐོབ་པ་གང་ཡིན་པ་དེ་ཐམས་ཅད་བདག་ལ་བརྟེན་ནས་ཐོབ་པ་ཡིན་ན། འཕགས་པ་འདིས་སྔོན་རབ་ཏུ་འབྱུང་བ་མ་ཐོབ་པ་གང་ཡིན་པ་དེ་ནི་ཁྱིམ་དེ་ལྟ་བུར་སྐྱེས་པ་ཡིན་ལ། བདག་གིས་རབ་ཏུ་འབྱུང་བ་མ་ ཐོབ་པ་གང་ཡིན་པ་དེ་ནི་ཁྱིམ་འདི་ལྟ་བུར་སྐྱེས་པ་ཡིན་ནོ་སྙམ་ནས། དེས་རང་སངས་རྒྱས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། དགེ་བའི་རྩ་བ་འདི་ཡིས་བདག །ཧ་ཅང་ཕྱུག་པའི་ཁྱིམ་དང་ནི། །དབུལ་བོའི་ཁྱིམ་དུ་མི་སྐྱེ་བར། །བར་མའི་ཁྱིམ་ དུ་སྐྱེ་འགྱུར་ཞིང་། །རྟག་པར་རབ་འབྱུང་མང་བར་ཤོག །ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྒྱལ་བུ་དེ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་ པས་ད་ལྟར་ཁྱིམ་ཧ་ཅང་ཕྱུག་པར་ཡང་མ་སྐྱེས། ཁྱིམ་ཧ་ཅང་དབུལ་བར་ཡང་མ་སྐྱེས་པར་ཁྱིམ་འབྲིང་པོར་སྐྱེས་ཤིང་རབ་ཏུ་འབྱུང་བ་མང་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་ དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ།

  86. 44a

    དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཡང་དགེ་སློང་རྣམས་ཐེ་ཙོམ་སྐྱེས་ནས་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཤཱ་རིའི་བུས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ བཅོམ་ལྡན་འདས་ཀྱིས་ཤེས་རབ་ཆེན་པོ་དང་ལྡན་པ་རྣམས་དང་། སྤོབས་པ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན། བཅོམ་ལྡན་འདས་ཀྱིས་བཀའ་སྩལ་པ། དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་བསྐལ་པ་བཟང་ པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་ སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཤེས་རབ་ཆེན་པོ་དང་ལྡན་པ་རྣམས་དང་སྤོབས་པ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེའི་འོག་ཏུ་འཆི་བའི་ཚེ་ སྨོན་ལམ་འདི་སྐད་ཅེས། བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་ སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ། བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

  87. 44b

    སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་ བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་ཉིད་མངོན་དུ་བྱེད་ཅིང་། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཤེས་རབ་ཆེན་པོ་དང་ལྡན་པ་རྣམས་དང་། སྤོབས་པ་ ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོ་གཙོ་བོ་དེས་ཤེས་རབ་ཆེན་པོ་དང་ལྡན་པ་རྣམས་དང་། སྤོབས་པ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་ པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཤེས་རབ་ཆེན་པོ་དང་ལྡན་པ་རྣམས་དང་། སྤོབས་པ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ ལ་ཞུས་པ། བཙུན་པ་ཚེ་དང་ལྡན་པ་མཽད་གལ་གྱི་བུ་ཆེན་པོས་ལས་ཇི་ཞིག་བགྱིས་ན་ལས་དེའི་རྣམ་པར་སྨིན་པས་རྫུ་འཕྲུལ་ཆེ་བ་དང་མཐུ་ཆེ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མཽད་གལ་གྱི་བུ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་མཽད་གལ་གྱི་བུ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་ པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་

  88. 45a

    ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ནས་ཧ་ཅང་ཐག་མི་རིང་བའི་བསྟི་གནས་ཤིག་ན་དྲང་སྲོང་བྱམས་པའི་བདག་ཉིད་ཅན། སྙིང་རྗེ་དང་ ལྡན་པ། སེམས་ཅན་ཐམས་ཅད་ལ་བྱམས་པ་ཞིག་འདུག་གོ། །ཇི་ཙམ་ན་མི་དབུལ་པོ་ཞིག་ཤིང་ཁུར་ཐོགས་ཏེ་བསྟི་གནས་དེར་སོང་ནས་ཤིང་ཁུར་ཕོག་སྟེ་ངལ་སོ་ཞིང་འདུག་པ་དྲང་སྲོང་དེས་མཐོང་ནས། དེ་དེ་ལ་སྙིང་རྗེ་སྐྱེས་ཏེ་ཉོན་མོངས་པ་འདི་སྔོན་གྱི་ལས་ཀྱི་ཉེས་པས་མིར་སྐྱེས་ ཀྱང་ཚེགས་ཆེན་པོས་འཚོ་བ་སྦྱོར་བར་བྱེད་ཀྱིས། བདག་གིས་འདི་རབ་ཏུ་འབྱུང་ངོ་སྙམ་ནས་སྨྲས་པ། བུ་ཁྱོད་སུ་ཞིག་ཡིན། དེས་སྨྲས་པ། འཕགས་པ་བདག་ནི་མི་དབུལ་པོ་ཤིང་གིས་འཚོ་བ་སྦྱོར་བ་ཞིག་ལགས་སོ། །དྲང་སྲོང་གིས་སྨྲས་པ། བུ་འོ་ན་ཁྱོད་ཅིའི་ཕྱིར་རབ་ཏུ་མི་ འབྱུང་། དེས་སྨྲས་པ། འཕགས་པ་བདག་ནི་མི་དབུལ་པོ་ཞིག་སྟེ་ཤིང་བཙོངས་ཤིང་བཙོངས་ནས་ཚེགས་ཆེན་པོས་འཚོ་བ་སྐྱོང་བར་བགྱིད་པ་ལགས་ན། སུ་ཞིག་གིས་བདག་རབ་ཏུ་འབྱིན་པར་འགྱུར། དེ་ནས་དྲང་སྲོང་དེ་བྱམས་པའི་བདག་ཉིད་ཅན་ཡིན་པའི་ཕྱིར་ཤིན་ཏུ་སྙིང་ རྗེ་སྐྱེས་ནས་དེས་དེ་ལ་སྨྲས་པ། བུ་ཁྱོད་རབ་ཏུ་འབྱུང་བར་འདོད་དམ། དེས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་གྱིས་ཐུགས་བརྩེ་བའི་སླད་དུ་བདག་རབ་ཏུ་དབྱུང་དུ་གསོལ། དྲང་སྲོང་དེས་དེ་རབ་ཏུ་ཕྱུང་ནས་ལྷུང་བཟེད་དང་ཆོས་གོས་དག་ཀྱང་བཀྲུས་ཤིང་ཁ་ བསྒྱུར་ཏེ་བྱིན་ནས་སྨྲས་པ། བཞིན་བཟངས་གལ་ཏེ་ཁྱོད་ཀྱིས་ཡོན་ཏན་གྱི་ཚོགས་ཅུང་ཟད་ཐོབ་ན་ཁོ་བོ་ལ་རྗོད་ཅིག །དེས་དེ་ལ་དེ་བཞིན་དུ་བགྱིའོ་ཞེས་ཁས་བླངས་སོ། །དེ་ཕྱོགས་གཅིག་ཏུ་སོང་ནས་མཁན་པོ་མེད་པ་དང་སློབ་དཔོན་མེད་པར་བྱང་ཆུབ་ཀྱི་ཕྱོགས་དང་མཐུན་ པས་ཆོས་སུམ་བཅུ་རྩ་བདུན་བསྐྱེད་ནས་རང་བྱང་ཆུབ་མངོན་སུམ་དུ་བྱས་སོ། །དེས་བསམས་པ། བདག་གིས་དྲང་སྲོང་དེ་ལ་ཁས་བླངས་པས་སོང་ལ་དེ་ལ་ཉེ་བར་བསྟན་པར་བྱའོ་སྙམ་མོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ཚིག་གིས་མི་སྟོན་པས་དེ་དེ་ལ་རྗེས་སུ་སྙིང་བརྩེ་

  89. 45b

    བའི་ཕྱིར་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་ པ་ཡིན་པས་དྲང་སྲོང་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་བསམས་པ། འཕགས་པ་འདིས་ཡོན་ཏན་གྱི་ཚོགས་ཅུང་ཟད་ཐོབ་ པ་གང་ཡིན་པ་དེ་ཐམས་ཅད་བདག་ལ་བརྟེན་ནས་ཐོབ་པ་ཡིན་ནོ་སྙམ་ནས། དེས་རང་སངས་རྒྱས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། འདི་ལྟར་འཕགས་པ་འདི་རྫུ་འཕྲུལ་ཆེ་བ་དང་མཐུ་ཆེ་བ་དེ་བཞིན་དུ། བདག་ཀྱང་དགེ་བའི་རྩ་བ་འདིས་རྫུ་འཕྲུལ་ཆེ་བ་ དང་མཐུ་ཆེ་བར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་དྲང་སྲོང་གང་ཡིན་པ་དེ་ནི་དགེ་སློང་མཽད་གལ་གྱི་བུ་འདི་ཉིད་ཡིན་ཏེ། དེས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ད་ལྟར་རྫུ་འཕྲུལ་ཆེ་བ་ དང་མཐུ་ཆེ་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱོད་ཀྱིས་དེ་ལྟར་བསླབ་པར་བྱའོ།། །།འདུལ་བ་གཞི། བམ་པོ་ལྔ་པ། དགེ་སློང་རྣམས་ ཐེ་ཙོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་མཽད་གལ་གྱི་བུ་ཆེན་པོས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་རྫུ་འཕྲུལ་ཆེན་པོ་དང་ལྡན་པ་རྣམས་དང་། མཐུ་ཆེན་པོ་

  90. 46a

    དང་ལྡན་པ་རྣམས་ཀྱི་མཆོག་ཏུ་བསྟན། དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་ རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་བཱ་རཱ་ ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫུ་འཕྲུལ་ཆེན་པོ་ལྡན་པ་རྣམས་ དང་། མཐུ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས། བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་ རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་ རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ། བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེས་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་ རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་

  91. 46b

    མངོན་དུ་བྱེད་ཅིང་། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫུ་འཕྲུལ་ཆེན་པོ་དང་ལྡན་པ་རྣམས་དང་། མཐུ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོ་གཙོ་བོ་དེས་རྫུ་འཕྲུལ་ཆེན་པོ་དང་ལྡན་པ་རྣམས་དང་། མཐུ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་རྫུ་འཕྲུལ་ཆེན་ པོ་དང་ལྡན་པ་རྣམས་དང་། མཐུ་ཆེན་པོ་དང་ལྡན་པ་རྣམས་ཀྱི་མཆོག་ཏུ་བསྟན་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་སྟོད་རིངས་ཀྱིས་ལས་ཇི་ཞིག་བགྱིས་ན། ལས་དེའི་ རྣམ་པར་སྨིན་པས་བཅོམ་ལྡན་འདས་ཀྱིས་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་བསྟན། དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ ཞེས་བྱ་བ་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་གང་གིས་དེ་རབ་ཏུ་ཕྱུང་བའི་དགེ་སློང་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་

  92. 47a

    དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་ གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ། བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་ གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ པས་དགྲ་བཅོམ་པ་ཉིད་མངོན་དུ་བྱེད་ཅིང་། ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ ཐུབ་པ། ཤཱཀྱའི་སེང་གེ །ཤཱཀྱའི་རྒྱལ་པོ་གཙོ་བོ་དེས་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་སོ་སོ་ཡང་དག་པར་རིག་པ་ཐོབ་པ་རྣམས་ཀྱི་མཆོག་ཏུ་ བསྟན་ཏོ། །དེའི་ཚེ་ན་ལེགས་པར་གསུངས་པའི་ཆོས་འདུལ་བ་ལ་འདི་ལྟར་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་ཏེ། བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་རབ་ཏུ་འབྱིན་པར་མཛད་ཅིང་བསྙེན་པར་རྫོགས་པར་མཛད་པས་འགའ་ ཞིག་གི་གན་དུ་རབ་ཏུ་འབྱུང་བར་འདོད་པ་འོངས་པ་ན། བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་རབ་ཏུ་འབྱིན་པར་མཛད་ཅིང་། དགེ་སློང་ཚུར་ཤོག་ཅེས་བྱ་བས་བསྙེན་པར་རྫོགས་པར་མཛད་པར་འགྱུར་རོ་སྙམ་ནས། དེས་དེ་ཁྲིད་དེ་བཅོམ་ལྡན་འདས་ག་ལ་བ་དེར་

  93. 47b

    འགྲོའོ། །དགེ་སློང་ཞིག་གི་གན་དུ་རབ་ཏུ་འབྱུང་བར་འདོད་པ་ཞིག་འོངས་པ་ན། བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་རབ་ཏུ་འབྱིན་པར་མཛད་ཅིང་། དགེ་སློང་ཚུར་ཤོག་ཅེས་བྱ་བས་བསྙེན་པར་རྫོགས་པར་མཛད་པར་འགྱུར་རོ་སྙམ་ནས། དེས་ད་ཁྲིད་དེ་ བཅོམ་ལྡན་འདས་ག་ལ་བ་དེར་སོང་བ་དང་། དེས་བཅོམ་ལྡན་འདས་ཀྱི་སྤྱན་སྔར་མ་ཕྱིན་པ་ཁོ་ནར་བར་མ་དོར་རྒྱུན་ཆད་ཅིང་ཤི་བར་གྱུར་ཏེ། དེ་ཉིད་དེའི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོར་འགྱུར་བའི་བར་ ཆད་དུ་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཀྱེ་མ་ངའི་ཉན་ཐོས་རྣམས་ཐག་རིང་པོ་དང་ཆེས་རིང་པོ་ནས་འོང་བ་རྣམས་ངལ་བར་འགྱུར་རོ་སྙམ་ནས་བཀའ་སྩལ་པ། དེ་ལྟ་བས་ན་དེང་ནས་དགེ་འདུན་ གྱིས་རབ་ཏུ་དབྱུང་བ་དང་། དགེ་འདུན་གྱིས་བསྙེན་པར་རྫོགས་པར་བྱ་བར་གནང་ངོ་། །བཅོམ་ལྡན་འདས་ཀྱིས་དགེ་འདུན་གྱིས་རབ་ཏུ་དབྱུང་བར་བྱ་བ་དང་། དགེ་འདུན་གྱིས་བསྙེན་པར་རྫོགས་པར་བྱའོ་ཞེས་བཀའ་སྩལ་ནས། དེ་དག་གིས་ཇི་ལྟར་རབ་ཏུ་དབྱུང་བར་བྱ་བ་ དང་། ཇི་ལྟར་བསྙེན་པར་རྫོགས་པར་བྱ་བ་མི་ཤེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་གཟུང་བར་བྱ་ཞིང་བཟུང་ནས་དགེ་ འདུན་ཐམས་ཅད་འདུས་པ་ན་ཆ་ལུགས་འདི་བཞིན་བྱས་ཤིང་རྒན་རིམས་ལ་ཕྱག་འཚལ་དུ་བཅུག་སྟེ། ཐལ་མོ་སྦྱར་ནས་ཙོག་ཙོག་པོར་འདུག་ཏུ་བཅུག་སྟེ། ལན་གསུམ་གསོལ་བ་འདེབས་སུ་བཅུག་ནས་དགེ་སློང་གཅིག་གིས་གསོལ་བ་དང་བཞིའི་ལས་ཀྱིས་ཅིག་ཅར་རབ་ ཏུ་འབྱུང་བ་དང་བསྙེན་པར་རྫོགས་པ་ཉེ་བར་བསྒྲུབ་པར་བྱའོ། །དེས་འདི་སྐད་ཅེས་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ་དགེ་འདུན་ལས་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོར་གསོལ་ན།

  94. 48a

    ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་རབ་ཏུ་དབྱུང་དུ་གསོལ། བསྙེན་པར་རྫོགས་པར་མཛད་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ ལས་བྱའོ། །འདི་ལྟར་བྱས་ཏེ་འདུག་ལ་འདི་སྐད་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་ དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མིང་འདི་ཞེས་བགྱི་བ་རབ་ཏུ་འབྱིན་ཏོ། །བསྙེན་པར་རྫོགས་པར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་ལས་ རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གསོལ་ཏེ། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་རབ་ཏུ་དབྱུང་བ་དང་། བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་རབ་ཏུ་དབྱུང་བ་དང་། བསྙེན་པར་རྫོགས་པར་ མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མིང་འདི་ཞེས་བགྱི་བ་རབ་ཏུ་ཕྱུང་བ་དང་བསྙེན་ པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནི་སྔོན་གྱི་ཆོ་གའོ། །དེ་ལྟར་རབ་ཏུ་བྱུང་ཞིང་བསྙེན་པར་རྫོགས་པ་དག་མཁན་པོ་མེད་པ་དང་། སློབ་དཔོན་མེད་པས་ལེགས་པར་མ་སྦྱངས་པ་དང་། ལེགས་པར་མ་བགོས་པ་དང་། སྒྲ་ མཐོན་པོ་དང་། སྒྲ་ཆེན་པོ་དང་། རྒོད་བག་གི་སྤྱོད་ལམ་གྱིས་བྲམ་ཟེ་དང་ཁྱིམ་བདག་གི་ཁྱིམ་དག་ཏུ་འདོང་ཞིང་དེ་དག་དེར་ཟས་སློང་བར་བྱེད། ཟས་སློང་དུ་འཇུག་པར་བྱེད། སྲན་ཚོད་སློང་བར་བྱེད། སྲན་ཚོད་སློང་དུ་འཇུག་པར་བྱེད་ཅིང་བསྟན་པ་དང་འགལ་བ་གཞན་དག་

  95. 48b

    ཀྱང་བྱེད་ནས། གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་མཁན་པོ་མེད་པ་དང་། སློབ་དཔོན་མེད་པས་ལེགས་པར་མ་སྦྱངས་པ་དང་། ལེགས་པར་མ་བགོས་པ་དང་། སྒྲ་མཐོན་པོ་དང་། སྒྲ་ཆེན་པོ་དང་། རྒོད་བག་གི་སྤྱོད་ལམ་གྱིས་ བྲམ་ཟེ་དང་ཁྱིམ་བདག་གི་ཁྱིམ་དག་ཏུ་འདོང་ཞིང་དེ་དག་དེར་ཟས་སློང་བར་བྱེད། ཟས་སློང་དུ་འཇུག་པར་བྱེད། སྲན་ཚོད་སློང་བར་བྱེད། སྲན་ཚོད་སློང་དུ་འཇུག་པར་བྱེད་དེ། དགེ་སྦྱོང་མགོ་རེག་འདི་དག་ལ་སུ་ཞིག་བསོད་སྙོམས་སྦྱིན་པ་དང་། བྱ་བར་སེམས་ཞེས་ སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །དགེ་སློང་ནད་པ་ཞིག་ཀྱང་ནད་གཡོག་དང་བྲལ་བས་ཤི་བར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ངས་ཉན་ཐོས་རྣམས་གཅིག་ གིས་གཅིག་བསྡུ་བའི་ཕྱིར་དང་། ནད་པ་རྣམས་ལ་རིམ་གྲོ་བྱ་བའི་ཕྱིར་མཁན་པོ་དང་སློབ་དཔོན་དག་གནང་བར་བྱའོ་སྙམ་ནས་བཀའ་སྩལ་པ། དེ་ལྟ་བས་ན་མཁན་པོ་དང་སློབ་དཔོན་དག་གིས་རབ་ཏུ་དབྱུང་བར་བྱ་བ་དང་། བསྙེན་པར་རྫོགས་པར་བྱ་བར་གནང་ངོ་། །བཅོམ་ལྡན་ འདས་ཀྱིས་མཁན་པོ་དང་སློབ་དཔོན་དག་གིས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱའོ་ཞེས་བཀའ་སྩལ་ནས། དེ་དག་གིས་མཁན་པོ་དང་སློབ་དཔོན་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། སློབ་དཔོན་ནི་ལྔ། མཁན་པོ་ནི་གཉིས་སོ། །སློབ་ དཔོན་ལྔ་གང་ཞེ་ན། དགེ་ཚུལ་གྱི་སློབ་དཔོན་དང་། གསང་སྟེ་སྟོན་པ་དང་། ལས་བྱེད་པ་དང་། གནས་སྦྱིན་པའི་སློབ་དཔོན་དང་། ཀློག་པའི་སློབ་དཔོན་ནོ། །དགེ་ཚུལ་གྱི་སློབ་དཔོན་གང་ཞེ་ན། གང་གིས་སྐྱབས་སུ་འགྲོ་བ་དང་། བསླབ་པའི་གཞི་དག་བྱིན་པ་ཡིན་ནོ། ། གསང་སྟེ་སྟོན་པ་གང་ཞེ་ན། གང་གིས་གསང་སྟེ་བསྟན་པ་ཡིན་ནོ། །ལས་བྱེད་པ་གང་ཞེ་ན། གང་གིས་གསོལ་བ་དང་བཞིའི་ལས་ཀྱིས་ལས་བྱས་པ་ཡིན་ནོ། །གནས་སྦྱིན་པའི་སློབ་དཔོན་གང་ཞེ་ན། གང་གི་དྲུང་དུ་ཞག་གཅིག་ཙམ་ཡང་གནས་པས་འདུག་པ་ཡིན་ནོ། །

  96. 49a

    ཀློག་པའི་སློབ་དཔོན་གང་ཞེ་ན། གང་ལས་ཚིག་བཞི་པའི་ཚིགས་སུ་བཅད་པ་ཙམ་ཡང་ལན་གསུམ་དུ་བཟླས་ཏེ་བཟུང་བ་ཡིན་ནོ། །མཁན་པོ་གཉིས་གང་ཞེ་ན། རབ་ཏུ་འབྱིན་པར་བྱེད་པ་གང་ཡིན་པ་དང་། བསྙེན་པར་རྫོགས་པར་བྱེད་པ་གང་ཡིན་པའོ། །བཅོམ་ལྡན་འདས་ཀྱིས་མཁན་པོ་དང་སློབ་དཔོན་ དག་གིས་རབ་ཏུ་དབྱུང་བར་བྱ་ཞིང་བསྙེན་པར་རྫོགས་པར་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ལྟར་རབ་ཏུ་དབྱུང་བར་བྱ་བ་དང་། ཇི་ལྟར་བསྙེན་པར་རྫོགས་པར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། འགའ་ཞིག་གི་གན་དུ་རབ་ཏུ་འབྱུང་ བར་འདོད་པ་འོངས་ན་དེས་དེ་ལ་བར་ཆད་ཀྱི་ཆོས་རྣམས་དྲིས་ནས་གཟུང་བར་བྱའོ། །བཟུང་ནས་གསུམ་ལ་སྐྱབས་སུ་འགྲོ་བ་དང་། དགེ་བསྙེན་ཉིད་དུ་ཁས་བླངས་པས་དགེ་བསྙེན་གྱི་སྡོམ་པ་སྦྱིན་པར་བྱའོ། །འདི་ལྟར་སྦྱིན་པར་བྱ་སྟེ། དང་པོར་སྟོན་པ་ལ་ཕྱག་འཚལ་དུ་ གཞུག་གོ། །དེའི་འོག་ཏུ་སློབ་དཔོན་ལ་ཕྱག་འཚལ་དུ་བཅུག་ནས་མདུན་དུ་ཙོག་ཙོག་པོར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་དེས་འདི་སྐད་ཅེས་བརྗོད་པར་བྱ་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་ འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ་། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ་། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་ གཟུང་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། ཚིག་གསུམ་པ་ལ་སློབ་དཔོན་གྱིས་ཞེས་བརྗོད་པར་བྱའོ། །སློབ་དཔོན་གྱིས་ཐབས་ཡིན་ནོ་ཞེས་བརྗོད་པར་བྱའོ། །དགེ་བསྙེན་གྱིས་ལེགས་སོ་ཞེས་བརྗོད་པར་བྱའོ། །དེ་ནི་དགེ་བསྙེན་གྱི་སྡོམ་པ་སྦྱིན་ པའོ། །དེའི་འོག་ཏུ་བསླབ་པ་བརྗོད་པ་ཁས་བླང་བའི་ཚུལ་གྱིས་བྱའོ། །འདི་ལྟར་བྱ་སྟེ། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་

  97. 49b

    འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་ སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ། །ཡན་ལག་ལྔ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་ བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །སློབ་དཔོན་གྱིས་ཐབས་ཡིན་ནོ་ཞེས་བརྗོད་པར་བྱའོ། །དགེ་བསྙེན་གྱིས་ལེགས་སོ་ཞེས་བརྗོད་པར་བྱའོ། །དགེ་བསྙེན་ཉིད་དུ་ཉེ་བར་སྒྲུབ་པའི་ཆོ་ག་རྫོགས་སྷོ།། །།དེའི་འོག་ཏུ་གང་གིས་དེ་ཞུ་བར་བྱེད་པའི་དགེ་སློང་ ལ་གཏད་པར་བྱའོ། །ཞུ་བའི་དགེ་སློང་གིས་མཁན་པོ་ལ་ཁྱོད་ཀྱིས་བར་ཆད་ཀྱི་ཆོས་རྣམས་དྲིས་སམ་ཞེས་དྲི་བར་བྱའོ། །མ་དྲིས་པར་ཞུ་བར་བྱེད་ན་འགལ་ཚབས་ཅན་དུ་འགྱུར་རོ། །དེའི་འོག་ཏུ་ཞུ་བའི་དགེ་སློང་གིས་ཞུ་བར་བྱའོ། །འདི་ལྟར་ཞུ་བར་བྱ་སྟེ། གནས་མལ་ བཤམ་པ་བྱས་ནས་གཎ་ཌཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལའང་རུང་། གནས་ཁང་སོ་སོ་ན་འཁོད་པ་ལའང་རུང་སྟེ། རྒན་རིམས་ལ་ཕྱག་འཚལ་དུ་བཅུག་ནས་ཙོག་ཙོག་

  98. 50a

    པོར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་ཞུ་བར་བྱེད་པས་འདི་སྐད་ཅེས་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། ཁྱིམ་པ་ གོས་དཀར་པོ་ཅན་སྐྲ་དང་ཁ་སྤུ་མ་བྲེགས་པ་ལས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བར་འཚལ་ཏེ། མིང་འདི་ཞེས་བགྱི་བ་འདི་རབ་ཏུ་འབྱུང་བར་འཚལ་ཞིང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་ པར་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་སྟེ། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་དེ་རབ་ཏུ་དབྱུང་ངམ་དེ་དག་ཐམས་ཅད་ཀྱིས་གལ་ཏེ་ཡོངས་སུ་དག་ནའོ་ཞེས་བརྗོད་པར་བྱའོ། །གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ ཏེ་མི་བརྗོད་ན་འགལ་ཚབས་ཅན་དུ་འགྱུར་རོ། །དེ་ནི་རབ་ཏུ་འབྱུང་བར་འདོད་པ་ཞུ་བའོ།། །།དེའི་འོག་ཏུ་མཁན་པོར་གསོལ་བའོ། །འདི་ལྟར་གསོལ་བར་བྱ་སྟེ། མཁན་པོ་ལ་ཕྱག་འཚལ་དུ་བཅུག་ནས་མདུན་དུ་ཙོག་ཙོག་པོར་འདུག་ཏུ་བཅུག་སྟེ། ཐལ་མོ་ སྦྱོར་དུ་བཅུག་ནས་དེས་འདི་སྐད་ཅེས་བརྗོད་པར་བྱ་སྟེ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱིས། སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་རབ་ཏུ་དབྱུང་བར་བགྱིའོ། །དེ་བཞིན་ དུ་ལན་གཉིས་ལན་གསུམ་དུ་བཟླས། ཚིག་གསུམ་པ་ལ་མཁན་པོ་ཞེས་བརྗོད་པར་བྱའོ། །མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །རབ་ཏུ་འབྱུང་བར་འདོད་པས་ལེགས་སོ་ཞེས་བརྗོད་པར་བྱའོ། །དེ་ནི་མཁན་པོར་གསོལ་བའོ། །དེའི་འོག་ཏུ་གང་གིས་དེའི་ སྐྲ་དང་ཁ་སྤུ་དག་འབྲེག་པར་བྱེད་པའི་དགེ་སློང་ལ་བཅོལ་བར་བྱའོ། །དེས་ཐམས་ཅད་འབྲེག་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་བྲེག་པར་མི་བྱ་བར་འདི་ལྟར་གཙུག་ཕུད་གཞག་པར་བྱ་ཞིང་དེའི་འོག་ཏུ་ཅི་གཙུག་ཕུད་བྲེག་གམ་ཞེས་དྲི་བར་

  99. 50b

    བྱའོ། །གལ་ཏེ་མི་བྲེག་གོ་ཞེས་ཟེར་ན་འོ་ན་སོང་ཤིག་ཅེས་བརྗོད་པར་བྱའོ། །གལ་ཏེ་བྲེགས་ཤིག་ཅེས་ཟེར་ན་བྲེག་པར་བྱའོ། །དེའི་འོག་ཏུ་ཁྲུས་བྱེད་དུ་གཞུག་སྟེ། གལ་ཏེ་རེ་ཞིག་གྲང་བའི་དུས་ཡིན་ན་ནི་ཆུ་དྲོན་པོས་ཁྲུས་བྱེད་དུ་གཞུག་གོ། །གལ་ཏེ་ཚ་བའི་དུས་ཡིན་ ན་ནི་ཆུ་གྲང་མོས་ཁྲུས་བྱེད་དུ་གཞུག་གོ། །དེའི་འོག་ཏུ་མཁན་པོས་ལྷུང་བཟེད་དང་གོས་ངུར་སྨྲིག་དག་སྦྱིན་པར་བྱ་ཞིང་དེས་ཀྱང་རྐང་པ་གཉིས་ལ་གཏུགས་ནས་བླང་བར་བྱའོ། །དེའི་འོག་ཏུ་མཁན་པོས་བསྐོན་པར་བྱ་ཞིང་མཚན་མེད་པའམ། མཚན་གཉིས་པའམ། གླེ་འདམས་པ་མ་ཡིན་ནམ་ཞེས་བརྟག་པར་བྱའོ། །བཅོམ་ལྡན་འདས་ཀྱིས་བརྟག་པར་བྱའོ་ཞེས་བཀའ་སྩལ་ནས་དགེ་སློང་དག་དེ་སྒྲེན་མོར་ཕྱུང་སྟེ་རྟོག་པར་བྱེད་པ་ན་དེ་ངོ་ཚ་ནས་བཅོམ་ལྡན་འདས་ཀྱིས་བཀའ་སྩལ་པ། སྒྲེན་མོར་ཕྱུང་སྟེ་བརྟག་པར་མི་བྱ་བར་ཤམ་ཐབས་ བསྐོན་པ་ཉིད་ཀྱི་ཚེ་མ་ཚོར་བར་བརྟག་པར་བྱའོ། །དེ་ནི་དུས་དང་པོར་བྱ་བའོ།། །།དེའི་འོག་ཏུ་སྐྱབས་སུ་འགྲོ་བ་རྩོམ་པས་རབ་ཏུ་འབྱུང་བ་ཉེ་བར་བསྒྲུབ་པར་བྱའོ། །འདི་ལྟར་ཉེ་བར་བསྒྲུབ་པར་བྱ་སྟེ། དང་པོར་སྟོན་པ་ལ་ཕྱག་འཚལ་དུ་གཞུག་གོ། ། དེའི་འོག་ཏུ་མཁན་པོ་ལ་ཕྱག་འཚལ་དུ་བཅུག་ནས་མདུན་དུ་ཙོག་ཙོག་པུར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་དེས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་ གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པས་སངས་རྒྱས་ཤཱཀྱ་ཐུབ་པ། ཤཱཀྱའི་སེང་གེ །ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་རྗེས་སུ་རབ་ཏུ་འབྱུང་སྟེ་ཁྱིམ་པའི་རྟགས་སྤོང་ངོ་། །རབ་ཏུ་བྱུང་བའི་རྟགས་ཡང་དག་པར་ལེན་ཏོ། །དེ་བཞིན་དུ་ལན་གཉིས་ལན་གསུམ་དུ་བཟླས། མཁན་པོས་ཐབས་ཡིན་ནོ་

  100. 51a

    ཞེས་བརྗོད་པར་བྱའོ། །རབ་ཏུ་བྱུང་བས་ལེགས་སོ་ཞེས་བརྗོད་པར་བྱའོ། །དེ་ནི་རབ་ཏུ་བྱུང་བ་ཉེ་བར་སྒྲུབ་པའོ།། །།དེའི་འོག་ཏུ་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་དགེ་སློང་ལ་གཏད་པར་བྱའོ། །དེས་ཀྱང་མཁན་པོ་ལ་ཅི་ཡོངས་སུ་དག་གམ་ཞེས་ དྲིས་ནས་ཡོངས་སུ་དག་ན་སྐྱབས་སུ་འགྲོ་བ་དང་། དགེ་ཚུལ་ཉིད་དུ་ཁས་བླང་བས་དགེ་ཚུལ་ཉིད་དུ་ཉེ་བར་བསྒྲུབ་པར་བྱའོ། །འདི་ལྟར་ཉེ་བར་བསྒྲུབ་པར་བྱ་སྟེ། དང་པོར་སྟོན་པ་ལ་ཕྱག་འཚལ་དུ་གཞུག་གོ། །དེའི་འོག་ཏུ་སློབ་དཔོན་ལ་ཕྱག་འཚལ་དུ་བཅུག་ནས་མདུན་དུ་ཙོག་ ཙོག་པོར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་དེས་འདི་སྐད་ཅེས་བརྗོད་པར་བྱ་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་དུ་བཙུན་པས་གཟུང་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། ཚིག་གསུམ་པ་ལ་སློབ་ དཔོན་གྱིས་ཞེས་བརྗོད་པར་བྱའོ། །སློབ་དཔོན་གྱིས་ཐབས་ཡིན་ནོ་ཞེས་བརྗོད་པར་བྱའོ། །དགེ་ཚུལ་གྱིས་ལེགས་སོ་ཞེས་བརྗོད་པར་བྱའོ། །དེ་ནི་དགེ་ཚུལ་གྱི་སྡོམ་པ་སྦྱིན་པའོ།། །།དེའི་འོག་ཏུ་སློབ་དཔོན་མ་ཡིན་པ་དགེ་སློང་གཞན་གང་ཡང་རུང་བ་གཅིག་ གིས་གྲིབ་ཚོད་གཞལ་བར་བྱ་ཞིང་སྐྱེས་བུ་དང་། རྩ་བ་དང་། ཉིན་མཚན་གྱི་ཆ་དང་། དུས་ཚོད་ཀྱང་བརྗོད་པར་བྱའོ། །དེའི་འོག་ཏུ་བསླབ་པ་བརྗོད་པ་ཁས་བླང་བའི་ཚུལ་གྱིས་བྱའོ། །འདི་ལྟར་བྱ་སྟེ། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་ པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་

  101. 51b

    དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་ བ་དང་། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་དང་། གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། འབྲུའི་ཆང་དང་ བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཟས་དང་། གསེར་དངུལ་ལེན་པ་སྤངས་ ཏེ། གསེར་དངུལ་ལེན་པ་ལས་སླར་ལྡོག་པར་བགྱིའོ། །ཡན་ལག་བཅུ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །སློབ་དཔོན་གྱིས་ཐབས་ཡིན་ནོ་ཞེས་བརྗོད་པར་བྱའོ། །དགེ་ཚུལ་གྱིས་ ལེགས་སོ་ཞེས་བརྗོད་པར་བྱའོ། །དགེ་ཚུལ་ཉིད་དུ་ཉེ་བར་སྒྲུབ་པའི་ཆོ་ག་རྫོགས་སྷོ།། །།དེའི་འོག་ཏུ་གལ་ཏེ་དེ་ལོ་ཉི་ཤུ་ཚང་ན་མཁན་པོས་དེའི་ལྷུང་བཟེད་དང་ཆོས་གོས་དག་བཙལ་བར་བྱ་ཞིང་ལས་བྱེད་པའི་དགེ་སློང་ལ་གསོལ་བ་གདབ་པར་བྱ། གསང་སྟེ་སྟོན་པའི་དགེ་ སློང་ལ་ཡང་གསོལ་བ་གདབ་པར་བྱ། གང་དག་དེའི་ལས་ཀྱི་གནས་སུ་འཇུག་པར་འགྱུར་བའི་དགེ་སློང་དག་ལ་ཡང་གསོལ་བ་གདབ་པར་བྱའོ། །དགེ་སློང་གང་དག་དེའི་ལས་ཀྱི་གནས་སུ་འཇུག་པར་འགྱུར་བ་དེ་དག་གིས་ཀྱང་དེར་འདུ་བར་འགྱུར་བའི་ཚེ་ཟླ་བ་ཕྱེད་འདས་པའི་ཉེས་པ་བསྡམ་པར་

  102. 52a

    བྱ་བ་དང་། བཤགས་པར་བྱ་བ་དང་། བྱིན་གྱིས་བརླབ་པར་བྱ་བ་དག་ལ་སོ་སོར་བརྟག་པར་བྱ་ཞིང་ཉེས་པ་ཤེས་པ་བསྡམ་པའམ། བཤགས་པའམ། བྱིན་གྱིས་བརླབས་པས་ཕྱིར་བཅོས་ཏེ་འདུག་པར་བྱའོ། །དེའི་འོག་ཏུ་དགེ་འདུན་ཐམས་ཅད་འདུག་ཅིང་ མཐུན་པར་གྱུར་པའམ། དཀྱིལ་འཁོར་བ་ཡང་རུང་སྟེ། ཡུལ་དབུས་སུ་དགེ་སློང་བཅུ་ལ་སོགས་པའི་ཚོགས་སམ། མཐའ་འཁོབ་དག་ཏུ་གཞན་མེད་ན་འདུལ་བ་འཛིན་པ་དང་ལྔ་ལ་སོགས་པའི་ཚོགས་ལ་ཡང་རུང་སྟེ། དང་པོར་སྟོན་པ་ལ་ཕྱག་འཚལ་དུ་གཞུག་གོ། ། དེའི་འོག་ཏུ་དགེ་སློང་རེ་རེ་ལ་ཕྱག་གསུམ་གསུམ་འཚལ་དུ་གཞུག་གོ། །ཕྱག་ནི་གཉིས་ཏེ། ཡན་ལག་ལྔས་ཕྱག་འཚལ་བ་དང་། སྒྱིད་པ་ནས་འཁྱུད་པ་སྟེ་འདིར་གང་ཡང་རུང་ངོ་། །འདི་ནི་དུས་དང་པོར་བྱ་བའོ།། །།དེའི་འོག་ཏུ་མཁན་པོར་གསོལ་བ་བྱའོ། །འདི་ལྟར་གསོལ་བར་བྱ་སྟེ། མཁན་པོ་ལ་ཕྱག་འཚལ་དུ་བཅུག་ནས་མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་གལ་ཏེ་མཁན་པོ་ཡིན་ན་མཁན་པོ་ཞེས་བརྗོད་པར་བྱ། སློབ་དཔོན་ཡིན་ན་སློབ་དཔོན་ཞེས་བརྗོད་པར་བྱ། བཙུན་པ་ཡིན་ན་བཙུན་པ་ཞེས་ཅི་རིགས་པར་བརྗོད་པར་བྱའོ་ཞེས་བསྟན་ནས། དེས་འདི་སྐད་ཅེས་བརྗོད་པར་བྱ་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་བཙུན་པ་ལ་མཁན་པོར་གསོལ་གྱིས། བཙུན་པ་བདག་གི་མཁན་པོ་མཛད་དུ་གསོལ། བཙུན་པ་ མཁན་པོས་བསྙེན་པར་རྫོགས་པར་བགྱིའོ། །དེ་བཞིན་དུ་ལན་གཉིས་ལན་གསུམ་དུ་བཟླས། ཚིག་གསུམ་པ་ལ་མཁན་པོ་ཞེས་བརྗོད་པར་བྱའོ། །མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེ་ནི་མཁན་པོར་གསོལ་བའོ།། །། དེའི་འོག་ཏུ་མཁན་པོ་རང་གིས་དེ་ལ་ཆོས་གོས་གསུམ་བྱིན་གྱིས་བརླབ་པར་བྱའོ། །གལ་ཏེ་རེ་ཞིག་ཆོས་གོས་དྲས་ཤིང་དྲུབས་པ་དག་ཡོད་ན་དེ་ལྟ་ན་ལེགས་ཏེ། འདི་ལྟར་བྱིན་གྱིས་བརླབ་པར་བྱ་སྟེ། ཆོས་གོས་གསུམ་པོ་སོ་སོར་བལྟབ་སྟེ་སློབ་མའི་ཕྲག་པ་གཡོན་པར་བཀལ་ནས་གཉིས་ཀ་

  103. 52b

    འགྲེང་སྟེ། ལག་པས་ཆོས་གོས་སྣམ་སྦྱར་བཟུང་ནས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །དེ་བཞིན་དུ་ལན་གཉིས་ ལན་གསུམ་དུ་བཟླས། མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེའི་འོག་ཏུ་ཆོས་གོས་བླ་གོས་བཟུང་ནས་དེས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། །བདག་མིང་འདི་ཞེས་བགྱི་བའི་ཆོས་གོས་ བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་བླ་གོས་སུ་བྱིན་གྱིས་བརླབ་བོ། །དེ་བཞིན་དུ་ལན་གཉིས་ལན་གསུམ་དུ་བཟླས། མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེའི་འོག་ཏུ་ཆོས་གོས་མཐང་གོས་བཟུང་ནས་ དེས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་མཐང་གོས་སུ་བྱིན་གྱིས་བརླབ་བོ། །དེ་བཞིན་དུ་ལན་གཉིས་ལན་གསུམ་དུ་བཟླས། མཁན་པོས་ཐབས་ ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེའི་འོག་ཏུ་ཆོས་གོས་དག་བསྐོན་པར་བྱ་ཞིང་དེས་ཀྱང་སྣམ་སྦྱར་དང་བཅས་པ་ཉིད་ཡིན་ན་བསྙེན་པར་རྫོགས་པའི་ཕྱིར་འདུས་པའི་དགེ་འདུན་ལ་ཕྱག་བྱའོ། །དེ་ནི་ཆོས་གོས་དྲས་ཤིང་དྲུབས་པ་གསུམ་ བྱིན་གྱིས་བརླབ་པའོ།། །།གལ་ཏེ་རེ་ཞིག་ཆོས་གོས་དྲས་ཤིང་དྲུབས་པ་དག་མེད་ན་རྒྱུ་ལ་བྱིན་གྱིས་བརླབ་པར་བྱའོ། །འདི་ལྟར་བྱིན་གྱིས་བརླབ་པར་བྱ་སྟེ། ཆོས་གོས་གསུམ་གྱི་རྒྱུ་སོ་སོར་བལྟབ་སྟེ་སློབ་མའི་ཕྲག་པ་གཡོན་པར་བཀལ་ནས་གཉི་ག་འགྲེང་སྟེ་ལག་པས་ ཆོས་གོས་སྣམ་སྦྱར་རྒྱུ་བཟུང་ནས་དེས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་འདི་སྣམ་སྦྱར་དུ་བྱིན་གྱིས་བརླབ་བོ། །འཚལ་ན་སྣམ་ཕྲན་དགུ་པ་ལ་སོགས་པར་བགྱིས་ཏེ། གླེགས་བུ་ཕྱེད་དང་གསུམ་པ་ལ་སོགས་

  104. 53a

    པར་བགྱིའོ། །བར་ཆད་མ་བྱུང་ན་བཀྲུའོ། །བརྐྱང་ངོ་། །དྲའོ། །བསྡེབ་བོ། །གཟུངས་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་རུང་བ་སྤྱད་པར་འོས་པའོ། །དེ་བཞིན་དུ་ ལན་གཉིས་ལན་གསུམ་དུ་བཟླས། མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེའི་འོག་ཏུ་ཆོས་གོས་བླ་གོས་རྒྱུ་བཟུང་ནས་དེས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ ཆོས་གོས་འདི་བླ་གོས་སུ་བྱིན་གྱིས་བརླབ་བོ། །འཚལ་ན་སྣམ་ཕྲན་བདུན་པར་བགྱིས་ཏེ། གླེགས་བུ་ཕྱེད་དང་གསུམ་པར་བགྱིའོ། །བར་ཆད་མ་བྱུང་ན་བཀྲུའོ། །བརྐྱང་ངོ་། །དྲའོ། །བསྡེབ་བོ། །གཟུངས་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་ སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་རུང་བ་སྤྱད་པར་འོས་པའོ། །དེ་བཞིན་དུ་ལན་གཉིས་ལན་གསུམ་དུ་བཟླས། མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེའི་འོག་ཏུ་ཆོས་གོས་མཐང་གོས་ རྒྱུ་བཟུང་ནས་དེས་འདི་སྐད་ཅེས་བརྗོད་པར་བྱ་སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་འདི་མཐང་གོས་སུ་བྱིན་གྱིས་བརླབ་བོ། །འཚལ་ན་སྣམ་ཕྲན་ལྔ་པར་བགྱིས་ཏེ། གླེགས་བུ་ཕྱེད་དང་གཉིས་པར་བགྱིའོ། །བར་ཆད་མ་བྱུང་ན་ བཀྲུའོ། །བརྐྱང་ངོ་། །དྲའོ། །བསྡེབ་བོ། །གཟུངས་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ། ཆོས་གོས་འདི་རུང་བ་སྤྱད་པར་འོས་པའོ། །དེ་བཞིན་དུ་ལན་གཉིས་ལན་གསུམ་དུ་བཟླས། མཁན་ པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེ་ནི་ཆོས་གོས་མ་དྲས་ཤིང་མ་དྲུབས་པ་གསུམ་བྱིན་གྱིས་བརླབ་པའོ།། །།དེའི་འོག་ཏུ་དེའི་ལྷུང་བཟེད་བསྟན་པར་བྱའོ། །འདི་ལྟར་བསྟན་པར་བྱ་སྟེ། དགེ་སློང་གཅིག་གིས་

  105. 53b

    ལྷུང་བཟེད་ལག་པ་གཡོན་པར་བཞག་སྟེ། ལག་པ་གཡས་པས་བཀབ་ནས་རྒན་པའི་མཐའ་ལོགས་ནས་དགེ་སློང་རེ་རེའི་མདུན་དུ་འགྲེང་སྟེ་འདུད་པ་དང་བཅས་པས་འདི་སྐད་ཅེས་བརྗོད་པར་བྱ་སྟེ། བཙུན་པའམ་ཚེ་དང་ལྡན་པ་དགོངས་སུ་གསོལ། ཚེ་དང་ལྡན་པ་མིང་འདི་ཞེས་ བགྱི་བའི་ལྷུང་བཟེད་འདི་མི་ཆུང་ངམ། མི་ཆེ་འམ། མི་སྐྱ་འམ། དགེ་སློང་ཐམས་ཅད་ཀྱིས་ཀྱང་ལྷུང་བཟེད་དེ་ལྟ་བུ་ཉིད་མ་ཡིན་ན་རེ་རེ་ནས་ལྷུང་བཟེད་བཟང་ངོ་ཞེས་བརྗོད་པར་བྱའོ། །གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་བརྗོད་ན་འགལ་ཚབས་ཅན་དུ་འགྱུར་རོ། ། དེ་ནི་ལྷུང་བཟེད་བསྟན་པའོ།། །།དེའི་འོག་ཏུ་མཁན་པོ་རང་གིས་དེ་ལ་ལྷུང་བཟེད་བྱིན་གྱིས་བརླབ་པར་བྱའོ། །འདི་ལྟར་བྱིན་གྱིས་བརླབ་པར་བྱ་སྟེ། གཉི་ག་འགྲེང་སྟེ་ལག་པ་གཡོན་པར་ལྷུང་བཟེད་བཞག་ལ་ལག་པ་གཡས་པས་བཀབ་ནས་དེས་འདི་སྐད་ཅེས་བརྗོད་པར་བྱ་ སྟེ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་བསླང་བའི་སྣོད་དུ་བྱིན་གྱིས་བརླབ་བོ། །དེ་བཞིན་དུ་ལན་གཉིས་ལན་གསུམ་དུ་བཟླས། མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་ སོ་ཞེས་བརྗོད་པར་བྱའོ། །དེ་ནི་ལྷུང་བཟེད་བྱིན་གྱིས་བརླབ་པའོ། །དེའི་འོག་ཏུ་བསྙེན་པར་རྫོགས་པར་བྱ་བ་དེ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་ཐལ་མོ་སྦྱོར་དུ་བཅུག་ནས་ཚོགས་ལ་མངོན་དུ་ཕྱོགས་པར་གཞག་པར་བྱའོ། །དེའི་འོག་ཏུ་དགེ་སློང་ལས་བྱེད་པས་ གསང་སྟེ་སྟོན་པའི་དགེ་སློང་ལ། མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་བའི་གསང་སྟེ་སྟོན་པར་གསོལ་བ་བཏབ་པ་གང་ཡིན་ཞེས་དྲི་བར་བྱའོ། །གསང་སྟེ་སྟོན་པ་གང་ཡིན་པ་དེས་བདག་མིང་འདི་ཞེས་བྱ་བའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་ལས་བྱེད་པས་ གསང་སྟེ་སྟོན་པའི་དགེ་སློང་ལ་མིང་འདི་ཞེས་བྱ་བ་ཁྱོད་མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་བ་ལ་གསང་སྟེ་སྟོན་པར་སྤྲོའམ་ཞེས་བརྗོད་པར་བྱའོ། །དེས་ཀྱང་སྤྲོ་འོ་ཞེས་བརྗོད་པར་བྱའོ། །དེ་ནི་གསང་སྟེ་སྟོན་པ་སྤྲོ་བར་བྱ་བའོ། །དེའི་འོག་ཏུ་དགེ་སློང་ལས་བྱེད་པས་གསང་

  106. 54a

    སྟེ་སྟོན་པས་བར་ཆད་དྲི་བའི་ཕྱིར་གསོལ་བ་འབའ་ཞིག་གི་ལས་བྱའོ། །འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་མིང་འདི་ཞེས་ བགྱི་བ་ལ་གསང་སྟེ་སྟོན་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་གསང་སྟེ་སྟོན་ཏོ། །འདི་ནི་གསོལ་བའོ། །དེ་ནི་གསང་སྟེ་ སྟོན་པའི་གསོལ་བའི་ལས་སོ།། །།དེའི་འོག་ཏུ་གསང་སྟེ་སྟོན་པའི་དགེ་སློང་གིས་དཀྱིལ་འཁོར་བའི་ཕྱི་རོལ་དུ་སོང་སྟེ་བསྙེན་པར་རྫོགས་པར་བྱ་བ་དེ་བདག་ལ་ཕྱག་འཚལ་དུ་བཅུག་ནས་མདུན་དུ་ཙོག་ཙོག་པོར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་འདི་སྐད་ཅེས་ བརྗོད་པར་བྱ་སྟེ། ཚེ་དང་ལྡན་པ་ཁྱོད་ཉོན་ཅིག་འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཆུང་ཟད་ཅིག་དྲིས། ཁྱོད་མ་འཛེམ་པར་བྱོས་ལ་ཡིན་པ་ལ་ཡིན་ཞེས་སྨྲོས་ཤིག །མ་ཡིན་པ་ལ་ཡང་མ་ཡིན་ཞེས་ལན་ཐོབ་ཤིག །ཁྱོད་སྐྱེས་པ་ ཡིན་ནམ། དེས་སྐྱེས་པ་ལགས་ཞེས་བརྗོད་པར་བྱའོ། །སྐྱེས་པའི་དབང་པོ་དང་ལྡན་ནམ། དེས་ལྡན་ཞེས་བརྗོད་པར་བྱའོ། །ལོ་ཉི་ཤུ་ལོན་ནམ། དེས་ལོན་ཞེས་བརྗོད་པར་བྱའོ། །ཁྱོད་ཀྱི་ཆོས་གོས་གསུམ་དང་ལྷུང་བཟེད་ཚང་ངམ། དེས་ཚང་ཞེས་བརྗོད་པར་བྱའོ། ། ཁྱོད་ཀྱི་ཕ་མ་གསོན་ནམ། གལ་ཏེ་གསོན་ཞེས་ཟེར་ན། ཁྱོད་ཕ་མས་གནང་ངམ་ཞེས་དྲི་བར་བྱའོ། །དེས་གནང་ཞེས་བརྗོད་པར་བྱའོ། །གལ་ཏེ་ཤི་ཟེར་ན། ཁྱོད་བྲན་མ་ཡིན་ནམ། བརྐུས་པ་མ་ཡིན་ནམ། རྙེད་བཙོན་མ་ཡིན་ནམ། རྩོད་པ་ཅན་མ་ཡིན་ནམ། བཙོངས་ པ་མ་ཡིན་ནམ། རྒྱལ་པོས་བཀྲབས་པ་མ་ཡིན་ནམ། རྒྱལ་པོ་ལ་སྡིགས་པ་མ་ཡིན་ནམ། རྒྱལ་པོ་ལ་གནོད་པའི་ལས་བྱེད་པ་མ་ཡིན་ནམ། ཁྱོད་རྒྱལ་པོ་ལ་གནོད་པའི་ལས་བྱས་སམ། བྱེད་དུ་བཅུག་པ་མ་ཡིན་ནམ། ཆོམ་རྐུན་པར་གྲགས་པ་མ་ཡིན་ནམ། ཟ་མ་མ་ཡིན་

  107. 54b

    ནམ། མ་ནིང་མ་ཡིན་ནམ། དགེ་སློང་མ་སུན་ཕྱུང་བ་མ་ཡིན་ནམ། རྐུ་ཐབས་སུ་གནས་པ་མ་ཡིན་ནམ། ཐ་དད་དུ་གནས་པ་མ་ཡིན་ནམ། གནས་པར་མི་བྱ་བ་མ་ཡིན་ནམ། མུ་སྟེགས་ཅན་མ་ཡིན་ནམ། མུ་སྟེགས་ཅན་ཞུགས་པ་མ་ཡིན་ནམ། ཕ་བསད་པ་མ་ཡིན་ནམ། མ་བསད་པ་མ་ཡིན་ནམ། དགྲ་བཅོམ་པ་བསད་པ་མ་ཡིན་ནམ། དགེ་འདུན་དབྱེན་བྱས་པ་མ་ཡིན་ནམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ། སྤྲུལ་པ་མ་ཡིན་ནམ། དུད་འགྲོ་མ་ཡིན་ནམ་ཞེས་དྲི་བར་བྱའོ། །དེས་མ་ལགས་ཞེས་བརྗོད་པར་ བྱའོ། །ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་མེད་དམ། གལ་ཏེ་བུ་ལོན་ཆགས་སོ་ཞེས་ཟེར་ན། ཁྱོད་བསྙེན་པར་རྫོགས་ནས་འཇལ་ནུས་སམ་ཞེས་དྲི་བར་བྱའོ། །གལ་ཏེ་མི་ནུས་ཞེས་ཟེར་ན། འོ་ན་སོང་ཤིག་ཅེས་བརྗོད་པར་བྱའོ། །གལ་ ཏེ་བསྙེན་པར་རྫོགས་ནས་འཇལ་ནུས་ཞེས་ཟེར་ན། ཁྱོད་སྔོན་རབ་ཏུ་བྱུང་བ་མ་ཡིན་ནམ་ཞེས་བརྗོད་པར་བྱའོ། །གལ་ཏེ་རབ་ཏུ་བྱུང་ངོ་ཞེས་ཟེར་ན་ཁྱོད་ལ་ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཁྱོད་འབབས་པ་ན་བསླབ་པ་ལེགས་པར་ ཕུལ་ལམ་ཞེས་དྲི་བར་བྱའོ། །གལ་ཏེ་ལྟུང་བ་བྱུང་ངོ་ཞེས་ཟེར་ན། འོ་ན་སོང་ཤིག་ཅེས་བརྗོད་པར་བྱའོ། །གལ་ཏེ་མ་བྱུང་ངོ་ཞེས་ཟེར་ན། ཇི་ལྟར་ཁྱོད་ད་ལྟར་རབ་ཏུ་བྱུང་བ་ཡིན་ནམ་ཞེས་དྲི་བར་བྱའོ། །གལ་ཏེ་བདག་རབ་ཏུ་བྱུང་བ་ཡིན་ཞེས་ཟེར་ན། ཁྱོད་ཀྱིས་ཚངས་པར་ སྤྱོད་པ་ལེགས་པར་སྤྱད་དམ་ཞེས་དྲི་བར་བྱའོ། །དེས་ལེགས་པར་སྤྱད་ཅེས་བརྗོད་པར་བྱའོ། །ཁྱོད་ཀྱི་མིང་ཅི། ཁྱོད་ཀྱི་མཁན་པོའི་མིང་ཅི། དེས་བདག་མིང་འདི་ཞེས་བགྱི། དོན་གྱི་སླད་དུ་མཚན་ནས་སྨོས་ཏེ་བདག་གི་མཁན་པོ་མིང་འདི་ཞེས་བགྱི་ཞེས་བརྗོད་པར་བྱའོ། །ཚེ་དང་ ལྡན་པ་ཁྱོད་ཉོན་ཅིག །མི་རྣམས་ཀྱི་ལུས་ལ་ལུས་ཀྱི་ནད་ཀྱི་རྣམ་པ་འདི་ལྟ་བུ་འདི་དག་འབྱུང་བ་འདི་ལྟ་སྟེ། མཛེ་དང་། འབྲས་དང་། ཕོལ་མིག་དང་། འབྲུམ་ཕྲན་དང་། ཤ་བཀྲ་དང་། ཁྱི་རྔོ་དང་། གཡའ་བ་དང་། གློག་པ་དང་། རྐང་ཤུ་དང་། སྐེམ་ནད་དང་། སྐེམ་པ་དང་། བརྗེད་

  108. 55a

    བྱེད་དང་། བཀྲེས་ངབ་དང་། སྐྱ་རྦབ་དང་། རྐང་བམ་དང་། མཚན་བར་རྡོལ་བ་དང་། རིམས་དང་། རིམས་དྲག་པོ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། འདུས་པ་དང་། རིམས་ཉིན་རེ་བ་དང་། རྟག་པའི་རིམས་དང་། རིམས་ལྡང་དུབ་པ་དང་། ཤུ་བ་དང་། གསུད་པ་དང་། སྐྱིགས་བུ་དང་། ལུད་པ་དང་། དབུགས་མི་བདེ་བ་དང་། ལྷོག་པ་དང་། ཡན་ལག་ཏུ་ཟུག་པ་དང་། སྐྲན་དང་། ཁྲག་ནད་དང་། མཁྲིས་ནད་དང་། གཞང་འབྲུམ་དང་། སྐྱུག་བྲོ་བ་དང་། ཆུས་བགགས་པ་དང་། ངལ་བ་དང་། ལུས་ཚ་བ་དང་། རྩིབ་ལོགས་ཚ་བ་དང་། རུས་པ་ལ་ཟུག་པ་སྟེ། ལུས་ཀྱི་ནད་འདི་ལྟ་བུ་འདི་དག་ལས་གང་ཡང་རུང་བ་དང་། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། དེས་མ་མཆིས་ཞེས་བརྗོད་པར་བྱའོ། །ཚེ་དང་ལྡན་ པ་ཁྱོད་ཉོན་ཅིག །ཁྱོད་ལ་ད་ལྟར་ངས་གང་དྲིས་པ་དེ་ཉིད་དགེ་འདུན་གྱི་དབུས་སུ་ཡང་ཚངས་པ་མཚུངས་པར་སྤྱོད་པ་མཁས་པ་རྣམས་ཁྱོད་ལ་འདྲི་བས་དེར་ཡང་ཁྱོད་ཀྱིས་མ་འཛེམ་པར་བྱོས་ལ་ཡིན་པ་ལ་ཡང་ཡིན་ཞེས་སྨྲོས་ཤིག །མ་ཡིན་པ་ལ་ཡང་མ་ཡིན་ཞེས་ལན་ ཐོབ་ཅིག །ཁྱོད་མ་བོས་ཀྱི་བར་དུ་མ་འོང་བར་སྡོད་ཅིག །དེ་ནི་གསང་སྟེ་བསྟན་པའོ།། །།དེའི་འོག་ཏུ་གསང་སྟེ་སྟོན་པའི་དགེ་སློང་གིས་རྒན་པའི་མཐའ་ལོགས་སུ་འགྲེང་སྟེ། འདུད་པ་དང་བཅས་པས་འདི་སྐད་ཅེས་བརྗོད་པར་བྱ་སྟེ། དགེ་འདུན་བཙུན་པ་རྣམས་ གསན་དུ་གསོལ། །བདག་གིས་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་མཆི་ཞིག་གམ། ཐམས་ཅད་ཀྱིས་གལ་ཏེ་ཡོངས་སུ་དག་ ནའོ་ཞེས་བརྗོད་པར་བྱའོ། །གལ་ཏེ་དེ་སྐད་བརྗོད་ན་དེ་ལྟ་ན་ལེགས། གལ་ཏེ་མི་བརྗོད་ན་འགལ་ཚབས་ཅན་དུ་འགྱུར་རོ། །དེ་ནི་འོང་བ་ཞུ་བའོ། །དེའི་འོག་ཏུ་བསྙེན་པར་རྫོགས་པར་བྱ་བ་དེ་དཀྱིལ་འཁོར་བར་བཀུག་ནས་རྒན་པའི་མཐའ་ལོགས་སུ་ཕྱག་འཚལ་དུ་བཅུག་སྟེ། དགེ་

  109. 55b

    སློང་ལས་བྱེད་པས་བསྙེན་པར་རྫོགས་པ་གསོལ་དུ་གཞུག་པར་བྱའོ། །འདི་ལྟར་གསོལ་དུ་གཞུག་པར་བྱ་སྟེ། དང་པོར་སྟོན་པ་ལ་ཕྱག་འཚལ་དུ་གཞུག་གོ། །དེའི་འོག་ཏུ་རྒན་པའི་མཐའ་ལོགས་སུ་ཕྱག་འཚལ་དུ་བཅུག་སྟེ། ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་ མནན་ནས་ཙོག་ཙོག་པོར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་དེས་འདི་སྐད་ཅེས་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ་དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་ པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བས་དོན་གྱི་སླད་དུ་མཚན་ནས་སྨོས་ཏེ། མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་པར་མཛད་དུ་གསོལ། དགེ་འདུན་ བཙུན་པ་རྣམས་ཀྱིས་བདག་དྲང་བར་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་གཟུང་དུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་ བརྩེ་བར་མཛད་དུ་གསོལ། དེ་བཞིན་དུ་ལན་གཉིས་ལན་གསུམ་དུ་བཟླས། དེ་ནི་བསྙེན་པར་རྫོགས་པར་གསོལ་བའོ། །དེའི་འོག་ཏུ་དགེ་སློང་ལས་བྱེད་པས་དགེ་འདུན་གྱི་ནང་དུ་བར་ཆད་དྲི་བའི་ཕྱིར་གསོལ་བ་འབའ་ཞིག་གི་ལས་བྱའོ། །འདི་ལྟར་བྱ་སྟེ་འདུག་ལ་འདི་སྐད་ཅེས་ བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་ གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། བདག་གིས་དགེ་འདུན་གྱི་ནང་དུ་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་དྲི་བར་བགྱིའོ། །འདི་ནི་གསོལ་བའོ། །དེ་ནི་ནང་དུ་བར་

  110. 56a

    ཆད་དྲི་བ་གསོལ་བའི་ལས་སོ།། །།དེའི་འོག་ཏུ་དགེ་སློང་ལས་བྱེད་པས་དགེ་འདུན་གྱི་ནང་དུ་བར་ཆད་དྲི་བར་བྱའོ། །འདི་ལྟར་དྲི་བར་བྱ་སྟེ། ལས་བྱེད་པ་ལ་ཕྱག་འཚལ་དུ་བཅུག་ནས་མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ ཙོག་ཙོག་པོར་འདུག་ཏུ་བཅུག་སྟེ། ཐལ་མོ་སྦྱོར་དུ་བཅུག་ནས་འདི་སྐད་ཅེས་བརྗོད་པར་བྱ་སྟེ། ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་ཅིག་དྲིས། ཁྱོད་མ་འཛེམ་པར་བྱོས་ལ་ཡིན་པ་ལ་ཡང་ ཡིན་ཞེས་སྨྲོས་ཤིག །མ་ཡིན་པ་ལ་ཡང་མ་ཡིན་ཞེས་ལན་ཐོབ་ཅིག །ཁྱོད་སྐྱེས་པ་ཡིན་ནམ། དེས་སྐྱེས་པ་ལགས་ཞེས་བརྗོད་པར་བྱའོ། །སྐྱེས་པའི་དབང་པོ་དང་ལྡན་ནམ། དེས་ལྡན་ཞེས་བརྗོད་པར་བྱའོ། །ལོ་ཉི་ཤུ་ལོན་ནམ། དེས་ལོན་ཞེས་བརྗོད་པར་བྱའོ། ། ཁྱོད་ཀྱི་ཆོས་གོས་གསུམ་དང་ལྷུང་བཟེད་ཚང་ངམ། དེས་ཚང་ཞེས་བརྗོད་པར་བྱའོ། །ཁྱོད་ཀྱི་ཕ་མ་གསོན་ནམ། གལ་ཏེ་གསོན་ཞེས་ཟེར་ན། ཁྱོད་ཕ་མས་གནང་ངམ་ཞེས་དྲི་བར་བྱའོ། །དེས་གནང་ཞེས་བརྗོད་པར་བྱའོ། །གལ་ཏེ་ཤི་ཞེས་ཟེར་ན། ཁྱོད་བྲན་མ་ཡིན་ ནམ། བརྐུས་པ་མ་ཡིན་ནམ། རྙེད་བཙོན་མ་ཡིན་ནམ། རྩོད་པ་ཅན་མ་ཡིན་ནམ། བཙོངས་པ་མ་ཡིན་ནམ། རྒྱལ་པོས་བཀྲབས་པ་མ་ཡིན་ནམ། རྒྱལ་པོ་ལ་སྡིགས་པ་མ་ཡིན་ནམ། རྒྱལ་པོ་ལ་གནོད་པའི་ལས་བྱེད་པ་མ་ཡིན་ནམ། ཁྱོད་རྒྱལ་པོ་ལ་གནོད་པའི་ལས་ བྱས་སམ་བྱེད་དུ་བཅུག་པ་མ་ཡིན་ནམ། ཆོམ་རྐུན་པར་གྲགས་པ་མ་ཡིན་ནམ། ཟ་མ་མ་ཡིན་ནམ། མ་ནིང་མ་ཡིན་ནམ། དགེ་སློང་མ་སུན་ཕྱུང་བ་མ་ཡིན་ནམ། རྐུ་ཐབས་སུ་གནས་པ་མ་ཡིན་ནམ། ཐ་དད་དུ་གནས་པ་མ་ཡིན་ནམ། གནས་པར་མི་བྱ་བ་མ་ཡིན་ནམ། མུ་སྟེགས་ ཅན་མ་ཡིན་ནམ། མུ་སྟེགས་ཅན་ཞུགས་པ་མ་ཡིན་ནམ། ཕ་བསད་པ་མ་ཡིན་ནམ། མ་བསད་པ་མ་ཡིན་ནམ། དགྲ་བཅོམ་པ་བསད་པ་མ་ཡིན་ནམ། དགེ་འདུན་གྱི་དབྱེན་བྱས་པ་མ་ཡིན་ནམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ།

  111. 56b

    སྤྲུལ་པ་མ་ཡིན་ནམ། དུད་འགྲོ་མ་ཡིན་ནམ་ཞེས་དྲི་བར་བྱའོ། །དེས་མ་ལགས་ཞེས་བརྗོད་པར་བྱའོ། །ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་མེད་དམ། གལ་ཏེ་བུ་ལོན་ཆགས་སོ་ཞེས་ཟེར་ན། ཁྱོད་བསྙེན་པར་རྫོགས་ནས་འཇལ་ནུས་སམ་ ཞེས་དྲི་བར་བྱའོ། །གལ་ཏེ་མི་ནུས་ཞེས་ཟེར་ན། འོ་ན་སོང་ཤིག་ཅེས་བརྗོད་པར་བྱའོ། །གལ་ཏེ་བསྙེན་པར་རྫོགས་ནས་འཇལ་ནུས་ཞེས་ཟེར་ན། ཁྱོད་སྔོན་རབ་ཏུ་བྱུང་བ་མ་ཡིན་ནམ་ཞེས་དྲི་བར་བྱའོ། །གལ་ཏེ་རབ་ཏུ་བྱུང་ངོ་ཞེས་ཟེར་ན་ཁྱོད་ལ་ཕམ་པར་འགྱུར་བ་བཞི་ལས་ལྟུང་ བ་གང་ཡང་རུང་བ་ཞིག་བྱུང་བ་མ་ཡིན་ནམ། ཁྱོད་འབབས་པ་ན་བསླབ་པ་ལེགས་པར་ཕུལ་ལམ་ཞེས་དྲི་བར་བྱའོ། །གལ་ཏེ་ལྟུང་བ་བྱུང་ངོ་ཞེས་ཟེར་ན། འོ་ན་སོང་ཤིག་ཅེས་བརྗོད་པར་བྱའོ། །གལ་ཏེ་མ་བྱུང་ངོ་ཞེས་ཟེར་ན། ཇི་ལྟར་ཁྱོད་ད་ལྟར་རབ་ཏུ་བྱུང་བ་ཡིན་ནམ་ ཞེས་དྲི་བར་བྱའོ། །གལ་ཏེ་བདག་རབ་ཏུ་བྱུང་བ་ཡིན་ཞེས་ཟེར་ན། ཁྱོད་ཀྱིས་ཚངས་པར་སྤྱོད་པ་ལེགས་པར་སྤྱད་དམ་ཞེས་དྲི་བར་བྱའོ། །དེས་ལེགས་པར་སྤྱད་ཅེས་བརྗོད་པར་བྱའོ། །ཁྱོད་ཀྱི་མིང་ཅི། ཁྱོད་ཀྱི་མཁན་པོའི་མིང་ཅི། དེས་བདག་མིང་འདི་ཞེས་ བགྱི་དོན་གྱི་སླད་དུ་མཚན་ནས་སྨོས་ཏེ་བདག་གི་མཁན་པོ་མིང་འདི་ཞེས་བགྱི་ཞེས་བརྗོད་པར་བྱའོ། །ཚེ་དང་ལྡན་པ་ཁྱོད་ཉོན་ཅིག །མི་རྣམས་ཀྱི་ལུས་ལ་ལུས་ཀྱི་ནད་ཀྱི་རྣམ་པ་འདི་ལྟ་བུ་འདི་དག་འབྱུང་བ་འདི་ལྟ་སྟེ། མཛེ་དང་། འབྲས་དང་། ཕོལ་མིག་དང་། འབྲུམ་ ཕྲན་དང་། ཤ་བཀྲ་དང་། ཁྱི་རྔོ་དང་། གཡའ་བ་དང་། གློག་པ་དང་། རྐང་ཤུ་དང་། སྐེམ་ནད་དང་། སྐེམ་པ་དང་། བརྗེད་བྱེད་དང་། བཀྲེས་ངབ་དང་། སྐྱ་རྦབ་དང་། རྐང་བམ་དང་། མཚན་པར་རྡོལ་བ་དང་། རིམས་དང་། རིམས་དྲག་པོ་དང་། ཉིན་གཅིག་ པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། འདུས་པ་དང་། རིམས་ཉིན་རེ་བ་དང་། རྟག་པའི་རིམས་དང་། རིམས་ལྡང་དུབ་པ་དང་། ཤུ་བ་དང་། གསུད་པ་དང་། སྐྱིགས་བུ་དང་། ལུད་པ་དང་། དབུགས་མི་བདེ་བ་དང་། ལྷོག་པ་

  112. 57a

    དང་། ཡན་ལག་ཏུ་ཟུག་པ་དང་། སྐྲན་དང་། ཁྲག་ནད་དང་། མཁྲིས་ནད་དང་། གཞང་འབྲུམ་དང་། སྐྱུག་བྲོ་བ་དང་། ཆུས་བགགས་པ་དང་། ངལ་བ་དང་། ལུས་ཚ་བ་དང་། རྩིབ་ལོགས་ཚ་བ་དང་། རུས་པ་ལ་ཟུག་པ་སྟེ། ལུས་ཀྱི་ནད་ འདི་ལྟ་བུ་འདི་དག་ལས་གང་ཡང་རུང་བ་དང་། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། དེས་མ་མཆིས་ཞེས་བརྗོད་པར་བྱའོ། །དེ་ནི་ནང་དུ་བར་ཆད་དྲི་བའོ།། །།དེའི་འོག་ཏུ་དགེ་སློང་ལས་བྱེད་པས་གསོལ་བ་བྱས་ཏེ་ལས་བྱའོ། །འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་ བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་ པར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་ བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ།

  113. 57b

    མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་ འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་ གནང་ནས་དགེ་འདུན་གྱིས་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནི་བསྙེན་པར་རྫོགས་པ་ཉེ་བར་སྒྲུབ་པའོ།། །།དེའི་འོག་ཏུ་གྲིབ་ཚོད་གཞལ་བར་བྱའོ། ། བཅོམ་ལྡན་འདས་ཀྱིས་གྲིབ་ཚོད་གཞལ་བར་བྱའོ་ཞེས་བཀའ་སྩལ་ནས་དགེ་སློང་དག་ཤིང་བུ་རིང་པོ་དག་གིས་གྲིབ་ཚོད་འཇལ་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཤིང་བུ་རིང་པོ་དག་གིས་གྲིབ་ཚོད་གཞལ་བར་མི་བྱའོ། །དགེ་སློང་དག་གོམ་པ་དག་གིས་ འཇལ་བར་བྱེད་པ་ན་ཧ་ཅང་ཐོགས་ནས་བཅོམ་ལྡན་འདས་ཀྱིས་བཀའ་སྩལ་པ། གོམ་པ་དག་གིས་གཞལ་བར་མི་བྱ་བར་འདི་ལྟར་ཐུར་མ་དག་གིས་གཞལ་བར་བྱའོ། །དགེ་སློང་དག་ཐུར་མ་རིང་པོ་དག་གིས་འཇལ་བར་བྱེད་པ་ན། དེ་ལྟ་ན་ཡང་ཧ་ཅང་ཐོགས་ནས་ བཅོམ་ལྡན་འདས་ཀྱིས་བཀའ་སྩལ་པ། ཐུར་མ་སོར་བཞི་ཙམ་གྱིས་གཞལ་བར་བྱ་ཞིང་ཐུར་མ་ཇི་ཙམ་ཡོད་པ་དེ་ཙམ་ལ་སྐྱེས་བུ་ཞེས་བརྗོད་པར་བྱའོ། །དེ་ནི་གྲིབ་ཚོད་གཞལ་བའོ།། །།དེའི་འོག་ཏུ་ཉིན་མཚན་གྱི་ཆ་བརྗོད་པར་བྱ་སྟེ། སྔ་དྲོ་དང་། གུང་དང་། ཕྱི་ དྲོ་དང་། མཚན་མོའི་ཐུན་དང་པོ་དང་། ཐུན་དང་པོའི་ཕྱེད་དང་། གུང་ཐུན་དང་། གུང་ཐུན་གྱི་ཕྱེད་དང་། ཐུན་ཐ་མ་དང་། ཐུན་ཐ་མའི་ཕྱེད་དང་། སྐྱ་རེངས་མ་ཤར་བ་དང་། སྐྱ་རེངས་ཤར་བ་དང་། ཉི་མ་མ་ཤར་བ་དང་། ཉི་མ་ཤར་བ་དང་། ཉི་མ་བརྒྱད་ཆ་ཤར་བ་དང་།

  114. 58a

    ཉི་མ་བཞི་ཆ་ཤར་བ་དང་། གུང་ཚིགས་མ་ཡོལ་བ་དང་། ཉི་མ་བཞི་ཆ་ལུས་པ་དང་། ཉི་མ་བརྒྱད་ཆ་ལུས་པ་དང་། ཉི་མ་མ་ནུབ་པ་དང་། ཉི་མ་ནུབ་པ་དང་། རྒྱུ་སྐར་རྣམས་མ་ཤར་བ་དང་། རྒྱུ་སྐར་རྣམས་ཤར་བ་སྟེ། དེ་ནི་ཉིན་མཚན་གྱི་ཆ་བརྗོད་ པའོ།། །།དེའི་འོག་ཏུ་དུས་ཚོད་བརྗོད་པར་བྱ་སྟེ། དུས་ཚོད་ནི་ལྔ་སྟེ། དགུན་གྱི་དུས་དང་། དཔྱིད་ཀྱི་དུས་དང་། དབྱར་གྱི་དུས་དང་། དབྱར་ཐུང་ངུའི་དུས་དང་། དབྱར་རིང་པོའི་དུས་སོ། །དེ་ལ་དགུན་གྱི་དུས་ནི་ཟླ་བ་བཞིའོ། །དཔྱིད་ཀྱི་དུས་ནི་ཟླ་བ་བཞིའོ། ། དབྱར་གྱི་དུས་ནི་ཟླ་བ་གཅིག་གོ། །དབྱར་ཐུང་ངུའི་དུས་ནི་ཉིན་ཞག་གཅིག་གོ། །དབྱར་རིང་པོའི་དུས་ནི་ཉིན་ཞག་གཅིག་གིས་ཟླ་བ་གསུམ་དུ་མ་ཆོག་པ་སྟེ། དེ་ནི་དུས་ཚོད་བརྗོད་པའོ།། །།དེའི་འོག་ཏུ་གནས་རྣམས་བརྗོད་པར་བྱ་སྟེ། ཚེ་དང་ལྡན་པ་མིང་འདི་ཞེས་བྱ་ བ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པའི་དགེ་སློང་གི་གནས་སུ་གསུངས་ཏེ། དེ་ལ་གནས་ན་དགེ་སློང་ ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །བཞི་གང་ཞེ་ན། གོས་ཀྱི་ནང་ན་ཕྱག་དར་ཁྲོད་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ བ་དང་བསྙེན་པར་རྫོགས་པར་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་ཕྱག་དར་ཁྲོད་ཀྱི་གོས་ཀྱིས་འཚོ་བར་སྤྲོའམ། དེས་སྤྲོ་ཞེས་བརྗོད་པར་བྱའོ། །ལྷག་པར་རྙེད་ན་དར་རམ། རས་ཡུག་ཆེན་ནམ། བེའུ་རས་སམ། དར་ལའམ། མོན་དར་རམ། བེའུ་རས་ཡུག་ཆེན་ནམ། བེའུ་རས་དམར་པོའམ། བེའུ་ཕྲུག་གམ། ལ་མར་རམ། ཡུལ་ཀ་ཤིའི་རས་ཕྲན་ནམ། ཁ་དོག་རན་པའམ། ཁ་དོག་ངན་པའམ། བལ་གོས་སམ། ཤ་ནའི་རས་སམ། ཟར་མའི་རས་སམ། རས་གོས་སམ།

  115. 58b

    དུ་གུ་ལའི་རས་སམ། ཀོ་ཏམ་པའི་རས་སམ། ཉི་འོག་གི་གོས་སམ། གཞན་ཡང་གོས་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུས་དམ་འཆའ་འམ། དེས་དམ་ འཆའོ་ཞེས་བརྗོད་པར་བྱའོ། །མིང་འདི་ཞེས་བྱ་བ་ཁྱོད་ཉོན་ཅིག །ཟས་ཀྱི་ནང་ན་བསོད་སྙོམས་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། ། མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་བསོད་སྙོམས་ཀྱི་ཟས་ཀྱིས་འཚོ་བར་སྤྲོའམ། དེས་སྤྲོ་ཞེས་བརྗོད་པར་བྱའོ། །ལྷག་པར་རྙེད་ན་འབྲས་ཅན་ནམ། སྐྱོ་མའམ། ཐུག་པའམ། ལྔ་སྟོན་ནམ། བརྒྱད་སྟོན་ནམ། བཅུ་བཞི་སྟོན་ནམ། ཉ་སྟོན་ནམ། རྟག་རེས་ འཁོར་རམ། མགྲོན་དུ་བོས་པའམ། འཕྲལ་ལ་བོས་པའམ། སྤགས་པའམ། གཞན་ཡང་ཟས་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའ་འམ། དེས་དམ་ འཆའོ་ཞེས་བརྗོད་པར་བྱའོ། །མིང་འདི་ཞེས་བྱ་བ་ཁྱོད་ཉོན་ཅིག །གནས་མལ་གྱི་ནང་ན་ཤིང་དྲུང་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དང་དགེ་སློང་གི་དངོས་པོར་འགྱུར་ རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་ཤིང་དྲུང་གི་གནས་མལ་གྱིས་འཚོ་བར་སྤྲོའམ། དེས་སྤྲོ་ཞེས་བརྗོད་པར་བྱའོ། །ལྷག་པར་རྙེད་ན་ཁང་པའམ། སྔ་ཁང་ངམ། ཁང་པ་བརྩེགས་པའམ། བསིལ་ཁང་ངམ། སབ་མོས་བསྐོར་བའམ། བ་གམ་ མམ། ཁང་བཟངས་སམ། སྒོ་ཁང་གི་སྟེང་གི་བསིལ་ཁང་ངམ། ཁང་སྟེང་གི་ཡོལ་ཁང་ངམ། ཡོལ་ཁང་ངམ། སྤང་ལེབ་ཁང་ངམ། ས་ཕུག་གམ། བྲག་ཕུག་གམ། རི་ཕུག་གམ། རྩྭའི་སྤྱིལ་བུའམ། ལོ་མའི་སྤྱིལ་བུའམ། འཆག་སར་བྱས་པའམ།

  116. 59a

    འཆག་སར་མ་བྱས་པའམ། བྱ་སྐྱིབས་སུ་བྱས་པའམ། བྱ་སྐྱིབས་སུ་མ་བྱས་པའམ། གཞན་ཡང་གནས་མལ་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་ འཆའ་འམ། དེས་དམ་འཆའོ་ཞེས་བརྗོད་པར་བྱའོ། །མིང་འདི་ཞེས་བྱ་བ་ཁྱོད་ཉོན་ཅིག །སྨན་གྱི་ནང་ན་བཀུས་ཏེ་བོར་བ་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་ པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་བཀུས་ཏེ་བོར་བའི་སྨན་གྱིས་འཚོ་བར་སྤྲོ་འམ། དེས་སྤྲོ་ཞེས་བརྗོད་པར་བྱའོ། །ལྷག་པར་རྙེད་ན་ཞུན་མར་རམ། འབྲུ་མར་རམ། སྦྲང་རྩིའམ། བུ་རམ་གྱི་དབུ་བའམ། དུས་སུ་རུང་བའམ། ཐུན་ཚོད་ དུ་རུང་བའམ། ཞག་བདུན་པའམ། འཚོ་བའི་བར་དུ་བཅང་བའམ། རྩ་བའི་སྨན་ནམ། སྡོང་བུའི་སྨན་ནམ། ལོ་མའི་སྨན་ནམ། འབྲས་བུའི་སྨན་ནམ། གཞན་ཡང་སྨན་རུང་བ་གང་དགེ་འདུན་ནམ་གང་ཟག་ལས་རྙེད་ན། དེ་ཡང་ཁྱོད་ཀྱིས་ལོང་ལ་ཚོད་ཟིན་པར་ གྱིས་ཤིག །ཇི་ལྟ་ཁྱོད་གནས་འདི་ལྟ་བུ་ལ་དམ་འཆའ་འམ། དེས་དམ་འཆའོ་ཞེས་བརྗོད་པར་བྱའོ། །དེ་ནི་གནས་རྣམས་བརྗོད་པའོ།། །།དེའི་འོག་ཏུ་ལྟུང་བར་འགྱུར་བའི་ཆོས་རྣམས་བརྗོད་པར་བྱ་སྟེ། མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་ དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པའི་དགེ་སློང་གི་ལྟུང་བར་འགྱུར་བའི་ཆོས་སུ་གསུངས་ཏེ། དགེ་སློང་གིས་དེ་བྱས་ན་བྱས་མ་ཐག་ཏུ་ དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་

  117. 59b

    པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །བཞི་གང་ཞེ་ན། འདོད་པ་དང་། འདོད་པ་ལ་ཞེན་པ་དང་། འདོད་པ་ལ་འཆུམས་པ་དང་། འདོད་པ་ ལ་ལྷག་པར་ཞེན་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །འདོད་པ་སྤངས་པ་ནི་བསྔགས་ཏེ་བོར་བ་དང་། བསྩལ་བ་དང་། ཟད་པ་དང་། འདོད་ཆགས་དང་བྲལ་བ་དང་། འགོག་པ་དང་། ཉེ་བར་ཞི་བ་དང་། ནུབ་པ་ནི་བསྟོད་དོ། །བཀུར་རོ། ། བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཆགས་པའི་སེམས་ཀྱིས་བུད་མེད་ལ་མིག་གཏད་དེ་མིག་གིས་བལྟ་བར་ཡང་མི་བྱ་ན། གཉིས་ཀྱིས་གཉིས་སྤྲད་དེ་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ལྟ་སྨོས་ཀྱང་ཅི་དགོས། ཚེ་དང་ལྡན་ པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས་བསླབ་པ་མ་ཕུལ་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་ འཁྲིག་པའི་ཆོས་བསྟེན་ན། ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། དགེ་སློང་དེ་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་ སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ཕམ་པ་ལྟུང་བར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །

  118. 60a

    ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ཅེས་བརྗོད་པར་བྱའོ། །ཚེ་དང་ལྡན་པ་ཁྱོད་ཉོན་ཅིག །མ་བྱིན་པར་ལེན་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །མ་བྱིན་པར་ལེན་པ་སྤངས་པ་ནི་བསྟོད་དོ། །བཀུར་ཏོ། ། བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་རྐུ་སེམས་ཀྱིས་གཞན་གྱི་ཏིལ་གྱི་ཕུབ་མ་ཡང་མ་བྱིན་པར་མི་བླང་ན། མ་ཤ་ཀ་ལྔའམ། མ་ཤ་ཀ་ལྔ་ལས་ལྷག་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པ་རྐུ་བའི་གྲངས་སུ་གཏོགས་པ་བླངས་ན། ཇི་ཙམ་མ་བྱིན་པར་བླངས་པས་དེ་རྒྱལ་པོའམ་བློན་པོ་ཆེན་པོས་ བཟུང་ནས་དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་ཟེར་ཞིང་གསོད་དམ། འཆིང་ངམ། སྤྱུག་ཀྱང་རུང་སྟེ། དགེ་སློང་དེ་ལྟར་མ་བྱིན་པར་ལེན་ན་དགེ་སློང་དེ་ཡང་ཕམ་པར་གྱུར་པ་ཡིན་པས་གནས་པར་མི་བྱའོ་ཞེས་བྱ་བ་འདི་བཀའ་ སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་ བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཤིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་ བ་མ་ཡིན་པ་དག་སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟ་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ཅེས་བརྗོད་པར་བྱའོ། །ཚེ་དང་ལྡན་པ་ཁྱོད་ཉོན་ཅིག །སྲོག་གཅོད་པ་ནི་བཅོམ་ལྡན་འདས་ཀྱིས་

  119. 60b

    རྣམ་གྲངས་དུ་མས་སྨད་དོ། །སྲོག་གཅོད་པ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཁྱོད་ཀྱི་ཐ་ན་བསམ་བཞིན་དུ་སྲོག་ཆགས་གྲོག་སྦུར་ཡང་གསད་པར་མི་བྱ་ན། མིའམ་མིར་ཆགས་པ་ལྟ་སྨོས་ ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་མིའམ་མིར་ཆགས་པ་ལ་བསམས་བཞིན་དུ་རང་གིས་ལག་དར་ཏེ་སྲོག་གཅོད་དམ། དེ་ལ་མཚོན་ བྱིན་ནམ། དེ་ལ་མཚོན་ཐོགས་པ་གཉེར་ཏམ། དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་སེམས་ཀྱི་འདོད་པ་ དང་། སེམས་ཀྱི་ཀུན་དུ་རྟོག་པ་དག་གི་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ་དེ་ཡང་རྩོམ་པ་དེས་དུས་བྱས་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་ བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཤིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་ པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ཅེས་བརྗོད་པར་བྱའོ། །ཚེ་དང་ལྡན་པ་ཁྱོད་ཉོན་ཅིག །བརྫུན་དུ་སྨྲ་བ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །བརྫུན་དུ་སྨྲ་བ་སྤངས་པ་

  120. 61a

    ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཐ་ན་བཞད་གད་བྱ་བར་བསམས་ཏེ་ཤེས་བཞིན་དུ་བརྫུན་དུ་སྨྲ་བར་ཡང་མི་བྱ་ན། བསམས་བཞིན་དུ་མིའི་ཆོས་བླ་མ་སྨྲ་བ་ལྟ་སྨོས་ཀྱང་ཅི་དགོས། ཚེ་དང་ལྡན་པ་ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་ལ་མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་ བ་དང་། རེག་པར་སྤྱོད་པ་མེད་ལ། མེད་བཞིན་དུ་འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་འདི་སྐད་ཅེས། ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས། མ་མཐོང་ བར་མཐོང་ངོ་ཞེས་སྨྲས་ཏེ། གསོབ་གསོག་བརྫུན་དུ་སྨྲས་སོ་ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་བྱ་བ་འདི་བཀའ་སྩལ་ཏེ། ཅི་ཞིག་ཤེས་ཞེ་ན། སྡུག་བསྔལ་ཤེས་སོ། །ཀུན་འབྱུང་བ་དང་། འགོག་ པ་དང་། ལམ་ཤེས་སོ། །ཅི་ཞིག་མཐོང་ཞེ་ན། ལྷ་རྣམས་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་མཐོང་ངོ་། །ལྷ་རྣམས་ཀྱིས་ཀྱང་བདག་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་བོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་མཐོང་ངོ་། །ལྷ་རྣམས་ཀྱི་སྒྲ་ཐོས་སོ། །ཀླུ་རྣམས་དང་།

  121. 61b

    གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་ རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་ བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་གི་སྒྲ་ཐོས་སོ། །ལྷ་རྣམས་བལྟ་བའི་ཕྱིར་འགྲོའོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ། །ལྷ་རྣམས་བདག་བལྟ་བའི་ཕྱིར་འོང་ངོ་། །ཀླུ་རྣམས་ དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ ཁྲོད་ཀྱི་ཤ་ཟ་རྣམས་བདག་བལྟ་བའི་ཕྱིར་འོང་ངོ་། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་ དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་

  122. 62a

    པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། ། ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་ དང་། རྡུལ་ཁྲོད་ཀྱི་ཤ་ཟ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་དང་། མི་རྟག་པ་ལ་སྡུག་བསྔལ་བའི་ འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་དང་བྲལ་བའི་ འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་། རྣམ་པར་སྔོས་པའི་འདུ་ཤེས་དང་། རྣམ་པར་རྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་གཞིགས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་འཐོར་བའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོར་རྟོག་པའི་འདུ་ཤེས་ཐོབ་བོ། །མ་ཐོབ་བཞིན་དུ་བདག་གིས་བསམ་གཏན་དང་པོ་དང་། གཉིས་པ་དང་། གསུམ་ པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་། རྒྱུན་

  123. 62b

    དུ་ཞུགས་པའི་འབྲས་བུ་དང་། ལན་གཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་ཀྱི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེམས་ཀྱི་རྣམ་གྲངས་དང་། སྔོན་གྱི་གནས་དང་། འཆི་འཕོ་དང་། སྐྱེ་བ་ དང་ཟག་པ་ཟད་པ་ཐོབ་བོ། །བདག་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང་གཉི་གའི་ཆ་ལས་རྣམ་པར་གྲོལ་བ་ཡིན་ནོ་ཞེས་བྱ་བ་སྟེ། དགེ་སློང་གིས་གནས་དེ་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་བ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བསླང་དུ་མེད་པར་འགྱུར་རོ། །འདི་ལྟ་སྟེ་དཔེར་ན་ཤིང་ཏ་ལའི་མགོ་བཅད་ན་སྔོན་ པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་ གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ཅེས་བརྗོད་པར་བྱའོ། །དེ་ནི་ལྟུང་བར་འགྱུར་བའི་ཆོས་རྣམས་བརྗོད་པའོ།། །།དེའི་འོག་ཏུ་དགེ་སྦྱོང་དུ་བྱེད་པའི་ཆོས་རྣམས་བརྗོད་པར་བྱ་སྟེ། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པའི་དགེ་སློང་གི་དགེ་སྦྱོང་དུ་བྱེད་པའི་ཆོས་སུ་གསུངས་ཏེ། བཞི་གང་ཞེ་ན། ཚེ་དང་ལྡན་པ་ཁྱོད་ཀྱིས་དེང་ཕྱིན་ཆད་གཤེ་ཡང་སླར་ མི་གཤེ་བར་བྱ་བ་དང་། ཁྲོས་ཀྱང་སླར་མི་ཁྲོ་བར་བྱ་བ་དང་། བརྡེགས་ཀྱང་སླར་མི་བརྡེག་པར་བྱ་བ་དང་། མཚང་བྲུས་ཀྱང་སླར་མཚང་མི་བྲུ་བར་བྱའོ། །ཇི་ལྟར་གནས་འདི་ལྟ་བུ་ལ་སྤྱོད་དམ། དེས་སྤྱོད་ཅེས་བརྗོད་པར་བྱའོ། །དེ་ནི་དགེ་སྦྱོང་དུ་བྱེད་པའི་ཆོས་རྣམས་བརྗོད་

  124. 63a

    པའོ།། །།དེའི་འོག་ཏུ་མཆོག་ཏུ་འདོད་པར་བྱ་བ་ཡང་དག་པ་ཉིད་ཀྱིས་རྫོགས་པ་ཉིད་བརྗོད་པར་བྱ་སྟེ། ཚེ་དང་ལྡན་པ་ཁྱོད་ཉོན་ཅིག །ཁྱོད་སྔོན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་ཀྱང་ ཅི་མ་རུང་སྙམ་དུ་སྨོན་པ་གང་ཡིན་པ་དེང་ཁྱོད་མཁན་པོར་འོས་པ་དང་། སློབ་དཔོན་དུ་འོས་པ་གཉིས་དང་། དགེ་འདུན་མཐུན་པ་དང་། གསོལ་བ་དང་བཞིའི་ལས་མི་གཡོ་བ་གཞག་པར་མི་འོས་པས་རབ་ཏུ་བྱུང་ཞིང་བསྙེན་པར་རྫོགས་སོ། །དེ་ནི་མཆོག་ཏུ་འདོད་པར་བྱ་བ་ཡང་དག་ པ་ཉིད་ཀྱིས་རྫོགས་པ་ཉིད་བརྗོད་པའོ།། །།དེའི་འོག་ཏུ་ཚུལ་ཁྲིམས་ཀྱིས་མཉམ་པར་གྱུར་པ་ཉིད་སྒྲུབ་པ་ལ་ངེས་པར་སྦྱར་བར་བྱ་སྟེ། ཚེ་དང་ལྡན་པ་ཁྱོད་ཉོན་ཅིག །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་དེ་རིང་བསྙེན་ པར་རྫོགས་པས་ཀྱང་བསླབ་བོ། །དེ་རིང་བསྙེན་པར་རྫོགས་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་བསྙེན་པར་རྫོགས་ནས་ལོ་བརྒྱ་ལོན་པས་ཀྱང་བསླབ་བོ། །དེ་ལྟར་ན་ཚུལ་ཁྲིམས་ཉིད་ཀྱིས་མཉམ་པ་དང་། བསླབ་པ་ཉིད་ཀྱིས་མཉམ་པ་དང་། སོ་སོར་ཐར་ པས་མདོ་འདོན་པ་ཉིད་ཀྱིས་མཉམ་པ་དེ་ཁྱོད་ཀྱིས་དེང་ཕྱིན་ཆད་བསྒྲུབ་པར་བྱའི་མི་བསྒྲུབ་པར་མི་བྱའོ། །དེ་ནི་ཚུལ་ཁྲིམས་ཀྱིས་མཉམ་པར་གྱུར་པ་ཉིད་སྒྲུབ་པ་ལ་ངེས་པར་སྦྱར་བའོ།། །།དེའི་འོག་ཏུ་ཚུལ་དང་འབྲེལ་པའི་གཟུགས་བརྙན་ལ་ངེས་པར་སྦྱར་བར་བྱ་སྟེ། དེང་ཕྱིན་ ཆད་ཁྱོད་ཀྱིས་མཁན་པོ་ལ་ཕའི་འདུ་ཤེས་ཉེ་བར་གཞག་པར་བྱའོ། །མཁན་པོས་ཀྱང་ཁྱོད་ལ་བུའི་འདུ་ཤེས་ཉེ་བར་གཞག་པར་བྱའོ། །ཁྱོད་ཀྱིས་དེང་ཕྱིན་ཆད་མཁན་པོ་ལ་ཇི་སྲིད་འཚོའི་བར་དུ་བསྙེན་བཀུར་བྱའོ། །མཁན་པོས་ཀྱང་ཁྱོད་ཤིའམ་སོས་ཀྱི་བར་དུ་ནད་གཡོག་ བྱའོ། །དེ་ནི་ཚུལ་དང་འབྲེལ་པའི་གཟུགས་བརྙན་ལ་ངེས་པར་སྦྱར་བའོ།། །།དེའི་འོག་ཏུ་དུལ་བར་གནས་པ་ཉིད་ལ་ངེས་པར་སྦྱར་བར་བྱ་སྟེ། དེང་ཕྱིན་ཆད་ཁྱོད་ཀྱིས་ཚངས་པ་མཚུངས་པར་སྤྱོད་པ་རྣམས་དང་། གནས་བརྟན་རྣམས་དང་། བར་མ་རྣམས་དང་། གསར་བུ་

  125. 63b

    རྣམས་ལ་གུས་པ་དང་བཅས་པ་དང་། ཞེ་ས་དང་བཅས་པ་དང་། འཇིགས་པ་དང་བཅས་པའི་དབང་དུ་འགྱུར་བར་གནས་པར་བྱའོ། །དེ་ནི་དུལ་བར་གནས་པ་ཉིད་ལ་ངེས་པར་སྦྱར་བའོ།། །།དེའི་འོག་ཏུ་དགོས་པ་རྗེས་སུ་བསྒྲུབ་པ་ལ་ངེས་པར་སྦྱར་བར་བྱ་སྟེ། དེང་ཕྱིན་ཆད་ཁྱོད་ཀྱིས་ལུང་མནོད་ པར་བྱ། བཀླག་པར་བྱ། ཁ་ཏོན་དུ་བྱའོ། །ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་ བྱ་བ་དང་། མངོན་དུ་མ་བྱས་པ་མངོན་དུ་བྱ་བའི་ཕྱིར་ཁྱོད་ཀྱིས་བརྩོན་པ་མི་འདོར་བར་བྱའོ། །དེ་ནི་དགོས་པ་རྗེས་སུ་བསྒྲུབ་པ་ལ་ཉེ་བར་སྦྱར་བར་བྱ་བའོ།། །།དེའི་འོག་ཏུ་མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་སྒྲུབ་པར་འགྱུར་བ་ཉིད་ཀྱང་བརྗོད་པར་བྱ་སྟེ། འདི་དག་ནི་ཁོ་བོས་ཁྱོད་ལ་ བསླབ་པའི་གཞི་ཆེ་ལོང་ཆེ་ལོང་ཙམ་ཞིག་བརྗོད་པར་ཟད་དེ། གཞན་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་ཐོས་པར་འགྱུར་རོ། །གཞན་དག་ཀྱང་སློབ་དཔོན་དང་། མཁན་པོ་དང་། མཁན་པོ་གཅིག་པ་དང་། སློབ་དཔོན་གཅིག་པ་དང་། གཏམ་འདྲེས་པ་དང་། ཕེབས་པར་སྨྲ་ བ་དང་། སྨོས་འདྲིན་དང་། འགྲོགས་བཤེས་རྣམས་ཀྱང་རྒྱ་ཆེར་སྟོན་པར་འགྱུར་རོ། །དེ་ནི་མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་སྒྲུབ་པར་འགྱུར་བ་ཉིད་བརྗོད་པའོ།། །།དེའི་འོག་ཏུ་གུས་པ་ལ་ཡང་ངེས་པར་སྦྱར་བར་བྱ་སྟེ། ཤེས་རབ་མཆོག་གི་བསྟན་པ་ལ། །ཁྱོད་ནི་བསྙེན་པར་ རྫོགས་པར་གྱུར། །དལ་དང་འབྱོར་པ་རྙེད་དཀའ་བས། །འདི་དག་ཇི་ལྟ་བཞིན་དུ་སྒྲུབས། །མཛེས་པ་རབ་ཏུ་དབྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །དེ་ནི་གུས་པ་ལ་ངེས་པར་སྦྱར་བའོ།། །།དེའི་འོག་ཏུ་བསྒྲུབ་པར་ བྱ་བ་ཐབས་བརྗོད་པ་དང་བཅས་པ་ལ་ངེས་པར་སྦྱར་བར་བྱ་སྟེ། ཚེ་དང་ལྡན་པ་ཁྱོད་བསྙེན་པར་རྫོགས་ཟིན་གྱིས་བག་ཡོད་པར་སྒྲུབས་ཤིག །དེ་ནི་བསྒྲུབ་པར་བྱ་བ་ཐབས་བརྗོད་པ་དང་བཅས་པ་ལ་ངེས་པར་སྦྱར་བའོ། །དགེ་སློང་བསྙེན་པར་རྫོགས་པར་བྱ་བའི་ཆོ་ག་རྫོགས་སོ།། །།འདུལ་བ་

  126. 64a

    གཞི། བམ་པོ་དྲུག་པ། བར་སྡོམ་ལ། མ་ཞུས་ལྷུང་བཟེད་ཆོས་གོས་དང་། །ནད་གཡོག་འགྱོད་དང་ལྟ་བ་དང་། །ནན་ཐུར་བཟོད་དང་སྤོ་བ་དང་། །མགུ་དང་དབྱུང་བ་རྣམ་པ་བཅུ། །དེ་དག་དེ་ལྟར་རབ་ཏུ་བྱུང་ཞིང་བསྙེན་པར་རྫོགས་པ་ན་མཁན་པོ་དང་ སློབ་དཔོན་ལ་ཞུ་བར་མི་བྱེད། ཡོངས་སུ་ཞུ་བར་མི་བྱེད་གུས་པར་མི་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངས་ལྷན་ཅིག་གནས་པ་དང་ཉེ་གནས་རྣམས་ཀྱི་ཀུན་དུ་སྤྱོད་པའི་ཆོས་དག་ བཅའ་བར་བྱ་སྟེ། དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས་མཁན་པོ་དང་སློབ་དཔོན་དག་ལ་མ་ཞུས་པར་གཙུག་ལག་ཁང་ཆག་ཆག་གདབ་པར་མི་བྱ། ཕྱག་དར་མི་བྱ། བ་ལང་གི་ལྕི་བ་སར་པས་བྱུག་པར་མི་བྱ། ལྷུང་བཟེད་ཀྱི་ལས་དང་ཆོས་གོས་ཀྱི་ལས་མི་བྱ། དགེ་སློང་དེ་འདྲ་བ་མཁོས་སུ་དབབ་པར་མི་བྱ། དགེ་སློང་དེ་འདྲ་བ་ལ་འདག་རྫས་དང་། སོ་ཤིང་དག་བསྟབ་པར་མི་བྱ། ཁ་ཏོན་དང་དམིགས་ཀྱིས་དྲི་བ་མི་བྱའོ། །དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས་མཁན་པོ་དང་སློབ་དཔོན་དག་ལ་མ་ཞུས་པར་ལས་ཐམས་ཅད་ མི་བྱ་སྟེ། བཤང་བ་དང་། གཅི་བ་དང་། སོ་ཤིང་དོར་བ་དང་། ཆུ་བཏུང་བ་དང་། ཉེ་འཁོར་དང་བཅས་པའི་གཙུག་ལག་ཁང་དུ་མཆོད་རྟེན་ལ་ཕྱག་བྱ་བ་དང་། གཙུག་ལག་ཁང་ནས་འདོམ་བཞི་བཅུ་རྩ་དགུའི་མཐའ་ཚུན་ཆད་དུ་འགྲོ་བ་ནི་མ་གཏོགས་སོ། །འདི་ལྟ་སྟེ་ མཁན་པོ་དང་སློབ་དཔོན་དག་གི་ལྷུང་བཟེད་ཀྱི་ལས་ཉེ་བར་གནས་པར་གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་བདག་ཅག་གིས་མཁན་པོ་དང་སློབ་དཔོན་དག་གི་ལྷུང་བཟེད་ཀྱི་ལས་བྱའོ་ཞེའམ། བྱེད་དུ་གཞུག་གོ་ཞེས་བརྩོན་པ་ཤས་ཆེན་ པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་གི་ཆོས་གོས་ཀྱི་ལས་ཉེ་བར་གནས་པར་གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་

  127. 64b

    ཀྱིས། ཨེ་མའོ་བདག་ཅག་གིས་མཁན་པོ་དང་སློབ་དཔོན་དག་གི་ཆོས་གོས་ཀྱི་ལས་བྱའོ་ཞེའམ། བྱེད་དུ་གཞུག་གོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། ། འདི་ལྟ་སྟེ་མཁན་པོ་དང་སློབ་དཔོན་དག་ན་བར་གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་བདག་ཅག་གིས་མཁན་པོ་དང་སློབ་དཔོན་དག་གི་ནད་གཡོག་བྱའོ་ཞེའམ། བྱེད་དུ་གཞུག་གོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་ བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་ལ་འགྱོད་པ་སྐྱེས་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་བདག་ཅག་གིས་མཁན་པོ་དང་སློབ་དཔོན་ དག་གི་འགྱོད་པ་བསལ་བར་བྱའོ་ཞེའམ། བྱེད་དུ་གཞུག་གོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་ལ་སྡིག་པ་ ཅན་གྱི་ལྟ་བའི་རྣམ་པ་སྐྱེས་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་བདག་ཅག་གིས་མཁན་པོ་དང་སློབ་དཔོན་དག་གི་སྡིག་པ་ཅན་གྱི་ལྟ་བའི་རྣམ་པ་སྤང་བར་བྱའོ་ཞེའམ། བྱེད་དུ་གཞུག་གོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། ། གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་ལ་དགེ་འདུན་གྱིས་ནན་ཐུར་གྱི་ལས་འདི་ལྟ་སྟེ། བསྡིགས་པའི་ལས་དང་། སྨད་པའི་ལས་དང་། བསྐྲད་པའི་ལས་དང་། ཕྱིར་དགྱེད་པའི་ལས་དང་། མ་མཐོང་བས་གནས་ནས་དབྱུང་བའི་ལས་དང་། ཕྱིར་མི་འཆོས་པས་གནས་ནས་དབྱུང་བའི་ལས་དང་། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བའི་ལས་དེ་ལྟ་བུ་དག་བྱེད་འདོད་པར་གྱུར་ན། དེ་ལ་དགེ་སློང་ལྷན་ཅིག་གནས་

  128. 65a

    པ་དང་ཉེ་གནས་རྣམས་ཀྱིས། ཨེ་མའོ་དགེ་འདུན་གྱིས་མཁན་པོ་དང་སློབ་དཔོན་དག་ལ་ནན་ཐུར་གྱི་ལས་འདི་ལྟ་བུ་དག་མི་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་ལ་དགེ་འདུན་གྱིས་ནན་ཐུར་གྱི་ལས་འདི་ལྟ་སྟེ། བསྡིགས་པའི་ལས་དང་། སྨད་པའི་ལས་དང་། བསྐྲད་པའི་ལས་དང་། ཕྱིར་དགྱེད་པའི་ལས་དང་། མ་མཐོང་བས་གནས་ནས་དབྱུང་བའི་ལས་དང་། ཕྱིར་མི་འཆོས་པས་གནས་ནས་དབྱུང་བའི་ལས་དང་། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བའི་ལས་དེ་ལྟ་བུ་དག་བྱས་པར་གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་དགེ་འདུན་གྱིས་མཁན་པོ་དང་སློབ་དཔོན་ དག་ལ་ནན་ཐུར་གྱི་ལས་འདི་ལྟ་བུ་བྱས་པ་སྐྲ་འགྲེང་བ་ལྟ་བུར་གྱུར། སྐྲ་ཞིག་པ་ལྟ་བུར་གྱུར་ཅིང་དགེ་འདུན་ལ་སྤུ་ས་ལ་ལྟུང་བ་ལྟ་བུར་བྱེད། འབྱུང་བར་སྐྱོང་། མཚུངས་པར་ཉེ་བར་སྟོན་ལ་མཚམས་ཀྱི་ནང་དུ་འོངས་ཏེ། བཟོད་པ་གསོལ་ཞིང་རྒྱུ་གང་གིས་ནན་ཐུར་གྱི་ལས་ བྱས་པ་དེ་ཡང་སྤོང་བ་དག་ལ་བཟོད་པ་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་ལ་དགེ་འདུན་ལྷག་མའི་ལྟུང་བ་བྱུང་བར་ གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་དགེ་འདུན་གྱིས་མཁན་པོ་དང་སློབ་དཔོན་དག་ལ་སྤོ་བ་དང་གཞི་ནས་སྤོ་བ་སྦྱིན་པར་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་ མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་གིས་སྤོ་བ་དང་གཞི་ནས་སྤོ་བ་སྤྱད་ཟིན་པར་གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་དགེ་འདུན་གྱིས་མཁན་པོ་དང་སློབ་དཔོན་སྤོ་བ་དང་གཞི་ནས་སྤོ་བ་

  129. 65b

    སྤྱད་ཟིན་པ་དག་ལ་མགུ་བར་བྱ་བ་དང་གཞི་ནས་མགུ་བར་བྱ་བ་སྦྱིན་པར་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་མཁན་པོ་དང་སློབ་དཔོན་དག་གིས་ མགུ་བར་བྱ་བ་དང་གཞི་ནས་མགུ་བར་བྱ་བ་སྤྱད་ཟིན་པར་གྱུར་ན། དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས། ཨེ་མའོ་དགེ་འདུན་གྱིས་མཁན་པོ་དང་སློབ་དཔོན་མགུ་བར་བྱ་བ་དང་གཞི་ནས་མགུ་བར་བྱ་བ་སྤྱད་ཟིན་པ་དག་ལ་དབྱུང་བ་སྦྱིན་པར་བྱའོ་ཞེས་བརྩོན་པ་ཤས་ ཆེན་པོ་བསྒྲུབ་པར་བྱའོ། །གལ་ཏེ་བརྩོན་པར་བྱེད་ན་དེ་ལྟ་ན་ལེགས། གལ་ཏེ་བརྩོན་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས་མཁན་པོ་དང་སློབ་དཔོན་དག་ལ་ཇི་ལྟར་བསྒྲུབ་པར་བྱ་བ་དེ་བཞིན་དུ་མཁན་པོ་དང་སློབ་ དཔོན་དག་གིས་ཀྱང་ལྷན་ཅིག་གནས་པ་དང་ཉེ་གནས་རྣམས་ལ་བསྒྲུབ་པར་བྱ་སྟེ་ཞུ་བ་ནི་མ་གཏོགས་སོ།། །།སངས་རྒྱས་བཅོམ་ལྡན་འདས་མཉན་ཡོད་དུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱར་གནས་པར་ཞལ་གྱིས་བཞེས་སོ། །དེའི་ཚེ་ན་ཚེ་དང་ ལྡན་པ་ཉེ་སྡེ་ལྗོངས་སུ་དབྱར་གནས་པར་ཁས་བླངས་ཤིང་དེས་ལོ་གཅིག་ལོན་པ་ན་ལྷན་ཅིག་གནས་པ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་སོ། །དེ་ནས་ཚེ་དང་ལྡན་པ་ཉེ་སྡེ་དབྱར་ཟླ་བ་གསུམ་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ལོ་གཉིས་ ལོན་པ་ལྷན་ཅིག་གནས་པ་ལོ་གཅིག་ལོན་པ་དང་ལྷན་ཅིག་ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ། །དེ་ནས་ཚེ་དང་ལྡན་པ་ཉེ་སྡེས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་ བཀྲུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་དགེ་སློང་གློ་བུར་དུ་འོངས་པ་རྣམས་ལ། དགེ་སློང་ཁྱོད་ད་གཟོད་

  130. 66a

    ག་ལས་འོངས་དབྱར་གང་དུ་གནས་པར་ཁས་བླངས་ཞེས་སོ་སོར་ཀུན་དགའ་བར་བྱ་བ་འདིས་སོ་སོར་ཀུན་དགའ་བར་མཛད་པ་ཡིན་པས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་སྡེ་ལ་བཀའ་སྩལ་པ། ཉེ་སྡེ་ཁྱོད་ད་གཟོད་ག་ལས་འོངས། དབྱར་གང་དུ་གནས་པར་ཁས་བླངས་བཙུན་པ་བདག་ད་གཟོད་ ལྗོངས་ནས་མཆིས་ཏེ། དབྱར་ལྗོངས་སུ་གནས་པར་མཆིད་ཀྱིས་འཚལ་ཏོ། །ཉེ་སྡེ་ཁྱོད་ཀྱི་རིགས་ཀྱི་བུ་འདི་སུ་ཞིག་ཡིན། བཙུན་པ་བདག་གི་ལྷན་ཅིག་གནས་པ་ལགས་སོ། །ཉེ་སྡེ་ཁྱོད་ལོ་དུ་ལོན། ཁྱོད་ཀྱི་ལྷན་ཅིག་གནས་པ་ལོ་དུ་ལོན། བཙུན་པ་བདག་ནི་དགུང་ལོ་གཉིས་ ལགས། བདག་གི་ལྷན་ཅིག་གནས་པས་ནི་དགུང་ལོ་གཅིག་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་རིགས་ཀྱི་བུ་ཉེ་སྡེས་དང་པོ་ཁོ་ནར་ཚོགས་བསྡུ་བར་བསམས་སོ། །དེ་ལྟ་བས་ན་ལོ་གཅིག་ལོན་པས་རབ་ཏུ་དབྱུང་ བར་མི་བྱ། བསྙེན་པར་རྫོགས་པར་མི་བྱ། གནས་སྦྱིན་པར་མི་བྱ། དགེ་ཚུལ་ཉེ་བར་གཞག་པར་མི་བྱ་ཞིང་བདག་ཉིད་ཀྱང་མི་གནས་པར་འདུག་པར་མི་བྱའོ། །ལོ་གཉིས་ལོན་པས་ཀྱང་མི་བྱ། ལོ་གསུམ་ལོན་པས་ཀྱང་མི་བྱ། ལོ་བཞི་ལོན་པས་ཀྱང་མི་བྱ། ལོ་ལྔ་ལོན་ པས་ཀྱང་མི་བྱ། ལོ་དྲུག་ལོན་པས་ཀྱང་མི་བྱ། ལོ་བདུན་ལོན་པས་ཀྱང་མི་བྱ། ལོ་བརྒྱད་ལོན་པས་ཀྱང་མི་བྱ་སྟེ། ལོ་དགུ་ལོན་པས་ཀྱང་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་སྦྱིན་པར་མི་བྱ། དགེ་ཚུལ་ཉེ་བར་གཞག་པར་མི་བྱ་ཞིང་བདག་ ཉིད་ཀྱང་མི་གནས་པར་འདུག་པར་མི་བྱའོ། །ལོ་བཅུ་ལོན་པས་ནི་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །དེ་དག་བྱེ་བྲག་མེད་པར་བྱིས་པ་དང་། རྨོངས་ པ་དང་། མི་གསལ་བ་དང་། མི་མཁས་པ་དག་གིས་ཀྱང་རབ་ཏུ་འབྱིན་པར་བྱེད་དེ། ཀྱེ་མ་དེ་དག་བདག་ཉིད་མ་དུལ་བར་གཞན་དུལ་བར་བྱེད་པ་དེ་ནི་གནས་མེད་ལ། བདག་ཉིད་མ་ཞི་བར་གཞན་ཞི་བར་བྱེད་པ་དང་། བདག་ཉིད་མ་གྲོལ་བར་གཞན་གྲོལ་བར་བྱེད་པ་དང་། བདག་ཉིད་

  131. 66b

    ཡོངས་སུ་མྱ་ངན་ལས་མ་འདས་པར་གཞན་ཡོངས་སུ་མྱ་ངན་ལས་འདའ་བར་བྱེད་པ་དང་། བདག་ཉིད་འདམ་ལས་མ་རྒལ་བར་གཞན་འདམ་ལས་སྒྲོལ་བར་བྱེད་པ་དེ་ནི་གནས་མེད་དོ།། །།རྒན་ཞུགས་བྱིས་པ། རྨོངས་པ། མི་གསལ་བ། མི་མཁས་པ་ ཞིག་གིས་གཞན་མུ་སྟེགས་ཅན་ཞིག་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ནས། དེས་དུས་དང་དུས་སུ་གདམས་ངག་དང་རྗེས་སུ་བསྟན་པ་མ་ཐོབ་ནས་བསླབ་པ་ཕུལ་ཏེ་ཉམས་པར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་ འདས་ཀྱིས་བཀའ་སྩལ་པ། དེ་ལྟ་བས་ན་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། བསྙེན་པར་རྫོགས་ནས་ལོ་བཅུ་ལོན་པའམ་ལྷག་པ་དང་། ལྷན་ཅིག་གནས་པ་དང་ཉེ་གནས་རྣམས་ཀྱི་ནད་གཡོག་བྱེད་དམ་བྱེད་དུ་འཇུག་ནུས་པ་དང་། ལྷན་ཅིག་གནས་པ་དང་ཉེ་གནས་རྣམས་ལ་འགྱོད་པ་སྐྱེས་པ་སེལ་ཏམ་སེལ་དུ་འཇུག་ནུས་པ་དང་། ལྷན་ཅིག་གནས་པ་དང་། ཉེ་གནས་རྣམས་ལ་སྡིག་པ་ཅན་གྱི་ལྟ་བའི་རྣམ་པ་བྱུང་བ་སྤོང་ངམ་སྤོང་དུ་འཇུག་ནུས་པ་དང་། ཕྱོགས་གང་དུ་ལྷན་ཅིག་གནས་པ་དང་ཉེ་གནས་རྣམས་མངོན་པར་མི་དགའ་ན་དེ་ལ་དོར་བའམ་འདོར་དུ་འཇུག་ནུས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་ བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་

  132. 67a

    རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་ པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་ལ་མཁས་པ་དང་། འདུལ་བ་ལ་མཁས་པ་དང་། མ་མོ་ལ་མཁས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་ བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་རིག་པ་དང་། འདུལ་བ་རིག་པ་དང་། མ་ མོ་རིག་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་ རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། མདོ་སྡེ་ལ་གསལ་བ་དང་། འདུལ་བ་ ལ་གསལ་བ་དང་། མ་མོ་ལ་གསལ་བ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་

  133. 67b

    ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། ལྷན་ཅིག་ གནས་པ་དང་ཉེ་གནས་རྣམས་མདོ་སྡེ་འཛིན་དུ་འཇུག་ནུས་པ་དང་། འདུལ་བ་འཛིན་དུ་འཇུག་ནུས་པ་དང་། མ་མོ་འཛིན་དུ་འཇུག་ནུས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་ འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། ལྷག་པའི་ཚུལ་ཁྲིམས་ཀྱི་བསླབ་པ་ལ་སློབ་པ་དང་། ལྷག་པའི་སེམས་ཀྱི་བསླབ་པ་ལ་སློབ་པ་དང་། ལྷག་པའི་ཤེས་རབ་ཀྱི་བསླབ་པ་ལ་སློབ་པ་སྟེ། ལོ་བཅུ་ལོན་པ་ཆོས་ ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་ རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། ལྷན་ཅིག་གནས་པ་དང་ཉེ་གནས་རྣམས་ལྷག་པའི་ཚུལ་ཁྲིམས་ཀྱི་བསླབ་ པ་ལ་སློབ་ཏུ་འཇུག་ནུས་པ་དང་། ལྷག་པའི་སེམས་ཀྱི་བསླབ་པ་ལ་སློབ་ཏུ་འཇུག་ནུས་པ་དང་། ལྷག་པའི་ཤེས་རབ་ཀྱི་བསླབ་པ་ལ་སློབ་ཏུ་འཇུག་ནུས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་

  134. 68a

    སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་ པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། ལྷག་པའི་སྤྱོད་པ་ལ་སློབ་པ་དང་། ལྷག་པའི་འདུལ་བ་ལ་སློབ་པ་དང་། ལྷག་པའི་སོ་སོར་ཐར་པ་ལ་སློབ་པ་སྟེ། ལོ་བཅུ་ལོན་པ་ཆོས་ལྔ་ པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་ རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། ལྷན་ཅིག་གནས་པ་དང་ཉེ་གནས་རྣམས་ལྷག་པའི་སྤྱོད་པ་ལ་སློབ་ཏུ་འཇུག་ ནུས་པ་དང་། ལྷག་པའི་འདུལ་བ་ལ་སློབ་ཏུ་འཇུག་ནུས་པ་དང་། ལྷག་པའི་སོ་སོར་ཐར་པ་ལ་སློབ་ཏུ་འཇུག་ནུས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་ བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ ཞེ་ན། དད་པ་ཕུན་སུམ་ཚོགས་པ་དང་། ཚུལ་ཁྲིམས་ཕུན་སུམ་ཚོགས་པ་དང་། ཐོས་པ་ཕུན་སུམ་ཚོགས་པ་དང་། གཏོང་བ་ཕུན་སུམ་ཚོགས་པ་དང་། ཤེས་རབ་ཕུན་སུམ་ཚོགས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་

  135. 68b

    པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་ གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་ཕུན་སུམ་ཚོགས་པ་དང་། ཏིང་ངེ་འཛིན་ཕུན་སུམ་ཚོགས་པ་དང་། ཤེས་རབ་ཕུན་སུམ་ཚོགས་པ་དང་། རྣམ་པར་གྲོལ་བ་ཕུན་སུམ་ཚོགས་པ་དང་། རྣམ་པར་གྲོལ་བ་ ཤེས་པ་དང་མཐོང་བ་ཕུན་སུམ་ཚོགས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། ཤེས་རབ་དང་ལྡན་པ་དང་། དྲན་པ་དང་ལྡན་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་ པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། ཤེས་རབ་དང་ལྡན་པ་དང་། ནང་དུ་ཡང་དག་བཞག་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་

  136. 69a

    ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། ། ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། བརྩོན་འགྲུས་བརྩམས་པ་དང་། ཤེས་རབ་དང་ལྡན་པ་དང་། མཉམ་པར་བཞག་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་ སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་ གནས་པར་འདུག་པར་བྱའོ། །ལྔ་གང་ཞེ་ན། སློབ་པའི་ཚུལ་ཁྲིམས་ཀྱི་ཕུང་པོ་དང་ལྡན་པ་དང་། སློབ་པའི་ཏིང་ངེ་འཛིན་གྱི་ཕུང་པོ་དང་ལྡན་པ་དང་། སློབ་པའི་ཤེས་རབ་ཀྱི་ཕུང་པོ་དང་ལྡན་པ་དང་། སློབ་པའི་རྣམ་པར་གྲོལ་བའི་ཕུང་པོ་དང་ལྡན་པ་དང་། སློབ་པའི་རྣམ་ པར་གྲོལ་བ་ཤེས་པ་དང་མཐོང་བའི་ཕུང་པོ་དང་ལྡན་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། མི་སློབ་པའི་ཚུལ་ཁྲིམས་ཀྱི་ཕུང་པོ་དང་ལྡན་པ་དང་། མི་ སློབ་པའི་ཏིང་ངེ་འཛིན་གྱི་ཕུང་པོ་དང་ལྡན་པ་དང་། མི་སློབ་པའི་ཤེས་རབ་ཀྱི་ཕུང་པོ་དང་ལྡན་པ་དང་། མི་སློབ་པའི་རྣམ་པར་གྲོལ་བའི་ཕུང་པོ་དང་ལྡན་པ་དང་། མི་སློབ་པའི་རྣམ་པར་གྲོལ་བ་ཤེས་པ་དང་མཐོང་བའི་ཕུང་པོ་དང་ལྡན་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་

  137. 69b

    རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་ པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། བྱུང་བ་ཤེས་པ་དང་། བཅས་པ་ཤེས་པ་དང་། རྗེས་སུ་བཅས་པ་ཤེས་པ་དང་། བཀག་པ་ཤེས་པ་དང་། གནང་བ་ཤེས་པ་སྟེ། ལོ་བཅུ་ལོན་པ་ཆོས་ལྔ་པོ་ དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་ པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། བར་དུ་གཅོད་པ་ཤེས་པ་དང་། བར་དུ་གཅོད་པ་མ་ཡིན་པ་ཤེས་པ་དང་། སྨྲ་བ་པོ་དང་། རྗེས་སུ་སྟོན་པ་དང་། ལྷན་ཅིག་གནས་པ་ དང་ཉེ་གནས་རྣམས་གནས་འཆར་གཞུག་ནུས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །ལྔ་གང་ཞེ་ན། བར་དུ་གཅོད་པ་ཤེས་པ་དང་། བར་དུ་གཅོད་པ་མ་ཡིན་པ་ ཤེས་པ་དང་། སྨྲ་བ་པོ་དང་། རྗེས་སུ་སྟོན་པ་དང་། ལྷན་ཅིག་གནས་པ་དང་ཉེ་གནས་རྣམས་རེ་ཞིག་གི་གནས་འཆར་གཞུག་ནུས་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་

  138. 70a

    བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །གཞན་ཡང་ལོ་བཅུ་ལོན་པ་ཆོས་ལྔ་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་ འདུག་པར་བྱའོ། །ལྔ་གང་ཞེ་ན། ལྟུང་བ་ཤེས་པ་དང་། ལྟུང་བ་མ་ཡིན་པ་ཤེས་པ་དང་། ཡང་བ་ཤེས་པ་དང་། ལྕི་བ་ཤེས་པ་དང་། སོ་སོར་ཐར་པའི་མདོ་གདོན་པ་དང་རྒྱས་པ་བཀླགས་པ་དང་ཐོན་པ་སྟེ། ལོ་བཅུ་ལོན་པ་ཆོས་ལྔ་པོ་དེ་དག་དང་ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ལོ་བཅུ་ལོན་པ་ཆོས་ལྔ་དང་ ལྡན་པས་རབ་ཏུ་དབྱུང་བར་བྱ། བསྙེན་པར་རྫོགས་པར་བྱ། གནས་སྦྱིན་པར་བྱ། དགེ་ཚུལ་ཉེ་བར་གཞག་པར་བྱ་ཞིང་བདག་ཉིད་ཀྱང་མི་གནས་པར་འདུག་པར་བྱའོ་ཞེས་བཀའ་སྩལ་ན། བཙུན་པ་དགེ་སློང་བསྙེན་པར་རྫོགས་ནས་ལོ་དྲུག་བཅུ་ལགས་ལ། དེས་སོ་སོར་ཐར་པའི་ མདོ་གདོན་པ་དང་། རྒྱས་པ་བཀླགས་པ་དང་། ཐོན་པ་མ་ལགས་ན་དེས་ཀྱང་གཞན་ལ་གནས་པས་མཆིས་པར་བགྱིའམ། ཉེ་བ་འཁོར་དེས་ཀྱང་གཞན་ལ་གནས་པས་འདུག་པར་བྱའོ། །བཙུན་པ་དེ་ལ་ཇི་སྐད་ཅེས་བགྱི། ཉེ་བ་འཁོར་གནས་བརྟན་བྱིས་པ་ཞེས་ བྱའོ། །གང་ལ་གནས་པས་མཆིས་པར་བགྱི། གལ་ཏེ་ཆེས་རྒན་པ་ཡོད་ན་ཆེས་རྒན་པ་ལ་གནས་པས་འདུག་པར་བྱའོ། །གལ་ཏེ་ཆེས་རྒན་པ་མེད་ན་ཆེས་གཞོན་པ་ལ་གནས་པར་འདུག་པར་བྱའོ། །བཙུན་པ་ཅི་ལགས་དེས་དེ་ལ་ཐམས་ཅད་བགྱིའམ། ཉེ་བ་འཁོར་ ཐམས་ཅད་བྱ་སྟེ། འདུད་པ་འབའ་ཞིག་མ་གཏོགས་སོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་ཏུ་འོད་མའི་ཚལ་ཀ་ལན་ད་ཀའི་གནས་སུ་དབྱར་གནས་པར་ཞལ་གྱིས་བཞེས་སོ། །དེའི་ཚེ་ན་རྒྱལ་པོའི་ཁབ་ཏུ་དགེ་སློང་གནས་བརྟན་དག་ནི་ཉུང་གསར་བུ་དག་ནི་མང་དུ་དབྱར་

  139. 70b

    གནས་པར་ཁས་བླངས་སོ། །དེ་ནས་བཅོམ་ལྡན་འདས་ཀྱིས་དབྱར་ཟླ་བ་གསུམ་འདས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ལྷོའི་རི་བོ་དག་ཏུ་ལྗོངས་རྒྱུར་གཤེགས་ཀྱིས། ཁྱེད་ཅག་ ལས་གང་དེ་བཞིན་གཤེགས་པ་དང་ཐབས་ཅིག་ལྷོའི་རི་བོ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག །ཅེས་བསྒོ་ཅིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ཀྱི་བཀའ་མཉན་ནས། དགེ་སློང་ རྣམས་ལ་ཚེ་དང་ལྡན་པ་དག་དེ་བཞིན་གཤེགས་པ་ལྷོའི་རི་བོ་དག་ཏུ་ལྗོངས་རྒྱུར་གཤེགས་ཀྱིས། ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ལྷོའི་རི་བོ་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་ཀྱི་ལས་གྱིས་ཤིག་ཅེས་བསྒོ་བ་དང་། དགེ་སློང་གནས་ བརྟན་རྣམས་ཀྱིས་སྨྲས་པ། ཚེ་དང་ལྡན་པ་ཀུན་དགའ་བོ་བདག་ཅག་ནི་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོ་མི་ནུས་སོ། །དེ་ཅིའི་ཕྱིར་ཞེ་ན། བདག་ཅག་རྒས་པའི་ཕྱིར་རོ། །དགེ་སློང་གསར་བུ་རྣམས་ཀྱིས་ཀྱང་སྨྲས་པ། ཚེ་དང་ལྡན་པ་ཀུན་དགའ་བོ་བདག་ཅག་ ཀྱང་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོ་མི་ནུས་སོ། །དེ་ཅིའི་ཕྱིར་ཞེ་ན། བདག་ཅག་གསར་བུ་ཡིན་ལ་བདག་ཅག་གི་མཁན་པོ་དང་སློབ་དཔོན་དག་མི་འདོང་བས་བདག་ཅག་གི་མཁན་པོ་དང་སློབ་དཔོན་དག་མི་འདོང་ན་བདག་ཅག་མྱུར་དུ་ལྡོག་པ་དང་། སྐྱེན་པར་ལྡོག་ དགོས་པ་དང་། འདི་ལྟ་སྟེ་གནས་བཙལ་བས་ཡང་དང་ཡང་དུ་བཙལ་བར་བྱ་དགོས་པའི་ཕྱིར་རོ། །དེ་ནས་བཅོམ་ལྡན་འདས་དབྱར་ཟླ་བ་གསུམ་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་འཁོར་ཉུང་ཤས་ཤིག་དང་ལྷུང་བཟེད་དང་ཆོས་གོས་བསྣམས་ ཏེ་ལྷོའི་རི་བོ་དག་ཏུ་ལྗོངས་རྒྱུར་གཤེགས་སོ། །སངས་རྒྱས་བཅོམ་ལྡན་འདས་ལྗོངས་རྒྱུར་གཤེགས་པ་རྣམས་ཀྱི་ཆོས་ཉིད་ནི་ལ་ལས་ལེགས་པར་མ་སྦྱངས་པ་དང་། ལེགས་པར་མ་བགོས་པ་དང་། ཁུར་ཐོགས་པའམ། གཅིག་ཏུ་མ་གྱུར་ཏམ་སྙམ་པས་སྐུ་ཐམས་ཅད་ཀྱི་གཡས་

  140. 71a

    ནས་གླང་པོ་ཆེའི་ལྟ་སྟངས་ཀྱིས་རྣམ་པར་གཟིགས་པ་མཛད་པ་ཡིན་པས། དེ་ནས་བཅོམ་ལྡན་འདས་ཀྱིས་སྐུ་ཐམས་ཅད་ཀྱི་གཡས་ནས་གླང་པོ་ཆེའི་ལྟ་སྟངས་ཀྱིས་རྣམ་པར་གཟིགས་སོ། །བཅོམ་ལྡན་འདས་ལྗོངས་རྒྱུར་གཤེགས་པས་སྐུ་ཐམས་ཅད་ཀྱི་གཡས་ ནས་གླང་པོ་ཆེའི་ལྟ་སྟངས་ཀྱིས་རྣམ་པར་གཟིགས་ན་དེ་བཞིན་གཤེགས་པའི་འཁོར་ཉུང་བར་གཟིགས་སོ། །གཟིགས་ནས་ཀྱང་སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་ མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ད་ལྟར་དེ་བཞིན་གཤེགས་པའི་འཁོར་ཉུང་བར་གྱུར་པའི་རྒྱུ་ནི་གང་ཡིན། རྐྱེན་ནི་གང་ཡིན། བཙུན་པ་རྒྱལ་པོའི་ཁབ་འདིར་དགེ་སློང་གནས་བརྟན་དག་ནི་ ཉུང་། གསར་བུ་དག་ནི་མང་དུ་དབྱར་གནས་པར་མཆིད་ཀྱིས་འཚལ་ཅིང་། དགེ་སློང་གནས་བརྟན་རྣམས་ནི་འདི་སྐད་ཅེས། ཚེ་དང་ལྡན་པ་ཀུན་དགའ་བོ་བདག་ཅག་ནི་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོ་མི་ནུས་སོ། །དེ་ཅིའི་ཕྱིར་ཞེ་ན། བདག་ཅག་རྒས་པའི་ ཕྱིར་རོ། །ཞེས་མཆི། དགེ་སློང་གསར་བུ་རྣམས་ཀྱང་འདི་སྐད་ཅེས། ཚེ་དང་ལྡན་པ་ཀུན་དགའ་བོ་བདག་ཅག་ཀྱང་བཅོམ་ལྡན་འདས་དང་ཐབས་ཅིག་ལྗོངས་རྒྱུར་འགྲོ་མི་ནུས་སོ། །དེ་ཅིའི་ཕྱིར་ཞེ་ན། བདག་ཅག་གསར་བུ་ཡིན་ལ་བདག་ཅག་གི་མཁན་པོ་དང་སློབ་དཔོན་མི་ འདོང་བས་བདག་ཅག་གི་མཁན་པོ་དང་སློབ་དཔོན་དག་མི་འདོང་ན་མྱུར་དུ་ལྡོག་པ་དང་། སྐྱེན་པར་ལྡོག་དགོས་པ་དང་། འདི་ལྟ་སྟེ་གནས་བཙལ་བས་ཡང་དང་ཡང་དུ་བཙལ་བར་བྱ་དགོས་པའི་ཕྱིར་རོ་ཞེས་མཆི་སྟེ། བཙུན་པ་ད་ལྟར་དེ་བཞིན་གཤེགས་པའི་འཁོར་ཉུང་བར་གྱུར་པའི་

  141. 71b

    རྒྱུ་ནི་དེ་ལགས། རྐྱེན་ནི་དེ་ལགས་སོ། །ཀུན་དགའ་བོ་དེ་ལྟ་བས་ན་ལོ་ལྔ་ལོན་པ་ཆོས་ལྔ་དང་ལྡན་པས་མི་གནས་པར་ལྗོངས་རྒྱུར་འགྲོ་བར་རྗེས་སུ་གནང་ངོ་། །ལྔ་གང་ཞེ་ན། ལྟུང་བ་ཤེས་པ་དང་། ལྟུང་བ་མ་ཡིན་པ་ཤེས་པ་དང་། ཡང་བ་ཤེས་པ་དང་། ལྕི་བ་ཤེས་པ་དང་། སོ་སོར་ཐར་པའི་མདོ་གདོན་པ་དང་། རྒྱས་པ་བཀླགས་པ་དང་། ཐོན་པ་སྟེ། ལོ་ལྔ་ལོན་པ་ཆོས་ལྔ་པོ་དེ་དག་དང་ལྡན་པས་མི་གནས་པར་ལྗོངས་རྒྱུར་འགྲོ་བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ལོ་ལྔ་ལོན་པ་ཆོས་ལྔ་དང་ལྡན་པས་མི་གནས་པར་ལྗོངས་རྒྱུར་འགྲོ་བར་བྱའོ། །ཞེས་བཀའ་སྩལ་ན། བཙུན་པ་དགེ་སློང་ལོ་དྲུག་ལགས་ལ། དེས་སོ་སོར་ཐར་པའི་མདོ་གདོན་པ་དང་། རྒྱས་པ་བཀླགས་པ་དང་། ཐོན་པ་མ་ལགས་ན། དེས་ ཀྱང་མི་གནས་པར་ལྗོངས་རྒྱུར་མཆི་བར་བགྱིའམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། ཆོས་ལྔ་དང་ལྡན་པ་ལ་བཅའ་བ་བརྟེན་པའི་ཕྱིར་རོ། །བཙུན་པ་ལོ་བཞི་ལགས་ལ། དེས་སོ་སོར་ཐར་པའི་མདོ་གདོན་པ་དང་། རྒྱས་པ་བཀླགས་པ་དང་། ཐོན་པ་ལགས་ན། དེས་ཀྱང་མི་གནས་པར་ལྗོངས་རྒྱུར་མཆི་བར་བགྱིའམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། ལོ་ལྔ་ལོན་པ་ལ་བཅའ་བ་བརྟེན་པའི་ཕྱིར་རོ། །བཙུན་པ་གསུམ་རིག་པ། དྲི་མ་གསུམ་སྤངས་ལ། དེ་ལོ་ལྔ་མ་ལགས་ཤིང་ཆོས་ལྔ་དང་མི་ལྡན་ན་དེས་ཀྱང་མི་གནས་པར་ ལྗོངས་རྒྱུར་མཆི་བར་མི་བགྱིའམ། ཉེ་བ་འཁོར་མི་བྱའོ།། །།བར་སྡོམ་ལ། ལོ་བཅུ་འཛིན་དང་མཁས་པ་དང་། །རིག་དང་གསལ་དང་འཛིན་འཇུག་དང་། །སློབ་དང་སློབ་འཇུག་རྣམ་གཉིས་དང་། །ཕུན་སུམ་ཚོགས་གཉིས་རྣམ་པ་གསུམ། །སློབ་དང་མི་ སློབ་བྱུང་ཤེས་དང་། །གནས་འཆའ་འཆར་གཞུག་ལྟུང་བ་ཤེས། །ལྷོ་ཡི་རི་ལ་རྒྱུ་བ་ཡི། །སྡེ་ཚན་ཡང་དག་བསྡུས་པ་ཡིན། །གནས་ཀྱི་སྐབས་རྫོགས་སྷོ།། །།སྡོམ་ལ། མུ་སྟེགས་ཅན་དང་ཉི་ཤུ་དང་། །དགེ་ཚུལ་བཅྭ་ལྔ་མ་ལོན་པའོ། །སངས་རྒྱས་

  142. 72a

    བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་རྒན་ཞུགས་བྱིས་པ། རྨོངས་པ། མི་གསལ་བ། མི་མཁས་པ་ཞིག་གིས་གཞན་མུ་སྟེགས་ཅན་ཞིག་རབ་ཏུ་ཕྱུང་ཞིང་བསྙེན་པར་རྫོགས་ པར་བྱས་པ་ན་དགེ་སློང་རྣམས་དང་ལྷན་ཅིག་རྩོད་པ་འགའ་ཞིག་བྱུང་ནས་བསླབ་པ་ཕུལ་ཏེ་སྔོན་གྱི་མུ་སྟེགས་ཅན་གྱི་གནས་དེ་ཉིད་དུ་སོང་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་ལྟར་མི་ གཏི་མུག་ཅན་དེ་ལེགས་པར་གསུངས་པའི་ཆོས་འདུལ་བ་གྱ་ནོམ་པ་འདི་ལྟ་བུ་སྤངས་ནས་སྔོན་གྱི་མུ་སྟེགས་ཅན་གྱི་གནས་དེ་ཉིད་དུ་སོང་བ་ལ་ལྟོས། དགེ་སློང་དག་འདི་ལྟ་སྟེ་དཔེར་ན་ཁྱི་བཀྲེས་པའི་ཉམ་ཆུང་བས་ཡོངས་སུ་གཟིར་བ་ནི་བཟའ་བ་དང་བཅའ་བ་གྱ་ནོམ་པ་སྤངས་ནས་བཤང་ བ་བཟའ་བར་བྱའོ་སྙམ་དུ་སེམས་སོ། །དགེ་སློང་དག་དེ་བཞིན་དུ་མི་གཏི་མུག་ཅན་དེས་ཀྱང་ལེགས་པར་གསུངས་པའི་ཆོས་འདུལ་བ་གྱ་ནོམ་པ་འདི་ལྟ་བུ་སྤངས་ནས་སྔོན་གྱི་མུ་སྟེགས་ཅན་གྱི་གནས་དེ་ཉིད་དུ་སོང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་ པ། དགེ་སློང་དག་དེ་ལྟ་བས་ན་ཉེ་དུ་ཤཱཀྱ་དང་མེ་བ་རལ་བ་ཅན་མ་གཏོགས་པ་སེམས་མགུ་བར་མ་གྱུར་པའི་མུ་སྟེགས་ཅན་རབ་ཏུ་དབྱུང་བར་མི་བྱ་ཞིང་བསྙེན་པར་རྫོགས་པར་མི་བྱའོ། །གལ་ཏེ་ཉེ་དུ་ཤཱཀྱ་མུ་སྟེགས་ཅན་གྱི་རྒྱལ་མཚན་གྱིས་འོངས་ཤིང་གལ་ཏེ་ལེགས་པར་གསུངས་པའི་ ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འདོད་ན། དགེ་སློང་དག་དེ་རབ་ཏུ་དབྱུང་བར་བྱ་ཞིང་བསྙེན་པར་རྫོགས་པར་བྱའོ། །དེ་ཅིའི་ཕྱིར་ཞེ་ན། དགེ་སློང་དག་ང་ནི་ཉེ་དུ་རྣམས་ལ་ཉེ་དུའི་ཡོངས་སུ་སྤང་བ་སྦྱིན་པར་བྱེད་པའི་ཕྱིར་རོ། །གལ་ཏེ་ གཞན་མུ་སྟེགས་ཅན་ཀུན་དུ་རྒྱུ་འོངས་ཤིང་གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འདོད་ན། དགེ་སློང་དག་དེ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པ་སྦྱིན་པར་བྱ་བ་ཤེས་པར་གྱིས་ཤིག །

  143. 72b

    དགེ་སློང་དག་གཞན་མུ་སྟེགས་ཅན་གནས་པ་སྤྱད་ནས་སེམས་མགུ་བར་གྱུར་ན་རབ་ཏུ་དབྱུང་བར་བྱ། བསྙེན་པར་རྫོགས་པར་བྱའོ། །བཅོམ་ལྡན་འདས་ཀྱིས་གཞན་མུ་སྟེགས་ཅན་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པ་སྦྱིན་པར་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ལྟར་སྦྱིན་པར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འགའ་ཞིག་གི་གན་དུ་གཞན་མུ་སྟེགས་ཅན་རབ་ཏུ་དབྱུང་བར་འདོད་པ་འོངས་ན། དེས་དེ་ལ་བར་ཆད་ཀྱི་ཆོས་རྣམས་དྲིས་ནས་གཟུང་བར་བྱའོ། །བཟུང་ནས་ གསུམ་ལ་སྐྱབས་སུ་འགྲོ་བ་དང་། དགེ་བསྙེན་ཉིད་དུ་ཁས་བླང་བས་དགེ་བསྙེན་གྱི་སྡོམ་པ་སྦྱིན་པར་བྱའོ། །དེའི་འོག་ཏུ་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་རྒན་རིམས་ཀྱིས་ཕྱག་འཚལ་དུ་བཅུག་ནས་ཙོག་ཙོག་པོར་འདུག་ཏུ་བཅུག་སྟེ། ཐལ་མོ་སྦྱར་དུ་བཅུག་ ནས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་མུ་སྟེགས་ཅན་མིང་འདི་ཞེས་བགྱི་བ་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། བདག་མུ་སྟེགས་ཅན་མིང་འདི་ཞེས་བགྱི་བ་ཟླ་བ་བཞིའི་བར་དུ་མཁན་པོས་སྦྱར་བའི་ གོས་དག་གིས་གནས་པར་དགེ་འདུན་ལ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་མུ་སྟེགས་ཅན་མིང་འདི་ཞེས་བགྱི་བ་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པར་བགྱི་བ་སྩལ་དུ་གསོལ། དེ་བཞིན་དུ་ ལན་གཉིས་ལན་གསུམ་དུ་བཟླས། དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། མུ་སྟེགས་ཅན་མིང་འདི་ཞེས་བགྱི་བ་འདི་མིང་འདི་ཞེས་བགྱི་ བ་ལས་རབ་ཏུ་འབྱུང་བར་འཚལ་ཏེ། མུ་སྟེགས་ཅན་མིང་འདི་ཞེས་བགྱི་བ་འདི་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པར་དགེ་འདུན་ལ་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་

  144. 73a

    འདུན་གྱིས་མུ་སྟེགས་ཅན་མིང་འདི་ཞེས་བྱ་བ་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པ་གསོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། མུ་སྟེགས་ཅན་མིང་འདི་ ཞེས་བགྱི་བ་འདི་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ནས། མུ་སྟེགས་ཅན་མིང་འདི་ཞེས་བགྱི་བ་འདི་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པར་དགེ་འདུན་ལ་གསོལ་ཏེ། དེའི་སླད་དུ་དགེ་འདུན་གྱིས་མུ་སྟེགས་ཅན་མིང་འདི་ཞེས་བགྱི་བ་ ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པ་སྩོལ་ན། ཚེ་དང་ལྡན་པ་གང་དག་མུ་སྟེགས་ཅན་མིང་འདི་ཞེས་བགྱི་བ་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་བསྩལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་ བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མུ་སྟེགས་ཅན་མིང་འདི་ཞེས་བགྱི་བ་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་ པ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་གཞན་མུ་སྟེགས་ཅན་གང་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་དག་གིས་གནས་པ་བྱིན་པ་དེའི་ཟན་ནི་དགེ་འདུན་ལས་སོ། །གོས་ནི་མཁན་པོ་ལས་སོ། །ལས་ནི་དགེ་ ཚུལ་གྱི་གྲལ་རིམས་བཞིན་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་གཞན་མུ་སྟེགས་ཅན་གནས་པ་སྤྱད་ནས་སེམས་མགུ་བར་གྱུར་ན་རབ་ཏུ་དབྱུང་བར་བྱ། བསྙེན་པར་རྫོགས་པར་བྱའོ་ཞེས་ བཀའ་སྩལ་ན། བཙུན་པ་ཇི་ཙམ་གྱིས་ན་གཞན་མུ་སྟེགས་ཅན་སེམས་མགུ་བར་གྱུར་པ་ཞེས་བརྗོད་པར་བགྱི། ཉེ་བ་འཁོར་གཞན་མུ་སྟེགས་ཅན་གྱི་མདུན་དུ་སངས་རྒྱས་ཀྱི་བསྔགས་པ་ཡང་དག་པ་བརྗོད་པར་བྱ། ཆོས་དང་དགེ་འདུན་གྱི་བསྔགས་པ་ཡང་དག་པ་བརྗོད་པར་

  145. 73b

    བྱ་ཞིང་མུ་སྟེགས་ཅན་རྣམས་ཀྱི་བསྔགས་པ་མ་ཡིན་པ་ཡང་དག་པ་བརྗོད་པར་བྱའོ། །ཉེ་བ་འཁོར་གལ་ཏེ་གཞན་མུ་སྟེགས་ཅན་སངས་རྒྱས་ཀྱི་བསྔགས་པ་ཡང་དག་པ་བརྗོད། ཆོས་དང་དགེ་འདུན་གྱི་བསྔགས་པ་ཡང་དག་པ་བརྗོད་ཅིང་མུ་སྟེགས་ཅན་རྣམས་ཀྱི་བསྔགས་པ་ མ་ཡིན་པ་ཡང་དག་པ་བརྗོད་པ་ན་ནང་བར་བྱེད། འཁྲུག་པར་བྱེད། ཁྲོ་བར་བྱེད་ཅིང་ཡུལ་ཡུལ་པོར་འདུག་པར་བྱེད། ཁྲོ་བ་སྐྱེད་པར་བྱེད་ན་གཞན་མུ་སྟེགས་ཅན་སེམས་མགུ་བར་མ་གྱུར་པ་ཞེས་བརྗོད་པར་བྱའོ། །ཉེ་བ་འཁོར་གལ་ཏེ་གཞན་མུ་སྟེགས་ཅན་སངས་ རྒྱས་ཀྱི་བསྔགས་པ་ཡང་དག་པ་བརྗོད། ཆོས་དང་དགེ་འདུན་གྱི་བསྔགས་པ་ཡང་དག་པ་བརྗོད་ཅིང་། མུ་སྟེགས་ཅན་རྣམས་ཀྱི་བསྔགས་པ་མ་ཡིན་པ་ཡང་དག་པ་བརྗོད་པ་ན་ནང་བར་མི་བྱེད། འཁྲུག་པར་མི་བྱེད། ཁྲོ་བར་མི་བྱེད་ཅིང་ཡུལ་ཡུལ་པོར་འདུག་པར་མི་བྱེད། ཁྲོ་བ་སྐྱེད་པར་མི་བྱེད་ན། ཉེ་བ་འཁོར་དེ་ཙམ་གྱིས་ན་གཞན་མུ་སྟེགས་ཅན་སེམས་མགུ་བ་ཞེས་བརྗོད་པར་བྱའོ། །དགེ་སློང་དག་མེ་བ་རལ་པ་ཅན་དག་རབ་ཏུ་དབྱུང་བར་བྱ་ཞིང་བསྙེན་པར་རྫོགས་པར་བྱའོ། །དེ་ཅིའི་ཕྱིར་ཞེ་ན། དགེ་སློང་དག་མེ་བ་རལ་པ་ཅན་དག་ནི་ལས་སྨྲ་བ་དང་། མེ་བ་རལ་པ་ཅན་དག་ནི་བྱ་བ་སྨྲ་བ་དང་། རྒྱུ་སྨྲ་བ་དང་། བརྩོན་འགྲུས་སྨྲ་བ་ཡིན་པའི་ཕྱིར་རོ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། ལས་སྨྲ་བར་འགྱུར་བ་དང་། བྱ་བ་སྨྲ་བ་དང་། རྒྱུ་སྨྲ་བ་དང་། བརྩོན་འགྲུས་སྨྲ་བར་འགྱུར་བར་བྱ་སྟེ། དགེ་སློང་ དག་ཁྱེད་ཀྱིས་དེ་ལྟར་བསླབ་པར་བྱའོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་ བདུན་སྡེའི་ཚོགས་དག་རབ་ཏུ་ཕྱུང་བསྙེན་པར་རྫོགས་པར་བྱས་པ་དེའི་ཚེ་ན་དེ་དག་མཚན་མོའི་ཐོ་རངས་ཀྱི་དུས་ཀྱི་ཚེ་བཀྲེས་པའི་ཉམ་ཆུང་བས་ཡོངས་སུ་གཟིར་ནས་ངུའོ། །བཅོམ་ལྡན་འདས་ཀྱིས་མཚན་མོའི་ཐོ་རངས་ཀྱི་དུས་ཀྱི་ཚེ་ཀུན་དགའ་ར་བའི་ནང་ན་བྱིས་པ་ཁྱེའུ་རབ་ཏུ་མང་པོ་དག་ངུ་

  146. 74a

    བའི་སྒྲ་གསན་ཏོ། །གསན་ནས་ཀྱང་སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་ དང་མི་ལྡན་པ་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་ཚེ་དང་ ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་མཚན་མོའི་ཐོ་རངས་ཀྱི་དུས་ཀྱི་ཚེ་ཀུན་དགའ་ར་བའི་ནང་ན་བྱིས་པ་ཁྱེའུ་རབ་ཏུ་མང་པོ་ངུ་བ་འདི་དག་སུ། བཙུན་པ་འདི་དག་ནི་ཚེ་དང་ལྡན་པ་མཽད་གལ་གྱི་བུ་ཆེན་པོས་ཉེ་བ་འཁོར་ལ་སོགས་པ་སར་པ་སྐྱེས་ཕྲན་གཞོན་ནུ་བཅུ་བདུན་སྡེའི་ ཚོགས་དག་རབ་ཏུ་བྱུང་ཞིང་བསྙེན་པར་རྫོགས་པར་བགྱིས་པ་དེ་དག་མཚན་མོའི་ཐོ་རངས་ཀྱི་དུས་ཀྱི་ཚེ་བཀྲེས་པའི་ཉམ་ཆུང་བས་ཡོངས་སུ་གཟིར་ཏེ་ངུ་བ་ལགས་སོ། །ཀུན་དགའ་བོ་དགེ་སློང་དག་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་བསྙེན་པར་རྫོགས་པར་བྱེད་དམ། བཙུན་ པ་བགྱིད་དོ། །ཀུན་དགའ་བོ་བསྙེན་པར་རྫོགས་པར་མི་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་གང་ཟག་ལོ་ཉི་ཤུ་མ་ལོན་པས་ནི་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། ཤ་སྦྲང་དང་། སྦྲང་བུ་མཆུ་རིངས་དང་། རླུང་དང་། ཉི་མ་དང་། སྡིག་སྦྲུལ་དག་ གི་རེག་པ་དག་དང་། གཞན་ལས་ཚིག་གི་ལམ་ངན་པ་སྨྲས་པ་དང་། ངན་པ་འོངས་པ་དག་དང་། ལུས་ཀྱི་ཚོར་བ་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བ་སྲོག་འཕྲོག་པར་བྱེད་པ་བྱུང་ངོ་ཅོག་དག་མི་བཟོད་ཅིང་ཟག་པ་དག་ལ་ཇི་མི་སྙམ་པར་བྱ་བ་ཡང་མ་བཟོད་ཅིང་དང་དུ་ ལེན་མི་ནུས་པའི་རང་བཞིན་ཅན་ཡིན་པའི་ཕྱིར་དང་། གང་ཟག་ལོ་ཉི་ཤུ་ལོན་པ་ནི་གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། ཤ་སྦྲང་དང་། སྦྲང་བུ་མཆུ་རིངས་དང་། རླུང་དང་། ཉི་མ་དང་། སྡིག་སྦྲུལ་གྱི་རེག་པ་དག་དང་། གཞན་ལས་ཚིག་གི་ལམ་ངན་པ་

  147. 74b

    སྨྲས་པ་དང་། ངན་པ་འོངས་པ་དག་དང་། ལུས་ཀྱི་ཚོར་བ་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བ་སྲོག་འཕྲོག་པར་བྱེད་པ་བྱུང་ངོ་ཅོག་བཟོད་ཅིང་ཟག་པ་དག་ལ་ཇི་མི་སྙམ་པར་བྱ་བ་ཡང་བཟོད་ཅིང་དང་དུ་ལེན་ནུས་པའི་རང་བཞིན་ཅན་ཡིན་པའི་ཕྱིར་རོ། །བཅོམ་ལྡན་ འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་བསྙེན་པར་རྫོགས་པར་བྱེད་པ་ལས་གྱུར་པ་ཡིན་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་ བསྙེན་པར་རྫོགས་པར་མི་བྱའོ། །འགའ་ཞིག་གི་གན་དུ་བསྙེན་པར་རྫོགས་པར་འདོད་པ་འོངས་ན་དེས་དེ་ལ་ལོ་ཉི་ཤུ་ལོན་ནམ་ཞེས་དྲི་བར་བྱའོ། །མ་དྲིས་པར་བསྙེན་པར་རྫོགས་པར་བྱེད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་མཉན་ཡོད་ན་ རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེའི་བུ་བྱུང་ནས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དེ་ནས་དུས་གཞན་ཞིག་ན་ཁྱིམ་བདག་དེ་ཉེ་དུ་ཟད་པར་གྱུར་ཅིང་ནོར་ཟད་པ་དང་། ལོངས་སྤྱོད་ཟད་པར་གྱུར་ནས་དེས་བསམས་པ། བདག་གིས་རྒས་པའི་གནས་སྐབས་སུ་ནོར་བསྒྲུབ་ པར་མི་ནུས་ཀྱིས་རབ་ཏུ་འབྱུང་བར་བྱའོ་སྙམ་ནས་དེས་བུ་དེ་ལ་སྨྲས་པ། བུ་ཁོ་བོ་རྒས་པའི་གནས་སྐབས་སུ་ནོར་བསྒྲུབ་པར་མི་ནུས་ཀྱིས། ཁོ་བོ་རབ་ཏུ་འབྱུང་དུ་འགྲོའོ། །དེས་སྨྲས་པ། ཡབ་གལ་ཏེ་ཁྱོད་རབ་ཏུ་འབྱུང་ན་བདག་ཀྱང་རབ་ཏུ་འབྱུང་ངོ་། །བུ་དེ་བཞིན་གྱིས་ཤིག་ཅེས་ དེས་དེ་ཁྲིད་ནས་རྒྱལ་བྱེད་ཀྱི་ཚལ་དུ་སོང་སྟེ། དགེ་སློང་གི་གན་དུ་སོང་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་སྨྲས་པ། ཁྱོད་ཀྱི་ཁྱེའུ་འདི་སུ་ཡིན། བུ་ལགས་སོ། །འདི་ཡང་རབ་ཏུ་འབྱུང་ངམ། འཕགས་པ་རབ་ཏུ་འབྱུང་ངོ་། །དེས་

  148. 75a

    དེ་ལ་ཆགས་པས་གཉི་ག་ཡང་རབ་ཏུ་ཕྱུང་ནས་དེའི་འོག་ཏུ་ཉི་མ་གཉིས་སམ་གསུམ་དུ་ཀུན་དུ་སྤྱད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟངས་དག་རི་དགས་ཀྱིས་རི་དགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་ གྱིས་བསོད་སྙོམས་སྒྲུབས་ལ་འཚོ་བར་གྱིས་ཤིག །དེ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ཏེ། དགེ་ཚུལ་དེ་ཉིད་དང་ལྷན་ཅིག་མཉན་ཡོད་དུ་བསོད་སྙོམས་ལ་ཞུགས་སོ། །དགེ་ཚུལ་དེས་སྲང་ཞིག་ན་ཁུར་བ་སྲེག་པ་མཐོང་ནས་དེས་སྨྲས་པ། ཡབ་བདག་ ལ་ཁུར་བ་སྦྱིན་དུ་ཆུག་ཤིག །དེས་སྨྲས་པ། བཞིན་བཟངས་དགེ་ཚུལ་འདི་ལ་ཁུར་བ་བྱིན་ཅིག །དེས་སྨྲས་པ། འཕགས་པ་རིན་མ་མཆིས་པར་མི་གསོལ་གྱི། འདི་ལྟར་ཀཱར་ཥཱ་པ་ཎ་དག་གི་སླད་དུ་གསོལ་ལོ། །བཞིན་བཟངས་ཁོ་བོ་ཅག་ནི་རབ་ཏུ་བྱུང་བ་ཡིན་པས་ཁོ་ བོ་ཅག་ལ་ཀཱར་ཥཱ་པ་ཎ་དག་ག་ལ་ཡོད། དེས་སྨྲས་པ། འཕགས་པ་ཅི་ལགས་དགེ་ཚུལ་འདི་ཁྱོད་རབ་ཏུ་བྱུང་བས་བསྐྱེད་དམ། འོན་ཏེ་ཁྱིམ་པས་བསྐྱེད། དེས་སྨྲས་པ། ཁྱིམ་པས་སོ། །དེ་ལྟ་ན་བསགས་པ་དེ་དག་སྩོལ་ཅིག །དེས་སྨྲས་པ། དགེ་ཚུལ་ འདི་བགྲང་བ་མང་པོ་དག་སློང་བར་བྱེད་ཀྱིས་ཚུར་ཤོག་འདོང་ངོ་ཞེས་དེས་དེ་སོར་མོ་དག་ནས་བཟུང་སྟེ་འཕགས་པ་དང་། དེ་གན་རྒྱལ་དུ་འགྱེལ་ནས་ངུ་བར་བརྩམས་སོ། །དེ་གཉིས་སྐྱེ་བོ་ཕལ་པོ་ཆེའི་ཚོགས་ཀྱིས་མཐོང་ནས་དེ་དག་གིས་སྨྲས་པ། ཤེས་ལྡན་དག་འདིའི་དགེ་ ཚུལ་འདི་སུ་ཞིག་ཡིན། བུ་ཡིན་ནོ། །དེ་དག་ཁྲག་གི་ཐིགས་པ་འདི་རབ་ཏུ་ཕྱུང་བས་ཅི་ཞིག་བྱ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་གང་ཟག་ལོ་བཅྭ་ལྔ་མ་ལོན་པར་རབ་ཏུ་འབྱིན་པར་བྱེད་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་གང་ཟག་ལོ་བཅྭ་ལྔ་མ་ལོན་པ་རབ་ཏུ་དབྱུང་བར་མི་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་

  149. 75b

    འདོད་པ་འོངས་ན་དེས་དེ་ལ་ལོ་བཅྭ་ལྔ་ལོན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ།། །།འདུལ་བ་གཞི། བམ་པོ་བདུན་པ། སྡོམ་ལ། དགེ་ཚུལ་གཉིས་དང་བྲན་དང་ནི། །བུ་ལོན་ཆགས་དང་མ་གནང་དང་། །ཞུ་ བ་དང་ནི་ནད་པ་དང་། །ཤཱཀྱའི་སྡེ་ཚན་བསྡུས་པ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའི་དགེ་ཚུལ་ཚེར་མ་དང་ཆེན་པོ་པ་གཉིས་གཅིག་ལ་གཅིག་གཞོགས་སྟེགས་དང་ ཕྱར་གཡེང་དང་། ལུས་ལ་རྡེག་པར་བྱེད་ཅིང་འདི་ལྟ་སྟེ་དཔེར་ན་བུད་མེད་སྐྱེས་པ་དང་ལྷན་ཅིག་བྱེད་པ་དང་། སྐྱེས་པ་བུད་མེད་དང་ལྷན་ཅིག་བྱེད་པ་ལྟར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་ གང་ཅི་བྱུང་བ་དེ་ནི་དགེ་སློང་དག་དགེ་ཚུལ་གཉིས་ཉེ་བར་འཇོག་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་དགེ་ཚུལ་གཉིས་ཉེ་བར་གཞག་པར་མི་བྱའོ། །ཉེ་བར་འཇོག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་ གིས་དགེ་ཚུལ་གཉིས་ཉེ་བར་གཞག་པར་མི་བྱའོ་ཞེས་བཀའ་སྩལ་ནས། གཞན་སྤུན་གཉིས་ཤིག་འོངས་ཏེ། བདག་ཅག་གཉིས་ཅིག་ཅར་ལྷན་ཅིག་ཏུ་རབ་ཏུ་འབྱུང་བར་བྱའོ་ཞེས་ངེས་པར་བྱས་ཏེ་ལྷགས་པ་ན། དགེ་སློང་དག་དེ་གཉིས་རབ་ཏུ་འབྱིན་པར་མི་བྱེད་པས་དེ་གཉིས་རབ་ཏུ་ འབྱུང་བ་མ་ཐོབ་པར་དོང་སྟེ། དེ་ཉིད་ཚེ་དང་ལྡན་པ་དེ་གཉིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོའི་བར་ཆད་དུ་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ ཀྱིས་བཀའ་སྩལ་པ། གལ་ཏེ་སྤུན་གཉིས་ཤིག་འོངས་ཏེ་བདག་ཅག་གཉིས་ཅིག་ཅར་ལྷན་ཅིག་ཏུ་རབ་ཏུ་འབྱུང་བར་བྱའོ་ཞེས་ངེས་པར་བྱས་ཏེ་ལྷགས་ན་རབ་ཏུ་དབྱུང་བར་བྱའོ། །རབ་ཏུ་ཕྱུང་ནས་གལ་ཏེ་ལོ་ཉི་ཤུ་ལོན་ན་བསྙེན་པར་རྫོགས་པར་བྱའོ། །གལ་ཏེ་གཅིག་ལོ་ཉི་ཤུ་ལོན་ན་དེ་

  150. 76a

    བསྙེན་པར་རྫོགས་པར་བྱ་ཞིང་ཅིག་ཤོས་དགེ་ཚུལ་དུ་ཉེ་བར་གཞག་པར་བྱའོ། །གལ་ཏེ་གཉི་ག་ལོ་ཉི་ཤུ་མ་ལོན་ན་གཅིག་བདག་ཉིད་ཀྱིས་ཉེ་བར་གཞག་པར་བྱ་ཞིང་། ཅིག་ཤོས་དགེ་སློང་གྲོགས་པོ་འགའ་ལ་གཏད་པར་བྱའོ། །གང་ལ་གཏད་པ་དེ་ཉིད་ ཀྱིས་བསྙེན་པར་རྫོགས་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དེ་གང་གི་ཡིན་པ་དེས་བསྙེན་པར་རྫོགས་པར་བྱའོ། །དེས་མི་སྟེར་ནས་བཅོམ་ལྡན་འདས་ཀྱིས་བཀའ་སྩལ་པ། མི་སྟེར་བ་ལས་མཐུས་དགུག་པར་བྱའོ།། །།སངས་རྒྱས་བཅོམ་ ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེ་ལ་བྲན་མཁས་པ། ལེ་ལོ་མེད་པ། སྒྲུབ་ཕོད་པ། འཕྲལ་གྱི་བྱ་བ་ཐམས་ཅད་ལ་སྔོན་དུ་འགྲོ་བ་ཞིག་ཡོད་དོ། །དུས་གཞན་ ཞིག་ན་དེས་བྲན་དེ་སྤྱོས་པ་དང་བྲན་དེས་བསམས་པ། ཁྱིམ་བདག་འདི་མགུ་དཀའ་བར་གྱུར་པས་བདག་གིས་འདིའི་སེམས་སྲུང་བར་བྱེད་མི་ནུས་ཀྱིས་འབྲོས་སུ་འགྲོ་སྙམ་མོ། །དེས་བསམས་པ། ཡུལ་གཏོང་བ་ནི་དཀའ་བ་བྱེད་པ་ཡིན་གྱིས་ཤཱཀྱའི་སྲས་ཀྱི་དགེ་སྦྱོང་འདི་ དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་འདི་དག་གི་ནང་དུ་རབ་ཏུ་འབྱུང་བར་བྱའོ་སྙམ་ནས། དེ་རྒྱལ་བྱེད་ཀྱི་ཚལ་དུ་སོང་སྟེ། དགེ་སློང་གི་གན་དུ་སོང་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་ཞིང་བསྙེན་པར་ རྫོགས་པར་བྱས་ཏེ། གདམས་ངག་བྱིན་ནས་དེས་བརྩོན་པ་དང་། འབད་པ་དང་། བརྩལ་བ་བྱས་པས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་ པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མཉམ་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་

  151. 76b

    དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །ཁྱིམ་བདག་དེ་འགྱོད་པ་སྐྱེས་ནས་དེས་བསམས་པ། དེ་བདག་གི་འཕྲལ་གྱི་བྱ་བ་ཐམས་ཅད་ ལ་སྔོན་དུ་འགྲོ་བ་ཡིན་ན། བདག་གིས་ཅིའི་ཕྱིར་སྤྱོས་སྙམ་མོ། །དེས་བསམས་པ། གལ་ཏེ་ད་མཐོང་ན་བཟོད་པ་གསོལ་ལོ་སྙམ་ནས་དེས་མཉན་ཡོད་ཀྱི་སྒོར་བསྡད་དོ། །དགེ་སློང་དེ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་དུ་ བསོད་སྙོམས་ལ་ཞུགས་པ་དང་ཁྱིམ་བདག་དེས་དེ་མཐོང་ནས་དེས་སྨྲས་པ། བཞིན་བཟངས་ཁྱོད་རབ་ཏུ་བྱུང་ན་ཁོ་བོའི་རིམ་གྲོ་སུས་བྱེད་པར་འགྱུར། ཚུར་ཤོག་འདོང་ཞེས་དེས་ལག་པ་བརྐྱང་སྟེ་དེའི་ལག་པ་གཉིས་ནས་གཟུང་བར་བརྩམས་པ་དང་། དེས་ངང་པའི་རྒྱལ་པོ་ འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཁྱིམ་བདག་དེ་ ཤིང་ལྗོན་པ་རྩ་བ་ནས་བཅད་པ་བཞིན་དུ་དགེ་སློང་དེའི་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་དེ་ལ་ཡོ་བྱད་ཐམས་ཅད་ཀྱིས་བསྟབས་པ་དང་། ཐམས་ཅད་དུ་ཁྱིམ་བདག་ཆེ་གེ་མོ་ཞིག་གི་བྲན་ རབ་ཏུ་བྱུང་ནས་ཡོན་ཏན་གྱི་ཚོགས་དེ་ལྟ་བུ་ཐོབ་བོ་ཞེས་སྒྲ་གྲགས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་ཁྱིམ་བདག་ཆེ་གེ་མོའི་བྲན་རབ་ཏུ་ཕྱུང་ནས་ཡོན་ཏན་གྱི་ཚོགས་དེ་ལྟ་བུ་ཐོབ་བོ་ཞེས་ཐོས་ནས་དེས་བློན་པོ་རྣམས་ལ་བསྒོ་བ། ཤེས་ལྡན་དག་ང་ནི་རྒྱལ་པོ་རྒྱལ་རིགས་སྤྱི་བོར་ དབང་བསྐུར་བ་བྱ་བ་ཐམས་ཅད་ཀྱི་མངའ་བདག་ཡིན་པས་དེང་ཕྱིན་ཆད་འགའ་ཞིག་གི་བྲན་རབ་ཏུ་འབྱུང་བར་འདོད་ན་དེས་མི་བཟློག་པར་བྱའོ། །མཉན་ཡོད་ན་ཁྱིམ་བདག་ཅིག་འདུག་པ་དེ་ལ་བྲན་མཁས་པ། ལེ་ལོ་མེད་པ། སྒྲུབ་ཕོད་པ། འཕྲལ་གྱི་བྱ་བ་ཐམས་ཅད་ལ་སྔོན་དུ་

  152. 77a

    འགྲོ་བ་ཞིག་ཡོད་དོ། །དུས་གཞན་ཞིག་ན་དེས་བྲན་དེ་སྤྱོས་པ་དང་བྲན་དེས་བསམས་པ། ཁྱིམ་བདག་འདི་མགུ་དཀའ་བར་གྱུར་པས་བདག་གིས་འདིའི་སེམས་སྲུང་བར་བྱེད་མི་ནུས་ཀྱིས་འབྲོས་སུ་འགྲོའོ་སྙམ་མོ། །དེས་བསམས་པ། ཡུལ་གཏོང་བ་ནི་དཀའ་ བ་བྱེད་པ་ཡིན་གྱིས་ཤཱཀྱའི་སྲས་ཀྱི་དགེ་སྦྱོང་འདི་དག་ནི་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་འདི་དག་གི་ནང་དུ་རབ་ཏུ་འབྱུང་བར་བྱའོ་སྙམ་ནས་དེ་རྒྱལ་བྱེད་ཀྱི་ཚལ་དུ་སོང་སྟེ། དགེ་སློང་གི་གན་དུ་སོང་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། ། དེས་དེ་རབ་ཏུ་དབྱུང་ཞིང་བསྙེན་པར་རྫོགས་པར་བྱས་ནས་དེའི་འོག་ཏུ་ཉི་མ་གཉིས་སམ་གསུམ་དུ་ཀུན་དུ་སྤྱད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟངས་རི་དགས་ཀྱིས་རི་དགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་ སྙོམས་སྒྲུབས་ལ་འཚོ་བར་གྱིས་ཤིག །ཁྱིམ་བདག་དེ་འགྱོད་པ་སྐྱེས་ནས་དེས་བསམས་པ། དེ་བདག་གི་འཕྲལ་གྱི་བྱ་བ་ཐམས་ཅད་ལ་སྔོན་དུ་འགྲོ་བ་ཡིན་ན། བདག་གིས་ཅིའི་ཕྱིར་སྤྱོས་སྙམ་མོ། །དེས་བསམས་པ། གལ་ཏེ་ད་མཐོང་ན་བཟོད་པ་གསོལ་ལོ་སྙམ་ ནས་དེས་མཉན་ཡོད་ཀྱི་སྒོར་བསྡད་དོ། །དགེ་སློང་དེ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང་། ཁྱིམ་བདག་དེས་དེ་མཐོང་ནས་དེས་སྨྲས་པ། བཞིན་བཟངས་ཁྱོད་རབ་ཏུ་བྱུང་ན་ཁོ་བོའི་རིམ་གྲོ་སུས་བྱེད་པར་ འགྱུར། ཚུར་ཤོག་འདོང་ཞེས་དེས་ལག་པ་བརྐྱང་སྟེ་དེའི་ལག་པ་གཉིས་ནས་གཟུང་བར་བརྩམས་པ་དང་། དེས་སྨྲས་པ། ཁོ་བོ་ཅག་ལ་རྒྱལ་པོས་གཞོན་ནུའི་ཡོངས་སུ་སྤང་བ་བྱིན་ནས་གལ་ཏེ་རེག་པར་བྱེད་ན་ཁྱོད་ཀྱི་ལག་པ་མཁྲིག་མ་ནས་གཅོད་དུ་གཞུག་གོ། །དེ་ཤཱཀྱའི་བུའི་ དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ནོ། །བྲམ་ཟེའི་ཚུལ་ནི་ཚིག་པ་ཡིན་ཏེ། འདི་ལྟར་བྲན་ཡང་རབ་ཏུ་འབྱིན་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་།

  153. 77b

    བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་བྲན་རབ་ཏུ་འབྱིན་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་བྲན་རབ་ཏུ་དབྱུང་བར་མི་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན་ དེས་དེ་ལ་བྲན་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་ པ་དེ་ལ་བུ་ལོན་ཆགས་པ་ཞིག་གིས་དུས་དང་དུས་སུ་དངོས་དང་སྐྱེད་འཇལ་བར་བྱེད་དོ། །དུས་གཞན་ཞིག་ན་ཁྱིམ་བདག་དེས་བུ་ལོན་ཆགས་པ་དེ་མ་ཚོར་བ་ཁོ་ནར་བཟུང་ནས་སྨྲས་པ། དངོས་དང་སྐྱེད་ཅིག་ཅར་ཕུལ་ཅིག་ཅེས་དེས་དེ་དུས་ཅུང་ཟད་ཅིག་ཏུ་བཟུང་སྟེ་བཏང་བ་དང་དེས་ བསམས་པ། ཁྱིམ་བདག་འདི་མགུ་དཀའ་བར་གྱུར་པས་བདག་གིས་དངོས་དང་སྐྱེད་ཅིག་ཅར་འཇལ་མི་ནུས་ཀྱིས་འབྲོས་སུ་འགྲོའོ་སྙམ་མོ། །དེས་བསམས་པ་ཡུལ་གཏོང་བ་ནི་དཀའ་བ་བྱེད་པ་ཡིན་གྱིས་ཤཱཀྱའི་སྲས་ཀྱི་དགེ་སྦྱོང་འདི་དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ ཐོབ་པས་འདི་དག་གི་ནང་དུ་རབ་ཏུ་འབྱུང་བར་བྱའོ་སྙམ་ནས། དེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་སོང་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ཏེ་གདམས་ངག་བྱིན་ནས། དེས་ བརྩོན་པ་དང་། འབད་པ་དང་། བརྩལ་བར་བྱས་པས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་ པས་སེམས་དང་ལྡན་པ། ཙན་དན་ཞག་ལོན་པར་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་

  154. 78a

    དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །ཁྱིམ་བདག་དེ་འགྱོད་པ་སྐྱེས་ནས་དེས་བསམས་པ། དེ་བདག་ལ་དུས་དང་དུས་སུ་དངོས་དང་སྐྱེད་འབུལ་བ་ཡིན་ན་བདག་གིས་ཅིའི་ཕྱིར་བཟུང་ སྙམ་མོ། །དེས་བསམས་པ། གལ་ཏེ་ད་མཐོང་ན་བཟོད་པ་གསོལ་ལོ་སྙམ་ནས་དེས་མཉན་ཡོད་ཀྱི་སྒོར་བསྡད་དོ། །དགེ་སློང་དེ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང་། ཁྱིམ་བདག་དེས་དེ་མཐོང་ནས་ དེས་སྨྲས་པ། བཞིན་བཟངས་ཁྱོད་རབ་ཏུ་བྱུང་ན་ཁོ་བོ་ལ་དུས་དང་དུས་སུ་དངོས་དང་སྐྱེད་སུས་འབུལ་བར་འགྱུར། ཚུར་ཤོག་འདོང་ཞེས་དེས་ལག་པ་བརྐྱང་སྟེ་དེའི་ལག་པ་གཉིས་ནས་གཟུང་བར་བརྩམས་པ་དང་། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཁྱིམ་བདག་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་དགེ་ སློང་དེའི་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་བརྙེས་སམ། ཐོབ་བོ། །དེས་དེ་ལ་ཡོ་བྱད་ཐམས་ཅད་ཀྱིས་བསྟབས་པ་དང་། ཐམས་ཅད་དུ་ཁྱིམ་བདག་ཆེ་གེ་མོ་ཞིག་གི་བུ་ལོན་ཆགས་པ་རབ་ཏུ་བྱུང་ནས་ཡོན་ཏན་གྱི་ ཚོགས་དེ་ལྟ་བུ་ཐོབ་བོ་ཞེས་སྒྲ་གྲགས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་ཁྱིམ་བདག་ཆེ་གེ་མོ་ཞིག་གི་བུ་ལོན་ཆགས་པ་རབ་ཏུ་བྱུང་ནས་ཡོན་ཏན་གྱི་ཚོགས་དེ་ལྟ་བུ་ཐོབ་བོ་ཞེས་ཐོས་ནས། དེས་བློན་པོ་རྣམས་ལ་བསྒོ་བ་ཤེས་ལྡན་དག་ང་ནི་རྒྱལ་པོ་རྒྱལ་རིགས་སྤྱི་བོར་དབང་ བསྐུར་བ་བྱ་བ་ཐམས་ཅད་ཀྱི་མངའ་བདག་ཡིན་པས་དེང་ཕྱིན་ཆད་འགའ་ཞིག་གི་བུ་ལོན་ཆགས་པ་རབ་ཏུ་འབྱུང་བར་འདོད་ན་དེས་དེ་མི་བཟློག་པར་བྱའོ།། །།མཉན་ཡོད་ན་ཁྱིམ་བདག་ཅིག་འདུག་པ་དེ་ལ་བུ་ལོན་ཆགས་པ་ཞིག་གིས་དུས་དང་དུས་སུ་དངོས་དང་སྐྱེད་འཇལ་

  155. 78b

    བར་བྱེད་དོ། །དུས་གཞན་ཞིག་ན་ཁྱིམ་བདག་དེས་བུ་ལོན་ཆགས་པ་དེ་མ་ཚོར་བ་ཁོ་ནར་བཟུང་ནས་སྨྲས་པ། དངོས་དང་སྐྱེད་ཅིག་ཅར་ཕུལ་ཅིག་ཅེས་དེས་དེ་དུས་ཅུང་ཟད་ཅིག་བཟུང་ནས་བཏང་བ་དང་། དེས་བསམས་པ། ཁྱིམ་བདག་འདི་མགུ་དཀའ་བར་གྱུར་པས་བདག་གིས་ དངོས་དང་སྐྱེད་ཅིག་ཅར་འཇལ་མི་ནུས་ཀྱིས་འབྲོས་སུ་འགྲོའོ་སྙམ་མོ། །དེས་བསམས་པ། ཡུལ་གཏོང་བ་ནི་དཀའ་བ་བྱེད་པ་ཡིན་གྱིས་ཤཱཀྱའི་སྲས་ཀྱི་དགེ་སྦྱོང་འདི་དག་གིས་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་འདི་དག་གི་ནང་དུ་རབ་ཏུ་འབྱུང་བར་བྱའོ་སྙམ་ནས། དེ་ རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་སོང་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ནས་དེའི་འོག་ཏུ་ཉི་མ་གཉིས་སམ་གསུམ་དུ་ཀུན་དུ་སྤྱད་པའི་ཆོས་དག་སློབ་ཏུ་བཅུག་ནས་སྨྲས་པ། བཞིན་བཟངས་ རི་དགས་ཀྱིས་རི་དགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་ཡུལ་ཡིན་གྱིས་བསོད་སྙོམས་སྒྲུབས་ལ་འཚོ་བར་གྱིས་ཤིག །ཁྱིམ་བདག་དེ་འགྱོད་པ་སྐྱེས་ནས་དེས་བསམས་པ། དེ་བདག་ལ་དུས་དང་དུས་སུ་དངོས་དང་སྐྱེད་འབུལ་བ་ཡིན་ན། བདག་གིས་ ཅིའི་ཕྱིར་གཟུང་སྙམ་མོ་དེས་བསམས་པ། གལ་ཏེ་ད་མཐོང་ན་བཟོད་པ་གསོལ་ལོ་སྙམ་ནས་དེས་མཉན་ཡོད་ཀྱི་སྒོར་བསྡད་དོ། །དགེ་སློང་དེ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང་། ཁྱིམ་བདག་དེས་དེ་ མཐོང་ནས་དེས་སྨྲས་པ། བཞིན་བཟངས་ཁྱོད་རབ་ཏུ་བྱུང་ན་ཁོ་བོ་ལ་དུས་དང་དུས་སུ་དངོས་དང་སྐྱེད་སུ་འབུལ་བར་འགྱུར། ཚུར་ཤོག་འདོང་ཞེས་དེས་ལག་པ་བརྐྱང་སྟེ། དེའི་ལག་པ་གཉིས་ནས་གཟུང་བར་བརྩམས་པ་དང་དེས་སྨྲས་པ། ཁོ་བོ་ཅག་ལ་རྒྱལ་པོས་གཞོན་ནུའི་ ཡོངས་སུ་སྤང་བ་བྱིན་པས་གལ་ཏེ་རེག་པར་བྱེད་ན་ཁྱོད་ཀྱི་ལག་པ་མཁྲིག་མ་ནས་གཅོད་དུ་གཞུག་གོ། །དེ་ཤཱཀྱའི་བུའི་དགེ་སྦྱོང་རྣམས་ཀྱི་དགེ་སྦྱོང་གི་ཚུལ་ནི་ཚིག་པ་ཡིན་ནོ། །བྲམ་ཟེའི་ཚུལ་ནི་ཚིག་པ་ཡིན་ཏེ། འདི་ལྟར་བུ་ལོན་ཆགས་པ་ཡང་རབ་ཏུ་འབྱིན་པར་བྱེད་དོ་ཞེས་སྨོད་པར་

  156. 79a

    བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་བུ་ལོན་ཆགས་པ་རབ་ཏུ་འབྱིན་པ་ལས་ གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་བུ་ལོན་ཆགས་པ་རབ་ཏུ་དབྱུང་བར་མི་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན་དེས་དེ་ལ་བུ་ལོན་ཆགས་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེའི་བུ་བྱུང་ནས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དུས་གཞན་ཞིག་ན་དེས་བུ་དེ་སྤྱོས་པ་དང་། བུ་དེས་བསམས་པ། ཕ་འདི་མགུ་ དཀའ་བར་གྱུར་པས་བདག་གིས་འདིའི་སེམས་སྲུང་བར་བྱེད་མི་ནུས་ཀྱིས་འབྲོས་སུ་འགྲོའོ་སྙམ་མོ། །དེས་བསམས་པ། ཡུལ་གཏོང་བ་ནི་དཀའ་བ་བྱེད་པ་ཡིན་གྱིས་ཤཱཀྱའི་སྲས་ཀྱི་དགེ་སྦྱོང་འདི་དག་ནི་རྒྱལ་པོ་ལས་གཞོན་ནུའི་ཡོངས་སུ་སྤང་བ་ཐོབ་པས་འདི་དག་གི་ནང་དུ་རབ་ཏུ་འབྱུང་ བར་བྱའོ་སྙམ་ནས། དེ་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་སོང་ནས་སྨྲས་པ། །འཕགས་པ་བདག་རབ་ཏུ་འབྱུང་བར་འཚལ་ལོ། །དེས་སྐྱབས་སུ་འགྲོ་བ་དང་བསླབ་པའི་གཞི་དག་བྱིན་ནས་གང་གིས་དེ་ཞུ་བར་བྱེད་པའི་དགེ་སློང་ལ་ཡང་གསོལ་བ་བཏབ། གང་ གིས་དེའི་སྐྲ་དང་ཁ་སྤུ་དག་འབྲེག་པར་བྱེད་པའི་དགེ་སློང་ལ་ཡང་གསོལ་བ་བཏབ་གང་གིས་དེའི་ཁྲུས་བྱེད་པའི་དགེ་སློང་ལ་ཡང་གསོལ་བ་བཏབ། གང་གིས་དེ་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་དགེ་སློང་ལ་ཡང་གསོལ་བ་བཏབ་སྟེ། དེ་རབ་ཏུ་ཕྱུང་ནས་གང་གིས་དེའི་ལས་

  157. 79b

    བྱེད་པའི་དགེ་སློང་ལ་ཡང་གསོལ་བ་བཏབ། གང་གིས་དེ་ལ་གསང་སྟེ་སྟོན་པའི་དགེ་སློང་ལ་ཡང་གསོལ་བ་བཏབ། གང་དག་དེའི་ལས་ཀྱི་གནས་སུ་འཇུག་པར་འགྱུར་བའི་དགེ་སློང་དག་ལ་ཡང་གསོལ་བ་བཏབ་ནས་དེ་བསྙེན་པར་རྫོགས་པར་བྱེད་པ་ན། ཁྱིམ་བདག་དེ་འོངས་ ནས་དྲིས་པ། འཕགས་པ་ཁྱེའུ་འདི་འདྲ་བ་ཞིག་མཆིས་པ་གཟིགས་སམ། དེས་སྨྲས་པ། དེ་ཞུ་བར་བྱེད། དེ་སྐྲ་དང་ཁ་སྤུ་དག་འབྲེག་པར་བྱེད། དེ་ཁྲུས་བྱེད་དེ། དགེ་ཚུལ་ཉིད་དུ་ཉེ་བར་སྒྲུབ་པར་བྱེད། དེ་བསྙེན་པར་རྫོགས་པར་བྱེད་དོ་ཞེས་དེ་དག་གིས་དེ་བསྙེན་ པར་རྫོགས་པར་བྱས་ནས་གྲིབ་ཚོད་གཞལ་ཞིང་ཉིན་མཚན་གྱི་ཆ་དང་། དུས་ཚིགས་བརྗོད་དེ། གནས་རྣམས་དང་། ལྟུང་བར་འགྱུར་བའི་ཆོས་རྣམས་དང་། དགེ་སྦྱོང་བྱེད་པའི་ཆོས་རྣམས་དང་། མཆོག་ཏུ་འདོད་པར་བྱ་བ་ཡང་དག་པ་ཉིད་ཀྱིས་རྫོགས་པ་ཉིད་དང་། ཚུལ་ཁྲིམས་ཀྱིས་མཉམ་པར་གྱུར་པ་ཉིད་བསྒྲུབ་པ་ལ་ངེས་པར་སྦྱར་བར་བྱ་བ་དང་། ཚུལ་དང་འབྲེལ་བའི་གཟུགས་བརྙན་ལ་ངེས་པར་སྦྱར་བར་བྱ་བ་དང་། དུལ་བར་གནས་པ་ཉིད་ལ་ངེས་པར་སྦྱར་བར་བྱ་བ་དང་། དགོས་པ་རྗེས་སུ་བསྒྲུབ་པ་ལ་ངེས་པར་སྦྱར་བར་བྱ་བ་དང་། མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་བསྒྲུབ་པར་འགྱུར་བ་ཉིད་དང་། གུས་པ་ལ་ངེས་པར་སྦྱར་བ། ཤེས་རབ་མཆོག་གི་བསྟན་པ་ལ། །ཁྱོད་ནི་བསྙེན་པར་རྫོགས་པར་གྱུར། །དལ་དང་འབྱོར་པ་རྙེད་དཀའ་བས། །འདི་དག་ཇི་ལྟ་བཞིན་དུ་སྒྲུབས། ། མཛེས་པ་རབ་ཏུ་དབྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །ཞེས་བྱ་བ་དང་། བསྒྲུབ་པར་བྱ་བ་ཐབས་བརྗོད་པ་དང་བཅས་པ་ལ་ངེས་པར་སྦྱར་བར་བྱས་ཏེ། དགེ་སློང་དེ་ དག་ལངས་པ་དང་ཁྱིམ་བདག་དེ་འོངས་ཏེ་སྨྲས་པ། འཕགས་པ་དག་ཅི་ཁྱེད་ཅག་སྤུ་གྲི་ཐོགས་པ་འབའ་ཞིག་གིས་སྡོད་དམ། གལ་ཏེ་བདག་ལ་དད་པ་མ་མཆིས་པར་གྱུར་དུ་ལགས་ན་འདིའི་ཚངས་པར་སྤྱོད་པའི་བར་ཆད་དུ་འགྱུར་རོ། །ཀྱེ་མ་ཁྱོད་ཀྱིས་ཞག་བདུན་ནམ་བརྒྱད་

  158. 80a

    ཅིག་བསྲེལ་ན་ཅི་ནོངས་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་རབ་ཏུ་འབྱུང་བར་འདོད་པ་ཕ་མས་མ་གནང་བ་ཞག་བདུན་མི་ བསྲེལ་བ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་འགའ་ཞིག་གི་གན་དུ་རབ་ཏུ་འབྱུང་བར་འདོད་པ་ཕ་མ་གསོན་ཞིང་དེ་གཉིས་ཀྱིས་མ་གནང་བར་འོངས་ན་ཞག་བདུན་ནམ་བརྒྱད་བསྲེལ་བར་བྱའོ། །བཅོམ་ལྡན་འདས་ཀྱིས་རབ་ཏུ་འབྱུང་བར་འདོད་པ་འོངས་ན་ ཞག་བདུན་ནམ་བརྒྱད་བསྲེལ་བར་བྱའོ་ཞེས་བཀའ་སྩལ་ནས། རབ་ཏུ་འབྱུང་བར་འདོད་པ་ཕ་མས་གནང་བ་གཞན་དག་འོངས་ཤིང་ཡུལ་ཐག་རིང་བ་ཕ་མས་གཏམ་ཡང་མི་ཐོས་པ་དག་ཀྱང་འོངས་པ་ན། དགེ་སློང་རྣམས་ཀྱིས་དེ་དག་ཀྱང་ཞག་བདུན་ནམ་བརྒྱད་སྲེལ་བར་བྱེད་ པས་དེ་དག་རབ་ཏུ་བྱུང་བ་མ་ཐོབ་པར་དོང་སྟེ། དེ་ཉིད་ཚེ་དང་ལྡན་པ་དེ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོའི་བར་ཆད་དུ་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ ལྡན་འདས་ཀྱིས་བཀའ་སྩལ་པ། ཕ་མས་གནང་བ་གང་དག་འོངས་པ་དང་། ཡུལ་ཐག་རིང་པོ་ཕ་མས་གཏམ་ཡང་མི་ཐོས་པ་གང་དག་འོངས་པ་དེ་དག་ནི་རབ་ཏུ་དབྱུང་བར་བྱ་སྟེ། འདི་ལ་འགྱོད་པར་མི་བྱའོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་ མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་བྱུང་ནས་དེས་ཆུང་མ་ལ་སྨྲས་པ། བཟང་མོ་ཡུ་བུ་ཅག་གི་བུ་ལོན་འཇལ་བར་བྱེད་པ་དང་། ནོར་སྤྱོད་པ་སྐྱེས་ཀྱིས། ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས་དེ་བཞིན་མཛོད་ཅིག །དེ་ཟོང་ཐོགས་ཏེ་ཡུལ་གཞན་དུ་སོང་

  159. 80b

    བ་དང་། དེ་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར་ཏོ། །མས་ཁྱེའུ་དེ་ཉེ་དུའི་མཐུ་དང་ལག་མཐུས་བསྙོད་ཅིང་གསོས་ཏེ་བསྐྱེད་ནས། དེས་ཁྱེའུ་དེ་ཡིག་དཔོན་ལ་བཅོལ་བ་དང་། ཁྱེའུ་དེའི་ན་ཟླ་རྣམས་ཀྱིས་ནི་ཡིག་འབྲུའི་ཡི་གེ་དག་ལོབས་ནས་ཕྱི་རོལ་གྱི་བསྟན་ བཅོས་དག་བཀླག་པར་བརྩམས་སོ། །དེ་ནི་ཡིག་འབྲུའི་ཡི་གེ་དེ་དག་ཉིད་ལ་སློབ་པར་བྱེད་པ་དང་། དེའི་མ་ཡིག་དཔོན་གྱི་གན་དུ་སོང་སྟེ་ཕྱིན་ནས་སྨྲས་པ། ཇོ་བོ་ཁྱེའུ་འདིའི་ན་ཟླ་ཁྱེའུ་དག་གིས་ཁྱོད་ལ་ཅི་འབུལ་བ་དེ་བདག་ཀྱང་ཁྱོད་ལ་འབུལ་ན། ཁྱེའུ་འདིའི་ན་ཟླ་ ཁྱེའུ་དག་གིས་ནི་ཡི་གེའི་ཡིག་འབྲུ་དག་ལོབས་ནས་ཕྱི་རོལ་གྱི་བསྟན་བཅོས་དག་བཀླག་པར་བརྩམས་ན། ཁྱེའུ་འདི་ནི་ད་དུང་ཡིག་འབྲུའི་ཡི་གེ་དག་སློབ་པར་བགྱིད་དོ། །དེས་སྨྲས་པ། རྒྱུ་གཉིས་ཀྱིས་རིག་པ་ལོབས་པར་འགྱུར་ཏེ། གང་ལ་བདག་ཉིད་ལས་ བྱུང་བའི་ངོ་ཚ་ཤེས་པ་ཡོད་པ་དང་། གང་ལ་ཕྱི་རོལ་ལས་བྱུང་བའི་ཁྲེལ་ཡོད་པ་ཡོད་པས་སོ། །ཁྱེའུ་འདི་ལ་ནི་ངོ་ཚ་ཤེས་པ་ཡང་མེད་ལ། ཁྲེལ་ཡོད་པ་ཡང་མེད་དོ། །འདི་ལྟར་ཁྱོད་ལ་ཡང་ཉེས་པ་ཡོད་དེ། ཁོ་བོས་འདི་གཞུས་པ་ན་ཁྱོད་ཀྱིས་ཤེད་བསྐྱེད་དོ། ། དེས་སྨྲས་པ། དེ་དེ་བཞིན་ནོ། །བདག་ལ་ནོངས་པ་དེ་མཆིས་ཏེ། ཁྱོད་ཀྱིས་གཞུས་པ་བདག་གིས་ཤེད་བསྐྱེད་དོ། །དུས་གཞན་ཞིག་ན་དེས་དེ་གཞུས་པ་དང་། དེ་ངུ་ཞིང་མའི་གན་དུ་སོང་ངོ་། །མས་དེ་ལ་སྨྲས་པ། བུ་ཁྱོད་ཅིའི་ཕྱིར་ངུ་། མ་བདག་ཡིག་དཔོན་གྱིས་ གཞུས་སོ། །མས་ཀྱང་དེ་གཞུས་པ་དང་ཁྱེའུ་དེས་བསམས་པ། གཉི་གར་ཉེས་དམིགས་བྱུང་སྟེ། སྔོན་ནི་བདག་གནས་གཅིག་ཏུ་གཞུས་ན། ད་ནི་གནས་གཉི་གར་གཞུས་པས་བདག་གིས་གནས་གཉི་གར་གནོད་པ་མི་བཟོད་པས་འབྲོས་སོ་སྙམ་ནས་དེ་རྒྱལ་བྱེད་ཀྱི་ཚལ་ དུ་སོང་བ་དང་། དེ་ན་དགེ་ཚུལ་ཞིག་མེ་ཏོག་ཐུ་བ་དེ་དེས་མཐོང་ནས་ཁྱེའུ་དེས་སྨྲས་པ། འཕགས་པ་ཁྱོད་རེ་བདེ། ཅིའི་ཕྱིར། གང་གི་ཕྱིར་ཁྱོད་རབ་ཏུ་བྱུང་བས་སོ། །ཁྱོད་ཅིའི་ཕྱིར་རབ་ཏུ་མི་འབྱུང་། འཕགས་པ་བདག་སུས་རབ་ཏུ་འབྱིན་པར་འགྱུར། དེས་སྨྲས་པ། ཚུར་

  160. 81a

    ཤོག་མཁན་པོའི་གན་དུ་འདོང་ཞེས་དེས་དེ་ཁྲིད་དེ་མཁན་པོའི་གན་དུ་སོང་ནས་སྨྲས་པ། མཁན་པོ་རིགས་ཀྱི་བུ་འདི་རབ་ཏུ་འབྱུང་བར་འཚལ་གྱིས་འདི་རབ་ཏུ་དབྱུང་དུ་གསོལ། དེས་དེ་རབ་ཏུ་ཕྱུང་ངོ་། །དེའི་མ་ཡིག་དཔོན་གྱི་གན་དུ་སོང་སྟེ་སྨྲས་པ། ཁྱེའུ་ དེ་ད་གར་མཆིས། དེ་དེ་རིང་ཁོ་བོས་གཞུས་སོ། །དེས་ཀྱང་སྨྲས་པ། བདག་གིས་ཀྱང་དེ་དེ་རིང་གཞུས་སོ། །ཡིག་དཔོན་གྱིས་སྨྲས་པ། དེ་བྲོས་ཀྱིས་ཚོལ་དུ་སོང་ཤིག །དེས་དཀའ་ཐུབ་ཀྱི་ཚལ་དང་མུ་སྟེགས་ཀྱི་གནས་དེ་དང་དེ་དག་ཏུ་བུ་འདྲི་ཞིང་སོང་སྟེ་དྲིས་ན་དེའི་ གཏམ་ཐོས་པ་ཡང་སུ་ཡང་མེད་དོ། །དེ་མཉན་ཡོད་དུ་སོང་སྟེ་སྒོར་བསྡད་པ་དང་། དགེ་ཚུལ་དེ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། ཕྱི་བཞིན་འབྲང་བའི་དགེ་སྦྱོང་དགེ་ཚུལ་དེ་ཉིད་དང་མཉན་ཡོད་དུ་བསོད་སྙོམས་ལ་ཞུགས་པ་དང་དེས་དེ་ མཐོང་ནས་དེས་བྲང་བརྡུངས་ཏེ་སྨྲས་པ། བུ་དཀའ་ཐུབ་ཀྱི་ཚལ་དང་མུ་སྟེགས་ཀྱི་གནས་དེ་དང་དེ་དག་ཏུ་ཁོ་མོས་ཁྱོད་ཀྱི་ཕྱིར་མ་བཙལ་བ་དེ་དག་གང་ཡོད་དེ། ཁྱོད་ཀྱི་གཏམ་ཐོས་པ་ཡང་སུ་ཡང་མེད་ན། ཁྱོད་ཤཱཀྱའི་བུའི་རྐུན་མ་རྣམས་ཀྱི་ནང་དུ་ཅིའི་ཕྱིར་རབ་ཏུ་འབྱུང་། ཚུར་ཤོག་འདོང་ཞེས་དེས་དེའི་ལག་པ་གཉིས་ནས་བཟུང་ནས་ཁྱིམ་དུ་ཁྲིད་དོ། །དེ་ཉིད་ཚེ་དང་ལྡན་པ་དེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོའི་བར་ཆད་དུ་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་ རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་དགེ་འདུན་ལ་མ་ཞུས་པར་རབ་ཏུ་འབྱིན་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་དགེ་འདུན་ལ་མ་ཞུས་པར་རབ་ཏུ་དབྱུང་བར་མི་བྱའོ། ། འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན་དེས་དེ་དགེ་འདུན་ལ་ཞུར་གཞུག་པར་བྱའོ། །མ་ཞུས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་

  161. 81b

    སོ། །རྒྱལ་པོའི་ཁབ་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་བྱུང་ནས་བསྲིངས་ཤིང་བསྐྱེད་ དེ་ཆེན་པོར་གྱུར་ཏོ། །དེ་དུས་གཞན་ཞིག་ན་ན་བར་གྱུར་ནས་སྨན་པ་ཐམས་ཅད་ཀྱིས་བོར་བ་དང་མས་དེ་ལ་སྨྲས་པ། བུ་འཚོ་བྱེད་གཞོན་ནུས་གསོས་འདི་ནི་སྨན་པའི་རྒྱལ་པོ་བླ་ན་མེད་པ་ཡིན་གྱིས་འདིའི་གན་དུ་སོང་ཤིག །དེ་འཚོ་བྱེད་ཀྱི་གན་དུ་སོང་སྟེ་སྨྲས་པ། འཚོ་བྱེད་བདག་ ལ་གསོས་མཛོད་ཅིག །དེས་སྨྲས་པ། བཞིན་བཟངས་ཁྱོད་ནི་གསོ་དཀའ་ལ་འདི་ལྟར་ཁོ་བོ་ཡང་གཞན་སུའི་གསོས་ཀྱང་མི་བྱེད་དེ། ཁོ་བོ་ནི་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོ་བཙུན་མོའི་འཁོར་དང་བཅས་པ་གཉིས་ཀྱི་ གསོས་བྱེད་དོ། །དེ་མའི་གན་དུ་སོང་བ་དང་མས་སྨྲས་པ། བུ་ཁྱོད་འཚོ་བྱེད་ཀྱི་གན་དུ་སོན་ཏམ། མ་བདག་གིས་འཚོ་བྱེད་ཀྱི་གན་དུ་སོན་ན་དེ་ན་རེ་ཁྱོད་ནི་གསོ་དཀའ་ལ། འདི་ལྟར་ཁོ་བོ་ཡང་གཞན་སུའི་གསོས་ཀྱང་མི་བྱེད་དེ། ཁོ་བོ་ནི་སངས་རྒྱས་བཅོམ་ལྡན་འདས་ ཉན་ཐོས་ཀྱི་དགེ་འདུན་དང་བཅས་པ་དང་། རྒྱལ་པོ་བཙུན་མོའི་འཁོར་དང་བཅས་པ་གཉིས་ཀྱི་གསོས་བྱེད་དོ་ཞེས་ཟེར་རོ། །བུ་གལ་ཏེ་དེ་ལྟ་ན་རབ་ཏུ་བྱུང་ཤིག །མ་བདག་རིགས་ཀྱི་མཆོག་ཏུ་གྱུར་ནས་ཇི་ལྟར་ཤཱཀྱའི་བུའི་དགེ་སྦྱོང་རིགས་སྣ་ཚོགས་ཅན་རྣམས་ཀྱི་ནང་དུ་ རབ་ཏུ་འབྱུང་བར་བྱ། དེས་སྨྲས་པ། བུ་ཁྱོད་ཀྱི་ཀླད་པར་རྩྭ་ཀ་ཤ་དང་ཀུ་ཤ་སྐྱེ་བར་འགྱུར་རམ་ཅི་བབས་སོ་ཅོག །དེ་འོད་མའི་ཚལ་དུ་སོང་སྟེ་དགེ་སློང་གི་གན་དུ་སོང་ནས་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་བ་དང་དེ་འཁུན་ ཞིང་འདུག་གོ། །དེས་སྨྲས་པ། ཅིའི་ཕྱིར་འཁུན་ཅིང་འདུག །མཁན་པོ་བདག་བྲོ་འཚལ་ཏོ། །དེས་སྨྲས་པ། བཞིན་བཟངས་ཅི་ཁྱོད་རབ་ཏུ་བྱུང་ནས་འདི་ལྟར་ན་བར་གྱུར་ཏམ། མཁན་པོ་བདག་རབ་ཏུ་བྱུང་ནས་འདི་ལྟར་བྲོ་འཚལ་བར་མ་གྱུར་གྱི། བདག་བྲོ་འཚལ་

  162. 82a

    བཞིན་དུ་རབ་ཏུ་བྱུང་ངོ་། །ཅིའི་ཕྱིར་ཁྱོད་ཀྱིས་ཁོ་བོ་ལ་མ་སྨྲས། དེས་སྨྲས་པ། མཁན་པོ་ཁྱོད་ཀྱིས་བདག་ལ་སྨྲས་སམ་ཅི། དེ་མི་དགའ་བར་གྱུར་ཅིང་འདུག་པ་དང་། དེའི་ལྷན་ཅིག་གནས་པ་དང་ཉེ་གནས་རྣམས་ལྷགས་ཏེ་སྨྲས་པ། མཁན་པོ་ཁྱོད་ཅིའི་ སླད་དུ་མི་དགྱེས་ཤིང་བཞུགས། བུ་དག་རིགས་ཀྱི་བུ་འདི་ན་བཞིན་དུ་རབ་ཏུ་ཕྱུང་བས་ཁོ་བོས་ནད་བྲང་ཉེ་བར་གཞག་གོ། །དེ་དག་གིས་སྨྲས་པ། མཁན་པོ་བཅོམ་ལྡན་འདས་ཀྱིས་སྐྱེས་བུ་དམ་པ་ནི་གཉིས་ཏེ། ཁུར་མ་བླངས་པ་ལེན་པར་མི་བྱེད་པ་དང་། གང་ཁུར་ བླངས་པ་མཐར་ཕྱིན་པར་བྱེད་པའོ་ཞེས་བཀའ་སྩལ་པས་ཁུར་བླངས་པ་འདི་མཐར་ཕྱིན་པར་མཛོད་ཅིག །དེ་དག་ཕན་ཚུན་སྨྲ་ཞིང་འཁོད་པ་ན་འཚོ་བྱེད་ཀྱང་ཕྱོགས་དེར་འོངས་ནས་དེ་དག་གིས་དེ་ལ་སྨྲས་པ། འཚོ་བྱེད་གཞོན་ནུ་འདིའི་ནད་ཅི་ཡིན་ལྟོས་ཤིག །དེས་སྨྲས་པ། བྲོ་ ལྕི་སྟེ། འདི་ལྟར་རྒྱལ་པོས་འདིའི་ཡོ་བྱད་ཐམས་ཅད་སྦྱར་ཅིང་བདག་གིས་འདིའི་གསོས་བགྱིས་ལ། འཕགས་པ་དག་གིས་བྲོ་གཡོག་མཛད་ན་རིང་པོ་མི་ཐོགས་པ་ཁོ་ནར་སོས་པར་འགྱུར་རོ་ཞེས་དེས་དེའི་གསོས་བྱས་པ་དང་དེ་སོས་པར་གྱུར་ཏོ། །དེས་སྨྲས་པ། མཁན་ པོ་བདག་གང་གི་དོན་དུ་རབ་ཏུ་འབྱུང་བའི་དོན་དེ་བདག་གིས་ཐོབ་ཀྱིས་མཆིའོ། །དེས་སྨྲས་པ། བུ་ཁྱོད་ཀྱིས་དགྲ་བཅོམ་པ་ཉིད་མངོན་དུ་བྱས་སམ། མཁན་པོ་མ་བགྱིས་སོ། །འོ་ན་ཅི་ཁྱོད་ཀྱིས་ཕྱིར་མི་འོང་བའི་འབྲས་བུའམ། ལན་གཅིག་ཕྱིར་འོང་བའི་འབྲས་བུའམ། རྒྱུན་དུ་ཞུགས་པའི་འབྲས་བུ་མངོན་དུ་བྱས་སམ། མཁན་པོ་མ་བགྱིས་ཏེ། བདག་བྲོ་འཚལ་བས་རབ་ཏུ་བྱུང་ན་ད་བདག་སོས་པར་གྱུར་ཏོ། །དེས་སྨྲས་པ། བུ་གང་དུ་འགྲོ། མཁན་པོ་སྡུམ་པར་འཆིའོ། །དེས་སྨྲས་པ། བཞིན་བཟངས་གང་གི་ཕྱིར་ཁྱོད་ཀྱིས་ལེགས་པར་ གསུངས་པའི་ཆོས་འདུལ་བ་ལ་རབ་ཏུ་བྱུང་ནས་དགེ་སྦྱོང་གི་འབྲས་བུ་བཞི་པོ་དག་ལས་དགེ་སྦྱོང་གི་འབྲས་བུ་གང་ཡང་རུང་བ་ཐོབ་པར་བྱ་བ་ཡིན་ན། ཁྱོད་དད་པས་སྦྱིན་པར་བྱ་བ་ཆུད་གཟན་ནས་ཚུལ་བཞིན་མ་ཡིན་པས་སྡུག་བསྔལ་སྐྱེད་པར་བྱེད་དམ། དེས་དེའི་ཚིག་ཚིག་མ་ཡིན་པར་

  163. 82b

    བྱས་ཏེ་སོང་ནས། དེ་བྱས་པ་ཤེས་པས་འཚོ་བྱེད་ལ་ལོ་མ་དག་དང་། མེ་ཏོག་དག་དང་། འབྲས་བུ་དག་དང་། སོ་ཤིང་དག་སྟོབས་པར་བྱེད་དོ། །འཚོ་བྱེད་ཀྱིས་སྨྲས་པ། བཞིན་བཟངས་ཁྱོད་ཁོ་བོ་ལས་ཅི་ཞིག་འདོད། དེས་སྨྲས་པ་ཅི་ཡང་མི་འཚལ་ཏེ། འདི་ལྟར་བདག་ བགྱིས་པ་འཚལ་བས་ཁྱོད་ལ་ལོ་མ་དག་དང་། མེ་ཏོག་དག་དང་། འབྲས་བུ་དག་དང་། སོ་ཤིང་དག་སྟོབས་པར་བགྱིད་དོ། །དེས་སྨྲས་པ། བཞིན་བཟངས་ཁྱོད་ལ་ཁོ་བོས་ཅི་ཞིག་བྱས། བདག་བྲོ་འཚལ་བ་ལ་ཁྱོད་ཀྱིས་གསོས་བགྱིས་སོ། །དེས་སྨྲས་པ། ཁོ་ བོས་མི་དྲན་ནོ། །བདག་གིས་ཁྱོད་དགོངས་པར་བགྱིའོ་ཞེས་དེས་དེ་དྲན་པར་བྱས་པ་དང་འཚོ་བྱེད་ཀྱིས་སྨྲས་པ། བཞིན་བཟངས་གང་གི་ཕྱིར་ཁྱོད་ཀྱིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་དགེ་སྦྱོང་གི་འབྲས་བུ་བཞི་པོ་དག་ལས་དགེ་སྦྱོང་གི་འབྲས་བུ་གང་ ཡང་རུང་བ་ཐོབ་པར་བྱ་བ་ཡིན་ན། ཁྱོད་དད་པས་སྦྱིན་པར་བྱ་བ་ཆུད་གཟན་ནས་ཚུལ་མ་ཡིན་པས་སྡུག་བསྔལ་སྐྱེད་པར་གྱུར་ཏམ། འཚོ་བྱེད་ཀྱིས་བསམས་པ། འདི་ནི་བདག་གི་བྱ་བ་ཁོ་ན་ཡིན་གྱིས། བཅོམ་ལྡན་འདས་ཀྱི་སྤྱན་སྔར་འགྲོ་སྙམ་མོ། །དེ་ནས་འཚོ་བྱེད་ གཞོན་ནུས་གསོས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་འཚོ་བྱེད་གཞོན་ནུས་གསོས་ཀྱིས་འདི་སྐད་ཅེས་ གསོལ་ཏོ། །བཙུན་པ་འཕགས་པ་འདི་དག་རིགས་ཀྱི་བུ་བྲོ་འཚལ་བ་རབ་ཏུ་འབྱིན་པར་བགྱིད། བསྙེན་པར་རྫོགས་པར་བགྱིད་པས་བཙུན་པ་རེ་ཞིག་རྒྱལ་པོའི་མཛོད་དང་བང་བ་དག་ཀྱང་བསྲབས་པ་དང་། ཡོངས་སུ་བས་པ་དང་། ཡོངས་སུ་གཏུགས་པར་འགྱུར་ལ། བདག་གི་ལུས་ཀྱང་དལ་ཞིང་འཕགས་པ་དག་གི་དགེ་བའི་ཕྱོགས་ཀྱང་ཡོངས་སུ་ཉམས་པར་འགྱུར་བས། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་དག་རིགས་ཀྱི་བུ་བྲོ་འཚལ་བ་རབ་ཏུ་འབྱིན་པ་དང་། བསྙེན་པར་རྫོགས་པར་མི་བགྱིད་པ་དྲན་པར་

  164. 83a

    བགྱི་བ་ཅུང་ཞིག་བཅའ་བ་མཛད་ན་ལེགས་སོ། །བཅོམ་ལྡན་འདས་ཀྱིས་འཚོ་བྱེད་གཞོན་ནུས་གསོས་ལ་ཅང་མི་གསུང་བས་གནང་ངོ་། །དེ་ནས་འཚོ་བྱེད་གཞོན་ནུས་གསོས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ནད་པ་རབ་ཏུ་འབྱིན་པར་བྱེད་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་ བས་ན་དགེ་སློང་གིས་ནད་པ་རབ་ཏུ་དབྱུང་བར་མི་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན་དེས་དེ་ལ་ནད་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་ འདས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་སེར་སྐྱའི་གནས་ཀྱི་ཤཱཀྱ་རྣམས་ཀྱི་ཁྱིམ་དག་ནས་རེ་རེ་རབ་ཏུ་ཕྱུང་བ་དེའི་ཚེ་ན་དེ་དག་གི་གན་དུ་ཉེ་དུ་དག་ལྷགས་ནས། དེ་དག་ཉེ་དུ་ལྷགས་པ་དེ་དག་ལ་ཆོས་སྟོན་པར་བྱེད་ དོ། །དེ་དག་ཆོས་ཐོས་ནས་དེ་ཉིད་དུ་རབ་ཏུ་ཕྱུང་བ་ན་ཤཱཀྱ་མོ་ལ་ལའི་ནི་ཕ་རབ་ཏུ་ཕྱུང་། ལ་ལའི་ནི་མིང་པོ། །ལ་ལའི་ནི་ཁྱིམ་ཐབ། ལ་ལའི་ནི་སྐུད་པོ། །ལ་ལའི་ནི་བུ་རབ་ཏུ་བྱུང་བ་དང་དེ་དག་མྱ་ངན་གྱིས་ནོན་ནས་མཚན་མོའི་ཐོ་རངས་ཀྱི་དུས་ཀྱི་ཚེ་སྙིང་རྗེ་རྗེ་སྐད་དུ་ངུའོ། །རྒྱལ་ པོ་ཟས་གཙང་གིས་མཚན་མོའི་ཐོ་རངས་ཀྱི་དུས་ཀྱི་ཚེ་ན་ཤཱཀྱ་མོ་རབ་ཏུ་མང་པོ་དག་སྙིང་རྗེ་རྗེ་སྐད་དུ་ངུ་བའི་སྒྲ་ཐོས་སོ། །ཐོས་ནས་ཀྱང་ཤཱཀྱ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་མཚན་མོའི་ཐོ་རངས་ཀྱི་དུས་ཀྱི་ཚེ་ཤཱཀྱ་མོ་རབ་ཏུ་མང་པོ་དག་སྙིང་རྗེ་རྗེ་སྐད་དུ་ངུ་། དེ་དག་གིས་ སྨྲས་པ། ལྷ་འཕགས་པ་འདི་དག་གིས་རིགས་ཀྱི་བུ་ཕ་མས་མ་གནང་བ་རབ་ཏུ་འབྱིན་པར་བགྱིད། བསྙེན་པར་རྫོགས་པར་བགྱིད་དེ། ཤཱཀྱ་མོ་ལ་ལའི་ནི་ཕ་རབ་ཏུ་ཕྱུང་། ལ་ལའི་ནི་མིང་པོ། ལ་ལའི་ནི་ཁྱིམ་ཐབ། ལ་ལའི་ནི་སྐུད་པོ། ལ་ལའི་ནི་བུ་རབ་ཏུ་བྱུང་བ་དང་དེ་དག་མྱ་ངན་

  165. 83b

    གྱིས་ནོན་ནས་མཚན་མོའི་ཐོ་རངས་ཀྱི་དུས་ཀྱི་ཚེ་སྙིང་རྗེ་རྗེ་སྐད་དུ་ངུའོ། །རྒྱལ་པོ་ཟས་གཙང་གིས་བསམས་པ། འདི་ནི་བདག་གི་བྱ་བ་ཁོ་ན་ཡིན་གྱིས། བཅོམ་ལྡན་འདས་ཀྱི་སྤྱན་སྔར་འགྲོའོ་སྙམ་མོ། །དེ་ནས་རྒྱལ་པོ་ཟས་གཙང་བཅོམ་ལྡན་འདས་ག་ལ་བ་དེར་སོང་སྟེ་ ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་ཟས་གཙང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་དམ་པ་འོས་སོ། །བདེ་བར་ གཤེགས་པ་བདག་ལ་དམ་པ་འོས་སོ། །རྒྱལ་པོ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དམ་པ་ལས་འདས་པ་ཁོ་ན་ཡིན་ན། ཁྱོད་ལ་དམ་པ་ཅི་ཞིག་སྦྱིན་སྨྲོས་ཤིག །འཕགས་པ་རྣམས་ཀྱིས་བརྙེས་སླ་བ་གང་ལགས་ པའོ། །གལ་ཏེ་རྙེད་སླ་བ་ཡིན་ན་སྦྱིན་ནོ། །བཙུན་པ་གང་གི་ཚེ་བཅོམ་ལྡན་འདས་འཁྲུངས་པ་དེའི་ཚེ་ན་བཅོམ་ལྡན་འདས་འཁོར་ལོས་སྒྱུར་བའི་རྒྱལ་པོར་འགྱུར་ལ། བདག་ཀྱང་ནམ་མཁའི་ངོས་ལ་རྒྱུ་ཞིང་གླིང་བཞི་དག་ཏུ་རྗེས་སུ་མཆིའོ་སྙམ་པས་བདེ་བ་དང་ཡིད་བདེ་བ་མི་ཆུང་ བ་དང་ལྡན་པ་ལས། བཙུན་པ་གང་གི་ཚེ་བཅོམ་ལྡན་འདས་རབ་ཏུ་བྱུང་བ་དེའི་ཚེ་ན་བདག་གི་འཁོར་ལོས་སྒྱུར་བར་རེ་བ་གང་ལགས་པ་དེ་མ་མཆིས་པར་གྱུར་ཏོ། །གཞན་ཡང་གཞོན་ནུ་མཛེས་དགའ་འདི་སྟོབས་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་རོ་སྙམ་དུ་རེ་བ་ཙམ་ དུ་གྱུར་པ་ལས་གང་གི་ཚེ་གཞོན་ནུ་མཛེས་དགའ་རབ་ཏུ་བྱུང་བ་དེའི་ཚེ་ན་བདག་གི་སྟོབས་ཀྱི་འཁོར་ལོས་སྒྱུར་བར་རེ་བ་གང་ལགས་པ་དེ་ཡང་མ་མཆིས་པར་གྱུར་ཏོ། །གཞན་ཡང་གཞོན་ནུ་སྒྲ་ཅན་ཟིན་བཟང་པོ་འདི་དངོས་བཙན་པའི་རྒྱལ་པོར་འགྱུར་རོ་སྙམ་དུ་རེ་བ་ཙམ་དུ་གྱུར་ པ་ལས། གང་གི་ཚེ་གཞོན་ནུ་སྒྲ་ཅན་ཟིན་བཟང་པོ་རབ་ཏུ་བྱུང་བ་དེའི་ཚེ་ན་བདག་གི་རྒྱལ་པོ་དངོས་བཙན་པར་རེ་བ་གང་ལགས་པ་དེ་ཡང་ཐམས་ཅད་ཀྱི་ཐམས་ཅད་དུ་མ་མཆིས་པར་གྱུར་ཏོ། །བཙུན་པ་གཞན་ཡང་ཕ་མ་དག་ནི་བུ་ལ་བག་དྲོ་བར་གྱུར་པ་ལགས་ན། བཙུན་པ་

  166. 84a

    འཕགས་པ་འདི་དག་རིགས་ཀྱི་བུ་ཕ་མས་མ་གནང་བ་རབ་ཏུ་འབྱིན་པར་བགྱིད། བསྙེན་པར་རྫོགས་པར་བགྱིད་པས། ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་གང་གིས་འཕགས་པ་དག་རིགས་ཀྱི་བུ་ཕ་མས་མ་གནང་བ་རབ་ཏུ་འབྱིན་པ་དང་བསྙེན་ པར་རྫོགས་པར་མི་བགྱིད་པར་དྲན་པར་བགྱི་བ་ཅུང་ཞིག་བཅའ་བ་མཛད་ན་ལེགས་སོ། །བཅོམ་ལྡན་འདས་ཀྱིས་རྒྱལ་པོ་ཟས་གཙང་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་ཟས་གཙང་གིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་ འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་རིགས་ཀྱི་བུ་ཕ་མས་མ་གནང་བ་རབ་ཏུ་འབྱིན་པར་བྱེད། བསྙེན་པར་རྫོགས་པར་བྱེད་ པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་རིགས་ཀྱི་བུ་ཕ་མས་མ་གནང་བ་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན་དེས་དེ་ལ་ཕ་མས་གནང་ངམ། ཞེས་དྲི་བར་བྱའོ། ། མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་རིགས་ཀྱི་བུ་ཕ་མས་མ་གནང་བ་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱའོ་ཞེས་བཀའ་སྩལ་ནས། ཕ་མས་མ་གནང་བ་ཡུལ་ཐག་རིང་བ་ཕ་མས་གཏམ་ ཡང་མི་ཐོས་པ་གཞན་དག་འོངས་ན། དགེ་སློང་རྣམས་ཀྱིས་དེ་དག་ཀྱང་རབ་ཏུ་འབྱིན་པར་མི་བྱེད་པས་དེ་དག་རབ་ཏུ་འབྱུང་བ་མ་ཐོབ་པར་དོང་སྟེ། དེ་ཉིད་ཚེ་དང་ལྡན་པ་དེ་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་ དངོས་པོའི་བར་ཆད་དུ་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕ་མས་མ་གནང་བ་ཡུལ་ཐག་རིང་པོ་ཕ་མས་གཏམ་ཡང་མི་ཐོས་པ་གང་དག་འོངས་ན་དེ་དག་ནི་རབ་ཏུ་དབྱུང་བར་བྱ་སྟེ། འདི་ལ་

  167. 84b

    འགྱོད་པར་མི་བྱའོ།། །།སྡོམ་ལ། བྱ་རོག་སྐྲོད་དང་སུན་ཕྱུང་དང་། །རྐུ་ཐབས་གནས་དང་མ་ནིང་དང་། །དུད་འགྲོ་དང་ནི་མུ་སྟེགས་ཅན། །མ་བསད་པ་དང་ཕ་བསད་པའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ ཀུན་དགའ་ར་བ་ན་བཞུགས་སོ། །གང་གི་ཚེ་འཕགས་སྐྱེས་པོ་མི་གཏི་མུག་ཅན་གྱིས་སེར་སྐྱའི་གནས་ན་གནས་པའི་ཤཱཀྱ་ཁོན་མེད་པ་དང་། མི་འགྲན་པ་དང་། མི་འཁུ་བ་དག་བསད་པ་དེའི་ཚེ་ན་ཚེ་དང་ལྡན་པ་ཀུན་དགའ་བོའི་སྲིང་མོའི་བུ་གཉིས་ཤིག་ཕ་མས་བོར་ནས། དེ་དང་དེ་ན་ འཁྱམ་པ་ལས་མཉན་ཡོད་ཀྱི་ཚོང་པ་དག་ཟོང་ཐོགས་ཏེ་སེར་སྐྱའི་གནས་སུ་དོང་བ་དང་། དེ་དག་གིས་དེ་གཉིས་བཞིན་གཟུགས་ལས་ངོ་ཤེས་ནས་སྨྲས་པ། ཁྱེའུ་གཉིས་ཁྱོད་ཀྱི་ཕ་མ་གཉིས་གང་ན། དེ་གཉིས་ཀྱིས་སྨྲས་པ། འཕགས་སྐྱེས་པོ་མི་གཏི་མུག་ཅན་གྱིས་བསད་དོ། ། མཉན་ཡོད་ན་ཁྱེད་གཉིས་ཀྱི་ཞང་པོ་བཙུན་པ་ཀུན་དགའ་བོ་ཞེས་བྱ་བ་དགེ་སློང་རབ་ཏུ་གྲགས་པ་འདུག་ན་ཅིའི་ཕྱིར་དེར་མི་འདོང་། དེས་གཉིས་ཀྱིས་སྨྲས་པ། ཁོ་བོ་ཅག་སུ་ཞིག་གིས་དེར་ཁྲིད་པར་འགྱུར། ཁོ་བོ་ཅག་གིས་བཀྲིའོ། །དེ་དག་གི་ཟོང་སྒྱུར་ནས་རིན་བླངས་ཏེ་ཁྱེའུ་དེ་གཉིས་ ཁྲིད་ནས་མཉན་ཡོད་དུ་དོང་སྟེ། དེ་དག་གིས་ཁྱེའུ་དེ་གཉིས་རྒྱལ་བྱེད་ཀྱི་ཚལ་གྱི་སྒོར་བོར་བ་དང་། ཚེ་དང་ལྡན་པ་ཀུན་དགའ་བོས་དེ་གཉིས་བཞིན་གཟུགས་ལས་ངོ་ཤེས་ནས་དེས་སྨྲས་པ། ཁྱེའུ་གཉིས་ཁྱེད་གཉིས་ཀྱི་ཕ་མ་གཉིས་གང་ན། དེ་གཉིས་ཀྱིས་སྨྲས་པ། འཕགས་ སྐྱེས་པོ་མི་གཏི་མུག་ཅན་གྱིས་བསད་དོ། །ཚེ་དང་ལྡན་པ་ཀུན་དགའ་བོ་ཉེ་དུ་ལ་མཉེས་གཤིན་པ་ཡིན་པས་དེས་ཉེ་དུ་དང་བྲལ་བ་ཐོས་ནས་མཆི་མས་བརྣངས་ཏེ་འདུག་གོ། །དགེ་སློང་རྣམས་ཀྱིས་དེ་ལ་སྨྲས་པ། ཚེ་དང་ལྡན་པ་ཀུན་དགའ་བོ་ཁྱོད་ཀྱི་ཁྱེའུ་འདི་གཉིས་སུ་དག་ཅིག་ ཡིན། སྲིང་མོའི་བུ་དག་གོ། །ཁྱོད་ཅིའི་ཕྱིར་འདི་གཉིས་སྡུད་པར་མི་བྱེད། དེས་སྨྲས་པ། ཁོ་བོ་ནི་ལྟོ་འགྲངས་ཙམ་གྱི་བསོད་སྙོམས་བླངས་ནས་ཕྱིར་འབྱུང་ན་ཁོ་བོས་འདི་གཉིས་ལ་གང་ནས་སྦྱིན། དེ་དག་གིས་སྨྲས་པ། ཁྱེའུ་འདི་གཉིས་ཀྱིས་དགེ་སློང་དག་ལ་ལོ་མ་དང་།

  168. 85a

    མེ་ཏོག་དང་། འབྲས་བུ་དག་འབུལ་ན། དགེ་སློང་དག་ཀྱང་འདི་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་འགྱུར་རོ། །དེས་དེ་གཉིས་བསྡུས་ནས་དགེ་སློང་དག་ལ་ལོ་མ་དང་། མེ་ཏོག་དང་། འབྲས་བུ་དག་འབུལ་དུ་གཞུག་པར་བརྩམས་པ་དང་། དགེ་སློང་དག་ཀྱང་དེ་གཉིས་ལ་ལྷུང་བཟེད་ཀྱི་ལྷག་མ་སྦྱིན་པར་བྱེད་དོ། །དེ་དག་གིས་དེ་གཉིས་ལ་ཞག་ཉུང་ཤས་ཤིག་བྱིན་ནས་ཡང་མི་སྦྱིན་པར་བརྩམས་པ་དང་། ཚེ་དང་ལྡན་པ་ཀུན་དགའ་བོ་ལྟོ་འགྲངས་ཙམ་གྱི་བསོད་སྙོམས་བླངས་ནས་ཕྱིར་འབྱུང་བར་བྱེད་ཅིང་དེ་ཕྱེད་ནི་བདག་ཉིད་ ཟ་བར་བྱེད། ཕྱེད་ནི་དེ་གཉིས་ལ་སྦྱིན་པར་བྱེད་པ་ན་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ། མཁྱེན་ཀྱང་མི་རྨེད་པ། དུས་སུ་རྨེད་པ། དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ། དོན་དང་མི་ལྡན་པ་མི་རྨེད་པས་སངས་རྒྱས་བཅོམ་ལྡན་འདས་རྣམས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་ འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས་སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཅིའི་ཕྱིར་དགེ་སློང་ཀུན་དགའ་བོ་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་ གྱུར། དེ་དག་གིས་གསོལ་པ། བཅོམ་ལྡན་འདས་ཚེ་དང་ལྡན་པ་ཀུན་དགའ་བོའི་སྲིང་མོའི་བུ་གཉིས་ཤིག་ཕ་མས་བོར་ནས་ཚེ་དང་ལྡན་པ་ཀུན་དགའ་བོ་གཡར་བལྟམ་གྱི་བསོད་སྙོམས་བླངས་ནས་སླར་འབྱུང་ཞིང་དེ་ཕྱེད་ནི་བདག་ཉིད་འཚལ་བར་བགྱིད། ཕྱེད་ནི་དེ་གཉིས་ལ་སྩོལ་བས་ དེས་ན་ཚེ་དང་ལྡན་པ་ཀུན་དགའ་བོ་འདི་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱེའུ་དེ་གཉིས་རབ་ཏུ་མི་འབྱིན་ཏམ།

  169. 85b

    བཅོམ་ལྡན་འདས་རབ་ཏུ་འབྱིན་ཏོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རབ་ཏུ་འབྱུང་བར་འདོད་པ་དགེ་འདུན་གྱི་ཟན་སྦྱིན་པར་རྗེས་སུ་གནང་ངོ་། །བཅོམ་ལྡན་འདས་ཀྱིས་རབ་ཏུ་འབྱུང་བར་འདོད་པ་དགེ་འདུན་གྱིས་ཟན་སྦྱིན་པར་བྱའོ་ཞེས་བཀའ་སྩལ་ ནས། དགེ་སློང་དག་གིས་ཞག་ཉུང་ཤས་ཤིག་བྱིན་ནས་སྨོད་པར་བརྩམས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཡང་ལན་གཉིས་སུ་བཀའ་སྩལ་པ། ཀུན་དགའ་བོ་ཁྱེའུ་དེ་གཉིས་རབ་ཏུ་མི་འབྱིན་ཏམ། བཙུན་པ་དེ་གཉིས་ཀྱིས་དགུང་ལོ་ བཅྭ་ལྔ་མ་ལགས་སོ། །ཁྱེའུ་དེ་གཉིས་ཀྱིས་དགེ་འདུན་གྱི་སྐོས་མལ་ནས་བྱ་རོག་སྐྲོད་ནུས་སམ། བཙུན་པ་རྡོ་ཐོག་གོ། །ཀུན་དགའ་བོ་དེ་ལྟ་བས་ན་ལོ་བདུན་ལོན་པ་བྱ་རོག་སྐྲོད་ནུས་པ་ཡོངས་སུ་སྤང་བས་རབ་ཏུ་དབྱུང་བར་རྗེས་སུ་གནང་ངོ་། །ཚེ་དང་ལྡན་པ་ཀུན་དགའ་བོས་ དེ་གཉིས་རབ་ཏུ་ཕྱུང་ངོ་། །རབ་ཏུ་ཕྱུང་ནས་ཀློག་ཏུ་གཞུག་པར་བརྩམས་པ་དང་། དེ་གཉིས་ཀྱིས་ཞག་ཉུང་ཤས་ཤིག་བཀླགས་ནས་མི་ཉན་པར་བརྩམས་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་ཀུན་དགའ་བོ་ལ་སྨྲས་པ། ཚེ་དང་ལྡན་པ་ཀུན་ དགའ་བོ་དགེ་ཚུལ་འདི་གཉིས་ཅིའི་ཕྱིར་ཀློག་ཏུ་མི་གཞུག །དེས་སྨྲས་པ། གནས་བརྟན་བདག་ལ་མཉན་པར་མི་བྱ་བར་སེམས་ན་བདག་གིས་ཇི་ལྟར་བྱ། བདག་གིས་འདི་གཉིས་ཀློག་ཏུ་གཞུག་གོ། །དེས་སྨྲས་པ། གནས་བརྟན་དེ་བཞིན་གྱིས་ཤིག །དེས་དེ་གཉིས་ ཀློག་ཏུ་གཞུག་པར་བརྩམས་སོ། །དེ་གཉིས་ཀྱིས་དེ་ལ་ཡང་ཞག་ཉུང་ཤས་ཤིག་བཀླགས་ནས་དེ་ལ་ཡང་མི་ཉན་པར་བརྩམས་པ་དང་། ཚེ་དང་ལྡན་པ་ཀུན་དགའ་བོས་སྨྲས་པ། གནས་བརྟན་དགེ་ཚུལ་འདི་གཉིས་ཅིའི་ཕྱིར་ཀློག་ཏུ་མི་གཞུག །དེས་སྨྲས་པ། ཚེ་དང་ ལྡན་པ་ཀུན་དགའ་བོ་འདི་གཉིས་ཀྱིས་བདག་ལ་ཡང་མི་མཉན་པར་བརྩམས་སོ། །ཚེ་དང་ལྡན་པ་ཀུན་དགའ་བོས་སྨྲས་པ། གནས་བརྟན་དགེ་ཚུལ་འདི་གཉིས་རེ་ཞིག་ཡིད་བྱུང་བར་གྱིས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་གཉིས་ལ་སྨྲས་པ། དགེ་ཚུལ་

  170. 86a

    གཉིས་ཉིན་མོ་སྤྱོད་དུ་འདོང་ངོ་། །དེ་གཉིས་ཀྱིས་སྨྲས་པ། འཕགས་པ་བཞུད་དོ། །སྟན་ཁྱེར་ཅིག །ཚེ་དང་ལྡན་པ་མཽད་གལ་གྱི་བུ་ཆེན་པོས་དགེ་ཚུལ་དེ་གཉིས་ཁྲིད་ནས་ཉིན་མོ་སྤྱོད་དུ་སོང་ངོ་། །དེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོས་ཕྱོགས་གཅིག་ ཏུ་སེམས་ཅན་དམྱལ་བ་དག་ཏུ་སྤྲུལ་ཏེ། དེ་ན་གཅོད་པ་དང་། འཚེག་པ་དང་། རྡུང་བ་དང་། འདྲལ་བ་ལ་སོགས་པའི་སྒྲ་དག་གྲག་གོ། །དེ་གཉིས་ཀྱིས་སྨྲས་པ། འཕགས་པ་འདི་ཅི་ལགས། དེས་སྨྲས་པ། དེང་ལ་ལྟོས་ཤིག །དེ་གཉིས་དེར་དོང་བ་དང་ཇི་ ཙམ་ན་གཅོད་པ་དང་། འཚེག་པ་དང་། རྡུང་བ་དང་། འདྲལ་བ་ལ་སོགས་པའི་ལས་དག་བྱེད་ཅིང་། དེ་ན་ཁ་ཅིག་ནི་སོག་ལེ་དག་གིས་འཚེག་པར་བྱེད། ཁ་ཅིག་ནི་རང་ཐག་དག་གིས་འཐག་པར་བྱེད། ཁ་ཅིག་ནི་ཟངས་པོ་ཆེ་ཁོལ་བ་དག་གི་ནང་དུ་འཇུད་པར་བྱེད་དེ། དེ་ན་ལྕགས་ཀྱི་ཟངས་པོ་ཆེ་གཉིས་ཤིག་ཁོལ་ཞིང་འདུག་པ་མཐོང་ནས་དེ་གཉིས་ཀྱིས་སྨྲས་པ། ཤེས་ལྡན་དག་འདི་གཉིས་སུ་སུ་ཡང་མི་གཞུག་གམ། དེ་དག་གིས་སྨྲས་པ། སུ་ཡང་མི་གཞུག་སྟེ། འདི་ལྟར་འཕགས་པ་ཀུན་དགའ་བོའི་སྲིང་མོའི་བུ་གཉིས་རབ་ཏུ་བྱུང་ ནས་ལེ་ལོས་འདའ་བར་བྱེད་པ་དེ་གཉིས་ཤི་ཞིང་དུས་ལ་བབ་ན་འདིར་སྐྱེ་བར་འགྱུར་བས་དེ་གཉིས་ཀྱི་དོན་དུ་བཞག་གོ། །དེ་གཉིས་ཤིན་ཏུ་སྐྲག་ནས་གལ་ཏེ་ཤེས་ན་དེང་ཉིད་དུ་བཅུག་པར་འོང་ངོ་སྙམ་ནས་ཕྱོགས་བཞིར་རྣམ་པར་བལྟ་བར་བརྩམས་ནས། དེ་གཉིས་ཚེ་དང་ལྡན་ པ་མཽད་གལ་གྱི་བུ་ཆེན་པོའི་གན་དུ་དོང་བ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ། ཁྱེད་ཀྱིས་མཐོང་ངམ། འཕགས་པ་མཐོང་ངོ་། །དེ་ན་ཅི་ཡོད། སེམས་ཅན་དམྱལ་བ་དག་མཆིས་སོ། །དེ་ན་ཅི་བྱེད། དེ་གཉིས་ཀྱིས་སྨྲས་པ། གཅོད་པ་དང་། འཚེག་ པ་དང་། རྡུང་བ་དང་། འདྲལ་བ་ལ་སོགས་པའི་ལས་དག་བགྱིད་ཅིང་དེ་ན་ཁ་ཅིག་ནི་སོག་ལེ་དག་གིས་འཚེག་པར་བགྱིད། ཁ་ཅིག་ནི་རང་ཐག་དག་གིས་འཐག་པར་བགྱིད། ཁ་ཅིག་ནི་ཟངས་པོ་ཆེ་ཁོལ་བ་དག་གི་ནང་དུ་སྩོལ་བར་བགྱིད་དེ། དེ་ན་ལྕགས་ཀྱི་ཟངས་པོ་ཆེ་གཉིས་

  171. 86b

    ཤིག་ཁོལ་ཞིང་མཆིས་པ་མཐོང་ནས་བདག་ཅག་གིས་ཤེས་ལྡན་དག་འདི་གཉིས་སུ་སུ་ཡང་མི་གཞུག་གམ་ཞེས་བགྱིས་ན། དེ་དག་གི་མཆིད་ནས་སུ་ཡང་མི་གཞུག་སྟེ། འདི་ལྟར་འཕགས་པ་ཀུན་དགའ་བོའི་སྲིང་མོའི་བུ་གཉིས་རབ་ཏུ་བྱུང་ནས་ལེ་ལོས་འདའ་བར་བྱེད་པ་དེ་ གཉིས་ཤི་ཞིང་དུས་ལ་བབ་ན་འདིར་སྐྱེ་བར་འགྱུར་བས་དེ་གཉིས་ཀྱི་དོན་དུ་བཞག་གོ་ཞེས་མཆིའོ། །དགེ་ཚུལ་གཉིས་དེ་ལྟར་ན་ཉེས་དམིགས་འདི་དག་དང་། གཞན་དག་ཀྱང་ལེ་ལོས་འབྱུང་བར་འགྱུར་བས་བརྩོན་འགྲུས་གྱིས་ཤིག །དེ་གཉིས་བརྩོན་འགྲུས་རྩོམ་པ་ བཀླག་པར་བྱ་བར་བརྩམས་ཤིང་། གལ་ཏེ་སྔ་དྲོ་སེམས་ཅན་དམྱལ་བ་དྲན་ན་ནི་ཟན་ཟ་བར་ཡང་མི་བྱེད་ལ། གལ་ཏེ་ཕྱི་དྲོ་དྲན་ན་ནི་ཟས་དེ་སྐྱུག་པར་འགྱུར་བས་དེ་གཉིས་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་ གྱུར་ནས་དེས་སྨྲས་པ། ཚེ་དང་ལྡན་པ་ཀུན་དགའ་བོ་དེ་གཉིས་ཡིད་བྱུང་བར་བྱས་ཟིན་ཏོ། །གནས་བརྟན་ད་ནི་གཟེངས་སྟོད་ཅིག །ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་གཉིས་ལ་སྨྲས་པ། དགེ་ཚུལ་གཉིས་ཉིན་མོ་སྤྱོད་དུ་འདོང་ངོ་། །དེ་གཉིས་ཀྱིས་སྨྲས་པ། འཕགས་ པ་བཞུད་དེ། ཕྱོགས་གཞན་དུ་བཞུད་ཀྱི་དེར་ནི་མི་བཞུད་དོ། །སྟན་ཁྱེར་ཅིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་གཉིས་ཁྲིད་ནས་ཉིན་མོ་སྤྱོད་དུ་སོང་ངོ་། །དེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོས་ཕྱོགས་གཅིག་ཅིག་ཏུ་ལྷ་དག་སྤྲུལ་ཏེ། དེ་ན་པི་བང་ དང་། འོད་མ་དང་། བལ་ལ་རི་དང་། མ་ཧ་ཏི་དང་། སུ་གྷོ་ཥ་ཀ་དག་གི་སྒྲ་དག་གྲག་གོ། །དེ་གཉིས་ཀྱིས་སྨྲས་པ། འཕགས་པ་འདི་ཅི་ལགས། དེས་སྨྲས་པ། དེང་ལ་ལྟོས་ཤིག །དེ་གཉིས་དེར་དོང་བ་དང་། ཇི་ཙམ་ན་པི་བང་དང་། འོད་མ་དང་། བལ་ལ་རི་དང་། མ་ ཧ་ཏི་དང་། སུ་གྷོ་ཥ་ཀ་དག་གི་སྒྲ་དག་སྒྲོགས་ཤིང་དེ་ན་གཞལ་མེད་ཁང་མལ་ཆ་དང་སྟན་བཤམས་པ་ལྷའི་བུ་མོ་དག་གིས་ཡོངས་སུ་གང་བ་གཉིས་ཤིག་ཡོད་དེ། དེ་གཉིས་ན་ལྷའི་བུ་སུ་ཡང་མི་འདུག་པ་མཐོང་ནས་དེ་གཉིས་ཀྱིས་སྨྲས་པ། ཤེས་ལྡན་དག་ཅིའི་ཕྱིར་གཞལ་

  172. 87a

    མེད་ཁང་འདི་གཉིས་ན་ལྷའི་བུ་སུ་ཡང་མི་འདུག །དེ་དག་གིས་སྨྲས་པ། སུ་ཡང་མི་འདུག་གོ། །ཅིའི་ཕྱིར། དེ་དག་གིས་སྨྲས་པ། འཕགས་པ་ཀུན་དགའ་བོའི་སྲིང་མོའི་བུ་གཉིས་རབ་ཏུ་བྱུང་ནས་བརྩོན་འགྲུས་བརྩམས་ཤིང་སྤྱོད་པ་དེ་གཉིས་ཤི་ཞིང་དུས་ ལ་བབ་ན་འདིར་སྐྱེ་བར་འགྱུར་བས་དེ་གཉིས་ཀྱི་དོན་དུ་བཞག་གོ། །དེ་གཉིས་ཡོངས་སུ་དགའ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་གན་དུ་དོང་བ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་གཉིས་ལ་སྨྲས་པ། ཁྱེད་ཀྱིས་མཐོང་ངམ། འཕགས་པ་མཐོང་ངོ་། །དེ་ ན་ཅི་ཡོད། ལྷ་དག་མཆིས་སོ། །དེ་ན་ཅི་བྱེད། དེ་གཉིས་ཀྱིས་སྨྲས་པ། པི་བང་དང་། འོད་མ་དང་། བལ་ལ་རི་དང་། མ་ཧ་ཏི་དང་། སུ་གྷོ་ཥ་ཀ་དག་གི་སྒྲ་དག་སྒྲོགས་ཤིང་དེ་ན་གཞལ་མེད་ཁང་མལ་ཆ་དང་སྟན་བཤམས་པ་ལྷའི་བུ་མོ་དག་གིས་ཡོངས་སུ་གང་བ་ གཉིས་ཤིག་མཆིས་ཏེ། དེ་གཉིས་ན་ལྷའི་བུ་སུ་ཡང་མ་མཆིས་པ་མཐོང་ནས། བདག་ཅག་གཉིས་ཀྱིས་ཤེས་ལྡན་དག་ཅིའི་ཕྱིར་གཞལ་མེད་ཁང་འདི་གཉིས་ན་ལྷའི་བུ་སུ་ཡང་མི་འདུག་ཅེས་བགྱིས་ན། དེ་དག་གི་མཆིད་ནས་སུ་ཡང་མི་འདུག་གོ། །ཅིའི་ཕྱིར་ཞེས་ བགྱིས་ན་དེ་དག་གི་མཆིད་ནས། འཕགས་པ་ཀུན་དགའ་བོའི་སྲིང་མོའི་བུ་གཉིས་རབ་ཏུ་བྱུང་ནས་བརྩོན་འགྲུས་བརྩམས་ཤིང་སྤྱོད་པ་དེ་གཉིས་ཤི་ཞིང་དུས་ལ་བབ་ན་འདིར་སྐྱེ་བར་འགྱུར་བས་དེ་གཉིས་ཀྱི་དོན་དུ་བཞག་གོ་ཞེས་མཆིའོ། །དགེ་ཚུལ་གཉིས་དེ་ལྟ་ན་ཕན་ཡོན་འདི་ དག་དང་། གཞན་དག་ཀྱང་བརྩོན་འགྲུས་བརྩམས་པ་ལས་འབྱུང་བར་འགྱུར་བས་བརྩོན་འགྲུས་གྱིས་ཤིག། །།འདུལ་བ་གཞི། བམ་པོ་བརྒྱད་པ། དེ་གཉིས་བརྩོན་འགྲུས་རྩོམ་པས་བཀླག་པར་བྱ་བར་བརྩམས་ཏེ་ལུང་ནོད་པ་དང་། ཇི་ཙམ་ན་གླེང་གཞི་དང་། ཡང་ དག་པར་ལྡན་པའི་རྒྱུད་དུ་གཏོགས་པ་ལས། དེ་ནས་བཅོམ་ལྡན་འདས་ཀྱི་ཕྱག་གི་སེན་མོའི་རྩེ་མོས་རྡུལ་དག་བཞེས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཇི་སྙམ་དུ་སེམས། ངས་སེན་མོའི་རྩེ་མོས་རྡུལ་དག་བླངས་པ་གང་དག་ཡིན་པ་དང་། ས་ལ་གནས་པའི་

  173. 87b

    རྡུལ་གང་དག་ཡིན་པ་དེ་དག་གང་མང་སྙམ། བཙུན་པ་བཅོམ་ལྡན་འདས་ཀྱི་ཕྱག་གི་སེན་མོའི་རྩེ་མོས་རྡུལ་དག་བཞེས་པ་གང་དག་ལགས་པ་དེ་དག་ནི་ཉུང་བ་དང་། ཉུང་ངུ་དང་། ཉུང་ཤས་དང་། ཉུང་ཟད་ལགས་ཏེ། དེ་དག་དོགས་ལ་གནས་པའི་རྡུལ་དག་དང་བསྐྲུན་ན་ བརྒྱའི་ཆར་ཡང་ཉེ་བར་མི་མཆི། སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་ འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་ བ་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་

  174. 88a

    བ་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་ པས་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་ ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་ རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་ དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ ཀྱི་སེམས་ཅན་དག་ནི་དུད་འགྲོ་དག་གི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་ རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་གྱི།

  175. 88b

    སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་ཡི་དགས་རྣམས་ཀྱི་ ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་དུད་འགྲོ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ ཤི་འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་ དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་ པས་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་ སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་

  176. 89a

    དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་ པས་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ཡི་དགས་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ལྷ་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་ འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ལྷ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ལྷ་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་ རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ལྷ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ལྷ་རྣམས་ཀྱི་ནང་ནས་ཤི་ འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་ལྷ་རྣམས་ཀྱི་ནང་ནས་ཤི་འཕོས་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ ནི་མི་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་མི་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་པའི་རྡུལ་དག་ཇི་ སྙེད་པ་དེ་སྙེད་ཀྱི་སེམས་ཅན་དག་ནི་མི་རྣམས་ཀྱི་ནང་ནས་ཤི་འཕོས་ཏེ་དུད་འགྲོ་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་མི་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་རོ། །ས་ལ་གནས་

  177. 89b

    པས་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་མི་རྣམས་ཀྱི་ནང་ནས་ཤི་འཕོས་ཏེ་ཡི་དགས་རྣམས་ཀྱི་ནང་དུ་སྐྱེ་བར་འགྱུར་གྱི། སེན་མོའི་རྩེ་མོ་ལ་གནས་པའི་རྡུལ་དག་ཇི་སྙེད་པ་དེ་སྙེད་ཀྱི་སེམས་ཅན་དག་ནི་མི་རྣམས་ཀྱི་ནང་ནས་ཤི་འཕོས་ཏེ་མི་རྣམས་ཀྱི་ནང་དུ་སྐྱེ་བར་འགྱུར་ རོ། །ཞེས་གསུངས་པ་འཁོར་ལོ་བཞིན་དུ་སྦྱར་བ་བླགས་པ་དང་། དེ་གཉིས་ཀྱིས་སྨྲས་པ། འཕགས་པ་བདག་ཅག་གིས་ཀྱང་ལྷ་དང་མི་རྣམས་ཀྱི་ནང་ནས་ཤི་འཕོས་ཏེ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་སྐྱེ་བར་བགྱིའམ། དེས་སྨྲས་པ། བཞིན་བཟངས་གཉིས་འགྲོ་བ་ལྔ་པའི་འཁོར་བར་ཇི་སྲིད་དུ་ཉོན་མོངས་པ་རྣམས་རྒྱུན་ཆད་པར་མ་གྱུར་པ་དེ་སྲིད་དུ་ཟོ་ཆུན་རྒྱུད་མོའི་ཚུལ་གྱིས་ཡོངས་སུ་འཁོར་བར་བྱ་དགོས་སོ། །དེ་གཉིས་ཡིད་བྱུང་ནས་ཚིགས་སུ་བཅད་པ་སྨྲས་པ། གང་ཕྱིར་མི་གནས་ ལྷ་རྣམས་མི་བཟང་སྟེ། །འཚོ་བ་ཐུང་བའི་མི་རྣམས་མི་བཟང་ངོ་། །གང་ན་ཞི་མེད་སྲིད་པ་མི་བཟང་སྟེ། །མྱ་ངན་འདས་པ་མཆོག་ཅེས་བདེ་གཤེགས་གསུང་། །འཕགས་པ་ཅི་ནས་ཀྱང་བདག་ཅག་འཁོར་བར་འཁོར་བ་ན་སླན་ཆད་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་ མི་འགྱུར་བ་དེ་ལྟར་བདག་ཅག་ལ་ཆོས་བསྟན་དུ་གསོལ། ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་གཉིས་ཀྱི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་ཁོང་དུ་ཆུད་ནས་གང་ཐོས་ནས་དེ་གཉིས་ཀྱིས་ཉོན་མོངས་པ་ཐམས་ཅད་སྤངས་པས་དགྲ་ བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མཉམ་པ། རིག་པས་སྒོ་ངའི་སྦུབས་དྲལ་བར་ གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་

  178. 90a

    བར་བྱ་བར་གྱུར་པ་དེ་ལྟ་བུའི་ཆོས་བསྟན་པ་བྱས་སོ། །དེ་གཉིས་རྫུ་འཕྲུལ་གྱིས་སྟེང་གི་ནམ་མཁའ་ལ་མེ་ཏོག་དག་ཐུ་ཞིང་འདོང་བ་དགེ་སློང་རྣམས་ཀྱིས་མཐོང་ནས་དེ་དག་གིས་སྨྲས་པ། ཚེ་དང་ལྡན་པ་དག་འདི་གཉིས་གང་དག་ཡིན། ཆེ་གེ་མོ་དང་ཆེ་གེ་མོ་ཡིན་ ནོ། །དེ་དག་གིས་སྨྲས་པ། བདག་ཅག་ལྷུང་བཟེད་ནག་པོར་ཟོས་ནས་སོ་དག་ལྷུང་ཞིང་མགོ་སྐྱ་བོར་གྱུར་ཀྱང་བདག་ཅག་གིས་སེམས་རྩེ་གཅིག་པ་ཡང་མ་ཐོབ་ན། ཚེ་དང་ལྡན་པ་འདི་གཉིས་དང་པོ་ལོ་བདུན་ཁོ་ན་ལོན་ཏེ་རབ་ཏུ་བྱུང་ན་ཉོན་མོངས་པ་ཐམས་ཅད་སྤངས་པས་དགྲ་བཅོམ་ པ་ཉིད་མངོན་དུ་བྱས་པས་བཅོམ་ལྡན་འདས་ཀྱིས་ཀུན་དགའ་བོ་བརྩོན་འགྲུས་ཀྱིས་བྱང་ཆུབ་འཐོབ་བོ་ཞེས་བཀའ་སྩལ་པ་དེ་ནི་ལེགས་པར་གསུངས་པ་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ དགེ་ཚུལ་འདི་གཉིས་ཀྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ལོ་བདུན་ཁོ་ན་ལགས་ན་རབ་ཏུ་བྱུང་སྟེ། བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་པ་གང་ལགས་པ་དེ་འདི་གཉིས་ཁོ་ན་ལ་བརྟེན་ནས་བག་ཡངས་སུ་མཛད་ ཅིང་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་གཉིས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་ བ་དག་བྱས་ཤིང་བསགས་པས་འདི་གཉིས་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །

  179. 90b

    རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་ གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་གི་འཁོར་ཉི་ཁྲི་དང་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་ བཞུགས་སོ། །བཱ་རཱ་ཎ་སཱི་ན་ཁྱིམ་བདག་ཕན་ཚུན་བཤེས་པ་གཉིས་ཤིག་གཞོན་ནུའི་གནས་སྐབས་སུ་རབ་ཏུ་འབྱུང་བར་འདོད་ན་དེ་གཉིས་ཀྱིས་ཉེ་དུ་དག་ལས་རབ་ཏུ་འབྱུང་བ་མ་ཐོབ་ནས། གང་གི་ཚེ་ལང་ཚོ་ཡོལ་བར་གྱུར་པ་དེའི་ཚེ་ན་དེ་གཉིས་ཀྱིས་ཉེ་དུ་དག་ལ་བལྟས་ཏེ་ཡང་དག་ པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ངོ་། །འདི་ནི་ཆོས་ཉིད་དེ་རྟག་ཏུ་གཞོན་རིམ་གྱིས་ལས་བྱ་བ་ཡིན་པས་དགེ་སློང་རྣམས་ཀྱིས་རྒན་ཞུགས་འདི་གཉིས་དེང་ཤིག །རྒན་ཞུགས་འདི་གཉིས་ཁྱེད་ཅིག་ཅེས་བསྒོའོ། །དེ་ན་གཅིག་ནི་སྤྲོ་རིང་བའི་རང་ བཞིན་ཅན་ཡིན། ཅིག་ཤོས་ནི་སྤྲོ་ཐུང་བའི་རང་བཞིན་ཅན་ཡིན་པས་དེ་ཁྲོ་བར་བྱེད་པ་དང་ཅིག་ཤོས་ཀྱིས་སྨྲས་པ། རྒན་ཞུགས་གཞོན་པའི་གནས་སྐབས་སུ་རབ་ཏུ་མ་བྱུང་ན་ད་ཅིའི་ཕྱིར་ཁྲོ། དེ་ན་འདི་གཉིས་ཀྱི་ཚེ་ཇི་སྲིད་བར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས། བདག་ཅག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་བར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་ མ་ཐོབ་སྟེ། བདག་ཅག་གིས་ཚེ་ཇི་སྲིད་བར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་

  180. 91a

    ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་ རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་ཅག་ལོ་བདུན་ཁོ་ན་ལོན་ནས་རབ་ཏུ་བྱུང་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་འདུལ་ བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་མཛད་པ་གང་ཡིན་པ་དེ་བདག་ཅག་གཉིས་ཁོ་ན་ལ་བརྟེན་ནས་བག་ཡངས་སུ་མཛད་ཅིང་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་གྱུར་ཅིག་ཅེས་གདབ་པར་བརྩམས་སོ། །དགེ་སློང་དག་དེ་ལ་དེའི་ཚེ་ དེའི་དུས་ན་ཁྱིམ་བདག་གཉིས་གང་དག་ཡིན་པ་དེ་དག་ནི་དགེ་ཚུལ་འདི་གཉིས་ཡིན་ཏེ། དེ་གཉིས་ཀྱིས་དེར་སྨོན་ལམ་བཏབ་པ་གང་ཡིན་པ་དེས་ད་ལྟར་ལོ་བདུན་ཁོ་ན་ལོན་ནས་རབ་ཏུ་བྱུང་སྟེ། ངས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅས་པ་གང་ཡིན་པ་འདི་ གཉིས་ཁོ་ན་ལ་བརྟེན་ནས་བག་ཡངས་སུ་བྱས་ཤིང་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་སོ། །སངས་རྒྱས་བཅོམ་ལྡན་འདས་ཡུལ་ཀ་ཤི་དག་ཏུ་ལྗོངས་རྒྱུ་ཞིང་གཤེགས་པ་ན་ཕྱོགས་གཅིག་ཅིག་ཏུ་བྱོན་པ་དང་འཛུམ་པ་མཛད་དོ། །ཆོས་ ཉིད་ཀྱིས་ན་གང་གི་ཚེ། སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས་ཁ་ཅིག་ནི་འོག་ལོགས་སུ་འདོང་། ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་

  181. 91b

    བུར་རྡོལ་བ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཆུ་ཟེར་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང་དག་ཡིན་པ་དེ་དག་ཏུ་བསིལ་བར་གྱུར་ཏེ་འབབ་པར་བྱེད་ ལ། སེམས་ཅན་དམྱལ་བ་གྲང་བ་གང་དག་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་ གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། གཞན་དུ་སྐྱེས་པ་ཡང་མ་ཡིན་ ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་ དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་འདོང་བ་དེ་དག་ནི་རྒྱལ་པོ་ཆེན་པོ་བཞི་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་ དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ ཆེ་དང་། མི་ཆེ་དང་། མི་གདུང་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། བརྩམ་

  182. 92a

    པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་བཅོམ་ལྡན་འདས་འདས་པའི་ ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་ འགྲོར་སྐྱེ་བར་ལུང་སྟོན་པར་བཞེད་ན་ནི་ལོང་བུར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་ བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་ བ་བྱས་ཏེ། བཅོམ་ལྡན་འདས་ཀྱི་ཞབས་ཀྱི་མཐིལ་དུ་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་ཞུས་པ། བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས་རྐྱེན་མ་མཆིས་པར་

  183. 92b

    འཛུམ་པ་མི་མཛད་ན། བཙུན་པ་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། ཚིགས་སུ་བཅད་པ་ཡང་གསོལ་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒྲོས་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་ བགྱིས་པ། །ཉི་གདུགས་བདལ་བར་གྱུར་པ་ཇི་བཞིན་ནོ། །རྒོད་བྲལ་ཞུམ་དང་རྒྱགས་པ་རབ་སྤངས་ལ། །སངས་རྒྱས་འགྲོ་བ་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་བ་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ རང་བློ་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་དགེ་བ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་ རྣམས་གློ་བུར་འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཀུན་དགའ་བོ་ཕྱོགས་འདི་ཉིད་དུ་གཡོན་ཅན་རབ་ཏུ་མང་པོ་དག་གིས་དགེ་སློང་མ་རབ་ཏུ་མང་པོ་དག་ལུས་བསྐྱོད་པས་སུན་ཕྱུང་སྟེ། དེ་དག་འདི་ནས་ཤི་འཕོས་ནས་སེམས་ཅན་དམྱལ་བ་རྣམས་ ཀྱི་ནང་དུ་སྐྱེ་བར་འགྱུར་རོ། །དེ་ནས་དགེ་སློང་ཞིག་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་གཡོན་ཅན་རབ་ཏུ་མང་པོ་དག་གིས་དགེ་སློང་མ་རབ་ཏུ་མང་པོ་དག་ལུས་བསྐྱོད་པས་སུན་ཕྱུང་བ་ གང་དག་ལགས་པ་དེ་དག་གི་ནང་ནས་གཅིག་བདག་ལགས་སོ། །མི་གཏི་མུག་ཅན་ཁྱོད་ཀྱིས་ཀྱང་དགེ་སློང་མ་རབ་ཏུ་མང་པོ་དག་ལུས་བསྐྱོད་པས་སུན་ཕྱུང་ངམ། བཙུན་པ་བདག་གིས་ཀྱང་དགེ་སློང་མ་རབ་ཏུ་མང་པོ་དག་ལུས་བསྐྱོད་པས་སུན་ཕྱུང་ངོ་། །དེ་ནས་བཅོམ་ལྡན་འདས་

  184. 93a

    ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་དགེ་སློང་མ་སུན་ཕྱུང་བ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་དགེ་སློང་དག་ཁྱེད་ཀྱིས་གང་ཟག་དགེ་སློང་མ་སུན་ཕྱུང་བ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་ གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ་དགེ་སློང་མ་སུན་ཕྱུང་བ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་རྒྱལ་བྱེད་ཀྱི་ཚལ་དུ་འོངས་སོ། །དགེ་སློང་དག་འདོད་ཆགས་དང་བྲལ་བ་མེད་པ་ན་དགེ་འདུན་ལྷག་མའི་ལྟུང་བ་འབྱིན་པར་བྱེད་དེ། ཁ་ཅིག་གཞོན་ནུའི་གནས་སྐབས་སུ་ལྟུང་བ་བྱུང་ནས་རྒན་པོར་ གྱུར། ཁ་ཅིག་ནི་རྒན་པོའི་གནས་སྐབས་ན་ལྟུང་བ་འབྱིན་པར་བྱེད་དོ། །དེ་དག་གིས་གང་གི་ཚེ་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལས་ཐོས་པ་དེའི་ཚེ་ན་ཆོས་བཞིན་དུ་སྒྲུབ་པར་བྱེད་དེ། དེ་དག་ཡོངས་སུ་སྤོ་བ་དང་མགུ་བར་བྱ་བར་ སྤྱོད་པ་ན་དགེ་འདུན་ལ་རིམ་གྲོ་བྱེད་ཅིང་དེ་ན་ཁ་ཅིག་ནི་བཏུང་བ་འདྲིམ་པར་བྱེད། ཁ་ཅིག་ནི་བསིལ་ཡབ་ཐོགས་ཏེ་གཡོབ་པར་བྱེད་དོ། །ཇི་ཙམ་ན་ཁྱིམ་བདག་དེས་དེ་ན་གནས་མལ་བཟང་པོ་དག་བཤམས་ཤིང་ཁ་ཟས་བསོད་པའི་སྤྱི་བུངས་བཤམས་པ་མཐོང་ནས་དེས་བསམས་པ། འདི་དག་གི་ཆོས་ནི་བཟང་ན་འདི་ལྟར་འདི་དག་ལ་སྐྱོན་ཡང་ཡོད་དེ། འདི་དག་ལ་རྗེས་དང་གུས་པ་མེད་དེ། རྒན་པ་རྒན་པ་དག་ལས་བྱེད་དུ་འཇུག་གོ་སྙམ་ནས་དེ་སྐད་སྨྲས་པ་དང་། དྲུག་སྡེ་དག་གིས་ཐོས་ནས་དེ་དག་གིས་སྨྲས་པ། ཁྱིམ་བདག་ཅི་ཟེར། འཕགས་པ་ཁྱེད་ ཅག་གི་ཆོས་ནི་བཟང་ན་འདི་ལྟར་ཁྱེད་ཅག་ལ་སྐྱོན་ཡང་མཆིས་སོ། །ཁྱིམ་བདག་ཁོ་བོ་ཅག་ལ་སྐྱོན་ཅི་ཡོད། དེས་སྨྲས་པ། འཕགས་པ་དག་ཁྱེད་ཅག་ལ་རྗེས་དང་གུས་པ་མ་མཆིས་ཏེ། རྒན་པ་རྒན་པ་དག་ལས་བགྱིད་དུ་སྩོལ་ཏོ། །རྒན་པ་དག་ལ་ཡང་ལས་བྱེད་དུ་

  185. 93b

    གཞུག་དགོས་པ་ཡོད་དོ། །འཕགས་པ་དག་ཁྱེད་ཀྱི་ནང་དུ་ང་རབ་ཏུ་ཕྱུང་ན་ཡང་ལས་བགྱིད་དུ་སྩོལ་ཏམ། དེ་དག་གིས་སྨྲས་པ། ཁྱོད་པས་གང་ཆེས་ཁྱད་པར་དུ་འཕགས་པ་རབ་ཏུ་ཕྱུང་ན་ཡང་དེ་ཡང་ངེད་ཀྱིས་ལས་བྱེད་དུ་གཞུག་ན་ཁྱོད་ལྟ་ཅི་སྨོས། དེས་བསམས་པ། གལ་ ཏེ་བདག་འདི་དག་གི་ནང་དུ་རབ་ཏུ་བྱུང་ན་བདག་ཀྱང་འདི་དག་གིས་ལས་བྱེད་དུ་བཅུག་པར་འགྱུར་གྱིས། ཐབས་ཀྱི་རྣམ་པ་ཞིག་བྱའོ་སྙམ་མོ། །ཁྱིམ་བདག་དེ་མཁས་པའི་རང་བཞིན་ཅན་ཡིན་པས་དེས་དགེ་སློང་དག་གི་གན་ནས་ཀུན་དུ་སྤྱོད་པའི་ཆོས་དག་བསླབས་སོ། །བསླབས་ ནས་མཐའ་འཁོབ་ཅིག་ཏུ་སོང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་དག་བགོས་ཏེ་འདུག་པ་དང་། ཇི་ཙམ་ན་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱོགས་དེ་ནས་འོང་ཞིང་འགྲོ་བར་བྱེད་པ་དེ་དག་གིས་དེ་མཐོང་ནས་སྨྲས་པ། གནས་བརྟན་མཉན་ཡོད་ན་ཆོས་ཀྱི་རྗེ་མངོན་ སུམ་དུ་བཞུགས་ཤིང་དེ་ན་དུས་དང་དུས་སུ་ལྷའི་གཟུགས་དག་ཀྱང་སྣང་། སྣང་བ་རྒྱ་ཆེན་པོ་དག་ཀྱང་འབྱུང་། ལྷའི་སྒྲ་དག་ཀྱང་གྲག །ཀུན་ཤེས་པ་བརྡ་སྤྲོད་པ་དག་ཀྱང་གྲག །ལོངས་སྤྱོད་གཉིས་པོ་ཟང་ཟིང་གི་ལོངས་སྤྱོད་དང་། ཆོས་ཀྱི་ལོངས་སྤྱོད་ཀྱང་ཡོད་ན་ཅིའི་ ཕྱིར་མཉན་ཡོད་དུ་མི་འགྲོ། དེས་སྨྲས་པ། ཚེ་དང་ལྡན་པ་དག་འདི་ཉིད་དུ་འདུག་པར་བྱའོ། །དེ་དག་གིས་དེ་ལ་ཡང་དང་ཡང་དུ་སྨྲས་པ། གནས་བརྟན་མཉན་ཡོད་ན་ཆོས་ཀྱི་རྗེ་མངོན་སུམ་དུ་བཞུགས་ཤིང་དེ་ན་དུས་དང་དུས་སུ་ལྷའི་གཟུགས་དག་ཀྱང་སྣང་། སྣང་བ་ཆེན་པོ་ དག་ཀྱང་འབྱུང་། ལྷའི་སྒྲ་དག་ཀྱང་གྲག །ཀུན་ཤེས་པ་བརྡ་སྤྲོད་པ་དག་ཀྱང་གྲག །ལོངས་སྤྱོད་གཉིས་པོ་ཟང་ཟིང་གི་ལོངས་སྤྱོད་དང་། ཆོས་ཀྱི་ལོངས་སྤྱོད་དག་ཀྱང་ཡོད་ན་ཅིའི་ཕྱིར་མཉན་ཡོད་དུ་མི་འགྲོ། དེ་ཚངས་པ་མཚུངས་པར་སྤྱོད་པ་དག་གིས་དུས་བསྐྱེད་པ་ན་མཉན་ ཡོད་དུ་སོང་ངོ་། །ཇི་ཙམ་ན་དེས་དེ་ན་གནས་མལ་བཟང་པོ་བཤམས་ཤིང་ཁ་ཟས་བསོད་པའི་སྤྱི་བུངས་བཤམས་པ་མཐོང་ནས་དེས་བསམས་པ། གལ་ཏེ་བདག་གྲལ་གྱི་དང་པོར་འདུག་ན་ནི་ཡོན་བཤད་པ་བྱ་དགོས་པར་འགྱུར་རོ་སྙམ་ནས་དེས་སྟན་གཅིག་བོར་ནས་སྟན་གཉིས་པ་ལ་

  186. 94a

    འདུག་གོ། །ཚེ་དང་ལྡན་པ་ཀུན་ཤེས་ཀཽཎྜི་ནྱ་འོངས་ནས་དེས་བསམས་པ། བཅོམ་ལྡན་འདས་ཀྱིས་བདག་སྣམ་སྦྱར་གྱི་རྒྱལ་མཚན་འཆང་བ་རྣམས་ཀྱི་མཆོག་ཏུ་བསྟན་ན་འདི་སུ་ཞིག་ཡིན་སྙམ་མོ། །ཇི་ཙམ་ན་བསམས་པ་དང་རྐུ་ཐབས་སུ་གནས་པ་ཞིག་ཡིན་ པར་མཐོང་ནས་དེས་དེ་སེ་གོལ་གྱི་སྒྲས་བསྐྲད་དོ། །ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མེད་དང་། བ་ལང་བདག་དང་། ལག་བཟངས་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ ལྡན་པ་མཽད་གལ་གྱི་བུ་ཆེན་པོ་དང་། དགེ་སློང་གནས་བརྟན་གནས་བརྟན་ཐམས་ཅད་ཀྱིས་ཀྱང་སེ་གོལ་གྱི་སྒྲས་བསྐྲད་དོ། །ཇི་ཙམ་ན་དྲུག་སྡེ་དག་གི་གན་དུ་སོང་བ་དང་དེ་དག་གིས་དེ་ལ་སྨྲས་པ། གནས་བརྟན་ཁྱོད་ལོ་དུ་ལོན། དེས་ན་ཚོད་ཀྱི་དབང་དུ་བྱས་ཏེ་ཁོ་བོ་ལོ་དྲུག་བཅུ་ལོན་ ནོ་ཞེས་སྨྲས་པ་དང་། དེ་དག་གིས་སྨྲས་པ། བཅོམ་ལྡན་འདས་ཉིད་ཀྱིས་ཀྱང་ལོ་དྲུག་བཅུ་མ་བཞེས་ན་འདིས་ག་ལ་ལོན། དེ་དག་གིས་དེ་ལ་སྨྲས་པ། རྒན་ཞུགས་ཁྱོད་ཀྱི་མཁན་པོ་གང་ཡིན། དེས་སྨྲས་པ། དགེ་སྦྱོང་གཽ་ཏ་མའི་མཁན་པོ་གང་ཡིན། དེ་དག་གིས་ སྨྲས་པ། ཚེ་དང་ལྡན་པ་དག་རྒན་ཞུགས་འདི་ནི་རང་གིས་རྟགས་བླངས་པ་ཡིན་ནོ་ཞེས་དེ་དག་གིས་དེ་ལག་པ་དང་རྐང་པ་དག་ནས་བཟུང་སྟེ་རྒན་པའི་མཐར་ཁྲིད་ནས་སྨྲས་པ། དགེ་འདུན་བཙུན་པ་རྣམས་གསན་དུ་གསོལ། འཇིག་རྟེན་ན་རང་བྱུང་གཅིག་ནི་བཅོམ་ལྡན་འདས་ ལགས་ན་གཉིས་པ་ནི་རྒན་ཞུགས་འདི་ལགས་སོ། །འདི་ནི་གསོལ་བའོ་ཞེས་སྨྲས་ནས་རྒན་པའི་མཐའ་ནས་བསྐྲད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་རྐུ་ཐབས་སུ་གནས་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ ཅན་ཡིན་པས། དགེ་སློང་དག་ཁྱེད་ཀྱིས་གང་ཟག་རྐུ་ཐབས་སུ་གནས་པ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ་རྐུ་ཐབས་སུ་གནས་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་

  187. 94b

    བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་གང་ཟག་རྐུ་ཐབས་སུ་གནས་པ་བསྙིལ་བར་བྱའོ་ཞེས་བཀའ་སྩལ་ན། བཙུན་པ་ཇི་ཙམ་གྱིས་ན་གང་ཟག་རྐུ་ཐབས་སུ་གནས་ པ་ལགས། ཉེ་བ་འཁོར་གང་ཚུན་ཆད་ནས་དགེ་སློང་རང་བཞིན་དུ་གནས་པ་དག་དང་ལྷན་ཅིག་གསོ་སྦྱོང་གི་ལས་དག་ལན་གཉིས་སམ་གསུམ་དུ་ཉམས་སུ་མྱོང་བར་གྱུར་ན་དེ་ཙམ་གྱིས་ན་གང་ཟག་རྐུ་ཐབས་སུ་གནས་པ་ཡིན་ནོ།། །།སངས་རྒྱས་བཅོམ་ལྡན་འདས་ མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་མ་ནིང་སྐྱེས་པ་འདྲ་བ་བུད་མེད་ཀྱང་མ་ཡིན་སྐྱེས་པ་ཡང་མ་ཡིན་པ་ཞིག་བྱུང་ནས་བསྲིངས་ཤིང་བསྐྱེད་དེ་ཆེ་བར་གྱུར་ཏོ། །དེ་ཁྱེའུ་དག་ དང་ལྷན་ཅིག་རྩེ་བར་བྱེད་པ་ན་དེ་དེ་དག་ལ་མཚན་མ་སྟོན་པར་བྱེད་ནས་དེ་དག་གིས་དེ་ལ་སྨྲས་པ། ཁྱོད་ཅི་ཡིན། དེས་སྨྲས་པ། བདག་མ་ནིང་ངོ་། །དེ་དག་གིས་སྨྲས་པ། ཁྱོད་ནི་བྲམ་ཟེ་ཡིན་པས་ཁྱོད་ཀྱི་ཁྱིམ་དུ་མི་སྙན་པ་གྲགས་པར་གྱུར་ན་མི་རུང་གིས་དེ་ལྟ་མ་བྱེད་ཅིག །དེ་དག་ གིས་དེའི་ཕ་མ་ལ་སྨྲས་པ། ཁྱོད་ཀྱིས་མ་ནིང་འདི་འདི་ལྟ་འདི་ལྟ་བྱེད་ཀྱིས་ཟློག་ཤིག །དེ་དག་གིས་དེ་ལ་སྨྲས་པ། མ་ནིང་བདག་ཅག་ནི་བྲམ་ཟེ་ཡིན་པས་བདག་ཅག་གི་ཁྱིམ་དུ་མི་སྙན་པར་གྲགས་པར་གྱུར་ན་མི་རུང་གིས་དེ་ལྟ་མ་བྱེད་ཅིག །དེ་དེ་དག་གིས་བཟློག་ཀྱང་མི་འདུག་གོ། ། དེ་དུས་གཞན་ཞིག་ན་རྒྱལ་བྱེད་ཀྱི་ཚལ་དུ་སོང་བ་དང་། ཇི་ཙམ་ན་དེས་དགེ་སློང་གཞོན་ནུ་གཞོན་ནུ་དག་མཐོང་ནས་དེས་བསམས་པ། བདག་འདི་དག་གི་ནང་དུ་རབ་ཏུ་བྱུང་ན་འདི་དག་བདག་ལ་སྐྱེས་པའི་བྱ་བ་བྱེད་པར་འགྱུར་ཞིང་བདག་ཀྱང་འདི་དག་ལ་བུད་མེད་ཀྱི་བྱ་བ་བྱེད་པར་འགྱུར་རོ་

  188. 95a

    སྙམ་ནས། དེ་དགེ་སློང་གི་གན་དུ་སོང་སྟེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་ལ་སྨྲས་པ། ཁྱོད་ཕ་མས་གནང་ངམ། དེས་སྨྲས་པ། མ་གནང་ངོ་། །སོང་ལ་ཕ་མ་ལ་གསོལ་ཅིག །དེ་ཕ་མའི་གན་དུ་སོང་སྟེ་སྨྲས་པ། ཡབ་ཡུམ་བདག་རབ་ཏུ་འབྱུང་བར་འཚལ་ལོ། །དེ་གཉིས་དེས་ཡོངས་སུ་གདུངས་པས་བསམས་པ། བདག་ཅག་འདི་དང་བྲལ་བར་བྱས་རབ་ཏུ་འབྱུང་ལ་རག་གོ་སྙམ་ནས། དེ་གཉིས་ཀྱིས་དེ་ལ་སྨྲས་པ། མ་ནིང་གནང་ངོ་། །དེ་དགེ་སློང་གི་ནང་དུ་སོང་སྟེ་སྨྲས་པ། འཕགས་ པ་བདག་ཕ་མས་གནང་གིས་རབ་ཏུ་དབྱུང་དུ་གསོལ། དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་པ་དང་། དགེ་སློང་རྣམས་ཀྱི་མདུན་དུ་མཚན་མ་སྟོན་པར་བྱེད་ནས། དེ་དག་གིས་དེ་ལ་སྨྲས་པ། ཁྱོད་མ་ནིང་ཡིན་ནམ་ཅི། དེས་སྨྲས་པ། ཡིན་ནོ་ཞེས་ཟེར་བའི་ སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་མ་ནིང་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས། དགེ་སློང་དག་ཁྱེད་ཀྱིས་གང་ཟག་མ་ནིང་ཆོས་འདུལ་ བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ་མ་ནིང་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དག་མ་ནིང་ནི་ལྔ་པོ་འདི་དག་ཡིན་ཏེ། ལྔ་གང་ཞེ་ན། སྐྱེས་ནས་མ་ནིང་དང་། ཟླ་བ་ཕྱེད་པའི་མ་ནིང་དང་། འཁྱུད་ནས་ལྡང་བའི་མ་ནིང་དང་། ཕྲག་དོག་ཅན་གྱི་མ་ནིང་དང་། ཉམས་པའི་མ་ནིང་ངོ་། །དེ་ལ་སྐྱེས་ནས་མ་ནིང་གང་ཞེ་ན། གང་སྐྱེས་ནས་བུད་མེད་ཀྱང་མ་ཡིན་སྐྱེས་པ་ཡང་མ་ཡིན་པའོ། །ཟླ་བ་ཕྱེད་པའི་མ་ནིང་གང་ ཞེ་ན། གང་ཟླ་བ་ཕྱེད་ནི་བུད་མེད་ཟླ་བ་ཕྱེད་ནི་སྐྱེས་པར་འགྱུར་བའོ། །འཁྱུད་ནས་ལྡང་བའི་མ་ནིང་གང་ཞེ་ན། གང་ལ་གཞན་དག་གིས་འཁྱུད་ན་དབང་པོ་འབྱུང་བར་འགྱུར་བའོ། །ཕྲག་དོག་ཅན་གྱི་མ་ནིང་གང་ཞེ་ན། གང་ལ་གཞན་དག་རྩོལ་བ་མཐོང་ན་དབང་པོ་འབྱུང་

  189. 95b

    བར་འགྱུར་བའོ། །ཉམས་པའི་མ་ནིང་གང་ཞེ་ན། གང་གི་དབང་པོ་ནད་ཀྱིས་ཉམས་པའམ་མཚོན་གྱིས་བཅད་པའོ། །དེ་ལ་མ་ནིང་སྔ་མ་བཞི་པོ་སྐྱེས་ནས་མ་ནིང་དང་། ཟླ་བ་ཕྱེད་པའི་མ་ནིང་དང་། འཁྱུད་ནས་ལྡང་བའི་མ་ནིང་དང་། ཕྲག་དོག་ཅན་གྱི་མ་ནིང་གང་དག་ཡིན་པ་ དེ་དག་ནི་རབ་ཏུ་མ་བྱུང་ན་ནི་རབ་ཏུ་དབྱུང་བར་མི་བྱ་ལ། རབ་ཏུ་བྱུང་ན་ནི་བསྙིལ་བར་བྱའོ། །དེ་ལ་ཉམས་པའི་མ་ནིང་གང་ཡིན་པ་དེ་ནི་རབ་ཏུ་མ་བྱུང་ན་ནི་རབ་ཏུ་དབྱུང་བར་མི་བྱ་ལ། རབ་ཏུ་བྱུང་ན་ནི་གལ་ཏེ་འགྱུར་བ་མི་སྟེན་ན་བཏང་སྙོམས་སུ་བྱའོ། །གལ་ཏེ་འགྱུར་བ་བསྟེན་ན་ བསྙིལ་བར་བྱའོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཀླུ་རྣམས་ཀྱི་ཀུན་དུ་སྤྱོད་པ་ནི་ལུས་ལ་ཉིན་མོ་བྱེ་མ་མེའི་མདོག་ལྟ་བུ་ལན་གསུམ་འབབ་ཅིང་དེས་དེ་དག་རུས་པའི་ཀེང་ རུས་ཙམ་ཞིག་ལུས་པར་བྱེད་དོ། །ཀླུ་གཞོན་ནུ་སྐྱེས་ནས་རིང་པོ་མ་ལོན་པ་ཞིག་གི་ལུས་ལ་ཉིན་མོ་བྱེ་མ་མེའི་མདོག་ལྟ་བུ་ལན་གསུམ་འབབ་ཅིང་དེས་དེ་རུས་པའི་ཀེང་རུས་ཙམ་ཞིག་ལུས་པར་བྱས་པ་དང་དེས་མ་ལ་སྨྲས་པ། མ་བདག་གིས་ཡུན་ཇི་སྲིད་ཅིག་ཏུ་སྡུག་བསྔལ་འདི་ ལྟ་བུ་མནག་པར་བགྱི་འཚལ། བུ་ཇི་སྲིད་དུ་རིས་མཐུན་པ་ཡོད་ཀྱི་བར་དུའོ། །དེ་ན་ཀླུ་རྫུ་འཕྲུལ་ཆེ་བ་དང་མཐུ་ཆེ་བ་གཞན་གང་དག་ཡིན་པ་དེ་དག་གི་ལུས་ལ་བྱེ་མ་མེའི་མདོག་ལྟ་བུ་མི་འབབ་ནས་དེས་སྨྲས་པ། མ་འདི་དག་ལ་ཅིའི་ཕྱིར་མི་འབབ། མས་སྨྲས་པ། འདི་དག་ ནི་རྫུ་འཕྲུལ་ཆེ་བ། མཐུ་ཆེ་བ། བསྐལ་པར་གནས་པ། ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་པས་དེའི་ཕྱིར་འདི་དག་ལ་མི་འབབ་བོ། །དེ་ན་ཀླུ་ཕྲ་མོ་གཞན་གང་དག་ཡིན་པ་དེ་དག་གི་ལུས་ལ་བྱེ་མ་མེའི་མདོག་ལྟ་བུ་མི་འབབ་ ནས་དེས་སྨྲས་པ། མ་འདི་དག་ལ་ནི་རིགས་ན་འདི་དག་ལ་ཅིའི་ཕྱིར་མི་འབབ། མས་སྨྲས་པ། འདི་དག་གིས་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་བ་དང་བསླབ་པའི་གཞི་དག་བླངས་པས་དེའི་ཕྱིར་འདི་དག་ལ་མི་འབབ་བོ། །དེས་སྨྲས་པ། གལ་ཏེ་དེ་ལྟ་ན་

  190. 96a

    བདག་གིས་ཀྱང་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་བ་དང་བསླབ་པའི་གཞི་དག་བླང་ངོ་། །མས་སྨྲས་པ། བུ་ཚེ་གཅིག་གི་སྡུག་བསྔལ་ནི་བླའི་ཚེ་རབས་མང་པོའི་ནི་མ་ཡིན་ཏེ། གལ་ཏེ་ཁྱོད་ཀྱིས་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་ བ་དང་བསླབ་པའི་གཞི་དག་བླངས་ནས་ཡང་དག་པར་མ་བསྲུངས་ན་ཡུན་རིང་པོར་སེམས་ཅན་དམྱལ་བར་སྡུག་བསྔལ་མནག་པར་བྱ་དགོས་སོ། །དེས་བསམས་པ། སྡུག་བསྔལ་འདི་བས་ཆེས་སྡུག་བསྔལ་བར་འགྱུར་བ་ཅི་ཞིག་ཡོད་ཀྱིས། བཅོམ་ལྡན་འདས་ཀྱི་སྤྱན་ སྔར་སྐྱབས་སུ་འགྲོ་བ་དང་བསླབ་པའི་གཞི་དག་ལེན་དུ་འགྲོའོ་སྙམ་ནས། དེ་བྲམ་ཟེའི་ཆ་ལུགས་སུ་མངོན་པར་སྤྲུལ་ནས་རྒྱལ་བྱེད་ཀྱི་ཚལ་དུ་སོང་བ་དང་། ཇི་ཙམ་ན་དེས་དགེ་སློང་དག་བསམ་གཏན་དང་། ཀློག་པ་དང་། རྣལ་འབྱོར་དང་། ཡིད་ལ་བྱེད་པ་ལ་བརྩོན་ཞིང་གནས་ པ་མཐོང་ངོ་། །མཐོང་ནས་ཀྱང་དད་པ་སྐྱེས་ཏེ། དེས་བསམས་པ། ཇི་ཇེ་དང་པོར་སྐྱབས་སུ་འགྲོ་བ་དང་བསླབ་པའི་གཞི་དག་བླང་ངམ། འོན་ཏེ་རབ་ཏུ་འབྱུང་བར་བྱ་སྙམ་མོ། །དེས་ཡང་བསམས་པ། རབ་ཏུ་འབྱུང་བར་བྱའོ་སྙམ་ནས་དེ་དགེ་སློང་གི་གན་དུ་སོང་སྟེ་སྨྲས་ པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་སྨྲས་པ། ཁོ་བོ་ནི་གསར་བུ་ཡིན་པས་གནས་བརྟན་གཞན་འགའ་ཞིག་གི་དྲུང་དུ་སོང་ཤིག །དེས་སྨྲས་པ། འཕགས་པ་བདག་གིས་གཞན་ངོ་འཚལ་བ་མ་མཆིས་ཏེ། འདི་ལྟར་བདག་ཐོག་མར་ཁོ་ནར་ འཕགས་པའི་གན་དུ་མཆིས་པས་ཁྱོད་ཉིད་ཀྱིས་བདག་དགེ་སློང་འགའ་ཞིག་ལ་གཏད་པར་གསོལ། དགེ་སློང་དེའི་མཁན་པོ་དགོན་པ་པ་ཞིག་དགོན་པ་ན་འདུག་པས་དེས་དེ་ཁྲིད་དེ་དེའི་གན་དུ་སོང་ནས་སྨྲས་པ། མཁན་པོ་རིགས་ཀྱི་བུ་འདི་རབ་ཏུ་འབྱུང་བར་འཚལ་གྱིས་རབ་ཏུ་ དབྱུང་དུ་གསོལ། དེས་སྨྲས་པ། བཞིན་བཟངས་བཅོམ་ལྡན་འདས་ཀྱིས་དགེ་སློང་དག་གཤན་པ་བྱེད་དུ་བཅུག་པ་ནི་བླའི་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ནས་ཡལ་བར་བོར་བ་ནི་མི་རུང་ངོ་ཞེས་བཀའ་སྩལ་པས། འདི་ཡང་སེམས་ཅན་དམྱལ་བར་འགྲོ་བར་འགྱུར་

  191. 96b

    ལ། ཁོ་བོ་ཡང་ལྟུང་བ་དང་བཅས་པར་འགྱུར་བས་ཁོ་བོ་འདི་རབ་ཏུ་མི་འབྱིན་ཏོ། །དེས་སྨྲས་པ། མཁན་པོས་རབ་ཏུ་དབྱུང་བ་འབའ་ཞིག་མཛོད་ཅིག་དང་། བདག་གིས་འདི་བསླབ་པར་བགྱི་ཞིང་ཀློག་ཏུ་སྩལ་བར་བགྱིའོ། །དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ ནས་སྨྲས་པ། བཞིན་བཟངས་འདི་ཉིད་ཁྱོད་ཀྱི་མཁན་པོ་གཅིག་པ་ཡིན། འདི་ཉིད་སློབ་དཔོན་ཡིན་གྱིས་ཁྱོད་ཀྱིས་འདི་ཉིད་ལ་དྲི་བར་བྱ། ཁྱོད་ཀྱིས་འདི་ཉིད་ལ་བཀླག་པར་བྱའོ། །ཁྱོད་ཀྱིས་འདི་ཉིད་ལ་བསླབ་པར་བྱའོ། །དེས་གཅིག་ལས་འཕྲོས་པའི་ལུང་བཀླགས་ པས་དེས་དེ་གཅིག་ལས་འཕྲོས་པའི་ལུང་ཀློག་ཏུ་གཞུག་པར་བརྩམས་པ་དང་། དེས་ཤིན་ཏུ་བརྩོན་འགྲུས་བརྩམས་པས་ཁ་ཏོན་དུ་ལྷོགས་ནས་དགེ་སློང་སློབ་དཔོན་དེ་ཤིན་ཏུ་མིག་གང་སྟེ་དེས་དེ་ལ་སྨྲས་པ། བཞིན་བཟངས་ཅི་ལྷན་ཅིག་ཏུ་བསོད་སྙོམས་ལ་འཇུག་པར་བྱའམ། འོན་ཏེ་སོ་སོར། དེས་བསམས་པ། བདག་གིས་མིའི་ཟས་ཀྱིས་འཚོ་བར་མི་ནུས་ཀྱིས། བདག་ཀླུའི་གནས་སུ་སོང་ལ་བདུད་རྩི་ཟོས་ཤིང་ཟོས་ཤིང་ཕྱིར་འོང་བར་བྱའོ་སྙམ་ནས། དེས་སྨྲས་པ། སློབ་དཔོན་སོ་སོར་འཇུག་པར་བྱའོ། །དེས་སྨྲས་པ། བཞིན་བཟངས་ དེ་ལྟར་གྱིས་ཤིག །དེ་ཀླུའི་གནས་སུ་ལྷའི་བདུད་རྩི་ཟོས་ནས་ཕྱིར་འོང་ངོ་། །ཀླུ་རྣམས་ནི་གཉིད་ཆེ་བ་ཡིན་པས་དེ་གང་གི་ཚེ་གཉིད་ལོག་ནས་ལངས་པ་དེའི་ཚེ་ན་དགེ་སློང་དེ་བསོད་སྙོམས་བླངས་ནས་ཕྱིར་འོང་ངོ་། །ཇི་ཙམ་དུས་གཞན་ཞིག་ན་དགེ་སློང་དེས་བསོད་སྙོམས་གློ་ བུར་བ་རྙེད་ནས་དེས་དེ་བླངས་ཏེ་ཕྱིར་འོངས་པ་དང་། ཇི་ཙམ་ན་གནས་ཁང་ན་མགར་བའི་སྦུད་པ་འབུད་པ་ལྟ་བུའི་སྒྲ་ཐོས་ནས་དེས་གཏན་པའི་བུ་ག་ནས་བལྟས་ན། གནས་ཁང་དེ་ཐམས་ཅད་ཀླུའི་ལུས་བསྐྱིལ་བས་གང་བ་མཐོང་ནས་དེས་སྤྲུལ་པ་སྤྲུལ་པ་ཞེས་སྒྲ་ཕྱུང་བ་དང་། དེ་སྒྲ་ལ་མཁས་པས་མྱུར་བ་མྱུར་བ་ཁོ་ནར་སད་ནས་རང་བཞིན་གྱི་ཆ་ལུགས་མི་སྣང་བར་བྱས་ཏེ་དེ་སྤྲུལ་པའི་ཆ་ལུགས་སུ་འདུག་གོ། །དགེ་སློང་དག་ལྷགས་ནས་དེ་དག་གིས་དེ་ལ་སྨྲས་པ། འདི་ཅི་ཡིན། དེས་སྨྲས་པ། སྤྲུལ་པ་ཡིན་ནོ། །དེ་དག་གིས་སྨྲས་པ། ཚེ་དང་

  192. 97a

    ལྡན་པ་བརྩོན་འགྲུས་བརྩམས་པས་རྟག་ཏུ་ཁ་ཏོན་ལ་བརྩོན་པ་ཡིན་ན་ཅི་ཁྱོད་འདི་ལ་སེར་སྣ་བྱེད་དམ། དེས་སྨྲས་པ། ཁོ་བོ་ནི་འདི་ལ་ཅུང་ཟད་ཀྱང་སེར་སྣ་མི་བྱེད་དེ། འདི་ལྟར་འདི་ནི་སྤྲུལ་པ་ཡིན་ནོ། །དེ་དག་ཕན་ཚུན་སྨྲ་བ་ན་བཅོམ་ལྡན་འདས་ཀྱང་ ཕྱོགས་དེར་གཤེགས་ནས། བཅོམ་ལྡན་འདས་ཀྱིས་བཀའ་སྩལ་པ། འདི་ཅི་ཡིན། དགེ་སློང་དག་གིས་གསོལ་པ། བཅོམ་ལྡན་འདས་སྤྲུལ་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གང་ཟག་སྤྲུལ་པ་ནི་ཆོས་འདུལ་བ་འདི་ལ་མི་སྐྱེ་ བའི་ཆོས་ཅན་ཡིན་པས། དགེ་སློང་དག་ཁྱེད་ཀྱིས་གང་ཟག་སྤྲུལ་པ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ་སྤྲུལ་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་ འགལ་ཚབས་ཅན་དུ་འགྱུར་རོ། །དགེ་སློང་དག་ཀླུའི་རང་བཞིན་ལྔ་པོ་འདི་དག་ཡིན་ལ་ལྷག་མ་ནི་སྤྲུལ་པ་ཡིན་ནོ། །ལྔ་གང་ཞེ་ན། རང་བཞིན་གྱིས་སྐྱེ་བ་དང་། རང་བཞིན་གྱིས་འཆི་བ་དང་། རང་བཞིན་གྱིས་ཉལ་བ་དང་། རང་བཞིན་གྱིས་ཟ་བ་དང་། རང་བཞིན་ གྱིས་མི་ཚངས་པར་སྤྱོད་པ་འཁྲིག་པའི་ཆོས་སྟེན་པར་བྱེད་པའོ། །བཅོམ་ལྡན་འདས་ཀྱིས་དེ་ལ་བཀའ་སྩལ་པ། བཞིན་བཟངས་ཁྱོད་ཀྱིས་ཕུང་པོ་འདི་དག་གིས་ཡོན་ཏན་གྱི་ཚོགས་འགའ་ཡང་ཐོབ་པར་མི་ནུས་ཀྱིས། དགེ་སློང་རྣམས་ལ་མ་འཚེ་བར་སོང་ཤིག །དེས་ བསམས་པ། འབབས་པར་ག་ལ་བྱ་སྙམ་ནས་དེས་སཱ་ལའི་དགོན་པ་ཞིག་ཏུ་སོང་ནས་གཙུག་ལག་ཁང་རྟ་བབས་མཐོན་པོ་དང་ལྡན་པ། མཐོངས་ཁུང་དང་། སྐར་ཁུང་དྲ་བ་ཅན་དང་། ལན་ཀན་གྱིས་བརྒྱན་པ། སྙིང་དང་མིག་འཕྲོག་པར་བྱེད་པ། མཐོ་རིས་ཀྱི་ཐེམ་སྐས་ སུ་གྱུར་པ། ཁྲི་དང་། ཁྲིའུ་དང་། ཡོ་བྱད་ཕུན་སུམ་ཚོགས་པ་ཞིག་སྤྲུལ་ཏེ། དགེ་སློང་གློ་བུར་དུ་འོངས་པ་དང་། འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ། །རྒན་ཞུགས་ཤིག་གཙུག་ལག་ཁང་དེར་དབྱར་གནས་ནས་མཉན་ཡོད་དུ་སོང་ངོ་། །

  193. 97b

    དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ། །སྙམ་པས་དྲུག་སྡེ་དག་ལས་གང་ཡང་རུང་བས་རྒྱལ་ བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །དེས་ཐག་རིང་པོ་ཁོ་ན་ནས་རྒན་ཞུགས་མགོ་སྤྲ་བའི་མེ་ཏོག་ལྟར་སྐྱ་བ་སྨིན་མ་འཕྱང་བ་ཞིག་འོང་བ་དེ་མཐོང་ ནས་དེས་བསམས་པ། འདི་ནི་དགེ་སློང་གནས་བརྟན་འགའ་ཞིག་ཡིན་གོར་མ་ཆག་སྙམ་ནས་དེས་བསུ་སྟེ་གནས་བརྟན་བྱོན་པ་ལེགས་སོ་བྱོན་པ་ལེགས་སོ་ཞེས་བྱས་པ་དང་དེས་སྨྲས་པ། སློབ་དཔོན་ཕྱག་འཚལ་ལོ། །ཉེ་དགའས་བསམས་པ། ཀྱེ་མ་འདི་ནི་རྒན་ཞུགས་ ཞིག་སྟེ། སློབ་དཔོན་ཡང་མི་ཤེས། མཁན་པོ་ཡང་མི་ཤེས་སོ་སྙམ་ནས་དེས་དེ་ལ་སྨྲས་པ། རྒན་ཞུགས་ཁྱོད་ག་ལས་འོངས། སཱ་ལའི་དགོན་པ་ནས་སོ། །ཅི་དེ་ན་གཙུག་ལག་ཁང་ཡོད་དམ། དེས་སྨྲས་པ། གཙུག་ལག་ཁང་ཡོད་དོ། །ཅི་དེ་གཙུག་ལག་ ཁང་ཡིན་ནམ། འོན་ཏེ་ཕོངས་པ་ཡིན། གཙུག་ལག་ཁང་ནི་ཅི་འདྲ། ཕོངས་པ་ནི་ཅི་འདྲ། གང་ན་ཡོ་བྱད་ཐམས་ཅད་དང་ལྡན་པ་ནི་གཙུག་ལག་ཁང་ཡིན་ལ། གང་ན་ཡོ་བྱད་ཐམས་ཅད་དང་བྲལ་བ་ནི་ཕོངས་པ་ཡིན་ནོ། །དེ་གཙུག་ལག་ཁང་ཡིན་ནོ། །དེ་ན་ཅི་ཡོད། དེ་ན་དགེ་སློང་ཞལ་ཏ་བྱེད་པ་གནས་ཏེ། དེས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ། །དྲུག་སྡེ་དག་གི་ཀུན་དུ་སྤྱོད་པ་ནི་གང་ཅུང་ཟད་ཅི་ཐོས་པ་དེ་ཕྱེ་འབྲེད་ཀྱི་དུས་ཀྱི་ཚེ་གཅིག་ཏུ་འདུས་ནས་ཕན་ཚུན་རྗོད་པར་བྱེད་པ་ ཡིན་པས་ཉེ་དགའ་གཙུག་ལག་ཁང་དུ་སོང་སྟེ་དྲུག་སྡེ་དག་ལ་སྨྲས་པ། ཚེ་དང་ལྡན་པ་བདག་ཅག་གིས་ཡུན་ཇི་སྲིད་ཀྱིས་བྲེལ་བ་སྤང་བར་བྱ། ཁྱོད་ཀྱིས་ཐོས་པ་ཅུང་ཞིག་ཡོད་དམ། ཉེ་དགའས་སྨྲས་པ། ཡོད་དེ། སཱ་ལའི་དགོན་པ་ན་གཙུག་ལག་ཁང་ཡོད་དོ། །

  194. 98a

    དེ་ན་ཅི་ཡོད། དེ་ན་ཞལ་ཏ་བྱེད་པ་གནས་ཏེ། དེས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་ཀྱིས། ཚུར་ཤོག་བདག་ཅག་དེར་འདོང་ངོ་། །དེ་དག་དེར་འདོང་བ་དང་། དེས་དེ་དག་ཐག་རིང་པོ་ཁོ་ ན་ནས་འོང་བ་མཐོང་ནས་དེས་བསམས་པ། གནས་ངན་ལེན་ཀུན་དུ་སྤྱོད་པ་དེ་དག་འདིར་འོངས་སོ་སྙམ་མོ། །དེས་ཡང་བསམས་པ། བདག་གིས་འདི་དག་ལ་ཡོ་བྱད་ཐམས་ཅད་ཀྱིས་བསྟབས་ན། འདི་དག་གིས་བདག་ལ་ཅི་བྱར་ཡོད་སྙམ་ནས། དེས་དེ་དག་ལ་རྒན་ རིམས་ཀྱིས་གནས་མལ་ཡང་ཏོག་དང་། ཁང་པ་བརྩེགས་པ་དག་བསྐོས་ཤིང་ཡོ་བྱད་ཐམས་ཅད་ཀྱིས་ཀྱང་བསྟབས་སོ། །དེ་དག་ཉི་མ་ཉུང་ཤས་ཤིག་འཁོད་ནས་སྨྲས་པ། དགའ་བོ་ཉེ་དགའ་རྒན་ཞུགས་འདི་ལ་འདུ་བ་ཡང་མི་སྣང་འགོད་པ་ཡང་མི་སྣང་བས་བདག་ཅག་ གིས་འདི་ལ་གྲངས་དག་འདེབས་སུ་གཞུག་གོ་ཞེས་དེ་དག་གིས་དེ་ལ་སྨྲས་པ། རྒན་ཞུགས་ཁྱོད་ལ་འདུ་བ་ཡང་མི་སྣང་། འགོད་པ་ཡང་མི་སྣང་བས་ཚུར་ཤོག་གྲངས་ཐོབ་ཤིག །དེས་སྨྲས་པ། འཕགས་པ་དག་ཅུང་ཟད་ཉམས་པའམ་གཅིག་ཏུ་མ་གྱུར་ཏམ། དེ་དག་ གིས་སྨྲས་པ། ཅུང་ཟད་ཀྱང་ཉམས་པར་མ་གྱུར་ཏེ་ཚངས་པ་མཚུངས་པར་སྤྱོད་པ་རྣམས་ཀྱིས་དྲུག་སྡེ་དག་གཙུག་ལག་ཁང་དེ་ཉིད་དུ་དབྱར་གནས་ན་དེ་དག་གིས་འདུ་བ་ཡང་མི་ཤེས། འགོད་པ་ཡང་མི་ཤེས་སོ་ཞེས་བདག་ཅག་སྨད་པར་འགྱུར་རོ། །དེས་སྨྲས་པ། གནས་བརྟན་དག་ གལ་ཏེ་དེ་ལྟ་ན་བགྱིའོ། །ཇི་ཙམ་ན་བྱ། ལོ་བཅུ་གཉིས་ནའོ། །དེ་དག་གིས་སྨྲས་པ། རྒན་ཞུགས་ལོ་བཅུ་གཉིས་ན་ཁྱོད་ཀྱིས་གཙུག་ལག་ཁང་འདི་སྒོ་འཕར་ཡང་ཟོས་པར་འགྱུར་རོ། །དེས་སྨྲས་པ། ལོ་བདུན་ནའོ། །དེ་དག་གིས་སྨྲས་པ། མི་རུང་ངོ་། །དེས་ སྨྲས་པ། ཟླ་བ་བདུན་ནའོ། །དེ་དག་གིས་སྨྲས་པ། མི་རུང་ངོ་། །དེས་སྨྲས་པ། ཉིན་ཞག་བདུན་ནའོ། །དེ་དག་གིས་སྨྲས་པ། དགའ་བོ་ཉེ་དགའ་ཉིན་ཞག་བདུན་གྱིས་རྒན་ཞུགས་འདིས་ཅི་ཞིག་ཟོས་པར་གྱུར་ཏེ་དེ་བཞིན་བྱའོ། །དེ་དག་གིས་དེ་ལ་སྨྲས་པ། རྒན་ཞུགས་

  195. 98b

    དེ་བཞིན་གྱིས་ཤིག །དེས་བསམས་པ། ཞག་བདུན་ལོན་ན་གཙུག་ལག་ཁང་འདི་མི་སྣང་བར་འགྱུར་རོ་སྙམ་ནས། དེས་དེ་ནས་ཚངས་པ་མཚུངས་པར་སྤྱོད་པ་དེས་པ་དེས་པ་རྣམས་ལ་ལ་ལ་ལ་ནི་སྣམ་སྦྱར་འབུལ་བར་བྱེད། ལ་ལ་ལ་ནི་བླ་གོས། ལ་ལ་ལ་ནི་ཤམ་ཐབས། ལ་ལ་ལ་ནི་རྔུལ་ཟན། ལ་ལ་ལ་ནི་ལྷུང་བཟེད། ལ་ལ་ལ་ནི་ལྷུང་བཟེད་ཆུང་ངུ་འབུལ་བར་བྱེད་དོ། །དྲུག་སྡེ་དག་གིས་དེ་མཐོང་ནས་དེ་དག་གིས་སྨྲས་པ། དགའ་བོ་ཉེ་དགའ་རྒན་ཞུགས་འདི་ཕྱོགས་ཚོལ་གྱིས་ཞག་བདུན་འདས་ནས་ཕྱོགས་དང་བཅས་ནས་རྩ་ནས་གདོན་ ཏོ། །དེས་ཀྱང་ཞག་བདུན་འདས་ནས་དེ་དག་ཉལ་བ་དང་གཙུག་ལག་ཁང་དེ་མི་སྣང་བར་བྱས་ནས་རྒྱ་མཚོའི་འགྲམ་དུ་སོང་ངོ་། །དེ་དག་ཀྱང་ས་སྒྲེ་བོ་ལ་ཉལ་ཞིང་འཁོད་ནས་སྨྲས་པ། དགའ་བོ་ཉེ་དགའ་ལོངས་ལ་རྡོ་རྒྱུས་ལོང་ཤིག་དང་གྲངས་འདེབས་སུ་གཞུག་གོ། ། དེ་དག་གིས་ཇི་ཙམ་ན་བདག་ཅག་ས་སྒྲེ་བོ་ལ་ཉལ་བར་མཐོང་ནས་དེ་དག་གིས་སྨྲས་པ། བཅོམ་ལྡན་འདས་ལ་མངོན་པར་དད་པ། སངས་རྒྱས་དང་། ཆོས་དང་། དགེ་འདུན་ལ་མཆོད་པ་བྱེད་པ་ཞིག་བདག་ཅག་གིས་ཐོ་བཙམས་ནས་གཙུག་ལག་ཁང་མི་སྣང་བར་བྱས་ཏེ་སོང་ བ་དེ་ལྷའམ། ཀླུའམ། གནོད་སྦྱིན་ནམ། སུ་ཡིན་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཞལ་ཏ་བྱེད་པ་དེ་ནི་སྤྲུལ་པ་གང་ཡིན་པ་དེ་ཉིད་ཡིན་ཏེ། གལ་ཏེ་དགེ་ སློང་དྲུག་སྡེ་དག་གིས་ཐོ་བཙམས་པར་མ་གྱུར་ན་བསྟན་པ་མཐར་ཐུག་གི་བར་དུ་སངས་རྒྱས་དང་། ཆོས་དང་། དགེ་འདུན་དག་ལ་མཆོད་པ་བྱེད་པར་འགྱུར་རོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་གཙུག་ལག་ཁང་གང་ན་འདུ་ འགོད་མི་མངོན་པ་དེར་གྲངས་འདེབས་སུ་འཇུག་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་གང་ན་འདུ་བ་ཡང་མི་མངོན་འགོད་པ་ཡང་མི་མངོན་པ་དེར་ཡང་དགེ་སློང་གིས་གྲངས་འདེབས་སུ་གཞུག་པར་མི་བྱའོ། །གང་ན་འདུ་བ་ནི་མངོན་ལ་འགོད་པ་མི་མངོན་པ་

  196. 99a

    དེར་ཡང་དགེ་སློང་གིས་གྲངས་འདེབས་སུ་གཞུག་པར་མི་བྱའོ། །གང་ན་འགོད་པ་ནི་མངོན་ལ་འདུ་བ་མི་མངོན་པ་དེར་ཡང་དགེ་སློང་གིས་གྲངས་འདེབས་སུ་གཞུག་པར་མི་བྱའོ། །གང་ན་འདུ་བ་དང་འགོད་པ་མངོན་པ་དེར་ནི་དགེ་སློང་གིས་དྲན་པ་དང་ཤེས་བཞིན་ གྱིས་ཚོད་རིག་པར་བྱའོ།། །།འདུལ་བ་གཞི། བམ་པོ་དགུ་པ། དེའི་འོག་ཏུ་རྒྱ་མཚོའི་འགྲམ་དུ་སོང་སྟེ་གཙུག་ལག་ཁང་རྟ་བབས་མཐོན་པོ་དང་ལྡན་པ། མཐོངས་ཁུང་དང་སྐར་ཁུང་དྲ་བ་ཅན་དང་ལྡན་པ། ལན་ཀན་གྱིས་བརྒྱན་པ། སྙིང་དང་མིག་འཕྲོག་ པར་བྱེད་པ། མཐོ་རིས་ཀྱི་ཐེམ་སྐས་སུ་གྱུར་པ། ཁྲི་དང་ཁྲིའུ་དང་ཡོ་བྱད་ཕུན་སུམ་ཚོགས་པ་གཉིས་པ་ཞིག་སྤྲུལ་ཏེ། དེར་རྒྱ་མཚོ་ཆེན་པོའི་ཀླུ་དག་བྲམ་ཟེ་དང་། ཁྱིམ་བདག་གི་ཆ་བྱད་ཀྱིས་མངོན་དུ་ལྷགས་ནས་དེ་དག་དེ་ལ་ཆོས་ཉན་པར་བྱེད་དོ། །དེ་དག་གིས་དེ་ལ་ཆོས་ ཐོས་ནས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ། །རྒན་ཞུགས་ཤིག་གཙུག་ལག་ཁང་དེར་དབྱར་གནས་ནས་མཉན་ཡོད་དུ་སོང་ངོ་། །དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་ཁྱིམ་བདག་ འོངས་ཤིང་ལྷགས་པ་རྣམས་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་པས་དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་ནང་པར་སྔར་ལངས་ཏེ་སོ་ཤིང་བོར་ ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་གོ། །དེས་ཐག་རིང་པོ་ཁོ་ན་ནས་རྒན་ཞུགས་མགོ་སྤྲ་བའི་མེ་ཏོག་ལྟར་སྐྱ་བ་སྨིན་མ་འཕྱང་བ་ཞིག་འོང་བ་དེ་མཐོང་ནས་དེས་བསམས་པ། འདི་ནི་དགེ་སློང་གནས་བརྟན་འགའ་ཞིག་ཡིན་གོར་མ་ཆག་ སྙན་ནས་དེས་དེ་བསུ་སྟེ་གནས་བརྟན་བྱོན་པ་ལེགས་སོ་བྱོན་པ་ལེགས་སོ་ཞེས་བྱས་པ་དང་དེས་སྨྲས་པ། སློབ་དཔོན་ཕྱག་འཚལ་ལོ། །ཉེ་དགའས་བསམས་པ། ཀྱེ་མ་འདི་ནི་རྒན་ཞུགས་ཤིག་སྟེ། སློབ་དཔོན་ཡང་མི་ཤེས་མཁན་པོ་ཡང་མི་ཤེས་སོ་སྙམ་ནས། དེས་དེ་ལ་སྨྲས་

  197. 99b

    པ། རྒན་ཞུགས་ཁྱོད་ག་ལས་འོངས། རྒྱ་མཚོའི་འགྲམ་ནས་སོ། །ཅི་དེ་ན་གཙུག་ལག་ཁང་ཡོད་དམ། དེས་སྨྲས་པ། གཙུག་ལག་ཁང་ཡོད་དོ། །ཅི་དེ་གཙུག་ལག་ཁང་ཡིན་ནམ། འོན་ཏེ་ཕོངས་པ་ཡིན། གཙུག་ལག་ཁང་ནི་ཅི་འདྲ། ཕོངས་པ་ནི་ཅི་འདྲ། གང་ ན་ཡོ་བྱད་ཐམས་ཅད་དང་ལྡན་པ་ནི་གཙུག་ལག་ཁང་ཡིན་ལ། གང་ན་ཡོ་བྱད་ཐམས་ཅད་དང་བྲལ་བ་དེ་ནི་ཕོངས་པ་ཡིན་ནོ། །དེ་གཙུག་ལག་ཁང་ཡིན་ནོ། །དེ་ན་ཅི་ཡོད། དེ་ན་དགེ་སློང་ཆོས་སྨྲ་བ་གནས་ཏེ། དེ་དེ་ན་བྲམ་ཟེ་དང་ཁྱིམ་བདག་རྣམས་ལ་ཆོས་སྟོན་པར་བྱེད་ཅིང་ དེ་དག་གིས་དེ་ལ་ཆོས་ཐོས་ནས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ། །དྲུག་སྡེ་དག་གི་ཀུན་དུ་སྤྱོད་པ་ནི་གང་ཅུང་ཟད་ཅི་ཐོས་པ་དེ་ཕྱི་འབྲེད་ཀྱི་དུས་ཀྱི་ཚེ་གཅིག་ཏུ་འདུས་ནས་ཕན་ཚུན་རྗོད་པར་བྱེད་པ་ཡིན་པས་ཉེ་དགའ་ གཙུག་ལག་ཁང་དུ་སོང་སྟེ་དྲུག་སྡེ་དག་ལ་སྨྲས་པ། ཚེ་དང་ལྡན་པ་དག་བདག་ཅག་གིས་ཡུན་ཇི་སྲིད་ཀྱིས་བྲེལ་བ་སྤང་བར་བྱ། ཁྱོད་ཀྱིས་ཐོས་པ་ཅུང་ཞིག་ཡོད་དམ། ཉེ་དགའས་སྨྲས་པ་ཡོད་དེ། རྒྱ་མཚོའི་འགྲམ་ན་གཙུག་ལག་ཁང་ཡོད་དོ། །དེ་ན་ཅི་ཡོད། དེ་ ན་དགེ་སློང་ཆོས་སྨྲ་བ་གནས་ཏེ། དེ་དེ་ན་བྲམ་ཟེ་དང་ཁྱིམ་བདག་རྣམས་ལ་ཆོས་སྟོན་པར་བྱེད་ཅིང་དེ་དག་གིས་དེ་ལས་ཆོས་ཐོས་ནས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་ཀྱིས། ཚུར་ཤོག་བདག་ཅག་དེར་འདོང་ངོ་། ། དེ་དག་དེར་དོང་བ་དང་། དེས་དེ་དག་ཐག་རིང་པོ་ཁོ་ན་ནས་འོང་བ་མཐོང་ནས་དེས་བསམས་པ། གནས་ངན་ལེན་ཀུན་དུ་སྤྱོད་པ་དེ་དག་འདིར་ཡང་འོངས་སོ་སྙམ་མོ། །དེས་ཡང་བསམས་པ། བདག་འདི་དག་ལ་ཅུང་ཟད་ཀྱང་རག་ལུས་པ་མེད་ན་འདི་དག་གིས་བདག་ལ་ཅི་བྱར་ ཡོད་སྙམ་མོ། །དེས་ནས་རྒྱ་མཚོ་ཆེན་པོའི་ཀླུ་ད་དག་བྲམ་ཟེ་དང་ཁྱིམ་བདག་གི་ཆ་ལུགས་ཀྱིས་མངོན་དུ་ལྷགས་པ་དང་། དེས་དེ་དག་ལ་ཆོས་བསྟན་ཏོ། །དེ་དག་གིས་དེ་ལས་ཆོས་ཐོས་ནས་དགེ་སློང་གློ་བུར་དུ་འོངས་པ་དང་འགྲོ་བར་ཆས་པ་རྣམས་ལ་ཡོ་བྱད་ཐམས་ཅད་ཀྱིས་བསྟབས་

  198. 100a

    པ་དང་དྲུག་སྡེ་དག་གིས་སྨྲས་པ། དགའ་བོ་ཉེ་དགའ་རྒན་ཞུགས་འདིས་ཅི་ཞིག་ཤེས། གཅིག་ལས་འཕྲོས་པའོ། །འདི་ནི་རེ་ཞིག་རྫུབས་པས་གཅིག་ལས་འཕྲོས་པའི་ཆོས་སྟོན་གྱིས་དགེ་སློང་འདི་དག་ནི་སྡེ་སྣོད་གསུམ་དང་ལྡན་པ། ཆོས་སྒྲོགས་ པ། རིགས་པ་དང་གྲོལ་བའི་སྤོབས་པ་ཅན་ཤ་སྟག་ཡིན་ན། ཅིའི་ཕྱིར་འདི་དག་ལ་གསོལ་བ་མི་འདེབས། དེ་དག་གིས་དེ་ལ་སྨྲས་པ། རྒན་ཞུགས་ཁྱོད་ཀྱིས་ཅི་ཤེས། དེས་སྨྲས་པ། གཅིག་ལས་འཕྲོས་པའོ། །དེ་དག་གིས་སྨྲས་པ། རྒན་ཞུགས་ཁྱོད་ནི་རེ་ ཞིག་རྫུབས་པས་གཅིག་ལས་འཕྲོས་པའི་ཆོས་སྟོན་གྱི། དགེ་སློང་འདི་དག་ནི་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཤ་སྟག་ཡིན་ན། ཅིའི་ཕྱིར་འདི་དག་ལ་གསོལ་བ་མི་འདེབས། དེས་སྨྲས་པ། འཕགས་པ་དག་བདག་ གིས་བཟློག་གམ་ཅི་ན་ཁྱེད་ཅིའི་ཕྱིར་ཆོས་མི་སྟོན། དེ་དག་གིས་སྨྲས་པ། དགའ་བོ་ཉེ་དགའ་རྒན་ཞུགས་འདི་བདག་ཅག་དང་མི་མཐུན་པར་བྱེད་ཀྱིས་གནས་ནས་དབྱུང་བའི་ལས་བྱའོ། །དེས་བསམས་པ། གལ་ཏེ་བདག་ལ་གནས་ནས་དབྱུང་བའི་ལས་བྱས་ན་ཀླུའི་ གནས་སུ་ཡང་སྐབས་མི་རྙེད་དོ་སྙམ་ནས་དེས་དེ་དག་ཉལ་བ་དང་གཙུག་ལག་ཁང་དེ་ཡང་མི་སྣང་བར་བྱས་ཏེ་རྒྱ་མཚོ་ཆེན་པོར་ཞུགས་སོ། །དེ་དག་བྱེ་མའི་ཐང་ལ་ཉལ་ཞིང་འཁོད་འཁོད་ནས་སྨྲས་པ། དགའ་བོ་ཉེ་དགའ་ལོངས་ལ་སེང་གེའི་ཁྲི་ཤོམས་ཤིག་དང་ཆོས་བསྟན་པར་ བྱའོ། །དེ་དག་གིས་ཇི་ཙམ་ན་བདག་ཅག་བྱེ་མའི་ཐང་ལ་ཉལ་བ་མཐོང་ནས་དེ་དག་གིས་སྨྲས་པ། བཅོམ་ལྡན་འདས་ལ་མངོན་པར་དད་པ། སངས་རྒྱས་དང་། ཆོས་དང་། དགེ་འདུན་ལ་མཆོད་པ་བྱེད་པ་ཞིག་བདག་ཅག་གིས་ཐོ་བཙམས་ནས་གཙུག་ལག་ཁང་མི་སྣང་ བར་བྱས་ཏེ་སོང་བ་དེ་ལྷའམ། ཀླུ་འམ། གནོད་སྦྱིན་ནམ། སུ་ཡིན་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཆོས་སྨྲ་བ་དེ་ནི་སྤྲུལ་པ་གང་ཡིན་པ་དེ་ཉིད་ཡིན་

  199. 100b

    ཏེ། གལ་ཏེ་དགེ་སློང་དྲུག་སྡེ་དག་གིས་ཐོ་བཙམས་པར་མ་གྱུར་ན་བསྟན་པ་མཐར་ཐུག་གི་བར་དུ་སངས་རྒྱས་དང་། ཆོས་དང་། དགེ་འདུན་དག་ལ་མཆོད་པ་བྱེད་པར་འགྱུར་རོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ མ་གསོལ་བར་ཆོས་སྟོན་པར་བྱེད་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དེ་ལྟ་བས་ན་དགེ་སློང་གིས་མ་གསོལ་བར་ཆོས་བསྟན་པར་མི་བྱའོ། །དགེ་སློང་མ་གསོལ་བར་ཆོས་སྟོན་ན་འགལ་ཚབས་ཅན་དུ་འགྱུར་རོ། །དེའི་ངོར་མགྲོན་དུ་བོས་པ་ལ་ནི་ལྟུང་བ་མེད་དོ། ། མཉན་ཡོད་ན་ཁྱིམ་བདག་སངས་རྒྱས་འཚོ་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཚེ་དང་ལྡན་པ་ཤཱ་རིའི་བུ་གདུལ་བ་ལ་ ལྟོས་པས་དེའི་ཁྱིམ་དུ་སོང་སྟེ། དེས་ཁྱིམ་བདག་དེ་ཆུང་མ་དང་བཅས་པ་སྐྱབས་སུ་འགྲོ་བ་དང་བསླབ་པའི་གཞི་དག་ལ་བཞག་གོ། །ཇི་ཙམ་ན་དུས་གཞན་ཞིག་ན་ཁྱིམ་བདག་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཚེ་དང་ལྡན་པ་ཤཱ་རིའི་བུས་སེམས་ཅན་དེ་ངེས་པར་ སྐལ་བ་དང་ལྡན་པ་ཉིད་དུ་ཤེས་ནས་ཕྱི་བཞིན་འབྲང་བའི་དགེ་སྦྱོང་མེད་པར་དེའི་ཁྱིམ་དུ་སོང་བ་དང་ཁྱིམ་བདག་དེས་རྐང་པ་ལ་ཕྱག་འཚལ་ཏེ་སྨྲས་པ། ཅི་འཕགས་པ་ལ་སླད་བཞིན་འབྲང་བའི་དགེ་སྦྱོང་མ་མཆིས་སམ། དེས་སྨྲས་པ། ཁྱིམ་བདག་ཅི་ཁོ་བོའི་ཕྱི་བཞིན་འབྲང་བའི་དགེ་ སྦྱོང་རྩྭ་ཀ་ཤའི་བྱིངས་སམ། ཀུ་ཤའི་བྱིངས་ནས་འབྱུང་བར་འགྱུར་རམ། འདི་ལྟར་ཁྱོད་ལྟ་བུ་དག་ལས་ཐོབ་པ་གང་དག་ཡིན་པ་དེ་དག་ཁོ་བོའི་ཕྱི་བཞིན་འབྲང་བའི་དགེ་སྦྱོང་དུ་འགྱུར་རོ། །ཁྱིམ་བདག་སངས་རྒྱས་འཚོས་སྨྲས་པ། འཕགས་པ་བདག་གི་མཆིས་འབྲང་འདི་ ལ་སེམས་ཅན་ཞིག་ཞུགས་པར་གྱུར་གྱིས། གལ་ཏེ་བུ་ཕོ་ཞིག་བཙས་པར་གྱུར་ན་དེ་བདག་གིས་འཕགས་པའི་སླད་བཞིན་འབྲང་བའི་དགེ་སྦྱོང་དུ་འབུལ་ལོ། །དེས་སྨྲས་པ། ཁྱིམ་བདག་ཐབས་ཡིན་ནོ། །དེ་ཟླ་བ་བརྒྱད་དམ་དགུ་འདས་པ་དང་ཁྱེའུ་གཟུགས་བཟང་བ། བལྟ་ན་

  200. 101a

    སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བཙས་སོ། །བཙས་ནས་དེའི་ཉེ་དུ་དག་འདུས་ཤིང་ ལྷགས་ནས་དེ་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུ་མིང་ཅིར་གདགས་ཞེས་མིང་འདོགས་པར་བྱེད་དོ། །གཞན་དག་གིས་སྨྲས་པ། ཁྱེའུ་འདི་སངས་རྒྱས་འཚོའི་བུ་ཡིན་པས་ཁྱེའུ་འི་མིང་དགེ་འདུན་འཚོར་གདགས་སོ་ཞེས་དེའི་ མིང་དགེ་འདུན་འཚོ་ཞེས་བྱ་བར་བཏགས་སོ། །དེ་དག་གིས་ཁྱེའུ་དགེ་འདུན་འཚོ་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་གུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་ མྱུར་དུ་སྐྱེད་པར་བྱེད་དོ། །གང་ཁོ་ནའི་ཉིན་མོ་དགེ་འདུན་འཚོ་བཙས་པ་དེ་ཁོ་ནའི་ཉིན་མོ་ཚོང་པ་ལྔ་བརྒྱ་དག་གི་བུ་དག་ཀྱང་བཙས་ཏེ། དེ་དག་ཀྱང་རིགས་དང་མཐུན་པའི་མིང་དག་བཏགས་སོ། །གང་གི་ཚེ་ཁྱེའུ་དགེ་འདུན་འཚོ་ཆེན་པོར་གྱུར་པ་དེའི་ཚེ་ན་ཚེ་དང་ལྡན་པ་ཤཱ་ རིའི་བུས་དེ་རབ་ཏུ་དབྱུང་བའི་དུས་ཤེས་ནས་གདུལ་བ་ལ་ལྟོས་པས་ཕྱི་བཞིན་འབྲང་བའི་དགེ་སྦྱོང་མེད་པར་གཅིག་པུ་དེའི་ཁྱིམ་དུ་སོང་བ་དང་ཁྱིམ་བདག་སངས་རྒྱས་འཚོས་རྐང་པ་ལ་ཕྱག་འཚལ་ཏེ་སྟན་བཏིང་བ་དང་ཚེ་དང་ལྡན་པ་ཤཱ་རིའི་བུ་འདུག་གོ། །འདུག་ནས་ཀྱང་ཁྱིམ་ བདག་སངས་རྒྱས་འཚོ་ལ་བརྡ་བྱ་བར་བརྩམས་སོ། །དེ་ནས་ཁྱིམ་བདག་སངས་རྒྱས་འཚོས་དགེ་འདུན་འཚོ་ལ་སྨྲས་པ། བུ་ཁོ་བོས་ཁྱོད་མའི་རུམ་ན་འདུག་ཅིང་མ་བཙས་པ་ཉིད་ནས་འཕགས་པ་ཤཱ་རིའི་བུ་ལ་ཕྱི་བཞིན་འབྲང་བའི་དགེ་སྦྱོང་དུ་ཕུལ་གྱིས་ཁྱོད་སོང་ལ་འདི་ལ་ བསྙེན་བཀུར་གྱིས་ཤིག །དེ་སེམས་ཅན་སྲིད་པ་ཐ་མ་པ་ཡིན་པས་འཛུམ་སྔོན་དུ་བཏང་སྟེ། འཇིགས་པ་མེད་ཅིང་བཞིན་ཉམས་པ་མེད་པ་དང་། དམན་པ་མེད་པས་དེ་ལྟར་བགྱིའོ་ཞེས་ཁས་བླངས་ནས་དེ་ཚེ་དང་ལྡན་པ་ཤཱ་རིའི་བུའི་ཕྱི་བཞིན་ཕྱི་བཞིན་རྗེས་སུ་འབྲང་ངོ་། །དེ་ནས་

  201. 101b

    ཚེ་དང་ལྡན་པ་ཤཱ་རིའི་བུས་དེ་རབ་ཏུ་བྱུང་ཞིང་བསྙེན་པར་རྫོགས་པར་བྱས་ནས་ཀུན་དུ་སྤྱོད་པའི་ཆོས་དག་བསླབས་ཏེ་ལུང་བཞི་ཀློག་ཏུ་བཅུག་གོ། །ཇི་ཙམ་དུས་གཞན་ཞིག་ན། ཚོང་པ་ལྔ་བརྒྱ་པོ་དག་གི་བུ་ལྔ་བརྒྱ་པོ་དེ་དག་གིས་ཕན་ཚུན་གྲོས་བྱས་ཏེ་རྒྱ་མཚོ་ཆེན་པོར་འདོང་བའི་ཟོང་སྟ་གོན་བྱས་ནས་རྒྱ་མཚོ་ཆེན་ པོར་འཕགས་པ་དང་། དེ་དག་འདི་སྙམ་སེམས་ཏེ། ཤེས་ལྡན་དག་རྒྱ་མཚོ་ཆེན་པོ་ནི་འཇིགས་པ་དུ་མས་ཀུན་དུ་གང་བ་ཡིན་པས་བདག་ཅག་གིས་གང་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་ཆོས་སྟོན་པར་འགྱུར་བའི་འཕགས་པ་འགའ་ཞིག་གཤེགས་སུ་གསོལ་ན། དེས་ བདག་ཅག་བདེ་ལེགས་སུ་འགྱུར་སྙམ་ནས། དེ་དག་གིས་དཔྱད་པར་བརྩམས་ཏེ་སྨྲས་པ། སུ་གཤེགས་སུ་གསོལ། གཞན་དག་གིས་སྨྲས་པ། ཤེས་ལྡན་དག་འཕགས་པ་དགེ་འདུན་འཚོ་འདི་བདག་ཅག་གི་ནེའུ་ལྡངས་ལྷན་ཅིག་སྐྱེས་པས་རྡུལ་ལ་ལྷན་ཅིག་རྩེ་རྩེ་ བ་ཡིན་པས་བདག་ཅག་གིས་འདི་ལ་གསོལ་བ་གདབ་པར་བྱའོ། །དེ་ནས་དེ་དག་དེའི་གན་དུ་སོང་སྟེ་རྐང་པ་ལ་ཕྱག་འཚལ་ནས་སྨྲས་པ། འཕགས་པ་དགེ་འདུན་འཚོ་བདག་ཅག་གི་ནེའུ་ལྡངས་ལྷན་ཅིག་སྐྱེས་པ་ས་རྡུལ་ལ་ལྷན་ཅིག་རྩེ་རྩེ་བ་ལགས་ཏེ། བདག་ཅག་ནི་རྒྱ་ མཚོ་ཆེན་པོར་འཕགས་ན་རྒྱ་མཚོ་ཆེན་པོ་ནི་འཇིགས་པ་དུ་མས་ཀུན་དུ་གང་བ་ལགས་པས་འཕགས་པས་བདག་ཅག་རྒྱ་མཚོ་ཆེན་པོའི་ནང་དུ་མཆིས་པ་རྣམས་ལ་ཆོས་བསྟན་ན་དེས་བདག་ཅག་བདེ་ལེགས་སུ་འགྱུར་བ་ལགས་ཀྱིས། དེའི་སླད་དུ་འཕགས་པ་བདག་ཅག་དང་ཐབས་ཅིག་རྒྱ་ མཚོ་ཆེན་པོར་གཤེགས་པར་གསོལ། དེས་སྨྲས་པ། ཤེས་ལྡན་དག་ཁོ་བོ་ལ་རང་དབང་མེད་ཀྱིས་དེང་ལ་མཁན་པོ་ལ་ཞུས་ཤིག །དེ་དག་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ། ཚེ་དང་ ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་ཤཱ་རིའི་བུ་མཁྱེན་པར་མཛོད་ཅིག །འཕགས་པ་དགེ་འདུན་འཚོ་འདི་བདག་ཅག་གི་ནེའུ་ལྡངས་ལྷན་ཅིག་སྐྱེས་པ་ས་རྡུལ་ལ་ལྷན་ཅིག་རྩེ་རྩེ་བ་ལགས་ཏེ། བདག་ཅག་ནི་རྒྱ་མཚོ་ཆེན་པོར་འཕགས་ན་རྒྱ་མཚོ་ཆེན་པོ་ནི་

  202. 102a

    འཇིགས་པ་དུ་མས་ཀུན་དུ་གང་བ་ལགས་པས་འཕགས་པ་དགེ་འདུན་འཚོས་བདག་ཅག་རྒྱ་མཚོ་ཆེན་པོའི་ནང་དུ་མཆིས་པ་རྣམས་ལ་ཆོས་བསྟན་ན་དེས་བདག་ཅག་བདེ་ལེགས་སུ་འགྱུར་ལགས་ཀྱིས། དེའི་སླད་དུ་འཕགས་པ་དགེ་འདུན་འཚོ་བདག་ཅག་དང་ ཐབས་ཅིག་རྒྱ་མཚོ་ཆེན་པོར་གཏང་བར་གསོལ། དེས་སྨྲས་པ། བཅོམ་ལྡན་འདས་ཉིད་ལ་ཞུས་ཤིག་དང་ཁོ་བོས་ཟློག་པར་མི་བྱེད་དོ། །དེ་དག་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མཁྱེན་པར་མཛད་དུ་གསོལ། འཕགས་པ་དགེ་འདུན་འཚོ་འདི་བདག་ཅག་གི་ནེའུ་ལྡངས་ལྷན་ཅིག་སྐྱེས་པ་ས་རྡུལ་ལ་ལྷན་ཅིག་རྩེ་རྩེ་བ་ལགས་ཏེ། བདག་ཅག་ནི་རྒྱ་མཚོ་ཆེན་པོར་འཕགས་ན་རྒྱ་མཚོ་ཆེན་ པོ་ནི་འཇིགས་པ་དུ་མས་ཀུན་དུ་གང་བ་ལགས་པས་འཕགས་པ་དགེ་འདུན་འཚོས་བདག་ཅག་རྒྱ་མཚོ་ཆེན་པོར་མཆིས་པ་རྣམས་ལ་ཆོས་བསྟན་ན་དེས་བདག་ཅག་བདེ་ལེགས་སུ་འགྱུར་བ་ལགས་ཀྱིས། དེའི་སླད་དུ་འཕགས་པ་དགེ་འདུན་འཚོ་བདག་ཅག་དང་ཐབས་ཅིག་རྒྱ་མཚོ་ ཆེན་པོར་གཏང་བར་གསོལ། བཅོམ་ལྡན་འདས་ཀྱིས་དགོངས་པ། ཅི་ཚོང་པ་འདི་དག་ལ་དགེ་བའི་རྩ་བ་ཅུང་ཟད་ཡོད་དམ། འོན་ཏེ་མེད་སྙམ་ན་ཡོད་པར་གཟིགས་སོ། །སུ་ལ་རག་ལུས་སྙམ་ནས་དགེ་སློང་དགེ་འདུན་འཚོ་ལ་རག་ལུས་པར་གཟིགས་ནས། དེ་ ནས་བཅོམ་ལྡན་འདས་ཀྱིས་ཚེ་དང་ལྡན་པ་དགེ་འདུན་འཚོ་ལ་བཀའ་སྩལ་པ། དགེ་འདུན་འཚོ་ཁྱོད་རྒྱ་མཚོ་ཆེན་པོར་འཇུག་ཏུ་སོང་ལ་ཁྱོད་ཀྱིས་འཇིགས་པ་དང་འཇིགས་སུ་རུང་བ་དག་བཟོད་པར་གྱིས་ཤིག །ཚེ་དང་ལྡན་པ་དགེ་འདུན་འཚོས་བཅོམ་ལྡན་འདས་ལ་ཅང་མི་སྨྲ་བར་ དང་དུ་བླངས་སོ། །དེ་ནས་ཚོང་པ་ལྔ་བརྒྱ་པོ་དེ་དག་ཚེ་དང་ལྡན་པ་དགེ་འདུན་འཚོ་དང་ལྷན་ཅིག་དགེ་མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་དག་བྱས་ཏེ། ཤིང་རྟ་དག་དང་། ཁུར་དག་དང་། སྤྱད་དག་དང་། གླེ་བ་དག་དང་། རྔ་མོ་དག་དང་། བ་ལང་

  203. 102b

    དག་དང་། བོང་བུ་དག་གིས་རྒྱ་མཚོ་ཆེན་པོར་འདོང་བའི་ཟོང་ཁྱེར་ཏེ། རྒྱ་མཚོ་ཆེན་པོར་འཕགས་ནས་མཐར་གྱིས་གྲོང་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དང་། ཚོང་རྡལ་དག་ཏུ་རྣམ་པར་རྒྱུ་བ་ན་རྒྱ་མཚོ་ཆེན་པོའི་འགྲམ་དུ་ཕྱིན་ནས་དེ་དག་ གིས་ལམ་གྱིས་དུབ་པ་བསལ་ཏེ། ཟོང་རྙིང་པ་ལྔ་བརྒྱས་གྲུ་བོ་ཆེ་སྦྱར་ནས་ཞོ་ཤས་འཚོ་བ་ལྔ་བརྒྱ་པོ་སྟོབས་པར་བྱེད་པ་དང་། སེལ་བར་བྱེད་པ་དང་། རྐྱལ་ཆེན་དང་། གྲུ་པ་དང་། རླུང་ཡོར་ཐོགས་པ་དག་ཁྲིད་དེ། ལན་གསུམ་དྲིལ་བསྒྲགས་ནས་ནོར་བསྒྲུབ་པའི་ཕྱིར་ རྒྱ་མཚོ་ཆེན་པོར་ཞུགས་སོ། །ཇི་ཙམ་ན་དེ་དག་རྒྱ་མཚོ་ཆེན་པོར་དོང་བ་དག་གི་གྲུ་བོ་ཆེ་དེ་ཀླུ་རྣམས་ཀྱིས་བཟུང་ནས་དེ་དག་ཞི་བ་དང་། ཆུ་ལྷ་དང་། ལུས་ངན་དང་། བརྒྱ་བྱིན་དང་། ཚངས་པ་ལ་སོགས་པ་ལྷ་རྣམས་ལ་རྒྱ་མཚོ་ཆེན་པོ་འདི་ན་ལྷའམ། ཀླུའམ། གནོད་ སྦྱིན་ནམ། དྲི་ཟའམ། གང་གནས་པ་དེ་བདག་ཅག་ལ་ཅི་འདོད་པ་སྨྲ་བར་གྱུར་ཅིག་ཅེས་གསོལ་བ་གདབ་པར་བརྩམས་པ་དང་། དེ་ནས་རྒྱ་མཚོ་ཆེན་པོ་ནས་འཕགས་པ་དགེ་འདུན་འཚོ་ངེད་ལ་བྱིན་ཅིག་ཅེས་སྒྲ་ཕྱུང་ངོ་། །དེ་དག་གིས་སྨྲས་པ། འཕགས་པ་དགེ་ འདུན་འཚོ་ནི་བདག་ཅག་གི་ནེའུ་ལྡངས་ལྷན་ཅིག་སྐྱེས་པ་ས་རྡུལ་ལ་ལྷན་ཅིག་རྩེ་རྩེ་བ། བཅོམ་ལྡན་འདས་དང་བཙུན་པ་ཤཱ་རིའི་བུས་བདག་ཅག་ལ་གནང་བ་ཡིན་པས་བདག་ཅག་འདི་དང་ལྷན་ཅིག་འཆི་བ་དང་དུས་བྱེད་པ་ནི་བླའི། འདི་ཡོངས་སུ་གཏང་བར་ནི་མི་བྱའོ། ། ཚེ་དང་ལྡན་པ་དགེ་འདུན་འཚོས་དེ་དག་ལ་སྨྲས་པ། ཤེས་ལྡན་དག་ཅི་ཟེར། དེ་དག་གིས་སྨྲས་པ། འཕགས་པ་རྒྱ་མཚོ་ཆེན་པོ་ནས་འཕགས་པ་དགེ་འདུན་འཚོ་ངེད་ལ་བྱིན་ཅིག་ཅེས་སྒྲ་བྱུང་ངོ་། །དེས་སྨྲས་པ། ཅིའི་ཕྱིར་མི་སྦྱིན། དེ་དག་གིས་སྨྲས་པ། འཕགས་ པ་ཁྱོད་ནི་བདག་ཅག་གི་ནེའུ་ལྡངས་ལྷན་ཅིག་སྐྱེས་པ་ས་རྡུལ་ལ་ལྷན་ཅིག་རྩེ་རྩེ་བ། བཅོམ་ལྡན་འདས་དང་། བཙུན་པ་ཤཱ་རིའི་བུས་བདག་ཅག་ལ་གནང་བ་ལགས་པས་བདག་ཅག་ཁྱོད་དང་ཐབས་ཅིག་འགུམ་པ་དང་དུས་བགྱིད་པ་ནི་བླའི། ཁྱོད་ཡོངས་སུ་གཏང་བར་ནི་

  204. 103a

    མི་བགྱིའོ། །ཚེ་དང་ལྡན་པ་དགེ་འདུན་འཚོས་བསམས་པ། བཅོམ་ལྡན་འདས་ཀྱིས་བདག་ལ་དགེ་འདུན་འཚོ་ཁྱོད་རྒྱ་མཚོ་ཆེན་པོར་འཇུག་ཏུ་སོང་ལ་ཁྱོད་ཀྱིས་འཇིགས་པ་དང་འཇིགས་སུ་རུང་བ་དག་བཟོད་པར་གྱིས་ཤིག་ཅེས་བཀའ་སྩལ་པ་གང་ཡིན་པ་དེ་ནི་འདི་ ཡིན་ནོ་སྙམ་ནས། དེས་ལྷུང་བཟེད་དང་ཆོས་གོས་ཐོགས་ཏེ་བདག་ཉིད་རྒྱ་མཚོ་ཆེན་པོར་མཆོང་བར་བརྩམས་པ་དང་། དེ་ནས་ཚོང་པ་དེ་དག་གིས་དེས་དེ་ལྟར་བརྩམས་པ་མཐོང་ནས་སྨྲས་པ། འཕགས་པ་དགེ་འདུན་འཚོ་ཅི་མཛད་ཅི་མཛད། དེ་དེ་དག་དེ་ལྟར་བཟློག་བཞིན་ དུ་རྒྱ་མཚོ་ཆེན་པོར་མཆོངས་པ་དང་། དེ་མ་ཐག་ཁོ་ནར་ཀླུ་རྣམས་ཀྱིས་གྲུ་བོ་ཆེ་དེ་བཏང་ངོ་། །ཚེ་དང་ལྡན་པ་དགེ་འདུན་འཚོ་ཡང་ཀླུ་རྣམས་ཀྱིས་ཁྲིད་དེ་ཀླུའི་གནས་སུ་ཞུགས་སོ། །དེ་ནས་ཀླུ་དེ་རྣམས་ཀླུའི་བུ་མོ་རྣམས་དང་ལྷན་ཅིག་འཛུམ་པ་སྔོན་དུ་བཏང་སྟེ་ཡ་མཚན་སྐྱེས་ ནས་མིག་ཚུགས་སུ་ལྟ་ཞིང་ཚེ་དང་ལྡན་པ་དགེ་འདུན་འཚོ་མཆོད་རྟེན་དེ་དག་ལ་ཕྱག་འཚལ་དུ་གཞུག་པར་བརྩམས་ཏེ་སྨྲས་པ། འཕགས་པ་དགེ་འདུན་འཚོ་འདི་ནི་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་དྲི་གཙང་ཁང་ལགས་སོ། །འདི་ནི་གཙུག་ཏོར་ཅན་ དང་། ཐམས་ཅད་སྐྱོབ་དང་། འཁོར་བ་འཇིག་དང་། གསེར་ཐུབ་དང་། འོད་སྲུང་གི་དྲི་གཙང་ཁང་ལགས་སོ། །འདི་ནི་བཅོམ་ལྡན་འདས་ཤཱཀྱ་ཐུབ་པའི་དྲི་གཙང་ཁང་ལགས་སོ། །དེས་དེ་དག་དང་ལྷན་ཅིག་མཆོད་རྟེན་དག་ལ་ཕྱག་འཚལ་ནས་ཀླུའི་ཚོགས་ ཀྱི་གུང་ལ་སྟན་བཤམས་པ་ཉིད་ལ་འདུག་གོ། །དེ་ནས་ཀླུ་དེ་རྣམས་ཀྱིས་ཐལ་མོ་སྦྱར་ནས་གསོལ་བ་བཏབ་པ། འཕགས་པ་དགེ་འདུན་འཚོ་ལྷ་དང་མི་རྣམས་ལ་ནི་བཅོམ་ལྡན་འདས་ཀྱི་མདོ་སྡེ་དང་། མ་མོ་རབ་ཏུ་གནས་ན། བདག་ཅག་ཀླུ་རྣམས་ནི་མི་ཁོམ་པར་སྐྱེས། ལོག་པར་ལྟུང་བའི་ལུས་དང་ལྡན་པས། ཀྱེ་མ་འཕགས་པས་བདག་ཅག་ལ་མདོ་སྡེའི་མཐའ་རབ་ཏུ་གནས་པར་མཛད་དུ་གསོལ། དེས་དེ་ལྟར་བྱའོ་ཞེས་ཁས་བླངས་སོ། །དེ་ནས་སྤྲུལ་པ་དེས་ཀླུ་གཞོན་ནུ་གསུམ་སྤྲོ་བ་བསྐྱེད་ནས་གཅིག་ལ་སྨྲས་པ། རེ་ཞིག་ཁྱོད་ཀྱིས་ནི་

  205. 103b

    ཡང་དག་པར་ལྡན་པ་ལྷོགས་ཤིག །གཉིས་པ་ལ་སྨྲས་པ། ཁྱོད་ཀྱིས་ནི་བར་མ་ལྷོགས་ཤིག །གསུམ་པ་ལ་སྨྲས་པ། ཁྱོད་ཀྱིས་ནི་རིང་པོ་ལྷོགས་ཤིག །ཁོ་བོས་ཀྱང་གཅིག་ལས་འཕྲོས་པའི་ལུང་བརྗོད་པའི་སྐབས་དེ་དག་ཉིད་ལ་གསལ་བར་བྱའོ། །དེ་དག་ གིས་བཀླག་པར་བརྩམས་ནས་དེ་ན་གཅིག་ནི་མིག་བཙུམས་ཏེ་ལུང་ནོད་པར་བྱེད་དོ། །གཉིས་པ་ནི་རྒྱབ་ཀྱིས་ཕྱོགས་ཏེ་ལུང་ནོད་པར་བྱེད་དོ། །གསུམ་པ་ནི་ཐག་རིང་པོར་འདུག་སྟེ་ལུང་ནོད་པར་བྱེད་དོ། །དེ་དག་གི་ནང་ནས་སྤྲུལ་པ་དེ་ཉིད་ནི་སྔོན་གྱི་བག་ཆགས་ཀྱི་ཁྱད་ པར་གྱིས་གུས་པ་དང་བཅས་པ་དང་། ཞེ་ས་དང་བཅས་པ་དང་། འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་པས་དེ་ནང་བར་སྔར་ལངས་ཏེ། འཕགས་པ་བཞེངས་ལ་ཚེམས་ཤིང་འོར་ཅིག །བཅོམ་ལྡན་འདས་ཀྱི་དཀྱིལ་འཁོར་དང་མཆོད་རྟེན་ལ་ཕྱག་མཛོད་ ཅིག །བཤོས་གསོལ་ཅིག །གཟིམས་མལ་ཤོམས་ཤིག་ཅེས་སྨྲ་བར་བྱེད་དོ། །ཇི་ཙམ་ན་དེ་ཐམས་ཅད་ཀྱིས་རིམ་གྱིས་ལུང་རྣམས་བཀླགས་པ་དང་། སྤྲུལ་པ་དེས་སྨྲས་པ། འཕགས་པ་འདི་དག་གིས་ལུང་རྣམས་བཀླགས་ན་ཅི་འཛིན་ཏམ་འོན་ཏེ་མི་འཛིན། དེས་སྨྲས་པ། འདི་དག་དྲན་པ་དང་ལྡན་པས་འཛིན་པར་ནི་འགྱུར་ན་འདི་ལྟར་འདི་དག་ལ་ཉེས་པ་ཡོད་དོ། །དེས་སྨྲས་པ། འཕགས་པ་ནོངས་པ་ཅི་མཆིས། འདི་དག་ཐམས་ཅད་གུས་པ་མེད་པ་དང་ཞེ་ས་མེད་པ་ཡིན་ཏེ། རེ་ཞིག་གཅིག་ནི་མིག་བཙུམས་ཏེ་ལུང་ནོད་ པར་བྱེད། གཉིས་པ་ནི་རྒྱབ་ཀྱིས་ཕྱོགས་ཏེ་ལུང་ནོད་པར་བྱེད། གསུམ་པ་ནི་ཐག་རིང་པོར་འདུག་སྟེ་ལུང་ནོད་པར་བྱེད་དོ། །ཁྱོད་འབའ་ཞིག་གུས་པ་དང་བཅས་པ་དང་། ཞེ་ས་དང་བཅས་པ་དང་འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་ནོ། །དེས་སྨྲས་པ། འཕགས་པ་དེ་དག་ནི་གུས་པ་མ་མཆིས་པ་དང་། ཞེས་མ་མཆིས་པ་མ་ལགས་ཏེ། རེ་ཞིག་མིག་བཙུམས་ཏེ་ལུང་ནོད་པ་གང་ལགས་པ་ནི་མིག་གདུག་པ་ལགས་སོ། །རྒྱབ་ཀྱིས་ཕྱོགས་ཏེ་ལུང་ནོད་པ་གང་ལགས་པ་ནི་དབུགས་གདུག་པ་ལགས་སོ། །ཐག་རིང་པོར་མཆིས་

  206. 104a

    ཏེ་ལུང་ནོད་པ་གང་ལགས་པ་དེ་ནི་རེག་པ་གདུག་པ་ལགས་སོ། །བདག་གཅིག་པུ་ནི་མཆེ་བ་གདུག་པ་ལགས་སོ། །དེ་ནས་ཚེ་དང་ལྡན་པ་དགེ་འདུན་འཚོ་སྐྲག་ནས་བསམས་པ། བདག་ཁོ་བོ་དགྲ་བོ་རྣམས་ཀྱི་ནང་ན་འདུག་པ་ལྟ་སྙམ་ནས། དེ་སྐྱ་བོ་ བསེང་བསེང་པོ། རིད་པ་དང་། ཉམ་ཆུང་བ་དང་། རྐེ་བ་དང་སྐམ་པ་དང་ལུས་མ་ཐོབ་པར་གྱུར་ཏོ། །ཀླུ་སྤྲུལ་པས་སྨྲས་པ། འཕགས་པ་ཁྱོད་ཅིའི་སླད་དུ་སྐྱ་བོ་བསེང་བསེང་པོ། །རིད་པ་དང་། ཉམ་ཆུང་བ་དང་། རྐེ་བ་དང་། སྐམ་པ་དང་། ལུས་མ་ཐོབ་པར་ གྱུར། དེས་སྨྲས་པ། ཁོ་བོ་ནི་དགྲ་བོ་རྣམས་ཀྱི་ནང་ན་འདུག་སྟེ་གང་གི་ཚེ་ཁྱེད་ཅག་ལས་གང་ཡང་རུང་བ་ཞིག་འཁྲུགས་པར་གྱུར་པ་དེའི་ཚེ་ན་ཁོ་བོ་མིང་ཙམ་ཞིག་ལུས་པར་འགྱུར་རོ། །དེས་སྨྲས་པ། བདག་ཅག་འཕགས་པ་ལ་གནོད་པ་མི་བགྱིད་དེ། འདི་ལྟར་ འཕགས་པ་སླར་འཛམ་བུའི་གླིང་དུ་གཤེགས་བཞེད་དམ་ཅི། དེས་སྨྲས་པ། བཞིན་བཟངས་ཁོ་བོ་འདི་ན་དགའ་བ་མེད་པས་འགྲོ་འདོད་དོ། །དེ་ནས་ཀླུ་དེ་རྣམས་ཀྱིས་ཕན་ཚུན་གྲོས་བྱས་ཏེ། གང་གི་ཚེ་གྲུ་བོ་ཆེ་དེ་ཕྱོགས་དེར་འོངས་པ་དེའི་ཚེ་ན་འཕགས་པ་དགེ་འདུན་ འཚོ་བཏེག་སྟེ་གྲུ་བོ་ཆེའི་ནང་དུ་བཞག་གོ། །དེ་ནས་ཚོང་པ་དེ་དག་འཛུམ་པ་སྔོན་དུ་བཏང་སྟེ་ཡ་མཚན་སྐྱེས་ནས་མིག་ཚུགས་སུ་ལྟ་ཞིང་སྨྲས་པ། འཕགས་པ་དགེ་འདུན་འཚོ་བྱོན་པ་ལེགས་སོ། །བྱོན་པ་ལེགས་སོ་དེས་སྨྲས་པ། ཤེས་ལྡན་དག་ཁོ་བོས་ནི་ཀླུའི་ གནས་སུ་ཀླུ་རྣམས་ལ་ལུང་བཞི་པོ་དག་རབ་ཏུ་གནས་པར་བྱས་ཀྱིས་རྗེས་སུ་ཡི་རང་བར་གྱིས་ཤིག །དེ་དག་གིས་སྨྲས་པ། འཕགས་པ་འདི་ལྟ་སྟེ། གཞན་ལ་ཕན་འདོགས་པ་འདི་ནི་སྟོན་པའི་བསྟན་པ་ལ་རབ་ཏུ་བྱུང་བས་བགྱི་བ་ལགས་ཏེ་རྗེས་སུ་ཡི་རང་ངོ་། །དེ་ ནས་ཚོང་པ་དེ་དག་ཚེ་དང་ལྡན་པ་དགེ་འདུན་འཚོ་དང་ལྷན་ཅིག་ཚོགས་ཤིང་ཀུན་དགའ་བཞིན་དུ་མཐར་གྱིས་རྒྱ་མཚོའི་འགྲམ་དུ་ཕྱིན་ཏོ། །ཇི་ཙམ་ན་ཐམས་ཅད་ངལ་ཞིང་དུབ་པས་གཉིད་ལོག་པ་ན་ཚེ་དང་ལྡན་པ་དགེ་འདུན་འཚོ་ཡང་རྒྱ་མཚོ་ཆེན་པོ་ལ་བལྟ་བར་བརྩམས་སོ། །

  207. 104b

    བཅོམ་ལྡན་འདས་ཀྱིས་དགེ་སློང་དག་ལྔ་པོ་འདི་དག་ནི་བལྟ་བས་ཆོག་མི་ཤེས་ཤིང་མཐོང་ན་མི་མཐུན་པ་མེད་པ་ཡིན་ཏེ། ལྔ་གང་ཞེ་ན། དགེ་སློང་དག་གླང་པོ་ཆེ་ཅང་ཤེས་གཞོན་ཤ་ཅན་དང་། འཁོར་ལོས་སྒྱུར་བའི་རྒྱལ་པོ་དང་། རྒྱ་མཚོ་དུག་ཅན་པ་དང་། རིའི་རྒྱལ་ རྒྱལ་པོ་རི་རབ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་བལྟ་བས་ཆོག་མི་ཤེས་ཤིང་མཐོང་ན་མི་མཐུན་པ་མེད་པ་ཡིན་ནོ་ཞེས་གསུངས་པས། དེ་ཡུན་རིང་དུ་རྒྱ་མཚོ་ཆེན་པོ་ལ་ལྟ་བ་ན་དུབ་པས་ཐོ་རངས་གཉིད་སྟུག་པོས་ནོན་ཏོ། ། དེ་ནས་ཚོང་པ་དེ་དག་ཁལ་དག་བཀལ་ཏེ་འཕགས་ནས་མཚན་མོ་ནམ་ནངས་པ་ན་ཚེ་དང་ལྡན་པ་དགེ་འདུན་འཚོ་མི་སྣང་ནས། དེ་དག་བརྟད་ཅིང་ཤེས་ལྡན་དག་འཕགས་པ་དགེ་འདུན་འཚོ་ག་རེ་ཞེས་ཕན་ཚུན་དུ་བལྟ་བར་བརྩམས་པ་དང་། དེ་ན་ཁ་ཅིག་ན་རེ་མདུན་དུ་སོང་ངོ་ ཞེས་ཟེར་རོ། །ཁ་ཅིག་ན་རེ་ཕྱི་བཞིན་འོང་ངོ་ཞེས་ཟེར་རོ། །ཁ་ཅིག་ན་རེ་དབུས་ནས་འགྲོའོ་ཞེས་ཟེར་རོ། །དེ་དག་རྣམ་པ་ཐམས་ཅད་དུ་ཀུན་དུ་ཚོལ་བ་ན་ཡི་ཆད་པར་གྱུར་ཅིང་མ་མཐོང་ངོ་། །དེ་ནས་དེ་དག་བཞིན་ཉམས་ཤིང་དམན་པར་གྱུར་ཏེ་སྨྲས་པ། ཤེས་ ལྡན་དག་བདག་ཅག་གིས་འཕགས་པ་དགེ་འདུན་འཚོ་བོར་བ་མ་ལེགས་པ་བྱས་ཀྱིས་ཕྱིར་ལྡོག་པར་བྱའོ། །ཡང་བསམས་པ། འཕགས་པ་དགེ་འདུན་འཚོ་ནི་རྫུ་འཕྲུལ་ཆེ་བ་མཐུ་ཆེ་བ་ཡིན་པས་འདི་ལྟར་རྒྱ་མཚོ་ཆེན་པོར་ཡང་དུས་ལ་མ་བབ་ན་དེ་ད་ལྟ་སྐམ་ལ་ཕྱིན་ན་དུས་ལ་ བབ་པར་ག་ལ་འགྱུར། དེ་ནི་རྫུ་འཕྲུལ་ཆེ་བ་མཐུ་ཆེ་བ་ཡིན་པས་དེ་ཆེས་སྔོན་དུ་སོང་བ་གང་ཡིན་པ་དེ་ལྟ་བུའི་གནས་ཡོད་དོ་སྙམ་ནས་སྨྲས་པ། ཤེས་ལྡན་དག་ཚུར་ཤེག་འདོང་ཞེས་དེ་དག་འཕགས་སོ། །ཚེ་དང་ལྡན་པ་དགེ་འདུན་འཚོ་ཡང་བྱེ་མའི་ཐང་སྟོང་པ་ལ་ཉི་མ་ འཆར་བའི་དུས་ཀྱི་ཚེ་ཉི་མའི་འོད་ཟེར་དག་གིས་ཕོག་ནས་སད་པ་དང་། ཇི་ཙམ་ན་ཅི་ཡང་མི་སྣང་ནས་དེས་བསམས་པ། ཚོང་པ་དེ་དག་ནི་དོང་ན་ད་ཇི་ལྟར་བྱ། གར་བབ་བབ་ཏུ་འགྲོའོ་སྙམ་མོ། །ཚེ་དང་ལྡན་པ་དེ་སྙིང་སྟོབས་ཆེ་བས་སོང་བ་དང་ལམ་མི་སྣང་ནས་དེས་

  208. 105a

    ཕན་ཚུན་བཙལ་ནས་ལམ་སྲང་ཞིག་མཐོང་ནས་དེ་དེར་ཞུགས་པ་དང་། ཇི་ཙམ་ན་ས་ལའི་དགོན་པ་ཞིག་ན་གཙུག་ལག་ཁང་རྟ་བབས་མཐོན་པོ་དང་ལྡན་པ། མཐོངས་ཁུང་དང་། སྐར་ཁུང་དྲ་བ་ཅན་དང་། ལན་ཀན་གྱིས་བརྒྱན་པ། སྙིང་དང་མིག་ འཕྲོག་པར་བྱེད་པ། མཐོ་རིས་ཀྱི་ཐེམ་སྐས་སུ་གྱུར་པ། ཁྲི་དང་ཁྲིའུ་དང་ཡོ་བྱད་ཕུན་སུམ་ཚོགས་པ་དང་ལྡན་པ། ཤིང་ལྗོན་པ་སྣ་ཚོགས་ཀྱིས་བསྐོར་བ། རྫིང་བུ་དང་མཚེའུས་ཉེ་བར་མཛེས་པར་བྱས་པ། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཚོ་དང་། རི་སྐེགས་དང་། ཁུ་བྱུག་མངོན་པར་སྒྲ་འབྱིན་པ། ལྷའི་གནས་ལྟར་དཔལ་གྱིས་འབར་བ་ཞིག་དང་། དེ་ན་དགེ་སློང་ལེགས་པར་བགོས་ཤིང་ལེགས་པར་སྦྱངས་པ། སྤྱོད་ལམ་ཞི་བས་གནས་པ་དག་མཐོང་ནས་གུས་པ་དང་བཅས་པས་དེ་དག་གི་གན་དུ་སོང་ངོ་། །དེ་ནས་ དེ་དག་གུས་པར་སྒྲིམ་པ་དང་བཅས་པས་དེ་ལ་སྨྲས་པ། བཙུན་པ་དགེ་འདུན་འཚོ་བྱོན་པ་ལེགས་སོ་བྱོན་པ་ལེགས་སོ་ཁྱོད་ད་གཟོད་ག་ལས་བྱོན། དེས་ཇི་ལྟར་གྱུར་པ་ཐམས་ཅད་བརྗོད་པ་དང་། དེ་ནས་དེ་དག་གིས་ངལ་སོར་བཅུག་སྟེ། ལམ་གྱི་དུབ་པ་བསལ་ནས་གཙུག་ ལག་ཁང་དུ་ཁྲིད་དོ། །ཇི་ཙམ་ན་སྟན་བཟང་པོ་བཤམས་པ་དང་། ཁ་ཟས་བསོད་པའི་སྤྱི་བུངས་བཤམས་པ་མཐོང་ནས་དེ་དག་གིས་དེ་ལ་སྨྲས་པ། བཙུན་པ་དགེ་འདུན་འཚོ་མི་སྐྱེམས་སམ། མི་སྦྲེབས་སམ། དེས་སྨྲས་པ། ཚེ་དང་ལྡན་པ་དག་སྐོམ་མོ། ། བཀྲེས་སོ། །དེ་དག་གིས་སྨྲས་པ། བཙུན་པ་དགེ་འདུན་འཚོ་གསོལ་ཅིག །དེས་སྨྲས་པ། དགེ་འདུན་གྱི་ནང་དུ་བཟའོ། །དེ་དག་གིས་སྨྲས་པ། བཙུན་པ་དགེ་འདུན་འཚོ་ཁྱོད་ཤུལ་གྱིས་དུབ་པ་ལགས་ཀྱིས་ད་གསོལ་ཅིག །སླད་ཀྱིས་འདིར་ཉེས་དམིགས་ འབྱུང་བར་འགྱུར་རོ། །དེས་ཉེས་དམིགས་མཐོང་བས་ཟོས་ནས་མཐའ་གཅིག་ཏུ་སོང་སྟེ་འདུག་གོ། །ཇི་ཙམ་ན་དེ་དག་དྲོ་ལ་བབ་སྟེ། གཎྜཱི་བརྡུངས་པ་ན་རང་རང་གི་ལྷུང་བཟེད་ཐོགས་ཏེ་གྲལ་རིམས་བཞིན་འཁོད་དོ། །དེ་དག་འཁོད་པ་དང་གཙུག་ལག་ཁང་དེ་ཡང་མི་སྣང་བར་གྱུར་

  209. 105b

    ཅིང་དེ་དག་གི་རང་རང་གི་ལྷུང་བཟེད་ཀྱང་ལྕགས་ཀྱི་ཐོ་བ་རྣམ་པ་སྣ་ཚོགས་སུ་གྱུར་ཏོ། །དེ་ནས་དེ་དག་ཇི་སྲིད་དུ་དྲོ་མ་ཡོལ་གྱི་བར་དུ་ལྕགས་ཀྱི་ཐོ་བ་དེ་དག་གིས་ཕན་ཚུན་གླད་པ་བཅོམ་ནས་དེ་དག་གླད་པ་ཞོམ་ཞིང་སྡུག་བསྔལ་གྱི་ཚོར་བས་ཉེན་ནས་ཉམ་ཐག་པའི་སྐད་འབྱིན་ཏོ། ། ཇི་ཙམ་ན་དྲོ་ཡོལ་བ་དང་གཙུག་ལག་ཁང་དེ་ཡང་དེ་ཁོ་ན་བཞིན་དུ་ཕྱིར་བྱུང་ཞིང་དགེ་སློང་དེ་དག་ཀྱང་དེ་ཁོ་ན་བཞིན་དུ་སྤྱོད་ལམ་ཞི་བས་གནས་སོ། །དེ་ནས་ཚེ་དང་ལྡན་པ་དགེ་འདུན་འཚོ་དེ་དག་གི་གན་དུ་སོང་སྟེ་དྲིས་པ། ཚེ་དང་ལྡན་པ་དག་ཁྱེད་སུ་ཡིན། ལས་གང་གིས་འདིར་ སྐྱེས། དེ་དག་གིས་སྨྲས་པ། བཙུན་པ་དགེ་འདུན་འཚོ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཁྱེད་ཡིད་ཆེས་པར་མི་འགྱུར་རོ། །དེས་སྨྲས་པ། ཁོ་བོས་མངོན་སུམ་ཁོ་ནར་མཐོང་ན་ཅིའི་ཕྱིར་ཡིད་ཆེས་པར་མི་འགྱུར། དེ་དག་གིས་སྨྲས་པ། བཙུན་ པ་དགེ་འདུན་འཚོ་བདག་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཉན་ཐོས་སུ་གྱུར་ཏེ། ཇི་ཙམ་ན་བདག་ཅག་གིས་ཟན་གྱི་གྲལ་དུ་འཐབ་མོ་བགྱིས་པས་ལས་དེའི་རྣམ་པར་སྨིན་པས་བདག་ཅག་ཉི་ཚེ་བའི་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་ཏེ། བདག་ ཅག་འདི་ནས་ཤི་འཕོས་པ་དག་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་བ་གང་ལགས་པ་དེ་ལྟ་བུའི་གནས་ཀྱང་མཆིས་པར་འགྱུར་རོ། །བཙུན་པ་དགེ་འདུན་འཚོ་དེའི་སླད་དུ་འཛམ་བུའི་གླིང་དུ་གཤེགས་ནས་ཚངས་པ་མཚུངས་པར་སྤྱོད་པ་རྣམས་ལ་ཚེ་དང་ལྡན་པ་ དག་འདི་ལྟ་སྟེ། དཔེར་ན་འོད་སྲུང་གི་དགེ་སློང་དག་ལྟར་ཟན་གྱི་གྲལ་དུ་ཐབ་མོ་མ་བྱེད་ཅིག །སྡུག་བསྔལ་གྱི་ཚོགས་དེ་ལྟ་བུའི་སྐལ་བ་ཅན་དུ་འགྱུར་བར་མ་བྱེད་ཅིག་ཅེས་དོན་འདི་རྒྱ་ཆེར་བརྗོད་ན་ལེགས་སོ། །དེས་དེ་ལྟར་བྱའོ་ཞེས་ཁས་བླངས་ཏེ་སོང་ངོ་། །ཇི་ཙམ་ན་ དེ་ཁོ་ན་བཞིན་དུ་ས་ལའི་དགོན་པ་ཞིག་ན་གཙུག་ལག་ཁང་གཉིས་པ་རྟ་བབས་མཐོན་པོ་དང་ལྡན་པ། མཐོངས་ཁུང་དང་། སྐར་ཁུང་དྲ་བ་ཅན་དང་། ལན་ཀན་གྱིས་བརྒྱན་པ། སྙིང་དང་མིག་འཕྲོག་པར་བྱེད་པ། མཐོ་རིས་ཀྱི་ཐེམ་སྐས་སུ་གྱུར་པ། ཁྲི་དང་ཁྲིའུ་དང་ཡོ་བྱད་

  210. 106a

    ཕུན་སུམ་ཚོགས་པ་དང་ལྡན་པ། ཤིང་ལྗོན་པ་སྣ་ཚོགས་ཀྱིས་བསྐོར་བ། རྫིང་བུ་དང་མཚེའུས་ཉེ་བར་མཛེས་པར་བྱས་པ། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དག་མངོན་པར་སྒྲ་འབྱིན་པ། ལྷའི་ གནས་ལྟར་དཔལ་གྱིས་འབར་བ་ཞིག་དང་། དེ་ན་དགེ་སློང་ལེགས་པར་བགོས་ཤིང་ལེགས་པར་སྦྱངས་པ། སྤྱོད་ལམ་ཞི་བས་གནས་པ་དག་མཐོང་ནས་གུས་པ་དང་བཅས་པས་དེ་དག་གི་གན་དུ་སོང་ངོ་། །དེ་ནས་དེ་དག་གིས་གུས་པ་དང་སྒྲིམ་པ་དང་བཅས་པས་དེ་ལ་སྨྲས་ པ། བཙུན་པ་དགེ་འདུན་འཚོ་བྱོན་པ་ལེགས་སོ་བྱོན་པ་ལེགས་སོ། །ཁྱོད་ད་གཟོད་ག་ལས་བྱོན། དེས་ཇི་ལྟར་གྱུར་པ་ཐམས་ཅད་བརྗོད་པ་དང་། དེ་ནས་དེ་དག་གིས་ངལ་སོར་བཅུག་སྟེ། ལམ་གྱིས་དུབ་པ་བསལ་ནས་གཙུག་ལག་ཁང་དུ་ཁྲིད་དོ། །ཇི་ཙམ་ ན་སྟན་བཟང་པོ་བཤམས་པ་དང་། ཁ་ཟས་བསོད་པའི་སྤྱི་བུངས་བཤམས་པ་དག་མཐོང་ནས་དེ་དག་གིས་དེ་ལ་སྨྲས་པ། བཙུན་པ་དགེ་འདུན་འཚོ་མི་སྐྱེམས་སམ། མི་སྦྲེབས་སམ། དེས་སྨྲས་པ། ཚེ་དང་ལྡན་པ་དག་སྐོམ་མོ། །བཀྲེས་སོ། །དེ་དག་གིས་སྨྲས་ པ། བཙུན་པ་དགེ་འདུན་འཚོ་གསོལ་ཅིག །དེས་སྨྲས་པ། དགེ་འདུན་གྱི་ནང་དུ་བཟའོ། །དེ་དག་གིས་སྨྲས་པ། བཙུན་པ་དགེ་འདུན་འཚོ་ཁྱོད་ཤུལ་གྱིས་མཉེལ་བ་ལགས་ཀྱིས་ད་གསོལ་ཅིག །སླད་ཀྱིས་འདིར་ཉེས་དམིགས་འབྱུང་བར་འགྱུར་རོ། །དེས་ཉེས་ དམིགས་མཐོང་བས་ཟོས་ནས་མཐའ་གཅིག་ཏུ་སོང་སྟེ་འདུག་གོ། །ཇི་ཙམ་ན་དེ་དག་དྲོ་ལ་བབ་སྟེ་གཎྜཱི་བརྡུངས་པ་ན་རང་རང་གི་ལྷུང་བཟེད་ཐོགས་ཏེ་གྲལ་རིམས་བཞིན་དུ་འཁོད་དོ། །དེ་དག་འཁོད་པ་དང་གཙུག་ལག་ཁང་དེ་ཡང་མི་སྣང་བར་གྱུར་ཅིང་བཟའ་བ་དང་བཏུང་བ་དེ་དག་ ཀྱང་ལྕགས་ཁུ་དག་ཏུ་གྱུར་ཏོ། །དེ་ནས་དེ་དག་ཇི་སྲིད་དྲོ་མ་ཡོལ་གྱི་བར་དུ་ལྕགས་ཁུ་དེ་དག་གིས་ཕན་ཚུན་གཏོར་ནས་དེ་དག་ལུས་ཚིག་ཅིང་སྡུག་བསྔལ་གྱི་ཚོར་བས་ཉེན་ནས་ཉམ་ཐག་པའི་སྐད་འབྱིན་ཏོ། །ཇི་ཙམ་ན་དྲོ་ཡོལ་བ་དང་གཙུག་ལག་ཁང་དེ་ཡང་དེ་ཁོ་ན་བཞིན་དུ་ཕྱིར་

  211. 106b

    བྱུང་ཞིང་དགེ་སློང་དེ་དག་ཀྱང་དེ་ཁོ་ན་བཞིན་དུ་སྤྱོད་ལམ་ཞི་བས་གནས་སོ། །དེ་ནས་ཚེ་དང་ལྡན་པ་དགེ་འདུན་འཚོ་དེ་དག་གི་གན་དུ་སོང་སྟེ་དྲིས་པ། ཚེ་དང་ལྡན་པ་དག་ཁྱེད་སུ་ཡིན། ལས་གང་གིས་འདིར་སྐྱེས། དེ་དག་གིས་སྨྲས་པ། བཙུན་པ་དགེ་འདུན་འཚོ་འཛམ་བུའི་ གླིང་པའི་མི་རྣམས་ནི་ཡིད་ཆེས་པར་དཀའ་བས་ཁྱོད་ཡིད་ཆེས་པར་མི་འགྱུར་རོ། །དེས་སྨྲས་པ། ཁོ་བོས་མངོན་སུམ་ཁོ་ནར་མཐོང་ན་ཅིའི་ཕྱིར་ཡིད་ཆེས་པར་མི་འགྱུར། དེ་དག་གིས་སྨྲས་པ། བཙུན་པ་དགེ་འདུན་འཚོ་བདག་ཅག་ནི་ཡང་དག་པར་རྫོགས་པའི་སངས་རྒྱས་འོད་ སྲུང་གི་ཉན་ཐོས་སུ་གྱུར་ཏེ། ཇི་ཙམ་ན་དགེ་འདུན་ལ་སྣུམ་བག་གི་རྙེད་པ་བྱུང་ཞིང་དགེ་སློང་གློ་བུར་དུ་འོངས་པ་དག་ཀྱང་ལྷགས་པ་ན། བདག་ཅག་སེར་སྣས་ཡོངས་སུ་བཟུང་བ་དག་གིས་ཇི་སྲིད་དུ་དགེ་སློང་གློ་བུར་དུ་འོངས་པ་དག་མ་དོང་བ་དེ་སྲིད་དུ་བཟའ་བར་མི་བྱའོ་ཞེས་དེ་ ལྟར་སེམས་བསྐྱེད་ཅིང་ཚིག་ཏུ་ཡང་རྗོད་ལ། ཞག་བདུན་གྱི་བར་དུ་དུས་མ་ཡིན་པར་ཡུལ་ངན་པ་བྱུང་ནས་དེས་བཟའ་བ་དང་བཏུང་བ་དེ་དག་རུལ་ཅིང་མ་རུང་བར་གྱུར་པ་དེ་ལྟར་བགྱིས་ཏེ། བདག་ཅག་གིས་དད་པས་སྦྱིན་པར་བྱ་བ་ཆུད་གསན་པས་ལས་དེའི་རྣམ་པར་སྨིན་པས་ བདག་ཅག་ཉི་ཚེ་བའི་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་ཏེ། བདག་ཅག་འདི་ནས་ཤི་འཕོས་པ་དག་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེ་བར་འགྱུར་བ་གང་ལགས་པ་དེ་ལྟ་བུའི་གནས་ཀྱང་མཆིས་པར་འགྱུར་རོ། །བཙུན་པ་དགེ་འདུན་འཚོ་དེའི་སླད་དུ་འཛམ་བུའི་ གླིང་དུ་གཤེགས་ནས་ཚངས་པ་མཚུངས་པར་སྤྱོད་པ་རྣམས་ལ་ཚེ་དང་ལྡན་པ་དག་འདི་ལྟ་སྟེ། དཔེར་ན་འོད་སྲུང་གི་དགེ་སྦྱོང་དག་ལྟར་དད་པས་སྦྱིན་པར་བྱ་བ་ཆུད་མ་གཟོན་ཅིག །སྡུག་བསྔལ་གྱི་ཚོགས་དེ་ལྟ་བུའི་སྐལ་བ་ཅན་དུ་འགྱུར་བར་མ་བྱེད་ཅིག་ཅེས་དོན་འདི་རྒྱ་ཆེར་བརྗོད་ན་ལེགས་ སོ། །དེས་དེ་ལྟར་བྱའོ་ཞེས་ཁས་བླངས་ནས་སོང་ངོ་། །ཇི་ཙམ་ན་ཡང་དེ་ཁོ་ན་བཞིན་དུ་སཱ་ལའི་དགོན་པ་ཞིག་ན་གཙུག་ལག་ཁང་གསུམ་པ་རྟ་བབས་མཐོན་པོ་དང་ལྡན་པ། མཐོངས་ཁུང་དང་། སྐར་ཁུང་དྲ་བ་ཅན་དང་། ལན་ཀན་གྱིས་བརྒྱན་པ། སྙིང་དང་མིག་འཕྲོག་པར་བྱེད་པ།

  212. 107a

    མཐོ་རིས་ཀྱི་ཐེམ་སྐས་སུ་གྱུར་བ། ཁྲི་དང་ཁྲིའུ་དང་ཡོ་བྱད་ཕུན་སུམ་ཚོགས་པ་དང་ལྡན་པ། ཤིང་ལྗོན་པ་སྣ་ཚོགས་ཀྱིས་བསྐོར་བ། རྫིང་བུ་དང་མཚེའུས་ཉེ་བར་མཛེས་པར་བྱས་པ། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་ བྱུག་དག་མངོན་པར་སྒྲ་འབྱིན་པ། ལྷའི་གནས་ལྟར་དཔལ་གྱིས་འབར་བ་ཞིག་དང་། དེ་ན་དགེ་སློང་ལེགས་པར་བགོས་ཤིང་ལེགས་པར་སྦྱངས་པ། སྤྱོད་ལམ་ཞི་བས་གནས་པ་དག་མཐོང་ནས་གུས་པ་དང་བཅས་པས་དེ་དག་གི་གན་དུ་སོང་ངོ་། །དེ་ནས་དེ་དག་གུས་པ་དང་ སྒྲིམ་པ་དང་བཅས་པས་དེ་ལ་སྨྲས་པ། བཙུན་པ་དགེ་འདུན་འཚོ་བྱོན་པ་ལེགས་སོ་བྱོན་པ་ལེགས་སོ། །ཁྱོད་ད་གཟོད་ག་ལས་བྱོན། དེས་ཇི་ལྟར་གྱུར་པ་ཐམས་ཅད་བརྗོད་པ་དང་། དེ་ནས་དེ་དག་གིས་ངལ་སོར་བཅུག་སྟེ་ལམ་གྱིས་དུབ་པ་བསལ་ནས་གཙུག་ལག་ཁང་དུ་ཁྲིད་ དོ། །ཇི་ཙམ་ན་སྟན་བཟང་པོ་བཤམས་པ་དང་། ཁ་ཟས་བསོད་པའི་སྤྱི་བུངས་བཤམས་པ་དག་མཐོང་ནས་དེ་དག་གིས་དེ་ལ་སྨྲས་པ། བཙུན་པ་དགེ་འདུན་འཚོ་མི་སྐྱེམས་སམ། མི་སྦྲེབས་སམ། དེས་སྨྲས་པ། ཚེ་དང་ལྡན་པ་དག་སྐོམ་མོ། །བཀྲེས་སོ། །དེ་དག་གིས་ སྨྲས་པ། བཙུན་པ་དགེ་འདུན་འཚོ་གསོལ་ཅིག །དེས་སྨྲས་པ། དགེ་འདུན་གྱི་ནང་དུ་བཟའོ། །དེ་དག་གིས་སྨྲས་པ། བཙུན་པ་དགེ་འདུན་འཚོ་ཁྱོད་ཤུལ་གྱིས་མཉེལ་བ་ལགས་ཀྱིས་ད་གསོལ་ཅིག །སླད་ཀྱིས་འདིར་ཉེས་དམིགས་འབྱུང་བར་འགྱུར་རོ། །དེས་ཉེས་དམིགས་ མཐོང་བས་ཟོས་ནས་མཐའ་གཅིག་ཏུ་སོང་སྟེ་འདུག་གོ། །ཇི་ཙམ་ན་དེ་དག་དྲོ་ལ་བབ་སྟེ་གཎྜཱི་བརྡུངས་ན་རང་རང་གི་ལྷུང་བཟེད་ཐོགས་ཏེ་གྲལ་རིམས་བཞིན་དུ་འཁོད་དོ། །དེ་དག་འཁོད་པ་དང་དེ་དག་གི་གཙུག་ལག་ཁང་དེ་འབར་རབ་ཏུ་འབར་ཀུན་དུ་རབ་ཏུ་འབར་ཞིང་མེ་ལྕེ་གཅིག་ཏུ་ གྱུར་ནས་སྲེག་པར་བརྩམས་སོ། །དེ་ནས་དེ་དག་ཇི་སྲིད་དུ་དྲོ་མ་ཡོལ་གྱི་བར་དུ་མེ་ལྕེ་དེས་བསྲེགས་ནས་དེ་དག་ལུས་ཚིག་ཅིང་སྡུག་བསྔལ་གྱི་ཚོར་བས་ཉེན་ནས་ཉམ་ཐག་པའི་སྐད་འབྱིན་ཏོ། །ཇི་ཙམ་ན་དྲོ་ཡོལ་བ་དང་གཙུག་ལག་ཁང་དེ་ཡང་དེ་ཁོ་ན་བཞིན་དུ་ཕྱིར་བྱུང་ཞིང་དགེ་སློང་

  213. 107b

    དེ་དག་ཀྱང་དེ་ཁོ་ན་བཞིན་དུ་སྤྱོད་ལམ་ཞི་བས་གནས་སོ། །དེ་ནས་ཚེ་དང་ལྡན་པ་དགེ་འདུན་འཚོ་དེ་དག་གི་གན་དུ་སོང་སྟེ་དྲིས་པ། ཚེ་དང་ལྡན་པ་དག་ཁྱེད་སུ་ཡིན། ལས་གང་གིས་འདིར་སྐྱེས། དེ་དག་གིས་སྨྲས་པ། བཙུན་པ་དགེ་འདུན་འཚོ་འཛམ་བུའི་གླིང་པའི་མི་རྣམས་ནི་ ཡིད་ཆེས་པར་དཀའ་བས་ཁྱེད་ཡིད་ཆེས་པར་མི་འགྱུར་རོ། །དེས་སྨྲས་པ། ཁོ་བོས་མངོན་སུམ་ཁོ་ནར་མཐོང་ན་ཅིའི་ཕྱིར་ཡིད་ཆེས་པར་མི་འགྱུར། དེ་དག་གིས་སྨྲས་པ། བཙུན་པ་དགེ་འདུན་འཚོ་བདག་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཉན་ཐོས་སུ་ གྱུར་ཏེ། ཇི་ཙམ་ན་བདག་ཅག་ཚུལ་ཁྲིམས་འཆལ་བ་དང་སྡིག་པའི་ཆོས་ཅན་དུ་གྱུར་ནས། དགེ་སློང་ཚུལ་ཁྲིམས་དང་ལྡན་པ་རྣམས་ཀྱིས་བདག་ཅག་གཙུག་ལག་ཁང་ནས་བསྐྲད་པ་དང་བདག་ཅག་གཙུག་ལག་ཁང་སྟོང་པ་ཞིག་ཏུ་འཁོད་དོ། །ཇི་ཙམ་ན་དགེ་སློང་ཚུལ་ ཁྲིམས་དང་ལྡན་པ་གཅིག་ཅིག་རྒྱུ་བ་ན་དེར་ཕྱིན་པ་དང་། དེ་ནས་བདག་ཅག་ལ་བློ་སྐྱེས་པ། འདི་གཅིག་པུས་བདག་ཅག་གི་ཡོན་སྦྱོང་བར་འགྱུར་གྱིས་འདུག་ལ་རག་གོ་སྙམ་པ་དང་། དེ་དེ་ཉིད་དུ་འདུག་གོ། །ཇི་ཙམ་ན་དེའི་ཞར་གྱིས་ཡང་དགེ་སློང་ཚུལ་ཁྲིམས་དང་ལྡན་པ་མང་ པོ་དག་ལྷགས་ནས་དེ་དག་གིས་བདག་ཅག་དེ་ནས་བསྐྲད་དོ། །དེ་ནས་བདག་ཅག་མི་བཟོད་པ་སྐྱེས་པ་དག་གིས་ཤིང་དང་། རྩྭ་དང་། ལྕི་བ་སྐམ་པོ་དག་བཅེར་ཏེ་གཙུག་ལག་ཁང་ལ་མེ་བཏང་ནས་དེར་དགེ་སློང་བསླབ་པ་འདོད་པ་མང་པོ་དག་བསྲེགས་པས་ལས་དེའི་རྣམ་པར་སྨིན་ པས་བདག་ཅག་ཉི་ཚེ་བའི་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་ཏེ། བདག་ཅག་འདི་ནས་ཤི་འཕོས་པ་དང་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་བ་གང་ལགས་པ་དེ་ལྟ་བུའི་གནས་ཀྱང་མཆིས་པར་འགྱུར་རོ། །བཙུན་པ་དགེ་འདུན་འཚོ་དེའི་སླད་དུ་འཛམ་བུའི་གླིང་ དུ་གཤེགས་ནས་ཚངས་པ་མཚུངས་པར་སྤྱོད་པ་རྣམས་ལ་ཚེ་དང་ལྡན་པ་དག་འདི་ལྟ་སྟེ། དཔེར་ན་འོད་སྲུང་གི་དགེ་སྦྱོང་ལྟར་ཚངས་པ་མཚུངས་པར་སྤྱོད་པ་དག་ལ་སྡང་བའི་སེམས་མ་སྐྱེད་ཅིག །སྡུག་བསྔལ་གྱི་ཚོགས་དེ་ལྟ་བུའི་སྐལ་བ་ཅན་དུ་འགྱུར་བར་མ་བྱེད་ཅིག་ཅེས་དོན་འདི་རྒྱ་ཆེར་

  214. 108a

    བརྗོད་ན་ལེགས་སོ། །དེས་དེ་ལྟར་བྱའོ་ཞེས་ཁས་བླངས་ཏེ་སོང་ངོ་། །ཇི་ཙམ་ན་སེམས་ཅན་རྩིག་པ་འདྲ་བ་དག་དང་། ཀ་བ་འདྲ་བ་དག་དང་། ཤིང་ལྗོན་པ་འདྲ་བ་དག་དང་། ལོ་མ་འདྲ་བ་དག་དང་། མེ་ཏོག་འདྲ་བ་དག་དང་། འབྲས་བུ་འདྲ་བ་དག་དང་། ཐག་ པ་འདྲ་བ་དག་དང་། ཕྱགས་མ་འདྲ་བ་དག་དང་། ཕོར་པ་འདྲ་བ་དག་དང་། གཏུན་འདྲ་བ་དག་དང་། ཕྲུ་བ་འདྲ་བ་དག་དང་། རྐེད་པ་ཆད་པ་ཆུ་རྒྱུས་ཀྱིས་བཟུང་བ་དག་འདོང་བ་ཡང་མཐོང་ངོ་། །ཚེ་དང་ལྡན་པ་དགེ་འདུན་འཚོ་ཡང་མཐར་གྱིས་ལྗོངས་སུ་སོང་བ་དང་། ཇི་ཙམ་ན་ བསྟི་གནས་ཤིག་ན་དྲང་སྲོང་ལྔ་བརྒྱ་ཙམ་འཁོད་དེ། དེ་དག་གིས་ཚེ་དང་ལྡན་པ་དགེ་འདུན་འཚོ་ཐག་རིང་པོ་ཁོ་ན་ནས་འོང་བ་མཐོང་ངོ་། །དེ་ནས་དེ་དག་གིས་གྲོས་བྱ་བར་བརྩམས་པ་ཤེས་ལྡན་དག་ཉོན་ཅིག །ཤཱཀྱའི་བུའི་དགེ་སྦྱོང་འདི་དག་ནི་སྨྲ་བ་མང་བ་ཡིན་པས་འདི་ལ་ སུས་ཀྱང་ཚིག་སྦྱིན་པར་མི་བྱའོ་ཞེས་དེ་དག་གིས་ཁྲིམས་སུ་བྱ་བ་བཅས་ཏེ་འཁོད་དོ། །ཚེ་དང་ལྡན་པ་དགེ་འདུན་འཚོ་ཡང་སྤྱོད་ལམ་ཞི་བས་དེ་དག་གི་གན་དུ་སོང་སྟེ་བསྟི་གནས་བརྙ་བར་བརྩམས་པ་ན་འགས་ཀྱང་ཚིག་མ་སྟེར་ཏོ། །དེ་ན་དྲང་སྲོང་བསོད་ནམས་འདོད་པ་གཅིག་ ཅིག་གིས་སྨྲས་པ། ཁྱོད་ལ་ཅིའི་ཕྱིར་བསྟི་གནས་མི་བརྙན་ཏེ་འདི་ལྟར་ཁྱེད་ལ་ཉེས་པ་ཡོད་དོ། །ཁྱེད་ནི་སྨྲ་བ་མང་བ་ཡིན་ནོ། །དེ་ལྟ་མོད་ཀྱི་དམ་ཚིག་གིས་བརྙ་བར་བྱ་སྟེ། གལ་ཏེ་ཅུང་ཟད་ཀྱང་མི་སྨྲ་ན་བརྙན་ནོ། །ཚེ་དང་ལྡན་པ་དགེ་འདུན་འཚོས་སྨྲས་པ། དྲང་སྲོང་དེ་ བཞིན་དུ་བྱས་མི་སྨྲའོ། །དེ་ན་དྲང་སྲོང་གཅིག་ཅིག་ལྗོངས་རྒྱུར་སོང་བ་དེའི་སྤྱིལ་བུ་སྟོང་པར་འདུག་པ་དེ་ཚེ་དང་ལྡན་པ་དགེ་འདུན་འཚོ་ལ་འདིར་ཉོལ་ཅིག་ཅེས་བརྙན་ནོ། །ཚེ་དང་ལྡན་པ་དགེ་འདུན་འཚོས་སྤྱིལ་བུ་དེ་ཆག་ཆག་བཏབ། ཕྱག་དར་བྱས། བ་ལང་གི་ལྕི་བ་སར་པས་བྱུག་ པ་བྱས་སོ། །དེ་དག་གིས་དེ་མཐོང་ནས་དེ་དག་གིས་སྨྲས་པ། ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་གཙང་སྦྲ་བྱེད་པ་ཡིན་ནོ། །ཚེ་དང་ལྡན་པ་དགེ་འདུན་འཚོས་སྤྱིལ་བུའི་ཕྱི་རོལ་དུ་རྐང་པ་གཉིས་བཀྲུས་ཏེ་སྤྱིལ་བུར་ཞུགས་ནས་སྐྱིལ་མོ་ཀྲུང་བཅས་ཏེ་ལུས་དྲང་པོར་

  215. 108b

    བསྲང་ནས་དྲན་པ་ཕྱོགས་པར་བཞག་སྟེ་འདུག་གོ། །དེ་ནས་བསྟི་གནས་དེ་ན་ལྷ་མོ་ཞིག་འདུག་པ་གང་ཡིན་པ་དེ་མཚན་མོ་ཐུན་དང་པོ་ལ་ཚེ་དང་ལྡན་པ་དགེ་འདུན་འཚོ་ག་ལ་བ་དེར་སོང་སྟེ་ཕྱིན་ནས་དེས་སྨྲས་པ། འཕགས་པ་དགེ་འདུན་འཚོ་ཆོས་བསྟན་དུ་གསོལ། དེས་སྨྲས་པ། ལྷ་མོ་ཁྱོད་བདེ་བར་གྱུར་ཅིག །ཁོ་བོས་ཁྲིམས་སུ་བྱ་བས་བསྟི་གནས་རྙེད་པ་ཁྱོད་ཀྱིས་མ་མཐོང་ངམ། ཅི་ཁོ་བོ་བསྐྲད་པར་འདོད་དམ། དེས་བསམས་པ། རབ་ཏུ་བྱུང་བ་འདི་ངལ་གྱིས་འདི་ལྟར་གུང་ཐུན་ལ་འོང་བར་བྱའོ་སྙམ་ནས་དེ་གུང་ཐུན་ལ་འོངས་ཏེ་སྨྲས་པ། འཕགས་ པ་དགེ་འདུན་འཚོ་ཆོས་བསྟན་དུ་གསོལ། དེས་སྨྲས་པ། སྲིང་མོ་ཁྱོད་ཁ་རོག་མི་སྡོད་པས་ཁོ་བོ་ངེས་པར་བསྐྲད་པར་འདོད་དམ། དེས་བསམས་པ། རབ་ཏུ་བྱུང་བ་འདི་ད་དུང་གཉིད་ཀྱིས་མྱོས་ཀྱིས་ཐུན་ཐ་མ་ལ་འོང་བར་བྱའོ་སྙམ་ནས་དེ་ཐུན་ཐ་མ་ལ་འོངས་ཏེ་སྨྲས་པ། འཕགས་པ་དགེ་འདུན་འཚོ་ཅིའི་སླད་དུ་གཟིམས། མཚན་མོའི་དགུང་སངས་ཀྱིས་བཞེངས་ལ་ཆོས་བསྟན་དུ་གསོལ། དེས་སྨྲས་པ། སྲིང་མོ་ཁྱོད་ཀྱིས་ཁོ་བོ་རྣམ་པ་ཐམས་ཅད་དུ་བསྐྲད་དོ། །དེས་སྨྲས་པ། འཕགས་པ་མཚན་མོའི་དགུང་སངས་པས་གལ་ཏེ་བསྐྲད་ན་ཡང་ ཅིར་འགྱུར་བཞུད་དོ་འཚལ། འདི་ལྟར་བཅོམ་ལྡན་འདས་ཀྱིས་འཇིགས་པ་དང་འཇིགས་སུ་རུང་བ་བཟོད་པར་བྱའོ་ཞེས་བཀའ་མ་སྩལ་ཏམ། ཚེ་དང་ལྡན་པ་དགེ་འདུན་འཚོས་བསམས་པ། སྲིང་མོ་འདི་ཟེར་བ་ནི་བདེན་ཏེ། གལ་ཏེ་ཁོ་བོ་བསྐྲད་ན་འགྲོ་ལ་རག་གིས་འདི་ ལྟར་འདི་དག་ནི་བྲམ་ཟེ་ཡིན་པས་བྲམ་ཟེ་དང་ཡང་དག་པར་ལྡན་པའི་ཚིགས་སུ་བཅད་པ་བརྗོད་པར་བྱའོ་སྙམ་ནས། དེས་བྲམ་ཟེའི་སྡེ་ཚན་འདི་སྐད་ཅེས། སོམ་ཉི་མ་རྒལ་གཅེར་བུའི་སྤྱོད་པ་དང་། །རལ་པ་རྫབ་དང་སྣ་ཚོགས་ཟས་དང་ནི། །ཐང་ལ་ཉལ་དང་རྡུལ་དང་དྲི་མ་དང་། ། ཙོག་བུའི་སྤོང་བས་མི་དག་འབྱུང་མི་འགྱུར། །འབྱུང་པོ་ཀུན་ལ་འཚེ་བ་རྣམ་སྤངས་ཏེ། །ཆོས་སྤྱོད་ཞི་དུལ་ཡང་དག་སྡོམ་པ་དང་། །ཚངས་སྤྱོད་ལྡན་པ་རྒྱན་གྱིས་བརྒྱན་གྱུར་ཀྱང་། །དེ་ཉིད་བྲམ་ཟེ་དགེ་སྦྱོང་དགེ་སློང་ཡིན། །ཞེས་ཁ་ཏོན་བྱ་བར་བརྩམས་སོ། །དེ་དག་གིས་

  216. 109a

    དེ་ཐོས་ནས་དེ་དག་གིས་བསམས་པ། བྲམ་ཟེ་དང་ཡང་དག་པར་ལྡན་པའི་ཚིགས་སུ་བཅད་པ་ཟེར་རོ་སྙམ་ནས་གཅིག་ཉེ་བར་འོངས་སོ། །དེ་བཞིན་དུ་གཉིས་པ་དང་། གསུམ་པ་ནས་དེ་དག་ཐམས་ཅད་ཀྱི་བར་དུ་ཉེ་བར་ལྷགས་པ་དང་། ལྷ་མོ་དེས་ཅི་ནས་ཀྱང་ དེ་དག་གཅིག་གིས་གཅིག་མི་མཐོང་བ་དེ་ལྟར་བྱིན་གྱིས་བརླབས་སོ། །དེའི་འོག་ཏུ་ཚེ་དང་ལྡན་པ་དགེ་འདུན་འཚོས་གྲོང་ཁྱེར་ལྟ་བུའི་མདོ་གདོན་པར་བརྩམས་སོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་ མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྔོན་ང་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་པའི་ཚེ་གཅིག་པུ་དབེན་པར་སོང་སྟེ་ནང་དུ་ཡང་དག་བཞག་པ་ན་ སེམས་ལ་སེམས་ཀྱི་ཡོངས་སུ་རྟོག་པ་འདི་ལྟ་བུ་བྱུང་སྟེ། ཀྱེ་མ་འཇིག་རྟེན་འདི་སྡུག་བསྔལ་བར་གྱུར་ཏེ། འདི་ལྟ་སྟེ་སྐྱེ་བར་འགྱུར། རྒ་བར་འགྱུར་འཆི་བར་འགྱུར། ཉམས་པར་འགྱུར། འབྱུང་བར་འགྱུར་ཡང་འོན་ཀྱང་སེམས་ཅན་འདི་དག་གིས་རྒ་ཤི་བས་བླ་མ་ཡོད་ བཞིན་དུ་ངེས་པར་འབྱུང་བ་ཡང་དག་པ་ཇི་ལྟ་བ་བཞིན་རབ་ཏུ་མི་ཤེས་སོ་སྙམ་ནས་ང་འདི་སྙམ་དུ་སེམས་ཏེ། གང་ཡོད་ན་རྒ་ཤི་འབྱུང་ཞིང་རྐྱེན་གང་གིས་རྒ་ཤི་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་སྐྱེ་བ་ཡོད་ན་རྒ་ཤི་འབྱུང་ཞིང་སྐྱེ་བའི་རྐྱེན་གྱིས་རྒ་ཤི་འབྱུང་ ངོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་སྐྱེ་བ་འབྱུང་ཞིང་རྐྱེན་གང་གིས་སྐྱེ་བ་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་སྲིད་པ་ཡོད་ན་སྐྱེ་བ་འབྱུང་ཞིང་སྲིད་པའི་རྐྱེན་གྱིས་སྐྱེ་བ་འབྱུང་ངོ་སྙམ་ དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་སྲིད་པ་འབྱུང་ཞིང་རྐྱེན་གང་གིས་སྲིད་པ་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་ལེན་པ་ཡོད་ན་སྲིད་པ་འབྱུང་ཞིང་ལེན་པའི་རྐྱེན་གྱིས་སྲིད་པ་འབྱུང་ངོ་སྙམ་དུ་ཡང་

  217. 109b

    དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་ལེན་པ་འབྱུང་ཞིང་རྐྱེན་གང་གིས་ལེན་པ་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་སྲེད་པ་ཡོད་ན་ལེན་པ་འབྱུང་ཞིང་སྲེད་པའི་རྐྱེན་གྱིས་ལེན་པ་འབྱུང་ངོ་སྙམ་དུ་ ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་སྲེད་པ་འབྱུང་ཞིང་རྐྱེན་གང་གིས་སྲེད་པ་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་ཚོར་བ་ཡོད་ན་སྲིད་པ་འབྱུང་ཞིང་ཚོར་བའི་རྐྱེན་གྱིས་སྲིད་པ་འབྱུང་ངོ་སྙམ་དུ་ ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་ཚོར་བ་འབྱུང་ཞིང་རྐྱེན་གང་གིས་ཚོར་བ་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་རེག་པ་ཡོད་ན་ཚོར་བ་འབྱུང་ཞིང་རེག་པའི་རྐྱེན་གྱིས་ཚོར་བ་འབྱུང་ངོ་སྙམ་ དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་རེག་པ་འབྱུང་ཞིང་རྐྱེན་གང་གིས་རེག་པ་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་སྐྱེ་མཆེད་དྲུག་ཡོད་ན་རེག་པ་འབྱུང་ཞིང་སྐྱེ་མཆེད་དྲུག་གི་རྐྱེན་གྱིས་ རེག་པ་འབྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་སྐྱེ་མཆེད་དྲུག་འབྱུང་ཞིང་རྐྱེན་གང་གིས་སྐྱེ་མཆེད་དྲུག་འབྱུང་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་མིང་དང་གཟུགས་ཡོད་ན་སྐྱེ་མཆེད་ དྲུག་འབྱུང་ཞིང་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་འབྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་མིང་དང་གཟུགས་འབྱུང་ཞིང་རྐྱེན་གང་གིས་མིང་དང་གཟུགས་འབྱུང་སྙམ་དུ་ང་ཚུལ་བཞིན་ཡིད་ ལ་བྱེད་པ་ན། འདི་ལྟར་རྣམ་པར་ཤེས་པ་ཡོད་ན་མིང་དང་གཟུགས་འབྱུང་ཞིང་རྣམ་པར་ཤེས་པའི་རྐྱེན་གྱིས་མིང་དང་གཟུགས་འབྱུང་ངོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་ཡོད་ན་རྣམ་པར་ཤེས་པ་འབྱུང་ཞིང་རྐྱེན་

  218. 110a

    གང་གིས་རྣམ་པར་ཤེས་པ་འབྱུང་སྙམ་པ་ལས། ངའི་ཡིད་རྣམ་པར་ཤེས་པ་ནས་ཕྱིར་ལོག་ཅིང་དེ་ཕན་ཆད་དུ་འཇུག་པར་མི་བྱེད་དེ། འདི་ལྟ་སྟེ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་ དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་རོ་སྙམ་མོ། །ང་འདི་སྙམ་དུ་སེམས་ཏེ། གང་མེད་ན་རྒ་ཤི་མི་འབྱུང་ཞིང་གང་འགགས་པས་རྒ་ཤི་འགག་སྙམ་དུ་ང་ཚུལ་བཞིན་ཡིད་ལ་བྱེད་ པ་ན། འདི་ལྟར་སྐྱེ་བ་མེད་ན་རྒ་ཤི་མི་འབྱུང་ཞིང་། སྐྱེ་བ་འགགས་པས་རྒ་ཤི་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་སྐྱེ་བ་མི་འབྱུང་ཞིང་གང་འགགས་པས་སྐྱེ་བ་འགག་སྙམ་དུ་ང་ཚུལ་བཞིན་ ཡིད་ལ་བྱེད་པ་ན། འདི་ལྟར་སྲིད་པ་མེད་ན་སྐྱེ་བ་མི་འབྱུང་ཞིང་། སྲིད་པ་འགགས་པས་སྐྱེ་བ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་སྲིད་པ་མི་འབྱུང་ཞིང་། གང་འགགས་པས་སྲིད་པ། འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་ལེན་པ་མེད་ན་སྲིད་པ་མི་འབྱུང་ཞིང་ལེན་པ་འགགས་པས་སྲིད་པ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་ལེན་པ་མི་འབྱུང་ཞིང་གང་ འགགས་པས་ལེན་པ་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་སྲེད་པ་མེད་ན་ལེན་པ་མི་འབྱུང་ཞིང་སྲེད་པ་འགགས་པས་ལེན་པ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་སྲེད་པ་མི་

  219. 110b

    འབྱུང་ཞིང་། གང་འགགས་པས་སྲེད་པ་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་ཚོར་བ་མེད་ན་སྲེད་པ་མི་འབྱུང་ཞིང་ཚོར་བ་འགགས་པས་སྲེད་པ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་ཚོར་བ་མི་འབྱུང་ཞིང་གང་འགགས་པས་ཚོར་བ་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་རེག་པ་མེད་ན་ཚོར་བ་མི་འབྱུང་ཞིང་རེག་པ་འགགས་པས་ཚོར་བ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་ དུ་སེམས་ཏེ། གང་མེད་ན་རེག་པ་མི་འབྱུང་ཞིང་གང་འགགས་པས་རེག་པ་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་སྐྱེ་མཆེད་དྲུག་མེད་ན་རེག་པ་མི་འབྱུང་ཞིང་སྐྱེ་མཆེད་དྲུག་འགགས་པས་རེག་པ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་ རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་སྐྱེ་མཆེད་དྲུག་མི་འབྱུང་ཞིང་གང་འགགས་པས་སྐྱེ་མཆེད་དྲུག་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་མིང་དང་གཟུགས་མེད་ན་སྐྱེ་མཆེད་དྲུག་མི་འབྱུང་ཞིང་མིང་དང་གཟུགས་འགགས་ པས་སྐྱེ་མཆེད་དྲུག་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་མིང་དང་གཟུགས་མི་འབྱུང་ཞིང་གང་འགགས་པས་མིང་དང་གཟུགས་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་རྣམ་པར་ཤེས་ པ་མེད་ན་མིང་དང་གཟུགས་མི་འབྱུང་ཞིང་རྣམ་པར་ཤེས་པ་འགགས་པས་མིང་དང་གཟུགས་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་རྣམ་པར་ཤེས་པ་མི་འབྱུང་ཞིང་གང་འགགས་པས་རྣམ་པར་ཤེས་པ་ འགག་གོ་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་འདུ་བྱེད་རྣམས་མེད་ན་རྣམ་པར་ཤེས་པ་མི་འབྱུང་ཞིང་འདུ་བྱེད་རྣམས་འགགས་པས་རྣམ་པར་ཤེས་པ་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་པར་རྟོགས་པར་གྱུར་ཏོ། །ང་འདི་སྙམ་དུ་སེམས་ཏེ། གང་མེད་ན་འདུ་

  220. 111a

    བྱེད་རྣམས་མི་འབྱུང་ཞིང་གང་འགགས་པས་འདུ་བྱེད་རྣམས་འགག་སྙམ་དུ་ང་ཚུལ་བཞིན་ཡིད་ལ་བྱེད་པ་ན། འདི་ལྟར་མ་རིག་པ་མེད་ན་འདུ་བྱེད་རྣམས་མི་འབྱུང་ཞིང་མ་རིག་པ་འགགས་པས་འདུ་བྱེད་རྣམས་འགག་གོ་སྙམ་དུ་ཡང་དག་པ་ཇི་ལྟ་བ་བཞིན་མངོན་ པར་རྟོགས་པར་གྱུར་ཏོ། །འདི་ལྟ་སྟེ་མ་རིག་པ་འགགས་པས་འདུ་བྱེད་རྣམས་འགག་འདུ་བྱེད་རྣམས་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་ མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་ དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་སྟེ། དེ་ལྟར་ན་སྡུག་བསྔལ་གྱི་ཕུང་པོ་འབའ་ཞིག་པ་འདི་འགག་པར་འགྱུར་རོ་སྙམ་མོ།། །།འདུལ་བ་གཞི། བམ་པོ་བཅུ་པ། དགེ་ སློང་དག་ང་འདི་སྙམ་དུ་སེམས་ཏེ་ངས་སྔོན་གྱི་ལམ་དང་། སྔོན་གྱི་བགྲོད་པ་དང་། སྔོན་གྱི་ལམ་སྲོལ་སྔོན་གྱི་དྲང་སྲོང་རྣམས་གཤེགས་ཤིང་རྗེས་སུ་འདོང་བ་རྙེད་དོ་སྙམ་མོ། །འདི་ལྟ་སྟེ་དཔེར་ན་མི་ཞིག་དགོན་པ་ནགས་མཆོག་ཏུ་འཁྱམ་ཞིང་འགྲོ་བ་ན་སྔོན་གྱི་ལམ་དང་། སྔོན་ གྱི་བགྲོད་པ་དང་། སྔོན་གྱི་ལམ་སྲོལ་སྔོན་གྱི་མི་རྣམས་དོང་ཞིང་རྗེས་སུ་འདོང་བ་ཞིག་རྙེད་ནས་དེ་དེའི་རྗེས་སུ་སོང་བ་དང་། སྔོན་གྱི་གྲོང་ཁྱེར་དང་། སྔོན་གྱི་རྒྱལ་པོའི་ཕོ་བྲང་ཀུན་དགའ་ར་བ་ཕུན་སུམ་ཚོགས་པ། ཚལ་ཕུན་སུམ་ཚོགས་པ། རྫིང་བུ་ཕུན་སུམ་ཚོགས་པ། བཟང་བ་ནགས་དང་ལྡན་པ། དགའ་བར་འགྱུར་བ་ཞིག་མཐོང་ཞིང་མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་རྒྱལ་པོའི་གན་དུ་སོང་སྟེ་བརྗོད་པར་བྱའོ་སྙམ་ནས། དེ་རྒྱལ་པོའི་གན་དུ་སོང་སྟེ་ལྷ་མཁྱེན་པར་མཛོད་ཅིག །འདི་ན་བདག་དགོན་པ་ནགས་མཆོག་ཅིག་ཏུ་

  221. 111b

    འཁྱམ་ཞིང་མཆི་བ་ན་སྔོན་གྱི་ཤུལ་དང་། སྔོན་གྱི་བགྲོད་པ་དང་། སྔོན་གྱི་ཤུལ་སྲོལ་སྔོན་གྱི་མི་རྣམས་མཆིས་ཤིང་རྗེས་སུ་མཆི་བ་ཞིག་རྙེད་ནས་བདག་དེའི་རྗེས་སུ་མཆིས་པ་དང་། སྔོན་གྱི་གྲོང་ཁྱེར་དང་། སྔོན་གྱི་རྒྱལ་པོའི་ཕོ་བྲང་ཀུན་དགའ་ར་བ་ཕུན་སུམ་ཚོགས་པ། ཚལ་ཕུན་སུམ་ཚོགས་པ། རྫིང་བུ་ཕུན་སུམ་ཚོགས་པ། བཟང་བ་ནགས་དང་ལྡན་པ། དགའ་བར་འགྱུར་བ་ཞིག་མཐོང་སྟེ་ལྷས་དེ་གྲོང་ཁྱེར་བགྱིད་དུ་གསོལ་ལ། དེ་རྒྱལ་པོའི་ཕོ་བྲང་བགྱིད་དུ་སྩོལ་ཅིག་དང་། དུས་གཞན་ན་དེ་རྒྱལ་པོའི་ཕོ་བྲང་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་བལྟམ་པར་འགྱུར་རོ་ཞེས་ཟེར་བ་དེ་བཞིན་དུ་དགེ་སློང་དག་ངས་ཀྱང་སྔོན་གྱི་ལམ་དང་། སྔོན་གྱི་བགྲོད་པ་དང་། སྔོན་གྱི་ལམ་སྲོལ་སྔོན་གྱི་དྲང་སྲོང་རྣམས་གཤེགས་ཤིང་རྗེས་སུ་འདོང་བ་རྙེད་དོ། །དགེ་སློང་དག་སྔོན་གྱི་ལམ་དང་། སྔོན་གྱི་བགྲོད་པ་དང་། སྔོན་གྱི་ལམ་སྲོལ་སྔོན་དྲང་སྲོང་རྣམས་གཤེགས་ཤིང་རྗེས་སུ་འདོང་བ་དེ་གང་ཞེ་ན། འདི་ལྟ་སྟེ། འཕགས་པའི་ལམ་ཡན་ལག་བརྒྱད་པ་འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་ དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏེ། དགེ་སློང་དག་འདི་ནི་སྔོན་གྱི་ལམ་དང་། སྔོན་གྱི་བགྲོད་པ་དང་། སྔོན་གྱི་ལམ་སྲོལ་སྔོན་གྱི་དྲང་སྲོང་རྣམས་ གཤེགས་ཤིང་རྗེས་སུ་འདོང་བ་ཡིན་ནོ། །ངས་དེར་སོན་ཅིང་དེར་སོན་པ་ན་རྒ་ཤི་མཐོང་། རྒ་ཤི་ཀུན་འབྱུང་བ་དང་། རྒ་ཤི་འགོག་པ་དང་། རྒ་ཤི་འགོག་པར་འགྲོ་བའི་ལམ་མཐོང་སྟེ། སྐྱེ་བ་དང་། སྲིད་པ་དང་། ལེན་པ་དང་། སྲེད་པ་དང་། ཚོར་བ་དང་། རེག་པ་དང་། སྐྱེ་མཆེད་དྲུག་དང་། མིང་དང་གཟུགས་དང་། རྣམ་པར་ཤེས་པ་དང་། འདུ་བྱེད་རྣམས་མཐོང་ཞིང་འདུ་བྱེད་རྣམས་ཀུན་འབྱུང་བ་དང་། འདུ་བྱེད་རྣམས་འགོག་པ་དང་། འདུ་བྱེད་རྣམས་འགོག་པར་འགྲོ་བའི་ལམ་མཐོང་སྟེ། ངས་རང་གི་མངོན་པར་ཤེས་པས་མངོན་པར་

  222. 112a

    རྫོགས་པར་བྱང་ཆུབ་ནས་དགེ་སློང་རྣམས་དང་། དགེ་སློང་མ་རྣམས་དང་། དགེ་བསྙེན་རྣམས་དང་། དགེ་བསྙེན་མ་རྣམས་དང་། གཞན་མུ་སྟེགས་ཅན་དང་། དགེ་སྦྱོང་དང་། བྲམ་ཟེ་དང་སྤྱོད་པ་ཅན་དང་། ཀུན་དུ་རྒྱུ་སྣ་ཚོགས་དག་ལ་བརྗོད་དོ། །དེ་ལ་དགེ་ སློང་གིས་ཀྱང་ཡང་དག་པར་སྒྲུབ་པ་ན་སྒྲུབ་པར་བྱེད་པ་ཡིན་ཞིང་རིགས་པ་དང་ལྡན་པ། ཆོས་དང་ལྡན་པ། དགེ་བ་སྒྲུབ་པར་བྱེད་དོ། །དགེ་སློང་མ་དང་། དགེ་བསྙེན་དང་། དགེ་བསྙེན་མས་ཀྱང་ཡང་དག་པར་སྒྲུབ་པ་ན་སྒྲུབ་པར་བྱེད་པ་ཡིན་ཞིང་། རིགས་པ་དང་ལྡན་པ། ཆོས་ དང་ལྡན་པ། དགེ་བ་སྒྲུབ་པར་བྱེད་དོ། །དེ་ལྟར་ན་ཚངས་པར་སྤྱོད་པ་འདི་ནི་རྒྱ་ཆེ་བ། སྐྱེ་བོ་མང་པོ་ལ་ཕན་པ། ཡང་དག་པར་གྱུར་པ། ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡིན་ནོ་ཞེས་བཏོན་ཅིང་། དེ་ནས་མཇུག་ཏུ། འབྱུང་པོ་གང་དག་འདིར་ནི་ལྷགས་ གྱུར་ཅིང་། །སའམ་འོན་ཏེ་བར་སྣང་འཁོད་པ་དག །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ཀྱང་སྤྱོད་གྱུར་ཅིག །ཅེས་ཡོངས་སུ་བསྔོས་པ་དང་། དེ་དག་ཐམས་ཅད་ཀྱིས་བདེན་པ་མངོན་པར་རྟོགས་མ་ཐག་ཏུ་ཕྱིར་མི་འོང་བའི་འབྲས་བུ་ ཐོབ་སྟེ་རྫུ་འཕྲུལ་ཡང་མངོན་པར་བསྒྲུབས་སོ། །དེ་ནས་དེ་དག་ཐམས་ཅད་ཀྱིས་བཙུན་པ་དགེ་འདུན་འཚོ་ལེགས་པར་གསུངས་སོ། །ལེགས་པར་གསུངས་སོ་ཞེས་མགྲིན་གཅིག་ཏུ་སྒྲ་ཕྱུང་ངོ་། །དེ་ནས་ལྷ་མོ་དེས་རྫུ་འཕྲུལ་མངོན་པར་འདུ་བྱ་བ་དེ་བརྟུལ་བ་དང་། གཅིག་གིས་ གཅིག་མཐོང་བར་གྱུར་ཏོ། །དེ་དག་གིས་གཅིག་གིས་གཅིག་མཐོང་ནས་སྨྲས་པ། ཀྱེ་ཁྱོད་ཀྱང་འོངས་སམ། ཁྱོད་འོངས་སམ། ཁོ་བོ་འོངས་སོ། །ལེགས་སོ། །དེ་དག་གིས་འབྱོར་པ་རྙེད་ཅིང་རྙེད་ནས་སྨྲས་པ། བཙུན་པ་དགེ་འདུན་འཚོས་བདག་ཅག་ལེགས་པར་ གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན་བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །དེས་འཛུམ་པ་སྔོན་དུ་བཏང་སྟེ་སྨྲས་པ། ཚེ་དང་ལྡན་པ་དག་ཁྱེད་སྤོབས་པ་རྒྱ་ཆེན་པོ་ཞུམ་པ་མེད་པ་

  223. 112b

    དགེ་བ་དང་ལྡན་པ་ལེགས་སོ་ལེགས་སོ། །བཅོམ་ལྡན་འདས་ཀྱིས་ཀྱང་ཕན་ཡོན་ལྔ་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པ་ཁོ་ནར་རིགས་ཏེ། ལྔ་གང་ཞེ་ན། བདག་གིས་རང་གི་དོན་མ་འདྲེས་པ་རྗེས་སུ་ཐོབ་པར་འགྱུར་རོ་ཞེས་བྱ་བར་ཡང་དག་པར་ རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང་། བདག་གང་དག་གི་བྲན་དང་། མངག་གཞུག་པ་དང་། བསྒོ་བ་དང་། རང་དབང་མེད་དང་། དགའ་མགུར་འགྲོར་མེད་པ་ཡིན་པ་དེ་དག་གི་མཆོད་པར་བྱ་བ་དང་། བསྟོད་པར་བྱ་བར་འགྱུར་ རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང་། གྲུབ་པ་དང་། བདེ་བ་བླ་ན་མེད་པའི་མྱ་ངན་ལས་འདས་པ་ཐོབ་པར་འགྱུར་རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་ པར་བྱ་བ་ཁོ་ནར་རིགས་པ་དང་། གྲུབ་པ་དང་། བདེ་བ་བླ་ན་མེད་པའི་མྱ་ངན་ལས་འདས་པ་འཐོབ་པ་ལས་ཉམས་ན་ཡང་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་རིགས་པ་དང་། རབ་ཏུ་བྱུང་ བ་ནི་སངས་རྒྱས་རྣམས་དང་། སངས་རྒྱས་ཀྱི་ཉན་ཐོས་དམ་པ་ཡང་དག་པར་སོང་བ། ཡང་དག་པར་ཞུགས་པ། སྐྱེས་བུ་དམ་པ་རྣམས་ཀྱིས་རྣམ་གྲངས་དུ་མས་བསྔགས་སོ་ཞེས་བྱ་བར་ཡང་དག་པར་རྗེས་སུ་མཐོང་བའི་མཁས་པས་རབ་ཏུ་འབྱུང་བ་ལ་མོས་པར་བྱ་བ་ཁོ་ནར་ རིགས་སོ་ཞེས་གསུངས་ཀྱིས་རབ་ཏུ་བྱུང་ཤིག །དེའི་ཕྱིར་ཅི། བཅོམ་ལྡན་འདས་ཀྱི་སྤྱན་སྔར་རབ་ཏུ་འབྱུང་ངམ། འོན་ཏེ་ཁོ་བོ་ལས། དེ་དག་གིས་སྨྲས་པ། བཅོམ་ལྡན་འདས་ཀྱི་སྤྱན་སྔར་རོ། །ཚེ་དང་ལྡན་པ་དགེ་འདུན་འཚོས་སྨྲས་པ། གལ་ཏེ་དེ་ལྟ་ན་ཚུར་ཤེག །བཅོམ་ ལྡན་འདས་ཀྱི་སྤྱན་སྔར་འདོང་ངོ་། །དེ་དག་གིས་སྨྲས་པ། བཙུན་པ་དགེ་འདུན་འཚོ་ཅི་བདག་ཅག་གི་རྫུ་འཕྲུལ་གྱིས་བཞུད་དམ། འོན་ཏེ་ཁྱོད་ཀྱི་རྫུ་འཕྲུལ་གྱིས། ཚེ་དང་ལྡན་པ་དགེ་འདུན་འཚོས་ཐོས་ནས་ཉམ་ང་བར་གྱུར་ཏེ། དེས་བསམས་པ། བདག་གི་མཐུས་འདི་

  224. 113a

    དག་གི་ཡོན་ཏན་གྱི་ཚོགས་འདི་ལྟ་བུ་ཐོབ་ན། བདག་ནི་གཟིངས་ལྟ་བུར་གྱུར་པ་ལྟ་སྙམ་ནས། དེ་བཞིན་ཉམས་ཤིང་གྱུར་ཏེ་སྨྲས་པ། ཚེ་དང་ལྡན་པ་དག་ཁྱེད་ཁོ་བོ་ལ་བྱ་བ་ཅུང་ཞིག་ཡོད་ཀྱིས། རེ་ཞིག་ཡུད་ཙམ་ཞིག་སྡོད་ཅིག་ཅེས་དེ་ཤིང་ལྗོན་པ་ ཞིག་གི་དྲུང་དུ་བརྟེན་ནས་སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲང་ནས་དྲན་པ་ཕྱོགས་པར་བཞག་སྟེ་འདུག་གོ། །བཅོམ་ལྡན་འདས་ཀྱིས་མང་དུ་ཐོས་པ་ལ་ཕན་ཡོན་ལྔ་ཡོད་དེ། ལྔ་གང་ཞེ་ན། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་ མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ་ཞེས་གསུངས་པས་དེས་བརྩོན་འགྲུས་བརྩམས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ཅིང་ཉོན་མོངས་པ་ཐམས་ཅད་སྤངས་པས། རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་ པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་ མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མཉམ་པ། རིག་པས་སྒོ་ངའི་སྦུབས་དྲལ་བར་ གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་

  225. 113b

    སྨྲ་བར་བྱ་བར་གྱུར་ཏོ། །དེས་དེ་དག་ལ་སྨྲས་པ། ཤེས་ལྡན་དག་ཁོ་བོའི་ཆོས་གོས་ཀྱི་གྲྭ་ནས་ཟུང་ཤིག་དང་། ཁོ་བོའི་རྫུ་འཕྲུལ་གྱིས་འདོང་བར་བྱའོ། །དེ་དག་དེའི་ཆོས་གོས་ཀྱི་གྲྭ་ལ་འཇུས་པ་དང་། དེ་ནས་ཚེ་དང་ལྡན་པ་དགེ་འདུན་འཚོ་ངང་པའི་རྒྱལ་པོ་འདབ་མ་བརྐྱང་ པ་ལྟར་རྫུ་འཕྲུལ་གྱིས་སྟེང་གི་ནམ་མཁའ་ལ་སོང་ངོ་། །ཇི་ཙམ་ན་ཚོང་པ་ལྔ་བརྒྱ་པོ་དེ་དག་རྫས་མཁོས་སུ་འབེབས་པར་བྱེད་པ་ན། དེ་དག་གིས་དེ་མཐོང་ནས་དེ་དག་གིས་སྨྲས་པ། འཕགས་པ་དགེ་འདུན་འཚོ་ཁྱོད་བྱོན་ཏམ། བྱོན་པ་ལེགས་སོ། །ཁོ་བོ་འོངས་སོ། ། གང་དུ་བཞུད། དེས་སྨྲས་པ། རིགས་ཀྱི་བུ་ལྔ་བརྒྱ་པོ་འདི་དག་བཅོམ་ལྡན་འདས་ཀྱི་སྤྱན་སྔར་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འདོད་པས་བཅོམ་ལྡན་འདས་ཀྱི་སྤྱན་སྔར་འགྲོའོ། །དེ་དག་གིས་སྨྲས་པ། འཕགས་པ་དགེ་འདུན་འཚོ་བདག་ཅག་ཀྱང་རབ་ཏུ་འབྱུང་གིས་བོབས་ལ་བདག་ཅག་རྫས་མཁོས་སུ་འབེབས་ཀྱི་བར་དུ་རེ་ཞིག་གཞེས་སུ་གསོལ། ཚེ་དང་ལྡན་པ་དགེ་འདུན་འཚོ་བབས་པ་དང་། དེ་དག་གིས་རྫས་མཁོས་སུ་ཕབ་བོ། །དེ་ནས་དེས་རིགས་ཀྱི་བུ་སྟོང་པོ་དེ་དག་ ཁྲིད་ནས་བཅོམ་ལྡན་འདས་ག་ལ་བ་དེར་སོང་ངོ་། །དེའི་ཚེ་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་གུང་ལ་བཞུགས་ཏེ་ཆོས་སྟོན་པར་མཛད་དོ། །བཅོམ་ལྡན་འདས་ཀྱིས་ཚེ་དང་ལྡན་པ་དགེ་འདུན་འཚོ་སྐྱེས་དང་ཆས་ཏེ་ཐག་རིང་པོ་ཁོ་ན་ནས་འོང་བ་གཟིགས་སོ། ། གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་དགེ་སློང་དགེ་འདུན་འཚོ་ཐག་རིང་པོ་ནས་འོང་བ་མཐོང་ངམ། བཙུན་པ་མཐོང་ངོ་། །དགེ་སློང་དག་དགེ་སློང་དགེ་འདུན་འཚོ་འདི་དེ་བཞིན་གཤེགས་པ་ལ་སྐྱེས་དང་བཅས་ཤིང་འོང་སྟེ། དེ་བཞིན་ གཤེགས་པའི་སྐྱེས་ནི་འདི་ལྟར་གདུལ་བ་ལས་གཞན་པ་ལྟ་བུ་མེད་དོ། །དེ་ནས་ཚེ་དང་ལྡན་པ་དགེ་འདུན་འཚོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་

  226. 114a

    འདུག་ནས་བཅོམ་ལྡན་འདས་ལ་ཚེ་དང་ལྡན་པ་དགེ་འདུན་འཚོས་འདི་སྐད་ཅེས་གསོལ་ཏོ། །བཙུན་པ་རིགས་ཀྱི་བུ་སྟོང་པོ་འདི་དག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་དག་རབ་ཏུ་དབྱུང་དུ་གསོལ། བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་ཞིང་དགེ་སློང་དག་ཚུར་ཤོག་ཚངས་པར་སྤྱོད་པ་སྤྱོད་ཅིག་ཅེས་བཀའ་སྩལ་པ་དང་། དེ་དག་བཅོམ་ལྡན་འདས་ཀྱི་ བཀའི་མཇུག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ན་ལྷུང་བཟེད་དང་བྱ་མ་བུམ་ཐོགས་པ་དང་། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་ གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། དེ་ནས་བཅོམ་ལྡན་འདས་ཀྱིས་དེ་དག་ལ་གདམས་ངག་སྩལ་ནས། དེ་དག་ གིས་བརྩོན་པ་དང་། འབད་པ་དང་། བརྩལ་བས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མཉམ་པ། རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་དགེ་འདུན་འཚོས་ཞུས་པ། བཙུན་པ་འདི་ན་བདག་གིས་སེམས་ཅན་རྩིག་པ་འདྲ་བ་དག་དང་། ཀ་བ་འདྲ་བ་དག་དང་། ཤིང་ལྗོན་པ་འདྲ་བ་

  227. 114b

    དག་དང་། ལོ་མ་འདྲ་བ་དག་དང་། མེ་ཏོག་འདྲ་བ་དག་དང་། འབྲས་བུ་འདྲ་བ་དག་དང་། ཐག་པ་འདྲ་བ་དག་དང་། ཕྱགས་མ་འདྲ་བ་དག་དང་། ཕོར་པ་འདྲ་བ་དག་དང་། གཏུན་འདྲ་བ་དག་དང་། ཕྲུ་བ་འདྲ་བ་དག་དང་། རྐེད་པ་ཆད་པ་ཆུ་རྒྱུས་ཀྱིས་བཟུང་བ་མཐོང་ན། བཙུན་པ་དེ་དག་གིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་དེ་འདྲ་བ་དག་ཏུ་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་འཚོ་སེམས་ཅན་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་ པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསྩགས་པས་དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་འདུན་འཚོ་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་ བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་འདུན་འཚོ་སྔོན་བྱུང་པ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་ པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་ སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་པ་ན་དེ་དག་དེའི་ཉན་ཐོས་སུ་གྱུར་ཏོ། །དགེ་འདུན་འཚོ་ཁྱོད་ཀྱིས་སེམས་ཅན་རྩིག་པ་འདྲ་བ་གང་དག་མཐོང་བ་དེ་དག་ནི་དགེ་སློང་དག་ཏུ་གྱུར་པ་ན། དེ་དག་གིས་དགེ་འདུན་གྱི་རྩིག་པ་མཆིལ་མས་མ་རུང་བར་

  228. 115a

    བྱས་པས་ལས་དེའི་རྣམ་པར་སྨིན་པས་རྩིག་པ་འདྲ་བ་དག་ཏུ་གྱུར་ཏོ། །ཁྱོད་ཀྱིས་སེམས་ཅན་ཀ་བ་འདྲ་བ་གང་དག་མཐོང་བ་དེ་དག་ཀྱང་དགེ་སློང་དག་ཏུ་གྱུར་པ་ན། དེ་དག་གིས་དགེ་འདུན་གྱི་ཀ་བ་སྣབས་ཀྱིས་མ་རུང་བར་བྱས་པས་ལས་དེའི་རྣམ་པར་སྨིན་པས་ ཀ་བ་འདྲ་བ་དག་ཏུ་གྱུར་ཏོ། །ཁྱོད་ཀྱིས་སེམས་ཅན་ཤིང་ལྗོན་པ་འདྲ་བ་དག་དང་། ལོ་མ་འདྲ་བ་དག་དང་། མེ་ཏོག་འདྲ་བ་དག་དང་། འབྲས་བུ་འདྲ་བ་གང་དག་མཐོང་བ་དེ་དག་ཀྱང་དགེ་སློང་དག་ཏུ་གྱུར་པ་ན། དེ་དག་གིས་དགེ་འདུན་གྱི་ཤིང་ལྗོན་པ་དང་། ལོ་མ་དང་། མེ་ ཏོག་དང་། འབྲས་བུ་དག་གང་ཟག་གི་ལོངས་སྤྱོད་དུ་སྤྱད་པས་ལས་དེའི་རྣམ་པར་སྨིན་པས་ཤིང་ལྗོན་པ་འདྲ་བ་དག་དང་། ལོ་མ་འདྲ་བ་དག་དང་། མེ་ཏོག་འདྲ་བ་དག་དང་། འབྲས་བུ་འདྲ་བ་དག་ཏུ་གྱུར་ཏོ། །ཁྱོད་ཀྱིས་སེམས་ཅན་ཐག་པ་འདྲ་བ་དག་དང་། ཕྱགས་མ་འདྲ་ བ་དག་མཐོང་བ་དེ་དག་ཀྱང་དགེ་སློང་དག་ཏུ་གྱུར་པ་ན། དེ་དག་གིས་དགེ་འདུན་གྱི་ཐག་པ་དང་ཕྱགས་མ་གང་ཟག་གིས་ལོངས་སྤྱོད་དུ་སྤྱད་པས་ལས་དེའི་རྣམ་པར་སྨིན་པས་ཐག་པ་འདྲ་བ་དག་དང་། ཕྱགས་མ་འདྲ་བ་དག་ཏུ་གྱུར་ཏོ། །ཁྱོད་ཀྱིས་སེམས་ཅན་ཕོར་པ་འདྲ་བ་དག་ གང་དག་མཐོང་བ་དེ་དག་ནི་དགེ་ཚུལ་སྐོམ་གྱི་གཙང་སྦྱོར་དུ་གྱུར་པ་ན་དེ་དག་ཕོར་པ་འཁྲུ་བར་བྱེད་པའི་ཚེ། དགེ་སློང་གློ་བུར་དུ་འོངས་པ་དག་ལྷགས་ནས་དེ་དག་གིས་དགེ་ཚུལ་དེ་དག་ལ་དྲིས་པ། དགེ་ཚུལ་དག་ཅི་དགེ་འདུན་ལ་སྐོམ་འབྱུང་བར་འགྱུར་རམ། དགེ་ཚུལ་དེ་དག་སེར་ སྣས་དཀྲིས་ཏེ་སྨྲས་པ། ཁོ་བོ་ཅག་གིས་ཕོར་པ་བཀྲུས་པ་མ་མཐོང་ངམ། སྐོམ་འཐུངས་ཟིན་ཏོ། །དེ་དག་གིས་བསམས་པ། དུས་ཡོལ་བ་ལྟ་སྙམ་ནས། རེ་བ་མེད་པར་གྱུར་ཏེ་བཞིན་གྱུར་ཅིང་ཉམས་ཏེ་དོང་བས་ལས་དེའི་རྣམ་པར་སྨིན་པས་ཕོར་པ་འདྲ་བ་དག་ཏུ་གྱུར་ཏོ། ། ཁྱོད་ཀྱིས་སེམས་ཅན་གཏུན་འདྲ་བ་གང་དག་མཐོང་བ་དེ་དག་ཀྱང་དགེ་སློང་དག་ཏུ་གྱུར་པ་ན། དེ་དག་ལ་ལྷུང་བཟེད་ཀྱི་ལས་དག་བྱུང་ནས་དེ་ན་དགེ་ཚུལ་དགྲ་བཅོམ་པ་ཅིག་དམ་ཞག་པར་བསྐོས་པ་དེ་ལ་དེ་དག་གིས་སྨྲས་པ། དགེ་ཚུལ་ཁོ་བོ་ཅག་ལ་གཏུན་དུ་འབྲུ་མར་གྱི་ཚིགས་མ་

  229. 115b

    ཉུང་བ་ཞིག་རྡུངས་ཏེ་བྱིན་ཅིག །དེས་སྨྲས་པ། གནས་བརྟན་དག་བདག་བྲེལ་གྱིས་རེ་ཞིག་ཡུད་ཙམ་ཞིག་གཞེས་ཤིག་དང་། སླད་ཀྱིས་གསོལ་ལོ། །དེ་དག་མི་བཟོད་པ་སྐྱེས་ནས་ཀུན་ནས་དཀྲིས་པ་དྲག་པོས་སྨྲས་པ། དགེ་ཚུལ་གལ་ཏེ་ཁོ་བོ་ཅག་གཏུན་ལ་རེག་ཏུ་རུང་ན་ཁོ་ བོ་ཅག་གིས་ཁྱོད་ཉིད་གཏུན་དུ་བཅུག་སྟེ། བརྡུང་བར་ཡང་བྱ་ན། འབྲུ་མར་ཚིགས་མ་ཉུང་ཞིག་ལྟ་ཅི་སྨོས། དགེ་ཚུལ་དེས་བསམས་པ། འདི་དག་ཀུན་ནས་དཀྲིས་པ་དྲག་པོས་དཀྲིས་པས་གལ་ཏེ་བདག་གིས་འདི་དག་ལ་ལན་བཏབ་ན་ལྷག་པར་ཡང་རབ་ཏུ་འཁྲུགས་ པར་འགྱུར་རོ་སྙམ་ནས། དེས་ཅང་མི་སྨྲ་བར་བསྡད་ནས་གང་གི་ཚེ་དེ་དག་ཀུན་ནས་དཀྲིས་པ་དང་བྲལ་བ་དེའི་ཚེ་ན་གན་དུ་སོང་སྟེ་སྨྲས་པ། གནས་བརྟན་དག་ཁྱེད་ཀྱིས་བདག་སུ་ལགས་པ་མཁྱེན་ཏམ། དེ་དག་གིས་སྨྲས་པ། ཤེས་ཏེ། ཁྱོད་ནི་ཡང་དག་པར་རྫོགས་པའི་ སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བའི་དགེ་ཚུལ་ཡིན་ནོ། །ཁོ་བོ་ཅག་ཀྱང་དགེ་སློང་ཡིན་ནོ། །གནས་བརྟན་དག་གལ་ཏེ་དེ་ལྟར་ལགས་ཀྱིས་ཀྱང་འདི་ལྟར་བདག་གིས་ནི་རབ་ཏུ་བྱུང་བས་བགྱི་བ་གང་ལགས་པ་དེ་བགྱིས་སོ། །ཅི་ཞིག་བྱས། ཉོན་མོངས་པ་ཐམས་ ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས་སོ། །ཁྱེད་ནི་འཆིང་བ་མཐའ་དག་གིས་བཅིངས་པ་ལགས་ལ། བདག་ནི་འཆིང་བ་མཐའ་དག་ལས་ངེས་པར་གྲོལ་བ་ལགས་ན། ཁྱེད་ཀྱིས་ངག་གི་ལས་རྩུབ་པོ་བརྗོད་ཀྱིས་སྡིག་པ་སྡིག་པ་ལས་ཤོགས་ཤིག་དང་། དེ་ ལྟར་ན་ལས་བསྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་མཐར་ཐུག་པར་འགྱུར་རོ། །དེ་དག་གིས་སྡིག་པ་སྡིག་པ་ལས་བཤགས་ཀྱང་ལས་དེའི་རྣམ་པར་སྨིན་པས་གཏུན་འདྲ་བ་དག་ཏུ་གྱུར་ཏོ། །ཁྱོད་ཀྱིས་སེམས་ཅན་ཕྲུ་བ་འདྲ་བ་གང་དག་མཐོང་བ་དེ་དག་ནི་དགེ་འདུན་ རྣམས་ལ་རིམ་གྲོར་བྱེད་པའི་ལྷ་འབངས་སུ་གྱུར་ཏེ། དེ་དག་སྨན་སྐོལ་བར་བྱེད་པ་ན། དགེ་སློང་རྣམས་ཀྱིས་མི་སྙན་པར་སྨྲས་པ་དང་། དེ་དག་སེམས་རབ་ཏུ་ཁྲོས་པས་ཕྲུ་བ་དེ་དག་བཅག་པས། ལས་དེའི་རྣམ་པར་སྨིན་པས་ཕྲུ་བ་འདྲ་བ་དག་ཏུ་གྱུར་ཏོ། །ཁྱོད་ཀྱིས་སེམས་

  230. 116a

    ཅན་རྐེད་པ་ཆད་པ་ཆུ་རྒྱུས་ཀྱིས་བཟུང་བ་གང་དག་མཐོང་བ་དེ་དག་ཀྱང་དགེ་སློང་རྙེད་པ་སྟོབས་པ་དག་ཏུ་གྱུར་པ་ན། དེ་དག་སེར་སྣས་ཟིལ་གྱིས་ནོན་པས་རྙེད་པ་བསྒྱུར་ཏེ། དབྱར་གྱི་རྙེད་པ་གང་ཡིན་པ་དེ་ནི་དགུན་གྱིར་བསྒྱུར། དགུན་གྱི་རྙེད་པ་གང་ཡིན་པ་དེ་ནི་དབྱར་གྱིར་ བསྒྱུར་བས་ལས་དེའི་རྣམ་པར་སྨིན་པས་རྐེད་པ་ཆད་པ་ཆུ་རྒྱུས་ཀྱིས་བཟུང་བ་དག་ཏུ་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་དགེ་འདུན་འཚོས་ལས་ཅི་ཞིག་བགྱིས་ན། ལས་དེའི་ རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང་དགྲ་བཅོམ་པ་ཉིད་མངོན་དུ་བགྱིས་པ་དང་། གདུལ་བའི་དོན་ཆེན་པོ་བགྱིས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་འདུན་འཚོ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་ སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས། དགེ་སློང་དགེ་འདུན་འཚོ་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་ བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་ མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན། བསྐལ་པ་བཟང་པོ་འདི་ཉིད་ལ་སྐྱེ་ དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་

  231. 116b

    བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་ཞལ་ཏ་བྱེད་པར་གྱུར་ཅིང་དེ་ལ་ལྷན་ཅིག་གནས་པ་ལྔ་བརྒྱ་ཡོད་པར་གྱུར་ཏོ། །རི་བྲགས་ན་ གནས་པའི་སྐྱེ་བོའི་ཚོགས་དེ་ཡང་ཕལ་ཆེར་དེ་ལ་མངོན་པར་དད་པར་གྱུར་ཏོ། །དེ་ནས་དེས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པ་ན་ཡོན་ཏན་གྱི་ཚོགས་འགའ་ཡང་མ་ཐོབ་བོ། །དེ་དུས་གཞན་ཞིག་ན་ན་བར་གྱུར་ནས་དེ་ལ་རྩ་བ་དང་། སྡོང་བུ་དང་། ལོ་མ་དང་། མེ་ཏོག་ དང་། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ནད་དེ་ཉེ་བར་ཞི་བར་མ་གྱུར་ཅིང་ཉམ་དམས་ནས་དེ་འཆི་བའི་དུས་ཀྱི་ཚེ་སྨོན་ལམ་འདི་སྐད་ཅེས། བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་པ་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ ལ། བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་ མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག་ཅེས་གདབ་པར་བརྩམས་ སོ། །དེ་ནས་དེའི་ལྷན་ཅིག་གནས་པ་དག་ལྷགས་ཏེ་དྲིས་པ། མཁན་པོས་ཡོན་ཏན་གྱི་ཚོགས་ཅུང་ཟད་བརྙེས་པ་མཆིས་སམ། དེས་སྨྲས་པ་མེད་དོ། །དེ་དག་གིས་དྲིས་པ། སྨོན་ལམ་ཇི་སྐད་བཏབ། དེས་སྨྲས་པ། འདི་དང་འདི་སྐད་ཅེས་སོ། །དེ་དག་གིས་སྨྲས་པ།

  232. 117a

    བདག་ཅག་ཀྱང་དགེ་བའི་བཤེས་གཉེན་མཁན་པོ་ལ་བརྟེན་ནས་བཅོམ་ལྡན་འདས་དེ་ཉིད་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག །དེ་ནས་རི་བྲགས་ན་གནས་པའི་སྐྱེ་བོའི་ཚོགས་ དེས་འཕགས་པ་དེ་ནའོ་ཞེས་ཐོས་ནས་དེ་དག་ཀྱང་དེའི་གན་དུ་སོང་སྟེ་དྲིས་པ། འཕགས་པས་ཡོན་ཏན་གྱི་ཚོགས་ཅུང་ཟད་བརྙེས་པ་མཆིས་སམ། དེས་སྨྲས་པ་མེད་དོ། །དེ་དག་གིས་སྨྲས་པ། སྨོན་ལམ་ཇི་སྐད་བཏབ། དེས་སྨྲས་པ། འདི་དང་འདི་སྐད་ཅེས་སོ། །དེ་དག་ གིས་སྨྲས་པ། བདག་ཅག་ཀྱང་དགེ་བའི་བཤེས་གཉེན་འཕགས་པ་ལ་བརྟེན་ནས་བཅོམ་ལྡན་འདས་དེ་ཉིད་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་པར་གྱུར་ཅིག །དགེ་སློང་དག་དེ་ལ་དེའི་ཚེ་དེའི་དུས་ན་དགེ་སློང་ ཞལ་ཏ་བྱེད་པར་གྱུར་པ་གང་ཡིན་པ་དེ་ནི་དགེ་སློང་དགེ་འདུན་འཚོ་འདི་ཉིད་ཡིན་ནོ། །དེའི་ལྷན་ཅིག་གནས་པ་ལྔ་བརྒྱ་པོ་གང་དག་ཡིན་པ་དེ་དག་ནི་དྲང་སྲོང་ལྔ་བརྒྱ་པོ་འདི་དག་ཉིད་ཡིན་ནོ། །རི་བྲགས་ན་གནས་པའི་སྐྱེ་བོའི་ཚོགས་གང་ཡིན་པ་དེ་དག་ནི་ཚོང་པ་ལྔ་བརྒྱ་པོ་འདི་དག་ ཡིན་ནོ། །འདིས་དེར་ཆོས་དང་ལྡན་པས་ཞལ་ཏ་བྱས་པ་གང་ཡིན་པའི་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་བ་ལོངས་སྤྱོད་ཆེ་བའི་ཁྱིམ་དུ་སྐྱེས་སོ། །འཆི་བའི་དུས་ཀྱི་ཚེ་སྨོན་ལམ་བཏབ་པ་དེས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་ བྱས་ཤིང་གདུལ་བའི་དོན་ཆེན་པོ་བྱས་པར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་ པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ་ལས་གཅིག་ཏུ་དཀར་བ་རྣམས་ལ་བཙལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་

  233. 117b

    ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀླུ་གཞོན་ནུ་སྤྲུལ་པས་དང་པོ་གང་དུ་དད་པ་ཐོབ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན། སྟོན་པ་དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་ འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིའི་འཁོར་དང་། བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེ་ཉན་ཐོས་རྣམས་ལ་དགེ་སློང་དག་དགོན་པ་དང་། ཤིང་དྲུང་དང་། ཁྱིམ་གྱིས་སྟོང་པ་དང་། རི་སུལ་དང་། རི་ཕུག་དང་། རྩ་ སྤྱིལ་དང་། བླ་གབ་མེད་པ་དང་། དུར་ཁྲོད་དང་། ནགས་ཁྲོད་དང་། རི་དྲུང་དང་། བས་མཐའི་གནས་མལ་འདི་དག་ཏུ་བསམ་གཏན་གྱིས་ཤིག །དགེ་སློང་དག་བག་ཡོད་པར་སྒྲུབས་ལ་ཕྱིས་འགྱོད་པར་མི་འགྱུར་བར་གྱིས་ཤིག །འདི་ནི་ངའི་གདམས་ངག་དང་རྗེས་ སུ་བསྟན་པ་ཡིན་ནོ་ཞེས་ཆོས་སྟོན་པར་མཛད་དོ། །བཅོམ་ལྡན་འདས་ཀྱིས་དགེ་སློང་རྣམས་ལ་དེ་སྐད་ཅེས་བཀའ་སྩལ་ནས། དགེ་སློང་རྣམས་དགོན་པ་དང་། ཤིང་དྲུང་དང་། ཁྱིམ་གྱིས་སྟོང་པ་དང་། རི་སུལ་དང་། རི་ཕུག་དང་། རྩྭ་སྤྱིལ་དང་། བླ་གབ་མེད་པ་ དང་། དུར་ཁྲོད་དང་། ནགས་ཁྲོད་དང་། རི་དྲུང་དང་། བས་མཐའི་གནས་མལ་དག་ཏུ་ཞུགས་སོ། །ཁ་ཅིག་ནི་རི་རབ་ཀྱི་བང་རིམ་ན་བསམ་གཏན་བྱེད། ཁ་ཅིག་ནི་གསེར་གྱི་རི་བདུན་པོ་དག་ན། ཁ་ཅིག་ནི་མཚོ་ཆེན་པོ་མ་དྲོས་པ་ན། ཁ་ཅིག་ནི་རྫིང་བུ་དལ་གྱིས་ འབབ་ན། ཁ་ཅིག་ནི་རྣལ་འབྱོར་པའི་སྐྱེ་བོ་དང་རྗེས་སུ་མཐུན་པའི་གྲོང་དང་། གྲོང་རྡལ་དང་། ཡུལ་དང་། ཡུལ་འཁོར་དང་། རྒྱལ་པོའི་ཕོ་བྲང་གི་ཕྱོགས་དེ་དང་དེ་དག་ན་བསམ་གཏན་བྱེད་དོ། །ཇི་ཙམ་ན་ཀླུ་གཞོན་ནུ་སྐྱེས་ནས་རིང་པོ་མ་ལོན་པ་ཞིག་འདབ་ཆགས་ཀྱི་

  234. 118a

    རྒྱལ་པོ་འདབ་བཟངས་ཀྱིས་རི་རབ་ཀྱི་བང་རིམ་གྱི་སྟེང་དུ་དྲངས་པ་དང་། ཇི་ཙམ་ན་དེས་དགེ་སློང་སྤྱོད་ལམ་ཞི་བས་བསམ་གཏན་དང་། ཀློག་པ་དང་། རྣལ་འབྱོར་ལ་རྗེས་སུ་བརྩོན་པ་དག་མཐོང་ངོ་། །མཐོང་ནས་ཀྱང་དེའི་སེམས་མངོན་པར་དད་པར་གྱུར་ཏོ། ། དེ་སེམས་དད་པ་སྐྱེས་ནས་འཕགས་པ་བདག་ཉིད་ཆེན་པོ་འདི་དག་ནི་སྡུག་བསྔལ་གྱི་བྱེ་བྲག་འདི་ལྟ་བུ་ལས་གྲོལ་བ་ཡིན་ནོ་སྙམ་དུ་སེམས་སྐྱེད་པར་བྱེད་ཅིང་། དེ་དེ་དག་ལ་སེམས་མངོན་པར་དད་པར་བྱས་ནས་དུས་ལ་བབ་པ་དང་། ལས་དྲུག་ལ་བརྩོན་པའི་བྲམ་ཟེའི་ཁྱིམ་ཞིག་ཏུ་ སྐྱེས་ནས་ཇི་ཙམ་ན་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དེ་དུས་གཞན་ཞིག་ན་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་རབ་ཏུ་བྱུང་ནས་དེས་བརྩོན་པ་དང་། འབད་པ་དང་། བརྩལ་བས་ཉོན་མོངས་པ་ཐམས་ཅད་སྤངས་པས་ དགྲ་བཅོམ་པ་ཉིད་མངོན་དུ་བྱས་ཏེ། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མཉམ་པ། རིག་པས་སྒོ་ངའི་སྦུབས་དྲལ་ བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེས་བསམས་པ། བདག་ག་ལས་ཤི་འཕོས། གང་དུ་སྐྱེས། ལས་གང་གིས་བྱས་སྙམ་ན། དེས་དུད་འགྲོ་ནས་ཤི་འཕོས་ཤིང་མི་རྣམས་ཀྱི་ནང་དུ་སྐྱེས་པ་དང་། ཉན་ཐོས་ཆེན་པོ་རྣམས་ལ་སེམས་མངོན་པར་དད་པར་བྱས་པས་སྐྱེས་པར་ མཐོང་ངོ་། །དེས་ཕ་མ་ལ་བསམས་ཏེ། བདག་གི་ཕ་མ་ག་ལ་འདུག་སྙམ་ན། ཀླུའི་གནས་ན་འདུག་པར་མཐོང་ངོ་། །ཅི་བྱེད་སྙམ་ན། ཀླུའི་སྐྱེ་གནས་ན་ངུ་ཞིང་འདུག་པར་མཐོང་ནས་དེ་རྫུ་འཕྲུལ་གྱིས་དེར་སོང་སྟེ་དྲི་བར་བརྩམས་པ། ཡབ་ཡུམ་ཅིའི་སླད་དུ་བཤུམ། དེ་གཉིས་

  235. 118b

    ཀྱིས་སྨྲས་པ། འཕགས་པ་བདག་ཅག་གི་ཀླུ་གཞོན་ནུ་སྐྱེས་ནས་རིང་པོ་མ་ལགས་པ་ཞིག་འདབ་ཆགས་ཀྱི་རྒྱལ་པོ་འདབ་བཟངས་ཀྱིས་ཕྲོགས་ན། དེ་གར་མཆིས་མ་འཚལ་ཏོ། །དེས་སྨྲས་པ། ཡབ་ཡུམ་དེ་ནི་བདག་ཉིད་ལགས་ཏེ། ཤི་ཞིང་དུས་ལ་བབ་ནས་ལས་ དྲུག་ལ་བརྩོན་པའི་བྲམ་ཟེའི་ཁྱིམ་དུ་སྐྱེས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བགྱིས་སོ། །འཕགས་པ་དེ་འདྲ་བར་སྐྱོན་ཆགས་པར་གྱུར་པ་དེ་བདག་ཅག་གིས་ བདེ་འགྲོར་མཆི་བར་ཡང་མ་བསམས་ན། དགྲ་བཅོམ་པ་ལྟ་ཅི་སྨོས་ཏེ། དེ་ནི་ངོ་མཚར་དང་རྨད་དུ་བྱུང་བ་ལགས་ན། ཁྱོད་ཀྱིས་ཡོན་ཏན་གྱི་ཚོགས་དེ་ལྟ་བུ་བརྙེས་སམ། ཐོབ་བོ། །འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ། བདག་ཅག་ནི་བསོད་ ནམས་འཚལ་བ་ལགས་ཀྱིས། ཁྱོད་འདི་ཉིད་དུ་གདུགས་རེ་རེ་ཞིང་གཤེགས་ཏེ། ཞལ་ཟས་ཀྱི་བྱ་བ་མཛོད་ལ་བཞུད་ཅིག །དེས་དང་དུ་བླངས་ནས་དེས་རྟག་པར་ཀླུའི་གནས་སུ་བདུད་རྩི་ཟོས་ཤིང་ལྡོག་པར་བྱེད་དོ། །དེའི་ལྷན་ཅིག་གནས་པའི་དགེ་ཚུལ་དེ་ལ་དགེ་ སློང་རྣམས་ཀྱིས་སྨྲས་པ། དགེ་ཚུལ་ཁྱོད་ཀྱི་མཁན་པོ་འདི་གང་དུ་ཟོས་ཤིང་འོང་། དེས་སྨྲས་པ། མ་འཚལ་ཏོ། །དེ་དག་གིས་སྨྲས་པ། ཀླུའི་གནས་སུ་ལྷའི་བདུད་རྩི་ཟོས་ཤིང་འོང་ན་ཁྱོད་ཅིའི་ཕྱིར་མི་འགྲོ། དེས་སྨྲས་པ། དེ་ནི་རྫུ་འཕྲུལ་ཆེ་བ་མཐུ་ཆེ་བ་ལགས་པས་ དེས་མཆི་ན་བདག་ཉིད་ཇི་ལྟར་མཆི། དེ་དག་གིས་སྨྲས་པ། གང་གི་ཚེ་འདི་རྫུ་འཕྲུལ་གྱིས་འགྲོ་བ་དེའི་ཚེ་ན་ཁྱོད་ཀྱིས་འདིའི་ཆོས་གོས་ཀྱི་གྲྭ་ནས་ཟུང་ཤིག །དེས་སྨྲས་པ། མི་ལྟུང་ངམ། བཞིན་བཟངས་གལ་ཏེ་དེའི་ཆོས་གོས་ཀྱི་གྲྭ་ལ་རིའི་རྒྱལ་པོ་རི་རབ་བཏགས་ན་ དེ་ཡང་མི་ལྟུང་ན་ཁྱོད་ལྟ་ཅི་སྨོས། དེ་དག་གིས་དེ་སྤྲོ་བར་བྱས་ནས། གནས་གང་དུ་དེ་རྫུ་འཕྲུལ་གྱིས་མི་སྣང་བར་བྱེད་པ་དེར་སོང་སྟེ་བསྡད་པ་དང་། དེ་ཡང་མི་སྣང་བར་བྱེད་ནས། དེས་ཀྱང་ཆོས་གོས་ཀྱི་གྲྭ་ནས་བཟུང་སྟེ། དེ་གཉིས་སྟེང་གི་ནམ་མཁའ་ལ་དོང་ངོ་། །ཇི་ཙམ་

  236. 119a

    ན་ཀླུ་རྣམས་ཀྱིས་མཐོང་ནས་དེ་གཉིས་ཀྱི་ཕྱིར་སྟན་གཉིས་བཤམས་ཤིང་དཀྱིལ་འཁོར་ཡང་གཉིས་བྱས་སོ། །དེས་བསམས་པ། ཅིའི་ཕྱིར་སྟན་བཤམས་པ་དང་། དཀྱིལ་འཁོར་གཞན་འདི་བྱས་སྙམ་ནས། དེས་རྒྱབ་ཏུ་བལྟ་བར་བརྩམས་པ་དང་། ཇི་ཙམ་ན་དགེ་ཚུལ་དེ་མཐོང་ནས། དེས་སྨྲས་པ། བུ་ཁྱོད་ཀྱང་འོངས་སམ། མཁན་པོ་མཆིས་སོ། །ལེགས་སོ། །ཀླུ་རྣམས་ཀྱིས་བསམས་པ། འཕགས་པ་འདི་ནི་རྫུ་འཕྲུལ་ཆེ་བ་མཐུ་ཆེ་བ་ཡིན་པས་ལྷའི་བདུད་རྩི་ཞུ་བར་ནུས་ན། འཕགས་པ་འདིས་ནི་ཞུ་བར་མི་ནུས་ཀྱིས། འདི་ལ་ཁ་ཟས་ཐ་མལ་པ་སྦྱིན་པར་བྱའོ་སྙམ་ནས། དེ་རྣམས་ཀྱིས་གཅིག་ལ་ནི་ལྷའི་བདུད་རྩི་བྱིན་ནོ། །དགེ་ཚུལ་ལ་ནི་ཁ་ཟས་ཐ་མལ་པ་བྱིན་ནོ། །དགེ་ཚུལ་དེ་དེའི་ལྷུང་བཟེད་ཐོགས་པ་ཡིན་པས་དེས་མཁན་པོ་ལ་ལྷུང་བཟེད་བླངས་པ་དང་། དེ་འབྲས་ཅན་གྱི་གཟེགས་མ་ གཅིག་ཆགས་ནས། དགེ་ཚུལ་དེས་དེ་ཁར་བཅུག་སྟེ་མྱངས་ན་ལྷའི་བདུད་རྩི་ཡིན་ནས། དེས་བསམས་པ། ཀླུ་རྣམས་ནི་སེར་སྣ་ཅན་ཡིན་ཏེ། ལྷན་ཅིག་ཏུ་འཁོད་པ་གཉིས་ལ། གཅིག་ལ་ནི་ལྷའི་བདུད་རྩི་བྱིན་ལ། གཅིག་ལ་ནི་ཁ་ཟས་ཐ་མལ་པ་བྱིན་ནོ་སྙམ་མོ། ། དེ་ནས་དེ་མི་བཟོད་པ་སྐྱེས་པས་བདག་གིས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་གི་སྤྱན་སྔར་ཚངས་པར་སྤྱོད་པ་སྤྱད་པ་གང་ཡིན་པའི་དགེ་བའི་རྩ་བ་འདིས་བདག་ཀླུ་འདི་གནས་འདི་ནས་ཉམས་པར་བྱས་ཏེ་འདི་ཉིད་དུ་སྐྱེ་བར་གྱུར་ ཅིག་ཅེས་སྨོན་ལམ་ལོག་པར་བཏབ་བོ། །ལས་ཤིན་ཏུ་ཆེན་པོ་ཡོངས་སུ་རྫོགས་པ་དག་ནི་ལུས་རྗེ་བ་ལ་མི་ལྟོས་པས། ཚེ་དེ་ཉིད་ལ་དེའི་ལག་པ་གཉིས་ནས་ཆུ་འཛག་པར་གྱུར་ཅིང་། ཀླུ་དེ་ཡང་ཀླད་པའི་ནད་ཀྱིས་བཏབ་པར་གྱུར་ནས་དེས་འཕྲིགས་ཏེ་སྨྲས་པ། འཕགས་ པ་དགེ་ཚུལ་འདིས་སེམས་མི་བཟང་བ་བསྐྱེད་ཀྱིས། འདི་ཟློག་ཤིག །དེས་དགེ་ཚུལ་དེ་ལ་འདི་སྐད་ཅེས་སྨྲས་སོ། །བུ་འདི་དག་ལ་སེམས་མི་བཟང་བ་བསྐྱེད་པ་བཟློག་ཤིག །དེས་ཚིགས་སུ་བཅད་པ་སྨྲས་པ། སེམས་ནི་ཐག་རིང་གྱུར་པ་སྟེ། །འདི་ལྟར་འདི་ན་གནས་

  237. 119b

    བཞིན་དུ། །བདག་གི་ལག་ཏུ་ཆུ་འཛགས་པས། །བཟློག་པར་བགྱི་བར་མི་ནུས་སོ། །དེས་ཀླུ་དེ་གནས་དེ་ནས་ཉམས་པར་བྱས་ནས་དེ་ཉིད་དུ་སྐྱེས་ཏེ། དགེ་སློང་དག་ཀླུ་གཞོན་ནུ་སྤྲུལ་པས་དང་པོར་དེར་དད་པ་ཐོབ་པར་གྱུར་ཏོ།། །།སངས་རྒྱས་བཅོམ་ལྡན་འདས་མཉན་ཡོད་ ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཇི་ཙམ་ན་མུ་སྟེགས་ཅན་ཞིག་རྒྱལ་བྱེད་ཀྱི་ཚལ་དུ་ཕྱིན་པ་དང་། དེས་དེ་ན་སྟན་བཟང་པོ་བཤམས་པ་དང་། བཟའ་བ་དང་བཏུང་བ་བསོད་པའི་སྤྱི་བུངས་བཤམས་པ་མཐོང་ནས་དེས་བསམས་པ། ཟང་ ཟིང་གི་ལོངས་སྤྱོད་ནི་ཤཱཀྱའི་བུའི་དགེ་སྦྱོང་འདི་དག་གི་བཟང་ལ། ཆོས་ཀྱི་ལོངས་སྤྱོད་ནི་བདག་ཅག་གི་བཟང་བས་དེའི་ཕྱིར་འདི་དག་གི་ནང་དུ་རབ་ཏུ་བྱུང་ལ། ཟང་ཟིང་གི་ལོངས་སྤྱོད་ནི་འདིར་བྱ་ཞིང་ཆོས་ཀྱི་ལོངས་སྤྱོད་ནི་དེར་བྱའོ་སྙམ་ནས། དེ་དགེ་སློང་གི་གན་དུ་སོང་སྟེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་སོ། །མུ་སྟེགས་ཅན་རྣམས་ཀྱི་གསོ་སྦྱོང་ནི་བཅུ་བཞི་པ་ཡིན་ལ། དགེ་སློང་རྣམས་ཀྱི་གསོ་སྦྱོང་ནི་བཅྭ་ལྔ་པ་ཡིན་པས་དེ་ཚེས་བཅུ་བཞི་ལ་ནི་མུ་སྟེགས་ཅན་རྣམས་ཀྱི་གསོ་སྦྱོང་ ཉམས་སུ་མྱོང་བར་བྱེད། ཚེས་བཅྭ་ལྔ་ལ་ནི་དགེ་སྦྱོང་རྣམས་ཀྱིའོ། །ཅི་ཙམ་དུས་གཞན་ཞིག་ན་ཞག་བྲི་བར་གྱུར་ནས། དགེ་སློང་རྣམས་ཀྱི་གསོ་སྦྱོང་བཅུ་བཞི་པ་ལ་བབ་པ་དང་། དེ་ལ་ཐེ་ཙོམ་སྐྱེས་ཏེ། ཅི་དེར་འགྲོ་བར་བྱ་འམ། འོན་ཏེ་འདི་ཉིད་དུ་གསོ་སྦྱོང་ཉམས་སུ་ མྱོང་བར་བྱ་སྙམ་པ་ལས། དེ་ལ་བློ་སྐྱེས་པ་ཤཱཀྱའི་བུའི་དགེ་སྦྱོང་འདི་དག་ནི་དེས་པ་འགྲོགས་ན་བདེ་བ་ཡིན་ལ་བདག་གི་ཚངས་པ་མཚུངས་པར་སྤྱོད་པ་རྣམས་ནི་ངང་ཚུལ་ངན་པ་ཡིན་པས་གལ་ཏེ་མ་སོང་ན་བདག་གི་ཚུལ་ཤིང་ཡང་ཕྱུང་བར་འགྱུར། སྤང་ལེབ་ཁྲིའུ་ཡང་བསྒྱུར་བར་ འགྱུར། སློང་ཕོར་ཡང་ཁས་བུབ་པར་འགྱུར། ཁར་བ་ཡང་བོར་བར་འགྱུར། ཚངས་པ་མཚུངས་པར་སྤྱོད་པ་རྣམས་ཀྱི་ནང་ནས་ཀྱང་ཕྱུང་བར་འགྱུར་རོ་སྙམ་ནས། དེ་མུ་སྟེགས་ཅན་རྣམས་ཀྱི་ནང་དུ་སོང་ངོ་། །ཇི་ཙམ་ན་དགེ་སྐོས་རྒན་པའི་མཐའ་ལོགས་སུ་འགྲེང་སྟེ། དགེ་

  238. 120a

    སློང་རྣམས་བསྔོས་པ་ན་དེ་མི་སྣང་ནས་དེས་དྲི་བར་བརྩམས་པ། ཚེ་དང་ལྡན་པ་དག་དགེ་སློང་མིང་འདི་ཞེས་བྱ་བ་ཞིག་འདིར་འོངས་སམ། དེའི་འདུན་པ་ཡང་འོངས་སམ། དེ་དག་གིས་སྨྲས་པ། མ་འོངས་སོ། །བཅོམ་ལྡན་འདས་ཀྱིས་ཕྱོགས་བཞིར་བལྟས་ནས་ གསོ་སྦྱོང་བྱའོ་ཞེས་བཀའ་སྩལ་པས། དགེ་སློང་དེ་དག་གིས་ཕྱོགས་བཞིར་བལྟས་ཏེ་གསོ་སྦྱོང་བྱས་སོ། །དེའི་འོག་ཏུ་ཕྱི་དེ་ཉིན་པར་དགེ་སློང་དེ་འོངས་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་གང་ནས་འོངས། དེས་སྨྲས་པ། ཚངས་པ་མཚུངས་པར་ སྤྱོད་པ་དག་གི་གན་ནས་སོ། །ཁྱོད་ཀྱི་ཚངས་པ་མཚུངས་པར་སྤྱོད་པ་དག་སུ་ཡིན། མུ་སྟེགས་ཅན་དག་ཡིན་ཏེ། ཁོ་བོ་ཟང་ཟིང་གི་ལོངས་སྤྱོད་ནི་ཁྱེད་ཅག་གི་གན་དུ་བྱེད་ལ། ཆོས་ཀྱི་ལོངས་སྤྱོད་ནི་དེ་དག་གི་གན་དུ་བྱེད་དོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་ སློང་རྣམས་ཀྱིས་གསོལ་པ་དང་། དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་འདི་ནི་མུ་སྟེགས་ཅན་ཞུགས་པ་ཡིན་ཏེ། དགེ་སློང་དག་གང་ཟག་མུ་སྟེགས་ཅན་ཞུགས་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་ པས་དགེ་སློང་དག་ཁྱེད་ཀྱིས་གང་ཟག་མུ་སྟེགས་ཅན་ཞུགས་པ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ་མུ་སྟེགས་ཅན་ཞུགས་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་ འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་གང་ཟག་མུ་སྟེགས་ཅན་ཞུགས་པ་ཆོས་འདུལ་བ་འདི་ལས་བསྙིལ་བར་བྱའོ་ཞེས་བཀའ་སྩལ་ན། བཙུན་པ་ཇི་ཙམ་གྱིས་ན་གང་ཟག་ མུ་སྟེགས་ཅན་ཞུགས་པ་བསྙིལ་བར་བགྱི་བ་ལགས། ཉེ་བ་འཁོར་གང་ཚུན་ཆད་ནས་རྒྱལ་མཚན་འདི་འཆང་ཞིང་ལྟ་བ་དེ་ལ་དགའ་བས་དེར་སྐྱ་རེངས་འཆར་བར་བྱེད་ན། དེ་ཙམ་གྱིས་ན་གང་ཟག་མུ་སྟེགས་ཅན་ཞུགས་པ་བསྙིལ་བར་བྱ་བ་ཡིན་ནོ།། །།སངས་རྒྱས་བཅོམ་ལྡན་འདས་

  239. 120b

    མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་བུ་བྱུང་ནས་དེས་ཆུང་མ་ལ་སྨྲས་པ། བཟང་མོ་འུ་བུ་ཅག་གི་བུ་ལོན་འཁོར་བར་བྱེད་པ། ནོར་སྤྱོད་པ་བཙས་པས་ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོ་བར་བྱའོ། །དེས་སྨྲས་པ། རྗེའི་སྲས་དེ་བཞིན་མཛོད་ཅིག །དེ་ཟོང་ ཐོགས་ཏེ་ཡུལ་གཞན་དུ་སོང་བ་དང་། དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དེས་ཀྱང་བུ་དེ་ཉེ་དུའི་སྟོབས་དང་ལག་མཐུས་བསྙོད་ཅིང་གསོས་ཏེ་བསྐྱེད་དོ། །དེ་དུས་གཞན་ཞིག་ན་ནེའུ་ལྡངས་དང་ལྷན་ཅིག་ཁྱིམ་ཞིག་གི་དྲུང་དུ་སོང་བ་ན། ཁྱིམ་དེའི་སྟེང་ན་བུ་མོ་ཞིག་ འདུག་པ་དེས་དེའི་སྟེང་དུ་མེ་ཏོག་གི་ཆུན་པོ་འཕངས་པ་དང་། དེས་བུ་མོ་དེ་མཐོང་ངོ་། །ནེའུ་ལྡངས་དེས་སྨྲས་པ། གྲོགས་པོ་ཁྱོད་ཀྱིས་ཁྱིམ་དེར་བརྡ་མ་བྱས་སམ། དེས་སྨྲས་པ། དེ་ཡིན་ཏེ། ཁོ་བོས་བརྡ་བྱས་སོ། །དེས་སྨྲས་པ། གྲོགས་པོ་ཁྱིམ་འདི་ན་ཡ་ང་བ་ཡིན་ གྱིས་མ་འཇུག་ཤིག །ཚུལ་མ་ཡིན་པས་སྡུག་བསྔལ་བར་གྱུར་ཏ་རེ་ཞེས་དེས་ཉིན་ཐོག་ཐག་ཏུ་འཕྱན་དུ་བཅུག་སྟེ། མའི་གན་དུ་ཁྲིད་ནས་སྨྲས་པ། མ་ཁྱོད་ཀྱི་བུ་འདིས་ཁྱིམ་ཆེ་གེ་མོ་ཞིག་ཏུ་བརྡ་བྱས་པ། ཁོ་བོས་ཉིན་ཐོག་ཐག་ཏུ་བསྲུངས་ཀྱིས་མཚན་མོ་སྲུངས་ཤིག །ཁྱིམ་དེ་ནི་ ཡ་ང་བ་ཡིན་གྱིས་འཇུག་ཏུ་མ་གཞུག་ཅིག །ཚུལ་མ་ཡིན་པས་སྡུག་བསྔལ་བར་གྱུར་ཏ་རེ། དེས་སྨྲས་པ། བུ་ཁྱོད་ཀྱིས་ཁོ་མོ་ལ་བསྙད་པ་ཁྱོད་ཀྱིས་ལེགས་པར་བྱས་སོ། །དེས་ཁྱེའུ་དེ་ཁྱིམ་གྱི་ནང་དུ་མལ་བཅས་ཏེ་གྱོ་མོ་གཉིས་དང་། ཆུ་དང་། ས་དག་བཞག་ནས་ཁྱིམ་ དེར་བཅུག་སྟེ། བདག་ཉིད་སྒོར་ཁྲི་བཅས་ནས་ཉལ་ལོ། །དེས་སྨྲས་པ། མ་སྒོ་ཕྱེ་ཤིག །བུ་ཅིའི་ཕྱིར། གཅིར་འགྲོའོ། །དེས་སྨྲས་པ། བུ་འདི་ཉིད་དུ་ཁོ་མོས་གྱོ་མོ་བཞག་གིས་དེར་གཅིས་ཅིག །དེས་ཡུད་ཙམ་ཞིག་བསྡད་དེ་སྨྲས་པ། མ་སྒོ་ཕྱེ་ཤིག །བུ་ཅིའི་ཕྱིར།

  240. 121a

    བཤང་དུ་འགྲོའོ། །དེས་སྨྲས་པ། བུ་འདི་ཉིད་དུ་ཁོ་མོས་གྱོ་མོ་དང་། ཆུ་དང་། ས་བཞག་གིས་འདི་ཉིད་དུ་བཤང་བ་བྱོས་ཤིག །དེས་ཡང་ཡུད་ཙམ་ཞིག་བསྡད་དེ་སྨྲས་པ། མ་སྒོ་ཕྱེ་ཤིག །དེས་སྨྲས་པ། བུ་ཁྱོད་གང་དུ་འགྲོ་འདོད་པ་ཁོ་མོས་མི་ཤེས་སམ་ ཅི། ཁོ་མོས་སྒོ་དབྱེ་བར་མི་ནུས་སོ། །མ་ཁོ་བོས་ཁྱོད་བསད་དོ། །དེས་སྨྲས་པ། བུ་ཁོ་མོ་ཤི་བ་ནི་བླའི། ཁོ་མོ་བུ་ཤི་བ་ལ་ལྟ་ནི་མི་ཕོད་དོ། །འདོད་པ་སྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་ དེས་རལ་གྲི་ཤུབས་ནས་ཕྱུང་སྟེ་དེའི་མགོ་དྲུངས་ནས་བཅད་དེ་ས་ལ་བསྒྱེལ་ཏོ། །དེས་མ་བསད་ནས་སོང་བ་དང་། སེམས་ཅན་སྡིག་པའི་ལས་བྱས་པ་འདར་བས། བུ་མོ་དེས་དེ་ལ་སྨྲས་པ། རྗེའི་སྲས་འདི་ན་སུ་ཡང་མ་མཆིས་ཏེ། བདག་བུ་མོ་དང་གཉིས་སུ་བས་ཀྱིས་མ་ བསྙེངས་ཤིག །དེས་བསམས་པ། དེ་འདི་ལ་སྨྲས་ན་དགའ་བར་འགྱུར་རོ་སྙམ་ནས། དེས་སྨྲས་པ། བཟང་མོ་ཁོ་བོས་ཁྱོད་ཀྱི་ཕྱིར་མ་བསད་དོ། །དེས་སྨྲས་པ། ཅི་མ་མའམ། འོན་ཏེ་སྐྱེད་མ་མོ། དེས་སྨྲས་པ། སྐྱེད་མ་མོའོ། །དེས་བསམས་པ། འདི་ཡོན་ ཏན་དག་མངོན་པར་མི་ཤེས་ཏེ་མ་གསོད་པར་བྱེད་པས་གང་གི་ཚེ་བདག་ལ་ཁྲོ་བ་སྐྱེས་ན། བདག་ལ་གནས་སྐབས་ཅི་ཞིག་འབྱུང་བར་འགྱུར་སྙམ་ནས། དེས་སྨྲས་པ། རྗེའི་སྲས་བདག་སྟེང་གི་ཁང་ཐོག་ཏུ་འཛེགས་ནས་སླར་མཆི་བའི་བར་དུ་རེ་ཞིག་ཡུད་ཙམ་ཞིག་གཞེས་ཤིག ། དེས་སྨྲས་པ། དེ་བཞིན་གྱིས་ཤིག །དེ་ནས་དེ་སྟེང་གི་ཁང་ཐོག་ཏུ་འཛེགས་ནས་ཆོམ་རྐུན་པ་ཆོམ་རྐུན་པ་ཞེས་སྒྲ་ཕྱུང་བ་དང་། དེས་འཇིགས་ཤིང་སྐྲག་ནས་བྲོས་ཏེ་རང་གི་ཁྱིམ་དུ་སོང་ནས་སྒོ་དྲུང་དུ་རལ་གྲི་བཞག་སྟེ་ཆོམ་རྐུན་པ་དེ་ནི་འདི་ཡིན་ཏེ། ཁོ་བོའི་མ་བསད་ནས་བྲོས་སོ་ ཞེས་སྒྲ་ཕྱུང་ནས་དེས་དེའི་མའི་རོ་དེ་བཀུར་སྟི་བྱས་ཏེ་སོང་ངོ་། །སེམས་ཅན་སྡིག་པའི་ལས་བྱས་པས་ནི་བརྟན་པ་མི་རྙེད་པས་དེ་མུ་སྟེགས་ཅན་གྱི་གནས་དང་། དཀའ་ཐུབ་ཀྱི་གནས་དེ་དང་དེ་དག་ཏུ་སོང་སྟེ་དྲིས་པ། ཤེས་ལྡན་དག་ལས་ཅི་ཞིག་བྱས་ན་སྡིག་པའི་ལས་ཟད་པར་འགྱུར།

  241. 121b

    དེ་ན་ཁ་ཅིག་ན་རེ་མེར་ཞུགས་ཤིག་ཅེས་ཟེར་རོ། །ཁ་ཅིག་ན་རེ་དུག་ཟོ་ཤིག་ཅེས་ཟེར་རོ། །ཁ་ཅིག་ན་རེ་གཡང་སར་མཆོངས་ཤིག་ཅེས་ཟེར་རོ། །ཁ་ཅིག་ན་རེ་ཐག་པས་འགེགས་ཏེ་ཤི་ཤིག་ཅེས་ཟེར་ཏེ། ཐམས་ཅད་ཀྱང་ཤི་བའི་ཐབས་སྟོན་པར་བྱེད་ཀྱི་ངེས་པར་འབྱུང་བའི་ ཐབས་སྟོན་པ་ནི་འགའ་ཡང་མེད་དོ། །དེ་དུས་གཞན་ཞིག་ན་རྒྱལ་བྱེད་ཀྱི་ཚལ་དུ་སོང་བ་དང་། དེས་དེ་ན་དགེ་སློང་ཞིག །གང་གིས་སྡིག་པའི་ལས་བྱས་པ། །དགེ་བ་ཡིས་ནི་འགོག་བྱེད་དེ། །ཉི་ཟླ་སྤྲིན་ནས་བྱུང་བ་ལྟར། །འཇིག་རྟེན་འདིར་ནི་དེར་སྣང་འགྱུར། །ཞེས་ ཁ་ཏོན་ཟེར་བ་ཐོས་ནས། དེས་བསམས་པ། སྡིག་པའི་ལས་ཀྱང་དགག་པར་ནུས་ཀྱིས་འདི་དག་གི་ནང་དུ་རབ་ཏུ་འབྱུང་ངོ་སྙམ་ནས། དེ་དགེ་སློང་གི་གན་དུ་སོང་སྟེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་བྱུང་ཞིང་བསྙེན་པར་རྫོགས་ པར་བྱས་ནས། དེས་ཤིན་ཏུ་བརྩོན་འགྲུས་བརྩམས་ཏེ་བཀླག་པར་བརྩམས་སོ། །དེས་ཀློག་ཅིང་ཁ་ཏོན་བྱེད་པ་ན་སྡེ་སྣོད་གསུམ་བཀླགས་ཤིང་སྡེ་སྣོད་གསུམ་དང་ལྡན་པ། རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེ་ལ་དགེ་སློང་དག་གིས་སྨྲས་པ། ཚེ་དང་ ལྡན་པ་ཁྱོད་བརྩོན་འགྲུས་འདིས་ཅི་ཞིག་དོན་དུ་གཉེར་དེས་སྨྲས་པ། སྡིག་པའི་ལས་ཟད་པར་བྱའོ། །ཁྱོད་ཀྱིས་སྡིག་པའི་ལས་ཅི་བྱས། མ་བསད་དོ། །ཅི་མ་མའམ། འོན་ཏེ་སྐྱེད་མ་མོ་ཡིན། དེས་སྨྲས་པ། སྐྱེད་མ་མོ་ཡིན་ནོ་ཞེས་ཟེར་བའི་སྐབས་དེ་བཅོམ་ལྡན་འདས་ ལ་དགེ་སློང་རྣམས་ཀྱིས་གསོལ་པ་དང་། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་གང་ཟག་མ་བསད་པ་བསྙིལ་བར་འོས་པ་ཡིན་ཏེ། དགེ་སློང་དག་གང་ཟག་མ་བསད་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་དགེ་སློང་ དག་ཁྱེད་ཀྱིས་གང་ཟག་མ་བསད་པ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་པ་ན་དེས་དེ་ལ་མ་བསད་པ་མ་ཡིན་ནམ། ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །དེས་བསམས་པ།

  242. 122a

    ཅི་འབབས་པར་བྱའམ། མཐའ་འཁོབ་ཏུ་འགྲོ་བར་བྱ་སྙམ་ནས། དེ་མཐའ་འཁོབ་ཏུ་སོང་སྟེ། ཁྱིམ་བདག་ཅིག་རྗེས་སུ་འཇུག་པར་བྱས་སོ། །དེས་མངོན་པར་དད་པས་དེའི་ཕྱིར་གཙུག་ལག་ཁང་རྩིག་ཏུ་བཅུག་སྟེ། དེ་ཕྱོགས་དང་ཡུལ་ཐ་དད་པ་ན་འཁོད་ པས་དགེ་སློང་དག་གནས་ཤིང་དེའི་གདམས་ངག་གིས་མང་པོ་དག་གིས་དགྲ་བཅོམ་པ་ཉིད་མངོན་དུ་བྱས་སོ། །དེ་དུས་གཞན་ཞིག་ན་ན་བར་གྱུར་ནས་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་དག་གིས་རིམ་གྲོ་བྱས་ན། ཉམ་དམས་པ་ཉིད་དུ་གྱུར་ ནས། དེས་ལྷན་ཅིག་གནས་པ་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་ཕྱིར་དགེ་འདུན་ལ་བསྲོ་ཁང་གྱིས་ཤིག །དེ་རྣམས་ཀྱིས་དེའི་ཕྱིར་བསྲོ་ཁང་བགྱིས་སོ། །བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་ འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དེ་ཤི་ཞིང་དུས་ལ་བབ་ནས་སེམས་ཅན་དམྱལ་བ་ཆེན་པོ་མནར་མེད་པར་སྐྱེས་སོ། །དེའི་ལྷན་ཅིག་གནས་པ་དགྲ་བཅོམ་པ་ཞིག་གིས་བདག་གི་མཁན་པོ་གང་དུ་སྐྱེས་ཞེས་སེམས་པར་ཞུགས་ནས་ དེ་ལྷ་རྣམས་ཀྱི་ནང་དུ་རྣམ་པར་བལྟ་བར་བརྩམས་ན་མ་མཐོང་ཞིང་མི་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་རྣམ་པར་བལྟས་ན་དེ་ཡང་མ་མཐོང་ངོ་། །སེམས་ཅན་དམྱལ་བའི་ནང་དུ་རྣམ་པར་བལྟ་བར་བརྩམས་ན། སེམས་ཅན་དམྱལ་བ་ཆེན་པོ་མནར་མེད་པར་ སྐྱེས་པར་མཐོང་ནས། དེས་བསམས་པ། མཁན་པོ་ནི་ཚུལ་ཁྲིམས་དང་ལྡན་པ་མང་དུ་ཐོས་པ། ཆོས་ཀྱི་འཁོར་སྡུད་སྡུད་པ་ཡིན་ན། དེས་ལས་ཅི་ཞིག་བྱས་ན་དེས་སེམས་ཅན་དམྱལ་བ་ཆེན་པོ་མནར་མེད་པར་སྐྱེས་སྙམ་ནས་བསམས་ན་མ་བསད་པ་ཡིན་པར་མཐོང་ངོ་ དེ་མནར་མེད་པའི་འོད་ཟེར་དག་གིས་ཕོག་པ་དང་སྨྲས་པ་ཀྱེ་མ་བསྲོ་ཁང་འདི་མེ་རེ་ཚ་ཞེས་སྨྲས་པ་དང་སེམས་ཅན་དམྱལ་བའི་སྲུང་མས་ཐོ་བ་བླངས་ཏེ་མགོར་བསྣུན་ནས་སྐལ་ཆད་ཁྱོད་ཀྱི་བསྲོ་ཁང་ག་ལ་ཡོད་འདི་ལྟར་འདི་ནི་སེམས་ཅན་དམྱལ་བ་ཆེན་པོ་མནར་མེད་པ་ཡིན་ནོ། །

  243. 122b

    ཞེས་སྨྲས་སོ། །དེ་དགེ་བའི་སེམས་ཀྱིས་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུའམ། ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང་གང་དུ་སྐྱེས་པ་དང་ལས་གང་གིས་སྐྱེས་ པའོ། །དེས་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་པ་དང་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པ་དང་། དགེ་འདུན་ལ་བསྲོ་ཁང་གི་ཁྲུས་བྱས་པས་སྐྱེས་པ་མཐོང་ངོ་། །དེ་ནས་སྔོན་སེམས་ཅན་དམྱལ་བའི་ལྷའི་བུ་དེ་འདི་སྙམ་དུ་སེམས་ཏེ་གང་གི་ཕྱིར་ བདག་ཞག་ལོན་པར་གནས་ཏེ་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱིས། བདག་ཞག་ལོན་པར་མ་གནས་པ་ཁོ་ནར་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་ མོ། །དེ་ནས་སྔོན་སེམས་ཅན་དམྱལ་བའི་ལྷའི་བུ་རྣ་ཆ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ། དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དག་གིས་ཐུ་བ་བཀང་སྟེ་ཁ་དོག་ཤིན་ཏུ་འདས་པས་མཚན་མོ་ ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང་། འདི་ལྟར་སྔོན་སེམས་ཅན་དམྱལ་བའི་ལྷའི་བུའི་ ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྔོན་སེམས་ཅན་དམྱལ་བའི་ལྷའི་བུའི་བསམ་པ་དང་། བག་ལ་ཉལ་བ་དང་། ཁམས་དང་རང་བཞིན་ཐུགས་སུ་ཆུད་ནས་གང་ཐོས་ནས་སེམས་ཅན་དམྱལ་བའི་ ལྷའི་བུས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་

  244. 123a

    བདེན་པ་མཐོང་ནས། བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་ མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་འདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་ རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་སེམས་ཅན་དམྱལ་བའི་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཏོག་འབྱོར་པ་ལྟ་བུ་དང་། དཔའ་བོ་གཡུལ་ ལས་རྣམ་པར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་པ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ་། །དེའི་ལྷན་ཅིག་གནས་པ་དགེ་འདུན་གྱི་གནས་བརྟན་དགྲ་བཅོམ་

  245. 123b

    པ་ཟས་ཀྱི་གྲལ་དུ་འདུག་སྟེ། དེའི་ལྷན་ཅིག་གནས་པ་གཞན་ཞིག་དགེ་འདུན་ལ་ཆུ་འགྲིམ་པར་བྱེད་དོ། །ཇི་ཙམ་ན་དགེ་འདུན་གྱི་གནས་བརྟན་དེས་ཆུ་ཁ་ཕོར་དུ་བླངས་ནས་སོར་མོའི་རྩེ་མོས་རེག་ན་ཤིན་ཏུ་གྲངས་ནས་དེས་བསམས་པ། བདག་ཅག་ནི་ཆུ་ཤིན་ཏུ་གྲང་མོ་འདི་ལྟ་བུ་འཐུང་ ན། མཁན་པོ་ནི་སེམས་ཅན་དམྱལ་བ་ཆེན་པོ་མནར་མེད་པ་ན་ཟངས་ཁུ་བསྐོལ་བ་འཐུང་ངོ་སྙམ་ནས། དེས་སེམས་ཅན་དམྱལ་བ་ཆེན་པོ་མནར་མེད་པར་རྣམ་པར་བལྟ་བར་བརྩམས་ན་མི་སྣང་ངོ་། །དུད་འགྲོ་དང་། ཡི་དགས་དང་། མི་དང་། སེམས་ཅན་དམྱལ་བ་ གཞན་རྣམས་སུ་ཡང་རྣམ་པར་བལྟས་ན། དེ་རྣམས་ན་ཡང་མི་སྣང་ནས། ལྷ་རྣམས་ཀྱི་བར་གྱི་ནང་དུ་རྣམ་པར་བལྟ་བར་བརྩམས་ན། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཏེ་ལྷར་གྱུར་པས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བར་བྱས་ཏེ་ལྷ་རྣམས་ཀྱི་ནང་ ན་འདུག་པ་མཐོང་ནས་འཛུམ་པ་སྔོན་དུ་བཏང་སྟེ། བཅོམ་ལྡན་འདས་ལ་དད་པ་ཐོབ་ནས། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ཀྱི་ལེགས་པར་གསུངས་པ་ཉིད། འདི་ལྟར་སྡིག་པ་བྱེད་པ་ལོག་པར་ལྟུང་བར་སོང་བ་དེ་ལྟ་བུ་དག་གིས་ཀྱང་ཡོན་ཏན་ གྱི་ཚོགས་འདི་ལྟ་བུ་ཐོབ་བོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །མཁན་པོ་གཅིག་པ་དེས་དེ་རངས་ཤིང་མགུ་བ་དང་། མཆོག་ཏུ་དགའ་བ་མཐོང་ནས་སྨྲས་པ། ཚེ་དང་ལྡན་པ་ཁྱོད་མཁན་པོ་དུས་ལ་བབ་པས་བདག་དགེ་འདུན་གྱི་གནས་བརྟན་དུ་གྱུར་ཏོ་སྙམ་ནས་རངས་ཤིང་མགུ་ བ་དང་མཆོག་ཏུ་དགའ་བར་གྱུར་ཏམ། དེས་སྨྲས་པ། ཚེ་དང་ལྡན་པ་རེ་ཞིག་ཁྱོད་ཀྱི་དྲི་བའི་ལན་གདབ་པའི་དུས་མ་ཡིན་གྱིས། དགེ་འདུན་གྱི་ནང་དུ་དྲིས་ཤིག་དང་དེར་ཁྱོད་ཀྱི་དྲི་བའི་ལན་གདབ་པའི་དུས་ལ་བབ་པར་འགྱུར་རོ། །ཇི་ཙམ་ན་དུས་གཞན་ཞིག་ན་དགེ་སློང་གི་དགེ་ འདུན་ཚོགས་ཤིང་འཁོད་པ་ན། དགེ་འདུན་གྱི་གནས་བརྟན་གྱིས་མཁན་པོ་གཅིག་པ་དེ་ལ་དྲིས་པ། ཚེ་དང་ལྡན་པ་ཁྱོད་ཀྱིས་དེའི་ཚེ་ཅི་སྨྲས་དེས་སྨྲས་པ། ཁྱོད་ལ་ཁོ་བོས་ཁྱོད་མཁན་པོ་དུས་ལ་བབ་པས་བདག་དགེ་འདུན་གྱི་གནས་བརྟན་དུ་གྱུར་ཏོ་སྙམ་ནས་རངས་ཤིང་མགུ་བ་

  246. 124a

    དང་མཆོག་ཏུ་དགའ་བར་གྱུར་ཏམ་ཞེས་སྨྲས་སོ། །དེས་སྐབས་དེ་དགེ་འདུན་གྱི་ནང་དུ་དེ་ལ་རྒྱ་ཆེར་བརྗོད་པ་དང་། དེ་ཡང་ཡི་རངས་ཤིང་དགེ་སློང་རྣམས་ཀྱང་ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ཀྱི་ལེགས་པར་གསུངས་པ་ ཉིད་འདི་ལྟར་སྡིག་པ་བྱེད་པ་ལོག་པར་ལྟུང་བར་སོང་བ་དེ་ལྟ་བུ་དག་གིས་ཀྱང་ཡོན་ཏན་གྱི་ཚོགས་དེ་ལྟ་བུ་ཐོབ་བོ་ཞེས་ཆེད་དུ་བརྗོད་པ་ཆེད་དུ་བརྗོད་དོ།། །།འདུལ་བ་གཞི། བམ་པོ་བཅུ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་ མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་ མགུར་སྤྱོད་པར་བྱེད་པ་དེའི་བུ་བྱུང་ནས། དེ་དུས་གཞན་ཞིག་ན་ནེའུ་ལྡངས་དང་ལྷན་ཅིག་ཁྱིམ་ཞིག་གི་དྲུང་དུ་སོང་བ་ན་ཁྱིམ་དེའི་སྟེང་ན་བུ་མོ་ཞིག་འདུག་པ་དེས་དེའི་སྟེང་དུ་མེ་ཏོག་གི་ཆུན་པོ་འཕངས་པ་དང་། དེས་བུ་མོ་དེ་མཐོང་ངོ་། །ནེའུ་ལྡངས་ཀྱིས་སྨྲས་པ། གྲོགས་པོ་ཁྱོད་ཀྱིས་ཁྱིམ་དེར་བརྡ་ མ་བྱས་སམ། དེས་སྨྲས་པ། དེ་ཡིན་ཏེ། ཁོ་བོས་བརྡ་བྱས་སོ། །དེས་སྨྲས་པ། གྲོགས་པོ་ཁྱིམ་འདི་ནི་ཡ་ང་བ་ཡིན་གྱིས་མ་འཇུག་ཤིག །ཚུལ་མ་ཡིན་པས་སྡུག་བསྔལ་བར་གྱུར་ཏ་རེ་ཞེས་དེས་ཉིན་ཐོག་ཐག་འཕྱན་དུ་བཅུག་སྟེ་ཕའི་གན་དུ་ཁྲིད་ནས་སྨྲས་པ། ཡབ་ཁྱོད་ཀྱི་བུ་འདིས་ཁྱིམ་ཆེ་གེ་མོ་ཞིག་ ཏུ་བརྡ་བྱས་པ། ཁོ་བོས་ནི་ཉིན་ཐོག་ཐག་ཏུ་བསྲུངས་ཀྱིས། ད་ཁྱོད་ཀྱིས་མཚན་མོ་སྲུངས་ཤིག །ཁྱིམ་དེ་ནི་ཡ་ང་བ་ཡིན་གྱིས་འཇུག་ཏུ་མ་གཞུག་ཅིག །ཚུལ་མ་ཡིན་པས་སྡུག་བསྔལ་བར་གྱུར་ཏ་རེ། དེས་སྨྲས་པ། བུ་ཁྱོད་ཀྱིས་ཁོ་བོ་ལ་བསྙད་པ་ཁྱོད་ཀྱིས་ལེགས་པར་ བྱས་སོ། །དེས་ཁྱེའུ་དེ་ཁྱིམ་གྱི་ནང་དུ་མལ་བཅས་ཏེ། གྱོ་མོ་གཉིས་དང་། ཆུ་དང་། ས་དག་བཞག་ནས་ཁྱིམ་དེར་བཅུག་སྟེ། བདག་ཉིད་སྒོར་ཁྲི་བཅས་ནས་ཉལ་ལོ། །དེས་སྨྲས་པ། ཡབ་སྒོ་ཕྱེ་ཤིག །བུ་ཅིའི་ཕྱིར། གཅིར་འགྲོའོ། །དེས་སྨྲས་པ། བུ་འདི་ཉིད་དུ་

  247. 124b

    ཁོ་བོས་གྱོ་མོ་བཞག་གིས་དེར་གཅི་ཤིག །དེས་ཡུད་ཙམ་ཞིག་བསྡད་དེ་སྨྲས་པ། ཡབ་སྒོ་ཕྱེ་ཤིག །བུ་ཅིའི་ཕྱིར། བཤང་དུ་འགྲོའོ། །དེས་སྨྲས་པ། བུ་འདི་ཉིད་དུ་ཁོ་བོས་གྱོ་མོ་དང་། ཆུ་དང་། ས་དག་བཞག་གིས་འདི་ཉིད་དུ་བཤང་བ་བྱོས་ཤིག །དེས་ཡང་ཡུད་ ཙམ་ཞིག་བསྡད་དེ་སྨྲས་པ། ཡབ་སྒོ་ཕྱེ་ཤིག །དེས་སྨྲས་པ། བུ་ཁྱོད་གང་དུ་འགྲོ་འདོད་པ་ཁོ་བོས་མི་ཤེས་སམ་ཅི། ཁོ་བོས་སྒོ་དབྱེ་བར་མི་ནུས་སོ། །ཡབ་ཁོ་བོས་ཁྱོད་བསད་དོ། །དེས་སྨྲས་པ། བུ་ཁོ་བོ་ཤི་བ་ནི་བླའི། ཁོ་བོ་བུ་ཤི་བ་ལ་ལྟ་ནི་མི་ཕོད་དོ། །འདོད་ པ་སྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་སྙིང་རྗེ་མེད་པའི་སེམས་དང་ལྡན་པ་འཇིག་རྟེན་ཕ་རོལ་བཏང་བ་དེས་རལ་གྲི་ཤུབས་ནས་ཕྱུང་སྟེ། དེའི་མགོ་དྲུངས་ནས་བཅད་དེ་ས་ལ་བསྒྱེལ་ཏོ། །དེས་ཕ་བསད་ནས་སོང་བ་དང་སེམས་ཅན་སྡིག་པའི་ལས་བྱས་པ་འདར་བས་བུ་མོ་ དེས་དེ་ལ་སྨྲས་པ། རྗེའི་སྲས་འདི་ན་སུ་ཡང་མ་མཆིས་ཏེ། བདག་བུ་མོ་དང་གཉིས་སུ་བས་ཀྱིས་མ་བསྙེངས་ཤིག །དེས་བསམས་པ། དེ་འདི་ལ་སྨྲས་ན་དགའ་བར་འགྱུར་རོ་སྙམ་ནས། བཟང་མོ་ཁོ་བོས་ཁྱོད་ཀྱི་ཕྱིར་ཕ་བསད་དོ། །དེས་སྨྲས་པ། ཅི་ཕ་བའམ། འོན་ ཏེ་སྐྱེད་ཕ། དེས་སྨྲས་པ། སྐྱེད་ཕའོ། །དེས་བསམས་པ། འདི་ཡོན་ཏན་དག་མངོན་པར་མི་ཤེས་ཏེ་ཕ་གསོད་པར་བྱེད་པས་གང་གི་ཚེ་བདག་ལ་ཁྲོ་བ་སྐྱེས་ན། བདག་ལ་གནས་སྐབས་ཅི་ཞིག་འབྱུང་བར་འགྱུར་སྙམ་ནས་དེས་སྨྲས་པ། རྗེའི་སྲས་བདག་སྟེང་གི་ཁང་ཐོག་ ཏུ་འཛེགས་ནས་སླར་མཆི་བའི་བར་དུ་རེ་ཞིག་གཞེས་ཤིག་དེས་སྨྲས་པ། དེ་ན་དེ་བཞིན་གྱིས་ཤིག་དེ་སྟེང་གི་ཁང་ཐོག་ཏུ་འཛེགས་ནས་ཆོམ་རྐུན་པ་ཆོམ་རྐུན་པ་ཞེས་བྱ་བ་སྒྲ་ཕྱུང་བ་དང་། དེ་འཇིགས་ཤིང་སྐྲག་ནས་བྲོས་ཏེ་རང་གི་ཁྱིམ་དུ་སོང་ནས་སྒོ་དྲུང་དུ་རལ་གྲི་བཞག་སྟེ་ཆོམ་ རྐུན་པ་དེ་ནི་འདི་ཡིན་ཏེ། ཁོ་བོའི་ཕ་བསད་ནས་བྲོས་སོ་ཞེས་སྒྲ་ཕྱུང་ནས། དེས་ཕའི་རོ་དེ་བཀུར་སྟི་བྱས་ཏེ་སོང་ངོ་། །སེམས་ཅན་སྡིག་པའི་ལས་བྱས་པས་ནི་བརྟན་པ་མི་རྙེད་པས་དེ་མུ་སྟེགས་ཅན་གྱི་གནས་དང་དཀའ་ཐུབ་ཀྱི་ནགས་དེ་དང་དེ་དག་ཏུ་སོང་སྟེ་དྲིས་པ། ཤེས་ལྡན་

  248. 125a

    དག་ལས་ཅི་ཞིག་བྱས་ན་དེས་སྡིག་པའི་ལས་ཟད་པར་འགྱུར། དེ་ན་ཁ་ཅིག་ན་རེ་མེར་ཞུགས་ཤིག་ཅེས་ཟེར་རོ། །ཁ་ཅིག་ན་རེ་དུག་ཟོ་ཤིག་ཅེས་ཟེར་རོ། །ཁ་ཅིག་ན་རེ་གཡང་སར་མཆོངས་ཤིག་ཅེས་ཟེར་རོ། །ཁ་ཅིག་ན་རེ་ཆུར་མཆོངས་ཤིག་ཅེས་ཟེར་རོ། ། ཁ་ཅིག་ན་རེ་ཐག་པས་འགེགས་ཏེ་ཤི་ཤིག་ཅེས་ཟེར་ཏེ། ཐམས་ཅད་ཀྱང་ཤི་བའི་ཐབས་སྟོན་པར་བྱེད་ཀྱི། ངེས་པར་འབྱུང་བའི་ཐབས་སྟོན་པ་ནི་འགའ་ཡང་མེད་དོ། །དེ་དུས་གཞན་ཞིག་ན་རྒྱལ་བྱེད་ཀྱི་ཚལ་དུ་སོང་བ་དང་། དེས་དེ་ན་དགེ་སློང་ཞིག །གང་གིས་སྡིག་པའི་ ལས་བྱས་པ། །དགེ་བ་ཡིས་ནི་འགོག་བྱེད་དེ། །ཉི་ཟླ་སྤྲིན་ནས་བྱུང་བ་ལྟར། །འཇིག་རྟེན་འདིར་ནི་དེ་སྣང་འགྱུར། །ཞེས་ཁ་ཏོན་ཟེར་བ་ཐོས་ནས་དེས་བསམས་པ། སྡིག་པའི་ལས་ཀྱང་དགག་པར་ནུས་ཀྱིས། འདི་དག་གི་ནང་དུ་རབ་ཏུ་འབྱུང་བར་བྱའོ་སྙམ་ནས། དགེ་སློང་གི་གན་དུ་སོང་སྟེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ནས་དེས་ཤིན་ཏུ་བརྩོན་འགྲུས་བརྩམས་ཏེ་བཀླག་པར་བརྩམས་སོ། །དེས་ཀློག་ཅིང་ཁ་ཏོན་བྱེད་པ་ན་སྡེ་སྣོད་གསུམ་བཀླགས་ཤིང་སྡེ་ སྣོད་གསུམ་དང་ལྡན་པ། རིགས་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །དེ་ལ་དགེ་སློང་དག་གིས་སྨྲས་པ། ཚེ་དང་ལྡན་པ་ཁྱོད་བརྩོན་འགྲུས་འདིས་ཅི་ཞིག་དོན་དུ་གཉེར། དེས་སྨྲས་པ། སྡིག་པའི་ལས་ཟད་པར་བྱའོ། །ཁྱོད་ཀྱིས་སྡིག་པའི་ལས་ཅི་ཞིག་བྱས། ཕ་བསད་དོ་ཅི་ཕ་བའམ། འོན་ཏེ་སྐྱེད་ཕ་ཡིན། དེས་སྨྲས་པ། སྐྱེད་ཕ་ཡིན་ནོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་གང་ཟག་ཕ་བསད་པ་ བསྙིལ་བར་འོས་པ་ཡིན་ཏེ། དགེ་སློང་དག་གང་ཟག་ཕ་བསད་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་དགེ་སློང་དག་ཁྱེད་ཀྱིས་གང་ཟག་ཕ་བསད་པ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པར་འོངས་ན། དེས་

  249. 125b

    དེ་ལ་ཕ་བསད་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །དེས་བསམས་པ། ཅི་དེ་འབབས་པར་བྱའམ། མཐའ་འཁོབ་ཅིག་ཏུ་འགྲོ་བར་བྱ་སྙམ་ནས། དེས་མཐའ་འཁོབ་ཏུ་སོང་སྟེ་ཁྱིམ་བདག་ཅིག་རྗེས་སུ་ འཇུག་པར་བྱས་སོ། །དེས་མངོན་པར་དད་པས་དེའི་ཕྱིར་གཙུག་ལག་ཁང་རྩིག་ཏུ་བཅུག་སྟེ། དེར་ཕྱོགས་དང་ཡུལ་ཐ་དད་པ་ན་འཁོད་པའི་དགེ་སློང་དག་གནས་ཤིང་དེའི་གདམས་ངག་གིས་མང་པོ་དག་གིས་དགྲ་བཅོམ་པ་ཉིད་མངོན་དུ་བྱས་སོ། །དེ་དུས་གཞན་ཞིག་ན་ན་ བར་གྱུར་ནས་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་དག་གིས་རིམ་གྲོ་བྱས་ན་ཉམ་དམས་པ་ཉིད་དུ་གྱུར་ནས། དེས་ལྷན་ཅིག་གནས་པ་རྣམས་ལ་སྨྲས་པ། ཚེ་དང་ལྡན་པ་དག་ཁོ་བོའི་ཕྱིར་དགེ་འདུན་ལ་བསྲོ་ཁང་གྱིས་ཤིག །དེ་རྣམས་ ཀྱིས་དེའི་ཕྱིར་བསྲོ་ཁང་བྱས་སོ། །བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དེ་ཤི་ཤིང་དུས་ལ་བབ་ནས་སེམས་ཅན་དམྱལ་བ་ཆེན་པོ་ མནར་མེད་པར་སྐྱེས་སོ། །དེའི་ལྷན་ཅིག་གནས་པ་དགྲ་བཅོམ་པ་ཞིག་གིས་བདག་གི་མཁན་པོ་གང་དུ་སྐྱེས་ཞེས་སེམས་པ་ལ་ཞུགས་ནས། དེས་ལྷ་རྣམས་ཀྱི་ནང་དུ་རྣམ་པར་བལྟ་བར་བརྩམས་ན་མ་མཐོང་ཞིང་མི་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་རྣམ་པར་བལྟ་ བར་བརྩམས་ན། སེམས་ཅན་དམྱལ་བ་ཆེན་པོ་མནར་མེད་པར་སྐྱེས་པར་མཐོང་ནས་དེས་བསམས་པ། མཁན་པོ་ནི་ཚུལ་ཁྲིམས་དང་ལྡན་པ། མང་དུ་ཐོས་པ། ཆོས་ཀྱི་འཁོར་སྡུད་སྡུད་པ་ཡིན་ན་དེས་ལས་ཅི་ཞིག་བྱས་ན། དེས་སེམས་ཅན་དམྱལ་བ་ཆེན་པོ་མནར་མེད་པར་ སྐྱེས་སྙམ་ནས་བསམས་ན། ཕ་བསད་པ་ཡིན་པར་མཐོང་ངོ་། །དེ་མནར་མེད་པའི་འོད་ཟེར་དག་གིས་ཕོག་པ་དང་སྨྲས་པ། ཀྱེ་མ་བསྲོ་ཁང་འདི་མེ་རེ་ཚ་ཞེས་སྨྲས་པ་དང་། སེམས་ཅན་དམྱལ་བའི་སྲུང་མས་ཐོ་བ་བླངས་ཏེ་མགོར་བསྣུན་ནས་སྐལ་ཆད་ཁྱོད་ལ་བསྲོ་ཁང་ག་ལ་ཡོད།

  250. 126a

    འདི་ལྟར་འདི་ནི་སེམས་ཅན་དམྱལ་བ་ཆེན་པོ་མནར་མེད་པ་ཡིན་ནོ་ཞེས་སྨྲས་སོ། །དེ་དགེ་བའི་སེམས་ཀྱིས་དུས་བྱས་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུའམ་ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་ སྟེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་སྐྱེས་པའོ། །དེས་སེམས་ཅན་དམྱལ་བ་རྣམས་ཀྱི་ནང་ནས་ཤི་འཕོས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པ་དང་། དགེ་འདུན་ལ་བསྲོ་ཁང་གི་ཁྲུས་བྱས་པས་སྐྱེས་པ་མཐོང་ ངོ་། །དེ་ནས་སྔོན་སེམས་ཅན་དམྱལ་བའི་ལྷའི་བུ་དེ་འདི་སྙམ་དུ་སེམས་ཏེ། གང་གི་ཕྱིར་བདག་ཞག་ལོན་པར་གནས་ཏེ་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱིས། བདག་ཞག་ལོན་པར་མ་གནས་ པ་ཁོ་ནར་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་སྔོན་སེམས་ཅན་དམྱལ་བའི་ལྷའི་བུ་རྣ་ཆ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ། དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤལ་དང་། པད་མ་ དང་། ཀུ་མུ་ད་དང་། པད་མ་དཀར་པོ་དག་གིས་ཐུ་བ་བཀང་སྟེ། ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་གིས་མངོན་པར་གཏོར་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་ བོས་ཕྱག་འཚལ་ནས་མཐའ་གཅིག་ཏུ་འདུག་པ་དང་། འདི་ལྟར་སྔོན་སེམས་ཅན་དམྱལ་བའི་ལྷའི་བུའི་ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྔོན་སེམས་ཅན་དམྱལ་བའི་ལྷའི་བུའི་བསམ་པ་དང་། བག་ ལ་ཉལ་བ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་སྔོན་སེམས་ཅན་དམྱལ་བའི་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་

  251. 126b

    བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པར་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་ པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་ པས་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་ མཆིས། །དེ་ནས་འདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་སེམས་ཅན་དམྱལ་བའི་ལྷའི་བུ་ཚོང་པ་ཁེ་སྤོགས་ རྙེད་པ་ལྟ་བུ་དང་། ཞིང་པ་ལོ་ཏོག་འབྱོར་པ་ལྟ་བུ་དང་། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་

  252. 127a

    སོང་ངོ་། །དེའི་ལྷན་ཅིག་གནས་པ་དགེ་འདུན་གྱི་གནས་བརྟན་དགྲ་བཅོམ་པ་ཟས་ཀྱི་གྲལ་དུ་འདུག་སྟེ་དེའི་ལྷན་ཅིག་གནས་པ་གཞན་ཞིག་དགེ་འདུན་ལ་ཆུ་འགྲིམ་པར་བྱེད་དོ། །ཇི་ཙམ་ན་དགེ་འདུན་གྱི་གནས་བརྟན་དེས་ཆུ་ཁ་ཕོར་དུ་བླུགས་ནས་སོར་མོའི་རྩེ་མོས་རེག་ ན་ཤིན་ཏུ་གྲངས་ནས་དེས་བསམས་པ། བདག་ཅག་ནི་ཆུ་ཤིན་ཏུ་གྲང་མོ་འདི་ལྟ་བུ་འཐུང་ན་མཁན་པོ་ནི་སེམས་ཅན་དམྱལ་བ་ཆེན་པོ་མནར་མེད་པ་ན་ཟངས་ཁུ་བསྐོལ་བ་འཐུང་ངོ་སྙམ་ནས། དེས་སེམས་ཅན་དམྱལ་བ་ཆེན་པོ་མནར་མེད་པར་རྣམ་པར་བལྟ་བར་བརྩམས་ན་མི་སྣང་ངོ་། ། དུད་འགྲོ་དང་། ཡི་དགས་དང་། མི་དང་། སེམས་ཅན་དམྱལ་བ་གཞན་རྣམས་སུ་ཡང་རྣམ་པར་བལྟས་ན་དེ་རྣམས་ན་ཡང་མི་སྣང་ནས། ལྷ་རྣམས་ཀྱི་ནང་དུ་རྣམ་པར་བལྟ་བར་བརྩམས་ན། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཏེ། ལྷར་གྱུར་པས་བཅོམ་ལྡན་འདས་ ཀྱི་སྤྱན་སྔར་བདེན་པ་མཐོང་བར་བྱས་ཏེ། ལྷ་རྣམས་ཀྱི་ནང་ན་འདུག་པ་མཐོང་ནས་འཛུམ་པ་སྔོན་དུ་བཏང་སྟེ། བཅོམ་ལྡན་འདས་ལ་དད་པ་ཐོབ་ནས། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ཀྱི་ལེགས་པར་གསུངས་པ་ཉིད། འདི་ལྟར་སྡིག་པ་བྱེད་པ། ལོག་པར་ལྟུང་བར་སོང་བ་དེ་ལྟ་བུ་དག་གིས་ཀྱང་ཡོན་ཏན་གྱི་ཚོགས་འདི་ལྟ་བུ་ཐོབ་བོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །མཁན་པོ་གཅིག་པ་དེས་དེ་རངས་ཤིང་མགུ་བ་དང་མཆོག་ཏུ་དགའ་བར་མཐོང་ནས་སྨྲས་པ། ཚེ་དང་ལྡན་པ་ཁྱོད་མཁན་པོ་དུས་ལ་བབ་པས་བདག་ནི་ དགེ་འདུན་གྱི་གནས་བརྟན་དུ་གྱུར་ཏོ་སྙམ་ནས་རངས་ཤིང་མགུ་བ་དང་མཆོག་ཏུ་དགའ་བར་གྱུར་ཏམ། དེས་སྨྲས་པ། ཚེ་དང་ལྡན་པ་རེ་ཞིག་ཁྱོད་ཀྱི་དྲི་བའི་ལན་གདབ་པའི་དུས་མ་ཡིན་གྱིས། དགེ་འདུན་གྱི་ནང་དུ་དྲིས་ཤིག་དང་། དེར་ཁྱོད་ཀྱི་དྲི་བའི་ལན་གདབ་པའི་དུས་ལ་ བབ་པར་འགྱུར་རོ། །ཇི་ཙམ་ན་དུས་གཞན་ཞིག་ན་དགེ་སློང་གི་དགེ་འདུན་ཚོགས་ཤིང་འཁོད་པ་ན་དགེ་འདུན་གྱི་གནས་བརྟན་གྱིས་མཁན་པོ་གཅིག་པ་དེ་ལ་དྲིས་པ། ཚེ་དང་ལྡན་པ་ཁྱོད་ཀྱིས་དེའི་ཚེ་ཅི་སྨྲས། དེས་སྨྲས་པ། ཁྱོད་ལ་ཁོ་བོས་ཁྱོད་མཁན་པོ་དུས་ལ་བབ་པས་བདག་དགེ་

  253. 127b

    འདུན་གྱི་གནས་བརྟན་དུ་གྱུར་ཏོ་སྙམ་ནས་རངས་ཤིང་མགུ་བ་དང་མཆོག་ཏུ་དགའ་བར་གྱུར་ཏམ་ཞེས་སྨྲས་སོ། །དེས་སྐབས་དེ་དགེ་འདུན་གྱི་ནང་དུ་དེ་ལ་རྒྱ་ཆེར་བརྗོད་པ་དང་དེ་ཡང་ཡི་རངས་ཤིང་དགེ་སློང་རྣམས་ཀྱང་ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ ཀྱི་ལེགས་པར་གསུངས་པ་ཉིད། འདི་ལྟར་སྡིག་པ་བྱེད་པ། ལོག་པར་ལྟུང་བར་སོང་བ་དེ་ལྟ་བུ་དག་གིས་ཀྱང་ཡོན་ཏན་གྱི་ཚོགས་དེ་ལྟ་བུ་ཐོབ་བོ་ཞེས་ཆེད་དུ་བརྗོད་པ་ཆེད་དུ་བརྗོད་དོ།། །།སྡོམ་ལ། དགྲ་བཅོམ་བསད་དང་དགེ་འདུན་དབྱེན། །ངན་སེམས་ཀྱིས་ནི་ཁྲག་ཕྱུང་དང་། །ཕམ་པར་འགྱུར་བ་བཞི་པོ་ དང་། །གནས་ནས་དབྱུང་བ་གསུམ་ཡིན་ནོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ལྟང་བྲང་གི་ཚལ་གསེབ་ཏུ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ ལྷ་བརྒྱད་ཁྲི་དང་། མ་ག་དྷཱའི་བྲམ་ཟེ་དང་ཁྱིམ་བདག་འབུམ་ཕྲག་དུ་མ་དག་དང་ལྷན་ཅིག་བདེན་པ་དག་ལ་བཀོད་པ་ན། དེས་རང་གི་ཡུལ་དུ་དྲིལ་བསྒྲགས་པ་བྱེད་དུ་བཅུག་སྟེ། ངའི་ཡུལ་དུ་སུས་ཀྱང་ཆོམ་རྐུན་མི་བྱའོ། །གང་ཞིག་བྱེད་པ་ན་ངས་དེ་ཡུལ་མེད་པར་བྱ་ཞིང་སྐྱིན་པ་ ནི་ང་ཉིད་ཀྱི་མཛོད་དང་བང་བ་ནས་སྦྱིན་པར་བྱའོ་ཞེས་བསྒོའོ། །གང་གི་ཚེ་བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོ་སྡེས་བཏུལ་བ་དེའི་ཚེ་ན་དེས་ཀྱང་དྲིལ་བསྒྲགས་པ་བྱེད་དུ་བཅུག་སྟེ། ངའི་ཡུལ་དུ་སུས་ཀྱང་ཆོམ་རྐུན་མི་བྱའོ། །གང་ཞིག་བྱེད་ན་དེ་ གསད་པའི་གྱོད་ལ་བསྐྲིན་ཅིང་སྐྱིན་པ་ནི་ང་ཉིད་ཀྱི་མཛོད་དང་བང་བ་ནས་སྦྱིན་པར་བྱའོ་ཞེས་བསྒོ་བ་དང་། དེ་ནས་ཡུལ་མ་ག་དྷཱའི་ཆོམ་རྐུན་པ་གང་དག་ཡིན་པ་དང་། ཡུལ་ཀོ་ས་ལའི་ཆོམ་རྐུན་པ་གང་ཡིན་པ་དེ་དག་ས་མཚམས་ཀྱི་བར་དུ་དོང་སྟེ། འཁོད་ནས་ཡུལ་མ་ག་དྷཱ་ནས་དོན་མཐུན་ འོང་བ་གང་ཡིན་པ་དེ་ཡང་འཇོམས་པར་བྱེད་དོ། །ཡུལ་ཀོ་ས་ལ་ནས་དོན་མཐུན་འོང་བ་གང་ཡིན་པ་དེ་ཡང་འཇོམས་པར་བྱེད་དོ། །ཇི་ཙམ་དུས་གཞན་ཞིག་ན་དོན་མཐུན་བསེལ་བ་དང་བཅས་པ་ཡུལ་མ་ག་དྷཱ་ནས་ཡུལ་ཀོ་ས་ལར་འཕགས་པ་དང་། གང་གི་ཚེ་ས་མཚམས་

  254. 128a

    ཀྱི་བར་དུ་ཕྱིན་པ་དེའི་ཚེ་དེད་དཔོན་དེས་སྨྲས་པ། ཤེས་ལྡན་དག་རྒྱལ་པོ་གསལ་རྒྱལ་དེ་ནི་གདུག་པ་ཕ་རོལ་གནོན་པ་ཡིན་པས་བདག་ཅག་ལ་སྐྱིན་པ་སྦྱིན་དུ་འཇུག་ནུས་པ་ཡིན་ན། བདག་ཅག་གིས་ཅིའི་ཕྱིར་བསེལ་བ་ལ་གླ་སྦྱིན་པར་བྱ། འདི་དག་ ཉིད་ནས་ཕྱིར་བཟློག་གོ་ཞེས་དེ་དག་ཕྱིར་བཟློག་སྟེ་དོན་མཐུན་དེ་ཚོགས་ཉུང་ངུར་ཆས་པ་དང་། ཆོམ་རྐུན་དེ་དག་གིས་ཀྱང་བྱ་མ་རྟ་བཙུགས་ཏེ་བསྡད་པ་དང་། དེས་དེ་མཐོང་ནས་ཤེས་ལྡན་དག་དོན་མཐུན་ཚོགས་ཉུང་ངུས་འོངས་ན་ཅིའི་ཕྱིར་བཏང་སྙོམས་སུ་འཁོད་ཅེས་སྨྲས་པ་དང་། དེ་ནས་ཆོམ་རྐུན་པ་དེ་དག་གིས་དེར་ཚོང་པ་ཁ་ཅིག་ནི་སྲོག་དང་ཕྲལ་ལོ། །ཁ་ཅིག་ནི་ཟོང་བོར་ཏེ་བྲོས་སོ། །དགྲ་བཅོམ་པ་དག་ནི་མ་བསམས་པར་ཤེས་པ་དང་མཐོང་བ་མི་འཇུག་པས་དགྲ་བཅོམ་པ་དོན་མཐུན་དེ་དང་འགྲོ་བ་ཞིག་ཀྱང་སྲོག་དང་ཕྲལ་ལོ། །དེ་ན་དོན་མཐུན་གང་དག་བྲོས་པ་ དེ་དག་མགོ་དང་ལུས་རྡུལ་གྱིས་ཡོག་སྟེ་ཀླད་པའི་སྐྲ་ཡོགས་ནས་ཀུ་ཅོ་འདོན་ཅིང་ཀོ་ས་ལའི་རྒྱལ་པོ་གསལ་རྒྱལ་གྱི་དྲུང་དུ་ཕྱིན་ནས་ཐལ་མོ་སྦྱར་ཏེ་སྨྲས་པ། ལྷ་ཁྱོད་ཀྱི་ཡུལ་དུ་བདག་ཅག་ཚོང་བར་མི་རུང་བར་རྣམ་པར་བཞག་གོ། །ཅི་ཞིག་བྱས། བདག་ཅག་ཆོམ་རྐུན་པ་དག་གིས་ བཅོམ་མོ། །ཕྱོགས་གང་དུ། ག་གེ་མོ་ཞིག་ཏུའོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། རྐུན་རྫས་དང་ཆོམ་རྐུན་པ་དག་མྱུར་དུ་ཁུག་ཤིག །དེས་དཔུང་གི་ཚོགས་ཡན་ལག་བཞི་པ་བསྒོ་ནས་ཕྱིར་བྱུང་བ་དང་ཆོམ་རྐུན་པ་དེ་དག་ཀྱང་གོ་ཆ་ཕུད་ནས་བག་ཡངས་ སུ་སཱ་ལའི་དགོན་པ་ཞིག་ན་རྐུན་རྫས་བགེད་ཅིང་འཁོད་པ་ལས། དམག་དཔོན་འཕགས་སྐྱེས་པོས་དེ་དག་ཕྱོགས་བཞིར་བསྐོར་ནས་དབུས་སུ་དུང་དང་། རྔ་པ་ཊ་ཧའི་སྒྲ་དག་གིས་སྐྲག་པར་བྱས་པ་དང་། དེ་རྣམས་ལས་ཁ་ཅིག་ནི་རྐུན་རྫས་བོར་ཏེ་བྲོས་སོ། །ཁ་ཅིག་ནི་བསད་དོ། ། དྲུག་བཅུ་ནི་གསོན་པོར་བཟུང་སྟེ་དེས་རྐུན་རྫས་དེ་ཡང་ཁྱེར་ནས་རྒྱལ་པོའི་དྲུང་དུ་སོང་སྟེ་སྨྲས་པ། ལྷ་ཆོམ་རྐུན་པ་དག་ནི་འདི་དག་ལགས་སོ། །རྐུན་རྫས་ནི་འདི་དག་ལགས་སོ། །དེ་ནས་རྒྱལ་པོས་དེ་རྣམས་ལ་སྨྲས་པ། ཤེས་ལྡན་དག་ཁྱེད་ཀྱིས་རྒྱལ་པོས་དྲིལ་བསྒྲགས་པ་

  255. 128b

    བྱེད་དུ་བཅུག་སྟེ། ངའི་ཡུལ་དུ་སུས་ཀྱང་ཆོམ་རྐུན་མི་བྱའོ། །གང་ཞིག་བྱེད་ན་དེ་གསད་པའི་གྱོད་ལ་བསྐྲིན་ཅིང་སྐྱིན་པ་ནི་ང་ཉིད་ཀྱི་མཛོད་དང་། བང་བ་ནས་སྦྱིན་ནོ་ཞེས་མ་ཐོས་སམ། དེ་དག་གིས་སྨྲས་པ། ལྷ་ཐོས་སོ། །འོ་ན་ཅིའི་ཕྱིར་ཚོང་པ་དག་བཅོམ། ལྷ་འཚོ་བ་ མ་མཆིས་སོ། །ཅིའི་ཕྱིར་སྲོག་དང་ཕྲལ། འཇིགས་པ་ཉེ་བར་བསྟན་པའི་སླད་དུའོ། །ཁྱོད་ཀྱིས་འཇིགས་པ་དེ་འདྲ་བ་ཉེ་བར་བསྟན་པ་དང་། ད་སྔོན་སུས་ཀྱང་མ་མཐོང་བ་གང་ཡིན་པའི་འཇིགས་པ་དེ་འདྲ་བ་ཉེ་བར་བསྟན་པར་བྱའོ། །དེ་ནས་རྒྱལ་པོས་བློན་པོ་རྣམས་ལ་བསྒོ་ བ། ཤེས་ལྡན་དག་དེང་ལ་འདི་དག་ཐམས་ཅད་སོད་ཅིག །དེ་དག་གིས་ལམ་པོ་ཆེ་དང་། སྲང་དང་། ལམ་གྱི་བཞི་མདོ་དང་། སུམ་མདོ་རྣམས་སུ་རྗེས་སུ་སྒྲོགས་ཤིང་གསད་པར་ཁྲིད་པ་ན་ཆོམ་རྐུན་པ་ཞིག་ལམ་དོག་པར་བྲོས་ཏེ་རྒྱལ་བྱེད་ཀྱི་ཚལ་དུ་དགེ་སློང་གི་གན་དུ་སོང་སྟེ་སྨྲས་ པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་སོ། །ཆོམ་རྐུན་པ་དེ་དག་ཀྱང་བསད་དོ། །བཅོམ་ལྡན་འདས་ཀྱིས་དགེ་སློང་དག་རང་གི་རྒུད་པ་དང་། གཞན་གྱི་རྒུད་པ་དང་། རང་གི་འབྱོར་པ་དང་། གཞན་གྱི་ འབྱོར་པ་ལ་ཡང་དང་ཡང་དུ་སོ་སོར་རྟོགས་ཤིག །དེ་ཅིའི་ཕྱིར་ཞེ་ན། དགེ་སློང་དག་རང་གི་རྒུད་པ་དང་། གཞན་གྱི་རྒུད་པ་ནི་ཀུན་དུ་སྐྱོ་བར་འགྱུར་བའི་གནས་ཡིན་ལ། རང་གི་འབྱོར་པ་དང་། གཞན་གྱི་འབྱོར་བ་ཡང་ཀུན་དུ་སྐྱོ་བར་འགྱུར་བའི་གནས་ཡིན་པའི་ཕྱིར་རོ། །ཞེས་ གསུངས་པས་ཇི་ཙམ་དུས་གཞན་ཞིག་ན་དགེ་སློང་རྣམས་དུར་ཁྲོད་རྒྱུར་འདོང་བ་ན་དགེ་སློང་དེ་ཡང་དེ་རྣམས་དང་ལྷན་ཅིག་དུར་ཁྲོད་རྒྱུར་སོང་བ་ལས་དེས་ཆོམ་རྐུན་པ་དེ་དག་བསད་པ་མཐོང་ནས་མཆི་མས་བརྣངས་ཏེ་འདུག་པར་གྱུར་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ འདི་གསར་དུ་རབ་ཏུ་བྱུང་བ་ཡིན་ཡང་བསམ་པ་འདི་འདྲ་བར་བཟང་ངོ་། །དེས་སྐད་ཕྱུང་སྟེ་ངུ་བར་བརྩམས་པ་དང་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཁྱོད་ཅིའི་ཕྱིར་ཆོ་ངེས་འདེབས། དེས་སྨྲས་པ། འདི་ནི་བདག་གི་ཕའོ། །འདི་ནི་བདག་གི་ཕུ་ནུའོ། །འདི་ནི་ཁུ་བོའོ། །འདི་

  256. 129a

    ནི་ཞང་པོའོ། །དེ་རྣམས་ཀྱིས་སྨྲས་པ། འདི་རྣམས་ཀྱིས་དགྲ་བཅོམ་པ་སྲོག་དང་ཕྲལ་ལམ། དེས་སྨྲས་པ། ཕྲལ་ལོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ དག་གང་ཟག་འདི་ནི་དགྲ་བཅོམ་པ་བསད་པ་ཡིན་ཏེ། གང་ཟག་དགྲ་བཅོམ་པ་བསད་པ་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས་དགེ་སློང་དག་ཁྱེད་ཀྱིས་གང་ཟག་དགྲ་བཅོམ་པ་བསད་པ་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་ བར་འདོད་པ་འོངས་ན། དེས་དེ་ལ་དགྲ་བཅོམ་པ་བསད་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད། བསྙེན་པར་རྫོགས་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གང་གིས་སྔོན་རབ་ཏུ་ཕྱུང་བ་ན་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ཕྱེ་བ་དེ་གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། རབ་ཏུ་དབྱུང་བར་བགྱིའམ་རབ་ཏུ་དབྱུང་བར་མི་བགྱི། ཉེ་བ་འཁོར་རབ་ཏུ་དབྱུང་བར་མི་བྱའོ། །དེ་ལྟ་བས་ན་འགའ་ཞིག་གི་གན་དུ་རབ་ཏུ་དབྱུང་བར་འདོད་པ་འོངས་ན། དེས་དེ་ལ་དགེ་འདུན་གྱི་དབྱེན་བྱས་པ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་ རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གང་གིས་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། རབ་ཏུ་དབྱུང་བར་བགྱིའམ། རབ་ཏུ་དབྱུང་བར་མི་བགྱི། ཉེ་བ་འཁོར་རབ་ཏུ་དབྱུང་བར་མི་བྱའོ། །དེ་ལྟ་བས་ན་འགའ་ཞིག་གི་གན་དུ་རབ་ཏུ་དབྱུང་བར་འདོད་པ་འོངས་ན། དེས་དེ་ལ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ་ཞེས་དྲི་བར་བྱའོ། །མ་དྲིས་

  257. 129b

    པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་སྔོན་གང་རབ་ཏུ་འབྱུང་བ་ན་ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་བྱུང་བ་དེ་གལ་ཏེ་ལེགས་པར་གསུངས་པའི་ ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། རབ་ཏུ་དབྱུང་བར་བགྱིའམ། རབ་ཏུ་དབྱུང་བར་མི་བགྱི། ཉེ་བ་འཁོར་རབ་ཏུ་དབྱུང་བར་མི་བྱའོ། །དེ་ལྟ་བས་ན་འགའ་ཞིག་གི་གན་དུ་རབ་ཏུ་འབྱུང་བར་འདོང་བ་འོངས་ན། དེས་དེ་ལ་ཕམ་པར་འགྱུར་བ་བཞི་ལས་ལྟུང་བ་གང་ཡང་རུང་བ་བྱུང་བ་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་ དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གལ་ཏེ་གང་ཟག་མ་མཐོང་བས་གནས་ནས་ཕྱུང་བ་བབས་པ་ཞིག་ཡང་ཕྱིར་འོངས་ནས། ཚེ་དང་ལྡན་པ་དག་ལྟུང་བ་མཐོང་གིས་བདག་རབ་ཏུ་དབྱུང་བར་གསོལ་ཞེས་ ཟེར་ན་དེ་རབ་ཏུ་དབྱུང་བར་བྱའོ། །རབ་ཏུ་ཕྱུང་ནས་ཚེ་དང་ལྡན་པ་དག་ལྟུང་བ་བཤགས་པར་བྱས། བདག་བསྙེན་པར་རྫོགས་པར་མཛད་དུ་གསོལ་ཞེས་ཟེར་ན་བསྙེན་པར་རྫོགས་པར་བྱའོ། །ཇི་སྟེ་བསྙེན་པར་རྫོགས་ནས་ལྟུང་བ་མ་མཐོང་ངོ་ཞེས་ཟེར་ན། གལ་ཏེ་དགེ་འདུན་ ཚོགས་པ་ཡོད་ན་ཡང་མ་མཐོང་བས་གནས་ནས་དབྱུང་བར་བྱའོ། །གལ་ཏེ་ཚོགས་པ་མེད་ལ་ཇི་སྟེ་བསྙེན་པར་རྫོགས་ན་ལེགས་པར་བསྙེན་པར་རྫོགས་པ་ཡིན་ཏེ། འདི་ལྟར་གང་ཟག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་ པ་དགེ་སློང་གི་དངོས་པོ་རྙེད་པར་དཀའ་བ་ཡིན་པའི་ཕྱིར་རོ། །མ་མཐོང་བས་གནས་ནས་ཕྱུང་བ་ཇི་ལྟ་བ་བཞིན་དུ་ཕྱིར་མི་འཆོས་པས་གནས་ནས་ཕྱུང་བ་དང་། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་ཕྱུང་བ་ཡང་དེ་བཞིན་ནོ།། །།སྡོམ་ལ། ལག་

  258. 130a

    རྡུམ་དག་དང་རྐང་རྡུམ་དང་། །ལག་སོར་ཟླུམ་པོར་འཇས་པ་དང་། །མཆུ་མེད་ལུས་ལ་རྨ་མཚན་ཅན། །རྒན་ཆེས་པ་དང་གཞོན་ཆེས་དང་། །ཐེང་པོ་སྨད་འཆར་ཞར་བ་དང་། །ལག་སོར་རྡུམ་སྒུར་མིའུ་ཐུང་དང་། །ལྦ་བ་ལྐུགས་པ་འོན་པ་དང་། །རྟེན་ འཕྱེ་དང་ནི་རྐང་འབམ་དང་། །བུད་མེད་ཀྱིས་དུབ་ཁུར་གྱིས་དུབ། །མི་གང་ལམ་གྱིས་དུབ་རྣམས་དང་། །ཡ་ཟ་མ་ལུག་གཏའ་གམ་དང་། །དེ་ལྟ་བུ་ཡི་མི་རྣམས་ནི། །དྲང་སྲོང་ཆེན་པོས་དགག་པ་མཛད། །མཛེས་པ་རབ་ཏུ་དབྱུང་བ་དང་། །ཡོངས་སུ་དག་པ་བསྙེན་རྫོགས་ པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གི་ཀུན་དུ་སྤྱོད་པ་ནི་གང་རབ་ཏུ་བྱུང་བ་དང་ བསྙེན་པར་རྫོགས་པར་བྱས་པ་དེས་ཇི་སྲིད་དུ་འདི་དག་ནི་གནས་ངན་ལེན་ཀུན་དུ་སྤྱོད་པ་དག་ཡིན་ནོ་ཞེས་བྱ་བར་མི་ཤེས་པ་དེ་སྲིད་དུ་དེ་དེ་དག་དང་ལྷན་ཅིག་གནས་པར་བྱེད་ལ། གང་གི་ཚེ་ཤེས་པར་གྱུར་པ་དེའི་ཚེ་དགེ་སློང་རང་བཞིན་དུ་གནས་པ་དག་དང་ལྷན་ཅིག་གནས་པར་བྱེད་དེ། སྟོན་པའི་བཀའ་ལུང་གིས་དུས་གསུམ་དུ་འགྲོ་བའི་ཕྱིར་བལྟ་བ་འབའ་ཞིག་བྱེད་དོ། །དེ་ནས་དེ་དག་གིས་གྲོས་བྱ་བར་བརྩམས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་བཙས་འཕྲོག་པ་དང་འདྲ་སྟེ། བདག་ཅག་གིས་རབ་ཏུ་ཕྱུང་བ་རྣམས་འདི་དག་གིས་འཕྲོག་ པར་བྱེད་ཀྱིས། ད་ནི་ལྷུང་བཟེད་ནག་པོ་ཅན་རྣམས་ཀྱིས་དབྲོག་པར་མི་འགྱུར་བ་གང་ཡིན་པ་དེ་འདྲ་བ་རབ་ཏུ་དབྱུང་བར་བྱའོ་ཞེས་གྲོས་བྱས་སོ། །ཇི་ཙམ་དུས་གཞན་ཞིག་ན་ཉེ་དགའ་ཀུན་དུ་འཁྱམ་པས་མི་ལག་རྡུམ་ཞིག་མཐོང་ནས་སྨྲས་པ། བཞིན་བཟངས་ཅིའི་ཕྱིར་རབ་ཏུ་མི་ འབྱུང་། དེས་སྨྲས་པ། འཕགས་པ་བདག་ལག་པ་མ་ཚང་བ་སུ་ཞིག་གིས་རབ་ཏུ་འབྱིན་པར་བགྱིད། ཉེ་དགའས་སྨྲས་པ། བཞིན་བཟངས་བཅོམ་ལྡན་འདས་ཀྱི་བསྟན་པ་ལ་ཐུགས་རྗེས་རབ་ཏུ་ཕྱེ་བ་ཡིན་གྱིས། ཁོ་བོས་ཁྱོད་རབ་ཏུ་དབྱུང་བར་བྱའོ་ཞེས་དེས་དེ་རབ་ཏུ་ཕྱུང་

  259. 130b

    ཞིང་བསྙེན་པར་རྫོགས་པར་བྱས་སོ། །དེ་ནས་ཞག་གཉིས་སམ་གསུམ་ཞིག་ཀུན་དུ་སྤྱོད་པའི་ཆོས་རྣམས་བསླབས་ནས་སྨྲས་པ། བཞིན་བཟངས་རི་དགས་ཀྱིས་རི་དགས་མི་སོས། མཉན་ཡོད་རྒྱ་ཆེ་ལ་རང་གི་སྤྱོད་ཡུལ་དང་ཡབ་ཀྱི་སྤྱོད་ཡུལ་ཡིན་པས་བསོད་སྙོམས་རྒྱུས་ ལ་འཚོ་བར་གྱིས་ཤིག །དེས་སྨྲས་པ། མཁན་པོ་ཇི་ལྟར་བསོད་སྙོམས་རྒྱུ་བར་བགྱི། དེས་སྨྲས་པ། ཁྱོད་ཀྱིས་དེ་ཙམ་ཡང་མི་ཤེས་སམ། ངས་ཁྱོད་ལ་བསྟན་པར་བྱའོ་ཞེས་དེས་དེའི་ཤམ་ཐབས་ནི་སྲད་བུས་བཅིངས། ཆོས་གོས་ནི་ཚེར་མས་གཏུར་ཏེ་བསྐོན། དཔུང་ པ་གཡོན་པར་ནི་ལྷུང་བཟེད་ཀྱི་སྣོད་བཞག །དཔུང་པ་གཡས་པར་ནི་ཁར་གསིལ་བཏགས་སོ། །དེ་ནས་དེ་མཉན་ཡོད་དུ་སྤྱོད་ཡུལ་དུ་ཞུགས་པ་དང་བུད་མེད་ཀྱིས་བྲང་བརྡུངས་ནས་སྨྲས་པ། འཕགས་པ་སུས་ཁྱོད་རབ་ཏུ་བྱུང་བའི་ལག་པ་གཉིས་བཅད། དེས་སྨྲས་པ། སྲིང་མོ་ ཁྱིམ་པ་ནས་ཁོ་བོའི་ལག་པ་ཆད་དེ། རབ་ཏུ་བྱུང་ནས་ཆད་པ་མ་ཡིན་ནོ། །སུས་རབ་ཏུ་ཕྱུང་། དེས་སྨྲས་པ། མཁན་པོ་ཉེ་དགའས་སོ། །དེ་རྣམས་ཀྱིས་སྨྲས་པ། གནས་ངན་ལེན་ཀུན་དུ་སྤྱོད་པ་དེ་མ་གཏོགས་པས་གཞན་སུ་ཞིག་འདི་ལྟ་བུ་རབ་ཏུ་འབྱིན་པར་བྱེད་ཅེས་ཟེར་ བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་དེ་ནི་དགེ་སློང་དག་ལག་རྡུམ་རབ་ཏུ་འབྱིན་པ་ལས་གྱུར་པ་ཡིན་ནོ་སྙམ་ནས་བཀའ་སྩལ་པ། དགེ་སློང་དག་དེ་ལྟ་བས་ན་དགེ་ སློང་གིས་ལག་རྡུམ་རབ་ཏུ་དབྱུང་བར་མི་བྱ་བསྙེན་པར་རྫོགས་པར་མི་བྱའོ། །རབ་ཏུ་འབྱིན་པར་བྱེད། བསྙེན་པར་རྫོགས་པར་བྱེད་ན་འགལ་ཚབས་ཅན་དུ་འགྱུར་རོ། །ལག་རྡུམ་ཇི་ལྟ་བ་དེ་བཞིན་དུ་རྐང་རྡུམ་དང་། ལག་སོར་ཟླུམ་པོར་འཇས་པ་དང་། མཆུ་མེད་པ་དང་། ལུས་ ལ་རྨ་མཚན་ཅན་དང་། རྒན་ཆེས་པ་དག་ཀྱང་དེ་བཞིན་ནོ། །དགེ་སློང་དག་གཞོན་ཆེས་པ་དག་རབ་ཏུ་འབྱིན་པར་བྱེད་ནས་དེ་དག་གིས་དགེ་འདུན་གྱི་གནས་མལ་བཤང་གཅིས་མ་རུང་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ཀྱང་རབ་ཏུ་དབྱུང་བར་མི་བྱའོ། །

  260. 131a

    ཐེང་པོ་དག་རབ་ཏུ་འབྱིན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་ཀྱང་རབ་ཏུ་དབྱུང་བར་མི་བྱའོ། །སྨད་འཆལ་དང་། ཞར་བ་དང་། ལག་སོར་རྡུམ་པོ་དང་། སྒུར་པོ་དང་། མིའུ་ཐུང་དང་། ལྦ་བ་ཅན་དང་། ལྐུགས་པ་དང་། འོན་པ་དང་། རྟེན་འཕྱེ་དང་། རྐང་འབམ་དག་རབ་ཏུ་འབྱིན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུ་དག་ཀྱང་རབ་ཏུ་དབྱུང་བར་མི་བྱའོ། །རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དག་བུད་མེད་ཀྱིས་དུབ་པ་དང་། ཁུར་ གྱིས་དུབ་པ་དང་། ལམ་གྱིས་དུབ་པ་དང་། ཡ་ཟ་མ་ལུག་དང་། གཏའ་གམ་བ་དག་རབ་ཏུ་འབྱིན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུ་དག་ཀྱང་རབ་ཏུ་དབྱུང་བར་མི་བྱའོ། །རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །བསྡུ་ བར་བྱ་བའི་སྐབས་སོ། །རབ་ཏུ་འབྱུང་བའི་གཞི་རྫོགས་སྷོ།། །།གསོ་སྦྱོང་གི་གཞིའི་སྡོམ་ལ། མུ་སྟེགས་ཅན་དང་ཀ་བི་ན། །གནས་དང་རྒྱལ་པོ་སྦྱར་བ་མང་། །སྡོམ་ལ། མུ་སྟེགས་ཅན་དང་གསོལ་བ་དང་། །གནང་བ་དང་ནི་འདུག་པ་དང་། །བབ་ ཅོལ་སྤོང་དང་ཞལ་ཏ་དང་། །བྱ་དང་གསོ་སྦྱོང་གནས་རྣམས་སོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་ནང་པར་ནང་པར་ཞིང་བཅོམ་ལྡན་འདས་ལ་ བལྟ་བ་དང་། བསྙེན་བཀུར་བྱ་བའི་ཕྱིར་འགྲོ་བར་བརྩོན་པར་གྱུར་ཏོ། །དེ་ནས་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་འདི་སྙམ་དུ་སེམས་ཏེ། ད་ལྟར་བཅོམ་ལྡན་འདས་ཀྱང་ནང་དུ་ཡང་དག་པར་འཇོག་པར་མཛད་ལ། དགེ་སློང་ཡིད་དུ་འཐད་པ་རྣམས་ཀྱང་ནང་དུ་ཡང་ དག་འཇོག་པར་བྱེད་པས་བདག་ཅག་རེ་ཞིག་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་འདོང་བ་སྔས་ཀྱིས། བདག་ཅག་གཞན་མུ་སྟེགས་ཅན་ཀུན་དུ་རྒྱུ་དག་གི་ཀུན་དགའ་ར་བ་ག་ལ་བ་དེར་དོང་ངོ་སྙམ་མོ་དེ་ནས་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་གཞན་

  261. 131b

    མུ་སྟེགས་ཅན་ཀུན་དུ་རྒྱུ་དག་གི་ཀུན་དགའ་ར་བ་ག་ལ་བ་དེར་དོང་སྟེ་ཕྱིན་ནས་གཞན་མུ་སྟེགས་ཅན་ཀུན་དུ་རྒྱུ་དག་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་གཏམ་སྣ་ཚོགས་བྱས་ཏེ་མཐའ་གཅིག་ཏུ་འཁོད་དོ། ། དེ་ནས་མུ་སྟེགས་ཅན་ཞིག་གིས་མུ་སྟེགས་ཅན་དག་ལ་འདི་སྐད་ཅེས་སྨྲས་སོ། །ཤེས་ལྡན་དག་བདག་ཅག་འབའ་ཞིག་ལ་འདུག་པ་དང་བྱ་བ་དང་གསོ་སྦྱོང་ཡོད་དམ། འོན་ཏེ་ཤཱཀྱའི་བུའི་དགེ་སྦྱོང་དག་ལ་ཡང་ཡོད། དེ་ནས་མུ་སྟེགས་ཅན་ཞིག་གིས་མུ་སྟེགས་ཅན་ དག་ལ་འདི་སྐད་ཅེས་སྨྲས་སོ། །ཤེས་ལྡན་དག་བདག་ཅག་འབའ་ཞིག་ལ་འདུག་པ་དང་བྱ་བ་དང་གསོ་སྦྱོང་ཡོད་ཀྱི། ཤཱཀྱའི་བུའི་དགེ་སྦྱོང་དག་ལ་ནི་མེད་དོ། །དེ་ནས་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་གཞན་མུ་སྟེགས་ཅན་ཀུན་དུ་རྒྱུ་དག་གིས་སྨྲས་པ་ལ་ མངོན་པར་བསྟོད་པར་ཡང་མི་བྱེད། ཕྱིར་ལྡོག་པར་ཡང་མི་བྱེད་ཅིང་མངོན་པར་བསྟོད་པ་ཡང་མ་བྱས། ཕྱིར་བཟློག་པར་ཡང་མ་བྱས་པར་སྟན་དག་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་གིས་གཞན་མུ་སྟེགས་ཅན་ཀུན་དུ་རྒྱུ་དག་དང་ལྷན་ཅིག་བར་སྐབས་སུ་གཏམ་ཅི་བརྗོད་པ་དེ་ཐམས་ཅད་བཅོམ་ལྡན་འདས་ལ་རྒྱས་པར་གསོལ་ནས་ འདི་སྐད་ཅེས་ཀྱང་གསོལ་ཏོ། །ཀྱེ་མ་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་བདག་ཅག་གི་ལ་ཡང་མཆིས་པ་དང་། བགྱི་བ་དང་། གསོ་སྦྱོང་བཅའ་བར་གསོལ། བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་ལ་ཅང་མི་གསུང་བས་ གནང་ངོ་། །དེ་ནས་རྒྱལ་པོའི་ཁབ་ཀྱི་དགེ་བསྙེན་རབ་ཏུ་མང་པོ་དག་གིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་པ་དང་རྗེས་སུ་ཡི་རང་བ་བྱས་ནས་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །

  262. 132a

    དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དེ་ལྟ་བས་ན་དགེ་སློང་རྣམས་ཀྱིས་དེང་ཕྱིན་ཆད་འདུག་པ་དང་། བྱ་བ་དང་། གསོ་སྦྱོང་ལ་ཏྲོན་བྱ་བར་རྗེས་སུ་གནང་ངོ་། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་དེང་ཕྱིན་ ཆད་འདུག་པ་དང་། བྱ་བ་དང་། གསོ་སྦྱོང་ལ་ཏྲོན་བྱ་བར་རྗེས་སུ་གནང་ངོ་ཞེས་བཀའ་སྩལ་ནས། དེ་དག་གིས་འདུག་པ་ཅི་ལྟ་བུ་ཡིན་པ་དང་། བྱ་བ་ཅི་ལྟ་བུ་ཡིན་པ་དང་། གསོ་སྦྱོང་ཅི་ལྟ་བུ་ཡིན་པ་མི་ཤེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཚུར་ཤོག །འདུག་པ་ནི་རྣལ་འབྱོར་ཏེ། ལུས་འདི་ཉིད་རྐང་པའི་མཐིལ་ཡན་ཆད་ཀླད་པའི་སྐྲ་མན་ཆད་པགས་པ་ལ་ཐུག་གི་བར་དུ་ཇི་ལྟར་གནས་པ་དང་། ཅི་ལྟར་བྱས་པ་ བཞིན་དུ་མི་གཙང་བ་རྣམ་པ་སྣ་ཚོགས་ཀྱིས་གང་སྟེ། ལུས་འདི་ལ་སྐྲ་དང་ཁ་སྤུ་དང་། སེན་མོ་དང་སོ་དང་། རྡུལ་དང་། དྲི་མ་དང་། པགས་པ་དང་། ཤ་དང་། རུས་པ་དང་། རྒྱུས་པ་དང་། རྩ་དང་། མཁལ་མ་དང་། སྙིང་དང་། མཆིན་པ་དང་། གློ་བ་དང་། རྒྱུ་ མ་དང་། གཉེ་མ་དང་། ཕོ་བ་དང་། ལོང་ཀ་དང་། ལྒང་པ་དང་། མཚེར་པ་དང་། ཕྱི་ས་དང་། མཆི་མ་དང་། སྣབས་དང་། ཞག་དང་། ཆུ་སེར་དང་། རྐང་དང་། ཚིལ་དང་། མཁྲིས་པ་དང་། བད་ཀན་དང་། རྣག་དང་། ཁྲག་དང་། ཀླད་པ་དང་། ཀླད་རྒྱས་དང་། གཅིན་དག་ཡོད་དོ་སྙམ་དུ་སོ་སོར་རྟོགས་ཤིག །བཅོམ་ལྡན་འདས་ཀྱིས་རྣལ་འབྱོར་བསྒོམ་པར་བྱའོ་ཞེས་བཀའ་སྩལ་ནས། དགེ་སློང་དག་སྤྱོད་ཡུལ་དུ་ཞུགས་པ་ན་ཡང་རྣལ་འབྱོར་སྒོམ་པར་བྱེད་པ་ན་དེ་དག་གླང་པོ་ཆེ་འཁྲུལ་པ་དང་། རྟ་འཁྲུལ་པ་དང་། རྐང་ཐང་པ་འཁྲུལ་ པ་དང་ལྷན་ཅིག་ཕྲད་ནས་འགྱེལ་བ་དང་བུབ་པར་གྱུར་ནས་མ་དད་པ་རྣམས་འཕགས་པ་དག་མི་མཐོང་ངམ་ཅི་ཞེས་ཅོ་འདྲི་བར་བྱེད་པ་དང་། དེ་དག་རྣལ་འབྱོར་སྒོམ་མོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་

  263. 132b

    སྩལ་པ། སྤྱོད་ཡུལ་དུ་ཞུགས་པས་རྣལ་འབྱོར་བསྒོམ་པར་མི་བྱའོ། །དེ་དག་སྒོ་ཁང་དུ་རྣལ་འབྱོར་སྒོམ་པར་བྱེད་པ་ན་ཡུར་ནས་མ་དད་པ་རྣམས་འཕགས་པ་དག་ཅི་ཁྱེད་འདུ་བར་ཉལ་བའི་བརྟུལ་ཞུགས་ཅན་ཡིན་ནམ་ཞེས་ཅོ་འདྲི་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་ སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྒོ་ཁང་དུ་རྣལ་འབྱོར་བསྒོམ་པར་མི་བྱའོ། །དེ་དག་ཁྱམས་སུ་སྒོམ་པར་བྱེད་པ་ན་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱམས་སུ་རྣལ་འབྱོར་བསྒོམ་པར་ མི་བྱའོ། །དེ་དག་གནས་ཁང་དུ་སྒོམ་པར་བྱེད་པ་ན་བསམ་གཏན་དག་གི་ཚེར་མ་ནི་སྒྲ་ཡིན་པས་སེམས་རྩེ་གཅིག་པ་ཉིད་ཀྱང་མི་ཐོབ་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གནས་ཁང་དུ་རྣལ་ འབྱོར་བསྒོམ་པར་མི་བྱའོ། །དེ་དག་དགོན་པར་དོང་སྟེ་སྒོམ་པར་བྱེད་པ་ན་ཆོམ་རྐུན་པ་རྣམས་དང་། གཡོན་ཅན་རྣམས་དང་། སེང་གེ་རྣམས་དང་། སྟག་རྣམས་དང་། གུང་རྣམས་དང་། གཟིག་རྣམས་ཀྱིས་བགྲོད་པར་གྱུར་པའི་སྐབས་དེ་བཅོམ་ལྡན་འདས་ལ་དགེ་ སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགོན་པར་རྣལ་འབྱོར་བསྒོམ་པར་མི་བྱའོ། །དེ་དག་གྲོང་དང་ཉེ་བར་ལྷགས་ནས་སྒོམ་པར་བྱེད་པ་ན་མ་དད་པ་རྣམས་འཕགས་པ་དག་ཅི་ཁྱེད་ཅག་འགའ་ཞིག་ཤི་བ་དང་ལྡན་པར་མ་གྱུར་ཏམ་ཞེས་ ཅོ་འདྲི་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕྱོགས་དེ་ཡལ་ག་དག་གམ། སེག་དག་དང་། རེ་ལྡེ་དག་གིས་བསྐོར་བར་བྱའོ། །དེ་དག་གིས་ཕྱོགས་ཡལ་ག་དག་གམ། སེག་ དག་གམ། རེ་ལྡེ་དག་གིས་བསྐོར་བ་དང་མ་དད་པ་རྣམས་འཕགས་པ་དག་ཅི་འདི་རྒྱལ་མོ་ག་གོན་གྱི་ར་བའམ། ལ་ཕུག་གི་ར་བའམ་ཞེས་ཅོ་འདྲི་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ།

  264. 133a

    ཕྱོགས་དེ་རྩིག་པ་དག་གམ། འོབས་དག་གིས་བསྐོར་བར་བྱའོ། །དེ་དག་གིས་ཕྱོགས་དེ་རྩིག་པ་དག་གམ། འོབས་དག་གིས་བསྐོར་བ་དང་། མ་དད་པ་རྣམས་འཕགས་པ་དག་ཅི་འདི་མ་དུ་ལུང་གའི་ར་བའམ། འོན་ཏེ་བལ་པོ་སེའུའི་ར་བ་ ཡིན། དེ་རྣམས་ཀྱིས་སྨྲས་པ། རྣལ་འབྱོར་སྒོམ་པའོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སྤོང་ཁང་བརྩིག་པར་གནང་ངོ་། །བཅོམ་ལྡན་འདས་ཀྱིས་སྤོང་ཁང་ བརྩིག་པར་བྱའོ་ཞེས་བཀའ་སྩལ་ནས། དེ་དག་གིས་སྤོང་ཁང་རྣམ་པ་ཇི་ལྟ་བུ་ཡིན་པ་མི་ཤེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྤོང་ཁང་ནི་གཉིས་ཏེ། ཆུང་ངུ་དང་། ཆེན་པོའོ། ། ཆུང་ངུ་ནི་གནས་ཁང་གཉིས་ཀྱི་བར་དུ་སྲང་བཏོད་པའོ། །ཆེན་པོ་ནི་གནས་ཁང་བཅུའམ། བཅུ་གཉིས་ཀྱི་བར་དུ་སྲང་བཏོད་པའོ། །དགེ་སློང་དག་གིས་གནས་ཁང་བྱས་ནས་སྦྱང་བྱེད་པ་བཞིན་དུ་སྒོ་དོད་པར་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། སྒོ་ གདོད་པར་བྱའོ། །དགེ་སློང་དག་སྒོ་གླེགས་མི་འཛུད་ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱའོ། །དབྱེ་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། ལག་ཟུངས་གདགས་པར་བྱའོ། །ཡང་མིག་སྒྲ་འཁྲོལ་ནས་བཅོམ་ལྡན་ འདས་ཀྱིས་བཀའ་སྩལ་པ། འོག་ཏུ་ཀོ་བའི་དུམ་བུ་གཞུག་པར་བྱའོ། །གཅད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། གནམ་གཟེར་དང་། འཁོར་གཏན་དང་། ཕྲེད་གཏན་གཞུག་པར་བྱའོ། །མུན་གནག་པར་གྱུར་ནས་བཅོམ་ལྡན་འདས་ཀྱིས་བཀའ་ སྩལ་པ། སྐར་ཁུང་གདོད་པར་བྱའོ། །དམའ་བར་བཏོད་པ་ན་ཆོམ་རྐུན་པ་དང་། གཡོན་ཅན་དང་། སེང་གེ་དང་། སྟག་དང་། གུང་རྣམས་ཀྱིས་བགྲོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དམའ་བར་གདོད་པར་མི་བྱའོ། །མཐོན་པོ་གདོད་པ་ན་སྣང་

  265. 133b

    བ་མི་གསལ་ནས། བཅོམ་ལྡན་འདས་ཀྱིས་བཀའ་སྩལ་པ། མཐོན་པོར་གདོད་པར་མི་བྱ་བར་སུམ་གཉིས་དོར་བར་བྱ་ཞིང་སུམ་གཉིས་དོར་ནས་སུམ་ཆར་གདོད་པར་བྱའོ། །དེ་དག་གོང་དུ་སུམ་གཉིས་བོར་ཏེ་འོག་གི་སུམ་ཆར་དོད་ནས་བཅོམ་ལྡན་འདས་ཀྱིས་བཀའ་སྩལ་པ། འོག་ཏུ་སུམ་གཉིས་བོར་ཏེ་གོང་དུ་སུམ་ཆ་བོར་བར་གདོད་པར་བྱའོ། །དགེ་སློང་དག་ཕྱི་ཡངས་ཤིང་ནང་རུབ་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། སྐར་ཁུང་རྒྱ་མཚོའི་རྣམ་པ་ལྟ་བུར་གདོད་པར་བྱ་སྟེ། ཕྱི་རུབ་ལ་ནང་ཡངས་པར་བྱའོ། །ཁྭ་དང་། མཆིལ་ པ་དང་། ཕུག་རོན་དག་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། སྐར་ཁུང་དྲ་བ་ཅན་དུ་བྱའོ། །སྦྲང་བུ་ཏྲེ་མ་བུ་ཀ་དང་། ཏྲེ་ལ་ཏ་དག་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱའོ། །རླུང་གིས་འབྱེད་ནས་བཅོམ་ལྡན་ འདས་ཀྱིས་བཀའ་སྩལ་པ། ཕྲེད་གཏན་གཞུག་པར་བྱའོ། །གཅད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། གནམ་གཟེར་དང་འཁོར་གཏན་གཞུག་པར་བྱའོ། །དབྱེ་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུག་གུ་སྐམ་ཀ་བྱས་ཏེ་ཕྲེད་ གཏན་དང་། གནམ་གཟེར་དང་། འཁོར་གཏན་དག་གིས་ནི་གཅད་པར་བྱའོ། །དབྱུག་གུ་སྐམ་ཀས་ནི་དབྱེ་བར་བྱའོ། །དེར་སྟན་དགོས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། སའི་སྟེགས་བུ་དག་བྱའོ། །མཁྲང་བར་གྱུར་ནས་བཅོམ་ལྡན་ འདས་ཀྱིས་བཀའ་སྩལ་པ། ཁྲིའུ་བྱའོ། །བཅོམ་ལྡན་འདས་ཀྱིས་ཁྲིའུ་བྱའོ་ཞེས་བཀའ་སྩལ་ནས། དེ་དག་གིས་ཁྲིའུ་ཅི་འདྲ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཁོ་ར་ཁོར་ཡུག་ཏུ་ཁྲུ་བཞིས་འཁོར་བའི་ཁྲིའུ་བྱ་ཞིང་དེ་ཐགས་མས་བླ་བར་ བྱའོ། །དེ་དག་གིས་ཐགས་མ་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཐགས་མ་ནི་ལྔ་སྟེ། མུན་ཛའི་དང་། ཤ་ནའི་དང་། གྲེས་མའི་དང་། རས་མའི་དང་། སྦ་ཕྲ་མོའིའོ། །དེ་དག་མཁྲང་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ།

  266. 134a

    སྟན་ནང་ཚངས་ཅན་གདིང་བར་བྱའོ། །བཅོམ་ལྡན་འདས་ཀྱིས་སྟན་ནང་ཚངས་ཅན་དག་གདིང་བར་བྱའོ་ཞེས་བཀའ་སྩལ་ནས། དེ་དག་གིས་སྟན་ནང་ཚངས་ཅན་ཅི་འདྲ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། སྲིད་དུ་ཁྲུ་བཞི་པ་ཞེང་ དུ་ཁྲུ་དོ་ཡོད་པ་ཉིས་ལྟབ་ཏུ་བྱས་ཏེ་དྲུབ་པར་བྱའོ། །དེའི་ནང་དུ་ཤིང་བལ་གྱིས་དགང་བར་བྱའོ། །དེ་དག་གིས་ཤིང་བལ་དུ་ཡོད་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཤིང་བལ་དག་ནི་ལྔ་སྟེ། ཨརྒའི་ཤིང་བལ་དང་། ཀ་ཤི་ཀའི་ཤིང་བལ་དང་། ཨེར་ ཀའི་ཤིང་བལ་དང་། སྤྲ་བའི་ཤིང་བལ་དང་། ཤལ་མ་ལིའི་ཤིང་བལ་དག་ཡིན་ནོ། །གཞན་ཡང་ལྔ་སྟེ། བལ་དང་། ཤ་ནའི་ཤིང་བལ་དང་། རས་བལ་དང་། རས་མ་དང་། ལོ་མའི་ཚོགས་དག་གིས་བཀང་བ་དག་ཡིན་ནོ། །ཤིང་བལ་ཐམས་ཅད་ཕྱོགས་ གཅིག་ཏུ་འཆུགས་ནས་བཅོམ་ལྡན་འདས་ཀྱིས་བཀའ་སྩལ་པ། མདོ་མདོར་སྐུད་པས་བྱ་རོག་རྐང་གི་གཟུངས་གདབ་པར་བྱའོ། །འཁོད་པ་ན་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། གདོས་བུ་གདགས་པར་བྱའོ། །ཇི་ལྟར་གདགས་མི་ཤེས་ནས་བཅོམ་ལྡན་ འདས་ཀྱིས་བཀའ་སྩལ་པ། སྐུད་པ་བཏགས་ཏེ་རྣ་བ་ལ་གདགས་པར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུག་གུ་གཟུགས་པར་བྱའོ། །དགེ་སློང་དག་དབྱུག་གུ་སྨྱིག་གུའི་བཅད་འཕྲོ་ལྟ་བུས་འཛུགས་པ་ན་རྨ་བྱུང་ནས་བཅོམ་ལྡན་འདས་ ཀྱིས་བཀའ་སྩལ་པ། བྲེའི་བཅད་འཕྲོ་ལྟ་བུར་བྱའོ། །འོན་ཀྱང་སྣད་ནས་བཅོམ་ལྡན་འདས་ཀྱིས་བཀའ་སྩལ་པ། རས་མ་དག་གིས་དཀྲིས་ནས་དལ་བུས་ཁད་ཀྱིས་ཁད་ཀྱིས་གཟུགས་པར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། ཕོ་ལོང་ འཕང་བར་བྱའོ། །དགེ་སློང་དག་གིས་མུན་ཁུང་དུ་འཕངས་པ་ན་དེ་འཁྱམས་ནས་བཅོམ་ལྡན་འདས་ཀྱིས་བཀའ་སྩལ་པ། ཐག་གུས་བཏགས་ཏེ་འཕང་བར་བྱ་ཞིང་དེ་ནས་ཡང་ཕྱིར་དྲང་བར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། མདུན་དུ་

  267. 134b

    མར་མེ་གཞག་པར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་པ་གཅིག་བརྐྱང་བར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་པ་ཡ་གཅིག་ཀྱང་བརྐྱང་བར་བྱའོ། །འོན་ཀྱང་ཡུར་ནས་བཅོམ་ལྡན་འདས་ ཀྱིས་བཀའ་སྩལ་པ། ལངས་ཏེ་བཅག་པར་བྱའོ། །དགེ་སློང་དག་འཆག་པ་ན་འཐོམ་ནས་བཅོམ་ལྡན་འདས་ཀྱིས་བཀའ་སྩལ་པ། ཕྲེད་དག་ལ་འཇུ་བར་བྱའོ། །ལག་པས་ཆང་རྒྱུད་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། སྦུ་བུ་བསྐོན་ལ་སྐུད་པས་ བཏགས་པ་ལ་འཇུས་ཏེ་བཅག་པར་བྱའོ། །མཆིལ་ལྷམ་དང་བཅས་པས་འཆག་པར་བྱེད་པ་ན་སྒྲ་བྱུང་ནས་བཅོམ་ལྡན་འདས་ཀྱིས་བཀའ་སྩལ་པ། མཆིལ་ལྷམ་ཅན་གྱིས་བཅག་པར་མི་བྱའོ། །རྡུལ་གྱིས་རྐང་པ་གཉིས་མ་རུང་ནས་བཅོམ་ལྡན་འདས་ཀྱིས་བཀའ་སྩལ་ པ། པར་ཐང་གདིང་བར་བྱའོ། །སྣུམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དགོངས་སྤོང་བ་པའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་སྤོང་བ་པས་ཞག་གསུམ་ཞིང་གསུམ་ཞིང་རྐང་པ་གཉིས་བསྐུ་བར་བྱའོ། །དགེ་སློང་ སྤོང་བ་པས་ཀུན་དུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་དག་དེར་མི་ཤོང་ནས་བཅོམ་ལྡན་འདས་ཀྱིས་བཀའ་སྩལ་པ། སྟེང་དུ་རིམ་ཁང་གཉིས་པ་བྱའོ། །འཛེག་དཀའ་ནས་བཅོམ་ལྡན་འདས་ ཀྱིས་བཀའ་སྩལ་པ། ཐེམ་སྐས་བྱའོ། །ལྟུང་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཁ་ཁྱེར་གྱིས་བསྐོར་བར་བྱའོ། །དེ་འཁྲུལ་ནས་བཅོམ་ལྡན་འདས་ཀྱིས་བཀའ་སྩལ་པ། ལྕགས་ཀྱི་གཟེར་བུ་དག་གིས་གདབ་པར་བྱའོ། །འོན་ཀྱང་མི་ཤོང་ ནས་བཅོམ་ལྡན་འདས་ཀྱིས་བཀའ་སྩལ་པ། ཕྱི་རོལ་དུ་སྤོང་ཁང་ཆེན་པོ་བྱའོ། །དེ་དག་སྒོ་སྤྲོད་དག་ཏུ་བྱེད་པ་ན་དེ་དག་ཕན་ཚུན་དག་ཏུ་སྣང་ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་སྣོལ་མར་གདོད་པར་བྱའོ། །སྒོ་ཁང་བྱའོ། །ཕུག་ཀྱང་བྱའོ། །དེ་དག་དེ་ན་ཡུར་

  268. 135a

    ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་དྲུང་དུ་སྣམ་བུའམ་རས་དཔྱངས་ཏེ་ཉལ་བར་བྱ་ཞིང་འདི་ལ་འགྱོད་པར་མི་བྱའོ། །དེ་དག་དེ་ནས་སོང་ཞིང་ཡང་ཕྱིས་འོངས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སྤོང་བའི་ཞལ་ཏ་བྱེད་པ་བསྐོ་ བར་བྱའོ། །དགེ་སློང་སྤོང་བའི་ཞལ་ཏ་བྱེད་པ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན། འདུན་པས་འགྲོ་བ་དང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། སྤོང་བ་ ལ་ཏྲོན་བྱས་པ་དང་མ་བྱས་པ་མི་ཤེས་པ་སྟེ། དགེ་སློང་སྤོང་བའི་ཞལ་ཏ་བྱེད་པ་ཆོས་ལྔ་པོ་དེ་དག་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱའོ། །དགེ་སློང་སྤོང་བའི་ཞལ་ཏ་བྱེད་པ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་ པ་ཡང་དབྱུང་བར་མི་བྱ་སྟེ། ལྔ་གང་ཞེ་ན། འདུན་པས་མི་འགྲོ་བ་དང་། ཞེ་སྡང་གིས་མི་འགྲོ་བ་དང་། གཏི་མུག་གིས་མི་འགྲོ་བ་དང་། འཇིགས་པས་མི་འགྲོ་བ་དང་། སྤོང་བ་ལ་ཏྲོན་བྱས་པ་དང་མ་བྱས་པ་ཤེས་པ་སྟེ། དགེ་སློང་སྤོང་བའི་ཞལ་ཏ་བྱེད་པ་ཆོས་ལྔ་པོ་དེ་དག་དང་ ལྡན་པ་ནི་མ་བསྐོས་པ་ཡང་བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱའོ། །འདི་ལྟར་བསྐོ་བར་བྱ་སྟེ། ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་གྱི་སྤོང་བའི་ཞལ་ཏ་བྱེད་པར་སྤྲོའམ་ཞེས་དྲི་བར་བྱའོ། །གལ་ཏེ་སྤྲོ་ན་དེས་སྤྲོ་ཞེས་བརྗོད་པར་བྱའོ། །དེའི་ འོག་ཏུ་དེས་གནས་མལ་བཤམས་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་པ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་ གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་པར་བསྐོ་སྟེ།

  269. 135b

    དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་པར་སྤྲོ་སྟེ། དེའི་སླད་དུ་དགེ་སློང་ མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་པར་བསྐོ་ཞིང་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་པར་བསྐོ་ཞིང་། དགེ་སློང་མིང་འདི་ ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་གྱི་སྤོང་བའི་ཞལ་ཏ་བགྱིད་པར་བསྐོས་ ཤིང་། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་སྤོང་བའི་ཞལ་ཏ་བགྱིད་དེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་སློང་དག་ངས་དགེ་སློང་སྤོང་བའི་ཞལ་ཏ་བྱེད་པའི་ཀུན་དུ་སྤྱོད་པའི་ཆོས་རྣམས་བཅའ་བར་བྱ་སྟེ། དགེ་སློང་སྤོང་བའི་ཞལ་ཏ་བྱེད་པས་ སྤོང་ཁང་དུ་ཆག་ཆག་གདབ་པར་བྱའོ། །ཕྱག་དར་བྱའོ། །ལྕི་བ་སར་པའི་བྱུག་པས་བསྐུ་བར་བྱའོ། །སྟན་བཤམ་པར་བྱའོ། །བཤང་བའི་ས་དང་གཅི་བའི་ས་བྱི་དོར་བྱའོ། །ཆག་ཆག་གདབ་པར་བྱའོ། །ཕྱག་དར་བྱའོ། །ལྕི་བ་སར་པའི་བྱུག་པས་བསྐུ་བར་བྱའོ། །ལོ་མའི་ ཆང་བུ་གཞག་པར་བྱའོ། །བོང་རྡོག་དང་། ས་དང་། ཆུ་གཞག་པར་བྱའོ། །དེ་དག་རེ་རེའི་གན་དུ་སོང་སྟེ་འབོད་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། རེ་རེ་ནས་བོད་པར་མི་བྱ་བར་གཎྜཱི་བརྡུང་བར་བྱའོ། །དེས་གཎྜཱི་རྒྱ་ཆེར་བརྡུངས་པ་དང་ཇི་ཙམ་ན་སྤྱོད་ཡུལ་གྱི་གྲོང་མི་རྣམས་ཆོམ་རྐུན་པ་མ་ འོངས་སམ་ཞེས་སྔངས་ནས། དེ་རྣམས་གོ་བགོས་ཏེ་ལྷགས་ནས་འཕགས་པ་དག་ཅི་ཆོམ་རྐུན་པ་དག་མཆིས་སམ། དེ་རྣམས་ཀྱིས་སྨྲས་པ། ཤེས་ལྡན་དག་ཆོམ་རྐུན་པ་དག་མ་ལྷགས་ཏེ། འདི་ལྟར་སྤོང་བ་ལ་ཏྲོན་བྱེད་དོ། །དེ་རྣམས་ཀྱིས་སྨྲས་པ། འཕགས་པ་དག་རྣམ་པར་འཚེ་བ་ལ་

  270. 136a

    ཏྲོན་མཛད་ཀྱི། འདི་ན་སྤོང་བ་ག་ལ་མཆིས་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གཎྜཱི་རྒྱ་ཆེར་བརྡུང་བར་མི་བྱ་སྟེ། འདི་ལྟར་གཎྜཱི་དེ་ནི་ལྔ་སྟེ། དགེ་འདུན་བསྡུ་བའི་གཎྜཱི་དང་། ལས་ཀྱི་གཎྜཱི་དང་། ཤི་བའི་གཎྜཱི་དང་། སྤོང་བའི་གཎྜཱི་དང་། གནོད་པ་བྱུང་བའི་གཎྜཱི་འོ། །དེ་ལ་དགེ་འདུན་བསྡུ་བའི་གཎྜཱི་དེ་ནི་རྒྱུད་གསུམ་དང་ཏོག་གསུམ་མོ། །ལས་ཀྱི་གཎྜཱི་དེ་ནི་རྒྱུད་གཅིག་དང་ཏོག་གསུམ་མོ། །ཤི་བའི་གཎྜཱི་དེ་ནི་བྱི་བོའོ། །སྤོང་བའི་གཎྜཱི་དེ་ནི་ཁར་ སིལ་ལོ། །གནོད་པ་བྱུང་བའི་གཎྜཱི་དེ་ནི་ཇི་ཙམ་གྱིས་ཆོག་པའོ། །དེ་དག་དུས་རྟིང་ལ་ཐུག་པ་ན་ཅི་བདེར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། རྟིང་ལ་ཐུག་ན་ཅི་བདེར་མི་བྱ་བར་དུས་ཤེས་པར་བྱས་ནས་ཅི་བདེར་བྱས་ཏེ། དགེ་འདུན་ལས་འཚལ་མ་ཐོབ་པ་གང་དག་ཡིན་ པ་དེ་དག་ཀྱང་ཁྲུས་བྱས་ནས་དགེ་འདུན་གྱི་ནང་དུ་འདུ་ཁོམ་པ་དང་། བསོད་སྙོམས་པ་གང་དག་ཡིན་པ་དེ་དག་ཀྱང་རྐང་ལག་གཉིས་བཀྲུས་ནས་གྲོང་དུ་བསོད་སྙོམས་ལ་འཇུག་ཁོམ་པར་བྱའོ། །དེ་དག་དེ་ཁོ་ན་བཞིན་དུ་ཅི་བདེར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། དེ་ ཁོ་ན་བཞིན་དུ་ཅི་བདེར་མི་བྱ་བར་རྒྱུད་ཆགས་གསུམ་པ་གདོན་པར་བྱའོ། །དེ་དག་ཧ་ཅང་མང་དུ་འདོན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཧ་ཅང་མང་དུ་གདོན་པར་མི་བྱའོ། །དེ་དག་ཧ་ཅང་ཉུང་ངུར་འདོན་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཧ་ ཅང་ཉུང་ངུར་གདོན་པར་མི་བྱ་སྟེ། འདི་ལྟར་རན་པར་གདོན་པར་བྱའོ། །དེ་དག་ཡོན་བཤད་པར་མི་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཡོན་བཤད་པར་བྱའོ། །བཅོམ་ལྡན་འདས་ཀྱིས་ཡོན་བཤད་པར་བྱའོ་ཞེས་བཀའ་སྩལ་ནས། དེ་དག་གིས་སུས་ཡོན་བཤད་ པར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་བརྟན་གྱིས་ཡོན་བཤད་པར་བྱའོ། །དེ་དག་ཡོན་བཤད་པ་ཧ་ཅང་མང་དུ་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཡོན་བཤད་པ་ཧ་ཅང་མང་དུ་མི་བྱའོ། །དེ་དག་ཡོན་བཤད་པ་ཧ་ཅང་

  271. 136b

    ཉུང་ངུར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཡོན་བཤད་པ་ཧ་ཅང་ཉུང་ངུར་མི་བྱ་སྟེ། འདི་ལྟར་ཡོན་བཤད་པར་རན་པར་བྱའོ། །དགེ་སློང་སྤོང་བའི་ཞལ་ཏ་བྱེད་པ་ཐམས་ཅད་ཀྱི་མཇུག་ཏུ་འདུ་ཞིང་ཐམས་ཅད་ཀྱི་མདུན་དུ་དགྱེས་པར་བྱེད་ནས་བཅོམ་ལྡན་འདས་ཀྱིས་བཀའ་ སྩལ་པ། དགེ་སློང་སྤོང་བའི་ཞལ་ཏ་བྱེད་པ་ཐམས་ཅད་ཀྱི་མཇུག་ཏུ་དགྱེས་པར་བྱ་ཞིང་ཐམས་ཅད་ཀྱི་མདུན་དུ་འདུ་བར་བྱའོ། །གལ་ཏེ་རྐྱེན་དེ་ལྟ་བུ་བྱུང་ན་དེས་ཕྱོགས་དབེན་པར་ལྡེ་མིག་སྦས་ཏེ། ཚེ་དང་ལྡན་པ་ཁོ་བོས་ཕྱོགས་ག་གེ་མོ་ཞིག་ཏུ་ལྡེ་མིག་སྦས་ཀྱིས་ཕྱེ་ལ་ཞུགས་ཤིག་ ཅེས་བརྗོད་པར་བྱའོ། །དགེ་སློང་སྤོང་བའི་ཞལ་ཏ་བྱེད་པས་ཀུན་དུ་སྤྱད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་མི་འཇུག་ན་འགལ་ཚབས་ཅན་དུ་འགྱུར་རོ། །དེ་ནི་འདུག་པ་ཞེས་བྱའོ། །བྱ་བ་གང་ཞེ་ན། དགེ་འདུན་གྱིས་གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་གང་ཡིན་པ་དེ་འདི་ནི་བྱ་བ་ཞེས་བྱའོ། །གསོ་སྦྱོང་གང་ཞེ་ན། དགེ་སློང་དག་ངས་སོ་སོར་ཐར་པའི་མདོ་གདོན་པ་སྟོན་པ་གང་ཡིན་པ་སྟེ། དེ་ཁྱེད་ཀྱིས་དེང་ཕྱིན་ཆད་ཟླ་བ་ཕྱེད་ཕྱེད་ཅིང་གདོན་པར་བྱའོ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་སོ་ སོར་ཐར་པའི་མདོ་གདོན་པ་གདོན་པར་བྱའོ་ཞེས་བཀའ་སྩལ་ནས། དེ་དག་གིས་སུས་གདོན་པར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གནས་བརྟན་གྱིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་གདོན་པར་བྱའོ། །བཅོམ་ལྡན་ འདས་ཀྱིས་དགེ་འདུན་གྱི་གནས་བརྟན་གྱིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་གདོན་པར་བྱའོ་ཞེས་བཀའ་སྩལ་ནས། དགེ་སློང་དག་དེའི་གནས་ཁང་དུ་འདུ་བར་བྱེད་པ་ན་དེ་དག་དེར་མི་ཤོང་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་ དང་། བཅོམ་ལྡན་འདས་ཀྱིས་བཀའ་སྩལ་པ། གནས་ཁང་དུ་གདོན་པར་མི་བྱའོ། །དེ་དག་ཁྱམས་སུ་གདོན་པར་བྱེད་པ་ན་དེར་ཡང་མི་ཤོང་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱིས་གསོ་སྦྱོང་གི་གནས་ལ་བློ་མཐུན་པར་བྱའོ། །བཅོམ་ལྡན་འདས་

  272. 137a

    ཀྱིས་དགེ་འདུན་གྱིས་གསོ་སྦྱོང་གི་གནས་ལ་བློ་མཐུན་པར་བྱའོ་ཞེས་བཀའ་སྩལ་ནས། དེ་དག་གིས་གང་ལ་བློ་མཐུན་པར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། གནས་ཐམས་ཅད་གྲུབ་པའམ། བྱས་པའམ། ཟིན་པ་ནང་མཚམས་དང་ ཕྱི་རོལ་ཉེ་འཁོར་འདོམ་གང་དང་བཅས་པ་དགེ་འདུན་གསོ་སྦྱོང་གི་གནས་སུ་འདོད་པ་གང་ཡིན་པ་དེ་ལ་བློ་མཐུན་པར་བྱའོ། །འདི་ལྟར་བློ་མཐུན་པར་བྱ་སྟེ། གནས་མལ་བཤམས་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་ དང་བཅས་པ་འདི་དགེ་འདུན་གྱིས་གསོ་སྦྱོང་གི་གནས་སུ་བཞེད་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་ འཁོར་འདོམ་གང་དང་བཅས་པ་འདི་ལ། དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་ མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་གསོ་སྦྱོང་གི་གནས་སུ་བཞེད་དེ། དེའི་སླད་དུ་དགེ་འདུན་གྱིས་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་ལ་དགེ་འདུན་ གྱི་གསོ་སྦྱོང་གི་གནས་སུ་བློ་མཐུན་པར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་ལ་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱི་བར་བཟོད་པ་

  273. 137b

    དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་གནས་ཐམས་ཅད་གྲུབ་པའམ། བགྱིས་པའམ། ལགས་པ་ནང་མཚམས་དང་ཕྱི་རོལ་ཉེ་འཁོར་འདོམ་གང་དང་བཅས་པ་འདི་ལ་དགེ་ འདུན་གྱི་གསོ་སྦྱོང་གི་གནས་སུ་བློ་མཐུན་པར་བགྱིས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གང་དུ་དགེ་འདུན་གྱི་གསོ་སྦྱོང་གི་གནས་སུ་བློ་མཐུན་པར་བྱས་པ་དེར་དགེ་སློང་རྣམས་ཀྱིས་འདུག་ལ་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ།། །།འདུལ་བ་གཞི། བམ་པོ་བཅུ་གཉིས་པ། སྡོམ་ལ། ཀ་པི་ན་དང་ཆོས་གོས་དང་། །དགྲོལ་དང་མཚམས་ཆུང་མཚམས་ཆེན་དང་། ། གནང་དང་བསྐྱུང་བསྐྱེད་དགྲོལ་བ་དང་། །གཅད་དང་མི་འབྲལ་མ་གཅད་དང་། །གྲོང་དགོན་ལས་དང་དགོན་པ་ཡི། །སྡེ་ཚན་ཡང་དག་བསྡུས་པ་ཡིན། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ ན་ཚེ་དང་ལྡན་པ་བྲམ་ཟེ་ཀ་པི་ན་རྒྱལ་པོའི་ཁབ་ན་སྡེ་ཅན་མའི་ཕུག་ན་གསོ་སྦྱོང་གཅིག་པའི་གནས་ཀྱི་སྡོམ་པས་དགེ་འདུན་དང་མཐུན་པར་འཇུག་གོ། །དེ་ནས་དགེ་སློང་རབ་ཏུ་མང་པོ་དག་གསོ་སྦྱོང་བཅྭ་ལྔ་པ་དེ་ཉིད་ཀྱི་ཚེ་གསོ་སྦྱོང་གི་གནས་སུ་འདུག་ཅིང་མཐུན་པར་གྱུར་ནས། ཤས་ཆེར་ཚེ་དང་ལྡན་པ་བྲམ་ཟེ་ཀ་པི་ན་ལ་སྡོད་ཅིང་འཁོད་དོ། །དེ་ནས་ཚེ་དང་ལྡན་པ་བྲམ་ཟེ་ཀ་པི་ན་འདི་སྙམ་དུ་སེམས་ཏེ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ལ་བདག་དགེ་སློང་ཀ་པི་ནའི་གསོ་སྦྱོང་ཡང་བཅྭ་ལྔ་པ་ཡིན་ན། ཅི་དགེ་འདུན་གྱི་གསོ་སྦྱོང་གི་གནས་སུ་ འགྲོ་བར་བྱའམ། འོན་ཏེ་དགེ་འདུན་གྱི་གསོ་སྦྱོང་གི་གནས་སུ་འགྲོ་བར་མི་བྱ། ཅི་དགེ་འདུན་དང་ལྷན་ཅིག་གསོ་སྦྱོང་ཉམས་སུ་མྱོང་བར་བྱའམ། འོན་ཏེ་དགེ་འདུན་དང་ལྷན་ཅིག་གསོ་སྦྱོང་ཉམས་སུ་མྱོང་བར་མི་བྱ། ཅི་དགེ་འདུན་གྱི་བྱ་བ་དག་དང་དགེ་འདུན་གྱི་བྱེད་པ་དག་ཏུ་འགྲོ་

  274. 138a

    བར་བྱའམ། འོན་ཏེ་དགེ་འདུན་གྱི་བྱ་བ་དག་དང་། དགེ་འདུན་གྱི་བྱེད་པ་དག་ཏུ་འགྲོ་བར་མི་བྱ། ཅི་དགེ་འདུན་དང་ལྷན་ཅིག་དགེ་འདུན་གྱི་བྱ་བ་དག་དང་དགེ་འདུན་གྱི་བྱེད་པ་དག་ཉམས་སུ་མྱོང་བར་བྱའམ། འོན་ཏེ་དགེ་འདུན་དང་ལྷན་ཅིག་དགེ་འདུན་གྱི་ བྱ་བ་དག་དང་། དགེ་འདུན་གྱི་བྱེད་པ་དག་ཉམས་སུ་མྱོང་བར་མི་བྱ། བཅོམ་ལྡན་འདས་ཀྱིས་ཀྱང་། རྟག་ཏུ་དག་པ་སྙིང་པོ་སྟེ། །རྟག་ཏུ་དག་པ་གསོ་སྦྱོང་ཡིན། །གཙང་མའི་ལས་ནི་དག་གྱུར་པ། །དེ་ཡི་བརྟུལ་ཞུགས་འགྲུབ་པར་འགྱུར། །ཞེས་བཀའ་སྩལ་ པས་བདག་ནི་དག་ཅིང་མཆོག་ཏུ་དག་པ་དང་ལྡན་ནོ་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བྲམ་ཟེ་ཀ་པི་ནའི་སེམས་ཀྱི་ཡོངས་སུ་རྟོག་པ་ཐུགས་སུ་ཆུད་ནས་འོད་མའི་ཚལ་ནས་མི་སྣང་བར་མཛད་དེ་སྡེ་ཅན་མའི་ཕུག་ཏུ་ཚེ་དང་ལྡན་པ་བྲམ་ཟེ་ཀ་པི་ནའི་མདུན་ དུ་བཞུགས་ཏེ་འདི་སྐད་ཅེས་བཀའ་སྩལ་ཏོ། །ཀ་པི་ན་ཁྱོད་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་པ་ན་འདི་སྙམ་དུ་དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ལ་བདག་དགེ་སློང་ཀ་པི་ནའི་གསོ་སྦྱོང་ཡང་བཅྭ་ལྔ་པ་ཡིན་ན། ཅི་དགེ་འདུན་གྱི་གསོ་སྦྱོང་གི་གནས་ སུ་འགྲོ་བར་བྱའམ། འོན་ཏེ་དགེ་འདུན་གྱི་གསོ་སྦྱོང་གི་གནས་སུ་འགྲོ་བར་མི་བྱ། ཅི་དགེ་འདུན་དང་ལྷན་ཅིག་གསོ་སྦྱོང་ཉམས་སུ་མྱོང་བར་བྱའམ། འོན་ཏེ་དགེ་འདུན་དང་ལྷན་ཅིག་གསོ་སྦྱོང་ཉམས་སུ་མྱོང་བར་མི་བྱ། ཅི་དགེ་འདུན་གྱི་བྱ་བ་དག་དང་། དགེ་འདུན་ གྱི་བྱེད་པ་དག་ཏུ་འགྲོ་བར་བྱའམ། འོན་ཏེ་དགེ་འདུན་གྱི་བྱ་བ་དང་། དགེ་འདུན་གྱི་བྱེད་པ་དག་ཏུ་འགྲོ་བར་མི་བྱ། ཅི་དགེ་འདུན་དང་ལྷན་ཅིག་དགེ་འདུན་གྱི་བྱ་བ་དག་དང་། དགེ་འདུན་གྱི་བྱེད་པ་དག་ཉམས་སུ་མྱོང་བར་བྱའམ། འོན་ཏེ་དགེ་འདུན་དང་ལྷན་ཅིག་དགེ་འདུན་གྱི་ བྱ་བ་དག་དང་། དགེ་འདུན་གྱི་བྱེད་པ་དག་ཉམས་སུ་མྱོང་བར་མི་བྱ། བཅོམ་ལྡན་འདས་ཀྱིས་ཀྱང་། རྟག་ཏུ་དག་པ་སྙིང་པོ་སྟེ། །རྟག་ཏུ་དག་པ་གསོ་སྦྱོང་ཡིན། །གཙང་མའི་ལས་ནི་དག་གྱུར་པ། །དེ་ཡི་བརྟུལ་ཞུགས་འགྲུབ་པར་འགྱུར། །ཞེས་བཀའ་སྩལ་པས་བདག་

  275. 138b

    ནི་དག་ཅིང་མཆོག་ཏུ་དག་པ་དང་ལྡན་ནོ་སྙམ་དུ་སེམས་ལ་སེམས་ཀྱི་ཡོངས་སུ་རྟོག་པ་མ་བྱུང་ངམ། བཙུན་པ་བྱུང་ངོ་། །ཀ་པི་ན་ཁྱོད་རེ་ཞིག་དགེ་འདུན་གྱི་གསོ་སྦྱོང་གི་གནས་སུ་མི་འགྲོ་ན་གཞན་སུ་ཞིག་འགྲོ་བར་འགྱུར། ཁྱོད་དགེ་འདུན་དང་ལྷན་ཅིག་གསོ་སྦྱོང་ཉམས་སུ་མྱོང་ བར་མི་བྱེད་ན། གཞན་སུ་ཞིག་ཉམས་སུ་མྱོང་བར་བྱེད། ཁྱོད་དགེ་འདུན་གྱི་བྱ་བ་དག་དང་། དགེ་འདུན་གྱི་བྱེད་པ་དག་ཏུ་མི་འགྲོ་ན་གཞན་སུ་ཞིག་འགྲོ་བར་འགྱུར། ཁྱོད་དགེ་འདུན་དང་ལྷན་ཅིག་དགེ་འདུན་གྱི་བྱ་བ་དག་དང་། དགེ་འདུན་གྱི་བྱེད་པ་དག་ཉམས་སུ་མྱོང་བར་མི་བྱེད། ན་གཞན་སུ་ཞིག་ཉམས་སུ་མྱོང་བར་བྱེད། ཀ་པི་ན་དེ་ལྟ་བས་ན་ཁྱོད་དགེ་འདུན་གྱི་གསོ་སྦྱོང་གི་གནས་སུ་མི་འགྲོ་བར་མ་བྱེད་པར་སོང་ཤིག །ཀ་པི་ན་ཁྱོད་དགེ་འདུན་གྱི་གསོ་སྦྱོང་ཉམས་སུ་མི་མྱོང་བར་མ་བྱེད་པར་ཉམས་སུ་མྱོང་བར་བྱོས་ཤིག །ཀ་པི་ན་ཁྱོད་དགེ་འདུན་གྱི་བྱ་བ་ དག་དང་། དགེ་འདུན་གྱི་བྱེད་པ་དག་ཏུ་མི་འགྲོ་བར་མ་བྱེད་པར་སོང་ཤིག །ཀ་པི་ན་ཁྱོད་དགེ་འདུན་དང་ལྷན་ཅིག་དགེ་འདུན་གྱི་བྱ་བ་དག་དང་། དགེ་འདུན་གྱི་བྱེད་པ་དག་ཉམས་སུ་མི་མྱོང་བར་མ་བྱེད་པར་ཉམས་སུ་མྱོང་བར་གྱིས་ཤིག །དེ་ནས་བཅོམ་ལྡན་འདས་ཀྱིས་ཚེ་ དང་ལྡན་པ་བྲམ་ཟེ་ཀ་པི་ན་ཁྲིད་ནས་གསོ་སྦྱོང་གི་གནས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ ན་དགེ་སློང་དག་གིས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་གཅད་པ་རྗེས་སུ་གནང་ངོ་། །བཅོམ་ལྡན་འདས་ཀྱིས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་གཅད་པར་བྱའོ་ཞེས་བཀའ་སྩལ་ནས། དགེ་སློང་རྣམས་ཀྱིས་ཇི་ལྟར་གཅད་ པར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཇེ་དང་པོར་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོ་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་

  276. 139a

    མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ སུ་ཡང་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། ། དེའི་འོག་ཏུ་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་ བཞིའི་མཚན་མ་བརྟན་པོ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་ པས་མཚན་མ་བརྟན་པོར་བརྗོད་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་ མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོར་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདི་ན་དགེ་སློང་གནས་པ་དང་། གཉུག་ མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི་ཀ་བའི་མཚན་མའམ། ཤིང་ལྗོན་པའི་མཚན་མ་བརྟན་པོ་ལགས། ནུབ་ཕྱོགས་སུ་ནི་

  277. 139b

    ར་བའི་མཚན་མའམ། བྱ་སྐྱིབས་ཀྱི་མཚན་མ་བརྟན་པོ་ལགས། བྱང་ཕྱོགས་སུ་ནི་ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་ གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་དགེ་འདུན་གྱིས་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་ མལ་ལ་ཐུག་གི་བར་དུ་མཚམས་ཆེན་པོ་གཅོད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདི་ན་དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་ བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི་ཀ་བའི་མཚན་མའམ། ཤིང་ལྗོན་པའི་མཚན་མ་བརྟན་པོ་ལགས། ནུབ་ཕྱོགས་སུ་ནི་ར་བའི་མཚན་མའམ། བྱ་སྐྱིབས་ཀྱི་མཚན་ མ་བརྟན་པོ་ལགས། བྱང་ཕྱོགས་སུ་ནི་ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་ལགས་ཏེ། དེའི་སླད་དུ་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་ སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་གཅོད་ན། ཚེ་དང་ལྡན་པ་གང་དག་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་གཅད་པར་བཟོད་པ་དེ་དག་ནི་ཅང་མ་

  278. 140a

    གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་ གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་བཅད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་གང་དུ་མཚམས་ཆེན་པོ་བཅད་པ་དེར་དགེ་ སློང་རྣམས་ཀྱིས་འདུག་སྟེ། གསོ་སྦྱོང་བྱ་ཞིང་དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་རྣམས་ཆོས་གོས་གསུམ་ཐོགས་ཏེ་ཉིན་མོ་སྤྱོད་དུ་འདོང་བ་ན་སྐྱོ་ བར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱིས་ཆོས་གོས་དག་དང་མི་འབྲལ་བའི་གནང་བ་སྦྱིན་པར་བྱའོ། །འདི་ལྟར་སྦྱིན་པར་བྱ་སྟེ། གནས་མལ་ བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་པ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདིར་དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་པ་ལས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱིས་ཆོས་གོས་དག་དང་བྲལ་བར་མི་འགྱུར་བའི་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདིར་

  279. 140b

    དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་དེ། དེའི་སླད་དུ་དགེ་འདུན་གྱིས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་ གོས་དག་དང་འབྲལ་བར་མི་འགྱུར་བའི་གནང་བ་སྩོལ་ན། ཚེ་དང་ལྡན་པ་གང་དག་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་ལ་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་ བའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩལ་ ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་གང་དུ་མཚམས་ཆེན་པོའི་ནང་དུ་དགེ་སློང་རྣམས་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་བྱིན་པ་དེར་དགེ་སློང་རྣམས་སྟོད་གཡོགས་དང་སྨད་གཡོགས་དང་བཅས་པས་ འདོང་བར་བྱ་སྟེ། འདི་ལ་འགྱོད་པར་མི་བྱའོ། །དགེ་སློང་དག་ལ་བཞིའི་ཚོགས་ཀྱིས་ལས་བྱ་བ་དག་བྱུང་ཞིང་ལྔའི་ཚོགས་ཀྱིས་ལས་བྱ་བ་དག་དང་། ཚོགས་ཀྱིས་ལས་བྱ་བ་དག་བྱུང་ནས། དེ་དག་དགེ་འདུན་ཐམས་ཅད་སྡུད་པར་བྱེད་པ་ན། དགེ་སློང་རྣམས་ཀྱི་དགེ་ བའི་ཕྱོགས་ཡོངས་སུ་ཉམས་པར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་བུ་ཆུང་གཅད་ཅིང་དཀྱིལ་འཁོར་བར་བློ་མཐུན་པར་བྱའོ། །འདི་ལྟར་གཅད་པར་བྱ་སྟེ། ཇེ་དང་ པོར་མཚམས་ཆེན་པོ་དགྲོལ་བར་བྱའོ། །འདི་ལྟར་དགྲོལ་བར་བྱ་སྟེ། གནས་མལ་བཤམ་པར་བྱས་ནས། གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་

  280. 141a

    གིས་གསོལ་བ་བྱས་ཏེ། ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདིར་དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་པ་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མཚམས་ཆེན་པོ་གཞིག་ཅིང་དགྲོལ་བར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་དགེ་འདུན་མཐུན་པས་གསོ་ སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་དེ། དེའི་སླད་དུ་དགེ་འདུན་གྱིས་མཚམས་ཆེན་པོ་གཞིག་ཅིང་དགྲོལ་བར་མཛད་ན། ཚེ་དང་ལྡན་པ་གང་དག་མཚམས་ཆེན་པོ་གཞིག་ཅིང་དགྲོལ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་ དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ་དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚམས་ཆེན་པོ་བཤིག་ཅིང་བཀྲོལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་ འཛིན་ཏོ། །དེའི་འོག་ཏུ་དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་ བརྟན་པོ་གཟུགས་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། །དེའི་འོག་ཏུ་གནས་མལ་བཤམ་ པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ། དགེ་སློང་གནས་པ་དང་གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་

  281. 141b

    ནི་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་པ་དང་། གཉུག་མར་ གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པ་ལགས། ལྷོ་ཕྱོགས་སུ་ནི་སྲད་བུ་བྲེས་པ་ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མཚན་མ་འདི་རྣམས་ཀྱི་ནང་དུ་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་ གཅོད་ཅིང་དཀྱིལ་འཁོར་བར་བློ་མཐུན་པར་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་ མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པ་ལགས། ལྷོ་ཕྱོགས་སུ་ནི་སྲད་བུ་བྲེས་པ་ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ལགས་ཏེ། དེའི་སླད་དུ་དགེ་འདུན་གྱིས་མཚན་མ་འདི་ རྣམས་ཀྱི་ནང་དུ་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་ན། ཚེ་དང་ལྡན་པ་གང་དག་མཚན་མ་འདི་རྣམས་ཀྱི་ནང་དུ་འདི་ལྟ་སྟེ། གནས་བསྡུ་

  282. 142a

    བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ ཅིང་གནང་ནས་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་འདི་ལྟར་གནས་བསྡུ་བ་དང་། དགེ་སློང་རྣམས་ལ་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་ དུ་འཛིན་ཏོ། །དེའི་འོག་ཏུ་མཚམས་ཆེན་པོ་གཅད་པར་བྱའོ། །འདི་ལྟར་གཅད་པར་བྱ་སྟེ། ཇེ་དང་པོར་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་ པས་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། །ལྷོ་ཕྱོགས་དང་། ནུབ་ ཕྱོགས་དང་། བྱང་ཕྱོགས་སུ་ཡང་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་ པས་མཚན་མ་བརྟན་པོ་གཟུགས་པར་བྱའོ། །དེའི་འོག་ཏུ་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གནས་པ་དང་། གཉུག་མར་ གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་

  283. 142b

    པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདི་ན་དགེ་སློང་གནས་པ་དང་། གཉུག་མར་གནས་པ་རྣམས་ཀྱི་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི་ཀ་བའི་མཚན་ མའམ། ཤིང་ལྗོན་པའི་མཚན་མ་བརྟན་པོ་ལགས། ནུབ་ཕྱོགས་སུ་ནི་ར་བའི་མཚན་མའམ། བྱ་སྐྱིབས་ཀྱི་མཚན་མ་བརྟན་པོ་ལགས། བྱང་ཕྱོགས་སུ་ནི་ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་ལགས་ན། གལ་ཏེ་དགེ་ འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱི་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་ དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་གཅོད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་ པ་དང་། གཉུག་མར་གནས་པ་རྣམས་ཀྱི་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི་ཀ་བའི་མཚན་མའམ། ཤིང་ལྗོན་པའི་མཚན་མ་བརྟན་པོ་ལགས།

  284. 143a

    ནུབ་ཕྱོགས་སུ་ནི་ར་བའི་མཚན་མའམ། བྱ་སྐྱིབས་ཀྱི་མཚན་མ་བརྟན་པོ་ལགས། བྱང་ཕྱོགས་སུ་ནི་ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་ལགས་ཏེ། དེའི་སླད་དུ་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་ གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་གཅོད་ན། ཚེ་ དང་ལྡན་པ་གང་དག་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ ལ་ཐུག་པའི་བར་དུ་མཚམས་ཆེན་པོ་གཅད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་བཅད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་ དུ་འཛིན་ཏོ། །དགེ་འདུན་གྱིས་གང་དུ་མཚམས་ཆེན་པོ་བཅད་པ་དེར་དགེ་སློང་རྣམས་ཀྱིས་འདུག་སྟེ་གསོ་སྦྱོང་བྱ་ཞིང་དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་ རོ། །དེའི་འོག་ཏུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱིས་ཆོས་གོས་དག་དང་མི་འབྲལ་བའི་གནང་བ་སྦྱིན་པར་བྱའོ། །འདི་ལྟར་སྦྱིན་པར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས།

  285. 143b

    དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་པ་ ལས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་ གོས་དག་དང་འབྲལ་བར་མི་འགྱུར་བའི་གནང་བ་སྩོལ་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་ བཅད་དེ། དེའི་སླད་དུ་དགེ་འདུན་གྱིས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩོལ་ན། ཚེ་དང་ལྡན་པ་གང་དག་འདི་ ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་ དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་ གང་དུ་མཚམས་ཆེན་པོའི་ནང་དུ་དགེ་སློང་རྣམས་ཀྱིས་ཆོས་གོས་དག་དང་འབྲལ་བར་མི་འགྱུར་བའི་གནང་བ་བྱིན་པ་དེར་དགེ་སློང་རྣམས་ཀྱི་སྟོད་གཡོགས་སྨད་གཡོགས་དང་བཅས་པས་འདོང་བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་ལ་ཚེ་

  286. 144a

    དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ལས་བགྱིད་པ་གཅིག་གིས་གསོལ་བ་གཅིག་དང་ལས་བརྗོད་པ་གཅིག་གིས་མཚམས་ཀྱི་སྒོ་ནང་དང་། སླད་རོལ་དང་བཅས་པ་བསྐྱུང་བ་དང་བསྐྱེད་པར་རུང་ངམ། ཉེ་བ་འཁོར་རུང་སྟེ། དེ་ལ་བསྐྱུང་བ་ནི་ འདི་ཡིན་ཏེ་ཆུང་ངུའོ། །དེ་ལ་བསྐྱེད་པ་ནི་འདི་ཡིན་ཏེ་ཆེན་པོའོ། །འདི་ལྟར་བྱ་སྟེ། ཇེ་དང་པོར་མཚམས་ཆེན་པོ་དགྲོལ་བར་བྱ་ཞིང་མཚམས་བུ་ཆུང་ཡང་དགྲོལ་བར་བྱ་སྟེ། དཀྱིལ་འཁོར་བ་གཞིག་པར་བྱའོ། །འདི་ལྟར་དགྲོལ་བར་བྱ་སྟེ། གནས་མལ་བཤམ་ པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་མཚམས་གཉི་གར་དགེ་འདུན་བཀོད་དེ། དགེ་སློང་ལས་བྱེད་པས་མཚམས་གཉི་གར་ཤིང་ངམ། དབྱུག་པའམ། སེག་གམ། རེ་ལྡེས་མནན་ནས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་ཅིང་མཚམས་བུ་ཆུང་བཅད་དེ་དཀྱིལ་འཁོར་ བར་བློ་མཐུན་པར་བགྱིས་པ་ལས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མཚམས་ཆེན་པོ་གཞིག་ཅིང་མཚམས་བུ་ཆུང་ཡང་གཞིག་སྟེ། དཀྱིལ་འཁོར་བ་དགྲོལ་བར་མཛད་དོ། །འདི་ནི་གསོལ་ བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་ཅིང་མཚམས་བུ་ཆུང་ཡང་བཅད་དེ། དཀྱིལ་འཁོར་བར་བློ་མཐུན་པར་བགྱིས་པ་ དེའི་སླད་དུ་དགེ་འདུན་གྱིས་མཚམས་ཆེན་པོ་གཞིག་ཅིང་མཚམས་བུ་ཆུང་ཡང་གཞིག་སྟེ། དཀྱིལ་འཁོར་བ་དགྲོལ་བར་མཛད་ན། ཚེ་དང་ལྡན་པ་གང་དག་མཚམས་ཆེན་པོ་གཞིག་ཅིང་མཚམས་བུ་ཆུང་ཡང་གཞིག་སྟེ། དཀྱིལ་འཁོར་བ་དགྲོལ་བར་བཟོད་པ་དེ་དག་ནི་ཅང་མ་

  287. 144b

    གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚམས་ཆེན་པོ་གཞིག་ཅིང་མཚམས་བུ་ཆུང་ཡང་བཤིག་ནས་དཀྱིལ་ འཁོར་བ་བཀྲོལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེའི་འོག་ཏུ་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་ཕ་བོང་གིས་མཚན་མའམ། རྩིག་པའི་ མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། །ལྷོ་ཕྱོགས་དང་། ནུབ་ཕྱོགས་ དང་། བྱང་ཕྱོགས་སུ་ཡང་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་ མ་བརྟན་པོ་གཟུགས་པར་བྱའོ། །མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། ། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ། །དེའི་འོག་ཏུ་གནས་མལ་བཤམ་པ་བྱས་ནས་གཎྜཱི་བརྡུངས་ ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་འཐུན་པར་གྱུར་པ་ལ་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་ཕ་བོང་གི་མཚན་མའམ།

  288. 145a

    རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་ཕ་བོང་གི་མཚན་མའམ། རྩིག་པའི་མཚན་མའམ། ཀ་བའི་མཚན་མའམ། ཤིང་ལྗོན་པའི་མཚན་མའམ། ར་བའི་མཚན་མའམ། བྱ་སྐྱིབས་ཀྱི་མཚན་མའམ། ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་ མ་བརྟན་པོ་བརྗོད་པར་བྱའོ། །མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་སེང་ལྡེང་གི་ཕུར་པ་བཏབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་བཏོད་པ་ལ་སོགས་པའི་མཚན་མ་བརྟན་པོ་བརྗོད་པར་བྱའོ། །དེའི་འོག་ཏུ་མཚམས་གཉི་གར་དགེ་འདུན་བཀོད་དེ་དགེ་སློང་ལས་བྱེད་པས་མཚམས་ གཉི་གར་ཤིང་ངམ། དབྱུག་པའམ། སེག་གམ། རེ་ལྡེས་མནན་ནས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་ མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི་ཀ་བའི་མཚན་མའམ། ཤིང་ལྗོན་པའི་མཚན་མ་བརྟན་པོ་ལགས། ནུབ་ཕྱོགས་སུ་ནི་ར་བའི་མཚན་མའམ། བྱ་སྐྱིབས་ཀྱི་མཚན་མ་ བརྟན་པོ་ལགས། བྱང་ཕྱོགས་སུ་ནི་ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་ལགས། མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པ་ལགས། ལྷོ་ཕྱོགས་སུ་ནི་སྲད་བུ་བྲེས་པ་

  289. 145b

    ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་ གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་བཅད་ཅིང་མཚམས་བུ་ ཆུང་ཡང་བཅད་དེ། དཀྱིལ་འཁོར་བར་བློ་མཐུན་པར་མཛད་དེ། འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདི་ན་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ ཆེན་པོའི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི་ཀ་བའི་མཚན་མའམ། ཤིང་ལྗོན་པའི་མཚན་མ་བརྟན་པོ་ལགས། ནུབ་ཕྱོགས་སུ་ནི་ར་བའི་མཚན་མའམ། བྱ་སྐྱིབས་ཀྱི་མཚན་མ་བརྟན་པོ་ལགས། བྱང་ཕྱོགས་སུ་ནི་ལམ་པོ་ཆེའི་མཚན་མའམ། ཁྲོན་པ་ལ་སོགས་པའི་མཚན་མ་བརྟན་པོ་ལགས། མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པ་ལགས། ལྷོ་ཕྱོགས་ སུ་ནི་སྲད་བུ་བྲེས་པ་ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ལགས་ཏེ། དེའི་སླད་དུ་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་ རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ཆེན་པོ་བཅད་ཅིང་མཚམས་བུ་ཆུང་ཡང་བཅད་དེ་དཀྱིལ་འཁོར་བར་བློ་མཐུན་པར་མཛད་ན་ཚེ་དང་ལྡན་པ་

  290. 146a

    གང་དག་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་ མལ་ལ་ཐུག་པའི་བར་དུ་མཚམས་ཆེན་པོ་བཅད་ཅིང་མཚམས་བུ་ཆུང་ཡང་བཅད་དེ། དཀྱིལ་འཁོར་བར་བློ་མཐུན་པར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་མཚན་ མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་། གནས་མལ་ལ་ཐུག་པའི་བར་དུ་མཚམས་ ཆེན་པོ་བཅད་ཅིང་མཚམས་བུ་ཆུང་ཡང་བཅད་དེ་དཀྱིལ་འཁོར་བར་བློ་མཐུན་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་གང་དུ་མཚམས་ཆེན་པོ་དང་མཚམས་བུ་ཆུང་བཅད་དེ་དཀྱིལ་འཁོར་བར་བློ་མཐུན་པར་བྱས་པ་དེར་ དགེ་སློང་རྣམས་ཀྱིས་འདུག་སྟེ་གསོ་སྦྱོང་བྱ་ཞིང་དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟར་གལ་ཏེ་འདོད་ན་བསྐྱེད་པར་ཡང་བྱའོ། །གལ་ཏེ་མི་འདོད་ ན་བསྐྱུང་བར་བྱའོ། །དེའི་འོག་ཏུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་མི་འབྲལ་བའི་གནང་བ་སྦྱིན་པར་བྱའོ། །འདི་ལྟར་སྦྱིན་པར་བྱ་སྟེ། མཚམས་བུ་ཆུང་གི་ནང་ནས་ཕྱིར་བྱུང་སྟེ་མཚམས་ཆེན་པོར་གནས་མལ་བཤམ་པར་བྱས་ནས་གཎྜཱི་ བརྡུངས་སྟེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་དགེ་འདུན་

  291. 146b

    མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་པ་ལས། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་ པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱིས་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩོལ་ལོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ་གནས་འདིར་ དགེ་འདུན་མཐུན་པས་གསོ་སྦྱོང་གཅིག་པའི་གནས་ཀྱི་སྡོམ་པས་མཚམས་ཆེན་པོ་བཅད་དེ། དེའི་སླད་དུ་དགེ་འདུན་གྱིས་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩོལ་ན། ཚེ་དང་ལྡན་པ་གང་དག་འདི་ལྟ་སྟེ། གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་ བའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་སྩལ་ ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དགེ་འདུན་གྱིས་གང་དུ་མཚམས་ཆེན་པོའི་ནང་དུ་དགེ་སློང་ཐམས་ཅད་ཀྱི་ཆོས་གོས་དག་དང་འབྲལ་བར་མི་འགྱུར་བའི་གནང་བ་བྱིན་པ་དེར་དགེ་སློང་རྣམས་སྟོད་གཡོགས་དང་སྨད་གཡོགས་དང་བཅས་པས་འདོང་ བར་བྱ་སྟེ། འདི་ལ་འགྱོད་པར་མི་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་མཚམས་མ་བཀུམ་པའི་གནས་ཀྱི་མཚམས་གང་ལགས། ཉེ་བ་འཁོར་རྩིག་པས་བསྐོར་བ་ཡིན་ན་རྩིག་པ་མཚམས་ཡིན་ལ། རྩིག་པས་མ་བསྐོར་ན་ཝ་ཁ་

  292. 147a

    ནས་ཆུ་འཛག་པ་གང་དུ་བབ་པ་ཚུན་ཆད་དེ། དགེ་སློང་དེ་ན་འཁོད་པ་རྣམས་ཀྱིས་དེར་འདུག་སྟེ་གསོ་སྦྱོང་བྱ་ཞིང་དགག་དབྱེ་དང་གསོལ་བ་དང་། གསོལ་བ་དང་གཉིས་དང་གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་ བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གྲོང་གི་མཚམས་ཀྱི་གནས་གང་ལགས། ཉེ་བ་འཁོར་ཉེ་འཁོར་གྱི་མཐའ་ཚུན་ཆད་དོ། །དགེ་སློང་དེ་ན་འཁོད་པ་རྣམས་ཀྱིས་དེར་འདུག་ཅིང་གསོ་སྦྱོང་བྱ་ཞིང་དགག་དབྱེ་དང་གསོལ་བ་དང་། གསོལ་བ་དང་གཉིས་ དང་གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གྲོང་མ་མཆིས་པའི་དགོན་པའི་གནས་ཀྱི་མཚམས་གང་ལགས། ཉེ་བ་འཁོར་རྒྱང་གྲགས་ཀྱི་མཐའ་ ཚུན་ཆད་དེ། དགེ་སློང་རྒྱང་གྲགས་ཀྱི་ནང་ན་འཁོད་པ་ཐམས་ཅད་ཀྱིས་གཅིག་ཏུ་འདུག་སྟེ་གསོ་སྦྱོང་བྱ་ཞིང་དགག་དབྱེ་དང་གསོལ་བ་དང་། གསོལ་བ་དང་གཉིས་དང་གསོལ་བ་དང་བཞིའི་ལས་བྱའོ། །མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གསོ་སྦྱོང་གི་ལས་དུ་མཆིས། ཉེ་བ་འཁོར་བཞི་སྟེ། ཆོས་མ་ཡིན་པས་མི་མཐུན་པར་བྱེད་པ་དང་། ཆོས་མ་ཡིན་པས་མཐུན་པར་བྱེད་པ་དང་། ཆོས་ཀྱིས་མི་མཐུན་པར་བྱེད་པ་དང་། ཆོས་ཀྱིས་མཐུན་པར་བྱེད་པའོ། །དེ་ལ་ གསོ་སྦྱོང་གི་ལས་ཆོས་དང་ལྡན་པ་ནི་གཅིག་སྟེ། འདི་ལྟ་སྟེ་ཆོས་ཀྱིས་མཐུན་པར་བྱེད་པའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་སོ་སོར་ཐར་པའི་མདོ་གདོན་པ་དུ་མཆིས། ཉེ་བ་འཁོར་ལྔ་སྟེ། གསོལ་བ་བྱས་ཏེ་གླེང་གཞི་བཏོན་ནས་ ལྷག་མ་ཐོས་པས་སྒྲོགས་པར་བྱེད་ན་དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །གསོལ་བ་བྱས་ཏེ་གླེང་གཞི་ཡང་བཏོན། ཕམ་པར་འགྱུར་བའི་ཆོས་བཞི་ཡང་བཏོན་ནས་ལྷག་མ་ཐོས་པས་སྒྲོགས་པར་བྱེད་ན་དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་

  293. 147b

    བྱས་པ་ཡིན་ནོ། །གསོལ་བ་བྱས་ཏེ་གླེང་གཞི་ཡང་བཏོན། ཕམ་པར་འགྱུར་བའི་ཆོས་བཞི་ཡང་བཏོན། དགེ་འདུན་ལྷག་མའི་ཆོས་བཅུ་གསུམ་ཡང་བཏོན་ནས་ལྷག་མ་ཐོས་པས་སྒྲོགས་པར་བྱེད་ན་དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །གསོལ་བ་བྱས་ཏེ་ གླེང་གཞི་ཡང་བཏོན། ཕམ་པར་འགྱུར་པའི་ཆོས་བཞི་ཡང་བཏོན། དགེ་འདུན་ལྷག་མའི་ཆོས་བཅུ་གསུམ་ཡང་བཏོན། མ་ངེས་པའི་ཆོས་གཉིས་ཀྱང་བཏོན་ནས་ལྷག་མ་ཐོས་པས་སྒྲོགས་པར་བྱེད་ན་དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །སོ་སོར་ཐར་ པས་འདོན་པ་རྒྱས་པར་བཏོན་པ་ནི་ལྔ་པ་ཡིན་ནོ།། །།སྡོམ་ལ། གནས་དང་དབྱར་སྔ་ཕྱི་མ་དང་། །གློ་བུར་བ་དང་རྒྱུ་བ་དང་། །མཚན་ཡོལ་གསོ་སྦྱོང་གྱིས་ཤིག་དང་། །སེམས་བསྐྱེད་པ་ཡིས་གསོ་སྦྱོང་བྱ། །འདི་ལྟ་སྟེ་གནས་ཤིག་ན་དགེ་སློང་རབ་ཏུ་མང་པོ་དག་འཁོད་པ་དེ་དག་འདི་ལྟར་ དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་། །དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་། །སྙམ་པ་ལས་དེ་དག་གི་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་སུ་ལ་ཡང་སོ་སོར་ཐར་པ་མི་སྣང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་དག་གིས་གནས་བསྟབས་པ་ དང་། གནས་མལ་བསྟབས་པ་དང་། ལས་བསྟབས་པ་དང་། རྙེད་པ་བསྟབས་པ་དང་། བསྙེན་བཀུར་བ་བསྟབས་པ་དང་། དགེ་སློང་གང་ལ་སོ་སོར་ཐར་པ་སྣང་བ་གཉེར་བར་བྱའོ། །གལ་ཏེ་དགེ་སློང་གང་ལ་སོ་སོར་ཐར་པ་སྣང་བ་ཞིག་རྙེད་ན་དེ་ལྟ་ན་ལེགས། འོན་ཏེ་མ་རྙེད་ན་དགེ་སློང་དེ་ དག་གིས་གནས་དེ་ཉིད་དུ་གསོ་སྦྱོང་གཞན་ལ་བསྡད་པར་མི་བྱའོ། །སྡོད་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གནས་ཤིག་ན་དགེ་སློང་རབ་ཏུ་མང་པོ་དག་དབྱར་སྔ་མར་གནས་པར་ཁས་བླང་བར་འདོད་ཅིང་དེ་དག་འདི་ལྟར་དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་། །དགེ་ སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་སྙམ་པ་ལས། དེ་དག་གིས་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་སུ་ལ་ཡང་སོ་སོར་ཐར་པ་མི་སྣང་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་དག་གིས་གནས་བསྟབས་པ་དང་། གནས་མལ་བསྟབས་པ་དང་། ལས་བསྟབས་པ་དང་།

  294. 148a

    རྙེད་པ་བསྟབས་པ་དང་། བསྙེན་བཀུར་བ་བསྟབས་པས་དགེ་སློང་གང་ལ་སོ་སོར་ཐར་པ་སྣང་བ་གཉེར་བར་བྱའོ། །གལ་ཏེ་དགེ་སློང་གང་ལ་སོ་སོར་ཐར་པ་སྣང་བ་ཞིག་རྙེད་ན་དེ་ལྟ་ན་ལེགས། འོན་ཏེ་མ་རྙེད་ན་དགེ་སློང་དེ་དག་གིས་ གནས་དེ་ཉིད་དུ་དབྱར་སྔ་མར་གནས་པར་ཁས་བླང་བར་མི་བྱའོ། །ཁས་ལེན་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གནས་ཤིག་ནས་དགེ་སློང་རབ་ཏུ་མང་པོ་དག་དབྱར་སྔ་མར་གནས་པར་ཁས་བླངས་ཤིང་དེ་དག་འདི་ལྟར་དགེ་སློང་ཆེ་གེ་མོ་ཞིག་ལ་སོ་ སོར་ཐར་པ་སྣང་ངོ་། །དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་སྙམ་པ་ལས། དེ་དག་གིས་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་སུ་ལ་ཡང་སོ་སོར་ཐར་པ་མི་སྣང་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་དག་གིས་གནས་བསྟབས་པ་དང་། གནས་མལ་ བསྟབས་པ་དང་། ལས་བསྟབས་པ་དང་། རྙེད་པ་བསྟབས་པ་དང་། བསྙེན་བཀུར་བ་བསྟབས་པས་དགེ་སློང་གང་ལ་སོ་སོར་ཐར་པ་སྣང་བ་གཉེར་བར་བྱའོ། །གལ་ཏེ་དགེ་སློང་གང་ལ་སོ་སོར་ཐར་པ་སྣང་བ་ཞིག་རྙེད་ན་དེ་ལྟ་ན་ལེགས། འོན་ཏེ་མ་རྙེད་ན་དགེ་སློང་དེ་དག་ གིས་གནས་དེ་ཉིད་དུ་དབྱར་སྔ་མར་གནས་པར་མི་བྱའོ། །གནས་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གནས་ཤིག་ན་དགེ་སློང་རབ་ཏུ་མང་པོ་དག་དབྱར་ཕྱི་མར་གནས་པར་ཁས་བླང་བར་འདོད་ཅིང་དེ་དག་འདི་ལྟར་དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་། ། དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་སྙམ་པ་ལས། དེ་དག་གི་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་སུ་ལ་ཡང་སོ་སོར་ཐར་པ་མི་སྣང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་དག་གིས་གནས་བསྟབས་པ་དང་། གནས་མལ་བསྟབས་པ་དང་། ལས་ བསྟབས་པ་དང་། རྙེད་པ་བསྟབས་པ་དང་། བསྙེན་བཀུར་བ་བསྟབས་པས་དགེ་སློང་གང་ལ་སོ་སོར་ཐར་པ་སྣང་བ་གཉེར་བར་བྱའོ། །གལ་ཏེ་དགེ་སློང་གང་ལ་སོ་སོར་ཐར་པ་སྣང་བ་ཞིག་རྙེད་ན་དེ་ལྟ་ན་ལེགས། འོན་ཏེ་མ་རྙེད་ན་དགེ་སློང་དེ་དག་གིས་གནས་དེ་ཉིད་དུ་དབྱར་ཕྱི་མར་གནས་

  295. 148b

    པར་ཁས་བླང་བར་མི་བྱའོ། །ཁས་ལེན་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གནས་ཤིག་ན་དགེ་སློང་རབ་ཏུ་མང་པོ་དག་དབྱར་ཕྱི་མར་གནས་པར་ཁས་བླངས་ཤིང་དེ་དག་འདི་ལྟར་དགེ་སློང་ཆེ་གེ་མོ་ཞིག་ལ་སོ་སོར་ཐར་པ་སྣང་ངོ་། །དགེ་སློང་ཆེ་གེ་མོ་ཞིག་ལ་སོ་སོར་ཐར་པ་ སྣང་ངོ་སྙམ་པ་ལས་དེ་དག་གིས་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་སུ་ལ་ཡང་སོ་སོར་ཐར་པ་མི་སྣང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེ་དག་གིས་གནས་དེ་ཉིད་དུ་ཟླ་བ་གཉིས་སོ་སོར་བརྟགས་ཏེ་གནས་པར་བྱའོ། །ཟླ་བ་གཉིས་འདས་ནས་དགེ་སློང་དེ་དག་ གིས་གནས་བསྟབས་པ་དང་། གནས་མལ་བསྟབས་པ་དང་། ལས་བསྟབས་པ་དང་། རྙེད་པ་བསྟབས་པ་དང་། བསྙེན་བཀུར་བ་བསྟབས་པས་དགེ་སློང་གང་ལ་སོ་སོར་ཐར་པ་སྣང་བ་གཉེར་བར་བྱའོ། །གལ་ཏེ་དགེ་སློང་གང་ལ་སོ་སོར་ཐར་པ་སྣང་བ་ཞིག་རྙེད་ན་དེ་ལྟ་ན་ལེགས། འོན་ཏེ་མ་རྙེད་ན་དགེ་སློང་དེ་དག་གིས་གནས་དེ་ཉིད་དུ་གསོ་སྦྱོང་གཞན་ལ་བསྡད་པར་མི་བྱའོ། །སྡོད་པར་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་འདི་ལྟ་སྟེ་དགེ་སློང་གཉུག་མར་གནས་པ་དག་ གིས་དགེ་སློང་གློ་བུར་བ་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་མཆིའོ་ཞེས་ཐོས་ནས་དེ་དག་གིས་དེ་དག་ལ་ཇི་ལྟར་བསྒྲུབ་པར་བགྱི། ཉེ་བ་འཁོར་དགེ་སློང་དེ་དག་གིས་དགེ་སློང་གློ་བུར་བ་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ གི་དོན་དུ་དཔག་ཚད་ཕྱེད་དང་གསུམ་དུ་གདུགས་དང་། རྒྱལ་མཚན་དང་། བ་དན་ལ་སོགས་པ་དག་གིས་བསུ་བར་བྱའོ། །གལ་ཏེ་འགྲུབ་ན་དེ་ལྟ་ན་ལེགས། འོན་ཏེ་མི་འགྲུབ་ན་རྒྱང་གྲགས་ལྔར་གདུགས་དང་། རྒྱལ་མཚན་དང་། བ་དན་ལ་སོགས་པ་དག་གིས་བསུ་བར་བྱའོ། །གལ་ ཏེ་འགྲུབ་ན་དེ་ལྟ་ན་ལེགས། འོན་ཏེ་མི་འགྲུབ་ན་དཔག་ཚད་ཕྱེད་དམ། རྒྱང་གྲགས་གསུམ་མམ། རྒྱང་གྲགས་སམ། རྒྱང་གྲགས་ཕྱེད་དམ། ཐ་ན་ཁྱམས་སུ་ཡང་གདུགས་དང་། རྒྱལ་མཚན་དང་། བ་དན་ལ་སོགས་པ་དག་གིས་བསུ་བར་བྱའོ། །ངག་གིས་བཤེས་པའི་ཚིག་གིས་

  296. 149a

    བསུས་ནས་ལྷུང་བཟེད་དང་ཆོས་གོས་དག་བླང་བར་བྱའོ། །ཁྲུས་བྱ་ཞིང་དགེ་འདུན་ལ་ཡང་སྣུམ་བག་གི་རྙེད་པ་དབུལ་བར་བྱའོ། །དེ་དག་ལ་གནས་བསྟབས་པ་དང་། གནས་མལ་བསྟབས་པ་དང་། ལས་བསྟབས་པ་དང་། རྙེད་པ་བསྟབས་པ་དང་། བསྙེན་བཀུར་ བ་བསྟབས་པ་དང་། ཆོས་མཉན་པ་སྦྱིན་པར་བྱའོ། །གལ་ཏེ་ལ་ལ་ཞིག་དེ་ན་འདི་སྐད་ཅེས། ཚེ་དང་ལྡན་པ་དག་རབ་ཏུ་བྱུང་བ་དག་ཏུ་འདྲ་ན་ཅིའི་ཕྱིར་དགེ་སློང་དེ་དག་ལ་ནི་མཆོད་པར་འོས་པར་བྱེད་ལ། ཁོ་བོ་ཅག་ལ་ནི་འོས་པར་མི་བྱེད་ཅེས་ཟེར་ན་དེ་ལ་འདི་སྐད་ཅེས། ཚེ་དང་ལྡན་པ་སྟོན་ པ་འདས་པའི་གསུང་རབ་ལ་འདི་ནི་སྟོན་པའོ། །འདི་ནི་རྟེན་ཏེ། འདི་ལྟ་སྟེ་མདོ་སྡེ་དང་། འདུལ་བ་དང་། མ་མོའོ། །དེ་ཡང་ཚེ་དང་ལྡན་པ་དེ་དག་གིས་རྒྱ་ཆེར་བཀླགས་ཤིང་ཐོན་པས་དེའི་ཕྱིར་འདི་དག་ནི་མཆོད་པར་འོས་པ་ཡིན་གྱི་ཁྱོད་ནི་མ་ཡིན་ནོ། །ཞེས་བརྗོད་པར་བྱའོ། ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ལྷན་ཅིག་གནས་པ་དང་། ཉེ་གནས་དག་ལྗོངས་རྒྱུར་འདོང་བར་འདོད་ན། དེ་དག་ལ་མཁན་པོ་དང་སློབ་དཔོན་དག་གིས་རྣམ་པ་གང་གིས་ཀྱང་གནང་བར་མི་བྱའོ། །གལ་ཏེ་རྐྱེན་དེ་ལྟ་བུ་ཞིག་བྱུང་ན་ཚེ་དང་ལྡན་པ་དག་གནས་ཆེ་གེ་ མོ་ཞིག་ན་དགེ་སློང་གི་དགེ་འདུན་གྱི་གནས་བརྟན་དང་བཅས། སོ་སོར་ཐར་པ་དང་བཅས་ཤིང་། དགེ་སློང་ཚུལ་ཁྲིམས་དང་ལྡན་པ་དང་ཡོན་ཏན་དང་ལྡན་པ་དེས་པ་དགེ་བའི་ཆོས་ཅན་དག་འཁོད་ཀྱིས། དེ་དག་གིས་འགྱོད་པ་མ་སྐྱེས་པ་ནི་སྐྱེད་པར་མི་འགྱུར་ལ་སྐྱེས་པ་ནི་ སེལ་བར་འགྱུར་གྱིས་དེར་དེང་ཤིག་ཅེས་བརྗོད་པར་བྱའོ། །གལ་ཏེ་བསྟན་པ་དེ་ལས་གཞན་དུ་འཇུག་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། ། བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མཚན་མོ་ཡོལ་གྱིས་གསོ་སྦྱོང་གྱིས་ཤིག །དེ་ནས་དགེ་སློང་ཞིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

  297. 149b

    བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་གནས་ཤིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་ཞིག་མཆིས་ན་དེ་ལ་བདག་ཅག་གིས་ཇི་ལྟར་བསྒྲུབ་པར་བགྱི། བཅོམ་ ལྡན་འདས་ཀྱིས་བཀའ་སྩལ་པ། དེའི་ཡོངས་སུ་དག་པ་བླང་བར་བྱའོ། །བཅོམ་ལྡན་འདས་ཀྱིས་དེའི་ཡོངས་སུ་དག་པ་བླང་བར་བྱའོ་ཞེས་བཀའ་སྩལ་ནས། དགེ་སློང་དག་གིས་ཇི་ལྟར་བླང་བར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གཅིག་ གིས་གཅིག་གི་དང་། གཅིག་གིས་གཉིས་ཀྱི་དང་། རབ་ཏུ་མང་པོ་རྣམས་ཀྱི་ཡང་རུང་སྟེ། དགེ་འདུན་གྱི་ནང་དུ་ཇི་སྙེད་ཀྱི་མིང་དག་བརྗོད་པར་ནུས་པའི་བར་དུའོ། །དགེ་སློང་དག་ངས་དགེ་སློང་ཡོངས་སུ་དག་པ་འབུལ་བར་བྱེད་པའི་ཀུན་དུ་སྤྱད་པའི་ཆོས་རྣམས་བཅའ་བར་ བྱ་སྟེ། དགེ་སློང་ཡོངས་སུ་དག་པ་འབུལ་བར་བྱེད་པས་བླ་གོས་ཕྲག་པ་གཅིག་ཏུ་གཟར་ཏེ། མཆིལ་ལྷམ་གཉིས་ཕུད་ནས་རྒན་རིམས་བཞིན་དུ་ཕྱག་འཚལ་ཏེ། ཙོག་ཙོག་པོར་འདུག་ནས་ཐལ་མོ་སྦྱར་ཏེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ ཡོངས་སུ་དག་གོ་ཞེས་བདག་མཆིའོ། །བདག་གི་གསོ་སྦྱོང་ཡང་ཡོངས་སུ་དག་སྟེ། ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །དེ་བཞིན་དུ་ལན་གཉིས་ལན་གསུམ་དུ་བཟླས། དགེ་སློང་ཡོངས་སུ་དག་པ་འབུལ་བས་གལ་ཏེ་ལུས་ཀྱི་རྣམ་པར་ རིག་བྱེད་ཀྱིས་ཡོངས་སུ་དག་པ་འབུལ་བར་བྱེད་ན་ཡོངས་སུ་དག་པ་ཕུལ་བར་བརྗོད་པར་བྱའོ། །ངག་གི་རྣམ་པར་རིག་བྱེད་ཀྱིས་འབུལ་བར་བྱེད་ན་ཡོངས་སུ་དག་པ་ཕུལ་བར་བརྗོད་པར་བྱའོ། །ལུས་ཀྱི་རྣམ་པར་རིག་བྱེད་དང་། ངག་གི་རྣམ་པར་རིག་བྱེད་ཀྱིས་འབུལ་བར་བྱེད་ན་

  298. 150a

    ཡོངས་སུ་དག་པ་ཕུལ་བར་བརྗོད་པར་བྱའོ། །ལུས་ཀྱི་རྣམ་པར་རིག་བྱེད་ཀྱིས་འབུལ་བར་མི་བྱེད། ངག་གི་རྣམ་པར་རིག་བྱེད་ཀྱིས་ཀྱང་འབུལ་བར་མི་བྱེད་ན་དགེ་འདུན་ཐམས་ཅད་དེར་དོང་བར་བྱའོ། །ཡང་ན་དགེ་སློང་དེ་དགེ་འདུན་གྱི་ནང་དུ་བླང་བར་ བྱའོ། །དགེ་འདུན་ཐམས་ཅད་དེར་དོང་བར་མི་བྱེད་དམ། དགེ་སློང་དེ་དགེ་འདུན་གྱི་ནང་དུ་ལེན་པར་མི་བྱེད་པར་མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་ཡོངས་སུ་དག་པ་འབུལ་བར་བྱེད་པས་ཀུན་དུ་སྤྱད་པའི་ཆོས་ཇི་ལྟར་བཅས་པ་རྣམས་ཡང་དག་ པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དག་ངས་དགེ་སློང་ཡོངས་སུ་དག་པ་ལེན་པའི་ཀུན་དུ་སྤྱད་པའི་ཆོས་རྣམས་བཅའ་བར་བྱ་སྟེ། དགེ་སློང་ཡོངས་སུ་དག་པ་ལེན་པས་ཡོངས་སུ་དག་པ་བླངས་ནས་བརྒྱུག་པར་མི་བྱའོ། །མགྱོགས་ པར་མི་བྱའོ། །མཆོང་བར་མི་བྱའོ། །ཕྱི་རོལ་ལ་མཆོང་བར་མི་བྱའོ། །འོབས་ལ་མཆོང་བར་མི་བྱའོ། །བང་རིམ་ལ་མཆོང་བར་མི་བྱའོ། །སྟེང་གི་ནམ་མཁའ་ལ་འདུག་པར་མི་བྱའོ། །མཚམས་ཀྱི་ཕྱི་རོལ་དུ་འགྲོ་བར་མི་བྱའོ། །གོམ་པ་གཅིག་གིས་སྐས་ཀྱི་རིམ་པ་གཉིས་ ལ་ཐོད་རྒལ་དུ་གཟེག་པར་མི་བྱའོ། །གོམ་པ་གཅིག་གིས་ཐེམ་སྐས་ཀྱི་ཐེམ་པ་གཉིས་ལ་ཐོད་རྒལ་དུ་གཟེག་པར་མི་བྱའོ། །ཆུ་ལྐོག་མ་ནུབ་ཙམ་ལ་འབོག་པར་མི་བྱའོ། །གཉིད་ལོག་པར་མི་བྱའོ། །སྙོམས་པར་འཇུག་པར་མི་བྱའོ། །གཉིད་ལོག་པར་བྱེད་པ་ དང་སྙོམས་པར་འཇུག་པར་བྱེད་པ་ནི་རྒྱུ་གཉིས་ཀྱིས་སྨད་པར་བྱ་བ་ཡིན་ཏེ། ངོ་ཚ་མེད་པ་ཉིད་གང་ཡིན་པ་དང་། མ་ཀླས་པ་ཉིད་གང་ཡིན་པས་སོ། །གང་གི་ཚེ་དགེ་འདུན་གྱི་གནས་བརྟན་གྱིས་ཚེ་དང་ལྡན་པ་དག་མ་ལྷགས་པ་རྣམས་ཀྱི་ཡོངས་སུ་དག་པ་རྗོད་ཅིག །བརྗོད་ པ་ཡང་རིག་པར་གྱིས་ཤིག་ཅེས་སྨྲས་པའི་ཚེ་དེས་དགེ་སློང་དྲུང་ན་འདུག་པའི་མདུན་དུ་འདུག་སྟེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་

  299. 150b

    བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆིའོ། །དེའི་གསོ་སྦྱོང་ཡང་ཡོངས་སུ་ དག་གོ། །ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །དེ་བཞིན་དུ་ལན་གཉིས་ལན་གསུམ་དུ་བཟླས། ཡང་ན་དེས་དགེ་འདུན་གྱི་དབུས་སུ་རྒན་པའི་མཐར་འགྲེང་སྟེ་འདུད་པ་དང་བཅས་པས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་ རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་ བ་བྲོ་ཚབས་ཆེ་བ་མིང་འདི་ཞེས་བགྱི་བ་དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆིའོ། །དེའི་གསོ་སྦྱོང་ཡང་ཡོངས་སུ་དག་གོ། །ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །དགེ་སློང་ཡོངས་སུ་དག་པ་ལེན་པས་ཀུན་དུ་སྤྱད་པའི་ཆོས་ ཇི་ལྟར་བཅས་པ་རྣམས་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་རེ་ཞིག་དགེ་སློང་ཡོངས་སུ་དག་པ་ལེན་པས་ཡོངས་སུ་དག་པ་བླངས་ཏེ། དེ་ཉིད་དུ་རྒྱུན་ ཆད་ཅིང་དུས་བགྱིད་ན་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །ཁྱིམ་པ་ཉིད་དུ་གཡར་གྱིས་འཆེ་བར་བགྱིད་དམ། དགེ་ཚུལ་ཉིད་དམ། ཟ་མ་ཉིད་དམ། མ་ནིང་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་དབྱེན་བགྱིས་པ་ཉིད་དམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་

  300. 151a

    པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་དད་པར་གནས་པ་ཉིད་དམ། གནས་པར་མི་བགྱིད་པ་ཉིད་དུ་གཡར་གྱིས་འཆེ་བར་བགྱིད་ན་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །བཙུན་པ་རེ་ཞིག་དགེ་སློང་ཡོངས་སུ་དག་པ་ལེན་པས་ཡོངས་སུ་དག་པ་བླངས་ཏེ། ཤུལ་དུ་རྒྱུན་ཆད་ཅིང་དུས་བགྱིད་ན་ཡོངས་སུ་དག་པ་བླངས་པ་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །ཁྱིམ་ པ་ཉིད་དུ་གཡར་གྱིས་འཆེ་བར་བགྱིད་དམ། དགེ་ཚུལ་ཉིད་དམ། ཟ་མ་ཉིད་དམ། མ་ནིང་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་དབྱེན་བགྱིས་པ་ཉིད་དམ། དེ་བཞིན་ གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་དད་པར་གནས་པ་ཉིད་དམ། གནས་པར་མི་བགྱི་བ་ཉིད་དུ་གཡར་གྱིས་འཆེ་བར་བགྱིད་ན་ཡོངས་སུ་དག་པ་བླངས་པར་བརྗོད་པར་ བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །བཙུན་པ་རེ་ཞིག་དགེ་སློང་ཡོངས་སུ་དག་པ་ལེན་པས་ཡོངས་སུ་དག་པ་བླངས་ཏེ། དགེ་འདུན་གྱི་ནང་དུ་རྒྱུན་ཆད་ཅིང་དུས་བགྱིད་ན་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་ པར་བརྗོད་པར་བགྱི། ཉེ་བ་འཁོར་བླངས་པ་ཡིན་ཏེ། ཡང་བླང་བར་མི་བྱའོ། །ཁྱིམ་པ་ཉིད་དུ་གཡར་གྱིས་འཆེ་བར་བགྱིད་དམ། དགེ་ཚུལ་ཉིད་དམ། ཟ་མ་ཉིད་དམ། མ་ནིང་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་ པ་བསད་པ་ཉིད་དམ། དགེ་འདུན་གྱི་དབྱེན་བགྱིས་པ་ཉིད་དམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་དད་པར་གནས་པ་ཉིད་དམ། གནས་པར་མི་བགྱི་བ་ཉིད་དུ་

  301. 151b

    གཡར་གྱིས་འཆེ་བར་བགྱིད་ན་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་བླངས་པ་ཡིན་ཏེ། ཡང་བླང་བར་མི་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གནས་གང་ན་དགེ་སློང་གཅིག་པུ་མཆིས་པ་དེས་གསོ་ སྦྱོང་བཅྭ་ལྔ་པ་དེ་ཉིད་ལ་ཇི་ལྟར་བསྒྲུབ་པར་བགྱི། ཉེ་བ་འཁོར་དགེ་སློང་དེས་གཙུག་ལག་ཁང་ཆག་ཆག་གདབ་པར་བྱ། ཕྱག་དར་བྱ། བ་ལང་གི་ལྕི་བ་སར་པའི་བྱུག་པས་བྱུག་པར་བྱ། སེང་གེའི་ཁྲི་བཤམ་པར་བྱ། སྟན་བཤམ་པར་བྱ། མར་མེ་གཟུགས་པར་བྱ། ཆོས་མཉན་པ་སྦྱིན་པར་བྱའོ། །དེའི་འོག་ཏུ་ ཕྱོགས་ཆེས་མཐོན་པོར་འདུག་སྟེ་ཕྱོགས་བཞིར་བལྟ་བར་བྱའོ། །དེར་དགེ་སློང་ཡོངས་སུ་དག་པ་ལྟ་བ་མཐུན་པ་ལ་ལ་དག་འོང་ན་འདི་སྐད་ཅེས། ཀྱེ་ཚེ་དང་ལྡན་པ་དག་མྱུར་བ་མྱུར་བར་ཤོག་ཤིག་དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ནོ་ཞེས་བརྗོད་པར་བྱ་ཞིང་དེ་དག་དང་ལྷན་ཅིག་འདུག་སྟེ་གསོ་སྦྱོང་བྱའོ། །གལ་ཏེ་ འགྲུབ་ན་དེ་ལྟ་ན་ལེགས། ཇི་སྟེ་མི་འགྲུབ་ན་དགེ་སློང་དེས་རང་གི་སྟན་ལ་འདུག་སྟེ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ལ། བདག་དགེ་སློང་མིང་འདི་ཞེས་བྱ་བའི་གསོ་སྦྱོང་ཡང་བཅྭ་ལྔ་པ་ཡིན་ཏེ། བདག་དགེ་སློང་མིང་འདི་ཞེས་བྱ་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཀྱང་བདག་སྨྲས། བདག་ཡོངས་ སུ་དག་པར་ལྷ་རྣམས་ཀྱིས་གཟུང་དུ་གསོལ། བདག་དགེ་སློང་མིང་འདི་ཞེས་བྱ་བས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་དེང་གསོ་སྦྱོང་བྱིན་གྱིས་བརླབ་བོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་ཏུ་གསོ་སྦྱོང་རྒྱ་ཆེར་ཉམས་སུ་མྱང་བར་བྱ་ཞིང་། སོ་སོར་ཐར་པའི་མདོ་གདོན་ པ་འདོན་པར་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུའང་བརྗོད་པར་བྱའོ། །དེ་བཞིན་དུ་ལན་གཉིས་ལན་གསུམ་དུ་བཟླས། གང་ན་དགེ་སློང་གཉིས་འཁོད་པ་དེར་ནི་རིམ་པ་དེ་ཉིད་ཀྱིས་གཅིག་ལ་གཅིག་བརྗོད་པར་བྱའོ། །གང་ན་དགེ་སློང་གསུམ་འཁོད་པ་དེར་ཡང་རིམ་པ་དེ་ཉིད་ཀྱིས་གཅིག་ལ་གཅིག་བརྗོད་ པར་བྱའོ། །གང་ན་དགེ་སློང་བཞི་པ་འཁོད་པ་དེར་ནི་དེ་རྣམས་ཀྱིས་གསོལ་བ་བྱས་ཏེ་གསོ་སྦྱོང་བྱའོ། །དེར་ནི་ནད་པའི་ཡོངས་སུ་དག་པ་བླང་བར་མི་བྱའོ། །གང་ན་དགེ་སློང་ལྔའམ། ལྷག་པར་འཁོད་པ་དེར་ནི་དེ་རྣམས་ཀྱིས་གསོལ་བ་བྱས་ཏེ་གསོ་སྦྱོང་བྱའོ། །ནད་པའི་ཡོངས་སུ་དག་པ་ཡང་བླང་བར་བྱའོ།། །།

  302. 152a

    འདུལ་བ་གཞི། བམ་པོ་བཅུ་གསུམ་པ། སྡོམ་ལ། རྒྱལ་པོས་དགེ་སློང་བཟུང་བ་དང་། །བྱ་བ་ཡོད་ཀྱིས་མ་ལྡང་དང་། །སྨྱོས་པ་གནང་བ་སྦྱིན་པ་དང་། །དྲན་པ་བཅུ་པོ་དག་ཡིན་ནོ། །འདི་ལྟ་སྟེ་རྒྱལ་པོའམ། ཆོམ་རྐུན་པའམ། གསོད་པའམ། ཕྱིར་རྒོལ་བའམ། དགྲ་བོ་རྣམས་ཀྱིས་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་བཟུང་ན། དགེ་སློང་དེའི་དོན་གྱི་ཕྱིར་དགེ་སློང་དེ་རྣམས་ཀྱིས་མངོན་སུམ་དུའམ་ཕྲིན་པ་གཏང་ཞིང་དགེ་སློང་འདི་བདག་ཅག་གི་ཚངས་པ་མཚུངས་པར་སྤྱོད་པ་ཡིན་གྱིས། འདི་ཐོང་ཤིག་ཅེས་བརྗོད་ པར་བྱའོ། །གལ་ཏེ་གཏོང་ན་དེ་ལྟ་ན་ལེགས། ཇི་སྟེ་མི་གཏོང་ན་དགེ་སློང་འདི་དང་བདག་ཅག་བྱ་བ་ཅུང་ཟད་ཅིག་ཡོད་ཀྱིས། དགེ་སློང་འདི་ཐོང་ཤིག་ཅེས་ཕྲིན་པ་གཉིས་པ་གཏང་བར་བྱའོ། །གལ་ཏེ་གཏོང་ན་དེ་ལྟ་ན་ལེགས། ཇི་སྟེ་མི་གཏོང་ན་དགེ་སློང་དེ་རྣམས་ཀྱིས་ དཀྱིལ་འཁོར་བར་དོང་སྟེ་གསོ་སྦྱོང་བྱའོ། །དེའི་འོག་ཏུ་ཕྱི་དེ་ཉིན་པར་དགེ་སློང་དེ་ཐར་བར་བྱ་བའི་ཕྱིར་འབད་པར་བྱ་སྟེ། གལ་ཏེ་འབད་པར་བྱེད་ན་དེ་ལྟ་ན་ལེགས། ཇི་སྟེ་འབད་པར་མི་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་གསོ་སྦྱོང་ བཅྭ་ལྔ་པ་དེ་ཉིད་ལ་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ནས། དགེ་འདུན་གྱི་སོ་སོར་ཐར་པ་བཏོན་ཏེ་གསོ་སྦྱོང་བྱས་པ་དང་། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་འདུན་གྱི་བྱ་བ་ ཅུང་ཞིག་ཡོད་ཀྱིས་རེ་ཞིག་མ་ལྡང་ཤིག །དེ་ནས་དགེ་སློང་ཞིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་གནས་ཤིག་ན་དགེ་སློང་ བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མཆིས་པ་དེའི་ཡོངས་སུ་དག་པ་བླངས་ན་དེ་ལ་བདག་ཅག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དེས་དགེ་སློང་བདག་ཉིད་ཡོངས་སུ་དག་པར་བྱ་བའི་ཕྱིར་ཡོངས་སུ་དག་པ་ཕུལ་བ་དེའི་འདུན་པ་

  303. 152b

    བླང་བར་བྱའོ། །བཅོམ་ལྡན་འདས་ཀྱིས་འདུན་པ་བླང་བར་བྱའོ་ཞེས་བཀའ་སྩལ་ན། དགེ་སློང་རྣམས་ཀྱིས་ཇི་ལྟར་བླང་བར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གཅིག་གིས་གཅིག་གི་དང་། གཅིག་གིས་གཉིས་ཀྱི་དང་། རབ་ཏུ་མང་པོ་རྣམས་ ཀྱི་ཡང་རུང་སྟེ། དགེ་འདུན་གྱི་ནང་དུ་ཇི་སྙེད་ཀྱི་མིང་དག་བརྗོད་པར་ནུས་པའི་བར་དུའོ། །དགེ་སློང་དག་ངས་དགེ་སློང་འདུན་པ་འབུལ་བར་བྱེད་པའི་ཀུན་ཏུ་སྤྱོད་པའི་ཆོས་རྣམས་བཅའ་བར་བྱ་སྟེ། དགེ་སློང་འདུན་པ་འབུལ་བར་བྱེད་པས་བླ་གོས་ཕྲག་པ་གཅིག་ཏུ་གཟར་ཏེ་མཆིལ་ ལྷམ་གཉིས་ཕུད་ནས་རྒན་རིམས་བཞིན་དུ་ཕྱག་འཚལ་ཏེ། ཙོག་ཙོག་པོར་འདུག་ནས་ཐལ་མོ་སྦྱར་ཏེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། བདག་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ ལོ། །བདག་གི་གསོ་སྦྱོང་ཡང་ཡོངས་སུ་དག་གོ། །འདུན་པ་དང་ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །དེ་བཞིན་དུ་ལན་གཉིས་ལན་གསུམ་དུ་བཟླས། དགེ་སློང་འདུན་པ་འབུལ་བས་གལ་ཏེ་ལུས་ཀྱི་རྣམ་པར་རིག་བྱེད་ཀྱིས་འདུན་པ་འབུལ་ བར་བྱེད་ན་འདུན་པ་ཕུལ་བར་བརྗོད་པར་བྱའོ། །ངག་གི་རྣམ་པར་རིག་བྱེད་ཀྱིས་འདུན་པ་འབུལ་བར་བྱེད་ན་འདུན་པ་ཕུལ་བར་བརྗོད་པར་བྱའོ། །ལུས་ཀྱི་རྣམ་པར་རིག་བྱེད་དང་། ངག་གི་རྣམ་པར་རིག་བྱེད་ཀྱིས་འདུན་པ་འབུལ་བར་བྱེད་ན་འདུན་པ་ཕུལ་བར་བརྗོད་པར་བྱའོ། །ལུས་ ཀྱི་རྣམ་པར་རིག་བྱེད་ཀྱིས་ཀྱང་འབུལ་བར་མི་བྱེད། ངག་གི་རྣམ་པར་རིག་བྱེད་ཀྱིས་ཀྱང་འབུལ་བར་མི་བྱེད་ན་དགེ་འདུན་ཐམས་ཅད་དེར་དོང་བར་བྱའོ། །ཡང་ན་དགེ་སློང་དེ་དགེ་འདུན་གྱི་ནང་དུ་བླང་བར་བྱའོ། །དགེ་འདུན་ཐམས་ཅད་དེར་འདོང་བར་མི་བྱེད་དམ། དགེ་སློང་

  304. 153a

    དེ་དགེ་འདུན་གྱི་ནང་དུ་ལེན་པར་མི་བྱེད་པར་མི་མཐུན་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་འདུན་པ་འབུལ་བར་བྱེད་པས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་རྣམས་ཡང་དག་པར་བླངས་ཏེ་མི་འཇུག་ན་འགལ་ཚབས་ཅན་དུ་འགྱུར་རོ། །དགེ་སློང་ དག་ངས་དགེ་སློང་འདུན་པ་ལེན་པའི་ཀུན་ཏུ་སྤྱད་པའི་ཆོས་རྣམས་བཅའ་བར་བྱ་སྟེ། དགེ་སློང་འདུན་པ་ལེན་པས་འདུན་པ་བླངས་ནས་བརྒྱུག་པར་མི་བྱའོ། །མགྱོགས་པར་མི་བྱའོ། །མཆོང་བར་མི་བྱའོ། །ཕྱི་རོལ་ལ་མཆོང་བར་མི་བྱའོ། །འོབས་ལ་མཆོང་བར་མི་བྱའོ། ། བང་རིམ་ལ་མཆོང་བར་མི་བྱའོ། །སྟེང་གི་ནམ་མཁའ་ལ་འདུག་པར་མི་བྱའོ། །མཚམས་ཀྱི་ཕྱི་རོལ་དུ་འགྲོ་བར་མི་བྱའོ། །གོམ་པ་གཅིག་གིས་སྐས་ཀྱི་རིམ་པ་གཉིས་ལ་ཐོད་རྒལ་དུ་འཛེག་པར་མི་བྱའོ། །གོམ་པ་གཅིག་གིས་ཐེམ་སྐས་ཀྱི་ཐེམ་པ་གཉིས་ལ་ཐོད་རྒལ་དུ་ དུ་གཟེག་པར་མི་བྱའོ། །ཆུ་ལྐོག་མ་ནུབ་ཙམ་ལ་འབོག་པར་མི་བྱའོ། །གཉིད་ལོག་པར་མི་བྱའོ། །སྙོམས་པར་འཇུག་པར་མི་བྱའོ། །གཉིད་ལོག་པར་བྱེད་པ་དང་། སྙོམས་པར་འཇུག་པར་བྱེད་པ་ནི་རྒྱུ་གཉིས་ཀྱིས་སྨད་པར་བྱ་བ་ཡིན་ཏེ། ངོ་ཚ་མེད་པ་ཉིད་གང་ ཡིན་པ་དང་། མ་ཀླས་པ་ཉིད་གང་ཡིན་པས་སོ། །གང་གི་ཚེ་དགེ་འདུན་གྱི་གནས་བརྟན་གྱིས་ཚེ་དང་ལྡན་པ་དག་མ་ལྷགས་པ་རྣམས་ཀྱི་འདུན་པ་དང་ཡོངས་སུ་དག་པར་བརྗོད་ཅིང་བརྗོད་པར་ཡང་རིག་པར་གྱིས་ཤིག་ཅེས་སྨྲས་པའི་ཚེ། དེས་དགེ་སློང་དྲུང་ན་འདུག་པའི་མདུན་ དུ་འདུག་སྟེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། གནས་ག་གེ་མོ་ཞིག་ ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །དེའི་གསོ་སྦྱོང་ཡང་ཡོངས་སུ་དག་གོ། །འདུན་པ་དང་ཡོངས་སུ་

  305. 153b

    དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །དེ་བཞིན་དུ་ལན་གཉིས་ལན་གསུམ་དུ་བཟླས། ཡང་ན་དེས་དགེ་འདུན་གྱི་དབུས་སུ་རྒན་པའི་མཐར་འགྲེང་སྟེ་འདུད་པ་དང་བཅས་པས་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། གནས་ག་གེ་མོ་ཞིག་ན་དགེ་སློང་བྲོ་འཚལ་བ་སྡུག་བསྔལ་བ་བྲོ་ཚབས་ཆེ་བ་མིང་འདི་ཞེས་བགྱི་བ་ དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆིའོ། །དགེ་འདུན་ཆོས་བཞིན་དུ་མཛད་པ་ལ་འདུན་པ་འབུལ་ལོ། །དེའི་གསོ་སྦྱོང་ཡང་ཡོངས་སུ་དག་གོ། །འདུན་པ་དང་ཡོངས་སུ་དག་པ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ། །དགེ་སློང་འདུན་ པ་ལེན་པས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་རྣམས་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་རེ་ཞིག་དགེ་སློང་འདུན་པ་དང་ཡོངས་སུ་དག་པ་ལེན་ པས་འདུན་པ་དང་ཡོངས་སུ་དག་པ་བླངས་ཏེ། དེ་ཉིད་དུ་རྒྱུན་ཆད་ཅིང་དུས་བགྱིད་ན་འདུན་པ་དང་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །ཁྱིམ་པ་ཉིད་དུ་གཡར་གྱིས་ འཆེ་བར་བགྱིད་དམ། དགེ་ཚུལ་ཉིད་དམ། ཟ་མ་ཉིད་དམ། མ་ནིང་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་དབྱེན་བགྱིས་པ་ཉིད་དམ། དེ་བཞིན་གཤེགས་ པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་དད་པར་གནས་པ་ཉིད་དམ། གནས་པར་མི་བགྱི་བ་ཉིད་དུ་གཡར་གྱིས་འཆེ་བར་བགྱིད་ན་འདུན་པ་དང་ཡོངས་སུ་དག་པ་བླངས་

  306. 154a

    པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །བཙུན་པ་རེ་ཞིག་དགེ་སློང་འདུན་པ་དང་ཡོངས་སུ་དག་པ་ལེན་པས་འདུན་པ་དང་ཡོངས་སུ་དག་པ་བླངས་ཏེ་ཤུལ་དུ་རྒྱུན་ཆད་ཅིང་དུས་བགྱིད་ ན་འདུན་པ་དང་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་མ་བླངས་པ་ཡིན་ཏེ། ཡང་བླང་བར་བྱའོ། །ཁྱིམ་པ་ཉིད་དུ་གཡར་གྱིས་འཆ་བར་བགྱིད་དམ། དགེ་ཚུལ་ཉིད་དམ། ཟ་མ་ཉིད་དམ། མ་ནིང་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་དབྱེན་བགྱིས་པ་ཉིད་དམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ ཅན་ཞུགས་པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་དད་པར་གནས་པ་ཉིད་དམ། གནས་པར་མི་བགྱི་བ་ཉིད་དུ་གཡར་གྱིས་འཆེ་བར་བགྱིད་ན་འདུན་པ་དང་ཡོངས་སུ་དག་པ་བླངས་པར་བརྗོད་པར་བགྱི་འམ། མ་བླངས་པར་བརྗོད་པར་བགྱི། ཉེ་བ་འཁོར་ མ་བླངས་པ་ཡིན་ཏེ། ཡང་བླང་བར་བྱའོ། །བཙུན་པ་རེ་ཞིག་དགེ་སློང་འདུན་པ་དང་ཡོངས་སུ་དག་པ་ལེན་པས་འདུན་པ་དང་ཡོངས་སུ་དག་པ་བླངས་ཏེ། དགེ་འདུན་གྱི་ནང་དུ་རྒྱུན་ཆད་ཅིང་དུས་བགྱིད་ན་འདུན་པ་དང་ཡོངས་སུ་དག་པ་བླངས་པར་བརྗོད་པར་བགྱི་འམ། མ་ བླངས་པར་བརྗོད་པར་བགྱི། ཉེ་བ་འཁོར་བླངས་པ་ཡིན་ཏེ། ཡང་བླང་བར་མི་བྱའོ། །ཁྱིམ་པ་ཉིད་དུ་གཡར་གྱིས་འཆེ་བར་བགྱིད་དམ། དགེ་ཚུལ་ཉིད་དམ། ཟ་མ་ཉིད་དམ། མ་ནིང་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་ པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་དབྱེན་བགྱིས་པ་ཉིད་དམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་

  307. 154b

    དད་པར་གནས་པ་ཉིད་དམ། གནས་པར་མི་བགྱི་བ་ཉིད་དུ་གཡར་གྱིས་འཆེ་བར་བགྱིད་ན་འདུན་པ་དང་ཡོངས་སུ་དག་པ་བླངས་པར་བརྗོད་པར་བགྱིའམ། མ་བླངས་པར་བརྗོད་པར་བགྱི། ཉེ་བ་འཁོར་བླངས་པ་ཡིན་ཏེ། ཡང་བླང་བར་མི་བྱའོ། །སངས་རྒྱས་བཅོམ་ལྡན་ འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གནས་གང་ན་དགེ་སློང་གཅིག་པུ་མཆིས་པ་དེས་གསོ་སྦྱོང་བཅྭ་ལྔ་པ་དེ་ཉིད་ལ་ཇི་ལྟར་བསྒྲུབ་པར་བགྱི། ཉེ་བ་འཁོར་དགེ་སློང་དེས་གཙུག་ལག་ཁང་ཆག་ཆག་གདབ་པར་བྱ། ཕྱག་དར་བྱ། བ་ལང་གི་ལྕི་བ་སར་ པས་བྱུག་པར་བྱ། སེང་གེའི་ཁྲི་བཤམ་པར་བྱ། སྟན་བཤམ་པར་བྱ། མར་མེ་གཟུགས་པར་བྱ། ཆོས་མཉན་པ་སྦྱིན་པར་བྱའོ། །དེའི་འོག་ཏུ་ཕྱོགས་ཆེས་མཐོན་པོར་འདུག་སྟེ་ཕྱོགས་བཞིར་བལྟ་བར་བྱའོ། །དེར་དགེ་སློང་ཡོངས་སུ་དག་པ་ལྟ་བ་མཐུན་པ་ལ་ལ་དག་འོང་ན་འདི་ སྐད་ཅེས་ཀྱེ་ཚེ་དང་ལྡན་པ་དག་མྱུར་བ་མྱུར་བར་ཤོག་ཤིག །དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ནོ་ཞེས་བརྗོད་པར་བྱ་ཞིང་དེ་དག་དང་ལྷན་ཅིག་འདུག་སྟེ་གསོ་སྦྱོང་བྱའོ། །གལ་ཏེ་འགྲུབ་ན་དེ་ལྟ་ན་ལེགས། ཇི་སྟེ་མི་འགྲུབ་ན་དགེ་སློང་དེས་རང་གི་སྟན་ལ་འདུག་སྟེ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ལ། བདག་དགེ་སློང་མིང་འདི་ཞེས་བྱ་བའི་གསོ་སྦྱོང་ཡང་བཅྭ་ལྔ་པ་ཡིན་ཏེ། བདག་དགེ་སློང་མིང་འདི་ཞེས་བྱ་བ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཀྱང་བདག་སྨྲས། བདག་ཡོངས་སུ་དག་པར་ལྷ་རྣམས་ཀྱིས་གཟུང་དུ་ གསོལ། བདག་དགེ་སློང་མིང་འདི་ཞེས་བྱ་བས་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་དེང་གསོ་སྦྱོང་བྱིན་གྱིས་བརླབ་བོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་དང་ལྷན་ཅིག་ཏུ་གསོ་སྦྱོང་རྒྱ་ཆེར་ཉམས་སུ་མྱང་བར་བྱ་ཞིང་སོ་སོར་ཐར་པའི་མདོ་གདོན་ པ་གདོན་པར་བྱའོ་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱའོ། །དེ་བཞིན་དུ་ལན་གཉིས་ལན་གསུམ་དུ་བཟླས། གང་ན་དགེ་སློང་གཉིས་འཁོད་པ་དེར་ནི་རིམ་པ་དེ་ཉིད་ཀྱིས་གཅིག་ལ་གཅིག་བརྗོད་པར་བྱའོ། །གང་ན་དགེ་སློང་གསུམ་འཁོད་པ་དེར་ཡང་

  308. 155a

    རིམ་པ་དེ་ཉིད་ཀྱིས་གཅིག་ལ་གཅིག་བརྗོད་པར་བྱའོ། །གང་ན་དགེ་སློང་བཞི་འཁོད་པ་དེར་ནི་དེ་རྣམས་ཀྱིས་གསོལ་བ་བྱས་ཏེ་གསོ་སྦྱོང་བྱའོ། །དེར་ནི་ནད་པའི་འདུན་པ་དང་ཡོངས་སུ་དག་པ་བླང་བར་མི་བྱའོ། །གང་ན་དགེ་སློང་ལྔའམ། ལྷག་པར་ འཁོད་ན་དེ་རྣམས་ཀྱིས་གསོལ་བ་བྱས་ཏེ་གསོ་སྦྱོང་བྱའོ། །ནད་པའི་འདུན་པ་དང་ཡོངས་སུ་དག་པ་ཡང་བླང་བར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་ བྱེ་མ་སྐྱེས་སྒྲེན་མོར་བྱུང་སྟེ་སྨྱོས་ཤིང་སེམས་འཁྲུགས་ཏེ་དེ་དང་དེར་འཁྱམ་ཞིང་དེ་དགེ་འདུན་གྱི་གསོ་སྦྱོང་གི་གནས་སུ་རེས་འགའ་ནི་འོང་། རེས་འགའ་ནི་མི་འོང་། དགེ་འདུན་དང་ལྷན་ཅིག་རེས་འགའ་ནི་གསོ་སྦྱོང་ཉམས་སུ་མྱོང་བར་བྱེད། རེས་འགའ་ནི་ཉམས་སུ་ མྱོང་བར་མི་བྱེད། དགེ་འདུན་གྱི་དགེ་འདུན་གྱི་ཆེད་དང་བྱ་བ་རྣམས་ལ་རེས་འགའ་ནི་འོང་། རེས་འགའ་ནི་མི་འོང་། དགེ་འདུན་དང་ལྷན་ཅིག་དགེ་འདུན་གྱི་དགེ་འདུན་གྱི་ཆེད་དང་དགེ་འདུན་གྱི་བྱ་བ་དག་རེས་འགའ་ནི་ཉམས་སུ་མྱོང་བར་བྱེད། རེས་འགའ་ནི་ཉམས་ སུ་མྱོང་བར་མི་བྱེད་པས་དགེ་སློང་རྣམས་བདག་ཅག་མཐུན་པར་མ་གྱུར་ཅེས་ལས་རྣམས་མི་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེད་ཀྱིས་དགེ་སློང་བྱེ་མ་སྐྱེས་དང་གཞན་ ཡང་དེ་ལྟ་བུ་གང་ཡིན་པ་ལ་སྨྱོས་པའི་གནང་བ་བྱིན་ཅིག །འདི་ལྟར་སྦྱིན་པར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་ གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་དགོངས་སུ་གསོལ། དགེ་སློང་བྱེ་མ་སྐྱེས་སྒྲེན་མོར་བྱུང་ནས་སྨྱོས་ཤིང་སེམས་འཁྲུགས་པ་དེ་དང་དེར་འཁྱམ་ཞིང་དགེ་འདུན་གྱི་གསོ་སྦྱོང་གི་གནས་སུ་རེས་འགའ་ནི་མཆི། རེས་འགའ་ནི་མི་

  309. 155b

    མཆི། དགེ་འདུན་དང་ལྷན་ཅིག་གསོ་སྦྱོང་རེས་འགའ་ནི་ཉམས་སུ་མྱོང་བར་བགྱིད། རེས་འགའ་ནི་ཉམས་སུ་མྱོང་བར་མི་བགྱིད། དགེ་འདུན་གྱི་དགེ་འདུན་གྱི་ཆེད་དང་བགྱི་བ་རྣམས་ལ་རེས་འགའ་ནི་མཆི། རེས་འགའ་ནི་མི་མཆི། དགེ་འདུན་དང་ལྷན་ཅིག་དགེ་འདུན་གྱི་ དགེ་འདུན་གྱི་ཆེད་དང་བགྱི་བ་རྣམས་རེས་འགའ་ནི་ཉམས་སུ་མྱོང་བར་བགྱིད། རེས་འགའ་ནི་ཉམས་སུ་མྱོང་བར་མི་བགྱིད་པས་དགེ་སློང་རྣམས་བདག་ཅག་མཐུན་པར་མ་གྱུར་ཅེས་ལས་རྣམས་མི་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་ བར་མཛོད་ཅིག་དང་། དགེ་འདུན་གྱིས་དགེ་སློང་བྱེ་མ་སྐྱེས་སྨྱོས་པ་ལ་སྨྱོས་པའི་གནང་བ་སྩལ་ཅིང་། གལ་ཏེ་ཚུར་མཆི་ཡང་བཟློག་པར་མི་བགྱི། ཕར་མཆི་ཡང་བཟློག་པར་མི་བགྱི་བར་དགེ་སློང་བྱེ་མ་སྐྱེས་ཚུར་མཆིའམ། ཕར་མཆི་ཡང་རུང་། དགེ་འདུན་གྱི་གསོ་སྦྱོང་ དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བགྱི་སྟེ། དེས་དགེ་འདུན་མི་མཐུན་པར་མི་འགྱུར་རོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ བྱེ་མ་སྐྱེས་འདི་ལྟར་སྒྲེན་མོར་བྱུང་ནས་སྨྱོས་ཤིང་སེམས་འཁྲུགས་ཏེ་དེ་དང་དེར་འཁྱམ་ཞིང་དགེ་འདུན་གྱི་གསོ་སྦྱོང་གི་གནས་སུ་རེས་འགའ་ནི་མཆི། རེས་འགའ་ནི་མི་མཆི། དགེ་འདུན་དང་ལྷན་ཅིག་གསོ་སྦྱོང་རེས་འགའ་ནི་ཉམས་སུ་མྱོང་བར་བགྱིད། རེས་འགའ་ནི་ ཉམས་སུ་མྱོང་བར་མི་བགྱིད། དགེ་འདུན་གྱི་དགེ་འདུན་གྱི་ཆེད་དང་བགྱི་བ་རྣམས་ལ་རེས་འགའ་ནི་མཆི། རེས་འགའ་ནི་མི་མཆི། དགེ་འདུན་དང་ལྷན་ཅིག་དགེ་འདུན་གྱི་དགེ་འདུན་གྱི་ཆེད་དང་དགེ་འདུན་གྱི་བགྱི་བ་རྣམས་རེས་འགའ་ནི་ཉམས་སུ་མྱོང་བར་བགྱིད། རེས་ འགའ་ནི་ཉམས་སུ་མྱོང་བར་མི་བགྱིད་པས་དགེ་སློང་རྣམས་བདག་ཅག་མཐུན་པར་མ་གྱུར་ཅེས་ལས་རྣམས་མི་བགྱིད་ན། དགེ་འདུན་གྱིས་དགེ་སློང་བྱེ་མ་སྐྱེས་སྨྱོས་པ་ལ་སྨྱོས་པའི་གནང་བ་སྩལ་ཅིང་། གལ་ཏེ་ཚུར་མཆི་ཡང་བཟློག་པར་མི་བགྱི། ཕར་མཆི་ཡང་

  310. 156a

    བཟློག་པར་མི་བགྱི་བར་དགེ་སློང་བྱེ་མ་སྐྱེས་ཚུར་མཆིའམ། ཕར་མཆི་ཡང་རུང་། དགེ་འདུན་གྱིས་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བགྱི་སྟེ། དེས་དགེ་འདུན་ མི་མཐུན་པར་མི་འགྱུར་བར་མཛད་ན། ཚེ་དང་ལྡན་པ་གང་དག་དགེ་སློང་བྱེ་མ་སྐྱེས་སྨྱོས་པ་ལ་སྨྱོས་པའི་གནང་བ་སྩལ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ དགེ་སློང་བྱེ་མ་སྐྱེས་སྨྱོས་པ་ལ་སྨྱོས་པའི་གནང་བ་སྩལ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ལྟུང་བ་དྲན་ན་དགེ་སློང་དེས་དགེ་སློང་གི་མདུན་དུ་ལྟུང་བ་ཆོས་བཞིན་དུ་ཕྱིར་བྱ་ སྟེ། དགེ་སློང་དེས་བླ་གོས་ཕྲག་པ་གཅིག་ཏུ་གཟར་ཏེ་མཆིལ་ལྷམ་གཉིས་ཕུད་དེ་རྒན་རིམས་བཞིན་དུ་ཕྱག་འཚལ་ནས། དགེ་སློང་གི་མདུན་དུ་ཙོག་ཙོག་པོར་འདུག་སྟེ་ཐལ་མོ་སྦྱར་བ་བཏུད་ནས་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་ དགེ་སློང་མིང་འདི་ཞེས་བགྱི་བ་ལ་ལྟུང་བ་འདི་ལྟ་བུ་འདི་བྱུང་སྟེ། བདག་དགེ་སློང་མིང་འདི་ཞེས་བགྱི་བ་ལྟུང་བ་དེ་དག་པའི་མཐའ་ཚུན་ཆད་ནས་བཟུང་སྟེ། ཚེ་དང་ལྡན་པའི་མདུན་དུ་མཐོལ་ལོ་བཤགས་སོ། །མི་འཆབ་བོ། །མཐོལ་ཞིང་བཤགས་ན་བདག་བདེ་བ་ལ་རེག་ པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །དེ་བཞིན་དུ་ལན་གཉིས་ལན་གསུམ་དུ་བཟླས། དེས་ལྟུང་བ་མཐོང་ངམ་ཞེས་བརྗོད་པར་བྱའོ། །མཐོང་ངོ་། །དེས་ཕྱིན་ཆད་སྡོམ་མམ་ཞེས་བརྗོད་པར་བྱའོ། །སྡོམ་མོ། །དེ་བཞིན་དུ་ ལན་གཉིས་ལན་གསུམ་དུ་བཟླས། ལེན་པས་ཐབས་ཡིན་ནོ་ཞེས་བརྗོད་པར་བྱའོ། །འཆགས་པས་ལེགས་སོ་ཞེས་བརྗོད་པར་བྱའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི། ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་

  311. 156b

    གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ལྟུང་བ་ལ་དོགས་པ་དང་ཡིད་གཉིས་ཟ་བར་གྱུར་ན། དགེ་སློང་དེས་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ལ་དྲིས་ཏེ། ལྟུང་བ་ལ་དོགས་པ་དང་ཡིད་གཉིས་བསལ་ནས་དགེ་སློང་གི་མདུན་ དུ་ཆོས་བཞིན་དུ་ཕྱིར་བྱའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གིས་དགེ་འདུན་གྱི་ནང་དུ་ལྟུང་བ་དྲན་ན། དགེ་སློང་དེས་ལྟུང་བ་དེ་དགེ་ སློང་དྲུང་ན་མོ་ལ་བྱིན་གྱིས་བརླབ་པར་བྱ་སྟེ། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་དགེ་འདུན་ གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་དྲན་ཏེ། བདག་དགེ་སློང་མིང་འདི་ཞེས་བགྱི་བས། ལྟུང་བ་འདི་ཚེ་དང་ལྡན་པའི་མདུན་དུ་བྱིན་གྱིས་བརླབས་ལ་དེང་གསོ་སྦྱོང་བགྱིའོ། །སང་ནང་པར་ལྟུང་བ་དེ་ཆོས་བཞིན་དུ་སླར་བགྱིའོ་ཞེས་དེ་ལྟར་བྱིན་གྱིས་བརླབ་པར་བྱའོ། །དེའི་ འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་དགེ་འདུན་གྱི་ནང་དུ་ལྟུང་བ་ལ་དོགས་པ་དང་ཡིད་གཉིས་ཟ་བར་གྱུར་ན། དགེ་སློང་དེས་ལྟུང་བ་དེ་དགེ་སློང་དྲུང་ ན་མོ་ལ་བྱིན་གྱིས་བརླབ་པར་བྱ་སྟེ། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། བདག་དགེ་སློང་མིང་འདི་ཞེས་བགྱི་བའི་གསོ་སྦྱོང་ཡང་བཅྭ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བ་དགེ་འདུན་གྱི་ནང་དུ་ལྟུང་ བ་འདི་དང་འདི་ལྟ་བུ་ཞིག་ལ་ཡིད་གཉིས་སུ་གྱུར་ན། བདག་ལྟུང་བ་དེ་ཚེ་དང་ལྡན་པའི་མདུན་དུ་བྱིན་གྱིས་བརླབས་ལ་དེང་གསོ་སྦྱོང་བགྱིའོ། །སང་ནང་པར་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་དྲིས་ཏེ་དོགས་པ་དང་ཡིད་གཉིས་

  312. 157a

    བསལ་ལ། ལྟུང་བ་དེ་ཆོས་བཞིན་དུ་སླར་བགྱིའོ་ཞེས་བྱ་བ་དེ་ལྟར་བྱིན་གྱིས་བརླབ་པར་བྱའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་ སློང་སོ་སོར་ཐར་པའི་མདོ་འདོན་པས་དགེ་འདུན་གྱི་ནང་དུ་ལྟུང་བ་དྲན་ན། དགེ་སློང་དེས་ལྟུང་བ་དེ་རང་གི་སེམས་ཀྱིས་བྱིན་གྱིས་བརླབ་པར་བྱ་སྟེ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ལ། བདག་དགེ་སློང་སོ་སོར་ཐར་པའི་མདོ་འདོན་པ་མིང་འདི་ཞེས་བྱ་བའི་གསོ་སྦྱོང་ ཡང་བཅྭ་ལྔ་པ་ཡིན་ཏེ། བདག་དགེ་སློང་སོ་སོར་ཐར་པའི་མདོ་འདོན་པ་མིང་འདི་ཞེས་བྱ་བ་དགེ་འདུན་གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་དྲན་ཏེ། བདག་དགེ་སློང་སོ་སོར་ཐར་པའི་མདོ་འདོན་པ་མིང་འདི་ཞེས་བྱ་བས་ལྟུང་བ་དེ་རང་གི་སེམས་ཀྱིས་བྱིན་གྱིས་བརླབས་ལ་ དེང་གསོ་སྦྱོང་བྱའོ། །སང་ནང་པར་ལྟུང་བ་དེ་ཆོས་བཞིན་དུ་ཕྱིར་བྱའོ་ཞེས་དེ་ལྟར་བྱིན་གྱིས་བརླབ་པར་བྱའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ སོ་སོར་ཐར་པའི་མདོ་འདོན་པ་དགེ་འདུན་གྱི་ནང་དུ་ལྟུང་བ་ལ་དོགས་པ་དང་ཡིད་གཉིས་ཟ་བར་གྱུར་ན། དགེ་སློང་དེས་ལྟུང་བ་དེ་རང་གི་སེམས་ཀྱིས་བྱིན་གྱིས་བརླབ་པར་བྱ་སྟེ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ཡིན་ལ། བདག་དགེ་སློང་སོ་སོར་ཐར་པའི་མདོ་འདོན་ པ་མིང་འདི་ཞེས་བྱ་བའི་གསོ་སྦྱོང་ཡང་བཅྭ་ལྔ་པ་ཡིན་ཏེ། བདག་དགེ་སློང་སོ་སོར་ཐར་པའི་མདོ་འདོན་པ་མིང་འདི་ཞེས་བྱ་བ་དགེ་འདུན་གྱི་ནང་དུ་ལྟུང་བ་འདི་དང་འདི་ལྟ་བུ་ཞིག་ལ་ཡིད་གཉིས་སུ་གྱུར་ན། བདག་དགེ་སློང་སོ་སོར་ཐར་པའི་མདོ་འདོན་པ་མིང་འདི་ཞེས་བྱ་བས་ལྟུང་བ་དེ་ རང་གི་སེམས་ཀྱིས་བྱིན་གྱིས་བརླབས་ལ་དེང་གསོ་སྦྱོང་བྱའོ། །སང་ནང་པར་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་དྲིས་ཏེ་དོགས་པ་དང་ཡིད་གཉིས་བསལ་ལ། ལྟུང་བ་དེ་ཆོས་བཞིན་དུ་ཕྱིར་བྱའོ་ཞེས་དེ་ལྟར་བྱིན་གྱིས་བརླབ་པར་

  313. 157b

    བྱའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅོད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་འདུན་ཐམས་ཅད་ལྟུང་བ་དང་བཅས་པར་གྱུར་ན། དགེ་སློང་དེ་རྣམས་ཀྱིས་གང་གི་མདུན་དུ་དེ་རྣམས་ལྟུང་བ་དེ་ ཆོས་བཞིན་དུ་ཕྱིར་བྱ་བའི་དགེ་སློང་འགའ་ཞིག་གནས་གཞན་དུ་སོང་ལ་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་ཕྱིར་བྱེད་པ་དེ་ལྟ་བུར་སྤྲོ་བར་བྱའོ། །གལ་ཏེ་འགྲུབ་ན་དེ་ལྟ་ན་ལེགས། ཇི་སྟེ་མི་འགྲུབ་ན་དགེ་སློང་དེ་རྣམས་ཀྱིས་གསོལ་བ་འབའ་ཞིག་བྱ་སྟེ། དགེ་འདུན་ བཙུན་པ་རྣམས་གསན་དུ་གསོལ། དེང་དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། བདག་ཅག་དགེ་འདུན་ཐམས་ཅད་ནི་ལྟུང་བ་དག་དང་བཅས་པར་གྱུར་ན། གང་གི་མདུན་དུ་བདག་ཅག་ལྟུང་བ་དེ་ཆོས་བཞིན་དུ་སླར་བགྱི་བ་བདག་ཅག་ལས་དགེ་སློང་འགའ་ཞིག་གནས་གཞན་ དུ་མཆིས་ལ་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ལྟུང་བ་དེ་བྱིན་གྱིས་བརླབས་ཏེ་གསོ་སྦྱོང་མཛད་ལ། སླད་ ཀྱིས་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་སླར་མཛད་དོ། །འདི་ནི་གསོལ་བའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་འདུན་ཐམས་ཅད་ལྟུང་བ་ ལ་དོགས་པ་དང་ཡིད་གཉིས་ཟ་བར་གྱུར་ན། དགེ་སློང་དེ་རྣམས་ཀྱིས་གང་གི་མདུན་དུ་དེ་རྣམས་ལྟུང་བ་ཆོས་བཞིན་དུ་ཕྱིར་བྱ་བའི་དགེ་སློང་འགའ་ཞིག་གནས་གཞན་དུ་སོང་ལ་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་དྲིས་ཏེ། ལྟུང་བ་ལ་དོགས་པ་དང་། ཡིད་གཉིས་བསལ་ནས་ཆོས་བཞིན་དུ་ཕྱིར་བྱེད་པ་དེ་ལྟ་བུར་སྤྲོ་བར་བྱའོ། །གལ་ཏེ་འགྲུབ་ན་དེ་ལྟ་ན་ལེགས། ཇི་སྟ་མི་འགྲུབ་ན་དགེ་སློང་དེ་རྣམས་ཀྱིས་གསོལ་བ་འབའ་ཞིག་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དེང་

  314. 158a

    དགེ་འདུན་གྱི་གསོ་སྦྱོང་བཅྭ་ལྔ་པ་ལགས་ལ། བདག་ཅག་དགེ་འདུན་ཐམས་ཅད་ལྟུང་བ་ལ་དོགས་པ་དང་ཡིད་གཉིས་དང་བཅས་པར་གྱུར་ན། གང་གི་མདུན་དུ་བདག་ཅག་བཤགས་པར་བགྱི་བ་བདག་ཅག་ལས་དགེ་སློང་གནས་གཞན་དུ་མཆིས་ལ། དགེ་ སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་དྲིས་ཏེ། དོགས་པ་དང་ཡིད་གཉིས་བསལ་ལ་ལྟུང་བ་དེ་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ ཅིག་དང་། དགེ་འདུན་གྱིས་དེང་ལྟུང་བ་དེ་བྱིན་གྱིས་བརླབས་ཏེ་གསོ་སྦྱོང་མཛད་ལ། སླད་ཀྱིས་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ལ་དྲིས་ཏེ། དོགས་པ་དང་ཡིད་གཉིས་བསལ་ལ་ལྟུང་བ་དེ་ཆོས་བཞིན་དུ་སླར་མཛད་དོ། །འདི་ནི་གསོལ་ བའོ། །དེའི་འོག་ཏུ་གསོ་སྦྱོང་བྱ་སྟེ། དགེ་སློང་དག་དེ་ལྟར་གསོ་སྦྱོང་བྱའི་ང་ནི་གསོ་སྦྱོང་གི་བར་གཅད་པར་མི་སྨྲའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་གཅིག་པུ་མ་གཏོགས་པ་དགེ་འདུན་ཐམས་ཅད་ལྟུང་བ་དང་བཅས་པར་གྱུར་ན། དགེ་སློང་དེ་ དགེ་སློང་གཏམ་འདྲེས་པ་དང་། ཕེབས་པར་སྨྲ་བ་དང་། སྨོས་འདྲིན་དང་། འགྲོགས་བཤེས་གང་ཡིན་པ་དེའི་དྲུང་དུ་སོང་སྟེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་འདི་དང་འདི་ལྟར་བྱེད་པ་གང་ཡིན་པ་དེས་དེ་ལ་ཅིར་འགྱུར། ལྟུང་བ་དང་བཅས་པར་འགྱུར་རོ། ། འོ་ན་ཚེ་དང་ལྡན་པས་ཀྱང་། འདི་དང་འདི་ལྟར་བྱས་སམ་བྱས་སོ། །འོ་ན་ཚེ་དང་ལྡན་པ་ཡང་ལྟུང་བ་དང་བཅས་པ་ཡིན་ནོ། །ཚེ་དང་ལྡན་པ་ཁོ་བོ་གཅིག་པུར་མ་ཟད་ཀྱི་དགེ་འདུན་ཐམས་ཅད་དོན་དེ་དང་ལྡན་པ་ཡིན་ནོ། །ཀྱེ་ཚེ་དང་ལྡན་པ་ཇེ་ཁྱོད་རང་གི་ལྟུང་བ་ཆོས་བཞིན་དུ་ཕྱིར་ གྱིས་ཤིག །དགེ་འདུན་ཐམས་ཅད་ཀྱིས་ཁྱོད་ལ་ཅིར་འགྱུར་ཞེས་བརྗོད་པར་བྱའོ། །གལ་ཏེ་འཆགས་ན་དེས་དེ་གང་དུ་དགེ་སློང་གཞན་དག་ཀྱང་མཐོང་ན་འཆགས་པར་འགྱུར་བའི་སྣང་བའི་ཕྱོགས་སུ་བཞག་སྟེ་འཆགས་སུ་གཞུག་པར་བྱའོ། །གལ་ཏེ་འགྲུབ་ན་དེ་ལྟ་ན་ལེགས།

  315. 158b

    ཇི་སྟེ་མི་འགྲུབ་ན་དེས་དགེ་སློང་དེ་ལ་མི་འདོད་བཞིན་དུ་གླེང་བར་མི་བྱ། མི་འདོད་བཞིན་དུ་དྲན་པར་མི་བྱའོ། །མི་འདོད་བཞིན་དུ་གླེང་བར་བྱེད། མི་འདོད་བཞིན་དུ་དྲན་པར་བྱེད་ན་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་ འོངས་པ་གཅིག་པུ་མ་གཏོགས་པ་དགེ་འདུན་ཐམས་ཅད་ལྟུང་བ་དང་བཅས་པར་གྱུར་ན། དགེ་སློང་དེ་དགེ་སློང་གཏམ་འདྲེས་པ་དང་། ཕེབས་པར་སྨྲ་བ་དང་། སྨོས་འདྲིན་དང་། འགྲོགས་བཤེས་གང་ཡིན་པ་དེའི་དྲུང་དུ་སོང་སྟེ་འདི་སྐད་ཅེས་བརྗོད་པར་བྱའོ། །ཚེ་དང་ལྡན་ པ་འདི་དང་འདི་ལྟར་བྱེད་པ་གང་ཡིན་པ་དེས་དེ་ལ་ཅིར་འགྱུར། ལྟུང་བ་དང་བཅས་པར་འགྱུར་རོ། །འོ་ན་ཚེ་དང་ལྡན་པས་ཀྱང་འདི་དང་འདི་ལྟར་བྱས་སམ་བྱས་སོ། །འོ་ན་ཚེ་དང་ལྡན་པ་ཡང་ལྟུང་བ་དང་བཅས་པ་ཡིན་ནོ། །ཚེ་དང་ལྡན་པ་ཁོ་བོ་གཅིག་པུར་མ་ཟད་ཀྱི་དགེ་འདུན་ཐམས་ ཅད་དོན་དེ་དང་ལྡན་པ་ཡིན་ནོ། །ཀྱེ་ཚེ་དང་ལྡན་པ་ཇེ་ཁྱོད་རང་གི་ལྟུང་བ་ཆོས་བཞིན་དུ་ཕྱིར་གྱིས་ཤིག །དགེ་འདུན་ཐམས་ཅད་ཀྱིས་ཁྱོད་ལ་ཅིར་འགྱུར་ཞེས་བརྗོད་པར་བྱའོ། །གལ་ཏེ་འཆགས་ན་དེས་དེ་གང་དུ་དགེ་སློང་གཞན་དག་ཀྱང་མཐོང་ན་འཆགས་པར་འགྱུར་བའི་སྣང་བའི་ ཕྱོགས་སུ་བཞག་སྟེ་འཆགས་སུ་གཞུག་པར་བྱའོ། །གལ་ཏེ་འགྲུབ་ན་དེ་ལྟ་ན་ལེགས། ཇི་སྟེ་མི་འགྲུབ་ན་དེས་དགེ་སློང་ལ་མི་འདོད་བཞིན་དུ་གླེང་བར་མི་བྱ། མི་འདོད་བཞིན་དུ་དྲན་པར་མི་བྱའོ། །མི་འདོད་བཞིན་དུ་གླེང་བར་བྱེད། མི་འདོད་བཞིན་དུ་དྲན་པར་བྱེད་ན་འགལ་ ཚབས་ཅན་དུ་འགྱུར་རོ།། །།སྡོམ་ལ། སྦྱར་བ་མང་དང་མི་མཐུན་དང་། །རྣམ་པ་དང་ནི་འགྲོ་བ་དང་། །ཡོངས་སུ་དག་པའི་གསོ་སྦྱོང་ངོ་། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་ དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་འདོན་པ་གདོན་དུ་རུང་ངོ་སྙམ་ནས་རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་

  316. 159a

    དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཀྱང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་ སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་འདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་ གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་

  317. 159b

    གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་ རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་ པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་ དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་ གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་ གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་

  318. 160a

    འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་ སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་

  319. 160b

    པས་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་ འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་ དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་

  320. 161a

    སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་ མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་ གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་ རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་

  321. 161b

    སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་ གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་ མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་ བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་

  322. 162a

    བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་ གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་ མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་

  323. 162b

    པས་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ ཏེ། དགེ་སློང་གང་དག་མ་ལྷགས་པ་དེ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་ གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་ གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་ མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་

  324. 163a

    བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངམ་སྙམ་ནས། ཡིད་གཉིས་ ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་ བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་ བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་ སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་ སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་

  325. 163b

    དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་ སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་ མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་ པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་

  326. 164a

    གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་ པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་ གནས་པ་ཆེས་མང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་ དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་ བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་

  327. 164b

    སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་ པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་ བསྡོགས་ལས་ཉེས་པ་སྦོམ་པོར་འགྱུར་རོ།། །།འདུལ་བ་གཞི། བམ་པོ་བཅུ་བཞི་པ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་ བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་ བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་

  328. 165a

    མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་ དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་ པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་

  329. 165b

    ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་ དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་ གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་ འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་ དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་

  330. 166a

    གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་ སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་ བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་ གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་

  331. 166b

    ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་ སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་ བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་པ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་ སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་

  332. 167a

    སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་ གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་ རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་ བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་ བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་

  333. 167b

    གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་ པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་ རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་

  334. 168a

    བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་ གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་བ་དག་ལྷགས་ན། དེ་ དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་ གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་

  335. 168b

    ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་ བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་ འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་ སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་

  336. 169a

    གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་ བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ ཅག་གིས་གསོལ་པ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས་རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་

  337. 169b

    པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་ སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་ གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་ གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་

  338. 170a

    དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་ སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་ སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་

  339. 170b

    ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་ པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་ རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་

  340. 171a

    གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་ དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་ གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་ བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་ སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་ གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་ བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་

  341. 171b

    མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་ དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་ པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་

  342. 172a

    དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ། གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་ མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་ དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་ གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་ གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་ གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་

  343. 172b

    པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་ གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་ སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་ སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་

  344. 173a

    སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ། གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་ པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་ གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་

  345. 173b

    གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་ པས་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་ པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་

  346. 174a

    འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་ གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་ འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་ གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་

  347. 174b

    ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་ འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་ དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་

  348. 175a

    དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་ གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་ འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་ སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་ པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་ སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་ གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་

  349. 175b

    གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་ པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་

  350. 176a

    གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་ གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དེ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །དགེ་སློང་སྔ་མ་

  351. 176b

    དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་ གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །བར་སྡོམ་ལ། རྟོག་པ་དང་ནི་ཡིད་གཉིས་དབྱེན།། །།འདུལ་བ་གཞི། བམ་པོ་བཅྭ་ལྔ་པ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་ མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་ དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་།

  352. 177a

    ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་ སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་ འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་ འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་ འཁོར་བར་དོང་སྟེ། གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་

  353. 177b

    གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་ པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་ སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་

  354. 178a

    ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་ པས་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་ གིས་གལ་ཏེ་རེ་ཞིག་ཚོགས་པ་རྙེད་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་ སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་། སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་

  355. 178b

    དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་ མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་ མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། ། འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་ མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་ དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་

  356. 179a

    སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་ བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་ མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་

  357. 179b

    བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་ སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་ སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་ དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན་དེ་དག་གིས་གལ་ཏེ་རེ་ཞིག་ཚོགས་པ་རྙེད་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་ དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་ འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་

  358. 180a

    པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་ དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་ དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་ གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་ གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་ དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་

  359. 180b

    འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློབ་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གལ་ ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་ སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་ དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གྲལ་

  360. 181a

    རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་ པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་ གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་ སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་

  361. 181b

    ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་ དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་ བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་

  362. 182a

    མ་ལངས་ཤིང་དགེ་སློང་གང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་ དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་ འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་ བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་ བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་

  363. 182b

    མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གྲལ་རིམས་བཞིན་དུ་འཁོད་ དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་ སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་ དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་

  364. 183a

    གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་ གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་ གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་

  365. 183b

    རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་ པས་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་ གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་

  366. 184a

    དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་ གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་ སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་ སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་

  367. 184b

    སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་ དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་ གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་ སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་

  368. 185a

    སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་ བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་ གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་ འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་

  369. 185b

    པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་ འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་ མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་ པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་ གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་

  370. 186a

    དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་ བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་ པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་ སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ ཅིག་ནི་དོང་ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་ པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་ པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་

  371. 186b

    གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་ བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་ འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་ འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་

  372. 187a

    འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་ དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་ སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་ གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་

  373. 187b

    བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་ འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ་དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་ དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་ དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་ སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་ འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་ སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་

  374. 188a

    ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་ གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་ པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་ པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་ བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་

  375. 188b

    བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་ དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་ དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་ དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་ མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་

  376. 189a

    དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་ ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་ འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་ སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་

  377. 189b

    སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་ གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་ བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་ གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་ འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་

  378. 190a

    མར་གནས་པ་མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་ དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་ དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་ སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་ སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་ མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་

  379. 190b

    འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་ བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་ བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་ གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་ པས་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་ ཆེས་ཉུང་བ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་ འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་

  380. 191a

    བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་གྲལ་རིམས་བཞིན་དུ་འཁོད་དེ། དེ་དག་དང་ལྷན་ཅིག་གསོ་སྦྱོང་བྱ་ཞིང་། སོ་སོར་ཐར་ པས་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་ བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་ པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་ སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་ བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་གལ་ཏེ་རེ་ཞིག་ཚོགས་པ་རྙེད་ན་དེ་དག་གིས་ཡང་དེ་དག་གི་དོན་དུ་གསོལ་བ་བྱས་ཏེ་གསོ་སྦྱོང་

  381. 191b

    བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱའོ། །ཅི་སྟེ་མ་རྙེད་ན་དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་ སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་ འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་ མཉམ་པ་དག་ལྷགས་ན། དེ་དག་གིས་དཀྱིལ་འཁོར་བར་དོང་སྟེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །བར་སྡོམ་ལ། གྲལ་རིམས་གསོལ་ཚོགས་དཀྱིལ་འཁོར་བའོ།། །། འདུལ་བ་གཞི། བམ་པོ་བཅུ་དྲུག་པ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་

  382. 192a

    འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་ གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་ དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་ དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་ འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་

  383. 192b

    སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་ གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་ འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་ དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་

  384. 193a

    སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་ པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་ གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་ སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་ དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་

  385. 193b

    སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་ སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་ འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་ འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་

  386. 194a

    སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་ དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་ དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་ གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་

  387. 194b

    པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་ འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་ འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་ བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་

  388. 195a

    འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་ འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་

  389. 195b

    འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་ དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་

  390. 196a

    དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་ མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་ པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་ འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་

  391. 196b

    དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་ འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་ གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་ སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་

  392. 197a

    པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་ འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་ དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་ མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་ བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་

  393. 197b

    གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་ མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་ བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་ གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་ སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་

  394. 198a

    ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་ གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་ མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་མ་ལངས་ཤིང་དགེ་སློང་དག་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ པ་ན། དེ་དག་འདི་སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་ སོར་ཐར་པ་བཏོན་ཅིང་གསོ་སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་ཁ་ཅིག་ནི་དོང་། ཁ་ཅིག་ནི་མ་དོང་བར་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་

  395. 198b

    གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་དང་། གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་འདི་ སྙམ་དུ་དགེ་སློང་གང་དག་མ་ལྷགས་པ་དག་ཡོད་དོ་སྙམ་དུ་མི་སེམས་ཤིང་། ཆོས་ཀྱི་འདུ་ཤེས་ཅན་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་འདུན་གྱིས་སོ་སོར་ཐར་པ་བཏོན་ཅིང་གསོ་ སྦྱོང་བྱས་པ་ཡིན་ནོ། །འཁོར་དེ་ལངས་ཤིང་དགེ་སློང་དག་དོང་ནས་དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ ཡང་འགལ་ཚབས་ཅན་དུ་མི་འགྱུར་རོ།། །།བར་སྡོམ་ལ། གསོལ་བ་དང་ནི་མ་དོང་དང་། །ཁ་ཅིག་དོང་དང་ཐམས་ཅད་དོང་། །དགེ་སློང་གཉུག་མར་གནས་པ་དག་གི་ནི་ཚེས་བཅྭ་ལྔ་ཡིན་ལ། དགེ་སློང་གློ་བུར་དུ་འོངས་པ་ཆེས་ཉུང་བ་དག་གི་ནི་ཚེས་བཅུ་ བཞིའམ་ཚེས་གཅིག་ཡིན་ན། གློ་བུར་དུ་འོངས་པ་དག་གིས་གཉུག་མར་གནས་པ་ཆེས་མང་པོ་དག་གི་རྗེས་སུ་འཇུག་པར་བྱའོ། །དགེ་སློང་གཉུག་མར་གནས་པ་དག་གི་ནི་ཚེས་བཅྭ་ལྔ་ཡིན་ལ། དགེ་སློང་གློ་བུར་དུ་འོངས་པ་མཉམ་པ་དག་གི་ནི་ཚེས་བཅུ་བཞིའམ་ ཚེས་གཅིག་ཡིན་ན། གློ་བུར་དུ་འོངས་པ་དག་གིས་ནི་གཉུག་མར་གནས་པ་མཉམ་པ་དག་གི་རྗེས་སུ་འཇུག་པར་བྱའོ། །དགེ་སློང་གཉུག་མར་གནས་པ་ཆེས་ཉུང་བ་དག་གི་ནི་ཚེས་བཅྭ་ལྔ་ཡིན་ལ། དགེ་སློང་གློ་བུར་དུ་འོངས་པ་ཆེས་མང་པོ་དག་གི་ནི་ཚེས་བཅུ་བཞིའམ་ ཚེས་གཅིག་ཡིན་ན། གཉུག་མར་གནས་པ་དག་གིས་གློ་བུར་དུ་འོངས་པ་ཆེས་མང་པོ་དག་གི་རྗེས་སུ་འཇུག་པར་བྱའོ། །དགེ་སློང་གློ་བུར་དུ་འོངས་པ་དག་གི་ནི་ཚེས་བཅྭ་ལྔ་ཡིན་ལ། དགེ་སློང་གཉུག་མར་གནས་པ་ཆེས་ཉུང་བ་དག་གི་ཚེས་བཅུ་བཞིའམ་ཚེས་གཅིག་

  396. 199a

    ཡིན་ན། གཉུག་མར་གནས་པ་དག་གིས་གློ་བུར་དུ་འོངས་པ་ཆེས་མང་པོ་དག་གི་རྗེས་སུ་འཇུག་པར་བྱའོ། །དགེ་སློང་གློ་བུར་དུ་འོངས་པ་དག་གི་ནི་ཚེས་བཅྭ་ལྔ་ཡིན་ལ། དགེ་སློང་གཉུག་མར་གནས་པ་མཉམ་པ་དག་གི་ནི་ཚེས་བཅུ་བཞིའམ་ཚེས་གཅིག་ ཡིན་ན། གློ་བུར་དུ་འོངས་པ་དག་གིས་གཉུག་མར་གནས་པ་མཉམ་པ་དག་གི་རྗེས་སུ་འཇུག་པར་བྱའོ། །དགེ་སློང་གློ་བུར་དུ་འོངས་པ་དག་གི་ནི་ཚེས་བཅྭ་ལྔ་ཡིན་ལ། དགེ་སློང་གཉུག་མར་གནས་པ་ཆེས་མང་པོ་དག་གི་ནི་ཚེས་བཅུ་བཞིའམ་ཚེས་གཅིག་ཡིན་ན། གློ་བུར་ དུ་འོངས་པ་དག་གིས་གཉུག་མར་གནས་པ་ཆེས་མང་པོ་དག་གི་རྗེས་སུ་འཇུག་པར་བྱའོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་ མཐོང་ན། དེ་དག་འདི་སྙམ་དུ་སེམས་ཤིང་། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་འདུག་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས་དབྱེན་གྱིས་དོན་དུ་གཉེར་ བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་ གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་

  397. 199b

    དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་ དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་རུང་ངམ་ འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་ གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་ འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་ དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་

  398. 200a

    ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་ གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་དུ་རུང་ངོ་སྙམ་ནས་རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་། སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་

  399. 200b

    བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ནས་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་ དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་ དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་ སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་

  400. 201a

    བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་འདུག་ཀྱང་རུང་། ཐག་རིང་ པོར་གྱུར་ཀྱང་རུང་སྙམ་ནས་དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་ བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་

  401. 201b

    ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ ལ་ནི་ཡིད་གཉིས་ཀྱིས་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་ འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་ དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས་ཆོས་མ་ཡིན་པའི་འདུ་ཤེས་ཅན། མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་ མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་ དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་།

  402. 202a

    ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཤིང་། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་ སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ ན། དེ་དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་ པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་ བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་ གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་

  403. 202b

    ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་ མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ནས། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་ སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་ གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་ དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་ པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་

  404. 203a

    གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་ བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་ བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་ དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་ པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་།

  405. 203b

    འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་ གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་ གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་ བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་ གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་ གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་ལྷགས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་

  406. 204a

    འགལ་ཚབས་ཅན་དུ་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་ དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ ན། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་ པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། གཞན་གྱི་ལྷུང་བཟེད་དང་། ཆོས་གོས་དང་། ཁར་བ་དང་། གཏུར་བུ་དང་། རིལ་བ་སྤྱི་བླུགས་དང་། འབྲུ་མར་སྣོད་དང་། ཞྭ་དང་། ལྷམ་སྒྲོ་གུ་ཅན་དང་། མཆིལ་ལྷམ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་

  407. 204b

    སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་ འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་ མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་ དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། ། འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་

  408. 205a

    ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དེ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་ བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་ དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་

  409. 205b

    སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་ བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དེ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་

  410. 206a

    ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་ མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་ སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་ གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན་དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ཡང་ འགལ་ཚབས་ཅན་དུ་མི་འགྱུར་རོ།། །།འདུལ་བ་གཞི། བམ་པོ་བཅུ་བདུན་པ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་ རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་ སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་

  411. 206b

    བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་ སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་ འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་ གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་ བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་།

  412. 207a

    སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་ པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་ པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་ སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་ སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་

  413. 207b

    གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་ རྙེད་ན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་ འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་ སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷགས་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ཡང་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་

  414. 208a

    གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་ འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་ བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་རུང་ སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་

  415. 208b

    གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་ འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་ དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་ འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་ སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་ འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་

  416. 209a

    པས་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་ སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་ སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་ བསམ་པས་བཙལ་ཏེ་མ་རྙེད་ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་ པས་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གཉུག་མར་གནས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གློ་བུར་དུ་འོངས་པའི་རྣམ་པ་ དང་། གློ་བུར་དུ་འོངས་པའི་རྟགས་དང་། གློ་བུར་དུ་འོངས་པའི་མཚན་མ་འདི་ལྟ་སྟེ། དགེ་སློང་གློ་བུར་དུ་འོངས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་

  417. 209b

    ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ཅིག་འཁོད་ དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་ པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་ མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གློ་བུར་དུ་འོངས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་ སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་ མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་

  418. 210a

    པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་ པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། ། འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་ གསོ་སྦྱོང་བྱེད་ཅིང་། སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་པར་

  419. 210b

    བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་ མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་ པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་ པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་། སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་ སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དེ་དག་

  420. 211a

    ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་། སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་ སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་ དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་ མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་ སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་ སློང་སྔ་མ་དག་ལ་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་

  421. 211b

    རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་ འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་ གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་ མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ། གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་ པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་ རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་

  422. 212a

    གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་ པས་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་ པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་ གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་ རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་

  423. 212b

    དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་ འགྱུར་རོ། །འདི་ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་ བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་ བ་བྱས་ཏེ་གསོ་སྦྱོང་བྱ་ཞིང་། སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་། སོ་སོར་ཐར་པའི་མདོ་གདོན་པ་འདོན་པར་བྱེད་ པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ ལྟ་སྟེ་གསོ་སྦྱོང་བཅྭ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ།

  424. 213a

    གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་ དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ན། དགེ་སློང་སྔ་མ་དག་ལ་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་ པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་ སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་ པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་

  425. 213b

    འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་ བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་ མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་ དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་ བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་ གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་

  426. 214a

    པས་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་ པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་ དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། གཙུག་

  427. 214b

    ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་ གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་ སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་ གནས་པའི་མཚན་མ་འདི་ལྟ་སྟེ། གཙུག་ལག་ཁང་ཆག་ཆག་བཏབ་པ་དང་། ཕྱག་དར་བྱས་པ་དང་། ལྕི་བ་སར་པའི་བྱུག་པས་བྱུགས་པ་དང་། གནས་མལ་བཤམས་པ་དང་། འབྲུ་མར་གྱི་མར་མེ་བུས་པ་དག་མཐོང་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་ རྙེད་ན། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་

  428. 215a

    འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། ། འདི་ལྟ་སྟེ། གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་ མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་ དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་

  429. 215b

    མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་ དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་ སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་ གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་ མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་ པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་

  430. 216a

    པས་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་ གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ། གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་ མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་ མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་ འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་ བསམ་པས་བཙལ་ཏེ་མ་རྙེད་ན། དེ་དག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་ཉུང་བ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་

  431. 216b

    སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་ཡང་དེ་ན་གཉུག་ མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་ གིས་དེ་དག་ལྷག་པའི་བསམ་པས་བཙལ་ཏེ་རྙེད་ན། དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་ པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་ མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་

  432. 217a

    གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ། གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་ སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་ མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་ པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས་ཡིད་གཉིས་ཀྱིས་དོན་དུ་ གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་ གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་

  433. 217b

    ཀྱོག་པོའི་སྒྲ་དང་། གཏང་རག་དག་ཐོས་ན་དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་ རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་གིས་ ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་ པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་ བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་ སོ་སོར་ཐར་པའི་མདོ་གདོན་པ་གདོན་དུ་རུང་ངོ་སྙམ་ནས་རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ན། དེ་དག་ གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་

  434. 218a

    དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ན། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་མཉམ་པ་དག་ལྷགས་ ན། དེ་དག་གིས་ཡང་གསོལ་བ་བྱས་ཏེ། གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་ འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་ བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན་དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་

  435. 218b

    སློང་སྔ་མ་དག་ལ་འགལ་ཚབས་ཅན་དུ་མི་འགྱུར་རོ།། །།འདུལ་བ་གཞི། བམ་པོ་བཅྭ་བརྒྱད་པ། འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་ མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་ཀྱང་རུང་། དེ་ཉིད་དུ་འདུག་ཀྱང་རུང་། སོ་སོར་གྱུར་ཀྱང་རུང་། ཐག་རིང་པོར་གྱུར་ཀྱང་རུང་སྙམ་ནས། དབྱེན་གྱིས་ དོན་དུ་གཉེར་བ་དབྱེན་གྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ། གསོ་ སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་དབྱེན་གྱི་ཉེར་བསྡོགས་ལས་ཉེས་པ་སྦོམ་པོར་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་ དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་རུང་

  436. 219a

    ངམ། འོན་ཏེ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་སྙམ་ནས། ཡིད་གཉིས་ཀྱིས་དོན་དུ་གཉེར་བ་ཡིད་གཉིས་ཀྱི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་ སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་ཡིད་ གཉིས་ཀྱི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་ རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། ཆོས་མ་ཡིན་པའི་འདུ་ཤེས་ཅན་མི་མཐུན་པའི་འདུ་ཤེས་ ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་ གདོན་པར་བྱ་སྟེ། དགེ་སློང་སྔ་མ་དག་ལ་ནི་མི་མཐུན་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་

  437. 219b

    མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་ པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་ དུ་རུང་ངོ་སྙམ་ནས། རྟོག་པས་དོན་དུ་གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན་དེ་དག་གིས་ཡང་གསོལ་ བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་རྟོག་པའི་ཉེར་བསྡོགས་ལས་འགལ་ཚབས་ཅན་དུ་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ཅིང་ མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་ མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་དུ་མི་རུང་ སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་མ་རྙེད་ནས། དེ་དག་གིས་གསོལ་བ་བྱས་ཏེ་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་པ་ལས། དེའི་འོག་ཏུ་དགེ་སློང་གཉུག་མར་གནས་པ་ཆེས་མང་པོ་དག་ལྷགས་ན། དེ་དག་

  438. 220a

    གིས་ཡང་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ཐར་པའི་མདོ་གདོན་པ་གདོན་པར་བྱ་སྟེ། དགེ་སློང་སྔ་མ་དག་ལ་ནི་འགལ་ཚབས་ཅན་དུ་མི་འགྱུར་རོ། །འདི་ལྟ་སྟེ་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་གློ་བུར་དུ་འོངས་པ་བཞིའམ་ལྷག་པ་དག་འདུག་ ཅིང་མཐུན་པར་གྱུར་པ་ན། དེ་དག་གིས་དེ་ན་གཉུག་མར་གནས་པའི་རྣམ་པ་དང་། གཉུག་མར་གནས་པའི་རྟགས་དང་། གཉུག་མར་གནས་པའི་མཚན་མ་འདི་ལྟ་སྟེ། དགེ་སློང་གཉུག་མར་གནས་པ་དག་གི་ཁར་བའི་སྒྲ་དང་། རྟིང་སྒྲ་དང་། སྐད་སེལ་བའི་སྒྲ་དང་། ལྡེ་མིག་གི་སྒྲ་དང་། ལྡེ་མིག་ཀྱོག་པོའི་སྒྲ་དང་། གཏང་རག་དག་ཐོས་ན། དེ་དག་འདི་སྙམ་དུ་སེམས་ཏེ། དགེ་སློང་གང་དག་མ་ལྷགས་པ་དག་ཡོད་ན། དགེ་སློང་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ་གསོ་སྦྱོང་བྱ་ཞིང་སོ་སོར་ ཐར་པའི་མདོ་གདོན་པ་གདོན་དུ་མི་རུང་ངོ་སྙམ་ནས། དེ་དག་གིས་དེ་དག་ལྷག་པའི་བསམ་པས་བཙལ་ཏེ་རྙེད་ན་དེ་དག་གིས་དེ་དག་དང་ལྷན་ཅིག་འཁོད་དེ་གསོལ་བ་བྱས་ནས་གསོ་སྦྱོང་བྱེད་ཅིང་སོ་སོར་ཐར་པའི་མདོ་གདོན་པ་འདོན་པར་བྱེད་ན། དགེ་སློང་སྔ་མ་དག་ལ་ནི་འགལ་ ཚབས་ཅན་དུ་མི་འགྱུར་རོ།། །།བར་སྡོམ་ལ། དབྱེན་དང་ཡིད་གཉིས་མི་མཐུན་དང་། །རྟོག་དང་མ་རྙེད་རྙེད་པའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་ནས་དགེ་སློང་དང་བཅས་པའི་གནས་གང་ན། དགེ་སློང་ཡོངས་སུ་ དག་པ་ལྟ་བ་མཐུན་པ་དག་འཁོད་པར་འགྲོ་བར་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་ནས་དགེ་སློང་དང་བཅས་པའི་གནས་གང་ན། དགེ་སློང་འཐབ་ཀྲོལ་བྱེད་པ། མཚང་འདྲུ་བར་བྱེད་པ། འཐབ་མོ་བྱེད་པ། འཐབ་ པར་བྱེད་པ། རྩོད་པའི་གཞི་བྱེད་པ་དག་འཁོད་པར་གནོད་པ་བྱུང་བ་དང་། དགེ་འདུན་ཐམས་ཅད་དེར་འགྲོ་བ་མ་གཏོགས་པར་འགྲོ་བར་མི་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་ནས་དགེ་སློང་དང་བཅས་པའི་གནས་དང་།

  439. 220b

    གནས་མ་ཡིན་པ་གང་ན་དགེ་སློང་ཡོངས་སུ་དག་པ་ལྟ་བ་མཐུན་པ་དག་འཁོད་པར་འགྲོ་བར་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་ནས་དགེ་སློང་དང་བཅས་པའི་གནས་དང་གནས་མ་ཡིན་པ་གང་ན་དགེ་སློང་འཐབ་ཀྲོལ་ བྱེད་པ། མཚང་འདྲུ་བར་བྱེད་པ། འཐབ་མོ་བྱེད་པ། འཐབ་པར་བྱེད་པ། རྩོད་པའི་གཞི་བྱེད་པ་དག་འཁོད་པར་གནོད་པ་བྱུང་བ་དང་། དགེ་འདུན་ཐམས་ཅད་དེར་འགྲོ་བ་མ་གཏོགས་པར་འགྲོ་བར་མི་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་ དགེ་སློང་དང་བཅས་པའི་གནས་དང་གནས་མ་ཡིན་པ་ནས་དགེ་སློང་དང་བཅས་པའི་གནས་དང་གནས་མ་ཡིན་པ་གང་ན་དགེ་སློང་ཡོངས་སུ་དག་པ་ལྟ་བ་མཐུན་པ་དག་འཁོད་པར་འགྲོ་བར་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་ གནས་དང་གནས་མ་ཡིན་པ་ནས་དགེ་སློང་དང་བཅས་པའི་གནས་དང་གནས་མ་ཡིན་པ་གང་ན་དགེ་སློང་འཐབ་ཀྲོལ་བྱེད་པ། མཚང་འདྲུ་བར་བྱེད་པ། འཐབ་མོ་བྱེད་པ། འཐབ་པར་བྱེད་པ། རྩོད་པའི་གཞི་བྱེད་པ་དག་འཁོད་པར་གནོད་པ་བྱུང་བ་དང་། དགེ་འདུན་ ཐམས་ཅད་དེར་འགྲོ་བ་མ་གཏོགས་པར་འགྲོ་བར་མི་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་དང་། དགེ་སློང་དང་བཅས་པའི་གནས་མ་ཡིན་པ་དང་། དགེ་སློང་དང་བཅས་པའི་གནས་དང་གནས་མ་ཡིན་པ་ནས་དགེ་སློང་ མེད་པའི་གནས་གང་དུ་སོང་ན། ལུས་སམ་སེམས་རེག་པར་འགྱུར་བ་དེར་འགྲོ་བར་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་དང་། དགེ་སློང་དང་བཅས་པའི་གནས་མ་ཡིན་པ་དང་། དགེ་སློང་དང་བཅས་པའི་གནས་དང་ གནས་མ་ཡིན་པ་ནས་དགེ་སློང་མེད་པའི་གནས་སུ་གནོད་པ་བྱུང་བ་དང་། དགེ་འདུན་ཐམས་ཅད་དེར་འགྲོ་བ་མ་གཏོགས་པར་འགྲོ་བར་མི་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་དང་། དགེ་སློང་དང་བཅས་པའི་གནས་མ་

  440. 221a

    ཡིན་པ་དགེ་སློང་དང་བཅས་པའི་གནས་དང་གནས་མ་ཡིན་པ་དང་། དགེ་སློང་མེད་པའི་གནས་ནས་དགེ་སློང་མེད་པའི་གནས་གང་དུ་སོང་ན། ལུས་སམ་སེམས་རེག་པར་འགྱུར་བ་དེར་འགྲོ་བར་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་ སློང་དང་བཅས་པའི་གནས་དང་། དགེ་སློང་དང་བཅས་པའི་གནས་མ་ཡིན་པ་དང་། དགེ་སློང་དང་བཅས་པའི་གནས་དང་གནས་མ་ཡིན་པ་དང་། དགེ་སློང་མེད་པའི་གནས་ནས་དགེ་སློང་མེད་པའི་གནས་སུ་གནོད་པ་བྱུང་བ་དང་། དགེ་འདུན་ཐམས་ཅད་དེར་འགྲོ་བ་ མ་གཏོགས་པར་འགྲོ་བར་མི་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་དང་། དགེ་སློང་དང་བཅས་པའི་གནས་མ་ཡིན་པ་དང་། དགེ་སློང་དང་བཅས་པའི་གནས་དང་གནས་མ་ཡིན་པ་དང་། དགེ་སློང་མེད་པའི་གནས་དང་། དགེ་སློང་མེད་པའི་གནས་མ་ཡིན་པ་ནས་དགེ་སློང་མེད་པའི་གནས་དང་གནས་མ་ཡིན་པ་གང་དུ་སོང་ན། ལུས་སམ་སེམས་རེག་པར་འགྱུར་བ་དེར་འགྲོ་བར་བྱའོ། །དགེ་སློང་གིས་གསོ་སྦྱོང་བཅོ་ལྔ་པ་དེ་ཉིད་ལ་དགེ་སློང་དང་བཅས་པའི་གནས་དང་། དགེ་སློང་དང་བཅས་ པས་གནས་མ་ཡིན་པ་དང་། དགེ་སློང་དང་བཅས་པའི་གནས་དང་གནས་མ་ཡིན་པ་དང་། དགེ་སློང་མེད་པའི་གནས་དང་། དགེ་སློང་མེད་པའི་གནས་མ་ཡིན་པ་ནས་དགེ་སློང་མེད་པའི་གནས་དང་གནས་མ་ཡིན་པར་གནོད་པ་བྱུང་བ་དང་། དགེ་འདུན་ཐམས་ཅད་དེར་ འགྲོ་བ་མ་གཏོགས་པར་འགྲོ་བར་མི་བྱའོ། །དགེ་སློང་དང་བཅས་པའི་གནས་གང་ཞེ་ན། གང་ན་ལས་ཐམས་ཅད་སྣང་བའོ། །དགེ་སློང་དང་བཅས་པའི་གནས་མ་ཡིན་པ་གང་ཞེ་ན། གང་ན་ལས་ཐམས་ཅད་མི་སྣང་བའོ། །དགེ་སློང་དང་བཅས་པའི་གནས་དང་གནས་ མ་ཡིན་པ་གང་ཞེ་ན། གང་ན་ལས་ཁ་ཅིག་ནི་སྣང་ལ། ཁ་ཅིག་ནི་མི་སྣང་བའོ། །དགེ་སློང་མེད་པའི་གནས་གང་ཞེ་ན། དགེ་སློང་མའི་གནས་སོ། །དགེ་སློང་མེད་པའི་གནས་མ་ཡིན་པ་གང་ཞེ་ན། མུ་སྟེགས་ཅན་གྱི་གནས་སོ། །དགེ་སློང་མེད་པའི་གནས་དང་གནས་མ་

  441. 221b

    ཡིན་པ་གང་ཞེ་ན། བཀར་བའི་གནས་སོ། །དགེ་སློང་རྣམས་ཀྱིས་ནི་ཁྱིམ་པ་དག་དང་འདུས་ཤིང་འཁོད་ནས་གསོ་སྦྱོང་དང་དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་མི་བྱ། དགེ་སྦྱོང་དུ་ཁས་འཆེ་བ་རྣམས་དང་མ་ ཡིན། ཟ་མ་རྣམས་དང་མ་ཡིན། མ་ནིང་རྣམས་དང་མ་ཡིན། དགེ་སློང་མ་སུན་ཕྱུང་བ་རྣམས་དང་མ་ཡིན། ཕ་བསད་པ་རྣམས་དང་མ་ཡིན། མ་བསད་པ་རྣམས་དང་མ་ཡིན། དགྲ་བཅོམ་པ་བསད་པ་རྣམས་དང་མ་ཡིན། དགེ་འདུན་གྱི་དབྱེན་བྱེད་པ་རྣམས་དང་མ་ ཡིན། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་རྣམས་དང་མ་ཡིན། མུ་སྟེགས་ཅན་རྣམས་དང་མ་ཡིན། མུ་སྟེགས་ཅན་ཞུགས་པ་རྣམས་དང་མ་ཡིན། རྐུ་ཐབས་སུ་གནས་པ་རྣམས་དང་མ་ཡིན། ཐ་དད་དུ་གནས་པ་རྣམས་དང་མ་ཡིན་ཏེ། གནས་ པར་མི་བྱ་བ་རྣམས་དང་འདུས་ཤིང་འཁོད་ནས་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་མི་བྱའི། ཐམས་ཅད་ཡོངས་སུ་དག་པ་དང་། ལྟ་བ་མཐུན་པ་དག་འདུས་ཤིང་འཁོད་ནས་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱའོ། །ལས་མི་མཐུན་པ་དག་བྱས་ན་འགལ་ཚབས་ཅན་དུ་འགྱུར་རོ། །གསོ་སྦྱོང་གི་གཞི་རྫོགས་སོ།། །།དགག་དབྱེའི་གཞིའི་བསྡུས་པའི་སྡོམ་ལ། དགག་དབྱེ་ ཆོས་མིན་དགེ་སློང་དང་། །ཟློས་དང་དབྱར་དང་ཕྱི་མའོ། །སྡོམ་ལ། དགག་དབྱེ་རྗེས་སུ་གནང་བ་དང་། །དགག་དབྱེ་བྱེད་པ་བསྒོ་བ་དང་། །ཆོས་དང་ཆོས་མིན་གཏོགས་པ་དང་། །ནད་པ་གསོ་བའི་ལས་རྣམས་སོ། །སངས་རྒྱས་བཅོམ་ལྡན་འདས་མཉན་ཡོད་ན་ རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱར་བཞུགས་པར་དམ་བཞེས་སོ། །དེའི་ཚེ་དགེ་སློང་རབ་ཏུ་མང་པོ་དག་ལྗོངས་ཤིག་ཏུ་ཁྲིམས་སུ་བཅའ་བ་འདི་ལྟ་བུ་དག་བྱས་ནས་དབྱར་གནས་པར་དམ་བཅས་ཏེ། ཚེ་དང་ལྡན་པ་དག་བདག་ཅག་གི་ནང་

  442. 222a

    ན་དགེ་སློང་གང་གིས་ཀྱང་དབྱར་གྱི་ནང་ལོགས་སུ་དགེ་སློང་ལ་ཚུལ་ཁྲིམས་ཉམས་ཤེའམ། ལྟ་བ་ཉམས་ཤེའམ། སྤྱོད་པ་ཉམས་ཤེའམ། འཚོ་བ་ཉམས་ཞེས་གླེང་བར་མི་བྱ་དྲན་པར་མི་བྱའོ། །བདག་ཅག་གི་ནང་ན་གང་གིས་ཆུ་རའི་བུམ་པའམ། ཁྲུས་ཀྱི་བུམ་པ་སྟོང་པ་སྐམ་པོ་ཆུ་མེད་པར་མཐོང་ན། གལ་ཏེ་གཅིག་པུས་ནུས་པར་གྱུར་ན་གཅིག་པུ་དེས་བཀང་ལ་གནས་ཇི་ལྟ་བ་བཞིན་དུ་གཞག་པར་བྱའོ། །གལ་ཏེ་གཅིག་པུས་མི་ནུས་པར་གྱུར་ན་དགེ་སློང་ཅིག་ཤོས་ལ་ལག་བརྡའི་སྒྲ་བྱས་ཏེ་ལག་རུབ་ཀྱིས་གནས་ ཇི་ལྟ་བ་བཞིན་དུ་བཞག་ནས་གཅིག་ལ་གཅིག་མི་སྨྲ་བར་ཁ་རོག་སྟེ་འགྲོ་བར་བྱའོ་ཞེས་དེ་ལྟ་བུའི་ཁྲིམས་སུ་བཅའ་བ་དག་བྱས་ནས་ལྗོངས་སུ་དབྱར་གནས་པར་དམ་བཅས་སོ། །དེ་ནས་དགེ་སློང་རབ་ཏུ་མང་པོ་དབྱར་ཟླ་བ་གསུམ་འདས་ནས་ཆོས་གོས་བྱས་པ་དང་ལྡན། ཆོས་ གོས་ཟིན་པ་དང་ལྡན་ནས་ལྷུང་བཟེད་དང་ཆོས་གོས་ཐོགས་ཏེ། ཕན་ཚུན་མི་སྨྲ་བར་མཉན་ཡོད་ག་ལ་བ་དེ་ལོགས་སུ་རྒྱུ་ཞིང་དོང་སྟེ། རིམ་གྱིས་རྒྱུ་ཞིང་དོང་བ་དང་། མཉན་ཡོད་དུ་ཕྱིན་ཏོ། །དེ་ནས་དགེ་སློང་རབ་ཏུ་མང་པོས་ལྷུང་བཟེད་དང་ཆོས་གོས་མཁོས་སུ་ཕབ་སྟེ། རྐང་པ་གཉིས་བཀྲུས་ནས། བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ནི་གློ་བུར་དུ་ལྷགས་པའི་དགེ་སློང་རྣམས་ལ་སོ་སོར་ ཡང་དག་པར་དགའ་བར་མཛད་པ་འདིས་སོ་སོར་ཡང་དག་པར་དགའ་བར་མཛད་དེ། དགེ་སློང་དག་ཁྱེད་གང་ནས་འདིར་འོངས། ཁྱེད་གང་དུ་དབྱར་གནས་པར་དམ་བཅས་ཞེས་བྱ་བ་སྟེ། སངས་རྒྱས་བཅོམ་ལྡན་འདས་ཀྱིས་གློ་བུར་དུ་འོངས་པའི་དགེ་སློང་རྣམས་ལ་དགེ་སློང་ དག་ཁྱེད་གང་ནས་འདིར་འོངས། ཁྱེད་གང་དུ་དབྱར་གནས་པར་དམ་བཅས་ཞེས་སོ་སོར་ཡང་དག་པར་དགའ་བར་མཛད་པ་དང་། བཙུན་པ་བདག་ཅག་ལྗོངས་ཤིག་ནས་ད་གཟོད་འདིར་མཆིས་ཏེ། བདག་ཅག་ལྗོངས་ཤིག་ཏུ་དབྱར་གནས་པར་དམ་བཅས་ལགས་སོ། །

  443. 222b

    དགེ་སློང་དག་ཁྱེད་ཅག་ལྗོངས་སུ་བདེ་བ་ལ་རེག་པར་དབྱར་གནས་པར་དམ་བཅས་སམ། ཁྱེད་ཅག་བསོད་སྙོམས་ཀྱིས་བྲེལ་བར་མ་གྱུར་མོད། བཙུན་པ་མེད་དེ། བདག་ཅག་ལྗོངས་ཤིག་ཏུ་བདེ་བ་ལ་རེག་པར་དབྱར་གནས་པར་དམ་བཅས་ཏེ། བདག་ཅག་བསོད་ སྙོམས་ཀྱིས་ཀྱང་བྲེལ་བ་མ་མཆིས་ལགས་སོ། །དགེ་སློང་དག་ཁྱེད་ཅག་ཇི་ལྟ་བུ་ཞིག་ཏུ་ལྗོངས་སུ་བདེ་བ་ལ་རེག་པར་དབྱར་གནས་པར་དམ་བཅས། བསོད་སྙོམས་ཀྱིས་ཀྱང་བྲེལ་བར་མ་གྱུར། བཙུན་པ་འདི་ལ་བདག་ཅག་དགེ་སློང་རབ་ཏུ་མང་པོས་ལྗོངས་ཤིག་ ཏུ་ཁྲིམས་སུ་བཅའ་བ་འདི་ལྟ་བུ་དག་བགྱིས་ནས་དབྱར་གནས་པར་དམ་བཅས་ཏེ། ཚེ་དང་ལྡན་པ་དག་བདག་ཅག་གིས་ནང་ན་དགེ་སློང་གང་གིས་ཀྱང་དབྱར་གྱི་ནང་ལོགས་སུ་དགེ་སློང་ལ་ཚུལ་ཁྲིམས་ཉམས་ཤེའམ། ལྟ་བ་ཉམས་ཤེའམ། སྤྱོད་པ་ཉམས་ཤེའམ། འཚོ་བ་ཉམས་ཞེས་གླེང་བར་མི་བྱ། དྲན་པར་མི་བྱའོ། །བདག་ཅག་གི་ནང་ན་གང་གིས་ཆུ་རའི་བུམ་པའམ། ཁྲུས་ཀྱི་བུམ་པ་སྟོང་པ་སྐམ་པོ་ཆུ་མེད་པར་མཐོང་ན། གལ་ཏེ་གཅིག་པུས་ནུས་པར་གྱུར་ན་གཅིག་པུ་དེས་བཀང་ལ་གནས་ཇི་ལྟ་བ་བཞིན་དུ་གཞག་པར་ བྱའོ། །གལ་ཏེ་གཅིག་པུས་མི་ནུས་པར་གྱུར་ན་དགེ་སློང་ཅིག་ཤོས་ལ་ལག་བརྡའི་སྒྲ་བྱས་ཏེ། ལག་རུབ་ཀྱིས་གནས་ཇི་ལྟ་བ་བཞིན་དུ་བཞག་ནས་གཅིག་ལ་གཅིག་མི་སྨྲ་བར་ཁ་རོག་སྟེ་འགྲོ་བར་བྱའོ་ཞེས་བཙུན་པ་བདག་ཅག་གིས་ཁྲིམས་སུ་བཅའ་བ་དེ་ལྟ་བུ་དག་ བགྱིས་ནས་ལྗོངས་ཤིག་ཏུ་དབྱར་གནས་པར་དམ་བཅས་ཏེ། བཙུན་པ་དེ་ལྟར་ན་བདག་ཅག་ལྗོངས་ཤིག་ཏུ་བདེ་བ་ལ་རེག་པར་དབྱར་གནས་པར་དམ་བཅས་ཤིང་བསོད་སྙོམས་ཀྱིས་ཀྱང་བྲེལ་བར་མ་གྱུར་ལགས་སོ། །སྐྱེས་བུ་གཏི་མུག་ཁྱེད་ཅག་གནས་མལ་ན་དགྲ་ དང་ལྷན་ཅིག་གནས་པས་བདེ་བ་ལ་རེག་པར་དབྱར་གནས་པར་དམ་བཅས་སྙམ་སེམས་སམ། སྐྱེས་བུ་གཏི་མུག་དག་འདི་ལྟ་སྟེ་མི་སྨྲ་བ་ནི་མུ་སྟེགས་ཅན་གྱི་རྒྱལ་མཚན་ཡིན་ནོ། །དེ་ལྟ་བས་ན་དགེ་སློང་གིས་མི་སྨྲ་བར་དམ་བཅའ་བར་མི་བྱའོ། །དགེ་སློང་གིས་མི་

  444. 223a

    སྨྲ་བར་དམ་འཆའ་ན་འགལ་ཚབས་ཅན་དུ་འགྱུར་རོ། །འོན་ཀྱང་དབྱར་གནས་པར་དམ་བཅས་པའི་དགེ་སློང་གིས་དགེ་འདུན་ལ་མཐོང་བ་དང་། ཐོས་པ་དང་དོགས་པའི་གནས་གསུམ་གྱིས་དགག་དབྱེ་བྱའོ། །བཅོམ་ལྡན་འདས་ཀྱིས་དབྱར་གནས་པར་དམ་ བཅས་པའི་དགེ་སློང་གིས་དགེ་འདུན་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་དགག་དབྱེ་བྱའོ་ཞེས་གསུངས་པ་དགེ་སློང་རྣམས་ཀྱིས་དགག་དབྱེ་ཇི་ལྟར་བྱ་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། ཉི་མ་བདུན་ནམ་བརྒྱད་ན་ དགག་དབྱེ་བྱེད་པར་འགྱུར་ན་ཉི་མ་འདི་སྙེད་ཅིག་ན་དགེ་འདུན་གྱི་དགག་དབྱེ་མཛད་པར་འགྱུར་རོ་ཞེས་སྤྱོད་ཡུལ་གྱི་གྲོང་ཁྱེར་དུ་གོ་བར་བྱའོ། །གནས་འཆའ་བའི་དགེ་སློང་རྣམས་ཀྱིས་མཆོད་རྟེན་དང་མཆོད་རྟེན་གྱི་འཁོར་ས་རྣམས་སུ་མཆོད་པར་བྱ་བའི་ལས་ལ་ལྷག་པར་ བརྩོན་པར་བྱ་སྟེ། དྲི་གཙང་ཁང་བྱི་དོར་བྱ། བརྒྱན་པར་བྱའོ། །གནས་པ་དང་གཉུག་མར་གནས་པའི་དགེ་སློང་རྣམས་ཀྱིས་གཙུག་ལག་ཁང་ཕྱག་དར་བྱ། ཆག་ཆག་བྱ། བ་ལང་གི་ལྕི་བ་སར་པའི་བྱུག་པས་བྱུག་པར་བྱའོ། །དགེ་འདུན་ལ་རྙེད་པ་སྣུམ་བག་ ཅན་དག་དབུལ་བར་བྱའོ། །དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་རྣམས་ཀྱིས་མཚན་མོ་ཐོག་ཐག་ཆོས་བཤད་པར་བྱའོ། །གལ་ཏེ་སྐྱ་རེངས་མ་ཤར་བར་དགག་དབྱེ་བྱ་མི་ནུས་པར་ཤེས་ན་དུས་ཤེས་པར་བྱ་སྟེ་ཅི་བདེར་བྱའོ། །དེ་ནས་ དགག་དབྱེ་བྱེད་པའི་དགེ་སློང་གཅིག་གམ། གཉིས་སམ། མང་པོ་བསྐོ་བར་བྱ་སྟེ། ཆོས་ལྔ་དང་ལྡན་པའི་དགེ་སློང་དགག་དབྱེ་བྱེད་པར་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ལྔ་གང་ཞེ་ན། འདུན་པས་འགྲོ་བ་དང་། ཞེ་སྡང་གིས་ འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། དགག་དབྱེ་དང་དགག་དབྱེ་མ་ཡིན་པ་མི་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་དགག་དབྱེ་བྱེད་པར་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ཆོས་ལྔ་

  445. 223b

    དང་ལྡན་པའི་དགེ་སློང་ནི་དགག་དབྱེ་བྱེད་པར་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །ལྔ་གང་ཞེ་ན། འདུན་པས་མི་འགྲོ་བ་དང་། ཞེ་སྡང་གིས་མི་འགྲོ་བ་དང་། གཏི་མུག་གིས་མི་འགྲོ་བ་དང་། འཇིགས་པས་མི་འགྲོ་བ་དང་། དགག་ དབྱེ་དང་དགག་དབྱེ་མ་ཡིན་པ་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་ནི་དགག་དབྱེ་བྱེད་པར་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །བསྐོ་བ་ནི་འདི་ལྟར་བྱ་སྟེ། གནས་མལ་བཤམ་པ་བྱས་ལ་གཎྜཱི་བརྡུངས་ཏེ། དགེ་སློང་རྣམས་ ལ་དྲིས་པའི་ཚིག་གིས་ཡང་དག་པར་བསྒོ་ལ། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་དང་། རེ་ཞིག་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དབྱར་གནས་པའི་དགེ་འདུན་ལ་དགག་དབྱེ་བྱེད་པར་སྤྲོའམ། དེས་སྤྲོའོ་ཞེས་བརྗོད་པར་བྱའོ། །དེའི་ འོག་ཏུ་དགེ་སློང་གཅིག་གིས་གསོལ་བ་བྱས་ནས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་ གྱིས་གནང་བར་མཛོད་ཅིག་དང་དགེ་འདུན་གྱིས་དགེ་སློང་མིང་འདི་ཞེས་བགྱི་བ་འདི་དགག་དབྱེ་བགྱིད་པར་བསྐོས་ཏེ། དགག་དབྱེ་བགྱིད་པའི་དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་འགྱུར་རོ། །འདི་ནི་གསོལ་བའོ། ། ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་སྤྲོ་སྟེ། དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགག་དབྱེ་བགྱིད་པར་བསྐོ་ན། དགེ་སློང་ མིང་འདི་ཞེས་བགྱི་བ་འདི་དབྱར་གནས་པའི་དགེ་འདུན་ལ་དགག་དབྱེ་བགྱིད་པར་བསྐོ་བར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་དགེ་སློང་

  446. 224a

    མིང་འདི་ཞེས་བགྱི་བ་འདི་དགེ་འདུན་ལ་དགག་དབྱེ་བགྱིད་པར་བསྐོས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་དགག་དབྱེ་བྱེད་པའི་དགེ་སློང་གི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། དགག་དབྱེ་བྱེད་པའི་དགེ་སློང་གིས་ དགེ་འདུན་གྱི་ཆེད་དུ་འཇག་མ་དག་ཉེ་བར་གཞག་པར་བྱ་སྟེ། དེའི་འོག་ཏུ་བྲིམ་པར་བྱའོ། །གལ་ཏེ་གཅིག་པུ་ཞིག་ཡིན་ན། དེས་རྒན་རིམས་ཀྱི་མཐའ་ནས་བཟུང་སྟེ་གཞོན་རིམས་ཀྱི་མཐའི་བར་དུ་བྲིམ་པར་བྱའོ། །ཇི་སྟེ་གཉིས་ཡོད་ན་གཅིག་གིས་རྒན་རིམས་ཀྱི་ མཐའ་ནས་བྲིམ་པར་བྱའོ། །ཅིག་ཤོས་ཀྱིས་ནི་གཞོན་རིམས་ཀྱི་མཐའ་ནས་སོ། །འོན་ཏེ་མང་པོ་ཞིག་ཡོད་ན་གཅིག་གིས་ནི་རྒན་རིམས་ཀྱི་མཐའ་ནས་བྲིམ་པར་བྱའོ། །གཅིག་གིས་ནི་དབུས་ནས་སོ། །གཅིག་གིས་ནི་གཞོན་རིམས་ཀྱི་མཐའ་ནས་སོ། །དེའི་འོག་ཏུ་ དགེ་འདུན་གྱི་གནས་བརྟན་གྱིས་གསོལ་བ་འབའ་ཞིག་གིས་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དེང་དགེ་འདུན་གྱིས་དགག་དབྱེ་མཛད་དོ། །འདི་ནི་གསོལ་བའོ། །དེ་ནས་དགག་དབྱེ་བྱེད་པའི་དགེ་སློང་གིས་དགེ་འདུན་གྱི་གནས་བརྟན་གྱི་མདུན་དུ་འགྲེང་བར་བྱ་སྟེ། དགེ་འདུན་གྱི་གནས་བརྟན་གྱིས་འདི་སྐད་ཅེས། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ན། བདག་དགེ་སློང་མིང་འདི་ཞེས་བགྱི་བ་དགེ་འདུན་བཙུན་པ་རྣམས་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་དགག་ དབྱེ་བགྱིད་ཀྱིས། ཚེ་དང་ལྡན་པ་རྣམས་ཀྱིས་བདག་ལ་གདམས་སུ་གསོལ། ཚེ་དང་ལྡན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། ཚེ་དང་ལྡན་པ་རྣམས་ཀྱིས་བདག་རྗེས་སུ་གཟུང་དུ་གསོལ། ཚེ་དང་ལྡན་པ་རྣམས་ཀྱིས་ཐུགས་བརྩེ་བ་ཉེ་བར་བཟུང་སྟེ། བདག་

  447. 224b

    ལ་ཐུགས་བརྩེ་བར་མཛད་དུ་གསོལ། ལྟུང་བ་ཤེས་ཤིང་མཐོང་ན་ཆོས་བཞིན་འདུལ་བ་བཞིན་སླར་བགྱིའོ་ཞེས་དེ་ལྟར་ལན་གཉིས། དེ་ལྟར་ལན་གསུམ་དུ་བརྗོད་པར་བྱའོ། །དེ་བཞིན་དུ་དགེ་འདུན་གསར་བུའི་བར་གྱིས་དགག་དབྱེ་བྱའོ། །དེའི་འོག་ཏུ་དགག་དབྱེ་བྱེད་ པས་དགེ་སློང་རྣམས་ཀྱིས་དགག་དབྱེ་བྱ་སྟེ། གལ་ཏེ་དགག་དབྱེ་བྱེད་པའི་དགེ་སློང་གཉིས་ཡོད་ན་གཅིག་ལ་གཅིག་དགག་དབྱེ་བྱའོ། །ཇི་སྟེ་གཅིག་པུ་ཞིག་ཡིན་ན་དགེ་སློང་ཞིག་གི་མདུན་དུ་དགག་དབྱེ་བྱའོ། །དེའི་འོག་ཏུ་དགེ་སློང་མ་རྣམས་དང་། དགེ་སློབ་མ་ རྣམས་དང་། དགེ་ཚུལ་ཕ་དང་། དགེ་ཚུལ་མ་རྣམས་དགག་དབྱེ་བྱེད་དུ་གཞུག་གོ། །དེའི་འོག་ཏུ་དགག་དབྱེ་བྱེད་པའི་དགེ་སློང་གིས་རྒན་རིམས་ཀྱི་མདུན་དུ་འདུག་སྟེ། དགེ་འདུན་གྱིས་དགག་དབྱེ་མཛད་ལགས་སོ་ཞེས་བརྗོད་པར་བྱའོ། །ཐམས་ཅད་ཀྱིས་དགག་དབྱེ་ ལེགས་པར་མཛད་ཟིན་ཏོ། །དགག་དབྱེ་ཤིན་ཏུ་ལེགས་པར་མཛད་ཟིན་ཏོ་ཞེས་བརྗོད་པར་བྱའོ། །གལ་ཏེ་དེ་སྐད་ཅེས་སྨྲས་ན་ལེགས། ཇི་སྟེ་དེ་སྐད་མ་སྨྲས་ན་འགལ་ཚབས་ཅན་དུ་འགྱུར་རོ། །དེའི་འོག་ཏུ་དགག་དབྱེ་བྱེད་པའི་དགེ་སློང་གིས་ཁབ་བམ། གྲི་ཡང་ རུང་ཁྱེར་ལ་རྒན་རིམས་ཀྱི་མདུན་དུ་འདུག་སྟེ། བཙུན་པ་དག་དངོས་པོ་འདི་ཙམ་གྱིས་ཀྱང་དབྱར་གནས་པའི་དགེ་འདུན་ལ་དགག་དབྱེ་མཛད་པར་ཆུད་དོ་ཞེས་བརྗོད་པར་བྱའོ། །ཐམས་ཅད་ཀྱིས་ལེགས་པར་ཆུད་དོ། །ཤིན་ཏུ་ལེགས་པར་ཆུད་དོ་ཞེས་བརྗོད་པར་ བྱའོ། །དེ་ན་གང་ཅུང་ཟད་ཅི་རྙེད་པ་ནི་དགེ་འདུན་རིལ་གྱིས་བགོ་བར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་དགག་དབྱེའི་ལས་དུ་མཆིས། ཉེ་བ་འཁོར་བཞི་ཡོད་དེ། ཆོས་མ་ཡིན་པས་མི་མཐུན་པར་དགག་དབྱེ་ བྱེད་པ་དང་། ཆོས་མ་ཡིན་པས་མཐུན་པ་དང་། ཆོས་ཀྱིས་མི་མཐུན་པ་དང་། ཆོས་ཀྱིས་མཐུན་པའོ། །ཉེ་བ་འཁོར་དེ་ལ་དགག་དབྱེའི་ལས་ཆོས་དང་མཐུན་པ་ནི་གཅིག་ཡིན་ཏེ། འདི་ལྟ་སྟེ་ཆོས་ཀྱིས་མཐུན་པར་དགག་དབྱེ་བྱེད་པའོ། །དེ་ནས་བཅོམ་ལྡན་འདས་

  448. 225a

    དགག་དབྱེ་བཅོ་ལྔ་པ་དེ་ཉིད་ལ་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ནམ་ནངས་སུ་ཉེའི་དགག་དབྱེ་གྱིས་ཤིག །དེ་ནས་དགེ་ སློང་གཞན་ཞིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་གནས་ཞིག་ན་དགེ་སློང་བྲོ་འཚལ་བ། སྡུག་བསྔལ་བ། བྲོ་ ཚབས་ཆེ་བ་ཞིག་མཆིས་ན་དེ་ལ་བདག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། དགག་དབྱེ་བླང་བར་བྱའོ། །བཅོམ་ལྡན་འདས་ཀྱིས་དགག་དབྱེ་བླང་བར་བྱའོ་ཞེས་གསུངས་པ་དགེ་སློང་རྣམས་ཀྱིས་དགག་དབྱེ་ཇི་ལྟར་བླང་བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གཅིག་གིས་གཅིག་གིའམ། གཅིག་གིས་གཉིས་ཀྱིའམ་མང་པོའི་ཡང་རུང་ཇི་ཙམ་མིང་སྒྲོགས་ནུས་ཀྱི་བར་དུ་བླང་བར་བྱའོ། །ངས་དགག་དབྱེ་འབུལ་བའི་དགེ་སློང་གིས་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། དགག་དབྱེ་ འབུལ་བའི་དགེ་སློང་གིས་བླ་གོས་ཕྲག་པ་གཅིག་ཏུ་གཟར་ནས་མཆིལ་ལྷམ་ཕུད་དེ། རྒན་རིམས་བཞིན་དུ་འདུད་པ་དང་བཅས་པས་ཙོག་པུར་འདུག་སྟེ་ཐལ་མོ་སྦྱོར་ལ་ཚིག་འདི་སྐད་ཅེས། ཚེ་དང་ལྡན་པ་དག་དགོངས་སུ་གསོལ། དེང་དགེ་འདུན་གྱི་དགག་དབྱེ་བཅོ་ལྔ་པ་ ལགས་ན། བདག་དགེ་སློང་མིང་འདི་ཞེས་བགྱི་བའི་ཡང་དགག་དབྱེ་བཅོ་ལྔ་པ་ལགས་ཏེ། བདག་དགེ་སློང་མིང་འདི་ཞེས་བགྱི་བས་དགེ་འདུན་བཙུན་པ་རྣམས་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་དགག་དབྱེ་བརྗོད་དོ། །བརྗོད་པ་ཡང་རིག་པར་ བགྱིད་དོ་ཞེས་དེ་ལྟར་ལན་གཉིས། དེ་ལྟར་ལན་གསུམ་དུ་བརྗོད་པར་བྱའོ། །དགག་དབྱེ་འབུལ་བའི་དགེ་སློང་གིས་གལ་ཏེ་ལུས་ཀྱི་རྣམ་པར་རིག་བྱེད་ཀྱིས་དགག་དབྱེ་ཕུལ་ན་དགག་དབྱེ་ཕུལ་བ་ཞེས་བྱའོ། །ངག་གི་རྣམ་པར་རིག་བྱེད་ཀྱིས་འབུལ་ན་དགག་དབྱེ་ཕུལ་བ་

  449. 225b

    ཞེས་བྱའོ། །ལུས་ཀྱི་རྣམ་པར་རིག་བྱེད་དང་། ངག་གི་རྣམ་པར་རིག་བྱེད་ཀྱིས་འབུལ་མི་ནུས་ན་དགེ་འདུན་ཐམས་ཅད་དེར་དོང་བར་བྱའོ། །ཡང་ན་དགེ་སློང་དེ་དགེ་འདུན་གྱིས་ནང་དུ་བླང་བར་བྱའོ། །དགེ་འདུན་ཐམས་ཅད་དེར་མ་དོང་ངམ། དགེ་སློང་དེ་དགེ་འདུན་གྱིས་ ནང་དུ་མ་བླངས་ཏེ། མ་ཚོགས་པར་དགག་དབྱེ་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དགག་དབྱེ་འབུལ་བས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །ངས་དགག་དབྱེ་ ལེན་པའི་དགེ་སློང་གི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། དགག་དབྱེ་ལེན་པའི་དགེ་སློང་གིས་དགག་དབྱེ་བླངས་ནས་བརྒྱུག་པར་མི་བྱ། མགྱོགས་པར་མི་བྱ། མཆོང་བར་མི་བྱ། ཕྱི་རོལ་དུ་མཆོང་བར་མི་བྱ། འོབས་ལ་མི་བྱ། བང་རིམ་ལ་མཆོང་བར་ མི་བྱ། སྟེང་གི་ནམ་མཁའ་ལ་འདུག་པར་མི་བྱ། མཚམས་ཀྱི་ཕྱི་རོལ་དུ་འགྲོ་བར་མི་བྱ། གོམ་པ་གཅིག་གིས་སྐས་ཀྱི་གདང་བུ་གཉིས་ལ་འཛེག་པར་མི་བྱ། གོམ་པ་གཅིག་གིས་སྐས་ཀྱི་རིམ་པ་གཉིས་ལ་གཟེག་པར་མི་བྱ། གཉིད་ལོག་པར་མི་བྱ། སྙོམས་པར་ འཇུག་པར་མི་བྱའོ། །གཉིད་ལོག་གམ། སྙོམས་པར་ཞུགས་ན་རྒྱུ་གཉིས་ཀྱིས་སྨད་པར་འགྱུར་ཏེ། ངོ་ཚ་མེད་པ་གང་ཡིན་པ་དང་། ཁྱད་དུ་བསད་པ་གང་ཡིན་པའོ། །གང་གི་ཚེ་དགེ་འདུན་གྱི་གནས་བརྟན་གྱིས་ཚེ་དང་ལྡན་པ་དག་མ་ལྷགས་པ་རྣམས་ཀྱི་འདུན་པ་དང་ཡོངས་ སུ་དག་པ་བརྗོད་ཅིག །བརྗོད་པ་ཡང་རིག་པར་གྱིས་ཤིག་ཅེས་སྨྲས་པ་ན། དེས་དགེ་སློང་དྲུང་ན་འདུག་པའི་འདུན་དུ་འདུག་སྟེ། ཚེ་དང་ལྡན་པ་དགོངས་སུ་གསོལ། གནས་ག་གེ་མོ་ཞིག་ན་དགེ་སློང་བྲོ་འཚལ་བ། སྡུག་བསྔལ་བ། བྲོ་ཚབས་ཆེ་བ་ཞིག་གནས་ཏེ། དེང་ དགེ་འདུན་གྱི་དགག་དབྱེ་བཅོ་ལྔ་པ་ལགས་ལ། དགེ་སློང་དེའི་ཡང་དགག་དབྱེ་བཅོ་ལྔ་པ་ལགས་ཏེ། དགེ་སློང་མིང་འདི་ཞེས་བགྱི་བ་དེ་དགེ་འདུན་བཙུན་པ་རྣམས་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་དགག་དབྱེ་བགྱིད་དེ། དགག་དབྱེ་བརྗོད་

  450. 226a

    དོ། །བརྗོད་པ་ཡང་རིག་པར་བགྱིད་དོ་ཞེས་སྨྲོས་ཤིག །དགག་དབྱེ་ལེན་པའི་དགེ་སློང་གིས་ཀུན་ཏུ་སྤྱོད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །སངས་རྒྱས་བཅོམ་ལྡན་འདས་ ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་རེ་ཞིག་དགག་དབྱེ་ལེན་པའི་དགེ་སློང་གིས་དགག་དབྱེ་བླངས་ནས་དེ་ཉིད་དུ་གུམ་ན་དགག་དབྱེ་བླངས་པ་ཞེས་བགྱིའམ། མ་བླངས་པ་ཞེས་བགྱི། ཉེ་བ་འཁོར་མ་བླངས་པ་ཞེས་བྱ་སྟེ། ཡང་བླང་བར་བྱའོ། ། ཁྱིམ་པ་ཉིད་དུ་དབྱར་གྱིས་འཆེའམ། དགེ་སྦྱོང་ཉིད་དུ་གཡར་གྱིས་འཆེའམ། མ་ནིང་ཉིད་དམ། ཟ་མ་ཉིད་དམ། དགེ་སློང་མ་སུན་ཕྱུང་བ་ཉིད་དམ། མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉིད་དམ། དགེ་འདུན་གྱི་ དབྱེན་བྱས་པ་ཉིད་དམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་ཉིད་དམ། མུ་སྟེགས་ཅན་ཉིད་དམ། མུ་སྟེགས་ཅན་ཞུགས་པ་ཉིད་དམ། རྐུ་ཐབས་སུ་གནས་པ་ཉིད་དམ། ཐ་དད་དུ་གནས་པ་ཉིད་དམ། གནས་པར་མི་བགྱི་བ་ཉིད་དུ་གཡར་གྱིས་ འཆེ་བས་དགག་དབྱེ་བླངས་པ་ཞེས་བགྱིའམ། མ་བླངས་པ་ཞེས་བགྱི། ཉེ་བ་འཁོར་མ་བླངས་པ་ཞེས་བྱ་སྟེ། ཡང་བླང་བར་བྱའོ། །ཤུལ་ཀར་གུམ་ན་དགག་དབྱེ་བླངས་པ་ཞེས་བགྱིའམ། མ་བླངས་པ་ཞེས་བགྱི། ཉེ་བ་འཁོར་མ་བླངས་པ་ཞེས་བྱ་བས་ཡང་བླང་ བར་བྱ་སྟེ། སྔར་གསོ་སྦྱོང་གི་གཞི་ལས་ཇི་སྐད་འབྱུང་བ་དེ་བཞིན་དུ་རྒྱས་པར་བརྗོད་པར་བྱའོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་གནས་གང་ཞིག་ན་དགེ་སློང་གཅིག་པུ་ཞིག་གནས་པ་དེས་དགག་དབྱེ་བཅོ་ལྔ་པ་དེ་ཉིད་ ལ་ཇི་ལྟར་བསྒྲུབ་པར་བགྱི། ཉེ་བ་འཁོར་དགེ་སློང་དེས་དགག་དབྱེ་བཅོ་ལྔ་པ་དེ་ཉིད་ལ་གཙུག་ལག་ཁང་ཕྱག་དར་བྱ། ཆག་ཆག་བྱ། བའི་ལྕི་བ་སར་པའི་བྱུག་པས་བྱུག་པར་བྱའོ། །སེང་གེའི་ཁྲི་བཤམ་པར་བྱའོ། །སྟན་དག་གདིང་བར་བྱའོ། །ཇི་ཙམ་ནུས་ཀྱི་

  451. 226b

    བར་དུ་ཆོས་བསྒྲག་པར་བྱའོ། །དེའི་འོག་ཏུ་ས་ཕྱོགས་མཐོན་པོ་ཞིག་ཏུ་འདུག་ལ་ཕྱོགས་བཞིར་བལྟ་བར་བྱའོ། །དེར་གལ་ཏེ་དགེ་སློང་ཡོངས་སུ་དག་པ་ལྟ་བ་མཐུན་པ་དག་ཅིག་འོང་ན། དེ་དག་ལ་ཚེ་དང་ལྡན་པ་དག་མྱུར་བ་མྱུར་བར་ཚུར་སྤྱོན། དེང་དགེ་འདུན་གྱི་དགག་དབྱེ་ བཅོ་ལྔ་པ་ལགས་ཀྱིས་ཁྱེད་དང་ལྷན་ཅིག་འཁོད་ལ་དགག་དབྱེ་བྱའོ་ཞེས་སྨྲོས་ཤིག །གལ་ཏེ་དེ་ལྟར་གྲུབ་ན་ལེགས། ཅི་སྟེ་དེ་ལྟར་མ་གྲུབ་ན་དགེ་སློང་དེས་རང་གི་སྟན་ལ་འདུག་ལ་སེམས་འདི་ལྟར་བསྐྱེད་ཅིང་ཚིག་ཏུ་བརྗོད་དེ། དེང་དགེ་འདུན་གྱི་དགག་དབྱེ་བཅོ་ལྔ་པ་ ལགས་ལ། དགེ་སློང་མིང་འདི་ཞེས་བགྱི་བའི་དགག་དབྱེ་ཡང་བཅོ་ལྔ་པ་ལགས་ན། བདག་དགེ་སློང་མིང་འདི་ཞེས་བགྱི་བའི་དགག་དབྱེ་བྱིན་གྱིས་བརླབ་བོ། །གང་གི་ཚེ་དགེ་འདུན་ཚོགས་པ་རྙེད་པ་དེའི་ཚེ་དགེ་འདུན་ཚོགས་པ་དང་ལྷན་ཅིག་དགག་དབྱེ་བགྱིའོ་ཞེས་ལན་ གཉིས་ལན་གསུམ་དུ་བྱིན་གྱིས་བརླབ་པར་བྱའོ། །གང་ན་དགེ་སློང་གཉིས་གནས་པ་དེར་ཡང་གོ་རིམས་ནི་འདི་ཉིད་ཀྱིས་གཅིག་ལ་གཅིག་བརྗོད་པར་བྱའོ། །གང་ན་དགེ་སློང་གསུམ་གནས་པ་དེར་ཡང་གོ་རིམས་ནི་འདི་ཉིད་ཀྱིས་ཕན་ཚུན་བརྗོད་པར་བྱའོ། །གང་ན་དགེ་ སློང་བཞི་གནས་པར་ནི་དེ་དག་གིས་གསོལ་བ་བྱས་ལ་དགག་དབྱེ་བྱའོ། །དགག་དབྱེ་བྱེད་པའི་དགེ་སློང་ནི་བསྐོ་བར་མི་བྱའོ། །གང་ན་དགེ་སློང་ལྔ་གནས་པར་ནི་དེ་དག་གིས་གསོལ་བ་བྱས་ལ་དགག་དབྱེ་བྱའོ། །དགག་དབྱེ་བྱེད་པའི་དགེ་སློང་བསྐོ་བར་བྱའོ། །ནད་ པས་དགག་དབྱེ་ནི་བླང་བར་མི་བྱའོ། །གང་ན་དགེ་སློང་དྲུག་གམ་ལྷག་པ་དག་གནས་པར་ནི་དེ་དག་གིས་གསོལ་བ་བྱས་ལ་དགག་དབྱེ་བྱའོ། །དགག་དབྱེ་བྱེད་པའི་དགེ་སློང་བསྐོ་བར་བྱའོ། །ནད་པའི་དགག་དབྱེ་ཡང་བླང་བར་བྱའོ།། །།བར་སྡོམ་ལ། གནས་པར་དམ་ནི་ བཅའ་བ་ལ། །ཆོས་མ་ཡིན་པ་གཞག་པ་དང་། །ཚིག་གཅིག་པ་ཡི་དགག་དབྱེ་དང་། །གང་ཕྱིར་ཚིག་གཅིག་བྱ་བའོ། །དགག་དབྱེ་གཞག་པ་ཆོས་དང་མཐུན་པ་གཅིག་དང་ཆོས་དང་མི་མཐུན་པ་གཅིག་དང་། དགག་དབྱེ་གཞག་པ་ཆོས་དང་མཐུན་པ་གསུམ་དང་།

  452. 227a

    ཆོས་དང་མི་མཐུན་པ་གཅིག་དང་། དགག་དབྱེ་གཞག་པ་ཆོས་དང་མཐུན་པ་ལྔ་དང་ཆོས་དང་མི་མཐུན་པ་གཅིག་གོ། །དགག་དབྱེ་གཞག་པ་ཆོས་དང་མཐུན་པ་གཅིག་དང་ཆོས་དང་མི་མཐུན་པ་གཅིག་གང་ཞེ་ན། དགག་དབྱེ་ལན་གཅིག་བཟླས་པ་ལ་ བརྗོད་པ་མ་རྫོགས་པར་དགག་དབྱེ་འཇོག་པ་ནི་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བརྗོད་པ་རྫོགས་ནས་དགག་དབྱེ་འཇོག་པ་ནི་ཆོས་དང་མི་མཐུན་པ་སྟེ། འདི་ནི་དགག་དབྱེ་གཞག་པའི་ཆོས་དང་མཐུན་པ་གཅིག་དང་ཆོས་དང་མི་མཐུན་པ་གཅིག་ཡིན་ ནོ། །དགག་དབྱེ་གཞག་པ་ཆོས་དང་མཐུན་པ་གསུམ་དང་ཆོས་དང་མི་མཐུན་པའི་གཅིག་གང་ཞེ་ན། དགག་དབྱེ་ལན་གཉིས་བཟླས་པ་ལ་བཟླས་པ་དང་པོ་བརྗོད་པ་མ་རྫོགས་པར་དགག་དབྱེ་འཇོག་པ་ནི་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བརྗོད་པ་ རྫོགས་ནས་འཇོག་པ་ཡང་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བཟླས་པ་གཉིས་བརྗོད་པ་མ་རྫོགས་པར་དགག་དབྱེ་འཇོག་པ་ཡང་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བརྗོད་པ་རྫོགས་ནས་དགག་དབྱེ་འཇོག་པ་ནི་དགག་དབྱེ་འཇོག་པ་ ཆོས་དང་མི་མཐུན་པ་སྟེ། དེ་ལྟར་དེ་དག་ནི་དགག་དབྱེ་འཇོག་པ་ཆོས་དང་མཐུན་པ་གསུམ་དང་ཆོས་དང་མི་མཐུན་པ་གཅིག་ཡིན་ནོ། །དགག་དབྱེ་འཇོག་པ་ཆོས་དང་མཐུན་པ་ལྔ་དང་ཆོས་དང་མི་མཐུན་པ་གཅིག་གང་ཞེ་ན། དགག་དབྱེ་ལན་གསུམ་བཟླས་པ་ལ་བཟླས་པ་ དང་པོ་བརྗོད་པ་མ་རྫོགས་པར་དགག་དབྱེ་འཇོག་པ་ནི་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བརྗོད་པ་རྫོགས་ནས་དགག་དབྱེ་འཇོག་པ་ཡང་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བཟླས་པ་གཉིས་པ་བརྗོད་པ་མ་རྫོགས་པར་དགག་དབྱེ་འཇོག་པ་ཡང་ དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བརྗོད་པ་རྫོགས་ནས་དགག་དབྱེ་འཇོག་པ་ཡང་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །བཟླས་པ་གསུམ་པ་བརྗོད་པ་མ་རྫོགས་པར་དགག་དབྱེ་འཇོག་པ་ཡང་དགག་དབྱེ་འཇོག་པ་ཆོས་དང་མཐུན་པ་ཡིན་ནོ། །

  453. 227b

    བརྗོད་པ་རྫོགས་ནས་དགག་དབྱེ་འཇོག་པ་ནི་དགག་དབྱེ་འཇོག་པ་ཆོས་དང་མི་མཐུན་པ་སྟེ། དེ་ལྟར་ན་དགག་དབྱེ་གཞག་པ་ཆོས་དང་མཐུན་པ་ལྔ་དང་ཆོས་དང་མི་མཐུན་པ་གཅིག་ཡིན་ནོ། །དགག་དབྱེ་ལན་གཅིག་བཟླས་པ་ཡོད། དགག་དབྱེ་ལན་གཉིས་བཟླས་པ་ ཡོད། དགག་དབྱེ་ལན་གསུམ་བཟླས་པ་ཡོད། ཚོགས་ཀྱི་དགག་དབྱེ་ཡོད་དོ། །དོན་གང་ལ་དགག་དབྱེ་ལན་གཅིག་བཟླས་པ་ཡིན་ཞེ་ན།། །།བར་སྡོམ་ལ། གཞང་འབྲུམ་ཆར་དང་རྒྱལ་པོ་དང་། །སྙན་དང་ཆོས་ནི་རྣམ་ངེས་དང་། །དགེ་འདུན་བར་ཆད་བྱེད་ གཏོགས་པ། །ཡང་དག་བསྡུས་པའི་ཚོགས་ཡིན་ནོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་སློང་གཞང་འབྲུམ་གྱིས་ཐེབས་པ་རབ་ཏུ་མང་པོ་འདུག་ཅིང་མཐུན་པར་གྱུར་པ་དང་། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་ འདུན་གྱི་དགག་དབྱེ་བཅོ་ལྔ་པ་ཡིན་ལ། དགེ་སློང་རབ་ཏུ་མང་པོ་འདུག་ཅིང་མཐུན་པར་གྱུར་པ་འདི་དག་ཀྱང་གཞང་འབྲུམ་གྱིས་ཐེབས་པ་ཡིན་ཏེ། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན། ཚེ་དང་ལྡན་པ་འདི་དག་རེག་པར་མི་གནས་ པར་འགྱུར་བས་མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན་དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ ཡང་དགག་དབྱེ་བཅོ་ལྔ་པ་དེ་ཉིད་ལ་བླ་གབ་མེད་པར་གནས་མལ་རབ་ཏུ་མང་པོ་བཀྲམ་ལ་ཆར་པ་བབ་པའམ། འབབ་དུ་དོགས་པ་དང་། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། གནས་མལ་རབ་ཏུ་ མང་པོ་ཞིག་ནི་བླ་གབ་མེད་པར་བཀྲམ་སྟེ། ཆར་པ་འབབ་པའམ། འབབ་ཏུ་དོགས་ལ། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་བདག་གིས་གནས་མལ་རྣམས་མ་གཤེར་བར་བརྟུལ་མི་ནུས་པས་མ་ལ་བདག་གིས་དགག་དབྱེ་

  454. 228a

    ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་དགག་དབྱེ་བཅོ་ལྔ་པ་དེ་ ཉིད་ལ་རྒྱལ་པོ་དང་། བཙུན་མོ་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་དག་དང་ཐབས་ཅིག་ཏུ་ཀུན་དགའ་ར་བར་ལྷགས་ལ། དེར་རྒྱལ་པོས་ཀྱང་དགེ་འདུན་ལ་གོས་དང་ཟང་ཟིང་གི་རྙེད་པ་མང་དུ་ཕུལ། བཙུན་མོ་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་དག་གིས་ཀྱང་དགེ་འདུན་ལ་གོས་དང་ཟང་ཟིང་གི་རྙེད་པ་མང་དུ་ཕུལ་ལ། སྒྲོགས་པར་བྱེད་པའི་དགེ་སློང་གིས་ཀྱང་བསྒྲགས་པས་ནམ་རིང་ཞིག་ཟད་པར་གྱུར་པ་ལ། དེ་ལ་དགག་དབྱེ་བྱེད་པའི་ དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། རྒྱལ་པོ་འདི་ཡང་བཙུན་མོ་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་དག་དང་ཐབས་ཅིག་ཏུ་ཀུན་དགའ་ར་བར་ལྷགས་ལ། འདིར་རྒྱལ་ པོས་ཀྱང་དགེ་འདུན་ལ་གོས་དང་ཟང་ཟིང་གི་རྙེད་པ་མང་དུ་ཕུལ། བཙུན་མོ་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་རྣམས་ཀྱིས་ཀྱང་དགེ་འདུན་ལ་གོས་དང་ཟང་ཟིང་གི་རྙེད་པ་མང་དུ་ཕུལ་ཏེ། སྒྲོགས་པར་བྱེད་པའི་དགེ་སློང་གིས་ ཀྱང་བསྒྲགས་པས་མཚན་རིང་ཞིག་ཟད་པས། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་བདག་གིས་སྐྱ་རེངས་མ་ཤར་བར་དགག་དབྱེ་བྱ་མི་ནུས་པས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་ དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་སྙན་པ་སྙན་པར་སྨྲ་བའི་དགེ་སློང་དག་གིས་ཆོས་སྙན་དགུ་བཏོན་པས་

  455. 228b

    མཚན་རིང་ཞིག་ཟད་ལ། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། སྙན་པ་སྙན་པར་སྨྲ་བའི་དགེ་སློང་འདི་དག་གིས་ཆོས་སྙན་དགུ་བཏོན་པས་མཚན་རིང་ཞིག་ཟད་དེ། གལ་ཏེ་བདག་གིས་ དགག་དབྱེ་ལན་གསུམ་བཟླས་པས་དགག་དབྱེ་བྱས་ན་བདག་གིས་སྐྱ་རེངས་མ་ཤར་བར་དགག་དབྱེ་བྱ་མི་ནུས་པས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་གིས་ཆོས་རྣམ་པར་ གཏན་ལ་འབེབས་པའི་གཏམ་གྱིས་མཚན་རིང་ཞིག་ཟད་པར་གྱུར་ཏེ། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་ འདི་དག་གིས་ཆོས་རྣམ་པར་གཏན་ལ་འབེབས་པའི་གཏམ་གྱིས་མཚན་རིང་ཞིག་ཟད་དེ། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་བདག་གིས་སྐྱ་རེངས་མ་ཤར་བར་དགག་དབྱེ་བྱ་མི་ནུས་པས་མ་ལ་བདག་གིས་དགག་དབྱེ་ལན་གཅིག་ བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་འདུན་ གྱིས་ནང་དུ་རྩོད་པའི་ཆོས་བཞི་ལས་རྩོད་པ་གང་ཡང་རུང་བ་ཞིག་བྱུང་བར་གྱུར་ལ། དེ་ནས་དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་གིས་རྩོད་པ་དེ་རྩོད་པ་ཞི་བར་བྱེད་པའི་ཆོས་བདུན་གྱིས་རྩོད་པ་རྣམས་དུལ་བར་བྱེད། ཞི་བར་བྱེད་

  456. 229a

    ཉེ་བར་ཞི་བར་བྱེད་པས་ནམ་རིང་ཞིག་ཟད་དེ། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། དགེ་འདུན་གྱི་ནང་དུ་རྩོད་པའི་ཆོས་བཞི་ལས་རྩོད་པ་གང་ཡང་རུང་བ་ཞིག་བྱུང་བར་གྱུར་ཏེ། དགེ་ སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་འདི་དག་གིས་རྩོད་པ་དེ་རྩོད་པ་ཞི་བར་བྱེད་པའི་ཆོས་བདུན་གྱིས་དུལ་བར་བྱེད། ཞི་བར་བྱེད། ཉེ་བར་ཞི་བར་བྱེད་པས་མཚན་རིང་ཞིག་ཟད་པས། གལ་ཏེ་བདག་གིས་དགག་དབྱེ་ལན་གསུམ་བཟླས་ པས་དགག་དབྱེ་བྱས་ན་བདག་གིས་སྐྱ་རེངས་མ་ཤར་བར་དགག་དབྱེ་བྱ་མི་ནུས་པས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་ བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་རྒྱལ་པོ་དཔུང་གི་ཚོགས་ཡན་ལག་བཞི་པ་གོ་བསྐོན་པ་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ ཚོགས་དང་། ཀུན་དགའ་ར་བའི་སྒོའི་བར་དུ་ལྷགས་ཏེ། སྤར་ཐབས་སུ་སྐུར་པ་སྒྲོགས་ཤིང་། ཤེས་ལྡན་དག་ཤཱཀྱའི་སྲས་ཀྱི་དགེ་སྦྱོང་རྣམས་ཟུང་ཤིག །སོད་ཅིག །ཆིངས་ཤིག །སྤྱུགས་ཤིག །ངའི་གླང་པོ་ཆེ་འཚོ་བ་དང་། རྟ་རྫི་དང་། ཤིང་རྟ་སྲུང་བ་ དང་། སོ་ཕག་སྐྱེད་པ་དང་། རྒྱལ་མཚན་ཐོགས་པ་དང་། འཕན་རིངས་འཛིན་པ་སོ་སོར་རྒྱལ་པོའི་བྱ་བ་དང་། རྒྱལ་པོའི་བྱེད་པ་རྣམས་བྱེད་པར་འགྱུར་རོ། །ཞེས་ཟེར་ལ། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་ བཅོ་ལྔ་པ་ཡིན་ལ། རྒྱལ་པོའི་དཔུང་གི་ཚོགས་ཡན་ལག་བཞི་པ་གོ་བསྐོན་པ་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་དང་། ཀུན་དགའ་ར་བའི་སྒོའི་བར་དུ་ལྷགས་ཏེ་སྤར་ཐབས་སུ་སྐུར་པ་སྒྲོགས་ཤིང་། ཁྱེད་ཀྱིས་

  457. 229b

    ཤཱཀྱའི་སྲས་ཀྱི་དགེ་སྦྱོང་རྣམས་ཟུང་ཤིག །སོད་ཅིག །ཆིངས་ཤིག །སྤྱུགས་ཤིག །བདག་ཅག་གི་གླང་པོ་ཆེ་འཚོ་བ་དང་། རྟ་རྫི་དང་། ཤིང་རྟ་སྲུང་བ་དང་། སོ་ཕག་སྐྱེད་པ་དང་། རྒྱལ་མཚན་ཐོགས་པ་དང་། འཕན་རིངས་འཛིན་པ་སོ་སོར་རྒྱལ་པོའི་བྱ་བ་ དང་། རྒྱལ་པོའི་བྱེད་པ་རྣམས་བྱེད་པར་འགྱུར་རོ་ཞེས་ཟེར་བས། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་བས་ མ་ལ་བདག་གིས་དགག་དབྱེ་ལན་གཅིག་བཟླས་པས། དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ ཡང་དགག་དབྱེ་བཅོ་ལྔ་པ་དེ་ཉིད་ལ་ཆོམ་རྐུན་པ་དག་གྲོང་བཅོམ་པའམ། གྲོང་ཁྱེར་བཅོམ་པའམ། ཡུལ་བཅོམ་སྟེ། ཀུན་དགའ་ར་བའི་སྒོར་ལྷགས་ནས་བ་ལང་ངམ། མ་ཧེའམ། ར་དག་བསད་དེ། ཁྲག་གིས་ཡན་ལག་དག་བྱུགས་ནས། དགེ་སློང་ དག་ལ་ཕོ་ཉ་བཏང་སྟེ། འཕགས་པ་རྣམས་བྱུང་ཤིག །འདིར་བདག་ཅག་འཁོད་དགོས་སོ་ཞེས་ཟེར་ལ། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། ཆོམ་རྐུན་པ་འདི་དག་ཀྱང་གྲོང་བཅོམ་ པའམ། གྲོང་ཁྱེར་བཅོམ་པའམ། ཡུལ་བཅོམ་སྟེ། ཀུན་དགའ་ར་བའི་སྒོར་ལྷགས་ནས་བ་ལང་ངམ། མ་ཧེའམ། ར་དག་བསད་དེ་ཁྲག་གིས་ཡན་ལག་དག་བྱུགས་ནས། དགེ་སློང་རྣམས་ལ་ཕོ་ཉ་དག་བཏང་སྟེ། འཕགས་པ་རྣམས་བྱུང་ཤིག །འདིར་བདག་ ཅག་རྣམས་འཁོད་དགོས་སོ་ཞེས་ཟེར་ཏེ། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་བས། མ་ལ་བདག་གིས་དགག་

  458. 230a

    དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་དགག་ དབྱེ་བཅོ་ལྔ་པ་དེ་ཉིད་ལ་རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་སྤྱོད་ཡུལ་ལམ། སྤྱོད་ཡུལ་གྱི་ལམ་ཀར་རིགས་ཀྱི་བུད་མེད་དམ། རིགས་ཀྱི་ན་ཆུང་ལ་གཤེས་སམ། ཁ་ངན་སྨྲས་སམ། རེག་པས་མི་རྣམས་ ཁྲོས་ཏེ། ཀུན་དགའ་ར་བའི་སྒོར་ལྷགས་ནས་སྤར་ཐབས་སུ་སྐུར་པ་སྒྲོགས་ཤིང་། ཤེས་ལྡན་དག་ཤཱཀྱའི་སྲས་ཀྱི་དགེ་སྦྱོང་རྣམས་ཟུང་ཤིག །སོད་ཅིག །ཆིངས་ཤིག །སྤྱུགས་ཤིག །རྒྱལ་པོའི་གླང་པོ་ཆེ་འཚོ་བ་དང་། རྟ་རྫི་དང་། ཤིང་རྟ་སྲུང་བ་དང་། སོ་ཕག་ སྐྱེད་པ་དང་། རྒྱལ་མཚན་ཐོགས་པ་དང་། འཕན་རིངས་འཛིན་པ་སོ་སོར་རྒྱལ་པོའི་བྱ་བ་དང་། རྒྱལ་པོའི་བྱེད་པ་རྣམས་བྱེད་པར་འགྱུར་རོ་ཞེས་ཟེར་ལ། དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་སྤྱོད་ཡུལ་ལམ། སྤྱོད་ཡུལ་གྱི་ལམ་ཀར་རིགས་ཀྱི་བུད་མེད་དམ། རིགས་ཀྱི་ན་ཆུང་ལ་གཤེས་སམ། ཁ་ངན་སྨྲས་སམ། རེག་པས་མི་རྣམས་ཁྲོས་ཏེ་ཀུན་དགའ་ར་བའི་སྒོར་ ལྷགས་ནས་སྤར་ཐབས་སུ་སྐུར་པ་སྒྲོགས་ཤིང་། ཤེས་ལྡན་དག་ཤཱཀྱའི་སྲས་ཀྱི་དགེ་སྦྱོང་རྣམས་ཟུང་ཤིག །སོད་ཅིག །ཆིངས་ཤིག །སྤྱུགས་ཤིག །རྒྱལ་པོའི་གླང་པོ་ཆེ་འཚོ་བ་དང་། རྟ་རྫི་དང་། ཤིང་རྟ་སྲུང་བ་དང་། སོ་ཕག་སྐྱེད་པ་དང་། རྒྱལ་མཚན་ཐོགས་ པ་དང་། འཕན་རིངས་འཛིན་པ་སོ་སོར་རྒྱལ་པོའི་བྱ་བ་དང་། རྒྱལ་པོའི་བྱེད་པ་རྣམས་བྱེད་པར་འགྱུར་རོ་ཞེས་ཟེར་ཏེ། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་

  459. 230b

    ཆད་དང་། ཚངས་པར་སྤྱོད་པའི་བར་ཆད་དུ་འགྱུར་བས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་ གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་མི་མ་ཡིན་པ་གནས་པའི་ཕྱོགས་ཤིག་ཏུ་གཙུག་ལག་ཁང་བརྩིགས་ལ། རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ས་ཕྱོགས་སུ་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་བོར་བ་དང་། མི་གཙང་བས་སྦགས་པའི་གནས་མལ་བཞག་པས་མི་མ་ཡིན་པ་རྣམས་ཁྲོས་ནས་སྤྱོད་ཡུལ་དང་། སྤྱོད་ཡུལ་གྱི་ལམ་ཀ་དང་། འཆག་ས་དང་། ཁྱམས་དང་། སྒོ་ ཁང་རྣམས་སུ་འདུག་ནས་ཀྱང་དགེ་སློང་རྣམས་ལ་འབབ་པར་བྱེད་དོ། །དེ་ལ་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ལ། གཙུག་ལག་ཁང་འདི་ཡང་མི་མ་ཡིན་པ་རྣམས་གནས་པའི་ཕྱོགས་ཤིག་ཏུ་བརྩིགས་ ལ། རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ས་ཕྱོགས་སུ་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་བོར་བ་དང་། མི་གཙང་བས་སྦགས་པའི་གནས་ མལ་བཞག་པས་མི་མ་ཡིན་པ་རྣམས་ཁྲོས་ནས་སྤྱོད་ཡུལ་ལམ། སྤྱོད་ཡུལ་གྱི་ལམ་མམ། འཆག་ས་འམ། ཁྱམས་སམ། སྒོ་ཁང་རྣམས་སུ་འདུག་སྟེ་དགེ་སློང་དག་ལ་འབབ་པར་བྱེད་ཀྱིས། ཇི་སྟེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་ བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་ལན་གཅིག་བཟླས་པའི་དགག་དབྱེས་

  460. 231a

    དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་གདུག་པ་གནས་པའི་ཕྱོགས་ཤིག་ཏུ་གཙུག་ལག་ཁང་བརྩིགས་ལ། དེ་ན་རྒན་ཞུགས་མི་ཤེས་པ། རྨོངས་ པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ཕྱོགས་སུ་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་དག་བོར་ཞིང་མི་གཙང་བས་སྦགས་པའི་གནས་མལ་བཞག་པས་གདུག་པ་ཁྲོས་ཏེ་སྤྱོད་ ཡུལ་ལམ། སྤྱོད་ཡུལ་གྱི་ལམ་མམ། འཆག་སའམ། ཁྱམས་སམ། སྒོ་ཁང་རྣམས་སུ་འདུག་ནས་ཀྱང་དགེ་སློང་རྣམས་ལ་འབབ་པར་བྱེད། ཉལ་ཁྲི་དག་ཀྱང་སྒྱུར་བར་བྱེད་དོ། །དེ་ན་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་ གྱི་དགག་དབྱེ་བཅོ་ལྔ་པ་ཡིན་ན། གཙུག་ལག་ཁང་འདི་ཡང་གདུག་པ་གནས་པའི་ཕྱོགས་ཤིག་ཏུ་བརྩིགས་ལ། རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ཕྱོགས་སུ་བཤང་བ་དང་། གཅི་བ་དང་། མཆིལ་ མ་དང་། སྣབས་དང་། སྐྱུགས་པ་དང་། འཁྲུ་བ་དག་བོར་ཞིང་མི་གཙང་བས་སྦགས་པའི་གནས་མལ་བཞག་པས་གདུག་པ་ཁྲོས་ནས་སྤྱོད་ཡུལ་ལམ་སྤྱོད་ཡུལ་གྱི་ལམ་མམ། འཆག་སའམ། ཁྱམས་སམ། སྒོ་ཁང་རྣམས་སུ་འདུག་ནས་དགེ་སློང་དག་ ལ་འབབ་པར་བྱེད། ཉལ་ཁྲི་དག་སྒྱུར་བར་བྱེད་ཀྱིས། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས་དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་ཀླུ་གནས་

  461. 231b

    པས་ཕྱོགས་ཤིག་ཏུ་གཙུག་ལག་ཁང་བརྩིགས་ལ། དེ་ན་རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ཕྱོགས་སུ་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་དག་བོར་ཞིང་མི་གཙང་བས་སྦགས་པའི་གནས་མལ་བཞག་པས་ཀླུ་ཁྲོས་ཏེ་སྤྱོད་ཡུལ་ལམ། སྤྱོད་ཡུལ་གྱི་ལམ་མམ། འཆག་སའམ། ཁྱམས་སམ། སྒོ་ཁང་དག་ཏུ་འདུག་ནས་དགེ་སློང་རྣམས་ལ་འབབ་པར་བྱེད། ཉལ་ཁྲི་དག་ཀྱང་སྒྱུར་བར་ བྱེད་དོ། །དེ་ན་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ན། གཙུག་ལག་ཁང་འདི་ཡང་ཀླུ་གནས་པའི་ཕྱོགས་གཅིག་ཏུ་བརྩིགས་ལ། རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ཕྱོགས་སུ་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་དག་བོར་ལ་མི་གཙང་བས་སྦགས་པའི་གནས་མལ་བཞག་པས་ཀླུ་ཁྲོས་ཏེ་སྤྱོད་ཡུལ་ལམ། སྤྱོད་ཡུལ་གྱི་ ལམ་མམ། འཆག་སའམ། ཁྱམས་སམ། སྒོ་ཁང་རྣམས་སུ་འདུག་ནས། དགེ་སློང་རྣམས་ལ་འབབ་པར་བྱེད། ཉལ་ཁྲི་དག་ཀྱང་སྒྱུར་བར་བྱེད་དེ། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་ སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ ལ་དགག་དབྱེ་ལན་གཅིག་བཟླས་པ་ཡིན་ནོ། །དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་ནགས་ཁྲོད་ཞིག་ཏུ་གཙུག་ལག་ཁང་བརྩིགས་པ་དང་། མེ་ཤོར་བས་གྲོང་དང་། གྲོང་ཁྱེར་དང་། རྒྱལ་པོའི་ཕོ་བྲང་འཁོར་རྣམས་ཀྱང་སྲེག་ཅིང་

  462. 232a

    འོང་སྟེ་སྤྱོད་ཡུལ་དང་། སྤྱོད་ཡུལ་གྱི་ལམ་ཀ་ཡང་ཚིག །འཆག་ས་དང་། ཁྱམས་སམ། སྒོ་ཁང་ཡང་ཚིག །གཙུག་ལག་ཁང་དང་། གཙུག་ལག་ཁང་གི་ཉེ་འཁོར་ཡང་ཚིག་ལ་ཐུག་ནས། དེ་ན་དགེ་སློང་དགག་དབྱེ་བྱེད་པ་འདི་སྙམ་དུ་ སེམས་ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ན། གཙུག་ལག་ཁང་འདི་ཡང་ནགས་ཁྲོད་ཞིག་ཏུ་བརྩིགས་ཏེ་མེ་ཤོར་བས་གྲོང་དང་། གྲོང་ཁྱེར་དང་། རྒྱལ་པོའི་ཕོ་བྲང་འཁོར་རྣམས་ཀྱང་སྲེག་ཅིང་འོང་སྟེ་སྤྱོད་ཡུལ་དང་། སྤྱོད་ཡུལ་གྱི་ལམ་ཀ་ཡང་ཚིག ། འཆག་ས་དང་། ཁྱམས་དང་། སྒོ་ཁང་རྣམས་ཀྱང་ཚིག །གཙུག་ལག་ཁང་དང་། གཙུག་ལག་ཁང་གི་ཉེ་འཁོར་ཡང་ཚིག་ལ་ཐུག་པས། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་པ་ ཡིན་ནོ།། །།འདུལ་བ་གཞི། བམ་པོ་བཅུ་དགུ་པ། དོན་གཞན་ལ་དགག་དབྱེ་ལན་གཅིག་བཟླས་པ་ནི་འདི་ལྟར་ཡང་གཤོང་ཞིག་ཏུ་གཙུག་ལག་ཁང་བརྩིགས་པ་དང་། རི་གཟར་པོའི་ཁར་ཆར་མོ་ཆེ་བབ་པས་གྲོང་དང་། གྲོང་ཁྱེར་དང་། ཡུལ་ འཁོར་དང་། རྒྱལ་པོའི་ཕོ་བྲང་འཁོར་ཡང་དེད་ཅིང་འོང་སྟེ། སྤྱོད་ཡུལ་དང་། སྤྱོད་ཡུལ་གྱི་ལམ་དང་། འཆག་ས་དང་། ཁྱམས་དང་། སྒོ་ཁང་ཡང་དེད་ལ་ཐུག །གཙུག་ལག་ཁང་ཡང་གཤེར་བར་གྱུར་པ་དང་། དེ་ན་དགག་དབྱེ་བྱེད་པའི་དགེ་སློང་འདི་སྙམ་དུ་སེམས་ ཏེ། དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ན། གཙུག་ལག་ཁང་འདི་ཡང་གཤོང་ཞིག་ཏུ་བརྩིགས་ཏེ། རི་གཟར་པོའི་ཁར་ཆར་མོ་ཆེ་བབ་པས་གྲོང་དང་། གྲོང་ཁྱེར་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་ཡང་དེད་ཅིང་འོང་སྟེ། སྤྱོད་ཡུལ་དང་

  463. 232b

    སྤྱོད་ཡུལ་གྱི་ལམ་དང་། འཆག་ས་དང་། ཁྱམས་དང་། སྒོ་ཁང་ཡང་དེད་ལ་ཐུག །གཙུག་ལག་ཁང་ཡང་གཤེར་བར་གྱུར་པས། གལ་ཏེ་བདག་གིས་དགག་དབྱེ་ལན་གསུམ་བཟླས་པས་དགག་དབྱེ་བྱས་ན་གཞི་དེས་བདག་གི་སྲོག་གི་བར་ཆད་དང་། དགེ་ སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གིས་དགག་དབྱེ་ལན་གཅིག་བཟླས་པས་དགག་དབྱེ་བྱའོ་སྙམ་ནས། དེ་དགག་དབྱེ་ལན་གཅིག་བཟླས་པས་དགག་དབྱེ་བྱེད་ན། དོན་དེ་ལ་དགག་དབྱེ་ལན་གཅིག་བཟླས་ པ་ཡིན་ནོ། །དོན་གང་གི་ཕྱིར་དགག་དབྱེ་ལན་གཉིས་བཟླས་པ་ཡིན་ཞེ་ན། གང་ལ་དགག་དབྱེ་ལན་གསུམ་བཟླས་པའི་སྐབས་མེད་པར་གྱུར་ན། དོན་དེ་ལ་དགག་དབྱེ་ལན་གཉིས་བཟླས་པ་ཡིན་ནོ། །དོན་གང་ལ་དགག་དབྱེ་ལན་གསུམ་བཟླས་པ་ཡིན་ཞེ་ན། རྣལ་ དུ་གནས་པའི་གནས་སྐབས་ནའོ། །དོན་གང་ལ་ཚོགས་ཀྱི་དགག་དབྱེ་བྱ་ཞེ་ན། འདི་ལྟར་ཡང་དགོན་པ་འཁྲུགས་པའི་དམག་གི་འཇིགས་པ་བྱུང་ནས། ཡུལ་མི་རྣམས་ཀྱང་དེ་དང་དེ་དག་ཏུ་བྲོས་སོ། །དེ་ནས་དགེ་སློང་རྣམས་ཀྱང་གཏུར་བུ་དག་ཏུ་ཆོས་གོས་རྣམས་ཐུམ་པོ་བྱས་ ཏེ་ཐོགས་ནས་ཕན་ཚུན་བལྟས་ཏེ། ཚེ་དང་ལྡན་པ་དག་དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་མོད་ཀྱི། གང་གི་ཚེ་དགེ་འདུན་མཐུན་པ་རྙེད་པ་དེའི་ཚེ་དགག་དབྱེ་བྱའོ་ཞེས་བརྗོད་ནས་འདོད་པར་བྱ་སྟེ། དོན་དེ་ལ་ཚོགས་ཀྱི་དགག་དབྱེ་ཞེས་བྱའོ། །སངས་རྒྱས་བཅོམ་ ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་འདི་ལྟར་ཡང་དགེ་སློང་རྣམས་ཀྱིས་འདི་ལྟ་བུའི་ཁྲིམས་སུ་བཅའ་བ་དག་བགྱིས་ནས་དབྱར་གནས་ཏེ། ཚེ་དང་ལྡན་པ་དག་བདག་ཅག་གི་ནང་ན་སུ་ཡང་རུང་དབྱར་གྱི་ནང་ལོགས་སུ་ཉེ་དུ་དག་འོངས་ན་དགག་ དབྱེ་སྦྱིན་པར་བྱའོ་ཞེས་མཆི་ན། བཙུན་པ་དགག་དབྱེ་སྩལ་བར་བགྱི་འམ། མི་སྩལ་བར་བགྱི། ཉེ་བ་འཁོར་བྱིན་ཅིག །ཅི་སྟེ་དངོས་པོ་བཞག་ལ་གང་ཟག་མ་ལགས་ན་དགག་དབྱེ་སྩལ་བར་བགྱིའམ། མི་སྩལ་བར་བགྱི། ཉེ་བ་འཁོར་མ་སྦྱིན་པར་དེ་ལ་ཚིག་

  464. 233a

    འདི་སྐད་ཅེས། ཚེ་དང་ལྡན་པ་བདག་ཅག་དོན་འདི་ལ་འདུས་ཤིང་མཐུན་པར་གྱུར་པ་ནི་མ་ཡིན་ན། ཚེ་དང་ལྡན་པ་ཅིའི་ཕྱིར་དངོས་པོ་བཞག་སྟེ་གང་ཟག་མ་ཡིན། འོན་ཀྱང་བདག་ཉིད་ཤིན་ཏུ་རྣམ་པར་དག་པར་བྱ་བའི་ཕྱིར་དགག་དབྱེ་བྱོས་ཤིག་ཅེས་བཅོམ་ ལྡན་འདས་ཀྱིས་བཀའ་སྩལ་གྱིས། གལ་ཏེ་འདོད་ན་ནི་འདུག་ལ་དགག་དབྱེ་བྱའོ་ཞེས་སྨྲོས་ཤིག །གལ་ཏེ་གང་ཟག་བཞག་ལ་དངོས་པོ་མ་ལགས་ན། དགག་དབྱེ་སྩལ་བར་བགྱིའམ། མི་སྩལ་བར་བགྱི། ཉེ་བ་འཁོར་མ་སྦྱིན་པར་དེ་ལ་ཚིག་འདི་སྐད་ཅེས། ཚེ་དང་ལྡན་པ་བདག་ཅག་དོན་འདི་ལ་འདུས་ཤིང་མཐུན་པར་གྱུར་པ་ནི་མ་ཡིན་ན། ཚེ་དང་ལྡན་པ་ཅིའི་ཕྱིར་གང་ཟག་བཞག་སྟེ་དངོས་པོ་མ་ཡིན། འོན་ཀྱང་བདག་ཉིད་ཤིན་ཏུ་རྣམ་པར་དག་པར་བྱ་བའི་ཕྱིར་དགག་དབྱེ་བྱོས་ཤིག་ཅེས་བཅོམ་ལྡན་འདས་ཀྱིས་བཀའ་སྩལ་ གྱིས། གལ་ཏེ་འདོད་ན་ནི་འདུག་ལ་དགག་དབྱེ་བྱའོ་ཞེས་སྨྲོས་ཤིག །གལ་ཏེ་དངོས་པོ་དང་གང་ཟག་བཞག་ན་དགག་དབྱེ་སྩལ་བར་བགྱིའམ། མི་སྩལ་བར་བགྱི། ཉེ་བ་འཁོར་མ་སྦྱིན་པར་ཚེ་དང་ལྡན་པ་བདག་ཅག་དོན་འདི་ལ་འདུས་ཤིང་མཐུན་པར་གྱུར་པ་ ནི་མ་ཡིན་ན། ཚེ་དང་ལྡན་པ་ཅིའི་ཕྱིར་གང་ཟག་དང་དངོས་པོ་བཞག་སྟེ་མ་ཡིན། འོན་ཀྱང་བདག་ཉིད་ཤིན་ཏུ་རྣམ་པར་དག་པར་བྱ་བའི་ཕྱིར་དགག་དབྱེ་བྱོས་ཤིག་ཅེས་བཅོམ་ལྡན་འདས་ཀྱིས་བཀའ་སྩལ་གྱིས། གལ་ཏེ་འདོད་ན་འདུག་ལ་དགག་དབྱེ་བྱའོ་ཞེས་ སྨྲོས་ཤིག །གལ་ཏེ་དངོས་པོ་དང་གང་ཟག་མ་བཞག་ན་དགག་དབྱེ་སྩལ་བར་བགྱིའམ། མི་སྩལ་པར་བགྱི། ཉེ་བ་འཁོར་བྱིན་ཅིག། །།སྡོམ་ལ། རྒྱལ་པོས་དགེ་སློང་བཟུང་བ་དང་། །དྲན་པར་བྱ་བ་བཅུ་པོ་དང་། །ལྟུང་བས་བདུན་པོ་བྱ་བ་དང་། །གླེང་ བ་ཡིས་ནི་བདུན་པོའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་སློང་རྒྱལ་པོའམ། ཆོམ་རྐུན་ནམ། གཡོན་ཅན་ནམ། གསོད་པའམ། ཕྱིར་རྒོལ་བའམ། ཕས་ཀྱི་དགྲ་བོས་བཟུང་བར་གྱུར་ན། དེ་ལ་དགེ་སློང་དག་གིས་ཕོ་ཉ་གཏང་བར་བྱ་

  465. 233b

    སྟེ། དགེ་སློང་འདི་བདག་ཅག་གི་ཚངས་པ་མཚུངས་པར་སྤྱོད་པ་ཡིན་གྱིས་འདི་ཐོང་ཤིག་ཅེས་སྤྲིང་ཤིག །གལ་ཏེ་བཏང་ན་ལེགས། ཅི་སྟེ་མ་བཏང་ན་ཕོ་ཉ་གཉིས་པ་གཏང་བར་བྱ་སྟེ། དགེ་སློང་འདི་བདག་ཅག་རྣམས་དང་ལྷན་ཅིག་ཏུ་བགྱི་བ་ཅུང་ཞིག་མཆིས་ཀྱིས་ འདི་ཐོང་ཤིག་ཅེས་སྤྲིང་ཤིག །གལ་ཏེ་བཏང་ན་ལེགས། ཅི་སྟེ་མ་བཏང་ན་དགེ་སློང་རྣམས་དཀྱིལ་འཁོར་གྱི་ནང་དུ་ཞུགས་ལ་དགག་དབྱེ་བྱའོ། །དེའི་འོག་ཏུ་ཕྱི་དེ་ཉིན་པར་ནས་དགེ་སློང་དེ་ཐར་བར་བྱ་བའི་ཕྱིར་བརྩོན་པར་བྱའོ། །གལ་ཏེ་བརྩོན་པར་བྱས་ན་ལེགས། ཅི་སྟེ་བརྩོན་པར་མ་བྱས་ན་འགལ་ཚབས་ཅན་དུ་འགྱུར་རོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་སློང་གིས་ལྟུང་བ་དྲན་ན། དགེ་སློང་དེས་ལྟུང་བ་དེ་དགེ་སློང་གི་མདུན་དུ་ཆོས་བཞིན་དུ་གྱིས་ལ་དེའི་འོག་ཏུ་དགག་དབྱེ་བྱའོ། །དགག་དབྱེ་ནི་འདི་ལྟར་བྱ་སྟེ། ངས་དགག་དབྱེའི་བར་ཆད་དུ་འགྱུར་བ་མི་སྨྲས་ཞེས་བྱ་བ་སྔར་གསོ་སྦྱོང་གི་གཞིར་ཇི་སྐད་བསྟན་པ་བཞིན་བཅུ་ཚན་རྒྱས་པར་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་སློང་གིས་ལྟུང་བ་ཤེས་ལ་ཅི་སྟེ་ཕས་ཕམ་པ་བྱུང་བར་ཤེས་ན་བསྐྲད་ལ་དགག་དབྱེ་བྱའོ། ། གལ་ཏེ་དགེ་འདུན་ལྷག་མ་བྱུང་བར་ཤེས་ན་བྱིན་གྱིས་བརླབས་ནས་དགག་དབྱེ་བྱའོ། །གལ་ཏེ་ལྟུང་བྱེད་དང་། སོ་སོར་བཤགས་པ་དང་། ཉེས་བྱས་དག་བྱུང་བར་ཤེས་ན་བཤགས་ནས་དགག་དབྱེ་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དངོས་པོ་མ་ངེས་ པར་གྱུར་ནས། ཁ་ཅིག་ནི་ལྷག་མ་མེད་པར་འདུ་ཤེས་ལ། ཁ་ཅིག་ནི་ལྷག་མ་དང་བཅས་པར་འདུ་ཤེས་ན་དེ་ལ་གང་དག་ལྷག་མ་མེད་པར་འདུ་ཤེས་པ་དེ་དག་གིས་ནི་བསྐྲད་ནས་དགག་དབྱེ་བྱའོ། །གང་དག་ལྷག་མ་དང་བཅས་པར་འདུ་ཤེས་པ་དེ་དག་གིས་ནི་བྱིན་གྱིས་རློབ་ཏུ་ བཅུག་ནས་དགག་དབྱེ་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་ལྟུང་བ་མ་ངེས་ཏེ། དེ་ལ་ཁ་ཅིག་ནི་བཤགས་པར་བྱའོ་ཞེས་ཟེར། ཁ་ཅིག་ནི་བསྡམ་པར་བྱའོ་ཞེས་ཟེར་ན། དེ་ལ་གང་དག་བཤགས་པར་བྱའོ་ཞེས་ཟེར་བ་དེ་དག་གིས་ནི་འཆགས་སུ་བཅུག་ནས་

  466. 234a

    དགག་དབྱེ་བྱའོ། །གང་དག་བསྡམ་པར་བྱའོ་ཞེས་ཟེར་བ་དེ་དག་གིས་ནི་བསྡམ་པ་བྱེད་དུ་བཅུག་ནས་དགག་དབྱེ་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དགེ་སློང་གིས་དགེ་སློང་ལ་གླེང་བར་བྱེད་ལ། གལ་ཏེ་གླེང་བ་པོ་ལུས་དང་ངག་མ་བསྡམས་ པར་གྱུར་ན། དེ་ལྟ་བུའི་གླེང་བ་པོ་ལ་བསྒོ་ཞིང་རབ་ཏུ་བསྒོ་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་ཀྱིས་བསྡམས་ལ་ངག་གིས་མ་ཡིན་པར་གྱུར་ན། དེ་ལྟ་བུའི་གླེང་བ་པོ་ལ་ཡང་བསྒོ་ཞིང་རབ་ཏུ་བསྒོ་ནས་དགག་དབྱེ་བྱའོ། །གལ་ཏེ་གླེང་བ་པོ་ངག་གིས་བསྡམས་ ལ་ལུས་ཀྱིས་མ་ཡིན་པར་གྱུར་ན། དེ་ལྟ་བུའི་གླེང་བ་པོ་ལ་ཡང་བསྒོ་ཞིང་རབ་ཏུ་བསྒོ་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་དང་ངག་གིས་བསྡམས་པར་གྱུར་ལ་མདོ་སྡེ་མི་འཛིན། འདུལ་བ་མི་འཛིན། མ་མོ་མི་འཛིན་པ་ཡིན་ན། དེ་ལྟ་བུའི་གླེང་བ་པོ་ལ་བརྡ་ སྤྲད་ཅིང་ཡང་དག་པར་བརྡ་སྤྲད་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་དང་ངག་གིས་བསྡམས་ལ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པར་གྱུར་ལ། མདོ་སྡེ་ལ་གསལ་བ་མ་ཡིན། འདུལ་བ་ལ་གསལ་བ་མ་ཡིན། མ་མོ་ལ་གསལ་བ་མ་ཡིན་ ན། དེ་ལྟ་བུའི་གླེང་བ་པོ་ལ་ཡང་བརྡ་སྤྲད་ཅིང་ཡང་དག་པར་བརྡ་སྤྲད་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་དང་ངག་གིས་བསྡམས་ཤིང་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ། མདོ་སྡེ་ལ་གསལ་བ། འདུལ་བ་ལ་གསལ་བ། མ་མོ་ལ་ གསལ་བ་ཡིན་ལ། མདོ་སྡེ་ལ་མི་གཟོ། འདུལ་བ་ལ་མི་གཟོ། མ་མོ་ལ་མི་གཟོ་བ་ཡིན་ན། དེ་ལྟ་བུའི་གླེང་བ་པོ་ལ་ཡང་བརྡ་སྤྲད་ཅིང་ཡང་དག་པར་བརྡ་སྤྲད་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་དང་ངག་གིས་བསྡམས་ཤིང་མདོ་སྡེ་འཛིན་པ། འདུལ་བ་ འཛིན་པ། མ་མོ་འཛིན་པ། མདོ་སྡེ་ལ་གསལ་བ། འདུལ་བ་ལ་གསལ་བ། མ་མོ་ལ་གསལ་བ། མདོ་སྡེ་ལ་གཟོ་བ། འདུལ་བ་ལ་གཟོ་བ། མ་མོ་ལ་གཟོ་བ་ཡིན་ལ། མདོ་སྡེ་ལ་མི་མཁས་པ། འདུལ་བ་ལ་མི་མཁས་པ། མ་མོ་ལ་མི་མཁས་པ་ཡིན་ན། དེ་ལྟ་

  467. 234b

    བུའི་གླེང་བ་པོ་ལ་ཡང་བརྡ་སྤྲད་ཅིང་ཡང་དག་པར་བརྡ་སྤྲད་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་དང་ངག་གིས་བསྡམས་ཤིང་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ། མདོ་སྡེ་ལ་གསལ་བ། འདུལ་བ་ལ་གསལ་བ། མ་མོ་ལ་གསལ་ བ། མདོ་སྡེ་ལ་གཟོ་བ། འདུལ་བ་ལ་གཟོ་བ། མ་མོ་ལ་གཟོ་བ། མདོ་སྡེ་ལ་མཁས་པ། འདུལ་བ་ལ་མཁས་པ། མ་མོ་ལ་མཁས་པ་ཡིན་ན། གལ་ཏེ་ཆེད་དུ་བསམས་ཏེ་དགེ་འདུན་གྱི་ནང་དུ་ཆོས་མ་ཡིན་པ་ལ་ཆོས་དང་། ཆོས་ལ་ཆོས་མ་ཡིན་པ་དང་། འདུལ་ བ་མ་ཡིན་པ་ལ་འདུལ་བ་དང་། འདུལ་བ་ལ་འདུལ་བ་མ་ཡིན་པར་སྟོན་པ་ཡིན་ན། དེ་ལྟ་བུའི་གླེང་བ་པོ་ལ་ཡང་བརྡ་སྤྲད་ཅིང་ཡང་དག་པར་བརྡ་སྤྲད་ནས་དགག་དབྱེ་བྱའོ། །གལ་ཏེ་གླེང་བ་པོ་ལུས་དང་ངག་གིས་བསྡམས་པ་ཡིན་ལ་མདོ་སྡེ་འཛིན་པ། འདུལ་བ་འཛིན་པ། མ་མོ་འཛིན་པ། མདོ་སྡེ་ལ་གསལ་བ། འདུལ་བ་ལ་གསལ་བ། མ་མོ་ལ་གསལ་བ། མདོ་སྡེ་ལ་གཟོ་བ། འདུལ་བ་ལ་གཟོ་བ། མ་མོ་ལ་གཟོ་བ། མདོ་སྡེ་ལ་མཁས་པ། འདུལ་བ་ལ་མཁས་པ། མ་མོ་ལ་མཁས་པ་ཡིན་ན། གལ་ཏེ་ཆེད་དུ་བསམས་པ་ མ་ཡིན་པར་དགེ་འདུན་གྱི་ནང་དུ་ཆོས་མ་ཡིན་པ་ལ་ཆོས་དང་། ཆོས་ལ་ཆོས་མ་ཡིན་པ་དང་། འདུལ་བ་མ་ཡིན་པ་ལ་འདུལ་བ་དང་། འདུལ་བ་ལ་འདུལ་བ་མ་ཡིན་ནོ་ཞེས་སྟོན་པ་དེ་ལ་འདི་སྐད་ཅེས་བརྗོད་པར་བྱ་སྟེ། ཚེ་དང་ལྡན་པ་གླེང་བ་པོ་གང་གིས་སྨྲ། ཕས་ཕམ་པས་སམ། དགེ་འདུན་གྱི་ལྷག་མས་སམ། ལྟུང་བྱེད་ཀྱིས་སམ། སོ་སོར་བཤགས་པས་སམ། ཉེས་བྱས་ཀྱིས་སམ། མཚན་མོ་བྱས་པས་སམ། ཉིན་མོ་བྱས་པས་སམ། ལམ་དུ་བྱས་པས་སམ། ལམ་གོལ་བར་བྱས་པས་སམ། འགྲོ་བའི་འམ། འགྲེང་བའི་འམ། འདུག་ པས་འམ། ཉལ་བའི་འམ། གལ་ཏེ་ཕས་ཕམ་པས་ཡིན་གྱི། དགེ་འདུན་ལྷག་མས་མ་ཡིན། ལྟུང་བྱེད་ཀྱིས་མ་ཡིན། སོ་སོར་བཤགས་པས་མ་ཡིན། ཉེས་བྱས་ཀྱིས་མ་ཡིན་ནམ། གལ་ཏེ་དགེ་འདུན་ལྷག་མས་ཡིན་གྱི། ཕས་ཕམ་པས་མ་ཡིན། ལྟུང་བྱེད་

  468. 235a

    ཀྱིས་མ་ཡིན། སོ་སོར་བཤགས་པས་མ་ཡིན། ཉེས་བྱས་ཀྱིས་མ་ཡིན་ནམ། གལ་ཏེ་ལྟུང་བྱེད་ཀྱིས་ཡིན་གྱི། ཕས་ཕམ་པས་མ་ཡིན། དགེ་འདུན་ལྷག་མས་མ་ཡིན། སོ་སོར་བཤགས་པས་མ་ཡིན། ཉེས་བྱས་ཀྱིས་མ་ཡིན་ནམ། གལ་ ཏེ་སོ་སོར་བཤགས་པས་ཡིན་གྱི། ཕས་ཕམ་པས་མ་ཡིན། དགེ་འདུན་ལྷག་མས་མ་ཡིན། ལྟུང་བྱེད་ཀྱིས་མ་ཡིན། ཉེས་བྱས་ཀྱིས་མ་ཡིན་ནམ། གལ་ཏེ་ཉེས་བྱས་ཀྱིས་ཡིན་གྱི། ཕས་ཕམ་པས་མ་ཡིན། དགེ་འདུན་ལྷག་མས་མ་ཡིན། ལྟུང་བྱེད་ཀྱིས་ མ་ཡིན། སོ་སོར་བཤགས་པས་མ་ཡིན་ནམ། གལ་ཏེ་ཕས་ཕམ་པ་དང་པོས་ཡིན་གྱི། གཉིས་པས་མ་ཡིན། གསུམ་པས་མ་ཡིན། བཞི་པས་མ་ཡིན་ནམ། གལ་ཏེ་གཉིས་པས་ཡིན་གྱི། དང་པོས་མ་ཡིན། གསུམ་པས་མ་ཡིན། བཞི་པས་མ་ཡིན་ ནམ། གལ་ཏེ་གསུམ་པས་ཡིན་གྱི། དང་པོས་མ་ཡིན། གཉིས་པས་མ་ཡིན། བཞི་པས་མ་ཡིན་ནམ། གལ་ཏེ་བཞི་པས་ཡིན་གྱི། དང་པོས་མ་ཡིན། གཉིས་པས་མ་ཡིན། གསུམ་པས་མ་ཡིན་ནམ། གལ་ཏེ་དགེ་འདུན་ལྷག་མ་དང་པོས་ཡིན་གྱི། གཉིས་པས་མ་ཡིན་ཞེས་བྱ་བ་ནས་བཅུ་གསུམ་པའི་བར་གྱིས་མ་ཡིན་ནམ། གལ་ཏེ་བཅུ་གསུམ་པའི་བར་གྱིས་ཡིན་གྱི་དང་པོས་མ་ཡིན། གཉིས་པས་མ་ཡིན། གསུམ་པས་མ་ཡིན་པ་ནས་བཅུ་གཉིས་པའི་བར་གྱིས་མ་ཡིན་པའམ། གལ་ཏེ་ལྟུང་བྱེད་དང་པོས་ཡིན་གྱི། གཉིས་པས་མ་ཡིན། གསུམ་པས་མ་ཡིན་པ་ནས་དགུ་བཅུ་པའི་བར་གྱིས་མ་ཡིན་པའམ། གལ་ཏེ་དགུ་བཅུ་པས་ཡིན་གྱི། དང་པོས་མ་ཡིན། གཉིས་པས་མ་ཡིན་པ་ནས་བརྒྱད་བཅུ་རྩ་དགུའི་བར་གྱིས་མ་ཡིན་པའམ། གལ་ཏེ་སོ་སོར་བཤགས་པ་དང་པོས་ཡིན་གྱི། གཉིས་པས་མ་ཡིན། གསུམ་པས་མ་ཡིན། བཞི་པས་མ་ཡིན་ནམ། གལ་ཏེ་གཉིས་པས་ཡིན་གྱི། དང་པོས་མ་ཡིན། གསུམ་པས་མ་ཡིན། བཞི་པས་མ་ཡིན་ནམ། གལ་ཏེ་གསུམ་པས་ཡིན་གྱི། དང་པོས་མ་ཡིན། གཉིས་པས་མ་ཡིན། བཞི་པས་མ་

  469. 235b

    ཡིན་ནམ། གལ་ཏེ་བཞི་པས་ཡིན་གྱི། དང་པོས་མ་ཡིན། གཉིས་པས་མ་ཡིན། གསུམ་པས་མ་ཡིན་ནམ། གལ་ཏེ་ཉེས་བྱས་དང་པོས་ཡིན་གྱི། གཉིས་པས་མ་ཡིན། གསུམ་པས་མ་ཡིན། ཐ་མའི་བར་གྱིས་མ་ཡིན་ནམ། གལ་ཏེ་ཐ་མས་ཡིན་གྱི། དང་པོས་ མ་ཡིན། གཉིས་པས་མ་ཡིན་པའམ། ཐ་ལྷག་གི་བར་གྱིས་མ་ཡིན་པའམ། གལ་ཏེ་ནུབ་མོ་བྱས་པས་ཡིན་གྱི། ཉིན་པར་བྱས་པས་མ་ཡིན་ནམ། གལ་ཏེ་ཉིན་པར་བྱས་པས་ཡིན་གྱི། མཚན་མོ་བྱས་པས་མ་ཡིན་ནམ། གལ་ཏེ་ལམ་གོལ་བ་ན་བྱས་པས་ཡིན་གྱི། ལམ་དུ་བྱས་པས་མ་ཡིན་ནམ། གལ་ཏེ་ལམ་དུ་བྱས་པས་ཡིན་གྱི། ལམ་གོལ་བར་བྱས་པས་མ་ཡིན་ནམ། གལ་ཏེ་འགྲོ་བའི་ཡིན་གྱི། འདུག་པའི་མ་ཡིན། འགྲེང་བའི་མ་ཡིན། ཉལ་བའི་མ་ཡིན་ནམ། གལ་ཏེ་འདུག་པའི་ཡིན་གྱི། འགྲོ་བའི་མ་ཡིན། འགྲེང་བའི་མ་ཡིན། ཉལ་བའི་མ་ཡིན་ནམ། གལ་ཏེ་ཉལ་བའི་ཡིན་གྱི། འགྲོ་བའི་མ་ཡིན། འགྲེང་བའི་མ་ཡིན། འདུག་པའི་མ་ཡིན་ནམ། གལ་ཏེ་འགྲེང་བའི་ཡིན་གྱི། ཉལ་བའི་མ་ཡིན། འདུག་པའི་མ་ཡིན་ཞེས་གལ་ཏེ་གླེང་བ་པོ་ལ་དེ་ལྟར་ལེགས་པར་ཤིན་ཏུ་ཡང་དག་པར་ སྨྲས། ཡང་དག་པར་བསྟན། ཡང་དག་པར་བརྟགས་པ་ན་གནས་ནས་གནས་སུ་སྦེད་པ་ནི་གླེང་བ་པོ་མ་ཡིན། གླེངས་པས་མ་ཡིན་ནོ། །གལ་ཏེ་གླེང་བ་པོ་དེ་ལྟར་ལེགས་པར་ཤིན་ཏུ་ཡང་དག་པར་སྨྲས། ཡང་དག་པར་བསྟན། ཡང་དག་པར་བརྟགས་པས་ན་ གནས་ནས་གནས་སུ་སྦེད་པར་མི་བྱེད་ན། དེ་ནི་གླེང་བ་པོ་ཡིན། གླེངས་པ་ཡིན་ནོ། །གལ་ཏེ་གླེང་བ་པོ་གནས་ནས་གནས་སུ་མི་སྦེད་ན། གླེངས་པ་ཡིན་པས་འདི་སྐད་ཅེས་བརྗོད་པར་བྱ་སྟེ། ཚེ་དང་ལྡན་པ་དེའི་ཚེ་ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་ འདུ་བྱེད་གང་དག་ཡིན་པ་སྨྲོས་ཤིག །གལ་ཏེ་ཕས་ཕམ་པ་ཡིན་པར་ཤེས་ན་བསྐྲད་ལ་དགག་དབྱེ་བྱའོ། །གལ་ཏེ་དགེ་འདུན་གྱི་ལྷག་མ་ཡིན་པར་ཤེས་ན་བྱིན་གྱིས་བརླབས་ལ་དགག་དབྱེ་བྱའོ། །གལ་ཏེ་ལྟུང་བྱེད་དང་། སོ་སོར་བཤགས་པ་དང་། ཉེས་བྱས་ཡིན་

  470. 236a

    པར་ཤེས་ན་བཤགས་ལ་དགག་དབྱེ་བྱའོ།། །།སྡོམ་ལ། མང་པོ་བསྒྲེ་དང་བཞག་པ་དང་། །བྱ་དང་རྣམ་པ་ལྔ་པ་དང་། །འདོང་བས་རྣམ་གནས་བྱ་བ་དང་། །ཡོངས་སུ་དག་ལ་དགག་དབྱེ་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ ལ་གཉུག་མར་གནས་པའི་དགེ་སློང་ལྔའམ་ལྷག་པ་དག་འདུག་ཅིང་མཐུན་པར་གྱུར་ལ། དེ་དག་འདི་སྙམ་དུ་སེམས་ཏེ། དགེ་སློང་མ་འོངས་པ་དག་ཡོད་དེ། དེ་དག་མ་འོངས་ཏེ་མེད་ཀྱང་བདག་ཅག་གིས་གསོལ་བ་བྱས་ཏེ་དགག་དབྱེ་བྱར་རུང་ངོ་སྙམ་ནས། རྟོག་པས་དོན་དུ་ གཉེར་བ་རྟོག་པའི་ཡོ་བྱད་ཅན་དེ་དག་གིས་གསོལ་བ་བྱས་ཏེ་དགག་དབྱེ་བྱེད་ན། དེའི་འོག་ཏུ་གཉུག་མར་གནས་པའི་དགེ་སློང་ཉུང་ཟད་ཅིག་འོངས་ན། དེ་དག་གིས་ཀྱང་གསོལ་བ་བྱས་ཏེ་དགག་དབྱེ་བྱའོ། །དགེ་སློང་སྔ་མ་རྟོག་པའི་ཉེར་བསྡོགས་ཅན་དག་ལ་ནི་འགལ་ ཚབས་ཅན་དུ་འགྱུར་ཏེ། སྔར་གསོ་སྦྱོང་གི་གཞི་ལས་སྡོམ་གྱི་ཚིགས་སུ་བཅད་པ་ལས་ཇི་སྐད་གསུངས་པ་དེ་བཞིན་དུ་བརྗོད་པར་བྱའོ། །ཁྱད་པར་གཅིག་ཡོད་པ་ནི་དེར་གཉུག་མར་གནས་པའི་དགེ་སློང་བཞིའམ་ལྷག་པ་ཞིག་འདུག་ཅིང་མཐུན་པར་གྱུར་ལ་ཞེས་སྨོས་པ་ འདིར་ནི་ལྔའམ་ལྷག་པར་བརྗོད་པར་བྱ་བ་ཡིན་ནོ།། །།སྡོམ་ལ། དབྱར་གནས་པར་ནི་དམ་བཅས་པའི། །འཐབ་ཀྲོལ་དགེ་སློང་ཤེས་ནས་ཀྱང་། །བཤེས་པའི་ཚིག་གིས་བསུ་བྱ་དང་། །ངེས་པའི་ཟླ་བ་བཞི་པོ་དང་། །ནད་པ་དང་ནི་དངོས་པོ་སྟེ། །ཡང་དག་བསྡོམས་ པས་ཚོགས་ཡིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་རྣམས་ཀྱིས་དགེ་སློང་འཐབ་ཀྲོལ་བགྱིད་པ། མཚང་འདྲུ་བར་བགྱིད་པ། རྩོད་པར་བགྱིད་པ། འགྱེད་ པར་བགྱིད་པ། རྩོད་པའི་གཞི་བགྱིད་པ་དག་མཆིའོ་ཞེས་ཐོས་ཏེ། དེ་དག་ངོ་ཚ་མ་མཆིས་པས་ཐོ་བཙམ་པ་ཉིད་དུ་བདག་ཅག་ལ་གླེང་བར་བགྱིད། དྲན་པར་བགྱིད་དོ་སྙམ་ན། དེ་རྣམས་ཀྱིས་དེ་དག་ལ་ཇི་ལྟར་བསྒྲུབ་པར་བགྱི། ཉེ་བ་འཁོར་དགེ་སློང་དེ་རྣམས་ཀྱིས་གསོ་སྦྱོང་

  471. 236b

    གི་ལས་གཉིས་སམ། གསུམ་འདས་པར་བྱས་ནས་དགག་དབྱེ་བྱའོ། །གལ་ཏེ་དེ་ལྟར་གྲུབ་ན་ལེགས། གལ་ཏེ་མ་གྲུབ་ན་དགེ་སློང་དེ་རྣམས་ཀྱིས་གནོད་པའི་ཆེད་ཀྱི་དཀྱིལ་འཁོར་གཉིས་སམ། གསུམ་ཁས་བླང་བར་བྱའོ། །གལ་ཏེ་དེ་ལྟར་གྲུབ་ན་ལེགས། གལ་ཏེ་མ་གྲུབ་ན་དགེ་སློང་དེ་རྣམས་ཀྱིས་བཤེས་པའི་ཚིག་གིས་བསུ་བར་བྱ། ལྷུང་བཟེད་དང་ཆོས་གོས་བླང་བར་བྱ་སྟེ། ལྷུང་བཟེད་དང་ཆོས་གོས་དག་གིས་མགུ་ཞིང་རབ་ཏུ་མགུ་བར་བྱས་ལ་དགག་དབྱེ་བྱའོ། །གལ་ཏེ་དེ་ལྟར་གྲུབ་ན་ལེགས། གལ་ཏེ་དེ་ལྟར་མ་ གྲུབ་ན་ཁྲུས་བྱ་སྟེ། ཁྲུས་བྱ་བས་མགུ་ཞིང་རབ་ཏུ་མགུ་བར་བྱས་ལ་དགག་དབྱེ་བྱའོ། །གལ་ཏེ་དེ་ལྟར་གྲུབ་ན་ལེགས། གལ་ཏེ་མ་གྲུབ་ན་ཆོས་བསྒྲག་པར་བྱ་སྟེ། ཆོས་བསྒྲགས་པས་མགུ་ཞིང་རབ་ཏུ་མགུ་བར་བྱས་ལ་དགག་དབྱེ་བྱའོ། །གལ་ཏེ་དེ་ལྟར་གྲུབ་ ན་ལེགས། གལ་ཏེ་མ་གྲུབ་ན་ཉེ་བ་འཁོར་དགེ་སློང་དེ་དག་དཀྱིལ་འཁོར་གྱི་ནང་དུ་དོང་ལ་གསོ་སྦྱོང་བྱའོ། །གལ་ཏེ་དེ་དག་འདི་སྐད་ཅེས། ཚེ་དང་ལྡན་པ་དག་དེང་དགེ་འདུན་གྱི་དགག་དབྱེ་བཅོ་ལྔ་པ་ཡིན་ན། ཁྱེད་ཅག་ཅིའི་ཕྱིར་གསོ་སྦྱོང་བྱེད་ཅེས་ཟེར་ན། དེ་དག་ ལ་འདི་སྐད་ཅེས་བརྗོད་པར་བྱ་སྟེ། ཚེ་དང་ལྡན་པ་ཁྱེད་ཅག་ནི་གློ་བུར་དུ་འོངས་པ་ཡིན་ལ། དོན་འདི་ནི་གཉུག་མར་གནས་པའི་དགེ་སློང་རྣམས་ཀྱིའོ་ཞེས་སྨྲོས་ཤིག །དེ་ནས་དེ་དག་འདི་སྙམ་དུ་ཚེ་དང་ལྡན་པ་འདི་དག་ནི་ངེས་པར་ཟླ་བ་བཞི་པའི་དགག་དབྱེ་བྱེད་དོ་ སྙམ་དུ་སེམས་པ་དང་། དེའི་འོག་ཏུ་འཇིགས་པ་དང་བྲལ་ཞིང་ཕས་ཀྱི་རྒོལ་བ་དང་བྲལ་ནས་སླར་ཡང་དགག་དབྱེ་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་ནད་པས་མི་ན་བའི་དགག་དབྱེ་འཇོག་ན་ནད་པ་ལ་འདི་སྐད་ཅེས། ཚེ་དང་ལྡན་པ་ཁྱོད་ནི་ནད་པ་སྟེ་ སྦྱོར་མི་བཟོད་ཀྱིས་འདུག་ཤིག་ཅེས་བརྗོད་པར་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་མི་ན་བས་ནད་པའི་དགག་དབྱེ་འཇོག་ན་མི་ན་བ་ལ་འདི་སྐད་ཅེས། ཚེ་དང་ལྡན་པ་དེ་ནི་ནད་པ་སྟེ། སྦྱོར་མི་བཟོད་ཀྱིས་ཁྱོད་ཚུར་ཞེས་བརྗོད་པར་བྱའོ། །འདི་ལྟར་

  472. 237a

    ཡང་དགག་དབྱེ་བཅོ་ལྔ་པ་དེ་ཉིད་ལ་ནད་པས་མི་ན་བའི་དགག་དབྱེ་ཕོ་ཉ་བཏང་སྟེ་འཇོག་ན་ཕོ་ཉ་ལ་འདི་སྐད་ཅེས། ཚེ་དང་ལྡན་པ་དེ་ནི་ན་བས་སྦྱོར་མི་བཟོད་ཀྱིས་ཁྱོད་འདུག་ཤིག་ཅེས་བརྗོད་པར་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་མི་ན་ བས་ནད་པའི་དགག་དབྱེ་ཕོ་ཉ་བཏང་སྟེ་འཇོག་ན་ཕོ་ཉ་ལ་འདི་སྐད་ཅེས། ཚེ་དང་ལྡན་པ་དེ་ནི་ན་བས་སྦྱོར་མི་བཟོད་ཀྱིས་ཁྱོད་ཚུར་ཞེས་བརྗོད་པར་བྱའོ། །འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་དངོས་པོ་ཤེས་ལ་གང་ཟག་མ་ཡིན་པ་དང་། གང་ཟག་ཤེས་ལ་ དངོས་པོ་མ་ཡིན་པ་དང་། གང་ཟག་དང་དངོས་པོ་ཤེས་པ་དང་། གང་ཟག་དང་དངོས་པོ་མི་ཤེས་པ་སྟེ། དངོས་པོ་ཤེས་ལ་གང་ཟག་མ་ཡིན་པ་ཇི་ལྟ་བུ་ཞེ་ན། འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་རྒན་ཞུགས་མི་ཤེས་པ། རྨོངས་པ། མི་གསལ་བ། མི་ མཁས་པ་གཞན་ཞིག་གིས་སྤྱོད་ཡུལ་ལམ། སྤྱོད་ཡུལ་གྱི་ལམ་ཀར་རིགས་ཀྱི་བུད་མེད་དམ། རིགས་ཀྱི་ན་ཆུང་ལ་ཁྲོས་སམ། ཚིག་ངན་སྨྲས་སམ། རེག་པར་གྱུར་པས་མི་རྣམས་ཁྲོས་ཏེ། ཀུན་དགའ་ར་བའི་སྒོར་འོངས་ནས་འདི་སྐད་ཅེས། འཕགས་པ་འདི་དག་ ནི་མི་མཛེས་པ། མ་བརྟགས་པ་ཡིན་ཏེ། འཕགས་པ་དག་གིས་ཉེས་པ་འདི་དང་འདི་དག་བྱས་སོ་ཞེས་སྨྲས་ཀྱི། ཆེ་གེ་མོ་ཞིག་གིས་ཞེས་དེ་སྐད་དུ་མ་སྨྲས་པ་སྟེ། དེ་ལྟ་བུ་ནི་དངོས་པོ་ཤེས་ལ་གང་ཟག་མ་ཡིན་པ་ཞེས་བྱའོ། །གང་ཟག་ཤེས་ལ་དངོས་པོ་མ་ཡིན་པ་ཇི་ལྟ་ བུ་ཞེ་ན། འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་ཞེས་བྱ་བ་ནས། ཀུན་དགའ་ར་བའི་སྒོར་འོངས་ནས་འདི་སྐད་ཅེས། འཕགས་པ་འདི་དག་ནི་མི་མཛེས་པ། མ་བརྟགས་པ་ཞེས་བྱ་བའི་བར་སྔ་མ་བཞིན་ཏེ། འདི་ལྟར་འཕགས་པ་ཆེ་གེ་མོ་ཞེས་བྱ་བས་ཉེས་པ་ བྱས་ཞེས་སྨོས་ཀྱི། འདི་སྐད་དུ་འདི་དང་འདི་དག་བྱས་སོ་ཞེས་ནི་མ་སྨོས་པ་སྟེ། དེ་ལྟ་བུ་ནི་གང་ཟག་ཤེས་ལ་དངོས་པོ་མ་ཡིན་པའོ། །གང་ཟག་དང་དངོས་པོ་ཤེས་པ་ཇི་ལྟ་བུ་ཞེ་ན། འདི་ལྟར་ཡང་དགག་དབྱེ་བཅོ་ལྔ་པ་དེ་ཉིད་ལ་ཞེས་བྱ་བ་ནས། ཀུན་དགའ་ར་

  473. 237b

    བའི་སྒོར་འོངས་ནས་འདི་སྐད་ཅེས་འཕགས་པ་ཞེས་བྱ་བའི་བར་སྔ་མ་བཞིན་ཏེ། འཕགས་པ་ཆེ་གེ་མོ་ཞེས་བྱ་བས་ཉེས་པ་འདི་དང་འདི་དག་བྱས་སོ་ཞེས་སྨོས་པ་སྟེ། འདི་ལྟ་བུ་ནི་གང་ཟག་དང་དངོས་པོ་ཤེས་པ་ཡིན་ནོ། །གང་ཟག་དང་དངོས་པོ་མི་ཤེས་པ་ཇི་ལྟ་བུ་ཞེ་ན། རྣམ་པ་འདི་དག་མ་གཏོགས་པའོ། །དགག་དབྱེའི་གཞི་རྫོགས་སྷོ།། །།དབྱར་གནས་ཀྱི་གཞིའི་བསྡུས་པའི་སྡོམ་ལ། དབྱར་གནས་པ་དང་ཟས་དང་ནི། །དབྱར་རལ་བ་དང་ལྔ་པོ་དང་། །སྨིག་དང་ལོ་མ་རྩྭ་མཆིལ་ལྷམ། །དབྱར་དང་ཀོ་ལྤགས་བཞི་དག་གོ། ། སྡོམ་ལ། དབྱར་གནས་རྗེས་སུ་གནང་བ་དང་། །འཆར་ཀར་འགྲོ་བ་དག་དང་ནི། །བྱ་བ་ལ་ནི་ཞག་བདུན་དང་། །འགྲོ་བྱ་ཅི་ཞིག་བྱ་བའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་དབྱར་ བཞུགས་པར་ཞལ་གྱིས་བཞེས་སོ། །དེའི་ཚེ་དགེ་སློང་དག་དབྱར་གྱི་ནང་ལོགས་སུ་ལྗོངས་རྒྱུ་ཞིང་དོང་ངོ་། །དེ་དག་དབྱར་གྱི་ནང་ལོགས་སུ་ལྗོངས་རྒྱུ་ཞིང་དོང་བ་དག་མི་སྦེད་ཅིང་མ་བསྲུངས་ལ་མ་སྦས་པར་གྱུར་པ་དག་ལ་མུ་སྟེགས་ཅན་རྣམས་ཤེས་ལྡན་དག་ཤཱཀྱའི་ བུའི་དགེ་སྦྱོང་འདི་དག་ནི་སྲོག་གཅོད་པ་ཡིན་ཏེ། སྲོག་གཅོད་པ་ལས་མ་ལོག །རྣམ་པར་མ་ལོག །ཕྱིར་མ་ལོག་པ་འདི་དག་དབྱར་གྱི་ནང་ལོགས་སུ་ལྗོངས་རྒྱུ་ཞིང་འདོང་སྟེ། དབྱར་གྱི་ནང་ལོགས་སུ་ལྗོངས་རྒྱུ་ཞིང་འདོང་བ་ན་སྲོག་ཆགས་ཕྲ་མོ་དང་ཤིན་ཏུ་ཕྲ་མོ་མང་ པོའི་ཚོགས་རྣམས་བརྫིས་ནས་སྲོག་དང་བྲལ་བར་བྱས་སོ། །རེ་ཞིག་བྱེའུ་ཁུག་རྟ་ཡང་དབྱར་ཟླ་བ་བཞི་རང་གི་ཚང་ན་ཞུམ་ཞུམ་པོར་བྱས། ཀུན་ཏུ་ཞུམ་ཞུམ་པོར་བྱས་ནས་བསྐུམས་ཤིང་བསྐུམས་ནས་འདུག་ན། དགེ་སྦྱོང་མགོ་རེག་འདི་དག་ནི་ཁས་ལེན་པ་ཙམ་ཡང་ མི་ཤེས་ན། དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་དེ་ལ་བྱ་བར་སེམས་པ་ལྟ་སུ་ཞིག་ཡོད་ཅེས་སྨོད་པར་བྱེད། འཕྱ་བར་བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་

  474. 238a

    པ། དེ་ལྟ་བས་ན་རྗེས་སུ་གནང་སྟེ། དགེ་སློང་གིས་དབྱར་གནས་པར་དམ་བཅའ་བར་བྱའོ། །བཅོམ་ལྡན་འདས་ཀྱིས་དགེ་སློང་གིས་དབྱར་གནས་པར་དམ་བཅའ་བར་བྱའོ་ཞེས་གསུངས་པ་དགེ་སློང་རྣམས་ཀྱིས་ཇི་ལྟར་གནས་པར་དམ་བཅའ་ བ་མ་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ཉིད་ཀྱི་དབྱར་ཟླ་འབྲིང་པོ་ཚེས་བཅོ་ལྔ་ལ་གཙུག་ལག་ཁང་ཆག་ཆག་བྱའོ། །ཕྱག་དར་བྱའོ། །བའི་ལྕི་བ་སར་པའི་བྱུག་པས་བྱུག་པར་བྱའོ། །གནས་མལ་ཐམས་ཅད་གཅིག་ཏུ་བསག་པར་བྱ་སྟེ། ཆུང་ངུ་ན་རྐང་པ་བཀྲུ་བའི་ཆོལ་ཟངས་ཀྱང་མི་སྦའོ། །དེའི་འོག་ཏུ་གནས་མལ་སྟོབས་པའི་དགེ་སློང་བསྐོ་བར་བྱ་སྟེ། ཆོས་ལྔ་དང་ལྡན་པའི་དགེ་སློང་གནས་མལ་སྟོབས་པར་མ་བསྐོས་པ་ནི་བསྐོ་བར་མི་བྱའོ། །བསྐོས་པ་ནི་དབྱུང་བར་བྱའོ། །ལྔ་གང་ཞེ་ན། འདུན་ པས་འགྲོ་བ་དང་། ཞེ་སྡང་གིས་འགྲོ་བ་དང་། གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། གནས་མལ་བསྟབས་པ་དང་མ་བསྟབས་པ་མི་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་གནས་མལ་སྟོབས་པར་མ་བསྐོས་པ་ནི་བསྐོ་བར་མི་བྱའོ། ། བསྐོས་པ་ནི་དབྱུང་བར་བྱའོ། །ཆོས་ལྔ་དང་ལྡན་པའི་དགེ་སློང་གནས་མལ་སྟོབས་པར་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །ལྔ་གང་ཞེ་ན། འདུན་པས་མི་འགྲོ་བ་དང་། ཞེ་སྡང་གིས་མི་འགྲོ་བ་དང་། གཏི་མུག་གིས་མི་འགྲོ་བ་ དང་། འཇིགས་པས་མི་འགྲོ་བ་དང་། གནས་མལ་བསྟབས་པ་དང་མ་བསྟབས་པ་ཤེས་པ་སྟེ། ཆོས་འདི་ལྔ་དང་ལྡན་པའི་དགེ་སློང་གནས་མལ་སྟོབས་པར་མ་བསྐོས་པ་ནི་བསྐོ་བར་བྱའོ། །བསྐོས་པ་ནི་དབྱུང་བར་མི་བྱའོ། །བསྐོ་བ་ནི་འདི་ལྟར་བྱ་སྟེ། གནས་མལ་ བཤམ་པ་བྱས་ལ་གཎྜཱི་བརྡུངས་ཏེ། དགེ་སློང་རྣམས་ལ་དྲིས་པའི་ལན་གྱིས་ཡང་དག་པར་བསྒོ་ལ། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་དང་རེ་ཞིག་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་ལ་དབྱར་གྱི་གནས་མལ་སྟོབས་པར་སྤྲོ་འམ།

  475. 238b

    དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། གནས་མལ་སྟོབས་པའི་དགེ་སློང་མིང་འདི་ཞེས་བགྱི་བ་དགེ་འདུན་ལ་དབྱར་གྱི་གནས་མལ་སྟོབས་པར་སྤྲོ་ན་གལ་ཏེ་དགེ་ འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་མིང་འདི་ཞེས་བགྱི་བ་དགེ་འདུན་ལ་གནས་མལ་སྟོབས་པར་བསྐོ་སྟེ། གནས་མལ་སྟོབས་པ་མིང་འདི་ཞེས་བགྱི་བ་དགེ་འདུན་ལ་དབྱར་གྱི་གནས་མལ་སྟོབས་སོ། ། འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། གནས་མལ་སྟོབས་པ་དགེ་སློང་མིང་འདི་ཞེས་བགྱི་བ་དགེ་འདུན་ལ་དབྱར་གྱི་གནས་མལ་སྟོབས་པར་སྤྲོ་ནས། མིང་འདི་ཞེས་བགྱི་བ་འདི་དགེ་འདུན་ལ་གནས་མལ་ སྟོབས་པར་བསྐོ་སྟེ། གནས་མལ་སྟོབས་པ་མིང་འདི་ཞེས་བགྱི་བ་འདི་དགེ་འདུན་ལ་དབྱར་གྱི་གནས་མལ་སྟོབས་པར་བགྱིད་ཀྱིས། ཚེ་དང་ལྡན་པ་དག་ལས་གང་དག་མིང་འདི་ཞེས་བགྱི་བ་གནས་མལ་སྟོབས་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་ དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་ལ་གནས་མལ་སྟོབས་པར་བསྐོ་སྟེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་གནས་མལ་སྟོབས་པའི་དགེ་ སློང་གི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། གནས་མལ་སྟོབས་པའི་དགེ་སློང་གིས་དགེ་འདུན་གྱི་ཆེད་དུ་ཚུལ་ཤིང་རྣམས་ཡོན་པོ་མ་ཡིན་པ་དང་། འཁྱོར་པོ་མ་ཡིན་པ་དང་། ཀྱར་ཁྱོར་མ་ཡིན་པ་དང་། དྲི་ཞིམ་པོ་དང་། རེག་ན་བདེ་བར་འགྱུར་བར་བསྟར་བར་བྱའོ། །དེའི་ འོག་ཏུ་ནང་པར་སྔར་ལངས་ཏེ་གནས་མལ་བཤམ་པ་བྱས་ལ་གཎྜཱི་བརྡུངས་ནས་དགེ་སློང་རྣམས་ལ་དྲིས་པའི་ལན་གྱིས་ཡང་དག་པར་བསྒོ་ལ། དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་དང་དགེ་སློང་གནས་མལ་སྟོབས་པས་ཚུལ་ཤིང་དྲི་ཞིམ་པོས་བསྐུས་ཏེ། སྤྲོག་མའི་

  476. 239a

    ནང་དུ་རས་དཀར་པོ་བཏིང་བའི་སྟེང་དུ་བཞག་ནས་རྒན་རིམས་ཀྱི་མཐར་གཞག་པར་བྱའོ། །དེའི་འོག་ཏུ་ཁྲིམས་སུ་བཅའ་བ་དག་བརྗོད་པར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། གནས་འདིར་ཁྲིམས་སུ་བཅའ་བ་འདི་དང་འདི་དག་མཆིས་ ཀྱིས། ཚེ་དང་ལྡན་པ་ཁྱེད་ཅག་ལས་གང་ཁྲིམས་སུ་བཅའ་བ་འདི་དང་འདིས་དབྱར་གནས་པར་དམ་བཅའ་བར་སྤྲོ་བ་དེ་ནི་ཚུལ་ཤིང་ལོང་ཤིག །ཁྱེད་ཅག་ལས་དགེ་སློང་སུས་ཀྱང་དབྱར་གྱི་ནང་ལོགས་སུ་དགེ་སློང་ལ་གླེང་བར་མི་བྱ། དྲན་པར་མི་བྱའོ། །ཁྱེད་ ཅག་ལས་སུ་ཡང་རུང་འགའ་ཞིག་ཅུང་ཟད་ཤེས་ན་དེ་ད་སྨྲོས་ཤིག །ཕྱིས་དབྱར་གྱི་ནང་ལོགས་སུ་མ་གླེང་ཤིག །ཁྱེད་ཅག་ལས་སུས་དབྱར་གྱི་ནང་ལོགས་སུ་གླེང་བར་གྱུར་ན། དེ་དགེ་འདུན་གྱིས་ཕྱིས་བརྟག་པར་དགོངས་སོ། །དེའི་འོག་ཏུ་གནས་མལ་སྟོབས་ པས་དགེ་སློང་གིས་ཚུལ་ཤིང་བྲིམ་པར་བྱ་སྟེ། ཇེ་ཐོག་མར་སྟོན་པའི་ཚུལ་ཤིང་བླང་བར་བྱའོ། །དེའི་འོག་ཏུ་དགེ་འདུན་གྱི་གནས་བརྟན་གྱིས་སྟན་གྱི་སྟེང་ནས་སྤགས་ཏེ། ཚུལ་ཤིང་བླངས་ལ་དལ་གྱིས་གཞག་པར་བྱ་སྟེ། དགེ་འདུན་གསར་བུ་རྣམས་ཀྱི་བར་དུ་ ཡང་དེ་བཞིན་དུ་བྱའོ། །དགེ་ཚུལ་རྣམས་ཀྱི་ཚུལ་ཤིང་ནི་སློབ་དཔོན་ནམ། མཁན་པོས་བླང་བར་བྱའོ། །དེའི་འོག་ཏུ་གནས་སྲུང་རྣམས་ཀྱིས་ཡང་བླང་བར་བྱའོ། །དེའི་འོག་ཏུ་བགྲངས་ཏེ་གནས་འདིར་དགེ་སློང་འདི་སྙེད་ཅིག་གིས་ཚུལ་ཤིང་བླངས་སོ་ཞེས་སྨྲོས་ ཤིག །དེའི་འོག་ཏུ་གནས་མལ་སྟོབས་པའི་དགེ་སློང་གིས་ལྡེ་མིག་དང་། ལྡེ་མིག་ཀྱོག་པོ་དག་བླངས་ལ་དགེ་འདུན་གྱི་གནས་བརྟན་གྱི་མདུན་དུ་འདུག་སྟེ། གནས་བརྟན་གནས་ཁང་ཆེ་གེ་མོ་ནི་རྙེད་པ་དང་བཅས་པ། གོས་དང་བཅས་པ་ལགས་ཀྱིས་བཞེས་ཤིག་ ཅེས་བརྗོད་པར་བྱའོ། །གལ་ཏེ་བླངས་ན་དགེ་འདུན་གྱི་གནས་བརྟན་གྱི་གནས་ཁང་གང་ཡིན་པ་དེ་གནས་བརྟན་གཉིས་པ་ལ་སྦྱིན་པར་བྱའོ། །གནས་བརྟན་གཉིས་པའི་གནས་ཁང་གང་ཡིན་པ་དེ་གནས་བརྟན་གསུམ་པ་ལ་སྦྱིན་པར་བྱ་སྟེ། དགེ་འདུན་གསར་བུའི་

  477. 239b

    པར་དུ་ཡང་དེ་བཞིན་དུ་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་མ་བླངས་ན་གནས་བརྟན་གཉིས་པ་ལ་སྦྱིན་པར་བྱའོ། །གལ་ཏེ་གནས་བརྟན་གཉིས་པས་མ་བླངས་ན་གནས་བརྟན་གསུམ་པ་ལ་སྦྱིན་པར་བྱའོ། །གལ་ཏེ་གནས་བརྟན་གསུམ་པས་བླངས་པ་ ལ་དགེ་འདུན་གྱི་གནས་བརྟན་སློང་ན་ཚིག་དང་པོ་ལ་སྦྱིན་པར་མི་བྱའོ། །ཚིག་གཉིས་པ་ལ་ཡང་སྦྱིན་པར་མི་བྱའོ། །ཚིག་གསུམ་པ་ལ་སྦྱིན་པར་བྱ་སྟེ། དགེ་འདུན་གྱི་གནས་བརྟན་གྱིས་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་པར་བྱའོ། །དགེ་འདུན་ གསར་བུའི་བར་དུ་དེ་བཞིན་དུ་བླངས་པ་ལ། གལ་ཏེ་དགེ་འདུན་གསར་བུ་གསུམ་པ་སློང་ན་ཚིག་དང་པོ་ལ་སྦྱིན་པར་མི་བྱའོ། །ཚིག་གཉིས་པ་ལ་ཡང་སྦྱིན་པར་མི་བྱའོ། །ཚིག་གསུམ་པ་ལ་སྦྱིན་པར་བྱ་སྟེ། དགེ་འདུན་གསར་བུ་གསུམ་པས་ཀྱང་འདུལ་བ་དང་འགལ་བའི་ ཉེས་བྱས་ཀྱི་ལྟུང་བ་བཤགས་པར་བྱའོ། །དགེ་སློང་རྣམས་ཀྱིས་གནས་ཁང་ཐམས་ཅད་བགོས་པ་དང་གློ་བུར་དུ་ལྷགས་པའི་དགེ་སློང་རྣམས་ཕོངས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གློ་བུར་དུ་ལྷགས་པའི་དགེ་སློང་རྣམས་ཀྱི་ཕྱིར་མ་བགོས་པའི་ གནས་གཅིག་གཞག་པར་བྱའོ། །དགེ་སློང་རྣམས་ཀྱིས་སྒོ་ཁང་ཡང་བགོས་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྒོ་ཁང་བགོ་བར་མི་བྱའོ། །ཁྱམས་རྣམས་བགོས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱམས་བགོ་བར་མི་བྱའོ། ། ཁྱམས་སྟོང་པ་རྣམས་སུ་ཁྭ་དང་། བྱེའུ་དང་། ཕུག་རོན་དག་གིས་ཚང་བཅས་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྐྲོད་པའི་དགེ་སློང་དག་བསྐོ་བར་བྱ་སྟེ། དེས་སོ་སོར་བལྟ་བར་བྱའོ། །གལ་ཏེ་སྒོ་ང་དག་མ་ལྷགས་པར་གྱུར་ན་བསྐྲད་པར་བྱའོ། །དེ་སྟེ་ ལྷགས་ན་ནི་གཞག་པར་བྱའོ། །སྲིན་བུ་ཏྲཻ་བུ་ཀ་དང་། ཏྲཻ་ལ་ཏའི་ཚང་བཅས་ནས། བཅོམ་ལྡན་འདས་ཀྱིས་བཀའ་སྩལ་པ། སོ་སོར་བརྟག་པར་བྱ་སྟེ། གལ་ཏེ་སྒོ་ང་མ་ལྷགས་པར་གྱུར་ན་བསྐྲད་པར་བྱའོ། །གལ་ཏེ་ལྷགས་པར་གྱུར་ན་སྐྱེད་པས་བཅིངས་ན་འཕེལ་

  478. 240a

    བར་མི་འགྱུར་རོ། །དེ་ནས་གནས་མལ་བགོ་བར་བྱ་སྟེ། འདི་ལྟར་རེ་ཞིག་དངོས་པོ་ཉུང་ངུ་ཞིག་ཡིན་ན་རེ་རེ་སྦྱིན་པར་བྱའོ། །འོན་ཏེ་མང་པོ་ཞིག་ཡིན་ན་གཉིས་གཉིས་གསུམ་གསུམ་སྦྱིན་པར་བྱའོ། །དངོས་པོ་ཁ་ཅིག་ཆེན་པོར་གྱུར་པས་དགེ་སློང་རྒན་རབས་ རྒན་རབས་དག་བྱི་དོར་བྱེད་པས་དུབ་ཅིང་ངལ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གནས་འཆའ་བ་རྣམས་ལ་སྦྱིན་པར་བྱའོ། །དེའི་འོག་ཏུ་གནས་མལ་སྟོབས་པའི་དགེ་སློང་གིས་ཁྲིམས་སུ་བཅའ་བ་དག་བརྗོད་པར་བྱ་སྟེ། དགེ་སློང་སུས་ ཀྱང་དགེ་འདུན་གྱི་གནས་མལ་ལ་གདིང་བ་མེད་པར་ལོངས་སྤྱོད་པར་མི་བྱ་སྟེ། མིང་ཐོགས་ཀྱི་གདིང་བས་མ་ཡིན། གདིང་བ་དྲི་མ་ཅན་གྱིས་མ་ཡིན། སེང་བས་མ་ཡིན་ནོ། །སྟུག་པོ་ཡིན་ན་རིམ་པ་གཅིག་གིས་སོ། །སེང་བ་ཡིན་ན་རིམ་པ་གཉིས་སོ། །ཁྱེད་ལས་ གང་གིས་དགེ་འདུན་གྱི་གནས་མལ་ལོངས་སྤྱོད་པར་བྱ་བ་མ་ཡིན་པར་ལོངས་སྤྱོད་པ་ན་དེ་ལ་དགེ་འདུན་གྱིས་ཕྱིས་བརྟག་པར་བྱ་བར་དགོངས་སོ། །གནས་མལ་སྟོབས་པའི་དགེ་སློང་གིས་ཟླ་བ་ཕྱེད་ཕྱེད་ཅིང་གནས་མལ་ལ་སོ་སོར་བརྟག་པར་བྱའོ། །འདི་ལྟར་རེ་ཞིག་ རྒན་པོ་དག་གིས་གནས་མལ་ལོངས་སྤྱད་པར་བྱ་བ་མ་ཡིན་པར་ལོངས་སྤྱད་པ་མཐོང་ན་དགེ་འདུན་ལ་གསོལ་ནས་སྦ་བར་བྱའོ། །འོན་ཏེ་གསར་བུ་ཞིག་གིས་མཐོང་ན་མཁན་པོའམ་སློབ་དཔོན་ལ་བརྗོད་དེ་སྦ་བར་བྱའོ། །དེའི་འོག་ཏུ་ཚོགས་ནས་སྦྱིན་བདག་ཆེ་གེ་མོ་ཞེས་ བགྱི་བ་དང་། ཞལ་ཏ་བགྱིད་པ་ཆེ་གེ་མོ་ཞེས་བགྱི་བ་དང་། སྤྱོད་ཡུལ་གྱི་གྲོང་ག་གེ་མོ་ཞེས་བགྱི་བས་དགེ་འདུན་དབྱར་གནས་པར་དམ་བཅའ་བ་མཛད་དོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་རྣམས་ཀྱིས་གནས་དང་སྤྱོད་ཡུལ་བལྟས་ནས་སྐྱབས་ཡོད་པར་ཞུགས་ཏེ་ དབྱར་གནས་པར་དམ་བཅའ་བར་བྱའོ། །གནས་ཇི་ལྟར་བརྟག་པར་བྱ་ཞེ་ན། ཇི་ག་བདག་ལ་གནས་འདིར་ཚངས་པ་མཚུངས་པར་སྤྱོད་པ་མཁས་པ་དག་གིས་གང་སྡུག་བསྔལ་བ་དང་ཡིད་མི་བདེ་བ་མ་སྐྱེས་པ་མི་སྐྱེད་པར་འགྱུར་ཞིང་། སྐྱེས་པ་ཡང་མྱུར་བ་ཁོ་ནར་སོ་སོར་ཞི་

  479. 240b

    པར་བྱེད་པར་འགྱུར་ལ། གང་བདེ་བ་དང་ཡིད་བདེ་བ་མ་སྐྱེས་པ་སྐྱེད་པར་འགྱུར་ཞིང་། སྐྱེས་པ་ཡང་ལེགས་པར་རབ་ཏུ་རྗེས་སུ་སྲུང་བར་སེམས་པ་དང་བདག་ན་བར་གྱུར་ན་ནད་གཡོག་བྱེད་པར་འགྱུར་བ་ལྟ་ཡོད་དམ་ཞེས་དེ་ལྟར་གནས་ལ་བརྟག་པར་བྱའོ། །སྤྱོད་ཡུལ་ ལ་ཇི་ལྟར་བརྟག་པར་བྱ་ཞེ་ན། ཇི་ག་སྤྱོད་ཡུལ་གྱི་གྲོང་འདི་ན་བསོད་སྙོམས་སྟེར་བ་དང་། ན་བར་གྱུར་ན་ནད་གཡོག་དང་། སྨན་སྦྱིན་པར་འགྱུར་བ་ལྟ་ཡོད་དམ་ཞེས་དེ་ལྟར་སྤྱོད་ཡུལ་ལ་བརྟག་པར་བྱའོ། །དེའི་འོག་ཏུ་སྐྱབས་ཡོད་པར་ཞུགས་ལ། དགེ་སློང་རྒན་ རིམས་ཇི་ལྟ་བ་བཞིན་གྱི་མདུན་དུ་འདུད་པ་དང་བཅས་པས་ཙོག་ཙོག་པོར་འདུག་ལ་ཐལ་མོ་སྦྱར་ཏེ་འདི་སྐད་ཅེས། ཚེ་དང་ལྡན་པ་དགོངས་སུ་གསོལ། དེང་དགེ་འདུན་གྱི་དབྱར་ཉེ་བར་སྒྲུབ་པ་དབྱར་ཟླ་འབྲིང་པོ་ཚེས་བཅུ་དྲུག་ལགས་ལ། བདག་དགེ་སློང་མིང་འདི་ཞེས་བགྱི་བའི་ དབྱར་ཉེ་བར་སྒྲུབ་པ་ཡང་དབྱར་ཟླ་འབྲིང་པོ་ཚེས་བཅུ་དྲུག་ལགས་ཏེ། བདག་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར་གནས་རལ་བ་དང་འདྲུམས་པ་བཅོས་པའི་སླད་དུ་སྦྱིན་བདག་ཆེ་གེ་མོ་ཞེས་བགྱི་བ་དང་། ཞལ་ཏ་བགྱིད་པ་ཆེ་གེ་མོ་ཞེས་བགྱི་བ་དང་། སྤྱོད་ ཡུལ་གྱི་གྲོང་ཁྱེར་ཆེ་གེ་མོ་ཞེས་བགྱི་བར་དབྱར་སྔ་མ་ཟླ་བ་གསུམ་གནས་པར་དམ་འཆའོ། །བདག་དབྱར་འདི་ན་མཆིས་ཤིང་དབྱར་གྱི་གནས་ནི་འདི་ལགས་སོ། །ཞེས་དེ་སྐད་ལན་གཉིས་དེ་སྐད་ལན་གསུམ་དུ་བཟླས་ཏེ། དེ་ལྟར་དགེ་སློང་རྣམས་ཀྱིས་དབྱར་གནས་པར་དམ་ བཅའ་བར་བྱའོ། །དབྱར་གནས་པར་དམ་བཅས་པའི་དགེ་སློང་གིས་མཚམས་ཀྱི་ཕྱི་རོལ་དུ་འགྲོ་བར་མི་བྱའོ། །གལ་ཏེ་སོང་ན་དེར་གནས་པར་མི་བྱའོ། །བཅོམ་ལྡན་འདས་ཀྱིས་དབྱར་གནས་པར་དམ་བཅས་པའི་དགེ་སློང་གིས་མཚམས་ཀྱི་ཕྱི་རོལ་དུ་འགྲོ་བར་མི་བྱའོ། ། གལ་ཏེ་སོང་ན་དེར་གནས་པར་མི་བྱའོ་ཞེས་གསུངས་པ་དང་གླང་པོ་ཆེ་སྐྱོང་བ་ཞེས་བྱ་བའི་གྲོང་ན་ཁྱིམ་བདག་འཆར་ཀ་ཞེས་བྱ་བ་གནས་ཏེ། དེའི་ཁྱིམ་ན་རང་གི་འཆིང་བ་བག་མ་བླངས་ནས་དེས་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་སྟ་གོན་བྱས་ཏེ། དེས་དགེ་སློང་རྣམས་ལ་ཕོ་

  480. 241a

    ཉ་བཏང་ནས་འཕགས་པ་དག་ལོངས་སྤྱད་པ་དག་འབུལ་གྱིས་ཚུར་སྤྱོན་ཅེས་སྤྲིང་བ་དང་། དགེ་སློང་རྣམས་ཀྱིས་དྲི་བར་བརྩམས་ཏེ། གླང་པོ་ཆེ་སྐྱོང་བའི་གྲོང་དུ་ཇི་སྲིད་ཡོད། དེར་ནི་དཔག་ཚད་གསུམ་ལྷག་ཙམ་མཆིས་སོ། །བདག་ཅག་གིས་ དེང་ཉིད་དོང་ལ་སླར་འཁོར་བར་ནུས་སམ་མི་ནུས་སྙམ་པ་ལས། དེ་དག་གིས་བསམས་པ། བཅོམ་ལྡན་འདས་ཀྱིས་དབྱར་གནས་པར་དམ་བཅས་པའི་དགེ་སློང་གིས་མཚམས་ཀྱི་ཕྱི་རོལ་དུ་འགྲོ་བར་མི་བྱའོ། །གལ་ཏེ་སོང་ན་དེར་གནས་པར་མི་བྱའོ་ཞེས་གསུངས་སོ་ སྙམ་ནས་དེ་རྣམས་མ་སོང་ངོ་། །དེ་ན་གླང་པོ་ཆེ་སྐྱོང་བའི་གྲོང་གི་ཉེ་འཁོར་དུ་དགེ་སློང་གང་དག་དབྱར་གནས་པར་དམ་བཅས་པ་དེ་དག་ལ་དེས་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་ཕུལ་ལོ། །དེ་དག་དབྱར་ཟླ་བ་གསུམ་འདས་ཏེ་ཆོས་གོས་བྱས་པ་དང་ལྡན། ཆོས་ གོས་ཟིན་པ་དང་ལྡན་ནས་ལྷུང་བཟེད་དང་ཆོས་གོས་ཐོགས་ཏེ། མཉན་ཡོད་གང་ན་བ་དེར་རྒྱུ་ཞིང་དོང་ནས་རིམ་གྱིས་རྒྱུ་ཞིང་དོང་བ་ན་མཉན་ཡོད་དུ་ཕྱིན་ཏོ། །དེ་དག་དགེ་སློང་རྣམས་ཀྱིས་རྒྱང་རིང་པོ་ཁོ་ན་ནས་མཐོང་ནས་ཚེ་དང་ལྡན་པ་དག་འོངས་པ་ལེགས་སོ། །འོངས་ པ་ལེགས་སོ་ཞེས་ངལ་སོར་བཅུག་ནས་སྨྲས་པ། ཚེ་དང་ལྡན་པ་དག་ཁྱེད་གང་ནས་ད་འདིར་འོངས། གང་དུ་དབྱར་གནས་པར་དམ་བཅས། ཚེ་དང་ལྡན་པ་བདག་ཅག་ནི་གླང་པོ་ཆེ་སྐྱོང་བའི་གྲོང་ནས་ད་གཟོད་འདིར་འོངས་ཏེ། གླང་པོ་ཆེ་སྐྱོང་བའི་གྲོང་དུ་དབྱར་གནས་ པར་དམ་བཅས་སོ། །ཚེ་དང་ལྡན་པ་དག་ཇི་ག་ཁྱེད་ཅག་གླང་པོ་ཆེ་སྐྱོང་བའི་གྲོང་དུ་བདེ་བ་ལ་རེག་པར་དབྱར་གནས་པར་དམ་བཅས་སམ། དེ་ན་ཁྱེད་བསོད་སྙོམས་ཀྱིས་བྲེལ་བར་མ་གྱུར་མོད། ཚེ་དང་ལྡན་པ་དག་བདེན་ཏེ། བདག་ཅག་གླང་པོ་ཆེ་སྐྱོང་བའི་གྲོང་དུ་བདེ་བ་ལ་ རེག་པར་དབྱར་གནས་པར་དམ་བཅས་ཤིང་བསོད་སྙོམས་ཀྱིས་ཀྱང་བྲེལ་བར་མ་གྱུར་ཏོ། །ཚེ་དང་ལྡན་པ་དག་ཇི་ལྟ་བ་ཞིག་ཏུ་ཁྱེད་ཅག་གླང་པོ་ཆེ་སྐྱོང་བའི་གྲོང་དུ་བདེ་བ་ལ་རེག་པར་དབྱར་གནས་པར་དམ་བཅས་ཤིང་བསོད་སྙོམས་ཀྱིས་ཀྱང་མ་བྲེལ། ཚེ་དང་ལྡན་པ་དག་གླང་

  481. 241b

    པོ་ཆེ་སྐྱོང་བའི་གྲོང་དེ་ན་ཁྱིམ་བདག་འཆར་ཀ་ཞེས་བྱ་བ་ཞིག་གནས་ཏེ། དེའི་ཁྱིམ་ན་རང་གི་འཆིང་བ་བག་མ་བླངས་ནས། བདག་ཅག་ལ་དེས་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་ཕུལ་ཏེ། དེ་ལྟར་ན་ཚེ་དང་ལྡན་པ་དག་བདག་ཅག་གླང་པོ་ཆེ་སྐྱོང་བའི་གྲོང་དུ་བདེ་བ་ལ་ རེག་པར་དབྱར་གནས་པར་དམ་བཅས་ཏེ་བསོད་སྙོམས་ཀྱིས་ཀྱང་བྲེལ་བར་མ་གྱུར་ཏོ། །དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་ལ་ཡང་ཁྱིམ་བདག་དེས་ཕོ་ཉ་བཏང་ནས་འཕགས་པ་དག་ལོངས་སྤྱད་པ་དག་འབུལ་གྱིས་འདིར་སྤྱོན་ཅིག་ཅེས་སྤྲིང་བ་ལས། དེ་ལ་བདག་ཅག་གིས་གླང་པོ་ཆེ་སྐྱོང་བའི་གྲོང་དུ་ཇི་སྲིད་ཡོད་ཅེས་སྨྲས་ན། དེར་དཔག་ཚད་གསུམ་ལྷག་ཙམ་ཡོད་དོ་ཞེས་ཟེར་ནས་བདག་ཅག་གིས་བློ་སྐྱེས་པ། བཅོམ་ལྡན་འདས་ཀྱིས་དབྱར་གནས་པར་དམ་བཅས་པའི་དགེ་སློང་གིས་མཚམས་ཀྱི་ཕྱི་རོལ་དུ་འགྲོ་བར་མི་བྱའོ། ། གལ་ཏེ་སོང་ན་དེར་གནས་པར་མི་བྱའོ་ཞེས་གསུངས་སོ་སྙམ་ནས་བདག་ཅག་མ་དོང་ངོ་། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཀྱེ་མ་ངའི་ཉན་ཐོས་རྣམས་ནི་གོས་ཀྱི་རྙེད་པ་དང་ཟས་ཀྱི་རྙེད་པ་དག་འདོད་ ཀྱིས། མ་ལ་ངས་དགེ་སློང་རྣམས་བདེ་བ་ལ་རེག་པར་གནས་པར་བྱ་བའི་ཕྱིར་དང་། སྦྱིན་བདག་གིས་བྱིན་པའི་ཆོས་ཡོངས་སུ་སྤྱད་པར་བྱ་བའི་ཕྱིར་ཞག་བདུན་རྗེས་སུ་གནང་བར་བྱ་སྟེ། དེ་ལྟ་བས་ན་རྗེས་སུ་གནང་སྟེ་བྱ་བའི་ཕྱིར་ཞག་བདུན་བྱིན་གྱིས་བརླབས་ལ་འགྲོ་བར་ བྱའོ། །བཅོམ་ལྡན་འདས་ཀྱིས་བྱ་བའི་ཕྱིར་ཞག་བདུན་བྱིན་གྱིས་བརླབས་ཏེ་འགྲོ་བར་བྱའོ་ཞེས་གསུངས་པ་དགེ་སློང་དག་གིས་གང་གི་བྱ་བའི་ཕྱིར་མ་ཤེས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་ པ། དགེ་བསྙེན་གྱི་བྱ་བ་དང་། དགེ་བསྙེན་མའི་བྱ་བ་དང་། དགེ་སློང་གི་དང་། དགེ་སློང་མའི་དང་། དགེ་ཚུལ་གྱི་དང་། དགེ་ཚུལ་མའི་བྱ་བའི་ཕྱིར་རོ། །དགེ་བསྙེན་གྱི་བྱ་བ་གང་ཞེ་ན། འདི་ལྟར་ཡང་དགེ་བསྙེན་གྱི་ཁྱིམ་དུ་རང་གི་འཆིང་བ་བག་མ་བླངས་ཏེ།

  482. 242a

    དེས་དེར་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་སྟ་གོན་བྱས་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་ལོངས་སྤྱད་པ་དག་འབུལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ནས་དགེ་བསྙེན་གྱི་བྱ་བའི་ཕྱིར་དགེ་ སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་གྱིས་ཕྱོགས་བཞིའི་དགེ་སློང་གི་དགེ་འདུན་གྱི་ཕྱིར་གཙུག་ལག་ཁང་བརྩིག་པར་འདོད་ནས། དེས་དེར་གོས་ཀྱི་རྙེད་པ་དང་ཟས་ཀྱི་རྙེད་པ་མང་ དུ་སྟ་གོན་བྱས་ཏེ། དེས་དགེ་སློང་དག་ལ་ཕོ་ཉ་བཏང་ནས། འཕགས་པ་དག་ལོངས་སྤྱད་པ་དག་འབུལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། ། གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་གྱིས་གཙུག་ལག་ཁང་དེ་ཉིད་དུ་གནས་མལ་དབུལ་བར་འདོད་པར་གྱུར་ནས། དེས་དེར་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་སྟ་གོན་བྱས་ཏེ། དེས་དགེ་སློང་རྣམས་ལ་ཕོ་ཉ་བཏང་ནས། འཕགས་པ་དག་ ལོངས་སྤྱད་པ་དག་དབུལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་གྱིས་གཙུག་ལག་ ཁང་དེ་ཉིད་དུ་མཐུན་པའི་མཆོད་སྦྱིན་བརྟན་པོ་བཅའ་བར་འདོད་ནས། དེས་དེར་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་སྟ་གོན་བྱས་ཏེ། དེས་དགེ་སློང་རྣམས་ལ་ཕོ་ཉ་བཏང་ནས། འཕགས་པ་དག་ལོངས་སྤྱོད་པ་དག་དབུལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་ གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་གྱིས་གཙུག་ལག་ཁང་དེ་ཉིད་དུ་དེ་བཞིན་གཤེགས་པའི་སྐུ་གདུང་གིས་མཆོད་རྟེན་བརྩིག་པར་འདོད་

  483. 242b

    ནས། དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་ཚུར་སྤྱོན་ཅིག་ཆོས་ཀྱི་གྲོགས་མཛོད་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་ དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་གྱིས་མཆོད་རྟེན་དེ་ཉིད་ལ་སྲོག་ཤིང་གཟུགས་པ་དང་། གདུགས་གདགས་པ་དང་། རྒྱལ་མཚན་གཟུགས་པ་དང་། འཕན་གདགས་པ་དང་། དྲི་སྣ་ཚོགས་ཀྱི་བྱུག་པ་དང་། ཙན་དན་གྱི་བསྐུ་བ་དང་། གུར་ཀུམ་གྱི་ བྱུག་པ་དག་དབུལ་བར་འདོད་ནས། དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་ཚུར་སྤྱོན་ཅིག །བདག་གི་ཆོས་ཀྱི་གྲོགས་མཛོད་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་ གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་གྱིས་མདོ་སྡེ་རིས་བཞི་ལས་མདོ་སྡེའི་རིས་གང་ཡང་རུང་བ་ཞིག་རྒྱས་པར་བཀླགས་སམ་བཏོན་པར་གྱུར་ནས། དེས་དེར་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་སྟ་གོན་བྱས་ཏེ། དགེ་སློང་དག་ལ་ཕོ་ཉ་ བཏང་ནས་འཕགས་པ་དག་ལོངས་སྤྱད་པ་དག་དབུལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་ཞིག་ འགྱོད་པར་གྱུར་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་འགྱོད་པ་སྐྱེས་པ་སོ་སོར་བསལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། ། གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་ཞིག་སྡིག་པ་ཅན་གྱི་ལྟ་བར་སོང་བ་སྐྱེས་པར་གྱུར་ནས། དེས་དགེ་སློང་དག་ལ་ཕོ་ཉ་བཏང་སྟེ། འཕགས་པ་དག་སྡིག་པ་ཅན་གྱི་ལྟ་བར་སོང་བ་སྐྱེས་པ་དེ་སོ་སོར་བསལ་གྱིས་ཚུར་སྤྱོན་ཅིག་ཅེས་

  484. 243a

    སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་འདུན་གྱིས་དགེ་བསྙེན་ལ་ལྷུང་བཟེད་ཁས་དབུབ་པར་འདོད་པར་གྱུར་ པ་དང་། དེས་དགེ་སློང་དག་ལ་ཕོ་ཉ་བཏང་སྟེ། འཕགས་པ་དག་ཆོས་དང་མཐུན་པའི་ཕྱོགས་སྟེན་པར་བགྱིད་ཀྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། ། གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་འདུན་གྱིས་དགེ་བསྙེན་ལ་ལྷུང་བཟེད་ཁས་བུབ་པར་གྱུར་པ་དང་། དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་ལྷུང་བཟེད་ཁས་བུབ་པ་བཏང་བར་གསོལ། ཚུར་སྤྱོན་ཅིག་ཅེས་སྤྲིང་ན་ཞག་བདུན་བྱིན་གྱིས་ བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །གཞན་ཡང་དགེ་བསྙེན་གྱི་བྱ་བ་འདི་ལྟ་སྟེ། དགེ་བསྙེན་ན་བ་སྡུག་བསྔལ་བ་ནད་ཚབས་ཆེ་བར་གྱུར་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་ ཚུར་སྤྱོན་ཅིག །འགའ་སྩོལ་ཅིག་ཅེས་སྤྲིང་ན་ཞག་བདུན་བྱིན་གྱིས་བརླབས་ལ་དགེ་བསྙེན་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་བསྙེན་གྱི་བྱ་བ་ཡིན་ནོ། །དགེ་བསྙེན་མའི་བྱ་བ་གང་ཞེ་ན། དེ་དག་ཐམས་ཅད་དགེ་བསྙེན་མའི་བྱ་བ་ཡིན་ཏེ། རང་གི་ འཆིང་བ་བག་མ་ལེན་པ་ནི་མ་གཏོགས་སོ། །དགེ་སློང་གི་བྱ་བ་གང་ཞེ་ན། འདི་ལྟ་སྟེ། དགེ་སློང་ཞིག་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའ་ར་བ་དབུལ་བར་འདོད་ནས། དེས་དེར་གོས་ཀྱི་རྙེད་པ་དང་ཟས་ཀྱི་རྙེད་པ་མང་དུ་སྟ་གོན་བྱས་ནས་དེས་དགེ་སློང་ རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་ལོངས་སྤྱད་པ་དག་འབུལ་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་སློང་གི་བྱ་བ་ཡིན་ནོ། །གཞན་ཡང་དགེ་སློང་གི་བྱ་བ་འདི་ལྟ་སྟེ།

  485. 243b

    དགེ་སློང་གིས་ཀུན་དགའ་ར་བ་དེ་ཉིད་དུ་གཙུག་ལག་ཁང་དང་། གནས་མལ་དང་། འཚོ་བ་བརྟན་པོ་དང་། དེ་བཞིན་གཤེགས་པའི་སྐུ་གདུང་གི་མཆོད་རྟེན་ལ་དྲི་སྣ་ཚོགས་ཀྱིས་བྱུག་པ་དང་། ཙན་དན་གྱིས་བྱུག་པ་དང་། སྲོག་ཤིང་གཟུགས་པ་དང་། རྒྱལ་ མཚན་གཟུགས་པ་དང་། མདོ་སྡེའི་རིས་བཞི་ལས་མདོ་སྡེའི་རིས་གང་ཡང་རུང་བ་དང་། འགྱོད་པ་དང་། སྡིག་པའི་ལྟ་བར་སོང་བ་སྐྱེས་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་སྡིག་པའི་ལྟ་བར་སོང་བ་སྐྱེས་པ་སོ་སོར་བསལ་གྱིས་ཚུར་སྤྱོན་ ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་སློང་གི་བྱ་བ་ཡིན་ཏེ། ཐམས་ཅད་གོང་མ་བཞིན་དུ་རྒྱས་པར་བརྗོད་པར་བྱའོ། །གཞན་ཡང་དགེ་སློང་གི་བྱ་བ་འདི་ལྟ་སྟེ། དགེ་འདུན་གྱིས་དགེ་སློང་ ཞིག་ལ་ཆད་པའི་ལས་འདི་ལྟ་སྟེ། བསྡིགས་པའི་ལས་སམ། སྨད་པའི་ལས་སམ། བསྐྲད་པའམ། ཕྱིར་འགྱེད་པ་དང་། མི་སྣང་བར་གནས་ནས་དབྱུང་བའམ། ཕྱིར་མི་འཆོས་པ་གནས་ནས་དབྱུང་བའམ། སྡིག་པའི་ལྟ་བར་སོང་བ་མ་བཏང་བ་གནས་ནས་དབྱུང་ བའི་ལས་དེ་ལྟ་བུ་བྱ་བར་འདོད་པར་གྱུར་པ་དང་། དེས་དགེ་སློང་རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་ཆོས་དང་མཐུན་པའི་ཕྱོགས་དང་མཐུན་པར་བགྱིད་པར་འགྱུར་གྱིས་ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་སློང་གི་བྱ་བའི་ཕྱིར་དགེ་སློང་འགྲོ་ བར་བྱ་སྟེ། འདི་ནི་དགེ་སློང་གི་བྱ་བ་ཡིན་ནོ། །གཞན་ཡང་དགེ་སློང་གི་བྱ་བ་འདི་ལྟ་སྟེ། དགེ་འདུན་གྱིས་དགེ་སློང་གི་ཆད་པའི་ལས་འདི་ལྟ་སྟེ། བསྡིགས་པའི་ལས་སམ། སྨད་པའི་ལས་སམ། བསྐྲད་པའི་ལས་སམ། ཕྱིར་འགྱེད་པའི་ལས་སམ། མི་སྣང་བར་ གནས་ནས་དབྱུང་བའམ། ཕྱིར་མི་འཆོས་པ་གནས་ནས་དབྱུང་བའམ། སྡིག་པའི་ལྟ་བར་སོང་བ་གནས་ནས་དབྱུང་བའི་ལས་དེ་ལྟ་བུ་བྱས་པ་དང་། དེས་དགེ་སློང་རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་འབྱིན་པར་འགྱུར་གྱིས། ཚུར་སྤྱོན་ཅིག་ཅེས་སྤྲིང་ན།

  486. 244a

    ཞག་བདུན་བྱིན་གྱིས་བརླབས་ལ་དགེ་སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་སློང་གི་བྱ་བ་ཡིན་ནོ། །གཞན་ཡང་དགེ་སློང་གི་བྱ་བ་འདི་ལྟ་སྟེ། དགེ་སློང་ཞིག་ལ་དགེ་འདུན་གྱིས་ལྷག་མའི་ལྟུང་བ་བྱུང་བར་གྱུར་ནས། དེས་དགེ་སློང་ རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་ཚུར་སྤྱོན། སྤོ་བ་སྩལ་དུ་གསོལ་ཞེས་སྤྲིང་ན་ཞག་བདུན་བྱིན་གྱིས་བརླབས་ལ་དགེ་སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་སློང་གི་བྱ་བ་ཡིན་ནོ། །གཞན་ཡང་དགེ་སློང་གི་བྱ་བ་འདི་ལྟ་སྟེ། དགེ་སློང་གིས་ སྤོ་བ་རྫོགས་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་ཚུར་སྤྱོན། མགུ་བར་བགྱི་བ་སྩལ་དུ་གསོལ་ཞེས་སྤྲིང་ན། ཞག་བདུན་བྱིན་གྱིས་བརླབས་ཏེ་དགེ་སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་སློང་གི་བྱ་བ་ཡིན་ནོ། །གཞན་ ཡང་དགེ་སློང་གི་བྱ་བ་འདི་ལྟ་སྟེ། དགེ་སློང་གིས་མགུ་བར་བྱ་བ་སྤྱད་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་ཚུར་སྤྱོན་དབྱུང་བ་བགྱིར་གསོལ་ཞེས་སྤྲིང་ན། ཞག་བདུན་བྱིན་གྱིས་བརླབས་ཏེ་དགེ་སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་ དགེ་སློང་གི་བྱ་བ་ཡིན་ནོ། །གཞན་ཡང་དགེ་སློང་གི་བྱ་བ་འདི་ལྟ་སྟེ། དགེ་སློང་ན་བ་སྡུག་བསྔལ་བ་ནད་ཚབས་ཆེ་བ་ཞིག་གིས་དགེ་སློང་རྣམས་ལ་ཕོ་ཉ་བཏང་སྟེ། ཚེ་དང་ལྡན་པ་དག་ཚུར་སྤྱོན་ཅིག །འགའ་སྩོལ་ཅིག་ཅེས་སྤྲིང་ན་ཞག་བདུན་བྱིན་གྱིས་བརླབས་ལ་དགེ་ སློང་གི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་སློང་གི་བྱ་བ་ཡིན་ནོ། །དགེ་སློང་མའི་བྱ་བ་གང་ཞེ་ན། དེ་དག་ཐམས་ཅད་དགེ་སློང་མའི་བྱ་བ་ཡིན་ཏེ། ཆད་པའི་ལས་ནི་མ་གཏོགས་སོ། །གཞན་ཡང་དགེ་སློང་མའི་བྱ་བ་འདི་ལྟ་སྟེ། དགེ་སློང་མ་ ཞིག་ལ་ལྕི་བའི་ཆོས་ཀྱི་ལྟུང་བ་བྱུང་བར་གྱུར་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་ཚུར་སྤྱོན། ཟླ་བ་ཕྱེད་ཀྱི་བར་དུ་མགུ་བར་བགྱི་བ་སྩལ་དུ་གསོལ་ཞེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་སློང་མའི་བྱ་བའི་ཕྱིར་དགེ་སློང་འགྲོ་བར་བྱ་སྟེ།

  487. 244b

    འདི་ནི་དགེ་སློང་མའི་བྱ་བ་ཡིན་ནོ། །དགེ་སློབ་མའི་བྱ་བ་གང་ཞེ་ན། དེ་དག་ཐམས་ཅད་དགེ་སློབ་མའི་བྱ་བ་ཡིན་ནོ། །གཞན་ཡང་དགེ་སློབ་མའི་བྱ་བ་འདི་ལྟ་སྟེ། དགེ་སློབ་མས་ལོ་གཉིས་ཀྱི་བར་དུ་བསླབ་པའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་བསླབས་ནས་དེས་ དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་བསྙེན་པར་རྫོགས་པར་མཛད་དུ་གསོལ། ཚུར་སྤྱོན་ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་སློབ་མའི་བྱ་བའི་ཕྱིར། དགེ་སློང་འགྲོ་བར་བྱ་སྟེ། འདི་ནི་དགེ་སློབ་མའི་བྱ་བ་ཡིན་ནོ། །དགེ་ཚུལ་ གྱི་བྱ་བ་གང་ཞེ་ན། དེ་དག་ཐམས་ཅད་དགེ་ཚུལ་གྱི་བྱ་བ་ཡིན་ནོ། །གཞན་ཡང་དགེ་ཚུལ་གྱི་བྱ་བ་གང་ཞེ་ན། འདི་ལྟ་སྟེ། དགེ་ཚུལ་ལོ་ཉི་ཤུ་ལོན་པར་གྱུར་ནས་དེས་དགེ་སློང་རྣམས་ལ་ཕོ་ཉ་བཏང་སྟེ། འཕགས་པ་དག་བསྙེན་པར་རྫོགས་པར་མཛད་དུ་གསོལ་ཚུར་སྤྱོན་ ཅིག་ཅེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་ཚུལ་གྱི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་ཚུལ་གྱི་བྱ་བ་ཡིན་ནོ། །དགེ་ཚུལ་མའི་བྱ་བ་གང་ཞེ་ན། དེ་དག་ཐམས་ཅད་དགེ་ཚུལ་མའི་བྱ་བ་ཡིན་ནོ། །གཞན་ཡང་དགེ་ཚུལ་མའི་བྱ་བ་འདི་ལྟ་སྟེ། དགེ་ ཚུལ་མ་ཁྱིམ་སོ་བཟུང་བ་ལོ་བཅུ་གཉིས་ལོན་པའམ། གཞོན་ནུ་མ་ལོ་བཅྭ་བརྒྱད་ལོན་ནས་དེས་དགེ་སློང་དག་ལ་ཕོ་ཉ་བཏང་སྟེ། འཕགས་པ་དག་ལོ་གཉིས་ཀྱི་བར་དུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་གི་བསླབ་པ་སྩལ་དུ་གསོལ་ཚུར་སྤྱོན་ཅིག་ཅེས་སྤྲིང་ན། ཞག་བདུན་ བྱིན་གྱིས་བརླབས་ལ་དགེ་ཚུལ་མའི་བྱ་བའི་ཕྱིར་དགེ་སློང་འགྲོ་བར་བྱ་སྟེ། འདི་ནི་དགེ་ཚུལ་མའི་བྱ་བ་ཡིན་ནོ།། །།སྡོམ་ལ། ཁ་ཟས་སྨན་དང་གཡོག་དང་ནི། །བུད་མེད་སྐྱེས་པ་མ་ནིང་དང་། །མཚན་མ་གཏེར་དང་གཉེན་དག་དང་། །བར་ཆད་ཀྱིས་ནི་འགྲོ་བྱ་བའོ། །འདི་ ལྟར་ཡང་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བདག་ལ་བསོད་སྙོམས་སྟེར་བ་ནི་འགའ་ཡང་མེད་དེ། བདག་གིས་བསོད་སྙོམས་མ་རྙེད་པས་བདག་ཉོན་མོངས་པའམ་ཤི་ན་བདག་གི་མ་ཐོབ་པ་

  488. 245a

    ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བ་དེའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བདག་ནད་ཀྱིས་ཐེབས་ན་ན་བ་ལ་ནད་ཀྱི་སྨན་སྦྱིན་པ་ནི་འགའ་ཡང་མེད་དེ། བདག་གིས་སྨན་མ་རྙེད་པས་ཉོན་མོངས་ པའམ་ཤི་ན་བདག་གི་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བ་དེའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བདག་ནད་ཀྱིས་ཐེབས་ན་ནད་གཡོག་བྱེད་པ་འགའ་ཡང་མེད་དོ། །བདག་ལ་ནད་གཡོག་བྱེད་པ་མེད་ པས་ཉོན་མོངས་པའམ་ཤི་ན་བདག་གི་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བ་དེའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་ སོང་བ་ལས་དབྱར་རལ་ན་ལྟུང་བ་མེད་དོ།། །།འདུལ་བ་གཞི། བམ་པོ་ཉི་ཤུ་པ། འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གི་དྲུང་དུ་བུད་མེད་དག་འོངས་ཏེ་མི་འཚམ་པའི་གསོལ་བས་གསོལ་བ་འདེབས་ཏེ། འཕགས་པ་བཞུགས་ ཤིག །འཕགས་པ་དགྱེས་པར་མཛོད་ཅིག །ཁྱོད་ལ་བདག་གིས་བསྙེན་བཀུར་བགྱིའོ། །ཁྱོད་ལ་བུ་མོ་དབུལ་ལོ། །ཁྱོད་ལ་མནའ་མ་དང་། ཁྱོད་ལ་བྲན་མོ་དང་། ལས་བགྱིད་པ་འབུལ་ལོ། །དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་

  489. 245b

    སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བུད་མེད་འདི་བདག་གི་དྲུང་དུ་འོངས་ནས་མི་འཚམ་པའི་གསོལ་བས་གསོལ་བ་འདེབས་ཏེ། འཕགས་པ་བཞུགས་ཤིག །འཕགས་པ་དགྱེས་པར་མཛོད་ཅིག །ཁྱོད་ལ་བདག་བསྙེན་བཀུར་བགྱིའོ། ། ཁྱོད་ལ་བུ་མོ་འབུལ་ལོ། །ཁྱོད་ལ་མནའ་མ་དང་། ཁྱོད་ལ་བྲན་མོ་དང་། ལས་བགྱིད་པ་འབུལ་ལོ། །ཞེས་ཟེར་ཏེ། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་ པས་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་སྟེ། དེས་དེ་ལྟ་བུས་རྐྱེན་བྱས་ནས་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གི་དྲུང་དུ་སྐྱེས་པ་ཞིག་འོངས་ནས་མི་འཚམ་ པས་གསོལ་བས་གསོལ་བ་འདེབས་ཏེ། འཕགས་པ་བཞུགས་ཤིག །འཕགས་པ་དགྱེས་པར་མཛོད་ཅིག །ཁྱོད་ལ་བདག་བསྙེན་བཀུར་བགྱིའོ། །ཁྱོད་ལ་བུ་མོ་འབུལ་ལོ། །ཁྱོད་ལ་མནའ་མ་དང་། ཁྱོད་ལ་བྲན་མོ་དང་། ལས་བྱེད་པ་འབུལ་ལོ། །དེ་ ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བདག་གི་དྲུང་དུ་སྐྱེས་པ་འདི་འོངས་ནས་མི་འཚམ་པའི་གསོལ་བས་གསོལ་བ་འདེབས་ཏེ། འཕགས་པ་བཞུགས་ཤིག །འཕགས་པ་དགྱེས་ པར་མཛོད་ཅིག །ཁྱོད་ལ་བདག་བསྙེན་བཀུར་བགྱིའོ། །ཁྱོད་ལ་བུ་མོ་འབུལ་ལོ། །མནའ་མ་དང་། བྲན་མོ་དང་། ལས་བགྱིད་པ་འབུལ་ལོ་ཞེས་ཟེར་ན། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་ བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གི་དྲུང་དུ་མ་

  490. 246a

    ནིང་ཞིག་འོངས་ནས་མི་འཚམ་པའི་གསོལ་བས་གསོལ་བ་འདེབས་ཏེ། འཕགས་པ་བཞུགས་ཤིག །འཕགས་པ་དགྱེས་པར་མཛོད་ཅིག །ཁྱོད་ལ་བདག་བསྙེན་བཀུར་བགྱིའོ། །ཁྱོད་ལ་བྲན་མོ་དང་། ལས་བགྱིད་པ་འབུལ་ལོ། །དེ་ན་ དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བདག་གི་དྲུང་དུ་མ་ནིང་འདི་འོངས་ནས་མི་འཚམ་པའི་གསོལ་བས་གསོལ་བ་འདེབས་ཏེ། འཕགས་པ་བཞུགས་ཤིག །འཕགས་པ་དགྱེས་ པར་མཛོད་ཅིག །ཁྱོད་ལ་བདག་བསྙེན་བཀུར་བགྱིའོ། །ཁྱོད་ལ་བྲན་མོ་དང་། ཁྱོད་ལ་ལས་བགྱིད་པ་འབུལ་ལོ་ཞེས་ཟེར་ཏེ། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་ པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གིས་བུད་མེད་གཞོན་ནུ་མདོག་ མཛེས་པ་ཆགས་པར་འོས་པ་ཞིག་མཐོང་ནས་ཚུལ་བཞིན་མ་ཡིན་པའི་ཡིད་ལ་བྱེད་པའི་མཚན་མ་བཟུང་བར་གྱུར་ཏོ། །དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བུད་མེད་གཞོན་ནུ་ མཛེས་པ་ཆགས་པར་འོས་པ་ཞིག་མཐོང་ནས་ཚུལ་བཞིན་མ་ཡིན་པ་ཡིད་ལ་བྱེད་པའི་མཚན་མ་བཟུང་བས་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་ གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གིས་ནོར་གྱི་གཏེར་ཞིག་མཐོང་ངོ་། །དེ་ན་དབྱར་གནས་པར་

  491. 246b

    དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་བདག་གིས་འདིར་ནོར་གྱི་གཏེར་ཞིག་མཐོང་བས། གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་ དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གི་དྲུང་དུ་གཉེན་ དག་འོངས་ནས་མི་འཚམ་པའི་གསོལ་བས་གསོལ་བ་འདེབས་ཏེ། འཕགས་པ་ཁྱོད་ཅིའི་ཕྱིར་མགོ་བྲེགས་ཤིང་ལྷུང་བཟེད་ལག་ཏུ་ཐོགས་ཏེ། རིགས་ཀྱི་གྲོང་ནས་གྲོང་དུ་རྒྱུ་ཞིང་གོས་ངུར་སྨྲིག་གྲང་མོ་འདིས་ཀྱང་ལུས་གདུང་བར་བགྱི། འཕགས་པ་ཁྱོད་ཚུར་སྤྱོན། འདོད་པ་ལ་ཡོངས་སུ་སྤྱོད་ཅིག །སྦྱིན་པ་དག་སྩོལ་ཅིག །བསོད་ནམས་དག་གྱིས་ཤིག །དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་གནས་འདིར་དབྱར་གནས་པར་དམ་བཅས་པས་བདག་གི་དྲུང་དུ་གཉེན་དག་འོངས་ནས་མི་ འཚམ་པའི་གསོལ་བས་གསོལ་བ་འདེབས་ཏེ། འཕགས་པ་ཁྱོད་ཅིའི་ཕྱིར་མགོ་བྲེགས་ཤིང་ལྷུང་བཟེད་ལག་ཏུ་ཐོགས་ཏེ། རིགས་ཀྱི་གྲོང་ནས་གྲོང་དུ་རྒྱུ་ཞིང་གོས་ངུར་སྨྲིག་གྲང་མོ་འདིས་ཀྱང་ལུས་གདུང་བར་བགྱི། འཕགས་པ་ཁྱོད་ཚུར་སྤྱོན། འདོད་པ་ལ་ ཡོངས་སུ་སྤྱོད་ཅིག །སྦྱིན་པ་དག་སྩོལ་ཅིག །བསོད་ནམས་དག་གྱིས་ཤིག་ཅེས་ཟེར་ཏེ། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས་ མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་རྒྱལ་པོ་དཔུང་གི་ཚོགས་ཡན་ལག་བཞི་གོ་བསྐོན་པ་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟ་པའི་

  492. 247a

    ཚོགས་དང་། དཔུང་བུ་ཆུང་གི་ཚོགས་ཅན་ཀུན་དགའ་ར་བའི་སྒོའི་བར་དུ་ལྷགས་ནས་སྤར་ཐབས་སུ་སྐུར་པ་སྒྲོགས་ཤིང་། ཤེས་ལྡན་དག་ཤཱཀྱའི་བུའི་དགེ་སྦྱོང་དག་ཟུང་ཤིག་ཅེས་བྱ་བ་ནས། གོང་དུ་གསོ་སྦྱོང་གི་གཞིར་ཇི་སྐད་བསྟན་པ་དེ་བཞིན་རྒྱས་ པར་རྫོགས་པར་བརྗོད་པར་བྱ་སྟེ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན་རྒྱལ་པོ་དཔུང་གི་ཚོགས་ཡན་ལག་བཞི་གོ་བསྐོན་པ་གླང་པོ་ཆེའི་ཚོགས་དང་། རྟ་པའི་ཚོགས་ཅན་ཞེས་བྱ་ བ་གོང་མ་བཞིན་ཏེ། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་ བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་སྐྱེས་པའམ། བུད་མེད་དམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་གྱུར་པ་དེ་རྒྱལ་པོས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། རྒྱལ་པོའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་སྐྱེས་པའམ། བུད་མེད་དམ། མ་ནིང་གང་ལ་བརྟེན་ ནས་འདིར་དབྱར་གནས་པར་དམ་བཅས་པ་དེ་རྒྱལ་པོས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། རྒྱལ་པོའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་བདག་གནས་ འདིར་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་

  493. 247b

    རལ་ན་ལྟུང་བ་མེད་དོ། །འདི་ལྟར་ཡང་ཆོམ་རྐུན་པ་དག་གིས་གྲོང་བཅོམ་མམ། གྲོང་ཁྱེར་བཅོམ་མམ། ཡུལ་ལྗོངས་བཅོམ་ནས་ཀུན་དགའ་ར་བའི་སྒོར་ལྷགས་ཏེ། བ་ལང་བསད་དམ། མ་ཧེ་འམ། ར་བསད་པའི་ཁྲག་གིས་ཡན་ལག་བྱུགས་ནས་དགེ་ སློང་རྣམས་ལ་ཕོ་ཉ་བཏང་སྟེ། འཕགས་པ་དག་ཕྱིར་བྱུང་ཤིག །བདག་ཅག་འདིར་གནས་སོ་ཞེས་སྤྲིང་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་གནས་འདིར་དབྱར་གནས་པར་དམ་བཅས་ན་ཆོམ་རྐུན་པ་འདི་དག་ གྲོང་བཅོམ་མམ་ཞེས་བྱ་བའི་བར་གོང་མ་བཞིན་ཏེ། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་གྱུར་ པ་དེ་ཆོམ་རྐུན་པས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། ཆོམ་རྐུན་པའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་ སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ཏེ་དབྱར་གནས་པར་དམ་བཅས་པ་དེ་ཆོམ་རྐུན་པ་དག་གིས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། ཆོམ་རྐུན་པའི་འཇིགས་པས་ཡུལ་འཁོར་གཞན་ ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་བདག་གནས་འདིར་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་ སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་སྤྱོད་ཡུལ་ལམ། སྤྱོད་ཡུལ་གྱི་ལམ་ཀར་རིགས་ཀྱི་བུད་

  494. 248a

    མེད་དམ། རིགས་ཀྱི་ན་ཆུང་ལ་གཤེས་སམ། ཁ་ངན་སྨྲས་སམ། རེག་པས་མི་རྣམས་ཁྲོས་ཏེ། ཀུན་དགའ་ར་བའི་སྒོར་ལྷགས་ནས་སྤར་ཐབས་སུ་སྐུར་པ་སྒྲོགས་ཤིང་ཞེས་བྱ་བའི་བར་གོང་མ་བཞིན་ཏེ། དེས་དེ་ལྟ་བུས་རྐྱེན་བྱས་ཏེ། གནས་ དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་གྱུར་པ་དེ་མི་རྣམས་ཀྱིས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་ འཕྲོགས་སམ། མི་མ་ཡིན་པའི་འཇིགས་པས་ཡུལ་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ཏེ་གནས་འདིར་ དབྱར་གནས་པར་དམ་བཅས་པ་དེ་མི་རྣམས་ཀྱིས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། མི་མ་ཡིན་པའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་བདག་གནས་འདིར་ དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་ མེད་དོ། །འདི་ལྟར་ཡང་མི་མ་ཡིན་པ་གནས་པའི་ཕྱོགས་ཤིག་ཏུ་གཙུག་ལག་ཁང་བརྩིགས་ལ། དེ་ན་རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ཕྱོགས་ཤིག་ཏུ་བཤང་བ་དང་གཅི་བ་ཞེས་བྱ་བའི་བར་གོང་མ་ བཞིན་ཏེ། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་གྱུར་པ་དེ་མི་མ་ཡིན་པ་རྣམས་ཀྱིས་བཟུང་ངམ།

  495. 248b

    བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། མི་མ་ཡིན་པའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་འདིར་དབྱར་གནས་པར་དམ་བཅས་པ་དེ་མི་མ་ཡིན་པས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། མི་མ་ཡིན་པའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ ཤི་བར་གྱུར་པས། གལ་ཏེ་བདག་གནས་འདིར་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་ བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་གདུག་པ་གནས་པའི་ཕྱོགས་ཤིག་ཏུ་གཙུག་ལག་ཁང་བརྩིགས་ལ། དེ་ན་རྒན་ཞུགས་མི་ཤེས་པ། རྨོངས་པ། མི་གསལ་བ། མི་མཁས་པ་གཞན་ཞིག་གིས་མི་རུང་བའི་ཕྱོགས་ ཤིག་ཏུ་བཤང་བ་དང་། གཅི་བ་དང་། མཆིལ་མ་དང་། སྣབས་དང་། སྐྱུགས་པ་དང་། འཁྲུ་བ་དག་བོར་ཞིང་མི་གཙང་བས་སྦགས་པའི་གནས་མལ་བཞག་པར་གྱུར་ནས་གདུག་པ་ཁྲོས་ཏེ་སྤྱོད་ཡུལ་ལམ། སྤྱོད་ཡུལ་གྱི་ལམ་ཀའམ། འཆག་སའམ། ཁྱམས་ སམ། སྒོ་ཁང་རྣམས་སུ་འདུག་ནས་དགེ་སློང་རྣམས་ལ་འབབ་པར་བྱེད་དེ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ་ཞེས་བྱ་བ་གོང་མ་བཞིན་ཏེ། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། ། འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་གྱུར་པ་དེ་གཏུམ་པོ་དག་གིས་བཟུང་ངམ། བཙོན་དུ་བཟུང་ངམ། བསད་དམ། གཏུམ་པོའི་འཇིགས་པས་ཡུལ་འཁོར་གཞན་ནམ།

  496. 249a

    ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ཏེ་འདིར་དབྱར་གནས་པར་དམ་བཅས་པ་དེ་གཏུམ་པོ་རྣམས་ཀྱིས་བཟུང་ ངམ། བཙོན་དུ་བཟུང་ངམ། དེའི་ནོར་འཕྲོགས་སམ། གཏུམ་པོའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་བདག་གནས་འདིར་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་ཀླུ་གནས་པའི་ཕྱོགས་ཤིག་ཏུ་གཙུག་ལག་ ཁང་བརྩིགས་ཏེ་ཞེས་བྱ་བའི་བར་གོང་མ་བཞིན་ཏེ། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་ གྱུར་པ་དེ་ཀླུ་རྣམས་ཀྱིས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། ཀླུའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་ དུ་སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་འདིར་དབྱར་གནས་པར་དམ་བཅས་པ་དེ་ཀླུ་རྣམས་ཀྱིས་བཟུང་ངམ། བཙོན་དུ་བཟུང་ངམ། བསད་དམ། དེའི་ནོར་འཕྲོགས་སམ། ཀླུའི་འཇིགས་པས་ཡུལ་འཁོར་ གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་

  497. 249b

    འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་ནགས་ཁྲོད་ཅིག་ཏུ་གཙུག་ལག་ཁང་བརྩིགས་ལ་ཞེས་བྱ་བའི་བར་གོང་མ་བཞིན་ཏེ། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་ དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པར་གྱུར་པ་དེ་མེས་ཚིག་གམ། དེའི་ནོར་མེས་ཚིག་གམ། མེའི་འཇིགས་པས་ཡུལ་འཁོར་གཞན་ནམ། ཡུལ་ གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ཏེ་འདིར་དབྱར་གནས་པར་དམ་བཅས་པ་དེ་མེས་ཚིག་གམ། དེའི་ནོར་མེས་ཚིག་གམ། མེའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་གནས་འདིར་བདག་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་གཤོང་ཞིག་གི་དབུས་སུ་གཙུག་ལག་ཁང་བརྩིགས་ལ་ཞེས་བྱ་བའི་བར་གོང་མ་བཞིན་ཏེ། དེས་དེ་ལྟ་བུས་རྐྱེན་བྱས་ ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་བུད་མེད་དམ། སྐྱེས་པའམ། མ་ནིང་གང་ལ་བརྟེན་ཏེ་དབྱར་གནས་པར་དམ་བཅས་པར་གྱུར་པ་དེ་ཆུས་ཁྱེར་རམ། དེའི་ནོར་ཆུས་ཁྱེར་རམ། ཆུའི་འཇིགས་པས་ཡུལ་འཁོར་ གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་ལ། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། བདག་བུད་མེད་དམ། སྐྱེས་པའམ། མ་ནིང་གང་ལ་བརྟེན་ནས་དབྱར་གནས་པར་དམ་བཅས་པ་དེ་ཆུས་ཁྱེར་རམ། དེའི་ནོར་ཆུས་

  498. 250a

    ཁྱེར་རམ། ཆུའི་འཇིགས་པས་ཡུལ་འཁོར་གཞན་ནམ། ཡུལ་གཞན་དུ་བྲོས་སམ་ཤི་བར་གྱུར་པས། གལ་ཏེ་བདག་གནས་འདིར་དབྱར་གནས་ན་གཞི་དེས་བདག་གི་སྲོག་གི་བར་ཆད་དང་། དགེ་སྦྱོང་གི་ཚུལ་གྱི་བར་ཆད་དང་། ཚངས་པར་སྤྱོད་པའི་ བར་ཆད་དུ་འགྱུར་གྱིས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ།། །།སྡོམ་ལ། དབྱར་རལ་ལྟུང་བ་མེད་པ་དང་། །གནས་པར་དམ་ནི་འཆའ་བ་དག །སྔ་མ་ཡི་ནི་བཅུ་ གཉིས་དང་། །ཕྱི་མ་ཡི་ནི་བཅུ་གཉིས་སོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གིས་དགེ་སློང་ཞིག་དགེ་འདུན་གྱི་དབྱེན་བྱ་བར་རྩོལ་ཞིང་དེ་ལྟ་དེ་ལྟ་བུར་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་ པར་བྱེད་ཅིང་། གང་ཡང་གནས་འདིར་དབྱར་གྱི་ནང་ལོགས་ཉིད་དུ་དགེ་འདུན་བྱེ་བར་འགྱུར་བའི་གནས་འདི་ཡོད་པར་མཐོང་ནས། དེ་ན་དབྱར་གནས་པར་དམ་བཅས་པའི་དགེ་སློང་འདི་སྙམ་དུ་སེམས་ཏེ། གནས་འདིར་བདག་དབྱར་གནས་པར་དམ་བཅས་ན། དགེ་སློང་འདི་དགེ་འདུན་གྱི་དབྱེན་བྱ་བར་རྩོལ་ཞིང་དེ་ལྟ་དེ་ལྟ་བུར་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་གང་ཡང་གནས་འདིར་དབྱར་གྱི་ནང་ལོགས་ཉིད་དུ་དགེ་འདུན་བྱེ་བར་འགྱུར་བའི་གནས་འདི་ཡོད་དེ། གལ་ཏེ་གནས་འདིར་བདག་དབྱར་གནས་ན་གང་ཡང་མི་མཐུན་པའི་སེམས་སྐྱེས་སམ། མ་བརྟགས་པའི་ཚིག་བྱུང་ན་བདག་གི་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་བར་ཆད་དུ་འགྱུར་ བའི་གནས་འདི་ཡོད་པས། མ་ལ་བདག་གནས་འདི་ནས་འགྲོའོ་སྙམ་ནས། དེས་དེ་ལྟ་བུས་རྐྱེན་བྱས་ཏེ་གནས་དེ་ནས་སོང་བ་ལས་དབྱར་རལ་ན་ལྟུང་བ་མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གིས་གནས་ག་གེ་མོ་ཞིག་ཏུ་དགེ་སློང་

  499. 250b

    ཞིག་གིས་དགེ་འདུན་གྱི་དབྱེན་བྱ་བར་རྩོལ་ཞིང་དེ་ལྟ་དེ་ལྟ་བུར་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། གང་ཡང་གནས་དེར་དབྱར་གྱི་ནང་ལོགས་ཉིད་དུ་དགེ་འདུན་བྱེ་བར་འགྱུར་བའི་གནས་འདི་ཡོད་པར་ ཐོས་ལ། དགེ་སློང་དེ་དང་ནི་བདག་ཏུ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་པ། འགྲོགས་བཤེས་པ་ཡིན་གྱིས། གལ་ཏེ་བདག་དེར་སོང་ན་བདག་གིས་ཇི་ལྟར་གནས་དེར་དབྱར་གྱི་ནང་ལོགས་སུ་དགེ་འདུན་བྱེ་བར་མི་འགྱུར་བ་དེ་ལྟ་དེ་ལྟར་བྱ་ནུས་སོ་སྙམ་ ན། དགེ་སློང་གིས་ཞག་བདུན་བྱིན་གྱིས་བརླབས་ལ་དགེ་འདུན་གྱི་བྱ་བའི་ཕྱིར་འགྲོ་བར་བྱ་སྟེ། གལ་ཏེ་དེར་སོང་ན་ལེགས། མ་སོང་ན་འགལ་ཚབས་ཅན་དུ་འགྱུར་རོ། །གལ་ཏེ་དགེ་འདུན་གྱི་བྱ་བའི་ཕྱིར་དེར་སོང་བ་ལས་ཞག་བདུན་འདས་ཏེ་དབྱར་རལ་ན་ལྟུང་བ་ མེད་དོ། །འདི་ལྟར་ཡང་དབྱར་གནས་པར་དམ་བཅས་པའི་དགེ་སློང་གིས་གནས་ག་གེ་མོ་ཞིག་ཏུ་དགེ་སློང་ཞིག་གིས་དགེ་འདུན་གྱི་དབྱེན་བྱ་བར་རྩོལ་ཞིང་དེ་ལྟ་དེ་ལྟ་བུར་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ ཅིང་། གང་ཡང་གནས་དེར་དབྱར་གྱི་ནང་ལོགས་ཉིད་དུ་དགེ་འདུན་བྱེ་བར་འགྱུར་བའི་གནས་འདི་ཡོད་པར་ཐོས་ལ། དགེ་སློང་དེ་དང་བདག་ཏུ་ནི་གཏམ་འདྲེས་པ་དང་། ཕེབས་པར་སྨྲ་བ་དང་། སྨོས་འདྲིན་པ་དང་། འགྲོགས་བཤེས་པ་མ་ཡིན་མོད་ཀྱི། འོན་ཀྱང་ དགེ་སློང་དེ་གང་དང་གཏམ་འདྲིས་པ། ཕེབས་པར་སྨྲ་བ། སྨོས་འདྲིན་པ། འགྲོགས་བཤེས་པའི་དགེ་སློང་དེ་དང་བདག་ཏུ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་པ། འགྲོགས་བཤེས་པ་ཡིན་གྱིས། བདག་དེར་སོང་ལ་བདག་གིས་ཇི་ལྟར་གནས་ དེར་དབྱར་གྱི་ནང་ལོགས་སུ་དགེ་འདུན་བྱེ་བར་མི་འགྱུར་བ་དེ་ལྟ་དེ་ལྟར་བྱ་ནུས་སོ་སྙམ་ནས། དགེ་སློང་གིས་ཞག་བདུན་བྱིན་གྱིས་བརླབས་ལ་དགེ་འདུན་གྱི་བྱ་བའི་ཕྱིར་འགྲོ་བར་བྱ་སྟེ། གལ་ཏེ་སོང་ན་ལེགས། མ་སོང་ན་འགལ་ཚབས་ཅན་དུ་འགྱུར་རོ། །གལ་ཏེ་

  500. 251a

    དགེ་འདུན་གྱི་བྱ་བའི་ཕྱིར་དེར་སོང་བ་ལས་ཞག་བདུན་འདས་ཏེ་དབྱར་རལ་ན་ལྟུང་བ་མེད་དོ། །འདི་ལྟར་ཡང་དགེ་སློང་གིས་གནས་ག་གེ་མོ་ཞིག་ཏུ་དབྱར་སྔ་མ་ཟླ་བ་གསུམ་གནས་པར་དམ་བཅས་པ་ལས་གནས་དེ་གཉིས་ན་རྙེད་པ་ནི་ཐུན་མོང་། གསོ་སྦྱིན་ནི་ཐ་དད་ པ་དང་དེ་འདི་སྙམ་དུ་སེམས་ཏེ། བདག་འདིར་གནས་ཀྱང་རྙེད་པ་ནི་དེར་ཟད། བདག་དེར་གནས་ཀྱང་རྙེད་པ་ནི་དེར་ཟད་དོ་སྙམ་ནས། དེ་དམ་བཅས་པར་མ་སོང་ན་དེའི་གནས་དེར་སྔ་མའི་ཟླ་བ་གསུམ་ཡང་མ་ཡིན་ལ། དམ་བཅས་པས་ཉེས་བྱས་སུ་ཡང་འགྱུར་རོ། ། འདི་ལྟར་ཡང་དགེ་སློང་གིས་གནས་ག་གེ་མོ་ཞིག་ཏུ་སྔ་མའི་ཟླ་བ་གསུམ་གནས་པར་དམ་བཅས་ཏེ། དེ་དམ་བཅས་པར་སོང་ནས་ཚུལ་ཤིང་མ་བླངས་ལ་བྱ་བའི་ཕྱིར་དེ་སོང་ན་དེའི་གནས་དེར་སྔ་མའི་ཟླ་བ་གསུམ་ཡང་མ་ཡིན་ལ། དམ་བཅས་པས་ཉེས་བྱས་སུ་ཡང་ འགྱུར་རོ། །འདི་ལྟར་ཡང་དགེ་སློང་གིས་གནས་ག་གེ་མོ་ཞིག་ཏུ་སྔ་མའི་ཟླ་བ་གསུམ་གནས་པར་དམ་བཅས་ཏེ། དེ་དམ་བཅས་པར་སོང་ནས་ཚུལ་ཤིང་ནི་བླངས་ཀྱིས་གནས་མལ་ནི་མ་བླངས་ལ་བྱ་བའི་ཕྱིར་དེ་སོང་ན་དེའི་གནས་དེར་སྔ་མའི་ཟླ་བ་གསུམ་ཡང་མ་ཡིན་ལ། དམ་བཅས་པས་ཉེས་བྱས་སུ་ཡང་འགྱུར་རོ། །འདི་ལྟར་ཡང་དགེ་སློང་གིས་གནས་ག་གེ་མོ་ཞིག་ཏུ་སྔ་མའི་ཟླ་བ་གསུམ་གནས་སོ་ཞེས་དམ་བཅས་ཏེ། དེ་དམ་བཅས་པར་སོང་ནས་ཚུལ་ཤིང་ཡང་བླངས་གནས་མལ་ཡང་བླངས་ཀྱི། དབྱར་གནས་པར་དམ་བཅས་ ལ། བྱ་བའི་ཕྱིར་དེ་སོང་ན་དེའི་གནས་དེར་སྔ་མའི་ཟླ་བ་གསུམ་ཡང་མ་ཡིན་ལ། དམ་བཅས་པས་ཉེས་བྱས་སུ་ཡང་འགྱུར་རོ། །འདི་ལྟར་ཡང་དགེ་སློང་གིས་གནས་ག་གེ་མོ་ཞིག་ཏུ་སྔ་མའི་ཟླ་བ་གསུམ་གནས་པར་དམ་བཅས་ཏེ། དེ་དམ་བཅས་པར་སོང་ནས་ཚུལ་ ཤིང་ཡང་བླངས། གནས་མལ་ཡང་བླངས། དབྱར་གནས་པར་དམ་བཅས་ལ། བྱ་བའི་ཕྱིར་བྱིན་གྱིས་མ་བརླབས་པར་ཞག་བདུན་མཚམས་ཀྱི་ཕྱི་རོལ་དུ་དེ་སོང་ན་དེའི་གནས་དེར་སྔ་མའི་ཟླ་བ་གསུམ་ཡང་མ་ཡིན་ལ། དམ་བཅས་པས་ཉེས་བྱས་སུ་ཡང་འགྱུར་རོ། །

  501. 251b

    འདི་ལྟར་ཡང་དགེ་སློང་གིས་གནས་ག་གེ་མོ་ཞིག་ཏུ་སྔ་མའི་ཟླ་བ་གསུམ་གནས་སོ་ཞེས་དམ་བཅས་ལ། དེ་དམ་བཅས་པར་སོང་ནས་ཚུལ་ཤིང་ཡང་བླངས། གནས་མལ་ཡང་བླངས། དབྱར་གནས་པར་དམ་ཡང་བཅས་ནས་བྱ་བའི་ཕྱིར་ཞག་བདུན་བྱིན་གྱིས་བརླབས་ལ་ མཚམས་ཀྱི་ཕྱི་རོལ་དུ་སོང་བ་ན་དེའི་གནས་དེར་སྔ་མའི་ཟླ་བ་གསུམ་ཡང་ཡིན་ལ། དམ་བཅས་པ་ལ་ཉེས་བྱས་སུ་ཡང་མི་འགྱུར་ཏེ། གལ་ཏེ་བྱ་བ་དེ་ཉིད་ཀྱི་ཕྱིར་དེའི་ཞག་བདུན་འདས་པ་ལ་དབྱར་རལ་བའི་ལྟུང་བ་མེད་དོ། །བྱ་བའི་ཕྱིར་དྲུག་པོ་ཇི་ལྟ་བ་དེ་བཞིན་དུ་བྱ་བ་མ་ ཡིན་པ་ཡང་དྲུག་གོ། །སྔ་མ་ཟླ་བ་གསུམ་ཇི་ལྟ་བ་དེ་བཞིན་ཕྱི་མ་ཡང་ཟླ་བ་གསུམ་མོ། །དབྱར་གྱི་གཞི་རྫོགས་སོ།། །།ཀོ་ལྤགས་ཀྱི་གཞིའི་སྡོམ་ལ། ལྔས་ནི་བསྙེན་པར་རྫོགས་པ་དང་། །གནས་མལ་ཆེ་དང་བེའུ་དང་ནི། །བཞོན་པ་ཁྲུས་དང་བ་ལང་འཇུག ། ཤིང་ལྷམ་རི་མོ་ཅན་མིན་ནོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་རྡོ་ཅན་ཞེས་བྱ་བའི་ཡུལ་གྱི་མཐའ་ན་གནས་པ་ཞེས་བྱ་བའི་གྲོང་ན་ཁྱིམ་བདག་སྟོབས་ཀྱི་སྡེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱང་བུ་ཕོ་ཡང་མེད། བུ་མོ་ཡང་མེད་ནས། ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་བདག་ལ་བུ་ཕོ་ཡང་མེད། བུ་མོ་ཡང་མེད་པས་ནོར་རྫས་འདི་རྙེད་བདག་གིས་ ཁྱིམ་དུ་བསགས་ཀྱང་། བདག་ཤི་ནས་བདོག་པ་ཐམས་ཅད་བདག་ལ་བུ་མེད་དོ་ཞེས་ནས་རྒྱལ་པོས་དབང་བྱས་པར་འགྱུར་རོ་སྙམ་དུ་སེམས་ཁོང་དུ་ཆུད་ཅིང་འདུག་གོ། །དེའི་མཛའ་བཤེས་དང་ཉེ་དུ་དང་གཉེན་རྣམས་ཀྱིས་སྨྲས་པ། ཁྱོད་ཅིའི་ཕྱིར་སེམས་ཁོང་དུ་ཆུད་

  502. 252a

    ལྷ་ལ་གསོལ་བ་བྱོས་ཤིག །ཁྱོད་ལ་བུ་ཡོད་པར་འགྱུར་རོ། །དེས་བསམས་པ། ལེགས་པ་ཞིག་སྨྲས་ཀྱིས། མ་ལ་བདག་གིས་བུའི་ཕྱིར་ལྷ་རྣམས་ལ་གསོལ་བ་བྱའོ་སྙམ་ནས་བུ་མེད་པ་དེ་བུ་མངོན་པར་འདོད་པའི་ཕྱིར་ཞི་བ་དང་། ཆུ་ལྷ་དང་། ལུས་ངན་ དང་། བརྒྱ་བྱིན་དང་། ཚངས་པ་ལ་སོགས་པ་ལྷ་རྣམས་ལ་ཡང་གསོལ་བ་བྱེད་དེ། འདི་ལྟ་སྟེ་ཀུན་དགའ་ར་བའི་ལྷ་དང་། ནགས་ཚལ་གྱི་ལྷ་དང་། བཞི་མདོའི་ལྷ་དང་། སུམ་མདོའི་ལྷ་དང་། གཏོར་མ་ལེན་པའི་ལྷ་དང་། ལྷན་ཅིག་སྐྱེས་པ་དང་། ཆོས་མཐུན་པ་དང་། རྟག་པར་རྗེས་སུ་འབྲང་བའི་ལྷ་ལ་ཡང་གསོལ་བ་འདེབས་སོ། །འཇིག་རྟེན་ན་གང་དག་གསོལ་བ་འདེབས་པའི་རྒྱུ་ལས་བུ་ཕོ་དང་བུ་མོ་སྐྱེ་བར་འགྱུར་བའི་གཏམ་དེ་ལྟ་བུ་གྲག་སྟེ། དེ་ནི་དེ་ལྟ་མ་ཡིན་ཏེ། གལ་ཏེ་དེ་ལྟར་འགྱུར་དུ་ཟིན་ན་རེ་རེ་ལ་ཡང་འདི་ལྟ་སྟེ། དཔེར་ན་འཁོར་ ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འོན་ཀྱང་གནས་གསུམ་པོ་དག་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་ཏེ། གནས་གསུམ་གང་ཞེ་ན། འདི་ལྟར་ཕ་དང་མ་གཉིས་ཆགས་པར་གྱུར་ཅིང་འདུས་པ་དང་། མ་ཡང་རུང་ཞིང་ཟླ་མཚན་དང་ ལྡན་པ་དང་། དྲི་ཟ་ཉེ་བར་གནས་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་ཅིང་འདུག་པ་ལས་སྲིད་པ་ཐ་མ་པའི་སེམས་ཅན་སྤྱོད་པ་ཚོལ་བ། ཐར་པའི་སྙིང་པོ་བཟུང་བ། མྱ་ངན་ ལས་འདས་པ་ལ་མངོན་དུ་ཕྱོགས་པ། འཁོར་བ་ལས་ཕྱིར་ཕྱོགས་པ། སྲིད་པ་པའི་འགྲོ་བ་ཐམས་ཅད་དུ་འཆི་འཕོ་དང་སྐྱེ་བ་དོན་དུ་མི་གཉེར་བ། ལུས་ཐ་མ་འཛིན་པ་ཞིག་ལྷའི་རིས་ཤིག་ནས་ཤི་འཕོས་ནས་དེའི་ཆུང་མའི་རུམ་དུ་ཞུགས་སོ། །བུད་མེད་མཁས་ པས་རང་བཞིན་ཅན་ཁ་ཅིག་ལ་མ་འདྲེས་པའི་ཆོས་ལྔ་ཡོད་དོ། །ལྔ་གང་ཞེ་ན། སྐྱེས་པ་ཆགས་པ་ཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་། མངལ་དུ་ཞུགས་པ་ཤེས་པ་དང་། གང་ལས་མངལ་དུ་ཞུགས་པ་དེ་

  503. 252b

    ཡང་ཤེས་པ་དང་། བུ་ཕོ་ཤེས་ཤིང་བུ་མོ་ཤེས་པའོ། །གལ་ཏེ་ཁྱེའུར་འགྱུར་ན་དཀུ་གཡས་པར་རྟེན་ཅིང་གནས་སོ། །གལ་ཏེ་བུ་མོར་འགྱུར་ན་དཀུ་གཡོན་པར་རྟེན་ཅིང་གནས་སོ། །དེ་ཡིད་དགའ་ཞིང་མགུ་ནས་ཁྱིམ་ཐབ་ལ་སྨྲས་པ། རྗེའི་སྲས་དགྱེས་པ་བསྐྱེད་དུ་ གསོལ། བདག་ལ་སེམས་ཅན་ཞུགས་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་གནས་པ་ལས་ན་གདོན་མི་ཟ་བར་ཁྱེའུར་འགྱུར་རོ། །དེ་ཡང་དགའ་ཞིང་མགུ་བས་ཆེད་དུ་བརྗོད་པས་ཆེད་དུ་བརྗོད་པ། འདི་ལྟར་བདག་གིས་ཡུན་རིང་མོ་ཞིག་ནས་མངོན་པར་ འདོད་པའི་བུའི་ངོ་མཐོང་བར་འགྱུར་གྱིས། བདག་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང་། བདག་གི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། བདག་གི་རིགས་ཀྱི་རྒྱུད་ཡུན་རིང་དུ་གནས་པར་སྒྲུབ་པ་དང་། བདག་ཅག་ཤི་ཞིང་དུས་ལ་བབ་པ་ན་ཉུང་ངུའམ་མང་པོ་ཡང་རུང་སྦྱིན་པ་དག་བྱིན་ཞིང་བསོད་ནམས་དག་བྱས་ནས་འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་བདག་ཅག་གཉིས་ཀྱི་མིང་ནས་བརྗོད་ཅིང་ཡོན་སྔོ་བ་བྱེད་པར་འགྱུར་རོ་ཞེས་སྨྲས་སོ། ། དེ་ལ་སེམས་ཅན་ཞུགས་པར་ཤེས་ནས་གང་ཡང་མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གྲང་བ་ན་གྲང་བའི་ཡོ་བྱད་དང་། དྲོ་བ་ན་དྲོ་བའི་ཡོ་བྱད་དང་། སྨན་པས་བཅས་པའི་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ ཅང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། མངར་བ་དང་། ཚ་བ་དང་། བསྐ་བ་རྣམས་སྤངས་པའི་ཟས་དང་། སེ་མོ་དོ་དང་། དོ་ཤལ་དག་གིས་བརྒྱན་པའི་ལུས་ལྷའི་བུ་མོ་དགའ་ཚལ་ ན་རྣམ་པར་སྤྱོད་པ་བཞིན་དུ་ཁྲི་ནས་ཁྲི་དང་། ཁྲིའུ་ནས་ཁྲིའུར་རྒྱུ་ཞིང་ཤོད་ཀྱིས་གཞིར་མི་འབབ་སྟེ། སྒྲ་ཡིད་དུ་མི་འོང་བ་ཅུང་ཟད་ཀྱང་མི་གྲག་པར་བྱས་སོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པགས་པའི་

  504. 253a

    མདོག་གསེར་འདྲ་བ། མགོ་གདུགས་ལྟ་བུ་ལག་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། རིན་པོ་ཆེས་སྤྲས་པའི་རྣ་ཆ་རྣ་བ་ལ་བཏགས་པའི་ཁྱེའུ་ཞིག་བཙས་སོ། །གནས་པ་ཞེས་བྱ་བའི་གྲོང་ན་རིན་པོ་ཆེ་དཔྱོད་པ་ ཇི་སྙེད་ཅིག་གནས་པ་དེ་ཐམས་ཅད་ཁྱིམ་བདག་སྟོབས་ཀྱི་སྡེས་རིན་པོ་ཆེ་བརྟག་པའི་ཕྱིར་བཀུག་ནས་སྨྲས་པ། ཤེས་ལྡན་དག་རིན་པོ་ཆེ་རིན་ཐང་ཆོད་ཅིག །དེ་དག་གིས་སྨྲས་པ། རིན་པོ་ཆེའི་རིན་ཐང་གཅད་པར་མི་ནུས་སོ། །ཆོས་ཉིད་ཀྱིས་རིན་ཐང་གཅད་པར་མི་ ནུས་པའི་རིན་པོ་ཆེ་གང་ཡིན་པ་དེ་ནི་བྱེ་བ་རི་བ་ཡིན་པས། དེ་དག་གིས་སྨྲས་པ། ཁྱིམ་བདག་རིན་པོ་ཆེ་འདི་ནི་བྱེ་བ་རིའོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་མིང་འདོགས་པར་བྱེད་དེ། ཤེས་ ལྡན་དག་ཁྱེའུའི་མིང་ཅིར་གདགས། གཉེན་དག་གིས་སྨྲས་པ། ཁྱེའུ་འདི་རིན་པོ་ཆེ་བྱེ་བ་རི་བས་སྤྲས་པའི་རྣ་ཆ་རྣ་བ་ལ་བཏགས་ཤིང་རྒྱུ་སྐར་གྲོ་བཞིན་ལ་བཙས་པས་ཁྱེའུའི་མིང་གྲོ་བཞིན་སྐྱེས་རྣ་བ་བྱེ་བ་རིར་གདགས་སོ་ཞེས་དེའི་མིང་གྲོ་བཞིན་སྐྱེས་རྣ་བ་བྱེ་བ་རིར་བཏགས་ སོ། །གང་གི་ཉི་མ་ལ་གྲོ་བཞིན་སྐྱེས་རྣ་བ་བྱེ་བ་རི་བཙས་པ་དེའི་ཉི་མ་ལ་ཁྱིམ་བདག་སྟོབས་ཀྱི་སྡེའི་མངག་གཞུག་པའི་ཁྱེའུ་གཉིས་བཙས་ཏེ། དེས་གཅིག་གི་མིང་ནི་བྲན་ཞེས་བྱ་བར་བཏགས་སོ། །གཅིག་གི་མིང་ནི་སྐྱོང་བ་ཞེས་བྱ་བར་བཏགས་སོ། །གྲོ་བཞིན་ སྐྱེས་རྣ་བ་བྱེ་བ་རི་མ་མ་བརྒྱད་ལ་རྗེས་སུ་གཏད་དེ། པང་ན་མཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ། མ་མ་བརྒྱད་ཀྱིས་དེ་འོ་མ་དང་། ཞོ་དང་། མར་སར་པ་དང་། ཞུན་མར་ དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་དེ། རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། རྩིས་དང་། གྲངས་དང་། ལག་

  505. 253b

    རྩིས་དང་། དབྱུང་བ་དང་། གཞུག་པ་དང་། གཞག་པ་དང་། ལེན་པ་དང་། གཞི་བརྟག་པ་དང་། རས་བརྟག་པ་དང་། རིན་པོ་ཆེ་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་དང་། ཤིང་བརྟག་པ་ལ་ཉེ་བར་ཞུགས་ཏེ། དེ་བརྟག་པ་བརྒྱད་རྣམས་ལ་བྱང་ཞིང་འབྱེད་པ་དང་། ཀློག་པ་ལ་གཡེར་པོར་གྱུར་ཏོ། །དེའི་ཕས་འདུག་པའི་ཁང་པ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་བརྩིགས་སོ། །སྐྱེད་མོས་ཚལ་གསུམ་ པོ་དགུན་གྱི་དང་། དཔྱིད་ཀྱི་དང་། དབྱར་གྱི་བཙུགས་ནས་ཆུང་མ་གསུམ་པོ་ཆེན་མ་དང་། བར་མ་དང་། ཆུན་མ་ཉེ་བར་བཞག་ནས། དེ་སྟེང་གི་ཁང་བཟངས་ཀྱི་གཞི་ལ་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་ སྤྱོད་པར་བྱེད་དོ། །ཁྱིམ་བདག་སྟོབས་ཀྱི་སྡེ་ནི་རྟག་ཏུ་ཞིང་ལས་ཀྱི་མཐའ་ལ་འབད་དོ། །དེས་ཕ་དེ་རྟག་པར་ཞིང་ལས་ཀྱི་མཐའ་ལ་འབད་པ་མཐོང་ནས་དེ་ལ་སྨྲས་པ། ཡབ་ཁྱོད་ཅིའི་ཕྱིར་རྟག་ཏུ་ཞིང་ལས་ཀྱི་མཐའ་ལ་འབད། དེས་སྨྲས་པ། བུ་ཁྱོད་ ཇི་ལྟར་སྟེང་གི་ཁང་བཟངས་ཀྱི་གཞི་ན་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་བཞིན་དུ་ངས་ཀྱང་རྩེད་མོ་བྱས། དགའ་བར་བྱས། དགའ་མགུར་སྤྱད་ན་རིང་པོར་མི་ཐོགས་པར་བདག་ཅག་གི་ལོངས་སྤྱོད་ འགྲིབས་ཤིང་ཡོངས་སུ་ཟད་པ་དང་གཏུགས་པར་འགྱུར་རོ། །དེས་སྨྲས་པ། ཡབ་གལ་ཏེ་དེ་ལྟ་ན་བདག་ཟོང་ཐོགས་ཏེ་ཡུལ་གྱི་མཐར་མཆིའོ། །བུ་རེ་ཞིག་ང་ལ་རིན་པོ་ཆེའི་རིགས་གལ་ཏེ་ཁྱོད་ཀྱིས་ཏིལ་དང་། འབྲས་དང་། རྒྱ་ཤུག་དང་། མོན་ སྲན་བཞིན་དུ་རིན་པོ་ཆེ་ཡོངས་སུ་སྤྱད་ཀྱང་རིན་པོ་ཆེ་དག་ཡོངས་སུ་ཟད་པར་མི་འགྱུར་བ་ང་ལ་ཡོད་དོ། །དེས་ཡང་དང་ཡང་དུ་སྨྲས་པ། ཡབ་བདག་ནི་ཟོང་ཐོགས་ལ་ཡུལ་གྱི་མཐར་མཆིའོ། །དེས་དེ་ངེས་པར་གལ་གྱིས་འཆུ་བར་ཤེས་ནས་གནང་ངོ་། །

  506. 254a

    ཁྱིམ་བདག་སྟོབས་ཀྱི་སྡེས་གནས་པའི་གྲོང་དུ་དྲིལ་བསྒྲགས་ནས། གནས་པའི་གྲོང་ན་གནས་པའི་ཤེས་ལྡན་ཚོང་པ་དག་ཉོན་ཅིག །གྲོ་བཞིན་སྐྱེས་རྣ་བ་བྱེ་བ་རི་རྒྱ་མཚོ་ཆེན་པོར་འཇུག་པར་འགྱུར་གྱིས། ཤེས་ལྡན་ཁྱེད་ལས་གང་ཞིག་གྲོ་ བཞིན་སྐྱེས་རྣ་བ་བྱེ་བ་རི་དང་ལྷན་ཅིག་ཤོ་གམ་མེད་པ་དང་། བསེལ་བའི་རྔན་པ་མི་དགོས་པ་དང་། གྲུ་བཙས་མི་དགོས་པར་རྒྱ་མཚོ་ཆེན་པོར་འཇུག་པར་སྤྲོ་བ་དེ་དག་རྒྱ་མཚོ་ཆེན་པོར་འགྲོ་བའི་ཟོང་སྡོགས་ཤིག །ཚོང་པ་ལྔ་བརྒྱས་རྒྱ་མཚོ་ཆེན་པོར་འཇུག་པའི་ཟོང་ སྟ་གོན་བྱས་སོ། །ཁྱིམ་བདག་སྟོབས་ཀྱི་སྡེས་ཚོང་པ་ལྔ་བརྒྱ་པོ་རང་གི་ཁྱིམ་དུ་མགྲོན་དུ་བོས་ཏེ་ཟས་བྱིན་ནས་སྨྲས་པ། ཤེས་ལྡན་ཚོང་པ་དག་ཉོན་ཅིག །གྲོ་བཞིན་སྐྱེས་རྣ་བ་བྱེ་བ་རི་ཇི་ལྟར་བདག་གི་བུ་ཡིན་པ་དེ་བཞིན་དུ་ཁྱེད་ཀྱི་ཡང་ཡིན་གྱིས་འདི་ལ་ ཁྱེད་རྣམས་ཀྱིས་གནོད་པ་སྤང་བར་བྱ་ཞིང་ཕན་པ་ལ་སྦྱར་བར་བྱའོ། །དཔོན་པོ་བཀའ་བཞིན་འཚལ་ཞེས་ཚོང་པ་རྣམས་ཀྱིས་ཁྱིམ་བདག་སྟོབས་ཀྱི་སྡེའི་ལྟར་མཉན་ཏོ། །དེ་ནས་ཁྱིམ་བདག་སྟོབས་ཀྱི་སྡེས་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་སྨྲས་སོ། ། བུ་ཁྱོད་ཀྱིས་ཇི་ལྟར་ང་ལས་ཚིག་མཉན་པར་བྱ་ཞིང་བསྒྲུབ་པར་བྱ་བར་སེམས་པ་དེ་བཞིན་དུ་ཚོང་པ་ལྔ་བརྒྱ་པོ་འདི་རྣམས་ཀྱི་ཡང་མཉན་པར་བྱ་ཞིང་བསྒྲུབ་པར་སོམས་ཤིག །ཁྱིམ་བདག་སྟོབས་ཀྱི་སྡེས་བསམས་པ། གྲོ་བཞིན་སྐྱེས་རྣ་བ་བྱེ་བ་རི་བཞོན་པ་ཅི་ འདྲ་བ་ཞིག་གིས་གཏང་སྙམ་མོ། །དེས་བསམས་པ། གལ་ཏེ་གླང་པོ་ཆེའི་བཞོན་པས་འགྲོ་ན་ནི་དེ་ཤིན་ཏུ་བསྐྱང་དཀའ་ཞིང་དགང་དཀའོ། །རྟ་ཡང་བསྐྱང་དཀའ་ལ་དགང་དཀའོ། །བོང་བུ་ནི་གསོ་སླ་ཞིང་དྲན་པ་དང་ལྡན་པས་བོང་བུའི་བཞོན་པས་བཏང་ངོ་། ། སྙམ་ནས་དེས་དེ་ལ་སྨྲས་པ། བུ་གྲོགས་ཀྱི་ཐོག་མ་དང་ཐ་མ་ནས་མ་འགྲོ་ཞིག །གལ་ཏེ་ཆོམ་རྐུན་པ་མཐུ་དང་ལྡན་པར་གྱུར་ན་ནི་འགྲོན་པའི་ཐོག་མ་ནས་འཇོམས་སོ། །གལ་ཏེ་མཐུ་ཆུང་བར་གྱུར་ན་ནི་ཐ་མ་ནས་འཇོམས་ཀྱིས་ཁྱོད་ཚོང་པའི་དབུས་ནས་འགྲོ་

  507. 254b

    བར་བྱ་སྟེ། དེད་དཔོན་བཅོམ་པས་ནི་ཚོང་པ་རྣམས་བཅོམ་ཞེས་བྱའོ། །བྲན་དང་། སྐྱོང་བ་ལ་སྨྲས་པ། ཁྱེད་གཉིས་ཀྱིས་རྣམ་གྲངས་གང་གིས་ཀྱང་གྲོ་བཞིན་སྐྱེས་རྣ་བ་བྱེ་བ་རི་གཏང་བར་མི་བྱའོ། །དེ་ནས་དུས་གཞན་ཞིག་ན་གྲོ་བཞིན་སྐྱེས་རྣ་བ་བྱེ་བ་རི་དགེ་ མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་དག་བྱས་ནས་མའི་གན་དུ་སོང་སྟེ། ཡུམ་བདག་མཆི་ཕྱག་འཚལ་ལོ། །དེས་ངུ་བར་བརྩམས་པ་དང་། དེས་སྨྲས་པ། ཡུམ་ཅིའི་ཕྱིར་བཤུམས། བུ་ཁྱོད་གསོན་པོར་ཁོ་མོ་དང་ནམ་ཞིག་ཕྲད་ སྙམ་མོད། དེས་བསམས་པ། བདག་བཀྲ་ཤིས་པར་བྱས་ཏེ། ཆས་པ་ལ་འདི་འདྲ་བའི་བཀྲ་མི་ཤིས་པ་སྨྲའོ་སྙམ་ནས་དེ་མི་བཟོད་པ་སྐྱེས་ཏེ་སྨྲས་པ། ངན་སོང་ལ་ཅིའི་ཕྱིར་མི་གཟིགས། དེས་སྨྲས་པ། བུ་ཁྱོད་ཀྱིས་ངག་གི་ལས་རྩུབ་པོ་བྱུང་གིས་ ཉེས་པ་ལ་ཉེས་པར་ཤོགས་ཤིག་དང་། དེས་ན་ལས་དེ་ཉིད་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ། །དེས་དེ་ལ་ཉེས་པ་ལ་ཉེས་པར་བཟོད་པར་གསོལ་ཏེ། དེ་ནས་གྲོ་བཞིན་སྐྱེས་རྣ་བ་བྱེ་བ་རི་དགེ་མཚན་དང་། བཀྲ་ཤིས་ དང་། བདེ་ལེགས་སུ་འགྱུར་བ་བྱས་ནས་ཤིང་རྟ་དང་། ཁུར་དང་། པང་ཚད་དང་། གཟེབ་རྣམས་དང་། རྔ་མོ་རྣམས་དང་། བ་ལང་དང་། བོང་བུ་རྣམས་ལ་ཟོང་མང་པོ་བཀལ་ནས་རྒྱ་མཚོ་ཆེན་པོར་ཆས་ཏེ། དེ་དག་རིམ་གྱིས་གྲོང་དང་། གྲོང་ཁྱེར་ དང་། གྲོང་འདབ་དང་། ཚོང་དུས་རྣམས་རྒྱུ་ཞིང་རྒྱ་མཚོ་ཆེན་པོའི་འགྲམ་དུ་ཕྱིན་ནས། རྒྱ་མཚོའི་གྲུ་བོ་ཆེ་ཕུན་སུམ་ཚོགས་པ་ཞིག་བསྒྲུབས་ཏེ། ནོར་བསྒྲུབ་པའི་ཕྱིར་རྒྱ་མཚོ་ཆེན་པོར་ཞུགས་པ་དང་། དེ་རྗེས་སུ་མཐུན་པའི་རླུང་གིས་བདས་ཏེ་རིན་པོ་ཆེའི་ གླིང་དུ་ཕྱིན་ཏོ། །དེས་དེར་བརྟགས་བརྟགས་ནས་རིན་པོ་ཆེ་རྣམས་ཀྱིས་གྲུ་བོ་ཆེ་དཔེར་ན་ཏིལ་ལམ། འབྲས་སམ། རྒྱ་ཤུག་གམ། མོན་སྲན་བཞིན་དུ་བཀང་ནས་དེ་རྗེས་སུ་མཐུན་པའི་རླུང་གིས་བདས་ཏེ་གྲུ་བོ་ཆེ་ཉེ་ཞོ་མེད་པར་འཛམ་བུའི་གླིང་དུ་ཕྱིན་ནས་ཚོང་པ་དེ་དག་རྒྱ་མཚོའི་

  508. 255a

    འགྲམ་དེ་ཉིད་དུ་འབྲང་བཏབ་བོ། །དེས་ཀྱང་བྲན་དང་སྐྱོང་བ་ཁྲིད་དེ། ཕྱོགས་གཅིག་ཏུ་དོང་ནས་འདུ་བ་དང་འགོད་པའི་རྩིས་བྱ་བར་བརྩམས་སོ། །ཕྱི་ཞིག་ནས་དེས་བྲན་ལ་སྨྲས་པ། བྲན་ཚོང་པ་རྣམས་ཅི་དག་བྱེད་ལྟོས་ཤིག །དེ་དེར་སོང་ན་ ཅི་ཙམ་ན་ཚོང་པ་རྣམས་གཉིད་ལོག་པ་མཐོང་ནས། དེ་ཡང་དེ་ཉིད་དུ་ཉལ་ལོ། །བྲན་རིང་ཞིག་ཐོགས་ནས་དེས་སྐྱོང་བ་ལ་སྨྲས་པ། སྐྱོང་བ་ཚོང་པ་རྣམས་ཅི་དག་བྱེད་པ་ལྟོས་ཤིག །དེས་དེར་སོང་ན་ཇི་ཙམ་ན་ཚོང་པ་རྣམས་ཁལ་འགེལ་བ་མཐོང་ནས་དེས་ཀྱང་ ཁལ་དགལ་བར་བརྩམས་སོ། །བྲན་གྱིས་བསམས་པ། སྐྱོང་བས་དེད་དཔོན་སྦྲན་གྲང་སྙམ་མོ། །སྐྱོང་བས་བསམས་པ། བྲན་གྱིས་དེད་དཔོན་སྦྲན་གྲང་སྙམ་མོ། །ཚོང་པ་དེ་དག་ནི་ཁལ་བཀལ་ནས་དོང་ངོ་། །གྲོ་བཞིན་སྐྱེས་རྣ་བ་བྱ་བའི་ བ་ནི་གཉིད་ཀྱིས་མྱོས་ནས་ཉལ་ལོ། །ཚོང་པ་དེ་རྣམས་དོང་བ་ལས་ཅི་ཙམ་ན་ནམ་ནངས་ནས་དེ་དག་གིས་སྨྲས་པ། ཤེས་ལྡན་དག་དེད་དཔོན་ག་རེ། དེད་དཔོན་སྔར་སོང་ངོ་། །སྔོན་དུ་སོང་ནས་དེད་དཔོན་ག་རེ་ཞེས་དྲིས་པ་དང་མཇུག་ནས་འོང་ངོ་། ། མཇུག་ཏུ་སོང་སྟེ་དེད་དཔོན་ག་རེ་ཞེས་དྲིས་པ་དང་བར་ནས་སོང་ངོ་། །བར་དུ་སོང་སྟེ་དྲིས་པ་ལས་གང་ན་ཡང་མི་སྣང་ནས། བྲན་གྱིས་སྨྲས་པ། བདག་གི་བློ་སྐྱེས་པ་སྐྱོང་བས་དེད་དཔོན་སྦྲན་གྲང་སྙམ་མོ། །སྐྱོང་བས་སྨྲས་པ། བདག་ གི་བློ་སྐྱེས་པ། བྲན་གྱིས་དེད་དཔོན་སྦྲན་གྲང་སྙམ་མོ། །ཤེས་ལྡན་དག་གང་ཡང་བདག་ཅག་གིས་དེད་དཔོན་བོར་ནས་དོང་བས་ནི་བཟང་པོ་མ་ཡིན་གྱིས་ཕྱིར་འདོང་གིས་ཚུར་ཤེག །དེ་དག་གིས་སྨྲས་པ། ཤེས་ལྡན་དག་གལ་ཏེ་བདག་ཅག་ཕྱིར་ ལོག་ན་ཐམས་ཅད་ཚུལ་མ་ཡིན་པས་སྡུག་བསྔལ་བར་འགྱུར་གྱིས་ཚུར་ཤེག །རེ་ཞིག་ནང་ཁྲིམས་ཤིག་བཅའ་བར་བྱ་སྟེ། གང་ཡང་བདག་ཅག་གི་རྫས་རྣམས་མ་བྲུབས་ཀྱི་བར་དུ་རེ་ཞིག་སུས་ཀྱང་གྲོ་བཞིན་སྐྱེས་རྣ་བ་བྱེ་བ་རིའི་ཕ་མ་ལ་གཏམ་བསྙད་པར་

  509. 255b

    མི་བྱའོ་ཞེས་དེ་རྣམས་ཀྱིས་ནང་ཁྲིམས་སུ་བཅའ་བ་དག་བྱས་ནས་དོང་ངོ་། །གྲོ་བཞིན་སྐྱེས་རྣ་བ་བྱེ་བ་རི་བའི་ཕ་མས་གྲོ་བཞིན་སྐྱེས་རྣ་བ་བྱེ་བ་རི་འོངས་སོ་ཞེས་ཐོས་ནས་དེ་གཉིས་བསུར་དོང་ནས། དེད་དཔོན་ག་རེ་སྔར་སོང་ངོ་། །དེ་གཉིས་སྔོན་དུ་སོང་ནས་དེད་དཔོན་ ག་རེ་ཞེས་དྲིས་པ་དང་མཇུག་ནས་འོང་ངོ་། །མཇུག་ཏུ་དོང་ནས་དེད་དཔོན་ག་རེ་ཞེས་དྲིས་པ་དང་བར་ནས་སོང་ངོ་ཞེས་རྫས་རྣམས་བྲུབས་ཀྱི་བར་དུ་མགོ་རྨོངས་སུ་བཅུག་ནས། དེའི་འོག་ཏུ་སྨྲས་པ། ཡབ་ཡུམ་བདག་ཅག་གིས་དེད་དཔོན་བརྗེད་དོ། །དེ་ གཉིས་ཀྱི་དྲུང་དུ་གཅིག་ཅིག་འོངས་ནས་ཡབ་ཡུམ་གྲོ་བཞིན་སྐྱེས་རྣ་བ་བྱེ་བ་རི་མཆིས་སོ་ཞེས་སྨྲས་པ་དང་། དེ་དག་གིས་དེ་ལ་རྔན་པ་བྱིན་ནས་བསུར་དོང་ནས་མ་མཐོང་ངོ་། །ཡང་གཞན་ཞིག་འོངས་ནས་ཡབ་ཡུམ་གྲོ་བཞིན་སྐྱེས་རྣ་བ་བྱེ་བ་རི་མཆིས་སོ་ཞེས་ སྨྲས་པ་དང་། དེ་དག་གིས་དེ་ལ་རྔན་པ་བྱིན་ནས་བསུར་དོང་ན་ཅང་མ་མཐོང་སྟེ། དེ་ལྟར་སུ་ལ་ཡང་ཡིད་མི་ཆེས་སོ། །དེ་གཉིས་ཀྱིས་སྐྱེད་མོས་ཚལ་དང་། ལྷ་ཁང་དང་། འདུན་ཁང་རྣམས་སུ་གདུགས་དང་། དྲིལ་བུ་དང་། རྔ་ཡབ་རྣམས་ཕུལ་ནས་ གལ་ཏེ་གྲོ་བཞིན་སྐྱེས་རྣ་བ་བྱེ་བ་རི་གསོན་པར་གྱུར་ན་མྱུར་དུ་འོང་བ་དང་། ལ་གོར་འོང་བར་གྱུར་ཅིག །གལ་ཏེ་དུས་ལས་འདས་ཏེ་ཤི་འཕོས་པར་གྱུར་ན་འགྲོ་བའི་གནས་གནས་ཁྱད་པར་ཅན་དུ་སྐྱེ་བར་གྱུར་ཅིག་ཅེས་ཡི་གེར་བྲིས་སོ། །དེ་གཉིས་ནི་མྱ་ངན་དང་ ངུད་མོས་ལོང་བར་གྱུར་ཏོ། །དེ་ཡང་ཉི་མ་འཆར་ཀའི་ཚེ་ཉི་མའི་ཟེར་གྱིས་ཕོག་ནས་སང་ན་དེ་ན་བོང་བུ་གཉིས་འདུག་པ་མ་གཏོགས་པར་ཚོང་པ་གང་ཡང་མ་མཐོང་ངོ་། །དེས་དེ་གཉིས་སྦྲེལ་ཏེ་དེད་དེ་སོང་བ་ན་རླུང་ལངས་པས་ལམ་བྱེ་མས་ཡོག་པ་བོང་བུ་དྲན་པ་དང་ ལྡན་པས་ལམ་སྣས་སྣོམ་ཞིང་དལ་གྱིས་སོང་བ་དང་། དེས་ལྕག་གཟེར་བུ་ཅན་གྱིས་གཞུས་ཤིང་དེད་པ་ལས་དེ་གཉིས་ཀྱི་དྲན་པ་འཁྲུགས་ནས་ཤིང་སཱ་ལའི་དགོན་པ་ཞིག་ཏུ་ཕྱིན་ཏོ། །དེ་གཉིས་སྐོམ་པས་སྲོ་ཤི་ཞིང་ལྕེ་ཕྱུང་སྟེ་ཕན་ཚུན་འཐོམ་པ་དེས་མཐོང་ནས་

  510. 256a

    སྙིང་རྗེ་སྐྱེས་ཏེ། དེས་བསམས་པ། གལ་ཏེ་བདག་གིས་མ་བཞག་ན་འདི་དང་ལྷན་ཅིག་ཏུ་ཚུལ་མ་ཡིན་པས་སྡུག་བསྔལ་བར་འགྱུར་རོ་སྙམ་ནས་དེས་དེ་གཉིས་བོར་ཏེ་རྐང་པས་སོང་བ་ལས། དེས་ཇི་ཙམ་ན་ལྕགས་ཀྱི་གྲོང་ཁྱེར་མཐོ་ཞིང་རྒྱ་ཆེ་བ་དེའི་ སྒོ་ན་སྐྱེས་བུ་གནག་ལ་ཆེ་བ། མིག་དམར་བ། བྱིན་སྙིང་རློ་བ་ལག་ན་དབྱུག་པ་ཐོགས་པ་ཞིག་འདུག་པ་མཐོང་ནས། དེ་དེའི་དྲུང་དུ་སོང་སྟེ། ཀྱེ་ནང་རྗེ་འདི་ན་ཆུ་ཡོད་དམ། དེ་ཡང་ཅང་མི་སྨྲ་བར་འདུག་གོ། །དེས་ཡང་དྲིས་པ། ཀྱེ་ནང་རྗེ་འདི་ན་ཆུ་ཡོད་དམ། འོན་ཀྱང་དེ་ཡང་མི་སྨྲ་བར་འདུག་གོ། །དེས་དེར་ཞུགས་ཏེ་ཆུ་ཆུ་ཞེས་བྱ་བའི་སྒྲ་ཕྱུང་བ་དང་ཡི་དགས་ལུས་སྡོང་དུམ་ཚིག་པ་འདྲ་བ། རུས་གོང་བསྒྲེང་བ་ལྟ་བུ་རང་གི་སྤུ་དང་སྐྲས་ཡོག་པ། ལྟོ་རི་སུལ་ལྟར་འདུག་པ། ཁབ་ཀྱི་མིག་ཙམ་གྱི་ཁ་ཡོད་པ་བརྒྱ་སྟོང་ དུ་མས་ཡོངས་སུ་བསྐོར་ནས་གྲོ་བཞིན་སྐྱེས་སྙིང་རྗེ་དང་ལྡན་པ་ཁྱོད་ཀྱིས་བདག་ཅག་སྐོམ་པ་ལ་ཆུ་ལུད་ཅིག །དེས་སྨྲས་པ། ཤེས་ལྡན་དག་བདག་ཀྱང་ཆུ་སློང་ན་བདག་གིས་ཆུ་བླུད་དུ་ག་ལ་ཡོད། དེ་དག་གིས་སྨྲས་པ། གྲོ་བཞིན་སྐྱེས་ཡི་དགས་ཀྱི་གྲོང་ ཁྱེར་འདི་ན་ཆུ་ག་ལ་ཡོད། བདག་ཅག་གིས་ལོ་བཅུ་གཉིས་ཀྱི་བར་དུ་ཆུ་ཆུ་ཞེས་བྱ་བའི་མིང་དེང་ཐོས་སོ། །ཤེས་ལྡན་དག་ཁྱེད་ཅག་སུ་ཞིག་ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ ཆེས་སོ། །ཤེས་ལྡན་དག་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེ་དག་གིས་ཚིགས་སུ་བཅད་དེ་སྨྲས་པ། བདག་ཅག་ངག་རྩུབ་ཁྲོ་ལྡན་ཞིང་། །བདག་ཅག་སེར་སྣ་འཇུངས་པ་ཅན། །སྦྱིན་པ་ཅུང་ཟད་མ་བཏང་དེས། །བདག་ ཅག་ཡི་དགས་འཇིག་རྟེན་ལྷགས། །གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་གྱིས་སོང་ཤིག །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེ་སོང་བ་དང་། ཇི་ཙམ་ན་སྐྱེས་བུ་

  511. 256b

    དེ་མཐོང་ནས་དེས་དེ་ལ་སྨྲས་པ། ཨེ་མའོ་བཞིན་བཟངས་ཁྱོད་ཀྱིས་ཁོ་བོ་ལ་འདི་ལྟ་སྟེ། འདི་ནི་ཡི་དགས་ཀྱི་གྲོང་ཁྱེར་ཡིན་ནོ། །ཞེས་སྨྲས་པ་དང་། ཁོ་བོ་དེར་མི་འཇུག་པ་ཞིག །དེས་སྨྲས་པ། གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ ཆེན་པོ་དང་ལྡན་གྱིས་སོང་ཤིང་། །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེས་སོང་བ་ལས་ཇི་ཙམ་ན་ལྕགས་ཀྱི་གྲོང་ཁྱེར་མཐོ་ཞིང་རྒྱ་ཆེ་བ་ཞིག་གི་སྒོ་ན་སྐྱེས་བུ་གནག་ལ་ཆེ་བ། མིག་ དམར་བ། བྱིན་སྙིང་རློ་བ། ལག་ན་དབྱིག་པ་ཐོགས་པ་ཞིག་འདུག་པ་མཐོང་ནས། དེ་དེའི་དྲུང་དུ་སོང་སྟེ། ཀྱེ་ནང་རྗེ་འདི་ན་ཆུ་ཡོད་དམ། དེ་ཅང་མི་སྨྲ་བར་འདུག་པ་དང་། དེ་ལ་ཡང་ཀྱེ་ནང་རྗེ་འདི་ན་ཆུ་ཡོད་དམ། དེ་འོན་ཀྱང་ཅང་མི་སྨྲ་བར་འདུག་གོ། ། དེས་དེར་ཞུགས་ཏེ་ཆུ་ཆུ་ཞེས་བྱ་བའི་སྒྲ་ཕྱུང་བ་དང་། ཡི་དགས་སྡོང་དུམ་ཚིག་པ་འདྲ་བ་རུས་གོང་བསྒྲེང་བ་ལྟ་བུ་རང་གི་སྐྲ་དང་སྤུས་ཡོག་པ། ལྟོ་རི་སུལ་ལྟར་འདུག་པ། ཁབ་ཀྱི་མིག་ཙམ་གྱི་ཁ་ཡོད་པ་བརྒྱ་སྟོང་དུ་མས་ཡོངས་སུ་བསྐོར་ནས་གྲོ་བཞིན་སྐྱེས་སྙིང་ རྗེ་དང་ལྡན་པ་ཁྱོད་ཀྱིས་བདག་ཅག་སྐོམ་པ་རྣམས་ལ་ཆུ་ལུད་ཅིག །དེས་སྨྲས་པ། ཤེས་ལྡན་དག་བདག་ཉིད་ཀྱང་ཆུ་སློང་ན་བདག་གིས་ཆུ་བླུད་དུ་ག་ལ་ཡོད། དེ་དག་གིས་སྨྲས་པ། གྲོ་བཞིན་སྐྱེས་ཡི་དགས་ཀྱི་གྲོང་ཁྱེར་འདི་ན་ཆུ་ག་ལ་ཡོད། བདག་ཅག་ གིས་ལོ་བཅུ་གཉིས་ལོན་ན་ཆུ་ཆུ་ཞེས་བྱ་བའི་སྒྲ་ཁྱོད་ལས་དེང་ཐོས་སོ། །ཤེས་ལྡན་དག་ཁྱེད་ཅག་སུ་ཞིག །ལས་གང་གིས་འདིར་སྐྱེས། དེ་དག་གིས་སྨྲས་པ། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། ། ཤེས་ལྡན་དག་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེ་དག་གིས་ཚིགས་སུ་བཅད་དེ་སྨྲས་པ། ནད་མེད་རྒྱགས་པས་མྱོས་པ་དང་། །ལང་ཚོ་ལོངས་སྤྱོད་དྲེགས་མྱོས་ཏེ། སྦྱིན་པ་ཅི་ཡང་མ་བཏང་བས། །བདག་ཅག་ཡི་དགས་

  512. 257a

    འཇིག་རྟེན་ལྷགས། །གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་པས་སོང་ཤིག །ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེ་སོང་བ་དང་ཅི་ཙམ་ན་སྐྱེས་བུ་དེ་མཐོང་ནས་ དེས་དེ་ལ་སྨྲས་པ། ཨེ་མའོ་བཞིན་བཟངས་ཁྱོད་ཀྱིས་ཁོ་བོ་ལ་འདི་ལྟ་སྟེ། འདི་ནི་ཡི་དགས་ཀྱི་གྲོང་ཁྱེར་ཡིན་ནོ་ཞེས་སྨྲས་པ་དང་། ཁོ་བོ་དེར་མི་འཇུག་པ་ཞིག །དེས་སྨྲས་པ། གྲོ་བཞིན་སྐྱེས་ཁྱོད་བསོད་ནམས་ཀྱི་མཐུ་ཆེན་པོ་དང་ལྡན་པས་སོང་ཤིག ། ཡི་དགས་ཀྱི་གྲོང་ཁྱེར་དུ་ཞུགས་པ་ལ་གསོན་པོར་འགྲོ་བ་འགའ་ཡང་ཁྱོད་ཀྱིས་མཐོང་བ་ཡོད་དམ། དེ་སོང་བ་དང་། ཅི་ཙམ་ན་ཉི་མ་ནུབ་ཀའི་དུས་སུ་གཞལ་མེད་ཁང་ཞིག་མཐོང་སྟེ། དེ་ན་ལྷ་མོ་གཟུགས་བཟང་བ་མཛེས་པ། བལྟ་ན་སྡུག་པ་བཞི་དང་། སྐྱེས་ བུ་གཟུགས་བཟང་བ། མཛེས་པ། བལྟ་ན་སྡུག་པ་དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་གཅིག་དང་དེ་དག་ཏུ་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ དག་གིས་དེ་རྒྱང་རིང་པོ་ཁོ་ན་ནས་མཐོང་ནས། དེ་དག་གིས་སོ་སོ་ནས་སྨྲ་བར་བརྩམས་པ། གྲོ་བཞིན་སྐྱེས་འོངས་པ་ལེགས་སོ། །མི་སྐོམ་མམ། མི་བཀྲེས་སམ། དེས་བསམས་པ། གདོན་མི་ཟ་བར་ལྷའམ། ཀླུའམ། གནོད་སྦྱིན་ཞིག་ཡིན་ ནོ་སྙམ་ནས་བདག་སྐོམ་མོ། །བདག་བཀྲེས་སོ། །དེ་དག་གིས་ཁྲུས་བྱས་ནས་ཟན་བྱིན་ཏེ་གཞལ་མེད་ཁང་དེ་ཉིད་དུ་ཇི་ཙམ་ཉི་མ་མ་ཤར་གྱི་བར་དུ་འདུག་པ་དང་། དེ་ལ་དེ་དག་གིས་སྨྲས་པ། གྲོ་བཞིན་སྐྱེས་འདིར་ཉེས་དམིགས་དག་འབྱུང་བར་འགྱུར་ གྱིས་བྱུང་ཤིག །དེ་བྱུང་ནས་མཐའ་གཅིག་ཏུ་སོང་སྟེ་གནས་སོ། །དེ་ནས་ཕྱི་ཞིག་ན་ཉི་མ་ཤར་བའི་དུས་ཀྱི་ཚེ་གཞལ་མེད་ཁང་དེ་ཡང་མི་སྣང་། ལྷའི་བུ་མོ་ཡང་མི་སྣང་བར་གྱུར་ཏེ། ཁྱི་སྲེ་བོ་བཞི་ཞིག་བྱུང་ནས་དེ་དག་གིས་སྐྱེས་པ་དེ་ཁས་བུབ་ཏུ་བསྙལ་

  513. 257b

    ཏེ་རྒྱབ་ཀྱི་ཤ་ལྤགས་ཁམ་ཚད་ཁམ་ཚད་དུ་བཅད་དེ། ཇི་ཙམ་ཉི་མ་ནུབ་ཀྱི་བར་དུ་ཟོས་སོ། །དེའི་འོག་ཏུ་ཡང་གཞལ་མེད་ཁང་ཡང་སླར་བྱུང་། ལྷའི་བུ་མོ་ཡང་བྱུང་བར་གྱུར་ཏེ། སྐྱེས་པ་གཟུགས་བཟང་བ། མཛེས་པ། བལྟ་ན་སྡུག་པ། དཔུང་རྒྱན་ དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་དེ་དང་དེ་དག་ཏུ་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དག་གི་དྲུང་དུ་སོང་ནས་ཤེས་ལྡན་དག་ཁྱེད་ཅག་སུ་ཞིག །ལས་གང་ གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །ཤེས་ལྡན་དག་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། གྲོ་བཞིན་སྐྱེས་བདག་གནས་པའི་གྲོང་གི་ཤེན་པར་ གྱུར་པ་ན་ལུག་བསད་དེ་བསད་པའི་ཤ་བཙོངས་པས་འཚོ་བར་བྱེད་པ་ལས་འཕགས་པ་ཀཱ་ཏྱཱ་ཡ་ན་ཆེན་པོས་བདག་ལ་ཐུགས་བརྩེ་བའི་ཕྱིར་བྱོན་ནས། བཞིན་བཟངས་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་ སྡིག་པ་སྤོང་ཤིག་ཅེས་གསུངས་ན། དེས་གསུངས་པ་བཞིན་དུ་བདག་གིས་མ་སྤངས་པ་དང་། དེས་བདག་ལ་སྤོང་དུ་གཞུག་པའི་ཕྱིར་ཡང་དང་ཡང་དུ་བཞིན་བཟངས་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་ མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན། འོན་ཀྱང་བདག་གིས་མ་སྤངས་ནས་དེས་བདག་ལ་སྨྲས་པ། བཞིན་བཟངས་ཁྱོད་ཅི་ལུག་ཉིན་པར་རམ། ནུབ་མོ་གསོད། བདག་གིས་སྨྲས་པ། འཕགས་པ་ཉིན་པར་རོ། །དེས་ཅིའི་ ཕྱིར་ནུབ་མོ་ཚུལ་ཁྲིམས་ཡང་དག་པར་མནོད་པ་མི་གཟུང་ཞེས་གསུངས་ནས། དེ་ལས་བདག་གིས་ནུབ་མོ་ཚུལ་ཁྲིམས་ཡང་དག་པར་མནོས་ཏེ་བཟུང་བ་དེའི་ལས་ཀྱི་རྣམ་པར་སྨིན་པའི་འབྲས་བུས་ནུབ་མོ་འདི་ལྟ་བུའི་བདེ་བ་ཉམས་སུ་མྱོང་ངོ་། །གང་ཡང་ཉིན་

  514. 258a

    པར་ལུག་བསད་པ་དེའི་ལས་ཀྱི་རྣམ་པར་སྨིན་པས་ཉིན་པར་འདི་ལྟ་བུའི་སྡུག་བསྔལ་ཉམས་སུ་མྱོང་ངོ་། །ཚིགས་སུ་བཅད་དེ། ཡང་སྨྲས་པ། ཉིན་པར་གཞན་གྱི་སྲོག་གཅོད་ཅིང་། །ནུབ་མོ་ཚུལ་ཁྲིམས་ཡོན་ཏན་ལྡན། །ལས་དེའི་ འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །གྲོ་བཞིན་སྐྱེས་ཁྱོད་གནས་པའི་གྲོང་དུ་འགྲོའམ། དེ་ན་བདག་གི་བུ་ཤེན་པ་བགྱིད་པ་དེ་ལ་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་ གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ་ཞེས་གསུང་ཤིག །ཀྱེ་ནང་རྗེ་ཁྱོད་ཀྱིས་ཁོ་བོ་ལ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའོ་ཞེས་སྨྲས་པས་ཡིད་ཆེས་པར་མི་འགྱུར་རོ། །གྲོ་བཞིན་སྐྱེས་གལ་ཏེ་ཡིད་མི་ཆེས་ན་ དེ་ལ་ཁྱོད་ཀྱི་ཕ་དེ་ན་རེ་རལ་གྲིས་བསད་པའི་སའི་འོག་ན་གསེར་ཕྱེ་བུམ་པ་གང་བཞག་གིས་དེ་ཕྱུང་སྟེ། བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ་བདག་ཅག་གི་མིང་ནས་ ཕྱུང་སྟེ་ཡོན་བསྔོ་བ་བྱོས་ཤིག་དང་། དེ་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་གསུང་ཤིག །དེ་སོང་བ་ལས་ཇི་ཙམ་ན་ཉི་མ་འཆར་ཀའི་དུས་སུ་གཞལ་མེད་ཁང་གཞན་ཞིག་མཐོང་སྟེ། དེ་ན་ལྷ་མོ་གཟུགས་ བཟང་བ། མཛེས་པ། བལྟ་ན་སྡུག་པ་གཅིག་དང་། སྐྱེས་པ་གཟུགས་བཟང་བ། མཛེས་པ། བལྟ་ན་སྡུག་པ། དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་གཅིག་དང་ དེར་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དེ་དག་གིས་རྒྱང་རིང་པོ་ནས་མཐོང་ནས་སོ་སོ་ནས་སྨྲ་བར་བརྩམས་པ། གྲོ་བཞིན་སྐྱེས་འོངས་པ་ལེགས་སོ། །མི་སྐོམ་མམ། མི་བཀྲེས་སམ། དེས་

  515. 258b

    བསམས་པ། གདོན་མི་ཟ་བར་ལྷའམ། ཀླུའམ། གནོད་སྦྱིན་ཞིག་ཡིན་ནོ་སྙམ་ནས་བདག་སྐོམ་མོ། །བདག་བཀྲེས་སོ། །དེ་དག་གིས་དེ་ཁྲུས་བྱས་ནས་ཟན་བྱིན་ཏེ། དེ་གཞལ་མེད་ཁང་དུ་ཇི་ཙམ་ཉི་མ་ནུབ་ཀྱི་བར་དུ་འདུག་པ་དང་། དེ་ལ་དེ་དག་ གིས་སྨྲས་པ། གྲོ་བཞིན་སྐྱེས་འདིར་ཉེས་དམིགས་དག་འབྱུང་བར་འགྱུར་གྱིས་བྱུང་ཤིག །དེས་ཉེས་དམིགས་དག་མཐོང་བས་བྱུང་སྟེ་མཐའ་གཅིག་ཏུ་འདུག་གོ། །དེའི་འོག་ཏུ་ཉི་མ་ནུབ་ཀའི་དུས་ཀྱི་ཚེ་དེ་ན་གཞལ་མེད་ཁང་ཡང་མི་སྣང་། ལྷ་མོ་དེ་ཡང་མི་ སྣང་གི། སྲིན་གྱི་མེད་ཆེན་པོ་ཞིག་བྱུང་སྟེ། དེས་སྐྱེས་པ་དེའི་ལུས་ལ་ལུས་ཀྱིས་ལན་བདུན་དུ་དཀྲིས་ནས་སྟེང་དུ་བྱུང་སྟེ། དེས་ནམ་ཉི་མ་ཤར་བའི་བར་དུ་ཀླད་རྒྱས་ཟ་བར་བྱེད་དོ།། །།འདུལ་བ་གཞི། བམ་པོ་ཉི་ཤུ་གཅིག་པ། དེ་ ནས་དེའི་འོག་ཏུ་གཞལ་མེད་ཁང་ཡང་སླར་བྱུང་། ལྷ་མོ་དེ་ཡང་སླར་བྱུང་ནས་སྐྱེས་པ་གཟུགས་བཟང་བ། མཛེས་པ། བལྟ་ན་སྡུག་པ། དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་དེ་དང་དེར་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དེ་དག་གི་དྲུང་དུ་སོང་སྟེ་སོང་ནས་སྨྲས་པ། ཤེས་ལྡན་དག་ཁྱེད་ཅག་སུ་ཞིག །ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། ། བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེས་སྨྲས་པ། གནས་པའི་གྲོང་ན་བདག་བྲམ་ཟེར་གྱུར་ཏེ། བྱི་བོ་བྱེད་པ་ལས་འཕགས་པ་ཀཱ་ཏྱཱ་ཡ་ན་ཆེན་པོས་བདག་ལ་ཐུགས་བརྩེ་བའི་ཕྱིར་བྱོན་ནས་གསུངས་པ། བཞིན་བཟངས་ལས་ འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན། དེ་གསུངས་པ་བཞིན་དུ་བདག་གིས་མ་སྤངས་པ་དང་། དེས་བདག་ལ་སྤོང་དུ་གཞུག་པའི་ཕྱིར་ཡང་དང་ཡང་དུ་བཞིན་བཟངས་ལས་

  516. 259a

    འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་གསུངས་ན་འོན་ཀྱང་བདག་གིས་དེ་མ་སྤངས་སོ། །དེས་བདག་ལ་སྨྲས་པ་བཞིན་བཟངས་ཁྱོད་ཉིན་པར་བྱི་བོ་ལ་འགྲོའམ་ནུབ་མོ། བདག་གིས་དེ་ལ་སྨྲས་པ། འཕགས་པ་ནུབ་མོའོ། །དེས་བཞིན་བཟངས་ཅིའི་ཕྱིར་ཉིན་པར་ཚུལ་ཁྲིམས་ཡང་དག་པར་མནོས་ཏེ་མི་གཟུང་དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་རོ། །ཞེས་གསུངས་ ནས། དེ་ལས་བདག་གིས་ཉིན་པར་ཚུལ་ཁྲིམས་ཡང་དག་པར་མནོས་ཏེ་བཟུང་ངོ་། །གང་ཡང་ཉིན་པར་ཚུལ་ཁྲིམས་ཡང་དག་པར་མནོས་ཏེ་བཟུང་བ་དེའི་ལས་ཀྱི་རྣམ་པར་སྨིན་པས་ཉིན་པར་བདེ་བ་འདི་ལྟ་བུ་ཉམས་སུ་མྱོང་ངོ་། །གང་ཡང་མཚན་མོ་ བྱི་བོ་བྱེད་དུ་སོང་བ་དེའི་ལས་ཀྱི་རྣམ་པར་སྨིན་པས་མཚན་མོ་སྡུག་བསྔལ་འདི་ལྟ་བུ་ཉམས་སུ་མྱོང་བར་གྱུར་ཏོ། །ཚིགས་སུ་བཅད་དེ་ཡང་སྨྲས་པ། མཚན་མོ་བྱི་བོ་བྱེད་ལ་ཆགས། །ཉིན་པར་ཚུལ་ཁྲིམས་ཡོན་ཏན་ལྡན། །ལས་དེའི་འབྲས་བུ་བཟང་ པོ་དང་། །སྡིག་ཏོ་འདི་ནི་མྱོང་བ་ཡིན། །གྲོ་བཞིན་སྐྱེས་ཁྱོད་གནས་པའི་གྲོང་དུ་འགྲོ་འམ། དེ་ན་བདག་གི་བུ་བྲམ་ཟེ་བྱི་བོ་བྱེད་པ་ལ་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས། དམ་པ་མ་ ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །ཞེས་གསུང་ཤིག །དེས་སྨྲས་པ། ཀྱེ་ནང་རྗེ་ཁྱོད་ན་རེ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའོ་ཞེས་སྨྲས་པས་ཡིད་ཆེས་པར་མི་འགྱུར་རོ། །གྲོ་བཞིན་སྐྱེས་གལ་ཏེ་ཡིད་མི་ཆེས་ན་དེ་ ལ་ཁྱོད་ཀྱི་ཕ་ན་རེ་མེ་ཐབ་ཀྱི་འོག་ན་གསེར་ཕྱེ་བུམ་པ་གང་བཞག་གིས་དེ་ཕྱུང་སྟེ། བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་གྱིས་

  517. 259b

    ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ་ཞེས་གསུང་ཤིག །དེ་སོང་བ་དང་ཇི་ཙམ་ན་གཞལ་མེད་ཁང་གཞན་ཞིག་མཐོང་སྟེ། དེ་ན་བུད་མེད་གཟུགས་བཟང་བ། མཛེས་པ། བལྟ་ན་སྡུག་པ་ དཔུང་རྒྱན་དང་། རྣ་ཆ་གདུབ་ཀོར་དང་། བྱུག་པ་དང་། ཕྲེང་བ་སྣ་ཚོགས་ཀྱིས་བརྒྱན་པ་ཞིག་འདུག་པ་དེའི་ཁྲིའི་རྐང་པ་བཞི་ལ་ཡི་དགས་བཞི་བཏགས་ཤིང་འདུག་གོ། །དེ་དེས་རྒྱང་རིང་པོ་ནས་མཐོང་ནས་སྨྲས་པ། གྲོ་བཞིན་སྐྱེས་འོངས་པ་ལེགས་ སོ། །འོངས་པ་ལེགས་སོ། །མི་སྐོམ་མམ། མི་བཀྲེས་སམ། དེས་བསམས་པ། གདོན་མི་ཟ་བར་ལྷ་མོའམ། ཀླུ་མོའམ། གནོད་སྦྱིན་མོ་ཞིག་ཡིན་ནོ་སྙམ་ནས། དེས་སྨྲས་པ། བདག་སྐོམ་མོ། །བདག་བཀྲེས་སོ། །དེས་དེ་ཁྲུས་ བྱས་ནས་ཟན་བྱིན་ཏེ་དེ་ལ་སྨྲས་པ། གྲོ་བཞིན་སྐྱེས་གལ་ཏེ་ཁྱོད་ལ་འདི་དག་ཆུང་ཟད་སློང་ན་མ་སྦྱིན་ཅིག་ཅེས་སྨྲས་ནས། སེམས་ཅན་དེ་རྣམས་ཀྱི་ལས་བདག་གིར་བྱ་བ་མངོན་སུམ་དུ་བྱ་བར་འདོད་ནས་གཞལ་མེད་ཁང་གི་ནང་དུ་ཞུགས་ཏེ་འདུག་གོ། །དེ་ དག་གིས་བསླང་བར་བརྩམས་ཏེ། གྲོ་བཞིན་སྐྱེས་སྙིང་རྗེ་དང་ལྡན་པ་ཁྱོད་ཀྱིས་བདག་ཅག་བཀྲེས་པས་ཉེན་པ་ལ་བྱིན་ཅིག །དེས་གཅིག་ལ་ཁམ་གཅིག་བྱིན་པ་དང་ཕུབ་མར་གྱུར་ཏོ། །ཡང་གཅིག་ལ་ཁམ་གཅིག་བྱིན་པ་དང་ལྕགས་ཀྱི་ཐུ་ལུམ་ཟ་བར་ གྱུར་ཏོ། །ཡང་གཅིག་ལ་ཁམ་གཅིག་བྱིན་པ་དང་དེ་རང་གི་ཤ་ལ་ཟ་བར་གྱུར་ཏོ། །ཡང་གཅིག་ལ་ཁམ་གཅིག་བྱིན་པ་དང་རྣག་ཁྲག་ཏུ་གྱུར་ཏོ། །དེ་དྲི་ཚོར་ནས་བྱུང་སྟེ། གྲོ་བཞིན་སྐྱེས་ཁྱོད་ལ་ཁོ་མོས་མ་ཟློག་གམ། ཅིའི་ཕྱིར་འདི་དག་ལ་སྦྱིན་ཅི་ཁོ་ མོའི་སྙིང་རྗེ་ལས་ཁྱོད་ཀྱི་སྙིང་རྗེ་ལྷག་གམ། དེས་སྨྲས་པ། སྲིང་མོ་འདི་དག་ཁྱོད་ཀྱི་ཅིར་འོང་། དེས་སྨྲས་པ། འདི་ནི་ཁོ་མོའི་ཁྱིམ་ཐབ་ཡིན། འདི་ནི་བུ་ཡིན། འདི་ནི་མནའ་མ་ཡིན། འདི་ནི་ཁོ་མོའི་བྲན་མོ་ཡིན་ནོ། །ཁྱེད་ཅག་སུ་དག་ཅིག །

  518. 260a

    ལས་གང་གིས་འདིར་སྐྱེས། གྲོ་བཞིན་སྐྱེས་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བས་ཡིད་མི་ཆེས་སོ། །སྲིང་མོ་བདག་གིས་མངོན་སུམ་དུ་མཐོང་ན་ཇི་ལྟར་ཡིད་མི་ཆེས་པར་འགྱུར། དེས་སྨྲས་པ། གྲོ་བཞིན་སྐྱེས་ ཁོ་མོ་གནས་པ་ཞེས་བྱ་བའི་གྲོང་གི་བྲམ་ཟེ་མོར་གྱུར་པ་ན་རྒྱུ་སྐར་ལ་བབ་པའི་ནུབ་མོ་ཁ་ཟས་བསོད་པ་དག་སྟ་གོན་བྱས་པ་དང་། འཕགས་པ་ཀཱ་ཏྱཱ་ཡ་ན་ཆེན་པོ་ཁོ་མོ་ལ་ཐུགས་བརྩེ་བའི་ཕྱིར་གནས་པའི་གྲོང་དུ་བསོད་སྙོམས་ལ་གཤེགས་ཏེ་རིམ་གྱིས་ཁོ་ མོའི་ཁྱིམ་དུ་བྱོན་པ་དང་། ཁོ་མོས་དེའི་སྐུ་འཛེས་ཤིང་ཐུགས་དང་བ་མཐོང་ངོ་། །མཐོང་ནས་ཀྱང་ཁོ་མོ་མངོན་པར་དད་པར་གྱུར་ཏེ། དེ་ལ་ཁོ་མོ་དད་པ་སྐྱེས་ནས་བསོད་སྙོམས་ཕུལ་ཏེ་ཁོ་མོའི་བློ་སྐྱེས་པ། དེ་ལ་ཁྱིམ་ཐབ་རྗེས་སུ་ཡི་རང་བ་འབུལ་དུ་ བཅུག་ན་རབ་ཏུ་དགའ་བ་སྐྱེ་བར་འགྱུར་རོ་སྙམ་པ་ལས་དེས་ཁྲུས་བྱས་ཏེ་འོངས་པ་དང་། དེ་ལ་ཁོ་མོས་སྨྲས་པ། རྗེའི་སྲས་འཕགས་པ་ཀཱ་ཏྱཱ་ཡ་ན་ཆེན་པོ་ལ་ཁོ་མོས་བསོད་སྙོམས་ཕུལ་གྱིས་རྗེས་སུ་ཡི་རང་བ་ཕུལ་ཅིག །དེ་ཁྲོས་ནས་སྨྲས་པ། ཇི་སྲིད་བྲམ་ཟེ་རྣམས་ ལ་མ་ཕུལ། གཉེན་བཤེས་རྣམས་ལ་གཉེན་གྱི་སྲི་ཞུ་མ་བྱས་པར་ཇེ་ཁྱོད་ཀྱིས་དགེ་སྦྱོང་མགོ་རེག་དེ་ལ་བསོད་སྙོམས་ཀྱི་ཕུད་སྦྱིན་ནམ་ཞེས་དེ་མི་བཟོད་པ་སྐྱེས་ནས་དགེ་སྦྱོང་མགོ་རེག་དེ་ཅིའི་ཕྱིར་ཕུབ་མ་མི་འགམ་ཞེས་སྨྲས་པས། དེ་ལས་དེའི་རྣམ་པར་སྨིན་ པས་ཕུབ་མ་འགམ་པར་གྱུར་ཏོ། །ཁོ་མོའི་བློ་སྐྱེས་པ། ཁྱིམ་ཐབ་ཀྱིས་རྗེས་སུ་ཡི་རང་བ་མ་ཕུལ་གྱིས། རེ་ཞིག་བུ་རྗེས་སུ་ཡི་རང་བ་འབུལ་དུ་བཅུག་ན་དགའ་བ་སྐྱེ་བར་འགྱུར་རོ་སྙམ་ནས་ཁོ་མོས་དེ་ལ་ཡང་སྨྲས་པ། བུ་འཕགས་པ་ཀཱ་ཏྱཱ་ཡ་ན་ཆེན་ པོ་ལ་ཁོ་མོས་བསོད་སྙོམས་ཕུལ་གྱིས་རྗེས་སུ་ཡི་རང་བ་ཕུལ་ཅིག །དེ་ཡང་ཁྲོས་ཏེ་སྨྲས་པ། ཇི་སྲིད་བྲམ་ཟེ་རྣམས་ལ་མ་བྱིན་པར་ཇེ་ཁྱོད་ཀྱིས་དགེ་སྦྱོང་མགོ་རེག་དེ་ལ་བསོད་སྙོམས་ཀྱི་ཕུད་བྱིན་ནམ་ཞེས་དེ་མི་བཟོད་པ་སྐྱེས་ནས་དགེ་སྦྱོང་མགོ་རེག་

  519. 260b

    དེ་ཅིའི་ཕྱིར་ལྕགས་ཀྱི་ཐུ་ལུམ་མི་ཟ་ཞེས་སྨྲས་པ། དེ་ལས་དེའི་རྣམ་པར་སྨིན་པས་ལྕགས་ཀྱི་ཐུ་ལུམ་ཟ་བར་གྱུར་ཏོ། །གྲོ་བཞིན་སྐྱེས་རྒྱུ་སྐར་ལ་བབ་པའི་ནུབ་མོ་གཉེན་དག་གིས་ཁོ་མོ་ལ་གཡར་གཟིགས་ཤིག་བསྐུར་བ་དེ་ཁོ་མོས་མནའ་མ་ལ་ གཏད་ན། དེས་གཡར་གཟིགས་བསོད་པ་བསོད་པ་དག་ནི་ཟོས་ལ། ངན་པ་དག་ཁོ་མོ་ལ་བྱིན་ནོ། །ཁོ་མོས་གཉེན་དེ་དག་ལ་ཁྱེད་ཅག་ལོ་ཉེས་སམ་ཅི། འདི་ལྟ་བུ་གཡར་གཟིགས་ངན་པ་བསྐུར། དེ་རྣམས་ཀྱིས་ཁོ་མོ་ལ་བདག་ཅག་གིས་གཡར་ གཟིགས་ངན་པ་ནི་མ་བསྐུར་ཏེ། དེ་ལྟ་མོད་ཀྱི་གཡར་གཟིགས་བསོད་པ་ཞིག་བསྐུར་རོ་ཞེས་སྤྲིང་པ་འོངས་ནས་ཁོ་མོས་མནའ་མ་ལ་སྨྲས་པ། བག་སར་ཁྱོད་ཀྱིས་གཡར་གཟིགས་བསོད་པ་དག་ནི་ཟོས་ལ་ངན་པ་དག་ཁོ་མོ་ལ་མ་བྱིན་གྲང་དེས་སྨྲས་པ། ཁྱོད་ཀྱི་གཡར་གཟིགས་ཟན་བདག་རང་གི་ཤ་ཅིའི་ཕྱིར་མི་ཟ་ཞེས་སྨྲས་པ། དེ་ལས་དེའི་རྣམ་པར་སྨིན་པས་རང་གི་ཤ་ཟ་བར་གྱུར་ཏོ། །རྒྱུ་སྐར་ལ་བབ་པའི་ནུབ་མོ་ཁོ་མོས་བྲན་མོ་གཡར་གཟིགས་བསོད་པ་དག་ཅིག་ལག་ཏུ་བསྐུར་ཏེ་གཉེན་བཤེས་ ཀྱི་གན་དུ་བཏང་བ་ལས། དེས་ལམ་ཀར་གཡར་གཟིགས་བསོད་པ་དག་ཟོས་ནས་དེ་དག་ལ་ངན་པ་དག་བྱིན་པ་དང་། དེ་དག་གིས་ཁོ་མོ་ལ་ཁྱོད་ལོ་ཉེས་སམ་ཅི། བདག་ཅག་ལ་གཡར་གཟིགས་ངན་པ་དག་བསྐུར་ཞེས་སྤྲིང་བ་འོངས་ན། ཁོ་ མོས་དེ་དག་ལ་ཁོ་མོས་ཁྱེད་ཅག་ལ་གཡར་གཟིགས་ངན་པ་ནི་མ་བསྐུར་ཏེ། དེ་ལྟ་མོད་ཀྱི་གཡར་གཟིགས་བསོད་པ་ཞིག་བསྐུར་རོ་ཞེས་སྤྲིང་ངོ་། །ཁོ་མོས་བྲན་མོ་ལ་དྲིས་པ། བྲན་མོ་གཡར་གཟིགས་བསོད་པ་དག་ཁྱོད་ཀྱིས་ཟོས་ལ་དེ་དག་ལ་ ངན་པ་དག་མ་བྱིན་གྲང་། དེས་སྨྲས་པ། ཁྱོད་ཀྱི་གཡར་གཟིགས་ཟ་ན་རྣག་ཁྲག་ཅིའི་ཕྱིར་མི་འཐུང་ཞེས་སྨྲས་པས། དེ་ལས་དེའི་རྣམ་པར་སྨིན་པས་རྣག་ཁྲག་འཐུང་བར་གྱུར་ཏོ། །བདག་གི་བློ་སྐྱེས་པ་གང་དུ་སེམས་ཅན་འདི་དག་རང་རང་གི་ལས་ཀྱི་

  520. 261a

    འབྲས་བུ་ཉམས་སུ་མྱོང་བར་འགྱུར་བ་དེར་ཉིང་མཚམས་སྦྱོར་ཞིང་ལྟ་བར་གྱུར་ཅིག་སྙམ་མོ། །ཁོ་མོས་གང་ཡང་འཕགས་པ་ཀ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་བས་སུམ་བཅུ་རྩ་གསུམ་པའི་གནས་བཟང་པོར་སྐྱེ་བར་འགྱུར་ བ་ལས་བདག་གིས་སྨོན་ལམ་ལོག་པར་བཏབ་པས། ད་ལྟར་ཡི་དགས་མཐུ་ཆེན་པོ་ཞིག་ཏུ་སྐྱེས་སོ། །གྲོ་བཞིན་སྐྱེས་ཡང་གནས་པ་ཞེས་བྱ་བའི་གྲོང་དུ་འགྲོ་ན་དེ་ན་ཁོ་མོའི་བུ་མོ་སྨད་འཚོང་བྱེད་པ་དེ་ལ། ཁྱོད་ཀྱི་ཕ་དང་། མ་དང་། མིང་ པོ་དང་། མནའ་མ་དང་། བྲན་མོ་དག་ངས་མཐོང་སྟེ། དེ་དག་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །ཞེས་གསུང་ཤིག །སྲིང་མོ་ཁྱེད་ཉིད་ ན་རེ་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའོ་ཞེས་སྨྲས་པས་ཡིད་ཆེས་པར་མི་འགྱུར་རོ། །དེས་སྨྲས་པ། གྲོ་བཞིན་སྐྱེས་གལ་ཏེ་ཡིད་མི་ཆེས་ན་ཁྱོད་ཀྱི་ཕའི་སྔོན་གྱི་ཁང་པ་ན་ལྕགས་ཟངས་གསེར་གྱིས་གང་བ་ཟུང་བཞི་དང་། དབུས་ ན་གསེར་གྱི་ཁར་བ་དང་། རིལ་བ་སྤྱི་བླུགས་ཤིག་ཡོད་ཀྱིས་དེ་དག་ཕྱུང་སྟེ། བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་དབུལ་ཞིང་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་ བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ་ཞེས་གསུང་ཤིག །དེས་དེ་ལས་ཁས་བླངས་ཏེ། དེ་དེ་ལྟར་འཁྱམ་པ་ལ་ལོ་བཅུ་གཉིས་འདས་སོ། །དེས་དེ་ལ་སྨྲས་པ། གྲོ་བཞིན་ སྐྱེས་ཁྱོད་གནས་པའི་གྲོང་དུ་འགྲོ་འམ། སྲིང་མོ་འགྲོའོ་ཞེས་དེ་གཞལ་མེད་ཁང་དུ་ཞུགས་པ་དང་དེས་ཡི་དགས་དེ་རྣམས་ལ་བསྒོ་བ། ཤེས་ལྡན་དག་དེང་ལ་གྲོ་བཞིན་སྐྱེས་རྣ་བ་བྱེ་བ་རི་ཉལ་བཞིན་དུ་གནས་པའི་གྲོང་གི་ཕའི་སྐྱེད་མོས་ཚལ་དུ་ཞོག་

  521. 261b

    ལ་སླར་གཤེགས་ཤིག །དེ་དག་གིས་དེ་གནས་པའི་གྲོང་དུ་ཕའི་སྐྱེད་མོས་ཚལ་དུ་བཞག་གོ། །དེ་གཉིད་སད་པ་དང་ཇི་ཙམ་ན་དྲིལ་བུ་དང་། གདུགས་དང་། བསིལ་ཡབ་རྣམས་ཕུལ་ནས་གལ་ཏེ་གྲོ་བཞིན་སྐྱེས་རྣ་བ་བྱེ་བ་རི་གསོན་པོ་ཞིག་ན་ལ་གོར་ འོང་ཞིང་མྱུར་དུ་འོང་བར་ཤོག་ཤིག །འོན་ཏེ་དུས་ལས་འདས་ཏེ་ཤི་འཕོས་པར་གྱུར་ན་འགྲོ་བའི་གནས་གནས་ཁྱད་པར་ཅན་དུ་སྐྱེ་བར་གྱུར་ཅིག་ཅེས་ཡི་གེ་བྲིས་པ་མཐོང་ནས། དེས་བསམས་པ། འདི་ལྟར་བདག་ཕ་དང་མས་ཤི་བའི་ཁོངས་སུ་བརྩིས་ན་ ཅིའི་ཕྱིར་སླར་ཁྱིམ་དུ་འཇུག །བདག་སོང་ལ་འཕགས་པ་ཀཱ་ཏྱཱ་ཡ་ན་ཆེན་པོའི་དྲུང་དུ་རབ་ཏུ་འབྱུང་བར་བྱའོ་སྙམ་མོ། །དེ་ནས་གྲོ་བཞིན་སྐྱེས་རྣ་བ་བྱེ་བ་རི་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གང་ན་བ་དེར་སོང་བ་དང་། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་གྲོ་ བཞིན་སྐྱེས་རྣ་བ་བྱེ་བ་རི་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་སྨྲས་སོ། །གྲོ་བཞིན་སྐྱེས་ཚུར་ཤོག །གྲོ་བཞིན་སྐྱེས་ཁྱོད་འོངས་པ་ལེགས་སོ། །གྲོ་བཞིན་སྐྱེས་ཁྱོད་ཀྱིས་འཇིག་རྟེན་འདི་དང་ འཇིག་རྟེན་ཕ་རོལ་མཐོང་ངམ། བཙུན་པ་ཀཱ་ཏྱཱ་ཡ་ན་ཆེན་པོ་མཐོང་ངོ་། །བཙུན་པ་ཀཱ་ཏྱཱ་ཡ་ན་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན། བཙུན་པ་ཀཱ་ཏྱཱ་ཡ་ན་ ཆེན་པོ་བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་ལ་སྤྱད་པར་འཚལ་ལོ། །གྲོ་བཞིན་སྐྱེས་རེ་ཞིག་སྔོན་གྱི་དམ་བཅས་པ་དྲན་པར་བྱོས་ལ་ཐ་ན་ཇི་སྐད་སྤྲིང་ཞིང་བཟུང་བ་ཆུབ་པར་སྐྱོལ་ཅིག །དེ་ཤེན་པ་དེའི་དྲུང་དུ་སོང་ནས་བཞིན་ བཟངས་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། །དེས་སྨྲས་པ། ཀྱེ་ནང་རྗེ་བདག་གི་ཕ་ནི་ཤི་ནས་དེང་དུ་ལོ་བཅུ་གཉིས་ལོན་ན།

  522. 262a

    ཁྱོད་ཀྱིས་འཇིག་རྟེན་ཕ་རོལ་ནས་སླར་འོངས་པ་འགའ་མཐོང་བ་ཡོད་དམ། བཞིན་བཟངས་བདག་དེར་སོན་ཏོ། །དེ་ཡིད་མ་ཆེས་པ་དང་བཞིན་བཟངས་ཅི་སྟེ་ཡིད་མི་ཆེས་ན་དེ་ན་རེ་ཁྱོད་ཀྱི་ཕའི་རལ་གྲིས་བསད་པའི་འོག་ན་གསེར་ཕྱེ་མ་བུམ་ པ་གང་བཞག་གིས་དེ་ཕྱུང་ལ་བདག་ཉིད་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ། བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ། །དེས་བསམས་པ། བདག་གིས་སྔོན་ཆད་ནི་དེ་ལྟ་བུ་ལན་འགའ་ཡང་མ་ཐོས་ན་རེ་ཞིག་བལྟས་ཏེ་གལ་ཏེ་བྱུང་བར་གྱུར་ན་ཟེར་བ་དེ་ཐམས་ཅད་བདེན་ནོ་སྙམ་ནས། དེས་སོང་སྟེ་བརྐོས་ནས་ཇི་ ཙམ་ན་མཐོང་བ་དང་དེ་ཐམས་ཅད་དེ་ཁོ་ན་བཞིན་དུ་གྱུར་ཏེ། དེས་ཡིད་ཆེས་པར་གྱུར་ཏོ། །དེའི་འོག་ཏུ་བྱི་བོ་བྱེད་པ་དེའི་དྲུང་དུ་སོང་སྟེ་སོན་ནས་སྨྲས་པ། བཞིན་བཟངས་ཁྱོད་ཀྱི་ཕ་ངས་མཐོང་སྟེ། དེ་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་ བ་ཡིན་གྱིས་དམ་པ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ་དེས་སྨྲས་པ། ཀྱེ་ནང་རྗེ་བདག་གི་ཕ་ཤི་ནས་དེང་དུ་ལོ་བཅུ་གཉིས་ལོན་ན་ཁྱོད་ཀྱིས་འཇིག་རྟེན་ཕ་རོལ་ནས་འོངས་པ་འགའ་མཐོང་བ་ཡོད་དམ། བཞིན་བཟངས་བདག་དེར་སོན་ཏོ། །དེ་ཡིད་མ་ ཆེས་ཏེ་དེས་སྨྲས་པ། བཞིན་བཟངས་གལ་ཏེ་ཡིད་མི་ཆེས་ན་ཕ་ན་རེ་ཁྱོད་ཀྱི་ཕའི་མེ་ཐབ་ཀྱི་འོག་ན་གསེར་ཕྱེ་བུམ་པ་གང་བཞག་གིས་དེ་ཕྱུང་ལ་བདག་ཉིད་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ ཕུལ་ལ་བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་དེ་སྐད་ཟེར་རོ། །དེས་བསམས་པ། བདག་གིས་དེ་སྐད་སྔོན་ཆད་ནི་ལན་འགའ་ཡང་མ་ཐོས་

  523. 262b

    ན་གལ་ཏེ་བྱུང་བར་གྱུར་ན་ཟེར་བ་དེ་ཐམས་ཅད་བདེན་ནོ་སྙམ་ནས། དེས་སོང་སྟེ་བརྐོས་ནས་ཇི་ཙམ་ན་མཐོང་བ་དང་དེ་ཐམས་ཅད་དེ་ཁོ་ན་བཞིན་དུ་གྱུར་ཏེ་དེས་ཡིད་ཆེས་པར་གྱུར་ཏོ། །དེའི་འོག་ཏུ་གྲོ་བཞིན་སྐྱེས་རྣ་བ་བྱེ་བ་རི་སྨད་འཚོང་མ་དེའི་དྲུང་དུ་སོང་སྟེ་ སྨྲས་པ། སྲིང་མོ་ཁྱོད་ཀྱི་ཕ་དང་། མ་དང་། མིང་པོ་དང་། མནའ་མ་དང་། བྲན་མོ་དག་ངས་མཐོང་སྟེ། དེ་དག་ན་རེ་ལས་འདིའི་འབྲས་བུ་རྣམ་པར་སྨིན་པ་ནི་ཡིད་དུ་མི་འོང་བ་ཡིན་གྱིས་དམ་པ་མ་ཡིན་པའི་ཆོས་སྡིག་པ་སྤོང་ཤིག་ཅེས་ཟེར་རོ། ། དེས་སྨྲས་པ། ཀྱེ་སྐྱེས་བུ་བདག་གི་ཕ་དང་མ་དག་ཤི་ནས་དེང་དུ་ལོ་བཅུ་གཉིས་ལོན་ན་ཁྱོད་ཀྱིས་འཇིག་རྟེན་ཕ་རོལ་ནས་འོངས་པ་འགའ་མཐོང་བ་ཡོད་དམ། དེས་སྨྲས་པ། བདག་དེར་སོན་ཏོ། །དེ་ཡིད་མ་ཆེས་པ་དང་། དེས་སྨྲས་པ། སྲིང་མོ་གལ་ཏེ་ཡིད་ མི་ཆེས་ན་དེ་དག་ན་རེ་ཁྱོད་ཀྱི་ཕའི་སྔོན་གྱི་ཁང་པ་རྙིང་པ་ན་ལྕགས་ཟངས་གསེར་ཕྱེས་གང་བ་ཟུང་བཞི་དང་། དབུས་ན་གསེར་གྱི་ཁར་བ་དང་། རིལ་བ་སྤྱི་བླུགས་ཡོད་ཀྱིས་དེ་དག་ཕྱུང་ལ་བདག་ལ་ཡུན་དུ་བདེ་བས་ཚིམ་པར་བྱ་བ་དང་། དུས་དུས་སུ་འཕགས་པ་ ཀཱ་ཏྱཱ་ཡ་ན་ཆེན་པོ་ལ་བསོད་སྙོམས་ཕུལ་ལ། བདག་ཅག་གི་མིང་ནས་ཕྱུང་སྟེ་ཡོན་བསྔོ་བ་བྱོས་ཤིག་དང་། དེས་ན་ལས་དེ་བསྲབས་པ་དང་། ཡོངས་སུ་ཟད་པ་དང་། གཏུགས་པར་འགྱུར་རོ་ཞེས་ཟེར་རོ། །དེས་བསམས་པ། བདག་གིས་སྔོན་ཅད་ ནི་དེ་ལྟ་བུ་ལན་འགའ་ཡང་མ་ཐོས་ན་བལྟ་བར་བྱ་སྟེ། གལ་ཏེ་བྱུང་བར་གྱུར་ན་ཟེར་བ་དེ་ཐམས་ཅད་བདེན་ནོ་སྙམ་ནས། དེས་སོང་སྟེ་བརྐོས་ནས་ཇི་ཙམ་ན་མཐོང་བ་དང་དེ་ཐམས་ཅད་དེ་ཁོ་ན་བཞིན་དུ་གྱུར་ཏེ་ཡིད་ཆེས་པར་གྱུར་ཏོ། །གྲོ་བཞིན་སྐྱེས་རྣ་བ་བྱེ་བ་རིས་བསམས་ པ། འཇིག་རྟེན་འདི་དག་ཐམས་ཅད་ནི་གསེར་གྱིས་ཡིད་ཆེས་ཀྱིས། བདག་ལ་ནི་འགའ་ཡང་ཡིད་ཆེས་པར་མ་གྱུར་ཏོ་སྙམ་ནས་དེས་འཛུམ་ཕྱུང་བ་དང་། དེ་བྱིས་པ་ན་མཆེ་བ་གསེར་གྱིས་བརྒྱན་པ་དེ་དེས་ངོ་ཤེས་པར་གྱུར་ནས་དཔོན་པོ་གྲོ་བཞིན་སྐྱེས་རྣ་བ་བྱེ་བ་རི་ཡིན་

  524. 263a

    ནམ། སྲིང་མོ་བདག་ནི་སྐྱེ་བོ་དག་གིས་དེ་ལྟར་ཤེས་སོ། །དེ་སོང་ནས་དེའི་ཕ་མ་ལ་ཡབ་ཡུམ་གྲོ་བཞིན་སྐྱེས་རྣ་བ་བྱེ་བ་རི་མཆིས་སོ་ཞེས་སྦྲན་པ་ནས་དུ་མ་ཞིག་གིས་སྦྲན་ན་ཡང་དེ་དག་ཡིད་མ་ཆེས་ནས། ཇི་ཙམ་ན་དེ་རང་ཉིད་འོངས་ཏེ་ཡབ་ཡུམ་ ཕྱག་འཚལ་ལོ་ཞེས་སྨྲས་པ་དང་། དེ་དབྱིག་གི་ང་རོ་ཅན་ཞིག་པས་དེ་གཉིས་ཀྱིས་སྐད་ལས་ངོ་ཤེས་ནས་དེ་གཉིས་ཀྱིས་དེའི་མགུལ་ནས་འཇུས་ཏེ་ངུ་བར་བརྩམས་པ་དང་། དེ་གཉིས་མཆི་མ་བྱུང་བས་མིག་གི་ལིང་ཏོག་བྱིད་ནས་བལྟ་བར་བརྩམས་སོ། །དེས་ སྨྲས་པ། ཡབ་ཡུམ་བདག་ཡང་དག་པར་ཁྱིམ་ནས་ཁྱིམ་མེད་པར་རབ་ཏུ་འབྱུང་གིས་གནང་བར་མཛོད་ཅིག །དེ་གཉིས་ཀྱིས་སྨྲས་པ། བུ་ཁྱོད་ཀྱི་མྱ་ངན་དང་ངུད་མོས་བདག་ཅག་མིག་ལྡོངས་པར་གྱུར་པ་ལས། ད་ཁྱོད་ཉིད་འོངས་ནས་བདག་ཅག་གི་མིག་ སོར་ཆུད་ཀྱིས། བདག་ཇི་སྲིད་གསོན་པ་དེ་སྲིད་དུ་རབ་ཏུ་མ་འབྱུང་བར་ནམ་ཤི་བར་གྱུར་པ་དེའི་ཚེ་རབ་ཏུ་བྱུང་ཤིག །དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་དྲུང་དུ་ཆོས་མཉན་པས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །ཕ་དང་མ་གཉིས་ཀྱང་ སྐྱབས་སུ་འགྲོ་བ་དང་བསླབ་པའི་གཞི་རྣམས་ལ་བཀོད་དོ། །ལུང་བཞིན་རྟོགས་པར་བྱས་ཏེ་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས་སོ། །ཕ་དང་མ་གཉིས་ཀྱང་བདེན་པ་རྣམས་ལ་བཀོད་དོ། །དུས་གཞན་ཞིག་ན་དེའི་ཕ་དང་མ་ཤི་ནས་དེས་ ནོར་དེ་དག་ཕོངས་པ་དང་། མགོན་མེད་པ་དང་། བཀྲེན་པ་དང་། ཉམ་ཐག་པ་རྣམས་ལ་བྱིན་ཏེ། བཀྲེན་པ་ཕལ་མོ་ཆེ་ཞིག་དབུལ་བོར་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་ མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་གྲོ་བཞིན་སྐྱེས་རྣ་བ་བྱེ་བ་རིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་ཀཱ་ཏྱཱ་ཡ་ན་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་

  525. 263b

    རབ་ཏུ་བྱུང་བ་དང་བསྙེན་པར་རྫོགས་ཏེ་དགེ་སློང་གི་དངོས་པོ་གནང་ན། བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་འཚལ་ལོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་རབ་ཏུ་ཕྱུང་ངོ་། །དེས་རབ་ཏུ་ཕྱུང་ནས་མ་མོ་རྟོགས་པར་བྱས་ཏེ། ཕྱིར་ མི་འོང་བའི་འབྲས་བུ་མངོན་སུམ་དུ་བྱས་སོ། །རྡོ་ཅན་ཞེས་བྱ་བའི་ཡུལ་གྱི་མཐའ་ན་དགེ་སློང་གི་ཚོགས་ཉུང་སྟེ་གྲངས་བཅུར་བསྐང་བ་དཀའ་ནས། དེས་དེ་ཟླ་བ་གསུམ་དུ་དགེ་ཚུལ་དུ་བཞག་གོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ ཀྱི་ཉན་ཐོས་རྣམས་ཀྱི་འདུས་པ་ནི་གཉིས་སུ་འགྱུར་ཏེ། འདུས་པ་ཆེན་པོ་ནི་དབྱར་ཟླ་འབྲིང་པོའི་དབྱར་ཉེ་བར་སྒྲུབ་པ་ལ་གང་ཡིན་པ་དང་། སྟོན་ཟླ་འབྲིང་པོའི་ཉ་ལ་གང་ཡིན་པའོ། །དེ་ལ་གང་དག་དབྱར་ཟླ་འབྲིང་པོའི་དབྱར་ཉེ་བར་སྒྲུབ་པ་ལ་འདུས་པ་དེ་ དག་ནི་ཡིད་ལ་བྱེད་པའི་ཁྱད་པར་དེ་དང་དེ་དག་བཟུང་ནས་ཆུབ་པར་བྱས་ཏེ་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་དང་དེ་རྣམས་སུ་དབྱར་གནས་པར་དམ་འཆའོ། །གང་དག་སྟོན་ཟླ་འབྲིང་པོའི་ཉ་ ལ་འདུས་པ་དེ་དག་ནི་ཇི་ལྟར་རྟོགས་པ་དག་སྨྲས་ནས་གོང་མ་དག་འདྲི་བར་བྱེད་དེ། ཉན་ཐོས་ཆེན་པོ་རྣམས་ཀྱི་ཡང་དེ་དང་འདྲའོ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ལྷན་ཅིག་གནས་པ་དང་། ཉེ་གནས་ཀྱི་དགེ་སློང་དག་གིས་ཡིད་ལ་བྱེད་པའི་ ཁྱད་པར་དེ་དང་དེ་དག་བཟུང་ནས་ཆུབ་པར་བྱས་ཏེ་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དེ་དང་དེ་རྣམས་སུ་དབྱར་གནས་པར་དམ་བཅས་སོ། །དེ་དག་གིས་དབྱར་ཟླ་བ་གསུམ་པོ་དག་འདས་ནས་ཆོས་ གོས་བྱས་པ་དང་ལྡན་ཆོས་གོས་ཟིན་པ་དང་ལྡན་ནས། ལྷུང་བཟེད་དང་ཆོས་གོས་ཐོགས་ཏེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གང་ན་བ་དེར་དོང་སྟེ་ཕྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་

  526. 264a

    ནས་དེ་དག་གིས་ཇི་ལྟར་རྟོགས་པ་དག་སྨྲས་ཏེ། གོང་མ་དག་ཀྱང་འདྲིའོ། །ཚོགས་ཀྱི་གྲངས་ཀྱང་བཅུར་བསྐངས་ནས་དེས་དེ་བསྙེན་པར་རྫོགས་པར་བྱས་སོ། །དེས་སྡེ་སྣོད་གསུམ་རྟོགས་པར་བྱས་ནས་ཉོན་མོངས་པ་ཐམས་ཅད་སྤངས་ ཤིང་དགྲ་བཅོམ་པ་མངོན་སུམ་དུ་བྱས་ཏེ་དགྲ་བཅོམ་པར་གྱུར་ནས་ཁམས་གསུམ་གྱི་འདོད་ཆགས་དང་བྲལ་བ་གྱོ་མོ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཉམ་པའི་སེམས་ཅན་དན་དང་སྟེའུར་མཉམ་པ། རིག་པས་མ་རིག་པའི་སྒོ་ངའི་ སྦུབས་དྲལ་བ། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། རྙེད་པ་དང་། ཆགས་པ་དང་། བཀུར་སྟི་ལས་ཕྱིར་ཕྱོགས་པ། དབང་པོ་ཉེ་དབང་པོའི་ལྷ་དང་བཅས་པ་རྣམས་ཀྱིས་མཆོད་པར་བྱ་ བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ལྷན་ཅིག་གནས་པ་དང་། ཉེ་གནས་ཀྱི་དགེ་སློང་རྣམས་ཀྱིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་བསྙེན་བཀུར་བྱས་ནས། ཚེ་དང་ལྡན་པ་ཀཱ་ཏྱཱ་ཡ་ན་ ཆེན་པོ་ལ་འདི་སྐད་ཅེས་སྨྲས་སོ། །མཁན་པོ་ནི་བདག་ཅག་གིས་མཐོང་སྟེ། བསྙེན་བཀུར་ཡང་བགྱིས་ལགས་ཀྱིས། བཅོམ་ལྡན་འདས་ལ་བདག་ཅག་རྣམས་བསྙེན་བཀུར་བགྱིད་དུ་མཆིའོ། །བུ་དག་དེ་བཞིན་དུ་གྱིས་ཤིག །དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བསྙེན་བཀུར་བྱ་བ་ཁོ་ན་ཡིན་ནོ། །དེའི་ཚེ་གྲོ་བཞིན་སྐྱེས་རྣ་བ་བྱེ་བ་རི་འཁོར་དེ་ཉིད་ཀྱི་ནང་དུ་ཚོགས་ཤིང་འདུག་པར་གྱུར་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་སྟན་ལས་ལངས་ནས་ བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །བདག་གིས་མཁན་པོ་ཡང་མཐོང་། བཅོམ་ལྡན་འདས་ཀྱང་ཆོས་ཀྱི་སྐུར་ནི་མཐོང་ན། གཟུགས་ཀྱི་

  527. 264b

    སྐུ་མ་མཐོང་བས། མཁན་པོ་བཅོམ་ལྡན་འདས་ཀྱི་གཟུགས་ཀྱི་སྐུ་ལྟར་མཆིའོ། །བུ་དེ་བཞིན་དུ་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་བ་ནི་རྙེད་པར་དཀའ་སྟེ། དཔེར་ན་མེ་ཏོག་ཨུ་དུམ་བཱ་ར་དང་ མཚུངས་སོ། །བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱོས་ལ། བདག་གི་ཚིག་འདིས་རེག་པར་སྤྱོད་དམ་ཞེས་བྱ་བའི་བར་དང་། ཞུ་བ་ལྔ་པོ་འདི་དག་ཀྱང་ཞུས་ཤིག །བཙུན་པ་རྡོ་ཅན་ཞེས་བགྱི་བའི་ཡུལ་གྱི་མཐའ་ན་དགེ་སློང་ཉུང་བས་གྲངས་ བཅུར་བསྐང་བ་དཀའ་ན་དེ་ལ་ཇི་ལྟར་བདག་གིས་བསྒྲུབ་པར་བགྱི། བཙུན་པ་བ་ལང་གི་རྗེས་ཀྱིས་ས་རྩུབ་པོར་གྱུར་པ་དང་། རྡོ་ཅན་ཞེས་བགྱི་བའི་ཡུལ་གྱི་མཐའ་ན་འདི་ལྟ་བུའི་གདིང་བ་དང་། དགབ་པ་འདི་ལྟ་སྟེ། ལུག་གི་པགས་པ་དང་། བའི་ཀོ་བ་ དང་། རི་དགས་ཀྱི་པགས་པ་དང་། རའི་པགས་པ་ལས་བགྱིད་དོ། །ཇི་ལྟར་ཡུལ་གཞན་དག་ན་འདི་ལྟ་བུའི་གདིང་བ་དང་། དགབ་པ་འདི་ལྟ་སྟེ། བལ་སྟན་དང་། ཤིང་ཤུན་གྱི་སྟན་དང་། སྲིན་བལ་གྱི་སྟན་དང་། རས་བལ་གྱི་སྟན་དག་མཆིས་པ་དེ་ བཞིན་དུ་རྡོ་ཅན་ཞེས་བགྱི་བའི་ཡུལ་གྱི་མཐའ་ན་འདི་ལྟ་བུའི་གདིང་བ་དང་། དགབ་པ་འདི་ལྟ་སྟེ། ལུག་གི་པགས་པ་དང་ཞེས་བྱ་བ་གོང་མ་བཞིན་ནོ། །ཆུས་འདག་པར་འཚལ་བའི་མི་རྣམས་རྟག་པར་ཁྲུས་ལ་སྤྱོད་པ་དང་། དགེ་སློང་གིས་དགེ་སློང་ལ་ ཆོས་གོས་བསྐུར་བ་ཚུ་རོལ་ནས་ནི་སྤགས་ལ་དེར་ནི་མ་མཆིས་ན། དེ་གང་ལ་སྤང་བའི་ལྟུང་བྱེད་དུ་འགྱུར་ཞེས་ཞུས་ཤིག །ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ཅང་མི་སྨྲ་བས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལས་མཉན་ཏོ། །དེ་ནས་ཚེ་དང་ལྡན་པ་གྲོ་ བཞིན་སྐྱེས་རྣ་བ་བྱེ་བ་རིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་བྱས་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་དྲུང་ནས་སོང་ངོ་། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་དེ་ཉིད་ཀྱི་མཚན་མོ་འདས་ནས་སྔ་དྲོའི་དུས་སུ་ཤམ་ཐབས་བགོས་

  528. 265a

    ལྷུང་བཟེད་དང་ཆོས་གོས་ཐོགས་ནས་གནས་པ་ཞེས་བྱ་བའི་གྲོང་དུ་བསོད་སྙོམས་ལ་ཞུགས་ཏེ། ཇི་ཙམ་ན་རིམ་གྱིས་མཉན་ཡོད་དུ་ཕྱིན་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་ལྷུང་བཟེད་དང་ཆོས་གོས་མཁོས་སུ་ཕབ་ནས་རྐང་ པ་གཉིས་བཀྲུས་ཏེ། བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་ དགའ་བོ་སོང་ལ་དེ་བཞིན་གཤེགས་པ་དང་། གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ཁང་གཅིག་ཏུ་ཁྲི་ཤོམས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ཀྱི་ལྟར་མཉན་ནས། དེ་བཞིན་གཤེགས་པ་ དང་གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ཁང་གཅིག་ཏུ་ཁྲི་བཤམས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་བཞིན་གཤེགས་པ་དང་གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ ཁང་གཅིག་ཏུ་ཁྲི་བཤམས་ལགས་ཏེ། བཅོམ་ལྡན་འདས་ད་དེའི་དུས་ལ་བབ་པ་ལགས་སོ། །དེ་ནས་བཅོམ་ལྡན་འདས་དང་གྲོ་བཞིན་སྐྱེས་རྣ་བ་བྱེ་བ་རི་གཙུག་ལག་ཁང་གང་ན་བ་དེར་གཤེགས་ཏེ་བྱོན་ནས། གཙུག་ལག་ཁང་གི་ཕྱི་རོལ་དུ་ཞབས་ གཉིས་བཀྲུས་ཏེ་གཙུག་ལག་ཁང་དུ་ཞུགས་ནས་དགོངས་པ་མངོན་དུ་བཞག་སྟེ་བཞུགས་སོ། །ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་ཡང་གཙུག་ལག་ཁང་གི་ཕྱི་རོལ་དུ་རྐང་པ་གཉིས་བཀྲུས་ནས་གཙུག་ལག་ཁང་དུ་ཞུགས་ཏེ་སྐྱིལ་མོ་ཀྲུང་བཅས་ལུས་ བསྲང་ནས་དྲན་པ་མངོན་དུ་ཕྱོགས་པར་བཞག་ནས་འདུག་སྟེ། བཅོམ་ལྡན་འདས་དང་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་འཕགས་པའི་མི་སྨྲ་བས་དེའི་མཚན་མོ་འདས་པར་མཛད་དོ། །དེ་ནས་བཅོམ་ལྡན་འདས་ཀྱིས་ནམ་ནངས་སུ་ཉེ་བ་ན་ཚེ་དང་ལྡན་པ་གྲོ་

  529. 265b

    བཞིན་སྐྱེས་རྣ་བ་བྱེ་བ་རི་ལ་བཀའ་སྩལ་པ། གྲོ་བཞིན་སྐྱེས་ཆོས་གང་ལ་བདག་གིས་མངོན་པར་ཤེས་ཏེ་མངོན་པར་སངས་རྒྱས་ནས་གསུངས་པ་ལ་ཁྱོད་སྤོབས་པར་གྱིས་ཤིག །དེ་ནས་གྲོ་བཞིན་སྐྱེས་རྣ་བ་བྱེ་བ་རི་བཅོམ་ལྡན་འདས་ཀྱིས་སྐབས་ཕྱེ་བ་དང་རྡོ་ཅན་ ཞེས་བྱ་བའི་མཐའི་དབྱངས་ཀྱི་ང་རོས་ཆེད་དུ་བརྗོད་པ་དང་། ཕ་རོལ་འགྲོ་བྱེད་དང་། བདེན་པ་མཐོང་བ་དང་། རི་གནས་ཀྱི་ཚིགས་སུ་བཅད་པ་དང་། ཐུབ་པའི་ཚིགས་སུ་བཅད་པ་དང་། གནས་བརྟན་གྱི་ཚིགས་སུ་བཅད་པ་དང་། གནས་བརྟན་མའི་ཚིགས་ སུ་བཅད་པ་དང་། དོན་གྱི་ཚོམས་ཀྱི་མདོ་སྡེ་དག་གསང་བསྟོད་དེ་བཏོན་ཏོ། །དེ་ནས་བཅོམ་ལྡན་འདས་ཀྱིས་གྲོ་བཞིན་སྐྱེས་རྣ་བ་བྱེ་བ་རིས་བརྗོད་པ་རྫོགས་པར་མཁྱེན་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་བཀའ་སྩལ་ཏོ། །གྲོ་བཞིན་སྐྱེས་ ཁྱོད་ཀྱིས་གང་ལ་བདག་གིས་མངོན་པར་ཤེས་ཏེ་མངོན་པར་སངས་རྒྱས་ནས་གསུངས་པའི་ཆོས་གྱ་ནོམ་པ་དང་སྙན་པར་བསྒྲགས་པ་ལེགས་སོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རི་འདི་སྙམ་དུ་སེམས་ཏེ། ད་བཅོམ་ལྡན་འདས་ལ་བདག་གི་མཁན་ པོས་ཕྲིན་གསོལ་བ་སྨྲ་བའི་དུས་ལ་བབ་པོ་སྙམ་དུ་རིག་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རྡོ་ཅན་ཞེས་ བགྱི་བའི་ཡུལ་གྱི་མཐའ་གནས་པ་ཞེས་བགྱི་བའི་གྲོང་ན། བཙུན་པ་ཀཱ་ཏྱཱ་ཡ་ན་ཆེན་པོ་མཆིས་པ་དེ་བདག་གི་མཁན་པོ་ལགས་ཏེ། དེ་ཡང་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ ངམ། འཚོ་འམ། སྟོབས་དང་བདེ་བ་དང་ཉམ་ང་བ་མ་མཆིས་པས་བདེ་བ་ལ་རེག་པར་སྤྱོད་དམ་ཞེས་སྙུན་གསོལ་ལགས་སོ། །གྲོ་བཞིན་སྐྱེས་དགེ་སློང་ཀཱ་ཏྱཱ་ཡ་ན་བདེ་བར་གྱུར་ཅིག །ཞུ་བ་ལྔ་པོ་དག་ཀྱང་རྒྱས་པར་བརྗོད་པར་བྱའོ། །དེ་ནས་བཅོམ་ལྡན་འདས་

  530. 266a

    ཀྱིས་གྲོ་བཞིན་སྐྱེས་རྣ་བ་བྱེ་བ་རི་ལ་འདི་སྐད་ཅེས་བཀའ་སྩལ་ཏོ། །གྲོ་བཞིན་སྐྱེས་རེ་ཞིག་ངས་ཞུ་བ་འདི་ལུང་བསྟན་པའི་དུས་ལ་མ་བབ་ཀྱིས་དགེ་འདུན་གྱི་ནང་དུ་ཞུ་བ་ཞུས་ཤིག་དང་དེར་ཁྱོད་ཀྱི་ཞུ་བ་ལུང་བསྟན་པའི་དུས་ལ་བབ་བོ། །དེ་ནས་ བཅོམ་ལྡན་འདས་ནང་པར་སྔར་བཞེངས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་ཞེས་བྱ་བ་ནས་ཕྱོགས་གཅིག་ཏུ་འདུག་གོ་ཞེས་བྱ་བའི་བར་དུ་སྟེ། གྲོ་བཞིན་སྐྱེས་རྣ་བ་བྱེ་བ་རིས་ བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་རྡོ་ཅན་ཞེས་བགྱི་བའི་ཡུལ་གྱི་མཐའ་ན་གནས་པ་ཞེས་བགྱི་བའི་གྲོང་ན་བཙུན་པ་ཀཱ་ཏྱཱ་ཡ་ན་ཆེན་པོ་མཆིས་པ་དེ་བདག་གི་མཁན་པོ་ལགས་ཏེ། དེ་ཡང་བཅོམ་ལྡན་འདས་ཀྱི་ཞབས་ལ་ཞེས་ བྱ་བ་ནས་བདེ་བ་ལ་རེག་པར་སྤྱོད་དམ་ཞེས་བྱ་བའི་བར་དུའོ། །ཞུ་བ་ལྔ་པོ་གོང་དུ་ཇི་སྐད་དུ་སྤང་བའི་ལྟུང་བྱེད་ཀྱི་བར་བརྗོད་པ་ཡང་རྒྱས་པར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་རྗེས་སུ་གནང་སྟེ། ཡུལ་མཐའ་འཁོབ་རྣམས་ སུ་འདུལ་བ་འཛིན་པ་དང་ལྔའི་ཚོགས་ཀྱིས་བསྙེན་པར་རྫོགས་པ་དང་། རྟག་ཏུ་ཁྲུས་བྱས་པ་དང་། མཆིལ་ལྷམ་རིམ་གཅིག་པ་བཅང་བར་བྱ་སྟེ། རིམ་གཉིས་པ་མ་ཡིན། རིམ་གསུམ་པ་མ་ཡིན་ནོ། །གལ་ཏེ་ཟད་པར་གྱུར་ན་ལྷན་བས་བཏབ་སྟེ་ བཅང་བར་བྱའོ། །ཀོ་བ་བཅང་བར་བྱའོ། །དགེ་སློང་གིས་དགེ་སློང་ལ་ཆོས་གོས་བསྐུར་བ་ཚུ་རོལ་ནས་ནི་སྤངས་ལ་དེར་མ་ཕྱིན་ན་གང་ལ་ཡང་སྤང་བའི་ལྟུང་བྱེད་དུ་མི་འགྱུར་རོ། །བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ བཅོམ་ལྡན་འདས་ཀྱིས་ཡུལ་མཐའ་འཁོབ་རྣམས་སུ་འདུལ་བ་འཛིན་པ་དང་ལྔའི་ཚོགས་ཀྱིས་བསྙེན་པར་རྫོགས་པར་བྱའོ་ཞེས་གང་གསུངས་པ་དེ་ལ་དབུས་ནི་གང་ལགས། མཐའ་འཁོབ་ནི་གང་ལགས། ཉེ་བ་འཁོར་ཤར་ཕྱོགས་ན་ལི་ཁ་ར་ཤིང་འཕེལ་

  531. 266b

    ཞེས་བྱ་བའི་གྲོང་ཡོད་པ་དེའི་ཤར་ཕྱོགས་ན་ལི་ཁ་ར་ཚང་ཚིང་ཞེས་བྱ་བའི་ཚལ་ཡོད་དེ་དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །ལྷོ་ཕྱོགས་ན་འདམ་བུ་ཅན་ཞེས་བྱ་བའི་གྲོང་ཡོད་པ་དེའི་ཕ་རོལ་ན་འདམ་བུ་ཅན་ཞེས་བྱ་བའི་ཆུ་བོ་ཡོད་པ་དེ་ནི་ དབུས་སོ། །དེ་ཕན་ཆད་ནི་མཐའ་འཁོབ་བོ། །ནུབ་ཕྱོགས་ན་བྲམ་ཟེའི་གྲོང་ཀ་བ་དང་ཉེ་བའི་ཀ་བ་དག་ཡོད་དེ་དེ་ནི་དབུས་སོ། །དེ་ཕན་ཆད་ནི་མཐའ་འཁོབ་བོ། །བྱང་ཕྱོགས་ན་ཨུ་ཤི་རིའི་རི་ཞེས་བྱ་བ་ཡོད་དེ་དེ་ནི་དབུས་སོ། །དེ་ཕན་ཆད་ནི་མཐའ་ འཁོབ་བོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་ བའི་རིགས་དང་རིན་པོ་ཆེས་སྤྲས་པའི་རྣ་ཆ་རྣ་བ་ལ་ཐོགས་ཤིང་བཙས་ལ། ངན་སོང་མཐོང་ཞིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བགྱིས་ལགས། བཅོམ་ལྡན་འདས་ཀྱིས་ བཀའ་སྩལ་པ། དགེ་སློང་དག་གྲོ་བཞིན་སྐྱེས་རྣ་བ་བྱེ་བ་རི་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ ན་བཱ་རཱ་ཎ་སཱིའི་གྲོང་ཁྱེར་དུ་སྟོན་པ་འོད་སྲུང་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་ནས་འཇིག་རྟེན་དུ་སྒྲ་རྣམ་པར་གྲགས་པ་ཞེས་བྱ་བའི་བར་འཇིག་རྟེན་དུ་བྱུང་ངོ་། །བཱ་རཱ་ཎ་སཱིའི་གྲོང་ན་ཁྱོ་ཤུག་གཉིས་ཤིག་ ཡོད་པ་དེ་གཉིས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་ལས་སྐྱབས་སུ་འགྲོ་བ་དང་བསླབ་པའི་གཞི་རྣམས་མནོས་སོ། །གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཕུང་པོའི་ལྷག་

  532. 267a

    མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་རྒྱལ་པོ་ཀྲྀ་ཀཱིས་དེའི་མཆོད་རྟེན་རིན་པོ་ཆེ་སྣ་བཞི་ལས་ཁོ་ར་ཁོར་ཡུག་ཏུ་དཔག་ཚད་གང་ཙམ་ལ་འཕང་དུ་དཔག་ཚད་ཕྱེད་པ་ཞིག་བྱེད་དུ་བཅུག་ནས། དེ་ཞིག་ཅིང་ གོགས་པ་སླར་བཅོས་པའི་ཕྱིར་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་དཔྱ་འདུ་བ་གང་ཡིན་པ་དེ་དག་དེས་མཆོད་རྟེན་དེ་ལ་ཕུལ་ལོ། །གང་གི་ཚེ་རྒྱལ་པོ་ཀྲྀ་ཀཱི་ཤི་ནས་དེའི་བུ་ལེགས་སྐྱེས་ཞེས་བྱ་བ་དེ་རྒྱལ་སྲིད་ལ་བཞག་པ་དང་དེའི་བློན་པོ་དག་གིས་དཔྱ་ཉུང་ ཤས་ཤིག་ཕུལ་ལོ། །དེས་བློན་པོ་རྣམས་ལ་སྨྲས་པ། ཅིའི་ཕྱིར་ཁྱེད་ཀྱིས་ང་ལ་དཔྱ་ཉུང་ངུ་ཞིག་ཕུལ། ངའི་ཡུལ་ནས་དཔྱ་མི་འདུ་འམ་ཞེས་སྨྲས་པ་དང་། དེ་དག་གིས་སྨྲས་པ། ལྷ་དཔྱ་དེ་ལས་འདུ་བ་གང་ལ་མཆིས། ལྷ་གྲོང་ཁྱེར་གྱི་ཤར་ ཕྱོགས་ཀྱི་སྒོ་ནས་དཔྱ་འདུ་བ་གང་ལགས་པ་དེ་དག་ནི་རྒྱལ་པོ་ཡབ་ཀྱི་མཆོད་རྟེན་ཞིག་ཅིང་གོགས་པ་སླར་བཅོས་པའི་རྒྱུར་གཞག་གོ། །གལ་ཏེ་ལྷས་གནང་ན་དཔྱ་དེ་བདག་ཅག་གིས་དགུམ་མོ། །དེས་སྨྲས་པ། ཤེས་ལྡན་ངའི་ཡབ་ཀྱིས་གང་མཛད་པ་དེ་ནི་ ཚངས་པས་བྱས་པའོ། །དེ་ནི་བརྒྱ་བྱིན་གྱིས་བྱས་པའོ། །དེ་དག་གིས་བསམས་པ། གལ་ཏེ་ལྷས་གནང་ན་བདག་ཅག་གིས་ཅི་ནས་དཔྱ་དེ་དག་རང་འདུ་བར་མི་འགྱུར་བ་དེ་ལྟར་བྱའོ་སྙམ་ནས། དེ་དག་གིས་སྒོ་བཅད་དེ་བཞག་པས་ཕྱིན་ཆད་དཔྱ་འདུ་བ་ཆད་དོ། ། མཆོད་རྟེན་དེ་ཡང་ཞིག་ཅིང་གོགས་པར་གྱུར་པ་དང་། ཁྱོ་ཤུག་དེ་གཉིས་རྒས་པར་གྱུར་པ་ནས་མཆོད་རྟེན་དེ་ཉིད་ལ་བྱི་དོར་བྱེད་ཅིང་འདུག་གོ། །བྱང་ཕྱོགས་ནས་དེད་དཔོན་ཞིག་ཟོང་ཐོགས་ཏེ་བཱ་རཱ་ཎ་སཱིའི་གྲོང་དུ་ཕྱིན་པ་དང་། དེས་མཆོད་རྟེན་ཞིག་ཅིང་ གོགས་པར་གྱུར་པ་དེ་མཐོང་ངོ་། །དེས་མཐོང་ནས་ཡབ་ཡུམ་མཆོད་རྟེན་འདི་སུའི་ལགས་ཞེས་དྲིས་སོ། །དེ་གཉིས་ཀྱིས་སྨྲས་པ། ཡང་དག་པར་རྫོགས་པའི་སངས་རྒྱས་འོད་སྲུང་གི་ཡིན་ནོ། །སུས་བགྱིས་པ། རྒྱལ་པོ་ཀྲྀ་ཀཱིས་སོ། །རྒྱལ་པོ་ཀྲྀ་ཀཱི་

  533. 267b

    དེས་མཆོད་རྟེན་དེ་ཞིག་པ་དང་གོགས་པ་སླར་བཅོས་པའི་ཕྱིར་ཕུལ་བ་ཅུང་ཟད་མེད་དམ། དེ་གཉིས་ཀྱིས་སྨྲས་པ། ཕུལ་བ་ཡོད་དེ་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་དཔྱ་འདུ་བ་གང་དག་མཆོད་རྟེན་དེ་ཞིག་པ་དང་གོགས་པ་བཅོས་པའི་ཕྱིར་ཕུལ་བ་ལས་རྒྱལ་ པོ་ཀྲྀ་ཀཱི་ནོངས་ནས་དེའི་སྲས་ལེགས་སྐྱེས་ཞེས་བྱ་བ་དེ་རྒྱལ་སྲིད་ལ་བཞག་ནས་དེས་དཔྱ་འདུ་བ་དེ་བཅད་པས་མཆོད་རྟེན་དེ་ཞིག་ཅིང་གོགས་པར་གྱུར་ཏོ། །དེས་རིན་པོ་ཆེས་སྤྲས་པའི་རྣ་ཆ་རྣ་བ་ལས་བཀྲོལ་ནས་དེས་དེ་གཉིས་ལ་བྱིན་ཏེ་སྨྲས་པ། ཡབ་ཡུམ་ རིན་པོ་ཆེའི་རྣ་ཆ་འདིས་མཆོད་རྟེན་འདི་ཞིག་ཅིང་གོགས་པ་རྣམས་ཆོས་ཤིག །བདག་ནམ་ཟོང་རྣམས་འགྱུར་ཏེ་འོངས་ནས་ཕྱིས་ཀྱང་སྦྱིན་ནོ། །དེ་གཉིས་ཀྱིས་དེ་བཙོངས་ནས་དེས་མཆོད་རྟེན་དེ་ཞིག་པ་དང་གོགས་པ་སླར་བཅོས་ཏེ་ཁ་ཅིག་ནི་ལྷག་གོ། །དེ་ ནས་དུས་ཕྱི་ཞིག་ན་དེད་དཔོན་གྱིས་ཟོང་བསྒྱུར་ནས་སྤོགས་ཁྱེར་ཏེ་འོངས་སོ། །དེས་མཆོད་རྟེན་དེ་ལྟ་བས་མི་ངོམས་པ་ཞིག་ཏུ་མཐོང་ངོ་། །མཐོང་ནས་ཀྱང་དེ་ཕྱིར་ཞིང་རབ་ཏུ་དགའ་བ་དང་། དང་བ་སྐྱེས་ཏེ་དྲིས་པ། ཡབ་ཡུམ་ཁྱེད་ཀྱིས་སྐྱིན་པོ་ཅུང་ཟད་ མ་བྱས་སམ། དེ་གཉིས་ཀྱིས་སྨྲས་པ། བུ་བདག་ཅག་གིས་སྐྱིན་པོ་ཅུང་ཟད་ཀྱང་མ་བྱས་ཏེ། འོན་ཀྱང་ལྷག་པ་ཡང་ཡོད་དོ། །དེ་རབ་ཏུ་དང་བ་སྐྱེས་ནས་དེ་ལ་ཅི་ལྷག་པ་དང་གཞན་ཡང་ཕུལ་ནས་མཆོད་པ་དང་བཀུར་སྟི་ཆེར་བྱས་ཏེ་དགེ་བའི་རྩ་བ་འདིས་ བདག་ཕྱུག་པ་དང་། ནོར་མང་བ་དང་། ལོངས་སྤྱོད་ཆེ་བའི་རིགས་སུ་སྐྱེ་བ་དང་། ཆོས་འདི་ལྟ་བུ་ཐོབ་པ་དང་། སྟོན་པ་འདི་ལྟ་བུ་ཁོ་ན་མཉེས་པར་བྱེད་ཀྱི། མི་མཉེས་པར་མི་བྱེད་པར་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་ཇི་སྙམ་དུ་སེམས། དེད་དཔོན་གང་ཡིན་པ་དེ་ནི་གྲོ་བཞིན་སྐྱེས་རྣ་བ་བྱེ་བ་རི་འདི་ཉིད་ཡིན་ཏེ། འདིས་གང་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བྱ་བ་བྱས་ཏེ་སྨོན་ལམ་བཏབ་པའི་ལས་དེའི་རྣམ་པར་སྨིན་པས་ཕྱུག་པ་དང་། ནོར་མང་བ་དང་། ལོངས་སྤྱོད་

  534. 268a

    ཆེ་བའི་རིགས་དང་། རིན་པོ་ཆེས་སྤྲས་པའི་རྣ་ཆ་རྣ་བ་ལ་ཐོགས་བཞིན་དུ་བཙས་ཤིང་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱས་ཏེ། འདིས་ཡང་དག་པར་རྫོགས་པའི་སངས་རྒྱས་འོད་སྲུང་ དང་ཤུགས་མཉམ་པ། སྟོབས་མཉམ་པ། བརྩོན་པ་མཉམ་པ། མི་མཉམ་པ་དང་མཉམ་པ་བརྙེས་པའི་སྟོན་པ་ང་མཉེས་པར་བྱས་ཀྱི་མ་མཉེས་པར་ནི་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ ཏུ་གནག་པ་ཡིན། གཅིག་ཏུ་དཀར་བ་རྣམས་ཀྱི་ནི་དཀར་བ་ཡིན། འདྲེན་མ་རྣམས་ཀྱི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་ཁོ་ན་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །བཙུན་པ་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་རིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མཐོང་བའི་ཆོས་འདི་ཉིད་ལ་ངན་སོང་དག་མཐོང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། འདིས་མ་ལ་ངག་གི་ལས་རྩུབ་མོ་སྨྲས་པ་དེའི་ལས་དེའི་རྣམ་པར་སྨིན་པས་མཐོང་བའི་ཆོས་ཉིད་ལ་ངན་སོང་དག་མཐོང་ངོ་།། །།སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་ པ་ཉེ་དགའ་དགེ་འདུན་གྱི་གསར་བུ་ཡིན་པས་དེ་གྲལ་རིམས་ཀྱིས་ཁྲི་ལྡེག་པ་ཞིག་ཐོབ་པ་དང་། དེ་ཞིག་གིས་དོགས་པས་བླ་འོག་མ་བསྒྱུར་བར་ཉལ་ལོ། །དེས་བསམས་པ། བདག་ཉེ་དགའ་ཡིན་ན་ཁྲི་ལ་ཡང་ཆགས་སམ། གལ་ཏེ་མལ་ ཆའམ་ཁྲི་མ་རྗེས་ན་ཉེ་དགའ་ཞེས་བྱ་བའི་མིང་ཡང་མི་འདོགས་སོ་སྙམ་ནས། དེ་ནང་པར་སྔར་ལངས་ཏེ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་དྲུང་དུ་སོང་བ་དང་དེས་དེ་ལ་སྨྲས་པ། བཙུན་པ་ཉེ་དགའ་བྱོན་པ་ལེགས་སོ། །བྱོན་པ་ལེགས་སོ། །ཇི་ག་བཙུན་

  535. 268b

    པ་ཉེ་དགའ་བདེ་བར་གཟིམས་སམ། དེས་སྨྲས་པ། གསུས་པོ་ཆེ་ཁྱོད་ཇི་སྙམ་དུ་སེམས། ཇི་ལྟར་བདག་མལ་སྟན་རིམ་པ་བརྒྱད་ལ་ཉལ་བ་བཞིན་ཉེ་དགའ་ཡང་དེ་བཞིན་སྙམ་མམ། ཁོ་བོ་དགེ་འདུན་གྱི་གསར་བུ་ཡིན་པས་ཁོ་བོ་གྲལ་རིམས་ཀྱིས་ཁྲི་ལྡེག་ པ་ཞིག་ཐོབ་སྟེ། དེ་ཞིག་གིས་དོགས་ནས་ཁོ་བོ་བླ་འོག་ཀྱང་མི་སྒྱུར་བར་ཉལ་ལོ། །བཙུན་པ་ཉེ་དགའ་མལ་སྟན་རིམ་པ་བརྒྱད་པོ་འདི་འདྲ་བ་བརྟགས་ལགས་སམ། ལེགས་པར་བརྟགས་པའོ། །ཤིན་ཏུ་བརྟགས་པའོ། །གང་དུ་བཀག་སུས་ བཀག །གལ་ཏེ་བརྟགས་པ་ལགས་ན་དབུལ་གྱིས་སྣོམས་ལ་བཞུད་ཅིག །ཉེ་དགའས་སྨྲས་པ། གསུས་པོ་ཆེ་ཀོ་ས་ལའི་ཡུལ་རྣམས་ཁོ་བོ་དབང་ངམ་ཅི། །གཙུག་ལག་ཁང་དུ་སྐྱོལ་ལ་བྱིན་ཅིག །དེས་དེ་ལ་མི་བརྒྱད་བྱིན་ཏེ། དེ་ལ་བཞིས་ ནི་མལ་སྟན་རྣམས་ཁྱེར། བཞིས་ཁྲི་ཁྱེར་ནས་དེ་དག་སྲང་གི་དབུས་ནས་འདོང་བ་བྲམ་ཟེ་དང་། ཁྱིམ་བདག་དེ་དག་གིས་མཐོང་ངོ་། །མཐོང་ནས་ཀྱང་དྲིས་པ། ཤེས་ལྡན་དག་དེང་ལྷའི་གཟིམས་མལ་གང་དུ་བྱེད། ཉེ་དགའས་སྨྲས་ པ། ཉིད་ཀྱི་ཕོ་བྲང་དུའོ། །གཟིམས་མལ་འདི་གང་དུ་ཁྱེར། ཉེ་དགའས་སྨྲས་པ། འདི་དག་ནི་བདག་གིས་ཐོབ་བོ། །ཤེས་ལྡན་དག་དགེ་སྦྱོང་ཉེ་དགའ་ནི། འདོད་པའི་ཡོན་ཏན་གྱིས་གཡེན་སྤྱོ་འམ་ཅི། ཞེས་དེ་དག་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་དོ། །དེ་གཙུག་ལག་ཁང་དུ་སོང་ནས་གཙུག་ལག་ཁང་ཆག་ཆག་བཏབ། ཕྱག་དར་བྱས་ནས་བའི་ལྕི་བ་སར་པའི་བྱུག་པས་བྱུགས་ཏེ། གནས་མལ་བཤམས་ནས་ཉལ་བར་བསམས་པ་དང་། བཅོམ་ ལྡན་འདས་ཀྱིས་ཀྱང་ཕྱོགས་དེར་བྱོན་ཏོ། །དེ་དགའ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གིས་གནས་མལ་ཅི་འདྲ་བ་མཆིས་གཟིགས་སུ་གསོལ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་

  536. 269a

    དག་ཐོག་མ་ཉིད་དུ་རུལ་པ་སྦེད་པ་ནི་སྐྱེས་བུ་གཏི་མུག་ཉེ་དགའ་ཡིན་པར་རིག་པར་བྱའོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཁྲི་སྟན་མཐོན་པོ་དང་ཁྲི་སྟན་ཆེན་པོ་ལ་ཉལ་བ་ཡིན་ནོ། །དེ་ལྟ་བས་ན་དགེ་སློང་ གིས་ཁྲི་སྟན་མཐོན་པོ་དང་ཁྲི་སྟན་ཆེན་པོ་ལ་འདུག་པར་མི་བྱའོ། །འདུག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཁྲི་སྟན་མཐོན་པོ་དང་སྟན་ཆེན་པོ་ལ་འདུག་པར་མི་བྱའོ་ཞེས་གསུངས་པ་དང་། ཁྱིམ་བདག་གཞན་ཞིག་གིས་སངས་རྒྱས་ལ་ སོགས་པ་དགེ་སློང་གི་དགེ་འདུན་ཁྱིམ་དུ་སྤྱན་དྲངས་ཏེ། དེས་ཁྲི་སྟན་མཐོན་པོ་དག་བཤམས་པར་བརྩམས་སོ། །ཚེ་དང་ལྡན་པ་ཀུན་དགའ་བོ་སྔོན་རོལ་ཉིད་དུ་སོན་པ་དང་། དེས་སྟན་མཐོན་པོ་དག་ཤོམ་པ་དེ་མཐོང་ནས་དེས་དེ་ལ་སྨྲས་པ། ཁྱིམ་བདག་སྟན་འདི་དག་ ནི་དགེ་སློང་དང་འཚམ་པ་མ་ཡིན་གྱིས་སྡུས་ཤིག །དེས་དེ་དག་བསྡུ་བར་བརྩམས་པ་ན་བཅོམ་ལྡན་འདས་ཀྱང་དེར་གཤེགས་སོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ ལ་རྨས་པ། ཀུན་དགའ་བོ་འདི་ཅི་ཞིག་བྱེད། བཅོམ་ལྡན་འདས་ཁྱིམ་བདག་འདིས་ཆེན་པོ་ལ་འོས་པའི་གདན་དག་ཤོམ་ནས་བདག་གིས་ཁྱིམ་བདག་སྟན་འདི་དག་ནི་དགེ་སློང་དང་འཚམ་པ་མ་ཡིན་གྱིས་འདི་དག་སྡུས་ཤིག་ཅེས་བསྒོ་བ་དང་དེ་དག་སྡུད་པ་ལགས་ སོ། །ཀུན་དགའ་བོ་ཐམས་ཅད་ལ་འབྱོར་པ་ཡོད་པ་མ་ཡིན་གྱིས། ཀུན་དགའ་བོ་ཁྱིམ་བདག་སྟན་ཤོམ་པ་མ་ཟློག་ཤིག །དེ་ལྟ་བས་ན་རྗེས་སུ་གནང་སྟེ། ཁྱིམ་དུ་ཁྲི་སྟན་མཐོན་པོ་ལ་འདུག་པར་བྱའི་དེར་ཉལ་བར་མི་བྱའོ། །གཙུག་ལག་ཁང་དུ་ནི་འདུག་པར་མི་ བྱའོ། །ཉལ་བར་ཡང་མི་བྱ་སྟེ། འདུག་གམ་ཉལ་ན་ཡང་འགལ་ཚབས་ཅན་དུ་འགྱུར་རོ། །ལྷོ་ཕྱོགས་ནས་དགེ་སློང་ཆོས་གོས་གསུམ་པ་གཞན་ཞིག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འོངས་པ་དང་། དེའི་པགས་པའི་གདིང་བ་བཟང་པོ་དེ་

  537. 269b

    ཉེ་དགའས་མཐོང་ནས་དེས་དེ་ལ་སྨྲས་པ། བསོད་སྙོམས་པ་པགས་པ་ཁོ་བོ་ལ་བྱིན་ཅིག །ཁོ་བོ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོའོ། །དེས་སྨྲས་པ། བཙུན་པ་ཉེ་དགའ་འགྲོ་ཡང་རུང་མི་འགྲོ་ཡང་རུང་། བདག་བཅོམ་ལྡན་འདས་ཀྱི་ཞབས་ལ་ཕྱག་ འཚལ་དུ་འདིར་འོངས་སོ། །བསོད་སྙོམས་པ་ཁྱོད་ཇི་སྙམ་དུ་སེམས། ཉེ་དགའས་འོ་ན་འདི་འདྲ་བའི་པགས་པ་རྙེད་པར་མི་ནུས་སྙམ་མམ། ངའི་རྙེད་པ་ལ་ལྟོས་ཤིག །བཙུན་པ་ཉེ་དགའ་ཁྱོད་ཀྱིས་གང་གི་ཕྱིར་དེ་ནུས་པ་དེའི་ཕྱིར་ཁོ་བོ་མི་འབུལ་ལོ། །ཡུལ་ཀོ་ས་ལའི་རྒྱལ་ པོ་གསལ་རྒྱལ་གྱི་བ་ལང་གི་སྤྱན་བྱེད་པ་ཆེན་པོ་ཞེས་བྱ་བ་དང་ཚེ་དང་ལྡན་པ་ཉེ་དགར་བཤེས་པས་དེ་དེའི་གན་དུ་སོང་བ་ན། ཇི་ཙམ་ན་སོས་ཀའི་དུས་སུ་བེའུ་བཀྲ་ཞིང་བཀྲ་བ་དག་བྱུང་ངོ་། །དེས་བེའུ་གཅིག་གི་རྒྱབ་ཏུ་བྱུགས་པ་དང་། ཆེན་པོས་སྨྲས་པ། བཙུན་པ་ཉེ་དགའ་ ཁྱོད་བེའུ་འདིའི་མའི་འོ་མ་གསོལ་བར་བཞེད་དམ་ཅི། དེས་སྨྲས་པ། དེ་ཡང་འདོད་མོད་ཀྱི། འདི་འདྲ་བའི་པགས་པ་དགེ་སློང་གང་ལ་ཡོད་པ་ནི་སེམས་ལས་ཆུང་ངུས་བདེ་བར་དགེ་བའི་ཕྱོགས་ལ་རབ་ཏུ་བརྩོན་པར་འགྱུར་རོ། །ཆེན་པོས་སྨྲས་པ། བཙུན་པ་ཉེ་དགའ་བཀའ་ སྩལ་པས་མཇལ་གྱིས་བཞུད་ཅིག །དེ་སོང་བ་དང་ཆེན་པོས་ཕྱུགས་རྫི་ལ་བསྒོ་བ། བེའུ་འདི་སོད་ལ་ཁྱོད་ཀྱིས་པགས་པ་ཁྱེར་ཏེ་བཙུན་པ་ཉེ་དགའ་ལ་ཕུལ་ཅིག །དེས་བེའུ་དེ་བསད་ནས་པགས་པ་ཁྱེར་ཏེ་སོང་བ་དང་། བ་དེ་བེའུ་དེ་ལ་གདུང་བས་སྐད་འབྱིན་ཅིང་རྗེས་བཞིན་དུ་ སོང་བ་ལས་དེ་རྒྱལ་བྱེད་ཀྱི་ཚལ་དུ་ཞུགས་པ་དང་། བ་དེ་རྒྱལ་བྱེད་ཀྱི་ཚལ་གྱི་སྒོ་ན་སྐད་འབྱིན་ཅིང་འདུག་གོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་ པ། ཀུན་དགའ་བོ་རྒྱལ་བྱེད་ཀྱི་ཚལ་གྱི་སྒོ་ན་བ་འདི་ཅིའི་ཕྱིར་སྐད་འབྱིན་ཅིང་འདུག །ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་བཙུན་པ་ཉེ་དགའས་བེའུ་དེའི་པགས་པ་འཚལ་བའི་སླད་དུ་འགུམས་སུ་སྩལ་བས་དེས་ན་བ་དེ་རྒྱལ་བྱེད་ཀྱི་ཚལ་གྱི་

  538. 270a

    སྒོ་ན་སྐད་འབྱིན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཀོ་ལྤགས་འཆང་བ་ཡིན་གྱིས། དེ་ལྟ་བས་ན་དགེ་སློང་གིས་ཀོ་ལྤགས་བཅང་བར་མི་བྱའོ། །བཅངས་ན་འགལ་ཚབས་ཅན་དུ་ འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་ཀོ་ལྤགས་བཅང་བར་མི་བྱའོ་ཞེས་གསུངས་པ་དང་། ཁྱིམ་བདག་གཞན་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་དུ་གདུགས་ཚོད་ལ་སྤྱན་དྲངས་ན་ཁྱིམ་བདག་དེས་གདན་གཞན་བཤམ་དུ་ མེད་ནས། དེས་ཀོ་ལྤགས་ཀྱི་གདན་དག་བཤམ་པར་བརྩམས་སོ། །ཚེ་དང་ལྡན་པ་ཀུན་དགའ་བོ་ནང་པར་སྔར་ལངས་ཏེ་ཁྱིམ་བདག་དེའི་ཁྱིམ་དུ་སོང་བ་དང་། དེས་ཁྱིམ་བདག་དེ་ཀོ་ལྤགས་ཀྱི་གདན་དག་ཤོམ་པ་མཐོང་ནས་སྨྲས་པ། ཁྱིམ་བདག་སྟན་འདི་ དག་ནི་དགེ་སློང་དང་འཚམ་པ་མ་ཡིན་གྱིས་འདི་དག་སྡུས་ཤིག །དེས་བསྡུ་བར་བརྩམས་པ་ན་བཅོམ་ལྡན་འདས་ཀྱང་དེར་གཤེགས་སོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་འདི་ཅི་ཞིག་བྱེད། ཚེ་དང་ལྡན་པ་ཀུན་དགའ་བོས་གསོལ་པ། ཁྱིམ་བདག་འདིས་གདན་གཞན་བཤམ་དུ་མ་འབྱོར་ནས་དེ་ན་ཀོ་ལྤགས་ཀྱི་གདན་དག་བཤམས་པ་དང་། བདག་གིས་ཁྱིམ་བདག་གདན་འདི་དག་ནི་དགེ་སློང་ དང་འཚམ་པ་མ་ཡིན་གྱིས་འདི་དག་སྡུས་ཤིག་ཅེས་བསྒོ་ནས། དེ་སྟན་འདི་དག་སྡུད་པ་ལགས་སོ། །ཀུན་དགའ་བོ་ཐམས་ཅད་ལ་འབྱོར་པ་མེད་པས་ཀུན་དགའ་བོ་ཁྱིམ་བདག་སྟན་ཤོམ་པ་མ་ཟློག་ཤིག །དེ་ལྟ་བས་ན་རྗེས་སུ་གནང་སྟེ། ཁྱིམ་དུ་ཀོ་ལྤགས་ཀྱི་ སྟན་བཤམས་པ་ལ་འདུག་པར་བྱའི་ཉལ་བར་ནི་མི་བྱའོ། །གཙུག་ལག་ཁང་དུ་ནི་འདུག་པར་མི་བྱ་ཉལ་བར་མི་བྱ་སྟེ་འདུག་གམ་ཉལ་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །

  539. 270b

    ཚེ་དང་ལྡན་པ་པི་ལིན་དའི་བུ་རབ་ཏུ་བྱུང་ཚུན་ཆད་ནས་རྟག་ཏུ་ནད་བུ་ཅན་ཉིད་དུ་གྱུར་ཏོ། །གཉེན་དག་དེའི་དྲུང་དུ་སོང་སྟེ་སོན་པ་དང་། དེས་དེ་དག་ལ་ཆོས་བཤད་དོ། །དེ་དག་གིས་ཚེ་དང་ལྡན་པ་པི་ལིན་དའི་བུ་ལ་ཆོས་མཉན་ནས་བུད་མེད་ཀྱི་གན་དུ་འོངས་ཏེ་སྨྲས་པ། འཕགས་པ་ པི་ལིན་དའི་བུས་སྦྲང་རྩི་བཙིར་བ་ལྟ་བུར་ཆོས་སྙན་དགུ་ཞིག་བཤད་དོ། །དེ་དག་གིས་སྨྲས་པ། ཁྱེད་ཅག་གིས་ཚེ་དང་ལྡན་པ་དེ་ལས་ཆོས་མཉན་པ་ནི་སངས་རྒྱས་འབྱུང་བ་འབྲས་བུ་དང་བཅས་པ་ཡིན་ནོ། །ཁྱེད་ཅག་ཀྱང་ཉན་འདོད་ཅིང་བདག་ཅག་དེར་མཆི་བར་ངོ་ཚའོ། །གལ་ཏེ་ འཕགས་པ་བདག་ཅག་གི་འདིར་གཤེགས་ཏེ་ཆོས་བཤད་པ་ན་བདག་ཅག་གིས་ཀྱང་དེ་བཞིན་དུ་མཉན་ནོ། །དེ་དག་གིས་སྨྲས་པ། བདག་ཅག་འཕགས་པ་པི་ལིན་དའི་བུའི་ཐད་དུ་སོང་ལ་ཞུ་བར་བྱའོ། །ཞེས་དེ་དག་ཚེ་དང་ལྡན་པ་པི་ལིན་དའི་བུ་གང་ན་བ་དེར་སོང་སྟེ་ཕྱིན་ནས་ སྨྲས་པ། འཕགས་པ་པི་ལིན་དའི་བུ་བུད་མེད་དག་ཆོས་ཐོས་པར་འཚལ་ལོ། །དེས་སྨྲས་པ། ཁོ་བོས་བཀག་གམ་ཅི་ཉོན་ཅིག །དེ་དག་གིས་སྨྲས་པ། འཕགས་པ་བུད་མེད་དེ་དག་མཆིར་ངོ་ཚ་ལགས་སོ། །གལ་ཏེ་འཕགས་པ་པི་ལིན་དའི་བུ་དེ་ཉིད་དུ་གཤེགས་ཏེ། ཆོས་བཤད་ན་དེ་དག་ཉན་པར་འགྱུར་རོ། །དེས་སྨྲས་པ། ཤེས་ལྡན་དག་ཁོ་བོ་ན་བས་རྐང་པས་ནི་འགྲོ་མི་ནུས་སོ། །དེ་དག་གིས་སྨྲས་པ། འཕགས་པ་བཞོན་པས་གཤེགས། བཞིན་བཟངས་དག་བཅོམ་ལྡན་འདས་ཀྱིས་རྗེས་སུ་མ་གནང་ངོ་། །སྐབས་དེ་བཅོམ་ ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། བཞོན་པས་འགྲོ་བར་བྱའོ། །བཅོམ་ལྡན་འདས་ཀྱིས་བཞོན་པས་འགྲོ་བར་བྱའོ་ཞེས་གསུངས་ནས། ཚེ་དང་ལྡན་པ་པི་ལིན་དའི་བུ་བཞོན་པ་ ལ་ཞོན་ནས་ལྷན་ཅིག་གནས་པ་དང་ཉེ་གནས་རྣམས་ཀྱིས་ཡོངས་སུ་བསྐོར་ཅིང་དོང་བ་དྲུག་སྡེ་རྣམས་ཀྱིས་མཐོང་ནས་དེ་དག་གིས་དྲིས་པ། ཤེས་ལྡན་དག་འགྲོ་བ་ཕ་བི་སུ་ཞིག །དེ་དག་གིས་སྨྲས་པ། མཁན་པོ་ཡིན་ནོ་ཅི་བཅོམ་ལྡན་འདས་ཀྱིས་བཞོན་པ་རྗེས་སུ་གནང་ངམ།

  540. 271a

    རྗེས་སུ་གནང་ངོ་། །དྲུག་སྡེ་རྣམས་ཀྱིས་སྨྲས་པ། བཅོམ་ལྡན་འདས་ཀྱི་དགོངས་པ་ནི་ཤཱཀྱ་རྣམས་ཤིན་ཏུ་གཞོན་པས་རྐང་པས་འགྲོ་མི་ནུས་ཏེ། བཅོམ་ལྡན་འདས་ཀྱིས་བཞོན་པ་རྗེས་སུ་གནང་ངོ་སྙམ་ནས་དེ་རྣམས་ཀྱིས་གསེར་དང་། དངུལ་དང་། བཻ་ཌཱུརྱ་ དང་། ཤེལ་གྱིས་ཁྲ་བོར་བྱས་ཤིང་པད་མ་བཞིན་དུ་བྱི་དོར་བྱས་པའི་བཞོན་པ་དག་ཉེ་བར་བཞག་སྟེ། དེ་དག་བཞོན་པ་ལ་ཞོན་ནས་སྲང་གི་དབུས་ནས་ལག་པ་བསྒྲེང་སྟེ། བྲམ་ཟེ་དང་ཁྱིམ་བདག་རྣམས་ལ་ནད་མེད་པར་གྱུར་ཅིག་ཅེས་ཟེར་ཞིང་དོང་ངོ་། །དེ་དག་གིས་སྨྲས་པ། འཕགས་པ་དག་ཅི་འདི་དག་བཅོམ་ལྡན་འདས་ཀྱིས་རྗེས་སུ་གནང་ངམ། རྗེས་སུ་གནང་ངོ་། །དེ་དག་གིས་འཕགས་པ་དགེ་སྦྱོང་ཁྱེད་ཅག་ནི་འདོད་པའི་ཡོན་ཏན་གྱིས་གཡེན་སྤྱོ་བ་ཡིན་ནོ་ཞེས་སྨྲས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་ འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་བཞོན་པས་འགྲོ་བ་ཡིན་ཏེ། དེ་ལྟ་བས་ན་དགེ་སློང་གིས་བཞོན་པས་འགྲོ་བར་མི་བྱའོ། །དེ་ཉིད་ཉེས་དམིགས་སུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། བཞོན་པས་འགྲོ་བར་བྱ་བ་ནི་གཉིས་ཏེ། རྒས་འཁོགས་ནས་ཉམ་ཆུང་བ་དང་། ན་སྟེ་སྦྱོར་མི་བཟོད་པའོ། །དགེ་སློང་རྣམས་ལྗོངས་རྒྱུ་ཞིང་དོང་བ་ལས་དེ་དག་གིས་ཆོས་གོས་དང་ལྷུང་བཟེད་ཐོགས་ཏེ་ཆུ་རྒལ་བ་ན་དབུས་སུ་ཕྱིན་ནས་འགྲོ་མ་ནུས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་གིས་རྐྱལ་བསླབ་པར་བྱའོ། །བཅོམ་ལྡན་འདས་ཀྱིས་རྐྱལ་བསླབ་པར་བྱའོ། །ཞེས་གསུངས་པ་དང་། དྲུག་སྡེ་རྣམས་ཀྱིས་ཆུ་བོ་ཨ་ཛིར་བ་ཏི་ལ་ཕར་ཡང་རྐྱལ་ཚུར་ཡང་རྐྱལ་བ་དང་། ཇི་ཙམ་ན་ ཕྱུགས་རྫི་བུད་མེད་དག་འོངས་པ་དེ་དག་གིས་མཐོང་ནས་སྨྲས་པ། སྲིང་མོ་ཚུར་ཤོག །ཁྱེད་ཅག་བདག་ཅག་གིས་བསྒྲལ་ལོ། །དེ་དག་གིས་དེ་དག་བསྒྲལ་བར་བརྩམས་པ་ན་དེ་དག་གིས་དེ་དག་གི་ཡན་ལག་དང་ཉིང་ལག་དག་ལ་རེག་ཅིང་དེ་དག་གིས་དེ་དག་བསྒྲལ་ནས་སྨྲས་པ། སྲིང་

  541. 271b

    མོ་དག་ཡང་ཚུར་ཤེག །ཁོ་བོ་ཅག་གིས་ཕྱིར་ཡང་བསྒྲལ་ལོ། །དེ་དག་གིས་སྨྲས་པ། འཕགས་པ་དག་བདག་ཅག་གི་ཡན་ལག་དང་ཉིང་ལག་དག་ལ་ཁྱིམ་ཐབ་ཀྱིས་ཀྱང་མ་རེག་ན་ཁྱེད་ཅག་གིས་རེག་པར་བྱས་པས་བདག་ཅག་སླར་ག་ལ་མཆི་ཞེས་དེ་དག་སྨོད་པར་བྱེད། འཕྱ་བར་ བྱེད། ཁ་ཟེར་བར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ་ཉེས་དམིགས་གང་ཅི་བྱུང་བ་དེ་ནི་དགེ་སློང་དག་བུད་མེད་ལ་རེག་པར་བྱེད་པ་ཡིན་གྱིས། དེ་ལྟ་བས་ན་དགེ་སློང་གིས་བུད་མེད་ལ་རེག་པར་མི་བྱའོ། ། རེག་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་ཀྱིས་དགེ་སློང་གིས་བུད་མེད་ལ་རེག་པར་མི་བྱའོ་ཞེས་གསུངས་པ་དང་། གྲོང་ཁྱེར་གྱི་མི་རྣམས་སྐྱེད་མོས་ཚལ་ལ་དགའ་བས་དེ་རྣམས་སྐྱེད་མོས་ཚལ་དུ་དོང་བ་དང་། བུད་མེད་ཅིག་ཆུ་ཆུར་སོང་བ་ལས་དེ་གྲེད་དེ་ཆུས་ཁྱེར་རོ། ། དེ་ཚོལ་དུ་སོང་བའི་མི་དེས་དགེ་སློང་དག་མཐོང་ནས་འཕགས་པ་བདག་གི་བུད་མེད་ཆུས་ཁྱེར་བ་ཞིག་གཟིགས་སམ། མཐོང་སྟེ་ཆུས་ཁྱེར་བ་ཕ་བི་ཡིན་ནོ། །ཕ་བི་དེ་ད་ལྟར་ཤི་ལ་ཐུག་ན་ཉིན་ཐོག་ཐག་ཏུ་ཆུ་ལ་ལྟ་ཞིང་འཁོད་དམ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་ རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དབྱུང་བར་བྱའོ། །གཞན་དག་ན་རེ་ཐོང་ཤིག་ཅེས་ཟེར་ན། གལ་ཏེ་མཐུ་ཡོད་པ་ཡིན་ན་གཏང་བར་བྱའོ། །གཞན་དག་གཡོ་བ་མེད་པར་གྱུར་ཏེ་དེ་དག་བྱེ་མ་སྤུངས་པ་ལ་ཁས་བུབ་ཏུ་བཞག་ནས་བོར་ ཏེ་དོང་བ་དང་ཝས་ཟོས་སོ། །དེ་བོར་ཏེ་འགྲོ་བར་མི་བྱའོ། །དེ་དག་ཆགས་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕྱོགས་གཞན་ཞིག་ན་འདུག་ལ་གང་དག་ཁ་ཏོན་ཟློས་པ་དེ་དག་གི་ནི་ཁ་ཏོན་བྱོས་ཤིག །བསམ་གཏན་པ་གང་དག་ཡིན་པ་དེ་དག་གིས་ནི་ཡིད་ལ་ བྱོས་ཤིག །དྲོ་ཡོལ་དུ་དོགས་ན་དེ་ན་བ་ལང་རྫི་དང་ཕྱུགས་རྫི་གང་དག་འཁོད་པ་དེ་དག་ལ་གཏད་ནས་འགྲོ་བར་བྱའོ། །དྲུག་སྡེ་དག་གིས་ཁྱིམ་བདག་གཞན་ཞིག་གི་བའི་མཇུག་མ་ལ་བཟུང་ནས། བའི་འོ་མ་ཟད་ཟད་དུ་ཕར་རྐྱལ་ཚུར་རྐྱལ་ལོ། །དེས་ཕྱུགས་རྫི་ལ་དྲིས་པ། དེ་

  542. 272a

    རིང་ཅིའི་ཕྱིར་འོ་མ་མེད། དེས་སྨྲས་པ། འཕགས་པ་དྲུག་སྡེ་དག་གིས་ཞེས་བྱ་བ་ནས་དེ་སྨོད་པར་བྱེད། འཕྱ་བར་བྱེད། ཁ་ཟེར་བར་བྱེད་ཅེས་བྱ་བའི་བར་གོང་མ་བཞིན་ཏེ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་བའི་མཇུག་ མ་ལས་བཟུང་སྟེ་རྐྱལ་པར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་བའི་མཇུག་མ་ལས་བཟུང་སྟེ་རྐྱལ་པར་མི་བྱའོ་ཞེས་གསུངས་པ་དང་། དགེ་སློང་ཆུ་རྒལ་བ་དག་ཅིག་གླང་པོ་ཆེའི་མཇུག་མ་ནས་བཟུང་སྟེ་འགྲོ་བར་འདོད་པ་ཕོངས་པར་གྱུར་ནས། བཅོམ་ལྡན་འདས་ཀྱིས་ བཀའ་སྩལ་པ། མཇུག་མ་ཅན་ལྔའི་མཇུག་མ་ལས་བཟུང་སྟེ་འགྲོ་བར་བྱ་སྟེ། གླང་པོ་ཅང་ཤེས་པ་དང་། རྟ་ཅང་ཤེས་དང་། ཁྱུ་མཆོག་དང་། མ་ཧེ་དང་། གཡག་གིའོ། །འོན་ཀྱང་རྐྱལ་པས་རྐྱལ་བར་བྱའོ། །བཅོམ་ལྡན་འདས་ཀྱིས་རྐྱལ་པས་རྐྱལ་བར་བྱའོ་ཞེས་ གསུངས་པ་དང་། དྲུག་སྡེ་དག་གིས་རྐྱལ་པ་བུད་མེད་དང་སྐྱེས་པ་ཉལ་པོ་བྱེད་པ་རི་མོར་བྲིས་ཤིང་པད་མ་ལྟར་བྱི་དོར་བྱས་པ་དག་བྱས་པ་དང་། དེ་དག་བྲམ་ཟེ་དང་ཁྱིམ་བདག་དག་གིས་མཐོང་ནས་སྨྲས་པ། འཕགས་པ་འདི་ཅི་ལགས། དེ་དག་གིས་སྨྲས་པ། བཅོམ་ལྡན་ འདས་ཀྱིས་རྐྱལ་པ་རྗེས་སུ་གནང་ངོ་། །འཕགས་པ་དགེ་སྦྱོང་ཁྱེད་ཅག་ནི་འདོད་པ་ལྔའི་ཡོན་ཏན་གྱིས་གཡེན་སྤྱོ་འམ་ཅི་ཞེས་དེ་དག་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སྦྱོང་གིས་རྐྱལ་ པ་བུད་མེད་དང་སྐྱེས་པ་ཉལ་པོ་བྱེད་པའི་རི་མོར་བྲིས་ཤིང་པད་མ་ལྟར་བྱི་དོར་བྱས་པ་དག་བཅང་བར་མི་བྱའོ། །འོན་ཀྱང་རྐྱལ་པ་གཉིས་བཅང་བར་བྱ་སྟེ། རྩིས་བསྐུས་པ་དང་། རྐྱལ་སྐྱའོ། །ཁྱིམ་བདག་མགོན་མེད་ཟས་སྦྱིན་གྱིས་འཁོར་གྱི་ཁྱམས་ཤིག་བརྩིགས་པ་དང་། ཆོས་མཉན་པར་དགེ་སློང་ཤིང་གི་མཆིལ་ལྷམ་གོན་པ་དག་ལྷགས་ནས། དེ་དག་གིས་ཤིང་གི་མཆིལ་ལྷམ་གྱིས་ས་གཞི་བསྟར་བ་བྲུད་ཅིང་རློག་པར་གྱུར་ཏོ། །ཁྱིམ་བདག་མགོན་མེད་ཟས་སྦྱིན་ནང་པར་སྔར་ལངས་ཏེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འོངས་པ་དེས་

  543. 272b

    མཐོང་ངོ་། །མཐོང་ནས་སྨྲས་པ། འཕགས་པ་འདིར་མ་དང་སུམ་རྒྱལ་པོ་གསལ་རྒྱལ་དཔུང་གི་ཚོགས་ཡན་ལག་བཞི་དང་དགོངས་བཏབ་བམ། དེ་དག་གིས་སྨྲས་པ། རྒྱལ་པོ་ནི་མ་ཡིན་མོད་ཀྱི་དགེ་སློང་ཤིང་གི་མཆིལ་ལྷམ་གོན་པ་དག་ཅིག་འོངས་ཏེ། དེ་དག་གིས་ འདི་མ་རུང་བར་བྱས་སོ། །དེ་སྨོད་པར་བྱེད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་ཤིང་གི་མཆིལ་ལྷམ་འཆང་བ་ཡིན་གྱིས། དེ་ལྟ་བས་ན་དགེ་སློང་ གིས་ཤིང་གི་མཆིལ་ལྷམ་བཅང་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་ཤིང་གི་མཆིལ་ལྷམ་བཅང་བར་མི་བྱའོ་ཞེས་གསུངས་པ་དང་། ཁྱིམ་དུ་དགེ་སློང་རྣམས་དབྱར་གནས་པར་དམ་བཅས་པ་ལས། དེ་དག་གིས་མཆིལ་ལྷམ་འདམ་གྱིས་རླན་པར་གྱུར་ པས་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཁྱིམ་གྱི་ནང་དུ་ཤིང་གི་མཆིལ་ལྷམ་བཅང་བར་བྱའོ། །དགེ་སློང་གིས་དགེ་འདུན་རྣམས་ལ་བྲམ་ཟེ་དང་ཁྱིམ་བདག་དད་པ་ཅན་དག་གིས་ ཤིང་གི་མཆིལ་ལྷམ་དག་ཕུལ་བ་དང་དགེ་སློང་རྣམས་ཀྱིས་མ་བླངས་སོ། །དེ་དག་གིས་སྨྲས་པ། འཕགས་པ་དག་གང་གི་ཚེ་བཅོམ་ལྡན་འདས་འཇིག་རྟེན་དུ་མ་བྱུང་བ་དེའི་ཚེ་མུ་སྟེགས་ཅན་རྣམས་སྦྱིན་གནས་སུ་གྱུར་ཏོ་ཞེས་བྱ་བའི་བར་དུ་སྟེ། བཅོམ་ལྡན་འདས་ཀྱིས་བཀའ་ སྩལ་པ། བླང་བར་བྱ་སྟེ། བླངས་ནས་དགེ་འདུན་གྱི་སྣམ་ཕྱིས་འམ། ཆབ་ཁུང་སར་གཞག་པར་བྱའོ།། །།འདུལ་བ་གཞི། བམ་པོ་ཉི་ཤུ་གཉིས་པ། སྡོམ་ལ། སྨྱུག་མའི་ལོ་མ་གྲོ་བཞིན་དང་། །རྗེས་སུ་གནང་དང་བསྲུངས་ཕྱིར་དང་། །དེ་བཞིན་བསེགས་ སུ་བཅིང་བ་དང་། །རྩེ་མོ་རྟིང་བ་སྦུ་གུ་ཅན། །བཅོམ་ལྡན་འདས་ཀྱིས་དགེ་སློང་གིས་ཤིང་གི་མཆིལ་ལྷམ་བཅང་བར་མི་བྱའོ་ཞེས་གསུངས་ནས་དེ་དག་སྨྱུག་ལོའི་མཆིལ་ལྷམ་འཆང་བ་དང་། དེ་ཉིད་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ།

  544. 273a

    སྨྱུག་ལོའི་མཆིལ་ལྷམ་བཅང་བར་མི་བྱའོ། །དེ་དག་རྩྭ་མུན་ཛའི་མཆིལ་ལྷམ་འཆང་བ་དང་། དེ་ཉིད་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭ་མུན་ཛའི་མཆིལ་ལྷམ་བཅང་བར་མི་བྱའོ། །དེ་དག་སྲད་བུའི་མཆིལ་ ལྷམ་འཆང་བ་དང་། དེ་ཉིད་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྲད་བུའི་མཆིལ་ལྷམ་བཅང་བར་མི་བྱའོ། །དགེ་སློང་དག་དྲེག་གིས་བཏབ་སྟེ། དེ་དག་ཤུ་བ་བྱུང་བས་ཀོ་བའི་མཆིལ་ལྷམ་རླན་པར་གྱུར་པའི་སྐབས་དེ་བཅོམ་ ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དྲེག་གིས་ཐེབས་པ་གང་ཡིན་པ་དེས་སྲད་བུའི་མཆིལ་ལྷམ་བཅང་བར་བྱའོ། །གང་གི་ཚེ་གྲོ་བཞིན་སྐྱེས་བྱེ་བ་ཉི་ཤུ་པ་རབ་ཏུ་བྱུང་བ་དེའི་ཚེ་དེའི་རྐང་མཐིལ་ལ་གསེར་གྱི་ཁ་དོག་འདྲ་ བའི་སྤུ་སོར་བཞི་ཙམ་ཡོད་པ་དེ་དྲུག་སྡེ་དག་གིས་མཐོང་ངོ་། །མཐོང་ནས་ཀྱང་དེ་དག་གིས་སྨྲས་པ། དགའ་བོ་ཉེ་དགའ་རེ་ཞིག་མར་སར་གྱི་གོང་བུ་འདྲ་བ་འདི་གཅིག་ཏུ་བརྩོན་པས་བསྟན་པ་ལ་རབ་ཏུ་བྱུང་ནས་ཅི་ཞིག་བྱེད་ཅེས་སྨྲས་པ་དེས་ཐོས་སོ། །དེས་ཐོས་ནས་ང་ རྒྱལ་སྐྱེས་ཏེ་ཚེ་དང་ལྡན་པ་ཀུན་དགའ་བོའི་དྲུང་དུ་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོ་ལ་དྲིས་པ། བཙུན་པ་ཀུན་དགའ་བོ་བཅོམ་ལྡན་འདས་ཀྱིས་གཅིག་ཏུ་བརྩོན་པས་བསྟན་པ་ལ་ཏིང་ངེ་འཛིན་ཡུན་རིང་དུ་གནས་པར་གསུངས་པ་གང་ལགས། ཚེ་དང་ལྡན་པ་གྲོ་བཞིན་ སྐྱེས་འཆག་པས་ཐོབ་པ་ཡིན་ནོ། །དེ་བསིལ་བའི་ཚལ་གྱི་དུར་ཁྲོད་དུ་སོང་ནས་འཆགས་བཅས་སོ། །དེ་འཆག་པ་ན་སྤུ་གསེར་གྱི་ཁ་དོག་འདྲ་བ་སོར་བཞི་ཙམ་པོ་དག་ཀྱང་ཟད་དོ། །དེའི་འོག་ཏུ་པགས་པ་རྡོལ། དེའི་འོག་ཏུ་ཁྲག་བྱུང་སྟེ། དེ་ཇི་སྲིད་འཆག་སའི་མགོ་ གཅིག་ནས་ཅིག་ཤོས་སུ་སོང་གི་བར་དུ་དེའི་འཆག་སའི་མགོ་གཅིག་ན་ཡང་ཁྭ་དག་ཁྲག་འཐུང་ལ་གཉིས་པ་ན་ཡང་འཐུང་ངོ་། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་ལ་གཞེས་པ་ནི་དུས་དུས་སུ་ཆུ་བོར་རྒྱུ་བ་སྤྱོད་དོ། །ཞེས་བྱ་བའི་བར་དུ་རྒྱས་

  545. 273b

    པར་བྱ་སྟེ། སྐབས་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་དུ་རྒྱུ་ཞིང་གཤེགས་པ་ཡིན་པས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པའི་གཙུག་ལག་ཁང་གང་ན་བ་དེར་གཤེགས་པ་དང་། བཅོམ་ལྡན་འདས་ཀྱིས་གྲོ་བཞིན་སྐྱེས་བྱེ་བ་ཉི་ཤུ་པའི་འཆག་ས་གཟིགས་ སོ། །གཟིགས་ནས་ཀྱང་སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས་མཁྱེན་བཞིན་དུ་རྨེད་དེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་གཅིག་ཏུ་བརྩོན་པའི་འཆག་ས་འདི་དགེ་སློང་གང་གི་ཡིན། གྲོ་བཞིན་སྐྱེས་བྱེ་བ་ཉི་ཤུ་པའི་ལགས་སོ། །ཀུན་དགའ་བོ་དེ་ལྟ་བས་ན་རྗེས་སུ་གནང་སྟེ། གྲོ་བཞིན་སྐྱེས་བྱེ་བ་ཉི་ཤུ་པས་རིམ་པ་གཅིག་པའི་མཆིལ་ལྷམ་བཅང་བར་བྱའོ། །རིམ་གཉིས་པ་མ་ཡིན། རིམ་གསུམ་པ་མ་ཡིན་ནོ། །གལ་ཏེ་རྡོལ་བར་གྱུར་ན་ལྷན་པས་བཏབ་སྟེ་ བཅང་བར་བྱའོ། །དེ་ནས་ཚེ་དང་ལྡན་པ་ཀུན་དགའ་བོ་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་སོང་སྟེ་སོན་ནས། ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤེས་པར་གྱིས་ཤིག་སྟོན་པས་ཁྱོད་ལ་མཆིལ་ལྷམ་རིམ་གཅིག་ པ་རྗེས་སུ་གནང་སྟེ། རིམ་གཉིས་པ་མ་ཡིན། རིམ་གསུམ་པ་མ་ཡིན་ནོ་ཞེས་བྱ་བ་རྒྱས་པར་སྦྱར་རོ། །བཙུན་པ་ཀུན་དགའ་བོ་ཅི་དགེ་འདུན་ཐམས་ཅད་ལའམ། འོན་ཏེ་བདག་འབའ་ཞིག་ལ། ཁྱོད་འབའ་ཞིག་ལའོ། །བཙུན་པ་ཀུན་དགའ་བོ་སྟོན་པའི་བཀའ་ནི་མི་ གཅོག་ན། གལ་ཏེ་བདག་གིས་བཅངས་ན་གཞི་དེས་བདག་ལ་ཚངས་པ་མཚུངས་པར་སྤྱོད་པ་དག་ཨེ་མའོ་གྲོ་བཞིན་སྐྱེས་བྱེ་བ་ཉི་ཤུ་པ་རབ་ཏུ་བྱུང་ནས་ལྟོག་པོ་ཞིག་རྙེད་དོ། །གང་ཡང་ཡུལ་ཙམ་པ་ཐུན་མོང་མ་ཡིན་པ་དང་གླང་པོ་ཆེ་བདུན་གྱི་ཚོགས་སྤངས་ཏེ་རབ་ཏུ་བྱུང་ལ། དེང་ མཆིལ་ལྷམ་ཐེ་གི་བ་ཙམ་ལ་ཆགས་པ་ལྟ་ཞེས་གླེང་བར་འགྱུར་ཏེ། དེ་ལྟ་མོད་ཀྱི་གལ་ཏེ་བཅོམ་ལྡན་འདས་ཀྱིས་བདག་ལ་བལྟོས་ཏེ་དགེ་འདུན་ཐམས་ཅད་ལ་རྗེས་སུ་གནང་ན་བདག་གིས་དེ་བཞིན་དུ་བཅང་བར་བྱའོ་ཞེས་པའི་སྐབས་དེ་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་རྒྱས་

  546. 274a

    པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། གྲོ་བཞིན་སྐྱེས་བྱེ་བ་ཉི་ཤུ་པ་ལ་བལྟོས་ནས་དགེ་འདུན་ཐམས་ཅད་ཀྱིས་རིམ་གཅིག་པའི་མཆིལ་ལྷམ་བཅང་བར་བྱ་སྟེ། རིམ་གཉིས་པ་མ་ཡིན་ཞེས་རྒྱས་པར་སྦྱར་ རོ། །བཅོམ་ལྡན་འདས་ཀྱི་སྤྱན་སྔ་ན་རྒན་ཞུགས་མཆིལ་ལྷམ་ཅན་གཞན་ཞིག་འཆག་པར་བྱེད་པ་དང་། དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཕར་སོང་ངའི་སྤྱན་སྔ་ན་མ་འདུག་ཅིག །དེ་ནས་བཅོམ་ལྡན་འདས་ཀྱིས་དགེ་ སློང་རྣམས་ལ་བཀའ་སྩལ་པ། དགེ་སློང་དག་རེ་ཞིག་འཇིག་རྟེན་ཐམས་ཅད་ཀྱི་ཟང་ཟིང་དང་འདྲེས་པའི་སྟོན་པ་གང་ཡིན་པ། སྟོན་པ་དེའི་ཉན་ཐོས་རྣམས་ཀྱང་འདི་ལྟར་མྱུར་བ་མྱུར་བར་ལྟུང་བར་འགྱུར་བའི་བརྟུལ་ཞུགས་མི་སྤྱོད་ན། ང་འཇིག་རྟེན་ཐམས་ཅད་ཀྱི་ཟང་ཟིང་དང་བྲལ་ བར་གནས་པའི་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་དགོངས་པ་ཉེས་དམིགས་གང་ཅི་བྱུང་བ་དེ་ནི་དགེ་སློང་དག་མཆིལ་ལྷམ་འཆང་པ་ཡིན་ཏེ། དེ་ལྟ་བས་ན་དགེ་སློང་གིས་མཆིལ་ལྷམ་བཅང་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་མཆིལ་ལྷམ་ བཅང་བར་མི་བྱའོ་ཞེས་གསུངས་པ་དང་། གར་མཁན་གཞན་ཞིག་རབ་ཏུ་བྱུང་བ་དེའི་ཆུ་སྣོད་ཆག་ནས་དེ་རྐང་པ་བཀྲུ་བའི་གནས་སུ་རྐང་པ་བཀྲུས་ནས་ཁའི་ནང་ཆུས་བཀང་སྟེ། རྨ་བྱའི་འགྲོས་སུ་སོང་བ་དེ་དྲུག་སྡེ་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། ཚེ་དང་ལྡན་པ་ དག་རོལ་མོའི་སྒྲ་མེད་པར་དགེ་སློང་གར་བྱེད་ཀྱིས་རོལ་མོའི་སྒྲ་བྱའོ་ཞེས་དེ་རྣམས་ཀྱིས་ཁས་རོལ་མོའི་སྒྲ་བྱ་བར་བརྩམས་སོ། །དེ་རྣམས་ལ་དགེ་སློང་དག་གིས་སྨྲས་པ། ཚེ་དང་ལྡན་པ་དག་ཅི་མ་གྲངས་པ་བྱེད་དམ། དེ་རྣམས་ཀྱིས་སྨྲས་པ། འདི་ལ་མ་གྲངས་སུ་ཅི་ ཞིག་ཡོད་ཁྱེད་ཀྱིས་རོལ་མོའི་སྒྲ་མེད་པར་དགེ་སློང་གར་བྱེད་པ་མཐོང་ངམ་ཞེས་བྱ་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་རྣམས་ནི་མཁྱེན་དུ་རྨེད་པ་ཡིན་པས་མཁྱེན་བཞིན་དུ་རྨེད་དེ། སངས་རྒྱས་བཅོམ་ལྡན་འདས་

  547. 274b

    ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་ཀྱིས་བསམ་པ་ཅི་ཞིག་གིས་དེ་ལྟ་བུ་བྱས། བཙུན་པ་གནས་མལ་བསྲུང་བའི་སླད་དུའོ། །དགེ་སློང་འདི་གནས་མལ་བསྲུང་བའི་ཕྱིར་དེ་ལྟ་བུ་བྱེད་པ་ལ་ལྟུང་བ་མེད་དེ། དེ་ལྟ་བས་ན་རྗེས་སུ་གནང་སྟེ། གནས་མལ་བསྲུང་ བའི་ཕྱིར་རིམ་གཅིག་པའི་མཆིལ་ལྷམ་བཅང་བར་བྱའོ། །རིམ་གཉིས་པ་མ་ཡིན། རིམ་གསུམ་པ་མ་ཡིན། གལ་ཏེ་རྡོལ་བར་གྱུར་ན་ལྷན་པས་བཏབ་སྟེ་བཅང་བར་བྱའོ། །བཅོམ་ལྡན་འདས་ཀྱིས་རིམ་གཅིག་པའི་མཆིལ་ལྷམ་བཅང་བར་བྱའོ་ཞེས་གསུངས་པ་དང་། བསོད་སྙོམས་པ་གཞན་ཞིག་ལ་ཁྱིམ་བདག་ཅིག་དད་པར་གྱུར་ཏོ། །དེ་ནང་པར་སྔར་ལངས་ཏེ་མཆིལ་ལྷམ་མེད་པར་མཉན་ཡོད་དུ་བསོད་སྙོམས་ལ་ཞུགས་སོ། །དེ་མཆིལ་ལྷམ་མེད་པ་ཁྱིམ་བདག་དེས་མཐོང་ངོ་། །མཐོང་ནས་སྨྲས་པ། འཕགས་པ་ལ་མཆིལ་ལྷམ་ མ་མཆིས་སམ། ཚུར་སྤྱོན་ལྷམ་མཁན་གྱི་དྲུང་དུ་བཞུད། མཆིལ་ལྷམ་ཅིག་འབུལ་དུ་སྩལ་ཏོ། །དེ་ལྷམ་མཁན་གྱི་དྲུང་དུ་སོང་ནས་དེས་ལྷམ་མཁན་ལ་སྨྲས་པ། ཀྱེ་ནང་རྗེ་འཕགས་པ་འདི་ལ་མཆིལ་ལྷམ་ཅིག་ཕུལ་ཅིག་ཅེས་བསྒོ་ནས་སོང་ངོ་། །དེའི་ཚེ་དགེ་སློང་རྣམས་ དང་། ཤི་བ་རྣམས་དང་གཉིས་ཀྱི་ཕྱིར་མཆིལ་ལྷམ་རིམ་གཅིག་པ་དག་བྱས་སོ། །དགེ་སློང་དེ་ཡང་ཡང་དུ་ལྷམ་མཁན་གྱི་དྲུང་དུ་སོང་ཡང་མ་བྱིན་ནོ། །དུས་གཞན་ཞིག་ན་ཁྱིམ་བདག་དེས་ཡང་དགེ་སློང་མཆིལ་ལྷམ་མེད་པ་མཐོང་ངོ་། །མཐོང་ནས་ཀྱང་སྨྲས་པ། འཕགས་ པ་ཁྱོད་ལ་ལྷམ་མཁན་གྱིས་མཆིལ་ལྷམ་མ་ཕུལ་ལམ། ཁྱིམ་བདག་ལྷམ་མཁན་ལ་བདེན་པར་སྨྲ་བ་དཀོན་པར་ཁྱོད་ཀྱིས་མ་ཐོས་སམ། ཡང་དང་ཡང་སོང་ཡང་མ་བྱིན་ནོ། །དེས་སྨྲས་པ། འཕགས་པ་ཚུར་སྤྱོན་ཁྱིམ་དུ་བཞུད། དེས་ཁྱིམ་དུ་ཁྲིད་ནས་ཁ་ཟས་བསོད་ པས་ཚིམ་པར་བྱས་ཏེ་རིམ་པ་མང་པོ་ཅན་གྱི་མཆིལ་ལྷམ་ཞིག་བྱིན་ནོ། །དགེ་སློང་གིས་སྨྲས་པ། ཁྱིམ་བདག་བཅོམ་ལྡན་འདས་ཀྱིས་རྗེས་སུ་མ་གནང་ངོ་། །དེས་འཕགས་པ་སྣོམས་ཏེ་བཞུད་ལ་རིམ་གཅིག་པའི་མཆིལ་ལྷམ་མཛོད་ལ་གསོལ་ཅིག །དེས་དེ་ཁྱེར་ཏེ་གནས་

  548. 275a

    ཁང་དུ་སོན་ནས་དེས་དེ་དང་གྲི་བླངས་ཏེ་ཤིང་དྲུང་དུ་འདུག་ནས་དྲལ་བར་བརྩམས་སོ། །བཅོམ་ལྡན་འདས་ཀྱང་ཕྱོགས་དེར་བྱོན་ནས་དགེ་སློང་ཅི་བྱེད། བཅོམ་ལྡན་འདས་ཀྱིས་རིམ་པ་མང་པོ་ཅན་གྱི་མཆིལ་ལྷམ་བཀག་ན་བདག་ལ་རིམ་པ་མང་པོ་ཅན་འདི་ ལྟ་བུ་གྲུབ་སྟེ། རིམ་པ་གཅིག་པར་བགྱིས་ལ་བཅང་བར་བགྱིའོ། །དེ་ནས་བཅོམ་ལྡན་འདས་འདི་སྙམ་དུ་ཨེ་མའོ་ངའི་ཉན་ཐོས་རྣམས་ལ་བྲམ་ཟེ་དང་། ཁྱིམ་བདག་དད་པ་ཅན་དག་གིས་རིམ་པ་མང་པོའི་མཆིལ་ལྷམ་སྟེར་བ་ལྟ་སྙམ་དུ་དགོངས་ནས། དེ་ལྟ་བས་ན་རྗེས་ སུ་གནང་སྟེ། མཆིལ་ལྷམ་རིམ་པ་མང་པོ་ཅན་ཁྱིམ་པའི་དམན་མ་ཡིན་ཕན་ཆད་བཅང་བར་བྱའོ། །ཚེ་དང་ལྡན་པ་ཉེ་བ་འཁོར་གྱིས་ཞུས་ཏེ་ཞེས་བྱ་བའི་བར་དུ་སྟེ། བཙུན་པ་བཅོམ་ལྡན་འདས་ཀྱིས་མཆིལ་ལྷམ་རིམ་པ་མང་པོ་ཅན་ཁྱིམ་པའི་དམན་མ་ཡིན་ཕན་ཆད་བཅང་ བར་བྱའོ་ཞེས་གསུངས་ན། བཙུན་པ་ཇི་ཙམ་གྱིས་ན་ཁྱིམ་པའི་དམན་མ་ལགས་པར་བརྗོད་པར་བགྱི། ཉེ་བ་འཁོར་ཐ་ན་གོམ་པ་བདུན་ནམ་བརྒྱད་བགོས་པར་གྱུར་ན་ཡང་ཡིན་ནོ། །གླེང་གཞི་ནི་ཡངས་པ་ཅན་ནའོ། །དེའི་ཚེ་ཡངས་པ་ཅན་ན་འདི་ལྟ་བུའི་མཆིལ་ ལྷམ་དག་བྱེད་དེ། འདི་ལྟ་སྟེ། ཐྲིག་ཐྲིག །ཚིག་ཚིག་ཆེམ་ཆེམ་ཞེས་ཟེར་བ་ལུག་རུའམ། བྱང་ཆུབ་ཀྱི་ཤིང་གི་ལོ་མ་ལྟ་བུ་ཁྲ་བོ་ཀཱར་ཥཱ་པ་ཎ་ལྔ་རི་བ་དག་བྱེད་དོ། །དྲུག་སྡེ་དག་གིས་མཆིལ་ལྷམ་གོན་པ་ཞིག་མཐོང་ནས་དེ་དག་གི་རྟིང་པ་རྐང་པའི་མཐེ་བོས་མནན་ ནས་ལྟག་པ་ནས་ཕུལ་ཏེ་ཁྱོད་ཀྱིས་སྦྱིན་པ་འདི་ཕུལ་བས་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་སངས་རྒྱས་ཉིད་ཐོབ་པར་གྱུར་ཅིག་ཅེས་བྱས་ནས་བླངས་པ་དང་། ཕྱོགས་ཀུན་དུ་འཕགས་པ་དག་ནི་ལྷམ་དེ་ལྟ་བུ་འཕྲོག་གོ། ། ཞེས་སྒྲ་གྲགས་སོ། །རྒན་མོ་ཞིག་གི་མག་པ་ཞིག་འོངས་པ་དང་། དེ་ལ་དེས་མཆིལ་ལྷམ་ཞིག་བྱིན་ནས་འཕགས་པ་དག་མཆིལ་ལྷམ་འཕྲོག་གིས་ཇི་ནས་ཀྱང་འཕྲོག་པར་མི་འགྱུར་བར་བག་ཡོད་པར་གྱིས་ཤིག་ཅེས་བསྒོའོ། །ཕྱིས་བསོད་སྙོམས་པ་ཞིག་བསོད་སྙོམས་ཀྱི་ཕྱིར་

  549. 275b

    ཞུགས་པ་དེས་མཐོང་ནས་དེ་ཁྱིམ་ཞིག་ཏུ་ཞུགས་སོ། །དེ་ཡང་དེ་ཉིད་དུ་ཞུགས་པ་དང་། ཁྱིམ་དེ་ནས་བྱུང་ནས་ཁྱིམ་གཞན་ཞིག་ཏུ་ཞུགས་སོ། །བསོད་སྙོམས་པས་ཀྱང་དེ་ཉིད་དུ་ཞུགས་པ་དང་། དེས་སྨྲས་པ། འཕགས་པ་ཁྱོད་དོན་ཅིའི་ཕྱིར་ཁོ་བོའི་རྗེས་བཞིན་དུ་ འབྲང་བ་ཅི་མཆིལ་ལྷམ་འདི་དབྲོག་པར་བཞེད་མོད། བཞིན་བཟངས་ཁྱོད་ཀྱི་མཆིལ་ལྷམ་ཁོ་བོ་མི་འཕྲོག་སྟེ། འོན་ཀྱང་ཁོ་བོ་བསོད་སྙོམས་ཀྱི་ཕྱིར་ཞུགས་སོ། །དེས་སྨྲས་པ། འཕགས་པ་འཕྲོག་ཀྱང་རུང་མི་འཕྲོག་ཀྱང་རུང་སྟེ། འོན་ཀྱང་ཕྱོགས་ཀུན་ཏུ་འཕགས་པ་ ཁྱེད་ཅག་མཆིལ་ལྷམ་འཕྲོག་གོ་ཞེས་སྒྲ་གྲགས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཉེས་དམིགས་གང་ཅི་བྱུང་བ་དེ་ནི་དགེ་སློང་དག་མཆིལ་ལྷམ་ཐྲིག་ཐྲིག་ཅེས་བྱ་བ་ནས་དེ་ལྟ་ བས་ན་དགེ་སློང་གིས་མཆིལ་ལྷམ་ཐྲིག་ཐྲིག་ཟེར་བ་བཅང་བར་མི་བྱའོ་ཞེས་བྱ་བའི་བར་རྒྱས་པར་སྦྱར་རོ། །དེ་ལྟ་བུ་བཅང་བར་མི་བྱའོ། །དགེ་སློང་གིས་དེ་ལྟ་བུའི་མཆིལ་ལྷམ་བཅངས་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །དེའི་ཚེ་དགེ་ སློང་རྣམས་མཆིལ་ལྷམ་གྱིས་རྐང་པའི་བོལ་རྨ་བྱུང་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས། ཁྱེད་ཅག་གི་ཞབས་ཀྱི་བོལ་ཇི་ཞིག་གིས་རྨ་བྱུང་བར་གྱུར། མཆིལ་ལྷམ་གྱིས་སོ། །ཅི་ཁྱེད་ཅག་གིས་བསེགས་སུ་བཅིངས་ནས་མ་བཅངས་སམ། བཅོམ་ལྡན་འདས་ ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། བསེགས་སུ་བཅིངས་ནས་བཅང་བར་བྱའོ། །དགེ་སློང་རྣམས་བྱ་རྒོད་ཀྱི་ཕུང་པོའི་རི་ལ་ འཛེག་པ་ན་རྐང་པའི་མཐེ་བོར་རྨ་བྱུང་ངོ་། །དེ་དག་བྲམ་ཟེ་དང་ཁྱིམ་བདག་དག་གིས་མཐོང་ནས་སྨྲས་པ། ཁྱེད་ཅག་གི་ཞབས་མཐེ་བོ་ལ་ཅི་ཞིག་གིས་རྨ་བྱུང་། བྱ་རྒོད་ཀྱི་ཕུང་པོའི་རི་ལ་འཛེག་པ་ནའོ། །ཅི་ཁྱེད་ཅག་གིས་མཆིལ་ལྷམ་གྱི་རྩེ་མོ་སྦུ་བུ་ཅན་མ་བཅངས་སམ།

  550. 276a

    བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་སློང་གིས་མཆིལ་ལྷམ་རྩེ་མོ་སྦུ་བུ་བཅང་བར་ བྱའོ། །དགེ་སློང་རྣམས་བྱ་རྒོད་ཀྱི་ཕུང་པོའི་རི་ལས་བབས་པ་ན་རྐང་པའི་རྟིང་པ་རྨ་བྱུང་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ་ཁྱེད་ཅག་རྣམས་ཀྱི་ཞབས་ཀྱི་རྟིང་པ་ཅི་ཞིག་གིས་རྨ་བྱུང་། བྱ་རྒོད་ཀྱི་ཕུང་པོའི་རི་ལས་བབས་པ་ནའོ། །ཅི་ཁྱེད་ ཅག་གིས་མཆིལ་ལྷམ་གྱི་རྟིང་པ་སྦུ་བུ་ཅན་མ་བཅངས་སམ། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། དགེ་ སློང་གིས་མཆིལ་ལྷམ་གྱི་རྟིང་པ་སྦུ་བུ་ཅན་བཅང་བར་བྱའོ།། །།སྡོམ་ལ། མགུལ་ཆད་དང་ནི་ཡུའུ་ཐུང་ལྷམ། །ཁ་ཁྲོད་དག་ཏུ་སྒྲོ་གུ་ཅན། །དོམ་གྱི་པགས་པ་གནང་བ་དང་། །སྨྱུང་བུ་འབྲེང་བུ་ཆུ་གྲིའོ། །གླེང་གཞི་ནི་མཉན་ཡོད་ནའོ། །དགེ་སློང་ རྣམས་རྩྭའི་མྱུ་གུས་རྐང་པ་རྨ་བྱུང་བ་དག་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། འཕགས་པ་དག་ཁྱེད་ཅག་གི་ཞབས་ཅི་ཞིག་གིས་རྨ་བྱུང་། རྩྭའི་མྱུ་གུས་སོ། །ཅི་ཁྱེད་ཅག་གིས་ལྷམ་མགུལ་ཆད་མ་བཅངས་སམ། བཅོམ་ལྡན་འདས་ཀྱིས་ རྗེས་སུ་མ་གནང་ངོ་ཞེས་བྱ་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ལྷམ་མགུལ་ཆད་བཅང་བར་བྱའོ། །གང་གི་ཚེ་རྩྭའི་མྱུ་གུ་དག་ཆེར་སྐྱེས་པ་དེའི་ཚེ་དགེ་སློང་ རྣམས་ཀྱི་རྐང་བ་དེ་བས་ཀྱང་རྨ་ཆེར་བྱུང་བ་བྲམ་ཟེ་དང་ཁྱིམ་བདག་རྣམས་ཀྱིས་མཐོང་ནས་སྨྲས་པ། ཁྱེད་ཅག་གི་ཞབས་ཅི་ཞིག་གིས་རྨ་བྱུང་། དེ་རྣམས་ཀྱིས་སྨྲས་པ། རྩྭའི་མྱུ་གུ་དག་ཆེར་སྐྱེས་པས་བདག་ཅག་གི་རྐང་པ་དེ་བས་ཀྱང་རྨ་ཆེར་བྱུང་ངོ་། །འཕགས་པ་རྣམས་ཅི་

  551. 276b

    ཁྱེད་ཅག་གིས་ལྷམ་ཡུའུ་ཐུང་མ་བཅངས་སམ། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ལྷམ་ཡུའུ་ཐུང་བཅང་བར་ བྱའོ། །གང་གི་ཚེ་སྐྱེས་བུ་གཏི་མུག་འཕགས་སྐྱེས་པོས་སེར་སྐྱ་ན་གནས་པའི་ཤཱཀྱ་རྣམས་ཁ་བཏག་པ་ན། དེ་དག་ལས་ཁ་ཅིག་ནུབ་ཕྱོགས་སུ་དོང་བ་ནས། ཁ་ཅིག་བལ་ཡུལ་གྱི་བར་དུ་དོང་ངོ་། །མཉན་ཡོད་པའི་དོན་མཐུན་དག་ཟོང་ཐོགས་ཏེ་བལ་ཡུལ་དུ་ལྷགས་པ་དང་། དེ་དག་གིས་དེ་རྣམས་མཐོང་ནས་སྨྲས་པ། ཤེས་ལྡན་དག་ཁྱེད་ཅག་གང་ནས་ད་འདིར་ལྷགས། དེ་རྣམས་ཀྱིས་སྨྲས་པ། མཉན་ཡོད་ནས་སོ། །བདག་ཅག་གི་གཉེན་འཕགས་པ་ཀུན་དགའ་བོ་ཡོད་ན་ལན་འགའ་ཡང་འཕགས་པ་ཀུན་དགའ་བོ་འདིར་འོངས་ཏེ་བདག་ ཅག་ལ་གཏམ་མ་དྲིས་སོ། །དེ་རྣམས་ཀྱིས་སྨྲས་པ། བདག་ཅག་གི་འཕགས་པ་ཀུན་དགའ་བོའི་དྲུང་དུ་སོང་ལ་སྦྲན་པར་བགྱིའོ། །དེ་རྣམས་ཀྱིས་ཟོང་རྣམས་བསྒྱུར་བའི་ཟོང་དག་ཁྱེར་ཏེ་མཉན་ཡོད་དུ་ལྷགས་ནས་དེ་རྣམས་ཀྱིས་འཕགས་པ་ཀུན་དགའ་བོ་ལ་སྨྲས་པ། འཕགས་པ་ཀུན་དགའ་བོ་ཁྱོད་ཀྱི་གཉེན་བལ་ཡུལ་ན་མཆིས་ཏེ་དེ་དག་ཁྱོད་མཐོང་བར་འཚལ་ལོ། །ཚེ་དང་ལྡན་པ་ཀུན་དགའ་བོ་ནི་གཉེན་ལ་གདུང་བ་ཡིན་པས་དེ་གཉེན་དག་ལ་བལྟ་བའི་ཕྱིར་བལ་ཡུལ་དུ་སོང་བ་ལས། དེ་ལྷགས་པས་ལག་པ་དང་རྐང་པ་སེར་ག་བྱུང་བ་ དང་། དེ་ལ་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཀུན་དགའ་བོ་པད་མའི་འདབ་མ་རལ་བ་བཞིན་དུ་ཁྱོད་ཀྱི་ལག་པ་དང་རྐང་པ་ཅི་ཞིག་གིས་སེར་ག་བྱུང་བར་གྱུར། དེས་སྨྲས་པ། ལྷགས་པས་སོ། །ཁྱོད་ཀྱི་གཉེན་དག་ནི་ལྷམ་སྒྲོ་གུ་ཅན་ཅི་སྟེ་འཆང་། ཁྱོད་ནི་ཅིའི་ ཕྱིར་མི་འཆང་། བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་རྗེས་སུ་གནང་སྟེ། ཡུལ་ཁ་བ་ཅན་རྣམས་སུ་ལྷམ་སྒྲོ་གུ་ཅན་བཅང་བར་བྱའོ། །

  552. 277a

    སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཡུལ་ཁ་བ་ཅན་རྣམས་སུ་ལྷམ་སྒྲོ་གུ་ཅན་བཅང་བར་བྱའོ་ཞེས་གསུངས་པ་གང་ལགས་པ། བཙུན་པ་ཇི་ཙམ་གྱིས་ཡུལ་ཁ་བ་ཅན་དུ་བརྗོད་པར་ བགྱི། །ཉེ་བ་འཁོར་གང་ན་སྣོད་དུ་ཆུ་འཁྱག་པ་ཡིན་ནོ། །དགེ་སློང་གཞན་ཞིག་ལ་རྔོན་པ་ཞིག་དད་པར་གྱུར་ནས། རྔོན་པ་དེས་དོམ་ལྤགས་ཤིག་རྙེད་པ་དགེ་སློང་དེ་ལ་ཕུལ་བ་དང་དེས་མ་བླངས་སོ། །དེས་དགེ་སློང་དེའི་ཕྱི་བཞིན་འབྲང་ཞིང་སྨྲས་པ། འཕགས་པ་ བདག་གིས་དོམ་ལྤགས་རྙེད་པ་ཁྱོད་ལ་འབུལ་གྱིས་བཞེས་ཤིག །དགེ་སློང་དེས་མ་བླངས་སོ། །བཅོམ་ལྡན་འདས་ཀྱང་ཕྱོགས་དེར་གཤེགས་ཏེ། སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས་མཁྱེན་བཞིན་དུ་རྨེད་དེ། སངས་རྒྱས་བཅོམ་ལྡན་ འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་དགེ་སློང་འོ་ནིའི་ཕྱི་བཞིན་དུ་རྔོན་པ་ཕ་བི་ཅི་སྟེ་འབྲང་། བཙུན་པ་རྔོན་པ་དེས་དོམ་ལྤགས་ཤིག་རྙེད་ནས། དེས་དགེ་སློང་འོ་ནི་ལ་སྩལ་པ་ལས། དགེ་སློང་གིས་དེ་མ་བླངས་པ་དང་རྔོན་པ་དེ་དགེ་སློང་འོ་ནིའི་ཕྱི་བཞིན་འབྲང་ ཞིང་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་རྔོན་པ་དད་པ་ཅན་ནི་དཀོན་ཏེ། གལ་ཏེ་བརྒྱའམ་སྟོང་ཞིག་དང་ཕྲད་ན་ཐམས་ཅད་གསོད་པ་ཡིན་པས། དེ་བས་ན་གལ་ཏེ་རྔོན་པས་དོམ་ལྤགས་བྱིན་ན་བླང་བར་བྱའོ། །བླངས་ནས་དྲི་གཙང་ ཁང་གི་སྒོའམ། རྐང་པའི་འོག་ཏུ་གདིང་བར་བྱ་སྟེ། དོམ་ལྤགས་ཐམས་ཅད་ནི་མིག་ལ་ཕན་ནོ། །དགེ་སློང་གཞན་ཞིག་མཆིལ་ལྷམ་རལ་ནས་དེ་ལྷམ་མཁན་གྱི་དྲུང་དུ་སོང་སྟེ་སོན་ནས་སྨྲས་པ། བཞིན་བཟངས་བདག་གི་མཆིལ་ལྷམ་རལ་བ་རྒྱུས་ཏེ་བདག་ལ་བྱིན་ ཅིག །ལྷམ་མཁན་གྱིས་བསམས་པ། ཤཱཀྱའི་སྲས་ཀྱི་དགེ་སྦྱོང་རྣམས་ནི་རྔན་པ་མེད་པར་འཚོལ་གྱིས་ཡུན་རིང་དུ་བསྒྱངས་པ་དང་། རང་གི་བློ་སླར་ལྡོག་པར་འགྱུར་རོ་སྙམ་ནས། འཕགས་པ་བདག་བྲེལ་གྱིས་སང་སྤྱོན་ཅིག །དགེ་སློང་དེ་ཡང་དང་ཡང་དུ་

  553. 277b

    ལྷམ་མཁན་དེའི་དྲུང་དུ་སོང་ཡང་དེས་བསྒྱངས་པ་དང་། དེ་མཛའ་བཤེས་དགེ་སློང་རྣམས་ཀྱིས་མཐོང་ནས་དེ་ལ་སྨྲས་པ། ཚེ་དང་ལྡན་པ་ཅི་དེ་ན་ཁྱེད་ཀྱི་ཟས་སྦྱོར་བའི་ཁྱིམ་ཡོད་དམ། འོན་ཏེ་གཉེན་གྱི་ཁྱིམ་ཡོད། དེས་སྨྲས་པ། དེ་ན་བདག་གི་ཟས་སྦྱོར་བའི་ཁྱིམ་ཡང་མེད། གཉེན་གྱི་ཁྱིམ་ཡང་མེད་མོད་ཀྱི་བདག་གི་མཆིལ་ལྷམ་རལ་ནས་བདག་གིས་དེ་ལ་རྒྱུས་ཏེ་བྱིན་ཅིག་ཅེས་སྨྲས་ན་དེས་བསྒྱངས་སོ། །དེས་སྨྲས་པ། ལྷམ་མཁན་ལ་བདེན་པར་སྨྲ་བ་དཀོན་པར་ཁྱོད་ཀྱིས་མ་ཐོས་སམ། འོན་ཀྱང་བདག་ཤེས་ཀྱིས་གལ་ཏེ་བཅོམ་ལྡན་འདས་ ཀྱིས་རྗེས་སུ་གནང་ན་བདག་གིས་བརྒྱུས་ཏེ་ཁྱོད་ལ་སྦྱིན་ནོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་ཞིག་ཤེས་པ་ཡོད་ན་དེས་གང་དུ་གཞན་གྱིས་མཐོང་ན་མི་དད་པར་མི་འགྱུར་བ་དབེན་ པས་ཕྱོགས་སུ་འདུག་སྟེ་བརྒྱུ་བར་བྱའོ། །དེ་དེའི་དྲུང་དུ་སོང་སྟེ་སྨྲས་པ། བཅོམ་ལྡན་འདས་ཀྱིས་རྗེས་སུ་གནང་གིས་རྒྱུས་ཤིག །དེས་སྨྲས་པ། ཅི་འདི་དེ་བཞིན་དུ་བརྒྱུར་རུང་སྙམ་མམ། དེ་ལ་རེ་ཞིག་སྨྱུང་བུ་དང་། དྲ་གྲི་དང་། འབྲེང་བུ་ཡང་དགོས་སོ་ཞེས་པའི་སྐབས་དེ་ བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གང་ཞིག་ཤེས་པ་ཡོད་ན་དེས་སྨྱུང་བུ་དང་། འབྲེང་བུ་ནི་བཅང་བར་བྱའོ། །དྲ་གྲི་ནི་བཅང་བར་མི་བྱའོ། །ཀོ་ལྤགས་ཀྱི་གཞི་རྫོགས་སྷོ།། །། སྨན་གྱི་གཞིའི་བསྡུས་པའི་སྡོམ་ལ། སྨན་དག་དང་ནི་བདེ་ཆེན་དང་། །རྒྱལ་པོའི་ཁབ་དང་འོད་མའི་ཚལ། །ཤིང་མཁན་ཡིད་ཙ་ནང་ག་ལ། །ཀམ་བི་ལ་དང་སྔོན་རྒྱལ་པོའོ། །གཞོན་ནུ་འཕེལ་དང་ནད་པ་དང་། །གཏམ་དུ་གྱུར་དང་སྡེར་བསྡུས་སོ། །སྡོམ་ལ། སྨན་ནི་ རྗེས་སུ་གནང་བ་དང་། །ཚིལ་དང་གཡན་པ་མིག་སྨན་དང་། །སྨྱོན་པ་དང་ནི་བི་ལིན་ད། །ནམ་གྲུ་དང་ནི་སྐྱུར་ཁུའོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་དགེ་སློང་

  554. 278a

    རྣམས་སྟོན་ཀའི་ནད་ཀྱིས་ཐེབས་ཏེ། དེ་རྣམས་སྟོན་ཀའི་ནད་ཀྱིས་བཏབ་པས་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་སྟེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ཅིའི་ཕྱིར་ད་ལྟར་དགེ་སློང་འདི་རྣམས་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར་ཚེ་དང་ལྡན་པ་ཀུན་དགའ་བོས་གསོལ་པ། བཙུན་པ་ དགེ་སློང་འདི་རྣམས་སྟོན་ཀའི་བྲོ་ནད་ཀྱིས་བཏབ་སྟེ། འདི་རྣམས་སྟོན་ཀའི་བྲོ་ནད་ཀྱིས་བཏབ་པས་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། བྲོ་འཚལ་བས་ཉམ་དམས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་ལྟ་ བས་ན་རྗེས་སུ་གནང་སྟེ། དགེ་སློང་གིས་སྨན་སོ་སོར་བསྟེན་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་སྨན་སོ་སོར་བསྟེན་པར་བྱའོ། །ཞེས་གསུངས་པ་དང་། དེ་རྣམས་དུས་སུ་ཟ་བ་ཡིན་པས་དུས་སུ་སྟེན་པར་བྱེད་ཀྱིས། དུས་ལས་ཡོལ་བར་སྟེན་པར་མི་བྱེད་ པས་དེ་རྣམས་སྐྱེ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར་ཏོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་ དགའ་བོ་ངས་དགེ་སློང་གིས་སྨན་སོ་སོར་བསྟེན་པར་བྱའོ་ཞེས་བཀའ་སྩལ་ན། འོན་ཀྱང་ད་ལྟར་དགེ་སློང་འདི་རྣམས་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར་ཏམ། ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་ འདས་ཀྱིས་དགེ་སློང་གིས་སྨན་སོ་སོར་བསྟེན་པར་བྱའོ་ཞེས་གསུངས་པ་འདི་དག་དུས་སུ་འཚལ་བ་ལགས་པས་དུས་སུ་སྟེན་པར་བགྱིད་ཀྱི་དུས་ལས་ཡོལ་བར་མི་སྟེན་ཏེ། དེའི་སླད་དུ་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། བྲོ་འཚལ་བས་ཉམ་དམས་

  555. 278b

    པར་གྱུར་ལགས་སོ། །ཀུན་དགའ་བོ་དེ་ལྟ་བས་ན་རྗེས་སུ་གནང་སྟེ། དགེ་སློང་རྣམས་ཀྱིས་སྨན་རྣམ་པ་བཞི་པོ་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། འཚོ་བའི་བར་དུ་བཅང་བ་སོ་སོར་བསྟེན་པར་བྱའོ། །དེ་ལ་དུས་སུ་རུང་བ་ནི་འདེ་གུ་དང་། འབྲས་ཆན་དང་། ཟན་དྲོན་དང་། ཤ་དང་། སྣུམ་ཁུར་རོ། །ཐུན་ཚོད་དུ་རུང་བ་ནི་བཏུང་བ་རྣམ་པ་བརྒྱད་པོ་ཤིང་ཐོག་ཙོ་ཙའི་བཏུང་བ་དང་། ཆུ་ཤིང་གི་འབྲས་བུའི་བཏུང་བ་དང་། རྒྱ་ཤུག་གི་བཏུང་བ་དང་། ཨ་ཤྭཏྠའི་བཏུང་བ་དང་། ཨུ་དུམ་བཱ་རའི་བཏུང་བ་དང་། པ་རུ་ཤ་ཀའི་བཏུང་བ་དང་། རྒུན་འབྲུའི་བཏུང་བ་དང་། འབྲ་གོའི་བཏུང་བའོ།། །།བར་སྡོམ་ལ། ཙོ་ཙ་ཆུ་ཤིང་རྒྱ་ཤུག་དང་། །ཨ་ཤྭད་ཨུ་དུམ་བཱ་ར་དང་། །བ་རུ་ཤ་ཀ་རྒུན་འབྲུ་དང་། །བརྒྱད་པ་ཡང་ནི་འབྲ་གོ་ཡིན། །ཞག་བདུན་པ་ནི་མར་དཀར་དང་། །ཏིལ་མར་ དང་། བུ་རམ་གྱི་དབུ་བ་དང་། སྦྲང་རྩི་དང་། ཤ་ཁ་རའོ། །འཚོ་བའི་བར་དུ་བཅང་བ་ནི་རྩ་བའི་སྨན་དང་། སྡོང་བུའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲས་བུའི་སྨན་དང་། ཏྲང་ཆུ་ལྔ་དང་། ཐལ་བ་ལྔ་དང་། ལན་ཚྭ་ལྔ་དང་། བསྐ་བ་ ལྔའོ། །དེ་ལ་རྩ་བའི་སྨན་ནི་གླ་སྒང་དང་། ཤུ་དག་དང་། ཡུང་དང་། སྒེའུ་གཤེར་དང་། བོང་ང་དཀར་པོ་དང་། གཞན་ཡང་རྩ་བའི་སྨན་གྱི་ནང་དུ་གཏོགས་པ་ཟས་ཀྱི་དོན་དུ་མི་འགྱུར་བ་གང་ཡིན་པའོ། །སྡོང་བུའི་སྨན་ནི་ཙན་དན་དང་། དབྱི་མོ་དང་། ཤུག་ པ་དང་། ཐང་ཤིང་དང་། སླེ་ཏྲེས་དང་། སྐྱེར་པ་དང་། གཞན་ཡང་སྡོང་བུའི་སྨན་གྱི་ནང་དུ་གཏོགས་པ་ཟས་ཀྱི་དོན་དུ་མི་འགྱུར་བ་གང་ཡིན་པའོ། །ལོ་མའི་སྨན་ནི་པ་ཏོ་ལའི་ལོ་མ་དང་། བ་ཤ་ཀའི་ལོ་མ་དང་། ནིམ་པའི་ལོ་མ་དང་། ཀོ་ཤ་ཏ་གའི་ལོ་མ་དང་། སཔྟ་ པརྞའི་ལོ་མ་དང་། གཞན་ཡང་ལོ་མའི་སྨན་གྱི་ནང་དུ་གཏོགས་པའི་ཟས་ཀྱི་དོན་དུ་མི་འགྱུར་བ་གང་ཡིན་པའོ། །མེ་ཏོག་གི་སྨན་ནི་མེ་ཏོག་ལྔ་པོ་བ་ཤ་ཀའི་མེ་ཏོག་དང་། ནིམ་པའི་མེ་ཏོག་དང་། དྷ་ཀའི་མེ་ཏོག་དང་། ཤ་ཏའི་མེ་ཏོག་དང་། པད་མ་ཀེ་ས་རའི་མེ་ཏོག་

  556. 279a

    དང་། གཞན་ཡང་མེ་ཏོག་གི་སྨན་གྱི་ནང་དུ་གཏོགས་པ་ཟས་ཀྱི་དོན་དུ་མི་འགྱུར་བ་གང་ཡིན་པའོ། །འབྲས་བུའི་སྨན་ནི་ཨ་རུ་ར་དང་། སྐྱུ་རུ་ར་དང་། བ་རུ་ར་དང་། ན་ལེ་ཤམ་དང་། པི་པི་ལིང་དང་། གཞན་ཡང་འབྲས་བུའི་སྨན་གྱི་ནང་དུ་ གཏོགས་པ་ཟས་ཀྱི་དོན་དུ་མི་འགྱུར་བ་གང་ཡིན་པའོ། །ཏྲང་ཆུ་ལྔ་ནི་ཤིང་ཀུན་དང་། སྲ་རྩི་དང་། རྒྱ་སྐེགས་དང་། སྤྲ་ཚིལ་དང་། དྲོད་སྨན་ནོ། །དེ་ལ་ཤིང་ཀུན་ནི་ཤིང་ཀུན་གྱི་ཏྲང་ཆུའོ། །སྲ་རྩི་ནི་ཤིང་ས་ལའི་ཏྲང་ཆུའོ། །རྒྱ་སྐེགས་ནི་རྒྱ་སྐེགས་སོ། །སྤྲ་ ཚིལ་ནི་སྤྲ་ཚིལ་ལོ། །དྲོད་སྨན་ནི་དེ་དག་ལས་གཞན་པའི་ཤིང་རྣམས་ཀྱི་ཏྲང་ཆུའོ། །ཐལ་བ་ལྔ་གང་ཞེ་ན། ནས་ཀྱི་ཐལ་བ་དང་། ནས་ཀྱི་ཕུབ་མའི་ཐལ་བ་དང་། ཤིང་སརྫི་ཀའི་ཐལ་བ་དང་། ཏིལ་གྱི་ཐལ་བ་དང་། ཤིང་འབའ་ཤིག་ཀའི་ཐལ་བའོ། །ལན་ ཚྭ་ལྔ་གང་ཞེ་ན། རྒྱམ་ཚྭ་དང་། ལན་ཚྭ་སྨུག་པོ་དང་། ཁ་རུ་ཚྭ་དང་། ལན་ཚྭ་དང་། རྒྱ་མཚོའི་ལན་ཚྭའོ། །བསྐ་པ་ལྔ་གང་ཞེ་ན། ཨ་མྲའི་བསྐ་བ་དང་། ནིམ་པའི་བསྐ་བ་དང་། འཛམ་བུའི་བསྐ་བ་དང་། ཤ་རི་ཤའི་བསྐ་བ་དང་། ཀོ་ཤམ་པའི་བསྐ་བའོ། །དེ་ ལ་དུས་སུ་རུང་བ་གང་ཡིན་པ་དང་། ཐུན་ཚོད་དུ་རུང་བ་གང་ཡིན་པ་དང་། ཞག་བདུན་པ་གང་ཡིན་པ་དང་། འཚོ་བའི་བར་དུ་བཅང་བ་གང་ཡིན་པ་དེ་དུས་སུ་རུང་བ་དང་འདྲེས་པར་གྱུར་ན་དུས་སུ་སྤྱད་པར་བྱའི་དུས་མ་ཡིན་པར་ལོངས་སྤྱད་པར་མི་བྱའོ། །དུས་སུ་རུང་བ་ གང་ཡིན་པ་དང་། ཐུན་ཚོད་དུ་རུང་བ་གང་ཡིན་པ་དང་། ཞག་བདུན་པ་གང་ཡིན་པ་དང་། འཚོ་བའི་བར་དུ་བཅང་བ་གང་ཡིན་པ་དེ་གལ་ཏེ་ཐུན་ཚོད་དུ་རུང་བ་དང་འདྲེས་པར་གྱུར་ན་ཐུན་ཚོད་ལ་ཡོངས་སུ་སྤྱད་པར་བྱའི་ཐུན་ཚོད་ལས་འདས་པར་སྤྱད་པར་མི་བྱའོ། །ཞག་བདུན་པ་ གང་ཡིན་པ་དང་། འཚོ་བའི་བར་དུ་བཅང་བ་གང་ཡིན་པ་དེ་ཞག་བདུན་པ་དང་འདྲེས་པར་གྱུར་ན་ཞག་བདུན་སྤྱད་པར་བྱའི་ཞག་བདུན་ལས་འདས་པར་སྤྱད་པར་མི་བྱའོ། །འཚོ་བའི་བར་དུ་བཅང་བ་ནི་འཚོ་བའི་བར་དུ་བཅང་བར་བྱིན་གྱིས་བརླབས་ནས་ཡོངས་སུ་སྤྱད་

  557. 279b

    པར་བྱའོ། །བྱིན་གྱིས་བརླབ་པ་ནི་འདི་ལྟར་བྱ་སྟེ། ཟན་མ་ཟོས་པའི་མདུན་དུ་ལག་པ་གཉིས་བཀྲུས་ནས་བྱིན་ལེན་བྱས་ཏེ། དགེ་སློང་ཞིག་གི་མདུན་དུ་འདུག་ནས་འདི་སྐད་ཅེས་བརྗོད་པར་བྱའོ། །ཚེ་དང་ལྡན་པ་དགོངས་སུ་གསོལ། བདག་ཅག་མིང་འདི་ཞེས་བགྱི་བའི་ སྨན་ནི་བདག་དང་ཚངས་པ་མཚུངས་པར་སྤྱོད་པ་རྣམས་ཀྱི་དོན་དུ་འཚོ་བའི་བར་དུ་བཅང་བར་བྱིན་གྱིས་བརླབ་བོ། །དེ་བཞིན་དུ་ལན་གཉིས་ལན་གསུམ་དུ་བརྗོད་དོ། །འཚོ་བའི་བར་དུ་བཅང་བ་བྱིན་གྱིས་བརླབ་པ་ཇི་ལྟ་བ་དེ་བཞིན་དུ་ཐུན་ཚོད་དུ་རུང་བ་དང་། ཞག་བདུན་པ་ཡང་བྱིན་ གྱིས་བརླབ་པར་བྱའོ། །གླེང་གཞི་ནི་མཉན་ཡོད་ནའོ། །དེ་ནས་དགེ་སློང་གཞན་ཞིག་རླུང་ནད་ཀྱིས་ཐེབས་ནས་དེས་སྨན་པའི་དྲུང་དུ་སོང་སྟེ། བཞིན་བཟངས་ཁོ་བོ་འདི་འདྲ་བའི་ནད་ཀྱིས་བཏབ་ན་སྨན་སྟོན་ཅིག །དེས་སྨྲས་པ། འཕགས་པ་ཚིལ་སྟེན་ཅིག་དང་ཁྱོད་སོས་ པར་འགྱུར་རོ། །དགེ་སློང་གིས་སྨྲས་པ། བཞིན་བཟངས་ཅི་ཁོ་བོ་འདྲེ་ཡིན་ནམ། སྨན་པས་སྨྲས་པ། དགེ་སློང་ཁྱོད་ཀྱི་སྨན་འདི་ཡིན་ཏེ་གཞན་གྱིས་ནི་སོས་པར་མི་ནུས་སོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་ བཀའ་སྩལ་པ། གལ་ཏེ་སྨན་པ་ན་རེ་དགེ་སློང་ཁྱོད་ཀྱི་སྨན་འདི་ཡིན་ཏེ་གཞན་གྱིས་ནི་སོས་པར་མི་ནུས་སོ་ཞེས་སྨྲ་ན་ཚིལ་བསྟེན་པར་བྱའོ། །དགེ་སློང་དག་གིས་མ་ཤེས་ནས་སྨན་པ་ལ་དྲིས་པ་དང་། དེས་སྨྲས་པ། འཕགས་པ་ཁྱེད་ཅག་གི་སྟོན་པ་ཐམས་ཅད་མཁྱེན་པ་ཡིན་ གྱིས། དེ་ཁོ་ནའི་དྲུང་དུ་བཞུད་ལ་ཞུས་ཤིག །སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཚིལ་ལྔ་སོ་སོར་བསྟེན་པར་བྱ་སྟེ། ལྔ་གང་ཞེ་ན། ཉ་ཚིལ་དང་། སྦལ་པ་དཀར་པོའི་ཚིལ་དང་། ཆུ་སྲིན་བྱིས་པ་གསོད་ཀྱི་ཚིལ་དང་། དོམ་ཚིལ་དང་། ཕག་གི་ཚིལ་ལོ། །ཚིལ་འདི་ལྔ་དུས་མ་ཡིན་པར་བཙོས་པ་དང་། དུས་མ་ཡིན་པར་བཙགས་པ་དང་། དུས་མ་ཡིན་པར་བྱིན་ལེན་བྱས་པ་དང་། དུས་མ་ཡིན་པར་བྱིན་གྱིས་བརླབས་ན་ལོངས་སྤྱད་བར་མི་བྱའོ། །དུས་སུ་

  558. 280a

    བཙོས་ལ་དུས་མ་ཡིན་པར་བཙགས། དུས་མ་ཡིན་པར་བྱིན་ལེན་བྱས། དུས་མ་ཡིན་པར་བྱིན་གྱིས་བརླབས་ན་ལོངས་སྤྱད་པར་མི་བྱའོ། །དུས་སུ་བཙོས་དུས་སུ་བཙགས་དུས་མ་ཡིན་པར་བྱིན་ལེན་བྱས། དུས་མ་ཡིན་པར་བྱིན་གྱིས་བརླབས་ན་སྤྱད་པར་ མི་བྱའོ། །དུས་སུ་བཙོས། དུས་སུ་བཙགས། དུས་སུ་བྱིན་ལེན་བྱས་ལ་དུས་མ་ཡིན་པར་བྱིན་གྱིས་བརླབས་ན་སྤྱད་པར་མི་བྱའོ། །དུས་སུ་བཙོས་དུས་སུ་བཙགས། དུས་སུ་བྱིན་ལེན་བྱས། དུས་སུ་བྱིན་གྱིས་བརླབས་ན་ཏིལ་མར་ལ་སྤྱོད་པ་བཞིན་དུ་ཞག་བདུན་དུ་སྤྱད་ པར་བྱའོ། །དེ་ནས་དགེ་སློང་དེས་ཚིལ་ལོངས་སྤྱད་ནས་སོས་པར་གྱུར་ཏོ། །དེ་སོས་པར་གྱུར་པ་དང་། དེས་ཚིལ་གྱི་ལྷག་མ་དག་བོར་རོ། །ཇི་ཙམ་ན་དགེ་སློང་གཞན་ཞིག་དེ་འདྲ་བའི་ནད་ཀྱིས་ཐེབས་ནས་དེ་ཡང་སྨན་པའི་དྲུང་དུ་སོང་ནས་སྨྲས་པ། བཞིན་བཟངས་ཁོ་བོ་ལ་ འདི་འདྲ་བའི་ནད་ཀྱིས་བཏབ་ཀྱིས་སྨན་སྟོན་ཅིག །དེས་དེ་ལ་ཡང་ཚིལ་བསྟན་པ་དང་། དེ་དགེ་སློང་དེའི་དྲུང་དུ་སོང་ནས་སྨྲས་པ། ཚེ་དང་ལྡན་པ་ཁྱོད་ཀྱིས་ཚིལ་སྤྱད་པ་ཁོ་བོ་ལ་ཡང་སྨན་པས་བསྟན་ན་ཚིལ་ལྷག་པ་ལྟ་ཅུང་ཟད་ཡོད་དམ། དེས་སྨྲས་པ། བདོག་བདོག་པ་ ལས་བདག་གིས་དེ་བོར་རོ། །མ་ལེགས་པ་ཞིག་བྱས་སོ། །ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཚིལ་ལོངས་སྤྱད་པའི་ལྷག་མ་བོར་བར་མི་བྱ་སྟེ། འོན་ཀྱང་བཅང་ བར་བྱའོ། །ངས་དགེ་སློང་ཚིལ་འཆང་བའི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། ཚིལ་འཆང་བའི་དགེ་སློང་གིས་ཚིལ་སྤྱད་པའི་ལྷག་མ་དགེ་སློང་གཞན་ལ་སྦྱིན་པར་བྱའོ། །གལ་ཏེ་མ་བྱིན་ན་སྨན་ཁང་དུ་གཞག་པར་བྱ་སྟེ། སུ་འདོད་པ་དེས་བླང་བར་བྱའོ། །ཚིལ་ འཆང་བའི་དགེ་སློང་གིས་ཀུན་དུ་སྤྱོད་པའི་ཆོས་ཇི་ལྟར་བཅས་པར་ཡང་དག་པར་བླངས་ནས་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །བཅོམ་ལྡན་འདས་མཉན་ཡོད་ན་བཞུགས་སོ། །དེའི་ཚེ་དགེ་སློང་གཞན་ཞིག་གཡན་པའི་ནད་ཀྱིས་ཐེབས་ནས། དེས་

  559. 280b

    སྨན་པའི་དྲུང་དུ་སོང་སྟེ། བཞིན་བཟངས་ཁོ་བོ་གཡན་པའི་ནད་ཀྱིས་བཏབ་ཀྱིས་སྨན་སྟོན་ཅིག་དེས་སྨྲས་པ། འཕགས་པ་བསྐ་བ་སྟེན་ཅིག་དང་ཁྱོད་སོས་པར་འགྱུར་རོ། །བཞིན་བཟངས་ཅི་ཁོ་བོ་འདོད་པ་ལ་སྤྱོད་པ་ཡིན་ནམ། དེས་སྨྲས་པ། དགེ་སློང་ཁྱོད་ཀྱི་ སྨན་འདི་ཡིན་ཏེ་གཞན་གྱིས་ནི་སོས་པར་མི་ནུས་སོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་ཞེས་བྱ་བའི་བར་གོང་མ་བཞིན་དུ་སྟེ། ཁྱོད་ཀྱི་སྟོན་པ་ནི་ཐམས་ཅད་མཁྱེན་པ་ཡིན་པས། དེ་ཁོ་ནས་མཁྱེན་པར་འགྱུར་ཞེས་པའི་སྐབས་དེ་བཅོམ་ ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསྐ་བ་ནི་ལྔ་སྟེ་ཨ་མྲའི་བསྐ་བ་ཞེས་བྱ་བ་ནས་གོང་མ་བཞིན་དུའོ། །དགེ་སློང་དེས་བསྐ་བ་དག་འདེ་གུར་བྱས་ཏེ་ལུས་ལ་བྱུགས་པ་ལས་རྨ་མཆེད་ནས་བཅོམ་ལྡན་འདས་ ཀྱིས་བཀའ་སྩལ་པ། ཕྱེ་མ་བྱའོ་དགེ་སློང་དག་གིས་རློན་པ་ལ་བཏགས་པས་རི་ལུར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། བསྐམ་པར་བྱའོ། །དེ་དག་གིས་ཉི་མ་ལ་བསྐམས་པ་དང་། མཐུ་ཉམས་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་ པ། ཉི་མ་ལ་བསྐམ་པར་མི་བྱའོ། །དེ་དག་གིས་གྲིབ་མ་ལ་བསྐམས་པ་དང་འོན་ཀྱང་རུལ་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཉི་མའི་གྲིབ་མས་བསྐམ་པར་བྱའོ། །དགེ་སློང་གིས་བསྐ་བས་ལུས་བྱུགས་ནས་བཀྲུས་ཏེ་བསྐ་བའི་བྱ་བ་མི་བྱེད་དོ། །བཅོམ་ ལྡན་འདས་ཀྱིས་བཀའ་སྩལ་པ། ལག་པས་ཇི་ཙམ་ཆོག་གི་བར་དུ་དྲིལ་ནས་ཁྲུས་བྱའོ། །བཀྲུས་ནས་སླར་ཡང་བསྐ་བས་བསྐུས་ནས་བཀྲུས་ན་བསྐ་བའི་བྱ་བ་བྱེད་པར་འགྱུར་རོ། །དགེ་སློང་དེས་བསྐ་བས་བསྐུས་པ་དང་ནད་ཞི་བར་གྱུར་ཏོ་དེས་བསྐ་བའི་ལྷག་མ་བོར་ རོ། །ཇི་ཙམ་ན་དགེ་སློང་གཞན་ཞིག་དེ་འདྲ་བའི་ནད་ཀྱིས་ཐེབས་ནས་དེ་ཡང་སྨན་པའི་དྲུང་དུ་སོང་སྟེ་ཞེས་བྱ་བ་ནས་གོང་མ་བཞིན་དུ་སྟེ། ཁོ་བོས་དེ་ནི་བོར་རོ། །མ་ལེགས་པ་ཞིག་བྱས་སོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་།

  560. 281a

    བཅོམ་ལྡན་འདས་ཀྱིས་བཀའ་སྩལ་པ། ངས་བསྐ་བ་འཆང་བའི་དགེ་སློང་གི་ཀུན་དུ་སྤྱོད་པའི་ཆོས་བཅའ་བར་བྱ་སྟེ། བསྐ་བ་འཆང་བའི་དགེ་སློང་གིས་བསྐ་བ་སྤྱད་པའི་ལྷག་མ་དགེ་སློང་སུ་སློང་བ་དེ་ལ་སྦྱིན་པར་བྱའོ། །གལ་ཏེ་མ་བྱིན་ན་སྨན་ཁང་དུ་གཞག་ པར་བྱའོ། །བསྐ་བ་བཅང་བའི་དགེ་སློང་གིས་ཀུན་དུ་སྤྱོད་པའི་ཆོས་ཇི་ལྟར་བཅས་པ་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །དེའི་ཚེ་དགེ་སློང་གཞན་ཞིག་མིག་ནད་ཀྱིས་ཐེབས་ནས་དེ་སྨན་པའི་དྲུང་དུ་ སོང་སྟེ་བཞིན་བཟངས་ཁོ་བོ་མིག་ནད་ཀྱིས་ཐེབས་པར་གྱུར་ན་ཁོ་བོ་ལ་སྨན་སྟོན་ཅིག །དེས་སྨྲས་པ། འཕགས་པ་མིག་སྨན་སོ་སོར་སྟེན་ཅིག་དང་ཁྱེད་སོས་པར་འགྱུར་རོ། །བཞིན་བཟངས་ཅི་ཁོ་བོ་འདོད་པ་ལ་སྤྱོད་དམ་འཕགས་པ་ཁྱོད་ཀྱི་སྨན་འདི་ཡིན་ཏེ་གཞན་གྱིས་ནི་ སོས་པར་མི་ནུས་སོ་ཞེས་བྱ་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པ་ན་རེ་སྨན་འདི་ཡིན་ཏེ་གཞན་གྱིས་ནི་སོས་པར་མི་ནུས་སོ་ཞེས་ཟེར་ན་མིག་སྨན་བསྟེན་པར་བྱའོ། །དགེ་སློང་དག་གིས་ མིག་སྨན་གང་བསྟེན་པར་བྱ་བ་མ་ཤེས་ནས་དེ་དག་གིས་སྨན་པ་ལ་དྲིས་པ་དང་དེས་སྨྲས་པ། འཕགས་པ་ཁྱོད་ཉིད་ཀྱི་སྟོན་པ་ཐམས་ཅད་མཁྱེན་པ་ཡིན་གྱིས་ཞེས་བྱ་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་ སྩལ་པ། མིག་སྨན་ནི་ལྔ་སྟེ། མེ་ཏོག་གི་མིག་སྨན་དང་། ཁུ་བའི་མིག་སྨན་དང་། ཕྱེ་མའི་མིག་སྨན་དང་། རི་ལུའི་མིག་སྨན་དང་། བཙག་ཡུག་སྣམ་གྱི་མིག་སྨན་ནོ། །དེ་ནས་དགེ་སློང་དེས་མིག་སྨན་དེ་བསྟེན་ནས་སོས་པར་གྱུར་ཏོ། །དེས་མིག་སྨན་གྱི་ལྷག་མ་ གར་བབ་བབ་ཏུ་བཞག་པ་ལས་དེ་ཆུད་ཟོས་པར་གྱུར་ཏོ། །ཇི་ཙམ་ན་དགེ་སློང་གཞན་ཞིག་མིག་ནད་ཀྱིས་ཐེབས་ནས་དེས་ཀྱང་སྨན་པ་ལ་དྲིས་པ་དང་། དེས་དེ་ལ་ཡང་མིག་སྨན་དེ་ཉིད་བསྟན་ཏོ། །དེ་དགེ་སློང་དེའི་དྲུང་དུ་སོང་ནས་ཚེ་དང་ལྡན་པ་ཁོ་བོ་ཡང་མིག་ནད་ཀྱིས་

  561. 281b

    བཏབ་པར་གྱུར་ན་ཁྱོད་ལ་མིག་སྨན་གྱི་ལྷག་མ་ཅུང་ཟད་ཡོད་དམ། དེས་བཙལ་བར་བརྩམས་པ་ལས་མ་རྙེད་ནས་དེས་སྨྲས་པ། ཚེ་དང་ལྡན་པ་མིག་སྨན་དེ་བདོག་བདོག་སྟེ་བཞག་པ་ལས་དེར་སྟོར་ཏོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་ དང་། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་མིག་སྨན་གར་བབ་བབ་ཏུ་གཞག་པར་མི་བྱའོ། །ངས་མིག་སྨན་འཆང་བའི་དགེ་སློང་གི་ཀུན་དུ་སྤྱད་པའི་ཆོས་བཅའ་བར་བྱ་སྟེ། མིག་སྨན་འཆང་བའི་དགེ་སློང་གིས་མིག་སྨན་རྣམས་སོ་སོར་ཕྱེ་ལ་ གཞག་པར་བྱ་སྟེ། མེ་ཏོག་གི་མིག་སྨན་ནི་སྣོད་ཀྱི་ནང་དུའོ། །ཁུ་བའི་མིག་སྨན་ནི་གབ་ཙེའི་ནང་དུའོ། །ཕྱེ་མའི་མིག་སྨན་ནི་དོང་བུའི་ནང་དུའོ། །རི་ལུའི་མིག་སྨན་དང་བཙག་ཡུག་སྣམ་གྱི་མིག་སྨན་ནི་སྒྱེའུ་འམ། ཐུམ་པོར་སྐུད་པས་བཅིངས་ལ་ཟུང་ང་ལ་ གདགས་པར་བྱའོ། །མིག་སྨན་འཆང་བའི་དགེ་སློང་གིས་ཀུན་དུ་སྤྱད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ནས་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་མཉན་ཡོད་ནའོ། །དེའི་ཚེ་ཚེ་དང་ལྡན་པ་བྱེ་མ་སྐྱེས་སེམས་ འཁྲུགས་ཏེ་སྨྱོས་པར་གྱུར་ནས་དེ་དེ་དང་དེ་དག་ཏུ་འཕྱན་པ། ཇི་ཙམ་ན་བྲམ་ཟེ་དང་ཁྱིམ་བདག་དག་གིས་མཐོང་སྟེ་དེ་དག་གིས་སྨྲས་པ། ཤེས་ལྡན་དག་འདི་སུའི་བུ་ཞིག་ཡིན། གཞན་དག་གིས་སྨྲས་པ། ཁྱིམ་བདག་ཆེ་གེ་མོ་ཞིག་གིའོ། །དེ་དག་གིས་སྨྲས་ པ་ཤཱཀྱའི་སྲས་ཀྱི་དགེ་སྦྱོང་མགོན་མེད་པ་རྣམས་ཀྱི་ནང་དུ་རབ་ཏུ་མ་བྱུང་ན་འདི་གཉེན་རྣམས་ཀྱིས་གསོས་པར་འགྱུར་བ་ཞིག་ཅེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ ན་དགེ་སློང་བྱེ་མ་སྐྱེས་ཀྱི་དཔྱད་སྨན་པ་ལ་དྲིས་ལ་བྱོས་ཤིག །སྨན་པའི་དྲུང་དུ་དོང་ནས་བཞིན་བཟངས་དགེ་སློང་ཞིག་འདི་འདྲ་བའི་ནད་ཀྱིས་ཐེབས་ཀྱིས་དེའི་སྨན་སྟོན་ཅིག །དེས་སྨྲས་པ། འཕགས་པ་དག་ཤ་རྗེན་འཚལ་དུ་སྩོལ་ཅིག་དང་སོས་པར་འགྱུར་རོ། །བཞིན་

  562. 282a

    བཟངས་དེ་ཅི་འདྲེ་ཡིན་ནམ། འཕགས་པ་དེའི་སྨན་འདི་ལགས་ཏེ་གཞན་གྱིས་ནི་སོས་པར་མི་ནུས་སོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྨན་པ་ན་ རེ་དེའི་སྨན་འདི་ཡིན་ཏེ་གཞན་གྱིས་ནི་སོས་པར་མི་ནུས་སོ་ཞེས་ཟེར་ན་ཤ་རྗེན་པ་སྦྱིན་པར་བྱའོ། །དགེ་སློང་དག་གིས་དེ་བཞིན་དུ་བྱིན་པ་དང་། དེ་ཟར་མ་བཏུབ་བོ་བཅོམ་ལྡན་འདས་ཀྱིས་བཀའ་སྩལ་པ། མིག་རས་ཀྱིས་བཀབ་ལ་སྦྱིན་པར་བྱའོ། །དེ་དག་གིས་ བྱིན་ཏེ་བྱིན་མ་ཐག་ཏུ་རས་ཕྱེ་བ་དང་དེས་ལག་པ་ལ་རེག་པ་མཐོང་ནས་ཞེ་བ་ལོག་པས་སྐྱུགས་སོ། །བཅོམ་ལྡན་འདས་ཀྱིས་བཀའ་སྩལ་པ། མོད་ལ་རས་དབྱེ་བར་མི་བྱ་སྟེ་དེ་ལྟ་མོད་ཀྱི་བཅའ་བ་དང་བཟའ་བ་གཙང་ཞིང་བསོད་པ་དག་མདུན་དུ་བཞག་ནས་གང་གི་ཚེ་དེའི་ ལག་པ་བཀྲུས་པ་དེའི་ཚེ་དེ་དབྱེ་བར་བྱའོ། །དེ་སོས་པར་གྱུར་པ་དང་དེ་དེ་ཉིད་ལ་སྲེད་པར་གྱུར་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་སོས་པར་གྱུར་པ་དེའི་ཚེ་བསླབ་པ་ཇི་ལྟར་ བཅས་པ་བཞིན་ཡང་དག་པར་བླངས་ཏེ་འཇུག་པར་བྱའོ། །ལོངས་སྤྱོད་ན་འགལ་ཚབས་ཅན་དུ་འགྱུར་རོ། །གླེང་གཞི་ནི་རྒྱལ་པོའི་ཁབ་ནའོ། །ཚེ་དང་ལྡན་པ་པི་ལིན་དའི་བུ་གང་གི་ཚེ་རབ་ཏུ་བྱུང་བ་དེ་ཚུན་ཆད་རྟག་ཏུ་ན་བ་དང་ཟུག་གཟེར་མང་པོར་གྱུར་བ་དང་། དེ་ལ་དགེ་སློང་ དག་གིས་སྨྲས་པ། གནས་བརྟན་ཁྱོད་ཀྱི་སྙུན་གྱི་ཟོ་ཇི་ལྟ་དེས་སྨྲས་པ། ཚེ་དང་ལྡན་པ་དག་བདག་རྒྱུན་དུ་ན་བ་དང་ཟུག་གཟེར་མང་བས་ཐེ་གེ་བའི་སྐབས་མེད་དོ། །གནས་བརྟན་ཁྱོད་སྔོན་ཅི་ཞིག་འཆང་བར་བྱེད། དེས་སྨྲས་པ། སྨན་གྱི་མཆན་ཁུག་གོ། །ད་ ཅིའི་ཕྱིར་མི་བཅང་བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་རྗེས་སུ་གནང་སྟེ་དགེ་སློང་གིས་སྨན་གྱི་མཆན་ཁུག་བཅང་བར་

  563. 282b

    བྱའོ། །དགེ་སློང་དག་གིས་རྩ་བ་དང་། མེ་ཏོག་དང་སྡོང་བུ་དང་། འབྲས་བུའི་སྨན་རགས་པ་དག་དེའི་ནང་དུ་བཅུག་པ་དང་དེ་དག་རུལ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་དག་སྦམ་པའམ་བམ་པོར་བྱས་ཏེ་ཟུང་ང་ལ་གདགས་པར་བྱའོ། །དེ་དག་རུལ་ནས་ བཅོམ་ལྡན་འདས་ཀྱིས་བཀའ་སྩལ་པ། དུས་དུས་སུ་བསྐམ་པར་བྱའོ། །དེ་དག་གིས་ཉི་མ་ལ་བསྐམས་པ་དང་དེ་དག་མཐུ་ཆུང་བར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། ཉི་མ་ལ་བསྐམ་པར་མི་བྱའོ། །དེ་དག་གིས་གྲིབ་མ་ལ་བསྐམས་པ་དང་འོན་ཀྱང་རུལ་བར་ གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གྲིབ་མ་ལ་བསྐམ་པར་མི་བྱའོ། །དེ་དག་གིས་བཏིང་ནས་དོང་བ་དང་། ཆར་པ་དང་རླུང་བྱུང་སྟེ་མ་བསྡུས་ནས་བཅོམ་ལྡན་འདས་ཀྱིས་བཀའ་སྩལ་པ། བསྡུ་བར་བྱའོ། །བཅོམ་ལྡན་འདས་ཀྱིས་བསྡུ་བར་བྱའོ་ཞེས་ གསུངས་པ་དང་དེ་དག་གིས་སུས་བསྡུ་བ་མ་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པས་སོ། །ཁྱིམ་པ་མེད་ན་དགེ་སྦྱོང་གིས་སོ། །དགེ་སྦྱོང་མེད་ན་དགེ་སློང་ཉིད་ཀྱིས་བསྡུ་བར་བྱའོ། །དགེ་སློང་གིས་བསྡུས་པ་དང་འདྲེས་པར་གྱུར་ནས་འདྲེས་སོ་ཞེས་མ་ ཟོས་པ་དང་། བཅོམ་ལྡན་འདས་ཀྱིས་བཀའ་སྩལ་པ། སོ་སོར་ཕྱེ་ནས་ལོངས་སྤྱད་པར་བྱ་སྟེ། དེ་ལ་འགྱོད་པར་མི་བྱའོ། །ངས་ན་བ་དག་ལ་རྗེས་སུ་གནང་བ་གང་ཡིན་པ་དེ་ཐ་མལ་པའི་གནས་སྐབས་ན་སྤྱད་པར་མི་བྱའོ། །སྤྱོད་ན་འགལ་ཚབས་ཅན་དུ་ འགྱུར་རོ། །གླེང་གཞི་ནི་མཉན་ཡོད་ནའོ། །ཚེ་དང་ལྡན་པ་ནམ་གྲུ་གར་ཡང་སོམ་ཉི་ཟ་བས་དེའི་མིང་ནམ་གྲུ་སོམ་ཉི་ཅན་ནམ་གྲུ་སོམ་ཉི་ཅན་ཞེས་བྱ་བར་གྲགས་སོ། །དེ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ལ་ཞུགས་ ཏེ་དེ་རིམ་གྱིས་བུ་རམ་བྱེད་པའི་གྲོང་དུ་ཕྱིན་པ་དང་། ཇི་ཙམ་ན་འབྲས་ཕྱེ་དང་བུ་རམ་སྦྲུ་བར་བྱེད་པ་མཐོང་ནས་དེས་སྨྲས་པ། ཤེས་ལྡན་དག་བུ་རམ་འབྲས་ཕྱེ་དང་མ་སྦྲུ་ཤིག །འཕགས་པ་སྤྱི་བར་བགྱིད་པ་གཞན་འགའ་མཁྱེན་ནམ། ཁོ་བོས་སྤྱི་བ་གཞན་

  564. 283a

    ཡང་མི་ཤེས་མོད་ཀྱི་བདག་ཅག་དུས་མ་ཡིན་པར་ལོངས་སྤྱོད་དགོས་སོ། །འཕགས་པ་དུས་སུ་འམ་དུས་མ་ཡིན་པར་གསོལ་བ་ཡང་རུང་སྟེ། དེའི་སྤྱི་བ་ནི་འདི་ལགས་ཏེ་གཞན་གྱིས་ནི་མི་འབྲུས་སོ་ཇི་ཙམ་དུས་གཞན་ཞིག་ན་དགེ་འདུན་གྱིས་བཅའ་ བ་བུ་རམ་དག་རྙེད་ན་དེས་མ་ཟོས་སོ། །དེའི་ལྷན་ཅིག་གནས་པ་དང་ཉེ་གནས་དག་གིས་སྨྲས་པ་སློབ་དཔོན་དགེ་འདུན་གྱི་བཅའ་བ་བུ་རམ་ཞིག་བརྙེས་ཀྱིས་ལོངས་སྤྱད་དུ་གསོལ། དེས་སྨྲས་པ། བཞིན་བཟངས་ཟས་དང་འདྲེས་སོ་དེ་དག་གིས་ཀྱང་ལོངས་མ་སྤྱད་པ་དང་དེ་ རྣམས་ལ་དགེ་སློང་གཞན་དག་གིས་སྨྲས་པ། ཚེ་དང་ལྡན་པ་དག་དགེ་འདུན་གྱི་བཅའ་བ་བུ་རམ་ཞིག་བརྙེས་ན་ཅི་སྟེ་ལོངས་མི་སྤྱད་དེ་དག་གིས་སྨྲས་པ་མཁན་པོའི་ཞལ་ནས་འདི་ཟས་དང་འདྲེས་སོ་ཞེས་གསུངས་སོ་དེ་རྣམས་ཀྱིས་ཀྱང་ལོངས་མ་སྤྱད་དོ་འཁོར་ཕལ་པོ་ཆེ་དེ་དང་དགེ་ འདུན་རིལ་ལས་ཀྱང་ཕལ་ཆེར་ལོངས་མི་སྤྱད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་བཅོམ་ལྡན་འདས་ཀྱིས་བཀའ་སྩལ་པ། ཟས་ཀྱིས་ཟས་ཀྱི་བྱ་བ་མི་བྱེད་པ་ནི་མི་རྙེད་པས་འབྱུང་ཁུང་ཡོངས་སུ་དག་པས་ལོངས་སྤྱད་པར་བྱ་སྟེ། འདི་ལ་ འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །ཚེ་དང་ལྡན་པ་ནམ་གྲུ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ལ་ཞུགས་སོ། །རིམ་གྱིས་སྲང་ཞིག་ཏུ་ཕྱིན་པ་དང་དེས་སྤོས་འཚོང་ཞིག་ཕྱེ་ལ་རེག་ནས་བུ་རམ་ལ་རེག་ པར་བྱེད་པ་མཐོང་ནས་དེས་སྨྲས་པ། བཞིན་བཟངས་ཕྱེ་ལ་རེག་ནས་བུ་རམ་ལ་རེག་པར་མ་བྱེད། དུས་མ་ཡིན་པར་ཡང་བདག་ཅག་གིས་ལོངས་སྤྱད་དགོས་སོ་དེས་སྨྲས་པ། འཕགས་པ་དག་ལ་ཡང་དང་ཡང་དུ་སུག་ཆབ་གཏོང་བ་སུ་ཞིག་མཆིས། དུས་གཞན་ ཞིག་ན་དགེ་འདུན་གྱི་བཅའ་བ་བུ་རམ་ཞིག་རྙེད་པ་དང་དེས་ལོངས་མ་སྤྱད་དོ། །ལྷན་ཅིག་གནས་པ་དང་ཉེ་གནས་དག་གིས་སྨྲས་པ་སློབ་དཔོན་དགེ་འདུན་གྱི་བཅའ་བ་བུ་རམ་དག་བརྙེས་ན་ཅི་སྟེ་མི་གསོལ་དེས་སྨྲས་པ། བཞིན་བཟངས་འདི་ཟས་དང་འདྲེས་སོ། །དེ་རྣམས་

  565. 283b

    ཀྱིས་ཀྱང་ལོངས་མ་སྤྱད་པ་དང་དེ་རྣམས་ལ་དགེ་སློང་དག་གིས་སྨྲས་པ། ཚེ་དང་ལྡན་པ་དག་དགེ་འདུན་གྱི་བཅའ་བ་བུ་རམ་ཞིག་བརྙེས་ན་ཅི་སྟེ་མི་ཟ་དེ་རྣམས་ཀྱིས་སྨྲས་པ། མཁན་པོའི་ཞལ་ནས་འདི་ཟས་དང་འདྲེས་སོ་ཞེས་གསུང་ངོ་། །དེ་དག་གིས་ཀྱང་ལོངས་མ་སྤྱད་ དོ། །འཁོར་ཕལ་པོ་ཆེ་དེ་དང་དགེ་འདུན་རིལ་ལས་ཀྱང་ཕལ་ཆེས་ལོངས་མ་སྤྱད་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཟས་ཀྱིས་ཟས་ཀྱི་བྱ་བ་མི་བྱེད་པས་མི་རྙེད་ཀྱིས་ཁྱིམ་པས་ཡོངས་ སུ་དག་པས་ལོངས་སྤྱད་པར་བྱ་སྟེ། དེ་ལ་འགྱོད་པར་མི་བྱའོ། །གླེང་གཞི་ནི་མཉན་ཡོད་ནའོ། །ཚེ་དང་ལྡན་པ་ཤཱ་རིའི་བུ་རླུང་ནད་ཀྱིས་ཐེབས་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བསམས་པ་ཚེ་དང་ལྡན་པ་ཤཱ་རིའི་བུ་ལ་བདག་རང་གི་བློས་རིམ་གྲོ་ནི་ལན་མང་དུ་བྱས་ མོད་ཀྱི་ལན་འགའ་ཡང་སྨན་པ་ལ་མ་དྲིས་ཀྱིས། མ་ལ་ད་ནི་སྨན་པ་ལ་དྲིའོ་སྙམ་ནས་དེ་སྨན་པའི་དྲུང་དུ་སོང་སྟེ། བཞིན་བཟངས་ཚེ་དང་ལྡན་པ་ཤཱ་རིའི་བུ་འདི་འདྲ་བའི་ནད་ཀྱིས་ཐེབས་པར་གྱུར་ན་དེའི་སྨན་སྟོན་ཅིག་དེས་སྨྲས་པ། འཕགས་པ་སྐྱུར་ཁུའི་ནང་དུ་ལན་ཚྭ་ སྩོལ་ལ་གསོལ་ཅིག་དང་སོས་པར་འགྱུར་རོ། །དེས་སྐྱུར་ཁུ་ནི་རྙེད་ན་ལན་ཚྭ་མེད་ནས་དེ་ལན་ཚྭ་བཙལ་བར་བརྩམས་པ་དང་ཚེ་དང་ལྡན་པ་པི་ལིན་དའི་བུས་སྨྲས་པ། ཚེ་དང་ལྡན་པ་མཽད་གལ་གྱི་བུ་ཁོ་བོ་ལ་ལན་ཚྭ་རྭ་གང་འཚོ་བའི་བར་དུ་བཅང་བར་བྱིན་གྱིས་བརླབས་པ་ཞིག་ ཡོད་ཀྱིས། གལ་ཏེ་བཅོམ་ལྡན་འདས་ཀྱིས་གནང་ན་སྦྱིན་ནོ་ཞེས་སྨྲས་པ་ཚེ་དང་ལྡན་པ་ཤཱ་རིའི་བུས་ཐོས་ནས་དེས་སྨྲས་པ། ཚེ་དང་ལྡན་པ་མཽད་གལ་གྱི་བུ་ཆེན་པོ་ཁོ་བོ་འདི་སྙམ་དུ་སེམས་ཏེ། འཚོ་བའི་བར་དུ་བཅངས་པ་དུས་སུ་རུང་བ་དང་འདྲེས་པ་ལོངས་སྤྱད་པར་མི་དབང་ ངོ་སྙམ་མོ་ཞེས་པའི་སྐབས་དེ་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་མི་དབང་སྟེ། དུས་སུ་རུང་བ་གང་ཡིན་པ་དང་། ཐུན་ཚོད་དུ་རུང་བ་གང་ཡིན་པ་དང་། ཞག་བདུན་པ་གང་

  566. 284a

    ཡིན་པ་དང་འཚོ་བའི་བར་དུ་བཅང་བ་གང་ཡིན་པ་དེ་གལ་ཏེ་དུས་སུ་རུང་བ་དང་འདྲེས་པར་གྱུར་ལ། གལ་ཏེ་བྱིན་གྱིས་ཀྱང་མ་བརླབས་ན་དུས་སུ་རུང་བ་དང་འདྲེས་པས་དུས་སུ་སྤྱད་པར་བྱའི་དུས་ལས་འདས་པར་སྤྱད་པར་མི་བྱའོ། །ཐུན་ཚོད་དུ་རུང་བ་གང་ ཡིན་པ་དང་། ཞག་བདུན་པ་གང་ཡིན་པ་དང་། འཚོ་བའི་བར་དུ་བཅང་བ་གང་ཡིན་པ་དེ་གལ་ཏེ་ཐུན་ཚོད་དུ་རུང་བ་དང་འདྲེས་པར་གྱུར་ལ། གལ་ཏེ་བྱིན་གྱིས་མ་བརླབས་ན་ཐུན་ཚོད་དུ་རུང་བ་དང་འདྲེས་པས་ཐུན་ཚོད་དུ་སྤྱད་པར་བྱའི་ཐུན་ཚོད་ལས་འདས་པར་སྤྱད་པར་མི་ བྱའོ། །ཞག་བདུན་པ་གང་ཡིན་པ་དང་། འཚོ་བའི་བར་དུ་བཅང་བ་གང་ཡིན་པ་དེ་ཞག་བདུན་པ་དང་འདྲེས་པར་གྱུར་ན་ཞག་བདུན་པ་དང་འདྲེས་པས་ཞག་བདུན་དུ་སྤྱད་པར་བྱའི་ཞག་བདུན་ལས་འདས་པར་སྤྱད་པར་མི་བྱའོ། །འཚོ་བའི་བར་དུ་བཅང་བ་གང་ཡིན་པ་དེ་ནི་ཇི་ སྲིད་འཚོའི་བར་དུ་སྤྱད་པར་བྱ་སྟེ་གཞན་དུ་སྤྱོད་ན་འགལ་ཚབས་ཅན་དུ་འགྱུར་རོ།། །།སྡོམ་ལ། སྡེ་ཆེན་ཤ་དང་གཞང་འབྲུམ་དང་། །རླུང་ནད་ཅན་དང་གང་པོ་དང་། །མེས་བྱིན་དང་ནི་བེའི་ར་ཏོ། །སྤྲིན་ཅན་བྱ་རོག་རྣམས་ཡིན་ནོ། །སངས་རྒྱས་བཅོམ་ལྡན་ འདས་ཡུལ་ཀ་ཤི་ནས་ལྗོངས་རྒྱུ་ཞིང་གཤེགས་པ་ན་བཱ་རཱ་ཎ་སཱིར་བྱོན་ནས། བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །བཱ་རཱ་ཎ་སཱི་ན་ཁྱིམ་བདག་སྡེ་ཆེན་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་གནས་སོ། །དེའི་ཆུང་མ་ནི་སྡེ་ཆེན་མ་ཞེས་ བྱའོ། །དེ་ཆུང་མ་དང་བཅས་ཏེ་དད་པ་བཟང་བ་དགེ་བའི་བསམ་པ་ཅན་ཡིན་ཏེ། དེས་བཅོམ་ལྡན་འདས་ཡུལ་ཀ་ཤི་ཞེས་བྱ་བ་ནས་ལྗོངས་རྒྱུ་ཞིང་གཤེགས་པ་ན་བཱ་རཱ་ཎ་སཱིར་བྱོན་ནས། བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ་ཞེས་ཐོས་སོ། །ཐོས་ ནས་ཀྱང་འདི་སྙམ་དུ་སེམས་ཏེ། བཅོམ་ལྡན་འདས་བདག་གི་ཁྱིམ་དུ་ལན་མང་དུ་སྤྱན་དྲངས་ཏེ་ཞལ་ཟས་ནི་གསོལ་ན་ཡོ་བྱད་ཐམས་ཅད་ཀྱིས་མ་བསྟབས་ཀྱིས། མ་ལ་བདག་གིས་ད་བཅོམ་ལྡན་འདས་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་པར་བྱའོ་སྙམ་

  567. 284b

    ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་ཆོས་དང་ལྡན་པའི་གཏམ་གྱིས་ཡང་དག་ པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག ། ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་སྡེ་ཆེན་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་དེ་རྗེས་སུ་ཡི་རངས་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་ སྨན་དང་། ཡོ་བྱད་རྣམས་འབུལ་ན་བདག་ལ་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་སྡེ་ཆེན་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་སོང་ངོ་། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་ཁྱིམ་བདག་སྡེ་ཆེན་གྱིས་ཟླ་བ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ ཀྱི་རྐྱེན་སྨན་དང་། ཡོ་བྱད་རྣམས་ཀྱིས་བསྙེན་བཀུར་ཁོ་ན་བྱས་སོ། །ཁྱིམ་བདག་སྡེ་ཆེན་གྱི་ཀུན་དུ་སྤྱོད་པ་ནི་ནང་པར་སྔར་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་དགེ་སློང་རྣམས་ལ་ལྟ་བར་བྱེད་པ་ལས་དགེ་སློང་ན་བ་ནད་ཚབས་ཆེ་བ་སྡུག་བསྔལ་བའི་ནད་པ་

  568. 285a

    གཞན་ཞིག་ཡོད་པ་དེ་ལ་སྨན་པས་ཤ་ཁུ་འཐུང་ཤིག་ཅེས་བསྟན་ཏོ། །དེ་ནས་ཁྱིམ་བདག་སྡེ་ཆེན་དགེ་སློང་དེ་གང་ན་བ་དེར་སོང་སྟེ་ཕྱིན་ནས་རྐང་པ་གཉིས་ལ་མགོ་བོས་ཕྱག་བྱས་ཏེ་དྲིས་པ། འཕགས་པ་སྨན་པས་ཅི་བསྟན། དེས་སྨྲས་པ། ཤ་ཁུ་འཐུང་ ཤིག་ལོ། །དེ་ནས་ཁྱིམ་བདག་སྡེ་ཆེན་རང་གི་ཁྱིམ་དུ་སོང་སྟེ་ཆུང་མ་ལ་སྨྲས་པ། སློབ་དཔོན་ཆེ་གེ་མོ་ཞེས་བྱ་བ་ལ་སྨན་པས་ཤ་ཁུ་འཐུང་ཤིག་ཅེས་བསྟན་གྱིས་སྦྱོར་ལ་སྐུར་ཅིག །དེས་བུ་མོ་ཞིག་ལ་རིན་བསྐུར་ནས་ཚོང་དུས་སུ་བཏང་བ་ལས། དེའི་ཉིན་མོ་རྒྱལ་པོའི་སྲས་ བལྟམ་ནས། དེས་དྲིལ་སྒྲོགས་སུ་བཅུག་པ། སུས་ཀྱང་སྲོག་གཅད་པར་མི་བྱའོ། །གང་ཞིག་སྲོག་བཅད་ན་ཆད་པས་ཆོད་པར་བཅད་དོ་ཞེས་བསྒོའོ། །དེ་ནས་རིན་གྱིས་ཀྱང་ཚོང་དུས་སུ་ཤ་མ་རྙེད་ནས། དེ་ནས་བུ་མོ་དེས་དེ་ལྟར་གྱུར་པ་དག་ཁྱིམ་བདག་སྡེ་ཆེན་ལ་རྒྱས་པར་བརྗོད་ པ་དང་། ཁྱིམ་བདག་སྡེ་ཆེན་གྱི་ཆུང་མས་བསམས་པ། སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བདག་ཅག་གི་ཡོ་བྱད་ཐམས་ཅད་ཀྱིས་བསྟབས་ན། གལ་ཏེ་དགེ་སློང་ཞིག་སྨན་མེད་པས་ཤི་བར་གྱུར་ན་མ་ལེགས་སོ་ཞེས་དེ་སྙམ་དུ་དཔྱད་ནས། གྲི་རྣོན་པོ་ བླངས་ཏེ་ཁྱིམ་དུ་ཞུགས་ནས་བརླའི་ཤ་ལས་བཅད་དེ་བུ་མོ་ལ་བྱིན་ནས་བུ་ཤ་འདི་ཁུ་བར་བྱོས་ལ་འཕགས་པ་ཆེ་གེ་མོ་ཞེས་བྱ་བའི་དྲུང་དུ་ཁྱེར་ཅིག །དེས་དེ་ཁྱེར་ནས་དགེ་སློང་གི་ལོངས་སྤྱད་པ་ལས་སོས་པར་གྱུར་ཏོ།། །།འདུལ་བ་གཞི། བམ་པོ་ཉི་ཤུ་ གསུམ་པ། དགེ་སློང་དེས་འདི་ལྟར་བདག་ལ་ཁྱིམ་བདག་གི་ཆུང་མ་འདིས་རང་གི་ཤས་བསྙེན་བཀུར་བྱས་པར་རིག་ནས་དེ་འདི་སྙམ་དུ་སེམས་ཏེ། བདག་དད་པས་བྱིན་པ་ལོངས་སྤྱད་ནས་གློས་ཕབ་སྟེ་འདུག་པ་ནི་རིགས་པ་མ་ཡིན་གྱི། མ་ལ་བདག་གིས་མ་ཐོབ་པ་ཐོབ་པར་བྱ་ བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བརྩོན་པར་བྱའོ་སྙམ་ནས། དེ་བརྩོན་འགྲུས་བརྩམ་པར་བརྩམས་ཏེ། དེས་བརྩོན་པ་དང་། འབད་པ་དང་། བརྩལ་བ་བྱས་པས་འཁོར་བའི་འཁོར་ལོ་ཆ་ལྔ་པོ་

  569. 285b

    གཡོ་བ་དང་། མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་དུ་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་དགྲ་ བཅོམ་པར་གྱུར་ཏེ། ཁམས་གསུམ་གྱི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཉམ་པའི་སེམས་སྟེའུ་དང་ཙན་དན་དུ་མཉམ་པ། རིག་པས་མ་རིག་པའི་སྒོ་ངའི་སྦུབས་དྲལ་ཅིང་རིག་པ་དང་། མངོན་པར་ཤེས་ པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པའི་རྙེད་པ་དང་ཆགས་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་པོ་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །སྐབས་ དེ་ལ་སངས་རྒྱས་བཅོམ་ལྡན་འདས་རྣམས་ནི་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་མནབས་ལྷུང་བཟེད་དང་། ཆོས་གོས་བསྣམས་ནས་དགེ་ སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་གྱིས་བལྟས་ཏེ་ཁྱིམ་བདག་སྡེ་ཆེན་གྱི་ཁྱིམ་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ ཁྱིམ་བདག་སྡེ་ཆེན་ལ་བཀའ་སྩལ་པ། ཁྱིམ་བདག་ཁྱིམ་བདག་གི་ཆུང་མ་སྡེ་ཆེན་མ་མི་སྣང་ན་ག་རེ། བཅོམ་ལྡན་འདས་སྤྱོད་ལམ་རྔོ་མི་ཐོག་པས་ཕུགས་ན་མཆིས་སོ། །སངས་རྒྱས་བཅོམ་ལྡན་འདས་རྣམས་ཀྱི་ཆེ་བའི་བདག་ཉིད་ནི་བསམ་གྱིས་མི་ཁྱབ་པ་ཡིན་ པས་བཅོམ་ལྡན་འདས་ཀྱིས་གང་གིས་ན་རྨ་དེ་མདོག་འདྲ་བ་དང་། པགས་པ་འདྲ་བ་དང་། བ་སྤུ་འདྲ་བར་གྱུར་པ་དེ་ལྟར་བྱིན་གྱིས་བརླབས་སོ། །དེ་ནས་ཁྱིམ་བདག་སྡེ་ཆེན་གྱི་ཆུང་མ་དད་པ་སྐྱེས་ཏེ་སྒོར་བྱུང་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་སོ། །

  570. 286a

    བཅོམ་ལྡན་འདས་ཀྱིས་བཀའ་སྩལ་པ། ཅི་ཁྱིམ་བདག་གི་ཆུང་མ་འདི་བྱང་ཆུབ་སེམས་དཔའི་སྦུངས་ཉམས་སུ་མྱོང་བར་བྱེད་དམ། དེས་ཚིགས་སུ་བཅད་དེ་གསོལ་པ། བསྒྲིམ་མི་དགོས་པར་འཁོར་བ་ན། །ལུས་ནི་ཤིན་ཏུ་རྙེད་པར་སླའི། །བསྐལ་ པ་བྱེ་བ་སྟོང་རྣམས་སུ། །སྦྱིན་གནས་ཤིན་ཏུ་རྙེད་པར་དཀའ། །དེ་ནས་ཁྱིམ་བདག་སྡེ་ཆེན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་རྣམས་རང་གི་ལག་གིས་སྟོབས་ཤིང་ཚིམ་པར་བྱེད་ དོ། །རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་གིས་བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ། ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་ འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་ དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། ། དེ་ནས་བཅོམ་ལྡན་འདས་གཙུག་ལག་ཁང་དུ་གཤེགས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཤ་རྣམས་ཀྱི་ནང་ནས་ནི་འདི་ལྟ་ སྟེ། མིའི་ཤ་ཐ་ཆད་ཡིན་ནོ། །དེ་ལྟ་བས་ན་དགེ་སློང་གིས་མིའི་ཤ་བཟའ་བར་མི་བྱའོ། །དགེ་སློང་གིས་མི་ཤ་ཟོས་ན་ལྟུང་བ་སྦོམ་པོར་འགྱུར་རོ། །གཞན་ཡང་ངས་དགེ་འདུན་གྱི་གནས་བརྟན་གྱི་དགེ་སློང་གི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། དགེ་འདུན་

  571. 286b

    གྱི་གནས་བརྟན་གྱི་དགེ་སློང་གིས་ཤ་འདྲིམ་པར་བྱེད་ན་འདི་ཅིའི་ཤ་ཞེས་དྲི་བར་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་མ་སྤོབས་ན་གནས་བརྟན་གཉིས་པས་དྲི་བར་བྱའོ། །དགེ་འདུན་གྱི་གནས་བརྟན་གྱིས་ཀུན་དུ་སྤྱད་པའི་ཆོས་ཇི་ལྟར་བཅས་པ་བཞིན་ཡང་ དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་ཐམས་ཅད་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཁྱིམ་བདག་སྡེ་ཆེན་གྱི་མཆིས་འབྲང་གིས་རང་གི་ཤས་དགེ་སློང་འདི་ལ་བསྙེན་ བཀུར་བགྱིས་ལ། དགེ་སློང་འདིས་ཀྱང་སྡེ་ཆེན་མ་ལ་བརྟེན་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་མ་ཡིན་གྱི། ཇི་ལྟར་འདིས་འདས་པའི་ དུས་ན་ཡང་དགེ་སློང་འདི་ལ་རང་གི་ཤས་བསྙེན་བཀུར་བྱས་ཏེ་འདིས་ཀྱང་དེ་ལ་བརྟེན་ནས་མངོན་པར་ཤེས་པ་ལྔ་མངོན་སུམ་དུ་བྱས་པ་དེ་ཤིན་ཏུ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ན་ཁྱིམ་བདག་སྡེ་ཆེན་ཞེས་བྱ་ བ་ཞིག་ཡོད་དེ། དེའི་ཆུང་མ་སྡེ་ཆེན་མ་ཞེས་བྱའོ། །ཇི་ཙམ་ན་བྲམ་ཟེ་ཚོགས་འདོན་དུ་འཇུག་པ་གཞན་ཞིག་བྲམ་ཟེའི་བུ་ལྔ་བརྒྱ་ཙམ་ལ་བྲམ་ཟེའི་གསང་ཚིག་འདོན་དུ་འཇུག་གོ། །དེ་ལ་ཁྱིམ་བདག་སྡེ་ཆེན་དད་པ་སྐྱེས་ཏེ། དེས་དེ་འཁོར་དང་བཅས་པ་ལ་ཡོ་བྱད་ ཐམས་ཅད་ཀྱིས་བསྟབས་ཏེ། ཁྱིམ་བདག་སྡེ་ཆེན་གྱིས་བྲམ་ཟེ་དེ་འཁོར་དང་བཅས་པ་ལ་བཀུར་སྟི་ཁོ་ན་བྱས་སོ། །ཁྱིམ་བདག་དེའི་ཀུན་ཏུ་སྤྱོད་པ་ནི་ནང་པར་སྔར་ལངས་ཏེ་ནད་པ་རྣམས་ལ་ལྟ་བར་བྱེད་པས་ཇི་ཙམ་ན་བྲམ་ཟེའི་ཁྱེའུ་གཞན་ཞིག་ན་བ་སྡུག་བསྔལ་བ་ནད་ཚབས་ཆེ་ བར་གྱུར་ནས་དེ་ལ་སྨན་པས་ཤ་ཁུ་འཐུང་ཤིག་ཅེས་བསྟན་ཏོ། །དེ་ནས་ཁྱིམ་བདག་སྡེ་ཆེན་བྲམ་ཟེའི་ཁྱེའུ་གང་ན་བ་དེར་སོང་སྟེ་སོན་ནས་ཕྱག་བྱས་ཏེ་དྲིས་པ། བྲམ་ཟེའི་ཁྱེའུ་ཁྱོད་ལ་སྨན་པས་ཅི་བསྟན། དེས་སྨྲས་པ། ཤ་ཁུ་འཐུང་ཤིག་ལོ། །དེ་ནས་ཁྱིམ་བདག་

  572. 287a

    སྡེ་ཆེན་ཁྱིམ་དག་ཏུ་སོང་ནས་ཆུང་མ་ལ་སྨྲས་པ། བྲམ་ཟེའི་ཁྱེའུ་ཆེ་གེ་མོ་ཞེས་བྱ་བ་ལ་ཤ་ཁུ་འཐུང་ཤིག་ཅེས་སྨན་པས་བསྟན་གྱིས་དེ་སྦྱོར་ལ་སྐུར་ཅིག །དེས་བུ་མོ་ཞིག་ལ་རིན་བསྐུར་ཏེ་ཚོང་དུས་སུ་བཏང་ངོ་། །དེ་ཉིད་ཀྱི་ཉིན་མོ་རྒྱལ་པོའི་བུ་བཙས་ནས་དེས་ དྲིལ་སྒྲོགས་སུ་བཅུག་སྟེ། སུས་ཀྱང་སྲོག་གཅད་པར་མི་བྱའོ། །གང་གིས་སྲོག་བཅད་པར་གྱུར་ན་དེ་ཆད་པས་ཆོད་པར་བཅད་དོ་ཞེས་བསྒོའོ། །དེ་ནས་ཚོང་དུས་སུ་རིན་གྱིས་ཀྱང་ཤ་མ་རྙེད་དོ། །དེ་ནས་བུ་མོ་དེས་དེ་ལྟར་གྱུར་པ་དག་ཁྱིམ་བདག་སྡེ་ཆེན་གྱི་ཆུང་མ་ལ་ རྒྱས་པར་སྨྲས་པ་དང་། ཁྱིམ་བདག་སྡེ་ཆེན་གྱི་ཆུང་མས་བསམས་པ། བྲམ་ཟེ་འཁོར་དང་བཅས་པ་འདི་དག་བདག་ཅག་གིས་ཡོ་བྱད་ཐམས་ཅད་བསྟབས་ན། གལ་ཏེ་བྲམ་ཟེའི་ཁྱེའུ་ཞིག་སྨན་མེད་པས་དུས་བྱས་པར་གྱུར་ན་མ་ལེགས་སོ་ཞེས་དེ་སྙམ་དུ་དཔྱད་ན། གྲི་ རྣོན་པོ་བླངས་ཏེ་ཁྱིམ་གྱི་ནང་དུ་ཞུགས་ནས་བརླའི་ཤ་ལས་བཅད་དེ་བུ་མོ་ལ་བྱིན་ནས། བུ་ཤ་འདི་ཁུ་བར་བྱོས་ལ་བྲམ་ཟེའི་ཁྱེའུ་ཆེ་གེ་མོ་ཞེས་བྱ་བའི་དྲུང་དུ་ཁྱེར་ཅིག །དེས་ཁྱེར་ནས་བྲམ་ཟེའི་ཁྱེའུ་དེས་ལོངས་སྤྱད་ནས་སོས་པར་གྱུར་ཏོ། །བྲམ་ཟེའི་ཁྱེའུ་དེས་འདི་ལྟར་ བདག་ལ་ཁྱིམ་བདག་གི་ཆུང་མ་དེས་རང་གི་ཤས་བསྙེན་བཀུར་བྱས་པར་རིག་ནས་དེ་འདི་སྙམ་དུ་སེམས་ཏེ། བདག་དད་པས་བྱིན་པ་ཡོངས་སུ་ལོངས་སྤྱད་ནས་བདག་གློས་ཕབ་སྟེ་འདུག་པ་ནི་རིགས་པ་མ་ཡིན་གྱིས། མ་ལ་བདག་གིས་མ་ཐོབ་པ་ཐོབ་པར་བྱ་བ་དང་། མ་རྟོགས་ པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བདག་གིས་འབད་པར་བྱའོ་སྙམ་ནས། དེ་ནས་དེ་ཞི་བའི་ཕྱོགས་སུ་སོང་སྟེ་མངོན་པར་ཤེས་པ་ལྔ་མངོན་སུམ་དུ་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་ སྡེ་ཆེན་ཞེས་བྱ་བའི་ཆུང་མ་གང་ཡིན་པ་དེ་ནི་ཁྱིམ་བདག་སྡེ་ཆེན་གྱི་ཆུང་མ་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་གང་ཡིན་པ་དེ་ནི་དགེ་སློང་འདི་ཉིད་ཡིན་ཏེ་དེའི་ཚེ་ཡང་འདིས་དགེ་སློང་དེ་ལ་རང་གི་ཤས་བསྙེན་བཀུར་བྱས་ཏེ། འདིས་ཀྱང་དེ་ལ་བརྟེན་ནས་མངོན་པར་

  573. 287b

    ཤེས་པ་ལྔ་མངོན་སུམ་དུ་བྱས་སོ། །ད་ལྟར་ཡང་འདིས་དགེ་སློང་འདི་ལ་རང་གི་ཤས་བསྙེན་བཀུར་བྱས་སོ། །དགེ་སློང་འདིས་ཀྱང་འདི་ལ་བརྟེན་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་ པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན། ལས་གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན། །འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ད་ཕྱིན་ཆད་ལས་གཅིག་ཏུ་གནག་པ་རྣམས་དང་འདྲེན་མ་ནི་སྤངས་ལ། ལས་ གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །གླེང་གཞི་ནི་མཉན་ཡོད་ནའོ། །དེའི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་གླང་པོ་ཆེ་ཚོ་དགུ་ཁ་དག་གོ། །མུ་གེའི་དུས་བྱུང་བས་བྲམ་ཟེ་དང་། ཁྱིམ་བདག་རྣམས་ ཀྱིས་གླང་པོ་ཆེའི་ཤ་བཟའ་བར་བརྩམས་སོ། །དྲུག་སྡེའི་དགེ་སློང་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ནས་མཉན་ཡོད་དུ་བསོད་སྙོམས་ལ་ཞུགས་སོ། །ཇི་ཙམ་ན་ཁྱིམ་བདག་གཞན་ཞིག་གིས་གླང་པོ་ཆེའི་ཤ་ཕྲུ་བར་བཅུག་སྟེ་འཚེད་ཅིང་འདུག་ པས་ཁྱིམ་དེར་དེ་དག་ཞུགས་པ་དང་། །ཁྱིམ་བདག་གི་ཆུང་མས་སྨྲས་པ། འཕགས་པ་དབུལ་དུ་ཅུང་ཟད་ཀྱང་མ་མཆིས་ཀྱིས་བཞུད་ཅིག །དེ་དག་གིས་སྨྲས་པ། ཕྲུ་བ་འདིའི་ནང་ན་འཚེད་ཅིང་འདུག་ན། འཕགས་པ་འདི་ནི་གླང་པོ་ཆེའི་ཤ་ལགས་ན་ཅི་ཁྱེད་ཅག་ ཀྱང་གླང་པོ་ཆེའི་ཤ་གསོལ་ལམ། ཁོ་བོ་ཅག་ནི་འཚོ་བ་ཁྱེད་ཅག་ལ་རག་ལས་པ་ཡིན་པས་གལ་ཏེ་ཁྱེད་ཟ་ན་ཁོ་བོ་ཅག་ལ་ཡང་བྱིན་ཅིག །དེ་དག་ལ་ཕུལ་ནས་དེ་དག་གིས་ལྷུང་བཟེད་ཀྱི་སྣོད་བཀང་སྟེ་ཕྱིར་བྱུང་བ་དགེ་སློང་གཞན་དག་ཅིག་བསོད་སྙོམས་ལ་རྒྱུས་པ་དེ་དག་གིས་ མཐོང་ངོ་། །མཐོང་ནས་དྲིས་པ། ཨེ་མའོ་དྲུག་སྡེ་ལྷུང་བཟེད་ཀྱི་སྣོད་ཁེངས་ན་ཅི་ཡིན། དེ་དག་གིས་སྨྲས་པ། གླང་པོ་ཆེའི་ཤ་ཅུང་ཞིག་རྙེད་དོ། །ཅི་ཁྱེད་ཅག་གླང་པོ་ཆེའི་ཤ་ཡང་ཟའམ། ཚེ་དང་ལྡན་པ་དག་མུ་གེའི་དུས་བྱུང་བ་ལ་གལ་ཏེ་གཞན་མ་རྙེད་ན་ཅི་ཁོ་བོ་ཅག་

  574. 288a

    ལྟོགས་ཏེ་འཆིའམ་ཞེས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོའི་གླང་པོ་ཆེ་ཚོ་དགུ་ཁ་དག་ལ། གལ་ཏེ་ཁྱེད་ཀྱིས་གླང་པོ་ཆེའི་ཤ་ཟོས་པ་རྒྱལ་ པོས་ཐོས་ན། ཁྱེད་ལ་མངོན་པར་དད་པའི་ལྷ་དང་། ཀླུ་དང་། མི་དང་། མི་མ་ཡིན་པ་གཞན་དག་ཀྱང་ཡོད་པས་འཕགས་པ་དག་གླང་པོ་ཆེའི་ཤ་ཟ་སྟེ། དེས་ན་བདག་གི་གླང་པོ་ཆེ་ཚོ་དགུ་ཁ་དག་གོ་ཞེས་སེམས་པར་མི་འགྱུར་རམ། དགེ་སློང་དག་གིས་གླང་ པོ་ཆེའི་ཤ་ལོངས་སྤྱད་པར་མི་བྱའོ། །ལོངས་སྤྱད་ན་འགལ་ཚབས་ཅན་དུ་འགྱུར་རོ། །གླང་པོ་ཆེའི་ཤ་ཇི་ལྟ་བ་བཞིན་དུ་རྟའི་ཤ་ཡང་དེ་དང་འདྲའོ།། །།སངས་རྒྱས་བཅོམ་ལྡན་འདས་ཡུལ་ཙམ་པ་ན་དྲང་སྲོང་གར་གའི་རྫིང་འགྲམ་ན་བཞུགས་སོ། །ཡུལ་ཙམ་པའི་ ཀླུ་དད་པ་བཟང་བ་དགེ་བའི་བསམ་པ་ཅན་དེ་ཚེས་བརྒྱད་དང་བཅུ་བཞི་ལ་གནས་ནས་བྱུང་སྟེ་ཡན་ལག་བརྒྱད་དང་ལྡན་པའི་བསྙེན་གནས་བླངས་ནས་གནས་སྣང་བར་ལུས་ཆེན་པོར་བྱས་ཏེ་ལུས་བཏང་ནས་འདུག་ཅིང་། འཇིག་རྟེན་ན་སེམས་ཅན་གནས་པ་དག་ལ་ཅུང་ཟད་ཀྱང་ གནོད་པའམ་སྐྲག་པར་མི་བྱེད་དོ། །མུ་གེའི་དུས་བྱུང་བས་ལས་ལ་མི་ལྟ་བའི་མི་ཕྱུགས་རྫི་རྣམས་དང་། ལུག་རྫི་རྣམས་དང་། རྩྭ་ཐུན་རྣམས་དང་། ཤིང་ཐུན་རྣམས་དང་། ལམ་གྱིས་འཚོ་བ་རྣམས་དང་། ལམ་གོལ་བས་འཚོ་བའི་མི་རྣམས་ཀྱིས་ཀླུའི་ཤ་ལ་དུམ་བུ་དུམ་བུར་བཅད་ནས་ ལོངས་སྤྱད་པར་བརྩམས་སོ། །དྲུག་སྡེའི་དགེ་སློང་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ནས་བསོད་སྙོམས་ལ་ཞུགས་པ་ལས། ཇི་ཙམ་ན་ཁྱིམ་བདག་གཞན་ཞིག་གིས་ཀླུའི་ཤ་ཕྲུ་བར་བཅུག་སྟེ་འཚེད་ཅིང་འདུག་པའི་ཁྱིམ་དེར་དེ་དག་ཞུགས་སོ། ། ཁྱིམ་བདག་གི་ཆུང་མས་སྨྲས་པ། འཕགས་པ་དབུལ་དུ་ཅུང་ཟད་ཀྱང་མ་མཆིས་ཀྱིས་བཞུད་ཅིག །དེ་དག་གིས་སྨྲས་པ། ཕྲུ་བ་འདིའི་ནང་ན་འཚེད་ཅིང་འདུག་ན། འཕགས་པ་འདི་ནི་ཀླུའི་ཤ་ལགས་ན་ཅི་ཁྱེད་ཅག་ཀྱང་ཀླུའི་ཤ་གསོལ་ལམ། ཁོ་བོ་ཅག་ནི་འཚོ་

  575. 288b

    བ་ཁྱེད་ལ་རག་ལས་པ་ཡིན་པས་གལ་ཏེ་ཁྱེད་ཅག་ཟ་ན་ཁོ་བོ་ཅག་ལ་ཡང་བྱིན་ཅིག །དེ་དག་ལ་ཕུལ་ནས་འཕགས་པ་རྣམས་ཀྱང་ལོངས་སྤྱོད་དོ་ཞེས་ཕལ་མོ་ཆེས་སྤྱད་པར་བརྩམས་སོ། །དེ་ནས་ཙམ་པའི་ཀླུའི་ཆུང་མ་འདི་སྙམ་དུ་སེམས་ཏེ། འཕགས་པ་འདི་དག་ ཀྱང་ཀླུའི་ཤ་ལ་ལོངས་སྤྱོད་པས་སྐྱེ་བོའི་ཚོགས་ཕལ་མོ་ཆེས་ལོངས་སྤྱད་ན་བདག་གི་ཁྱིམ་ཐབ་ཀྱིས་ཡུན་ཇི་སྲིད་ཅིག་སྡུག་བསྔལ་མནགས་དགོས། བདག་གིས་འདིའི་ཕྱིར་འདི་ཁོ་ན་བྱའོ་སྙམ་མོ། །དེ་ནས་ཙམ་པའི་ཀླུའི་ཆུང་མ་དེའི་མཚན་མོ་འདས་ནས་ཁ་དོག་ འཕགས་པས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེའི་ཚེ་ཙམ་པའི་ཀླུའི་ཆུང་མའི་ཁ་དོག་གི་མཐུས་དྲང་སྲོང་གར་གའི་རྫིང་གི་ཉེན་ཀོར་ཐམས་ཅད་སྣང་བ་རྒྱ་ཆེན་ པོས་ཁྱབ་པར་བྱས་སོ། །ཙམ་པའི་ཀླུའི་ཆུང་མ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གི་སྡུམ་ཐབ་དད་པ་བཟང་བ་དགེ་བའི་བསམ་པ་ཅན་དེས་ཚེས་བརྒྱད་དང་བཅུ་བཞི་ལ་གནས་ནས་བྱུང་སྟེ་ཡན་ལག་བརྒྱད་དང་ལྡན་ པས་བསྙེན་གནས་བླངས་ནས་ལུས་བཏང་སྟེ་མཆིས་ལ། འཇིག་རྟེན་ན་སེམས་ཅན་དག་གནས་པ་ལ་གནོད་པ་དང་སྐྲག་པ་ཅུང་ཟད་ཀྱང་མི་བགྱིད་པ་མུ་གེའི་དུས་བྱུང་བས་ལས་ལ་མི་ལྟ་བའི་མི་ཕྱུགས་རྫི་རྣམས་དང་། ལུག་རྫི་རྣམས་དང་། རྩྭ་ཐུན་རྣམས་དང་། ཤིང་ ཐུན་རྣམས་དང་། ལམ་གྱིས་འཚོ་བ་རྣམས་དང་། ལམ་གོལ་བས་འཚོ་བའི་མི་རྣམས་ཀྱིས་ཀླུའི་ཤ་དུམ་བུ་དུམ་བུར་བཀུམ་ནས་འཚལ་བ་འཕགས་པ་དག་གིས་གཟིགས་ནས་འཕགས་པ་རྣམས་ཀྱིས་གསོལ་བར་བརྩམས་སོ། །འཕགས་པ་རྣམས་ཀྱིས་གསོལ་ལ་དེ་ དག་གིས་ཀྱང་ཆེར་བཀུམ་ཞིང་འཚལ་བར་བརྩམས་ནས་བདག་གི་སྡུམ་ཐབ་ཀྱིས་ཡུན་ཇི་སྲིད་ཅིག་སྡུག་བསྔལ་མནགས་འཚལ། ཀྱེ་མ་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ། གང་གི་ཕྱིར་འཕགས་པ་དག་ཀླུའི་ཤ་མི་གསོལ་བར་དགོངས་པའི་རྒྱུ་ཆུང་ཞིག་

  576. 289a

    བཅའ་བར་གསོལ། བཅོམ་ལྡན་འདས་ཀྱིས་ཙམ་པའི་ཀླུའི་ཆུང་མ་ལ་ཅང་མི་གསུང་བས་གནང་ངོ་། །དེ་ནས་ཙམ་པའི་ཀླུའི་ཆུང་མ་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་ བྱས་ཏེ་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་དེ་ཉིད་ཀྱི་མཚན་མོ་འདས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ མདང་སུམ་ངའི་སྤྱན་སྔར་ཙམ་པའི་ཀླུའི་ཆུང་མ་མཚན་མོ་འདས་ནས་ཁ་དོག་འཕགས་པས་གང་ན་བ་དེར་འོངས་ཏེ་ཕྱིན་ནས་ངའི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེའི་ཚེ་ཙམ་པའི་ཀླུའི་ཆུང་མའི་ཁ་དོག་གི་མཐུས་དྲང་སྲོང་གར་གའི་རྫིང་གི་ ཉེན་ཀོར་ཐམས་ཅད་སྣང་བ་རྒྱ་ཆེན་པོས་ཁྱབ་པར་བྱས་སོ། །ཙམ་པའི་ཀླུའི་ཆུང་མ་ཕྱོགས་གཅིག་ཏུ་འདུག་ནས་ང་ལ་འདི་སྐད་ཅེས་གསོལ་ཏོ། །བཙུན་པ་བདག་གི་སྡུམ་ཐབ་དད་པ་བཟང་བ་དགེ་བའི་བསམ་པ་ཅན་དེ་ཚེས་བརྒྱད་དང་བཅུ་བཞི་ལ་རང་གི་གནས་ནས་བྱུང་སྟེ་ཡན་ ལག་བརྒྱད་དང་ལྡན་པའི་བསྙེན་གནས་བླངས་ནས་ལུས་བཏང་སྟེ་མཆིས་ལ། འཇིག་རྟེན་ན་སེམས་ཅན་དག་གནས་པ་ལ་གནོད་པ་དང་སྐྲག་པ་ཅུང་ཟད་ཀྱང་མི་བགྱིད་པ་མུ་གེའི་དུས་བྱུང་བས་ལས་ལ་མི་ལྟ་བའི་མི་ཕྱུགས་རྫི་རྣམས་དང་། ལུག་རྫི་རྣམས་དང་། རྩྭ་ཐུན་རྣམས་ དང་། ཤིང་ཐུན་རྣམས་དང་། ལམ་གྱིས་འཚོ་བ་རྣམས་དང་། ལམ་གོལ་བས་འཚོ་བའི་མི་རྣམས་ཀྱིས་ཀླུའི་ཤ་དུམ་བུ་དུམ་བུར་བཀུམ་ནས་འཚལ་ལོ། །དེ་དག་གིས་འཚལ་བ་དང་། འཕགས་པ་དག་གིས་ཀྱང་གསོལ་བར་བརྩམས་སོ། །འཕགས་པ་རྣམས་ཀྱང་ གསོལ་ཏོ་ཞེས་དེ་དག་གིས་ཆེར་བཀུམ་ཞིང་འཚལ་བར་བརྩམས་ན། བདག་གི་སྡུམ་ཐབ་ཀྱིས་ཡུན་ཇི་སྲིད་ཅིག་སྡུག་བསྔལ་མནགས་འཚལ། ཀྱེ་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་གང་གི་ཕྱིར་འཕགས་པ་དག་ཀླུའི་ཤ་མི་གསོལ་བར་དགོངས་

  577. 289b

    པས་རྒྱུ་ཅུང་ཞིག་བཅའ་བར་གསོལ་ཞེས་ཟེར་ནས་ངས་ཙམ་པའི་ཀླུའི་ཆུང་མ་ལ་ཅང་མི་གསུང་བས་གནང་ངོ་། །དེ་ནས་ཙམ་པའི་ཀླུའི་ཆུང་མས་ང་ཅང་མི་གསུང་བས་གནང་བར་རིག་ནས་ངའི་ཞབས་གཉིས་ལ་མགོ་བོས་ཕྱག་བྱས་ཏེ་དེ་ཉིད་དུ་མི་སྣང་བར་གྱུར་ཏོ། །གང་ ལ་ད་ལྟར་ལྷ་དག་ཀྱང་ཤཱཀྱའི་སྲས་ཀྱི་དགེ་སློང་རྣམས་ནི་དགེ་བའི་ཆོས་རྣམས་ལས་ཉམས་སོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པ་འདི་ནི་བཟང་པོ་མ་ཡིན། རིགས་པ་མ་ཡིན་ཏེ། དགེ་སློང་དག་དེ་ལྟ་བས་ན་དགེ་སློང་དག་གིས་ཀླུའི་ཤ་བཟའ་ བར་མི་བྱའོ། །ཟ་ན་འགལ་ཚབས་ཅན་དུ་འགྱུར་རོ།། །།བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །མ་ག་དྷཱའི་རྒྱལ་པོ་བཟོ་སྦྱངས་གཟུགས་ ཅན་སྙིང་པོས་བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་ཏེ། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཡང་འདི་སྙམ་དུ་སེམས་ཏེ། བཅོམ་ལྡན་འདས་བདག་གིས་ལན་མང་དུ་སྤྱན་དྲངས་ཏེ་ཞལ་ ཟས་གསོལ་ནས་ལན་འགའ་ཡང་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་མ་བསྟབས་ཀྱིས། མ་ལ་བདག་གིས་བཅོམ་ལྡན་འདས་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་ཤིང་སྨན་པའི་རྒྱལ་པོ་འཚོ་བྱེད་ཀྱང་དབུལ་ལོ་སྙམ་མོ། །དེ་ནས་རྒྱལ་པོའི་འབྱོར་ པ་དང་། རྒྱལ་པོའི་མཐུ་ཆེན་པོས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་མ་ག་དྷཱའི་རྒྱལ་པོ་བཟོ་སྦྱངས་ གཟུགས་ཅན་སྙིང་པོ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་

  578. 290a

    པས་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟན་ལས་ ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་ དགུང་ཟླ་གསུམ་དུ་བསོད་སྙོམས་དང་། ན་བཟའ་ཆོས་གོས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་དང་། སྨན་པའི་རྒྱལ་པོ་འཚོ་བྱེད་དབུལ་ན་བདག་ལ་གནང་བར་མཛད་དུ་གསོལ། བཅོམ་ལྡན་འདས་ཀྱིས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ ཅན་སྙིང་པོ་ལ་ཅང་མི་གསུང་བས་གནང་ངོ་། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སོང་ངོ་། །བཅོམ་ ལྡན་འདས་དགེ་སློང་གི་དགེ་འདུན་དང་ཐབས་ཅིག་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཟླ་བ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་གྱི་རྐྱེན་སྨན་གྱི་ཡོ་བྱད་ཐམས་ཅད་དང་། སྨན་པའི་རྒྱལ་པོ་འཚོ་བྱེད་ཀྱིས་ རིམ་གྲོ་ཁོ་ན་བྱས་སོ། །ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས། བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཡོ་བྱད་ཐམས་ཅད་དང་། སྨན་པའི་རྒྱལ་པོ་འཚོ་བྱེད་བསྟབས་སོ་ཞེས་ཐོས་སོ། ། ཐོས་ནས་ཀྱང་འདི་སྙམ་དུ་སེམས་ཏེ། དེ་ཡང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡིན། བདག་ཀྱང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡིན་ལ། དེའི་སྨན་པའི་རྒྱལ་པོ་ནི་འཚོ་བྱེད་ཡིན་ལ། བདག་གི་སྨན་པའི་རྒྱལ་པོ་ནི་རྒྱུན་ཤེས་ཀྱི་བུ་ཡིན་གྱིས་

  579. 290b

    གང་གི་ཚེ་བཅོམ་ལྡན་འདས་མཉན་ཡོད་དུ་བྱོན་པ་དེའི་ཚེ་བདག་གིས་ཀྱང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ལ་ཡོ་བྱད་ཐམས་ཅད་དང་། སྨན་པའི་རྒྱལ་པོ་རྒྱུན་ཤེས་ཀྱི་བུ་བསྟབ་པར་བྱའོ་སྙམ་མོ། །ཇི་ཙམ་ན་བཅོམ་ལྡན་འདས་རྒྱལ་པོའི་ཁབ་ཏུ་དབྱར་བཞུགས་ ནས་དབྱར་གྱི་ཟླ་བ་གསུམ་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ནས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱི་མདུན་གྱིས་བལྟས་ནས་མཉན་ཡོད་གང་ན་བ་དེར་རྒྱུ་ཞིང་ གཤེགས་ཏེ། རིམ་གྱིས་རྒྱུ་ཞིང་གཤེགས་པ་ན། མཉན་ཡོད་དུ་བྱོན་ནས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཡུལ་ཀོ་ས་ལའི་ལྗོངས་རྒྱུ་ཞིང་གཤེགས་པ་ན་མཉན་ ཡོད་དུ་བྱོན་ནས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ་ཞེས་ཐོས་སོ། །ཐོས་ནས་ཀྱང་མཉན་ཡོད་ནས་བྱུང་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་ བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་ སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ ནས་ཀོ་ས་ལའི་རྒྱལ་པོ་གསལ་རྒྱལ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

  580. 291a

    བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་སྨན་གྱི་རྐྱེན་སྨན་གྱི་ཡོ་བྱད་རྣམས་དང་། སྨན་པའི་རྒྱལ་པོ་རྒྱུན་ཤེས་ཀྱི་བུ་དབུལ་ན་བདག་ལ་གནང་ བར་མཛད་དུ་གསོལ། བཅོམ་ལྡན་འདས་ཀྱིས་ཀོ་ས་ལའི་རྒྱལ་པོ་གསལ་རྒྱལ་ལ་ཅང་མི་གསུང་བས་གནང་ངོ་། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ ལ་མགོ་བོས་ཕྱག་བྱས་ནས་སོང་ངོ་། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཀོ་ས་ལའི་རྒྱལ་པོ་གསལ་རྒྱལ་གྱིས་ཟླ་བ་གསུམ་དུ་ཡོ་བྱད་ཐམས་ཅད་དང་། སྨན་པའི་རྒྱལ་པོ་རྒྱུན་ཤེས་ཀྱི་བུས་རིམ་གྲོ་ཁོ་ན་བྱས་སོ། །ཀོ་ས་ལའི་རྒྱལ་པོ་གསལ་རྒྱལ་གྱི་ཀུན་ དུ་སྤྱོད་པ་ནི་ནང་པར་སྔར་ལངས་ཏེ། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་དགེ་སློང་ནད་པ་ལ་ལྟ་བ་ཡིན་ནོ། །ཇི་ཙམ་ན་དགེ་སློང་གཞན་ཞིག་གཞང་འབྲུམ་གྱིས་ཐེབས་ནས་དེ་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་ དམས་པར་གྱུར་པ་དེ་ཀོ་ས་ལའི་རྒྱལ་པོ་གསལ་རྒྱལ་གྱིས་མཐོང་ནས་སྨྲས་པ། འཕགས་པ་ཁྱོད་ཅིའི་ཕྱིར་སྐྱ་བོ་བསེང་བསེང་པོར་གྱུར་ཅིང་རིད་པ་དང་། ཉམ་ཆུང་བ་དང་། ན་བས་ཉམ་དམས་པར་གྱུར། ལྷ་བདག་གཞང་འབྲུམ་གྱིས་ཐེབས་སོ། །དེ་ནས་རྒྱལ་ པོས་སྨན་པའི་རྒྱལ་པོ་རྒྱུན་ཤེས་ཀྱི་བུ་ལ་བསྒོ་བ། དགེ་སློང་འདིའི་དཔྱད་བྱོས་ཤིག །ལྷ་བཀའ་བཞིན་འཚལ། དེ་མ་དད་པས་དེས་མ་བྱས་སོ། །ཇི་ཙམ་ན་རྒྱལ་པོས་ཡང་དགེ་སློང་དེ་མཐོང་ནས་སྨྲས་པ། འཕགས་པ་ཁྱོད་རྒྱུན་ཤེས་ཀྱི་བུས་དཔྱད་མ་བགྱིས་སམ། ལྷ་མ་བགྱིས་སོ། །དེ་ནས་རྒྱལ་པོ་ཁྲོས་ཏེ་རྒྱུན་ཤེས་ཀྱི་བུ་ཕོ་ཉས་བཀུག་ནས་བསྒོ་བ། གལ་ཏེ་ཁྱོད་ཀྱིས་དགེ་སློང་འདིའི་དཔྱད་བྱས་ན་དེ་ལྟ་ན་ལེགས། གལ་ཏེ་མ་བྱས་ན་ཁྱོད་ཀྱི་དབང་ཐང་གཅད་དོ། །དེ་རང་བཞིན་གྱིས་མ་དད་པ་ཞིག་པས་ཆེར་འཁྲུགས་ནས། དགེ་

  581. 291b

    སྦྱོང་མགོ་རེག་འདིའི་ཕྱིར་ལྷས་བདག་གི་དབང་ཐང་གཅོད་པར་འགྱུར་རོ་ཞེས་དེས་དགེ་སློང་དེ་རྒྱལ་བུ་རྒྱལ་བྱེད་ཀྱི་ཚལ་གྱི་སྒོར་བཟོ་བཅོས་བྱས་ནས་དེ་དང་དེ་ནས་མཚོན་གྱི་ལས་བྱ་བར་བརྩམས་སོ། །དེ་ནས་དགེ་སློང་དེ་ཉམ་ང་བ་དང་། དོག་པ་དང་། གནོད་པ་ཐོབ་ཅིང་སྡུག་བསྔལ་ རྩུབ་པ་མི་བཟད་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་ནས་བསམས་པ། བདག་ཉམ་ང་བ་དོག་པ་གནོད་པ་ཐོབ་པ་ལ་བཅོམ་ལྡན་འདས་ཀྱིས་མ་དགོངས་པ་ལྟ་ཞིག །སྐབས་དེ་ལ་སངས་རྒྱས་བཅོམ་ལྡན་འདས་རྣམས་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའོ། །དེ་ནས་བཅོམ་ལྡན་འདས་ཐུགས་རྗེ་ཆེན་པོས་བསྐུལ་ནས་ཕྱོགས་དེར་གཤེགས་པ་དང་། སྨན་པའི་རྒྱལ་པོ་རྒྱུན་ཤེས་ཀྱི་བུས་བཅོམ་ལྡན་འདས་ཕྱོགས་དེར་གཤེགས་པ་མཐོང་ངོ་། ། མཐོང་ནས་ཀྱང་ཀུན་ནས་དཀྲིས་པ་དྲག་པོས་བཅོམ་ལྡན་འདས་ལ་སྨྲས་པ། དགེ་སྦྱོང་བྲན་མོའི་བུ་ཚུར་ཤོག །ཉན་ཐོས་ཀྱི་རྐུབ་ཕྱེ་བ་ལ་ལྟོས། དེ་ནས་བཅོམ་ལྡན་འདས་དེ་ཉིད་ནས་སླར་ལོག་སྟེ་གཙུག་ལག་ཁང་དུ་གཤེགས་ནས་གདན་བཤམས་པ་ཉིད་ལ་བཞུགས་སོ། ། བཞུགས་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །འདི་ནི་ཆོས་ཉིད་ཡིན་ཏེ། གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་འབྱུང་ཞིང་ཁ་ཅིག་ནི་འོག་ཏུ་ འགྲོའོ། །ཁ་ཅིག་ནི་སྟེང་དུ་འགྲོའོ། །གང་དག་འོག་ཏུ་སོང་བ་དེ་དག་ནི་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་བ་དང་། སོ་ཐམས་ ཐམས་དང་། ཀྱི་ཧུད་ཟེར་བ་དང་། ཨ་ཆུ་ཟེར་བ་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོ་རྣམས་སུ་ཡང་སོང་སྟེ། ཚ་བའི་སེམས་ཅན་དམྱལ་བ་གང་དག་ཡིན་པ་དེ་དག་ལ་ནི་བསིལ་བར་འབབ་བོ། གྲང་བའི་སེམས་ཅན་

  582. 292a

    དམྱལ་བ་གང་དག་ཡིན་པ་དེ་དག་ལ་ནི་དྲོ་བར་འབབ་བོ། །དེས་སེམས་ཅན་དེ་རྣམས་ཀྱི་སྡུག་བསྔལ་གྱི་ཁྱད་པར་དག་སོ་སོར་ཞི་བར་བྱས་སོ། །དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་ཅི་བདག་ཅག་འདི་ནས་ཤི་འཕོས་པར་གྱུར་ཏམ། འོན་ཏེ་ གཞན་དུ་སྐྱེས་པར་གྱུར་སྙམ་པ་ལ། དེ་རྣམས་དད་པ་བསྐྱེད་པའི་ཕྱིར་བཅོམ་ལྡན་འདས་ཀྱིས་སྤྲུལ་པ་ཞིག་བཏང་ངོ་། །དེ་རྣམས་ཀྱིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་ནི་འདི་ནས་ཤི་འཕོས་པ་མེད་ལ། གཞན་དུ་སྐྱེས་པ་མེད་ཀྱིས་ ཀྱང་སྔོན་མ་མཐོང་བའི་སེམས་ཅན་འདིའི་མཐུས་བདག་ཅག་གི་སྡུག་བསྔལ་གྱི་ཁྱད་པར་རྣམས་སོ་སོར་ཞི་བར་བྱས་སོ་ཞེས་དེ་རྣམས་སྤྲུལ་པ་ལ་སེམས་མངོན་པར་དད་པར་གྱུར་པས་དམྱལ་བ་མྱོང་བར་གྱུར་པའི་ལས་དེ་ཟད་པར་བྱས་ནས་གང་དུ་བདེན་པ་རྣམས་མཐོང་བའི་སྣོད་དུ་འགྱུར་ བ་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་བཟུང་ངོ་། །གང་དག་སྟེང་དུ་སོང་བ་དེ་དག་ནི་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་ པས་མདུན་ན་འདོན་དང་། ཚངས་པ་ཆེན་པོ་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། གྱ་ནོམ་ སྣང་བ་དང་། ཤིན་དུ་མཐོང་བ་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་དབྱངས་སྒྲོག་ཅིང་ཚིགས་སུ་བཅད་པ་འདི་གཉིས་ཀྱང་བསྒྲགས་སོ། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་ བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པས། །ཆོས་འདུལ་འདི་ལ་བརྩོན་གྱུར་ན། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་གྱུར། །དེ་ནས་འོད་ཟེར་དེ་དག་

  583. 292b

    གིས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་རྣམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་རྗེས་བཞིན་དུ་འགྲོའོ། །དེ་ལ་གལ་ཏེ་བཅོམ་ལྡན་འདས་ཀྱིས་འདས་པའི་ལས་རྣམས་ལུང་སྟོན་པར་བཞེད་ན་ནི། བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་ འོངས་པ་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར་རོ། །དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར་རོ། །དུད་འགྲོར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་རྟིང་པར་ནུབ་པར་འགྱུར་རོ། །ཡི་དགས་སུ་སྐྱེ་བར་ལུང་སྟོན་པར་ བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར་རོ། །མིར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་པུས་མོར་ནུབ་པར་འགྱུར་རོ། །སྟོབས་ཀྱི་འཁོར་ལོས་སྒྱུར་བའི་རྒྱལ་པོར་ལུང་སྟོན་པར་བཞེད་ན་ནི་ཕྱག་གཡོན་པའི་མཐིལ་དུ་ནུབ་པར་འགྱུར་རོ། །འཁོར་ལོས་སྒྱུར་བའི་ རྒྱལ་པོར་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་ནུབ་པར་འགྱུར་རོ། །ལྷ་རྣམས་སུ་ལུང་སྟོན་པར་བཞེད་ན་ནི་སྐུའི་ལྟེ་བར་ནུབ་པར་འགྱུར་རོ། །ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་གྱི་ནང་དུ་ནུབ་པར་འགྱུར་རོ། །རང་བྱང་ཆུབ་ཏུ་ལུང་སྟོན་པར་ བཞེད་ན་ནི་མཛོད་སྤུར་ནུབ་པར་འགྱུར་རོ། །ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་དབུའི་གཙུག་ཏུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཞབས་ཀྱི་མཐིལ་དུ་ནུབ་ བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ནས་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་ནང་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་དུ་སྣང་ བར་བགྱིས། །ཡང་ཚིགས་སུ་བཅད་པ་དག་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་

  584. 293a

    བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བའི་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུའི་རི་བོ་ལྟ་བུར་བརྟན་པའི་མགོན། ། རྫོགས་སངས་རྒྱས་རྣམས་བློ་བུར་འཛུམ་མི་སྟོན། །བརྟན་པ་ཅི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེ་འདི་དག་དེ་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ཏེ། དེ་དེ་བཞིན་ནོ། །ཀུན་དགའ་བོ་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་སྟོན་ཏེ། ཀུན་དགའ་བོ་སྨན་པའི་རྒྱལ་པོ་རྒྱུན་ཤེས་ཀྱི་བུ་ཉམས་ཤིང་ཆུད་ཟོས་པར་གྱུར་ཏེ། དེས་དེ་བཞིན་གཤེགས་པ་མང་པོས་བཀུར་བའི་གདུང་རྒྱུད་ནས་བཟུང་སྟེ་སྤྱོད་ པ་སྐྱོན་མི་མངའ་བ་ལ་བྲན་མོའི་བུ་ཞེས་སྨྲས་སོ། །དེ་དེང་ནས་ཞག་བདུན་ནས་ཁྲག་དྲོན་དུ་སྐྱུགས་ཏེ་དུས་བྱེད་པར་འགྱུར་ཏེ། ལུས་ཞིག་ནས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དགེ་སློང་དག་དེ་ལྟ་བས་ན་རྒྱུན་ཤེས་ཀྱི་བུའམ། རྒྱུན་ཤེས་ཀྱི་བུ་འདྲ་ བ་ལ་བསྙེན་བཀུར་བྱེད་དུ་མ་གཞུག་ཅིག །གཞང་འབྲུམ་ཡང་གཅད་པར་མི་བྱའོ། །འོན་ཀྱང་གཞང་འབྲུམ་གྱི་དཔྱད་ནི་རྣམ་པ་གཉིས་ཀྱིས་བྱ་སྟེ། གསང་སྔགས་དང་། སྨན་གྱིས་སོ། །དགེ་སློང་གིས་གཞང་འབྲུམ་གཅོད་དམ། རྒྱུན་ཤེས་ཀྱི་བུའམ། རྒྱུན་ཤེས་ཀྱི་བུ་འདྲ་ བ་ལ་བསྙེན་བཀུར་བྱེད་དུ་འཇུག་ན་འགལ་ཚབས་ཅན་དུ་འགྱུར་རོ། །དགེ་སློང་དེ་རྒྱུན་ཤེས་ཀྱི་བུས་ཇི་ལྟར་གནོད་པ་དེ་ཉིད་ཀྱིས་དུས་ལས་འདས་པ་དེ་ལྟ་དེ་ལྟར་བྱས་སོ། །དེ་ནས་བློན་པོ་དག་གིས་རྒྱལ་པོ་གསལ་རྒྱལ་ལ་སྨྲས་པ། ལྷ་རྒྱུན་ཤེས་ཀྱི་བུས་ནི་བཅོམ་ལྡན་འདས་ལ་ ཡང་བྲན་མོའི་བུ་ཞེས་ཚིག་ཏུ་སྨྲས་ལ། དགེ་སློང་དེ་ཡང་ཇི་ལྟར་གནོད་པ་དེ་ཉིད་ཀྱིས་དུས་ལས་འདས་པ་དེ་ལྟ་དེ་ལྟར་བགྱིས་སོ། །དེ་ནས་རྒྱལ་པོ་ཆེ་ཐང་དུ་ཁྲོས་ནས་བློན་པོ་རྣམས་ལ་བསྒོ་བ། ཤེས་ལྡན་དག་ངས་སྨན་པའི་རྒྱལ་པོ་རྒྱུན་ཤེས་ཀྱི་བུ་ཡོངས་སུ་བཏང་ཟིན་

  585. 293b

    ཀྱིས་དེང་ཤིག །བློན་པོ་རྣམས་ཀྱིས་སྨྲས་པ། ལྷ་གུམ་ལགས་པ་དེ་དགུམ་ཅི་འཚལ། བཅོམ་ལྡན་འདས་ཉིད་ཀྱི་ཞག་བདུན་ན་ཁྲག་དྲོན་དུ་སྐྱུགས་ནས་དུས་བྱེད་པར་འགྱུར་ཏེ་ལུས་ཞིག་ནས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ་ཞེས་ལུང་བསྟན་ལགས་ སོ། །རྒྱལ་པོས་སྨྲས་པ། གལ་ཏེ་དེ་ལྟར་གྱུར་ན་ངའི་ཡུལ་ནས་སྤྱུགས་ཤིག །དེ་དག་གིས་དེ་སྤྱུགས་ནས་ཡུལ་གནས་བཅས་ཞེས་བྱ་བར་ཕྱིན་ནོ། །ཡུལ་གནས་བཅས་ན་གནས་པའི་ལྷ་རྣམས་ཀྱིས་སྐྱེས་བུ་གཏི་མུག་གང་གི་ཕྱིར་ཁྱོད་ཁམས་གསུམ་གྱི་ མགོན་པོ་ལ་བྲན་མོའི་བུའོ་ཞེས་ཚིག་ཏུ་སྨྲས་པ། ཁྱོད་འདིར་གནས་སུ་ག་ལ་རུང་ཞེས་མང་དུ་སྤྱོས་ནས་བསྐྲད་དོ། །དེ་ནས་བཱ་རཱ་ཎ་སཱིར་སོང་ངོ་། །དེ་ནས་ཀྱང་བསྐྲད་ནས་ཡངས་པ་ཅན་དུ་སོང་ངོ་། །དེ་ནས་ཀྱང་བསྐྲད་ནས་ཡུལ་ཙམ་པར་སོང་ངོ་། །དེ་ནས་ཀྱང་བསྐྲད་ ནས་རྒྱལ་པོའི་ཁབ་ཏུ་སོང་ངོ་། །དེ་ནས་ཀྱང་བསྐྲད་ནས་ཤིང་དྲུང་ཞིག་ན་གནས་སོ། །དེ་ནས་ཀྱང་ཤིང་ལ་གནས་པའི་ལྷ་རྣམས་ཀྱིས་བསྐྲད་ནས། འབབ་ཆུ་དང་། མཚོ་དང་། མཚེའུ་དག་གི་འགྲམ་ཤིག་ཏུ་སོང་བ་དང་དེར་ཡང་སྐབས་མ་རྙེད་ནས་དེས་བསམ་པ། འཛམ་བུའི་གླིང་འདི་ན་རེ་ཞིག་ཝ་དག་གིས་ཀྱང་སྐབས་རྙེད་ན། བདག་གིས་སྐབས་ཤིང་དྲུང་དང་། མཚོ་དང་། མཚེའུ་དག་ན་ཡང་མེད་དོ་སྙམ་པ་དང་། དེ་ལ་གང་གིས་ན་ཁྲག་དྲོན་པོ་སྐྱུགས་ནས་དུས་ལས་འདས་པ་དེ་ལྟ་བུའི་ཀུན་ནས་དཀྲིས་པ་སྐྱེས་སོ། །དུས་ལས་ འདས་མ་ཐག་ཏུ་མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་སོ། །དེ་ནས་བཅོམ་ལྡན་འདས་ཀྱིས་བྱུང་བ་དེ་ལ་ཚིགས་སུ་བཅད་པ་དག་གསུངས་པ། མི་ཞིག་སྐྱེས་པར་གྱུར་པ་ཡི། །ཁ་ནས་སྟ་རེའི་ཚིག་འབྱུང་སྟེ། །ཉེས་པར་སྨྲ་བ་སྨྲ་ཚིག་དེས། །བདག་ཉིད་ལ་ནི་ གཅོད་པར་བྱེད། །གང་ཞིག་སྨད་འོས་སྐྱེ་བོ་བསྔགས་བྱེད་ཅིང་། །བསྔགས་འོས་སྐྱེ་བོ་རྣམ་པར་སྨོད་བྱེད་པ། །དེ་ནི་ཁ་ཡི་ཉེས་པས་གང་གིས་ན། །བདེ་བ་ཐོབ་མི་འགྱུར་བའི་ཉེས་པ་སོགས། །འདིར་ནི་བརྒྱན་པོས་རང་གི་ནོར་ཡལ་བ། །འདི་ནི་ཕུང་བ་ཅུང་ཟད་ཙམ་

  586. 294a

    ཡིན་ཏེ། །བདེ་གཤེགས་རྣམས་ལ་ཡིད་ཀྱིས་གདུག་བསམ་པ། །གང་ཡིན་དེ་ནི་ཕུང་བ་ཆེན་པོ་ཡིན། །འཕགས་ལ་གནོད་བྱེད་ལུས་དང་ངག་གིས་ལས། །སྡིག་ཏོ་བྱས་ནས་ཆུ་བུར་རྡོལ་རྣམས་སུ། །ལོ་འབུམ་དག་དང་ཆུ་བུར་ཅན་དུ་ལོ། །བཞི་ཁྲི་ ཆིག་སྟོང་གང་ཡིན་དམྱལ་དེར་འགྲོ།། །།སངས་རྒྱས་བཅོམ་ལྡན་འདས་ཡུལ་ཀ་ཤི་ནས་ལྗོངས་རྒྱུ་ཞིང་གཤེགས་པ་ན་གྲོང་རྡལ་མཚམས་མ་བཅད་པ་གཞན་ཞིག་ཏུ་དགོངས་བཏབ་ནས་བཞུགས་སོ། །དེ་ན་བཅོམ་ལྡན་འདས་རླུང་ནད་ཀྱི་སྙུན་གྱིས་ཐེབས་པར་གྱུར་ཏོ། །དེ་ ནས་ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ། བཅོམ་ལྡན་འདས་ལ་བདག་གིས་རང་གི་བློས་ནི་རིམ་གྲོ་ལན་མང་དུ་བྱས་ན་སྨན་པ་ལ་ལན་འགའ་ཡང་མ་དྲིས་ཀྱིས། མ་ལ་བདག་གིས་ད་ནི་སྨན་པ་ལ་དྲིའོ་སྙམ་སྟེ། དེ་སྨན་པའི་དྲུང་དུ་སོང་ནས་བཞིན་བཟངས་ བཅོམ་ལྡན་འདས་འདི་ལྟ་བུའི་སྙུན་གྱིས་ཐེབས་ཀྱིས་སྨན་སྟོན་ཅིག །དེས་སྨྲས་པ། འཕགས་པ་གྲུ་སུམ་ཆབ་མར་མང་པོ་སྩལ་པ་སྒྲོལ་ལ་གསོལ་ཅིག་དང་སྙུན་གདངས་པར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོ་རང་ཉིད་ཀྱིས་བྱས་ཏེ་བཙོས་ནས་ བཅོམ་ལྡན་འདས་ལ་འབུལ་ལོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་འདི་ཅི་ཡིན། དེས་གསོལ་པ། བཙུན་པ་བདག་གིས་གློ་བ་ ལ་བསམས་ན། བཅོམ་ལྡན་འདས་ལ་བདག་གིས་རང་གི་བློས་ནི་རིམ་གྲོ་ལན་མང་དུ་བགྱིས་ན་སྨན་པ་ལ་ལན་འགའ་ཡང་མ་དྲིས་ཀྱིས། མ་ལ་བདག་གིས་ད་ནི་སྨན་པ་ལ་དྲིའོ་སྙམ་བགྱིས་ནས་བདག་གིས་སྨན་པ་ལ་སྨྲས་ན་དེའི་མཆིད་ནས། གྲུ་སུམ་ཆབ་མར་མང་ པོས་སྩལ་བ་སྒྲོལ་ལ་གསོལ་ཅིག་དང་སྙུན་གདངས་པར་འགྱུར་རོ་ཞེས་མཆི་ནས། དེ་ནས་བདག་གིས་བགྱིས་ཏེ་བསྒྲལ་བ་ལགས་སོ། །ཀུན་དགའ་བོ་གང་དུ་བཙོས། མཚམས་ཀྱི་ནང་དུའོ། །གང་དུ་གཞག །མཚམས་ཀྱི་ནང་དུའོ། །སུས་བཙོས། བདག་གིས་

  587. 294b

    མཚམས་ཀྱི་ནང་དུའོ། །ཀུན་དགའ་བོ་མཚམས་ཀྱི་ནང་དུ་བཙོས་ལ་མཚམས་ཀྱི་ནང་དུ་ཞག་ཀྱང་ལོན་པ་ལོངས་སྤྱད་པར་མི་བྱའོ། །མཚམས་ཀྱི་ནང་དུ་བཙོས་ལ་མཚམས་ཀྱི་ཕྱི་རོལ་དུ་ཞག་ལོན་པ་ཡང་ལོངས་སྤྱད་པར་མི་བྱའོ། །མཚམས་ཀྱི་ཕྱི་རོལ་དུ་བཙོས་ལ་མཚམས་ ཀྱི་ནང་དུ་ཞག་ལོན་པ་ཡང་ལོངས་སྤྱད་པར་མི་བྱའོ། །མཚམས་ཀྱི་ཕྱི་རོལ་དུ་བཙོས་ལ་མཚམས་ཀྱི་ཕྱི་རོལ་དུ་ཞག་ལོན་ན་ལོངས་སྤྱད་པར་བྱའོ། །ཀུན་དགའ་བོ་མཚམས་ཀྱི་ནང་ཡང་རུང་མཚམས་ཀྱི་ཕྱི་རོལ་ཡང་རུང་སྟེ་དགེ་སློང་གིས་བཙོས་པ་ནི་ཐམས་ཅད་ཀྱི་ཐམས་ཅད་ དུ་ལོངས་སྤྱད་པར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་བཙོས་པ་ཐམས་ཅད་ཀྱི་ཐམས་ཅད་དུ་ལོངས་སྤྱད་པར་མི་བྱའོ་ཞེས་གསུངས་པ་དང་། མཉན་ཡོད་ན་ཁྱིམ་བདག་གཞན་ཞིག་ཡོད་པ་དེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་ པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཞེས་བྱ་བ་ནས། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་དུའོ། །དེ་ནས་ཁྱིམ་བདག་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་ གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ་ ཞེས་བྱ་བ་ནས་རྒྱས་པར་སྦྱར་ཏེ། ཇི་ཙམ་ན་སྤྱན་འདྲེན་གྱིས་དུས་ཚོད་གསོལ་བ། བཙུན་པ་གདུགས་ཚོད་ལགས་ན། བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་དགེ་སློང་གི་དགེ་འདུན་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་

  588. 295a

    ནས་ཁྱིམ་བདག་དེའི་ཁྱིམ་ག་ལ་བ་དེར་དོང་ངོ་། །བཅོམ་ལྡན་འདས་ནི་བསོད་སྙོམས་བཞེས་ནས་རྫས་ཀྱིས་བསྒྲུབས་པའི་ཁྱིམ་ན་བཞུགས་སོ། །སངས་རྒྱས་བཅོམ་ལྡན་འདས་རྣམས་ནི་བསོད་སྙོམས་བཞེས་ནས་རྒྱུ་ལྔས་རྫས་ཀྱིས་བསྒྲུབས་པའི་ ཁྱིམ་ན་བཞུགས་སོ། །ལྔ་གང་ཞེ་ན། ནད་པ་ལ་གཟིགས་པར་བཞེད་པ་དང་། གནས་མལ་ལ་གཟིགས་པར་བཞེད་པ་དང་། ནང་དུ་ཡང་དག་འཇོག་ལ་བཞུགས་པར་བཞེད་པ་དང་། ལྷ་རྣམས་ལ་ཆོས་སྟོན་པར་བཞེད་པ་དང་། ཉན་ཐོས་རྣམས་འདུལ་བ་ ལ་བསླབ་པའི་གཞི་བཅའ་བར་བཞེད་པ་ཡིན་ནོ། །སྐབས་འདིར་ནི་བཅོམ་ལྡན་འདས་ཉན་ཐོས་རྣམས་འདུལ་བ་ལ་བསླབ་པའི་གཞི་བཅའ་བར་བཞེད་པས་བསོད་སྙོམས་བཞེས་ནས་རྫས་ཀྱིས་བསྒྲུབས་པའི་ཁྱིམ་ན་བཞུགས་སོ། །ཚེ་དང་ལྡན་པ་ཀུན་དགའ་བོ་ནི་ བཅོམ་ལྡན་འདས་ཀྱི་བསོད་སྙོམས་ནོད་པ་ཡིན་ཏེ། ཇི་ཙམ་ན་དེར་འབྲས་ཆན་མ་ཚོས་པ་ཞིག་ཕོག་པ་དང་། དེ་ནས་ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ། བཅོམ་ལྡན་འདས་སྙུན་གདངས་ནས་རིང་པོ་མ་ལོན་ལ་འབྲས་ཆན་འདི་ཡང་མ་ཚོས་པ་ཞིག་པས་ འདི་གལ་ཏེ་ལོངས་སྤྱད་ན་སྙུན་སླར་ལྡང་བར་འགྱུར་སྲིད་ཀྱིས། བཅོམ་ལྡན་འདས་ཀྱིས་མ་གནང་ཡང་འདི་ཉིད་ཀྱིས་རྐྱེན་བྱས་ནས་གནང་བར་འགྱུར་བའི་གནས་དེ་ཡོད་དོ་སྙམ་ནས། དེས་ཆུ་སྣོད་བླངས་ཏེ་ཆུས་བཏབ་ནས་ཇི་སྲིད་ཚོས་པ་དེ་སྲིད་དུ་བཙོས་སོ། །དེ་ནས་བཅོམ་ ལྡན་འདས་ལ་གསོལ་ཏོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་རྨས་པ། ཀུན་དགའ་བོ་ཅི་དགེ་འདུན་ཐམས་ཅད་ཀྱི་འབྲས་ཆན་ཡང་འདི་འདྲའམ། བཙུན་ པ་མ་ལགས་ཏེ། འོན་ཀྱང་མ་དྲལ་བ་ལགས་སོ། །འོ་ན་འདི་ག་ལས་འོངས། དེས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ལེགས་སོ་ལེགས་སོ། །ངས་རྗེས་སུ་མ་གནང་བ་གང་

  589. 295b

    ཡིན་པ་ཡང་ཁྱོད་ཀྱིས་ཤེས་སོ། །དེ་ལྟ་བས་ན་རྗེས་སུ་གནང་སྟེ། དགེ་སློང་གིས་མཚོས་པ་བྱིན་ལེན་བྱོས་ལ་བཙོས་ཏེ་ལོངས་སྤྱད་པར་བྱའོ། །བཅོམ་ལྡན་འདས་ཀྱིས་དགེ་སློང་གིས་མ་ཚོས་པ་བྱིན་ལེན་བྱོས་ལ་བཙོས་ཏེ་ལོངས་སྤྱད་པར་བྱའོ་ཞེས་གསུངས་པ་ དང་། དྲུག་སྡེ་རྣམས་ཀྱིས་འབྲས་སྐམ་བྱིན་ལེན་བྱས་ཏེ་བཙོས་ནས་ལོངས་སྤྱད་པར་བརྩམས་པའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འབྲས་ཆན་སུམ་ཆ་ཚོས་པ་བྱིན་ལེན་བྱོས་ ལ་བཙོས་ཏེ་ལོངས་སྤྱད་པར་བྱའོ། །ཚོད་མ་དང་། མེ་ཏོག་དང་། འབྲས་བུ་དང་། ཉ་དང་། ཤ་དག་ནི་ཁ་དོག་གྱུར་ནས་བྱིན་ལེན་བྱས་ཏེ་ལོངས་སྤྱད་པར་བྱའོ། །འོ་མ་ལ་སོགས་པའི་རྫས་ཀྱི་ཁུ་བ་རྣམས་གང་གི་ཚེ་ལན་གཉིས་ལན་གསུམ་དུ་བསྐོལ་བར་གྱུར་ པ་དེའི་ཚེ་བྱིན་ལེན་བྱས་ཏེ་བསྐོལ་ནས་སྤྱད་པར་བྱ་སྟེ། འདི་ལ་འགྱོད་པར་མི་བྱའོ། །འདི་ལས་གཞན་དུ་ལོངས་སྤྱད་ན་འགལ་ཚབས་ཅན་དུ་འགྱུར་རོ།། །།སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་ བཞུགས་སོ། །དེའི་ཚེ་གྲོང་ཁྱེར་སློ་མ་ལྟ་བུ་ཞེས་བྱ་བ་ན་ཁྱིམ་བདག་འབྱོར་པ་ཞེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་སོ། ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་ལ་སེམས་ཅན་ཞུགས་པར་ གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་བཙས་ནས། དེ་ཉི་མ་བདུན་གསུམ་ཉི་ཤུ་གཅིག་ཏུ་བཙས་སྟོན་རྒྱ་ཆེར་བྱས་ནས་མིང་འདོགས་པར་བྱེད་དེ། ཁྱེའུ་འདིའི་མིང་ཅིར་གདགས། ཉེ་དུ་རྣམས་

  590. 296a

    ཀྱིས་སྨྲས་པ། ཁྱེའུ་འདི་ཁྱིམ་བདག་འབྱོར་པའི་བུ་ཡིན་པས། དེ་ལྟ་བས་ན་ཁྱེའུའི་མིང་འབྱོར་ལེན་ཞེས་གདགས་སོ་ཞེས་ཁྱེའུ་དེའི་མིང་འབྱོར་ལེན་ཞེས་བྱ་བར་བཏགས་སོ། །ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ ཞིག་བཙས་ཏེ། དེའི་མིང་ནི་འབྱོར་སྐྱོབ་ཅེས་བྱ་བར་བཏགས་སོ། །ཡང་དེའི་ཁྱེའུ་ཞིག་བཙས་ཏེ། དེའི་མིང་ནི་འབྱོར་དགའ་ཞེས་བྱ་བར་བཏགས་སོ། །ཇི་ཙམ་ན་དུས་གཞན་ཞིག་ན་ཁྱིམ་བདག་འབྱོར་པ་ནད་ཀྱིས་བཏབ་པར་གྱུར་ནས་དེ་ཤིན་ཏུ་ཚིག་རྩུབ་མོར་སྨྲ་སྟེ། དེས་ན་ཆུང་མ་དང་བུས་ཀྱང་ཡལ་བར་བོར་རོ། །དེའི་མངག་གཞུག་བྱེད་པའི་བུ་མོ་ཞིག་ཡོད་པ་དེས་བསམས་པ། བདག་གི་ཇོ་བོས་ཐབས་བརྒྱ་སྟོང་དུ་མས་ལོངས་སྤྱོད་རྣམས་བསགས་ན། དེ་ད་ནད་ཀྱིས་ཐེབས་པར་གྱུར་པ་དང་ཆུང་མ་དང་བུས་ཀྱང་ཡལ་བར་བོར་ན། བདག་གི་རྗེ་བོ་ཡལ་བར་དོར་བ་ནི་བདག་ལ་རིགས་པ་མ་ཡིན་ནོ་སྙམ་ནས་དེས་སྨན་པའི་དྲུང་དུ་སོང་སྟེ། ཇོ་བོ་ཁྱོད་ཀྱིས་ཁྱིམ་བདག་འབྱོར་པ་མཁྱེན་ཏམ། ཤེས་སོ། །དེ་ཅི་བྱ། དེ་འདི་འདྲ་བའི་བྲོ་ནད་ཅིག་གིས་ཐེབས་ཏེ། དེ་ཆུང་མ་དང་བུས་ཀྱང་ཡལ་བར་བོར་ ན་དེའི་སྨན་སྟོན་ཅིག །དེས་སྨྲས་པ། ཆུང་མ་དང་བུ་དག་གིས་ཀྱང་ཡལ་བར་བོར་རོ་ཞེས་ཁྱོད་ཉིད་ཟེར་ན། འོ་ན་དེ་ལ་སུ་ཞིག་རིམ་གྲོ་བྱེད། དེའི་རིམ་གྲོ་བདག་གིས་བགྱི་མོད་ཀྱི་ཁྱོད་ཀྱིས་ཅི་ནས་སྨན་རིན་ཆུང་བ་ཞིག་སྟོན་ཅིག །དེས་དེའི་སྨན་ནི་འདི་ཡིན་ནོ་ ཞེས་བསྟན་ཏོ། །དེ་ནས་དེས་བདག་རང་གི་རྒྱགས་ལས་ཀྱང་ཅུང་ཟད་སྦྱར། ཁྱིམ་དེ་ཉིད་ནས་ཀྱང་ཅུང་ཟད་བརྐུས་ནས་རིམ་གྲོ་བྱས་ཏེ་དེ་སོས་པར་གྱུར་ཏོ། །དེས་བསམས་པ་བདག་ནི་ཆུང་མ་དང་བུས་ཀྱང་ཡལ་བར་བོར་ཏེ་འདི་ལྟར་བདག་གསོན་པོར་གྱུར་པ་ནི་བུ་མོ་འདིའི་ མཐུ་ཡིན་གྱིས། འདི་ལ་ཕན་གདགས་པར་བྱའོ་སྙམ་ནས་དེས་དེ་ལ་སྨྲས་པ། བུ་མོ་ཁོ་བོ་ནི་ཆུང་མ་དང་བུས་ཀྱང་ཡལ་བར་བོར་བ་ལས། ཁོ་བོ་ཅུང་ཟད་ཅིག་གསོན་པ་དེ་ཐམས་ཅད་ནི་ཁྱོད་ཀྱི་དྲིན་ཡིན་ན། ཁྱོད་མཆོག་ཅི་འདོད་པ་སྦྱིན་གྱིས་སྨྲོས་ཤིག །གལ་ཏེ་ཇོ་

  591. 296b

    བོ་བདག་ཁྱོད་ཀྱི་ཐུགས་སུ་འཐད་པར་གྱུར་ན་བདག་ཁྱོད་དང་ལྷན་ཅིག་འགྲོགས་པར་འཚལ་ལོ། །དེས་སྨྲས་པ། ང་དང་ཁྱོད་ལྷན་ཅིག་འགྲོགས་པས་ཅི་བྱས་ཀཱར་ཥཱ་པ་ཎ་ལྔ་བརྒྱ་བྱིན་ལ་བྲན་ལས་དབྱུང་བར་བྱའོ། །དེས་སྨྲས་པ། ཇོ་བོ་བདག་རྒྱངས་བཀུམ་པར་མཆིས་ ཀྱང་བྲན་མོ་ཁོ་ན་ལགས་པར་བས་ཀྱིས། གལ་ཏེ་རྗེའི་སྲས་ཁྱོད་དང་ལྷན་ཅིག་འགྲོགས་ན་དེ་ལྟ་ན་བྲན་མོར་མི་འགྱུར་ལགས་སོ། །དེས་གལ་གྱིས་འཆུ་བར་ཤེས་ནས་སྨྲས་པ། བུ་མོ་གང་གི་ཚེ་རུང་ཞིང་ཟླ་མཚན་དང་ལྡན་པར་གྱུར་པ་དེའི་ཚེ་ཁོ་བོ་ལ་སྦྲོན་ཅིག །དེས་ དུས་གཞན་ཞིག་ན་རུང་ཞིང་ཟླ་མཚན་དང་ལྡན་པར་གྱུར་ནས་དེས་དེ་ལ་སྦྲན་ཏོ། །དེ་ནས་ཁྱིམ་བདག་འབྱོར་པ་དང་དེ་གཉིས་ལྷན་ཅིག་དགའ་མགུར་སྤྱད་པས་དེ་སེམས་ཅན་དང་ལྡན་པར་གྱུར་ཏོ། །གང་གི་ཉི་མ་ལ་སེམས་ཅན་ཞུགས་པར་གྱུར་པའི་ཉི་མ་དེ་ཁོ་ན་ནས་བཟུང་ ནས་ཁྱིམ་བདག་འབྱོར་པའི་ནོར་ཐམས་ཅད་དང་། ལས་ཀྱི་མཐའ་ཐམས་ཅད་ཡོངས་སུ་རྫོགས་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ། མཛེས་པ། བལྟ་ན་སྡུག་པ། མདོག་གསེར་འདྲ་བ། མགོ་གདུགས་ལྟར་འདུག་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་ནས་ལྷག་པར་ཁྱིམ་བདག་འབྱོར་པའི་དགོས་པ་ཐམས་ཅད་དང་། ལས་ཀྱི་མཐའ་ཐམས་ཅད་ ཡོངས་སུ་རྫོགས་པར་གྱུར་ཏོ། །དེ་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་མིང་འདོགས་པར་བྱེད་དེ་ཞེས་བྱ་བ་ནས། གང་པོ་ཞེས་བྱ་བར་གདགས་སོ་ཞེས་དེའི་མིང་གང་པོ་ཞེས་བཏགས་སོ་ཞེས་བྱ་བའི་བར་གོང་མ་བཞིན་ནོ། །ཁྱེའུ་གང་ པོ་མ་མ་བརྒྱད་ལ་རྗེས་སུ་གཏད་དེ། དྲི་མ་ཕྱི་བའི་མ་མ་གཉིས་དང་ཞེས་བྱ་བ་ནས་རྒྱས་པར་སྦྱར་ཏེ། རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ་ཞེས་བྱ་བའི་བར་དུའོ། །དེ་ཆེན་པོར་གྱུར་པ་དེའི་ཚེ་ཡི་གེ་དང་། རྩིས་དང་། གྲངས་དང་། ལག་རྩིས་དང་།

  592. 297a

    དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ཤིང་བརྟག་པ་བརྒྱད་པོ་གཞི་བརྟག་པ་དང་། རས་བརྟག་པ་དང་། རིན་པོ་ཆེ་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། གཞོན་ ནུ་བརྟག་པ་དང་། གཞོན་ནུ་མ་བརྟག་པ་ལ་ཤིན་ཏུ་བྱང་ཞིང་། བརྟག་པ་གཞན་ཡང་བྱེད་པ་དང་། ཀློག་པ་ལ་མཁས་པ་དང་། སྤྱོད་པ་གསལ་བར་གྱུར་ཏོ། །དེ་ནས་ཁྱིམ་བདག་འབྱོར་པས་འབྱོར་ལེན་ལ་སོགས་པ་བུ་རྣམས་རིམ་བཞིན་དུ་ཁྱིམ་ ཕུབ་པ་དང་། དེ་དག་ཆུང་མ་ལ་ལྷག་པར་ཆགས་པས་འཚོ་ནམ་ཡལ་བར་བོར་ཏེ་འཇོ་སྒེག་ལྷུར་ལེན་ཅིང་འཁོད་དོ། །དེ་ནས་ཁྱིམ་བདག་འབྱོར་པ་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་པ་དེ་བུ་རྣམས་ཀྱིས་མཐོང་ནས་དྲིས་པ། ཡབ་ ཁྱོད་ཅིའི་སླད་དུ་ཕྱག་ལ་ཞལ་གཏད་ནས་སེམས་ཁོང་དུ་ཆུད་ཅིང་བཞུགས། དེས་སྨྲས་པ། བུ་དག་ང་ནི་ཇི་སྲིད་གསེར་འབུམ་མ་རྙེད་པ་དེ་སྲིད་དུ་ཁྱིམ་མ་ཕུབ་བོ། །ཁྱེད་ཅག་འཚོ་ནམ་ཡལ་བར་བོར་ནས་ཆུང་མ་ལ་ལྷག་པར་ཆགས་པས་འཇོ་སྒེག་ལྷུར་ལེན་ཅིང་ འཁོད་དེ། ང་ཤི་ནས་ཁྱིམ་མྱ་ངན་གྱིས་གང་བར་འགྱུར་ན་ཇི་ལྟར་སེམས་ཁོང་དུ་ཆུད་པར་མི་འགྱུར། འབྱོར་ལེན་གྱིས་རིན་པོ་ཆེའི་རྣ་རྒྱན་ཐོགས་པ་བཀྲོལ་ནས་ཤིང་གི་རྣ་རྒྱན་གཅིག་བཏགས་ཏེ་བདག་གིས་ཇི་སྲིད་གསེར་འབུམ་མ་གྲུབ་པ་དེ་སྲིད་དུ་རིན་པོ་ ཆེའི་རྣ་རྒྱན་གདགས་པར་མི་བྱའོ་ཞེས་དམ་བཅས་སོ། །གཅིག་གིས་ནི་རྒྱ་སྐེགས་ཀྱི་རྣ་རྒྱན་ནོ། །གཅིག་གིས་ནི་ཞ་ཉེའི་རྣ་རྒྱན་ནོ། །དེ་དག་མིང་འབྱོར་ལེན་དང་། འབྱོར་སྐྱོབ་དང་། འབྱོར་དགའ་ཞེས་བྱ་བ་གང་ཡིན་པ་དེ་དག་ནུབ་པར་གྱུར་ནས་ ཤིང་གི་རྣ་རྒྱན་ཅན། རྒྱ་སྐེགས་ཀྱི་རྣ་རྒྱན་ཅན། ཞ་ཉེའི་རྣ་རྒྱན་ཅན་ཞེས་བྱ་བར་མིང་གྲགས་སོ། །དེ་རྣམས་ཟོང་ཐོགས་ཏེ་རྒྱ་མཚོ་ཆེན་པོར་དོང་བ་དང་། གང་པོས་སྨྲས་པ། ཡབ་བདག་ཀྱང་རྒྱ་མཚོ་ཆེན་པོར་མཆིའོ། །དེས་སྨྲས་པ། བུ་ཁྱོད་

  593. 297b

    བུས་པ་ཡིན་གྱིས་འདི་ཉིད་དུ་འདུག་ལ་ཚོང་ཁང་གི་བྱ་བ་དག་བྱོས་ཤིག་ཅེས་དེ་ཉིད་དུ་འདུག་གོ། །དེ་རྣམས་ཀྱིས་ཀྱང་གྲུ་བོ་ཆེ་གྲུབ་ནས་ལྷགས་ཏེ་ལམ་གྱིས་དུབ་པ་དག་ངལ་བསོ་ནས་སྨྲས་པ། ཡབ་བདག་ཅག་གི་ཟོང་འདི་བརྩིར་གསོལ། བརྩིས་ ནས་རེ་རེས་ཀྱང་གསེར་འབུམ་འབུམ་རྙེད་པར་གྱུར་ཏོ། །གང་པོས་ཀྱང་དེ་ཉིད་དུ་ཆོས་དང་མཐུན་པས་བསྒྱུར་བས་གསེར་འབུམ་ལྷ་གཅིག་རྙེད་ནས་གང་པོས་ཀྱང་ཕའི་རྐང་པ་གཉིས་ལ་གཏུགས་ནས་སྨྲས་པ། ཡབ་བདག་གི་ཚོང་ཁང་ནས་བསྒྱུར་བའི་རྫས་ ཀྱང་བརྩིར་གསོལ། དེས་སྨྲས་པ། བུ་ཁྱོད་འདི་ཉིད་ན་འདུག་འདུག་ན་ཁྱོད་ལ་ཅི་ཞིག་བརྩིར་ཡོད། དེས་སྨྲས་པ། ཡབ་འོན་ཀྱང་བརྩིར་གསོལ། མཁྱེན་པར་འགྱུར་རོ། །བརྩིས་ན་གང་ཡང་རིགས་པས་བསྒྲུབས་པ་གསེར་བཞི་པོ་ཉིད་མ་གཏོགས་པ་ གསེར་འབུམ་ལྷག་ཅིག་བྱུང་ངོ་། །ཁྱིམ་བདག་འབྱོར་པ་དགའ་བ་དང་ཡིད་བདེ་བ་སྐྱེས་ཏེ་བསམས་པ། སེམས་ཅན་འདི་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཞིག་ལྟ་སྟེ། འདིས་འདི་ཉིད་ན་འདུག་བཞིན་གསེར་འབུམ་རྙེད་ཅིག་གྲུབ་བོ་སྙམ་མོ། །ཇི་ ཙམ་དུས་གཞན་ཞིག་ན་ཁྱིམ་བདག་འབྱོར་པ་ནད་ཀྱིས་བཏབ་པར་གྱུར་ནས་དེས་བསམས་པ་བདག་ཤི་བ་དང་འདི་དག་འབྱེ་བར་འགྱུར་གྱིས་ཐབས་ཤིག་བཤམ་པར་བྱའོ་སྙམ་ནས་དེས་དེ་དག་ལ་སྨྲས་པ། བུ་དག་ཤིང་སྐམ་པོ་དག་སྟ་གོན་གྱིས་ཤིག །དེ་རྣམས་ ཀྱིས་ཤིང་དག་སྟ་གོན་བྱས་པ་དང་། དེས་སྨྲས་པ། མེ་བུས་ཤིག །དེ་རྣམས་ཀྱིས་མེ་བུས་པ་དང་། དེས་སྨྲས་པ། མགལ་པ་རེ་རེ་ནས་ཕྱུང་ཤིག །དེ་རྣམས་ཀྱིས་མགལ་པ་རེ་རེ་ནས་ཕྱུང་བ་དང་། མེ་དེ་ཤི་བར་གྱུར་ཏོ། །དེས་སྨྲས་པ། བུ་དག་ཁྱེད་ ཀྱིས་མཐོང་ངམ། ཡབ་མཐོང་ལགས་སོ། །དེས་ཚིགས་སུ་བཅད་པ་དག་སྨྲས་པ། མགལ་པ་ཚོགས་པས་མེ་འབར་ལྟར། །སྤུན་ཚོགས་པ་ཡང་དེ་བཞིན་ནོ། །མགལ་པ་ཕྲལ་ན་ཤི་གྱུར་པ། །མི་རྣམས་ཀྱང་ནི་དེ་དང་འདྲ། །བུ་དག་ང་ཤི་ནས་

  594. 298a

    ཁྱེད་ཅག་གིས་བུད་མེད་ཀྱི་ཚིག་མཉན་པར་མི་བྱའོ། །བུད་མེད་ཀྱིས་ནི་བཟའ་དག་འབྱེད། །སྡར་མ་རྣམས་ནི་ངག་གིས་འབྱེད། །ངན་ལ་སྨྲས་པས་གསང་ཚིག་འཕེལ། །འདོད་པ་ཡིས་ནི་མཛའ་བཤེས་འབྱེད། །དེ་དག་ གཞན་ནི་དོང་ངོ་། །འབྱོར་ལེན་དེ་ཉིད་ན་འདུག་པ་དང་དེས་དེ་ལ་སྨྲས་པ། བུ་ཁྱོད་ཀྱིས་ཇི་ལྟར་གྱུར་ཀྱང་གང་པོ་གཏང་བར་མི་བྱ་སྟེ། སེམས་ཅན་འདི་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་ནོ་ཞེས་བསྒོ་སྟེ། བསགས་པ་ཀུན་གྱི་ མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་གྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་སྨྲས་ནས་དུས་ཀྱི་ཆོས་དང་ལྡན་པར་གྱུར་ཏོ། །དེ་རྣམས་ཀྱིས་དེ་རས་སྔོན་པོ་དང་། སེར་པོ་དང་། དམར་པོ་དང་། དཀར་པོ་རྣམས་ཀྱིས་ཁྱོགས་བརྒྱན་ཏེ་བཀུར་སྟི་ཆེར་བྱས་ནས་དུར་ཁྲོད་དུ་ཁྱེར་ཏེ་བསྲེགས་སོ། །དེ་ནས་མྱ་ངན་བསང་བ་བྱས་ནས་སྨྲས་པ། གང་གི་ཚེ་བདག་ཅག་གི་ཕ་གསོན་པ་དེའི་ཚེ་ནི་སྲོག་དེ་ལ་རག་ལས་ན་ད་དེ་དུས་ལས་འདས་ ན། གལ་ཏེ་དེ་འཚོ་ནམ་ཡལ་བར་བོར་ཏེ་འདུག་ན་ཁྱིམ་ཞིག་པར་འགྱུར་ཞིང་ཉེ་དུ་རྣམས་ཀྱིས་ཀྱང་དཔྱས་པར་འགྱུར་གྱིས། མ་ལ་བདག་ཅག་ཟོང་ཐོགས་ཏེ་ཡུལ་གཞན་དུ་འདོང་ངོ་། །གང་པོས་སྨྲས་པ། གལ་ཏེ་དེ་ལྟར་ན་བདག་ཀྱང་མཆིའོ། ། དེ་རྣམས་ཀྱིས་སྨྲས་པ། ཁྱོད་འདི་ཉིད་དུ་འདུག་ལ་ཚོང་ཁང་གི་བྱ་བ་དག་བྱོས་ཤིག །ཁོ་བོ་ཅག་ཁོ་ན་འདོང་ངོ་ཞེས་དེ་རྣམས་ཀྱིས་ཟོང་ཁྱེར་ཏེ་ཡུལ་གཞན་དུ་དོང་ངོ་།། །།འདུལ་བ་གཞི། བམ་པོ་ཉི་ཤུ་བཞི་པ། གང་ པོ་ལ་ནི་དགོས་པ་ཐམས་ཅད་གཏད་ནས་དེ་ཉིད་ན་གནས་སོ། །ཆོས་ཉིད་ཀྱིས་ཕྱུག་པོའི་ཁྱིམ་དག་ན་ཉིན་རེ་ཞིང་འགོད་པ་འབོག་པ་ཡིན་པས། དེ་དག་གི་ཆུང་མས་བྲན་མོ་དེ་དག་མངགས་ཏེ་འགོད་པ་ནོད་དུ་བཏང་བ་ལས་གང་པོ་ཚོང་པ་དང་། ཚོང་

  595. 298b

    དཔོན་དང་། དེད་དཔོན་དང་། གཞན་ཡང་རྗེས་སུ་འཚོ་བ་དག་གིས་ཡོངས་སུ་བསྐོར་ཅིང་འདུག་སྟེ་དེ་དག་གིས་སྐབས་མ་རྙེད་དོ། །ཇི་ཙམ་ན་དེ་དག་ལངས་ཏེ་དོང་བར་གྱུར་པ་དེའི་ཚེ་དེ་དག་ལ་ཉིན་བར་གྱི་འགོད་པ་ཕོག་གོ། །བུ་མོ་དེ་དག་རིང་ ཞིག་ལོན་ཏེ་འོངས་པ་དང་། ཀྱེ་མ་བུ་མོ་ཁྱེད་ཅག་རིང་ཞིག་ཅི་ཐོགས་ཞེས་སྤྱོས་པས་དེ་དག་གིས་སྨྲས་པ། གང་པོ་ཚོང་པ་དང་། ཚོང་དཔོན་དང་། དེད་དཔོན་དང་། གཞན་ཡང་རྗེས་སུ་འཚོ་བ་དག་གིས་ཡོངས་སུ་བསྐོར་ནས་ཉི་མའི་འོད་ཟེར་ ལྟ་བུར་གཟི་བརྗིད་འབར་ཞིང་བཞུགས་ཏེ། གང་གི་ཚེ་དེ་དག་ལངས་ཏེ་མཆིས་པ་དེའི་ཚེ་ཕོག་གོ། །དེ་དག་གིས་སྨྲས་པ། གང་དག་གིས་ཁྱིམ་ན་བྲན་མོའི་བུ་དག་དབང་ཕྱུག་ལ་དབང་བྱེད་པ་དེ་དག་ལ་ཡོང་ཡང་དེ་ལྟར་འགྱུར་རོ། །འབྱོར་ ལེན་གྱི་ཆུང་མས་བྲན་མོ་ལ་སྨྲས་པ། རིང་མོ་ཞིག་ཏུ་ཅིའི་ཕྱིར་ཐོགས། དེས་སྐབས་དེ་རྒྱས་པར་སྨྲས་པ་དང་། དེས་སྨྲས་པ། ཁྱོད་འོར་ཆེའོ། །ཁྱོད་ཀྱིས་དུས་ཤེས་པར་བྱོས་ལ་སོང་ཤིག །དེས་དུས་ཤེས་པར་བྱས་ནས་སོང་བ་དང་མྱུར་ དུ་ཐོབ་བོ། །གཞན་དག་ནི་རིང་དུ་ཐོགས་པར་གྱུར་ནས་དེ་དག་གིས་དེ་ལ་དྲིས་པ། ཁྱོད་ནི་ཅི་སྟེ་མྱུར་པར་འཁོར། དེས་ཐམས་ཅད་སྨྲས་ནས་དེ་དག་ཀྱང་དེ་དང་ལྷན་ཅིག་འདོང་བར་བརྩམས་སོ། །གང་པོ་ཡང་ཚོང་པ་དང་། ཚོང་དཔོན་དང་། དེད་དཔོན་དང་། གཞན་ཡང་རྗེས་སུ་འཚོ་བ་རྣམས་ཀྱིས་ཡོངས་སུ་བསྐོར་ཅིང་འདུག་པ་ལས་དེ་དག་ཀྱང་དོང་ནས། དེས་དེ་ལ་ཉིན་པར་གྱི་འགོད་པ་ཕོག་གོ། །དེ་དག་གིས་ཀྱང་མྱུར་དུ་ཐོབ་བོ། །དེ་དག་གི་ཇོ་མོ་དག་གིས་སྨྲས་པ། ད་མྱུར་དུ་འཁོར་ བ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། ཇོ་མོ་ཐུ་མོ་སྙུན་མི་མངའ་བར་གྱུར་ཅིག །དེའི་ཚེ་གང་གི་བྲན་མོ་མཆིས་པ་དེའི་ཚེ་ཕོག་ལགས་གྱིས་བདག་ཅག་དེ་དག་དང་འགྲོགས་ཏེ་མཆིའོ། །དེ་དག་མི་བཟོད་པ་སྐྱེས་ནས་སྨྲས་པ། གང་དག་གི་ཁྱིམ་

  596. 299a

    ན་བྲན་མོའི་བུ་དག་དབང་ཕྱུག་ལ་དབང་བྱེད་པ་དེ་དག་ལ་ཡོང་ཡང་དེ་ལྟར་འགྱུར་རོ། །ཇི་ཙམ་དུས་གཞན་ཞིག་ན་འབྱོར་ལེན་དང་། འབྱོར་སྐྱོབ་དང་། འབྱོར་དགའ་རྣམས་ལྷན་ཅིག་ཏུ་དགའ་ཞིང་མཐུན་པས་རྒྱ་མཚོ་ཆེན་པོ་ནས་གྲུ་བོ་ ཆེ་གྲུབ་སྟེ་འོངས་སོ། །འབྱོར་ལེན་གྱིས་ཆུང་མ་ལ་དྲིས་པ། བཟང་མོ་གང་པོས་ཁྱོད་ལེགས་པར་བསྐྱངས་སམ། དེས་སྨྲས་པ། ཇི་ལྟར་མིང་པོ་འམ། བུས་བགྱི་བ་བཞིན་དུ་ལེགས་པར་བགྱིས་སོ། །གཞན་དག་ལ་ཁྱིམ་ཐབ་དག་དག་གིས་སྨྲས་ པ་དང་དེ་དག་གིས་སྨྲས་པ། གང་དག་གིས་ཁྱིམ་ན་བྲན་མོའི་བུ་དབང་ཕྱུག་ལ་དབང་བགྱིད་པ་དེ་དག་ལ་ཡོང་ཡང་དེ་ལྟར་འགྱུར་ལགས་སོ། །དེ་དག་གིས་བསམས་པ། བུད་མེད་དག་ནི་མཛའ་བཤེས་ཀྱི་དབྱེན་དུ་འགྱུར་རོ་སྙམ་མོ། །ཇི་ཙམ་དུས་ གཞན་ཞིག་ན་ཀ་ཤི་ཀའི་རས་ཀྱི་ཚོང་ཁང་གི་སྒོ་ཕྱེ་མ་ཐག་ཏུ་འབྱོར་ལེན་གྱི་བུ་འོངས་ནས་གང་པོས་དེ་ལ་ཀ་ཤི་ཀའི་རས་ཡུག་གཅིག་བསྐོན་ནོ། །མནའ་མ་དག་གིས་མཐོང་ནས་སྨྲས་པ། བུ་འདི་སུས་བྱིན། དེས་སྨྲས་པ། ཁུ་གུས་བྱིན་ནོ། །གཞན་དག་ གིས་མཐོང་ནས་ཀྱང་རང་རང་གི་བུ་བཏང་བ་དང་། ཀ་ཤི་ཀའི་རས་ཀྱི་ཚོང་ཁང་གི་སྒོ་ནི་བཅད། རས་སྦོམ་པོ་དག་ཡོད་པའི་ཚོང་ཁང་གི་སྒོ་ཕྱེ་བ་ལ་དེ་དག་ཀྱང་མ་སྟེས་ཏེ། ཕྱིན་ནས་དེ་དག་ལ་གང་པོས་རས་སྦོམ་པོ་དག་བསྐོན་ནོ། །དེ་དག་གིས་ མཐོང་ནས་ཁྱིམ་ཐབ་དག་ལ་སྨྲས་པ། ཁྱེད་ཅག་གིས་གཟིགས་སམ། ཁ་ཅིག་ལ་ནི་ཀ་ཤི་ཀའི་རས་ཡུག་སྩལ་ལ། ཁ་ཅིག་ལ་ནི་རས་སྦོམ་པོ་དག་གོ། །དེ་དག་གིས་ལན་བཏབ་པ། ཅིག་གདོན་མི་ཟ་བར་འདི་ལྟར་ཀ་ཤི་ཀའི་ཚོང་ཁང་གི་རས་ ཀྱི་སྒོ་ནི་བཅད་ལ། རས་སྦོམ་པོའི་སྒོ་བྱེ་བ་ལ་བབ་པ་ཞིག་མ་ཡིན་གྲང་། དེ་དག་གིས་སྨྲས་པ། ད་དུང་ཡང་བརྟག་པར་བགྱིའོ། །ཇི་ཙམ་དུས་གཞན་ཞིག་ན་ཤ་ཁ་རའི་ཚོང་ཁང་གི་སྒོ་ཕྱེ་བ་ན་འབྱོར་ལེན་གྱི་བུ་འོངས་ནས་དེས་ཤ་ཁ་ར་ཕོར་བུ་གང་

  597. 299b

    ཐོབ་སྟེ། དེས་དེ་ཁྱེར་ནས་ཁྱིམ་དུ་སོང་བ་དང་མནའ་མ་དག་གིས་མཐོང་ནས་སྨྲས་པ། བུ་འདི་སུས་བྱིན། དེས་སྨྲས་པ། ཁུ་གུས་བྱིན་ནོ། །དེ་དག་གིས་ཀྱང་རང་རང་གི་བུ་བཏང་བ་དང་། ཤ་ཁ་རའི་ཚོང་ཁང་གི་སྒོ་ནི་བཅད། བུ་ རམ་གྱི་ཚོང་ཁང་གི་སྒོ་ཕྱེ་བ་དང་། དེ་དག་ཀྱང་མ་སྟེས་ཏེ། བུ་རམ་གྱི་ཚོང་ཁང་གི་སྒོ་བྱེ་བའི་ཁར་འོངས་ནས་དེ་དག་གིས་བུ་རམ་ཞིག་ཐོབ་བོ། །དེ་དག་གིས་སྨྲས་པ། ཁྱེད་ཀྱིས་གཟིགས་སམ། གཅིག་ལ་ནི་ཤ་ཁ་ར་སྩལ་ལ། གཞན་ ལ་ནི་བུ་རམ་སྩལ་ལོ། །དེ་དག་གིས་དེ་མཐོང་སྟེ། ཇི་ལྟར་ཁྱིམ་བགོ་བ་བྱེད་པར་སྩོལ་བ་དེ་ལྟ་དེ་ལྟར་ཁྱིམ་ཐབ་དག་བྱེ་ནས་དེ་དག་ཕན་ཚུན་གྲོས་བྱས་པ། བདག་ཅག་གི་ཁྱིམ་གཏན་ཞིག་གིས་བགོ་བར་བྱའོ། །གཅིག་གིས་སྨྲས་པ། ཕུ་བོ་ཆེན་པོ་སྦྲན་པ་སྙམ། གཅིག་གིས་སྨྲས་པ། རེ་ཞིག་ཇི་ལྟར་བགོ་བར་དཔྱད་དོ། །དེ་གཉིས་ཀྱིས་རང་གི་བློས་དཔྱད་པ། གཅིག་གིས་ནི་ཁྱིམ་ན་ཡོད་པ་དང་ཞིང་ན་ཡོད་པའོ། །གཅིག་གིས་ནི་ཚོང་ཁང་ན་ཡོད་པ་དང་ཡུལ་གཞན་ ན་ཡོད་པའོ། །གཅིག་གིས་ནི་གང་པོའོ། །གལ་ཏེ་ཕུ་བོ་ཆེན་པོས་ཁྱིམ་ན་ཡོད་པ་དང་ཞིང་ན་ཡོད་པ་བླངས་ན། བདག་ཅག་གིས་ཚོང་ཁང་ན་ཡོད་པ་དང་། ཡུལ་གཞན་ན་ཡོད་པས་རང་འཚོ་བར་ནུས་སོ། །འོན་ཏེ་ཚོང་ཁང་ན་ ཡོད་པ་དང་། ཡུལ་གཞན་ན་ཡོད་པ་བླངས་ན། འོན་ཀྱང་བདག་ཅག་གིས་ཁྱིམ་ན་ཡོད་པ་དང་། ཞིང་ན་ཡོད་པ་དང་། འཚོ་བར་བྱ་ཞིང་གང་པོ་ཡང་མནར་བར་ནུས་སོ་སྙམ་ནས། དེ་གཉིས་ཀྱིས་དེ་ལྟར་གྲོས་བྱས་ཏེ་འབྱོར་ལེན་ གྱི་དྲུང་དུ་སོང་ནས་སྤུན་ཞིག་པར་འགྱུར་གྱིས་བདག་ཅག་ཁྱིམ་བགོའོ། །དེས་སྨྲས་པ། ཁྱིམ་འཇིགས་པར་བྱེད་པ་ནི་བུད་མེད་དག་ཡིན་པས་ལེགས་པར་བརྟགས་ཏེ་བྱ་བ་སྙམ། དེ་གཉིས་ཀྱིས་སྨྲས་པ། བདག་ཅག་གིས་བརྟགས་

  598. 300a

    ཟིན་གྱིས་བགོའོ། །དེས་སྨྲས་པ། གལ་ཏེ་དེ་ལྟར་ན་གཟུ་བོ་མི་ལྔ་ཞིག་བོས་ཤིག །དེ་གཉིས་ཀྱིས་སྨྲས་པ། བདག་ཅག་གིས་སྔ་མོ་ཞིག་ཏུ་བགོས་ཟིན་ན་གཟུ་བོ་མི་ལྔ་ཅི་དགོས་ཀྱིས་གཅིག་གིས་ནི་ཁྱིམ་ན་ཡོད་ པ་དང་ཞིང་ན་ཡོད་པ་དག་གོ། །གཅིག་གིས་ནི་ཚོང་ཁང་ན་ཡོད་པ་དང་ཡུལ་གྱི་མཐའ་ན་ཡོད་པའོ། །གཅིག་གིས་ནི་གང་པོའོ། །དེས་སྨྲས་པ། ཅི་གང་པོའི་སྐལ་བ་མི་སྦྱིན་ནམ། དེ་གཉིས་ཀྱིས་སྨྲས་པ། བྲན་མོའི་བུ་དེ་ལ་བགོ་སྐལ་ སུས་སྦྱིན། དེར་མ་བས་ཀྱིས་དེ་ཉིད་བདག་ཅག་གིས་བགོའོ། །གལ་ཏེ་ཁྱོད་བཞེད་ན་ཁྱོད་ཉིད་སྣོམས་ཤིག །དེས་བསམས་པ། ཕ་ན་རེ་བདག་ལ་ཁྱོད་ཀྱིས་བདོག་པ་ཐམས་ཅད་ཡོངས་སུ་བཏང་ཡང་གང་པོ་གཏང་བར་མི་བྱའོ་ཞེས་བསྒོ་ བས་གང་པོ་བླང་བར་བྱའོ་སྙམ་དུ་བསམས་ནས་སྨྲས་པ། གལ་ཏེ་དེ་ལྟ་ན་གང་པོ་ནི་ཁོ་བོས་བཀུར་རོ། །ཁྱིམ་ན་ཡོད་པ་དང་། ཞིང་ན་ཡོད་པ་དབང་བ་གང་ཡིན་པ་དེ་ནི་རིངས་པར་ཁྱིམ་དུ་སོང་ནས་སྨྲས་པ། མནའ་མཐུ་མོ་ཕྱུང་ཤིག །དེ་ཕྱིར་ བྱུང་བ་དང་སླར་ཡང་མ་འཇུག་ཤིག །ཅིའི་ཕྱིར། བདག་ཅག་གིས་ཁྱིམ་དུ་གཏོགས་པ་བགོས་ཟིན་ཏོ། །ཚོང་ཁང་ན་ཡོད་པ་དང་། ཡུལ་གཞན་ན་ཡོད་པ་དབང་བ་གང་ཡིན་པ་དེ་ཡང་དེ་མ་ཐག་ཏུ་ཚོང་ཁང་དུ་སོང་ནས་སྨྲས་པ། གང་པོ་མར་ བོབས་ཤིག །དེས་བབས་པ་དང་། ད་ཕན་ཆད་མ་འཛེག་ཤིག །ཅིའི་ཕྱིར། བདག་ཅག་གིས་ཁྱིམ་བགོས་ཏེ། ཡུལ་གཞན་ན་ཡོད་པ་དང་ཚོང་ཁང་ན་ཡོད་པ་ནི་བདག་གི་ཡིན་ནོ། །དེས་སྨྲས་པ། བདག་གི་བགོ་སྐལ་བྱིན་ཅིག ། དེས་སྨྲས་པ། ཁྱོད་བྲན་མོའི་བུ་ཡིན་ན་ཁྱོད་ལ་ཅིའི་ཕྱིར་བགོ་སྐལ་བྱིན། དེར་མ་ཟད་ཁྱོད་ཉིད་ཁོ་བོ་ཅག་གིས་བགོས་ཏེ་ཕུ་བོ་ཆེན་པོས་ཐོབ་བོ། །འབྱོར་ལེན་གྱི་ཆུང་མ་གང་པོ་དང་ལྷན་ཅིག་འགྲོགས་ཏེ་གཉེན་ཞིག་གི་ཁྱིམ་དུ་དོང་བ་ན་བུས་པ་བཀྲེས་

  599. 300b

    ནས་ངུ་བར་བརྩམས་སོ། །དེས་སྨྲས་པ། གང་པོ་བུས་པ་དག་ལ་གཡར་སྩུས་སྩོལ་ཅིག །དེས་སྨྲས་པ། ཀཱར་ཥཱ་པ་ཎ་ཕོག་ཤིག །དེས་སྨྲས་པ། ཁྱོད་ཀྱིས་གསེར་འབུམ་སྙེད་ཀྱི་སྤོགས་བྱས་ན་བུས་པ་དག་གི་གཡར་སྩུས་མ་མཆིས་ པ་ལྟ་ཅི་ཁོ་བོས་ཁྱེད་ཅག་གི་ཁྱིམ་འདི་འདྲ་བ་མཁོས་སུ་འབེབས་པར་འགྱུར་བར་ཤེས་སམ། གལ་ཏེ་ཁོ་བོས་ཤེས་པར་གྱུར་ན་གསེར་འབུམ་ཕྲག་དུ་མ་སྤགས་པ་ཞིག །བུད་མེད་ཀྱི་གོས་ཀྱི་མཐར་མ་ཤ་ཀ་སྒྱུ་མ་ཅན་དག་ཐུམ་པོ་བྱེད་པ་དེ་ནི་ ཆོས་ཉིད་ཡིན་ཏེ། དེས་མ་ཤ་ཀ་སྒྱུ་མ་ཅན་ཞིག་ཕོག་སྟེ་གཡར་སྩུས་སྣོམས་ཏེ་བྱོན་ཅིག །དེས་དེ་ཁྱེར་ཏེ་ཚོང་དུས་སུ་སོང་བ་ལས་མི་ཞིག་གིས་རྒྱ་མཚོའི་རླབས་ཀྱིས་བདས་པའི་ཤིང་ལས་ཁུར་ཅིག་ཁྱེར་ཏེ་གྲང་བས་སྦྲེབས་ནས་འདར་ཞིང་འོང་བ་ དེ་དེས་མཐོང་ནས་དྲིས་པ། ཀྱེ་ནང་རྗེ་ཅིའི་ཕྱིར་དེ་ལྟར་འདར། དེས་སྨྲས་པ། བདག་གིས་ཀྱང་མ་འཚལ་ཏེ། ཅུང་ཟད་དུ་ན་ཤིང་ཁུར་འདི་ཐོགས་ནས་བདག་འདི་འདྲ་བར་གྲང་བར་གྱུར་ཏོ། །དེ་ཤིང་བརྟགས་པ་ལ་མཁས་པས་དེས་ ཤིང་དེ་བརྟག་པར་བརྩམས་པ་དང་། དེ་ན་ཙན་དན་ས་མཆོག་ཡོད་པར་མཐོང་ནས་དེས་དེ་ལ་སྨྲས་པ། ཀྱེ་ནང་རྗེ་རིན་ཇི་ཙམ་དུ་བཙོང་། །ཀཱར་ཥཱ་པ་ཎ་ལྔ་བརྒྱར་རོ། །དེས་ཤིང་ཁུར་དེ་བླངས་ནས་ཙན་དན་ས་མཆོག་དེ་ཕྱུང་སྟེ། ཚོང་དུས་སུ་ སོང་ནས་སོག་ལེས་དུམ་བུ་བཞིར་གཤེགས་ཏེ། བུ་རམ་དེ་རྣམས་ཀཱར་ཥཱ་པ་ཎ་སྟོང་དུ་བཙོངས་ནས་དེ་ནས་དེ་ལ་ཀཱར་ཥཱ་པ་ཎ་ལྔ་བརྒྱ་བྱིན་ཏེ་འདི་སྐད་ཅེས་སྨྲས་སོ། །ཁྱིམ་ག་གེ་མོ་ཞེས་བྱ་བ་ན་འབྱོར་ལེན་གྱི་ཆུང་མ་འདུག་གིས། དེར་ཤིང་ཁུར་ འདི་ཁྱེར་ལ་གང་པོས་བསྐུར་བ་ཡིན་ནོ་ཞེས་བྱོས་ཤིག །དེས་དེ་ཁྱེར་ནས་ཇི་ལྟར་གྱུར་པ་དག་སྨྲས་པ་དང་། དེས་བྲང་བརྡུངས་ནས་སྨྲས་པ། འདི་ལྟར་དེ་ནོར་འཁྱམས་ན་ཤེས་རབ་ཀྱང་འཁྱམས་སམ། ཅི་བཙོ་བ་ཚོལ་དུ་བཏད་ན་བཙོ་རྒྱུ་གང་

  600. 301a

    ཡིན་པ་དེ་ཉིད་མེད་པར་བུད་པ་བསྐུར་ཏོ། །ཅི་ཙམ་དུས་གཞན་ཞིག་ན་གྲོང་ཁྱེར་སློ་མ་ལྟ་བུའི་རྒྱལ་པོ་ཚ་བའི་རིམས་ཆེན་པོས་ཐེབས་ནས་མྱོག་མྱོག་པོར་གྱུར་པ་དེ་ལ་སྨན་པས་ཙན་དན་ས་མཆོག་བསྟན་ཏོ། །དེ་ནས་བློན་པོ་རྣམས་ཀྱིས་ཙན་ དན་ས་མཆོག་བཙལ་བར་བརྩམས་པ་དང་། དེ་རྣམས་ཀྱིས་ཚོང་དུས་སུ་བརྒྱུད་པ་ལས་ཐོས་ནས་དེ་རྣམས་གང་པོའི་དྲུང་དུ་སོང་སྟེ། ཙན་དན་ས་མཆོག་ཡོད་དམ། ཡོད་དོ། །རིན་ཇི་ཙམ་དུ་བཙོང་། ཀཱར་ཥཱ་པ་ཎ་སྟོང་ངོ་། །དེ་རྣམས་ཀཱར་ཥཱ་པ་ ཎ་སྟོང་གིས་ཉོས་ནས་རྒྱལ་པོ་ལ་བྱུགས་པ་དང་སོས་པར་གྱུར་ཏོ། །རྒྱལ་པོས་བསམས་པ། གང་གི་ཁྱིམ་ན་ཙན་དན་ས་མཆོག་ཡོད་པའི་ཁྱིམ་དེ་ཅི་འདྲ་བ་ཞིག་ཡིན་སྙམ་ནས། རྒྱལ་པོས་བློན་པོ་རྣམས་ལ་སྨྲས་པ། འདི་ག་ལས་འོངས། བློན་པོ་ རྣམས་ཀྱིས་སྨྲས་པ། ལྷ་གང་པོ་ལས་སོ། །གང་པོ་འདིར་ཁུག་ཤིག །དེར་ཕོ་ཉ་སོང་ནས་སྨྲས་པ། གང་པོ་ལྷས་བཀའ་སྩལ་ཏོ། །དེས་དཔྱད་པར་བརྩམས་པ། རྒྱལ་པོ་བདག་ལ་ཅིའི་ཕྱིར་བཀའ་སྩོལ། དེས་ཡང་བསམས་པ། དེས་ཙན་ དན་ས་མཆོག་གིས་སྙུན་གདངས་པར་གྱུར་པས་དེའི་ཕྱིར་བདག་ལ་བཀའ་སྩལ་གྱིས་ཙན་དན་ས་མཆོག་ཐམས་ཅད་ཁྱེར་ཏེ་འགྲོའོ་སྙམ་ནས། དེས་ཙན་དན་ས་མཆོག་གི་དུམ་བུ་གསུམ་རས་ཀྱིས་ཁུད་དུ་དཀྲིས་ཏེ། གཅིག་ལག་ཏུ་ཐོགས་ནས་རྒྱལ་པོའི་ དྲུང་དུ་སོང་བ་དང་། རྒྱལ་པོས་སྨྲས་པ། གང་པོ་ཙན་དན་ས་མཆོག་ཅུང་ཟད་ཡོད་དམ། དེས་སྨྲས་པ། ལྷ་འདིར་མཆིས་སོ། །འདི་ལ་རིན་ཇི་ཙམ། གསེར་འབུམ་མོ། །གཞན་ཡང་ཡོད་དམ། ལྷ་མཆིས་སོ་ཞེས་དེས་དུམ་བུ་སུམ་ཅར་བསྟན་པ་ དང་རྒྱལ་པོས་བློན་པོ་རྣམས་ལ་བསྒོ་བ། གང་པོ་ལ་གསེར་བཞི་འབུམ་བྱིན་ཅིག །གང་པོས་སྨྲས་པ། ལྷ་གསུམ་གྱིས་ནི་སྩོལ་ཅིག །གཅིག་ནི་ལྷ་ལ་སྐྱེས་སུ་འབུལ་ལོ། །གསུམ་གྱིས་བྱིན་ནས་རྒྱལ་པོས་སྨྲས་པ། གང་པོ་ཁྱོད་ངའི་ཐུགས་སུ་འཐད་ཀྱིས་

  601. 301b

    མཆོག་ཅི་འདོད་པ་གསོལ་ཅིག་དང་སྦྱིན་ནོ། །ལྷ་གལ་ཏེ་ཐུགས་དང་འཐད་པར་གྱུར་ན་ལྷའི་ཡུལ་དུ་སུས་ཀྱང་མི་གཙེ་བར་མཆིས་པར་གསོལ། རྒྱལ་པོས་བློན་པོ་རྣམས་ལ་བསྒོ་བ་ཤེས་ལྡན་དག་དེང་ཕྱིན་ཆད་ཁྱེད་ཀྱིས་གཞོན་ནུ་རྣམས་ལ་བསྒོ་བར་བྱའི། གང་པོ་ལ་ནི་མ་ཡིན་ནོ། །ཇི་ཙམ་ན་ཚོང་པ་ལྔ་བརྒྱ་ཙམ་པ་རྒྱ་མཚོ་ཆེན་པོའི་གྲུ་བོ་ཆེ་གྲུབ་ནས་གྲོང་ཁྱེར་སློ་མ་ལྟ་བུར་ལྷགས་སོ། །ཚོང་པའི་ཚོགས་ཀྱིས་ནང་ཁྲིམས་སུ་བཅས་པ། བདག་ཅག་སུས་ཀྱང་གཅིག་པུ་ཚོགས་ལས་གར་ཏེ་ཚོང་པའི་དྲུང་ དུ་འགྲོ་བར་མི་བྱའོ། །གལ་ཏེ་སོང་ན་དེ་ལ་ཀཱར་ཥཱ་པ་ཎ་དྲུག་བཅུ་དབབ་བོ། །བྲུངས་ཀྱང་ཚོགས་ཏེ་བླང་བར་བྱའོ་ཞེས་བཅས་སོ། །ཁ་ཅིག་གིས་སྨྲས་པ། གང་པོ་ཡང་སྦྲན་པ་སྙམ། ཁ་ཅིག་གིས་སྨྲས་པ། བཀྲེན་པ་དེ་ལ་སྦྲན་ན་ཅི་ཡོད། དེའི་ ཚེ་གང་པོ་ཕྱིར་བྱུང་བ་ན། དེས་ཚོང་པ་ལྔ་བརྒྱ་ཙམ་རྒྱ་མཚོ་ཆེན་པོ་ནས་གྲུ་བོ་ཆེ་གྲུབ་ནས་གྲོང་ཁྱེར་སློ་མ་ལྟ་བུར་ཕྱིན་ནོ་ཞེས་ཐོས་ནས། དེ་གྲོང་ཁྱེར་དུ་མ་ཞུགས་པ་ཉིད་དུ་དེ་དག་གི་དྲུང་དུ་སོང་སྟེ་དྲིས་པ། ཤེས་ལྡན་དག་རྫས་འདི་དག་ཅི་ཡིན། དེ་ རྣམས་ཀྱིས་སྨྲས་པ། འདི་དང་འདི་དག་ཡིན་ནོ། །རིན་ཇི་ཙམ། དེད་དཔོན་གར་ཕྱིན་ཡང་ཁྱོད་ཁོ་ན་དྲི་བར་བས་སོ། །དེས་སྨྲས་པ། གལ་ཏེ་དེ་ལྟ་ཡིན་ཡང་འོན་ཀྱང་རིན་ཐང་སྨོས་ཤིག །དེ་དག་གིས་གསེར་ས་ཡ་དང་བརྒྱད་འབུམ་དུ་རིན་བཏབ་ བོ། །དེས་སྨྲས་པ། ཤེས་ལྡན་དག་ཐག་བཅད་པའི་གསེར་སུམ་འབུམ་ཁྱེར་ཅིག །ཟོང་འདི་དག་ནི་ཁོ་བོའི་ཡིན་ནོ། །ལྷག་མ་ནི་ནང་དུ་ཕྱིན་ནས་སྦྱིན་ནོ། །དེ་བཞིན་དུ་བགྱིའོ་ཞེས་པ་དང་། དེས་གསེར་སུམ་འབུམ་ཡང་བླངས་ནས་ཐག་གཅད་ པས་ཕྱིར་བྱིན། རང་གིས་རྒྱས་ཀྱང་བཏབ་སྟེ་སོང་ངོ་། །དེ་ནས་ཚོང་པའི་ཚོགས་ཀྱིས་ཚོང་པའི་གཡོག་གིས་མི་དག་རྫས་ཅི་ཡོད་ལྟོས་ཤིག་ཅེས་མངགས་ནས་དེ་དག་སོང་སྟེ་དྲིས་པ། རྫས་འདི་དག་ཅི་ཡིན། འདི་དང་འདི་དག་ཡིན་ནོ། །བདག་ཅག་

  602. 302a

    ལ་འདི་འདྲ་བས་ནི་མཛོད་དང་བང་བ་གང་བར་འདུག་གོ། །དེ་རྣམས་ཀྱིས་སྨྲས་པ། གང་ཡང་རུང་མ་གང་ཡང་རུང་སྟེ། འོན་ཀྱང་འདི་བཙོངས་ཟིན་ཏོ། །སུ་ཞིག་ལ། གང་པོ་ལའོ། །གང་པོ་ལ་བཙོངས་ན་ཆེན་མོ་ཞིག་ཁུགས་མོད། དེ་རྣམས་ཀྱིས་ སྨྲས་པ། དེས་ཐག་བཅད་པར་བྱིན་པ་གང་ཡིན་པ་དེ་ཁྱོད་ཀྱིས་རིན་དུ་ཡང་མི་བྱིན་ནོ། །དེས་ཐག་བཅད་པར་ཅི་བྱིན་གསེར་སུམ་འབུམ་མོ། །དེས་ཕུ་བོ་དེ་དག་ལས་བརྐུས་ཡང་དག་གོ། །དེ་རྣམས་སླར་ལོག་སྟེ་ཚོང་པའི་ཚོགས་ལ་སྨྲས་པ། རྫས་དེ་དག་ནི་བཙོངས་ཟིན་ཏོ། ། སུ་ཞིག་ལ། གང་པོ་ལའོ། །གང་པོ་ལ་ཚོངས་ན་ཆེན་མོ་ཞིག་ཁུགས་མོད། དེས་ཐག་བཅད་པར་བྱིན་པ་གང་ཡིན་པ་དེ་ཁྱོད་ཀྱིས་རིན་དུ་ཡང་མི་བྱིན་ནོ། །དེས་ཐག་བཅད་པར་ཅི་བྱིན། སྲང་སུམ་འབུམ་མོ། །དེས་སྤུན་དེ་དག་ལས་བརྐུས་ཡང་དག་གོ། །དེ་རྣམས་ཀྱིས་དེ་བོས་ནས་ སྨྲས་པ། གང་པོ་ཚོང་པའི་ཚོགས་ཀྱིས་ཁྲིམས་སུ་བཅས་པ། སུས་ཀྱང་གཅིག་པུས་ཟོང་མི་བླང་གིས་ཚོང་པའི་ཚོགས་ཁོ་ནས་བླང་བར་བྱའོ་ཞེས་བཅས་ན་ཁྱོད་ཀྱིས་ཅིའི་ཕྱིར་བླང་། དེས་སྨྲས་པ། ཤེས་ལྡན་དག་གང་གི་ཚེ་ཁྱོད་ཀྱིས་ཁྲིམས་སུ་བཅའ་བ་བྱས་པ་ དེའི་ཚེ་ཅི་ཁོ་བོའམ། ཁོ་བོའི་ཕུ་ནུ་བོ་དག་ལ་བསྒོའམ། ཁྱོད་ཁོ་བོ་ནས་ཁྲིམས་སུ་བཅའ་བ་བྱས། ཁྱེད་ཅག་ཉིད་སྲུངས་ཤིག །དེ་ནས་ཚོང་པའི་ཚོགས་ཁྲོས་ནས་ཀཱར་ཥཱ་པ་ཎ་དྲུག་བཅུའི་ཕྱིར་བཟུང་སྟེ་ཉི་མ་ལ་བཞག་པ་རྒྱལ་པོའི་མི་གང་གིས་མཐོང་བ་དེ་དག་གིས་རྒྱལ་པོ་ལ་ སྨྲས་པ་དང་། རྒྱལ་པོས་བསྒོ་བ། ཤེས་ལྡན་དག་དེ་རྣམས་ཁུག་ཤིག །དེ་དག་གིས་དེ་རྣམས་བཀུག་པ་དང་། རྒྱལ་པོས་སྨྲས་པ། ཤེས་ལྡན་དག་ཁྱེད་ཅག་གིས་ཅིའི་ཕྱིར་གང་པོ་བཟུང་སྟེ་ཉི་མ་ལ་བཞག །ལྷ་ཚོང་པ་རྣམས་ཀྱིས་ཁྲིམས་སུ་བཅས་པ། སུས་ ཀྱང་གཅིག་པུས་ཟོང་འཇལ་ཚོང་མི་བགྱིའོ་ཞེས་བཅས་པ་ལས། འདི་གཅིག་པུས་འཇལ་ཚོང་བགྱིས་པས་སོ། །དེས་སྨྲས་པ། ལྷ་གང་གི་ཚེ་འདི་དག་གིས་ཁྲིམས་སུ་བཅའ་བ་བགྱིས་པ་དེའི་ཚེ་འདི་དག་གིས་ཅི་བདག་གམ་བདག་གི་ཕུ་ནུ་པོ་དག་ལ་བསྒོའམ་ཞེས་རྨར་

  603. 302b

    གསོལ། རྒྱལ་པོས་སྨྲས་པ། ཤེས་ལྡན་དག་གང་པོའི་ཤགས་བཟང་ངོ་། །དེ་རྣམས་སྐྱེངས་ནས་དེ་བཏང་ངོ་། །ཇི་ཙམ་དུས་གཞན་ཞིག་ན་རྒྱལ་པོ་ལ་རྫས་ཤིག་གི་དགོས་པ་བྱུང་ནས་དེས་ཚོང་པའི་ཚོགས་བཀུག་སྟེ་བསྒོ་བ། ཤེས་ལྡན་དག་ང་ལ་རྫས་ཆེ་གེ་མོ་ ཞེས་བྱ་བ་ཞིག་དགོས་ཀྱིས་དེ་ང་ལ་ཕུལ་ཅིག །དེ་རྣམས་ཀྱིས་སྨྲས་པ། ལྷ་གང་པོ་ལ་མཆིས་སོ། །དེས་སྨྲས་པ། ང་དེ་ལ་བཀའ་མི་སྩོལ་གྱིས། ཁྱེད་ཉིད་ཀྱིས་དེ་ལས་ཉོས་ལ་ང་ལ་ཕུལ་ཅིག །དེ་དག་གིས་གང་པོ་ལ་ཕོ་ཉ་བཏང་སྟེ་ཚོང་པའི་ཚོགས་འབོད་ དོ་ཞེས་བྱས་སོ། །དེས་སྨྲས་པ། ཁོ་བོ་མི་འོང་ངོ་། །དེ་ནས་ཚོང་པའི་ཚོགས་ཐམས་ཅད་འདུས་ཏེ་དེའི་ཁྱིམ་དུ་སོང་ནས་སྒོར་བསྡད་དེ་དེ་ལ་ཕྲིན་བཏང་ནས་གང་པོ་ཚོང་པའི་ཚོགས་སྒོ་ན་སྡོད་ཀྱིས་བྱུང་ཞིག་ཅེས་སྤྲིང་ངོ་། །དེ་ང་རྒྱལ་དང་ཉམ་དུ་ཤེད་དང་བཅས་ པས་དྲེགས་པས་བྱུང་བ་དང་། ཚོང་པའི་ཚོགས་ཀྱིས་སྨྲས་པ། དེད་དཔོན་ཇི་ལྟར་ཉོས་པ་བཞིན་དུ་ཟོང་བྱིན་ཅིག །དེས་སྨྲས་པ། གལ་ཏེ་ཇི་ལྟར་ཉོས་པ་བཞིན་ཟོང་བྱིན་ན་ཁོ་བོ་ཚོང་པ་ཆེན་པོ་ཡིན་མོད། དེ་དག་གིས་སྨྲས་པ། རིན་ཉིས་འགྱུར་གྱིས་བྱིན་ ཅིག་དང་ཚོང་པའི་ཚོགས་མཆོད་པར་འགྱུར་རོ། །དེས་བསམས་པ། ཚོང་པའི་ཚོགས་ནི་མཆོད་པར་བྱ་བ་ཡིན་ནོ་སྙམ་ནས། དེས་ས་ཡ་དང་ལྔ་འབུམ་ཉིས་འགྱུར་དུ་བྱིན་ནོ། །ལྷག་མ་ནི་ཁྱིམ་དུ་སྦས་ནས་དེས་བསམས་པ། ཇི་ག་ཟིལ་པའི་ཐིགས་པས་བུམ་པ་ དགང་བར་ནུས་སམ། རྒྱ་མཚོ་ཆེན་པོར་འཇུག་པར་བྱའོ་སྙམ་ནས། རྒྱ་མཚོ་ཆེན་པོར་འཇུག་པར་བྱ་བའི་ཕྱིར་དེས་གྲོང་ཁྱེར་སློ་མ་ལྟ་བུར་དྲིལ་སྒྲོགས་སུ་བཅུག་པ། ཤེས་ལྡན་གྲོང་ཁྱེར་སློ་མ་ལྟ་བུ་ན་གནས་པའི་ཚོང་པ་དག་ཉོན་ཅིག །དེད་དཔོན་གང་པོ་རྒྱ་ མཚོ་ཆེན་པོར་འཇུག་པར་འགྱུར་གྱིས། ཁྱེད་ཅག་ལས་གང་དེད་དཔོན་གང་པོ་དང་ལྷན་ཅིག་ཤོ་གམ་མེད་པ་དང་། ལག་ཅན་པའི་གླ་མེད་པ་དང་། གྲུ་བཙས་མེད་པར་རྒྱ་མཚོ་ཆེན་པོར་འཇུག་པར་སྤྲོ་བ་དེ་དག་གིས་རྒྱ་མཚོ་ཆེན་པོར་འདོང་བའི་ཟོང་སྟ་གོན་བྱོས་

  604. 303a

    ཤིག །ཚོང་པ་ལྔ་བརྒྱ་ཙམ་གྱིས་རྒྱ་མཚོ་ཆེན་པོར་འདོང་བའི་ཟོང་སྟ་གོན་བྱས་སོ། །དེ་ནས་དེད་དཔོན་གང་པོ་དགེ་མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་དག་བྱས་ཏེ་འཁོར་ཚོང་པ་ལྔ་བརྒྱ་དང་རྒྱ་མཚོ་ཆེན་པོར་ཞུགས་པ་ ལས། གྲུ་བོ་ཆེ་གྲུབ་ནས། གྲོང་ཁྱེར་སློ་མ་ལྟ་བུར་འཁོར་ཏོ། །དེ་ལྟ་བུར་ལན་དྲུག་གི་བར་དུ་རྒྱ་མཚོ་ཆེན་པོར་ཞུགས་པ་ལས་གྲུ་བོ་ཆེ་གྲུབ་ནས་སླར་འཁོར་ཏོ། །ཕྱོགས་ཀུན་དུ་གང་པོས་ལན་དྲུག་གི་བར་དུ་རྒྱ་མཚོ་ཆེན་པོར་ཞུགས་པ་ལས་གྲུ་བོ་ཆེ་གྲུབ་ནས་སླར་འཁོར་ཏོ་ཞེས་སྒྲ་ གྲགས་པ་དང་། མཉན་ཡོད་པའི་ཚོང་པ་དག་ཟོང་ཐོགས་ཏེ་གྲོང་ཁྱེར་སློ་མ་ལྟ་བུར་དོང་ནས། དེ་དག་ལམ་གྱིས་དུབ་པ་ངལ་སོས་ནས། དེད་དཔོན་གང་པོ་གང་ན་བ་དེར་དོང་སྟེ་ལྷགས་ནས་སྨྲས་པ། དེད་དཔོན་རྒྱ་མཚོ་ཆེན་པོར་བཞུད་དོ། །དེས་སྨྲས་པ། ཤེས་ལྡན་དག་ལན་དྲུག་ གི་བར་དུ་རྒྱ་མཚོ་ཆེན་པོ་ནས་གྲུ་བོ་ཆེ་གྲུབ་སྟེ། སླར་འཁོར་བ་ལས་བདུན་པར་འཇུག་པ་ཁྱེད་ཅག་གིས་མཐོང་བའམ་ཐོས་པ་འགའ་ཡོད་དམ། དེ་དག་གིས་སྨྲས་པ། གང་པོ་བདག་ཅག་ཤུལ་རིང་པོ་ནས་ཁྱོད་ཀྱི་ཆེད་དུ་ལྷགས་ཏེ་གལ་ཏེ་མི་འཇུག་ན་ཁྱོད་ཉིད་ཚད་མ་ཡིན་ནོ། །དེས་ བསམས་པ། བདག་ལ་ནི་ནོར་གྱིས་ཅུང་ཟད་ཀྱང་མི་ཆོག་པ་མེད་ན་འདི་དག་གིས་དོན་དུ་འགྲོ་བར་བྱའོ་སྙམ་ནས། དེ་དེ་རྣམས་དང་ལྷན་ཅིག་ཏུ་རྒྱ་མཚོ་ཆེན་པོར་ཆས་སོ། །དེ་དག་གིས་ནམ་ཐོ་རངས་ཀྱི་དུས་སུ་ཆེད་དུ་བརྗོད་པ་དང་། ཕ་རོལ་འགྲོ་བྱེད་དང་། བདེན་པ་མཐོང་བ་ དང་། གནས་བརྟན་པའི་ཚིགས་སུ་བཅད་པ་དང་། གནས་བརྟན་མའི་ཚིགས་སུ་བཅད་པ་དང་། རི་གནས་པའི་ཚིགས་སུ་བཅད་པ་དང་། ཐུབ་པའི་ཚིགས་སུ་བཅད་པ་དང་། དོན་གྱི་ཚོམས་ཀྱི་མདོ་དག་གསང་བསྟོད་དེ་བཏོན་པ་དང་། དེས་དེ་དག་ཐོས་ནས་སྨྲས་པ། ཤེས་ལྡན་ དག་གླུ་བཟང་པོ་ཞིག་ལོང་ཤིག །དེ་རྣམས་ཀྱིས་སྨྲས་པ། དེད་དཔོན་དེ་དག་ནི་གླུ་མ་ལགས་སོ། །འོ་ན་ཅི། དེ་ནི་སངས་རྒྱས་ཀྱིས་བཀའོ། །དེས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་ཐོས་ནས་བ་སྤུའི་ཁུང་བུ་ཐམས་ཅད་ནས་སྤུ་ཟིང་ཞེས་བྱེད་ནས་གུས་པ་དང་བཅས་པས་དྲིས་

  605. 303b

    པ། ཤེས་ལྡན་དག་སངས་རྒྱས་ཞེས་བྱ་བ་དེ་སུ་ཞིག་ཡིན། དེ་རྣམས་ཀྱིས་སྨྲས་པ། ཤཱཀྱའི་སྲས་དགེ་སློང་གཽ་ཏ་མ་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་བླ་ན་མེད་པ་ཡང་དག་ པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཞིག་ཡོད་དེ། དེད་དཔོན་དེ་ནི་སངས་རྒྱས་ཞེས་བགྱིའོ། །ཤེས་ལྡན་དག་བཅོམ་ལྡན་འདས་དེ་ད་ལྟར་གང་ན་བཞུགས། དེད་དཔོན་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་ བཞུགས་སོ། །དེས་དེ་སྙིང་ལ་བཟུང་ནས་དེ་རྣམས་དང་ལྷན་ཅིག་རྒྱ་མཚོ་ཆེན་པོར་ཞུགས་ཏེ་གྲུ་བོ་ཆེ་གྲུབ་ནས་སླར་ལྷགས་སོ། །དེའི་ཕུ་བོ་འབྱོར་ལེན་གྱིས་བསམས་པ་འདི་རྒྱ་མཚོ་ཆེན་པོར་འགྲོ་འགྲོ་བས་དུབ་པར་གྱུར་གྱིས་འདི་ཁྱིམ་དབུབ་པར་བྱའོ་སྙམ་ནས་དེས་དེ་ལ་སྨྲས་ པ། ཁྱོད་ཀྱི་དོན་དུ་ཚོང་པ་དང་། ཚོང་དཔོན་དང་། དེད་དཔོན་གང་གིས་བུ་མོ་བསླང་བ་ཕུ་བོ་ལ་སྨྲོས་ཤིག །དེས་སྨྲས་པ། བདག་འདོད་པ་ནི་མ་འཚལ་གྱིས་གལ་ཏེ་གནང་ན་རབ་ཏུ་འབྱུང་ངོ་། །དེས་སྨྲས་པ། གང་གི་ཚེ་བདག་ཅག་ཁྱིམ་གྱི་འཚོ་ནམ་ལ་མ་ཞུགས་པ་དེའི་ཚེ་རབ་ཏུ་ མི་འབྱུང་བར་ད་ཅིའི་ཕྱིར་རབ་ཏུ་འབྱུང་། དེས་སྨྲས་པ། དེའི་ཚེ་ནི་མི་རིགས་ལགས་སོ། །ད་ནི་རིགས་པ་ལགས་སོ། །དེས་དེ་གདོན་མི་ཟ་བར་གལ་གྱིས་འཆུ་བར་ཤེས་ནས་གནང་ངོ་། །དེས་སྨྲས་པ། ཕུ་བོ་རྒྱ་མཚོ་ཆེན་པོ་ན་ཉེས་དམིགས་ནི་མང་ལ་མནོག་ནི་ཆུང་ངོ་། །དེར་ འཇུག་པ་ནི་མང་ལ་སླར་འཁོར་བ་ཉུང་བས་ཁྱོད་ཀྱིས་རྣམ་པ་ཐམས་ཅད་དུ་རྒྱ་མཚོ་ཆེན་པོར་འཇུག་པར་མི་བྱའོ། །ཁྱོད་ལ་རིགས་པས་བསྒྲུབ་པའི་ནོར་ཕལ་པོ་ཆེ་ཡོད་ལ་ཁྱོད་ཀྱི་ནུ་བོ་དག་ལ་རིགས་པ་མ་ཡིན་པས་བསྒྲུབས་པ་ཡིན་པས་གལ་ཏེ་དེ་དག་ན་རེ་ལྷན་ཅིག་འཁོད་ པར་བྱའོ་ཞེས་ཟེར་ན་འདུག་པར་མི་བྱའོ་ཞེས་སྨྲས་ནས་རིམ་གྲོ་པ་གཅིག་ཁྲིད་དེ་མཉན་ཡོད་དུ་སོང་སྟེ། མཉན་ཡོད་ཀྱི་སྐྱེད་མོས་ཚལ་དུ་འདུག་ནས་ཁྱིམ་བདག་མགོན་མེད་ཟས་སྦྱིན་ལ་ཕྲིན་པ་བཏང་སྟེ། ཁྱིམ་བདག་དེད་དཔོན་གང་པོ་ཁྱིམ་བདག་བལྟ་བར་འདོད་ནས་

  606. 304a

    སྐྱེད་མོས་ཚལ་ན་སྡོད་དོ་ཞེས་སྤྲིང་བ་དང་། མགོན་མེད་ཟས་སྦྱིན་གྱིས་བསམས་པ། གདོན་མི་ཟ་བར་ཆུའི་བཞོན་པས་དུབ་ནས། ད་ནི་ཐང་གི་བཞོན་པས་འོངས་སོ་སྙམ་མོ། །དེ་ནས་དྲིས་པ། ཀྱེ་ནང་རྗེ་ཟོང་ཇི་སྙེད་ཅིག་ཁྱེར་ཏེ་འོངས། དེ་ལ་ཟོང་ག་ལ་ཡོད། རིམ་གྲོ་པ་ དང་གཉིས་པུ་སྟེ་དེ་དང་བདག་ཏུབས་སོ། །མགོན་མེད་ཟས་སྦྱིན་གྱིས་བསམས་པ། གང་བདག་གིས་སྐྱེས་བུ་དམ་པ་དེ་ལ་བཀུར་སྟིར་མ་བྱས་པར་ཁྱིམ་དུ་བོད་པ་ནི་བདག་རིགས་པ་དང་ལྡན་པ་མ་ཡིན་ནོ་སྙམ་ནས། དེས་དེ་བཀུར་སྟི་ཆེན་པོས་ཁྱིམ་དུ་བོས་ནས་སྐུ་མཉེ་བྱས་ཏེ་ཁྲུས་ བྱས་ནས་ཟན་བྱིན་ཏེ་དགའ་བའི་གཏམ་བྱས་ཏེ་འདུག་ནས། མགོན་མེད་ཟས་སྦྱིན་གྱིས་དྲིས་པ། དེད་དཔོན་དགོས་པ་ཅི་ཞིག་ལ་འོངས། ཁྱིམ་བདག་བདག་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ ལོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་རོ་སྟོད་བསྟོད་ནས་ལག་པ་གཡས་པ་བརྐྱང་སྟེ་ཆེད་དུ་བརྗོད་པས་ཆེད་དུ་བརྗོད་པ། ཀྱེ་མའོ་སངས་རྒྱས། ཀྱེ་མའོ་ཆོས། ཀྱེ་མའོ་དགེ་འདུན། ཀྱེ་མའོ་ཆོས་ལེགས་པར་གསུངས་པ་ཉིད། དེ་ལ་ནི་ད་སྐྱེས་བུ་གཙོ་བོ་འདི་ ལྟ་བུ་ཡང་རང་གི་སྐྱེ་བོ་དང་གཉེན་བཤེས་ཀྱི་ཚོགས་རྒྱ་ཆེན་པོ་དང་། མཛོད་དང་བང་མཛོད་རྒྱས་པ་རྣམས་ཀྱང་སྤངས་ནས་ལེགས་པར་གསུངས་པའི་ཆོས་འདུལ་བ་ལས་རབ་ཏུ་བྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འདོད་པར་གྱུར་ཏོ། །དེ་ནས་ཁྱིམ་ བདག་མགོན་མེད་ཟས་སྦྱིན་གྱིས་དེད་དཔོན་གང་པོ་ཁྲིད་དེ་བཅོམ་ལྡན་འདས་གང་ན་བ་དེར་སོང་ངོ་། །དེའི་ཚེ་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་གུང་ལ་བཞུགས་ནས་ཆོས་འཆད་དོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ སྐྱེས་དང་ཆས་ཏེ་འོང་བ་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་བདག་མགོན་མེད་ཟས་སྦྱིན་སྐྱེས་དང་ཆས་ཏེ་ད་ལྟར་འོང་ངོ་། །དེ་བཞིན་གཤེགས་པའི་སྐྱེས་ནི་འདི་ལྟ་བུ་མེད་དེ། འདི་ལྟ་སྟེ་གདུལ་བའི་སྐྱེས་

  607. 304b

    བུའོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱི་ཞབས་གཉིས་ལ་ཕྱག་བྱས་ཏེ། དེད་དཔོན་གང་པོ་དང་ལྷན་ཅིག་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་ གསོལ་ཏོ། །བཙུན་པ་དེད་དཔོན་གང་པོ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་འཚལ་ན། དེ་བཅོམ་ལྡན་འདས་ཀྱིས་རབ་ཏུ་དབྱུང་བ་དང་བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་ཁྱིམ་ བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ་། །དེ་ནས་བཅོམ་ལྡན་འདས་ཀྱིས་དེད་དཔོན་གང་པོ་ལ་བཀའ་སྩལ་པ། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པའི་མོད་ཁོ་ནར་དེ་སྐྲ་བྱི་བ་དང་། སྣམ་སྦྱར་གོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་ན་ལྷུང་བཟེད་དང་བྱ་མ་བུམ་ཐོགས་པ་དང་། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །དེ་བཞིན་གཤེགས་པས་ཚུར་ཤོག་གསུངས་པས་དེ། །སྐྲ་བྱི་སྣམ་སྦྱར་གོན་པའི་ལུས་ལྡན་ཞིང་། མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་དུས་གཞན་ཞིག་ན་ཚེ་དང་ལྡན་པ་གང་པོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་ གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་གང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ལས་བདག་གིས་མདོར་བསྡུས་པའི་ཆོས་ཐོས་པ་ཇི་ལྟ་བུས་གཅིག་པུས་དབེན་པ་བག་ཡོད་པ་དང་རྟུན་པ་ དང་ལྡན་ལ་བདག་ཉིད་ལ་བདག་ཉིད་གཏོད་ཅིང་གནས་པར་འགྱུར་བ་དེ་ལྟ་བུའི་ཆོས་མདོར་བསྡུས་པ་ལེགས་པར་བཤད་དུ་གསོལ། གཅིག་པུ་དབེན་པ་བག་ཡོད་པ་དང་རྟུན་པ་དང་ལྡན་ལ་བདག་ཉིད་གཏོད་ཅིང་གནས་ན། རིགས་ཀྱི་བུ་དག་གང་གི་ཕྱིར་སྐྲ་དང་ཁ་

  608. 305a

    སྤུ་བྲེགས་ནས་གོས་ངུར་སྨྲིག་བགོས་ཏེ་ཡང་དག་པའི་དད་པས་ཁྱིམ་ནས་ཁྱིམ་མ་མཆིས་པར་རབ་ཏུ་བྱུང་བར་བགྱིད་པ་ཚངས་པར་སྤྱོད་པའི་མཐའ་བླ་ན་མ་མཆིས་པ་དེ་མཐོང་བའི་ཆོས་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བགྱིས་ཏེ་བསྒྲུབས་ནས་ བདག་གི་སྐྱེ་བ་ནི་ཟད་དོ། །ཚངས་པར་སྤྱོད་པ་ནི་སྤྱད་དོ། །བྱ་བ་ནི་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་གང་པོ་ལ་འདི་སྐད་ཅེས་བཀའ་སྩལ་ཏོ། །གང་པོ་ལེགས་ སོ། ལེགས་སོ། །གང་པོ་གང་ཁྱོད་འདི་སྐད་དུ་སྲིད་པ་འདི་ལས་གཞན་མི་ཤེས་སོ་ཞེས་བྱ་བ་ནས་དེ་ལྟ་བུའི་ཆོས་མདོར་བསྡུས་པ་ལེགས་པར་བཤད་དུ་གསོལ་ཞེས་བྱ་བའི་བར་སྨྲ་བ་ནི་ཡང་ལེགས་སོ་ཞེས་བྱ་བ་སྔ་མ་བཞིན་ཏེ། དེའི་ཕྱིར་རབ་ཏུ་ཉོན་ལ་ཡིད་ལ་ཟུང་ ཤིག་དང་བཤད་དོ། །གང་པོ་མིག་གིས་རྣམ་པར་ཤེས་པར་བྱ་བའི་གཟུགས་སྡུག་པ་དང་། ཆགས་པ་དང་། དགའ་བ་དང་། ཡིད་དུ་འོང་བ་དང་། འདོད་པ་དང་ལྡན་པ་དང་། ཀུན་དུ་ཆགས་པར་འགྱུར་བ་ཡོད་ལ། དེ་དག་གལ་ཏེ་དགེ་སློང་གིས་མཐོང་ནས་ མངོན་པར་དགའ་བ་དང་། མངོན་པར་བསྟོད་པ་དང་། ལྷག་པར་ཆགས་པ་དང་། ལྷག་པར་ཞེན་ཅིང་གནས་ནས་དེ་དག་ལ་མངོན་པར་དགའ་བ་དང་། མངོན་པར་བསྟོད་པ་དང་། ལྷག་པར་ཆགས་པ་དང་། ལྷག་པར་ཞེན་ཅིང་གནས་པ་དེ་ལ་ཀུན་དུ་དགའ་བ་འབྱུང་ངོ་། ། ཀུན་དུ་དགའ་བ་ཡོད་ན་དགའ་བ་དང་། ཡིད་བདེ་བར་འགྱུར་རོ། །དགའ་བ་དང་ཡིད་བདེ་བ་ཡོད་ན་ཀུན་དུ་ཆགས་པར་འགྱུར་རོ། །ཀུན་དུ་ཆགས་པ་ཡོད་ན་ཀུན་དུ་སྦྱོར་བར་འགྱུར་ཏེ། དགའ་བ་དང་། ཀུན་དུ་ཆགས་པ་དང་། ཀུན་དུ་སྦྱོར་བ་དང་ལྡན་པར་གྱུར་པའི་དགེ་སློང་ནི་ གང་པོ་མྱ་ངན་ལས་འདས་པ་ལས་རིང་དུ་གྱུར་པ་ཞེས་བྱའོ། །གང་པོ་རྣ་བས་རྣམ་པར་ཤེས་པར་བྱ་བའི་སྒྲ་དང་། སྣས་རྣམ་པར་ཤེས་པར་བྱ་བའི་དྲི་དང་། ལྕེས་རྣམ་པར་ཤེས་པར་བྱ་བའི་རོ་དང་། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་དང་། ཡིད་ཀྱིས་རྣམ་

  609. 305b

    པར་ཤེས་པར་བྱ་བའི་ཆོས་སྡུག་པ་དང་། ཆགས་པ་དང་། དགའ་བ་དང་། ཡིད་དུ་འོང་བ་དང་། འདོད་པ་དང་། ལྡན་པ་དང་ཀུན་དུ་ཆགས་པར་འགྱུར་བ་རྣམས་ཡོད་ལ། དེ་དག་གལ་ཏེ་དགེ་སློང་གིས་ཤེས་ནས་ཞེས་བྱ་བ་ནས། མྱ་ངན་ལས་འདས་པ་ལས་རིང་དུ་གྱུར་པ་ཞེས་བྱའོ་ཞེས་ བྱ་བའི་བར་སྔ་མ་བཞིན་ནོ། །གང་པོ་མིག་གིས་རྣམ་པར་ཤེས་པ་བྱ་བའི་གཟུགས་སྡུག་པ་དང་། ཆགས་པ་དང་། དགའ་བ་དང་། ཡིད་དུ་འོང་བ་དང་། འདོད་པ་དང་ལྡན་པ་དང་། ཀུན་དུ་ཆགས་པར་འགྱུར་བ་ཡོད་ལ། དེ་དག་གལ་ཏེ་དགེ་སློང་གིས་མཐོང་ནས་མངོན་པར་མི་དགའ་བ་དང་། མངོན་པར་ མི་སྟོད་པ་དང་། ལྷག་པར་མ་ཆགས་པ་དང་། ལྷག་པར་མི་ཞེན་ཅིང་གནས་ན་དེ་དག་ལ་མངོན་པར་མི་དགའ་བ་དང་། མངོན་པར་མི་སྟོད་པ་དང་། ལྷག་པར་མ་ཆགས་པ་དང་། ལྷག་པར་མ་ཞེན་པར་གནས་པ་དེ་ལ་ཀུན་དུ་དགའ་བ་མི་འབྱུང་ངོ་། །ཀུན་དུ་དགའ་བ་མེད་ན་དགའ་བ་དང་ཡིད་བདེ་བ་མེད་པར་འགྱུར་རོ། །དགའ་ བ་དང་ཡིད་བདེ་བ་མེད་ན་ཀུན་དུ་མ་ཆགས་པར་འགྱུར་རོ། །ཀུན་དུ་ཆགས་པ་མེད་ན་ཀུན་དུ་སྦྱོར་བ་མེད་པར་འགྱུར་རོ། །ཀུན་དུ་སྦྱོར་བ་མེད་ན་དགའ་བ་དང་། ཀུན་དུ་ཆགས་པ་དང་། ཀུན་དུ་སྦྱོར་བ་དང་མི་ལྡན་པའི་དགེ་སློང་ནི་གང་པོ་མྱ་ངན་ལས་འདས་པ་ལ་ཉེ་བར་གྱུར་པ་ཞེས་བྱའོ། ། གང་པོ་རྣ་བས་རྣམ་པར་ཤེས་པར་བྱ་བའི་སྒྲ་དང་། སྣས་རྣམ་པར་ཤེས་པར་བྱ་བའི་དྲི་དང་། ལྕེས་རྣམ་པར་ཤེས་པར་བྱ་བའི་རོ་དང་། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་དང་། ཡིད་ཀྱིས་རྣམ་པར་ཤེས་པར་བྱ་བའི་ཆོས་སྡུག་པ་དང་། ཆགས་པ་དང་། དགའ་བ་དང་། ཡིད་དུ་ འོང་བ་དང་། འདོད་པ་དང་ལྡན་པ་དང་། ཀུན་དུ་ཆགས་པར་འགྱུར་བ་ཡོད་ལ། དེ་དག་གལ་ཏེ་དགེ་སློང་གིས་ཤེས་ནས་ཞེས་བྱ་བ་ནས། དེ་ནི་མྱ་ངན་ལས་འདས་པ་ལ་ཉེ་བར་གྱུར་པ་ཞེས་བྱའོ་ཞེས་བྱ་བའི་བར་གོང་མ་བཞིན་དུའོ། །གང་པོ་ངས་མདོར་བསྡུས་པའི་གདམས་ངག་འདིས་ ཁྱོད་ལ་གཏམས་ན་གང་དུ་གནས་པར་འདོད། གང་དུ་གནས་བཅའ་བར་འདོད། བཙུན་པ་བཅོམ་ལྡན་འདས་ཀྱིས་མདོར་བསྡུས་པའི་གདམས་ངག་འདིས་བདག་ལ་གཏམས་ལགས་པས་གྲོ་བཞིན་སྐྱེས་གནས་པའི་ཡུལ་གྱི་མཐར་མཆིས་པར་འཚལ་ལགས་སོ། །གང་པོ་གྲོ་བཞིན་སྐྱེས་

  610. 306a

    གནས་པའི་ཡུལ་གྱི་མཐའི་མི་རྣམས་ནི་གཏུམ་པ། གཟུ་ལུམས་ཅན། རྩུབ་པ། གཤེ་བ། སྤྲོ་ཐུང་བ། འཕྱ་བ་ཡིན་ཏེ། གང་པོ་གལ་ཏེ་ཁྱོད་ལ་གྲོ་བཞིན་སྐྱེས་གནས་པའི་མཐའི་མི་རྣམས་མངོན་སུམ་དུ། སྡིག་པ་ཚོགས་པར་མི་ དབྱུང་བའི་ཚིག་རྩུབ་པོས་གཤེ་བར་བྱེད། ཞེར་འདེབས་པར་བྱེད། འཕྱ་བར་བྱེད་ན། དེ་ལ་ཁྱོད་ཇི་སྙམ་བྱེད། བཙུན་པ་གལ་ཏེ་གྲོ་བཞིན་སྐྱེས་གནས་པའི་མཐའི་མི་རྣམས་བདག་ལ་མངོན་སུམ་དུ་སྡིག་པ་ཚོགས་པར་མི་དབྱུང་བའི་ཚིག་རྩུབ་པོས་གཤེ་བར་ བགྱིད། ཞེར་འདེབས་པར་བགྱིད། འཕྱ་བར་བགྱིད་ན་དེ་ལ་བདག་གིས་འདི་སྙམ་དུ་སེམས་ཏེ། ཨེ་མའོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་རུང་བ་དག་ཡིན་ནོ། །ཨེ་མའོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་བློ་དང་ལྡན་པ་ཡིན་ཏེ། དེ་ དག་བདག་ལ་སྡིག་པ་ཚོགས་པར་མི་དབྱུང་བའི་ཚིག་རྩུབ་པོས་གཤེ་བར་བྱེད། ཞེར་འདེབས་པར་བྱེད། འཕྱ་བར་བྱེད་ཀྱང་ལག་པའམ་བོང་པས་མ་བརྒྱབ་སྙམ་མོ། །གང་པོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་གཏུམ་པ་ཞེས་བྱ་བ་ནས་འཕྱ་བར་བྱེད་པ་ ཡིན་ནོ། །ཞེས་བྱ་བའི་བར་གོང་མ་བཞིན་ཏེ། གང་པོ་གལ་ཏེ་གྲོ་བཞིན་སྐྱེས་གནས་པའི་མཐའི་མི་རྣམས་ཀྱིས་དབྱུག་པའམ་མཚོན་གྱིས་བརྒྱབ་ན་དེ་ལ་ཁྱོད་ཇི་སྙམ་བྱེད། བཙུན་པ་གལ་ཏེ་བདག་ལ་གྲོ་བཞིན་སྐྱེས་གནས་པའི་མཐའི་མི་རྣམས་ཀྱིས་དབྱུག་པའམ་ མཚོན་གྱིས་བརྒྱབ་པར་གྱུར་ན། དེ་ལ་བདག་གིས་འདི་སྙམ་སེམས་ཏེ། ཀྱེ་མའོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་རུང་བ་དག་ཡིན་ནོ། །ཀྱེ་མའོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་བློ་དང་ལྡན་པ་ཡིན་ཏེ། དེ་དག་བདག་ལ་དབྱུག་པའམ་མཚོན་གྱིས་ བརྒྱབ་ཀྱང་ཐམས་ཅད་ཀྱིས་ཐམས་ཅད་དུ་སྲོག་དང་བྲལ་བར་མི་བྱེད་དོ་སྙམ་མོ། །གང་པོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་གཏུམ་པ་ཞེས་བྱ་བ་ནས་འཕྱ་བར་བྱེད་པ་ཡིན་ནོ་ཞེས་བྱ་བའི་བར་དུ་སྟེ། གལ་ཏེ་གང་པོ་གྲོ་བཞིན་སྐྱེས་གནས་པའི་མཐའི་མི་རྣམས་ཀྱིས་

  611. 306b

    ཁྱོད་ཐམས་ཅད་ཀྱིས་ཐམས་ཅད་དུ་སྲོག་དང་འབྲལ་བར་བྱེད་ན་དེ་ལ་ཁྱོད་ཇི་སྙམ་བྱེད། བཙུན་པ་གལ་ཏེ་བདག་ལ་གྲོ་བཞིན་སྐྱེས་གནས་པའི་མཐའི་མི་རྣམས་ཀྱིས་ཐམས་ཅད་ཀྱིས་ཐམས་ཅད་དུ་སྲོག་དང་འབྲལ་བར་བགྱིད་ན། དེ་ལ་བདག་ཉིད་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཉན་ཐོས་ལུས་རྣག་ཅན་འདིས། སྐྱེ་བ་དང་། ངོ་ཚ་བ་དང་། རྣམ་པར་སྨོད་པ་གང་དག་མཚོན་གྱིས་ཀྱང་འདེབས་པར་བྱེད། དུག་ཀྱང་ཟ་བར་བྱེད། ཐག་པས་ཀྱང་འགེགས་ཏེ་འཆི་བར་བྱེད། གཡངས་ནས་ཀྱང་མཆོངས་ ཏེ་འཆི་བ་ཡོད་ན། །ཀྱེ་མའོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་རུང་བ་དག་ཡིན་ནོ། །ཀྱེ་མའོ་གྲོ་བཞིན་སྐྱེས་གནས་པའི་མཐའི་མི་རྣམས་ནི་བློ་དང་ལྡན་པ་ཡིན་ཏེ། དེ་དག་བདག་གི་ལུས་རྣག་ཅན་འདི་ལས་ཚེགས་ཆུང་ངུས་གྲོལ་བར་བྱེད་དོ་སྙམ་བསམ་ པར་བགྱིའོ། །གང་པོ་ལེགས་སོ་ལེགས་སོ། །གང་པོ་ཁྱོད་བཟོད་པ་དང་ངེས་པ་འདི་དང་ལྡན་པར་གྲོ་བཞིན་སྐྱེས་གནས་པའི་ཡུལ་གྱི་མཐའ་གནས་པར་ནུས་པ་ནི་ཁྱོད་ཡང་ལེགས་སོ། །གང་པོ་སོང་ལ་མ་བསྒྲལ་བ་རྣམས་ནི་སྒྲོལ་ཅིག །མ་གྲོལ་ བ་རྣམས་ནི་ཁྲོལ་ཅིག །དབུགས་མ་ཕྱིན་པ་རྣམས་ནི་དབུགས་ཕྱུང་ཤིག །ཡོངས་སུ་མྱ་ངན་ལས་མ་འདས་པ་རྣམས་ནི་ཡོངས་སུ་མྱ་ངན་ལས་ཟློས་ཤིག །དེ་ནས་ཚེ་དང་ལྡན་པ་གང་པོས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ཅིང་རྗེས་སུ་ ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་གང་པོ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ཏེ་ལྷུང་བཟེད་དང་ཆོས་གོས་ཐོགས་ནས་མཉན་ཡོད་ དུ་བསོད་སྙོམས་ལ་ཞུགས་ཏེ། མཉན་ཡོད་དུ་བསོད་སྙོམས་ཀྱི་ཟས་ཀྱི་བྱ་བ་བྱས་ནས་ཟས་ཕྱི་མའི་བསོད་སྙོམས་ལས་སླར་ལོག་སྟེ། གནས་མལ་ཇི་ལྟར་ལོངས་སྤྱད་པ་མཁོས་སུ་ཕབ་ནས། ལྷུང་བཟེད་དང་ཆོས་གོས་ཐོགས་ཏེ། གྲོ་བཞིན་སྐྱེས་གནས་

  612. 307a

    པས་ཡུལ་གྱི་མཐའ་གང་ན་བ་དེར་ཆས་ཏེ། རིམ་གྱིས་རྒྱུ་ཞིང་སོང་བ་ན་གྲོ་བཞིན་སྐྱེས་གནས་པའི་ཡུལ་གྱི་མཐར་ཕྱིན་ཏོ། །དེ་ནས་ཚེ་དང་ལྡན་པ་གང་པོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། གྲོ་བཞིན་སྐྱེས་གནས་ པས་མཐར་བསོད་སྙོམས་ལ་ཞུགས་པ་རྔོན་པ་ཞིག་མདའ་གཞུ་ལག་ན་ཐོགས་ཏེ་རི་དགས་གཤོར་དུ་འགྲོ་བ་དེས་མཐོང་ནས་དེས་བསམས་པ། དགེ་སྦྱོང་མགོ་རེག་འདི་མཐོང་བ་ནི་ཁ་རྗེ་མ་རུང་བར་བྱས་སོ་སྙམ་དུ་བསམས་ནས་གཞུ་རྣ་དྲུང་དུ་བཀང་སྟེ། ཚེ་དང་ལྡན་ པ་གང་པོ་གང་ན་བ་དེར་བརྒྱུགས་པ་དང་། དེ་ནས་ཚེ་དང་ལྡན་པ་གང་པོས་དེ་མཐོང་ངོ་། །མཐོང་ནས་ཀྱང་བླ་གོས་བསྙིལ་ཏེ་སྨྲས་པ། །བཞིན་བཟངས་དགང་དཀའ་བ་འདིའི་དོན་དུ་ཞུགས་པས་འདི་ལ་སྣུན་ཅིག །ཚིགས་སུ་བཅད་དེ་སྨྲས་པ། གང་གི་དོན་དུ་ མཁའ་ལ་བྱ་རྒྱུ་རི་དགས་རྙིས་ཟིན་གྱུར། །གཡུལ་ངོར་མདའ་མདུང་མདའ་བོ་ཆེ་ཐོགས་མི་རྣམས་འཆི་འགྱུར་ལ། །བཀྲེན་པ་ཉོན་མོངས་ཡུལ་ངན་རྒྱུ་ཞིང་མཆིལ་པས་ཉ་ཟིན་པ། །སྡིག་པ་རབ་མང་ལྟོ་འདིར་ཁྱོད་ཀྱིས་འཚམ་རིམས་མདའ་འཕོངས་ཤིག ། དེས་བསམས་པ། རབ་ཏུ་བྱུང་བ་འདི་ནི་འདི་ལྟ་བུའི་བཟོད་པ་དང་དེས་པ་དང་ལྡན་པ་ཡིན་ན། ཅིའི་ཕྱིར་འདི་ལ་མདའ་འཕང་སྙམ་དུ་བསམས་ནས་དེ་སེམས་མངོན་པར་དད་པར་གྱུར་ཏོ། །དེ་ནས་ཚེ་དང་ལྡན་པ་གང་པོས་དེ་ལ་ཆོས་བཤད་དེ། སྐྱབས་སུ་འགྲོ་བ་ དང་། བསླབ་པའི་གཞི་རྣམས་ལ་བཞག་པ་དང་། དེས་རི་ཁྲོད་པ་གཞན་ལྔ་བརྒྱ་ནི་དགེ་བསྙེན་བྱས། ལྔ་བརྒྱ་ནི་དགེ་བསྙེན་མར་བྱས་ནས་གཙུག་ལག་ལྔ་བརྒྱ་རྩིག་ཏུ་བཅུག་སྟེ། ཁྲི་དང་། ཁྲིའུ་དང་། སྟན་ནང་ཚངས་ཅན་དང་། སྔས་ནང་ཚངས་ཅན་དང་། གོར་ཐབས་བརྒྱ་ཕྲག་དུ་མ་འབུལ་དུ་བཅུག་གོ། །ཟླ་བ་གསུམ་པོ་དེ་འདས་པ་དང་དེས་རིག་པ་གསུམ་ལུས་ཀྱིས་མངོན་སུམ་དུ་བྱས་ནས་དགྲ་བཅོམ་པར་གྱུར་ཏེ། ཁམས་གསུམ་གྱི་འདོད་ཆགས་དང་བྲལ་བ་ཞེས་བྱ་བ་ནས། དབང་པོ་དང་ཉེ་དབང་པོའི་ལྷ་དང་བཅས་

  613. 307b

    པ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་སུམ་དུ་སྨྲ་བར་བྱ་བར་གྱུར་ཏོ་ཞེས་བྱ་བའི་བར་དུའོ། །ཇི་ཙམ་དུས་གཞན་ཞིག་ན་ཤིང་གི་རྣ་ཆ་ཅན་གྱི་ནུ་བོ་གཉིས་ལོངས་སྤྱོད་སྲབས་ཤིང་ཡོངས་སུ་ཟད་པས་གཏུགས་པར་གྱུར་ནས་དེ་གཉིས་ཀྱིས་སྨྲས་ པ། བྱུར་ལྟ་བུ་དེ་བདག་ཅག་གི་ཁྱིམ་ནས་སོང་གིས་ཚུར་ཤོག་ལྷན་ཅིག་གནས་པར་བྱའོ། །དེས་སྨྲས་པ། བྱུར་ལྟ་བུ་དེ་གང་ཞིག་ཡིན། གང་པོ་ཡིན་མོད། དེ་ནི་ཁོ་བོའི་ཁྱིམ་ནས་དཔལ་བྱུང་བ་ཡིན་གྱི་བྱུར་ལྟ་བུ་ནི་མ་ཡིན་ནོ། །དེ་གཉིས་ཀྱིས་སྨྲས་པ། དཔལ་ཡང་རུང་ བྱུར་ཡང་རུང་ཚུར་ཤོག་ལྷན་ཅིག་ཏུ་གནས་པར་བྱའོ། །དེས་སྨྲས་པ། ཁྱེད་ཅག་གི་ནོར་ནི་རིགས་པར་བསྒྲུབས་པ་མ་ཡིན་ལ། ཁོ་བོའི་ནི་རིགས་པར་བསྒྲུབས་པ་ཡིན་པས་ཁྱེད་ཅག་དང་ཁོ་བོར་ལྷན་ཅིག་གནས་པར་མི་བྱའོ། །དེ་གཉིས་ཀྱིས་སྨྲས་པ། བྲན་མོའི་བུ་དེས་རྒྱ་མཚོ་ ཆེན་པོར་ཡང་སོང་ཡང་སོང་ནས་ཁྱོད་ཀྱི་ལོངས་སྤྱོད་དག་བསྒྲུབས་པས་ཁྱོད་དེ་ལ་སྤྱོད་པས་རྒྱགས་སུ་ཟད། ཁྱོད་ཀྱིས་ནི་རྒྱ་མཚོ་ཆེན་པོར་འཇུག་པར་ག་ལ་ནུས། དེ་དེ་གཉིས་ལས་ང་རྒྱལ་བཟུང་ནས་དེས་བསམས་པ། བདག་ཀྱང་རྒྱ་མཚོ་ཆེན་པོར་འཇུག་པར་བྱའོ་སྙམ་ནས་ཞེས་བྱ་ བ་ནས་རྒྱ་མཚོ་ཆེན་པོར་ཞུགས་སོ་ཞེས་བྱ་བའི་བར་གོང་མ་བཞིན་དུའོ། །ཇི་ཙམ་ན་གྲུ་བོ་ཆེ་དེ་རྗེས་སུ་མཐུན་པའི་རླུང་གིས་ཙན་དན་ས་མཆོག་གི་ཚལ་དུ་བདས་སོ། །ས་མཁན་གྱིས་སྨྲས་པ། ཤེས་ལྡན་དག་ཙན་དན་ས་མཆོག་གི་ཚལ་ཞེས་གྲགས་པ་གང་ཡིན་པ་དེ་ནི་འདི་ཡིན་ གྱིས་འདི་ལས་འདོམས་ལ་ལོང་ཤིག །དེའི་ཚེ་ན་ཙན་དན་ས་མཆོག་གི་ཚལ་གྱི་དབང་པོ་གནོད་སྦྱིན་དབང་ཕྱུག་ཆེན་པོ་ཞེས་བྱ་བ་ཡིན་ཏེ། དེ་ཡང་གནོད་སྦྱིན་རྣམས་ཀྱི་གནོད་སྦྱིན་གྱི་མདུན་སར་སོང་ངོ་། །དེ་ནས་ཙན་དན་ས་མཆོག་གི་ཚལ་སྟ་རེ་ལྔ་བརྒྱ་ཙམ་གྱིས་བཅད་པར་བརྩམས་སོ། །གནོད་ སྦྱིན་མི་དགའ་བ་ཞེས་བྱ་བས་ཙན་དན་ས་མཆོག་གི་ཚལ་སྟ་རེ་ལྔ་བརྒྱ་ཙམ་གྱིས་གཅོད་པར་མཐོང་ངོ་། །མཐོང་ནས་ཀྱང་གནོད་སྦྱིན་དབང་ཕྱུག་ཆེན་པོ་གང་ན་བ་དེར་སོང་སྟེ་ཕྱིན་ནས་གནོད་སྦྱིན་དབང་ཕྱུག་ཆེན་པོ་ལ་འདི་སྐད་ཅེས་སྨྲས་སོ། །དཔོན་པོ་མཁྱེན་པར་མཛོད་ཅིག །

  614. 308a

    ཙན་དན་ས་མཆོག་གི་ཚལ་སྟ་རེ་ལྔ་བརྒྱ་ཙམ་གྱིས་འགུམས་ན་ཁྱོད་ཀྱི་ཕྲིན་ལས་སམ་བགྱི་བ་གང་ལགས་བ་དེ་མཛོད་ཅིག །དེ་ནས་གནོད་སྦྱིན་དབང་ཕྱུག་ཆེན་པོ་གནོད་སྦྱིན་རྣམས་ཀྱི་གནོད་སྦྱིན་གྱི་འདུན་མ་བྱས་ནས་མི་བཟོད་པ་སྐྱེས་ཏེ། རླུང་ནག་པོ་ཆེན་པོ་འཇིགས་སུ་རུང་བ་ བསླངས་ནས་ཙན་དན་ས་མཆོག་གི་ཚལ་གང་ན་བ་དེར་ཆས་སོ། །ས་མཁན་གྱིས་སྨྲས་པ། ཤེས་ལྡན་འཛམ་བུའི་གླིང་གི་ཚོང་པ་དག་ཉོན་ཅིག །རླུང་ནག་པོ་ཆེན་པོའི་འཇིགས་པ་ཞིག་ཡོད་དོ་ཞེས་གྲག་པ་གང་ཡིན་པ་དེ་ནི་འདི་ཡིན་གྱིས་ངོ་ལོན་སོམ་ཤིག །དེ་ནས་ཚོང་པའི་ཚོགས་དེ་རྣམས་ འཇིགས་སྐྲག་ཕོངས་ཏེ་བ་སྤུའི་ཁུང་བུ་ཐམས་ཅད་ནས་སྤུ་ཟིང་ཞེས་བྱེད་ནས། ལྷ་རྣམས་ལ་གསོལ་བ་བྱེད་པར་རྩོམ་སྟེ། ཞི་བ་དང་ནི་ཆུ་ལྷ་ལུས་ངན་ནོར་ལྷ་སོགས། །ལྷ་མི་ལྟོ་འཕྱེ་གནོད་སྦྱིན་ལྷ་མི་དབང་པོ་རྣམས། །བདག་ཅག་ཤིན་ཏུ་ཉམ་ཐག་འཇིགས་པར་གྱུར་ལགས་ཀྱིས། །བསྙེངས་ བྲལ་དེ་རིང་བདག་ཅག་རྣམས་ཀྱི་མགོན་མཛོད་ཅིག །མི་རྣམས་ཁ་ཅིག་བདེ་སོགས་ཁྱོད་ལ་འདུད། །གཞན་དག་ཚངས་དང་ཁྱབ་འཇུག་ལྷ་ཆེན་དང་། །སར་རྟེན་ཤིང་དང་ཚལ་ལ་བརྟེན་པ་ལ། །ཤ་ཟའི་རླུང་གིས་ཟིན་པས་སྐྱབས་ཚོལ་འདུད། །ཤིང་གི་རྣ་ཆ་ཅན་སེམས་ལས་ཆུང་ངུར་འདུག་པ་དང་། ཚོང་པ་རྣམས་ཀྱིས་སྨྲས་པ། དེད་དཔོན་བདག་ཅག་ནི་སྡུག་བསྔལ་མི་བཟད་པ་ཉམ་ང་བར་གྱུར་ན། ཁྱོད་ཅིའི་ཕྱིར་སེམས་ལས་ཆུང་ངུར་འདུག །དེས་སྨྲས་པ། ཤེས་ལྡན་དག་ཁོ་བོ་ལ་ནུ་བོས་བསྒོ་བ། ཕུ་བོ་རྒྱ་མཚོ་ཆེན་པོར་འཇུག་པ་ནི་མནོག་ཆུང་ལ་ཉེས་དམིགས་མང་སྟེ། སྲེད་པས་ལྡོངས་པ་ཕལ་ཆེར་འཇུག་ཀྱང་སླར་འཁོར་བ་ཉུང་བས་ཁྱོད་ཀྱིས་རྣམ་པ་གང་གིས་ཀྱང་རྒྱ་མཚོ་ཆེན་པོར་འཇུག་པར་མི་བྱའོ་ཞེས་བསྒོ་བ་ལས། ཁོ་བོས་དེའི་ཚིག་མ་མཉན་ཏེ་རྒྱ་མཚོ་ཆེན་པོར་ཞུགས་པས་ད་ཅི་བྱར་ཡང་མེད་དོ། །ཁྱོད་ཀྱི་ནུ་བོ་གང་ཡིན། གང་པོ་ཡིན་ ནོ། །ཚོང་པའི་ཚོགས་རྣམས་ཀྱིས་སྨྲས་པ། ཤེས་ལྡན་དག་འཕགས་པ་གང་པོ་དེ་ནི་བསོད་ནམས་ཀྱི་མཐུ་ཆེན་པོ་དང་ལྡན་པ་ཡིན་གྱིས། དེ་ཉིད་ལ་བདག་ཅག་སྐྱབས་སུ་འགྲོ་བར་བྱའོ་ཞེས་དེ་ཐམས་ཅད་ཀྱིས་ཚིག་མཐུན་པར་འདི་སྐད་ཅེས་འཕགས་པ་གང་པོ་དེ་ལ་ཕྱག་འཚལ་ལོ། །

  615. 308b

    འཕགས་པ་གང་པོ་དེ་ལ་ཕྱག་འཚལ་ལོ། །ཕྱག་འཚལ་ལོ་ཞེས་སྨྲས་སོ། །དེ་ནས་ཚེ་དང་ལྡན་པ་གང་པོ་ལ་མངོན་པར་དགའ་བའི་ལྷ་གང་ཡིན་པ་དེ་དག་ཚེ་དང་ལྡན་པ་གང་པོ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་གང་པོ་ལ་འདི་སྐད་ཅེས་སྨྲས་སོ། །འཕགས་པ་ཁྱོད་ཀྱིས་ གཅན་ནི་སྡུག་བསྔལ་མི་བཟད་པ་ཉམ་ང་བར་གྱུར་གྱིས་དགོངས་སུ་གསོལ། དེས་བསམས་ཏེ། དེ་ནས་སེམས་ཇི་ལྟར་མཉམ་པར་བཞག་ན་གྲོ་བཞིན་སྐྱེས་གནས་པའི་མཐའ་ནས་མི་སྣང་བར་གྱུར་ཏེ། རྒྱ་མཚོ་ཆེན་པོ་གྲུའི་དངོར་སྐྱིལ་མོ་ཀྲུང་བཅས་ནས་འདུག་པ་དེ་ལྟ་བུའི་ ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་རླུང་ནག་པོ་དེ་རི་རབ་ལ་ཕོག་སྟེ་རྡུགས་པ་བཞིན་དུ་སླར་ལོག་པར་གྱུར་ཏོ། །གནོད་སྦྱིན་དབང་ཕྱུག་ཆེན་པོས་བསམས་པ། སྔོན་ཆད་ནི་རླུང་ནག་པོས་གྲུ་གང་ལ་རེག་པ་དེ་ཤིང་བལ་གྱི་འདའ་བུ་བཞིན་འཕངས་པ་དང་འཇིག་པར་ འགྱུར་ན་ད་རླུང་ནག་པོ་དེ་རི་རབ་ལ་ཕོག་སྟེ། རྡུགས་པ་བཞིན་དུ་སླར་ལོག་པར་གྱུར་པའི་རྒྱུ་གང་ཡིན་སྙམ་ནས། ཕན་ཚུན་དུ་བརྟག་པར་བརྩམས་པ་ལས། ཇི་ཙམ་ན་ཚེ་དང་ལྡན་པ་གང་པོ་གྲུའི་དངོར་སྐྱིལ་མོ་ཀྲུང་བཅས་ནས་འདུག་པ་མཐོང་ངོ་། །མཐོང་ནས་ཀྱང་དེས་ སྨྲས་པ། འཕགས་པ་གང་པོ་ཐོ་བཙམས་ཏེ་ཅི་བགྱི། གང་པོས་སྨྲས་པ། རྒ་བའི་ཆོས་ཅན་ཁྱོད་ཉིད་ཀྱིས་ང་ལ་ཐོ་འཚམ་མམ། གལ་ཏེ་ངས་འདི་ལྟ་བུའི་ཡོན་ཏན་གྱི་ཚོགས་མ་ཐོབ་པར་གྱུར་ན། ཁྱོད་ཀྱིས་ངའི་ཕུ་བོ་མིང་ལུས་པར་བྱས་པར་འགྱུར་རོ། ། དབང་ཕྱུག་ཆེན་པོས་སྨྲས་པ། འཕགས་པ་ཙན་དན་ས་མཆོག་འདི་ནི་འཁོར་ལོས་སྒྱུར་བའི་རྒྱལ་པོའི་དོན་དུ་སྲུང་ལགས་སོ། །གང་པོས་སྨྲས་པ། དཔོན་པོ་ཇི་སྙམ་དུ་སེམས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། འཁོར་ལོས་སྒྱུར་བའི་རྒྱལ་པོ་གང་ཆེ། འཕགས་པ་ཅི་བཅོམ་ལྡན་འདས་འཇིག་རྟེན་དུ་བྱུང་ངམ། བྱུང་ངོ་། །གལ་ཏེ་དེ་ལྟ་ན་ད་གང་མ་གང་བ་དེ་ཁོང་ཤིག །དེ་ནས་ཚོང་པའི་ཚོགས་དེ་རྣམས་སྲོག་བྱིན་ཏེ། ཚེ་དང་ལྡན་པ་གང་པོ་ལ་སེམས་མངོན་པར་དད་ནས་གྲུ་

  616. 309a

    དེ་ཙན་དན་ས་མཆོག་གིས་བཀང་སྟེ་ཆས་པ་དང་རིམ་གྱིས་གྲོང་ཁྱེར་སློ་མ་ལྟ་བུར་ཕྱིན་ཏོ། །དེ་ནས་གང་པོས་ཕུ་བོ་ལ་སྨྲས་པ། གང་གི་མིང་གིས་གྲུ་བོ་ཆེ་གྲུབ་སྟེ་འོངས་པ་དེ་ནི་དེ་དབང་བས་ཁྱོད་ཀྱིས་རིན་པོ་ཆེ་ནི་ཚོང་པ་འདི་རྣམས་ལ་གོས་ཤིག །བདག་གིས་ནི་ཙན་དན་ས་མཆོག་འདི་རྣམས་ཀྱིས་བཅོམ་ ལྡན་འདས་ཀྱི་ཕྱིར་ཙན་དན་གྱི་ཕྲེང་བའི་ཁང་བཟངས་བརྩིག་གོ། །དེས་ཚོང་པ་དེ་རྣམས་ལ་རིན་པོ་ཆེ་རྣམས་བགོས་སོ། །དེ་ནས་གང་པོས་ཙན་དན་ས་མཆོག་གི་ཁང་བཟངས་ཞིག་བརྩིག་པར་བརྩམས་ཏེ། དེས་བཟོ་བོ་དག་བཀུག་ནས་སྨྲས་པ། ཤེས་ལྡན་ དག་ཅི་ཉི་མ་རེ་རེ་ཞིང་ཀཱར་ཥཱ་པ་ཎ་ལྔ་བརྒྱ་ལེན་ནམ་འོན་ཏེ་ཙན་དན་ས་མཆོག་གི་ཕྱེ་མ་ཕོ་སུམ་གང་ལེན། དེ་དག་གིས་སྨྲས་པ། འཕགས་པ་ཙན་དན་ས་མཆོག་གི་ཕྱེ་མ་ཕོ་སུམ་གང་འཚལ་ལོ། །ཇི་ཙམ་ན་རིང་པོ་མ་ཐོགས་པར་ཙན་དན་གྱི་ཕྲེང་བའི་ཁང་བཟངས་ བརྩིགས་ཏེ་བྱི་དོར་ཐམས་ཅད་ཟིན་པར་གྱུར་ཏོ། །དེ་ན་ཞོགས་མ་དང་ཕྱེ་མའི་ལྷག་མ་གང་ཡིན་པ་དེ་དག་ཀྱང་བཏགས་ནས་དེ་ཉིད་ལ་ཞལ་ཞལ་དུ་བྱུགས་སོ། །དེས་སྤུན་དེ་རྣམས་ཕན་ཚུན་དུ་ཐམས་ཅད་བཟོད་པ་གསོལ་དུ་བཅུག་ནས་སྨྲས་པ། སངས་རྒྱས་ ལ་སོགས་པ་དགེ་སློང་གི་དགེ་འདུན་རྣམས་སྤྱན་དྲངས་ལ་ཞལ་ཟས་གསོལ་ཅིག །འཕགས་པ་གང་པོ་བཅོམ་ལྡན་འདས་གང་ན་བཞུགས། མཉན་ཡོད་ནའོ། །ལམ་ཇི་སྲིད་མཆིས། མཉན་ཡོད་ན་དཔག་ཚད་བརྒྱ་ལྷག་ཙམ་མོ། །རེ་ཞིག་རྒྱལ་ པོ་ལ་བརྟག་པར་བགྱིའོ། །དེ་བཞིན་དུ་གྱིས་ཤིག །དེ་དག་རྒྱལ་པོའི་དྲུང་དུ་དོང་ནས་ལྷ་བདག་ཅག་ནི་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲངས་ཏེ་ཞལ་ཟས་གསོལ་བར་འཚལ་ན། ལྷས་བདག་ཅག་ལ་བསྟང་དུ་གསོལ། རུང་གིས་དེ་བཞིན་དུ་ བྱའོ། །དེ་ནས་ཚེ་དང་ལྡན་པ་གང་པོ་ཁང་སྟེང་དུ་འཛེགས་ནས་རྒྱལ་བྱེད་ཀྱི་ཚལ་ལོགས་སུ་ཁ་བལྟས་ཏེ། པུས་མོ་ལྷ་ང་གཉིས་ས་ལ་བཙུགས་ཏེ་འདུག་ནས་མེ་ཏོག་གིས་གཏོར། བདུག་པས་བདུགས་ནས་ཁྱིམ་པ་ཞིག་གསེར་གྱི་བྱ་མ་བུམ་འཛིན་དུ་བཅུག་སྟེ་གསོལ་

  617. 309b

    བ་འདེབས་པ་ལ་ཞུགས་པ། ཚུལ་ཁྲིམས་རྣམ་དག་ཤིན་ཏུ་རྣམ་དག་བློ། །ཞལ་ཟས་དུས་སུ་རྟག་ཏུ་དོན་གཟིགས་པ། །མགོན་མེད་གྱུར་པ་རབ་ཏུ་གཟིགས་ནས་ནི། །ཤིན་ཏུ་ཐུགས་བརྩེར་མཛད་དེ་གཤེགས་པར་གསོལ། དེ་ནས་མེ་ཏོག་དེ་རྣམས་ སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་ལྷ་རྣམས་ཀྱི་ལྷའི་མཐུས་མེ་ཏོག་གི་ཁང་བཟངས་སུ་བྱས་ཏེ། རྒྱལ་བུ་རྒྱལ་བྱེད་ཀྱི་ཚལ་དུ་རྒན་རིམས་བཞིན་གནས་པར་གྱུར་ཏོ། །བདུག་པ་ནི་སྤྲིན་ལྟར་སྤུངས་སོ། །ཆུ་ནི་བཻ་ཌཱུརྱའི་ཕུར་མ་ལྟ་བུར་གྱུར་ཏོ། །ཚེ་ དང་ལྡན་པ་ཀུན་དགའ་བོ་མཚན་མ་ལ་མཁས་པ་ཡིན་པས་ཐལ་མོ་སྦྱར་བ་བྱས་ཏེ་བཅོམ་ལྡན་འདས་ལ་ཞུས་པ་བཙུན་པ་སྤྱན་འདྲེན་པ་གང་ནས་མཆིས། ཀུན་དགའ་བོ་གྲོང་ཁྱེར་སློ་མ་ལྟ་བུ་ནས་སོ། བཙུན་པ་གྲོང་ཁྱེར་སློ་མ་ལྟ་བུར་ཇི་སྲིད་ཅིག་མཆིས། ཀུན་ དགའ་བོ་དཔག་ཚད་བརྒྱ་ལྷག་ཙམ་ཡོད་ཀྱིས་སོང་ལ་དགེ་སློང་རྣམས་ལ་ཁྱེད་ཅག་ལས། གང་དང་གང་སང་གྲོང་ཁྱེར་སློ་མ་ལྟ་བུར་སོང་ནས་ཟས་ཟ་བར་སྤྲོ་བས་ཚུལ་ཤིང་ལོང་ཤིག་ཅེས་བསྒོ་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་ བོས་བཅོམ་ལྡན་འདས་ལས་མཉན་ནས་ཚུལ་ཤིང་བླངས་ཏེ། བཅོམ་ལྡན་འདས་ཀྱི་སྤྱན་སྔར་འདུག་པ་དང་། བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱིས་ཚུལ་ཤིང་བླངས་སོ། །དེའི་ཚེ་ཡུལ་ཆུ་མིག་ཅན་ན་གནས་པའི་ གནས་བརྟན་ཚེ་དང་ལྡན་པ་གང་པོ་ཤེས་རབ་ཀྱིས་རྣམ་པར་གྲོལ་བ་འཁོར་དེ་ཉིད་དུ་འདུས་ཏེ་འདུག་པར་གྱུར་པ་དེས་ཀྱང་ཚུལ་ཤིང་བླང་བར་བརྩམས་པ་དང་། དེ་ལ་ཚེ་དང་ལྡན་པ་ཀུན་དགའ་བོས་སླར་ཚིགས་སུ་བཅད་དེ་སྨྲས་པ། ཚེ་དང་ལྡན་པ་ཟན་འདི་ནི། །ཀོ་ ས་ལ་བདག་པོའི་ཕོ་བྲང་ངམ། །རབ་སྦྱིན་ཁྱིམ་དང་རི་དགས་ཀྱི། །ཁྱིམ་གྱི་ཟས་ཀྱང་མ་ལགས་སོ། །གྲོང་ཁྱེར་སློ་མ་ཞེས་བྱ་བ། །དཔག་ཚད་བརྒྱ་ལྷག་མཆིས་པ་དེར། །རྫུ་འཕྲུལ་གྱིས་ནི་བཞུད་འཚལ་བས། །གང་པོ་ཁྱོད་ནི་མ་གསུང་བཞུགས། །

  618. 310a

    དེ་ཤེས་རབ་ཀྱིས་རྣམ་པར་གྲོལ་བ་ཡིན་གྱི། དེས་རྫུ་འཕྲུལ་མ་བསྐྱེད་པས་དེ་འདི་སྙམ་དུ་སེམས་ཏེ་གང་གི་ཕྱིར་བདག་གིས་ཉོན་མོངས་པའི་ཚོགས་མཐའ་དག་བཙལ་ཅིང་བོར་ལ་སྤངས་ཤིང་སོ་སོར་སྤངས་ན། བདག་མུ་སྟེགས་ཅན་དང་ཐུན་མོང་བའི་རྫུ་ འཕྲུལ་ལ་སྒྱིད་ལུག་གམ་སྙམ་ནས་དེས་བརྩོན་འགྲུས་ལ་གནས་ཏེ་རྫུ་འཕྲུལ་བསྐྱེད་པས་ཇི་སྲིད་ཚེ་དང་ལྡན་པ་ཀུན་དགའ་བོས་གནས་བརྟན་གསུམ་པ་ལ་ཚུལ་ཤིང་མ་བྱིན་པ་དེའི་བར་དུ་དེས་ལག་པ་གླང་པོ་ཆེའི་སྣ་ལྟ་བུ་བརྐྱང་ནས་ཚུལ་ཤིང་བླངས་ཏེ། དེ་ནས་ཚིགས་སུ་བཅད་དེ་སྨྲས་པ། གཽ་ཏ་མ་འདི་ན་མངོན་ཤེས་དྲུག་པོ་ཉིད། །གྲགས་པ་དང་ནི་ཐོས་པས་འཐོབ་མིན་ལ། །ཚན་གྱི་ཡོན་ཏན་རྣམས་དང་ངག་དང་ནི། །ཡིད་སྨོན་ཆེན་པོས་ཀྱང་ནི་མ་ཡིན་གྱི། །བདག་འདྲ་ཡོངས་སུ་རྟོག་པར་བྱེད་པ་རྣམས། །རྒ་བས་དར་ཡལ་གྱུར་ཀྱང་ཞི་བ་དང་། །ཚུལ་ཁྲིམས་ལྷག་མཐོང་ སྟོབས་དང་བསམ་གཏན་སྟོབས། །རྣམ་པ་དུ་མས་མངོན་ཤེས་དྲུག་ལྡན་འགྱུར། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་ངའི་དགེ་སློང་རྣམས་ཀྱི་མཆོག་ཡིན་ཏེ། ངའི་ཉན་ཐོས་མཆོད་པའི་ཚུལ་ཤིང་བླང་པ་ལ་དང་པོ་ཚུལ་ཤིང་ལེན་པ་ རྣམས་ཀྱི་ནང་ན་འདི་ལྟ་སྟེ་ཡུལ་ཆུ་མིག་ཅན་ན་གནས་པའི་གནས་བརྟན་གང་པོ་མཆོག་ཡིན་ནོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ངས་དགེ་སློང་དག་ཁྱེད་ཀྱིས་དགེ་བ་མི་སྤྱོམས་པ་དང་། སྡིག་པ་མི་ བཅབ་པར་གནས་པར་བྱའོ་ཞེས་བཤད་མོད་ཀྱི། འོན་ཀྱང་གྲོང་ཁྱེར་དེ་ན་མུ་སྟེགས་པ་རྣམས་གནས་པས་ཁྱེད་ལས་གང་གིས་རྫུ་འཕྲུལ་གང་ཐོབ་པ་དེ་དེས་གྲོང་ཁྱེར་སློ་མ་ལྟ་བུར་སོང་ལ་ཟན་བཟའ་བར་བྱའོ་ཞེས་སྒོ་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་ བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་ཀྱིས་འདི་སྐད་ཅེས་ངས་དགེ་སློང་རྣམས་ཀྱིས་དགེ་བ་མི་སྤྱོམས་པ་དང་། སྡིག་པ་མི་བཅབ་པར་གནས་པར་བྱའོ། །ཞེས་བཤད་མོད་ཀྱི་ཞེས་བྱ་བ་ནས་སོང་ལ་ཟན་བཟའ་བར་བྱའོ་ཞེས་

  619. 310b

    བྱ་བའི་བར་གོང་མ་བཞིན་དུའོ། །རྒྱལ་པོས་གྲོང་ཁྱེར་སློ་མ་ལྟ་བུ་རྡོ་བ་དང་གསེག་མ་དང་གྱོ་མོ་རྣམས་སེལ་དུ་བཅུག་སྟེ། ཙན་དན་གྱི་ཆུས་ཆག་ཆག་བཏབ་དྲི་ཞིམ་པོའི་པོག་ཕོར་སྣ་ཚོགས་བཤམས། དར་གྱི་ཆུན་འཕྱང་མང་པོ་དཔྱངས། མེ་ཏོག་སྣ་ཚོགས་ཆལ་བར་བཀྲམ་སྟེ་དགའ་དགའ་ལྟར་ བྱས་ཏེ་གྲོང་ཁྱེར་སློ་མ་ལྟ་བུ་ལ་སྒོ་བཅྭ་བརྒྱད་ཡོད་ལ་རྒྱལ་པོ་དེ་ལ་ཡང་བུ་བཅུ་བདུན་ཡོད་དེ། གྲོང་ཁྱེར་གྱི་སྒོ་རེར་སོ་སོར་རྒྱལ་པོའི་བུ་རྣམས་འབྱོར་པ་མཆོག་དང་བཀོད་དོ། །སྒོ་ཆེན་པོར་ནི་སློ་མ་ལྟ་བུའི་བདག་པོའི་རྒྱལ་པོ་རྒྱལ་པོའི་འབྱོར་པ་ཆེན་པོ་དང་ཚེ་དང་ལྡན་པ་གང་པོ་དང་ཤིང་གི་ རྣ་ཆ་ཅན་དང་རྒྱ་སྐྱེགས་ཀྱི་རྣ་ཆ་ཅན་དང་ཞ་ཉེའི་རྣ་ཆ་ཅན་འདུག་གོ། །ཇི་ཙམ་ན་ལོ་མ་འདྲིམ་པ་དང་། ཤང་ཙེ་འདྲིམ་པ་དང་སྣོད་སྤྱད་འདྲིམ་པ་དག་རྫུ་འཕྲུལ་གྱིས་ལྷགས་པ་རྒྱལ་པོས་མཐོང་ནས་སྨྲས་པ། ཅི་བཙུན་པ་གང་པོ་བཅོམ་ལྡན་འདས་གཤེགས་སམ་དེས་སྨྲས་པ། འདི་ དག་ནི་ལོ་མ་འདྲིམ་པ་དང་། ཤང་ཙེ་འདྲིམ་པ་དང་། སྣོད་སྤྱད་འདྲིམ་པ་ལགས་ཏེ། བཅོམ་ལྡན་འདས་མ་ལགས་སོ། །ཇི་ཙམ་ན་དགེ་སློང་གནས་བརྟན་གནས་བརྟན་རྣམས་བསམ་གཏན་ལ་སྙོམས་པར་ཞུགས་པ་རྣམ་པ་དུ་མས་ལྷགས་པ་དང་རྒྱལ་པོས་ཡང་དྲིས་པ། ཅི་ བཙུན་པ་གང་པོ་བཅོམ་ལྡན་འདས་གཤེགས་སམ། དེས་སྨྲས་པ། མ་ལགས་ཏེ་འདི་ནི་དགེ་སློང་གནས་བརྟན་གནས་བརྟན་རྣམས་བསམ་གཏན་ལ་སྙོམས་པར་ཞུགས་པ་རྣམ་པ་དུ་མས་ལྷགས་པ་ལགས་སོ། །དེ་ནས་དགེ་བསྙེན་ཞིག་གིས་ཚིགས་སུ་བཅད་དེ་སྨྲས་ པ། ཁ་ཅིག་སེང་གེ་སྟག་དང་གླང་པོ་ཆེ་རྟ་ཀླུ་དང་ཁྱུ་མཆོག་བཟང་པོ་བཅིབས། །ཁ་ཅིག་རིན་ཆེན་གཞལ་མེད་ཁང་དང་རི་དང་ཤིང་མཛེས་ཤིང་རྟ་འབར་ལ་རྟེན། །གཞན་དག་ནམ་མཁའི་ངོས་ལས་ཆུ་འཛིན་གློག་གི་ཕྲེང་བས་བརྒྱན་པ་ལྟ་བུར་ནི། །རབ་ ཏུ་དགྱེས་བཞིན་ལྷ་ཡི་ཕོ་བྲང་ལྟ་བུར་རྫུ་འཕྲུལ་དག་གིས་གཤེགས་པར་བརྩོན། །ཁ་ཅིག་ས་བརྟོལ་གྱེན་དུ་འབྱུང་། །ཁ་ཅིག་ནམ་མཁའི་དཀྱིལ་ནས་འབབ། །ཁ་ཅིག་སྟན་ལས་སྤྲུལ་པར་བྱེད། །རྫུ་འཕྲུལ་ལྡན་པའི་མཐུ་ལ་ལྟོས། །དེ་ནས་བཅོམ་ལྡན་

  620. 311a

    འདས་ཀྱིས་གཙུག་ལག་ཁང་གི་ཕྱི་རོལ་དུ་ཞབས་གཉིས་བཀྲུས་ཏེ། གཙུག་ལག་ཁང་དུ་ཞུགས་ནས་གདན་བཤམས་པ་ཉིད་ལ་བཞུགས་ཏེ། སྐུ་དྲང་པོར་བསྲང་ནས་དགོངས་པ་མངོན་དུ་ཕྱོགས་པར་བཞག་གོ། །ཇི་ཙམ་ན་བཅོམ་ ལྡན་འདས་ཀྱིས་མངོན་པར་འདུ་བྱེད་པ་དང་བཅས་པའི་ཞབས་ཀྱིས་དྲི་གཙང་ཁང་དུ་བཞག་པ་ནས་རྣམ་པ་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་སྟེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། མཐའ་མཐོ་ན་དབུས་དམའ། དབུས་མཐོ་ ན་མཐའ་དམའོ། །རྒྱལ་པོས་ཚེ་དང་ལྡན་པ་གང་པོ་ལ་དྲིས་པ། འཕགས་པ་གང་པོ་འདི་ཅི་ལགས། དེས་སྨྲས་པ། བཅོམ་ལྡན་འདས་ཀྱིས་མངོན་པར་འདུ་བྱེད་པ་དང་བཅས་པའི་ཞབས་ཀྱིས་དྲི་གཙང་ཁང་དུ་བཞག་པ་དེས་ན་ས་རྣམ་པ་དྲུག་ཏུ་གཡོས་ པར་གྱུར་པ་ལགས་སོ། །དེ་ནས་བཅོམ་ལྡན་འདས་ཀྱིས་གསེར་གྱི་འོད་ཟེར་གྱི་ཁ་དོག་ལྟ་བུའི་འོད་བཀྱེ་སྟེ། དེས་འཛམ་བུའི་གླིང་གསེར་ཞུན་མ་ལྟ་བུར་སྣང་བར་གྱུར་ཏོ། །ཡང་རྒྱལ་པོ་ངོ་མཚར་དུ་གྱུར་པའི་མིག་ཕྱེ་ནས་དྲིས་པ། འཕགས་ པ་གང་པོ་འདི་ཅི་ལགས། དེས་སྨྲས་པ། རྒྱལ་པོ་ཆེན་པོ་བཅོམ་ལྡན་འདས་ཀྱིས་གསེར་གྱི་ཁ་དོག་ལྟ་བུའི་འོད་ཟེར་བཀྱེ་བ་ལགས་སོ།། །

  621. 1a

    ༄༅། །འདུལ་བ་ང་བཞུགས་སོ།།

  622. 1b

    ༄༅༅། །འདུལ་བ་གཞི། བམ་པོ་བརྒྱད་བཅུ་གསུམ་པ། གཟིགས་ནས་ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་མི་སྐྱ་བོ་རྦབ་རྦབ་པོ་རིད་པ་ཉམ་ཆུང་བ་དབང་པོ་ ཉམས་པ། སྐྱེ་བོ་མང་པོའི་མིག་གིས་ཀྱང་ལྟ་མི་ཕོད་པ་འདི་ཅི་ཡིན། ལྷ་འདི་ནི་བྲོ་འཚལ་བ་ཞེས་བགྱིའོ། །ཁ་ལོ་སྒྱུར་བ་ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན། ལྷ་མི་འདི་གང་ འདིས་འགུམ་པར་འགྱུར་བའི་གནས་དེ་མཆིས་ཏེ། ལྷ་འདི་ནི་བྲོས་ཐེབས་པ་ཞེས་བགྱིའོ། །ཁ་ལོ་སྒྱུར་བ་ང་ཡང་ནད་ཀྱི་ཆོས་དང་ནད་ཀྱི་ཆོས་ཉིད་ལས་མ་འདས་སམ། ལྷ་ཡང་སྙུན་གྱི་ཆོས་ དང་སྙུན་གྱི་ཆོས་ཉིད་ལས་མ་འདས་སོ། །ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་ཉིད་དུ་ཕྱིན་ནས་ང་ནད་ལས་མ་འདས་ཞེས་གྲགས་པའི་དོན་དེ་ཉིད་ བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ། དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་ནད་ལས་མ་འདས་པ་

  623. 2a

    ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །འདིར་སྨྲས་པ། མི་ནི་ལུས་རིད་སྐྱ་བོ་རྦབ་རྦབ་པོ། །རང་དབང་མེད་པའི་ནད་ཐེབས་འདིར་གཟིགས་ནས། ནད་ལས་བདག་མ་འདས་པ་ལྟ་ཞིག་ཅེས། །དེ་ནས་མི་དགྱེས་ཐུགས་ངན་ དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་བྱུང་ངམ། སྐྱེད་མོས་ཚལ་ལ་མངོན་པར་དགའ་བར་གྱུར་ཏམ། ལྷ་མ་ལགས་སོ། །དེ་ཅིའི་སླད་དུ་ཞེ་ ན། ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན་མི་སྐྱ་བོ་རྦབ་རྦབ་པོ་རིད་པ། ཉམ་ཆུང་བ། དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་ཞིག་གཟིགས་སོ། །གཟིགས་ནས་ཀྱང་བདག་ལ་བཀའ་སྩལ་པ། ཁ་ལོ་སྒྱུར་བ་མི་སྐྱ་བོ་རྦབ་རྦབ་པོ་རིད་པ། ཉམ་ཆུང་བ། དབང་པོ་ཉམས་པ། སྐྱེ་བོ་མང་པོའི་མིག་གིས་ལྟ་མི་ཕོད་པ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་འདི་ནི་བྲོས་ཐེབས་པ་ཞེས་བགྱིའོ། །དེ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་ནད་ཀྱིས་ཐེབས་པ་ཞེས་བྱ་བ་འདི་ཅི་ཡིན། དེ་ ལ་བདག་གིས་འདི་སྐད་ཅེས་གསོལ་ཏོ། །མི་འདི་གང་གནོད་པ་འདིས་འགུམ་པར་འགྱུར་བའི་གནས་དེ་མཆིས་ཏེ། ལྷ་དེ་ནི་བྲོས་ཐེབས་པ་ཞེས་བགྱིའོ། །དེ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་ང་ཡང་ནད་ཀྱི་ཆོས་དང་ནད་ཀྱི་ཆོས་ཉིད་ལས་མ་འདས་སམ། དེ་ ལ་བདག་གིས་འདི་སྐད་ཅེས་གསོལ་ཏོ། །ལྷ་ཡང་སྙུན་གྱི་ཆོས་དང་སྙུན་གྱི་ཆོས་ཉིད་ལས་མ་འདས་སོ། །དེ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་ཉིད་དུ་ཕྱིན་ནས་ང་ནད་ལས་མ་འདས་

  624. 2b

    ཞེས་གྲགས་པའི་དོན་དེ་ཉིད་བསམ་པར་བྱའོ། །ལྷ་གཞོན་ནུ་དེ་ཕོ་བྲང་གི་ནང་དུ་གཤེགས་ནས་ང་ཡང་ནད་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ ཚིག་ཡང་དག་པར་བདེན་པར་མི་འགྱུར་གྲང་། གཞོན་ནུ་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་དུ་འོང་གིས། མ་ལ་བདག་གིས་གཞོན་ནུ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ལ་ ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱའོ་སྙམ་མོ། །དེ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ཏེ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱས་སོ། །འདིར་སྨྲས་ པ། དེ་ཚེ་དགའ་ནས་བདག་འདོར་མི་གཞུག་ཕྱིར། །གཟུགས་དང་སྒྲ་དང་དྲི་དང་རོ་རྣམས་དང་། །རེག་བྱ་ཡིད་དུ་འོང་བ་གཙོ་རྣམས་ཀྱི། །འདོད་པའི་ཡོན་ཏན་ལྔ་པོ་ཡང་བྱིན་ནོ། །ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་མོས་ཚལ་གྱི་གཞིར་གཤེགས་པར་བཞེད་པར་གྱུར་པ་དེའི་ ཚེ་ཁ་ལོ་སྒྱུར་བ་ལ། ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང་། དེར་བཞུགས་ནས་སྐྱེད་མོས་ཚལ་གྱི་གཞིར་འགྲོའོ་ཞེས་གསུང་བར་འགྱུར་བས་དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་གསུངས་པ། ཀྱེ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ ཤིག །དེར་ང་ཞུགས་ནས་སྐྱེད་མོས་ཚལ་གྱི་གཞིར་འགྲོའོ། །ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་བཤམས་ཏེ་བྱང་ཆུབ་སེམས་དཔའ་ཤཱཀྱ་ཐུབ་པ་གང་ན་བ་དེར་སོང་ནས་ཕྱིན་པ་དང་། བྱང་ཆུབ་སེམས་དཔའ་ ཤཱཀྱ་ཐུབ་པ་ལ་འདི་སྐད་ཅེས་སྨྲས་སོ། །ལྷ་བཅིབས་པ་བཟང་པོ་བཤམས་ལགས་ཀྱིས། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་པོར་ཞུགས་ཏེ་སྐྱེད་མོས་ཚལ་གྱི་གཞིར་བྱུང་བ་དང་། བྱང་ཆུབ་སེམས་དཔའ་ཤཱཀྱ་ཐུབ་

  625. 3a

    པས་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་། ཁྱོགས་ཁྱེར་བ་དང་། མདུན་ན་མེ་སྒྲོན་ཐོགས་པ་དང་། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་། བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་འབྲང་བ་ཞིག་གཟིགས་སོ། །གཟིགས་ནས་ ཀྱང་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་། ཁྱོགས་ཁྱེར་བ་དང་། མདུན་ན་མེ་སྒྲོན་ཐོགས་པ་དང་། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་། བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་དུ་འབྲང་བ་འདི་ཅི་ཡིན། ལྷ་འདི་ནི་གུམ་པ་ཞེས་བགྱིའོ། །ཁ་ལོ་སྒྱུར་བ་ཤི་བ་ཞེས་བྱ་བ་འདི་ཅི་ཡིན། ལྷ་མི་འདིས་སླན་ཆད་སྡུག་པའི་ཕ་མ་མི་མཐོང་ཞིང་བུ་ཕོ་དང་། བུ་མོ་དང་། བྲན་ཕོ་དང་། བྲན་མོ་དང་། ལས་བགྱིད་པ་དང་། ཞོ་ཤས་འཚོ་བའི་མི་རྣམས་ཀྱང་མ་ལགས་ལ། དེ་དག་གིས་ཀྱང་སླན་ཆད་ འདི་མི་མཐོང་བས་ལྷ་འདི་ནི་གུམ་པ་ཞེས་བགྱིའོ། །ཁ་ལོ་སྒྱུར་བ་ང་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སམ། ལྷ་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སོ། །ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་ བྲང་ཉིད་དུ་ཕྱིན་ནས་ང་འཆི་བ་ལས་མ་འདས་ཞེས་གྲགས་པའི་དོན་དེ་ཉིད་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ། །དེར་བྱང་ཆུབ་སེམས་དཔའ་ཤཱཀྱ་ཐུབ་པ་ཕོ་བྲང་གི་ནང་དུ་གཤེགས་ནས་བདག་ཀྱང་འཆི་བ་ལས་མ་འདས་པ་ལྟ་ཞིག་ཅེས་མི་དགྱེས་ ཤིང་ཐུགས་ངན་དགོངས་སོ། །འདིར་སྨྲས་པ། ཚེ་ཟད་པ་ཡིས་འདུ་ཤེས་བྲལ་གྱུར་ཅིང་། །སེམས་མེད་མི་ཡི་རོ་ཞིག་གཟིགས་ནས་ནི། །འཆི་ལས་བདག་མ་འདས་པ་ལྟ་ཞིག་ཅེས། །དེ་ནས་མི་དགྱེས་ཐུགས་ངན་དགོངས་པར་མཛད། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ ལ་སྨྲས་པ། ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ཚལ་གྱི་གཞིར་བྱུང་ངམ། སྐྱེད་མོས་ཚལ་ལ་མངོན་པར་དགའ་བར་གྱུར་ཏམ། ལྷ་མ་ལགས་སོ། །དེ་ཅིའི་སླད་དུ་ཞེ་ན། ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན་རས་ཁ་དོག་སྣ་ཚོགས་ལས་བགྱིས་

  626. 3b

    པའི་བླ་རེ་བྲེས་པ་དང་། ཁྱོགས་ཁྱེར་བ་དང་། མདུན་ན་མེ་སྒྲོན་ཐོགས་པ་དང་། སྐྱེ་བོའི་ཚོགས་ཆེན་པོ་མདུན་ནས་མཆི་བ་དང་། བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་རྗེས་བཞིན་དུ་འབྲང་བ་ཞིག་གཟིགས་སོ། །གཟིགས་ནས་ཀྱང་བདག་ལ་གསུངས་པ། ཁ་ལོ་སྒྱུར་བ་ རས་ཁ་དོག་སྣ་ཚོགས་ལས་བྱས་པའི་བླ་རེ་བྲེས་པ་དང་། ཁྱོགས་ཁྱེར་བ་དང་། མདུན་ན་མེ་སྒྲོན་ཐོགས་པ་དང་། སྐྱེ་བོའི་ཚོགས་ཆེན་པོ་མདུན་ནས་འགྲོ་བ་དང་། བུད་མེད་སྐྲ་བཤིག་པ་རྣམས་ངུ་ཞིང་རྗེས་བཞིན་རྗེས་བཞིན་དུ་འབྲང་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ ཏོ། །ལྷ་འདི་ནི་གུམ་པ་ཞེས་བགྱིའོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་ཤི་བ་ཞེས་བྱ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་མི་འདིས་སླན་ཆད་སྡུག་པའི་ཕ་མ་མི་མཐོང་ཞིང་། བུ་ཕོ་དང་། བུ་མོ་དང་། བྲན་ཕོ་དང་། བྲན་མོ་དང་། ལས་བགྱིད་ པ་དང་། ཞོ་ཤས་འཚོ་བ་རྣམས་ཀྱང་མ་ལགས་ལ། དེ་རྣམས་ཀྱིས་ཀྱང་སླན་ཆད་འདི་མི་མཐོང་བས་ལྷ་འདི་ནི་གུམ་པ་ཞེས་བགྱིའོ། །དེ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་ང་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སམ། དེ་ལ་བདག་གིས་འདི་སྐད་ཅེས་གསོལ་ཏོ། ། ལྷ་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སོ། །དེས་འདི་སྐད་ཅེས་གསུངས་ཏེ། ཁ་ལོ་སྒྱུར་བ་དེའི་ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་དུ་ཕྱིན་ནས་འཆི་བ་ལས་མ་འདས་ཞེས་གྲགས་པའི་དོན་དེ་ཉིད་བསམ་པར་བྱའོ། །ལྷ་གཞོན་ནུ་དེ་ཕོ་བྲང་ གི་ནང་དུ་གཤེགས་ཏེ་བདག་ཀྱང་འཆི་བ་ལས་མ་འདས་པ་ལྟ་ཞིག་ཅེས་མི་དགྱེས་ཤིང་ཐུགས་ངན་དགོངས་སོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་དག་པར་བདེན་པར་མི་འགྱུར་གྲང་། གཞོན་ནུ་སྐྲ་དང་ཁ་ སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་དུ་འོང་གིས། མ་ལ་བདག་གིས་གཞོན་ནུ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ལ་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱའོ་སྙམ་མོ། །དེ་

  627. 4a

    ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདོད་པའི་ཡོན་ཏན་ལྔ་ལས་ཕལ་མོ་ཆེ་ཞིག་བྱིན་ནས་ཅི་ནས་ཀྱང་འདི་ལ་དགའ་ཞིང་རབ་ཏུ་འབྱུང་བར་མི་འགྱུར་བར་བྱས་སོ། །འདིར་སྨྲས་པ། གྲོང་ཁྱེར་དམ་པ་དཔལ་ལྡན་ཡིད་འོང་དེར། །ལྷ་ཡི་ ལྷར་གྱུར་སྒྲོན་མ་དང་མཚུངས་པ། །འདོད་པའི་ཡོན་ཏན་ལྔ་པོས་ཀུན་དགྱེས་པ། །མིག་སྟོང་དགའ་བའི་ཚལ་ན་གནས་པ་བཞིན། །དེ་ནས་གནས་གཙང་མའི་རིས་ཀྱི་ལྷ་རྣམས་འདི་སྙམ་དུ་སེམས་ཏེ། བྱང་ཆུབ་སེམས་དཔའ་རྣམས་ནི་རྒྱུའི་སྟོབས་ཅན་ཡིན་མོད་ཀྱི་འོན་ཀྱང་རྐྱེན་བསྒྲུབ་པར་བྱ་ དགོས་ཏེ། འདི་ལྟར་རྒྱུའི་སྟོབས་ཆེན་པོ་ཡང་རྐྱེན་གྱི་སྟོབས་ལ་ལྟོས་སོ་སྙམ་ནས་དེ་རྣམས་ཀྱིས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ་ལག་པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང་ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་སྤྲུལ་ཏོ། །ཆོས་ཉིད་ཀྱིས་བྱང་ཆུབ་སེམས་དཔའ་སྐྱེད་ མོས་ཚལ་གྱི་གཞིར་གཤེགས་པར་བཞེད་པར་གྱུར་པ་དེའི་ཚེ་ཁ་ལོ་སྒྱུར་བ་ལ་ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག་དང་དེར་བཞུགས་ནས་སྐྱེད་མོས་ཚལ་གྱི་གཞིར་གཤེགས་སོ་ཞེས་གསུང་བར་འགྱུར་བས། དེ་ནས་བྱང་ཆུབ་སེམས་དཔས་ཁ་ལོ་སྒྱུར་བ་ལ་གསུངས་ པ། ཁ་ལོ་སྒྱུར་བ་རེ་ཞིག་བཞོན་པ་བཟང་པོ་མྱུར་དུ་ཤོམས་ཤིག །དེར་བཞུགས་ནས་སྐྱེད་མོས་ཚལ་གྱི་གཞིར་གཤེགས་སོ། །ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་བཞོན་པ་བཟང་པོ་བཤམས་ནས་བྱང་ཆུབ་སེམས་ དཔའ་ཤཱཀྱ་ཐུབ་པ་གང་ན་བ་དེར་སོང་ནས་ཕྱིན་པ་དང་། བྱང་ཆུབ་སེམས་དཔའ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །ལྷ་བཅིབས་པ་བཟང་པོ་བཤམས་ལགས་ཀྱིས། ལྷ་ད་དེའི་དུས་ལ་བབ་པར་དགོངས་སུ་གསོལ། དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པ་བཞོན་པ་བཟང་ པོར་ཞུགས་ནས་སྐྱེད་མོས་ཚལ་གྱི་གཞིར་བྱུང་བ་དང་། བྱང་ཆུབ་སེམས་དཔའ་ཤཱཀྱ་ཐུབ་པས་མི་སྐྲ་བྲེགས་ཤིང་གོས་ངུར་སྨྲིག་གྱོན་པ་ལག་པ་ན་ལྷུང་བཟེད་ཐོགས་པ་ཞིག་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་བ་ཞིག་གཟིགས་སོ། །གཟིགས་ནས་ཀྱང་ཁ་ལོ་

  628. 4b

    སྒྱུར་བ་ལ་གསུངས་པ། ཁ་ལོ་སྒྱུར་བ་མི་སྐྲ་བྲེགས་ཤིང་ལག་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་ལ་འདིའི་གོས་ཀྱང་ཁ་དོག་མི་མཚུངས་ཏེ། ཇི་ལྟར་ཡང་མི་གཞན་དག་གི་དང་མི་འདྲ་བ་འདི་ཅི་ཡིན། ལྷ་དེ་ནི་རབ་ཏུ་བྱུང་བ་ཞེས་བགྱིའོ། ། ཁ་ལོ་སྒྱུར་བ་རབ་ཏུ་བྱུང་བ་ཞེས་བྱ་བ་འདི་ཅི་ཡིན། ལྷ་རབ་ཏུ་བྱུང་བ་དེ་ནི་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་ སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་སྟེ། ལྷ་འདི་ནི་རབ་ཏུ་བྱུང་བ་ཞེས་བགྱིའོ། །ཁ་ལོ་སྒྱུར་བ་དེའི་ཕྱིར་ཤིང་རྟ་འདི་རབ་ཏུ་བྱུང་བ་གང་ན་བ་དེ་ལོགས་སུ་སྒྱུར་ཅིག །ལྷ་བཀའ་བཞིན་འཚལ་ཞེས་ཁ་ལོ་སྒྱུར་བས་ བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་ཤིང་རྟ་དེ་རབ་ཏུ་བྱུང་བ་གང་ན་བ་དེར་བསྒྱུར་ཏོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་རབ་ཏུ་བྱུང་བ་དེ་ལ་འདི་སྐད་ཅེས་བཀའ་སྩལ་ཏོ། །ཀྱེ་མི་ཁྱོད་ཅིའི་ཕྱིར་སྐྲ་བྲེགས་ཤིང་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་ དང་། ཁང་པ་ནས་ཁང་པར་རྒྱུ་ཞིང་འགྲོ་ལ་ཁྱོད་ཀྱི་གོས་ཀྱང་ཁ་དོག་མི་མཚུངས་ཏེ། ཅི་ལྟར་ཡང་མི་གཞན་དག་གི་དང་མི་འདྲ་བ་ཡིན། དེས་འདི་སྐད་ཅེས་སྨྲས་སོ། །གཞོན་ནུ་བདག་ནི་རབ་ཏུ་བྱུང་བ་ཞེས་བགྱིའོ། །ཀྱེ་མི་ཁྱོད་ཇི་ལྟར་ན་རབ་ཏུ་བྱུང་བ་ཞེས་བྱ། གཞོན་ནུ་བདག་ གིས་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ལྟར་ན་བདག་རབ་ཏུ་བྱུང་བ་ཞེས་བྱའོ། །ཀྱེ་མི་ཁྱོད་ཀྱིས་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་

  629. 5a

    སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས། དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལེགས་སོ། །དེ་ནས་བྱང་ཆུབ་སེམས་དཔའ་ཤཱཀྱ་ཐུབ་པས་ཁ་ལོ་སྒྱུར་བ་ལ་གསུངས་པ། ཁ་ལོ་སྒྱུར་བ་དེའི་ ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་དུ་ཕྱིན་ནས་དོན་འདི་ཁོ་ན་བསམ་པར་བྱའོ། །ཁ་ལོ་སྒྱུར་བས་ཤིང་རྟ་ཕྱིར་བསྒྱུར་ནས་ཕོ་བྲང་ཉིད་དུ་ཆས་ཏེ། དེར་ཕོ་བྲང་དུ་གཤེགས་པ་དང་བྱང་ཆུབ་སེམས་དཔའ་ཤཱཀྱ་ཐུབ་པ་ཀྱེ་མའོ་བདག་ནི་སྐྲ་དང་ཁ་ སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་པའི་དོན་དེ་ཉིད་དགོངས་སོ། །དེ་ནས་རྒྱལ་པོ་ཟས་གཙང་གིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་ཅི་གཞོན་ནུ་ཡིད་དགའ་བ་དང་མགུ་བས་སྐྱེད་མོས་ ཚལ་གྱི་གཞིར་བྱུང་ངམ། སྐྱེད་མོས་ཚལ་ལ་མངོན་པར་དགའ་བར་གྱུར་ཏམ། ལྷ་མ་ལགས་སོ། །དེ་ཅིའི་སླད་དུ་ཞེ་ན། ལྷ་གཞོན་ནུ་སྐྱེད་མོས་ཚལ་གྱི་གཞིར་བྱུང་བ་ན་མི་སྐྲ་བྲེགས་ཤིང་གོས་ངུར་སྨྲིག་འཚལ་བ་སུག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་། ཁང་ པ་ནས་ཁང་པར་རྒྱུ་ཞིང་མཆི་བ་ཞིག་གཟིགས་སོ། །གཟིགས་ནས་ཀྱང་བདག་ལ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་མི་སྐྲ་བྲེགས་པ་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་ལ་འདིའི་གོས་ཀྱང་ཁ་དོག་མི་མཚུངས་ཏེ། ཇི་ ལྟར་ཡང་མི་གཞན་དག་གི་དང་མི་འདྲ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་དེ་ནི་རབ་ཏུ་བྱུང་བ་ཞེས་བགྱིའོ། །དེ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་རབ་ཏུ་བྱུང་བ་ཞེས་བྱ་བ་འདི་ཅི་ཡིན། དེ་ལ་བདག་གིས་འདི་སྐད་ཅེས་གསོལ་ཏོ། །ལྷ་རབ་ ཏུ་བྱུང་བ་དེ་ནི་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་

  630. 5b

    པ་ཁོ་ནས་ཁྱིམ་མེད་པར་རབ་ཏུ་བྱུང་བ་སྟེ། ལྷ་འདི་ནི་རབ་ཏུ་བྱུང་བ་ཞེས་བགྱིའོ། །དེ་འདི་སྐད་ཅེས་གསུངས་ཏེ། ཁ་ལོ་སྒྱུར་བ་དེའི་ཕྱིར་ཤིང་རྟ་འདི་རབ་ཏུ་བྱུང་བ་གང་ན་བ་དེ་ལོགས་སུ་སྒྱུར་ཅིག །ལྷ་བཀའ་བཞིན་འཚལ་ཞེས་བྱང་ཆུབ་སེམས་དཔའ་ཤཱཀྱ་ཐུབ་པའི་ལྟར་མཉན་ནས་ ཤིང་རྟ་དེ་རབ་ཏུ་བྱུང་བ་གང་ན་བ་དེ་ལོགས་སུ་བསྒྱུར་བ་དང་། བྱང་ཆུབ་སེམས་དཔའ་ཤཱཀྱ་ཐུབ་པས་རབ་ཏུ་བྱུང་བ་དེ་ལ་འདི་སྐད་ཅེས་གསུངས་ཏེ། ཀྱེ་མི་ཁྱོད་ཅིའི་ཕྱིར་སྐྲ་བྲེགས་ལ་ལག་པ་ན་ལྷུང་བཟེད་ཐོགས་ནས་ཁྱིམ་ནས་ཁྱིམ་དང་། ཁང་པ་ནས་ཁང་པར་རྒྱུ་ཞིང་འགྲོ་ལ་ཁྱོད་ཀྱི་ གོས་ཀྱང་ཁ་དོག་མི་མཚུངས་ཏེ། ཇི་ལྟར་ཡང་མི་གཞན་དག་དང་མི་འདྲ་བ་ཡིན། དེས་འདི་སྐད་ཅེས་གསོལ་ཏོ། །གཞོན་ནུ་བདག་ནི་རབ་ཏུ་བྱུང་བ་ཞེས་བྱའོ། །བྱང་ཆུབ་སེམས་དཔས་གསུངས་པ། ཀྱེ་མི་ཁྱོད་ཇི་ལྟར་རབ་ཏུ་བྱུང་བ་ཞེས་བྱ། དེས་འདི་སྐད་ཅེས་གསོལ་ཏོ། ། གཞོན་ནུ་བདག་གིས་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་ལྟར་ན་བདག་རབ་ཏུ་བྱུང་བ་ཞེས་བྱའོ། །བྱང་ཆུབ་སེམས་དཔས་གསུངས་པ་ཀྱེ་མི་ཁྱོད་ཀྱིས་དུལ་བ་ལེགས་པ་དང་། ཡང་དག་པར་སྡོམ་པ་ལེགས་པ་དང་། དོན་སྤྱོད་པ་ལེགས་པ་དང་། ཆོས་སྤྱོད་པ་ ལེགས་པ་དང་། དགེ་བ་སྤྱོད་པ་ལེགས་པ་དང་། དགེ་ལེགས་སྤྱོད་པ་ལེགས་པར་རིག་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལེགས་སོ། །ལྷ་དེ་ནས་གཞོན་ནུས་གསུངས་པ། ཁ་ལོ་སྒྱུར་བ་དེའི་ ཕྱིར་ཤིང་རྟ་ཕྱིར་སྒྱུར་ཅིག་ཕོ་བྲང་ཉིད་དུ་འདོང་ངོ་། །འདི་ལྟར་ང་ཕོ་བྲང་དུ་ཕྱིན་ནས་དོན་འདི་བསམ་པར་བྱའོ། །བདག་གིས་དེ་ནས་ཤིང་རྟ་བསྒྱུར་ནས་གཞོན་ནུ་ཕོ་བྲང་དུ་ཞུགས་སོ། །རྒྱལ་པོས་བསམས་པ། མཚན་མཁན་དང་ལྟས་མཁན་གྱི་བྲམ་ཟེ་དེ་རྣམས་ཀྱི་ཚིག་ཡང་

  631. 6a

    དག་པར་བདེན་པར་མི་འགྱུར་གྲང་། གཞོན་ནུ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་དུ་འོང་གིས། མ་ལ་བདག་གིས་གཞོན་ནུ་ཞིང་པའི་གྲོང་དུ་བཏང་ལ་ཅི་ནས་ཀྱང་དེ་ལ་ སེམས་གཡེངས་པར་འགྱུར་བར་བྱའོ་སྙམ་ནས། གཞོན་ནུ་ཤཱཀྱ་ཐུབ་པ་ལ་འདི་སྐད་ཅེས་སྨྲས་སོ། །གཞོན་ནུ་ཚུར་ཤོག །ཁྱོད་ཞིང་པའི་གྲོང་དུ་སོང་ལ་ལས་ཀྱི་མཐའ་ལ་ལྟོས་ཤིག །དེ་ནས་བྱང་ཆུབ་སེམས་དཔའ་རྒས་པ་དང་། ནད་པ་དང་། ཤི་བ་མཐོང་ནས་ནི་ཡིད་བྱུང་ངོ་། ། རབ་ཏུ་བྱུང་བ་ལ་ནི་མངོན་པར་ཞེན་པའི་བློས་ཡབ་ཤཱཀྱ་ཟས་གཙང་གི་ཚིག་གསན་ནས་ཤིང་རྟར་ཞུགས་ཏེ་ཞིང་པའི་གྲོང་དུ་སྐུས་གཤེགས་ཀྱི་ཐུགས་ཀྱིས་ནི་མ་ཡིན་ནོ། །དེ་ལ་ལམ་ཀར་གཏེར་ལྔ་བརྒྱས་ཁ་ཉེ་བར་བསྟན་ཏེ་སྒྲ་ཕྱུང་བ། གཞོན་ནུ་བདག་ཅག་ནི་ཁྱོད་ཀྱི་ཉེ་དུའི་གཏེར་ལགས་ ཀྱིས་བདག་ཅག་བཞེས་ཤིག །བྱང་ཆུབ་སེམས་དཔས་གསུངས་པ། རེ་ཞིག་དེ་རྣམས་ཀྱིས་བླུན་པོའི་ཡོངས་སུ་གཟུང་བ་བྱས་ནས་ཅི་ཞིག་བྱས། ཁྱེད་ང་ལ་དགོས་པ་མེད་ཀྱིས་སོང་ཤིག །ཚིགས་སུ་བཅད་པས་ཀྱང་གསུངས་པ། གང་གིས་ང་ལ་འཆི་བའི་གཏམ་སྨྲས་པ། །དེ་ དག་ཀྱང་ཤི་གཏམ་དུ་གྱུར་པ་ཡིན། །བདག་ཀྱང་ཤི་ནས་རིང་པོ་མི་ཐོགས་པར། །གཞན་དག་གི་ཡང་གཏམ་དུ་འགྱུར་བར་འོང་། །དེ་རྣམས་ཀྱིས་ཡང་སྒྲ་ཕྱུང་བ། །གཞོན་ནུས་གལ་ཏེ་མི་བཞེས་ན། །བདག་ཅག་རྒྱ་མཚོ་ཆེན་པོར་འཇུག་གོ། །བྱང་ཆུབ་སེམས་དཔས་ཅི་བདེ་བར་ ཞུགས་ཤིག་ཅེས་གསུངས་པ་དང་། དེ་རྣམས་རྒྱ་མཚོ་ཆེན་པོའི་ནང་དུ་ཞུགས་སོ། །བྱང་ཆུབ་སེམས་དཔའ་གཤེགས་པ་དང་། ཇི་ཙམ་ན་ཞིང་པ་སྐྲ་གྱེན་དུ་འགྲེང་བ། ལག་པ་དང་རྐང་པ་སེར་ག་བྱུང་བ། ལུས་རྡུལ་གྱིས་ཡོག་པ་དག་ཅིག་དང་། རྨོན་པ་ལྕག་གཟེར་བུ་རྣོན་པོ་ ཅན་གྱིས་ལུས་དྲལ་བས་རྒྱབ་དང་མཇུག་དོའི་ཕྱོགས་ཁྲག་གིས་ཡོག་པ། ལྟོགས་པ་དང་སྐོམ་པས་དབུགས་བརྫགས་ཤིང་སྙིང་གའི་ཕྱོགས་ནས་དབུགས་བརྫགས་པ་རིང་དུ་འདྲེན་ལ་གཉའ་ཤིང་གིས་མནན་པའི་རྨ་ལས་རྣག་ཁྲག་འཛག་པ་ལ་སྦྲང་བུ་དང་འབུའི་ཚོགས་ཟ་བ། ཐོང་

  632. 6b

    ལྕགས་ཀྱིས་རྐང་པ་རྨ་བྱུང་ཞིང་། ཁ་དང་སྣ་ནས་ཁ་ཆུ་སྣ་ཆུ་འཛག་ལ་སྦལ་པ་དང་། ཤ་སྦྲང་དང་། སྦྲང་བུ་མཆུ་རིངས་ཀྱིས་ཡོག་པ་རྣམས་གཟིགས་སོ། །གཟིགས་ནས་ཀྱང་ཐོག་མ་མེད་པའི་དུས་ནས་བསོད་ནམས་བསྐྱེད་ཅིང་བསགས་པའི་ཐུགས་རྗེས་ཀུན་ནས་བསྐྱོད་པའི་ ཐུགས་ཀྱིས་ཞིང་པ་རྣམས་ལ་འདི་སྐད་ཅེས་གསུངས་སོ། །ཤེས་ལྡན་དག་ཁྱོད་སུའི་ཡིན། དེ་རྣམས་ཀྱིས་གསོལ་པ། ལྷའི་ལགས་སོ། །དེས་གསུངས་པ། ཤེས་ལྡན་དག་དེང་ཕན་ཆད་བྲན་དུ་མི་བྱ། མངག་གཞུག་པར་མི་བྱ། རང་དབང་ཅན་གང་དགའ་བར་འགྲོ་བར་བྱས། བདེ་བ་ལ་རེག་པར་གནོས་ཤིག །རྨོན་པ་རྣམས་ཀྱང་བཀྲོལ་ནས་གསུངས་པ། ཁྱེད་ཅག་ཀྱང་དེང་ཕྱིན་ཆད་རྩྭ་མཆོག་མ་ཉམས་པ་ལ་ཟ་ཞིང་ཆུ་མ་རྡུལ་མ་བསྙོགས་ཤིང་དང་བདག་ལ་འཐུངས་ཤིག །ཁྱོད་ལ་ཕྱོགས་བཞི་ནས་ཀྱང་རླུང་བསིལ་བ་ལྡང་བར་གྱུར་ཅིག །དེ་ནས་བྱང་ ཆུབ་སེམས་དཔའ་ཡིད་བྱུང་བ་དེ་ཉིད་ཀྱིས་ཡབ་ཤཱཀྱ་ཟས་གཙང་གི་ཞིང་བླས་ཀྱི་མཐའ་ལ་གཟིགས་ནས་ཤིང་འཛམ་བུའི་གྲིབ་མ་གང་ན་བ་དེར་གཤེགས་ཏེ་བྱོན་ནས། ཤིང་འཛམ་བུའི་གྲིབ་མ་ལ་བཞུགས་ཏེ། འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་དབེན་ པ། རྟོག་པ་དང་བཅས། དཔྱོད་པ་དང་བཅས་ཤིང་དབེན་པ་ལས་སྐྱེས་པའི་དགའ་བ་དང་བདེ་བ་ཅན་ཟག་པ་མེད་པ་དང་འདྲ་བའི་བསམ་གཏན་དང་པོ་ལ་སྙོམས་པར་ཞུགས་སོ། །སྐྱེ་བོའི་ཚོགས་ཆེན་པོ་ཡང་བྱང་ཆུབ་སེམས་དཔའ་སྤངས་ཏེ་མི་འགྲོ་བར་ཤིང་གཞན་རྣམས་ ཀྱི་དྲུང་ན་སྡོད་དོ། །རྒྱལ་པོ་ཟས་གཙང་གིས་བསམས་པ་བྱང་ཆུབ་སེམས་དཔའ་རིང་ཞིག་ཐོགས་ཏེ་འདི་ལྟར་དྲོའི་དུས་ལས་ཡོལ་གྱིས་ལྟར་འགྲོའོ་ཞེས་དེ་ཤིང་རྟར་ཞུགས་ནས་ཞིང་པའི་གྲོང་དུ་སོང་སྟེ་ཕན་ཚུན་དུ་བྱང་ཆུབ་སེམས་དཔའ་ཚོལ་ཞིང་ཤིང་འཛམ་བུའི་དྲུང་དུ་ཕྱིན་ཏོ། ། དེའི་ཚེ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ཏོ། །བྱང་ཆུབ་སེམས་དཔའི་མཐུས་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་ངོ་། །རྒྱལ་པོ་ཟས་གཙང་གིས་

  633. 7a

    ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ན་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ། གཞོན་ ནུ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། འདི་ལྟར་ད་ལྟ་ཉི་མའི་གུང་ཡོལ་ནས་ཤིང་གཞན་རྣམས་ཀྱི་གྲིབ་མ་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་པར་གྱུར་ན་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་མི་གཏོང་བ་ངོ་མཚར་ཆེའོ་སྙམ་མོ། ། དེ་ནས་དགའ་བའི་བསྟི་སྟང་བྱས་ཏེ་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་ཚིགས་སུ་བཅད་པས་སྨྲས་པ། ཇི་ལྟར་བལྟམས་ཚེ་ས་ནི་གཡོས་པ་ལྟར། །འཛམ་བུའི་གྲིབ་མས་ཁྱོད་སྐུ་མི་གཏོང་བ། །བློ་ཆེན་ཁྱོད་ཀྱི་ཡ་མཚན་གཉིས་འདི་སྟེ། །ཀུན་གཟིགས་ཁྱོད་ ཀྱི་ཞབས་ལ་ཕྱག་འཚལ་ལོ། །དེ་ནས་རྒྱལ་པོ་ཟས་གཙང་གིས་བྱང་ཆུབ་སེམས་དཔའ་སྐྱིལ་མོ་ཀྲུང་བཅས་པ་ལས་བསླང་ནས་ཤིང་རྟར་ཞུགས་ཏེ། དུར་ཁྲོད་ཀྱི་ནང་ནས་སེར་སྐྱའི་གཞིར་གཤེགས་པ་ན་བྱང་ཆུབ་སེམས་དཔས་དུར་ཁྲོད་ཀྱི་ནང་ན་མི་རོ་རྣམ་པར་སྡོས་པ་དང་། རྣམ་པར་ འབུས་གཞིགས་པ་དང་། རྣམ་པར་བམ་པ་དག་གཟིགས་ནས་དེ་ཤིན་ཏུ་སྐྱོ་བ་སྐྱེས་ཏེ། ཤིང་རྟར་ཞུགས་བཞིན་དུ་སྐྱིལ་མོ་ཀྲུང་བཅས་ནས་བཞུགས་སོ། །དེ་ནས་ཡང་རྒྱལ་པོ་ཟས་གཙང་གིས་སྐྱིལ་མོ་ཀྲུང་བཅས་པ་ལས་བསླང་ནས། སེར་སྐྱའི་གཞིར་གཤེགས་ཏེ། གྲོང་ཁྱེར་ གྱི་ནང་དུ་འཇུག་པ་ན་མཚན་མཁན་རྣམས་ཀྱིས་གལ་ཏེ་གཞོན་ནུ་ཞག་བདུན་གྱི་བར་དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་བར་ལུང་བསྟན་པར་རིག་ནས་དེ་རྣམས་ཀྱིས་རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ། །གལ་ཏེ་དེ་ཡི་བཟང་པོ་གཟིགས་བཞེད་ན། །དེའི་ སླད་དགུང་བདུན་བར་དུ་སྲུངས་ཤིག་དང་། །མི་དབང་གདུགས་ནི་བདལ་བར་གྱུར་པ་ན། །རིན་ཆེན་སྣ་བདུན་འབྱུང་བར་ཐེ་ཚོམ་མེད། །ཁྱོད་སྲས་རིན་ཆེན་བདུན་པོ་ཡི། །དབང་ཕྱུག་གི་ནི་རྒྱལ་པོར་འགྱུར། །རྒྱ་མཚོ་ལ་ནི་ཐུག་པའི་ས། །ཆད་པ་མེད་པས་སྐྱོང་བར་འགྱུར། །

  634. 7b

    འོན་ཏེ་ས་ནི་སྤངས་ནས་སུ། །བསྙེངས་མེད་ནགས་སུ་བཞུད་ན་ནི། །ཐམས་ཅད་མཁྱེན་པ་ཐོབ་གྱུར་ནས། །འགྲོ་བ་སྒྲོལ་བར་མཛད་པར་འགྱུར། །ཤཱཀྱ་དུས་ལེགས་ཀྱི་བུ་མོ་རི་དགས་སྐྱེས་ཞེས་བྱ་བ་དེ་སྐར་ཁུང་ན་འདུག་པས་བྱང་ཆུབ་སེམས་དཔའ་མཐོང་ནས་ཚིགས་སུ་བཅད་ དེ་སྨྲས་པ། ཀྱེ་མ་འདི་ཡི་ཡུམ་བདེ་ཞིང་། །ཡབ་དེ་ཡང་ནི་བདེ་བ་ཡིན། །ཀྱེ་མ་གང་གི་ཁྱིམ་ཐབ་འགྱུར། །བུད་མེད་དེ་ཡང་མྱ་ངན་འདས། །སྐྱེས་མཆོག་བསམ་གཏན་པ་དེ་ཡིས། །མྱ་ངན་འདས་པའི་སྒྲ་ཐོས་ནས། །མྱ་ངན་འདས་པ་ཞི་ཉིད་དུ། །མཁྱེན་ནས་དེ་ལ་ ཐུགས་དགྱེས་གྱུར། །དེ་ནས་བྱང་ཆུབ་སེམས་དཔས་ལེགས་པར་སྨྲས་པའི་ཕྱིར་མུ་ཏིག་གི་ཕྲེང་བ་འཕངས་པ་དང་། བྱང་ཆུབ་སེམས་དཔའི་མཐུས་སྐར་ཁུང་ནས་སོང་སྟེ་དེའི་མགུལ་དུ་འཁྲིས་པར་གྱུར་ཏོ། །སྐྱེ་བོའི་ཚོགས་ཀྱིས་ནང་དུ་སོང་བ་དེ་མཐོང་ནས། དེ་རྣམས་ཀྱིས་རྒྱལ་ པོ་ཟས་གཙང་ལ་རྒྱས་པར་སྨྲས་ནས་རྒྱལ་པོ་ཟས་གཙང་གིས་རི་དགས་སྐྱེས་འཁོར་ཉི་ཁྲི་དང་བྱང་ཆུབ་སེམས་དཔའི་བཙུན་མོར་བླངས་སོ། །དེ་ནས་བྱང་ཆུབ་སེམས་དཔའི་བཙུན་མོས་འཚོ་མ་དང་། རི་དགས་སྐྱེས་ལ་སོགས་པའི་འཁོར་བུད་མེད་དྲུག་ཁྲི་ཡོད་དོ། །དེ་ནས་རྒྱལ་ པོ་ཟས་གཙང་གཅུང་བྲེ་བོ་ཟས་དང་། ཟས་དཀར་དང་། ཚད་མེད་ཟས་གསུམ་དང་ལྷན་ཅིག་གཅིག་ཏུ་ཚོགས་ནས་གྲོས་བྱ་བར་བརྩམས་པ། ཤེས་ལྡན་དག་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་བྱང་ཆུབ་སེམས་དཔའ་ཤཱཀྱ་ཐུབ་པ་ལ་གལ་ཏེ་ཞག་བདུན་གྱི་བར་ དུ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་གྱིས། དེ་ལྟ་བས་ན་བདག་ཅག་གིས་བྱང་ཆུབ་སེམས་དཔའ་ཞག་བདུན་གྱི་བར་དུ་བསྒྲིམས་ཏེ་བསྲུང་བར་བྱ་ཞིང་གྲོང་ཁྱེར་ཡང་ལེགས་པར་བསྲུང་བར་བྱའོ། །དེ་ནས་དེ་རྣམས་ཀྱིས་སེར་སྐྱའི་གཞིའི་གྲོང་ཁྱེར་རབ་ རིམ་པ་བདུན་དང་འོབས་རིམ་པ་བདུན་གྱིས་བསྐོར་ནས་གྲོང་ཁྱེར་གྱི་སྒོ་འཕར་ལྕགས་ལས་བྱས་ཤིང་། སྒོ་འཕར་རྣམས་ལ་དྲིལ་བུ་ཤིན་ཏུ་སྒྲ་གསལ་བ་བཏགས་ཏེ་སྒོ་ཕྱེ་ན་དེའི་སྒྲས་དཔག་ཚད་གཅིག་ཁོ་ར་ཁོར་ཡུག་ཏུ་གྲག་པར་འགྱུར་རོ། །བྱང་ཆུབ་སེམས་དཔའ་ནི་ཁང་བཟངས་

  635. 8a

    ཀྱི་གཞི་ན་བུད་མེད་ཡིད་འཕྲོག་པ་གཟུགས་བཟང་བ་རྣམས་དང་། གར་དང་གླུ་དང་། རོལ་མོ་རྣམས་ཀྱི་སྤྱོད་པས་བསྙེན་བཀུར་བྱེད་དུ་བཅུག་གོ། །བློན་པོ་རྣམས་ནི་དཔུང་གི་ཚོགས་ཡན་ལག་བཞི་དང་ལྷན་ཅིག་ར་བའི་ཕྱི་རོལ་ཁོ་ར་ཁོར་ཡུག་ཏུ་གཅན་པ་བྱེད་དུ་ བཅུག་གོ། །སྐས་སྤོར་རུང་བ་མི་ལྔ་བརྒྱས་ཚུགས་པ་ཡང་བྱས་སོ། །བཙུན་མོའི་འཁོར་གྱི་སྒོར་ཡང་སྒོ་ཕྱེ་ན་དེའི་སྒྲས་རྒྱལ་པོ་ཟས་གཙང་གི་ཕོ་བྲང་དུ་གྲག་ཅིང་དེ་ཐོས་ནས་བཙུན་མོའི་འཁོར་གྱི་མི་དང་། གྲོང་ཁྱེར་གྱི་སྒོ་སྲུང་རྣམས་དང་། ཕོ་བྲང་འཁོར་གྱི་མི་གྲོང་ཁྱེར་གྱི་ཕྱི་རོལ་ ནས་སྲུང་དུ་བཅུག་པ་རྣམས་བག་དང་ཆས་ཏེ་འདུག་པར་འགྱུར་བ་དེ་ལྟ་བུ་བཏགས་སོ། །བྱང་ཆུབ་སེམས་དཔའ་ནི་སྟེང་གི་ཁང་བཟངས་ཀྱི་གཞི་སྐྱེས་པ་མེད་པར་ཞུགས་ནས་པི་བང་དང་། གླིང་བུ་དང་། འཁར་རྔ་དང་། སྒྲ་སྙན་ལ་སོགས་པ་རོལ་མོའི་ཆ་སྤྱད་དག་ཉེ་བར་ལེན་ཅིང་འབྱོར་ པ་ཆེན་པོས་བཞུགས་སོ། །མཚན་མོ་ནི་རྒྱལ་པོ་ཟས་གཙང་ཡང་དཔུང་གི་ཚོགས་ཡན་ལག་བཞི་དང་ཤར་སྒོའི་ཕྱི་རོལ་ན་འདུག་གོ། །ལྷོ་ཕྱོགས་ན་ནི་བྲེ་བོ་ཟས་སོ། །ནུབ་ཕྱོགས་ན་ནི་ཟས་དཀར་རོ། །བྱང་ཕྱོགས་ན་ནི་ཚད་མེད་ཟས་སོ། །གྲོང་ཁྱེར་གྱི་དབུས་ཀྱི་འགྲམ་པོ་བྱེད་པ་ནི་ ཤཱཀྱ་མིང་ཆེན་ནོ། །དེ་ཤར་སྒོར་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད་རྒྱལ་པོ་ཟས་གཙང་གིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ་མེལ་ཚེ་མཛོད་ཅིག །མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ཏེ། ཚིགས་སུ་བཅད་དེ་སྨྲས་པ། འཇིག་ རྟེན་གཉིད་ལོག་རོ་དང་མཚུངས། །གཉིད་ལོག་བདུད་ཀྱི་དབང་དུ་སོང་། །འདི་ན་མི་ཉལ་རྟག་ཏུ་མཁས། །དེ་བས་མ་ཉལ་མེལ་ཚེ་བྱོས། །ལྷོ་སྒོར་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད། བྲེ་བོ་ཟས་ཀྱིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ་མེལ་ཚེ་ མཛོད་ཅིག །མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། འཇིག་རྟེན་གཉིད་ལོག་རོ་དང་མཚུངས། །གཉིད་ལོག་བདུད་ཀྱི་དབང་དུ་སོང་། །གཉིད་ལོག་འཆི་བདག་དབང་དུ་སོང་། །དེ་བས་མ་ཉལ་མེལ་ཚེ་བྱོས། །ནུབ་སྒོར་སོང་ནས་

  636. 8b

    སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད། ཟས་དཀར་གྱིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ་མེལ་ཚེ་མཛོད་ཅིག །མེལ་ཚེ་མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། གཉིད་ལོག་པ་ནི་རྟག་ཏུ་མྱོས། །མྱོས་ འགྱུར་བྲེ་བོས་འཐུངས་པ་ཉལ། །དགོན་པའི་ནགས་སུ་ཉལ་བ་འདྲ། །དེ་བས་མ་ཉལ་མེལ་ཚེ་བྱོས། །བྱང་སྒོར་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད། ཚད་མེད་ཟས་ཀྱིས་སྨྲས་པ། ཁོ་བོ་མེལ་ཚེ་བྱེད་དོ། །ལྷ་མེལ་ཚེ་མཛོད་ཅིག །མེལ་ཚེ་ མཛད་དང་ཁྱོད་ལ་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། རི་ཉལ་རི་སུལ་ཉལ་བ་བཞིན། །རྒྱ་མཚོའི་ཆུར་ནི་ཉལ་བ་དང་། །ལྗོན་ཤིང་རྩེ་ལ་ཉལ་བ་བཞིན། །དེ་བས་མ་ཉལ་མེལ་ཚེ་བྱོས། །དབུས་ཀྱི་བཞི་མདོ་དང་སུམ་མདོ་དག་ཏུ་སོང་ནས་སྨྲས་པ། སུ་ཞིག་མེལ་ཚེ་བྱེད། སུ་ཞིག་མེལ་ཚེ་བྱེད། སྲུང་མ་རྣམས་ཀྱིས་སྨྲས་པ། བདག་ཅག་མེལ་ཚེ་བགྱིད་དོ། །མེལ་ཚེ་བྱོས་ཤིག །མེལ་ཚེ་བྱས་དང་ལེགས་པར་འགྱུར་རོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། ཆོས་སྤྱོད་ཆོས་མ་ཡིན་མ་སྤྱོད། །བདེན་པ་སྨྲོས་ཤིག་བརྫུན་མ་ སྨྲ། །མུན་པ་ཆེན་པོར་འཇུག་པར་འགྱུར། །དེ་བས་མ་ཉལ་མེལ་ཚེ་བྱོས། །དེ་ནས་ནམ་ནངས་ནས་ཤཱཀྱ་མིང་ཆེན་གྱིས་རྒྱལ་པོ་ཟས་གཙང་ལ་སྨྲས་པ། ལྷ་དགུང་སངས་ལགས་ཏེ་དགུང་བདུན་ལ་དགུང་གཅིག་ནི་ཐལ། དགུང་དྲུག་ནི་ལུས་སོ། །རྒྱལ་པོ་ཟས་གཙང་ གིས་སྨྲས་པ། ལེགས་ཀྱིས་ཞག་དྲུག་འདས་ན་གཞོན་ནུ་འཁོར་ལོས་སྒྱུར་བར་གྱུར་ན་བདག་ཅག་ནམ་མཁའི་ངོས་ལ་རྒྱུ་ཞིང་གླིང་བཞིར་ཕྱི་བཞིན་དོང་ངོ་། །དེ་བཞིན་དུ་དགུང་གཅིག་ལུས་སོ་ཞེས་བྱ་བའི་བར་དུ་སྟེ། ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་ འོག་ཏུ་འཇུག་པ་ཡིན་པས་ཚིགས་སུ་བཅད་དེ་སྨྲས་པ། མི་དབང་ཤཱཀྱའི་སྲས་པོ་ཐུབ་པ་འདི། །བདག་ཉིད་ཆེན་པོ་ཕ་རོལ་ཕྱིན་དྲུག་རྫོགས། །ཐུབ་རྣམས་དགྱེས་པར་མཛད་པ་དཀའ་ཐུབ་ཚལ། །འཕགས་པ་དགྱེས་པའི་ནགས་སུ་གཤེགས་པར་བཞེད། །དེ་ནས་

  637. 9a

    བྱང་ཆུབ་སེམས་དཔའ་བཙུན་མོ་དང་ལྷན་ཅིག་སྐྱེས་པ་མེད་པ་ན་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་འདི་སྙམ་དུ་དགོངས་ཏེ། བདག་ལ་གཞན་དག་གཞོན་ནུ་ཤཱཀྱ་ཐུབ་པ་ནི་སྐྱེས་པ་མ་ཡིན་ཏེ། གང་གི་ཕྱིར་གྲགས་ འཛིན་མ་དང་། ས་འཚོ་མ་དང་། རི་དགས་སྐྱེས་དང་། བུད་མེད་དྲུག་ཁྲི་སྤངས་ནས་རབ་ཏུ་བྱུང་ངོ་ཞེས་གཞི་དེས་ཁ་ཟེར་བར་འགྱུར་དུ་འོང་གིས། མ་ལ་བདག་གིས་གྲགས་འཛིན་མ་དང་ལྷན་ཅིག་དགའ་མགུར་སྤྱད་པར་བྱའོ་སྙམ་ནས་དེས་གྲགས་འཛིན་མ་དང་ལྷན་ཅིག་དགའ་ མགུར་སྤྱོད་པ་དང་གྲགས་འཛིན་མ་སེམས་ཅན་དང་ལྡན་པར་གྱུར་ནས། དེ་འདི་སྙམ་དུ་སེམས་ཏེ། ནམ་ནངས་ནས་བྱང་ཆུབ་སེམས་དཔའི་སྙན་དུ་གསོལ་ལོ་སྙམ་མོ། །དེ་ནས་བྱང་ཆུབ་སེམས་དཔས་དེའི་ཚེ་རྟེན་ཅིང་འབྲེལ་བར་འབྱུང་བ་དང་ལྡན་པས་ཚིགས་སུ་བཅད་དེ་གསུངས་པ། བུད་ མེད་དང་བདག་ཁྱིམ་ཉལ་བའི། །ཐ་མ་དེང་གི་འདི་ཡིན་ཏེ། །ཕྱིན་ཅད་ཁྱིམ་དུ་བུད་མེད་དང་། །ང་ནི་ལྷན་ཅིག་མི་གནས་སོ། །དེ་ནས་བུད་མེད་དེ་རྣམས་གར་དང་གླུ་དང་རོལ་མོས་དུབ་ནས་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང་ལག་པ་དག་ལྷུག་པར་བཏང་ནས་བསླ་བའི་ཚིག་ བྱུང་རྒྱལ་དུ་བརྡོལ་ཞིང་གཉིད་ལོག་གོ། །བྱང་ཆུབ་སེམས་དཔས་བུད་མེད་དེ་དག་ཐམས་ཅད་ཁ་ནས་ཁ་ཆུ་འཛག་ཅིང་སྐྲ་ཞིག་ལ་གོས་དང་ལག་པ་དག་ལྷུག་པར་བཏང་ནས་བསླ་བའི་ཚིག་བྱུང་རྒྱལ་དུ་བརྡོལ་ཞིང་གཉིད་ལོག་པ་གཟིགས་སོ། །གཟིགས་ནས་ཀྱང་བཙུན་མོའི་འཁོར་ལ་ དུར་ཁྲོད་ཀྱི་འདུ་ཤེས་སྐྱེས་ནས་དེས་ཚིགས་སུ་བཅད་དེ་གསུངས་པ། རླུང་གི་ཤུགས་ཀྱིས་པད་མའི་ཚལ་ལྟར་ས་གཞི་འདིར། །ལག་པ་དག་དང་རྐང་པ་བརྐྱང་ནས་འགྱེལ་གྱུར་ཏེ། །སྐྲ་རྣམས་ཞིག་ཅིང་མདོམས་དང་རྐུབ་ཀྱི་ཕྱོགས་སྣང་བ། །ཤཱཀྱའི་སྲས་ཀྱིས་གཟིགས་ནས་རང་ བཞིན་སྐྱོ་བར་གྱུར། །ཚུལ་དང་བྲལ་བའི་བུད་མེད་ན་ཆུང་ཚོགས་འདི་དག །དུར་ཁྲོད་འཇིགས་སུ་རུང་བའི་རང་བཞིན་འདྲར་མཐོང་ནས། །སེམས་ཅན་བྱིས་པའི་སྤྱོད་པའི་ཡུལ་ལ་དེང་དགའ་ན། །སེམས་དང་བློ་གྲོས་དྲན་དང་བྲལ་བ་ཡིན་ནམ་ཅི། །འདོད་པ་ཐ་ཆད་འདམ་དང་

  638. 9b

    མདའ་མདུང་དུག་མེ་འདྲ། །རྨི་ལམ་ལྟ་བུ་ཡིན་ཏེ་ཚྭ་ཆུའི་རོ་དང་མཚུངས། །འདོད་པ་ཕུང་བྱེད་རྩོད་དང་སྡིག་པའི་རྒྱུར་གྱུར་པ། །མཐའ་ངན་སྦྲུལ་གྱི་དབང་པོ་ལྟ་བུ་བདག་གིས་སྤང་། །བར་སྐབས་དེར་སྐྱེ་དགུའི་བདག་མོ་ཆེན་མོའི་རྨི་ལམ་དུ་བཞི་རྨིས་པ། ཟླ་བ་སྒྲ་ཅན་གྱིས་ཟིན་པ་ དང་། ཉི་མ་ཤར་ཕྱོགས་ནས་ཤར་ནས་དེ་ཉིད་དུ་ནུབ་པ་དང་། སྐྱེ་བོའི་ཚོགས་ཆེན་པོས་བདག་ལ་ཕྱག་བྱས་པ་དང་། བདག་ཉིད་དགོད་ཅིང་ངུ་བའོ། །གྲགས་འཛིན་མའི་རྨི་ལམ་དུ་བརྒྱད་རྨིས་པ། བདག་ཉིད་ཀྱི་ཁྱིམ་གྱི་གདུང་ཆག་པ་དང་། བཀྲ་ཤིས་ཀྱི་མལ་ཁྲི་ཆག་པ་དང་། ལག་ པའི་གདུ་བུ་ཆག་པ་དང་། སོའི་ཕྲེང་བ་ལྷགས་པ་དང་། སྐྲའི་ལན་བུ་ཞིག་པ་དང་། དཔལ་ཁྱིམ་ནས་བྱུང་བ་དང་། ཟླ་བ་སྒྲ་ཅན་གྱིས་ཟིན་པ་དང་། ཉི་མ་ཤར་ཕྱོགས་ནས་ཤར་ནས་དེ་ཉིད་དུ་ནུབ་པའོ། །བྱང་ཆུབ་སེམས་དཔས་ཀྱང་རྨི་ལམ་ལྔ་རྨིས་པ། ས་ཆེན་པོ་ཉིད་ཀྱི་ གཟིམས་མལ་དུ་བྱས་ཤིང་། རི་རབ་རིའི་རྒྱལ་པོ་དབུ་རྟེན་དུ་བཅུག །ཕྱག་གཡོན་པ་ཤར་ཕྱོགས་ཀྱི་རྒྱ་མཚོ་ཆེན་པོར་འཇུག །ཕྱག་གཡས་པ་ནུབ་ཕྱོགས་ཀྱི་རྒྱ་མཚོ་ཆེན་པོར་འཇུག །ཞབས་གཉིས་རྒྱ་མཚོ་ཆེན་པོར་འཇུག་པ་དང་། འགྲེང་བ་ཞེས་བྱ་བའི་རྩའི་རིགས་ལྟེ་བ་ནས་ བྱུང་ནས་ནམ་མཁའི་བར་དུ་འཕགས་ཏེ་འདུག་པ་དང་། བྱ་ཀུན་ནས་དཀར་ལ་མགོ་གནག་པ་རྣམས་ཀྱིས་ཞབས་གཉིས་ལ་གཏུགས་ནས་པུས་མོའི་ལྷ་ང་ལ་ཐུག་གི་བར་དུ་ལྡག་པ་དང་བྱ་སྣ་ཚོགས་ཕྱོགས་བཞི་ནས་འོངས་ནས་མདུན་དུ་ཁ་དོག་གཅིག་ཏུ་འདུག་པ་དང་། མི་གཙང་ པའི་རིའི་སྟེང་ནས་བདག་ཉིད་མི་གཙང་བས་མ་གོས་པར་འཆག་པའོ། །རྨིས་ནས་ཀྱང་ཐུགས་དགྱེས་ཏེ་དགོངས་པ། ངའི་རྨི་ལམ་འདི་འདྲ་བ་རྨིས་པས་རིང་པོ་མི་ཐོགས་པ་ཁོ་ནར་བླ་ན་མེད་པའི་ཡེ་ཤེས་ཐོབ་པར་འགྱུར་རོ་སྙམ་མོ། །དེ་ནས་གྲགས་འཛིན་མས་བྱང་ཆུབ་སེམས་ དཔའ་ལ་རྨི་ལམ་གསོལ་པ། ལྷ་ད་གཟོད་བདག་གིས་གཡར་ལམ་དུ་བརྒྱད་རྨིས་པ། བདག་གི་སྡུམ་པའི་གདུང་ཆག་པ་དང་། བཀྲ་ཤིས་ཀྱི་མལ་ཁྲི་ཆག་པ་དང་། སུག་པའི་གདུ་བུ་ཆག་པ་དང་། སོའི་ཕྲེང་བ་ལྷགས་པ་དང་། སྐྲའི་ལན་བུ་ཞིག་པ་དང་། དཔལ་སྡུམ་

  639. 10a

    བ་ནས་བྱུང་བ་དང་། ཟླ་བ་སྒྲ་ཅན་གྱིས་ཟིན་པ་དང་། གདུགས་ཤར་ཕྱོགས་ནས་བདལ་ནས་དེ་ཉིད་དུ་ནུབ་པ་རྨིས་ལགས་སོ། །བྱང་ཆུབ་སེམས་དཔས་གྲགས་འཛིན་མའི་ཡིད་མི་བདེ་བ་བསལ་བའི་ཕྱིར་རྨི་ལམ་རྣམས་བཤད་པ། བདག་གི་ཁྱིམ་གྱི་ གདུང་ཆག་གོ་ཞེས་སྨྲས་པ་གང་ཡིན་པ་དེ་མི་འདུག་གམ། བདག་གི་བཀྲ་ཤིས་ཀྱི་མལ་ཁྲི་ཆག་གོ་ཞེས་སྨྲས་པ་གང་ཡིན་པ་དེ་ཡང་མ་ཆག་སྟེ་འདུག་པའོ་ནི་ཡིན་མོད། ལག་པའི་གདུ་བུ་ཆག་གོ་ཞེས་སྨྲས་པ་གང་ཡིན་པ་ཅི་ཆག་གམ་མ་ཆག་རང་ཉིད་རྟོགས་ཤིག །སོའི་ཕྲེང་ བ་ལྷགས་སོ་ཞེས་སྨྲས་པ་གང་ཡིན་པ་དེ་ཡང་སོ་སོ་རང་གིས་རིག་པར་བྱ་བ་ཡིན་པས་ཅི་ལྷགས་སམ་མ་ལྷགས་རྟོགས་ཤིག །བདག་གི་ལན་བུ་ཞིག་གོ་ཞེས་གང་སྨྲས་པ་དེ་ཡང་ཁྱོད་ཀྱིས་སོ་སོ་རང་གིས་རིག་པར་བྱ་བ་ཡིན་པས་ཅི་ཞིག་གམ་མ་ཞིག་རྟོགས་ཤིག །ཁྱིམ་ནས་ དཔལ་བྱུང་ངོ་ཞེས་སྨྲས་པ་གང་ཡིན་པ་དེ་ནི་བུད་མེད་རྣམས་ཀྱི་དཔལ་ནི་ཁྱོ་ཡིན་ལ་ང་ནི་འདུག་པ་ཉིད་དོ། །ཟླ་བ་སྒྲ་ཅན་གྱིས་ཟིན་ཅེས་སྨྲས་པ་གང་ཡིན་པ་དེ་ནི་ཟླ་བ་འདི་མངོན་སུམ་དུ་འདུག་པ་མ་ཡིན་ནམ། ཉི་མ་ཤར་ཕྱོགས་ནས་ཤར་ནས་དེ་ཉིད་དུ་ནུབ་བོ་ཞེས་སྨྲས་པ་གང་ཡིན་པ་དེ་ནི་ ད་དུང་ཡང་ནམ་ཕྱེད་ཡོད་དེ། རེ་ཞིག་ཤར་ཀྱང་མ་ཤར་ན་ནུབ་པར་ལྟ་ག་ལ་གྱུར་ཅེས་དེ་ལྟར་བརྡ་སྤྲད་ནས་བཙུན་མོ་གྲགས་འཛིན་ཅང་མི་སྨྲ་བར་འདུག་གོ། །བྱང་ཆུབ་སེམས་དཔས་དགོངས་པ་གྲགས་འཛིན་མའི་རྨི་ལམ་དེ་འདྲ་བ་རྨིས་པས་གདོན་མི་ཟ་བར་ང་ཁོ་ན་བདག་འགྲོ་བར་ བྱས་འདི་ལ་ཚིག་ཟུར་གྱིས་བསྟན་ནོ་སྙམ་ནས་དེས་དེ་ལ་ཚིག་ཟུར་གྱིས་བསྟན་པ་དང་། གྲགས་འཛིན་མས་གསོལ་པ། ལྷ་ཁྱོད་གང་དུ་བཞུད་པ་དེར་བདག་ཁྲིད་ཅིག །བྱང་ཆུབ་སེམས་དཔས་མྱ་ངན་ལས་འདས་པ་ལས་དགོངས་ནས་བཀའ་སྩལ་པ། དེ་བཞིན་དུ་བྱ་སྟེ། གང་ དུ་འགྲོ་བ་དེ་དང་དེར་ཁྱོད་བཀྲིའོ། །དེ་ནས་བརྒྱ་བྱིན་དང་ཚངས་པ་ལ་སོགས་ཏེ་ལྷ་རྣམས་ཀྱི་སེམས་ཀྱིས་བྱང་ཆུབ་སེམས་དཔའི་དགོངས་པ་ཤེས་ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང་། བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ། །ནགས་ཀྱི་སྤྲེའུ་ནི་སྤྱོད་

  640. 10b

    ཡུལ་རྒྱུ་འདྲ་ཞིང་། །ཡན་པར་འདུག་པའི་རྟེའུ་དང་འདྲ་བའི་ཐུགས། །གལ་ཏེ་འདོད་པའི་ཡོན་ཏན་ལས་བཟློག་ན། །དེ་ནས་ཤིན་ཏུ་གསལ་བའི་སྣང་བ་གཟིགས། །བློ་གྲོས་བཟང་པོ་བཞེངས་ཤིག་བཞེངས། །ས་ནི་སྤངས་ཏེ་བཞུད་མཛོད་ལ། །ཐམས་ཅད་མཁྱེན་ཉིད་ བརྙེས་ནས་ནི། །འགྲོ་བ་དག་ནི་བསྒྲལ་བར་མཛོད། །བྱང་ཆུབ་སེམས་དཔས་གསུངས་པ། ཀཽ་ཤི་ཀ་མ་མཐོང་ངམ། ང་ནི་རི་དགས་བདག་པོ་རྒྱས་བསྐོར་ལྟར། །མི་ནི་མཐུ་ལྡན་གཞུ་མཚོན་རལ་གྲི་ཐོགས། །རྟ་གླང་ཤིང་རྟ་དཔུང་ཚོགས་མང་པོ་ཡིས། །གྲོང་ཁྱེར་སེར་སྐྱ་ཀུན་ ནས་ཡོངས་སུ་བསྐོར། །ཟས་གཙང་ལ་སོགས་ཤཱཀྱའི་ཚོགས་འདི་དག །གླང་ཆེན་རྟ་ཞོན་ལེགས་པར་གོ་བགོས་ལུས། །མི་སྡུག་སྣ་ཚོགས་ལག་ན་མཚོན་ཐོགས་ཏེ། །ཁྱམས་དང་རྟ་བབས་ཁང་བཟངས་གཞི་ནང་གནས། །ཕོ་བྲང་དང་ནི་ཁྱིམ་སྒོ་དང་། །དེ་བཞིན་གྲོང་ཁྱེར་སྒོ་ དག་ཀྱང་། །བཅད་ནས་གཏན་པ་དམ་བཅུག་སྟེ། །དེ་བཞིན་ཀུན་ནས་བསྲུངས་པར་གྱུར། །རྭ་དུང་པ་ཊ་ཧ་སྒྲ་རྔ་སྒྲ་ཡིས། །ཁྱམས་དང་རྟ་བབས་ཁང་བཟངས་ནང་གནས་ཤིང་། །གླང་ཆེན་རྟ་དམག་འབད་པའི་སྐྱེ་བོའི་ཚོགས། །རྒྱུན་དུ་ང་མི་བཏང་ཕྱིར་སྲུང་བར་བྱེད། །བརྒྱ་བྱིན་ གྱིས་གསོལ་པ། དེས་པ་མར་མེ་མཛད་ཀྱིས་ལུང་བསྟན་དང་། །སྡུག་བསྔལ་གྱིས་གདུངས་འཇིག་རྟེན་འདི་དང་ཡང་། །ཁྱོད་ཀྱི་སྔོན་གྱི་དམ་བཅས་དགོངས་མཛོད་ལ། །ཁབ་དག་སྤོངས་ཏེ་ངེས་པར་འབྱུང་བར་མཛོད། །ཇི་ལྟར་ཁྱོད་ནི་བགེགས་མེད་པར། །དེང་ཉིད་ནགས་སུ་གཤེགས་ འགྱུར་བ། །བདག་ཅག་ཚངས་སོགས་བཅས་པ་ཡི། །ལྷ་རྣམས་ཀྱིས་ནི་དེ་བཞིན་བགྱི། །བྱང་ཆུབ་སེམས་དཔས་ལེགས་སོ་ཞེས་གསུངས་ནས་ཐུགས་དགྱེས་པར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་གཉིད་ཀྱིས་མྱོས་པར་བྱས་ནས། གནོད་སྦྱིན་གྱི་སྡེ་དཔོན་ཆེན་ པོ་ལྔས་རྩེན་ལ་བསྒོ་བ། གྲོགས་པོ་བྱང་ཆུབ་སེམས་དཔའ་སྟེང་གི་ཁང་བཟངས་ནས་འབབས་ཀྱིས་སྐས་ལོང་ཤིག །དེས་སྐས་བླངས་པ་ལ་བྱང་ཆུབ་སེམས་དཔའ་འབབས་པ་དང་། དེ་ནས་བརྒྱ་བྱིན་གྱིས་བརྡ་བྱས་མ་ཐག་ཏུ་ཞབས་འབྲིང་བ་འདུན་པ་གང་ན་བ་དེར་གཤེགས་ནས། ཇི་

  641. 11a

    ཙམ་ན་འདུན་པ་གཉིད་སྟུག་པོས་ནོན་པར་གཟིགས་ནས་བྱང་ཆུབ་སེམས་དཔས་བསྒྲིམས་ཏེ་བསླང་ནས་ཚིགས་སུ་བཅད་པའི་དབྱངས་ཀྱིས་གསུངས་པ། འདུན་པ་ལོངས་ཀྱེ་ཁྱིམ་ནས་མྱུར་དུ་ནི། །ང་ཡི་རྟ་ཕོ་རིན་ཆེན་བསྔགས་ལྡན་ལོང་། །སྔོན་གྱི་རྒྱལ་བས་ ལོངས་སྤྱོད་དཀའ་ཐུབ་ཚལ། །ཐུབ་རྣམས་དགྱེས་པར་མཛད་པར་ངག་གཤེགས་སོ། །འདུན་པ་གཉིད་ལོག་པའི་མིག་ཕྱེ་ནས་སྨྲས་པ། ལྷ་ཁྱོད་སྐྱེད་མོས་ཚལ་གྱི་དུས་མ་བབ། །དེས་པ་ཁྱོད་དང་འགའ་ཡང་ཁོ་ན་མ་མཆིས། །ཁྱོད་ལ་དགྲ་བོ་སུ་ཡང་མ་མཆིས་ན། །དགུང་ཕྱེད་ཁྱོད་ལ་ བཅིབས་པས་ཅི་ཞིག་བགྱིད། །བྱང་ཆུབ་སེམས་དཔས་བཀའ་སྩལ་པ། འདུན་པ་ཁྱོད་ཀྱིས་ལན་འགའ་ཡང་། །ང་ཡི་ཚིག་ནི་མ་བཅག་ན། །ང་ཡི་དེང་དུས་ཐ་མ་ལ། །ང་ཡི་ཚིག་འདི་མ་གཅག་ཅིག །འདུན་པས་གསོལ་པ། གཞོན་ནུ་མཚན་མོ་འདི་ནི་འཇིགས་པ་དང་ འཇིགས་སུ་རུང་བ་མཆིས་པས་བདག་བཅིབས་པ་མི་ལེན་ནོ། །བྱང་ཆུབ་སེམས་དཔས་དགོངས་པ། ལན་དང་ཡང་ལན་གྱིས་གདོན་མི་ཟ་བར་སྐྱེ་བོ་སད་པར་འགྱུར་གྱིས་བདག་ཉིད་སོང་ལ་རྟའི་རྒྱལ་པོ་བསྔགས་ལྡན་སྟ་གོན་བྱའོ་སྙམ་ན། དེ་ནས་ཉིད་ཀྱིས་ཕོ་བྲང་གི་སྒོ་ཕྱེ་ནས་རྟའི་རྒྱལ་པོ་ བསྔགས་ལྡན་བཟུང་བར་བརྩམས་པ་ན་དེ་ཁྲོས་པའི་མེ་རབ་ཏུ་འབར་བས་རྐང་པ་འཕྲ། འཇིང་ཀྱོག་བྱེད་ལ་ཕར་བྲོས་ཚུར་བྲོས་ཤིང་འདུག་ཏུ་མི་བཏུབ་བོ། །དེ་ནས་བྱང་ཆུབ་སེམས་དཔའི་ཕྱག་བསོད་ནམས་བརྒྱ་ཕྲག་དུ་མས་བསྐྱེད་པ། འཁོར་ལོ་དང་བཀྲ་ཤིས་དང་། གཡུང་དྲུང་འཁྱིལ་ པ་མངའ་བ། སྐྲག་པ་རྣམས་ལ་དབུགས་འབྱིན་པར་མཛད་པས་མགོ་ལ་བྱུགས་ནས་གསུངས་པ། བསྔགས་ལྡན་ཐ་མ་ཡི་ནི་ཁུར་ལོང་སྟེ། །དཀའ་ཐུབ་ནགས་སུ་མ་ཐོགས་ང་སྐྱོལ་ཅིག །བྱང་ཆུབ་ཐོབ་ནས་མྱུར་དུ་འགྲོ་བ་ཀུན། །བསམ་གཏན་རྣམ་ཐར་ཆར་གྱིས་ཚིམ་པར་བྱ། ། ཆོས་ཉིད་ཀྱིས་དུད་འགྲོ་ཡང་གདམས་ན་ཕྱི་ལང་མི་བྱེད་པས་རྟའི་རྒྱལ་པོ་བསྔགས་ལྡན་མི་གཡོ་བར་འདུག་གོ། །དེ་ནས་བྱང་ཆུབ་སེམས་དཔའ་ཐུགས་དགྱེས་པ་སྐྱེས་ཏེ་རྟའི་རྒྱལ་པོ་བསྔགས་ལྡན་བསྟད་ནས་བཞེས་སོ། །བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཀྱིས་བྱང་ཆུབ་

  642. 11b

    སེམས་དཔའ་ཕྱིར་གཤེགས་པའི་ཕྱིར་ལྷའི་བུ་བཞི་པོ་བསྒོ་སྟེ་བཞག་པ། འགྲམ་དང་། ཉེ་འགྲམ་དང་། ལོ་མ་དང་། ལོ་མ་གྱོན་པའོ། །བྱང་ཆུབ་སེམས་དཔས་དེ་རྣམས་ལ་གསུངས་པ། ཤེས་ལྡན་དག་ང་སུས་བཀུར། དེ་རྣམས་ཀྱིས་གསོལ་པ། བདག་ཅག་གིས་བཀུར་ ལགས་སོ། །ཁྱེད་ཅག་ལ་སྟོབས་ཇི་ཙམ་ཡོད། གཅིག་གིས་གསོལ་པ། གཞོན་ནུ་བདག་གིས་ནི་སའི་རྡུལ་ཇི་སྙེད་མཆིས་པ་ཁུར་དུ་ཐོགས་ཏེ་མཆིའོ། །གཉིས་པས་གསོལ་པ། བདག་གིས་ནི་རྒྱ་མཚོ་ཆེན་པོ་བཞི་དང་། མཚོ་དང་མཚེའུ་དང་ལྟེང་ཀ་དང་། ཆུ་མིག་རྣམས་ ཀྱི་ཆབ་ཇི་སྙེད་མཆིས་པ་དེ་ཐམས་ཅད་ཁུར་དུ་ཐོགས་ཏེ་མཆིའོ། །གསུམ་པས་གསོལ་པ། བདག་གིས་ནི་ས་ལ་རི་ཇི་སྙེད་མཆིས་པ་དེ་ཐམས་ཅད་ཁུར་དུ་ཐོགས་ཏེ་མཆིའོ། །བཞི་པས་གསོལ་པ། བདག་གིས་ནི་ས་ལ་རྩྭ་དང་ཤིང་དང་ཡལ་ག་དང་ལོ་མ་ཇི་སྙེད་མཆིས་པ་དེ་ཐམས་ ཅད་ཁུར་དུ་ཐོགས་ཏེ་མཆིའོ། །དེ་ནས་བྱང་ཆུབ་སེམས་དཔས་ཞབས་ས་ལ་བཞག་པ་ན་དེ་རྣམས་ཀྱིས་བསྒུལ་བར་ཡང་མ་ནུས་ནས་ངོ་མཚར་སྐྱེས་ཏེ་གསོལ་པ། གཞོན་ནུ་བདག་ཅག་གིས་ནི་བྱང་ཆུབ་སེམས་དཔའ་རྣམས་ལ་སྟོབས་འདི་འདྲ་བ་མངའ་བར་མ་འཚལ་ཏོ། །གལ་ཏེ་འཚལ་ ན་བདག་ཅག་མི་མཆིས་པ་ལགས་པ་ཞིག །གཏམ་དེ་འདུན་པ་སྔར་སད་པས་ཐོས་ནས་བྱང་ཆུབ་སེམས་དཔའི་སྤྱན་སྔར་སོང་བ་དང་། དེ་ནས་བྱང་ཆུབ་སེམས་དཔའ་རྟའི་རྒྱལ་པོ་བསྔགས་ལྡན་ལ་བཅིབས། འདུན་པ་ཡང་འཕོངས་ལ་ཞོན་ནས་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ ཆུབ་སེམས་དཔའི་མཐུ་དང་། ལྷ་རྣམས་ཀྱིས་ལྷའི་མཐུས་རྟ་རིན་པོ་ཆེ་བསྔགས་ལྡན་སྟེང་གི་ནམ་མཁའ་ལས་མངོན་པར་འཕགས་པ་དང་ཕོ་བྲང་ན་གནས་པའི་ལྷ་རྣམས་བྱང་ཆུབ་སེམས་དཔའ་དང་བྲལ་བས་ངུ་བར་བརྩམས་སོ། །དེ་རྣམས་ངུ་བའི་མཆི་མའི་ཐིགས་པ་རྣམས་ལུས་དང་ས་ ལ་བབ་བོ། །འདུན་པས་གསོལ་པ། གཞོན་ནུ་ཆར་གྱི་ཐིགས་པ་དག་འབབ་ན་ཅི་ལྷས་དགུང་ཆར་ཕབ་བམ། བྱང་ཆུབ་སེམས་དཔས་གསུངས་པ། ལྷས་ཆར་ཕབ་པ་མ་ཡིན་ཏེ། འོན་ཀྱང་ཕོ་བྲང་ན་གནས་པའི་ལྷ་རྣམས་ང་དང་བྲལ་བས་ངུ་བར་བརྩམས་ཏེ། དེ་རྣམས་ཀྱི་

  643. 12a

    མཆི་མའི་ཐིགས་པ་རྣམས་ལུས་ལ་བབ་པ་ཡིན་ནོ། །དེ་ནས་འདུན་པ་མིག་མཆི་མས་གང་ཞིང་དབུགས་རིང་པོའི་ཤུགས་ནར་གྱིས་ཕྱུང་ནས་ཅང་མི་སྨྲ་བར་འདུག་གོ། །བྱང་ཆུབ་སེམས་དཔའ་སྐུ་ཐམས་ཅད་ཀྱིས་གླང་པོ་ཆེའི་གཟིགས་སྟངས་ཀྱིས་གཡས་ཕྱོགས་ སུ་གཟིགས་ཏེ་དགོངས་པ། ང་བུད་མེད་དང་ལྷན་ཅིག་ཁྱིམ་ན་ཉལ་བའི་ཐ་མ་ནི་འདི་ཡིན་ནོ་སྙམ་མོ། །ཡང་དགོངས་པ་གལ་ཏེ་ང་ཤར་སྒོ་སྤངས་ཏེ་སྒོ་གཞན་ནས་བྱུང་ན་གཞོན་ནུས་ནི་བདག་ལ་ཐ་མའི་དུས་ན་ཡང་མ་བལྟས་སོ་སྙམ་དུ་རྒྱལ་པོ་མི་དགའ་བར་འགྱུར་རོ་སྙམ་མོ། །ཇི་ཙམ་ ན་རྒྱལ་པོ་ཟས་གཙང་གཉིད་སྟུག་པོས་ནོན་པ་གཟིགས་ནས་དེས་དེ་ལ་བསྐོར་བ་མཛད་དེ་གསུངས་པ། ཡབ་གུས་པ་མ་མཆིས་པ་དང་། ཞེས་མ་མཆིས་པས་སྐྲག་ནས་མཆི་བ་ནི་མ་ལགས་ཏེ། གཞན་དུ་ན་འཇིག་རྟེན་རྒ་བ་དང་འཆི་བས་བཅོམ་པ་རྒ་བ་དང་འཆི་བའི་སྡུག་ བསྔལ་གྱིས་འཇིགས་པ་ལས་ཡོངས་སུ་དགྲོལ་བའི་སླད་དུ་ལགས་སོ། །ཇི་ཙམ་ན་ཤཱཀྱ་མིང་ཆེན་འགྲམ་པོ་བྱེད་པ་སྐྱེ་བོ་ཉུལ་ཞིང་ཕྱོགས་དེར་ཕྱིན་པ་དང་བྱང་ཆུབ་སེམས་དཔའ་གཤེགས་པར་ཆས་པ་མཐོང་ངོ་། །དེ་ནས་སྐད་འཛེར་ཅིང་མིག་མཆི་མས་གང་བས་སྨྲས་པ། གཞོན་ནུ་འདི་ཅི་མཛད། མིང་ཆེན་འགྲོའོ། །གཞོན་ནུ་འདི་ནི་རིགས་པ་མ་ལགས་སོ། །མིང་ཆེན་གང་གི་ཕྱིར་ངས་བསྐལ་པ་གྲངས་མེད་པ་གསུམ་དུ་དཀའ་བ་བརྒྱ་སྟོང་དུ་མས་སེམས་ཅན་རྣམས་ཀྱི་དོན་དུ་བྱང་ཆུབ་ཡང་དག་པར་བསྒྲུབས་པ་དེས་ན་དང་ཅི་ཁྱིམ་ན་འདུག་ཕོད་དམ། འདི་ནི་ངེས་ཏེ་དཀའ་ཐུབ་ཀྱི་ཚལ་དུ་འགྲོའོ། །དེ་ནས་གསུང་ཚིག་དྲག་པོས་ཤཱཀྱ་མིང་ཆེན་སྤྱོས་པ་དང་། ཆོ་ངེས་བཏབ་སྟེ་ཀྱི་ཧུད། དེང་དུ་རྒྱལ་པོ་ཟས་གཙང་དང་། །ཤཱཀྱ་དག་ནི་ཐམས་ཅད་ཀྱིས། །ཡང་དང་ཡང་དུ་བསམས་པ་ཡི། །རེ་བ་འབྲས་བུ་མེད་པར་གྱུར། །དེང་ དུ་རྒྱལ་པོ་ཟས་གཙང་ནི། །སྲས་ཀྱི་མྱ་ངན་གྱིས་གདུངས་པས། །ལག་བསྒྲེང་ཤིན་ཏུ་སྡུག་བསྔལ་ཞིང་། །མི་བཟད་སྒྲ་ནི་འབྱིན་པར་གྱུར། །ས་འཚོ་གྲགས་འཛིན་རི་དགས་སྐྱེས། །དེ་བཞིན་བཙུན་མོའི་འཁོར་རྒྱས་པའང་། །དོན་གྲུབ་དང་ནི་བྲལ་བ་ཡིས། །ཤིན་ཏུ་སྡུག་

  644. 12b

    བསྔལ་མྱོང་བར་གྱུར། །ཞེས་སྨྲས་ནས། དེ་སྔངས་པས་གྲགས་འཛིན་མ་བསླང་སྟེ་སྨྲས་པ། དོན་གྲུབ་འདི་ནི་གཤེགས་གྱུར་གྱིས། །ཁྱིམ་ཐབ་སྡུག་བསྔལ་གྱིས་གདུངས་ནས། །སྡུག་བསྔལ་ཉམ་ཐག་དུར་འོང་གིས། །ཁྱིམ་ཐབ་སྡུག་པ་དེ་ཟློག་ཤིག །ཁྱོད་ཀྱིས་ཁྱིམ་ ཐབ་གཤེགས་འགྱུར་འདི་ནི་མཐོང་དཀའ་སྟེ། །ཁྱོད་ཀྱིས་འདི་ལྟོས་ཁྱིམ་ཐབ་མཐོང་བའི་ཐ་མ་ཡིན། །ཀྱི་ཧུད་ཕོངས་པས་བདག་གིས་མཚན་མོ་ཀུས་བཏབ་ཀྱང་། །སུས་ཀྱང་ལན་མ་སྟེར་བས་བདག་གིས་མཉེས་སོ། །དེས་ནི་དེ་ལྟར་ཁུས་བཏབ་ཀྱང་། །འདི་ལྟར་ལྷ་རྣམས་བྱིན་ རླབས་ཀྱིས། །དགོན་པར་འོ་དོད་བོས་པ་བཞིན། །འགའ་ཡང་སད་པར་མ་གྱུར་ཏོ། །དེ་ནས་ཤཱཀྱ་མིང་ཆེན་སྡུག་བསྔལ་ཞིང་ཡིད་མི་བདེ་བས་གདུངས་ནས་དེ་རིངས་པར་རྒྱལ་པོ་ཟས་གཙང་གི་དྲུང་དུ་སོང་ནས་རྒྱལ་པོ་ཟས་གཙང་བསླང་སྟེ་སྨྲས་པ། དོན་གྲུབ་འདི་ནི་བཞུད་ལགས་ ཀྱིས། །ས་བདག་དེ་ནི་བཟློག་པར་མཛོད། །སྲས་ཀྱི་མྱ་ངན་གྱིས་ཐེབས་ནས། །སྡུག་བསྔལ་གྱིས་གདུངས་བཤུམས་འགྱུར་མཆིས། །མ་སྟེས་ཏེ་དེ་ཡང་གཉིད་མ་སད་དོ། །དེ་ནས་བརྒྱ་བྱིན་དང་། ཚངས་པ་ལ་སོགས་པ་ལྷ་རྣམས་ཀྱང་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ ནས་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་པ་དང་། བྱང་ཆུབ་སེམས་དཔའ་བསྐོར་ཅིང་དོང་སྟེ་གཡས་ཕྱོགས་ནས་གཟུགས་ན་སྤྱོད་པའི་ལྷ་རྣམས་སྤྱོད་ལམ་ཞི་བ་དང་། གཡོན་ཕྱོགས་ནས་འདོད་པ་ན་སྤྱོད་པའི་ལྷ་རྣམས་ཀྱིས་རྒྱལ་མཚན་དང་བ་དན་བསྒྲེང་ནས་ལྷའི་རོལ་མོའི་ཁྱད་ པར་སྣ་ཚོགས་དང་། མདུན་ནས་བརྒྱ་བྱིན་དང་ཚངས་པ་ལ་སོགས་པ་རང་རང་གི་སྤྱོད་ལམ་གྱིས་དོང་ངོ་། །ནམ་མཁའི་ངོས་ལ་གནས་པའི་ལྷ་བརྒྱ་སྟོང་ཕྲག་དུ་མས་ནི་བྱང་ཆུབ་སེམས་དཔའི་སྟེང་ནས་ལྷའི་མེ་ཏོག་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོ་ རྣམས་ཀྱིས་གཏོར་རོ། །ཨ་ག་རུའི་ཕྱེ་མ་དང་། ཙན་དན་གྱི་ཕྱེ་མ་དང་། ཏ་མ་ལའི་འདབ་མའི་ཕྱེ་མ་དང་། ལྷའི་མེ་ཏོག་མན་དཱ་ར་བས་ཀྱང་གཏོར་ཏོ། །ལྷའི་རོལ་མོའི་ཆ་བྱད་སྣ་ཚོགས་ཀྱང་བརྡུངས་སོ། །གོས་རྣམས་ཀྱང་གཏོར་རོ། །འདིར་སྨྲས་པ། མཁའ་ལ་ལྷ་རྣམས་གཞའི་

  645. 13a

    སྒྲ་ཆེན་འབྱིན་བྱེད་ལ། །དགའ་བའི་ཡིད་ཀྱིས་གོས་ཀྱི་གཡབ་མོས་འདེབས་བྱེད་ཅིང་། །ཁ་ཅིག་བྱང་ཆུབ་སེམས་དཔའ་ལ་ནི་སྟོད་བྱེད་དེ། །ནམ་མཁའ་ལ་ནི་སོར་མོ་བརྒྱ་ཕྲག་སྒྱུར་བར་བྱེད། །ཁ་ཅིག་དག་ནི་སྒོ་རྣམས་འབྱེད་བྱེད་ཅིང་། །མེ་ཏོག་མན་དཱ་ར་ བས་འཐོར་བར་བྱེད། །ཁ་ཅིག་དག་ནི་བཅིབས་པའི་རྐང་འཛིན་ཅིང་། །བདེ་བར་གཤེགས་པ་རྟོག་ཅིང་རྗེས་བཞིན་འབྲང་། །ཁ་ཅིག་དག་ཀྱང་གཡས་ནས་རྗེས་བཞིན་འབྲང་། །གཡོན་ནས་འགྲོ་བ་དག་ཀྱང་རྗེས་བཞིན་འབྲང་། །བརྒྱ་བྱིན་དེ་བཞིན་ཚངས་པར་བཅས་པ་དང་། ། ལུས་ངན་བདག་ཉིད་ཤུལ་ནི་མཚོན་པར་བྱེད། །ཟླ་བ་ཉ་བ་རྒྱུ་སྐར་ཚོགས་ཀྱིས་ལྟར། །བདག་ཉིད་ཆེན་པོ་ལྷ་ཚོགས་མདུན་བདར་ནས། །དཀའ་ཐུབ་ནགས་ནི་ཐུབ་རྣམས་དགྱེས་བྱེད་པ། །འཕགས་པ་དགྱེས་པའི་ནགས་སུ་ཐུགས་དགྱེས་གཤེགས། །དེ་ནས་བྱང་ཆུབ་སེམས་ དཔའ་གྲོང་ཁྱེར་སེར་སྐྱའི་གཞི་ནས་ཕྱིར་བྱུང་བ་དང་བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཡིད་དགའ་བས་སྤྲོ་བ་བསྐྱེད་པ། གྲོགས་པོ་ཁྱོད་ཡུན་རིང་པོ་ནས་ནམ་ཞིག་ནང་བགེགས་ལས་ཐར་ཏེ་དཀའ་ཐུབ་ཀྱི་ནགས་སུ་འགྲོ་བར་འགྱུར་སྙམ་དུ་དགོངས་པ་སྐྱེད་པ་གང་ལགས་པ་དེ་དེང་ དུ་ཡོངས་སུ་རྫོགས་པ་ལགས་ཀྱིས། ནམ་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དེའི་ཚེ། བདག་ཅག་ལ་ཡང་དགོངས་ཤིག །བྱང་ཆུབ་སེམས་དཔས་དེ་བཞིན་དུ་བྱའོ་ཞེས་དམ་བཅས་ནས་སྐུ་ཐམས་ཅད་ཀྱིས་གཡས་ ཕྱོགས་སུ་གླང་པོ་ཆེའི་ལྟ་སྟངས་ཀྱིས་གཟིགས་ནས། སངས་རྒྱས་རྣམས་ཀྱིས་བསྟན་པ་ཡི། །ལམ་གྱི་མཆོག་ནི་མ་ཐོབ་པར། །གྲོང་ཁྱེར་སེར་སྐྱའི་གཞིར་ནི་སླར། །ང་ནི་འཇུག་པར་མི་བྱའོ། །ཞེས་གསུངས་སོ། །དེ་ནས་བྱང་ཆུབ་སེམས་དཔའ་ཐུན་གཉིས་ཀྱི་དཔག་ཚད་བཅུ་ གཉིས་སུ་བྱོན་ནས་བཅིབས་པ་ལས་བབས་ཏེ་རྒྱན་བཀྲོལ་ནས་འདུན་པ་ལ་བཀའ་སྩལ་པ། འདུན་པ་རྒྱན་དང་རྟ་ཁྱེར་ལ་སླར་སོང་ཤིག །འདིར་སྨྲས་པ། ཁ་ལོ་སྒྱུར་ཁྱོད་ང་ཡི་རྟ་འདི་དང་། །རྒྱན་འདི་རྣམས་ཀྱང་གཉེན་པ་དག་ལ་བྱིན། །ང་ནི་འདོད་པ་རྒྱ་ཆེན་སྤངས་ནས་སུ། །ད་ལྟར་

  646. 13b

    འདི་ཉིད་དུ་ནི་རབ་བྱུང་བྱ། །དེ་ནས་འདུན་པ་གདོང་ལ་མཆི་མ་ཆར་བཞིན་འབབ་པས་བྱང་ཆུབ་སེམས་དཔའ་ལ་གསོལ་པ། སེང་གེ་སྟག་གིས་བལྟམ་པ་དང་། །ཕྱུགས་རྗེས་བལྟམ་པའི་ནགས་ཚལ་དུ། །འབའ་ཞིག་སྐུ་གཉེན་དང་བྲལ་ནས། །འཕགས་པ་ཇི་ལྟར་སྤྱོད་པར་འགྱུར། ། བྱང་ཆུབ་སེམས་དཔས་གསུངས་པ། སྐྱེ་དགུ་འདི་ནི་སྐྱེ་ནའང་གཅིག་པུ་སྟེ། །དེ་བཞིན་འཆི་ནའང་གཅིག་པུ་འཆི་བར་འགྱུར། །འདི་ནི་གཅིག་པུས་སྡུག་བསྔལ་མྱོང་འགྱུར་གྱི། །འཁོར་བ་ལ་ནི་གྲོགས་ཡོད་མ་ཡིན་ནོ། །འདུན་པས་གསོལ་པ། ཀྱེ་ཧུད་གཞོན་ནུས་སྡུག་བསྔལ་ མ་གཟིགས་ཏེ། །ཞབས་འཇམ་གླང་ཆེན་རྟ་ལ་བཅིབས་གོམས་པ། །ས་གཞི་རྩྭ་དང་རྡོ་བས་བལྟམ་རྩུབ་པར། །ཇི་ལྟར་ཞབས་ཀྱིས་གཤེགས་ཤིང་ནགས་སུ་རྒྱུ། །བྱང་ཆུབ་སེམས་དཔས་གསུངས་པ། འཆི་བདག་འཇིགས་པ་དེ་ནི་ལན་འགའ་ཡང་། །སྐྱིད་ལ་བརྩམས་མེད་ བདེ་བར་གོམས་ལ་མིན། །མགོན་བཅས་ལ་མིན་རིགས་བཙུན་ལ་མ་ཡིན། །དཔའ་དང་བརྩོན་མིན་སྐྱེ་བོ་དགའ་ལ་མིན། །དགའ་བས་འཆི་བདག་འཇིགས་པ་དག །བསྐྱེད་ནས་འོངས་པར་འགྱུར་ཞེས་གྲགས། །དོན་མ་བྱས་ཤིང་མ་བརྩམས་པར། །འཆི་བར་ཡང་ནི་འགྲོ་བར་ འགྱུར། །འདུན་པས་གསོལ་པ། ལྷ་རྒྱལ་པོ་བགྲེས་པོ་ནི་སྲས་ཀྱི་མྱ་ངན་གྱིས་འགྲོངས་པར་འགྱུར་རོ། །འོན་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་ཚོགས་བསགས་པའི་ཕྱིར་འདུན་པའི་ཚིག་ཐུགས་ལ་མ་བབ་བོ། །དེ་ནས་བྱང་ཆུབ་སེམས་དཔས་ཨུཏྤལ་སྔོན་པོ་འདྲ་བའི་རལ་ གྲི་ཤུབས་ནས་ཕྱུང་ནས་གཙུག་ཕུད་བྲེགས་ཏེ་སྟེང་གི་ནམ་མཁའ་ལ་བོར་བ་དང་ལྷ་རྣམས་ཀྱི་དབང་པོ་བརྒྱ་བྱིན་གྱིས་བླངས་ནས་བཀུར་སྟི་ཆེན་པོ་བྱས་ཏེ་སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཁྱེར་ནས་གཙུག་ཕུད་ཀྱི་མཆོད་པ་ཆེན་པོ་བཙུགས་སོ། །བྲམ་ཟེ་དང་ཁྱིམ་བདག་དད་པ་ཅན་ རྣམས་ཀྱིས་ཕྱོགས་དེར་དབུ་སྐྲ་བླངས་པའི་མཆོད་རྟེན་བརྩིགས་ཏེ་ད་དུང་ཡང་མཆོད་རྟེན་ལ་ཕྱག་བྱེད་པའི་དགེ་སློང་དག་ཕྱག་བྱེད་དོ།། །།འདུལ་བ་གཞི། བམ་པོ་བརྒྱད་བཅུ་བཞི་པ། བྱང་ཆུབ་སེམས་དཔས་གསུངས་པ། འདུན་པ་ཇི་སྙམ་དུ་སེམས། གང་ལ་

  647. 14a

    འདི་ལྟ་བུའི་བརྟུལ་བ་ཡོད་པ་དེ་ཅིག་ཡང་ཁྱིམ་ན་གནས་པར་འགྱུར་རམ། ལྷ་མ་ལགས་སོ། །འདུན་པས་བསམས་པ། གཞོན་ནུ་ནི་རྒྱལ་རིགས་ཀྱི་ང་རྒྱལ་ཅན་ཡིན་པས་འདི་ཕྱིར་བཟློག་པར་མི་ནུས་སོ་སྙམ་མོ། །དེ་ནས་རྟའི་རྒྱལ་པོ་བསྔགས་ལྡན་གྱིས་བྱང་ ཆུབ་སེམས་དཔའི་ཞབས་གཉིས་ལ་ལྕེས་བལྡགས་པ་དང་། བྱང་ཆུབ་སེམས་དཔའི་ཕྱག་འཁོར་ལོ་དང་། བཀྲ་ཤིས་དང་། གཡུང་དྲུང་འཁྱིལ་བ་མངའ་བས་བྱུགས་ནས་གསུངས་པ། བསྔགས་ལྡན་སོང་ཤིག་དང་། མངོན་པར་རྫོགས་པར་བྱང་ཆུབ་ནས་ཁྱོད་ཀྱི་བྱས་པ་ གཟོ་བར་འགྱུར་རོ། །འདུན་པ་ལ་ཡང་གསུངས་པ། ཁྱོད་ཀྱིས་བསྔགས་ལྡན་ཕོ་བྲང་དུ་མ་བཀྲི་ཤིག །དེ་སྐད་ཅེས་གསུངས་པ་དང་། འདུན་པ་སྐད་འཛེར་ཅིང་མིག་མཆི་མས་གང་ནས་རྟའི་རྒྱལ་པོ་བསྔགས་ལྡན་ཁྲིད་དེ་ཡང་དང་ཡང་དུ་བྱང་ཆུབ་སེམས་དཔའ་ལ་བལྟ་ཞིང་སོང་ངོ་། ། དེ་གཉིས་ཀྱིས་ཐུན་གཉིས་ཀྱིས་སོན་པའི་ས་གང་ཡིན་པ་དེ་ནས་ཞག་བདུན་གྱིས་ཕྱིར་འཁོར་ཏོ། །འདུན་པས་བསམས་པ། གལ་ཏེ་ལྷན་ཅིག་ཏུ་དོང་ན་སྨྲེ་སྔགས་ཆེན་པོས་བདག་ཤི་བར་འགྱུར་རོ་སྙམ་ནས་དེས་སྐྱེད་མོས་ཚལ་དུ་འདུག་ནས་བསྔགས་ལྡན་བཏང་ངོ་། །དེས་ སྐད་ཕྱུང་བ་དང་ཕོ་བྲང་གི་སྐྱེ་བོ་དང་སྐྱེ་བོའི་ཚོགས་གཞན་གྱིས་ཀྱང་སྐད་དེ་ཤེས་ནས་རེ་སྟེ་ཕྱིར་བྱུང་བ་ལས་བྱང་ཆུབ་སེམས་དཔའ་མ་མཐོང་ནས་བསྔགས་ལྡན་དེའི་མགུལ་དུ་འཇུས་ཏེ་ངུ་བར་བརྩམས་སོ། །འདི་ནི་ཆོས་ཉིད་ཡིན་ཏེ། དུད་འགྲོའི་སྐྱེ་གནས་སུ་སོང་བའི་སྲོག་ཆགས་ ཕལ་པ་གཞན་ལ་ཡང་ཀུན་རྫོབ་ཀྱི་ཤེས་པ་ཡོད་ན་རྟའི་རྒྱལ་པོ་བསྔགས་ལྡན་ལ་ལྟ་སྨོས་ཀྱང་ཅི་དགོས་པས་དེས་སྐྱེ་བོའི་ཚོགས་ཆེན་པོ་སྨྲེ་སྔགས་འདོན་པའི་སྒྲ་ཐོས་ཏེ་དབུགས་ཁོང་དུ་སོང་བ་ཉིད་ཀྱིས་བརྣངས་ཏེ་ཤི་ནས་དེ་སྒྲ་ཅན་གྱི་བྲམ་ཟེ་ལས་དྲུག་ལ་བརྩོན་པ་ཞིག་གི་རིགས་སུ་ ཉིང་མཚམས་སྦྱོར་བ་བླངས་སོ། །གང་གི་ཚེ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་བྱང་ཆུབ་པ་དེའི་ཚེ་དེ་ལ་དམུ་རྒོད་ཀྱི་གདམས་པས་གཏམས་ནས་འཁོར་བའི་དགོན་པ་ལས་བསྒྲལ་ཏེ་ཤིན་ཏུ་མཐར་ཕྱིན་པའི་གྲུབ་པ་དང་བདེ་བ་མྱ་ངན་

  648. 14b

    འདས་པ་ལ་འཇོག་པར་འགྱུར་རོ། །བྱང་ཆུབ་སེམས་དཔའ་ལ་ངུར་སྨྲིག་གིས་དགོས་པ་བྱུང་ནས་གྲོང་ཁྱེར་དཔེ་མེད་དུ་ཁྱིམ་བདག་ཕྱུག་པོ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་ གྱིས་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་སོ་ཞེས་བྱ་བ་ནས་དེ་ བཞིན་དུ་ཁྱེའུ་བཅུ་བཙས་སོ་ཞེས་བྱ་བའི་བར་དུ་སྟེ། དེ་དག་ཐམས་ཅད་རབ་ཏུ་བྱུང་ནས་རང་སངས་རྒྱས་ཀྱི་བྱང་ཆུབ་མངོན་སུམ་དུ་བྱས་སོ། །དེ་དག་གི་མ་རྒན་མོ་དེས་དེ་དག་ལ་ཤ་ནའི་གོས་དག་ཅིག་བྱིན་པ་དང་། དེ་རྣམས་ཀྱིས་སྨྲས་པ། ཡུམ་བདག་ཅག་ཡོངས་སུ་མྱ་ངན་ ལས་འདའ་བས་འདི་དག་བདག་ཅག་ལ་མི་དགོས་ཏེ་འོན་ཀྱང་རྒྱལ་པོ་ཟས་གཙང་གི་སྲས་གཞོན་ནུ་ཤཱཀྱ་ཐུབ་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འགྱུར་བ་ཞིག་ཡོད་ཀྱིས་འདི་དག་དེ་ལ་ཕུལ་ཅིག །དེས་ན་ཁྱོད་ཀྱིས་འབྲས་བུ་ཆེན་པོ་ ཐོབ་པར་འགྱུར་རོ་ཞེས་སྨྲས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །རྒན་མོ་དེས་ཀྱང་འཆི་ཁར་གོས་དེ་དག་ བུ་མོ་ལ་གཏད་ནས་ཇི་ལྟར་གྱུར་པ་རྣམས་སྨྲས་སོ། །དེའི་བུ་མོ་དེ་ཡང་ནད་ཀྱིས་ཐེབས་ཏེ་འཆི་བར་ཤེས་ནས་དེས་ཀྱང་ཤིང་དྲུང་ཞིག་ཏུ་བཞག་ནས་ཤིང་དེ་ལ་གནས་པའི་ལྷ་གང་ཡིན་པ་དེ་ལ་ཁྱོད་ཀྱིས་འདི་དག་རྒྱལ་པོ་ཟས་གཙང་གི་སྲས་ལ་ཕུལ་ཅིག་ཅེས་གསོལ་བ་བཏབ་བོ། །ལྷ་ རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་དེ་དག་ཤེས་ནས་བླངས་ཏེ། དེ་ནས་རྔོན་པ་རྒས་འཁོགས་པ་ལྟ་བུ་ཞིག་ཏུ་བདག་ཉིད་མངོན་པར་སྤྲུལ་ནས་དེ་དག་བགོས་ཏེ་ལག་ན་མདའ་གཞུ་ཐོགས་ནས་བྱང་ཆུབ་སེམས་དཔའ་གཤེགས་པའི་

  649. 15a

    ལམ་ཀར་བསྡད་པ་དང་། བྱང་ཆུབ་སེམས་དཔའ་ཡང་རིམ་གྱིས་ལམ་དེར་བྱོན་ནས་རྔོན་པ་ལག་ན་མདའ་གཞུ་ཐོགས་ཤིང་གོས་ངུར་སྨྲིག་གྱོན་པ་ཞིག་གཟིགས་སོ། །གཟིགས་ནས་ཀྱང་མི་དེ་ལ་གསུངས་པ། ཀྭའི་ནང་རྗེ་ཤ་ནའི་གོས་འོ་ནི་དག་ནི་ རབ་ཏུ་བྱུང་བ་ལ་འཚམ་པ་ཡིན་གྱིས། ཀ་ཤི་ཀའི་རས་ཕྲན་འདི་དག་ཁྱེར་ལ་འོ་ནི་དག་ང་ལ་བྱིན་ཅིག་དེས་གསོལ་པ། གཞོན་ནུ་བདག་ལ་གཞན་དག་ཁྱོད་ཀྱིས་རྒྱལ་བུ་གཞོན་ནུ་བཀྲོངས་ནས་ཀ་ཤི་ཀའི་རས་ཕྲན་གྱི་གོས་འདི་དག་བླངས་སོ་ཞེས་གཞི་དེས་གཡར་མཆི་བར་ འགྱུར་ལགས་པས་བདག་འདི་དག་མི་འབུལ་ལོ། །བྱང་ཆུབ་སེམས་དཔས་གསུངས་པ། ཀྱེ་ནང་རྗེ་ང་ནི་མཐུ་ཇི་ལྟ་བུ་དང་ལྡན་པ་འཇིག་རྟེན་ཐམས་ཅད་ཀྱིས་ཤེས་ཏེ་སུ་ཞིག་གིས་ང་དགྲོངས་པར་ནུས། ཁྱོད་ཀྱིས་ང་དགྲོངས་པར་སུ་ཞིག་ཡིད་ཆེས་ཀྱིས་བག་ཚ་བ་མེད་པར་ བྱིན་ཅིག །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ཞབས་གཉིས་ལ་གཏུགས་ནས་ཤ་ནའི་གོས་དག་ཕུལ་ཏེ་ཀ་ཤི་ཀའི་རས་ཕྲན་རྣམས་བླངས་སོ། །བྱང་ཆུབ་སེམས་དཔའི་སྐུ་དང་ཤ་ནའི་གོས་དེ་དག་འཚམ་པར་མ་གྱུར་པ་དང་དེ་འདི་སྙམ་དུ་དགོངས་ ཏེ། ཀྱེ་མའོ་ཤ་ནའི་གོས་རྣམས་བདག་གི་སྐུ་དང་འཚམ་པར་གྱུར་ཅིག་སྙམ་ནས་ཚིག་ཏུ་སྨྲས་མ་ཐག་ཏུ་ཤ་ནའི་གོས་དེ་དག་འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་མཐུ་དང་། ལྷ་རྣམས་ཀྱི་ལྷའི་མཐུས་བྱང་ཆུབ་སེམས་དཔའི་སྐུ་དང་འཚམ་པར་གྱུར་ ཏོ། །བྱང་ཆུབ་སེམས་དཔས་དགོངས་པ། ད་ནི་བདག་རབ་ཏུ་བྱུང་ཟིན་གྱིས། འགྲོ་བ་རྣམས་རྗེས་སུ་གཟུང་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའི་ཀ་ཤི་ཀའི་རས་ཕྲན་གྱི་གོས་དེ་དག་ལྷ་རྣམས་ཀྱི་དབང་པོ་བརྒྱ་བྱིན་གྱིས་བླངས་ནས་སུམ་བཅུ་རྩ་གསུམ་གྱི་ལྷ་རྣམས་ ཀྱི་ནང་དུ་ཀ་ཤི་ཀའི་མཆོད་པ་ཆེན་པོ་བཙུགས་སོ། །བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་ཀྱང་ཕྱོགས་དེར་ངུར་སྨྲིག་བླངས་པ་ཞེས་བྱ་བའི་མཆོད་རྟེན་བརྩིགས་ཏེ་ད་དུང་དུ་ཡང་མཆོད་རྟེན་ལ་ཕྱག་འཚལ་བའི་དགེ་སློང་དག་ཕྱག་བྱེད་དོ། །དེ་ནས་བྱང་ཆུབ་སེམས་དཔའ་

  650. 15b

    དབུ་སྐྲ་བྲེགས་ཤིང་ན་བཟའ་ངུར་སྨྲིག་མནབས་ཏེ་དཀའ་ཐུབ་ཀྱི་ནགས་སུ་ཕན་ཚུན་རྒྱུ་ཞིང་དྲང་སྲོང་ངན་སྤོང་གི་བུའི་བསྟི་གནས་སུ་གཤེགས་པ་དང་། དེའི་ཚེ་དྲང་སྲོང་ངན་སྤོང་གི་བུ་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག་པ་དེ་ལྟ་བུ་དེ་བྱང་ཆུབ་སེམས་དཔས་གཟིགས་ ནས་གསུངས་པ་དྲང་སྲོང་ཆེན་པོ་ཅིའི་ཕྱིར་ལག་པ་ལ་འགྲམ་པ་གཏད་ནས་སེམས་ཁོང་དུ་ཆུད་ཅིང་འདུག །དེས་གསོལ་པ། བདག་གི་བསྟི་གནས་འདི་ན་ཤིང་ཏ་ལ་རྣམས་གསེར་གྱི་ལོ་མ་དང་། མེ་ཏོག་དང་། འབྲས་བུ་ཆགས་པ་ལས་དེ་རྣམས་སྔ་མཁོ་བཞིན་དུ་མ་གྱུར་ཏོ། །བྱང་ཆུབ་ སེམས་དཔས་གསུངས་པ། དྲང་སྲོང་ཆེན་པོ་གང་གི་མཐུས་བསྟི་གནས་འདི་ནི་ཤིང་ཏ་ལ་རྣམས་གསེར་གྱི་ལོ་མ་དང་། མེ་ཏོག་དང་། འབྲས་བུར་ལྡན་པ་དེ་རྒ་བ་དང་། ན་བ་དང་། འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པས་སོ། །གལ་ ཏེ་དེས་རྒ་བ་དང་། ན་བ་དང་། འཆི་བ་ཡང་དག་པར་མཐོང་ནས་ཡིད་བྱུང་སྟེ་དཀའ་ཐུབ་ཀྱི་ནགས་སུ་གནས་པར་མ་གྱུར་ན། སྐྱེད་མོས་ཚལ་འདི་དེའི་ཡིན་པར་འགྱུར་བ་ཞིག །དེ་སྐད་ཅེས་གསུངས་པ་དང་། དྲང་སྲོང་ཆེན་པོ་ངན་སྤོང་གི་བུས་བྱང་ཆུབ་སེམས་དཔའ་ལ་བརྟག་ པར་བརྩམས་སོ། །དེ་ནས་གཟུགས་བཟང་ཞིང་ཞི་བའི་ཆ་བྱད་དུ་མཐོང་ནས་ཡུན་རིང་དུ་བརྟགས་ཏེ་ངོ་མཚར་སྐྱེས་ནས་གསོལ་པ། ཀྱེ་རབ་ཏུ་བྱུང་བ་དེ་ཁྱོད་ཁོ་ན་མ་ལགས་གྲང་། བྱང་ཆུབ་སེམས་དཔས་གསུངས་པ། དྲང་སྲོང་ཆེན་པོ་དེ་ལྟར་ངེས་སོ། །ད་ནས་ངན་སྤོང་གི་བུ་ ཡ་མཚན་སྐྱེས་པའི་མིག་བགྲད་དེ་བལྟས་ནས། བྱང་ཆུབ་སེམས་དཔའ་ཐོག་མར་གདན་ལ་སྤྱན་དྲངས་ཏེ་མེ་ཏོག་དང་། འབྲས་བུ་བསྟབས་སོ། །དེ་ལྟར་ཀུན་དུ་དགྱེས་པར་བྱས་པ་དང་བྱང་ཆུབ་སེམས་དཔས་སྐད་ཅིག་གཅིག་བཞེས་ནས་གསུངས་པ། དྲང་སྲོང་ཆེན་པོ་འདི་ ནས་གྲོང་ཁྱེར་སེར་སྐྱའི་གཞིར་ཇི་སྲིད་ཡོད། དེས་གསོལ་པ། དཔག་ཚད་བཅུ་གཉིས་མཆིས་སོ། །བྱང་ཆུབ་སེམས་དཔས་དགོངས་པ། གྲོང་ཁྱེར་སེར་སྐྱའི་གཞི་ཉེའོ། །འདིར་གནས་པ་ནི་རུང་བ་མ་ཡིན་ཏེ། ཤཱཀྱ་རྣམས་ཀྱིས་གྲོང་གི་འཁྲུག་པ་བྱེད་པར་འགྱུར་གྱིས།

  651. 16a

    མ་ལ་བདག་གང་གཱ་རྒལ་ལོ་སྙམ་ནས་དེ་གང་གཱ་རྒལ་ནས་མཐར་གྱིས་རྒྱུ་ཞིང་གཤེགས་པ་དང་རྒྱལ་པོའི་ཁབ་ཏུ་བྱོན་ཏོ། །བྱང་ཆུབ་སེམས་དཔའ་ནི་བཟོའི་གནས་དང་། ལས་ཀྱི་གནས་དེ་དང་། དེ་རྣམས་ལ་མཁས་པ་ཡིན་པས་དེས་ཤིང་ཀ་ར་བཱི་རའི་ལོ་མ་ ལས་ལྷུང་བཟེད་བྱས་ནས་སྤྱོད་ལམ་ཞི་བས་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་ཞུགས་སོ། །དེའི་ཚེ་རྒྱལ་པོ་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞི་ན་འདུག་པ་དེས་དེ་འགྲོ་བ་དང་། ལྡོག་པ་དང་། ལྟ་བ་དང་། རྣམ་པར་ལྟ་བ་དང་། བསྐུམ་པ་ དང་། བརྐྱང་བ་དང་། ཆོས་གོས་སྣམ་སྦྱར་དང་། ལྷུང་བཟེད་ཐོགས་པ་མཛེས་པས་བསོད་སྙོམས་སྤྱོད་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། རྒྱལ་པོའི་ཁབ་ན་རབ་ཏུ་བྱུང་བ་ཇི་སྙེད་ཅིག་གནས་པ་ལ་ཇི་ལྟར་རབ་ཏུ་བྱུང་བ་འདིའི་སྤྱོད་ལམ་དེ་ ལྟ་བུ་ནི་འགའ་ཡང་མེད་དོ་སྙམ་ནས་འདིར་སྨྲས་པ། ཇི་ལྟར་མིག་ཅན་འགྲོ་བ་ལྟར། །རབ་ཏུ་བྱུང་བ་བསྒྲགས་པར་བྱ། །འདི་ནི་བརྟགས་པར་མཛད་ནས་སུ། །རབ་ཏུ་བྱུང་བ་ཡང་དག་བཞེད། །ཁྱིམ་གནས་འདི་ནི་སྡུག་བསྔལ་ཏེ། འདི་ནི་རྡུལ་གྱི་གནས་ཡིན་ ཞིང་། །རབ་ཏུ་བྱུང་བ་བར་སྣང་ལྟར། །མཁྱེན་ནས་དེ་ཚེ་རབ་ཏུ་བྱུང་། །རབ་ཏུ་བྱུང་ནས་སྐུ་ཡི་ནི། །སྡིག་པའི་ལས་ནི་སྤངས་པ་དང་། །གསུང་གི་སྡིག་པ་སྤངས་ནས་ནི། །འཚོ་བ་ཀུན་ནས་དག་པར་མཛད། །དེ་ནས་མ་ག་དྷཱ་ཡི་ནི། །གྲོང་མཆོག་རྒྱལ་པོའི་ ཁབ་གཤེགས་ནས། །མགོན་པོ་ཤེས་བཞིན་དྲན་ལྡན་པས། །བསོད་སྙོམས་ཕྱིར་ནི་གཤེགས་པ་དེ། །བཟོ་སྦྱངས་མ་ག་དྷཱ་ཡི་བདག །ཁང་བཟངས་ན་ནི་འདུག་པས་མཐོང་། །མཐོང་ནས་སེམས་དད་དེ་ནས་ནི། །བློན་པོ་རྣམས་ལ་འདི་སྐད་སྨྲས། །མཚན་ མཆོག་གི་ནི་རྒྱས་གྱུར་ཅིང་། །ཁོ་ལག་ཕུན་སུམ་ཚོགས་པ་དང་། །གཉའ་ཤིང་གང་དུ་ལྟ་བ་ཡི། །འདི་ལ་ཤེས་ལྡན་དག་ལྟོས་ཤིག །སྤྱན་མི་འདེག་ལ་ཡིད་གཞུངས་ཤིང་། །དམན་པའི་རིགས་ལས་མ་འཁྲུངས་འདི། །གང་དུ་གནས་པར་གཤེགས་གྱུར་

  652. 16b

    པ། །རྒྱལ་པོས་ཕོ་ཉ་རྗེས་བཞིན་བཏང་། །དེ་ནས་ཕོ་ཉ་ལ་བསྒོ་བ། །དགེ་སློང་དེ་ནི་གར་འགྲོ་ཞིང་། །གང་དུ་གནས་ནི་བཏབ་པ་ཡི། །རྗེས་བཞིན་དུ་ནི་འབྲང་བར་གྱིས། །དེ་ནི་བསོད་སྙོམས་གཤེགས་པ་ན། །སྒོ་དྲུག་ལེགས་པར་བསྡམས་ནས་ནི། །ཤེས་ བཞིན་དྲན་དང་ལྡན་པ་ཡིས། །ལྷུང་བཟེད་མྱུར་དུ་གང་བར་མཛད། །བསོད་སྙོམས་སྤྱད་པ་བྱས་ནས་ཀྱང་། །ཐུབ་པ་གྲོང་ཁྱེར་ཕྱིར་བྱུང་ནས། །སྐྱ་བསེང་ལས་ནི་མངོན་གཤེགས་ཏེ། །དེ་ལ་གནས་ནི་བཏབ་པར་གྱུར། །གནས་བཏབ་པ་ནི་ཤེས་ནས་ཀྱང་། །ཕོ་ཉ་ གཅིག་གིས་བསྡད་བྱས་ནས། །གཞན་ནི་མྱུར་དུ་སླར་ལོག་སྟེ། །རྒྱལ་པོ་ལ་ནི་ཚིག་སྨྲས་པ། །རྒྱལ་པོ་ཆེན་པོ་དགེ་སློང་དེ། །སེང་གེའམ་སྟག་གི་ཕྲུ་གུ་དང་། །རི་སུལ་དག་ན་གནས་པ་ལྟར། །སྐྱ་བསེང་གི་ནི་སྟེང་ན་གནས། །ཕོ་ཉ་རྣམས་ཀྱི་ཚིག་ཐོས་ནས། ། ས་བདག་ཤིང་དྲུང་ཞུགས་ནས་ནི། །དེ་ནི་བློན་པོས་ཡོངས་བསྐོར་ནས། །མྱུར་དུ་ཁོ་ནར་དོང་བར་གྱུར། །བཞོན་པས་བགྲོད་པའི་སར་ཞོན་ཏེ། །དེ་ནི་བཞོན་པ་ལས་བབ་ནས། །རྐང་གིས་ཉེ་བར་སོང་ནས་ནི། །དེ་ནས་དེ་བཞིན་གཤེགས་པ་མཐོང་། །རྒྱལ་པོས་ འདུག་ནས་དགྱེས་པ་དང་། །མགུ་བར་འགྱུར་བའི་གཏམ་གསོལ་ནས། དེ་ནི་མ་ཁེངས་མི་བརླང་བར། །དོན་འདི་དག་ནི་རབ་སྨྲས་སོ། །དགེ་སློང་ལང་ཚོ་དང་པོ་ལ། །བང་བར་ཡང་དག་གནས་གྱུར་ཅིང་། །འདི་འདྲ་གཟི་བརྗིད་ལྡན་པ་ལ། །བསོད་སྙོམས་སྤྱོད་པ་ མཛེས་མ་ལགས། །ཁང་པ་ཉམས་དགའ་དག་དང་ནི། །བུད་མེད་རྒྱན་གྱིས་བརྒྱན་པ་དང་། །ལོངས་སྤྱོད་མཆོག་ནི་ཁྱོད་གསོལ་ན། །ཉིད་ཀྱི་གདུང་ནི་ཞུ་ཡིས་གསུངས། །རྒྱལ་པོ་གངས་རི་ཉེ་བ་ན། །ཡུལ་གྱི་ལྗོངས་ནི་ནོར་དག་དང་། །འབྲུ་དག་གིས་ནི་གང་གྱུར་ པ། །ཀོ་ས་ལ་ཞེས་གྲགས་པ་ཡོད། །བུ་རམ་ཤིང་པ་ཉི་མའི་རུས། །ཤཱཀྱ་དག་ནི་དེ་ན་གནས། །རྒྱལ་པོ་ངའི་རིགས་རྒྱལ་རིགས་ཏེ། །ང་ནི་འདོད་པ་དོན་མི་གཉེར། །ས་འདི་རི་དང་བཅས་ཤིང་རྒྱ་མཚོར་བཅས། །རིན་ཆེན་ཀུན་དང་ལྡན་པ་བསྐྱངས་གྱུར་ཀྱང་། །

  653. 17a

    མི་ནི་ནམ་ཡང་ངོམས་པར་མི་འགྱུར་ཏེ། །སོ་ག་ཚ་དུས་ཤིང་གིས་མེ་བཞིན་ནོ། །འདོད་པ་རྣམས་ནི་ཤ་ཁོ་ན་འབྲེལ་ཅེས་གསུངས། །མི་དབང་རྒལ་བར་དཀའ་ཞིང་འདམ་རྫབ་འདྲ། །སྡུག་བསྔལ་དང་ནི་མྱ་ངན་འཇིགས་པ་ཡི། །རྩ་བའི་གཙོ་སྟེ་བློ་ངན་ རྣམས་ཀྱིས་བསྟན། །རྒྱལ་པོ་ངས་ནི་བྱུང་མ་ཐག་ཏུ་ཡང་། །འདོད་པ་རྣམས་ལ་མི་དགའི་བློ་བསྐྱེད་ན། །འཇིགས་བྱེད་ཆོས་ཀྱི་དགྲ་བོར་གྱུར་པ་དག །བོར་བ་དེ་ཁོ་སླར་ཡང་ཇི་ལྟར་བླང་། །རྩེ་མོ་སྣ་ཚོགས་ཡངས་པར་གྱུར་པ་ཡི། །ལྷུན་པོ་གངས་ཅན་རླུང་གིས་བསྐྱོད་ སྲིད་ཀྱི། །ང་ཡི་བློ་ནི་ཐར་པ་ལ་བརྟེན་པ། །འདོད་པའི་ཤུགས་ཀྱིས་བསྐྱོད་པར་མི་ནུས་སོ། །འཇིག་རྟེན་འདི་ནི་འདོད་པར་བྱིང་གྱུར་ནས། །འཁོར་བའི་འཁོར་ལོས་ཡོངས་སུ་འཁྱམ་པ་ལ། །མི་དབང་ང་སྐྱབས་ཡིན་ཏེ་གཞན་མེད་པས། །འཇིགས་པ་ཆེ་ལས་དེ་ནི་ ཐར་བར་བྱ། །འདོད་པ་རྣམས་ཀྱི་ཉེས་དམིགས་མཁྱེན། །མྱ་ངན་འདས་པ་ཞི་བ་གཟིགས། །སྤང་ཕྱིར་གང་དུ་ང་ཡི་ཡིད། །དགའ་བ་དག་ཏུ་འགྲོ་བར་བྱ། །རྒྱལ་པོ་གཟུགས་ཅན་སྙིང་པོས་གསོལ་པ། ཀྱེ་རབ་ཏུ་བྱུང་བ་བརྟུལ་ཞུགས་འདིས། ཅི་ཞིག་དོན་ དུ་གཉེར། དེས་གསུངས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །རྒྱལ་པོས་གསོལ་པ། ཀྱེ་རབ་ཏུ་བྱུང་བ་གང་གི་ཚེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པར་གྱུར་པ་དེའི་ཚེ་བདག་ལ་ཡང་དགོངས་ཤིག །བྱང་ ཆུབ་སེམས་དཔས་གསུངས་པ། དེ་བཞིན་དུ་བསམ་པར་བྱའོ་ཞེས་གསུངས་ནས། རྒྱལ་པོའི་ཁབ་ནས་བྱུང་སྟེ་བྱ་རྒོད་ཀྱི་ཕུང་པོའི་རི་དང་ཧ་ཅང་ཡང་མི་རིང་བར་དྲང་སྲོང་རྣམས་ཀྱི་བསྟི་གནས་དེར་གཤེགས་སོ། །དེ་རྣམས་སྤྱོད་པ་དང་གནས་པས་བསམ་གཏན་ལ་བརྩོན་ པར་གནས་ཏེ། དེ་རྣམས་གང་གི་ཚེ་རྐང་པ་གཅིག་གིས་ཉིན་ཐུན་གཅིག་འགྲེང་བ་དེའི་ཚེ་བྱང་ཆུབ་སེམས་དཔའ་ཐུན་གཉིས་སུ་བཞེངས་སོ། །གལ་ཏེ་དེ་རྣམས་གདུང་བ་ལྔའི་སྦྱོར་བས་ཉིན་ཐུན་གཅིག་འདུག་པ་དེའི་ཚེ་བྱང་ཆུབ་སེམས་དཔས་ཀྱང་སྦྱོར་བ་དེས་ཐུན་གཉིས་སུ་

  654. 17b

    བཞུགས་སོ། །དེ་ནས་དེ་རྣམས་ཡ་མཚན་སྐྱེས་ནས་དགེ་སྦྱོང་འདི་ནི་ཆེན་པོ་ཞིག་གོ་ཞེས་སྨྲས་པས་དགེ་སྦྱོང་ཆེན་པོ་དགེ་སྦྱོང་ཆེན་པོ་ཞེས་བྱ་བར་གྱུར་ཏོ། །བྱང་ཆུབ་སེམས་དཔས་དེ་རྣམས་ལ་སྨྲས་པ། ཤེས་ལྡན་དག་ཁྱེད་བརྟུལ་ཞུགས་འདིས་ཅི་ཞིག་དོན་དུ་གཉེར། །དེ་ ན་ཁ་ཅིག་གིས་གསོལ་པ། བརྒྱ་བྱིན་ཉིད་དོ། །ཁ་ཅིག་གིས་གསོལ་པ། བདག་ཅག་ནི་ཚངས་པ་ཉིད་དོ། །ཁ་ཅིག་གིས་གསོལ་པ། བདུད་ཉིད་དོ། །བྱང་ཆུབ་སེམས་དཔས་དགོངས་པ། དྲང་སྲོང་འདི་དག་ནི་སླར་ལྟུང་བ་ལམ་ལོག་པར་ཞུགས་པ་སྟེ། ལམ་དེ་ནི་ནུས་པ་མ་ ཡིན་ནོ་སྙམ་ནས་དེ་སྒྱུ་རྩལ་ཤེས་ཀྱི་བུ་རིང་དུ་འཕུར་གང་ན་བ་དེར་གཤེགས་ཏེ་བྱོན་པ་དང་། སྒྱུ་རྩལ་ཤེས་ཀྱི་བུ་རིང་དུ་འཕུར་ལ་འདི་སྐད་ཅེས་གསུངས་སོ། །རིང་དུ་འཕུར་གལ་ཏེ་ཁྱོད་ལ་མི་བདེ་བ་མེད་ན་ཁྱོད་ཀྱི་དྲུང་དུ་ཁོ་བོ་ཚངས་པར་སྤྱོད་པ་སྤྱད་དོ། །དེས་སྨྲས་པ། ཚེ་དང་ལྡན་ པ་གཽ་ཏ་མ་བདག་ལ་མི་བདེ་བ་མེད་ཀྱིས། ཁྱོད་ཅི་བདེ་བ་ཁོ་ནར་བཞུགས་ཤིག །བྱང་ཆུབ་སེམས་དཔས་གསུངས་པ། རིང་དུ་འཕུར་ཁྱོད་ཀྱིས་ཆོས་ཇི་སྙེད་ཅིག་རྟོགས་པར་གྱུར། དེས་གསོལ་པ། ཚེ་དང་ལྡན་པ་གཽ་ཏ་མ་ཅི་ཡང་མེད་པའི་སྐྱེ་མཆེད་ཀྱི་བར་དུའོ། །དེ་ནས་ བྱང་ཆུབ་སེམས་དཔའ་འདི་སྙམ་དུ་དགོངས་ཏེ། སྒྱུ་རྩལ་ཤེས་ཀྱི་བུ་རིང་དུ་འཕུར་དད་པ་དེ་ལ་ནི་ང་ཡང་དད་ལ། སྒྱུ་རྩལ་ཤེས་ཀྱི་བུ་རིང་དུ་འཕུར་ལ་བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཡོད་པ་ལྟར་བདག་ལ་ཡང་བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཡོད་པས་སྒྱུ་རྩལ་ཤེས་ཀྱི་བུ་རིང་དུ་འཕུར་གྱིས་ཅི་ཡང་མེད་པའི་སྐྱེ་མཆེད་ཀྱི་བར་དུ་ཆོས་དེ་སྙེད་མངོན་སུམ་དུ་བྱས་ན། ཅིའི་ཕྱིར་བདག་གིས་ཀྱང་ཆོས་འདི་དག་མངོན་སུམ་དུ་མི་བྱ་སྙམ་ནས། དེ་ནས་བྱང་ཆུབ་སེམས་དཔས་ཆོས་དེ་རྣམས་ཁོ་ན་མ་ཐོབ་པ་ ཐོབ་པར་བྱ་བའི་ཕྱིར་དང་། མ་རྟོགས་པ་རྟོགས་པར་བྱ་བའི་ཕྱིར་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་གཅིག་པུ་དབེན་པ་བག་ཡོད་པ། རྟུན་པ་དང་ལྡན་པ། བདག་ཉིད་གཏོད་པར་གནས་ཏེ་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་

  655. 18a

    གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་དག་མངོན་སུམ་དུ་མཛད་པར་གྱུར་ཏོ། །ཆོས་དེ་དག་མངོན་སུམ་དུ་མཛད་ནས་ཡང་སྒྱུ་རྩལ་ཤེས་ཀྱི་བུ་རིང་དུ་འཕུར་གང་ན་བ་དེར་གཤེགས་ཏེ་བྱོན་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་ལ་འདི་སྐད་ཅེས་གསུངས་སོ། ། རིང་དུ་འཕུར་ཁྱོད་ཀྱིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་འདི་དག་རང་གི་མངོན་པར་ཤེས་པས་མངོན་སུམ་དུ་བྱས་སམ། དེས་འདི་སྐད་ཅེས་སྨྲས་སོ། །ཚེ་དང་ལྡན་པ་གཽ་ཏ་མ་མད་དེ། བདག་གིས་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་མངོན་སུམ་དུ་བྱས་སོ། ། བྱང་ཆུབ་སེམས་དཔས་གསུངས་པ། ཚེ་དང་ལྡན་པ་རིང་དུ་འཕུར་བདག་གིས་ཀྱང་ཅི་ཡང་མེད་པའི་སྐྱེ་མཆེད་ཀྱི་བར་གྱི་ཆོས་དེ་དག་རང་གི་མངོན་པར་ཤེས་པས་མངོན་སུམ་དུ་བྱས་སོ། །ཚེ་དང་ལྡན་པ་གཽ་ཏ་མ་དེ་ལྟ་ན་ཁྱོད་ཀྱི་ཇི་ཙམ་པ་བདག་གི་ཡང་དེ་ཙམ་ལ། བདག་གི་ཇི་ཙམ་ པ་ཁྱོད་ཀྱི་ཡང་དེ་ཙམ་པས་དོན་འདི་ལའོ་སྐོལ་མཚུངས་ཤིང་མཉམ་སྟེ་འདྲ་བར་ཐོབ་ཀྱིས་ཚུར་སྤྱོན་འོ་སྐོལ་གཉི་གས་འཁོར་འདི་ཡོངས་སུ་དྲང་བར་བགྱིའོ། །དེ་ནས་སྒྱུ་རྩལ་ཤེས་ཀྱི་བུ་རིང་དུ་འཕུར་བྱང་ཆུབ་སེམས་དཔའི་ཐོག་མའི་སློབ་དཔོན་ཉིད་ཀྱིས་བྱང་ཆུབ་སེམས་དཔའ་ ལ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་དོ། །དེའི་རྟོགས་པ་དག་ལ་ཡང་དགའ་བ་དང་མགུ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ནི་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་ དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་དཔས་ལམ་དེ་ནུས་པ་མེད་པར་རིག་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་ནས་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ། །ལྷག་སྤྱོད་གལ་ཏེ་ཁྱོད་ལ་མི་ བདེ་བ་མེད་ན་ཁྱོད་ཀྱི་དྲུང་དུ་ང་ཚངས་པར་སྤྱོད་པ་སྤྱད་དོ། །དེས་གསོལ་པ་ཚེ་དང་ལྡན་པ་གཽ་ཏ་མ་བདག་ལ་མི་བདེ་བ་མེད་ཀྱིས་ཁྱོད་ཅི་བདེ་བ་ཁོ་ནར་བཞུགས་ཤིག །ཁྱོད་ཀྱིས་ཆོས་ཇི་སྙེད་ཅིག་མངོན་སུམ་དུ་བྱས་ཚེ་དང་ལྡན་པ་གཽ་ཏ་མ་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་

  656. 18b

    ཀྱི་བར་དུའོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། རངས་བྱེད་ཀྱི་བུ་ལྷག་སྤྱོད་དད་པ་ལ་ནི་བདག་ཀྱང་དད་ལ་རངས་བྱེད་ཀྱི་བུ་ལྷག་སྤྱོད་ལ་བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཡོད་པ་ལྟ་བུའི་བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ནི་བདག་ལ་ཡོད་ན་རངས་ཁྱེད་ཀྱི་བུ་ལྷག་སྤྱོད་ཀྱིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་སྙེད་ཅིག་མངོན་སུམ་དུ་བྱས་ན་བདག་གིས་ཀྱང་ཅིའི་ཕྱིར་ཆོས་འདི་དག་མངོན་སུམ་དུ་མི་བྱ་སྙམ་མོ། །དེ་ནས་བྱང་ཆུབ་སེམས་དཔས་ཆོས་ དེ་རྣམས་ཁོ་ན་མ་ཐོབ་པ་ཐོབ་པར་བྱ་བའི་ཕྱིར་དང་། མ་རྟོགས་པ་རྟོགས་པར་བྱ་བའི་ཕྱིར་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོད་པར་གནས་ཏེ། གཅིག་པུ་དབེན་པ་བག་ཡོད་པ་རྟུན་པ་དང་ལྡན་ པ། བདག་ཉིད་གཏོད་པར་གནས་པ་ན་རིང་པོ་མ་ཐོགས་པ་ཁོ་ནར་ཆོས་དེ་མངོན་སུམ་དུ་མཛད་པར་གྱུར་ཏོ། །ཆོས་དེ་མངོན་སུམ་དུ་མཛད་ནས་རངས་བྱེད་ཀྱི་བུ་ལྷག་སྤྱོད་གང་ན་བ་དེར་གཤེགས་ཏེ་བྱོན་པ་དང་རངས་བྱེད་ཀྱི་བུ་ལྷག་སྤྱོད་ལ་འདི་སྐད་ཅེས་གསུངས་སོ། །ལྷག་སྤྱོད་ཁྱོད་ ཀྱིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་དུ་ཆོས་འདི་དག་རང་གིས་མངོན་སུམ་དུ་བྱས་སམ། ཚེ་དང་ལྡན་པ་གཽ་ཏ་མ་མད་ལགས་ཏེ་བདག་གིས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་དག་མངོན་སུམ་དུ་བགྱིས་སོ། །བྱང་ཆུབ་སེམས་དཔས་ གསུངས་པ། ཚེ་དང་ལྡན་པ་ལྷག་སྤྱོད་བདག་གིས་ཀྱང་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་བར་གྱི་ཆོས་འདི་དག་རང་གིས་མངོན་སུམ་དུ་བྱས་སོ། །ཚེ་དང་ལྡན་པ་གཽ་ཏ་མ་དེ་ལྟ་ན་ཁྱོད་ཀྱི་ཇི་ཙམ་པ་བདག་གི་ཡང་དེ་ཙམ་ལ། བདག་གི་ཇི་ཙམ་པ་ཁྱོད་ཀྱི་ཡང་དེ་ཙམ་པས་ དོན་འདི་ལ་འོ་སྐོལ་མཚུངས་ཤིང་མཉམ་སྟེ་འདྲ་བ་ཐོབ་ཀྱིས་ཚུར་སྤྱོན་འོ་སྐོལ་གཉི་གས་ཚོགས་འདི་ཡོངས་སུ་དྲང་བར་བགྱིའོ། །དེ་ནས་རངས་བྱེད་ཀྱི་བུ་ལྷག་སྤྱོད་བྱང་ཆུབ་སེམས་དཔའི་ཐོག་མའི་སློབ་དཔོན་གྱིས་བྱང་ཆུབ་སེམས་དཔའ་ལ་རྗེད་པ་དམ་པས་རྗེད་ཅིང་མཆོད་པའི་དམ་

  657. 19a

    པས་མཆོད་དོ། །དེའི་ཤེས་པ་རྣམས་ལ་ཡང་དགའ་བ་དང་མགུ་བར་གྱུར་ཏོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ནི་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་ པར་ནུས་པ་མ་ཡིན་ནོ་སྙམ་མོ། །དེ་ནས་བྱང་ཆུབ་སེམས་དཔའ་ལམ་དེ་ཡང་ནུས་པ་མེད་པར་རིག་ནས་གཤེགས་སོ། །རྒྱལ་པོ་ཟས་གཙང་བུའི་མྱ་ངན་གྱིས་རྟག་ཏུ་གདུངས་ནས་བྱང་ཆུབ་སེམས་དཔའ་བཙལ་བའི་ཕྱིར་ཕོ་ཉ་བཏང་བ་ལས། དེས་ཇི་ལྟར་གཞོན་ནུ་དོན་ཐམས་ ཅད་གྲུབ་པ་རངས་བྱེད་ཀྱི་བུ་ལྷག་སྤྱོད་དང་ལྷན་ཅིག་བཞུགས་པ་ལས་རྒྱལ་པོའི་ཁབ་ནས་ཕྱིར་བྱུང་སྟེ་རིམ་གྲོ་པ་མེད་པར་འཁྱམ་མོ་ཞེས་ཐོས་སོ། །ཐོས་ནས་རིམ་གྲོ་བྱེད་པ་སུམ་བརྒྱ་བཏང་ངོ་། །གྲོང་ཁྱེར་ལྷས་བསྟན་དུ་ཤཱཀྱ་ལེགས་པར་རབ་སད་ཀྱིས་ཀྱང་དེ་བཞིན་དུ་ཐོས་ ནས་དེས་ཀྱང་རིམ་གྲོ་བྱེད་པ་ཉིས་བརྒྱ་བཏང་ངོ་། །དེ་ནས་བྱང་ཆུབ་སེམས་དཔའ་རིམ་གྲོ་པ་ལྔ་བརྒྱས་ཡོངས་སུ་བསྐོར་ནས་དཀའ་ཐུབ་ཀྱི་ནགས་སུ་རྒྱུ་བ་ན་དེས་དགོངས་པ། དཀའ་ཐུབ་ཀྱི་ནགས་གང་བར་སྤྱོད་ཅིང་གནས་པས་ན་བདུད་རྩི་ཐོབ་པར་མི་ནུས་ཀྱིས། མ་ལ་བདག་ གིས་རིམ་གྲོ་བྱེད་པ་ལྔ་ཞིག་བླངས་ལ་ལྷག་མ་ནི་དགྱེའོ་སྙམ་ནས་དེས་ཡུམ་གྱི་ཕྱོགས་ལས་གཉིས། ཡབ་ཀྱི་ཕྱོགས་ནས་གསུམ་ཁྲིད་དེ། དེ་རྣམས་ཀྱིས་དེའི་རིམ་གྲོ་བྱེད་དོ། །དེ་ནས་བྱང་ཆུབ་སེམས་དཔའ་རིམ་གྲོ་པ་ལྔས་ཡོངས་སུ་བསྐོར་ཏེ་ག་ཡཱའི་ལྷོ་ཕྱོགས་ན་ལྟེང་ རྒྱས་འོད་སྲུང་གི་སྡེའི་གྲོང་རྡལ་གང་ན་བ་དེར་རྒྱུ་ཞིང་གཤེགས་ཏེ་བྱོན་ནས་དེ་ཕན་ཚུན་དུ་འཆག་པ་ན་ས་ཕྱོགས་དགའ་དགའ་ལྟར་འདུག་པ། ནགས་ཚང་ཚིང་མཛེས་པ། ཆུ་ཀླུང་ནཻ་རཉྫ་ན་བསིལ་བར་འབབ་པ། གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་ སྔོན་པོ་དང་ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་གཟིགས་སོ། །གཟིགས་ནས་ཀྱང་འདི་སྙམ་དུ་དགོངས་ཏེ། ཀྱེ་མའོ་ས་ཕྱོགས་འདི་ནི་དགའ་དགའ་ལྟར་འདུག་པ། ནགས་ཚང་ཚིང་མཛེས་པ། ཆུ་ཀླུང་ནཻ་རཉྫ་ན་བསིལ་བར་འབབ་པ།

  658. 19b

    གསེ་གུ་ཅན་འཇུག་ངོགས་བདེ་ཞིང་མཐའ་རྒྱ་ཆེ་ལ་གསིང་མ་སྔོན་པོ་དང་། ཤིང་སྣ་ཚོགས་ཀྱིས་བརྒྱན་པ་དགའ་དགའ་ལྟར་འདུག་པ་ཞིག་སྟེ། ཀྱེ་མ་སྤོང་བ་དོན་དུ་གཉེར་བའི་རིགས་ཀྱི་བུས་ནགས་ཁྲོད་འདིར་བརྟེན་ན་སྤོང་བ་བྱ་བར་ནུས་སོ། །བདག་སྤོང་བ་དོན་དུ་གཉེར་བ་ ཡིན་པས་མ་ལ་བདག་གིས་ཀྱང་ནགས་ཁྲོད་འདིར་བརྟེན་ལ་སྤོང་བ་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་ནགས་ཁྲོད་དུ་ཞུགས་ཏེ་ཤིང་ཞིག་གི་དྲུང་དུ་བཞུགས་ནས་ཚེམས་ལ་ཚེམས་གཏད། ལྗགས་རྐན་ལ་བཅར་ནས་ཐུགས་ཀྱིས་ཐུགས་མངོན་དུ་བཟུང་། མངོན་དུ་ བསྡམས། ཤིན་ཏུ་མངོན་དུ་བསྡམས་སོ། །དེ་ཐུགས་ཀྱིས་ཐུགས་མངོན་དུ་བཟུང་། མངོན་དུ་བསྡམས། ཤིན་ཏུ་མངོན་དུ་བསྡམས་པས་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཏེ། དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བ་ཞིག་ཕྱིང་ཀ་ལོག་ཏུ་བཟུང་། མངོན་དུ་བསྡམས། ཤིན་ཏུ་མངོན་དུ་བསྡམས་ན་དེའི་བ་སྤུའི་ཁུང་བུ་ཐམས་ཅད་ནས་རྡུལ་འབྱུང་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཚེམས་ལ་ཚེམས་གཏད། ལྗགས་རྐན་ལ་བཅར་ཏེ་ཐུགས་ཀྱིས་ཐུགས་མངོན་དུ་བཟུང་། མངོན་དུ་བསྡམས། ཤིན་ཏུ་མངོན་དུ་བསྡམས་པ་ ན་བ་སྤུའི་ཁུང་བུ་ཐམས་ཅད་ནས་རྡུལ་བྱུང་བར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་ སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་ བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །

  659. 20a

    དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་རླུང་ཐམས་ཅད་སྤྱི་བོའི་ནང་དུ་སོང་ནས། དེ་དེའི་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ། །དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་སྤྱི་བོར་ལྕགས་ཀྱི་ཕུར་པ་ རྣོན་པོས་བཏབ་ན་དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་ སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་ སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པས་རླུང་ཐམས་ཅད་སྙན་གཉིས་ཀྱི་བུ་ གནས་རྒྱུས་པར་གྱུར་ཏོ། །དཔེར་ན་མགར་བས་སྦུད་པ་བུས་ན་རླུང་ཐམས་ཅད་ཀྱི་རྒྱུན་གྲྭ་གཉིས་ཀྱི་བུ་གནས་རྒྱུ་བ་དེ་བཞིན་དུ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་རླུང་ཐམས་ཅད་ཀྱི་རྒྱུན་སྙན་གཉིས་ཀྱི་བུ་གནས་རྒྱུས་པར་གྱུར་ ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། སྐུ་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་

  660. 20b

    ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་པར་ཡང་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་ མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་ དབུགས་རྔུབ་པ་དང་འབྱུང་བ་བགགས་པས་ཕྱལ་གྱི་ནང་ཐམས་ཅད་རྒྱས་པར་གྱུར། ཤིན་ཏུ་རྒྱས་པར་གྱུར་ཏོ། །དཔེར་ན་མགར་བའི་སྦུད་པ་བུས་ན་གང་བར་གྱུར། ཤིན་ཏུ་གང་བར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་ དག་ལ་སྙོམས་པར་ཞུགས་པ་ན་ཕྱལ་གྱི་ནང་ཐམས་ཅད་རྒྱས་པར་གྱུར། ཤིན་ཏུ་རྒྱས་པར་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་ གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་དེའི་ཚེ་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་སོ། །དཔེར་ན་མི་སྟོབས་དང་ལྡན་པས་མི་སྟོབས་ཤིན་ཏུ་ཆུང་བའི་མགོ་འབྲེང་བས་ཡང་ནས་ཡང་དུ་དམ་

  661. 21a

    དུ་བཅིངས་ན་དེའི་མགོ་ལ་མགོའི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་དབུ་ལ་དབུའི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་ སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེར་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་ འཇུག་པར་བརྩམས་ཏེ། དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་དེའི་ཚེ་ཁོང་དུ་ཁོང་གི་ཚོར་བ་མི་བཟད་པ་ སྐྱེས་སོ། །དཔེར་ན་བ་ལང་གི་ཤེན་པ་མཁས་པའམ། བ་ལང་གི་ཤེན་པའི་སློབ་མ་མཁས་པས་བ་ལང་གསོད་པའི་གྲི་རྣོན་པོས་བ་ལང་གི་ལྟོ་དྲལ་ན་དེའི་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་ དག་ལ་སྙོམས་པར་ཞུགས་པ་ན་ཁོང་དུ་ཁོང་གི་ཚོར་བ་ཤིན་ཏུ་མི་བཟད་པ་སྐྱེས་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་ བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཆེ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ལྷག་

  662. 21b

    པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བྱའོ་སྙམ་མོ། །དེས་ལྷག་པར་རྣམ་པར་བམ་པའི་བསམ་གཏན་དག་ལ་སྙོམས་པར་འཇུག་པར་བརྩམས་ཏེ། དེས་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་དང་། ཞལ་དང་ཤངས་ ནས་དབུགས་རྔུབ་པ་དང་འབྱུང་བ་བགགས་སོ། །དེའི་ཞལ་དང་ཤངས་ནས་དབུགས་རྔུབ་པ་དང་འབྱུང་བ་བགགས་པ་དང་། དེའི་ཚེ་སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་སོ། །དཔེར་ན་མི་ཤིན་ཏུ་སྟོབས་དང་ལྡན་པ་གཉིས་ཀྱིས་མི་སྟོབས་ཤིན་ཏུ་ཆུང་བ་ཞིག་ཕྱིང་ ཀ་ལོག་ཏུ་བཟུང་སྟེ་མེ་དོང་གི་ནང་དུ་སྦྱངས་ན་དེའི་ལུས་ལ་ལུས་ཀྱི་གདུང་བ་ཤིན་ཏུ་མི་བཟད་པ་སྐྱེ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་རྣམ་པར་བམ་པའི་བསམ་གཏན་དག་ལ་སྙོམས་པར་ཞུགས་པ་ན། སྐུ་ལ་སྐུའི་གདུང་བ་ཤིན་ཏུ་མི་བཟད་པ་སྐྱེས་ཀྱང་། དེ་ཞུམ་པ་ མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །བྱང་ཆུབ་སེམས་དཔས་སྡུག་བསྔལ་མི་བཟད་པ་རྩུབ་པ་ཚ་བ་ཡིད་ དུ་མི་འོང་བ་དེ་ལྟ་བུའི་ཚོར་བ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ཐམས་ཅད་ཀྱི་ཐམས་ཅད་དུ་ཟས་མི་ཟ་བ་བསྒྲུབ་པར་བྱའོ་སྙམ་མོ། །དེ་ནས་ལྷ་རབ་ཏུ་མང་ པོའི་སེམས་ཀྱིས་བྱང་ཆུབ་སེམས་དཔའི་ཐུགས་ཤེས་ནས་བྱང་ཆུབ་སེམས་དཔའ་གང་ན་བ་དེར་དོང་སྟེ་ཕྱིན་ནས། བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གྲོགས་པོ་གལ་ཏེ་ཁྱོད་མིའི་ཁ་ཟས་ཀྱིས་འཛེམ་པར་མཛད། །ངོ་ཚ་བར་མཛད། སྨོད་པར་མཛད། རྣམ་པར་སྨོད་པར་མཛད་ན། བདག་ཅག་གིས་ཁྱོད་ཀྱི་བ་སྤུའི་ཁུང་བུ་ཐམས་ཅད་ནས་ལྷའི་མདངས་བསྒྲུབ་པར་བགྱིས་ཏེ། ཁྱོད་ཀྱིས་གཏོར་ཅིག །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། གལ་ཏེ་བདག་གིས་མིའི་ཟས་མི་བཟའ་བར་དམ་བཅས་ལ་

  663. 22a

    བདག་གི་བ་སྤུའི་ཁུང་བུ་ཐམས་ཅད་དུ་ལྷ་རྣམས་ཀྱིས་ལྷའི་མདངས་བསྒྲུབས་ནས་དེ་བདག་གིར་བྱེད་པ་ནི་བདག་གི་བརྫུན་ཡིན་ལ། བདག་གི་བརྫུན་གང་ཡིན་པ་དེ་ནི་བདག་གི་ལོག་པ་ཡིན་ནོ། །བདག་གི་ལོག་པ་གང་ཡིན་པ་དེའི་རྐྱེན་གྱིས་ནི་འདི་ན་སེམས་ ཅན་ཁ་ཅིག་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་གྱིས། མ་ལ་བདག་གིས་ལྷ་རྣམས་ཀྱི་ཚིག་ནི་ཐམས་ཅད་ཀྱི་ཐམས་ཅད་དུ་སྤངས་ལ་ཁ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་བཟའ་ བའམ། ཡང་ན་མོན་སྲན་སྡེའུའི་ཁུ་བའམ། འོན་ཏེ་རྒྱ་སྲན་གྱི་ཁུ་བའམ། ཡང་ན་ཧ་རེ་ནུ་ཀའི་འབྲས་བུའི་ཁུ་བ་བཏུང་ངོ་སྙམ་མོ། །དེ་ནས་བྱང་ཆུབ་སེམས་དཔས་དེའི་ཚེ་ལྷ་རྣམས་ཀྱི་ཚིག་ཐམས་ཅད་ཀྱི་ཐམས་ཅད་དུ་སྤངས་ནས་ཞལ་ཟས་ཉུང་བ་དང་། ཆུང་བ་དང་། ཆུང་ ཟད་དང་། ཆང་ཆུང་གསོལ་བའམ། ཡང་ན་མོན་སྲན་སྡེའུའི་ཁུ་བའམ། འོན་ཏེ་རྒྱ་སྲན་གྱི་ཁུ་བའམ། ཡང་ན་ཧ་རེ་ནུ་ཀའི་འབྲས་བུའི་ཁུ་བ་གསོལ་ལོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་ ཡན་ལག་དང་ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ། སྐེམ་ཞིང་དཔལ་ཆུང་བར་གྱུར་ཏོ། །དཔེར་ན་ལྡུམ་བུ་ཨ་སི་ཏའི་སྡོང་བུ་དང་། ཀ་ལི་ཀའི་སྡོང་བུ་འཇུམ་ཀུན་དུ་འཇུམ་པས་ཤ་ཆུང་ཞིང་སྐམས་པར་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་ བ་དང་། ཆུང་ཟད་དང་། ཆང་ཆུང་གསོལ་བ་ན་ཡན་ལག་དང་ཉིང་ལག་ཐམས་ཅད་ཞུམ་ཀུན་དུ་ཞུམ་སྟེ་སྐེམ་ཞིང་དཔལ་ཆུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་དེའི་ཚེ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་དབུ་ལ་དབུའི་ པགས་པ་རྙིས་ཀུན་དུ་རྙིས་ཏེ་འཁུམས་ཤིང་འབར་འབུར་དུ་གྱུར་ཏོ། །དཔེར་ན་ཀུ་བ་རྩ་བ་ནས་བཅད་ན་རྙིས་ཀུན་དུ་རྙིས་པས་འཁུམས་ལ་འབར་འབུར་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་

  664. 22b

    བ་ན་དབུ་ལ་དབུའི་པགས་པ་རྙིས་ཀུན་ཏུ་རྙིས་ཏེ་འཁུམས་ཤིང་འབར་འབུར་དུ་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་ བཞག་པ་ཡིན་ནོ། །བྱང་ཆུབ་སེམས་དཔའ་དེའི་ཚེ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ཞལ་ཟས་ཉུང་བ་ དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ། ཟབ་པ་ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ངོ་། །དཔེར་ན་ཁྲོན་པ་ཟབ་མོའི་ཆུར་སྐར་མའི་གཟུགས་བརྙན་ཕུག་ཏུ་སོང་ཤིན་ ཏུ་ཕུག་ཏུ་སོང་སྟེ། ཟབ་པ་ཤིན་ཏུ་ཟབ་པར་རིང་དུ་སོང་བར་གཏམ་དུ་བྱ་བ་དེ་བཞིན་དུ་དེའི་ཚེ་བྱང་ཆུབ་སེམས་དཔས་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་སྤྱན་གཉིས་ཀྱི་སྤྱན་གྱི་འབྲས་བུ་ཕུག་ཏུ་སོང་ཤིན་ཏུ་ཕུག་ཏུ་སོང་སྟེ། ཟབ་པ་ ཤིན་ཏུ་ཟབ་པར་རིང་དུ་སོང་བས་ཕྱུང་བ་ལྟ་བུར་སྣང་ཡང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །དེའི་ཚེ་བྱང་ ཆུབ་སེམས་དཔའ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ནས་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་ དང་། ཆུང་ཟད་དང་། ཆང་ཆུང་གསོལ་བ་ན་དེའི་ཚེ་རྩིབ་མའི་བར་མཐོན་དམན་ཅན་དུ་གྱུར་ཏེ། དཔེར་ན་རྩྭ་ཁང་ལོ་གཉིས་སམ་གསུམ་ལོན་པའི་ཕྱམ་དགུ་པོ་མཐོན་དམན་དུ་གྱུར་པ་དེ་བཞིན་དུ་དེའི་ཚེ་བྱང་ཆུབ་སེམས་དཔའ་ཞལ་ཟས་ཉུང་བ་དང་། ཆུང་བ་དང་། ཆུང་ཟད་དང་།

  665. 23a

    ཆང་ཆུང་གསོལ་བ་ན་རྩིབ་མའི་བར་མཐོན་དམན་དུ་གྱུར་ཀྱང་དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨུགས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་ པ་ཡིན་ནོ། །བྱང་ཆུབ་སེམས་དཔའ་དེའི་ཚེ་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་ཡང་འདི་ལྟར་སྐུ་བསྒོམས་པ་ཡིན་པའི་ཕྱིར་ཐུགས་ཡོངས་སུ་གཏུགས་ཏེ་མི་གནས་སོ། །དེ་ནས་བྱང་ཆུབ་སེམས་དཔའ་ཞལ་ ཟས་ཉུང་བ་དང་། ཆུང་བ་དང་། ཆུང་ཟད་དང་། ཆང་ཆུང་གསོལ་བ་ན་སྒལ་པའི་ཚིགས་འདི་ལྟ་སྟེ། སྐྲའི་ལན་བུ་ལྟ་བུར་གྱུར་ཏོ། །མཇུག་དོ་ནི་འདི་ལྟ་སྟེ་རྔ་མོའི་རྐང་པ་ལྟ་བུར་གྱུར་ཏོ། །དེ་ལན་འགའ་ལྡང་བར་འདོད་ན་ཁ་སྦུབ་ཏུ་འགྱེལ་ལ། ལན་འགའ་འདུག་པར་ འདོད་ན་གན་རྐྱལ་དུ་འགྱེལ་ལོ། །དེ་རོ་སྟོང་ལ་བརྟེན་ནས་རོ་སྨད་འཇོག་པར་བྱེད། རོ་སྨད་ལ་བརྟེན་ནས་རོ་སྟོད་འཇོག་པར་བྱེད་དོ། །དེ་ཕྱག་གཉིས་ཀྱིས་སྐུ་ལ་བྱུགས་ཡོངས་སུ་བྱུགས་ཏེ། དེའི་ཕྱག་གཉིས་ཀྱིས་སྐུ་ལ་བྱུགས་ཡོངས་སུ་བྱུགས་པ་དེའི་ཚེ་བ་སྤུ་རྣམས་དྲུང་རུལ་ བས་ས་ལ་ལྷགས་པར་གྱུར་ཏོ། །དེ་འདི་སྙམ་དུ་དགོངས་ཏེ། ལམ་འདི་ཡང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་ནས་ལྷ་གསུམ་ཞིག་བྱང་ཆུབ་སེམས་དཔའ་གང་ ན་བ་དེར་ལྷགས་ཏེ། དེ་ནས་གཅིག་གིས་འདི་སྐད་ཅེས་སྨྲས་སོ། །དགེ་སྦྱོང་གཽ་ཏ་མ་ནི་ནག་པོ་ཞིག་གོ། །གཉིས་པས་འདི་སྐད་ཅེས་སྨྲས་སོ། །འདི་ནག་པོ་ནི་མ་ཡིན་གྱི་འོན་ཀྱང་སྔོ་བསངས་ཞིག་གོ། །གསུམ་པས་འདི་སྐད་ཅེས་སྨྲས་སོ། །འདི་ནག་པོ་ཡང་མ་ཡིན། སྔོ་བསངས་ཀྱང་མ་ཡིན་གྱི་མདོག་དམར་སྨུག་ཅིག་གོ། །བྱང་ཆུབ་སེམས་དཔའི་སྐུ་མདོག་བཟང་པོར་སྣང་བ་ནི་ཐམས་ཅད་ཀྱི་ཐམས་ཅད་དུ་ནུབ་པར་གྱུར་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་གསུམ་ཞིག་སྣང་བ་འདི་ལྟ་སྟེ། ཤིང་རློན་པ་ཆུ་

  666. 23b

    ཅན་ཞིག་ཆུ་ནས་ཕྱུང་སྟེ་ཉེ་བར་སྐམ་ལ་བཞག་པ་དང་། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་དེར་འོངས་ནས་དེས་དེ་ལ་གཙུབ་སྟན་བྱས་ཏེ་གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་རློན་པ་ཆུ་ཅན་ཡིན་པའི་ཕྱིར་མེ་འབྱུང་བ་དང་། འབར་དུ་མི་བཏུབ་པ་དེ་བཞིན་དུ་དགེ་ སྦྱོང་ངམ་བྲམ་ཟེ་ཁ་ཅིག་འདོད་པ་རྣམས་ལ་ལུས་དང་སེམས་ཀྱིས་ཐག་སྲིང་བར་མི་གནས་ཀྱི། དེ་རྣམས་ཀྱི་འདོད་པ་རྣམས་ལ་འདུན་པ་དང་། འདོད་པ་ལ་ཆགས་པ་དང་། འདོད་པ་ལ་དགའ་བ་དང་། འདོད་པ་ལ་ཞེན་པ་དང་། འདོད་པ་ལ་འཆུམས་པ་དང་། འདོད་པ་ལ་ལྷག་ པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ། གནས་པ་ཡིན་པས་ལུས་དང་སེམས་ཀྱིས་ཐག་སྲིང་བར་མི་གནས་པ་རྣམས་ཀྱི་ནི་དེ་དང་འདྲའོ། །དེ་རྣམས་བདག་ཉིད་གནོན་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ ཉམས་སུ་མྱོང་མོད་ཀྱི། འོན་ཀྱང་དེ་རྣམས་ཀྱིས་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་དང་པོ་ཡིན་ནོ། ། དཔེར་ན་ཤིང་རློན་པ་ཆུ་ཅན་ཞིག་ཆུ་ནས་ཕྱུང་སྟེ། ཉེ་བར་སྐམ་ལ་བཞག་པ་དང་། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་འོངས་ནས་དེས་དེ་ལ་གཙུབ་སྟན་བྱས་ཏེ། གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་རློན་པ་ཆུ་ཅན་ཡིན་པའི་ཕྱིར་མེ་འབྱུང་བ་དང་ འབར་དུ་མི་བཏུབ་པ་དེ་བཞིན་དུ་དགེ་སྦྱོང་ངམ་བྲམ་ཟེ་ཁ་ཅིག་འདོད་པ་རྣམས་ལ་ལུས་ཀྱིས་སྤོང་བར་གནས་ཀྱི་སེམས་ཀྱིས་མ་ཡིན་པ་དེ་རྣམས་ཀྱི་འདོད་པ་རྣམས་ལ་འདོད་པ་ལ་འདུན་པ་དང་། འདོད་པ་ལ་ཆགས་པ་དང་། འདོད་པ་ལ་དགའ་བ་དང་། འདོད་པ་ལ་ཞེན་པ་ དང་། འདོད་པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ་གནས་པ་ཡིན་ནོ། །དེ་རྣམས་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་མོད་

  667. 24a

    ཀྱི། འོན་ཀྱང་དེ་རྣམས་ཀྱིས་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་གཉིས་པ་ཡིན་ནོ། ། འདི་ལྟ་སྟེ་ཤིང་སྐམ་ཁོང་སྟོང་ཆུ་མེད་པ་ཞིག་ཆུ་དང་ཐག་རིང་པོར་སྐམ་ལ་བཞག་པ་དང་། དེ་ནས་མི་མེ་དོན་དུ་གཉེར་བ་མེ་ཚོལ་བ་ཞིག་འོངས་ནས་དེས་དེ་ལ་གཙུབ་སྟན་བྱས་ཏེ། གཙུབ་ཤིང་བཞག་ནས་གཙུབས་ན་འདི་ལྟར་ཤིང་དེ་སྐམ་ཞིང་ཁོང་སྟོང་ཡིན་པའི་ཕྱིར་མེ་འབྱུང་བ་ དང་འབར་དུ་བཏུབ་པ་དེ་བཞིན་དུ་དགེ་སྦྱོང་ངམ་བྲམ་ཟེ་ཁ་ཅིག་འདོད་པ་རྣམས་ལ་ལུས་དང་སེམས་ཀྱིས་ཐག་སྲིང་བར་གནས་པ་དེ་རྣམས་ཀྱི་འདོད་པ་རྣམས་ལ་འདོད་པ་ལ་འདུན་པ་དང་། འདོད་པ་ལ་ཆགས་པ་དང་། འདོད་པ་ལ་དགའ་བ་དང་། འདོད་པ་ལ་ཞེན་པ་དང་། འདོད་ པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་གང་ཡིན་པ་དེ་ནི་དེ་རྣམས་ཀྱི་སེམས་ཡོངས་སུ་གཏུགས་ཏེ་མི་གནས་པ་ཡིན་ནོ། །དེ་རྣམས་བདག་ཉིད་གནོད་པའི་སྡུག་བསྔལ་མི་བཟད་པ་རྩུབ་པ་ཚ་བ་ཡིད་དུ་མི་འོང་བའི་ཚོར་བ་དེ་ལྟ་བུ་ཉམས་སུ་མྱོང་མོད་ཀྱི། འོན་ཀྱང་དེ་རྣམས་ ཀྱིས་ཤེས་པར་ནུས། མཐོང་བར་ནུས་བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་ཏེ། དེ་ལ་འདི་ནི་དེའི་ཚེ་བྱང་ཆུབ་སེམས་དཔའ་ལ་སྔོན་མ་གསན་པའི་དཔེ་སྣང་བ་གསུམ་པ་ཡིན་ནོ། །འདི་ལྟར་དེའི་ཚེ་བྱང་ཆུབ་སེམས་དཔའ་ལ་དཔེ་གསུམ་པ་སྣང་ནས་མ་ལ་བདག་གིས་ ཏིལ་འབྲུ་གཅིག་གི་ཟས་བཟའ་བར་བྱའོ་ཞེས་དེ་ཏིལ་འབྲུ་གཅིག་གི་ཟས་གསོལ་ཏེ། ཇི་སྲིད་དེའི་མདངས་དེ་སྐུ་ལས་ཡལ་བར་མ་གྱུར་གྱི་བར་དུ་ཏིལ་འབྲུ་གཉིས་པའི་ཟས་མི་གསོལ་ཏེ། ཡལ་ནས་ཏིལ་འབྲུ་གཉིས་པའི་ཟས་དེ་གསོལ་བར་མཛད་དོ། །དེ་ཏིལ་འབྲུ་གཅིག་གི་ཟས་ གསོལ་བས་ཡན་ལག་དང་ཉིང་ལག་རྣམས་ཤིན་ཏུ་སྐམས་པར་གྱུར་ཏོ། །ཏིལ་འབྲུ་གཅིག་ཇི་ལྟ་བར་འབྲས་འབྲུ་གཅིག་དང་། སྲན་ཀོལ་འབྲུ་གཅིག་དང་། རྒྱ་སྲན་འབྲུ་གཅིག་དང་། མོན་སྲན་གྲེའུ་འབྲུ་གཅིག་དང་། མོན་སྲན་སྡེའུ་འབྲུ་གཅིག་དང་། རྩྭའི་གདིང་བ་ལ་

  668. 24b

    མནལ་བར་མཛད་དོ། །རྒྱལ་པོ་ཟས་གཙང་གིས་དཀའ་བ་སྤྱོད་པའི་གནས་སྐབས་དེ་ཐོས་ནས་ཉི་མ་རེ་རེ་ཞིང་རྟོག་པ་ཉིས་བརྒྱ་ལྔ་བཅུ་གཏོང་བར་བྱེད་དོ། །རྒྱལ་པོ་ལེགས་པར་རབ་སད་ཀྱིས་ཀྱང་ཉིས་བརྒྱ་ལྔ་བཅུའོ། །དེ་དག་ཉི་མ་རེ་རེ་ཞིང་དེ་གཉིས་ལ་མྱུར་བ་མྱུར་བར་གཏམ་ སྐྱེལ་བར་བྱེད་དེ། བྱང་ཆུབ་སེམས་དཔའ་ནི་འདི་འདྲ་བའི་དཀའ་བ་སྤྱོད་དེ། ཏིལ་འབྲུ་གཅིག་དང་། འབྲས་འབྲུ་གཅིག་དང་། སྲན་ཀོ་ལ་འབྲུ་གཅིག་དང་། རྒྱ་སྲན་འབྲུ་གཅིག་དང་། མོན་སྲན་གྲེའུ་འབྲུ་གཅིག་དང་། མོན་སྲན་སྡེའུ་འབྲུ་གཅིག་གི་ཟས་གསོལ་ཞིང་རྩྭའི་ གདིང་བ་ལ་མནལ་ཏོ་ཞེས་སྨྲའོ། །དེ་རྒྱལ་པོ་ཟས་གཙང་གིས་ཐོས་ནས་བུའི་མྱ་ངན་གྱིས་ནོན་པས་ལྷག་པར་དང་ཁར་ན་ཞིང་མིག་མཆི་མས་བརྣངས་ཏེ་གདུངས་ནས་བཙུན་མོའི་འཁོར་དང་བཅས་པར་རྩྭའི་གདིང་བ་ལ་ཉལ་བར་བྱེད་དོ། །བཙུན་མོ་གྲགས་འཛིན་ཡང་ཁྱིམ་ཐབ་ཀྱི་ གནས་སྐབས་དེ་ཐོས་ནས་ཁྱིམ་ཐབ་ཀྱི་མྱ་ངན་གྱིས་ནོན་ཏེ་གདོང་མཆི་མས་རླན་ཅིང་མེ་ཏོག་ཕྲེང་དང་། རྒྱན་དང་སྤུད་པ་རྣམས་བོར་ནས་དཀའ་བ་སྤྱོད་པར་བྱེད་དེ། ཏིལ་འབྲུ་གཅིག་དང་། འབྲས་འབྲུ་གཅིག་དང་། སྲན་ཀོ་ལ་འབྲུ་གཅིག་དང་། རྒྱ་སྲན་འབྲུ་གཅིག་དང་། མོན་སྲན་གྲེའུ་འབྲུ་གཅིག་དང་། མོན་སྲན་སྡེའུ་འབྲུ་གཅིག་གི་ཟས་ཟ་ཞིང་རྩྭའི་གདིང་བ་ལ་ཉལ་བར་བྱེད་དོ། །དེའི་རུམ་མི་བདེའོ་ཞེས་རྒྱལ་པོ་ཟས་གཙང་གིས་ཐོས་ནས་དེས་བསམས་པ། གལ་ཏེ་གྲགས་འཛིན་མས་བྱང་ཆུབ་སེམས་དཔའི་གཏམ་ཉི་མ་རེ་རེ་ཞིང་ཐོས་ན་ཁྱིམ་ཐབ་ཀྱི་ མྱ་ངན་གྱིས་ནོན་ཏེ་དཀའ་བ་སྤྱད་པ་འདིས་མངལ་མི་འཆགས་པའམ། སྲོག་འཆད་པར་འགྱུར་བའི་གནས་འདི་ཡོད་པས་དེས་ན་གྲགས་འཛིན་མ་ལ་བྱང་ཆུབ་སེམས་དཔའི་གཏམ་སུ་ཡང་གླེང་བར་མི་འགྱུར་རོ་སྙམ་ནས། རྒྱལ་པོ་ཟས་གཙང་གིས་བཙུན་མོའི་འཁོར་གྱི་སྐྱེ་བོ་ ཐམས་ཅད་ལ་ཁྲིམས་སུ་བཅས་པ། སུས་ཀྱང་བྱང་ཆུབ་སེམས་དཔའི་གཏམ་གྲགས་འཛིན་མ་ལ་བརྗོད་པར་མི་བྱའོ། །གཏམ་སྐྱེལ་བ་ལ་ཡང་བསྒོ་བ། ང་མ་གཏོགས་པར་སུ་ལ་ཡང་བྱང་ཆུབ་སེམས་དཔའི་གཏམ་བརྗོད་པར་མི་བྱའོ། །རང་གིས་ཐོས་ན་ཡང་གྲགས་འཛིན་

  669. 25a

    མ་ལ་བསམས་ནས་མྱ་ངན་མནགས་ཏེ་གང་ཐོས་ན་བཙུན་མོ་གྲགས་འཛིན་མ་མི་འཆི་བར་འགྱུར་བའི་གཏམ་གཞན་གྱིས་བཙུན་མོའི་འཁོར་ལ་འདྲིད་པར་བྱེད་དོ། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ལམ་འདི་ཡང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་མ་ཡིན་ནོ་སྙམ་མོ། །དེ་འདི་སྙམ་དུ་དགོངས་ཏེ། མ་ལ་བདག་གིས་ཁ་ཟས་ཤིན་ཏུ་ངན་པ་བཟའ་བར་བྱའོ་སྙམ་སྟེ། དེས་ཁ་ཟས་ཤིན་ཏུ་ངན་པ་གསོལ་བར་མཛད་དོ། །དེ་ལ་ཟས་ཕལ་པ་ནི་ འདི་ཡིན་ཏེ། བེའུ་བྱུང་ནས་རིང་པོ་མ་ལོན་པར་མའི་འོ་མ་འཐུང་བ་གང་ཡིན་པ་དེ་རྣམས་ཀྱི་གཅིན་དང་ལྕི་བ་ཡིན་ནོ། །ཇི་ལྟར་དེའི་སྐུ་ལས་མདངས་དེ་ཡལ་བར་མ་གྱུར་པ་དེ་སྲིད་དུ་ཟས་གཉིས་པ་མི་གསོལ་ཏེ། ཡལ་ནས་ཁ་ཟས་ཕྱི་མ་གསོལ་བར་མཛད་དོ། །དུར་ཁྲོད་ཆེན་ པོར་གཤེགས་ནས་ཀྱང་མི་རོ་དབུ་རྟེན་དུ་བཅུག །ཞབས་ལ་ཞབས་བཞག་སྟེ་སྣང་བའི་འདུ་ཤེས་དང་། དྲན་པ་དང་ཤེས་བཞིན་དང་། ལྡང་བའི་འདུ་ཤེས་ཡིད་ལ་མཛད་པས་གློ་གཡས་པས་མནལ་བར་མཛད་དོ། །དེའི་ཚེ་གྲོང་ཁྱེར་གྱི་གཞོན་ནུ་རྣམས་དང་། གྲོང་ཁྱེར་གྱི་གཞོན་ ནུ་མ་རྣམས་ལྷགས་ནས་ཤིང་བུས་དེའི་སྙན་གཉིས་ཀྱི་བུ་གར་འཛུགས་པར་བྱེད། རྣ་བ་གཉིས་ནས་འདྲེན་པར་བྱེད་ཅིང་འདི་སྐད་ཅེས་ཀྱེ་ཕྱག་དར་ཁྲོད་ཀྱི་ཤ་ཟ་ལ་ལྟོས། ཀྱེ་ཕྱག་དར་ཁྲོད་ཀྱི་ཤ་ཟ་ལ་ལྟོས་ཞེས་སྨྲ་བར་ཡང་བྱེད་དོ། །དེའི་ཚེ་ཕྱག་དར་དང་བོང་རྡོག་དང་། གསེག་ མས་ཀྱང་འཐོར་བར་བྱེད་དོ། །འོན་ཀྱང་བྱང་ཆུབ་སེམས་དཔའ་ནི་གྲོང་ཁྱེར་གྱི་གཞོན་ནུ་རྣམས་སམ། གྲོང་ཁྱེར་གྱི་གཞོན་ནུ་མ་དེ་རྣམས་ལ་ངན་སེམས་སྐྱེད་པའམ། སྡིག་པའི་ཚིག་དབྱུང་བར་མི་དགོངས་སོ། །བྱང་ཆུབ་སེམས་དཔའ་དེ་ལྟ་བུའི་དཀའ་བ་སྤྱོད་པ་ན་འདི་སྙམ་ དུ་དགོངས་ཏེ། གང་སུ་དག་སྡུག་བསྔལ་སྤང་བར་བརྩོན་པར་གནས་པ་དེ་ཐམས་ཅད་ནི་འདི་ཙམ་དུ་ཟད་དེ། དེ་ལས་ལྷག་པ་ཡང་མེད་དེའི་གོང་ན་ཡང་མེད་ན། ལམ་འདི་ཡང་ཤེས་པར་ནུས་པ་མ་ཡིན། མཐོང་བར་ནུས་པ་མ་ཡིན། བླ་ན་མེད་པ་ཡང་དག་པར་རྫོགས་པར་བྱང་

  670. 25b

    ཆུབ་པར་ནུས་པ་མ་ཡིན་ནོ་སྙམ་ནས། དེ་ཞུམ་པ་མ་ཡིན་གྱི་བརྩོན་འགྲུས་བརྩམས་པ་ཡིན། ལུས་མ་སྦྱངས་པ་མ་ཡིན་གྱི་སྦྱངས་པ་ཡིན། རྨོངས་པ་མ་ཡིན་གྱི་དྲན་པ་ཉེ་བར་གཞག་པ་ཡིན་ཏེ། སེམས་རྩེ་གཅིག་ཏུ་མཉམ་པར་བཞག་པ་ཡིན་ནོ། །དེ་འདི་སྙམ་དུ་དགོངས་ཏེ། ཤེས་པར་ ནུས་པ་དང་། མཐོང་བར་ནུས་པ་དང་། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པའི་ལམ་དེ་གང་ཡིན་སྙམ་ན། དེ་འདི་སྙམ་དུ་དགོངས་ཏེ། བདག་ཡབ་ཤཱཀྱ་ཟས་གཙང་གི་ཁྱིམ་ན་གནས་པའི་ཚེ་ཞིང་ལས་ཀྱི་མཐའི་དྲུང་དུ་སོང་ནས་ཤིང་འཛམ་བུའི་གྲིབ་མ་ལ་འདུག་ སྟེ། འདོད་པ་ལས་དབེན་པ། སྡིག་པ་མི་དགེ་བའི་ཆོས་ལས་དབེན་པ། རྟོག་པ་དང་བཅས་ཤིང་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ཏེ་གནས་པ་དེ་མངོན་པར་དྲན་ཏེ། དེ་ནི་ལམ་ཡིན། དེ་ནི་སྒྲུབ་པ་ཡིན། ཤེས་པར་ནུས་པ་ཡིན། མཐོང་བར་ནུས་པ་ཡིན། བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་ནུས་པ་ཡིན་ན། དེ་བདག་གིས་བསྐྱེད་དུ་ཡང་འདི་ལྟར་རིད་ཅིང་ཉམ་ཆུང་ལ་ཞན་པས་སླ་བ་མ་ཡིན་ཏེ། མ་ལ་བདག་གིས་ཅི་བདེར་དབུགས་རྔུབ་པ་དང་། ཅི་བདེར་དབུགས་ འབྱུང་བ་དང་། ཅི་བདེར་འབྲས་ཆན་དང་ཟན་དྲོན་གྱི་ཁ་ཟས་རགས་པ་བཟའ་ཞིང་ལུས་མར་སར་དང་ཏིལ་མར་གྱིས་བྱུགས་ལ་ཆུ་འཇམ་པོས་ལུས་བཀྲུ་བར་བྱའོ་སྙམ་སྟེ། དེ་ཅི་བདེར་དབུགས་རྔུབ་པ་དང་། ཅི་བདེར་དབུགས་འབྱུང་བ་དང་། ཅི་བདེར་འབྲས་ཆན་དང་ཟན་དྲོན་གྱི་ཞལ་ ཟས་རགས་པ་གསོལ་ཞིང་སྐུ་ཏིལ་མར་དང་མར་སར་གྱིས་བྱུགས་ནས་ཆུ་འཇམ་པོས་སྐུ་འཁྲུ་བར་མཛད་དོ།། །།འདུལ་བ་གཞི། བམ་པོ་བརྒྱད་བཅུ་ལྔ་པ། དེ་ནས་རིམ་གྲོ་པ་ལྔ་པོ་དེ་རྣམས་འདི་སྙམ་དུ་སེམས་ཏེ། ཤེས་ལྡན་དག་དགེ་སྦྱོང་གཽ་ཏ་མ་འདི་ནི་སྡོམ་པ་ ལྷོད་པ། བྱ་བ་མང་བ། མང་པོས་འཚོ་བ། སྤོང་བ་ཉམས་པར་གྱུར་པ་ཡིན་ཏེ། འདི་ད་ལྟ་འབྲས་ཆན་དང་ཟན་དྲོན་གྱི་ཁ་ཟས་མང་དུ་ཟ་ལ་ལུས་ཞུན་མར་དང་ཏིལ་མར་གྱིས་བྱུགས་ནས་ཆུ་འཇམ་པོས་ལུས་ཁྲུས་བྱེད་དེ། འདིས་ད་ནི་ཆུང་ཟད་ཀྱང་ཐོབ་པར་མི་ནུས་སོ་སྙམ་དུ་བསམས་ནས་

  671. 26a

    བྱང་ཆུབ་སེམས་དཔའ་བོར་ཏེ་དོང་བ་ལས། རིམ་གྱིས་བཱ་རཱ་ཎ་སཱིར་ཕྱིན་ནས་འཇིག་རྟེན་པའི་དགྲ་བཅོམ་པ་གང་ཡིན་པ་དེ་ལ་བརྟེན་ནས་རབ་ཏུ་བྱུང་སྟེ། ལྔ་པོ་དེ་རྣམས་བློ་མཐུན་ཞིང་ལྷན་ཅིག་འགྲོགས་ལ་ཀུན་དུ་དགའ་བས་རྩོད་པ་མེད་པར་དྲང་སྲོང་སྨྲ་བ་རི་དགས་ཀྱི་ནགས་ ན་གནས་པས་ལྔ་སྡེ་ལྔ་སྡེ་ཞེས་བྱ་བར་གྱུར་ཏོ། །བྱང་ཆུབ་སེམས་དཔས་རིམ་གྱིས་ལུས་ཀྱི་སྟོབས་དང་། མཐུ་དང་བརྩོན་འགྲུས་ཡང་དག་པར་བསྐྱེད་ནས་རིམ་གྱིས་སྡེ་ཅན་གྱི་གྲོང་ཁྱེར་དུ་གཤེགས་སོ། །དེ་ན་གྲོང་ཁྱེར་གྱི་དཔོན་པོ་སྡེ་ཅན་ཞེས་བྱ་བ་དེ་ལ་བུ་མོ་གཉིས་ཡོད་དེ། དགའ་ མོ་དང་། དགའ་སྟོབས་མའོ། །དེ་གཉིས་ཀྱིས་ཤཱཀྱ་རྣམས་ཀྱི་གཞོན་ནུ་གངས་རིའི་ངོས་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བར་བྱུང་བ་དེ་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་འཁོར་ལོས་སྒྱུར་བའི་རྒྱལ་པོར་འགྱུར་ རོ་ཞེས་ལུང་བསྟན་པ་དེ་ཡང་གཟུགས་བཟང་བ། བལྟ་ན་སྡུག་པ། མཛེས་པ། མཚན་ཐམས་ཅད་དང་ལྡན་པ། སྐྱེ་བོ་ཐམས་ཅད་ཀྱི་ཡིད་འཕྲོག་པ་ཡིན་པས་བུད་མེད་གང་གིས་ལོ་བཅུ་གཉིས་སུ་འདི་ལྟ་བུའི་བརྟུལ་ཞུགས་ཡང་དག་པར་བླངས་ཏེ་སྤྱོད་པ་དེའི་ཁྱིམ་ཐབ་ཏུ་འགྱུར་ རོ་ཞེས་ཐོས་སོ། །ཐོས་ནས་ཀྱང་བུད་མེད་ནི་སྐྱེས་པ་ལ་མངོན་པར་དགའ་བ་ཡིན་པས་དེ་གཉིས་ཀྱིས་ལོ་བཅུ་གཉིས་སུ་དཀའ་ཐུབ་བླངས་ཏེ་དེ་རྫོགས་པར་བྱས་ནས་དེ་རྫོགས་པ་དང་། ལན་བཅུ་དྲུག་ཏུ་སྙིང་ཁུར་བྱས་པའི་འོ་ཐུག་སྦྲང་རྩི་ལྟར་མངར་བས་དྲང་སྲོང་དཀའ་ཐུབ་ཀྱིས་ཡོངས་ སུ་དུབ་པ་གློ་བུར་དུ་འོངས་པ་ལ་འབུལ་བར་བྱེད་དོ། །དེ་གཉིས་ཀྱིས་བ་སྟོང་བཞོས་ནས་བ་སྟོང་པོ་དེ་ཉིད་ལ་བླུད་དོ། །དེ་ནས་བ་སྟོང་པོ་དེ་དག་ཉིད་བཞོས་ནས་ལྔ་བརྒྱ་ལ་བླུད་དོ། །དེ་ནས་ལྔ་བརྒྱ་པོ་དེ་དག་བཞོས་ནས་ལྔ་བརྒྱ་པོ་དེ་དག་ཉིད་ལ་བླུད་དོ། །དེ་ནས་ལྔ་བརྒྱ་པོ་དེ་དག་བཞོས་ ནས་ཉིས་བརྒྱ་ལྔ་བཅུ་ལ་བླུད་དོ། །དེ་ནས་ཉིས་བརྒྱ་ལྔ་བཅུ་པོ་དེ་དག་ཉིད་བཞོས་ནས་ཉིས་བརྒྱ་ལྔ་བཅུ་པོ་དེ་དག་ལ་བླུད་དོ། །དེ་ནས་ཉིས་བརྒྱ་ལྔ་བཅུ་པོ་དེ་དག་ཉིད་བཞོས་ནས་བརྒྱ་ཉི་ཤུ་རྩ་ལྔ་ལ་བླུད་དོ། །དེ་ནས་བརྒྱ་ཉི་ཤུ་རྩ་ལྔ་པོ་དེ་དག་བཞོས་ནས་བརྒྱ་ཉི་ཤུ་རྩ་ལྔ་པོ་དེ་དག་ཉིད་ལ་བླུད་

  672. 26b

    དོ། །དེ་ནས་བརྒྱ་ཉི་ཤུ་རྩ་ལྔ་པོ་དེ་དག་བཞོས་ནས་དྲུག་བཅུ་རྩ་གསུམ་ལ་བླུད་དོ། །དེ་ནས་དྲུག་བཅུ་རྩ་གསུམ་པོ་དེ་དག་བཞོས་ནས་དྲུག་བཅུ་རྩ་གསུམ་པོ་དེ་དག་ཉིད་ལ་བླུད་དོ། །དེ་ནས་དྲུག་བཅུ་རྩ་གསུམ་པོ་དེ་དག་བཞོས་ནས་སུམ་བཅུ་རྩ་གཉིས་ལ་བླུད་དོ། །དེ་ནས་སུམ་བཅུ་རྩ་ གཉིས་པོ་དེ་དག་བཞོས་ཏེ། སུམ་བཅུ་རྩ་གཉིས་པོ་དེ་དག་ཉིད་ལ་བླུད་དོ། །དེ་ནས་སུམ་བཅུ་རྩ་གཉིས་པོ་དེ་དག་བཞོས་ནས་བཅུ་དྲུག་ལ་བླུད་དོ། །དེ་ནས་བཅུ་དྲུག་པོ་དེ་དག་བཞོས་ནས་བཅུ་དྲུག་པོ་དེ་དག་ཉིད་ལ་བླུད་དོ། །དེ་ནས་བཅུ་དྲུག་པོ་དེ་དག་ཉིད་བཞོས་ནས་བརྒྱད་ལ་བླུད་དོ། ། དེ་ནས་བརྒྱད་པོ་དེ་དག་ཉིད་བཞོས་ནས་བརྒྱད་པོ་དེ་དག་ཉིད་ལ་བླུད་དོ། །དེ་ནས་བརྒྱད་པོ་དེ་དག་ཉིད་ལན་བཅུ་དྲུག་ཏུ་སྙིང་ཁུར་བྱས་པ་བཞོས་ཏེ། ཤེལ་ལས་བྱས་པའི་སྣོད་ཀྱི་ནང་དུ་བླུགས་ནས་བསྐོལ་ཏེ་འོ་ཐུག་སྦྲང་རྩི་ལྟར་མངར་བར་བྱེད་པ་ན་གནས་གཙང་མའི་རིས་ཀྱི་ལྷ་རྣམས་ ཀྱིས་བསམས་པ། འོ་མའི་ཐུག་པ་འདི་བྱང་ཆུབ་སེམས་དཔས་གསོལ་ན་དེང་ཉིད་དུ་བླ་ན་མེད་པའི་ཡེ་ཤེས་ཐོབ་པར་འགྱུར་གྱིས་དེ་ལྟ་བས་ན་འདི་ལ་མཐུ་ཞིག་བསྟབས་པར་བྱའོ་སྙམ་ནས། དེ་རྣམས་ཀྱིས་མོད་ལ་མཐུ་སྐྱེད་པ་ཞེས་བྱ་བའི་སྨན་བླུགས་སོ། །འོ་མ་ཁོལ་བ་དེ་ལ་འཁོར་ ལོ་དང་བཀྲ་ཤིས་དང་། གཡུང་དྲུང་འཁྱིལ་བའི་མཚན་མ་དག་སྣང་ངོ་། །དེར་ཡང་ཀུན་ཏུ་འཚོ་ཉེར་འགྲོ་ཞེས་བྱ་བ་འཁྱམ་ཞིང་ཕྱོགས་དེར་ཕྱིན་ན་དེས་འོ་མའི་ཐུག་པ་དེ་མཐོང་ནས། དེས་བསམས་པ། འོ་མའི་ཐུག་པ་འདི་སུས་འཐུངས་པ་དེས་དེང་ཉིད་དུ་བླ་ན་མེད་པའི་ཡེ་ཤེས་ཐོབ་ པར་འགྱུར་གྱིས། མ་ལ་བདག་གིས་འདི་བསླང་ངོ་སྙམ་ནས་རེ་ཞིག་མ་ཕྱུང་གི་བར་དུ་དེ་ཡུད་ཙམ་ཞིག་མཐའ་གཅིག་ཏུ་སོང་སྟེ་བསྡད་ནས་དེས་སོང་སྟེ། སྨྲས་པ། ཁོ་བོ་བཀྲེས་པ་དང་སྐོམ་པས་དུབ་ཅིང་ཉེན་གྱིས་འདི་ཁོ་བོ་ལ་ལུད་ཅིག །དེ་གཉིས་ཀྱིས་སྨྲས་པ། མི་སྦྱིན་ནོ། ། དེ་ཅང་མི་སྨྲ་བར་སོང་ངོ་། །དེ་ནས་དེ་གཉིས་ཀྱིས་ཤེལ་ལས་བྱས་པའི་སྣོད་ཀྱི་ནང་ནས་རིན་པོ་ཆེའི་ཡོལ་གོའི་ནང་དུ་བླུགས་སོ། །ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་དེའི་བྲམ་ཟེའི་ཆ་བྱད་དུ་མངོན་པར་སྤྲུལ་ནས་དེ་གཉིས་ཀྱི་མདུན་

  673. 27a

    དུ་འདུག་གོ། །ཚངས་པ་ཡང་འོངས་ནས་དེ་དང་ཉེ་བ་ཞིག་ཏུ་འདུག་གོ། །དེ་གཉིས་ཀྱིས་བརྒྱ་བྱིན་ལ་སྦྱིན་པ་སྦྱིན་པར་བརྩམས་པ་དང་། དེས་སྨྲས་པ། ཅི་བདག་ལ་སྦྱིན་ནམ། འོན་ཏེ་བདག་པས་ཆེས་ཁྱད་པར་དུ་འཕགས་པ་གང་ཡིན་པ་དེ་ལ་སྦྱིན་དེ་གཉིས་ཀྱིས་སྨྲས་པ། ཁྱོད་པས་ཆེས་ཁྱད་པར་འཕགས་པ་གང་ཡིན་པ་དེ་ལ་ཕུལ་ལོ། །དེས་སྨྲས་པ། ཚངས་པ་འདི་ནི་བདག་བས་ཆེས་ཁྱད་པར་དུ་འཕགས་པ་ཡིན་གྱིས་དེ་ལ་ཕུལ་ཅིག །དེ་གཉིས་ཀྱིས་དེ་ལ་སྦྱིན་པར་བརྩམས་པ་དང་། དེས་སྨྲས་པ། ཅི་བདག་ལ་སྦྱིན་ནམ། འོན་ཏེ་བདག་བས་ ཆེས་ཁྱད་པར་དུ་འཕགས་པ་གང་ཡིན་པ་དེ་ལ། དེ་གཉིས་ཀྱིས་སྨྲས་པ། ཁྱོད་པས་ཆེས་ཁྱད་པར་དུ་འཕགས་པ་གང་ཡིན་པ་དེ་ལ་དབུལ་ལོ། །དེས་སྨྲས་པ། གནས་གཙང་མའི་རིས་ཀྱི་ལྷ་འདི་དག་ནི་བདག་བས་ཆེས་ཁྱད་པར་དུ་འཕགས་པ་ཡིན་གྱིས་དེ་དག་ལ་ཕུལ་ཅིག ། དེ་གཉིས་ཀྱིས་དེ་དག་ལ་སྦྱིན་པར་བརྩམས་པ་དང་། དེ་དག་གིས་ཀྱང་སྨྲས་པ། ཅི་བདག་ཅག་ལ་སྦྱིན་ནམ། འོན་ཏེ་བདག་ཅག་བས་ཆེས་ཁྱད་པར་དུ་འཕགས་པ་གང་ཡིན་པ་དེ་ལ། དེ་གཉིས་ཀྱིས་སྨྲས་པ། ཁྱེད་བས་ཆེས་ཁྱད་པར་དུ་འཕགས་པ་གང་ཡིན་པ་དེ་ལའོ། །དེ་ དག་གིས་སྨྲས་པ། བྱང་ཆུབ་སེམས་དཔའ་བཅོམ་ལྡན་འདས་འདི་ཆུ་ཀླུང་ནཻ་རཉྫ་ནར་ཞུགས་ནས་སྐུ་ཁྲུས་མཛད་དེ་ཉམ་ཆུང་བ་ཉིད་ཀྱིས་བཞེངས་མི་སྤྱོད་པ་ཞིག་ཡོད་དེ། དེ་བདག་ཅག་པས་ཆེས་ཁྱད་པར་དུ་འཕགས་པ་ཡིན་གྱིས་དེ་ལ་ཕུལ་ཅིག །དེ་གཉིས་དེའི་དྲུང་དུ་ཆས་པ་དང་། དེའི་ ཚེ་ལྷ་རྣམས་ཀྱིས་ཤིང་ཨརྫུ་ནའི་ཡལ་ག་བཏུད་ནས་བཏུད་པ་ལ་བྱང་ཆུབ་སེམས་དཔའ་འཇུས་ཏེ་ཆུ་ཀླུང་ནཻ་རཉྫ་ན་ནས་བྱུང་ནས་ཆོས་གོས་བགོས་ཏེ་ཆུ་ཀླུང་ནཻ་རཉྫ་ནའི་འགྲམ་ན་བཞུགས་སོ། །དེ་ནས་དེ་གཉིས་ཀྱིས་གུས་པ་དང་བསམ་པ་དྲག་པོས་དེ་ལའོ་ཐུག་སྦྲང་རྩི་ལྟར་མངར་བ་དེ་ ཕུལ་ལོ། །བྱང་ཆུབ་སེམས་དཔས་ཀྱང་དེ་གཉིས་རྗེས་སུ་གཟུང་བའི་ཕྱིར་བཞེས་སོ། །བཞེས་ནས་གསུངས་པ། ཅི་ཡོལ་གོ་འདི་ཡང་ཡོངས་སུ་བཏང་ངམ། དེ་གཉིས་ཀྱིས་གསོལ་པ། བཅོམ་ལྡན་འདས་འདི་ཡང་ཡོངས་སུ་བཏང་ལགས་སོ། །དེ་ནས་བྱང་ཆུབ་སེམས་

  674. 27b

    དཔས་འོ་ཐུག་སྦྲང་རྩི་ལྟར་མངར་བ་གསོལ་ནས་ཡོལ་གོ་དེ་བཀྲུས་ཏེ་ཆུ་ཀླུང་ནཻ་རཉྫ་ནར་བོར་བ་ཀླུ་རྣམས་ཀྱིས་བླངས་སོ། །འདི་ནི་ཆོས་ཉིད་ཡིན་ཏེ། ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ནམ་མཁའ་ལྡིང་གི་ཆ་བྱད་དུ་སྤྲུལ་ཏེ། ཆུ་ ཀླུང་ནཻ་རཉྫ་ན་དཀྲུགས་ནས་ཀླུ་སྐྲག་པར་བྱས་ཏེ་ཡོལ་གོ་དེ་ཕྲོགས་ནས་སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཁྱེར་ཏེ་ཡོལ་གོའི་མཆོད་པ་ཆེན་པོ་བཙུགས་སོ། །དེ་ནས་བྱང་ཆུབ་སེམས་དཔས་དགའ་མོ་དང་། དགའ་སྟོབས་ལ་གསུངས་པ། སྦྱིན་པ་འདིས་ཅི་ཞིག་དོན་དུ་གཉེར། དེ་གཉིས་ཀྱིས་གསོལ་པ། བཅོམ་ལྡན་འདས་ཤཱཀྱ་རྣམས་ཀྱི་གཞོན་ནུ་གངས་རིའི་ངོས། ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བར་བྱུང་བ་དེ་མཚན་མཁན་དང་ལྟས་མཁན་གྱི་བྲམ་ཟེ་རྣམས་ཀྱིས་འཁོར་ལོས་སྒྱུར་བའི་རྒྱལ་པོར་ ལུང་བསྟན་པ་ཞིག་མཆིས་པ་དེ་སེམས་བསྐྱེད་པ་དང་ཞལ་ཟས་ཕུལ་བའི་དགེ་བའི་རྩ་བས་བདག་ཅག་གི་ཁྱིམ་ཐབ་ཏུ་གྱུར་ཅིག །བྱང་ཆུབ་སེམས་དཔས་གསུངས་པ། དེ་འདོད་པ་རྣམས་ལ་དོན་དུ་མི་གཉེར་བས་རབ་ཏུ་བྱུང་ཟིན་ནོ། །དེ་གཉིས་ཀྱིས་གསོལ་པ། བཅོམ་ ལྡན་འདས་གལ་ཏེ་འདོད་པ་རྣམས་དོན་དུ་མི་གཉེར་ན། བསོད་པ་ཕུལ་བའི་བསོད་ནམས་ཅི་མཆིས་པས། །གྲགས་དང་ལྡན་པ་དོན་རྣམས་ཀུན་གྲུབ་པ། །མི་ཡི་མཆོག་གྱུར་བློ་མཆོག་ལྡན་པ་དེའི། །དོན་ཀུན་མྱུར་དུ་ཤིན་ཏུ་གྲུབ་གྱུར་ཅིག །བྱང་ཆུབ་སེམས་དཔས་དེ་བཞིན་ དུ་གྱུར་ཅིག་ཅེས་གསུངས་ནས་འོ་ཐུག་སྦྲང་རྩི་ལྟར་མངར་བ་གསོལ་ཏེ། དབང་པོ་དྲུག་ཚིམ་ཞིང་སྟོབས་དང་མཐུ་ཐོབ་ནས་ཆུ་ཀླུང་ནཻ་རཉྫ་ནའི་འགྲམ་ན་ཕན་ཚུན་དུ་བཞུགས་པའི་ས་བཙལ་བ་དང་། ཇི་ཙམ་ན་རི་བྲགས་ཆེན་པོ་མེ་ཏོག་དང་འབྲས་བུ་སྣ་ཚོགས་དང་ལྡན་པ་ཞིག་གཟིགས་ནས། དེ་དེ་ལ་འཛེགས་ཏེ་ཕྱོགས་དབེན་ཞིང་གསལ་བའི་ས་ཕྱོགས་སུ་སྐྱིལ་མོ་ཀྲུང་བཅས་ཏེ་བཞུགས་སོ། །བཞུགས་མ་ཐག་ཏུ་རི་དེ་ཉིད་ཉིལ་ཏོ། །བྱང་ཆུབ་སེམས་དཔས་དགོངས་པ། ངེས་པར་བདག་གིས་ལས་སྐྱོན་ཅན་ཞིག་བྱས་ཏེ་དེས་ན་རི་འདི་ཉིལ་ཏོ་སྙམ་མོ། །ལྷ་རྣམས་ཀྱི་སེམས་

  675. 28a

    ཀྱིས་བྱང་ཆུབ་སེམས་དཔའི་ཐུགས་ཤེས་ནས་གསོལ་པ། བཅོམ་ལྡན་འདས་ཁྱོད་ཀྱིས་སྐྱོན་ཅན་གྱི་ཕྲིན་ལས་མ་མཛད་དོ། །འོན་ཀྱང་འདི་ནི་ཆོས་ཉིད་ལགས་ཏེ། ས་ཐམས་ཅད་ཀྱིས་གཟུང་བར་རྔོ་མི་ཐོག་པ་ནི་གཉིས་ཏེ། དགེ་བའི་རྩ་བ་ཆད་པ་གང་ལགས་པ་དང་། དགེ་བའི་རྩ་བ་སྦྱངས་པ་གང་ལགས་པའོ། །ཁྱོད་ནི་དགེ་བའི་རྩ་བ་སྦྱངས་པ་ལགས་སོ། །བཅོམ་ལྡན་འདས་འདི་ནི་བྱང་ཆུབ་སེམས་དཔའ་རྣམས་ཀྱི་གནས་མ་ལགས་ཏེ། འོན་ཀྱང་ཆུ་ཀླུང་ནཻ་རཉྫ་ན་རྒོལ་ལ་ཕྱོགས་ཆེ་གེ་མོ་ཞིག་ན་རྡོ་རྗེའི་གདན་མཆིས་ཀྱིས་བཞུད་ཅིག །དེར་ནི་འདས་ པ་དང་། མ་བྱོན་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་བཞུགས་ནས་བླ་ན་མེད་པའི་ཡེ་ཤེས་ཐོབ་པར་གྱུར་ཅིང་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷས་ལམ་བསྟན་པ་བཞིན་གཤེགས་པ་ན་དེའི་ཞབས་བཞག་པར་པད་མ་དག་བྱུང་བར་གྱུར་ཏོ། ། རྒྱ་མཚོ་ཆེན་པོ་བཞི་ལས་ཀྱང་ཆུ་བབ་ནས་པད་མའི་རྫིང་དག་བྱུང་བར་གྱུར་ཏོ། །གོམ་པ་བོར་ནས་མནན་པ་ན་ས་ཆེན་པོ་འདི་ཁར་བའི་སྣོད་བཞིན་དུ་སྒྲ་འབྱིན་པར་བརྩམས་སོ། །བྱ་ཙ་ཤ་དང་རི་དགས་དག་གིས་ཀྱང་བྱང་ཆུབ་སེམས་དཔའ་ལ་སྐོར་བ་བྱེད་དོ། །རླུང་གཏོང་བའི་ལྷའི་བུ་ རྣམས་ཀྱིས་ཀྱང་དལ་བུ་དལ་བུས་རླུང་གཏོང་བར་བྱེད་དོ། །ཆར་པ་འབེབས་པའི་ལྷའི་བུ་རྣམས་ཀྱིས་ཀྱང་ཆར་པ་ཆུང་ཟད་འབེབས་པར་བྱེད་དོ། །བྱང་ཆུབ་སེམས་དཔས་དགོངས་པ། ང་ལ་འདི་འདྲ་བའི་མཚན་མ་བྱུང་བར་གྱུར་པས་དེང་ཉིད་བདག་གིས་བླ་ན་མེད་པའི་ཡེ་ཤེས་ཐོབ་པར་ འགྱུར་རོ་སྙམ་མོ། །ཆུ་ཀླུང་ནཻ་རཉྫ་ནར་ཀླུའི་རྒྱལ་པོ་དུས་ཅན་སྔོན་གྱི་ལས་ཀྱི་རྣམ་པར་སྨིན་པ་ལས་སྐྱེས་པའི་གནས་ཤིག་བྱུང་བར་གྱུར་ཏེ། དེ་སངས་རྒྱས་བྱུང་ཞིང་སངས་རྒྱས་འབྱུང་བ་ན་མིག་ཐོབ་པར་འགྱུར་བ་ཡིན་པས་དེ་སའི་སྒྲ་གྲགས་པས་གནས་ནས་བྱུང་བ་ན་རྒྱང་རིང་པོ་ཁོ་ན་ ནས་བྱང་ཆུབ་སེམས་དཔའ་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་སྤྲས་པ། འོད་འདོམ་གང་གིས་བརྒྱན་པ། ཉི་མ་སྟོང་བས་ལྷག་པའི་འོད་ཟེར་དང་། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ་མཐོང་ངོ་། །

  676. 28b

    མཐོང་མ་ཐག་ཏུ་བྱང་ཆུབ་སེམས་དཔའ་ལ་ཚིགས་སུ་བཅད་པའི་དབྱངས་ཀྱིས་བསྟོད་པར་བརྩམས་པ། དགའ་བའི་དབྱངས་ཀྱིས་ཀུན་གང་བའི། །ས་ཡི་སྒྲ་ནི་ཐོས་ནས་ཀྱང་། །ཀླུ་ནི་གནས་ནས་བྱུང་ནས་སུ། །ཕྱོགས་ཀུན་དུ་ཡང་ལྟ་བར་བྱེད། །བྲང་གིས་འགྲོ་བའི་གཙོ་བོ་སྟེ། །ཀླུ་ཡི་ རྒྱལ་པོ་མཐུ་ཆེན་གྱིས། །ནཻ་རཉྫ་ནའི་ངོས་སུ་ནི། །འཇིག་རྟེན་འདྲེན་པ་གཤེགས་པ་མཐོང་། །སངས་རྒྱས་བྱུང་བའི་མཐུ་ཡིས་ནི། །ཀླུ་ཡིས་མིག་ནི་ཐོབ་གྱུར་ཏེ། །སེམས་དགའ་ཞིང་ནི་ཡིད་མགུ་ནས། །དེས་ནི་འདི་སྐད་ཚིག་གསོལ་ཏོ། །བདག་གིས་སྔོན་ནི་མཐོང་བ་ཡི། །སངས་ རྒྱས་མཐུ་ཆེན་དེ་རྣམས་དང་། །ཐུབ་པ་ཁྱོད་ནི་མཐོང་གྱུར་ན། །དེ་དང་ཐ་དད་དབྱེར་མ་མཆིས། །ཐུབ་པ་ཇི་ལྟར་ཐོག་མར་ནི། །གཡས་པའི་ཞབས་ནི་བཏེག་པ་ལས། །ཁྱོད་ནི་སངས་རྒྱས་དེང་གྱུར་ནས། །འཇིག་རྟེན་གྱི་ནི་ཡོན་གནས་འགྱུར། །ཇི་ལྟར་ཆོས་གོས་མནབས་པ་དང་། ། ནཻ་རཉྫ་ནའི་ཆུ་བསིལ་ལ། །ཇི་ལྟ་བུར་ནི་འཇུག་པ་ལས། །དེ་རིང་ཁྱོད་ནི་སངས་རྒྱས་འགྱུར། །ཇི་ལྟར་རབ་བརྟེན་འགྲོས་སུ་གཤེགས་པ་དང་། །བ་ལང་ཁྱུ་མཆོག་འགྱིང་བ་ལྟར་གཤེགས་པས། །སྐྱེས་བུ་ཁྱུ་མཆོག་ཆོས་འཛིན་རྣམས་ཀྱི་མཆོག །དེང་འདིར་ཁྱོད་ནི་སངས་རྒྱས་ མཆོག་འགྱུར་རོ། །ད་ལྟར་མཁའ་ལ་ཙ་ཤ་བརྒྱ་ཕྲག་གིས། །ཁྱོད་སྐུ་རྒྱ་ཆེན་རྒྱ་ཆེན་མཛད་དེ་ལ། །ལྡིང་ཞིང་བསྐོར་བ་བགྱིད་པར་གྱུར་པ་ལས། །མི་མཆོག་དེང་ནི་སངས་རྒྱས་མཆོག་འགྱུར་རོ། །ཇི་ལྟར་དྲི་ཞིམ་རླུང་ནི་ལྡང་བ་དང་། །རི་དགས་བྱ་ཡི་ཚོགས་ཀྱང་མི་སྐྲག་ལ། ། ལྗོན་ཤིང་རླུང་གིས་གཡོས་པར་མ་གྱུར་པས། །མི་མཆོག་དེང་ནི་སངས་རྒྱས་མཆོག་འགྱུར་རོ། །ཇི་ལྟར་བཙུན་པ་ཁྱོད་ཀྱི་ཞལ་གྱི་འོད། །དྲི་མེད་གསེར་འོད་འབར་བ་འདྲ་བ་དེ། །རྣམ་པར་མཛེས་ཤིང་ཁ་དོག་ལྡན་པས་ན། །མི་མཆོག་དེང་ནི་སངས་རྒྱས་མཆོག་འགྱུར་རོ།། །། བར་སྡོམ་ལ། སྒྲ་དང་མཐོང་དང་སངས་རྒྱས་དང་། །རྫོགས་དང་ཞབས་དང་ཆོས་གོས་དང་། །བརྟེན་དང་རྩྭ་ཤ་དེ་བཞིན་རླུང་། །ཁྱོད་གཏོགས་པ་དང་དེ་བཅུའོ། །དེ་ནས་བྱང་ཆུབ་སེམས་དཔའ་ཀླུའི་རྒྱལ་པོ་དུས་ཅན་གྱིས་ཡང་དག་པར་བསྟོད་ནས་རྡོ་རྗེའི་གདན་ལོགས་སུ་གཤེགས་ཏེ་

  677. 29a

    དེས་དགོངས་པ། རྩྭའི་གདིང་བ་ལ་འདུག་པར་བྱའོ་སྙམ་པ་དང་། དེ་ལ་རྩྭའི་དགོས་པ་བྱུང་བར་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་བྱང་ཆུབ་སེམས་དཔའི་དགོངས་པ་ཤེས་ནས། རི་སྤོས་ཀྱི་ངད་ལྡང་ལས་ཤིང་བལ་གྱི་འདབ་མ་ལྟར་རེག་ན་བདེ་བའི་རྩྭ་ཁུར་གཅིག་ བླངས་ནས་རྩྭ་འཚོང་བཀྲ་ཤིས་ཀྱི་ཁ་དོག་ཏུ་བདག་ཉིད་མངོན་པར་སྤྲུལ་ཏེ་བྱང་ཆུབ་སེམས་དཔའི་སྤྱན་སྔར་བསྡད་དོ། །བྱང་ཆུབ་སེམས་དཔས་གསུངས་པ། བཞིན་བཟངས་རྩྭའོ་ནི་དག་ང་ལ་ཕུལ་ཅིག །ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ཞབས་གཉིས་ ལ་གཏུགས་ནས་གུས་པ་དང་བཅས་པས་ཕུལ་ལོ། །དེ་ནས་བྱང་ཆུབ་སེམས་དཔས་བཀྲ་ཤིས་ཀྱི་རྩྭ་འཚོང་ལས་རྩྭ་བཞེས་ཏེ་ལྷ་རྣམས་ཀྱིས་བསྟན་པའི་ལམ་ནས་བྱང་ཆུབ་ཀྱི་སྙིང་པོ་གང་ན་བ་དེར་གཤེགས་ཏེ་བྱོན་ནས་རྩྭ་རྣམས་མ་འཁྲུགས་པ་དང་། སྟུག་སྲབ་མེད་པ་དགྲམ་པར་ བརྩམས་སོ། །དེ་ནས་རྩྭ་དེ་རྣམས་བསྐོར་ཐབས་སུ་ལྷུང་ནས་བྱང་ཆུབ་སེམས་དཔས་དགོངས་པ། ཇི་ལྟར་རྩྭ་འདི་རྣམས་བསྐོར་ཐབས་སུ་ལྷུང་བ་ལས་བདག་གིས་གདོན་མི་ཟ་བར་དེང་བླ་ན་མེད་པའི་ཡེ་ཤེས་རྟོགས་པར་འགྱུར་རོ་སྙམ་དུ་དགོངས་ནས་རྡོ་རྗེའི་གདན་ལ་འཛེགས་ཏེ་བྲང་ གིས་འགྲོ་བའི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་སྐུ་དྲང་པོར་བསྲང་དྲན་པ་མངོན་དུ་ཕྱོགས་པར་བཞག་སྟེ་བཞུགས་ནས་སེམས་བསྐྱེད་ཅིང་ཚིག་ཏུ་ཡང་གསུངས་པ། ཇི་སྲིད་ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་ཀྲུང་གཞིག་པར་མི་བྱའོ་ཞེས་དེས་རེ་ ཞིག་ཟག་པ་ཟད་པ་མ་ཐོབ་ཀྱི་བར་དུ་སྐྱིལ་མོ་ཀྲུང་མ་བཤིག་གོ། །བདུད་སྡིག་ཅན་གྱི་རྒྱལ་མཚན་གཉིས་པོ་དགའ་བའི་གནས་དང་། དོགས་པའི་གནས་གཉིས་ཡོད་པ་ལས། དོགས་པའི་གནས་ཀྱི་རྒྱལ་མཚན་གཡོ་བར་བརྩམས་སོ། །སྡིག་ཅན་གྱིས་བསམས་པ། ཇི་ལྟར་ རྒྱལ་མཚན་འདི་གཡོ་བ་ལས་གདོན་མི་ཟ་བར་གནོད་པ་བྱེད་པ་ཞིག་བྱུང་ངོ་སྙམ་སྟེ། དེ་བསམ་པ་ལ་ཞུགས་པ་དང་། ཇི་ཙམ་ན་བྱང་ཆུབ་སེམས་དཔའ་རྡོ་རྗེའི་གདན་ལ་བཞུགས་པ་མཐོང་ངོ་། །དེ་འདི་སྙམ་དུ་སེམས་ཏེ། ཤཱཀྱ་ཟས་གཙང་གི་བུ་འདི་རྡོ་རྗེའི་གདན་ལ་འདུག་གིས། ཅི་ཙམ་

  678. 29b

    བདག་གི་ཡུལ་ལས་མ་འདས་ཀྱི་བར་དུ་དེ་ལ་བགེགས་བྱའོ་སྙམ་དུ་བསམས་ནས་ཕྲིན་ཡིག་སྐྱེལ་བ་སྐྲ་གྱེན་དུ་འགྲེང་བ། ཤ་ནའི་སྨད་གཡོགས་བགོས་པ་ཞིག་གི་ཁ་དོག་ཏུ་མངོན་པར་སྤྲུལ་ནས། བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་རྟབས་པར་སྨྲས་པ། གྲོང་ཁྱེར་སེར་སྐྱའི་ གཞི་ནི་ལྷས་བྱིན་གྱིས་མནན་ཕོ་བྲང་ནི་བཅོམ། ཤཱཀྱ་རྣམས་ནི་ཁ་བཏག་ན་ཁྱོད་ཅིའི་ཕྱིར་གནས་བཏབ་སྟེ་འདུག །དེ་ན་བྱང་ཆུབ་སེམས་དཔའ་ལ་སྡིག་པ་མི་དགེ་བའི་རྣམ་པར་རྟོག་པ་གསུམ་སྐྱེས་པ་འདི་ལྟ་སྟེ། འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པའོ། །དེ་ལ་འདོད་པའི་རྣམ་པར་རྟོག་པ་ནི་གྲགས་འཛིན་མ་དང་། རི་དགས་སྐྱེས་དང་། ས་འཚོམ་ལའོ། །གནོད་སེམས་ཀྱི་རྣམ་པར་རྟོག་པ་ནི་ལྷས་བྱིན་ལའོ། །རྣམ་པར་འཚེ་བའི་རྣམ་པར་རྟོག་པ་ནི་དེའི་རྗེས་སུ་འཚོ་བའི་ཤཱཀྱ་རྣམས་ལའོ། ། བྱང་ཆུབ་སེམས་དཔའ་འདི་སྙམ་དུ་དགོངས་ཏེ། ཅིའི་ཕྱིར་བདག་ལ་སྡིག་པ་མི་དགེ་བའི་རྣམ་པར་རྟོག་པ་གསུམ་སྐྱེས་སྙམ་ན། ཇི་ཙམ་ན་བདུད་སྡིག་ཅན་འདི་ལྟ་སྟེ། དཀྲུག་པའི་ལས་ཀྱི་ཕྱིར་ཉེ་བར་འོངས་པ་གཟིགས་སོ། །དེ་ནས་བྱང་ཆུབ་སེམས་དཔའ་ལ་དགེ་བའི་རྣམ་པར་རྟོག་ པ་གསུམ་སྐྱེས་ཏེ། འདི་ལྟ་སྟེ། ངེས་པར་འབྱུང་བའི་རྣམ་པར་རྟོག་པ་དང་། གནོད་སེམས་མེད་པའི་རྣམ་པར་རྟོག་པ་དང་། རྣམ་པར་མི་འཚེ་བའི་རྣམ་པར་རྟོག་པའོ། །ཡང་བདུད་ཀྱིས་སྨྲས་པ། ཁྱོད་ཅིའི་ཕྱིར་བྱང་ཆུབ་ཀྱི་སྙིང་པོ་ལ་འདུག །བྱང་ཆུབ་སེམས་དཔས་བཀའ་ སྩལ་པ། བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་རོ། །བདུད་ཀྱིས་སྨྲས་པ། ཁྱོད་ཀྱིས་བླ་ན་མེད་པའི་ཡེ་ཤེས་ག་ལ་ཐོབ། བྱང་ཆུབ་སེམས་དཔས་བཀའ་སྩལ་པ། སྡིག་ཅན་ཁྱོད་ཀྱིས་རེ་ཞིག་མཆོད་སྦྱིན་གཅིག་བྱས་པས་ཀྱང་འདོད་པའི་ཁམས་ཀྱི་དབང་ཕྱུག་ཕུན་སུམ་ཚོགས་པར་ གྱུར་ན། ངས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང་། ལག་པ་དང་། རྐང་པ་དང་། མིག་དང་། ཤ་དང་། ཁྲག་དང་། བུ་དང་། ཆུང་མ་དང་། དབྱིག་དང་། གསེར་ལ་སོགས་པ་ཡོངས་སུ་བཏང་

  679. 30a

    བས་བླ་ན་མེད་པའི་ཡེ་ཤེས་ཐོབ་པར་འགྱུར་བ་ལྟ་སྨོས་ཀྱང་ཅི་དགོས་ཏེ། ངས་བླ་ན་མེད་པའི་ཡེ་ཤེས་ཐོབ་པར་མི་འགྱུར་བ་དེ་སྲིད་རེ་སྐན། དེ་སྐད་ཅེས་བཀའ་སྩལ་པ་དང་། བདུད་ཀྱིས་སྨྲས་པ། རེ་ཞིག་ཇི་ལྟར་བདག་གི་མཆོད་སྦྱིན་གཅིག་གིས་འདོད་པའི་ཁམས་ཀྱི་དབང་ ཕྱུག་ཐོབ་པར་གྱུར་པའི་བདག་གི་དཔང་ནི་ཁྱོད་ཉིད་ཡིན་ན། ཇི་ལྟར་ཁྱོད་ཀྱི་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང་། ལག་པ་དང་། རྐང་པ་དང་། མིག་དང་། ཤ་དང་། ཁྲག་དང་། བུ་དང་། ཆུང་མ་དང་། དབྱིག་དང་། གསེར་ལ་སོགས་པ་ཡོངས་སུ་བཏང་བར་ཁྱོད་ལ་དཔང་དུ་སུ་ཡོད། དེ་ནས་བྱང་ཆུབ་སེམས་དཔའ་བཅོམ་ལྡན་འདས་ཀྱི་ཕྱག་འཁོར་ལོ་དང་། བཀྲ་ཤིས་དང་། གཡུང་དྲུང་འཁྱིལ་བ་དང་། དྲ་བས་ འབྲེལ་བ་བསོད་ནམས་བརྒྱ་ཕྲག་དུ་མས་བསྐྱེད་པ་སྐྲག་པ་རྣམས་ལ་དབུགས་འབྱིན་པར་མཛད་པས་ས་ལ་རེག་པར་མཛད་ནས་ངས་བསྐལ་པ་གྲངས་མེད་པ་གསུམ་དུ་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱས་ཤིང་སེམས་ཅན་རྣམས་ཀྱི་ཕྱིར་མགོ་དང་། ལག་པ་དང་། རྐང་པ་ དང་། མིག་དང་། ཤ་དང་། ཁྲག་དང་། བུ་དང་། ཆུང་མ་དང་། དབྱིག་དང་། གསེར་ལ་སོགས་པ་ཡོངས་སུ་བཏང་བའི་ངའི་དཔང་ནི་ས་འདི་ཡིན་ནོ། །དེ་ནས་སའི་ལྷས་ས་བརྟོལ་ནས་ཐལ་མོ་སྦྱར་ཏེ་སྐད་ཕྱུང་བ། སྡིག་ཅན་བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་ དེ་བཞིན་ཡིན་ནོ་ཞེས་དེ་སྐད་སྨྲས་པ་དང་། བདུད་སྡིག་ཅན་ཅང་མི་སྨྲ་བར་གྱུར་ཏེ། ཞུམ་ཞུམ་པོར་གྱུར། བག་འཁུམས་པར་གྱུར། སྤྱི་བོ་སྨད་ནས་སྤོབས་པ་མེད་ལ་སེམས་ཁོང་དུ་ཆུད་ཅིང་འདུག་པར་གྱུར་ཏེ། དེ་སྡུག་བསྔལ་ཞིང་ཡིད་མི་བདེ་བས་བསམས་པ། བདག་གིས་ ཤཱཀྱ་ཟས་གཙང་གི་བུ་ལ་དེ་ལྟར་བྱས་ཀྱང་གླགས་མ་རྙེད་ཀྱིས། མ་ལ་འདི་ལ་བདག་གིས་ཡང་བགེགས་ཤིག་བྱའོ་ཞེས་སྨྲས་ནས་སོང་ངོ་། །དེ་ནས་དེས་བུ་མོ་གསུམ་པོ་སྲེད་མ་དང་། དགའ་བྱེད་མ་དང་། དགའ་སྤྱོད་མ་མངགས་ཏེ་དེ་རྣམས་གཟུགས་དང་། ལང་ཚོའི་རྒྱགས་

  680. 30b

    པས་དྲེགས་ཤིང་ལྷའི་གོས་དང་རྒྱན་གྱིས་བཀླུབས་ནས་བྱང་ཆུབ་སེམས་དཔའི་མདུན་དུ་བུད་མེད་ཀྱི་གཡོ་རྣམས་བསྟན་པར་བརྩམས་སོ། །དེ་ནས་བྱང་ཆུབ་སེམས་དཔའ་ཐབས་ལ་མཁས་པས་ཇི་ལྟར་རྒན་མོར་གྱུར་པ་དེ་ལྟར་བྱིན་གྱིས་བརླབས་ནས་བདུད་གང་ན་བ་དེར་དོང་བ་དང་། བདུད་ཀྱིས་དེ་རྣམས་དེ་ལྟ་བུའི་རྣམ་པར་མཐོང་ནས་ཡི་ཆད་ནས་ལག་པ་ལ་འགྲམ་པ་གཏད་དེ་གང་གིས་ན་ཤཱཀྱ་ཟས་གཙང་གི་བུའི་དཀའ་ཐུབ་ལ་བགེགས་བྱེད་པར་འགྱུར་བའི་ཐབས་ལེགས་པ་ཅི་ཡོད་སྙམ་ནས་སེམས་ཁོང་དུ་ཆུད་ཅིང་འདུག་གོ། །དེས་འབྱུང་པོའི་དཔུང་ཚོགས་དང་ལྡན་པ་གླང་ པོ་ཆེ་དང་། རྟ་དང་། རྔ་མོ་དང་། ར་དང་། རི་དགས་དང་། མ་ཧེ་དང་། ཕག་དང་། ཁྱི་དང་། འུག་པ་དང་། ནེའུ་ལེ་དང་། སྤྲེའུ་དང་། ཝ་ལ་སོགས་པ་འདྲ་བ་རལ་གྲི་དང་། མདའ་བོ་ཆེ་དང་། མཚོན་རྩེ་གཅིག་པ་དང་། འཁོར་ལོ་དང་། མདུང་ཐུང་དང་། གཞུ་དང་། ཞགས་ པ་དང་། དགྲ་སྟ་དང་། ལྕགས་ཀྱི་བེར་ཀ་ལ་སོགས་ཏེ་མཚོན་ཆ་ཅན་བྱེ་བ་ཕྲག་སུམ་བཅུ་རྩ་དྲུག་དེད་ནས་རང་ཉིད་གཞུ་རྣ་དྲུང་དུ་བཀང་སྟེ་བྱང་ཆུབ་སེམས་དཔའ་ཡོངས་སུ་བསྐོར་ནས་འདུག་གོ། །དེ་ནས་བྱང་ཆུབ་སེམས་དཔས་གཟུགས་རྣམ་པ་དུ་མ་ཅན་མཚོན་ཆ་རྣམ་པ་སྣ་ཚོགས་མང་པོ་དང་ བཅས་པ་དེ་རྣམས་གཟིགས་ནས་དགོངས་པ། རེ་ཞིག་ཕོ་ཕལ་པ་ཞིག་དང་ལྷན་ཅིག་འཐབ་པར་རྩོམ་ན་ཡང་དེའི་གཉེན་པོའི་ཕྱོགས་ལ་སྦྱོར་བ་བྱེད་ན་འདོད་པའི་ཁམས་ཀྱི་དབང་ཕྱུག་འདི་ལ་ལྟ་སྨོས་ཀྱང་ཅི་དགོས་ཀྱིས། མ་ལ་བདག་གིས་གཉེན་པོའི་ཕྱོགས་ལ་སྦྱར་བར་བྱའོ་སྙམ་དུ་ དགོངས་ནས་དེ་ཞི་བར་འགྱུར་བའི་ཐབས་ལ་དགོངས་པར་བརྩམས་སོ། །བདུད་ཀྱིས་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་དང་ལྷན་ཅིག་ཏུ་བྱང་ཆུབ་སེམས་དཔའི་སྟེང་ནས་འཁོར་ལོ་དང་། མདུང་དང་། མདའ་བོ་ཆེ་དང་། མཚོན་རྩེ་གཅིག་པ་དང་། མདའ་ལ་སོགས་པའི་མཚོན་ཆ་ རྣམས་དབབ་པར་བརྩམས་སོ། །དེ་ནས་བྱང་ཆུབ་སེམས་དཔའ་བྱམས་པ་ལ་སྙོམས་པར་ཞུགས་པ་ན་དེའི་མཚོན་ཆ་དེ་རྣམས་ལྷའི་མེ་ཏོག་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོར་གྱུར་ནས་བྱང་ཆུབ་སེམས་དཔའི་ཉེ་འཁོར་དུ་འབབ་པར་བརྩམས་སོ། །དེ་ནས་བདུད་སྟེང་

  681. 31a

    གི་བར་སྣང་ལ་མངོན་པར་འཕགས་ཏེ་ཕྱག་དར་གྱི་ཆར་དབབ་པར་བརྩམས་ན། དེ་ཡང་ལྷའི་མེ་ཏོག་མན་དཱ་ར་བ་རྣམས་སུ་གྱུར་ནས་བྱང་ཆུབ་སེམས་དཔའི་སྟེང་ནས་འབབ་པར་བརྩམས་སོ། །དེ་ནས་བདུད་ཀྱིས་གདུག་པའི་རླུང་དང་། རྡོའི་ཆར་ཕབ་པ་དང་། གནས་གཙང་མའི་རིས་ ཀྱི་ལྷ་རྣམས་ཀྱིས་བྱང་ཆུབ་སེམས་དཔའི་སྟེང་དུ་ལོ་མ་ལས་མ་ཡིན་པའི་སྤྱིལ་པོ་མངོན་པར་སྤྲུལ་པས་རྡོའི་ཆར་དང་གདུག་པའི་རླུང་དུ་བཅས་པ་དེས་བྱང་ཆུབ་སེམས་དཔའ་ལ་ཆུང་ཟད་ཀྱང་གནོད་པར་མ་གྱུར་ཏོ། །བདུད་ཀྱིས་བསམས་པ། བདག་གིས་ནམ་དུ་ཡོངས་སུ་བསྐོར་ཏེ་འདུག །བསམ་ གཏན་གྱི་ཚེར་མ་ནི་སྒྲ་ཡིན་གྱི། བྱང་ཆུབ་ཀྱི་ཤིང་ཤེལ་ལས་བྱས་པར་མངོན་པར་སྤྲུལ་ལ་སོང་བ་དང་། དེའི་ལོ་མ་རྣམས་རྟག་པར་སྒྲ་འབྱིན་པས་དེའི་སེམས་རྩེ་གཅིག་པར་མི་འགྱུར་རོ་སྙམ་དུ་བསམས་ནས་བྱང་ཆུབ་ཀྱི་ཤིང་ཤེལ་ལས་བྱས་པར་མངོན་པར་སྤྲུལ་ཏེ། རྣ་བ་གཏད་ནས་བསྒྲིམས་ ཏེ་བསྡད་པ་ན་བྱང་ཆུབ་ཀྱི་ཤིང་གི་ལོ་མ་ཤེལ་ལས་བྱས་པ་རྣམས་མྱུར་བ་མྱུར་བར་སྒྲ་འབྱིན་པར་བརྩམས་པས་བསམ་གཏན་གྱི་ཚེར་མ་ནི་སྒྲ་ཡིན་པས། བྱང་ཆུབ་སེམས་དཔས་སེམས་རྩེ་གཅིག་པ་མ་ཐོབ་བོ། །གནས་གཙང་མའི་རིས་ཀྱི་ལྷ་རྣམས་ཀྱིས་བསམས་པ། ཤེལ་ལས་བྱས་ པའི་བྱང་ཆུབ་ཀྱི་ཤིང་གི་ལོ་མ་ཤེལ་ལས་བྱས་པ་རྣམས་ཀྱི་སྒྲས་བྱང་ཆུབ་སེམས་དཔའ་སེམས་རྩེ་གཅིག་པ་མ་ཐོབ་ཀྱིས་ཐབས་ཤིག་བཤམ་པར་བྱའོ་སྙམ་སྟེ། དེ་ནས་དེ་རྣམས་ཀྱིས་ལོ་མ་རེ་རེ་བཟུང་ན། འོན་ཀྱང་བདུད་ཀྱི་དཔུང་དེ་བཞིན་དུ་གནས་ནས་གནས་གཙང་མའི་རིས་ཀྱི་ལྷ་ རྣམས་ཀྱིས་བསམས་པ། བདུད་སྡིག་ཅན་འདི་ནི་རིང་མོ་ཞིག་ཏུ་བྱང་ཆུབ་སེམས་དཔའ་ལ་རྣམ་པར་འཚེ་བར་འགྱུར་རོ་སྙམ་དུ་བསམས་ནས་བདུད་ཀྱི་དཔུང་དེ་ཁོར་ཡུག་གི་ཕ་རོལ་དུ་འཕངས་སོ། །དེ་ནས་བྱང་ཆུབ་སེམས་དཔའ་བཅོམ་ལྡན་འདས་ལྟེང་རྒྱས་ནས་འབབ་ཆུ་ནཻ་རཉྫ་ནའི་འགྲམ་ བྱང་ཆུབ་ཀྱི་ཤིང་དྲུང་དུ་བཞུགས་ཏེ་རྟག་ཏུ་བྱ་བ་དང་། འགྲུས་སྐྱོང་དང་ལྡན་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་བསྒོམ་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་སོ། །དེ་ནམ་གྱི་ཐུན་དང་པོ་ལ་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་

  682. 31b

    དགོངས་པ་མངོན་དུ་བཞག་པ་ན། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་མཛད་དེ། འདི་ལྟ་སྟེ་གཅིག་ཏུ་གྱུར་ཅིང་མང་པོར་གྱུར་པ་དང་། མང་པོར་གྱུར་ཅིང་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་གྱུར་པ་ཡེ་ཤེས་གཟིགས་པས་ཉམས་སུ་མྱོང་བར་མཛད་དོ། ། སྐུས་རྩིག་པ་དང་། རི་དང་། ར་བ་ལ་ཡང་ཐད་ཀར་གཤེགས་པར་མཛད་དེ། དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་། བྱིའུ་ཟུལ་མཛད་དེ། དཔེར་ན་ཆུ་ལ་བྱ་བ་བཞིན་ནོ། །ཆུའི་རྒྱུན་ལ་ཡང་མི་ཉམས་པར་གཤེགས་ཏེ། དཔེར་ན་ས་ལ་བྱ་བ་ བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་གཤེགས་པར་མཛད་དེ། དཔེར་ན་འདབ་ཆགས་བྱ་བཞིན་ནོ། །ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་གཟི་བརྗིད་ཆེ་བ་ལ་ཕྱག་གིས་ནོམ་ཞིང་ཉུག་པར་མཛད་ཅིང་ཚངས་པའི་འཇིག་རྟེན་གྱི་བར་དུ་སྐུས་དབང་སྒྱུར་ བར་མཛད་དོ། །ཡང་བདུད་ཀྱིས་བསམས་པ། བསམ་གཏན་གྱི་ཚེར་མ་སྒྲ་ཡིན་པས་མ་ལ་བདག་གིས་རྒྱང་རིང་པོ་ཁོ་ནར་འདུག་ལ་སྒྲ་དབྱུང་བར་བྱའོ་སྙམ་ནས་དེས་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་དང་། འཇིགས་པ་ཆེན་པོ་འཇིགས་སུ་རུང་བའི་སྒྲ་ཕྱུང་ངོ་། །བྱང་ཆུབ་སེམས་ དཔས་ཀྱང་དེ་བསྒྲིབ་པའི་ཕྱིར་དཔག་ཚད་བཅུ་གཉིས་ཀྱི་བར་དུ་ཤིང་ཀ་དམ་པའི་ཚལ་སྤྲུལ་པས་དེས་ན་སྒྲ་དེ་རྡུགས་པས་མི་གྲག་གོ། །བྱང་ཆུབ་སེམས་དཔས་དགོངས་པ། མ་ལ་བདག་གིས་ལྷའི་རྣ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་བཞག་ ནས། དེས་ན་ལྷ་དང་མི་རྣམས་ཀྱི་སྒྲ་གང་དང་གང་དག་ཐོས་པར་འདོད་པ་དེ་དག་མཉན་པར་བྱའོ་སྙམ་དུ་དགོངས་ནས་ལྷའི་རྣ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་བཞག་པ་ན། དེ་ལྷའི་སྙན་རྣམ་པར་དག་པ་མི་རྣམས་ཀྱི་ལས་འདས་པས་སྒྲ་གཉིས་པོ་མི་ རྣམས་དང་། མི་མ་ཡིན་པ་རྣམས་ཀྱི་དང་། གང་དག་རིང་བ་དང་། གང་དག་ཉེ་བ་ཡང་གསན་ཏོ། །དེ་ནས་བྱང་ཆུབ་སེམས་དཔས་དགོངས་པ། བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་ལས་བདག་ལ་སུ་དག་ནི་གནོད་པར་སེམས། སུ་དག་ནི་མ་ཡིན་ཞེས་དེ་དག་ཇི་

  683. 32a

    ལྟར་ཤེས་པར་བྱ་སྙམ་པ་དང་དེ་འདི་སྙམ་དུ་དགོངས་ཏེ། སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་ནས། དེ་ནམ་གྱི་གུང་ཐུན་ལ་སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་ པ་ན། དེའི་ཐུགས་ཀྱིས་སེམས་ཅན་གཞན་དག་དང་གང་ཟག་གཞན་གྱི་རྣམ་པར་རྟོག་པ་དང་། རྣམ་པར་དཔྱོད་པའི་ཡིད་ཇི་ལྟ་བ་བཞིན་དུ་རབ་ཏུ་མཁྱེན་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདོད་ ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། བསྡུས་པ་དང་། རྣམ་པར་གཡེངས་པ་དང་། ཞུམ་ པ་དང་། རབ་ཏུ་འཛིན་པ་དང་། རྒོད་པ་དང་། མི་རྒོད་པ་དང་། ཉེ་བར་མ་ཞི་བ་དང་། ཉེ་བར་ཞི་བ་དང་། མཉམ་པར་མ་བཞག་པ་དང་། མཉམ་པར་བཞག་པ་དང་། མ་བསྒོམས་པ་དང་། བསྒོམས་པ་དང་། སེམས་རྣམ་པར་མ་གྲོལ་བ་དང་། རྣམ་པར་གྲོལ་བ་ཞེས་ཇི་ལྟ་བ་བཞིན་ དུ་རབ་ཏུ་མཁྱེན་ཏོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་སོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་འདི་སྙམ་དུ་དགོངས་ཏེ། བདུད་ཀྱི་མངག་གཞུག་པ་འདི་རྣམས་ལས་སུ་དག་བདག་དང་ཚེ་རབས་གཞན་ན་མར་འབྲེལ་བའམ། ཕར་འབྲེལ་ བའམ། སུ་དག་གཤེད་མའམ། ཕྱིར་རྒོལ་བའམ། དགྲར་གྱུར་པ་དེ་དག་ཇི་ལྟར་ཤེས་པར་བྱ་སྙམ་མོ། །དེ་འདི་སྙམ་དུ་དགོངས་ཏེ། སྔོན་གྱི་གནས་རྗེས་སུ་དྲན་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་ནས། དེ་ནམ་གྱི་གུང་ཐུན་ལ་སྔོན་གྱི་གནས་ རྗེས་སུ་དྲན་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན། དེས་སྔོན་གྱི་གནས་རྣམ་པ་དུ་མ་རྗེས་སུ་དགོངས་ཏེ། འདི་ལྟ་སྟེ། དེས་སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་།

  684. 32b

    དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱ་དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བརྒྱ་ཕྲག་དུ་མ་དང་། སྐྱེ་བ་སྟོང་ཕྲག་དུ་མ་དང་། སྐྱེ་བ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་ བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་འཆགས་པའི་བསྐལ་པ་དུ་མ་རྗེས་སུ་དགོངས་ཏེ། བདག་སྔོན་སེམས་ཅན་འདི་དག་གི་ནང་ན་གནས་པ་ན་མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་སྡུག་བསྔལ་ནི་འདི་ལྟ་བུ་ཞིག་ཉམས་སུ་མྱོང་། ཚེ་ནི་འདི་སྲིད་ཅིག་ལོན། ཡུན་ནི་འདི་སྲིད་ཅིག་འདུག་འདུག །ཚེ་ནི་འདི་སྲིད་ཅིག་ལོན་ཏེ་གནས་དེ་ནས་བདག་ཤི་འཕོས་ཏེ་ཆེ་གེ་མོ་ཞིག་ཏུ་སྐྱེས་ སོ། །དེ་ནས་ཀྱང་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་བྱ་བ་རྣམ་པ་དང་བཅས་ཏེ་ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དགོངས་སོ། །དེ་འདི་སྙམ་དུ་དགོངས་ཏེ། བདུད་ཀྱི་མངག་གཞུག་འདི་རྣམས་ལས་ སུ་དག་ནི་ངན་སོང་དུ་འགྲོ། སུ་དག་ནི་མི་འགྲོ་བ་དེ་དག་ཇི་ལྟར་ཤེས་པར་བྱ་སྙམ་མོ། །དེ་འདི་སྙམ་དུ་དགོངས་ཏེ། འཆི་འཕོ་དང་སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་སྟེ། དེ་ནམ་གྱི་ཐུན་ཐ་མ་ལ་འཆི་འཕོ་དང་སྐྱེ་བ་ཤེས་པ་མངོན་སུམ་དུ་བྱ་བའི་མངོན་ པར་ཤེས་པ་ལ་དགོངས་པ་མངོན་དུ་བཞག་པ་ན། དེའི་ལྷའི་སྤྱན་རྣམ་པར་དག་པ་མི་རྣམས་ཀྱི་ལས་འདས་པས་གཟིགས་ན་སེམས་ཅན་རྣམས་ཀྱི་འཆི་འཕོ་དང་། སྐྱེ་བ་དང་། ཁ་དོག་བཟང་པོ་དང་། ཁ་དོག་ངན་པ་དང་། དམན་པ་དང་། གྱ་ནོམ་པ་དང་། བདེ་འགྲོ་དང་། ངན་འགྲོ་ དང་། ངན་འགྲོར་འགྲོ་བའི་སེམས་ཅན་རྣམས་ལས་ཇི་ལྟ་བ་བཞིན་གྱི་རྗེས་སུ་འགྲོ་བ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། ཤེས་ལྡན་སེམས་ཅན་འདི་ཞེས་བྱ་བ་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན། ངག་དང་ཡིད་ཀྱི་ཉེས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་བ་

  685. 33a

    འདེབས་པ་ལོག་པར་ལྟ་བ་སྟེ། ལོག་པར་ལྟ་བའི་ཆོས་དང་ལས་ཡང་དག་པར་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །ཤེས་ལྡན་སེམས་ཅན་འདི་དག་ནི་ལུས་ ཀྱི་ལེགས་པར་སྤྱོད་པ་དང་ལྡན། ངག་དང་ཡིད་ཀྱི་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་སྐུར་བ་མི་འདེབས་ཤིང་ཡང་དག་པར་ལྟ་བ་སྟེ། ཡང་དག་པར་ལྟ་བའི་ཆོས་དང་ལས་ཡང་དག་པར་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་ རིས་ཀྱི་འཇིག་རྟེན་དུ་ལྷ་དང་མི་རྣམས་སུ་སྐྱེ་བར་འགྱུར་རོ། །དེ་འདི་སྙམ་དུ་དགོངས་ཏེ། ཤེས་ལྡན་སེམས་ཅན་འདི་དག་ནི་འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པས་འཁོར་བ་ན་འཁོར་རོ། །འདི་རྣམས་ཀྱི་འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པ་དེ་ཇི་ལྟར་སྤང་བ་དེ་ཇི་ལྟར་ཤེས་པར་བྱ་སྙམ་མོ། །དེ་འདི་སྙམ་དུ་དགོངས་ཏེ། ཟག་པ་ཟད་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ཡིན་ནོ་སྙམ་སྟེ། དེ་རྟག་ཏུ་བྱེད་པ་དང་། འགྲུས་སྐྱོང་དང་ལྡན་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་རྣམས་ལ་བསྒོམ་ པའི་རྣལ་འབྱོར་གྱི་རྗེས་སུ་བརྩོན་པས་གནས་ནས་ཟག་པ་མེད་པའི་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་དགོངས་པ་མངོན་དུ་བཞག་པ་ན། དེས་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་ནི་སྡུག་བསྔལ་ཀུན་འབྱུང་ བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ་ཞེས་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་དེ་ལྟར་ཤེས་ཤིང་དེ་ལྟར་མཐོང་ན་འདོད་པའི་ཟག་པ་ལས་སེམས་རྣམ་པར་གྲོལ་བར་འགྱུར་ཞིང་སྲིད་པའི་ཟག་ པ་དང་། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ། །རྣམ་པར་གྲོལ་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་ལ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་རྣམ་པར་གྲོལ་བའི་ཡེ་ཤེས་ཉིད་མཐོང་བར་འགྱུར་རོ། །

  686. 33b

    དེ་ལྟར་དེ་ན་བཅོམ་ལྡན་འདས་བྱང་ཆུབ་མངོན་པར་རྫོགས་པར་སངས་རྒྱས་ཏེ། བྱ་བ་བྱས། བྱེད་པ་བྱས་ནས་མེའི་ཁམས་ལ་སྙོམས་པར་ཞུགས་སོ། །གང་གི་ཚེ་བྱང་ཆུབ་སེམས་དཔས་བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་བྱམས་པའི་མཚོན་གྱིས་མངོན་དུ་བཅོམ་ ནས་བླ་ན་མེད་པའི་ཡེ་ཤེས་བརྙེས་པའི་ཚེ་བདུད་སྡིག་ཅན་གྱིས་གནས་གཞུ་ལྷུང་། རྒྱལ་མཚན་འགྱེལ། གནས་ཀྱང་གཡོས་སོ། །དེ་ནས་བདུད་སྡིག་ཅན་འབྱུང་པོའི་འཁོར་བྱེ་བ་ཕྲག་སུམ་བཅུ་རྩ་དྲུག་སྡུག་བསྔལ་ཞིང་ཡིད་མི་བདེ་བ་ཡིད་ལ་བཅགས་ཏེ་དེ་ཉིད་དུ་མི་སྣང་བར་གྱུར་ཏོ། ། བདུད་ཀྱི་རིས་ཀྱི་ལྷ་རྣམས་ཀྱིས་གྲོང་ཁྱེར་སེར་སྐྱའི་གཞིར་བྱང་ཆུབ་སེམས་དཔའ་ཤཱཀྱ་ཐུབ་པ་ནི་དཀའ་བ་ལོ་དྲུག་སྤྱད་ནས་རྡོ་རྗེའི་གདན་ལ་འཛེགས་ཏེ་རྩྭའི་གདིང་བ་ལ་གྲོངས་སོ་ཞེས་བསྒྲགས་པ་གང་ཡིན་པ་དེ་རྒྱལ་པོ་ཟས་གཙང་བཙུན་མོ་དང་། གཞོན་ནུ་དང་། བློན་པོའི་ཚོགས་དང་། གྲོང་ ཁྱེར་སེར་སྐྱ་ན་གནས་པའི་སྐྱེ་བོའི་ཚོགས་དང་བཅས་པས་ཐོས་ནས་སྡུག་བསྔལ་ཆེན་པོ་དང་ཡིད་མི་བདེ་བས་གདུངས་པར་གྱུར་ཏོ། །ས་འཚོ་མ་དང་། རི་དགས་སྐྱེས་དང་། གྲགས་འཛིན་མ་ཡང་བྱང་ཆུབ་སེམས་དཔའི་ཡོན་ཏན་རྗེས་སུ་དྲན་ནས་བརྒྱལ་ཏེ་ས་ལ་འགྱེལ་ནས་ཆུས་ གཏོར་བ་ལས་སླར་དབུགས་བྱུང་ངོ་། །བཙུན་མོའི་སྤྲོ་བསྲིང་བའི་སྐྱེ་བོ་དག་ནི་མིག་མཆི་མས་གང་ལ་མྱུར་བ་མྱུར་བར་དབུགས་བརྫགས་ཤིང་དལ་བུས་དལ་བུས་སྨྲེ་སྔགས་འདོན་ཅིང་འདུག་གོ། །དེ་དག་སྡུག་བསྔལ་བ་སངས་རྒྱས་ལ་མངོན་པར་དད་པའི་ལྷ་དགའ་བ་སྐྱེས་པ་ རྣམས་ཀྱིས་མཐོང་ནས་བྱང་ཆུབ་སེམས་དཔའ་ཤཱཀྱ་ཐུབ་པ་མ་ནོངས་ཏེ། འདི་ལྟར་དེས་བླ་ན་མེད་པའི་ཡེ་ཤེས་བསྙེས་སོ་ཞེས་སྨྲས་པ་གང་ཡིན་པ་རྒྱལ་པོ་ཟས་གཙང་འཁོར་དང་བཅས་པ་དང་། སེར་སྐྱའི་སྐྱེ་བོའི་ཚོགས་ཀྱིས་ཐོས་ནས་མཆོག་ཏུ་དགའ་བ་སྐྱེས་སོ། །བཅོམ་ ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་པ་ན་གྲགས་འཛིན་མ་ལ་ཡང་ཁྱེའུ་ཞིག་བཙས་སོ། །བདུད་རྩི་ཟས་ཀྱི་ཡང་ཁྱེའུ་ཞིག་བཙས་སོ། །ཟླ་བ་ཡང་སྒྲ་ཅན་གྱིས་ཟིན་ཏོ། །དེ་ནས་རྒྱལ་པོ་ཟས་གཙང་གིས་ཕུན་སུམ་ཚོགས་པ་དེ་མཐོང་ནས། དགའ་བ་དང་། མགུ་

  687. 34a

    བ་དང་། རབ་ཏུ་དགའ་བ་དང་། རངས་པ་རྒྱ་ཆེན་པོ་དང་། ཡིད་བདེ་བ་སྐྱེས་པར་གྱུར་ཏོ། །དེས་གྲོང་ཁྱེར་སེར་སྐྱའི་གཞི་རྡོ་བ་དང་། གསེག་མ་དང་། གྱོ་མོ་རྣམས་བསལ་ནས་ཙན་དན་གྱི་ཆུས་ཆག་ཆག་བཏབ། ཤིན་ཏུ་དྲི་ཞིམ་པོའི་པོག་པོར་ཉེ་བར་བཤམས། དར་གྱི་ཆུན་ཕྱང་མང་པོ་དབྱངས། རྒྱལ་མཚན་དང་། བ་དན་བསྒྲེང་། མེ་ཏོག་སྣ་ཚོགས་ཀྱིས་དགའ་དགའ་ལྟར་བཀྲམ་ནས་གྲོང་ཁྱེར་གྱི་སྒོ་བཞི་དང་སུམ་མདོ་རྣམས་སུ་སྦྱིན་གཏོང་གི་ཁང་པ་བརྩིགས་སོ། །དེ་ནས་གྲོང་ཁྱེར་གྱི་ཤར་སྒོར་དགེ་སྦྱོང་དང་། བྲམ་ཟེ་དང་། སྤྱོད་པ་ པ་དང་། ཀུན་དུ་རྒྱུ་དང་། ངན་པ་དང་། མགོན་མེད་པ་དང་། བཀྲེན་པ་དང་། ཕོངས་པ་དང་། སློང་མོ་བ་རྣམས་ལ་སྦྱིན་པ་དག་གཏོང་ངོ་། །ལྷོ་དང་། ནུབ་དང་། བྱང་དང་། དབུས་ཀྱི་སུམ་མདོ་རྣམས་སུ་ཡང་སྦྱིན་པ་དག་གཏོང་། བསོད་ནམས་དག་བྱེད་དོ། ། གྲགས་འཛིན་མའི་བུའི་མིང་འདོགས་པར་བྱེད་དེ། བཙུན་མོའི་འཁོར་གྱི་སྐྱེ་བོས་སྨྲས་པ། འདི་བཙས་པ་ན་ཟླ་བ་སྒྲ་ཅན་གྱིས་ཟིན་པ་དེ་བས་ན་ཁྱེའུའི་མིང་སྒྲ་ཅན་ཟན་ཞེས་གདགས་སོ་ཞེས་བཏགས་སོ། །བདུད་རྩི་ཟས་ཀྱི་ཡང་དེ་བཞིན་དུ་སྦྱིན་པ་དག་བཏང་། བསོད་ནམས་ དག་བྱས་ནས་ཁྱེའུའི་མིང་ཅིར་བཏགས་ཞེས་བུའི་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། གང་གི་ཚེ་འདི་བཙས་པ་ན་གྲོང་ཁྱེར་ཐམས་ཅད་དགའ་བར་གྱུར་པས་དེའི་ཕྱིར་ཁྱེའུའི་མིང་ཀུན་དགའ་བོར་གདགས་སོ་ཞེས་བཏགས་སོ། །རྒྱལ་པོ་ཟས་གཙང་ གིས་སྨྲས་པ། གྲགས་འཛིན་མའི་བུ་གང་ཡིན་པ་འདི་ནི་ཤཱཀྱ་ཐུབ་པའི་བུ་མ་ཡིན་ནོ་ཞེས་སྨྲས་པ། གྲགས་འཛིན་མས་ཐོས་ནས་ཡི་ཆད་པར་གྱུར་ཏོ། །དེ་ནས་དེས་བྱང་ཆུབ་སེམས་དཔའི་བང་ཚད་ཀྱི་ཕ་བོང་ལ་ཞོན་ནས་རོལ་པའི་རྫིང་འགྲམ་དུ་འདུག་སྟེ་བདེན་པ་གསོལ་ བ་བཏབ་པ། གལ་ཏེ་འདི་བྱང་ཆུབ་སེམས་དཔའ་ལས་སྐྱེས་པ་ཡིན་ན་དེ་བཞིན་དུ་རྫིང་འདིར་ཕ་བོང་དང་ལྷན་ཅིག་འཕྱོ་བར་གྱུར་ཅིག །ཅི་སྟེ་མ་ཡིན་ན་བྱིང་བར་གྱུར་ཅིག་ཅེས་སྨྲས་ནས་ཆུར་བོར་བ་དང་དེ་ཤིང་བལ་གྱི་འདབ་མ་བཞིན་དུ་ཕ་བོང་དང་ལྷན་ཅིག་འཕྱོ་བར་བརྩམས་

  688. 34b

    སོ། །རྒྱལ་པོ་ཟས་གཙང་གིས་ཡ་མཚན་དུ་གྱུར་པ་དེ་ཐོས་ནས་སྐྱེ་བོའི་ཚོགས་ཆེན་པོས་ཡོངས་སུ་བསྐོར་ཏེ་བྱང་ཆུབ་སེམས་དཔའ་རོལ་པའི་རྫིང་འགྲམ་དུ་སོང་ན། ཇི་ཙམ་ན་སྒྲ་ཅན་ཟིན་བཟང་པོ་བྱང་ཆུབ་སེམས་དཔའི་བང་ཚད་ཀྱི་ཕ་བོང་ལ་ཞོན་ནས་ཤིང་བལ་གྱི་འདབ་མ་ བཞིན་དུ་ཆུ་ན་འཕྱོ་བ་མཐོང་ངོ་། །མཐོང་ནས་ཀྱང་དགའ་བ་དང་། མགུ་བ་དང་། རབ་ཏུ་དགའ་བ་དང་། རངས་པ་རྒྱ་ཆེན་པོ་དང་། ཡིད་བདེ་བ་སྐྱེས་ཏེ་དེ་མ་ཐག་ཏུ་རྫིང་དེར་ཞུགས་ནས་གཞོན་ནུ་སྒྲ་ཅན་ཟིན་བཟང་པོ་པང་དུ་བླངས་ནས་ལངས་སོ། །གང་གི་ཚེ་བཅོམ་ལྡན་ འདས་ཀྱིས་བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་བཅུ་རྩ་དྲུག་བྱམས་པའི་མཚོན་གྱིས་མངོན་དུ་བཏུལ་ནས་བླ་ན་མེད་པའི་ཡེ་ཤེས་བརྙེས་པ་དེའི་ཚེ་ས་ཆེན་པོ་འདི་ཤིན་ཏུ་གཡོས་པར་གྱུར་ཏོ། །འཇིག་རྟེན་འདི་ཐམས་ཅད་ཀྱང་སྣང་བ་རྒྱ་ཆེན་པོས་གསལ་བར་གྱུར་ཏེ། འདི་ ལྟར་འཇིག་རྟེན་དང་འཇིག་རྟེན་གྱི་བར་གྱི་མུན་པ་མུན་ནག་སྨག་ཏུ་གྱུར་པ་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་བའི་སྣང་བས་སྣང་བ་ཉམས་སུ་མ་མྱོང་བ་གང་ཡིན་པ་དེ་དག་ཀྱང་དེའི་ཚེ་སྣང་བ་རྒྱ་ཆེན་པོས་གསལ་བར་གྱུར་ནས་དེར་སེམས་ཅན་གང་དག་ སྐྱེས་པ་དེ་རྣམས་ཀྱིས་སྣང་བ་དེས་སེམས་ཅན་གཅིག་གིས་གཅིག་མཐོང་ནས། ཤེས་ལྡན་དག་སེམས་ཅན་གཞན་དག་ཀྱང་འདིར་སྐྱེས་པ་ལྟ་ཞིག་ཤེས་ལྡན་དག་སེམས་ཅན་གཞན་ཞིག་ཀྱང་འདིར་སྐྱེས་པ་ལྟ་ཞིག་ཅེས་ངོ་ཤེས་པར་གྱུར་ཏོ།། །།སྡོམ་ལ། འཁོར་ བཞི་དང་ནི་ལང་ཚོ་དང་། །ཡབ་དང་སྲས་ནི་མཇལ་བ་དང་། །ཤཱཀྱ་དེ་བཞིན་རང་བྱུང་དང་། །དུང་སྐྱོང་ཁྱོད་ལ་ཕྱག་འཚལ་བའོ། །དེ་ནས་ཚངས་རིས་ཀྱི་ལྷ་གཉིས་ཤིག་ཚངས་པའི་འཇིག་རྟེན་ན་འདུག་པ་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་ལྟེང་ རྒྱས་ན་ཆུ་ཀླུང་ནཻ་རཉྫ་ནའི་འགྲམ་བྱང་ཆུབ་ཀྱི་ཤིང་དྲུང་ན་བཞུགས་ཏེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་མེའི་ཁམས་ལ་སྙོམས་པར་ཞུགས་ཏེ་སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་ནས། དེ་ལ་སུས་ཀྱང་བསོད་སྙོམས་མ་ཕུལ་གྱིས། མ་

  689. 35a

    ལ་བདག་ཅག་དེར་སོང་ལ་ཚིགས་སུ་བཅད་པ་རེ་རེས་མངོན་པར་བསྟོད་དོ་སྙམ་མོ། །དེ་ནས་ཚངས་རིས་ཀྱི་ལྷ་དེ་གཉིས་ཀྱིས་འདི་ལྟ་སྟེ། སྐྱེས་བུ་སྟོབས་དང་ལྡན་པའི་དཔུང་པ་བསྐུམས་ཏེ་བརྐྱང་པའམ་བརྐྱང་སྟེ་བསྐུམས་པ་ཙམ་གྱིས་ཚངས་རིས་ཀྱི་ལྷ་གཉིས་ཚངས་ རིས་ཀྱི་འཇིག་རྟེན་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་ཕྱིན་ནས་ཕྱོགས་གཅིག་ཏུ་འདུག་སྟེ། ཚངས་རིས་ཀྱི་ལྷ་གཉིས་ལས་གཅིག་གིས་ཚིགས་སུ་བཅད་དེ་གསོལ་པ། དེད་དཔོན་གཡུལ་ལས་རྣམ་པར་རྒྱལ་བ་པོ། །སྡིག་པ་མི་མངའ་བཞེངས་ཤིག་འཇིག་ རྟེན་གཟིགས། །རིན་ཆེན་ཆོས་ནི་འཚལ་བར་འགྱུར་མཆིས་ཀྱིས། །བདེ་གཤེགས་ཆོས་ཀྱི་མཆོག་ནི་བཤད་དུ་གསོལ། །ཅིག་ཤོས་ཀྱིས་ཀྱང་ཚིགས་སུ་བཅད་དེ་གསོལ་པ། ང་རྒྱལ་བཅོམ་ཞིང་གཡུལ་ལས་རྣམ་རྒྱལ་བ། །སྡིག་པ་མི་མངའ་བཞེངས་ཤིག་འཇིག་རྟེན་ གཟིགས། །བཅོ་ལྔ་ལོན་པའི་དགུང་ཟླ་ཉ་བ་ལྟར། །ཁྱོད་ཀྱི་ཐུགས་ནི་ཤིན་ཏུ་རྣམ་དག་ལགས། །ཞེས་གསོལ་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ནས་དེའི་ཚེ་ཚིགས་སུ་བཅད་དེ་བཀའ་སྩལ་པ། འཇིག་རྟེན་འདོད་པའི་ བདེ་གང་དང་། །ལྷ་ཡུལ་བྱུང་བདེ་གང་ཡིན་པ། །སྲིད་པ་ཟད་པའི་བདེ་དེ་ལ། །བཅུ་དྲུག་ཆར་ཡང་མི་ཕོད་དོ། །ཁུར་ཁྱེར་བ་ནི་སྡུག་བསྔལ་ཏེ། །ཁུར་བོར་བ་ནི་བདེ་བ་ཡིན། །ཁུར་ནི་ལྕི་བ་རྣམས་བོར་ནས། །གཞན་དག་བླང་བར་མི་བྱའོ། །སྲེད་པ་ཐམས་ཅད་རྣམ་ སྤངས་ཤིང་། །འདུས་བྱས་ཐམས་ཅད་ཟད་ནས་ནི། །དངོས་པོ་ཐམས་ཅད་ཡོངས་ཤེས་ནས། །སླར་ཡང་སྲིད་པར་མི་འོང་ངོ་། །སངས་རྒྱས་བཅོམ་ལྡན་འདས་རྣམ་པར་གྲོལ་བའི་དགའ་བ་དང་བདེ་བ་སྐུ་ཉམས་སུ་བཏར་ནས། སྐྱིལ་མོ་ཀྲུང་གཅིག་གིས་ཞག་བདུན་འདས་པར་ མཛད་པ་ན། །དེ་ལ་སུས་ཀྱང་བསོད་སྙོམས་མ་ཕུལ་ལོ། །དེའི་ཚེ་ཚོང་པ་ག་གོན་དང་བཟང་པོ་གཉིས་ཤིང་རྟ་ལྔ་བརྒྱ་ཙམ་དང་ལྷན་ཅིག་དོང་བ་ན་ལམ་དེ་ཉིད་དུ་ཞུགས་པར་གྱུར་ཏོ། །དེ་ནས་ཚོང་པ་ག་གོན་དང་། བཟང་པོའི་སྔོན་གྱི་གྲོགས་པོ་དང་། བློན་པོ་དང་། ཉེ་དུ་དང་། མཛའ་

  690. 35b

    བཤེས་སུ་གྱུར་པའི་ལྷ་ཞིག་ཡོད་པ་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་འདི་ལྟེང་རྒྱས་ན་ཆུ་ཀླུང་ནཻ་རཉྫ་ནའི་འགྲམ་བྱང་ཆུབ་ཀྱི་ཤིང་དྲུང་ན་བཞུགས་ཏེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་རྣམ་པར་གྲོལ་བའི་དགའ་བ་དང་བདེ་བ་སྐུ་ཉམས་སུ་ བཏར་ནས། སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་པ་ན། དེ་ལ་སུས་ཀྱང་བསོད་སྙོམས་མ་ཕུལ་གྱིས། དེ་ལ་ཚོང་པ་ག་གོན་དང་། བཟང་པོ་གཉིས་ཀྱིས་དེར་ཐོག་མར་བསོད་སྙོམས་འབུལ་དུ་བཅུག་ན། དེ་ནི་ཚོང་པ་ག་གོན་དང་། བཟང་པོ་དེ་གཉིས་ཀྱི་ཡུན་ རིང་པོའི་དོན་དང་ཕན་པ་དང་བདེ་བར་འགྱུར་གྱིས། མ་ལ་བདག་རང་གིས་འདི་གཉིས་འདི་ལྟ་སྟེ། བཅོམ་ལྡན་འདས་ལ་བསོད་སྙོམས་འབུལ་དུ་གཞུག་པའི་ཕྱིར་བརྩོན་པར་བྱའོ་སྙམ་ནས། དེ་ནས་ལྷ་དེས་ཤིང་རྟ་དང་ཚོང་པ་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་ཚོང་པ་ ག་གོན་དང་། བཟང་པོ་ལ་འདི་སྐད་ཅེས་སྨྲས་སོ། །ཚོང་པ་ཚོང་པ་དག་སངས་རྒྱས་བཅོམ་ལྡན་འདས་འདི་ལྟེང་རྒྱས་ན་ཆུ་ཀླུང་ནཻ་རཉྫ་ནའི་འགྲམ་བྱང་ཆུབ་ཀྱི་ཤིང་དྲུང་ན་བཞུགས་ཏེ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་རྣམ་པར་གྲོལ་བའི་དགའ་བ་དང་། བདེ་བ་སྐུ་ ཉམས་སུ་བཏར་བ་ན་སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་དེ། དེ་ལ་སུས་ཀྱང་བསོད་སྙོམས་མ་ཕུལ་གྱིས། དེ་ལ་ཁྱེད་ཀྱིས་དེར་ཐོག་མར་བསོད་སྙོམས་ཕུལ་ན་དེ་ནི་ཁྱེད་ཀྱི་ཡུན་རིང་མོའི་དོན་དང་ཕན་པ་དང་བདེ་བར་འགྱུར་རོ་ཞེས་སྨྲས་ནས་ལྷ་དེ་དེ་ཉིད་དུ་མི་སྣང་བར་ གྱུར་ཏོ། །དེ་ནས་ཚོང་པ་ག་གོན་དང་བཟང་པོ་གཉིས་འདི་སྙམ་དུ་སེམས་ཏེ། སངས་རྒྱས་ནི་མཆོག་མ་ཡིན་པ་མ་ཡིན་ལ། ཆོས་བཤད་པ་ཡང་མཆོག་མ་ཡིན་པ་མ་ཡིན་ཏེ། གང་གི་ཕྱིར་འདི་ལྟར་ལྷས་ཀྱང་འདི་ལྟ་སྟེ། བཅོམ་ལྡན་འདས་དེ་ལ་བསོད་སྙོམས་དབུལ་བའི་ཕྱིར་བརྩོན་ པར་བྱེད་དོ་སྙམ་དུ་བསམས་ནས་སྦྲང་རྩི་དང་ལྡེ་གུ་མང་དུ་ཁྱེར་ནས་བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚོང་པ་ག་གོན་དང་། བཟང་པོས་

  691. 36a

    བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱི་ཆེད་དུ་འདིར་བདག་ཅག་གིས་སྦྲང་རྩི་དང་ལྡེ་གུ་མང་དུ་འཚལ་ཏེ་མཆིས་ཀྱིས། བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་འདི་བཞེས་སུ་གསོལ། དེ་ནས་བཅོམ་ལྡན་ འདས་འདི་སྙམ་དུ་དགོངས་ཏེ། གལ་ཏེ་བདག་གི་ཕྱག་གིས་བསོད་སྙོམས་བཞེས་ན་དཔེར་ན་མུ་སྟེགས་ཅན་བཞིན་དུ་འགྱུར་བས་དེ་ནི་བདག་གི་ཆ་མ་ཡིན་གྱིས། མ་ལ་བདག་གིས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྲོག་ཆགས་རྣམས་ལ་ཕན་པའི་ཕྱིར་བསོད་ སྙོམས་གང་དུ་བཞེས་པ་བསམ་པར་བྱའོ་སྙམ་པ་ན་བཅོམ་ལྡན་འདས་ལ་ལྷ་རྣམས་ཀྱིས་གསོལ་པ། བཙུན་པ་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་སྲོག་ཆགས་རྣམས་ལ་སྨན་པར་བགྱི་བའི་སླད་དུ་ལྷུང་བཟེད་དུ་བསོད་སྙོམས་བཞེས་ལགས་སོ། །བཅོམ་ལྡན་འདས་ ཀྱིས་ཀྱང་དགོངས་ཤིང་ཡེ་ཤེས་གཟིགས་པ་བསྐྱེད་ན་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱིས་སྲོག་ཆགས་རྣམས་ལ་ཕན་པའི་ཕྱིར་བསོད་སྙོམས་ལྷུང་བཟེད་དུ་བཞེས་པར་གྱུར་ནས་དེ་ནས་བཅོམ་ལྡན་འདས་ལ་ལྷུང་བཟེད་ཀྱིས་ལྷུང་བཟེད་ཀྱི་དགོས་པ་བྱུང་ངོ་། །དེ་ནས་རྒྱལ་པོ་ ཆེན་པོ་བཞིས་བཅོམ་ལྡན་འདས་ལ་ལྷུང་བཟེད་ཀྱིས་ལྷུང་བཟེད་ཀྱི་དགོས་པ་བྱུང་བར་རིག་ནས་རི་བྲགས་ཅན་ཞིག་ལ་རྡོ་ལས་བྱས་པའི་ལྷུང་བཟེད་མི་མ་ཡིན་པས་བྱས་ཤིང་མི་མ་ཡིན་པས་ཟིན་པར་བྱས་ལ་གསལ་བ། གཙང་མ། དྲི་མི་ཞིམ་པ་མེད་པ་བཞི་ཁྱེར་ཏེ་བཅོམ་ལྡན་འདས་ གང་ན་བ་དེར་དོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ལ་ལྷུང་བཟེད་ ཀྱིས་ལྷུང་བཟེད་ཀྱི་མཁོ་བ་བྱུང་བར་བདག་ཅག་གིས་འཚལ་ནས་རི་བྲགས་ཅན་ཞིག་ལས་རྡོའི་ལྷུང་བཟེད་མི་མ་ལགས་པས་བགྱིས་ཤིང་མི་མ་ལགས་པས་ལེགས་པར་བགྱིས་པ་གསལ་བ། གཙང་མ་དྲི་ང་བ་མ་མཆིས་པ་བཞི་འདིར་འཚལ་ཏེ་མཆིས་ན། བཅོམ་ལྡན་འདས་ཐུགས་

  692. 36b

    བརྩེ་བ་ཉེ་བར་བཟུང་སྟེ་འདི་བཞེས་སུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་བདག་གིས་རྒྱལ་པོ་ཆེན་པོ་གཅིག་ལས་ལྷུང་བཟེད་གཅིག་བཞེས་ན་གསུམ་གྱི་སེམས་མི་དགའ་བར་འགྱུར་རོ། །གལ་ཏེ་གཉིས་ལས་ན་ནི་གཉིས་ཀྱི་སེམས་མི་དགའ་བར་ འགྱུར་རོ། །གལ་ཏེ་གསུམ་ལས་ན་ནི་གཅིག་གི་སེམས་མི་དགའ་བར་འགྱུར་གྱིས། མ་ལ་བདག་གིས་རྒྱལ་པོ་ཆེན་པོ་བཞི་ལས་ལྷུང་བཟེད་བཞི་བཞེས་ལ་ལྷུང་བཟེད་གཅིག་ཏུ་བྱིན་གྱིས་བརླབ་པར་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་ལས་ལྷུང་ བཟེད་བཞི་བཞེས་ཏེ་ལྷུང་བཟེད་གཅིག་ཏུ་བྱིན་གྱིས་བརླབས་སོ།། །།འདུལ་བ་གཞི། བམ་པོ་བརྒྱད་བཅུ་དྲུག་པ། དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང་བཟང་པོ་ལས་སྲོག་ཆགས་རྣམས་ལ་ཕན་པའི་ཕྱིར་བསོད་སྙོམས་བཞེས་སོ། །དེ་ནས་བཅོམ་ལྡན་ འདས་ཀྱིས་ཚོང་པ་ག་གོན་དང་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཚོང་པ་དག་ཁྱེད་ཚུར་སངས་རྒྱས་ལ་སྐྱབས་སུ་དེང་ཤིག །ཆོས་ལ་སྐྱབས་སུ་དེང་ཤིག །མ་འོངས་པའི་དུས་ན་འབྱུང་བར་འགྱུར་བའི་དགེ་འདུན་ཞེས་བྱ་བ་གང་ཡིན་པ་དེ་ལ་ཡང་སྐྱབས་སུ་དེང་ཤིག ། བཙུན་པ་བདག་ཅག་སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །མ་འོངས་པའི་དུས་ན་འབྱུང་བར་འགྱུར་བའི་དགེ་འདུན་གང་ལགས་པ་དེ་ལ་ཡང་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང་བཟང་པོའི་སྦྱིན་པ་དེ་ལ་རྗེས་སུ་ཡི་རང་བས་ རྗེས་སུ་ཡི་རང་བར་མཛད་དེ། གང་གི་དོན་དུ་སྦྱིན་པ་བཏང་། །དེ་ཡི་དོན་དུ་འགྱུར་བ་སྟེ། །བདེ་བའི་དོན་དུ་སྦྱིན་བཏང་ན། །དེ་ནི་བདེ་བར་འགྱུར་བ་ཡིན། །བསོད་ནམས་རྣམ་སྨིན་བདེ་བ་དང་། །བསམས་པ་ཡང་ནི་འགྲུབ་པར་འགྱུར། །མྱུར་དུ་ཞི་བ་དམ་པ་ཡི། །མྱ་ངན་ འདས་པ་རྟོགས་པར་འགྱུར། །ཕ་རོལ་ལས་བྱུང་གནོད་པ་ནི། །ལྷ་དང་བདུད་ཀྱི་རིགས་དག་གིས། །བསོད་ནམས་ཁོ་ན་བྱེད་པ་ན། །བར་ཆད་བྱ་བར་མི་ནུས་སོ། །གལ་ཏེ་འཕགས་པའི་ཤེས་རབ་ཕྱིར། །གཏོང་ལྡན་དེ་ནི་འབད་བྱེད་ན། །སྡུག་བསྔལ་ཐ་མར་བྱེད་པ་དག །

  693. 37a

    རྣམ་པར་མཐོང་ཞིང་རེག་པར་འགྱུར། །དེ་ནས་ཚོང་པ་ག་གོན་དང་། བཟང་པོ་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། ། དེ་ནས་བཅོམ་ལྡན་འདས་ཀྱིས་ཚོང་པ་ག་གོན་དང་། བཟང་པོ་ལ་བསོད་སྙོམས་བཞེས་ནས་ཆུ་ཀླུང་ནཻ་རཉྫ་ན་གང་ན་བ་དེར་གཤེགས་ཏེ་བྱོན་ནས་ཆུ་ཀླུང་ནཻ་རཉྫ་ནའི་འགྲམ་དུ་བཞུགས་ཏེ་ཞལ་ཟས་ཀྱི་བྱ་བ་མཛད་དོ། །དེ་ནས་སྦྲང་རྩི་ཡང་རླུང་སློང་ལ་ལྡེ་གུ་ཡང་རླུང་སློང་བས་དེས་བཅོམ་ལྡན་ འདས་རླུང་ནད་ཀྱི་སྙུན་གྱིས་ཐེབས་སོ། །དེ་ནས་བདུད་སྡིག་ཅན་གྱིས་བཅོམ་ལྡན་འདས་རླུང་ནད་ཀྱི་སྙུན་གྱིས་ཐེབས་པར་རིག་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་ དུས་ལ་བབ་ལགས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བའི་དུས་ལ་བབ་ལགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། འདི་ལྟ་སྟེ་དཀྲུག་པའི་ལས་ཀྱི་ཕྱིར་བདུད་སྡིག་ཅན་འདི་ཉེ་བར་འོངས་སོ་སྙམ་དུ་དགོངས་ནས། བདུད་སྡིག་ཅན་ལ་འདི་སྐད་ ཅེས་བཀའ་སྩལ་ཏོ། །སྡིག་ཅན་ཇི་སྲིད་ངའི་ཉན་ཐོས་མཁས་པ། གསལ་བ། ཡིད་གཞུངས་པ། ཕ་རོལ་གྱི་རྒོལ་བ་བྱུང་ཞིང་བྱུང་བ་རྣམས་ཆོས་བཞིན་གྱིས་ཚར་གཅོད་ནུས་པ། རང་གི་སྨྲ་བ་གསལ་བར་བྱེད་ནུས་པའི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་ བསྙེན་མ་རྣམས་བྱུང་བར་མ་གྱུར་པ་དང་། ངའི་ཚངས་པར་སྤྱོད་པ་རྒྱ་ཆེན་པོ་སྐྱེ་བོ་མང་པོ་དང་ལྷ་དང་མིའི་བར་ལ་རྒྱ་ཆེར་ཡང་དག་པར་ལེགས་པར་རབ་ཏུ་མ་བསྟན་གྱི་བར་དུ་ང་ཡོངས་སུ་མྱ་ངན་ལས་མི་འདའོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། ཀྱེ་མའོ་དགེ་སྦྱོང་གཽ་ཏ་མ་ནི་ཡོངས་ སུ་མྱ་ངན་ལས་མི་འདའོ། །སྙམ་དུ་བསམས་ནས་སྡུག་བསྔལ་ཞིང་ཡིད་མི་བདེ་ལ་འགྱོད་པས་དེ་ཉིད་དུ་མི་སྣང་བར་གྱུར་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་རླུང་ནད་ཀྱི་སྙུན་གྱིས་ཐེབས་པར་རིག་ནས་ཤིང་འཛམ་བུ་ཞེས་བྱ་བས་འཛམ་བུའི་གླིང་དུ་གདགས་པ་

  694. 37b

    གང་ཡིན་པ་དེ་དང་ཧ་ཅང་ཡང་མི་རིང་བ་ཞིག་ན་ཨ་རུ་ར་ཆེན་པོའི་ཚལ་ཡོད་དེ། དེ་ནས་ཁ་དོག་དང་། དྲི་དང་། རོ་དང་ལྡན་པའི་ཨ་རུ་ར་བླངས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བསེར་མའི་སྙུན་ནད་ཀྱིས་ཐེབས་པར་བདག་གིས་འཚལ་ནས་ཤིང་འཛམ་བུ་ཞེས་བགྱི་བས་འཛམ་བུའི་གླིང་དུ་བཏགས་པ་གང་ ལགས་པ་དེ་དང་ཧ་ཅང་ཡང་མི་རིང་བ་ན་ཨ་རུ་ར་ཆེན་པོའི་ཚལ་མཆིས་ཏེ། དེ་ནས་བདག་གིས་ཁ་དོག་དང་། དྲི་དང་། རོར་ལྡན་པའི་ཨ་རུ་ར་འདིར་འཚལ་ཏེ་མཆིས་ཀྱིས་དེ་བཅོམ་ལྡན་འདས་ཀྱིས་གསོལ་ཅིག །བཅོམ་ལྡན་འདས་ཀྱིས་དེ་གསོལ་དང་། བསེར་མ་དང་མཐུན་པར་འགྱུར་ ཞིང་བསེར་མའི་སྙུན་ཉེ་བར་ཞི་བར་འགྱུར་རོ། །བཅོམ་ལྡན་འདས་ཀྱིས་དེ་གསོལ་བ་དང་རླུང་དང་མཐུན་པར་གྱུར་ནས་རླུང་ནད་ཀྱི་སྙུན་ཉེ་བར་ཞི་བར་གྱུར་ཏོ། །དེས་ན་བཅོམ་ལྡན་འདས་ཤིན་ཏུ་བཟོད་ཅིང་ལྷག་པར་འཚོ་བར་གྱུར་ཏོ། །དེ་ནས་བཅོམ་ལྡན་འདས་ཇི་ཙམ་དགྱེས་ཀྱི་བར་ དུ་བྱང་ཆུབ་ཀྱི་ཤིང་དྲུང་དུ་བཞུགས་ནས་ཀླུའི་རྒྱལ་པོ་བཏང་བཟུང་གི་གནས་གང་ན་བ་དེར་གཤེགས་ཏེ་བྱོན་ནས་ཤིང་ཞིག་གི་དྲུང་དུ་བརྟེན་ཏེ་སྐྱིལ་མོ་ཀྲུང་བཅས་ནས་སྐུ་དྲང་པོར་བསྲང་སྟེ་དྲན་པ་མངོན་དུ་ཕྱོགས་པར་བཞག་ནས་བཞུགས་སོ། །དེའི་ཚེ་ཀླུའི་རྒྱལ་པོ་བཏང་བཟུང་གི་ གནས་སུ་ཞག་བདུན་དུ་དུས་མ་ཡིན་པའི་སྤྲིན་ཆགས་པར་གྱུར་ཏོ། །དེ་ནས་ཀླུའི་རྒྱལ་པོ་བཏང་བཟུང་གིས་ཞག་བདུན་དུ་དུས་མ་ཡིན་པའི་སྤྲིན་ཆགས་པར་རིག་ནས་གནས་ནས་མངོན་པར་འཕགས་ཏེ། བཅོམ་ལྡན་འདས་ཞག་བདུན་པོ་འདི་ལ་བསེར་བར་འགྱུར་དུ་འོང་། ཚ་བ་དང་། སྦྲང་ མ་དང་། ཤ་སྦྲང་དང་། རླུང་དང་། ཉི་མ་དང་། སྡིག་སྦྲུལ་གྱི་རེག་པས་སྐུ་ལ་གནོད་པར་འགྱུར་དུ་འོང་ཞེས་ལུས་ཀྱིས་བཅོམ་ལྡན་འདས་ལ་ལན་བདུན་དུ་དཀྲིས་ཏེ་སྟེང་དུ་མགོའི་གདེངས་ཀ་ཆེན་པོ་བྱས་ནས་འདུག་གོ། །དེ་ནས་ཀླུའི་རྒྱལ་པོ་བཏང་བཟུང་གིས་ཞག་བདུན་གྱི་དུས་མ་ཡིན་

  695. 38a

    པའི་སྤྲིན་ཆགས་པ་མེད་པར་རིག་ནས་བཅོམ་ལྡན་འདས་ཀྱི་སྐུ་ལུས་ལས་ལུས་བཀྲོལ་ཏེ་དཔུང་རྒྱན་དང་། རྣ་རྒྱན་དང་། ཕྲེང་བ་དང་། རྒྱན་སྣ་ཚོགས་དང་། བྱུག་པས་བྱུགས་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་ འདི་སྐད་ཅེས་གསོལ་ཏོ། །བཅོམ་ལྡན་འདས་དགུང་བདུན་པོ་འདི་ལ་བསེར་བར་མ་གྱུར་ཏམ། ཚ་བ་དང་། སྦྲང་མ་དང་། ཤ་སྦྲང་དང་། བསེར་མ་དང་། གདུགས་དང་། སྡིག་སྦྲུལ་གྱི་གནོད་པས་སྐུ་ལ་རེག་པར་མ་གྱུར་ཏམ། དེ་ནས་བཅོམ་ལྡན་འདས་ཀྱིས་དེའི་ཚེ་ ཚིགས་སུ་བཅད་དེ་བཀའ་སྩལ་པ། དབེན་པའི་དགའ་བ་བདེ་བ་ཡིན། །ཆོས་ཐོས་པ་ལ་ལྟ་བ་དང་། །སྲོག་ཆགས་རྣམས་ལ་སྡོམ་པ་ཡིས། །འཇིག་རྟེན་འཚེ་བ་མེད་པ་བདེ། །འཇིག་རྟེན་འདོད་ཆགས་བྲལ་བ་དང་། །འདོད་ཆགས་རྣམས་ལས་རྒལ་བ་བདེ། །ངའོ་ ང་རྒྱལ་ཐུལ་བ་གང་། །དེ་ཉིད་བདེ་བའི་དམ་པ་ཡིན། །དེ་ནས་བཅོམ་ལྡན་འདས་ཇི་ཙམ་བཞེད་ཀྱི་བར་དུ་ཀླུའི་རྒྱལ་པོ་བཏང་བཟུང་གི་གནས་ན་བཞུགས་ནས་བྱང་ཆུབ་ཀྱི་སྙིང་པོ་གང་ན་བ་དེར་གཤེགས་ཏེ་བྱོན་པ་དང་རྩྭའི་གདིང་བ་བཤམས་པ་ཉིད་ལ་སྐྱིལ་མོ་ཀྲུང་བཅས། སྐུ་དྲང་ པོར་བསྲང་ནས་དྲན་པ་མངོན་དུ་ཕྱོགས་པར་བཞག་ནས་བཞུགས་ཏེ། སྐྱིལ་མོ་ཀྲུང་གཅིག་གིས་ཞག་བདུན་འདས་པར་མཛད་ཅིང་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་པོ་ལུགས་དང་མཐུན་པ་དང་། ལུགས་དང་མི་མཐུན་པ་འདི་ཉིད་ལ་གཟིགས་པར་མཛད་ དེ། འདི་ལྟ་སྟེ་འདི་ཡོད་པས་འདི་ཡོད། འདི་སྐྱེས་པས་འདི་སྐྱེ་བ་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་ དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་།

  696. 38b

    ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ་འདི་མེད་ན་འདི་མེད་ལ། འདི་འགགས་པས་འདི་འགག་པར་འགྱུར་ཏེ། འདི་ལྟ་སྟེ་མ་རིག་པ་འགགས་པས་འདུ་བྱེད་ འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག ། ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་ བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཞག་བདུན་པོ་དེ་ཉིད་འདས་པར་མཛད་ནས་ཏིང་ངེ་འཛིན་དེ་ལས་བཞེངས་ཏེ་དེའི་ཚེ་ཚིགས་སུ་བཅད་དེ་བཀའ་སྩལ་པ། གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་ཆོས་རྣམས་རྒྱུ་དང་བཅས་ཤེས་པ། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་ པ་ཡིན། །གང་ཚེ་སྡུག་བསྔལ་རྒྱུ་དང་བཅས་ཤེས་པ། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་ཚོར་བ་ཟད་པ་ཐོབ་འགྱུར་བ། །དེ་ནས་དེ་ཡི་སོམ་ཉི་ཐམས་ཅད་ འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །གང་ཚེ་རྐྱེན་རྣམས་ཟད་པ་ཐོབ་ནས་ནི། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་

  697. 39a

    ཚངས་པ་ཡིན། །གང་ཚེ་ཟག་པ་ཟད་པ་ཐོབ་གྱུར་ནས། །དེ་ནས་དེ་ཡི་སོམ་ཉི་ཐམས་ཅད་འབྲལ། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །འཇིག་རྟེན་ཀུན་དུ་སྣང་བར་འདུག་པ་ནི། །ཇི་ལྟར་ཉི་མ་བར་ སྣང་ཤར་བ་བཞིན། །གང་ཚེ་ཆོས་འདི་དག་ནི་སྐྱེད་བྱེད་པའི། །བརྩོན་འགྲུས་ལྡན་པའི་བསམ་གཏན་ཚངས་པ་ཡིན། །བདུད་ཀྱི་སྡེ་རྣམས་རྣམ་པར་བཅོམ་གནས་ཏེ། །སངས་རྒྱས་ཀུན་དུ་སྦྱོར་ལས་རྣམ་པར་གྲོལ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་ཆོས་ཟབ་མོ་ཟབ་པར་སྣང་བ་མཐོང་བར་དཀའ་ཞིང་ཁོང་དུ་ཆུད་པར་དཀའ་བ་རྟོག་གེ་པ་རྣམས་ཀྱི་རྟོག་གེའི་སྤྱོད་ཡུལ་མ་ཡིན་པ་ཞིབ་མོ་མཛངས་པའི་མཁས་པ་དང་། རིག་པས་རྣམ་པར་ཤེས་པར་བྱ་བ་རྟོགས་ཏེ། དེ་བདག་གིས་གཞན་ལ་སྨྲས་ཀྱང་གཞན་གྱིས་དེ་ མི་ཤེས་པས་དེས་བདག་དུབ་པར་འགྱུར། ངལ་བར་འགྱུར། སེམས་ལ་སྤྲོ་བ་མེད་པ་ཁོ་ནར་འགྱུར་བར་ཟད་པས་མ་ལ་བདག་གཅིག་པུ་དགོན་པའི་ནགས་སྟུག་པོར་མཐོང་བའི་ཆོས་ལ་བདེ་བར་གནས་པའི་རྣལ་འབྱོར་ལ་རྗེས་སུ་བརྩོན་པས་གནས་པར་བྱའོ་སྙམ་སྟེ། དེ་ནས་བཅོམ་ ལྡན་འདས་ཐུགས་ལས་ཆུང་ངུས་བཞུགས་པ་ལ་ཐུགས་གཞོལ་བར་མཛད་ཅིང་ཆོས་འཆད་པ་ལ་མ་ཡིན་ནོ། །དེ་ནས་ཚངས་པ་མི་མཇེད་ཀྱི་བདག་པོ་འདི་སྙམ་དུ་སེམས་ཏེ། ཀྱེ་མའོ་འཇིག་རྟེན་འདི་མ་རུང་བའོ་ཀྱེ་མའོ་འཇིག་རྟེན་འདི་མ་རུང་བ་སྟེ། གང་གི་ཕྱིར་ད་ལྟར་བརྒྱ་ལམ་ན་ལན་ འགའ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་བ་ནི་དཔེར་ན་ཨུ་དུམ་བཱ་རའི་མེ་ཏོག་བཞིན་ན། བཅོམ་ལྡན་འདས་དེ་ད་ལྟར་ཐུགས་ལས་ཆུང་ངུས་བཞུགས་པ་ལ་ཐུགས་གཞོལ་བར་མཛད་ཅིང་ཆོས་འཆད་པ་ལ་ནི་མ་ཡིན་པས་མ་ལ་ བདག་དེར་སོང་ལ་གསོལ་བ་གདབ་བོ་སྙམ་མོ། །དེ་ནས་ཚངས་པ་མི་མཇེད་ཀྱི་བདག་པོས་དཔེར་ན་སྐྱེས་བུ་སྟོབས་དང་ལྡན་པའི་དཔུང་པ་བསྐུམས་ནས་བརྐྱང་བའམ། བརྐྱང་ནས་བསྐུམས་པ་ཙམ་གྱིས་ཚངས་པ་མི་མཇེད་ཀྱི་བདག་པོ་ཚངས་པའི་འཇིག་རྟེན་ནས་མི་སྣང་བར་བྱས་ཏེ།

  698. 39b

    བཅོམ་ལྡན་འདས་ཀྱི་སྤྱན་སྔར་འདུག་གོ། །དེ་ནས་ཚངས་པ་མི་མཇེད་ཀྱི་བདག་པོས་དེའི་ཚེ་ཚིགས་སུ་བཅད་དེ་གསོལ་པ། མ་ག་དྷཱར་ནི་སྔོན་ཆད་ཆོས་བྱུང་བ། །དག་པ་མ་ལགས་དྲི་མར་བཅས་པས་རྟོགས། །བདུད་རྩི་ཆོས་ཀྱི་སྒོ་ནི་ཕྱེ་མཛོད་ལ། །དྲི་མ་མེད་པས་རྟོགས་པ་བཤད་ པར་མཛོད། །བཅོམ་ལྡན་འདས་ཀྱིས་བཀའ་སྩལ་པ། །ཚངས་པ་ངས་ནི་ཚེགས་ཆེན་གྱིས། །སྐྱོན་རྣམས་བཅོམ་ནས་རྟོགས་གྱུར་པ། །སྲིད་དང་ཆགས་པས་དཀྲིས་རྣམས་ཀྱིས། །ཆོས་ནི་ལེགས་པར་རྟོགས་མི་འགྱུར། །རྒྱུན་ལས་བཟློག་ཕྱོགས་འགྲོ་བའི་ལམ། ། ཟབ་ཅིང་ཤིན་ཏུ་མཐོང་དཀའ་བ། །མུན་པའི་ཕུང་པོས་བསྒྲིབས་པ་ཡི། །འདོད་ཆགས་ཞེན་པས་མཐོང་མི་འགྱུར། །བཙུན་པ་འཇིག་རྟེན་དུ་སྐྱེས་ཤིང་འཇིག་རྟེན་དུ་རྒས་པའི་སེམས་ཅན་རྣམས་ལ་དབང་པོ་རྣོན་པོ་དང་། དབང་པོ་འབྲིང་པོ་དང་། དབང་པོ་རྟུལ་པོ་དང་། དྲང་ སླ་བ་དང་། གདུལ་སླ་བ་དང་། ཉོན་མོངས་པ་ཆུང་བ་དང་། རྡུལ་ཆུང་བའི་རིགས་མཆིས་ཏེ། དེ་དག་གིས་དམ་པའི་ཆོས་མ་ཐོས་ན་ཡོངས་སུ་ཉམས་པར་འགྱུར་ལགས་སོ། །བཙུན་པ་དཔེར་ན་ཨུཏྤ་ལའམ། པད་མའམ། ཀུ་མུ་དའམ། པད་མ་དཀར་པོ་དག་ཆབ་ནས་ སྐྱེས་ཤིང་ཆབ་ནས་ཆེན་པོར་གྱུར་ཏེ་ཆབ་ནས་འཕགས་ཏེ་མཆིས་པ་ལས་ཁ་ཅིག་ནི་ཆབ་དང་མཉམ། ཁ་ཅིག་ནི་ཆབ་ཀྱི་ནང་དུ་ནུབ་ཅིང་མཆིས་པ་དེ་བཞིན་དུ་བཙུན་པ་འཇིག་རྟེན་དུ་སྐྱེས་ཤིང་འཇིག་རྟེན་དུ་རྒས་པའི་སེམས་ཅན་རྣམས་ལ་ཡང་དབང་པོ་རྣོན་པོ་དང་། དབང་པོ་འབྲིང་ པོ་དང་། དབང་པོ་རྟུལ་པོ་དང་། དྲང་སླ་བ་དང་། གདུལ་སླ་བ་དང་། ཉོན་མོངས་པ་ཆུང་བ་དང་། རྡུལ་ཆུང་བའི་རིགས་མཆིས་ཏེ་དེ་དག་གིས་དམ་པའི་ཆོས་མ་ཐོས་ན་ཡོངས་སུ་ཉམས་པར་འགྱུར་བས་ཆོས་རིན་པོ་ཆེ་འཚལ་བར་འགྱུར་བ་མཆིས་ཀྱིས། བཅོམ་ལྡན་འདས་ ཆོས་བཤད་དུ་གསོལ། བདེ་བར་གཤེགས་པ་ཆོས་བཤད་དུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ང་ཉིད་ཀྱི་སངས་རྒྱས་ཀྱི་སྤྱན་གྱིས་འཇིག་རྟེན་ལ་བལྟ་བར་བྱའོ་སྙམ་ནས། དེ་ནས་བཅོམ་ལྡན་འདས་ཉིད་ཀྱི་སངས་རྒྱས་ཀྱི་སྤྱན་གྱིས་འཇིག་རྟེན་ལ་

  699. 40a

    གཟིགས་ཏེ། བཅོམ་ལྡན་འདས་ཉིད་ཀྱི་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་པ་དང་། འཇིག་རྟེན་དུ་སྐྱེས་ཤིང་འཇིག་རྟེན་དུ་རྒས་པའི་སེམས་ཅན་རྣམས་ལ་དབང་པོ་རྣོན་པོ་དང་། དབང་པོ་འབྲིང་པོ་དང་། དབང་པོ་རྟུལ་པོ་དང་། དྲང་སླ་བ་དང་། གདུལ་སླ་བ་དང་། ཉོན་མོངས་པ་ཆུང་བ་དང་། རྡུལ་ཆུང་བའི་རང་བཞིན་ཡོད་དེ། དེ་དག་དམ་པའི་ཆོས་མ་ཐོས་ན་ཡོངས་སུ་ཉམས་པར་འགྱུར་བར་གཟིགས་སོ། །གཟིགས་ནས་ཀྱང་སེམས་ཅན་རྣམས་ལ་ཐུགས་རྗེ་ཆེན་པོ་གཞོལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ དེའི་ཚེ་ཚིགས་སུ་བཅད་དེ་བཀའ་སྩལ་པ། བདུད་རྩིའི་སྒོ་མོ་དག་ནི་དབྱེ་བར་བྱས། །ཉན་པར་སུ་འདོད་སོམ་ཉི་སོལ་ཅིག་དང་། །ཚངས་པ་མི་རྣམས་ལ་ནི་གྱ་ནོམ་ཆོས། །ཀླན་ཀ་མི་བཙལ་མདོ་ཙམ་བཤད་པར་བྱ། །དེ་ནས་ཚངས་པ་མི་མཇེད་ཀྱི་བདག་པོ་འདི་སྙམ་དུ་སེམས་ ཏེ། ཀྱེ་བཅོམ་ལྡན་འདས་ཀྱིས་ཆོས་བཤད་པར་འགྱུར་རོ། །ཀྱེ་བདེ་བར་གཤེགས་པས་ཆོས་བཤད་པར་འགྱུར་རོ་སྙམ་དུ་རིག་ནས་དགའ་བ་དང་། མགུ་བ་དང་། མཆོག་ཏུ་དགའ་བ་དང་། དགའ་བ་རྒྱ་ཆེན་པོ་དང་། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངས་སུ་ལ་ཐོག་མར་ཆོས་བཤད་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་སྒྱུ་ རྩལ་ཤེས་ཀྱི་བུ་རིང་དུ་འཕུར་དེ་ལ་ཐོག་མར་ཆོས་བཤད་པར་བྱ་སྟེ། དེ་ནི་ངའི་ཐོག་མའི་སློབ་དཔོན་ཁོ་ན་ཡིན་བཞིན་དུ་རྗེད་པའི་དམ་པས་རྗེད་ཅིང་མཆོད་པའི་དམ་པས་མཆོད་ལ་རྟོགས་པ་དམ་པ་དག་ལ་ཡང་ཡིད་རངས་ཤིང་དད་པར་གྱུར་པ་ཡིན་ནོ་སྙམ་མོ། །བཅོམ་ལྡན་འདས་ལ་ལྷ་རྣམས་ ཀྱིས་གསོལ་པ། བཙུན་པ་སྒྱུ་རྩལ་ཤེས་ཀྱི་བ་རིང་དུ་འཕུར་གུམ་ནས་དགུང་བདུན་ལགས་སོ། །བཅོམ་ལྡན་འདས་ཀྱིས་ཀྱང་དགོངས་པ་ལ་ཞུགས་ཏེ། ཡེ་ཤེས་གཟིགས་པ་བསྐྱེད་ན་སྒྱུ་རྩལ་ཤེས་ཀྱི་བུ་རིང་དུ་འཕུར་ཤི་ནས་ཞག་བདུན་ལོན་ནོ། །དེ་ནས་བཅོམ་ལྡན་འདས་འདི་

  700. 40b

    སྙམ་དུ་དགོངས་ཏེ། ཨེ་མའོ་སྒྱུ་རྩལ་ཤེས་ཀྱི་བུ་རིང་དུ་འཕུར་ཤི་བ་དེ་ནི་ཏེ་པོར་མ་སྟེས་སོ། །ཨེ་མའོ་སྒྱུ་རྩལ་ཤེས་ཀྱི་བུ་རིང་དུ་འཕུར་ཤི་བ་དེ་ནི་ཤིན་ཏུ་ཏེ་པོར་མ་སྟེས་ཏེ་ཆོས་འདུལ་བ་འདི་མ་ཐོས་སོ། །གལ་ཏེ་དེས་ཆོས་འདུལ་བ་འདི་ཐོས་ན་ཤེས་པར་འགྱུར་བ་ཞིག་སྙམ་མོ། །དེ་ནས་ བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་ཐོག་མར་སུ་ཞིག་ལ་ཆོས་བཤད་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་རངས་བྱེད་ཀྱི་བུ་ལྷག་སྤྱོད་དེ་ལ་ཐོག་མར་ཆོས་བཤད་པར་བྱ་སྟེ། དེ་ནི་ངའི་ཐོག་མའི་སློབ་དཔོན་ཁོ་ན་ཡིན་བཞིན་དུ་རྗེད་ པའི་དམ་པས་རྗེད་ཅིང་མཆོད་པའི་དམ་པས་མཆོད་ལ་རྟོགས་པ་དམ་པ་དག་ལ་ཡང་ཡིད་རངས་ཤིང་དད་པར་གྱུར་ཏོ་སྙམ་མོ། །བཅོམ་ལྡན་འདས་ལ་ལྷ་རྣམས་ཀྱིས་གསོལ་པ། བཙུན་པ་རངས་བྱེད་ཀྱི་བུ་ལྷག་སྤྱོད་མདང་སུམ་སྲོད་ལ་གུམ་ལགས་སོ། །བཅོམ་ལྡན་འདས་ཀྱིས་ཀྱང་ དགོངས་པ་ལ་ཞུགས་ཏེ་ཡེ་ཤེས་གཟིགས་པ་བསྐྱེད་ན་རངས་བྱེད་ཀྱི་བུ་ལྷག་སྤྱོད་སྲོད་ལ་ཤི་བར་གྱུར་ཏོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཨེ་མའོ་རངས་བྱེད་ཀྱི་བུ་ལྷག་སྤྱོད་ཤི་བ་དེ་ནི་ཏེ་པོར་མ་སྟེས་སོ། །ཨེ་མའོ་རངས་བྱེད་ཀྱི་བུ་ལྷག་སྤྱོད་ཤི་བ་དེ་ནི་ཤིན་ཏུ་ཏེ་པོར་མ་ སྟེས་ཏེ་ཆོས་འདུལ་བ་འདི་མ་ཐོས་སོ། །གལ་ཏེ་དེས་ཆོས་འདུལ་བ་འདི་ཐོས་ན་ཤེས་པར་འགྱུར་བ་ཞིག་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་ཐོག་མར་སུ་ཞིག་ལ་ཆོས་བཤད་སྙམ་མོ། །དེ་ནས་འདི་སྙམ་དུ་དགོངས་ཏེ། མ་ལ་ངས་ལྔ་སྡེའི་དགེ་སློང་ དེ་རྣམས་ལ་ཐོག་མར་ཆོས་བཤད་པར་བྱ་སྟེ། དེ་དག་གིས་ང་སྔོན་སྡུག་བསྔལ་སྤོང་བའི་རྣལ་འབྱོར་གྱིས་རྗེས་སུ་བརྩོན་པར་གནས་པ་ན་བླ་མ་དང་། གུས་པ་དང་། སྡུག་པ་དང་བཅས་པས་གནས་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ལྔ་ སྡེའི་དགེ་སློང་རྣམས་ད་ལྟར་གང་ན་འདུག་སྙམ་ནས་བཅོམ་ལྡན་འདས་ཀྱིས་ལྷའི་སྤྱན་རྣམ་པར་དག་པ་མི་རྣམས་ཀྱི་ལས་འདས་པས་ལྔ་སྡེའི་དགེ་སློང་རྣམས་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་འཁོད་པ་གཟིགས་སོ། །གཟིགས་ནས་ཀྱང་ཇི་ཙམ་བཞེད་ཀྱི་བར་དུ་བྱང་ཆུབ་

  701. 41a

    ཀྱི་ཤིང་དྲུང་དུ་བཞུགས་ན་བཱ་རཱ་ཎ་སཱིའི་ཀ་ཤིའི་གྲོང་ཁྱེར་གང་ན་བ་དེར་རྒྱུ་ཞིང་གཤེགས་སོ། །དེའི་ཚེ་ཀུན་ཏུ་རྒྱུ་ཉེར་འགྲོ་ལམ་དེ་ཉིད་དུ་ཞུགས་པར་གྱུར་ཏེ། ཀུན་ཏུ་རྒྱུ་ཉེར་འགྲོས་བཅོམ་ལྡན་འདས་ལམ་ནས་གཤེགས་པ་མཐོང་ངོ་། །མཐོང་ནས་ཀྱང་འདི་སྐད་ཅེས་ གསོལ་ཏོ། །དགེ་སྦྱོང་གཽ་ཏ་མ་ཁྱོད་ཀྱི་དབང་པོ་རྣམས་ནི་དངས། བཞིན་གྱི་མདོག་ནི་ཡོངས་སུ་དག །པགས་པའི་མདོག་ནི་གསལ་ན། ཚེ་དང་ལྡན་པ་གཽ་ཏ་མ་ཁྱོད་ཀྱི་སྟོན་པ་ནི་གང་། ཁྱོད་སུ་ལས་བརྟེན་ཏེ་རབ་ཏུ་བྱུང་། ཁྱོད་སུའི་ཆོས་ལ་དགའ། བཅོམ་ལྡན་འདས་ཀྱིས་དེའི་ ཚེ་ཚིགས་སུ་བཅད་དེ་བཀའ་སྩལ་པ། ང་དང་འདྲ་བ་ཡོད་མིན་པས། །ང་ལ་སློབ་དཔོན་འགའ་མེད་དོ། །འཇིག་རྟེན་སངས་རྒྱས་ང་གཅིག་པུ། །ཡང་དག་བྱང་ཆུབ་དམ་པ་ཐོབ། །ཐམས་ཅད་ཟིལ་མནན་འཇིག་རྟེན་ཀུན་མཁྱེན་ལ། །འདི་ན་ཆོས་ཀུན་གྱིས་ནི་ང་མ་གོས། ། ཐམས་ཅད་སྤངས་ཤིང་སྲེད་བྲལ་རྣམ་གྲོལ་ཏེ། །རང་གིས་མངོན་པར་ཤེས་ན་སུ་ལ་བརྟེན། །དེ་བཞིན་གཤེགས་པ་ལྷ་མིའི་སྟོན་པ་པོ། །ཐམས་ཅད་མཁྱེན་པའི་སྟོབས་ནི་ཀུན་ལྡན་པས། །ཉིད་ཀྱིས་བྱང་ཆུབ་རྟོགས་ནས་རབ་གསུང་བ། །མི་མཉམ་མཚུངས་པ་མེད་ན་སུ་ལ་ བརྟེན། །ང་ནི་འཇིག་རྟེན་དགྲ་བཅོམ་སྟེ། །འཇིག་རྟེན་བླ་མེད་ང་ཡིན་པས། །ལྷ་དང་བཅས་པའི་འཇིག་རྟེན་ན། །ང་ནི་རྒྱལ་བ་བདུད་ཟིལ་གནོན། །ཚེ་དང་ལྡན་པ་གཽ་ཏ་མ་རྒྱལ་བ་ཞེས་གསུང་ངམ། །གང་གིས་ཟག་པ་ཟད་ཐོབ་པ། །རྒྱལ་བ་ང་འདྲ་ཤེས་པར་བྱ། །སྡིག་ པའི་ཆོས་ནི་ངས་བཅོམ་པས། །དེ་བས་ཉེར་འགྲོ་ང་རྒྱལ་བའོ། །ཚེ་དང་ལྡན་པ་གཽ་ཏ་མ་གང་དུ་བཞུད། །བཱ་རཱ་ཎ་སཱིར་གཤེགས་ནས་ནི། །ངས་ནི་ཆོས་ཀྱི་རྔ་བརྡུང་ཞིང་། །འཇིག་རྟེན་མ་བསྐོར་གང་ཡིན་པའི། །ཆོས་ཀྱི་འཁོར་ལོ་རབ་ཏུ་བསྐོར། །འཇིག་རྟེན་ཆགས་ལས་རྒལ་ བ་ཡི། །ཀུན་མཁྱེན་སངས་རྒྱས་ཞི་གྱུར་པ། །འཇིག་རྟེན་བསྒྲལ་བ་མ་བྱས་པར། །སྐྱེས་བུ་དམ་པ་གྲགས་མི་སྲིད། །ཚེ་དང་ལྡན་པ་གཽ་ཏ་མ་རྒྱལ་བ་ལེགས་སོ། །ཞེས་གསོལ་ནས་ཀུན་དུ་རྒྱུ་ཉེར་འགྲོ་ལམ་ནས་སོང་ངོ་། །དེ་ནས་བཅོམ་ལྡན་འདས་ཡུལ་ཀ་ཤིའི་ལྗོངས་རྒྱུ་ཞིང་

  702. 41b

    གཤེགས་པ་ན་བཱ་རཱ་ཎ་སཱིར་བྱོན་ཏོ། །དེའི་ཚེ་ལྔ་སྡེའི་དགེ་སྦྱོང་རྣམས་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་འཁོད་དོ། །ལྔ་སྡེའི་དགེ་སློང་རྣམས་ཀྱིས་བཅོམ་ལྡན་འདས་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཕན་ཚུན་ནས་ཆེད་དུ་བསམས་ཏེ་ལེགས་པར་འདུག་ནས་ ཁྲིམས་སུ་བཅས་པ། ཤེས་ལྡན་དག་དགེ་སྦྱོང་གཽ་ཏ་མ་མི་བརྟན་པ། བྱ་བ་མང་བ། མང་པོས་འཚོ་ཞིང་། སྤོང་བ་ཉམས་པ་དེ་ད་འབྲས་ཆན་དང་། ཟན་དྲོན་གྱི་ཁ་ཟས་མང་དུ་ཟ་ཞིང་ལུས་མར་སར་དང་ཏིལ་མར་གྱིས་བྱུགས་ནས་ཆུ་འཇམ་པོས་ལུས་ཁྲུས་བྱེད་ཅིང་འོང་གིས་དེ་བདག་ཅག་ གི་དྲུང་དུ་འོངས་པ་དང་དེ་ལ་སྨྲ་བར་མི་བྱ། ཕྱག་མི་བྱ། ལྡང་བ་མི་བྱ། ལངས་ཏེ་སྟན་བསྟབ་པར་མི་བྱའོ། །གཞན་དུ་ན་སྟན་ནར་མ་ཁོ་ན་བཏིང་ལ་ཚིག་འདི་སྐད་ཅེས་ཚེ་དང་ལྡན་པ་གཽ་ཏ་མ་སྟན་ཡོད་ཀྱིས་ཇི་སྟེ་འདོད་ན་འདུག་ཤིག་ཅེས་བརྗོད་པར་བྱའོ་ཞེས་ཁྲིམས་བཅས་སོ། །བཅོམ་ ལྡན་འདས་ཀྱིས་ཇི་ལྟ་ཇི་ལྟར་ལྔ་སྡེའི་དགེ་སློང་རྣམས་ལ་གཟིགས་པའི་ཕྱིར་ཉེ་བར་གཤེགས་པ་དེ་ལྟ་དེ་ལྟར་ལྔ་སྡེའི་དགེ་སློང་རྣམས་བཅོམ་ལྡན་འདས་ཀྱི་གཟི་བརྗིད་དང་། དཔལ་དང་། བཀུར་སྟི་མ་བཟོད་ནས་སྟན་ལས་ལངས་ཏེ་ཁ་ཅིག་ནི་བཅོམ་ལྡན་འདས་ཀྱི་ཆེད་དུ་གདན་ཤོམ་མོ། །ཁ་ ཅིག་ནི་ཞབས་བཀྲུ་བའི་ཆུ་དང་ཞབས་ཀྱི་རྟེན་དག་མཐའ་གཅིག་ཏུ་འཇོག་པར་བྱེད་དོ། །ཁ་ཅིག་ནི་བསུ་སྟེ་ན་བཟའ་ཆོས་གོས་དག་བླངས་ནས་འདི་སྐད་ཅེས་ཤེས་ལྡན་གཽ་ཏ་མ་ཚུར་སྤྱོན། ཤེས་ལྡན་གཽ་ཏ་མ་བྱོན་པ་ལེགས་སོ། །ཤེས་ལྡན་གཽ་ཏ་མ་གདན་བཤམས་པ་ཉིད་ལ་བཞུགས་ ཤིག་ཞེས་ཟེར་རོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མ་སྐྱེས་བུ་བླུན་པོ་འདི་རྣམས་ཀྱིས་ཁྲིམས་བཅས་ནས་རང་གིས་བཤིག་གོ་སྙམ་དུ་མཁྱེན་ནས་གདན་བཤམས་པ་ཉིད་ལ་བཞུགས་སོ། །དེ་ནས་ལྔ་སྡེའི་དགེ་སློང་རྣམས་ལྷག་པར་ཡང་བཅོམ་ལྡན་འདས་ཀྱི་ མཚན་ནས་བརྗོད། གདུང་ནས་བརྗོད། ཚེ་དང་ལྡན་པས་བརྗོད་པ་ཀུན་དུ་རྗོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ལྷག་པར་ཡང་དེ་བཞིན་གཤེགས་པའི་མཚན་ནས་བརྗོད་པ་དང་། གདུང་ནས་བརྗོད་པ་

  703. 42a

    དང་། ཚེ་དང་ལྡན་པས་རྗོད་པའི་ཀུན་དུ་མ་བརྗོད་ཅིག །ཁྱེད་ལ་ཡུན་རིང་པོར་གནོད་པ་དང་ཕན་པ་མ་ཡིན་པ་དང་། སྡུག་བསྔལ་བར་འགྱུར་རོ། །དེ་ཅིའི་ཕྱིར་ཞེ་ན། དགེ་སློང་དག་གང་ལ་ལ་ལྷག་པར་ཡང་དེ་བཞིན་གཤེགས་པའི་མཚན་ནས་བརྗོད་པ་དང་། གདུང་ནས་བརྗོད་པ་དང་། ཚེ་དང་ལྡན་པས་རྗོད་པའི་ཀུན་དུ་བརྗོད་པ་དེ་ནི་སྐྱེས་བུ་བླུན་པོ་དེ་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་རོ། །དེ་དག་གིས་འདི་སྐད་ཅེས་གསོལ་ཏོ། །ཚེ་དང་ལྡན་པ་གཽ་ཏ་མ་ཁྱོད་ཀྱིས་རེ་ཞིག་སྔོན་གྱི་ཚུལ་དང་། སྤྱོད་ པ་དང་དཀའ་བ་སྤྱད་པ་དེས་མིའི་ཆོས་བླ་མ་འཕགས་པའི་ཁྱད་པར་ཐོབ་པར་ནུས་པའམ། ཤེས་པའམ། མཐོང་བའམ། རེག་པར་གནས་པ་ཅུང་ཟད་ཀྱང་མ་ཐོབ་ན། ད་ལྟ་ཁྱོད་མི་བརྟན་ཞིང་བྱ་བ་མང་ལ་མང་པོས་འཚོ་ཞིང་སྤོང་བ་ཉམས་པས་ད་ཁྱོད་འབྲས་ཆན་དང་། ཟན་དྲོན་དང་། ཁ་ ཟས་ལ་མང་དུ་ཟ་ཞིང་ལུས་མར་སར་དང་ཏིལ་མར་གྱིས་བྱུགས་ནས་ཆུ་འཇམ་པོས་ལུས་ཁྲུས་བྱེད་པ་ལྟ་སྨོས་ཀྱང་ཅི་དགོས། དགེ་སློང་དག་ཁྱོད་ཀྱིས་དེ་བཞིན་གཤེགས་པའི་ཞལ་མདོག་དང་དབང་པོ་རྣམས་གསལ་བ་སྔོན་ལས་ཐ་དད་དུ་བྱ་བ་གཞན་ལྟ་མཐོང་ངམ། དེ་རྣམས་ཀྱིས་འདི་སྐད་ ཅེས་གསོལ་ཏོ། །ཚེ་དང་ལྡན་པ་གཽ་ཏ་མ་དེ་དེ་བཞིན་ནོ། །དེ་ནས་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་རབ་ཏུ་བྱུང་བས་ནི་མཐའ་འདི་གཉིས་ལ་བརྟེན་པར་མི་བྱ། བསྙེན་པར་མི་བྱ། བསྙེན་བཀུར་མི་བྱ་སྟེ། གཉིས་གང་ཞེ་ན། འདོད་པ་རྣམས་ལ་འདོད་པའི་བསོད་སྙོམས་ཀྱི་རྗེས་སུ་བརྩོན་པ། དམན་པ། ངན་པ། ཐ་ཆད་མ་རབས་གང་ཡིན་པ་དང་། བདག་ཉིད་དུབ་པ་ལ་རྗེས་སུ་བརྩོན་པ། སྡུག་བསྔལ་བ། འཕགས་པ་མ་ཡིན་པ། གནོད་པ་དང་ལྡན་པ་གང་ཡིན་པའོ། །ཁྱེད་ཀྱིས་མཐའ་འདི་གཉིས་ ལ་མི་བརྟེན་པར་དབུ་མའི་ལམ་མིག་བྱེད་པ། ཡེ་ཤེས་བྱེད་པ། ཉེ་བར་ཞི་བར་འགྱུར་བ། མངོན་པར་ཤེས་པ་དང་། རྫོགས་པར་བྱང་ཆུབ་པ་དང་། མྱ་ངན་ལས་འདས་པར་འགྱུར་བ་ཡོད་དེ། དབུ་མའི་ལམ་གང་ཞེ་ན། འཕགས་པའི་ལམ་ཡན་ལག་བརྒྱད་པ་འདི་ལྟ་སྟེ། ཡང་

  704. 42b

    དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཡིན་ནོ། །བཅོམ་ལྡན་འདས་ཀྱིས་ལྔ་སྡེའི་དགེ་སློང་ རྣམས་ལ་ཤེས་པར་བྱ་བ་འདིས་ཤེས་པར་མཛད་སྤྱོད་པས་བཅོམ་ལྡན་འདས་ལྔ་སྡེའི་དགེ་སློང་རྣམས་ལས་གཉིས་ལ་སྔ་དྲོ་གདམས་ངག་འབོགས་པ་ན་གསུམ་གྲོང་དུ་བསོད་སྙོམས་ལ་འཇུག་སྟེ། གསུམ་གྱིས་བསྒྲུབ་པ་གང་ཡིན་པ་དེས་དྲུག་ཆར་འཚོ་བར་བྱེད་དོ། །བཅོམ་ལྡན་འདས་ལྔ་སྡེ་ རྣམས་ཀྱི་དགེ་སློང་གསུམ་ལ་ཕྱི་དྲོ་གདམས་ངག་འབོགས་པ་ན་གཉིས་གྲོང་དུ་བསོད་སྙོམས་འཇུག་སྟེ། གཉིས་ཀྱིས་བསྒྲུབ་པ་གང་ཡིན་པ་དེས་ལྔ་སྡེ་འཚོ་བར་བྱེད་དེ། དེ་བཞིན་གཤེགས་པ་ནི་སྔ་དྲོའི་དུས་ཁོ་ནར་གསོལ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་ལ་ བཀའ་སྩལ་པ། དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་བསྔལ་འཕགས་པའི་བདེན་པའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་འདི་ནི་སྡུག་ བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་མོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་ བསྔལ་འཕགས་པའི་བདེན་པ་དེ་ངས་མངོན་པར་ཤེས་པས་ཡོངས་སུ་ཤེས་པར་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་ བདེན་པ་དེ་ངས་མངོན་པར་ཤེས་པས་སྤང་བར་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་ངས་མངོན་

  705. 43a

    པར་ཤེས་པས་མངོན་སུམ་དུ་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་ངས་མངོན་ པར་ཤེས་པས་བསྒོམ་པར་བྱའོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འཕགས་པའི་བདེན་པ་དེ་ངས་མངོན་པར་ཤེས་པས་ཡོངས་སུ་ཤེས་སོ་ཞེས་ ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་ཀུན་འབྱུང་བ་འཕགས་པའི་བདེན་པ་དེ་ངས་མངོན་པར་ཤེས་པས་སྤངས་སོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་ སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པ་འཕགས་པའི་བདེན་པ་དེ་ངས་མངོན་པར་ཤེས་པས་མངོན་སུམ་དུ་བྱས་སོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་སྔོན་མ་ཐོས་པའི་ཆོས་རྣམས་ལ་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་དེ་ངས་མངོན་པར་ཤེས་པས་བསྒོམས་སོ་ཞེས་ཚུལ་བཞིན་ཡིད་ལ་བྱེད་པ་ན་མིག་སྐྱེས་སོ། །ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་སོ། །དགེ་སློང་དག་ང་ཇི་སྲིད་དུ་འཕགས་པའི་བདེན་པ་བཞི་པོ་འདི་རྣམས་ལ་དེ་ལྟར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་མིག་མ་སྐྱེས། ཤེས་པ་མ་ཡིན། རིག་པ་མ་ཡིན། བློ་མ་ཡིན། རྟོགས་པ་མ་སྐྱེས་པ་དེ་སྲིད་དུ་ང་ལྷ་དང་བཅས་ པའི་འཇིག་རྟེན་བདུད་དང་བཅས། ཚངས་པ་དང་བཅས་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་མིར་བཅས་པ་འདི་ལས་གྲོལ་བ་དང་། ངེས་པར་འབྱུང་བ་དང་། མི་ལྡན་པ་དང་། རབ་ཏུ་གྲོལ་བ་དང་། ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་མ་གྱུར་

  706. 43b

    ཅིང་དགེ་སློང་དག་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བྱ་བར་མ་ཤེས་སོ། །དགེ་སློང་དག་ངས་གང་ནས་འཕགས་པའི་བདེན་པ་བཞི་པོ་འདི་རྣམས་ལ་དེ་ལྟར་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་མིག་སྐྱེས་ཤིང་ ཤེས་པ་དང་། རིག་པ་དང་། བློ་དང་། རྟོགས་པ་སྐྱེས་པ་དེ་ནས་ང་ལྷ་དང་བཅས་པའི་འཇིག་རྟེན། བདུད་དང་བཅས། ཚངས་པ་དང་བཅས། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་ལྷ་དང་མིར་བཅས་པ་འདི་ལས་གྲོལ་བ་དང་། ངེས་པར་འབྱུང་བ་དང་། མི་ལྡན་པ་དང་། རབ་ ཏུ་གྲོལ་བ་དང་། ཕྱིན་ཅི་ལོག་དང་བྲལ་བའི་སེམས་ཀྱིས་མང་དུ་གནས་པར་གྱུར་ཅིང་། དགེ་སློང་དག་ངས་དེ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་བྱ་བར་ཤེས་སོ་ཆོས་ཀྱི་རྣམ་གྲངས་དེ་བཀའ་སྩལ་པ་ན་ཚེ་དང་ལྡན་པ་ཀཽཎྜི་ནྱ་དང་། ལྷ་བརྒྱད་ཁྲི་ལ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜི་ནྱ་ལ་བཀའ་སྩལ་པ། ཀཽཎྜི་ནྱ་ཁྱོད་ཀྱི་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། ཀུན་ ཤེས་སམ། བདེ་བར་གཤེགས་པ་ཀུན་འཚལ་ལགས་སོ། །ཀུན་འཚལ་ལགས་སོ། །ཚེ་དང་ལྡན་པ་ཀཽཎྜི་ནྱས་ཆོས་ཀུན་ཤེས་པས་དེའི་ཕྱིར་ཚེ་དང་ལྡན་པ་ཀཽཎྜི་ནྱ་ཀུན་ཤེས་ཀཽཎྜི་ནྱ་ཞེས་ཚིག་བླ་དགས་སུ་བཏགས་སོ། །ཚེ་དང་ལྡན་པ་ཀཽཎྜི་ནྱས་ཆོས་ཀུན་ཤེས་སོ། །ཞེས་ས་བླའི་གནོད་སྦྱིན་ རྣམས་སྒྲ་སྒྲོགས་པར་བྱེད་དོ། །གྲོགས་པོ་དག་བཅོམ་ལྡན་འདས་ཀྱི་བཱ་རཱ་ཎ་སཱིར་དྲང་སྲོང་སྨྲ་བའི་རི་དགས་ཀྱི་ནགས་སུ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་ཀྱི་འཁོར་ལོ་ཆོས་དང་ལྡན་པ། དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ འཇིག་རྟེན་དུ་ཆོས་དང་ལྡན་པར་མ་བསྐོར་བ་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། བདེ་བའི་ཕྱིར་བསྐོར་བས་ལྷའི་རིས་མངོན་པར་འཕེལ་ཞིང་ལྷ་མ་ཡིན་གྱི་རིས་ཡོངས་སུ་ཉམས་སོ་ཞེས་

  707. 44a

    དབྱངས་བསྒྲགས་སོ། །ས་བླའི་གནོད་སྦྱིན་རྣམས་ཀྱི་སྒྲ་ཐོས་ནས་ནམ་མཁའ་ལ་རྒྱུ་བའི་གནོད་སྦྱིན་དང་། རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་པའི་ལྷ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ནས་ སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་དང་། སྐད་ཅིག་དང་། ཐང་ཅིག་དང་། ཡུད་ཙམ་དེ་ལ་ཚངས་པའི་འཇིག་རྟེན་གྱི་བར་དུ་སྒྲ་བསྒྲགས་སོ། །ཚངས་རིས་ཀྱི་ལྷ་རྣམས་ཀྱིས་ཀྱང་སྒྲ་སྒྲོགས་པར་བྱེད་དོ། །གྲོགས་པོ་དག་བཅོམ་ལྡན་འདས་ཀྱིས་བཱ་རཱ་ཎ་སཱིར་དྲང་སྲོང་སྨྲ་བའི་རི་དགས་ ཀྱི་ནགས་སུ་ལན་གསུམ་དུ་བཟླས་ཏེ་རྣམ་པ་བཅུ་གཉིས་ཀྱི་ཆོས་ཀྱི་འཁོར་ལོ་ཆོས་དང་ལྡན་པ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་འཇིག་རྟེན་དུ་ཆོས་དང་མཐུན་པར་འགའ་ཡང་མ་བསྐོར་བ་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། བདེ་བའི་ཕྱིར་བསྐོར་བས་ལྷའི་རིས་མངོན་པར་འཕེལ་ཞིང་ལྷ་མ་ཡིན་གྱི་རིས་ཡོངས་སུ་ཉམས་སོ་ཞེས་དབྱངས་བསྒྲགས་སོ། །བཅོམ་ལྡན་འདས་ཀྱིས་བཱ་རཱ་ཎ་སཱིར་དྲང་སྲོང་སྨྲ་བའི་རི་དགས་ཀྱི་ནགས་སུ་ལན་ གསུམ་བཟླས་ཏེ་རྣམ་པ་བཅུ་གཉིས་སུ་ཆོས་ཀྱི་འཁོར་ལོ་ཆོས་དང་ལྡན་པ་བསྐོར་བས་དེའི་ཕྱིར་ཆོས་ཀྱི་རྣམ་གྲངས་འདི་ལ་ཆོས་ཀྱི་འཁོར་ལོ་བསྐོར་བ་ཞེས་ཚིག་བླ་དགས་སུ་བཏགས་སོ། །དེ་ནས་བཅོམ་ལྡན་འདས་ཀྱིས་ལན་གཉིས་སུ་ཡང་ལྔ་སྡེའི་དགེ་སློང་རྣམས་ལ་བཀའ་སྩལ་པ། དགེ་སློང་དག་འཕགས་པའི་བདེན་པ་བཞི་ནི་འདི་དག་ཡིན་ཏེ། བཞི་གང་ཞེ་ན། སྡུག་བསྔལ་འཕགས་པའི་བདེན་པ་དང་། སྡུག་བསྔལ་ཀུན་འབྱུང་བ་དང་། སྡུག་བསྔལ་འགོག་པ་དང་། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །སྡུག་བསྔལ་འཕགས་པའི་ བདེན་པ་གང་ཞེ་ན། སྐྱེ་བ་སྡུག་བསྔལ་བ་དང་། རྒ་བ་སྡུག་བསྔལ་བ་དང་། ན་བ་སྡུག་བསྔལ་བ་དང་། འཆི་བ་སྡུག་བསྔལ་བ་དང་། སྡུག་པ་དང་བྲལ་བ་སྡུག་བསྔལ་བ་དང་། མི་སྡུག་པ་དང་ཕྲད་པ་སྡུག་བསྔལ་བ་དང་། གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་བ་དང་། མདོར་

  708. 44b

    ན་ཉེ་བར་ལེན་པའི་ཕུང་པོ་ལྔ་སྡུག་བསྔལ་བ་སྟེ། དེ་ཡོངས་སུ་ཤེས་པར་བྱ་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱའོ། །སྡུག་བསྔལ་ཀུན་འབྱུང་བ་འཕགས་པའི་བདེན་པ་གང་ཞེ་ན། ཡང་སྲིད་པའི་སྲེད་པ་དགའ་བའི་འདོད་ཆགས་དང་ལྡན་པ་དེ་དང་དེ་ལ་མངོན་པར་ འདོད་པ་སྟེ། དེ་སྤང་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱའོ། །སྡུག་བསྔལ་འགོག་པ་འཕགས་པའི་བདེན་པ་གང་ཞེ་ན། ཡང་སྲིད་པའི་སྲེད་པ་དགའ་བའི་འདོད་ཆགས་དང་ལྡན་པ་དེ་དང་དེ་ལ་མངོན་པར་དགའ་བ་གང་ཡིན་པ་དེ་ཉིད་མ་ལུས་པར་སྤངས་པ་དང་། བོར་ བ་དང་། བསལ་བ་དང་། ཟད་པ་དང་། འདོད་ཆགས་དང་བྲལ་བ་དང་། འགགས་པ་དང་། ཉེ་བར་ཞི་བ་དང་། ནུབ་པ་སྟེ། དེ་མངོན་སུམ་དུ་བྱ་བའི་ཕྱིར་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱའོ། །སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ གང་ཞེ་ན། འཕགས་པའི་ལམ་ཡན་ལག་བརྒྱད་པ་སྟེ། འདི་ལྟ་སྟེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏེ། དེ་ཡང་བསྒོམ་པར་བྱའོ། །ཆོས་ཀྱི་རྣམ་གྲངས་འདི་བཤད་པ་ན་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ལྔ་སྡེའི་དགེ་སློང་ལྷག་མ་རྣམས་ལ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། ། དེའི་ཚེ་འཇིག་རྟེན་ན་དགྲ་བཅོམ་པ་གཅིག་དང་། གཉིས་པ་ནི་བཅོམ་ལྡན་འདས་སོ། །དེ་ནས་བཅོམ་ལྡན་འདས་ཀྱིས་ཡང་དགེ་སློང་ལྔ་སྡེ་ལྷག་མ་རྣམས་ལ་བཀའ་སྩལ་པ། དགེ་སློང་དག་གཟུགས་ནི་བདག་མ་ཡིན་ནོ། །དགེ་སློང་དག་གལ་ཏེ་གཟུགས་བདག་ཡིན་ན་གཟུགས་ལ་གནོད་པ་ དང་། སྡུག་བསྔལ་བར་མི་འགྱུར་ཞིང་གཟུགས་ལ་བདག་གི་གཟུགས་འདི་ལྟ་བུར་གྱུར་ཅིག །འདི་ལྟ་བུར་མ་གྱུར་ཅིག་སྙམ་ཡང་འཐོབ་པར་འགྱུར་རོ། །དགེ་སློང་དག་གང་གི་ཕྱིར་གཟུགས་བདག་མ་ཡིན་པ་དེའི་ཕྱིར་གཟུགས་ལ་གནོད་པ་དང་། སྡུག་བསྔལ་བར་འགྱུར་ཞིང་གཟུགས་

  709. 45a

    ལ་བདག་གི་གཟུགས་འདི་ལྟ་བུར་གྱུར་ཅིག །འདི་ལྟ་བུར་མ་གྱུར་ཅིག་སྙམ་ཡང་འཐོབ་པར་མི་འགྱུར་རོ། །དགེ་སློང་དག་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་རྣམ་པར་ཤེས་པ་ནི་བདག་མ་ཡིན་ནོ། །དགེ་སློང་དག་གལ་ཏེ་རྣམ་པར་ཤེས་ པ་བདག་ཡིན་ན་རྣམ་པར་ཤེས་པ་ལ་གནོད་པ་དང་། སྡུག་བསྔལ་བར་མི་འགྱུར་ཞིང་རྣམ་པར་ཤེས་པ་ལ་བདག་གི་རྣམ་པར་ཤེས་པ་འདི་ལྟ་བུར་གྱུར་ཅིག །འདི་ལྟ་བུར་མ་གྱུར་ཅིག་སྙམ་ཡང་འཐོབ་པར་འགྱུར་རོ། །དགེ་སློང་དག་གང་གི་ཕྱིར་རྣམ་པར་ཤེས་པ་བདག་མ་ཡིན་པ་དེའི་ཕྱིར་རྣམ་ པར་ཤེས་པ་ལ་གནོད་པ་དང་། སྡུག་བསྔལ་བར་འགྱུར་ཞིང་རྣམ་པར་ཤེས་པ་ལ་བདག་གི་རྣམ་པར་ཤེས་པ་འདི་ལྟ་བུར་གྱུར་ཅིག །འདི་ལྟ་བུར་མ་གྱུར་ཅིག་སྙམ་ཡང་འཐོབ་པར་མི་འགྱུར་རོ། །དགེ་སློང་དག་ཇི་སྙམ་དུ་སེམས། གཟུགས་རྟག་གམ་མི་རྟག་བཙུན་པ་མི་རྟག་ལགས་སོ། །མི་ རྟག་པ་དེ་སྡུག་བསྔལ་ཡིན་ནམ། སྡུག་བསྔལ་མ་ཡིན། བཙུན་པ་སྡུག་བསྔལ་ལགས་སོ། །མི་རྟག་པ་སྡུག་བསྔལ་བ་རྣམ་པར་འགྱུར་བའི་ཆོས་གང་ཡིན་པ་དེ་ལ་ཅིག་འཕགས་པའི་ཉན་ཐོས་ཐོས་པ་དང་ལྡན་པ་འདི་ནི་བདག་གོ། །བདག་ནི་འདི་ཡིན་ནོ། །འདི་ནི་བདག་གི་བདག་གོ་ ཞེས་བདག་ཏུ་ཁས་ལེན་ཏམ། བཙུན་པ་མ་ལགས་སོ། །དགེ་སློང་དག་ཇི་སྙམ་དུ་སེམས། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྟག་གམ་མི་རྟག །བཙུན་པ་མི་རྟག་ལགས་སོ། །མི་རྟག་པ་གང་ཡིན་པ་དེ་སྡུག་བསྔལ་ཡིན་ནམ་སྡུག་བསྔལ་མ་ཡིན། བཙུན་པ་སྡུག་བསྔལ་ལགས་སོ། །མི་རྟག་པ་སྡུག་བསྔལ་བ་རྣམ་པར་འགྱུར་བའི་ཆོས་གང་ཡིན་པ་དེ་ལ་ཅིག་འཕགས་པའི་ཉན་ཐོས་ཐོས་པ་དང་ལྡན་པ་འདི་ནི་བདག་གོ། །བདག་ནི་འདི་ཡིན་ནོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་ཏམ། བཙུན་པ་མ་ལགས་སོ། ། དགེ་སློང་དག་དེ་ལྟ་བས་ན་གཟུགས་གང་ཡིན་པ་ཅི་ཡང་རུང་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱིའིའམ། རགས་པའམ། ཕྲ་བའམ། ངན་པའམ། གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བ་དེ་དག་ཐམས་ཅད་ནི་

  710. 45b

    བདག་མ་ཡིན། བདག་ནི་དེ་མ་ཡིན། དེ་ནི་བདག་གི་བདག་མ་ཡིན་ནོ་ཞེས་ཇི་ལྟ་བ་དེ་བཞིན་དུ་ཡང་དག་པའི་ཤེས་རབ་ཀྱིས་བལྟ་བར་བྱའོ། །དགེ་སློང་དག་དེ་ལྟ་བས་ན་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཇི་སྙེད་པ་གང་ཅི་ཡང་རུང་འདས་པའམ། མ་འོངས་ པའམ། ད་ལྟར་བྱུང་བའམ། ནང་གིའམ། ཕྱིའིའམ། རགས་པའམ། ཕྲ་བའམ། ངན་པའམ། གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བ་དེ་དག་ཐམས་ཅད་ནི་བདག་མ་ཡིན། བདག་ནི་དེ་མ་ཡིན། དེ་ནི་བདག་གི་བདག་མ་ཡིན་ནོ་ཞེས་ཇི་ལྟ་བ་དེ་ བཞིན་དུ་ཡང་དག་པའི་ཤེས་རབ་ཀྱིས་བལྟ་བར་བྱའོ། །དགེ་སློང་དག་འདི་ལྟར་འཕགས་པའི་ཉན་ཐོས་ཐོས་པ་དང་ལྡན་པ་ནི་ཉེ་བར་ལེན་པའི་ཕུང་པོ་ལྔ་པོ་འདི་བདག་མ་ཡིན། བདག་གི་མ་ཡིན་པར་ལྟ་བ་སྟེ། དེ་དེ་ལྟར་བལྟ་བ་ན་འཇིག་རྟེན་ཅི་ཡང་ལེན་པ་མེད་དོ། །ལེན་པ་མེད་ན་ཡོངས་ སུ་གདུང་བ་མེད་དོ། །ཡོངས་སུ་གདུང་བ་མེད་ན་བདག་ཉིད་ཡོངས་སུ་མྱ་ངན་ལས་འདས་ཏེ་བདག་གི་སྐྱེ་བ་ཟད་དོ། །ཚངས་པར་སྤྱོད་པ་ལ་བསྟེན་ཏོ། །བྱ་བ་བྱས་སོ། །སྲིད་པ་འདི་དག་ལས་གཞན་མི་ཤེས་སོ་ཞེས་བྱ་བར་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན། ལྔ་སྡེའི་དགེ་ སློང་ལྷག་མ་རྣམས་ཀྱིས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེའི་ཚེ་དགྲ་བཅོམ་པ་ལྔ་དང་དྲུག་པ་ནི་བཅོམ་ལྡན་འདས་སོ། །དེ་ནས་བཅོམ་ལྡན་འདས་བཱ་རཱ་ཎ་སཱིའི་འབབ་ཆུ་གནོད་པ་ཅན་གྱི་འགྲམ་ན་བཞུགས་སོ། །དེའི་ཚེ་བཱ་རཱ་ཎ་སཱི་ན་རིགས་ཀྱི་གཙོ་བོ་ཞེས་བྱ་ བའི་བུ་གྲགས་པ་ཞེས་བྱ་བ་ཞིག་གནས་ཏེ། དེ་ཉི་མ་རེ་རེ་ཞིང་བུད་མེད་ཀྱིས་བྱས་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པས་ལུས་སྙོམ། ལུས་དུབ། ལུས་རྒུད་པས་མྱུར་དུ་གཉིད་ཀྱིས་ལོག་པར་གྱུར་ཏོ། །བུད་མེད་དེ་རྣམས་ཀྱང་ལུས་སྙོམ། ལུས་དུབ། ལུས་རྒུད་པས་མྱུར་དུ་གཉིད་ཀྱིས་ལོག་པར་གྱུར་ཏོ། །རིགས་ཀྱི་གཙོ་བོའི་བུ་གྲགས་པ་མཚན་མོ་གཉིད་སད་པ་ན་བུད་མེད་དེ་དག་ཐམས་ཅད་རྡོལ་ཞིང་སྒྲེན་མོར་བྱུང་ལ་སྐྲ་ཞིག་ལག་པ་བརྐྱང་སྟེ་བྱུང་རྒྱལ་དུ་བླ་བ་མཐོང་ངོ་། །མཐོང་ནས་ཀྱང་དེ་རང་གི་ཆུང་མ་ལ་དུར་ཁྲོད་ཀྱི་འདུ་

  711. 46a

    ཤེས་སྐྱེས་པར་གྱུར་ཏོ། །དེ་ནས་རིགས་ཀྱི་གཙོ་བོའི་བུ་གྲགས་པ་མལ་ཆེན་པོ་ལས་བབས་ཏེ། རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་གོན་ནས་ཉལ་ཁང་གི་སྒོ་གང་ན་བ་དེར་སོང་སྟེ་ཕྱིན་ནས་གྲོགས་པོ་བདག་ནི་གཙེས་སོ། །གྲོགས་པོ་བདག་ནི་ཉམས་སོ་ཞེས་སྐད་ ངན་ཕྱུང་བ་དང་། དེའི་སྒོ་མི་མ་ཡིན་པ་རྣམས་ཀྱིས་ཕྱེ་ནས་སྐད་ཀྱང་མི་གྲག་པར་བྱས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་ཁྱིམ་གྱི་སྒོ་གང་ན་བ་དེར་སོང་སྟེ་ཕྱིན་ནས་གྲོགས་པོ་བདག་ནི་གཙེས་སོ། །གྲོགས་པོ་བདག་ནི་ཉམས་སོ་ཞེས་སྐད་ངན་ཕྱུང་བ་དང་། དེའི་སྒོ་མི་མ་ཡིན་ པ་རྣམས་ཀྱིས་ཕྱེ་ནས་སྐད་ཀྱང་མི་གྲག་པར་བྱས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་གྲོང་ཁྱེར་གྱི་སྒོ་གང་ན་བ་དེར་སོང་སྟེ་ཕྱིན་ནས་གྲོགས་པོ་བདག་ནི་གཙེས་སོ། །གྲོགས་པོ་བདག་ནི་ཉམས་སོ་ཞེས་སྐད་ངན་ཕྱུང་བ་དང་། དེའི་སྒོ་མི་མ་ཡིན་པ་རྣམས་ཀྱིས་ཕྱེ་ནས་སྐད་ཀྱང་མི་གྲག་ པར་བྱས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་འབབ་ཆུ་གནོད་པ་ཅན་གང་ན་བ་དེར་སོང་བ་དང་། དེའི་ཚེ་བཅོམ་ལྡན་འདས་འབབ་ཆུ་གནོད་པ་ཅན་གྱི་འགྲམ་ན་གཙུག་ལག་ཁང་གི་ཕྱི་རོལ་བླ་གབ་མེད་པ་ན་རིགས་ཀྱི་གཙོ་བོའི་བུ་གྲགས་པ་འོང་བ་ལ་ཡང་དང་ཡང་དུ་གཞེས་ཤིང་འཆག་པས་ འཆག་གོ། །རིགས་ཀྱི་གཙོ་བོའི་བུ་གྲགས་པས་བཅོམ་ལྡན་འདས་འབབ་ཆུ་གནོད་པ་ཅན་གྱི་འགྲམ་ན་འཆག་པ་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་དགེ་སྦྱོང་བདག་ནི་གཙེས་སོ། །དགེ་སྦྱོང་བདག་ནི་ཉམས་སོ་ཞེས་སྐད་ངན་ཕྱུང་ངོ་། །དེ་ནས་བཅོམ་ལྡན་འདས་ཀྱིས་རིགས་ ཀྱི་གཙོ་བོའི་བུ་གྲགས་པ་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་ཚུར་ཤོག་གནས་འདི་ནི་ཁྱོད་ལ་འཚེ་བ་མེད་པ་ཡིན། འདི་ནི་ཉམས་པ་མེད་པ་ཡིན་ནོ། །དེ་ནས་རིགས་ཀྱི་གཙོ་བོའི་བུ་གྲགས་པ་རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་པོ་འབབ་ཆུ་གནོད་པ་ཅན་གྱི་འགྲམ་དུ་ཕུད་ནས་ འབབ་ཆུ་གནོད་པ་ཅན་རྒལ་ཏེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་རིགས་ཀྱི་གཙོ་བོའི་བུ་གྲགས་པ་ཁྲིད་དེ་ཉིད་ཀྱི་གཙུག་ལག་ཁང་གང་ན་བ་དེར་

  712. 46b

    གཤེགས་ནས་བྱོན་པ་དང་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་རིགས་ཀྱི་གཙོ་བོའི་བུ་གྲགས་པ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ ཏུ་དགའ་བར་མཛད་དེ། སངས་རྒྱས་བཅོམ་ལྡན་འདས་རྣམས་ཀྱིས་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་དེ་ནི་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པ་རྗེས་སུ་བསྔགས་པ་དང་། རྣམ་པར་བྱང་བའི་ཕྱོགས་ཀྱི་ཆོས་རྣམས་རྒྱ་ཆེར་བཤད་དོ། །གང་གི་ཚེ་དེ་བཅོམ་ལྡན་འདས་ཀྱིས་དགའ་བའི་སེམས་དང་། དགེ་བའི་སེམས་དང་། མགུ་ བའི་སེམས་དང་། སྒྲིབ་པ་དང་བྲལ་བའི་སེམས་དང་། སྐལ་བ་དང་ལྡན་པ་དང་། ཡང་དག་ཕུལ་གྱི་ཆོས་བཤད་ན་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བཤད་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་ བཞི་པོ་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དེ་རྒྱ་ཆེར་བཤད་དོ། །དཔེར་ན་གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་རིགས་ཀྱི་གཙོ་བོའི་བུ་གྲགས་པ་སྟན་དེ་ཉིད་ལ་འདུག་བཞིན་དུ་འཕགས་ པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་རྟོགས་སོ། །དེ་ནས་རིགས་ཀྱི་གཙོ་བོའི་བུ་གྲགས་པ་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ།

  713. 47a

    བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་འཕགས་སོ། །མངོན་པར་འཕགས་སོ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་དགེ་བསྙེན་དུ་གཟུང་དུ་གསོལ། དེང་སླན་ ཆད་ཇི་སྲིད་འཚོའི་བར་དུ་སྲོག་དང་ཡང་བསྔོས་ཏེ་སྐྱབས་སུ་མཆི་བར་མངོན་པར་དད་ལགས་སོ།། །།འདུལ་བ་གཞི། བམ་པོ་བརྒྱད་བཅུ་བདུན་པ། བྲན་མོ་ཞིག་དེ་ཉིད་ཀྱི་མཚན་མོ་གཉིད་ལོག་པ་ལས་སད་ན་གཞོན་ནུ་གྲགས་པ་མལ་ཆེན་པོ་ན་མི་སྣང་བར་མཐོང་ངོ་། །མཐོང་ནས་ཀྱང་ ཁྱིམ་བདག་གི་གཙོ་བོ་གང་ན་བ་དེར་སོང་སྟེ་ཕྱིན་ནས་ཁྱིམ་བདག་རིགས་ཀྱི་གཙོ་བོ་ལ་འདི་སྐད་ཅེས་སྨྲས་སོ། །ཇོ་བོ་མཁྱེན་པར་མཛོད་ཅིག །གཞོན་ནུ་གྲགས་པ་ནི་རང་གི་མལ་ཆེན་པོ་ན་མི་གདའ་ལགས་སོ། །དེ་ནས་ཁྱིམ་བདག་རིགས་ཀྱི་གཙོ་བོ་འདི་སྙམ་དུ་སེམས་ཏེ། གཞོན་ནུ་ནོར་གྱི་ཕྱིར་ ཆོམ་རྐུན་ནམ་གཡོན་ཅན་རྣམས་ཀྱིས་ཕྱི་རོལ་དུ་ཁྲིད་པར་མ་གྱུར་གྲང་སྙམ་དུ་སེམས་ཤིང་ཕྱོགས་བཞིར་ཕོ་ཉ་རྟ་པ་དག་བཀྱེ་ནས་རང་ཉིད་མི་ལག་ན་སྒྲོན་མ་ཐོགས་པ་རྣམས་དང་ལྷན་ཅིག་ཏུ་འབབ་ཆུ་གནོད་པ་ཅན་གང་ན་བ་དེ་ལོགས་སུ་སོང་བ་དང་། ཁྱིམ་བདག་རིགས་ཀྱི་གཙོ་བོས་འབབ་ཆུ་ གནོད་པ་ཅན་གྱི་འགྲམ་ན་རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་ཕུད་པ་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ། གཞོན་ནུ་ནི་ནོར་གྱི་ཕྱིར་ཆོམ་རྐུན་ནམ་གཡོན་ཅན་རྣམས་ཀྱིས་ཕྱི་རོལ་དུ་མ་ཁྲིད་ཀྱི། འདི་ལྟར་འབབ་ཆུ་གནོད་པ་ཅན་གྱི་འགྲམ་ན་རིན་པོ་ཆེའི་ལྷམ་བརྒྱ་སྟོང་རི་བཟུང་ གཅིག་ཕུད་པ་ལས་ན་གཞོན་ནུ་འབབ་ཆུ་གནོད་པ་ཅན་གྱི་ངོགས་འདི་ཉིད་ནས་རྒལ་བར་མ་གྱུར་གྲང་། འདི་ལྟར་འབབ་ཆུ་གནོད་པ་ཅན་གྱི་འགྲམ་ན་རིན་པོ་ཆེའི་ལྷམ་བརྒྱ་སྟོང་རི་བཟུང་གཅིག་བོར་རོ་སྙམ་དུ་བསམས་ནས། འབབ་ཆུ་གནོད་པ་ཅན་གྱི་ངོགས་དེ་ཉིད་ནས་རྒལ་ཏེ་བཅོམ་ལྡན་འདས་གང་ན་བ་ དེར་སོང་ངོ་། །བཅོམ་ལྡན་འདས་ཀྱིས་ཁྱིམ་བདག་རིགས་ཀྱི་གཙོ་བོ་རྒྱང་རིང་པོ་ནས་གཟིགས་སོ། །གཟིགས་ནས་ཀྱང་འདི་སྙམ་དུ་དགོངས་ཏེ། ཅི་ནས་ཀྱང་ངས་རྫུ་འཕྲུལ་མངོན་པར་འདུ་བྱ་བ་ཇི་ལྟ་བུས་མངོན་པར་འདུ་བྱ་བས་ཁྱིམ་བདག་རིགས་ཀྱི་གཙོ་བོས་གཞོན་ནུ་གྲགས་པ་སྟན་འདི་

  714. 47b

    ཉིད་ལ་འདུག་བཞིན་དུ་མི་མཐོང་བ་དེ་ལྟ་བུ་ཞིག་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་འདུ་མཛད་པས་ཁྱིམ་བདག་རིགས་ཀྱི་གཙོ་བོས་གཞོན་ནུ་གྲགས་པ་སྟན་དེ་ཉིད་ལ་འདུག་བཞིན་དུ་མི་མཐོང་བ་དེ་ལྟ་བུ་མཛད་དོ། །དེ་ནས་ ཁྱིམ་བདག་རིགས་ཀྱི་གཙོ་བོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིག་གཞོན་ནུ་གྲགས་པ་གཟིགས་སམ་ཁྱིམ་བདག་དེའི་ཕྱིར་འདུག་ཤིག་དང་། སྟན་འདི་ཁོ་ན་ལ་གཞོན་ནུ་གྲགས་པ་འདུག་པ་མཐོང་ བར་འགྱུར་བའི་གནས་གང་ཡིན་པ་དེ་ཡོད་དོ། །དེ་ནས་ཁྱིམ་བདག་རིགས་ཀྱི་གཙོ་བོ་འདི་སྙམ་དུ་སེམས་ཏེ། གདོན་མི་ཟ་བར་བཅོམ་ལྡན་འདས་ཀྱིས་གཞོན་ནུ་གྲགས་པ་གཟིགས་པར་གྱུར་ཏོ། །འདི་ལྟར་བཅོམ་ལྡན་འདས་ཀྱིས་འདི་སྐད་ཅེས་ཁྱིམ་བདག་དེའི་ཕྱིར་འདུག་ཤིག་དང་། སྟན་འདི་ཁོ་ན་ལ་གཞོན་ནུ་གྲགས་པ་འདུག་པ་མཐོང་བར་འགྱུར་བའི་གནས་གང་ཡིན་པ་དེ་ཡོད་དོ་ཞེས་བཀའ་སྩལ་ཏོ་སྙམ་དུ་རིག་ནས་དགའ་བ་དང་། མགུ་བ་དང་། མཆོག་ཏུ་དགའ་བ་དང་། དགའ་བ་རྒྱ་ཆེན་པོ་དང་། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་ བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། ཁྱིམ་བདག་རིགས་ཀྱི་གཙོ་བོ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ དེ། སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་རྗེས་སུ་བསྔགས་པ་དང་། རྣམ་པར་བྱང་བའི་ཕྱོགས་ཀྱི་ཆོས་རྒྱ་ཆེར་བཤད་དོ། །གང་གི་ཚེ་དེ་བཅོམ་ལྡན་འདས་ཀྱིས་དགའ་བའི་སེམས་དང་། དགེ་བའི་སེམས་དང་། མགུ་བའི་སེམས་དང་། སྒྲིབ་པ་དང་བྲལ་བའི་

  715. 48a

    སེམས་དང་། སྐལ་བ་དང་ལྡན་པ་དང་། ཡང་དག་ཕུལ་གྱི་ཆོས་བཤད་ན་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བཤད་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་དང་། ཀུན་ འབྱུང་བ་དང་། འགོག་པ་དང་། ལམ་རྒྱ་ཆེར་བཤད་དོ། །དཔེར་ན་གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་ཁྱིམ་བདག་རིགས་ཀྱི་གཙོ་བོ་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་ བསྔལ་དང་། ཀུན་འབྱུང་བ་དང་། འགོག་པ་དང་། ལམ་རྟོགས་ཏེ། ཆོས་ཀྱི་རྣམ་གྲངས་དེ་བཤད་པ་ན་ཁྱིམ་བདག་རིགས་ཀྱི་གཙོ་བོ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །ཚེ་དང་ལྡན་པ་གྲགས་པ་ཡང་རྒྱན་ཐམས་ཅད་ཀྱིས་བརྒྱན་བཞིན་དུ་ལེན་པ་ མེད་པར་ཟག་པ་རྣམས་ལས་སེམས་རྣམ་པར་གྲོལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་སླར་བསྡུས་ནས་དེའི་ཚེ་ཚིགས་སུ་བཅད་པས་བཀའ་སྩལ་པ། རྒྱན་གྱིས་བརྒྱན་བཞིན་དུ་ནི་ཆོས་སྤྱད་དེ། །དུལ་ཞིང་ཡང་དག་སྡོམ་པ་ཚངས་ སྤྱོད་ལ། །འབྱུང་པོ་ཀུན་ལ་ཆད་པ་སྤངས་པ་ནི། །དེ་ནི་བྲམ་ཟེ་དགེ་སྦྱོང་དགེ་སློང་ཡིན། །དེའི་ཚེ་འཇིག་རྟེན་ན་དགྲ་བཅོམ་པ་དྲུག་དང་བདུན་པ་ནི་བཅོམ་ལྡན་འདས་སོ། །ཁྱིམ་བདག་རིགས་ཀྱི་གཙོ་བོས་གཞོན་ནུ་གྲགས་པ་སྟན་དེ་ཉིད་ལ་འདུག་པ་མཐོང་ངོ་། །མཐོང་ནས་ཀྱང་ གཞོན་ནུ་གྲགས་པ་ལ་འདི་སྐད་ཅེས་སྨྲས་སོ། །གཞོན་ནུ་ཚུར་ཤོག །ཁྱོད་ཀྱི་མ་ལུས་ངལ་ཞིང་ལུས་དུབ་པས་སྨྲེ་སྔགས་འདོན་གྱིས་ཁྱིམ་དུ་འདོང་། དེ་ནས་བཅོམ་ལྡན་འདས་ཀྱིས་ཁྱིམ་བདག་རིགས་ཀྱི་གཙོ་བོ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཇི་སྙམ་དུ་སེམས། གང་གིས་མི་སློབ་པའི་ཤེས་པ་དང་། མི་སློབ་པའི་ལྟ་བས་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་པ་དེ་ཅིག་ཁྱིམ་པ་ཁྱིམ་ན་གནས་པའམ། སོགས་འཇོག་གི་ལོངས་སྤྱོད་ཀྱིས་འདོད་པ་ལ་

  716. 48b

    སྤྱོད་པར་འགྱུར་རམ། བཙུན་པ་མ་ལགས་སོ། །ཁྱིམ་བདག་ཇི་ལྟར་ཁྱོད་ཀྱིས་སློབ་པའི་ཤེས་པ་དང་། སློབ་པའི་ལྟ་བས་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་པ་དེ་བཞིན་དུ་གཞོན་ནུ་ གྲགས་པས་མི་སློབ་པའི་ཤེས་པ་དང་། མི་སློབ་པའི་ལྟ་བས་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་སོ། །བཙུན་པ་གཞོན་ནུ་གྲགས་པས་གང་གིས་ན་མི་སློབ་པའི་ཤེས་པ་དང་། མི་སློབ་པའི་ ལྟ་བས་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་པ་ནི་རྙེད་པ་ལེགས་པར་རྙེད་ལགས་སོ། །བཅོམ་ལྡན་འདས་སླད་བཞིན་འབྲང་བའི་དགེ་སྦྱོང་གྲགས་པ་དང་ཐུགས་བརྩེ་བ་ཉེ་བར་བཟུང་སྟེ་རིགས་ཀྱི་ གཙོ་བོའི་ཁྱིམ་གང་ན་བ་དེར་གཤེགས་ན་ལེགས་སོ། །བཅོམ་ལྡན་འདས་ཀྱིས་ཁྱིམ་བདག་རིགས་ཀྱི་གཙོ་བོ་ལ་ཅང་མི་གསུང་བས་གནང་ངོ་དེ་ནས་ཁྱིམ་བདག་རིགས་ཀྱི་གཙོ་བོས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་ བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་དེ་ཉིད་ཀྱི་མཚན་མོ་འདས་ནས་སྔ་དྲོ་ན་བཟའ་ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ཏེ། ཕྱི་བཞིན་འབྲང་བའི་དགེ་སྦྱོང་ཚེ་དང་ལྡན་པ་གྲགས་པ་དང་ཁྱིམ་བདག་རིགས་ཀྱི་གཙོ་བོའི་ཁྱིམ་ གང་ན་བ་དེར་གཤེགས་སོ། །དེའི་ཚེ་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་བཅོམ་ལྡན་འདས་ལ་ཡང་དང་ཡང་དུ་བསུ་བའི་ཕྱིར་བར་སྒོ་ན་སྡོད་དོ། །ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ཀྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་བཅོམ་ ལྡན་འདས་ཀྱི་ཕྱིར་གདན་བཤམས་ནས་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་ཚུར་སྤྱོན་བཅོམ་ལྡན་འདས་བྱོན་པ་ལེགས་སོ། །བཅོམ་ལྡན་འདས་གདན་བཤམས་པ་ཉིད་ལ་བཞུགས་སུ་གསོལ་ཞེས་གསོལ་ནས་བཅོམ་ལྡན་འདས་གདན་བཤམས་པ་ཉིད་ལ་བཞུགས་སོ། །

  717. 49a

    དེ་ནས་ཚེ་དང་ལྡན་པ་གྲགས་པའི་མ་དང་ཆུང་མ་གཉིས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ལ་ཆོས་དང་ལྡན་ པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དེ། སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་འདི་ལྟ་སྟེ། སྦྱིན་པའི་གཏམ་དང་ ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་རྗེས་སུ་བསྔགས་པ་དང་། རྣམ་པར་བྱང་བའི་ཕྱོགས་ཀྱི་ཆོས་ རྣམས་རྒྱ་ཆེར་བཤད་དོ། །གང་གི་ཚེ་དེ་གཉིས་བཅོམ་ལྡན་འདས་ཀྱིས་དགའ་བའི་སེམས་དང་། དགེ་བའི་སེམས་དང་། མགུ་བའི་སེམས་དང་། སྒྲིབ་པ་དང་བྲལ་བའི་སེམས་དང་། སྐལ་བ་དང་ལྡན་པ་དང་། ཡང་དག་ཕུལ་གྱི་ཆོས་བཤད་ན་ཤེས་པར་ནུས་པ་གཟིགས་པ་དེའི་ ཚེ། སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བཤད་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དེ་རྒྱ་ཆེར་བཤད་དོ། །དཔེར་ན་གོས་གཙང་མ་ནག་ནོག་མེད་པ་ཚོན་རྩི་འོས་ པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ཀྱིས་སྟན་དེ་ཉིད་ལ་འཁོད་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་ སོ། །དེ་ནས་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ཀྱིས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་

  718. 49b

    བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་ནི་འཕགས་སོ། །བདག་ཅག་ནི་མངོན་པར་ འཕགས་ལགས་ཏེ། བདག་ཅག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །བཙུན་ པ་དེའི་སླད་དུ་འདིར་ཞལ་ཟས་ཀྱི་མཛད་པ་མཛད་དུ་གསོལ། བཅོམ་ལྡན་འདས་ཀྱིས་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ལ་ཅང་མི་གསུང་བས་གནང་ངོ་། །དེ་ནས་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་ གནང་བར་རིག་ནས་བཅོམ་ལྡན་འདས་གདན་ལ་བདེ་བར་བཞུགས་པ་དང་། གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དོ། །རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་ བྱས་ནས་བཅོམ་ལྡན་འདས་ཀྱིས་གསོལ་ཟིན་ཅིང་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྲགས་པའི་མ་དང་། ཆུང་མ་གཉིས་ལ་ ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་ དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་

  719. 50a

    པ་གྲགས་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མཆིས་འབྲང་གི་འཁོར་ན་མཆིས་ན་རང་གི་མཆིས་འབྲང་ལ་དུར་ཁྲོད་ཀྱི་འདུ་ཤེས་སྐྱེས་ཤིང་རྒྱན་ཐམས་ཅད་ཀྱིས་བརྒྱན་བཞིན་དུ་བཅོམ་ལྡན་འདས་ཀྱི་སྤྱན་སྔར་དགྲ་བཅོམ་པ་མངོན་སུམ་དུ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གྲགས་པ་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་ཏེ། འདི་ཉིད་ཀྱིས་ལས་བྱས་ཤིང་བསགས་པ་དག་ གཞན་སུ་ཞིག་གིས་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར། འདི་ལྟར་ལས་དགེ་བ་དང་མི་དགེ་བ་བྱས་ཤིང་ བསགས་པ་དག་ནི་ཟིན་པའི་ཕུང་པོ་དང་ཁམས་དང་། སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། དགེ་སློང་དག་སྔོན་བྱུང་བ་བཱ་རཱ་ཎ་ སཱིའི་གྲོང་ཁྱེར་དང་ཧ་ཅང་ཡང་མི་རིང་བ་ཞིག་ན་དྲང་སྲོང་བྱམས་པའི་བདག་ཉིད་སྙིང་རྗེ་ཅན་སེམས་ཅན་ཐམས་ཅད་ལ་ཕན་པར་སེམས་པ་ཞིག་གནས་པ་དེ་བསོད་སྙོམས་ལ་ཞུགས་པ་ན་མི་རོ་ཞིག་མཐོང་ནས། དེ་དེ་ལ་ཞེན་པའི་སེམས་ཀྱིས་བསོད་སྙོམས་ལ་ཞུགས་ཏེ། བསོད་སྙོམས་སྤྱད་ནས་ སླར་ལོག་པ་དང་། ཇི་ཙམ་ན་མི་རོ་དེ་རྣམ་པར་སྡོས་ཤིང་རྣམ་པར་བམ་པར་འགྱུར་བ་བལྟས་པ་དང་། དེ་ཉིད་ཀྱི་མདུན་དུ་ཞིགས་ནས་དེས་དེ་ཉིད་དུ་འདོད་ཆགས་དང་བྲལ་བ་བསྐྱེད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་གཞོན་ནུ་གྲགས་པ་འདི་ཉིད་ ཡིན་ཏེ། འདིས་དེ་ན་འདོད་ཆགས་དང་བྲལ་བ་བསྐྱེད་དེ། དེས་ན་ད་ལྟར་ཆུང་མའི་ནང་ན་འདུག་པ་ན་རྐྱེན་རྙེད་པ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་དང་

  720. 50b

    འདྲེན་མ་རྣམས་ཀྱི་ནི་འདྲེན་མ་ཡིན་པས་དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་འདྲེན་མ་རྣམས་ནི་སྤངས་ལ་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བཱ་རཱ་ཎ་སཱི་ན་ཁྱིམ་བདག་རིགས་ཀྱི་གཙོ་བོས་བུ་གཉིས་པ་དང་། གསུམ་པ་དང་། བཞི་པ་དང་། ལྔ་པ་གང་པོ་དང་། དྲི་མེད་དང་། བ་ལང་བདག་དང་། ལག་བཟངས་ཏེ། རིགས་ཀྱི་ གཙོ་བོའི་བུ་དག་གིས་རིགས་ཀྱི་གཙོ་བོའི་བུ་གྲགས་པ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། ཀྱེ་མའོ་སངས་རྒྱས་ནི་མཆོག་མ་ཡིན་པ་མ་ཡིན་ཞིང་། ཆོས་བསྟན་པ་ཡང་མཆོག་མ་ཡིན་པ་མ་ཡིན་ཏེ། གང་གི་ཕྱིར་ད་ལྟར་རིགས་ཀྱི་གཙོ་བོའི་བུ་གྲགས་པ་རེ་ཞིག་ཤིན་ཏུ་གཞོན་པ་ཤིན་ཏུ་བདེ་བ་འདོད་པ་ཡང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་གིས། མ་ལ་བདག་ཅག་ གིས་ཀྱང་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་མོ། །དེ་ནས་རིགས་ཀྱི་གཙོ་བོའི་བུ་གཉིས་པ་དང་། གསུམ་པ་དང་། བཞི་པ་དང་། ལྔ་པ་གང་པོ་དང་། དྲི་མེད་དང་། བ་ལང་བདག་དང་། ལག་ བཟངས་ཏེ། རིགས་ཀྱི་གཙོ་བོའི་བུ་རྣམས་བཱ་རཱ་ཎ་སཱི་ནས་བྱུང་ནས་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་རིགས་ཀྱི་གཙོ་བོའི་བུ་གཉིས་པ་དང་། གསུམ་པ་དང་། བཞི་པ་དང་། ལྔ་པ་གང་པོ་དང་། དྲི་མེད་དང་། བ་ལང་བདག་དང་། ལག་བཟངས་ཏེ། རིགས་ཀྱི་གཙོ་བོའི་བུ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ལེགས་པར་གསུངས་པའི་ཆོས་འདུལ་བ་ལ་བདག་ཅག་རབ་ཏུ་འབྱུང་བ་

  721. 51a

    དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན། བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཚེ་དང་ལྡན་པ་དེ་དག་གིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ ཐོབ་སྟེ། དེ་ལྟར་རབ་ཏུ་བྱུང་ནས་ཚེ་དང་ལྡན་པ་དེ་དག་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོང་བར་གནས་སོ། །གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོང་བར་གནས་པ་ན་གང་གི་ཕྱིར་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་ གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ། བསྒྲུབས་ནས་བདག་ཅག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་ བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་ཚེ་དང་ལྡན་པ་དེ་དག་སེམས་ཤིན་ཏུ་རྣམ་པར་གྲོལ་བ་ཀུན་ཤེས་པ་དང་ལྡན་པའི་དགྲ་བཅོམ་པར་གྱུར་ཏོ། །དེའི་ཚེ་འཇིག་རྟེན་ན་དགྲ་བཅོམ་པ་བཅུ་དང་བཅུ་གཅིག་པ་ནི་བཅོམ་ལྡན་འདས་སོ། །བཱ་རཱ་ཎ་སཱིའི་གྲོང་མི་གཙོ་ བོ་གཙོ་བོ་རྣམས་ཀྱི་ཁྱེའུ་ལྔ་བཅུས་རིགས་ཀྱི་གཙོ་བོའི་བུ་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། ལྔ་པ་སྟེ། གྲགས་པ་དང་། གང་པོ་དང་། དྲི་མེད་དང་། བ་ལང་བདག་དང་། ལག་བཟངས་ཏེ། རིགས་ཀྱི་གཙོ་བོའི་བུ་རྣམས་སྐྲ་དང་ཁ་སྤུ་བྲེགས་ཏེ་གོས་ངུར་ སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་ཞེས་ཐོས་སོ། །ཐོས་ནས་ཀྱང་དེ་དག་འདི་སྙམ་དུ་སེམས་ཏེ། ཀྱེ་མ་སངས་རྒྱས་ནི་མཆོག་མ་ཡིན་པ་མ་ཡིན་ཞིང་ཆོས་བསྟན་པ་ཡང་མཆོག་མ་ཡིན་པ་མ་ཡིན་ཏེ། གང་གི་ཕྱིར་ད་ལྟར་རིགས་ཀྱི་གཙོ་བོའི་བུ་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། ལྔ་པ་སྟེ། གྲགས་པ་དང་། གང་པོ་དང་། དྲི་མེད་དང་། བ་ལང་བདག་དང་། ལག་བཟངས་ཏེ། རིགས་ཀྱི་གཙོ་བོའི་བུ་རྣམས་ནི་རེ་ཞིག་ཤིན་ཏུ་གཞོན་པ་ཤིན་ཏུ་བདེ་བ་འདོད་པ་ཡང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་

  722. 51b

    དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་གིས། མ་ལ་བདག་ཅག་ཀྱང་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་བྱའོ་སྙམ་མོ། །དེ་ནས་གྲོང་གི་མི་གཙོ་བོ་གཙོ་བོ་རྣམས་ཀྱི་ཁྱེའུ་ལྔ་བཅུ་པོ་དག་བཱ་རཱ་ཎ་ སཱི་ནས་བཅོམ་ལྡན་འདས་གང་ན་བ་དེར་སོང་སྟེ་ལྷགས་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་གྲོང་མི་གཙོ་བོ་གཙོ་བོ་རྣམས་ཀྱི་ཁྱེའུ་ལྔ་བཅུ་པོ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན། བདག་ཅག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཚེ་དང་ལྡན་པ་དེ་དག་ལེགས་པར་གསུངས་པའི་ཆོས་འདུལ་བ་ལ་རབ་ ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་སྟེ། དེ་ལྟར་རབ་ཏུ་བྱུང་ནས་ཚེ་དང་ལྡན་པ་དེ་དག་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོང་བར་གནས་སོ། །གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་གཏོང་བར་གནས་པ་ན་ གང་གི་ཕྱིར་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་ཅག་གི་སྐྱེ་བ་ཟད་དོ། ། ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་ཚེ་དང་ལྡན་པ་དེ་དག་སེམས་ཤིན་ཏུ་རྣམ་པར་གྲོལ་བ་ཀུན་ཤེས་པ་དང་ལྡན་པའི་དགྲ་བཅོམ་པར་གྱུར་ཏོ། །དེའི་ཚེ་འཇིག་རྟེན་ན་དགྲ་བཅོམ་པ་དྲུག་བཅུ་དང་དྲུག་བཅུ་རྩ་གཅིག་པ་ནི་ བཅོམ་ལྡན་འདས་སོ། །དེ་ནས་བཅོམ་ལྡན་འདས་བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི་ལྷ་དང་མིའི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་ནོ། །དགེ་སློང་དག་

  723. 52a

    ཁྱེད་ཀྱང་ལྷ་དང་མི་རྣམས་ཀྱི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་གྱིས། དགེ་སློང་དག་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་ཡང་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ལ་ཕན་པ་དང་བདེ་བའི་ཆེད་དུ་རྒྱུ་ཞིང་དེང་ལ་ཁྱེད་གཉིས་ ཤིང་ནི་གཅིག་ཏུ་མ་འགྲོ་ཤིག །ང་ཡང་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་རྒྱུ་ཞིང་གཤེགས་སོ། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་འདི་བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་འདུག་ནས་དེ་ཉན་ཐོས་རྣམས་ལ་འདི་སྐད་དུ་ཆོས་སྟོན་ཏོ། །དགེ་ སློང་དག་ང་ནི་ལྷ་དང་མིའི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་ནོ། །དགེ་སློང་དག་ཁྱེད་ཀྱང་ལྷ་དང་མིའི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་གྱིས། དགེ་སློང་དག་སྐྱེ་བོ་མང་པོ་ལ་ཕན་པ་དང་ཞེས་བྱ་བ་ནས་རྒྱུ་ཞིང་དེང་ཤིག་ཅེས་བྱ་བའི་བར་དུ་སྟེ། ང་ཡང་ལྟེང་ རྒྱས་ཀྱི་གྲོང་ཁྱེར་སྡེ་ཅན་གང་ན་བར་རྒྱུ་ཞིང་འགྲོའོ་ཞེས་ཟེར་གྱིས། མ་ལ་བདག་གིས་དེ་ལ་འདི་ལྟ་སྟེ། དཀྲུག་པའི་ལས་ཤིག་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་བདུད་སྡིག་ཅན་བྲམ་ཟེའི་ཁྱེའུའི་ཁ་དོག་ཏུ་བདག་ཉིད་མངོན་པར་སྤྲུལ་ཏེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ ནས། བཅོམ་ལྡན་འདས་ཀྱི་སྤྱན་སྔར་འདུག་སྟེ་ཚིགས་སུ་བཅད་པས་གསོལ་པ། མ་གྲོལ་གྲོལ་བར་འདུ་ཤེས་ན། །ཇི་ལྟར་བདག་ཉིད་གྲོལ་བར་སེམས། །བདག་གིས་དགེ་སྦྱོང་མ་བཀྲོལ་བས། །འཆིང་བ་ཆེན་པོས་བཅིངས་པ་ཡིན། །དེ་ནས་བཅོམ་ལྡན་འདས་འདི་སྙམ་ དུ་དགོངས་ཏེ། ཨེ་མའོ་འདི་ནི་བདུད་སྡིག་ཅན་ཡིན་ཏེ། འདི་ལྟ་སྟེ། དཀྲུག་པའི་ལས་ཀྱི་ཕྱིར་ཉེ་བར་འོངས་སོ་སྙམ་དུ་ཐུགས་སུ་ཆུད་ནས་ཚིགས་སུ་བཅད་དེ་བཀའ་སྩལ་པ། ང་ནི་ལྷ་དང་མི་རྣམས་ཀྱི། །འཆིང་བ་གང་ཡིན་ཀུན་ལས་གྲོལ། །བར་ཆད་བྱེད་པ་ཁྱོད་བཅོམ་པར། ། སྡིག་ཅན་དེ་ལྟར་ཤེས་པར་གྱིས། །དེ་ནས་བདུད་སྡིག་ཅན་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མའི་སེམས་ཀྱིས་བདག་གི་སེམས་ཤེས་སོ་སྙམ་དུ་རིག་ནས་སྡུག་བསྔལ་ཞིང་ཡིད་མི་བདེ་བ་ཡིད་ལ་གཅགས་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལན་

  724. 52b

    གཉིས་སུ་ཡང་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི་ལྷ་དང་མི་རྣམས་ཀྱི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་ནོ། །དགེ་སློང་དག་ཁྱེད་ཀྱང་ལྷ་དང་མི་རྣམས་ཀྱི་འཆིང་བ་གང་ཡིན་པ་ཐམས་ཅད་ལས་གྲོལ་བ་ཡིན་གྱིས། དགེ་སློང་དག་སྐྱེ་བོ་མང་པོ་ལ་ཕན་པ་ དང་ཞེས་བྱ་བ་ནས་རྒྱུ་ཞིང་དེང་ཤིག་ཅེས་བྱ་བའི་བར་གོང་མ་བཞིན་དུའོ། །ང་ཡང་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་གཤེགས་སོ། །བཙུན་པ་བཀའ་བཞིན་འཚལ་ཞེས་དགེ་སློང་རྣམས་ཀྱིས་བཅོམ་ལྡན་འདས་ལས་མཉན་ནས་ལྗོངས་རྒྱུ་ཞིང་དོང་ངོ་། །དེ་ནས་བཅོམ་ལྡན་འདས་ཀྱིས་ བཱ་རཱ་ཎ་སཱིར་ཇི་ཙམ་བཞེད་ཀྱི་བར་དུ་བཞུགས་ནས་ལྟེང་རྒྱས་ཀྱི་གྲོང་ཁྱེར་སྡེ་ཅན་གང་ན་བ་དེར་རྒྱུ་ཞིང་གཤེགས་ཏེ་རིམ་གྱིས་རྒྱུ་ཞིང་གཤེགས་པ་དང་། གྲོང་ཁྱེར་སྡེ་ཅན་དུ་བྱོན་ཏོ། །དེ་ནས་བཅོམ་ལྡན་འདས་རས་བལ་ཅན་གྱི་ནགས་ཚང་ཚིང་གང་ན་བ་དེར་གཤེགས་ཏེ་བྱོན་ནས་ཤིང་ཞིག་གི་དྲུང་ དུ་བརྟེན་ཏེ་ཉིན་པར་གྱི་གནས་པས་བཞུགས་སོ། །དེའི་ཚེ་དྲུག་བཅུ་སྡེ་བཟང་པོའི་ཚོགས་གྲོང་ཁྱེར་སྡེ་ཅན་གྱི་ཕྱི་རོལ་དུ་ཉི་མ་རེ་རེ་ཞིང་བུད་མེད་ཀྱིས་བྱས་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན། དེ་རྣམས་ལས་བུད་མེད་ཅིག་དམ་བཅས་པ་དྲལ་ཏེ་ བྲོས་སོ། །དེ་ནས་དྲུག་བཅུ་སྡེ་བཟང་པོའི་ཚོགས་བུད་མེད་དེ་ཚོལ་ཞིང་རས་བལ་ཅན་གྱི་ནགས་ཚང་ཚིང་གང་ན་བ་དེར་དོང་བ་དང་། དྲུག་བཅུ་སྡེ་བཟང་པོའི་ཚོགས་ཀྱིས་བཅོམ་ལྡན་འདས་མཛེས་པ། དད་པར་འོས་པ། བཟང་པོ་ཞི་བ། ཐུགས་ཞི་བ། ཐུགས་མཆོག་ཏུ་དུལ་བ། ཞི་བ་དང་ དུལ་བ་དང་ལྡན་པ། གསེར་གྱི་མཆོད་སྡོང་ལྟ་བུར་གྱུར་པ། དཔལ་གྱིས་འབར་ཞིང་ཤིང་གི་དྲུང་ན་བརྟེན་ཏེ་བཞུགས་པ་མཐོང་ངོ་། །མཐོང་ནས་ཀྱང་བཅོམ་ལྡན་འདས་གང་ན་བ་དེར་སོང་སྟེ་ལྷགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིག་བུད་མེད་ཅིག་ གཟིགས་སམ། གཞོན་ནུ་དག་བུད་མེད་དེ་ཁྱེད་ཅག་གི་ཅིར་འོང་། བཙུན་པ་འདི་ནི་བདག་ཅག་གི་དྲུག་བཅུ་སྡེ་བཟང་པོའི་ཚོགས་གྲོང་ཁྱེར་སྡེ་ཅན་གྱི་སླད་རོལ་དུ་བུད་མེད་ཀྱིས་བགྱིས་པའི་རོལ་མོས་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་དེ། དེ་རྣམས་དང་བདག་

  725. 53a

    ཅག་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་པ་ན་བུད་མེད་ཅིག་དམ་བཅས་པ་དྲལ་ཏེ་བྲོས་ནས་བདག་ཅག་ཚོལ་ལགས་སོ། །གཞོན་ནུ་དག་ཇི་སྙམ་དུ་སེམས། བུད་མེད་ཚོལ་བ་གང་ཡིན་པ་དང་། བདག་ཉིད་ཚོལ་བ་གང་ཡིན་པ་གང་བདམ། བཙུན་པ་བདག་ཅག་ལ་བུད་མེད་ཀྱིས་ཅི་བགྱི། བདག་ཅག་ནི་བདག་ཉིད་ཚོལ་བ་གང་ལགས་པ་དེ་འདམ་ལགས་སོ། །གཞོན་ནུ་དག་དེའི་ཕྱིར་འདུག་ཤིག་དང་ཁྱེད་ལ་ཆོས་བཤད་དོ། །དེ་ནས་དྲུག་བཅུ་སྡེ་བཟང་པོའི་ཚོགས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ཀྱིས་དྲུག་བཅུ་སྡེ་བཟང་པོའི་ཚོགས་ལ་ཆོས་དང་ལྡན་འདས་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་ བར་མཛད་དེ། སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང་། ཀུན་ནས་ཉོན་མོངས་ པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་རྗེས་སུ་བསྔགས་པ་དང་། རྣམ་པར་བྱང་བའི་ཕྱོགས་ཀྱི་ཆོས་རྣམས་རྒྱ་ཆེར་བཤད་དོ། །གང་གི་ཚེ་དེ་དག་བཅོམ་ལྡན་འདས་ཀྱིས་དགའ་བའི་སེམས་དང་། དགེ་བའི་སེམས་དང་། མགུ་བའི་སེམས་ དང་། སྒྲིབ་པ་དང་བྲལ་བའི་སེམས་དང་། སྐལ་བ་དང་ལྡན་པ་དང་། ཡང་དག་ཕུལ་གྱི་ཆོས་བཤད་པ་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་ཀྱི་ཡང་དག་ཕུལ་གྱི་ཆོས་བཤད་པ་གང་ཡིན་པ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་ དང་། ཀུན་འབྱུང་བ་དང་། འགོག་པ་དང་། ལམ་དེ་རྒྱ་ཆེར་བཤད་དོ། །དཔེར་ན་གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་དྲུག་བཅུ་སྡེ་བཟང་པོའི་ཚོགས་ཀྱིས་སྟན་དེ་ཉིད་ལ་འདུག་བཞིན་དུ་འཕགས་པའི་

  726. 53b

    བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་སོ། །དེ་ནས་དྲུག་བཅུ་སྡེ་བཟང་པོའི་ཚོགས་ཀྱིས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་ རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་འཕགས་སོ། །མངོན་པར་འཕགས་སོ། །བདག་ཅག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་ཅག་དགེ་བསྙེན་དུ་གཟུང་དུ་གསོལ། དེང་ སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་དྲུག་བཅུ་སྡེ་བཟང་པོའི་ཚོགས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་ བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །དེའི་ཚེ་སེར་སྐྱའི་གཞི་ན་བྲམ་ཟེ་ལྷ་ཞེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། བཅོམ་ལྡན་འདས་ཀྱི་སྔོན་གྱི་ཐུགས་རག་པོར་གྱུར་པ་ཞིག་གནས་པ་དེ་དུས་གཞན་ཞིག་ན་གཉེན་ཟད། ནོར་ཟད། འབྱོར་པ་ཟད་པར་གྱུར་ཏོ། ། གང་གི་ཚེ་བཅོམ་ལྡན་འདས་ཀྱིས་བདུད་ཀྱི་འཁོར་འབྱུང་པོ་བྱེ་བ་ཕྲག་སུམ་བཅུ་དྲུག་བཅོམ་ནས་བླ་ན་མེད་པའི་ཡེ་ཤེས་བརྙེས་པ་དེའི་ཚེ་བྲམ་ཟེ་ལྷ་ཆུང་མ་དང་ལྷན་ཅིག་གྲོང་ཁྱེར་སྡེ་ཅན་དུ་འོངས་སོ། །བྲམ་ཟེ་ལྷས་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་སོ་ཞེས་ཐོས་ནས། དེས་ཆུང་མ་ལ་སྨྲས་པ། བཟང་མོ་བཅོམ་ལྡན་འདས་བླ་ན་མེད་པའི་ཡེ་ཤེས་བརྙེས་ཏེ། འཁོར་ལོས་སྒྱུར་བའི་རིགས་སུ་འཁྲུངས་པའི་བཅོམ་ལྡན་འདས་དེ་ནི་གྲོང་ཁྱེར་སྡེ་ཅན་དུ་བསོད་སྙོམས་ལ་གཤེགས་ན་བདག་ཅག་གིས་བཅོམ་ལྡན་འདས་དེ་ལ་བསོད་སྙོམས་དབུལ་དུ་གང་གི་ཕྱིར་བདག་

  727. 54a

    གི་ཁྱིམ་ན་ཉི་མ་གཅིག་གི་ཁ་ཟས་ཀྱང་མེད་ཀྱིས། ངས་ཁྱོད་གཏར་བཅུག་སྟེ་ཀཱར་ཥཱ་པ་ཎ་ལྔ་ཞིག་སྐྱིན་པོར་བླང་ངོ་། །དེས་སྨྲས་པ། རྗེའི་སྲས་དེ་བཞིན་དུ་མཛོད་ཅིག །བྲམ་ཟེ་ལྷས་ཆུང་མ་བྲམ་ཟེ་ཞིག་ལ་གཏར་བཅུག་ནས་ཀཱར་ཥཱ་པ་ཎ་ལྔ་བཅོམ་ལྡན་འདས་བཤོས་ གསོལ་བའི་ཕྱིར་སྐྱིན་པོའི་ཚུལ་དུ་བླངས་སོ། །དེའི་ཆུང་མས་སྨྲས་པ། རྗེའི་སྲས་བདག་ནི་བྱང་ཆུབ་སེམས་དཔས་ལན་འགའ་ཡང་དྲི་མ་ཅན་དང་གོས་ངན་པ་གྱོན་པ་མ་གཟིགས་སོ། །བྲམ་ཟེ་ལྷས་ཁྱིམ་བདག་ཅིག་ལས་རྒྱན་རྣམས་བརྙས་ནས་ཆུང་མ་ལ་བསྐོན་ནོ། །དེ་ནས་བྲམ་ཟེ་ ལྷ་ཆུང་མ་དང་ལྷན་ཅིག་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་བྲམ་ཟེ་ལྷ་ལ་ཅང་མི་གསུང་བས་གནང་ངོ་། །དེ་ནས་བཅོམ་ལྡན་འདས་བྲམ་ཟེ་ལྷའི་བཀད་ས་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་བྲམ་ཟེ་ལྷས་བཅོམ་ལྡན་འདས་བདེ་བར་བཞུགས་པར་རིག་ནས་ཆུང་མ་དང་ལྷན་ཅིག་ ཏུ་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་བྲམ་ཟེ་ལྷ་ལ་ཡོན་བསྔོ་བ་མཛད་ནས་གཤེགས་སོ། །དེའི་ཆུང་མས་རྒྱན་རྣམས་བཀྲོལ་ཏེ་བཞག་པ་དེ་མ་བྱིན་པར་ ལེན་པས་བརྐུས་སོ་ཞེས་བྲམ་ཟེ་ལྷས་ཐོས་ནས་སྡུག་བསྔལ་ཞིང་ཡིད་མི་བདེ་བར་གྱུར་ཏེ། འབྲོག་དགོན་པ་ཞིག་ཏུ་སོང་ནས་ང་ལ་རྒྱན་སྦྱིན་དུ་ག་ལ་ཡོད་གཞན་བྱར་མེད་ཀྱིས་བདག་འཆིའོ་སྙམ་པ་དང་། ཇི་ཙམ་ན་མི་ཞིག་གིས་དོང་བརྐོས་ནས་སོང་ངོ་། །བྲམ་ཟེ་ལྷ་ངོ་མཚར་སྐྱེས་ནས་

  728. 54b

    དེ་ན་ཅི་ཡོད་རེ་ཞིག་བལྟའོ་སྙམ་པ་ལས། ཇི་ཙམ་ན་རྒྱན་དེ་མཐོང་ནས་དེས་རྒྱན་བླངས་ཏེ་ཁྱིམ་དུ་འོངས་སོ། །ལྷའི་ཆུང་མ་ཡང་སྡུག་བསྔལ་ཞིང་ཡིད་མི་བདེ་བས་གདུངས་ནས་ཁྱིམ་ཕྱག་དར་བྱེད་པ་ན་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་ལྷ་རྣམས་ཀྱི་ལྷའི་མཐུས་ཇི་ཙམ་ན་ གསེར་གྱི་བུམ་པ་འཚེར་བག་ཅན་ཞིག་མཐོང་ངོ་། །ལྷས་དེ་ལ་དྲིས་པ། བཟང་མོ་འོ་ནི་ཅི་ཡིན། དེས་སྨྲས་པ། རྗེའི་སྲས་བདག་གིས་གསེར་གྱི་བུམ་པ་ཞིག་མཐོང་ངོ་། །དེས་ཀྱང་སྨྲས་པ། བཟང་མོ་ཁོ་བོས་ཀྱང་རྒྱན་དེ་མཐོང་ངོ་། །དེ་གཉིས་ཀྱིས་ལྷག་པར་ཡང་བཅོམ་ལྡན་ འདས་ལ་དད་པ་བསྐྱེད་དོ། །དེ་ལྟར་མངོན་པར་དད་པ་དང་བཅོམ་ལྡན་འདས་ཀྱིས་དེ་གཉིས་ཇི་ལྟར་འཕགས་པའི་བདེན་པ་བཞི་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས་བྲམ་ཟེ་ལྷ་ཆུང་མ་དང་བཅས་ཏེ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་ནས་བཅོམ་ལྡན་འདས་དེའི་ནུབ་མོ་འདས་ནས་སྔ་དྲོ་ན་བཟའ་ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ཏེ་གྲོང་ཁྱེར་སྡེ་ཅན་དུ་བསོད་སྙོམས་ལ་ཞུགས་སོ། །དེ་ནས་བཅོམ་ལྡན་འདས་གྲོང་ཁྱེར་སྡེ་ཅན་དུ་བསོད་ སྙོམས་ལ་ཞུགས་པ་ན་འདི་སྙམ་དུ་དགོངས་ཏེ། མ་ལ་ངས་གྲོང་ཁྱེར་སྡེ་ཅན་དེར་ཐོག་མར་སུ་ཞིག་ལ་ཆོས་བཤད་སྙམ་པ་ལས། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངས་གྲོང་པའི་བུ་མོ་དགའ་མོ་དང་། དགའ་སྟོབས་མ་ལ་ཐོག་མར་ཆོས་བཤད་པར་བྱ་སྟེ། དེ་དག་ གིས་ང་སྔོན་གྱི་སྡུག་བསྔལ་སྤོང་བའི་རྣལ་འབྱོར་ལ་རྗེས་སུ་བརྩོན་པས་གནས་པ་ན་འདིས་མར་གསར་དང་འོ་ཐུག་སྦྲང་རྩི་ལྟར་མངར་བས་བསྙེན་བཀུར་བྱས་སོ་སྙམ་མོ། །དེ་ནས་བཅོམ་ལྡན་འདས་གྲོང་པའི་བུ་མོ་དགའ་མོ་དང་། དགའ་སྟོབས་མའི་ཁྱིམ་གང་ན་བ་དེར་གཤེགས་སོ། ། གྲོང་པའི་བུ་མོ་དགའ་མོ་དང་། དགའ་སྟོབས་མས་བཅོམ་ལྡན་འདས་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ཀྱི་ཆེད་དུ་གདན་བཤམས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚུར་སྤྱོན། བཅོམ་ལྡན་འདས་བྱོན་པ་ལེགས་སོ། །བཅོམ་ལྡན་འདས་

  729. 55a

    གདན་བཤམས་པ་འདི་ཉིད་ལ་བཞུགས་ཞེས་གསོལ་ནས་བཅོམ་ལྡན་འདས་གདན་བཤམས་པ་དེ་ཉིད་ལ་བཞུགས་སོ། །དེ་ནས་གྲོང་བའི་བུ་མོ་དགའ་མོ་དང་། དགའ་སྟོབས་མས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་ འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་གྲོང་པའི་བུ་མོ་དགའ་མོ་དང་། དགའ་སྟོབས་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་ མཛད་དེ། སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པ་རྣམས་ལ་མནོག་ཆུང་ཞིང་ཉེས་དམིགས་དང་། ཀུན་ནས་ཉོན་མོངས་པ་ དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་རྗེས་སུ་བསྔགས་པ་དང་། རྣམ་པར་བྱང་བའི་ཕྱོགས་ཀྱི་ཆོས་རྒྱ་ཆེར་བཤད་དོ། །གང་གི་ཚེ་བཅོམ་ལྡན་འདས་ཀྱིས་དེ་དག་དགའ་བའི་སེམས་དང་། དགེ་བའི་སེམས་དང་། མགུ་བའི་སེམས་དང་། སྒྲིབ་པ་དང་བྲལ་བའི་སེམས་དང་། སྐལ་བ་དང་ལྡན་པ་དང་། ཡང་དག་ཕུལ་གྱི་ཆོས་བཤད་ན་ཤེས་པར་ནུས་པར་གཟིགས་པ་དེའི་ཚེ་སངས་རྒྱས་བཅོམ་ལྡན་འདས་ཀྱི་ཡང་དག་ཕུལ་གྱི་ཆོས་བཤད་པ་གང་ཡིན་པ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་ འབྱུང་བ་དང་། འགོག་པ་དང་། ལམ་དེ་རྒྱ་ཆེར་བཤད་དོ། །དཔེར་ན་གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་གྲོང་པའི་བུ་མོ་དགའ་མོ་དང་། དགའ་སྟོབས་མ་སྟན་དེ་ཉིད་ལ་འཁོད་བཞིན་དུ་འཕགས་པའི་ བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་སོ། །དེ་ནས་གྲོང་པའི་བུ་མོ་དགའ་མོ་དང་། དགའ་སྟོབས་མས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། ཐེ་ཚོམ་

  730. 55b

    ལས་རྒལ་བ་དང་། སོམ་ཉི་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ འདི་སྐད་ཅེས་གསོལ་ཏོ། །བཙུན་པ་བདག་ཅག་འཕགས་སོ། །མངོན་པར་འཕགས་སོ། །བདག་ཅག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས་བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་ བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་གྲོང་པའི་བུ་མོ་དགའ་མོ་དང་། དགའ་སྟོབས་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེའི་སླད་དུ་འདིར་ཞལ་ཟས་ཀྱི་མཛད་པ་མཛད་དུ་གསོལ་བཅོམ་ལྡན་འདས་ཀྱིས་གྲོང་པའི་བུ་མོ་དགའ་མོ་དང་། དགའ་སྟོབས་མ་ལ་ཅང་མི་གསུང་བས་གནང་ངོ་། །དེ་ནས་གྲོང་པའི་བུ་མོ་དགའ་མོ་དང་། དགའ་སྟོབས་མས་བཅོམ་ལྡན་འདས་ཅང་མི་གསུང་བས་གནང་པར་རིག་ཅིང་། བཅོམ་ལྡན་འདས་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །བཅོམ་ལྡན་འདས་ཀྱིས་གསོལ་ཟིན་ཏེ་ཕྱག་བཅབས་ཤིང་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །དེ་ནས་བཅོམ་ལྡན་འདས་ཀྱིས་གྲོང་པའི་བུ་མོ་དགའ་མོ་དང་། དགའ་སྟོབས་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་ པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་བཅོམ་ལྡན་འདས་གྲོང་ཁྱེར་སྡེ་ཅན་ནས་གཤེགས་པ་ན་འདི་སྙམ་དུ་དགོངས་ཏེ། ངས་ཡུལ་མ་ག་དྷཱ་འདིར་ངང་ཚུལ་བཟང་པོར་བཀུར་བའི་དགེ་སྦྱོང་ངམ་བྲམ་ཟེ་གང་ཞིག་དབང་དུ་བྱས་ན་དེ་དབང་དུ་གྱུར་པས་

  731. 56a

    ཚེགས་ཆུང་ངུས་སྐྱེ་བོའི་ཚོགས་ཆེན་པོ་དབང་དུ་འགྱུར་བ་སུ་ཞིག་ཡོད་སྙམ་མོ། །དེའི་ཚེ་ལྟེང་རྒྱས་འོད་སྲུང་རལ་པ་ཅན་བཙས་ནས་ལོ་བརྒྱ་ཉི་ཤུ་ལོན་པ་རྒས་འཁོགས་གཏུགས་པ་ཞིག་ཡོད་པ་དེ་མ་ག་དྷཱའི་མི་རྣམས་ཀྱིས་བཀུར་སྟི་བྱ་བ་དང་། བླ་མར་བྱ་བ་དང་། རྗེད་པར་ བྱ་བ་དང་། མཆོད་པར་བྱ་བས་དགྲ་བཅོམ་པར་བཀུར་ཅིང་འཁོར་ལྔ་བརྒྱ་དང་ནཻ་རཉྫ་ནའི་ཀླུང་གི་འགྲམ་གྱི་བསྟི་གནས་ན་དཀའ་ཐུབ་སྤྱོད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ལྟེང་རྒྱས་འོད་སྲུང་རལ་པ་ཅན་བཙས་ནས་ལོ་བརྒྱ་ཉི་ཤུ་ལོན་པ་རྒས་འཁོགས་གཏུགས་པ་འདི་ མ་ག་དྷཱའི་མི་རྣམས་ཀྱིས་ཞེས་བྱ་བ་ནས་དཀའ་ཐུབ་སྤྱོད་དོ་ཞེས་བྱ་བའི་བར་གོང་མ་བཞིན་དུ་སྟེ། མ་ལ་ངས་ལྟེང་རྒྱས་འོད་སྲུང་རལ་པ་ཅན་དབང་དུ་བྱས་ཏེ། འདི་དབང་དུ་གྱུར་ན་ཚེགས་ཆུང་ངུས་སྐྱེ་བོའི་ཚོགས་ཆེན་པོ་དབང་དུ་འགྱུར་རོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་གཤེགས་སོ། །ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ཀྱི་ཆེད་དུ་གདན་བཤམས་ནས་འདི་སྐད་ཅེས་ཀྱང་གསོལ་ཏོ། །དགེ་སྦྱོང་ཆེན་པོ་ཚུར་སྤྱོན། དགེ་སྦྱོང་ཆེན་པོ་བྱོན་པ་ལེགས་སོ། །དགེ་སྦྱོང་ཆེན་པོ་ཡུན་རིང་པོ་ཞིག་ལགས་ན་གང་ནས་འཁོར་ཏེ་འདིར་བྱོན། དགེ་སྦྱོང་ཆེན་པོ་གདན་བཤམས་པ་ཉིད་ལ་བཞུགས་ཤིག་ཅེས་གསོལ་ཏོ། །བཅོམ་ལྡན་འདས་ཀྱིས་གདན་བཤམས་པ་ཉིད་ལ་བཞུགས་སོ། །དེ་ནས་ལྟེང་རྒྱས་ འོད་སྲུང་རལ་པ་ཅན་དང་། བཅོམ་ལྡན་འདས་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་། མགུ་བར་འགྱུར་བའི་གཏམ་རྣམ་པ་སྣ་ཚོགས་མཛད་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་ ལ་འདི་སྐད་ཅེས་བཀའ་སྩལ་ཏོ། །འོད་སྲུང་གལ་ཏེ་ཁྱོད་ལ་མི་བདེ་བ་མེད་ན། ཁྱོད་ཀྱི་མེ་ཁང་དུ་བདག་ཞག་གཅིག་འདུག་གོ། །དགེ་སྦྱོང་ཆེན་པོ་བདག་ལ་ནི་མི་བདེ་བ་མ་མཆིས་ན། འོན་ཀྱང་དེ་ན་ཀླུ་གདུག་པ་ཞིག་གནས་ཏེ། དེས་ཁྱོད་ཐོ་བཙམས་པར་འགྱུར་དུ་མཆིའོ། །འོད་སྲུང་

  732. 56b

    ཁྱོད་ཀྱིས་རེ་ཞིག་གནང་བར་གྱིས་ཤིག་དང་ཐོ་བཙམས་པར་མི་འགྱུར་རོ། །དགེ་སྦྱོང་ཆེན་པོ་གལ་ཏེ་ཁྱོད་ལ་ཐོ་མི་བཙམ་ན་དགེ་སྦྱོང་ཆེན་པོ་ཅི་བདེ་བ་ཁོ་ནར་བཞུགས་ཤིག །དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་པ་ཅན་གྱི་མེ་ཁང་གང་ན་བ་དེར་གཤེགས་ཏེ་བྱོན་ནས་མེ་ཁང་གི་ ཕྱི་རོལ་དུ་ཞབས་བསིལ་ནས་མེ་ཁང་གི་ནང་དུ་ཞུགས་ཏེ། ཉིད་ཀྱིས་རྩྭ་གདིང་བ་བཤམས་ནས་སྐུ་དྲང་པོར་བསྲང་སྟེ། སྐྱིལ་མོ་ཀྲུང་བཅས་ནས་དྲན་པ་མངོན་དུ་ཕྱོགས་པར་བཞག་སྟེ་བཞུགས་སོ། །ཀླུ་གདུག་པས་བཅོམ་ལྡན་འདས་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་ཁྲོས་ པའི་མཐུས་དུད་པ་ཕྱུང་ངོ་། །བཅོམ་ལྡན་འདས་ཀྱིས་ཀྱང་རྫུ་འཕྲུལ་གྱི་མཐུས་དུད་པ་ཕྱུང་ངོ་། །ཀླུ་གདུག་པས་ཁྲོས་པའི་མཐུས་འབར་བར་བྱས་སོ། །བཅོམ་ལྡན་འདས་ཀྱིས་ཀྱང་མེའི་ཁམས་ལ་སྙོམས་པར་ཞུགས་སོ། །དེ་ན་ཀླུ་གདུག་པ་ཁྲོས་པའི་མཐུ་དང་། བཅོམ་ལྡན་ འདས་ཀྱི་རྫུ་འཕྲུལ་གྱི་མཐུས་མེ་ཁང་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་པས་སྲེག་པར་བྱེད་དོ། །ལྟེང་རྒྱས་འོད་སྲུང་རལ་པ་ཅན་མཚན་མོ་རྒྱུ་སྐར་ལ་ལྟ་བ་ན་མེ་ཁང་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་ གཅིག་ཏུ་གྱུར་ནས་སྲེག་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། དགེ་སྦྱོང་གཽ་ཏ་མ་ཆེན་པོ་འདི་ལྟར་མཛེས་པ། ཀླུ་གདུག་པས་ཐལ་བར་བྱས་པར་མ་གྱུར་གྲང་། ཀྱི་ཧུད་ཉོན་མོངས་པ་དག་གི་ཚིག་མ་ཉན་ཏོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ ཏེ། ང་ལྟེང་རྒྱས་འོད་སྲུང་རལ་པ་ཅན་འཁོར་དང་བཅས་པ་ཆས་བཅད་ཀྱིས། མ་ལངས་རྫུ་འཕྲུལ་ཇི་ལྟ་བུ་མངོན་པར་འདུ་བྱ་བ་ལ་སེམས་མཉམ་པར་བཞག་ན། མེས་ཀླུ་གདུག་པའི་མེ་ཟིལ་གྱིས་མནན་ལ་དེས་ཀྱང་དེའི་ལུས་ལ་གནོད་པར་མི་བྱེད་ཅིང་དེ་དུལ་བར་མཁྱེན་ནས་ལྷུང་ བཟེད་དུ་བཅུག་སྟེ་ལྟེང་རྒྱས་འོད་སྲུང་རལ་པ་ཅན་དེ་ལ་སྦྱིན་པ་དེ་ལྟ་བུ་ཞིག་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་རྫུ་འཕྲུལ་ཇི་ལྟ་བུ་མངོན་པར་འདུ་མཛད་པ་ལ་ཐུགས་མཉམ་པར་བཞག་ན་མེས་ཀླུ་གདུག་པའི་མེ་ཟིལ་གྱིས་མནན་ལ་དེས་ཀྱང་དེའི་ལུས་ལ་གནོད་པ་མི་བྱེད་པ་

  733. 57a

    དེ་ལྟ་བུ་མངོན་པར་འདུ་མཛད་དེ། དེ་དུལ་བར་མཁྱེན་ནས་ལྷུང་བཟེད་དུ་བཅུག་སྟེ་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་བསྣམས་ནས་གཤེགས་སོ། །ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་བཅོམ་ ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་གསོན་པ་ལྟ་ཞིག །འོད་སྲུང་གསོན་ནོ། །དགེ་སྦྱོང་ཆེན་པོ་ཁྱོད་ཀྱིས་ལྷུང་བཟེད་ན་བསྣམས་ཏེ་བྱོན་པ་ཅི། འོད་སྲུང་ཀླུ་གདུག་པ་གང་གི་མཐུས་ཁྱོད་ཀྱི་མེ་ཁང་དུ་མིར་གྱུར་པ་རྫུ་འཕྲུལ་དང་མི་ལྡན་པ་གནས་སུ་མི་སྟེར་ བ་དེ་ངས་བཏུལ་ནས་ལྷུང་བཟེད་དུ་བཅུག་ནས་ཁྱེར་ཏེ་འོངས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེའི་ཚེ་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ན་བྲམ་ཟེའི་ཁྱེའུ་ལྔ་བརྒྱ་ཙམ་མེ་ལ་ཡོངས་སུ་སྤྱོད་པ་རེ་རེའི་མེ་ཐབ་གསུམ་གསུམ་སྟེ་མེ་ཐབ་སྟོང་ལྔ་བརྒྱ་ཡོད་དོ། །དེ་ནས་བྲམ་ ཟེའི་ཁྱེའུ་དེ་རྣམས་མེ་ལ་ཡོངས་སུ་སྤྱོད་པར་འདོད་ན་མེ་དེ་སྤར་བར་མ་ནུས་སོ། །དེ་ནས་བྲམ་ཟེའི་ཁྱེའུ་དེ་རྣམས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་སོང་སྟེ་ཕྱིན་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། །མཁན་པོ་མཁྱེན་པར་མཛོད་ཅིག །འདིར་ བདག་ཅག་ཞུགས་ལ་ཡོངས་སུ་སྤྱོད་པར་འཚལ་ན་ཞུགས་དེ་སྤར་བར་རྔོ་མ་ཐོག་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་བདག་གི་ཉེ་འཁོར་ན་གནས་པ་དེའི་མཐུ་ཞིག་མ་བྱུང་གྲང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛོད་ཅིག །འདིར་བདག་གི་བྲམ་ཟེའི་ཁྱེའུ་ལྔ་བརྒྱ་ཙམ་མེ་ལ་ཡོངས་སུ་སྤྱོད་པར་འཚལ་ན་མེ་དེ་སྤར་བར་རྔོ་མ་ཐོག་ནས་བདག་འདི་སྙམ་དུ་སེམས་ཏེ། བདག་གི་

  734. 57b

    ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་མ་བྱུང་གྲང་སྙམ་བགྱིད་དོ། །འོད་སྲུང་མེ་དེ་སྦར་བར་འདོད་དམ། དགེ་སྦྱོང་ཆེན་པོ་སྦར་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་མེ་དེ་རང་ཉིད་འབར་བར་གྱུར་ ཏོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ ཀྱི་ནགས་ཚང་ཚིང་ན་བཞུགས་སོ། །དེ་ནས་བྲམ་ཟེའི་ཁྱེའུ་དེ་རྣམས་མེ་ལ་ཡོངས་སུ་སྤྱད་ནས་མེ་བསད་པར་འདོད་ན་མེ་བསད་པར་མ་ནུས་སོ། །བྲམ་ཟེའི་ཁྱེའུ་དེ་རྣམས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་སོང་སྟེ་ལྷགས་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་ སྨྲས་སོ། །མཁན་པོ་མཁྱེན་པར་མཛོད་ཅིག །འདིར་བདག་ཅག་ཞུགས་ལ་ཡོངས་སུ་སྤྱད་ནས་ཞུགས་དགུམ་པར་འཚལ་ན་དགུམ་པའི་རྔོ་མ་ཐོག་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་བདག་གི་ཉེ་འཁོར་ན་ གནས་པ་དེའི་མཐུ་ཞིག་མ་བྱུང་གྲང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། འདིར་བདག་གི་བྲམ་ཟེའི་ཁྱེའུ་ རྣམས་ཞུགས་ལ་ཡོངས་སུ་སྤྱད་ནས་ཞུགས་དགུམ་པར་འཚལ་ན་དགུམ་པར་རྔོ་མ་ཐོག་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་མ་བྱུང་གྲང་སྙམ་བགྱིད་དོ། །འོད་སྲུང་མེ་དེ་བསད་དམ། དགེ་སྦྱོང་ཆེན་པོ་དགུམ་ དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་མེ་དེ་རང་ཉིད་ཤིའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་

  735. 58a

    ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་དུས་གཞན་ཞིག་ན་ལྟེང་རྒྱས་འོད་སྲུང་རལ་པ་ཅན་རང་ཉིད་མེ་ལ་ཡོངས་སུ་སྤྱོད་པར་འདོད་ན་སྤར་ བར་མ་ནུས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་གནས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་ འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། འདིར་བདག་ཉིད་ཞུགས་ལ་ཡོངས་སུ་སྤྱོད་པར་འཚལ་ན་སྤར་བར་རྔོ་མ་ཐོག་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་བྱུང་བར་མ་གྱུར་ གྲང་སྙམ་བགྱིད་དོ། །འོད་སྲུང་མེ་དེ་སྤར་བར་འདོད་དམ། དགེ་སྦྱོང་ཆེན་པོ་སྤར་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་མེ་དེ་རང་ཉིད་འབར་བར་གྱུར་ཏོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་ སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་དུས་ གཞན་ཞིག་ན་ལྟེང་རྒྱས་འོད་སྲུང་རལ་པ་ཅན་རང་ཉིད་མེ་ལ་ཡོངས་སུ་སྤྱད་ནས་མེ་བསད་པར་འདོད་ན་བསད་པར་མ་ནུས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་གནས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་མོ། །དེ་ ནས་ལྟེང་རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། འདིར་བདག་ཉིད་ཞུགས་ལ་ཡོངས་སུ་སྤྱད་ནས་ཞུགས་དགུམ་པར་འཚལ་ན་དགུམ་པའི་རྔོ་མ་

  736. 58b

    ཐོག་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་བགྱིད་དོ། །དྲང་སྲོང་མེ་དེ་བསད་དམ། དགེ་སྦྱོང་ཆེན་པོ་དགུམ་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་ རྣམས་ཀྱི་ལྷའི་མཐུས་མེ་དེ་རང་ཉིད་ཤིའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་ འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་དུས་གཞན་ཞིག་ན་ལྟེང་རྒྱས་འོད་སྲུང་རལ་པ་ཅན་གྱི་མེ་ཁང་ཐམས་ཅད་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་དེ་ལ་ལྟེང་རྒྱས་འོད་སྲུང་རལ་པ་ཅན་འཁོར་ དང་བཅས་པ་དང་། གཞན་ཡང་སྐྱེ་བོའི་ཚོགས་ཆེན་པོ་རྣམས་ཀྱིས་བསྒྲིམས་ཀྱང་བསད་མ་ནུས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་གནས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་མོ། །དེ་ནས་ལྟེང་རྒྱས་འོད་ སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། དགེ་སྦྱོང་ཆེན་པོ་འདིར་བདག་གི་མེ་ཁང་ཐམས་ཅད་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་ སྲེག་པར་བགྱིད་པ་དེ་ལ་བདག་འཁོར་དང་བཅས་པ་དང་། གཞན་ཡང་སྐྱེ་བོའི་ཚོགས་ཆེན་པོས་བསྒྲིམས་ན་ཞུགས་དགུམ་པའི་རྔོ་མ་ཐོག་ནས་བདག་འདི་སྙམ་དུ་སེམས་ཏེ། བདག་གི་ཉེ་འཁོར་ན་དགེ་སྦྱོང་ཆེན་པོ་བཞུགས་ན་དེའི་མཐུ་ཞིག་བྱུང་བར་མ་གྱུར་གྲང་སྙམ་བགྱིད་དོ། །འོད་ སྲུང་མེ་ཁང་དེ་ཞི་བར་བྱ་འམ་དགེ་སྦྱོང་ཆེན་པོ་ཞི་བར་མཛད་དུ་གསོལ། དེ་ནས་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་མེ་ཁང་དེ་རང་ཉིད་ཞི་བར་གྱུར་ཏོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་

  737. 59a

    སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ།། །།འདུལ་བ་གཞི། བམ་པོ་བརྒྱད་བཅུ་བརྒྱད་པ། དེ་ནས་བཅོམ་ལྡན་འདས་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ ནགས་ཚང་ཚིང་ན་བཞུགས་སོ། །དེ་ནས་རྒྱལ་པོ་ཆེན་པོ་བཞི་པོ་དག་ཁ་དོག་འཕགས་པས་མཚན་མོ་ལ་བབ་པ་ན། བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། དེ་རྣམས་དཔེར་ན་མེའི་ཕུང་པོ་འབར། རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་བཞི་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་གོ། །ལྟེང་རྒྱས་འོད་སྲུང་རལ་པ་ཅན་དེ་ཉིད་ཀྱི་མཚན་མོ་རྒྱུ་སྐར་རྣམས་ལ་བལྟ་བ་ན། བཅོམ་ལྡན་འདས་ཀྱི་སྤྱན་སྔ་ན་མེའི་ཕུང་པོ་འབར་རབ་ཏུ་འབར། ཀུན་དུ་རབ་ཏུ་ འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་བཞི་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ཡང་མེ་ལ་ཡོངས་སུ་སྤྱོད་དེ། འདི་ལྟར་དེའི་སྤྱན་སྔ་ན་མེའི་ཕུང་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་ བཞི་ཡོད་དོ་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་ནང་པར་སྔར་ལངས་ཏེ་བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། འདིར་མདང་སུམ་བདག་རྒྱུ་སྐར་རྣམས་ ལ་བལྟ་བ་ན་དགེ་སྦྱོང་ཆེན་པོའི་སྤྱན་སྔ་ན་ཞུགས་ཀྱི་ཕུང་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ཏེ་སྲེག་པར་བྱེད་པ་བཞི་མཐོང་ངོ་། །མཐོང་ནས་ཀྱང་བདག་ཉིད་འདི་སྙམ་དུ་སེམས་ཏེ། །དགེ་སྦྱོང་ཆེན་པོ་ཡང་མེ་ལ་ཡོངས་སུ་སྤྱོད་དེ། འདི་ལྟར་དེའི་སྤྱན་ སྔ་ན་མེའི་ཕུང་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བགྱིད་པ་བཞི་མཆིས་སོ་སྙམ་མོ། །འོད་སྲུང་ཅིང་མེ་ལ་ཡོངས་སུ་སྤྱོད་དམ། ང་མེ་ལ་ཡོངས་སུ་མི་སྤྱོད་དེ། དེ་ལྟ་མོད་ཀྱི་འདིར་མདང་སུམ་རྒྱལ་པོ་ཆེན་པོ་བཞི་པོ་དག་ཁ་དོག་འཕགས་

  738. 59b

    པས་མཚན་མོ་ལ་བབ་པ་ནང་གང་ན་བ་དེར་འོངས་ཏེ་ལྷགས་ནས། ངའི་ཞབས་གཉིས་ལ་མགོ་བོས་ཕྱག་བྱས་ཏེ་དེ་རྣམས་དཔེར་ན་མེའི་ཕུང་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་བཞི་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་པ་ཡིན་ ནོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ ཀྱི་ནགས་ཚང་ཚིང་ན་བཞུགས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་ཁ་དོག་འཕགས་པས་མཚན་མོ་ལ་བབ་པ་ན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། དེ་དཔེར་ན་མེའི་ཕུང་པོ་འབར་རབ་ཏུ་འབར། ཀུན་དུ་ རབ་ཏུ་འབར་ཏེ་མེ་ལྕེ་གཅིག་ཏུ་གྱུར་པ་བཞི་པོ་དེ་དག་བས་ཀྱང་ཆེས་ལྷག་ཅིང་ཆེས་འཕགས་ལ་ཆེས་བཟང་བ་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་གོ། །ལྟེང་རྒྱས་འོད་སྲུང་རལ་པ་ཅན་དེ་ཉིད་ཀྱི་མཚན་མོ་རྒྱུ་སྐར་རྣམས་ལ་བལྟ་བ་ན་བཅོམ་ལྡན་འདས་ཀྱི་སྤྱན་སྔར་མེའི་ཕུང་པོ་ཆེན་ པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་ཞིག་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ཡང་མེ་ལ་ཡོངས་སུ་སྤྱོད་དེ། འདི་ལྟར་དེའི་མདུན་ན་མེའི་ཕུང་པོ་ཆེན་པོ་འབར་རབ་ཏུ་འབར། ཀུན་དུ་རབ་ཏུ་ འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་པ་ཞིག་ཡོད་དོ་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་ནང་པར་སྔར་ལངས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་ གསོལ། འདིར་བདག་མདང་སུམ་རྒྱུ་སྐར་རྣམས་ལ་བལྟ་བ་ན་དགེ་སྦྱོང་ཆེན་པོའི་སྤྱན་སྔ་ན་ཞུགས་ཀྱི་ཕུང་པོ་ཆེན་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བགྱིད་པ་ཞིག་མཐོང་ངོ་། །མཐོང་ནས་ཀྱང་བདག་འདི་སྙམ་དུ་སེམས་ཏེ། དགེ་

  739. 60a

    སྦྱོང་ཆེན་པོ་ཡང་མེ་ལ་ཡོངས་སུ་སྤྱོད་དེ། འདི་ལྟར་དེའི་སྤྱན་སྔ་ན་མེའི་ཕུང་པོ་ཆེན་པོ་འབར་རབ་ཏུ་འབར། ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བགྱིད་པ་ཞིག་མཆིས་སོ་སྙམ་མོ། །འོད་སྲུང་ཅིང་མེ་ལ་ཡོངས་སུ་སྤྱོད་དམ། ང་མེ་ལ་ཡོངས་ སུ་མི་སྤྱོད་དེ། དེ་ལྟ་མོད་ཀྱི་འདིར་མདང་སུམ་ལྷ་རྣམས་ཀྱི་དབང་པོ་བརྒྱ་བྱིན་ཁ་དོག་འཕགས་པས་མཚན་མོ་ལ་བབ་པ་ནང་གང་ན་བ་དེར་འོངས་ཏེ་ཕྱིན་ནས་ངའི་ཞབས་ལ་མགོ་བོས་ཕྱག་བྱས་ཏེ། དེ་དཔེར་ན་མེའི་ཕུང་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ ནས་སྲེག་པ་བཞི་པོ་དེ་དག་པས་ཀྱང་ཆེས་ལྷག་ཅིང་ཆེས་འཕགས་ལ་ཆེས་བཟང་བ་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་པ་ཡིན་ནོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་ མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་མི་མཇེད་ཀྱི་བདག་པོ་ཚངས་པ་ཁ་དོག་འཕགས་པས་མཚན་མོ་ལ་བབ་པ་ན་བཅོམ་ལྡན་འདས་གང་ན་བ་ དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། དཔེར་ན་མེའི་ཕུང་པོ་བཞི་པོ་དེ་དག་ཉིད་སྔ་མ་བཞིན་དུ་སྲེག་པ་ཞེས་བྱ་བ་ནས་མེའི་ཕུང་པོ་ལྔ་པ་དེ་མེ་ལྕེ་གཅིག་ཏུ་གྱུར་ནས་སྲེག་པར་བྱེད་དོ་ཞེས་བྱ་བའི་བར་དེ་དག་པས་ཀྱང་ཆེས་ལྷག་ཅིང་ཆེས་འཕགས་ ལ་ཆེས་བཟང་བ་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་གོ །ལྟེང་རྒྱས་འོད་སྲུང་རལ་པ་ཅན་དེ་ཉིད་ཀྱི་མཚན་མོ་རྒྱུ་སྐར་རྣམས་ལ་བལྟ་བ་ན་བཅོམ་ལྡན་འདས་ཀྱི་སྤྱན་སྔ་ན་མེའི་ཕུང་པོ་ཆེན་པོ་འབར་རབ་ཏུ་འབར་བ་ཞེས་བྱ་བ་ནས་སྲེག་པར་བྱེད་པ་ཞེས་བྱ་བའི་བར་ཞིག་མཐོང་ངོ་། ། མཐོང་ནས་ཀྱང་དེ་འདི་སྙམ་དུ་སེམས་ཏེ། །དགེ་སྦྱོང་ཆེན་པོ་ཡང་མེ་ལ་ཡོངས་སུ་སྤྱོད་དེ། འདི་ལྟར་དེའི་མདུན་དུ་མེའི་ཕུང་པོ་ཆེན་པོ་ཞེས་བྱ་བ་ནས་སྲེག་པར་བྱེད་པའི་བར་ཞིག་ཡོད་དོ་སྙམ་མོ། །དེ་ནས་ལྟེང་རྒྱས་འོད་སྲུང་རལ་པ་ཅན་ནང་པར་སྔར་ལངས་ནས་བཅོམ་ལྡན་འདས་གང་

  740. 60b

    ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། འདིར་བདག་མདང་སུམ་རྒྱུ་སྐར་རྣམས་ལ་བལྟ་བ་ན་དགེ་སྦྱོང་ཆེན་པོའི་སྤྱན་སྔ་ན་ཞུགས་ཀྱི་ཕུང་པོ་ཆེན་པོ་འབར་བ་ཞེས་བྱ་བ་ནས་སྲེག་པར་བྱེད་པ་ཞེས་བྱ་བའི་བར་ཞིག་ མཐོང་ངོ་། །མཐོང་ནས་ཀྱང་བདག་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ཡང་མེ་ལ་ཡོངས་སུ་སྤྱོད་དེ། འདི་ལྟར་དེའི་སྤྱན་སྔ་ན་མེའི་ཕུང་པོ་ཆེན་པོ་འབར་རབ་ཏུ་འབར། ཀུན་དུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་ནས་སྲེག་པར་བགྱིད་པ་ཞིག་མཆིས་སོ་སྙམ་མོ། །འོད་ སྲུང་ཅིང་མེ་ལ་ཡོངས་སུ་སྤྱོད་དམ། ང་མེ་ལ་ཡོངས་སུ་མི་སྤྱོད་དེ། དེ་ལྟ་མོད་ཀྱི་འདིར་མདང་སུམ་མི་མཇེད་ཀྱི་བདག་པོ་ཚངས་པ་ཁ་དོག་འཕགས་པས་མཚན་མོ་ལ་བབ་པ་ན་ང་གང་ན་བ་དེར་འོངས་ཏེ་ཕྱིན་ནས། ངའི་ཞབས་ལ་མགོ་བོས་ཕྱག་བྱས་ཏེ། དེ་དཔེར་ན་མེའི་ཕུང་པོ་ འབར་རབ་ཏུ་འབར་བ་བཞི་པོ་དེ་དག་ནས་སྔ་མ་བཞིན་དུ་མེའི་ཕུང་པོ་ཆེན་པོ་ལྔ་པ་དེ་འབར་བ་ནས་མེ་ལྕེ་གཅིག་ཏུ་གྱུར་པ་ནས་སྲེག་པར་བྱེད་པའི་བར་གོང་མ་བཞིན་དུ་སྟེ། དེ་དག་པས་ཀྱང་ཆེས་ལྷག་ཅིང་ཆེས་འཕགས་ལ་ཆེས་བཟང་བ་ལྟ་བུའི་ལུས་ཀྱིས་ཕྱོགས་གཅིག་ཏུ་འདུག་པ་ཡིན་ནོ། ། དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་གཽ་ཏ་མ་ནི་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ ཀྱི་ནགས་ཚང་ཚིང་ན་བཞུགས་སོ། །དེའི་ཚེ་ལྟེང་རྒྱས་འོད་སྲུང་རལ་པ་ཅན་གྱི་འདུག་གནས་ན་མཆོད་སྦྱིན་ཞག་བདུན་པ་བྱེད་པ་ལ་བབ་བོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། གལ་ཏེ་མ་ག་དྷཱའི་མི་རྣམས་ཀྱིས་དགེ་སྦྱོང་ཆེན་པོ་འདི་ལྟར་རྫུ་འཕྲུལ་ཆེ་ཞིང་ འདི་ལྟར་མཐུ་ཆེ་བ་ཡིན་པར་ཤེས་ན་དེ་ཉིད་ལ་བྱ་བ་བྱེད་པར་སེམས་ཀྱི། བདག་ལ་ནི་དེ་ལྟར་མ་ཡིན་པའི་གནས་འདི་ཡོད་ཀྱིས། ཀྱེ་མ་དགེ་སྦྱོང་ཆེན་པོ་ཞག་བདུན་ཞིག་འདི་ནས་གཞན་དུ་སོང་ཡང་ཅི་མ་རུང་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ལྟེང་རྒྱས་འོད་སྲུང་རལ་པ་

  741. 61a

    ཅན་གྱི་སེམས་མཁྱེན་ནས་ཞག་བདུན་གཞན་དུ་བཞུད་དོ་དེའི་ཚེ་ཞག་བདུན་དུ་ལྟེང་རྒྱས་འོད་སྲུང་རལ་པ་ཅན་ལ་རྙེད་པ་དང་བཀུར་སྟི་ཆེན་པོ་བྱུང་ནས། བཟའ་བ་དང་བཅའ་བ་རབ་ཏུ་མང་པོ་དང་ལྡན། སྐྱེ་བོའི་ཚོགས་ཆེན་པོ་ཡང་དབང་དུ་གྱུར་ཏོ། །དེ་ནས་ལྟེང་རྒྱས་འོད་སྲུང་ རལ་པ་ཅན་གྱི་འདུག་གནས་ན་མཆོད་སྦྱིན་དེ་ཞག་བདུན་དུ་བྱས་ཟིན་ནས་འདི་སྙམ་དུ་སེམས་ཏེ། འདིར་བདག་ལ་ཞག་བདུན་དུ་རྙེད་པ་དང་བཀུར་སྟི་ཆེན་པོ་བྱུང་ཞིང་བཟའ་བ་དང་བཅའ་བ་རབ་ཏུ་མང་པོ་དང་ཡང་ལྡན། སྐྱེ་བོའི་ཚོགས་ཆེན་པོ་ཡང་དབང་དུ་གྱུར་གྱིས། ཀྱེ་མ་ད་ནི་དགེ་སྦྱོང་ཆེན་ པོ་འོངས་ཀྱང་ཅི་མ་རུང་། བདག་གིས་དེ་ཡང་དེ་ལ་ལོངས་སྤྱོད་དུ་གཞུག་གོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ལྟེང་རྒྱས་འོད་སྲུང་རལ་པ་ཅན་གྱི་སེམས་མཁྱེན་ནས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་གཤེགས་སོ། །ལྟེང་རྒྱས་འོད་སྲུང་རལ་པ་ཅན་གྱིས་ བཅོམ་ལྡན་འདས་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བྱོན་ཏམ། འོད་སྲུང་འོངས་སོ། །དགེ་སྦྱོང་ཆེན་པོ་ཁྱོད་ཅིའི་སླད་དུ་ཞག་བདུན་འདི་ནས་གཞན་དུ་བཞུད་ལགས། འོད་སྲུང་ཁྱོད་ཀྱི་འདུག་གནས་ན་མཆོད་ སྦྱིན་ཞག་བདུན་དུ་བྱེད་པ་ལ་བབ་ནས་འདི་སྙམ་དུ། གལ་ཏེ་མ་ག་དྷཱའི་མི་རྣམས་ཀྱིས་དགེ་སྦྱོང་ཆེན་པོ་ནི་འདི་ལྟར་རྫུ་འཕྲུལ་ཆེ་བ་འདི་ལྟར་མཐུ་ཆེ་བ་ཡིན་པར་ཤེས་ན་དེ་ཁོ་ན་ལ་བྱ་བ་བྱེད་པར་སེམས་ཀྱི། བདག་ལ་ནི་དེ་ལྟ་མ་ཡིན་པའི་གནས་འདི་ཡོད་པར་འགྱུར་གྱིས། ཀྱེ་མ་དགེ་སྦྱོང་ ཆེན་པོ་ཞག་བདུན་ཞིག་འདི་ནས་གཞན་དུ་སོང་ཡང་ཅི་མ་རུང་སྙམ་དུ་སེམས་པ་མ་ཡིན་ནམ། ངའི་ཐུགས་ཀྱིས་ཁྱོད་ཀྱི་སེམས་ཤེས་ནས་ཞག་བདུན་འདི་ནས་གཞན་དུ་སོང་ངོ་། །འོ་ན་ཅིའི་སླད་དུ་འདིར་བྱོན་ལགས། འོད་སྲུང་ཁྱོད་ཀྱིས་མཆོད་སྦྱིན་ཞག་བདུན་དུ་བྱས་ཟིན་ནས་འདི་སྙམ་ དུ་བདག་ལ་ཞག་བདུན་དུ་རྙེད་པ་དང་བཀུར་སྟི་ཆེན་པོ་བྱུང་ཞིང་བཟའ་བ་དང་བཅའ་བ་རབ་ཏུ་མང་པོ་དང་ཡང་ལྡན། སྐྱེ་བོའི་ཚོགས་ཆེན་པོ་ཡང་དབང་དུ་གྱུར་གྱིས། ཀྱེ་མ་དགེ་སྦྱོང་ཆེན་པོ་འོངས་ཀྱང་ཅི་མ་རུང་། བདག་གིས་དེ་ཡང་དེ་ལ་ཡོངས་སུ་ལོངས་སྤྱོད་དུ་གཞུག་གོ་སྙམ་དུ་

  742. 61b

    སེམས་པ་མ་ཡིན་ནམ། དགེ་སྦྱོང་ཆེན་པོ་དེ་ལྟ་ལགས་སོ། །ངའི་ཐུགས་ཀྱིས་ཁྱོད་ཀྱི་སེམས་ཤེས་ནས་ང་འོངས་པ་ཡིན་ནོ། །དགེ་སྦྱོང་ཆེན་པོ་ཅི་བདེ་ཁོ་ནར་ལོངས་སྤྱད་དུ་གསོལ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་ འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་ལ་ འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་དེའི་སླད་དུ་བདག་གི་ཉེ་འཁོར་དུ་བཞུགས་ཤིག་དང་བདག་གིས་ཁྱོད་ལ་ཆོས་དང་མཐུན་པའི་འཚོ་བ་སྦྱར་རོ། །བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་ལ་ཅང་མི་གསུང་བས་གནང་ངོ་། །དེ་ནས་ལྟེང་རྒྱས་འོད་སྲུང་རལ་པ་ཅན་ གྱིས་བཅོམ་ལྡན་འདས་ཀྱི་ཆེད་དུ་རང་ཁོ་ནས་གཡོས་བྱས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་གདུགས་ཚོད་ལགས་ཤིང་མཆིས་ན། དགེ་སྦྱོང་ཆེན་པོ་ད་དེའི་དུས་ལ་བབ་པར་དགོངས་སུ་གསོལ། འོད་སྲུང་དེའི་ཕྱིར་སོང་ཤིག་ང་ཡང་འོང་ངོ་། །དེ་ནས་བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་སོང་ནས་རིང་པོ་མ་ལོན་པར་མཁྱེན་ནས་ཇི་ལྟར་ཐུགས་མཉམ་པར་བཞག་ན་ཤིང་འཛམ་བུ་ཞེས་བྱ་བ་གང་གིས་འཛམ་བུའི་གླིང་དུ་གདགས་པ་དེ་ལས་ཁ་དོག་དང་དྲི་དང་རོ་དང་ལྡན་ པའི་འཛམ་བུའི་སྙེ་མ་རྣམས་ཀྱིས་ལྷུང་བཟེད་བཀང་ནས་བསྣམས་ཏེ། ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་གཤེགས་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་དེའི་འོག་ཏུ་ལྟེང་རྒྱས་འོད་སྲུང་ རལ་པ་ཅན་འོངས་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་བསྟི་གནས་ཀྱི་གདན་བཤམས་པ་ཉིད་ལ་བཞུགས་པ་མཐོང་ངོ་། །མཐོང་ནས་ཀྱང་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བྱོན་ཏམ། འོད་སྲུང་འོངས་སོ། །དགེ་སྦྱོང་ཆེན་པོ་ཁྱོད་ཀྱི་ལྷུང་བཟེད་

  743. 62a

    ན་ཅི་མཆིས། འདིར་ངས་འོད་སྲུང་ཁྱོད་སོང་ནས་རིང་པོ་མ་ལོན་པར་མཁྱེན་ནས་ཇི་ལྟར་ཐུགས་མཉམ་པར་བཞག་ན་ཤིང་འཛམ་བུ་ཞེས་བྱ་བ་གང་གིས་འཛམ་བུའི་གླིང་དུ་གདགས་པ་དེ་ལས་ཁ་དོག་དང་། དྲི་དང་། རོ་དང་ལྡན་པའི་འཛམ་བུའི་སྙེ་མ་རྣམས་ཀྱིས་ ལྷུང་བཟེད་བཀང་ནས་འདིར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཀྱིས། གལ་ཏེ་འདོད་ན་ལོངས་སྤྱོད་ཅིག །དགེ་སྦྱོང་ཆེན་པོ་ཅི་བདེ་ཁོ་ནར་འཚལ་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །འཛམ་བུའི་སྙེ་མ་ཇི་ལྟ་བར་སྐྱུ་རུ་རའི་སྙེ་མ་རྣམས་ཀྱང་དེ་བཞིན་ནོ། །བྱང་གི་སྒྲ་མི་སྙན་གྱི་གླིང་དུ་གཤེགས་ནས་མ་རྨོས་མ་བཏབ་པའི་འབྲས་སཱ་ལུའི་འབྲུས་ལྷུང་བཟེད་བཀང་སྟེ་བསྣམས་ ནས། ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་དེའི་འོག་ཏུ་ལྟེང་རྒྱས་འོད་སྲུང་རལ་པ་ཅན་འོངས་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་བསྟི་གནས་ཀྱི་གདན་བཤམས་ པ་ཉིད་ལ་བཞུགས་པ་མཐོང་ངོ་། །མཐོང་ནས་ཀྱང་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བྱོན་ཏམ། འོད་སྲུང་འོངས་སོ། །དགེ་སྦྱོང་ཆེན་པོ་ཁྱོད་ཀྱི་ལྷུང་བཟེད་ན་ཅི་མཆིས། འདིར་ངས་འོད་སྲུང་ཁྱོད་སོང་ནས་རིང་པོ་མ་ལོན་པར་མཁྱེན་ནས་ཇི་ལྟར་ཐུགས་མཉམ་པར་བཞག་ ན་བྱང་གི་སྒྲ་མི་སྙན་གྱི་གླིང་དུ་གཤེགས་ནས་མ་རྨོས་མ་བཏབ་པའི་འབྲས་སཱ་ལུའི་འབྲུས་ལྷུང་བཟེད་བཀང་ནས་འདིར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཀྱིས། གལ་ཏེ་འདོད་ན་ལོངས་སྤྱོད་ཅིག །དགེ་སྦྱོང་ཆེན་པོ་ཅི་བདེ་ཁོ་ནར་འཚལ་ལགས་སོ། །དེ་ནས་ལྟེང་ རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་བཞིན་དུ་རྒྱལ་པོ་ཆེན་པོ་བཞི་དང་། སུམ་བཅུ་རྩ་གསུམ་པའི་གནས་སུ་གཤེགས་ནས་ལྷའི་བདུད་

  744. 62b

    རྩིས་ལྷུང་བཟེད་བཀང་ནས་བསྣམས་ཏེ་ཞེས་བརྗོད་པར་བྱའོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་ཀྱི་ཆེད་དུ་རང་ཉིད་ཀྱིས་གཡོས་བྱས་ནས་ བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་གདུགས་ཚོད་ལགས་ཤིང་མཆིས་ན། དགེ་སྦྱོང་ཆེན་པོ་ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་སྔ་དྲོ་ན་བཟའ་ཤམ་ཐབས་མནབས་ ལྷུང་བཟེད་དང་ཆོས་གོས་བསྣམས་ཏེ་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་བདེ་བར་བཞུགས་པར་རིག་ནས་གཙང་ཞིང་བསོད་པའི་ བཟའ་བ་དང་བཅའ་བས་ལྷུང་བཟེད་བཀང་ནས་ཕུལ་ལོ། །དེ་ནས་བཅོམ་ལྡན་འདས་ཀྱིས་ལྟེང་རྒྱས་འོད་སྲུང་རལ་པ་ཅན་ལས་བསོད་སྙོམས་བཞེས་ནས་ཕྱོགས་གཞན་ཞིག་ཏུ་བཞུགས་ནས་ཞལ་ཟས་ཀྱི་བྱ་བ་མཛད་དོ། །དེ་ནས་བཅོམ་ལྡན་འདས་ལ་ཆུས་ཆུའི་དགོས་པ་ཞིག་བྱུང་ ངོ་། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ཆུས་ཆུའི་དགོས་པ་བྱུང་བར་ཤེས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་སྤྱན་སྔར་ལག་པས་ས་ལ་བསྣུན་པ་དང་། དེ་ནས་བཀོད་མ་ཆེན་པོ་ཞིག་བྱུང་སྟེ། ཆུ་བབ་ པ་དེ་ལ་བཅོམ་ལྡན་འདས་ཀྱིས་ཆུས་ཆུའི་བྱ་བ་མཛད་དོ། །ལྟེང་རྒྱས་འོད་སྲུང་རལ་པ་ཅན་བསྟི་གནས་ན་འཆག་པ་ན་བཀོད་མ་ཆེན་པོ་བྱུང་སྟེ་ཆུ་བབ་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ཆུ་འདི་སྔོན་ནི་མེད་ན་འདི་ད་ལྟར་གང་ནས་བབ་སྙམ་མོ། །དེ་ནས་ལྟེང་ རྒྱས་འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། བདག་འདིར་བསྟི་གནས་ན་འཆག་པ་ན་བཀོད་མ་ཆེན་པོའི་ཆབ་ཅིག་མཐོང་ངོ་། །མཐོང་ནས་ཀྱང་འདི་

  745. 63a

    སྙམ་དུ་སེམས་ཏེ། ཆུ་འདི་སྔོན་ནི་མ་མཆིས་ན་ད་ལྟར་ཆུ་འདི་གང་ནས་བབ་སྙམ་བགྱིད་དོ། །འོད་སྲུང་རལ་པ་ཅན་འདིར་ཁྱོད་ལས་ངས་བསོད་སྙོམས་བཞེས་ནས་ཕྱོགས་འདིར་ཞུགས་ཏེ་ཞལ་ཟས་ཀྱི་བྱ་བ་མཛད་པ་ན་ང་ལ་ཆུས་ཆུའི་དགོས་པ་ཞིག་བྱུང་ངོ་། །དེ་ནས་ལྷ་རྣམས་ ཀྱི་དབང་པོ་བརྒྱ་བྱིན་གྱིས་ང་ལ་ཆུས་ཆུའི་དགོས་པ་བྱུང་བར་ཤེས་ནས་ཕྱོགས་འདིར་ལག་པ་ས་ལ་བསྣུན་པ་ལས། དེ་ནས་བཀོད་མ་ཆེན་པོ་བྱུང་བ་དེ་ལ་ངས་ཆུས་ཆུའི་བྱ་བ་མཛད་དོ། །འོད་སྲུང་རྫིང་འདི་ནི་ལག་པས་བརྐོས་པ་ཞེས་བྱའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་ དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེ་ནས་བཅོམ་ལྡན་ འདས་ཕྱི་འབྲེད་ནང་དུ་ཡང་དག་འཇོག་ལས་བཞེངས་ནས་རྫིང་ལག་པས་བརྐོས་པ་གང་ན་བ་དེར་གཤེགས་ཏེ་བྱོན་ནས། རྫིང་ལག་པས་བརྐོས་པའི་འགྲམ་གྱི་མཐའ་གཅིག་ཏུ་ན་བཟའ་ཆོས་གོས་རྣམས་བཞག་སྟེ། རྫིང་ལག་པས་བརྐོས་པར་ཞུགས་ནས་སྐུ་ཁྲུས་མཛད་ནས་རྫིང་ལག་ པས་བརྐོས་པ་ནས་འབྱུང་བར་བཞེད་པ་ན་ཤིང་ཨརྫུ་ན་གང་ན་བ་དེ་ལོགས་སུ་ཕྱག་བརྐྱང་ངོ་། །དེ་ནས་ཨརྫུ་ནའི་ཡལ་ག་ཆེན་པོ་འདུད་པར་གྱུར་ཏེ། དེ་ལ་བཅོམ་ལྡན་འདས་ཀྱིས་བཟུང་ནས་རྫིང་ལག་པས་བརྐོས་པ་ནས་བྱུང་ངོ་། །ལྟེང་རྒྱས་འོད་སྲུང་རལ་པ་ཅན་བསྟི་གནས་ན་འཆག་པ་ ན་རྫིང་ལག་པས་བརྐོས་པའི་འགྲམ་ན་ཨརྫུ་ནའི་ཡལ་ག་ཆེན་པོ་འདུད་པ་ཞིག་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ཨརྫུ་ནའི་ཡལ་ག་འདི་སྔོན་ནི་འདུད་པར་མ་གྱུར་ན། ཨརྫུ་ནའི་ཡལ་ག་ཆེན་པོ་འདི་ད་སུ་ཞིག་གིས་བཏུད་སྙམ་མོ། །དེ་ནས་ལྟེང་རྒྱས་འོད་སྲུང་རལ་ པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། བདག་འདིར་བསྟི་གནས་ན་འཆག་པ་ན་རྫིང་ལག་པས་བརྐོས་པའི་འགྲམ་ན་ཨརྫུ་ནའི་ཡལ་ག་ཆེན་པོ་འདུད་པ་མཐོང་ངོ་། །

  746. 63b

    མཐོང་ནས་ཀྱང་བདག་འདི་སྙམ་དུ་སེམས་ཏེ། ཨརྫུ་ནའི་ཡལ་ག་ཆེན་པོ་འདི་སྔོན་ནི་འདུད་པར་མ་གྱུར་ན། ད་འདི་སུ་ཞིག་གིས་བཏུད་སྙམ་བགྱིད་དོ། །འོད་སྲུང་ང་འདིར་ཕྱི་འབྲེད་ནང་དུ་ཡང་དག་འཇོག་ལས་བཞེངས་ནས་རྫིང་ལག་པས་བརྐོས་པ་གང་ན་བ་དེར་གཤེགས་ཏེ་བྱོན་ནས། རྫིང་ལག་པས་བརྐོས་པའི་འགྲམ་གྱི་མཐའ་གཅིག་ན་ན་བཟའ་ཆོས་གོས་རྣམས་བཞག་སྟེ་རྫིང་ལག་པས་བརྐོས་པར་ཞུགས་ཏེ། ལུས་ཁྲུས་བྱས་ནས་རྫིང་ལག་པས་བརྐོས་པ་ནས་འབྱུང་བར་འདོད་ནས་ཤིང་ཨརྫུ་ན་འདི་གང་ན་བ་དེ་ལོགས་སུ་ལག་པ་བརྐྱང་བ་དང་། དེ་ནས་ ཨརྫུ་ནའི་ཡལ་ག་ཆེན་པོ་འདི་འདུད་པར་གྱུར་ཏེ། དེ་ལ་ང་འཇུས་ནས་རྫིང་ལག་པས་བརྐོས་པ་ནས་བྱུང་ངོ་། །འོད་སྲུང་ཤིང་འདི་ནི་ཨརྫུ་ན་ལག་པས་བཟུང་བ་ཞེས་བྱའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེའི་ཚེ་བཅོམ་ལྡན་འདས་ཀྱིས་ཕྱག་དར་ཁྲོད་པའི་ཤ་ནའི་རས་དག་ བརྙེས་ནས། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངའི་ཕྱག་དར་ཁྲོད་པའི་ཤ་ནའི་རས་དག་གང་དུ་བཀྲུ་སྙམ་མོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་བཅོམ་ལྡན་འདས་ཀྱི་དགོངས་པ་ཤེས་ནས་བྲག་ཅིག་ལས་རྡོ་ལེབ་ཆེ་ལ་རིང་བ་ཞིག་བླངས་ ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་དར་ཁྲོད་པའི་ཤ་ནའི་རས་དག་འདི་ལ་བཀྲུ་བར་གསོལ། དེ་ལ་བཅོམ་ལྡན་འདས་ཀྱིས་ཕྱག་དར་ཁྲོད་པའི་ཤ་ནའི་རས་རྣམས་བཀྲུས་སོ། ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངའི་ཕྱག་དར་ཁྲོད་པའི་ཤ་ནའི་རས་རྣམས་གང་དུ་དགྲམ་སྙམ་པ་དང་། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་བཅོམ་ལྡན་འདས་ཀྱི་དགོངས་པ་ཤེས་ནས། བྲག་ཅིག་ལས་རྡོ་ལེབ་ཆེ་ལ་རིང་བ་ཞིག་ཁྱེར་ནས་

  747. 64a

    བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་ཕྱག་དར་ཁྲོད་པའི་ཤ་ནའི་རས་རྣམས་དགྲམ་དུ་གསོལ། དེ་ལ་བཅོམ་ལྡན་འདས་ཀྱིས་ཕྱག་དར་ཁྲོད་པའི་ཤ་ནའི་རས་དག་ བཀྲམ་མོ། །ལྟེང་རྒྱས་འོད་སྲུང་རལ་པ་ཅན་བསྟི་གནས་ན་འཆག་པ་ན་རྡོ་ལེབ་ཆེ་ལ་རིང་བ་དག་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། རྡོ་ལེབ་ཆེ་ལ་རིང་བ་འདི་དག་སྔོན་ནི་མེད་ན་རྡོ་ལེབ་ཆེ་ལ་རིང་བ་འདི་དག་ད་སུ་ཞིག་གིས་ཁྱེར་ཏེ་འོངས་སྙམ་མོ། །དེ་ནས་ལྟེང་རྒྱས་ འོད་སྲུང་རལ་པ་ཅན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་མཁྱེན་པར་མཛད་དུ་གསོལ། འདིར་བདག་བསྟི་གནས་ན་འཆག་པ་ན་རྡོ་ལེབ་ཆེ་ལ་རིང་བ་དག་ཅིག་མཐོང་ངོ་། །མཐོང་ནས་ཀྱང་བདག་ འདི་སྙམ་དུ་སེམས་ཏེ། རྡོ་ལེབ་ཆེ་ལ་རིང་བ་འདི་དག་སྔོན་ནི་མ་མཆིས་ན་རྡོ་ལེབ་ཆེ་ལ་རིང་བ་འདི་དག་ད་སུ་ཞིག་གིས་འཚལ་ཏེ་མཆིས་སྙམ་བགྱིད་དོ། །འོད་སྲུང་འདིར་ངས་ཕྱག་དར་ཁྲོད་པའི་ཤ་ནའི་རས་དག་ཅིག་བརྙེས་སོ། །དེ་ནས་ང་འདི་སྙམ་དུ་དགོངས་ཏེ། ཕྱག་དར་ཁྲོད་པའི་ཤ་ ནའི་རས་གང་དུ་བཀྲུ་སྙམ་པ་དང་། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་ངའི་དགོངས་པ་ཤེས་ནས་བྲག་ཅིག་ལས་རྡོ་ལེབ་ཆེ་ལ་རིང་བ་ཞིག་བླངས་ཏེ། ང་གང་ན་བ་དེར་འོངས་ཏེ། ཕྱིན་ནས་ང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་ཕྱག་དར་ཁྲོད་པའི་ ཤ་ནའི་རས་རྣམས་བཀྲུ་བར་གསོལ། ངས་དེ་ལ་ཕྱག་དར་ཁྲོད་པའི་ཤ་ནའི་རས་རྣམས་བཀྲུས་སོ། །ང་འདི་སྙམ་དུ་དགོངས་ཏེ། ངས་ཕྱག་དར་ཁྲོད་པའི་ཤ་ནའི་རས་རྣམས་གང་དུ་དགྲམ་སྙམ་པ་དང་། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་སེམས་ཀྱིས་ངའི་དགོངས་པ་ཤེས་ནས་ བྲག་ཅིག་ལས་རྡོ་ལེབ་ཆེ་ལ་རིང་བ་གཞན་ཞིག་བླངས་ཏེ། ང་གང་ན་བ་དེར་འོངས་ཏེ་ཕྱིན་ནས་ང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལ་ཕྱག་དར་ཁྲོད་པའི་ཤ་ནའི་རས་རྣམས་དགྲམ་དུ་གསོལ། ངས་དེ་ལ་ཕྱག་དར་ཁྲོད་པའི་ཤ་ནའི་རས་རྣམས་བཀྲམ་མོ། །འོད་

  748. 64b

    སྲུང་རྡོ་ལེབ་ཆེ་ཞིང་རིང་བ་འདི་དག་ནི་གནོད་སྦྱིན་གྱིས་བླངས་པ་ཞེས་བྱའོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ ལྟེང་རྒྱས་ན་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་ཀྱི་ནགས་ཚང་ཚིང་ན་བཞུགས་སོ། །དེའི་ཚེ་ནཻ་རཉྫ་ནའི་ཆུ་ཆེར་བྲུག་ནས་བབ་བོ། །དེ་ནས་བཅོམ་ལྡན་འདས་ཆུ་ཀླུང་མི་གང་བས་ལྷག་པས་ཁེབས་པའི་སྟེང་ནས་ས་རྡུལ་གྱིས་ཡོག་པ་བླ་གབ་མེད་པ་ལ་འཆག་པས་འཆག་པར་མཛད་ དོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་དེ་ལྟར་མཛེས་པ་ཆུ་ཆེན་པོ་བྲུག་པས་ཁྱེར་བར་མ་གྱུར་གྲང་། མ་ལ་བདག་གིས་དགེ་སྦྱོང་ཆེན་པོ་བཙལ་ལོ་སྙམ་དུ་བསམས་ནས་ཤིང་གཅིག་པའི་གྲུའི་ནང་དུ་ཞུགས་ཏེ་བཅོམ་ལྡན་འདས་བཙལ་ བ་ན། ལྟེང་རྒྱས་འོད་སྲུང་རལ་པ་ཅན་གྱིས་བཅོམ་ལྡན་འདས་ཆུ་ཀླུང་མི་གང་བས་ལྷག་པས་ཁེབས་པའི་སྟེང་ནས་རྡུལ་གྱིས་ཡོག་པ་བླ་གབ་མེད་པ་ན་འཆག་པས་འཆག་པ་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་གསོན་ ནམ། འོད་སྲུང་གསོན་ནོ། །དགེ་སྦྱོང་ཆེན་པོ་ཞུགས་ཤིང་གཅིག་པའི་གྲུར་འཇུག་གམ། འོད་སྲུང་འཇུག་གོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། མ་ལ་ངས་ཇི་ལྟར་ཐུགས་མཉམ་པར་བཞག་ན་ཤིང་གཅིག་པའི་གྲུ་ཇི་ལྟ་བར་ཆུ་ལ་འཇུག་པ་དེ་ལྟ་བུའི་རྫུ་འཕྲུལ་ མངོན་པར་འདུ་བྱ་བ་འདུ་བྱའོ་སྙམ་ནས། དེ་ནས་བཅོམ་ལྡན་འདས་ཀྱིས་ཇི་ལྟར་ཐུགས་མཉམ་པར་བཞག་ན་ཤིང་གཅིག་པའི་གྲུ་ཇི་ལྟ་བར་ཆུ་ལ་འཇུག་པ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་དོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། འདི་ལྟར་དགེ་ སྦྱོང་ཆེན་པོ་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ཏེ། ཡ་མཚན་ཆེ་མོད་ཀྱི་བདག་ཀྱང་དགྲ་བཅོམ་པ་ཡིན་ནོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ལྟེང་རྒྱས་འོད་སྲུང་རལ་པ་ཅན་གྱི་སེམས་མཁྱེན་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་བཀའ་སྩལ་ཏོ། །འོད་

  749. 65a

    སྲུང་ཁྱོད་ནི་དགྲ་བཅོམ་པ་མ་ཡིན། དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་མ་ཡིན་ཏེ། དགྲ་བཅོམ་པའི་ལམ་གང་ཡིན་པ་དེ་ཡང་མི་ཤེས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འདི་སྙམ་དུ་སེམས་ཏེ། དགེ་སྦྱོང་ཆེན་པོ་གཽ་ཏ་མའི་ ཐུགས་ཀྱིས་བདག་གི་སེམས་མཁྱེན་ཏོ་སྙམ་དུ་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། དགེ་སྦྱོང་ཆེན་པོའི་སྤྱན་སྔར་ བདག་ཚངས་པར་སྤྱོད་པ་སྤྱད་པར་བགྱིའོ། །འོད་སྲུང་ཁྱོད་ཀྱིས་འཁོར་ལ་བལྟས་སམ། དགེ་སྦྱོང་ཆེན་པོ་མ་བལྟས་ལགས་སོ། །འོད་སྲུང་དེའི་ཕྱིར་རེ་ཞིག་འཁོར་ལ་ལྟོས་ཤིག །འདི་ལྟར་ཁྱོད་ལྟ་བུའི་མི་གྲགས་པ་དང་ལྡན་པ་ཤེས་ཉེན་ཅན་རྣམས་ཀྱིས་ནི་འཁོར་ལ་བལྟ་ བ་ལེགས་པ་ཡིན་ནོ། །དེ་ནས་ལྟེང་རྒྱས་འོད་སྲུང་རལ་པ་ཅན་རང་གི་བསྟི་གནས་གང་ཡིན་པ་དེར་སོང་སྟེ་ཕྱིན་ནས་བྲམ་ཟེའི་ཁྱེའུ་རྣམས་ལ་སྨྲས་པ། བྲམ་ཟེའི་ཁྱེའུ་དག་ཤེས་པར་གྱིས་ཤིག །བྲམ་ཟེའི་ཁྱེའུ་དག་ཁོ་བོ་ནི་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་ ན་ཤེས་ལྡན་དག་ཅི་བྱེད། མཁན་པོ་བདག་ཅག་གིས་ཆུང་ཟད་ཅི་འཚལ་བ་དེ་ཐམས་ཅད་ནི་མཁན་པོ་ལ་བརྟེན་ནས་ལགས་པས་གལ་ཏེ་མཁན་པོ་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་ན། བདག་ཅག་ཀྱང་མཁན་པོ་རབ་ཏུ་བྱུང་བའི་རྗེས་སུ་རབ་ཏུ་འབྱུང་ངོ་། །བྲམ་ ཟེའི་ཁྱེའུ་དག་ཁྱེད་ཀྱིས་དེའི་ཕྱིར་གཡང་གཞི་དང་། ཤིང་ཤུན་དང་། ཁར་བ་དང་། རིལ་བ་སྤྱི་བླུགས་དང་། བླུགས་གཟར་འདི་དག་ཆུ་ཀླུང་ནཻ་རཉྫ་ནའི་ནང་དུ་འོར་ཅིག །མཁན་པོ་བཀའ་བཞིན་འཚལ་ཞེས་བྲམ་ཟེའི་ཁྱེའུ་དེ་རྣམས་ཀྱིས་གཡང་གཞི་དང་། ཤིང་ཤུན་དང་། ཁར་བ་དང་། རིལ་བ་སྤྱི་བླུགས་དང་། བླུགས་གཟར་རྣམས་ཆུ་ཀླུང་ནཻ་རཉྫ་ནའི་ནང་དུ་བོར་ནས་ལྟེང་རྒྱས་འོད་སྲུང་རལ་པ་ཅན་གང་ན་བ་དེར་སོང་སྟེ་ཕྱིན་ནས་ལྟེང་རྒྱས་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། །མཁན་པོ་འདི་ལྟར་བདག་ཅག་གིས་བགྱི་བ་གང་ལགས་

  750. 65b

    པ་དེ་བགྱིས་ལགས་སོ། །དེ་ནས་ལྟེང་རྒྱས་འོད་སྲུང་རལ་པ་ཅན་འཁོར་ལྔ་བརྒྱ་དང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བདག་གིས་འཁོར་ལ་བལྟས་ལགས་ཏེ། བདག་ལེགས་པར་གསུངས་པའི་ ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན། བདག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །འོད་སྲུང་ཚུར་ཤོག །ཚངས་པར་སྤྱད་པ་སྤྱོད་ཅིག །དེ་ཉིད་ཀྱིས་ཚེ་དང་ལྡན་པ་དེ་དག་རབ་ཏུ་བྱུང་བ་ དང་། དེས་བསྙེན་པར་རྫོགས་པ་དང་། དེས་དགེ་སློང་གི་དངོས་པོར་གྱུར་ཏོ། །དེའི་ཚེ་ལྟེང་རྒྱས་འོད་སྲུང་རལ་པ་ཅན་གྱི་སྤུན་ཆུ་ཀླུང་འོད་སྲུང་དང་། ག་ཡཱ་འོད་སྲུང་གཉིས་འཁོར་ཉིས་བརྒྱ་ལྔ་བཅུ་ལྔ་བཅུ་དང་ཆུ་ཀླུང་ནཻ་རཉྫ་ནའི་འཇུག་ངོགས་ཀྱི་འགྲམ་གྱི་བསྟི་གནས་ན་དཀའ་ཐུབ་སྤྱོད་ དོ། །ཆུ་ཀླུང་འོད་སྲུང་དང་། ག་ཡཱ་འོད་སྲུང་སྤུན་གྱིས་གཡང་གཞི་དང་། ཤིང་ཤུན་དང་། ཁར་བ་དང་། རིལ་བ་སྤྱི་བླུགས་དང་། བླུགས་གཟར་དེ་དག་ཆུ་ཀླུང་ནཻ་རཉྫ་ནས་ཁྱེར་བ་མཐོང་ངོ་། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། བདག་ཅག་གི་ཚངས་པ་ མཚུངས་པར་སྤྱོད་པ་རྣམས་རྒྱལ་པོའམ། ཆོམ་རྐུན་ནམ། མེའམ། ཆུས་ཉེས་དམིགས་འགའ་ཞིག་བྱུང་བར་མ་གྱུར་གྲང་། མ་ལ་བདག་ཅག་གིས་ཚངས་པ་མཚུངས་པར་སྤྱོད་པ་རྣམས་བཙལ་ལོ་སྙམ་མོ། །དེ་ནས་ཆུ་ཀླུང་འོད་སྲུང་དང་། ག་ཡཱ་འོད་སྲུང་སྤུན་དག་ལྟེང་ རྒྱས་འོད་སྲུང་རལ་པ་ཅན་ཚོལ་ཞིང་ལྟེང་རྒྱས་འོད་སྲུང་རལ་པ་ཅན་གྱི་བསྟི་གནས་གང་ན་བ་དེར་དོང་བ་དང་དེའི་ཚེ་ཚེ་དང་ལྡན་པ་ལྟེང་རྒྱས་འོད་སྲུང་རལ་པ་ཅན་སྐྲ་བྱི་སྣམ་སྦྱར་བགོས་ནས་འཁོར་ལྔ་བརྒྱ་དང་བཅོམ་ལྡན་འདས་ཀྱི་སྤྱན་སྔ་ན་ཆོས་ཉན་པའི་ཕྱིར་འཁོད་དོ། །ཆུ་ཀླུང་འོད་སྲུང་ དང་། ག་ཡཱ་འོད་སྲུང་སྤུན་གྱིས་ལྟེང་རྒྱས་འོད་སྲུང་རལ་པ་ཅན་སྐྲ་བྱི་སྣམ་སྦྱར་བགོས་ནས། བཅོམ་ལྡན་འདས་ཀྱི་སྤྱན་སྔ་ན་ཆོས་ཉན་པའི་ཕྱིར་འདུག་པ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་འོད་སྲུང་རལ་པ་ཅན་ལ་འདི་སྐད་ཅེས་སྨྲས་སོ། །འོད་སྲུང་འདི་ནི་མཆོག་ཡིན་

  751. 66a

    ལ། དེ་མཆོག་མ་ཡིན་ནམ། འོད་སྲུང་དག་འདི་ནི་མཆོག་ཡིན་ཏེ། དེ་ནི་མ་ཡིན་ནོ། །དེ་ནས་ཆུ་ཀླུང་འོད་སྲུང་དང་། ག་ཡཱ་འོད་སྲུང་སྤུན་དག་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་ནི་མཆོག་མ་ཡིན་པ་མ་ཡིན་ཞིང་ཆོས་བཤད་པ་ཡང་མཆོག་ མ་ཡིན་པ་མ་ཡིན་ཏེ། གང་གི་ཕྱིར་ད་ལྟར་ལྟེང་རྒྱས་འོད་སྲུང་རལ་པ་ཅན་བཙས་ནས་ལོ་བརྒྱ་ཉི་ཤུ་ལྷག་ལོན་པ་རྒས་འཁོགས་གཏུགས་པ། མ་ག་དྷཱའི་མི་རྣམས་ཀྱིས་བཀུར་སྟི་བྱས། བླ་མར་བྱས། རྗེད་པར་བྱས། མཆོད་པར་བྱས་ཤིང་དགྲ་བཅོམ་པར་བཀུར་བ་དེ་ཡང་ ལན་གཉིས་ཀྱི་བར་དུ་དགེ་སྦྱོང་ཆེན་པོའི་སྤྱན་སྔར་རབ་ཏུ་འབྱུང་བར་ཁས་བླངས་ཀྱིས། མ་ལ་བདག་ཅག་ཀྱང་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བྱའོ་སྙམ་དུ་བསམས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བདག་ཅག་ལེགས་ པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། བདག་ཅག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཁྱེད་ཀྱིས་འཁོར་ལ་བལྟས་སམ། དགེ་སྦྱོང་ཆེན་པོ་མ་བལྟས་ལགས་སོ། །འོད་སྲུང་ དག་དེའི་ཕྱིར་རེ་ཞིག་འཁོར་ལ་ལྟོས་ཤིག །འདི་ལྟ་བུའི་མི་གྲགས་པ་དང་ལྡན་པ་ཤེས་ཉེན་ཅན་དག་གིས་ནི་འཁོར་ལ་བལྟ་བ་ལེགས་པ་ཡིན་ནོ། །དེ་ནས་ཆུ་ཀླུང་འོད་སྲུང་དང་། ག་ཡཱ་འོད་སྲུང་སྤུན་རང་གི་བསྟི་གནས་གང་ན་བ་དེར་སོང་སྟེ་ཕྱིན་ནས། བྲམ་ཟེའི་ཁྱེའུ་རྣམས་ལ་འདི་ སྐད་ཅེས་སྨྲས་སོ། །བྲམ་ཟེའི་ཁྱེའུ་དག་ཤེས་པར་གྱིས་ཤིག །ཁོ་བོ་ཅག་ནི་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་ན་ཤེས་ལྡན་དག་ཅི་བྱེད། མཁན་པོ་དག་བདག་ཅག་ཆུང་ཟད་ཅི་འཚལ་བ་དེ་ཐམས་ཅད་ནི་མཁན་པོ་དག་ལ་བརྟེན་ནས་ལགས་ཀྱིས། གལ་ཏེ་མཁན་ པོ་དག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་ན་བདག་ཅག་ཀྱང་མཁན་པོ་དག་རབ་ཏུ་བྱུང་བའི་རྗེས་སུ་རབ་ཏུ་འབྱུང་ངོ་། །བྲམ་ཟེའི་ཁྱེའུ་དག་དེའི་དུས་ད་ཡིན་པར་ཤེས་པར་གྱིས་ཤིག །དེ་ནས་ཆུ་ཀླུང་འོད་སྲུང་དང་། ག་ཡཱ་འོད་སྲུང་སྤུན་འཁོར་ཉིས་བརྒྱ་ལྔ་བཅུ་ལྔ་བཅུ་དང་

  752. 66b

    བཅོམ་ལྡན་འདས་གང་ན་བ་དེར་སོང་སྟེ་ལྷགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཆེན་པོ་བདག་ཅག་གིས་འཁོར་ལ་བལྟས་ལགས་ཏེ། དགེ་སྦྱོང་ཆེན་པོ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་ སློང་གི་དངོས་པོ་འཐོབ་པ་ལྟ་ན། བདག་ཅག་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །འོད་སྲུང་དག་ཚུར་ཤེག་ཚངས་པར་སྤྱོད་པ་སྤྱོད་ཅིག །དེ་ཉིད་ཀྱིས་ཚེ་དང་ལྡན་པ་དེ་རྣམས་རབ་ཏུ་བྱུང་བ་དང་། དེས་བསྙེན་པར་རྫོགས་པ་དང་། དེས་དགེ་སློང་གི་དངོས་ པོར་གྱུར་ཏོ། །དེ་ནས་བཅོམ་ལྡན་འདས་ཀྱིས་རལ་པ་ཅན་སྟོང་པ་དེ་རབ་ཏུ་ཕྱུང་བསྙེན་པར་རྫོགས་པར་མཛད་ནས་ལྟེང་རྒྱས་སུ་ཇི་ཙམ་བཞེད་ཀྱི་བར་དུ་བཞུགས་ནས་ག་ཡཱ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་ན་ག་ཡཱར་བྱོན་ནས་ག་ཡཱ་ན་ག་ཡཱ་མགོའི་མཆོད་ རྟེན་ལ་སྔོན་གྱི་རལ་པ་ཅན་ཐམས་ཅད་རབ་ཏུ་བྱུང་བའི་དགེ་སློང་སྟོང་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་སྟོང་པོ་དེ་ལ་ཆོ་འཕྲུལ་རྣམ་པ་གསུམ་གྱིས་འདོམས་པར་མཛད་དེ། རྫུ་འཕྲུལ་གྱི་ཆོ་འཕྲུལ་དང་། ཀུན་རྗོད་པའི་ཆོ་འཕྲུལ་དང་། རྗེས་སུ་ བསྟན་པའི་ཆོ་འཕྲུལ་ལོ། །དེ་ལ་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ནི་འདི་ཡིན་ཏེ། དེ་ནས་བཅོམ་ལྡན་འདས་ཀྱིས་ཇི་ལྟར་ཐུགས་མཉམ་པར་བཞག་ན། ཉིད་ཀྱི་གདན་གྱི་ནང་དུ་མི་སྣང་བར་གྱུར་ཅིང་ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་ བཞི་མཛད་དེ། འདི་ལྟ་སྟེ་འཆག་པ་དང་། བཞེངས་པ་དང་། བཞུགས་པ་དང་། མནལ་བ་མཛད་དོ། །མེའི་ཏིང་ངེ་འཛིན་ལ་ཡང་སྙོམས་པར་འཇུག་པར་མཛད་དེ། མེའི་ཏིང་ངེ་འཛིན་ལ་སྙོམས་པར་ཞུགས་པ་ན་སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་རྣམ་པ་སྣ་ཚོགས་ དག་འབྱིན་པར་མཛད་དེ། འདི་ལྟ་སྟེ་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་གོ། །ཆོ་འཕྲུལ་ཟུང་དུ་ཡང་སྟོན་པར་མཛད་དེ། སྐུའི་སྨད་ནས་འབར་བར་མཛད་ལ། སྐུའི་སྟོད་ནས་ཆུ་གྲང་མོའི་རྒྱུན་འབེབས་པར་མཛད་དོ། །

  753. 67a

    སྐུའི་སྟོད་ནས་འབར་བར་མཛད་ལ་སྐུའི་སྨད་ནས་ཆུ་གྲང་མོའི་རྒྱུན་འབེབས་པར་མཛད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་ རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་མཛད་པ་རྣམས་བསྡུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ཏེ། དེ་ལ་འདི་ནི་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ཡིན་ནོ། །དེ་ལ་བཅོམ་ལྡན་འདས་ཀྱི་ཀུན་རྗོད་པའི་ཆོ་འཕྲུལ་ནི་འདི་ཡིན་ཏེ། དགེ་སློང་དག་ཁྱེད་ཀྱི་སེམས་ནི་འདི་ལྟ་བུའོ། །ཁྱེད་ཀྱི་ཡིད་ནི་འདི་ལྟ་བུའོ། །རྣམ་པར་ཤེས་པ་ནི་འདི་ལྟ་བུའོ། །འདི་ནི་རྟོགས་ཤིག །འདི་ནི་མ་རྟོགས་ཤིག །འདི་ནི་ཡིད་ལ་བྱོས་ཤིག །འདི་ནི་ཡིད་ལ་མ་བྱེད་ཅིག །འདི་ནི་སྤོངས་ཤིག །འདི་ནི་མ་སྤོངས་ཤིག །འདི་ནི་ ལུས་ཀྱིས་མངོན་སུམ་དུ་བྱས་ལ་རྫོགས་པར་བྱས་ཏེ་གནོས་ཤིག །འདི་ནི་བཅོམ་ལྡན་འདས་ཀྱི་ཀུན་རྗོད་པའི་ཆོ་འཕྲུལ་ཡིན་ནོ། །དེ་ལ་བཅོམ་ལྡན་འདས་ཀྱི་རྗེས་སུ་བསྟན་པའི་ཆོ་འཕྲུལ་ནི་འདི་ཡིན་ཏེ། དགེ་སློང་དག་འདི་ཐམས་ཅད་ནི་ཀུན་དུ་འབར་བ་ཡིན་ནོ། །དགེ་སློང་དག་ཐམས་ཅད་ ཀུན་དུ་འབར་བ་དེ་ཅི་ཡིན་ཞེ་ན། དགེ་སློང་དག་མིག་དང་། གཟུགས་དང་། མིག་གི་རྣམ་པར་ཤེས་པ་དང་། མིག་གི་འདུས་ཏེ་རེག་པ་ཀུན་དུ་འབར་བ་ཡིན་ཞིང་མིག་གི་འདུས་ཏེ་རེག་པའི་རྐྱེན་གྱིས་ནང་གི་ཚོར་བ་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན་སྡུག་ བསྔལ་བ་ཡང་མ་ཡིན་པ་འབྱུང་བ་གང་ཡིན་པ་དེ་ཡང་ཀུན་དུ་འབར་བ་ཡིན་ནོ། །དགེ་སློང་དག་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཆོས་དང་། ཡིད་ཀྱི་རྣམ་པར་ཤེས་པ་དང་། ཡིད་ཀྱི་འདུས་ཏེ་རེག་པ་ནི་ཀུན་དུ་འབར་བ་ཡིན་ཞིང་ཡིད་ཀྱི་འདུས་ཏེ་རེག་པའི་རྐྱེན་ གྱིས་ནང་གི་ཚོར་བ་བདེ་བའམ། སྡུག་བསྔལ་བའམ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་འབྱུང་བ་གང་ཡིན་པ་དེ་ཡང་ཀུན་དུ་འབར་བ་ཡིན་ནོ། །གང་གིས་ཀུན་དུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་དུ་འབར། སྐྱེ་བ་

  754. 67b

    དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་སྟེ། སྡུག་བསྔལ་གྱིས་ཀུན་དུ་འབར་བའོ་ཞེས་སྨྲའོ། །དེ་ལ་འདི་ནི་བཅོམ་ལྡན་འདས་ཀྱི་རྗེས་སུ་བསྟན་པའི་ཆོ་འཕྲུལ་ཡིན་ནོ། །ཆོས་ ཀྱི་རྣམ་གྲངས་འདི་བཤད་པ་ན་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་དེ་དག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ག་ཡཱ་ན་ག་ཡཱ་མགོའི་མཆོད་རྟེན་ལ་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སྦྱོང་ཐམས་ཅད་ཀྱང་ དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་བཞུགས་སོ། །རྒྱལ་པོ་ གཟུགས་ཅན་སྙིང་པོའི་ཞོ་ཤས་འཚོ་བའི་མི་རྣམས་ལྗོངས་རྒྱུ་བ་ན་ཤཱཀྱ་རྣམས་ཀྱི་གཞོན་ནུ་གངས་རིའི་ངོས། ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་བ་དེ་བྲམ་ཟེ་མཚན་མཁན་དང་ལྟས་མཁན་རྣམས་ཀྱིས། གལ་ཏེ་ ཁྱིམ་པར་གྱུར་ཏེ་ཁྱིམ་ན་གནས་ན་ནི་འཁོར་ལོས་སྒྱུར་བའི་རྒྱལ་པོ་ཆོས་དང་ལྡན་པའི་ཆོས་ཀྱི་རྒྱལ་པོ་མཐའ་བཞིར་རྣམ་པར་རྒྱལ་བ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་ཡིན་པར་འགྱུར་རོ། །འདི་ལྟ་སྟེ་འཁོར་ལོ་རིན་པོ་ཆེ་དང་། གླང་ པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡིན་ནོ། །དེ་ལ་བུ་སྟོང་ཡང་ཚང་བར་འབྱུང་བར་འགྱུར་ཏེ། དཔའ་བརྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པར་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་

  755. 68a

    བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་བར་ལུང་བསྟན་ཏོ་ཞེས་ཐོས་ སོ། །ཐོས་ནས་ཀྱང་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་གང་ན་བ་དེར་སོང་སྟེ་ཕྱིན་ནས། མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། བདག་ཅག་འདིར་ལྷའི་ཡུལ་ན་རྒྱུ་བ་ན་ཤཱཀྱ་རྣམས་ཀྱི་གཞོན་ ནུ་གངས་རིའི་ངོས། ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་བ་དེ་བྲམ་ཟེ་མཚན་མཁན་དང་ལྟས་མཁན་རྣམས་ཀྱིས། གལ་ཏེ་ཁྱིམ་པར་གྱུར་ཏེ་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ་ ཞེས་བྱ་བ་ནས། བདུན་པ་བློན་པོ་རིན་པོ་ཆེར་འགྱུར་རོ་ཞེས་བྱ་བའི་བར་དུའོ། །དེ་ལ་བུ་སྟོང་ཡང་ཚང་བར་འབྱུང་བར་འགྱུར་རོ་ཞེས་བྱ་བ་ནས་ཆོས་དང་མཐུན་ཞིང་སྙོམས་པར་ལེགས་པར་ཕབ་སྟེ་གནས་པར་འགྱུར་རོ་ཞེས་བྱ་བའི་བར་གོང་མ་བཞིན་དུའོ། །གལ་ཏེ་སྐྲ་དང་ཁ་སྤུ་བྲེགས་ ཏེ་གོས་ངུར་སྨྲིག་བགོས་ནས་ཞེས་བྱ་བ་ནས། འཇིག་རྟེན་དུ་སྒྲ་རྣམ་པར་གྲགས་པར་འགྱུར་བར་ལུང་བསྟན་པ་ཞིག་ཐོས་སོ་ཞེས་བྱ་བའི་བར་གོང་མ་བཞིན་དུའོ། །ལྷ་དེ་ཁུམ་ཤིག །ལྷ་བས་གཙོ་བོ་བས་ཆེས་གཙོ་བོར་འགྱུར་དུ་མཆིའོ། །གྲོང་པ་དག་ཤཱཀྱ་རྣམས་ཀྱི་གཞོན་ ནུ་གངས་རིའི་ངོས། ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་བ་ཞེས་བྱ་བའི་བར་གོང་མ་བཞིན་དུ་སྟེ། གལ་ཏེ་ཁྱིམ་པར་གྱུར་ཏེ་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོ་ཞེས་བྱ་བ་ནས་ཆོས་དང་མཐུན་ཞིང་སྙོམས་ པར་ལེགས་པར་ཕབ་སྟེ་གནས་པར་འགྱུར་རོ་ཞེས་བྱ་བའི་བར་གོང་མ་བཞིན་དུའོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

  756. 68b

    པའི་སངས་རྒྱས་སུ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་བ་དེ་ལྷ་ཁུམ་ཤིག །ལྷ་བས་གཙོ་བོ་བས་ཆེས་གཙོ་བོར་འགྱུར་དུ་མཆིའོ་ཞེས་ཁྱེད་ཅག་དེ་སྐད་མ་སྨྲ་ཤིག །དེ་ཅིའི་ཕྱིར་ཞེ་ན། གྲོང་པ་དག་ཤཱཀྱ་རྣམས་ཀྱི་གཞོན་ནུ་ཞེས་བྱ་བ་ནས་བྱུང་བ་ཞེས་བྱ་བའི་བར་གོང་མ་ བཞིན་དུ་སྟེ། གལ་ཏེ་འཁོར་ལོས་སྒྱུར་བའི་རྒྱལ་པོར་གྱུར་ན་དེའི་གཡོག་བྱའོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་རྫོགས་པའི་ སངས་རྒྱས་སུ་འཇིག་རྟེན་དུ་སྒྲ་རྣམ་པར་གྲགས་པར་གྱུར་ན་དེའི་ཉན་ཐོས་སུ་ཁས་བླང་བར་བྱའོ། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞི་ལ་འདུག་ནས་སྨོན་པའི་གཞི་ལྔ་སྨོན་པར་བྱེད་དེ། ཀྱེ་མ་བདག་གི་ཡུལ་དུ་འཇིག་རྟེན་གྱི་སྟོན་པ་ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འབྱུང་བ་ དང་། དེ་ལ་ཡང་བལྟ་བའི་ཕྱིར་བདག་ཉེ་བར་འགྲོ་བ་དང་། ཉེ་བར་སོང་བ་ན་དེས་ཀྱང་བདག་ལ་ཆོས་བཤད་པ་དང་། བདག་གིས་ཀྱང་ཆོས་བཤད་པ་དེ་ཤེས་པ་དང་། བདག་གིས་ཆོས་ཤེས་ནས་བསླབ་པ་བཅས་ཤིང་བསླབ་པ་དེ་ཡང་བདག་གིས་བླངས་ཏེ་གནས་ཀྱང་ཅི་མ་རུང་སྙམ་མོ། ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་དེ་སྟེང་གི་ཁང་བཟངས་ཀྱི་གཞི་ལ་འདུག་ནས་སྨོན་པའི་གཞི་ལྔ་སྨོན་པར་བྱེད་དེ། ཀྱེ་མའོ་བདག་གི་ཡུལ་དུ་འཇིག་རྟེན་གྱི་སྟོན་པ་དེ་བཞིན་གཤེགས་པ་ དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འབྱུང་བ་དང་། དེ་ལ་ཡང་བལྟ་བའི་

  757. 69a

    ཕྱིར་བདག་ཉེ་བར་འགྲོ་བ་དང་། ཉེ་བར་སོང་བ་ན་དེས་ཀྱང་བདག་ལ་ཆོས་བཤད་པ་དང་། བདག་གིས་ཀྱང་ཆོས་བཤད་པ་དེ་ཤེས་པ་དང་། བདག་གིས་ཆོས་ཤེས་ནས་བསླབ་པ་བཅས་ཤིང་བསླབ་པ་དེ་ཡང་བདག་གིས་བླངས་ཏེ་གནས་ཀྱང་ཅི་མ་རུང་སྙམ་མོ། །མ་ག་ དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་ཞོ་ཤས་འཚོ་བ་དག་ཅིག་ལྗོངས་རྒྱུ་བ་ན་ཤཱཀྱ་རྣམས་ཀྱི་གཞོན་ནུ་གངས་རིའི་ངོས། ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་བ་གང་ཡིན་པ་དེ་བྲམ་ཟེ་མཚན་མཁན་དང་ལྟས་མཁན་ ཞེས་བྱ་བ་ནས་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་ལུང་བསྟན་པ་ཞེས་བྱ་བའི་བར་གོང་མ་བཞིན་དུའོ། །དེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ མངོན་པར་རྫོགས་པར་སངས་རྒྱས་ནས། དེ་ག་ཡཱ་ན་ག་ཡཱ་མགོའི་མཆོད་རྟེན་ལ་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་སྟོང་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་བཞུགས་སོ་ཞེས་ཐོས་སོ། །ཐོས་ནས་ཀྱང་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་གང་ན་བ་དེར་དོང་སྟེ་ལྷགས་ནས། མ་ག་དྷཱའི་རྒྱལ་པོ་བཟོ་སྦྱངས་གཟུགས་ ཅན་སྙིང་པོ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། བདག་ཅག་འདི་ན་ལྷའི་ཡུལ་ན་རྒྱུ་བ་ན་ཤཱཀྱ་རྣམས་ཀྱི་གཞོན་ནུ་གང་ལགས་པ་དེ་ཞེས་བྱ་བ་ནས་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་བྱ་བའི་བར་གོང་མ་བཞིན་དུ་སྟེ། དེ་སྐྲ་དང་ཁ་སྤུ་བྲེགས་ཏེ་གོས་ངུར་ སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། དེ་ག་ཡཱ་ན་ག་ཡཱ་མགོའི་མཆོད་རྟེན་ལ་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་ཐམས་ཅད་ཀྱང་དགྲ་

  758. 69b

    བཅོམ་པ། ཟག་པ་ཟད་པ་ཞེས་བྱ་བ་ནས་ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་བཞུགས་སོ་ཞེས་བྱ་བའི་བར་དུ་སྟེ། ལྷ་དེ་ལ་བཀུར་སྟི་མཛོད་ཅིག་དང་། དེ་ལྟ་ན་ལྷ་གཙོ་བོ་བས་ཆེས་གཙོ་བོར་འགྱུར་རོ། །དེ་ནས་མ་ག་དྷཱའི་རྒྱལ་པོ་ བཟོ་སྦྱངས་གཟུགས་ཅན་སྙིང་པོས་མི་ཞིག་ལ་བསྒོ་བ། ཀྭའེ་ནང་རྗེ་ཚུར་ཁྱོད་བཅོམ་ལྡན་འདས་གང་ན་བ་དེར་སོང་ནས་ཁོ་བོའི་ཚིག་འདི་དག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱོས་ལ། གནོད་པ་ཆུང་ངམ། ཉམ་ང་བ་ཉུང་ངམ། འཚོ་འམ། བསྐྱོད་པ་ཡང་ ངམ། སྟོབས་དང་། བདེ་བ་དང་། སྐུ་ཉམས་དང་ལྡན་ནམ། རེག་པར་སྤྱོད་དམ་ཞེས་ཞུས་ལ་འདི་སྐད་ཅེས་ཀྱང་གསོལ་ཅིག །བདག་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་ཇི་སྲིད་འཚོའི་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་ཀྱིས་བསྙེན་བཀུར་བགྱིད་ན། བཅོམ་ལྡན་འདས་རྒྱལ་པོའི་ཁབ་ཏུ་གཤེགས་སུ་གསོལ་ཞེས་གསོལ་ཅིག །ལྷ་བཀའ་བཞིན་འཚལ་ཞེས་མི་དེས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལས་མཉན་ནས། བཅོམ་ལྡན་ འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ལ་མི་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱི་ཞབས་གཉིས་ལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ ཅན་སྙིང་པོ་མགོ་བོས་ཕྱག་འཚལ་ནས་གནོད་པ་ཆུང་ངམ། ཉམ་ང་བ་ཉུང་ངམ་ཞེས་བྱ་བ་ནས་རེག་པར་སྤྱོད་དམ་ཞེས་བྱ་བའི་བར་གོང་མ་བཞིན་ཏེ། སྙུན་གསོལ་ལགས་སོ། །ཀྱེ་མི་ཁྱོད་དང་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བདེ་བར་གྱུར་ཅིག །བཙུན་པ་མ་ ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་མཆིད་ནས་འདི་སྐད་ཅེས། བདག་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་ཇི་སྲིད་འཚོའི་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་

  759. 70a

    ཀྱིས་བསྙེན་བཀུར་བགྱིད་ན། བཅོམ་ལྡན་འདས་རྒྱལ་པོའི་ཁབ་ཏུ་གཤེགས་སུ་གསོལ་ཞེས་མཆི་ལགས་སོ། །བཅོམ་ལྡན་འདས་ཀྱིས་མི་དེ་ལ་ཅང་མི་གསུང་བས་གནང་ངོ་། །དེ་ནས་མི་དེས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ་ཞེས་བྱ་བ་ནས་ཡང་དག་ པའི་ཤེས་པས་སེམས་ཤིན་དུ་རྣམ་པར་གྲོལ་བ་ཞེས་བྱ་བའི་བར་ཤ་སྟག་དང་ཐབས་ཅིག་ཏུ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན་ཡུལ་མ་ག་དྷཱ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ན་ཡོད་པ་གང་ན་བ་དེར་གཤེགས་སོ། །དེ་ནས་བཅོམ་ལྡན་འདས་ལེགས་པར་ རབ་གནས་སུ་བྱོན་ནས་མ་ག་དྷཱ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ན་ཡོད་པ་ན་བཞུགས་སོ། །མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་སྔོན་ཐམས་ཅད་རལ་པ་ཅན་དུ་གྱུར་པའི་དགེ་སློང་སྟོང་གི་དགེ་སློང་གི་དགེ་འདུན་ཆེན་པོ་ཞེས་བྱ་ བ་ནས། སེམས་ཤིན་ཏུ་རྣམ་པར་གྲོལ་བ་ཞེས་བྱ་བའི་བར་དུ་སྟེ། མ་ག་དྷཱའི་ལྗོངས་རྒྱུ་ཤིང་གཤེགས་པ་ན། མ་ག་དྷཱ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་བྲང་གི་ཚལ་ན་ཡོད་པ་གང་ན་བ་དེར་གཤེགས་ཏེ། མ་ག་དྷཱ་པ་རྣམས་ཀྱི་མཆོད་རྟེན་ལེགས་པར་རབ་གནས་ལྟང་ བྲང་གི་ཚལ་ན་ཡོད་པ་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཤིང་རྟ་བཟང་པོའི་ནང་དུ་ཞུགས་ཏེ་འཁོར་བརྒྱ་ཕྲག་དུ་མ་དང་རྒྱལ་པོའི་ཁབ་ནས་བྱུང་ནས་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་བ་ན། དེའི་ཤིང་རྟའི་འཁོར་ ལོ་སའི་ནང་དུ་བྱིང་བར་གྱུར་ཏོ། །དེས་བསམས་པ་བདག་གིས་ལས་སྐྱོན་ཅན་ཆུང་ཟད་བྱས་པར་མ་གྱུར་གྲང་སྙམ་མོ། །ལྷ་རྣམས་ཀྱིས་དེ་ལ་སྨྲས་པ། རྒྱལ་པོ་ཆེན་པོ་ཁྱོད་ཀྱིས་ལས་སྐྱོན་ཅན་མ་བྱས་མོད་ཀྱི། ཁྱོད་དང་ལྷན་ཅིག་ལས་མཚུངས་པར་སྤྱོད་པ་གང་ཡིན་པ་དེ་དག་

  760. 70b

    བཙོན་ར་ན་འདུག་གིས་དེ་དག་ཐོན་ཅིག །རྒྱལ་པོས་སྨྲས་པ། གལ་ཏེ་དེ་ལྟ་ན་གདོན་ནོ་ཞེས་རྒྱལ་པོས་བཙོན་རྣམས་འདོན་དུ་བཅུག་གོ། །ཡང་རྒྱལ་པོ་ཕྱིར་འབྱུང་བར་བརྩམས་པ་ན་དེའི་དབུ་རྒྱན་སྒོ་ལ་ཐུག་གོ། །དེས་ཡང་བསམས་པ། བདག་གིས་ནི་གདོན་མི་ཟ་བར་ལས་སྐྱོན་ ཅན་ཞིག་བྱས་ཏེ། དེས་ན་བདག་ལ་ལྟས་ངན་པ་གཞན་སྒོ་ལ་དབུ་རྒྱན་ཐུག་པ་འདི་བྱུང་ངོ་སྙམ་མོ། །ལྷ་དེ་རྣམས་ཀྱིས་ཡང་སྨྲས་པ། རྒྱལ་པོ་ཆེན་པོ་ཁྱོད་ཀྱིས་ལས་སྐྱོན་ཅན་མ་བྱས་མོད་ཀྱི། ཁྱོད་དང་ལྷན་ཅིག་ལས་མཚུངས་པར་སྤྱོད་པ་གང་ཡིན་པ་དེ་དག་ཁ་ཅིག་ནི་འདུས། ཁ་ཅིག་ནི་ཡུལ་ཕྱོགས་གཞན་ག་གེ་མོ་ཞེས་བྱ་བ་དག་ན་ལས་ཀྱི་མཐའ་བྱེད་ཅིང་འདུག་པ་དེ་དག་སྦྲོན་ཅིག །རྒྱལ་པོས་ཡུལ་དེ་ན་གནས་པའི་སྐྱེ་བོའི་ཚོགས་ཐམས་ཅད་བཀུག་གོ། །དེ་ནས་རྒྱལ་པོ་གཟུགས་ཅན་སྙིང་པོ་ཤིང་རྟ་ཁྲི་ཉིས་སྟོང་དང་། ཞབས་འབྲིང་བ་རྟ་པའི་ཚོགས་ཁྲི་ བརྒྱ་སྟོང་དང་། མ་ག་དྷཱའི་བྲམ་ཟེ་དང་། ཁྱིམ་བདག་བརྒྱ་སྟོང་ཕྲག་དུ་མ་དང་ལྷན་ཅིག་རྒྱལ་པོའི་ཁབ་ནས་བྱུང་སྟེ། བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་ངོ་། །དེ་ཇི་ཙམ་བཞོན་པའི་སའི་བར་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་པ་ཁོ་ནས་ཀུན་དགའ་ར་བར་ཞུགས་སོ། །མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཐག་ཅི་ཙམ་ནས་བཅོམ་ལྡན་འདས་མཐོང་བའི་བར་དེ་ནས་རྒྱལ་པོའི་མཚན་མ་ལྔ་པོ་ཟེའུ་ཁ་དང་། གདུགས་དང་། རལ་གྲི་དང་ནོར་བུའི་རྔ་ཡབ་དང་། ལྷམ་ ཁྲ་བོ་རྣམས་ཕུད་དོ།། །།འདུལ་བ་གཞི། བམ་པོ་བརྒྱད་བཅུ་དགུ་པ། དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་པོའི་མཚན་མ་ལྔ་བཞག་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་ འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་རང་གི་མིང་ནས་ཕྱུང་སྟེ། ལན་གསུམ་དུ་གསོལ་པ། བཙུན་པ་བདག་ནི་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །བཙུན་པ་བདག་ནི་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །རྒྱལ་པོ་

  761. 71a

    ལགས་སོ། །རྒྱལ་པོ་ཆེན་པོ་དེ་དེ་བཞིན་ཏེ། དེ་དེ་བཞིན་ནོ། །རྒྱལ་པོ་ཆེན་པོ་ཁྱོད་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། །རྒྱལ་པོ་ཆེན་པོ་ཁྱོད་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། །རྒྱལ་པོ་ཡིན་ནོ། །རྒྱལ་ པོ་ཆེན་པོ་ཁྱོད་རང་གི་སྟན་ཇི་ལྟ་བ་ལ་འདུག་ཤིག །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །མ་ག་དྷཱའི་བྲམ་ཟེ་དང་ཁྱིམ་བདག་ཁ་ཅིག་གིས་ནི། བཅོམ་ལྡན་འདས་ཀྱི་ ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་ནི་བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་ནི་བཅོམ་ལྡན་འདས་ གང་ན་བ་དེ་ལོགས་སུ་ཐལ་མོ་སྦྱར་ཏེ་འཁོད་དོ། །ཁ་ཅིག་ནི་བཅོམ་ལྡན་འདས་རྒྱང་རིང་པོ་ནས་མཐོང་ནས་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །དེའི་ཚེ་ཚེ་དང་ལྡན་པ་ལྟེང་རྒྱས་འོད་སྲུང་འཁོར་དེ་ཉིད་དུ་འདུས་ཤིང་འདུག་པར་གྱུར་ཏོ། །དེ་ནས་མ་ག་དྷཱའི་བྲམ་ཟེ་དང་ཁྱིམ་བདག་རྣམས་ འདི་སྙམ་དུ་སེམས་ཏེ། ཅི་དགེ་སྦྱོང་ཆེན་པོ་ལྟེང་རྒྱས་འོད་སྲུང་རལ་པ་ཅན་གྱི་ཚངས་པར་སྤྱོད་པ་ལ་སྤྱོད་དམ། འོན་ཏེ་ལྟེང་རྒྱས་འོད་སྲུང་རལ་པ་ཅན་དགེ་སྦྱོང་ཆེན་པོའི་ཚངས་པར་སྤྱོད་པ་ལ་སྤྱོད་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་མ་ག་དྷཱའི་བྲམ་ཟེ་དང་། ཁྱིམ་བདག་ རྣམས་ཀྱི་སེམས་མཁྱེན་ནས་ཚེ་དང་ལྡན་པ་ལྟེང་རྒྱས་འོད་སྲུང་ལ་ཚིགས་སུ་བཅད་པའི་དབྱངས་ཀྱིས་དྲི་བ་རྨས་པ། ལྟེང་རྒྱས་གནས་པ་ཁྱོད་འདིར་ཅི་མཐོང་ན། །མེ་སྤངས་ནས་ནི་བརྟུལ་ཞུགས་འདི་དག་སྤྱོད། །ཁྱོད་ཀྱིས་ཅི་ལྟར་མེ་ཡི་མཆོད་སྤངས་པ། །དོན་དེ་འོད་སྲུང་ང་ལ་སྨྲ་ བར་གྱིས། །ལྟེང་རྒྱས་འོད་སྲུང་གིས་གསོལ་པ། འདི་ནི་ཁ་ཅིག་ཟས་སྐོམ་དེ་བཞིན་རོ། །འདོད་པ་དག་དང་བུད་མེད་ཁོ་ན་སྨྲ། །དེ་དག་ཐབས་ཀྱི་དྲི་མ་རབ་མཐོང་སྟེ། །དེས་བདག་མཆོད་སྦྱིན་མི་དགའ་སྲེག་བླུགས་མ་ནི། །ཁྱོད་ནི་འདོད་དང་བཟའ་དང་བཏུང་བ་དང་།

  762. 71b

    དེ་བཞིན་རོ་ལ་ཡིད་ནི་མི་དགའ་ན། །ལྷ་མི་འཇིག་རྟེན་ལ་ཅི་ཁྱོད་ཀྱི་ཡིད། །དགའ་བ་ཡིན་ནམ་འོད་སྲུང་དྲི་ཡིས་སྨྲོས། །ཕུང་པོ་མ་མཆིས་ཞི་བ་ཅི་མ་མཆིས། །འདོད་སྲེད་མ་ཆགས་གཞན་དུ་འགྱུར་མ་མཆིས། །གཞན་གྱིས་མི་བཀྲིའི་གོ་འཕང་མཆོག་མཐོང་སྟེ། །དེས་ བདག་མཆོད་སྦྱིན་མི་དགའ་སྲེག་བླུགས་མིན། །གོ་འཕང་མི་ཉམས་མཆོག་ནི་མ་མཐོང་བས། །མཆོད་སྦྱིན་བརྟུལ་ཞུགས་དང་ནི་ཞུགས་དག་གིས། །གྲོལ་སྙམ་བདག་གི་ཡིད་ནི་རྨོངས་གྱུར་ཏེ། །དམུས་ལོང་གྱུར་ནས་སྐྱེ་ཤི་རྗེས་བཞིན་འཐོམ། །སྐྱོབ་པ་གཙོ་བོ་མཆོག་གིས་ལེགས་ བཤད་པ། །གོ་འཕང་འདུས་མ་བྱས་ཏེ་གཟོད་མཐོང་ན། །ཐུབ་པ་གཽ་ཏམ་རྣམ་པར་འདྲེན་ཁྱོད་ནི། །སྐྱེ་བོ་ཕལ་ཆེན་དོན་བརྩོན་བདེན་ལ་ཞུགས། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱི་རྟོགས་པ་ལེགས་རྟོགས་ཏེ། །ཁྱོད་ཀྱིས་ཉེས་པར་བསམས་མ་ཡིན། །རབ་ ཏུ་ཕྱེ་བའི་ཆོས་རྣམས་ལ། །གཙོ་བོ་གང་ཡིན་དེ་བླངས་སོ། །འོད་སྲུང་འཁོར་སྐྱོ་བ་སྐྱེད་ཅིག །དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་བཅོམ་ལྡན་འདས་ཀྱིས་སྐབས་ཕྱེ་ནས་ཇི་ལྟར་སེམས་མཉམ་པར་བཞག་ན་རང་གི་སྟན་གྱི་ནང་དུ་མི་སྣང་བར་གྱུར་ཅིང་། ཤར་ཕྱོགས་ ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་བྱེད་དེ། འདི་ལྟ་སྟེ། འཆག་པ་དང་། འགྲེང་བ་དང་། འདུག་པ་དང་། ཉལ་བ་བྱེད་དོ། །མེའི་ཏིང་ངེ་འཛིན་ལ་ཡང་སྙོམས་པར་འཇུག་པར་བྱེད་དེ། མེའི་ཏིང་ངེ་འཛིན་ལ་སྙོམས་པར་ཞུགས་པ་ན་ཚེ་ དང་ལྡན་པ་ལྟེང་རྒྱས་འོད་སྲུང་གི་ལུས་ལས་འོད་ཟེར་རྣམ་པ་སྣ་ཚོགས་འབྱིན་པར་བྱེད་དེ། འདི་ལྟ་སྟེ་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་དག་གོ། །ཆོ་འཕྲུལ་ཟུང་དུ་ཡང་སྟོན་པར་བྱེད་དེ། ལུས་ཀྱི་སྨད་ནས་འབར་ བར་བྱེད་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབེབས་པར་བྱེད་དོ། །ལུས་ཀྱི་སྟོད་ནས་འབར་བར་བྱེད་ལ་ལུས་ཀྱི་སྨད་ནས་ཆུ་གྲང་མོའི་རྒྱུན་འབེབས་པར་བྱེད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་

  763. 72a

    ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དག་བསྡུས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་བའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནི་བདག་གི་སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །བཅོམ་ལྡན་འདས་ནི་བདག་གི་སྟོན་པ་ལགས་སོ། །སྟོན་པ་ལགས་སོ། ། བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །ཉན་ཐོས་ལགས་སོ། །འོད་སྲུང་དེ་དེ་བཞིན་ནོ། །དེ་དེ་བཞིན་ཏེ། འོད་སྲུང་ང་ནི་ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །འོད་སྲུང་ང་ནི་ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །འོད་སྲུང་ཁྱོད་ རང་གི་སྟན་ཇི་ལྟ་བ་ལ་འདུག་ཤིག །དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་མ་ག་ངྷཱའི་བྲམ་ཟེ་དང་ཁྱིམ་བདག་རྣམས་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ནི་ལྟེང་རྒྱས་འོད་སྲུང་ རལ་པ་ཅན་གྱི་ཚངས་པར་སྤྱོད་པ་ལ་མི་སྤྱོད་ཀྱི། ལྟེང་རྒྱས་འོད་སྲུང་རལ་པ་ཅན་ཉིད་དགེ་སྦྱོང་ཆེན་པོའི་ཚངས་པར་སྤྱོད་པ་ལ་སྤྱོད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་བཀའ་སྩལ་པ། རྒྱལ་པོ་ཆེན་པོ་གཟུགས་ལ་སྐྱེ་བ་ཡང་ ཡོད། འཇིག་པ་ཡང་ཡོད་དེ། དེའི་སྐྱེ་བ་དང་འཇིག་པ་ཡང་རིག་པར་བྱའོ། །རྒྱལ་པོ་ཆེན་པོ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་སྐྱེ་བ་ཡང་ཡོད། འཇིག་པ་ཡང་ཡོད་དེ། དེའི་སྐྱེ་བ་དང་འཇིག་པ་ཡང་རིག་པར་བྱའོ། །རྒྱལ་པོ་ཆེན་པོ་ རིགས་ཀྱི་བུས་གཟུགས་ཀྱི་སྐྱེ་བ་དང་འཇིག་པའི་ཆོས་ཉིད་རིག་ནས་གཟུགས་དེ་ཡོངས་སུ་ཤེས་སོ། །རྒྱལ་པོ་ཆེན་པོ་རིགས་ཀྱི་བུས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་སྐྱེ་བ་དང་འཇིག་པའི་ཆོས་ཉིད་རིག་ནས་རྣམ་པར་ཤེས་པ་དེ་ཡོངས་སུ་ཤེས་སོ། །རྒྱལ་

  764. 72b

    པོ་ཆེན་པོ་རིགས་ཀྱི་བུས་གཟུགས་ཡོངས་སུ་ཤེས་ན་གཟུགས་ལ་བདག་གམ་བདག་གིར་ཁས་མི་ལེན། མི་འཛིན་ལྷག་པར་མི་གནས། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ་རིགས་ཀྱི་བུས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡོངས་སུ་ ཤེས་ན་བདག་གམ་བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ་རིགས་ཀྱི་བུས་གཟུགས་ལ་བདག་གམ། བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་ན་ཚད་མེད་ཅིང་ གྲངས་མེད་པའི་མྱ་ངན་ལས་འདས་པ་ཡིན་ནོ་ཞེས་སྨྲའོ། །རྒྱལ་པོ་ཆེན་པོ་རིགས་ཀྱི་བུས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་བདག་གམ། བདག་གིར་ཁས་མི་ལེན། མི་འཛིན། ལྷག་པར་མི་གནས། མངོན་པར་ཞེན་པར་མི་བྱེད་ན་ཚད་ མེད་ཅིང་གྲངས་མེད་པའི་མྱ་ངན་ལས་འདས་པ་ཡིན་ནོ་ཞེས་སྨྲའོ། །དེ་ནས་མ་ག་དྷཱའི་བྲམ་ཟེ་དང་ཁྱིམ་བདག་རྣམས་འདི་སྙམ་དུ་སེམས་ཏེ། གལ་ཏེ་གཟུགས་བདག་མ་ཡིན། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་མ་ཡིན་ན། འོ་ན་བདག་གམ། སེམས་ཅན་ནམ། སྲོག་གམ། སྐྱེ་བ་པོའམ། གསོ་བ་པོའམ། གང་ཟག་གམ། ཤེད་ལས་སྐྱེས་སམ། ཤེད་བུའམ། བྱེད་པ་པོའམ། བྱེད་དུ་འཇུག་པ་པོའམ། ཤེས་པ་པོའམ། ཀུན་ནས་ཤེས་པ་པོའམ། སློང་བ་པོའམ། ཀུན་ནས་སློང་བ་པོའམ། སྨྲ་བ་པོའམ། ཚོར་བ་པོའམ། ཀུན་ནས་ཚོར་བ་པོ་གང་ཡིན་པ་ནམ་ཡང་མ་བྱུང་འབྱུང་བར་མི་འགྱུར་ཞིང་ད་ལྟ་ཡང་ཡོད་པ་མ་ཡིན་ན། གང་གིས་དེ་དང་དེར་དགེ་བ་དང་སྡིག་པའི་ལས་བྱས་པ་རྣམས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་ཞིང་གང་གིས་ཕུང་པོ་འདི་བོར་ཏེ་ཕུང་པོ་གཞན་དང་ཉིང་ མཚམས་སྦྱོར་བ་དེ་སུ་ཞིག་ཡིན་པར་འགྱུར་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་མ་ག་དྷཱའི་བྲམ་ཟེ་དང་ཁྱིམ་བདག་རྣམས་ཀྱི་སེམས་མཁྱེན་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་བདག་བདག་ཅེས་བྱ་བ་ནི་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པས་

  765. 73a

    བཏགས་པའི་རྗེས་སུ་ལྷུང་བ་ཡིན་ཏེ། འདི་ལ་བདག་ཅེའམ་བདག་གི་མེད་ཀྱི། དགེ་སློང་དག་སྐྱེ་བ་ན་སྡུག་བསྔལ་འདི་སྐྱེ་ཞིང་འགག་པ་ན་ཡང་སྡུག་བསྔལ་འགག་གོ། །སྐྱེ་བ་ན་འདུ་བྱེད་རྣམས་སྐྱེ་ཞིང་འགག་པ་ན་འདུ་བྱེད་རྣམས་འགག་པར་འགྱུར་ཏེ། རྒྱུ་དང་རྐྱེན་དེ་ ལ་བརྟེན་ནས་སེམས་ཅན་རྣམས་ཀྱི་འདུ་བྱེད་ཀྱི་རྒྱུད་འཇུག་གོ། །དགེ་སློང་དག་དེ་བཞིན་གཤེགས་པས་འདུ་བྱེད་ཀྱི་རྒྱུད་ཉིང་མཚམས་སྦྱོར་བ་ཐུགས་སུ་ཆུད་ནས་སེམས་ཅན་རྣམས་ཀྱི་འཆི་འཕོ་དང་སྐྱེ་བ་འདོགས་པར་མཛད་དེ། དགེ་སློང་དག་ངས་ལྷའི་སྤྱན་རྣམ་པར་དག་པ་མིའི་ལས་ འདས་པས་སེམས་ཅན་རྣམས་ཀྱི་འཆི་འཕོ་དང་། སྐྱེ་བ་དང་ཁ་དོག་བཟང་པོ་དང་། ཁ་དོག་ངན་པ་དང་། དམན་པ་དང་། གྱ་ནོམ་པ་དང་། བདེ་འགྲོ་དང་། ངན་འགྲོར་འགྲོ་བ་ཡང་གཟིགས་སོ། །ལས་ཇི་ལྟ་བ་བཞིན་ཉེ་བར་འགྲོ་བའི་སེམས་ཅན་རྣམས་ཡང་དག་པ་ཇི་ལྟ་བ་བཞིན་ དུ་རབ་ཏུ་མཁྱེན་ཏེ། སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན། ངག་དང་ཡིད་ཀྱི་ཉེས་པར་སྤྱོད་པ་དང་ལྡན། འཕགས་པ་རྣམས་ལ་སྐུར་པ་འདེབས་པ་དང་། ལོག་པར་ལྟ་བ་ཡིན་ཏེ། ལོག་པར་ལྟ་བའི་ལས་དང་ཆོས་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་ ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་དང་ལྡན། ངག་དང་ཡིད་ཀྱི་ལེགས་པར་སྤྱོད་པ་དང་ལྡན། འཕགས་པ་རྣམས་ལ་སྐུར་བ་མི་འདེབས་པ་དང་། ཡང་དག་པར་ལྟ་ བ་ཡིན་ཏེ། ཡང་དག་པར་ལྟ་བའི་ལས་དང་ཆོས་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་སུ་སྐྱེ་བར་འགྱུར་རོ་ཞེས་བྱ་བར་མཁྱེན་ཏོ། །དགེ་སློང་དག་ངས་དེ་ལྟར་མཁྱེན་ཅིང་དེ་ལྟར་གཟིགས་པས་ང་འདི་སྐད་ཅེས་བདག་གམ། སེམས་ ཅན་ནམ། སྲོག་གམ། སྐྱེ་བ་པོའམ། གསོ་བ་པོའམ། གང་ཟག་གམ། ཤེད་ལས་སྐྱེས་སམ། ཤེད་བུ་འམ། བྱེད་པ་པོ་འམ། བྱེད་དུ་འཇུག་པ་པོའམ། ཤེས་པ་པོ་འམ། ཀུན་ནས་ཤེས་པ་པོའམ། སློང་བ་པོའམ། ཀུན་ནས་སློང་བ་པོའམ། སྨྲ་བ་པོའམ།

  766. 73b

    ཚོར་བ་པོའམ། ཀུན་ནས་ཚོར་བ་པོ་གང་ཡིན་པ་ནི་ནམ་ཡང་མ་བྱུང་འབྱུང་བར་མི་འགྱུར་ཞིང་ད་ལྟར་ཡང་ཡོད་པ་མ་ཡིན་པས་གང་གིས་དེ་དང་དེར་དགེ་བ་དང་། སྡིག་པའི་ལས་བྱས་པའི་ལས་ཀྱི་རྣམ་པར་སྨིན་པ་སོ་སོར་ཉམས་སུ་མྱོང་ཞིང་གང་གིས་ཕུང་པོ་འདི་བོར་ཏེ་ཕུང་པོ་གཞན་དང་ཉིང་ མཚམས་སྦྱོར་བ་དེ་ཆོས་སུ་བརྡར་བཏགས་པ་མ་གཏོགས་པ་འདི་ཡིན་ནོ་ཞེས་མི་གསུང་ངོ་། །དེ་ལ་ཆོས་ཀྱི་བརྡར་བཏགས་པ་ནི་འདི་ཡིན་ཏེ། འདི་ལྟ་སྟེ་འདི་ཡོད་པས་འདི་ཡོད། འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་ པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་ པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ་འདི་མེད་པས་འདི་མེད་ ལ། འདི་འགགས་པས་འདི་འགག་པར་འགྱུར་ཏེ། འདི་ལྟ་སྟེ་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག ། སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་སྟེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་འདུ་བྱེད་རྣམས་ནི་སྡུག་བསྔལ་ལོ། །མྱ་ངན་ལས་

  767. 74a

    འདས་པ་ནི་ཞི་བའོ། །རྒྱུ་ཀུན་འབྱུང་བས་སྡུག་བསྔལ་ཀུན་འབྱུང་ཞིང་རྒྱུ་འགགས་པས་སྡུག་བསྔལ་འགག་སྟེ། རྒྱུན་བཅད་པས་མི་འབྱུང་ཞིང་ཉིང་མཚམས་སྦྱོར་བ་མེད་པར་འགགས་པ་འདི་ཉིད་ནི་སྡུག་བསྔལ་གྱི་མཐའ་ཡིན་ནོ། །དགེ་སློང་དག་དེ་ལ་ཡོངས་སུ་ མྱ་ངན་ལས་འདས་པ་གང་ཞེ་ན། གཞན་མེད་ཀྱི་སྡུག་བསྔལ་འགགས་པ་གང་ཡིན་པ་དེ་ནི་ཉེ་བར་ཞི་བ། དེ་ནི་བསིལ་བར་གྱུར་པ་དེ་ནི་ནུབ་པ་སྟེ། དགེ་སློང་དག་ཞི་བའི་གནས་འདི་ཡིན་ཏེ། འདི་ལྟ་སྟེ་ཕུང་པོ་ཐམས་ཅད་སྤངས་པ། སྲེད་པ་ཟད་པ། འདོད་ཆགས་དང་བྲལ་བ། འགགས་པ། མྱ་ངན་ལས་འདས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ལན་གཉིས་སུ་བཀའ་སྩལ་པ། རྒྱལ་པོ་ཆེན་པོ་ཇི་སྙམ་དུ་སེམས། གཟུགས་རྟག་གམ་མི་རྟག །བཙུན་པ་འདི་མི་རྟག་ལགས་སོ། ། མི་རྟག་པ་གང་ཡིན་པ་དེ་སྡུག་བསྔལ་ཡིན་ནམ། སྡུག་བསྔལ་མ་ཡིན། བཙུན་པ་འདི་ནི་སྡུག་བསྔལ་ལགས་སོ། །མི་རྟག་པ་སྡུག་བསྔལ་བ་འགྱུར་བའི་ཆོས་ཅན་གང་ཡིན་པ་དེ་ལ་ཅི་ག་འཕགས་པ་ཉན་ཐོས་ཐོས་པ་དང་ལྡན་པ་འདི་ནི་བདག་ཡིན་ནོ། །བདག་ནི་འདི་ཡིན་ནོ། འདི་ནི་བདག་གི་བདག་གོ་ཞེས་བདག་ཏུ་ཁས་ལེན་པར་བྱེད་དམ། བཙུན་པ་མ་ལགས་སོ། །རྒྱལ་པོ་ཆེན་པོ་ཇི་སྙམ་དུ་སེམས། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྟག་གམ་མི་རྟག །བཙུན་པ་འདི་ནི་མི་རྟག་ལགས་སོ། །མི་རྟག་པ་གང་ ཡིན་པ་དེ་སྡུག་བསྔལ་ཡིན་ནམ། སྡུག་བསྔལ་མ་ཡིན། བཙུན་པ་འདི་ནི་སྡུག་བསྔལ་ལགས་སོ། །མི་རྟག་པ་སྡུག་བསྔལ་བ་འགྱུར་བའི་ཆོས་ཅན་གང་ཡིན་པ་དེ་ལ་ཅི་ག་འཕགས་པ་ཉན་ཐོས་ཐོས་པ་དང་ལྡན་པ་འདི་ནི་བདག་ཡིན་ནོ། །བདག་ནི་འདི་ཡིན་ནོ། །འདི་ནི་བདག་གི་ བདག་གོ་ཞེས་བདག་ཏུ་ཁས་ལེན་པར་བྱེད་དམ། བཙུན་པ་མ་ལགས་སོ། །རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་གཟུགས་གང་ཡིན་པ་ཅི་ཡང་རུང་། འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱིའི་འམ། རགས་པའམ། ཕྲ་བའམ། ངན་པའམ།

  768. 74b

    གྱ་ནོམ་པའམ། གང་དག་ཐག་རིང་བའམ། གང་དག་ཐག་ཉེ་བ་ཡང་རུང་སྟེ། དེ་ཐམས་ཅད་ལ་འདི་ནི་བདག་མ་ཡིན་ནོ། །བདག་ནི་འདི་མ་ཡིན་ནོ། །འདི་ནི་བདག་གི་བདག་མ་ཡིན་ནོ་ཞེས་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །རྒྱལ་པོ་ཆེན་ པོ་དེ་ལྟ་བས་ན་ཁྱོད་ཀྱིས་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་གང་ཅི་ཡང་རུང་། འདས་པའམ། མ་འོངས་པའམ། ད་ལྟར་བྱུང་བའམ། ནང་གི་འམ། ཕྱིའི་འམ། རགས་པ་འམ། ཕྲ་བའམ། ངན་པའམ། གྱ་ནོམ་པའམ། གང་དག་ཐག་རིང་ བའམ། གང་དག་ཐག་ཉེ་བ་ཡང་རུང་སྟེ། དེ་དག་ཐམས་ཅད་ལ་འདི་ནི་བདག་མ་ཡིན་ནོ། །བདག་ནི་འདི་མ་ཡིན་ནོ། །འདི་ནི་བདག་གི་བདག་མ་ཡིན་ནོ་ཞེས་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །རྒྱལ་པོ་ཆེན་པོ་འཕགས་པ་ཉན་ཐོས་ཐོས་པ་དང་ ལྡན་པ་དེ་ལྟར་མཐོང་བ་ནི་གཟུགས་ལ་ཡང་ཡིད་འབྱུང་བར་འགྱུར་རོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་ཡང་ཡིད་འབྱུང་བར་འགྱུར་རོ། །ཡིད་བྱུང་ན་འདོད་ཆགས་དང་འབྲལ་ལོ། །འདོད་ཆགས་དང་བྲལ་ན་རྣམ་པར་གྲོལ་བར་འགྱུར་རོ། ། རྣམ་པར་གྲོལ་ན་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་རྣམ་པར་གྲོལ་བའི་ཡེ་ཤེས་མཐོང་བར་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ དང་། ལྷ་བརྒྱད་ཁྲི་དང་། མ་ག་དྷཱའི་བྲམ་ཟེ་དང་། ཁྱིམ་བདག་འབུམ་ཕྲག་དུ་མ་ལ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས།

  769. 75a

    བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་འཕགས་སོ། །མངོན་པར་འཕགས་སོ། །བདག་བཙུན་པ་བཅོམ་ལྡན་འདས་དང་། ཆོས་དང་། དགེ་སློང་གི་དགེ་ འདུན་ལ་སྐྱབས་སུ་མཆི་ལགས་ཀྱིས། དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །བཅོམ་ལྡན་འདས་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་དུ་བཅས་ པ་ལ་ཇི་སྲིད་འཚོའི་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྙེན་བཀུར་བགྱིད་ལགས་ན། བཅོམ་ལྡན་འདས་རྒྱལ་པོའི་ཁབ་ཏུ་གཤེགས་སུ་གསོལ། བཅོམ་ལྡན་འདས་ཀྱིས་མ་ག་དྷཱའི་རྒྱལ་ པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ་། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་ སྔ་ནས་སོང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་འཁོར་དང་བཅས་པས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་བཅོམ་ ལྡན་འདས་ཀྱི་སྤྱན་སྔར་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་གཟུགས་ཅན་སྙིང་པོ་འཁོར་དང་བཅས་པས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་ བར་འགྱུར་བའི་ལས་དག་བྱས་ཤིང་བསགས་པ་ནི་རྒྱལ་པོ་གཟུགས་ཅན་སྙིང་པོ་འཁོར་དང་བཅས་པས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་

  770. 75b

    འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་དག་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་ བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པ་ན་འཇིག་རྟེན་དུ་སྟོན་པ་རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྩིབས་ཀྱི་ལྟེ་བ་ཞེས་བྱ་བ་བྱུང་ནས་དེས་སངས་རྒྱས་ཀྱི་མཛད་པ་མཐའ་དག་མཛད་དེ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །སྐྱེ་བོའི་ཚོགས་ ཆེན་པོས་དེའི་སྐུ་གདུང་ལ་སྐུ་གདུང་གི་མཆོད་པ་བྱས་ནས་ས་ཕྱོགས་དབེན་ཞིང་ཡངས་པ་ཞིག་ཏུ་མཆོད་རྟེན་ཆེན་པོ་བརྩིགས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་ཀྲྀ་ཀཱི་ཞེས་བྱ་བ་ཁྲོམ་གྱི་རུ་བ་བྱེ་བ་ཕྲག་བཅྭ་བརྒྱད་དང་སྟེང་གི་ནམ་མཁའ་ལས་ཡུལ་རྒྱུ་བ་ན་མཆོད་རྟེན་དེ་དང་ཉེ་བ་ཞིག་ཏུ་ཕྱིན་ པ་དང་། སངས་རྒྱས་ལ་མངོན་པར་དད་པའི་ལྷ་རྣམས་ཀྱིས་དེའི་འཁོར་ལོ་རིན་པོ་ཆེ་ཐོགས་པར་བྱས་སོ། །རྒྱལ་པོ་ཀྲྀ་ཀཱིས་བསམས་པ། འདི་ལྟར་འཁོར་ལོ་རིན་པོ་ཆེ་འདི་ཐོགས་པ་ལས་ན་བདག་གི་བསོད་ནམས་ཟད་པར་མ་གྱུར་གྲང་སྙམ་མོ། །དེ་ལ་ལྷ་རྣམས་ཀྱིས་སྨྲས་པ། རྒྱལ་པོ་ཁྱོད་ཀྱི་བསོད་ནམས་མ་ཟད་མོད་ཀྱི་ཕྱོགས་འདི་ན་ཡང་དག་པར་རྫོགས་པའི་སངས་རྒྱས་རྩིབས་ཀྱི་ལྟེ་བའི་མཆོད་རྟེན་བཞུགས་པས། དེས་ན་འཁོར་ལོ་རིན་པོ་ཆེ་འདི་དེའི་སྟེང་དུ་མི་འགྲོ་ཞིང་ཐོགས་པར་གྱུར་ཏོ། །དེ་ནས་རྒྱལ་པོ་ཀྲྀ་ཀཱི་ཁྲོམ་གྱི་རུ་པ་བྱེ་བ་ཕྲག་བཅྭ་བརྒྱད་དང་ལྷན་ ཅིག་བབས་ན་ཇི་ཙམ་ན་མཆོད་རྟེན་བྱི་དོར་མ་བྱས་པ་དེ་མཐོང་ནས་འཁོར་དང་བཅས་པ་དེས་བྱི་དོར་བྱས་ཏེ་དྲི་དང་། བྱུག་པ་དང་། བདུག་པ་དང་། ཕྱེ་མ་དང་། རོལ་མོ་རྣམས་ཀྱིས་མཆོད་པ་བྱས་ནས་འཁོར་དང་བཅས་པས་དྲུང་དུ་བཏུད་དེ་སྨོན་ལམ་བཏབ་པ། བདག་གིས་ཡོན་གནས་དམ་

  771. 76a

    པ་འདི་ལྟ་བུ་ལ་བྱ་བ་བྱས་པ་གང་ཡིན་པའི་དགེ་བའི་རྩ་བ་འདིས་བདག་གིས་ཡོན་ཏན་འདི་ལྟ་བུ་དག་ཐོབ་པར་འགྱུར་བ་དང་། སྟོན་པ་འདི་ལྟ་བུ་མཉེས་པར་བྱེད་ཅིང་མི་མཉེས་པར་མི་བྱེད་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ འཁོར་ལོས་སྒྱུར་བའི་རྒྱལ་པོ་ཀྲྀ་ཀཱི་ཞེས་བྱ་བ་འཁོར་དང་བཅས་པ་གང་ཡིན་པ་དེ་ནི་དེའི་ཚེ་དེའི་དུས་ན་རྒྱལ་པོ་གཟུགས་ཅན་སྙིང་པོ་འདི་ཉིད་ཡིན་ཏེ། འཁོར་དང་བཅས་པ་དེས་ཡང་དག་པར་རྫོགས་པའི་སངས་རྒྱས་རྩིབས་ཀྱི་ལྟེ་བའི་མཆོད་རྟེན་ལ་མཆོད་པ་བྱས་པ་གང་ཡིན་པ་དེའི་ ལས་ཀྱི་རྣམ་པར་སྨིན་པས་འདིས་བསྐལ་པ་བྱེ་བ་བརྒྱ་སྟོང་ཕྲག་མང་པོར་ལྷ་དང་མི་རྣམས་ཀྱི་བདེ་བ་ཁྱད་པར་དུ་འཕགས་པ་ཉམས་སུ་མྱོང་བར་གྱུར་ཏོ། །འདི་ལྟ་བུའི་ཡོན་ཏན་དག་ཐོབ་པར་གྱུར་ཅིག་ཅེས་སྨོན་ལམ་བཏབ་པ་གང་ཡིན་པ་དེས་ནི་ངའི་སྤྱན་སྔར་འཁོར་དང་བཅས་པ་བདེན་པ་ མཐོང་བར་བྱས་སོ། །སྟོན་པ་འདི་ལྟ་བུ་མཉེས་པར་བྱེད་ཅིང་མི་མཉེས་པར་མི་བྱེད་པར་གྱུར་ཅིག་ཅེས་སྨོན་ལམ་བཏབ་པ་གང་ཡིན་པས་ནི་ང་ཉིད་དང་ཡང་དག་པར་རྫོགས་པའི་སངས་རྒྱས་རྩིབས་ཀྱི་ལྟེ་བར་ལྷན་ཅིག་མཉམ་པར་མཉམ་སྟེ། སྟོབས་མཉམ་པ་དང་། ཤུགས་མཉམ་པ་དང་ བརྩོན་འགྲུས་མཉམ་པ་དང་། ཐོབ་པ་མཉམ་པ་ཡིན་ཏེ། འདིས་སྟོན་པ་ང་མཉེས་པར་བྱས་ཀྱི། མི་མཉེས་པར་མ་བྱས་པ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ནི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་ དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །དགེ་སློང་རྣམས་ཐེ་ཚོམ་ སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ལྟེང་རྒྱས་འོད་སྲུང་གིས་ལས་ཅི་ཞིག་བགྱིས་ན། དེས་ན་ཆོ་འཕྲུལ་ལྔ་བརྒྱས་བཏུལ་བར་གྱུར་ལགས། ཆུ་ཀླུང་འོད་སྲུང་དང་། ག་ཡཱ་འོད་སྲུང་དག་ནི་ཚེགས་ཆུང་དུས་བཏུལ་

  772. 76b

    པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་ པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་བྱུང་ནས། དེ་བཱ་རཱ་ཎ་སཱིའི་གྲོང་ཁྱེར་དང་ཉེ་བ་ཞིག་ཏུ་བརྟེན་ཏེ་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །དེས་སངས་རྒྱས་ཀྱི་མཛད་པ་མཐའ་དག་མཛད་ནས། ཤིང་ཟད་པའི་མེ་བཞིན་དུ་ཕུང་པོའི་ལྷག་མ་མེད་པའི་ མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེའི་སྐུ་གདུང་རྒྱལ་པོ་ཀྲྀ་ཀཱིས་སྤོས་ཀྱི་ཤིང་ཐམས་ཅད་སྤུངས་ཏེ་སྤུངས་པས་བསྲེགས་ནས་མེ་འོ་མས་བསད་དེ། སྐུ་གདུང་དེ་དག་ནི་རིན་པོ་ཆེ་སྣ་བཞི་ལས་བྱས་པའི་བུམ་པའི་ནང་དུ་བླུགས་ནས་ས་ཕྱོགས་དབེན་ ཞིང་ཡངས་པར་སྐུ་གདུང་གི་མཆོད་རྟེན་འཕང་དུ་དཔག་ཚད་གཅིག་ལ་རྒྱར་དཔག་ཚད་ཕྱེད་པ་ཞིག་རྩིག་ཏུ་བཅུག་གོ། །དེའི་ཚེ་བཱ་རཱ་ཎ་སཱི་ན་ཁྱིམ་བདག་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ ཀྱི་བུ་ལ་ནོར་གྱིས་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་རིམ་གྱིས་ཁྱེའུ་གསུམ་བཙས་ སོ། །ཇི་ཙམ་ན་ཁྱིམ་བདག་དེ་ནད་ཀྱིས་ཐེབས་ནས་དེ་རྩ་བ་དང་། སྡོང་བུ་དང་། ལོ་མ་དང་། འདབ་མ་དང་། འབྲས་བུའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ནས་དེ་འཆི་བའི་ཆོས་དང་ལྡན་པར་གྱུར་ཏོ། །དེ་ནས་དེའི་བུ་རྣམས་ཀྱིས་རས་སྔོན་པོ་དང་། སེར་

  773. 77a

    པོ་དང་། དམར་པོ་དང་། དཀར་པོས་ཁྱོགས་བརྒྱན་ནས་དུར་ཁྲོད་དུ་ཁྱེར་ཏེ་བསྲེགས་སོ། །དེ་ནས་ཕ་ལ་ཕའི་བྱ་བ་བྱས་ནས་མྱ་ངན་སངས་ཏེ། ནོར་སོ་སོར་བགོ་བར་གྲོས་བྱ་བར་བརྩམས་ནས་ཕུ་བོ་ཤོས་ཀྱིས་སྨྲས་པ། ནོར་བགོའོ། །ནུ་བོ་སྤུན་གཉིས་མ་དད་དོ། ། དེས་གལ་གྱིས་གཅུས་པ་དང་དེ་གཉིས་ཀྱིས་སྨྲས་པ། གལ་ཏེ་དེ་ལྟ་ན་རེ་ཞིག་འཇིག་རྟེན་ཕ་རོལ་གྱི་ལམ་རྒྱགས་བླངས་ལ་ཕྱིས་བགོ་བར་བྱའོ། །དེས་སྨྲས་པ། ཅི་དག་བྱ། དེ་གཉིས་ཀྱིས་སྨྲས་པ། ཡང་དག་པར་རྫོགས་པའི་སངས་རྒྱས་འོད་སྲུང་འདི་ལ་མཆོད་དོ། །དེ་དད་པ་ཆུང་བ་ ཞིག་པས་དེས་བཀའ་འཁོར་དུ་ཁས་བླངས་སོ། །དེ་ནས་དེ་རྣམས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་ལ་མཆོད་ནས་སྨོན་ལམ་གདབ་པར་བརྩམས་ཏེ། གཉིས་ཀྱིས་འདི་སྐད་ཅེས་སྨྲས་སོ། །དགེ་བའི་རྩ་བ་འདིས་བདག་ཅག་གཉིས་ཡང་དག་པར་རྫོགས་པའི་སངས་ རྒྱས་བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་བྱ་བ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་གང་ཡིན་པ་དེའི་བསྟན་པ་ལ་ བདག་ཅག་རབ་ཏུ་བྱུང་ནས་ཁྱད་པར་ཐོབ་པར་གྱུར་ཅིག་ཅེས་བཏབ་བོ། །དེ་གཉིས་ཀྱིས་སྨོན་ལམ་བཏབ་པ་ཕུ་བོ་དེས་ཐོས་ནས་དྲུང་དུ་བཏུད་དེ། སྨོན་ལམ་གདབ་པར་བརྩམས་པ། བདག་ནི་དད་པ་ཆུང་ལ་དམུ་རྒོད་ཡིན་པས་དགེ་བའི་རྩ་བ་འདིས་ན་བདག་ཀྱང་བཅོམ་ལྡན་འདས་ཤཱཀྱ་ཐུབ་ པ་དེས་ཆོ་འཕྲུལ་ལྔ་བརྒྱས་བཏུལ་ནས་རབ་ཏུ་ཕྱུང་སྟེ། རབ་ཏུ་བྱུང་ནས་ཀྱང་ཁྱད་པར་རྟོགས་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། ཕུ་བོ་ཤོས་དམུ་རྒོད་དད་པ་ཆུང་བ་གང་ཡིན་པ་དེ་ནི་ལྟེང་རྒྱས་འོད་སྲུང་འདི་ཉིད་ཡིན་ནོ། །ནུ་བོ་གཉིས་པོ་གང་དག་ཡིན་ པ་དེ་དག་ནི་ཆུ་ཀླུང་འོད་སྲུང་དང་། ག་ཡཱ་འོད་སྲུང་འདི་དག་ཉིད་ཡིན་ནོ། །སྨོན་ལམ་གྱི་དབང་དེས་ན་ལྟེང་རྒྱས་འོད་སྲུང་ཆོ་འཕྲུལ་ལྔ་བརྒྱས་བཏུལ་བ་ཡིན་ནོ། །ཆུ་ཀླུང་འོད་སྲུང་དང་། ག་ཡཱ་འོད་སྲུང་ནི་ཚེགས་ཆུང་དུས་བཏུལ་བ་ཡིན་ནོ། །གང་གི་ཚེ་རྒྱལ་པོ་གཟུགས་ཅན་སྙིང་

  774. 77b

    པོ་གཞོན་ནུར་གྱུར་པ་དེའི་ཚེ་རྒྱལ་པོའི་ཁབ་ན་ཁྱིམ་བདག་ཅིག་ཡོད་པ་དེ་ལ་ཀུན་དགའ་ར་བ་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་ཞིག་ཡོད་དེ། དེ་དེ་ལ་ལྷག་པར་ཆགས་པར་གྱུར་ཏོ། །ཇི་ཙམ་ན་གཟུགས་ཅན་སྙིང་པོ་ཕྱི་རོལ་དུ་བྱུང་བས་སྐྱེད་མོས་ཚལ་དེ་མཐོང་བ་ དང་། དེ་ཡང་ལྷག་པར་ཆགས་པར་གྱུར་ནས་སྨྲས་པ། ཁྱིམ་བདག་སྐྱེད་མོས་ཚལ་འདི་ང་ལ་བྱིན་ཅིག །དེས་མ་བྱིན་ནོ། །ལན་གཉིས་ལན་གསུམ་དུ་ཡང་སྨྲས་ན་ཡང་མ་བྱིན་ནས། ཡང་སྨྲས་པ། རིན་སྦྱིན་ནོ། །དེས་སྨྲས་པ། གཞོན་ནུ་ཉིས་ན་ཁོ་བོ་ཡུལ་ནས་སྤྱུགས་ ཀྱང་བླའི་སྐྱེད་མོས་ཚལ་ནི་མི་འབུལ་ལོ། །གཞོན་ནུ་གཟུགས་ཅན་སྙིང་པོས་སྨྲས་པ། ཁྱིམ་བདག་ཁྱོད་ཀྱིས་སྨྲས་པ་དྲན་པར་བྱོས་ཤིག །ང་ནམ་རྒྱལ་པོར་གྱུར་པ་དེའི་ཚེ་ང་ཉིད་ཀྱིས་བཀུར་རོ། །དེས་སྨྲས་པ། ནམ་ཁྱོད་རྒྱལ་པོར་གྱུར་པ་དེའི་ཚེ་ཁོ་བོ་ཡང་རྒྱལ་པོའི་ཁབ་ཏུ་འགྲོའོ། ། གཞོན་ནུ་གཟུགས་ཅན་སྙིང་པོས་མཇལ་ཏོ་ཞེས་བྱས་ནས་སོང་ངོ་། །ཇི་ཙམ་དུས་གཞན་ཞིག་ན་རྒྱལ་པོ་པད་མ་ཆེན་པོ་ཤི་ནས། གཞོན་ནུ་གཟུགས་ཅན་སྙིང་པོ་རྒྱལ་སྲིད་ལ་བཞག་པ་དང་། དེས་སྐྱེད་མོས་ཚལ་དེ་མཐུས་ཕྲོགས་སོ། །ཁྱིམ་བདག་དེ་སྙིང་ན་ཞིང་སྐྱེད་མོས་ཚལ་དེ་ལ་ ལྷག་པར་ཆགས་པས་ཤི་ནས་དེ་ཉིད་སྦྲུལ་གདུག་པ་ཞིག་ཏུ་སྐྱེས་ཏེ། དེ་རྒྱལ་པོ་ལ་རྒྱུན་དུ་གླགས་ཚོལ་བ་ལྷུར་ལེན་ཅིང་གནས་སོ། །ཇི་ཙམ་ན་རྒྱལ་པོ་གཟུགས་ཅན་སྙིང་པོ་སོ་གའི་དུས་ལ་བབ་སྟེ། མེ་ཏོག་གི་ཤིང་རྣམས་ཁ་འབུས་པ་ན་བཙུན་མོ་དང་ལྷན་ཅིག་སྐྱེད་མོས་ཚལ་དེར་ཞུགས་ ནས་དེ་དེ་ན་སྐྱེས་པ་མེད་པར་རོལ་མོས་བཙུན་མོའི་བུད་མེད་དང་ལྷན་ཅིག་དགའ་བའི་རྩེད་མོ་ཉམས་སུ་མྱོང་བར་བྱས་ནས་གཉིད་ལོག་གོ། །བུད་མེད་ནི་མེ་ཏོག་དང་འབྲས་བུ་ལ་དགའ་བ་ཡིན་པས་ཀུན་དུ་འཁྱམ་དུ་དོང་ངོ་། །བུད་མེད་གཅིག་གིས་རལ་གྲི་བསྐུར་ཏེ་རྒྱལ་པོ་སྲུང་དུ་བཅུག་གོ། ། དེ་ནས་སྦྲུལ་གདུག་པ་དེས་རྒྱལ་པོའི་དྲུང་ན་སྒྲ་མི་གྲག་པར་རིག་ནས་རྒྱལ་པོ་ལ་གཟུང་བའི་ཕྱིར་ཚང་ནས་བྱུང་སྟེ་ཆས་སོ། །རྒྱལ་པོའི་བསོད་ནམས་ཀྱི་མཐུས་བྱ་ཀ་ལན་ད་ཀ་ཞེས་བྱ་བ་དེ་རྣམས་ཀྱིས་སྦྲུལ་གདུག་པ་དེ་ཀུན་ནས་བསྐོར་ནས་ཙི་ཙིའི་སྒྲ་ཕྱུང་ངོ་། །བུད་མེད་རལ་གྲི་ཐོགས་པས་

  775. 78a

    ཐོས་ནས་དངངས་ཏེ་སྒྲ་ཆེན་པོ་བྱུང་ནས་རལ་གྲིས་བསད་དོ། །དེ་ནས་རྒྱལ་པོ་ཡང་དངངས་ཏེ་སད་ནས་སྨྲས་པ། འདི་ཅི་བྱུང་། བུད་མེད་དེས་སྨྲས་པ། ལྷ་སྦྲུལ་གདུག་པ་འདི་ལྷ་ལ་གཟུང་བའི་ཕྱིར་ཆས་པ་ན་བྱ་ཀ་ལན་ད་ཀ་རྣམས་ཀྱིས་ཙི་ཙིའི་སྒྲ་ཕྱུང་ནས་བདག་ གིས་བཀུམ་ལགས་སོ། །རྒྱལ་པོའི་གནས་སྐབས་དེ་གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་རྣམས་ཀྱིས་ཐོས་ནས་སྐྱེད་མོས་ཚལ་དེའི་ཕྱི་ནང་དུ་ཀུ་ཅོའི་སྒྲ་ཆེན་པོས་གང་བར་གྱུར་ཏེ། རྒྱལ་པོ་དེ་སྐྱེ་དགུ་ལ་བྱམས་པ་ ཞིག་པས་ཕྱིར་ཞིང་བཙུན་མོ་སྐྱེ་བོའི་ཚོགས་དང་བཅས་ཏེ་མིག་མཆི་མས་གང་ཞིང་འཁོད་དོ། །དེ་ནས་རྒྱལ་པོས་སྨྲས་པ། ཤེས་ལྡན་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་སྲོག་སྐྱོབ་པ་དེ་ལ་མཆོག་ཅི་ཞིག་སྦྱིན། སྐྱེ་བོའི་ཚོགས་ཀྱིས་སྨྲས་པ། ལྷ་རྒྱལ་སྲིད་ ཀྱི་ཕྱེད་དོ། །རྒྱལ་པོས་སྨྲས་པ། ཤེས་ལྡན་དག་བྱ་ཀ་ལན་ད་ཀ་རྣམས་ཀྱིས་ངའི་སྲོག་བྱིན་པས་རྒྱལ་སྲིད་ཕྱེད་འདི་དག་ལ་སྦྱིན་ནོ། །བློན་པོ་རྣམས་ཀྱིས་སྨྲས་པ། ལྷ་བྱ་འདི་དག་ནི་དུད་འགྲོའི་སྐྱེ་གནས་སུ་སོང་བ་ལགས་པས་རྒྱལ་སྲིད་ཕྱེད་ཀྱིས་འདི་དག་ལ་ཅི་བགྱི། འདི་དག་ འོད་མའི་ཚལ་གང་དུ་གནས་པ་དེར་འདི་དག་གི་གནས་བཅའོ། །རྒྱལ་པོས་སྨྲས་པ། དེ་བཞིན་དུ་གྱིས་ཤིག །སྐྱེད་མོས་ཚལ་དེ་འོད་མའི་ཚལ་གྱིས་ཡོངས་སུ་བསྐོར་ཏེ། བློན་པོ་རྣམས་ཀྱིས་དེ་རྣམས་ཀྱི་གནས་འོད་མའི་ཚལ་གྱི་ཉེ་འཁོར་དུ་བཅས་པས། དེ་འོད་མའི་ཚལ་བྱ་ཀ་ ལན་ད་ཀ་གནས་པ་ཞེས་བྱ་བར་གྱུར་ཏོ། །རྒྱལ་པོ་གཟུགས་ཅན་སྙིང་པོའི་ཞང་པོ་ཀུན་དུ་འཚོ་རྣམས་ཀྱི་ནང་དུ་རབ་ཏུ་བྱུང་ནས་དེས་སྐྱེད་མོས་ཚལ་དེ་དེའི་གནས་ཀྱི་ཕྱིར་བྱིན་ནོ། །ཇི་ཙམ་ན་བཅོམ་ལྡན་འདས་མ་ག་དྷཱ་ནས་ལྗོངས་རྒྱུ་ཞིང་གཤེགས་པ་དང་རྒྱལ་པོའི་ཁབ་ཏུ་བྱོན་ནས་ཤིང་ ཞིག་གི་དྲུང་ན་བཞུགས་སོ། །མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་མ་ག་དྷཱ་ནས་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་ཤིང་ཞིག་གི་དྲུང་དུ་བཞུགས་སོ་ཞེས་ཐོས་སོ། །ཐོས་ནས་ཀྱང་རྒྱལ་པོའི་འབྱོར་བ་ཆེན་པོ་དང་རྒྱལ་པོའི་མཐུ་

  776. 78b

    ཆེན་པོས་རྒྱལ་པོའི་ཁབ་ནས་བྱུང་སྟེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་ སྙིང་པོ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ་རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་ འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་སྦྱོར་ཞིང་མཆིས་ན། གནང་བར་མཛད་དུ་གསོལ། བཅོམ་ལྡན་འདས་ཀྱིས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་ མི་གསུང་བས་གནང་ངོ་། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་སོང་ངོ་། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་ གཟུགས་ཅན་སྙིང་པོས་དེ་ཉིད་ཀྱི་མཚན་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། གདན་བཤམས་ནོར་བུའི་ཆུ་སྣོད་བཞག་ནས་བཅོམ་ལྡན་འདས་ལ་སྤྱན་འདྲེན་གྱི་དུས་ཚོད་གསོལ་པ། བཙུན་པ་གདུགས་ཚོད་ལགས་ན་ད་དེའི་དུས་ལ་ བབ་པར་དགོངས་སུ་གསོལ། དེ་ནས་བཅོམ་ལྡན་འདས་སྔ་དྲོ་ན་བཟའ་ཤམ་ཐབས་མནབས། ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོའི་

  777. 79a

    བཀད་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ་རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ ནས། གསེར་གྱི་བྱ་མ་བུམ་བླངས་ཏེ་བཙུན་པ་འོད་མའི་ཚལ་བྱ་ཀ་ལན་ད་ཀ་གནས་པ་འདིར་བཅོམ་ལྡན་འདས་ཅི་བདེར་བཞུགས་ཤིག་ཅེས་བཅོམ་ལྡན་འདས་ལ་སྐྱེད་མོས་ཚལ་དེ་ཕུལ་ལོ། །དེ་བཞིན་དུ་གནས་བརྟན་རྣམས་ཀྱིས་ཀྱང་མདོ་སྡེ་རྣམས་ཀྱི་ནང་དུ་བཅོམ་ལྡན་འདས་རྒྱལ་པོའི་ཁབ་ འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ་ཞེས་གདགས་པར་བྱས་སོ། །དེའི་ཚེ་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་ཁྱིམ་བདག་ཅིག་གནས་པ་དེས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་ རང་གི་ཁྱིམ་དུ་སྤྱན་དྲངས་སོ། །ཡང་དེའི་ཚེ་ཁྱིམ་བདག་མགོན་མེད་ཟས་སྦྱིན་གྱིས་དགོས་པ་འགའ་ཞིག་གི་ཕྱིར་རྒྱལ་པོའི་ཁབ་ཏུ་ཕྱིན་ནས་དེ་ཁྱིམ་བདག་དེའི་ཁྱིམ་དུ་ནུབ་མོ་འབྲང་བཏབ་བོ། །དེ་ནས་ཁྱིམ་བདག་དེ་དེ་ཉིད་ཀྱི་མཚན་མོ་ལངས་ཏེ་ནང་མི་རྣམས་ལ་བསྒོ་བ། ནང་རྗེ་དག་ལོངས་ ཤིག །བཞིན་བཟང་དག་ལོངས་ཤིག །ཤིང་རྣམས་གཤེགས་ཤིག །མེ་དག་བུས་ཤིག །འབྲས་ཆན་ཚོས་ཤིག །སྲན་ཚོད་ཚོས་ཤིག །བཅའ་བ་དག་བཟང་དུ་གྱིས་ཤིག །བཀད་སའི་ཞལ་ཏ་དག་གྱིས་ཤིག །དེ་ནས་ཁྱིམ་བདག་མགོན་མེད་ཟས་སྦྱིན་འདི་སྙམ་དུ་སེམས་ ཏེ། ཅི་ཁྱིམ་བདག་འདི་བག་མ་ལེན་ཏམ། བག་མ་གཏོང་ངམ། ཡུལ་མིའམ། ཚོང་པའམ། ཚོགས་སམ། འཁོར་ཏམ། འདིས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སང་ཁྱིམ་དུ་གདུགས་ཚོད་ལ་སྤྱན་དྲངས་སམ་སྙམ་དུ་བསམས་ནས་ཁྱིམ་བདག་དེ་ལ་འདི་སྐད་ཅེས་

  778. 79b

    སྨྲས་སོ། །ཁྱིམ་བདག་ཁྱོད་ཅི་བག་མ་ལེན་ཏམ། བག་མ་གཏོང་ངམ། ཡུལ་མིའམ། ཚོང་པའམ། ཚོགས་སམ། འཁོར་ཏམ། ཁྱོད་ཀྱིས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སང་ཁྱིམ་དུ་གདུགས་ཚོད་ལ་སྤྱན་དྲངས་སམ། ཁྱིམ་བདག་ཁོ་བོ་བག་མ་ལེན་ པའམ། བག་མ་གཏོང་བ་ཡང་མེད་ཡུལ་མི་མ་ཡིན། ཚོང་པ་མ་ཡིན། ཚོགས་མ་ཡིན། འཁོར་མ་ཡིན། མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡང་གདུགས་ཚོད་ལ་སྤྱན་དྲངས་པ་མ་ཡིན་ཏེ། འོན་ཀྱང་ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ ཚོད་ལ་སྤྱན་དྲངས་སོ། །ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་ཐོས་པ་དང་བ་སྤུའི་ཁུང་བུ་ཐམས་ཅད་ནས་སྤུ་ཟིང་ཞེས་བྱེད་ནས་དེ་སྤུ་ཟིང་ཞེས་བྱེད་པས་ཁྱིམ་བདག་དེ་ལ་འདི་སྐད་ཅེས་སྨྲས་སོ། །ཁྱིམ་བདག་སངས་རྒྱས་ཞེས་བྱ་བ་འདི་སུ་ཡིན། ཁྱིམ་བདག་དགེ་སྦྱོང་གཽ་ཏ་མ་ཤཱཀྱའི་སྲས་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཞིག་ཡོད་དེ། ཁྱིམ་བདག་ དེ་ནི་སངས་རྒྱས་ཞེས་བྱའོ། །ཁྱིམ་བདག་དགེ་འདུན་ཞེས་བྱ་བ་འདི་སུ་ཡིན། ཁྱིམ་བདག་རྒྱལ་རིགས་ལས་ཀྱང་རིགས་ཀྱི་བུ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་བཅོམ་ལྡན་འདས་དེ་ཁོ་ན་རབ་ཏུ་བྱུང་བའི་རྗེས་སུ་རབ་ཏུ་བྱུང་ བ་དག་ཡོད། བྲམ་ཟེའི་རིགས་དང་རྗེའུ་རིགས་དང་། དམངས་རིགས་ལས་ཀྱང་རིགས་ཀྱི་བུ་དག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་བཅོམ་ལྡན་འདས་དེ་ཁོ་ན་རབ་ཏུ་བྱུང་བའི་རྗེས་སུ་རབ་ཏུ་བྱུང་བ་དག་ཡོད་དེ། ཁྱིམ་ བདག་དེ་ནི་དགེ་འདུན་ཞེས་བྱ་བ་ཡིན་ཏེ་སང་ཁོ་བོའི་ཁྱིམ་དུ་སངས་རྒྱས་ལ་སོགས་པ་དགེ་སློང་གི་དགེ་འདུན་དེ་རྣམས་གདུགས་ཚོད་ལ་སྤྱན་དྲངས་སོ། །ཁྱིམ་བདག་བཅོམ་ལྡན་འདས་དེ་ད་ལྟར་གང་ན་བཞུགས། རྒྱལ་པོའི་ཁབ་འདི་ཉིད་ཀྱི་དུར་ཁྲོད་བསིལ་བའི་ཚལ་ན་བཞུགས་སོ། །

  779. 80a

    ཁྱིམ་བདག་བཅོམ་ལྡན་འདས་དེ་བདག་ཅག་གིས་བལྟར་རུང་ངམ། ཁྱིམ་བདག་དེའི་ཕྱིར་རེ་ཞིག་སྡོད་ཅིག་དང་། གལ་ཏེ་བཅོམ་ལྡན་འདས་འདི་ཉིད་དུ་གཤེགས་པ་དང་སང་ཁྱོད་ཀྱི་མཐོང་བར་འགྱུར་བའི་གནས་གང་ཡིན་པ་དེ་ཡོད་དོ། །དེ་ནས་ཁྱིམ་བདག་མགོན་ མེད་ཟས་སྦྱིན་སངས་རྒྱས་ལ་དམིགས་པའི་དྲན་པས་ཉལ་ལོ། །དེ་ནམ་མ་ནངས་པར་ནམ་ནངས་པའི་འདུ་ཤེས་ཀྱིས་ལྷོ་སྒོ་གང་ན་བ་དེར་སོང་བ་དང་། དེའི་ཚེ་ལྷོ་སྒོ་ཐུན་གཉིས་ལ་སྒོ་ཕྱེ་ནས་འཇོག་སྟེ། ཐུན་དང་པོ་ལ་ནི་ཕོ་ཉ་གློ་བུར་དུ་འོངས་པ་རྣམས་མི་ཐོགས་པར་བྱ་བའི་ཕྱིར་ཕྱེ་སྟེ་ འཇོག་གོ། །ཐུན་ཐ་མ་ལ་ནི་ཕོ་ཉ་འགྲོ་བར་ཆས་པ་རྣམས་མི་ཐོགས་པར་བྱ་བའི་ཕྱིར་ཕྱེ་སྟེ་འཇོག་གོ། །དེ་ནས་ཁྱིམ་བདག་མགོན་མེད་ཟས་སྦྱིན་འདི་སྙམ་དུ་སེམས་ཏེ། འདི་ལྟར་ལྷོ་སྒོ་ཕྱེ་སྟེ་འདུག་པས་གདོན་མི་ཟ་བར་ནམ་ནངས་སོ་སྙམ་དུ་རིག་ནས་སྣང་བ་དེ་ཉིད་དུ་གྲོང་ཁྱེར་ནས་བྱུང་ བ་དང་། དེ་བྱུང་མ་ཐག་ཏུ་སྣང་བ་གང་ཡིན་པ་མེད་ནས་སླར་མུན་ནག་པོར་གྱུར་ཏོ། །དེ་འཇིགས་པར་གྱུར། བག་ཚ་བར་གྱུར་ཅིང་། སྤུ་ཟིང་ཞེས་བྱེད་པར་གྱུར་ནས་བདག་མིའམ། མི་མ་ཡིན་པའམ། གཡོན་ཅན་འགའ་ཞིག་གིས་གཙེས་པར་མི་འགྱུར་གྲང་སྙམ་དུ་བསམས་ ནས་སླར་ལྡོག་པར་འདོད་པ་དང་། དེ་ནས་ལྷོ་ཕྱོགས་ཀྱི་སྒོ་ན་གནས་པའི་ལྷ་གང་ཡིན་པ་དེས་ཅི་ཙམ་ལྷོ་ཕྱོགས་ཀྱི་སྒོ་ནས་བསིལ་བའི་ཚལ་གྱི་དུར་ཁྲོད་ཀྱི་བར་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་ བདག་སྤྱན་སྔར་སོང་ཤིག །སླར་མ་ལྡོག་ཤིག །ཁྱོད་སྤྱན་སྔར་སོང་ན་ལེགས་པར་འགྱུར་གྱི་སླར་ལོག་ན་ནི་མ་ཡིན་ནོ། །དེ་ཅིའི་ཕྱིར་ཞེ་ན། རྟ་བརྒྱ་དང་ནི་གསེར་རྒྱན་བརྒྱ། །དྲེའུའི་ཤིང་རྟ་བརྒྱ་དང་ནི། །སྣ་ཚོགས་ནོར་ཀྱིས་སྤུད་པ་ནི། །རྟ་རྒོད་མ་ཡི་ཤིང་རྟ་བརྒྱ། །གོམ་ པ་གཅིག་ཅིག་བོར་བ་ཡི། །བཅུ་དྲུག་ཆར་ཡང་མི་ཕོད་དོ། །ཁྱིམ་བདག་སྤྱན་སྔར་སོང་ཤིག །སླར་མ་ལྡོག་ཤིག །ཁྱོད་སྤྱན་སྔར་སོང་ན་ལེགས་པར་འགྱུར་གྱི་སླར་ལོག་ན་ནི་མ་ཡིན་ནོ། །དེ་ཅིའི་ཕྱིར་ཞེ་ན། གངས་ཅན་རི་ཡི་གླང་ཆེན་བརྒྱ། །གསེར་དང་ནོར་བུས་བརྒྱན་

  780. 80b

    བྱས་ལ། །ལུས་ཆེ་གཤོལ་མདའི་མཆེ་བར་ལྡན། །མ་ཏང་གར་སྐྱེས་སྟོད་པོ་ཆེ། །གོམ་པ་གཅིག་ཅིག་བོར་བ་ཡི། །བཅུ་དྲུག་ཆར་ཡང་མི་ཕོད་དོ། །ཁྱིམ་བདག་སྤྱན་སྔར་སོང་ཤིག །སླར་མ་ལྡོག་ཤིག །ཁྱོད་སྤྱན་སྔར་སོང་ན་ལེགས་པར་འགྱུར་གྱི། སླར་ལོག་ ན་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཐོ་གར་ཡུལ་གྱི་བུ་མོ་བརྒྱ། །རྣ་ཆ་དང་ནི་གདུབ་ཀོར་ཐོགས། །གསེར་གྱི་དཔུང་རྒྱན་ཐོགས་པ་ཡི། །མགྲིན་པ་རྒྱན་གྱིས་ལེགས་བརྒྱན་པ། །གོམ་པ་གཅིག་ཅིག་བོར་བ་ཡི། །བཅུ་དྲུག་ཆར་ཡང་མི་ཕོད་དོ། །ཁྱིམ་བདག་སྤྱན་ སྔར་སོང་ཤིག །སླར་མ་ལྡོག་ཤིག །ཁྱོད་སྤྱན་སྔར་སོང་ན་ལེགས་པར་འགྱུར་གྱི་སླར་ལོག་ན་ནི་མ་ཡིན་ནོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་ལྷའི་བུ་དེ་ལ་འདི་སྐད་ཅེས་སྨྲས་སོ། །བཞིན་བཟངས་ཁྱོད་སུ་ཞིག །ཁྱིམ་བདག་ཁོ་བོ་ནི་ཁྱོད་ཉིད་ཀྱི་གྲོགས་པོ་རྙིང་ པ་བྲམ་ཟེའི་ཁྱེའུ་སྦྲང་རྩིའི་ཕུང་པོ་ཡིན་ཏེ། ཁོ་བོས་དགེ་སློང་ཤཱ་རིའི་བུ་དང་། མཽད་གལ་གྱི་བུ་གཉིས་ལ་སེམས་དད་པ་བསྐྱེད་ནས་ཤི་བ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་ཏེ་ལྷོ་སྒོ་འདི་ཉིད་ལ་གཉུག་མར་གནས་སོ། །དེའི་ཕྱིར་ཁྱོད་ལ་ཁོ་བོས་འདི་སྐད་ཅེས་ ཁྱིམ་བདག་སྤྱན་སྔར་སོང་ཤིག །སླར་མ་ལྡོག་ཤིག །ཁྱོད་སྤྱན་སྔར་སོང་ན་ལེགས་པར་འགྱུར་གྱི། སླར་ལོག་ན་ནི་མ་ཡིན་ནོ་ཞེས་སྨྲའོ། །དེ་ནས་ཁྱིམ་བདག་མགོན་མེད་ཟས་སྦྱིན་འདི་སྙམ་དུ་སེམས་ཏེ། ཀྱེ་མའོ་སངས་རྒྱས་བཅོམ་ལྡན་འདས་ནི་མཆོག་མ་ཡིན་པ་མ་ ཡིན་ཞིང་ཆོས་བཤད་པ་ཡང་མཆོག་མ་ཡིན་པ་མ་ཡིན་ཏེ། ད་ལྟར་བཅོམ་ལྡན་འདས་དེ་ལ་བལྟ་བར་ལྷ་ཡང་བརྩོན་པར་བྱེད་དོ་སྙམ་དུ་བསམས་ནས། བསིལ་བའི་ཚལ་གྱི་དུར་ཁྲོད་དུ་སོང་བ་དང་། དེའི་ཚེ་བཅོམ་ལྡན་འདས་གཙུག་ལག་ཁང་གི་ཕྱི་རོལ་བླ་གབ་མེད་པ་ན་འཆག་ཅིང་ ལྷག་པར་ཡང་ཁྱིམ་བདག་མགོན་མེད་ཟས་སྦྱིན་འོང་བ་ལ་གཞེས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་ཁྱིམ་བདག་གིས་ཡང་དག་པར་དགྱེས་པར་འགྱུར་བས་ཡང་དག་པར་དགྱེས་པར་བྱེད་དོ། །བཅོམ་

  781. 81a

    ལྡན་འདས་ཅིག་བདེ་བར་མནལ་ཏམ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། གང་ཞིག་འདོད་པས་མ་གོས་ལ། །ཟག་མེད་རབ་ཏུ་རྣམ་གྲོལ་བ། །མྱ་ངན་ཡོངས་འདས་བྲམ་ཟེ་ནི། །ཐམས་ཅད་དུ་ནི་བདེ་བར་མནལ། །འདིར་ ནི་རེ་བ་ཀུན་བཅད་ནས། །ཐུགས་ཀྱི་རིམས་ནད་རྣམས་བསལ་ཅིང་། །ཞི་བ་ཐོབ་པའི་ཐུགས་ཀྱིས་ན། །ཉེ་བར་ཞི་བ་བདེ་བར་མནལ། །དེ་ནས་བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ཁྲིད་ནས་གཙུག་ལག་ཁང་དུ་ཞུགས་ཏེ་གདན་བཤམས་པ་ཉིད་ལ་བཞུགས་པ་ དང་། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཆོས་དང་ལྡན་པའི་གཏམ་གྱིས་ཡང་དག་པར་ བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དེ། སངས་རྒྱས་བཅོམ་ལྡན་འདས་རྣམས་ཀྱི་ཐོག་མའི་དུས་སུ་ཆོས་ཀྱི་གཏམ་གླེང་བ་གང་ཡིན་པ་འདི་ལྟ་སྟེ་སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་ དང་། མཐོ་རིས་ཀྱི་གཏམ་དང་། འདོད་པ་རྣམས་མནོག་ཆུང་བ་དང་། ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་ཕན་ཡོན་གྱི་རྗེས་སུ་བསྔགས་པ་དང་། རྣམ་པར་བྱང་བའི་ཕྱོགས་དང་མཐུན་ པའི་ཆོས་ཀྱི་གཏམ་རྒྱས་པར་ཡང་དག་པར་བསྟན་ཏོ། །གང་གི་ཚེ་བཅོམ་ལྡན་འདས་ཀྱིས་དེ་དགའ་བའི་སེམས་དང་། དགེ་བའི་སེམས་དང་། མགུ་བའི་སེམས་དང་། སྒྲིབ་པ་དང་བྲལ་བའི་སེམས་དང་། སྐལ་བ་དང་ལྡན་ཞིང་ཡང་དག་ཕུལ་གྱི་ཆོས་བཤད་པ་ཀུན་ཤེས་ པར་ནུས་པར་གཟིགས་པ་དེའི་ཚེ། སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བཤད་པ་འཕགས་པའི་བདེན་པ་བཞི་པོ་གང་ཡིན་པ་འདི་ལྟ་སྟེ། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་རྒྱས་པར་རབ་ཏུ་བསྟན་ཏོ། །དཔེར་

  782. 81b

    ན་གོས་གཙང་མ་ནག་ནོག་མེད་པ་ཚོན་རྩི་འོས་པའི་ནང་དུ་བཅུག་ན་ཚོན་རྩི་ལེགས་པར་འཇེན་དུ་བཏུབ་པ་དེ་བཞིན་དུ་ཁྱིམ་བདག་མགོན་མེད་ཟས་སྦྱིན་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་དང་། འགོག་པ་ དང་། ལམ་མངོན་པར་རྟོགས་སོ། །ཁྱིམ་བདག་མགོན་མེད་ཟས་སྦྱིན་གྱིས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཙུན་པ་བདག་ནི་འཕགས་སོ། །མངོན་པར་འཕགས་སོ། །བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས་བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་བསྡོས་ཏེ་སྐྱབས་སུ་ མཆི་བར་མངོན་པར་དད་ལགས་སོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་ཀྱི་མིང་ཅི། བཙུན་པ་བདག་གི་མིང་བཟང་སྦྱིན་ལགས་མོད་ཀྱི་བདག་གིས་མགོན་མ་མཆིས་པ་རྣམས་ལ་འཚལ་མ་ སྩོལ་བས་དེས་ན་བདག་མགོན་མེད་ཟས་སྦྱིན་ཞེས་བགྱི་བར་སྐྱེ་བོས་འཚལ་ཏོ། །ཁྱིམ་བདག་ཁྱོད་ཀྱི་གནས་གང་ཡིན། བཙུན་པ་ཡུལ་པྲ་ཙིན་ཞེས་བགྱི་བ་ན་ཀོ་ས་ལ་པ་རྣམས་ཀྱི་གྲོང་རྡལ་མཉན་ཡོད་ཅེས་བགྱི་བ་མཆིས་ཏེ། དེ་ན་བདག་མཆིས་ལགས་སོ། །བཅོམ་ ལྡན་འདས་མཉན་ཡོད་དུ་གཤེགས་ཤིག་དང་། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཇི་སྲིད་འཚོའི་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་ཀྱིས་བསྙེན་

  783. 82a

    བཀུར་བགྱི་ལགས་སོ། །ཁྱིམ་བདག་མཉན་ཡོད་ན་གཙུག་ལག་ཁང་ཡོད་དམ། བཙུན་པ་མ་མཆིས་ལགས་སོ། །ཁྱིམ་བདག་གང་ན་གཙུག་ལག་ཁང་ཡོད་པ་དེར་དགེ་སློང་རྣམས་འོང་བ་དང་། འགྲོ་བ་དང་གནས་པར་སེམས་སོ། །བཅོམ་ལྡན་ འདས་གཤེགས་ཤིག་དང་། བདག་གིས་ཅི་ནས་ཀྱང་མཉན་ཡོད་དུ་དགེ་སློང་རྣམས་མཆིས་པ་དང་། གཞན་དུ་མཆི་བ་དང་། མཆི་བར་སེམས་པར་འགྱུར་བ་དེ་ལྟར་གཙུག་ལག་ཁང་བརྩིག་ལགས་སོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་ མི་གསུང་བས་གནང་ངོ་། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེས་རྒྱལ་པོའི་ཁབ་ཏུ་བྱ་བ་ དང་བསྒྲུབ་པ་གང་ཡིན་པ་དེ་ཐམས་ཅད་བྱས་ཤིང་བསྒྲུབས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་གྱིས་བཅོམ་ ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་གྲོགས་དགེ་སློང་གཅིག་སྩལ་དུ་གསོལ། དེ་དང་ལྷན་ཅིག་བཅོམ་ལྡན་འདས་ཀྱི་སླད་དུ་གཙུག་ལག་ཁང་བརྩིག་ལགས་སོ། །བཅོམ་ལྡན་འདས་ཀྱིས་དགོངས་པ། དགེ་སློང་སུ་ཞིག་གིས་ཁྱིམ་བདག་ མགོན་མེད་ཟས་སྦྱིན་འཁོར་དང་བཅས་པ་དང་། མཉན་ཡོད་ན་གནས་པའི་སྐྱེ་བོའི་ཚོགས་འདུལ་བར་འགྱུར་སྙམ་ན་དགེ་སློང་ཤཱ་རིའི་བུས་འདུལ་བར་གཟིགས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཁྱིམ་བདག་མགོན་མེད་ ཟས་སྦྱིན་འཁོར་དང་བཅས་པ་དང་། མཉན་ཡོད་ན་གནས་པའི་སྐྱེ་བོའི་ཚོགས་ལ་སོམས་ཤིག །ཚེ་དང་ལྡན་པ་ཤཱ་རིའི་བུ་ཅང་མི་སྨྲ་བས་བཅོམ་ལྡན་འདས་ཀྱི་བཀའ་མཉན་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ།

  784. 82b

    བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །ཚེ་དང་ལྡན་པ་ཤཱ་རིའི་བུས་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་ནས་རྒྱལ་པོའི་ཁབ་ཏུ་བསོད་སྙོམས་སྤྱད་དེ་ཟས་ཀྱི་བྱ་བ་བྱས་ནས་ ཟས་ཕྱི་མའི་བསོད་སྙོམས་སྤངས་ཏེ། གནས་མལ་ཇི་ལྟར་སྤྱད་པ་མཁོས་སུ་ཕབ་ནས་དེ་ལྷུང་བཟེད་དང་ཆོས་གོས་བླངས་ཏེ་མཉན་ཡོད་གང་ན་བ་དེར་རྒྱུ་ཞིང་སོང་ངོ་། །དེ་ནས་ཁྱིམ་བདག་མགོན་མེད་ཟས་སྦྱིན་ལམ་རྒྱགས་མང་པོ་ཁྱེར་ནས་ནུབ་མོ་ནུབ་མོ་ཞིང་མཉན་ཡོད་དུ་སོང་ སྟེ་ཕྱིན་ནས་ད་མཉན་ཡོད་དུ་མ་ཞུགས་པ་ཉིད་དུ་ཀུན་དགའ་ར་བ་ནས་ཀུན་དགའ་ར་བ་དང་། སྐྱེད་མོས་ཚལ་ནས་སྐྱེད་མོས་ཚལ་དང་། ནགས་ཚལ་ནས་ནགས་ཚལ་དུ་འཆགས་ནས་འཆག་སར་དཔྱོད་ཅིང་འདི་སྐད་ཅེས་སྨྲས་སོ། །མཉན་ཡོད་དང་ཧ་ཅང་ཡང་མི་རིང་ལ་ཧ་ཅང་ ཡང་མི་ཉེ་བ་དང་ཉིན་པར་ལང་ལོང་ཉུང་ཞིང་ཀུ་ཅོ་ཉུང་བ་དང་། མཚན་མོ་གཅོམ་ཆུང་བ་དང་། སྒྲ་ཆུང་བ་དང་། སྦྲང་བུ་དང་། ཤ་སྦྲང་དང་། རླུང་དང་ཉི་མ་དང་། སྡིག་སྦྲུལ་གྱི་རེག་པ་ཆུང་བའི་ས་ཕྱོགས་གང་ན་ཡོད་པ་དེར་བདག་གིས་བཅོམ་ལྡན་འདས་ཀྱི་ཕྱིར་གཙུག་ ལག་ཁང་བརྩིག་ན་ཕྱོགས་དེ་གང་ན་ཡོད་སྙམ་པ་ལས། ཁྱིམ་བདག་མགོན་མེད་ཟས་སྦྱིན་གྱིས་གཞོན་ནུ་རྒྱལ་བྱེད་ཀྱི་ཀུན་དགའ་ར་བ་ནི་མཉན་ཡོད་དང་ཧ་ཅང་ཡང་མི་རིང་ལ་ཧ་ཅང་ཡང་མི་ཉེ་བ་དང་། ཉིན་པར་ལང་ལོང་ཉུང་ཞིང་ཀུ་ཅོ་ཉུང་བ་དང་། མཚན་མོ་གཅོམ་ཆུང་ བ་དང་། སྒྲ་ཆུང་བ་དང་། སྦྲང་བུ་དང་། ཤ་སྦྲང་དང་། རླུང་དང་། ཉི་མ་དང་། སྡིག་སྦྲུལ་གྱི་རེག་པ་ཉུང་བར་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། འདིར་བདག་གིས་བཅོམ་ལྡན་འདས་ཀྱི་ཕྱིར་གཙུག་ལག་ཁང་བརྩིག་གོ་སྙམ་ནས། དེ་རང་གི་ ཁྱིམ་དུ་མ་སོང་བ་ཉིད་དུ་གཞོན་ནུ་རྒྱལ་བྱེད་གང་ན་བ་དེར་སོང་སྟེ་ཕྱིན་ནས་གཞོན་ནུ་རྒྱལ་བྱེད་ལ་འདི་སྐད་ཅེས་སྨྲས་སོ། །གཞོན་ནུ་ཀུན་དགའ་ར་བ་བདག་ལ་སྩོལ་ཅིག་དེར་བདག་གིས་བཅོམ་ལྡན་འདས་ཀྱི་ཕྱིར་གཙུག་ལག་ཁང་བརྩིག་ལགས་སོ། །དེས་སྨྲས་པ།

  785. 83a

    ཁྱིམ་བདག་དེ་ནི་ངའི་ཀུན་དགའ་ར་བ་ནི་མ་ཡིན་ཏེ། སྐྱེད་མོས་ཚལ་ཡིན་མོད་ཀྱི་དེ་ངའི་ཡིན་ནོ། །ཁྱིམ་བདག་མགོན་མེད་ཟས་སྦྱིན་གྱིས་ལན་གཉིས་ལན་གསུམ་དུ་ཡང་གཞོན་ནུ་རྒྱལ་བྱེད་ལ་འདི་སྐད་ཅེས་སྨྲས་སོ། །གཞོན་ནུ་བདག་ལ་ཀུན་དགའ་ར་བ་ན་ སྩོལ་ཅིག །བདག་གིས་དེར་བཅོམ་ལྡན་འདས་ཀྱི་ཕྱིར་གཙུག་ལག་ཁང་བརྩིག་ལགས་སོ། །ཁྱིམ་བདག་ཀུན་དགའ་ར་བ་དེ་གསེར་བྱེ་བ་གཤིབས་ཀྱང་ང་མི་གཏོད་དོ།། །།འདུལ་བ་གཞི། བམ་པོ་དགུ་བཅུ་པ། ཡང་ཁྱིམ་བདག་མགོན་མེད་ཟས་སྦྱིན་གྱིས་ གཞོན་ནུ་རྒྱལ་བྱེད་ལ་འདི་སྐད་ཅེས་སྨྲས་སོ། །གཞོན་ནུས་ཀུན་དགའ་ར་བའི་རིན་ཐང་བཀུམ་ལགས་ཀྱིས་དབྱིག་དང་། གསེར་བཞེས་ཤིག །ཀུན་དགའ་ར་བ་ནི་བདག་གི་ལགས་སོ། །རིན་ཐང་སུས་བཅད། ཁྱོད་ཀྱིས་རིན་ཐང་བཀུམ་མོད། དེ་གཉིས་རིན་ཐང་བཅད་དོ། །རིན་ ཐང་མ་བཅད་དོ་ཞེས་རྩོད་པར་གྱུར་ནས་ཞལ་ཆེ་གཅོད་པའི་མི་གང་ན་བ་དེར་དོང་བ་དང་། བར་སྐབས་དེར་འཇིག་རྟེན་སྐྱོང་བ་བཞི་འདི་སྙམ་དུ་སེམས་ཏེ། ཁྱིམ་བདག་མགོན་མེད་ཟས་སྦྱིན་འདི་ནི་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྩིག་པར་བརྩོན་གྱིས་དེའི་གྲོགས་བྱའོ་སྙམ་ནས་དེ་ ནས་ཞལ་ཆེ་གཅོད་པའི་མིར་བདག་ཉིད་མངོན་པར་སྤྲུལ་ནས་དགོས་པའི་ཕྱིར་འདུས་སོ། །ཁྱིམ་བདག་མགོན་མེད་ཟས་སྦྱིན་དང་གཞོན་ནུ་རྒྱལ་བྱེད་གཉིས་ཞལ་ཆེ་གཅོད་པ་སྣ་ཆེན་པོ་ལ་གཏོགས་པའི་དྲུང་དུ་སོང་ནས། དེ་ནས་ཁྱིམ་བདག་མགོན་མེད་ཟས་སྦྱིན་གྱིས་ཞལ་ཆེ་གཅོད་ པ་སྣ་ཆེན་པོ་ལ་གཏོགས་པ་རྣམས་ལ་དོན་དེ་རྒྱས་པར་སྨྲས་པ་དང་། དེ་རྣམས་ཀྱིས་སྨྲས་པ། གཞོན་ནུ་ཀུན་དགའ་ར་བའི་རིན་ཐང་བཅད་ཟིན་གྱིས་གསེར་ལོང་ཤིག །ཀུན་དགའ་ར་བ་ནི་ཁྱིམ་བདག་གི་ཡིན་ནོ། །དེ་ཅང་མི་སྨྲ་བར་འདུག་གོ། །དེ་ནས་ཁྱིམ་བདག་མགོན་ མེད་ཟས་སྦྱིན་གྱིས་ཤིང་རྟ་དང་། རྒྱ་དང་། གཟེབ་དང་། རྔ་མོ་དང་། གླང་དང་། བོང་བུ་རྣམས་ལ་གསེར་མང་པོ་བཀལ་ཏེ་འོངས་ནས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་གཤིབ་པར་བརྩམས་པ་དང་། ས་ཕྱོགས་འགའ་ཞིག་མ་ཡོག་པས་མ་བཀྲམ་པ་ཉིད་དུ་འདུག་གོ། །

  786. 83b

    དེ་ནས་ཁྱིམ་བདག་མགོན་མེད་ཟས་སྦྱིན་དོན་དེ་སེམས་ཤིང་ཡུད་ཙམ་ཞིག་ཅང་མི་སྨྲ་བར་འདུག་སྟེ། གང་གིས་མ་བཀྲམ་པའི་ས་ཕྱོགས་འདི་བཀྲམ་ནས་སླར་ཡང་སྤ་བར་བྱ་མི་དགོས་པའི་གཏེར་ཧ་ཅང་ཉུང་ངུ་ཡང་མ་ཡིན་ཧ་ཅང་མང་པོ་ཡང་མ་ཡིན་པ་དེ་གང་ཡིན་སྙམ་པ་དང་། གཞོན་ནུ་རྒྱལ་བྱེད་ཀྱིས་བསམས་པ། ཁྱིམ་བདག་མགོན་མེད་ཟས་སྦྱིན་ནི་གདོན་མི་ཟ་བར་ཅིའི་ཕྱིར་ཀུན་དགའ་ར་བའི་ཆེད་དུ་ནོར་གྱི་ཕུང་པོ་ཆེན་པོ་འདི་སྙེད་ཡོངས་སུ་བཏང་ཞེས་འགྱོད་པ་སྐྱེས་སོ་སྙམ་དུ་བསམས་ནས་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་ སོ། །ཁྱིམ་བདག་གལ་ཏེ་ཁྱོད་འགྱོད་པ་སྐྱེས་ན་གསེར་སླར་ལོང་ཤིག །ཀུན་དགའ་ར་བ་ནི་ང་ཉིད་ཀྱི་ཡིན་ནོ། །གཞོན་ནུ་བདག་ནི་འགྱོད་པ་མ་སྐྱེས་ཏེ་འོན་ཀྱང་དོན་འདི་སེམས་ཤིང་ཡུད་ཙམ་ཞིག་ཅང་མི་སྨྲ་བར་འདུག་པ་ནི་བདག་གིས་མ་བཀྲམ་པའི་ས་ཕྱོགས་འདི་བཀྲམ་ནས་ སླར་ཡང་སྦ་བར་བྱ་མི་དགོས་པའི་གཏེར་ཧ་ཅང་ཉུང་བ་ཡང་མ་ཡིན། ཧ་ཅང་མང་པོ་ཡང་མ་ཡིན་པ་དེ་གང་ཡིན་སྙམ་མོ། །དེ་ནས་གཞོན་ནུ་རྒྱལ་བྱེད་འདི་སྙམ་དུ་སེམས་ཏེ། ཀྱེ་མ་སངས་རྒྱས་བཅོམ་ལྡན་འདས་མཆོག་མ་ཡིན་པ་མ་ཡིན་ཞིང་ཆོས་བཤད་པ་ཡང་མཆོག་མ་ཡིན་པ་ མ་ཡིན་ཏེ། དེ་ལ་ད་ལྟར་ཁྱིམ་བདག་འདི་ཀུན་དགའ་ར་བའི་ཆེད་དུ་ནོར་གྱི་ཕུང་པོ་འདི་སྙེད་ཡོངས་སུ་གཏོང་ངོ་སྙམ་དུ་བསམས་ནས་ཁྱིམ་བདག་མགོན་མེད་ཟས་སྦྱིན་ལ་འདི་སྐད་ཅེས་སྨྲས་སོ། །ཁྱིམ་བདག་མ་བཀྲམ་པའི་ས་ཕྱོགས་ཁོ་བོ་ལ་བྱིན་ཅིག །དེར་ཁོ་བོས་བཅོམ་ལྡན་ འདས་ཀྱི་ཕྱིར་སྒོ་ཁང་བརྩིག་པར་བྱའོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་གཞོན་ནུ་རྒྱལ་བུ་རྒྱལ་བྱེད་ལ་མ་བཀྲམ་པའི་ས་ཕྱོགས་བྱིན་ནས་དེར་གཞོན་ནུ་རྒྱལ་བྱེད་ཀྱིས་བཅོམ་ལྡན་འདས་ཀྱི་ཕྱིར་སྒོ་ཁང་རྩིག་ཏུ་བཅུག་གོ། །དེ་ནས་ཁྱིམ་བདག་མགོན་མེད་ཟས་སྦྱིན་ གྱིས་བཅོམ་ལྡན་འདས་ཀྱི་ཕྱིར་གཙུག་ལག་ཁང་བརྩིག་པར་བརྩམས་པ་དང་། མུ་སྟེགས་ཅན་ཞེ་སྡང་དྲག་པོས་ཀུན་ནས་སློང་བའི་ཡིད་ཅན་རྣམས་འདུས་ནས་ཁྱིམ་བདག་མགོན་མེད་ཟས་སྦྱིན་གང་ན་བ་དེར་སོང་སྟེ་ལྷགས་པ་དང་། སྨྲས་པ། ཁྱིམ་བདག་ཁྱོད་དགེ་སྦྱོང་གཽ་ཏ་མ་ནི་

  787. 84a

    ཕྱིར་གཙུག་ལག་ཁང་མ་རྩིག་ཤིག །ཅིའི་ཕྱིར་ཁོ་བོ་ཅག་གིས་གྲོང་ཁྱེར་བགོས་ཏེ་དགེ་སྦྱོང་གཽ་ཏ་མའི་རྒྱལ་པོའི་ཁབ་ཡིན་ནོ། །ཁོ་བོ་ཅག་གི་ནི་མཉན་ཡོད་ཡིན་ནོ། །དེས་སྨྲས་པ། ཁྱེད་ཅག་གིས་གྲོང་ཁྱེར་རྣམས་བགོས་ཀྱི། བདག་གི་ནོར་མ་བགོས་པས་གང་ ལ་མངོན་པར་དགའ་བ་དེའི་ཆོས་ཀྱི་ཕུང་པོ་བརྩིག་གོ། །དེ་རྣམས་རྒྱལ་པོའི་དྲུང་དུ་དོང་བ་དང་། དེར་ཡང་ཁྱིམ་བདག་མགོན་མེད་ཟས་སྦྱིན་གྱིས་ཕམ་པར་བྱས་པ་དང་། མུ་སྟེགས་སྤྱི་བརྟོལ་ཅན་མུ་ཅོར་སྨྲ་བ་རྣམས་ཀྱིས་སྨྲས་པ། ཁྱིམ་བདག་ཁྱོད་དགའ་མགུར་བྱེད་དུ་མི་ གཞུག་སྟེ། དགེ་སྦྱོང་གཽ་ཏ་མའི་ཉན་ཐོས་ཀྱི་མཆོག་ཅིག་འོངས་ནས། གལ་ཏེ་དེའི་ཤགས་ཀྱིས་ཁོ་བོ་ཅག་ཕམ་པར་གྱུར་ན་གཙུག་ལག་ཁང་རྩིགས་ཤིག །དེས་སྨྲས་པ། རུང་གིས་རེ་ཞིག་འཕགས་པ་ཤཱ་རིའི་བུ་ལ་བརྟག་གོ། །དེ་ནས་ཁྱིམ་བདག་མགོན་མེད་ཟས་སྦྱིན་ཚེ་ དང་ལྡན་པ་ཤཱ་རིའི་བུ་གང་ན་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཁྱིམ་བདག་མགོན་མེད་ཟས་སྦྱིན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་ པ་ཤཱ་རིའི་བུ་མུ་སྟེགས་ཅན་རྣམས་འདི་སྐད་ཅེས་ཁྱིམ་བདག་ཁྱོད་དགའ་མགུར་བྱེད་དུ་མི་གཞུག་སྟེ། དགེ་སྦྱོང་གཽ་ཏ་མའི་ཉན་ཐོས་ཀྱི་མཆོག་འོངས་ནས། གལ་ཏེ་དེའི་ཤགས་ཀྱིས་ཁོ་བོ་ཅག་ཕམ་པར་གྱུར་ན་གཙུག་ལག་ཁང་རྩིགས་ཤིག་ཅེས་མཆི་ན། དེ་ལ་ཇི་ལྟར་བསྒྲུབ་ པར་བགྱི། ཚེ་དང་ལྡན་པ་ཤཱ་རིའི་བུས་བསམས་པ། ཇི་འདི་རྣམས་ལ་དགེ་བའི་རྩ་བ་ཆུང་ཟད་ཡོད་དམ་འོན་ཏེ་མེད་ཅེས་བསམས་པ་ལས་ཡོད་པར་མཐོང་ངོ་། །སུ་ཞིག་ལ་རག་ལས་པར་འགྱུར་སྙམ་ན་བདག་ཁོ་ན་ལའོ། །ཡང་བསམས་པ་ཇི་འདི་སྙེད་ཅིག་ཁོ་ན་བདག་ལ་རག་ ལས་པའི་ཚིག་གིས་འདུལ་བར་འགྱུར་རམ། འོན་ཏེ་གཞན་ཡང་ཚིག་གིས་འདུལ་བ་ཡོད་སྙམ་པ་ལས་ཡོད་པར་མཐོང་ངོ་། །དུས་ཇི་སྲིད་ཀྱིས་ཚོགས་པར་འགྱུར་སྙམ་ན་ཞག་བདུན་ལོན་ནས་སོ། །བསམས་ནས་སྨྲས་པ། ཁྱིམ་བདག་དེ་བཞིན་དུ་བྱ་སྟེ། འོན་ཀྱང་ཞག་

  788. 84b

    བདུན་པའི་ཉིན་པར་བྱའོ། །དེ་ནས་ཁྱིམ་བདག་མགོན་མེད་ཟས་སྦྱིན་དགའ་བ་དང་མགུ་བ་སྐྱེས་ནས་མུ་སྟེགས་ཅན་རྣམས་གང་ན་བ་དེར་སོང་སྟེ་ཕྱིན་ནས་མུ་སྟེགས་ཅན་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་འཕགས་པ་ཤཱ་རིའི་བུ་ན་རེ་དེ་བཞིན་དུ་བྱ་སྟེ། འོན་ཀྱང་ཞག་བདུན་ པའི་ཉིན་པར་བྱའོ་ཞེས་ཟེར་རོ། །དེ་རྣམས་ཀྱིས་བསམས་པ་འདི་ལ་རྒྱུ་གཉིས་ཡོད་པར་འགྱུར་ཏེ། ཡང་ན་ནི་དེ་འབྲོས་འདོད་དོ། །ཡང་ན་ནི་དེ་ཕྱོགས་ཚོལ་ལོ། །དེ་མ་ཡིན་ན་དུས་དེར་གདབ་ཅི་དགོས། བདག་ཅག་ཀྱང་ཕྱོགས་བཙལ་ལོ་ཞེས་དེ་རྣམས་ཕྱོགས་བཙལ་བར་ བརྩམས་ཏེ་དེ་རྣམས་ཀྱིས་ཕྱོགས་བཙལ་བ་དང་། ཀུན་དུ་རྒྱུ་མིག་དམར་མཐོང་ནས་དེ་ལ་དེ་རྣམས་ཀྱིས་སྨྲས་པ། ཁྱོད་དང་བདག་ཅག་ནི་ཚངས་པ་མཚུངས་པར་སྤྱོད་པ་ཡིན་གྱིས། དགེ་སྦྱོང་གཽ་ཏ་མའི་ཉན་ཐོས་ཀྱི་མཆོག་བདག་ཅག་གིས་བརྩད་པའི་ཕྱིར་བཀུག་ན་དེ་ཕྱོགས་ཚོལ་ གྱིས། ཁྱོད་ཀྱང་བདག་ཅག་གི་གྲོགས་གྱིས་ཤིག །དུས་ཇི་ཙམ་ཞིག་ན། འདི་ནས་ཞག་བདུན་གྱི་ཉིན་པར་རོ། །རུང་གིས་དེ་བཞིན་དུ་བྱ་སྟེ། གང་གི་ཚེ་ཁྱེད་ཅག་འདུས་པར་གྱུར་པ་དེའི་ཚེ་ཁོ་བོ་ལ་སྦྲོན་ཅིག །མུ་སྟེགས་ཅན་རྣམས་བག་ཚ་བ་དང་སེམས་ཁྲལ་སྐྱེས་ནས་ ཉིན་རེ་ཞིང་ཕྱོགས་ཚོལ་བ་དང་། ཉི་མ་བགྲང་བར་བྱེད་དོ། །ཇི་ཙམ་ན་ཞག་བདུན་ལོན་པ་དང་། ཁྱིམ་བདག་མགོན་མེད་ཟས་སྦྱིན་གྱིས་བླ་གབ་མེད་པའི་ས་ཕྱོགས་ཡངས་པར་སྟན་ཤོམ་དུ་བཅུག་གོ། །ཚེ་དང་ལྡན་པ་ཤཱ་རིའི་བུའི་ཆེད་དུ་ཡང་སེང་གེའི་ཁྲི་བཤམས་སོ། ། ཡུལ་སྣ་ཚོགས་ན་གནས་པའི་མུ་སྟེགས་ཅན་རྣམས་དང་། མཉན་ཡོད་ན་གནས་པའི་སྐྱེ་བོའི་ཚོགས་དང་། དེའི་ཉེ་འཁོར་ན་གནས་པའི་སྲོག་ཆགས་བརྒྱ་སྟོང་ཕྲག་དུ་མ་དག་ཀྱང་ཁ་ཅིག་ནི་ངོ་མཚར་སྐྱེས། ཁ་ཅིག་ནི་སྔོན་གྱི་དགེ་བའི་རྩ་བས་བསྐུལ་ནས་འདུས་སོ། །དེ་ནས་ཚེ་ དང་ལྡན་པ་ཤཱ་རིའི་བུ་ཁྱིམ་བདག་མགོན་མེད་ཟས་སྦྱིན་འཁོར་དང་བཅས་པས་མདུན་དུ་བདར་ཏེ་རྩོད་པའི་དཀྱིལ་འཁོར་དུ་ཞུགས་ནས་གདུལ་བའི་སྐྱེ་བོ་རྣམས་ལ་བལྟས་ཏེ་འཛུམ་པ་སྔོན་དུ་བཏང་ནས་སྤྱོད་ལམ་ཞི་བས་སེང་གེའི་ཁྲི་ལ་འཛེགས་ནས་འདུག་གོ། །འཁོར་ཐམས་ཅད་སེམས་

  789. 85a

    མི་གཡེང་པར་ཚེ་དང་ལྡན་པ་ཤཱ་རིའི་བུ་ལ་རྟོག་ཅིང་འདུག་གོ། །དེ་ནས་ཚེ་དང་ལྡན་པ་ཤཱ་རིའི་བུས་མུ་སྟེགས་ཅན་རྣམས་ལ་སྨྲས་པ། ཤེས་ལྡན་དག་ཅི་རེ་ཞིག་བྱེད་དམ། འོན་ཏེ་འཇིག །དེ་རྣམས་ཀྱིས་སྨྲས་པ། ཁོ་བོ་ཅག་གིས་བྱས། ཁྱོད་ཀྱིས་ཤིག་ཅིག་ཚེ་དང་ ལྡན་པ་ཤཱ་རིའི་བུས་བསམས་པ། གལ་ཏེ་བདག་གིས་བྱས་ན་འཇིག་རྟེན་ལྷ་དང་བཅས་པས་ཀྱང་འཇིག་པར་མི་ནུས་ན་ཀུན་དུ་རྒྱུ་མིག་དམར་གྱིས་ལྟ་སྨོས་ཀྱང་ཅི་དགོས་སྙམ་དུ་རིག་ནས་ཀུན་དུ་རྒྱུ་མིག་དམར་ལ་འདི་སྐད་ཅེས་སྨྲས་སོ། །ཁྱོད་ཀྱིས་བྱོས་ཤིག་ངས་གཞིག་གོ། ། དེ་མིག་འཕྲུལ་བྱེད་པ་ཡིན་པས་དེས་ཤིང་ས་ཧ་ཀར་ཤིན་ཏུ་མེ་ཏོག་གིས་རྒྱས་པ་ཞིག་སྤྲུལ་པ་དང་། ཚེ་དང་ལྡན་པ་ཤཱ་རིའི་བུས་རླུང་དང་ཆར་དྲག་པོ་ཕབ་སྟེ། དེས་དེ་རྩ་བ་ནས་ཕྱུང་ནས་ཕན་ཚུན་དུ་རྣམ་པར་གཏོར་ཏེ་རྣལ་འབྱོར་པ་རྣམས་ཀྱི་ཡུལ་དུ་ཡང་མ་གྱུར་ཏོ། །དེ་ནས་དེས་ པད་མའི་རྫིང་ཞིག་སྤྲུལ་པ་དང་། ཚེ་དང་ལྡན་པ་ཤཱ་རིའི་བུས་གླང་པོ་ཆེ་བཟང་པོ་ཞིག་སྤྲུལ་ནས་དེས་ཀུན་དུ་བརྣལ་ནས་མིང་གི་ལྷག་མ་ཙམ་ཞིག་བཞག་གོ། །དེས་སྦྲུལ་མགོ་བདུན་པ་ཞིག་སྤྲུལ་པ་དང་། ཚེ་དང་ལྡན་པ་ཤཱ་རིའི་བུས་ནམ་མཁའ་ལྡིང་ཞིག་སྤྲུལ་ཏེ་དེས་དེ་བླངས་སོ། ། དེས་རོ་ལངས་ཤིག་སྤྲུལ་པ་དང་། ཚེ་དང་ལྡན་པ་ཤཱ་རིའི་བུས་སྔགས་ཀྱི་ཕུར་བས་བཏབ་པ་ལས་ཉེས་པར་སྤྱོད་པའི་རོ་ལངས་ནི་བདག་ཉིད་ལ་གསོད་པར་བྱེད་པས་དེས་དེ་ཉིད་ལ་བསྙགས་པ་དང་། དེ་ནས་དེ་འཇིགས་སྐྲག་ཕོངས་ཤིང་བ་སྤུ་ཟིང་ཞེས་བྱེད་ནས། ཚེ་དང་ལྡན་པ་ཤཱ་རིའི་བུའི་ རྐང་པ་གཉིས་ལ་གཏུགས་ཏེ། འཕགས་པ་ཤཱ་རིའི་བུ་སྐྱབས་སུ་མཆི་ལགས་ཀྱིས་ཡོངས་སུ་བསྐྱབ་ཏུ་གསོལ། དེ་ནས་ཚེ་དང་ལྡན་པ་ཤཱ་རིའི་བུས་སྔགས་ཀྱི་ཕུར་པ་ཕྱུང་བ་དང་རོ་ལངས་དེ་ཞི་བར་གྱུར་ཏོ། །ཚེ་དང་ལྡན་པ་ཤཱ་རིའི་བུས་དེ་ལ་ཆོས་བཤད་དེ། དེ་དད་པ་སྐྱེས་ནས་སྨྲས་ པ། འཕགས་པ་ཤཱ་རིའི་བུ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན་བདག་འཕགས་པ་ཤཱ་རིའི་བུའི་སྤྱན་སྔར་ཚངས་པར་སྤྱོད་པ་སྤྱད་པར་བགྱིའོ། །ཚེ་དང་ལྡན་པ་ཤཱ་རིའི་བུས་དེ་རབ་ཏུ་ཕྱུང་བསྙེན་པར་

  790. 85b

    རྫོགས་པར་བྱས་ནས་གདམས་ངག་བྱིན་ཏེ། དེས་བརྩོན་པ་དང་འབད་པ་དང་། བརྩལ་བ་བྱས་པས་ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་མངོན་སུམ་དུ་བྱས་ཏེ་དགྲ་བཅོམ་པར་གྱུར་ནས། ཁམས་གསུམ་གྱི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་ པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེའུར་མཉམ་པ། རིག་པས་མ་རིག་པའི་སྒོ་ངའི་སྦུབས་དྲལ་ཅིང་རིག་པ་དང་། མངོན་པར་ཤེས་པ་དང་། སོ་སོར་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་ལ་ཆགས་པ་ དང་། བཀུར་སྟི་ལ་རྒྱབ་ཀྱིས་ཕྱོགས་པ་དབང་པོ་དང་ཉེ་བའི་དབང་པོ་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་དེའི་འཁོར་རྣམས་ངོ་མཚར་གྱི་མིག་བགྲད་ནས་ཚེ་དང་ལྡན་པ་ཤཱ་རིའི་བུ་ལ་མངོན་པར་དད་ པར་གྱུར་ཏེ། སྨྲས་པ། འཕགས་པ་ཤཱ་རིའི་བུས་ནི་སྨྲ་བའི་ཁྱུ་མཆོག་ཆེན་པོ་ཚར་བཅད་དོ་སྙམ་དུ་རིག་ནས། ཚེ་དང་ལྡན་པ་ཤཱ་རིའི་བུའི་གདོང་དུ་ལྟ་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་འཁོར་དེའི་བསམ་པ་དང་བག་ལ་ཉལ་དང་། ཁམས་དང་། རང་བཞིན་ ཤེས་ནས་འཕགས་པའི་བདེན་པ་བཞི་སོ་སོར་ཡང་དག་པར་རྟོགས་པར་འགྱུར་བ་དེ་ལྟ་བུའི་ཆོས་བཤད་པར་བྱས་སོ། །དེ་ཐོས་པས་སེམས་ཅན་བརྒྱ་ཕྲག་དུ་མས་ཁྱད་པར་ཆེན་པོ་ཐོབ་སྟེ། ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་ སངས་རྒྱས་ཀྱི་བྱང་ཆུབ་ཏུ། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ། ཁ་ཅིག་གིས་ནི་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་ འོང་བའི་འབྲས་བུ་དང་། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་མངོན་སུམ་དུ་བྱས་སོ། །འཁོར་དེ་ཕལ་ཆེར་ཡང་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་

  791. 86a

    པ་ལ་བཀོད་དོ། །མུ་སྟེགས་ཅན་རྣམས་ཀྱིས་བསམས་པ། བདག་ཅག་གིས་འདི་ཤགས་ཀྱིས་ཚར་བཅད་མི་ནུས་ཀྱིས་ཐབས་ཤིག་བཤམ་པར་བྱས་ལ། དེ་ནས་གླགས་རྙེད་ནས་འདི་བགགས་ཏེ་གསད་པར་བྱའོ་སྙམ་ནས་ཐམས་ཅད་འདུས་ཏེ་ཁྱིམ་ བདག་མགོན་མེད་ཟས་སྦྱིན་གྱི་དྲུང་དུ་དོང་སྟེ་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་གི་འཚོ་བའི་གཞི་ཐམས་ཅད་ནི་བཅད་པས་དེ་བས་སྙིང་བརྩེ་བར་གྱིས་ཤིག་དང་། ཁྱོད་ཀྱི་གཙུག་ལག་ཁང་དུ་གླ་མིའི་ལས་བྱའོ། །ཁོ་བོ་ཅག་འདི་ན་རིང་ཞིག་ཏུ་གནས་གནས་པས་ ཡུལ་བོར་ན་མི་རུང་ངོ་། །ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། རེ་ཞིག་འཕགས་པ་ཤཱ་རིའི་བུ་ལ་བརྟག་གོ་ཞེས་དེ་ཚེ་དང་ལྡན་པ་ཤཱ་རིའི་བུ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་མུ་སྟེགས་ཅན་རྣམས་ཀྱི་མཆིད་ ནས་ཁྱོད་ཀྱིས་ཁོ་བོ་ཅག་གི་འཚོ་བའི་གཞི་ཐམས་ཅད་བཅད་པས་དེ་བས་ན་སྙིང་བརྩེ་བར་གྱིས་ཤིག །ཁྱོད་ཀྱི་གཙུག་ལག་ཁང་དུ་གླ་མིའི་ལས་བྱའོ། །ཁོ་བོ་ཅག་འདི་ན་རིང་ཞིག་ཏུ་གནས་གནས་པས་ཡུལ་བོར་ན་མི་རུང་ངོ་ཞེས་མཆིའོ། །ཚེ་དང་ལྡན་པ་ཤཱ་རིའི་བུ་བསམ་པ་ལ་ ཞུགས་ཏེ། ཅི་འདི་དག་ལ་དགེ་བའི་རྩ་བ་ཅུང་ཟད་ཡོད་དམ་འོན་ཏེ་མེད་སྙམ་ན་དེས་ཡོད་པར་མཐོང་ངོ་། །སུ་ཞིག་ལ་རག་ལུས་སྙམ་ན། བདག་ཁོ་ན་ལའོ་སྙམ་ནས་དེས་བསམས་ཏེ་སྨྲས་པ། ཁྱིམ་བདག་དེ་ལ་འགལ་བ་ཅི་ཡོད་ཀྱིས་དེ་བཞིན་དུ་གྱིས་ཤིག །དེ་རྣམས་གཙུག་ལག་ ཁང་དེར་གླ་མིའི་ལས་བྱེད་པར་བརྩམས་པ་ན་ཚེ་དང་ལྡན་པ་ཤཱ་རིའི་བུས་ལྕག་ཐོགས་ཀྱི་མི་གཏུམ་པོ་ཞིག་སྤྲུལ་ནས་དེས་དེ་རྣམས་ལས་བྱེད་དུ་གཞུག་པར་བརྩམས་སོ། །ཚེ་དང་ལྡན་པ་ཤཱ་རིའི་བུས་དེ་རྣམས་ཀྱི་གདུལ་བའི་དུས་ཤེས་ནས། དེ་དང་ཉེ་བའི་ཤིང་དྲུང་ཞིག་ན་འཆག་ཅིང་འདུག་ པ་དང་། དེ་རྣམས་ཀྱིས་མཐོང་ནས་དེ་རྣམས་ཀྱིས་བསམས་པ། དབེན་པ་ན་འདུག་པས་འདི་བསད་པའི་དུས་ནི་འདི་ཡིན་ནོ་སྙམ་ནས། དེ་རྣམས་ཀྱིས་དེའི་དྲུང་དུ་དོང་སྟེ་བསྐོར་ནས་འདུག་གོ། །ཚེ་དང་ལྡན་པ་ཤཱ་རིའི་བུས་བསམས་པ། འདི་རྣམས་བསམ་པ་ཅི་འདྲ་བས་བདག་གི་

  792. 86b

    དྲུང་དུ་འོངས་སྙམ་ན། ཅི་ཙམ་ན་བསད་པའི་སེམས་ཀྱིས་ཡིན་པར་ཤེས་ནས་དེས་ལྕག་ཐོགས་སྤྲུལ་པ་དེ་སྦད་ནས། དེས་དེ་རྣམས་ལས་བྱོས་དེ་བཞེས་ཐག་བཅུག་པ་དང་། དེ་རྣམས་ཀྱིས་སྨྲས་པ། འཕགས་པ་ཤཱ་རིའི་བུ་ཡོངས་སུ་བསྐྱབ་ཏུ་གསོལ། དེས་སྨྲས་པ། ཚེ་དང་ལྡན་པ་རེ་ ཞིག་སོང་ལ་ངལ་སོར་ཆུག་ཤིག །དེ་རྣམས་ཀྱིས་སྨྲས་པ། འདི་ནི་འདི་ལྟ་བུར་བདག་ཉིད་ཆེ་བ་ཡིན་ཏེ། བདག་ཅག་གིས་ནི་གསད་པར་བསམས་ན་འདི་ནི་བདག་ཅག་ལ་བྱམས་པར་སེམས་སོ་སྙམ་དུ་རིག་ནས་དད་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་དེ་རྣམས་ཀྱི་བསམ་པ་དང་ བག་ལ་ཉལ་དང་། ཁམས་དང་། རང་བཞིན་ཤེས་ནས་འཕགས་པའི་བདེན་པ་བཞི་པོ་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པར་བྱས་ཏེ། དེ་ཐོས་ནས་དེ་རྣམས་ཀྱིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་ བུ་མངོན་སུམ་དུ་བྱས་ཏེ་དེ་རྣམས་ཀྱིས་བདེན་པ་མཐོང་ནས་སྨྲས་པ། བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་གནང་ན་བདག་ཅག་བཙུན་པ་ཤཱ་རིའི་བུའི་སྤྱན་སྔར་ཚངས་པར་སྤྱོད་པ་སྤྱད་པར་ བགྱིའོ། །ཚེ་དང་ལྡན་པ་ཤཱ་རིའི་བུས་དེ་རྣམས་རབ་ཏུ་ཕྱུང་བསྙེན་པར་རྫོགས་པར་བྱས་ནས་གདམས་ངག་བྱིན་ཏེ། དེ་རྣམས་ཀྱིས་བརྩོན་པ་དང་། འབད་པ་དང་བརྩལ་བར་བྱས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ ཐམས་ཅད་ཉམས་པ་དང་། ལྷུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་མངོན་སུམ་དུ་བྱས་ཏེ། དགྲ་བཅོམ་པར་གྱུར་ནས་ཁམས་གསུམ་གྱི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་དང་སྟེ་འུར་མཉམ་པ། རིག་པས་མ་རིག་པའི་སྒོ་ངའི་སྦུབས་དྲལ་ཞིང་རིག་པ་དང་མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་

  793. 87a

    རྙེད་པ་ལ་ཆགས་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་བའི་དབང་པོ་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་གཙུག་ལག་ཁང་གི་ ཐིག་སྐུད་ཀྱི་མཐའ་གཅིག་ནས་བཟུང་། མཐའ་གཅིག་ནས་ཁྱིམ་བདག་མགོན་མེད་ཟས་སྦྱིན་གྱིས་བཟུང་བ་དང་། ཚེ་དང་ལྡན་པ་ཤཱ་རིའི་བུས་འཛུམ་དབྱུང་བར་བརྩམས་སོ། །ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། འཕགས་པ་ཤཱ་རིའི་བུ་དེ་བཞིན་གཤེགས་པ་རྣམས་ སམ། དེ་བཞིན་གཤེགས་པའི་ཉན་ཐོས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་ན། འཕགས་པ་ཤཱ་རིའི་བུ་ཅིའི་རྒྱུ་ཅིའི་རྐྱེན་གྱིས་འཛུམ་པ་མཛད། ཁྱིམ་བདག་དེ་དེ་བཞིན་ནོ། །དེ་དེ་བཞིན་ཏེ། དེ་བཞིན་གཤེགས་པ་རྣམས་སམ། དེ་བཞིན་གཤེགས་ པའི་ཉན་ཐོས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཁྱོད་ཀྱིས་འདིར་ཐིག་སྐུད་བཟུང་བ་དང་། དགའ་ལྡན་གྱི་ལྷའི་རིས་སུ་ཡང་གསེར་གྱི་ཁང་པ་གྲུབ་པར་གྱུར་ཏོ། །དེ་ནས་ཁྱིམ་བདག་མགོན་མེད་ཟས་སྦྱིན་ངོ་མཚར་སྐྱེས་པའི་མིག་བགྲད་དེ་སྨྲས་པ། འཕགས་ པ་ཤཱ་རིའི་བུ་གལ་ཏེ་དེ་ལྟ་ན་དེའི་སླད་དུ་ཡང་ཐིག་སྐུད་བརྐྱང་དང་ལྷག་པར་སེམས་མངོན་པར་དད་པར་བགྱིའོ། །ཚེ་དང་ལྡན་པ་ཤཱ་རིའི་བུས་ཡང་ཐིག་སྐུད་དེ་བཟུང་བ་དང་། ཁྱིམ་བདག་མགོན་མེད་ཟས་སྦྱིན་གྱིས་ལྷག་པར་དང་བ་དྲག་པོའི་ཤུགས་ཀྱིས་སེམས་མངོན་པར་དད་པར་ བྱས་ཏེ། དད་པ་དེའི་མཇུག་ཐོགས་ཁོ་ནར་གསེར་གྱི་ཁང་པ་རིན་པོ་ཆེ་སྣ་བཞི་ལས་བྱས་པར་གྱུར་ནས་ཚེ་དང་ལྡན་པ་ཤཱ་རིའི་བུས་ཀྱང་དེ་ལ་གོ་བར་བྱས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་གོང་ནས་གོང་དུ་བསོད་ནམས་རབ་ཏུ་འཕེལ་བའི་རྒྱུད་ཀྱིས་གཙུག་ལག་ཁང་ཆེན་ པོ་བཅུ་དྲུག་དང་། ཁང་ཕྲན་དྲུག་བཅུ་རྩིག་ཏུ་བཅུག་སྟེ། དེས་གཙུག་ལག་ཁང་ཆེན་པོ་བཅུ་དྲུག་དང་། ཁང་ཕྲན་དྲུག་བཅུ་བརྩིགས་ནས་ཡོ་བྱད་ཐམས་ཅད་ཀྱིས་རྒྱས་པར་བྱས་ཏེ། ཚེ་དང་ལྡན་པ་ཤཱ་རིའི་བུ་གང་ན་བ་དེར་སོང་སྟེ་ཕྱིན་པ་དང་། ཚེ་དང་ལྡན་པ་ཤཱ་རིའི་བུ་ལ་

  794. 87b

    འདི་སྐད་ཅེས་སྨྲས་སོ། །འཕགས་པ་ཤཱ་རིའི་བུ་བཅོམ་ལྡན་འདས་གཤེགས་ན་ཤུལ་སོ་ཇི་ཙམ་དུ་བྱོན་པར་འགྱུར། ཁྱིམ་བདག་དཔེར་ན་འཁོར་ལོས་སྒྱུར་བའི་རྒྱལ་པོའི་ཙམ་མོ། །འཁོར་ལོས་སྒྱུར་བའི་རྒྱལ་པོ་མཆི་བའི་ཚད་ཇི་ཙམ། ཁྱིམ་བདག་འཁོར་ལོས་སྒྱུར་བའི་རྒྱལ་པོ་ནི་ ཉི་མ་གཅིག་གིས་རྒྱང་གྲགས་བཅུའི་ལམ་དུ་འགྲོའོ། །དེ་ནས་ཁྱིམ་བདག་མགོན་མེད་ཟས་སྦྱིན་གྱིས་གང་ཡང་མཉན་ཡོད་ནས་རྒྱལ་པོའི་ཁབ་དེའི་བར་གྱི་གཤེགས་དགོངས་བརྩིས་ནས་གཞེས་ས་དག་བྱེད་དུ་བཅུག །སྦྱིན་གཏོང་གི་ཁང་པ་དག་བྱེད་དུ་བཅུག །དུས་ཚོད་གསོལ་ བའི་མི་དག་བཀོད། གདུགས་དང་རྒྱལ་མཚན་དང་། བ་དན་གྱིས་བརྒྱན། ཙན་དན་གྱི་ཆུས་ཆག་ཆག་བཏབ། ཤིན་ཏུ་དྲི་ཞིམ་པོའི་པོག་པོར་དག་ཉེ་བར་བཀོད། རྟ་བབས་དག་བྱེད་དུ་བཅུག །དུས་ཀྱི་དང་ཐུན་ཚོད་ཀྱི་སྨན་དག་ཀྱང་འཇོག་ཏུ་བཅུག་གོ། །དེ་ལྟར་ཚོགས་ བསགས་ནས་མི་ཞིག་ལ་བསྒོ་བ། ཀྱེ་ནང་རྗེ་ཚུར་སྤྱོན། ཁྱོད་བཅོམ་ལྡན་འདས་གང་ན་བ་དེར་སོང་ལ་སོན་པ་དང་། ཁོ་བོའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚོལ་ལ། གནོད་པ་ཉུང་ངམ། ཉམ་ང་བ་ཆུང་ངམ། འཚོ་འམ་བསྐྱོད་པ་ཡང་ ངམ། སྟོབས་དང་བདེ་བ་ལ་རེག་པར་གནས་སམ་ཞེས་ཞུས་ལ་འདི་སྐད་ཅེས་བཅོམ་ལྡན་འདས་མཉན་ཡོད་དུ་གཤེགས་སུ་གསོལ། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཇི་སྲིད་འཚོའི་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྙེན་བཀུར་བགྱིད་དོ་ཞེས་ཀྱང་གསོལ་ཅིག་ཇོ་བོ་བཀའ་བཞིན་འཚལ་ཞེས་མི་དེས་ཁྱིམ་བདག་མགོན་མེད་ཟས་སྦྱིན་གྱི་ལྟར་མཉན་ནས་རྒྱལ་པོའི་ཁབ་གང་ན་བ་དེར་ཆས་ཏེ་རིམ་གྱིས་རྒྱལ་པོའི་ཁབ་ཏུ་ཕྱིན་ཏོ། ། དེ་ནས་ལམ་གྱིས་དུབ་པ་ངལ་སོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་མི་དེས་བཅོམ་ལྡན་འདས་ལ་འདི་སྐད་ཅེས་

  795. 88a

    གསོལ་ཏོ། །བཙུན་པ་བཅོམ་ལྡན་འདས་ཀྱི་ཞབས་གཉིས་ལ་ཁྱིམ་བདག་མགོན་མེད་ཟས་སྦྱིན་མགོ་བོས་ཕྱག་འཚལ་ནས་ཞེས་བྱ་བ་ནས། རེག་པར་གནས་སམ་ཞེས་བྱ་བའི་བར་གོང་མ་བཞིན་དུའོ། །ཀྱེ་མི་ཁྱོད་དང་ཁྱིམ་བདག་མགོན་མེད་ཟས་སྦྱིན་བདེ་བར་ གྱུར་ཅིག །བཙུན་པ་ཁྱིམ་བདག་མགོན་མེད་ཟས་སྦྱིན་གྱི་མཆིད་ནས་བཅོམ་ལྡན་འདས་མཉན་ཡོད་དུ་གཤེགས་སུ་གསོལ། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཇི་སྲིད་འཚོའི་བར་དུ་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་ དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བཀུར་སྟིར་བགྱིད་དོ། །ཞེས་མཆིའོ། །བཅོམ་ལྡན་འདས་ཀྱིས་མི་དེ་ལ་ཅང་མི་གསུང་བས་གནང་ངོ་། །དེ་ནས་མི་དེ་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་དུལ་བ་འཁོར་དུལ་བ། ཞི་བ་འཁོར་ཞི་བ། གྲོལ་བ་འཁོར་གྲོལ་བ། དབུགས་ཕྱིན་པ་འཁོར་དབུགས་ཕྱིན་པ། རྣམ་པར་དུལ་བ་འཁོར་རྣམ་པར་དུལ་བ། དགྲ་བཅོམ་པ་ འཁོར་དགྲ་བཅོམ་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ། མཛེས་པ་འཁོར་མཛེས་པ། ཁྱུ་མཆོག་བ་ལང་གི་ཚོགས་ཀྱིས་བསྐོར་བ་ལྟ་བུ། གླང་པོ་ཆེའི་མཆོག་གླང་པོ་ཆེའི་ཕྲུ་གུའི་ཚོགས་ཀྱིས་བསྐོར་བ་ལྟ་བུ། སེང་གེ་མཆེ་བ་ཅན་གྱི་ཚོགས་ ཀྱིས་བསྐོར་བ་ལྟ་བུ། ངང་པའི་རྒྱལ་པོ་ངང་པའི་ཚོགས་ཀྱིས་བསྐོར་བ་ལྟ་བུ། ནམ་མཁའ་ལྡིང་བྱའི་ཚོགས་ཀྱིས་བསྐོར་བ་ལྟ་བུ། བྲམ་ཟེ་སློབ་མའི་ཚོགས་ཀྱིས་བསྐོར་བ་ལྟ་བུ། འཁོར་ལོས་སྒྱུར་བ་བུ་སྟོང་གིས་བསྐོར་བ་ལྟ་བུ། ཟླ་བ་རྒྱུ་སྐར་གྱི་ཚོགས་ཀྱིས་བསྐོར་བ་ ལྟ་བུ། ཉི་མ་འོད་ཟེར་སྟོང་གིས་བསྐོར་བ་ལྟ་བུ། ཡུལ་འཁོར་སྲུང་དྲི་ཟའི་ཚོགས་ཀྱིས་བསྐོར་བ་ལྟ་བུ། འཕགས་སྐྱེས་པོ་གྲུལ་བུམ་གྱི་ཚོགས་ཀྱིས་བསྐོར་བ་ལྟ་བུ། མིག་མི་བཟང་ཀླུའི་ཚོགས་ཀྱིས་བསྐོར་བ་ལྟ་བུ། རྣམ་ཐོས་ཀྱི་བུ་གནོད་སྦྱིན་གྱི་ཚོགས་ཀྱིས་བསྐོར་བ་

  796. 88b

    ལྟ་བུ། ཐགས་ཟངས་རིས་ལྷ་མ་ཡིན་གྱི་ཚོགས་ཀྱིས་བསྐོར་བ་ལྟ་བུ། བརྒྱ་བྱིན་སུམ་བཅུ་རྩ་གསུམ་གྱི་ཚོགས་ཀྱིས་བསྐོར་བ་ལྟ་བུ། ཚངས་པ་ཚངས་རིས་ཀྱི་ཚོགས་ཀྱིས་བསྐོར་བ་ལྟ་བུ། རྒྱ་མཚོ་གཡོ་བ་མེད་པ་ལྟ་བུ། སྤྲིན་ཆུ་དང་བཅས་པ་ལྟ་བུ། གླང་ པོ་ཆེ་དམ་པ་དྲེགས་པ་དང་བྲལ་བ་ལྟར་དབང་པོ་རྣམས་ཤིན་ཏུ་དུལ་བས་སྤྱོད་ལམ་གྱི་ཚུལ་མ་འཁྲུགས་པ། སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་རྣམ་པར་མཛེས་པར་བྱས་པ། འོད་འདོམ་ གང་གིས་བརྒྱན་པའི་སྐུ་ཉི་མའི་འོད་ཟེར་སྟོང་བས་ལྷག་པའི་འོད་ཅན། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ་དགེ་ སློང་གི་དགེ་འདུན་ཆེན་པོ་དང་། ཁྱིམ་བདག་མགོན་མེད་ཟས་སྦྱིན་འཁོར་དང་བཅས་པ་དང་། མཉན་ཡོད་ན་གནས་པའི་སྐྱེ་བོའི་ཚོགས་དང་ལྷ་བརྒྱ་སྟོང་ཕྲག་དུ་མས་ཞབས་འབྲིང་བྱས་ནས་མཉན་ཡོད་ཀྱི་གྲོང་ཁྱེར་དུ་གཤེགས་སོ། །གང་གི་ཚེ་བཅོམ་ལྡན་འདས་མཉན་ཡོད་ ཀྱི་གྲོང་ཁྱེར་དུ་གཤེགས་ནས། མངོན་པར་འདུ་མཛད་པ་དང་བཅས་པས་གྲོང་ཁྱེར་གྱི་སྒོའི་ཐེམ་པ་ལ་ཞབས་གཡས་པས་མནན་པ་དེའི་ཚེ་ས་རྣམ་པ་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་དུ་རབ་ཏུ་གཡོས། ལྡེག །རབ་ཏུ་ལྡེག ། ཀུན་དུ་རབ་ཏུ་ལྡེག་སྟེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ་བར་གྱུར་ཅིང་། འཇིག་ རྟེན་འདི་ཐམས་ཅད་འཇིག་རྟེན་གྱི་བར་དང་བཅས་ཏེ་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །བར་སྣང་ལ་ཡང་ལྷའི་རྔ་བརྡུང་ཞིང་ནམ་མཁའི་དཀྱིལ་ན་གནས་པའི་ལྷས་བཅོམ་ལྡན་འདས་ཀྱི་སྟེང་ནས་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་།

  797. 89a

    ཨ་ག་རུའི་ཕྱེ་མ་དང་། རྒྱ་སྤོས་ཀྱི་ཕྱེ་མ་དང་། ཙན་དན་གྱི་ཕྱེ་མ་དང་། གུར་གུམ་གྱི་ཕྱེ་མ་དང་། ཏ་མ་ལའི་ལོ་མའི་ཕྱེ་མ་དང་། ལྷའི་མེ་ཏོག་མན་དཱ་ར་བ་རྣམས་འཐོར་ཞིང་ལྷའི་གོས་རྣམས་ཀྱང་འཐོར་རོ། །བཅོམ་ལྡན་འདས་གྲོང་ཁྱེར་དུ་གཤེགས་པ་ན་འདི་ དག་དང་། གཞན་ཡང་ངོ་མཚར་དེ་ལྟ་བུ་དག་བྱུང་བར་གྱུར་ཏོ། །གཞན་ཡང་དོག་པ་རྣམས་ནི་ཡངས་པར་གྱུར་ཏོ། །དམའ་བ་རྣམས་ནི་མཐོན་པོར་གྱུར་ཏོ། །མཐོན་པོ་རྣམས་ནི་མཉམ་པར་གྱུར་ཏོ། །གླང་པོ་ཆེ་ཡང་སྐད་འབྱིན་ཏོ། །རྟ་ཡང་སྐད་འབྱིན། ཁྱུ་མཆོག་ རྣམས་ཀྱང་སྐད་འབྱིན་ཏོ། །ཁྱིམ་ན་ཡོད་པའི་རོལ་མོའི་ཆ་བྱད་སྣ་ཚོགས་པ་རྣམས་ཀྱང་རང་སྒྲ་འབྱིན་ཏོ། །ལོང་བ་རྣམས་ཀྱིས་ནི་མིག་ཐོབ་བོ། །འོན་པ་རྣམས་ཀྱིས་ནི་རྣ་བས་ཐོས་སོ། །ལྐུགས་པ་རྣམས་ཀྱིས་ནི་སྨྲ་ནུས་པར་གྱུར་ཏོ། །དབང་པོ་མ་ཚང་བ་རྣམས་ཀྱིས་ནི་དབང་ པོ་རྣམས་ཡོངས་སུ་ཚང་བ་ཐོབ་བོ། །ཆང་གིས་མྱོས་པ་རྣམས་ནི་མྱོས་པ་དང་བྲལ་བར་གྱུར་ཏོ། །དུག་འཐུངས་པ་རྣམས་ནི་དུག་ཞི་བར་གྱུར་ཏོ། །ཕན་ཚུན་ཁོ་ན་བྱུང་བ་རྣམས་ནི་བྱང་བར་གྱུར་ཏོ། །སྦྲུམ་མ་རྣམས་ནི་བདེ་བར་བཙས་པར་གྱུར་ཏོ། །བཙོན་དུ་བཅིངས་པ་རྣམས་ནི་ བཅིངས་པ་ལས་ཐར་ཏོ། །ནོར་མེད་པ་རྣམས་ནི་ནོར་རྙེད་པར་གྱུར་ཏོ། །དེ་དག་དང་གཞན་ཡང་བཅོམ་ལྡན་འདས་གྲོང་ཁྱེར་དུ་གཤེགས་པ་ན་ངོ་མཚར་བརྒྱ་སྟོང་དག་བྱུང་བར་གྱུར་ཏོ། །དེ་ནས་བཅོམ་ལྡན་འདས་བཀུར་སྟི་ཆེན་པོ་དེ་ལྟ་བུས་མཉན་ཡོད་དུ་གཤེགས་སོ། །གཤེགས་ ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་མགོན་མེད་ཟས་སྦྱིན་མཛའ་བཤེས་དང་ཉེ་དུ་དང་གཉེན་གྱི་སྐྱེ་བོས་ཡོངས་སུ་བསྐོར་ནས་གསེར་གྱི་བྱ་མ་བུམ་བླངས་ཏེ་ཆུའི་རྒྱུན་སྦྲེང་བར་བརྩམས་པ་ལས། དེ་འཛག་ཏུ་མ་བཏུབ་ པས་ཁྱིམ་བདག་མགོན་མེད་ཟས་སྦྱིན་ཡིད་མི་བདེ་སྟེ་བསམས་པ། བདག་གིས་ལས་ཉེས་པ་དང་བཅས་པ་ཆུང་ཟད་བྱས་པར་མ་གྱུར་གྲང་སྙམ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཁྱོད་ཀྱིས་ལས་ཉེས་པ་དང་བཅས་པ་ཆུང་ཟད་ཀྱང་བྱས་པ་མེད་དོ། །འོན་

  798. 89b

    ཀྱང་ཁྱོད་ཀྱིས་ཕྱོགས་འདིར་འདུག་ནས་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ལ་ཕྱོགས་འདི་ཉིད་ཕུལ་བ་ཡིན་གྱིས་ཕྱོགས་གཞན་ཞིག་ཏུ་འདུག་ལ་སྦྲེངས་ཤིག །དེས་ཕྱོགས་གཞན་ཞིག་ཏུ་འདུག་ནས་སྦྲེངས་པ་དང་། བཅོམ་ལྡན་འདས་ཉིད་ཀྱིས་ཡན་ལག་ལྔ་དང་ ལྡན་པའི་གསུང་དབྱངས་ཀྱིས་རྒྱལ་བྱེད་ཀྱི་ཚལ་བརྗོད་པར་མཛད་དེ། རྒྱལ་བྱེད་ཀྱི་ཚལ་བརྗོད་པར་མཛད་པ་ན། གཞོན་ནུ་རྒྱལ་བྱེད་ཀྱིས་བསམས་པ། ཀྱེ་མ་བཅོམ་ལྡན་འདས་ཀྱིས་དེར་བདག་གི་མིང་ཐོག་མར་སྨོས་ཀྱང་ཅི་མ་རུང་སྙམ་པ་དང་། བཅོམ་ལྡན་འདས་ཀྱི་ཐུགས་ཀྱིས་ གཞོན་ནུ་རྒྱལ་བྱེད་ཀྱི་སེམས་མཁྱེན་ནས་དགེ་སློང་དག་འདི་ནི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ཡིན་ནོ་ཞེས་དེར་མིང་ཐོག་མར་སྨོས་པར་མཛད་དོ། །གཞོན་ནུ་རྒྱལ་བྱེད་ཀྱིས་བཅོམ་ལྡན་འདས་ཀྱིས་དེང་བདག་གི་མིང་ཐོག་མར་སྨོས་པ་མཛད་པ་ཐོས་ནས་ ཤིན་ཏུ་དགའ་བར་གྱུར་ཏེ། དགའ་བ་དང་མགུ་བ་སྐྱེས་པ་དེས་ནོར་གྱི་རིགས་ལས་བཅོམ་ལྡན་འདས་ཀྱི་ཕྱིར་རིན་པོ་ཆེ་སྣ་བཞིའི་སྒོ་ཁང་བྱེད་དུ་བཅུག་གོ། །དེ་བཞིན་དུ་གནས་བརྟན་སྡུད་པ་བྱེད་པ་རྣམས་ཀྱིས་ཀྱང་མདོ་སྡེའི་ནང་དུ་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ ཟས་སྦྱིན་གྱི་ཀུན་དགའ་ར་བ་ན་བཞུགས་སོ་ཞེས་གདགས་པ་བྱས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་དགེ་སྦྱོང་གཽ་ཏ་མ་ཀོ་ས་ལའི་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས། མཉན་ཡོད་དུ་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་ བཞུགས་ཏེ། ཤེས་ལྡན་གཽ་ཏ་མ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པར་བདག་ཉིད་ཞལ་གྱིས་འཆེའོ་ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་དང་ལྷན་ཅིག་མངོན་དུ་ཡང་ དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་བདག་གིས་

  799. 90a

    ཤེས་ལྡན་གཽ་ཏ་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པར་བདག་ཉིད་ཞལ་གྱིས་འཆེའོ་ཞེས་ཐོས་ལགས་ན། གཽ་ཏ་མ་གང་དག་དེ་སྐད་ཅེས་ལུང་སྟོན་པ་དེ་དག་ཅི་ག་དགེ་སྦྱོང་གཽ་ཏ་མ་ལ་སྐུར་བ་འདེབས་པ་མ་ལགས་ སམ། ཐལ་བར་སྨྲ་བ་མ་ལགས་སམ། ཤེས་ལྡན་གཽ་ཏ་མས་གསུངས་པ་བཞིན་སྨྲ་བ་ལགས་སམ། ཆོས་སྨྲ་བ་ལགས་སམ། ཆོས་དང་མཐུན་པའི་ཆོས་ལུང་སྟོན་པ་ལགས་སམ། ཅིག་དེ་དག་གི་དྲུང་དུ་ཕ་རོལ་པོ་ཆོས་དང་མཐུན་པའི་རྩོད་པའི་རྗེས་སུ་ རྩོད་པ་མཆིས་ན་སྨོད་པའི་ཆོས་ཀྱི་གནས་སུ་མི་འགྱུར་ལགས་སམ། རྒྱལ་པོ་ཆེན་པོ་གང་དག་དེ་སྐད་དུ་སྨྲ་བ་དེ་དག་ནི་དེ་སྐད་དུ་ལུང་སྟོན་པ་བདེན་པ་དེ་ང་ལ་སྐུར་བ་འདེབས་པ་མ་ཡིན། ཐལ་བར་སྨྲ་བ་མ་ཡིན། དེ་ནི་གསུངས་པ་བཞིན་སྨྲ་བ་ཡིན། ཆོས་སྨྲ་ བ་ཡིན། ཆོས་དང་མཐུན་པའི་ཆོས་ལུང་སྟོན་པ་ཡིན་ཏེ། དེ་དག་གི་དྲུང་དུ་ཕ་རོལ་པོ་ཆོས་དང་མཐུན་པའི་རྩོད་པའི་རྗེས་སུ་རྩོད་པ་འོངས་ན་སྨོད་པའི་ཆོས་ཀྱི་གནས་སུ་མི་འགྱུར་རོ། །རྒྱལ་པོ་ཆེན་པོ་དེ་ཅིའི་ཕྱིར་ཞེ་ན། ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ མངོན་པར་སངས་རྒྱས་སོ། །ཤེས་ལྡན་གཽ་ཏ་མ་དེ་སྐད་གསུངས་མོད་ཀྱི། ཤེས་ལྡན་གཽ་ཏ་མ་ལ་བདག་ཡིད་མི་ཆེས་ལགས་སོ། །དེ་ཅིའི་སླད་དུ་ཞེ་ན། ཀྱེ་གཽ་ཏ་མ་རེ་ཞིག་རྒན་ཞིང་རྒན་པའི་དགེ་སྦྱོང་དང་བྲམ་ཟེ་ནི་འདི་དག་ལགས་ཏེ། འདི་ལྟ་སྟེ་འོད་སྲུང་རྫོགས་བྱེད་དང་། ཀུན་ དུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་། གཅེར་བུ་པ་གཉེན་གྱི་བུ་གང་ལགས་པ་དེ་དག་ཀྱང་ད་དུང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ པར་བདག་ཉིད་གཡར་གྱིས་མི་འཆེ་བ་ལགས་ན། ཤེས་ལྡན་གཽ་ཏ་མ་འཁྲུངས་ནས་རིང་པོ་མ་ལགས་པ་གསར་དུ་རབ་ཏུ་བྱུང་བས་ལྟ་སྨོས་ཀྱང་ཅི་འཚལ། རྒྱལ་པོ་ཆེན་པོ་གཞོན་ནུ་བཞི་པོ་འདི་དག་ལ་ཁྱད་དུ་གསད་པར་མི་བྱ་གཞོན་ནུ་ལ་ཟིལ་གྱིས་མནན་པར་མི་བྱ་སྟེ། བཞི་གང་ཞེ་ན།

  800. 90b

    རྒྱལ་པོ་ཆེན་པོ་རྒྱལ་རིགས་གཞོན་ནུ་ལ་ཁྱད་དུ་གསད་པར་མི་བྱ་གཞོན་ནུ་ལ་ཟིལ་གྱིས་མནན་པར་མི་བྱའོ། །རྒྱལ་པོ་ཆེན་པོ་སྦྲུལ་གཞོན་ནུ་ལ་ཁྱད་དུ་གསད་པར་མི་བྱ། གཞོན་ནུ་ལ་ཟིལ་གྱིས་མནན་པར་མི་བྱའོ། །རྒྱལ་པོ་ཆེན་པོ་མེ་ཆུང་ངུ་ཁྱད་དུ་གསད་པར་མི་བྱ། ཆུང་ངུ་ ལ་ཟིལ་གྱིས་མནན་པར་མི་བྱའོ། །རྒྱལ་པོ་ཆེན་པོ་དགེ་སློང་གཞོན་ནུ་ལ་ཁྱད་དུ་གསད་པར་མི་བྱ་གཞོན་ནུ་ལ་ཟིལ་གྱིས་མནན་པར་མི་བྱའོ། །དེ་ཅིའི་ཕྱིར་ཞེ་ན། དགེ་སློང་གཞོན་ནུར་གྱུར་ཀྱང་དེ་རྫུ་འཕྲུལ་ཆེ་ཞིང་མཐུ་ཆེ་བའི་དགྲ་བཅོམ་པར་འགྱུར་རོ། །བཅོམ་ལྡན་འདས་ ཀྱིས་དེ་སྐད་ཅེས། །བཀའ་སྩལ་ནས་ནི་བདེ་གཤེགས་ཀྱིས། །དེ་སྐད་ཅེས་ནི་བཀའ་སྩལ་ནས། །སྟོན་པས་གཞན་ཡང་འདི་སྐད་གསུངས། །རྒྱལ་རིགས་དཔེ་བྱད་ལྡན་པ་དང་། །རིགས་བཙུན་གྲགས་པར་ལྡན་པ་ལ། །བློ་དང་ལྡན་པས་དེ་གཞོན་ཞེས། །ཁྱད་ དུ་མི་གསད་ཟིལ་མི་མནན། །རྒྱལ་པོ་རྒྱལ་རིགས་མཁས་པ་ཡིས། །རྒྱལ་སྲིད་དག་ནི་ཐོབ་གྱུར་ནས། །ཆད་པས་གཅོད་པའི་གནས་དེ་ཡོད། །དེ་བས་དེ་ལ་ཤིན་ཏུ་གདུང་། །དེ་ལྟས་རང་གི་སྲོག་བསྲུང་ཞིང་། །རང་གི་དོན་ལ་ལྟ་བས་ནི། །དེ་ནི་ཁྱད་དུ་མི་གསད་ཅིང་། ། དེ་ལ་ལེགས་པར་བག་ཀྱང་བྱ། །གལ་ཏེ་གྲོང་ངམ་དགོན་པའང་རུང་། །གང་དུ་སྦྲུལ་ནི་མཐོང་གྱུར་ན། །བློ་དང་ལྡན་པས་དེ་གཞོན་ཞེས། །ཁྱད་དུ་མི་གསད་ཟིལ་མི་མནན། །འདི་ལྟར་སྦྲུལ་ནི་རྒྱུ་བ་ན། །རིགས་ནི་རྣམ་པ་སྣ་ཚོགས་ལ། །གླགས་རྙེད་ནས་ནི་ གཞོན་ནུས་ཀྱང་། །སྐྱེས་པ་བུད་མེད་དུ་མ་ཟིན། །དེ་ལྟས་རང་གི་སྲོག་བསྲུང་ཞིང་། །རང་གི་དོན་ལ་ལྟ་བས་ནི། །དེ་ནི་ཁྱད་དུ་མི་གསད་ཅིང་། །དེ་ལ་ལེགས་པར་བག་ཀྱང་བྱ། །མང་པོ་སྲེག་ཅིང་འབར་བྱེད་པ། །ལམ་གནག་བསྲེག་བྱ་ཟ་བའི་མེ། །བློ་དང་ ལྡན་པས་དེ་ཆུང་ཞེས། །ཁྱད་དུ་མི་གསད་ཟིལ་མི་མནན། །མེ་ནི་ཆུང་ངུར་གྱུར་པ་ཡང་། །རྐྱེན་ལས་ཆེན་པོར་འགྱུར་བ་ཡིན། །མེས་ནི་རིང་པོར་མི་ཐོགས་པར། །གྲོང་རྡལ་དང་ནི་གྲོང་ཁྱེར་སྲེག །དེ་ལྟས་རང་གི་སྲོག་བསྲུང་ཞིང་། །རང་གི་དོན་ལ་ལྟ་

  801. 91a

    བས་ནི། །དེ་ནི་ཁྱད་དུ་མི་གསད་ཅིང་། །དེ་ལ་ལེགས་པར་བག་ཀྱང་བྱ། །ལམ་གནག་བསྲེག་བྱ་ཟ་བའི་མེ། །ནགས་ཚལ་སྲེག་པ་གང་ཡིན་ཏེ། །ཞག་འདས་ནས་ནི་འགའ་ཞིག་ཏུ། །འདབ་མ་རྣམས་ནི་སྐྱེ་འགྱུར་གྱི། །དགེ་སློང་ཚུལ་ ཁྲིམས་ལྡན་པ་ལ། །བརྟེན་ནས་གང་ཞིག་ཚིག་གྱུར་པ། །དེ་ལ་བུ་ཚ་ཡོད་མིན་པས། །བགོ་སྐལ་སྤྱོད་པ་འཐོབ་མི་འགྱུར། །ཏ་ལའི་མགོ་ནི་བཅད་པ་བཞིན། །རིང་པོར་མི་ཐོགས་རབས་ཀྱང་འཆད། །དེ་བས་རང་གི་སྲོག་བསྲུང་ཞིང་། །རང་གི་དོན་ལ་ལྟ་བས་ནི། ། དེ་ནི་ཁྱད་དུ་མི་གསད་ཅིང་། །དེ་ལ་ལེགས་པར་བག་ཀྱང་བྱ། །རྒྱལ་རིགས་དཔེ་བྱད་ལྡན་པ་དང་། །དེ་བཞིན་བྲང་འགྲོ་མེ་དང་ནི། །དགེ་སློང་ཚུལ་ཁྲིམས་ལྡན་དེ་ལ། །བློ་དང་ལྡན་པས་བརྙས་མི་བྱ། །དེ་བས་རང་གི་སྲོག་བསྲུང་ཞིང་། །རང་གི་དོན་ལ་ལྟ་བས་ནི། །དེ་ལ་ཁྱད་དུ་ མི་གསད་ཅིང་། །དེ་ལ་ལེགས་པར་བག་ཀྱང་བྱ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་ སོང་ངོ་། །དེ་ནས་སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་རྒྱལ་པོ་ཟས་གཙང་ལ་སྤྲིང་ཡིག་བསྐུར་བ། ལྷ་དགྱེས་པ་བསྐྱེད་དུ་གསོལ། ཁྱོད་ཀྱི་སྲས་ཀྱིས་ བདུད་རྩི་ཐོབ་ནས་བདུད་རྩིས་འགྲོ་བ་ཚིམ་པར་བྱེད་དོ་ཞེས་སྤྲིང་བ་རྒྱལ་པོ་ཟས་གཙང་གིས་ཐོས་ནས་ཕོ་ཉ་བཏང་བ་ལས་དེ་དེ་ཉིད་དུ་རབ་ཏུ་བྱུང་ངོ་། །གཉིས་པ་བཏང་བ་དང་། དེ་ཡང་དེ་ཉིད་དུ་རབ་ཏུ་ཕྱུང་སྟེ། ཕོ་ཉ་གང་དང་གང་བཏང་བ་དེ་དང་དེ་དག་དེ་ཉིད་དུ་ལེགས་པར་གསུངས་ པའི་ཆོས་འདུལ་བ་ཉིད་ལ་རབ་ཏུ་བྱུང་བར་གྱུར་ཏོ། །རྒྱལ་པོ་ཟས་གཙང་ལག་པ་ལ་འགྲམ་པ་གཏད་ནས་ཕོ་ཉ་གང་དང་གང་བཏང་བ་དེ་དང་དེ་དག་དེ་ཉིད་དུ་ལེགས་པར་གསུངས་པའི་ཆོས་འདུལ་བ་ཉིད་ལ་རབ་ཏུ་བྱུང་ངོ་སྙམ་མོ། །སེམས་ཁོང་དུ་ཆུད་ཅིང་འདུག་པ་འཆར་ཀས་

  802. 91b

    མཐོང་ནས་སྨྲས་པ། ལྷ་ཅིའི་སླད་དུ་ཁྱོད་ཕྱག་ལ་ཞལ་གཏད་ནས་ཐུགས་མི་དགྱེས་ཤིང་བཞུགས། དེས་སྨྲས་པ། འཆར་ཀ་གང་གི་ཚེ་གཞོན་ནུ་དོན་ཐམས་ཅད་གྲུབ་པ་དཀའ་བ་སྤྱོད་པ་དེའི་ཚེ་ཁོ་བོས་ཕྲིན་ཡིག་སྐྱེལ་བའི་མི་བཏང་བ་ལས་དེ་དག་ཁོ་བོའི་གན་དུ་འོངས་ནས་ གཞོན་ནུ་དོན་ཐམས་ཅད་གྲུབ་པ་བཞུགས་པ་འདི་དང་འདིར་བཞུགས་སོ་ཞེས་སྨྲའོ། །ད་ནི་ཁོ་བོས་ཕྲིན་ཡིག་སྐྱེལ་བའི་མི་བཏང་ན་འགའ་ཡང་ཕྲིན་ཡིག་ཁྱེར་ཏེ་མི་འོང་ན་ཇི་ལྟར་སེམས་ཁོང་དུ་ཆུད་པར་མི་འགྱུར། འཆར་ཀས་སྨྲས་པ། ལྷ་བདག་མཆི་སྟེ་བཀའ་མཆིད་ འཚལ་ལ་སླར་མཆིའོ། །རྒྱལ་པོ་ཟས་གཙང་གིས་སྨྲས་པ། འཆར་ཀ་གང་དང་གང་སོང་བ་དེ་དང་དེ་དེའི་བསྟན་པ་ཕུན་སུམ་ཚོགས་པ་མཐོང་ནས་དེ་ཉིད་དུ་འདུག་པས་ཁྱོད་ཀྱང་སོང་ན་དེ་ཉིད་དུ་འདུག་པར་འགྱུར་བའི་གནས་གང་ཡིན་པ་དེ་ཡོད་དོ། །འཆར་ཀས་སྨྲས་ པ། ལྷ་སླར་མཆི་ལགས་སོ། །དེ་ནས་རྒྱལ་པོ་ཟས་གཙང་རང་ཉིད་ཀྱིས་སྤྲིང་ཡིག་བྲིས་པ། ལྷུམས་སུ་ཞུགས་པ་བཟུང་ནས་སུ། །ཁྱོད་ནི་བདག་གིས་ཆེར་བསྐྲུན་ཏེ། །ཉོན་མོངས་མེ་རབ་འབར་བཞིན་དུ། །རྒྱལ་བ་ལྗོན་ཤིང་ལ་བསྡད་ན། །ད་ནི་ཁྱོད་ ཀྱི་སློབ་མ་ཡི། །ཡལ་ག་ལྕུག་མ་འཕེལ་འགྱུར་བས། །གཞན་ནི་བདེ་བས་དགའ་བར་གྱུར། །བདག་ནི་སྡུག་བསྔལ་སྐལ་བར་ལྡན། །གཞན་ཡང་གང་གིས་ཁྱོད་ནི་ལྗོན་ཤིང་ལྕུག་ཕྲན་མཚུངས་ཙམ་ན། །བདག་གི་བུ་ནི་འདི་ཡིན་སྙམ་ནས་ཆུང་ནས་བསྐྲུན་ བསྐྲུན་ཏེ། །བུ་གཅིག་ཡུལ་མིས་འབྲས་བུས་ཡོངས་སུ་སྤྱད་ཐོབ་ན། །དེ་ལ་ཡོན་ཏན་འབྲས་བུ་མི་སྟེར་ཁྱོད་ལ་སྙིང་རྗེ་མེད། །གང་ཚེ་ཐོག་མ་བལྟམས་པ་ན། །ཉིད་དོན་བསྒྲུབས་ནས་གཉེན་རྣམས་ནི། །ཤིན་ཏུ་ཆེ་དང་ཕན་གདགས་ཞེས། །ཁྱོད་ཀྱིས་དམ་བཅས་ མཛད་ནས་ནི། །ཁྱོད་ཀྱིས་ཞི་གནས་དེ་བརྙེས་ན། །བདག་དང་གཉེན་གྱི་ཚོགས་རྣམས་ལ། །ཐུགས་བརྩེས་རྗེས་སུ་ཟུང་མཛོད་དེ། །གཤེགས་པར་དགོངས་པ་མཛད་དུ་གསོལ། །ཞེས་སྤྲིང་བའི་ཡི་གེ་འཆར་ཀས་ཁྱེར་ནས་ཆས་ཏེ་རིམ་གྱིས་མཉན་ཡོད་དུ་ཕྱིན་པ་དང་། ལམ་

  803. 92a

    གྱིས་དུབ་པ་ངལ་སོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་རྒྱལ་པོ་ཟས་གཙང་གིས་གསོལ་བའི་ཡི་གེ་ལགས་སོ་ཞེས་བཅོམ་ལྡན་འདས་ལ་ཡི་གེ་ཕུལ་བ་དང་། བཅོམ་ལྡན་འདས་ཉིད་ཀྱིས་བཞེས་ནས་བཀླགས་སོ། །བཀླགས་ ནས་ཡི་གེ་མཐའ་གཅིག་ཏུ་བཞག་པ་དང་འཆར་ཀས་གསོལ་པ། བཅོམ་ལྡན་འདས་ཅི་ལགས་སེར་སྐྱའི་གཞིར་མི་བཞུད་དམ། བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་འདོང་ངོ་། །འཆར་ཀ་སྔོན་བཅོམ་ལྡན་འདས་དང་ལྷག་པར་འདྲིས་པ་ཡིན་པས་དེ་སྔོན་གྱི་འདྲིས་པ་ ཁོ་ནས་གསོལ་པ། བཅོམ་ལྡན་འདས་གལ་ཏེ་མི་བཞུད་དང་། བདག་གིས་མཐུས་བཀྲི་བར་བགྱི་ལགས་སོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་དེ་བཀའ་སྩལ་པ། གང་ཞིག་ཡུལ་གྱི་རྒྱ་མོར་མ་ཆགས་ཤིང་། །སྲེད་འགགས་བཀྲི་བ་ཡོད་པ་མ་ཡིན་ པའི། །སངས་རྒྱས་སྤྱོད་ཡུལ་མཐའ་ཡས་མངའ་བ་དེ། །གཞི་མེད་ན་ནི་གང་གི་གཞི་ཡིས་བཀྲི། །གང་ཞིག་ཡུལ་གྱི་རྒྱ་མོར་མ་ཆགས་ཤིང་། །སྲེད་འགགས་བཀྲི་བ་ཡོད་པ་མ་ཡིན་པའི། །སངས་རྒྱས་མཐའ་ཡས་པ་ཡི་རྩལ་མངའ་དེ། །གཞི་མེད་ན་ནི་གང་གི་གཞི་ ཡིས་བཀྲི། །གང་ཞིག་བཅོམ་ནས་བརྩེགས་པ་མེད་གྱུར་ཅིང་། །འཇིག་རྟེན་མ་བཅོམ་ཅུང་ཟད་ཡོད་མིན་པ། །སངས་རྒྱས་སྤྱོད་ཡུལ་མཐའ་ཡས་མངའ་བ་དེ། །གཞི་མེད་ན་ནི་གང་གི་གཞི་ཡིས་བཀྲི། །གང་ཞིག་བཅོམ་ནས་བརྩེགས་པ་མེད་གྱུར་ཅིང་། །འཇིག་རྟེན་མ་ བཅོམ་ཅུང་ཟད་ཡོད་མིན་པ། །སངས་རྒྱས་མཐའ་ཡས་པ་ཡི་རྩལ་མངའ་དེ། །གཞི་མེད་ན་ནི་གང་གི་གཞི་ཡིས་བཀྲི། །ལན་ལ་སྤོབས་པ་མེད་ནས་གསོལ་པ། །བཅོམ་ལྡན་འདས་མཆི་སྟེ། རྒྱལ་པོ་ཟས་གཙང་ལ་རིག་པར་བགྱིའོ། །འཆར་ཀ་སངས་རྒྱས་ཀྱི་ཕོ་ཉ་ནི་འདི་ ལྟ་བུ་མ་ཡིན་ནོ། །འཆར་ཀས་གསོལ་པ། བཅོམ་ལྡན་འདས་ཅི་འདྲ་བ་ཞིག་ལགས། རབ་ཏུ་བྱུང་བ་ཡིན་གྱིས་ཁྱོད་ཀྱང་རབ་ཏུ་བྱུང་ཤིག །བཅོམ་ལྡན་འདས་བདག་གིས་རྒྱལ་པོ་ཟས་གཙང་ལ་སླར་མཆི་བར་དམ་བཅས་ལགས་སོ། །བཅོམ་ལྡན་འདས་ཀྱིས་བཀའ་

  804. 92b

    སྩལ་པ། འཆར་ཀ་རབ་ཏུ་བྱུང་ལ་ཇི་ལྟར་དམ་བཅས་པ་བཞིན་དུ་གྱིས་ཤིག །འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་པ་ན། ཡབ་དང་། ཡུམ་དང་། མཁན་པོ་དང་། སློབ་དཔོན་དང་། བླ་མ་དང་། བླ་མའི་གནས་ལྟ་བུ་རྣམས་ཀྱི་ཆོས་དང་ མཐུན་པའི་ཚིག་ལན་འགའ་ཡང་སླར་མ་བཟློག་གོ། །འཆར་ཀས་གསོལ་པ། བཅོམ་ལྡན་འདས་གལ་ཏེ་དེ་ལྟ་ན་རབ་ཏུ་འབྱུང་ལགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་འཆར་ཀ་འདི་ནི་ཡུན་རིང་པོའི་དོན་དང་ཕན་ པ་དང་བདེ་བའི་ཕྱིར་རབ་ཏུ་ཕྱུང་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལས་མཉན་ནས་འཆར་ཀ་རབ་ཏུ་ཕྱུང་བསྙེན་པར་རྫོགས་པར་བྱས་ཏེ་ཀུན་དུ་སྤྱོད་པའི་ཆོས་དག་དེ་ལ་རྒྱས་པར་སྨྲས་ནས། འཆར་ཀ་འདི་ནི་ཁྱོད་ཀྱི་བྱ་བ་ཡིན་ཏེ། དེང་ཕན་ཆད་བུད་མེད་དང་ལྷན་ཅིག་ཁང་པ་གཅིག་ཏུ་ཉལ་བར་མི་བྱའོ་ཞེས་བྱ་བ་ལ་སོགས་པ་དག་གོ། །བཙུན་པ་བཀའ་བཞིན་འཚལ་ཞེས་འཆར་ཀས་ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་བྱས་ཏེ་སོང་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེར་སྐྱའི་གཞིར་མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་སོང་ལ་ཁྱོད་མོད་ཁོ་ནས་རྒྱལ་པོའི་ཁབ་ཏུ་མ་འཇུག་པར་སྒོ་ ན་སྡོད་ལ་ཤཱཀྱའི་དགེ་སློང་འོངས་སོ་ཞེས་བརྗོད་པར་བྱའོ། །གལ་ཏེ་ནང་དུ་སྤྱོན་ཅིག་ཅེས་གླེང་ན་འཇུག་པར་བྱའོ། །ཞུགས་ནས་གལ་ཏེ་ཤཱཀྱའི་དགེ་སློང་གཞན་ཡང་ཡོད་དམ་ཞེས་ཟེར་ན་ཡོད་དོ་ཞེས་བརྗོད་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་ཡང་འདི་འདྲ་ཞིང་ ཆ་བྱད་འདི་འདྲའམ་ཞེས་འདྲི་ན། འདི་འདྲ་ཞིང་ཆ་བྱད་འདི་འདྲའོ་ཞེས་བརྗོད་པར་བྱའོ། །ཁྱོད་ཀྱིས་རྒྱལ་པོའི་ཁབ་ཏུ་ཡང་གནས་པར་མི་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་ཡང་རྒྱལ་པོའི་ཁབ་ཏུ་གནས་པར་མི་བྱེད་དམ་ཞེས་གླེང་ན། མི་བཞུགས་སོ་ཞེས་བརྗོད་

  805. 93a

    པར་བྱའོ། །གལ་ཏེ་གང་དུ་གནས་པར་བྱེད་ཅེས་འདྲི་ན་དགོན་པའམ་གཙུག་ལག་ཁང་དུའོ་ཞེས་བརྗོད་པར་བྱའོ། །གལ་ཏེ་གཙུག་ལག་ཁང་ཅི་འདྲ་ཞེས་འདྲི་ན། རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་བྲིས་ཏེ་བསྟན་པར་བྱའོ། །གལ་ཏེ་གཞོན་ནུ་དོན་ཐམས་ ཅད་གྲུབ་བ་བྱོན་ནམ་ཞེས་འདྲི་ན། བྱོན་ནོ་ཞེས་བརྗོད་པར་བྱའོ། །ཇི་སྲིད་ཅིག་ན་བྱོན་ཞེས་འདྲི་ན་ཞག་བདུན་ལོན་ནའོ་ཞེས་བརྗོད་པར་བྱའོ། །དེས་གསོལ་པ། བཅོམ་ལྡན་འདས་མཆི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སོང་ཤིག །ས་བདག་ རྣམས་ནི་ཚིག་གིས་ཏེ། །ལྷ་རྣམས་བསམས་པས་འགྲུབ་འགྱུར་ཞིང་། །དེ་བཞིན་བསམ་གཏན་པ་རྣམས་ཀྱིས། །སེམས་བསྐྱེད་པས་ནི་ཐམས་ཅད་འགྲུབ། །བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་དེ་ཇི་ལྟར་སྐད་ཅིག་དེ་ཉིད་ལ་གྲོང་ཁྱེར་སེར་སྐྱའི་གཞིར་སོན་ པ་དེ་ལྟར་བྱིན་གྱིས་བརླབས་པ་དང་། ཚེ་དང་ལྡན་པ་འཆར་ཀ་བཅོམ་ལྡན་འདས་ལ་དད་པ་མི་བཟོད་པ་སྐྱེས་པ་དེ་རྒྱལ་པོའི་ཁབ་ཀྱི་སྒོར་བསྡད་ནས་སྨྲས་པ། ཤེས་ལྡན་དག་རྒྱལ་པོ་ལ་ཤཱཀྱའི་དགེ་སློང་མཆིས་སོ་ཞེས་གསོལ་ཅིག །དེ་རྣམས་ཀྱིས་སྨྲས་པ། ཅི་ ཤཱཀྱའི་དགེ་སློང་གཞན་དག་ཀྱང་ཡོད་དམ། ཤེས་ལྡན་དག་ཡོད་དོ། །དེ་རྣམས་ཀྱིས་རྒྱལ་པོ་ལ་སྨྲས་པ། ཤཱཀྱའི་དགེ་སློང་མཆིས་སོ། །རྒྱལ་པོས་སྨྲས་པ། ནང་དུ་ཐོང་ཤིག །དེ་ནང་དུ་ཞུགས་པ་རྒྱལ་པོ་ཟས་གཙང་གིས་མཐོང་ནས་སྨྲས་པ། འཆར་ཀ་རབ་ ཏུ་བྱུང་ངམ། དེས་སྨྲས་པ། ལྷ་རབ་ཏུ་བྱུང་ངོ་། །ཁྱོད་སླར་འོང་ངོ་ཞེས་སྨྲས་པ་མ་ཡིན་ནམ། འདི་ཅི་ཡིན། འཆར་ཀས་སྨྲས་པ། ལྷ་བཅོམ་ལྡན་འདས་ཀྱིས་སངས་རྒྱས་ཀྱི་ཕོ་ཉ་ནི་འདི་ལྟ་བུ་མ་ཡིན་ནོ་ཞེས་བཀའ་སྩལ་ནས་ཆོས་འདུལ་བ་ལེགས་པར་གསུངས་ པའི་ཕྱིར་བདག་རབ་ཏུ་བྱུང་མོད་ཀྱི་བདག་རང་གི་དད་པས་ཀྱང་རབ་ཏུ་བྱུང་ངོ་། །རྒྱལ་པོས་ཡན་ལག་ཐམས་ཅད་ཀྱིས་འཁྱུད་ནས་སྟན་བཤམས་པ་ཉིད་ལ་འདུག་ཏུ་བཅུག་སྟེ། དེའི་དོན་དུ་ཆུ་བཙགས་རྩ་བ་དང་འབྲས་བུ་བརྟགས་པ་གཙང་སྦྲ་བྱས་ཏེ་ཟར་བཅུག་གོ། །ཚེ་དང་

  806. 93b

    ལྡན་པ་འཆར་ཀ་མཆོག་ཏུ་ཉེ་བར་ཞི་བ་དང་། དུལ་བར་གནས་པ་དང་ལྡན་ཞིང་ཇི་སྐད་རྗེས་སུ་བསྟན་པའི་ཆོ་ག་བཞིན་ཡོངས་སུ་ལོངས་སྤྱད་དོ། །རྒྱལ་པོས་དེ་ལ་བརྟགས་ནས་ངོ་མཚར་སྐྱེས་ཏེ་སྨྲས་པ། འཆར་ཀ་ཅི་གཞོན་ནུ་དོན་ཐམས་ཅད་གྲུབ་པ་ཡང་འདི་འདྲ་བ་ཉེ་བར་ཞི་བ་ཡིན་ ནམ། འཆར་ཀས་སྨྲས་པ། ལྷ་བདག་གི་དུལ་བ་དང་ཉེ་བར་ཞི་བ་ནི་ཅུང་ཟད་ཙམ་ལགས་སོ། །དཔེར་ཇི་ལྟ་བུ་རི་རབ་དང་ཡུངས་འབྲུ་བཞིན་ནོ། །རྒྱ་མཚོ་དང་རྨིག་རྗེས་བཞིན་ནོ། །ཉི་མ་དང་སྲིན་བུ་མེ་ཁྱེར་བཞིན་ནོ། །ནམ་མཁའ་དང་པད་མའི་རྩ་བའི་བུ་ག་བཞིན་ནོ། །རྒྱལ་ པོ་ཟས་གཙང་གིས་སྨྲས་པ། འཆར་ཀ་གཞོན་ནུ་དོན་ཐམས་ཅད་གྲུབ་པ་ཡང་འདི་འདྲ་ཞིང་ཆ་བྱད་འདི་འདྲ་འམ། ལྷ་འདི་འདྲ་ཞིང་ཆ་ཞིང་ཆ་བྱད་འདི་འདྲའོ། །རྒྱལ་པོ་ཟས་གཙང་བརྒྱལ་ནས་ས་ལ་འགྱེལ་བ་དང་། ཆུ་མང་དུ་བཏབ་ནས་དབུགས་སླར་བྱུང་སྟེ་སྨྲས་པ། འཆར་ཀ་ གཞོན་ནུ་དོན་ཐམས་ཅད་གྲུབ་པ་བྱོན་ནམ། འཆར་ཀས་སྨྲས་པ་བྱོན་ནོ། །དུས་ཇི་སྲིད་ན་དགུང་བདུན་ལོན་ནའོ། །རྒྱལ་པོ་ཟས་གཙང་གིས་བློན་པོ་རྣམས་ལ་བསྒོ་བ་ཤེས་ལྡན་དག་གཞོན་ནུ་དོན་ཐམས་ཅད་གྲུབ་པ་བྱོན་པར་འགྱུར་གྱིས་རྒྱལ་པོའི་ཁབ་དང་ཕོ་བྲང་བྱི་དོར་བྱོས་ཤིག ། འཆར་ཀས་སྨྲས་པ། ལྷ་བཅོམ་ལྡན་འདས་ནི་ཕོ་བྲང་དུ་བཞུགས་པར་མི་མཛད་དོ། །རྒྱལ་པོས་སྨྲས་པ་གང་དུ་བཞུགས། འཆར་ཀས་སྨྲས་པ། དགོན་པའམ་གཙུག་ལག་ཁང་དུའོ། །རྒྱལ་པོ་ཟས་གཙང་གིས་སྨྲས་པ། འཆར་ཀ་གཙུག་ལག་ཁང་ཅི་འདྲ་བ་ཡིན། ཚེ་དང་ལྡན་པ་འཆར་ཀས་རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་རི་མོར་བྲིས་ཏེ་བསྟན་ཏོ། །དེ་ནས་རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ནྱ་གྲོ་དྷའི་ཀུན་དགའ་ར་བར་རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་གཙུག་ལག་ཁང་ཆེན་པོ་བཅུ་དྲུག་དང་། ཁང་ཕྲན་དྲུག་བཅུ་རྩིག་ ཏུ་ཆུག་ཤིག །ལྷ་བཀའ་བཞིན་འཚལ་ཞེས་བློན་པོ་རྣམས་ཀྱིས་རྒྱལ་པོ་ཟས་གཙང་ལས་མཉན་ནས་ནྱ་གྲོ་དྷའི་ཀུན་དགའ་ར་བར་རྒྱལ་བུ་རྒྱལ་བྱེད་ཀྱི་ཚལ་གྱི་རྣམ་པ་གཙུག་ལག་ཁང་ཆེན་པོ་བཅུ་དྲུག་དང་། ཁང་ཕྲན་དྲུག་བཅུ་རྩིག་ཏུ་བཅུག་གོ། །དེ་ནས་བཅོམ་ལྡན་འདས་ཀྱིས་

  807. 94a

    ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་སོང་ལ་དགེ་སློང་རྣམས་ལ་བཅོམ་ལྡན་འདས་སེར་སྐྱའི་གཞིར་གཤེགས་ཏེ་ཡབ་སྲས་གདན་འཛོམ་ན་ཁྱེད་ཅག་ལས་སུ་ཞིག་ལྟ་བར་སྤྲོ་བ་དེ་ཆོས་གོས་དག་ལོང་ཤིག་ ཅེས་སྒོ་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བཅོམ་ལྡན་འདས་སེར་སྐྱའི་གཞིར་གཤེགས་ཏེ་ཡབ་སྲས་གདན་འཛོམ་ན་ཁྱེད་ཅག་ལས་སུ་ལྟ་བར་ སྤྲོ་བ་དེ་ཆོས་གོས་དག་ལོང་ཤིག་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ། ཞི་བ་འཁོར་ཞི་བ། གྲོལ་བ་འཁོར་གྲོལ་བ། དབུགས་ཕྱིན་པ་འཁོར་དབུགས་ཕྱིན་པ། རྣམ་པར་དུལ་བ་འཁོར་རྣམ་པར་དུལ་བ། དགྲ་བཅོམ་པ་འཁོར་དགྲ་བཅོམ་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ། མཛེས་པ་འཁོར་མཛེས་པ། ཁྱུ་མཆོག་བ་ལང་གི་ཚོགས་ཀྱིས་བསྐོར་བ་ལྟ་བུ། གླང་པོ་ཆེ་གླང་པོའི་ཕྲུ་གུའི་ཚོགས་ཀྱིས་བསྐོར་བ་ལྟ་བུ། སེང་གེ་མཆེ་བ་ཅན་གྱི་ཚོགས་ཀྱིས་བསྐོར་བ་ལྟ་བུ། ངང་པའི་རྒྱལ་པོ་ངང་པའི་ ཚོགས་ཀྱིས་བསྐོར་བ་ལྟ་བུ། ནམ་མཁའ་ལྡིང་བྱའི་ཚོགས་ཀྱིས་བསྐོར་བ་ལྟ་བུ། བྲམ་ཟེ་སློབ་མའི་ཚོགས་ཀྱིས་བསྐོར་བ་ལྟ་བུ། སྨན་པ་མཁས་པ་ནད་པའི་ཚོགས་ཀྱིས་བསྐོར་བ་ལྟ་བུ། དཔའ་བོ་རུ་བའི་ཚོགས་ཀྱིས་བསྐོར་བ་ལྟ་བུ། ལམ་མཁན་འགྲོན་པོའི་ཚོགས་ཀྱིས་ བསྐོར་བ་ལྟ་བུ། དེད་དཔོན་ཚོང་པའི་ཚོགས་ཀྱིས་བསྐོར་བ་ལྟ་བུ། ཁམས་ཀྱི་རྒྱལ་ཕྲན་བློན་པོའི་ཚོགས་ཀྱིས་བསྐོར་བ་ལྟ་བུ། འཁོར་ལོས་སྒྱུར་བ་བུ་སྟོང་གིས་བསྐོར་བ་ལྟ་བུ། ཟླ་བ་རྒྱུ་སྐར་གྱི་ཚོགས་ཀྱིས་བསྐོར་བ་ལྟ་བུ། ཉི་མ་འོད་ཟེར་སྟོང་གིས་བསྐོར་བ་ལྟ་བུ། ཡུལ་ འཁོར་སྐྱོང་དྲི་ཟའི་ཚོགས་ཀྱིས་བསྐོར་བ་ལྟ་བུ། འཕགས་སྐྱེས་པོ་གྲུལ་བུམ་གྱི་ཚོགས་ཀྱིས་བསྐོར་བ་ལྟ་བུ། མིག་མི་བཟང་ཀླུའི་ཚོགས་ཀྱིས་བསྐོར་བ་ལྟ་བུ། རྣམ་ཐོས་ཀྱི་བུ་གནོད་སྦྱིན་གྱི་ཚོགས་ཀྱིས་བསྐོར་བ་ལྟ་བུ། ཐགས་ཟངས་རིས་ལྷ་མ་ཡིན་གྱི་ཚོགས་ཀྱིས་བསྐོར་

  808. 94b

    བ་ལྟ་བུ། བརྒྱ་བྱིན་སུམ་བཅུ་རྩ་གསུམ་གྱི་ཚོགས་ཀྱིས་བསྐོར་བ་ལྟ་བུ། ཚངས་པ་ཚངས་རིས་ཀྱི་ཚོགས་ཀྱིས་བསྐོར་བ་ལྟ་བུ། རྒྱ་མཚོ་གཡོ་བ་མེད་པ་ལྟ་བུ། སྤྲིན་ཆུ་དང་བཅས་པ་ལྟ་བུ། གླང་པོ་དམ་པ་དྲེགས་པ་དང་བྲལ་བ་ལྟར་དབང་པོ་རྣམས་ཤིན་ཏུ་དུལ་བས་སྤྱོད་ལམ་ གྱི་ཚུལ་མ་འཁྲུགས་པ། སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་རྣམ་པར་མཛེས་པར་བྱས་པ། འོད་འདོམ་གང་གིས་བརྒྱན་པའི་སྐུ་ཉི་མའི་འོད་ཟེར་སྟོང་བས་ལྷག་པའི་འོད་ཅན། རིན་པོ་ཆེའི་རི་བོ་འགྲོ་བ་ལྟར་ཀུན་ནས་ མཛེས་པ། སྟོབས་བཅུ་དང་མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་འབབ་ཆུ་རོ་ཧི་ཀར་བྱོན་ཏོ། །རྒྱལ་པོ་ཟས་གཙང་གིས་གཞོན་ནུ་དོན་ཐམས་ཅད་གྲུབ་པ་འབབ་ཆུ་ རོ་ཧི་ཀར་བྱོན་ཏོ་ཞེས་ཐོས་སོ། །ཐོས་ནས་ཀྱང་རྒྱལ་པོ་ཟས་གཙང་གིས་གྲོང་ཁྱེར་སེར་སྐྱའི་གཞི་རྡོ་བ་དང་། གྱོ་མོ་དང་། གསེག་མ་རྣམས་བསལ་ནས་ཙན་དན་གྱི་ཆུས་ཆག་ཆག་བཏབ། དྲི་ཤིན་ཏུ་ཞིམ་པོའི་པོག་པོར་ཉེ་བར་བཤམས། དར་གྱི་ཆུན་ཕྱང་མང་པོ་དཔྱངས་ཏེ། གང་ ཡང་འབབ་ཆུ་རོ་ཧི་ཀ་ནས་གང་ཡང་ནྱ་གྲོ་དྷའི་ཀུན་དགའ་ར་བ་དེའི་བར་གྱི་ལམ་ཤིན་ཏུ་མཛེས་པར་བྱས་ཏེ། ས་ཕྱོགས་ཡངས་ཤིང་རྒྱ་ཆེ་བར་གདན་རྣམ་པར་བཀྲ་བ་དག་ཤོམ་དུ་བཅུག་གོ། །དེ་ན་འབབ་ཆུ་རོ་ཧི་ཀ་ལ་དགེ་སློང་ཁ་ཅིག་ནི་ལག་པ་འཁྲུ་བར་བྱེད་དོ། །ཁ་ཅིག་ནི་སོ་ཤིང་འདོར་ བར་བྱེད་དོ། །ཁ་ཅིག་ནི་ཁྲུས་བྱེད་དོ། །སེར་སྐྱའི་གཞི་ན་གནས་པའི་ཤཱཀྱ་རྣམས་ཀྱིས་གཞོན་ནུ་དོན་ཐམས་ཅད་གྲུབ་པ་གཤེགས་སོ་ཞེས་ཐོས་སོ། །ཐོས་ནས་ཀྱང་ཁ་ཅིག་ནི་སྔོན་གྱི་དགེ་བའི་རྩ་བས་བསྐུལ། ཁ་ཅིག་ནི་ཡ་མཚན་སྐྱེས་ནས་ཐམས་ཅད་ནྱ་གྲོ་དྷའི་ཀུན་དགའ་ར་བ་ ནས་བྱུང་སྟེ་ཅི་ཡབ་སྲས་ཀྱི་ཞབས་ལ་ཕྱག་བྱེད་དམ། འོན་ཏེ་སྲས་ཡབ་ཀྱི་ཞབས་ལ་ཕྱག་བྱེད་པ་བལྟའོ་སྙམ་མོ།། །།འདུལ་བ་གཞི། བམ་པོ་དགུ་བཅུ་རྩ་གཅིག་པ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་ང་ཞབས་ཀྱིས་སེར་སྐྱའི་གཞིར་གཤེགས་

  809. 95a

    ན། ཤཱཀྱ་ང་རྒྱལ་ཅན་རྣམས་ཀྱེ་མའོ་གཞོན་ནུ་དོན་ཐམས་ཅད་གྲུབ་པས་དཀའ་ཐུབ་ཀྱི་ནགས་སུ་གཤེགས་ནས་ལྟོགས་པོ་ཞིག་གྲུབ་པ་ལྟ་ཞིག་སྟེ། དེ་ལྷ་བརྒྱ་སྟོང་ཕྲག་དུ་མས་ཞམ་འབྲིང་བྱས་ནས་སྟེང་གི་ནམ་མཁའ་ལས་གཤེགས་ཏེ་དུས་དེ་སྲིད་དུ་དཀའ་བ་བརྒྱ་སྟོང་ སྤྱད་པས་བདུད་རྩི་ཐོབ་ནས་ང་ཞབས་ཀྱིས་གཤེགས་པ་ལྟ་ཞེས་མ་དད་པ་སྐྱེད་པར་འགྱུར་རོ་སྙམ་ནས། དེ་ནས་བཅོམ་ལྡན་འདས་ཀྱིས་ཇི་ལྟར་ཐུགས་མཉམ་པར་བཞག་ན་ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་མཛད་དེ། འདི་ལྟ་སྟེ་འཆག་ པ་དང་། བཞེངས་པ་དང་། བཞུགས་པ་དང་མནལ་བ་མཛད་དོ། །མེའི་ཏིང་ངེ་འཛིན་ལ་ཡང་སྙོམས་པར་འཇུག་པ་མཛད་དོ། །མེའི་ཏིང་ངེ་འཛིན་ལ་སྙོམས་པར་ཞུགས་པ་ན་སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་རྣམ་པ་སྣ་ཚོགས་དག་འབྱིན་པར་མཛད་ དེ། འདི་ལྟ་སྟེ་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་གོ། །ཆོ་འཕྲུལ་ཟུང་དུ་ཡང་སྟོན་པར་མཛད་དེ། སྐུའི་སྨད་ནས་མེ་འབར་བར་མཛད་དེ། སྐུའི་སྟོད་ནས་ཆུ་གྲང་མོའི་རྒྱུན་འབེབས་པར་མཛད་དོ། །སྐུའི་ སྟོད་ནས་མེ་འབར་བར་མཛད་ལ། སྐུའི་སྨད་ནས་ཆུ་གྲང་མོའི་རྒྱུན་འབེབས་པར་མཛད་པའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བར་ལྷོ་དང་ནུབ་དང་བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་ འཕྲུལ་མངོན་པར་འདུ་མཛད་པ་བསྡུས་ཏེ་ཏ་ལ་བདུན་གྱི་སྲིད་ཙམ་ན་བཞུགས་སོ། །དགེ་སློང་རྣམས་ནི་ཏ་ལ་དྲུག་གི་སྲིད་ཙམ་ནའོ། །བཅོམ་ལྡན་འདས་དྲུག་གི་སྲིད་ཙམ་ན་ནི་དགེ་སློང་རྣམས་ལྔའི་སྲིད་ཙམ་ནའོ། །བཅོམ་ལྡན་འདས་ལྔའི་སྲིད་ཙམ་ན་ནི་དགེ་སློང་རྣམས་བཞིའི་སྲིད་ ཙམ་ནའོ། །བཅོམ་ལྡན་འདས་བཞིའི་སྲིད་ཙམ་ན་ནི་དགེ་སློང་རྣམས་གསུམ་གྱི་སྲིད་ཙམ་ནའོ། །བཅོམ་ལྡན་འདས་གསུམ་གྱི་སྲིད་ཙམ་ན་ནི་དགེ་སློང་རྣམས་གཉིས་ཀྱི་སྲིད་ཙམ་ནའོ། །བཅོམ་ལྡན་འདས་གཉིས་ཀྱི་སྲིད་ཙམ་ན་ནི་དགེ་སློང་རྣམས་ཏ་ལ་གཅིག་གི་སྲིད་ཙམ་ནའོ། །

  810. 95b

    བཅོམ་ལྡན་འདས་མི་བདུན་གྱི་སྲིད་ཙམ་ན་བཞུགས་ན་ནི་དགེ་སློང་རྣམས་མི་དྲུག་གི་སྲིད་ཙམ་ནའོ། །བཅོམ་ལྡན་འདས་དྲུག་གི་སྲིད་ཙམ་ན་ནི་དགེ་སློང་རྣམས་ལྔའི་སྲིད་ཙམ་ནའོ། །བཅོམ་ལྡན་འདས་ལྔའི་སྲིད་ཙམ་ན་ནི་དགེ་སློང་རྣམས་བཞིའི་སྲིད་ཙམ་ནའོ། །བཅོམ་ལྡན་འདས་ བཞིའི་སྲིད་ཙམ་ན་ནི་དགེ་སློང་རྣམས་གསུམ་གྱི་སྲིད་ཙམ་ནའོ། །བཅོམ་ལྡན་འདས་གསུམ་གྱི་སྲིད་ཙམ་ན་ནི་དགེ་སློང་རྣམས་གཉིས་ཀྱི་སྲིད་ཙམ་ནའོ། །བཅོམ་ལྡན་འདས་གཉིས་ཀྱི་སྲིད་ཙམ་ན་ནི་དགེ་སློང་རྣམས་མི་གང་ལྷག་ཙམ་ནའོ། །བཅོམ་ལྡན་འདས་མི་གང་ལྷག་ ཙམ་ན་ནི་དགེ་སློང་རྣམས་ས་ལའོ། །རྒྱལ་པོ་ཟས་གཙང་གིས་ཆོ་འཕྲུལ་དེ་ལྟ་བུ་དེ་དང་། དགེ་སློང་མང་པོ་མཐོང་ནས་དེ་ལ་བཅོམ་ལྡན་འདས་གང་ཡིན་པ་མ་ཤེས་ཏེ་རྨོངས་པར་གྱུར་ཏོ། །དེ་ནས་ཚེ་དང་ལྡན་པ་འཆར་ཀ་ལ་སྨྲས་པ། འཆར་ཀ་འདི་ན་ངུར་སྨྲིག་གྱོན་པའི་རབ་ཏུ་བྱུང་ བ་མང་པོ་ཞིག་ཡོད་ན་དེ་ལ་གཞོན་ནུ་གང་ཡིན། ཚེ་དང་ལྡན་པ་འཆར་ཀས་བཅོམ་ལྡན་འདས་བསྟན་ནས་སྨྲས་པ། འདི་ནི་བཅོམ་ལྡན་འདས་ལགས་སྲིད་པའི་མཐར་བྱེད་སེམས་ཀྱི་དབང་ཕྱུག་འདྲེན་པ་ལགས། །འདི་ནི་ཉོན་མོངས་སེལ་མཛད་ཉིན་བྱེད་དེ་ཉིད་དོན་ནི་ཀུན་དུ་སྟོན་ མཛད་ལགས། །འདི་ནི་དགོངས་པ་བཞིན་བརྙེས་སྟོབས་བཅུ་མངའ་བས་ཀུན་གྱི་ཕ་རོལ་གཤེགས་པ་ལགས། །དྲི་མེད་གསལ་བ་ཆོས་ཀྱི་དབང་ཕྱུག་ཁྱོད་ཀྱི་སྲས་ལགས་མི་དབང་ད་གཟིགས་ཤིག །དེ་ནས་རྒྱལ་པོ་ཟས་གཙང་གིས་ལུས་བཏུད་ནས་ཞབས་ལ་ཕྱག་བྱས་ཏེ་ ཚིགས་སུ་བཅད་པས་གསོལ་པ། བློ་གྲོས་ཡངས་པ་ཁྱོད་ལ་འདི་དང་ནི། །ཀུན་སྤྱན་ཞབས་ལ་ལན་གསུམ་ཕྱག་བགྱིས་ཏེ། །བལྟམ་པའི་ཚེ་ནས་ནི་གཡོས་པ་དང་། །འཛམ་བུའི་གྲིབ་མ་སྐུ་ལས་མ་འདས་པའོ། །དེ་ནས་ཤཱཀྱ་དང་ཤཱཀྱ་མོ་རྣམས་ཀྱིས་རྒྱལ་པོ་ཟས་ གཙང་བཅོམ་ལྡན་འདས་ཀྱི་ཞབས་ལ་གཏུགས་པ་མཐོང་ནས་ད་ལྟར་ཡབ་སྲས་ཀྱི་ཞབས་ལ་ཕྱག་བྱེད་པ་ཅི་ཐ་ཚིག་ཅེས་མ་དད་པ་བསྐྱེད་དོ། །རྒྱལ་པོ་ཟས་གཙང་གིས་ཤཱཀྱ་དང་ཤཱཀྱ་མོ་རྣམས་ལ་གོ་བར་བྱ་བའི་ཕྱིར་འདི་སྐད་ཅེས་སྨྲས་སོ། །ཤེས་ལྡན་དག་ད་གདོད་ཁོ་བོས་གཞོན་ནུ་དོན་

  811. 96a

    ཐམས་ཅད་གྲུབ་པའི་ཞབས་ལ་ཕྱག་བྱས་པ་མ་ཡིན་ཏེ། གང་གི་ཚེ་གཞོན་ནུ་དོན་ཐམས་ཅད་གྲུབ་པ་བལྟམ་པ་ན་ས་ཆེན་པོ་གཡོས་པར་གྱུར་ཅིང་འཇིག་རྟེན་འདི་ཐམས་ཅད་སྣང་བ་རྒྱ་ཆེན་པོས་གསལ་བར་གྱུར་ཏེ། འཇིག་རྟེན་ན་འཇིག་རྟེན་གྱི་བར་གྱི་མུན་པ་མུན་ གནག་སྨག་ཏུ་གྱུར་པ་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བའི་འོད་ཀྱི་སྣང་བ་ཉམས་སུ་མ་མྱོང་བ་གང་ཡིན་པ་དེ་ཡང་དེའི་ཚེ་སྣང་བ་རྒྱ་ཆེན་པོས་གསལ་བར་གྱུར་ནས། དེར་སེམས་ཅན་གང་དག་སྐྱེས་པ་དེ་དག་སྣང་བ་དེས་སེམས་ཅན་དག་གཅིག་གིས་གཅིག་ མཐོང་བ་དང་། ཤེས་ལྡན་དག་འདིར་སེམས་ཅན་གཞན་དག་ཀྱང་སྐྱེས་པ་ལྟ། ཤེས་ལྡན་དག་འདིར་སེམས་ཅན་གཞན་དག་ཀྱང་སྐྱེས་པ་ལྟ་ཞེས་ངོ་ཤེས་པར་གྱུར་པ་དེའི་ཚེ་ཡང་ཁོ་བོས་བྱང་ཆུབ་སེམས་དཔའི་ཞབས་ལ་མགོ་བོས་ཕྱག་བྱས་སོ། །གང་གི་ཚེ་གཞོན་ནུ་དོན་ ཐམས་ཅད་གྲུབ་པ། ཞིང་བླས་ཀྱི་མཐའ་ལ་གཟིགས་པ་ན་ཤིང་འཛམ་བུའི་གྲིབ་མ་ལ་བཞུགས་ནས་འདོད་པ་རྣམས་ལས་དབེན་པ། སྡིག་པ་མི་དགེ་བའི་ཆོས་རྣམས་ལས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་། བདེ་བ་ཟག་པ་མེད་པ་དང་མཚུངས་པའི་བསམ་གཏན་དང་པོ་ཉེ་བར་བསྒྲུབས་ཏེ་བཞུགས་པ་ན་ཤིང་གཞན་རྣམས་ཀྱི་གྲིབ་མ་ནི་ཤར་ཕྱོགས་སུ་གཞོལ། ཤར་ཕྱོགས་སུ་འབབ། ཤར་ཕྱོགས་སུ་བབ་ཀྱང་ཤིང་འཛམ་བུའི་གྲིབ་མ་ནི་བྱང་ཆུབ་སེམས་དཔའི་སྐུ་ལས་མ་འདས་པར་ གྱུར་པ་དེའི་ཚེ་ཡང་ངོ་མཚར་རྨད་དུ་བྱུང་བའི་ཆོས་དེས་ཁོ་བོའི་ཡིད་བསྡུས་པས་བཅོམ་ལྡན་འདས་ཀྱི་ཞབས་ལ་ཡང་ཕྱག་བྱས་ཏེ། འདི་དང་བཅོམ་ལྡན་འདས་ཀྱི་ཞབས་ལ་ལན་གསུམ་ཕྱག་བྱས་སོ། །དེ་བས་ན་འདི་སྐད་ཅེས། བློ་གྲོས་ཡངས་པ་ཁྱོད་ལ་འདི་དང་ནི། །ཀུན་ སྤྱན་ཞབས་ལ་ལན་གསུམ་ཕྱག་བགྱིས་ཏེ། །བལྟམ་པའི་ཚེ་ན་ས་ནི་གཡོས་པ་དང་། །འཛམ་བུའི་གྲིབ་མ་སྐུ་ལས་མ་འདས་པའོ་ཞེས་སྨྲའོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་བརྟུལ་ནས་འཁོར་བརྒྱ་སྟོང་ཕྲག་དུ་མ་ཟིལ་གྱིས་མནན་ནས་དགེ་སློང་

  812. 96b

    གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཟས་གཙང་སྐད་འཛེར་ཅིང་སྙིང་དང་མིག་མཆི་མས་གང་བས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། གཞལ་མེད་ཁང་གི་གནས་རྣམས་ལས། །ཡབ་ཀྱི་ཁབ་ན་ བཞུགས་པ་ལས། །དགོན་པའི་འཇིགས་དང་བཅས་རྣམས་སུ། །ཇི་ལྟ་བུར་ནི་འབའ་ཞིག་བཞུགས། །བཅོམ་ལྡན་འདས་ཀྱིས་བཀའ་སྩལ་པ། །མི་ཡི་བདག་པོ་གང་དུ་ནི། །ཁྱིམ་གྱི་འཆིང་བ་ལས་གྲོལ་བ། །འཕགས་པ་ཡི་ནི་གནས་པ་བཅུས། །ཐུབ་པ་རྣམས་ ནི་གནས་པར་མཛད། །རྒྱལ་པོས་གསོལ་པ། བ་སོ་གསེར་གྱི་རྩ་བ་ཅན། །ཤིན་ཏུ་བདེ་བ་བཏིང་བ་ཡི། །ཁྲི་ལ་མནལ་བར་མཛད་པ་ལས། །གདིང་བ་ལ་ནི་ཇི་ལྟར་མནལ། །བཅོམ་ལྡན་འདས་ཀྱིས་བཀའ་སྩལ་པ། །རྒྱལ་པོ་རྣམ་གྲོལ་གནས་མལ་ནི། །དགའ་བ་ བྱང་ཆུབ་ཡན་ལག་གི། །མེ་ཏོག་བཀྲམ་པར་ཆགས་མེད་ཅིང་། །ཡོངས་སུ་གདུང་བ་རྣམ་སྤངས་མནལ། །རྒྱལ་པོ་ཟས་གཙང་གིས་གསོལ་པ། །དཔའ་བོ་ཉིད་ཀྱི་ཁབ་ན་ནི། །གསེར་དངུལ་བུམ་པས་ཁྲུས་མཛད་ན། །རྙོག་པ་ཅན་ལ་དྲོ་བ་ཡི། །ཆབ་ཀྱིས་ཇི་ལྟར་ཁྲུས་མཛད་ ལགས། །བཅོམ་ལྡན་འདས་ཀྱིས་བཀའ་སྩལ་པ། །གཽ་ཏམ་དད་པའི་འབབ་ཆུ་རྙོག་པ་མེད། །བསོད་ནམས་འཇུག་ངོགས་དམ་པས་བསྔགས་པ་སྟེ། །དེ་ལ་རིག་པའི་ཡོན་ཏན་མི་བཀྲུས་ནས། །ལུས་མི་གཤེར་བར་ཕ་རོལ་རབ་ཏུ་རྒལ། །རྒྱལ་པོ་ཟས་གཙང་གིས་གསོལ་ པ། །དཔའ་བོ་ཁྱོད་སྔོན་སེར་སྐྱ་ཡི། །ཙན་དན་གྱིས་ནི་སྐུ་བཀྲུས་ཤིང་། །ཀ་ཤིའི་མཆོག་གནས་མཛེས་པ་ལས། །དེ་དང་བྲལ་ན་མཛེས་མ་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཚུལ་ཁྲིམས་ང་ཡི་རྒྱན་ཡིན་ཏེ། །ཚུལ་ཁྲིམས་ཉིད་ནི་ཕྱུག་པ་ཡིན། ། གསེར་དང་ནོར་བུ་རྣ་ཆ་དག །རྨོངས་སྐྱེད་ང་ལ་ཅི་ཞིག་བྱ། །རྒྱལ་པོས་གསོལ་པ། དཔའ་བོ་ཉིད་ཀྱི་ཕོ་བྲང་ན། །གླང་པོ་ཤིང་རྟ་རྟས་བཞུད་པ། །ཚེར་མར་བཅས་པའི་ས་གཞི་ལ། །ཞབས་ཀྱིས་ཇི་ལྟར་གཤེགས་པར་མཛད། །བཅོམ་ལྡན་འདས་ཀྱིས་བཀའ་སྩལ་པ།

  813. 97a

    ང་ཡི་ཤིང་རྟ་རྫུ་འཕྲུལ་རྐང་། །ཡང་དག་རྩོལ་བའི་བཞོན་པ་ཡིས། །ས་ཀུན་རྣམ་པར་རྒྱུ་ན་ཡང་། །ཉོན་མོངས་ཚེར་མས་གནོད་པ་མེད། །རྒྱལ་པོ་ཟས་གཙང་གིས་གསོལ་བ། །དཔའ་བོ་སྔོན་ནི་ཀ་ཤི་ཀའི། །ན་བཟའ་མནབས་ན་མཛེས་པ་ལས། །ངུར་ སྨྲིག་རྩུབ་པོའི་གོས་མནབས་པ། །ཇི་ལྟར་ཁྱོད་ཀྱི་སྐུ་ཡིས་བཟོད། །བཅོམ་ལྡན་འདས་ཀྱིས་བཀའ་སྩལ་པ། །རྒྱལ་པོ་ང་ཡི་གོས་ནི་ངོ་ཚ་ཤེས། །ང་ཡི་བགོ་བསྣམ་སྦྱར་ཏེ། །དེ་བགོས་ཐུབ་པ་ཞི་བ་རྣམས། །ནགས་ཁྲོད་ན་ནི་མཛེས་པར་འགྱུར། །རྒྱལ་པོ་ཟས་གཙང་ གིས་གསོལ་པ། །འདི་ལྟར་ཁྱོད་སྔོན་གསེར་གྱི་གཞོང་པ་ལས། །དུ་མའི་རོ་ལྡན་འབྲས་ཆན་གསོལ་བ་ལས། །འདི་ལྟར་གཙོ་བོ་ད་ལྟའི་བསོད་སྙོམས་ནི། །ཕལ་པ་གསོལ་བ་ཇི་ལྟར་མགུར་དུ་མཆི། །བཅོམ་ལྡན་འདས་ཀྱིས་བཀའ་སྩལ་པ། །ཟས་ཀྱི་སྲེད་པ་ཐམས་ ཅད་སྤངས་ནས་ནི། །ངེས་པར་བྱུང་དང་མཉམ་པར་བཞག་ལྡན་པའི། །ང་ནི་ཆོས་ཀྱི་རོ་མཆོག་གསོལ་མོད་ཀྱི། །འཇིག་རྟེན་ཀུན་ལ་བརྩེ་ཕྱིར་ང་སྤྱོད་དོ། །རྒྱལ་པོ་ཟས་གཙང་གིས་གསོལ་པ། །མགུར་དུ་བདེ་བ་མང་བགྱིད་པའི། །དགུན་སྐྱེམས་ཁ་རའི་ཆབ་གསོལ་ ན། །རྙོག་པ་ཅན་ལ་དྲོ་བ་ཡི། །ཆབ་ནི་ཇི་ལྟ་ཞིག་ཏུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །མི་ཡི་བདག་པོ་གང་འཐུངས་ན། །བདག་ལ་བཏུང་བ་ཐམས་ཅད་ནི། །དུག་དང་འདྲ་བར་སྣང་གྱུར་པ། །ཆོས་ཀྱི་རོ་མཆོག་ང་བཏུང་ངོ་། །རྒྱལ་པོ་ཟས་ གཙང་གིས་གསོལ་པ། །འདི་ལྟར་ཁྱོད་སྔོན་བསིལ་ཁང་གཞལ་མེད་ཁང་། །ཁང་བཟངས་སྟེང་ན་ཇི་ལྟའི་དུས་བཞིན་བཞུགས། །ད་ལྟ་གཅིག་པུ་ནགས་ཁྲོད་ཁྱོད་བཞུགས་པ། །བློ་བཟངས་ཇི་ལྟར་བསྙེངས་པ་མེད་པར་བཞུགས། །བཅོམ་ལྡན་འདས་ཀྱིས་བཀའ་ སྩལ་པ། །གཽ་ཏམ་འཇིགས་པའི་རྩ་བ་གང་ཡིན་དེ། །དྲི་མ་བག་ཆགས་བཅས་པར་ངས་སྤངས་པས། །ང་ནི་མྱ་ངན་འཇིགས་པ་མེད་གནས་ཏེ། །ང་ལ་འདི་ན་འཇིགས་པ་ཅུང་ཟད་མེད། །རྒྱལ་པོ་ཟས་གཙང་གིས་གསོལ་པ། །ཁྱོད་སྔོན་ཁྲུས་ཁང་ཤིན་ཏུ་ཡིད་

  814. 97b

    འོང་བར། །ཁྲུས་མཆོག་ཁྱད་པར་འཕགས་པས་རྟག་བསིལ་ན། །གཅིག་པོ་ཁྱོད་ནི་ནགས་ཁྲོད་གནས་ལྡན་པར། །ཐུབ་དབང་ད་ལྟར་སུ་ཡིས་ཁྲུས་མཛད་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །གཽ་ཏ་མ་ཆོས་ཀྱི་མཚོ་བྲན་དྲི་མེད་པ། །ཚུལ་ ཁྲིམས་འཇུག་ངོགས་དམ་པས་བསྔགས་པ་སྟེ། །དེ་ལ་རིག་པའི་ཡོན་ཏན་མི་བཀྲུས་ནས། །ལུས་མི་གཤེར་བར་ཕ་རོལ་རབ་ཏུ་རྒལ། །རྒྱལ་པོ་ཟས་གཙང་གིས་གསོལ་པ། །གང་གིས་ཁྱོད་ནི་ཁྱད་དུ་གསོད། །གང་ལས་འཇིགས་སུ་རུང་བ་སྐྱེ། །ཡིད་ འབྱུང་བ་ཡང་གང་ལས་སྐྱེ། །ཞུས་པ་དེ་དག་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །གང་གིས་ང་ཡི་ཁྱད་གསོད་དང་། །གང་ཞིག་ལས་ནི་འཇིགས་པ་དང་། །གང་ལས་ཡིད་འབྱུང་སྐྱེས་པ་དག །ཉོན་ཅིག་ཁྱོད་ལ་བཤད་པར་བྱ། །རྒ་ དང་ན་དང་འཆི་བ་སྟེ། །གལ་ཏེ་འདི་གསུམ་ཡོད་མིན་ན། །ང་ཡང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་འགྱུར། །རྒྱལ་པོ་ཟས་གཙང་གིས་གསོལ་པ། །ཤཱཀྱ་རྣམས་ཀྱི་རིགས་དགའ་བ། །ལེགས་པར་འཁྲུངས་པའི་དཔའ་བོ་ལེགས། །ཁྱོད་ནི་འཇིག་ རྟེན་ཆོས་བརྒྱད་ཀྱིས། །ཇི་ལྟ་བུར་ཡང་མ་གོས་སོ། །དེ་ནས་རབ་དགའ་དད་པ་རྒྱས་བྱས་ནས། །དྲང་སྲོང་དགེ་འདུན་བསྐོར་བ་བྱས་ནས་ནི། །ཐུབ་པའི་ཞབས་ལ་མགོ་བོས་ཕྱག་བྱས་ཏེ། །བདེ་བར་གཤེགས་ལ་ཀུན་ནས་རྟོག་ཅིང་འདུག །དེ་ནས་རྒྱལ་པོ་ཟས་གཙང་འདི་སྙམ་དུ་ སེམས་ཏེ། གང་བདག་གི་བུས་ཡོན་ཏན་གྱི་ཚོགས་འདི་ལྟ་བུ་ཐོབ་པ་ནི་བདག་གི་རྙེད་པ་ལེགས་པར་རྙེད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་ནྱ་གྲོ་དྷའི་ཀུན་དགའ་ར་བར་འཁོར་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་དེ་དང་མཐུན་ པའི་ཆོས་བཤད་པ་མཛད་དོ། །དེ་ཐོས་པས་ཟས་དཀར་ལ་སོགས་པ་ཤཱཀྱ་བདུན་ཁྲི་བདུན་སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ་རྒྱལ་པོ་ཟས་གཙང་ནི་མ་གཏོགས་སོ། །ལྷ་སྦྱིན་ང་རྒྱལ་ལས་ཀྱང་ང་རྒྱལ་ཅན། སྡིག་པ་འདོད་པ་དེས་བདེན་པ་མཐོང་བར་མ་

  815. 98a

    བྱས་པས་ཁྲོ་བའི་ཀུན་ནས་དཀྲིས་པ་དང་བཅས་པས་སྨྲས་པ། གལ་ཏེ་བདག་གིས་འདི་འདྲ་བའི་སྒྱུ་མས་དབང་དུ་བྱེད་པ་ཤེས་ན་བདག་གིས་ཀྱང་འཇིག་རྟེན་ཐམས་ཅད་དབང་དུ་བྱ་བ་ཞིག །དེ་ལ་ཤཱཀྱ་རྣམས་ཀྱིས་བཤེས་པའི་ཚིག་གིས་སྨྲས་པ། ལྷ་སྦྱིན་བཅོམ་ ལྡན་འདས་ནི་རྫུ་འཕྲུལ་ཆེ་བ་མཐུ་ཆེ་བ་ཡིན་གྱིས་དེ་སྐད་མ་སྨྲ་ཤིག་ཅེས་བཟློག་ནས་ཅང་མི་སྨྲ་བར་འདུག་གོ། །ཚངས་པས་བསྐོར་བའི་སྐྱེད་མོས་ཚལ་དུ་འདི་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་མ་གཏོགས་པར་བྲེ་བོ་ཟས་ལ་སོགས་པ་ཤཱཀྱ་བདུན་ ཁྲི་དྲུག་སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་ན་ཡང་ལྷ་སྦྱིན་དེ་ཁོ་ན་བཞིན་དུ་ཁ་ཟེར་རོ། །རོ་ཧི་ཏ་ཀའི་སྐྱེད་མོས་ཚལ་དུ་འདི་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་མ་གཏོགས་པར་བདུད་རྩི་ཟས་ལ་སོགས་པ་ཤཱཀྱ་བདུན་ཁྲི་ལྔ་ སྟོང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་ན་ཡང་ལྷ་སྦྱིན་དེ་ཁོ་ན་བཞིན་དུ་ཁ་ཟེར་རོ། །འཁོར་ལྷག་མ་རྣམས་ལས་ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་ པ་ཐམས་ཅད་སྤངས་ཏེ་དགྲ་བཅོམ་པར་གྱུར། ཁ་ཅིག་གིས་ནི་སངས་རྒྱས་ལ་སྐྱབས་སུ་སོང་། ཁ་ཅིག་གིས་ནི་ཆོས་ལ། ཁ་ཅིག་གིས་ནི་དགེ་འདུན་ལ་སྟེ། འཁོར་དེ་དག་ཀྱང་ཕལ་ཆེར་ཀྱང་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་པར་བཀོད་ དོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། སྔོན་ནི་བཅོམ་ལྡན་འདས་ལྷ་དང་ལྷ་མ་ཡིན་གྱི་འགྲོ་བར་བཅས་པས་མཆོད་པ་དང་། རྗེད་པ་དང་མངོན་དུ་སྨྲ་བར་བྱ་བར་གྱུར་ན། ད་ལྟ་ནི་མིས་མཆོད་ཀྱི་ལྷས་ནི་མ་ཡིན་ནོ་སྙམ་མོ། །དེ་ནས་ཤཱཀྱ་གཞོན་ནུ་ཞིག་གིས་ཚིགས་

  816. 98b

    སུ་བཅད་དེ་གསོལ་པ། དྲང་སྲོང་ཆེན་པོ་སྨྲ་མཆོག་དམ་ཆོས་ཀྱི། །ཆར་པས་འགྲོ་བ་འདི་ནི་ཚིམ་མཛད་དོ། །མི་བཟད་ལམ་དུ་ལྷུང་བའི་འཇིག་རྟེན་འདི། །དྲོངས་ཏེ་ཐར་བའི་ལམ་ལ་སྦྱར་བར་མཛོད། །རྒྱལ་པོ་ཟས་གཙང་ནི་འདི་སྙམ་དུ་བདག་གི་བུ་འབའ་ཞིག་འདི་ལྟར་རྫུ་འཕྲུལ་ ཆེ་ཞིང་འདི་ལྟར་མཐུ་ཆེ་བ་ཡིན་ནོ་སྙམ་སྟེ། ལྷག་པར་དགའ་བས་བདེན་པ་མ་མཐོང་ངོ་། །བཅོམ་ལྡན་འདས་ཀྱིས་དགོངས་པ། རྒྱལ་པོ་ཟས་གཙང་གིས་ཅིའི་ཕྱིར་བདེན་པ་མ་མཐོང་སྙམ་པ་ལས་དེ་འདི་སྙམ་དུ་བདག་གི་བུ་འབའ་ཞིག་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་ཡིན་ནོ་སྙམ་སྟེ། ལྷག་པར་དགའ་བར་གྱུར་གྱིས་མདོར་ན་དེའི་དྲེགས་པ་སྤོང་དུ་གཞུག་གོ། །རྒྱུ་གཉིས་ཀྱིས་བདེན་པ་རྣམས་མཐོང་བར་མི་འགྱུར་ཏེ། ཧ་ཅང་ཞུམ་པ་དང་། ཤིན་ཏུ་དགའ་བའོ། །དེ་ལ་ཞུམ་པའི་སེམས་དང་ཤིན་ཏུ་དགའ་བ་ཡོད་ཀྱིས། མ་ལ་ངས་དེའི་ཞུམ་པ་དང་། ཤིན་ ཏུ་དགའ་བ་གཉིས་སྤོང་དུ་གཞུག་གོ་སྙམ་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་རྒྱལ་པོ་ཟས་གཙང་ལ་སོམས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ ལྡན་འདས་ལས་མཉན་ནས་རྒྱལ་པོ་ཟས་གཙང་གང་ན་བ་དེར་སོང་བ་དང་། རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་ བུ་ཆེན་པོ་ཚུར་སྤྱོན། མཽད་གལ་གྱི་བུ་ཆེན་པོ་ཁྱོད་བྱོན་པ་ལེགས་སོ། །བཙུན་པ་མཽད་གལ་གྱི་བུ་ཆེན་པོ་གདན་བཤམས་པ་ཉིད་ལ་བཞུགས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་སྟན་བཤམས་པ་ཉིད་ལ་འདུག་གོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་སེམས་ ཇི་ལྟར་མཉམ་པར་བཞག་ན་རང་གི་སྟན་ལས་མི་སྣང་བར་གྱུར་ཏེ། ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་བྱེད་དེ། འདི་ལྟ་སྟེ་འཆག་པ་དང་། འགྲེང་བ་དང་། འདུག་པ་དང་། ཉལ་བར་བྱེད་དོ། །མེའི་ཏིང་ངེ་འཛིན་ལ་ཡང་སྙོམས་

  817. 99a

    པར་འཇུག་པར་བྱེད་དོ། །མེའི་ཏིང་ངེ་འཛིན་ལ་སྙོམས་པར་ཞུགས་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོའི་ལུས་ལས་འོད་ཟེར་རྣམ་པ་སྣ་ཚོགས་དག་འབྱིན་པར་བྱེད་དོ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་དག་གོ། །ཆོ་འཕྲུལ་ཟུང་དུ་ཡང་སྟོན་པར་བྱེད་དེ། ལུས་ཀྱི་སྟོད་ནས་འབར་བར་བྱེད་ལ། ལུས་ཀྱི་སྨད་ནས་ཆུ་གྲང་མོའི་རྒྱུན་འབེབས་པར་བྱེད་དོ། །ལུས་ཀྱི་སྨད་ནས་མེ་འབར་བར་བྱེད་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབེབས་ པར་བྱེད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས། རྫུ་འཕྲུལ་མངོན་པར་འདུ་བྱ་བ་བསྡུས་ཏེ་སྟན་བཤམས་པ་ ཉིད་ལ་འདུག་གོ། །དེ་ནས་རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱི་ཉན་ཐོས་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་གཞན་ཡང་མཆིས་ལགས་སམ། རྒྱལ་པོ་ཆེན་པོ་མཆིས་ སོ་ཞེས་ཚིགས་སུ་བཅད་དེ་སྨྲས་པ། མཐུ་ཆེ་བ་དང་གསུམ་རིག་དང་། །སེམས་ཀྱི་རྣམ་གྲངས་ཤེས་པ་དང་། །ཟག་ཟད་དགྲ་བཅོམ་གང་ཡིན་པ། །ཐུབ་པའི་ཉན་ཐོས་མང་དུ་མཆིས། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བདག་གི་བུ་འབའ་ཞིག་ འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བར་མ་ཟད་དེ་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བའི་རབ་ཏུ་བྱུང་བ་གཞན་ཡང་ཡོད་དོ་སྙམ་ནས་དེ་ཤིན་ཏུ་དགའ་བ་གང་ཡིན་པ་དེ་དང་བྲལ་བར་གྱུར་ཏོ། །སྐབས་དེར་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་དེ། ཀྱེ་མ་བརྒྱ་བྱིན་དང་ ཚངས་པ་ལ་སོགས་པ་ལྷ་རྣམས་འོངས་ན་ལྷའི་འཁོར་དག་པ་ལ་ཆོས་བཤད་དོ་སྙམ་པ་དང་། ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་པ་དེའི་ཚེ་སྲོག་ཆགས་གྲོག་སྦུར་རྣམས་ཀྱི་སེམས་ཀྱིས་ཀྱང་བཅོམ་ལྡན་

  818. 99b

    འདས་ཀྱིས་དགོངས་པ་ཤེས་པར་འགྱུར་ན། བརྒྱ་བྱིན་དང་ཚངས་པ་ལ་སོགས་པ་ལྷ་རྣམས་ཀྱིས་ལྟ་སྨོས་ཀྱང་ཅི་དགོས། གང་གི་ཚེ་འཇིག་རྟེན་ལས་འདས་པའི་ཐུགས་བསྐྱེད་པ་དེའི་ཚེ། ཉན་ཐོས་ཆེན་པོ་རྣམས་ཀྱི་སེམས་ཀྱིས་ཀྱང་བཅོམ་ལྡན་འདས་ཀྱི་དགོངས་པ་མི་ཤེས་ན། བརྒྱ་ བྱིན་དང་ཚངས་པ་ལ་སོགས་ཏེ་ལྷ་རྣམས་ཀྱིས་ལྟ་ཅི་སྨོས། སྲོག་ཆགས་གྲོག་སྦུར་རྣམས་ཀྱིས་ལྟ་ག་ལ་ཤེས། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བཅོམ་ལྡན་འདས་ཅིའི་ཕྱིར་འཇིག་རྟེན་པའི་ཐུགས་བསྐྱེད་པ་མཛད་དོ་སྙམ་པ་ལས་དེ་འདི་སྙམ་དུ་སེམས་ཏེ། ལྷའི་འཁོར་དག་པ་རྣམས་ལ་ཆོས་འཆད་པར་བཞེད་དོ་སྙམ་ནས། དེས་ལྷའི་བུ་བཟོ་ཐམས་ཅད་པ་ལ་བསྒོ་བ། བཟོ་ཐམས་ཅད་པ་བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་པར་བཞེད་ཀྱིས་ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་རྩེག་མ་གདན་སྣ་ཚོགས་བཤམས་ པ་ཞིག་སྤྲུལ་ཅིག །ཀཽ་ཤི་ཀ་ཁྱོད་ཀྱི་མཆོག་ཏུ་བཟང་ངོ་ཞེས་ལྷའི་བུ་བཟོ་ཐམས་ཅད་པས་ལྷའི་དབང་པོ་བརྒྱ་བྱིན་ལས་མཉན་ཏེ་ནྱ་གྲོ་དྷའི་ཀུན་དགའ་ར་བར་རིན་པོ་ཆེ་སྣ་བཞིའི་ཁང་པ་རྩེག་མ་གདན་སྣ་ཚོགས་བཤམས་པ་ཞིག་སྤྲུལ་ཏོ། །དེ་ནས་རྒྱལ་པོ་ཆེན་པོ་བཞི་སྒོ་བཞིན་འཁོད་པའི་ཡུལ་ འཁོར་སྐྱོང་དང་། འཕགས་སྐྱེས་པོ་དང་། མིག་མི་བཟང་དང་། ལུས་ངན་པོ་སྟེ། ཤར་ཕྱོགས་ན་ནི་ཡུལ་འཁོར་སྐྱོང་དཔུང་རྒྱན་དང་། རྣ་ཆ་གདུབ་ཀོར་དང་། ཕྲེང་བ་དང་། རྒྱན་སྣ་ཚོགས་ཀྱིས་བརྒྱན་པའོ། །ལྷོ་ཕྱོགས་ན་ནི་འཕགས་སྐྱེས་པོ་ལྷའི་རྒྱན་ཐམས་ཅད་ཀྱིས་ བརྒྱན་པའོ། །ནུབ་ཕྱོགས་ན་ནི་མིག་མི་བཟང་རིན་པོ་ཆེ་སྣ་ཚོགས་ཀྱིས་བརྒྱན་པའོ། །བྱང་ཕྱོགས་ན་ནི་ལུས་ངན་པོ་རྒྱན་ཐམས་ཅད་ཀྱིས་བརྒྱན་པའོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ནྱ་གྲོ་དྷའི་ཀུན་དགའ་ར་བ་ཆེ་ཐང་དུ་བརྒྱན་དུ་བཅུག་སྟེ། བཅོམ་ལྡན་འདས་གང་ན་བ་ དེར་སོང་སྟེ་ཕྱིན་ནས་བཅོམ་ལྡན་འདས་ལ་དོན་དེ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་བརྒྱ་བྱིན་དང་ཚངས་པ་ལ་སོགས་པ་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་ཁང་པ་བརྩེགས་པར་ཞུགས་ཏེ། ལྷའི་འཁོར་ཕལ་པོ་ཆེའི་གུང་ལ་རིན་པོ་ཆེ་སྣ་ཚོགས་ཀྱིས་བརྒྱན་པའི་

  819. 100a

    སེང་གེའི་ཁྲི་ལ་བཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྒྱལ་པོ་ཟས་གཙང་ཁྲིད་དེ། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་ནང་དུ་ཞུགས་པ་དང་། རྒྱལ་པོ་ཟས་གཙང་ལ་རྒྱལ་པོ་ཆེན་པོ་ཡུལ་ འཁོར་སྐྱོང་གིས་རྒྱལ་པོ་ཆེན་པོ་ནང་དུ་མ་འགྲོ་བར་སྡོད་ཅིག་ཅེས་བཟློག་གོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ཁྱོད་སུ་ཞིག །ཡུལ་འཁོར་སྐྱོང་ གིས་སྨྲས་པ། རྒྱལ་པོ་ཆེན་པོ་བདག་ནི་ཡུལ་འཁོར་སྐྱོང་ངོ་། །དེ་ནས་རྒྱལ་པོ་ཟས་གཙང་ལྷོ་སྒོར་སོང་བ་དང་། རྒྱལ་པོ་ཆེན་པོ་འཕགས་སྐྱེས་པོས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ཁྱོད་སུ་ ཞིག །འཕགས་སྐྱེས་པོས་སྨྲས་པ། རྒྱལ་པོ་ཆེན་པོ་བདག་ནི་འཕགས་སྐྱེས་པོའོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །དེ་ནས་རྒྱལ་པོ་ཟས་གཙང་ནུབ་སྒོར་སོང་བ་དང་། རྒྱལ་པོ་ཆེན་པོ་མིག་མི་ བཟང་གིས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ཁྱོད་སུ་ཞིག །མིག་མི་བཟང་གིས་སྨྲས་པ། རྒྱལ་པོ་ཆེན་པོ་བདག་ནི་མིག་མི་བཟང་ངོ་། །ཅིའི་ཕྱིར། བཅོམ་ལྡན་འདས་ལྷའི་འཁོར་ དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །དེ་ནས་རྒྱལ་པོ་ཟས་གཙང་བྱང་སྒོར་སོང་བ་དང་། རྒྱལ་པོ་ཆེན་པོ་རྣམ་ཐོས་ཀྱི་བུས་མཐོང་ནས་སྨྲས་པ། རྒྱལ་པོ་ཆེན་པོ་ནང་དུ་མ་འཇུག་པར་སྡོད་ཅིག །རྒྱལ་པོ་ཟས་གཙང་གིས་སྨྲས་པ། བཞིན་བཟངས་ ཁྱོད་སུ་ཞིག །རྣམ་ཐོས་ཀྱི་བུས་སྨྲས་པ། རྒྱལ་པོ་ཆེན་པོ་བདག་ནི་རྣམ་ཐོས་ཀྱི་བུའོ། །ཅིའི་ཕྱིར། བཅོམ་ལྡན་འདས་ལྷའི་འཁོར་དག་པ་ལ་ཆོས་འཆད་དེ། དེར་མིར་གྱུར་པ་འཇུག་ཏུ་མི་དབང་ངོ་། །དེ་ནས་རྒྱལ་པོ་ཟས་གཙང་ཀྱེ་མའོ་བཅོམ་ལྡན་འདས་ལྷའི་འཁོར་དག་

  820. 100b

    པ་ལ་ཆོས་འཆད་པ་དེ་བདག་གིས་བལྟའོ་སྙམ་པའི་འདོད་པ་སྐྱེས་སོ། །དེ་ནས་རྒྱལ་པོ་ཟས་གཙང་ཞུམ་པའི་རྒྱུད་གང་ཡིན་པ་དེ་དང་བྲལ་བར་གྱུར་ཏོ། །བཅོམ་ལྡན་འདས་ཀྱིས་དགོངས་པ། རྒྱལ་པོ་ཟས་གཙང་གིས་གལ་ཏེ་ང་མ་མཐོང་ན་ཁྲག་དྲོན་མོ་སྐྱུགས་ནས་འཆི་བར་འགྱུར་ བའི་གནས་སྐབས་གང་ཡིན་པ་དེ་ཡོད་པས་དེ་ལ་ཐབས་ཤིག་བཤམ་པར་བྱའོ་སྙམ་ནས། བཅོམ་ལྡན་འདས་ཀྱིས་རིན་པོ་ཆེ་སྣ་བཞིའི་ཁང་པ་བརྩེགས་པ་གང་ཡིན་པ་དེ་ཤེལ་ལས་བྱས་པར་སྤྲུལ་པ་དང་། དེས་ན་རྒྱལ་པོ་ཟས་གཙང་གིས་སངས་རྒྱས་ཀྱི་སྐུ་སྒྲིབ་པ་མེད་པར་མཐོང་ངོ་། ། མཐོང་ནས་ཀྱང་དགའ་བ་དང་མགུ་བ་སྐྱེས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་འཕགས་ པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། དེ་ཐོས་པས་རྒྱལ་པོ་ཟས་གཙང་གིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་བདེན་པ་མཐོང་ ནས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་པ། བཙུན་པ་བཅོམ་ལྡན་འདས་བདག་ལ་ཕས་མ་བགྱིས། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེ་རྣམས་ཀྱིས་མ་ལགས། སྡུག་པ་དང་། རང་གི་སྐྱེ་བོ་དང་། གཉེན་གྱི་ཚོགས་ཀྱིས་མ་ལགས་པ་གང་ལགས་པ་དེ་ནི་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་དག་ལས་ནི་བསྒྲལ། ངན་སོང་གི་སྒོ་རྣམས་ནི་བཀུམ། མཐོ་རིས་དང་ཐར་པའི་སྒོ་རྣམས་ ནི་ཕྱེ། བདག་ལྷ་དང་མི་རྣམས་སུ་ནི་བཞག་གོ། །ཡང་གསོལ་པ། ཕ་ལ་ལན་དུ་ཕན་གདགས་པ། །དམ་པའི་བུས་ནི་བགྱི་བ་གང་། །ཁྱོད་ཀྱིས་བདག་ལ་མཛད་ལགས་ཏེ། །སེམས་ནི་གྲོལ་བར་གཞོལ་བར་བགྱིས། །ཁྱོད་ཀྱིས་བདག་ནི་ངན་འགྲོ་ལས། །དྲངས་ཏེ་

  821. 101a

    མཐོ་རིས་ཐར་པ་ལ། །བསྒྲིམ་མི་འཚལ་བར་བཞག་ལགས་ཏེ། །ཁྱོད་ཀྱིས་དཀའ་བ་མཛད་པ་ལེགས། །མགོན་པོ་བྱམས་པ་ཁྱོད་ཀྱིས་ནི། །བདག་ནི་ཚོང་པ་རྙེད་ལྡན་ལྟར། །མཐོ་རིས་རྙེད་པས་སྲིད་པ་ཡི། །ལོངས་སྤྱོད་དག་ནི་རྙེད་པར་མཛད། །དེ་ནས་ རྒྱལ་པོ་ཟས་གཙང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་ གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་རྒྱལ་པོ་ཟས་གཙང་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་ཟས་གཙང་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་ བོས་ཕྱག་བྱས་ཏེ། བཅོམ་ལྡན་འདས་ཀྱི་སྤྱན་སྔ་ནས་ཆས་ཏེ། ཟས་དཀར་གང་ན་བ་དེར་སོང་སྟེ་ཕྱིན་ནས་ཟས་དཀར་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་རྒྱལ་སྲིད་ཐོབ་ཀྱིས་རྒྱལ་སྲིད་ཁྱེར་ཅིག །ཅིའི་སླད་དུ་ངས་བཅོམ་ལྡན་འདས་ཀྱི་སྤྱན་སྔར་བདེན་པ་མཐོང་བས་སོ། ། གང་གི་གདུགས་ལ་ལགས། དེ་རིང་ཁོ་ནའོ། །བདག་གིས་ཀྱང་བཅོམ་ལྡན་འདས་ཀྱིས་གང་གི་ཉི་མ་ལ་ནྱ་གྲོ་ངྷའི་ཀུན་དགའ་ར་བར་ཆོས་བཤད་པ་དེའི་ཉི་མ་ལ་ཤཱཀྱ་བདུན་ཁྲི་བདུན་སྟོང་དང་ལྷན་ཅིག་བདེན་པ་མཐོང་ལགས་སོ། །དེ་བཞིན་དུ་བྲེ་བོ་ཟས་ལ་རྒྱལ་སྲིད་ཁྱེར་ཅིག་ཅེས་སྨྲས་ པ་དང་། དེས་སྨྲས་པ། བདག་གིས་ཀྱང་བཅོམ་ལྡན་འདས་ཀྱིས་གང་གི་ཚེ་ཚངས་པས་བསྐོར་བའི་སྐྱེད་མོས་ཚལ་དུ་ཆོས་བཤད་པ་དེའི་ཚེ་ཤཱཀྱ་བདུན་ཁྲི་དྲུག་སྟོང་དང་ལྷན་ཅིག་བདེན་པ་མཐོང་ལགས་སོ། །དེ་བཞིན་དུ་བདུད་རྩི་ཟས་ལ་རྒྱལ་སྲིད་ཁྱེར་ཅིག་ཅེས་སྨྲས་པ་དང་། དེས་ སྨྲས་པ། བདག་གིས་ཀྱང་གང་གི་ཚེ་བཅོམ་ལྡན་འདས་ཀྱིས་རོ་ཧི་ཏ་ཀའི་སྐྱེད་མོས་ཚལ་དུ་ཆོས་བཤད་པ་དེའི་ཚེ་ཤཱཀྱ་བདུན་ཁྲི་ལྔ་སྟོང་དང་ལྷན་ཅིག་བདེན་པ་མཐོང་ལགས་སོ། །གལ་ཏེ་དེ་ལྟར་གྱུར་ན་ད་སུ་ཞིག་རྒྱལ་སྲིད་ལ་གཞག །དེ་རྣམས་ཀྱིས་སྨྲས་པ། ཤཱཀྱའི་རྒྱལ་པོ་

  822. 101b

    བཟང་ལྡན་གྱིས་བགྱིའོ་ཞེས་དེ་རྣམས་འདུས་ནས་ཤཱཀྱའི་རྒྱལ་པོ་བཟང་ལྡན་རྒྱལ་སྲིད་ཀྱི་དབང་ཕྱུག་ལ་དབང་བསྐུར་རོ། །དེ་ནས་རྒྱལ་པོ་ཟས་གཙང་གིས་དེ་ཉིད་ཀྱི་མཚན་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། གདན་ བཤམས་ཤིང་ནོར་བུའི་ཆུ་སྣོད་བཞག་ནས་བཅོམ་ལྡན་འདས་ལ་སྤྱན་འདྲེན་གྱིས་གདུགས་ཚོད་གསོལ་པ། བཙུན་པ་བཅོམ་ལྡན་འདས་གདུགས་ཚོད་ལགས་ན། ད་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་ དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་རྒྱལ་པོ་ཟས་གཙང་གི་བཀད་ས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ ཟས་གཙང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་རང་གི་ལག་ནས་ བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་གསེར་གྱི་བྱ་མ་བུམ་བླངས་ཏེ། བཅོམ་ལྡན་འདས་ལ་ནྱ་གྲོ་ངྷའི་ཀུན་དགའ་ར་བ་ཕུལ་ལོ། །བཅོམ་ལྡན་འདས་ཀྱིས་ཡན་ལག་ལྔ་དང་ལྡན་པའི་གསུང་དབྱངས་ ཀྱིས་ཡོན་བསྔོ་བ་མཛད་པ། སྦྱིན་པའི་བསོད་ནམས་གང་ཡིན་འདིས། །ཤཱཀྱ་རྣམས་ཀྱིས་བསམས་པ་ཡི། །ཡིད་ལ་རེ་བ་རྫོགས་ནས་ནི། །རྟག་པའི་གནས་ནི་ཐོབ་པར་ཤོག །དེ་ནས་བཅོམ་ལྡན་འདས་སེར་སྐྱའི་གཞི་ཤིང་ནྱ་གྲོ་ངྷའི་ཀུན་དགའ་ར་བ་ན་བཞུགས་སོ། ། དེ་བཞིན་དུ་གནས་བརྟན་རྣམས་ཀྱིས་ཀྱང་མདོ་སྡེ་ལ་བཅོམ་ལྡན་འདས་སེར་སྐྱའི་གཞི་ཤིང་ནྱ་གྲོ་ངྷའི་ཀུན་དགའ་ར་བ་ན་བཞུགས་སོ་ཞེས་གདགས་པར་བྱས་སོ། །བཅོམ་ལྡན་འདས་སེར་སྐྱའི་གཞི་དེ་ཉིད་ན་བཞུགས་ནས་ཉི་མ་གཅིག་ནི་རྒྱལ་པོའི་ཕོ་བྲང་དུ་གདུགས་ཚོད་གསོལ།

  823. 102a

    ཉི་མ་གཅིག་ནི་བཙུན་མོའི་ནང་དུ་གསོལ་ལོ། །རྒྱལ་པོ་ཟས་གཙང་གིས་རལ་པ་ཅན་ལས་རབ་ཏུ་བྱུང་བའི་དགེ་སློང་རྣམས་སྤྱོད་ལམ་ཞི་ཞིང་སེམས་དང་བ་ཡིན་ན་དཀའ་ཐུབ་དྲག་པོའི་བརྟུལ་ཞུགས་ཀྱི་ཁྱད་པར་དག་གིས་ལུས་གདུངས་པས་ལུས་མི་མཛེས་པར་ མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། འདི་ལྟར་རལ་པ་ཅན་འདི་དག་སྤྱོད་ལམ་ཞི་ཞིང་སེམས་དང་བ་ཡིན་མོད་ཀྱི། ལུས་མཛེས་པ་མ་ཡིན་ན་འཁོར་ཅི་འདྲ་བ་ཞིག་གིས་བཅོམ་ལྡན་འདས་མཛེས་པར་འགྱུར་སྙམ་པ་ལས། དེས་བསམས་པ། ཤཱཀྱའི་འཁོར་ གྱིས་ཡིན་ནོ་སྙམ་ནས། དེ་ནས་ཤཱཀྱ་ཐམས་ཅད་བསོགས་ཏེ་སྨྲས་པ། ཤེས་ལྡན་དག་གལ་ཏེ་གཞོན་ནུ་དོན་ཐམས་ཅད་གྲུབ་པ་རབ་ཏུ་མ་བྱུང་བར་གྱུར་ན་ཅིར་འགྱུར། འཁོར་ལོས་སྒྱུར་བའི་རྒྱལ་པོར་འགྱུར་རོ། །ཁྱེད་ཅག་ཅི་ཞིག་བྱེད་པར་འགྱུར། གཡོག་བགྱིད་པར་འགྱུར་ རོ། །ད་ལྟར་གཞོན་ནུ་དོན་ཐམས་ཅད་གྲུབ་པ་བླ་ན་མེད་པའི་ཆོས་ཀྱི་རྒྱལ་པོར་གྱུར་ན། ཁྱེད་ཅག་ཅིའི་ཕྱིར་གཡོག་མི་བྱེད། ལྷ་ཅི་རབ་ཏུ་འབྱུང་ངམ། རབ་ཏུ་བྱུང་ཤིག །ཅི་ཐམས་ཅད་དམ། ཁྱིམ་རེ་ནས་རེ་རེའོ། །བཀའ་བཞིན་འཚལ་ཞེས་རྒྱལ་པོ་ཟས་གཙང་གིས་གྲོང་ ཁྱེར་སེར་སྐྱའི་གཞིར་དྲིལ་སྒྲོགས་སུ་བཅུག་པ། རྒྱལ་པོའི་ཞལ་ནས་ངའི་ཡུལ་ན་གནས་པའི་ཤཱཀྱ་རྣམས་ཀྱིས་ཁྱིམ་རེ་ནས་རེ་རེ་རབ་ཏུ་བྱུང་ཤིག་ཅེས་དེ་སྐད་བཀའ་སྩལ་ཏོ། །བྲེ་བོ་ཟས་ལ་བུ་གཉིས་ཡོད་པ་མ་འགགས་པ་དང་། མིང་ཆེན་ནོ། །མིང་ཆེན་ནི་ཞིང་བླས་ཀྱི་མཐའ་ ལ་ལྷག་པར་བརྩོན་ནོ། །མ་འགགས་པ་ནི་སྟེང་གི་ཁང་བཟངས་ཀྱི་གཞི་ལ་འདུག་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །མིང་ཆེན་ལ་མས་སྨྲས་པ། བུ་རྒྱལ་པོས་དྲིལ་སྒྲོགས་སུ་བཅུག་པ། ཤཱཀྱ་རྣམས་ལས་ ཁྱིམ་རེ་ནས་རེ་རེ་རབ་ཏུ་བྱུང་ཤིག་ཅེས་བསྒོས་ཁྱོད་རབ་ཏུ་བྱུང་ཤིག །དེས་སྨྲས་པ། བདག་ནི་རབ་ཏུ་མི་འབྱུང་གིས་ཁྱོད་ཀྱི་བུ་སྡུག་པ་བདེ་བ་དང་ལྡན་པར་གནས་པ་གང་ཡིན་པ་དེ་རབ་ཏུ་ཕྱུང་ཤིག །བུ་བསོད་ནམས་ཀྱི་དབང་ཐང་ཆེན་པོ་ཅན་གྱི་སེམས་ཅན་དེ་ལ་ཁྱོད་འགྲན་མ་

  824. 102b

    ཚོལ་ཅིག །ཡུམ་ཁྱོད་གང་ལ་དགྱེས་པ་དེ་བསོད་ནམས་ཀྱི་དབང་ཐང་ཆེན་པོ་ཅན་ལགས་མོད། དེ་རིང་དེ་ལ་ཆུང་ཟད་ཀྱང་མ་བསྐུར་དང་། ཅི་བསོད་ནམས་ཀྱི་དབང་ཐང་ཆེན་པོ་ལེགས་སམ་མ་ལེགས་མངོན་པར་འགྱུར་རོ། །བུ་དེ་བཞིན་དུ་བྱས་ཏེ་ཡིད་ཆེས་པར་བྱའོ། ། དེས་གཟེབ་སྟོང་པ་རྫེའུ་ཡིས་བཀང་ནས་ཁ་རས་དཀར་པོས་དཀྲིས་ཏེ་རྒྱ་སྐྱེགས་ལ་རྒྱས་བཏབ་ནས་བུ་མོ་མངག་གཞུག་མའི་ལག་ཏུ་བསྐུར་ནས་བསྒོ་བ། གལ་ཏེ་དེ་ན་ཅི་ཡོད་ཅེས་འདྲི་དང་ཅི་ཡང་མ་མཆིས་སོ་ཞེས་སྨྲོས་ཤིག །དེས་དེ་ལ་ཁྱེར་ནས་སོང་བ་དང་། ལྷ་རྣམས་ཀྱི་དབང་ པོ་བརྒྱ་བྱིན་གྱི་ཤེས་པ་མཐོང་བ་འོག་ཏུ་འཇུག་པ་ཡིན་པས་དེས་བསམས་པ། རང་སངས་རྒྱས་ཀུན་ཤེས་པ་ལ་བསོད་སྙོམས་ཕུལ་བ་གང་ཡིན་པ་དེ་དེང་ཅིའི་ཕྱིར་ཟས་ཀྱིས་ཕོངས་པར་བྱ། དེའི་ཟན་སྦྱར་བར་བྱའོ་ཞེས་དེས་རྫེའུ་དེ་རྣམས་སུ་སྲན་ཚོད་དང་། ཚོད་མ་སྣ་ ཚོགས་རོ་དང་ལྡན་པ་དང་ཟས་ཀྱིས་བཀང་ངོ་། །ཇི་ཙམ་ན་མངག་གཞུག་མ་དེས་ཁྱེར་ནས་མ་འགགས་པའི་དྲུང་དུ་ཕྱིན་པ་དང་། དེས་སྨྲས་པ། བུ་མོ་འོ་ན་ནི་ཅི་ཡོད། དེས་སྨྲས་པ། གཞོན་ནུ་ཅི་ཡང་མ་མཆིས་སོ། །མ་འགགས་པས་བསམས་པ། བདག་ལ་མ་ བྱམས་ན་འདི་སྟོང་པར་ཅི་སྟེ་བསྐུར། གདོན་མི་ཟ་བར་འདི་ནི་ཅི་ཡང་མ་ཡིན་པ་ཞེས་བྱ་བའི་ཟས་ཤིག་བསྐུར་གྱིས་རེ་ཞིག་བལྟའོ། །ཞེས་ཅི་ཙམ་ན་ཁ་ཕྱེ་བ་དང་། སྐྱེད་མོས་ཚལ་དེ་ཐམས་ཅད་ཟས་ཀྱི་དྲི་ཞིམ་པོས་གང་བར་གྱུར་ཏེ། དེ་བསྣམས་ནས་མ་འགགས་པ་མཆོག་ཏུ་ ཡ་མཚན་སྐྱེས་སོ། །དེ་མ་ལ་གུས་པ་ཡིན་པས་དེས་མ་ལ་ཟས་ཀྱི་ཕུད་བསྐུར་ནས་སྤྲིང་པ། ཡུམ་གདུགས་རེ་རེ་ཞིང་ཟས་ཅི་ཡང་མ་ཡིན་པ་ཞེས་བགྱི་བ་འདི་ལྟ་བུ་ཤ་སྟག་བསྐུར་བའི་རིགས་སོ། །དེས་ཀྱང་མཐོང་ནས་མཆོག་ཏུ་ཡ་མཚན་སྐྱེས་ཏེ། དེས་མིང་ཆེན་ལ་བསྟན་ནས། བུ་མཐོང་ངམ། ཡུམ་མཐོང་ལགས་སོ། །ཁྱོད་ལ་ཁོ་མོས་སྔར་བསོད་ནམས་ཀྱི་དབང་ཐང་ཆེན་པོའི་སེམས་ཅན་མི་སྐལ་བ་བཟང་པོ་དང་ལྡན་པ་ལ་ཁྱོད་འགྲན་མ་ཚོལ་ཅིག་ཅེས་མ་སྨྲས་སམ། དེས་སྨྲས་པ། ཡུམ་བསོད་ནམས་ཀྱི་དབང་ཐང་ཆེན་པོ་དང་ལྡན་ཡང་རུང་མི་ལྡན་ཡང་རུང་བདག་ནི་

  825. 103a

    རབ་ཏུ་མི་འབྱུང་ངོ་ཞེས་ཇི་ལྟར་མིང་ཆེན་གནས་སྐབས་ཐམས་ཅད་དུ་རབ་ཏུ་བྱུང་བར་ཁས་ལེན་དུ་མ་བཏུབ་བོ། །དེ་ནས་དེས་མ་འགགས་པ་ལ་སྨྲས་པ། བུ་རྒྱལ་པོས་དྲིལ་སྒྲོགས་སུ་བཅུག་པ་ཤཱཀྱ་རྣམས་ལས་ཁྱིམ་རེ་ནས་རེ་རེ་རབ་ཏུ་བྱུང་ཤིག་ཅེས་བསྒོ་ན་ཁྱོད་ཅི་རབ་ ཏུ་འབྱུང་ངམ། འོན་ཏེ་ཁྱིམ་པར་འདུག །དེས་སྨྲས་པ། ཡུམ་རབ་ཏུ་བྱུང་བ་ལ་ཕན་ཡོན་ཅི་མཆིས། ཉེས་དམིགས་ཅི་མཆིས། ཁྱིམ་པར་མཆིས་པ་ལ་ཕན་ཡོན་ཅི་མཆིས། ཉེས་དམིགས་ཅི་མཆིས། བུ་རབ་ཏུ་བྱུང་བས་ལེགས་པར་བསྒྲུབས་ན། མྱ་ངན་ལས་འདས་ པ་ཐོབ་པར་འགྱུར་རོ། །ལེགས་པར་མ་བསྒྲུབས་ན་ལྷ་དང་མི་ཐོབ་པར་འགྱུར་རོ། །ཁྱིམ་པར་འདུག་སྟེ་ལེགས་པར་བསྐྱངས་ན་ལྷ་དང་མི་ཐོབ་བོ། །མ་བསྐྱངས་ན་སེམས་ཅན་དམྱལ་བ་དང་། དུད་འགྲོ་དང་། ཡི་དགས་འཐོབ་བོ། །ཡུམ་རབ་ཏུ་བྱུང་བའི་ཉེས་དམིགས་ གང་ལགས་པ་དེ་ནི་ཁྱིམ་ན་གནས་པའི་ཕན་ཡོན་ལགས་པས་དེ་བས་ན་ཁྱིམ་ན་གནས་པ་མི་འཚལ་གྱིས་གནང་བར་མཛོད་ཅིག་དང་རབ་ཏུ་འབྱུང་ངོ་། །དེས་སྨྲས་པ། བུ་ལེགས་ཀྱིས་དེ་བཞིན་དུ་གྱིས་ཤིག །མ་འགགས་པའི་ནེའུ་ཟླ་ཤཱཀྱའི་རྒྱལ་པོ་བཟང་ལྡན་ཡིན་པས་དེ་དེའི་དྲུང་ དུ་སོང་ངོ་། །དེའི་ཚེ་ཤཱཀྱའི་རྒྱལ་པོ་བཟང་ལྡན་པི་བང་ལེན་ཏེ། དེ་པི་བང་ལེན་པ་ན་རྒྱུད་ཆད་ནས་སྒྲ་གཞན་དུ་གྱུར་ཏོ། །མ་འགགས་པ་པི་བང་ལེན་པ་ལ་བྱང་བ་ཡིན་པས་དེས་སྒྲ་ཅི་འདྲ་བར་གྱུར་པའི་རྟགས་བཟུང་ནས་དེ་སྒོར་བསྡད་དེ་སྒོ་སྲུང་གི་མི་ལ་སྨྲས་པ། ཀྱེ་ནང་རྗེ་སོང་ ལ་རྒྱལ་པོ་བཟང་ལྡན་ལ་མ་འགགས་པ་ལྷའི་ཞལ་མཐོང་བར་འཚལ་ནས་སྒོ་ན་སྡོད་ཅིང་མཆིས་སོ་ཞེས་གསོལ་ཅིག །སྒོ་སྲུང་སོང་ནས་ཤཱཀྱའི་རྒྱལ་པོ་བཟང་ལྡན་ལ་སྨྲས་པ། ལྷ་མ་འགགས་པ་ལྷའི་ཞལ་མཐོང་བར་འཚལ་ནས་ཆབ་སྒོ་ན་སྡོད་ཅིང་མཆིས་སོ། །དེས་སྨྲས་པ། ཤེས་ལྡན་མ་འགགས་པ་ལ་སུ་འགོག །ཤེས་ལྡན་མ་འགགས་པ་ནང་དུ་ཐོང་ཤིག །དེ་ནང་དུ་ཞུགས་པ་དང་། རྒྱལ་པོས་འཁྱུད་ནས་འདུག་ཏུ་བཅུག་སྟེ་སྨྲས་པ། ཁྱོད་འོངས་ནས་ཇི་སྲིད་ལོན། དེས་སྨྲས་པ། གང་གི་ཚེ་ཁྱོད་པི་བང་ལེན་པ་ན་རྒྱུད་ཆད་ནས་སྒྲ་གཞན་དུ་གྱུར་པ་

  826. 103b

    ནའོ། །དེ་མཆོག་ཏུ་ཡ་མཚན་སྐྱེས་ནས་དེས་སྨྲས་པ། ཁྱེད་པི་བང་ལེན་པ་ལ་བྱང་བ་ཡིན་ནོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། གཞོན་ནུ་དོན་ཅི་ཞིག་ལ་འོངས། མ་འགགས་པས་སྨྲས་པ། ལྷ་རྒྱལ་པོ་ཟས་གཙང་གིས་དྲིལ་སྒྲོགས་སུ་བཅུག་པ་ཤཱཀྱ་རྣམས་ ལ་ཁྱིམ་རེ་ནས་རེ་རེ་རབ་ཏུ་བྱུང་ཤིག་པར་བསྒོ་བས་དེ་ཁྱོད་ཀྱིས་མཁྱེན་པར་མཛོད་ཅིག་རབ་ཏུ་འབྱུང་ངོ་། །རྒྱལ་པོས་སྨྲས་པ། གལ་ཏེ་དེ་ལྟ་ན་ཁོ་བོ་ཡང་རབ་ཏུ་འབྱུང་སྟེ། གྲོས་བྱ་བ་ཡོད་ཀྱིས་ཁྱོད་དེ་རིང་འདི་ཉིད་དུ་གནས་ཐོབ་ཤིག །དེ་དེ་ཉིད་དུ་གནས་བཏབ་བོ། །མ་ལ་ འཆའ་བས་རིམས་བག་གི་དྲི་ཅན་གྱི་གོས་ཀྱིས་བཏིང་ཞིང་མེ་ཏོག་གི་སིལ་མས་བཀྲམ་པའི་མལ་དུ་མ་འགགས་པ་ཉལ་བ་དང་། དེའི་འོག་ན་མེ་ཏོག་གི་རྩ་བ་ཡོད་པའི་རེག་པ་དེའི་ཉམས་སུ་ཚོར་ནས་སྨྲས་པ། ཅི་འདིའི་འོག་ན་རྡོ་ཕྲེའུ་ཡོད་དམ། དེ་རྣམས་ཀྱིས་བརྟག་པར་ བརྩམས་པ་ན་མེ་ཏོག་གི་རྩ་བ་ཞིག་མཐོང་ནས་དེ་རྣམས་མཆོག་ཏུ་ངོ་མཚར་སྐྱེས་སོ། །མ་འགགས་པ་མཚན་མོ་མི་བདེ་བཞིན་ཉལ་ནས་ནམ་ནངས་སོ། །རྒྱལ་པོས་སྨྲས་པ། མ་འགགས་པ་ཅི་ག་བདེ་བར་གཉིད་ལོག་གམ། དེས་སྨྲས་པ། ལྷ་བདེ་བར་གཉིད་མ་ལོག་གོ ། རྒྱལ་པོས་སྨྲས་པ། ཅིའི་ཕྱིར། མ་འགགས་པས་སྨྲས་པ། ལྷ་རིམས་བག་གི་དྲི་ཅན་གྱི་གོས་བཏིང་བར་མེ་ཏོག་གི་སིལ་མ་བཀྲམ་པའི་མེ་ཏོག་གི་རྩ་བས་ལུས་གནད་ལགས་སོ། །རྒྱལ་པོས་མལ་འཆའ་བ་བཀུག་ནས་ཁྱོད་ཀྱིས་རིམས་བག་གི་དྲི་ཅན་གྱི་གོས་བཏིང་སྟེ་ ཅི་བྱ། མལ་འཆའ་བས་སྨྲས་པ། ལྷ་བདག་ལ་དཀོར་བས་གཏད་པ་ལགས་སོ། །རྒྱལ་པོས་དཀོར་བ་བཀུག་ནས་སྨྲས་པ། ཁྱོད་ཀྱིས་རིམས་བག་གི་དྲི་ཅན་གྱི་གོས་ཕོག་སྟེ་ཅི་བྱ། དེས་སྨྲས་པ། ལྷ་བདག་ལ་ཐག་པས་གཏད་པ་ལགས་སོ། །རྒྱལ་པོས་ཐག་པ་ བཀུག་ནས་སྨྲས་པ། ཁྱོད་ཀྱིས་ཅིའི་ཕྱིར་རིམས་བག་གི་དྲི་ཅན་གྱི་གོས་དབུལ། ཐ་ག་པས་སྨྲས་པ། ལྷ་སྣམ་བུ་འཐག་པའི་འཕྲོ་ཅུང་ཞིག་ལུས་པ་ན་བདག་རིམས་ཀྱིས་ཐེབས་བཞིན་བགྱིས་པ་ལགས་སོ། །རྒྱལ་པོས་སྨྲས་པ། གཞོན་ནུ་ཁྱོད་ཀྱིས་ཇི་ལྟར་

  827. 104a

    ཤེས། དེས་སྨྲས་པ། ཚ་བའི་རེག་པ་ཉམས་སུ་མྱོང་བས་རིམས་བག་གི་དྲི་ལགས་སོ། །རྒྱལ་པོ་མཆོག་ཏུ་ཡ་མཚན་སྐྱེས་ཏེ་སྨྲས་པ། ཤེས་ལྡན་མ་འགགས་པ་ནི་ཤཱཀྱ་སྐལ་བ་བཟང་པོ་དང་ལྡན་པ་ཡིན་ནོ། །དེ་ནས་ཤཱཀྱའི་རྒྱལ་པོ་བཟང་ལྡན་ གྱིས་སྨྲས་པ། གཞོན་ནུ་གལ་ཏེ་ཁོ་བོ་རབ་ཏུ་བྱུང་ན་ལྷ་སྦྱིན་ཤཱཀྱ་རྣམས་ཀྱི་རྒྱལ་པོར་གྱུར་ཏེ། དེ་ཤཱཀྱ་རྣམས་ལ་གནོད་པར་བྱེད་པར་འགྱུར་གྱིས། མ་ལ་བདག་ཅག་ཐམས་ཅད་འདུས་ལ་ལྷ་སྦྱིན་སྤྲོ་བ་བསྐྱེད་པར་བྱའོ་ཞེས་ཤཱཀྱའི་རྒྱལ་པོ་བཟང་ལྡན་གྱིས་དེ་བཀུག་སྟེ། དེ་ ནས་ཐམས་ཅད་འདུས་ནས་སྨྲས་པ། ལྷ་སྦྱིན་ཁོ་བོ་ཅག་ཐམས་ཅད་རབ་ཏུ་འབྱུང་ན་ཁྱོད་ཅི་བྱེད། ལྷ་སྦྱིན་གྱིས་བསམས་པ་གལ་ཏེ་རབ་ཏུ་མི་འབྱུང་ངོ་ཞེས་སྨྲས་པ་དང་། ཤཱཀྱའི་རྒྱལ་པོ་བཟང་ལྡན་རབ་ཏུ་འབྱུང་བར་མི་འགྱུར་གྱིས། དེ་ལ་ཐབས་ཅིག་བཤམ་པར་བྱ་སྟེ་ བསླུའོ། །གཞན་ཡང་བཅོམ་ལྡན་འདས་ཀྱིས་གང་གི་ཉི་མ་ལ་ནྱ་གྲོ་དྷའི་ཀུན་དགའ་ར་བར་སྒྱུ་མའི་ཆོ་འཕྲུལ་བསྟན་པ་དེའི་ཚེ་བདག་བློ་སྐྱེས་པ། ཇི་ལྟར་འདིའི་སྒྱུ་མས་སྐྱེ་བོའི་ཚོགས་ཆེན་པོ་དབང་དུ་བྱེད་པ་དེ་བཞིན་དུ་བདག་གིས་ཀྱང་དབང་བྱའོ་ཞེས་བསམས་སོ་སྙམ་ནས་ སྨྲས་པ། ཁྱེད་ཅག་རབ་ཏུ་འབྱུང་ན་བདག་ཅི་སྟེ་འདུག །ཤཱཀྱའི་རྒྱལ་པོ་བཟང་ལྡན་གྱིས་བསམས་པ། འདི་ནི་བརྫུན་དུ་སྨྲ་བ་ཡིན་གྱིས་དམ་འཆར་བཅུག་ལ་འགྲོ་བ་མང་པོས་སོ་སོར་རིག་པར་བྱའོ་སྙམ་མོ། །དེ་ནས་རྒྱལ་པོས་ཚིག་དེ་གླེགས་བུ་ལ་བྲིས་ནས་གྲོང་ཁྱེར་སེར་ སྐྱའི་གཞིར་དྲིལ་སྒྲོགས་སུ་བཅུག་པ། གྲོང་ཁྱེར་སེར་སྐྱའི་གཞི་ན་གནས་པའི་ཤེས་ལྡན་དག་ཉོན་ཅིག །བཟང་ལྡན་དང་། ནམ་གྲུ་དང་། མ་འགགས་པ་དང་། ལྷ་སྦྱིན་ལ་སོགས་ཏེ་ཤཱཀྱ་ལྔ་བརྒྱ་རབ་ཏུ་འབྱུང་བར་འགྱུར་གྱིས། ཐོས་པར་གྱིས་ལ་རབ་ཏུ་དགའ་བ་སྐྱེད་ཅིག་ ཅེས་བསྒོའོ། །ལྷ་སྦྱིན་གྱིས་དེ་ཐོས་ནས་སྡུག་བསྔལ་ཆེན་པོ་དང་ཡིད་མི་བདེ་བ་སྐྱེས་ནས། གལ་ཏེ་བདག་གིས་ཤཱཀྱའི་རྒྱལ་པོ་བཟང་ལྡན་ངེས་པར་རབ་ཏུ་འབྱུང་བ་ཤེས་པར་གྱུར་དང་བདག་ཁས་ལེན་པར་མི་འགྱུར་བ་ཞིག་ན། ད་ནི་གལ་ཏེ་རབ་ཏུ་མ་བྱུང་ན་བརྫུན་དུ་སྨྲ་བ་ཡིན་ནོ་ཞེས་རྒྱལ་སྲིད་

  828. 104b

    ཀྱང་ཐོབ་པར་མི་འགྱུར་བས་ཐམས་ཅད་ཀྱི་ཐམས་ཅད་དུ་དུས་འདིར་ཟད་དམ་ཅིས་རབ་ཏུ་བྱུང་ལ་བདག་རབ་ཏུ་བྱུང་བཞིན་དུ་རྒྱལ་སྲིད་བྱའོ་སྙམ་མོ། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། ཤཱཀྱ་རྣམས་ཀྱི་ཐ་མའི་འབྱོར་པ་ལ་བལྟའོ་སྙམ་ནས་དེས་གྲོང་ཁྱེར་གསེག་མ་དང་གྱོ་མོ་ བསལ། ཙན་དན་གྱི་ཆུས་ཆག་ཆག་བཏབ། གདུགས་དང་། རྒྱལ་མཚན་བསྒྲེང་། དར་གྱི་ཆུན་འཕྱང་མང་པོ་དཔྱངས། ཤིན་ཏུ་དྲི་ཞིམ་པོའི་པོག་པོར་ཉེ་བར་བཞག །མེ་ཏོག་སྣ་ཚོགས་ཀྱི་སིལ་མས་དགའ་དགའ་ལྟར་བྱེད་དུ་བཅུག་གོ། །དེ་ནས་ཤཱཀྱ་བརྒྱ་སྟོང་ཕྲག་དུ་མས་ ཡོངས་སུ་བསྐོར་ནས་གྲོང་ཁྱེར་གྱི་སྒོ་ན་སེང་གེའི་ཁྲི་ལ་འདུག་གོ། །ཤཱཀྱ་མོ་དང་ཤཱཀྱ་གཞོན་ནུ་མ་ངོ་མཚར་སྐྱེས་པ་རྣམས་ཀྱང་སྐར་ཁུང་ཁོལ་མ་ཅན་དང་། སྐར་ཁུང་དང་། སྟེགས་བུ་དག་ལ་འདུག་གོ། །ཤཱཀྱ་རྣམས་ཀྱི་འབྱོར་པ་ལ་བལྟ་བར་འདོད་པའི་སྐྱེ་བོའི་ཚོགས་ཡུལ་སྣ་ ཚོགས་ནས་ལྷགས་པ་དག་ཀྱང་ལམ་པོ་ཆེ་འམ། ཚོང་འདུས་དང་། བཞི་མདོ་དང་། སུམ་མདོ་རྣམས་སུ་འདུག་གོ། །ཤཱཀྱ་ལས་སུ་དག་གིས་ནི་མཉེས་པར་འགྱུར། སུ་དག་གིས་ནི་ཐུགས་བྱུང་བར་འགྱུར་བ་བརྟག་པའི་ཕྱིར་བྲམ་ཟེ་དང་། མཚན་མཁན་དང་། ལྟས་མཁན་ དག་བཀུག་གོ། །ཤཱཀྱ་རྣམས་དོ་ཤལ་དང་། གདུ་བུ་དང་། དཔུང་རྒྱན་དང་། རྒྱན་གྱིས་བརྒྱན་པ་རྣམས་ཀྱིས་ཕ་དང་མ་དག་ལ་བལྟས་ནས་སོ་སོའི་ཤིང་རྟར་ཞུགས་ཏེ་ཕྱིར་འབྱུང་བར་བརྩམས་པ་ན། ཤཱཀྱའི་རྒྱལ་པོ་བཟང་ལྡན་སྣ་ལ་བྱུང་བ་མཚན་མཁན་རྣམས་ཀྱིས་མཐོང་ ནས་དེ་དག་གིས་སྨྲས་པ། རེ་ཞིག་འདིས་ནི་མཉེས་པར་བྱེད་པར་འགྱུར་རོ། །དེ་བཞིན་དུ་ནམ་གྲུ་དང་། མ་འགགས་པ་ལ་སོགས་པ་ཕྱིར་བྱུང་བ་ན་དེ་རྣམས་ཀྱང་མཚན་མཁན་རྣམས་ཀྱིས་ལུང་བསྟན་ཏོ། །དེ་ནས་ལྷ་སྦྱིན་ཕྱིར་བྱུང་སྟེ། དེ་ཕྱིར་བྱུང་བ་ན་བྱ་ཁྲས་གཙུག་གི་ནོར་བུ་ ཕྲོགས་པ་མཚན་མཁན་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། འདིའི་རྟགས་དང་སྦྱར་ན་གདོན་མི་ཟ་བར་སྟོན་པ་ལ་འཁུས་ནས་དམྱལ་བ་ལ་གཞོལ་བར་འགྱུར་རོ། །ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏ་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཕྱིར་བྱུང་བ་དང་

  829. 105a

    བོང་བུའི་སྐད་གྲག་ནས་དེ་དག་ཀྱང་མཚན་མཁན་རྣམས་ཀྱིས་བསྟན་པ། འདི་དག་གིས་ཀྱང་ཉན་ཐོས་ཆེན་པོ་རྣམས་ལ་ཚིག་ངན་པ་སྨྲས་ནས་དམྱལ་བར་གཞོལ་བར་འགྱུར་རོ། །ཉེ་དགའ་གླང་པོ་ཆེ་ལ་ཞོན་ནས་ཕན་ཚུན་དུ་ལྟ་བར་བྱེད་པ་ན་མུ་ཏིག་གི་དོ་ཤལ་ལྷུང་ བ་དང་། དེ་གླང་པོ་ཆེ་ལས་བབས་ཏེ་བླངས་སོ། །དེ་ཡང་དེ་རྣམས་ཀྱིས་ལུང་བསྟན་པ། འདི་ཧ་ཅང་འདོད་ཆེན་ཆེས་པས་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དེ་ནས་བཟང་ལྡན་དང་། ནམ་གྲུ་དང་། མ་འགགས་པ་དང་། ལྷ་སྦྱིན་ལ་སོགས་པ་ཤཱཀྱ་ལྔ་བརྒྱ་པོ་ དེ་རྣམས་སྐྱེད་མོས་ཚལ་དུ་དུས་སྟོན་ལ་འགྲོ་བ་བཞིན་དུ་བཟང་པོས་འགྲན་ཅིང་བཅོམ་ལྡན་འདས་གང་ན་བ་དེར་དོང་ངོ་། །བཅོམ་ལྡན་འདས་ཀྱིས་དགོངས་པ། གལ་ཏེ་ངས་ཤཱཀྱ་རྣམས་ལ་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་ན་ཁ་ཅིག་གིས་ནི་མཉེས་པར་བྱེད་པར་འགྱུར། ཁ་ཅིག་གིས་ནི་མཉེས་པར་བྱེད་པར་མི་འགྱུར་ཏེ། མཉེས་པར་བྱེད་པར་མི་འགྱུར་བ་གང་ཡིན་པ་དེ་དག་གཞན་དུ་སེམས་ལ། དགེ་སློང་ཚུར་ཤོག་ཅེས་བྱ་བ་ནི་ཐམས་ཅད་སྲིད་པ་ཐ་མ་ཡིན་པས་མ་ལ་ངས་ཐམས་ཅད་དགེ་སློང་རྣམས་ཀྱིས་གསོལ་བ་དང་བཞིའི་ལས་ཀྱིས་རབ་ཏུ་ བྱུང་བ་དང་བསྙེན་པར་རྫོགས་སུ་གཞུག་གོ་སྙམ་དུ་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་སེར་སྐྱའི་གཞིའི་ཤཱཀྱ་རྣམས་གསོལ་བ་དང་བཞིའི་ལས་ཀྱིས་རབ་ཏུ་འབྱུང་བ་དང་བསྙེན་པར་རྫོགས་པར་གྱིས་ཤིག །བཙུན་པ་བཀའ་བཞིན་འཚལ་ཞེས་དགེ་ སློང་དེ་རྣམས་ཀྱིས་བཅོམ་ལྡན་འདས་ལས་མཉན་ཏོ། །རྒྱལ་པོ་ཟས་གཙང་གིས་ཤཱཀྱ་རྣམས་ཀྱི་འབྲེག་མཁན་ཉེ་བ་འཁོར་ཞེས་བྱ་བ་དེ་རྣམས་རབ་ཏུ་འབྱིན་པ་ན་སྐྲ་འབྲེག་པར་བཏང་ནས་ཤཱཀྱའི་རྒྱལ་པོ་བཟང་ལྡན་གྱི་སྐྲ་འབྲེག་པ་ན་དེ་ངོམ་ཟུང་གནག་ཅིང་མཆི་མ་འཛག་ལ་སྐད་ འཛེར་ཅིང་དབུགས་བརྫགས་པར་སྐྲ་འབྲེག་པར་བྱེད་དོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། ཉེ་བ་འཁོར་ཅིའི་ཕྱིར་དུ། དེ་སྙིང་རྗེ་རྗེ་སྐད་དུ་གཅོམ་ཆུང་ངུ་དལ་བུས་ཚིག་རེ་ནས་སྨྲས་པ། ལྷ་བདག་འཛམ་བུའི་གླིང་གི་སྐྱེས་བུ་གཙོ་བོ་རྣམས་ལ་བསྙེན་བཀུར་བགྱིད་པ་

  830. 105b

    མི་ཕལ་པ་རྣམས་ལ་ཡང་བསྙེན་བཀུར་བགྱིད་པར་འགྱུར་བ་ལྟ་ཞིག །ཁྱེད་ཀྱིས་སྤངས་ཏེ་གསོན་པ་བས་ནི་འགུམ་མི་བསྡོའོ། །ཤཱཀྱའི་རྒྱལ་པོ་བཟང་ལྡན་གྱིས་སྨྲས་པ། ཉེ་བ་འཁོར་ཁྱོད་ཀྱིས་ཇོ་བོ་ལ་སྙིང་ཉེ་བའི་མཉེས་པར་བྱ་བ་བསྟན་ཟིན་ཏེ། ཆོག་གིས་མྱ་ངན་མ་ བྱེད་ཅིག །ངས་ཇི་ལྟར་མི་ཕལ་པ་རྣམས་ལ་བསྙེན་བཀུར་བྱེད་པར་མི་འགྱུར་བ་དེ་ལྟར་བྱའོ་ཞེས་སྨྲས་ནས་དེས་ཕྱོགས་གཅིག་ཏུ་རས་ཞིག་བཏིང་ནས་ཤཱཀྱ་གཞོན་ནུ་རྣམས་ལ་སྨྲས་པ། ཤེས་ལྡན་གཞོན་ནུ་དག་ཉོན་ཅིག །འབྲེག་མཁན་ཉེ་བ་འཁོར་འདིས་བདག་ཅག་ལ་བཀུར་ སྟི་བྱས་ལ་བདག་ཅག་ཀྱང་སླར་ཁྱིམ་དུ་མི་གནས་ཀྱིས་རྒྱན་རྣམས་དེའི་འཚོ་བའི་རྐྱེན་དུ་རས་ཀྱི་སྟེང་དུ་ཞོག་ཤིག །དེ་རྣམས་ཀྱིས་སེ་མོ་དོ་དང་། དོ་ཤལ་དང་། མགུལ་རྒྱན་དང་། གདུ་བུ་དང་། དཔུང་རྒྱན་དང་། རྣ་རྒྱན་ལ་སོགས་པ་རིན་པོ་ཆེ་སྣ་ཚོགས་ཀྱིས་བརྒྱན་པའི་རྒྱན་ ཁྱད་པར་ཅན་རྣམས་ཀྱིས་རས་ཀྱི་སྟེང་དུ་ཕུང་པོ་ཆེན་པོར་སྤུངས་སོ། །ཉེ་བ་འཁོར་གྱིས་དེ་རྣམས་མཐར་གྱིས་སྐྲ་བྲེགས་ཏེ་དེ་རྣམས་ཁྲུས་ལ་དོང་བ་དང་། དེས་བསམས་པ། རེ་ཞིག་གཞོན་ནུ་འདི་དག་རིགས་དང་། འབྱོར་པ་དང་། ལང་ཚོ་ལ་བབ་ཅིང་ཆུང་མ་དང་ལྡན་ལ། མཛོད་ དང་བང་མཛོད་ཀྱིས་རྒྱས་པ་ཡང་སྤངས་ནས་རབ་ཏུ་འབྱུང་ན། བདག་རྒྱན་འདི་ཙམ་ལ་ཆགས་པ་ནི་ཚུལ་མ་ཡིན་པས་སྡུག་བསྔལ་བར་འགྱུར་རོ། །གལ་ཏེ་བདག་རིགས་ངན་དུ་མ་སྐྱེས་ན་བདག་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་ཆུ་བོ་ལས་རྒལ་བ་ དང་། སྦྱོར་བ་ལས་ཡང་དག་པར་འདའ་བར་བྱ་བའི་ཕྱིར་བརྩལ་བ་དང་འབད་པ་ལ་བརྩོན་པར་བྱ་བ་ཞིག་སྙམ་མོ། །འདི་ནི་ཆོས་ཉིད་ཡིན་ཏེ། ཇི་ལྟར་སངས་རྒྱས་བཅོམ་ལྡན་འདས་རྣམས་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་ གཟིགས་པ་དེ་བཞིན་དུ་ཉན་ཐོས་ཆེན་པོ་རྣམས་ཀྱང་བྱེད་པས་ཚེ་དང་ལྡན་པ་ཤཱ་རིའི་བུས་འབྲེག་མཁན་ཉེ་བ་འཁོར་ལྷག་པར་སྐྱོ་བ་སྐྱེས་པར་མཐོང་ངོ་། །མཐོང་ནས་ཀྱང་འབྲེག་མཁན་ཉེ་བ་འཁོར་གང་ན་བ་དེར་སོང་སྟེ་ཕྱིན་ནས་འབྲེག་མཁན་ཉེ་བ་འཁོར་ལ་འདི་སྐད་ཅེས་སྨྲས་

  831. 106a

    སོ། །ཉེ་བ་འཁོར་ཁྱོད་ཅིའི་ཕྱིར་ཤིན་ཏུ་མི་དགའ་བས་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་འདུག་ཉེ་བ་འཁོར་གྱིས་སྨྲས་པ། བཙུན་པ་ཤཱ་རིའི་བུ་གང་གི་ཕྱིར་ད་ལྟར་གཞོན་ནུ་འདི་དག་རིགས་དང་། འབྱོར་པ་དང་། ལང་ཚོ་ལ་བབ་ཅིང་ཆུང་མ་ དང་ལྡན་ལ། མཛོད་དང་བང་མཛོད་ཀྱིས་རྒྱས་པ་ཡང་སྤངས་ནས་རབ་ཏུ་འབྱུང་ན། བདག་རྒྱན་འདི་ཙམ་ལ་ཆགས་པ་ནི་ཚུལ་མ་ཡིན་པས་སྡུག་བསྔལ་བར་འགྱུར་རོ། །གལ་ཏེ་བདག་རིགས་ངན་དུ་མ་སྐྱེས་ན་བདག་ཀྱང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་ ཆུ་བོ་ལས་རྒལ་བ་དང་། སྦྱོར་བ་ལས་ཡང་དག་པར་འདའ་བར་བྱ་བའི་ཕྱིར་བརྩལ་བ་དང་འབད་པ་ལ་བརྩོན་པར་བགྱི་བ་ཞིག་ན། བདག་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། ཚེ་དང་ལྡན་པ་ཤཱ་རིའི་བུས་སྨྲས་པ། བཞིན་བཟངས་ཐུབ་པའི་དབང་པོའི་གསུང་རབ་འདི་ལ་ནི་ རིགས་སྙིང་པོར་བྱེད་པ་མ་ཡིན། རུས་སྙིང་པོར་བྱེད་པ་མ་ཡིན། རྒྱུད་སྙིང་པོར་བྱེད་པ་མ་ཡིན། ཐོས་པ་སྙིང་པོར་བྱེད་པ་མ་ཡིན་ཏེ། འདི་ལྟར་ཐུབ་པའི་དབང་པོའི་གསུང་རབ་འདི་ལ་ནི་སྒྲུབ་པ་སྙིང་པོར་བྱེད་པ་ཡིན་ནོ། །དེ་བཞིན་གཤེགས་རྣམས་རིགས་དང་ནི། །རྒྱུད་དང་ རུས་ལ་རྟོག་མི་མཛད། །འདས་ནས་ཡུན་རིང་ལོན་པ་ཡི། །ལས་རྣམས་ལ་ནི་རྟོག་པར་མཛད། །གལ་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འདོད་ན་ཚུར་བཅོམ་ལྡན་འདས་ཀྱི་སྤྱན་སྔར་འདོང་དང་། ཁྱོད་བཅོམ་ ལྡན་འདས་ཀྱིས་རབ་ཏུ་འབྱིན་པར་འགྱུར་རོ།། །།འདུལ་བ་གཞི། བམ་པོ་དགུ་བཅུ་རྩ་གཉིས་པ། དེས་ཁས་བླངས་སོ། །དེ་ནས་ཚེ་དང་ལྡན་པ་ཤཱ་རིའི་བུས་འབྲེག་མཁན་ཉེ་བ་འཁོར་ཁྲིད་དེ་བཅོམ་ལྡན་འདས་གང་ན་བ་དེར་དོང་ནས་ཕྱིན་པ་དང་། བཅོམ་ལྡན་འདས་ ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཉེ་བ་འཁོར་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོ་འཚལ་ལགས་ན་ཐུགས་བརྩེ་བ་ཉེ་བར་གཟུང་སྟེ།

  832. 106b

    བཅོམ་ལྡན་འདས་ཀྱིས་འདི་རབ་ཏུ་འབྱུང་བ་དང་བསྙེན་པར་རྫོགས་པར་མཛད་དུ་གསོལ། བཅོམ་ལྡན་འདས་ཀྱིས་དེ་ལ་བཀའ་སྩལ་པ། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པའི་མོད་ཁོ་ནར་སྐྲ་བྱི་བ་དང་། སྣམ་སྦྱར་གྱོན་པ་དང་། ལག་པར་ལྷུང་བཟེད་དང་བྱ་མ་བུམ་གྱིས་འབྲེལ་བ་དང་། སྐྲ་དང་ཁ་སྤུ་སྐྱེས་ནས་ཞག་བདུན་ལོན་པ་ཙམ་དང་། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་ སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཤཱཀྱ་རབ་ཏུ་བྱུང་བ་རྣམས་ནི་རྒན་རབས་ཇི་ལྟ་བུ་བཞིན་དུ་འདུད་པར་བྱེད་པས་ཤཱཀྱའི་རྒྱལ་པོ་བཟང་ལྡན་འདུད་པར་བྱེད་པ་ན། ཉེ་བ་ འཁོར་གྱི་རྐང་པ་ཡིན་པར་ཤེས་སོ། །དེ་ནས་དེས་གདོང་བཏེག་སྟེ་གསོལ་པ། བཅོམ་ལྡན་འདས་འདི་ནི་ཉེ་བ་འཁོར་ལགས་ན། ཅི་བདག་གིས་འདིའི་རྐང་པ་གཉིས་ལ་ཡང་འདུད་པར་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། བུ་ང་རྒྱལ་སྤང་བའི་ཕྱིར་རབ་ཏུ་བྱུང་བ་ ཡིན་ཏེ། འདི་རྒན་གྱིས་ཁྱོད་ཀྱིས་ང་རྒྱལ་གྱི་དྲེགས་པ་ཆོག་ལ་ཐུད་ཅིག །དེས་དེའི་རྐང་པ་ལ་གཏུགས་པ་ན་ས་ཆེན་པོ་ལན་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་སྟེ། ཤར་ཕྱོགས་མཐོ་ན་ནི་ནུབ་ཕྱོགས་དམའ། ནུབ་ཕྱོགས་མཐོ་ན་ནི་ཤར་ཕྱོགས་དམའ། ལྷོ་ཕྱོགས་མཐོ་ན་ནི་བྱང་ཕྱོགས་དམའ། བྱང་ཕྱོགས་མཐོ་ན་ནི་ལྷོ་ཕྱོགས་དམའ། དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བར་གྱུར་ཏེ། དེ་ལྟར་ཐམས་ཅད་ཀྱིས་ རིམ་བཞིན་དུ་གཏུགས་སོ། །ལྷ་སྦྱིན་གྱིས་མ་བཏུད་པ་དང་། བཅོམ་ལྡན་འདས་ཀྱིས་བཀའ་སྩལ་པ། བུ་ང་རྒྱལ་སྤང་བའི་ཕྱིར་རབ་ཏུ་བྱུང་བ་ཡིན་གྱིས་ཐུད་ཅིག །དེས་གསོལ་པ། བདག་གིས་དེའི་རྐང་པ་ལ་མ་གཏུགས་ན་ཁྱོད་ལ་གནོད་པ་ཅི་མཆིས་ཞེས་དེ་འདུད་དུ་

  833. 107a

    མ་བཏུབ་སྟེ། དེར་ཐོག་མར་བཅོམ་ལྡན་འདས་ཀྱི་བཀའ་ལྷ་སྦྱིན་གྱིས་བཅག་གོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཤཱཀྱའི་རྒྱལ་པོ་བཟང་ལྡན་གྱིས་ཉེ་བ་འཁོར་ ལ་ཕྱག་བགྱིས་པ་དང་ས་ཆེན་པོ་འདི་རྣམ་པ་དྲུག་ཏུ་གཡོས་པར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། འདི་ནི་ཆོས་ཉིད་ཡིན་ཏེ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད། འདི་ལྟར་འདས་པའི་དུས་ན་ཡང་འདིས་དེའི་རྐང་པ་ལ་གཏུགས་པ་ ན་ས་ཆེན་པོ་རྣམ་པ་དྲུག་ཏུ་གཡོས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་བཅུག་གོ། །དེའི་ཚེ་ བཱ་རཱ་ཎ་སཱིའི་གྲོང་ཁྱེར་ན་སྨད་འཚོང་མ་བཟང་མོ་ཞེས་བྱ་བ་ཞིག་གནས་པ་དེའི་དྲུང་དུ་བྲམ་ཟེའི་ཁྱེའུ་མཛེས་དགའ་ཞེས་བྱ་བ་སོང་ནས་སྨྲས་པ། བཟང་མོ་དགའ་མགུར་སྤྱད་ཀྱིས་ཚུར་ཤོག །དེས་སྨྲས་པ། ཁྱོད་ལ་ཀཱར་ཥཱ་པཱ་ཎ་ལྔ་བརྒྱ་ཡོད་དམ། དེས་སྨྲས་པ་མེད་དོ། །སོང་ ལ་ཀཱར་ཥཱ་པ་ཎ་ལྔ་བརྒྱ་ཁྱེར་ཏེ་ཤོག་ཤིག །དེ་ལ་འབྱོར་པ་མེད་ཀྱང་དེ་དེ་ལ་ལྷག་པར་ཆགས་པས་དུས་དུས་སུ་མེ་ཏོག་དང་འབྲས་བུ་རྣམ་པ་སྣ་ཚོགས་སྐྱེལ་བར་བྱེད་པ་དང་། དེ་དེ་ལ་སྡུག་པ་སྐྱེས་སོ། །ཇི་ཙམ་དུས་གཞན་ཞིག་ན་བཱ་རཱ་ཎ་སཱིར་དུས་སྟོན་བྱུང་ནས་བུད་མེད་ཐམས་ཅད་གོས་ དང་། ཕྲེང་བ་དང་། རྒྱན་རྣམས་ཀྱིས་བཀླུབས་ནས་རང་གི་ཁྱིམ་ན་རྩེ་ཞིང་དགའ་བ་མང་པོས་གནས་པ་དེ་བྲམ་ཟེའི་ཁྱེའུ་མཛེས་དགའས་མཐོང་ནས་ཡི་ཆད་པར་གྱུར་ཏེ། སྨད་འཚོང་མ་བཟང་མོས་བསམས་པ། དེ་རིང་བཱ་རཱ་ཎ་སཱིའི་མི་རྣམས་གོས་དང་། ཕྲེང་བ་དང་། རྒྱན་རྣམས་ ཀྱིས་བཀླུབས་ནས་རང་རང་གི་ཆུང་མ་རྣམས་དང་ལྷན་ཅིག་དགའ་མགུར་སྤྱོད་པར་འགྱུར་ན། བྲམ་ཟེའི་ཁྱེའུ་མཛེས་དགའ་སུ་ཞིག་དང་དགའ་མགུར་སྤྱོད་པར་འགྱུར་ཞེས་དེ་དེ་སྙམ་དུ་སེམས་ཤིང་བྲམ་ཟེའི་ཁྱེའུ་མཛེས་དགའ་གང་ན་ཡོད་པའི་ཕྱོགས་དེར་འོངས་ནས། དེས་དེ་མཐོང་བ་དང་།

  834. 107b

    སྔོན་གྱི་བྱས་པ་དྲིན་དུ་གཟོ་བ་ཡིད་ལ་བསྐྱེད་ནས་སྨྲས་པ། བྲམ་ཟེའི་ཁྱེའུ་སོང་ལ་ཤིན་ཏུ་དྲི་ཞིམ་པའི་མེ་ཏོག་དག་ཁྱེར་ཏེ་ཤོག་ཤིག །བདག་ཅག་ལྷན་ཅིག་དགའ་མགུར་སྤྱད་པར་བྱའོ། །དེ་ཤི་བ་ལས་སོས་པ་བཞིན་དུ་དགའ་བས་སེམས་ཀྱི་རྒྱུད་ངོ་མཚར་གྱིས་བསྡུས་ནས་སོང་ངོ་། ། དེའི་གཟུགས་དང་། ལང་ཚོ་དང་། གཡེར་བའི་ཡོན་ཏན་བརྟགས་ནས་མོས་ཤིང་ཞེན་པས་མཚན་ཐོག་ཐག་གཉིད་མ་ལོག་པས་ནམ་ནངས་པ་དང་མཚན་མོ་གཉིད་ཀྱིས་ཤིན་ཏུ་ལྕི་བར་གྱུར་ནས། ཇི་ཙམ་ཉི་མ་ཤར་གྱི་བར་དུ་གཉིད་ལོག་ནས་གང་གི་ཚེ་འཇིག་རྟེན་གྱི་དུས་སྟོན་གྱི་ཆེད་ དུ་མེ་ཏོག་ཐམས་ཅད་བཏུས་ཟིན་པ་དེའི་ཚེ་སད་ནས་མེ་ཏོག་གི་ཆེད་དུ་ཕན་ཚུན་སོང་བ་ན་མ་རྙེད་ནས། དེས་ཤིང་ཤིརྵ་ཞེས་བྱ་བའི་མེ་ཏོག་ཅིག་ཁྱེར་ནས་དེའི་དྲུང་དུ་སོང་སྟེ་ཚིགས་སུ་བཅད་དེ་སྨྲས་པ། གཡང་གཞི་ཐོགས་པ་བུ་ཕོ་མཛེས་དགའ་ནི། །མ་ཤ་ཕྱེད་མེད་རྒྱུད་ གཞན་སྙོམ་ལས་ཀྱིས། །དེ་རིང་ཤིང་རྣམས་མེ་ཏོག་རྒྱས་དུས་ན། །སྦྱིན་པའི་མེ་ཏོག་ཤིརྵ་ད་འདི་ཡིན་ནོ། །དེས་སྨྲས་པ། སོང་ལ་མེ་ཏོག་གཞན་དག་ཁྱེར་ལ་ཤོག་ཤིག །འདོད་པ་རྣམས་ལ་སོ་སོར་རྟེན་པར་བྱེད་པ་ནི་ཀུན་དུ་སྦྱོར་བ་ལ་སོགས་ཏེ། དེའི་འདོད་ཆགས་ རབ་ཏུ་འཕེལ་བས་སོ་ཀའི་ཟླ་བའི་ཐ་མའི་ཉིན་པར་སྤྲིན་མེད་ཅིང་རླུང་མི་ལྡང་བར་འདུག་པའི་ཉི་མ་ཕྱེད་ཀྱི་དུས་ན་གྲོང་ཁྱེར་ནས་ཤིན་ཏུ་ཐག་རིང་བའི་ཡུལ་དགོན་པ་དག་ཏུ་མགོ་འདྲེན་པ་དང་དཀྱུས་མ་ངག་དབྱངས་སུ་ལེན་ཅིང་མེ་ཏོག་ཐུའོ། །རྒྱལ་པོ་ཚངས་སྦྱིན་ཡང་རི་དགས་ཤོར་དུ་ཆས་ པ་ན་དེ་ཉི་མའི་གཟེར་རྣོན་པོས་གདུངས་ནས་གྲིབ་མའི་ཆེད་དུ་ཕྱོགས་དེར་སོན་པ་དང་། དེའི་གླུའི་སྒྲ་ཐོས་ནས་ཚིགས་སུ་བཅད་ནས་སྨྲས་པ། སྟེང་ནས་ཉི་མས་གདུང་བྱེད་ཅིང་། །འོག་ནས་བྱེ་མས་གདུངས་པ་ལ། །གླུ་ལེན་ཁྱོད་ཀྱི་ལུས་ལ་ནི། །ཅི་ཕྱིར་ཉི་མའི་གདུང་བ་མེད། ། མཛེས་དགའས་ཀྱང་ཚིགས་སུ་བཅད་དེ་སྨྲས་པ། བདག་ནི་ཉི་མས་མ་གདུངས་ཏེ། །རྟོག་པ་ཡིས་ནི་བདག་གདུངས་ལགས། །བྱ་བ་བྱ་བ་མ་ཡིན་པས། །འཇིག་རྟེན་འདི་གདུངས་ཉི་མ་མིན། །རྒྱལ་པོས་བསམས་པ། བྲམ་ཟེའི་ཁྱེའུ་འདི་ནི་གདོན་མི་ཟ་བར་བསིལ་

  835. 108a

    བར་བྱེད་པའི་གཏམ་ལ་མཁས་པ་ཞིག་ཡིན་ཏེ། དེས་ན་ཉི་མ་ཕྱེད་ཀྱི་ཚེ་འདུག་ནས་མེ་ཏོག་ཐུའོ་སྙམ་ནས། དེས་བཀུག་སྟེ་སྨྲས་པ། བྲམ་ཟེའི་ཁྱེའུ་རེ་ཞིག་བསིལ་བར་བྱེད་པའི་གཏམ་དག་བྱོས་ཤིག་མཉན་ཏོ། །དེས་བསམས་པ། རྒྱལ་པོ་དེ་ནི་ གདོན་མི་ཟ་བར་ལུས་གདུངས་པ་ཡིན་ཏེ། དེས་ན་འདི་སྐད་སྨྲའོ་སྙམ་ནས། དེས་བསིལ་བར་བྱེད་པའི་གཏམ་རྣམ་པ་སྣ་ཚོགས་དེ་ལ་སྨྲས་པ་ཐོས་ནས་རྒྱལ་པོ་ལུས་གདུང་བ་དང་བྲལ་བར་གྱུར་ཏོ། །རྒྱལ་པོ་མངོན་པར་དགའ་བར་གྱུར་ནས་བློན་པོ་རྣམས་ལ་སྨྲས་པ། ཤེས་ལྡན་དག་ རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་སྲོག་སྦྱིན་པ་གང་ཡིན་པ་དེ་ལ་ལན་དུ་ཕན་ཅི་གདགས། ལྷ་རྒྱལ་སྲིད་ཕྱེད་ཀྱིས་སོ། །དེ་ནས་རྒྱལ་པོ་དེས་སྨྲས་པ། བྲམ་ཟེའི་ཁྱེའུ་དེ་རིང་རྒྱལ་པོའི་ཕོ་བྲང་དུ་གནས་ཐོབ་ཅིག་དང་། སང་རྒྱལ་སྲིད་ཀྱི་ཕྱེད་སྦྱིན་ནོ། །དེ་རྒྱལ་པོའི་ ཕོ་བྲང་དུ་མ་ལ་བཟང་པོ་བྱིན་ནས་དེ་དེ་ལ་ཉལ་བ་ན་བཟང་མོ་རྗེས་སུ་དྲན་པར་སེམས་ཤིང་རྒྱལ་སྲིད་ཕྱེད་པོ་དེ་ཡང་སྨད་འཚོང་བཟང་མོའི་ཕྱིར་བླང་ངོ་སྙམ་མོ། །ཡང་བསམས་པ། རྒྱལ་སྲིད་ཕྱེད་པོ་དེ་ལ་ལོངས་སྤྱོད་པའི་རྒྱལ་པོ་དེ་ཅི་འདྲ་བ་ཞིག །མ་ལ་བདག་གིས་དེ་སྲོག་དང་དབྲལ་ བར་བྱའོ་སྙམ་མོ། །ཡང་བསམས་པ། རྒྱལ་པོ་བསད་པའི་རྒྱལ་སྲིད་གང་ཡིན་པ་དེས་ཅི་ཞིག་བྱ་སྙམ་ནས་ཚིགས་སུ་བཅད་དེ་སྨྲས་པ། དོན་མ་གྲུབ་ན་འདོད་འགྱུར་ལ། །དོན་གྲུབ་འདོད་པ་ལྡོག་མི་འགྱུར། །མ་གྲུབ་ན་ནི་ཕོངས་གྱུར་པས། །དེ་བས་དོན་ནི་དོན་མ་ ཡིན། །ཇི་ཙམ་ནམ་ནངས་སུ་ཉེ་བ་ན་དེ་འགྱོད་པ་སྐྱེས་ནས་མལ་ནས་བབས་ཏེ་གཡང་གཞི་ས་ལ་བཏིང་ནས་ཉལ་ལོ། །ནམ་ནངས་པ་ན་རྒྱལ་པོས་སྨྲས་པ། ཤེས་ལྡན་དག་བྲམ་ཟེའི་ཁྱེའུ་དེ་ཁུག་ཤིག །དེ་ལ་རྒྱལ་སྲིད་ཕྱེད་སྦྱིན་ནོ། །རྒྱལ་པོའི་ཕོ་ཉ་དག་འོངས་པ་ནམ་ལ་ ཆེན་པོ་ནས་བབས་ཏེ་གཡང་གཞི་ས་ལ་བཏིང་ནས་ཉལ་བ་མཐོང་ངོ་། །མཐོང་ནས་ཀྱང་མ་དད་པ་བསྐྱེད་དེ་རྒྱལ་པོའི་གན་དུ་སོང་ནས་སྨྲས་པ། ལྷ་འདི་ནི་རྒྱལ་སྲིད་ཀྱི་འོས་མ་ལགས་སོ། །རྒྱལ་པོས་སྨྲས་པ། ཅིའི་ཕྱིར། དེ་རྣམས་ཀྱིས་སྨྲས་པ། ལྷ་ཉོན་མོངས་

  836. 108b

    མལ་ཆེན་པོ་གྱ་ནོམ་པ་སྤངས་ཏེ་གཡང་གཞི་ས་ལ་བཏིང་ནས་མཆིས་ཉལ་བའི་དམན་པ་ལ་མོས་པ་གང་ལགས་པ་དེ་རྒྱལ་སྲིད་སྩལ་ཏེ་ཅི་རུང་། རྒྱལ་པོས་སྨྲས་པ། ཤེས་ལྡན་དག་ཤེས་རབ་ཅན་དེ་དེ་ལ་རྒྱུ་ཞིག་ཡོད་པར་འགྱུར་གྱིས་ཁུག་ཤིག །དེ་རྣམས་ཀྱིས་དེ་བཀུག་པ་དང་ རྒྱལ་པོས་སྨྲས་པ། ཀྱེ་བྲམ་ཟེའི་ཁྱེའུ་ཁྱོད་ཅིའི་ཕྱིར་མལ་ཆེན་པོ་ནས་བབས་ཏེ་གཡང་གཞི་ས་ལ་བཏིང་ནས་ཉལ། དེས་ཇི་ལྟར་གྱུར་པ་རྣམས་རྒྱལ་པོ་ལ་རིག་པར་བྱས་ནས་དེ་ནས་སྨྲས་པ། ལྷ་གནང་བར་མཛོད་ཅིག་རབ་ཏུ་འབྱུང་ངོ་། །རྒྱལ་པོས་སྨྲས་པ། དམ་ཞིག་བཅས་ཏེ་ གལ་ཏེ་ཁྱོད་རབ་ཏུ་བྱུང་ན་ཁྱོད་ཀྱིས་ཡོན་ཏན་གྱི་ཚོགས་ཆུང་ཟད་རྟོགས་པ་ང་ལ་བརྗོད་པ་ལྟ་ན་གནང་ངོ་། །དེས་དེ་བཞིན་དུ་བགྱིའོ་ཞེས་ཁས་བླངས་སོ། །དེ་ནས་དེས་ཞི་བའི་ཕྱོགས་སུ་སོང་ནས་མཁན་པོ་དང་སློབ་དཔོན་མེད་པར་རང་བྱང་ཆུབ་རྟོགས་པར་བྱས་ནས་རང་སངས་རྒྱས་དེས་ བསམས་པ། བདག་གིས་རྒྱལ་པོ་དེ་ལ་སྔོན་ཁས་བླངས་པས་སོང་ལ། ཁས་བླངས་པ་དེ་རིག་པར་བྱའོ་ཞེས་དེ་རྒྱལ་པོའི་དྲུང་དུ་སོང་ནས་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་ བྱ་བར་བརྩམས་སོ། །རྒྱལ་པོས་དེའི་རྐང་པ་གཉིས་ལ་གཏུགས་ཏེ་ཚིགས་སུ་བཅད་པས་སྨྲས་པ། དགེ་བ་ཅི་ཞེས་བཙལ་ཕྱིར་རབ་བྱུང་བའི། །བྲམ་ཟེའི་ཁྱེའུས་རྙེད་པ་ལེགས་རྙེད་དེ། །ཆུང་ཟད་ལས་ཀྱི་རྣམ་སྨིན་བསྐྱེད་པ་ཡི། །ཉེར་འགྲོས་ཁྱད་པར་ཆེན་པོ་འདིར་རྟོགས་ལྟོས། ། རྒྱལ་པོ་ཚངས་སྦྱིན་གྱི་སྐྲ་མཁན་གང་ག་སྐྱོང་ཞེས་བྱ་བ་ཞིག་ཡོང་བ་དེ་དེས་མཛེས་དགའས་ཚིགས་སུ་བཅད་པས་སྨྲས་པ་འཛིན་དུ་བཅུག་ནས་སྨྲས་པ། གང་ག་སྐྱོང་ང་ལ་ཚིགས་སུ་བཅད་པ་དེ་ཡང་དང་ཡང་དུ་དྲན་པར་གྱིས་ཤིག །སྐྲ་མཁན་གང་ག་སྐྱོང་རང་གི་བཟོ་ལ་ཤིན་ཏུ་བྱང་བ་ ཡིན་པས་དེ་གང་གི་ཚེ་རྒྱལ་པོ་ཚངས་སྦྱིན་གྱི་ཁ་སྤུ་འཆོས་པ་དེའི་ཚེ་དེ་གཉིད་ལོག་པར་འགྱུར་ཞིང་སེ་གོལ་གྱིས་སད་པར་བྱས་ཏེ། སད་ནས་ཀྱང་གང་ག་སྐྱོང་ལ་མཆོག་གང་འདོད་པ་གསོལ་ཅིག་ཅེས་མཆོག་སྦྱིན་པར་བྱེད་པ་ན་དེས་སྨྲས་པ། ལྷ་གསོལ་བ་ཞིག་མཆིས་སོ། །གང་གི་

  837. 109a

    ཚེ་གང་ག་སྐྱོང་གིས་རྒྱལ་པོ་ལ་ཚིགས་སུ་བཅད་པ་དྲན་པར་བྱེད་པ་དེའི་ཚེ་རྒྱལ་པོ་འདོད་པའི་གཏམ་ལ་སེམས་ཀྱང་མི་འགྲོ་ན་འདོད་པ་ལ་ཞེན་ཅིང་སྤྱོད་པ་ལྟ་སྨོས་ཀྱང་ཅི་དགོས་ཏེ། བཙུན་མོ་ལ་བལྟ་བར་ཡང་མི་བྱེད་དོ། །བཙུན་མོ་རྣམས་ཉོན་མོངས་པས་མྱོས་ཤིང་ཞེན་ ནས་གང་ག་སྐྱོང་ལ་སྨྲས་པ། ཞང་པོ་གང་གི་ཚེ་རྒྱལ་པོ་ཁྱོད་ལ་ལྷས་མཆོག་སྦྱིན་པར་མཛད་པ་དེའི་ཚེ་ལྷ་གལ་ཏེ་བདག་ལ་དགྱེས་ན་ཚིགས་སུ་བཅད་པ་འདིའི་དོན་རྒྱས་པར་བཤད་དུ་གསོལ་ཅིག །རྒྱལ་པོས་ཚིགས་སུ་བཅད་པ་དེའི་དོན་རྒྱས་པར་རྣམ་པར་བཀྲོལ་བ་དང་། དེ་སྐྱོ་བ་སྐྱེས་ནས་རྐང་པ་ ལ་གཏུགས་ཏེ་སྨྲས་པ། ལྷ་བདག་གིས་བསྙེན་བཀུར་བགྱིས་ལགས་ཀྱིས་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ངོ་། །རྒྱལ་པོས་སྨྲས་པ། གལ་ཏེ་རབ་ཏུ་བྱུང་ནས་ཡོན་ཏན་གྱི་ཚོགས་ཆུང་ཟད་རྙེད་ན་ང་ལ་རིག་པར་བྱོས་ཤིག །དེས་སྨྲས་པ། ལྷ་བཀའ་བཞིན་འཚལ་སྙན་དུ་གསོལ་ བར་བགྱིའོ། །དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་ཏུ་བྱུང་ནས་དེས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེ་འདི་སྙམ་དུ་སེམས་ཏེ། བདག་གིས་རྒྱལ་པོ་ཚངས་སྦྱིན་ལ་སྔོན་ཁས་བླངས་ཀྱིས་སོང་ལ་ཁས་བླངས་པ་དེ་རིག་པར་བྱའོ་སྙམ་ནས། དེས་རྒྱལ་པོ་ཚངས་སྦྱིན་གང་ན་ བ་དེར་སོང་སྟེ་ཕྱིན་ནས་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེས་རྐང་པ་ལ་གཏུགས་ཏེ་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་རྟོགས་སམ། རྟོགས་སོ། །རྒྱལ་པོ་ཚངས་སྦྱིན་གྱིས་དྲང་སྲོང་གང་ག་སྐྱོང་གི་རྐང་པ་ལ་གཏུགས་པས་ས་རྣམ་པ་དྲུག་ཏུ་གཡོས་པར་གྱུར་ཏོ། །ཡང་དེའི་མས་ཚིགས་སུ་བཅད་དེ་སྨྲས་པ། ཚངས་སྦྱིན་བློ་དང་ལྡན་པ་པོ། །འདི་ རུ་འབྲེག་མཁན་ལག་ཆ་དག །བཞག་ནས་རབ་ཏུ་བྱུང་འདི་ལ། །ལྷ་ཁྱོད་འདུད་པའི་ཚུལ་མ་ཡིན། །རྒྱལ་པོ་ཚངས་སྦྱིན་གྱི་མས་ཁོང་དུ་ཆུད་པར་བྱ་བའི་ཕྱིར་ཚིགས་སུ་བཅད་པ་སྨྲས་པ། འདི་ལྟར་ཐུབ་པས་བསླབ་པའི་གཞི་རྣམས་ལ། །དེས་ནི་དཀའ་སྤྱད་འདི་དག་སྤྱད་

  838. 109b

    ལགས་ཏེ། །བློ་རྒྱ་ཆེན་པོར་གྱུར་པ་གང་ལགས་པ། །གང་ག་སྐྱོང་ལ་ཆུང་ཟད་མ་གསུང་ཤིག །དཀའ་ཐུབ་ཟིལ་གྱིས་སྡིག་པ་ཐམས་ཅད་མནན། །དཀའ་ཐུབ་ཟིལ་གྱིས་འཇིག་རྟེན་ཐམས་ཅད་མནན། །དཀའ་ཐུབ་ཟིལ་གྱིས་འབྲེག་མཁན་སྣོད་བཅོམ་སྟེ། །དཀའ་ཐུབ་ འབར་ལ་ཆུང་ཟད་མ་གསུང་ཤིག །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཚངས་སྦྱིན་ཞེས་བྱ་བར་གྱུར་པ་གང་ཡིན་པ་དེ་བཟང་ལྡན་འདི་ཉིད་ཡིན་ནོ། །དྲང་སྲོང་གང་ག་སྐྱོང་ཞེས་བྱ་བ་གང་ཡིན་པ་དེ་ནི་ཉེ་བ་འཁོར་འདི་ཉིད་ཡིན་ཏེ། དེ་ན་ཡང་ཤཱཀྱའི་རྒྱལ་པོ་ བཟང་ལྡན་ཚངས་སྦྱིན་དུ་གྱུར་པ་ན་ཉེ་བ་འཁོར་དྲང་སྲོང་གང་ག་སྐྱོང་ཞེས་བྱ་བར་གྱུར་པ་ལ་ཕྱག་བྱས་པ་ནས་རྣམ་པ་དྲུག་ཏུ་གཡོས་པར་གྱུར་ཏོ། །ད་ལྟར་ཡང་བཟང་ལྡན་གྱིས་ཉེ་བ་འཁོར་རབ་ཏུ་བྱུང་བ་ལ་ཕྱག་བྱས་པ་ནས་རྣམ་པ་དྲུག་ཏུ་གཡོས་པར་གྱུར་ཏོ།། །།སྡོམ་ལ། ཀཽཎྜི་ ནྱ་དང་རིལ་བའི་དབྱིབས། །ཐམས་ཅད་སྐྱོབ་ནོར་ཤིང་རྟ་དང་། །གདུགས་དང་སྲིན་བུ་ཀི་ཏ་ཀ། །བྱམས་པའི་དྲིལ་སྒྲོགས་བཅུག་པ་དང་། །དགའ་སྐྱོང་ལ་དུ་བཏུང་བ་དང་། །སྣུམ་ཁུར་གནས་འཇོག་སྦྲང་རྩི་ཅན། །འདུལ་བ་འཛིན་མཆོག་བགྲང་བའོ། །གང་གི་ཚེ་ཚེ་དང་ལྡན་ པ་ཀུན་ཤེས་ཀཽཎྜི་ནྱས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་བཅོམ་ལྡན་འདས་ཀྱིས་ཀྱང་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་བསྟན་པ་དེའི་ཚེ་དགེ་སློང་རྣམས་ཐེ་ཙོམ་སྐྱེས་ཏེ་ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན་དེས་ན་བཅོམ་ལྡན་འདས་ཀྱིས་སྣམ་སྦྱར་གྱི་རྒྱལ་མཚན་ཐོགས་པ་རྣམས་ཀྱི་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་ཤེས་ཀཽཎྜ་ནྱི་འདི་ཉིད་ཀྱིས་ལས་ ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་དགེ་སློང་ཀཽཎྜི་ནྱ་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་

  839. 110a

    ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་ དང་། ཁམས་དང་། སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་ རྣམས་ཀྱི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ འོད་སྲུང་ཞེས་བྱ་བ་བྱུང་སྟེ། དེ་གྲོང་ཁྱེར་བཱ་རཱ་ཎ་སཱིར་ཉེ་བར་བརྟེན་ནས་རི་བོ་རིལ་བའི་དབྱིབས་ཞེས་བྱ་བ་ལ་བཞུགས་སོ། །ཇི་ཙམ་དུས་གཞན་ཞིག་ན་ཡང་དག་པར་རྫོགས་པའི་སངས་རྒྱས་འོད་སྲུང་སྔ་དྲོ་ན་བཟའ་ཤམ་ཐབས་མནབས་ཆོས་གོས་དང་ལྷུང་བཟེད་བསྣམས་ཏེ། བཱ་རཱ་ཎ་ སཱིར་བསོད་སྙོམས་ལ་ཞུགས་པ་དང་། དགེ་འདུན་ལྔ་བརྒྱ་ཙམ་དོང་བའི་དགེ་འདུན་དེ་རྣམས་ཀྱིས་སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ། སྐུ་དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ། འོད་འདོམ་གང་ གིས་བརྒྱན་པ། འོད་ཟེར་ཉི་མ་སྟོང་བས་ལྷག་པའི་འོད་ཅན། རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པར་མཐོང་ངོ་། །མཐོང་མ་ཐག་ཏུ་དད་པ་བསྐྱེད་ནས་གྲོས་བྱ་བར་བརྩམས་པ། ཤེས་ལྡན་དག་བདག་ཅག་འདི་ལས་རབ་ཏུ་འབྱུང་བར་བྱའོ་ཞེས་དེ་རྣམས་ཀྱིས་དེ་ ལྟར་གྲོས་བྱས་པ་ལས་ཁ་ཅིག་ནི་རྒྱ་མཚོ་ཆེན་པོར་ཞུགས་སོ། །ཁ་ཅིག་ནི་ཡུལ་གྱི་མཐར་དོང་ངོ་། །ཁ་ཅིག་ནི་ཤི་བའི་ཆོས་དང་ལྡན་པར་གྱུར་ཏེ། སྐྱེ་བོ་བཅུ་དྲུག་ཞིག་ལུས་པ་དེ་རྣམས་རི་བོ་རིལ་བའི་དབྱིབས་ལ་དོང་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལས་རབ་

  840. 110b

    ཏུ་བྱུང་སྟེ། དེ་རྣམས་དེ་ན་བསམ་གཏན་དང་། ཀློག་པ་དང་། རྣལ་འབྱོར་གྱིས་གནས་སོ། །ཇི་ཙམ་དུས་གཞན་ཞིག་ན་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཤིང་ཟད་པའི་མེ་བཞིན་དུ་དྲང་སྲོང་སྨྲ་བ་རི་དགས་ཀྱི་ནགས་ སུ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་རྣམས་ལ་ལྷ་རྣམས་ཀྱིས་སྨྲས་པ། ཤེས་ལྡན་དག་ཡང་དག་པར་རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་ཏེ། དེ་ཡོངས་སུ་མྱ་ངན་ལས་འདས་ནས་དེ་རིང་ དུ་ཞག་བདུན་ལོན་ཏེ། དེའི་བསྟན་པ་ཡང་ནུབ་ན་ཁྱེད་ཅག་འབྲས་བུ་མེད་པའི་སྦུན་པ་འབྲུ་ཞིང་འདུག་སྟེ། ཅི་རུང་ཞེས་བྱས་པ་ཐོས་ནས་བྱ་བ་མ་བྱས་པའི་སྡུག་བསྔལ་ཆེན་པོས་གདུངས་སོ། །དེ་ནས་ལྔ་ནི་ཐོས་མ་ཐག་ཏུ་རི་བོ་རིལ་བའི་དབྱིབས་ལས་བབས་ནས་བཱ་རཱ་ཎ་སཱིར་ཞུགས་སོ། ། དྲུག་གིས་ནི་དེ་ཉིད་དུ་ཡིད་བྱུང་བས་བརྩོན་འགྲུས་བརྩམས་ནས་རང་བྱང་ཆུབ་མངོན་སུམ་དུ་བྱས་སོ། །ཕྱི་ནས་ལྔ་ཡང་བབས་ནས་བཱ་རཱ་ཎ་སཱི་ཉིད་དུ་འཇུག་པར་བརྩམས་པ་ན་ཇི་ཙམ་ན་ཤིང་རྟས་འཚོ་བའི་ཚོང་པ་དག་འགྲོ་བ་ན་ཤིང་རྟས་འཚོ་བ་ཅིག་གི་གླང་དག་ཉམ་ཆུང་བཞིན་དུ་དེ་དག་ལ་ དེས་ལྕག་གཟེར་བུ་ཅན་གྱིས་ཡང་ནས་ཡང་དུ་གཞུས་ཏེ། དེ་རྣམས་ཉམ་ཆུང་བས་ཤི་ལ་ཐུག་ཅིང་འགྲོ་མི་ནུས་བཞིན་དུ་ཤིང་རྟས་འཚོ་བའི་སྣ་ལ་འགྲོ་བ་དང་། དེ་ལ་དགེ་སློང་དེ་རྣམས་ཀྱིས་སྨྲས་པ། ཀྱེ་ཤིང་རྟས་འཚོ་བ་ཁྱོད་ཀྱི་གླང་ཉམ་ཆུང་བ་འདི་རྣམས་ལ་ལྕག་གཟེར་བུ་ཅན་གྱིས་ ཡང་ནས་ཡང་དུ་གཞུས་ཏེ་ཅི་རུང་། གལ་ཏེ་འགྲོ་མི་ནུས་ན་དལ་བུས་འགྲོར་ཆུག་ལ་ཕྱི་ནས་སོང་ངོ་ཅོག །དེས་སྨྲས་པ། བདག་སྣ་ལ་ཤིང་རྟས་འཚོ་བའི་ཚོང་པ་དང་ལྷན་ཅིག་མཆི་མི་ནུས་ཞེས་གལ་ཏེ་བདག་ཕྱི་ནས་ཆས་ན་གདོན་མི་ཟ་བར་ཤིང་རྟས་འཚོ་བའི་ཚོང་པ་འདིས་བདག་ བོར་ནས་དོང་བར་འགྱུར་རོ། །དེ་རྣམས་ཀྱིས་ཤིང་རྟས་འཚོ་བ་དེ་ལས་བཟུར་བཟུར་ནས་མི་དགའ་སྟེ། གཅིག་ལ་གཅིག་སྨྲས་པ། ཤེས་ལྡན་དག་ཡང་དག་པར་རྫོགས་པའི་སངས་རྒྱས་འོད་སྲུང་ཡོངས་སུ་མྱ་ངན་ལས་འདས་ཏེ་བདག་ཅག་ལུས་ན་འདིས་ཀྱང་བདག་ཅག་ལ་

  841. 111a

    སྐུལ་མ་བཏབ་ཀྱིས། མ་ལ་བདག་ཅག་གིས་བརྩོན་འགྲུས་བརྩམ་པར་བྱའོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། ཐུབ་པ་ཆེན་པོ་འོད་སྲུང་གི། །གལ་ཏེ་ཆོས་ནི་ནུབ་གྱུར་ཀྱང་། །ཡང་དག་སངས་རྒྱས་ཀྱིས་བཤད་པའི། །བརྩོན་འགྲུས་འདོར་ བར་མི་བྱའོ། །བདག་ཅག་གི་ནི་ཟག་པ་ཡང་། །གལ་ཏེ་ཟད་པར་མ་གྱུར་ན། །ཤཱཀྱ་སེང་གེ་སྐྱོབ་པ་ཡི། །ཉན་ཐོས་མཆོག་ཏུ་འགྱུར་བར་བྱ། །དེ་རྣམས་བཱ་རཱ་ཎ་སཱ་རི་ཞུགས་ནས་བསོད་སྙོམས་སྤྱད་དེ་སླར་ཡང་རི་བོ་རིལ་བའི་དབྱིབས་ལ་དོང་ནས་བསམ་གཏན་དང་། ཀློག་ པ་དང་། རྣལ་འབྱོར་གྱིས་གནས་པ་ན་དེ་རྣམས་ལས་བཞི་ཤིའོ། །གཅིག་ཅིག་ལུས་པ་དེ་མི་དགའ་བ་སྐྱེས་ཤིང་ཡིད་བྱུང་བས་ཆེད་དུ་བརྗོད་པ་ཆེད་དུ་བརྗོད་པ། རི་བོ་རིལ་བའི་དབྱིབས་གང་ཡིན་པ་འདི་ཉིད་ལ་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་ བཀུར་བྱས་ལ་དེའི་དགེ་སློང་ཉི་ཁྲི་ཡང་མཐོང་ན། བདག་འབའ་ཞིག་འཛམ་བུའི་གླིང་མཐའ་དག་ན་སྣམ་སྦྱར་གྱི་རྒྱལ་མཚན་འཛིན་པ་ལྟ་ཞིག་སྙམ་ནས། དེས་སྨོན་ལམ་གདབ་པར་བརྩམས་པ། འདི་ལྟར་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལས་འདི་ སྲིད་དུ་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་ཆུང་ཟད་ཀྱང་མ་རྟོགས་ཀྱིས། དགེ་བའི་རྩ་བ་འདིས་བདག་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་འགྱུར་རོ་ཞེས་ལུང་བསྟན་པ་དེའི་བསྟན་པ་ལས་བདག་རབ་ཏུ་བྱུང་ནས། དེར་ཐོག་མར་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས། བཅོམ་ལྡན་འདས་ཤཱཀྱ་ཐུབ་པ་ དེས་བདག་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་ཡོངས་སུ་མྱ་ངན་ལས་འདས་པའི་དགེ་སློང་ཉི་ཁྲི་

  842. 111b

    ཡོད་པ་ལས་དགེ་སློང་གཅིག་ལུས་པས་འཛམ་བུའི་གླིང་མཐའ་དག་ན་སྣམ་སྦྱར་གྱི་རྒྱལ་མཚན་བཟུང་སྟེ། རི་བོ་རིལ་བའི་དབྱིབས་གང་ན་བ་དེར་སོང་ནས་སྨོན་ལམ་བཏབ་པ་གང་ཡིན་པ་དེ་ནི་དགེ་སློང་ཀུན་ཤེས་ཀཽཎྜི་ནྱ་འདི་ཉིད་ཡིན་ཏེ། དེའི་སྨོན་ལམ་གྱི་དབང་གིས་ད་ལྟར་ ཡང་བཅོམ་ལྡན་འདས་ཀྱིས་སྣམ་སྦྱར་གྱི་རྒྱལ་མཚན་འཛིན་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་ ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས་དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །གང་གི་ཚེ་བཅོམ་ལྡན་འདས་ ཀྱིས་ཚེ་དང་ལྡན་པ་ཀཽཎྜི་ནྱ་ལ་ཆོས་བཤད་ནས་ཡང་དང་ཡང་དུ་རྨེད་པར་མཛད་དེ། ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ལགས་སོ་ཞེས་གསོལ་པ་དེའི་ ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན། དེས་ན་བཅོམ་ལྡན་འདས་ཀྱིས་ཆོས་བཤད་ནས་ཡང་དང་ཡང་དུ་རྨེད་པ་མཛད་དེ། ཀཽཎྜི་ནྱ་ ཁྱོད་ཀྱིས་ཆོས་ཀུན་ཤེས་སམ། བཅོམ་ལྡན་འདས་ཀུན་འཚལ་ལགས་སོ། །ཀཽཎྜི་ནྱ་ཁྱོད་ཀྱིས་ཆོས་ཀུན་ཤེས་སམ། བདེ་བར་གཤེགས་པ་ཀུན་འཚལ་ལགས་སོ་ཞེས་གསོལ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀཽཎྜི་ནྱ་འདི་ཉིད་ཀྱིས་ ལས་བྱས་ཞིང་བསགས་པ། ཚོགས་རྙེད་པ་ཞེས་བྱ་བ་ནས་ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱིར་རྒྱལ་པོ་ཚངས་སྦྱིན་ཞེས་བྱ་བ་འབྱོར་བ་དང་། རྒྱས་པ་དང་། བདེ་བ་དང་། ལོ་ལེགས་

  843. 112a

    པ་སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེ་དུས་གཞན་ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་ མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་གཟུགས་བཟང་ཞིང་མཛེས་པ། བལྟ་ན་སྡུག་པ། ཡན་ལག་གི་མཆོག་ཐམས་ཅད་དང་ལྡན་པ་ཞིག་བཙས་སོ། །བཙས་ནས་དེའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་ མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ཡུལ་དབུས་ཀྱི་ཡུལ་ཆོས་ཀྱིས་ནི་གཟུགས་བཟང་ཞིང་མཛེས་པ་བལྟ་ན་སྡུག་པ་ལགས་ན་དེ་མཛེས་དགའ་ཞེས་འདོགས་ལགས་ལ། ཁྱེའུ་འདི་ཡང་གཟུགས་བཟང་ཞིང་མཛེས་པ་བལྟ་ན་སྡུག་ཅིང་ཡུལ་ཀ་ཤིའི་རྒྱལ་པོའི་ སྲས་ཀྱང་ལགས་པས་ཁྱེའུའི་མིང་ཀ་ཤི་མཛེས་དགའ་ཞེས་བགྱི་བར་གདགས་སོ་ཞེས་དེའི་མིང་ཀ་ཤི་མཛེས་དགའ་ཞེས་བྱ་བར་བཏགས་སོ། །ཁྱེའུ་ཀ་ཤི་མཛེས་དགའ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་ མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ་མ་མ་བརྒྱད་ལ་རྗེས་སུ་གཏད་ནས་དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་པོ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །ཡང་རྒྱལ་པོ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་ཏེ། གང་གི་ཉི་མ་ལ་བཙས་པ་དེ་ ཉིད་ཀྱི་ཉི་མ་ལ་བཱ་རཱ་ཎ་སཱིར་ཡུལ་མི་དང་གྲོང་མི་འཐབ་མོ་ཆེན་པོ་བྱུང་ངོ་། །དེ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །བཙུན་མོའི་ཚོགས་ཀྱིས་སྨྲས་པ། ལྷ་འདི་བཙས་པ་ན་བཱ་རཱ་ཎ་སཱིར་གྲོང་མི་དང་ཡུལ་མི་རྣམས་

  844. 112b

    འཐབ་མོ་ཆེན་པོ་བྱུང་བས་དེའི་སླད་དུ་ཁྱེའུའི་མིང་འཐབ་མོ་སྐྱེས་སུ་གདགས་སོ་ཞེས་བཏགས་སོ། །རྒྱལ་པོ་ཚངས་སྦྱིན་ནི་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་སྟེ། གཞོན་ནུ་ཀ་ཤི་མཛེས་དགའས་ཕ་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་པ་མཐོང་ངོ་། ། མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་ཀྱང་ཡབ་འདས་ན་རྒྱལ་པོར་འགྱུར་ཞིང་བདག་གིས་ཀྱང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ནས་དམྱལ་བར་གཞོལ་བར་འགྱུར་གྱིས། མ་ལ་བདག་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས་དེ་ཕའི་དྲུང་དུ་སོང་ སྟེ་རྐང་པ་ལ་གཏུགས་ཏེ་སྨྲས་པ། ཡབ་གནང་བར་མཛད་དུ་གསོལ། བདག་ཁྱིམ་ནས་ཁྱིམ་མ་མཆིས་པར་རབ་ཏུ་འབྱུང་ལགས་སོ། །དེས་སྨྲས་པ། བུ་གང་གི་དོན་དུ་མཆོད་སྦྱིན་མཆོད་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་རྒྱལ་སྲིད་ ཁྱོད་ཀྱི་ལག་ཏུ་འོངས་ན་ཅིའི་ཕྱིར་རྒྱལ་སྲིད་སྤངས་ཏེ་རབ་ཏུ་འབྱུང་། དེས་ཚིགས་སུ་བཅད་པས་སྨྲས་པ། ནགས་ན་ཤིང་ཤུན་རྩྭ་གྱོན་ཞིང་། །རྩ་བ་འབྲས་བུ་འཆའ་བ་དང་། །རི་དགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་ རོལ་འཇིག་བྱེད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་བཅིང་དང་རྡེག་པ་དག །བགྱིད་པ་དེ་ལྟ་མ་ལགས་སོ། །རྒྱལ་པོས་སྨྲས་པ། གཞོན་ནུ་ཤེས་པར་གྱིས་ཤིག །ཁྱོད་ནི་ངའི་བུ་གཅིག་པ་སྡུག་པ། ཡིད་དུ་འོང་བ། བཟོད་པ། མི་མཐུན་ པ་མེད་པ་ཡིན་ཏེ། ང་ཤི་བར་གྱུར་ན་མི་འདོད་བཞིན་དུ་ཁྱོད་དང་འབྲལ་གྲང་། གསོན་བཞིན་དུ་ལྟ་ག་ལ་བཏང་། གཞོན་ནུ་ཀ་ཤི་མཛེས་དགའས་སྨྲས་པ། ཡབ་གལ་ཏེ་གནང་ན་དེ་ལྟ་ན་ལེགས། གལ་ཏེ་མི་གནང་ན་འཚལ་མ་ཡང་མི་འཚལ། ཕྱག་ཡང་མི་འཚལ་ ལོ། །དེ་ན་གཞོན་ནུ་ཀ་ཤི་མཛེས་དགའས་ཉི་མ་གཅིག་ཀྱང་ཟན་གཅད་པ་བྱས་པ་ནས། གཉིས་དང་། གསུམ་དང་། དྲུག་གི་བར་དུ་ཟན་གཅད་པ་བྱས་སོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །བུ་གཞོན་ནུ་

  845. 113a

    ཤེས་པར་གྱིས་ཤིག །ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །གཅིག་པུ་ཉིད་ལ་མངོན་པར་དགའ་བར་བྱ་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་བས་མཐའ་དག་ཏུ་གནས་པས་མནགས་དཀའོ། །གཅིག་པུ་ དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་རྣམས་དང་ལྷན་ཅིག་གནས་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་ དབེན་པར་བྱ་དགོས་སོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བ་དང་། རྩེད་མོ་དག་ལས་དབེན་པར་བྱ་དགོས་སོ། །བུ་གཞོན་ནུ་ཁྱོད་ཚུར་ཤོག །འདི་ཉིད་དུ་འདུག་ལ་རྒྱལ་ཚབ་བྱོས་ཏེ་འདོད་པ་དག་ལ་ཡང་སྤྱོད་ཅིག །སྦྱིན་བདག་ཀྱང་བྱིན་ཅིག །བསོད་ནམས་དག་ ཀྱང་བྱོས་ཤིག །དེ་སྐད་ཅེས་སྨྲས་ཀྱང་གཞོན་ནུ་ཀ་ཤི་མཛེས་དགའ་ཅང་མི་སྨྲའོ། །དེ་ནས་རྒྱལ་པོ་ཚངས་སྦྱིན་གྱིས་བཙུན་མོ་དང་། བློན་པོ་དང་། མདུན་ན་འདོན་ལ་བསྒོ་བ། ཤེས་ལྡན་དག་རེ་ཞིག་གཞོན་ནུ་སློང་ཤིག །ལྷ་བཀའ་བཞིན་འཚལ་ཞེས་བཙུན་མོ་དང་། བློན་ པོ་དང་། མདུན་ན་འདོན་རྣམས་གཞོན་ནུ་ཀ་ཤི་མཛེས་དགའ་གང་ན་བ་དེར་དོང་སྟེ་ལྷགས་ནས་གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་སོ། །སྲས་གཞོན་ནུ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པས་སྡུག་བསྔལ་མི་མཁྱེན་ཏེ། ཚངས་ པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པ་དགའ་བར་བགྱི་དཀའོ། །གནས་མལ་དགོན་པ་ནགས་ཁྲོད་རི་དྲུང་དང་། བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། ། ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་

  846. 113b

    འཚོའི་བར་དུ་མིའི་དགའ་བའི་རྩེད་མོ་རྣམས་ལས་དབེན་པར་བགྱི་འཚལ་ལོ། །སྲས་གཞོན་ནུ་ཁྱོད་ཚུར་སྤྱོན། འདི་ཉིད་དུ་བཞུགས་ལ་རྒྱལ་ཚབ་མཛོད་དེ། འདོད་པ་རྣམས་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་གྱིས་ཤིག་ཅེས་ དེ་སྐད་སྨྲས་པ་ན། གཞོན་ནུ་ཀ་ཤི་མཛེས་དགའ་ཅང་མི་སྨྲ་བར་འདུག་གོ། །དེ་ནས་རྒྱལ་པོ་ཚངས་སྦྱིན་གྱིས་གཞོན་ནུ་ཀ་ཤི་མཛེས་དགའ་དང་ལྷན་ཅིག་རྡུལ་ཁྲོད་ན་རྩེ་རྩེ་བའི་བློན་པོའི་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞན་ཡང་གཞོན་ནུ་རྣམས་ལ་བསྒོ་བ་གཞོན་ ནུ་དག་ཚུར་རེ་ཞིག་གཞོན་ནུ་ཀ་ཤི་མཛེས་དགའ་སློང་ཤིག །དེ་ནས་བློན་པོའི་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞོན་ནུ་རྣམས་ཀྱིས་རྒྱལ་པོ་ཚངས་སྦྱིན་ལས་མཉན་ནས། གཞོན་ནུ་ཀ་ཤི་མཛེས་དགའ་གང་ན་བ་དེར་དོང་སྟེ་ལྷགས་ནས་གཞོན་ནུ་ཀ་ཤི་མཛེས་དགའ་ ལ་འདི་སྐད་ཅེས་སྨྲས་སོ། །གཞོན་ནུ་དེས་པ་མཁྱེན་པར་མཛོད་ཅིག །ཁྱོད་ནི་ཤིན་ཏུ་གཞོན་པ་བདེ་བ་བཞེད་པས་སྡུག་བསྔལ་མི་མཁྱེན་ཏེ། ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བགྱི་དཀའོ། །གཅིག་པུ་ཉིད་ལ་མངོན་པར་དགའ་བར་དཀའོ། །གནས་ མལ་དགོན་པ་ནགས་ཁྲོད་རི་དྲུང་དང་། བས་མཐའ་དག་ཏུ་གནས་པས་མནགས་དཀའོ། །གཅིག་པུ་དགོན་པར་གནས་པ་ཡང་སྡུག་བསྔལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་རི་དགས་གདུག་པ་དག་དང་ལྷན་ཅིག་གནས་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་ གཞན་གྱིས་བྱིན་པས་འཚོ་བར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་འདོད་པ་དག་ལས་དབེན་པར་བགྱི་འཚལ་ལོ། །ཁྱོད་ཀྱིས་ཇི་སྲིད་འཚོའི་བར་དུ་མིའི་དགའ་བའི་རྩེད་མོ་དག་ལས་དབེན་པར་བགྱི་འཚལ་ལོ། །སྲས་གཞོན་ནུ་ཁྱོད་ཚུར་སྤྱོན། འདི་ཉིད་དུ་ བཞུགས་ལ་རྒྱལ་ཚབ་མཛོད་དེ། འདོད་པ་དག་ལ་ཡང་ཡོངས་སུ་སྤྱོད་ཅིག །སྦྱིན་པ་དག་ཀྱང་སྩོལ་ཅིག །བསོད་ནམས་དག་ཀྱང་གྱིས་ཤིག་ཅེས་སྨྲས་པ་ན། གཞོན་ནུ་ཀ་ཤི་མཛེས་དགའ་ཅང་མི་སྨྲ་བར་འདུག་གོ། །དེ་ནས་བློན་པོའི་བུ་རྣམས་དང་། མདུན་ན་འདོན་གྱི་བུ་

  847. 114a

    རྣམས་དང་། གཞོན་ནུ་རྣམས་རྒྱལ་པོ་ཚངས་སྦྱིན་གང་ན་བ་དེར་སོང་སྟེ་ཕྱིན་ནས་རྒྱལ་པོ་ཚངས་སྦྱིན་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །གཞོན་ནུ་དེས་པ་ཀ་ཤི་མཛེས་དགའ་གུམ་ན་ཅི་རུང་། འདི་ལྟར་རབ་ཏུ་བྱུང་བ་ནི་མཁས་པ་རྣམས་ཀྱིས་ བསྔགས་པ་ལགས་ཏེ། གལ་ཏེ་དེ་ལ་མངོན་པར་དགའ་བར་གྱུར་ན་གསོན་པོར་དེ་ལ་གཟིགས་པར་འགྱུར་རོ། །གལ་ཏེ་མངོན་པར་དགའ་བར་མ་གྱུར་ཏེ། སླར་ཡང་དྲང་སྲོང་རྣམས་ལས་ལོག་པར་གྱུར་ན་བུའི་གནས་ནི་ཕ་དང་མ་མ་ལགས་པ་གཞན་གང་དུ་མཆི་བར་འགྱུར། རྒྱལ་ པོ་ཚངས་སྦྱིན་གྱིས་སྨྲས་པ། གཞོན་ནུ་དག་གལ་ཏེ་དེ་ལྟ་ན་གནང་བར་བྱའོ། །དེ་ནས་བློན་པོའི་བུ་རྣམས་དང་། མདུན་ན་འདོན་གྱི་བུ་རྣམས་དང་། གཞོན་ནུ་རྣམས་གཞོན་ནུ་ཀ་ཤི་མཛེས་དགའ་གང་ན་བ་དེར་སོང་སྟེ་ཕྱིན་ནས། གཞོན་ནུ་ཀ་ཤི་མཛེས་དགའ་ལ་འདི་སྐད་ཅེས་སྨྲས་ སོ། །གཞོན་ནུ་དེས་པ་མཁྱེན་པར་མཛོད་ཅིག །རབ་ཏུ་འབྱུང་བར་གནང་སྟེ་གཞོན་ནུ་ད་ནི་དེའི་དུས་མཁྱེན་པར་མཛོད་ཅིག །དེ་ནས་གཞོན་ནུ་ཀ་ཤི་མཛེས་དགའ་བཅུད་ཀྱི་ཁུ་བའི་རིམ་གྱིས་ལུས་ཀྱི་མཐུ་དང་། སྟོབས་དང་། བརྩོན་འགྲུས་བསྐྱེད་དེ་བཱ་རཱ་ཎ་སཱི་ནས་བྱུང་ ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་ངོ་། །དེས་བརྩོན་པ་དང་། འབད་པ་དང་། བརྩལ་བ་བྱས་པས་འདོད་པ་རྣམས་ལས་འདོད་ཆགས་དང་བྲལ་བར་བྱས་ནས་བྱམས་པའི་ཏིང་ངེ་འཛིན་ཐོབ་སྟེ། དེ་ཤིན་ཏུ་སེམས་ཅན་རྣམས་ལ་བརྩེ་བ་དང་ལྡན་པར་གྱུར་ནས། དེའི་ བྱམས་པ་དེས་ནི་རི་དགས་གདུག་པ་རྣམས་ཀྱང་བསྟི་གནས་སུ་འདྲིས་པར་གྱུར་ཏེ། གནོད་པ་མི་བྱེད་པས་དེའི་མིང་བཟོད་པ་སྨྲ་བ་བཟོད་པ་སྨྲ་བ་ཞེས་བྱ་བར་གྱུར་ཏོ། །ཇི་ཙམ་དུས་གཞན་ཞིག་ན་རྒྱལ་པོ་ཚངས་སྦྱིན་ཤི་ནས་འཐབ་མོ་སྐྱེས་རྒྱལ་སྲིད་ལ་བཞག་སྟེ། དེ་ཆོས་དང་ཆོས་ མ་ཡིན་པས་རྒྱལ་སྲིད་བྱེད་དུ་འཇུག་གོ། །དྲང་སྲོང་བཟོད་པ་སྨྲ་བས་སྨྲས་པ། མཁན་པོ་བདག་གི་ལུས་ནི་ཁ་ཟས་དང་བཏུང་བས་བསྐྱེད་པས་དགོན་པའི་སྨན་གྱིས་འཚོ་བར་རྔོ་མི་ཐོག་གིས་གྲོང་མཐར་གནས་སུ་མཆི་ལགས་སོ། །དེས་སྨྲས་པ། བུ་གྲོང་ངམ་དགོན་པར་གནས་

  848. 114b

    ཀྱང་རུང་སྟེ། དྲང་སྲོང་རྣམས་ནི་དབང་པོ་རྣམས་སྲུང་བར་བྱེད་ཀྱིས། སོང་ལ་བཱ་རཱ་ཎ་སཱིའི་ཉེ་འཁོར་དུ་སོང་ནས་ལོ་མ་དང་འདབ་མའི་སྤྱིལ་བུ་བྱོས་ལ་གནས་པར་གྱིས་ཤིག །དེ་མཁན་པོ་ལས་ལུང་ཐོབ་ནས་བཱ་རཱ་ཎ་སཱིར་སོང་སྟེ། ཞི་བའི་གནས་བཙལ་བའི་ཕྱིར་ཕན་ཚུན་དུ་རྒྱུ་ཞིང་ རིམ་གྱིས་ཕའི་སྐྱེད་མོས་ཚལ་དུ་སོང་སྟེ། དེས་དེར་གནས་བཙལ་བ་ལས་ཞི་བའི་ཕྱོགས་ཤིག་མཐོང་ནས་དེ་དེ་ན་གནས་སོ། །ཇི་ཙམ་དུས་གཞན་ཞིག་ན་རྒྱལ་པོ་འཐབ་མོ་སྐྱེས་སོ་གའི་དུས་ལ་བབ་པ་ན་ནགས་ཚང་ཚིང་མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཁྲུང་ཁྲུང་ དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ཤང་ཤང་ཏེའུ་རྣམས་ཀྱང་སྐད་འབྱིན་པའི་སྐྱེད་མོས་ཚལ་གྱི་ས་གཞིར་བཙུན་མོ་དང་ལྷན་ཅིག་དོང་ནས་དེས་སྐྱེད་མོས་ཚལ་དེར་བདེ་བ་ཉམས་སུ་མྱོང་བས་དུབ་པར་གྱུར་ཏེ་གཉིད་ལོག་པ་དང་། བུད་མེད་ནི་མེ་ཏོག་དང་ འབྲས་བུ་ལ་དགའ་བ་ཡིན་པས་སྐྱེད་མོས་ཚལ་དེ་ཉིད་ནས་ཕན་ཚུན་དུ་རྒྱུ་བར་བརྩམས་པ་ལས། ཅི་ཙམ་ན་དྲང་སྲོང་བཟོད་པ་སྨྲ་བ་སྤྱོད་ལམ་ཞི་བས་མཐའ་གཅིག་ན་འདུག་པ་མཐོང་ངོ་། །མཐོང་ནས་ཀྱང་བླ་མར་བྱ་བའི་སེམས་བསྐྱེད་ནས་དྲང་སྲོང་དེ་ལ་ཕྱག་བྱས་ཏེ་བསྐོར་ནས་འཁོད་ དོ། །དྲང་སྲོང་བཟོད་པ་སྨྲ་བས་བུད་མེད་རྣམས་མཐོང་ནས་ལྷག་པར་སྤྱོད་ལམ་ཞི་བས་ཆོས་བཤད་པར་བརྩམས་སོ། །ཇི་ཙམ་ན་རྒྱལ་པོ་འཐབ་མོ་སྐྱེས་གཉིད་ཀྱི་སྙོམས་པས་དུབ་པ་ལས་སངས་པ་ན། བཙུན་མོའི་འཁོར་གྱི་བུད་མེད་མ་མཐོང་ནས། དེས་རལ་གྲི་བླངས་ཏེ་ བཙུན་མོའི་འཁོར་གྱི་བུད་མེད་བཙལ་བར་བརྩམས་པ་དང་། ཇི་ཙམ་ན་དྲང་སྲོང་བཟོད་པ་སྨྲ་བ་བསྐོར་ནས་འཁོད་པ་མཐོང་ངོ་། །མཐོང་ནས་ཀྱང་ཕྲག་དོག་བསྐྱེད་དེ། བདག་ཉིད་ཁྲོས་པའི་ཀུན་ནས་དཀྲིས་པའི་རང་བཞིན་གྱིས་དྲང་སྲོང་དེའི་དྲུང་དུ་སོང་བ་དང་། བཙུན་ མོའི་ཚོགས་ཀྱིས་དེ་ཁྲོས་པའི་གནས་སྐབས་མཐོང་ནས་སྐྲག་སྟེ་བྱེར་རོ། །རྒྱལ་པོ་སྙེམས་པ་ཅན་གྱིས་བཟོད་པ་སྨྲ་བ་ལ་སྨྲས་པ། ཀྱེ་ནང་རྗེ་ཁྱོད་སུ་ཞིག་དེས་སྨྲས་པ། བཟོད་པ་སྨྲ་བའོ། །རྒྱལ་པོ་འཐབ་མོ་སྐྱེས་ཀྱིས་སྨྲས་པ། ཁོ་བོ་འཁྲུགས་པ་ལ་ཡང་བཟོད་པ་

  849. 115a

    སྨྲ་བར་བདག་ཉིད་ཁས་འཆེ་བ་ཡིན་ནམ། ད་ནི་ཁྱོད་བཟོད་པ་སྨྲ་བ་ཡིན་ནམ་མ་ཡིན་ཤེས་པར་བྱའོ་ཞེས་དེས་དེའི་ལག་པ་གཉིས་བཅད་ནས་ཡང་དྲིས་པ། ཁྱོད་སུ་ཡིན། དེས་སྨྲས་པ། བཟོད་པ་སྨྲ་བའོ། །དེས་དེའི་རྐང་པ་བཅད་ཅིང་ཡན་ལག་དང་ཉིང་ལག་ རྣམས་ཀྱང་བཅད་པ་དང་། དེས་ཚིགས་སུ་བཅད་པ་སྨྲས་པ། གལ་ཏེ་བདག་གི་ལུས་ལ་ནི། །ཏིལ་འབྲུ་ཙམ་དུ་གཏུབ་པ་ཡི། །ལུས་ནི་ཕྱེ་མ་བརྒྱར་གཏུབས་ནས། །ས་ལ་གཏོར་ཀྱང་བཟོད་མི་སྤོང་། །གང་ཕྱིར་བདག་གིས་བྱམས་དགེ་བའི། །སེམས་ནི་རྟག་ཏུ་གོམས་ བྱས་པས། །བུ་སྡུག་ལྟ་བུའི་སྐྱེ་བོ་ལ། །བཟོད་པ་དེ་གཏོང་སྤྲོ་བ་མེད། །ཅེས་ཚིགས་སུ་བཅད་པའི་དབྱངས་དེ་ལྟ་བུས་ཚོར་བ་བསལ་ནས་སྨོན་ལམ་གདབ་པར་བརྩམས་པ། ཇི་ལྟར་རྒྱལ་པོ་འདི་ཉོན་མོངས་པ་ལ་ཞེན་པའི་བློས་བདག་ལ་ཡང་དང་ཡང་དུ་རྨས་ནས་ཡན་ལག་དང་ ཉིང་ལག་རྣམས་གཏུབས་པ་དེ་བཞིན་དུ་བདག་བཟོད་པ་དང་དེས་པ་དང་ལྷན་ཅིག་པར་གྱུར་པའི་དགེ་བའི་རྩ་བ་འདིས་བདག་ཉིད་ཀྱི་ཉོན་མོངས་པའི་ཚོགས་རྣམས་བཅོམ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན། དེ་ལ་ཤེས་རབ་ཀྱི་ རལ་གྲིས་ཡང་དང་ཡང་དུ་རྨེད་ཅིང་ཐོག་མར་དེའི་ཉོན་མོངས་པ་གཅོད་པར་གྱུར་ཅིག་ཅེས་བཏབ་བོ། །དེ་ནས་བཟོད་པ་སྨྲ་བ་ལ་མངོན་པར་དད་པའི་ལྷ་གང་ཡིན་པས་བསམས་པ། རྒྱལ་པོ་སྡིག་ཅན་འདིས་དྲང་སྲོང་འདི་ཉེས་པ་མེད་ཅིང་གནོད་པ་མ་བྱས་པར་རྐང་པ་དང་ལག་པ་དང་ཕྲལ་ཏེ་བོར་ གྱིས། ཅི་ནས་ཀྱང་བདག་གིས་འདི་ལ་གནོད་པར་བྱའོ་སྙམ་དུ་རིག་ནས་ཁྲོ་བ་དྲག་པོའི་ཀུན་ནས་དཀྲིས་པས་བཟོད་པ་སྨྲ་བའི་མདུན་དུ་འདུག་སྟེ་ཚིགས་སུ་བཅད་པས་སྨྲས་པ། འཐབ་སྐྱེས་བུ་དང་བུ་མོར་བཅས། །གཉེན་གྱི་ཚོགས་བཅས་གྲོང་ཁྱེར་དང་། །ལྗོངས་བཅས་འཇིག་ རྟེན་འཚོ་བ་ཀུན། །ཐལ་བར་བགྱི་ཡིས་བཀའ་སྩོལ་ཅིག །དེས་སླར་ཚིགས་སུ་བཅད་དེ་སྨྲས་པ། གང་གིས་བདག་ལུས་ལག་པ་རྐང་པ་དང་། །སྣ་དང་ཕྲལ་ནས་མ་རུང་བྱས་གྱུར་པ། །དེ་ལའང་སྡིག་པ་ཅུང་ཟད་མི་འདོད་ན། །ཉེས་མེད་འགྲོ་བ་རྣམས་ལ་སྨོས་ཅི་དགོས།

  850. 115b

    དེ་ནས་བཱ་རཱ་ཎ་སཱིའི་ལྷ་གང་ཡིན་པ་དེས་ཡམས་ཀྱི་ནད་དང་། བྱི་བ་དང་། བྱེ་བ་དང་། ནེ་ཙོ་རྣམས་བཏང་ཞིང་ལྷས་ཆར་མ་ཕབ་པས་སྐྱེ་བོའི་ཚོགས་རྣམས་ཤི་བར་གྱུར་ཏོ། །རྒྱལ་པོས་ལྟས་མཁན་རྣམས་བཀུག་ནས་སྨྲས་པ། ཤེས་ལྡན་དག་ཅིའི་ཕྱིར་ལྷ་ཆར་མི་འབེབས་ཤིང་ བྱི་བ་དང་། བྱེ་བ་དང་། ནེ་ཙོ་རྣམས་རབ་ཏུ་མང་པོར་གྱུར་ལ་སྐྱེ་བོའི་ཚོགས་རྣམས་ཀྱང་ཤི་བར་གྱུར། དེ་རྣམས་ཀྱིས་སྨྲས་པ། ལྷ་དང་དྲང་སྲོང་བཟོད་པ་སྨྲ་བ་ལ་མངོན་པར་དད་པའི་ལྷ་གང་ལགས་པའི་ལྷ་དེ་རབ་ཏུ་འཁྲུགས་ཏེ། དེ་འཁྲུགས་པས་དེས་ཡམས་ཀྱི་ནད་འདི་ བཏང་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེ་ལ་ཇི་ལྟར་བསྒྲུབ་པར་བྱ། ལྟས་མཁན་རྣམས་ཀྱིས་སྨྲས་པ། ལྷ་གཏོར་མ་དང་། མེ་ཏོག་ཕྲེང་དང་། ཡོ་བྱད་རྣམས་ཀྱིས་ལྷ་རབ་ཏུ་འཁྲུགས་པ་མཉེས་པར་འགྱུར་བས་གཏོར་མ་དང་། མེ་ཏོག་ཕྲེང་དང་། ཡོ་ བྱད་རྣམས་སྦྱར་ལ་ལྷ་དང་དྲང་སྲོང་དེ་ལ་ཡང་བཟོད་པ་གསོལ་བར་བགྱིའོ། །དེ་ནས་རྒྱལ་པོས་བཱ་རཱ་ཎ་སཱིར་དྲིལ་སྒྲོགས་སུ་བཅུག་པ། གྲོང་ཁྱེར་བཱ་རཱ་ཎ་སཱི་ན་གནས་པའི་ཤེས་ལྡན་དག་ཉོན་ཅིག །སྐྱེད་མོས་ཚལ་ན་གནས་པའི་ལྷ་དྲང་སྲོང་བཟོད་པ་སྨྲ་བ་ལ་མངོན་པར་དད་པ་དེས་ ཡམས་ཀྱི་ནད་བཏང་ཞིང་དེས་ཆར་མི་འབེབས་པ་དང་། བྱི་བ་དང་། བྱེ་བ་དང་། ནེ་ཙོ་རྣམས་རབ་ཏུ་མང་པོར་བྱས་ཏེ་སྐྱེ་བོའི་ཚོགས་ཀྱང་ཤི་བར་གྱུར་གྱིས། ཡམས་ཀྱི་ནད་དེ་ཉེ་བར་ཞི་བར་བྱ་བའི་ཕྱིར་ཁྱེད་ཅག་སང་གཏོར་མ་དང་། མེ་ཏོག་ཕྲེང་དང་། ཡོ་བྱད་རྣམས་དང་ ཆས་ཏེ་སྐྱེད་མོས་ཚལ་དེར་དེང་ལ་མཆོད་པ་བྱོས་ཤིག །སྐྱེ་བོའི་ཚོགས་ཀྱིས་དེ་ཉིད་ཀྱི་ནུབ་མོ་ནས་གཏོར་མ་དང་། མེ་ཏོག་ཕྲེང་དང་། ཡོ་བྱད་རྣམས་སྟ་གོན་བྱས་ཏེ་སྐྱེད་མོས་ཚལ་དེར་རྒྱལ་པོ་དང་། བཙུན་མོ་དང་ལྷན་ཅིག་ཏུ་དོང་ངོ་། །དེ་ནས་སྐྱེ་བོའི་ཚོགས་ཆེན་པོས་ལྷ་དེ་ ལ་བརྟེན་ནས་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་རྣམས་ལ་སྦྱིན་པ་དག་བྱིན་ནས་ལྷའི་གནས་སུ་མཆོད་པ་ཆེན་པོ་བྱས་ཏེ་ལྷ་དེ་ལ་ཡང་བཟོད་པར་གསོལ་ཏོ། །དེ་ནས་རྒྱལ་པོ་དྲང་སྲོང་བཟོད་པ་སྨྲ་བའི་དྲུང་དུ་སོང་ནས་རྐང་པ་ལ་གཏུགས་ཏེ་བཟོད་པ་

  851. 116a

    གསོལ་བར་བརྩམས་པ། དྲང་སྲོང་ཆེན་པོ་བདག་གིས་ཡུལ་ཞིག་ལ་ལྷག་པར་ཞེན་པས་ཁྲོ་བའི་ཀུན་ནས་དཀྲིས་པའི་བློ་གྲོས་ཀྱིས་ཁྱོད་ལ་གནོད་པ་བགྱིས་པ་བཟོད་པར་གསོལ་ལོ། །བཟོད་པ་སྨྲ་བས་སྨྲས་པ། རྒྱལ་པོ་ཆེན་པོ་བཟོད་དོ། །སུས་འཚལ། དེས་ཚིགས་སུ་བཅད་པས་སྨྲས་པ། ལུས་ལ་མཚོན་གྱིས་འདེབས་པ་ནའང་། །བདག་ནི་སེམས་ཅན་ཀུན་ལ་བྱམས། །གལ་ཏེ་ཁྱོད་ཡིད་མི་ཆེས་ན། །བདག་གི་ཁྲག་འཛག་པ་ལ་ལྟོས། །དེའི་ཁྲག་འོ་མའི་ཐིགས་པར་འཛག་པའི་ཆོ་འཕྲུལ་རྒྱལ་པོ་སྡིག་པའི་ལས་བྱེད་ པ་དེ་ལ་བསྟན་ན། འོན་ཀྱང་ཡིད་ཆེས་པར་མ་གྱུར་ནས་དེས་ཡང་སྨྲས་པ། དྲང་སྲོང་ཆེན་པོ་བཟོད་པར་གསོལ་ལོ། །རྒྱལ་པོ་ཆེན་པོ་བཟོད་དོ། །སུས་འཚལ། དེ་ནས་བྱང་ཆུབ་སེམས་དཔས་ཡན་ལག་དང་ཉིང་ལག་གཏུབས་པའི་གནས་རྣམས་ཇི་ལྟ་བ་བཞིན་དུ་བཞག་ནས་ བདེན་པ་གསོལ་བའི་ཕྱིར་ཚིགས་སུ་བཅད་དེ་སྨྲས་པ། རྒྱལ་པོ་ཁྱོད་ཀྱིས་བདག་གི་ལུས། །གཏུབས་ཀྱང་ཤིན་ཏུ་ཕྲ་བ་ཡི། །ཞེ་སྡང་འདི་ལྟར་ཡོད་མིན་ན། །བདག་ལུས་ཇི་ལྟར་སྔོན་བཞིན་ཤོག །དེས་བདེན་པའི་ཚིག་གསོལ་བས་ལུས་སྔོན་གྱི་ཇི་ལྟ་བ་བཞིན་དུ་གྱུར་ཏོ། ། དེ་ནས་རྒྱལ་པོ་ཡ་མཚན་གྱིས་མིག་ཕྱེ་ནས་ཚིགས་སུ་བཅད་པས་སྨྲས་པ། ཀྱེ་མའོ་ཆོས་ལ་ལེགས་གནས་པས། །ཀྱེ་མ་བརྟུལ་ཞུགས་འདི་གྲུབ་སྟེ། །ལུས་ལ་གཏུབ་པར་བྱེད་པ་ན། །ཁྱོད་ལ་མི་དགའ་ཅི་ཡང་མེད། །རྒྱལ་པོ་འཐབ་མོ་སྐྱེས་བཙུན་མོ་དང་། བློན་པོ་ དང་། གྲོང་མི་དང་། ཡུལ་མི་དང་བཅས་པས་དྲང་སྲོང་དེའི་རྐང་པ་ལ་མགོ་བོས་ཕྱག་བྱས་ཏེ་དོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་བཟོད་པ་སྨྲ་བ་གང་ཡིན་པ་དེ་ནི་ང་ཉིད་ཡིན་ནོ། །རྒྱལ་པོ་འཐབ་མོ་སྐྱེས་གང་ཡིན་པ་དེ་ནི་དགེ་སློང་ཀཽཎྜི་ནྱ་འདི་ཉིད་ ཡིན་ཏེ། ངས་དེ་ལ་བྱམས་པའི་སེམས་བསྐྱེད་ཅིང་སྨོན་ལམ་དུ་དགེ་བའི་རྩ་བ་འདིས་བདག་གིས་དེ་ལ་ཡང་ནས་ཡང་དུ་རྨེད་ཅིང་ཉོན་མོངས་པ་གཅོད་པར་གྱུར་ཅིག་ཅེས་བཏབ་པའི་སྨོན་ལམ་གང་ཡིན་པ་དེའི་དབང་གིས། ད་ལྟར་ཡང་དེ་བཞིན་གཤེགས་པ་དེ་ལ་ཆོས་བཤད་ནས་ཡང་

  852. 116b

    ནས་ཡང་དུ་སྨྲས་སོ། །དགེ་སློང་དག་ད་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །གང་གི་ཚེ་བཅོམ་ལྡན་འདས་ཀྱིས་ལྷ་བརྒྱད་ཁྲི་ཆོས་ཀྱི་རོས་ཡང་དག་ པར་བསྡུས་བདེན་པ་རྣམས་ལ་རབ་ཏུ་བཀོད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྷ་བརྒྱད་ཁྲི་ཆོས་ཀྱི་རོས་ཡང་དག་པར་བསྡུས་ཏེ་བདེན་པ་རྣམས་ལ་རབ་ཏུ་བཀོད་ པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ངས་འདི་རྣམས་ཚོང་པ་བརྒྱད་ཁྲིར་གྱུར་པ་ན་ཟང་ཟིང་གིས་ཡང་དག་པར་བསྡུས་ནས་བརྟུལ་ཞུགས་ལྔའི་གཞི་རྣམས་ལ་རབ་ཏུ་བཀོད་པ་ དེ་ཉོན་ཅིག །དགེ་སློང་དག་སྔོན་བྱུང་བ་དེད་དཔོན་གཉིས་ཞིག་བྱུང་སྟེ། ཐམས་ཅད་སྐྱོབ་དང་། ལེགས་གྲུབ་ཅེས་བྱ་སྟེ། རེ་རེ་ལ་ཡང་ཚོང་པའི་འཁོར་བཞི་ཁྲི་བཞི་ཁྲི་ཡོད་དོ། །དེ་ལ་ལེགས་གྲུབ་ངེས་པར་འབྱུང་བ་ལ་མངོན་པར་དགའ་ནས་དེ་དྲང་སྲོང་རྣམས་ཀྱི་ནང་དུ་རབ་ ཏུ་བྱུང་སྟེ། དེས་མཐའ་གཅིག་ཏུ་བརྩོན་འགྲུས་ལ་གནས་ནས་མཁན་པོ་དང་སློབ་དཔོན་མེད་པར་རང་བྱང་ཆུབ་མངོན་སུམ་དུ་བྱས་སོ། །དེའི་ཚོང་པ་དེ་རྣམས་དེད་དཔོན་མ་མཐོང་ནས་ཕན་ཚུན་དུ་བཙལ་བར་བརྩམས་པ་ན། གང་གི་ཚེ་རྣམ་པ་ཐམས་ཅད་དུ་མ་རྙེད་པ་དེའི་ཚེ་དེད་ དཔོན་ཐམས་ཅད་སྐྱོབ་ཀྱི་དྲུང་དུ་དོང་ནས་སྨྲས་པ། དེད་དཔོན་དེད་དཔོན་དེས་ནི་བདག་ཅག་ལ་མ་བལྟས་པར་མཆིས་ཏེ། བདག་ཅག་གིས་བཙལ་ན་ཡང་མ་རྙེད་ན་དེ་ལ་ཇི་ལྟར་བསྒྲུབ་པར་བགྱི། དེས་སྨྲས་པ། ཡི་བློང་བར་མ་བྱེད་པར་འཁོད་ཅིག་དེད་དཔོན་དེ་བཙལ་ལོ། ། དེ་ནས་དེད་དཔོན་ཐམས་ཅད་སྐྱོ་བ་ཚོང་པ་བརྒྱད་ཁྲིས་ཡོངས་སུ་བསྐོར་ནས། དེད་དཔོན་ལེགས་གྲུབ་སྐྱེད་མོས་ཚལ་དང་། འདུག་གནས་དང་། དཀའ་ཐུབ་ཀྱི་ནགས་སུ་བཙལ་བར་བརྩམས་པ་ན་དེས་དེ་མཐོང་ནས་དྲིས་པ། ཁྱོད་ཀྱིས་ཅིའི་ཕྱིར་ཚོང་པ་རྣམས་སྤངས་ཏེ་རབ་

  853. 117a

    ཏུ་བྱུང་། བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་འཆད་ཀྱིས། ངག་གིས་མ་ཡིན་པས་དེད་དཔོན་འཁོར་དང་བཅས་པ་དེ་ལ་འབར་བ་དང་། གསལ་བ་དང་། ཆར་འབབ་པ་དང་། གློག་འབྱིན་པའི་ཆོ་འཕྲུལ་གྱིས་དད་པར་བྱས་སོ། །དེས་ཚོང་པ་བརྒྱད་ཁྲི་པོ་དེ་ ཟང་ཟིང་གིས་བསྡུ་བས་བསྡུས་ནས་སྨྲས་པ། འདིའི་ཕྱིར་བྱ་བ་བྱོས་ཤིག །འདི་ལ་བྱ་བ་བྱས་ན་གདོན་མི་ཟ་བར་འབྲས་བུ་སྨིན་པར་འགྱུར་རོ། །དེ་རྣམས་ཀྱིས་དེ་ལ་བྱ་བ་རྣམ་པ་དུ་མ་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དེད་དཔོན་ཐམས་ཅད་ སྐྱོབ་གང་ཡིན་པ་དེ་ནི་ང་ཉིད་ཡིན་ནོ། །ཚོང་པ་བརྒྱད་ཁྲི་པོ་གང་ཡིན་པ་དེ་དག་ནི་ལྷ་བརྒྱད་ཁྲི་པོ་འདི་དག་ཉིད་ཡིན་ཏེ། དེ་ན་ཡང་ངས་ཟང་ཟིང་གིས་ཉེ་བར་བསྡུས་ནས་བརྟུལ་ཞུགས་ལྔའི་གཞི་རྣམས་ལ་རབ་ཏུ་བཀོད་དོ། །འདི་དག་ད་ལྟར་ཡང་ངས་ཆོས་ཀྱི་རོས་ཡང་དག་ པར་བསྡུས་ནས་བདེན་པ་རྣམས་ལ་རབ་ཏུ་བཀོད་དོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ནི་གཅིག་ཏུ་དཀར་བ་ཡིན་ལ། འདྲེན་མ་རྣམས་ཀྱི་ནི་འདྲེན་མ་ཡིན་པས་ ཞེས་བྱ་བ་ནས་དགེ་སློང་ཁྱོད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །གང་གི་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་རིན་པོ་ཆེ་རྣམས་བགོ་བཤའ་མཛད་ ནས། དམ་པའི་ཆོས་ཀྱི་རོས་ཚིམ་པར་མཛད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ་དམ་པའི་ཆོས་ཀྱི་ རོས་ཚིམ་པར་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་

  854. 117b

    པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ། ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ་དམ་པའི་ཆོས་ ཀྱི་རོས་ཚིམ་པར་མཛད་པ་དེ་ལ་ངོ་མཚར་ཅི་ཞིག་ཆེ། འདས་པའི་དུས་ན་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་ དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་ཏེ། དེད་དཔོན་དུ་གྱུར་པ་ན་ལྔ་པོ་དག་འབྲོག་དགོན་པའི་ལམ་དུ་ཆུ་མེད་པས་སྲོག་དང་བྲལ་བའི་སྡུག་བསྔལ་དོག་པ་ཉམ་ང་བ་ཐོབ་པ་ན་ལྷ་རྣམས་ལ་བདེན་པ་གསོལ་ནས་དབང་ཕྱུག་ཆེན་པོས་ཆར་ཕབ་པའི་ ཆུས་ཚིམ་པར་བྱས་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་དེད་དཔོན་ཐམས་ཅད་སྐྱོབ་ཅེས་བྱ་བ་ཚོང་པ་ལྔ་བརྒྱ་དང་ལྷན་ཅིག་ཏུ་ཚོང་བྱེད་ཅིང་འབྲོག་དགོན་པའི་ལམ་ཆུ་ཆུང་བ་ཞིག་ཏུ་ཞུགས་ནས་རིམ་གྱིས་འབིགས་བྱེད་ཅེས་བྱ་བའི་དགོན་པར་ཕྱིན་པ་དང་། ཚོང་ པ་དེ་རྣམས་དེར་ཆུ་ཐམས་ཅད་ཀྱི་ཐམས་ཅད་དུ་ཟད་ནས་ཆུ་དང་བྲལ་ཡང་མནགས་ཏེ་དོང་བ་ལས། ཚོང་པ་ལྔ་ཙམ་ཆུ་མ་རྙེད་པས་ལྷག་པར་ཡི་བློང་བར་གྱུར་པའི་རྣམ་པ་དེ་ལྟ་བུ་དེ་དག་དེད་དཔོན་ཐམས་ཅད་སྐྱོབ་ཀྱིས་མཐོང་ནས་སྙིང་རྗེས་སེམས་བསྐྱོད་པས་ཁ་གྱེན་དུ་བལྟས་ཏེ་ལྷ་རྣམས་ ལ་གསོལ་བ་བྱ་བར་བརྩམས་པ། ཞི་བ་དང་། ཆུ་ལྷ་དང་། ལུས་ངན་དང་། ཁྱབ་འཇུག་ལ་སོགས་པ་ལྷ་ཤེས་ལྡན་དག་གསོན་ཅིག །བདག་སེམས་ཅན་རྣམས་ལ་མཉམ་པར་སེམས་པའི་བདེན་པ་དང་བདེན་པའི་ཚིག་གང་ཡིན་པའི་བདེན་པ་དང་བདེན་པའི་ཚིག་ འདིས་དབང་ཕྱུག་ཆེན་པོའི་ལྷས་ཆར་འབེབས་པར་གྱུར་ཅིག །བྱང་ཆུབ་སེམས་དཔའི་མཐུས་དབང་ཕྱུག་ཆེན་པོའི་གནས་གཡོས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་གྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེས་བསམས་པ། སུ་ཞིག་གིས་དབང་ཕྱུག་ཆེན་

  855. 118a

    པོའི་གནས་གཡོས་པར་བྱས་སྙམ་ན། བྱང་ཆུབ་སེམས་དཔའི་མཐུ་ཡིན་པར་མཐོང་ནས་དེས་དབང་ཕྱུག་ཆེན་པོའི་ཆར་གྱི་རྣམ་པ་དེ་ལྟ་བུ་དག་ཕབ་སྟེ། དེས་ཚོང་པ་དེ་རྣམས་ཚིམ་པར་བྱས་ནས་འབྲོག་དགོན་པའི་ལམ་ནས་བསྒྲལ་ཏོ། །དགེ་སློང་དེ་ཅི་སྙམ་དུ་སེམས། དེའི་ཚེ་དེའི་དུས་ཀྱི་དེད་དཔོན་ཐམས་ཅད་སྐྱོབ་གང་ཡིན་པ་དེ་ནི་ང་ཉིད་ཡིན་ནོ། །ཚོང་པ་ལྔ་པོ་ཆུ་དང་བྲལ་བས་ལྷག་པར་ཡི་བློང་པར་གྱུར་པ་དེ་དག་ནི་ལྔ་སྡེའི་དགེ་སློང་འདི་དག་ཡིན་ཏེ། དེ་ན་ཡང་ངས་འདི་དག་ཆུས་ཚིམ་པར་བྱས་ནས་འབྲོག་དགོན་པ་ནས་བསྒྲལ་ཏོ། །ད་ལྟར་ཡང་ངས་འདི་དག་ དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ནས་བསྒྲལ་ཏོ། །གང་གི་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ནས་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་གི་རིན་པོ་ཆེ་རྣམས་ཀྱི་བགོ་བཤའ་མཛད་ པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ནས་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་གི་རིན་པོ་ ཆེ་རྣམས་ཀྱི་བགོ་བཤའ་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་ འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ། ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ལྔ་སྡེའི་དགེ་སློང་རྣམས་འཁོར་བའི་འབྲོག་དགོན་པ་ནས་བཏོན་ཏེ། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་རྣམས་ཀྱི་བགོ་བཤའ་མཛད་པ་དེ་ལ་ངོ་མཚར་ཅི་ཞིག་ཆེ། འདས་པའི་དུས་ན་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་།

  856. 118b

    མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་ཏེ། དེད་དཔོན་དུ་གྱུར་པ་ན་རང་གི་སྲོག་ཡོངས་སུ་བཏང་ནས་འདི་དག་རྒྱ་མཚོ་ཆེན་པོ་ནས་བཏོན་ཏེ་རིན་པོ་ཆེ་རྣམས་ཀྱི་བགོ་བཤའ་བྱས་པ་གང་ཡིན་པ་ དེ་ཉོན་ཅིག །དགེ་སློང་དག་སྔོན་བྱུང་བ་ན་དེད་དཔོན་ནོར་གྱི་ཤིང་རྟ་ཞེས་བྱ་བ་ཞིག་བྱུང་སྟེ། དེ་ཚོང་པ་ལྔ་ཞིག་དང་ལྷན་ཅིག་རྒྱ་མཚོ་ཆེན་པོར་དོང་བ་ན་དེ་རྣམས་དང་དེད་དཔོན་དེས་ཕན་ཚུན་བཤེས་པའི་གཏམ་སྨྲ་བར་བྱེད་པས་མཛའ་བར་གྱུར་ཏོ། །ཇི་ཙམ་ན་མཐར་གྱིས་རྒྱ་མཚོའི་ འགྲམ་དུ་ཕྱིན་ནས་གྲུ་སོ་སོ་སྟ་གོན་བྱས་ནས་འཇུག་པའི་ཚེ་དེ་རྣམས་ཀྱིས་དེད་དཔོན་ནོར་གྱི་ཤིང་རྟ་ལ་སྨྲས་པ། དེད་དཔོན་བདག་ཅག་ནི་ཁྱོད་དང་བྲལ་ན་དགའ་བར་མི་འགྱུར་ལགས་སོ། །དེས་སྨྲས་པ། གལ་ཏེ་དེ་ལྟ་ན་འདིར་ཞུགས་ཤིག་དང་གྲུ་དོར་རོ། །དེ་རྣམས་དེར་ཞུགས་པ་ དང་རླུང་ལངས་ནས་སྐྲག་པར་གྱུར་ཏོ། །ནོར་གྱི་ཤིང་རྟས་སྨྲས་པ། ཤེས་ལྡན་དག་མ་འཇིགས་ཤིག །གང་གི་ཚེ་གྲུ་ཞིག་པར་གྱུར་པ་དེའི་ཚེ་བདག་གི་མགུལ་དུ་འཇུས་ཤིག་དང་། བདག་གིས་ཁྱེད་ཅག་གདོན་ཏོ། །བྱང་ཆུབ་སེམས་དཔའ་རྣམས་ནི་བཟོའི་གནས་དང་ལས་ཀྱི་ གནས་དེ་དང་དེ་དག་ལ་མཁས་པ་ཡིན་པས་དེས་ནི་རིན་པོ་ཆེ་ཆེན་པོ་ལ་འོས་པ་དག་མཆན་ཁུང་དུ་བཏགས་ནས་གྲུ་ཞིག་པ་ན་དེ་རྣམས་དེད་དཔོན་དེའི་མགུལ་དུ་འཇུས་ནས། དེས་དེ་རྣམས་ལུས་དུ་བཅིང་སྲོག་གི་ལྷག་མ་ཅུང་ཟད་ཅིག་ལུས་ཏེ་རྒྱ་མཚོའི་འགྲམ་དུ་ཕྱིན་པར་བྱས་སོ། །དེ་རྣམས་ སྐམ་ལ་ཕྱིན་ཏེ་དེ་བཏང་བ་དང་། དེ་དབུགས་གཏན་ཆད་ནས་ཤིའོ། །དེ་རྣམས་ཀྱིས་དེ་ཆུ་ནས་སྐམ་ལ་ཕྱུང་བ་དང་། ཇི་ཙམ་ན་མཆན་ཁུང་ན་རིན་པོ་ཆེ་ཆེན་པོ་ལ་འོས་པ་དག་མཐོང་ནས་དེ་རྣམས་ཀྱིས་དེ་ཁྱེར་ཏེ་དོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དེད་དཔོན་ ནོར་གྱི་ཤིང་རྟ་གང་ཡིན་པ་དེ་ནི་ང་ཉིད་ཡིན་ནོ། །ཚོང་པ་དེ་རྣམས་ནི་དགེ་སློང་ལྔ་པོ་འདི་དག་ཉིད་ཡིན་ཏེ། དེ་ན་ཡང་ངས་འདི་དག་རྒྱ་མཚོ་ཆེན་པོ་ནས་བཏོན་ཏེ་རིན་པོ་ཆེ་རྣམས་ཀྱི་བགོ་བཤའ་བྱས་སོ། །ད་ལྟར་ངས་འདི་དག་འཁོར་བའི་འབྲོག་དགོན་པ་ནས་བཏོན་ནས་དབང་པོ་དང་།

  857. 119a

    སྟོབས་དང་། བྱང་ཆུབ་ཀྱི་ཡན་ལག་གི་རིན་པོ་ཆེ་རྣམས་ཀྱི་བགོ་བཤའ་བྱས་སོ།། །།འདུལ་བ་གཞི། བམ་པོ་དགུ་བཅུ་རྩ་གསུམ་པ། ཡང་གང་གི་ཚེ་ཚེ་དང་ལྡན་པ་ཀུན་ཤེས་ཀཽཎྜི་ནྱ་རྒན་པའི་ངང་ལ་འདུག་པ་དེའི་ཚེ་འཁོར་ལ་གདུགས་ལྟ་བུར་ བྱས་ཏེ་འདུག་གོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་ཤེས་ཀཽཎྜི་ནྱས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་འཁོར་ལ་གདུགས་ལྟ་བུར་བགྱིས་ཏེ་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཀུན་ཤེས་ཀཽཎྜི་ནྱ་འདི་ཉིད་ཀྱིས་ལས་བྱས་ཤིང་བསགས་པ་ཚོགས་རྙེད་པ་དག་ནི་ཞེས་བྱ་བ་ནས་ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་ནོ། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་ཁྱིམ་བདག་ སྡུམས་བྱེད་ཅེས་བྱ་བ་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་སོ། །དེའི་ཚེ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་པ་ལས་ཇི་ཙམ་ན་ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་བོ་ཞེས་བསྟན་ཏོ། །རྒྱལ་པོ་ཚངས་སྦྱིན་གྱིས་རང་གི་ཡུལ་དུ་དྲིལ་སྒྲོགས་སུ་བཅུག་ པ། ངའི་ཡུལ་ན་གནས་པའི་ཤེས་ལྡན་གྲོང་མི་དག་ཉོན་ཅིག །ལྟས་མཁན་རྣམས་ཀྱིས་ལོ་བཅུ་གཉིས་སུ་ཆར་མི་འབབ་བོ་ཞེས་བསྟན་གྱིས། དེ་ལ་ཁྱེད་ཅག་ལས་ལོ་བཅུ་གཉིས་ཀྱི་བཟའ་བ་དང་བཏུང་བ་ཡོད་པ་དེ་དག་ནི་ངའི་ཡུལ་ན་གནས་པར་གྱིས་ཤིག །གཞན་ནི་ཕྱོགས་ སྣ་ཚོགས་སུ་དེང་ལ་ལོ་བཅུ་གཉིས་འདས་ནས་སླར་ཤོག་ཤིག །དེ་ནས་ཁྱིམ་བདག་སྡུམས་བྱེད་ཀྱིས་མངན་ལ་སྨྲས་པ། ཀྱེ་ནང་རྗེ་བང་མཛོད་ན་བདག་འཁོར་དང་བཅས་པའི་ལོ་བཅུ་གཉིས་ཀྱི་བཟའ་བ་དང་བཏུང་བ་དག་ཡོད་དམ། དེས་སྨྲས་པ། དཔོན་པོ་མཆིས་སོ། །དེ་ནས་

  858. 119b

    ཁྱིམ་བདག་སྡུམས་བྱེད་འཁོར་དང་བཅས་པ་ནི་འདུག་གོ། །སྐྱེ་བོའི་ཚོགས་ནི་ཀུན་དུ་དོང་ངོ་། །མུ་གེ་ཆེན་པོ་ཉམ་ང་བ། དགོན་པ་སློང་མོ་པས་ཟས་རྙེད་པར་དཀའ་བ་བྱུང་བ་ལ་སངས་རྒྱས་བཅོམ་ལྡན་འདས་རྣམས་འབྱུང་བ་མེད་པ་ན་རང་སངས་རྒྱས་དམན་པ་དང་ངན་པ་ལ་ སྙིང་བརྩེ་བ་ཅན། བས་མཐའི་གནས་མལ་བརྟེན་པ། འཇིག་རྟེན་གྱི་ཡོན་གནས་གཅིག་པུ་དག་འཇིག་རྟེན་དུ་འབྱུང་བར་འགྱུར་བས་དེའི་ཚེ་བཱ་རཱ་ཎ་སཱི་དང་ཧ་ཅང་ཡང་མི་རིང་བའི་བསྟི་གནས་ཞིག་ཏུ་རང་སངས་རྒྱས་ལྔ་བརྒྱ་གནས་སོ། །གང་གི་ཚེ་མུ་གེའི་དུས་ཀྱི་འཆི་བའི་འཇིགས་ སུ་རུང་བས་སྐྱེ་བོའི་ཚོགས་སྐྲག་ནས་ཀུན་དུ་དོང་བ་དེའི་ཚེ་དེ་རྣམས་ཀྱི་བསོད་སྙོམས་ཆད་ནས་དེ་དག་ཐམས་ཅད་འདུས་ཏེ་ཁྱིམ་བདག་སྡུམས་བྱེད་གང་ན་བ་དེར་དོང་ནས་སྨྲས་པ། ཁྱིམ་བདག་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་བསོད་སྙོམས་རྒྱུན་དུ་སྦྱོར་རམ། དེས་སྨྲས་པ། མངན་ལ་རྨས་ཏེ་བགྱིའོ་ཞེས་དེས་མངན་བྱེད་པའི་མི་ལ་སྨྲས་པ། ཀྱེ་ནང་རྗེ་བདག་ཅག་གི་བང་མཛོད་ན་བདག་ཅག་དང་རབ་ཏུ་བྱུང་བ་ལྔ་བརྒྱ་པོ་གང་ཡིན་པ་འདི་རྣམས་ཀྱི་ལོ་བཅུ་གཉིས་ཀྱི་བཟའ་བ་དང་བཏུང་བ་ཡོད་དམ། དེས་སྨྲས་པ། དཔོན་པོ་མཆིས་སོ། །དེ་ནས་རང་ སངས་རྒྱས་ལྔ་བརྒྱ་པོ་དེ་རྣམས་ལ་ཁས་བླངས་སོ། །ཁྱིམ་བདག་སྡུམས་བྱེད་ཀྱིས་རབ་ཏུ་བྱུང་བ་ལྔ་བརྒྱའི་བསོད་སྙོམས་སྦྱར་ཏོ་ཞེས་རང་སངས་རྒྱས་ལྔ་བརྒྱ་གཞན་དག་གིས་ཐོས་ནས་ཁྱིམ་བདག་སྡུམས་བྱེད་ཀྱི་དྲུང་དུ་དོང་སྟེ་ཕྱིན་ནས་ཁྱིམ་བདག་སྡུམས་བྱེད་ལ་འདི་སྐད་ཅེས་སྨྲས་ སོ། །ཁྱིམ་བདག་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་བསོད་སྙོམས་ཀུན་དུ་སྦྱོར་རམ། དེས་སྨྲས་པ། འཕགས་པ་དག་ཕུལ་ལགས་བཞིན་དུ་ཡང་བསླང་ཅི་འཚལ། ཁྱིམ་བདག་དེ་རྣམས་ཀྱང་གཞན་ཡིན་ལ་བདག་ཅག་ཀྱང་གཞན་ཡིན་ནོ། །དེས་སྨྲས་པ། འཕགས་ པ་གལ་ཏེ་དེ་ལྟ་ན་མངན་ལ་སྨྲས་ཏེ་བགྱིའོ་ཞེས་དེས་མངན་བྱེད་པའི་མི་ལ་སྨྲས་པ། ཀྱེ་ནང་རྗེ་བདག་ཅག་གི་བང་མཛོད་ན་བདག་ཅག་དང་རབ་ཏུ་བྱུང་བ་སྟོང་པོ་གང་ཡིན་པ་འདི་རྣམས་ཀྱི་ལོ་བཅུ་གཉིས་ཀྱི་བཟའ་བ་དང་། བཏུང་བ་ཡོད་དམ། དེས་སྨྲས་པ། དཔོན་པོ་

  859. 120a

    མཆིས་སོ། །དེར་རང་སངས་རྒྱས་དེ་རྣམས་ལ་སྨྲས་པ། འཕགས་པ་རྣམས་བཞུགས་ཤིག་ཁྱེད་ཀྱི་གདུགས་ཚོད་ཀྱི་དུས་གང་ལགས། དེ་རྣམས་ཀྱིས་སྨྲས་པ། ཁྱིམ་བདག་ཉི་མ་ཕྱེད་མ་ཡོལ་བར་རོ། །དེ་ནས་ཁྱིམ་བདག་སྡུམས་བྱེད་ཀྱིས་སྦྱིན་གཏོང་ གི་ཁང་པ་རྩིག་ཏུ་བཅུག་ནས་སྦྱིན་གཏོང་གི་ཞལ་ཏ་བྱེད་པའི་མི་དང་དུས་ཚོད་སྦྲོན་པ་ཡང་བཞག་ནས་དེ་རྣམས་ཉི་མ་རེ་རེ་ཞིང་ལྷགས་ནས་ཟས་ཀྱི་བྱ་བ་བྱེད་དོ། །དགྲ་བཅོམ་པ་སྟོང་པོ་དེའི་དགེ་འདུན་གྱི་གནས་བརྟན་གང་ཡིན་པ་དེ་ལྷག་པར་མཛེས་པ་མགོ་གདུགས་ལྟར་འདུག་ པས་འཁོར་དེ་ལ་གདུགས་ལྟར་བྱས་ཏེ་གནས་སོ། །ཁྱིམ་བདག་སྡུམས་བྱེད་ཀྱི་བུ་མོས་དགེ་འདུན་གྱི་གནས་བརྟན་དེའི་མགོ་གདུགས་ལྟར་འདུག་ཅིང་ཁ་དོག་རྒྱས་པ་མཆོག་དང་ལྡན་པར་མཐོང་ནས་ཀྱང་ལྷག་པར་དད་པ་སྐྱེས་སོ། །ཇི་ཙམ་དུས་གཞན་ཞིག་ན་དྲོལ་བབ་པ་དང་ ལྷས་ཆར་དབབ་པར་བརྩམས་སོ། །དེ་ནས་བུ་མོ་དེས་དགེ་འདུན་གྱི་གནས་བརྟན་གྱི་སྤྱི་བོར་གདུགས་བཟུང་ནས་ཟན་ཟོས་ཟིན་པ་དང་། རྐང་པ་གཉིས་ལ་གཏུགས་ཏེ་སྨོན་ལམ་བཏབ་པ། དགེ་བའི་རྩ་བ་འདིས་ཇི་ལྟར་འཕགས་པ་འདི་ཡོན་ཏན་གྱི་ཚོགས་ཅི་འདྲ་བའི་རྣམ་པ་འདི་ ལྟ་བུ་དག་ཐོབ་པས་འདི་འཁོར་ལ་གདུགས་ལྟ་བུར་བྱས་ཏེ་གནས་པ་དེ་བཞིན་དུ་བདག་ཀྱང་འཁོར་ལ་གདུགས་ལྟ་བུར་བྱས་ཏེ་གནས་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། ཁྱིམ་བདག་སྡུམས་བྱེད་ཀྱི་བུ་མོ་གང་ཡིན་པ་དེ་དགེ་སློང་ཀུན་ཤེས་ཀཽཎྜི་ནྱ་འདི་ཉིད་ ཡིན་ཏེ། དེ་ན་འདི་གཞོན་ནུ་མར་གྱུར་པ་ན་རང་སངས་རྒྱས་ཀྱི་དགེ་འདུན་གྱི་གནས་བརྟན་གྱི་གདུགས་བཟུང་ནས་སྨོན་ལམ་དུ་ཡོན་ཏན་གྱི་ཚོགས་འདི་ལྟ་བུ་ཐོབ་ནས་འཁོར་ལ་གདུགས་ལྟ་བུར་བྱས་ཏེ་གནས་པར་གྱུར་ཅིག་ཅེས་བཏབ་བོ། །དེས་ན་ད་ལྟར་ཉོན་མོངས་པ་ཐམས་ཅད་ སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་ཀྱང་འཁོར་ལ་གདུགས་ལྟ་བུར་བྱས་ཏེ་གནས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་དེ་ལྟ་བུ་ལ་ཁྱེད་ཀྱིས་བསླབ་པར་བྱའོ་ཞེས་

  860. 120b

    བྱ་བའི་བར་གོང་མ་བཞིན་དུའོ། །གང་གི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་བརྟེན་ནས་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་ པ། བཙུན་པ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་བརྟེན་ནས་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གང་གི་ཕྱིར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ་ཡེ་ཤེས་ དང་ཤེས་བྱ་ཐམས་ཅད་ལ་དབང་བརྙེས་ནས་ཀུན་ཤེས་ཀཽཎྜི་ནྱ་ལ་བརྟེན་ཏེ་ལྷ་བརྒྱད་ཁྲི་དམ་པའི་ཆོས་ཀྱི་རོས་ཚིམ་པར་མཛད་པ་དེ་ལ་ངོ་མཚར་ཅི་ཞིག་ཆེ། འདས་པའི་དུས་ན་ང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་ དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་མ་གྲོལ་ཏེ། དུད་འགྲོ་བྱོལ་སོང་གི་ལུས་སུ་སྐྱེས་པ་ན། ཀཽཎྜི་ནྱ་སྲིན་བུ་ཀི་ཏ་ཀར་གྱུར་པ་ལ་བརྟེན་ནས་སྲིན་བུ་ཀི་ཏ་ཀ་བརྒྱད་ ཁྲི་རང་གི་ཤས་ཚིམ་པར་བྱས་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་ཏེ་རྒྱ་མཚོ་ཆེན་པོའི་རུས་སྦལ་རྣམས་ཀྱི་ནང་དུ་སྐྱེས་ནས་དེ་རྣམས་ཀྱི་གཙོ་བོར་གྱུར་ཏོ། །ཇི་ཙམ་ན་ཚོང་པ་ལྔ་བརྒྱ་རྒྱ་མཚོ་ཆེན་པོའི་གྲུ་བོ་ཆེ་ བསྒྲུབས་ནས་རྒྱ་མཚོ་ཆེན་པོར་ཞུགས་ཏེ། དེ་ནས་རིན་པོ་ཆེ་སྣ་ཚོགས་བླངས་ནས་སླར་ལོག་པ་ལས་འདི་ལྟར་གྲུ་བོ་ཆེ་ཆུ་སྲིན་ཉའི་རིགས་ཀྱི་ཚན་གྱིས་ཕུག་སྟེ། དེ་ན་ཀུ་ཅོ་ཆེན་པོ་བྱུང་བའི་སྒྲ་དེ་རུས་སྦལ་གྱིས་ཐོས་ནས་རྒྱ་མཚོ་ཆེན་པོ་ནས་ལངས་ཏེ། དེ་དེ་རྣམས་ཀྱི་དྲུང་དུ་སོང་

  861. 121a

    ནས་སྨྲས་པ། ཤེས་ལྡན་དག་བག་ཚ་བ་བོར་ལ་ཁོ་བོའི་རྒྱབ་ཏུ་ཞོན་ཅིག་དང་ཁོ་བོས་བསྒྲལ་བར་བྱའོ། །དེ་ནས་ཚོང་པ་དེ་རྣམས་ཤི་བ་ལས་སོས་པ་བཞིན་དུ་ཐམས་ཅད་རུས་སྦལ་གྱི་རྒྱབ་ཏུ་ཞོན་ཏེ། དེས་དེ་རྣམས་ཁྱེར་ནས་རྒྱ་མཚོའི་འགྲམ་དུ་ཕྱོགས་ཏེ་ཆས་པ་ ན་ཁུར་གྱིས་ཤིན་ཏུ་བཙིར་ཀྱང་བརྩོན་འགྲུས་ལ་གནས་ཤིང་སྙོམ་པ་མ་བསྐྱེད་དེ། དེ་ལུས་དུབ་པས་དེ་རྣམས་ལེགས་པར་བསྒྲལ་ཏེ་མགྲིན་པ་བརྐྱང་ནས་གཉིད་ལོག་གོ། །དེ་དང་ཧ་ཅང་ཡང་མི་རིང་བ་ཞིག་ན་སྲིན་བུ་ཀི་ཏ་ཀ་རྣམས་ཀྱི་ཚང་ཡོད་པས་དེ་ནས་ཀི་ཏ་ཀ་གཅིག་རྒྱུ་ཞིང་སོང་ བ་ན་དྲི་ཚོར་ཏེ་དེའི་དྲུང་དུ་སོང་བ་དང་། དེ་ནས་ལུས་ཆེན་པོ་དེ་གཉིད་ལོག་པར་མཐོང་ནས་རིངས་པའི་འགྲོས་ཀྱིས་སྲིན་བུ་ཀི་ཏ་ཀའི་ཚང་དུ་སོན་ཏེ། རང་རང་གི་བརྡས་ཀི་ཏ་ཀ་རྣམས་ལ་གོ་བར་བྱས་ནས་སྲིན་བུ་ཀི་ཏ་ཀ་བརྒྱད་ཁྲི་དེད་དེ་རུས་སྦལ་གྱི་དྲུང་དུ་དོང་ངོ་། །དེ་ནས་དེ་གཉིད་ ལོག་སྟེ་ཤི་བ་བཞིན་དུ་སེམས་མེད་པ་ལ་བཟའ་བར་བརྩམས་ཏེ། གང་གི་ཚེ་དེའི་ཤ་ཆེན་པོ་རྣམས་ལས་ཟོས་ནས་ངལ་བས་དུབ་སྟེ་གཉིད་སྟུག་པོས་ནོན་པས་མ་ཚོར་རོ། །ཇི་ཙམ་གནད་རྣམས་ཀྱི་ཤ་རྣམས་ཟ་བ་དེའི་ཚེ་སད་ན་སྲིན་བུ་ཀི་ཏ་ཀ་ཐམས་ཅད་ཀྱིས་ལུས་ཡོག་པར་མཐོང་ ནས་དེས་བསམས་པ། གལ་ཏེ་ལུས་བསྒུལ་ལམ་བསྒྱུར་ན་གདོན་མི་ཟ་བར་འདི་རྣམས་འཆི་བར་འགྱུར་ཏེ། སྲོག་ཆགས་གཞན་ལ་གནོད་པར་བྱེད་པ་བས་ནི་སྲོག་དང་བྲལ་ཡང་བླའོ་སྙམ་དུ་བསམས་ནས། གནད་རྣམས་སུ་ཕུག་ཅིང་ཚིགས་རྣམས་ཕྲལ་བ་ན་སྨོན་ལམ་གདབ་ པར་བརྩམས་པ། ཇི་ལྟར་སྲིན་བུ་ཀི་ཏ་ཀ་བརྒྱད་ཁྲི་པོ་འདི་རྣམས་ལ་ཤ་དང་ཁྲག་གིས་ཚིམ་པར་བྱས་པ་དེ་བཞིན་དུ་བདག་མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ཡང་དེ་རྣམས་ཆོས་ཀྱི་རོས་ཚིམ་པར་བྱེད་པར་ གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རུས་སྦལ་གྱི་གཙོ་བོ་གང་ཡིན་པ་དེ་ནི་ང་ཉིད་ཡིན་ནོ། །སྲིན་བུ་ཀི་ཏ་ཀ་དེ་རྣམས་ལ་ལམ་སྟོན་པ་གང་ཡིན་པ་དེ་ནི་དགེ་སློང་ཀཽཎྜི་ནྱ་འདི་ཉིད་ཡིན་ནོ། །དེ་ལ་བརྟེན་ནས་ཤ་དང་ཁྲག་གིས་ཚིམ་

  862. 121b

    པར་བྱས་པའི་སྲིན་བུ་ཀི་ཏ་ཀ་བརྒྱད་ཁྲི་པོ་གང་དག་ཡིན་པ་དེ་དག་ནི་ལྷ་བརྒྱད་ཁྲི་པོ་འདི་དག་ཉིད་ཡིན་ཏེ། དེ་ན་ཡང་ངས་རང་གི་ཁྲག་གིས་ཚིམ་པར་བྱས་སོ། །ད་ལྟར་ཡང་ངས་དེ་རྣམས་དམ་པའི་ཆོས་ཀྱི་རོས་ཚིམ་པར་མཛད་དོ། །དགེ་སློང་དག་དེ་ལྟ་བས་ན་གཅིག་ཏུ་གནག་པ་རྣམས་ ཀྱི་ལས་ཀྱི་རྣམ་པར་སྨིན་པ་ནི་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ། །གང་གི་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་ བྲལ་ཞིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་གྲོལ་ནས་ཐམས་ཅད་མཁྱེན་ཅིང་རྣམ་པ་ཐམས་ཅད་མཁྱེན་ཏེ་ཡེ་ཤེས་དང་ཤེས་ བྱ་ཐམས་ཅད་ལ་དབང་བརྙེས་ནས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ། ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེ་ལ་ངོ་མཚར་ཅི་ཞིག་ཚེ། འདས་པའི་དུས་ན་ང་ འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡོངས་སུ་མ་གྲོལ་

  863. 122a

    བ་ན། འདི་དག་ལ་རང་གི་ཁྲག་གིས་ཚིམ་པར་བྱས་ནས་བརྟུལ་ཞུགས་ལྔའི་གཞི་རྣམས་ལ་བཀོད་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་རྡོ་རྗེའི་དཔུང་པ་ཞེས་བྱ་བ་འབྱོར་བ་དང་ཞེས་བྱ་བ་ནས་སྐྱེ་བོ་དང་མི་མང་པོས་གང་ བ་ན་རྒྱལ་སྲིད་བྱེད་དུ་འཇུག་སྟེ་ཞེས་བྱ་བའི་བར་དུ་སྟེ། རྒྱལ་པོ་དེ་ཡང་དད་པ་བཟང་བ། དགེ་བའི་རྩ་བ་ཅན། བདག་ལ་ཕན་པ་དང་གཞན་ལ་ཕན་པར་ཞུགས་པ། སྙིང་རྗེའི་བདག་ཉིད་ཆེན་པོ། ཆོས་འདོད་པ་སྐྱེ་དགུ་ལ་བྱམས་པ། ཐམས་ཅད་སྦྱིན་པ། ཐམས་ཅད་ ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། གཏོང་བ་ཆེན་པོ་ལ་གནས་པ་སྟེ། དེ་ལྷག་པར་བྱམས་པ་ལ་ཤིན་ཏུ་གོམས་པས་དེ་ཉིན་གཅིག་ལ་ལན་གསུམ་བྱམས་པ་ལ་སྙོམས་པར་འཇུག་པར་བྱེད་དེ། དེ་བྱམས་པ་ལ་སྙོམས་པར་ཞུགས་པ་ན། སློང་བའི་སྐྱེ་བོས་ཕོངས་པར་གྱུར་ནས་དེས་བློན་པོ་རྣམས་ལ་བསྒོ་བ། ཤེས་ལྡན་དག་གྲོང་ཁྱེར་བཱ་རཱ་ཎ་སཱིའི་གྲོང་ཁྱེར་གྱི་སྒོ་བཞི་རྣམས་སུ་སྦྱིན་གཏོང་གི་ཁང་པ་རྩིག་ཏུ་བཅུག་ལ་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་དང་། ལམ་དུ་འཇུག་པའི་སློང་ མོ་པ་གང་དག་ཅི་དོན་དུ་གཉེར་བ་དེ་དག་བྱིན་ཅིག །ལྷ་བཀའ་བཞིན་འཚལ་ཟས་དང་། སྐོམ་དང་། གོས་དང་། གནས་མལ་དང་། དབྱིག་དང་། གསེར་དང་། ནོར་བུ་དང་། མུ་ཏིག་དང་། བཻཌཱུརྱ་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དང་། རྡོའི་སྙིང་པོ་དང་། སྤུག་དང་། པད་མ་རཱ་ག་དང་། གཡས་སུ་འཁྱིལ་བ་ལ་སོགས་ཏེ་ནོར་མང་པོས་སློང་མོ་པའི་སྐྱེ་བོ་ཚིམ་པར་བྱ་བའི་ཕྱིར་ཕུང་པོར་སྤུངས་སོ། །ཇི་ཙམ་དུས་གཞན་ཞིག་ན་རྒྱལ་པོ་རྣམ་ཐོས་ཀྱི་བུས་རྒྱལ་པོའི་ཕོ་བྲང་ལྕང་ལོ་ཅན་ནས་ མདངས་འཕྲོག་པའི་གནོད་སྦྱིན་ལྔ་སྤྱུགས་ཏེ། ཕན་ཚུན་འཕྱན་པ་ལས་བཱ་རཱ་ཎ་སཱིར་ཕྱིན་ནས་དེ་རྣམས་ཀྱིས་བ་ལང་རྫི་དང་། ལུག་རྫི་དང་། རྩྭ་ཐུན་དང་། ཤིང་ཐུན་དང་། ལམ་གྱིས་འཚོ་བ་དང་། ལམ་གོལ་བས་འཚོ་བའི་མི་རྣམས་མཐོང་ནས་སྨྲས་པ། ཤེས་ལྡན་དག་

  864. 122b

    ཁྱེད་ཅག་ཁོ་བོ་ཅག་གིས་མི་འཇིགས་སམ། ཤེས་ལྡན་དག་གང་གི་ཕྱིར་ཁོ་བོ་ཅག་གི་རྒྱལ་པོ་བྱམས་པ་དང་སྙིང་རྗེའི་བདག་ཉིད་ཅན་སེམས་ཅན་ལ་ཕན་པའི་བསམ་པས་ཉིན་གཅིག་ལ་ལན་གསུམ་དུ་བྱམས་པ་ལ་སྙོམས་པར་ཞུགས་པ་ཡོད་ན་ཅིའི་ཕྱིར་འཇིགས། དེ་ནས་དེ་རྣམས་ བྲམ་ཟེའི་ཆ་བྱད་དུ་མངོན་པར་སྤྲུལ་ནས་གྲོང་ཁྱེར་བཱ་རཱ་ཎ་སཱིའི་སྒོ་བཞི་རྣམས་སུ་སྦྱིན་གཏོང་གི་ཁང་པ་རྣམས་ལ་བརྟགས་ཏེ་རྒྱལ་པོ་རྡོ་རྗེའི་དཔུང་པ་བྱམས་པ་ལས་ལངས་པར་ཤེས་ནས་དུལ་བའི་ཆ་བྱད་ཀྱིས་རྒྱལ་པོའི་དྲུང་དུ་སོང་ངོ་། །སོང་ནས་རྒྱལ་བ་དང་ཚེ་སྤེལ་བ་དག་རྒྱལ་པོ་ལ་ བྱས་ནས་སྨྲས་པ། ལྷ་བདག་ཅག་བཀྲེས་ལགས་ན་གཡར་ཟས་ཀྱིས་རྗེས་སུ་གཟུང་དུ་གསོལ། རྒྱལ་པོས་བློན་པོ་རྣམས་བཀུག་སྟེ་སྨྲས་པ། ཤེས་ལྡན་དག་བྲམ་ཟེ་འདི་རྣམས་ཁ་ཟས་བསོད་པས་ཚིམ་པར་བྱོས་ཤིག །དེ་རྣམས་ཀྱིས་སྨྲས་པ། བདག་ཅག་ནི་ཤ་དང་ཁྲག་ འཚལ་ལགས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་ཤ་དང་ཁྲག་གི་འབྱོར་པ་མེད་ན་ཚོང་འདུས་ནས་ཆོས་བཞིན་གྱིས་རྙེད་པའི་ཁྲག་བྱིན་ཅིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་མོད་ལ་བཀུམ་པའི་ཤ་དང་ཁྲག་འཚལ་ན། མོད་ལ་ བཀུམ་པའི་ཤ་དང་ཁྲག་གིས་རྗེས་སུ་གཟུང་བར་མཛོད་ཅིག །རྒྱལ་པོས་བསམས་པ། གཞན་ལ་གནོད་པ་མ་བྱས་པར་མོད་ལ་བསད་པའི་ཤ་དང་ཁྲག་ག་ལ་རྙེད་ཀྱིས་ཅི་ནས་ཀྱང་འདི་རྣམས་ལ་བདག་གིས་རང་གི་ཁྲག་སྦྱིན་པར་བྱའོ་སྙམ་སྟེ། དེ་ནས་དཔྱད་མཁན་རྣམས་བཀུག་སྟེ་ སྨྲས་པ། ཤེས་ལྡན་དག་ངའི་ཡན་ལག་གི་རྩ་ཐམས་ཅད་ཆོད་ཅིག་དང་། སློང་མོ་པའི་སྐྱེ་བོ་ཚིམ་པར་བྱའོ། །དཔྱད་མཁན་རྣམས་ཀྱིས་སྨྲས་པ། ལྷ་མི་ཕལ་པ་རྣམས་ཀྱི་ཕྱིར་བདག་ཅག་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་ནི་བཟོའི་གནས་ དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་པས་དེས་རང་ཉིད་ཀྱིས་ལུས་ཀྱི་ཡན་ལག་ལྔ་མཚོན་གྱིས་གཏར་ཏེ། དེ་ནས་རང་གི་ཁྲག་གིས་ཚིམ་པར་བྱས་ནས་དེ་རྣམས་ལ་དེ་ལྟ་བུའི་ཆོས་བཤད་དེ། དེ་ཐོས་པས་གནོད་སྦྱིན་དེ་རྣམས་བརྟུལ་ཞུགས་ལྔའི་གཞི་རྣམས་ལ་

  865. 123a

    བཀོད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་རྡོ་རྗེའི་དཔུང་པ་ཞེས་བྱ་བར་གྱུར་པ་དེ་ནི་ང་ཉིད་ཡིན་ནོ། །མདངས་འཕྲོག་པའི་གནོད་སྦྱིན་ལྔ་པོ་གང་དག་ཡིན་པ་དེ་དག་ནི་ལྔ་སྡེའི་དགེ་སློང་འདི་དག་ཉིད་ཡིན་ཏེ། དེ་ན་ཡང་ངས་འདི་རྣམས་ རང་གི་ཁྲག་གིས་ཚིམ་པར་བྱས་ནས་བརྟུལ་ཞུགས་ལྔའི་གཞི་རྣམས་ལ་བཀོད་དོ། །ད་ལྟར་ཡང་ངས་འདི་རྣམས་དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ནས་བཏོན་ཏེ། ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་ དོ། །གང་གི་ཚེ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལྔ་སྡེའི་དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་ པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟར་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཞིང་ཞེས་བྱ་བ་ནས་ཡེ་ཤེས་དང་ཤེས་བྱ་ཐམས་ཅད་ལ་དབང་བརྙེས་ནས་ཞེས་བྱ་བའི་བར་དུ་སྟེ། ལྔ་སྡེའི་ དགེ་སློང་རྣམས་དམ་པའི་ཆོས་ཀྱི་རོས་ཚིམ་པར་མཛད་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་དེ་ལ་ངོ་མཚར་ཅི་ཞིག་ཆེ། ང་འདས་པའི་དུས་ན་འདོད་ཆགས་དང་བཅས་ཞེས་བྱ་བ་ནས་སྡུག་ བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མ་གྲོལ་བ་ན་ཞེས་བྱ་བའི་བར་གོང་མ་བཞིན་དུ་སྟེ། འདི་རྣམས་རང་གི་ཤས་ཚིམ་པར་བྱས་ནས་བརྟུལ་ཞུགས་ལྔའི་གཞི་རྣམས་ལ་བཀོད་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་

  866. 123b

    གྲོང་ཁྱེར་བཱ་རཱ་ཎ་སཱི་ན་རྒྱལ་པོ་བྱམས་པའི་སྟོབས་ཞེས་བྱ་བ་འབྱོར་པ་དང་ཞེས་བྱ་བ་ནས་སྐྱེ་བོ་དང་མི་མང་པོ་ཡོད་པ་རྒྱལ་སྲིད་བྱེད་དུ་འཇུག་སྟེ་ཞེས་བྱ་བའི་བར་དུ་སྟེ། བྱམས་པའི་བདག་ཉིད་སྙིང་རྗེ་ཅན་བདག་ཉིད་ཆེན་པོ་སེམས་ཅན་ཐམས་ཅད་ལ་བྱམས་པ་དང་ལྡན་པ་ ཞིག་ཡོད་དེ། ཇི་ཙམ་དུས་གཞན་ཞིག་ན་རྒྱལ་པོ་རྣམ་ཐོས་ཀྱི་བུས་རྒྱལ་པོའི་ཕོ་བྲང་ལྕང་ལོ་ཅན་ནས་མདངས་འཕྲོག་པའི་གནོད་སྦྱིན་ལྔ་ཉེས་པ་འགའ་ཞིག་གི་ཕྱིར་སྤྱུགས་ནས། དེ་རྣམས་ལྗོངས་དེ་ནས་རྒྱུ་ཞིང་བཱ་རཱ་ཎ་སཱིར་ཕྱིན་ནས་དེ་རྣམས་ལ་སུས་ཀྱང་གཏོར་ མ་འམ། མེ་ཏོག་ཕྲེང་དང་། ཡོ་བྱད་དག་མ་བྱིན་ནས། དེ་རྣམས་ཁྲོས་པས་ཡམས་ཀྱི་ནད་བཏང་སྟེ་བཱ་རཱ་ཎ་སཱིའི་སྐྱེ་བོའི་ཚོགས་ཤི་བར་གྱུར་ཏོ། །བློན་པོ་རྣམས་ཀྱིས་རྒྱལ་པོ་བྱམས་པའི་སྟོབས་ལ་སྨྲས་པ། ལྷ་བཱ་རཱ་ཎ་སཱིའི་སྐྱེ་བོའི་ཚོགས་ཏེ་པོར་འགུམ་ལགས་ སོ། །རྒྱལ་པོས་དེ་རྣམས་ལ་བསྒོ་བ། དེང་ལ་བཱ་རཱ་ཎ་སཱི་ཁོ་ནར་དྲིལ་སྒྲོགས་སུ་བཅུག་ལ། ཤེས་ལྡན་དག་རྒྱལ་པོ་བྱམས་པའི་སྟོབས་ཀྱིས་བཀའ་སྩལ་པ། ང་སེམས་ཅན་ཐམས་ཅད་ལ་ཕན་པའི་བསམ་པ་ལ་ལྷག་པར་རྩོམ་པའི་ཡིད་ཀྱིས་ཉིན་མཚན་འདའ་བར་ བྱེད་ཀྱིས། དེ་ལ་ཁྱེད་ཅག་གིས་ཀྱང་སེམས་ཅན་ཐམས་ཅད་ཀྱི་རྗེས་སུ་སོང་བའི་བྱམས་པ་ཡིད་ལ་བྱོས་ཤིག་དང་། དེ་ལྟ་ན་ཞི་བར་འགྱུར་རོ། །དེ་རྣམས་སེམས་ཅན་ཐམས་ཅད་ཀྱི་རྗེས་སུ་སོང་བའི་བྱམས་པ་ཡིད་ལ་བྱེད་པ་ལ་ཞུགས་པ་ན་མདངས་འཕྲོག་པའི་གནོད་ སྦྱིན་རྣམས་ཀྱིས་བཱ་རཱ་ཎ་སཱིའི་ཉེ་འཁོར་དུ་རྒྱུ་བར་བརྩམས་ན་འཇུག་མ་ནུས་སོ། །དེ་རྣམས་ཀྱིས་འཇུག་མ་ནུས་པས་གླགས་མ་རྙེད་དོ། །གླགས་མ་རྙེད་པས་བ་ལང་རྫི་དང་། ལུག་རྫི་དང་། རྩྭ་ཐུན་དང་། ཤིང་ཐུན་དང་། ལམ་གྱིས་འཚོ་བ་དང་། ལམ་གོལ་བས་འཚོ་བའི་མི་རྣམས་མཐོང་ ནས་དྲིས་པ། ཤེས་ལྡན་དག་ཁྱེད་ཅག་ཁོ་བོ་ཅག་གིས་མི་འཇིགས་སམ། དེ་རྣམས་ཀྱིས་སྨྲས་པ། མི་འཇིགས་སོ། །ཅིའི་ཕྱིར། འདི་ལྟར་བདག་ཅག་གི་རྒྱལ་པོ་བྱམས་པའི་སྟོབས་དགོངས་པ་གང་ཡིན་པ་དེ་སེམས་པས་སོ། །རྒྱལ་པོ་བྱམས་པའི་སྟོབས་ཅི་

  867. 124a

    དགོངས། སེམས་ཅན་ཐམས་ཅད་ཀྱི་རྗེས་སུ་སོང་བའི་བྱམས་པའོ། །དེ་རྣམས་ཀྱིས་བསམས་པ། འདིར་རྒྱུ་འདིས་ན་ད་ལྟར་བདག་ཅག་གིས་གླགས་མ་རྙེད་དོ་སྙམ་ནས་དེ་རྣམས་བཱ་རཱ་ཎ་སཱིའི་སྒོ་ནས་སྒོར་རྒྱུ་ཞིང་རྒྱལ་པོ་བྱམས་པའི་སྟོབས་ནམ་ཞིག་ མཐོང་སྙམ་མོ། །ཇི་ཙམ་དུས་གཞན་ཞིག་ན་རྒྱལ་པོ་བྱམས་པའི་སྟོབས་ཕྱི་རོལ་དུ་སྐྱེད་མོས་ཚལ་དུ་ཆས་པ་དང་། དེ་ནས་དེ་རྣམས་བྲམ་ཟེའི་ཆ་བྱད་དུ་བདག་ཉིད་མངོན་པར་སྤྲུལ་ནས་སྤྱོད་ལམ་ཞི་བས་རྒྱལ་པོའི་དྲུང་དུ་ཉེ་བར་དོང་སྟེ་རྒྱལ་བ་དང་ཚེ་སྤེལ་བ་དག་བྱས་ནས་སྨྲས་པ། ལྷ་བདག་ཅག་བཀྲེས་ལགས་ན་གཡར་ཟས་ཀྱིས་རྗེས་སུ་གཟུང་དུ་གསོལ། རྒྱལ་པོས་བློན་པོ་རྣམས་བཀུག་སྟེ་བསྒོ་བ། ཤེས་ལྡན་དག་བྲམ་ཟེ་འདི་རྣམས་ཁ་ཟས་བསོད་པས་ཚིམ་པར་བྱོས་ཤིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་ཤ་དང་ཁྲག་འཚལ་ལགས་ སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་ཤ་དང་ཁྲག་འབྱོར་པ་མེད་ན་ཚོང་འདུས་ནས་ཆོས་བཞིན་གྱིས་རྙེད་པའི་ཤ་དང་ཁྲག་བྱིན་ཅིག །ལྷ་བདག་ཅག་ནི་མོད་ལ་བཀུམ་པའི་ཤ་དང་ཁྲག་འཚལ་ན་མོད་ལ་བཀུམ་པའི་ཤ་དང་ཁྲག་གིས་རྗེས་ སུ་གཟུང་དུ་གསོལ། རྒྱལ་པོས་བསམས་པ། སེམས་ཅན་གཞན་ལ་གནོད་པ་མ་བྱས་པར་ནི་མོད་ལ་བསད་པའི་ཤ་དང་ཁྲག་ག་ལ་རྙེད་ཀྱིས། ཅི་ནས་ཀྱང་འདི་རྣམས་ལ་བདག་གིས་རང་གི་ཁྲག་སྦྱིན་པར་བྱའོ་སྙམ་སྟེ། དེ་ནས་དཔྱད་མཁན་རྣམས་བཀུག་ནས་སྨྲས་པ། ཤེས་ལྡན་དག་ངའི་ཡན་ལག་གི་རྩ་ཐམས་ཅད་ཆོད་ཅིག་དང་སློང་མོ་བའི་སྐྱེ་བོ་ཚིམ་པར་བྱའོ། །དཔྱད་མཁན་གྱིས་སྨྲས་པ། ལྷ་མི་ཕལ་པ་རྣམས་ཀྱི་ཕྱིར་བདག་ཅག་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་ནི་བཟོའི་གནས་དང་ལས་ཀྱི་གནས་དེ་ དང་དེ་དག་ལ་མཁས་པ་ཡིན་པས་དེས་རང་ཉིད་ཀྱི་ལུས་ཀྱི་ཡན་ལག་ལྔ་མཚོན་གྱིས་གཏར་ཏེ། དེ་ནས་རང་གི་ཁྲག་གིས་ཚིམ་པར་བྱས་ནས་དེ་རྣམས་ལ་དེ་ལྟ་བུའི་ཆོས་བཤད་དེ། གང་ཐོས་པས་གནོད་སྦྱིན་དེ་རྣམས་བརྟུལ་ཞུགས་ལྔའི་གཞི་རྣམས་ལ་བཀོད་དོ། །དགེ་

  868. 124b

    སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་བྱམས་པའི་སྟོབས་གང་ཡིན་པ་དེ་ནི་ང་ཉིད་ཡིན་ནོ། །མདངས་འཕྲོག་པའི་གནོད་སྦྱིན་ལྔ་པོ་གང་དག་ཡིན་པ་དེ་དག་ནི་ལྔ་སྡེའི་དགེ་སློང་འདི་ཉིད་ཡིན་ཏེ། དེ་ན་ཡང་ངས་འདི་རྣམས་རང་གི་ཁྲག་གིས་ཚིམ་པར་བྱས་ཏེ་ བརྟུལ་ཞུགས་ལྔའི་གཞི་རྣམས་ལ་བཀོད་དོ། །ད་ལྟར་ཀྱང་ངས་འདི་རྣམས་དམ་པའི་ཆོས་ཀྱི་རོས་ཚིམ་པར་བྱས་ནས་འཁོར་བའི་འབྲོག་དགོན་པ་ནས་བཏོན་ཏེ་ཤིན་ཏུ་མཐར་ཐུག་པའི་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་དོ། །གང་གི་ཚེ་བཅོམ་ལྡན་འདས་ཀྱིས་ ལོ་དྲུག་ཏུ་དཀའ་བ་སྤྱད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་ནས་བཱ་རཱ་ཎ་སཱིར་གཤེགས་ཏེ། ཆོས་ཀྱི་འཁོར་ལོ་བསྐོར་ནས་ལྔ་སྡེ་དང་། ཉེ་ལྔའི་སྡེ་དང་། དྲུག་བཅུའི་ཚོགས་བཟང་པོ་རྣམས་བཏུལ་བས་དགེ་སློང་མང་དུ་གྱུར་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན་ཕྲིན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་དགུང་ལོ་དྲུག་ཏུ་དཀའ་བ་སྤྱད་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་སྐུ་ཚེ་གཞན་རྣམས་སུ་ཕྲིན་ལས་བྱས་ཤིང་བསགས་པ་དང་། ཚོགས་རྙེད་པ་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཻ་བྷི་ཊིང་གའི་གྲོང་ཁྱེར་ གྱི་གྲོང་རྡལ་འབྱོར་བ་དང་ཞེས་བྱ་བ་ནས་སྐྱ་བོ་དང་མི་མང་པོ་ཡོད་པ་ཞེས་བྱ་བའི་བར་དུ་སྟེ། དགེ་སློང་དག་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་ན་བྲམ་ཟེའི་ཤིང་སཱ་ལ་ཆེན་པོ་ལྟ་བུ་ནྱ་གྲོ་ངྷ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་བྱུང་སྟེ། བཻ་བྷི་ཊིང་གའི་འདུ་ཏང་དང་ བཅས། ས་དང་། ཤིང་དང་། ཆུར་བཅས་པར་རྒྱལ་པོ་ཀྲྀ་ཀཱིས་བྲམ་ཟེའི་སྦྱིན་པར་བྱིན་ནས་འབྱོར་པ་ན་ཡོངས་སུ་ལོངས་སྤྱོད་དོ། །དགེ་སློང་དག་བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་ངྷའི་སློབ་མ་བྲམ་ཟེའི་ཁྱེའུ་བླ་མ་ཞེས་བྱ་བ་ཕ་དང་མའི་རིགས་དང་ལྡན་པ། མོ་ཕྱོགས་

  869. 125a

    ནས་དག་པ། མེས་པོའི་ཕྱོགས་དང་། ཕྱི་མོའི་ཕྱོགས་ཟུང་བདུན་རྒྱུད་ཀྱིས་བཟུང་སྟེ་རིགས་ལ་གཏམ་གྱིས་མ་ཕོག་པ། ཀློག་ཏུ་འཇུག་པ། གསང་ཚིག་འཛིན་པ། རིག་བྱེད་གསུམ་པོ་སྒྲ་ངེས་པར་སྦྱོར་བ་དང་། ཤེས་གསལ་དང་བཅས་པ་དང་། ཡི་གེ་ རབ་ཏུ་འབྱེད་པ་དང་བཅས་པ་དང་ལྔ་པོ་དེ་ལྟ་བུ་བྱུང་བ་ཅན་རྣམས་ཀྱི་ཕ་རོལ་དུ་ཕྱིན་ཅིང་ལུང་སྟོན་པར་བྱེད་པ། གཟུགས་བཟང་པོ་བལྟ་ན་སྡུག་པ་མཛེས་པ་ཞིག་ཡོད་དེ། བྲམ་ཟེ་ཤིང་སཱ་ལ་ཆེན་པོ་ལྟ་བུ་ནྱ་གྲོ་ངྷའི་བྲམ་ཟེའི་ཁྱེའུ་ལྔ་བརྒྱ་ཙམ་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་ གོ། །དགེ་སློང་དག་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་ན་རྫ་མཁན་དགའ་སྐྱོང་ཞེས་བྱ་བ་སངས་རྒྱས་ལ་མངོན་པར་དད་པ། ཆོས་དང་དགེ་འདུན་ལ་མངོན་པར་དད་པ། སངས་རྒྱས་ལ་སྐྱབས་སུ་སོང་བ། ཆོས་དང་དགེ་འདུན་ལ་སྐྱབས་སུ་སོང་བ། སངས་རྒྱས་ལ་གཅིག་ཏུ་ བྱེད་པ། ཆོས་དང་དགེ་འདུན་ལ་གཅིག་ཏུ་བྱེད་པ། སངས་རྒྱས་ལ་ཡིད་གཉིས་དང་དང་ཐེ་ཚོམ་མེད་པ། ཆོས་དང་དགེ་འདུན་དང་། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་ལ་ཡིད་གཉིས་དང་ཐེ་ཚོམ་མེད་པ། བདེན་པ་མཐོང་བ། འབྲས་བུ་ཐོབ་ཅིང་རྟོགས་པ། ལོ་མ་དང་གཏུན་སྤངས་པ་ཞིག་གནས་ཏེ། གཞན་དུ་ན་དེ་གང་ན་ཆུས་བརྐོས་པའམ། བྱི་བྲུན་མ་གཏོགས་པ་རང་གི་ལག་གིས་ས་མི་རྐོ་ཞིང་བརྐོར་མི་འཇུག་གོ། །དེ་ནས་ས་ལུས་ཀྱིས་བླངས་ནས་སྲོག་ཆགས་མེད་པའི་ཆུས་སྤྲུས་ཏེ། སྣོད་ རྣམས་བྱས་ཤིང་མཐའ་གཅིག་ཏུ་བཞག་ནས་འདི་སྐད་ཅེས་འཕགས་པ་དག་ཚུར། བཞིན་བཟངས་དག་ཚུར། ཏིལ་ལམ། འབྲས་སམ། མོན་སྲན་སྡེའུ་ལ་སོགས་པའམ། མོན་སྲན་གྲེའུ་ལ་སོགས་པ་མཐའ་གཅིག་ཏུ་ཞོག་ལ་ཁྱེད་ཅག་ལས་གང་ཞིག་སྣོད་གང་དོན་ དུ་གཉེར་བ་དེ་ལོང་ལ་དེང་ཤིག་ཅེས་སྨྲས་ཤིང་དེས་དེ་ལས་ཕ་མ་ལོང་བ་གཉིས་གསོ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་དུས་སུ་བསོད་སྙོམས་འབུལ་ལོ། །བྲམ་ཟེའི་ཁྱེའུ་བླ་མའི་གྲོགས་པོ་དང་། སྙིང་དུ་སྡུག་པ་དང་། ནེའུ་ཟླ་ཡང་ཡིན་

  870. 125b

    ནོ། །དེ་ནས་རྫ་མཁན་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་པ་ དང་། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་རྫ་མཁན་དགའ་སྐྱོང་ཡང་དག་པར་རྫོགས་པའི་སངས་རྒྱས་ འོད་སྲུང་གིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ནས་སོང་ངོ་། །དེའི་ཚེ་བྲམ་ཟེའི་ཁྱེའུ་བླ་མ་ཤིང་རྟ་ཐམས་ཅད་ནས་དཀར་བ་རྟ་རྒོད་མ་དང་ལྡན་པའི་ནང་དུ་ཞུགས། གསེར་གྱི་ཁར་བ་དང་རིལ་བ་ ཐོགས་ཏེ། བྲམ་ཟེའི་ཁྱེའུའི་ཚོགས་ཀྱིས་ཡོངས་སུ་བསྐོར་ཅིང་བྲམ་ཟེའི་ཁྱེའུའི་ཚོགས་ཀྱིས་མདུན་གྱིས་བལྟས་ཏེ། བཻ་བྷི་ཊིང་གའི་ཕྱི་རོལ་དུ་བྲམ་ཟེའི་ཁྱེའུ་རྣམས་གསང་ཚིག་ཀློག་ཏུ་གཞུག་པར་འདོད་ནས་བཻ་བྷི་ཊིང་ག་ནས་བྱུང་བ་དང་བྲམ་ཟེའི་ཁྱེའུ་བླ་མས་རྫ་མཁན་དགའ་སྐྱོང་ རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་གང་ནས་འདིར་འོངས། དེས་པ་བླ་མ་བདག་ནི་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱས་ནས་ད་གཟོད་འདིར་འོངས་ཀྱིས། དེས་པ་བླ་མ་ཚུར། བདག་ ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །དེས་པ་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལྟ་བ་ཐོང་ཤིག །བསྙེན་བཀུར་བྱ་བ་ཐོང་ཤིག །དེ་ཅིའི་ཕྱིར་ཞེ་ན། དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད།

  871. 126a

    བྱང་ཆུབ་ནི་མཆོག་ཏུ་དཀའ་བ་ཡིན་ནོ། །དེས་པ་བླ་མ་ཁྱོད་འདི་སྐད་ཅེས་དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ་ཞེས་མ་སྨྲ་ཤིག །འདི་ལྟར་བཅོམ་ལྡན་འདས་དེ་ཉིད་སངས་རྒྱས་ཡིན་ཏེ། དེས་ཆོས་ཐམས་ ཅད་སངས་རྒྱས་སོ། །རྫ་མཁན་དགའ་སྐྱོང་གིས་ལན་གཉིས་ལན་གསུམ་དུ་ཡང་བྲམ་ཟེའི་ཁྱེའུ་བླ་མ་ལ་འདི་སྐད་ཅེས་སྨྲས་སོ། །དེས་པ་བླ་མ་ཚུར། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །བྲམ་ཟེའི་ཁྱེའུ་བླ་མས་ ལན་གཉིས་ལན་གསུམ་དུ་ཡང་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལྟ་བ་ཐོང་ཤིག །བསྙེན་བཀུར་བྱ་བ་ཐོང་ཤིག །དེ་ཅིའི་ཕྱིར་ཞེ་ན། དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ། །དེས་པ་བླ་མ་ཁྱོད་འདི་སྐད་ཅེས་དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ་ཞེས་མ་སྨྲ་ཤིག །འདི་ལྟར་བཅོམ་ལྡན་འདས་དེ་ཉིད་སངས་རྒྱས་ཡིན་ཏེ། དེས་ཆོས་ཐམས་ཅད་སངས་རྒྱས་སོ། ། དེ་ནས་རྫ་མཁན་དགའ་སྐྱོང་གིས་བྲམ་ཟེའི་ཁྱེའུ་བླ་མའི་ཤིང་རྟའི་ནང་དུ་འཛེགས་ནས་བྲམ་ཟེའི་ཁྱེའུ་བླ་མའི་སྐྲ་ལས་བཟུང་སྟེ། བྲམ་ཟེའི་ཁྱེའུ་བླ་མ་ལ་འདི་སྐད་ཅེས་སྨྲས་སོ། །དེས་པ་བླ་མཚུར། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་ བྱེད་དུ་འདོང་ངོ་། །དེ་ནས་བྲམ་ཟེའི་ཁྱེའུ་བླ་མ་འདི་སྙམ་དུ་སེམས་ཏེ། ཀྱེ་མ་སངས་རྒྱས་མཆོག་མ་ཡིན་པ་ཡང་མ་ཡིན་ཞིང་ཆོས་བཤད་པ་ཡང་མཆོག་མ་ཡིན་པ་མ་ཡིན་ཏེ། དེས་ན་ད་ལྟར་རྫ་མཁན་དགའ་སྐྱོང་ཡུན་རིང་པོ་ནས་ཁྲོ་བ་མ་ཡིན། གཏུམ་པ་མ་ཡིན། བརླང་ བ་མ་ཡིན། གཟུ་ལུམས་ཅན་མ་ཡིན་པ་དེས་ཀྱང་སྐྲ་ལས་བཟུང་བ་ཡན་ཆད་བྱས་སོ་སྙམ་དུ་བསམས་ནས་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་དེ་ཙམ་བྱ་བ་ལ་ཐུག་གམ། དེས་པ་བླ་མ་དེ་ཙམ་བྱ་བ་ལ་ཐུག་ཅེས་སོ། །དེས་པ་དགའ་སྐྱོང་

  872. 126b

    ཅི་དེ་ཙམ་བྱ་བ་ལ་ཐུག་གམ། དེས་པ་བླ་མ་དེ་ཙམ་བྱ་བ་ལ་ཧ་ཅང་ཐུག་ཅེས་སོ། །དེས་པ་དགའ་སྐྱོང་དེའི་ཕྱིར་ཐོང་ཤིག་དང་། བདག་ཅག་ཡང་དག་པར་རྫོགས་པའི་སངས་རྒྱས་འོད་སྲུང་ལ་བསྙེན་བཀུར་བྱེད་དུ་འདོང་ངོ་། །དེ་ནས་བྲམ་ཟེའི་ཁྱེའུ་བླ་མ་དང་རྫ་མཁན་དགའ་སྐྱོང་ ཤིང་རྟ་གཅིག་གི་ནང་དུ་ཞུགས་ནས་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་དོང་སྟེ། དེ་གཉིས་ཀྱིས་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་དོང་སྟེ་ཕྱིན་ནས་ཡང་ དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་རྫ་མཁན་དགའ་སྐྱོང་གིས་ཡང་དག་པར་རྫོགས་པའི་སངས་རྒྱས་འོད་སྲུང་ལ་འདི་སྐད་ཅེས་གསོལ་ཏོ། །བཙུན་པ་བྲམ་ཟེའི་ཁྱེའུ་བླ་ མ་འདི་ནི་སངས་རྒྱས་ལ་མངོན་པར་མ་དད། ཆོས་དང་དགེ་འདུན་ལ་མངོན་པར་མ་དད་ལགས་ཀྱིས། བཅོམ་ལྡན་འདས་ཇི་ལྟར་བྲམ་ཟེའི་ཁྱེའུ་བླ་མ་འདི་སངས་རྒྱས་ལ་མངོན་པར་དད་པ་དང་། ཆོས་དང་དགེ་འདུན་ལ་མངོན་པར་དད་པར་འགྱུར་བ་དེ་ལྟ་བུའི་ཆོས་ལེགས་པར་བཤད་ དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཅང་མི་གསུང་བས་གནང་ངོ་། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་བྲམ་ཟེའི་ཁྱེའུ་བླ་མས་རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ལེགས་པར་གསུངས་པའི་ཆོས་འདུལ་བ་གྱ་ནོམ་པ་འདི་ལྟ་བུ་ཐོས་ན་ཁྱོད་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་ཅིའི་ཕྱིར་རབ་ཏུ་མ་བྱུང་།

  873. 127a

    དེས་པ་བླ་མ་ཇི་ལྟར་ཁོ་བོ་ཕ་མ་ལོང་བ་གཉིས་གསོ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་དུས་དུས་སུ་བསོད་སྙོམས་འབུལ་བར་ཁྱོད་མི་ཤེས་སམ། དེས་པ་དགའ་སྐྱོང་ཁྱོད་རབ་ཏུ་བྱུང་ཡང་རུང་མ་བྱུང་ཡང་རུང་། རེ་ཞིག་ཁོ་བོ་ནི་རབ་ ཏུ་འབྱུང་ངོ་། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྫ་མཁན་དགའ་སྐྱོང་གིས་འདི་སྐད་ཅེས་གསོལ་ཏོ། །བཙུན་པ་བྲམ་ཟེའི་ཁྱེའུ་བླ་མ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ འཚལ་ན། བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ། དེ་རབ་ཏུ་དབྱུང་བ་དང་བསྙེན་པར་རྫོགས་པར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྫ་མཁན་དགའ་སྐྱོང་ལ་ཅང་མི་གསུང་བས་གནང་ངོ་། །དེ་ནས་རྫ་མཁན་དགའ་ སྐྱོང་གིས་ཡང་དག་པར་རྫོགས་པའི་སངས་རྒྱས་འོད་སྲུང་ཅང་མི་གསུང་བས་གནང་བར་རིག་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་སྟན་ལས་ལངས་ནས་སོང་ངོ་། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ གིས་རྫ་མཁན་དགའ་སྐྱོང་སོང་ནས་རིང་པོ་མ་ལོན་པར་ཐུགས་སུ་ཆུད་ནས་བྲམ་ཟེའི་ཁྱེའུ་བླ་མ་རབ་ཏུ་ཕྱུང་བསྙེན་པར་རྫོགས་པར་མཛད་དེ། བཻ་བྷི་ཊིང་གར་ཇི་ཙམ་བཞེད་ཀྱི་བར་དུ་བཞུགས་ནས་བཱ་རཱ་ཎ་སཱི་ཀ་ཤི་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་བཱ་རཱ་ཎ་ སཱིར་བྱོན་ནས་བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ། །རྒྱལ་པོ་ཀྲྀ་ཀཱིས་ཡང་དག་པར་རྫོགས་པའི་སངས་རྒྱས་འོད་སྲུང་ཀ་ཤི་ནས་ལྗོངས་རྒྱུ་ཞིང་གཤེགས་པ་དང་། བཱ་རཱ་ཎ་སཱིར་བྱོན་ནས། བཱ་རཱ་ཎ་སཱིའི་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ་ ཞེས་ཐོས་སོ། །ཐོས་ནས་ཀྱང་བཱ་རཱ་ཎ་སཱི་ནས་བྱུང་སྟེ། ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེར་སོང་ནས་ཕྱིན་པ་དང་། ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་

  874. 127b

    གཅིག་ཏུ་འདུག་པ་དང་། ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲྀ་ཀཱི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་ དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་རྒྱལ་པོ་ཀྲྀ་ཀཱི་སྟན་ལས་ ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཡང་དག་པར་རྫོགས་པའི་སངས་རྒྱས་འོད་སྲུང་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཡང་དག་པར་རྫོགས་པའི་སངས་རྒྱས་འོད་སྲུང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་སྡུམ་པར་ དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་རྒྱལ་པོ་ཀྲྀ་ཀཱི་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་ཀྲྀ་ཀཱིས་ཡང་དག་པར་རྫོགས་པའི་ སངས་རྒྱས་འོད་སྲུང་ཅང་མི་གསུང་བས་གནང་བར་རིག་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་སོང་ངོ་། །དེ་ནས་རྒྱལ་པོ་ཀྲྀ་ཀཱིས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་ གོན་བྱས་ནས་ནང་པར་སྔར་ལངས་ཏེ་གདན་བཤམས་ནོར་བུའི་ཆུ་སྣོད་བཞག་ནས། ཡང་དག་པར་རྫོགས་པའི་སངས་རྒྱས་འོད་སྲུང་ལ་སྤྱན་འདྲེན་གྱིས་དུས་ཚོད་གསོལ་པ། བཙུན་པ་གདུགས་ཚོད་ལགས་ཏེ། བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ། དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་ཚོགས་ཀྱིས་མདུན་དུ་བདར་ནས། རྒྱལ་པོ་ཀྲྀ་ཀཱིའི་བཀད་ས་གང་ན་བ་དེར་གཤེགས་ཏེ་བྱོན་ནས་

  875. 128a

    དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཀྲྀ་ཀཱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ། །ཡང་དག་པར་རྫོགས་པའི་སངས་རྒྱས་འོད་སྲུང་གིས་ཞལ་ཟས་གསོལ་ཟིན་ཏེ། ཕྱག་བཅབས་ལྷུང་བཟེད་གྱུ་བར་རིག་ནས་གསེར་གྱི་བྱ་མ་ བུམ་བླངས་ཏེ་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་གསོལ་བ་བཏབ་པ། བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་བདག་གིས་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ ཡོ་བྱད་རྣམས་དང་། བཅོམ་ལྡན་འདས་ཀྱི་སླད་དུ་གཙུག་ལག་ཁང་ལྔ་བརྒྱ་རྩིག་ཏུ་སྩལ་ཅིང་ཁྲི་དང་། ཁྲིའུ་དང་། ལ་བ་དང་། སྟན་ནང་ཚངས་ཅན་དང་། དབུ་རྟེན་དང་། གོར་བུ་ལྔ་བརྒྱ་ལྔ་བརྒྱ་འཇོག་ཏུ་སྩལ་ཅིང་། འབྲས་སོག་མའི་སྦུབས་སུ་སྨིན་པ་དེ་ལྟ་བུས་བཅོམ་ ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་བགྱིད་ལགས་ན་གནང་བར་མཛད་དུ་གསོལ། རྒྱལ་པོ་ཆེན་པོ་སེམས་མངོན་པར་དད་པ་དེ་ཉིད་ཀྱིས་བྱས་པ་ཡིན་གྱིས་ཆོག་གོ། །ཡང་དག་པར་རྫོགས་པའི་སངས་རྒྱས་འོད་སྲུང་ལ་རྒྱལ་པོ་ཀྲྀ་ཀཱིས་ལན་གཉིས་ལན་གསུམ་ དུ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་བདག་གིས་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་དང་། བཅོམ་ལྡན་འདས་ཀྱི་སླད་དུ་ གཙུག་ལག་ཁང་ལྔ་བརྒྱ་རྩིག་ཏུ་སྩལ་ཅིང་། ཁྲི་དང་། ཁྲིའུ་དང་། ལ་བ་དང་། སྟན་ནང་ཚངས་ཅན་དང་། དབུ་རྟེན་དང་། གོར་བུ་ལྔ་བརྒྱ་ལྔ་བརྒྱ་འཇོག་ཏུ་སྩལ་ཅིང་། འབྲས་སོག་མའི་སྦུབས་སུ་སྨིན་པ་དེ་ལྟ་བུས་བཅོམ་ལྡན་འདས་དང་དགེ་སློང་གི་དགེ་འདུན་ལ་བསྙེན་བཀུར་

  876. 128b

    བགྱིད་ལགས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་འོད་སྲུང་གིས་ལན་གཉིས་ལན་གསུམ་དུ་ཡང་རྒྱལ་པོ་ཀྲྀ་ཀཱི་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་སེམས་མངོན་པར་དད་པར་བྱས་པ་གང་ཡིན་པ་དེ་ཉིད་ཀྱིས་བྱས་ཟིན་པས་ཆོག་གོ། ། དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་རྒྱལ་པོ་ཀྲྀ་ཀཱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་རིམ་གྲོ་བགྱིད་པ་དཔེར་ན་ད་ལྟར་གྱི་བདག་འདྲ་བ་གཞན་ཞིག་མཆིས་ལགས་སམ། རྒྱལ་པོ་ཆེན་པོ་ཡོད་དེ། ཁྱོད་ཀྱི་ཡུལ་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་ དེ་ན་རྫ་མཁན་དགའ་སྐྱོང་ཞེས་བྱ་བ་སངས་རྒྱས་ལ་མངོན་པར་དད་པ། ཆོས་དང་དགེ་འདུན་ལ་མངོན་པར་དད་པ། སངས་རྒྱས་ལ་སྐྱབས་སུ་སོང་བ། ཆོས་དང་དགེ་འདུན་ལ་སྐྱབས་སུ་སོང་བ། སངས་རྒྱས་ལ་གཅིག་ཏུ་བྱེད་པ། ཆོས་དང་དགེ་འདུན་ལ་གཅིག་ཏུ་བྱེད་པ། སངས་ རྒྱས་ལ་ཡིད་གཉིས་དང་ཐེ་ཚོམ་མེད་པ། ཆོས་དང་། དགེ་འདུན་དང་། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་ལ་ཡིད་གཉིས་དང་ཐེ་ཚོམ་མེད་པ། བདེན་པ་མཐོང་བ། འབྲས་བུ་ཐོབ་ཅིང་རྟོགས་པ། ལོ་མ་དང་གཏུན་སྤངས་པ་ཞིག་གནས་ཏེ། དེ་གཞན་དུ་ན་ ཆུས་བརྐོས་པའམ། བྱི་བྲུན་མ་གཏོགས་པར་རང་གི་ལག་གིས་ས་མི་རྐོ་ཞིང་བརྐོར་མི་འཇུག་གོ། །དེ་ནས་ས་ལུས་ཀྱིས་བླངས་ནས་སྲོག་ཆགས་མེད་པའི་ཆུས་སྦྲུས་ཏེ། སྣོད་རྣམས་བྱས་ཤིང་མཐའ་གཅིག་ཏུ་བཞག་ནས་འདི་སྐད་ཅེས། འཕགས་པ་དག་ཚུར། བཞིན་བཟངས་ དག་ཚུར། ཏིལ་ལམ། འབྲས་སམ། མོན་སྲན་སྡེའུ་ལ་སོགས་པའམ། མོན་སྲན་གྲེའུ་ལ་སོགས་པ་མཐའ་གཅིག་ཏུ་ཞོག་ལ། ཁྱེད་གང་ཞིག་སྣོད་གང་དོན་དུ་གཉེར་བ་དེ་དེས་ལོང་ལ་དེང་ཤིག་ཅེས་སྨྲ་ཞིང་། དེས་དེ་ལས་ཕ་མ་ལོང་བ་གཉིས་གསོ་བ་དང་། ང་ལ་ཡང་དུས་དུས་སུ་བསོད་ སྙོམས་འབུལ་བར་བྱེད་དོ། །རྒྱལ་པོ་ཆེན་པོ་ང་དུས་གཅིག་གཅིག་ན་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་ན་ཉེ་བར་རྟེན་ཅིང་བཞུགས་པ་ན་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་དུ་བསོད་སྙོམས་ལ་ཞུགས་ཏེ། རིམ་

  877. 129a

    གྱིས་བསོད་སྙོམས་ལ་རྒྱུ་བ་ན་རྫ་མཁན་དགའ་སྐྱོང་གི་ཁྱིམ་གང་ན་བ་དེར་གཤེགས་ཏེ་བྱོན་ནས་སྒོ་འཕར་ལ་མི་དྲག་པར་དལ་བུ་དལ་བུས་བརྡབས་པ་དང་། དེའི་ཚེ་རྫ་མཁན་དགའ་སྐྱོང་ནི་དགོས་པ་འགའ་ཞིག་གི་ཕྱིར་ཕྱི་རོལ་དུ་སོང་བར་གྱུར་ནས། རྫ་མཁན་དགའ་སྐྱོང་གི་ཕ་ མས་སྒོ་འཕར་བརྡབས་པའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྒོ་འཕར་ལ་མི་དྲག་པ་དལ་བུ་དལ་བུས་རྡེབས་པའི་འཕགས་པ་དེ་སུ་ཞིག །བཞིན་བཟངས་དེ་སུ་ཞིག་ཅེས་སྨྲས་སོ། །ངས་དེ་གཉིས་ལ་འདི་སྐད་ཅེས་བཀའ་སྩལ་ཏོ། །ང་ནི་ཡང་དག་པར་རྫོགས་པའི་སངས་ རྒྱས་འོད་སྲུང་ཡིན་ཏེ་བསོད་སྙོམས་བཞེད་དོ། །དེ་གཉིས་ཀྱིས་འདི་སྐད་ཅེས་སྨྲས་སོ། །འཕགས་པ་ནང་དུ་སྤྱོན་ཅིག །བཞིན་བཟངས་དག་ནང་དུ་སྤྱོན་ཅིག །ཕྲུ་བ་འདི་རྣམས་ན་བཤོས་དྲོན་པོ་དང་། རྫེའུ་ན་སྲན་ཚོད་མཆིས་མོད་ཀྱི་ཁྱོད་ལ་བསྙེན་བཀུར་བགྱིད་པ་ནི་སླད་རོལ་དུ་ མཆིས་ལགས་ཀྱིས། གལ་ཏེ་བཞེད་ན་ཉིད་ཀྱིས་བཞེས་ཏེ་ཡོངས་སུ་ལོངས་སྤྱད་དུ་གསོལ། རྒྱལ་པོ་ཆེན་པོ་ངས་བྱང་གི་སྒྲ་མི་སྙན་གྱི་དུས་བྱིན་གྱིས་བརླབས་ནས་ཉིད་ཁོ་ནས་ཕྲུ་བའི་ནང་ནས་ཟན་དྲོན་དང་། རྫེའུ་ན་སྲན་ཚོད་ཡོད་པ་བླངས་ནས་ཡོངས་སུ་ལོངས་སྤྱད་དོ། །དེ་ནས་ཕྱི་ཞིག་ ནས་རྫ་མཁན་དགའ་སྐྱོང་འོངས་ནས་རྫ་མཁན་དགའ་སྐྱོང་གིས་ཕྲུ་བའི་ནང་ན་ཟན་དྲོན་དང་། རྫེའུ་ན་སྲན་ཚོད་ཡོད་པ་ཟོས་པར་མཐོང་ངོ་། །མཐོང་ནས་ཀྱང་ཕ་མ་ལོང་བ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་ཕྲུ་བའི་ནང་ན་ཟན་དྲོན་དང་། རྫེའུ་ན་སྲན་ཚོད་མཆིས་པ་འདི་སུ་ཞིག་གིས་ གསོལ། དེ་གཉིས་ཀྱིས་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་སོང་ནས་རིང་པོ་མ་ལོན་པར་འདིར་སྒོ་འཕར་ལ་རྡེབས་པའི་སྒྲ་ཞིག་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །སྒོ་འཕར་ལ་མི་དྲག་པར་དལ་བུ་དལ་བུས་རྡེབས་པའི་འཕགས་པ་དེ་སུ་ཞིག །བཞིན་བཟངས་ དེ་སུ་ཞིག །དེས་འདི་སྐད་ཅེས། ང་ནི་ཡང་དག་པར་རྫོགས་པའི་སངས་རྒྱས་འོད་སྲུང་ཡིན་ཏེ་བསོད་སྙོམས་བཞེད་དོ་ཞེས་གསུངས་ནས་དེ་ལ་འདི་སྐད་ཅེས། འཕགས་པ་ནང་དུ་སྤྱོན་ཅིག །བཞིན་བཟངས་ནང་དུ་སྤྱོན་ཅིག །ཕྲུ་བ་འདིའི་ནང་ན་བཤོས་དྲོན་པོ་དང་། རྫེའུ་ན་སྲན་ཚོད་མཆིས་མོད་

  878. 129b

    ཀྱི། ཁྱོད་ལ་བསྙེན་བཀུར་བགྱིད་པ་ནི་སླད་རོལ་དུ་མཆིས་ལགས་ཀྱིས་གལ་ཏེ་བཞེད་ན་ཉིད་ཀྱིས་བཞེས་ཏེ་ཡོངས་སུ་ལོངས་སྤྱད་དུ་གསོལ་ཞེས་གསོལ་པ་དང་། དེས་ཕྲུ་བའི་ནང་ན་ཟན་དྲོན་ཡོད་པ་དང་། རྫེའུ་ན་སྲན་ཚོད་ཡོད་པ་དེ་དག་གསོལ་བ་ལྟ་ཞིག །དེ་ནས་རྫ་མཁན་དགའ་སྐྱོང་འདི་སྙམ་དུ་ སེམས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་ལེགས་པར་བག་ཕབ་ཅིང་འདྲིས་པར་གྱུར་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་དུ་རིག་ནས་དགའ་བ་དང་བདེ་བ་དེ་ཉིད་ཀྱིས་སྐྱིལ་མོ་ཀྲུང་གཅིག་གིས་ཞག་བདུན་འདས་པར་བྱས་སོ། །ཟླ་བ་ཕྱེད་ཀྱི་བར་དུ་ཡང་དེའི་ལྷན་ཅིག་ ལྡན་པའི་དྲན་པ་ལུས་མི་འདོར་ཞིང་དེ་རྟག་ཏུ་ལུས་ལ་བར་ཆད་མེད་པར་གནས་སོ། །ཞག་བདུན་གྱི་བར་དུ་ཕ་མའི་ཕྲུ་བ་ན་ཟན་དྲོན་པོ་ཡོད་པ་དང་། རྫེའུ་ན་སྲན་ཚོད་ཡོད་པ་ཇི་ལྟ་བ་དེ་བཞིན་དུ་ཕྲུ་བ་ན་ཡང་ཟན་དྲོན་ཡོད་ལ། རྫེའུ་ན་ཡང་སྲན་ཚོད་ཡོད་དོ། །རྒྱལ་པོ་ཆེན་པོ་ང་དུས་གཅིག་ ཅིག་ན་བཻ་བྷི་ཊིང་གའི་གྲོང་ཁྱེར་གྱི་གྲོང་རྡལ་དུ་ཉེ་བར་བརྟེན་ཏེ་དབྱར་བཞུགས་པར་ཞལ་གྱིས་བཞེས་པ་ལས་ང་ལ་དེར་ཐོག་མར་ལྷས་ཆར་ཕབ་པས་གཙུག་ལག་ཁང་ཟགས་པར་གྱུར་ཏོ། །དེའི་ཚེ་རྫ་མཁན་དགའ་སྐྱོང་གི་ལས་བྱེད་པའི་ཁང་པ་རྩྭ་སར་པས་གཡོགས་སོ། །ངས་དགེ་སློང་ ཞབས་འབྲིང་བྱེད་པ་རྣམས་ལ་བཀའ་སྩལ་པ། དགེ་སློང་དག་ཁྱེད་ཅག་དེང་ལ་རྫ་མཁན་དགའ་སྐྱོང་གི་ལས་བྱེད་པའི་ཁང་པ་གཡོགས་པའི་རྩྭ་སར་པ་ཤུས་ལ་ངའི་གཙུག་ལག་ཁང་གཡོགས་ཤིག །དེ་རྣམས་ཀྱིས་བཀའ་བཞིན་འཚལ་ཞེས་ང་ལས་མཉན་ནས་རྫ་མཁན་དགའ་སྐྱོང་གི་ ལས་བྱེད་པའི་ཁང་པ་རྩྭ་སར་པས་གཡོགས་པ་འཆུ་བར་བྱེད་དོ། །དེའི་ཚེ་རྫ་མཁན་དགའ་སྐྱོང་དགོས་པ་འགའ་ཞིག་གི་ཕྱིར་ཕྱི་རོལ་དུ་སོང་བར་གྱུར་ཏོ། །རྫ་མཁན་དགའ་སྐྱོང་གི་ཕ་མ་ལོང་བས་ལས་ཀྱི་ཁང་པ་ཐོག་འཆུ་བའི་སྒྲ་ཐོས་སོ། །ཐོས་ནས་ཀྱང་འདི་སྐད་ཅེས་སྨྲས་སོ། །རྫ་ མཁན་དགའ་སྐྱོང་གི་ལས་ཀྱི་ཁང་པ་རྩྭ་སར་པས་གཡོགས་པ་འཆུ་བའི་འཕགས་པ་དེ་སུ་ཞིག །བཞིན་བཟངས་དེ་སུ་ཞིག །དེ་རྣམས་ཀྱིས་འདི་སྐད་ཅེས་སྨྲས་སོ། །ཁོ་བོ་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་འབྲིང་བ་དགེ་སློང་རྣམས་ཡིན་ཏེ། ཡང་དག་པར་

  879. 130a

    རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་དེར་ཐོག་མར་ལྷས་ཆར་ཕབ་པས་ཟགས་པར་གྱུར་ནས། ཁོ་བོ་ཅག་རྫ་མཁན་དགའ་སྐྱོང་གི་ལས་བྱེད་པའི་ཁང་པ་གཡོགས་པ་རྩྭ་སར་པ་བཤུས་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་ གཡོག་གོ། །དེ་རྣམས་ལ་འདི་སྐད་ཅེས་སྨྲས་སོ། །ཁྱེད་ལ་བསྙེན་བཀུར་བགྱིད་པ་ནི་སླད་རོལ་དུ་མཆིས་ལགས་ཀྱིས། འཕགས་པ་དག་སྣོམས་ཤིག །བཞིན་བཟངས་དག་སྣོམས་ཤིག །དེ་རྣམས་ཀྱིས་དེ་བཤུས་ཏེ་ངའི་གཙུག་ལག་ཁང་གཡོགས་སོ།། །།འདུལ་བ་གཞི། བམ་པོ་དགུ་བཅུ་རྩ་བཞི་པ། དེ་ནས་ཕྱི་ནས་རྫ་མཁན་དགའ་སྐྱོང་འོངས་ནས་རྫ་མཁན་དགའ་སྐྱོང་གིས་ལས་ཀྱི་ཁང་པ་གཡོགས་པའི་རྩྭ་སར་པ་བཤུས་པར་མཐོང་ངོ་། །མཐོང་ནས་ཀྱང་ཕ་མ་ལོང་བ་གཉིས་ལ་འདི་སྐད་ཅེས་སྨྲས་སོ། །ཡབ་ཡུམ་ལས་ཀྱི་ཁང་པ་གཡོགས་པའི་རྩྭ་སར་ པ་དེ་རྣམས་སུ་ཞིག་གིས་བཤུས་ལགས། དེ་གཉིས་ཀྱིས་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་སོང་ནས་རིང་པོ་མ་ལོན་པར་འདིར་ལས་ཀྱི་ཁང་པ་གཡོགས་པའི་རྩྭ་སར་པ་འཆུ་བ་ཐོས་སོ། །ཐོས་ནས་ཀྱང་འདི་སྐད་ཅེས་ལས་ཀྱི་ཁང་པ་གཡོགས་པའི་རྩྭ་སར་པ་འཆུ་བའི་ འཕགས་པ་དེ་སུ་ཞིག །བཞིན་བཟངས་དེ་སུ་ཞིག་ཅེས་སྨྲས་པ་དང་། དེ་དག་གིས་འདི་སྐད་ཅེས། ཁོ་བོ་ཅག་ནི་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་འབྲིང་བ་དགེ་སློང་རྣམས་ཡིན་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་དེར་ཐོག་ མར་ལྷས་ཆར་ཕབ་པས་ཟགས་པར་གྱུར་ནས་ཁོ་བོ་ཅག་རྫ་མཁན་དགའ་སྐྱོང་གི་ལས་ཀྱི་ཁང་པ་གཡོགས་པའི་རྩྭ་སར་པ་བཤུས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གཙུག་ལག་ཁང་གཡོག་གོ་ཞེས་སྨྲས་ནས་དེ་དག་ལ་འདི་སྐད་ཅེས། ཁྱེད་ལ་བསྙེན་བཀུར་བགྱིད་བ་ ནི་སླད་རོལ་དུ་མཆིས་ལགས་ཀྱི་འཕགས་པ་དག་སྣོམས་ཤིག །བཞིན་བཟངས་དག་སྣོམས་ཤིག་ཅེས་སྨྲས་པས་དེ་རྣམས་ཀྱིས་ལས་ཀྱི་ཁང་པའི་རྩྭ་དེ་དག་བཤུས་པར་གྱུར་གྲང་། དེ་ནས་རྫ་མཁན་དགའ་སྐྱོང་འདི་སྙམ་དུ་སེམས་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གིས་

  880. 130b

    ཤིན་ཏུ་བག་ཕབ་ཅིང་འདྲིས་པར་གྱུར་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་དུ་རིག་ནས་དགའ་བ་དང་བདེ་བ་དེ་ཉིད་ཀྱིས་སྐྱིལ་མོ་ཀྲུང་གཅིག་གིས་ཞག་བདུན་འདས་པར་བྱས་སོ། །ཟླ་བ་ཕྱེད་ཀྱི་བར་དུ་ཡང་དེའི་ལྷན་ཅིག་ལྡན་པའི་དྲན་པ་རྟག་ཏུ་ལུས་ལས་མི་འདོར་ཞིང་། ཞག་བདུན་ དུ་ཕ་དང་མའི་ལུས་ལ་ཡང་དེ་བར་ཆད་མེད་པར་འདུག་གོ། །དབྱར་གྱི་གནས་དེར་རྫ་མཁན་དགའ་སྐྱོང་གི་ལས་བྱེད་པའི་ཁང་པ་འདི་ལྟར་སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་ཆར་ཐིགས་པ་གཅིག་ཀྱང་མ་བབ་བོ། །རྒྱལ་པོ་ཆེན་པོ་ཁྱོད་ནི་ཡང་དག་ པར་རྫོགས་པའི་སངས་རྒྱས་འོད་སྲུང་གིས་ཟླ་བ་གསུམ་དུ་བདག་གིས་ན་བཟའ་ཆོས་གོས་དང་། བསོད་སྙོམས་དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་གྱི་ཡོ་བྱད་རྣམས་འབུལ་ན་མ་གནང་ངོ་ཞེས་སེམས་གཞན་དུ་འགྱུར་གྱི། རྫ་མཁན་དགའ་སྐྱོང་ནི་ལས་བྱེད་པའི་ཁང་པ་གཡོགས་ པའི་རྩྭ་སར་པ་བཤུས་ཀྱང་སེམས་གཞན་དུ་མ་གྱུར་ཏོ། །བཙུན་པ་རྫ་མཁན་དགའ་སྐྱོང་གིས་ནི་རྙེད་པ་ལེགས་པར་རྙེད་དེ། བཅོམ་ལྡན་འདས་ཀྱིས་དེའི་སྡུམ་པར་ཤིན་དུ་བག་ཕབ་ཅིང་འདྲིས་པར་མཛད་ལགས་སོ། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲྀ་ཀཱིའི་ སྦྱིན་པ་དེ་ལ་རྗེས་སུ་ཡི་རང་བ་འདིས་རྗེས་སུ་ཡི་རང་བར་མཛད་དེ། སྦྱིན་སྲེག་མཆོད་སྦྱིན་རྣམས་ཀྱི་མཆོག །སྡེབ་སྦྱོར་མཆོག་ནི་ཉི་མའི་ལྷ། །མི་ཡི་མཆོག་ནི་རྒྱལ་པོ་སྟེ། །རྒྱ་མཚོ་ཆུ་བོ་རྣམས་ཀྱི་མཆོག །ཟླ་བ་རྒྱུ་སྐར་རྣམས་ཀྱི་གཙོ། །ཉི་མ་སྣང་བྱེད་རྣམས་ཀྱི་གཙོ། །སྟེང་དང་ འོག་དང་ཐད་ཀར་ཡང་། །འགྲོ་བའི་འགྲོ་བ་ཇི་སྙེད་པ། །ལྷ་དང་བཅས་པའི་འཇིག་རྟེན་ན། །སྨྲ་བའི་མཆོག་ནི་རྫོགས་སངས་རྒྱས། །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲྀ་ཀཱི་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་ དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་

  881. 131a

    རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་རྒྱལ་པོ་ཀྲྀ་ཀཱིས་ཡང་དག་པར་རྫོགས་པའི་སངས་རྒྱས་འོད་སྲུང་གཤེགས་ནས་རིང་པོ་མ་ལོན་པར་ཤེས་ནས་མི་ཞིག་ལ་སྨྲས་པ། ཀྱེ་ནང་རྗེ་ཚུར་ཤོག །ཁྱོད་ཀྱིས་འབྲས་སོག་མའི་སྦུབས་ སུ་སྨིན་པ་ཤིང་རྟ་ལྔ་བརྒྱ་ཙམ་ཁོང་ལ་རྫ་མཁན་དགའ་སྐྱོང་གང་ན་བ་དེར་སོང་སྟེ་ཕྱིན་ནས་རྫ་མཁན་དགའ་སྐྱོང་ལ་འདི་སྐད་ཅེས། དེས་པ་དགའ་སྐྱོང་ཁྱོད་ལ་རྒྱལ་པོ་ཀྲྀ་ཀཱིས་འབྲས་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་པོ་བསྐུར་བ་འདི་དག་ཡིན་གྱིས། དེ་ལས་ཁྱོད་བདག་ཉིད་དང་ཁྱོད་ ཉིད་ཀྱི་ཕ་མ་ཡང་དག་པའི་བདེ་བས་ཚིམ་པར་བྱ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་ཡང་དུས་དུས་སུ་བསོད་སྙོམས་ཕུལ་ཅིག་ཅེས་གསུང་ངོ་ཞེས་སྨྲོས་ཤིག །ལྷ་བཀའ་བཞིན་འཚལ་ལོ་ཞེས་མི་དེས་རྒྱལ་པོ་ཀྲྀ་ཀཱི་ལས་མཉན་ནས་འབྲས་སོག་མའི་སྦུབས་སུ་ སྨིན་པས་ཤིང་རྟ་ལྔ་བརྒྱ་ཙམ་བཀང་སྟེ། རྫ་མཁན་དགའ་སྐྱོང་གང་ན་བ་དེར་སོང་ནས་ཕྱིན་པ་དང་། རྫ་མཁན་དགའ་སྐྱོང་ལ་འདི་སྐད་ཅེས་སྨྲས་སོ། །དེས་པ་དགའ་སྐྱོང་ཁྱོད་ལ་རྒྱལ་པོ་ཀྲྀ་ཀཱིས་འབྲས་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་པོ་བསྐུར་བ་འདི་དག་ཡིན་གྱིས། དེ་ལས་ཁྱོད་བདག་ཉིད་དང་ཁྱོད་ཀྱི་ཕ་མ་ཡང་དག་པའི་བདེ་བས་ཚིམ་པར་བྱ་བ་དང་། ཡང་དག་པར་རྫོགས་པའི་སངས་རྒྱས་འོད་སྲུང་ལ་ཡང་དུས་དུས་སུ་བསོད་སྙོམས་ཕུལ་ཅིག་ཅེས་གསུང་ངོ་། །ཀྱེ་ནང་རྗེ་རྒྱལ་པོ་རྣམས་ནི་བྱ་བ་སྒྲུབ་པ་མང་ངོ་ཞེས་སྨྲས་ནས་ལེན་དུ་མ་བཏུབ་བོ། །དགེ་སློང་དག་ འདི་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་བླ་མ་གང་ཡིན་པ་དེ་ནི་ང་ཡིན་ཏེ། ངས་དགེ་སྦྱོང་མགོ་རེག་དེ་ལ་བྱང་ཆུབ་ག་ལ་ཡོད། བྱང་ཆུབ་ནི་མཆོག་ཏུ་དཀའ་བ་ཡིན་ནོ་ཞེས་ཡང་དག་པར་རྫོགས་པའི་སངས་རྒྱས་འོད་སྲུང་ལ་ངག་རྩུབ་པོ་ཕྱུང་བ་གང་ཡིན་པ་དེའི་ལས་ཀྱི་རྣམ་པར་སྨིན་ པས་ད་ལྟར་ངས་དཀའ་བ་ལོ་དྲུག་སྤྱད་དོ། །གལ་ཏེ་ངས་བྱང་ཆུབ་ལ་སྐུར་བ་བཏབ་པར་གྱུར་ན་སླར་ཡང་ངས་བྱང་ཆུབ་ཀྱི་ཆེད་དུ་བསྐལ་པ་གྲངས་མེད་པ་གསུམ་དུ་བདག་ཉིད་དུབ་པར་བྱས་པར་འགྱུར་རོ། །དགེ་སློང་དག་ཁྱེད་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་

  882. 131b

    གཅིག་ཏུ་གནག་པ་ཡིན་ལ་ཞེས་བྱ་བ་ནས་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །གང་གི་ཉི་མ་ལ་བྱང་ཆུབ་སེམས་དཔའ་ཕྱིར་བྱུང་བ་དེ་ཉིད་ཀྱི་ཉི་མ་ལ་གྲགས་འཛིན་མ་སེམས་ཅན་དང་ལྡན་ པར་གྱུར་ཏོ། །གང་གི་ཚེ་བྱང་ཆུབ་སེམས་དཔའ་དཀའ་བ་སྤྱད་པ་དེའི་ཚེ་བཙུན་མོ་ཡང་དཀའ་བ་སྤྱད་པ་ལ་ཞུགས་པས་གྲགས་འཛིན་མ་མང་ལ་ཞུམ་པར་གྱུར་ཏོ། །གང་གི་ཚེ་བཅོམ་ལྡན་འདས་ཀྱིས་དཀའ་བ་སྤྱད་པ་དོན་མེད་པར་ཐུགས་སུ་ཆུད་ནས་ཅི་བདེར་དབུགས་འབྱིན་པ་དང་། ཅི་བདེར་ དབུགས་རྔུབ་པ་དང་། འབྲས་ཆན་དང་ཟན་དྲོན་གྱི་ཞལ་ཟས་མང་པོ་གསོལ་ཞིང་། མར་དང་ཏིལ་མར་གྱིས་སྐུ་བྱུགས་ནས་ཆུ་འཇམ་པོས་སྐུ་འཁྲུ་བར་མཛད་པ་དེའི་ཚེ་བཙུན་མོ་ཡང་ཅི་བདེར་དབུགས་འབྱིན་པ་དང་། ཅི་བདེར་དབུགས་རྔུབ་པ་དང་། འབྲས་ཆན་དང་ཟན་དྲོན་གྱི་ཁ་ཟས་མང་པོ་ཟ་ཞིང་། མར་དང་ཏིལ་ མར་གྱིས་ལུས་བྱུགས་ནས་ཆུ་འཇམ་པོས་ལུས་འཁྲུ་བར་བྱེད་པ་དེའི་ཚེ་མངལ་དེ་ཡང་སླར་རྒྱས་པར་གྱུར་ཏོ། །དེའི་མངལ་གྱི་མཚན་མ་སྐྱེས་པར་གྱུར་པ་དང་། ཤཱཀྱ་རྣམས་ཀྱིས་ཅོ་དྲི་བ་དང་བཅས་པར་སྨྲས་པ། བྱང་ཆུབ་སེམས་དཔའ་དཀའ་ཐུབ་ཀྱི་ནགས་སུ་བཞུད་ནས་ཁྱོད་ཀྱིས་བྱི་ཕྱིན་ ཏོ། །དེས་སྨྲས་པ། ཁོ་མོའི་སྡིག་པ་ཞི་བས་བྱི་མ་ཕྱིན་ཏོ། །ཇི་མངོན་ཁྱོད་ཡིད་ཆེས་པར་བྱའོ། །ཇི་ཙམ་ཞིག་ན་དེ་ཁྱེའུ་ཞིག་བཙས་ཏེ། དེ་ཉི་མ་གང་ལ་བཙས་པའི་ཉི་མ་དེ་ཉིད་ལ་ཟླ་བ་སྒྲ་ཅན་གྱིས་ཟིན་ཏོ། །དེ་བཙས་པའི་བཙས་སྟོན་བྱས་ནས་ཁྱེའུའི་མིང་ཅིར་གདགས་ཞེས་མིང་ འདོགས་པར་བྱེད་དོ། །དེའི་ཉེ་དུ་རྣམས་ཀྱིས་སྨྲས་པ། འདི་བཙས་པ་ན་ཟླ་བ་སྒྲ་ཅན་གྱིས་ཟིན་པས་དེ་བས་ན་ཁྱེའུའི་མིང་ནི་སྒྲ་ཅན་ཟིན་དུ་གདགས་སོ་ཞེས་བཏགས་སོ། །གཞོན་ནུ་བཙས་པ་ན་ཤཱཀྱ་རྣམས་ཡང་དང་ཡང་དུ་གླེང་བ་ཁོ་ནར་བྱེད་ནས། དེས་བདེན་པ་གསོལ་བ་བྱས་ཏེ། སྒྲ་ཅན་ཟིན་བཟང་པོ་བྱང་ཆུབ་སེམས་དཔའི་བང་ཚད་ཀྱི་རྡོ་ལ་ཞོན་ནས་རོལ་པ་རྫིང་གི་ནང་དུ་བཅུག་སྟེ། གལ་ཏེ་འདི་བྱང་ཆུབ་སེམས་དཔའ་ལས་སྐྱེས་པ་ཡིན་ན་འཕྱོ་བར་གྱུར་ཅིག་ཅེས་དེ་བཅུག་པ་དང་། དེ་ཕ་རོལ་དུ་བྱུང་ངོ་། །དེས་ཕ་རོལ་ནས་ཚུ་རོལ་དུ་འོང་བར་གྱུར་ཅིག་ཅེས་སྨྲས་པ་དང་།

  883. 132a

    དེ་ཕ་རོལ་ནས་ཚུ་རོལ་དུ་འོངས་ནས་དེ་རྣམས་ངོ་མཚར་སྐྱེས་པར་གྱུར་ཏོ། །གྲགས་འཛིན་མས་སྨྲས་པ། ཤེས་ལྡན་དག་ཇི་ལྟར་བྱང་ཆུབ་སེམས་དཔའ་ལས་སྐྱེས་པ་ཡིན་ཞིང་ཁོ་མོས་བྱི་མ་ཕྱིན་པར་ཡང་ཡིད་ཆེས་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ལོ་དྲུག་གིས་ མངོན་པར་རྫོགས་པར་སངས་རྒྱས་ཏེ་ལོ་བཅུ་གཉིས་འདས་པ་ན་སེར་སྐྱའི་གཞིར་བྱོན་ནས་ཉི་མ་གཅིག་ནི་རྒྱལ་པོའི་ཕོ་བྲང་དུ་གདུགས་ཚོད་གསོལ། ཉི་མ་གཅིག་ནི་བཙུན་མོའི་ནང་དུ་གསོལ་བ་དེའི་ཚེ་གྲགས་འཛིན་མ་འདི་སྙམ་དུ་སེམས་ཏེ། གང་གིས་ན་བཅོམ་ལྡན་འདས་བདག་གིས་དབང་དུ་ འགྱུར་བའི་ཐབས་ལེགས་པ་ཅི་ཞིག་ཡོད་སྙམ་མོ། །སེར་སྐྱའི་གཞི་ན་ཀུན་དུ་རྒྱུ་མོ་དབང་དུ་བྱ་བ་ལ་སོགས་པ་ལས་རྣམས་ལ་ཤིན་ཏུ་མཁས་པ་ཞིག་ཡོད་དེ། གྲགས་འཛིན་མས་དེ་ལ་ཀཱ་ར་ཥཱ་པ་ཎ་ལྔ་བརྒྱ་བྱིན་ནས་ཆེ་ཞེ་ཀཱར་ཥཱ་པ་ཎ་འདི་རྣམས་ལས་དབང་དུ་བྱ་བ་བྱོས་ལ་སྐུར་ཅིག །དེས་དབང་དུ་ བྱ་བའི་ལ་དུ་ཞིག་གྲགས་འཛིན་མ་ལ་བསྐུར་བ་དང་། གྲགས་འཛིན་མས་སྒྲ་ཅན་ཟིན་གྱི་ལག་ཏུ་བྱིན་ནས་སྨྲས་པ། བུ་ཁྱོད་ཀྱི་ཡབ་གང་ཡིན་པ་དེ་ལ་ཕུལ་ཅིག །སངས་རྒྱས་བཅོམ་ལྡན་འདས་རྣམས་ཀྱིས་དེ་ལྟ་བུ་མི་མཁྱེན་པ་དང་། མི་གཟིགས་པ་དང་། ཐུགས་སུ་མི་ཆུད་ པ་དང་། རྣམ་པར་མི་རིག་པ་ཅི་ཡང་མི་མངའ་བས་བཅོམ་ལྡན་འདས་ཀྱིས་དགོངས་པ། གྲགས་འཛིན་མ་ལ་མི་སྙན་པ་གྲག་གིས་དེ་སྤང་བར་བྱའོ་སྙམ་ནས་བཅོམ་ལྡན་འདས་ཀྱིས་སངས་རྒྱས་ལྔ་བརྒྱ་སྤྲུལ་པ་དང་། སྒྲ་ཅན་ཟིན་གྱིས་སངས་རྒྱས་ཐམས་ཅད་ལ་བརྟགས་ནས་བཅོམ་ལྡན་འདས་ རྒན་པའི་ངང་ལས་བཞུགས་པ་ལ་ཕུལ་ལོ། །བཅོམ་ལྡན་འདས་ཀྱིས་བཞེས་ནས་སླར་ཡང་དེ་ལ་བྱིན་ཏེ་སྒྲ་ཅན་ཟིན་གྱིས་ཟོས་སོ། །བཅོམ་ལྡན་འདས་ཀྱིས་ཡོན་ཏན་བསྔོ་བ་མཛད་ནས་གཤེགས་པ་དང་། བཅོམ་ལྡན་འདས་ཀྱི་རྗེས་བཞིན་གཞོན་ནུ་སྒྲ་ཅན་ཟིན་བཟང་པོ་འབྲང་ནས་སླར་བཟློག་ཀྱང་ དུས་ཏེ་སླར་ལྡོག་ཏུ་མ་བཏུབ་བོ། །བཅོམ་ལྡན་འདས་ཀྱིས་དགོངས་པ། སེམས་ཅན་འདི་ནི་སྲིད་པ་ཐ་མ་པ་ཡིན་པས་འདིས་ཁྱིམ་གྱི་གནས་པས་གནས་མི་ཕོད་དོ་སྙམ་མོ། །སྒྲ་ཅན་ཟིན་གྱིས་བཅོམ་ལྡན་འདས་ཀྱི་ཞལ་འཚོས་པ་དང་། རྒྱལ་པོ་ཟས་གཙང་བཙུན་མོའི་བུད་མེད་དང་ཤཱཀྱ་

  884. 132b

    རྣམས་དང་བཅས་པ་ངོ་མཚར་སྐྱེས་ནས། གྲགས་འཛིན་མ་ལ་ལྷག་པར་མངོན་པར་དགའ་བར་གྱུར་ཏོ། །དེ་ནས་གྲགས་འཛིན་མའི་མི་སྙན་པ་ཐམས་ཅད་ཀྱི་ཐམས་ཅད་དུ་མེད་པར་གྱུར་ཏོ། །བཅོམ་ལྡན་འདས་ཀྱིས་གཞོན་ནུ་སྒྲ་ཅན་ཟིན་བཟང་པོ་རབ་ཏུ་དབྱུང་བར་བརྩམས་པ། རྒྱལ་ པོ་ཟས་གཙང་གིས་ཐོས་ནས་དེ་བཅོམ་ལྡན་འདས་ཀྱི་དྲུང་དུ་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་གཞོན་ནུ་སྒྲ་ཅན་ཟིན་བཟང་པོ་རབ་ཏུ་འབྱིན་པར་མཛད་པར་ངེས་པར་ལྟ་ན། དེང་གི་གདུགས་གཅིག་ལ་མཆིས་སུ་གསོལ་ཅིག་དང་། འདི་ལ་དེའི་བར་དུ་བདག་གིས་མཆོད་པ་བགྱིའོ། །རྒྱལ་པོ་ཟས་གཙང་གིས་སྒྲ་ཅན་ཟིན་གྱི་སྐྱེ་བོའི་དུས་སྟོན་ཆེན་པོ་བྱས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་གཞོན་ནུ་སྒྲ་ཅན་ཟིན་རབ་ཏུ་ཕྱུང་ཤིག །བཙུན་པ་བཀའ་བཞིན་འཚལ་ ཞེས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལས་མཉན་ནས་གཞོན་ནུ་སྒྲ་ཅན་ཟིན་བཟང་པོ་རབ་ཏུ་ཕྱུང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་སྒྲ་ཅན་ཟིན་གྱིས་སྐྱེ་བོའི་ཚོགས་ཆེན་པོའི་དབུས་ སུ་བཅོམ་ལྡན་འདས་ལ་དུས་ཞལ་འཚོས་པར་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་མེ་ཏོག་གི་ཕྲེང་བས་ངོ་ཤེས་པར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་ འོར་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་ནས་དེས་ཆུང་མ་ལ་སྨྲས་པ། བཟང་ མོ་བདག་ཅག་གིས་བུ་ལོན་དེད་པ་དང་ནོར་འཕྲོག་པ་སྐྱེས་ཀྱིས་ཟོང་ཐོགས་ཏེ་རྒྱ་མཚོ་ཆེན་པོར་འཇུག་ཏུ་འགྲོའོ། །དེས་སྨྲས་པ། རྗེའི་སྲས་དེ་བཞིན་དུ་མཛོད་ཅིག །དེ་ཟོང་ཐོགས་ཏེ་རྒྱ་མཚོ་ཆེན་པོར་ཞུགས་པ་ལས་དེ་ཉིད་དུ་ཤིའོ། །དེ་ནས་དེའི་ཆུང་མས་མྱ་ངན་བསང་བ་བྱས་ནས་ལག་

  885. 133a

    ལས་ཀྱི་མཐུ་དང་གཉེན་གྱི་མཐུས་བསྣུན་བསྐྱངས་ཏེ་བསྐྱེད་དོ། །དེ་དང་ཧ་ཅང་ཡང་མི་རིང་བ་ཞིག་ན་ཐག་པ་རང་གི་བཟོ་ལ་མཁས་པ་ཞིག་གནས་ཏེ། དེ་རང་གི་བཟོས་ཐམས་ཅད་གྲུབ་པར་འགྱུར་རོ། །དེས་དེའི་རང་གི་བཟོས་འབྱོར་པ་འགྲུབ་པ་མཐོང་ནས་སྨྲས་པ། ཐ་གའི་ལས་ནི་མཆོག་ཡིན་གྱི། རྒྱ་མཚོར་འཇུག་པ་ནི་དེ་ལྟ་བུ་མ་ཡིན་ཏེ། དེར་སོང་ན་ཚུལ་མ་ཡིན་པས་སྡུག་བསྔལ་བར་འགྱུར་རོ། །དེས་ཐ་ག་པ་དེ་ལ་སྨྲས་པ། མིང་པོ་དཔོན་པོ་འདི་ཡང་ཐ་ག་པའི་ལས་སློབས་ཤིག །དེས་སྨྲས་པ། རུང་གིས་དེ་བཞིན་དུ་བྱའོ་ཞེས་དེས་དེ་ལ་ བསླབ་པར་བརྩམས་པ་ན་དེ་སྒྲིན་པོ་གཡེར་བག་ཅན་ཞིག་པས་དེས་དུས་ཐུང་ངུ་ཞིག་གིས་ཐ་ག་པའི་ལས་རྣམས་ལོབས་སོ། །ཐ་ག་པ་དེ་ནི་བཟང་པོས་འཁྲུ་བ་དང་། བཟང་པོ་གྱོན་པ་དང་། ཁ་ཟས་བཟང་པོ་ཟ་ནས་ཁྱེའུ་དེས་སྨྲས་པ། ཞང་པོ་ཁྱོད་ཀྱང་ལས་འདི་ཁོ་ན་བྱེད་ལ་བདག་ཅག་ ཀྱང་འདི་ཁོ་ན་བྱེད་པ་ལས་ཅིའི་ཕྱིར་ཁྱོད་ནི་བཟང་པོས་འཁྲུ། བཟང་པོ་གྱོན། ཟས་བཟང་པོ་ལ་ཡོངས་སུ་ལོངས་སྤྱོད་ལ། བདག་ནི་མི་འགྲུབ། དེས་སྨྲས་པ། ཚ་བོ་བདག་ནི་ལས་གཉིས་བྱེད་དེ། ཉིན་པར་ནི་ཐ་ག་པའི་ལས་སོ། །ནུབ་མོ་ནི་རྐུན་པོ་བྱེད་དོ། །དེས་སྨྲས་པ། ཞང་ པོ་གལ་ཏེ་དེ་ལྟ་ན་བདག་ཀྱང་རྐུན་པོ་བགྱིའོ། །ཚ་བོ་ཁྱོད་ཀྱིས་རྐུན་པོ་བྱེད་མི་ནུས་སོ། །ཞང་པོ་ནུས་སོ། །དེས་བསམས་པ། རེ་ཞིག་འདི་བགམ་པར་བྱའོ་སྙམ་ནས་དེ་ཁྲིད་དེ་ཚོང་འདུས་སུ་སོང་ནས་དེས་དེར་རི་བོང་ཞིག་ཉོས་ཏེ་དེ་ལ་གཏད་ནས་ཚ་བོ་རེ་ཞིག་སྲེགས་ཤིག་དང་། དེའི་བར་དུ་ བདག་ཁྲུས་བྱས་ནས་འོང་ངོ་ཞེས་དེ་ཁྲུས་བྱེད་དུ་སོང་བ་དང་། དེས་དེ་མྱུར་བ་མྱུར་བ་ཞིག་ཏུ་བསྲེགས་ནས་གཟུགས་གཅིག་ཟོས་སོ། །ཐ་ག་པ་དེ་ཁྲུས་བྱས་ནས་འོངས་ཏེ་ཚ་བོ་རི་བོང་བསྲེགས་སམ། ཞང་པོ་བསྲེགས་སོ། །འོ་ན་བལྟའོ། །དེས་དེ་བྱིན་པ་དང་རྐང་ལག་གསུམ་མཐོང་ནས་ སྨྲས་པ། ཚ་བོ་རི་བོང་འདིའི་གཟུགས་བཞི་པ་ཤོས་གར་སོང་། དེས་སྨྲས་པ། ཞང་པོ་རི་བོང་ལ་གཟུགས་བཞི་པ་ཡོད་ཡང་མེད་ན་གར་འགྲོ། དེས་བསམས་པ། རེ་ཞིག་བདག་ཀྱང་རྐུན་མ་ཡིན་ན། འདི་ནི་རྐུན་ཆེན་ཡིན་ནོ་སྙམ་ནས། དེས་དེ་དང་རི་བོང་གཟུགས་གསུམ་པོ་ཁྱེར་ཏེ་

  886. 133b

    ཆང་འཚོང་གི་ཁྱིམ་ཞིག་ཏུ་ཞུགས་ནས་ཚ་བོ་ཆང་བཏུང་ངམ། བཏུང་ངོ་། །དེ་གཉིས་ཀྱིས་འཐུངས་ནས་ཐ་ག་པས་སྨྲས་པ། ཚ་བོ་ཆང་རིན་ནི་གྱ་གྱུས་དགང་ངོ་། །དེས་སྨྲས་པ། ཞང་པོ་སུས་འཐུངས་པ་དེ་གྱ་གྱུ་བྱེད་གྲང་། བདག་གིས་ནི་མ་འཐུངས་པས་གྱ་གྱུ་བྱར་ཅི་ཡོད། ཐ་ག་པ་ དེས་བསམས་པ། འདི་ནི་རྐུན་ཆེན་ཡིན་པས་ལྷན་ཅིག་རྐུན་མ་བྱ་ནུས་སོ་སྙམ་ནས་དེ་དེ་དང་ལྷན་ཅིག་ཁྱིམ་འབིགས་པའི་རྐུན་མ་ལ་ཞུགས་ཏེ། དེ་གཉིས་ཀྱིས་ཁྱིམ་ཕུག་ནས་ཐ་ག་པ་དེས་བུ་གར་མགོ་བཅུག་པ་དང་དེས་སྨྲས་པ། ཞང་པོ་ཁྱོད་རྐུན་མ་བྱེད་ཀྱང་ཐབས་མི་ཤེས་ཏེ། ཐོག་མར་རྐང་ པ་གཞུག་པར་བྱའི་མགོ་ནི་མ་ཡིན་ནོ། །གལ་ཏེ་མགོ་བཅད་པར་གྱུར་ན་ངོ་ཤེས་པས་རིགས་ཐམས་ཅད་བརླག་པར་འགྱུར་གྱིས་རྐང་པ་ཆུག་ཤིག །དེས་རྐང་པ་བཅུག་པ་དང་། ཚོར་ནས་རྐུན་པོ་རྐུན་པོ་ཞེས་ཀུ་ཅོ་བཏོན་ནས་སྐྱེ་བོའི་ཚོགས་ཆེན་པོས་རྐང་པ་གཉིས་ནས་བཟུང་ནས་འཐེན་ཏོ། ། དེ་ནི་གཅིག་པུ་ཡིན་པས་སླར་འདྲེན་མ་ནུས་ནས་མགོ་བཅད་དེ་ཁྱེར་ཏེ་སོང་ངོ་། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་རྐུན་པོ་གཅིག་པུ་གར་ཞུགས་པ་ལས་ཟིན་ན། དེའི་མགོ་གཅིག་གིས་བཀུམ་ནས་འཚལ་ཏེ་མཆིས་སོ། །རྒྱལ་པོས་སྨྲས་པ། ཤེས་ལྡན་དག་མགོ་ བཅད་དེ་ཁྱེར་ཏེ་སོང་བ་གང་ཡིན་པ་དེ་ནི་རྐུན་ཆེན་ཡིན་ནོ། །དེང་ལ་རོ་མགོ་རྡུམ་དེ་ལམ་པོ་ཆེའི་བཞི་མདོར་ཞོག་སྟེ་ཕྱོགས་དབེན་པར་འཁོད་དང་། དེ་ལས་བཟུང་སྟེ་ཆོ་ངེས་འདེབས་པ་ཡོད་ན་དེ་ནི་རྐུན་པོ་ཡིན་གྱིས་དེ་ཟུང་ཤིག །དེ་ནས་རྒྱལ་པོའི་མི་དེ་རྣམས་ཀྱིས་རོ་མགོ་རྡུམ་དེ་ལམ་པོ་ཆེའི་ བཞི་མདོར་བཞག་ནས་ཕྱོགས་དབེན་པར་བསྡད་དོ། །རྐུན་པོ་ཅིག་ཤོས་དེས་བསམས་པ། བདག་གིས་ཞང་པོའི་མགུལ་ནས་འཇུས་ཏེ་དུང་མོས་མི་གདབ་པ་ལྟ་མི་སྲིད་དོ་སྙམ་ནས། དེས་བདག་ཉིད་སྨྱོན་པའི་ཆ་བྱད་དུ་ཞུགས་ནས་བུད་མེད་ཀྱི་མགུལ་ནས་ཀྱང་འཇུས། སྐྱེས་པ་ དང་། ཤིང་རྟ་དང་། རྟ་དང་། ཁྱུ་མཆོག་དང་། མ་ཧེ་དང་། ར་དང་། ཁྱིའི་མགུལ་ནས་ཀྱང་འཇུ་བར་བརྩམས་ནས་གང་གི་ཚེ་འཇིག་རྟེན་གྱིས་སྨྱོས་པར་ཤེས་པ་དེའི་ཚེ་རོ་མགོ་རྡུམ་པང་དུ་བླངས་ཏེ་ཇི་ཙམ་འདོད་ཀྱི་བར་དུ་ངུས་ནས་སོང་ངོ་། །རྒྱལ་པོའི་མི་རྣམས་ཀྱིས་རྒྱལ་པོ་ལ་

  887. 134a

    སྨྲས་པ། སྨྱོན་པ་ཞིག་གིས་རོ་མགོ་རྡུམ་དེ་པང་དུ་བླངས་ཏེ་ཇི་ཙམ་འཚལ་གྱི་བར་དུ་ངུས་ནས་མཆིས་སོ། །རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་མ་ཅིག་ཤོས་ཡིན་ན། དེ་མ་བཟུང་བ་མ་ལེགས་པ་ཞིག་བྱས་ཀྱིས་དེ་ཟུང་ཤིག །རྐུན་པོ་ཅིག་ཤོས་ཀྱིས་ བསམས་པ། བདག་གིས་ཞང་པོ་ལ་བསྐུར་སྟི་མི་བྱ་བ་ལྟ་མི་སྲིད་དོ་སྙམ་ནས་དེས་ཤིང་རྟ་པའི་ཆ་བྱད་དུ་བྱས་ནས་ཤིང་རྟ་ཤིང་སྐམ་གྱིས་བཀང་སྟེ། ཕྱོགས་དེར་འོངས་ནས་དེའི་སྟེང་དུ་ཤིང་རྟ་ཤིང་སྐམ་གྱིས་བཀང་བ་བཞག་སྟེ་གླང་བཀྲོལ་ནས་ཤིང་རྟ་མེས་བཏང་སྟེ་སོང་བ་དང་། མེ་དེས་རོ་མགོ་ རྡུམ་དེ་ཡང་ཚིག་གོ། །རྒྱལ་པོའི་མི་རྣམས་ཀྱིས་རྒྱལ་པོ་ལ་སྨྲས་པ། ལྷ་རྐུན་པོ་གཅིག་པོ་དེ་བསྲེགས་ལགས་སོ། །སུས་དེ་དག་གིས་ཇི་ལྟར་གྱུར་པ་རྣམས་སྨྲས་པ་དང་རྒྱལ་པོས་སྨྲས་པ། ཤེས་ལྡན་དག་ཤིང་རྟ་པ་གང་ཡིན་པ་དེ་ཉིད་རྐུན་པོ་ཅིག་ཤོས་ཡིན་ཏེ། དེ་མ་བཟུང་ བ་མ་ལེགས་པ་ཞིག་བྱས་ཀྱིས་ཟུང་ཤིག །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོ་ལ་དུར་ཁྲོད་དུ་མཚུན་གྱི་བྱ་བ་མ་བྱས་པ་ནི་མི་སྲིད་དོ་སྙམ་ནས། དེས་བྲམ་ཟེའི་ཆ་བྱད་དུ་བྱས་ནས་ཁྱིམ་ནས་ཁ་སློང་ཞིང་བརྒྱུས་ཏེ་བསླངས་པ་དེ་ལས་དེའི་ཕངས་ཤ་ལྔ་བྱས་ནས་ དུར་ཁྲོད་དུ་བཞག་སྟེ་སོང་ངོ་། །རྒྱལ་པོའི་མི་རྣམས་ཀྱིས་རྒྱལ་པོ་ལ་སྨྲས་པ། ལྷ་བྲམ་ཟེ་ཞིག་གིས་ཁྱིམ་ནས་སློང་ཞིང་བརྒྱུས་ཏེ་ཕྱོགས་གང་དུ་རོ་མགོ་རྡུམ་བསྲེགས་པ་དེར་དེས་ཕངས་ཤ་ལྔ་བགྱིས་སྟེ་བཞག་སྟེ་མཆིས་ལགས་སོ། །རྒྱལ་པོས་སྨྲས་པ། ཤེས་ལྡན་དག་ དེ་ཉིད་རྐུན་པོ་ཅིག་ཤོས་ཡིན་ན། དེ་མ་བཟུང་བ་ནི་མ་ལེགས་པ་ཞིག་བྱས་སོ། །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོའི་རུས་པ་རྣམས་གང་གཱར་མི་འདོར་བ་ལྟ་མི་སྲིད་དོ་སྙམ་ནས། དེས་ཐོད་པ་ཅན་གྱི་ཆ་བྱད་དུ་བྱས་ཏེ་ཕྱོགས་དེར་སོང་ནས་དེས་དེར་ལུས་ ཐལ་བས་བྱུགས་ཤིང་རུས་པ་དང་ཐལ་བས་ཐོད་པ་བཀང་ནས་གང་གཱར་ཕོ་སྟེ་སོང་ངོ་། །རྒྱལ་པོའི་མི་རྣམས་ཀྱིས་རྒྱལ་པོ་ལ་ཇི་ལྟར་གྱུར་པ་སྨྲས་པ་དང་། རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་པོ་ཅིག་ཤོས་ཡིན་ན་དེ་མ་བཟུང་བ་ནི་མ་ལེགས་པ་ཞིག་བྱས་སོ། །མདོར་

  888. 134b

    ན་ཁྱེད་འདུག་ཤིག་དང་། ངས་དེ་གཟུང་ངོ་ཞེས་རྒྱལ་པོས་གང་གཱའི་གྲུའི་ནང་དུ་སྐྱེད་མོས་ཚལ་བྱེད་དུ་བཅུག་སྟེ། འགྲམ་གཉིས་སུ་སྲུང་མའི་མི་དག་བཀོད་ནས་རྒྱལ་པོའི་བུ་མོ་གཟུགས་བཟང་བ། མཛེས་པ། བལྟ་ན་སྡུག་པ་ཞིག་ཆུའི་སྐྱེད་མོས་ཚལ་དེར་བཞག་སྟེ་བསྒོ་བ། གལ་ཏེ་ཁྱོད་ལ་འགའ་ཞིག་གིས་བཟུང་དང་སྐད་ཕྱུང་ཤིག །སྲུང་མའི་མི་རྣམས་ལ་ཡང་བསྒོ་བ། གང་གི་ཚེ་སྐད་འབྱིན་པ་དེའི་ཚེ་ཁྱེད་ཅག་ཆུའི་སྐྱེད་མོས་ཚལ་དུ་དེང་ཤིག །དེ་ན་གལ་ཏེ་མི་འགའ་ཞིག་ཡོད་པ་དང་། དེ་བཟུང་ལ་ང་ལ་ཕུལ་ཅིག །རྐུན་པོ་ཅིག་ཤོས་ཀྱིས་བསམས་ པ། བདག་གིས་རྒྱལ་པོའི་བུ་མོ་དང་ལྷན་ཅིག་དགའ་མགུར་མ་སྤྱད་དུ་མི་གཏོང་ངོ་སྙམ་ནས་དེ་གང་གཱའི་འབབ་ཕྱོགས་ཞིག་ཏུ་འདུག་སྟེ། དེས་དེར་རྫེའུ་སྟོང་པ་ཞིག་ཏུ་ཆུ་བསྐུར་བར་བརྩམས་སོ། །གཅིག་བསྐུར་བ་དང་སྲུང་མའི་མི་རྣམས་ཀྱིས་རྐུན་པོའོ་སྙམ་ནས་བསྙགས་ཏེ་དེ་དག་གིས་དེ་ ལ་ཐལ་མོ་གཅིག་བསྣུན་ནས་བཅག་གོ། །གཉིས་པ་ཤོས་བསྐུར་བ་དང་། དེ་ཡང་བཅག་གོ། །གསུམ་པ་ཤོས་བསྐུར་བ་དང་། དེ་ཡང་བཅག་ནས་སྲུང་མ་དག་ན་རེ་འདི་དག་ནི་རྫེའུ་སྟོང་པ་ཆུས་ཁྱེར་བ་ཡིན་ནོ་ཞེས་བག་བོར་ཏེ་འདུག་གོ། །དེ་ནས་རྐུན་པོ་ཅིག་ཤོས་པོ་དེས་རྫེའུ་ཞིག་གི་ ནང་དུ་མགོ་བཅུག་ནས་རྒྱུན་ཕྱོགས་སུ་བརྐྱལ་ཏེ། ཕྱོགས་དེར་ཕྱིན་པ་དང་དེ་ནས་གྲུ་ལ་འཛེགས་ནས་བུ་མོ་ལ་སྨྲས་པ། ཁྱོད་བསད་ད་རེ་སྒྲ་མ་འབྱིན་ཅིག །དེ་སྐྲག་ནས་ཅང་མི་སྨྲ་བར་འདུག་པ་དང་། དེ་དེ་དང་ལྷན་ཅིག་དགའ་མགུར་སྤྱད་ནས་སོང་ངོ་། །དེས་ངུ་བར་ བརྩམས་ཏེ། ཤེས་ལྡན་དག་རྐུན་པོ་ཅིག་ཤོས་ཀྱིས་ཁོ་མོ་ལ་དགའ་མགུར་སྤྱད་ནས་སོང་ངོ་། །སྲུང་མ་རྣམས་ཀྱིས་སྨྲས་པ། གང་གི་ཚེ་དགའ་མགུར་སྤྱད་པ་དེའི་ཚེ་ཅང་མི་སྨྲ་བར་འདུག་ལ། གང་གི་ཚེ་དགའ་མགུར་སྤྱད་ནས་སོང་བ་དེའི་ཚེ་དུས་ན་ད་གང་དུ་བཙལ་བར་བྱ། སྲུང་མ་རྣམས་ཀྱིས་རྒྱལ་པོ་ལ་ཇི་ལྟར་གྱུར་པ་སྨྲས་སོ། །རྒྱལ་པོས་སྨྲས་པ། དེ་མ་བཟུང་བ་ནི་མ་ལེགས་པ་ཞིག་བྱས་སོ། །བུ་མོ་དེ་རྐུན་པོ་དང་ལྷན་ཅིག་དགའ་མགུར་སྤྱད་པས་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་འདས་པ་ན་ཁྱེའུ་ཞིག་བཙས་སོ་

  889. 135a

    ཞེས་རྐུན་པོ་ཅིག་ཤོས་ཀྱིས་ཐོས་ནས་དེས་བསམས་པ། བདག་གི་བུ་བཙས་པའི་དགའ་སྟོན་མ་བྱས་པར་མི་བཏང་ངོ་སྙམ་ནས། དེས་ནང་ཀོར་མའི་ཆ་བྱད་དུ་བྱས་ནས་རྒྱལ་པོའི་ཕོ་བྲང་ནས་ཕྱིར་བྱུང་སྟེ་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་ལྷའི་ ཞལ་ནས་ཚོང་རྡལ་དུ་ཕྲོག་རློམ་གྱིས་ཤིག་ཅེས་བཀའ་སྩལ་ཏོ། །དེ་རྣམས་ཀྱིས་བསམས་པ། རྒྱལ་པོའི་དཔོན་པོ་བཙས་པས་དེས་ན་བདག་ཅག་ཚོང་རྡལ་དུ་ཕྲོག་རློམ་བྱེད་དུ་བཅུག་གོ་སྙམ་ནས། དེ་རྣམས་ཕྲོག་རློམ་བྱ་བར་བརྩམས་པ་ན་སྒྲ་མཐོན་པོ་དང་སྒྲ་ཆེན་པོ་བྱུང་ནས་རྒྱལ་ པོས་སྨྲས་པ་དེ་ཅི་ཡིན། བློན་པོ་རྣམས་ཀྱིས་རྒྱས་པར་སྨྲས་སོ། །དེས་སྨྲས་པ། གལ་ཏེ་དེ་ལྟ་ན་ང་ཡང་དེས་བསླུས་པར་གྱུར་གྱིས། རྒྱལ་སྲིད་དོར་བའམ་དེ་ཆད་པས་གཅད་པ་ཞིག་བྱའོ། །སྙམ་དུ་བསམས་ནས། དེར་འཁོར་གྱི་ཁྱམས་རྩིག་ཏུ་བཅུག་སྟེ། དུས་ ཆུང་ངུ་ཞིག་བསྡད་ནས་དེས་བློན་པོ་རྣམས་ལ་བསྒོ་བ། ཤེས་ལྡན་དག་ཡུལ་འཁོར་དུ་དྲིལ་འདི་སྐད་དུ་སྒྲོགས་སུ་ཆུག་ཤིག །ཡུལ་འཁོར་ན་སྐྱེས་པ་ཇི་སྙེད་གནས་པ་དེ་དག་ཐམས་ཅད་སྙད་མ་འདོགས་པར་འཁོར་གྱི་ཁྱམས་སུ་འདུས་ཤིག །སུ་མ་འདུས་པ་དེ་ནི་ཆད་ པས་གཅད་དོ་ཞེས་སྒྲོགས་ཤིག །བློན་པོ་རྣམས་ཀྱིས་དྲིལ་སྒྲོགས་སུ་བཅུག་ནས་ཡུལ་འཁོར་ན་གནས་པའི་སྐྱེས་པ་ཐམས་ཅད་འདུས་པ་དང་། དེ་ནས་རྒྱལ་པོས་ཁྱེའུ་དེ་ལ་མེ་ཏོག་གི་ཕྲེང་བ་ཞིག་བྱིན་ནས་བསྒོ་བ། ཁྱོད་ཀྱི་ཕ་གང་ཡིན་པ་དེ་ལ་བྱིན་ཅིག །སྲུང་མའི་སྐྱེས་ པ་རྣམས་ལ་བསྒོ་བ། ཁྱེའུ་འདིས་སུ་ལ་མེ་ཏོག་ཕྲེང་བ་བྱིན་པ་དེ་ཁྱེད་ཅག་གིས་ཟུང་ལ་ང་ལ་ཕུལ་ཅིག །དེ་ནས་ཁྱེའུ་དེ་མེ་ཏོག་གི་ཕྲེང་བ་དེ་ཁྱེར་ནས་སྐྱེ་བོའི་ཚོགས་ལ་རྟོག་ཅིང་རྒྱུ་བ་ན་དེས་རྐུན་པོ་ཅིག་ཤོས་པོ་དེ་མཐོང་ངོ་། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་ བསམ་གྱིས་མི་ཁྱབ་པ་ཡིན་པས་དེས་དེ་ལ་མེ་ཏོག་ཕྲེང་བ་བྱིན་པ་དང་། རྒྱལ་པོའི་མི་རྣམས་ཀྱིས་རྐུན་པོ་ཅིག་ཤོས་པོ་དེ་བཟུང་ནས་རྒྱལ་པོ་ལ་ཕུལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ལ་ཇི་ལྟར་བསྒྲུབ་པར་བྱ། དེ་རྣམས་ཀྱིས་སྨྲས་པ།

  890. 135b

    ལྷ་དགུམ་ལགས་སོ། །རྒྱལ་པོས་སྨྲས་པ། ཤེས་ལྡན་དག་སྐྱེས་བུ་འདི་ལྟ་བུའི་དཔའ་བོ་ག་ལ་གསད། འདི་ལ་སྤྱན་རས་ཀྱིས་བཙའ་བར་བྱའོ་ཞེས་དེས་བུ་མོ་རྒྱན་ཐམས་ཅད་ཀྱིས་བརྒྱན་ནས་དེ་ལ་ཆུང་མར་བྱིན་ཏེ། རྒྱལ་སྲིད་ཕྱེད་ཀྱང་བགོས་སོ། །དགེ་སློང་དག་ཇི་ སྙམ་དུ་སེམས། དེའི་ཚེ་དེའི་དུས་ཀྱི་རྐུན་པོ་ཅིག་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་བུ་གང་ཡིན་པ་དེ་ནི་སྒྲ་ཅན་ཟིན་འདི་ཉིད་ཡིན་ཏེ། དེ་ན་ཡང་ང་ལ་འདིས་མེ་ཏོག་གི་ཕྲེང་བས་ངོ་ཤེས་སོ། །ད་ལྟར་ཡང་འདིས་ང་ལ་དུས་ངོ་ཤེས་པར་བྱས་སོ། ། དགེ་སློང་དག་དེ་ལྟ་བས་ན་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པས་ལས་ཀྱི་གནས་པ་ལ་གོམས་པར་བྱའོ། །གྲགས་འཛིན་མས་བསམས་པ། གལ་ཏེ་སྒྲ་ཅན་ཟིན་གྱི་ཡབ་ཕོ་བྲང་དུ་གཤེགས་དང་། ཇི་ལྟར་ཡང་སླར་གཤེགས་པར་མི་ འགྱུར་བ་དེ་ལྟ་བུར་སྤྱད་པར་བྱའོ་སྙམ་ནས། དེ་ནས་བདག་ཉིད་དང་། ས་འཚོ་མ་དང་། རི་དགས་སྐྱེས་ལ་སོགས་པ་བུད་མེད་དྲུག་ཁྲི་རྒྱན་སྣ་ཚོགས་ཀྱིས་བརྒྱན་ཅིང་ཤིན་དུ་དྲི་ཞིམ་པོའི་མེ་ཏོག་གི་ཕྲེང་བ་དང་། བདུག་པས་བསྒོས་པའི་གོས་རྣམས་ཀྱིས་བཀླུབས་སོ། །དེ་ནས་ བཅོམ་ལྡན་འདས་ཀྱིས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་དུ་བདར་ཏེ་འདུལ་བའི་སྐྱེ་བོ་ལ་གཟིགས་ནས་ཕོ་བྲང་གི་ནང་དུ་ཞུགས་སོ། །དེ་ནས་གྲགས་ འཛིན་མ་དང་། རི་དགས་སྐྱེས་དང་། ས་འཚོ་མ་ལ་སོགས་ཏེ་བུད་མེད་དྲུག་ཁྲི་གཟུགས་དང་། ལང་ཚོ་དང་། དྲེགས་པའི་རྒྱགས་པས་ཟིན་ཅིང་ཡིད་ལ་གཅགས་པས་གཡེན་སྤྱོ་ཞིང་བསྐྱོད་པ་ན་གསེར་གྱི་འོག་བག་ལྷོད་པར་བཅིངས་པ་མང་པོ་འཁྲོལ་ཞིང་སྒྲ་འབྱིན་ ལ། འཛུམ་པའི་གླུ་དབྱངས་སྙན་པ་དང་། མིག་དང་སྨིན་མ་སྐྱོད་ཅིང་ནུ་མ་དང་། ཡན་ལག་རྣམས་གསལ་བར་སྟོན་པ། བུད་མེད་ཀྱི་ཚུལ་གྱི་སྟེག་ཆོས་རྣམས་བསྟན་ཏོ། །དེ་ནས་བཅོམ་ལྡན་འདས་ཀྱིས་འདི་སྙམ་དུ་དགོངས་ཏེ། གལ་ཏེ་གདུགས་ཚོད་གསོལ་

  891. 136a

    ན་འདུལ་བའི་སྐྱེ་བོའི་དུས་ལས་ཀྱང་འདས་པར་འགྱུར་ལ། བུད་མེད་འདི་རྣམས་ཀྱང་འདོད་ཆགས་ཀྱིས་གདུངས་པས་བདེན་པའི་སྣོད་དུ་མི་འགྱུར་གྱིས་འདི་ལྟར་སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་མ་ལ་ངས་ཕོ་བྲང་དུ་རྫུ་འཕྲུལ་གྱི་ཆོ་ འཕྲུལ་བསྟན་པས་དད་པར་བྱའོ་སྙམ་དུ་དགོངས་ཏེ། ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་མཛད་དེ། འདི་ལྟ་སྟེ་འཆག་པ་དང་། བཞེངས་པ་དང་། བཞུགས་པ་དང་། མནལ་བ་མཛད་དོ། །མེའི་ཁམས་ལ་ཡང་ སྙོམས་པར་འཇུག་པར་མཛད་དེ། མེའི་ཁམས་ལ་སྙོམས་པར་ཞུགས་པ་ན་སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་རྣམ་པ་སྣ་ཚོགས་དག་འབྱིན་པར་མཛད་དེ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་དག་གོ། །གཞན་ཡང་ཆོ་འཕྲུལ་ཟུང་དུ་སྟོན་པར་བྱེད་དེ། སྐུའི་སྨད་ནས་འབར་བར་མཛད་ལ་སྐུའི་སྟོད་ནས་ཆུ་གྲང་མོའི་རྒྱུན་འབེབས་པར་མཛད་དེ། སྐུའི་སྟོད་ནས་འབར་བར་མཛད་ལ་སྐུའི་སྨད་ནས་ཆུ་གྲང་མོའི་རྒྱུན་འབེབས་པར་མཛད་དོ། །ཤར་ཕྱོགས་ ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་གྱི་ཆོ་འཕྲུལ་མངོན་པར་འདུ་མཛད་པ་སླར་བསྡུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ སོ། །དེ་ནས་བུད་མེད་དེ་རྣམས་ཀྱིས་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་དག་མཐོང་ནས་དད་པར་གྱུར་ཏེ། ཤིང་རྩ་བ་ནས་བཅད་པ་བཞིན་དུ་བཅོམ་ལྡན་འདས་ཀྱི་ཞབས་ལ་གཏུགས་ཏེ་ཆོས་མཉན་པའི་ཕྱིར་སྤྱན་སྔ་ན་འཁོད་དོ། །དེ་ནས་བཅོམ་ལྡན་འདས་ཀྱིས་ དེ་རྣམས་ཀྱི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་མཁྱེན་ནས། གང་ཐོས་པས་འཕགས་པའི་བདེན་པ་བཞི་སོ་སོར་ཡང་དག་པར་ཁོང་དུ་ཆུད་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། ས་འཚོ་མ་དང་། རི་དགས་སྐྱེས་ལ་སོགས་པ་

  892. 136b

    བུད་མེད་དྲུག་ཁྲིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །གྲགས་འཛིན་མ་ནི་ལྷག་པར་འདོད་ཆགས་ཀྱིས་ཟིལ་གྱིས་ནོན་པས་བདེན་པ་མཐོང་བར་མ་བྱས་ཏེ། དེ་འདི་སྙམ་དུ་སེམས་ཏེ། མ་ལ་བདག་གིས་བཅོམ་ལྡན་འདས་རོའི་སྲེད་པས་དབང་དུ་བྱའོ་སྙམ་དུ་བསམས་ ནས། རང་ཉིད་ཀྱིས་བཅོམ་ལྡན་འདས་ཀྱི་ཆེད་དུ་བཟའ་བ་དང་བཏུང་བ་དག་གཡོས་ནས་བདག་རང་གི་ལག་ནས་བཅོམ་ལྡན་འདས་ལ་དབུལ་བར་བྱའོ་ཞེས་པ་དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ལ་གྲགས་འཛིན་མ་ནི་རང་གི་ལག་ ནས་བགྱིས་པའི་རོའི་སྲེད་པས་དབང་དུ་བགྱི་བར་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ང་སྔོན་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་པས་རོ་སོ་སོར་ཉམས་སུ་མྱོང་ཞིང་རོ་སོ་སོའི་ཆགས་པ་ཉམས་སུ་མྱོང་བ་ ལས་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཏེ། རོ་སོ་སོར་ཉམས་སུ་མྱོང་ཡང་རོ་ལ་སོ་སོར་ཆགས་པར་འགྱུར་བའི་ཉམས་སུ་མྱོང་བ་མེད་ན། ད་ང་ལ་གྲགས་འཛིན་མས་རོའི་སྲེད་པས་ཇི་ལྟར་དབང་དུ་བྱ། དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་གྲགས་འཛིན་མས་དབང་དུ་བགྱི་བའི་སླད་དུ་ལ་དུས་དབང་དུ་བགྱི་བར་བརྩམས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ད་ལྟར་གྱི་འབའ་ཞིག་ཏུ་མ་ཟད་ཀྱི་ཇི་ལྟར་ འདིས་འདས་པའི་དུས་ན་ཡང་དགའ་བར་འགྱུར་བས་དབང་དུ་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་རྡལ་མེད་པའི་དགོན་པའི་གནས་མེ་ཏོག་དང་། འབྲས་བུ་དང་། ཆུ་དང་། རྩ་བ་ཕུན་སུམ་ཚོགས་པ་ཞིག་ན་དྲང་སྲོང་དཀའ་ཐུབ་དྲག་པ་རྩ་བ་དང་། འབྲས་བུ་དང་། ཆུ་ལ་ལོངས་སྤྱོད་པ། པགས་པ་དང་ལོ་མ་གྱོན་པ་ཞིག་གནས་ཏེ། དེས་མངོན་པར་ཤེས་པ་ལྔ་མངོན་སུམ་དུ་བྱས་པས་དེ་ལ་རི་དགས་གདུག་པ་རྣམས་ཀྱང་འདྲིས་པའི་གནས་པས་བསྟི་གནས་ན་གནས་སོ། །དེ་ཕྱོགས་གཞན་ཞིག་ཏུ་གཅི་བའི་ཕྱིར་སོང་བ་ན་རི་དགས་མོ་ཞིག་རྗེས་

  893. 137a

    བཞིན་རྗེས་བཞིན་དུ་འབྲེང་ངོ་། །དེས་ཁུ་བ་དང་བཅས་པར་གཅིས་པ་དེ་རི་དགས་མོ་དེས་འཐུངས་ནས་ལྕེས་མོ་མཚན་ལ་བལྡགས་སོ། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པ་ཡིན་པས་སེམས་ཅན་དང་ལྡན་པར་གྱུར་ཏོ། །དེ་འབྱུང་ བའི་དུས་སུ་ཕྱོགས་དེར་འོངས་ནས་ཁྱེའུ་ཞིག་བྱུང་བ་དང་དེས་དྲི་བསྣམས་ན་རིས་མི་མཐུན་པའི་སེམས་ཅན་ཡིན་ཏེ། སྐྲག་ནས་གཅིན་རྟུག་ཤོར་ནས་བོར་ཏེ་སོང་ངོ་། །ཇི་ཙམ་ཞིག་ན་དྲང་སྲོང་དེ་ཕྱོགས་དེར་ཕྱིན་པ་དང་། དེས་ཁྱེའུ་དེ་མཐོང་ནས་འདི་སུའི་བུ་ཡིན་སྙམ་པའི་བསམ་པ་ལ་ཞུགས་ པ་ན། བདག་ཉིད་ཀྱི་ཡིན་པར་མཐོང་ནས་དེས་དེ་བསྟི་གནས་སུ་ཁྱེར་ཏེ་བསྣུན་བསྙོད་ནས་བསྐྱེད་དེ། དེ་ཆེན་པོར་གྱུར་པ་དང་མགོ་ལ་རི་དགས་ཀྱི་རྭ་སྐྱེས་པར་གྱུར་ཏེ། དེ་ལ་རི་དགས་ཀྱི་རྭ་འདྲ་བ་ཡོད་པས་དྲང་སྲོང་རྭ་ཅན་དྲང་སྲོང་རྭ་ཅན་ཞེས་བྱ་བར་གྱུར་ཏོ། །ཇི་ཙམ་ན་དྲང་སྲོང་དེ་ནད་ཀྱིས་ ཐེབས་པར་གྱུར་ནས། དྲང་སྲོང་དེ་དང་མཐུན་པའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏེ། གང་གི་ཚེ་དེ་འཆི་བ་ལ་ཐུག་པའི་ཚོར་བ་སྐྱེས་ནས་རིང་པོ་མི་ཐོགས་པར་འཆི་བར་འགྱུར་བ་དེའི་ཚེ་དེས་བུ་དེ་ལ་སྨྲས་པ། བུ་བསྟི་གནས་འདིར་ཕྱོགས་སྣ་ཚོགས་ན་ གནས་པའི་དྲང་སྲོང་རྣམས་དུས་དུས་སུ་འོང་གིས་ཁྱོད་ང་ལ་དགའ་བས་དེ་རྣམས་ལ་ཀུན་དུ་སྤྱོད་པའི་ཆོས་ཀྱིས་འོངས་པ་ལེགས་སོ་ཞེས་བརྗོད་པས་ཡང་དག་པར་དགའ་བར་བྱ་ཞིང་། སྟན་ལ་མགྲོན་དུ་བོས་ལ་རྩ་བ་དང་། འབྲས་བུ་ཅི་ནུས་པར་སྟོབས་ཤིག་ཅེས་སྨྲས་ནས། བསགས་པ་ ཀུན་གྱི་མཐའ་ཟད་ཅིང་། །མཐོན་པོ་ཀུན་གྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །དེས་དེ་དྲང་སྲོང་གི་ཆོས་བཞིན་དུ་བསྲེགས་ཏེ། དེ་ཕ་དང་བྲལ་བའི་མྱ་ངན་ གྱིས་ནོན་པས་སྐྱོ་བ་སྐྱེས་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེས་དུས་གཞན་ཞིག་ན་ཆུའི་དོན་དུ་བུམ་པ་ཁྱེར་ནས་སོང་བ་ན་ལྷས་ཆར་དབབ་པར་བརྩམས་སོ། །དེ་ཆུས་བུམ་པ་བཀང་ནས་ཁྱེར་ཏེ་འོང་བ་འགྲེད་ནས་རྡེག་འཆོས་སོ། །དྲང་སྲོང་རྣམས་ནི་མྱུར་

  894. 137b

    དུ་ཁྲོ་བ་ཡིན་པས་དེས་ཆུ་ཉུང་ཞིག་བླངས་ཏེ་གཏོར་ནས་དམོད་པ་བོར་བ་སྤྱོད་པ་ངན་པ་ཅན་ཁྱོད་ཀྱིས་བུམ་པ་ཆུས་བཀང་བ་ཆག་པར་བྱས་ཀྱིས། དེ་ལྟ་བས་ན་ཁྱོད་ཉི་མ་འདི་ནས་བཟུང་སྟེ་ལོ་བཅུ་གཉིས་སུ་ཆར་མི་འབེབས་པར་གྱུར་ཅིག་ཅེས་བྱས་པས་ལྷ་ཆར་མི་འབེབས་པར་གྱུར་ཏོ། ། བཱ་རཱ་ཎ་སཱིར་མུ་གེ་ཆེན་པོ་བྱུང་ནས་སྐྱེ་བོའི་ཚོགས་ཀུན་དུ་དོང་ངོ་། །རྒྱལ་པོས་ལྟས་མཁན་རྣམས་བཀུག་སྟེ་སྨྲས་པ། ཤེས་ལྡན་དག་སུ་ཞིག་གི་མཐུས་ན་ལྷ་ཆར་མི་འབེབས། དེ་རྣམས་ཀྱིས་སྨྲས་པ། དྲང་སྲོང་ཁྲོས་པས་ལགས་སོ། །ཇི་སྟེ་དྲང་སྲོང་དེ་དཀའ་ཐུབ་དེ་ལ་ བསྐྱོད་པར་ནུས་ན་ལྷ་དེ་བཞིན་དུ་ཆར་འབེབས་ཀྱི་གཞན་དུ་ན་ནི་མ་ལགས་སོ། །རྒྱལ་པོ་སེམས་ཁོང་དུ་ཆུད་ཅིང་འདུག་པ་དང་། བཙུན་མོ་དང་། བློན་པོ་དང་། གཞོན་ནུ་རྣམས་ཀྱིས་སྨྲས་པ། ལྷ་ཅིའི་སླད་དུ་ཐུགས་མི་དགྱེས། དེས་སྨྲས་པ། དྲང་སྲོང་ཁྲོས་པས་ལྷ་ ཆར་མི་འབེབས་ལ་ལྟས་མཁན་རྣམས་ཀྱང་འདི་སྐད་ཅེས་གལ་ཏེ་དྲང་སྲོང་དེ་དཀའ་ཐུབ་དེ་ལས་བསྐྱོད་ན་དེ་བཞིན་དུ་ལྷ་ཆར་འབེབས་ཀྱི། གཞན་དུ་ན་མ་ཡིན་ནོ་ཞེས་ཟེར་ཏེ། དཀའ་ཐུབ་དེ་ལ་སུ་ཞིག་གིས་བསྐྱོད་པར་ནུས་པ་མི་ཤེས་སོ། །རྒྱལ་པོ་དེའི་བུ་མོ་ཞི་ལྡན་མ་ཞེས་བྱ་བ་དེས་སྨྲས་ པ། ལྷ་གལ་ཏེ་དེ་ལྟ་ན་ཐུགས་ལས་ཆུང་ངུར་མཛོད་ཅིག་དང་། བདག་གིས་དྲང་སྲོང་དེ་དཀའ་ཐུབ་དེ་ལས་ཇི་ནས་ཀྱང་གཡོས་པར་གྱུར་པ་དེ་ལྟར་བགྱིའོ། །དེས་སྨྲས་པ། ཐབས་ཅི་ཞིག་གིས་བྱ། དེས་སྨྲས་པ། བདག་དང་བུད་མེད་གཞན་རྣམས་བྲམ་ཟེ་རྣམས་ལ་གསང་ཚིག་ འདོན་དུ་སྩོལ་ཅིག །གྲུ་ཟམ་གྱི་བསྟི་གནས་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་བགྱིད་དུ་སྩོལ་ཅིག །དེས་དེ་དང་བུད་མེད་གཞན་དག་ཀྱང་བྲམ་ཟེ་ལ་གསང་ཚིག་སློབ་ཏུ་བཅུག་གོ། །གྲུ་ཟམ་གྱི་བསྟི་གནས་ཀྱང་བྱེད་དུ་བཅུག་གོ། །དེ་ནས་དེས་དབང་དུ་ བྱ་བའི་རྫས་དང་ཆང་གིས་བཀང་བའི་འབྲས་བུ་དེ་དག་དང་། གཞན་ཡང་འབྲས་བུ་རྣམ་པར་བཀྲ་བ་སྣ་ཚོགས་བྱེད་དུ་བཅུག་ནས། དྲང་སྲོང་གི་ཆ་བྱད་དུ་བྱས་ཏེ། དེ་རྩྭ་དང་ཤིང་ཤུན་གྱོན་ནས་བུད་མེད་རྣམས་དང་ལྷན་ཅིག་བྲམ་ཟེ་རྣམས་ལ་གསང་ཚིག་འདོན་ཅིང་དེའི་བསྟི་གནས་

  895. 138a

    སུ་ལྷགས་པ་དང་། དྲང་སྲོང་ལ་སློབ་མ་རྣམས་ཀྱིས་སྨྲས་པ། མཁན་པོ་ཁྱོད་ཀྱི་བསྟི་གནས་སུ་དྲང་སྲོང་མང་དུ་ལྷགས་སོ། །དྲང་སྲོང་རྣམས་ལྷགས་པ་ལེགས་ཀྱིས་ནང་དུ་ཤོག་ཤིག །དེ་རྣམས་ནང་དུ་ཞུགས་པ་དེས་མཐོང་ནས་ཚིགས་སུ་བཅད་པས་ སྨྲས་པ། བརྟགས་པ་མེད་པར་འགྱིང་ཞིང་འགྲོ་བ་དང་། །བཞིན་ཡང་ཁ་སྤུ་རྣམས་དང་བྲལ་གྱུར་ཅིང་། །འདི་རྣམས་བྲང་ནི་མཐོན་དམན་གྱུར་པ་སྟེ། །ཨེ་མ་དྲང་སྲོང་ཆ་བྱད་སྔོན་མ་བྱུང་། །དེ་དེ་རྣམས་ལ་ཐེ་ཚོམ་གྱི་ཀུན་ནས་དཀྲིས་པའི་བློས་རྩ་བ་དང་འབྲས་བུ་བསྟབས་ སོ། །དེ་རྣམས་ཀྱིས་དེ་དག་ཟོས་ནས་དྲང་སྲོང་དེ་ལ་སྨྲས་པ། ཁྱོད་ཀྱི་འབྲས་བུ་འདི་དག་ནི་རྩུབ་པ་ཁ་བ་བསྐ་བ་ཡིན་གྱི། བདག་ཅག་གི་ཆུ་ནང་གི་བསྟི་གནས་དེ་ན་ཡོད་པའི་འབྲས་བུ་རྣམས་ནི་བདུད་རྩི་དང་འདྲ་བ་ཡོད་དེ། འདི་ལྟར་ཁྱོད་བདག་ཅག་གི་བསྟི་གནས་སུ་སྤྱན་འདྲེན་ ཏོ། །དེས་ཁས་བླངས་ནས་དེ་དེ་རྣམས་དང་གྲུ་ཟམ་གྱི་སྐྱེད་མོས་ཚལ་དུ་ཞུགས་ནས་དེས་དེ་ལ་དབང་དུ་བྱ་བའི་རྫས་ཆང་གིས་བཀང་བ་དང་ལྡན་པའི་ན་ལི་ཀེ་རའི་འབྲས་བུ་རྣམས་དང་། གཞན་དག་ཀྱང་བྱིན་ནོ། །དེ་ཆང་གིས་མྱོས་པ་དང་དབང་དུ་བྱ་བའི་རྫས་ཀྱི་སྦྱོར་བས་དེ་དེ་དང་ ལྷན་ཅིག་མི་ཚངས་པར་སྤྱད་པས་རྫུ་འཕྲུལ་ཡོངས་སུ་ཉམས་སོ། །ཆར་ལ་མངོན་པར་དགའ་བའི་ལྷས་སྤྲིན་ཀུན་ནས་བསྡུས་པ་དང་དྲང་སྲོང་དེས་བཀག་གོ། །ཞི་ལྡན་མས་སྨྲས་པ། ད་དུང་ཁྱོད་ཀྱིས་བདག་ཉིད་སུ་ཡིན་པ་མི་ཤེས་སམ། དེས་དེའི་འདོད་ཆགས་ཀྱི་ ཞགས་པས་བཅིངས་ནས་རྒྱལ་པོ་ལ་ཕུལ་ནས་ལྷ་དྲང་སྲོང་དེ་ནི་འདི་ལགས་སོ། །དེ་ནས་ལྷས་ཆར་དབབ་པར་བརྩམས་ནས་ལོ་ལེགས་པར་གྱུར་ཏོ། །རྒྱལ་པོས་ཞི་ལྡན་མ་འཁོར་དང་བཅས་ཏེ་དྲང་སྲོང་དེ་ལ་ཆུང་མར་བྱིན་ནོ། །དེས་ཞི་ལྡན་མ་སྤངས་ནས་གཞན་དག་དང་ ལྷན་ཅིག་དགའ་མགུར་སྤྱོད་པ་ལ་ཞུགས་པ་ན། དེ་ལ་ཞི་ལྡན་མ་ཕྲག་དོག་གི་ཀུན་ནས་དཀྲིས་པའི་སྙིང་གིས་དེ་ལ་བཀུར་སྟི་མ་ཡིན་པ་བྱ་བར་བརྩམས་པ་དང་། དེ་ནས་ཕར་ཅིག་ཚུར་ཅིག་རྩོད་པས་མཆིལ་ལྷམ་དང་བཅས་པའི་རྡོག་པས་མགོར་བསྣུན་པ་དང་། དེས་

  896. 138b

    བསམས་པ། སྤྲིན་གྱི་འབྲུག་སྒྲ་ཡང་བདག་གིས་མནགས་པར་མི་བཟོད་ན་ད་ནི་འདོད་ཆགས་ཀྱི་ཞགས་པས་བཅིངས་ན་བུད་མེད་ཙམ་གྱིས་ཀྱང་བརྙས་སམ་སྙམ་ནས་དེས་བརྩོན་འགྲུས་ལ་གནས་པས་སླར་ཡང་མངོན་པར་ཤེས་པ་ལྔ་མངོན་སུམ་དུ་བྱས་སོ། །དགེ་སློང་ དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །ཞི་ལྡན་མ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་ཡང་འདིས་ང་རོའི་སྲེད་པས་དབང་དུ་བྱས་སོ། །ད་ལྟར་ཡང་འདིས་ལ་དུས་དབང་དུ་བྱ་བ་ལ་ཞུགས་སོ། །གང་གི་ཚེ་བཅོམ་ ལྡན་འདས་ཕོ་བྲང་དུ་གདུགས་ཚོད་གསོལ་ནས་ཕྱི་རོལ་དུ་བྱུང་བ་དེའི་ཚེ་གྲགས་འཛིན་མ་ཁྱིམ་ཐབ་ཀྱི་བྱམས་པ་དང་བྲལ་ལོ་སྙམ་སྟེ་རེ་ཐག་ཆད་ནས་ཁང་ཐོག་ཏུ་འཛེགས་ཏེ་བདག་ཉིད་མཆོངས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ ཡིན་པས་བཅོམ་ལྡན་འདས་ཀྱི་རྫུ་འཕྲུལ་གྱིས་དེ་བླངས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་སླད་དུ་གྲགས་འཛིན་མ་ཁང་ཐོག་ནས་བདག་ཉིད་མཆོངས་པ་ ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་ངའི་ཕྱིར་བདག་ཉིད་བོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་ བྱ་བ་ཞིག་བྱུང་སྟེ། དེ་དུས་གཞན་ཞིག་ན་རི་དགས་ཤོར་ཞིང་རིམ་གྱིས་སོང་སྟེ་རི་སུལ་ཞིག་ཏུ་ཕྱིན་པ་དང་། དེས་དེ་ན་མི་འམ་ཅི་ཕོ་དང་། མི་འམ་ཅི་མོ་གཉིས་ལས་མི་འམ་ཅི་ཕོ་ནི་ཉལ། མིའམ་ཅི་མོ་ནི་མ་ཉལ་བ་ཞིག་མཐོང་ནས་རྒྱལ་པོས་གཞུ་རྣ་དྲུང་དུ་བཀང་བའི་མདས་མིའམ་ཅི་ཕོ་ གནད་དུ་བསྣུན་ནས་སྲོག་དང་ཕྲལ་ཏེ། རྒྱལ་པོས་མི་འམ་ཅི་མོ་ཆུང་མའི་དོན་དུ་བཟུང་ནས་ཁྲིད་དེ་སོང་བ་ལས་དེས་སྨྲས་པ། ལྷ་རེ་ཞིག་གཞེས་ལ་དེའི་བར་དུ་བདག་གིས་མི་འམ་ཅིའི་རོ་ལ་མཆོད་པ་བགྱིད་ན་གནང་བར་མཛད་དུ་གསོལ། རྒྱལ་པོས་སྨྲས་པ། རེ་ཞིག་གང་དུ་འགྲོ་བར་འགྱུར།

  897. 139a

    དེ་ལ་མཆོད་པ་ཇི་ལྟར་བྱེད་པ་བལྟའོ་སྙམ་ནས་དེས་དེ་ལ་གནང་ངོ་། །དེ་ནས་དེས་མི་འམ་ཅིའི་རོ་དེ་ལ་ཤིང་གི་ཕུང་པོ་བྱས་ནས་མེ་སྦར་ཏེ་བདག་ཉིད་མཆོངས་སོ། །ལྷས་ཚིགས་སུ་བཅད་པས་སྨྲས་པ། མིའམ་ཅི་མོ་དགའ་སྤྱད་ཅེས། དོན་གཞན་དུ་ནི་བསམས་པ་ལས། །གཞན་དུ་ཡོངས་སུ་བསྒྱུར་བྱས་པས། །སྲོག་ཆགས་གཉིས་ནི་བསད་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་མི་འམ་ཅི་གང་ཡིན་པ་དེ་ནི་ང་ཉིད་ཡིན་ནོ། །མིའམ་ཅི་མོ་གང་ཡིན་པ་དེ་ནི་ གྲགས་འཛིན་མ་འདི་ཉིད་ཡིན་ཏེ། དེ་ན་ཡང་འདིས་ངའི་ཕྱིར་བདག་ཉིད་མེ་ཕུང་དུ་མཆོངས་སོ། །ད་ལྟར་ཡང་འདིས་ངའི་ཕྱིར་ཁང་ཐོག་ནས་བདག་ཉིད་མཆོངས་སོ། །བཅོམ་ལྡན་འདས་ཀྱིས་དགོངས་པ། ད་ནི་གྲགས་འཛིན་མ་གདུལ་བའི་དུས་ལ་བབ་ཀྱིས། མ་ ལ་འདི་ངས་འཁོར་བའི་འབྲོག་དགོན་པ་ནས་བསྒྲལ་བར་བྱའོ་སྙམ་དུ་དགོངས་ནས་དེ་ལ་གང་ཐོས་པས་འཕགས་པའི་བདེན་པ་བཞི་ཡང་དག་པར་ཁོང་དུ་ཆུད་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། གྲགས་འཛིན་མ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་ མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཇི་ཙམ་ན་དགྲ་བཅོམ་མར་གྱུར་པ་དང་། དེ་རང་གི་རིགས་རྒྱུད་དང་མཐུན་པར་བྱ་བ་དང་། འཕགས་ པའི་ལམ་ཐོབ་པས་དགེ་སློང་མ་རྣམས་ཀྱི་ནང་དུ་དགོས་པ་བྱུང་བ་རྣམས་ལ་ཤིན་ཏུ་འཛེམ་པ་དང་ལྡན་ནོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་མ་རྣམས་ལ་འཛེམ་པ་དང་ལྡན་པའི་མཆོག་ནི་འདི་ལྟ་ སྟེ་སྒྲ་ཅན་ཟིན་གྱི་མ་གྲགས་འཛིན་མ་འདི་ཡིན་ནོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གྲགས་འཛིན་མས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མངལ་དུ་ལོ་དྲུག་བཟུང་ལགས།

  898. 139b

    བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གྲགས་འཛིན་མ་འདི་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་ བྱུང་བ་གནག་ལྷས་ཞིག་ན་ཕྱུགས་རྫི་མ་དང་། བུ་མོ་མ་སྨད་གཉིས་ཞིག་གནས་ཏེ། དེ་གཉིས་དར་བའི་བུམ་པ་ཐོགས་ཏེ། རྒྱུན་དུ་གྲོང་མཐར་འགྲོ་བ་ན། དེ་གཉིས་ལས་བུ་མོ་ནི་ངན་གཡོའི་རང་བཞིན་ཅན་ཡིན་ནོ། །མ་ནི་དྲང་བ་ཞིག་ཡིན་ནོ། །བུ་མོས་སྨྲས་པ། ཡུམ་རེ་ཞིག་དར་བའི་བུམ་པ་སྣོམས་ཤིག་བཤང་བ་ཞིག་བགྱིད་དོ། །དེས་ཐོགས་ཏེ་སོང་ངོ་། །དེ་ནི་ངན་གཡོའི་རང་བཞིན་ཅན་ཡིན་པས་ཕྱིན་སྡོད་ཅིང་དེའི་རྗེས་སླེབས་པར་མ་སོང་སྟེ། དེ་དེ་ལྟར་བྱེད་པ་ན་མ་དེས་དར་བའི་བུམ་པ་རྒྱང་གྲགས་དྲུག་གི་བར་དུ་ཁྱེར་རོ། ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཕྱུགས་རྫི་བུ་མོ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་འདིས་མ་ལ་ངན་གཡོའི་སྤྱོད་པས་རྒྱང་གྲགས་དྲུག་ཏུ་དར་བའི་བུམ་པ་བསྐུར་རོ། །ལས་དེའི་རྣམ་པར་སྨིན་པས་འདིས་སྒྲ་ཅན་ཟིན་ལོ་དྲུག་ཏུ་ མངལ་དུ་བཟུང་ངོ་། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་སྒྲ་ཅན་ཟིན་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་ལོ་དྲུག་ཏུ་མའི་མངལ་ན་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒྲ་ཅན་ ཟིན་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། སྒྲ་ཅན་ཟིན་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར།

  899. 140a

    དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་ དང་ཁམས་དང་སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བཱ་རཱ་ཎ་སཱི་དང་ཧ་ཅང་མི་རིང་བ་ན་མེ་ཏོག་དང་འབྲས་བུ་ ཕུན་སུམ་ཚོགས་པའི་བསྟི་གནས་བྱ་སྣ་ཚོགས་སྐད་འབྱིན་ཅིང་བྱ་དང་རི་དགས་འདྲིས་པར་བསྟེན་པ་ཞིག་ཡོད་དེ། དེ་ན་དྲང་སྲོང་འབྲས་བུ་དང་། རྩ་བ་དང་ཆུ་ལ་ལོངས་སྤྱོད་པ། པགས་པ་དང་ལོ་མ་གྱོན་པ། དུང་དང་བྲིས་པ་ཞེས་བྱ་བ་སྤུན་གཉིས་ཞིག་གནས་ཏེ། དུང་ནི་མཁན་པོ་བྱེད་ དོ། །བྲིས་པ་ནི་སློབ་མ་བྱེད་དེ། དེ་གཉིས་བཱ་རཱ་ཎ་སཱིའི་འཇིག་རྟེན་ཐམས་ཅད་ལ་ཡང་གྲགས་སོ། །རྒྱལ་པོ་ཚངས་སྦྱིན་གྱིས་ཀྱང་སྐྱེད་མོས་ཚལ་ག་གེ་མོ་ཞེས་བྱ་བར་དྲང་སྲོང་དུང་དང་བྲིས་པ་སྤུན་གཉིས་གནས་ཏེ། དེ་ལ་དུང་ནི་མཁན་པོ་བྱེད་དོ། །བྲིས་པ་ནི་སློབ་མ་བྱེད་དོ་ཞེས་ཐོས་སོ། །ཇི་ ཙམ་དུས་གཞན་ཞིག་ན་དུང་གིས་རིལ་བ་ཆུས་བཀང་ནས་རྩ་བ་དང་འབྲས་བུའི་ཆེད་དུ་ནགས་ཁྲོད་དུ་སོང་ངོ་། །བྲིས་པ་ཡང་དེ་ཉིད་ནས་ནང་པར་སྔར་ལངས་ཏེ་སོང་ནས་དེས་མེ་ཏོག་དང་འབྲས་བུ་དག་བླངས་ཏེ་རིངས་པར་འོངས་ནས་རང་གི་རིལ་བ་ལས་བརྟགས་ནས་ཆུ་ཉུང་ནས་དེ་སྐོམ་པས་ཉེན་ པས་བསམས་པ། མཁན་པོའི་ཆུ་བཏུང་ངོ་སྙམ་ནས་དེས་འཐུངས་སོ། །ཇི་ཙམ་ན་དྲང་སྲོང་དུང་རྩ་བ་དང་འབྲས་བུ་དག་བླངས་ནས་སྐོམ་པས་ཉེན་པའི་རང་བཞིན་གྱིས་བསྟི་གནས་སུ་ཕྱིན་ནས་རིལ་བ་ལ་བརྟགས་ན་སྟོང་པར་མཐོང་ནས་དེ་མི་བཟོད་པ་སྐྱེས་ཏེ་སྨྲས་པ། ཁོ་བོའི་ཆུ་རྐུན་མ་སུ་ཞིག་གིས་བརྐུས། བྲིས་པས་སྨྲས་པ། མཁན་པོ་རྐུན་མ་ནི་བདག་ལགས་ཏེ། བདག་གིས་འཚལ་གྱིས་བདག་ལ་ཆད་པས་དགུམ་དུ་གསོལ། དེས་སྨྲས་པ། ཁྱོད་ནི་ཁོ་བོ་དང་སྤུན་ཡིན་ལ་སློབ་མ་ཡང་ཡིན་པས་གལ་ཏེ་འཐུངས་ན་འཐུངས་པས་ལེགས་ཀྱིས་ཅི་བདེར་སྤྱོད་ཅིག །དེས་སྨྲས་པ། མཁན་པོ་འགྱོད་པ་འདི་བདག་

  900. 140b

    གིས་བསལ་བར་རྔོ་མི་ཐོག་གིས་ཆོམ་རྐུན་པ་ལ་གཅོད་པའི་ཆད་པ་ལྕི་བ་གང་ལགས་པས་བདག་ལ་དགུམ་དུ་གསོལ་ཞེས་དེ་སྐད་སྨྲས་པ་དང་། དྲང་སྲོང་དུང་ཁྲོས་ནས་སྨྲས་པ། ཁོ་བོ་ཆད་པ་མི་གཅོད་ཀྱིས་ཅི་སྟེ་ཁྱོད་ཆད་པ་དོན་དུ་གཉེར་ན་རྒྱལ་པོའི་དྲུང་དུ་སོང་ཤིག །ཡང་དེའི་ཚེ་རྒྱལ་པོ་རི་དགས་ འཆོར་བའི་ཕྱིར་ཆས་པ་དེ་ལ་དེས་རྒྱལ་བ་དང་ཚེ་སྤེལ་བ་དག་ཀྱང་བྱས་ནས་ཚིགས་སུ་བཅད་པས་གསོལ་བ་བཏབ་པ། རྒྱལ་ཆེན་གང་ཕྱིར་མ་སྩལ་ཆབ། །འཚལ་བས་བདག་ནི་རྐུན་མ་ལགས། །ཆོམ་རྐུན་གཅད་པ་གང་ལགས་པའི། །ཆད་པའི་ལྕི་བས་བདག་ལ་ཁུམ། །རྒྱལ་པོས་སྨྲས་པ། ཆུ་ལ་ནི་མ་བྱིན་པར་ལེན་པ་མེད་ན་འོན་ཀྱང་སུ་དབང་བའི་ཆུ་ཁྱོད་ཀྱིས་བརྐུས། དེས་ཇི་ལྟར་གྱུར་པ་རྣམས་སྨྲས་པ་དང་། རྒྱལ་པོས་སྨྲས་པ། ཁྱོད་དང་དེ་སྤུན་ཡིན་ཞིང་མཁན་པོ་ཡང་ཡིན་པས་ཆད་པས་གཅད་པར་མི་འོས་ཀྱིས་སོང་ཤིག །དེས་སྨྲས་པ། ལྷ་བདག་གིས་འགྱོད་པ་བསལ་བར་རྔོ་མི་ཐོག་གིས་ ཆོམ་རྐུན་པ་ལ་འགུམ་པའི་ཆད་པ་ལྕི་བ་གང་ལགས་པས་བདག་ལ་དགུམ་དུ་གསོལ་ཞེས་དེ་སྐད་སྨྲས་པ་དང་། རྒྱལ་པོ་ཁྲོ་བའི་ཀུན་ནས་དཀྲིས་པ་ལ་གནས་པའི་ཀུན་ནས་དཀྲིས་པ་དྲག་པོས་སྨྲས་པ། གལ་ཏེ་དེ་ལྟ་ན་འདི་ཉིད་དུ་འདུག་ལ་རེ་ཞིག་ང་སླར་མ་ལོག་གི་བར་དུ་ཁྱོད་མ་འགྲོ་ཤིག །རྒྱལ་པོ་ དེས་རི་དགས་བཤོར་ནས་ཆེད་དུ་བསམས་ཏེ་སྒོ་གཞན་ནས་ནང་དུ་ཞུགས་ནས་ཕྱིར་ཡང་མ་བྱུང་ངོ་། །བློན་པོ་རྣམས་ཀྱིས་ཞག་དྲུག་གི་ཉིན་པར་རྒྱལ་པོ་ལ་སྨྲས་པ། ལྷ་དྲང་སྲོང་དེ་ཕྱོགས་དེ་ཁོ་ན་ཉིད་ན་མཆིས་ནས་དེང་དུ་དགུང་དྲུག་ལགས་ཀྱིས་བཀའ་སྩལ་པའི་རིགས་སོ། །རྒྱལ་པོས་སྨྲས་པ། ཆད་པ་ནས་ཕྱུང་ ལ་དེའི་ཆད་པ་ནི་དེ་ཁོ་ན་ཡིན་གྱིས་སོང་ཤིག །བློན་པོ་རྣམས་ཀྱིས་དྲང་སྲོང་དེ་ལ་སྨྲས་པ། དྲང་སྲོང་ལྷའི་ཞལ་ནས་ཆད་པ་ནས་ཕྱུང་ལ་དེའི་ཆད་པ་ནི་དེ་ཁོ་ན་ཡིན་གྱིས་སོང་ཤིག་ཅེས་གསུང་ངོ་། །དེ་འགྱོད་པ་དང་བྲལ་ཏེ་སོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ རྒྱལ་པོ་ཚངས་སྦྱིན་གང་ཡིན་པ་དེ་ནི་སྒྲ་ཅན་ཟིན་འདི་ཉིད་ཡིན་ཏེ། དེ་ན་འདིས་སེམས་གདུག་པས་དྲང་སྲོང་ལ་ཕྱོགས་འདི་ཉིད་དུ་འདུག་ལ་མ་འགྲོ་ཤིག་ཅེས་སྨྲས་པ་དེའི་ལས་ཀྱི་རྣམ་པར་སྨིན་པས་མའི་མངལ་དུ་ལོ་དྲུག་གོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་

  901. 141a

    རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ།། །།འདུལ་བ་གཞི། བམ་པོ་དགུ་བཅུ་རྩ་ལྔ་པ། དགེ་སློང་རྣམས་ཐེ་ཚོམ་སྐྱེས་ ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་བཟང་ལྡན་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་མི་གཙོ་བོ་རྣམས་ཀྱི་རྒྱལ་པོར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བཟང་ལྡན་འདི་ ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་བཟང་ལྡན་གྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་མུ་ལྟོ་བ་ཞིག་ལྗོངས་ཤིག་ནས་བཱ་རཱ་ཎ་སཱིར་འོངས་པ་དང་། དེ་ན་གཉུག་མར་གནས་པའི་མུ་ལྟོ་བ་ཕྲག་དོག་གི་རང་བཞིན་ཅན་རྣམས་ཀྱིས་དེ་ ལྟག་དབྱུག་དང་ཐག་ལྕག་དང་། དབྱུག་པ་ལ་སོགས་པས་ཤིན་ཏུ་བརྡེགས་ནས་བསྐྲད་དེ་དེ་བཱ་རཱ་ཎ་སཱིའི་ཕྱི་རོལ་ན་རྒྱལ་པོའི་སྐྱེད་མོས་ཚལ་ཞིག་ཡོད་པ་ན་གནས་སོ། །ཇི་ཙམ་ན་རྒྱལ་པོ་ཚངས་སྦྱིན་སོ་གའི་དུས་ལ་བབ་སྟེ། མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཀྲུང་ཀྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་ཁུ་བྱུག་དང་། །ཤང་ཤང་ཏེའུ་རྣམས་སྐད་འབྱིན་པའི་ནགས་ཚལ་སྟུག་པོའི་སྐྱེད་མོས་ཚལ་གྱི་གཞིར་བཙུན་མོ་དང་ལྷན་ཅིག་སོང་ནས་དེ་སྐྱེད་མོས་ཚལ་དེ་ན་བཙུན་མོ་དང་ལྷན་ཅིག་བདེ་བ་ཉམས་སུ་མྱོང་བར་བྱས་ནས་གཉིད་ལོག་གོ། །བུད་མེད་ནི་མེ་ཏོག་དང་འབྲས་བུ་ལ་དགའ་

  902. 141b

    བ་ཡིན་པས། མེ་ཏོག་དང་འབྲས་བུ་ཚོལ་ཞིང་ཕན་ཚུན་འཁྱམ་པ་ལ་ཞུགས་སོ། །ཇི་ཙམ་ན་རྒྱལ་པོ་ཚངས་སྦྱིན་གཉིད་ཀྱིས་དུབ་པ་སངས་ནས་རིངས་པ་རིངས་པར་བཱ་རཱ་ཎ་སཱིར་ཞུགས་སོ། །བཙུན་མོའི་བུད་མེད་རྣམས་ཀྱང་རིངས་པ་རིངས་པར་དོང་ངོ་། །ཇི་ཙམ་ན་བུད་མེད་གཞན་ཞིག་རྟབས་པས་མུ་ཏིག་གི་དོ་ཤལ་ བོར་ཏེ་སོང་ངོ་། །ཇི་ཙམ་ན་མུ་ལྟོ་བ་དེ་སྐྱེད་མོས་ཚལ་དེར་རྒྱུ་བར་བརྩམས་པ་ན། དེས་མུ་ཏིག་གི་དོ་ཤལ་དེ་མཐོང་ནས། དེས་བསམས་པ། བདག་ལ་འདི་ཅི་དགོས་འདིའི་ཕྱིར་གནོད་པར་འགྱུར་བའི་གནས་གང་ཡིན་པ་དེ་ཡོད་སྙམ་ནས་དེས་དེ་སུའི་ཡིན་པ་དེ་ལེན་པར་འགྱུར་གྲང་ཞེས། དེ་སྐྱེད་མོས་ཚལ་ཉིད་དུ་ཤིང་གི་ཡལ་ག་ཞིག་ལ་བཏགས་ཏེ་བཞག་གོ། །ཇི་ཙམ་ན་བཙུན་མོ་རྣམས་ཀྱིས་རྒྱལ་པོ་ལ་གསོལ་པ། ལྷ་བཙུན་མོ་ཆེ་གེ་མོ་ཞེས་བགྱི་བའི་མུ་ཏིག་གི་དོ་ཤལ་སྐྱེད་མོས་ཚལ་དུ་ལུས་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་མུ་ཏིག་གི་དོ་ ཤལ་སྐྱེད་མོས་ཚལ་དུ་ལུས་པ་ཚོལ་ཅིག །དེ་རྣམས་སྐྱེད་མོས་ཚལ་དུ་དོང་ནས་བཙལ་བར་བརྩམས་པ་དང་། ཇི་ཙམ་ན་ཤིང་གི་ཡལ་ག་ཞིག་ལ་བཏགས་པ་མཐོང་ནས་དེ་རྣམས་ཀྱིས་བསམས་པ། རེ་ཞིག་འདི་སུས་བཏགས་དཔྱད་པར་བྱའོ་སྙམ་ནས་དེ་རྣམས་སྐྱེད་མོས་ཚལ་ ན་རྒྱུ་བར་བརྩམས་པ་དང་། ཇི་ཙམ་ན་མུ་ལྟོ་བ་ཞིག་མཐོང་ནས་དེ་རྣམས་ཀྱིས་དེ་ལ་སྨྲས་པ། ཀྭའི་ནང་རྗེ་མུ་ཏིག་གི་དོ་ཤལ་འདི་སུ་ཞིག་གིས་ཡལ་ག་ལ་བཏགས་ཏེ་བཞག །དེས་ཇི་ལྟར་གྱུར་པ་དེ་རྣམས་ལ་སྨྲས་པ་དང་། བློན་པོ་རྣམས་ཀྱིས་རྒྱལ་པོ་ལ་མུ་ཏིག་གི་དོ་ཤལ་ཕུལ་ ནས་ཇི་ལྟར་གྱུར་པ་སྨྲས་སོ། །རྒྱལ་པོས་སྨྲས་པ། ཤེས་ལྡན་དག་མུ་ལྟོ་བ་དེ་བལྟས་ཁུག་ཤིག་དེ་རྣམས་ཀྱིས་བཀུག་ནས་རྒྱལ་པོས་སྨྲས་པ། ཀྭའི་ནང་རྗེ་ཁྱོད་ཀྱིས་ཅིའི་ཕྱིར་མུ་ཏིག་གི་དོ་ཤལ་ཤིང་གི་ཡལ་ག་ལ་བཏགས་ཏེ་བཞག་ནས་རང་གིར་མ་བྱས། དེས་སྨྲས་པ། ལྷ་འདིའི་སྐལ་ བ་བདག་ལ་མ་མཆིས་ཀྱི་ལྷ་ཁོ་ན་ལ་འོས་པའི་སླད་དུའོ། །རྒྱལ་པོ་དགའ་བར་གྱུར་ནས་སྨྲས་པ། ཀྭའི་ནང་རྗེ་ཁྱོད་ནི་དམ་པ་འོས་པ་ཡིན་པས་དམ་པ་གང་འདོད་པ་གསོལ་ཅིག་སྦྱིན་ནོ། །དེས་སྨྲས་པ། གལ་ཏེ་ལྷ་བདག་ལ་དགྱེས་པར་གྱུར་ན་མུ་ལྟོ་བ་རྣམས་འཚལ་མ་སྩལ་ཅིང་དེ་རྣམས་རེ་རེ་ལ་

  903. 142a

    རས་ཟུང་རེ་བསྐོན་ནས་བདག་དཔོན་པོར་བསྐོ་བར་གསོལ། རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ཁྱེད་ཅག་གིས་མུ་ལྟོ་བ་ཐམས་ཅད་ཟན་བྱིན་ལ་རེ་རེ་ལ་རས་ཟུང་རེ་བསྐོན་ཏེ་འདི་དེ་རྣམས་ཀྱི་དཔོན་པོར་ཆུག་ཤིག །དེ་རྣམས་ཀྱིས་བཱ་རཱ་ཎ་སཱིར་དྲིལ་སྒྲོགས་ སུ་བཅུག་པ། ལྷས་བཀའ་སྩལ་གྱིས་བཱ་རཱ་ཎ་སཱིའི་མུ་ལྟོ་བ་ཇི་སྙེད་པ་ཐམས་ཅད་སྐྱེད་མོས་ཚལ་ཆེ་གེ་མོ་ཞིག་ཏུ་འདུས་ཤིག །ངས་མུ་ལྟོ་བ་རྣམས་ལ་ཟས་སྦྱིན་ཞིང་རེ་རེ་ལ་ཡང་རས་ཟུང་རེ་བསྐོན་ནོ་ཞེས་བསྒྲགས་པ་དང་། དེ་དག་ཐམས་ཅད་འདུས་ནས་བློན་པོ་རྣམས་ཀྱིས་ཁ་ཟས་ བསོད་པས་ཚིམ་པར་བྱས་ནས་རེ་རེ་ལ་ཡང་རས་ཟུང་རེ་བསྐོན་ཏེ་བསྒོ་བ། ལྷས་བཀའ་སྩལ་པ། དེང་ཕན་ཆད་ཁྱེད་ཅག་གི་རྒྱལ་པོར་མུ་ལྟོ་བ་འདི་བསྐོས་ཀྱིས། ཁྱེད་ཅག་གིས་འདིའི་ཚིག་བཞིན་དུ་བྱོས་ཤིག །དེ་རྣམས་ཁ་ཟས་བསོད་པས་ཚིམ་པར་བྱས་པ་དང་། རས་ཟུང་རེ་བསྐོན་པས་ཡི་ རངས་ནས་སྨྲས་པ། ལྷས་ཇི་སྐད་བཀའ་སྩལ་པ་བཞིན་དུ་འཚལ་ལོ་ཞེས་མུ་ལྟོ་བ་དེ་དཔོན་པོར་གྱུར་ཏོ། །མུ་ལྟོ་བ་རྣམས་ནི་རང་བཞིན་གྱིས་བཀྲེས་སྐོམ་པས་ཟིལ་གྱིས་ནོན་པ་ཡིན་པས་ཚོང་འདུས་ནས་བཟའ་བ་དང་བཏུང་བ་འཕྲོག་པར་བྱེད་དོ། །དེ་རྣམས་རྒྱལ་པོས་བཀུར་ནས་ནི་ལྷག་པར་ཡང་ དབྲོག་པར་བརྩམས་སོ། །ཚོང་རྡལ་གྱིས་འཚོ་བའི་ཚོགས་འཁྲུགས་ནས་དེས་རྒྱལ་པོ་ལ་གསོལ་པ་དང་། རྒྱལ་པོས་སྨྲས་པ། ཁྱེད་ཅག་སྲུང་བ་ལ་བག་ཡོད་པར་བྱོས་ལ་དེ་རྣམས་ལ་ནི་མ་རྡེག་ཤིག །ཇི་ཙམ་ན་མི་ཞིག་སྣུམ་ཁུར་དག་ཁྱེར་ནས་ཚོང་འདུས་ཀྱི་དབུས་ནས་སོང་བ་ལས་མུ་ལྟོ་ བའི་དཔོན་པོ་དེས་དེ་ལ་ཕྲོགས་ནས་དེ་ཁྱེར་ཏེ་ཕྱོགས་དབེན་པ་ཞིག་ཏུ་སོང་བ་དང་། མུ་ལྟོ་བ་རྣམས་ཀྱིས་ཕྱིར་འབྲངས་ཏེ་དེ་རྣམས་ཀྱིས་དེ་ལ་གླགས་བལྟས་པ་ན་འབབ་ཆུ་བ་རི་ཀ་རྒལ་ནས་ཤིང་ཞིག་གི་དྲུང་དུ་འདུག་གོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་། ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་བ་ཡིན་པས། ཇི་ཙམ་ན་རང་སངས་རྒྱས་ཞིག་སྟེས་ཏེ་ཕྱོགས་དེར་འོངས་པ་དང་། དེས་དེ་ལུས་མཛེས་ཤིང་སེམས་དང་བ་དང་། སྤྱོད་ལམ་ཞི་བར་མཐོང་ནས་དེས་

  904. 142b

    བསམས་པ། གདོན་མི་ཟ་བར་བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་མ་བྱས་པ་དེས་ན་བདག་མི་ཐོབ་ན་ཡང་མུ་ལྟོ་བར་སྐྱེས་ཀྱིས། གལ་ཏེ་བདག་ཉིད་ཆེན་པོ་འདི་བདག་ལས་སྣུམ་ཁུར་བཞེས་པར་གྱུར་ན་བདག་གིས་དེ་དབུལ་ལོ་སྙམ་མོ། །དེ་ནས་རང་སངས་རྒྱས་དེའི་སེམས་ཀྱིས་དེའི་ བསམ་པ་ཤེས་ནས། ཕ་རོལ་རྗེས་སུ་བཟུང་བའི་ཆེད་དུ། དེ་ལ་ལྷུང་བཟེད་བཟེད་དོ། །དེས་དེ་ལ་གུས་པས་སྣུམ་ཁུར་ཕུལ་ལོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ངག་གིས་མ་ཡིན་པས་དེ་སྟེང་གི་བར་སྣང་ལ་འཕགས་ཏེ། འབར་བ་དང་། གསལ་བ་ དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་རྣམས་ནི་རྫུ་འཕྲུལ་ལ་མྱུར་དུ་སེམས་གཏོང་བ་ཡིན་པས་དེ་ཤིང་རྩ་བ་ནས་བཅད་པ་བཞིན་དུ་རང་སངས་རྒྱས་ཀྱི་རྐང་པ་ལ་གཏུགས་ནས་སྨོན་ལམ་གདབ་པར་བརྩམས་པ། བདག་གིས་ ཡོན་གནས་དམ་པ་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་མི་གཙོ་བོ་རྣམས་ཀྱི་རྒྱལ་པོར་གྱུར་ལ། འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཀྱི་མི་མཉེས་པར་མི་བྱེད་པར་གྱུར་ཅིག་ཅེས་བཏབ་བོ། །དེ་ནས་མུ་ལྟོ་བ་རྣམས་ལྷགས་ནས་སྨྲས་ པ། བདག་ཅག་ལ་ཡང་སྣུམ་ཁུར་སྩོལ་ཅིག །དེས་སྨྲས་པ། ངས་དེ་བདག་ཉིད་ཆེན་པོའི་དྲང་སྲོང་དེ་ལ་ཕུལ་ལོ། །དེ་རྣམས་ཀྱིས་སྨྲས་པ། ཕུལ་ན་ཁྱོད་ཀྱིས་སྨོན་ལམ་ཇི་སྐད་བཏབ། དེས་སྨྲས་པ། མི་གཙོ་བོ་རྣམས་ཀྱི་རྒྱལ་པོར་གྱུར་ཅིག་ཅེས་བྱས་སོ། །དེ་རྣམས་ཀྱིས་སྨྲས་ པ། བདག་ཅག་ཁོ་ན་ཁྱོད་ཀྱི་མི་གཙོ་བོ་རྣམས་སུ་གྱུར་ཅིང་། དེ་རྣམས་ཀྱི་རྒྱལ་པོར་ཁྱོད་གྱུར་ཅིག །དེས་སྨྲས་པ། ལེགས་ཀྱིས་དེ་བཞིན་དུ་གྱུར་ཅིག །ཁྱེད་ཅག་གིས་ཅི་དྲང་སྲོང་གི་ཞབས་ལ་གཏུགས་ཏེ་སྨོན་ལམ་མི་གདབ་བམ། དེ་རྣམས་ཀྱིས་རང་སངས་རྒྱས་དེའི་རྐང་པ་ལ་གཏུགས་ ཏེ་སྨོན་ལམ་བཏབ་པ། བདག་ཅག་ཁྱོད་ཀྱི་མི་གཙོ་བོ་རྣམས་སུ་གྱུར་ཅིང་དེ་རྣམས་ཀྱི་རྒྱལ་པོར་ཁྱོད་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་མུ་ལྟོ་བའི་དཔོན་པོ་གང་ཡིན་པ་དེ་ནི་ཤཱཀྱའི་རྒྱལ་པོ་བཟང་ལྡན་འདི་ཉིད་ཡིན་ནོ། །མུ་ལྟོ་བ་དེ་རྣམས་

  905. 143a

    ནི་ཤཱཀྱ་ལྔ་བརྒྱ་པོ་འདི་དག་ཡིན་ཏེ། འདི་དག་དང་བཟང་ལྡན་མུ་ལྟོ་བར་གྱུར་པ་ན་རང་སངས་རྒྱས་ལ་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་ཤཱཀྱ་ལྔ་བརྒྱ་པོ་འདི་རྣམས་ཀྱི་རྒྱལ་པོར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་ པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །སངས་རྒྱས་བཅོམ་ལྡན་འདས་སྒྲ་ཅན་གྱི་དྲང་སྲོང་ཀུན་རྫི་ཀའི་གནས་ན་བཞུགས་སོ། །དེའི་ཚེ་ལྷུང་བཟེད་རབ་ཏུ་མང་པོ་དང་། བཅོམ་ལྡན་འདས་ ཀྱིས་ལྷུང་བཟེད་བླ་གབ་མེད་པར་བཞག་གོ། །དེ་ནས་སྤྲེའུ་ཤིག་ཤིང་སཱ་ལ་ལས་བབས་ནས་ལྷུང་བཟེད་རྣམས་གང་ན་ཡོད་པ་དེར་སོང་བ་དང་། དགེ་སློང་རྣམས་ཀྱིས་ལྷུང་བཟེད་རྣམས་བཅག་ཏུ་འོང་ཞེས་དེ་བཟློག་གོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་ པ། དགེ་སློང་དག་སྤྲེའུ་འདིས་ལྷུང་བཟེད་རྣམས་བཅག་པར་མི་འགྱུར་གྱིས་འདི་ལ་མ་བཟློག་ཤིག །དེ་ནས་སྤྲེའུ་དེ་བཅོམ་ལྡན་འདས་ཀྱི་ལྷུང་བཟེད་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ལྷུང་བཟེད་ཁྱེར་ཏེ་ཤིང་སཱ་ལ་དེ་ལ་འཛེགས་ནས་སྦྲང་བུའི་སྦྲང་རྩིའི་དངས་མས་ བཀང་སྟེ་རིམ་གྱིས་དལ་བུ་དལ་བུས་ཤིང་སཱ་ལ་ལས་བབས་ནས་བཅོམ་ལྡན་འདས་ལ་ཕུལ་བ་དང་། བཅོམ་ལྡན་འདས་ཀྱིས་དེ་སྲོག་ཆགས་དང་བཅས་པ་ཡིན་པས་མ་བཞེས་སོ། །དེ་ནས་སྤྲེའུ་དེས་མཐའ་གཅིག་ཏུ་སོང་ནས་སྲོག་ཆགས་བསལ་ཏེ་བཅོམ་ལྡན་འདས་ལ་ཕུལ་བ་དང་། བཅོམ་ ལྡན་འདས་ཀྱིས་དེ་བརྟགས་པ་མ་ཡིན་ནོ་ཞེས་མ་བཞེས་སོ། །དེ་ནས་སྤྲེའུ་དེ་མཐའ་གཅིག་ཏུ་སོང་སྟེ་ཆུ་གྲང་མོས་བཏབ་ནས་བཅོམ་ལྡན་འདས་ལ་ཕུལ་བ་དང་། བཅོམ་ལྡན་འདས་ཀྱིས་དེ་བརྟགས་པ་བྱས་སོ་ཞེས་བཞེས་སོ། །དེ་ནས་སྤྲེའུ་དེ་བཅོམ་ལྡན་འདས་ཀྱིས་བདག་གི་སྦྲང་རྩིའི་ ལྷུང་བཟེད་བཞེས་སོ་སྙམ་དུ་རིག་ནས། དགའ་བ་དང་། མགུ་བ་དང་། དགའ་བ་རྒྱ་ཆེན་པོ་དང་། ཡིད་བདེ་བ་སྐྱེས་ནས་ཐལ་མོ་ཁོང་སྟོང་དུ་སྦྱར་བ་བྱས་ཏེ་ཕྱི་ནུར་དུ་གར་བྱེད་ཅིང་ཕྱག་འཚལ་བ་ལས་དེ་བཅོམ་ལྡན་འདས་ལ་དད་པ་སྐྱེས་ནས་བཅོམ་ལྡན་འདས་ལ་རྟོག་ཅིང་རྒྱབ་ཏུ་མ་བལྟས་

  906. 143b

    པས་ཁྲོན་པར་ལྷུང་ནས་ཤི་སྟེ་སྒྲ་ཅན་ཉིད་ཀྱི་བྲམ་ཟེ་ལས་དྲུག་ལ་བརྩོན་པ་ཞིག་གི་ཁྱིམ་དུ་སྐྱེས་སོ། །གང་གི་ཉི་མ་ཁོ་ན་ལ་ཉིང་མཚམས་སྦྱོར་བ་བླངས་པ་དེ་ཁོ་ནའི་ཉི་མ་ལ་སྦྲང་རྩིའི་ཆར་བབ་བོ། །དེའི་ཕས་ལྟས་མཁན་རྣམས་བཀུག་ནས་སྨྲས་པ་དང་། དེ་རྣམས་ཀྱིས་སྨྲས་པ། སེམས་ ཅན་འདིའི་མཐུ་ཡིན་ནོ། །ཇི་ཙམ་ན་བྲམ་ཟེ་མོ་དེ་ཟླ་བ་བརྒྱད་དམ་དགུ་འདས་ནས་ཁྱེའུ་ཞིག་བཙས་སོ། །གང་གི་ཉི་མ་ཁོ་ན་ལ་བཙས་པ་དེ་ཁོ་ནའི་ཉི་མ་ལ་སྦྲང་རྩིའི་ཆར་བབ་བོ། །དེའི་ཉེ་དུ་རྣམས་ཚོགས་ཤིང་འདུས་ནས་ཉི་མ་བདུན་གསུམ་ཉི་ཤུ་གཅིག་ཏུ་དེའི་བཙས་སྟོན་རྒྱ་ཆེར་བྱས་ནས་ ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། ཁྱེའུ་འདི་གང་གི་ཉི་མ་ཁོ་ན་ལ་མའི་རུམ་དུ་ཞུགས་པ་དེ་ཁོ་ནའི་ཉི་མ་ལ་སྦྲང་རྩིའི་ཆར་བབ་ལ། གང་གི་ཉི་མ་ཁོ་ན་ལ་བཙས་པ་དེ་ཁོ་ནའི་ཉི་མ་ལ་ཡང་སྦྲང་རྩིའི་ཆར་བབ་ལ། གནས་འཇོག་དང་ ཡང་རུས་གཅིག་པས་དེ་བས་ན་ཁྱེའུའི་མིང་གནས་འཇོག་གི་བུ་སྦྲང་རྩི་ཅན་ཞེས་བྱ་བར་གདགས་སོ་ཞེས་དེའི་མིང་གནས་འཇོག་གི་བུ་སྦྲང་རྩི་ཅན་ཞེས་བྱ་བར་བཏགས་སོ། །དེ་བསྲིངས་བསྐྱེད་ནས་ཆེན་པོར་གྱུར་ཏོ། །གང་གི་ཚེ་ཆེན་པོར་གྱུར་པ་དེའི་ཚེ་ལེགས་པར་གསུངས་པའི་ཆོས་འདུལ་བ་ ལ་རབ་ཏུ་བྱུང་སྟེ། དེ་རབ་ཏུ་བྱུང་ནས་ཀྱང་ཉི་མ་རེ་རེ་ཞིང་སྦྲང་རྩི་ལྷུང་བཟེད་གསུམ་གསུམ་གྲུབ་པར་གྱུར་ཏེ། དེས་དེ་རྣམས་ལས་གཅིག་ནི་བཅོམ་ལྡན་འདས་ལ་འབུལ་ལོ། །གཉིས་པ་ནི་དགེ་འདུན་ལའོ། །གསུམ་པ་འགྲོགས་བཤེས་དང་ལྷན་ཅིག་ལོངས་སྤྱོད་པར་བྱེད་དོ། ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གནས་འཇོག་གི་བུ་སྦྲང་རྩི་ཅན་གྱིས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་གདུགས་རེ་རེ་ཞིང་སྦྲང་རྩི་ལྷུང་བཟེད་གསུམ་གསུམ་ གྲུབ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གནས་འཇོག་གི་བུ་སྦྲང་རྩི་ཅན་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་

  907. 144a

    བའི་བར་གོང་མ་བཞིན་དུའོ། །དགེ་སློང་དག་ཁྱེད་ཀྱིས་དེ་བཞིན་གཤེགས་པ་ལ་སྦྲང་རྩིའི་ལྷུང་བཟེད་འབུལ་བའི་སྤྲེའུ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །དེའི་ཚེ་དེའི་དུས་ཀྱི་སྤྲེའུ་གང་ཡིན་པ་དེ་ནི་གནས་འཇོག་གི་བུ་སྦྲང་རྩི་ཅན་ འདི་ཉིད་ཡིན་ཏེ། དེས་ན་འདིས་དེ་བཞིན་གཤེགས་པ་ལ་སྦྲང་རྩིའི་ལྷུང་བཟེད་ཕུལ་བ་དེའི་ལས་ཀྱི་རྣམ་པར་སྨིན་པས་བྲམ་ཟེ་ལས་དྲུག་ལ་བརྩོན་པའི་ཁྱིམ་དུ་སྐྱེས་ཤིང་ཉིང་མཚམས་སྦྱོར་བ་བླངས་པ་དང་བཙས་པ་ན་ཡང་སྦྲང་རྩིའི་ཆར་བབ་བོ། །འདི་ལྟར་ད་ལྟར་ཡང་ཉི་མ་རེ་རེ་ ཞིང་སྦྲང་རྩི་ལྷུང་བཟེད་གསུམ་གསུམ་འགྲུབ་པར་འགྱུར་རོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཞེས་བྱ་བ་ནས་ལས་གཅིག་ཏུ་དཀར་བ་ལས་བརྩལ་བར་བྱའོ་ཞེས་བྱ་བའི་བར་གོང་མ་བཞིན་དུའོ། །དེ་ཅིའི་ཕྱིར་ ཞེ་ན། གལ་ཏེ་དགེ་སློང་གནས་འཇོག་གི་བུ་སྦྲང་རྩི་ཅན་གྱིས་ཤར་གྱི་རྒྱ་མཚོ་ཆེན་པོ་ལ་སྦྲང་རྩིར་མོས་ཤིང་། ལྷོ་དང་། ནུབ་དང་། བྱང་གི་རྒྱ་མཚོ་ཆེན་པོ་སྦྲང་རྩིར་མོས་ན་དེ་དག་ཀྱང་སྦྲང་རྩིར་འགྱུར་ཏེ། དགེ་སློང་དག་དེ་ལྟར་ན་ཡོན་གནས་དེ་བཞིན་གཤེགས་པ་ནི་དཔག་ཏུ་མེད་པ་ཡིན་ ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཉེ་བ་འཁོར་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་རྒྱལ་པོའི་འབྲེག་མཁན་དུ་གྱུར་ལགས། བཅོམ་ལྡན་འདས་ཀྱིས་བཀའ་སྩལ་ པ། དགེ་སློང་དག་ཉེ་བ་འཁོར་འདི་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་བྱས་ཤིང་བསགས་པ་དང་ཚོགས་རྙེད་པ་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་རྒྱལ་པོའི་འབྲེག་མཁན་ཞིག་ཡོད་ པའི་དྲུང་དུ་རང་སངས་རྒྱས་ཤིག་སོང་ནས་བཞིན་བཟངས་པའི་སྐྲ་བྲེགས་ཤིག་དང་། ཁྱོད་ལ་བསོད་ནམས་སུ་འགྱུར་རོ། །དེ་ཡང་རྒྱལ་པོའི་ཕོ་བྲང་དུ་ཆས་པས་དེས་ཚ་བོ་ལ་སྨྲས་པ། ཚ་བོ་རབ་ཏུ་བྱུང་བ་འདིའི་དབུ་རེགས་ཤིག །ཁོ་བོ་རྒྱལ་པོའི་ཁབ་ཏུ་འགྲོ་དགོས་ཀྱིས། ཇི་ལྟར་རྒྱལ་

  908. 144b

    པོ་ལ་བྱ་བ་དེ་བཞིན་དུ་རེགས་ཤིག །དེས་བསམས་པ། ཞང་པོས་ཇི་སྐད་སྨྲས་པ་ལས་ན་གདོན་མི་ཟ་བར་འདི་ལ་བསོད་ནམས་ཡོད་དོ་སྙམ་ནས། དེས་གུས་པར་བྱས་ཏེ་དེའི་སྐྲ་དང་ཁ་སྤུ་བྲེགས་སོ། །རང་སངས་རྒྱས་ཀྱིས་བསམས་པ། སེམས་ཅན་འདིས་བསོད་ནམས་མང་དུ་བསྐྱེད་ ཀྱིས་འདི་དགེ་བ་བསྐྱེད་པར་བྱའོ་སྙམ་དུ་བསམས་ནས་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་བར་སྣང་ལ་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་ གཏོད་པ་ཡིན་པས་དེ་ཤིང་རྩ་བ་ནས་བཅད་པ་བཞིན་དུ་རྐང་པ་གཉིས་ལ་གཏུགས་ཏེ་སྨོན་ལམ་གདབ་པར་བརྩམས་པ། དགེ་བའི་རྩ་བ་འདིས་ཇི་ལྟར་བདག་གི་ཞང་པོ་རྒྱལ་པོའི་འབྲེག་མཁན་བྱེད་པ་དེ་བཞིན་དུ་བདག་ཀྱང་རྒྱལ་པོའི་འབྲེག་མཁན་དུ་གྱུར་ཅིག་ཅེས་བྱས་སོ། །དགེ་ སློང་དག་ཇི་སྙམ་དུ་སེམས། རྒྱལ་པོའི་འབྲེག་མཁན་གྱི་ཚ་བོ་གང་ཡིན་པ་དེ་ནི་དགེ་སློང་ཉེ་བ་འཁོར་འདི་ཉིད་ཡིན་ཏེ། དེ་ན་འདིས་རང་སངས་རྒྱས་ཀྱི་སྐྲ་དང་ཁ་སྤུ་བྲེགས་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་རྒྱལ་པོའི་འབྲེག་མཁན་དུ་གྱུར་ཏོ། །གཞན་ཡང་འདིས་ སྨོན་ལམ་བཏབ་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་ཏེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ་ཞེས་བྱ་བ་ནས། རིམ་གྱིས་ཁྱེའུ་བདུན་བཙས་སོ་ཞེས་བྱ་བའི་བར་དུའོ། །དེའི་ནེའུ་ཟླ་རྒྱལ་པོའི་འབྲེག་མཁན་ཞིག་ཡོད་པ་ དེ་བུ་མེད་པས་ལག་པ་ལ་འགྲམ་པ་གཏད་དེ། བདག་ལ་བུ་ཕོ་ཡང་མེད། བུ་མོ་ཡང་མེད་པས་བདག་ཤི་ན་བདོག་བ་ཐམས་ཅད་བུ་མེད་དོ་ཞེས་རྒྱལ་པོས་མངའ་མཛད་པར་འགྱུར་རོ་སྙམ་དུ་སེམས་ཁོང་དུ་ཆུད་ཅིང་འདུག་པ་དེ་ཁྱིམ་བདག་དེས་མཐོང་ནས་སྨྲས་པ། ནེའུ་ཟླ་ཅིའི་ཕྱིར་སེམས་

  909. 145a

    ཁོང་དུ་ཆུད། དེས་སྨྲས་པ། ནེའུ་ཟླ་ཁོ་བོ་ལ་ནོར་གྱི་རིགས་འདི་སྙེད་ཡོད་ན་བུ་ཕོ་ཡང་མེད། བུ་མོ་ཡང་མེད་པས་ཁོ་བོ་ཤི་ནས་འདི་དག་ཐམས་ཅད་རྒྱལ་པོས་མངའ་མཛད་པར་འགྱུར་ན་ཅིའི་ཕྱིར་སེམས་ཁོང་དུ་ཆུད་པར་མི་འགྱུར། དེས་སྨྲས་པ། གལ་ཏེ་དེ་ ལྟ་ན་ཁོ་བོའི་བུ་འདི་དག་ཐམས་ཅད་ཀྱི་ནུ་བོ་ཤོས་དེ་ཁོ་བོས་ཁྱོད་ལ་སྦྱིན་ནོ། །དེས་དེ་བླངས་སོ། །ཇི་ཙམ་ན་ཁྱིམ་བདག་དེ་ཤི་བ་དང་། དེའི་བུ་དེ་རྣམས་གང་གི་ཚེ་ཁ་ཅིག་དང་ལྷན་ཅིག་འཐབ་མོ་འགྱེད་པ་དེའི་ཚེ་དེས་གང་དག་གི་སྤུ་འབྲེག་མཁན་ཡིན་པ་ཁྱེད་ཀྱང་འཐབ་མོ་རྒོལ་ ལམ་ཞེས་ཁ་ཟེར་བར་བྱེད་དོ། །དེ་རྣམས་ཡིད་མི་བདེ་བ་སྐྱེས་ནས་བསམས་པ། བདག་ཅག་བརྙས་པ་ཅི་ཡང་རུང་བ་གང་ཡིན་པ་དེ་ཐམས་ཅད་ནི་ནུ་བོ་འདིའི་སྐྱོན་ལས་གྱུར་གྱིས་ཐམས་ཅད་དུ་དབྲོག་གོ་སྙམ་ནས་དེ་རྣམས་ཀྱིས་དེ་ཕྲོགས་པ་དང་། འབྲེག་མཁན་ཁྲོས་ནས་དེས་ འབྲེག་མཁན་ཐམས་ཅད་ལ་ཁྲིམས་སུ་བཅས་པ། ཁྱིམ་བདག་ཆེ་གེ་མོ་ཞེས་བྱ་བའི་བུ་རྣམས་ཀྱི་ཁ་སྤུ་བཅོས་པའི་ལས་སུས་ཀྱང་མི་བྱའོ་ཞེས་བཅས་སོ། །དེ་རྣམས་སྐྲ་དང་། ཁ་སྤུ་དང་། སེན་མོ་རིང་པོར་སྐྱེས་པ་དེ་རྣམས་རྒྱལ་པོས་མཐོང་ནས་སྨྲས་པ། ཤེས་ལྡན་དག་ཁྱེད་ ཅག་ཅིའི་ཕྱིར་སྐྲ་དང་། ཁ་སྤུ་དང་། སེན་མོ་རིང་པོར་འདུག །དེ་རྣམས་ཀྱིས་སྨྲས་པ། ལྷ་འབྲེག་མཁན་འདིས་འབྲེག་མཁན་ཐམས་ཅད་ལ་དེ་རྣམས་ཀྱི་ཁ་སྤུ་བཅོས་པའི་ལས་སུ་ཡང་མ་བགྱིད་ཅིག་ཅེས་བཀག་ལགས་སོ། །ཅིའི་ཕྱིར། དེ་རྣམས་ཀྱིས་ཇི་ལྟར་གྱུར་པ་སྨྲས་པ་ དང་། རྒྱལ་པོས་སྨྲས་པ། ཕས་བུ་བྱིན་ན་ཁྱེད་ཅག་གིས་ཅིའི་ཕྱིར་དབྲོག །དེ་ལ་སླར་བྱིན་ཅིག །དེ་རྣམས་ཀྱིས་མི་འདོད་བཞིན་དུ་སླར་བཏང་ངོ་། །དེ་རྣམས་ཡིད་མི་བདེ་བ་སྐྱེས་ཏེ་འཇིག་རྟེན་གྱིས་སྨད་པས་འཇིགས་ནས་དེ་གསད་པར་འདོད་དོ། །འཇིག་རྟེན་ལ་ནི་མཛའ་བ་དང་། མི་མཛའ་བ་དང་། བར་མ་ཡོད་པས་དེ་ལ་གཞན་དག་གིས་སྦྲན་པ་དང་། དེས་འབྲེག་མཁན་དེ་ལ་སྨྲས་པ། དེ་རྣམས་བདག་ལ་གསད་པར་འཚལ་གྱིས་གནང་བར་མཛོད་ཅིག་དང་རབ་ཏུ་འབྱུང་ངོ་། །དེས་བསམས་པ། དེ་རྣམས་ཀྱིས་སྲོག་དང་བྲལ་བ་བས་ནི་རབ་ཏུ་བྱུང་བ་

  910. 145b

    བླའོ་སྙམ་དུ་བསམས་ནས་སྨྲས་པ། བུ་གལ་ཏེ་དེ་ལྟ་ན་སོང་ལ་རབ་ཏུ་བྱུང་ཤིག །གང་གི་ཚེ་ཡོན་ཏན་ཀྱི་ཚོགས་ཅུང་ཟད་ཐོབ་པ་དེའི་ཚེ་བདག་ལ་སྨྲོས་ཤིག །དེ་གནང་བ་ཐོབ་ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་སྟེ། དེས་མཁན་པོ་མེད་པ་དང་སློབ་དཔོན་མེད་པར་རང་བྱང་ཆུབ་ མངོན་སུམ་དུ་བྱས་ནས་དེས་བསམས་པ། བདག་གིས་ཕ་དེ་ལ་སྔོན་ཁས་བླངས་པའི་དམ་བཅས་པ་དེ་སྟོན་དུ་འགྲོའོ་སྙམ་ནས་དེ་དེའི་དྲུང་དུ་སོང་སྟེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་ཤིང་རྩ་བ་ནས་བཅད་པ་བཞིན་དུ་རྐང་པ་གཉིས་ལ་གཏུགས་ནས་སྨོན་ལམ་གདབ་པར་བརྩམས་པ། བདག་གིས་ཡོན་གནས་དམ་པ་འདི་ལྟ་བུ་ལ་བྱ་བ་བྱས་པ་གང་ཡིན་པའི་དགེ་བའི་རྩྭ་བ་འདིས་བདག་རྒྱལ་པོའི་འབྲེག་ མཁན་དུ་གྱུར་ཅིག །གཞན་ཡང་འདིས་རང་སངས་རྒྱས་ལྔ་བརྒྱ་ལ་བྱ་བ་བྱས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་རྒྱལ་པོའི་འབྲེག་མཁན་དུ་གྱུར་ཅིག །གཞན་ཡང་ཡང་དག་པར་རྫོགས་པའི་སངས་རྒྱས་བཞི་ལ་བྱ་བ་བྱས་ནས་སྨོན་ལམ་བཏབ་པ། དགེ་བའི་ རྩ་བ་འདིས་བདག་རྒྱལ་པོའི་འབྲེག་མཁན་དུ་གྱུར་ཅིག་ཅེས་བཏབ་པའི་ལས་དེའི་རྣམ་པར་སྨིན་པས་ལན་མང་དུ་རྒྱལ་པོའི་འབྲེག་མཁན་དུ་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ ལྡན་པ་ཉེ་བ་འཁོར་གྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་བཏབ་པ་ཉིད་ཀྱིས་སོ། །གང་དུ་སྨོན་ལམ་བཏབ་ལགས། དགེ་སློང་དག་སྔོན་བྱུང་བ་ བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ་ཞེས་བྱ་བ་ནས། དེ་གྲོང་ཁྱེར་བཱ་རཱ་ཎ་སཱིར་ཉེ་བར་བརྟེན་ཏེ་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ་ཞེས་བྱ་བའི་བར་གོང་མ་

  911. 146a

    བཞིན་དུ་སྟེ། དེའི་བསྟན་པ་ལ་འདི་རབ་ཏུ་བྱུང་བར་གྱུར་ཏེ། རབ་ཏུ་འབྱིན་པའི་དགེ་སློང་གང་ཡིན་པ་དེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་ཏོ། །དེ་ལ་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེ་ན་འདི་འཆི་བའི་དུས་ལ་བབ་པ་ན་སྨོན་ལམ་བཏབ་པ། བདག་གིས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ཀྱིས། དགེ་ བའི་རྩ་བ་གང་ཡིན་པ་འདིས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པར་གྱུར་པ་དེའི་བསྟན་པ་ལ་བདག་རབ་ཏུ་བྱུང་ཞིང་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་བྱས་ནས། ཇི་ལྟར་བདག་གི་མཁན་པོ་ཡང་དག་པར་རྫོགས་པའི་སངས་རྒྱས་འོད་སྲུང་གིས་འདུལ་བ་འཛིན་པ་རྣམས་ཀྱི་མཆོག་ ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ་དེས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་བཏབ་པ་དེའི་སྨོན་ལམ་གྱི་དབང་གིས་ད་ལྟར་དེ་བཞིན་གཤེགས་པས་འདུལ་བ་འཛིན་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟ་བས་ན་ལས་ གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་བརྩལ་བར་བྱ་སྟེ། དགེ་སློང་དག་དེ་ལྟ་བུ་ལ་ཁྱེད་ཀྱིས་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །གང་གི་ཚེ་བཅོམ་ལྡན་འདས་ཀྱིས་བདུད་འབྱུང་པོ་འཁོར་དང་བཅས་པ་བྱེ་བ་ཕྲག་སུམ་བཅུ་རྩ་ དྲུག་བཅོམ་ནས་བླ་ན་མེད་པའི་ཡེ་ཤེས་བརྙེས་པ་དེའི་ཚེ་བདུད་ཀྱི་རིས་ཀྱི་ལྷ་རྣམས་ཀྱིས་གྲོང་ཁྱེར་སེར་སྐྱའི་གཞིར་རྒྱལ་པོ་བཙུན་མོ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པ་ལ་དགེ་སྦྱོང་གཽ་ཏ་མ་ནི་དེ་རིང་ཤིའོ་ཞེས་བསྒྲགས་སོ། །དེ་ནས་རྒྱལ་པོ་ཟས་གཙང་བཙུན་མོ་དང་།

  912. 146b

    གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པས་མྱ་ངན་བྱ་བར་བརྩམས་པ་དང་། ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་གནས་གཙང་མའི་རིས་ཀྱི་ལྷ་རྣམས་ཀྱིས་སྨྲས་པ། བཅོམ་ལྡན་འདས་མ་ནོངས་ཏེ། འདི་ལྟར་བཅོམ་ལྡན་འདས་ཀྱིས་བླ་ན་ མེད་པའི་ཡེ་ཤེས་བརྙེས་སོ། །ད་ནས་རྒྱལ་པོ་ཟས་གཙང་གིས་ཀུན་དགའ་བ་བྱས་ཏེ་ཀུན་དགའ་བར་གྱུར་པ་དེའི་ཚེ་བདུད་རྩི་ཟས་ཀྱི་ཁྱེའུ་ཞིག་བཙས་ཏེ། དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། ཁྱེའུ་འདི་ཀུན་དགའ་བར་གྱུར་པ་ན་བཙས་པས་ཁྱེའུའི་མིང་ཀུན་དགའ་བོ་ཞེས་གདགས་སོ་ཞེས་དེའི་མིང་ཀུན་དགའ་བོ་ཞེས་བྱ་བར་བཏགས་སོ། །ཁྱེའུ་ཀུན་དགའ་བོ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་ གྲོགས་ཀྱི་མ་མ་གཉིས་ལ་རྗེས་སུ་གཏད་དེ། དེ་མ་མའི་པང་ན་འཚོ་བ་ན་མཚན་མཁན་རྣམས་ཀྱིས་ཁྱེའུ་འདིས་ནི་བཅོམ་ལྡན་འདས་ཤཱཀྱ་ཐུབ་པའི་རིམ་གྲོ་བྱེད་པར་འགྱུར་རོ་ཞེས་ལུང་བསྟན་ཏོ། །བདུད་རྩི་ཟས་ཀྱིས་ཁྱེའུ་མཚན་མཁན་རྣམས་ཀྱིས་ལུང་བསྟན་ཏོ་ཞེས་ཐོས་ནས་དེས་བསམས་པ། གལ་ཏེ་དེ་ལྟ་ན་བཅོམ་ལྡན་འདས་ཀྱིས་རབ་ཏུ་ཕྱུང་དུ་འོང་ངོ་ཞེས་སྤྱན་སྔར་མི་འབབ་པར་བྱའོ་སྙམ་ནས། གང་གི་ཚེ་བཅོམ་ལྡན་འདས་སེར་སྐྱའི་གཞིར་གཤེགས་པ་དེའི་ཚེ་དེ་ཡངས་པ་ཅན་དུ་སྐྱེལ་ལོ། །གང་གི་ཚེ་བཅོམ་ལྡན་འདས་ཡངས་པ་ཅན་དུ་གཤེགས་པ་དེའི་ཚེ་སླར་ཡང་སེར་སྐྱའི་གཞིར་ ཁྱེར་རོ། །སངས་རྒྱས་བཅོམ་ལྡན་འདས་རྣམས་ནི་དེ་ལྟ་བུ་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་རིག་པ་ཅུང་ཟད་ཀྱང་མི་མངའོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་ པ། སྲུང་བ་གཅིག་པུ་པ། ཉག་གཅིག་དཔའ་བ། ཟླ་མེད་པ། གཉིས་སུ་མི་གསུང་བ། ཞི་གནས་དང་། ལྷག་མཐོང་གིས་བཞུགས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིའི་ཞབས་ལེགས་པར་གནས་པ། བསྡུ་བའི་

  913. 147a

    དངོས་པོ་བཞི་ལ་ཡུན་རིང་པོ་ནས་གོམས་པ། ཡན་ལག་ལྔ་སྤངས་པ། འགྲོ་བ་ལྔ་ལས་འདས་པ། ཡན་ལག་དྲུག་དང་ལྡན་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ་བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ནི་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་ གཟིགས་ནས་གང་ནི་ཉམས་པར་འགྱུར། གང་ནི་འཕེལ་བར་འགྱུར། གང་ནི་གནོད་པར་འགྱུར། གང་ནི་ཉམ་ང་བར་འགྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ ནི་ངན་སོང་ལ་བབ། ངས་གང་ནི་ངན་སོང་ལས་བསླང་སྟེ་མཐོ་རིས་དང་ཐར་པ་ལ་གཞག་པར་བྱ། གང་གི་དགེ་བའི་རྩ་བ་མ་བསྐྱེད་པ་དག་ནི་བསྐྱེད་པར་བྱ། གང་གི་བསྐྱེད་པ་དག་ནི་ཡོངས་སུ་སྨིན་པར་བྱ། གང་གི་སྨིན་པ་ནི་གྲོལ་བར་བྱ། ཞེས་མཁྱེན་པ་དང་གཟིགས་པ་འཇུག་གོ། ཡང་སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །བཅོམ་ལྡན་འདས་ཀྱིས་དགོངས་པ། གཞོན་ནུ་ཀུན་དགའ་བོ་ནི་སྲིད་པ་ཐ་མ་པ་ཡིན་པས་དེ་ངའི་བསྟན་པ་ལ་ རབ་ཏུ་འབྱུང་སྟེ། རབ་ཏུ་བྱུང་ནས་ངའི་རིམ་གྲོ་བྱེད་ཅིང་གསུང་རབ་འཛིན་པ་དང་། ང་ཡོངས་སུ་མྱ་ངན་ལས་འདས་ནས་བདུད་རྩི་ཐོབ་པར་འགྱུར་གྱིས། མ་ལ་ངས་གཞོན་ནུ་ཀུན་དགའ་བོ་བསྟན་པ་ལ་གཞུག་པར་བྱའོ་སྙམ་ནས་མ་ཚོར་བ་ཁོ་ནར་གྲོང་ཁྱེར་སེར་སྐྱའི་གཞིར་བྱོན་ནས་བདུད་ རྩི་ཟས་ཀྱི་གནས་ཁང་དུ་གཤེགས་ཏེ་གདན་བཤམས་པ་ཉིད་ལ་བཞུགས་སོ། །བདུད་རྩི་ཟས་ཀྱིས་གཞོན་ནུ་ཀུན་དགའ་བོ་ཁང་ཕྲན་གཞན་ཞིག་གི་ནང་དུ་བཅུག་སྟེ་བཞག་གོ། །བཅོམ་ལྡན་འདས་ཀྱིས་གང་གི་ཚེ་ན་སྒོ་རང་བྱེ་བར་འགྱུར་བ་དེ་ལྟར་བྱིན་གྱིས་བརླབས་ནས་ཐོག་མ་ཁོ་ནར་

  914. 147b

    བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བསིལ་ཡབ་བླངས་ནས་བཅོམ་ལྡན་འདས་ཀྱི་སྣམ་ལོགས་ནས་བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་བདུད་རྩི་ཟས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་ གཅིག་ཏུ་འདུག་པ་དང་། བཅོམ་ལྡན་འདས་ཀྱིས་བདུད་རྩི་ཟས་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་ མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་བཞུད་དོ། །རྒྱུའི་སྟོབས་ཆེ་ཡང་རྐྱེན་གྱི་སྟོབས་ལ་ལྟོས་དགོས་པས་སྲིད་པ་ཐ་མ་ པའི་སེམས་ཅན་ཀུན་དགའ་བོ་བཅོམ་ལྡན་འདས་ཀྱི་རྗེས་བཞིན་རྗེས་བཞིན་འབྲང་བ་ན། བདུད་རྩི་ཟས་ཆུང་མའི་འཁོར་དང་བཅས་པས་བཟློག་པར་མ་ནུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདི་ནི་སྲིད་པ་ཐ་མ་པའི་སེམས་ཅན་ཡིན་པས་ཁྱེད་ཀྱིས་བཟློག་པར་མི་ནུས་ ཀྱིས་མ་ཟློག་ཤིག །བདུད་རྩི་ཟས་ཀྱིས་གསོལ་པ། བཅོམ་ལྡན་འདས་གལ་ཏེ་དེ་ལྟར་གྱུར་ན་འདི་ལ་རིམ་པ་བཞིན་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་བྱོས་ཤིག །དེ་ནས་བདུད་རྩི་ཟས་ཀྱིས་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་ པ་དང་། འགྲོ་བར་ཆས་པའི་སློང་བ་པ་རྣམས་ཀྱི་ཕྱིར་སྦྱིན་པ་དག་གཏོང་དུ་བཅུག །བསོད་ནམས་དག་བྱེད་དུ་བཅུག །རང་གི་སྐྱེ་བོ་དང་གཉེན་གྱི་ཚོགས་རྣམས་ལ་ཡང་བཟོད་པ་གསོལ་དུ་བཅུག་ནས་རྒྱན་ཐམས་ཅད་ཀྱིས་བརྒྱན་ཏེ། གླང་པོ་ཆེ་ལ་ཞོན་ནས་སྐྱེ་བོ་དུ་མས་ཡོངས་སུ་ བསྐོར་ཏེ། ནྱ་གྲོ་ངྷའི་ཀུན་དགའ་ར་བ་ལོགས་སུ་ཕྱོགས་ཏེ་བཅོམ་ལྡན་འདས་ཀྱི་སྤྱན་སྔར་བཏང་ངོ་། །དེ་ཡང་སྲང་གི་དབུས་ནས་འགྲོ་བ་ན་གླང་པོ་ཆེས་ཨུཏྤ་ལའི་ཆུན་པོ་ཞིག་ཟོས་སོ། །མཚན་མཁན་རྣམས་ཀྱིས་མཐོང་ནས་དེ་རྣམས་ཀྱིས་སྨྲས་པ། གཞོན་ནུ་འདི་ནི་ཐོས་པ་འཛིན་པ་

  915. 148a

    རྣམས་ཀྱི་མཆོག་ཏུ་འགྱུར་རོ། །དེ་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པ་ཁོ་ནས་ནྱ་གྲོ་ངྷའི་ཀུན་དགའ་ར་བར་ཞུགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ ཕྱག་བྱས་ཏེ་ཕྱོགས་གཅིག་ཏུ་འདུག་གོ། །བཅོམ་ལྡན་འདས་ཀྱིས་འོད་སྲུང་གཞོན་ནུ་རབ་ཏུ་ཕྱུང་ཤིག་ཅེས་འོད་སྲུང་སྟོབས་བཅུ་ལྡན་ལ་གཏད་ནས་དེས་དེ་རབ་ཏུ་ཕྱུང་བསྙེན་པར་རྫོགས་པར་བྱས་སོ། །དེ་ནས་བཅོམ་ལྡན་འདས་སེར་སྐྱའི་གཞིར་ཇི་ཙམ་བཞེད་ཀྱི་བར་དུ་བཞུགས་ནས་ རྒྱལ་པོའི་ཁབ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །ཚེ་དང་ལྡན་པ་ཀུན་དགའ་བོའི་སྤྱི་བོར་ཕོལ་མིག་བྱུང་ནས་བཅོམ་ལྡན་འདས་ཀྱིས་འཚོ་བྱེད་ལ་ བཀའ་སྩལ་པ། དགེ་སློང་ཀུན་དགའ་བོ་ལ་དཔྱད་བྱོས་ཤིག །བཙུན་པ་བཀའ་བཞིན་འཚལ་ཞེས་འཚོ་བྱེད་གཞོན་ནུས་བསྐྱེད་ཀྱིས་བཅོམ་ལྡན་འདས་ལས་མཉན་ཏོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ནས་ཆོས་ འཆད་དོ། །ཚེ་དང་ལྡན་པ་ཀུན་དགའ་བོ་ཡང་ཆོས་མཉན་པའི་ཕྱིར་དེ་ཉིད་ན་འདུག་གོ། །འཚོ་བྱེད་གཞོན་ནུས་བསྐྱེད་ཀྱིས་བསམས་པ། འདི་ཆོས་ལ་དད་པ་བདོ་བར་གྱུར་པས་མི་ཚོར་གྱིས་དཔྱད་བྱ་བའི་དུས་ལ་བབ་བོ་སྙམ་ནས། དེས་དེའི་ཕོལ་མིག་སྨིན་པར་འགྱུར་བ་དག་ བསྐུས་ནས་དེ་ཉིད་དུ་དྲལ་ཏེ་དེ་ཉིད་དུ་སོས་པར་བྱས་སོ། །དེ་ན་ཆོས་བཤད་པ་རྫོགས་ནས་འཚོ་བྱེད་ཀྱིས་གསོལ་པ། བཅོམ་ལྡན་འདས་བདག་གིས་འཕགས་པ་ཀུན་དགའ་བོ་འདི་ཉིད་ན་མཆིས་བཞིན་དུ་ཕོལ་མིག་སྨིན་པར་བགྱིས་ཏེ་བརྟོལ་ནས་སོས་པར་བགྱིས་ལགས་སོ། །ཚེ་ དང་ལྡན་པ་ཀུན་དགའ་བོས་སྨྲས་པ། གལ་ཏེ་བདག་གི་ལུས་ཏིལ་འབྲུ་ཙམ་དུ་གཏུབས་པར་གྱུར་ཀྱང་བདག་གིས་མི་ཚོར་ལགས་སོ། །བཅོམ་ལྡན་འདས་ཀྱི་ཆོས་ལས་བྱུང་བའི་དད་པས་བསམ་པ་བསྡུས་པ་ལ་འཚོ་བྱེད་མཆོག་ཏུ་ཡ་མཚན་སྐྱེས་སོ། །དགེ་སློང་རྣམས་ཐེ་ཚོམ་

  916. 148b

    སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན། དེས་ན་སྤྱི་བོར་ཕོལ་མིག་བྱུང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་ཡུལ་མཐའ་འཁོབ་ཅིག་ན་རྒྱལ་པོ་ཀི་ར་ཏ་ཞེས་བྱ་བ་གནས་སོ། །སངས་རྒྱས་རྣམས་ འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་བ་དག་འབྱུང་བར་འགྱུར་བས་དེ་ནས་རང་སངས་རྒྱས་ཞིག་དེ་དེར་རྒྱུ་བ་ན་ཀི་ར་ཏའི་གྲོང་ཁྱེར་དུ་ཕྱིན་ནས་དེ་དེར་ བསོད་སྙོམས་ཀྱི་ཕྱིར་ཀི་ར་ཏའི་རྒྱལ་པོའི་ཁྱིམ་དུ་ཞུགས་པ་དང་། དེ་དེ་ལ་མི་བཟོད་པ་སྐྱེས་ཏེ་སེམས་གདུག་པས་འཇིམ་རིལ་གྱི་ངན་ཀོང་གིས་རྒྱབ་ཏུ་བསྣུན་པ་ལས་བདག་ཉིད་ཆེན་པོ་དེ་དྲེགས་པ་དང་ང་རྒྱལ་བཅོམ་པ་ཡིན་པས་དེ་སྣོད་དུ་མ་གྱུར་པར་ཤེས་ནས་སོང་ངོ་། །དགེ་ སློང་དག་ཇི་སྙམ་དུ་སེམས། ཀི་ར་ཏའི་རྒྱལ་པོ་གང་ཡིན་པ་དེ་ནི་དགེ་སློང་ཀུན་དགའ་བོ་དེ་ཉིད་ཡིན་ཏེ། གང་འདིས་རང་སངས་རྒྱས་ལ་མི་བཟོད་པ་སྐྱེས་ཏེ་སེམས་གདུག་པས་འཇིམ་རིལ་གྱི་ངན་ཀོང་གིས་རྒྱབ་ཏུ་བསྣུན་པ་དེའི་ལས་ཀྱི་རྣམ་པར་སྨིན་པས་ཚེ་རབས་ལྔ་བརྒྱར་གང་དང་ གང་དུ་སྐྱེས་པ་དེ་དང་དེར་སྤྱི་བོར་ཕོལ་མིག་བྱུང་བར་གྱུར་ཏོ། །འདི་ལྟར་ད་ལྟར་འདིའི་སྲིད་པ་ཐ་མ་ལ་ཡང་སྤྱི་བོར་ཕོལ་མིག་བྱུང་ངོ་། །གང་གི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་དང་ཐབས་ཅིག་འགྲོ་བ་དེའི་ཚེ་བཅོམ་ལྡན་འདས་ལ་ལྷག་པར་དད་པ་དང་། གུས་ པ་དང་། ཁྲེལ་ཡོད་པ་དང་། ངོ་ཚ་ཤེས་པ་དང་། འཛེམ་པ་ཉིད་ཀྱིས་ཉེ་བར་གནས་སོ། །གང་གི་ཚེ་སྤྲུལ་པ་ཡིན་ན་ནི་དད་པ་དང་། གུས་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། འཛེམ་པ་དེ་འདྲ་བ་དག་གིས་མི་གནས་སོ། །ཇི་ཙམ་ན་ཁྱིམ་བདག་ཅིག་གིས་སངས་

  917. 149a

    རྒྱས་ལ་སོགས་པ་དགེ་སློང་གི་དགེ་འདུན་རང་གི་ཁྱིམ་དུ་གདུགས་ཚོད་ལ་སྤྱན་དྲངས་པ་དང་། བཅོམ་ལྡན་འདས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱི་མདུན་ གྱིས་བལྟས་ནས་ཁྱིམ་བདག་དེའི་ཁྱིམ་དུ་གཤེགས་ཏེ། གདུགས་ཚོད་གསོལ་ནས་སླར་གཤེགས་སོ། །དགེ་སློང་རྣམས་ཀྱིས་ཚེ་དང་ལྡན་པ་ཀུན་དགའ་བོ་ལ་དྲིས་པ། ཚེ་དང་ལྡན་པ་ཀུན་དགའ་བོ་ཅི་དེ་རིང་ཁྱོད་བཅོམ་ལྡན་འདས་དང་ཐབས་ཅིག་སོང་ངམ། འོན་ཏེ་སྤྲུལ་པ་ དང་། དེས་སྨྲས་པ། བཅོམ་ལྡན་འདས་དང་ཐབས་ཅིག་སོང་གིས་སངས་རྒྱས་ཀྱི་སྤྲུལ་པ་དང་ནི་མ་ཡིན་ནོ། །ཅི་མངོན་གང་གི་ཚེ་ཁོ་བོ་བཅོམ་ལྡན་འདས་དང་ཐབས་ཅིག་འགྲོ་བ་དེའི་ཚེ་བདག་བཅོམ་ལྡན་འདས་ལ་ལྷག་པར་དད་པ་དང་། གུས་པ་དང་། ངོ་ཚ་ཤེས་པ་དང་། ཁྲེལ་ཡོད་པ་དང་། འཛེམ་པས་ཉེ་བར་གནས་པ་ཡིན་ནོ། །གང་གི་ཚེ་སངས་རྒྱས་ཀྱི་སྤྲུལ་པ་ཡིན་པ་དེའི་ཚེ་དེ་ལྟར་མི་འགྱུར་རོ། །དགེ་སློང་དག་ཕན་ཚུན་སྨྲས་པ། ཚེ་དང་ལྡན་པ་ཀུན་དགའ་བོ་ནི་མཚན་མ་ལ་མཁས་སོ། །ཕྱོགས་དང་ཕྱོགས་མཚམས་རྣམས་སུ་དགེ་ སློང་ཀུན་དགའ་བོ་མཚན་མ་ལ་མཁས་སོ་ཞེས་བྱ་བའི་སྒྲ་བསྒྲགས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོའི་ཁབ་ཏུ་ཇི་ཙམ་བཞེད་ཀྱི་བར་དུ་བཞུགས་ནས་མཉེན་ཡོད་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་མཉན་ཡོད་དུ་བྱོན་ནས་མཉན་ ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་ཀུན་དགའ་བོ་སྔ་དྲོ་ཤམ་ཐབས་བགོས་ཆོས་གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ཀྱི་ཕྱིར་ཞུགས་པ་བྲམ་ཟེ་ཞིག་གིས་མཐོང་ནས་བསམས་པ། དགེ་ སྦྱོང་གཽ་ཏ་མའི་ཉན་ཐོས་དགེ་སློང་ཀུན་དགའ་བོ་མཚན་མ་ལ་མཁས་སོ། །ཞེས་ཐོས་པ་གང་ཡིན་པ་དེ་ནི་འདི་ཡིན་གྱིས་རེ་ཞིག་ཤིང་ཤ་པ་ཞེས་བྱ་བ་འདི་ལ་འདབ་མ་དུ་ཡོད་པ་དྲིའོ་སྙམ་ནས་དེས་དེ་ལ་དྲིས་པ། འཕགས་པ་ཤིང་ཤ་པ་འདི་ལ་འདབ་མ་ཇི་སྙེད་མཆིས། དེས་སྨྲས་པ། བརྒྱ་

  918. 149b

    དང་། སྟོང་དང་། ཁྲི་ཕྲག་འདི་སྙེད་ཡོད་དོ་ཞེས་སྨྲས་ནས་སོང་ངོ་། །བྲམ་ཟེ་དེས་དེ་ལ་ལོ་མ་དག་ཅིག་བཏོགས་ནས་བགྲངས་ཏེ་བོར་རོ། །ཚེ་དང་ལྡན་པ་ཀུན་དགའ་བོས་བསོད་སྙོམས་སྤྱད་དེ་སླར་ལོག་པ་དང་། བྲམ་ཟེ་དེས་ཡང་སྨྲས་པ། འཕགས་པ་ད་ལྟར་ཤིང་ཤ་ པ་འདི་ལ་འདབ་མ་ཇི་སྙེད་མཆིས་མཁྱེན་ཏམ། དེས་སྨྲས་པ། སྔར་ནི་བརྒྱ་དང་། སྟོང་དང་། ཁྲི་ཕྲག་འདི་སྙེད་ཡོད་པ་ལས་ད་ལས་འདི་སྙེད་ཅིག་བཏོགས་སོ། །བྲམ་ཟེ་དེ་འཕགས་པ་ནི་རྩིས་ལ་ཡང་དེ་ལྟར་མཁས་པ་ལྟ་ཞེས་མཆོག་ཏུ་ངོ་མཚར་སྐྱེས་སོ། །དགེ་སློང་ རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་དེས་ན་མཚན་མ་ལ་མཁས་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ དགེ་སློང་ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་བྲམ་ཟེ་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ་ཞག་བདུན་གསུམ་ཉི་ཤུ་གཅིག་ཏུ་དེ་བཙས་པའི་བཙས་སྟོན་རྒྱ་ཆེར་བྱས་ཏེ་རིགས་དང་མཐུན་པའི་མིང་ བཏགས་ནས་གསོས་བསྐྱེད་དེ་ཆེན་པོར་གྱུར་ཏོ། །དེ་ཡུལ་གཞན་དུ་སོང་སྟེ་མཚན་མའི་བསྟན་ཆོས་དྲུག་ཁྲི་བསླབས་སོ། །དེ་བཞིན་དུ་ཚེ་རབས་ལྔ་བརྒྱའི་བར་དུ་འཁོར་བ་ན་འཁོར་བའི་ཚེ་མཚན་མའི་བསྟན་ཆོས་དྲུག་ཁྲི་བསླབས་ཤིང་གཞན་ལ་ཡང་བསྟན་པའི་རྒྱུ་དེ་དང་རྐྱེན་ དེས་གང་དང་གང་དུ་སྐྱེས་པ་དེ་དང་དེར་མཚན་མཁན་རྣམས་ཀྱི་མཆོག་ཏུ་བྱུང་ངོ་། །འདི་ལྟར་ད་ལྟར་གྱི་སྲིད་པ་ཐ་མ་ལ་ཡང་མཚན་མཁན་རྣམས་ཀྱི་མཆོག་ཏུ་བྱུང་ངོ་། །ཀོ་ས་ལའི་རྒྱལ་པོ་གསལ་རྒྱལ་ལ་ཡང་ཉི་མ་རེ་རེ་ཞིང་དྲོ་ཀའི་དུས་སུ་གཞོང་པར་འབྲས་སཱ་ལུའི་ཆན་དང་།

  919. 150a

    བུ་རམ་ཤིང་གི་སྡོང་བུ་ཞིག་དང་། སྲེག་པ་གཉིས་ལྷུང་ལ་དེ་གཉིས་ལས་གཅིག་ནི་གཞོང་པའི་སྟེང་དུ་འབབ། ཅིག་ཤོས་ནི་ས་ལའོ། །དེས་ཚེ་དང་ལྡན་པ་ཀུན་དགའ་བོ་ལ་རིག་པར་བྱས་ཏེ། དེས་ཀྱང་དགེ་སློང་རྣམས་ལའོ། །དགེ་སློང་རྣམས་ཐེ་ཚོམ་ སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀོ་ས་ལའི་རྒྱལ་པོ་གསལ་རྒྱལ་གྱིས་ལས་ཅི་ཞིག་བགྱིས་ན། དེས་ན་འཚལ་མའི་དུས་སུ་གཞོང་བར་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་ཞིག་དང་། སྲེག་པ་གཉིས་ ལྷུང་ལ། དེ་གཉིས་ལས་གཅིག་ནི་གཞོང་པའི་སྟེང་དུ་འབབ། ཅིག་ཤོས་ནི་ས་ལ་ལྷུང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཀོ་ས་ལའི་རྒྱལ་པོ་གསལ་རྒྱལ་འདི་ཉིད་ཀྱིས་སྔོན་གྱི་ཚེ་རབས་གཞན་དག་ཏུ་ལས་བྱས་ཤིང་བསགས་ཏེ། དེས་ ན་འདིའི་ཟས་ཀྱི་དུས་སུ་གཞོང་པར་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་དང་། སྲེག་པ་གཉིས་ལྷུང་ལ། དེ་གཉིས་ལས་གཅིག་ནི་གཞོང་པའི་སྟེང་དུ་འབབ། ཅིག་ཤོས་ནི་ས་ལ་ལྷུང་བར་གྱུར་པ་ནི་དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་ཁྱིམ་བདག་ ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་གནས་ཏེ། དེའི་མངག་གཞུག་པ་རྣམས་ཀྱིས་ཞིང་པའི་གྲོང་ནས་འབྲས་སཱ་ལུ་སར་པ་ཞིག་དང་། སྲེག་པ་གཉིས་དང་། བུ་རམ་ཤིང་གི་སྡོང་བུ་ཞིག་ཁྱེར་ཏེ་འོངས་སོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་ རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་བ་དག་འབྱུང་བར་འགྱུར་བས་དེ་ནས་རང་སངས་རྒྱས་ཞིག་བཱ་རཱ་ཎ་སཱིར་འོངས་ནས་དེ་སྔ་དྲོ་ན་བཟའ་ཤམ་ཐབས་བགོས་ཆོས་གོས་དང་ ལྷུང་བཟེད་ཐོགས་ཏེ་བསོད་སྙོམས་ལ་ཁྱིམ་བདག་དེའི་ཁྱིམ་དུ་ཞུགས་པ་ན་དེས་དེ་ལུས་དེ་མཛེས་པ་དང་། སེམས་དད་པར་མཐོང་ནས་དེས་དེར་དེ་ལ་ཐོག་མར་ལོ་ཏོག་སར་པ་འོན་ཅིག་ཅེས་བྱས་ནས་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་ཞིག་དང་། སྲེག་པ་གཉིས་

  920. 150b

    ཕུལ་བ་ལས། དེ་ལས་གཅིག་ནི་ལྷུང་བཟེད་དུ་ལྷུང་ངོ་། །ཅིག་ཤོས་ནི་ས་ལའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གང་ཡིན་པ་དེ་ནི་རྒྱལ་པོ་གསལ་རྒྱལ་འདི་ཉིད་ཡིན་ཏེ། འདིས་རང་སངས་རྒྱས་ ལ་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་དང་། སྲེག་པ་གཉིས་ཕུལ་བ་དེའི་ལས་ཀྱི་རྣམ་པར་སྨིན་པས་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་མིའི་བདེ་བ་ཉམས་སུ་མྱོང་ངོ་། །ད་ལྟར་ཡང་འདིའི་ཟས་ ཀྱི་དུས་སུ་གཞོང་པར་འབྲས་སཱ་ལུའི་ཆན་དང་། བུ་རམ་ཤིང་གི་སྡོང་བུ་དང་། སྲེག་པ་གཉིས་ལྷུང་སྟེ། དེ་ལས་གཅིག་ནི་གཞོང་པའི་སྟེང་དུ་ལྷུང་ལ། ཅིག་ཤོས་ནི་ས་ལའོ། །ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་བདག་གི་ལས་ཀྱི་རྒྱུ་བ་ གཅིག་ལུང་བསྟན་པས་སྔོན་གྱི་མཐའི་ནི་ལས་ཀྱི་རྣམ་པར་སྨིན་པའི་འབྲས་བུ་ནི་ཡོད་དོ་སྙམ་དུ་རིག་ནས་ཉན་ཐོས་ཀྱི་དགེ་འདུན་དང་བཅས་པ་ལ་མངོན་པར་དད་དེ་དེ་ལྟར་ལས་ཀྱི་རྣམ་པར་སྨིན་པ་ལ་ཡིད་ཆེས་པའི་བློ་གྲོས་ཀྱིས་གནས་སོ། །ལྟས་མཁན་རྣམས་ཀྱིས་ འཕགས་པ་ཀུན་དགའ་བོ་ནི་ཅོད་པན་གྱིས་བཅིངས་པར་འགྱུར་རོ་ཞེས་ལུང་བསྟན་པས་ཅི་ཙམ་ནམ་ནངས་པ་དང་། ཚེ་དང་ལྡན་པ་ཀུན་དགའ་བོའི་འཕྲལ་བར་ཕོལ་མིག་བྱུང་ངོ་ཞེས་ཀོ་ས་ལའི་རྒྱལ་པོ་གསལ་རྒྱལ་གྱིས་ཐོས་ནས་དེ་འདི་སྙམ་དུ་སེམས་ཏེ། ཡོན་ གནས་རྣམས་ལ་བྱ་བ་བྱས་ན་བསོད་ནམས་ཀྱི་འབྲས་བུ་ཁྱད་པར་མེད་པར་མི་འགྱུར་བས་མ་ལ་བདག་གིས་འདི་ལ་རང་ཉིད་ཀྱིས་བཀུར་སྟི་བྱའོ་སྙམ་ནས། དེས་སྨན་པ་ཐམས་ཅད་བཀུག་སྟེ། འཕགས་པ་ཀུན་དགའ་བོའི་དཔྱད་གྱིས་ཤིག །དེའི་དཔྱད་གསལ་བ་ན་བྱ་བར་ བརྩམས་པ་དང་། ཀོ་ས་ལའི་རྒྱལ་པོ་གསལ་རྒྱལ་གྱིས་ཚེ་དང་ལྡན་པ་ཀུན་དགའ་བོ་ལ་རང་ཉིད་ཀྱིས་རྩིབས་བརྒྱ་ཡོད་པའི་གདུགས་བཟུང་ཞིང་། འཕྲལ་བའི་རྩ་འདེབས་པ་ན་ཅོད་པན་གྱིས་བཅིངས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་

  921. 151a

    བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཀོ་ས་ལའི་རྒྱལ་པོ་གསལ་རྒྱལ་གྱིས་ཚེ་དང་ལྡན་པ་ཀུན་དགའ་བོ་ལ་རང་ཉིད་ཀྱིས་རྩིབས་བརྒྱ་མཆིས་པའི་གདུགས་བཟུང་ཞིང་རང་ཉིད་ ཀྱིས་ཅོད་པན་དཀར་པོས་བཅིངས་ཏེ་བསྙེན་བཀུར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་སྔོན་གྱི་ཚེ་རབས་གཞན་དག་ཏུ་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་ འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་སྨན་པ་ཞིག་གནས་པའི་དྲུང་དུ་རང་སངས་རྒྱས་ནད་པ་ཞིག་སོང་བ་དང་། དེས་དེ་ལ་ཡོ་བྱད་ཐམས་ཅད་ཀྱིས་བསྟབས་ཏེ་རང་ཉིད་ཀྱིས་སྨན་དཔྱད་དང་བཀུར་སྟི་བྱས་སོ། །དགེ་སློང་དག་ཇི་ སྙམ་དུ་སེམས། དེའི་ཚེ་དེའི་དུས་ཀྱི་སྨན་པ་གང་ཡིན་པ་དེ་ནི་དགེ་སློང་ཀུན་དགའ་བོ་འདི་ཉིད་ཡིན་ཏེ། དེ་ན་འདིས་རང་སངས་རྒྱས་ལ་བྱ་བ་བྱས་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་ལོ་བརྒྱ་ཕྲག་དུ་མ་དང་། ལོ་སྟོང་ཕྲག་དུ་མར་རྒྱལ་པོ་དང་། བློན་པོ་དང་། བྲམ་ཟེ་ དང་། ཁྱིམ་བདག་རྣམས་ཀྱིས་འདི་ལ་བསྙེན་བཀུར་བྱས་སོ། །ཇི་ལྟར་ད་ལྟར་ཀྱང་འདི་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་རྩིབས་བརྒྱ་ཡོད་པའི་གདུགས་སྤྱི་བོར་བཟུང་ཞིང་རང་ཉིད་ཀྱིས་བསྙེན་བཀུར་བྱས་སོ། །དེ་ནས་བཅོམ་ལྡན་འདས་མཉན་ཡོད་ན་ཇི་ཙམ་བཞེད་ཀྱི་བར་དུ་ བཞུགས་ནས་ཤིང་སཱ་ལ་ཅན་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་སཱ་ལ་ཅན་དུ་བྱོན་ནས་སཱ་ལ་ཅན་གྱི་བྲམ་ཟེའི་གྲོང་ཁྱེར་ན་བཞུགས་སོ། །དེའི་ཚེ་འདི་ལྟ་བུའི་ཉན་ཐོས་ཆེན་པོ་གནས་བརྟན་གནས་བརྟན་རྣམས་བཅོམ་ལྡན་འདས་ཀྱི་ཉེ་འཁོར་ན་ཉེ་བར་བརྟེན་ ཅིང་འདུག་པ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང་། ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མ་མེད་པ་དང་། བ་ལང་བདག་དང་། ལག་བཟངས་དང་། ཚེ་དང་ལྡན་པ་ཤཱ་རིའི་བུ་དང་། ཚེ་

  922. 151b

    དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་ཀ་པི་ན་ཆེན་པོ་དང་། ཚེ་དང་ལྡན་པ་མ་འགགས་པ་དང་། དགའ་ཡོད་དང་། ཀིམ་པི་ལ་དང་། ས་ལ་ན་གནས་པའི་གནས་བརྟན་གྲགས་ལྡན་དང་། ཡུལ་ཆུ་མིག་ཅན་ན་གནས་པའི་གནས་བརྟན་གང་པོ་དང་། དེ་དག་དང་གཞན་ཡང་གནས་བརྟན་ཉན་ཐོས་ཆེན་པོ་རྣམས་བཅོམ་ལྡན་འདས་ཀྱི་ཉེ་འཁོར་ན་ཉེ་བར་བརྟེན་ཏེ་གནས་སོ།། །།འདུལ་བ་གཞི། བམ་པོ་དགུ་བཅུ་རྩ་དྲུག་པ། དེ་ནས་བཅོམ་ལྡན་འདས་ ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ནི་ང་རྒས་འཁོགས་གཏུགས་ཏེ་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་གདམས་ངག་དབོག་ཏུ་དུབ་ཀྱིས་དགེ་སློང་དག་ངའི་རིམ་གྲོ་ལ་ཐུགས་ལ་མི་འཐད་པ་མ་ཡིན་གྱི་ ཐུགས་ལ་འཐད་པས་རིམ་གྲོ་བྱེད་ཅིང་བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བའི་དགེ་སློང་ཞིག་སྤྲོ་བ་སྐྱེད་ཅིག །དེ་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་བཅོམ་ལྡན་འདས་ལ་ཐུགས་ལ་མི་འཐད་པ་མ་ལགས་ཀྱི། ཐུགས་ལ་འཐད་པས་རིམ་གྲོ་བགྱིད་ཅིང་བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ ལགས་སོ། །ཀཽཎྜི་ནྱ་ཁྱོད་རེ་ཞིག་རྒས་འཁོགས་གཏུགས་པས་ཁྱོད་ཉིད་ལ་རིམ་གྲོ་པ་དགོས་ཀྱིས་རེ་ཞིག་ཀཽཎྜི་ནྱ་ཁྱོད་ཉིད་ཀྱི་སྟན་ཇི་ལྟ་བ་བཞིན་ལ་འདུག་ཤིག །ཚེ་དང་ལྡན་པ་ཀུན་ཤེས་ཀཽཎྜི་ནྱ་རང་གི་སྟན་ཇི་ལྟ་བ་ལ་འདུག་གོ། །དེ་ནས་ཚེ་དང་ལྡན་པ་རྟ་ཐུལ་དང་། བཟང་ ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མ་མེད་པ་དང་། བ་ལང་བདག་དང་། ལག་བཟངས་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་

  923. 152a

    དང་ལྡན་པ་གསུས་པོ་ཆེ་དང་། ཚེ་དང་ལྡན་པ་ཀ་པི་ན་ཆེན་པོ་དང་། ཚེ་དང་ལྡན་པ་མ་འགགས་པ་དང་། དགའ་ཡོད་དང་། ཀིམ་པི་ལ་དང་། ས་ལ་ན་གནས་པའི་གནས་བརྟན་གྲགས་པ་དང་། ཡུལ་ཆུ་མིག་ཅན་གྱི་གནས་བརྟན་གང་པོ་སྟན་ལས་ ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་བཅོམ་ལྡན་འདས་ལ་ཐུགས་ལ་མི་འཐད་པ་མ་ལགས་ཀྱི་ཐུགས་ལ་འཐད་པས་རིམ་གྲོ་བགྱིད་ ཅིང་། བཀའ་སྩལ་པ་འཛིན་པ་དང་། བདག་གི་དོན་ཡང་ཉམས་པར་མི་འགྱུར་བ་ལགས་སོ། །གང་པོ་ཁྱོད་ཀྱང་རྒས་འཁོགས་གཏུགས་ཏེ། ཁྱོད་ཉིད་ལ་རིམ་གྲོ་པ་དགོས་ཀྱིས་རེ་ཞིག་གང་པོ་ཁྱོད་ཉིད་ཀྱི་སྟན་ཇི་ལྟ་བ་བཞིན་ལ་འདུག་ཤིག །ཚེ་དང་ལྡན་པ་གང་པོ་རང་གི་ སྟན་ཇི་ལྟ་བ་ལ་འདུག་གོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་འདི་སྙམ་དུ་སེམས་ཏེ། བཅོམ་ལྡན་འདས་དགེ་སློང་གང་ཞིག་རིམ་གྲོ་པར་བཞེད་པར་འགྱུར། མ་ལ་བདག་གིས་ཇི་ལྟར་སེམས་མཉམ་པར་གཞག་ན་བཅོམ་ལྡན་འདས་ཀྱི་ཐུགས་ལ་ལྟ་བར་འགྱུར་བ་དེ་ལྟ་བུའི་ ཏིང་ངེ་འཛིན་ལ་སྙོམས་པར་འཇུག་པར་བྱའོ་སྙམ་མོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཇི་ལྟར་སེམས་མཉམ་པར་བཞག་ན་བཅོམ་ལྡན་འདས་ཀྱི་ཐུགས་ལ་ལྟ་བར་འགྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཚེ་དང་ལྡན་པ་མཽད་གལ་གྱི་བུ་ཆེན་པོས་ བཅོམ་ལྡན་འདས་ཀྱི་ཐུགས་ལ་བལྟས་ན་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ཡིན་ནོ་ཞེས་བཅོམ་ལྡན་འདས་ཀྱི་ཐུགས་ཚེ་དང་ལྡན་པ་ཀུན་དགའ་ བོ་ལ་གཏད་པ་མཐོང་ངོ་། །མཐོང་ནས་ཀྱང་ཏིང་ངེ་འཛིན་དེ་ལས་ལངས་ཏེ་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་ཤེས་པར་གྱིས་ཤིག །བཅོམ་ལྡན་འདས་ཀྱི་ཐུགས་ལ་བལྟས་ན་དགེ་སློང་ཀུན་དགའ་བོས་ངའི་རིམ་གྲོ་བྱས་ན་ཐུགས་ལ་མི་འཐད་པ་མ་

  924. 152b

    ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་ཡིན་ནོ་ཞེས་ཚེ་དང་ལྡན་པ་ཀུན་དགའ་བོ་ལ་གཏད་དོ། །དཔེར་ན་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་བྱང་ཕྱོགས་སུ་རིང་བ་ཤར་ཕྱོགས་སུ་སྐར་ཁུང་ བཏོད་པ། ཤར་ཕྱོགས་སུ་སྐར་ཁུང་ནས་ཉི་མའི་འོད་ཟེར་ཤར་བ་ནུབ་ཕྱོགས་ཀྱི་རྩིག་པའི་ངོས་ལ་འབབ་པ་དེ་བཞིན་དུ་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་ པར་མི་འགྱུར་བ་ཡིན་ནོ་ཞེས་བཅོམ་ལྡན་འདས་ཀྱི་ཐུགས་ཚེ་དང་ལྡན་པ་ཀུན་དགའ་བོ་ལ་གཏད་ཀྱིས་ཚུར་བདག་ཅག་དོང་ལ་སྤྲོ་བར་བྱའོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་ཚེ་དང་ལྡན་པ་ཀུན་དགའ་བོ་གང་ན་བ་དེར་སོང་སྟེ་ཕྱིན་ནས། ཚེ་དང་ ལྡན་པ་ཀུན་དགའ་བོ་དང་ལྷན་ཅིག་མངོན་དུ་ཡང་དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས། དེ་ནས་ཚེ་ དང་ལྡན་པ་ཤཱ་རིའི་བུས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་ཁྱོད་བཅོམ་ལྡན་འདས་ཀྱི་རིམ་གྲོ་པར་སྤྲོའམ། བདེ་བར་གཤེགས་པ་ལ་བསྙེན་བཀུར་བྱ་བ་ནི་ཁྱོད་ལ་དོན་ཆེན་པོར་འགྱུར་རོ། །ཚེ་དང་ལྡན་པ་ཤཱ་རིའི་བུ་ བཅོམ་ལྡན་འདས་ཀྱི་རིམ་གྲོ་པར་བདག་མི་སྤྲོའོ། །དེ་ཅིའི་ཕྱིར་ཞེ་ན། འདི་ལྟར་སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །འདི་ལྟ་སྟེ་དཔེར་ན་མེ་འབར་བའི་མེ་ཕྲག་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །དེ་ བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བསྙེན་པར་དཀའ་ཞིང་བཟོད་པར་དཀའ་བས་བཅོམ་ལྡན་འདས་ཀྱི་རིམ་གྲོ་པར་བདག་མི་སྤྲོའོ། །འདི་ལྟ་སྟེ་དཔེར་ན་གཅན་གཟན་གྱི་རྒྱལ་པོ་སེང་གེ་རི་ཕུག་ན་གནས་པའི་སོ་ཕྲག་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །

  925. 153a

    དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །འདི་ལྟ་སྟེ་དཔེར་ན་མ་ཏང་གའི་གླང་པོ་ཆེའི་རྒྱལ་པོ་ལོ་དྲུག་བཅུ་ལོན་པ་དར་ལ་བབ་པ། གྲགས་པ། མཆེ་བ་གཤོལ་མདའ་ཙམ་ཡོད་པ། བྲང་གི་ ཕེལ་ཀ་ཆེ་བ། གཡུལ་མྱོང་བ། གཡུལ་ངོར་སོན་པའི་མཆེ་བའི་ཕྲག་ནི་བསྙེན་པར་དཀའ་ཞིང་བཟོད་པར་དཀའ་བ་ཡིན་ནོ། །དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་བསྙེན་པར་དཀའ་ཞིང་བཟོད་པར་དཀའ་བས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་ རིམ་གྲོ་པར་བདག་མི་སྤྲོའོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤེས་པར་གྱིས་ཤིག །བཅོམ་ལྡན་འདས་ནི་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་རོ་ཞེས་ཚེ་དང་ལྡན་པ་ཀུན་དགའ་བོ་ལ་ཐུགས་གཏད་དེ་དཔེར་ན་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་བྱང་ཕྱོགས་སུ་རིང་བ་ཤར་ཕྱོགས་སུ་སྐར་ཁུང་བཏོད་པ་ཤར་ ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་ཤར་བ་ནུབ་ཕྱོགས་ཀྱི་རྩིག་པའི་ངོས་ལ་འབབ་པ་དེ་བཞིན་དུ་བཅོམ་ལྡན་འདས་ནི་ངའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་ པར་མི་འགྱུར་རོ་ཞེས་ཚེ་དང་ལྡན་པ་ཀུན་དགའ་བོ་ལ་ཐུགས་གཏད་ན་ཚེ་དང་ལྡན་པ་ཀུན་དགའ་བོ་ཁྱོད་བཅོམ་ལྡན་འདས་ཀྱི་རིམ་གྲོ་པར་སྤྲོའམ། བདེ་བར་གཤེགས་པ་ལ་བསྙེན་བཀུར་བྱ་བ་ནི་ཁྱོད་ལ་དོན་ཆེན་པོར་འགྱུར་རོ། །ཚེ་དང་ལྡན་པ་མཽད་གལ་གྱི་བུ་བདག་གིས་དེ་བཞིན་དུ་བགྱི་ སྟེ། བཅོམ་ལྡན་འདས་ཀྱི་རིམ་གྲོ་བགྱི་བར་སྤྲོ་བར་བགྱིད་ན། གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་པོ་བཅོམ་ལྡན་འདས་ཀྱི་ན་བཟའ་སྨད་གཡོགས་དང་ཆོས་གོས་བདག་གིས་མི་བཅང་བ་དང་། བཅོམ་ལྡན་འདས་ཀྱི་ཕྱིར་གང་ཟག་པའི་མགྲོན་དུ་འབོད་ན་

  926. 153b

    བདག་གིས་བདག་གིར་མི་བྱ་བ་དང་། བདག་བཅོམ་ལྡན་འདས་བལྟ་བ་དང་། བཀུར་སྟི་བྱ་བའི་ཕྱིར་ཉེ་བར་འགྲོ་བ་ལ་དུས་མ་ཡིན་པ་ཅུང་ཟད་ཀྱང་མེད་པར་གནང་ངམ། ཚེ་དང་ལྡན་པ་མཽད་གལ་གྱི་བུ་ཆེན་པོ་གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་གནང་བ་ ལྟ་ན་བདག་དེ་བཞིན་དུ་བཅོམ་ལྡན་འདས་ཀྱི་རིམ་གྲོ་བགྱིད་པར་སྤྲོའི་གཞན་དུ་ན་མ་ལགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་རིམ་གྲོ་པར་སྤྲོ་བ་བསྐྱེད་ནས། བཅོམ་ལྡན་འདས་གང་ན་ བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱི་རིམ་ གྲོ་བགྱིད་པའི་དགེ་སློང་བདག་ཅག་གིས་སྤྲོ་བ་བསྐྱེད་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོ་ལགས་ན། དེའི་མཆིད་ནས་འདི་སྐད་ཅེས་ཚེ་དང་ལྡན་པ་མཽད་གལ་གྱི་བུ་ཆེན་པོ་བདག་གིས་དེ་བཞིན་དུ་བཅོམ་ལྡན་འདས་ཀྱི་རིམ་གྲོ་བགྱིད་པར་སྤྲོ་བར་བགྱི་ན། གལ་ཏེ་བཅོམ་ལྡན་འདས་ ཀྱིས་བདག་ལ་མཆོག་གསུམ་པོ་བཅོམ་ལྡན་འདས་ཀྱི་ན་བཟའ་སྨད་གཡོགས་དང་ཆོས་གོས་བདག་གིས་མི་བཅང་བ་དང་། བཅོམ་ལྡན་འདས་ཀྱི་ཕྱིར་གང་ཟག་པའི་མགྲོན་དུ་འབོད་ན་བདག་གིས་བདག་གིར་མི་བྱ་བ་དང་། བདག་བཅོམ་ལྡན་འདས་ལ་བལྟ་བ་དང་བཀུར་སྟི་བྱ་བའི་ཕྱིར་ཉེ་ བར་འགྲོ་བ་དུས་མ་ཡིན་པ་ཅུང་ཟད་ཀྱང་མེད་པ་གནང་ངམ། གལ་ཏེ་བཅོམ་ལྡན་འདས་ཀྱིས་བདག་ལ་མཆོག་གསུམ་གནང་བ་ལྟ་ན་བདག་དེ་བཞིན་དུ་བཅོམ་ལྡན་འདས་ཀྱི་རིམ་གྲོ་བགྱིད་པར་སྤྲོའོ་ཞེས་མཆི་ལགས་སོ། །མཽད་གལ་གྱི་བུ་ཆེན་པོ་ལེགས་སོ་ལེགས་སོ། །དགེ་སློང་ཀུན་དགའ་བོ་ ནི་མཁས་པ་ཡིན་ཏེ། དེས་མ་འོངས་པ་ན་ཚངས་པ་མཚུངས་པར་སྤྱོད་པ་རྣམས་ལས་རྩོད་ཅིང་རྗེས་སུ་རྩོད་པ་སྨད་པའི་གནས་ཀྱི་ཆོས་འབྱུང་ལ། གཞི་འདིས་བདག་ལ་ཚངས་པ་མཚུངས་པར་སྤྱོད་པ་རྣམས་དགེ་སློང་ཀུན་དགའ་བོ་ནི་ཆོས་གོས་ཀྱི་རྒྱུས་སྟོན་པ་ལ་བཀུར་སྟི་བྱེད་དོ་ཞེས་ཁ་ཟེར་

  927. 154a

    བར་འགྱུར་བ་མཐོང་སྟེ། མཽད་གལ་གྱི་བུ་འདི་ནི་དགེ་སློང་ཀུན་དགའ་བོའི་ངོ་མཚར་རྨད་དུ་བྱུང་བའི་ཆོས་ཡིན་ནོ། །མཽད་གལ་གྱི་བུ་ལེགས་སོ། །ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ཏེ། དེས་མ་འོངས་པ་ན་ཚངས་པ་མཚུངས་པར་སྤྱོད་པ་ རྣམས་ལས་རྩོད་ཅིང་རྗེས་སུ་རྩོད་པའི་སྨད་པའི་གནས་ཀྱི་ཆོས་འབྱུང་ལ། གཞི་འདིས་བདག་ལ་ཚངས་པ་མཚུངས་པར་སྤྱོད་པ་རྣམས་དགེ་སློང་ཀུན་དགའ་བོ་ནི་ཁ་ཟས་ཀྱི་རྒྱུས་སྟོན་པ་ལ་བཀུར་སྟི་བྱེད་དོ་ཞེས་ཁ་ཟེར་བར་འགྱུར་བ་མཐོང་སྟེ། མཽད་གལ་གྱི་བུ་འདི་ནི་དགེ་སློང་ཀུན་དགའ་ བོའི་ངོ་མཚར་རྨད་དུ་བྱུང་བའི་ཆོས་ཡིན་ནོ། །མཽད་གལ་གྱི་བུ་ལེགས་སོ་ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ཏེ། དུས་ཤེས་ཤིང་དུས་རིག་པས་དེ་འདི་ནི་བདག་གིས་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན། འདི་ནི་དུས་མ་ཡིན། འདི་ནི་དགེ་ སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་གྱི་དུས་ཡིན། འདི་ནི་གཞན་མུ་སྟེགས་ཅན་དང་། ཀུན་ཏུ་རྒྱུ་དག་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན། འདི་ནི་དུས་མ་ཡིན། གཞན་མུ་སྟེགས་ཅན་ དང་། ཀུན་ཏུ་རྒྱུ་འདི་དག་ནི་བཅོམ་ལྡན་འདས་ཀྱི་བཀའ་ལ་སྤོབས་པ་དང་ལྡན་པར་འགྱུར། འདི་དག་ནི་བཀའ་ལ་སྤོབས་པ་དང་ལྡན་པར་མི་འགྱུར། བཟའ་བ་དང་བཅའ་བ་འདི་ནི་བཅོམ་ལྡན་འདས་ལ་བདེ་བ་སྐྱེད་པར་འགྱུར། འདི་ནི་བདེ་བ་སྐྱེད་པ་མ་ཡིན་ནོ་ཞེས་ཤེས་ཏེ། མཽད་ གལ་གྱི་བུ་དགེ་སློང་ཀུན་དགའ་བོ་ནི་མཁས་པ་ཡིན་ཏེ། དུས་ཤེས་ཤིང་དུས་རིག་པས་དེ་འདི་ནི་བདག་གིས་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན་ནོ། །འདི་ནི་དུས་མ་ཡིན་ནོ། །འདི་ནི་དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་ གྱི་འཁོར་དང་། དགེ་བསྙེན་མའི་འཁོར་གྱི་དུས་ཡིན་ནོ། །འདི་ནི་གཞན་མུ་སྟེགས་ཅན་དང་། ཀུན་ཏུ་རྒྱུ་དག་བཅོམ་ལྡན་འདས་ལ་བལྟ་བའི་ཕྱིར་འགྲོ་བའི་དུས་ཡིན་ནོ། །འདི་ནི་དུས་མ་ཡིན་ནོ། །གཞན་མུ་སྟེགས་ཅན་དང་། ཀུན་ཏུ་རྒྱུ་འདི་དག་ནི་བཅོམ་ལྡན་འདས་

  928. 154b

    ཀྱི་བཀའ་ལ་སྤོབས་པ་དང་ལྡན་པར་འགྱུར་རོ། །འདི་དག་ནི་བཀའ་ལ་སྤོབས་པ་དང་ལྡན་པར་མི་འགྱུར་རོ། །བཟའ་བ་དང་བཅའ་བ་འདི་ནི་བཅོམ་ལྡན་འདས་ལ་བདེ་བ་སྐྱེད་པར་འགྱུར་རོ། །འདི་ནི་བདེ་བ་སྐྱེད་པ་མ་ཡིན་ནོ་ཞེས་ཤེས་པ་གང་ཡིན་པ་འདི་ནི་མཽད་གལ་གྱི་བུ་དགེ་ སློང་ཀུན་དགའ་བོའི་ངོ་མཚར་རྨད་དུ་བྱུང་བའི་ཆོས་ཡིན་ནོ། །མཽད་གལ་གྱི་བུ་ལེགས་སོ་ལེགས་སོ། །དགེ་སློང་ཀུན་དགའ་བོ་ནི་མཁས་པ་ཡིན་ནོ། །དེ་སེམས་ཀྱི་རྣམ་གྲངས་ལ་མཁས་པ་ཡིན་ཏེ། དེ་བཞིན་གཤེགས་པ་ཕྱི་མ་ནང་དུ་ཡང་དག་འཇོག་ལས་བཞེངས་པ་ མཚན་མ་འམ་གསུང་བསྟན་པས་ཤེས་པར་འགྱུར་ཞིང་བདེ་བའི་གནས་པ་འདི་དང་འདིས་བཅོམ་ལྡན་འདས་མང་དུ་བཞུགས་སོ། །གནས་པ་འདི་དང་འདིས་བདེ་བར་གཤེགས་པ་མང་དུ་བཞུགས་སོ་ཞེས་སྟོན་པར་འདོད་ན་ཇི་སྐད་བསྟན་པ་དེ་དག་ཐམས་ཅད་དེ་བཞིན་དུ་འགྱུར་ཏེ། གཞན་དུ་མི་འགྱུར་བ་གང་ཡིན་པ་འདི་ནི་མཽད་གལ་གྱི་བུ་དགེ་སློང་ཀུན་དགའ་བོའི་རྨད་དུ་བྱུང་བའི་ཆོས་ཡིན་ཏེ། དེས་དེ་བཞིན་གཤེགས་པའི་རིམ་གྲོ་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་ འགྱུར་རོ། །མཽད་གལ་གྱི་བུ་དེ་བཞིན་གཤེགས་པའི་རིམ་གྲོ་དགེ་སློང་ཀུན་དགའ་བོས་བྱས་ན་ཐུགས་ལ་མི་འཐད་པ་མ་ཡིན་གྱི་ཐུགས་ལ་འཐད་པ་དང་། བཀའ་སྩལ་པ་འཛིན་པ་དང་། རང་གི་དོན་ཡང་ཉམས་པར་མི་འགྱུར་བ་གང་ཡིན་པ་འདི་ནི་དགེ་སློང་ཀུན་དགའ་བོའི་རྨད་དུ་ བྱུང་བའི་ཆོས་ཡིན་ནོ། །གང་གི་ཚེ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་རིམ་གྲོ་བར་སྤྲོ་བ་བསྐྱེད་པ་ན། བཅོམ་ལྡན་འདས་ཀྱིས་རྗེས་སུ་བསྔགས་པ་མཛད་པ་དེའི་ཚེ་དགེ་སློང་རྣམས་ཐེ་ཚོམ་སྐྱེས་ནས་ ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་མཆེད་དུ་གྱུར་ཅིང་ཐོས་པ་མང་བ་དང་། ཐོས་པ་འཛིན་པ་དང་། ཐོས་པ་བསགས་པའི་

  929. 155a

    རིམ་གྲོ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་ སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་འོད་ཟེར་ཞེས་བྱ་བ་འབྱོར་པ་དང་ཞེས་བྱ་བ་ནས། སྐྱེ་བོ་དང་། མི་མང་པོ་ཡོད་པ་ན་རྒྱལ་སྲིད་བྱེད་དུ་འཇུག་སྟེ་ཞེས་བྱ་བའི་བར་དུ་སྟེ། དེ་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ་དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། འདིའི་ཡབ་འོད་ཟེར་ལགས་པས་དེའི་སླད་དུ་ཁྱེའུའི་ མིང་འོད་ཟེར་ཅན་དུ་གདགས་སོ་ཞེས་དེའི་མིང་འོད་ཟེར་ཅན་དུ་བཏགས་ནས། བསྲིངས་བསྐྱེད་དེ་ཆེན་པོར་གྱུར་པ་དང་ཕས་རྒྱལ་ཚབ་ཏུ་དབང་བསྐུར་ཏོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་ནས་དེའི་ཡང་བཙས་སྟོན་རྒྱ་ ཆེར་བྱས་ཏེ་འོད་ཟེར་ལྡན་ཞེས་བྱ་བར་མིང་བཏགས་སོ། །གཞོན་ནུ་འོད་ཟེར་ཅན་ངེས་པར་འབྱུང་བ་ལ་མངོན་པར་དགའ་ཞིང་དེས་ཕ་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་པ་མཐོང་ནས་དེས་བསམས་པ། བདག་ཀྱང་ཡབ་འདས་ནས་རྒྱལ་པོར་འགྱུར་ཏེ་བདག་གིས་ཀྱང་ ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་ནས་དམྱལ་བར་གཞོལ་བར་འགྱུར་རོ་སྙམ་ནས། དེ་ཕའི་དྲུང་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། ལྷ་མཁྱེན་པར་མཛད་དུ་གསོལ། རབ་ཏུ་འབྱུང་ལགས་སོ། །དེས་སྨྲས་པ། བུ་གང་གི་དོན་དུ་མཆོད་སྦྱིན་མཆོད་པར་ བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་རྒྱལ་སྲིད་དེ་ཁྱོད་ཀྱི་ལག་ཏུ་འོངས་ན་ཅིའི་ཕྱིར་རབ་ཏུ་འབྱུང་ཞེས་དེ་བཟློག་ཀྱང་མ་བཏུབ་བོ། །རྒྱལ་པོས་གདོན་མི་ཟ་བར་གལ་གྱིས་འཆུ་བར་ཤེས་ནས་གནང་བ་དང་། དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་

  930. 155b

    ཏུ་བྱུང་ངོ་། །རྒྱལ་པོས་གཞོན་ནུ་འོད་ཟེར་ལྡན་རྒྱལ་ཚབ་ཏུ་དབང་བསྐུར་ཏོ། །འོད་ཟེར་ཅན་དྲང་སྲོང་རྣམས་ཀྱི་ནང་དུ་རབ་ཏུ་ཕྱུང་སྟེ། མཐའ་གཅིག་ཏུ་སོང་ནས་མཁན་པོ་མེད་པ་དང་། སློབ་དཔོན་མེད་པར་རང་བྱང་ཆུབ་མངོན་སུམ་དུ་བྱས་སོ། །དེ་དུས་གཞན་ཞིག་ན་ནད་ཀྱིས་ཐེབས་ པར་གྱུར་ནས་ཕན་ཚུན་འཁྱམ་པ་ན་བཱ་རཱ་ཎ་སཱིར་ཕྱིན་ཏོ། །རྒྱལ་པོ་འོད་ཟེར་གྱིས་འོད་ཟེར་ཅན་རང་བྱང་ཆུབ་མངོན་སུམ་དུ་བྱས་ཏེ་དེ་དེར་འོངས་སོ་ཞེས་ཐོས་ནས་དེ་དེའི་དྲུང་དུ་འོང་སྟེ་རྐང་པ་ལ་གཏུགས་ནས་སྨྲས་པ། དྲང་སྲོང་ཆེན་པོ་ཁྱོད་ནི་བསོད་སྙོམས་དོན་དུ་གཉེར་བ་ལགས་ལ། བདག་ནི་བསོད་ནམས་འཚལ་བ་ལགས་ཀྱིས་བདག་གི་སྐྱེད་མོས་ཚལ་འདི་ཉིད་དུ་བཞུགས་ཤིག་དང་ཁྱོད་ལ་བདག་གིས་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ། །དེས་ཁས་བླངས་པ་དང་རྒྱལ་པོས་དེའི་རིམ་གྲོ་བར་གཞོན་ནུ་འོད་ཟེར་ལྡན་བྱིན་ཏེ་དེས་དེའི་རིམ་གྲོ་བྱ་བ་ལ་ཞུགས་ པ་ན་རང་སངས་རྒྱས་ཀྱིས་དེ་ཞག་བདུན་ན་འཆི་བར་འགྱུར་བའི་མཚན་སྨིན་པ་མཐོང་ནས་དེས་དེ་ལ་སྨྲས་པ། ནུ་བོ་ཅིའི་ཕྱིར་རབ་ཏུ་མི་འབྱུང་། དེས་སྨྲས་པ། དྲང་སྲོང་ཆེན་པོ་རབ་ཏུ་འབྱུང་ངོ་། །གལ་ཏེ་དེ་ལྟར་གྱུར་ན་སོང་ལ་ཡབ་ལ་རྟོགས་ཤིག །དེ་རྒྱལ་པོའི་དྲུང་དུ་སོང་ ནས་ལྷ་མཁྱེན་པར་མཛད་དུ་གསོལ། བདག་རབ་ཏུ་འབྱུང་ལགས་སོ། །རྒྱལ་པོས་སྨྲས་པ། ཁྱོད་ཀྱི་ཕུ་བོ་རབ་ཏུ་བྱུང་བས་ང་འདས་ན་ཁྱོད་ཁོ་ན་རྒྱལ་པོ་ཡིན་ན་ཅིའི་ཕྱིར་རབ་ཏུ་འབྱུང་ཞེས་དེས་རབ་ཏུ་འབྱུང་བ་མ་ཐོབ་བོ། །རང་སངས་རྒྱས་དེ་ཉིད་རྒྱལ་པོའི་དྲུང་དུ་སོང་སྟེ་སོང་ ནས་ཚིགས་སུ་བཅད་པས་སྨྲས་པ། འོད་ཟེར་འོད་ཟེར་ལྡན་ཐོང་དང་། །འོད་ཟེར་ལྡན་པ་རབ་ཏུ་འབྱུང་། །འོད་ཟེར་རབ་ཏུ་བྱུང་བ་ལེགས། །འདི་ལྟར་རྒྱལ་བ་རྣམས་ཀྱིས་བསྔགས། །རྒྱལ་པོས་སྨྲས་པ། དྲང་སྲོང་ཆེན་པོ་ཁྱོད་རབ་ཏུ་བྱུང་བས་དེ་ནི་བདག་འདས་ན་རྒྱལ་ པོར་འགྱུར་ཏེ་འདི་ཉིད་དུ་སྦྱིན་པ་དག་སྩོལ་བ་དང་། བསོད་ནམས་དག་བགྱིད་པར་འགྱུར་ན་ཅིའི་ཕྱིར་རབ་ཏུ་འབྱུང་། རང་སངས་རྒྱས་ཀྱིས་ཚིགས་སུ་བཅད་དེ་སྨྲས་པ། འོད་ཟེར་ཚེ་ནི་ཅུང་ཞིག་སྟེ། །རེ་ལྟར་ཐོགས་ན་ཞག་བདུན་ཉིད། །དོན་གཞན་ཆེད་དུ་བསམས་བསམ་

  931. 156a

    པ། གཞན་ཉིད་དུ་ནི་ཡོངས་སུ་འགྱུར། །དྲང་སྲོང་ཆེན་པོ་འདིའི་ཚེ་ཞག་བདུན་ལགས་སམ། རང་སངས་རྒྱས་ཀྱིས་སྨྲས་པ། ཞག་བདུན་ཡིན་ནོ། །རྒྱལ་པོས་སྨྲས་པ། དྲང་སྲོང་ཆེན་པོ་གལ་ཏེ་དེ་ལྟ་ན་གནང་བར་བགྱིས་རབ་ཏུ་ཕྱུང་ཤིག །དེ་བདག་ལ་ཚེ་ཅུང་ ཞིག་ཡོད་པར་ཤེས་ནས་དད་པ་དྲག་པོས་དེ་ལ་བཀུར་སྟི་བྱ་བར་བརྩམས་སོ། །རང་སངས་རྒྱས་དེ་རླུང་ནད་ཅན་ཞིག་བས་དེས་ལྷུང་བཟེད་ལག་ཏུ་བླངས་ནས་ཟ་བ་ན་རླུང་གིས་ལག་པ་འདར་བར་གྱུར་ཏོ། །དེ་ནས་རྒྱལ་བུ་གཞོན་ནུ་དེ་གདུ་བུ་ཕྱུང་ནས་ལྷུང་བཟེད་ཀྱི་གཞིར་བཞག་པ་དང་དེ་ལ་ལྷུང་ བཟེད་མི་གཡོ་བར་འདུག་གོ། །དེས་དེ་མཐོང་ནས་སྨོན་ལམ་གདབ་པར་བརྩམས་པ། ཇི་ལྟར་འདི་ལ་ལྷུང་བཟེད་མི་གཡོ་བ་དེ་བཞིན་དུ་དགེ་བའི་རྩ་བ་འདིས་བདག་གི་རྒྱུད་ལ་ཆོས་ཅི་ཡོད་པ་དེ་དག་མི་གཡོ་བར་གནས་པར་གྱུར་ཅིག་ཅེས་བཏབ་བོ། །དེ་དེ་ལ་སྔོན་ཡི་གེ་དང་ཚིག་རན་པ་རན་པར་ ཆོས་འཆད་པ་ཡིན་པས་དེས་སྨྲས་པ། ཁྱོད་སྔོན་ཁྱིམ་པར་གྱུར་པ་ན་ཡི་གེ་དང་ཚིག་རན་པ་རན་པར་ཆོས་འཆད་པ་ལགས་ན། ད་རང་བྱང་ཆུབ་མངོན་སུམ་དུ་བགྱིས་ན་ཅིའི་ཕྱིར་ཆོས་མི་བཤད། དེས་སྨྲས་པ། ཁོ་བོ་ཆོས་མི་འཆད་དོ། །འོ་ན་སུ་འཆད་ལགས། དེ་བཞིན་གཤེགས་ པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་གང་ཡིན་པ་སྟེ། སངས་རྒྱས་བཅོམ་ལྡན་འདས་དེ་དག་ནི་ཚིག་དང་ཡི་གེ་རན་པ་རན་པར་ཆོས་འཆད་དོ། །དེས་སྨོན་ལམ་བཏབ་པ། སངས་རྒྱས་བཅོམ་ལྡན་འདས་ཚིག་དང་ཡི་གེ་རན་པ་རན་པར་ཆོས་འཆད་པ་གང་ཡིན་པ་ དེའི་མཆེད་དང་རིམ་གྲོ་པར་བདག་གྱུར་ཅིག་ཅེས་བཏབ་བོ། །རང་སངས་རྒྱས་དེས་རབ་ཏུ་ཕྱུང་ནས་སྨྲས་པ། ཁྱོད་ཞག་བདུན་འདས་ནས་འཆི་བར་འགྱུར་བ་དེ་ཁོ་ན་ཁྱོད་ཀྱིས་ཡིད་ལ་བྱོས་ཤིག །དེས་ཞག་བདུན་ལོན་ན་ཅུང་ཟད་ཀྱང་མ་རྟོགས་ནས་དེའི་འཆི་བའི་ཚེ་སྨོན་ལམ་བཏབ་པ། དགེ་བའི་རྩ་བ་འདིས་བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་བསྟན་པ་ལ་རབ་ཏུ་བྱུང་ནས་ཐོས་པ་མང་བ་དང་། ཐོས་པ་འཛིན་པ་དང་། ཐོས་པ་བསགས་པར་གྱུར་ཅིག་ཅེས་བཏབ་བོ། །དགེ་སློང་དག་ཇི་སྙམ་དུ་སེམས།

  932. 156b

    རྒྱལ་བུ་གཞོན་ནུ་རང་སངས་རྒྱས་ཀྱི་ནུ་བོར་གྱུར་པ་གང་ཡིན་པ་དེ་ནི་དགེ་སློང་ཀུན་དགའ་བོ་འདི་ཉིད་ཡིན་ཏེ། དེ་ན་ཡང་འདིས་རང་སངས་རྒྱས་ཕུ་བོ་ཤོས་ཀྱི་རིམ་གྲོ་བྱས་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་བཅོམ་ལྡན་འདས་ཀྱི་མཆེད་དུ་གྱུར་ཅིང་། ཐོས་པ་ མང་བ་དང་། ཐོས་པ་འཛིན་པ་ཐོས་པ་བསགས་པའི་རིམ་གྲོ་པར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཀུན་དགའ་བོས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ བཅོམ་ལྡན་འདས་ཀྱིས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་བསྟན་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཀུན་དགའ་བོ་འདི་ཉིད་ཀྱིས་ལས་བྱས་ཤིང་བསགས་པ་དང་ཚོགས་རྙེད་པ་ནི་ཞེས་ བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་ཞེས་བྱ་བ་ནས། སངས་ རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ་ཞེས་བྱ་བའི་བར་དུ་སྟེ། དེ་གྲོང་ཁྱེར་བཱ་རཱ་ཎ་སཱིར་ཉེ་བར་བརྟེན་ནས་དྲང་སྲོང་སྨྲ་བ་རི་དགས་ཀྱི་ནགས་ན་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ན་དེ་ན་འདིས་ཡོན་ཏན་གྱི་ཚོགས་ཅུང་ཟད་ཀྱང་མ་ཐོབ་བོ། ། འདི་རབ་ཏུ་འབྱིན་པ་གང་ཡིན་པ་དེ་ནི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་པ་ཡིན་པས་དེ་འཆི་བའི་ཚེ་སྨོན་ལམ་བཏབ་པ། བདག་གིས་ཡང་དག་པར་ རྫོགས་པའི་སངས་རྒྱས་བཅོམ་ལྡན་འདས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་ཅུང་ཟད་ཀྱང་མ་ཐོབ་ཀྱིས། དགེ་བའི་རྩ་བ་གང་ཡིན་པ་འདིས་བདག་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ཞེས་

  933. 157a

    བྱ་བ་གང་ཡིན་པ་དེ་ལ་བྲམ་ཟེའི་ཁྱེའུ་ཁྱོད་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་ཇི་ལྟར་བདག་གི་མཁན་པོ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གིས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་པ་དེ་བཞིན་དུ་བདག་ཀྱང་ཤཱཀྱའི་ རྒྱལ་པོའི་ཡང་རྒྱལ་པོ་བཅོམ་ལྡན་འདས་ཤཱཀྱ་ཐུབ་པ་དེས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་རྣམས་ཀྱི་མཆོག་ཏུ་ལུང་བསྟན་པར་གྱུར་ཅིག་ཅེས་བཏབ་བོ། །སྨོན་ལམ་དེའི་དབང་གིས་ད་ལྟར་ངས་ཐོས་པ་མང་བ། ཐོས་པ་འཛིན་པ། ཐོས་པ་བསགས་པ་ རྣམས་ཀྱི་མཆོག་ཏུ་ལུང་བསྟན་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་དུའོ།། །།སྡོམ་ལ། རྫུ་འཕྲུལ་སྟོན་པ་གསུམ་སྨྲ་དང་། །གཏུམ་བྱེད་རིག་པ་ག་ཡཱ་ དང་། གང་གི་ཕྱིར་ནི་གནོད་པ་དང་། །སེམས་ཅན་རྣ་བ་ཁྱི་ཡིན་ནོ། །བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་མུ་གེའི་དགོན་པ་ཉམ་ང་བ་སློང་མོ་བས་ཟས་རྙེད་པར་དཀའ་བ་བྱུང་ངོ་། །དེ་ན་དགེ་སློང་རྫུ་འཕྲུལ་ཐོབ་པ་གང་ ཡིན་པ་དེ་རྣམས་ནི་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་དེ་ལས་ཤིང་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་ རྣམས་ལ་འགོད་པར་བྱེད་དོ། །གཞན་ཡང་འདིའི་ཉེ་འཁོར་ན་བིལ་པའི་ཚལ་ལམ། ཀ་པིད་ཐའི་ཚལ་ལམ། སྐྱུར་རྩིའི་ཚལ་གང་ཡིན་པ་དེ་ལས་སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་

  934. 157b

    ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་དོ། །བྱང་གི་སྒྲ་མི་སྙན་གྱི་གླིང་དུ་དོང་ནས་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་ པར་བྱེད་དོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་དོང་ནས་ལྷའི་བདུད་རྩི་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགོད་པར་བྱེད་དོ། །ཡུལ་ལྗོངས་འབྱོར་པ་དང་ ཞེས་བྱ་བ་ནས། སྐྱེ་བོ་དང་། མི་མང་པོས་གང་བའི་བར་གང་ཡིན་པ་དེ་ནས་གཙང་ཞིང་བསོད་པའི་བཟའ་བ་དང་བཅའ་བས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་དོ། །དེ་ནས་ལྷ་སྦྱིན་འདི་ སྙམ་དུ་སེམས་ཏེ། ད་ལྟར་མུ་གེའི་དགོན་པ་ཉམ་ང་བ་སློང་མོ་པས་ཟས་རྙེད་པར་དཀའ་བ་བྱུང་བ་ལ། དགེ་སློང་རྫུ་འཕྲུལ་ཐོབ་པ་གང་ཡིན་པ་དེ་རྣམས་ནི་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་དེ་ལས་ཤིང་འཛམ་བུའི་སྙེ་མ་ཁ་ དོག་དང་དྲི་དང་རོ་ཕུན་སུམ་ཚོགས་པ་རྣམས་ཀྱིས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་དོ། །གཞན་ཡང་འདིའི་ཉེ་འཁོར་ན་བིལ་བའི་ཚལ་ལམ། ཀ་པིད་ཐའི་ཚལ་ལམ། སྐྱུར་རྩིའི་ཚལ་གང་ཡིན་ པ་དེ་ལས་སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་དོ། །བྱང་གི་སྒྲ་མི་སྙན་གྱི་གླིང་དུ་དོང་ནས་མ་རྨོས་མ་བཏབ་པའི་འབྲས་ སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་དོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་དོང་ནས་ལྷའི་བདུད་རྩི་ལས་ལྷུང་བཟེད་བཀང་སྟེ་

  935. 158a

    བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་དོ་ཞེས་བྱ་བ་ནས་ཡུལ་ལྗོངས་འབྱོར་པ་དང་ཞེས་བྱ་བ་ནས། སྐྱེ་བོ་དང་མི་མང་པོས་གང་བའི་བར་གང་ཡིན་པ་དེ་ནས་གཙང་ཞིང་བསོད་པའི་བཟའ་བ་དང་བཅའ་བས་ལྷུང་ བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་པར་བྱེད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་འགེད་པར་བྱེད་ཀྱིས། གལ་ཏེ་བདག་གིས་ཀྱང་རྫུ་འཕྲུལ་ཞིག་ཐོབ་ན་བདག་གིས་ཀྱང་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་ ལས་ཤིང་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །གཞན་ཡང་འདིའི་ཉེ་འཁོར་ན་བིལ་བའི་ཚལ་ལམ། ཀ་པིད་ཐའི་ཚལ་ལམ། སྐྱུར་ རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །བྱང་གི་སྒྲ་མི་སྙན་གྱི་གླིང་དུ་སོང་ལ་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་ བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའོ། །རྒྱལ་ཆེན་བཞིའི་རིས་སམ། སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་དུ་སོང་ལ་ལྷའི་བདུད་རྩི་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་ དགེ་སློང་ཡོད་པ་རྣམས་ལ་བགོ་བར་བྱའོ། །ཡུལ་ལྗོངས་འབྱོར་པ་དང་ཞེས་བྱ་བ་ནས། སྐྱེ་བོ་དང་མི་མང་པོས་གང་བའི་བར་གང་ཡིན་པ་དེ་ནས་གཙང་ཞིང་བསོད་པའི་བཟའ་བ་དང་བཅའ་བས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་རྣམས་ ལ་བགོ་བར་བྱ་ན། སུ་ཞིག་གིས་བདག་ལ་རྫུ་འཕྲུལ་གྱི་ལམ་ལུང་དབོག་པར་ནུས་སྙམ་མོ། །དེ་ནས་ལྷ་སྦྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་

  936. 158b

    ལྡན་འདས་ལ་ལྷ་སྦྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། དེ་ནས་བཅོམ་ལྡན་འདས་ཀྱིས་ལྷ་སྦྱིན་སྡིག་པའི་འདོད་པ་དེ་ལྟ་བུ་སྐྱེས་པར་གྱུར་པ་ཐུགས་སུ་ཆུད་ནས་ལྷ་སྦྱིན་ལ་འདི་སྐད་ཅེས་བཀའ་སྩལ་ཏོ། ། གཽ་ཏ་མ་ཁྱོད་ལྷག་པའི་ཚུལ་ཁྲིམས་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །གཽ་ཏ་མ་ཁྱོད་ལྷག་པའི་སེམས་ལ་ཚུལ་བཞིན་ཡིད་ལ་བྱོས་ཤིག་དང་ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །གཽ་ཏ་མ་ ཁྱོད་ལྷག་པའི་ཤེས་རབ་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་བདག་ལ་རྫུ་འཕྲུལ་གྱི་ལམ་གྱི་ལུང་མ་ཕོག་གོ་སྙམ་དུ་བསམས་ནས་ཆས་ཏེ་ཚེ་དང་ལྡན་པ་ ཀུན་ཤེས་ཀཽཎྜི་ནྱ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། དེ་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱས་བཅོམ་ལྡན་འདས་ཀྱི་ཐུགས་དང་ལྷ་སྦྱིན་གྱི་ལ་བལྟས་ན་སྡིག་པ་འདོད་ པ་དེ་ལྟ་བུ་སྐྱེས་པར་ཤེས་ནས་ལྷ་སྦྱིན་ལ་འདི་སྐད་ཅེས་སྨྲས་སོ། །ལྷ་སྦྱིན་ཁྱོད་གཟུགས་ལ་ཚུལ་བཞིན་ཡིད་ལ་བྱོས་ཤིག་དང་ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། གནས་བརྟན་ཀུན་ཤེས་ཀཽཎྜི་ནྱས་ཀྱང་བདག་ལ་རྫུ་འཕྲུལ་ གྱི་ལམ་གྱི་ལུང་མ་ཕོག་གོ་སྙམ་དུ་བསམས་ནས། ཚེ་དང་ལྡན་པ་རྟ་ཐུལ་དང་། བཟང་ལྡན་དང་། རླངས་པ་དང་། མིང་ཆེན་དང་། གྲགས་པ་དང་། གང་པོ་དང་། དྲི་མ་མེད་པ་དང་། བ་ལང་བདག་དང་། ལག་བཟངས་དང་། གནས་བརྟན་ལྔ་བརྒྱ་གང་ན་བ་དེར་སོང་སྟེ་ཕྱིན་ནས་ གནས་བརྟན་ལྔ་བརྒྱ་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། །དེ་ནས་གནས་བརྟན་ལྔ་བརྒྱ་པོས་བཅོམ་ལྡན་འདས་ཀྱི་ཐུགས་དང་། དགེ་སློང་གནས་བརྟན་གནས་བརྟན་རྣམས་དང་ལྷ་སྦྱིན་གྱི་ལ་བལྟས་ན་སྡིག་པའི་འདོད་པ་དེ་

  937. 159a

    ལྟ་བུ་སྐྱེས་པར་ཤེས་ནས་ལྷ་སྦྱིན་ལ་འདི་སྐད་ཅེས་སྨྲས་སོ། །ལྷ་སྦྱིན་ཁྱོད་གཟུགས་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །ལྷ་སྦྱིན་ཁྱོད་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་ པར་ཤེས་པ་ལ་ཚུལ་བཞིན་ཡིད་ལ་བྱོས་ཤིག་དང་། ཁྱོད་རྫུ་འཕྲུལ་དང་གཞན་དག་དང་ཡང་ལྡན་པར་འགྱུར་རོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། གནས་བརྟན་ལྔ་བརྒྱས་ཀྱང་བདག་ལ་རྫུ་འཕྲུལ་གྱི་ལམ་གྱི་ལུང་མ་ཕོག་ན། ཅི་ཚེ་དང་ལྡན་པ་འདི་དག་དང་བཅོམ་ལྡན་ འདས་དང་ལྷན་ཅིག་སྔ་ཉིད་ནས་བགྲོས་སམ། འདི་ལྟར་བདག་ལ་སུས་ཀྱང་རྫུ་འཕྲུལ་གྱི་ལམ་གྱི་ལུང་མ་ཕོག་གོ་སྙམ་མོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། སུ་ཞིག་བདག་ལ་རྫུ་འཕྲུལ་གྱི་ལམ་གྱི་ལུང་དབོག་པར་ནུས་སྙམ་མོ། །དེའི་ཚེ་ཚེ་དང་ལྡན་པ་འོད་སྲུང་སྟོབས་བཅུ་ ལྡན་རྒྱལ་པོའི་ཁབ་ཀྱི་སྡེ་ཅན་གྱི་ཕུག་ན་འདུག་གོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། གནས་བརྟན་འོད་སྲུང་སྟོབས་བཅུ་ལྡན་འདི་ནི་ཡུན་རིང་པོ་ནས་གཡོ་མེད་པ། སྒྱུ་ཅན་མ་ཡིན་པ། དྲང་པོར་བྱེད་པ། དྲང་པོའི་རང་བཞིན་ཅན་ཡིན་ལ། བདག་གི་ཉེ་མཚམས་ཀྱི་ཕུ་བོ་ཀུན་ དགའ་བོའི་ཡང་མཁན་པོ་ཡིན་པས་གནས་བརྟན་འོད་སྲུང་སྟོབས་བཅུ་ལྡན་གྱིས་བདག་ལ་རྫུ་འཕྲུལ་གྱི་ལམ་གྱི་ལུང་དབོག་པར་ནུས་སོ་སྙམ་དུ་བསམས་ནས། ཚེ་དང་ལྡན་པ་འོད་སྲུང་སྟོབས་བཅུ་ལྡན་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱི་རྐང་པ་གཉིས་ ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷ་སྦྱིན་གྱིས་ཚེ་དང་ལྡན་པ་འོད་སྲུང་སྟོབས་བཅུ་ལྡན་ལ་འདི་སྐད་ཅེས་སྨྲས་སོ། །གནས་བརྟན་བདག་ལ་རྫུ་འཕྲུལ་གྱི་ལམ་གྱི་ལུང་དབོག་ཏུ་གསོལ། དེ་ནས་ཚེ་དང་ལྡན་པ་འོད་སྲུང་སྟོབས་ བཅུ་ལྡན་གྱིས་བཅོམ་ལྡན་འདས་ཀྱི་ཐུགས་དང་། དགེ་སློང་གནས་བརྟན་གནས་བརྟན་རྣམས་དང་། ལྷ་སྦྱིན་གྱི་ལ་བལྟས་ན་སྡིག་པའི་འདོད་པ་དེ་ལྟ་བུ་སྐྱེས་པར་གྱུར་པར་མ་རིག་ནས་ལྷ་སྦྱིན་ལ་རྫུ་འཕྲུལ་གྱི་ལམ་གྱི་ལུང་ཕོག་གོ། །དེ་ནས་ལྷ་སྦྱིན་གྱིས་ནམ་གྱི་ཆ་སྟོད་དང་། ནམ་གྱི་ཆ་

  938. 159b

    སྨད་ལ་མི་ཉལ་བར་བརྩོན་པ་དང་ལྡན་པའི་གནས་པས་བསམ་གཏན་དང་པོ་ལ་བརྟེན་ཏེ་རྫུ་འཕྲུལ་མངོན་པར་བསྒྲུབས་ནས། དེ་གཅིག་ཏུ་གྱུར་ཅིང་མང་པོར་འགྱུར་བ་དང་། མང་པོར་གྱུར་ཅིང་གཅིག་ཏུ་འགྱུར་བ་དང་། སྣང་བར་གྱུར་ཅིང་མི་སྣང་བར་འགྱུར་བ་ཤེས་པ་མཐོང་བས་ ཉམས་སུ་མྱོང་བར་བྱེད་དོ། །རྩིག་པ་ལ་ཡང་ཐད་ཀར་འགྲོ། རི་ལ་ཡང་ཐད་ཀར་འགྲོ། རབ་ལ་ཡང་ལུས་ཀྱིས་མི་ཐོགས་པར་ཐད་ཀར་འགྲོའོ། །འདི་ལྟ་སྟེ། ནམ་མཁའ་དང་ས་ལ་ཡང་སྟེང་དུ་འབྱུང་བ་དང་བྱིའུ་ཟུལ་བྱེད་དེ་དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ ནུབ་པར་རྒྱུན་ཕྱོགས་སུ་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །སྐྱིལ་མོ་ཀྲུང་གིས་ནམ་མཁའ་ལ་འགྲོ་བར་བྱེད་དེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་། ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ལ་ཡང་ལག་པས་ཉུག་ཅིང་ཀུན་དུ་ཉུག་ པར་བྱེད་དོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། ཅི་བདག་གིས་འཛམ་བུ་ཞེས་བྱ་བའི་མིང་གིས་འཛམ་བུའི་གླིང་ཞེས་བྱ་བར་བཏགས་པ་གང་ཡིན་པ་དེ་ལས་འཛམ་བུའི་སྙེ་མ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་ སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ། གཞན་ཡང་འདིའི་ཉེ་འཁོར་ན་བིལ་བའི་ཚལ་ལམ། ཀ་པིད་ཐའི་ཚལ་ལམ། སྐྱུར་རྩིའི་ཚལ་གང་ཡིན་པ་དེ་ལས་སྐྱུར་རྩིའི་འབྲས་བུ་ཁ་དོག་དང་དྲི་དང་རོ་ཕུན་སུམ་ཚོགས་པ་རྣམས་ལས་ལྷུང་བཟེད་བཀང་ སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ། བྱང་གི་སྒྲ་མི་སྙན་གྱི་གླིང་དུ་སོང་ལ་མ་རྨོས་མ་བཏབ་པའི་འབྲས་སཱ་ལུའི་འབྲུ་ལས་ལྷུང་བཟེད་བཀང་སྟེ་བླངས་ནས་ཞེས་བྱ་བའི་བར་གོང་མ་བཞིན་དུའོ། །རྒྱལ་ཚེ་ན་ བཞིའི་རིས་སམ། སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སོང་ལ། ལྷའི་བདུད་རྩི་ལས་ལྷུང་བཟེད་བཀང་སྟེ་བླངས་ནས་བདག་ཉིད་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ། ཡུལ་ལྗོངས་འབྱོར་པ་དང་ཞེས་བྱ་བ་ནས་སྐྱེ་བོ་དང་།

  939. 160a

    མི་མང་པོས་གང་བའི་བར་དེ་ནས་གཙང་ཞིང་བསོད་པའི་བཟའ་བ་དང་བཅའ་བ་ལྷུང་བཟེད་བཀང་སྟེ་བླངས་ནས་བདག་གིས་ལོངས་སྤྱོད་ཅིང་། ལྷག་མ་ཡང་དགེ་སློང་ཡོད་པ་རྣམས་ལ་བགོ་བར་བྱའམ་སྙམ་མོ། །དེ་ནས་ཡང་ལྷ་སྦྱིན་འདི་སྙམ་དུ་ སེམས་ཏེ། བདག་གིས་ཡུལ་མ་ག་དྷཱའི་མི་གཙོ་བོ་གང་ཞིག་དབང་དུ་བྱས་ན་དེ་དབང་དུ་གྱུར་པས་སྐྱེ་བོའི་ཚོགས་ཆེན་པོ་ཚོགས་ཆུང་ངུས་བདག་གི་དབང་དུ་འགྱུར་སྙམ་པ་དང་། དེ་ནས་ལྷ་སྦྱིན་འདི་སྙམ་དུ་སེམས་ཏེ། གཞོན་ནུ་མ་སྐྱེས་དགྲ་འདི་ཕ་ཤི་ནས་ཕའི་རྒྱལ་སྲིད་ཀྱི་ དབང་ཕྱུག་ལ་བཞག་པར་འགྱུར་གྱིས། མ་ལ་བདག་གིས་གཞོན་ནུ་མ་སྐྱེས་དགྲ་དབང་དུ་འགྱུར་བར་བྱ་སྟེ། དེ་དབང་དུ་གྱུར་ན་སྐྱེ་བོའི་ཚོགས་ཆེན་པོ་ཚེགས་ཆུང་ངུས་བདག་གི་དབང་དུ་འགྱུར་རོ་སྙམ་མོ། །དེ་ནས་ལྷ་སྦྱིན་གྱིས་གླང་པོ་ཅང་ཤེས་བཟང་པོ་དང་། རྟ་ཅང་ ཤེས་བཟང་པོ་དང་། དགེ་སློང་སྐྲ་བྲེགས་ཤིང་སྣམ་སྦྱར་བགོས་པ་དར་ལ་བབ་པ་དག་ཏུ་བསྒྱུར་ནས་གཞོན་ནུ་མ་སྐྱེས་དགྲའི་སྒོ་ནས་ཞུགས་ཤིང་སྒེའུ་ཆུང་ངུ་འབྱུང་བ་དང་། སྒེའུ་ཆུང་ནས་ཞུགས་ཤིང་སྒོར་འབྱུང་བར་བྱེད་དོ། །རེས་འགའ་གཞོན་ནུ་གསེར་གྱི་འོག་པག་གིས་བཅིངས་ པར་བསྒྱུར་ནས་གཞོན་ནུ་མ་སྐྱེས་དགྲའི་པང་ན་འགྲེ་ལྡོག་པར་བྱེད་དོ། །མ་སྐྱེས་དགྲ་ཡང་གཞོན་ནུ་དེ་ལ་འཛིན་ཅིང་ཁ་སྤྲད་དེ་འཁྱུད་པར་བྱེད་དོ། །རེས་འགའ་ནི་ཁར་མཆིལ་མའི་ཐལ་བ་བླུགས་ན་དེ་ཡང་ལྷ་སྦྱིན་མེད་པར་བྱེད་དོ། །འདི་ལྟ་སྟེ་རྙེད་པ་དང་བཀུར་སྟིས་ཟིལ་གྱིས་ནོན་པས་ སེམས་གཏུགས་པའི་ཕྱིར་རོ། །དེ་ན་གཞོན་ནུ་མ་སྐྱེས་དགྲ་ལྷག་པར་ཡང་སྡིག་པ་ཅན་གྱི་ལྟ་བར་སོང་བ་ཐོབ་སྟེ། ཀྱེ་མ་སྟོན་པ་བས་ནི་འཕགས་པ་ལྷ་སྦྱིན་ཆེས་མཐུ་ཆེའོ་ཞེས་དད་པར་གྱུར་ཏོ། །དེ་ལ་དད་པར་གྱུར་ནས་ལྷག་པར་བྱ་བ་བྱེད་དོ། །ཤིང་རྟ་ལྔ་བརྒྱ་ཙམ་དང་ལྷན་ ཅིག་སྔ་དྲོ་དང་ཕྱི་དྲོ་རིམ་གྲོ་བྱེད་དུ་འགྲོའོ། །དེ་ལ་གཡོས་ཀྱི་སྣ་རྫེའུ་ལྔ་བརྒྱ་ཙམ་ཡང་བཀད་ས་དང་བཀད་ས་དག་ཏུ་སྟོབས་པར་བྱེད་དོ། །ལྷ་སྦྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་བཀད་སའི་གུང་ལ་འདུག་པར་བྱེད་དོ། །དེ་ནས་དགེ་སློང་རབ་ཏུ་མང་པོ་སྔ་དྲོ་ཤམ་ཐབས་བགོས་

  940. 160b

    ལྷུང་བཟེད་དང་ཆོས་གོས་བླངས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །དགེ་སློང་རབ་ཏུ་མང་པོ་རྒྱལ་པོའི་ཁབ་ཏུ་བསོད་སྙོམས་སྤྱོད་པས་ལྷ་སྦྱིན་ལ་རྙེད་པ་དང་བཀུར་སྟི་འདི་ལྟ་བུ་དག་བྱུང་བར་གྱུར་ཏེ། མ་ག་དྷཱའི་རྒྱལ་པོ་ལུས་འཕགས་མའི་བུ་མ་སྐྱེས་དགྲས་ཤིང་རྟ་ལྔ་བརྒྱ་ཙམ་ དང་ལྷན་ཅིག་སྔ་དྲོ་དང་ཕྱི་དྲོ་རིམ་གྲོ་བྱེད་དུ་འགྲོ་ཞིང་། དེ་ལ་གཡོས་ཀྱི་སྣ་རྫེའུ་ལྔ་བརྒྱ་ཙམ་ཡང་བཀད་ས་དང་བཀད་ས་དག་ཏུ་སྟོབས་པར་བྱེད་དོ། །ལྷ་སྦྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་བཀད་སའི་གུང་ལ་འདུག་པར་བྱེད་དོ་ཞེས་ཐོས་སོ། །ཐོས་ནས་ཀྱང་རྒྱལ་པོའི་ཁབ་ཏུ་ བསོད་སྙོམས་སྤྱད་དེ། ཟས་ཀྱི་བྱ་བ་བྱས་ཤིང་ཟས་ཕྱི་མའི་བསོད་སྙོམས་སྤངས་ནས་ཆོས་གོས་དང་ལྷུང་བཟེད་མཁོས་སུ་ཕབ་སྟེ་རྐང་པ་བཀྲུས་ནས་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོས་འདི་སྐད་ཅེས་གསོལ་ཏོ། །བཙུན་པ་འདིར་བདག་ཅག་དགེ་སློང་རབ་ཏུ་མང་པོ་སྔ་དྲོ་ཤམ་ཐབས་འཚལ་ལྷུང་བཟེད་དང་ཆོས་གོས་བླངས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ ནས་བཙུན་པ་བདག་ཅག་དགེ་སློང་རབ་ཏུ་མང་པོ་རྒྱལ་པོའི་ཁབ་ཏུ་བསོད་སྙོམས་སྤྱད་པ་ན། ལྷ་སྦྱིན་ལ་རྙེད་པ་དང་བཀུར་སྟི་འདི་ལྟ་བུ་དག་བྱུང་བར་གྱུར་ཏེ། མ་ག་དྷཱའི་རྒྱལ་པོ་ལུས་འཕགས་མའི་བུ་མ་སྐྱེས་དགྲས་ཤིང་རྟ་ལྔ་བརྒྱ་ཙམ་དང་ལྷན་ཅིག་སྔ་དྲོ་དང་ཕྱི་དྲོ་རིམ་གྲོ་བགྱིད་དུ་མཆི་ཞིང་། དེ་ ལ་གཡོས་ཀྱི་སྣ་རྫེའུ་ལྔ་བརྒྱ་ཙམ་ཡང་བཀད་ས་དང་བཀད་ས་དག་ཏུ་སྟོབས་པར་བགྱིད་དོ། །ལྷ་སྦྱིན་ཡང་དགེ་སློང་ལྔ་བརྒྱ་ཙམ་དང་ལྷན་ཅིག་བཀད་སའི་གུང་ལ་མཆིས་པར་བགྱིད་དོ་ཞེས་ཐོས་ལགས་སོ། །དགེ་སློང་དག་ཁྱེད་ལྷ་སྦྱིན་གྱི་རྙེད་པ་དང་བཀུར་སྟི་ལ་དགའ་བར་མ་བྱེད་ ཅིག །དེ་ཅིའི་ཕྱིར་ཞེ་ན། ལྷ་སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དགེ་སློང་དག་དཔེར་ན་ཆུ་ཤིང་གི་འབྲས་བུ་ཕྱུང་ནས་བརྙིས་པར་འགྱུར་ཞིང་། ཆུ་ཤིང་ནི་འབྲས་བུ་ཕྱུང་ནས་བསྐམས་པར་འགྱུར་བ་དེ་བཞིན་དུ་ལྷ་

  941. 161a

    སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དཔེར་ན་སྦ་དང་སྨྱུག་མ་ནི་འབྲས་བུ་ཕྱུང་ནས་བསྐམས་པར་འགྱུར་ཞིང་། སྦ་དང་སྨྱུག་མ་ནི་འབྲས་བུ་ཕྱུང་ནས་དུང་ཡག་ཏུ་འགྱུར་བ་དེ་བཞིན་དུ་ལྷ་སྦྱིན་གྱི་རྙེད་པ་དང་བཀུར་ སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་པ་ཡིན་ནོ། །དཔེར་ན་དྲེའུ་མོ་མངལ་དུ་བཟུང་ནས་འཆི་བར་འགྱུར་ཞིང་། དྲེའུ་མོ་ནི་མངལ་དུ་བཟུང་ནས་མ་རུང་བར་འགྱུར་བ་དེ་བཞིན་དུ་ལྷ་སྦྱིན་གྱི་རྙེད་པ་དང་བཀུར་སྟི་ནི་གསོད་པ་ཡིན་ནོ། །ལྷ་སྦྱིན་གྱི་རྙེད་པ་དང་བཀུར་སྟི་ནི་སྨད་ པ་ཡིན་ནོ། །དགེ་སློང་དག་ལྷ་སྦྱིན་གྱི་རྙེད་པ་དང་བཀུར་སྟི་དེ་ལྟ་བུ་ཇི་སྙེད་བྱུང་བ་དེ་དག་ནི་སྐྱེས་བུ་གཏི་མུག་ཅན་དེ་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་རོ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། རྙེད་པ་དང་བཀུར་སྟི་གང་ཡིན་པ་ ཟིལ་གྱིས་མནན་པར་བྱའི་རྙེད་པ་དང་བཀུར་སྟི་བྱུང་བ་ལ་སེམས་གཏུགས་ཏེ་གནས་པར་མི་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་བར་བྱའོ། །ཆུ་ཤིང་འབྲས་བུ་སྨྱུག་འབྲས་དང་། །སྦ་ནི་འབྲས་བུས་སྐེམས་པ་དང་། །རང་གི་བུ་ཡིས་དྲེའུ་མོ་ལྟར། །སྐྱེས་བུ་ཐ་ཤལ་བཀུར་ སྟིས་འཇོམས། །ཇི་སྲིད་བྱིས་པ་མངོན་བྱེད་པ། །དེ་སྲིད་དུ་ནི་ཕུང་བར་འགྱུར། །བྱིས་པའི་དཀར་བའི་ཆ་འཇོམས་པ། །རྩེ་མོ་ལས་ཀྱང་ལྟུང་བར་འགྱུར། །དེ་ནས་ལྷ་སྦྱིན་རྙེད་པ་དང་བཀུར་སྟིས་ཟིལ་གྱིས་ནོན་པ་སེམས་ཡོངས་སུ་གཏུགས་པ་ལ་སྡིག་པའི་འདོད་པ་འདི་ལྟ་བུ་སྐྱེས་པར་གྱུར་ཏེ། ད་ནི་བཅོམ་ལྡན་འདས་བགྲེས་འཁོགས་གཏུགས་ཏེ་འཁོར་བཞི་ལ་གདམས་ངག་དབོག་ཏུ་མཉེལ་བར་གྱུར་གྱིས། ཨེ་མའོ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་སྤངས་ཏེ་བདག་གིས་དགེ་སློང་གི་དགེ་འདུན་ཡོངས་སུ་དྲང་ཞིང་། བཅོམ་ལྡན་འདས་ནི་ཐུགས་ལས་ཆུང་ངུར་ མཐོང་བའི་ཆོས་ལ་བདེ་བར་གནས་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་ཀྱང་ཅི་མ་རུང་སྙམ་དུ་སེམས་བསྐྱེད་མ་ཐག་ཏུ་ལྷ་སྦྱིན་རྫུ་འཕྲུལ་དེ་ལས་ཡོངས་སུ་ཉམས་ཀྱང་བདག་ཡོངས་སུ་ཉམས་སོ་ཞེས་མི་ཤེས་སོ། །དེའི་ཚེ་བཅོམ་ལྡན་འདས་ཀྱི་ཉན་ཐོས་སྐྲོད་ངའི་བུ་དགེ་སློང་ནོག་ཅན་ཞེས་

  942. 161b

    བྱ་བས་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱོད་པ་སྤྱད་དེ། ཚངས་པའི་གནས་པ་བཞི་བསྒོམས་ནས་འདོད་པ་རྣམས་ལ་འདོད་པའི་འདུན་པ་སྤང་བའི་ཕྱིར་དེ་ལ་མང་དུ་གནས་པས་ཚངས་པའི་འཇིག་རྟེན་དང་སྐལ་བ་མཉམ་པར་སྐྱེས་སོ། །དེའི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ངན་ སྤོང་གི་ཆུ་སྲིན་བྱིས་པ་གསོད་ཀྱི་རི་ལ་འཇིགས་བྱེད་ཀྱི་ཚལ་གྱི་རི་དགས་ཀྱི་ནགས་ན་འདུག་གོ། །དེ་ནས་ཚངས་པ་ནོག་ཅན་གྱིས་ལྷ་སྦྱིན་རྫུ་འཕྲུལ་དེ་ལས་ཡོངས་སུ་ཉམས་པར་ཤེས་ནས། དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ་བརྐྱང་བ་ལས་བསྐུམ་ པ་ཙམ་གྱིས་ཚངས་པ་ནོག་ཅན་ཚངས་པའི་འཇིག་རྟེན་ནས་མི་སྣང་བར་བྱས་ཏེ་ངན་སྤོང་དུ་འོངས་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་མདུན་དུ་འདུག་གོ། །དེ་ནས་ཚངས་པ་ནོག་ཅན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་ གལ་གྱི་བུ་ཆེན་པོ་ཤེས་པར་གྱིས་ཤིག །ལྷ་སྦྱིན་རྙེད་པ་དང་བཀུར་སྟིས་ཟིལ་གྱིས་ནོན་པ་སེམས་གཏུགས་པ་ལ་སྡིག་པའི་འདོད་པ་འདི་ལྟ་བུ་སྐྱེས་ཏེ། ད་ནི་བཅོམ་ལྡན་འདས་བགྲེས་འཁོགས་གཏུགས་ཏེ་འཁོར་བཞི་ལ་གདམས་ངག་དབོག་ཏུ་མཉེལ་བར་གྱུར་གྱིས། ཨེ་མའོ་ བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་སྤངས་ཏེ། བདག་གིས་དགེ་སློང་གི་དགེ་འདུན་ཡོངས་སུ་དྲང་ཞིང་། བཅོམ་ལྡན་འདས་ནི་ཐུགས་ལས་ཆུང་ངུར་གནས་ཤིང་མཐོང་བའི་ཆོས་ལ་བདེ་བར་གནས་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་ཀྱང་ ཅི་མ་རུང་སྙམ་དུ་སེམས་བསྐྱེད་མ་ཐག་ཏུ་རྫུ་འཕྲུལ་དེ་ལས་སླར་ཡོངས་སུ་ཉམས་ཏེ། ཡོངས་སུ་ཉམས་ཀྱང་བདག་ནི་སླར་ཡོངས་སུ་ཉམས་སོ་ཞེས་མ་ཤེས་ཀྱིས། བཙུན་པ་མཽད་གལ་གྱི་བུ་སྙིང་བརྩེ་བ་ཉེ་བར་བཟུང་སྟེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་དོན་འདི་ རྒྱས་པར་གསོལ་ན་ལེགས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པ་ནོག་ཅན་ལ་ཅང་མི་སྨྲ་བས་ཁས་བླངས་སོ། །དེ་ནས་ཚངས་པ་ནོག་ཅན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཅང་མི་སྨྲ་བས་ཁས་བླངས་པར་རིག་ནས་ཚེ་དང་ལྡན་པ་མཽད་གལ་གྱི་བུ་ཆེན་པོའི་རྐང་

  943. 162a

    པ་གཉིས་ལ་མགོ་བོས་ཕྱག་འཚལ་ཏེ་དེ་ཉིད་དུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་ཚངས་པ་ནོག་ཅན་སོང་ནས་རིང་པོ་མ་ལོན་པར་ཤེས་ནས་ཇི་ལྟར་སེམས་མཉམ་པར་བཞག་ན་ངན་སྤོང་ནས་མི་སྣང་བར་གྱུར་ཏེ། རྒྱལ་ པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པ་ནོག་ཅན་དང་ལྷན་ཅིག་བར་སྐབས་ཀྱི་གཏམ་ཇི་སྙེད་གླེངས་པ་དེ་དག་ཐམས་ཅད་རྒྱས་པར་གསོལ་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་ པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་སྔ་མོ་ཞིག་ཏུ་ལྷ་སྦྱིན་སེམས་ལ་བཀྲམ་ནས་རིག་པར་མ་བྱས་སམ་ཅི་ན་ད་གཟོད་ཚངས་པ་ནོག་ཅན་གྱིས་སྦྲན། བཙུན་པ་མད་ལགས་སོ། །བཅོམ་ལྡན་འདས་དང་ཚེ་དང་ལྡན་པ་མཽད་གལ་གྱི་བུ་ཐབས་ཅིག་ཏུ་ བར་སྐབས་ཀྱི་གཏམ་འདི་གླེང་བར་མཛད་པ་ན། དེ་ནས་ལྷ་སྦྱིན་གྲོགས་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་དང་ལྷན་ཅིག་བཅོམ་ལྡན་འདས་གང་ན་བ་དེར་དོང་བ་དང་། བཅོམ་ལྡན་འདས་ཀྱིས་ལྷ་སྦྱིན་རྒྱང་རིང་པོ་ཁོ་ན་ ནས་གཟིགས་སོ། །གཟིགས་ནས་ཀྱང་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ལྷ་སྦྱིན་འོ་ནི་ད་ལྟར་འོང་གིས་ཚིག་སྲུངས་ཤིག་དང་། དེའུ་རེ་སྐྱེས་བུ་གཏི་མུག་འོ་ནི་བདག་ཉིད་ཀྱིས། བདག་ཉིད་ལུང་བསྟན་ཏོ། །དེ་ནས་ཚེ་དང་ལྡན་པ་མཽད་ གལ་གྱི་བུ་ཆེན་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཇི་ལྟར་སེམས་མཉམ་པར་བཞག་ན་འོད་མའི་ཚལ་ནས་མི་སྣང་བར་གྱུར་ཏེ། ངན་སྤོང་གི་ཆུ་སྲིན་བྱིས་པ་གསོད་ཀྱི་རི་ལ་འཇིགས་བྱེད་ཀྱི་ཚལ་གྱི་རི་དགས་ཀྱི་ནགས་སུ་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་

  944. 162b

    ཞུགས་སོ། །དེ་ནས་ལྷ་སྦྱིན་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས། བཅོམ་ལྡན་འདས་ལ་ལྷ་སྦྱིན་གྱིས་འདི་སྐད་ཅེས་གསོལ་ཏོ། །ད་ནི་བཅོམ་ ལྡན་འདས་བགྲེས་འཁོགས་གཏུགས་ཏེ་འཁོར་བཞི་ལ་གདམས་ངག་དབོག་ཏུ་མཉེལ་བར་གྱུར་གྱིས། ཨེ་མའོ་བཅོམ་ལྡན་འདས་ཀྱིས་དགེ་སློང་གི་དགེ་འདུན་བདག་ལ་སྤོངས་ཤིག་དང་། བདག་གིས་དགེ་སློང་གི་དགེ་འདུན་ཡོངས་སུ་དྲང་གིས། བཅོམ་ལྡན་འདས་ནི་ཐུགས་ལས་ཆུང་ ངུར་བདེ་བར་གནས་པའི་རྣལ་འབྱོར་གྱི་རྗེས་སུ་བརྩོན་པས་བཞུགས་སུ་གསོལ། སྐྱེས་བུ་གཏི་མུག་རེ་ཞིག་ཤཱ་རིའི་བུ་དང་། མཽད་གལ་གྱི་བུ་ཚངས་པ་མཚུངས་པར་སྤྱོད་པ་དེ་དག་ལ་ཡང་ངས་དགེ་སློང་གི་དགེ་འདུན་མི་སྤོངས་ན། རོ་དང་འདྲ་བ་མཆིལ་མ་འཐུང་བ་ཁྱོད་ལ་ལྟག་ལ་སྤོང་། དེ་ནས་ལྷ་སྦྱིན་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཤཱ་རིའི་བུ་དང་མཽད་གལ་གྱི་བུ་ལ་ནི་བསྔགས་པ་གསུངས་ལ་བདག་ལ་ནི་རོ་དང་འདྲ་བ་མཆིལ་མ་འཐུང་བའོ་ཞེས་སྨད་པ་གསུངས་སོ་སྙམ་མོ། །དེ་ནས་བཅོམ་ལྡན་འདས་ལ་ལྷ་སྦྱིན་འཁྲུགས་པ་དང་། ཞེ་སྡང་དང་། ང་རྒྱལ་དང་། འཆབ་པ་དང་། བགྲོངས་པ་དང་། མི་བཟོད་པ་དང་། མ་དད་པ་བསྟན་ཏོ། །དེ་ནས་ལྷ་སྦྱིན་གྱིས་འཇལ་ཏོ་ཞེས་བྱས་ནས་མགོ་ལན་གསུམ་ལྕོགས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།འདུལ་བ་གཞི། བམ་པོ་དགུ་བཅུ་རྩ་བདུན་ པ། དེའི་ཚེ་ཚེ་དང་ལྡན་པ་ཀུན་དགའ་བོ་བསིལ་ཡབ་ཐོགས་ཏེ་བཅོམ་ལྡན་འདས་ཀྱི་སྣམ་ལོགས་ན་བཅོམ་ལྡན་འདས་ལ་གཡོབ་ཅིང་འདུག་གོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་འོད་མའི་ཚལ་བྱ་ཀ་ལན་ད་ཀ་གནས་ པ་ན་དགེ་སློང་ཇི་སྙེད་ཉེ་བར་བརྟེན་ཏེ་གནས་པ་དེ་དག་ཐམས་ཅད་རིམ་གྲོའི་གནས་སུ་སྡུས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས་འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ཇི་སྙེད་ཉེ་བར་བརྟེན་ཏེ་གནས་པ་དེ་དག་ཐམས་

  945. 163a

    ཅད་རིམ་གྲོའི་གནས་སུ་བསོགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་ སྐད་ཅེས་གསོལ་ཏོ། །བཙུན་པ་འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་ཇི་སྙེད་ཉེ་བར་བརྟེན་ཏེ་མཆིས་པ་དེ་དག་ཐམས་ཅད་རིམ་གྲོའི་གནས་སུ་བསོགས་ལགས་ཏེ། བཅོམ་ལྡན་འདས་ད་ནི་དེའི་དུས་ལ་བབ་པར་དགོངས་སུ་གསོལ། དེ་ནས་བཅོམ་ལྡན་འདས་རིམ་གྲོའི་གནས་ གང་ན་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྟོན་པ་ལྔ་པོ་འདི་དག་འཇིག་རྟེན་ན་ཡོད་ཅིང་མངོན་ཏེ། ལྔ་གང་ཞེ་ན། འདི་ན་ སྟོན་པ་གཅིག་ནི་ཚུལ་ཁྲིམས་ཡོངས་སུ་མ་དག་པ་ཡིན་བཞིན་དུ་བདག་གི་ཚུལ་ཁྲིམས་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདི་ནི་ཚུལ་ཁྲིམས་ཡོངས་སུ་མ་དག་པ་ ཡིན་བཞིན་དུ་བདག་གི་ཚུལ་ཁྲིམས་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་པར་འགྱུར་བ་གང་ཡིན་པ་དེ་བདག་ཅག་གིས་ གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ཚུལ་ཁྲིམས་ལས་རྗེས་སུ་ སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ཚུལ་ཁྲིམས་ཀྱི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་སྟོན་པ་ཡོད་ཅིང་མངོན་པ་དང་པོ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་འཚོ་བ་ཡོངས་སུ་མ་དག་པ་ཡིན་བཞིན་དུ་བདག་གི་འཚོ་བ་

  946. 163b

    ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ཏེ། སྟོན་པ་ཤེས་ལྡན་འདི་ནི་འཚོ་བ་ཡོངས་སུ་མ་དག་པ་ཡིན་བཞིན་དུ་བདག་གི་འཚོ་བ་ཡོངས་སུ་དག་སྟེ། ཉོན་མོངས་པ་ཅན་མ་ཡིན་ནོ་ཞེས་ ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་འཚོ་བའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་འཚོ་བའི་སྒོ་ནས་ རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་ཡོད་ཅིང་མངོན་པའི་སྟོན་པ་གཉིས་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ཤེས་པ་མཐོང་བ་ཡོངས་སུ་མ་དག་པ་ཡིན་བཞིན་དུ་བདག་གི་ཤེས་པ་མཐོང་བ་ཡོངས་སུ་དག་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདིའི་ཤེས་པ་མཐོང་བ་ཡོངས་སུ་མ་དག་པ་ཡིན་བཞིན་དུ་བདག་གི་ཤེས་པ་མཐོང་བ་ཡོངས་སུ་དག་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ཤེས་པ་མཐོང་བའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ཤེས་པ་མཐོང་བའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་

  947. 164a

    ཡོད་ཅིང་མངོན་པའི་སྟོན་པ་གསུམ་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ལུང་སྟོན་པ་ཕུན་སུམ་ཚོགས་པ་མ་ཡིན་བཞིན་དུ་བདག་གིས་ལུང་སྟོན་པ་ནི་ཕུན་སུམ་ཚོགས་པ་ཡིན་ཏེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ ལྷན་ཅིག་གནས་པའི་རྒྱུས་སོ་སོར་ཤེས་ནས་སྟོན་པ་ཤེས་ལྡན་འདི་ནི་ལུང་སྟོན་པ་ཕུན་སུམ་ཚོགས་པ་མ་ཡིན་བཞིན་དུ་བདག་གི་ལུང་སྟོན་པ་ནི་ཕུན་སུམ་ཚོགས་པ་ཡིན་ཏེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་ཅེས་སྨྲས་ན། དེས་ ན་འདིའི་ཡིད་ལ་མི་འབབ་པར་འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་དེ་བདག་ཅག་གིས་གླེངས་ཏེ་ཅི་རུང་སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་། འདི་བདག་ཅག་ལ་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ ཀྱི་རྐྱེན་སྨན་དང་། ཡོ་བྱད་རྣམས་ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ལུང་སྟོན་པ་ཕུན་སུམ་ཚོགས་པའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ལུང་སྟོན་པ་ཕུན་སུམ་ཚོགས་པའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་ འཇིག་རྟེན་ན་ཡོད་ཅིང་མངོན་པའི་སྟོན་པ་བཞི་པ་ཡིན་ནོ། །གཞན་ཡང་འདི་ན་སྟོན་པ་གཅིག་ནི་ཆོས་འདུལ་བ་ཉེས་པར་འཆད་བཞིན་དུ་བདག་གི་ཆོས་འདུལ་བ་ནི་ལེགས་པར་བཤད་པ་ཡིན་ཏེ་ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་སྟེ། དེ་ཉན་ཐོས་རྣམས་དང་ལྷན་ཅིག་གནས་པའི་ རྒྱུས་སོ་སོར་ཤེས་ནས་སྟོན་པ་ཤེས་ལྡན་འདི་ནི་ཆོས་འདུལ་བ་ཉེས་པར་འཆད་བཞིན་དུ་བདག་གི་ཆོས་འདུལ་བ་ནི་ལེགས་པར་བཤད་པ་སྟེ། ཉོན་མོངས་པ་ཅན་མ་ཡིན་ནོ་ཞེས་ཁས་འཆེ་བ་ཡིན་ཏེ། གལ་ཏེ་བདག་ཅག་གིས་གཞན་ལ་དེ་སྐད་སྨྲས་ན། དེས་ན་འདིའི་ཡིད་ལ་མི་འབབ་པར་ འགྱུར་བས་སྟོན་པ་དེ་ལ་ཡིད་དུ་མི་འོང་བར་འགྱུར་བ་གང་ཡིན་པ་དེ་བདག་ཅག་གིས་གླེངས་ཏེ་ཅི་རུང་། སྟོན་པ་ཤེས་ལྡན་འདི་རང་ཉིད་ཤེས་པར་འགྱུར་གྲང་འདི་བདག་ཅག་ལ་འདི་ལྟ་སྟེ་ཆོས་གོས་དང་། བསོད་སྙོམས་དང་། གནས་མལ་དང་། ནད་གསོས་ཀྱི་རྐྱེན་སྨན་དང་། ཡོ་བྱད་རྣམས་

  948. 164b

    ཀྱིས་སེམས་སོ་སྙམ་སྟེ། དེ་ཉན་ཐོས་རྣམས་ཀྱིས་ཆོས་འདུལ་བ་ལེགས་པར་བཤད་པའི་སྒོ་ནས་རྗེས་སུ་སྲུང་བར་སེམས་སོ། །སྟོན་པ་དེ་ལྟ་བུ་ནི་ཉན་ཐོས་རྣམས་ཀྱིས་ཆོས་འདུལ་བ་ལེགས་པར་བཤད་པའི་སྒོ་ནས་རྗེས་སུ་སྲུང་བར་རེ་བ་ཡིན་ཏེ། འདི་ནི་འཇིག་རྟེན་ན་ཡོད་ཅིང་མངོན་པའི་ སྟོན་པ་ལྔ་པ་ཡིན་ནོ། །དགེ་སློང་དག་ང་ནི་ཚུལ་ཁྲིམས་ཡོངས་སུ་དག་པ་ཁོ་ན་ཡིན་པས་ང་ཚུལ་ཁྲིམས་ཡོངས་སུ་དག་པ་སྟེ་ཉོན་མོངས་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ཚུལ་ཁྲིམས་ཀྱི་སྒོ་ནས་རྗེས་སུ་སྲུང་བར་བསམ་ཡང་མི་དགོས་ལ་ང་ཡང་ཉན་ཐོས་ རྣམས་ཀྱིས་ཚུལ་ཁྲིམས་ཀྱི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་འཚོ་བ་ཡོངས་སུ་དག་པ་ཁོ་ན་ཡིན་པས་ངའི་འཚོ་བ་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་འཚོ་བའི་སྒོ་ནས་རྗེས་སུ་སྲུང་བར་བསམ་ ཡང་མི་དགོས་ལ། ང་ལ་ཡང་ཉན་ཐོས་རྣམས་ཀྱིས་འཚོ་བའི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་ཡེ་ཤེས་གཟིགས་པ་ཡོངས་སུ་དག་པ་ཁོ་ན་ཡིན་པས་ང་ཡེ་ཤེས་གཟིགས་པ་ཡོངས་སུ་དག་སྟེ་ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ ཐོས་རྣམས་ཀྱིས་ང་ལ་ཡེ་ཤེས་གཟིགས་པའི་སྒོ་ནས་རྗེས་སུ་སྲུང་བར་བསམ་ཡང་མི་དགོས་ལ་ང་ཡང་ཉན་ཐོས་རྣམས་ཀྱིས་ཡེ་ཤེས་གཟིགས་པའི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་ལུང་སྟོན་པ་དང་ལྡན་པ་ཁོ་ན་ཡིན་པས་ངའི་ལུང་སྟོན་པ་ཕུན་སུམ་ཚོགས་ཏེ་ཉོན་ མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ལུང་སྟོན་པ་ཕུན་སུམ་ཚོགས་པའི་སྒོ་ནས་རྗེས་སུ་བསྲུང་བར་བསམ་ཡང་མི་དགོས་ལ། ང་ཡང་ཉན་ཐོས་རྣམས་ཀྱིས་ལུང་སྟོན་པ་དང་ལྡན་པར་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ངའི་ཆོས་འདུལ་ བ་ནི་ལེགས་པར་གསུངས་པ་ཁོ་ན་ཡིན་པས་ངའི་ཆོས་འདུལ་བ་ལེགས་པར་གསུངས་པ་སྟེ། ཉོན་མོངས་པ་ཅན་མ་ཡིན་ནོ་ཞེས་ཞལ་གྱིས་འཆེ་སྟེ། ཉན་ཐོས་རྣམས་ཀྱིས་ང་ལ་ཆོས་འདུལ་བ་ནི་ལེགས་པར་གསུངས་པའི་སྒོ་ནས་རྗེས་སུ་བསྲུང་བར་བསམ་མི་དགོས་ལ། ང་ཡང་ཉན་ཐོས་

  949. 165a

    རྣམས་ཀྱིས་ཆོས་འདུལ་བ་ལེགས་པར་གསུངས་པའི་སྒོ་ནས་རྗེས་སུ་སྲུང་བར་འདོད་པ་མི་མངའོ། །དགེ་སློང་དག་ང་ནི་ཁྱེད་ལ་ཚར་བཅད་ཅིང་ཚར་བཅད་ཅིང་། ཐག་བཅུག་ཅིང་ཐག་བཅུག་ཅིང་རབ་ཏུ་སྨྲའི་ཁྱེད་ལ་ངོ་ནི་མི་བྱེད་དེ། རྫ་མཁན་གྱིས་རྫ་མ་ཚོས་པ་རྣམས་ ལ་བྱ་བ་བཞིན་དུ་གང་རུང་བ་དེ་འཇོག་པར་ཟད་པས་ངའི་ཚིག་གི་ལམ་རྣམས་བཟོད་པར་ཡང་གྱིས་ཤིག །དེ་ནས་ལྷ་སྦྱིན་གྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ལ་སྨྲས་པ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་ བྱིན་དག་ཚུར། དགེ་སྦྱོང་གཽ་ཏ་མ་འདུག་བཞིན་དུ་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་དབྱེ་བར་བྱའོ། །དེས་ན་བདག་ཅག་ཤི་སྟེ་འདས་ན་ཡང་། དགེ་སྦྱོང་གཽ་ཏ་མ་དེ་ལྟར་རྫུ་འཕྲུལ་ཆེ་བ། དེ་ལྟར་མཐུ་ཆེ་བ་འདུག་བཞིན་དུ་ལྷ་སྦྱིན་དང་། ཀོ་ཀ་ལི་ཀ་དང་། ཁཎྜ་དྲ་བྱ་ དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་གྱིས་ཉན་ཐོས་ཀྱི་དགེ་འདུན་མཐུན་པ་ཕྱེ་བ་དང་། འཁོར་ལོ་ཕྱེ་བ་བྱས་སོ་ཞེས་ཕྱོགས་དང་ཕྱོགས་མཚམས་སུ་གྲགས་པ་དང་། སྒྲ་དང་ཚིགས་སུ་བཅད་པ་སྙན་པ་རྒྱ་ཆེར་འབྱུང་བར་འགྱུར་རོ། །དེ་རྣམས་ཀྱིས་སྨྲས་པ། ལྷ་སྦྱིན་བདག་ཅག་ གིས་ནི་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་། འཁོར་ལོ་དབྱེ་བར་བྱ་མི་ནུས་སོ། །དེ་ཅིའི་ཕྱིར་ཞེ་ན། ཚེ་དང་ལྡན་པ་ལྷ་སྦྱིན་བཅོམ་ལྡན་འདས་ཀྱི་ཉན་ཐོས་རྫུ་འཕྲུལ་ཆེ་བ་མཐུ་ཆེ་བ་ལྷའི་མིག་དང་ཕ་རོལ་གྱི་སེམས་རིག་པ་དག་ཡོད་ལ། དེ་དག་ནི་རྒྱང་རིང་པོ་ ནས་ཀྱང་མཐོང་ལ། དྲུང་ན་འདུག་ཀྱང་མི་སྣང་བ་དག་ཡིན་ཏེ། དེ་རྣམས་ཀྱི་སེམས་ཀྱིས་སེམས་ཁྱབ་པར་བྱས་ནས། ཡིད་ཀྱིས་ཡིད་རྣམ་པར་ཤེས་ཀྱི། དེ་རྣམས་ཀྱིས་བདག་ཅག་བསྐྱོད་པ་ཉིད་ཀྱིས་ཤེས་པར་འགྱུར་རོ། །དེས་སྨྲས་པ། ཀོ་ཀ་ལི་ཀ་དག་ཚུར་ཐབས་ཡོད་ཀྱིས་ བདག་ཅག་དགེ་སློང་གནས་བརྟན་གནས་བརྟན་རྣམས་ཀྱི་དྲུང་དུ་སོང་ལ་གནས་བརྟན་དག་ཐུགས་ལས་ཆུང་ངུར་མཛོད་ཅིག་དང་། བདག་ཅག་གིས་གནས་བརྟན་རྣམས་ལ་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ་ཞེས་ཡོ་བྱད་ཐམས་ཅད་ཀྱིས་བསྟབ་པར་བྱ་ཞིང་དགེ་སློང་གསར་བུ་རྣམས་ལ་ཡང་

  950. 165b

    ལྷུང་བཟེད་དང་། ཆོས་གོས་དང་། ལྷུང་བཟེད་ཀྱི་སྣོད་དང་། ཆུ་ཚགས་དང་། སྐ་རགས་དང་། ལུང་འབོགས་པ་དང་། ཀློག་ཏུ་གཞུག་པ་དང་། འདོན་དུ་གཞུག་པ་དང་། རྣལ་འབྱོར་དང་། ཡིད་ལ་བྱེད་པས་ཉེ་བར་བསྡུ་ཞིང་རིམ་གྲོ་བྱའོ། །ཚེ་དང་ལྡན་པ་ལྷ་སྦྱིན་ཐབས་དེ་ནི་ བདེན་པ་ཞིག་ཡོད་དོ། །དེ་ན་ལྷ་སྦྱིན་གྱིས་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བརྩམས་སོ། །དགེ་སློང་གནས་བརྟན་གནས་བརྟན་རྣམས་ཀྱིས་ལྷ་སྦྱིན་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བསྐྱོད་པ་ཉིད་ཚོར་ནས་སྐབས་དེ་དགེ་སློང་རྣམས་ལ་སྨྲས་པ་དང་། དགེ་སློང་རྣམས་ ཀྱིས་བཅོམ་ལྡན་འདས་ལ་གསོལ་པ། བཙུན་པ་ལྷ་སྦྱིན་ནི་དགེ་འདུན་མཐུན་པ་དབྱེ་བའི་སླད་དུ་རྟུལ་བ་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་ལྷ་སྦྱིན་དང་། དེ་ལྟ་བུ་དང་མཐུན་པ་གཞན་སུ་ཡང་རུང་བ་ལ་ བཞམས་ཏེ་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ཤིག ། དགེ་འདུན་མཐུན་མི་ཕྱེད། ཀུན་ཏུ་དགའ། མི་རྩོད། མཆོག་གཅིག་འདོན་པ་གཅིག་ཅིང་། ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་བསྒོ་ཤིག །དགེ་སློང་དེ་རྣམས་ཀྱིས་ལྷ་སྦྱིན་བཞམས་ ཏེ་བསྒོ་བ་དང་། དེ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་ནོ་ཞེས་རྗེས་སུ་ཐ་སྙད་འདོགས་པར་བྱེད་ནས། སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བདག་ཅག་གིས་ལྷ་སྦྱིན་ ལ་བཞམས་ཏེ་བསྒོ་ལགས་ན། དེ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་ཐ་སྙད་འདོགས་པར་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་ལྷ་སྦྱིན་དང་།

  951. 166a

    གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ། །བསྒོ་བ་ཡང་འདི་ལྟར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ། དགེ་འདུན་ཐམས་ཅད་ འདུག་ཅིང་མཐུན་པར་གྱུར་པ་དང་། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། ལྷ་སྦྱིན་འདི་དགེ་འདུན་མཐུན་པ་དབྱེ་བའི་སླད་དུ་རྟུལ་ཏེ་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ ན། འདི་ལ་དགེ་སློང་མང་པོས་བཞམས་ཏེ་བསྒོ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་ འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ལྷ་སྦྱིན་ལ་ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་པར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ ཤིག །དགེ་འདུན་མཐུན་མི་ཕྱེད། ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་ མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ལྷ་སྦྱིན་འདི་དགེ་འདུན་མཐུན་པ་དབྱེ་བའི་སླད་དུ་རྟུལ་ཏེ་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ནས་འདི་ལ་དགེ་སློང་མང་པོས་ བཞམས་ཏེ་བསྒོ་བ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་ལྷ་སྦྱིན་ལ་ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་

  952. 166b

    བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །ལྷ་སྦྱིན་ཁྱོད་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་དུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་ པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས། ལྷ་སྦྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །ལྷ་སྦྱིན་ ཁྱོད་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་དུ་དགའ་མི་རྩོད། མཆོག་གཅིག །འདོན་པ་གཅིག་ཅིང་ཆུ་དང་། འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ ཞེས་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་ན། ཚེ་དང་ལྡན་པ་གང་དག་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོ་སྟེ། དེ་ བཞིན་དུ་ལས་བརྗོད་པ་གཉིས་པ་དང་གསུམ་པའི་བར་དུ་བྱའོ། །དགེ་འདུན་དེ་རྣམས་ཀྱིས་ལྷ་སྦྱིན་ལ་གསོལ་བ་དང་། བཞིའི་ལས་ཀྱིས་བསྒོ་ན། བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་ནོ་ཞེས་རྗེས་སུ་ཐ་སྙད་ འདོགས་སོ། །དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ཏེ། དེ་རྣམས་ཀྱིས་ཀྱང་དགེ་སློང་རྣམས་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་ཁྱེད་ཅག་དགེ་ཡང་ རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་འདི་ནི་ཆོས་སྨྲ་བ་འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

  953. 167a

    དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བདག་ཅག་གིས་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་ན། བསྒོ་ཡང་གཞི་དེ་ཉིད་ལ་ ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ལགས་སོ། །དེའི་གྲོགས་བགྱིད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་ དང་། རྒྱ་མཚོས་བྱིན་དེ་རྣམས་ཀྱང་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་ བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་བཟོད་ཅིང་འདོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མཆི་ལགས་སོ། །བཅོམ་ལྡན་འདས་ཀྱིས་བཀའ་ སྩལ་པ། དགེ་སློང་དག་ཁྱེད་ཀྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ལ་བཞམས་ཏེ་བསྒོ་བར་བྱའོ། །བཞམས་ཏེ་བསྒོ་བ་ཡང་འདི་ལྟར་བྱ་སྟེ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ དག་ཁྱེད་ཤེས་བཞིན་དུ་དགེ་སློང་གང་དགེ་འདུན་མཐུན་པར་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པའི་གྲོགས་བྱེད་ཅིང་མི་མཐུན་པར་རྗེས་སུ་ཕྱོགས་པར་མ་བྱེད་ཅིག །དགེ་སློང་རྣམས་ལ་འདི་སྐད་ཅེས་ཚེ་ དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

  954. 167b

    དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །ཚེ་དང་ལྡན་པ་ཁྱེད་ཅག་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་ཁྱེད་ཅག་དགེ་འདུན་མཐུན་ པར་སྨྲ་བ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ་མི་རྩོད། མཆོག་གཅིག །འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་ བདེ་བ་ལ་རེག་པར་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོ་ཤིག །དགེ་སློང་དེ་རྣམས་ཀྱིས། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་ བྱིན་རྣམས་ལ་བཞམས་ཏེ་བསྒོ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་ཏན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་དོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བདག་ཅག་གིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་བཞམས་ཏེ་བསྒོ་ལགས་ན། བསྒོ་ཡང་གཞི་དེ་ཉིད་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་ འདོགས་པར་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་དང་གཞན་ཡང་དེ་ལྟ་བུ་དང་མཐུན་པ་སུ་ཡང་རུང་བ་ལ་གསོལ་པ་དང་བཞིའི་ལས་ཀྱིས་བསྒོ་བར་བྱའོ། ། བསྒོ་བ་ནི་འདི་ལྟར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ལ་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་དང་། དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་

  955. 168a

    པ་རྣམས་གསན་དུ་གསོལ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་འདི་དག་འཚལ་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་གྱུར་ ནས་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་ རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་བཟོད་ཅིང་འདོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མཆིས་ནས། འདི་དག་ལ་དགེ་སློང་མང་པོས་བཞམས་ཏེ་བསྒོ་ན་ བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ཀོ་ཀ་ ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ཁྱེད་ཅག་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་གྱུར་པའི་རྩོད་ པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་

  956. 168b

    ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི་ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ ཆོས་མ་ཡིན་པ་དང་། འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་ མ་བྱེད་ཅིག །ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག །ཚེ་དང་ལྡན་པ་དག་དགེ་ འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་རོ་ཞེས་བསྒོ་བ་མཛད་ན། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་འདི་དག་འཚལ་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དེ་མི་མཐུན་པར་སྨྲ་བའི་རྗེས་སུ་ཕྱོགས་པར་གྱུར་ནས་དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་ཡང་ རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་པ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་

  957. 169a

    བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མཆིས་ནས། འདི་དག་ལ་དགེ་སློང་མང་པོས་བཞམས་ཏེ་ བསྒོ་ན། བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ། དེའི་སླད་དུ་དགེ་འདུན་གྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་ བྱིན་རྣམས་ལ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ཁྱེད་ཅག་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དང་དེ་ མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ། འདུལ་བ་སྨྲ་བ། དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག ། དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན། འདུལ་བ་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ། འདུལ་བ་མ་ཡིན་པ་སྨྲ་བ། དགེ་སློང་འདི་ནི་ཆོས་མ་ཡིན་པ་དང་། འདུལ་བ་མ་ཡིན་པ་ཡང་དག་པར་བླངས་ ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ། དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ། དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །ཚེ་དང་ལྡན་པ་དག་དགེ་འདུན་འབྱེད་འདོད་པར་མ་

  958. 169b

    བྱེད་པར། ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །དགེ་འདུན་མཐུན་མི་ཕྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱི། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན། ཚེ་དང་ལྡན་པ་གང་དག་ཀོ་ཀ་ལི་ ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །འདི་ནི་ལས་བརྗོད་པ་དང་པོའོ། །དེ་བཞིན་དུ་ལན་ གཉིས་ལན་གསུམ་དུ་བཟླས། དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་ བཞིན་དུ་འཛིན་ཏོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་། བཞིའི་ལས་ཀྱིས་བསྒོའོ། །དགེ་སློང་དེ་རྣམས་ ཀྱིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་ན། དེ་རྣམས་དགེ་སློང་རྣམས་ཀྱིས་གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས། འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་དོ། །སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བདག་ཅག་གིས་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་ལ་གསོལ་པ་དང་།

  959. 170a

    བཞིའི་ལས་ཀྱིས་བསྒོ་ལགས་ན། བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་ བཀའ་སྩལ་པ། དགེ་སློང་དག་ལྷ་སྦྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་དབྱེ་བར་བྱ་ནུས་ཏེ། འདི་ལྟར་འདིའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་ དང་། རྒྱ་མཚོས་བྱིན་རྣམས་ཡིན་པས་སོ། །ལྷ་སྦྱིན་གྱིས་བདག་ལ་དགེ་སྦྱོང་གཽ་ཏ་མས་ལྷ་སྦྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་དབྱེ་བར་བྱ་ནུས་ཏེ། འདི་ལྟར་འདིའི་གྲོགས་བྱེད་ཅིང་མི་མཐུན་པར་སྨྲ་བ་རྗེས་སུ་ཕྱོགས་པའི་དགེ་སློང་བཞི་ པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཡིན་པས་སོ་ཞེས་ལུང་བསྟན་པ་ཐོས་སོ། །ཐོས་ནས་ཀྱང་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ལ་སྨྲས་པ། ཀོ་ཀ་ལི་ཀ་དང་། ཁཎྜ་ དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་དག་ཤེས་པར་གྱིས་ཤིག །དགེ་སྦྱོང་གཽ་ཏ་མས་ཁོ་བོ་ལ་ལྷ་སྦྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་། འཁོར་ལོ་དབྱེ་བར་བྱ་ནུས་ཏེ། འདི་ལྟར་འདིའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ ཕྱོགས་པའི་དགེ་སློང་བཞི་པོ་ཀོ་ཀ་ལི་ཀ་དང་། ཁཎྜ་དྲ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཡིན་པས་སོ་ཞེས་ལུང་བསྟན་ཏོ། །མ་ལ་ཁོ་བོས་ལྷག་པར་ཡང་དགེ་འདུན་དབྱེ་བར་བྱ་བའི་ཕྱིར་རྟུལ་བར་བྱའོ་ཞེས་དེ་དགེ་སློང་ལྔ་བརྒྱ་དང་ལྷན་ཅིག་ཀུན་དགའ་ར་ བའི་ནང་དུ་ཚོགས་ཤིང་ཟ་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེ་བཞིན་གཤེགས་པས་ཅིའི་ཕྱིར་གསུམ་ནི་ཟ་བར་རྗེས་སུ་གནང་ལ། ཚོགས་ཤིང་

  960. 170b

    ཟ་བ་ནི་བཀག་པ་མཛད་ཅེ་ན། རིགས་འབར་བ་ལ་བརྟེན་པ་དང་། གང་ཟག་སྡིག་པ་འདོད་པ་རྣམས་ཀྱི་ཕྱོགས་གཞོམ་པའི་དོན་གཉིས་གཟིགས་པ་སྟེ། གང་ཟག་སྡིག་པ་འདོད་པ་རྣམས་དགེ་འདུན་ཁོ་ན་ལ་བརྟེན། དགེ་འདུན་ཁོ་ནའི་ཆེད་དུ་བྱས། དགེ་འདུན་ཁོ་ན་མ་ཤེས་ ཤིང་ཡ་མཚན་ཅན་ལྟ་བུར་བྱས་ནས་དགེ་འདུན་ཁོ་ན་དང་ལྷན་ཅིག་རྩོད་པ་བཟུང་ནས་གནས་པར་འགྱུར་དུ་འོང་ངོ་སྙམ་པས་སོ། །གང་གི་ཚེ་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་ལྷ་སྦྱིན་ལ་རྫུ་འཕྲུལ་གྱི་ལམ་གྱི་ལུང་ཕོག་པ་དེའི་ཚེ། དེ་ལ་དགེ་སློང་རྣམས་ཀྱིས་སྨྲས་པ། གནས་ བརྟན་ཁྱོད་ཀྱིས་ཅིའི་ཕྱིར་ལྷ་སྦྱིན་ལ་རྫུ་འཕྲུལ་གྱི་ལམ་གྱི་ལུང་ཕོག །དེས་སྨྲས་པ། ཚེ་དང་ལྡན་པ་དག་བདག་གིས་དེ་སྡིག་པ་འདོད་པར་མ་ཤེས་མོད། གལ་ཏེ་བདག་གིས་ཤེས་ན་དེ་ལ་བདག་གིས་རྫུ་ཞེས་བྱ་བ་ཙམ་གྱི་ལུང་ཡང་མི་དབོག་ན་རྫུ་འཕྲུལ་གྱི་ལམ་ལྟ་སྨོས་ཀྱང་ ཅི་དགོས། དེ་ནས་ལྷ་སྦྱིན་ལ་དགེ་སློང་རྣམས་ཀྱིས་གཅུགས་པས་སྨྲས་པ། ལྷ་སྦྱིན་ཁྱོད་ཀྱི་དཔལ་དང་སྐལ་བ་ཕུན་སུམ་ཚོགས་པ་ཅི་ཡོད་པ་དེ་ཐམས་ཅད་ནི་གནས་བརྟན་འོད་སྲུང་སྟོབས་བཅུ་ལྡན་ལ་བརྟེན་ཏེ་ཡིན་ན་ཁྱོད་དེའི་དྲུང་དུ་མི་འགྲོའམ། དེ་རྣམས་ཀྱིས་བསམས་ པ། བདག་ཅག་གིས་འདི་བསྐུལ་ན་དེའི་དྲུང་དུ་འགྲོ་ཞིང་དེས་འདི་སླར་ཟློག་པར་འགྱུར་རོ་སྙམ་མོ། །དེ་ལ་དེ་ལྟར་བསྐུལ་བ་ན་སྨྲས་པ། ཁོ་བོ་ལ་དེས་ཅི་ཞིག་བྱས། ཁོ་བོས་བརྩོན་འགྲུས་ལ་གནས་ཏེ་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་ པས་གནས་ནས་བསམ་གཏན་དང་པོ་ལ་བརྟེན་ཏེ་རྫུ་འཕྲུལ་འགྲུབ་པར་མ་བྱས་སམ་ཞེས་དེའི་ཚིག་སྨྲས་མ་ཐག་ཁོ་ནར་བྱས་པ་མི་གཟོ་བས་རྫུ་འཕྲུལ་ལས་ཉམས་པར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ ལ་ཞུས་པ། བཙུན་པ་ལྷ་སྦྱིན་བྱས་པ་མི་གཟོ་བས་རྫུ་འཕྲུལ་ལས་ཉམས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདི་འདས་པ་ན་ཡང་བྱས་པ་མི་གཟོ་བས་རིག་སྔགས་ལས་ཉམས་པ་དེ་ཉོན་ཅིག་

  961. 171a

    དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་བ་དང་། ཞེས་བྱ་བ་ནས་སྐྱེ་བོ་དང་། མི་མང་པོས་རབ་ཏུ་གང་བས་རྒྱལ་སྲིད་བྱེད་དུ་འཇུག་གོ་ཞེས་བྱ་བའི་བར་དུ་སྟེ། དེ་ལ་རིག་སྔགས་དང་གསང་སྔགས་འཆང་གདོལ་པ། རིག་ སྔགས་དང་གསང་སྔགས་སུ་མཁས་པ་ཞིག་ཡོད་དེ། དེས་ས་འཛིན་གྱི་རིག་སྔགས་སྦྱར་ནས་རྫུ་འཕྲུལ་གྱིས་རི་བོ་སྤོས་ཀྱི་ངད་ལྡང་ལས་དུས་མ་ཡིན་པ་དང་། དུས་ཚིགས་མ་ཡིན་པའི་མེ་ཏོག་དང་འབྲས་བུ་དག་བླངས་ནས་རྒྱལ་པོ་ཚངས་སྦྱིན་ལ་འབུལ་བ་བྱེད་དོ། །རྒྱལ་པོ་ཚངས་ སྦྱིན་དེ་ལ་མངོན་པར་དགའ་ནས་བྱ་དགའ་སྦྱིན་པར་བྱེད་དོ། །ཇི་ཙམ་ན་བྲམ་ཟེའི་ཁྱེའུ་ཞིག་གསང་སྔགས་དོན་དུ་གཉེར་ཞིང་གསང་སྔགས་ཚོལ་བ་ན་བརྒྱུད་པ་ལས་ཐོས་ནས་ཡུལ་ནས་བཱ་རཱ་ཎ་སཱིར་སོན་ཏེ། དེ་ནས་ལམ་གྱིས་དུབ་པ་ངལ་སོས་ནས་རིག་སྔགས་དང་གསང་སྔགས་འཆང་ གདོལ་པ་དེའི་དྲུང་དུ་སོང་སྟེ་ཕྱིན་ནས་སྨྲས་པ། མཁན་པོ་ལ་བདག་བསྙེན་བཀུར་བགྱིད་པར་འཚལ་ལོ། །ཅིའི་ཕྱིར། རིག་སྔགས་ཀྱི་སླད་དུའོ། །དེས་ཚིགས་སུ་བཅད་པས་སྨྲས་པ། རིག་སྔགས་སུ་ལའང་མི་སྦྱིན་ཏེ། །རིག་སྔགས་དང་ནི་ལྷན་ཅིག་འཆི། །ཡང་ན་རིག་ དང་བསྙེན་བཀུར་དང་། ནོར་གྱིས་རིག་སྔགས་སྦྱིན་པར་བྱ། །དེས་སྨྲས་པ། མཁན་པོ་གལ་ཏེ་དེ་ལྟ་ལགས་ན་བདག་ཅག་བསྙེན་བཀུར་བགྱིད་ན་དུས་ཇི་ཙམ་གྱི་བར་དུ་བགྱི། དེས་སྨྲས་པ། ལོ་བཅུ་གཉིས་ཀྱི་བར་དུ་བསྙེན་བཀུར་བྱས་ན་སྦྱིན་ནམ་མི་སྦྱིན་དུ་ཟད་དོ། །དེ་ཤིན་ཏུ་ རིག་སྔགས་དོན་དུ་གཉེར་བ་ཞིག་པས་ཁས་བླངས་སོ། །དེ་ནས་མགུ་བར་བྱ་བ་ལྷུར་བླངས་ནས་གུས་པར་བྱས་ཏེ་བསྙེན་བཀུར་བྱ་བར་བརྩམས་སོ། །ཇི་ཙམ་དུས་གཞན་ཞིག་ན་གདོལ་པ་དེ་ཆང་གིས་མྱོས་ནས་ཁྱིམ་དུ་འོངས་སོ། །བྲམ་ཟེའི་ཁྱེའུ་དེས་བསམས་པ། མཁན་པོ་འདི་མ་ འོས་པར་ཆང་གིས་མྱོས་ཀྱིས་འདིའི་གློར་ཉལ་བར་བྱའོ་སྙམ་མོ། །ཇི་ཙམ་ན་གདོལ་པ་དེ་མལ་ནས་འགྲེ་བར་བརྩམས་ཏེ་དེ་འགྲེས་པ་དང་ཁྲིའི་ངོས་ཆག་པ་བྲམ་ཟེའི་ཁྱེའུ་ཡིས་ཐོས་ནས་སད་དེ་དེས་བསམས་པ། མཁན་པོ་སྡུག་བསྔལ་ཞིང་ཉལ་བར་འགྱུར་གྱིས། མལ་བདག་གིས་

  962. 171b

    ཁྲིའི་ངོས་སུ་རྒྱབ་གཏད་དོ་སྙམ་ནས། དེས་ཁྲིའི་ངོས་སུ་རྒྱབ་གཏད་ནས་འདུག་གོ། །འདི་ནི་ཆོས་ཉིད་ཡིན་ཏེར་རོ་བ་རྣམས་ལས་གང་སྟོབས་དང་ལྡན་པ་དེའི་ཐུན་དང་པོས་མྱོས་པ་སངས་པར་འགྱུར་ན། དེ་ཆང་ལྕི་བའི་ཤུགས་ཀྱིས་བྲམ་ཟེའི་ཁྱེའུའི་རྒྱབ་ལ་སྐྱུགས་པས་གཏོར་ཏོ། ། དེས་བསམས་པ། གལ་ཏེ་བདག་གིས་ལུས་བསྒུལ་ཏམ་ཚིག་ཕྱུང་ན་མཁན་པོས་ཐོས་ཏེ་སད་ནས་སླར་གཉིད་ལྡོག་པར་མི་འགྱུར་བ་གང་ཡིན་པའི་གནས་འདི་ཡོད་དོ་སྙམ་ནས་དེ་མནགས་ནས་འདུག་གོ། །ཇི་ཙམ་ན་གདོལ་པ་དེ་རང་ཉིད་སད་པ་དང་དེ་ལྟ་བུའི་ངན་པ་དེ་མཐོང་ནས་དེ་ནས་ དྲིས་པ་འདི་སུ་ཡིན་དེས་སྨྲས་པ། མཁན་པོ་བདག་ནི་བདེ་བའི་ཟླ་བ་ལགས་སོ། །བུ་འདི་ལྟར་འདུག་སྟེ་ཅི་བྱེད། དེས་ཇི་ལྟར་གྱུར་པ་རྣམས་སྨྲས་པ་དང་། དེ་ཡང་ལྷག་པར་དགའ་ནས་སྨྲས་པ། བུ་ཁོ་བོ་མགུ་བར་གྱུར་གྱིས་སོང་ལ་ཁྲུས་བྱོས་ཏེ་ཤོག་ཤིག་དང་ཁྱོད་ལ་རིག་ སྔགས་སྦྱིན་ནོ། །དེས་ཁྲུས་བྱས་ཏེ་འོངས་པ་དང་དེས་དེ་ལ་རིག་སྔགས་བྱིན་ནོ། །བྲམ་ཟེ་རྣམས་ནི་རྒོད་བག་ཅན་ཡིན་པས་དེས་ནོགས་མ་ཐུབ་སྟེ་བསམས་པ། རེ་ཞིག་སྔགས་འདི་འདི་ཉིད་དུ་སད་ལ་དེ་ནས་གཞན་དུ་འགྲོའོ་སྙམ་ནས། དེས་རིག་སྔགས་དེ་སྦྱར་ཏེ་ནམ་མཁའ་ ལ་འཕངས་ནས་མྱུར་བར་རི་བོ་སྤོས་ཀྱི་ངད་ལྡང་ལ་སོང་སྟེ་དུས་མ་ཡིན་པ་དང་དུས་ཚིགས་མ་ཡིན་པའི་མེ་ཏོག་དང་། འབྲས་བུ་དག་བླངས་ཏེ་འོངས་ནས་དེས་དེ་དག་རྒྱལ་པོའི་མདུན་ན་འདོན་ལ་བྱིན་ནོ། །དེས་ཀྱང་རྒྱལ་པོ་ཚངས་སྦྱིན་ལའོ། །རྒྱལ་པོས་སྨྲས་པ། ཁྱོད་ཀྱིས་ འདི་སུ་ལས་འོངས། དེས་སྨྲས་པ། ཡུལ་ཐག་རིང་པོ་ནས་བྲམ་ཟེའི་ཁྱེའུ་ཞིག་མཆིས་ཏེ། དེས་འདི་དག་བདག་ལ་སྩལ་ཏོ། །དེ་ནི་ལྷག་པར་རིག་སྔགས་དང་གསང་སྔགས་འཆང་ཞིང་བྲམ་ཟེ་འདོད་པ་ཆུང་བ་ལགས་ཀྱིས། གདོལ་པ་འཇིག་རྟེན་ཐམས་ཅད་ཀྱིས་སྨད་ པ་འདིས་ཅི་ཞིག་བགྱི། དེ་དབང་བའི་འཚོ་བ་བཀུམ་སྟེ་བྲམ་ཟེའི་ཁྱེའུ་འདི་ལ་སྩལ་དུ་གསོལ། རྒྱལ་པོས་སྨྲས་པ། དེ་བཞིན་དུ་གྱིས་ཤིག །དེ་ནས་མདུན་ན་འདོན་གྱིས་གདོལ་པའི་འཚོ་བ་བཅད་ནས་བྲམ་ཟེའི་ཁྱེའུ་དེ་ལ་བྱིན་ནོ། །དེ་བྱས་པ་མི་གཟོ་བ་དེས་རིག་སྔགས་

  963. 172a

    དེ་ལས་ཡོངས་སུ་ཉམས་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གདོལ་པ་གང་ཡིན་པ་དེ་ནི་འོད་སྲུང་སྟོབས་བཅུ་ལྡན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ འདི་རིག་སྔགས་ལས་ཡོངས་སུ་ཉམས་པར་གྱུར་ཏོ། །ད་ལྟར་ཡང་འདི་རྫུ་འཕྲུལ་ལས་ཡོངས་སུ་ཉམས་པར་གྱུར་ཏོ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། ཅི་ནས་ཀྱང་བྱས་པ་གཟོ་བ་དང་བྱས་པ་ཚོར་བ་ཅན་དུ་བྱ་སྟེ། ཆུང་ངུ་བྱས་པ་ཡང་ཆུད་མི་གཟན་ན་ མང་པོ་ལྟ་སྨོས་ཀྱང་ཅི་དགོས་ཏེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དེ་ནས་བཅོམ་ལྡན་འདས་ཇི་ཙམ་བཞེད་ཀྱི་བར་དུ་རྒྱལ་པོའི་ཁབ་ཏུ་བཞུགས་ནས། དགེ་སློང་རྣམས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ག་ཡཱ་གང་ན་བ་ དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་དང་ག་ཡཱར་བྱོན་ནས་ག་ཡཱ་ན་བཞུགས་སོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་འབྲས་སཱ་ལུ་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ཙམ་དབུལ་བ་བཏང་བ་དང་། ལྷ་སྦྱིན་གྱིས་མ་སྐྱེས་དགྲ་ལ་སྨྲས་ པ། རྒྱལ་པོ་བགྲེས་པོ་དགེ་སྦྱོང་གཽ་ཏ་མ་ལ་ཅི་འདྲ་བར་བྱ་བ་བྱེད་པ་གཟིགས་ལ། བདག་ཅག་ལྗོངས་རྒྱུ་ཞིང་མཆི་བ་ན་བདག་ཅག་ལ་ཡང་བསོད་སྙོམས་ཀྱིས་མི་བྲེལ་བར་གྱིས་ཤིག །ལྷ་སྦྱིན་ཡང་འཁོར་ལྔ་བརྒྱས་བསྐོར་ཏེ་ལྗོངས་རྒྱུ་ཞིང་འདོང་བ་དང་། ལྷ་སྦྱིན་ལ་རྒྱལ་པོ་མ་ སྐྱེས་དགྲས་འབྲས་སཱ་ལུ་སོག་མའི་སྦུབས་སུ་སྨིན་པ་ཤིང་རྟ་ལྔ་བརྒྱ་ལམ་དུ་བསྐུར་བ་དགེ་སློང་རྣམས་ཀྱིས་མཐོང་ནས་བསམས་པ། ཤིང་རྟ་ལྔ་བརྒྱ་ཙམ་པོ་འདི་སུ་ཞིག་ལས་འོངས་སྙམ་སྟེ། དེ་རྣམས་ངོ་མཚར་སྐྱེས་ནས་ལམ་ནས་འགྲོ་བའི་མི་དག་ལ་དྲིས་པ་དང་དེ་རྣམས་ཀྱིས་རྒྱས་པར་ སྨྲས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ་བཙུན་པ་རྒྱལ་པོ་མ་སྐྱེས་དགྲ་སྣོད་མ་ལགས་པས་སྣོད་མ་ལགས་པར་ཆར་ཕབ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་མ་སྐྱེས་

  964. 172b

    དགྲ་སྣོད་མ་ཡིན་པས་སྣོད་མ་ཡིན་པར་ཆར་ཕབ་པ་ད་ལྟར་གྱི་འབའ་ཞིག་ཏུ་མ་ཟད་དེ་ཇི་ལྟར་འདིས་འདས་པ་ན་ཡང་སྣོད་མ་ཡིན་པར་ཆར་ཕབ་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་རྡལ་མེད་པའི་དགོན་པའི་གནས་ཞིག་ན་དྲང་སྲོང་རྣམས་ཀྱི་བསྟི་གནས་མེ་ཏོག་ དང་འབྲས་བུ་སྣ་ཚོགས་དང་ལྡན་པ་ཞིག་ཡོད་དེ། དེ་ན་དྲང་སྲོང་ཟས་སུ་རྩ་བ་དང་། ཆུ་དང་། འབྲས་བུ་ཟ་བ། རལ་པ་ཅན་ཤིང་ཤུན་གྱོན་པ། འབྲས་བུ་ལྷུང་བ་ལ་ལོངས་སྤྱོད་པ་དག་གནས་སོ། །ཇི་ཙམ་ན་བསྟི་གནས་དེ་ན་ཡོད་པའི་ཤིང་ཨ་མྲའི་ཡལ་ག་འབྲས་བུ་ཅན་ དག་འབྲས་བུ་སྨིན་པས་གཡུར་ཟ་ཞིང་འདུག་གོ། །དྲང་སྲོང་རྣམས་ཀྱིས་འབྲས་བུ་བསླངས་པ་ན་ཤིང་དེ་ལ་གནས་པའི་ལྷ་གང་ཡིན་པ་དེ་སེར་སྣའི་ཟིལ་གྱིས་ནོན་པས་མ་བྱིན་ནོ། །དེ་ནས་དྲང་སྲོང་དེ་རྣམས་ཀྱིས་དྲང་སྲོང་གཅིག་བསྟི་གནས་སུ་འདུག་ཏུ་བཅུག་ནས་རྩ་བ་ དང་འབྲས་བུའི་ཕྱིར་འཁྱམ་དུ་དོང་མ་ཐག་ཏུ་ཆོམ་རྐུན་པ་ལྔ་བརྒྱ་བསྟི་གནས་སུ་ལྷགས་ནས་དེ་རྣམས་ཀྱིས་ཤིང་དེ་མཐོང་སྟེ། དེ་རྣམས་ཀྱིས་སྨྲས་པ། བདག་ཅག་གིས་འབྲས་བུ་ཇི་ལྟར་ལོངས་སྤྱོད་པར་བྱ། ཆོམ་རྐུན་པའི་སྡེ་དཔོན་གྱིས་སྨྲས་པ། སྟ་རེས་ཤིང་རྩ་ ནས་བཅད་ལ་འབྲས་བུ་རྣམས་བཟའོ་ཞེས་དེ་སྐད་ཅེས་སྨྲས་པ་དང་། ལྷས་འབྲས་བུ་ཐམས་ཅད་ས་ལ་བླགས་ནས་ཆོམ་རྐུན་པ་རྣམས་ཀྱིས་ཇི་ཙམ་འདོད་པ་ཟོས་ནས་དོང་ངོ་། །དྲང་སྲོང་རྣམས་ལྷགས་ནས་དྲིས་པ། ཤིང་ཨ་མྲའི་འབྲས་བུ་རྣམས་སུས་ཟོས། དྲང་སྲོང་ དེས་ཚིགས་སུ་བཅད་པས་སྨྲས་པ། ཞི་བ་ཚངས་པར་སྤྱོད་རྣམས་ལ། །ཤིང་གི་འབྲས་བུ་མ་བྱིན་གྱི། །རྐུན་པོ་སྡིག་བྱེད་དེ་དག་ལ། །འབྲས་བུ་རྣམས་ནི་བྱིན་པར་གྱུར། །དེ་རྣམས་ཀྱིས་དྲིས་པ། དྲང་སྲོང་དེ་ཇི་ལྟ་བུ་ཡིན། །དེས་ཇི་ལྟར་གྱུར་པ་སྨྲས་པ་དང་དེ་རྣམས་ཀྱིས་ སྨད་པར་བརྩམས་པ། སེར་སྣའི་ཟིལ་གྱིས་ནོན་པའི་ལྷས་འབྲས་བུ་དྲང་སྲོང་རྣམས་ལ་མ་བྱིན་གྱི། སྣོད་མ་ཡིན་པའི་རྐུན་པོ་རྣམས་ལ་བྱིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ལྷ་གང་ཡིན་པ་དེ་ནི་མ་སྐྱེས་དགྲ་

  965. 173a

    འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ཆོམ་རྐུན་པའི་སྡེ་དཔོན་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེའི་ཚེ་ན་ཡང་མ་སྐྱེས་དགྲ་འདི་ལྟར་གྱུར་པ་ན་སྣོད་མ་ཡིན་པས་སྣོད་མ་ཡིན་པར་ཆར་ཕབ་བོ། །ད་ལྟར་ཡང་སྣོད་མ་ཡིན་པ་འདིས་སྣོད་མ་ཡིན་པར་ཆར་ ཕབ་བོ། །དེ་ནས་བཅོམ་ལྡན་འདས་ཡུལ་མ་ག་དྷཱ་ནས་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །ལྷ་སྦྱིན་ནི་རྒྱལ་པོའི་ཁབ་ཏུ་གནས་པའི་སྐྱེ་བོའི་ཚོགས་ལ་རྒྱུན་ཁོ་ནར་འཚེ་བར་བྱེད་དོ། ། གང་དང་གང་གཙེས་པ་དེ་བཅོམ་ལྡན་འདས་ཀྱི་སྙན་དུ་གསོལ་བ་གཏོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སྣམ་སྦྱར་ཁྱེར་ལ་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་སོང་ལ་རྒྱལ་པོའི་ཁབ་ཀྱི་ལམ་པོ་ཆེ་དང་ སྲང་དང་། བཞི་མདོ་དང་། སུམ་མདོ་རྣམས་སུ་ཁྱིམ་བདག་དང་བྲམ་ཟེ་རྣམས་ལ་ལྷ་སྦྱིན་ནམ་ལྷ་སྦྱིན་གྱི་ཕྱོགས་ཀྱིས་འཚེར་བཅུག་པ་གང་ཡིན་པ་དེ་རྣམས་ནི་སངས་རྒྱས་སམ། ཆོས་སམ། དགེ་འདུན་གྱི་དང་འབྲེལ་བ་མ་ཡིན་ནོ་ཞེས་སྒོ་ཤིག །གལ་ཏེ་ལྷ་སྦྱིན་ནི་རྫུ་འཕྲུལ་ཆེ་ཞིང་ མཐུ་ཆེ་བ་ཡིན་ནོ་ཞེས་ཟེར་ན་མཐུ་ཆེན་པོར་གྱུར་པ་ལས་ད་ནི་རྫུ་འཕྲུལ་དེ་ལས་ཡོངས་སུ་ཉམས་སོ་ཞེས་སྨྲོས་ཤིག །དེ་སོང་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་བྲམ་ཟེ་དང་ཁྱིམ་བདག་རྣམས་ལ་བསྒོ་ནས་དེ་རྣམས་ཕྱིན་ ཆད་བཅོམ་ལྡན་འདས་ཀྱི་སྙན་དུ་གསོལ་བ་མི་གཏོང་ངོ་། །བཅོམ་ལྡན་འདས་སྙུན་གྱིས་ཐེབས་ནས་འཚོ་བྱེད་ཀྱིས་སྨན་མར་ལྕགས་མདའ་ཞེས་བྱ་བ་བཅོམ་ལྡན་འདས་ལ་ཕུལ་ལོ། །དེ་ནས་བཅོམ་ལྡན་འདས་ཀྱིས་སྨན་པའི་རྒྱལ་པོ་འཚོ་བྱེད་ལ་བཀའ་སྩལ་པ། འཚོ་བྱེད་ངོ་མཚར་ ཆེའམ། བཅོམ་ལྡན་འདས་ངོ་མཚར་ཆེ་ལགས་སོ། །འཚོ་བྱེད་ཡ་མཚན་ཆེའམ། བཅོམ་ལྡན་འདས་ཡ་མཚན་ཆེ་ལགས་སོ། །འཚོ་བྱེད་ཤེས་སམ། བཅོམ་ལྡན་འདས་འཚལ་ལགས་སོ། །འཚོ་བྱེད་མི་ཤེས་སམ། བདེ་བར་གཤེགས་པ་མ་འཚལ་ལགས་སོ། །

  966. 173b

    འཚོ་བྱེད་ངོ་མཚར་ཆེ་བ་ཅི་ཡིན། བཅོམ་ལྡན་འདས་པ་རྣམས་རན་སྤྱོད་ཅིང་ཆབ་འཚལ་བ་དེ་ལས་བདུད་རྩི་འདི་འབྱུང་ལ། དེ་ལས་ཀྱང་བསྒྲལ་བའི་སྨན་མར་ལྕགས་མདའ་ཞེས་བགྱི་བ་འབྱུང་ལགས་སོ། །འཚོ་བྱེད་ཡ་མཚན་ཆེ་བ་ཅི་ཡིན། བཅོམ་ལྡན་འདས་སངས་རྒྱས་ བྱུང་བ་དང་། དམ་པའི་ཆོས་བཤད་པ་དང་། དགེ་འདུན་ལེགས་པར་སྒྲུབ་པ་ལགས་སོ། །ཤེས་པ་ཅི་ཡིན། བཅོམ་ལྡན་འདས་སྐྱེ་བ་མཆིས་ན་གདོན་མི་འཚལ་བར་འགུམ་ལགས་སོ། །མི་ཤེས་པ་ཅི་ཡིན། བཅོམ་ལྡན་འདས་གང་ཞིག་གང་དུ་འགུམ་པ་དེ་མ་འཚལ་ ལགས་སོ། །དགེ་སློང་རྣམས་ཐེ་ཚོམ་སྐྱེས་ཏེ། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་དགོངས་ཏེ་བཀའ་སྩལ་པ་འཚོ་བྱེད་ཀྱིས་འཚལ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་ སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པ་ན་ཡང་འདིས་ངའི་དགོངས་ཏེ་བཀའ་སྩལ་པ་ཤེས་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཕྱུག་པ་ནོར་མང་བ་ལོངས་སྤྱོད་ཆེ་བ་ཞིག་གནས་པ་དེས་རིགས་མཉམ་པ་ལས་ཆུང་མ་ བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་པ་དང་བུ་མོ་ཞིག་ བཙས་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་གདུ་བུ་ཅན་ཞེས་བྱ་བར་མིང་བཏགས་སོ། །དེ་ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་ཏེ། དེ་ཡང་རིགས་དང་མཐུན་པར་མིང་བཏགས་ སོ། །དེས་བསམས་པ། བདག་ཅག་ལ་བུ་ལོན་དེད་པ་དང་ནོར་འཕྲོག་པ་བཙས་ཀྱིས་ཟོང་ཁྱེར་ཏེ་ཡུལ་གྱི་མཐར་འགྲོའོ། །དེས་ཡང་བསམས་པ། བདག་གི་ཆུང་མ་འདི་དར་ལ་བབ་པའི་གཟུགས་དང་ལང་ཚོ་ལ་བབ་པས། བདག་གིས་འདི་ལ་ཀཱར་ཥཱ་པ་ཎ་མང་པོ་གཏད་དེ་སོང་ན་སྐྱེས་

  967. 174a

    པ་གཞན་དང་ལྷན་ཅིག་ཆུད་གསོན་པར་བྱེད་པར་འགྱུར་བའི་གནས་གང་ཡིན་པ་དེ་ཡོད་ཀྱིས་མ་ལ་བདག་གིས་འདི་ལ་ཀཱར་ཥཱ་པ་ཎ་ཉུང་ཞིག་བྱིན་ལ་འགྲོའོ་སྙམ་ནས། དེས་དེ་ལ་ཀཱར་ཥཱ་པ་ཎ་ཉུང་ཞིག་བྱིན་ནས་ལྷག་མ་རྣམས་གསེར་གྱི་བུམ་པའི་ནང་དུ་བླུགས་ཏེ། དེའི་ མགྲིན་པ་མུ་ཏིག་གི་ཕྲེང་བས་བཅིངས་ནས་དུར་ཁྲོད་ཀྱི་ཤིང་རྟ་རྣ་ཞེས་བྱ་བའི་དྲུང་དུ་སྦས་ནས་ཟོང་ཐོགས་ཏེ་ཡུལ་གྱི་མཐར་སོང་ངོ་། །དེ་དེ་ན་རྙེད་པ་མང་པོ་དང་ལྡན་པས་དེས་དེ་ཉིད་དུ་བུད་མེད་གཅིག་བླངས་ཏེ་འདུག་ནས་དེ་ལ་བུ་ཡང་མང་དུ་བཙས་སོ། །ད་ནས་ཆུང་མ་སྔ་མ་དེས་གདུ་བུ་ ཅན་དང་ཁྱེའུ་གཉིས་ལག་ལས་དང་གཉེན་གྱི་མཐུས་གསོས་བསྐྱེད་དོ། །དེ་གཉིས་ཀྱིས་སྨྲས་པ། བདག་ཅག་གི་ཕ་གར་མཆིས། དེས་སྨྲས་པ། བུ་ཡུལ་ཆེ་གེ་མོ་ཞེས་བྱ་བའི་གྲོང་ག་གེ་མོ་ཞེས་བྱ་བ་དེ་ན་དེ་ནོར་ཆེན་པོ་དང་ལྡན་ཞིང་འདུག་གོ་ཞེས་ཐོས་ཀྱིས་སོང་དང་གལ་ཏེ་ ཅུང་ཟད་བྱིན་ན་ཁྱེད་ཀྱི་འཚོ་བའི་རྐྱེན་དུ་འགྱུར་རོ།། །།འདུལ་བ་གཞི། བམ་པོ་དགུ་བཅུ་རྩ་བརྒྱད་པ། དེ་ཕ་ཚོལ་ཞིང་རིམ་གྱིས་དེའི་དྲུང་དུ་ཕྱིན་ནས་དེ་སྲང་ན་འཁྱམ་པ་ན་ཕས་བཞིན་རས་ལས་ངོ་ཤེས་ནས་བོས་ཏེ་སྨྲས་པ། ཁྱོད་གང་ནས་འོངས། གང་དུ་འགྲོ་ འདོད། དེས་རྒྱས་པར་སྨྲས་པ་དང་དེས་བསམས་པ། བདག་གི་བུ་དེ་ནི་འདི་ཁོ་ན་ཡིན་ནོ་ཞེས་དེས་དེ་བཟུང་སྟེ། བུ་ཁྱོད་སུ་ལ་ཡང་འདི་བདག་གི་ཕ་ཡིན་ནོ་ཞེས་མ་སྨྲ་ཤིག་ཅེས་སྨྲས་ནས་དེ་དེ་ལ་ཤིན་ཏུ་སྡུག་པར་བྱེད་དོ། །དེ་ནས་བུ་གཞན་རྣམས་ཀྱིས་སྨྲས་པ། ཡབ་ཁྱེའུ་འདི་ སུའི་ལགས། དེས་སྨྲས་པ། འདི་ངའི་གྲོགས་པོ་ཞིག་གི་བུ་ཡིན་ནོ། །དེ་རྣམས་ཀྱིས་བསམས་པ། ཇི་ལྟར་འདི་ལ་ཤིན་ཏུ་སྡུག་པར་བྱེད་པ་ལས་ན་གདོན་མི་ཟ་བར་འདི་ཉིད་ཀྱི་བུ་ཡིན་ནོ་སྙམ་ནས་དེ་རྣམས་ཀྱིས་ཕན་ཚུན་གྲོས་བྱ་བར་བརྩམས་པ། འདི་ནི་མས་དབྱེན་གྱི་སྤུན་ ཡིན་ནོ་སྙམ་མོ། །དེས་བསམས་པ། ཤ་འཁོན་རྣམས་ཀྱི་ནང་ན་ནི་འདི་ལྟ་སྟེ། ཆེན་ཆུན་ནི་ཐ་ཆད་ཡིན་པས་འདི་བསད་པར་འགྱུར་པའི་གནས་གང་ཡིན་པ་འདི་ཉིད་ཡོད་ཀྱིས་གཏང་ངོ་། །གལ་ཏེ་ཅུང་ཟད་བརྫངས་ན་ནོར་ལ་སོགས་པའི་ཕྱིར་ལམ་ཀར་བསད་པར་འགྱུར་གྱིས། །མ་

  968. 174b

    ལ་བདག་གིས་འདི་ལ་བརྗེད་བྱང་ཅིག་བྱིན་ཏེ་གཏང་ངོ་སྙམ་དུ་བསམས་ནས་བྲིས་པ། གྲོང་ཁྱེར་གྱི་ནི་གྲོང་རྡལ་རྟ་རྣའི་དྲུང་། །ས་ཡི་ཤར་དུ་དཔག་ཚད་ཀྱིས་བཅད་པར། །མཁས་པས་བག་ཡོད་པར་ནི་བརྐོ་བྱས་ན། །བདག་གི་ནོར་གྱི་སྐལ་བ་འཐོབ་འགྱུར་གྱིས། །མགུལ་ཆིངས་གང་ ཡིན་དེ་ནི་གདུབ་ཅན་བྱིན། །དེས་བརྗེད་བྱང་དེ་ཁྱེར་ཏེ་སོང་བ་དང་ལམ་ཀར་མས་དབྱེན་གྱི་སྤུན་རྣམས་ཀྱིས་བཟུང་ནས་སྨྲས་པ། ཁྱོད་ཀྱིས་ཡབ་ལས་ཅི་ཐོབ། དེས་སྨྲས་པ། འདི་ནི་བརྗེད་བྱང་ཡིན་ཏེ་ཅི་ཡང་མེད་དོ། །དེ་རྣམས་ཀྱིས་བསམས་པ། ཕས་འདི་བྲིད་ནས་བཏང་ངོ་ ཞེས་དེ་རྣམས་ཀྱིས་དེ་བཏང་ངོ་། །རིམ་གྱིས་རང་གི་ཁྱིམ་དུ་ཕྱིན་ནས་ལམ་གྱིས་དུབ་པ་ངལ་སོས་པ་དང་མས་སྨྲས་པ། ཁྱོད་ཀྱིས་ཕ་ལས་ཆུང་ཟད་ཅི་ཐོབ། དེས་སྨྲས་པ། འདི་ནི་བརྗེད་བྱང་ཡིན་ཏེ་ཅི་ཡང་མེད་དོ། །དེས་སྨྲས་པ། བུ་ཁྱོད་དེས་བསླུས་ཏེ་ལམ་གྱི་ཚེགས་ཕྱུང་ བར་ཟད་ཀྱི་ཆུང་ཟད་ཀྱང་མ་རྙེད་དོ། །དེས་སྨྲས་པ། ཡུམ་བདག་ཉིད་ཆེན་པོ་དེ་བདག་ལ་མི་འདྲིད་དོ་ཞེས་བྱས་ནས་དེས་བརྗེད་བྱང་དེ་དཔྱད་པར་བརྩམས་ཏེ། གྲོང་ཁྱེར་ཞེས་བྱ་བ་ནི་གང་དུ་བཙས་པ་དེ་ནི་གྲོང་ཁྱེར་དུ་འདོད་དོ། །གྲོང་རྡལ་ཞེས་བྱ་བ་ནི་གང་དུ་རོ་བསྲེགས་པའོ། །རྟ་ རྣའི་དྲུང་ཞེས་བྱ་བ་ལ་རྟ་ཞེས་བྱ་བ་ན་རྟ་རྣམས་ཏེ་དེའི་རྣ་བ་ཞེས་བྱ་བའི་ཤིང་ནི་རྟ་རྣ་སྟེ། དེའི་དྲུང་ན་ཞེས་སྨྲས་པ་ཡིན་ནོ། །སའི་ཤར་དུ་ཞེས་བྱ་བ་ནི་ཤར་ཕྱོགས་སུའོ། །དཔག་ཚད་ཀྱིས་བཅད་པར་ཞེས་བྱ་བ་ནི་གཉའ་ཤིང་གང་ཙམ་གྱིས་བཅད་པར་རོ། །དེས་དེ་ལྟར་ཚིགས་ བཅད་ཀྱི་དོན་དཔྱད་ནས་མུན་ཚབ་ཚུབ་ཙམ་ན་དུར་ཁྲོད་དུ་སོང་སྟེ་དེའི་ཉེ་འཁོར་དུ་དེས་བལྟས་ན་ཤིང་རྟ་རྣ་ཞིག་ཡོད་པ་དེའི་ཤར་གྱི་ངོས་སུ་གཉའ་ཤིང་གང་གཅལ་ཏེ་བརྐོས་པ་དང་། ཅི་ཙམ་ན་གསེར་གྱི་བུམ་པ་མགུལ་མུ་ཏིག་གི་ཕྲེང་བས་བཅིངས་པ་ཞིག་མཐོང་ནས། དེ་མགུ་བས་དེ་ བླངས་ནས་ཁྱིམ་དུ་སོང་སྟེ་མུ་ཏིག་གི་ཕྲེང་བ་ནི་བཀྲོལ་ཏེ་གདུ་བུ་ཅན་ལ་བྱིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་བུ་གང་ཡིན་པ་དེ་ནི་འཚོ་བྱེད་འདི་ཉིད་ཡིན་ཏེ། དེ་ན་ཡང་འདིས་ངའི་བསམས་ཏེ་

  969. 175a

    སྨྲས་པ་ཤེས་སོ། །ད་ལྟར་ཡང་འདིས་ངའི་དགོངས་ཏེ་བཤད་པ་ཤེས་སོ། །འཚོ་བྱེད་ཀྱིས་བསམས་པ། བཅོམ་ལྡན་འདས་ནི་རྡོ་རྗེའི་སྐུ་མངའ་ལ་སྐུ་ཆེ་བ་ཡིན་པས་དེ་ལ་མར་ཉུང་ངུས་ནི་གདངས་པར་བྱ་མི་ནུས་སོ་སྙམ་དུ་བརྟགས་ནས་དེས་མར་སྲང་སུམ་བཅུ་ རྩ་གཉིས་སྲང་ལ་བཅལ་ཏེ་ལྷུང་བཟེད་བཟེད་ནས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་ལྷུང་བཟེད་ཀྱི་ལྷག་མ་དགེ་སློང་རྣམས་ལ་འབྲིམ་དུ་བཅུག་པ་དང་། འཚོ་བྱེད་དགེ་སློང་རྣམས་ཀྱིས་བཅོམ་ལྡན་འདས་ཀྱིས་ལྷུང་བཟེད་ཀྱི་ལྷག་མ་བོར་རོ་ཞེས་བྱས་ ནས་ཕྱག་བྱས་སོ། །ལྷ་སྦྱིན་གྱིས་བསམས་པ། བདག་གིས་ཀྱང་མར་བཏུང་ངོ་སྙམ་ནས་དེས་འཚོ་བྱེད་ལ་དྲིས་པ། འཚོ་བྱེད་དགེ་སྦྱོང་གཽ་ཏ་མས་མར་ཇི་ཙམ་གྱི་ཚད་ཅིག་གསོལ། དེས་སྨྲས་པ། སྲང་སུམ་བཅུ་སོ་གཉིས་སོ། །དེས་སྨྲས་པ། ཁོ་བོས་ཀྱང་སྲང་སུམ་བཅུ་རྩ་གཉིས་ བཏུང་ངོ་། །འཚོ་བྱེད་ཀྱིས་སྨྲས་པ། བཅོམ་ལྡན་འདས་ནི་རྡོ་རྗེའི་སྐུ་མངའ་ལ་སྐུ་ཆེ་བས་འདི་ཙམ་ཡང་འཇུ་བར་སྤྱོད་ཀྱི། ཁྱོད་ཀྱིས་ནི་འཇུ་བར་མི་ནུས་སོ། །དེས་སྨྲས་པ། ཁོ་བོ་ཡང་རྡོ་རྗེའི་ལུས་ཅན་ཡིན་ན་ཅིའི་ཕྱིར་མི་འཇུ། དེས་མར་སྲང་སུམ་བཅུ་རྩ་གཉིས་ལྷུང་བཟེད་ནས་ འཐུངས་སོ། །བཅོམ་ལྡན་འདས་ཀྱིས་ནི་ལེགས་པར་ཞུའོ། །ལྷ་སྦྱིན་གྱིས་ནི་མ་ཞུའོ། །ཕྱི་དེ་ཉིན་པར་འཚོ་བྱེད་ཀྱིས་བཅོམ་ལྡན་འདས་ལ་འཇམས་གསོལ་ཏོ། །ལྷ་སྦྱིན་གྱིས་ང་རྒྱལ་བསྐྱེད་ནས་བཅོམ་ལྡན་འདས་ཀྱིས་ཀྱང་གསོལ་ཏོ་ཞེས་མར་མ་ཞུ་བཞིན་དུ་ཐུག་པ་འཐུངས་པས། སྦོས་གཟེར་ནས་གནད་དུ་གནོད་པའི་ཚོར་བ་ཉམས་སུ་མྱོང་བས་དེ་རྒྱུ་དེས་ན་སྡུག་བསྔལ་ཉམ་ང་བ་རྩུབ་པ། དོག་པ། ཡིད་དུ་མི་འོང་བའི་ཚོར་བ་ཉམས་སུ་མྱོང་ཞིང་ཉིན་དང་མཚན་དུ་གཉིད་མི་འོང་ངོ་། །ཚེ་དང་ལྡན་པ་ཀུན་དགའ་བོ་ནི་གཉེན་ལ་གདུང་བ་ཡིན་པས་དེས་གླེང་གཞི་ དེ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱི་ཕྱག་གླང་པོ་ཆེའི་སྣ་ལྟ་བུ་འཁོར་ལོ་དང་། བཀྲ་ཤིས་དང་། གཡུང་དྲུང་འཁྱིལ་བ་ཅན་བསོད་ནམས་བརྒྱ་ཕྲག་དུ་མས་བསྒྲུབས་པ། འཇིགས་པ་རྣམས་ཀྱི་དབུགས་འབྱིན་པར་མཛད་པའི་ཕྱག་མངོན་དུ་བརྐྱང་སྟེ་བྱ་རྒོད་ཀྱི་ཕུང་

  970. 175b

    པོའི་རི་ཕུག་ནས་ལྷ་སྦྱིན་གྱི་སྤྱི་བོར་བཞག་སྟེ་བདེན་པ་གསུངས་པ། ཇི་ལྟར་ང་བུ་གཅིག་པ་སྒྲ་ཅན་ཟིན་བཟང་པོ་ལ་དགོངས་པ་དེ་བཞིན་དུ་ལྷ་སྦྱིན་ལ་ཡང་ལྷག་ཆད་མེད་པ་ཡིན་ཞེ་ན། བདེན་པ་དེས་ནད་ཞི་བར་གྱུར་ཅིག་ཅེས་བདེན་པའི་ཚིག་གསུངས་མ་ཐག་ཁོ་ནར་ ལྷ་སྦྱིན་གྱི་ནད་ཞི་བར་གྱུར་ཅིང་དེ་དབུགས་ཆད་པ་ལས་སླར་དབུགས་བྱུང་ནས་བཅོམ་ལྡན་འདས་ཀྱི་ཕྱག་ལ་གཏད་ནས་བརྟགས་ཏེ་དེས་ཤེས་ནས་དེས་བསམས་པ། དགེ་སྦྱོང་གཽ་ཏ་མའི་ལག་པ་ཡིན་ནོ་སྙམ་ན་དེ་བསྐལ་པ་མི་ཉུང་བར་ངན་གཡོའི་ཀུན་ཏུ་སྤྱོད་པ་དྲེགས་པའི་ མཐུས་བསྒྲུབས་པའི་བསམ་པ་ཅན་ཡིན་པས་དེ་ལྟར་སངས་རྒྱས་བདག་ཉིད་ཆེན་པོས་ཚོར་བ་ཞི་བར་མཛད་པ་དང་སྨྲས་པ། དོན་གྲུབ་ཁྱོད་སྨན་དཔྱད་ཁོང་དུ་ཆུད་པ་ནི་ལེགས་ན་འདིས་འཚོ་བར་ནུས་སམ། ཀུན་ཏུ་བཅོམ་ལྡན་འདས་ཀྱི་བདེན་པའི་གསུང་གིས་ལྷ་ སྦྱིན་ཚོར་བ་དྲག་པོས་ཉེན་པས་སྲོག་དང་འབྲལ་བ་ན་སོས་པར་མཛད་དོ། །ཞེས་སྒྲ་གྲགས་པ་དེ་ལྷ་སྦྱིན་གྱི་ཕྱོགས་ཤིན་ཏུ་ཞེན་པ་རྣམས་ཀྱིས་ཀྱང་ཐོས་ནས། བཅོམ་ལྡན་འདས་ལ་ཀྱེ་མའོ་འདི་ནི་བྱམས་པ་ཡང་དག་པ་དང་ལྡན། ཀྱེ་མ་འདི་ནི་སེམས་ཅན་རྣམས་ ལ་ཐུགས་རྗེ་ལེགས་པར་བསྒོམས་པ་ཡིན་ནོ་ཞེས་ངོ་མཚར་དུ་འཛིན་པར་གྱུར་ཏོ། །དགེ་སློང་རྣམས་ཀྱིས་ལྷ་སྦྱིན་ལ་སྨྲས་པ། ལྷ་སྦྱིན་ཁྱོད་ནི་བཅོམ་ལྡན་འདས་ཀྱིས་སོས་པར་མཛད་ཀྱི་གཞན་དུ་ན་སྲོག་དང་བྲལ་བར་འགྱུར་རོ། །དེས་སྨྲས་པ། དེ་ནི་དབང་ དུ་བྱེད་པའི་སྒྱུ་མ་ཤེས་ཏེ་དེས་འཇིག་རྟེན་དབང་དུ་བྱེད་དོ། །དགེ་སློང་རྣམས་ཀྱིས་སྨྲས་པ། ལྷ་སྦྱིན་ཁས་རླབས་དེ་ཐོང་ལ་རང་གི་སེམས་གཏན་ལ་ཕོབ་ཤིག །ཁྱོད་ནི་བཅོམ་ལྡན་འདས་ཀྱིས་གསོས་སོ། །དེས་སྨྲས་པ། མར་ཞུ་ནས་ནད་ཞི་བར་ཟད་མོད་དེས་ཁོ་ བོ་ལ་ཅི་ཞིག་བྱས། འདི་ནི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ་ཞེས་བྱས་ནས་དེ་རྣམས་ཆས་ཏེ། བཅོམ་ལྡན་འདས་གང་ན་བ་དེར་དོང་ནས་ལྷགས་པ་དང་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ལྡན་འདས་ལ་ཞུས་པ།

  971. 176a

    བཙུན་པ་ལྷ་སྦྱིན་བྱས་པ་མི་གཟོ་བ་དང་། བྱས་པ་མི་ཚོར་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ་ཇི་ལྟར་འདས་པའི་དུས་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་ བ་དེ་ཉོན་ཅིག། །།སྡོམ་ལ། ཀཽ་ཤི་དབང་ཕྱུག་ཆེན་པོའི་སྡེ། །ཨ་མྲ་དང་ནི་ཤིང་སྟ་མོ། །དོམ་གཉིས་ཤི་བའི་རྒྱལ་པོ་དང་། །ཉམས་པར་བྱས་དང་ཛུ་ཛུ་ཀ། །དགེ་སློང་དག་སྔོན་བྱུང་བ་གྲོང་རྡལ་མེད་པའི་དགོན་པའི་གནས་སྐྱེད་མོས་ཚལ་མེ་ཏོག་དང་འབྲས་ བུ་རྣམ་པ་སྣ་ཚོགས་དང་། ཆུ་ཕུན་སུམ་ཚོགས་པ་ཞིག་ཡོད་དེ། དེ་ན་ཀཽ་ཤི་ཀ་དང་རུས་གཅིག་པའི་དྲང་སྲོང་འབྲས་བུ་ལྷུང་བ་ལ་ལོངས་སྤྱོད་པ། ཟས་སུ་རྩ་བ་དང་། ཆུ་དང་། འབྲས་བུ་ཟ་བ། པགས་པ་དང་ཤིང་ཤུན་གྱོན་པ་ཞིག་གནས་ཏེ། དེའི་བསྟི་གནས་ ཀྱི་ཉེ་འཁོར་དུ་རི་དགས་དང་བྱ་རྣམས་འདྲིས་པས་ཅི་བདེར་འཁོད་དོ། །དེ་དང་ཧ་ཅང་ཡང་མི་རིང་བར་བལ་གླང་མོ་ཞིག་ཕྲུ་གུ་བྱུང་སྟེ། དེ་བུ་བྱུང་མ་ཐག་ཏུ་སེང་གེའི་སྒྲ་སྒྲོགས་ནས་དེ་འཇིགས་སྔངས་ནས་ཕྲུ་གུ་བོར་ཏེ་གཅིན་རྟུག་ཤོར་ནས་བྲོས་སོ། །རེ་ཞིག་ཅིག་ན་དྲང་སྲོང་ དེ་བསྟི་གནས་ནས་བྱུང་ནས་བསྟི་གནས་ཀྱི་ཉེ་འཁོར་གྱི་ཕྱོགས་སུ་ལྟ་ཞིང་སོང་བ་ལས་ཇི་ཙམ་ན་གླང་པོ་ཆེའི་ཕྲུ་གུ་གསར་དུ་བྱུང་མ་ཐག་པ་མ་དང་བྲལ་བ་དེ་མཐོང་ངོ་། །དེ་ནས་དྲང་སྲོང་དེ་སྙིང་རྗེས་བསྐྱོད་པའི་སྙིང་གིས་དེའི་མ་བཙལ་བའི་ཕྱིར་བསྒྲིམ་པའི་མིག་གིས་ཀུན་ཏུ་ལྟ་བར་ བརྩམས་པ་ན། གང་གི་ཚེ་གནས་ཐམས་ཅད་ན་མི་སྣང་བ་དེའི་ཚེ་དེ་ཁྱེར་ནས་བསྟི་གནས་སུ་ཞུགས་ཏེ། དེས་དེ་བུ་བཞིན་དུ་བསྣུན་བསྙོད་དེ་བསྐྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་དྲང་སྲོང་དེའི་བསྟི་གནས་སུ་གནོད་པ་བྱེད་དེ་མེ་ཏོག་གི་ཤིང་རྣམས་ འབྱིན་པར་བྱེད། འབྲས་བུའི་ཤིང་རྣམས་ཡལ་ག་གཅོག་པར་བྱེད་ཅིང་དེ་དག་དང་གནོད་པ་གཞན་ཡང་སྟོང་ཕྲག་དག་བྱེད་དོ། །དྲང་སྲོང་དེས་དེ་ལ་བསྡིགས་ཏེ། དྲང་སྲོང་དེས་བསྡིགས་པ་ན་དེ་ཞུམ་ཞུམ་པོར་བྱས་ཏེ་འདུག་གོ། །གང་གི་ཚེ་འདོད་ཆགས་སྐྱེས་

  972. 176b

    པར་གྱུར་པ་དེའི་ཚེ་བསྡིགས་ཀྱང་བརྙས་ཐབས་བྱེད་དོ། །ཇི་ཙམ་དུས་གཞན་ཞིག་ན་དྲང་སྲོང་དེས་དྲག་ཏུ་བསྡིགས་པ་དང་དྲང་སྲོང་དེ་ཉིད་བསད་པར་བརྒྱུགས་པ་དང་། དྲང་སྲོང་དེས་སྤྱིལ་བུའི་གློ་ཕུག་ནས་བྲོས་སོ། །ལྷས་ཚིགས་སུ་བཅད་པས་སྨྲས་པ། སེམས་ ཅན་རབ་གདུག་བྱས་པ་ཆུད་གསོན་པའི། །སྐྱེས་བུ་ངན་དང་འགྲོགས་པ་བཟང་པོ་མིན། །ཇི་ལྟར་ཀཽ་ཤི་ཀའི་བསྟི་གནས་སུ། །ཡུན་རིང་བསྐྱེད་པའི་གླང་ཆེན་སྡིག་བྱེད་བཞིན། །གུས་པས་ཟས་དང་སྐོམ་དང་གཉི་ག་ཡིས། །སྐྱེ་བོ་ངན་བསྟེན་ཁྱོད་ལ་ཅི་ཞིག་དགོས། ། ངེས་པར་ཀཽ་ཤི་ཀའི་བསྟི་གནས་སུ། །གླང་ཆེན་བཞིན་དུ་དེ་ཡིས་མཐར་གྲོགས་གསོད། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་གླང་པོ་ཆེ་དམ་པ་ གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེའི་ཚེ་དེའི་དུས་ན་ཡང་འདི་བྱས་པ་མི་གཟོ་ཞིང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་ཞིང་བྱས་པ་མི་ཚོར་བ་ཡིན་ནོ། །གཞན་ཡང་འདི་ལྟར་འདི་བྱས་པ་མི་གཟོ་ཞིང་བྱས་པ་མི་ཚོར་བ་དེ་ཉོན་ཅིག ། དགེ་སློང་དག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱིར་རྒྱལ་པོ་དབང་ཕྱུག་ཆེན་པོའི་སྡེ་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེའི་བཙུན་མོ་ཟླ་ འོད་མ་ཞེས་བྱ་བ་རྨི་ལམ་རྣོ་བ་ཡིན་ཏེ། རྨི་ལམ་དུ་གང་ཅི་མཐོང་བ་དེ་ཐམས་ཅད་དེ་བཞིན་དུ་འགྱུར་གྱི་གཞན་དུ་མ་ཡིན་པ་ཞིག་ཡོད་དོ། །རྒྱལ་པོ་དེའི་ཡུལ་དུ་བྱང་ཆུབ་སེམས་དཔའ་རི་དགས་རྣམས་ཀྱི་ནང་དུ་སྐྱེས་ནས་གསེར་གྱི་གློ་ཞེས་བྱ་སྟེ། རི་དགས་རྣམས་ ཀྱི་དཔོན་པོར་གྱུར་ཏོ། །དེ་ཡང་ལུས་ཀྱི་གཟི་བརྗིད་བསམ་གྱིས་མི་ཁྱབ་པ་དང་ལྡན་ཞིང་འཇིག་རྟེན་ཐམས་ཅད་ཀྱི་ཡིད་དང་། མིག་ཏུ་སྡུག་པར་བྱེད་པས་འདོད་པ་སྐྱེད་པར་བྱེད་དོ། །གང་གིས་དེ་མཐོང་ན་དེ་རྟོག་ཅིང་དེ་ཉིད་དུ་སྡོད་པར་བྱེད་དོ། །དེ་ལྷག་པར་

  973. 177a

    རྟོག་པ་ན་ཡིད་གཉིས་སུ་གྱུར་ཏེ། དེ་རྔོན་པས་འཇིགས་པ་དང་། འཇིག་རྟེན་པ་གཞན་གྱིས་འཇིགས་པས་འཚེར་ཞིང་སྐྲག་པས་སྤྱོད་དོ། །འདི་ནི་ཆོས་ཉིད་ཡིན་ཏེ། འཇིག་རྟེན་ཆགས་ནས་རིང་པོར་མ་ལོན་པ་ན་དུད་འགྲོ་རྣམས་ཀྱང་མིའི་སྐད་དུ་སྨྲ་ ནུས་པ་ཡིན་ནོ། །དེ་ནས་བྱ་རོག་ཅིག་དེའི་དྲུང་དུ་འོངས་ནས་དེས་དེ་དང་ལྷན་ཅིག་བཤེས་ཤིང་འདྲེ་བའི་གཏམ་བྱས་ནས་སྨྲས་པ། ཀྱེ་ཞང་པོ་ཁྱོད་ཅིའི་ཕྱིར་འདི་ལྟར་འཚེར་ཞིང་སྐྲག་པས་སྤྱོད། དེས་སྨྲས་པ། ཚ་བོ་བདག་གི་ལུས་སྐལ་བ་དང་ལྡན་པ་འདི་ལ་འཇིག་རྟེན་ ཐམས་ཅད་འདོད་པ་སྐྱེད་པས་ཁོ་བོ་འཇིག་རྟེན་གྱིས་འཇིགས་ཤིང་རྔོན་པས་འཚེར་ཞིང་སྐྲག་པས་སྤྱོད་དོ། །དེས་སྨྲས་པ། ཞང་པོ་བདག་ཀྱང་དེ་བས་ཀྱང་འུག་པས་འཇིགས་པས་གཅིག་ལ་གཅིག་བསྲུང་བར་བྱ་སྟེ། བདག་གིས་ནི་ཁྱོད་ཉིན་པར་བསྲུང་ངོ་། །ཁྱོད་ཀྱིས་ནི་ བདག་མཚན་མོ་སྲུངས་ཤིག་ཅེས་དེ་གཉིས་ཀྱིས་དེ་ལྟར་དམ་བཅས་ནས་གནས་སོ། །ཇི་ཙམ་ན་མི་ཞིག་དགྲས་ལག་པ་ཕྱིང་ཀ་ལོག་ཏུ་བཅིང་བས་དམ་དུ་བཅིངས་ནས་ཆུ་གསར་དུ་བབ་པ་ཤུགས་དྲག་པོའི་དབའི་ནང་དུ་བོར་ཏེ། དེ་དེས་ཁྱེར་བ་ན་ཉམ་ཐག་པའི་ང་རོས་སྙིང་རྗེ་རྗེ་ སྐད་དུ་སྨྲེ་སྔགས་འདོན་པར་བྱེད་དེ། གང་གིས་དེ་རིང་བདག་གི་སྲོག །འཇིག་རྟེན་རྙེད་དཀའ་སྦྱིན་འགྱུར་བ། །བདག་གིས་དེ་ཡི་དྲན་བྱ་ཞིང་། །དེ་ཡི་གོར་རེ་ལོང་ཡང་བྱ། །སྟེས་དབང་གིས་རི་དགས་ཀྱི་དཔོན་པོ་དེའི་སྙིང་རྗེའི་བསམ་པས་རི་དགས་ཀྱི་ཚོགས་ཀྱིས་ ཡོངས་སུ་བསྐོར་ཏེ། འབབ་ཆུའི་འགྲམ་དུ་ཉེ་བར་སོང་ངོ་། །དེ་ནས་མི་འོ་དོད་འབོད་པ་ཐོས་ནས་རི་དགས་དེ་རྣམས་ནི་ཀུན་དུ་བྲོས་སོ། །འདི་ནི་ཆོས་ཉིད་ཡིན་ཏེ། བྱང་ཆུབ་སེམས་དཔའ་རྣམས་ནི་ལུས་ཀྱིས་ལོག་པར་ལྟུང་བ་ཡིན་ཡང་སེམས་ཀྱིས་མ་ཡིན་པས་རི་དགས་ཀྱི་ དཔོན་པོ་དེ་སྙིང་རྗེས་བརླན་པའི་སྙིང་གིས་མོད་ལ་འབབ་ཆུ་དེའི་ནང་དུ་འཇུག་པར་བརྩམས་པ་ན་བྱ་རོག་ཀྱང་དེ་དང་སྔོན་དམ་བཅས་པའི་ཡིད་ཀྱིས་ཀུན་དུ་བསྲུང་བའི་ཕྱིར། དེའི་ཕྱི་བཞིན་འབྲང་བས་དེས་མི་དེ་དབྱུང་བའི་ཕྱིར་འབད་པ་བྱེད་པར་རིག་ནས་འདི་སྐད་ཅེས་སྨྲས་སོ། །རི་

  974. 177b

    དགས་ཀྱི་དཔོན་པོ་ཐོང་ཐོང་གཟུ་ལུམས་མ་བྱེད། མི་འདི་དག་ནི་བྱས་པ་མི་གཟོ་ཞིང་བྱས་པ་མི་སེམས་པ་ཡིན་ནོ། །བྱང་ཆུབ་སེམས་དཔའ་བདག་ཉིད་ཆེན་པོ་རྣམས་ནི་མི་ཟློགས་པ་ཡིན་པས་དེས་དེའི་ཚིག་མ་མཉན་པར་འབབ་ཆུ་དེའི་ནང་དུ་ཞུགས་ཏེ། བུ་གཅིག་པ་སྡུག་ པ་བཞིན་དུ་མི་དེ་རྒྱབ་ཏུ་ཞོན་ནས་ཆུའི་འགྲམ་དུ་ཕྱུང་སྟེ། བཅིངས་པ་རྣམས་བཀྲོལ་ཞིང་ཡུད་ཙམ་ཅིག་དབུགས་ཕྱུང་ནས་སྨྲས་པ། བུ་ལམ་འདི་ནས་ཅི་དགའ་བར་སོང་ཤིག །དེ་ནས་མི་དེས་ཐལ་མོ་སྦྱར་ཏེ། རི་དགས་ཀྱི་དཔོན་པོའི་རྐང་པ་གཉིས་ལ་གཏུགས་ ནས། འདི་སྐད་ཅེས་སྨྲས་པ། ཁྱོད་ཀྱིས་བདག་གི་སྲོག་གང་ལགས། །འཇིག་རྟེན་རྙེད་དཀའ་སྩལ་པས་ན། ཡབ་གཅིག་ཁྱོད་ཀྱི་འབངས་བདག་སྟེ། །དེ་བཞིན་གོ་རེ་ལོང་ཡང་བགྱི། །དེས་སྨྲས་པ། དེང་ཁྱོད་བདག་གི་བྲན་དང་ནི། །གོ་རེ་ལོང་ཡང་ མ་བྱེད་པར། །པགས་པའི་ཕྱིར་ནི་བསད་འོང་གིས། །ཁྱོད་ཀྱིས་བདག་གཞན་མ་བསྟན་ཅིག །བུ་ཁྱོད་ཀྱིས་མདོར་བྱ་བ་ནི་འདི་ཡིན་ཏེ། ཁོ་བོའི་ལུས་འདི་འཇིག་རྟེན་ཐམས་ཅད་ཀྱིས་ཤིན་ཏུ་ཆགས་པར་བྱ་བ་དང་། འདོད་པར་བྱ་བ་ཡིན་པས་ཁྱོད་ཀྱིས་ཁོ་བོ་ སུ་ལ་ཡང་མ་བསྟན་དང་། བྱས་པ་ལ་ལན་དུ་ཕན་བཏགས་པ་ཡིན་ནོ། །དེ་ནས་མི་དེས་དེ་བཞིན་དུ་བགྱིའོ་ཞེས་ཁས་བླངས་ནས། རི་དགས་ཀྱི་དཔོན་པོ་ལ་ལན་གསུམ་བསྐོར་བ་བྱས་ཏེ་རྐང་པ་ལ་གཏུགས་ནས་སོང་ངོ་། །ཇི་ཙམ་དུས་གཞན་ཞིག་ན་བཙུན་མོ་ཟླ་འོད་མ་ རྩེད་མོས་དུབ་ནས་མལ་ཆེན་པོར་ལེགས་པར་གཉིད་ལོག་པ་ལས་མཚན་མོའི་ཐུན་ཐ་མ་ལ་རྨི་ལམ་དུ་རི་དགས་ཀྱི་དཔོན་པོ་གཟུགས་མཆོག་ཏུ་སྡུག་པ་ཞིག་སེང་གེའི་ཁྲི་ལ་འདུག་ནས། རྒྱལ་པོའི་འཁོར་མང་པོ་ལ་ཆོས་འཆད་པར་མཐོང་ངོ་། །མཐོང་ནས་ཀྱང་མངོན་ སུམ་དུ་གྱུར་པ་བཞིན་དུ་རྨི་ལམ་དུ་རྨིས་པས། ཡིད་བདེ་བ་སྐྱེས་ནས་མྱུར་བ་མྱུར་བར་མལ་ནས་ལངས་ཏེ་རྒྱལ་པོ་ལ་སྨྲས་སོ། །རྒྱལ་པོས་ཐོས་ནས་ཀྱང་དེའི་བདེན་པའི་རྨི་ལམ་གྱི་ཁྱད་པར་ལ་མཆོག་ཏུ་ངོ་མཚར་སྐྱེས་ཏེ། མི་འདོད་པའི་འགྲོ་བར་སྐྱེས་པ་དེས་གོ་ཇི་ལྟར་

  975. 178a

    སེང་གེའི་ཁྲི་ལ་འདུག་ནས་རྒྱལ་པོའི་འཁོར་མང་པོ་ལ་ཆོས་འཆད་པར་འགྱུར་སྙམ་མོ། །དེ་ནས་བཙུན་མོ་ཟླ་འོད་མས་དགའ་བ་དང་། སྙན་པ་དང་། གཡེར་བག་གི་གཏམ་དང་ལྡན་པའི་ཀུན་དུ་སྤྱོད་པས་རྒྱལ་པོ་ཡུད་ཙམ་ཞིག་དགའ་བར་བྱས་ནས་ སྨྲས་པ། ལྷ་རི་དགས་དེ་ཁུགས་པར་བགྱི་བའི་སླད་དུ་ནན་ཏན་མཛད་དུ་གསོལ། །དེ་ནས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་པའི་ཡུལ་ན་རྔོན་པ་ཇི་སྙེད་གནས་པ་དེ་དག་ཐམས་ཅད་ངའི་སྤྱན་སྔར་ཁུག་ཅིག །བློན་པོ་རྣམས་ཀྱིས་ཡུལ་སོ་སོར་རྒྱལ་པོའི་ མི་རྣམས་ལ་བསྒོ་བ། ལྷས་བཀའ་སྩལ་པ། ངའི་ཡུལ་ན་རྔོན་པ་གནས་པ་རྣམས་འདིར་ཁུག་ཅིག་ཅེས་བྱུང་གིས་ཁྱོད་ཀྱིས་རྔོན་པ་ཐམས་ཅད་འདིར་ཐོང་ཤིག །དེ་རྣམས་ཀྱིས་ཡུལ་རྣམས་ན་གནས་པའི་རྔོན་པ་ཐམས་ཅད་རྒྱལ་པོའི་དྲུང་དུ་བཏང་ནས། བློན་པོ་རྣམས་ ཀྱིས་རྒྱལ་པོ་ལ་ཕུལ་བ་དང་། རྒྱལ་པོས་སྨྲས་པ། ཤེས་ལྡན་དག་ངའི་ཡུལ་ན་རི་དགས་ཀྱི་དཔོན་པོ་གཟུགས་ཤིན་ཏུ་རབ་ཏུ་སྡུག་པ་ཞིག་ཡོད་དོ། །ཞེས་ངས་ཐོས་ཀྱིས་ཁྱེད་ཀྱིས་དེ་རྙི་འཇམ་ཞིང་ལྷོད་པས་ཟུང་ལ་མ་སྣད་པ་རང་ལ་ཕུལ་ཅིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་འདི་ཉིད་ཀྱིས་འཚོ་བ་ལགས་པས་བདག་ཅག་གིས་དུས་འདི་ཙམ་གྱི་བར་དུ་ལྷའི་ཡུལ་དུ་བརྒྱུས་པ་ལས་རི་དགས་ཀྱི་དཔོན་པོ་མཆོག་འདི་ལྟ་བུ་ནི་སྔོན་ཆད་ལན་འགའ་ཡང་མ་ཐོས་ན་མཐོང་བ་ལྟ་ཅི་སྨོས། ལྷ་གཅིག་ནས་གཅིག་ཏུ་སྨྲས་ཏེ་ཕྱོགས་ག་གེ་མོ་ ཞིག་ན་མཆིས་སོ་ཞེས་གསན་ནས་བདག་ཅག་ལ་བཀའ་སྩལ་པའི་རིགས་སོ། །དེ་ལྟ་ན་བདག་ཅག་གིས་ཀྱང་ལྷའི་བཀའ་སྩལ་པ་ངེས་པར་འགྲུབ་པར་མཆིའོ། །དེ་ནས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་བཱ་རཱ་ཎ་སཱིར་དྲིལ་སྒྲོགས་སུ་ཆུག་ལ། ལྷས་ བཀའ་སྩལ་པ། ངའི་ཡུལ་ན་རི་དགས་ཀྱི་དཔོན་པོ་གཟུགས་ཤིན་ཏུ་རབ་ཏུ་སྡུག་པ་ཞིག་ཡོད་ཀྱིས་སུས་དེའི་གཏམ་ངའི་སྙན་དུ་གསོལ་ན། དེ་ངས་བཀུར་སྟི་ཆེན་པོས་བཀུར་སྟི་བྱས་ལ་དེ་ལ་གྲོང་རྡལ་མཆོག་ལྔ་སྦྱིན་ནོ་ཞེས་སྒོ་ཤིག །བློན་པོ་རྣམས་ཀྱིས་རྒྱལ་པོ་ལས་

  976. 178b

    མཉན་ནས་བཱ་རཱ་ཎ་སཱིར་དྲིལ་བསྒྲགས་པ། བཱ་རཱ་ཎ་སཱི་ན་གནས་པའི་གྲོང་མི་དང་། ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་ཀྱི་ཤེས་ལྡན་དག་ཉོན་ཅིག །ལྷས་འདི་སྐད་ཅེས་བཀའ་སྩལ་ཏོ། །ངའི་ཡུལ་ན་རི་དགས་ཀྱི་དཔོན་པོ་གཟུགས་ཤིན་ཏུ་རབ་ཏུ་སྡུག་ པ་ཞིག་ཡོད་ཀྱིས་སུས་དེའི་གཏམ་ངའི་སྙན་དུ་གསོལ་པ། དེ་ངས་བཀུར་སྟི་ཆེན་པོས་བཀུར་སྟི་བྱས་ཏེ། དེ་ལ་གྲོང་རྡལ་མཆོག་ལྔ་སྦྱིན་ནོ་ཞེས་བྱུང་ངོ་། །དེ་ནས་དེ་མཐོང་བའི་མི་དེ་འདི་སྙམ་དུ་སེམས་ཏེ། ཅི་རེ་ཞིག་འཁོར་རྗེས་སུ་བསྐྱང་བར་བྱ་འམ། འོན་ ཏེ་བྱས་པ་གཟོ་བར་བྱ་སྙམ་པ་ལས་འདོད་པ་ལ་སོ་སོར་བསྟེན་པ་ནི་སྡིག་པའི་ལས་མི་བྱེད་པ་ཅི་ཡང་མེད་པས་དེ་འདོད་པའི་རྒྱུས་བསླང་བའི་ཞེ་སྡང་གི་མེ་དྲག་པོས་སྙིང་གདུངས་ནས་བསམས་པ། བྱས་པ་གཟོ་བ་རེ་ཞིག་ཞོག །དགྲ་ལ་ཤ་གླན་པའི་དུས་ལ་བབ་ བོ། ཅི་བདག་གིས་ཡང་དེ་འདྲ་བའི་གནས་སྐབས་ཐོབ་པར་འགྱུར་རམ། རེ་ཞིག་དེ་ལ་ཤ་གླན་པར་བྱའོ་སྙམ་ནས། དེ་ནམ་ནངས་པ་དང་། རྒྱལ་པོའི་དགོས་པ་སྒྲུབ་པའི་འཁོར་གྱི་ནང་དུ་འདུག་པས་རྒྱལ་པོའི་ཕོ་བྲང་གི་སྒོ་ལྷུག་པར་འདུག་པ་ན་དེ་མེ་ཏོག་ཤིན་ཏུ་ དྲི་ཞིམ་པ་སྣ་ཚོགས་དག་ཁྱེར་ཏེ་སྒོ་བ་དང་། བློན་པོ་རྣམས་ལས་གཅིག་ནས་གཅིག་ཏུ་བརྒྱུད་དེ་རྒྱལ་པོས་ཐོས་པར་བྱས་ནས། འཁོར་གྱི་ནང་དུ་ཞུགས་ཏེ་ཐོག་མར་བཀུར་སྟི་རྣམ་པ་སྣ་ཚོགས་བྱས་ནས་རྒྱལ་པོ་ལ་སྨྲས་པ། ལྷ་ཕྱོགས་ག་གེ་མོ་ཞིག་ན་ཞུགས་ཤིང་སྣ་ ཚོགས་ཀྱི་ནགས་བྱ་དང་རི་དགས་འདྲིས་པས་མཛེས་པར་བགྱིས་པ་ན་རི་དགས་ཀྱི་དཔོན་པོ་གསེར་གྱི་གློ་ཞེས་བགྱི་བ་རི་དགས་ཀྱི་ཚོགས་སྟོང་ཕྲག་དུ་མས་ཡོངས་སུ་བསྐོར་ཅིང་མཆིས་ཏེ། བདག་གིས་ལྷ་ལ་རི་དགས་དམ་པ་གཟུགས་མཆོག་ཏུ་སྡུག་པ་དེ་བསྟན་པར་ བགྱིའོ། །དེ་ནས་རྒྱལ་པོས་དེ་ཐོས་ནས་ཡིད་བདེ་བ་སྐྱེས་ཏེ། བློན་པོ་བརྒྱ་ཕྲག་དུ་མས་ཡོངས་སུ་བསྐོར་ཅིང་ཡ་མཚན་སྐྱེས་པ་ཡུལ་སྣ་ཚོགས་ནས་ལྷགས་པ་གཞན་རྣམས་དང་བཱ་རཱ་ཎ་སཱི་ན་གནས་པའི་གྲོང་མི་དང་ཡུལ་མི་རྣམས་ཀྱིས་ཀྱང་མདུན་དུ་བདར་ཏེ། མི་དེས་ལམ་

  977. 179a

    བསྟན་པ་བཞིན་རིམ་གྱིས་ཕྱོགས་དེར་ཕྱིན་ཏོ། །ཇི་ཙམ་ན་བྱ་རོག་བྱང་ཆུབ་སེམས་དཔའ་དང་དམ་བཅས་པས་ཕྱོགས་སུ་བལྟ་བའི་ཕྱིར་ནགས་ཚང་ཚིང་དེའི་ཤིང་ཁ་ན་འདུག་པས་སྐྱེ་བོའི་ཚོགས་ཆེན་པོ་ནགས་ཚང་ཚིང་དུ་ཕྱོགས་ཏེ་འོང་བ་མཐོང་ནས་དེས་ རིངས་པ་རིངས་པར་རི་དགས་ཀྱི་དཔོན་པོའི་དྲུང་དུ་སོང་སྟེ་སྨྲས་པ། རི་དགས་ཀྱི་རྒྱལ་པོ་ཁྱོད་ལ་བདག་གིས་སྔར་མི་རྣམས་ནི་ཕན་པ་བྱས་པ་མི་སེམས་ཤིང་བྱས་པ་མི་གཟོ་ལ་བྱས་པ་མི་ཚོར་བ་ཡིན་ནོ་ཞེས་སྨྲས་པ་ཡིན་ཏེ། མི་དེས་སྐྱེས་མང་དུ་ཁྱེར་ནས་འོང་ངོ་། །སྒྲ་དེ་རི་ དགས་རྣམས་ཀྱིས་ཐོས་ནས་སྐྲག་སྟེ་ཀུན་དུ་བྲོས་སོ། །རི་དགས་ཀྱི་དཔོན་པོ་བྱང་ཆུབ་སེམས་དཔས་བསམས་པ། གལ་ཏེ་བདག་གིས་རི་དགས་འདི་དག་མ་བསྲུངས་ན་དེ་རིང་ཉིད་དུ་ཁ་བཏགས་པར་འགྱུར་གྱིས་སེམས་ཅན་ཡལ་བར་དོར་བ་བས་ནི་རང་གི་སྲོག་ཆུད་ གཟོན་པ་བླའོ་སྙམ་ནས་རྒྱལ་པོ་སུར་སོང་ངོ་། །དེ་ནས་མི་སྙིང་རྗེ་མེད་ཅིང་འཇིག་རྟེན་ཕ་རོལ་ལ་མི་ལྟ་བ་དེ་རི་དགས་ལ་བལྟ་བར་བརྟུན་པའི་བློས་རི་དགས་ཀྱི་མཆོག་དེ་ལག་པ་གཉིས་ཀྱིས་བསྟན་ཏེ་སྨྲས་པ། ལྷ་རི་དགས་ཀྱི་དཔོན་པོ་ནི་འདི་ལགས་སོ། །ལས་ཤིན་དུ་ དྲག་པོ་ཡོངས་སུ་རྫོགས་པ་དག་ནི་རྣམ་པར་སྨིན་པའི་དུས་ལ་མི་ལྟོས་པ་ཡིན་པས་ཚིག་སྨྲས་མ་ཐག་ཁོ་ནར་མི་དེའི་ལག་པ་གཉིས་ཀ་ས་ལ་ལྷུང་བར་གྱུར་ཏོ། །དེ་ནས་རྒྱལ་པོ་དེ་སྐྱོ་བ་སྐྱེས་ནས་མི་དེ་ལ་དྲིས་པ། ཀྭའི་ནང་རྗེ་འདི་ཅི་ལས་གྱུར། དེ་སྡུག་བསྔལ་གྱི་ཚོར་བས་ཉེན་ ཅིང་ང་རོ་མི་གསལ་བས་ཚིགས་སུ་བཅད་དེ་སྨྲས་པ། རྒྱལ་ཆེན་གང་ཞིག་བཀུམ་ནས་ནོར། །འཕྲོག་དེ་ཆོམ་རྐུན་མ་ལགས་ཀྱི། །རྒྱལ་ཆེན་བྱས་པ་མི་གཟོ་བ། །གང་ལགས་དེ་ནི་ཆོམ་རྐུན་ལགས། །རྒྱལ་པོས་སྨྲས་པ། ཀྭའི་ནང་རྗེ་སྨྲས་པ་དེའི་དོན་ཅི་ཡིན། དེས་ཇི་ ལྟར་གྱུར་པ་ཐམས་ཅད་རྒྱས་པར་རྒྱལ་པོ་ལ་སྨྲས་སོ། །དེ་ནས་རྒྱལ་པོས་བྱས་པ་ཆུད་གཟོན་པའི་མི་དེ་ལ་ཚིགས་སུ་བཅད་པས་སླར་སྨྲས་པ། ཅི་ཕྱིར་ཐ་ཆད་སར་ནི་བྱིང་མ་གྱུར། །ཅིའི་ཕྱིར་ལྕེ་ནི་དུམ་བུ་བརྒྱར་མ་ལྷགས། །ཇི་ལྟར་ཁྱོད་ཀྱིས་ལུས་འདི་གསང་བ་བས། །རྡོ་རྗེ་ཆར་

  978. 179b

    མདུང་མངའ་ཆེན་བརྡེག་མ་གྱུར། །དེ་ནས་རྒྱལ་པོས་བྱང་ཆུབ་སེམས་དཔའི་མཐུ་ཆེན་པོ་དེ་ཤེས་ནས་བློན་པོ་རྣམས་ལ་སྨྲས་པ། ཤེས་ལྡན་དག་རི་དགས་ཀྱི་དཔོན་པོ་བདག་ཉིད་ཆེན་པོ་འདི་ནི་བསྙེན་བཀུར་བྱ་བར་འོས་ཀྱིས་དེང་ལ་གྲོང་ཁྱེར་དང་ལམ་བྱི་དོར་བྱེད་དུ་ཆུག་ཤིག ། དེ་རྣམས་ཀྱིས་གྲོང་ཁྱེར་དེའི་རྡོ་བ་དང་། གསེག་མ་དང་། གྱོ་མོ་རྣམས་བསལ་ཅིང་ཙན་དན་གྱི་ཆུས་ཆག་ཆག་བཏབ། ཤིན་ཏུ་དྲི་ཞིམ་པོའི་པོག་ཕོར་དག་བཞག །རྒྱལ་མཚན་བཙུགས། དར་གྱི་ཆུན་འཕྱང་མང་པོ་དབྱངས། མེ་ཏོག་སྣ་ཚོགས་ཀྱིས་དགའ་དགའ་ ལྟར་བཀྲམ་སྟེ། ལྷ་རྣམས་ཀྱི་དགའ་ཚལ་གྱི་སྐྱེད་མོས་ཚལ་བཞིན་དུ་ལམ་ཡང་མཛེས་པར་བྱེད་དུ་བཅུག་ནས་བཱ་རཱ་ཎ་སཱི་ན་གནས་པའི་སྐྱེ་བོའི་ཚོགས་ཀྱིས་མེ་ཏོག་གི་ཕྲེང་བ་དག་ཐོགས་ཏེ་བསུར་དོང་ངོ་། །དེ་ནས་རྒྱལ་པོས་རི་དགས་ཀྱི་དཔོན་པོ་གཟུགས་ཤིན་ཏུ་སྡུག་པ་དེ་ འབྱོར་པ་ཆེན་པོས་གྲོང་ཁྱེར་བཱ་རཱ་ཎ་སཱིར་ཞུགས་ནས་སེང་གེའི་ཁྲི་ལ་འདུག་ཏུ་བཅུག་གོ། །དེ་ནས་རྒྱལ་པོ་རྒྱལ་པོའི་འབྱོར་པ་དང་། མཐུ་ཆེན་པོས་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པས་ཡོངས་སུ་བསྐོར་ཅིང་ འདུག་གོ། །དེ་ནས་རི་དགས་ཀྱི་དཔོན་པོ་བྱང་ཆུབ་སེམས་དཔས་འཁོར་ལ་བལྟས་ནས་རྒྱལ་པོ་དང་འཁོར་དེ་ལ་དེ་ལྟ་བུའི་ཆོས་བཤད་དེ། དེ་ཐོས་པས་རྒྱལ་པོ་འཁོར་དང་བཅས་པས་བསླབ་པ་ལྔའི་གཞི་བླངས་སོ། །སེམས་ཅན་དུ་མ་དག་གིས་ནི་དགེ་བའི་རྩ་བ་དག་ ཐོབ་བོ། །དེ་ནས་རྒྱལ་པོས་ནགས་དེ་རི་དགས་རྣམས་ལ་བྱིན་ནོ། །སྲོག་ཆགས་འབྱུང་པོ་ཐམས་ཅད་ལ་ཡང་མི་འཇིགས་པ་བྱིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རི་དགས་ཀྱི་དཔོན་པོ་གསེར་གྱི་གློ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་ དེའི་དུས་ཀྱི་མི་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་ལྷ་སྦྱིན་འདི་བྱས་པ་མི་གཟོ་ཞིང་བྱས་པ་མི་ཚོར་བ་དེ་ཉོན་

  979. 180a

    ཅིག །དགེ་སློང་དག་སྔོན་བྱུང་བ་རི་འོར་ཞིག་ན་མེ་ཏོག་ཕྲེང་རྒྱུད་མཁན་ཞིག་གནས་ཏེ། དེའི་མེ་ཏོག་གི་རབ་ཆུའི་ཕ་རོལ་ན་ཡོད་པས་དེ་ཉི་མ་རེ་རེ་ཞིང་ཆུ་རྒལ་ཞིང་མེ་ཏོག་ཐུའོ། །ཇི་ཙམ་དུས་གཞན་ཞིག་ན་ཆུ་རྒལ་བ་ན་དུས་ཚིགས་མ་ཡིན་པའི་ཨ་མྲའི་ འབྲས་བུ་ཆུས་ཁྱེར་བ་ཞིག་མཐོང་ནས་དེས་དེ་བླངས་ཏེ་སྒོ་བ་ལ་བྱིན་ནོ། །སྒོ་བས་གསོལ་ཀ་བ་ལའོ། །གསོལ་ཀ་བས་རྒྱལ་པོ་ལའོ། །རྒྱལ་པོས་བཙུན་མོ་ལའོ། །བཙུན་མོས་དེ་མྱངས་པ་ན་རོལ་ཞེན་ནས་རྒྱལ་པོ་ལ་གསོལ་བ་བཏབ་པ། ལྷ་ཨ་མྲའི་འབྲས་བུ་ འདི་འདྲ་བ་གཞན་ཡང་སྩལ་བའི་རིགས་སོ། །རྒྱལ་པོས་གསོལ་ཀ་བ་ལ་སྨྲས་པ། ཁྱོད་ཀྱིས་ཨ་མྲའི་འབྲས་བུ་སུ་ལས་འོངས། དེས་སྨྲས་པ། སྒོ་སྲུངས་ཀྱིས་སྩལ་ལགས་སོ། །སྒོ་སྲུངས་ལ་སྨྲས་པ་དང་། དེས་སྨྲས་པ། མེ་ཏོག་ཕྲེང་རྒྱུད་མཁན་ གྱིས་སྩལ་ལགས་སོ། །རྒྱལ་པོས་སྨྲས་པ། ཤེས་ལྡན་དག་མེ་ཏོག་ཕྲེང་རྒྱུད་མཁན་ཁུག་ཤིག །རྒྱལ་པོའི་མི་རྣམས་ཀྱིས་བཀུག་ནས་རྒྱལ་པོས་སྨྲས་པ། ཀྭའི་མེ་ཏོག་ཕྲེང་རྒྱུད་མཁན་ཁྱོད་ཀྱིས་ཨ་མྲའི་འབྲས་བུ་འདི་ག་ལས་རྙེད། དེས་ཇི་ལྟར་གྱུར་པ་ སྨྲས་པ་དང་། རྒྱལ་པོས་དེ་ཉིད་ལ་བསྒོ་བ། སོང་ལ་ཨ་མྲའི་འབྲས་བུ་འདི་འདྲ་བ་གཞན་ཡང་ཁྱེར་ཏེ་ཤོག་ཤིག །མིའི་དབང་པོ་རྣམས་ཀྱི་ཚིག་ནི་གཅིག་ཏུ་མི་རུང་བས་དེ་བག་ཚ་བས་སྙིང་ལ་ཟུག་ཅིང་ཨ་མྲའི་འབྲས་བུ་བཙལ་བར་བརྩམས་ཏེ། དེས་རྒྱགས་ཁྱེར་ནས་ཐོག་ མ་ཨ་མྲ་རྙེད་པ་ལོགས་སུ་སོང་བ་དང་། རིའི་ཕྱོགས་གཅིག་ན་ཨ་མྲའི་ཤིང་སྤྲེའུ་རྣམས་ཀྱི་བགྲོད་པར་གྱུར་གྱི་མི་རྣམས་ཀྱི་ནི་མ་ཡིན་པ་དེ་མཐོང་ནས། དེ་ནས་མེ་ཏོག་ཕྲེང་རྒྱུད་མཁན་དེ་ཤིང་དེ་ལ་ཕན་ཚུན་ནས་བརྟགས་ན། གཡང་ས་ཆེན་པོར་སྐྱེས་པས་མི་རྣམས་ཀྱིས་ བགྲོད་པ་མ་ཡིན་ཏེ་གཟེག་པར་མ་ནུས་སོ། །དེ་དེ་ན་ཨ་མྲའི་འབྲས་བུ་འདོད་པའི་ཕྱིར་ཞག་མང་དུ་ལོན་པས་རྒྱགས་ཟད་པར་གྱུར་ཏོ། །དེས་བསམས་པ། བདག་འདི་བཞིན་འདུག་ན་ཡང་རྒྱགས་མེད་པས་འཆིར་ཆ་བས་གཅིག་གིས་ཅི་བྱུང་བ་བྱུང་གཟེག་གོ་ཞེས་དེས་རྡོ་

  980. 180b

    བ་རྣམས་ལ་འཇུས་ཏེ་འཛེག་པར་བརྩམས་པ་ལས་ཨ་མྲའི་འབྲས་བུ་མ་ཐོབ་པར་གཡང་དུ་ལྷུང་ངོ་། །རི་དེ་ལ་བྱང་ཆུབ་སེམས་དཔའ་སྤྲེའུར་གྱུར་པ་ན་སྤྲེའུ་རྣམས་ཀྱི་དཔོན་པོར་གྱུར་ཏོ། །སྟེས་དབང་གིས་དེས་རི་དེ་ལ་ཚོགས་བཞག་སྟེ། ཕྱོགས་དེར་ཕྱིན་པ་དང་། ཇི་ ཙམ་ན་དེས་མེ་ཏོག་ཕྲེང་རྒྱུད་མཁན་དེ་སྡུག་བསྔལ་དོག་ཅིང་ཉམ་ང་བར་གྱུར་པར་མཐོང་ནས་བྱང་ཆུབ་སེམས་དཔའ་ནི་བཟོའི་གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་ཏེ། དེ་དེ་ལ་ཕན་པ་སྐྱེད་པ་ལྷུར་ལེན་པས་རིམ་གྱིས་མ་སད་ན་དབྱུང་བར་མི་ནུས་སོ། །ཞེས་ རྡོ་རྣམས་ཀྱིས་གོམས་པར་བྱ་བར་བརྩམས་ཏེ། གང་གི་ཚེ་བདག་གིས་དབྱུང་བར་ནུས་སོ་སྙམ་དུ་རིག་པ་དེའི་ཚེ་དེས་དེ་གཡང་ས་ནས་རིམ་གྱིས་ཕྱུང་བ་དང་། རྡོ་བ་བཏེག་པ་དང་། མེ་ཏོག་ཕྲེང་རྒྱུད་མཁན་ཕྱུང་བས་ཤིན་ཏུ་དུབ་པར་གྱུར་ཏོ། །དེའི་ཚེ་དུད་འགྲོ་ཡང་མིའི་སྐད་ དུ་སྨྲ་བ་ཡིན་པས་དེས་དེ་ལ་དྲིས་པ། ཁྱོད་ཅིའི་ཕྱིར་ཉམ་ང་བ་འདི་ལྟ་བུ་དང་ལྡན་པར་གྱུར། དེས་ཇི་ལྟར་གྱུར་པ་སྨྲས་པ་དང་། བྱང་ཆུབ་སེམས་དཔས་བསམས་པ། འདི་ཨ་མྲའི་འབྲས་བུ་མེད་པར་སོང་ན་གནོད་པ་འཐོབ་པར་འགྱུར་གྱི། བདག་གིས་འདི་ལ་ཨ་མྲའི་ འབྲས་བུ་སྦྱིན་ནོ་སྙམ་ནས་བདག་ཉིད་ཆེན་པོ་དེ་སྤྲོ་བ་དང་གཞན་ལ་ཕན་པར་བྱ་བ་ལ་བརྩོན་པ་མ་བོར་བས་དུབ་བཞིན་དུ་ཡང་ཤིང་དེ་ལ་འཛེགས་ནས་ཨ་མྲའི་འབྲས་བུ་ཀླག་པར་བརྩམས་ཏེ། མི་དེ་ཇི་ཙམ་འདོད་ཀྱི་བར་དུ་ཨ་མྲའི་འབྲས་བུ་ཟར་བཅུག་ནས་ཐུ་བ་ཡང་བཀང་ངོ་། ། བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ལ་བག་འབེབས་པ་ཡིན་པས་དེ་ནས་སྤྲེའུའི་དཔོན་པོ་དེ་བབས་ནས་དེས་མི་དེ་ལ་སྨྲས་པ། ཀྭའི་ནང་རྗེ་ཁོ་བོ་དུབ་པས་ཡུད་ཙམ་ཞིག་ཉལ་གྱིས་རེ་ཞིག་ཕྱོགས་སུ་བྱར་གྱིས་ཤིག །དེས་སྨྲས་པ། བཀའ་བཞིན་འཚལ་ དེ་གཉིད་ལོག་པ་དང་མི་དེས་བསམས་པ། བདག་རྒྱགས་ཆད་པས་གལ་ཏེ་ཨ་མྲ་རྣམས་ཟོས་ན་ནི་བདག་གིས་རྒྱལ་པོ་ལ་ཡང་ཅི་དབུལ་དེ་བས་ན་སྤྲེའུ་འདི་བསད་ལ་ཤ་སྐམ་དུ་བྱས་ཏེ་ལམ་དུ་འཇུག་གོ་སྙམ་ནས། སྙིང་རྗེ་མེད་པ་འཇིག་རྟེན་ཕ་རོལ་ཡལ་བར་བོར་བ་དེས་དེ་རྡོ་བ་

  981. 181a

    ཆེན་པོས་བསད་དོ། །ལྷས་ཚིགས་སུ་བཅད་དེ་སྨྲས་པ། ཕན་འདོགས་པ་ཡི་མཚན་ཉིད་དང་། །དེ་བཞིན་དྲིན་གཟོ་གྲོགས་པོར་བརྗོད། །མི་རྣམས་ལ་ཡང་ཁ་ཅིག་ནི། །ཕན་པ་བྱས་པ་མི་ཤེས་སོ། །དགེ་སློང་དག་ཇི་སྙམ་དུ་སེམས་དེའི་ཚེ་དེའི་ དུས་ཀྱི་སྤྲེའུའི་དཔོན་པོ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་མེ་ཏོག་ཕྲེང་རྒྱུད་མཁན་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་ཞིང་བྱས་པ་མི་ཚོར་བ་ ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་། བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་ན་གྲོང་རྡལ་མེད་པའི་དགོན་པའི་གནས་རི་འོར་དང་རིའི་ཕུག་ཆུ་དང་། མེ་ཏོག་དང་། འབྲས་ བུས་རྒྱས་པ་ཞིག་ཏུ་བྱ་རྣམས་ཀྱི་ནང་དུ་སྐྱེས་ཏེ། བྱ་ཤིང་སྟ་མོ་ཞེས་བྱ་བར་གྱུར་ཏོ། །རི་དེ་ཉིད་ཀྱི་ཕྱོགས་ཞིག་ན་རི་དགས་ཀྱི་རྒྱལ་པོ་སེང་གེ་ཞིག་ཇི་ལྟར་འདོད་པའི་སྤྱོད་པ་དང་གནས་པས་རི་དགས་བསད་ཅིང་བསད་ཅིང་ཟ་བར་བྱེད་དོ། །དེ་དུས་གཞན་ཞིག་ན་ཤ་ཟོས་པ་ ལས་སོའི་བར་དུ་རུས་པ་ཆུད་ནས་དེ་འཇིགས་པ་དང་། བག་ཚ་བ་དང་བྲལ་བ་ཡིན་ཡང་སོའི་ནད་ཀྱི་ཚོར་བས་ལུས་ལ་གནོད་པར་གྱུར་ནས་བློང་བར་གྱུར་པས་ཁ་ཟས་ཟ་མ་ནུས་སོ། །སྟེས་དབང་གིས་ཤིང་སྟ་མོ་དེ་ཤིང་ཁ་གཅིག་ནས་གཅིག་ཏུ་རྒྱུ་བ་ལ་གོམས་པས་དེ་ ཕྱོགས་དེ་ནས་རི་དགས་ཀྱི་དཔོན་པོ་འདུག་པའི་ཕྱོགས་དེར་འོངས་པ་ན། དེས་སེང་གེ་དེ་སྡུག་བསྔལ་གྱི་ཚོར་བས་ཉེན་པར་མཐོང་ནས་སྨྲས་པ། ཞང་པོ་ཅིའི་ཕྱིར་བློང་བར་གྱུར། དེས་སྨྲས་པ། ཚ་བོ་བདག་སྡུག་བསྔལ་གྱི་ཚོར་བས་ཉེན་ཏོ། །ཁྱོད་སྡུག་བསྔལ་ ཅི་ལྟ་བུ་ཞིག་གིས། དེས་རྒྱས་པར་སྨྲས་པ་དང་། དེས་སྨྲས་པ། ཞང་པོ་ཁྱོད་ལ་བདག་གིས་དཔྱད་བྱས་ཁྱོད་ནི་སེང་གེ་ཡིན་ཏེ་རྐང་བཞི་བ་ཐམས་ཅད་ཀྱི་དཔོན་པོ་ཡིན་པས་ཕན་གདགས་པར་ནུས་ཀྱིས་ཁྱོད་ཀྱིས་བདག་ལ་དུས་དུས་སུ་ཕན་པ་བྱོས་ཤིག །དེས་སྨྲས་པ།

  982. 181b

    དེ་བཞིན་དུ་བྱའོ། །ཤིང་སྟ་མོས་བསམས་པ། ཇི་ལྟར་འདིས་བྱེད་པ་ཡང་མ་ཚོར་བ་དེ་ལྟར་འདིའི་དཔྱད་བྱས་ནས་སོས་ནས་ཤེས་པར་འགྱུར་བར་བྱའོ་སྙམ་མོ། །དེ་ཕན་པར་བྱ་བ་ལྷུར་ལེན་པས་དེའི་སྤྱོད་པ་དང་གནས་པ་ལ་རྟོག་ཅིང་འདུག་གོ། །ཇི་ཙམ་ན་རི་དགས་ཀྱི་ དཔོན་པོ་དེ་རླུང་བདེ་བའི་རེག་པས་ནད་རྩེ་ཞིལ་ནས་རྡོ་བ་ཆེ་ཞིང་ཡངས་པ་ཞིག་ལ་ཁ་གདངས་ནས་གཉིད་ལོག་གོ། །དེ་ནས་ཤིང་སྟ་མོ་དེ་རི་དགས་ཀྱི་དཔོན་པོ་དེའི་དྲུང་དུ་སོང་ན་དེ་ལྟར་བསོད་པར་གནས་པར་མཐོང་ནས་དེས་བསམས་པ། འདིའི་དཔྱད་བྱ་བའི་དུས་དེ་ལ་བབ་བོ་ སྙམ་དུ་རིག་ནས་ལེགས་པར་བརྟགས་ཏེ་སོའི་བར་དུ་ཆུད་པའི་རུས་པ་འདབ་མས་བསྐྱོད་པའི་རིམ་པས་མོད་ལ་ཕྱུང་སྟེ་སྐྱེས་ཤིང་གཉིད་ཀྱི་སྙོམས་པ་བསལ་བའི་མིག་གིས་ལངས་ནས་འདུག་གོ། །དེ་ནས་ཤིང་སྟ་མོ་དེས་རི་དགས་ཀྱི་དཔོན་པོ་དེ་སྡུག་བསྔལ་དང་། ཡིད་མི་ བདེ་བ་དང་བྲལ་བར་རིག་ནས་རབ་ཏུ་དགའ་བའི་ཡིད་ཀྱིས་དེའི་དྲུང་དུ་སོང་སྟེ་སྨྲས་པ། ཞང་པོ་ཁྱོད་ཀྱི་སྡུག་བསྔལ་གྱི་རྒྱུར་གྱུར་པ་ནི་རུས་པ་འདི་ཡིན་ནོ། །དེ་ནས་རི་དགས་ཀྱི་དཔོན་པོ་དེ་མཆོག་ཏུ་ངོ་མཚར་སྐྱེས་ནས་སྨྲས་པ། ཚ་བོ་ཕན་པ་འདིའི་ལན་ཁྱོད་ལ་བདག་གིས་ ངེས་པར་སླར་ཕན་པ་བྱས་དུས་དུས་སུ་ཤོག་ཤིག །ལེགས་སོ་དེ་བཞིན་དུ་བྱའོ་ཞེས་སྨྲས་ནས་ཤིང་སྟ་མོ་སོང་ངོ་། །ཇི་ཙམ་དུས་གཞན་ཞིག་ན་རི་དགས་ཀྱི་དཔོན་པོ་ཤ་ལ་ཟ་བ་ན་ཤིང་སྟ་མོ་དེ་ཡང་བྱ་ཁྲ་ཞིག་གིས་ཟིན་ཏེ་དེའུ་ཤི་བ་ལས་ཤོར་ཏེ་བཀྲེས་པས་གདུངས་པའི་སྙིང་གིས་རི་ དགས་ཀྱི་དཔོན་པོ་དེའི་དྲུང་དུ་སོང་སྟེ། ཉམ་ཐག་པ་དག་རིག་པར་བྱས་ནས་སྨྲས་པ། ཞང་པོ་བདག་བཀྲེས་པས་གཟིར་གྱིས་ཤ་ལ་ཆུང་ཟད་བྱིན་ཅིག །དེས་ཚིགས་སུ་བཅད་དེ་སྨྲས་པ། ད་ལྟར་ཁོ་བོ་སྲོག་གཅོད་ཅིང་། །གཏུམ་པོ་མི་དགེ་བྱེད་པ་ཡི། །མཆེ་བའི་བར་ དུ་ཁྱོད་འོངས་པ། །གསོན་པ་དྲིན་ཆེར་མི་སེམས་སམ། །དེས་ཀྱང་ཚིགས་སུ་བཅད་དེ་སྨྲས་པ། རྒྱ་མཚོར་ལྷུང་བ་ཕུང་བ་སྟེ། །རྨི་ལམ་བསམས་པ་དོན་མེད་ཡིན། །ཕོ་ངན་བསྟེན་པ་གང་ཡིན་དང་། །བྱས་མི་གཟོ་ལ་བྱས་དོན་མེད། །བཅོམ་ལྡན་འདས་ཀྱིས་བཀའ་སྩལ་

  983. 182a

    པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཤིང་སྟ་མོ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རི་དགས་ཀྱི་དཔོན་པོ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། ། ད་ལྟར་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་། བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་མི་དབུལ་པོ་ཞིག་གནས་པ་དེ་ཤིང་བཙོང་ཞིང་བཙོངས་པས་འཚོ་བར་བྱེད་ དོ། །དེ་དུས་གཞན་ཞིག་ན་ནང་པར་སྔར་ལངས་ཏེ་སྟ་རེ་དང་ཁུར་ཤིང་དག་ཐོགས་ཏེ་ཤིང་གི་ཕྱིར་ནགས་ཁྲོད་དུ་སོང་བ་དང་། དུས་མ་ཡིན་པའི་ཆར་སྤྲིན་ཆེན་པོ་སྣ་ལ་རླུང་ལྡང་བ་ལངས་སོ། །མི་དེ་འདི་རུང་ངམ་འདི་རུང་ངམ་ཞེས་གནས་ཀྱི་ཁྱད་པར་ཚོལ་ཞིང་ཤིང་ནས་ཤིང་ གཞན་གྱི་དྲུང་དུ་སོང་ན་འོན་ཀྱང་གཤེར་བར་གྱུར་པ་ཉིད་པས། དེས་ཤིང་དྲུང་བརྒྱུས་ཏེ་རིམ་གྱིས་བྲག་ཕུག་ཅིག་ཏུ་ཞུགས་པ་དང་། དེས་བྲག་ཕུག་དེ་ན་དོམ་ཞིག་གནས་པ་དེ་མཐོང་ནས་སྔངས་ཏེ་འབྲོས་པར་བརྩམས་པ་ལས། དོམ་གྱིས་སྨྲས་པ། བུ་ཅིའི་ཕྱིར་སྡངས་བུ་ མ་འཇིགས་པར་ཁོ་བོའི་དྲུང་ན་འདུག་ཤིག །དེ་བག་ཚ་བཞིན་དུ་བྲེད་ནས་འགྲོ་མ་ནུས་སོ། །དེ་ནས་དོམ་དེས་དབུགས་ཕྱུང་སྟེ། ལག་པ་གཉིས་ཀྱིས་པང་དུ་འཁྱུད་ནས་རྩ་བ་དང་འབྲས་བུས་ཚིམ་པར་བྱས་སོ། །ཡུལ་ངན་ཡང་ཞག་བདུན་དུ་བྱུང་ལྷས་ཀྱང་ཆར་པ་མ་བཅད་ དོ། །ཞག་བདུན་འདས་ཏེ་ཞག་བརྒྱད་པའི་ཉིན་པར་ཆར་སྤྲིན་སངས་ནས་དོམ་གྱིས་ཕྱོགས་བཞིར་བལྟས་ཏེ་རྩ་བ་དང་། འབྲས་བུ་རབ་ཏུ་མང་པོ་བྱིན་ནས་མི་དེ་ལ་སྨྲས་པ། བུ་ཆར་སྤྲིན་སངས་ཏེ་ཡུལ་ངན་མེད་ཀྱིས་ཅི་བདེར་སོང་ཤིག །མི་དེས་རྐང་པ་ལ་གཏུགས་ཏེ་སྨྲས་པ། ཡབ་མཆི་ན་བདག་གིས་ཁྱེད་ལ་ལན་ཅི་ཞིག་གླན། དེས་སྨྲས་པ། བུ་ཅི་ནས་ཀྱང་ཁོ་བོ་སུ་ལ་ཡང་མ་སྨྲས་ན་དེ་ཉིད་ཀྱིས་ལན་གླན་པ་ཡིན་ནོ། །དེས་སྨྲས་པ། ཡབ་དེ་བཞིན་དུ་བགྱིའོ་ཞེས་དེས་དེ་ལ་བསྐོར་བ་བྱས་ནས་རྐང་པ་ལ་ཕྱག་བྱས་ནས་ཆས་སོ། །དེ་བཱ་རཱ་ཎ་སཱིར་ཞུགས་

  984. 182b

    པ་དང་རྔོན་པ་ཞིག་རི་དགས་འཆོར་དུ་ཆས་པ་དེས་དེ་མཐོང་ནས་སྨྲས་པ། གྲོགས་པོ་ཁྱོད་དུས་འདི་སྲིད་ཅིག་ལོན་ན་གང་ནས་འདིར་འོངས། ཁྱོད་ཀྱི་བུ་སྨད་ནི་ཁྱོད་དུས་མ་ཡིན་པར་ཆར་ཞག་བདུན་བབ་པས་གཅན་གཟན་གྱིས་བསད་པར་མ་གྱུར་གྲང་ཞེས་སྐྲག་པར་གྱུར་ནས་ཤིན་ཏུ་སྨྲེ་ སྔགས་འདོན་ཏོ། །དུས་མ་ཡིན་པའི་ཆར་ཞག་བདུན་བབ་པས་བྱ་དང་། རི་དགས་ཀྱང་དུ་མ་ཤི་ན་ཁྱོད་ཇི་ལྟར་ཤོར། དེས་ཇི་ལྟར་གྱུར་པ་རྒྱས་པར་སྨྲས་པ་དང་། དེས་སྨྲས་པ། གྲོགས་པོ་དོམ་དེ་གང་ན་འདུག་པའི་ཕུག་དེ་སྨྲོས་ཤིག །དེས་སྨྲས་པ། ནེའུ་ཟླ་ཅིས་ འཚོ་ཡང་བླ། སླར་ནགས་ཁྲོད་དུ་མི་འགྲོའོ། །དེས་དེ་ལ་ཇི་ལྟར་ཁས་ལེན་པར་འགྱུར་བ་དེ་ལྟར་ཤའི་སྐལ་བ་སུམ་ཉིས་སྦྱིན་པས་བསླུས་པ་དང་ལམ་མཚོན་པའི་ཕྱིར་སོང་སྟེ། ཇི་ཙམ་ན་རིམ་གྱིས་བདག་ཉིད་ཆེན་པོའི་དོམ་དེ་གང་ན་གནས་པའི་ཕུག་དེར་ཕྱིན་ཏོ། །དེ་ནས་སྙིང་ རྗེ་མེད་པ་ལ་གནས་པ་བྱས་པ་མི་གཟོ་བས་སྨྲས་པ། ཕུག་འདི་ན་དོམ་གནས་སོ། །དེ་ནས་རྔོན་པ་ཕ་རོལ་གྱི་སྲོག་ལ་གནོད་པ་བྱེད་པས་ཕུག་དེར་མེ་བཏང་ངོ་། །དེ་ནས་བདག་ཉིད་ཆེན་པོའི་དོམ་དེ་དུ་བས་སུབས་པའི་ཡིད་དང་མིག་མཆིས་མས་གང་བས་ཚིགས་སུ་བཅད་དེ་ སྨྲས་པ། བདག་ནི་རི་ཡི་སུལ་གནས་ཏེ། །རྩ་བ་འབྲས་བུ་ཆུ་འཐུང་ཞིང་། །སེམས་ཅན་ལ་ནི་ཕན་བློ་ཡིས། །སུ་ལ་གནོད་པ་ཅི་ཞིག་བྱས། །འཆི་བའི་དུས་ལ་བབ་གྱུར་པས། །ད་ནི་ཅི་ཡང་བྱར་མེད་དེ། །ལུས་ཅན་འདོད་དང་མི་འདོད་པའི། །ལས་ཀྱི་ རྗེས་སུ་འབྲང་བར་བྱ། །ཞེས་སྨྲས་ནས་ཤིའོ། །དེ་ནས་དེ་རྣམས་ཀྱིས་བཤས་ཏེ་ཤ་བགོས་ནས་བྱས་པ་ཆུད་གཟོན་པའི་མི་དེ་ལ་སྨྲས་པ། ཤའི་སྐལ་བ་སུམ་ཉིས་ལོང་ཤིག །དེས་བླང་ངོ་ཞེས་ལག་པ་གཉིས་བརྐྱང་བ་དང་ས་ལ་ལྷུང་ངོ་། །དེ་ནས་རྔོན་པ་དེ་རྣམས་ ཀྱིས་དེ་ལྟར་མ་རུང་བ་དེ་མཐོང་ནས་ཀྱི་ཧུད་ཀྱི་ཧུད་ཅེས་སྨྲས་ཏེ། རང་རང་གི་སྐལ་བ་ཡང་བོར་ནས་དོང་ངོ་། །ཤིན་ཏུ་ཡ་མཚན་དུ་གྱུར་པ་དེ་སྐྱེ་བོའི་ཚོགས་ཆེན་པོས་ཐོས་ནས་ཕྱོགས་དེར་འདུས་སོ། །རྒྱལ་པོ་ཚངས་སྦྱིན་ཡང་ཡ་མཚན་སྐྱེས་ནས་དེ་ཉིད་དུ་འོངས་སོ། །

  985. 183a

    རི་དེའི་ཕྱོགས་གཅིག་ན་དགེ་འདུན་གྱི་གཙུག་ལག་ཁང་ཡོད་པས་དེ་ནས་རྒྱལ་པོ་ཚངས་སྦྱིན་གྱིས་དེའི་པགས་པ་བླངས་ཏེ། ཡ་མཚན་གྱི་མིག་ཕྱེ་ནས་དོན་དེ་དགེ་སློང་གི་དགེ་འདུན་ལ་རིག་པར་བྱའོ་ཞེས་དགེ་འདུན་གྱི་གཙུག་ལག་ཁང་དེར་སོང་ནས་པགས་པ་ དག་བཏིང་སྟེ། རྒན་པའི་མཐའ་ལོགས་སུ་འདུག་ནས་དགེ་འདུན་ལ་དོན་དེ་རྒྱས་པར་སྨྲས་སོ། །དེ་ན་གནས་བརྟན་དགྲ་བཅོམ་པ་ཞིག་ཡོད་པ་དེས་ཚིགས་སུ་བཅད་དེ། རྒྱལ་པོ་དེ་ལ་སྨྲས་པ། རྒྱལ་ཆེན་འདི་ནི་དོམ་མ་ལགས། །བྱང་ཆུབ་སེམས་དཔའ་གཟི་ འཆང་སྟེ། །རྒྱལ་ཆེན་འཇིག་རྟེན་གསུམ་པོ་དང་། །ཁྱོད་ཀྱིས་ཀྱང་ནི་མཆོད་འོས་ལགས། །རྒྱལ་པོས་བསམས་པ། འདི་ལ་མཆོད་པ་བྱའོ་སྙམ་མོ་དགེ་སློང་རྣམས་ཀྱིས་སྨྲས་པ། ལྷ་འདི་ནི་བསྐལ་པ་བཟང་པོའི་བྱང་ཆུབ་སེམས་དཔའ་ལགས་ཀྱིས་འདི་ལ་མཆོད་ པ་མཛོད་ཅིག །དེ་ནས་རྒྱལ་པོ་ཚངས་སྦྱིན་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་དང་བཅས་པས་དྲིའི་ཤིང་ཐམས་ཅད་བླངས་ཏེ། ཕྱོགས་དེར་དོང་ནས་དེའི་ཤ་དང་། ཀེང་རུས་ཐམས་ཅད་ཕུང་པོ་གཅིག་ཏུ་བྱས་ནས་སྨྲས་ པ། ཤེས་ལྡན་དག་དྲིའི་ཤིང་ཐམས་ཅད་སྤུངས་ལ་སྤུངས་ཟིན་ནས་སྲེགས་ཤིག །དེ་དྲིའི་ཤིང་ཐམས་ཅད་ཀྱིས་སྤུངས་ཏེ་སྤུངས་ནས་བཀུར་སྟི་ཆེན་པོ་བྱས་ཏེ་བསྲེགས་ནས་ཕྱོགས་དེ་ཉིད་དུ་མཆོད་རྟེན་ཆེན་པོ་བྱེད་དུ་བཅུག་སྟེ། གདུགས་དང་། རྒྱལ་མཚན་དང་། བ་དན་བཏགས་ནས་དུས་མཆོད་ཆེན་པོ་བཙུགས་སོ། །དེ་ལ་བྱ་བ་བྱས་པ་གང་ཡིན་པ་དེ་ཐམས་ཅད་ཀྱང་མཐོ་རིས་སུ་གཞོལ་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དོམ་གང་ཡིན་པ་དེ་ནི་ང་ཡིན་ནོ། །དེའི་ཚེ་དེའི་དུས་ཀྱི་མི་བྱས་པ་ ཆུད་གཟོན་པ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་། བྱས་པ་

  986. 183b

    མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་མི་དབུལ་པོ་ཞིག་ཡོད་པ་དེ་ཤིང་བཙོང་ཞིང་བཙོངས་པས་འཚོ་བར་བྱེད་དོ། །དེ་དུས་གཞན་ཞིག་ན་ནང་པར་སྔར་ལངས་ཏེ་སྟ་རེ་དང་ཁུར་ཤིང་བླངས་ཏེ་ཤིང་གི་ཕྱིར་ནགས་ཁྲོད་དུ་སོང་བ་དང་། རི་དེའི་ ཕྱོགས་ཤིང་རྣམ་པ་སྣ་ཚོགས་ཀྱི་ནགས་སྟུག་པོ་མེ་ཏོག་དང་འབྲས་བུ་སྣ་ཚོགས་ཀྱིས་རྒྱས་པ་ཞིག་ཡོད་པ་དེ་ན་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་དོམ་རྣམས་ཀྱི་ནང་དུ་སྐྱེས་པ་ཞིག་ཡོད་དོ། །ཇི་ཙམ་ན་ཤིང་ཐུན་དེ་ཤིང་འཚོལ་བ་ན་ཕྱོགས་གཞན་ཞིག་ནས་ སྟག་གིས་གཙེས་ཏེ་འཆི་བའི་འཇིགས་པས་སྐྲག་ནས་སྟེས་དབང་གི་ཤིང་གང་ལ་བྱང་ཆུབ་སེམས་དཔའ་དོམ་དེ་གནས་པའི་ཤིང་དེ་ལ་འཛེགས་པ་ལས་དེས་དེ་མཐོང་ནས་ལྷག་པར་སྐྲག་པར་གྱུར་པ་དང་། བདག་ཉིད་ཆེན་པོ་དེས་དབུགས་ཕྱུང་ནས་བཟུང་སྟེ་པང་དུ་བཞག་གོ། ། སྟག་དེ་ཡང་ཁ་ཟས་ལ་ཞེན་པས་ཤིང་དྲུང་དེ་ཉིད་མི་གཏང་བར་སྨྲས་པ། ཀྱེ་བདག་ཉིད་ཆེན་པོ་མི་མགོ་ནག་འདི་རྣམས་ནི་བྱས་པ་མི་གཟོ་བ་ཡིན་གྱིས་འོར་ཅིག་དང་དེ་ཟོས་ཏེ་འགྲོའོ། །མི་གཞན་ཕལ་ཆེར་སྐྱབས་སུ་འོངས་པ་ལ་བྱམས་ན། བྱང་ཆུབ་སེམས་དཔའ་རྣམས་ལྟ་ སྨོས་ཀྱང་ཅི་དགོས་པས་དེས་སྨྲས་པ། འདི་བདག་ལ་སྐྱབས་སུ་འོངས་པས་བདག་གིས་མི་དོར་རོ། །འོན་ཀྱང་སྟག་དེ་ཤ་དང་ཁྲག་འདོད་པས་དེ་ཉིད་དུ་འདུག་གི་མ་སོང་ངོ་། །དེ་ནས་དོམ་དེས་མི་དེ་ལ་སྨྲས་པ། བུ་ཁོ་བོ་ངལ་གྱིས་རེ་ཞིག་ཁྱོད་འདུག་ཤིག་དང་ཁོ་བོ་ངལ་སོས་ པར་བྱའོ། །དེ་དེའི་པང་དུ་འདུག་ནས་ངལ་བ་དང་དུབ་པས་གཉིད་ལོག་གོ། །སྟག་གིས་སྨྲས་པ། ཀྭའི་མི་ཁྱོད་དུས་ཇི་སྲིད་ཞིག་ཏུ་འདིར་འདུག །འོ་ནི་མར་འོར་ཅིག་དང་ཟོས་ལ་འགྲོའོ། །དེ་ནས་ཁྱོད་ཅི་བདེར་སོང་ཤིག །སྙིང་རྗེ་མེད་པ་སྡིག་པའི་ལས་ཅན་འཇིག་ རྟེན་ཕ་རོལ་ཡལ་བར་བོར་བ་དེས་བསམས་པ། བདག་གིས་དུས་ཇི་སྲིད་ཞིག་ཏུ་འདིར་གནས་པར་བྱས་དེས་སྨྲས་པ། ལེགས་ཀྱིས་དོར་རོ་སྙམ་ནས་དེས་དེ་བོར་བ་དང་བདག་ཉིད་ཆེན་པོ་དེས་བོར་བ་ན་སྨྲས་པ། ཀྱེ། མིན། ཚིག །དེས། ཀྱི། ཅི། སེ། ངན། བསྟེན།

  987. 184a

    གྲོ་ཞེས་སྨྲས་ཏེ་ལྷུང་ནས་སྟག་གིས་ཚུལ་མ་ཡིན་པས་བསད་དོ། །མི་དེས་བསམས་ཏེ་སྨྲས་པ། དེ་ཐོས་ནས་བསམས་པ། འདིས་བདག་ལ་ཇི་ཞིག་བགོ་བཤའ་བྱ་བར་འདོད་དེ། གང་གི་ཕྱིར་འདི་སྐད་ཅེས་སྨྲས་སོ་སྙམ་ནས། དེ་སྲེད་པས་ལྡོངས་ བས་བླ་བར་གྱུར་ཏེ། དེ་སེམས་འཁྲུགས་ཤིང་སྨྱོས་ནས་དེ་དང་དེ་དག་ཏུ་འཁྱམ་པ་ན་འདི་སྐད་ཅེས་ཀྱེ། མིན། ཚིག །དེས། ཀྱི། ཅི། སེ། ངན། བསྟེན། གྲོ་ཞེས་སྨྲའོ། །དེ་གཉེན་རྣམས་ཀྱིས་ཁྱིམ་དུ་ཁྲིད་ན་དེ་བཞིན་དུ་བླ་ཞིང་འདུག་གོ། །དེ་རྣམས་ཀྱིས་འབྱུང་པོའི་དཔྱད་བྱ་བའི་ རིག་སྔགས་དང་། གསང་སྔགས་འཆང་དང་། གཞན་ཡང་དགེ་སྦྱོང་དང་། བྲམ་ཟེ་དང་། སྙིང་དུ་སྡུག་པ་དང་། ཉེ་དུ་དང་། རྩ་ལག་རྣམས་ལ་དྲིས་ན། དེ་རྣམས་རྣམ་པ་ཕལ་མོ་ཆེར་སྨྲ་ཞིང་དཔྱད་ནི་ཆུང་ཟད་ཀྱང་མི་བྱེད་དོ། །དེའི་ཚེ་བཱ་རཱ་ཎ་སཱི་དང་ཧ་ཅང་ཡང་མི་རིང་བའི་བསྟི་ གནས་ཤིང་རྣམ་པ་སྣ་ཚོགས་ཀྱི་ནགས་སྟུག་པོ་འབྲས་བུ་དང་། མེ་ཏོག་དང་། ཆུ་ཕུན་སུམ་ཚོགས་པ། བྱ་དུ་མ་སྐད་འབྱིན་པས་མཛེས་པར་བྱས་པ་ཞིག་ཡོད་པ་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ཞིག་གནས་སོ། །མི་དེའི་གཉེན་རྣམས་ཀྱིས་མི་དེ་ཁྲིད་དེ་དྲང་སྲོང་དེའི་ གན་དུ་དོང་ནས་རྐང་པ་གཉིས་ལ་གཏུགས་ཏེ་སྨྲས་པ། དྲང་སྲོང་ཆེན་པོ་བདག་ཅག་གི་གཉེན་འདི་ཡང་དང་ཡང་འདི་སྐད་དུ་བླ་བ་འདི་ལ་ཇི་ལྟར་བགྱི། དེས་སྨྲས་པ། སེམས་ཅན་འདི་ནི་སྡིག་པ་བྱེད་པ་ཡིན་ཏེ། རང་བཞིན་ངན་པ་འདིས་བྱང་ཆུབ་སེམས་དཔའ་ཕན་འདོགས་ འདོགས་པ་སྟག་གི་མདུན་དུ་བོར་རོ། །བདག་ཉིད་ཆེན་པོ་དེས་ནི་འདི་ལ་ཆོས་བཤད་པར་བྱའོ་སྙམ་དུ་བསམས་ན་འདིས་དེ་བོར་ཏེ། དེ་བོར་བ་ན་མྱ་མྱོ་ཁྱེར་ཏེ་ཚིགས་སུ་བཅད་པ་བཅུ་ལས་ཡི་གེ་རེ་རེ་ཞིག་དྲན་པ་ནི་ཀྱེ། མིན། ཚིག །དེས། ཀྱི། ཅི། སེ། ངན། བསྟེན། གྲོ་ཞེས་བྱ་བ་ཡིན་ནོ། །དྲང་སྲོང་དེའི་སློབ་མ་ཞིག་གིས་སྨྲས་པ། མཁན་པོ་རེ་ཤིག་ཚིགས་སུ་བཅད་པ་དེ་རྣམས་ཇི་ལྟ་བུ་ལགས་པ་གསུངས་ཤིག །དྲང་སྲོང་དེས་རིམ་བཞིན་དུ་ཚིགས་སུ་བཅད་པ་དེ་རྣམས་སྨྲ་བར་བརྩམས་པ། ཀྱེ་མ་ཀྱི་ཧུད་འཇིག་རྟེན་འདིར། །

  988. 184b

    ཆོས་མ་ཡིན་པ་མི་བཟད་དེ། །ཚོགས་པར་མི་དབྱུང་མི་རྣམས་ལ། །གྲོགས་པོ་གསོད་པར་བྱེད་པ་ཡོད། །གྲོགས་གསོད་གནས་སྐབས་གང་དུ་ཡང་། །བདེ་བར་འགྱུར་བ་མ་ཡིན་ཏེ། །སྟན་ལ་མ་ཡིན་ལམ་དུ་མིན། །འདུག་མིན་འཆག་པ་ན་ཡང་མིན། ། དེ་ལྷུང་སྙིང་ནི་རྗེ་རྗེ་སྐད། །འདི་ལ་ཚིག་ཏུ་སྨྲས་པ་གང་། །དེས་ནི་སེམས་ཅན་བློ་ངན་པོ། །ཇི་ལྟར་ཁན་ད་འབར་བཞིན་སྲེག །ཤིན་ཏུ་མི་བཟད་ལས་བྱས་པ། །ངེས་ཁྱོད་འཇིག་རྟེན་ཕ་རོལ་དུ། །སྡུག་བསྔལ་རེག་པའི་ཚོར་བ་ནི། །སིམ་པ་མ་ཡིན་མྱོང་ བར་འགྱུར། །ཐ་ཤལ་བས་ཀྱང་ཐ་ཤལ་ཁྱོད། །ངུ་འབོད་ཤིན་ཏུ་མི་བཟད་པར། །ཀྱི་ཧུད་ཀྱི་ཧུད་ཅེས་སྒྲོགས་པའི། །སྡུག་བསྔལ་ངན་པ་ཆེན་པོ་འཐོབ། །མི་དགེའི་ལས་ཅན་གཏུམ་དེ་ལ། །དེ་ཡིས་ཅི་ཞིག་བྱས་གྱུར་ན། །ཚོགས་པར་མི་འབྱུང་མི་ རྣམས་ལས། །གྲོགས་པོ་གསོད་པར་བྱེད་པ་ཡོད། །ཆོས་འཇིག་བྱེད་པ་མི་བཟད་པའི། །སེམས་ནི་སྡིག་པ་ཡིན་པར་ཤེས། །ཁྱོད་ཀྱིས་དོམ་ལ་སྡིག་པ་དང་། །སྟག་ལ་གང་བྱས་དྲན་པར་གྱིས། །བློ་ངན་ཁྱོད་ཀྱིས་ཇི་ལྟ་བུར། །གྲོགས་ལ་བྱ་བ་མི་ ཤེས་ཏེ། །གསོད་པར་བྱེད་པས་གསོད་འཐོབ་ལ། །ཤ་འཁོན་ཅན་གྱིས་འཁོན་རྣམས་མཐོང་། །སྟག་གི་འཇིགས་ཆེན་བྱུང་བ་ན། །ཁྱོད་ནི་ཡུན་རིང་བསྟེན་བྱས་ཤིང་། །ཉལ་བ་ན་ཡང་ཁྱོད་བསྲུངས་ན། །ཁྱོད་ཀྱིས་དེ་ནི་མ་བསྲུངས་སོ། །གྲོགས་འཁུ་ཁ་ ན་མཐོ་ཆེར། །ཆོས་སྨྲ་བ་རྣམས་རྗོད་བྱེད་དོ། །བློ་ངན་ལུས་ནི་ཞིག་གྱུར་ནས། །དམྱལ་བ་རྣམས་སུ་སྐྱེ་བར་འགྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དོམ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱས་ པ་ཆུད་གཟོན་པའི་མི་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་། བྱས་པ་མི་ཚོར་བ་ཡིན་ནོ།། །།

  989. 185a

    འདུལ་བ་གཞི། བམ་པོ་དགུ་བཅུ་རྩ་དགུ་པ། གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་ཡུལ་ཤི་བིའི་དབྱངས་ཀྱི་རྒྱལ་པོའི་ཕོ་བྲང་ན་རྒྱལ་པོ་ཤི་བི་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །རྒྱལ་པོ་དེ་ཡང་དད་པ་བཟང་བ། དགེ་བའི་བསམ་པ་ཅན། བདག་ལ་ཕན་པ་དང་། གཞན་ལ་ཕན་པར་ཞུགས་པ། སྙིང་རྗེ་ཅན། བདག་ཉིད་ཆེན་པོ་ཆོས་འདོད་པ། སྐྱེ་དགུ་རྣམས་ལ་བྱམས་ པ། ཐམས་ཅད་རབ་ཏུ་སྦྱིན་པ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། གཏོང་བ་ཆེན་པོ་ལ་གནས་པ་ཞིག་ཡིན་ཏེ། དེ་འདི་ལྟ་སྟེ་དགེ་སྦྱོང་དང་། བྲམ་ཟེ་དང་། བཀྲེས་པ་དང་། ཕོངས་པ་དང་། འགྲོ་བར་ཆས་པའི་སློང་བ་རྣམས་ལ་སྦྱིན་ པར་ཡོངས་སུ་མི་གཏོང་བ་ཅི་ཡང་མེད་དེ། ལྷག་པར་ཡང་ནད་པ་རྣམས་ལ་སྦྱིན་ནོ། །རྒྱལ་པོ་དེའི་ཀུན་ཏུ་སྤྱོད་པ་ནི་ནང་པར་སྔར་ལངས་ནས་ཕ་དང་མ་གཉིས་ལ་ཕྱག་བྱས་ཏེ་ནད་པ་ལ་བལྟས་ནས་དགོས་པའི་ཆེད་ཀྱི་ཕྱིར་འདུག་པར་བྱེད་དོ། །ཇི་ཙམ་ན་མི་ནད་པ་སྨན་པ་ཐམས་ ཅད་ཀྱིས་བོར་བ་འཚོ་བའི་རེ་བ་མེད་ལ་འཆི་བ་ལ་མངོན་དུ་ཕྱོགས་པ་ཞིག་དེ་དང་དེ་དག་ཏུ་འཁྱམ་ཞིང་ཤི་བིའི་དབྱངས་ཀྱི་རྒྱལ་པོའི་ཕོ་བྲང་དུ་ཕྱིན་ཏོ། །དེའི་ཚེ་རྒྱལ་པོ་ཤི་བི་སོ་གའི་དུས་ལ་བབ་སྟེ། མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་སྒྲ་འབྱིན་པའི་ནགས་ཚལ་སྟུག་པོའི་སྐྱེད་མོས་ཚལ་གྱི་སར་བཙུན་མོས་ཡོངས་སུ་བསྐོར་ཏེ་ཆས་སོ། །ནད་པ་དེ་ཡང་ཚོར་བ་དྲག་པོས་གདུངས་པས་ཡིད་མི་བདེ་བ་སྐྱེས་ཤིང་ལུས་ཀྱི་དབུགས་ནི་བརྫགས། མིག་ནི་མཆི་མས་གང་བཞིན་ ལག་པ་ཁར་བ་ལ་བརྟེན་ནས་དལ་བུས་རྒྱལ་པོའི་དྲུང་དུ་སོང་ནས་མགོ་བོས་ཕྱག་བྱས་ཏེ་སྨྲས་པ། ལྷ་བདག་བྲོ་ནད་འདི་ལས་ཡོངས་སུ་བསྐྱབ་ཏུ་གསོལ། སྲོག་སྩལ་དུ་གསོལ། དེ་ནས་ཤི་བིའི་རྒྱལ་པོས་ནད་པ་དེའི་ཚིག་སྙིང་རྗེ་རྗེ་སྐད་དུ་དལ་བུས་ཡི་གེ་རེ་རེ་ནས་སྨྲས་པ་ཐོས་ནས་སྙིང་

  990. 185b

    རྗེས་ཀུན་ནས་བསྐྱོད་པའི་སེམས་ཀྱིས་དེ་ཉིད་ནས་སླར་ལོག་སྟེ། བློན་པོ་རྣམས་ལ་སྨྲས་པ། ཤེས་ལྡན་དག་ངའི་ཡུལ་ན་གནས་པའི་སྨན་པ་རྣམས་ཁུག་ཅིག །དེ་རྣམས་ཀྱིས་སྨན་པ་ཐམས་ཅད་བཀུག་སྟེ་རྒྱལ་པོ་ལ་ཕུལ་ལོ། །དེ་ནས་རྒྱལ་པོས་མི་དེ་བཀུག་ནས་སྨྲས་པ། ཤེས་ལྡན་ དག་མི་འདིའི་དཔྱད་གྱིས་ཤིག །སྨན་པ་རྣམས་ཀྱིས་དཔྱད་དེ་བློ་གྲོས་གཅིག་ཏུ་བྱས་ནས་སྨྲས་པ། ལྷ་འདིའི་སྨན་དཀོན་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེའི་སྨན་ཅི་འདྲ་བ་ཞིག་ཡིན། སྨན་པ་རྣམས་ཀྱིས་སྨྲས་པ། ལྷ་སྐྱེས་པ་ཐོག་མ་བཙས་ནས་སུ་ལ་ཡང་ཁྲོམ་ མྱོང་བ་གང་ལགས་པ་དེའི་ཁྲག་གིས་ནས་ཐུག་སྦྱར་ནས་གལ་ཏེ་འཚལ་དུ་སྩལ་ན་འདི་སོས་པར་འགྱུར་ལགས་ཀྱི་གཞན་དུ་མ་ལགས་སོ། །རྒྱལ་པོས་ཐོས་ནས་བསམས་པ། བདག་གིས་ནི་འདི་འདྲ་བའི་སྡུག་བསྔལ་གྱིས་ཉེན་པ་གཞན་དག་ཞི་བར་བྱེད་མི་ནུས་པའི་རྒྱལ་སྲིད་ཀྱི་དབང་ཕྱུག་ གམ། འཚོ་བ་འདི་ལྟ་བུ་བདག་ལ་ཅི་དགོས་ཞེས་དེ་སྙམ་དུ་བསམས་ནས། རྒྱལ་པོ་རང་གི་རྒྱུད་ལ་བརྟག་པར་བརྩམས་ནས་དེས་མ་མ་ལ་སྨྲས་པ། ང་སྔོན་སུ་ལ་ལན་འགའ་ཁྲོས་པ་ཡོད་དམ། དེས་སྨྲས་པ། ལྷ་གང་གི་ཚེ་ཁྱོད་བདག་གིས་པང་དུ་བླངས་པ་དེའི་ཚེ་ནས་བདག་ཀྱང་སུ་ལ་ ཡང་ཁྲོ་མ་མྱོང་ན་ཁྱོད་ལྟ་སྨོས་ཅི་འཚལ། དེ་ནས་མའི་དྲུང་དུ་སོང་སྟེ་སྨྲས་པ། ཡུམ་བདག་སྔོན་སུ་ལ་ཡང་ལན་འགའ་ཁྲོས་པ་མ་མཆིས་སམ། དེས་སྨྲས་པ། བུ་ཁྱོད་གང་གི་ཚེ་ཁོ་མོའི་རུམ་དུ་ཞུགས་པ་དེའི་ཚེ་ནས་བདག་ཀྱང་སུ་ལ་ཡང་ཁྲོམ་མྱོང་ན་ཁྱོད་ལྟ་ཞིག་ཅི་སྨོས། རྒྱལ་པོས་བསམས་པ། ད་ནི་སྨན་རྙེད་དོ་སྙམ་ནས་དེས་སྨན་པ་དེ་རྣམས་ལ་སྨྲས་པ། ངའི་ལུས་ཀྱི་ཡན་ལག་ལྔའི་རྩ་གཏུབས་ཤིག །དེ་རྣམས་ཀྱིས་སྨྲས་པ། ལྷ་བདག་ཅག་ནི་མི་ཕལ་པའི་ཆེད་དུ་ལྷའི་སྐུ་ལ་མཚོན་གྱིས་མི་འདེབས་སོ། །བྱང་ཆུབ་སེམས་དཔའ་རྣམས་ནི་བཟོའི་ གནས་དང་ལས་ཀྱི་གནས་དེ་དང་དེ་དག་ལ་མཁས་པ་ཡིན་པས་དེས་རང་ཉིད་ཀྱི་ལུས་ཀྱི་ཡན་ལག་ལྔའི་རྩ་གཏར་ཏེ། ཁྲག་གིས་རྫེའུ་བཀང་ནས་དེས་ནས་ཐུག་སྦྱར་ཏེ་བླུད་དོ། །རྒྱལ་པོ་དེ་ལ་རྗེས་སུ་ཆགས་པའི་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་

  991. 186a

    རྣམས་ངུ་བ་ལ་ཞུགས་སོ། །ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་ཀྱིས་ཀྱང་འཕྱ་བར་བརྩམས་ཏེ་མི་ཕལ་པ་གཅིག་གི་ཕྱིར་འདི་སྙེད་ཀྱི་སེམས་ཅན་འདོར་བ་ལྟ་ཅི་ཐ་ཚིག་ཅེས་གླེང་ངོ་། །དེ་ནས་རྒྱལ་པོས་སྐྱེ་བོའི་ཚོགས་དེ་དབུགས་ཕྱུང་ནས་ཐབས་དེས་ ཟླ་བ་དྲུག་ཏུ་ལུས་ཀྱི་ཡན་ལག་ལྔའི་རྩ་གཏར་ཏེ། གཏར་ནས་ནས་ཐུག་བླུད་དོ། །རྒྱལ་པོ་ཤི་བིའི་ལུས་དེ་ཚགས་འདྲ་བར་གྱུར་ནས་གཟི་བྱིན་ཡོངས་སུ་ཉམས་སོ། །གནས་གཙང་མའི་རིས་ཀྱི་ལྷ་རྣམས་ཀྱིས་བསམས་པ། འདི་ནི་བསྐལ་པ་བཟང་པོའི་བྱང་ཆུབ་སེམས་དཔའ་ ཡིན་ཏེ། གལ་ཏེ་ཡོངས་སུ་ཉམས་ནམ་ལེགས་སོ་སྙམ་ནས་དེ་རྣམས་དེ་ལ་ཉི་མ་རེ་རེ་ཞིང་གཟི་བྱིན་སྒྲུབ་པར་བྱེད་དེ་དེས་དེ་འཚོའོ། །གང་གི་ཚེ་མི་དེའི་ནད་དེ་ཞི་བར་གྱུར་པ་དེའི་ཚེ་རྒྱལ་པོ་ཤི་བིས་གྲོང་རྡལ་མཆོག་ལྔ་བྱིན་ནས་བཱ་རཱ་ཎ་སཱི་ན་གཙོ་བོར་བཀུར་བར་གྱུར་ཏོ། །མཐའ་དག་ཏུ་ སྒྲ་གྲགས་པ་རྒྱལ་པོ་ཤི་བིའི་ལུས་ཀྱི་ཡན་ལག་ལྔའི་རྩ་གཏུབས་པའི་ཁྲག་གིས་ནད་པའི་རིམ་གྲོ་དུས་འདི་སྲིད་ཅིག་བྱས་པས་དེ་ཡང་སོས་པར་གྱུར་ཏོ། །གང་ཡང་ཡ་མཚན་སྐྱེས་པའི་སེམས་ཅན་རྣམས་ལྷགས་ནས་མི་དེ་ལ་དྲིས་པ། ཀྱེ་ནང་རྗེ་ཁྱོད་ལ་རྒྱལ་པོ་ཤི་བིས་དུས་འདི་སྲིད་ ཅིག་རིམ་གྲོ་བྱས་སོ་ཞེས་གྲག་ན་བདེན་ནམ། དེས་སྨྲས་པ། བདག་ལ་དེས་ཅི་ཞིག་བྱས། ངན་ཁྲག་ལྟ་ཞིག་ས་ལ་ཕོ་འམ་གཞན་ལ་བྱིན་ཡང་རུང་སྟེ་ངོ་མཚར་ཅི་ཞིག་ཆེ། དེ་སྐད་ཅེས་སྨྲས་མ་ཐག་ཁོ་ནར་དེའི་ཁྱིམ་དུ་མེ་བྱུང་ནས་དེས་དེའི་ཁྱིམ་དང་ནོར་ཐམས་ཅད་ཚིག་པར་གྱུར་ཏོ། ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཤི་བི་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱས་པ་ཆུད་གཟོན་པའི་མི་གང་ཡིན་པ་དེ་ནི་ལྷས་བྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་ བ་དང་བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཕོ་བྲང་ཞིག་ན་རྒྱལ་པོ་ཞིག་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་སྲིད་

  992. 186b

    བྱེད་དུ་འཇུག་གོ། །དེ་དུས་གཞན་ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད་དེ། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ ན་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པགས་པའི་མདོག་གསེར་འདྲ་བ། མགོ་གདུགས་ལྟར་འདུག་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་ བཙས་ཏེ། དེ་བཙས་པ་ན་དགེ་བ་སྟོང་ཕྲག་དུ་མ་བྱུང་བར་གྱུར་ཏོ། །དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དེ། བློན་པོ་རྣམས་ཀྱིས་སྨྲས་པ། ལྷ་འདི་བཙས་པས་ན་དགེ་བ་སྟོང་ཕྲག་དུ་མ་བྱུང་བས་ཁྱེའུ་མིང་དགེ་བྱེད་དུ་ གདགས་སོ་ཞེས་དེའི་མིང་དགེ་བྱེད་དུ་བཏགས་ཏེ། ཁྱེའུ་དགེ་བྱེད་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དེ། དེ་མ་མ་བརྒྱད་པོ་དག་གིས་ འོ་མ་དང་། ཞོ་དང་། མར་དང་། ཞུན་མར་གྱི་སྙིང་པོ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །རྒྱལ་པོ་དེ་ཡང་བཙུན་མོ་དང་ལྷན་ཅིག་རྩེ་བར་བྱེད་དེ། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་ཏེ། དེ་བཙས་པ་ན་མི་དགེ་བ་སྟོང་ཕྲག་དུ་མ་བྱུང་ ནས་དེའི་མིང་ནི་སྡིག་བྱེད་ཅེས་བྱ་བར་བཏགས་ཏེ། དེ་ཡང་བསྲིངས་བསྐྱེད་དེ་ཆེན་པོར་གྱུར་ཏོ། །གཞོན་ནུ་དགེ་བྱེད་ནི་བྱམས་པའི་བདག་ཉིད་སྙིང་རྗེ་ཅན་སེམས་ཅན་ཐམས་ཅད་ལ་བརྩེ་བ་ཅན། སྦྱིན་འདོད་པ། སྦྱིན་པ་ལ་དགའ་བ་ཡིན་པས་དེ་དགེ་སྦྱོང་དང་། བྲམ་ཟེ་

  993. 187a

    དང་། བཀྲེན་པ་དང་། ཕོངས་པའི་སློང་བ་རྣམས་ལ་སྦྱིན་པ་གཏོང་བར་བྱེད་དོ། །ཕས་དེ་ལ་སྨྲས་པ། བུ་ཁྱོད་རྟག་ཏུ་སྦྱིན་པ་མ་གཏོང་ཞིག །དེ་ལྟར་བཏང་ན་རེ་ཞིག་འུ་བུ་ཅག་ལ་ནོར་གྱི་རིགས་དེ་རྙེད་ག་ལ་ཡོད། འདི་ནི་ཆོས་ཉིད་ཡིན་ཏེ་སྦྱིན་ པ་པོ་དང་སྦྱིན་བདག་ལ་སྐྱེ་བོ་མང་པོ་དགའ་བ་དང་ཡིད་དུ་འོང་བར་འགྱུར་ཞིང་ཕྱོགས་དང་ཕྱོགས་མཚམས་རྣམས་སུ་ཡང་དེའི་གྲགས་པ་དང་། སྒྲ་དང་། ཚིགས་སུ་བཅད་པ་དང་། བཟང་པོ་འབྱུང་བ་ཡིན་པས་ཡུལ་གཞན་གྱི་རྒྱལ་པོ་ཞིག་གིས་དེའི་ཡོན་ཏན་ གྱི་བདག་ཉིད་ཆེན་པོ་ཐོས་ནས་བུ་མོ་སྦྱིན་ནོ། །རྒྱལ་པོས་དེ་དཔལ་གྱི་འབྱོར་པ་ཆེན་པོས་བསུ་བར་བྱས་པ་དང་། དགེ་བྱེད་ཀྱིས་སྨྲས་པ། རེ་ཞིག་ནོར་མ་བསྒྲུབས་ཀྱི་བར་དུ་བདག་མཆིས་འབྲང་མི་འཚལ་གྱིས། ཡབ་རྒྱ་མཚོ་ཆེན་པོར་འཇུག་པར་གནང་བའི་རིགས་ སོ། །དེས་སྨྲས་པ། དེ་བཞིན་དུ་གྱིས་ཤིག །དེ་ཟོང་ཐོགས་ཏེ་རྒྱ་མཚོ་ཆེན་པོར་ཆས་པ་ན་དེའི་ནུ་བོ་སྡིག་བྱེད་གང་ཡིན་པ་དེས་བསམས་པ། འདི་སྐྱེ་བོ་མང་པོ་སྡུག་པ་དང་། ཡིད་དུ་འོང་བ་ཡིན་ཏེ། གལ་ཏེ་ཡང་རྒྱ་མཚོ་ཆེན་པོའི་གྲུ་གྲུབ་སྟེ་སླར་འོངས་ནས་ལྷག་ པར་ཡང་སྐྱེ་བོ་མང་པོ་སྡུག་པ་དང་ཡིད་དུ་འོང་བར་འགྱུར་ཞིང་དེས་ན་ཕ་འདུག་བཞིན་དུ་རྒྱལ་སྲིད་ཀྱི་དབང་ཕྱུག་ལ་དབང་བྱེད་དུ་བཅུག་པར་འགྱུར་བའི་གནས་གང་ཡིན་པ་འདི་ཡོད་ཀྱིས། འདིར་ཡོང་ཅིའི་དུས་ལ་བབ་ཅེ་ན། བདག་ཀྱང་དེ་དང་ལྷན་ཅིག་རྒྱ་མཚོ་ཆེན་པོར་ཞུགས་ ལ་དེར་འདི་སྲོག་དང་ཕྲལ་ན། བདག་མི་འདོད་བཞིན་དུ་ཡང་རྒྱལ་ཚབ་ཏུ་དབང་བསྐུར་བར་འགྱུར་རོ་སྙམ་དུ་བསམས་ནས་ཕའི་དྲུང་དུ་སོང་སྟེ་སྨྲས་པ། ལྷ་དགེ་བྱེད་རྒྱ་མཚོ་ཆེན་པོར་མཆི་ན་བདག་ཀྱང་དེ་དང་ལྷན་ཅིག་མཆིའོ། །དེས་སྨྲས་པ། དེ་བཞིན་དུ་གྱིས་ ཤིག །དེ་ནས་དགེ་བྱེད་ཀྱིས་རང་གི་ཡུལ་དུ་དྲིལ་སྒྲོགས་སུ་བཅུག་པ། གྲོང་ཁྱེར་ན་གནས་པའི་ཚོང་པ་ཤེས་ལྡན་དག་ཉོན་ཅིག །གཞོན་དུ་དགེ་བྱེད་ཟོང་ཐོགས་ཏེ་རྒྱ་མཚོ་ཆེན་པོར་འཇུག་གིས། དེད་དཔོན་དགེ་བྱེད་དང་ལྷན་ཅིག་རྒྱ་མཚོ་ཆེན་པོར་འཇུག་པར་ཁྱེད་ཅག་

  994. 187b

    ལས་སུ་སྤྲོ་བ་དེ་ཤོ་གམ་དང་། ལ་གཅན་དང་། གྲུ་བཙས་མེད་པར་འགྱུར་གྱིས། རྒྱ་མཚོ་ཆེན་པོར་འདོང་བའི་ཟོང་སྟ་གོན་གྱིས་ཤིག །ཚོང་པ་བརྒྱ་ཕྲག་དུ་མས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། །དེ་ནས་དེད་དཔོན་དགེ་བྱེད་ནུ་བོ་སྡིག་བྱེད་དང་ལྷན་ཅིག་དགེ་ མཚན་དང་བདེ་ལེགས་སུ་འགྱུར་བ་དག་བྱས་ནས་ཚོང་པ་བརྒྱ་ཕྲག་དུ་མས་ཡོངས་སུ་བསྐོར་ཏེ། ཤིང་རྟ་དང་། ཁུར་དང་། གཟེབ་དང་། པང་ཚད་དང་། རྔ་མོ་དང་། བ་ལང་དང་། བོང་བུ་དག་གིས་རྒྱ་མཚོ་ཆེན་པོར་འཇུག་པའི་ཟོང་མང་པོ་ཁྱེར་ནས་ཆས་ཏེ་དེ་རིམ་གྱིས་ གྲོང་རྡལ་དང་། གྲོང་ཁྱེར་དང་། ཡུལ་དང་། རྒྱལ་པོའི་ཕོ་བྲང་དང་། ཚོང་རྡལ་རྣམས་ལ་ལྟ་ཞིང་རྒྱ་མཚོ་ཆེན་པོའི་འགྲམ་དུ་ཕྱིན་ནས། དེས་ཀཱརྵཱ་པ་ཎ་ལྔ་བརྒྱས་གྲུ་ཉོས་ཏེ་ཞོ་ཤས་འཚོ་བ་ལྔ་པོ་སྟོབས་པར་བྱེད་པ་དང་། སེལ་བར་བྱེད་པ་དང་། རྐྱལ་ཆེན་པ་དང་། གྲུ་ པ་དང་། རླུང་ཡོར་ཐོགས་པ་ཁྲིད་ནས་ལན་གསུམ་དུ་དྲིལ་བསྒྲགས་ཏེ་རྒྱ་མཚོ་ཆེན་པོར་ཞུགས་ནས་གྲུ་སྤངས་པ་ན་ནུ་བོ་སྡིག་བྱེད་ལ་སྨྲས་པ། གལ་ཏེ་རྒྱ་མཚོ་ཆེན་པོའི་དབུས་སུ་གྲུ་ཆག་པར་གྱུར་ནམ་རྟབས་པར་ངའི་མགུལ་དུ་འཇུས་ཤིག །དེས་སྨྲས་པ། ལེགས་ཀྱིས་ དེ་བཞིན་དུ་བགྱིའོ། །ཇི་ཙམ་ན་གྲུ་དེ་རྗེས་སུ་མཐུན་པའི་རླུང་གིས་རིན་པོ་ཆེའི་གླིང་དུ་ཕྱིན་ནས་རླུང་ཡོར་ཐོགས་པས་སྨྲས་པ། འཛམ་བུའི་གླིང་གི་ཚོང་པ་ཤེས་ལྡན་དག་ཉོན་ཅིག །རིན་པོ་ཆེའི་གླིང་ཞེས་བྱ་བ་རྡོ་རྗེ་དང་། བཻ་ཌཱུརྱ་དང་། ཨིནྡྲ་ནཱི་ལ་དང་། མ་རྒད་ལ་སོགས་ པའི་རིན་པོ་ཆེ་སྣ་ཚོགས་ཀྱི་འབྱུང་གནས་ཤིག་ཡོད་དོ་ཞེས་ཐོས་པ་གང་ཡིན་པ་དེར་ཡུ་བུ་ཕྱིན་གྱིས། རིན་པོ་ཆེ་ཅི་འདོད་པ་ལོང་ཤིག །དེ་ནས་དེ་རྣམས་དགའ་བ་དང་མགུ་བས་བརྟགས་ཤིང་བརྟགས་ནས་རིན་པོ་ཆེ་རྣམས་ཀྱིས་གྲུ་དེ་དཔེར་ན་ཏིལ་ལམ། འབྲས་སམ། རྒྱ་སྲན་ནམ། སྲན་མ་ལ་སོགས་པ་བཞིན་དུ་བཀང་ངོ་། །བྱང་ཆུབ་སེམས་དཔའ་རྣམས་ནི་ཤིན་ཏུ་བརྟགས་པ་དང་མཁས་པ་ཡིན་པས་གཞོན་ནུ་དགེ་བྱེད་ཀྱིས་ཆེན་པོ་ལ་འོས་པའི་ནོར་བུ་ཆེན་པོ་རྣམས་རྐེད་ལ་བཏགས་སོ། །ཇི་ཙམ་ན་གྲུ་དེ་སླར་བསྒྱུར་བ་ལས་

  995. 188a

    འགྲམ་དང་། ཧ་ཅང་ཡང་མི་རིང་བ་ཞིག་ཏུ་ཆུ་སྲིན་ཉའི་རིགས་ཀྱིས་ཚུལ་མ་ཡིན་པས་མ་རུང་བར་བྱས་སོ། །དེ་ནས་སྡིག་བྱེད་ཀྱིས་དགེ་བྱེད་ཀྱི་མགུལ་ནས་འཇུས་པ་དང་། དེས་དེ་འབད་པ་ཆེན་པོས་འགྲམ་དུ་ཕྱུང་ངོ་། །དེ་ཁུར་གྱིས་ དུབ་ནས་གཉིད་ཀྱིས་ལོག་པ་དང་། དེ་འགྲེས་པའི་རྐེད་པ་ལ་རིན་པོ་ཆེ་བཏགས་པ་དག་སྡིག་བྱེད་ཀྱིས་མཐོང་ནས་དེས་བསམས་པ། འདི་ནི་རིན་པོ་ཆེ་འདི་ལྟ་བུ་དག་ཁྱེར་ཏེ་འགྲོ་བར་འགྱུར་ན། བདག་གི་ལག་པ་སྟོང་པར་འགྲོ་བར་འགྱུར་བ་ལྟ་ཞེས་བསམས་ནས་ དེས་དེ་གཉིད་སྟུག་པོས་ནོན་པ་ན་རིན་པོ་ཆེ་དེ་རྣམས་ཀྱང་ཕྲོགས། མིག་གཉིས་ཀྱང་ཚེར་མས་ཕྱུང་ནས་དེས་དེ་ལོང་བར་རྒྱ་མཚོའི་འགྲམ་དུ་བོར་ཏེ་སོང་ངོ་། །སྟེས་ཏེ་ཕྱུགས་རྫི་དག་ཅིག་ཕྱུགས་སྐྱོང་ཞིང་ཕྱོགས་དེར་ཕྱིན་པ་དང་། དེ་རྣམས་ཀྱིས་དེ་མཐོང་ནས་དྲིས་པ། ཀྱེ་ ནང་རྗེ་ཁྱོད་སུ་ཞིག་དེས་ཇི་ལྟར་གྱུར་པ་རྒྱས་པར་སྨྲས་པ། དེ་རྣམས་ཀྱིས་ཐོས་ནས་སྙིང་རྗེ་སྐྱེས་ཏེ། དེ་རྣམས་ཀྱིས་དེ་ཕྱུགས་རྫི་དཔོན་པོའི་ཁྱིམ་དུ་ཁྲིད་དོ། །དེ་དེ་ན་པི་ཝང་བླང་བར་བརྩམས་པ་དང་། ཕྱུགས་རྫི་དཔོན་པོ་དེའི་ཆུང་མ་གཟུགས་དང་ལང་ཚོའི་དྲེགས་ པས་རྒྱགས་པས་པི་ཝང་གི་སྒྲ་ཐོས་ནས་བསྒུགས་པ་ལས། དེ་བྱས་པ་ཆུད་གཟོན་པའི་སྤྱོད་པ་རྗེས་སུ་དྲན་ནས་རྣ་བ་བཀག་སྟེ་འདུག་ནས་མ་བཏུབ་བོ། །འདོད་པ་ལ་ཞེན་པ་རྣམས་ནི་མི་བྱ་བ་ཅི་ཡང་མེད་པས་དེས་ཁྱིམ་ཐབ་ལ་དཔར་བ་སྨྲས་པ། མི་ལོང་བ་འདི་ བདག་ལ་སྒུགས་ན། ཁྱོད་འདི་འདྲ་བ་དག་སྡུད་པར་བྱེད་དམ། ཤ་འཁོན་རྣམས་ཀྱི་ནང་ན་འདི་ལྟ་སྟེ་བུད་མེད་ཀྱི་ཤ་འཁོན་ནི་ཐ་ཆད་ཡིན་པས་དེས་བསམས་པ། འདི་ཆད་པས་ནི་བཅད་ཟིན་པས་སྤང་པ་མ་གཏོགས་པར་འདི་ལ་ཅི་བྱར་ཡང་མེད་དོ་སྙམ་ནས་དེས་དེ་ཁྱིམ་ནས་སྤངས་ ཏེ་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་ན་པི་ཝང་གིས་འཚོ་བར་བྱེད་དོ། །དེའི་ཕ་ཤི་ནས་དེའི་ནུ་བོ་སྡིག་བྱེད་རྒྱལ་སྲིད་ལ་བཞག་གོ། །དེ་ཡང་རིམ་གྱིས་མཚམས་གཞན་གྱི་རྒྱལ་པོ་སྔོན་བུ་མོ་བྱིན་པ་གང་ཡིན་པ་དེའི་གྲོང་ཁྱེར་དུ་ཕྱིན་ཏོ། །

  996. 188b

    དེ་ཡང་ཆེན་མོར་གྱུར་ནས། དེ་སློང་བ་ཡུལ་སྣ་ཚོགས་ན་གནས་པ་རྒྱལ་པོའི་བུ་དང་། བློན་པོའི་བུ་དང་། མདུན་ན་འདོན་གྱི་བུ་དག་ལྷགས་ནས་ཕས་སྨྲས་པ། བུ་མོ་ཁྱོད་གང་ལ་བྱིན་པའི་གཞོན་ནུ་དགེ་བྱེད་དེ་ནི་རྒྱ་མཚོ་ཆེན་པོར་སོང་བ་ལས་དེ་ཉིད་དུ་ཚུལ་མ་ ཡིན་པས་ཤི་བར་གྱུར་ཏོ། །ད་ནི་ཁྱོད་སློང་བ་དག་ལྷགས་ཏེ། གང་ལ་ཁྱོད་མ་བྱིན་པ་དེ་མི་དགའ་བར་འགྱུར་ན། འདི་ལ་ཇི་ལྟར་བསྒྲུབ་པར་བྱ། དེས་སྨྲས་པ། ཡབ་གལ་ཏེ་དེ་ལྟར་ན་གྲོང་ཁྱེར་བྱི་དོར་བགྱིད་དུ་སྩོལ་ཅིག་དང་བདག་ཉིད་ཀྱིས་ཁྱིམ་ཐབ་འདམ་ མོ། །རྒྱལ་པོས་སྨྲས་པ། བུ་དེ་བཞིན་གྱིས་ཤིག །དེ་ནས་རྒྱལ་པོས་ཡུལ་སྣ་ཚོགས་དང་གྲོང་ཁྱེར་སྣ་ཚོགས་རྣམས་སུ་རང་ཉིད་ཁྱིམ་ཐབ་འདམ་པར་བསྒྲགས་ནས་གྲོང་ཁྱེར་དེ་ཡང་གསེག་མ་དང་། རྡོ་བ་དང་། གྱོ་མོ་བསལ་ཅིང་ཙན་དན་གྱི་ཆུས་ཆག་ ཆག་བཏབ། དྲི་ཞིམ་པའི་པོག་པོར་དག་བཞག །གདུགས་དང་། རྒྱལ་མཚན་དང་། བ་དན་བསྒྲེང་། དར་གྱི་ཆུན་འཕྱང་མང་པོ་དཔྱངས། མེ་ཏོག་རྣམ་པ་སྣ་ཚོགས་ཀྱི་ལྷ་རྣམས་ཀྱི་དགའ་ཚལ་གྱི་སྐྱེད་མོས་ཚལ་བཞིན་དུ་དགའ་དགའ་ལྟར་བྱས་ནས་དྲིལ་སྒྲོགས་ སུ་བཅུག་པ། གྲོང་ཁྱེར་ན་གནས་པ་དང་གྲོང་མི་དང་ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་ཀྱི་ཤེས་ལྡན་དག་ཉོན་ཅིག །སང་རྒྱལ་པོའི་གཞོན་ནུ་མ་རང་ཉིད་ཁྱིམ་ཐབ་འདམ་གྱིས་ཁྱེད་ཅག་འབྱོར་པ་ཇི་ལྟ་བ་བཞིན་དུ་འདུ་བར་གྱིས་ཤིག །ནམ་ནངས་ནས་རྒྱལ་པོའི་ གཞོན་ནུ་མ་དེ་རྒྱན་སྣ་ཚོགས་ཀྱིས་བཀླུབས་ཏེ་གཞོན་ནུ་མ་དུ་མས་ཡོངས་སུ་བསྐོར་ནས་ནགས་ཚལ་གྱི་ལྷ་མེ་ཏོག་རྒྱས་པའི་ནགས་ཚལ་གྱི་ནང་ན་ཤིན་ཏུ་མཛེས་པ་དེ་བཞིན་དཔལ་གྱི་འབྱོར་པ་ཆེན་པོས་གྲོང་ཁྱེར་གྱི་དབུས་ན་སྲོག་ཆགས་བརྒྱ་སྟོང་ཕྲག་མང་པོ་འདུས་པའི་ནང་དུ་རང་ ཉིད་ཁྱིམ་ཐབ་འདམ་དུ་འོངས་སོ། །དགེ་བྱེད་དེ་ཡང་དེའི་ཕྱོགས་གཞན་ཞིག་ན་པི་ཝང་ལེན་ཅིང་འདུག་གོ། །སེམས་ཅན་རྣམས་ནི་ལས་རྣམས་ཁོ་ནས་ཕན་ཚུན་སྦྱོར་བར་བྱེད་པ་ཡིན་ལ། རྒྱུའི་སྟོབས་ཆེ་ཡང་རྐྱེན་གྱི་སྟོབས་ལ་ལྟོས་པ་ཡིན་པས། དེ་ནས་རྒྱལ་པོའི་

  997. 189a

    གཞོན་ནུ་མ་དེ་པི་ཝང་གི་སྒྲས་སེམས་བསྡུས་པས་དགེ་བྱེད་པི་ཝང་ལེན་པ་ལ་ཆགས་ནས་དེས་དེ་ལ་འདི་བདག་གི་ཁྱིམ་ཐབ་བོ་ཞེས་མེ་ཏོག་གི་ཕྲེང་བ་བོར་རོ། །སྐྱེ་བོའི་ཚོགས་ཡིད་མི་བདེ་བར་གྱུར་ཅིང་ཁ་ཅིག་སྙིང་ན་ནས་མོད་ལ་འཕྱ་བར་བརྩམས་པ། རྒྱལ་པོའི་གཞོན་ནུ་མ་འདི་ལྟར་གཟུགས་བཟང་བ་དར་ལ་བབ་པ་སྒྱུ་རྩལ་ཕུན་སུམ་ཚོགས་པ་དང་ལྡན་པས་ཡུལ་སྣ་ཚོགས་ནས་ལྷགས་པའི་རྒྱལ་པོ་དང་། བློན་པོ་དང་། མདུན་ན་འདོན་གྱི་བུ་རྣམས་དང་། གཞན་ཡང་གྲོང་ཁྱིམ་ན་གནས་པའི་སྐྱེས་པའི་གཙོ་བོ་རྣམས་ སྤངས་ཏེ་ལོང་བ་ལ་ཁྱིམ་ཐབ་ཏུ་འདམ་པ་ཅི་ཐ་ཚིག །ཞོ་ཤས་འཚོ་བ་རྣམས་ཡིད་མི་བདེ་ཞིང་མི་དགའ་བས་རྒྱལ་པོ་ལ་སྨྲས་པ། ལྷ་གཞོན་ནུ་མ་རང་ཉིད་ཀྱིས་ཁྱིམ་ཐབ་བདམས་ལགས་སོ། །རྒྱལ་པོས་སྨྲས་པ། ཅི་འདྲ་བ་ཞིག །ལྷ་ལོང་བ་ཞིག་ལགས་སོ། །དེ་ ཡང་ཐོས་ནས་ཡིད་མི་བདེ་བར་གྱུར་ཏེ་དེ་ནས་དེ་བཀུག་ནས་སྨྲས་པ། བུ་རྒྱལ་པོ་དང་། ནོར་ཅན་དང་། ཚོང་དཔོན་དང་། དེད་དཔོན་དང་། བློན་པོའི་བུ་དང་། མདུན་ན་འདོན་གྱི་བུ་གཟུགས་བཟང་བ་དང་དར་ལ་བབ་པ་འབྱོར་པ་ཕུན་སུམ་ཚོགས་པ་དག་ཡོད་ན། ཁྱོད་ ཀྱིས་ཅིའི་ཕྱིར་འདི་འདྲ་བ་ཞིག་ཁྱིམ་ཐབ་ཏུ་བདམས། དེས་སྨྲས་པ། ཡབ་འདི་ཁོ་ན་བདག་འཚལ་ལགས་སོ། །རྒྱལ་པོས་སྨྲས་པ། བུ་གལ་ཏེ་དེ་ལྟར་ན་དེ་ཉིད་ཀྱི་ཐད་དུ་སོང་ཤིག་ཅིའི་ཕྱིར་འདུག །དེ་དེའི་དྲུང་དུ་སོང་ནས་སྨྲས་པ། བདག་གི་ཁྱིམ་ཐབ་ཏུ་ཁྱོད་ འདམས་སོ། །དེས་སྨྲས་པ། ཁྱོད་ཀྱིས་མ་ལེགས་པ་ཞིག་བྱས་ཏེ་དེ་ལྟ་མོད་ཀྱི་འདི་ནི་ལོང་བ་ཡིན་པས། བདག་སྐྱེས་པ་གཞན་དང་ལྷན་ཅིག་དགའ་མགུར་སྤྱད་པར་བྱའོ་སྙམ་དུ་བསམས་པ་ལྟ་ཞིག །དེས་སྨྲས་པ། བདག་ནི་དེ་ལྟ་བུའི་ལས་བྱེད་པ་མ་ཡིན་ནོ། ། དེས་སྨྲས་པ། ཅི་མངོན་དེས་བདེན་པ་གསོལ་བར་བརྩམས་ཏེ། བདེན་པ་དང་བདེན་པའི་ཚིག་གང་གིས་རྒྱལ་བུ་གཞོན་ནུ་དགེ་བྱེད་དེ་དང་ཁྱོད་ལ་འདོད་ཆགས་སྐྱེས་ཀྱི་གཞན་སུ་ལ་ཡང་མ་ཡིན་ཞེ་ན། བདེན་པ་དང་བདེན་པའི་ཚིག་དེས་ཁྱོད་ཀྱི་མིག་གཅིག་སྔོན་གྱི་ཇི་ལྟ་བ་བཞིན་

  998. 189b

    དུ་གྱུར་ཅིག་ཅེས་བདེན་པའི་བྱིན་གྱིས་བརླབས་མ་ཐག་ཁོ་ནར་དེའི་མིག་གཅིག་སྔོན་གྱི་ཇི་ལྟ་བ་བཞིན་དུ་གྱུར་ཏེ། དེས་སྨྲས་པ། དགེ་བྱེད་དེ་ཉིད་ང་ཡིན་ཏེ། ནུ་བོ་ཤོས་སྡིག་བྱེད་ཀྱིས་འདི་ལྟ་བུའི་གནས་སྐབས་སུ་བྱས་སོ། །དེས་སྨྲས་པ། གཞོན་ནུ་དགེ་བྱེད་དེ་ཁོ་ན་ ཁྱོད་ཡིན་པར་ཅི་མངོན། དེས་ཀྱང་བདེན་པ་གསོལ་བར་བརྩམས་ཏེ། བདེན་པ་དང་བདེན་པའི་ཚིག་གང་གིས་སྡིག་བྱེད་ཀྱིས་བདག་གི་མིག་ཕྱུང་བ་ན་དེ་ལ་ངན་སེམས་ཅུང་ཟད་ཀྱང་མ་བྱུང་ཞེ་ན། བདེན་པ་དང་བདེན་པའི་ཚིག་དེས་བདག་གི་མིག་ཅིག་ཤོས་ཀྱང་ སྔོན་གྱི་ཇི་ལྟ་བ་བཞིན་དུ་གྱུར་ཅིག་ཅེས་བྱས་པ་དང་། བདེན་པ་གསོལ་བས་དེའི་མིག་ཅིག་ཤོས་ཀྱང་སྔོན་གྱི་ཇི་ལྟ་བ་བཞིན་དུ་གྱུར་ཏོ། །དེ་ནས་རྒྱལ་པོ་གཞོན་ནུ་མ་དེས་དགེ་བྱེད་དབང་པོ་མ་ཚང་བ་མ་ཡིན་པ་དེ་ཁྲིད་ནས་རྒྱལ་པོའི་དྲུང་དུ་སོང་སྟེ་སྨྲས་པ། ཡབ་དགེ་བྱེད་དེ་ ནི་འདི་ཉིད་ལགས་སོ། །རྒྱལ་པོ་ཡིད་མ་ཆེས་པ་ལས་དེས་ཇི་ལྟར་གྱུར་པ་སྨྲས་པ་དང་རྒྱལ་པོ་མཆོག་ཏུ་ངོ་མཚར་སྐྱེས་ནས་དེ་ནས་དེས་བུ་མོ་དེ་དཔལ་གྱི་འབྱོར་པ་ཆེན་པོས་བ་བྱིན་ནས་དཔུང་ཆེན་པོ་དང་ཆས་ཏེ་གྲོང་ཁྱེར་དེར་སོང་སྟེ་སྡིག་བྱེད་རྒྱལ་སྲིད་ལས་ཕྱུང་སྟེ་དགེ་བྱེད་དེ་ཡང་ཕའི་ རྒྱལ་སྲིད་ལ་བཞག་གོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དགེ་བྱེད་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་སྡིག་བྱེད་གང་ཡིན་པ་དེ་ནི་ལྷས་བྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདིས་ བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གཞན་ཡང་འདི་ཇི་ལྟར་བྱས་པ་མི་གཟོ་བ་དང་། བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཕོ་བྲང་ཞིག་ན་རྒྱལ་པོ་ཞིག་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་ དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེ་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་རིམ་གྱིས་བུ་བཞི་བཙས་ཏེ་ཡལ་ག་དང་། ལྕུག་

  999. 190a

    མ་དང་། རྗེས་སུ་མཐུན་པའི་ལྕུག་མ་དང་ས་གའོ། །དེ་རྣམས་བསྲིངས་བསྐྱེད་དེ་ཆེན་པོར་གྱུར་ནས་ཡུལ་གཞན་གྱི་རྒྱལ་པོའི་བུ་མོ་དག་ལས་ཆུང་མ་བླངས་པ་དང་། དེ་རྣམས་རྒྱལ་པོ་ལ་བརྙས་ཐབས་བྱེད་པར་བརྩམས་པ་དང་། དེ་ནས་རྒྱལ་པོས་ སྤྱུགས་ཏེ་རང་རང་གི་ཆུང་མ་ཁྲིད་དེ་དོང་བ་ལས་ཇི་ཙམ་ན་དགོན་པའི་ལམ་ཞིག་ཏུ་ཕྱིན་པ་ན་དེ་རྣམས་ལམ་རྒྱགས་ཆད་ནས་དེ་རྣམས་ལ་ཕན་ཚུན་དུ་ནང་ཁྲིམས་བཅས་ཏེ། ཆུང་མ་རེ་རེ་བསད་ལ་དེའི་ཤས་དགོན་པའི་ལམ་རྒལ་བར་བྱའོ་ཞེས་བྱས་སོ། །ས་གས་བསམས་པ། གཞན་གྱི་སྲོག་གཅོད་པ་བས་རང་གི་སྲོག་ཆུད་ཟོས་པ་བླའི་འདིར་ཡོང་ཅིའི་དུས་ལ་བབ་ཅེ་ན་ཆུང་མ་ཁྲིད་དེ་བྲོས་ཏེ་འགྲོའོ་སྙམ་ནས། དེས་ཆུང་མ་ཁྲིད་དེ་བྲོས་པ་ལས་དེའི་ཆུང་མ་བཟའ་བ་དང་བཏུང་བ་དང་བྲལ་བ་དང་ལམ་གྱི་དུབ་པས་བློང་བློང་པོར་གྱུར་ཏེ་སྨྲས་པ། རྗེའི་སྲས་སྲོག་ དང་བྲལ་བར་འགྱུར་རོ། །ས་གས་བསམས་པ། བདག་གིས་འདི་སྲིན་པོ་རྣམས་ཀྱི་ནང་ནས་ཡོངས་སུ་བསྐྱབས་ནས་ད་གལ་ཏེ་ཤི་བར་གྱུར་ནམ་ལེགས་སོ་སྙམ་ནས་དེས་བརླའི་ཤ་ལས་བཅད་དེ་ཟར་བཅུག་ཅིང་། ལག་པ་གཉིས་ཀྱི་རྩ་གཏུབས་པའི་ཁྲག་བླུད་དེ་དེས་དེ་ཁྲིད་དེ་ རིམ་གྱིས་རི་ཞིག་གི་དྲུང་དུ་ཕྱིན་ནས། དེ་ན་རྩ་བ་དང་འབྲས་བུས་འཚོ་བར་བྱེད་དོ། །རི་དེའི་དྲུང་ན་འབབ་ཆུ་ཞིག་འབབ་པ་དེ་ལ་མི་ཞིག་དགྲས་ལག་པ་དང་རྐང་པ་གཏུབས་ནས་ཆུར་བསྐྱུར་ཏེ་དེ་ཆུས་ཁྱེར་བ་ན་ཉམ་ཐག་པའི་ང་རོའི་སྐད་འབྱིན་ཏོ། །ས་གཡང་ཕྱོགས་གཞན་ཞིག་ན་རྩ་བ་ དང་འབྲས་བུ་རྐོ་བ་ལས་དེས་མི་དེའི་འོ་དོད་འབོད་པ་ཐོས་ནས། དེ་སེམས་ཀྱི་རྒྱུད་སྙིང་རྗེས་བརླན་པས་རི་དེ་ལ་འཛེགས་ཏེ་ཀུན་ཏུ་བལྟ་བར་བརྩམས་པ་ལས། ཇི་ཙམ་ན་མི་ཆུས་ཁྱེར་བ་དེ་མཐོང་ནས་དེས་མྱུར་བ་མྱུར་བར་རི་ལས་བབས་ཏེ་འབབ་ཆུའི་ནང་དུ་ཞུགས་ནས་མི་དེ་ ཁུར་དུ་བླངས་ཏེ་འབབ་ཆུའི་འགྲམ་དུ་ཕྱུང་སྟེ་བཞག་ནས་དེའི་སྡུག་བསྔལ་གྱིས་སྙིང་གདུངས་ནས་སྨྲས་པ། བུ་འདི་ཅི་ལས་གྱུར། དེས་ཇི་ལྟར་གྱུར་པ་ཐམས་ཅད་སྨྲས་ནས་དེ་ནས་དེས་དེ་དབུགས་ཕྱུང་སྟེ། རྩ་བ་དང་འབྲས་བུས་ཚིམ་པར་བྱས་ནས་ཆུང་མ་ལ་གཏད་དེ། དེས་

  1000. 190b

    དེའི་རིམ་གྲོ་བྱས་ནས་སོས་པར་གྱུར་ཏོ། །དེ་དེའི་རིམ་གྲོ་བྱེད་པ་ན་གཅུགས་པའི་བདེ་བས་ཡང་དང་ཡང་དུ་དྲུང་དུ་སོང་ནས་གཏམ་རྣམ་པ་སྣ་ཚོགས་སྨྲ་ཞིང་འདུག་གོ། །འདི་ནི་ཆོས་ཉིད་ཡིན་ཏེ། བྱང་ཆུབ་སེམས་དཔའ་རྣམས་ནི་རང་བཞིན་གྱིས་འདོད་ཆགས་ཆུང་བ་ཡིན་པས་ས་ ག་དེ་དང་ལྷན་ཅིག་རེས་འགའ་དགའ་མགུར་སྤྱོད་ལ། རེས་འགའ་དགའ་མགུར་སྤྱོད་པར་མི་བྱེད་དོ། །བྱང་ཆུབ་སེམས་དཔའི་མཐུས་སྡོང་བུ་དང་རྩ་བ་དང་འབྲས་བུ་དེ་དག་ལྷག་པར་མཐུ་དང་ལྡན་པ་ཡིན་པས་དེས་དེ་དག་ལོངས་སྤྱད་པས་ཉོན་མོངས་པ་བདོ་ནས་མི་རྐང་ལག་ རྡུམ་བུ་དེ་ལ་བསྒུགས་པར་བརྩམས་པ་དང་དེ་མ་བཏུབ་ནས་སྨྲས་པ། རེ་ཞིག་བདག་ཤི་ཟིན་པ་དང་འདྲ་བ་ལས་ད་ལྟ་སོས་པ་ཡང་སྟེས་ཏེ་གསོན་ན། གལ་ཏེ་ཡང་འདི་འདྲ་བ་བྱས་ན་ཁྱོད་ཀྱི་ཁྱོད་ས་བདག་ཐམས་ཅད་ཀྱི་ཐམས་ཅད་དུ་སྲོག་དང་ཕྲལ་བར་འགྱུར་བའི་གནས་གང་ཡིན་ པ་དེ་ཡོད་དོ། །དེ་ལ་དེས་ཡང་ནས་ཡང་དུ་བསྒུགས་པ་དང་ཉོན་མོངས་པ་རྣམས་ནི་ཐུལ་བར་དཀའ་བ་ཡིན་པས་དེ་དེ་དང་ལྷན་ཅིག་ཉལ་ལོ། །དེ་དེ་དང་ལྷན་ཅིག་ཀུན་དུ་དགའ་བ་དང་ཡིད་དུ་འོང་བ་དང་། ལྷག་པར་ཆགས་པར་གྱུར་པས་མངགས་ཀྱང་དེའི་དྲུང་དུ་མི་འགྲོའོ། །དེས་ བསམས་པ། འདི་ལྟར་འདི་ཆགས་པར་གྱུར་ལ་ཤ་འཁོན་རྣམས་ཀྱི་ནང་ན་འདི་ལྟ་སྟེ། བུད་མེད་ཀྱི་ཤ་འཁོན་ཐ་ཆད་ཡིན་པས་ད་ནི་བདག་མ་རུང་ངོ་སྙམ་ནས་དེས་དེ་དང་ལྷན་ཅིག་གྲོས་བྱ་བར་བརྩམས་ཏེ། ཁྱོད་ཀྱི་ཁྱོ་འདིས་གལ་ཏེ་བདག་ཅག་ཉལ་བ་ཤེས་པར་གྱུར་ན་གདོན་མི་ཟ་ བར་ཁྱོད་ལ་གནོད་པ་བྱེད་ཅིང་བདག་ཀྱང་སྲོག་དང་བྲལ་བར་འགྱུར་རོ། །དེས་བསམས་པ། སྨྲས་པ་འདི་ནི་ལེགས་ཀྱིས་ཐབས་ཤིག་བཤམ་པར་བྱའོ་སྙམ་མོ། །བུད་མེད་ནི་མ་བསླབས་པར་མཁས་པས་དེས་མགོ་བོ་གོས་ཀྱིས་དཀྲིས་ནས་རིའི་བྲག་ཀ་ཞིག་ན་ཉལ་ཏེ་འདུག་གོ། ། ཇི་ཙམ་ན་ས་ག་རྩ་བ་དང་འབྲས་བུ་ཁྱེར་ཏེ་འོངས་ནས་དེ་དེ་ལྟར་ཉལ་བ་མཐོང་ནས་དེ་ནས་དྲིས་པ་བཟང་མོ་འདི་ཅི་ཞིག །དེས་སྨྲས་པ། རྗེའི་སྲས་བདག་ཀླད་པ་བྲོ་འཚལ་ཏེ་ཏེ་པོར་མི་བདེའོ། །ས་གས་སྨྲས་པ། དེ་ལ་ཇི་ལྟར་བསྒྲུབ་པར་བྱ། དེས་རིའི་བྱ་སྐྱིབས་ན་རྡོ་དྲེག་ཅིག་

  1001. 191a

    མཐོང་ནས་དེས་སྨྲས་པ། རྗེའི་སྲས་བདག་སྔོན་ཡང་ཀླད་པའི་བྲོ་ནད་འདི་ལྟ་བུས་ཐེབས་པ་ན་སྨན་པས་རྡོ་དྲེག་བསྟན་ཏེ་དེས་སོས་པར་གྱུར་ལགས་སོ། །ས་གས་སྨྲས་པ། རྡོ་དྲེག་བཙལ་ལོ། །དེས་སྨྲས་པ། རྗེའི་སྲས་རིའི་བྱ་སྐྱིབས་འདི་ལ་མཆིས་ཀྱིས་བདག་ གིས་ཁྱོད་ཀྱིས་སྤྱང་ཐག་གཟུང་གིས་ཁྱོད་ཀྱིས་ཕྱུང་ཤིག །བདག་ཉིད་ཆེན་པོ་དྲང་པོ་དྲང་པོ་ཡིན་པས་དེའི་ངན་གཡོ་མ་ཤེས་པས་དེ་བཞིན་དུ་བྱས་ཟུང་ཤིག་དང་དབྱུང་ངོ་ཞེས་ཁས་བླངས་ནས་དེས་དེ་ཐག་པ་ལས་དཔྱང་ལ་བཏང་བ་དང་། དེས་ལག་པ་གཅིག་གིས་ཐག་པ་བཏང་བ་ན་ དེས་ཀྱང་བཏང་ནས་ཆུར་ལྷུང་ངོ་། །སེམས་ཅན་ཚེ་རིང་བ་རྒྱལ་སྲིད་ཀྱི་བདེ་བ་ཉམས་སུ་མྱོང་བར་འགྱུར་བ་ནི་མི་འཆི་བ་ཡིན་པས་ཆུའི་རྒྱུན་ཕྱོགས་སུ་ཁྱེར་ནས་རྒྱལ་པོའི་ཕོ་བྲང་ཞིག་ཏུ་ཕྱིན་ཏོ། །དེའི་རྒྱལ་པོ་ཡང་བུ་མེད་པར་ཤིའོ། །བློན་པོ་རྣམས་དང་། གྲོང་མི་དང་། ཡུལ་ མི་དང་བཅས་པ་ཐམས་ཅད་འདུས་ནས་གྲོས་བྱེད་དེ། ཤེས་ལྡན་དག་རྒྱལ་པོ་ནོངས་ན་ད་སུ་ཞིག་རྒྱལ་སྲིད་ལ་གཞག་པར་བྱ། དེ་རྣམས་ཀྱིས་མཚན་མཁན་གྱི་མི་རྣམས་བསྐོས་ཏེ། ཤེས་ལྡན་དག་སེམས་ཅན་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཚོལ་ཅིག་དང་དེ་ རྒྱལ་སྲིད་ལ་གཞག་པར་བྱའོ། །དེ་རྣམས་ཀྱིས་ཕྱོགས་ཀུན་དུ་བཙལ་བར་བརྩམས་པ་ན། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །ས་ག་ལ་རྒྱལ་སྲིད་འབྱུང་ བར་འགྱུར་བའི་ལས་ཀྱི་རྣམ་པར་སྨིན་པ་ཉིད་ཉེ་བར་གནས་པས་འབབ་ཆུ་ནས་བྱུང་ནས་ཕྱོགས་གཞན་ཞིག་ན་འདུག་པ་ལས་བྱང་ཆུབ་སེམས་དཔའི་མཐུས་ས་ཕྱོགས་དེ་རྒྱན་གྱིས་བརྒྱན་པ་བཞིན་དུ་འདུག་གོ། །ཇི་ཙམ་ན་མཚན་མཁན་གྱི་མི་རྣམས་ཕྱོགས་དེར་ལྷགས་ནས་བདག་ ཉིད་ཆེན་པོ་དེ་རྒྱལ་སྲིད་ཀྱི་མཚན་དང་ལྡན་པར་མཐོང་ནས། དེ་རྣམས་དགའ་བ་དང་ཡིད་བདེ་བས་བློན་པོ་རྣམས་ཀྱི་དྲུང་དུ་དོང་སྟེ་སྨྲས་པ། བདག་ཅག་གིས་བཙལ་ན་སེམས་ཅན་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཞིག་ཡོད་དེ་དེ་ལ་རྒྱལ་སྲིད་འོས་སོ། །དེ་ནས་བློན་

  1002. 191b

    པོ་དེ་རྣམས་ཀྱིས་ལམ་གྱི་བྱི་དོར་བྱས་གྲོང་ཁྱེར་བྱི་དོར་བྱས་ནས་དཔལ་གྱི་འབྱོར་པ་ཆེན་པོས་གྲོང་ཁྱེར་དུ་ཁྲིད་དེ་ཉི་མ་དང་། ཚེས་གྲངས་དང་། ཡུད་ཙམ་དང་། རྒྱུ་སྐར་རྣམས་རིམ་བཞིན་དུ་སྦྱར་ཏེ་རྒྱལ་སྲིད་ཀྱི་དབང་བསྐུར་རོ། །དེ་ལ་བཙུན་མོ་མེད་ནས་བློན་པོ་རྣམས་དང་། མདུན་ན་འདོན་རྣམས་དང་། ཡུལ་གཞན་གྱི་རྒྱལ་པོ་རྣམས་དང་། གཞན་ཡང་ནོར་ཅན་དང་། ཚོང་དཔོན་དང་། དེད་དཔོན་རྣམས་དང་། རང་གི་བུ་མོ་རྒྱན་ཐམས་ཅད་ཀྱིས་བཀླུབས་ནས་ཁྲིད་དེ་རྒྱལ་པོས་ཁབ་ཏུ་བཞེས་པར་བྱ་བའི་ཕྱིར་གྲོང་ཁྱེར་དེར་ལྷགས་ན། རྒྱལ་པོ་ དེ་བུད་མེད་ཀྱིས་སུན་ཕྱུང་བ་ཡིན་པས་ཁས་མ་བླངས་སོ། །བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་རྣམས་ནི་བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མིར་བཅས་པ་ལགས་ཀྱིས་བཙུན་མོ་གཞག་ཏུ་གསོལ། ཡུལ་སྣ་ཚོགས་ན་གནས་ པའི་མི་གཙོ་བོ་རྣམས་དང་ཡུལ་གཞན་གྱི་རྒྱལ་པོ་རྣམས་དང་། མི་གཙོ་བོ་དེ་རྣམས་ཀྱི་བུ་མོ་རྣམས་དེའི་མངོན་དུ་འགྱུར་བར་བྱ་བའི་ཕྱིར་སྟ་གོན་བྱས་ཏེ་བཞག་ན། འོན་ཀྱང་དེ་ཁས་ལེན་དུ་མ་བཏུབ་སྟེ་བུད་མེད་རྣམས་ཡང་དང་ཡང་དུ་སྨོད་དོ། །སེམས་ཅན་རྣམས་ཀྱི་བསོད་ནམས་ ཀྱི་མཐུས་ལོངས་སྤྱོད་རྣམས་མཐུ་དང་ལྡན་ཞིང་ཕུན་སུམ་ཚོགས་པ་ཡིན་པས་གང་གི་ཚེ་བྱང་ཆུབ་སེམས་དཔའ་བུད་མེད་བྱས་པ་ཆུད་གཟོན་པས་རི་དེ་ལས་བོར་བ་དེའི་ཚེ་རི་དེའི་རྩ་བ་དང་འབྲས་བུ་རྣམས་སྲབས་པར་གྱུར་ཅིང་མཐུ་མེད་པར་གྱུར་ཏོ། །དེ་ནས་བུད་མེད་དེ་མུ་གེའི་དུས་ཀྱི་འཆི་བའི་ འཇིགས་པས་སྐྲག་ནས་རྐང་ལག་མ་ཚང་བའི་མི་དེ་ཁུར་དུ་ཐོགས་ཏེ་གྲོང་མཐར་སོང་ནས་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་ཡང་སྤྲང་ཞིག་རྒྱུའོ། །དྲིས་པ་ན་སྨྲས་པ། བདག་ཁྱིམ་ཐབ་ལས་མི་འཕྱོ་བའོ། །བུད་མེད་གང་ཞིག་ཁྱིམ་ཐབ་ལས་ མི་འཕྱོ་བ་དེ་འཇིག་རྟེན་གྱིས་མཆོད་པའི་ཆོས་དེ་ཡོད་པས་དེ་གང་དུ་ཞུགས་པ་དེར་སློང་མོ་འཐོབ་བོ། །ཇི་ཙམ་ན་དེ་རིམ་གྱིས་རྒྱལ་པོའི་ཕོ་བྲང་དུ་ཕྱིན་པ་དང་། འཇིག་རྟེན་གྱིས་ཐོས་ནས་མཆོག་ཏུ་ངོ་མཚར་སྐྱེས་སོ། །ཁ་ཅིག་དག་ནི་ངོ་མཚར་སྐྱེས་ནས་དེ་ལ་བལྟ་བའི་ཕྱིར་ཕྱིར་

  1003. 192a

    བྱུང་བ་དང་གྲོང་ཁྱེར་ན་གནས་པའི་སྐྱེ་བོའི་ཚོགས་ཀྱིས་གླགས་རྙེད་ནས་དེ་དག་འཕྱ་བར་བྱེད། གཞོགས་འཕྱས་བྱེད། ཁ་ཟེར་བར་བྱེད་དེ། རྒྱལ་པོ་འདི་ནི་བུད་མེད་ཐམས་ཅད་ལ་སྨོད་པར་བྱེད་ན་ཁྱིམ་ཐབ་ལས་མི་འཕྱོ་བ་མི་རྐང་ལག་མ་ཚང་བ་ཁུར་ནས་འཁྱམ་ པ་དམ་པ་འདི་མ་མཐོང་བ་ལྟ། གཏམ་དེ་མདུན་ན་འདོན་གྱིས་རྒྱལ་པོ་ལ་སྨྲས་པ་དང་། རྒྱལ་པོས་བསམས་ནས་དེས་སྨྲས་པ། བུད་མེད་དེ་བལྟས་ཁུག་ཤིག །དེ་བཀུག་ནས་རྒྱལ་པོས་མཐོང་བ་དང་། འཛུམ་དམུལ་ཏེ་ཚིགས་སུ་བཅད་པས་སྨྲས་པ། ང་ཡི་བརླ་ཡི་ ཤ་དག་དང་། །ཁྲག་ཀྱང་ཟོས་ཤིང་འཐུངས་ནས་ནི། །རྡུམ་པོ་ཁུར་དུ་ཐོགས་པ་ཁྱོད། །ཁྱིམ་ཐབ་ལས་ད་མི་འཕྱོ་འམ། །རྡོ་དྲེག་དག་གི་ཆེད་དུ་ནི། །ང་ནི་གཡང་སར་བོར་ནས་སུ། །རྡུམ་པོ་ཁུར་དུ་ཐོགས་པ་ཁྱོད། །ཁྱིམ་ཐབ་ལས་ད་མི་འཕྱོ་འམ། །དེ་ངོ་ཚ་ བར་གྱུར་པའི་སྙིང་གིས་གདོང་སྨད་དེ་འདུག་གོ། །བློན་པོ་རྣམས་ཀྱིས་དོན་དེ་རྒྱལ་པོ་ལ་དྲིས་པ་དང་དེས་ཇི་ལྟར་གྱུར་པ་རྒྱས་པར་སྨྲས་ནས། དེ་ལ་སྨད་པའི་ཚིག་གིས་གྲོང་ཁྱེར་གྱི་ཕྱི་རོལ་དུ་བསྐྲད་དོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས་ དེའི་ཚེ་དེའི་དུས་ཀྱི་རྒྱལ་པོ་གཞོན་ནུ་ས་ག་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བུད་མེད་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། ། གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་ཐམས་ཅད་ཀྱི་གྲོང་རྡལ་གྱི་གྲོང་ཁྱེར་ན་རྒྱལ་པོ་ཐམས་ཅད་ཀྱི་བཤེས་གཉེན་ཞེས་བྱ་བ་ཞིག་རྒྱལ་སྲིད་བྱེད་དུ་འཇུག་སྟེ། །འབྱོར་པ་དང་། རྒྱས་པ་དང་། བདེ་བ་དང་། ལོ་ ལེགས་པ། སྐྱེ་བོ་དང་མི་མང་པོས་རབ་ཏུ་གང་བ་ན་འཐབ་པ་དང་། ཐབ་མོ་དང་། ཁྲག་ཁྲུག་དང་། འགྱེད་པ་དང་། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ་འབྲས་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ་ན་ཆོས་ཀྱི་རྒྱལ་པོ་

  1004. 192b

    ཆོས་དང་ལྡན་པ། ཆོས་བཞིན་གྱིས་རྒྱལ་སྲིད་བྱེད་དུ་འཇུག་སྟེ། རྒྱལ་པོ་དེ་ཡང་དད་པ་བཟང་བ། དགེ་བའི་བསམ་པ་ཅན། བདག་དང་གཞན་ལ་ཕན་པར་ཞུགས་པ། སྙིང་རྗེ་ཅན། བདག་ཉིད་ཆེན་པོ་ཆོས་འདོད་པ། སྐྱེ་དགུ་ལ་བྱམས་པ་ཞིག་ཡོད་པ་དེ་དུས་གཞན་ ཞིག་ན་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་བཙུན་མོ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་ཁྱེའུ་གཟུགས་བཟང་བ། མཛེས་ པ། བལྟ་ན་སྡུག་པ། པགས་པའི་མདོག་གསེར་འདྲ་བ། མགོ་བོ་གདུགས་ལྟར་འདུག་པ། དཔུང་པ་རིང་བ། དཔྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ། །ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །བཙས་ནས་དེའི་ བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། ཁྱེའུ་འདི་རྒྱལ་པོ་ཐམས་ཅད་ཀྱི་བཤེས་གཉེན་ཀྱི་སྲས་ཡིན་པས་དེ་བས་ན་ཁྱེའུའི་མིང་ཐམས་ཅད་སྒྲོལ་ཞེས་བྱ་བར་གདགས་སོ། །ཞེས་བཏགས་ནས་ཁྱེའུ་ ཐམས་ཅད་སྒྲོལ་མ་མ་བརྒྱད་པོ་བང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་དང་། མ་མ་བརྒྱད་ལ་རྗེས་སུ་གཏད་ནས་དེ་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་ དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིད་པར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་ལ་ཉེ་བར་ཞུགས་ཤིང་རྒྱལ་པོ་ རྒྱལ་རིགས་སྤྱི་བོ་ནས་དབང་བསྐུར་བ་ཡུལ་གྱི་འབྱོར་བ་དང་། མཐུ་དང་། བརྩོན་འགྲུས་ཐོབ་པ། ས་ཆེན་པོའི་དཀྱིལ་འཁོར་མངོན་པར་ཟིལ་གྱིས་མནན་ཏེ་གནས་པ་རྣམས་ཀྱི་བཟོའི་གནས་དང་ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་

  1005. 193a

    ཆེའི་གཉའ་བར་ཞོན་པ་དང་། རྟ་ལ་ཞོན་པ་དང་། ཤིང་རྟ་ལ་ཞོན་པའི་ཐབས་དང་། རལ་གྲིའི་ཐབས་དང་། གཞུའི་འཛིན་སྟངས་དང་། མདུན་དུ་བསྣུར་བ་དང་། ཕྱིར་བསྣུར་བ་དང་། ལྕགས་ཀྱུས་སྒྱུར་ཐབས་དང་། ཞགས་པ་གདབ་པ་དང་། མདའ་ བོ་ཆེ་འཕེན་པ་དང་། གཅད་པ་དང་། དྲལ་བ་དང་། དབུག་པ་དང་། འཛིན་སྟངས་དང་། གོམ་སྟངས་དང་། རྒྱང་ནས་ཕོག་པ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེ་བ་སྟེ་གནས་ལྔ་རྣམས་ལ་ཡང་བྱང་བར་གྱུར་ཏོ། ། གཞོན་ནུ་ཐམས་ཅད་སྒྲོལ་དད་པ་བཟང་བ། དགེ་བའི་བསམ་པ་ཅན། བདག་དང་གཞན་ལ་ཕན་པར་ཞུགས་པ། སྙིང་རྗེ་ཅན་བདག་ཉིད་ཆེན་པོ་ཆོས་འདོད་པ། སྐྱེ་དགུ་རྣམས་ལ་བྱམས་པ། ཐམས་ཅད་རབ་ཏུ་གཏོང་བ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ ཡོངས་སུ་གཏོང་བ། གཏོང་བ་ཆེན་པོ་ལ་ཞུགས་པ་ཡིན་ཏེ། དེའི་གཏོང་བ་རྒྱ་ཆེན་པོ་ཐོས་ན་དཔག་ཚད་བརྒྱ་ནས་ཀྱང་དོན་དུ་གཉེར་བའི་སྐྱེ་བོ་འོང་སྟེ། ཐམས་ཅད་ཀྱང་ཡིད་ལ་རེ་བ་ཡོངས་སུ་རྫོགས་པར་བྱས་ནས་གཏོང་ངོ་། །དེ་ནས་རེ་ཞིག་ཅིག་ན་བྱང་ཆུབ་སེམས་དཔའ་ཤིང་རྟ་ནོར་བུ་དང་། གསེར་དང་། དངུལ་དང་། རྡོ་རྗེ་དང་། བྱི་རུ་དང་། བཻ་ཌཱུརྱ་དང་། སྤུག་དང་། པད་མ་རཱ་ག་དང་། ཨིནྡྲ་ནཱི་ལས་འབར་བར་བྱས་པ། ཙན་དན་མཆོག་གི་སྙིང་པོ་ལས་བསྒྲུབས་པ། སེང་གེ་དང་། སྟག་དང་། གུང་གི་པགས་པས་གཡོགས་པ། རྟ་རླུང་གི་ཤུགས་ལྟར་ མགྱོགས་པ། གསེར་དང་དངུལ་གྱི་དྲིལ་བུ་གཡེར་ཀའི་སྒྲ་འཁྲོལ་བ་བཞི་དང་ལྡན་པ་མཆོག་གི་ནང་དུ་ཞུགས་ནས་གྲོང་ཁྱེར་དམ་པ་ནས་སྐྱེད་མོས་ཚལ་དུ་མངོན་དུ་སོང་ངོ་། །དེ་ནས་བྲམ་ཟེ་རིག་བྱེད་དང་རིག་བྱེད་ཀྱི་ཡན་ལག་ཤེས་པ་ཁ་ཅིག་གིས་ཐམས་ཅད་སྒྲོལ་བསུ་ནས་སྨྲས་པ། རྒྱལ་ རིགས་གཞོན་ནུ་ཁྱོད་རྒྱལ་བར་གྱུར་ཅིག །ཡང་སྨྲས་པ། ཁྱོད་ནི་འཇིག་རྟེན་ཐམས་ཅད་དུ། །ཐམས་ཅད་གཏོང་ཞེས་རྣམ་པར་གྲགས། །བྲམ་ཟེ་རྣམས་ལ་ཤིང་རྟ་འདི། །ཁྱོད་ཀྱིས་སྦྱིན་པ་གཏང་བར་རིགས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ཐམས་

  1006. 193b

    ཅད་སྒྲོལ་ཤིང་རྟ་དེ་ལས་མྱུར་བ་མྱུར་བར་བབས་ཏེ་སྙིང་དགའ་བ་དང་། མགུ་བ་དང་། རབ་ཏུ་དགའ་བས་བྲམ་ཟེ་དེ་དག་ལ་ཤིང་རྟ་དེ་བྱིན་ནས་སྨྲས་པ། བདག་གིས་ཇི་ལྟར་བྲམ་ཟེ་ལ། །མཆོག་ཏུ་དགའ་བས་ཤིང་རྟ་བཏང་། །དེ་བཞིན་བདག་གིས་སྲིད་པ་གསུམ། །བཏང་ནས་བྱང་ ཆུབ་མཆོག་རེག་ཤོག །དེ་དུས་གཞན་ཞིག་ན་གླང་པོ་ཆེའི་མཆོག་རྒྱལ་སྲིད་འཕེལ་ཞེས་བྱ་བ་མེ་ཏོག་ཀུན་ད་དང་། པུཎྜ་རཱི་ཀ་དང་། ཁ་བ་དང་། དངུལ་དང་། སྤྲིན་དཀར་པོ་ལྟ་བུའི་མདོག་ཅན་བདུན་ལེགས་པར་གྱུར་པ། རྐང་ལག་ལེགས་པར་གནས་པ། གླང་པོ་ཆེས་སྲུང་ གི་བུ་ལྟར་འགྱིང་ཞིང་འགྲོ་བ། སྐལ་བ་མཆོག་གི་མཚན་ཅན། བསོད་ནམས་བྱས་པས་མཐོང་བ་ལ་ཞོན་ནས་ཤིན་ཏུ་སྡུག་པའི་བྲན་དང་། མཛའ་བཤེས་དང་། གཡོག་རྣམས་ཕྱི་བཞིན་འབྲང་ཞིང་ཟླ་བ་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ་བཞིན་དུ་སོ་གའི་དུས་ལ་ བབ་པས་ཤིང་རྣམས་མེ་ཏོག་ཁ་འབུས་ཤིང་། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ཤང་ཤང་ཏེའུ་སྒྲ་འབྱིན་པའི་ནགས་ཚལ་གྱི་སྐྱེད་མོས་ཚལ་གྱི་སར་སོང་བ་དང་། དེ་ནས་ཕྱིར་རྒོལ་བས་རྦད་པའི་བྲམ་ཟེ་ཁ་ཅིག་གཞོན་ ནུ་ཐམས་ཅད་སྒྲོལ་གྱི་དྲུང་དུ་རིངས་པ་རིངས་པར་འོངས་ནས་གཞོན་ནུ་ཐམས་ཅད་སྒྲོལ་ལ་སྨྲས་པ། རྒྱལ་རིགས་གཞོན་ནུ་ཁྱོད་རྒྱལ་བར་གྱུར་ཅིག །ཡང་སྨྲས་པ། ལྷ་མིན་ལྷར་བཅས་འཇིག་རྟེན་དུ། །ཁྱོད་ནི་ཐམས་ཅད་གཏོང་ཞེས་གྲགས། །ཁྱོད་ཀྱི་གླང་པོ་མཆོག་ འདི་ནི། །བདག་ཅག་རྣམས་ལ་སྩལ་པའི་རིགས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་གླང་པོ་ཆེའི་མཆོག་དེ་ལས་མྱུར་བ་མྱུར་བར་བབས་ནས། དགའ་བ་དང་། མགུ་བ་དང་། རབ་ཏུ་དགའ་བའི་ཡིད་ཀྱིས་དེ་དག་ལ་གླང་པོ་ཆེའི་མཆོག་དེ་བྱིན་ནས་སྨྲས་པ། བདག་གིས་ཇི་ལྟར་བྲམ་ཟེ་ལ། །མཆོག་ཏུ་དགའ་བས་གླང་ཆེན་བཏང་། །དེ་བཞིན་བདག་གིས་སྲིད་པ་གསུམ། །བཏང་ནས་བྱང་ཆུབ་མཆོག་རེག་ཤོག །རྒྱལ་པོ་ཐམས་ཅད་ཀྱི་བཤེས་གཉེན་གྱི་བུ་ཐམས་ཅད་སྒྲོལ་གྱིས་གླང་པོ་ཆེའི་མཆོག་རྒྱལ་སྲིད་འཕེལ་ཞེས་བྱ་བ་ཕྱིར་རྒོལ་

  1007. 194a

    བས་རྦད་པའི་བྲམ་ཟེ་རྣམས་ལ་བྱིན་ནོ་ཞེས་ཐོས་སོ། །ཐོས་ནས་ཀྱང་རྒྱལ་པོ་ཐམས་ཅད་ཀྱི་བཤེས་གཉེན་ཤིན་ཏུ་ཁྲོས་འཁྲུགས་ནས་གཞོན་ནུ་ཐམས་ཅད་སྒྲོལ་བཀུག་སྟེ་སྨྲས་པ། གཞོན་ནུ་ཁྱོད་ངའི་ཡུལ་ན་མ་འདུག་པར་སོང་ཤིག །དེ་ནས་གཞོན་ནུ་ ཐམས་ཅད་སྒྲོལ་ཕས་སྤངས་པ་དང་བསམས་པ། བདག་གིས་བྱང་ཆུབ་ཀྱི་ཕྱིར་འབད་པ་བྱས་པ་དང་། འཇིག་རྟེན་ཐམས་ཅད་རྗེས་སུ་གཟུང་བའི་ཕྱིར་བརྩོན་འགྲུས་ཀྱི་གོ་ཆ་བགོས་པས་གླང་པོ་ཆེ་དེ་ཡང་བཏང་སྟེ། དེ་བས་ཁྱིམ་ན་གནས་པས་ནི། །ཅི་ནུས་པས་ནི་སྦྱིན་པ་བཏང་། ། དཀའ་ཐུབ་ནགས་སུ་བརྟེན་ནས་ནི། །ངེས་པ་མཆོག་དག་བྱ་བ་ཡིན། །བསླངས་ན་མི་སྦྱིན་བྱ་བ་ཡི། །ཚིག་ནི་སྨྲ་བར་མི་ཕོད་ཀྱི། །དེ་བས་བདག་ནི་ཁྱིམ་སྤངས་ཏེ། །དཀའ་ཐུབ་ནགས་སུ་རབ་ཏུ་འགྲོ། །དེ་ནས་བྱང་ཆུབ་སེམས་དཔས་དེ་ལྟར་སྙིང་ལ་མནའ་མཐོ་ བཅད་ནས་ཆུང་མ་རྒྱགས་སྦྱིན་མའི་དྲུང་དུ་སོང་སྟེ་དེ་དག་རྒྱས་པར་སྨྲས་སོ། །དེ་ནས་རྒྱགས་སྦྱིན་མས་ཐོས་མ་ཐག་ཏུ་སྡུག་པ་དང་བྲལ་བར་དོགས་པའི་སྙིང་གིས་ཐལ་མོ་སྦྱར་ཏེ་བྱང་ཆུབ་སེམས་དཔའ་ལ་སྨྲས་པ། རྗེའི་སྲས་གལ་ཏེ་དེ་ལྟར་ན་བདག་ཀྱང་དཀའ་ཐུབ་ཀྱི་ནགས་སུ་ མཆི་སྟེ། བདག་ནི་རྗེའི་སྲས་དང་བྲལ་ན་སྐད་ཅིག་ཙམ་ཡང་འཚོ་བར་རྔོ་མི་ཐོག་ལགས་སོ། །ཅིའི་སླད་དུ་ཞེ་ན། ནམ་མཁའ་ཟླ་བས་སྟོངས་པར་གྱུར་པ་དང་། །ཇི་ལྟར་ས་ནི་ལོ་ཏོག་གིས་སྟོངས་དང་། །པད་མ་ཆུ་ཡིས་སྟོངས་པར་གྱུར་པ་དང་། །བུད་མེད་ཁྱིམ་ཐབ་ཀྱིས་ སྟོངས་དེ་བཞིན་ནོ། །བྱང་ཆུབ་སེམས་དཔས་སྨྲས་པ། བདག་ཅག་མཐར་གདོན་མི་ཟ་བར་འབྲལ་བར་འགྱུར་ཏེ། འདི་ནི་འཇིག་རྟེན་གྱི་རང་བཞིན་ནོ། །ཁྱོད་ནི་བཟའ་བ་དང་། བཏུང་བ་དང་། མལ་ཆ་དང་། བགོ་བ་མཆོག་ལ་གོམས་པས་ལུས་ཤིན་ཏུ་སྐྱིད་དེ་བ་ ཡིན། དཀའ་ཐུབ་ཀྱི་ནགས་ན་ནི་རྩྭ་དང་ལོ་མ་བཏིང་བར་ནི་ཉལ། རྩ་བ་དང་། མེ་ཏོག་དང་། འབྲས་བུ་ནི་ཟ། རྩྭ་དཱུར་བ་དང་། ཟུག་རྡོ་དང་། རྩྭ་དང་། ཚེར་མས་གང་བའི་ས་ལ་ནི་རྒྱུ། ཡང་དང་ཡང་དུ་ཟ་གཅིག་པ་ལ་ནི་སྟེན། བདག་ཉིད་སྐྱེ་བོ་ཐམས་ཅད་ལ་ནི་

  1008. 194b

    བསྟེན་དགོས། གློ་བུར་དུ་འོངས་པ་ཐམས་ཅད་མཆོད་པ་ལ་ནི་འབད་དགོས་ལ། དེ་ན་ཡང་ང་གདོན་མི་ཟ་བར་ཅི་ནུས་ཀྱིས་སྦྱིན་པ་གཏོང་སྟེ་དེ་ལ་ཁྱོད་ཀྱིས་ཅུང་ཟད་ཀྱང་མི་འགྱོད་པར་བྱ་དགོས་སོ། །དེ་བས་ན་རེ་ཞིག་ད་དུང་ཡང་ལེགས་པར་སོམས་ཤིག་རྒྱགས་སྦྱིན་མས་སྨྲས་པ། རྗེའི་ སྲས་བདག་རྔོ་ཅི་ཐོག་གིས་རྗེའི་སྲས་ཀྱི་རྗེས་སུ་སྒྲུབ་ལགས་སོ། །བྱང་ཆུབ་སེམས་དཔའ་སྨྲས་པ། གལ་ཏེ་དེ་ལྟ་ན་དམ་བཅས་པ་དེ་དག་ཁྱོད་ཀྱིས་དྲན་པར་བྱོས་ཤིག །དེ་ནས་བྱང་ཆུབ་སེམས་དཔའ་ཕའི་དྲུང་དུ་སོང་ནས་མགོ་བོས་ཕྱག་བྱས་ཏེ། ཡབ་ཅིག་བདག་གིས་སྦྱིན་ པར་གླང་ཆེན་སྩལ། །ནོངས་པ་གང་ལགས་ས་བདག་བཟོད་པར་གསོལ། །བདག་ནི་གྲོང་ནས་དགོན་པར་མཆི་ལགས་ཀྱི། །མི་ཡི་དབང་པོ་ཕྱག་མཛོད་སྟོངས་མ་གྱུར། །དེ་ནས་རྒྱལ་པོ་བུ་དང་བྲལ་བའི་སྡུག་བསྔལ་གྱིས་དབུགས་ཀྱིས་བརྣངས་ཏེ་སྐད་འདར་འདར་བོས་སྨྲས་པ། བུ་སྦྱིན་པའི་བློ་བོར་ལ་འདུག་ཤིག །བྱང་ཆུབ་སེམས་དཔས་སྨྲས་པ། ས་ནི་རི་དང་བཅས་པར་ཡང་། །གལ་ཏེ་ལྡོག་པར་འགྱུར་གདའ་ཡིས། །ས་བདག་བདག་ནི་སྦྱིན་པ་ལས། །སེམས་ནི་ལྡོག་པར་མི་བགྱིད་དོ། །ཞེས་སྨྲས་ནས་སོང་ངོ་། །དེ་ནས་བུ་དང་། བུ་མོ་དང་། ཆུང་མ་དང་ལྷན་ཅིག་ཤིང་རྟའི་ནང་དུ་ཞུགས་ཏེ་གྲོང་ཁྱེར་དམ་པ་དེ་ནས་བྱུང་ནས་ཕོ་བྲང་འཁོར་གྱི་མི་དང་ཡུལ་མི་མྱ་ངན་བྱེད་པ་བརྒྱ་སྟོང་རྗེས་སུ་འབྲང་བཞིན་དུ་སོང་ངོ་། །དེ་ནས་མི་ཞིག་གིས་ངུ་ཞིང་སྨྲེ་སྔགས་འདོན་པའི་སྒྲ་དེ་ཡང་ཐོས། སྐྱེ་བོའི་ཚོགས་ཆེན་པོ་གྲོང་ཁྱེར་གྱི་སྒོར་བྱུང་བ་ཡང་ མཐོང་ནས་མི་ཞིག་ལ་དྲིས་པ། ཀྱེ་ནང་རྗེ་སྐྱེ་བོའི་ཚོགས་ཆེན་པོ་འདི་ཆོ་ངེས་འདེབས་པ་ཅི་ལས་གྱུར་དེས་སྨྲས་པ། ཤེས་ལྡན་ཅི་མི་ཤེས་སམ། འདི་ལྟར་མི་ཡི་དབང་པོ་ཉིད་ཀྱི་སྲས་པོ་མཆེ་བ་བཟང་། །བརྟན་པའི་ངང་ཚུལ་རབ་ཏུ་སྦྱིན་ལ་དགའ་བ་འདི་ནས་སྤྱུགས། དེ་ནི་བུ་དང་ཆུང་མར་ བཅས་ཏེ་ནགས་མཐར་ཆས་པ་ལ། །ཕོ་བྲང་འཁོར་བ་རྣམས་འདུས་ཤིན་ཏུ་སྙིང་རྗེས་ཆོ་ངེས་འདེབས། །དེ་ནས་བྱང་ཆུབ་སེམས་དཔས་གྲོང་ཁྱེར་དམ་པ་དེ་ནས་བྱུང་བའི་ཕོ་བྲང་འཁོར་བ་རྣམས་ལ་ཅི་རིགས་པར་མངོན་དུ་སོང་ནས་སྨྲས་པ། ཤེས་ལྡན་དག་སླར་དེང་ཤིག །སླར་

  1009. 195a

    དེང་ཤིག །འདི་ལྟར་ཤིན་ཏུ་ཡུན་རིང་པོ་ནས་སྡུག་པ་དང་འགྲོགས་པ་ཡང་མཇུག་ཏུ་གདོན་མི་ཟ་བར་འབྲལ་བའི་མཐའ་ཅན་དུ་འགྱུར་ཏེ། གཉེན་གྱི་སྐྱེ་བོ་དང་འགྲོགས་པ་ནི་ལམ་ཀའི་ངལ་བསོ་བའི་བསྟི་གནས་ཀྱི་ཤིང་དང་འདྲ་བས་གདོན་མི་ཟ་བར་སྡུག་པ་དང་བྲལ་ བར་འགྱུར་རོ། །དེ་ཅིའི་ཕྱིར་ཞེ་ན། འཇིག་རྟེན་ཀུན་ན་སྐྱེ་བོ་དབང་མེད་དེ། །མཛའ་བ་རྣམས་དང་བྲལ་བར་འགྱུར་བསམས་ནས། །ཁྱེད་ཀྱིས་ས་སྟེང་འབད་པ་ཐམས་ཅད་ཀྱིས། །ཞི་ཕྱིར་བློ་གྲོས་མི་གཡོ་བརྟན་པ་གྱིས། །དེ་ནས་དཔག་ཚད་སུམ་བརྒྱ་འདས་པ་དང་། །བྱང་ཆུབ་ སེམས་དཔའ་མཐོང་ནས་བྲམ་ཟེ་ཞིག་མངོན་དུ་འོངས་ཏེ་སྨྲས་པ། ཀྱེ་རྒྱལ་རིགས་གཞོན་ནུ་བདག་ནི་ཁྱོད་ཀྱི་ཡོན་ཏན་ཐོས་ནས་འདི་ནས་དཔག་ཚད་སུམ་བརྒྱ་ཙམ་གྱི་ཡུལ་ནས་འདིར་མཆིས་ལགས་ཀྱིས། ཁྱོད་ཀྱི་ཤིང་རྟ་མཆོག་འདིས་བདག་ངལ་བ་འབྲས་བུ་མཆིས་པར་བགྱི་བའི་རིགས་ སོ། །དེ་ནས་རྒྱགས་སྦྱིན་མ་མི་བཟོད་པ་སྐྱེས་ཏེ་ཚིག་བརླང་པོས་བྲམ་ཟེ་དེ་ལ་སྨྲས་པ། ཨེ་མའོ་ནགས་ནའང་མི་དབང་སྲས་ལ་སློང་བ་གང་། །བྲམ་ཟེ་འདི་ནི་ཤིན་ཏུ་བརྩེ་བ་མེད་པའི་བློ། །མི་དབང་སྲས་པོ་མི་དབང་དཔལ་ལས་ཉམས་གྱུར་པ། །འདི་ལ་འདིར་ནི་སྙིང་རྗེ་ཅིག་མི་ སྐྱེ་འམ། །བྱང་ཆུབ་སེམས་དཔས་སྨྲས་པ། ཁྱོད་ཀྱིས་བྲམ་ཟེ་མ་སྤྱོ་ཤིག །དེ་ཅིའི་ཕྱིར་ཞེ་ན། རྒྱགས་སྦྱིན་གལ་ཏེ་ནོར་འདོད་ལེན་པ་འདི་དག་མེད་གྱུར་ན། །ཀུན་སྦྱིན་མེད་པར་མི་གང་ཞིག་གིས་ས་སྟེང་བྱང་ཆུབ་འཐོབ། །སྦྱིན་སོགས་ཕ་རོལ་ཕྱིན་དྲུག་ཚུལ་གྱིས་ཡོན་ཏན་ མཆོག་ཅན་གྱི། །བྱང་ཆུབ་སེམས་དཔའ་རྣམས་ཀྱིས་ཀུན་མཁྱེན་ཉིད་མཆོག་རྟག་ཏུ་འཐོབ། །དེ་ནས་བྱང་ཆུབ་སེམས་དཔའ་མཆོག་ཏུ་དགའ་བས་རྟ་དང་ལྡན་པའི་ཤིང་རྟ་དེ་བྲམ་ཟེ་དེ་ལ་བྱིན་ནས་སྨྲས་པ། བྲམ་ཟེ་སེར་སྣ་དྲི་མ་སེལ་བྱེད་པ། །ཤིང་རྟ་རབ་ཏུ་བྱིན་པ་འདི་ཡིས་ འདིར། །བདག་ནི་དྲང་སྲོང་ཆེ་མཆོག་གིས་བསྐོར་བའི། །ཟག་མེད་ཆོས་ཀྱི་ཤིང་རྟ་ཆེ་སྐོར་ཤོག །དེ་ནས་ཐམས་ཅད་སྒྲོལ་གྱིས་སྙིང་རབ་ཏུ་དགའ་བས་ཤིང་རྟའི་མཆོག་དེ་ཡང་བྲམ་ཟེ་ལ་བྱིན་ནས་གཞོན་ནུ་མདོག་གནག་ཕྲག་པ་ལ་ཁྱེར། རྒྱགས་སྦྱིན་མས་ནི་གཞོན་ནུ་མ་དྲ་བ་ཅན་

  1010. 195b

    ཁྱེར་ནས་དཀའ་ཐུབ་ཀྱི་ནགས་ལོགས་སུ་ཆས་པ་དང་རིམ་གྱིས་དཀའ་ཐུབ་ཀྱི་ནགས་སུ་ཕྱིན་ཏོ། །དེ་ནས་ཐམས་ཅད་སྒྲོལ་དཀའ་ཐུབ་ཀྱི་ཚལ་དེར་རང་གི་སྙིང་མགུ་བར་བྱེད་པའི་བརྟུལ་ཞུགས་བླངས་ཏེ་གནས་སོ། །ཅི་ཙམ་ན་རྒྱགས་སྦྱིན་མ་རྩ་བ་དང་འབྲས་བུའི་ཕྱིར་དཀའ་ཐུབ་ཀྱི་ ནགས་སུ་སོང་བ་དང་བྲམ་ཟེ་ཞིག་ཐམས་ཅད་སྒྲོལ་གྱི་དྲུང་དུ་འོངས་ནས་སྨྲས་པ། རྒྱལ་རིགས་གཞོན་ནུ་ཁྱོད་རྒྱལ་བར་གྱུར་ཅིག །བདག་ཅག་བཀོལ་བ་མ་མཆིས་པ། །སྤ་ཤུག་ལྷན་ཅིག་འཁྱམ་བགྱིད་ན། །དེ་ཡི་དོན་དུ་བུས་པ་གཉིས། །ཁྱོད་ཀྱིས་བདག་ལ་སྦྱིན་པའི་རིགས། ། དེ་སྐད་ཅེས་སྨྲས་པ་དང་། དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་བུ་སྡུག་པ་གཏོང་བ་ལ་ཆུང་ཤིག་སེམས་ཤིང་འདུག་པ་དང་དེ་ནས་བྲམ་ཟེ་དེས་བྱང་ཆུབ་སེམས་དཔའ་ཐམས་ཅད་སྒྲོལ་ལ་སྨྲས་པ། ཀྱེ་རྒྱལ་རིགས་གཞོན་ནུ་བདག་གིས་ཁྱོད་ཐམས་ཅད་སྟེར་བའོ་ཞེས་ཐོས་ན་འདི་ ལྟར་ཁྱོད་ལ་བདག་གིས་བསླངས་པ་དེ་ལ་ཅི་ཞིག་དཔྱད་དུ་ཡོད། ཁྱོད་ནི་ཀུན་སྟེར་སྙིང་རྗེ་ཡི། །བདག་ཉིད་ཅན་དུ་ས་སྟེང་གྲགས། །ཇི་ལྟར་གྲགས་པ་དེ་བཞིན་དུ། །ཁྱོད་ཀྱིས་རྟག་ཏུ་བྱ་བའི་རིགས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ཐམས་ཅད་སྒྲོལ་གྱིས་ བྲམ་ཟེ་དེ་ལ་སྨྲས་པ། ཀྱེ་བྲམ་ཟེ་ཆེན་པོ། །རང་གི་སྲོག་ནི་གཏོང་བ་ལའང་། །ལན་འགའ་དཔྱོད་པ་མ་མྱོང་ན། །རང་གི་བུ་ནི་གཏོང་བ་ལ། །བདག་བློ་གཞན་དུ་འགྱུར་ཅི་སྨོས། །བྲམ་ཟེ་ཆེན་པོ་དེ་ལྟ་མོད་ཀྱི། བདག་གིས་ནགས་སུ་བསྐྱེད་བསྐྱེད་པའི། །བུས་པ་འདི་གཉིས་ ཡོངས་སྤངས་ན། །མ་དང་བྲལ་བའི་ཉོན་མོངས་པ། །འདི་དག་ཇི་ལྟར་གནས་སྙམ་མོད། །གཞོན་ནུ་ཤིན་ཏུ་བརྩེ་མེད་པས། །བུས་པ་བཏང་ལ་བདག་མིན་ཞེས། །ཁ་ཅིག་བདག་ལ་འཕྱར་འོང་གིས། །བྲམ་ཟེ་བདག་ནི་ཁྲིད་ན་ལེགས། །དེ་ནས་བྲམ་ཟེ་དེས་ཐམས་ཅད་ སྒྲོལ་ལ་སྨྲས་པ། ཀྱེ་རྒྱལ་རིགས་གཞོན་ནུ་རྒྱལ་པོ་ཆེན་པོའི་རིགས་སུ་སྐྱེས་པ། ས་འདི་ཐམས་ཅད་དུ་ཡོན་ཏན་གྲགས་པ། སྲོག་ཆགས་ཐམས་ཅད་ལ་སྙིང་རྗེ་བརྩེ་བས་འོ་བྱམས་པར་ཞུགས་པ། སྦྱིན་པ་དང་། མཆོད་པ་དང་། བཀུར་སྟིས་སྤོས་ཀྱི་གླང་པོ་ལྟ་བུ་དགེ་

  1011. 196a

    སྦྱོང་དང་། བྲམ་ཟེ་དང་། བློ་བུར་བའི་སྐྱེ་བོ་ལ་མཆོད་པ་བྱེད་པ། སྐྱེ་བོ་བཀྲེན་པ་དང་། ཕོངས་པ་དང་། མགོན་མེད་པ་དང་། ལྟོགས་པ་ཡོངས་སུ་སྡུག་པ་ཐམས་ཅད་ཀྱི་ཡིད་ལ་རེ་བ་ཡོངས་སུ་རྫོགས་པར་བྱེད་པ། མཐོང་ན་དོན་ཡོད་པ་ཁྱོད་ཀྱིས་བདག་ འོངས་ན་ནོམ་པ་མེད་པའམ། ལམ་གྱིས་དུབ་པ་འབྲས་བུ་མེད་པའམ། མཐོང་ན་དོན་མེད་པའམ། རེ་བ་དང་ཡུན་རིང་པོ་ནས་བརྣག་བརྣག་པའི་འདོད་པ་འབྲས་བུ་མེད་པར་བྱ་བ་གང་ཡིན་པ་དེ་ནི་ཆ་མ་ཡིན་ཏེ། ཁྱོད་ཀྱི་མེད་དོ་ཞེས་བྱ་བའི་ཚིག་གིས་ཁོ་བོའི་ཡིད་ལ་རེ་བ་ཀུན་ཏུ་རྟོག་པའི་ རྟ་བསྟབས་ན་མྱུར་དུ་ལྡོག་པར་འགྱུར་རོ། །དེ་བས་ན་ཁྱོད་ཀྱིས་བདག་གི་ཡིད་ལ་རེ་བ་ཡོངས་སུ་རྫོགས་པར་བྱས་ནས་བཏང་བའི་རིགས་སོ། །དེ་ཅིའི་ཕྱིར་ཞེ་ན། ཆུ་གཏེར་གོས་སུ་གྱོན་ཞིང་བཟའ་མིག་མཚུངས་མེད་པ། །རི་བོ་མཆོག་རྒྱས་ནུ་མར་ལྡན་པའི་རོ་སྟོད་ཅན། །གྲོང་ཁྱེར་ གྲོང་རྡལ་བཅས་པའི་ས་ལ་བཙལ་བྱས་ཀྱང་། །མཆེ་བཟང་ཁྱོད་དང་མཚུངས་པར་གཏོང་ཕོད་ཡོད་མ་ཡིན། །དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་གྱིས་བྲམ་ཟེའི་ཚིག་དེ་ཐོས་ནས་བུ་ལ་ཆགས་པའི་སློང་བས་འདི་དག་སེམས་པར་བྱེད་དེ། གལ་ཏེ་རེ་ཞིག་བུ་གཉིས་པོ། །བྲམ་ ཟེ་བྱིན་ན་བུ་དང་ནི། །བྲལ་བ་ལས་བྱུང་སྡུག་བསྔལ་དག །བདག་དང་རྒྱགས་སྦྱིན་གྱིས་འཐོབ་འགྱུར། །འོན་ཏེ་འདི་ལ་མ་བྱིན་ན། །བརྟུལ་ཞུགས་ལས་ཀྱང་ཉམས་གྱུར་ཅིང་། །བྲམ་ཟེ་འདི་ནི་ཚེ་ཆད་དེ། །ཇི་ལྟར་འོངས་པ་བཞིན་དུ་འགྲོ། །ཉེས་ན་བུ་བྲལ་ཉམ་ཐག་པའི། ། མྱ་ངན་ས་སྟེང་བདག་གིས་བླང་། །དེ་བཞིན་མ་བྱས་དམ་བཅས་པ། །ཞིག་ཅིང་བརྟུལ་ཞུགས་ཉམས་པར་འགྱུར། །དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་གྱིས་སྡུག་པའི་བུ་གཉིས་ངེས་པར་བཏང་བར་ཆད་ནས་སྨྲས་པ། ཀྱེ་ཁོ་བོས་དཀའ་སྤྱད་བརྒྱ་ཡིས་འཇིག་རྟེན་ སྡུག་བསྔལ་གྱི། །རྒྱ་མཚོ་ཆེན་པོ་སོ་སོར་འཇིགས་བྱེད་པ། །གཏིང་མི་དཔོགས་པར་རབ་ཏུ་བྱིང་བ་དག །ཕ་རོལ་བསྒྲལ་ཕྱིར་ལམ་གྱི་ཟམ་སྟེགས་བཅའ། །ཟླ་བ་དྲི་མེད་ཉ་བའི་བཞིན་རས་ཅན། །མ་ཞུམ་ཁ་ནས་དེ་སྐད་ཚིག་སྨྲས་ནས། །མཆི་མའི་བརླན་ཆུས་མིག་ནི་

  1012. 196b

    གང་གྱུར་པས། །བྱིས་པ་གཉིས་པོ་བྲམ་ཟེ་དེ་ལ་བྱིན། །ཡང་སྨྲས་པ། བུ་འདི་བྱིན་པའི་འབྲས་བུ་ནི། །རྒྱ་ཆེན་བདག་གིས་ཐོབ་གྱུར་ནས། །དེས་ནི་འཁོར་བའི་རྒྱ་མཚོ་ལས། །འཇིག་རྟེན་རྣམས་ནི་བསྒྲལ་བར་བྱ། །བྱིས་པ་གཞོན་ནུ་དག་བྱིན་མ་ཐག་ཏུ་ས་འདི་རྣམ་པ་དྲུག་ ཏུ་གཡོས་སོ། །དེ་ནས་ས་གཡོ་བ་དེས་ནགས་དེ་ན་གནས་པའི་དཀའ་ཐུབ་ཅན་རྣམས་སྡངས་ནས་ཕན་ཚུན་སྨྲས་པ། ས་ནི་མི་བཟད་གཡོས་གྱུར་པ། །འདི་ནི་སུ་ཡི་མཐུ་ལྟས་ཡིན། །གང་གི་མཐུ་ནི་འདི་འདྲ་བ། །ཤིན་ཏུ་བསལ་བར་ཤེས་པར་བྱ། །དེ་ན་གནས་འཇོག་དང་རུས་གཅིག་ པ་རྒན་པོ་དཀའ་ཐུབ་ཅན་ལྟས་ཤེས་པ་ལ་མཁས་པ་གཞན་ཞིག་ཡོད་པ་དེས་དྲང་སྲོང་དེ་རྣམས་ལ་དོན་དེ་གོ་བར་བྱས་པ། གདོན་མི་ཟ་བར་དཀའ་ཐུབ་ཀྱི་ནགས་སུ་འདུག་པའི་བུ་བྱིས་པ་འབྲས་བུ་དང་ཆུ་འཐུང་བ་ཡིད་དུ་འོང་བའི་མིག་ཏུ་སྡུག་པར་བྱེད་པ་གཉིས་ཐམས་ཅད་སྒྲོལ་གྱིས་སྐྱེ་བོ་སྡུག་ བསྔལ་གྱིས་ཉམ་ཐག་པ། ཡོངས་སུ་ཐར་བར་བྱ་བའི་ཕྱིར་བཏང་སྟེ། དེས་ནས་གཡོས་པར་གྱུར་ཏོ།། །།འདུལ་བ་གཞི། བམ་པོ་བརྒྱ་པ། དེ་ནས་བུས་པ་གཞོན་ནུ་དེ་གཉིས་ཀྱིས་ཕས་སྙིང་ནས་ཡོངས་སུ་བཏང་བའི་བློ་རིག་ནས་སྙིང་རྗེ་རྗེ་སྐད་དུ་ངུ་ཞིང་ཐལ་མོ་གཉིས་སྦྱར་ ནས་ཐམས་ཅད་སྒྲོལ་གྱི་རྐང་པ་གཉིས་ལ་གཏུགས་ཏེ་སྨྲས་པ། ཡབ་ཅིག་ཡུམ་ནི་མ་མཆིས་པར། །ཁྱོད་ནི་བདག་ཅག་སྩོལ་བཞེད་པ། །རེ་ཞིག་དེ་ནི་མཐོང་གྱུར་ནས། །དེ་ནས་བདག་ཅག་སྩལ་དུ་གསོལ། །དེ་ནས་བྱང་ཆུབ་སེམས་དཔའ་ཡིད་ལ་གཅགས་པའི་སྡུག་བསྔལ་ གྱིས་ངོམ་ཟུང་གནག་ཅིང་མཆི་མ་འཛག་བཞིན་དེ་གཉིས་ལ་འཁྱུད་ནས་སྨྲས་པ། བུ་དག་ང་ཡི་སྙིང་དུ་མི་སྡུག་མིན། །སྙིང་བརྩེ་སྙིང་རྗེ་མེད་མིན་ཏེ། །འཇིག་རྟེན་ཀུན་ལ་ཕན་པའི་ཕྱིར། །ཡོན་ཏན་མཐོང་ནས་བཏང་བ་ཡིན། །ཅི་ནས་ང་ཡིས་བྱང་ཆུབ་མཆོག །ཞི་བ་རང་ གིས་ཐོབ་ནས་ནི། །སྡུག་བསྔལ་རྒྱ་མཚོ་ལ་གནས་པའི། །རྟེན་མེད་འཇིག་རྟེན་རྣམས་བསྒྲལ་ལོ། །དེ་ནས་བྱིས་པ་གཞོན་ནུ་དེ་དག་གིས་ཕས་སྙིང་ནས་ཡོངས་སུ་བཏང་བའི་བློ་རིག་ནས་ཕའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་སྙིང་རྗེ་རྗེ་སྐད་དང་སྨ་

  1013. 197a

    བབ་པའི་ཚིག་གིས་དལ་གྱིས་སྨྲས་པ། གལ་ཏེ་ཁྱོད་ཀྱིས་ཐག་བཀུམ་ན། །མ་ལ་བདག་ཅག་གཉིས་ཀྱི་ཕྲིན། །ཁྱོད་ཀྱིས་བཟོད་པ་མཛོད་ཅིག་ཅེས། །ཡབ་ཅིག་ཁྱོད་ཀྱིས་གསུང་དུ་གསོལ། །ཡབ་གཞན་ཡང་བྱིས་པར་གྱུར་པས་བླ་མ་ཁྱོད་ལ་ ནོངས་པ་བགྱིས་པ་གང་། །གལ་ཏེ་ལ་ལར་ཐུགས་ལ་མི་བབ་ཚིག་འགའ་སྨྲས་པའམ། །གུས་པར་མཉན་པས་ཡོངས་སུ་མཉེས་པ་ཉིད་དུ་མ་བགྱིས་པ། །དེ་ནི་བྱིས་པའི་ནོངས་པ་ལགས་ཞེས་བཟོད་པ་མཛད་དུ་གསོལ། །དེ་སྐད་ཅེས་སྨྲས་ནས་ཕ་ལ་ཕྱག་འཚལ་ཏེ་ལན་ གསུམ་དུ་བསྐོར་བ་བྱས་ནས་མིག་མཆི་མས་གང་བཞིན་བླ་མ་ལ་སྨྲ་བར་ཡིད་ལ་གཅགས་པས་ཡང་དང་ཡང་ཕྱིར་ལྟ་ཞིང་བསྟི་གནས་དེ་ནས་བྱུང་སྟེ་སོང་ངོ་། །དེ་ནས་བྱང་ཆུབ་སེམས་དཔའ་བྱིས་པ་གཞོན་ནུའི་ཚིག་ཤིན་ཏུ་སྙིང་རྗེར་རུང་བ་དེ་དག་གིས་སྙིང་བློང་ནས་ཡིད་ཀྱི་བྱང་ཆུབ་ཏུ་ སྨོན་ལམ་བཏབ་སྟེ། དཀའ་ཐུབ་ཀྱི་ཚལ་གྱི་ལོ་མའི་སྤྱིལ་བུར་ཞུགས་སོ། །བྱིས་པ་གཞོན་ནུ་དག་དོང་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་སོ། །ལྷ་སྟོང་ཕྲག་དུ་མས་ཡང་བར་སྣང་ལ་ཅ་ཅོ་དང་ག་ཞའི་སྒྲ་འབྱིན་ཅིང་། ཨེ་ མའོ་རབ་སྦྱིན་བདག་ཉིད་ཆེ། །བྱིས་པ་འདི་གཉིས་བཏང་ནས་ཀྱང་། །གང་གི་ཡིད་ནི་འགྱུར་མེད་པ། །དེ་ནི་ངེས་པ་རྨད་ཅིག་གོ། །དེ་ནས་རྒྱགས་སྦྱིན་མ་རྩ་བ་དང་འབྲས་བུ་རྣམས་ཁྱེར་ཏེ་བསྟི་གནས་ལོགས་སུ་ཆས་པ་ལས་ས་ཆེ་ཐང་དུ་གཡོས་པ་དེས་མྱུར་བ་ཁོ་ནར་བསྟི་གནས་དེ་ ཉིད་དུ་སོང་བ་དང་། ལྷ་གཞན་ཞིག་གིས་རྒྱགས་སྦྱིན་མ་བྱང་ཆུབ་སེམས་དཔའ་སེམས་ཅན་ཐར་བར་བྱ་བར་བརྩོན་པ་བྱས་པའི་སྦྱིན་པའི་ཕ་རོལ་ཏུ་ཕྱིན་པའི་བར་ཆད་བྱེད་པར་འགྱུར་དུ་འོང་ངོ་སྙམ་ནས་སེང་གེ་མོ་ཞིག་གི་གཟུགས་སུ་བསྒྱུར་ཏེ་ལམ་བཀག་ནས་འདུག་པ་དང་རྒྱགས་སྦྱིན་ མས་རི་དགས་ཀྱི་རྒྱལ་པོའི་ཆུང་མ་དེ་ལ་སྨྲས་པ། རི་དགས་རྒྱལ་པོའི་ཆུང་མ་སྒེག་སྒེག་མ། །ཁོ་མོ་ལམ་འདིར་བཀག་ནས་ཅི་སྟེ་འདུག །ཇི་ལྟར་བདག་ནི་མི་འཕྱོ་ངེས་གྱུར་ན། །ལམ་ལས་བཟུར་ཏེ་མྱུར་དུ་འགྲོ་བར་གྱིས། །གཞན་ཡང་ཁྱོད་ཀྱང་རི་དགས་རྒྱལ་པོའི་ཆུང་མ་ལ། །

  1014. 197b

    བདག་ཀྱང་མི་ཡི་དབང་པོ་སེང་གེ་ཡི། །བཙུན་མོ་ཡིན་པས་ཆོས་ཀྱི་སྤུན་གྱུར་གྱིས། །རི་དགས་རྒྱལ་མོས་བདག་གི་ལམ་ཕྱེ་ཤིག །དེ་སྐད་ཅེས་སྨྲས་པ་དང་ལྷ་སེང་གེ་མོའི་གཟུགས་སུ་བསྒྱུར་བ་དེ་ཡང་ལམ་དེ་ནས་ལོགས་ཤིག་ཏུ་སོང་ངོ་། །དེ་ནས་རྒྱགས་སྦྱིན་མས་བཀྲ་མི་ ཤིས་པའི་ལྟས་དག་མཐོང་ནས་ཡུད་ཙམ་ཞིག་བསམས་པ། ཇི་ལྟར་བར་སྣང་ལ་ངུད་མོའི་སྒྲ་གྲག་པ་དང་། ཇི་ལྟར་ཡང་ཚལ་ན་གནས་པའི་འབྱུང་པོ་རྣམས་མྱ་ངན་བྱེད་པའི་སྒྲ་གྲག་པ་ལས་ན་གདོན་མི་ཟ་བར་བསྟི་གནས་སུ་མ་ལེགས་པ་ཞིག་བྱུང་བར་གྱུར་ཏོ་སྙམ་ནས་སྨྲས་པ། ཇི་ ལྟར་བདག་མིག་འགུལ་བ་དང་། །ཇི་ལྟར་བྱ་སྐད་འབྱིན་པ་དང་། །ཇི་ལྟར་བདག་ནི་དོགས་པ་ལས། །བུས་པ་དེ་གཉིས་བཏང་བར་ངེས། །ཇི་ལྟར་ས་འདི་གཡོས་པ་དང་། །བདག་གི་སྙིང་ནི་འདར་བ་དང་། །ཇི་ལྟར་ལུས་ཀྱང་རྨ་བ་ལས། །བུས་པ་དེ་ཡང་བཏང་བར་ངེས། ། ཞེས་དེ་ལྟ་བུའི་མི་ལེགས་པ་བརྒྱ་སྟོང་དག་སེམས་ཤིང་བསྟི་གནས་སུ་སོང་ནས་བསྟི་གནས་སུ་ཞུགས་ཏེ། མི་དགའ་བཞིན་བལྟས་ན་བུ་དེ་གཉིས་མ་མཐོང་ནས་དེ་ནས་རྨོངས་ཤིང་སྙིང་འདར་བས་བསྟི་གནས་ཀྱི་གཞི་དེའི་རྗེས་བཞིན་དུ་སེམས་ཏེ། ཕྱོགས་འདི་ན་ནི་གཞོན་ནུ་མདོག་ནག་སྲིང་ མོ་དང་ལྷན་ཅིག་རི་དགས་ཀྱི་ཕྲུ་གུ་དང་ལྷན་ཅིག་རྟག་ཏུ་རྩེ་རྩེ། འདི་ནི་དེ་གཉིས་ཀྱིས་ས་རྡུལ་ལས་བྱས་པའི་ཁྱིམ་ཡིན། འདི་ནི་དེ་གཉིས་ཀྱི་རྩེད་མོའི་ཆ་བྱད་ཡིན་ན་དེ་གཉིས་ནི་མི་སྣང་ན་གལ་ཏེ་ཞིག་ན་བདག་གིས་མ་མཐོང་གི་ལོ་མའི་སྤྱིལ་བུར་ཞུགས་ནས་ཉལ་ལྟ་སྲིད་དམ་སྙམ་དུ་དེ་ལྟར་ སྙིང་ལ་རེ་ཞིག་བུ་མཐོང་བར་འདོད་པས་རྩ་བ་དང་འབྲས་བུ་ཕྱོགས་གཅིག་ཏུ་བཞག་ནས་མིག་མཆི་མས་གང་བཞིན་དུ་ཁྱིམ་ཐབ་ཀྱི་རྐང་པ་གཉིས་ལ་གཏུགས་ཏེ་སྨྲས་པ། རྗེའི་སྲས་ཁྱེའུ་དང་བུ་མོ་དེ་གཉིས་གང་དུ་མཆིས། ཐམས་ཅད་སྒྲོལ་གྱིས་སྨྲས་པ། ཁོ་བོའི་དྲུང་དུ་བྲམ་ཟེ་ཞིག །རེ་ བས་ཡང་དག་འོངས་གྱུར་ན། །བུས་པ་དེ་གཉིས་དེ་ལ་བྱིན། །དེ་ལ་རྗེས་སུ་ཡི་རང་གྱིས། །དེ་སྐད་ཅེས་སྨྲས་པ་དང་། རྒྱགས་སྦྱིན་མ་རི་དགས་མོ་མདའ་དུག་ཅན་གྱིས་ཕོག་པ་བཞིན་དུ་ས་ལ་སྐྱེལ་ནས་ཉ་ཆུའི་གནས་ནས་ཕྱུང་བ་བཞིན་དུ་འགྲེ་ལྡོག་པར་བྱེད། ཁྲུང་ཁྲུང་བུ་སྟོར་བ་

  1015. 198a

    བཞིན་དུ་ནི་སྙིང་རྗེ་རྗེ་སྐད་དུ་དུ། བ་བེའུ་ཤི་བ་བཞིན་དུ་ནི་འབའ་སྒྲ་སྣ་ཚོགས་འདོན་ཅིང་སྨྲས་པ། པད་མོ་གཞོན་ནུ་ལྟ་བུའི་བྱད་བཞིན་ཅན། །ལག་པ་པད་མའི་མདའ་ལྟར་གཞོན་ཤ་ཅན། །བདག་གི་བུ་གཉིས་སྡུག་བསྔལ་མ་མྱོང་བ། །འགྲོ་བ་གང་དུ་ སོང་ནས་སྡུག་བསྔལ་གྱུར། །རི་དགས་བུ་ལྟར་དྲང་ཞིང་རི་དགས་མིག །རི་དགས་ལྷན་ཅིག་བསྟི་གནས་དགའ་བ་ན། །དེ་རིང་བདག་གི་བུ་གཉིས་ཇི་ལྟ་བུར། །གཞན་གྱི་དབང་གིས་དོང་ཞིང་སྡུག་བསྔལ་གྱུར། །མིག་ནི་མཆི་མས་གང་བའི་མིག་གིས་ནི། །སྙིང་རྗེས་དུ་ བས་ཤིན་ཏུ་སྡུག་བསྔལ་བ། །དེ་རིང་བདག་གིས་ལེགས་པར་མ་མཐོང་བས། །སྐྱེ་བོ་བཀྲེན་པའི་ནང་ན་སྡུག་པས་འཚོ། །དེ་གཉིས་བདག་གི་པང་ནས་བསྐྱེད་བསྐྱེད་པ། །ཟས་སུ་རྩ་བ་མེ་ཏོག་འབྲས་བུ་ཟ། །བཟོད་དང་གནས་པས་བླ་མ་རྟག་དགའ་བས། །བདག་གི་བུ་གཉིས་ ཤིན་ཏུ་སྡུག་བསྔལ་ལོ། །དེ་གཉིས་མ་དང་ཉེ་དུ་བྲལ་བ་དང་། །རྩ་ལག་རྣམས་ཀྱིས་གཟུ་ལུམས་སྤངས་པ་ལས། །སྐྱེ་བོ་སྡིག་ཅན་ངན་དང་ཕྲད་གྱུར་ནས། །བདག་གི་བུ་གཉིས་ཤིན་ཏུ་སྡུག་བསྔལ་ལོ། །སྐོམ་ཞིང་བཀྲེས་པས་བདག་ཉིད་རྟག་གདུངས་ན། །དེ་གཉིས་སུ་ཡི་དབང་ གིས་འགྲོ་བར་འགྱུར། །བྲན་དུ་གྱུར་པས་གདོན་མི་ཟ་བར་ནི། །དེ་གཉིས་ཉམ་ཐག་སྡུག་བསྔལ་ཡོངས་སུ་ཟིན། །བདག་གིས་ངེས་པར་ཚེ་རབས་གཞན་དག་ཏུ། །སྲོག་ཆགས་སྡུག་པ་བརྒྱ་དག་ཕྲལ་བ་ཡི། །སྡིག་ལས་ཤིན་ཏུ་མི་བཟད་འདིར་བྱས་པ། །དེས་ན་བ་བེའུ་མེད་ བཞིན་ཆོ་ངེས་འདེབས། །བདེན་ཚིག་གང་གིས་བདག་ནི་རྟག་ཏུ་ཡང་། །སེམས་ཅན་ཀུན་ལ་ཡིད་ནི་མཉམ་གྱུར་པ། །བདེན་ཚིག་དེས་ནི་བདག་གི་བུ་གཉིས་པོ། །བྲན་དུ་གྱུར་པ་ལས་ནི་ཐར་བར་ཤོག །དེ་ནས་རྒྱགས་སྦྱིན་མས་བུས་པ་གཞོན་ནུ་དེ་དག་གིས་བསྐྱེད་ཅིང་བསྲུངས་ པའི་ཤིང་གང་ཡིན་པ་དེ་དག་ལོ་མ་ཐིབ་བེ་འདུག་པར་མཐོང་ནས་སྙིང་དུ་སྡུག་ནས་འཁྱུད་དེ་སྨྲས་པ། བུས་པས་རིལ་བ་ཆུང་ངུའི་ཆུས་བཅུས་པ། །ལོ་མ་རྣམས་ལ་ཆུ་ཐིགས་འཛག་པ་ཡི། །ལྗོན་ཤིང་རྣམས་ནི་སེམས་དང་བཅས་པ་བཞིན། །བུས་པ་ནུ་ཞོ་མ་བླུད་ལྟ་བུར་ངུ་། །

  1016. 198b

    ཡང་བུས་པ་གཞོན་ནུ་དེ་གཉིས་དང་རྩེ་རྩེ་བའི་རི་དགས་ཀྱི་ཕྲུ་གུ་བསྟི་གནས་ན་འདུག་པ་རྣམས་མཐོང་ནས་མི་དགའ་སྟེ་སྙིང་རྗེ་རྗེ་སྐད་ཀྱི་ཚིག་གིས་དལ་བུས་སྨྲས་པ། དེའི་ནེའུ་ཟླ་མཐོང་བར་འདོད་པ་གང་། །གནས་སུ་ས་ཚུགས་མཚོན་ཅིང་ཚོལ་བྱེད་པ། །རི་དགས་ཕྲུ་གུ་རྒྱུ་བ་ འདི་དག་ཀྱང་། །བདག་གི་སྡུག་བསྔལ་མི་ཆུང་གཞན་ཡིན་ནོ། །དེ་ནས་བུས་པ་གཞོན་ནུ་དེ་དག་ལམ་གང་ནས་དོང་བའི་ལམ་དེར་རྗེས་བཅད་པ་དང་། བུས་པ་གཞོན་ནུ་དེ་གཉིས་རྗེས་དྲང་པོར་མ་བྱུང་གི་གྱ་གྱུས་གང་བར་མཐོང་ནས་ལྷག་པར་ཡང་སྡུག་བསྔལ་གྱིས་གདུངས་ནས་ སྨྲས་པ། ཇི་ལྟར་འཐེན་པའི་རྗེས་བྱུང་དང་། །ལ་ལར་མྱུར་དུ་སོང་བ་ལས། །བརྡེགས་ཏེ་ཁྲིད་པར་གདོན་མི་ཟ། །ཀྱེ་མ་བྲམ་ཟེ་བརྩེ་མེད་མཆོག །མགུལ་ནི་དབུགས་ཀྱིས་བརྫགས་ཤིང་སྐད་ཀྱང་འཛེར། །མ་མཆུ་མཛེས་པ་འདར་ཞིང་བདག་གི་བུ། །རི་དགས་བཞིན་དུ་མིག་ ཀྱང་རིག་རིག་སྟེ། །རྐང་པ་འཇམ་པོས་ཇི་ལྟར་སོང་ཞིག་གུ། །དེ་ནས་བྱང་ཆུབ་སེམས་དཔའ་དེ་ལྟར་སྨྲེ་སྔགས་འདོན་པའི་བདག་ཉིད་དེ་མཐོང་ནས་མི་རྟག་པ་ཉིད་དང་ལྡན་པའི་ཚིག་དེ་དང་དེ་དག་གིས་རྣམ་གྲངས་མང་པོར་གོ་བར་བྱས་ནས་སྨྲས་པ། ཁོ་བོས་བུ་གཉིས་གྲགས་པ་ཡིས། ། བཏང་བ་མ་ཡིན་སྡང་བས་མིན། །སེམས་ཅན་ཀུན་ལ་ཕན་དོན་དུ། །བཏང་བར་དཀའ་བའི་བུ་དེ་བཏང་། །མཆོག་ཏུ་བཏང་དཀའ་བདག་ཉིད་དང་། །བུ་དང་ཆུང་མ་རྣམས་བཏང་ནས། །སེམས་དཔའ་ཆེན་པོས་ཚུལ་བཞིན་དུ། །བྱང་ཆུབ་མཆོག་ནི་ཐོབ་པར་འགྱུར། །རྒྱགས་ སྦྱིན་བདག་གིས་གཏོང་བ་ལ་བརྟེན་གཏང་དཀའ་བའི། །བུས་པ་དེ་གཉིས་འཇིག་རྟེན་ཐར་པའི་དོན་དུ་བཏང་། །བདག་དང་ཆུང་མ་གཞོན་ནུ་ནོར་ཡང་གཏང་བྱ་སྟེ། །ཀུན་ལ་ཐམས་ཅད་བཏང་བའི་བློ་གྲོས་ང་ལ་ཡོད། །དེ་ནས་རྒྱགས་སྦྱིན་མས་སེམས་བརྟན་ཏེ། བྱང་ཆུབ་སེམས་ དཔའ་ལ་སྨྲས་པ། ཁྱོད་ལ་བར་ཆད་མི་བགྱིད་ཀྱིས། །ཁྱོད་བློ་གཞན་དུ་མ་འགྱུར་ཅིག །གལ་ཏེ་བདག་ཀྱང་སྩོལ་བཞེད་ན། །དོགས་པ་མ་མཛད་བདག་སྩོལ་ཅིག །གཞན་ཡང་དཔའ་བོ་གང་ཕྱིར་ཉིད་ཀྱི་མི། །སྡུག་པས་ཆགས་པ་བཏང་བ་ཡི། །དོན་དེ་མྱུར་དུ་ཐོབ་ནས་ནི། །

  1017. 199a

    སྲིད་ལས་འགྲོ་བ་བསྒྲལ་བར་མཛོད། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་དང་། རྒྱགས་སྦྱིན་མ་བརྩོན་འགྲུས་ཤིན་ཏུ་རྨད་དུ་བྱུང་བ་དང་། ཤིན་ཏུ་བྱ་དཀའ་བར་རིག་ནས་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་ བསྐོར་ཏེ། སྟེང་གི་ནམ་མཁའ་ལས་བསྟི་གནས་དེར་ལྷགས་ནས་སྣང་བ་རྒྱ་ཆེན་པོས་གནས་དེ་གསལ་བར་བྱས་ཏེ། ནམ་མཁའ་ལ་འདུག་བཞིན་དུ་བྱང་ཆུབ་སེམས་དཔའ་ལ་སྨྲས་པ། འདི་ལྟར་འཇིག་རྟེན་རྨོངས་པ་བློ་ངན་གཞུང་གིས་བཅིངས་པའི་བློ་གྲོས་ཅན། །ལོངས་ སྤྱོད་ལ་ཆགས་སྙིང་གི་ཞགས་པ་བུ་ཡིས་བཅིངས་པའི་ནང་ན་ཡང་། །ཁྱབ་བདག་ཁྱོད་གཅིག་ཆགས་པ་མེད་པས་དགའ་བསྐྱེད་པའི་བུ་གཏོང་བས། །ངེས་པར་གོ་འཕང་བ་དེ་དང་ཞི་བ་དྲི་མེད་དཀའ་བ་མེད་པས་འཐོབ། །དེ་སྐད་ཅེས་བྱང་ཆུབ་སེམས་དཔའ་སྤྲོ་བ་བསྐྱེད་ནས་ལྷ་ རྣམས་ཀྱི་དབང་པོ་བརྒྱ་བྱིན་གྱིས་བསམས་པ། འདི་གཅིག་པུ་གཡོག་དང་བྲལ་ན་ཉོན་མོངས་པར་འགྱུར་གྱིས། མ་ལ་བདག་གིས་རྒྱགས་སྦྱིན་མ་བསླང་ངོ་སྙམ་ནས། དེ་ནས་བྲམ་ཟེའི་ཆ་བྱད་དུ་བསྒྱུར་ཏེ་བྱང་ཆུབ་སེམས་དཔའི་དྲུང་དུ་སོང་ནས་ཡང་བྱང་ཆུབ་སེམས་དཔའ་ལ་ སྨྲས་པ། ཡན་ལག་ཀུན་བཟང་ཁྱིམ་ཐབ་ལས། །འཕྱོ་བ་མེད་ཅིང་སྙིང་ཉེ་བ། །རིགས་ན་བསྔགས་པའི་སྲིང་མོ་འདི། །བདག་ལ་བྲན་མོའི་དོན་དུ་སྩོལ། །དེ་ནས་རྒྱགས་སྦྱིན་མ་མི་བཟོད་པ་སྐྱེས་ནས་བྲམ་ཟེ་ལ་སྨྲས་པ། ངོ་ཚ་མེད་ཅིང་བརྐམ་པ་ཁྱོད། །འདི་ནི་ བྲམ་ཟེའི་ཐ་ཤལ་ཏེ། །ཁྱོད་ལྟ་འཕྱོན་མ་མི་བྱེད་ཅིང་། །དམ་ཆོས་དགའ་བ་ང་འདོད་དམ། །དེ་ནས་བྱང་ཆུབ་སེམས་དཔའ་ཐམས་ཅད་སྒྲོལ་སྙིང་རྗེ་དང་ལྡན་པའི་སྙིང་གིས་རྒྱགས་སྦྱིན་མ་ལ་བརྟག་པར་བརྩམས་པ་དང་། དེ་ནས་རྒྱགས་སྦྱིན་མས་བྱང་ཆུབ་སེམས་དཔའ་ལ་སྨྲས་པ། བདག་ནི་བདག་ལ་གཡར་ངན་མེད། །དེ་བཞིན་བདག་ལ་ལྟ་མ་ལགས། །གཅིག་པུ་ཇི་ལྟར་བཞུགས་འགྱུར་ཞེས། །དེ་ལྟར་ཁྱོད་སླང་གཡར་ངན་བགྱིད། །དེ་ནས་བྱང་ཆུབ་སེམས་དཔས་རྒྱགས་སྦྱིན་མ་ལ་སྨྲས་པ། གོ་འཕང་མི་ཟད་མྱ་ངན་མེད་པ་ཚོལ་བདག་ལ། །ས་

  1018. 199b

    སྟེང་འདིར་ནི་རྒྱགས་སྦྱིན་མྱ་ངན་བྱ་མི་དགོས། །ཁྱོད་ནི་མྱ་ངན་མེད་པར་བྲམ་ཟེ་འདི་རྗེས་འབྲོངས། །བདག་ནི་རི་དགས་འཆི་བ་བཞིན་དུ་བསྟི་གནས་འཐེན། །དེ་སྐད་ཅེས་སྨྲས་ནས་དགའ་བ་དང་། མགུ་བ་དང་། ཡིད་རབ་ཏུ་དགའ་བས་བསམས་པ། སྦྱིན་པ་འདི་ནི་ནགས་ ཚལ་འདིར། །བདག་གི་སྦྱིན་པ་ཐ་མ་ཡིན། །རྒྱགས་སྦྱིན་འདིར་ཡང་ཡོངས་བཏང་ནས། །ཡོངས་སུ་གཟུང་བ་མེད་པར་འགྱུར་སྙམ་དུ་རིག་ནས་རྒྱགས་སྦྱིན་མ་ལག་པ་ནས་བཟུང་སྟེ་བྲམ་ཟེ་དེ་ལ་སྨྲས་པ། བདག་གི་མཆིས་འབྲང་སྡུག་པ་འདི། །སྙིང་ནས་སྙིང་ཉེ་བསྒོ་བ་ཉན། ། ཡ་རབས་ཚུལ་ཅན་སྙན་པར་སྨྲ། །བྲམ་ཟེའི་མཆོག་ཁྱོད་བཞེས་སུ་གསོལ། །དེ་ནས་མཆེ་བ་བཟང་པོ་ཡི། །ཆུང་མ་བྱང་ཆུབ་འདོད་ཕྱིར་བཏང་། །ཆུ་ལ་གྲུ་ནི་ཇི་ལྟ་བར། །ས་ནི་མཐའ་དག་རྣམ་དྲུག་གཡོས། །དེ་ནས་རྒྱགས་སྦྱིན་མ་བྲམ་ཟེའི་དབང་དུ་གྱུར་ཏེ། །ཁྱོ་དང་། བུ་ དང་། བུ་མོ་དང་བྲལ་བའི་སྡུག་བསྔལ་གྱིས་ཉམ་ཐག་ནས་དབུགས་བརྫགས་པས་མགུལ་སྒྲ་ངར་ངར་པོར་འགགས་བཞིན་འདི་སྐད་ཅེས་སྨྲས་སོ། །བདག་གིས་ཚེ་རབས་སྔ་མ་ལ། །ཅི་འདྲ་བ་ཡི་ལས་ངན་བྱས། །དེས་ན་བ་བེའུ་ཤི་བ་བཞིན། །སྐྱེ་བོ་མེད་པའི་ནགས་ན་ངུ་། །དེ་ ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྲམ་ཟེའི་ཆ་བྱད་མི་སྣང་བར་བྱས་ཏེ་རང་བཞིན་གྱི་ཆ་བྱད་དུ་གནས་ནས་རྒྱགས་སྦྱིན་མ་ལ་སྨྲས་པ། སྐལ་བཟངས་བདག་ནི་བྲམ་ཟེ་མ་ཡིན་མི་ཡང་མ་ཡིན་གྱི། །བདག་ནི་ལྷ་ཡི་དབང་པོ་བརྒྱ་བྱིན་ལྷ་མིན་འཇོམས་བྱེད་དེ། །ཁྱོད་ཀྱི་འདུལ་བའི་མཆོག་ ཏུ་གྱུར་པ་འདི་ཡིས་བདག་མགུ་ཡིས། །བདག་ལས་དམ་པ་གང་ཞིག་འདོད་པ་དེ་འདིར་སྨྲ་བར་གྱིས། །དེ་ནས་དེའི་ཚིག་གིས་རྒྱགས་སྦྱིན་མ་ཡིད་བདེ་བ་སྐྱེས་ནས་བརྒྱ་བྱིན་ལ་ཕྱག་འཚལ་ནས་སྨྲས་པ། སྤྱན་སྟོང་ལྡན་པ་བདག་གི་བུ། །བྲན་གྱུར་པ་ལས་ཐར་མཛད་ཅིང་། །མེས་ པོའི་དྲུང་དུ་ཕྱིན་པར་ཡང་། །སུམ་བཅུ་རྩ་གསུམ་བདག་པོས་མཛོད། །དེ་སྐད་ཅེས་སྨྲས་ནས་ཡང་དབང་པོ་ཆེན་པོ་བསྟི་གནས་སུ་ཞུགས་ནས་བྱང་ཆུབ་སེམས་དཔའི་དྲུང་དུ་སོང་སྟེ། རྒྱགས་སྦྱིན་མ་ལག་པ་གཡོན་པས་བཟུང་ནས་བྱང་ཆུབ་སེམས་དཔའ་ལ་སྨྲས་པ། བདག་གིས་ཁྱོད་

  1019. 200a

    ལ་རྒྱགས་སྦྱིན་འདི། །གཡོག་གི་ཕྱིར་ནི་སྦྱིན་པར་བྱས། །ཁྱོད་ཀྱིས་སུ་ལའང་མ་སྦྱིན་ཅིག །བཞག་པ་བྱིན་ན་སྨད་པར་འགྱུར། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྲམ་ཟེ་ཁྱེའུ་དང་བུ་མོ་ཁྱེར་བ་དེ་ཇི་ལྟར་གྲོང་ཁྱེར་གཞན་ཡིན་ནོ་སྙམ་ནས་གྲོང་ཁྱེར་དེ་ ཉིད་དུ་སོང་སྟེ་བུས་པ་གཞོན་ནུ་དེ་དག་བཙོང་བར་བརྩམས་པ་དེ་ལྟ་བུར་རྨོངས་པར་བྱས་སོ། །ཇི་ཙམ་ན་བློན་པོ་རྣམས་ཀྱིས་མཐོང་ནས་རྒྱལ་པོ་ལ་སྨྲས་པ། ལྷ་ཁྱོད་ཀྱི་དཔོན་པོ་མདོག་ནག་དང་། །དྲ་བ་ཅན་དང་དེ་གཉིས་ནི། །བྲམ་ཟེ་ཤིན་ཏུ་མ་རུངས་པ། །གྲོང་ཁྱེར་མཆོག་ འདིར་འཚོང་ཞིང་མཆིས། །དེ་སྐད་ཅེས་ཐོས་ནས་རྒྱལ་པོ་དེ་སེམས་མི་དགའ་ནས་སྨྲས་པ། གཞོན་ནུ་གཉིས་མྱུར་དུ་སྟོན་ཅིག །བློན་པོ་རྣམས་ཀྱིས་སྐད་ཕྱུང་བ་དང་གྲོང་ཁྱེར་པ་རྣམས་མྱུར་དུ་རྒྱལ་པོའི་མདུན་དུ་ཉེ་བར་ལྷགས་ནས། ཇི་ཙམ་ན་བློན་པོ་གཞན་ཞིག་གིས་རྒྱལ་པོའི་ དྲུང་དུ་ཁྲིད་པ་དང་། མི་ཡི་དབང་པོ་མངོན་ཕྱོགས་ཁྲིད་པའི་ཚ་བོ་གོས་མེད་ཅིང་། །ལུས་རྦེག་དྲི་མ་ཅན་གྱི་ལུས་དེ་དེ་ཡིས་མཐོང་ནས་ནི། །མོད་ལ་སེང་གེའི་ཁྲི་ལས་ས་ཡི་སྟེང་དུ་ལྟུང་གྱུར་ཏེ། །ཕོ་བྲང་འཁོར་མི་བློན་ཚོགས་བུད་མེད་དག་ཀྱང་ངུ་བར་གྱུར། །དེ་ནས་རྒྱལ་པོས་ བློན་པོ་རྣམས་ལ་སྨྲས་པ། གང་ཞིག་ནགས་ན་གནས་པ་ཡང་། །སྦྱིན་ལ་མངོན་པར་དགའ་བའི་ཡིད། །མིག་བཟངས་དེ་ནི་མྱུར་དུ་འདིར། །ཆུང་མ་དང་བཅས་དགུག་པར་གྱིས། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་ཕྱག་བྱས་ནས་རང་གི་གནས་ སུ་སོང་ངོ་། །ཕྱི་ཞིག་ན་རྒྱལ་པོ་ཐམས་ཅད་ཀྱི་བཤེས་གཉེན་འདས་པ་དང་། །བྲམ་ཟེ་དེ་དང་། བློན་པོ་དང་། གྲོང་མི་དང་། ཡུལ་མི་རྣམས་ལྷན་ཅིག་བསྟི་གནས་དེར་སོང་ནས་བྱང་ཆུབ་སེམས་དཔའ་ལ་གསོལ་བ་བཏབ་སྟེ། རང་གི་གྲོང་ཁྱེར་དུ་བོས་ནས་རྒྱལ་པོར་བཅུག་གོ། །དེ་ ནས་རྒྱལ་པོ་ཐམས་ཅད་སྒྲོལ་ཐམས་ཅད་གཏོང་ཞེས་བྱ་བར་གྱུར་ཏོ། །དེས་དགེ་སྦྱོང་དང་། བྲམ་ཟེ་དང་། བཀྲེན་པ་དང་། ཕོངས་པ་དང་། མཛའ་བོ་དང་། ཉེ་དུ་དང་། གཉེན་བཤེས་དང་། ཞོ་ཤས་འཚོ་བ་རྣམས་ལ་སྦྱིན་པ་རྣམ་པ་དུ་མ་དག་བྱིན་ནས་ཚིགས་སུ་བཅད་དེ་སྨྲས་པ། བྱང་

  1020. 200b

    ཆུབ་དོན་དུ་གཉེར་བ་ཡིས། །རྒྱལ་རིགས་བྲམ་ཟེ་རྗེའུ་རིགས་དང་། །དམངས་རིགས་གདོལ་པ་གཡུང་པོ་ལའང་། །འཇིགས་པ་མེད་པར་སྦྱིན་པ་བཏང་། །གསེར་དང་དངུལ་དང་བ་ལང་དང་། །རྟ་དང་ནོར་བུའི་རྣ་རྒྱན་དང་། །དེ་བཞིན་ལས་དག་བྱེད་པའི་བྲན། །ཚུལ་ཁྲིམས་ཕུན་ སུམ་ཚོགས་ལ་སྦྱིན། །ཆགས་པ་མེད་པའི་སེམས་ཀྱིས་ནི། །བུ་དང་ཆུང་མ་ཡོངས་བཏང་བས། །འཇིག་རྟེན་འདི་དང་ཕ་རོལ་ཏུ། །མི་ཡིས་དག་པ་ཐོབ་པར་འགྱུར། །གང་གི་ཚེ་རྒྱལ་པོ་ཐམས་ཅད་ཀྱི་བཤེས་གཉེན་གྱིས་ཐམས་ཅད་སྒྲོལ་གྱི་ཆེད་དུ་བྲམ་ཟེ་ཛུ་ཛུ་ཀ་ལ་ནོར་ མང་པོ་སྦྱིན་པ་དེའི་ཚེ་དེ་འབྱོར་པ་རྒྱ་ཆེན་པོར་གྱུར་པ་དང་། དེ་ལ་སྙིང་དུ་སྡུག་པ་དང་། རྩ་ལག་དང་། གྲོགས་པོ་དག་འོངས་ནས་སྨྲས་པ། ཁྱོད་ཀྱི་འབྱོར་པ་དང་། དཔལ་དང་སྐལ་བ་ཕུན་སུམ་ཚོགས་པ་གང་ཡིན་པ་ཅི་ཡང་རུང་དེ་དག་ཐམས་ཅད་ནི་གཞོན་ནུ་ཐམས་ཅད་སྒྲོལ་ དེ་ལ་བརྟེན་ཏེ་ཡིན་ནོ། །དེས་སྨྲས་པ། གཞོན་ནུ་ཐམས་ཅད་སྒྲོལ་གྱིས་ཁོ་བོ་ལ་ཅི་ཞིག་བྱས། རིགས་མཆོག་གི་ནང་དུ་སྐྱེས་པས་ཁོ་བོ་འཇིག་རྟེན་གྱི་ཡོན་གནས་སུ་གྱུར་ཏེ། །དེས་ན་ཁོ་བོ་སྐལ་པ་དང་ལྡན་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གཞོན་ནུ་ཐམས་ཅད་སྒྲོལ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཛུ་ཛུ་ཀ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་ པ་མི་ཚོར་བ་ཡིན་ནོ། །དེ་ལྟ་བས་ན་དགེ་སློང་དག་འདི་ལྟར་བསླབ་པར་བྱ་སྟེ། བྱས་པ་གཟོ་བ་དང་བྱས་པ་ཚོར་བར་བྱ་སྟེ། ཅུང་ཟད་བྱས་པ་ཡང་ཆུད་མི་གསན་པར་བྱ་ན་མང་པོ་ལ་ལྟ་སྨོས་ཀྱང་ཅི་དགོས་ཏེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །སངས་རྒྱས་ བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་ཡུལ་ཙམ་པ་ན་ཁྱིམ་བདག་གྲུ་འཛིན་ཞེས་བྱ་བ་ཕྱུག་པ་ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ་རྣམ་ཐོས་ཀྱི་བུ་ལ་ནོར་

  1021. 201a

    གྱིས་འགྲན་པ་ཞིག་གནས་ཏེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས། དུས་གཞན་ཞིག་ ན་ཆུང་མ་སེམས་ཅན་དང་ལྡན་པར་གྱུར་ཏེ། འདི་ལྟར་དེའི་མངལ་ཡོངས་སུ་སྨིན་པར་བྱ་བའི་ཕྱིར་དེ་ཡིད་དུ་མི་འོང་བའི་སྒྲ་ཅུང་ཟད་ཀྱང་མི་ཐོས་ཤིང་གྲང་བ་ན་གྲང་བའི་ཡོ་བྱད་དང་། དྲོ་བ་ན་དྲོ་བའི་ཡོ་བྱད་དང་། སྨན་པས་བཅས་པའི་ཁ་ཟས་ཧ་ཅང་ཁ་བ་མ་ཡིན་པ་དང་། ཧ་ཅང་སྐྱུར་བ་མ་ ཡིན་པ་དང་། ཧ་ཅང་ལན་ཚྭ་ཆེ་བ་མ་ཡིན་པ་དང་། ཧ་ཅང་མངར་བ་མ་ཡིན་པ་དང་། ཧ་ཅང་ཚ་བ་མ་ཡིན་པ་དང་། ཧ་ཅང་བསྐ་བ་མ་ཡིན་པ་སྟེ། དེ་ལྟར་ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་སྤངས་པའི་ཁ་ཟས་ཀྱིས་བསྙེན་བཀུར་བྱེད་ཅིང་དོ་ ཤལ་དང་། སེ་མོ་དོས་ལུས་བརྒྱན་ནས་ལྷའི་བུ་མོ་དགའ་ཚལ་ན་རྒྱུ་བ་བཞིན་དུ་ཁྲིའུ་ནས་ཁྲིའུར་དང་། ཁྲི་ནས་ཁྲིར་རྒྱུ་ཞིང་འོག་གིས་གཞི་ལ་མི་འབབ་བོ། །དེའི་ཚེ་ཁྱིམ་བདག་གྲུ་འཛིན་དགོས་པ་འགའ་ཞིག་ལ་རྒྱལ་པོའི་ཁབ་ཏུ་སོང་ངོ་། །དེ་ཡང་ཟླ་བ་དགུ་འམ། བཅུ་ལོན་ཏེ་རྒྱུ་སྐར་ གྲོ་བཞིན་ལ་བབ་པ་ན་ཁྱེའུ་གཟུགས་བཟང་པོ་བལྟ་ན་སྡུག་པ་མཛེས་པ་དེའི་རྐང་པའི་མཐིལ་གཉིས་ལ་སྤུ་གསེར་གྱི་ཁ་དོག་འདྲ་བ་སོར་བཞི་ཙམ་སྐྱེས་པ་ཞིག་བཙས་སོ། །བཙས་ནས་ཇི་ཙམ་ན་ཁྱིམ་བདག་གྲུ་འཛིན་གྱི་མི་ཞིག་རིངས་པ་རིངས་པར་རྒྱལ་པོའི་ཁབ་ཏུ་སོང་ནས་ཁྱིམ་བདག་གྲུ་ འཛིན་ལ་སྨྲས་པ། ཁྱིམ་བདག་དགྱེས་པ་སྐྱེད་ཅིག །ཁྱོད་ཀྱི་ཁྱེའུ་ཞིག་བཙས་སོ། །དེ་དགའ་བ་དང་ཡིད་བདེ་བ་སྐྱེས་ནས་སྨྲས་པ། ཀྱེ་ནང་རྗེ་ཅི་ཞིག་སྨྲ། དེས་སྨྲས་པ། ཁྱིམ་བདག་ཁྱོད་ཀྱི་ཁྱེའུ་ཞིག་བཙས་སོ། །དེ་དགའ་བ་དང་། ཡིད་བདེ་བ་སྐྱེས་ནས་ཡང་དྲིས་པ། ཀྱེ་ནང་རྗེ་ཅི་ཞིག་སྨྲ། དེས་སྨྲས་པ། ཁྱིམ་བདག་ཁྱོད་ཀྱི་ཁྱེའུ་ཞིག་བཙས་སོ། །ཡང་དྲིས་པ། ཀྱེ་ནང་རྗེ་ཅི་ཞིག་སྨྲ། དེ་ནས་མི་དེ་འདི་སྙམ་དུ་སེམས་ཏེ་ཅི་ཁྱིམ་བདག་འདི་ཡང་ནས་ཡང་དུ་འདྲི་བ་བདག་ལ་ཀྱལ་ཀ་སྨྲ་བར་མི་འདོད་གྲང་སྙམ་དུ་བསམས་ནས་ཅང་མི་སྨྲ་བར་འདུག་གོ། །ཁྱིམ་

  1022. 201b

    བདག་གིས་སྨྲས་པ། ཀྱེ་ནང་རྗེ་ཁྱོད་ཀྱིས་ཉེས་ཏེ། གལ་ཏེ་ཁྱོད་ཀྱིས་ལན་བརྒྱར་སྨྲས་པར་གྱུར་ན་ཡང་། ངས་ཀྱང་ཁྱོད་ཀྱི་ཁ་གསེར་གྱིས་ལན་བརྒྱ་བཀང་བར་འགྱུར་བ་ཞིག །དེ་ནས་ཁྱིམ་བདག་གྲུ་འཛིན་གྱིས་མི་དེའི་ཁ་གསེར་གྱིས་ལན་གསུམ་བཀང་ནས་དཀོར་པ་ལ་ཁྱེའུ་དཀན་ དབབ་པའི་རིན་གསེར་བྱེ་བ་ཉི་ཤུ་བྱིན་ཅིག་ཅེས་སྤྲིང་ངོ་། །ཁྱིམ་བདག་གྲུ་འཛིན་དགའ་བ་དང་ཡིད་བདེ་བས་རྒྱལ་པོའི་དྲུང་དུ་སོང་ནས་ལྷ་བདག་གི་ཁྱེའུ་ཞིག་བཙས་སོ། །རྒྱལ་པོས་སྨྲས་པ་ལེགས་སོ། །ངས་དེ་ལ་ཙམ་པ་གཞི་དང་བཅས་པ་དང་། གླང་པོ་ཆེ་བདུན་གྱི་ཚོགས་ སྦྱིན་ནོ། །ཁྱིམ་བདག་གྲུ་འཛིན་གྱིས་རྒྱལ་པོ་གཟུགས་ཅན་སྙིང་པོ་ལ་བལྟས་ཏེ་ཙམ་པར་འོངས་ནས་དེ་ནས་ཁྱིམ་བདག་གི་གཉེན་རྣམས་ཀྱིས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །གཞན་དག་ གིས་སྨྲས་པ། ཁྱེའུ་འདི་རྒྱུ་སྐར་གྲོ་བཞིན་ལ་བཙས་ལ་འདི་བཙས་པ་ན་ཕས་ཀྱང་དཀན་དབབ་པའི་རིན་དུ་གསེར་བྱེ་བ་ཉི་ཤུ་བྱིན་པས། དེ་བས་ན་ཁྱེའུའི་མིང་གྲོ་བཞིན་སྐྱེས་བྱེ་བ་ཉི་ཤུ་པ་ཞེས་བྱ་བར་གདགས་སོ་ཞེས་དེའི་མིང་གྲོ་བཞིན་སྐྱེས་བྱེ་བ་ཉི་ཤུ་པ་ཞེས་བྱ་བར་བཏགས་ཏེ། ཁྱེའུ་གྲོ་བཞིན་སྐྱེས་ བྱེ་བ་ཉི་ཤུ་པ་མ་མ་བརྒྱད་ལ་རྗེས་སུ་གཏད་དེ། པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ། དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་ དང་གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྐྱེད་པར་བྱེད། སྲིང་བར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དེ། དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་ པ་ལ་ཉེ་བར་ཞུགས་ཤིང་། བརྟག་པ་བརྒྱད་པོ་གཞི་བརྟག་པ་དང་། གོས་བརྟག་པ་དང་། རིན་པོ་ཆེ་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། གཞོན་ནུ་བརྟག་པ་དང་། གཞོན་ནུ་མ་བརྟག་པ་དང་། འབྱེད་པ་དང་། ཀློག་པ་ལ་མཁས་

  1023. 202a

    པ་དང་། གཡེར་པོར་གྱུར་ཏོ། །དེ་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཡིན་ནོ། །ཞེས་རིགས་མཉམ་པ་མང་པོས་ཐོས་ནས་བུ་སྲིང་དག་བྱིན་ནོ། །དེའི་ཕས་འདུག་པའི་ཁང་པ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་རྩིག་ཏུ་བཅུག་སྟེ་ཆུང་མ་ གསུམ་པོ་ཆེན་མ་དང་། བར་མ་དང་། ཆུན་མ་བཞག་ནས་དེ་སྟེང་གི་ཁང་བཟངས་ཀྱི་གཞིར་སོང་སྟེ་སྐྱེས་པ་མེད་པ་ན་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་ཉི་མ་རེ་རེ་ཞིང་ལྔ་བརྒྱའི་སྟོན་མོ་སྣོད་ནས་འཚེད་ཅིང་སྦྱོར་རོ། །ལྷ་སྦྱིན་གྱིས་གཞོན་ནུ་མ་སྐྱེས་དགྲ་ ལ་རྦད་པ་གཞོན་ནུ་རྒྱལ་པོ་ཐམས་ཅད་ནི་གང་གི་ཚེ་སྐྲ་སྐྱ་བོ་སྐྱེས་པར་གྱུར་པ་དེའི་ཚེ་གཞོན་ནུའི་ཐུ་བོ་ཤོས་རྒྱལ་སྲིད་ཀྱི་དབང་ཕྱུག་ལ་བཞག་ནས་རབ་ཏུ་འབྱུང་ན། ཁྱོད་ཀྱི་ཡབ་ནི་སྐྲ་ཁ་དོག་རྣམ་པ་གསུམ་པའི་མཐར་ཕྱིན་ན་འོན་ཀྱང་འདོད་པ་རྣམས་ལ་ཞེན་བཞིན་ཏེ་ཉེ་བར་ཞི་བར་མི་འགྲོའོ། ། མ་སྐྱེས་དགྲས་སྨྲས་པ། དེ་ཉིད་ཀྱིས་ཤེས་མོད། དེ་ལ་ཅི་བྱར་ཡོད། ལྷ་སྦྱིན་གྱིས་སྨྲས་པ། ཕ་རོལ་གནོད་པ་གྱིས་ཤིག །འདོད་པ་དོན་དུ་གཉེར་བ་རྣམས་ནི་མི་བྱེད་པ་ཅི་ཡང་མེད་པས། ཇི་ཙམ་ན་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་མར་གསོལ་ནས་འཇམས་གསོལ་བར་ བཞེད་པའི་འཇམས་ཀྱི་ཞལ་ཏ་བྱས་ཏེ། འོད་མའི་ཚལ་དུ་སོང་བ་མ་སྐྱེས་དགྲས་མཐོང་ནས་དེས་རྡོ་རྗེ་རྩེ་གཅིག་པ་ཞིག་འཕངས་པ་དང་རྒྱལ་པོ་སྒྲ་ལ་མཁས་པ་ཡིན་པས་དེས་གཡོན་ཕྱོགས་སུ་ཐུག་པའི་རྫེའུ་ཆག་པར་གྱུར་ནས་དེ་ཉིད་ནས་སླར་ལོག་གོ། །སངས་རྒྱས་བཅོམ་ལྡན་འདས་ རྣམས་ནི་འདི་ལྟ་བུ་མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་མ་སྐྱེས་དགྲ་མི་དགེ་བའི་བཤེས་གཉེན་ ལྷ་སྦྱིན་གྱིས་ཟིན་པས། དེ་བཞིན་གཤེགས་པའི་བསོད་སྙོམས་མ་རུང་བར་བྱས་ཀྱིས་ཙམ་པར་གྲུ་འཛིན་གྱི་བུའི་དྲུང་དུ་སོང་ལ་བསོད་སྙོམས་ཁྱེར་ཏེ་ཤོག་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་ཇི་

  1024. 202b

    ལྟར་སེམས་མཉམ་པར་བཞག་ན་རྒྱལ་པོའི་ཁབ་ནས་མི་སྣང་བར་གྱུར་ཏེ་ཙམ་པར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །གྲོ་བཞིན་སྐྱེས་བྱེ་བ་ཉི་ཤུ་པ་ཉི་མ་ལ་དད་པས་དེ་ཉི་མ་རེ་རེ་ཞིང་ནང་པར་སྔར་ལངས་ཏེ་ཉི་མ་ལ་ཕྱག་བྱེད་པ་ན་ཚེ་དང་ལྡན་པ་མཽད་གལ་གྱི་བུ་ཆེན་པོའི་ རྫུ་འཕྲུལ་གྱིས་ཉི་མའི་དཀྱིལ་འཁོར་བརྟོལ་ནས་བབས་པ། ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་མཐོང་ངོ་། །མཐོང་ནས་ཀྱང་བདག་གིས་མངོན་སུམ་ཁོ་ནར་ཉི་མ་ཉིད་ཀྱི་གཟུགས་མཐོང་ངོ་སྙམ་ནས་མཆོག་ཏུ་ངོ་མཚར་སྐྱེས་སོ། །མཐོང་ནས་ཡང་ཚིགས་སུ་བཅད་ནས་སྨྲས་པ། ཉི་མ་བརྟོལ་ནས་ས་སྟེང་མངོན་ཕྱོགས་མྱུར་ཉིད་དུ། །བདག་གི་གནས་སུ་བྱོན་པ་འདི་ཀོ་སུ་ཞིག་ལགས། །འདི་ཅི་ཉི་མའམ་ནོར་སྦྱིན་ཟླ་བའམ་བརྒྱ་བྱིན་ནམ། །འོན་ཏེ་ལྷ་ཡི་བདག་པོ་མོད་ལ་གཤེགས་ཤིག་གུ། །ཚེ་དང་ལྡན་པ་མཽད་གལ་གྱི་བུ་ཆེན་པོའི་སེམས་ཀྱིས་ཀྱང་དེའི་བསམ་པ་ ཤེས་ནས་ཡང་ཚིགས་སུ་བཅད་དེ་སྨྲས་པ། ཁོ་བོ་འོད་ཟེར་སྟོང་གི་འོད་འབར་ཉི་མ་མ་ཡིན་རྒྱུ་སྐར་བདག་པོ་མིན། །ཁོ་བོ་རྣམ་ཐོས་མ་ཡིན་མཆོག་ལྡན་མ་ཡིན་ལེགས་པའི་བརྟུལ་ཞུགས་དབང་ཕྱུག་མིན། །ཁོ་བོ་ཐུགས་ཞི་གཟི་བརྗིད་ཀྱིས་འབར་སངས་རྒྱས་སྲས་པོ་ཡིན་པར་ཤེས་པར་ བྱོས། །ཁོ་བོ་ཐུབ་ལ་བསོད་སྙོམས་དགོངས་ནས་བསླང་བའི་ཕྱིར་ནི་ཁྱོད་ཀྱི་དྲུང་དུ་འོངས། གྲོ་བཞིན་སྐྱེས་ཀྱིས་སྨྲས་པ། ཅི་ཤེས་ལྡན་ཉིད་ཐུབ་པ་ཡིན་ནམ། དེས་ཚིགས་སུ་བཅད་དེ་སྨྲས་པ། ཇི་ལྟར་གསེར་གྱི་རི་བོ་ལྷུན་པོའི་ཟླར་ནི་ཡུངས་ཀར་ཁྱེར་ཏེ་འོང་བ་དང་། ཇི་ལྟར་ཉི་ མའི་ཟླར་ནི་ས་སྟེང་སྲོག་ཆགས་སྲིན་བུ་མེ་ཁྱེར་འཇལ་བ་དང་། །རིན་ཆེན་གྱིས་ཕྱུག་རྒྱ་མཚོའི་ཟླར་ནི་འདི་ནི་གནག་གི་རྨིག་རྗེས་སྒྲུན་པ་ལྟར། །དེ་བཞིན་མི་མཆོག་བླ་མ་སངས་རྒྱས་ལ་ལྟོས་སྟོན་པའི་སྲས་དག་རིག་པར་གྱིས། གྲོ་བཞིན་སྐྱེས་ཀྱིས་སྨྲས་པ། རྗེས་སུ་དཔག་པ་འདི་ཡིས་ ན། །བདག་གིས་ཁྱོད་ཀྱི་འདྲེན་པ་ནི། །ཇི་ལྟར་དཀའ་ཐུབ་རབ་ཆེ་བ། །གསལ་བར་རབ་ཏུ་རྟོགས་ལགས་སོ། །དགོས་པ་ཅི་ལ་བྱོན་བཀའ་སྩོལ་ཅིག །བཅོམ་ལྡན་འདས་ཀྱི་བསོད་སྙོམས་ཕུལ་ཅིག །བཅོམ་ལྡན་འདས་དེ་སུ་ཡིན། ཁྱིམ་བདག་གི་བུ་དགེ་སྦྱོང་གཽ་ཏ་མ་ཤཱཀྱའི་

  1025. 203a

    སྲས་ཤཱཀྱའི་རིགས་ལས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཞིག་ཡོད་དོ། །ཁྱིམ་བདག་གི་ བུ་དེ་ནི་སངས་རྒྱས་ཞེས་བྱའོ། །དེས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་ཐོས་ནས་བ་སྤུའི་ཁུང་ཐམས་ཅད་གཡོས་ཤིང་མངོན་པར་དད་པ་དེས་སྣོད་དུ་བཙོས་པ་ལྔ་བརྒྱ་པོ་དེ་ཉིད་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ཕུལ་ལོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་དེ་ལས་ བསོད་སྙོམས་བླངས་ནས་ཇི་ལྟར་སེམས་མཉམ་པར་བཞག་ན་ཙམ་པ་ནས་མི་སྣང་བར་གྱུར་ཏེ། རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པར་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས། དེས་བཅོམ་ལྡན་འདས་ལ་བསོད་སྙོམས་ཕུལ་ཏེ་བཅོམ་ལྡན་འདས་ཀྱིས་ གསོལ་པར་བརྩམས་པ་ན། མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་སྣོད་ནས་བཙོས་པ་ཕྱི་མ་ཤོས་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་བ་དང་། ཇི་ཙམ་ན་འོད་མའི་ཚལ་ཐམས་ཅད་ཁ་ཟས་ཀྱི་དྲི་ཞིམ་པོ་རྣམ་པ་སྣ་ཚོགས་ཀྱིས་ཁྱབ་པར་མཐོང་ནས་དེས་བསམས་ པ། གདོན་མི་ཟ་བར་ལྷ་རྣམས་ཀྱི་དབང་པོ་བརྒྱ་བྱིན་ནམ། ལྷ་གཞན་དག་གིས་བཅོམ་ལྡན་འདས་ལ་བསོད་སྙོམས་ཕུལ་ཏེ། འདི་ལྟར་འོད་མའི་ཚལ་འདི་ཁ་ཟས་ཀྱི་དྲི་ཞིམ་པོ་རྣམ་པ་སྣ་ཚོགས་ཀྱིས་ཁྱབ་པར་གྱུར་ཏོ་སྙམ་དུ་བསམས་ནས་བཅོམ་ལྡན་འདས་ལ་འདི་སྐད་ཅེས་གསོལ་ ཏོ། །བཙུན་པ་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་ནམ། ལྷ་གཞན་དག་གིས་བསོད་སྙོམས་ཕུལ་བའམ་ཅི་ལགས་ན། འདི་ལྟར་འོད་མའི་ཚལ་འདི་ཞལ་ཟས་ཀྱི་དྲི་བདའ་བ་སྣ་ཚོགས་ཀྱིས་ཁྱབ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ ཆེན་པོ་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་མ་ཡིན་ལ། ལྷ་གཞན་རྣམས་ཀྱིས་ཀྱང་མ་ཕུལ་ཏེ། དེ་ལྟ་མོད་ཀྱི་ཁྱོད་ཉིད་ཀྱི་ཡུལ་ཙམ་པ་ན་གྲུ་འཛིན་གྱི་བུ་ཉི་མ་རེ་རེ་ལྔ་བརྒྱའི་སྟོན་མོ་སྣོད་ནས་འཚེད་ཅིང་སྦྱོར་བ་ཡོད་དེ། དེ་ལས་དགེ་སློང་མཽད་གལ་གྱི་བུས་བླངས་སོ། །བཅོམ་

  1026. 203b

    ལྡན་འདས་དེའི་བསྔགས་པ་གསུང་བར་བརྩམས་པ་ཐོས་ནས་དེ་ཡང་མཐོང་བར་འདོད་པ་སྐྱེས་པ་དང་། བཅོམ་ལྡན་འདས་ཀྱི་ཐུགས་ཀྱིས་དེའི་བསམ་པ་མཁྱེན་ནས་བཀའ་སྩལ་པ། རྒྱལ་པོ་ཆེན་པོ་སེམས་ཅན་དེ་ནི་བསོད་ནམས་ཀྱི་སྐལ་བ་ཆེན་པོ་དང་ལྡན་པ་ཡིན་པས་ཁྱོད་བསོད་ ནམས་ཡོངས་སུ་ཟད་པར་འགྱུར་དུ་འོང་གིས་དེ་ལ་བཀའ་མ་སྩོལ་ཅིག །དེ་ལྟ་མོད་ཀྱི་རྒྱལ་པོ་ཆེན་པོ་ལྷུང་བཟེད་ཀྱི་ལྷག་མ་ལ་ལོངས་སྤྱོད་ཅིག །དེས་གསོལ་པ། བཙུན་པ་བདག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལགས་ཏེ། སྔོན་ནི་སུའི་ལྷུང་བཟེད་ཀྱི་ལྷག་མ་ ཡང་མ་འཚལ་ལགས་མོད་ཀྱི། བཅོམ་ལྡན་འདས་ནི་ཆོས་ཉིད་ཀྱིས་བདག་གི་ཡབ་ལགས་པས། གལ་ཏེ་བཅོམ་ལྡན་འདས་ཀྱིས་བཀའ་སྩལ་ན་ལོངས་སྤྱོད་པར་བགྱིའོ་ཞེས་དེས་ལོངས་སྤྱོད་པར་བརྩམས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ ཆེན་པོ་ཁྱོད་ཀྱིས་སྔོན་ལན་འགའ་ཡང་བཟའ་བ་དང་བཏུང་བ་འདི་འདྲ་བ་ལོངས་སྤྱད་པ་ཡོད་དམ། རྒྱལ་པོས་གསོལ་པ། བཙུན་པ་བདག་ཀྱང་རྒྱལ་པོའི་རྒྱུད་དུ་བཙས། རྒྱལ་པོའི་རྒྱུད་ལས་ཆེན་པོར་གྱུར་ཅིང་རྒྱལ་པོར་གྱུར་ཀྱང་གཡར་ཟས་དང་བཏུང་བ་འདི་འདྲ་བ་ནི་སྔོན་ལན་འགའ་ ཡང་མྱོང་བར་མ་འཚལ་ལགས་སོ། །རྒྱལ་པོ་ཆེན་པོ་སེམས་ཅན་སྐལ་བ་ཆེན་པོ་དེ་ནི་འདི་ལྟར་འདི་འདྲ་བའི་བཟའ་བ་དང་བཏུང་བ་ལ་ལོངས་སྤྱོད་དོ། །དེ་ནས་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་ འདས་ཀྱི་སྤྱན་སྔ་ནས་སོང་ནས། དེས་བློན་པོ་རྣམས་ལ་བསྒོ་བ། ཤེས་ལྡན་དག་ཡུལ་ཙམ་པར་འདོང་གིས་དཔུང་གི་ཚོགས་ཡན་ལག་བཞི་པ་གོ་སྐོན་ཅིག །ཅིའི་སླད་དུ་ལགས། གྲུ་འཛིན་གྱི་བུ་བལྟའོ། །ལྷའི་ཡུལ་ན་དེ་མཆིས་པས་དེ་ཉིད་དགུག་ཏུ་གསོལ། དེ་ནི་སེམས་ཅན་བསོད་ ནམས་ཀྱི་སྐལ་བ་ཆེན་པོ་དང་ལྡན་པ་ཡིན་པས་དེ་ལ་བཀའ་མི་སྩོལ་ཏོ། །ལྷ་ཇི་ལྟར་བཀའ་མ་སྩལ་ཀྱང་བདག་ཅག་གིས་མཆི་བར་འགྱུར་བ་དེ་ལྟར་བགྱིའོ། །དེ་བཞིན་དུ་གྱིས་ཤིག །དེ་རྣམས་ཀྱིས་ཙམ་པར་ཡི་གེ་སྤྲིང་བ། ཤེས་ལྡན་དག་རྒྱལ་པོ་གཤེགས་པར་འགྱུར་གྱིས་གྲོང་ཁྱེར་བྱི་

  1027. 204a

    དོར་གྱིས་ཤིག །རྩྭ་དང་ཆས་དག་སྟ་གོན་གྱིས་ཤིག་ཅེས་སྤྲིང་བ་དེ་རྣམས་ཀྱིས་ཐོས་ནས་ཤིན་ཏུ་དགའ་བར་གྱུར་པ་དང་ཡང་ཡི་གེ་སྤྲིང་བ། ཤེས་ལྡན་དག་རྒྱལ་པོ་ནི་མི་གཤེགས་མོད་ཀྱི་གཞོན་ནུ་གཤེགས་པར་འགྱུར་རོ་ཞེས་སྤྲིང་བ་དང་། དེ་རྣམས་སྐྲག་སྟེ་ གཞོན་ནུ་གཏུམ་པོ་ལན་འགའ་ཞིག་འོངས་ན་ཡང་གནོད་པར་འགྱུར་རོ་སྙམ་ནས་ཡང་སྤྲིང་བ། རྒྱལ་པོ་ཡང་མི་གཤེགས་གཞོན་ནུ་ཡང་མི་གཤེགས་ཏེ། དེ་ལྟ་མོད་ཀྱི་ཁྱེད་ཀྱིས་གང་གཱ་ཇི་ལྟར་རྒྱུན་ལས་བཟློག་ཕྱོགས་སུ་འབབ་པ་དེ་ལྟར་གགས་རྩིགས་ཤིག་ཅེས་སྤྲིང་བ་ཐོས་ནས་ཙམ་ པ་ན་གནས་པའི་གྲོང་ཁྱེར་གྱི་མི་རྣམས་འདུས་ནས་ཤེས་ལྡན་དག་གདོན་མི་ཟ་བར་རྒྱལ་པོ་ནི་བདག་ཅག་ལ་ཆད་པ་གཅད་པར་བཞེད་པས་དེས་ན་ཡི་གེ་འདི་སྐད་སྤྲིང་མོད་ཅེས་དེ་རྣམས་ཀྱིས་བློན་པོ་རྣམས་ལ་དོན་དེ་སྤྲིང་བ་དང་། དེ་རྣམས་ཀྱིས་བླགས་ཏེ་ཡང་དྲང་པོར་སྤྲིང་བ། ཤེས་ལྡན་དག་ འདི་ནི་བདེན་པ་ཡིན་ཏེ། རྒྱལ་པོ་དང་གཞོན་ནུ་ཡང་མི་གཤེགས་ལ། གང་གཱ་གགས་བརྩིག་པ་ཡང་དགོས་པ་ཅུང་ཟད་ཀྱང་མེད་དོ། །དེ་ལྟ་མོད་ཀྱི་ལྷ་ནི་གྲུ་འཛིན་གྱི་བུ་བལྟ་བར་བཞེད་དོ་ཞེས་སྤྲིང་བ་དང་། དེ་རྣམས་ཀྱིས་ཉན་རྣ་བའི་མི་ཞིག་མངགས་སོ། །དེས་ཀྱང་དེ་བཞིན་དུ་བསྙད་དོ། ། དེ་ནས་དེ་རྣམས་འདུས་ནས་ཁྱིམ་བདག་གྲུ་འཛིན་གྱི་དྲུང་དུ་སོང་ནས་ཁྱིམ་བདག་ལྷ་གྲོ་བཞིན་སྐྱེས་བྱེ་བ་ཉི་ཤུ་པ་བལྟ་བར་བཞེད་ནས་བློན་པོ་རྣམས་ཀྱིས་བདག་ལ་དྲང་པོར་སྤྲིང་སྟེ། ཉན་རྣ་བའི་མིས་ཀྱང་དོན་དེ་ཉིད་སྨྲས་ན། འདི་ཐོང་ཤིག །དེས་སྨྲས་པ། ཤེས་ལྡན་དག་ཁོ་བོའི་གགས་ ཀྱི་སྐལ་བ་གང་ཡིན་པ་གསེར་གྱི་གོང་བུས་རྩིག་ཀྱང་བླའི་མི་བཏང་ངོ་། །དེ་རྣམས་ཀྱིས་སྨྲས་པ། ཁྱིམ་བདག་གལ་ཏེ་དེ་ལྟ་ཡིན་དུ་ཟིན་ཀྱང་མ་འོངས་པའི་སྐྱེ་བོ་རྣམས་ལ་སྙིང་བརྩེ་བར་གྱིས་ཤིག་དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་དམ་ཞིག་བཅའ་སྟེ། གལ་ཏེ་ཁྱེད་ ཅག་གི་བུ་རྣམས་ཀྱང་གྲོ་བཞིན་སྐྱེས་དང་ལྷན་ཅིག་གཏོང་བ་ལྟ་ན་བཏང་ངོ་། །དེ་རྣམས་ཀྱིས་སྨྲས་པ། ཁྱིམ་བདག་དེ་བཞིན་དུ་བགྱིའོ། །འོ་ན་ཤེས་ལྡན་དག་དིང་ཤིག །ཁྱིམ་བདག་གྲུ་འཛིན་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་སོང་སྟེ་ཕྱིན་ནས་གྲོ་བཞིན་སྐྱེས་བྱེ་བ་ཉི་ཤུ་པ་

  1028. 204b

    ལ་འདི་སྐད་ཅེས་སྨྲས་སོ། །བུ་གྲོང་མི་འདི་དག་འདི་སྐད་ཅེས་ཟེར་རོ། །དེས་སྨྲས་པ། ཡབ་གལ་ཏེ་དེ་ལྟ་ན་མཆིའོ། །བུ་གདོན་མི་ཟ་བར་རྒྱལ་པོ་དེ་ཁྱོད་ཀྱི་རྐང་མཐིལ་གྱི་སྤུ་གསེར་གྱི་ཁ་དོག་ཅན་བལྟ་བར་འདོད་ཀྱིས། རྒྱལ་པོ་དེ་དག་ནི་གནས་མ་ཡིན་པར་ཁྲོ་བས་ཁྱོད་ལ་གནོད་ པ་བྱེད་པར་འགྱུར་དུ་འོང་གིས་ཁྱོད་ཀྱིས་རྐང་པ་བཏེག་སྟེ་དེ་ལ་བསྟན་པར་མི་བྱའི། འདི་རེ་མུ་ཏིག་ཕྲེང་བ་འདི་རྒྱལ་པོ་དེའི་ཞབས་ཀྱི་དྲུང་དུ་ཞོག་ལ་ཕྱག་བྱས་ནས་དེའི་སྤྱན་སྔར་སྐྱིལ་མོ་ཀྲུང་ཆོས་ཏེ་འདུག་ཤིག་དང་། དེས་ན་སྤུ་རྣམས་མཐོང་བར་འགྱུར་རོ། །ཁྱིམ་བདག་གྲུ་འཛིན་གྱིས་ བསམས་པ། གྲོ་བཞིན་སྐྱེས་བཞོན་པ་གང་གིས་གཏང་། ཅི་གླང་པོ་ཆེའི་བཞོན་པས་སམ། རྟའི་བཞོན་པས་སམ། ཤིང་རྟའི་བཞོན་པས་སམ། འོན་ཏེ་གྲུའི་བཞོན་པས་སྙམ་པ་ལས་དེ་འདི་སྙམ་དུ་སེམས་ཏེ། འདི་དག་གི་ནང་ན་གྲུའི་བཞོན་པ་མཆོག་ཡིན་པས་གྲུའི་ བཞོན་པས་གཏང་ངོ་སྙམ་དུ་བསམས་ནས་དེས་ཆུ་བོ་གང་གཱ་ལ་གྲུ་སྦྲེངས་ནས་དེར་སྐྱེད་མོས་ཚལ་རྣམ་པ་སྣ་ཚོགས་བྱེད་དུ་བཅུག་སྟེ། མེ་ཏོག་དང་འབྲས་བུ་རྣམ་པ་སྣ་ཚོགས་དང་ལྡན་ཞིང་ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་ལ་སོགས་ པ་བྱ་རྣམས་སྐད་འབྱིན་ཅིང་རོལ་མོའི་ཆ་བྱད་སྣ་ཚོགས་དང་། བུད་མེད་རྒྱན་སྣ་ཚོགས་ཀྱིས་བཀླུབས་པ་དག་འདུག་ཏུ་བཅུག་སྟེ། འབྱོར་པ་དེས་ཆུའི་ནང་ནས་བཏང་ངོ་། །དེ་རིམ་གྱིས་རྒྱལ་པོའི་ཁབ་ཏུ་ཉེ་བར་ཕྱིན་པ། རྒྱལ་པོ་གཟུགས་ཅན་སྙིང་པོས་གྲུ་འཛིན་གྱི་བུ་འོང་ངོ་ཞེས་ཐོས་ནས་ དེས་རྒྱལ་པོའི་ཁབ་ནས་གང་གཱའི་འབབ་ཆུའི་བར་དེར་འོབས་བརྐོས་ནས་ཆུས་བཀང་སྟེ་དེའི་ནང་ནས་གྲུ་དྲངས་སོ། །རྒྱལ་པོའི་ཁབ་ཀྱི་གྲོང་ཁྱེར་ཡང་རྡོ་བ་དང་། གསེག་མ་དང་། གྱོ་མོ་བསལ་ཅིང་ཙན་དན་གྱི་ཆུས་ཆག་ཆག་བཏབ། དྲི་ཞིམ་པོའི་པོག་ཕོར་བཞག །དར་གྱི་ཆུན་ འཕྱང་མང་པོ་བཏགས། རྒྱལ་མཚན་དང་། བ་དན་བཙུགས་མེ་ཏོག་སྣ་ཚོགས་ཀྱིས་ལྷ་རྣམས་ཀྱི་དགའ་ཚལ་གྱི་སྐྱེད་མོས་ཚལ་བཞིན་དུ་དགའ་དགའ་ལྟར་བྱས་ཏེ། དེ་འབྱོར་པ་དེས་རྒྱལ་པོའི་ཁབ་ཀྱི་གྲོང་ཁྱེར་དུ་ཁྲིད་དོ། །དེ་ནས་རྒྱལ་པོ་སེང་གེའི་ཁྲི་ལ་འདུག་པའི་རྐང་པའི་དྲུང་དུ་

  1029. 205a

    མུ་ཏིག་གི་ཕྲེང་བ་བཞག་ནས་མགོ་བོས་ཕྱག་བྱས་ཏེ་མདུན་དུ་སྐྱིལ་མོ་ཀྲུང་བཅས་ནས་འདུག་པ་དང་། རྒྱལ་པོས་དེའི་རྐང་པ་གཉིས་ལ་གསེར་གྱི་ཁ་དོག་འདྲ་བའི་སྤུ་ཡོད་པ་མཐོང་ངོ་། །མཐོང་ནས་ཀྱང་ཀྱེ་མ་གྲོ་བཞིན་སྐྱེས་བྱེ་བ་ཉི་ཤུ་པ་ནི་བསོད་ནམས་ཀྱི་ སྐལ་བ་ཆེན་པོ་དང་ལྡན་པ་ཡིན་ནོ་ཞེས་མཆོག་ཏུ་ངོ་མཚར་སྐྱེས་སོ། །མཐོང་ནས་སྨྲས་པ་གྲོ་བཞིན་སྐྱེས་ཁྱོད་ཀྱིས་བཅོམ་ལྡན་འདས་མཐོང་ངམ། ལྷ་མ་མཐོང་ལགས་སོ། །ཚུར་ཤོག་འདོང་ངོ་། །དེས་དྲིས་པ་ལྷ་ཅི་བཅོམ་ལྡན་འདས་བཞོན་པས་གཤེགས་སམ། འོན་ཏེ་ ཞབས་ཀྱིས་ལགས། རྒྱལ་པོས་སྨྲས་པ། དེ་རབ་ཏུ་བྱུང་བ་ཡིན་ན་དེ་ལ་བཞོན་པས་ཅི་བྱ། དེས་སྨྲས་པ། ལྷ་གལ་ཏེ་དེ་ལྟ་ན་བདག་ཀྱང་སུག་པ་ཁོ་ནས་འཆིའོ་ཞེས་དེ་རྐང་པ་ཁོ་ནས་ཆས་པ་ན། དེའི་ཞོ་ཤས་འཚོ་བ་རྣམས་ཀྱིས་ས་ལ་གོས་དག་བཏིང་བ་དང་། དེས་སྨྲས་ པ། ཅི་བཅོམ་ལྡན་འདས་གདིང་བ་ལས་བཞུད་དམ། འོན་ཏེ་གདིང་བ་མེད་པར་བཞུད། དེ་རྣམས་ཀྱིས་སྨྲས་པ། གདིང་བ་མེད་པར་བཞུད་དོ། །དེས་སྨྲས་པ། གདིང་བ་སྡུས་ཤིག །བདག་ཀྱང་གདིང་བ་མེད་པར་འགྲོའོ། །ཞོ་ཤས་འཚོ་བ་རྣམས་ཀྱིས་གོས་ རྣམས་བསྡུས་པ་དང་། མི་མ་ཡིན་པ་རྣམས་ཀྱིས་བཏིང་ནས་དེས་སྨྲས་པ། ཤེས་ལྡན་དག་ངས་ཁྱེད་ཅག་ལ་མ་བཟློག་གམ། དེ་རྣམས་ཀྱིས་སྨྲས་པ། ལྷ་བཟློག་ལགས་སོ། །འོ་ན་ཡང་སུ་ཞིག་གིས་བཏིང་། ལྷ་ཁྱོད་བསོད་ནམས་ཀྱི་སྐལ་བ་ཆེན་པོ་མངའ་བས་མི་མ་ ཡིན་པ་རྣམས་ཀྱིས་བཏིང་ལགས་གྲང་། དེས་སྙིང་ནས་ཚིག་ཏུ་སྨྲས་པ། མི་མ་ཡིན་པ་དག་གོས་རྣམས་སྡུས་ཤིག །དེ་རྣམས་ཀྱིས་བསྡུས་ནས་རྐང་པ་ས་ལ་བཞག་པ་ནས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏེ། ས་ཆེན་པོ་འདི་གཡོས། རབ་ཏུ་གཡོས། ཀུན་ཏུ་རབ་ ཏུ་གཡོས། ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག་པར་གྱུར་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། མཐའ་མཐོ་ན་དབུས་དམའ། དབུས་

  1030. 205b

    མཐོ་ན་མཐའ་དམའ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནས་བཟུང་སྟེ་བསྐལ་པ་དགུ་བཅུ་རྩ་གཅིག་གི་བར་དུ་གྲུ་འཛིན་གྱི་བུས་ལན་འགའ་ཡང་གདིང་བ་མེད་པར་རྐང་པས་ལམ་བོར་ཏེ། ད་ལྟར་བོར་བ་ཡང་ཆོས་ལ་ གུས་པས་ཡིན་གྱི་བསོད་ནམས་ཡོངས་སུ་ཟད་པས་ནི་མ་ཡིན་ཏེ། དེས་ནས་འདི་རྣམ་པ་དྲུག་ཏུ་གཡོས་པར་གྱུར་ཏོ། །དེ་ནས་གྲོ་བཞིན་སྐྱེས་བྱེ་བ་ཉི་ཤུ་པ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་ འདུག་གོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཐུགས་སུ་ཆུད་ནས་གང་ཐོས་པས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པར་མཛད་པས་གྲོ་བཞིན་སྐྱེས་བྱེ་བ་ཉི་ཤུ་པས་འཇིག་ ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་བ་དང་། དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་ བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་པ་ལྟ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་ལགས་སོ། །བཅོམ་ལྡན་འདས་ ཀྱིས་བཀའ་སྩལ་པ། ཁྱིམ་བདག་གི་བུ་དེ་བཞིན་གཤེགས་པ་རྣམས་སམ། དེ་བཞིན་གཤེགས་པའི་ཉན་ཐོས་རྣམས་ནི་ཕ་མས་མ་གནང་བའི་རིགས་ཀྱི་བུ་རབ་ཏུ་འབྱིན་པ་དང་བསྙེན་པར་རྫོགས་པར་མི་བྱེད་ཀྱིས་སོང་ལ་ཕ་དང་། མ་ལ་རྟོགས་ཤིག །རྒྱལ་པོས་གསོལ་པ། བཙུན་ པ་བདག་ནི་རྟེན་པ་ཐམས་ཅད་ཀྱི་དཔོན་པོ་ལགས་ཏེ་དོན་དུ་འདི་ནི་ཆོས་ཉིད་ཀྱིས་བདག་གི་བུ་ལགས་པས་འདི་བདག་གིས་གནང་ལགས་ཀྱིས་བཅོམ་ལྡན་འདས་ཅི་ལེགས་སུ་རབ་ཏུ་དབྱུང་དུ་གསོལ། དེ་ནས་བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་དགེ་སློང་ཚུར་ཤོག་ཚངས་

  1031. 206a

    པར་སྤྱད་པ་སྤྱོད་ཅིག་ཅེས་གསུངས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་མ་ཐག་ཁོ་ནར་སྐྲ་བྱི་བ་དང་སྣམ་སྦྱར་གྱོན་པར་གྱུར་ཏེ་སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ལྷུང་བཟེད་དང་། བྱ་མ་བུམ་གྱིས་འབྲེལ་པ་དང་། ལོ་བརྒྱ་ ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །འདིར་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། ། དྲུག་སྡེ་རྣམས་ཀྱིས་དེ་ལ་ཅོ་དྲི་བར་བརྩམས་པ། རེ་ཞིག་བསྟན་པ་ལ་ནི་གཅིག་ཏུ་བརྩོན་པར་བྱ་དགོས་པ་ཡིན་ན། མར་སར་གྱི་གོང་བུ་འདིས་ཁྱད་པར་ཅི་ཞིག་རྟོགས་པར་འགྱུར་ཞེས་དེ་རྣམས་ཀྱིས་དེ་ཅོ་དྲིས་པ་དང་། ཚེ་དང་ལྡན་པ་ཀུན་དགའ་བོ་གང་ན་བ་དེར་སོང་སྟེ་ཕྱིན་ནས་ཚེ་དང་ལྡན་ པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བཅོམ་ལྡན་འདས་ཀྱིས་དགེ་སློང་གཅིག་ཏུ་བརྩོན་པའི་རྣལ་འབྱོར་དང་མཐུན་པའི་ཏིང་ངེ་འཛིན་དུ་གསུངས་པ་གང་ལགས། ཚེ་དང་ལྡན་པ་གྲོ་བཞིན་སྐྱེས་འཆག་པས་ཐོབ་པའི་ཏིང་ངེ་འཛིན་ནི་ཡུན་རིང་དུ་གནས་པར་ འགྱུར་རོ་ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེས་བསིལ་བའི་ཚལ་གྱི་དུར་ཁྲོད་དུ་སོང་སྟེ། འཆག་ས་བྱས་ནས་དེ་ན་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་རྒྱལ་པོའི་ཁབ་ཀྱི་བསིལ་བའི་ཚལ་གྱི་དུར་ཁྲོད་དུ་གནས་ནས་རྟག་ཏུ་འགྲུས་པ་དང་ལྡན་པར་བྱང་ཆུབ་ཀྱི་ཕྱོགས་དང་ མཐུན་པའི་ཆོས་རྣམས་ལ་རྣལ་འབྱོར་གྱི་རྗེས་སུ་བརྩོན་པའི་སྒོམ་པས་གནས་སོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་གཅིག་པུ་དབེན་པར་སོང་སྟེ་ནང་དུ་ཡང་དག་བཞག་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་སྙམ་དུ་སྐྱེས་པར་གྱུར་ཏེ། བཅོམ་ལྡན་འདས་ཀྱི་ ཉན་ཐོས་བརྩོན་འགྲུས་བརྩམས་ཏེ་གནས་པ་ཇི་སྙེད་ཅིག་ཡོད་པ་དེ་རྣམས་ཀྱི་ནང་ན་བདག་མཆོག་ཡིན་ན། འོན་ཀྱང་བདག་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་མ་གྱུར་གྱིས། བདག་གི་ཉེ་དུ་རྣམས་ལ་ལོངས་སྤྱོད་རྒྱ་ཆེན་པོ་ཡོད་པས། མ་ལ་བདག་འདུག་ལ་

  1032. 206b

    འདོད་པ་རྣམས་ལ་ལོངས་སྤྱོད་ཅིང་སྦྱིན་པ་དག་སྦྱིན་བསོད་ནམས་དག་བྱའོ་སྙམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པའི་བསམ་པ་མཁྱེན་ནས་དགེ་སློང་ཞིག་ལ་བཀའ་སྩལ་པ། དགེ་སློང་ཚུར་ཤོག །ཁྱོད་གྲོ་བཞིན་སྐྱེས་བྱེ་བ་ཉི་ ཤུ་པ་གང་ན་བ་དེར་སོང་ལ་ཕྱིན་ནས་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་གྲོ་བཞིན་སྐྱེས་བྱེ་བ་ཉི་ཤུ་པ་ཁྱོད་ལ་སྟོན་པ་གསུང་ངོ་ཞེས་སྒོ་ཤིག །བཙུན་པ་བཀའ་བཞིན་འཚལ་ཞེས་དགེ་སློང་དེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་གང་ན་བ་དེར་ སོང་སྟེ་ཕྱིན་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་གྲོ་བཞིན་སྐྱེས་ཁྱོད་ལ་སྟོན་པ་གསུང་ངོ་། །ཚེ་དང་ལྡན་པ་བཀའ་བཞིན་འཚལ་ཞེས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་དགེ་སློང་དེ་ལས་མཉན་ནས་བཅོམ་ལྡན་འདས་གང་ ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་ལ་འདི་སྐད་ཅེས་བཀའ་སྩལ་ཏོ། །གྲོ་བཞིན་སྐྱེས་ཁྱོད་ གཅིག་པུ་དབེན་པར་སོང་སྟེ་ནང་དུ་ཡང་དག་བཞག་པ་ན་སེམས་ལ་སེམས་ཀྱི་རྣམ་པར་རྟོག་པ་འདི་ལྟ་བུ་བཅོམ་ལྡན་འདས་ཀྱི་ཉན་ཐོས་བརྩོན་འགྲུས་བརྩམས་ཏེ་གནས་པ་ཇི་སྙེད་ཡོད་པ་དེ་རྣམས་ཀྱི་ནང་ན་བདག་མཆོག་ཡིན་ན། འོན་ཀྱང་བདག་ལེན་པ་མེད་པར་ཟག་པ་རྣམས་ལས་ སེམས་རྣམ་པར་གྲོལ་བར་མ་གྱུར་གྱིས། བདག་གི་ཉེ་དུ་རྣམས་ལ་ལོངས་སྤྱོད་རྒྱ་ཆེན་པོ་ཡོད་པས་མ་ལ་བདག་འདུག་ལ་འདོད་པ་རྣམས་ལ་ལོངས་སྤྱོད་ཅིང་སྦྱིན་པ་དག་སྦྱིན། བསོད་ནམས་དག་བྱའོ་སྙམ་པ་སྐྱེས་པར་མ་གྱུར་ཏམ། དེ་ནས་ཚེ་དང་ལྡན་པ་གྲོ་བཞིན་སྐྱེས་འདི་སྙམ་ དུ་སེམས་ཏེ། བཅོམ་ལྡན་འདས་ཀྱི་ཐུགས་ཀྱིས་བདག་གི་སེམས་མཁྱེན་ཏོ་སྙམ་དུ་བསམས་ནས་འཇིགས་པ་དང་སྐྲག་པ་དང་སྐྱོབས་པ་སྤུ་ཟིང་ཞེས་བྱེད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་ལྟ་ལགས་སོ། །དེའི་ཕྱིར་གྲོ་བཞིན་སྐྱེས་ཁྱོད་ལ་དྲི་ཡིས་

  1033. 207a

    ཁྱོད་ཀྱིས་ཇི་ལྟར་བཟོད་པ་བཞིན་དེའི་ལན་ཐོབ་ཤིག །གྲོ་བཞིན་སྐྱེས་ཇི་སྙམ་དུ་སེམས་ཁྱོད་སྔོན་ཁྱིམ་པར་གྱུར་པ་ན་པི་བང་གི་རྒྱུད་ཀྱི་སྒྲ་ལ་མཁས་པ་ཡིན་ནམ། བཙུན་པ་བདག་སྔོན་ཁྱིམ་པར་གྱུར་པ་ན་པི་བང་གི་རྒྱུད་ཀྱི་སྒྲ་ལ་མཁས་པ་མད་ལགས་སོ། །གྲོ་ བཞིན་སྐྱེས་ཇི་སྙམ་དུ་སེམས། གང་གི་ཚེ་པི་བང་གི་རྒྱུད་ཤིན་ཏུ་བསྡམས་པར་གྱུར་པ་དེའི་ཚེ་ཇི་ག་པི་བང་གི་སྒྲ་སྙན་པར་འགྱུར་བའམ། སྒྲ་ཡིད་དུ་འོང་བའམ། སྒྲ་དང་ལྡན་པའམ། ལས་སུ་རུང་བར་འགྱུར་རམ། བཙུན་པ་མ་ལགས་སོ། །འོ་ན་གང་གི་ཚེ་པི་བང་གི་རྒྱུད་ ལྷག་པར་ལྷོད་པར་གྱུར་པ་དེའི་ཚེ་ཇི་ག་པི་བང་གི་སྒྲ་སྙན་པར་འགྱུར་བའམ། སྒྲ་ཡིད་དུ་འོང་བའམ། སྒྲ་དང་ལྡན་པའམ། ལས་སུ་རུང་བར་འགྱུར་རམ། བཙུན་པ་མ་ལགས་སོ། །གང་གི་ཚེ་པི་བང་གི་རྒྱུད་ཤིན་ཏུ་བསྡམས་པ་མ་ཡིན་ཞིང་ལྷག་པར་ལྷོད་པ་མ་ཡིན་པར་གྱུར་ཏེ་རྒྱུད་རན་པར་ འདུག་པ་དེའི་ཚེ་པི་བང་གི་སྒྲ་སྙན་པར་འགྱུར་བའམ། སྒྲ་ཡིད་དུ་འོང་བའམ། སྒྲ་དང་ལྡན་པའམ། ལས་སུ་རུང་བར་འགྱུར་བ་མ་ཡིན་ནམ། བཙུན་པ་དེ་ལྟ་ལགས་སོ། །གྲོ་བཞིན་སྐྱེས་དེ་བཞིན་དུ་ཧ་ཅང་བརྩོན་འགྲུས་བརྩམས་པ་ནི་རྒོད་པར་འགྱུར་རོ། །ཧ་ཅང་ཞན་ན་ནི་ཞུམ་ པར་འགྱུར་རོ། །གྲོ་བཞིན་སྐྱེས་དེ་ལྟ་བས་ན་ཁྱོད་ཀྱིས་རན་པ་ཉིད་རྟོགས་པར་བྱ་སྟེ། དེས་ཀྱང་ང་རྒྱལ་དུ་མི་བྱ་ཞིང་དེ་ལ་ཡང་བག་ཡོད་པར་བྱ། དེའི་ཚེ་མཚན་མ་ཡང་གཟུང་བར་བྱ། གྲོ་བཞིན་སྐྱེས་ཁྱོད་གནས་པ་འདིས་གནས་ན་རིང་པོ་མི་ཐོགས་པ་ཁོ་ནར་ཟག་པ་རྣམས་ཟད་ ནས་ཟག་པ་མེད་པ་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་མཐོང་བའི་ཆོས་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ནས་རྫོགས་པར་བྱས་ཏེ། བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་ གཞན་མི་ཤེས་སོ་ཞེས་སྒྲོགས་པར་འགྱུར་རོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་

  1034. 207b

    ནས་བཅོམ་ལྡན་འདས་ཀྱིས་པི་བང་གི་དཔེ་འདིས་ཚེ་དང་ལྡན་པ་གྲོ་བཞིན་སྐྱེས་ལ་གདམས་ངག་ཕོག་ནས་གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་གཏོང་བར་གནས་སོ། །གཅིག་པུ་དབེན་པ་བག་ཡོད་པ་རྟུན་པ་དང་ལྡན་པ་བདག་ཉིད་གཏོང་བར་གནས་པ་ན་གང་གི་ཕྱིར་རིགས་ཀྱི་བུ་ རྣམས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ། ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ། བསྒྲུབས་ནས་བདག་གི་སྐྱེ་བ་ཟད་དོ། །ཚངས་ པར་སྤྱོད་པ་བསྟེན་ཏོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་གོ་བར་བྱེད་ཅིང་ཚེ་དང་ལྡན་པ་དེ་ཀུན་ཤེས་པར་གྱུར་ཏེ། སེམས་ཤིན་ཏུ་རྣམ་པར་གྲོལ་བའི་དགྲ་བཅོམ་པར་གྱུར་ཏོ། །དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་དགྲ་བཅོམ་པ་ཐོབ་སྟེ། རྣམ་ པར་གྲོལ་བའི་དགའ་བའི་བདེ་བ་ཉམས་སུ་མྱོང་ནས་དེ་འདི་སྙམ་དུ་སེམས་ཏེ། བདག་བཅོམ་ལྡན་འདས་བལྟ་བ་དང་བསྙེན་བཀུར་བྱ་བའི་ཕྱིར་འགྲོ་བའི་དུས་ནི་འདི་ཡིན་ནོ་སྙམ་ནས་དེ་ནས་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པ་དགོངས་ཀ་ནང་དུ་ཡང་དག་འཇོག་ལས་ལངས་ཏེ་བཅོམ་ ལྡན་འདས་གང་ན་བ་དེར་སོང་ནས་ཕྱིན་པ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་འདི་སྐད་ཅེས་གསོལ་ཏོ། །བཙུན་པ་ དགེ་སློང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བར་གྱུར་པ་གང་ལགས་པ་དེ་དེའི་ཚེ་གནས་དྲུག་ ལ་མོས་པར་འགྱུར་ཏེ་ངེས་པར་འབྱུང་བ་ལ་མོས་པར་འགྱུར་བ་ལགས། འཚེ་བ་མ་མཆིས་པ་ལ་མོས་པར་འགྱུར་བ་ལགས། རབ་ཏུ་དབེན་པ་ལ་མོས་པར་འགྱུར་བ་ལགས། སྲེད་པ་ཟད་པ་དང་། ལེན་པ་ཟད་པ་དང་། མི་བརྗེད་པའི་སེམས་ལ་མོས་པར་འགྱུར་བ་ལགས་

  1035. 208a

    སོ། །བཙུན་པ་འདི་ན་ཁ་ཅིག་འདི་སྙམ་དུ་ཀྱེ་མ་ཚེ་དང་ལྡན་པ་འདི་དད་པ་ཙམ་ཁོ་ན་ལ་གནས་པས་ངེས་པར་འབྱུང་བ་ལ་མོས་སོ་སྙམ་དུ་སེམས་ན། བཙུན་པ་དེ་ལྟར་བལྟ་བར་མི་བགྱི་སྟེ། འདོད་ཆགས་ཟད་པ་དང་། ཞེ་སྡང་ཟད་པ་དང་། གཏི་མུག་ཟད་ པས་ངེས་པར་འབྱུང་བ་ལ་མོས་པར་འགྱུར་ལགས་སོ། །བཙུན་པ་འདི་ན་ཁ་ཅིག་འདི་སྙམ་དུ་ཀྱེ་མ་ཚེ་དང་ལྡན་པ་འདི་ཚུལ་ཁྲིམས་ཙམ་ཁོ་ན་ལ་བརྟེན་ནས་མི་འཚེ་བ་ལ་མོས་སོ་སྙམ་དུ་སེམས་ན། བཙུན་པ་དེ་ལྟར་བལྟ་བར་མི་བགྱི་སྟེ། འདོད་ཆགས་ཟད་པ་དང་། ཞེ་སྡང་ ཟད་པ་དང་། གཏི་མུག་ཟད་པས་མི་འཚེ་བ་ལ་མོས་པར་འགྱུར་ལགས་སོ། །བཙུན་པ་འདི་ན་ཁ་ཅིག་འདི་སྙམ་དུ་ཀྱེ་མ་ཚེ་དང་ལྡན་པ་འདི་རྙེད་པ་དང་། བཀུར་སྟི་དང་། ཚིགས་སུ་བཅད་པ་ཙམ་ཁོ་ན་ཚོལ་བའི་སླད་དུ་རབ་ཏུ་དབེན་པ་ལ་མོས་སོ་སྙམ་དུ་སེམས་ན། བཙུན་པ་ དེ་ལྟར་བལྟ་བར་མི་བགྱི་སྟེ། འདོད་ཆགས་ཟད་པ་དང་། ཞེ་སྡང་ཟད་པ་དང་། གཏི་མུག་ཟད་པ་དང་། སྲེད་པ་ཟད་པ་དང་། ལེན་པ་ཟད་པ་ལས་མི་བརྗེད་པའི་སེམས་ལ་ཡང་མོས་པར་འགྱུར་ལགས་ཏེ། བཙུན་པ་དགེ་སློང་དགྲ་བཅོམ་པ་ཟག་པ་ཟད་པ། བྱ་བ་བྱས་ པ། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བར་གྱུར་པ་གང་ལགས་པ་དེ་དེའི་ཚེ་དེ་གནས་དྲུག་པོ་འདི་དག་ལ་མོས་པར་འགྱུར་ལགས་སོ། །བཙུན་པ་ དགེ་སློང་སློབ་པ་གང་ཡིན་པ་མ་ཐོབ་པ་གང་ལགས་པ་དེ་གོང་མའི་གྲུབ་པ་དང་བདེ་བའི་མྱ་ངན་ལས་འདས་པ་དོན་དུ་གཉེར་བའི་ཚུལ་ལ་ལན་མང་དུ་གནས་ཏེ། དེ་དེའི་ཚེ་སློབ་པའི་ཚུལ་ཁྲིམས་དང་། སློབ་པའི་དབང་པོ་དང་ལྡན་པ་ལགས་སོ། །དེ་དུས་གཞན་ན་ཟག་པ་རྣམས་ ཟད་ནས་ཟག་པ་མེད་པའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་མཐོང་བའི་ཆོས་ཉིད་ལ་རང་གི་མངོན་པར་ཤེས་པས་མངོན་སུམ་དུ་བགྱིས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །སྲིད་པ་འདི་ལས་གཞན་མི་ཤེས་

  1036. 208b

    སོ་ཞེས་སྒྲོགས་པ་དེའི་ཚེ་ནི་དེ་མི་སློབ་པའི་ཚུལ་ཁྲིམས་དང་། མི་སློབ་པའི་དབང་པོ་རྣམས་དང་ལྡན་ལགས་སོ།། །།འདུལ་བ་གཞི། བམ་པོ་བརྒྱ་རྩ་གཅིག་པ། བཙུན་པ་དཔེར་ན་བུས་པ་གཞོན་ནུ་ཆུང་ངུ་ཞན་པ་གན་རྐྱལ་དུ་ཉལ་བ་དེ་ནི་དེའི་ཚེ་བྱིས་པའི་ ངང་ཚུལ་དང་། བྱིས་པའི་དབང་པོ་རྣམས་དང་ལྡན་ལགས་ལ། དེ་དུས་གཞན་ན་ཆེན་པོར་གྱུར་པའི་རྒྱུས་དབང་པོ་རྣམས་ཡོངས་སུ་སྨིན་པ་དེའི་ཚེ་ན་ཆེན་པོའི་ངང་ཚུལ་དང་། ཆེན་པོའི་དབང་པོ་དང་ལྡན་ལགས་སོ། །བཙུན་པ་དེ་བཞིན་དུ་དགེ་སློང་སློབ་པ་ཡིད་མ་ཐོབ་པ་གང་ ལགས་པ་དེ་གོང་མའི་གྲུབ་པ་དང་བདེ་བའི་མྱ་ངན་ལས་འདས་པ་ལ་དོན་དུ་གཉེར་བའི་ཚུལ་ལ་ལན་མང་དུ་གནས་ཏེ། དེ་དེའི་ཚེ་སློབ་པའི་ཚུལ་ཁྲིམས་དང་སློབ་པའི་དབང་པོ་དང་ལྡན་ལགས་སོ། །དེ་དུས་གཞན་ན་ཟག་པ་རྣམས་ཟད་ནས་ཟག་པ་མེད་པའི་རྣམ་པར་གྲོལ་བའི་ སེམས་དང་། རྣམ་པར་གྲོལ་བའི་ཤེས་རབ་མཐོང་བའི་ཆོས་ཉིད་ལ་རང་གི་མངོན་པར་ཤེས་པས་མངོན་སུམ་དུ་བགྱིས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་སྒྲོགས་པ་དེའི་ ཚེ་ནི་དེ་མི་སློབ་པའི་ཚུལ་ཁྲིམས་དང་། མི་སློབ་པའི་དབང་པོ་དང་ལྡན་ལགས་སོ། །གལ་ཏེ་དེའི་མིག་གིས་རྣམ་པར་ཤེས་པར་བྱ་བའི་གཟུགས་རྣམས་མིག་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་གཏུགས་ པར་མི་འགྱུར་ཏེ། དེའི་སེམས་ཕྱིན་ཅི་མ་ལོག་པ་ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་བལྟའོ། །གལ་ཏེ་དེའི་རྣ་བས་རྣམ་པར་ཤེས་པར་བྱ་བའི་སྒྲ་རྣམས་དང་། སྣས་རྣམ་པར་ཤེས་པར་བྱ་བའི་དྲི་རྣམས་ དང་། ལྕེས་རྣམ་པར་ཤེས་པར་བྱ་བའི་རོ་རྣམས་དང་། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་རྣམས་དང་། ཡིད་ཀྱིས་རྣམ་པར་ཤེས་པར་བྱ་བའི་ཆོས་རྣམས་ཡིད་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་

  1037. 209a

    གཏུགས་པར་མི་འགྱུར་ཏེ་དེའི་སེམས་ཕྱིན་ཅི་མ་ལོག་པ། ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་བལྟའོ། །བཙུན་པ་དཔེར་ན་གྲོང་ཁྱེར་རམ། གྲོང་རྡལ་དང་ཧ་ཅང་ཡང་ཐག་མི་རིང་བ་ ཞིག་ན་རི་བྲག་ཆེན་པོ་སེར་ག་མ་མཆིས་པ། ཤིན་ཏུ་མཁྲེགས་པ་གཅིག་ཏུ་འཐས་པ་ཞིག་མཆིས་ན། དེ་ལ་གལ་ཏེ་ཤར་ཕྱོགས་ནས་རླུང་གི་ཤུགས་དྲག་པོ་ལངས་ཀྱང་དེ་གཡོས་པར་མི་འགྱུར། དེ་འགུལ་བར་མི་འགྱུར་ཞིང་དེ་ནུབ་ཕྱོགས་སུ་བཀུར་བར་མི་ནུས་ལགས་སོ། ། གལ་ཏེ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ནས་རླུང་གི་ཤུགས་དྲག་པོ་ལངས་ཀྱང་དེ་གཡོས་པར་མི་འགྱུར། དེ་འགུལ་བར་མི་འགྱུར་ཞིང་དེ་ལྷོ་ཕྱོགས་སུ་བཀུར་བར་མི་ནུས་ལགས་ཏེ། གང་ནས་རླུང་གི་ཤུགས་དྲག་པོ་ལངས་ཀྱང་དེས་དེ་གཡོས་པར་མི་འགྱུར། དེ་འགུལ་བར་མི་འགྱུར་ཞིང་དེ་གང་དུ་ཡང་བཀུར་བར་མི་ནུས་ལགས་སོ། །དེ་བཞིན་དུ་གལ་ཏེ་དེའི་མིག་གིས་རྣམ་པར་ཤེས་པར་བྱ་བའི་གཟུགས་རྣམས་མིག་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་གཏུགས་པར་མི་ འགྱུར་ཏེ་དེའི་སེམས་ཕྱིན་ཅི་མ་ལོག་པ། ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་ལྟའོ། །གལ་ཏེ་དེའི་རྣ་བས་རྣམ་པར་ཤེས་པར་བྱ་བའི་སྒྲ་རྣམས་དང་། སྣས་རྣམ་པར་ཤེས་པར་བྱ་བའི་དྲི་རྣམས་དང་། ལྕེས་རྣམ་པར་ཤེས་པར་བྱ་བའི་རོ་རྣམས་དང་། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་རྣམས་དང་། ཡིད་ཀྱིས་རྣམ་པར་ཤེས་པར་བྱ་བའི་ཆོས་རྣམས་ཡིད་ལ་ཤིན་ཏུ་སྣང་བར་གྱུར་ཀྱང་དེའི་རྣམ་པར་གྲོལ་བའི་སེམས་དང་། རྣམ་པར་གྲོལ་བའི་ཤེས་རབ་དེ་གཏུགས་ པར་མི་འགྱུར་ཏེ། དེའི་སེམས་ཕྱིན་ཅི་མ་ལོག་པ། ཤིན་ཏུ་རྣམ་པར་གྲོལ་བ། ཤིན་ཏུ་བསྒོམས་པ་དེ་ནང་དུ་གནས་པར་འགྱུར་ཞིང་དེ་ལ་ཟད་པར་ཡང་རྗེས་སུ་ལྟའོ། །ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས། དེ་སྐད་ཅེས་གསོལ་ནས་གནས་བརྟན་དགྲ་བཅོམ་

  1038. 209b

    པས་གཞན་ཡང་འདི་སྐད་ཅེས་གསོལ་ཏོ། །ངེས་པར་འབྱུང་ལ་མོས་པ་དང་། །སེམས་ནི་འཚེ་བ་མེད་པ་དང་། །རབ་ཏུ་དབེན་ལ་མོས་པ་དང་། །སྲེད་པ་ཟད་ལ་དགའ་བ་དང་། །ལེན་པ་ཟད་ལ་མོས་པ་དང་། །སེམས་ནི་བརྗེད་པ་མེད་གྱུར་པ། །སྐྱེ་མཆེད་སྐྱེ་ བ་ཤེས་ནས་སུ། །སེམས་ནི་རྣམ་པར་གྲོལ་བར་འགྱུར། །དེ་ནས་སེམས་ནི་རྣམ་གྲོལ་ཞིང་། །སེམས་ཞི་བ་ཡི་སྐྱོབ་པ་ཡིས། །བྱ་བ་དག་ནི་བྱས་ཟིན་པས། །བྱ་བ་ཡོད་པ་མ་ཡིན་ནོ། །ཇི་ལྟར་བྲག་གི་རི་བོ་ལ། །རླུང་གིས་རབ་ཏུ་མི་གཡོས་པ། །དེ་བཞིན་ སྡུག་དང་མི་སྡུག་པའི། །གཟུགས་རྣམས་དང་ནི་སྒྲ་དག་དང་། །དྲི་དང་རོ་དང་རེག་པ་དང་། །ཆོས་ཀྱིས་སྐྱོབ་པ་མི་གཡོ་སྟེ། །བཀྲིར་མི་བཏུབ་པའི་སེམས་གནས་ཤིང་། །དེ་ལའང་ཟད་པར་རྗེས་སུ་ལྟ། །དགེ་སློང་རྣམས་ཐེ་ཙོམ་སྐྱེས་ཏེ་ཐེ་ཙོམ་ཐམས་ཅད་གཅོད་ པ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་གྲོ་བཞིན་སྐྱེས་བྱེ་བ་ཉི་ཤུ་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་བ་ལོངས་སྤྱོད་ཆེ་བའི་རིགས་སུ་སྐྱེས་ཤིང་རྐང་པའི་མཐིལ་གཉིས་སུ་སྤུ་གསེར་གྱི་ཁ་དོག་འདྲ་བ་ སྐྱེས་པ་དང་། གདུགས་རེ་རེ་ཞིང་ལྔ་བརྒྱའི་སྟོན་མོ་སྣོད་ནས་སྒྲོལ་ཞིང་སྦྱོར་བ་དང་། འདི་ནས་བཟུང་སྟེ་བསྐལ་པ་དགུ་བཅུ་རྩ་གཅིག་གི་བར་དུ་ལན་འགའ་ཡང་གདིང་བ་མ་མཆིས་པའི་ས་ཕྱོགས་སུ་རྐང་པ་མ་བཞག་པ་དང་། བཙས་མ་ཐག་ཏུ་དཀན་དབབ་པའི་རིན་གསེར་བྱེ་བ་ ཕྲག་ཉི་ཤུ་ཐོབ་ཅིང་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཀྱང་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གྲོ་བཞིན་སྐྱེས་བྱེ་བ་ཉི་ཤུ་པ་འདི་ཉིད་ཀྱིས་ལས་ཚོགས་རྙེད་ པ་རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་གྲོ་བཞིན་སྐྱེས་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་

  1039. 210a

    ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི་འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་ པོ་དང་། ཁམས་དང་། སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་དགུ་ བཅུ་རྩ་གཅིག་ན་འཇིག་རྟེན་དུ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ རྣམ་པར་གཟིགས་ཞེས་བྱ་བ་བྱུང་སྟེ། དེ་དགེ་སློང་དྲུག་ཁྲི་ཉིས་སྟོང་གིས་ཡོངས་སུ་བསྐོར་ནས་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཕོ་བྲང་བཤེས་ལྡན་ཞེས་བྱ་བར་གཤེགས་སོ། །རྒྱལ་པོའི་ཕོ་བྲང་བཤེས་ལྡན་ན་དགའ་སྡེ་རབ་ཏུ་མང་པོ་གནས་ཏེ། དེ་རྣམས་ཀྱིས་ ཡང་དག་པར་རྫོགས་པའི་སངས་རྒྱས་རྣམ་པར་གཟིགས་དགེ་སློང་དྲུག་ཁྲི་ཉིས་སྟོང་གིས་ཡོངས་སུ་བསྐོར་ཏེ་ལྗོངས་རྒྱུ་ཞིང་གཤེགས་པ་ན་འདིར་བྱོན་ཏོ་ཞེས་ཐོས་སོ། །ཐོས་ནས་ཀྱང་ཐམས་ཅད་འདུས་ཏེ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་གང་ན་བ་ དེར་དོང་སྟེ་ལྷགས་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་དགའ་སྡེ་རྣམས་ལ་ ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན།

  1040. 210b

    ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་དགའ་སྡེ་རབ་ཏུ་མང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཅག་དགུང་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་ དང་། གཟིམས་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་སྦྱོར་ཞིང་མཆིས་ན་གནང་བར་མཛད་དུ་གསོལ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱིས་དགའ་སྡེ་རབ་ཏུ་མང་པོ་རྣམས་ལ་ཅང་མི་གསུང་བས་གནང་ངོ་། །དེ་ནས་དགའ་སྡེ་རབ་ཏུ་ མང་པོས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ ཏེ་དོང་ངོ་། །དེ་རྣམས་འདུན་ཁང་དུ་འདུས་ཏེ་གྲོས་བྱ་བར་བརྩམས་པ། ཤེས་ལྡན་དག་བདག་ཅག་གིས་བཅོམ་ལྡན་འདས་ཇི་ལྟར་གདུགས་ཚོད་གསོལ་བར་བྱ། ཅི་འདུས་ཏེ་བྱ་འམ། འོན་ཏེ་རེ་རེས་བྱ། དེ་ན་ཁ་ཅིག་གིས་སྨྲས་པ། ཉི་མ་རེ་རེ་ཞིང་འདུས་ཏེ་གདུགས་ ཚོད་གསོལ་ན་བདག་ཅག་གི་ཞིང་བླས་ཀྱི་མཐའ་རྣམས་བར་ཆད་དུ་འགྱུར་བས་ཤེས་ལྡན་དག་གལ་ཏེ་འདོད་ན་རེ་མོས་རེ་མོས་གདུགས་ཚོད་གསོལ་བར་བྱའོ་ཞེས་དེ་རྣམས་ཀྱིས་རེ་མོས་རེ་མོས་སྤྱི་བུ་ངས་ལས་སྟོན་མོ་བྱ་བར་བརྩམས་ཏེ། འབྱོར་པ་ཇི་ལྟ་བ་བཞིན་བདག་ཉིད་ཀྱི་ཡང་སྣོན་ པར་བྱེད་དོ། །དེ་ནས་དགའ་སྡེ་རྣམས་ཀྱི་ནང་ན་བྲམ་ཟེའི་ཁྱེའུ་བཀྲེན་པ་ཞིག་ཡོད་པ་དེ་མའི་དྲུང་དུ་སོང་སྟེ་སྨྲས་པ། ཡུམ་དགའ་སྡེ་རྣམས་ཀྱིས་ཁྲིམས་སུ་བཅས་པ་རེ་མོས་རེ་མོས་བཅོམ་ལྡན་འདས་གདུགས་ཚོད་གསོལ་བར་བྱའོ་ཞེས་བཅས་ན། དེ་ལ་བདག་གི་འབྱོར་པ་

  1041. 211a

    ནི་ཉུང་ན་བདག་གིས་ཇི་ལྟར་གདུགས་ཚོད་གསོལ་བར་བགྱི། དེས་སྨྲས་པ། བུ་གལ་ཏེ་དེ་ལྟ་ན་ཁྱོད་ཀྱིས་ཉི་མ་ཐ་མ་ཟུང་ལ་དུས་དེའི་བར་དུ་ཅུང་ཟད་སྒྲུབས་ཤིག །ཚོགས་ཀྱི་རྒྱུ་ལྷག་ཀྱང་ཅུང་ཟད་རྙེད་གྲང་། དེས་ཉི་མ་ཐ་མ་བཟུང་ནས་དེ་ན་ཚོགས་ཀྱི་རྒྱུ་ ལྷག་པ་རབ་ཏུ་མང་པོ་ཡོད་པ་དང་། དེས་ཀྱང་ཅུང་ཟད་བསྒྲུབས་ནས་དེ་ནས་དེས་གནས་ཁང་རྩིག་ཏུ་བཅུག་སྟེ། དེར་གོས་རྣམས་བཏིང་ནས་གྲྭ་རྣམས་སུ་ཀཱརྵཱ་པ་ཎ་ལྔ་ལྔ་བཞག །དེ་ལ་དོམ་ལྤགས་ཤིག་བདོག་པ་དེ་ཡང་གནས་ཁང་གི་སྒོར་བཏིང་ངོ་། །དེ་ནས་ལྔ་བརྒྱའི་སྟོན་ མོ་སྣོད་དུ་བཙོས་ཤིང་སྦྱར་ནས་བཀུར་སྟི་ཆེན་པོས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་གདུགས་ཚོད་གསོལ་ཏེ་ཞབས་ལ་གཏུགས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་ཕྱུག་ཅིང་ནོར་མང་བ་ལོངས་སྤྱོད་ཆེ་བའི་རིགས་སུ་སྐྱེ་ཞིང་ལན་ འགའ་ཡང་གདིང་བ་མ་མཆིས་པའི་ས་ཕྱོགས་སུ་རྐང་པ་མི་འཇོག་པ་དང་། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཀྱི་ཞབས་ཀྱི་མཐིལ་གཉིས་ལ་སྤུ་གསེར་གྱི་ཁ་དོག་འདྲ་བ་སོར་བཞི་ཙམ་འཁྲུངས་པ་ཇི་འདྲ་བ་དེ་ལྟ་བུར་བདག་གི་ཡང་དེ་དང་འདྲ་བ་དང་ཡོན་ ཏན་འདི་ལྟ་བུ་དག་ཀྱང་ཐོབ་ཅིང་། སྟོན་པ་འདི་འདྲ་བ་མཉེས་པར་བགྱིད་པར་འགྱུར་གྱིས་མི་མཉེས་པར་བགྱིད་པར་མ་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དགའ་སྡེའི་བྲམ་ཟེའི་ཁྱེའུ་གང་ཡིན་པ་དེ་ནི་གྲོ་བཞིན་སྐྱེས་བྱེ་བ་ཉི་ཤུ་པ་འདི་ ཉིད་ཡིན་ཏེ། འདིས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ལ་བྱ་བ་བྱས་ཤིང་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པ་གང་ཡིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་པ་དང་། རྐང་པ་གཉིས་ལ་སྤུ་གསེར་གྱི་ཁ་དོག་འདྲ་བ་སོར་ བཞི་ཙམ་སྐྱེས་པ་དང་། འདི་ནས་བཟུང་སྟེ་བསྐལ་པ་དགུ་བཅུ་རྩ་གཅིག་གི་བར་དུ་ལན་འགའ་ཡང་གདིང་བ་མེད་པའི་ས་ཕྱོགས་སུ་རྐང་པ་མ་བོར་བ་དང་། བཙས་པ་ན་ཡང་དཀན་དབབ་པའི་རིན་དུ་གསེར་བྱེ་བ་ཕྲག་ཉི་ཤུ་ཐོབ་ཅིང་། ངའི་བསྟན་པ་ལ་རབ་ཏུ་བྱུང་ནས་ཀྱང་ཉོན་མོངས་

  1042. 211b

    པ་ཐམས་ཅད་སྤངས་ནས་དགྲ་བཅོམ་པ་མངོན་སུམ་དུ་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །གང་གི་ཚེ་མ་སྐྱེས་དགྲ་མི་དགེ་བའི་བཤེས་གཉེན་ལྷ་སྦྱིན་གྱིས་ཟིན་པས་ རྒྱལ་པོ་གཟུགས་ཅན་སྙིང་པོ་ལ་རྡོ་རྗེ་རྩེ་གཅིག་པ་འཕངས་པ་དེའི་ཚེ། རྒྱལ་པོའི་ཁབ་ན་གནས་པའི་གྲོང་མི་རྣམས་ཀྱིས་འཕྱ་བར་བརྩམས་ཏེ། དེ་ན་ཁ་ཅིག་ནི་རྒྱལ་པོ་ལ་མི་སྙན་པ་སྒྲོགས་པར་བྱེད་དེ། འདི་མ་བཙས་པ་ཉིད་ནས་ཡབ་ལ་དགྲར་འགྱུར་རོ་ཞེས་ལུང་ བསྟན་ན། ཅིའི་ཕྱིར་མ་བཙས་པ་ཉིད་དུ་མི་བསད། གཞན་དག་གིས་སྨྲས་པ། ཤེས་ལྡན་དག་རྒྱལ་པོས་མཉེས་ཏེ་ཅི་ཐམས་ཅད་ཀྱི་ལུང་བསྟན་པ་བདེན་པར་འགྱུར་རམ། གཞོན་ནུ་ཉིད་དུལ་བ་ཡིན་མོད་ཀྱི་འོན་ཀྱང་ལྷ་སྦྱིན་མི་དགེ་བའི་བཤེས་གཉེན་གྱིས་བསླུས་ནས་དེས་ན་བྱ་ བ་ངན་པ་ལ་ཤིན་ཏུ་ཞུགས་པར་གྱུར་ཏོ། །གཞན་དག་གིས་སྨྲས་པ། ཤེས་ལྡན་དག་རྒྱལ་པོ་དང་ལྷ་སྦྱིན་གྱིས་ཀྱང་མ་ཉེས་ཏེ། འོན་ཀྱང་ལྷ་སྦྱིན་ཁྲིད་དེ་འཇིག་རྟེན་གྱི་ཁམས་ཀྱི་བར་དུ་མི་བཞག་པར་འདི་ལྟར་རབ་ཏུ་འབྱིན་པར་མཛད་པས་ན་བཅོམ་ལྡན་འདས་ཁོ་ནས་ནོངས་སོ། ། ཁ་ཅིག་གིས་སྨྲས་པ། བཅོམ་ལྡན་འདས་ཀྱིས་མ་ནོངས་ཏེ། དེ་གང་གི་ཕྱིར་གནས་ནས་དབྱུང་བའི་ལས་མ་བྱས་པས་དགེ་འདུན་གྱིས་ཉེས་སོ། །དེ་ནས་གང་དག་རྒྱལ་པོ་ལ་མི་སྙན་པར་སྒྲོགས་པ་དེས་རྒྱལ་པོ་ངོ་ཚ་བར་མི་བྱེད་ཀྱི། སྔོན་གྱི་ཚེ་རབས་རྣམས་སུ་བདག་གིས་ ལས་འདི་དག་བྱས་ཤིང་བསགས་པ་ཡིན་ནོ་སྙམ་མོ། །གང་དག་བཅོམ་ལྡན་འདས་དང་དགེ་འདུན་ལ་མི་སྙན་པ་སྒྲོགས་པ་དེས་ནི་རྒྱལ་པོ་ཤིན་ཏུ་ངོ་ཚ་བར་བྱེད་དེ། བདག་གི་ལུས་ངན་པ་གང་ཡིན་པ་དེས་འཇིག་རྟེན་བཅོམ་ལྡན་འདས་དང་དགེ་འདུན་གྱི་མི་སྙན་པ་

  1043. 212a

    བརྗོད་དོ་སྙམ་མོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་བཅོམ་ལྡན་འདས་ལ་ཞུས་པ། བཙུན་པ་ནོངས་པ་གཞན་གྱིས་བགྱིས་ལ་སྐྱོན་གཞན་ལ་བསྒོ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་ཉེས་པ་གཞན་གྱིས་བྱས་ལ་སྐྱོན་གཞན་ལ་བསྒོས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ ལེགས་པ་སྐྱེ་བོའི་ཚོགས་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེ་ལ་ཁྱི་གཉིས་ཞིག་ཡོད་པ་འགྲམ་དང་ཉེ་འགྲམ་ཞེས་བྱ་སྟེ། དེ་གཉིས་ཀྱིས་རྒྱལ་པོའི་རྟ་ཁྲབ་ཀྱི་ཆ་སྤྱད་འཆོས་སོ། །ཇི་ཙམ་དུས་གཞན་ཞིག་ན་རྒྱལ་པོ་ཚངས་སྦྱིན་དྲ་མ་ལ་ཆ་བ་ན་དེས་བློན་པོ་ རྣམས་ལ་བསྒོ་བ། ཤེས་ལྡན་དག་རྟ་ཁྲབ་ཀྱི་ཡོ་བྱད་ལྟོས་ཤིག །དེ་རྣམས་ཀྱིས་བལྟ་བར་བརྩམས་པ་ན་ཐམས་ཅད་བཅད་ཅིང་རབ་ཏུ་གཏུབས་པར་མཐོང་ནས་དེ་རྣམས་ཀྱིས་རྒྱལ་པོ་ལ་སྨྲས་པ། ལྷ་རྟ་ཁྲབ་ཀྱི་ཆ་སྤྱད་ཞེས་རྣམས་ཀྱིས་འཚལ་ཏོ། །རྒྱལ་པོས་སྨྲས་པ། ཤེས་ ལྡན་དག་གལ་ཏེ་དེ་ལྟ་ན་ངས་ཁྱི་རྣམས་ཡོངས་སུ་སྤང་ངོ་། །དེ་ན་ཁ་ཅིག་ནི་བསད་དོ། །ཁ་ཅིག་ནི་བྲོས་སོ། །ཇི་ཙམ་ན་ཡུལ་གཞན་གྱི་ཁྱི་ཞིག་ཡུལ་ནས་བཱ་རཱ་ཎ་སཱིར་འོང་བ་ན་དེས་དེ་རྣམས་འབྲོས་པ་མཐོང་ནས་དྲིས་པ། ཤེས་ལྡན་དག་ཅིའི་ཕྱིར་ཁྱེད་འདི་ལྟར་སྐྲག །དེ་རྣམས་ ཀྱིས་ཇི་ལྟར་གྱུར་པ་རྒྱས་པར་སྨྲས་པ་དང་དེས་སྨྲས་པ། ཁྱེད་ཅིའི་ཕྱིར་རྒྱལ་པོ་ལ་གསོལ་བར་མ་བྱས། དེ་རྣམས་ཀྱིས་སྨྲས་པ། གཞན་དག་ནི་ཁ་བཏག །ཁོ་བོ་ཅག་ནི་བྲོས་ན་རྒྱལ་པོ་ལ་གསོལ་བར་བྱ་བའི་གཏོལ་ག་ལ་ཡོད། དེས་སྨྲས་པ། འདུག་ཤིག་དང་ཁྱེད་ ཀྱི་དོན་དུ་ཁོ་བོས་རྒྱལ་པོ་ལ་གསོལ་བ་བྱའོ། །དེས་དེ་རྣམས་དབུགས་ཕྱུང་ནས་སླར་ལོག་པ་དང་། དེ་ནས་དེས་རྒྱུན་ལུགས་ཚད་ཙམ་ན་ཐོས་པའི་ཉེན་ཀོར་དུ་འདུག་ནས་ཚིགས་སུ་བཅད་པས་གསོལ་བ་བཏབ་པ། རྒྱལ་པོའི་ཁབ་ན་ཞེས་གཉིས་མཆིས་པ་འགྲམ་དང་ནི། །ཉེ་

  1044. 212b

    འགྲམ་སྟོབས་དང་ཁ་དོག་ལྡན་པ་གང་ལགས་པ། །དེ་འདིར་དགུམ་རྒྱུ་བདག་ཅག་དགུམ་པའི་རྒྱུ་མ་ལགས། ལྷ་ཅིག་དགུམ་རྒྱུ་མ་ལགས་བཀུམ་པ་རིགས་པ་མིན། །རྒྱལ་པོས་ཐོས་ནས་དེས་ནམ་ལངས་པ་དང་བློན་པོ་རྣམས་ལ་བསྒོ་བ། ཤེས་ལྡན་དག་མདང་སུམ་ང་ ལ་ཚིགས་སུ་བཅད་པས་གསོལ་བ་བྱེད་པ་གང་ཡིན་པ་དེ་ཚོལ་ཅིག །དེ་རྣམས་ཀྱིས་སྐུ་སྲུང་རྣམས་ལ་བསྒོ་བ། ཤེས་ལྡན་དག་མདང་སུམ་ལྷ་ལ་ཚིགས་སུ་བཅད་པས་གསོལ་བ་བྱེད་པ་དེ་ཚོལ་ཅིག །དེ་རྣམས་ཀྱིས་སྨྲས་པ། ཡུལ་གྱི་ཁྱི་ལགས་སོ། །རྒྱལ་པོས་ སྨྲས་པ། ཤེས་ལྡན་དག་ཅི་འགྲམ་དང་ཉེ་འགྲམ་གྱིས་ཟོས་སམ་འོན་ཏེ། ཁྱི་གཞན་རྣམས་ཀྱིས་ཡིན་རྟོགས་ཤིག །བློན་པོ་རྣམས་འདུས་ནས་གྲོས་བྱ་བར་བརྩམས་པ། ཤེས་ལྡན་དག་ལྷས་འདི་སྐད་ཅེས་ཁྱི་རྣམས་རྟོགས་ཤིག་ཅེས་བཀའ་སྩལ་ན། དེ་རྣམས་ ལ་ཇི་ལྟར་བརྟག་པར་བྱ། གཞན་དག་གིས་སྨྲས་པ། དེ་ལ་གཞན་བརྟག་ཏུ་ཅི་ཡོད། སྐྲའི་ཐུམ་པོ་བྱིན་ཏེ་སྐྱུག་ཏུ་གཞུག་མོད། དེ་རྣམས་ཀྱིས་སྐྲའི་ཐུམ་པོ་བྱིན་ཏེ་སྐྱུག་ཏུ་བཅུག་པ་ལས། ཇི་ཙམ་ན་འགྲམ་དང་ཉེ་འགྲམ་གཉིས་ཀོ་བའི་དུམ་བུར་སྐྱུགས་ནས་རྒྱལ་པོ་ལ་རིག་པར་བྱས་ པ་དང་། རྒྱལ་པོས་དེ་གཉིས་སྤངས་ཏེ། ལྷག་མ་རྣམས་ལ་མི་འཇིགས་པ་བྱིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་འགྲམ་དང་ཉེ་འགྲམ་གང་ཡིན་པ་དེ་གཉིས་ནི་ལྷ་སྦྱིན་དང་། མ་སྐྱེས་དགྲ་འདི་གཉིས་ཡིན་ཏེ། དེ་ན་ཡང་འདི་གཉིས་ཀྱིས་ཉེས་པ་ བྱས་ལ་སྐྱོན་གཞན་ལ་བསྒོའོ། །ད་ལྟར་ཡང་འདི་གཉིས་ཀྱིས་ཉེས་པ་བྱས་ལ་སྐྱོན་གཞན་ལ་བསྒོའོ། །གཞན་ཡང་ཇི་ལྟར་ལྷ་སྦྱིན་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་རྒྱལ་སྲིད་བྱེད་དུ་འཇུག་གོ། །ཇི་ཙམ་ན་མི་ ཞིག་སྟ་རེ་དང་ཁུར་ཤིང་ཐོགས་ཏེ་ཤིང་གི་ཕྱིར་ནགས་ཁྲོད་དུ་སོང་ནས། དེ་དེ་ན་ཤིང་ཚོལ་བར་བྱེད་པ་ན་སེང་གེས་སྐྲག་ནས་བྲོས་པ་ལས་སུ་ར་ཁུང་ཞིག་དུ་ལྷུང་ངོ་། །སེང་གེས་ཀྱང་དེ་བཟའ་བའི་བསམ་པས་དེ་ཉིད་དུ་ལྷུང་ངོ་། །སྦྲུལ་ཞིག་གིས་བྱི་བ་ཞིག་སྐྲག་ནས་བྲོས་པ་དང་། ཁྲས་བྱི་བ་བཟའ་

  1045. 213a

    བའི་ཕྱིར་བསྙགས་པ་ལས། ཅི་ཙམ་ན་ཐམས་ཅད་སུར་ཁུང་དུ་ལྷུང་སྟེ། དེ་དག་ཐམས་ཅད་གཅིག་ལ་གཅིག་བསད་པར་འདོད་པའི་གནོད་སེམས་དང་ལྡན་པར་གྱུར་པ་དང་སེང་གེས་སྨྲས་པ། ཤེས་ལྡན་དག་ཁྱེད་ཐམས་ཅད་ཁོ་བོའི་བགྲོད་པ་ཡིན་ཏེ། དེ་ལྟ་མོད་ཀྱི་བདག་ཅག་སྡུག་བསྔལ་མི་བཟད་པ་དོག་པ་ཐོབ་པས་འདི་ནི་གནོད་པར་བྱ་བའི་དུས་མ་ཡིན་གྱིས་མ་འགུལ་བར་འཁོད་ཅིག །སྟེས་དབང་གིས་རྔོན་པ་ཞིག་རི་དགས་རྣམས་ཚོལ་ཞིང་ཕྱོགས་དེར་ཕྱིན་པ་དང་། དེས་སུར་ཁུང་དེར་བལྟ་བར་བརྩམས་པ་ལས། དེ་རྣམས་ ཀྱིས་བརྟབས་པའི་ཚིག་གིས་སྨྲས་པ། ཀྱེ་ནང་རྗེ་སྐྱབས་གྱིས་ཤིག །དེ་ནས་རྔོན་པ་དེས་ཤེས་ནས་ཐོག་མར་སེང་གེ་ཕྱུང་བ་དང་། དེས་རྐང་པ་ལ་གཏུགས་ཏེ་སྨྲས་པ། ཁྱོད་ཀྱི་དྲིན་གཟོ་བར་བྱ་སྟེ། འོན་ཀྱང་འདི་ན་མགོ་ནག་པོ་གནས་པ་དེ་ནི་བྱས་པ་ཆུད་གསོན་པ་ཡིན་ གྱིས་ཁྱོད་ཀྱིས་མ་དབྱུང་ཤིག་ཅེས་སྨྲས་ནས་སོང་ངོ་། །ཇི་ཙམ་ན་རྔོན་པ་དེས་ཐམས་ཅད་མཐར་གྱིས་ཕྱུང་ངོ་། །ཇི་ཙམ་དུས་གཞན་ཞིག་ན་སེང་གེས་རི་དགས་ཤིག་བསད་པ་དང་རྔོན་པ་དེ་ཡང་ཕྱོགས་དེར་ཕྱིན་པ་སེང་གེས་དེ་ངོ་ཤེས་ནས་རྔོན་པའི་རྐང་པ་ལ་གཏུགས་ཏེ་རི་དགས་ དེ་བྱིན་ནོ། །དུས་གཞན་ཞིག་ན་རྒྱལ་པོ་ཚངས་སྦྱིན་བཙུན་མོ་དང་ལྷན་ཅིག་སྐྱེད་མོས་ཚལ་གྱི་སར་སོང་ནས་དེས་སྐྱེད་མོས་ཚལ་དེར་བདེ་བ་ཉམས་སུ་མྱོང་བར་བྱས་ནས་གཉིད་ཀྱིས་ལོག་གོ། །བཙུན་མོ་བུད་མེད་རྣམས་ཀྱང་བག་ཡངས་སུ་གནས་པས་གོས་དག་ཕུད་དེ་སྐེམས། རྒྱན་དག་བཀྲོལ་ནས་ཕྱོགས་དག་ཏུ་བཞག་སྟེ་སྐྱེད་མོས་ཚལ་ན་འཆག་པར་བྱེད། འདུག་པར་བྱེད། ཉལ་བར་བྱེད། གཉིད་ལོག་པར་བྱེད་དོ། །ཇི་ཙམ་ན་བཙུན་མོ་ཞིག་རྒྱན་རྣམས་བཀྲོལ་ཏེ་ཕྱོགས་ཞིག་ཏུ་བཞག་ནས་གཉིད་ལོག་པ་དང་ཁྲས་དེ་བླངས་ནས་རྔོན་པ་དེ་ལ་བྱས་པ་ གཟོ་བར་བྱ་བའི་ཕྱིར་བྱིན་ནོ། །རྒྱལ་པོ་ཚངས་སྦྱིན་གཉིད་ཀྱིས་སྙོམ་པ་བསལ་ནས་མྱུར་བ་མྱུར་བར་བཱ་རཱ་ཎ་སཱིར་ཞུགས་སོ། །བཙུན་མོ་དང་། གཞོན་ནུ་དང་། བློན་པོ་དང་། གྲོང་མི་དང་། ཡུལ་མི་རྣམས་ཀྱང་རིངས་པར་དོང་ངོ་། །ཇི་ཙམ་ན་བཙུན་མོ་དེས་རྒྱན་བཙལ་བ་ལས་

  1046. 213b

    མ་རྙེད་ནས་དེས་རྒྱལ་པོ་ལ་སྨྲས་པ། ལྷ་སྐྱེད་མོས་ཚལ་དུ་བདག་གི་རྒྱན་སྟོར་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྒྱན་སྟོར་གྱིས་སུ་ཡིས་ཁྱེར་ཚོལ་ཅིག །དེ་རྣམས་ཀྱིས་བཙལ་བར་བརྩམས་པ་ན་མགོ་ནག་པོ་དེ་རྔོན་པའི་དྲུང་དུ་དུས་དུས་ སུ་འགྲོ་བས་དེ་དེའི་ཁྱིམ་དུ་སོང་བ་ན་མཚན་མ་ལས་དེ་ལ་རྒྱན་ཡོད་པར་ཤེས་ནས། བྱས་པ་ཆུད་གཟོན་པ་དེས་རྒྱལ་པོའི་དྲུང་དུ་སོང་ནས་གསོལ་པ་དང་། དེ་ནས་རྒྱལ་པོ་མཆོག་ཏུ་ཁྲོས་ཏེ་རྒྱལ་པོའི་མི་རྣམས་ཀྱིས་རྔོན་པ་བཀུག་ནས་སྨྲས་པ། ཀྭའི་ནང་རྗེ་ཁྱོད་ཀྱིས་སྐྱེད་མོས་ ཚལ་ནས་རྒྱན་བརྐུས་སོ། །དེ་ནས་དེ་སྐྲག་ནས་ཇི་ལྟར་གྱུར་པ་སྨྲས་ཏེ་རྒྱན་དེ་རྒྱལ་པོ་ལ་ཕུལ་ན། འོན་ཀྱང་མི་དེ་བཅིངས་ནས་བཙོན་རར་བཞག་གོ། །བྱི་བས་སོང་ནས་སྦྲུལ་ལ་སྨྲས་པ། མགོ་ནག་པོ་སྡིག་པ་བྱེད་པ་དེས་བྱ་བ་བྱས་ནས་བདག་ཅག་གི་དགེ་བའི་ བཤེས་གཉེན་རྒྱལ་པོས་བཅིངས་ནས་བཙོན་རར་བཞག་གོ། །སྦྲུལ་གྱིས་སྨྲས་པ། ཀྱེ་རྔོན་པ་དེ་རིང་བདག་གིས་རྒྱལ་པོ་ལ་ཟིན་པར་བྱས་ཁྱོད་ཀྱིས་སྔགས་ཀྱི་ཚིག་འདི་དང་སྨན་འདི་དག་གིས་གསོས་ཤིག་དང་། དེ་ལྟར་ན་རྒྱལ་པོ་དེ་དགའ་ནས་ཁྱོད་གདོན་མི་ཟ་བར་ བཏང་ནས་ལོངས་སྤྱོད་ཀྱང་བགོ་བཤའ་བྱེད་པར་འགྱུར་རོ། །དེས་སྨྲས་པ་ལེགས་ཀྱིས་དེ་བཞིན་གྱིས་ཤིག །སྦྲུལ་གྱིས་རྒྱལ་པོ་ཟིན་པ་དང་རྔོན་པས་སོང་སྟེ་སྔགས་དང་སྨན་དེ་དག་གིས་གསོས་སོ། །དེ་ནས་རྒྱལ་པོ་མགུ་ནས་བཙོན་ལས་བཏང་སྟེ་ལོངས་སྤྱོད་དག་ གིས་བགོ་བཤའ་ཡང་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྔོན་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱས་པ་ཆུད་གསོན་པའི་མི་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གཞན་ཡང་ཇི་ལྟར་འདི་བྱས་པ་མི་གཟོ་བ་དང་བྱས་པ་མི་ཚོར་བ་དེ་ཉོན་ཅིག །དགེ་སློང་དག་སྔོན་བྱུང་བ་དུས་མ་ཡིན་པར་ཞག་བདུན་དུ་སྤྲིན་ཆགས་ཏེ་

  1047. 214a

    ལྷས་ཆར་ཕབ་ནས་ནེའུ་ལེ་ཞིག་བྱི་བའི་ཚང་དུ་ཞུགས་སོ། །སྦྲུལ་ཞིག་ཀྱང་ཆར་པས་སྐྲག་ནས་ཕན་ཚུན་རྒྱུ་བ་ན་དེ་ཉིད་དུ་ཞུགས་སོ། །ཇི་ཙམ་ན་ནེའུ་ལེ་དེས་བྱི་བ་དེ་གསད་པར་བརྩམས་པ་ན་སྦྲུལ་གྱིས་སྨྲས་པ། ཤེས་ལྡན་དག་བདག་ཅག་སྡུག་བསྔལ་མི་བཟད་པ་ དོག་པ་ཐོབ་ཀྱིས་གཅིག་ལ་གཅིག་གནོད་པ་མ་བྱེད་པར་མ་འགུལ་བར་འཁོད་ཅིག །དེ་ན་སྦྲུལ་གྱི་མིང་ནི་དགའ་སྡེ་ཞེས་བྱའོ། །ནེའུ་ལེའི་མིང་ནི་དགའ་བོ་ཞེས་བྱའོ། །བྱི་བའི་མིང་ནི་གང་གཱས་བྱིན་ཞེས་བྱའོ། །དགའ་སྡེ་དང་། དགའ་བོས་གང་གཱས་བྱིན་ལ་སྨྲས་པ། ཁྱོད་འཇབ་ཅིང་སོང་ ལ་བདག་ཅག་གི་ཁ་ཟས་ཚོལ་ཅིག །དེ་དྲང་ཞིང་བསམ་པ་བཟང་བ་ཡིན་པས་དེ་གཉིས་ཀྱི་ཆེད་དུ་སྙིང་ནས་ཁ་ཟས་བཙལ་བར་བརྩམས་པ་ན་མ་རྙེད་དོ། །དགའ་བོས་དགའ་སྡེ་ལ་སྨྲས་པ། གལ་ཏེ་གང་གཱས་བྱིན་ཁ་ཟས་མེད་པར་འོངས་ན་དེ་ཉིད་བདག་གིས་བཟའ་བར་བྱའོ། །དགའ་སྡེས་བསམས་ པ། སྡུག་བསྔལ་མི་བཟད་པ་དོག་པ་ཐོབ་ན་ཡང་འདི་དེ་ལ་གསོད་པར་རྩོམ་ན། གལ་ཏེ་དེ་ཁ་ཟས་མེད་པར་འོངས་ན་ལྟ་སྨོས་ཀྱང་ཅི་དགོས་པས་ཡེ་དེ་ལ་སྤྲིང་བར་བྱའོ་སྙམ་ནས་དེས་དེ་ལ་སྤྲིང་བ། དགའ་བོ་ན་རེ་འདི་སྐད་ཅེས་གལ་ཏེ་གང་གཱས་བྱིན་ཁ་ཟས་མེད་པར་འོངས་ན་དེ་ཉིད་བདག་གིས་ བཟའ་བར་བྱའོ་ཞེས་ཟེར་རོ། །གང་གཱས་བྱིན་གྱིས་ཁ་ཟས་བཙལ་བ་ལས་ཅུང་ཟད་ཀྱང་མ་རྙེད་ནས་དེས་བསམས་པ། གདོན་མི་ཟ་བར་དེས་བདག་ཟོས་པར་འགྱུར་རོ་སྙམ་ནས་དེས་དགའ་སྡེ་ལ་སྤྲིང་བ། མི་བཀྲེན་ལྟོགས་པའི་ཤུགས་ཀྱིས་ཡོངས་དུབ་ནས། །ཉམ་ཐག་སྙིང་རྗེ་མེད་པར་འགྱུར་ བས་ཁྱོད། །བྱས་པ་ཆུད་གསོན་སེམས་ཅན་དེ་ལ་ནི། །གང་གཱས་བྱིན་པ་ཕྱིར་མི་འོང་ཞེས་གསུངས། །ཞེས་སྤྲིང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གང་གཱས་བྱིན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ནེའུ་ལེ་དགའ་བོ་གང་ཡིན་པ་དེ་ནི་ ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །ད་ལྟར་ཡང་འདི་བྱས་པ་མི་གཟོ་བ་དང་བྱས་པ་མི་ཚོར་བ་ཡིན་ནོ། །གང་གི་ཚེ་མ་སྐྱེས་དགྲས་རྒྱལ་པོ་གཟུགས་ཅན་སྙིང་པོ་ལ་རྡོ་རྗེ་རྩེ་གཅིག་པ་འཕངས་པ་དེའི་ཚེ་རྒྱལ་པོས་དེ་ལ་སྤྱོས་ནས་

  1048. 214b

    གཞོན་ནུ་ཅིའི་ཕྱིར་ཁྱོད་ཀྱིས་ང་ལ་རྡོ་རྗེ་རྩེ་གཅིག་པ་འཕངས། དེས་སྨྲས་པ། ལྷ་ཚིག་པ་འཚལ་བའི་སླད་དུ་སྟེ། ལྷ་ལ་ནི་ལོངས་སྤྱོད་མངའ་ན་བདག་ལ་མ་མཆིས་སོ། །རྒྱལ་པོས་སྨྲས་པ། བུ་གལ་ཏེ་དེ་ལྟ་ན་སོང་ལ་ཙམ་པ་གཞི་དང་བཅས་པ་ཁྱོད་ཀྱི་ཡིན་ནོ། ། དེ་དགའ་བ་དང་། མགུ་བ་དང་། རབ་ཏུ་དགའ་བས་ལྷ་སྦྱིན་གྱི་དྲུང་དུ་སོང་སྟེ་སྨྲས་པ། འཕགས་པ་བདག་གིས་ཙམ་པ་གཞི་དང་བཅས་པ་ཐོབ་བོ། །དེས་སྨྲས་པ། གཞོན་ནུ་ཁྱོད་ཀྱིས་ཕ་རོལ་གནོན་པའི་འབྲས་བུ་མཐོང་ངམ། འཕགས་པ་མཐོང་ངོ་། །ད་དུང་ ཡང་ཕ་རོལ་གནོན་པ་གྱིས་ཤིག་དང་། ཁྱོད་ཀྱི་མངོན་པར་འཕེལ་བར་འགྱུར་རོ། །དེས་ཙམ་པར་དཔྱད་བབ་པས་གཙེ་བར་བརྩམས་ཏེ་གཙེས་པ་ན་སྐྱེ་བོའི་ཚོགས་འབྲོས་པ་ལ་ཞུགས་ཏེ། ཁ་ཅིག་ནི་རྒྱལ་པོའི་ཁབ་ཏུ་དོང་ངོ་། །ཁ་ཅིག་ནི་ཡུལ་གཞན་དུ་དོང་ནས་ བློན་པོ་རྣམས་ཀྱིས་རྒྱལ་པོ་ལ་ཕོ་ཉས་བཟླུགས་པ། ལྷ་གཞོན་ནུས་ཙམ་པའི་སྐྱེ་བོ་གཙེས་ཏེ། གཙེས་པ་ན་འབྲོས་ལགས་ཀྱིས། ལྷ་གཞོན་ནུ་དེ་ལས་བཟློག་པར་མཛད་པའི་རིགས་སོ། །རྒྱལ་པོས་སྨྲས་པ། གཞོན་ནུ་ཅིའི་ཕྱིར་ཡུལ་མི་ལ་གནོད་པར་བྱེད། དེས་སྨྲས་ པ། ལྷ་དཔུང་རྒྱས་པར་མི་འགྱུར་ལགས་སོ། །རྒྱལ་པོས་སྨྲས་པ། གཞོན་ནུ་གལ་ཏེ་དེ་ལྟ་ན་རྒྱལ་པོའི་ཁབ་འབའ་ཞིག་མ་གཏོགས་པར་ཡུལ་མ་ག་དྷཱ་ཁྱེར་ཅིག །དེས་ཡུལ་མ་ག་དྷཱ་བླངས་ནས་ལྷ་སྦྱིན་གྱི་དྲུང་དུ་དོང་སྟེ་སྨྲས་པ། འཕགས་པ་བདག་གིས་རྒྱལ་ པོའི་ཁབ་འབའ་ཞིག་མ་གཏོགས་པ་ཡུལ་མ་ག་དྷཱ་ཐམས་ཅད་ཐོབ་བོ། །དེས་སྨྲས་པ། གཞོན་ནུ་ཕ་རོལ་གནོན་པའི་འབྲས་བུ་ནི་དེ་འདྲས་ཡང་ཕ་རོལ་གནོན་པ་གྱིས་ཤིག །དེས་ཡུལ་མ་ག་དྷཱ་བརླག་པར་བྱ་བར་བརྩམས་པ་ན་ཡུལ་མ་ག་དྷཱ་ན་གནས་པའི་སྐྱེ་བོའི་ཚོགས་ཀྱིས་ རྒྱལ་པོ་གཟུགས་ཅན་སྙིང་པོ་ལ་གསོལ་པ། ལྷ་གཞོན་ནུས་ཡུལ་མ་ག་དྷཱ་བརླག་པར་བགྱིས་ཀྱིས་ཟློག་མཛོད་ཅིག །རྒྱལ་པོས་དེ་བཀུག་སྟེ་སྨྲས་པ། གཞོན་ནུ་ཅིའི་ཕྱིར་ཡུལ་མ་ག་དྷཱ་བརླག་པར་བྱ། དེས་སྨྲས་པ། ལྷ་བདག་གི་སྐྱེ་བོའི་ཚོགས་ཕལ་མོ་ཆེ་རྒྱས་པར་མི་

  1049. 215a

    འགྱུར་ལགས་སོ། །རྒྱལ་པོས་སྨྲས་པ། གཞོན་ནུ་གལ་ཏེ་དེ་ལྟ་ན་མཛོད་ཅིག་མ་གཏོགས་པ་ཐམས་ཅད་ཁྱོད་ཁོ་ནའི་ཡིན་ནོ། །དེས་རྒྱལ་པོའི་ཁབ་ཀྱང་བླངས་ནས་ལྷ་སྦྱིན་གྱི་དྲུང་དུ་སོང་སྟེ་སྨྲས་པ། འཕགས་པ་བདག་གིས་མཛོད་ཅིག་མ་གཏོགས་པར་ལོངས་ སྤྱོད་ཐམས་ཅད་ཐོབ་བོ། །དེས་སྨྲས་པ། ཕ་རོལ་གནོན་པའི་འབྲས་བུ་དེ་ཡིན་མོད་ཀྱི་འོན་ཀྱང་རྒྱལ་པོ་རྣམས་ནི་མཛོད་ཀྱི་མཐུ་ཅན་ཡིན་ཏེ། གང་ལ་མཛོད་ཡོད་པ་དེ་རྒྱལ་པོ་ཡིན་པས་མཛོད་ཀྱི་ཕྱིར་ཕ་རོལ་གནོན་པ་གྱིས་ཤིག །དེས་རྒྱལ་པོའི་ཁབ་ཀྱང་བརླག་པར་བྱ་བར་ བརྩམས་པ་ན་རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་དང་། ཡུལ་མ་ག་དྷཱ་ན་གནས་པའི་སྐྱེ་བོའི་ཚོགས་དང་། ཙམ་པ་བ་ཐམས་ཅད་སྐྲག་པར་གྱུར་ནས། ཇི་ལྟར་མ་སྐྱེས་དགྲས་མི་མཐོང་བ་དེ་ལྟར་ཕོ་ཉ་བཏང་སྟེ་རྒྱལ་པོ་ལ་གསོལ་པ། ལྷས་བདག་ཅག་བུ་བཞིན་དུ་སོ་ སོར་བསྐྱངས་ན་གཞོན་ནུས་མ་འོས་པ་བཞིན་དུ་བཀྲེན་པར་བགྱིས་པས་ལྷའི་ཡུལ་མི་ཕལ་ཆེར་བྲོས་ལགས་ཏེ། བདག་ཅག་ཀྱང་འབྲོས་པར་འཚལ་ལགས་སོ། །རྒྱལ་པོ་སྙིང་རྗེའི་བདག་ཉིད་ཅན་ཆོས་གཙོར་བྱེད་པ་དེ་མི་བདེ་བ་སྐྱེས་ནས་མ་སྐྱེས་དགྲ་བཀུག་སྟེ། དགའ་བ་ དང་། སྙན་པ་དང་། རྗེས་སུ་མཐུན་པའི་ཚིག་གིས་མགོ་ལ་བྱུགས་ཏེ་སྨྲས་པ། བུ་ངས་ཁྱོད་ལ་ཡུལ་ཐམས་ཅད་བྱིན་ན་ཅིའི་ཕྱིར་ཡི་ཆད་པར་བྱ་སོ་སོར་སྐྱོངས་ཤིག །དེས་སྨྲས་པ། ལྷ་རྒྱལ་པོ་རྣམས་ནི་མཛོད་ཀྱི་མཐུ་ཅན་ལགས་ན། བདག་ལ་མཛོད་ཀྱི་མཐུ་མ་ མཆིས་ན་ཇི་ལྟར་བགྱི། དེས་སྨྲས་པ། གལ་ཏེ་དེ་ལྟ་ན་བཙུན་མོའི་འཁོར་མ་གཏོགས་པ་ཐམས་ཅད་ཁྱོད་ཁོ་ནའི་ཡིན་ནོ། །འོན་ཀྱང་རང་བཞིན་ངན་ཅིང་སྡིག་པའི་གྲོགས་པོ་ཅན་དེ་འདུག་ཏུ་མི་བཏུབ་ཅིང་བརླག་པ་ཁོ་ནར་བྱེད་དོ། །རྒྱལ་པོས་སྤྱོ་བ་དང་བཅས་པས་སྨྲས་པ། བང་མཛོད་དང་། མཛོད་དང་། ཡུལ་ཐམས་ཅད་ཁྱོད་ཁོ་ན་ལ་བྱིན་ན་ཅིའི་ཕྱིར་ད་དུང་རླག་པར་བྱེད། དེ་སྐད་ཅེས་སྨྲས་པ་དང་དེ་ཁྲོས་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་སྨོད་པ་གང་ཡིན་པ་དེ་ལ་ཆད་པ་ཅིས་གཅད།

  1050. 215b

    བློན་པོ་རྣམས་ཀྱིས་སྨྲས་པ། ལྷ་ཆད་པར་དགུམ་ལགས་མོད། དེས་སྨྲས་པ། དེ་ངའི་ཡབ་ཡིན་པས་ཇི་ལྟར་བསད་ཀྱིས། དེང་ལ་དེ་ཟུང་སྟེ་ཕྱག་སྦལ་དུ་ཆུག་ལ་ཞོག་ཤིག །དེ་ཕྱག་སྦལ་དུ་བཅུག་པ་དང་། རྒྱལ་པོ་དེ་ལ་གྲོང་མི་རྣམས་དགའ་བས་ཡུལ་དེ་ན་གནས་ པའི་སྐྱེ་བོའི་ཚོགས་ཀྱིས་ཐོས་ནས་ཡིད་མི་བདེ་བར་གྱུར་ན་མ་སྐྱེས་དགྲ་གཏུམ་པ་དང་། བརླང་བ་དང་། གཟུ་ལུམས་ཆེ་བས་དེ་ལ་སུ་ཡང་ཁ་ཟེར་མི་ཕོད་དོ། །རྒྱལ་པོ་གཟུགས་ཅན་སྙིང་པོ་ཕྱག་སྦལ་ན་ལས་ཁོ་ན་ལ་རྟེན་ཅིང་འདུག་པ་དེ་ལ་ལུས་འཕགས་མས་སྣོད་དུ་བཙོས་པ་སྐྱེལ་ བར་བྱེད་དོ། །མ་སྐྱེས་དགྲས་བཙོན་སྲུངས་རྣམས་ལ་དྲིས་པ། ཤེས་ལྡན་དག་རྒྱལ་པོ་བགྲེས་པོ་ཇི་ལྟར་འཚོ་བར་བྱེད། དེ་རྣམས་ཀྱིས་སྨྲས་པ། ལྷ་ཁྱོད་ཀྱི་ཡུམ་གྱིས་སྣོད་ནས་བཙོས་པ་སྐྱེལ་ལགས་སོ། །མ་སྐྱེས་དགྲས་བསྒོ་བ། ཕྱིན་ཆད་བཟའ་བ་དང་བཏུང་བ་ཇི་ལྟར་ཡང་ སྐྱེལ་བར་མི་འགྱུར་བར་ཁོག་ཤིག །བཙུན་མོ་རྣམས་ལ་ཡང་བསྒོ་བ། སུས་ཀྱང་ཕྱག་སྦལ་དུ་བཟའ་བ་དང་བཏུང་བ་བསྐྱལ་བར་མི་བྱའོ། །གང་ཞིག་སྐྱེལ་ན་དེ་ཆད་པས་བསད་དོ། །དེ་ཞེ་གནག་པའི་ལས་ཅན་ཡིན་པར་ཤེས་པས་སུ་ཡང་ཁ་ཟས་སྦྱོར་བ་ཡང་མི་བྱེད་ན་ སྐྱེལ་བ་ལྟ་སྨོས་ཀྱང་ཅི་དགོས། དེ་ནས་ལུས་འཕགས་མ་ཁྱིམ་ཐབ་ལ་སྡུག་པར་འཆུམས་པའི་སྙིང་གིས་ཕྱེའི་འདེ་གུས་ལུས་བྱུགས་ཤིང་རྐང་གདུབ་ཀྱི་སྦུབས་ཆུས་བཀང་ནས་བསྐྱལ་བར་བརྩམས་ཏེ་དེ་དེས་འཚོ་བར་བྱེད་དོ། །བཙོན་སྲུངས་ཀྱི་མི་རྣམས་ཀྱིས་དེའི་ཐབས་ཤེས་མོད་ཀྱི་ རྒྱལ་པོ་དེ་ལ་དགའ་བས་མཐོང་ཡང་མ་སྐྱེས་དགྲ་ལ་མ་སྦྲན་ཏོ། །ཇི་ཙམ་ན་ཡང་མ་སྐྱེས་དགྲས་བཙོན་སྲུངས་ཀྱི་མི་རྣམས་ལ་སྨྲས་པ། ཤེས་ལྡན་དག་རྒྱལ་པོ་བགྲེས་པོ་ཇི་ལྟར་འཚོ་བར་བྱེད། དེ་རྣམས་ཀྱིས་རྒྱས་པར་སྨྲས་པ་དང་། དེས་སྨྲས་པ། ཤེས་ལྡན་དག་ལུས་ འཕགས་མ་ཇི་ལྟར་ཡང་ཕྱིས་སྐྱེལ་བར་མི་འགྱུར་བར་ཁོག་ཤིག །དེ་ནས་བཅོམ་ལྡན་འདས་ཀྱིས་དེའི་དགེ་བའི་རྩ་བ་བསྐྱེད་པའི་ཕྱིར་སྐར་ཁུང་གི་དྲང་ཐད་ཀྱི་བྱ་རྒོད་ཀྱི་ཕུང་པོའི་རི་ལ་འཆག་པར་བརྩམས་ནས། རྒྱལ་པོ་གཟུགས་ཅན་སྙིང་པོས་སྐར་ཁུང་ནས་དྲང་ཐད་ཀྱི་བྱ་རྒོད་

  1051. 216a

    ཀྱི་ཕུང་པོའི་རི་ལ་བཅོམ་ལྡན་འདས་གང་ན་བ་ལ་བལྟས་ནས་དགའ་བསྐྱེད་པས་དེས་ན་སྲོག་དང་བྲལ་བར་མ་གྱུར་ཏོ། །མ་སྐྱེས་དགྲས་ཡང་བཙོན་སྲུངས་ཀྱི་མི་རྣམས་ལ་སྨྲས་པ། ཤེས་ལྡན་དག་བཟའ་བ་དང་བཏུང་བ་ནི་བཀག་ན་ད་ལྟར་རྒྱལ་པོ་བགྲེས་པོ་ཇི་ལྟར་ འཚོ་བར་བྱེད། དེ་རྣམས་ཀྱིས་སྨྲས་པ། བཅོམ་ལྡན་འདས་ཀྱིས་དེ་རྗེས་སུ་གཟུང་བའི་སླད་དུ་སྐར་ཁུང་གི་དྲང་ཐད་ཀྱི་བྱ་རྒོད་ཀྱི་ཕུང་པོའི་རི་ལ་འཆག་པར་མཛད་པ་དེ་ལ་དེ་གདུགས་རེ་རེ་ཞིང་བཞེངས་ནས་གཟིགས་ལགས་སོ། །དེས་སྨྲས་པ། སྐར་ཁུང་ཁོག་ལ་དེའི་རྐང་པ་གཉིས་ ཀྱང་སྤུ་གྲིས་དྲོས་ཤིག །དེ་རྣམས་ཀྱིས་སྐར་ཁུང་དག་བཀག་དེའི་རྐང་པ་གཉིས་ཀྱང་སྤུ་གྲིས་དྲས་པ་དང་དེ་སྡུག་བསྔལ་གྱི་ཚོར་བས་གདུངས་པས་མཆི་མས་བརྣངས་ཤིང་སྐད་འགགས་ལ་མིག་མཆི་མས་གང་བས་བསམས་པ། བདག་སྡུག་བསྔལ་མི་བཟད་པ་དོག་པ་ཐོབ་ན་བཅོམ་ལྡན་ འདས་ཀྱིས་མ་དགོངས་པ་ལྟ་ཞིག་སྙམ་མོ། །སངས་རྒྱས་བཅོམ་ལྡན་འདས་རྣམས་ནི་དེ་ལྟ་བུ་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་མཁྱེན་པ་ཅི་ཡང་མི་མངའོ། །ཆོས་ཉིད་ཀྱིས་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ དང་ལྡན་པ། འཇིག་རྟེན་ལ་ཕན་པར་ཞུགས་པ། བསྲུང་བ་གཅིག་པུ་པ། ཉག་གཅིག་དཔའ་བ། ཟླ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་ འཕྲུལ་གྱི་རྐང་པ་བཞིའི་ཞབས་ཀྱི་མཐིལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་

  1052. 216b

    སྒྱུར་བ་ལས་ཁྱད་པར་དུ་འཕགས་པ་རྣམས་ནི་སངས་རྒྱས་ཀྱི་སྤྱན་གྱིས་ཉིན་ལན་གསུམ་མཚན་ལན་གསུམ་དུ་འཇིག་རྟེན་ལ་རྣམ་པར་གཟིགས་ནས་གང་ནི་ཉམས། གང་ནི་འཕེལ། གང་ནི་མི་བཟད་པར་གྱུར། གང་ནི་དོག་པར་གྱུར། གང་ནི་སྡུག་བསྔལ་བར་གྱུར། གང་ནི་མི་ བཟད་པ་དང་དོག་པ་དང་སྡུག་བསྔལ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་ནས་དྲངས་ཏེ་མཐོ་རིས་དང་ཐར་པ་དང་འབྲས་བུ་ལ་གཞག་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་ གི་དགེ་བའི་རྩ་བ་བསྐྱེད་པ་དག་ནི་ཡོངས་སུ་སྨིན་པར་བྱ། གང་གི་ཡོངས་སུ་སྨིན་པ་ནི་རྣམ་པར་གྲོལ་བར་བྱ་ཞེས་ཡེ་ཤེས་གཟིགས་པ་ལ་འཇུག་པར་མཛད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་སོང་ལ་ ངའི་ཚིག་གིས་རྒྱལ་པོ་གཟུགས་ཅན་སྙིང་པོ་ལ་ནད་མེད་པར་གྱུར་ཅིག་ཅེས་བྱོས་ལ་འདི་སྐད་ཅེས་བཅོམ་ལྡན་འདས་ཀྱི་ཞལ་ནས་དགེ་བའི་བཤེས་གཉེན་གྱིས་བྱ་བ་གང་ཡིན་པ་དེ་ངས་ཁྱོད་ལ་མཛད་ཟིན་ཏེ། ཁྱོད་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་ དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཞག །འཁོར་བའི་ནི་མཐར་བྱས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་རྣམས་ཀྱི་སྒོ་ནི་བཅད། མཐོ་རིས་དང་ཐར་པའི་སྒོ་རྣམས་ནི་ཕྱེ་ན། འོན་ཀྱང་ ཁྱོད་ཉིད་ཀྱི་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་ཁྱོད་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་ པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་

  1053. 217a

    རྣམས་ཁོ་ན་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་དེ་ལྟ་བས་ན་ལས་ཀྱི་སྐྱབས་ཅན་དུ་གྱིས་ ཤིག་ཅེས་གསུང་ངོ་། །ཞེས་བྱོས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ལས་མཉན་ནས་ཇི་ལྟར་སེམས་མཉམ་པར་བཞག་ན་བྱ་རྒོད་ཀྱི་ཕུང་པོའི་རི་ལས་མི་སྣང་བར་གྱུར་ཏོ། །ཕྱག་སྦལ་དུ་རྒྱལ་པོ་གཟུགས་ཅན་སྙིང་ པོའི་མདུན་དུ་འདུག་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་ཏེ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བཅོམ་ལྡན་འདས་ཀྱི་ཞལ་ནས་ཁྱོད་ནད་མེད་པར་གྱུར་ཅིག་ཅེས་གསུང་ངོ་། །བཙུན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ལ་ཕྱག་འཚལ་ལོ། །རྒྱལ་པོ་ཆེན་ པོ་བཅོམ་ལྡན་འདས་ཀྱི་ཞལ་ནས་འདི་སྐད་ཅེས། དགེ་བའི་བཤེས་གཉེན་གྱིས་བྱ་བ་གང་ཡིན་པ་དེ་ངས་ཁྱོད་ལ་མཛད་དེ། ཁྱོད་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་སུ་ནི་རབ་ཏུ་བཞག །འཁོར་བའི་ནི་ མཐར་བྱས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་རྣམས་ཀྱི་སྒོ་ནི་བཅད། མཐོ་རིས་དང་ཐར་པའི་སྒོ་རྣམས་ནི་ཕྱེ་ན། འོན་ཀྱང་ཁྱོད་ཉིད་ཀྱི་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་ པ། གདོན་མི་ཟ་བར་འབྱུང་བར་འགྱུར་བའི་ལས་དག་ཁྱོད་ཉིད་ཀྱིས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་པོ་ཆེན་པོ་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་ འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ཁོ་ན་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་

  1054. 217b

    ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་ལས་ཀྱི་སྐྱབས་ཅན་དུ་གྱིས་ཤིག་ཅེས་གསུང་ངོ་། །དེ་ཕྱག་སྦལ་དུ་བཅུག་པ་དང་། སྤུ་གྲིས་རྐང་པ་དྲས་པ་དང་། བཟའ་ བ་དང་བཏུང་བ་དང་བྲལ་བའི་སྡུག་བསྔལ་གྱིས་ཉེན་པས་སྨྲས་པ། བཙུན་པ་མཽད་གལ་གྱི་བུ་ཆེན་པོ་གང་ན་ཁ་ཟས་བཟང་པོ་འཚལ་ལགས། དེས་སྨྲས་པ། རྒྱལ་པོ་ཆེན་པོ་རྒྱལ་ཆེན་བཞིའི་རིས་ཀྱི་ལྷ་རྣམས་ནའོ་ཞེས་སྨྲས་ནས། ཚེ་དང་ལྡན་པ་མཽད་གལ་གྱི་བུ་ཆེན་པོས་ ཇི་ལྟར་སེམས་མཉམ་པར་བཞག་ན་ཕྱག་སྦལ་དེ་ནས་མི་སྣང་བར་གྱུར་ཏེ། བྱ་རྒོད་ཀྱི་ཕུང་པོ་ལ་ཕྱིན་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །མ་སྐྱེས་དགྲའི་བུ་འཆར་བྱེད་བཟང་པོའི་མཛུབ་མོ་ལ་ཕོལ་མིག་བྱུང་བས་དེ་ངུ་བར་གྱུར་ནས་མ་སྐྱེས་དགྲས་དྲུང་དུ་སོང་སྟེ། དེས་དེ་པང་བར་བཞག་ནས་མགུལ་ནས་འཁྱུད། འོ་བྱས། ཀུན་ཏུ་འཁྱུད་ན་འོན་ཀྱང་དེ་ངུ་སྟེ་འདུག་ཏུ་མི་བཏུབ་བོ། །དེ་ནས་མ་སྐྱེས་དགྲས་དེའི་མཛུབ་མོ་ཁར་བཅུག་པ་དང་། ཕོ་ལ་མིག་ཁར་རྡོལ་ནས་མ་སྐྱེས་དགྲས་རྣག་ཁྲགས་ལ་ཕོའོ། །གཞོན་ནུ་འཆར་བྱེད་བཟང་པོས་ རྣག་ཁྲག་དེ་མཐོང་ནས་ལྷག་པར་ངུ་བར་བརྩམས་པ་དང་། བཙུན་མོ་ལུས་འཕགས་མས་འཛུམ་ཕྱུང་བ་མ་སྐྱེས་དགྲས་མཐོང་ནས་སྨྲས་པ། ཡུམ་འདི་ཇི་ལྟ་བུ་ཞིག །དེས་སྨྲས་པ། བུ་ནད་འདི་ནི་ཁྱེད་ཀྱི་ཡབ་མེས་བརྒྱུད་དེ་འོངས་པ་ཡིན་ཏེ། ཁྱོད་ཀྱང་དེ་ལྟར་གྱུར་པ་ན་ཁྱོད་ཀྱི་ ཡབ་ཀྱིས་མཛུབ་མོ་ཁར་བཅུག་པ་དང་། ཕོལ་མིག་རྡོལ་ནས་ཁྱོད་མི་ངུ་བར་བྱ་བའི་ཕྱིར་རྣག་ཁྲག་ས་ལ་མ་ཕོ་བར་ཁོང་དུ་མིད་དོ་དེས་སྨྲས་པ། ཡུམ་བདག་གི་ཡབ་འདི་འདྲ་བར་བྱམས་པར་གྱུར་ཏམ། དེས་སྨྲས་པ། དེ་འདྲའོ། །དེ་ནས་མ་སྐྱེས་དགྲ་ཕ་ལ་ཞེ་སྡང་གི་ཀུན་ནས་ དཀྲིས་པ་དང་བྲལ་ཞིང་རྗེས་སུ་ཆགས་པ་སྐྱེས་ཏེ། དེས་བློན་པོ་རྣམས་ལ་སྨྲས་པ། ཤེས་ལྡན་དག་གང་ཞིག་ང་ལ་རྒྱལ་པོ་བགྲེས་པོ་གསོན་ནོ་ཞེས་ཟེར་བ་དེ་ལ་ངས་རྒྱལ་སྲིད་ཕྱེད་སྦྱིན་ནོ། །རྒྱལ་པོ་དེ་ལ་གྲོང་མི་དང་ཡུལ་མི་རྣམས་དགའ་བ་ཡིན་པས་སྐྱེ་བོའི་ཚོགས་ཆེན་པོས་

  1055. 218a

    ཕྱག་སྦལ་ལོགས་སུ་བརྒྱུགས་པའི་སྒྲ་རྒྱལ་པོས་ཐོས་ནས་བསམས་པ། ད་ནི་གནོད་པ་མི་བཟད་པ་ཅི་ཞིག་བྱེད་པར་འགྱུར་རོ་སྙམ་སྟེ། སྐྲག་ནས་ཤུགས་ནར་ཞེས་ཕྱུང་སྟེ་ཤི་བ་དང་། རྒྱལ་པོ་ཆེན་པོ་རྣམ་ཐོས་ཀྱི་བུའི་བུར་སྐྱེས་ཏེ་པང་དུ་འདུག་ནས་ལྷའི་ བདུད་རྩིས་ལོངས་སྤྱོད་པར་བྱེད་དོ། །རྣམ་ཐོས་ཀྱི་བུས་སྨྲས་པ། ཁྱོད་སུ་ཞིག །དེས་བདག་ནི་རྒྱལ་བ་ཁྱུ་མཆོག་ལགས་སོ། །ཞེས་སྨྲས་པས། དེའི་མིང་རྒྱལ་བ་ཁྱུ་མཆོག་རྒྱལ་བ་ཁྱུ་མཆོག་ཅེས་བྱ་བར་གྲགས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་གཟུགས་ཅན་སྙིང་པོ་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རྒྱལ་པོའི་རིགས་སུ་སྐྱེས་པར་གྱུར་ཅིང་བཅོམ་ལྡན་འདས་ཀྱི་སྤྱན་སྔ་ནས་བདེན་པ་མཐོང་ བར་བགྱིས་པ་དང་། སྤུ་གྲིས་སུག་པ་རྐང་པ་དྲས་ཏེ་ཕྱག་སྦལ་དུ་སྩལ་ཅིང་བཀྲེས་པ་དང་། སྐོམ་པས་གཟིར་ནས་གུམ་པར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་གཟུགས་ཅན་སྙིང་པོ་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། གཟུགས་ཅན་སྙིང་པོས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ ཕུང་པོ་དང་། ཁམས་དང་། སྐྱེ་མཆེད་རྣམས་ཁོ་ན་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་

  1056. 218b

    བ་སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་དག་འབྱུང་བར་འགྱུར་བ་ཡིན་པས། ཇི་ཙམ་ན་རང་སངས་རྒྱས་ཞིག་ ལྗོངས་རྒྱུ་ཞིང་སྤྱོད་པ་ན་བཱ་རཱ་ཎ་སཱིར་ཕྱིན་ནས་བཱ་རཱ་ཎ་སཱིའི་རྫ་མཁན་ཞིག་གི་ལས་ཁང་དུ་ནུབ་མོ་ཉེ་བར་བརྟེན་ཏེ་གནས་སོ། །འགྲོན་པ་ཞིག་ཀྱང་ལས་ཁང་དེ་ཉིད་དུ་གནས་བཏབ་པ་ལས་དེར་འགྲོན་པ་དེས་བཤང་བ་བྱས་ནས་ནུབ་མོ་ཉིད་ལངས་ཏེ་སོང་ངོ་། །དགྲ་བཅོམ་པ་རྣམས་ དང་། རང་སངས་རྒྱས་རྣམས་ནི་མ་བསམས་པར་ཡེ་ཤེས་མཐོང་བ་མི་འཇུག་པ་ཡིན་པས་རང་སངས་རྒྱས་ཀྱིས་འདི་ཉིད་དུ་བསོད་སྙོམས་སྤྱད་པར་བྱའོ་སྙམ་ནས་དེ་ཉིད་དུ་འདུག་གོ། །ཇི་ཙམ་ན་རྫ་མཁན་ནམ་ནངས་ནས་ལས་ཀྱི་ཁང་པར་ཞུགས་ན་མི་གཙང་བས་མ་རུངས་པར་ བྱས་པ་མཐོང་ངོ་། །མི་ཕལ་པ་རྣམས་ནི་མི་རྟོག་པ་ཡིན་པས་དེས་རང་སངས་རྒྱས་ལ་སེམས་རབ་ཏུ་གདུག་པར་བྱས་ཏེ་དེ་སེམས་རབ་ཏུ་སྡང་བས་སྨྲས་པ། རབ་ཏུ་བྱུང་བ་ཁྱོད་ཀྱི་རྐང་པ་གཉིས་སྤུ་གྲིས་དྲས་སམ་ཅིན་གང་གི་ཕྱིར་ཁྱོད་ཀྱིས་ལས་ཁང་དུ་བཤང་བ་བྱས་ཤིང་ཕྱི་རོལ་ དུ་མ་སོང་། དེས་དེ་སྒོ་བཅད་ནས་འདི་ཉིད་དུ་སྐོམ་པ་དང་བཀྲེས་པས་ཤི་ཤིག་ཅེས་བཞག་གོ། །བདག་ཉིད་ཆེན་པོ་དེས་བསམས་པ། ཉོན་མོངས་པ་འདི་ནི་ཉམས་ཀྱིས་གལ་ཏེ་བདག་གིས་སྒོ་ཕྱེ་སྟེ་སོང་བར་གྱུར་ན་ལྷག་པར་ཡང་ཉམས་པར་འགྱུར་རོ་སྙམ་ནས་དེ་ཅང་མི་སྨྲ་བར་ འདུག་གོ། །ཇི་ཙམ་ན་རྫ་མཁན་དྲོའི་དུས་ལ་བབ་ནས་དེའི་ཞེ་སྡང་གི་ཀུན་ནས་དཀྲིས་པ་དང་བྲལ་ནས་དེས་སྨྲས་པ། ཀྱེ་རབ་ཏུ་བྱུང་བ་གདུགས་ཚོད་གསོལ་གྱིས་ཚུར་སྤྱོན། རང་སངས་རྒྱས་ཀྱིས་སྨྲས་པ། བཞིན་བཟངས་ཁོ་བོ་དུས་སུ་ལོངས་སྤྱོད་པ་ཡིན་པ་ལས་དུས་ལས་ཡོལ་ཟིན་ ཏོ། །དེས་སྨྲས་པ། གལ་ཏེ་དེ་ལྟ་ན་འདི་ཉིད་དུ་བཞུགས་ཏེ། སང་བཤོས་གསོལ་ལ་གཤེགས་ཤིག །དེས་དེ་ལ་སྙིང་བརྩེ་བའི་ཕྱིར་ཁས་བླངས་སོ། །དེས་དེ་ཕྱི་དེ་ཉིན་པར་ཁ་ཟས་བསོད་པས་ཚིམ་པར་བྱས་སོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ངག་

  1057. 219a

    གིས་མ་ཡིན་པས་དེ་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་ཤིང་རྩ་བ་ ནས་བཅད་པ་བཞིན་དུ་རྐང་པ་གཉིས་ལ་གཏུགས་ཏེ་སྨྲས་པ། ཡོན་གནས་ཆེན་པོ་མར་སྤྱོན། མར་སྤྱོན། བདག་འདོད་པའི་འདམ་དུ་བྱིང་བ་ལག་ནས་དྲང་དུ་གསོལ། དེ་བབས་པ་དང་། དེས་དེའི་རྐང་པ་གཉིས་ལ་གཏུགས་ཏེ་སྨོན་ལམ་བཏབ་པ། བདག་གིས་ཡོན་གནས་ དམ་པ་འདི་ལྟ་བུ་ལ་གནོད་པ་བགྱིས་པའི་ལས་གང་ལགས་པ་དེའི་སྐལ་བ་ཅན་དུ་མ་གྱུར་ཅིག །བྱ་བ་བྱས་པའི་དགེ་བའི་རྩ་བ་གང་ཡིན་པ་འདིས་བདག་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་ཞིང་འདི་བས་ཁྱད་པར་དུ་འཕགས་པའི་སྟོན་པ་མཉེས་པར་བགྱིད་ཀྱི་མི་མཉེས་པར་མི་ བགྱིད་པ་དང་། འདི་ལྟ་བུའི་ཆོས་རྣམས་ཀྱང་ཐོབ་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས་དེའི་ཚེ་དེའི་དུས་ཀྱི་རྫ་མཁན་གང་ཡིན་པ་དེ་ནི་གཟུགས་ཅན་སྙིང་པོ་འདི་ཉིད་ཡིན་ཏེ། རང་སངས་རྒྱས་ལ་སེམས་རབ་ཏུ་གདུག་པས་ངག་རྩུབ་པོའི་ལས་ཕྱུང་བ་གང་ཡིན་པ་དེའི་ ལས་ཀྱི་རྣམ་པར་སྨིན་པས་སྤུ་གྲིས་རྐང་པ་གཉིས་དྲས་པ་དང་། ཕྱག་སྦལ་དུ་བཅུག་པ་དང་། སྐོམ་པ་དང་བཀྲེས་པས་ཤི་བ་ཡིན་ནོ། །དེས་བཟོད་པ་གསོལ་ནས་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ཕྱུག་པ་དང་རྒྱལ་པོའི་རིགས་སུ་སྐྱེས་ནས་ཀྱང་ངའི་སྤྱན་སྔ་ ནས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་ཐོབ་པར་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་ཏུ་དཀར་བ་རྣམས་ ཀྱི་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ།། །།

  1058. 219b

    འདུལ་བ་གཞི། བམ་པོ་བརྒྱ་རྩ་གཉིས་པ། བློན་པོ་རྣམས་ཀྱིས་མ་སྐྱེས་དགྲ་ལ་སྨྲས་པ། ལྷ་རྒྱལ་པོ་བགྲེས་པོ་ནི་ནོངས་སོ། །དེས་ཐོས་ནས་བརྒྱལ་ཏེ་ས་ལ་འགྱེལ་བ་དང་། ཆུས་གཏོར་ནས་དབུགས་སླར་བྱུང་ནས་མྱ་ངན་གྱི་ཁང་པར་ཞུགས་ཏེ་འདུག་གོ། །དེའི་མྱ་ངན་ བསལ་བར་སུས་ཀྱང་མི་ནུས་ནས་བློན་པོ་རྣམས་ཀྱིས་དེའི་མྱ་ངན་བསལ་བ་བརྩལ་བར་བརྩམས་པ་ལས། ཇི་ཙམ་ན་ལྷོ་ཕྱོགས་ནས་གར་མཁན་ཞིག་འོངས་ནས། བློན་པོ་རྣམས་ཀྱིས་དེ་དེའི་མདུན་དུ་གར་བྱེད་དུ་བཅུག་ཀྱང་མ་སྐྱེས་དགྲ་ཡིད་མི་བདེ་བ་ཉིད་པས་སུས་ཀྱང་དེ་ལ་ལེགས་ སོ་ཞེས་བྱ་བ་མ་བྱིན་ནས། གར་མཁན་ཕྱིར་བྱུང་བ་དང་བཅོམ་ལྡན་འདས་ཀྱང་ཕྱོགས་དེར་གཤེགས་སོ། །དེས་བཅོམ་ལྡན་འདས་མཐོང་ནས་དེས་བསམས་པ། སྐྱེས་བུ་དམ་པ་འདི་ལྟ་བུ་དག་ལ་བྱས་དང་དེས་བདག་ལ་ལེགས་སོ་ཞེས་བྱ་བ་བྱིན་པ་ཞིག་སྙམ་སྟེ། དེ་བཅོམ་ལྡན་ འདས་ལ་སེམས་མངོན་པར་དད་པས་རྫ་རྔ་ཆེན་པོ་བརྡུངས་སོ། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དག་བྱུང་ནས་ཁ་ཅིག་ནི་འོག་ཏུ་འགྲོ། ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་དོང་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་ དང་། ཆུ་བུར་ཅན་དང་། ཆུ་བུར་རྡོལ་བ་ཅན་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཅུ་ཟེར་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་སོང་སྟེ། སེམས་ཅན་དམྱལ་བ་ཚ་བ་གང་ཡིན་པ་དེ་དག་ནི་བསིལ་ བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ་འོན་

  1059. 220a

    ཏེ་གཞན་དུ་སྐྱེས་སྙམ་དུ་སེམས་སོ། །དེ་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ་གཞན་དུ་ སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་ བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་དུ་འདོང་བ་དེ་དག་ནི་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་ དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། མི་ ཆེ་བ་དང་། མི་གདུང་བ་དང་། གྱ་ནོམ་སྣང་བ་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོག་པར་བྱེད་ཅིང་། ཚིགས་སུ་བཅད་པ་གཉིས་པོ། བརྩམ་པར་བྱ་ ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་ བྱེད་པར་འགྱུར། །ཞེས་བྱ་བར་ཡང་སྒྲོགས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་རྗེས་བཞིན་དུ་འགྲོ་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་

  1060. 220b

    བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ ན་ནི་རྟིང་བར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་ པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་ སྤུར་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་ཏུ་སྣང་ བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་དབང་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་འཛུམ་མི་སྟོན། །

  1061. 221a

    བརྟན་པ་ཅི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །ཀུན་དགའ་བོ་ཁྱོད་ཀྱིས་གར་མཁན་ང་ལ་སེམས་མངོན་པར་དད་པར་བྱས་ནས་རྫ་རྔ་ཆེན་པོ་རྡུང་བར་བྱེད་པ་དེ་མཐོང་ངམ། བཙུན་པ་དེ་མཐོང་ལགས་སོ། །ཀུན་དགའ་བོ་གར་མཁན་ དེ་སེམས་བསྐྱེད་པ་དེས་རང་སངས་རྒྱས་རྔ་སྒྲ་ཞེས་བྱ་བར་འགྱུར་ཏེ། དེའི་སྦྱིན་པའི་ཆོས་ནི་འདི་ཡིན་ཏེ། ང་ལ་སེམས་དད་པར་བྱས་པ་གང་ཡིན་པའོ། །ལྷ་སྦྱིན་གྱིས་མ་སྐྱེས་དགྲ་ལ་སྨྲས་པ། ཁོ་བོས་ཁྱོད་རྒྱལ་སྲིད་ལ་བཞག་པ་ཡིན་གྱིས་ཁྱོད་ཀྱིས་ཀྱང་ཁོ་བོ་སངས་རྒྱས་ཉིད་དུ་སྐོས་ ཤིག །དེས་སྨྲས་པ། བཅོམ་ལྡན་འདས་ནི་སྐུ་གསེར་གྱི་ཁ་དོག་ཏུ་འདུག་ལ་རེ་ཞིག་དང་པོར་གསེར་གྱི་ཁ་དོག་ཉིད་མེད་དོ། །དེས་སྨྲས་པ། ཁོ་བོས་ཀྱང་གསེར་གྱི་ཁ་དོག་ཏུ་སྣང་བར་བསྒྱུར་རོ། །ཞེས་དེས་གསེར་མགར་བཀུག་ནས་སྨྲས་པ། ཁོ་བོའི་ལུས་གསེར་གྱིས་ གཡོགས་ཤིག །དེས་སྨྲས་པ། འཕགས་པ་གལ་ཏེ་ཚོར་བ་མནགས་ཕོང་ནའོ། །དེས་སྨྲས་པ། ཁྱོད་ཀྱིས་གཡོགས་ཤིག་དང་ཕོད་པར་བྱའོ། །དེས་ཙན་ཙུ་ཞེས་བྱ་བའི་འབྲུ་མར་གྱིས་ལུས་བྱུགས་ནས་གསེར་གྱི་གྱིམ་ཕག་གིས་ལུས་གཡོགས་པ་དང་དེ་སྡུག་བསྔལ་མི་བཟད་ པ་ཚབ་རྩུབ་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་ངོ་། །དགེ་སློང་རྣམས་ཀྱིས་ཀོ་ཀ་ལི་ཀ་ལ་དྲིས་པ། ལྷ་སྦྱིན་གང་ན། དེས་སྨྲས་པ། ཕྱོགས་ཆེ་གེ་མོ་ཞིག་ན་གསེར་གྱི་ཁ་དོག་ཏུ་སྣང་བར་སྒྱུར་རོ། །དགེ་སློང་རྣམས་ཕྱོགས་དེར་སོང་བ་དང་། དེ་རྣམས་ཀྱིས་དེ་སྡུག་ བསྔལ་གྱི་ཚོར་བས་ཉེན་ཏེ། ཀུ་ཅོ་འདོན་པ་ཐོས་ནས་དེ་རྣམས་བཅོམ་ལྡན་འདས་ཀྱི་སྤྱན་སྔར་དོང་ངོ་། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གསེར་གྱི་ཁ་དོག་དོན་དུ་གཉེར་བས་སྡུག་ བསྔལ་མི་བཟད་པ་ཚ་བ་རྩུབ་པ་ཡིད་དུ་མི་མཆི་བའི་ཚོར་བ་ཉམས་སུ་མྱོང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདི་འདས་པའི་དུས་ན་ཡང་གསེར་གྱི་ཞྭ་དོན་དུ་གཉེར་བའི་ཕྱིར་ཚུལ་མ་ཡིན་པས་

  1062. 221b

    སྡུག་བསྔལ་བར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་ཁྱོ་ལམ་རིང་པོར་སོང་བའི་བུད་མེད་ཅིག་ཡོད་པ་དེའི་མདུན་དུ་བྱ་རོག་ཅིག་སྐད་སྙན་པ་སྙན་པར་འབྱིན་ནས་དེས་སྨྲས་པ། བྱ་རོག་སོང་ཤིག་བྱ་རོག་སོང་ཤིག་གལ་ཏེ་བདག་གི་ཁྱིམ་ཐབ་ བདེ་བར་འཁོར་ན་ཁྱོད་ལ་གསེར་གྱི་ཞྭ་ཞིག་སྦྱིན་ནོ། །ཅི་ཙམ་ན་དེའི་ཁྱིམ་ཐབ་དེ་ཡང་བདེ་བར་སླར་འོངས་སོ། །བྱ་རོག་དེ་གསེར་གྱི་ཞྭའི་ཆེད་དུ་དེའི་མདུན་དུ་འདུག་ནས་སྐད་སྙན་པ་སྙན་པར་ཕྱུང་བ་དང་དེ་ནས་དེས་དེ་ལ་གསེར་གྱི་ཞྭ་ཞིག་བྱིན་ནོ། །དེས་དེ་གྱོན་ནས་ཕན་ཚུན་དུ་ལྡིང་བ་ དང་། དེ་གསེར་གྱི་ཞྭའི་ཕྱིར་བྱ་ཁྲས་མགོ་བཅད་དོ། །ལྷས་ཚིགས་སུ་བཅད་དེ་སྨྲས་པ། དོན་མེད་གཞི་དང་ལྡན་པ་ཡི། །ནོར་ནི་ཕུང་བར་འགྱུར་བ་སྟེ། །གང་གི་མགོ་ལ་གསེར་ཡོད་པའི། །བྱ་རོག་གིས་ནི་ཕུང་བྱེད་བཙལ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྱ་རོག་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་གསེར་གྱི་རྒྱུས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདི་གསེར་གྱི་ཁ་དོག་དོན་དུ་གཉེར་བའི་ཕྱིར་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་ འོང་བའི་ཚོར་བ་ཉམས་སུ་མྱོང་བར་གྱུར་ཏོ། །གཞན་ཡང་ལྷ་སྦྱིན་གྱིས་མ་སྐྱེས་དགྲ་ལ་སྨྲས་པ། ཁོ་བོས་ནི་ཁྱོད་རྒྱལ་སྲིད་ལ་བཞག་གིས་ཁྱོད་ཀྱིས་ཀྱང་ཁོ་བོ་སངས་རྒྱས་ཉིད་དུ་ཆུག་ཤིག །དེས་སྨྲས་པ། བཅོམ་ལྡན་འདས་ཀྱི་ཞབས་ཀྱི་མཐིལ་ལ་ནི་འཁོར་ལོའི་མཚན་གྱིས་ མཚན་པའི་རྟགས་ཡོད་ན། ཁྱོད་ཀྱི་རྐང་པའི་མཐིལ་ལ་ནི་འཁོར་ལོའི་མཚན་གྱིས་མཚན་པའི་རྟགས་མེད་དོ། །དེས་སྨྲས་པ། ཁོ་བོས་ཀྱང་རྐང་པའི་མཐིལ་ལ་ནི་འཁོར་ལོའི་རྟགས་བསྒྲུབ་པར་བྱའོ་ཞེས་དེས་ལྕགས་མགར་རྣམས་བཀུག་ནས་སྨྲས་པ། ཁོ་བོའི་རྐང་མཐིལ་ལ་ འཁོར་ལོ་འདྲི་ནུས་སམ། དེ་རྣམས་ཀྱིས་སྨྲས་པ། འཕགས་པ་གལ་ཏེ་ཚོར་བ་མནགས་ཕོད་ནའོ། །དེས་སྨྲས་པ། ཕོད་ཀྱིས་གྱིས་ཤིག །དེ་རྣམས་ཀྱིས་བསམས་པ། འདི་མཐུ་དང་ལྡན་པ་ཡིན་པས་གལ་ཏེ་འདི་བཞིན་དུ་བྲིས་ན་རྡོག་པས་བདག་ཅག་སྲོག་དང་ཕྲལ་བར་

  1063. 222a

    འགྱུར་བའི་གནས་གང་ཡིན་པ་འདི་ཡོད་དོ་སྙམ་ནས། དེ་རྣམས་ཀྱིས་རྩིག་པ་འབིགས་སུ་བཅུག་ནས་སྨྲས་པ། འཕགས་པ་རྩིག་པའི་བུ་ག་འདིར་རྐང་པ་གཉིས་ཆུག་ཤིག །དེས་རྩིག་པའི་བུ་གར་རྐང་པ་གཉིས་བཅུག་པ་དང་ལྕགས་མགར་རྣམས་ཀྱིས་འཁོར་ ལོ་མེའི་ཁ་དོག་ཏུ་འདུག་པར་བྱས་ནས་རྐང་པ་བསྲེགས་པ་དང་། དེ་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་བར་གྱུར་ཏོ། །དགེ་སློང་རྣམས་ཀྱིས་ཀོ་ཀ་ལི་ཀ་ལ་དྲིས་པ། ལྷ་སྦྱིན་གང་ན། ཕྱོགས་ག་གེ་མོ་ཞིག་ན་རྐང་པའི་མཐིལ་ལ་འཁོར་ལོའི་ རྟགས་སྒྲུབ་བོ། །དགེ་སློང་རྣམས་ཕྱོགས་དེར་སོང་བ་དང་དེ་རྣམས་ཀྱིས་དེ་སྡུག་བསྔལ་གྱི་ཚོར་བས་ཉེན་ཅིང་ཀུ་ཅོ་འདོན་པ་ཡང་ཐོས་ནས་དེ་རྣམས་བཅོམ་ལྡན་འདས་ཀྱི་སྤྱན་སྔར་དོང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ། སངས་རྒྱས་བཅོམ་ ལྡན་འདས་ལ་ཞུས་པ། བཙུན་པ་ལྷ་སྦྱིན་རྐང་པའི་མཐིལ་ལ་འཁོར་ལོའི་རྟགས་དོན་དུ་གཉེར་བས་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་མཆི་བའི་ཚོར་བ་ཉམས་སུ་མྱོང་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་ འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདི་རྐང་རྗེས་ཀྱི་ཕྱིར་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་གངས་ཅན་ལ་གླང་པོ་ཆེ་ཞིག་ཡོད་པ་ཆུ་འཐུང་དུ་འབབས་པས་དེའི་ཕྱི་བཞིན་ཝ་ཞིག་ཀྱང་བབས་པ་དང་། དེས་གླང་པོ་ཆེའི་ རྗེས་མཐོང་ནས་བདག་ཉིད་ཀྱི་གོམ་པས་གཞལ་བར་བརྩམས་ཏེ་དེས་བསམས་པ། རྗེས་འདི་ནི་བདག་གི་ཡིན་ནོ་ཞེས་དེ་མཆོང་ཞིང་མཆོང་ཞིང་རྗེས་ཀྱི་སྟེང་དུ་རྐང་པ་འཇོག་པ་ན་སྡོམ་དུམ་ཁྱེའུ་ག་ཞིག་གི་སྟེང་དུ་རྡེག་འཆོས་པར་གྱུར་ཏོ། །ལྷས་ཚིགས་སུ་བཅད་དེ་སྨྲས་པ། མདོར་ན་ གླང་ཆེན་རྐང་རྗེས་དང་། །བླུན་པོ་ཁྱོད་རྗེས་མི་འདྲ་ཡི། །དོན་མེད་བློ་འདི་སློངས་བྱོས་ཤིག །ངལ་བ་ཐོབ་པར་གྱུར་ཏ་རེ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་རྐང་རྗེས་ཀྱི་ཕྱིར་ཚུལ་མ་ཡིན་པས་

  1064. 222b

    སྡུག་བསྔལ་བར་གྱུར་ཏོ། །ད་ལྟར་ཡང་འདི་རྐང་པའི་མཐིལ་ལ་འཁོར་ལོའི་རྟགས་དོན་དུ་གཉེར་བའི་ཕྱིར་སྡུག་བསྔལ་མི་བཟད་པ་ཚ་བ་རྩུབ་པ་ཡིད་དུ་མི་འོང་བའི་ཚོར་བ་ཉམས་སུ་མྱོང་བར་གྱུར་ཏོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་གནོད་སྦྱིན་ ཀུམ་བི་རའི་གནས་ན་བཞུགས་སོ། །ལྷ་སྦྱིན་གྱིས་ཡང་མ་སྐྱེས་དགྲ་ལ་སྨྲས་པ། ཁོ་བོས་ཁྱོད་ནི་རྒྱལ་སྲིད་ལ་བཞག་ན་ཁྱོད་ཀྱིས་ཁོ་བོ་སངས་རྒྱས་སུ་གཞུག་མ་ནུས་ཀྱིས། ད་ནི་ཁོ་བོས་དགེ་སྦྱོང་གཽ་ཏ་མ་སྲོག་དང་དབྲལ་གྱིས་ཁྱོད་ཀྱིས་སུས་བསད་དམ། གང་དུ་ བསད་པ་མ་སྨྲ་ཤིག །དེས་སྨྲས་པ། དེ་བཞིན་དུ་གྱིས་ཤིག །ཇི་ཙམ་ན་ལྷོ་ཕྱོགས་ནས་འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་ཞིག་འོངས་ནས་ལྷ་སྦྱིན་གྱིས་དེ་བཀུག་ནས་སྨྲས་པ། ཀྱེ་སློབ་དཔོན་ཁྱོད་ཀྱིས་མི་ལྔ་བརྒྱས་འཕེན་པ་དེ་ལྟ་བུའི་སྒྱོགས་ནུས་སམ། དེས་ སྨྲས་པ། འཕགས་པ་ནུས་སོ། །དེས་དེ་ལ་མུ་ཏིག་གི་དོ་ཤལ་བརྒྱ་སྟོང་རི་བ་བྱིན་ཞིང་མི་སྟོང་གི་གླ་ཡང་བྱིན་ནས་སྨྲས་པ། གནས་གང་ན་བཅོམ་ལྡན་འདས་བཞུགས་པ་དེའི་དྲང་ཐད་ཀྱི་བྱ་རྒོད་ཀྱི་ཕུང་པོའི་རིའི་སྟེང་དེར་སྒྱོགས་ཆོས་ཤིག །སྒྱོགས་འཕེན་པའི་མི་ལྔ་བརྒྱ་པོ་དེ་དག་ ཀྱང་འཁོད་དུ་བཅུག་གོ། །གནས་གཞན་ཞིག་ཏུ་ཉིས་བརྒྱ་ལྔ་བཅུ་འཁོད་དུ་བཅུག་ནས་བསྒོ་བ། ཁྱེད་ཅག་གལ་ཏེ་དགེ་སྦྱོང་གཽ་ཏ་མ་སྒྱོགས་ཀྱིས་མ་སོད་ན་ཁྱེད་ཀྱིས་སོད་ཅིག་དེའི་དོན་དུ་གནས་གཞན་དང་གཞན་དུ་ཡང་མི་རྣམས་འཁོད་དུ་བཅུག་ནས་ཐམས་ཅད་ལ་བསྒོ་བ། ཁྱེད་ཅག་ གང་གི་གོར་དགེ་སྦྱོང་གཽ་ཏ་མ་འོངས་དང་དེ་དག་གིས་སོད་ཅིག །བདག་ཉིད་ཀྱང་ཕྱོགས་གཞན་ཞིག་ཏུ་འདུག་ནས་འདི་རྣམས་ཀྱིས་ཤོར་དང་བདག་གིས་བསད་དོ་སྙམ་མོ། །ཇི་ཙམ་ན་མི་ལྔ་བརྒྱས་སྒྱོགས་འཕང་བར་བརྩམས་ཏེ་སྨྲས་པ། སུའི་ཕྱིར་སྒྱོགས་འཕང་། ཇི་ཙམ་ན་སངས་རྒྱས་ བཅོམ་ལྡན་འདས་ཤོད་ན་བཞུགས་པ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་བདག་ཅག་རང་གི་སྲོག་བཏང་བ་ནི་བླའི་ལྷ་དང་མིས་མཆོད་པའི་སངས་རྒྱས་བཅོམ་ལྡན་འདས་བགྲོངས་པ་ནི་དེ་ལྟ་མ་ཡིན་གྱིས་སྒྱོགས་བོར་རོ་ཞེས་དེ་རྣམས་ཀྱིས་སྒྱོགས་བོར་ནས་བྱ་རྒོད་ཀྱི་ཕུང་པོའི་རི་ལ་

  1065. 223a

    ཕན་ཚུན་དུ་རྒྱུ་ཞིང་གནས་གང་ཞིག་ནས་བབས་ན་ལྷ་སྦྱིན་གྱིས་མི་མཐོང་བར་འགྱུར་སྙམ་མོ། །དེ་རྣམས་ཀྱིས་བསམ་པ། བཅོམ་ལྡན་འདས་ཀྱིས་ཐུགས་སུ་ཆུད་ནས་ཐེམ་སྐས་ཤིག་སྤྲུལ་པ་དང་། དེ་རྣམས་ཀྱིས་ཐེམ་སྐས་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་ཐེམ་སྐས་འདི་སུས་བཙུགས་སྙམ་ན་དེ་ནི་བཅོམ་ལྡན་འདས་ཀྱི་མཐུས་ཡིན་ནོ་སྙམ་ནས། དེ་རྣམས་ཀྱི་ལྷག་པར་ཡང་བཅོམ་ལྡན་འདས་ལ་སེམས་མངོན་པར་དད་པར་གྱུར་ཏེ་ཐེམ་སྐས་དེ་ལས་བབས་ནས་བཅོམ་ལྡན་འདས་གང་ན་བ་དེར་དོང་ངོ་། །བཅོམ་ལྡན་འདས་ཀྱང་ དེ་དག་གདུལ་བ་ཁོ་ན་ལ་ལྟོས་ནས་བྱ་རྒོད་ཕུང་པོའི་རི་ལ་འཆག་ཅིང་བཞུགས་སོ། །དེ་ནས་དེ་རྣམས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཆོས་མཉན་པའི་ཕྱིར་སྤྱན་སྔ་ན་འདུག་གོ། །བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་ དང་། ཁམས་དང་། རང་བཞིན་མཁྱེན་ནས་གང་ཐོས་པས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆས་བཤད་པ་མཛད་པས། དེ་རྣམས་ཀྱིས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་ བུ་མངོན་སུམ་དུ་བྱས་ཏེ་བདེན་པ་མཐོང་བ་དང་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ཅག་ལ་ཕས་མ་བགྱིས། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེ་རྣམས་ཀྱིས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ཅག་ལ་མཛད་དེ། དམྱལ་བ་དང་། དུད་འགྲོ་དང་། ཡི་དགས་རྣམས་ནས་ནི་རྐང་པ་དྲངས། ལྷ་དང་མི་རྣམས་སུ་ ནི་རབ་ཏུ་བཞག །འཁོར་བའི་ནི་མཐར་བགྱིས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་རྣམས་ནི་བསྐུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་

  1066. 223b

    རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ལྡན་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ཅག་ནི་འཕགས་སོ། །མངོན་པར་འཕགས་སོ། །བདག་ཅག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བཅོམ་ ལྡན་འདས་ཀྱིས་བདག་ཅག་དགེ་བསྙེན་དུ་གཟུང་དུ་གསོལ། དེང་སླན་ཆད་དུ་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ་ཞེས་གསོལ་ནས། བཅོམ་ལྡན་འདས་ཀྱི་སྤྱན་སྔ་ནས་བསླབ་པའི་གཞི་ལྔ་རྣམས་བླང་བར་བརྩམས་སོ། །འཁྲུལ་འཁོར་ གྱི་སྒྱུ་རྩལ་གྱི་སློབ་དཔོན་ཡང་འདི་ནི་སངས་རྒྱས་བཅོམ་ལྡན་འདས་བགྲོངས་པར་བྱེད་པ་ཡིན་ནོ་སྙམ་དུ་བསམས་ནས། དེ་རྣམས་ཀྱི་ཕྱི་བཞིན་ཐེམ་སྐས་ལ་བབས་ནས་མུ་ཏིག་གི་དོ་ཤལ་བརྒྱ་སྟོང་རི་བ་ཁྱེར་ཏེ་བྲོས་སོ། །ལྷ་སྦྱིན་ནི་རྡོ་བ་འཕེན་པར་དགའ་བས་ཡང་དང་ཡང་དུ་ལྟ་བ་ན་མ་ འཕངས་སོ་སྙམ་སྟེ། རང་ཉིད་ཀྱིས་མི་ལྔ་བརྒྱ་པོ་གཞན་ཁྲིད་དེ་བྱ་རྒོད་ཀྱི་བུང་པོའི་རི་ལ་འཛེག་པར་བརྩམས་པ་ན། མི་ལྔ་བརྒྱ་པོ་དེ་དག་བཅོམ་ལྡན་འདས་ཀྱི་སྤྱན་སྔ་ན་ཆོས་ཉན་པ་མཐོང་ངོ་། །མཐོང་ནས་ཀྱང་ལྷག་པར་ཡང་མི་བཟོད་པ་སྐྱེས་ཏེ་ཕྱོགས་གཞན་ཞིག་ནས་བྱ་རྒོད་ཀྱི་ཕུང་ པོའི་རི་ལ་འཛེགས་པ་དང་། ཇི་ཙམ་ན་འཁྲུལ་འཁོར་གྱི་སློབ་དཔོན་ཡང་བྲོས་པར་མཐོང་ནས། དེ་རང་ཉིད་ཀྱིས་འཁོར་ལྔ་བརྒྱ་དང་སྒྱོགས་འཕང་བར་བརྩམས་སོ། །བཅོམ་ལྡན་འདས་ཀྱིས་དགོངས་པ། ང་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་ བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས། ང་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར་སྙམ་དུ་དགོངས་ནས་མི་ལྔ་བརྒྱ་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །ཤེས་ལྡན་དག་ ལྷ་སྦྱིན་ཀུན་ནས་དཀྲིས་པ་དྲག་པོ་ལ་གནས་ནས་བྱ་རྒོད་ཀྱི་ཕུང་པོའི་རི་ལ་འཛེག་གིས་དེང་ཤིག །འདི་དག་ནི་ངའི་ལས་ཡིན་ནོ། །དེ་ནས་མི་ལྔ་བརྒྱ་པོ་དེ་དག་བྲོས་སོ། །ལྷ་རྣམས་ཀྱི་ཤེས་པ་མཐོང་བ་ནི་འོག་ཏུ་འཇུག་པ་ཡིན་པས་དེ་ནས་གནོད་སྦྱིན་ལག་ན་རྡོ་རྗེས་འདི་སྙམ་དུ་

  1067. 224a

    སེམས་ཏེ། ལྷ་སྦྱིན་ནི་བཅོམ་ལྡན་འདས་བགྲོངས་པའི་ཕྱིར་ཕ་རོལ་གནོན་པ་བྱེད་དོ་སྙམ་དུ་བསམས་ནས། གནོད་སྦྱིན་ཀུམ་བིར་གང་ན་བ་དེར་སོང་སྟེ་ཕྱིན་པ་དང་། གནོད་སྦྱིན་ཀུམ་བི་ར་ལ་འདི་སྐད་ཅེས་སྨྲས་སོ། །ལྷ་སྦྱིན་ནི་བྱ་རྒོད་ཀྱི་ཕུང་པོའི་རི་ལ་སྒྱོགས་ ཀྱིས་བཅོམ་ལྡན་འདས་ལ་རྡོ་བ་འཕེན་པར་རྩོམ་ལ། བཅོམ་ལྡན་འདས་ནི་ཁྱོད་ཀྱི་གནས་ན་བཞུགས་ན། དེ་ལ་ཁོ་བོས་འབད་དེ་རྡོ་བ་བར་སྣང་ལ་རྡོ་རྗེས་ཕྱེ་མར་བརླག་ན་གལ་ཏེ་ཕྱེ་མར་བརླགས་པའི་དུམ་བུས་བཅོམ་ལྡན་འདས་ཀྱི་སྟེང་དུ་འབབ་པར་འགྱུར་གྱིས། ཁྱོད་ཀྱིས་ གྲོགས་གྱིས་ཤིག །དེས་སྨྲས་པ། བདག་བཀའ་བཞིན་འཚལ་བཅོམ་ལྡན་འདས་ཀྱིས་ནི་བླ་གབ་མེད་པ་ན་བཞུགས་བཞུགས་ནས་རིའི་ཕུག་ཏུ་གཤེགས་སོ། །ལྷ་སྦྱིན་འཁོར་ལྔ་བརྒྱ་པོས་སྒྱོགས་དྲངས་ཏེ་བཅོམ་ལྡན་འདས་ལ་རྡོ་བ་འཕངས་སོ། །གནོད་སྦྱིན་ལག་ན་རྡོ་རྗེའི་ རྡོ་རྗེས་ཕྱེ་མར་བྱས་པ་ལས་དེའི་ཕྱེད་བཅོམ་ལྡན་འདས་ཀྱི་གནས་སུ་ལྷུང་ངུ་ཆ་བ་གནོད་སྦྱིན་ཀུམ་བི་རས་ལེགས་པར་མ་ཟིན་པ་དེས་བསད་ནས་རྡོ་བའི་དུམ་བུ་ཡར་བ་ཞིག་གིས་བཅོམ་ལྡན་འདས་ཀྱི་ཞབས་ལ་རྨ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་ སྩལ་པ། གང་དུ་གནས་ན་ལས་ཀྱིས་མི་རྫི་བའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ཉིད་མིན་རྒྱ་མཚོའི་ནང་མིན་ཞིང་། །རི་བོའི་ཕུག་ཏུ་ཞུགས་པའང་མ་ཡིན་ནོ། །གནོད་སྦྱིན་ཀུམ་བི་ར་ཡང་དགེ་བའི་སེམས་ཀྱིས་ཤི་སྟེ་ཤི་ནས་སུམ་བཅུ་རྩ་གསུམ་པའི་ལྷ་གྱ་ནོམ་པ་ རྣམས་ཀྱི་ནང་དུ་སྐྱེས་སོ། །ཆོས་ཉིད་ཀྱིས་ལྷའི་བུའམ་ལྷའི་བུ་མོ་ནི་སྐྱེས་ནས་རིང་པོ་མ་ལོན་པར་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །དེས་གནོད་སྦྱིན་ལས་ཤི་འཕོས་པ་དང་། སུམ་བཅུ་རྩ་གསུམ་ པའི་ལྷ་གྱ་ནོམ་པ་རྣམས་ཀྱི་ནང་དུ་སྐྱེས་པ་དང་། བཅོམ་ལྡན་འདས་ལ་སེམས་མངོན་པར་དད་པར་བྱས་པ་ཡིན་པར་མཐོང་སྟེ། དེ་ནས་སྔོན་གནོད་སྦྱིན་བྱེད་བྱེད་པའི་ལྷའི་བུ་འདི་སྙམ་དུ་སེམས་ཏེ། ཞག་ལོན་ནས་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་གི་ཆ་མ་ཡིན་གྱིས།

  1068. 224b

    མ་ལ་བདག་གིས་ཞག་མ་ལོན་པར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་འགྲོའོ་སྙམ་ནས། དེ་ནས་སྔོན་གནོད་སྦྱིན་བྱེད་བྱེད་པའི་ལྷའི་བུ་རྣ་ཆ་གདུབ་ཀོར་དྲི་མ་མེད་ཅིང་གཡོ་བ་ཐོགས་པ། དོ་ཤལ་དང་སེ་མོ་དོས་ལུས་བརྒྱན་ནས་དེ་ཉིད་ཀྱི་མཚན་མོ་ལྷ་རྣམས་ཀྱི་མེ་ ཏོག་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་རྣམས་ཀྱིས་ཐུ་བ་བཀང་སྟེ། བྱ་རྒོད་ཀྱི་ཕུང་པོའི་རི་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ནས། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ ཕྱིར་འདུག་གོ། །བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་པས་འཕགས་པའི་བདེན་པ་བཞི་སོ་སོར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས་སྔོན་གནོད་སྦྱིན་བྱེད་བྱེད་པའི་ལྷའི་བུ་འཇིག་ ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ལ་ཕས་མ་ལགས། མས་མ་ལགས། རྒྱལ་པོས་མ་ལགས། ལྷ་ རྣམས་ཀྱིས་མ་ལགས། སྡུག་པས་མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། སྔོན་གྱི་འདས་པ་རྣམས་ཀྱིས་མ་ལགས། དགེ་སྦྱོང་དང་བྲམ་ཟེས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་ བསྐམས། རུས་པའི་རི་བོ་ལས་ནི་བསྒྲལ། ངན་སོང་རྣམས་ཀྱི་སྒོ་ནི་བཀུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། ལྷ་དང་མི་རྣམས་སུ་ནི་བདག་རབ་ཏུ་བཞག་གོ། །ཡང་གསོལ་པ། ཁྱོད་མཐུས་ཉེས་པ་མང་ལྡན་མི་བཟད་པའི། །ངན་སོང་ལམ་བཀག་བསོད་ནམས་མང་ པོ་ཡི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ལམ་ཡང་ཐོབ་པར་གྱུར། །ཁྱོད་ལ་བརྟེན་ནས་ཤིན་ཏུ་རྣམ་དག་མིག །ཉེས་བྲལ་དག་པ་དེ་རིང་བདག་གིས་ཐོབ། །གོ་འཕང་ཞི་བ་འཕགས་པ་རྗེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་ལགས་

  1069. 225a

    སོ། །འགྲོ་བར་ལྷ་མིན་ལྷ་དང་མིས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀའ་བ། །ཐུབ་པ་དེང་ཁྱོད་མཐོང་བའི་འབྲས་བུ་མཆིས། །དེ་ནས་དོ་ཤལ་རབ་འཕྱང་དག་འགྱུར་པ། །ཞབས་གཉིས་ལ་ནི་མངོན་པར་ཕྱག་ འཚལ་ནས། །དགྲ་ཐུབ་པ་ལ་གཡས་ནས་བསྐོར་བྱས་ནས། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་གནོད་སྦྱིན་བྱེད་བྱེད་པའི་ལྷའི་བུ་ཚོང་བ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཐོག་ལེགས་པ་ལྟ་བུ་དང་། དཔའ་བོ་གཡུལ་ངོ་རྒྱལ་བ་ལྟ་བུ་དང་། ནད་པ་ ནད་ཐམས་ཅད་ལས་ཡོངས་སུ་ཐར་བ་ལྟ་བུར་འབྱོར་བ་གང་གིས་བཅོམ་ལྡན་འདས་ཀྱི་སྤྱན་སྔར་སོང་བའི་འབྱོར་བ་དེ་ཉིད་ཀྱིས་རང་གི་གནས་སུ་སོང་ངོ་། །དགེ་སློང་རྣམས་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་པས་གནས་པ་ན། དེ་རྣམས་ཀྱིས་བཅོམ་ལྡན་འདས་ཀྱི་ སྤྱན་སྔ་ན་སྣང་བ་རྒྱ་ཆེན་པོ་དེ་མཐོང་ངོ་། །མཐོང་ནས་ཐེ་ཚོམ་སྐྱེས་ཏེ་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་བཅོམ་ལྡན་འདས་ལ་བལྟ་བའི་སླད་དུ་མི་མཇེད་ཀྱི་བདག་པོ་ཚངས་པའམ། ལྷ་རྣམས་ཀྱི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་མཆིས་ ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ངལ་བལྟ་བའི་ཕྱིར་འོངས་པ་ནི་མི་མཇེད་ཀྱི་བདག་པོ་ཚངས་པ་ཡང་མ་ཡིན། ལྷ་རྣམས་ཀྱི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་སྐྱོང་བ་བཞི་ཡང་མ་ཡིན་ཏེ། དེ་ལྟ་མོད་ཀྱི་ལྷ་སྦྱིན་ང་བསད་པའི་ཕྱིར་འབད་ པས་བྱ་རྒོད་ཀྱི་ཕུང་པོའི་རི་ལས་སྒྱོགས་ཀྱི་རྡོ་འཕངས་པ་གང་ཡིན་པ་དེ་བར་སྣང་ཉིད་ལ་གནོད་སྦྱིན་ལག་ན་རྡོ་རྗེས་ཕྱེ་མར་བྱས་པ་དེའི་ཕྱེད་ངའི་སྟེང་དུ་ལྷུང་བ་གནོད་སྦྱིན་ཀུམ་བི་རས་གཟུང་ཉེས་པས་དེ་དེས་བསད་དོ། །ང་ལ་སེམས་མངོན་པར་དད་པར་བྱས་ནས་ཤི་བས་སུམ་བཅུ་རྩ་གསུམ་པའི་ལྷ་གྱ་ ནོམ་པ་རྣམས་ཀྱི་ནང་དུ་སྐྱེས་པ་ཡིན་ཏེ། དེ་མདང་སུམ་ངའི་སྤྱན་སྔར་འོངས་ནས་ངས་དེ་ལ་ཆོས་བཤད་དེ་བདེན་པ་མཐོང་བར་བྱས་ནས་རང་གི་གནས་སུ་སོང་བ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། གཅིག་

  1070. 225b

    ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་ནི་འདྲེན་མ་ཡིན་པས། དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་ནི་སྤངས་ལ། ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་ པར་བྱའོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ་བཙུན་པ་གནོད་སྦྱིན་ཀུམ་བི་རས་བཅོམ་ལྡན་འདས་ཀྱི་སླད་དུ་བདག་ཉིད་ཡོངས་སུ་བཏང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ དག་ད་ལྟར་གྱི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ངའི་ཕྱིར་བདག་ཉིད་ཡོངས་སུ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་ མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེའི་ཚེ་གྲོང་ཁྱེར་བཱ་རཱ་ཎ་སཱི་དང་ཧ་ཅང་ཡང་མི་རིང་བ་ཞིག་ན་ཡོད་པའི་བསྟི་གནས་རྩ་བ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་དང་། བྱ་སྣ་ཚོགས་སྐད་འབྱིན་པ་ཞིག་ན་དྲང་སྲོང་དཀའ་ཐུབ་དྲག་པོ་སྤྱོད་པ་ཆུ་ དང་རྩ་བ་དང་འབྲས་བུ་ལ་ལོངས་སྤྱོད་པ། པགས་པ་དང་ཤིང་ཤུན་གྱོན་པ་ཞིག་གནས་སོ། །དེའི་བསྟི་གནས་ཀྱི་ཉེ་འཁོར་ན་རྔོན་པ་ཞིག་རི་དགས་བསད་ཅིང་འཚོ་བར་བྱེད་དེ། དེ་དུས་དུས་སུ་དྲང་སྲོང་དེའི་གན་དུ་འོང་ངོ་། །དྲང་སྲོང་དེས་ཀྱང་དེ་ལ་ཅི་ནས་ཀྱང་རྔོན་པ་འདིས་བདག་གི་ཉེ་ འཁོར་ན་གནས་པའི་རི་དགས་རྣམས་གསོད་པར་མི་འགྱུར་བར་བྱ་བའི་ཕྱིར་དེ་ལ་ངལ་སོས་ནས་རྩ་བ་དང་འབྲས་བུས་སྟོབས་པར་བྱེད་པས། དེ་གཉིས་གཅིག་ལ་གཅིག་ཕ་དང་བུའི་འདུ་ཤེས་སྐྱེས་པར་གྱུར་ཏེ་རྔོན་པས་ནི་དྲང་སྲོང་ལ་ཕ་ཞེས་ཚིག་ཏུ་འབོད་དོ། །དྲང་སྲོང་གིས་ཀྱང་རྔོན་པ་ལ་ བུ་ཞེས་འབོད་དོ། །ཇི་ཙམ་དུས་གཞན་ཞིག་ན་རྒྱལ་པོ་ཚངས་སྦྱིན་ནང་པར་སྔར་ལངས་ཏེ་རི་དགས་ཤོར་དུ་ཕྱིར་བྱུང་བ་དེས་རི་དགས་ཤིག་ལ་མདས་ཤི་གསོར་དུ་བསྣུན་པ་དང་དྲང་སྲོང་དེའི་བསྟི་གནས་སུ་ཞུགས་སོ། །དེར་ཡང་རྒྱལ་པོས་ལྕགས་མདས་གནད་དུ་བསྣུན་པས་ཤི་བར་གྱུར་ཏོ། །

  1071. 226a

    དེ་ནས་དྲང་སྲོང་དེ་ཁྲོ་བའི་ཀུན་ནས་དཀྲིས་པས་སྨྲས་པ། རྒྱལ་པོ་ཁྱོད་ནི་ཕུང་ཀྲོལ་སྤྱོད་པ་ངན་པ་ཞིག་སྟེ། དེས་ན་རི་དགས་ང་ལ་སྐྱབས་སུ་འོངས་པ་བསད་དོ་ཞེས་དེ་སྐད་ཅེས་སྨྲས་པ་དང་། རྒྱལ་པོ་དེ་ཞེ་སྡང་གི་ཀུན་ནས་དཀྲིས་པ་ལ་ཞེན་པའི་བློས་བློན་པོ་རྣམས་ ལ་སྨྲས་པ། ཤེས་ལྡན་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་ཁ་ཚས་ཟེར་བ་གང་ཡིན་པ་དེ་ལ་ཆད་པ་ཅི་བཅད་བློན་པོ་རྣམས་ཀྱིས་སྨྲས་པ། ལྷ་ཆད་པས་དགུམ་ལགས་མོད། རྒྱལ་པོས་སྨྲས་པ། གལ་ཏེ་དེ་ལྟ་ན་དྲང་སྲོང་འདི་ངས་ཡོངས་སུ་སྤངས་སོ། ། བློན་པོ་རྣམས་ཀྱིས་དྲང་སྲོང་གསད་པར་བརྩམས་པ་ན་སྟེས་དབང་གིས་རྔོན་པ་དེ་ཡང་དྲང་སྲོང་དེའི་ཉེན་འཁོར་ན་འདུག་ནས་དེས་བསམས་པ། བདག་གསོན་བཞིན་དུ་དྲང་སྲོང་ཅིའི་ཕྱིར་གསོད་དུ་གཞུག་སྙམ་ནས། དེས་གཡུལ་འགྱེད་པར་བརྩམས་པ་ན་དྲང་སྲོང་བྲོས་ནས། དཔུང་ ཆེན་པོའི་ཚོགས་ཀྱིས་དེ་བསད་དོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རྔོན་པ་གང་ཡིན་པ་དེ་ནི་གནོད་སྦྱིན་ཀུམ་བི་ར་འདི་ཉིད་ཡིན་ཏེ། དེ་ན་ཡང་འདིས་ ངའི་ཕྱིར་བདག་ཉིད་ཡོངས་སུ་བཏང་ངོ་། །ད་ལྟར་ཡང་འདིས་ངའི་ཕྱིར་བདག་ཉིད་ཡོངས་སུ་བཏང་ངོ་། །བཅོམ་ལྡན་འདས་ཀྱི་ཞབས་ལ་རྡོ་བའི་དུམ་བུས་རྨ་བྱུང་བ་ཁྲག་འཆད་དུ་མ་བཏུབ་ནས་དེ་བཞིན་དུ་འཛག་གོ། །སྨན་པའི་རྒྱལ་པོ་འཚོ་བྱེད་བཅོམ་ལྡན་འདས་ཀྱི་སྙུན་ བརྟག་པའི་ཕྱིར་དུས་གསུམ་དུ་སྤྱན་སྔར་འགྲོའོ། །རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་དད་པ་ཅན་དང་། ཡུལ་སྣ་ཚོགས་ནས་ལྷགས་པའི་ཡང་དག་པའི་ལྟ་བ་དང་ལྡན་པ་ནོར་ཅན་དང་། ཚོང་དཔོན་དང་། དེད་དཔོན་རྣམས་ཀྱང་འོངས་ཏེ། དེ་ན་ཁ་ཅིག་ གིས་སྨྲས་པ། འཚོ་བྱེད་སྨན་འདི་ནི་དེ་ལ་བཟང་ངོ་། །གཞན་དག་གིས་སྨྲས་པ། འདི་ནི་དེ་བས་ཀྱང་བཟང་ངོ་། །སྨན་པའི་རྒྱལ་པོ་འཚོ་བྱེད་ཀྱིས་སྨྲས་པ། འདི་ལ་མོད་ལ་གདངས་པར་འགྱུར་བའི་སྨན་ཡོད་མོད་ཀྱི་དེ་ནི་རྙེད་པར་དཀའོ། །ཚེ་དང་ལྡན་པ་ཀུན་

  1072. 226b

    དགའ་བོས་སྨྲས་པ། འཚོ་བྱེད་དེ་ཅི་ཡིན། དེས་སྨྲས་པ། ཙན་དན་ས་མཆོག་ཡིན་ནོ། །དེའི་ཚེ་ཙན་དན་ས་མཆོག་རྙེད་པ་ཉིད་མེད་དོ། །ཇི་ཙམ་ན་ཚོང་པ་ཞིག་ཡོད་པས་འདི་ལྟར་བདག་གིས་ཙན་དན་ས་མཆོག་དུས་དུས་སུ་བཙོངས་པས་མ་སྐྱེས་དགྲ་འདི་ནི་གཏུམ་པ་ བརླང་བ། གཟུ་ལུམས་ཅན་ཡིན་པས་གལ་ཏེ་མ་སྟེས་ཏེ་དེ་ལ་ཙན་དན་ས་མཆོག་དགོས་པར་གྱུར་ལ། དེ་མ་རྙེད་ན་གདོན་མི་ཟ་བར་མགོ་གཅོད་པར་ཡང་འགྱུར་རོ་སྙམ་ནས་ཙན་དན་ས་མཆོག་བསྲེས་ཏེ་བཞག་པ་ཞིག་ཡོད་དོ། །དེས་སྨན་པའི་རྒྱལ་པོ་འཚོ་བྱེད་ཀྱིས་ཇི་ལྟར་ བཅོམ་ལྡན་འདས་ཀྱི་སྙུན་ལ་ནི་ཙན་དན་ས་མཆོག་གིས་གདངས་པར་འགྱུར་རོ་ཞེས་བསྟན་པ་ཐོས་ནས་དེས་བསམས་པ། མ་སྐྱེས་དགྲ་འདི་ལྷ་སྦྱིན་གྱིས་རྦད་པས་བཅོམ་ལྡན་འདས་ལ་ཞེ་འགྲས་པའི་བློ་ཡོད་དེ། གལ་ཏེ་བདག་གིས་བཅོམ་ལྡན་འདས་ལ་ཙན་དན་ས་མཆོག་ཕུལ་ ན་བདག་ལ་གནོད་པ་བྱེད་པའི་གནས་གང་ཡིན་པ་དེ་ཡོད་དོ་སྙམ་མོ། །ཡང་བསམས་པ། བཅོམ་ལྡན་འདས་ནི་ལྷ་དང་མིས་མཆོད་པ་ཡིན་པས་གལ་ཏེ་དེའི་དོན་དུ་སྲོག་དང་ཕྲལ་ན་ཡང་ཕྲལ་དུ་ཟད། མ་ལ་བདག་གིས་བཅོམ་ལྡན་འདས་ལ་ཙན་དན་ས་མཆོག་དབུལ་ལོ་སྙམ་ནས། དེས་ ཙན་དན་ས་མཆོག་ཁྱེར་ཏེ་བཅོམ་ལྡན་འདས་ཀྱི་སྤྱན་སྔར་སོང་ནས་ཞབས་ལ་གཏུགས་ཏེ་གསོལ་པ། བཅོམ་ལྡན་འདས་བདག་གིས་བཅོམ་ལྡན་འདས་ལ་ཙན་དན་ས་མཆོག་གིས་བགྱི་བ་ཅི་མཆིས་པ་གློ་བར་ཆུད་ན། བཅོམ་ལྡན་འདས་ཀྱིས་ཐུགས་བརྩེ་བར་དགོངས་ཏེ་འདི་བཞེས་སུ་ གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བདག་ཉིད་ཆེན་པོ་འདི་ལས་ཙན་དན་ས་མཆོག་ལོང་ཤིག །ཚེ་དང་ལྡན་པ་ཀུན་དགའ་བོས་བླངས་སོ། །དེ་ནས་ཚོང་པ་དེ་དགའ་བ་དང་མགུ་བ་སྐྱེས་ནས་བཅོམ་ལྡན་འདས་ ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་

  1073. 227a

    པོ་དང་། དཀར་པོ་དང་། བཙོད་ཀ་དག་བྱུང་ནས་ཁ་ཅིག་ནི་འོག་དུ་འགྲོ། །ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་འགྲོ་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་པ་ཅན་དང་། སོ་ཐམས་ཐམས་དང་། ཀྱི་ཧུད་ཟེར་བ་དང་། ཨ་ཅུ་ཟེར་བ་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་སོང་སྟེ། སེམས་ ཅན་དམྱལ་བ་ཚ་བ་གང་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་། དེ་དག་འདི་སྙམ་དུ་ ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་འདི་ ནས་ཤི་འཕོས་པ་ཡང་མ་ཡིན་ལ་གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་ནས་སྤྲུལ་པ་ལ་སེམས་མངོན་པར་དད་པར་གྱུར་ནས་སེམས་ཅན་དམྱལ་བ་མྱོང་བར་འགྱུར་བའི་ ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་དུ་འགྲོ་བ་དེ་དག་རྒྱལ་ཆེན་བཞིའི་རིས་དང་། སུམ་བཅུ་རྩ་གསུམ་དང་། འཐབ་བྲལ་བ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་

  1074. 227b

    བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་ བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྒྲོགས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་རྗེས་བཞིན་དུ་འགྲོ་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་ སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པ་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་ པར་བཞེད་ན་ནི་རྟིང་པར་ནུབ་པར་འགྱུར། ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་གཡོན་པའི་ མཐིལ་དུ་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་གཡས་པའི་མཐིལ་དུ་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་ རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་མཛོད་སྤུར་ནུབ་

  1075. 228a

    པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ། བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་ རྣམས་ཀུན་དུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པར། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་ བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་ འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །ཀུན་དགའ་བོ་དེ་དེ་བཞིན་ཏེ། དེ་དེ་བཞིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་ཚོང་པས་སེམས་མངོན་པར་དད་པར་བྱས་ནས་ཙན་དན་ས་མཆོག་ཕུལ་བ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་ཚོང་བ་དེ་དགེ་བའི་རྩ་བ་དང་། སེམས་བསྐྱེད་པ་དང་། སྦྱིན་པའི་ཆོས་ཡོངས་སུ་ བཏང་བ་དེས་རང་སངས་རྒྱས་ཙན་དན་ཅན་ཞེས་བྱ་བར་འགྱུར་རོ། །དེའི་སྦྱིན་པའི་ཆོས་ནི་འདི་ཡིན་ཏེ། ང་ལ་སེམས་དད་པར་བྱས་པ་གང་ཡིན་པའོ། །འོན་ཀྱང་ཁྲག་དེ་འཆད་དུ་མ་བཏུབ་ནས་དེ་བཞིན་དུ་འཛག་གོ། །འཚོ་བྱེད་ཀྱིས་སྨྲས་པ། ད་ནི་བུད་མེད་གཞོན་ནུའི་འོ་མས་གདབ་ འཚལ་ལོ། །དགེ་སློང་རྣམས་ཀྱིས་བུད་མེད་གཞོན་ནུ་ཅི་འདྲ་བ་མ་ཤེས་ནས། དེས་སྨྲས་པ། བུ་ཐོན་བུ་བཙས་པ་གང་ཡིན་པ་དེ་ནི་བུད་མེད་གཞོན་ནུ་འདོད་དེ། དེའི་འོ་མ་གང་ཡིན་པ་དེ་ནི་བུད་མེད་གཞོན་ནུའི་འོ་མ་ཞེས་བགྱིའོ། །ཚེ་དང་ལྡན་པ་ཀུན་དགའ་བོས་ལྷ་སྦྱིན་དང་། ལྷ་

  1076. 228b

    སྦྱིན་གྱི་ཕྱོགས་མ་གཏོགས་པར་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཕལ་ཆེར་ལ་ཡང་བསྒོ་ནས་ཐམས་ཅད་ཀྱིས་བུད་མེད་གཞོན་ནུའི་འོ་མ་བཙལ་བར་བརྩམས་སོ། །འཁོར་ བཞི་པོ་དང་སྐྱེ་བོའི་ཚོགས་རྣམས་ཚོལ་བ་ན་དེ་རྣམས་ཀྱིས་ཐབས་ཡོད་ཡོད་ཀྱིས་བགེགས་བྱེད་དོ། །ཇི་ཙམ་ན་རྒྱལ་པོའི་ཁབ་ན་བུ་ཐོན་བུ་བཙས་པའི་བུད་མེད་གཞོན་ནུ་འོ་མ་ཉུང་སྟེ་རང་གི་བུ་ཡང་འོ་མས་མི་ངོམས་ན་གཞན་ལ་སྦྱིན་དུ་ལྟ་ག་ལ་ཡོད་པ་ཞིག་འདུག་པ་དེས་ཇི་ལྟར་བཅོམ་ ལྡན་འདས་ལ་བུད་མེད་གཞོན་ནུའི་འོ་མའི་དགོས་པ་བྱུང་བ་ཐོས་ནས་དེས་བསམས་པ། གལ་ཏེ་ཕུལ་ན་ནི་བདག་གི་བུ་ཉམ་ཆུང་བས་འོ་མ་མེད་ན་འཆི་བར་འགྱུར་ལ་ཉེས་དམིགས་དེ་འབའ་ཞིག་ཏུ་མ་ཟད་ཀྱི་གཞན་འདི་ཡང་ཡོད་དེ། ལྷ་སྦྱིན་བཅོམ་ལྡན་འདས་ལ་ཡུན་རིང་པོ་ནས་ཕྱིར་ རྒོལ་བ་དགྲར་གྱུར་བ་ཡིན་ཏེ། དེས་རྦད་པ་ནི་རྒྱལ་པོ་མ་སྐྱེས་དགྲ་ཡིན། ལྷ་སྦྱིན་གྱི་ཕྱོགས་ནི་ཀོ་ཀ་ལི་ཀ་དང་། ཁན་ད་དྲ་བ་བྱ་དང་། ཀ་ཏི་མ་ར་ཀ་ཏི་ཥྱ་དང་། རྒྱ་མཚོས་བྱིན་ཡིན་པས་འདི་དག་གིས་ཀྱང་བདག་གདོན་མི་ཟ་བར་བསད་པར་འགྱུར་རོ་སྙམ་མོ། །ཡང་བསམས་ པ། བདག་བསད་པ་དང་བུ་དང་བྲལ་བ་ནི་བླའི་ལྷ་དང་མིས་མཆོད་པའི་སངས་རྒྱས་བཅོམ་ལྡན་འདས་སྙུན་གྱིས་འོ་བརྒྱལ་བའི་ཚོར་བ་སྐུ་ཉམས་སུ་བརྟར་ནས་དེས་ན་རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཐམས་ཅད་འཁྲུགས་པར་གྱུར་པ་ནི་དེ་ལྟ་མ་ཡིན་གྱི། མ་ལ་བདག་གིས་འོ་མ་ཁྱེར་ ལ་འགྲོའོ་སྙམ་སྟེ། དེ་བཅོམ་ལྡན་འདས་ལ་སེམས་ཤིན་ཏུ་དད་པ་བྱས་ནས་སྣོད་གསར་པར་འོ་མ་བཞོས་ཏེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་ འདས་ལ་འཚོ་བྱེད་ཀྱིས་བུད་མེད་གཞོན་ནུའི་འོ་མ་བསྟན་པར་བདག་གིས་འཚལ་ན། བདག་རྗེས་སུ་གཟུང་བའི་སླད་དུ་བུད་མེད་གཞོན་ནུའི་འོ་མ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་བསམ་པ་བཟང་པོ་ཅན་

  1077. 229a

    གྱི་བུ་མོ་འདི་ལས་འོ་མ་ལོང་ཤིག །དེས་བླངས་པ་དང་དེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ ལྡན་འདས་རྣམས་འཛུམ་པ་མཛད་པ་དེའི་ཚེ་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་བྱུང་ནས། ཁ་ཅིག་ནི་འོག་ཏུ་འགྲོ། །ཁ་ཅིག་ནི་སྟེང་དུ་འགྲོ་ལ། གང་དག་འོག་ཏུ་འགྲོ་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཆུ་ཟེར་དང་། ཨུཏྤལ་ལྟར་གས་པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་སོང་སྟེ། སེམས་ཅན་དམྱལ་བ་ཚ་བ་གང་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དམྱལ་བ་དེ་དག་གི་གནོད་པའི་བྱེ་བྲག་དག་རྒྱུན་ གཅོད་པར་བྱེད་ཅིང་། དེ་དག་འདི་སྙམ་དུ་ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱི་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་སེམས་ཏེ་ཤེས་ ལྡན་དག་བདག་ཅག་འདི་ནས་ཤི་འཕོས་པ་ཡང་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་དག་རྒྱུན་ཆད་པར་གྱུར་ཏོ་སྙམ་མོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་ཅན་ དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ།། །།འདུལ་བ་གཞི། བམ་པོ་བརྒྱ་རྩ་གསུམ་པ། གང་དག་སྟེང་དུ་འགྲོ་བ་དེ་དག་ནི་རྒྱལ་ཆེན་བཞིའི་

  1078. 229b

    རིས་དང་། སུམ་བཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་ དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་འཕེལ་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་སོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་ དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་། ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་ པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྒྲོགས་པར་བྱེད་དོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཉིད་ཀྱི་རྗེས་བཞིན་ རྗེས་བཞིན་དུ་སོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་ བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བར་ལུང་སྟོན་པར་བཞེད་ན་ནི་རྟིང་པར་ནུབ་པར་འགྱུར། །ཡི་དགས་སུ་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བར་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བར་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་

  1079. 230a

    ཆུབ་ཏུ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ཏུ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་ དེ་དག་གིས་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ་བཅོམ་ལྡན་འདས་ཀྱི་མཛོད་སྤུར་ནུབ་བོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡིས། །ཚོགས་རྣམས་ཞལ་གྱི་སྒོ་ནས་བྱུང་གྱུར་ པ། །ཇི་ལྟར་གདུགས་ནི་ཤར་བར་གྱུར་པ་བཞིན། །དེ་ཡིས་ཕྱོགས་རྣམས་ཀུན་ཏུ་སྣང་བར་བགྱིས། །ཡང་ཚིགས་སུ་བཅད་དེ་གསོལ་པ། རྒོད་བྲལ་ཞུམ་དང་རྒྱགས་པ་སྤངས་པ་ཡི། །སངས་རྒྱས་འགྲོ་ནང་མཆོག་གི་རྒྱུར་གྱུར་པ། །རྒྱལ་བ་དགྲ་ཐུལ་བྱེད་རྒྱུ་མཆིས་པར། །རྩ་ ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟན་པ་ཉིད་བློས་དུས་མཁྱེན་ནས། །རྒྱལ་བའི་དབང་པོ་ཐུབ་པ་སྐྱེས་ཀྱི་མཆོག །ཉན་པར་འཚལ་བ་ཉན་པ་པོ་རྣམས་ཀྱི། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་བཟང་པོ་དག་གིས་བསལ་དུ་གསོལ། །ཚྭ་ཆུ་རི་ རྒྱལ་ལྟ་བུར་བརྟན་པའི་མཆོག །རྫོགས་སངས་རྒྱས་རྣམས་བློ་བུར་འཛུམ་མི་སྟོན། །བརྟན་པ་ཇི་སླད་འཛུམ་པ་སྟོན་མཛད་པ། །སྐྱེ་བོ་ཕལ་ཆེན་འདི་དག་དེ་ཉན་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ང་ལ་བུད་མེད་ཀྱིས་སེམས་མངོན་པར་དད་ པར་བྱས་ཏེ་བུད་མེད་གཞོན་ནུའི་འོ་མ་ཕུལ་བ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་བུ་མོ་དེ་ནི་དགེ་བའི་རྩ་བ་དང་། སེམས་བསྐྱེད་པ་དང་། སྦྱིན་པའི་ཆོས་ཡོངས་སུ་བཏང་བ་དེས་རང་སངས་རྒྱས་འོ་མ་སྦྱིན་པ་ཞེས་བྱ་བར་འགྱུར་ཏེ། དེའི་སྦྱིན་ པའི་ཆོས་ནི་འདི་ཡིན་ཏེ། ང་ལ་སེམས་མངོན་པར་དད་པ་གང་ཡིན་པའོ། །འོན་ཀྱང་ཁྲག་དེ་འཆད་དུ་མ་བཏུབ་ནས་དེ་བཞིན་དུ་འཛག་གོ། །ཡུལ་སྣ་ཚོགས་ན་གནས་པའི་དགེ་སློང་རྣམས་དང་། གཞན་ཡང་བྲམ་ཟེ་དང་ཁྱིམ་བདག་དད་པ་ཅན་མང་པོས་བཅོམ་ལྡན་འདས་དེ་ལྟར་ཐུགས་

  1080. 230b

    མི་བདེའོ་ཞེས་ཐོས་ཏེ་ལྷགས་ནས། དེ་ན་ཁ་ཅིག་ནི་སྨན་དག་འདེབས་པར་བྱེད་དོ། །ཁ་ཅིག་ནི་སྔགས་ཀྱི་དཔྱད་བྱེད་དོ། །ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་བདེན་པ་གསོལ་བར་བརྩམས་པ། བཅོམ་ལྡན་ཁྱོད་ཀྱི་ཐུགས་ལ་ནི། །སྲས་དང་དགྲ་བོར་མཚུངས་ཤེ་ན། ། བདེན་པའི་ཚིག་ནི་འདི་ཡིས་སུ། །རྨ་ཡི་འཛག་པ་ཆད་པར་ཤོག །བདེན་པ་གསོལ་ཟིན་པའི་མོད་ཁོ་ནར་ཁྲག་དེ་མི་འཛག་པར་གྱུར་པ་དང་། ལྷ་སྦྱིན་དང་། མ་སྐྱེས་དགྲ་དང་། ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་མ་གཏོགས་ པར་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་དང་། རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཕལ་ཆེར་ཐམས་ཅད་རབ་ཏུ་དགའ་བར་གྱུར་ཏོ། །བཅོམ་ལྡན་འདས་ནི་མཁྱེན་བཞིན་དུ་གང་ཞིག་ཇི་ལྟར་དཔྱད་བྱེད་པ་དེ་ལ་དེ་བཞིན་དུ་རྗེས་སུ་དགྱེས་ པར་མཛད་དེ། དེ་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་རོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་འོད་སྲུང་སྟོབས་བཅུ་ལྡན་གྱིས་བདེན་པ་གསོལ་བས་བཅོམ་ལྡན་འདས་ཀྱི་ཁྲག་འཛག་ པ་ཆད་པར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ང་དུག་འབགས་ནས་ཀུན་ཏུ་འཁྲུགས་པར་གྱུར་པ་ན་འདིས་དུག་ཞི་བར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་ འོར་དང་ཧ་ཅང་ཡང་མི་རིང་བ་ཞིག་ན་སྐྱེད་མོས་ཚལ་རྩ་བ་དང་། སྡོང་བུ་དང་། མེ་ཏོག་དང་། ཆུ་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ། དེ་ན་དྲང་སྲོང་ཆུ་དང་། རྩ་བ་དང་། འབྲས་བུ་ལོངས་སྤྱོད་པ། པགས་པ་དང་། ཤིང་ཤུན་གྱོན་པ། རིག་སྔགས་དང་། གསང་སྔགས་འཆང་བ་ཞིག་གནས་སོ། །རི་འོར་དེ་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་

  1081. 231a

    དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་དང་ཁྱེའུ་ཞིག་བཙས་ཏེ། ཉི་མ་བདུན་གསུམ་ཉི་ཤུ་རྩ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ཏེ་མིང་བཏགས་ནས་དེ་བསྐྱེད་བསྲིངས་ཏེ་ཆེན་པོར་གྱུར་ཏོ། །དེ་ འཆག་པའམ། འགྲེང་བ་འམ། འདུག་པའམ་ཉལ་བ་ན་ཡང་དགེ་བ་སེམས་ཤིང་དགེ་བའི་ལས་བྱེད་པས་དེ་སྐྱེ་བོའི་ཚོགས་ཀྱིས་ཆོས་འདོད་ཅེས་བྱ་བར་མིང་བཏགས་སོ། །དེ་དགེ་བ་ཅི་ཡིན་ཞེས་ཚོལ་བའི་ཕྱིར་རི་འོར་ནས་བྱུང་ནས་དུས་དུས་སུ་དྲང་སྲོང་དེའི་དྲུང་དུ་འགྲོ་ཞིང་དེ་ལ་བསྙེན་བཀུར་བྱེད་ དེ་དཀའ་ཐུབ་ཀྱི་དྲུང་དུ་འགྲོ་བས་དཀའ་ཐུབ་ལྡན་དཀའ་ཐུབ་ལྡན་ཞེས་བྱ་བར་ཡང་གྲགས་སོ། །དེ་དུས་གཞན་ཞིག་ན་དུག་ཅིག་གིས་འབགས་པ་ལངས་ནས་དེ་ལ་དུག་སྨན་དུ་མ་དང་སྔགས་ཀྱི་སྦྱོར་བས་དཔྱད་བྱས་ན་ཡང་དེའི་ནད་དེ་ཞི་བར་མ་གྱུར་ནས་དེའི་ཕ་དང་མ་གཉིས་དྲང་སྲོང་དེའི་ དྲུང་དུ་སོང་སྟེ། དྲང་སྲོང་ཆེན་པོ་ཁྱོད་ཀྱི་རིམ་གྲོ་བགྱིད་པ་ནི་དུག་གིས་འབགས་ནས་སྲོག་དང་བྲལ་ལ་ཐུག་གིས་དཔྱད་མཛོད་ཅིག །དེས་བདེན་པ་གསོལ་བར་བརྩམས་ཏེ། བུ་གཅིག་ཁྱོད་ཀྱིས་སེམས་ལ་ནི། །དགྲ་དང་མཛའ་བོ་མཚུངས་ཤེ་ན། །བདེན་པའི་ཚིག་ནི་འདི་ཡིས་སུ། ། ཁྱེའུ་ཁྱོད་དུག་ནི་མེད་པར་ཤོག །དེས་བདེན་པ་གསོལ་མ་ཐག །ཁོ་ནར་དུག་ཞི་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱེའུ་གང་ཡིན་པ་དེ་ནི་ང་ཉིད་ཡིན་ནོ། །དྲང་སྲོང་གང་ཡིན་པ་དེ་ནི་འོད་སྲུང་སྟོབས་བཅུ་ལྡན་འདི་ཉིད་ཡིན་ཏེ། དེ་ན་ཡང་ འདིས་བདེན་པ་གསོལ་བས་ང་སོས་བར་བྱས་སོ། །ད་ལྟར་ཡང་འདིའི་བདེན་པ་གསོལ་བས་ང་སོས་པར་བྱས་སོ། །ལྷ་སྦྱིན་སྡུག་བསྔལ་ཞིང་ཡིད་མི་བདེ་བ་དང་འགྱོད་པས་སེམས་པ། བདག་གིས་དགེ་སྦྱོང་གཽ་ཏ་མ་ལ་རྡོ་འཕངས་པ་ནི་དོན་མེད་པ་ཞིག་བྱས་ཏེ། དགེ་སྦྱོང་གཽ་ཏ་མ་ ཡང་མ་སོད་ལ། སྐྱེ་བོ་མང་པོས་ཀྱང་རབ་ཏུ་ཤེས་པར་གྱུར་ཏོ་སྙམ་ནས། དེ་ཤིང་དྲུང་ཞིག་ཏུ་སོང་སྟེ་སེམས་ཁོང་དུ་ཆུད་ཅིང་སྐྱིལ་མོ་ཀྲུང་བཅས་ཏེ་འདུག་གོ། །དགེ་སློང་རྣམས་གནས་དང་གནས་རྣམས་སུ་བཙུན་པ་དག་གཟིགས་ཤིག །ལྷ་སྦྱིན་འདི་འདྲ་བར་ཞེ་གདུག་སྟེ།

  1082. 231b

    གང་གི་ཕྱིར་བཅོམ་ལྡན་འདས་རབ་ཏུ་བྱུང་བ་དེ་ལ་ཡང་ཕ་རོལ་གནོན་པས་སྟེང་དུ་རྡོ་བ་འཕེན་ནོ་ཞེས་སྨོད་པར་བྱེད། གཞོགས་འཕྱས་བྱེད། ཁ་ཟེར་བར་བྱེད་པ་དང་། ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་ཀྱིས་སྨྲས་པ། ཤེས་ལྡན་དག་མ་བརྟགས་པར་བྱུང་རྒྱལ་དུ་ཅི་བརྡོལ། ལྷ་སྦྱིན་ཤིང་ཆེ་གེ་མོ་ཞེས་བྱ་བའི་དྲུང་ན་བསམ་གཏན་བཞི་པ་ལ་སྙོམས་པར་ཞུགས་པ་མ་མཐོང་ངམ། བདག་ཉིད་ཆེན་པོ་དེ་དེ་ལྟ་བུ་བྱེད་པར་ག་ལ་འགྱུར། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་ པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀོ་ཀ་ལི་ཀ་དང་། ཁན་ད་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་བདག་ཉིད་ངོ་ཚ་མ་མཆིས་པས་ལྷ་སྦྱིན་ངོ་ཚ་མ་མཆིས་པའི་བསྔགས་པ་སྒྲོགས་པ་ལ་གཟིགས། བཅོམ་ལྡན་འདས་ཀྱིས་ བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པ་ན་ཡང་ངོ་ཚ་མེད་པ་འདིས་ངོ་ཚ་མེད་པའི་བསྔགས་པ་སྨྲས་པ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཁབ་ཀྱི་མི་རྣམས་དང་རྒྱལ་པོས་དགོས་པ་འགའ་ཞིག་གི་ཕྱིར་ཁྲིམས་སུ་ བཅས་པ། དུར་ཁྲོད་གཉིས་བཤམས་ལ་གཅིག་ཏུ་ནི་སྐྱེས་པ་རྣམས་དོར་བར་བྱའོ། །གཅིག་ཏུ་ནི་བུད་མེད་རྣམས་སོ་ཞེས་བཅས་སོ། །ཇི་ཙམ་དུས་གཞན་ཞིག་ན་མ་ནིང་ཞིག་ཤི་ནས་དེ་དུར་ཁྲོད་གཅིག་ཏུ་ཡང་གནས་སྐབས་མ་རྙེད་ཅིང་གཉིས་པར་ཡང་མ་རྙེད་དོ། །རྒྱལ་པོའི་ཁབ་ ཀྱི་ཕྱོགས་ཞིག་ན་སྐྱེད་མོས་ཚལ་རྩ་བ་དང་འབྲས་བུ་དང་མེ་ཏོག་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ། དེ་ན་དྲང་སྲོང་སྤྱི་ཅེར་ཆུ་དང་རྩ་བ་དང་འབྲས་བུ་ལ་ལོངས་སྤྱོད་པ། པགས་པ་དང་། ཤིང་ཤུན་གྱོན་པ་ཞིག་གནས་སོ། །ཕྱོགས་དེ་ན་ཡང་ཞིང་གྲུ་ གསུམ་ཞིག་ལ་ཤིང་ཨེ་རན་ད་ཞིག་སྐྱེས་ནས་མ་ནིང་གི་རོ་དེ་དེར་བོར་རོ། །རོའི་དྲི་ཚོར་ནས་ཝ་ཞིག་འོངས་ཏེ་དེས་མ་ནིང་གི་རོ་དེ་ལ་བཟའ་བར་བརྩམས་སོ། །བྱ་རོག་གཅིག་ཀྱང་ཤིང་ཨེ་རན་དའི་ཁ་ན་ཚང་བཅས་ཏེ་འདུག་གོ། །དེའི་བློ་སྐྱེས་ནས་ཝ་ལ་བསྔགས་པ་སྨྲས་པ་དང་། གལ་

  1083. 232a

    ཏེ་ན་ཟོས་པའི་ལྷག་མ་སྟེར་རོ་སྙམ་ནས་དེས་དེ་ལ་ཚིགས་སུ་བཅད་དེ་བསྔགས་པ་སྨྲ་ངར་བརྩམས་པ། ཇི་ལྟར་ཁྱོད་ནི་སེང་གེའི་མགྲིན་པ་དང་། །ཇི་ལྟར་ཁྱུ་མཆོག་བཤུལ་དང་ལྡན་པ་ཡི། །རི་དགས་རྒྱལ་པོ་ཁྱོད་ལ་ཕྱག་འཚལ་ནས། །གསོལ་བའི་ཕམ་འབབས་ལས་ ནི་ཐུགས་དཔག་མཛོད། །ཝས་བལྟས་ཏེ་སླར་ཚིགས་སུ་བཅད་པས་སྨྲས་པ། བྱ་ཡི་རབ་མཆོག་མཁའ་འགྲོ་བ། །ཕྱོགས་ཀུན་གསལ་བར་མཛད་ནས་ནི། །རིན་ཆེན་སྦྲམ་ལྟར་མཛེས་གྱུར་པ། །ཤིང་མཆོག་རྩེ་ལ་བཞུགས་འདི་གང་། །བྱ་རོག་གིས་སྨྲས་པ། སྐལ་ལྡན་ ཆེན་པོ་བལྟ་བའི་ཕྱིར། །ཁྱོད་ཀྱི་དྲུང་དུ་བདག་མཆིས་ཏེ། །རི་དགས་རྒྱལ་ཁྱོད་ཕྱག་འཚལ་ན། །གསོལ་བའི་ཕམ་འབབས་ཐུགས་དཔག་མཛོད། །ཝས་སྨྲས་པ། རྨ་བྱའི་མགྲིན་པ་ལྟ་བུ་ཡི། །ཕོ་རོག་བལྟ་ན་སྡུག་པ་ཁྱོད། །ཀུན་དགའ་བྱེད་པ་རྣམས་ཀྱི་གཙོ། །ཅི་ བདེར་གསོལ་གྱིས་མར་སྤྱོན་ཅིག །དེ་བབས་ནས་ཝ་དང་ལྷན་ཅིག་མ་ནིང་གི་རོ་ལ་ཟ་བར་བྱེད་པ་དྲང་སྲོང་གིས་མཐོང་ནས་དེས་ཚིགས་སུ་བཅད་དེ་སྨྲས་པ། ལྗོན་ཤིང་ཐ་ཆད་གྲིབ་མ་ལ། །ངོ་ཚ་མེད་པ་འདུག་ནས་སུ། །ཐ་ཆད་རོ་ལ་ལོངས་སྤྱོད་པ། །ཨེ་མའོ་རིང་ཞིག་ལོན་ནས་ མཐོང་། །བྱ་རོག་གིས་ཐོས་ནས་དེ་མ་བཟོད་ནས་ཚིགས་སུ་བཅད་དེ་སྨྲས་པ། འདི་ལྟར་སེང་གེ་རྨ་བྱ་དག །དམ་པའི་ཤ་ལ་ལོངས་སྤྱོད་ན། །གཞན་གྱིས་བྱིན་པས་འཚོ་བ་ཡི། །སྤྱི་ཅེར་འདིར་ནི་ཅི་ཞིག་གཏོགས། །དྲང་སྲོང་དེ་ཡང་མི་བཟོད་པ་སྐྱེས་ནས་ཚིགས་སུ་བཅད་དེ་སྨྲས་ པ། འདབ་ཆགས་ཐ་ཆད་བྱ་རོག་དང་། །རྐང་བཞི་ཐ་ཆད་ཝ་དང་ནི། །ལྗོན་ཤིང་ཐ་ཆད་ཨེ་རན་ད། །མི་ཡི་ཐ་ཆད་མ་ནིང་རོ། །ཞིང་གི་ཐ་ཆད་གྲུ་གསུམ་སྟེ། །ངོ་ཚ་མེད་རྣམས་འདུས་ལ་ལྟོས། །དེ་ནས་བྱ་རོག་ལྷག་པར་ཡང་མི་བཟོད་པ་སྐྱེས་ནས་དྲང་སྲོང་གི་མེ་ཁང་དུ་ ཞུགས་ཏེ་བལྟ་བར་བརྩམས་པ་ལས། ཅི་ཡང་མི་སྣང་ནས་རིལ་བ་སྤྱི་བླུགས་བཅག་སྟེ་བྲོས་སོ། །ཇི་ཙམ་ན་དྲང་སྲོང་དེ་མེ་ཁང་དུ་ཞུགས་ན་རིལ་བ་སྤྱི་བླུགས་ཆག་པ་མཐོང་ནས། དེས་བསམས་པ། འདི་ནི་བྱ་རོག་གདུག་པ་དེའི་ལས་ཀྱིས་བྱས་ཀྱི་གཞན་ནི་སུ་ཡང་མ་ཡིན་ནོ་

  1084. 232b

    སྙམ་དུ་རིག་ནས་ཚིགས་སུ་བཅད་དེ་སྨྲས་པ། སུ་ལ་འདི་འདྲའང་མི་སྨྲ་སྟེ། །ངོ་ཚ་མེད་པའི་གདུག་སེམས་ཀྱིས། །མེ་ཁང་མ་རུང་བྱས་ནས་ནི། །རིལ་བ་ཡང་ནི་བཅག་པར་གྱུར། །བསྔགས་འོས་སྨད་པར་འོས་ཀྱང་རུང་། །ཡོང་ཡེ་ཅུང་ཟད་སྨྲ་མི་བྱ། །བློ་གྲོས་ལྡན་པས་རྟག་ ཏུ་ནི། །ཁ་རོག་པས་ནི་བདེ་བ་འཐོབ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་ཡིན་ནོ། །དེའི་ཚེ་དེའི་དུས་ཀྱི་བྱ་རོག་གང་ཡིན་པ་དེ་ནི་ཀོ་ཀ་ལི་ཀ་ཡིན་ཏེ། དེ་ན་ཡང་ངོ་ཚ་མེད་པ་དེ་དག་གིས་ངོ་ ཚ་མེད་པའི་བསྔགས་པ་བརྗོད་དོ། །ད་ལྟར་ཡང་ངོ་ཚ་མེད་པ་འདི་དག་ངོ་ཚ་མེད་པའི་བསྔགས་པ་བརྗོད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་དང་ལྷ་སྦྱིན་ཐོག་མར་གང་དུ་མི་མཐུན་པར་ གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་ཤང་ཤང་ཏིའུ་གཉིས་ལུས་གཅིག་ཏུ་གྱུར་ནས་རྒྱ་མཚོའི་འགྲམ་ན་གནས་ཏེ། ཆོས་ཅན་དང་ཆོས་མ་ཡིན་པ་ཞེས་བྱའོ། །ཇི་ཙམ་ན་ཆོས་མ་ཡིན་པ་ནི་གཉིད་ལོག་ཆོས་ཅན་ནི་མེལ་ཙེ་བྱེད་པ་དང་། དེས་བདུད་ རྩིའི་འབྲས་བུ་ཞིག་ཆུས་ཁྱེར་བ་མཐོང་ནས། དེས་དེ་བླངས་ཏེ་བསམས་པ། ཅི་རེ་ཞིག་འདི་ཡང་བསླང་ངམ། འོན་ཏེ་བཟའ་སྙམ་མོ། །ཡང་བསམས་པ། ཐོས་ཀྱང་ལུས་འདི་གཅིག་ཁོ་ན་གསོ་བར་ཟད་དོ་སྙམ་ནས་དེས་དེ་མ་བསླང་བ་དང་། རང་ཉིད་སད་དེ། དེ་སད་པ་ན་ཆོས་ཅན་ལ་ བདུད་རྩིའི་འབྲས་བུའི་སྒྲེགས་པ་བྱུང་བ་ཆོས་མ་ཡིན་པས་ཚོར་ནས་དེས་སྨྲས་པ། དེ་ཅིའི་སྒྲེགས་པ་ཡིན། དེས་སྨྲས་པ། བདུད་རྩིའི་འབྲས་བུའིའོ། །དེ་གང་ནས་རྙེད། དེས་སྨྲས་པ། ཁྱོད་གཉིད་ལོག་པ་ན་ཁོ་བོས་བདུད་རྩིའི་འབྲས་བུ་རྙེད་ནས་ལུས་གཅིག་ཁོ་ན་གསོ་བར་ཟད་དོ་སྙམ་ནས་ ཁྱོད་མ་བསླང་བར་ཁོ་བོས་ཟོས་སོ། །དེས་སྨྲས་པ། ཁྱོད་ཀྱིས་མ་ལེགས་པ་ཞིག་བྱས་ཏེ་ངས་ཀྱང་དུས་ཤེས་པར་བྱའོ། །ཇི་ཙམ་དུས་གཞན་ཞིག་ན་ཆོས་ཅན་གཉིད་ལོག་ནས་ཆོས་མ་ཡིན་པ་མེལ་ཙེ་བྱེད་པ་ན་དེས་དུག་གི་འབྲས་བུ་ཆུས་ཁྱེར་བ་ཞིག་མཐོང་ནས་དེས་དེ་ཟོས་པ་དང་། དེ་གཉི་ག་

  1085. 233a

    བརྒྱལ་བར་གྱུར་ཏོ། །ཆོས་མ་ཡིན་པ་དུག་གི་འབྲས་བུས་ཀུན་ནས་འཁྲུགས་པས་སྨྲས་པ། གང་དང་གང་དུ་སྐྱེས་པའི་ཚེ་རབས་དེ་དང་དེ་དག་ཏུ་ཁྱོད་ལ་གསོད་པ་དང་ཕྱིར་རྒོལ་བ་དང་དགྲ་བོར་གྱུར་ཅིག །ཆོས་ཅན་གྱིས་སྨྲས་པ། བདག་ཀྱང་གང་དང་གང་དུ་སྐྱེས་པའི་ཚེ་རབས་ དེ་དང་དེ་དག་ཏུ་ཁྱོད་ལ་བྱམས་པ་སྒྲུབ་པར་གྱུར་ཅིག་ཅེས་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཆོས་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཆོས་མ་ཡིན་པ་གང་ཡིན་པ་དེ་ནི་ལྷ་སྦྱིན་ཡིན་ནོ། །དེར་ཐོག་ མར་ང་དང་འདི་མི་མཐུན་པར་གྱུར་ཏོ། །ངས་ཀྱང་དེ་ལ་བྱམས་པའི་ཐུགས་བཞག་གོ། །གཞན་ཡང་ཇི་ལྟར་འདིས་ང་ལ་མི་མཐུན་པར་བྱས་པ་དང་། ངས་ཀྱང་འདི་ལ་བྱམས་པར་བསམས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་སྲ་རྩི་ལྡན་ཞེས་བྱ་བ་འབྱོར་བ་ དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེས་ཡུལ་གཞན་གྱི་རྒྱལ་པོའི་བུ་མོ་ཞིག་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་ བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་དེ་དུས་གཞན་ཞིག་ན་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པའི་ཉི་མའི་རྩེ་ན་ཁྱེའུ་གཟུགས་བཟང་པོ་མཛེས་པ་བལྟ་ན་སྡུག་པ་ཞིག་བཙས་ཏེ། དེའི་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ཁྱེའུ་འདི་གདུགས་ཀྱི་རྩེ་ན་བཙས་པས། དེའི་སླད་དུ་ཁྱེའུའི་མིང་ཉི་མའི་མུ་ཁྱུད་ཅེས་བགྱི་བར་གདགས་སོ། །ཞེས་དེའི་མིང་ཉི་མའི་མུ་ཁྱུད་ཅེས་བྱ་བར་བཏགས་ནས་ཁྱེའུ་ཉི་མའི་མུ་ཁྱུད་མ་མ་བརྒྱད་པོ་པང་ན་འཚོ་བའི་མ་མ་ གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དེ། དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་

  1086. 233b

    བོ་གཙོ་བོ་དག་གིས་སྲིད་པར་བྱེད་སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ། ཡི་གེ་དང་། གྲངས་དང་། རྩིས་དང་། ལག་རྩིས་ལ་ཉེ་བར་ཞུགས་ཤིང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡུལ་དང་ དབང་ཕྱུག་དང་མཐུ་ཐོབ་པ་སའི་དཀྱིལ་འཁོར་ཆེན་པོ་མངོན་པར་ཟིལ་གྱིས་མནན་ནས་གནས་པ་རྣམས་ཀྱི་བཟོའི་གནས་དང་ལས་ཀྱི་གནས་ཐ་དད་པར་གྱུར་པ་གང་དག་ཡིན་པ་འདི་ལྟ་སྟེ། གླང་པོ་ཆེའི་གཉར་ཞོན་པ་དང་། རྟ་ལ་ཞོན་པ་དང་། ཤིང་རྟའི་ཐབས་དང་། རལ་གྲིའི་ ཐབས་དང་། འཕོང་དང་། ཕྱིར་བསྣུར་བ་དང་། མདུན་དུ་བསྣུར་བ་དང་། ལྕགས་ཀྱུས་སྒྱུར་ཐབས་དང་། མདའ་བོ་ཆེ་འཕེན་པ་དང་། ཞགས་པ་གདབ་པ་དང་། བཅད་པ་དང་། དྲལ་བ་དང་། དབུག་པ་དང་། འཛིན་སྟངས་དང་། གོམ་སྟངས་དང་། ཐོར་ཚུགས་ དང་། རྒྱང་ནས་ཕོག་པ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མི་འཆོར་བར་ཕོག་པ་དང་། ཚབས་ཆེར་ཕོག་པ་སྟེ་བཟོའི་གནས་དང་། ལས་ཀྱི་གནས་ལྔ་པོ་དེ་དག་ལ་ཡང་བྱང་བར་གྱུར་ནས་ཕས་དེ་རྒྱལ་ཚབ་ཏུ་བཅུག་གོ། །རྒྱལ་པོ་སྲ་རྩི་ལྡན་གྱི་བཙུན་ མོ་དམ་པ་ནི་ཆོས་ལྡན་ཞེས་བྱའོ། །བློན་པོའི་མཆོག་ནི་ཕྱུགས་འདུག་ཅེས་བྱ་སྟེ། དེ་ལ་རྒྱལ་པོ་ལྷག་པར་སྙིང་འཇོག་གོ། །ཇི་ཙམ་དུས་གཞན་ཞིག་ན་རྒྱལ་པོ་སྲ་རྩི་ལྡན་ཆོས་ལྡན་མ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་ བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཆོས་ལྡན་མ་སེམས་ཅན་དང་ལྡན་པར་གྱུར་ཏོ། །དེ་མཚན་མཁན་རྣམས་ཀྱིས་ཁྱེའུ་ཞིག་བཙའ་བར་འགྱུར་ཏེ། དེས་རྒྱལ་པོ་སྲོག་དང་ཕྲལ་ནས་རང་ཉིད་ཅོད་པན་བཅིངས་ཏེ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་འགྱུར་རོ། ། ཞེས་ལུང་བསྟན་ཏོ། །ཇི་ཙམ་ན་རྒྱལ་པོ་སྲ་རྩི་ལྡན་ནད་ཀྱིས་ཐེབས་པར་གྱུར་ནས་དེ་ལ་རྩ་བ་དང་། སྡོང་བུ་དང་། འདབ་མ་དང་། མེ་ཏོག་དང་། འབྲས་བུའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏེ། དེས་ལུས་ཀྱི་གནས་སྐབས་རིག་པར་བྱས་ནས་དེས་

  1087. 234a

    བསམས་པ། བདག་འདས་ནས་ཉི་མའི་མུ་ཁྱུད་རྒྱལ་པོར་འགྱུར་ཏེ། དེས་གདོན་མི་ཟ་བར་ཆོས་ལྡན་མ་བསད་པར་མི་འགྱུར་བར་འདིར་ཡེ་ཇི་ལྟར་བྱ་བའི་དུས་ལ་བབ། ཡང་བསམས་པ། བློན་པོ་ཕྱུགས་འདུག་འདི་ལ་བདག་གིས་ལོངས་སྤྱོད་བཟང་པོ་དག་གིས་ བགོ་བཤའ་བྱས་ཤིང་སྤྱན་རས་ཀྱིས་བཙས་པ་ཡིན་གྱིས་འདི་ལ་ཆོས་ལྡན་མ་གཏད་དོ་སྙམ་ནས་དེས་ཕྱུགས་འདུག་བཀུག་སྟེ་བསྒོ་བ། ངའི་བཙུན་མོ་དམ་པ་ནི་ཆོས་ལྡན་མ་ཡིན་ལ། བློན་པོའི་མཆོག་ནི་ཁྱོད་ཡིན་ཏེ། ངས་ལུས་ཀྱི་གནས་སྐབས་ཤེས་ན་གདོན་མི་ཟ་བར་ང་སྲོག་དང་ འབྲལ་བར་འགྱུར་གྱིས། ཁྱོད་ཀྱིས་ང་ལ་སྡུག་པར་སེམས་ན་ཉི་མའི་མུ་ཁྱུད་ཀྱིས་ཆོས་ལྡན་མ་ཇི་ལྟར་ཡང་སྲོག་དང་ཕྲལ་བར་མི་འགྱུར་བ་དེ་ལྟར་གྱིས་ཤིག་དེས་སྨྲས་པ། ལྷ་དེ་ཙམ་ཡང་རྔོ་མི་ཐོག་གམ། ལྷ་ཐུགས་ལས་ཆུང་ངུར་མཛོད་ཅིག་དང་ཇི་ལྟར་མི་བཀུམ་པ་དེ་ལྟར་བགྱིའོ། ། བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ཀྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །རྒྱལ་པོ་སྲ་རྩི་ལྡན་ཤི་ནས་དེ་གདུགས་དང་། རྒྱལ་མཚན་དང་། བ་དན་ལ་སོགས་པ་བཟང་པོ་རྣམས་ཀྱིས་བཀུར་སྟི་ཆེར་བྱས་ ཏེ་བསྲེགས་སོ། །ཉི་མའི་མུ་ཁྱུད་རྒྱལ་པོའི་རྒྱལ་སྲིད་ཆེན་པོའི་དབང་བསྐུར་བས་དབང་བསྐུར་ཏོ། །དེས་བློན་པོ་རྣམས་ལ་བསྒོ་བ། ཆོས་ལྡན་མ་སོད་ཅིག །ཕྱུགས་འདུག་གིས་སྨྲས་པ། ལྷ་མ་བརྟགས་པར་བཀུམ་སྟེ་ཅི་རུང་། ཅི་ཁྱེའུར་བཙའ་བར་འགྱུར་རམ། འོན་ཏེ་བུ་ མོར་འགྱུར་སུས་འཚལ། གལ་ཏེ་ཁྱེའུ་བཙས་པར་གྱུར་ན། དེ་ཉིད་དགུམ་མོད། རྒྱལ་པོ་ཉི་མའི་མུ་ཁྱུད་ཀྱིས་སྨྲས་པ། དེ་བཞིན་དུ་གྱིས་ལ་ཁྱོད་ཁོ་ནས་སྲུངས་ཤིག །དེས་ཁྱིམ་དུ་བཞག་པ་ན་ཟླ་བ་བརྒྱད་དམ་དགུ་ལོན་ནས་ཁྱེའུ་ཞིག་བཙས་སོ། །དེ་ཉིད་ཀྱི་ཉི་མ་ལ་ཉ་པའི་ཆུང་ མ་ཞིག་ལ་བུ་མོ་ཞིག་བཙས་སོ། །དེས་བཙས་མ་ཐག་ཁོ་ནར་ཉ་པའི་ཆུང་མ་ལ་ནོར་གྱིས་བྲིད་དེ་བརྗེས་ནས་ཕྱུགས་འདུག་གིས་རྒྱལ་པོ་ལ་སྨྲས་པ། ལྷ་ཆོས་ལྡན་མ་ལ་བུ་མོ་ཞིག་བཙས་ལགས་སོ། །ལེགས་པ་ཞིག་སྨྲས་སོ། །ཁྱེའུ་དེ་ཉ་པའི་ཆུང་མས་བསྣུན་བསྙོད་གསོས་ཏེ་

  1088. 234b

    ཆེན་པོར་གྱུར་ནས་ཡིག་འབྲུ་དང་བཀླག་པ་བསླབས་ཏེ། སྙན་དངགས་བྱ་བར་བརྩམས་ནས་དེའི་མིང་ཉ་པའི་ཁྱེའུ་སྙན་དངགས་མཁན་ཉ་པའི་ཁྱེའུ་སྙན་དངགས་མཁན་ཞེས་བྱ་བར་གྱུར་ཏོ། །ཕྱུགས་འདུག་གིས་ཆོས་ལྡན་མ་ལ་སྨྲས་པ། ཁྱོད་ལ་ནི་ཁྱེའུ་སྙན་དངགས་མཁན་ཞིག་ བཙས་པར་གྱུར་ཏོ། །དེ་ཅི་འདྲ་བ་ཞིག་ཡིན་རེ་ཞིག་བལྟའོ། །དེས་སྨྲས་པ། དེ་བལྟ་ཅི་དགོས་ཞོག་ཤིག །དེ་བུ་ལ་མངོན་པར་དགའ་ཞིང་བལྟ་འདོད་པས་འདུག་ཏུ་མི་བཏུབ་བོ། །ཕྱུགས་འདུག་གིས་ངེས་པར་གལ་གྱིས་འཆུ་བར་ཤེས་ནས་ཐབས་ཤིག་བཤམས་ཏེ། ཉ་ཞིག་ བསྐུར་ནས་བཏང་ངོ་། །དེ་ནང་དུ་ཞུགས་པ་དེ་ཁོ་ན་ན་མཚན་མཁན་རྣམས་ཀྱིས་ཉ་པའི་ཁྱེའུ་སྙན་དངགས་མཁན་འདི་ནི་རྒྱལ་པོ་སྲོག་དང་ཕྲལ་ཏེ་རང་ཉིད་ཅོད་པན་བཅིངས་ནས་རྒྱལ་སྲིད་བྱེད་པར་འགྱུར་རོ་ཞེས་ལུང་བསྟན་པ་རྒྱལ་པོས་ཐོས་ནས་དེ་བློན་པོ་རྣམས་ལ་བསྒོ་བ། ཅི་ནས་ ཀྱང་དེ་མ་ཤོར་བར་ཟུང་ཤིག །དེས་གཅིག་ནས་གཅིག་ཏུ་བརྒྱུད་པ་ལས་ཐོས་ནས་དེ་ཕན་ཚུན་བྲོས་པ་ལས་རྒན་མོ་ཞིག་གི་ཁྱིམ་དུ་ཞུགས་པ་དང་དེས་དེ་སྦས་ཏེ། དེ་ནས་ཡུང་དང་འབྲུ་མར་གྱིས་ལུས་བསྐུས་ནས་ཁྱོགས་ཀྱི་སྟེང་དུ་བཞག་སྟེ་རོ་ལྟ་བུར་བཅོས་ནས་ཕྱུང་སྟེ་དུར་ཁྲོད་དུ་བོར་ བ་དང་ལངས་ཏེ་བྲོས་པ་ཕྱོགས་དེ་ན་མི་ཞིག་མེ་ཏོག་དང་འབྲས་བུ་ཚོལ་བ་དེས་དེ་བྲོས་པ་མཐོང་ངོ་། །དེའི་ཕྱི་བཞིན་སྙེགས་ཤིང་རྒྱུགས་པའི་མི་རྣམས་ཀྱིས་མི་དེ་ལ་དྲིས་པ་ཀྱེ་ནང་རྗེ་བོང་ཚོད་དང་ཁ་དོག་འདི་འདྲ་བའི་མི་འགའ་ཞིག་ལམ་འདི་ནས་འགྲོ་བ་ཁྱོད་ཀྱིས་མ་མཐོང་ངམ། དེས་སྨྲས་པ། མཐོང་སྟེ་ལམ་འདི་ནས་སོང་ངོ་། །དེ་རྣམས་དེའི་རྗེས་བཞིན་དུ་དོང་ངོ་། །དེ་ཡང་རི་འོར་དེར་བཙོ་བླག་མཁན་ཞིག་གི་ཁྱིམ་དུ་ཞུགས་ནས་དེ་ལ་ཇི་ལྟར་གྱུར་པ་སྨྲས་པ་དང་། སྙེགས་མའི་མི་རྣམས་ཀྱིས་རི་འོར་བཙལ་བར་བརྩམས་པ་ན་བཙོ་བླག་མཁན་གྱིས་གོས་ཀྱི་ཐུམ་པོའི་ནང་དུ་བཅུག་ནས་ བོང་བུ་ལ་བཀལ་ཏེ་རི་འོར་ནས་ཕྱིར་བྱུང་སྟེ་ཁྲུས་བྱེད་པའི་སར་ཁྱེར་ནས་བཏང་བ་དང་ལངས་ཏེ་ཕྱོགས་བཞིར་བལྟས་ཏེ་བྲོས་སོ། །དེར་ཡང་མི་གཞན་ཞིག་གིས་མཐོང་ནས། དེས་སྙེགས་མའི་མི་རྣམས་ལ་སྨྲས་པ། ཤེས་ལྡན་དག་ཁྱེད་གང་གི་དོན་དུ་རི་འོར་ན་ཚོལ་བའི་མི་དེ་ནི་ལམ་འདི་

  1089. 235a

    ནས་སོང་གིས་མྱུར་དུ་དེང་ཤིག །དེ་རྣམས་དོང་བ་ལས་དེ་ཡང་གྲོང་གཞན་ཞིག་ཏུ་ལྷམ་མཁན་གྱི་ཁྱིམ་ཞིག་ཏུ་ཞུགས་ནས་དེས་དེ་ལ་ཇི་ལྟར་གྱུར་པ་བསྙད་ནས་སྨྲས་པ། མཆིལ་ལྷམ་བོལ་རྟིང་བར་བལྟས་པ་ཞིག་གྱིས་ཤིག །དེས་སྨྲས་པ། བདག་གིས་སྔོན་ལན་འགའ་ ཡང་མཆིལ་ལྷམ་དེ་ལྟ་བུ་བྱེད་མ་མྱོང་ངོ་། །དེས་ཚིགས་སུ་བཅད་དེ་སྨྲས་པ། བློ་གྲོས་སྣ་ཚོགས་རང་བཞིན་དུ་མ་སྟེ། །དེ་དག་སྲང་གཅིག་ཏུ་ནི་གཞལ་བ་མེད། །ལྷམ་མཁན་ཁྱོད་ཀྱིས་ང་ཡི་ཚིག་བཞིན་འདིར། །རྟིང་པ་གང་དེ་མདུན་དུ་ལྟ་བར་གྱིས། །དེས་ལྷམ་མཁན་དེ་ལ་བསླབས་ ནས་ལྷམ་མཁན་གྱིས་དེ་འདྲ་བའི་མཆིལ་ལྷམ་ཞིག་བྱས་སོ། །རི་འོར་དེར་བས་བསྐོར་བ་ཡིན་པས་དེ་མཆིལ་ལྷམ་དེ་གྱོན་ནས། སྟོར་ཁུང་ནས་འཛུལ་ཏེ་བྲོས་སོ། །སྙེགས་མའི་མི་རྣམས་ཀྱིས་མཆིལ་ལྷམ་གྱི་རྗེས་བཞིན་རི་འོར་དེ་ཉིད་བསྐོར་ཏེ་དེ་ཡང་བྲོས་ནས་སོ། །ཆུར་ཞུགས་པ་ དང་ཀླུ་རྣམས་ཀྱིས་གནས་སུ་ཁྲིད་དོ། །རྒྱལ་པོས་གཅིག་ནས་གཅིག་ཏུ་བརྒྱུད་པ་ལས་དེ་ཇི་ལྟར་ཀླུ་རྣམས་ཀྱིས་ཀླུའི་གནས་སུ་ཁྲིད་དོ་ཞེས་ཐོས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ངའི་ཡུལ་ན་སྦྲུལ་ཁས་སྡིགས་ཇི་སྙེད་གནས་པ་དེ་དག་ཐམས་ཅད་ངའི་སྤྱན་ སྔར་ཁུག་ཤིག །དེ་རྣམས་ཀྱིས་ཡུལ་ཐམས་ཅད་ན་གནས་པའི་སྦྲུལ་ཁས་སྡིགས་རྣམས་རྒྱལ་པོ་ལ་ཕུལ་ལོ། །རྒྱལ་པོས་དེ་རྣམས་ལ་བསྒོ་བ། ཤེས་ལྡན་དག་དེང་ལ་ཀླུའི་གནས་ཆེ་གེ་མོ་ཞེས་བྱ་བར་ཀླུ་ཟུང་ཤིག །ལྷ་བཀའ་བཞིན་འཚལ་ཞེས་སྦྲུལ་ཁས་སྡིགས་ཐམས་ཅད་ ཀྱིས་རྒྱལ་པོ་ལས་མཉན་ནས་ཀླུའི་གནས་སུ་དོང་ངོ་། །འབྲོག་གཅིག་ན་གནོད་སྦྱིན་སེར་སྐྱ་ཞེས་བྱ་བ་ཁྲག་དང་ཤ་ཟ་བ་གཅིག་ཡོད་དོ། །དེས་སྐྲག་པས་གཅན་གཟན་རྣམས་ཀྱིས་ཀྱང་འབྲོག་དེ་ཡོངས་སུ་སྤངས་ན་མི་རྣམས་ཀྱིས་ལྟ་སྨོས་ཀྱང་ཅི་དགོས་ཏེ་དེ་སེར་སྐྱའི་འབྲོག་ཅེས་བྱ་བར་གྲགས་ སོ། །སྦྲུལ་ཁས་སྡིགས་རྣམས་ཀྱི་སྔགས་ཀྱི་མཐུས་ཇི་ལྟར་ཀླུ་དེ་ལ་གནོད་པར་འགྱུར་བ་དེ་ལྟར་བྱས་པས་དེ་སྐྲག་ནས་དེ་སེར་སྐྱའི་འབྲོག་དེ་རྒལ་བར་མི་ནུས་པར་བོར་རོ། །ཀླུ་རྣམས་ཀྱིས་གྲོས་བྱས་པ་བདག་ཅག་གིས་འདི་ལྟར་དེ་སེར་སྐྱའི་འབྲོག་ལས་མ་བསྒྲལ་བ་ནི་མ་ལེགས་པ་ཞིག་བྱས་ཏེ།

  1090. 235b

    དེ་ཡང་གནོད་སྦྱིན་སེར་སྐྱས་བསད་ལ་བདག་ཅག་ཀྱང་དེའི་ཕྱིར་གཙེས་པར་འོང་ན་དེ་ལ་ཇི་ལྟར་བསྒྲུབ་པར་བྱ། ཀླུའི་རྒྱལ་པོ་དེས་སྨྲས་པ། དོན་དེ་སྦྲུལ་ཁས་སྡིགས་རྣམས་ལ་རིག་པར་བྱའོ་ཞེས་དེ་རྣམས་ཀྱིས་སྦྲུལ་ཁས་སྡིགས་རྣམས་ལ་སྨྲས་པ། ཤེས་ལྡན་དག་གང་གི་ཕྱིར་བདག་ཅག་ འཁྲུགས་པར་བྱས་པ་དེ་ནི་བདག་ཅག་གིས་ཐབས་ཀྱིས་བསད་པ་ཉིད་དེ་འདི་ལྟར་སེར་སྐྱའི་འབྲོག་ཏུ་བོར་རོ། །སྦྲུལ་ཁས་སྡིགས་རྣམས་ཀྱིས་དོན་དེ་རྒྱལ་པོ་ལ་སྨྲས་པ་དང་། རྒྱལ་པོས་སྨྲས་པ། གལ་ཏེ་དེ་ལྟ་ན་ཡང་འོན་ཀྱང་ཚོལ་ཅིག །དེ་སེར་སྐྱའི་འབྲོག་ན་ཕན་ཚུན་འཁྱམ་པར་ བརྩམས་པ་ན་གནོད་སྦྱིན་སེར་སྐྱ་ཡང་ཕྱོགས་ཤིག་ན་ཁྱི་རྣམས་ཀྱིས་ཡོངས་སུ་བསྐོར་ཏེ་འདུག་གོ། །དེ་དང་ཁྱི་རྣམས་ཀྱིས་དེ་རྒྱང་རིང་པོ་ཁོ་ན་ནས་མཐོང་ནས་དེས་བསམས་པ། ཅི་འདིས་བདག་ཤི་བར་གྱུར་ཏོ་ཞེས་ཐོས་ནས་དེས་ན་དེ་འདིར་འོངས་སམ་སྙམ་མོ། །དེས་དེ་ལ་ཁྱི་ རྣམས་སྦད་པ་ལས་དེ་བྲོས་ཏེ་ཤིང་ལྗོན་པ་ཞིག་ལ་འཛེགས་པ་དང་། ཁྱི་རྣམས་དང་། སེར་སྐྱས་ལྗོན་ཤིང་གི་དྲུང་དུ་བསྡད་དེ། སེར་སྐྱས་སྨྲས་པ། ཀྭའི་ནང་རྗེ་ཁྱོད་ཀྱི་སེར་སྐྱའི་འབྲོག་ན་མི་མ་ཡིན་པ་སེར་སྐྱ་ཞེས་བྱ་བ་གནས་ཏེ། དེར་སོང་བ་གང་ཡིན་པ་དེ་དེས་གསོད་ པར་འགྱུར་རོ་ཞེས་མ་ཐོས་སམ། ཁྱོད་ཀྱི་དུས་ལ་བབ་ཀྱིས་བོབས་ཤིག །དེས་སྨྲས་པ། ཇི་སྲིད་འཚོ་བ་དེ་སྲིད་དུ་འདུག་གོ། །གནོད་སྦྱིན་སེར་སྐྱ་པུས་སྐྱུད་ཀྱིས་བཅིངས་ཏེ་སྒྲིམ་པས་འདུག་ནས་དེ་ཡུར་བ་ན་དེས་དེའི་སྟེང་དུ་གོས་ཤིག་བོར་རོ། །ཁྱི་རྣམས་ཀྱིས་བསམས་པ། འདི་ནི་མི་དེ་ཁོ་ན་ལྷུང་བ་ཡིན་ནོ་སྙམ་ནས་དེ་རྣམས་ཀྱིས་གནོད་སྦྱིན་སེར་སྐྱ་ཟོས་ནས་དོང་ངོ་། །དེ་ལྗོན་ཤིང་ལས་དལ་གྱིས་དལ་གྱིས་བབས་ཏེ་སོང་ནས་དེ་དེ་དང་དེ་ན་འཁོར་ཞིང་བསམས་པ། བདག་གི་ཞང་པོ་དྲང་སྲོང་རྣམས་ཀྱི་ནང་དུ་རབ་ཏུ་བྱུང་བ་ཞིག་ཡོད་ཀྱིས་དེའི་དྲུང་དུ་འགྲོའོ་ སྙམ་ནས་དྲང་སྲོང་དེ་ལ་ཡང་རི་འོར་ཞིག་ན་སྐྱེད་མོས་ཚལ་རྩ་བ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་ཤིང་རྣམ་པ་སྣ་ཚོགས་ཚང་ཚིང་གིས་མཛེས་པར་བྱས་པ། བྱ་སྣ་ཚོགས་སྐད་འབྱིན་པ་ཞིག་ཡོད་དེ་དེ་རིམ་གྱིས་ཐོས་པ་གཅིག་ནས་གཅིག་ཏུ་བརྒྱུད་དེ་དེའི་

  1091. 236a

    དྲུང་དུ་འོངས་ནས་གཉེན་དུ་འབྲེལ་བས་སྨྲས་ཏེ་འདུག་གོ། །དེར་ཡང་རྒྱལ་པོའི་མི་རྣམས་ཀྱིས་བཙལ་ཏེ་དེ་རྣམས་ཀྱིས་དེ་གཟུང་བར་བརྩམས་པ་ལས་དེས་རིའི་གཡང་ས་ནས་བདག་ཉིད་མཆོངས་སོ། །དེ་མཆོངས་པ་དང་མི་ཞིག་གིས་གཙུག་པུད་ནས་བཟུང་བ་ལས་གཙུག་ པུད་བྱུང་ནས་དེ་ལྷུང་ངོ་། །དེ་རྣམས་ཀྱིས་བསམས་པ་འདི་ནི་ཤི་བས་འདོང་ངོ་ཞེས་གཙུག་པུད་ཁྱེར་ཏེ་རྒྱལ་པོའི་དྲུང་དུ་སོང་ནས། དེ་རྣམས་ཀྱིས་སྨྲས་པ། ལྷ་ཉ་པའི་ཁྱེའུ་སྙན་དངགས་མཁན་དེ་བཀུམ་ནས་གཙུག་པུད་ཀྱང་འདི་ལགས་སོ། །རྒྱལ་པོ་མགུ་ནས་དེས་དེ་རྣམས་ལ་ལོངས་སྤྱོད་ ཀྱིས་བགོ་བཤའ་བྱས་སོ། །དེ་ནས་དྲང་སྲོང་གི་སྐྱེད་མོས་ཚལ་ན་གནས་པའི་ལྷ་གང་ཡིན་པ་དེས་དྲང་སྲོང་དེ་ལ་སྨྲས་པ། ཁྱོད་ཀྱི་ཚ་བོ་ནི་སྡུག་བསྔལ་མི་བཟད་པ་དོག་པ་ཉམ་ང་བ་ཐོབ་ན་མ་དགོངས་སམ། དེས་སྨྲས་པ། གལ་ཏེ་བདག་གིས་མ་བསམས་པར་གྱུར་ན་དེ་རིང་ཉིད་དུ་སྲོག་དང་ བྲལ་བར་འགྱུར་རོ། །དྲང་སྲོང་དེ་ནི་རིག་སྔགས་དང་གསང་སྔགས་འཆང་བ་ཡིན་ཏེ། གང་གིས་ནི་སྐྱེས་པ་བུད་མེད་དུ་འགྱུར་ཞིང་ཕྱིར་ཡང་སྐྱེས་པར་འགྱུར་བ་དེ་ལྟ་བུའི་རིག་སྔགས་ཤེས་པས་དེས་དེ་ལ་རིག་སྔགས་དེ་བསླབས་ཏེ་སྨྲས་པ། ད་ནི་སོང་ལ་འཇིགས་པ་དང་བག་ཚ་བ་མེད་པས་འདུག་ ཤིག །དེས་རིག་སྔགས་ཀྱིས་དཔེས་བསྐྲུན་པར་མི་ནུས་པའི་བུད་མེད་ཀྱི་ཆ་བྱད་དུ་མངོན་པར་སྤྲུལ་ནས་བཱ་རཱ་ཎ་སཱིར་སོང་སྟེ། རྒྱལ་པོའི་སྐྱེད་མོས་ཚལ་ན་འདུག་པ་སྐྱེད་མོས་ཚལ་གྱི་སྲུང་མས་མཐོང་ནས་མཆོག་ཏུ་ངོ་མཚར་སྐྱེས་ཏེ་དེས་མྱུར་བ་མྱུར་བར་སོང་ནས་རྒྱལ་པོ་ཉི་མའི་མུ་ཁྱུད་ལ་སྨྲས་པ། ལྷ་སྐྱེད་མོས་ཚལ་ན་བུད་མེད་གཟུགས་ཕུན་སུམ་ཚོགས་པ་དར་ལ་བབ་བ་ཞིག་མཆིས་སོ། །དེས་བསྒོ་བ་ཁྲིད་དེ་ཤོག་ཤིག །དེས་དཔལ་གྱི་འབྱོར་བ་ཆེན་པོས་བླངས་ཏེ་རྒྱལ་པོའི་ཕོ་བྲང་དུ་ཁྲིད་ནས་དེ་ལ་རྒྱལ་པོ་ཉི་མའི་མུ་ཁྱུད་ལྷག་པར་ཆགས་པར་གྱུར་པ་དང་དེས་སྐབས་རྙེད་ནས་དབེན་པ་ན་ འདུག་པ་ལ་བསད་དེ་སླར་ཡང་རིག་སྔགས་བཟླས་ཏེ་སྐྱེས་པར་གྱུར་པ་དང་། དེ་ནས་རང་ཉིད་ཀྱིས་ཅོད་པན་བཅིངས་ཏེ་བློན་པོ་ཕྱུགས་འདུག་ལ་གོ་བར་བྱས་ནས་རྒྱལ་སྲིད་ལ་འདུག་གོ། །ལྷས་ཚིགས་སུ་བཅད་དེ་སྨྲས་པ། གང་གིས་མགོ་མ་བཅད་པ་དེ་བསད་མིན། ཕྱིར་ཡང་ལངས་ནས་

  1092. 236b

    ལས་ནི་བྱེད་པར་འགྱུར། །ཇི་ལྟར་སྙན་དངགས་མཁན་དེ་གླགས་རྙེད་ནས། །སྲ་རྩི་ཅན་བུ་ལྟ་བུ་དེ་བསད་ཡིན། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་སྲ་རྩི་ལྡན་གྱི་བུ་ཉི་མའི་མུ་ཁྱུད་ཅེས་བྱ་བ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་སྙན་ དངགས་མཁན་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་འདིས་ང་ལ་ཤར་གཉེར་ལ་ད་ལྟར་ཡང་འདིས་ཤར་གཉེར་རོ། །གཞན་ཡང་ཇི་ལྟར་འདིས་ང་ལ་ཤར་གཉེར་བ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ནོར་བུ་མཁན་གཉིས་ཤིག་གནས་ཏེ་དེ་གཉིས་ཀྱིས་ལམ་པོ་ཆེ་ དང་གྲོང་བགོས་སོ། །དེའི་ཚེ་ཚོང་པ་འབྱོར་པ་ཡོངས་སུ་ཟད་པ་ཞིག་ཡོད་པ་དེ་ནོར་བུའི་སྣོད་ཁྱེར་ནས་རི་འོར་དེར་ཕྱིན་ཏོ། །ད་ནས་ལམ་གྱིས་དུབ་པ་ངལ་སོས་ནས་ནོར་བུ་མཁན་གཅིག་གི་དྲུང་དུ་སོང་སྟེ་སྨྲས་པ། ནོར་བུའི་སྣོད་འདི་རིན་ཐང་ཆོད་ཅིག །དེས་དེའི་རིན་ཐང་ཆུང་ངུ་ཞིག་ཏུ་ བཅད་པ་དང་། དེས་སྨྲས་པ། འདི་ལྟར་ཁོ་བོ་ལོངས་སྤྱོད་ལས་ཉམས་ཀྱང་ཤེས་རབ་ལས་མ་ཡིན་པས་ཁོ་བོས་འདི་ཅི་རི་བ་ལྟ་ཤེས་ན། དེ་སྐད་དུ་སྨྲ་བ་ཅིའི་ཐ་ཚིག །དེ་དེའི་དྲུང་ནས་ལོག་པ་སྟེ། ཅིག་ཤོས་ཀྱི་དྲུང་དུ་སོང་ནས་སྨྲས་པ། ནོར་བུའི་སྣོད་འདི་རིན་ཐང་ཆོད་ཅིག ། དེས་དེའི་རིན་ཐང་ཐོག་ཏུ་བབ་པར་བཅད་ནས་དེས་སྨྲས་པ། འདི་སྙེད་ཀྱི་རིན་ཐང་རེ་ཞིག་བདག་ལ་མི་བདོག་གོ། །དེས་སྨྲས་པ། ཅི་བདོག་པ་དེ་བྱིན་ལ་ཁྱེར་ཅིག །དེས་བླངས་སོ། །ནོར་བུ་མཁན་ཅིག་ཤོས་པོ་དེས་ཐོས་ནས། དེ་མི་བཟོད་པ་སྐྱེས་ཏེ། དེའི་དྲུང་དུ་སོང་ནས་བདག་ གིས་འདི་ཐོག་མར་ཁྱིམ་དུ་ཁྲིད་ཅིང་བདག་གིས་འདིའི་རིན་ཐང་ཡང་བཅད་ན་ཁྱོད་ཀྱིས་ཅིའི་ཕྱིར་བཀུར། དེ་གཉིས་ཕན་ཚུན་འཁོན་བྱུང་བར་གྱུར་ཏོ། །དགེ་སློང་དག་དེ་ཇི་སྙམ་དུ་སེམས། དེའི་ཚེ་དེའི་དུས་ཀྱི་ནོར་བུ་མཁན་ནོར་བུའི་སྣོད་རིན་ཐང་ཆུང་ངུར་གཅོད་པ་གང་ཡིན་པ་དེ་ནི་ལྷ་སྦྱིན་ འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ནོར་བུ་མཁན་ཅིག་ཤོས་རིན་ཐང་ཐོག་ཏུ་བབ་པར་གཅོད་པ་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་ངེད་ཕན་ཚུན་མི་མཐུན་པར་གྱུར་ཏེ། ད་ལྟར་ཡང་ངེད་ཕན་ཚུན་མི་མཐུན་པར་གྱུར་ཏོ། །གཞན་ཡང་ཇི་ལྟར་ངེད་མི་མཐུན་པར་གྱུར་པ་

  1093. 237a

    དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་ མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ནས་དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་སོ། །བཙས་ནས་དེའི་ཆུང་མ་ཤིའོ། །དེས་བསམས་པ། ཁྱེའུ་གསོར་གཞུག་པའི་ཕྱིར་གཞན་ཞིག་བླང་ངོ་སྙམ་ནས་དེས་གཞན་ཞིག་བླངས་ཏེ། དེ་ དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དེ་ལས་ཀྱང་ཁྱེའུ་ཞིག་བཙས་ནས་དེ་ཡང་ཤིའོ། །ཁྱིམ་བདག་དེས་བསམས་པ། གལ་ཏེ་གཞན་བླངས་ན་དེ་ཡང་ཤི་བར་འགྱུར་གྱིས་ཁྱེའུ་ཕུ་བོ་ཤོས་ཀྱི་ཁྱིམ་དབུབ་པར་བྱའོ་སྙམ་ནས་དེའི་ཁྱེའུ་ཕུ་བོ་ཤོས་ཀྱི་ ཁྱིམ་ཕུབ་པ་ལས་དེ་ལས་ཁྱེའུ་དང་བུ་མོ་མང་དུ་བཙས་སོ། །དེའི་ཆུང་མ་དེས་སྨྲས་པ། རྗེའི་སྲས་ཁྱེའུ་འདི་ཁྱོད་ཀྱི་ཅིར་མཆི། དེས་སྨྲས་པ། སྤུན་དུ་འོང་སྟེ་ནུ་བོ་ཡིན་ནོ། །དེས་སྨྲས་པ། རྗེའི་སྲས་ཁྱོད་ལ་ནི་སྲས་མང་ལ། འདི་ནི་གཅིག་པུ་ལགས་ན། འདི་དག་དང་འདིའི་ ཁྱིམ་དང་ལོངས་སྤྱོད་མཉམ་པར་སྩལ་ལམ། དེས་སྨྲས་པ། བཟང་མོ་འདི་ནི་འཇིག་རྟེན་གྱི་ཆོས་ཡིན་ནོ། །དེས་སྨྲས་པ། རྗེའི་སྲས་གལ་ཏེ་དེ་ལྟ་ན་འདི་ཁུམ་ཤིག །འདོད་པ་ལ་སོ་སོར་སེན་པ་ནི་སྡིག་པའི་ལས་མི་བྱེད་པ་ཅི་ཡང་མེད་པས་དེས་དེ་མེ་ཏོག་དང་འབྲས་བུ་ལ་བྲིད་ནས་ དགོན་པར་ཁྲིད་དེ་རྡོས་བསྣུན་ཏེ་བསད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་གི་བུ་ཕུ་བོ་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ནུ་བོ་ཤོས་གང་ཡིན་པ་དེ་ནི་ང་ཉིད་ཡིན་ཏེ། དེ་ན་ཡང་འདིས་ང་ལ་མི་མཐུན་པར་བྱས་སོ། །ད་ ལྟར་ཡང་འདིས་ང་ལ་མི་མཐུན་པར་བྱས་སོ། །གཞན་ཡང་ངེད་ཇི་ལྟར་མི་མཐུན་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་བྲམ་ཟེ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་

  1094. 237b

    མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཆུང་མ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་བུ་མོ་གཟུགས་བཟང་བ་བལྟ་ན་སྡུག་པ་མཛེས་པ་ཞིག་བཙས་སོ། །བྲམ་ཟེ་དེས་བསམས་པ། དེ་རིང་ བདག་གི་ཁྱིམ་དུ་བྲམ་ཟེ་སུ་བསོད་སྙོམས་ཀྱི་ཕྱིར་ཞུགས་པ་དེ་ལ་བུ་མོ་འདི་བསོད་སྙོམས་ཀྱི་གོར་སྦྱིན་ནོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་ཞིག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་ནས་བཀྲ་ཤིས་པར་གྱུར་ཅིག །བསོད་སྙོམས་བྱིན་ཅིག །བྲམ་ཟེ་དེས་དེ་ལ་བོས་ཏེ་སྨྲས་པ། བྲམ་ཟེའི་ཁྱེའུ་བུ་མོ་གཞོན་ནུ་འདི་བདག་གིས་ཁྱོད་ལ་བསོད་སྙོམས་ཀྱི་གོར་སྦྱིན་ནོ། །དེས་སྨྲས་པ། དེ་རིང་མི་བླང་གི་ཉི་མ་དང་ཡུད་ཙམ་དག་བསྟུན་ནས་བླང་ངོ་ཞེས་སོང་ངོ་། །ཇི་ཙམ་ན་བྲམ་ཟེའི་ཁྱེའུ་གཞན་ཞིག་བསོད་སྙོམས་ཀྱི་ཕྱིར་དེའི་ཁྱིམ་དུ་ཞུགས་ནས་བཀྲ་ཤིས་པར་ གྱུར་ཅིག །བསོད་སྙོམས་བྱིན་ཅིག །བྲམ་ཟེ་དེས་དེ་ལ་སྨྲས་པ། བྲམ་ཟེའི་ཁྱེའུ་བུ་མོ་གཞོན་ནུ་འདི་བདག་གིས་ཁྱོད་ལ་བསོད་སྙོམས་ཀྱི་གོར་སྦྱིན་ནོ། །དེས་སྨྲས་པ། འདིར་བྲམ་ཟེའི་ཁྱེའུ་གཞན་ཞིག་བསོད་སྙོམས་ལ་ཞུགས་ན་དེ་ལ་ཅིའི་ཕྱིར་མ་བྱིན། དེས་སྨྲས་པ། དེ་ན་རེ་རྒྱུ་སྐར་མི་བཟང་ཞེས་ཟེར་རོ། །དེས་སྨྲས་པ། གལ་ཏེ་དེ་ལྟར་ན་བླང་བར་བགྱིའོ། །བྲམ་ཟེས་སྨྲས་པ། ཁྱོད་རྒྱུ་སྐར་ལ་ཅིའི་ཕྱིར་མི་སྡོད། དེས་ཚིགས་སུ་བཅད་དེ་སྨྲས་པ། དོན་རྣམས་གྲུབ་པར་གྱུར་ན་ནི། །དེ་དག་ཐམས་ཅད་མཐུན་པ་སྟེ། །རྒྱུ་སྐར་ཐམས་ཅད་བཟང་པོ་ ཡིན། །ཉི་མ་ཐམས་ཅད་དགེ་བ་ཡིན། །རྒྱུ་སྐར་རྩི་བ་ལྷུར་ལེན་པའི། །མི་རྣམས་དོན་ནི་ཉམས་འགྱུར་ཏེ། །འདི་ཡི་དོན་ནི་རྒྱུ་སྐར་ཡིན། །སྐར་མ་རྣམས་ཀྱིས་ཅི་ཞིག་བྱ། །ཞེས་སྨྲས་ནས་དེས་ཁྱེར་ཏེ་སོང་ངོ་། །བྲམ་ཟེ་གཞན་པོ་དེས་བྲམ་ཟེ་དེ་ལས་བྲམ་ཟེ་ཆེ་གེ་མོ་ ཞེས་བྱ་བས་བུ་མོ་ཁྱེར་རོ་ཞེས་ཐོས་ནས་དེ་དེའི་དྲུང་དུ་སོང་སྟེ་སྨྲས་པ། བྲམ་ཟེའི་ཁྱེའུ་བདག་གི་བུ་མོ་དེ་སྔར་ཐོབ་ཟིན་ན་ཁྱོད་ཀྱིས་ཅིའི་ཕྱིར་བཀུར། དེས་སྨྲས་པ། རྒྱུ་སྐར་རྩི་བ་ལྷུར་ལེན་པ་ཁྱོད་རེ་ཞིག་རྒྱུ་སྐར་ལ་རྟོགས་ཤིག །ཁོ་བོ་ལ་ནི་རྒྱུ་སྐར་བཟང་ངོ་ཞེས་བྱས་པ་དང་དེ་

  1095. 238a

    ཁྲོས་པར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་སྔ་མ་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་ཕྱི་མ་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེ་ན་ཡང་འདི་ང་ལ་མི་ མཐུན་པར་གྱུར་ཏོ། །ད་ལྟར་ཡང་འདི་ང་དང་མི་མཐུན་པར་གྱུར་ཏོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་རྒྱལ་པོ་མ་སྐྱེས་དགྲའི་གླང་པོ་ཆེ་གདུག་པ་ནོར་སྐྱོང་ཞེས་བྱ་བ་ཞིག་ཡོད་པ་དེ་ཉིན་རེ་ཞིང་ཁྱིམ་ནས་བྱུང་ བ་ན་སྐྱེ་བོ་མང་པོ་ཁ་འདོག་པར་བྱེད་དོ། །རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཀྱིས་རྒྱལ་པོ་མ་སྐྱེས་དགྲ་ལ་གསོལ་བ་བཏབ་པ། ལྷ་གླང་པོ་ཆེ་གདུག་པ་ནོར་སྐྱོང་གདུགས་རེ་ཞིང་གནས་ནས་བྱུང་བ་ན་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་རྣམས་སུ་སྐྱེ་བོ་མང་པོ་ ཁ་འདོག་པར་བགྱིད་ཀྱིས། ལྷས་གླང་པོ་ཆེའི་འདུལ་མཁན་རྣམས་ལ་བཀའ་སྩལ་ཏེ་ཅི་ནས་གདུགས་རེ་ཞིང་མི་འབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་སུ་སྩལ་བའི་རིགས་སོ། །རྒྱལ་པོས་སྨྲས་པ། དེ་བཞིན་དུ་བྱས་ཁྱེད་དེང་ཤིག །རྒྱལ་པོས་བློན་པོ་རྣམས་ལ་བསྒོ་ བ། ཤེས་ལྡན་དག་གླང་པོ་ཆེའི་འདུལ་མཁན་རྣམས་ཁུག་ཤིག །དེ་རྣམས་ཀྱིས་གླང་པོ་ཆེའི་འདུལ་མཁན་རྣམས་བཀུག་པ་དང་། རྒྱལ་པོས་སྨྲས་པ། ཤེས་ལྡན་དག་རྒྱལ་པོའི་ཁབ་ན་གནས་པའི་སྐྱེ་བོའི་ཚོགས་ཀྱིས་ང་ལ་གསོལ་བ། གླང་པོ་ཆེ་གདུག་པ་ནོར་སྐྱོང་ གདུགས་རེ་ཞིང་གནས་ནས་བྱུང་བ་ན་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་རྣམས་སུ་སྐྱེ་བོ་མང་པོ་ཁ་འདོག་པར་བགྱིད་ཀྱིས། ལྷས་གླང་པོ་ཆེ་འདུལ་མཁན་རྣམས་ལ་བཀའ་སྩལ་ཏེ། ཅི་ནས་གདུགས་རེ་ཞིང་མི་དབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་སུ་སྩལ་བའི་རིགས་ སོ་ཞེས་གསོལ་གྱིས། ཁྱེད་ཀྱིས་དེ་ཉིན་རེ་ཞིང་མ་དབྱུང་བར་སང་ལྟ་བུ་འབྱིན་པ་ན་ཡང་དྲིལ་སྒྲོགས་ཤིག །ལྷ་བཀའ་བཞིན་འཚལ་ཞེས་གླང་པོ་ཆེའི་འདུལ་མཁན་རྣམས་ཀྱིས་རྒྱལ་པོ་མ་སྐྱེས་དགྲ་ལས་མཉན་ནས་རྐང་པ་ལ་གཏུགས་ཏེ་དོང་ངོ་། །རྒྱལ་པོའི་ཁབ་ན་ཁྱིམ་བདག་ཕྱུག་

  1096. 238b

    པ་ནོར་མང་བ་ལོངས་སྤྱོད་ཆེ་བ་ཞིག་གནས་པ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་སོ། །ལྷ་སྦྱིན་གྱིས་ཇི་ལྟར་ཁྱིམ་བདག་ཆེ་གེ་མོ་ཞིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་ དྲངས་པ་ཐོས་ནས་དེས་གླང་པོ་ཆེའི་འདུལ་མཁན་ལ་མུ་ཏིག་གི་དོ་ཤལ་བརྒྱ་སྟོང་རི་བ་བྱིན་ནས་སྨྲས་པ། ཁྱིམ་བདག་ཆེ་གེ་མོས་དགེ་སྦྱོང་གཽ་ཏ་མ་ཉན་ཐོས་ཀྱི་དགེ་འདུན་དང་ཐབས་ཅིག་སང་ཁྱིམ་དུ་གདུགས་ཚོད་ལ་སྤྱན་དྲངས་ཀྱིས་དེ་ལ་ཁྱོད་ཀྱིས་གླང་པོ་ཆེ་ནོར་སྐྱོང་རྦོད་ཅིག །དེས་ སྨྲས་པ། འཕགས་པ་དེ་བཞིན་དུ་བགྱི་ལགས་ཀྱིས། འོན་ཀྱང་འོལ་བྱི་ལྷ་ལ་ཡང་མཁྱེན་པར་མཛོད་ཅིག །དེ་ནས་ལྷ་སྦྱིན་རྒྱལ་པོ་མ་སྐྱེས་དགྲ་གང་ན་བ་དེར་སོང་སྟེ་ཕྱིན་ནས། རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཁྱོད་ཀྱིས་ནི་བདག་སངས་རྒྱས་ཉིད་དུ་གཞུག་ མ་ནུས་ན་ཁྱོད་ཀྱིས་ཡབ་སྲོག་དང་བྲལ་ནས་རྒྱལ་སྲིད་ལ་འདུག་ན་བདག་གིས་ཀྱང་དགེ་སྦྱོང་གཽ་ཏ་མ་བསད་ལ་ཐམས་ཅད་མཁྱེན་པ་ཉིད་བྱས། གླང་པོ་ཆེ་དམ་པ་ནོར་སྐྱོང་རྦོད་ཅིག །མ་སྐྱེས་དགྲས་སྨྲས་པ། ཁྱོད་ཀྱིས་སངས་རྒྱས་བཅོམ་ལྡན་འདས་རྣམས་ནི་མ་ཐུལ་བ་འདུལ་བར་མཛད་ པ་ཡིན་ནོ་ཞེས་མ་ཐོས་སམ། དེས་སྨྲས་པ། གལ་ཏེ་མ་དུལ་བ་འདུལ་བ་ཡིན་པར་གྱུར་ན་འདིས་རེ་ཞིག་བདག་ཁོ་ན་འདུལ་བར་འགྱུར་གྲང་ཞེས་དེས་དེ་ལ་འོལ་བྱི་སྨྲས་ནས། གླང་པོ་ཆེའི་འདུལ་མཁན་རྣམས་ཀྱི་དྲུང་དུ་སོང་སྟེ་སྨྲས་པ། ལྷ་ལ་ཡང་བདག་གིས་རིག་པར་བྱས་ཀྱིས་ཁྱོད་ ཀྱིས་སང་གླང་པོ་ཆེ་དམ་པ་ནོར་སྐྱོང་རྦོད་ཅིག །དེ་ནས་གླང་པོ་ཆེའི་འདུལ་མཁན་རྣམས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་དུ་དྲིལ་བསྒྲགས་ནས་རྒྱལ་པོའི་ཁབ་ན་གནས་པའི་གྲོང་མི་ཤེས་ལྡན་དག་ཉོན་ཅིག །སང་གླང་པོ་ཆེ་དམ་པ་ནོར་སྐྱོང་གཏོང་གིས་དེ་བས་ན་ཁྱེད་ཅག་ཐམས་ཅད་སང་རང་ རང་སྲུང་བ་ལ་སྒྲིམས་ཤིག་ཅེས་བསྒྲགས་པ། ཁྱིམ་བདག་དེས་ཐོས་ནས་བདག་འདྲ་བ་བྱུར་ངན་པ་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་ཁྱིམ་དུ་གདུགས་ཚོད་ལ་སྤྱན་དྲངས་ན་གླང་པོ་ཆེ་གདུག་པ་ནོར་སྐྱོང་ཡང་སང་གཏོང་ན་བདག་གིས་སངས་རྒྱས་ལ་སོགས་པ་དགེ་

  1097. 239a

    སློང་གི་དགེ་འདུན་ཇི་ལྟར་གདུགས་ཚོད་གསོལ་བར་བྱ་སྙམ་སྟེ་སེམས་ཁོང་དུ་ཆུད་ཅིང་འདུག་གོ། །ཡང་བསམས་པ། གཡོས་བྱས་ལ་དེ་ཉིད་དུ་ཁྱེར་ཏེ་བཅོམ་ལྡན་འདས་གདུགས་ཚོད་གསོལ་ལོ་སྙམ་ནས་དེས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་ བ་དང་བཅའ་བ་དག་སྟ་གོན་བྱས་ནས་ནང་པར་སྔར་ལངས་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས་བཅོམ་ལྡན་འདས་རྒྱལ་པོའི་ཁབ་ཏུ་དྲིལ་བསྒྲགས་པ། སང་གླང་པོ་ཆེ་དམ་པ་ནོར་སྐྱོང་གཏོང་གིས་ཁྱེད་ཅག་རང་རང་སྲུང་བ་ལ་སྒྲིམས་ཤིག་ཅེས་མཆི་བས། དེ་བས་ན་བཅོམ་ ལྡན་འདས་རྒྱལ་པོའི་ཁབ་ཏུ་མ་གཤེགས་ཤིག །ཞལ་ཟས་དང་བཏུང་བ་འཚལ་ཏེ་བདག་འདི་ཉིད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཁྱོད་སེམས་ལས་ཆུང་ངུར་གྱིས་ལ་ཞལ་ཟས་དང་བཏུང་བ་སྟ་གོན་བྱོས་ཤིག་དང་། དེ་བཞིན་གཤེགས་པ་ ནི་གླང་པོ་ཆེའི་བསྙེངས་པ་དང་བྲལ་བ་ཡིན་པས་ང་ཉན་ཐོས་ཀྱི་དགེ་འདུན་དང་ཐབས་ཅིག་རྒྱལ་པོའི་ཁབ་ཏུ་གཤེགས་སོ། །དེ་ནས་ཁྱིམ་བདག་ཡིད་དགའ་ནས་རང་གི་ཁྱིམ་དུ་སོང་སྟེ་ཞལ་ཟས་དང་བཏུང་བ་སྟ་གོན་བྱས་གདན་བཤམས་ནས་བཅོམ་ལྡན་འདས་ལ་སྡོད་ཅིང་འདུག་གོ། ། དེ་ནས་བཅོམ་ལྡན་འདས་སྔ་དྲོ་ན་བཟའ་ཆོས་གོས་མནབས་ལྷུང་བཟེད་བསྣམས་ཏེ་དགེ་སློང་ལྔ་བརྒྱ་དང་ཐབས་ཅིག་རྒྱལ་པོའི་ཁབ་ཏུ་ཞུགས་པ་ན་གླང་པོ་ཆེ་དམ་པ་ནོར་སྐྱོང་ཡང་རྦད་དོ། །གླང་པོ་ཆེའི་དམ་པ་ནོར་སྐྱོང་གིས་བཅོམ་ལྡན་འདས་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ འགྱིང་ཞིང་སྐད་ཕྱུང་ནས་བཅོམ་ལྡན་འདས་གང་ན་བ་དེ་ལོགས་སུ་མོད་ལ་ཤུགས་ཅི་ཡོད་པས་བང་ཐག་པས་བརྒྱུགས་སོ། །དེ་ནས་ལྷ་སྦྱིན་མ་སྐྱེས་དགྲའི་གྲོགས་ཅན་སྟེང་གི་ཁང་བཟངས་ཀྱི་གཞིར་འཛེགས་ནས་དགེ་སྦྱོང་གཽ་ཏ་མ་གསོད་པ་ལ་ལྟ་ཞིང་འདུག་གོ། །དེ་ནས་ལྷ་སྦྱིན་གྱིས་བཅོམ་ལྡན་འདས་ དེ་མཐོང་ནས་དགའ་བ་དང་། མགུ་བ་དང་། རབ་ཏུ་དགའ་བས་གསང་བསྟོད་དེ་ཚིགས་སུ་བཅད་པས་སྨྲས་པ། གླང་པོ་ཆེ་ཡི་ལས་བལྟས་ན། །ཁྱོད་ནི་གླང་ཆེན་མཐུས་བརྫིས་ནས། །ཤཱཀྱའི་བུ་ཁྱོད་དེ་རིང་དུ། །ཉན་ཐོས་བཅས་ཏེ་རེ་སྙམ་མེད། །བཅོམ་ལྡན་འདས་ཀྱིས་བཀའ་

  1098. 239b

    སྩལ་པ། ལྷ་སྦྱིན་ངན་ཁྱོད་ང་ལ་ནི། །ཁྱད་གསོད་ཅོ་འདྲི་སྨྲ་བར་བྱེད། །སྟོབས་བཅུའི་སྟོབས་ལྡན་རྨད་བྱུང་བའི། །སྟོབས་ཀྱི་མཐུ་ལ་ད་ལྟོས་ཤིག །དེ་ནས་བཅོམ་ལྡན་འདས་ཀྱིས་ཕྱག་གཡས་པའི་མཐིལ་ནས་སེང་གེ་རལ་པ་ཅན་ལྔ་སྤྲུལ་ཏོ། །དེས་དེ་རྣམས་ཀྱི་དྲི་ཚོར་ནས་ གཅིན་དང་རྟུག་པ་ཤོར་ཏེ་འབྲོས་པར་བརྩམས་པ་ན། བཅོམ་ལྡན་འདས་ཀྱིས་ཉིད་ཀྱི་ཞབས་ཀྱི་དྲུང་གྲང་ཞིང་བསིལ་བར་གྱུར་པ་མ་གཏོགས་པར་ཕྱོགས་ཐམས་ཅད་འབར་རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པར་བྱིན་གྱིས་བརླབས་སོ། །དེ་ནས་གླང་ པོ་ཆེ་དམ་པ་ནོར་སྐྱོང་ཕན་ཚུན་དུ་བརྒྱུག་པར་བརྩམས་པ་ན་བཅོམ་ལྡན་འདས་ཀྱི་ཞབས་ཀྱི་དྲུང་དུ་གྲང་ཞིང་བསིལ་བར་གྱུར་པ་མ་གཏོགས་པར་ཕྱོགས་ཐམས་ཅད་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། །མེ་ལྕེ་གཅིག་ཏུ་གྱུར་པར་མཐོང་ངོ་། །ནོར་སྐྱོང་འཁྲུགས་པ་མཐོང་ ནས་ཚེ་དང་ལྡན་པ་ཀུན་དགའ་བོ་མ་གཏོགས་པར་དགེ་སློང་ཐམས་ཅད་བྲོས་སོ། །དེ་ནས་ནོར་སྐྱོང་དྲེགས་པའི་ཤུགས་དང་བྲལ་ནས་དལ་གྱིས་འགྲོ་བའི་འགྲོས་ཀྱིས་བཅོམ་ལྡན་འདས་ཀྱི་སྤྱན་སྔར་སོང་བ་དང་། བཅོམ་ལྡན་འདས་ཀྱི་ཕྱག་འཁོར་ལོ་དང་། བཀྲ་ཤིས་དང་། །གཡུང་ དྲུང་འཁྱིལ་བས་བརྒྱན་པ། བསོད་ནམས་བརྒྱ་ཕྲག་དུ་མས་བསྐྱེད་པ། སྐྲག་པ་རྣམས་དབུགས་འབྱིན་པར་མཛད་པས་དེའི་མགོ་ལ་བྱུགས་ནས་ཚིགས་སུ་བཅད་དེ་བཀའ་སྩལ་པ། གླང་ཆེན་གཙོ་བོ་ལ་ནི་ཐོ་མ་འཚམ། །གླང་ཆེན་དེ་ལ་ཐོ་འཚམ་སྡུག་བསྔལ་འགྱུར། །གཙོ་ལ་གནོད་ པ་བྱས་པ་ཕ་རོལ་ཏུ། །འགྲོ་བ་བཟང་པོར་འགྱུར་བ་མ་ཡིན་ནོ། །བཞིན་བཟངས་ཁྱོད་རེ་ཞིག་སྔོན་གྱི་ཉེས་པར་སྤྱད་པས་དམན་པ་དུད་འགྲོའི་སྐྱེ་གནས་སུ་སྐྱེས་ན་ཁྱོད་ད་དུང་གཞན་གྱི་སྲོག་གཅོད་ཅིང་གཞན་གྱི་སྲོག་གཅོད་པས་ཡོངས་སུ་དགའ་བར་བྱེད་པ་འདི་ནས་ཤི་འཕོས་ན་ཁྱོད་ཀྱི་འགྲོ་ བ་ནི་ཅིར་འགྱུར། སྐྱེ་བ་ནི་གང་ཚེ་ཕྱི་མ་ནི་ཅིར་འགྱུར། བཞིན་བཟངས་དེ་ལྟ་བས་ན་འདུ་བྱེད་ཐམས་ཅད་ནི་སྡུག་བསྔལ་བ། ཆོས་ཐམས་ཅད་ནི་བདག་མེད་པ། མྱ་ངན་ལས་འདས་པ་ནི་ཞི་བ་ཡིན་གྱིས། ང་ལ་སེམས་མངོན་པར་དད་པར་གྱིས་ལ་ཅི་ནས་ཀྱང་དུད་

  1099. 240a

    འགྲོའི་སྐྱེས་གནས་ལ་འདོད་ཆགས་དང་བྲལ་བར་གྱིས་ཤིག་ཅེས་བཀའ་སྩལ་ནས་ཁྱིམ་བདག་གི་ཁྱིམ་གང་ན་བ་དེར་གཤེགས་ཏེ་བྱོན་ནས་གདན་བཤམས་པ་ཉིད་ལ་བཞུགས་སོ། །ནོར་སྐྱོང་ཡང་བཅོམ་ལྡན་འདས་ཀྱི་རྗེས་བཞིན་རྗེས་བཞིན་སོང་སྟེ་ བཅོམ་ལྡན་འདས་ནང་དུ་གཤེགས་པ་ན་སྒོ་དྲུང་དུ་སྡོད་པ་ལས་བཅོམ་ལྡན་འདས་མ་མཐོང་ནས་ཁྱིམ་གཞིག་པར་བརྩམས་སོ། །བཅོམ་ལྡན་འདས་ཀྱིས་ཁྱིམ་དེ་ཤེལ་གྱི་རང་བཞིན་དུ་སྤྲུལ་ནས་དེ་ལ་སངས་རྒྱས་ཀྱི་སྐུ་སྒྲིབ་པ་མེད་པར་སྣང་ངོ་། །དེས་བཅོམ་ལྡན་འདས་མཐོང་ནས་དེ་མ་ བཤིག་གོ། །བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་གདུགས་ཚོད་གསོལ་ནས་ཡོན་བསྔོ་བ་མཛད་དེ་གཤེགས་སོ། །དེ་བཅོམ་ལྡན་འདས་ཀྱི་རྗེས་བཞིན་རྗེས་བཞིན་སོང་བའི་སྐབས་དེ་བློན་པོ་རྣམས་ཀྱིས་རྒྱལ་པོ་ལ་རིག་པར་བྱས་སོ། །མ་སྐྱེས་དགྲས་ལྷ་སྦྱིན་ ལ་སྨྲས་པ། ཁྱོད་ཀྱིས་བདག་ལ་གནོད་པ་བྱས་ཏེ། གླང་པོ་ཆེ་དམ་པ་འདི་ལ་བརྟེན་ནས་མཚམས་གཞན་གྱི་རྒྱལ་པོ་རྣམས་ཁོ་བོ་ལ་གནོད་པ་བྱེད་པར་མི་འགྱུར་ན་དེ་ཡང་ཁྱོད་ཀྱིས་དུལ་བར་བྱས་སོ། །དེ་ཅང་མི་སྨྲ་བར་འདུག་གོ། །རྒྱལ་པོས་བློན་པོ་རྣམས་ལ་བསྒོ་བ། གང་ གི་ཚེ་བཅོམ་ལྡན་འདས་ཕྱིར་བྱུང་བར་གྱུར་པ་དེའི་ཚེ་གླང་པོ་ཆེ་དམ་པ་ནོར་སྐྱོང་ཇི་ལྟར་ཡང་ཁྱོད་ཀྱིས་བཅོམ་ལྡན་འདས་ཀྱི་ཕྱི་བཞིན་འབྲང་བར་མི་འགྱུར་བར་སྒོ་ཆོད་ལ་ཞོག་ཤིག །བློན་པོ་རྣམས་ཀྱིས་གླང་པོ་ཆེ་འདུལ་མཁན་རྣམས་ལ་བསྒོ་བ། གླང་པོ་ཆེ་དམ་པ་ནོར་སྐྱོང་ཇི་ལྟར་ཡང་བཅོམ་ ལྡན་འདས་ཀྱི་ཕྱི་བཞིན་འགྲོ་བར་མི་འགྱུར་བར་སྒོ་ཆོད་ལ་ཞོག་ཤིག །དེས་བཅོམ་ལྡན་འདས་མ་མཐོང་ནས་རྡོག་པས་སྣ་བརྫིས་ནས་ཤི་བ་དང་རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་སོ།། །།འདུལ་བ་གཞི། བམ་པོ་བརྒྱ་རྩ་བཞི་པ། ཆོས་ཉིད་ཀྱིས་ལྷའི་བུའམ་ལྷའི་བུ་མོ་ ནི་སྐྱེས་ནས་རིང་པོར་མ་ལོན་པར་སེམས་གསུམ་སྐྱེ་བར་འགྱུར་ཏེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་ཡིན་པའོ། །དེས་གླང་པོ་ཆེ་ལས་ཤི་འཕོས་པ་དང་། རྒྱལ་ཆེན་བཞིའི་རིས་ཀྱི་ལྷ་རྣམས་སུ་སྐྱེས་པ་དང་། བཅོམ་ལྡན་འདས་ལ་སེམས་

  1100. 240b

    མངོན་པར་དད་པར་བྱས་པ་ཡིན་པར་མཐོང་ནས། དེ་ནས་སྔོན་གླང་པོ་ཆེ་བྱེད་བྱེད་པའི་ལྷའི་བུ་འདི་སྙམ་དུ་སེམས་ཏེ། བདག་ཞག་ལོན་ནས་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་གི་ཆ་མ་ཡིན་གྱིས། མ་ལ་བདག་གིས་ཞག་མ་ལོན་པར་བཅོམ་ལྡན་འདས་ལ་བལྟ་བ་དང་བསྙེན་ བཀུར་བྱ་བའི་ཕྱིར་འགྲོའོ་སྙམ་མོ། །དེ་ནས་སྔོན་གླང་པོ་ཆེ་བྱེད་བྱེད་པའི་ལྷའི་བུ་རྣ་ཆ་དྲི་མ་མེད་ཅིང་གཡོ་བ་ཐོགས་ལ། དོ་ཤལ་དང་སེ་མོ་དོས་ལུས་བརྒྱན་ནས་དེ་ཉིད་ཀྱི་མཚན་མོ་ལྷ་རྣམས་ཀྱི་མེ་ཏོག་ཨུཏྤལ་དང་། པད་མ་དང་། ཀུ་མུད་དང་། པད་མ་དཀར་པོ་དང་། མན་དཱ་ར་ བ་རྣམས་ཀྱིས་ཐུ་བ་བཀང་སྟེ། འོད་མའི་ཚལ་བྱ་ཀ་ལན་ད་ཀའི་གནས་ཐམས་ཅད་སྣང་བ་རྒྱ་ཆེན་པོས་གསལ་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ཏེ་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་གང་ཐོས་པས་འཕགས་པའི་བདེན་པ་བཞི་སོ་སོར་ཡང་དག་པར་རྟོགས་པར་འགྱུར་བ་དེ་ལྟ་བུའི་ཆོས་བཤད་པ་མཛད་པས་སྔོན་གྱི་གླང་པོ་ཆེ་ལྷའི་བུས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་ བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ། བཙུན་པ་བདག་ལ་ཕས་མ་བགྱིས་ཏེ། མས་མ་ལགས། རྒྱལ་པོས་མ་ལགས། ལྷ་རྣམས་ཀྱིས་མ་ལགས། སྡུག་པས་ མ་ལགས། རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས། སྔོན་གྱི་འདས་པས་མ་ལགས། དགེ་སྦྱོང་དང་བྲམ་ཟེས་མ་ལགས་པ་གང་ལགས་པ་དེ་བཅོམ་ལྡན་འདས་ཀྱིས་བདག་ལ་མཛད་དེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་རྣམས་ནི་བཀུམ། མཐོ་རིས་དང་ཐར་པའི་སྒོ་རྣམས་ནི་ཕྱེ། བདག་ལྷ་དང་མི་རྣམས་སུ་ནི་བཞག །ཡང་གསོལ་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་བཞིན་བདག་

  1101. 241a

    གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་ གཡས་ནས་གཡོན་དུ་བསྐོར་བྱས་ནས། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་གླང་པོ་ཆེ་བྱེད་བྱེད་པའི་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཐོག་ལེགས་པ་ལྟ་བུ་དང་། དཔའ་བོ་གཡུལ་ངོ་རྒྱལ་བ་ལྟ་བུ་དང་། ནད་པ་ ནད་ཐམས་ཅད་ལས་ཡོངས་སུ་ཐར་བ་ལྟ་བུར་འབྱོར་པ་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་འབྱོར་པ་དེ་ཉིད་ཀྱིས་རང་གི་གནས་སུ་སོང་ངོ་། །དགེ་སློང་རྣམས་ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་རྗེས་སུ་བརྩོན་པས་གནས་པ་ན། དེ་རྣམས་ ཀྱིས་བཅོམ་ལྡན་འདས་ཀྱི་སྤྱན་སྔ་ན་སྣང་བ་རྒྱ་ཆེན་པོ་མཐོང་ངོ་། །མཐོང་ནས་ཀྱང་ཡིད་གཉིས་སུ་གྱུར་ཏེ་བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་བཅོམ་ལྡན་འདས་ལ་བལྟ་བའི་སླད་དུ་མི་མཇེད་ཀྱི་བདག་པོ་ཚངས་པའམ། ལྷ་རྣམས་ ཀྱི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞི་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ང་བལྟ་བའི་ཕྱིར་འོངས་པ་ནི་མི་མཇེད་ཀྱི་བདག་པོ་ཚངས་པ་ཡང་མ་ཡིན། །ལྷ་རྣམས་ཀྱི་དབང་པོ་བརྒྱ་བྱིན་ཡང་མ་ཡིན། འཇིག་རྟེན་ སྐྱོང་བ་བཞི་ཡང་མ་ཡིན་ཏེ། དེ་ལྟ་མོད་ཀྱི་དགེ་སློང་དག་ཁྱེད་ཀྱིས་གླང་པོ་ཆེ་དམ་པ་ནོར་སྐྱོང་ཞེས་བྱ་བ་འདི་ལྟར་གདུག་པ། འདི་ལྟར་གཏུམ་པ་དེས་དེ་བཞིན་གཤེགས་པ་བགྲོངས་པའི་ཕྱིར་ཕ་རོལ་གནོན་པ་བྱས་པ་གང་ཡིན་པ་དེ་མཐོང་ངམ། བཙུན་པ་མཐོང་ལགས་སོ། །ངས་དེ་

  1102. 241b

    བཏུལ་ནས་ང་ལ་མངོན་པར་དད་པར་བྱས་ཏེ་ཤི་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པ་ཡིན་ཏེ། དེ་མདང་སུམ་ངའི་སྤྱན་སྔར་འོངས་ནས་ངས་དེ་ལ་ཆོས་བཤད་དེ་བདེན་པ་མཐོང་བར་བྱས་ནས་རང་གི་གནས་སུ་སོང་བ་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ནོར་སྐྱོང་གིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་དུད་འགྲོར་སྐྱེས་ལགས། ལས་ཅི་ཞིག་བགྱིས་ན་དེས་ན་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ནས་བདེན་པ་མཐོང་བར་བགྱིས་ལགས། བཅོམ་ ལྡན་འདས་ཀྱིས་བཀའ་སྩལ་པ། དགེ་སློང་དག་ནོར་སྐྱོང་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་ཞེས་བྱ་བ་ནས། ལུས་ཅན་དག་ལ་འབྲས་ བུར་འགྱུར། །ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་སྟོན་པ་སངས་རྒྱས་བཅོམ་ལྡན་འདས། རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་ མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། འོད་སྲུང་ཞེས་བྱ་བ་བྱུང་སྟེ། དེ་གྲོང་ཁྱེར་བཱ་རཱ་ཎ་སཱི་ཞེས་བྱ་བར་ཉེ་བར་བརྟེན་ནས་དྲང་སྲོང་སྨྲ་བའི་རི་དགས་ཀྱི་ནགས་ན་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་སྟེ་ཞལ་ཏ་བྱེད་པ་ན་ དེ་ན་འདི་བསླབ་པའི་གཞི་ཕྲ་མོ་ཕྲ་མོ་རྣམས་ལ་གུས་པར་མ་བྱས་པས་ལས་དེ་ཉིད་ཀྱི་རྣམ་པར་སྨིན་པས་དུད་འགྲོར་སྐྱེས་པར་གྱུར་ཏོ། །དེ་ན་འདིས་དགེ་འདུན་ལ་བཀུར་སྟི་བྱས་པའི་ལས་ཀྱི་རྣམ་པར་སྨིན་པ་གང་ཡིན་པ་དེས་བཟའ་བ་དང་བཏུང་བ་ཐོབ་པར་གྱུར་ཏོ། །ང་ལ་སེམས་མངོན་ པར་དད་པར་བྱས་ཏེ་ཤི་བ་གང་ཡིན་པ་དེས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ཡང་དག་པར་རྫོགས་པའི་སངས་རྒྱས་འོད་སྲུང་ལ་རབ་ཏུ་བྱུང་ནས་བཀླག་པ་དང་། མནོད་པར་བྱས་ཤིང་ཕུང་པོ་ལ་མཁས་པར་བྱས། ཁམས་ལ་མཁས་པར་བྱས། སྐྱེ་མཆེད་ལ་

  1103. 242a

    མཁས་པར་བྱས། རྟེན་ཅིང་འབྲེལ་བར་འབྱུང་བ་ལ་མཁས་པར་བྱས་པ་གང་ཡིན་པ་དེས་ལྷར་གྱུར་ནས་ང་ལས་བདེན་པ་མཐོང་བར་བྱས་སོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས་ལས་གཅིག་ཏུ་དཀར་བ་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ།། །།སྡོམ་ནི། ངང་པ་གད་རྒྱངས་དབྱུང་བ་དང་། །རི་དགས་རུལ་དང་སྤྲེའུ་དང་ནི། །གླང་པོ་ཆེ་དང་བྱི་ལ་དང་། །བ་ལང་ཟླ་བ་རྡོ་བ་དང་། །གླང་ཆེན་ཝ་དང་བྲམ་ཟེའོ། །དགེ་སློང་རྣམས་ ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་དགེ་སློང་ལྔ་བརྒྱས་ཡོངས་སུ་བཏང་ན་ཚེ་དང་ལྡན་པ་ཀུན་དགའ་བོས་ཡོངས་སུ་མ་བཏང་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ཀུན་དགའ་བོ་འདིས་ང་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་མཚོ་ཆེན་པོ་མ་དྲོས་པ་ན་ངང་པའི་དཔོན་པོ་ཡུལ་འཁོར་སྐྱོང་ཞེས་བྱ་བར་གྱུར་ཏོ། །དེ་ལ་བུ་གཉིས་ཡོད་ལ། གང་ བ་དང་། བཞིན་རྒྱས་ཞེས་བྱ་བ་སྟེ། གང་བ་ནི་ཕུ་བོ་ཡིན་ནོ། །བཞིན་རྒྱས་ནི་ནུ་བོ་ཡིན་ནོ། །དེ་གཉིས་ལས་གང་བ་ནི་གཏུམ་པ། བརླང་བ། གཟུ་ལུམས་ཅན་ཞིག་སྟེ་རྟག་ཏུ་ངང་པ་རྣམས་ལ་སྡིགས་པར་བྱེད་དེ། ཁ་ཅིག་ལ་སྒྲོ་འབྱིན། ཁ་ཅིག་ལ་ ནི་སྡེར་མོས་རྨ་འབྱིན་པར་བྱེད་ཅིང་དེ་ལྟ་བུ་དང་གཞན་ཡང་གནོད་པ་བརྒྱ་ཕྲག་དག་བྱེད་དེ། ངང་པ་རྣམས་ཉི་མ་རེ་རེ་ཞིང་ངང་པ་རྣམས་ཀྱི་དཔོན་པོ་ཡུལ་འཁོར་སྐྱོང་གི་གན་དུ་སོང་སྟེ་རིག་པར་བྱེད་ནས་དེས་བསམས་པ། གང་བ་གཏུམ་པ། བརླང་བ། གཟུ་ལུམས་ཅན་ ཡིན་པས་གལ་ཏེ་བདག་གིས་འདི་རྒྱལ་ཚབ་ལ་བཞག་ན་བདག་ཤི་ནས་འདིས་ངང་པའི་ཚོགས་བཤིག་པར་འགྱུར་གྱིས། དེ་ལ་ཐབས་ཤིག་བཤམ་པར་བྱའོ་སྙམ་མོ། །དེས་གང་བ་དང་བཞིན་རྒྱས་གཉིས་བཀུག་ནས་བསྒོ་བ། འབབ་ཆུའི་དངོ་དང་མཚོ་དང་མཚེའུ་རྣམས་

  1104. 242b

    བལྟས་ནས། ངའི་དྲུང་དུ་ཐོག་མར་སུ་འོངས་པ་དེ་ངང་པ་རྣམས་ཀྱི་དཔོན་པོར་གཞུག་གོ། །དེ་གཉིས་ཀྱང་གཅིག་ལ་གཅིག་འགྲན་པའི་ཕྱིར་འཁོར་ལྔ་བརྒྱ་ལྔ་བརྒྱ་དང་དོང་སྟེ། དེ་གཉིས་ཀྱིས་ཕན་ཚུན་གྱི་འབབ་ཆུའི་དངོ་དང་མཚོ་དང་མཚེའུ་རྣམས་བལྟས་ནས་མཐར་གྱིས་གྲོང་ཁྱེར་བཱ་ རཱ་ཎ་སཱིར་ཕྱིན་ཏོ། །དེའི་ཚེ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེས་བཱ་རཱ་ཎ་སཱིའི་སྐྱེད་མོས་ཚལ་དང་ཧ་ཅང་ཡང་མི་རིང་བ་ཞིག་ཏུ་ ཚངས་ལྡན་ཞེས་བྱ་བའི་རྫིང་མཚེའུ་བས་ཆེས་ཁྱད་པར་དུ་འཕགས་པ་ཞིག་རྐོར་བཅུག་སྟེ། དེར་ཆུ་ནས་སྐྱེས་པའི་མེ་ཏོག་རྣམ་པ་སྣ་ཚོགས་བསྐྱེད་དོ། །འགྲམ་དང་ཕྱོགས་བཞི་ཀུན་ཏུ་ཡང་མེ་ཏོག་དང་འབྲས་བུའི་ཤིང་སྟོང་ཕྲག་དུ་མ་བསྐྱེད་དོ། །དེར་ཨུཏྤ་ལ་དང་། པད་མ་དང་། ཀུ་མུད་ དང་། པད་མ་དཀར་པོས་ཡོག་པར་བྱས་ཤིང་ཤིང་ཚང་ཚིང་དུ་མས་མཛེས་པ། བྱ་སྣ་ཚོགས་མང་པོ་སྐད་འབྱིན་པའི་འབྱོར་པ་དེ་ལྟ་བུ་དེ་མཐོང་ནས་ངང་པ་གང་བ་འཁོར་ལྔ་བརྒྱས་ཡོངས་སུ་བསྐོར་ཏེ་བབས་ནས་ཅི་དགའ་བའི་སྤྱོད་པ་རྩེ་བར་བརྩམས་སོ། །བཞིན་རྒྱས་ལ་རང་རང་གི་ ཚོགས་ཀྱིས་སྨྲས་པ། ཁྱོད་ཀྱང་བོབས་ལ་རྩེད་མོ་གྱིས་ཤིག །དེས་སྨྲས་པ། རེ་ཞིག་རྒྱལ་སྲིད་བླངས་ལ་དེ་ནས་ཕྱིས་ལོག་སྟེ་རྩེ་བར་བྱའོ་ཞེས་དེ་རིངས་པ་རིངས་པར་སོང་སྟེ་རྒྱལ་སྲིད་བླངས་སོ། །དེ་ནས་དེ་ངང་པ་ལྔ་བརྒྱས་ཡོངས་སུ་བསྐོར་ཏེ་བཱ་རཱ་ཎ་སཱིར་འོངས་ནས་ཚངས་ལྡན་ གྱི་རྫིང་དུ་བབས་ཏེ་བག་རྐྱོང་ཞིང་བག་རྐྱོང་ཞིང་གནས་པས་རྩེ་བར་བརྩམས་སོ། །དེ་དེ་ལྟར་བག་ཡོད་པས་གནས་པ་སྐྱེ་བོའི་ཚོགས་ཀྱིས་མཐོང་ནས་མཆོག་ཏུ་ངོ་མཚར་སྐྱེས་ཏེ། ཀྱེ་མ་ངང་པའི་དཔོན་པོ་མཆོག་ཏུ་གཟུགས་བལྟ་ན་སྡུག་པ་གང་ནས་འདིར་འོངས་ཏེ། གཟུགས་ བཟང་པོས་ཆུ་ན་རྒྱུ་བའི་འདབ་ཆགས་ཐམས་ཅད་ཟིལ་གྱིས་མནན་ནས་ཚངས་ལྡན་གྱི་རྫིང་གི་རྒྱན་བྱེད་ཅིང་དགའ་བར་གནས་ཤིང་འཇིག་རྟེན་དགའ་བ་སྐྱེད་པར་བྱེད། བཱ་རཱ་ཎ་སཱི་ན་གནས་པའི་སྐྱེ་བོའི་ཚོགས་ཐམས་ཅད་ཀྱིས་ཀྱང་ཐོས་ནས་ཚངས་ལྡན་གྱི་རྫིང་ཀུན་ནས་བསྐོར་ཏེ། དེའི་

  1105. 243a

    གཟུགས་བཟང་པོ་དང་། བག་རྐྱོང་ཞིང་གནས་པ་ན་རྟོག་ཅིང་འཁོད་དོ། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་ངང་པ་རྣམས་ཀྱི་དཔོན་པོ་ཞིག་ག་ཞིག་ནས་འདིར་མཆིས་ཏེ་ཚངས་ལྡན་གྱི་རྫིང་དུ་བབས་ནས་ངང་པ་བརྒྱ་ཕྲག་དུ་མས་ཡོངས་སུ་བསྐོར་ཅིང་གཟུགས་ བཟང་པོས་ཆབ་ན་རྒྱུ་བའི་འདབ་ཆགས་ཐམས་ཅད་ཟིལ་གྱིས་མནན་ནས་འཇིག་རྟེན་དགའ་བ་བསྐྱེད་ཅིང་བག་རྐྱོང་ཞིང་མཆིས་ལགས་སོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་བྱ་པ་རྣམས་ཁུག་ཤིག །དེ་རྣམས་ཀྱིས་བཀུག་པ་དང་རྒྱལ་པོས་བསྒོ་བ། ཤེས་ལྡན་ དག་ཚངས་ལྡན་གྱི་རྫིང་ན་ངང་པའི་དཔོན་པོ་གཟུགས་མཆོག་ཏུ་བལྟ་ན་སྡུག་པ་ཞིག་གཞིག་ནས་འོངས་སོ་ཞེས་ཐོས་ཀྱིས་ཁྱེད་ཀྱིས་དེ་གཅིག་པུ་རྙིས་མ་སྣད་པར་ཟུང་ལ་ང་ལ་ཕུལ་ཅིག །དེ་རྣམས་ཀྱིས་དེ་མཆོག་ཏུ་རྙི་འཇམ་པོས་མ་སྣད་པར་གཟུང་བ་དང་དེས་ཚིགས་སུ་བཅད་དེ་སྨྲས་པ། ཁོ་བོ་རྙིས་ནི་དམ་པོར་བཟུང་ཟིན་ཏེ། །མི་ཡི་དབང་དུ་སོང་བས་ཁོ་བོ་ལ། །ཅི་བྱར་མེད་ཀྱིས་ངང་པའི་ཚོགས་དེང་དེ། །མ་དྲོས་པར་ནི་མྱུར་དུ་འདོད་བར་གྱིས། །ངང་པ་གཅིག་གིས་ལྔ་བརྒྱར་མ་ཚང་བ་ནི་བྲོས་སོ། །གཅིག་པུ་ཞིག་རྙིས་ཟིན་པ་དེ་ཉིད་ལ་མྱ་ངན་བྱེད་ཅིང་འདུག་པ་དེ་བྱ་པ་ རྣམས་ཀྱིས་མཐོང་ནས་མཆོག་ཏུ་ངོ་མཚར་སྐྱེས་ཞིང་རྒྱལ་པོས་སྐྲག་ནས་མ་བཟུང་མ་བསད་དེ། དེ་རྣམས་ཀྱིས་ངང་པའི་དཔོན་པོ་དེ་ཁྱེར་ནས་རྒྱལ་པོའི་དྲུང་དུ་སོང་བ་དང་། ཅིག་ཤོས་མ་བཟུང་བ་དེ་ཡང་ཆགས་པའི་རྙིས་བཟུང་བས་རང་ཉིད་འོངས་སོ། །ངང་པའི་དཔོན་པོ་རྒྱལ་པོ་ལ་ ཕུལ་བ་དང་། རྒྱལ་པོས་སྨྲས་པ། ཤེས་ལྡན་དག་ཅིག་ཤོས་འདི་ཅིའི་ཕྱིར་ཁྱེར་ཏེ་འོངས་དེ་རྣམས་ཀྱིས་སྨྲས་པ། ལྷ་བདག་ཅག་གིས་འདི་མ་བཟུང་མོད་ཀྱི་རང་ཉིད་མཆིས་ལགས་སོ། །རྒྱལ་པོ་མཆོག་ཏུ་ངོ་མཚར་སྐྱེས་ཏེ་སྨྲས་པ། གདོན་མི་ཟ་བར་འདི་ནི་དེའི་ཆུང་མ་ཡིན་ པས་འོངས་ཀྱིས་ངང་པའི་དཔོན་པོ་འདི་དང་སྤ་ཤུག་ལྷན་ཅིག་ཐོང་ལ་ཁྱེད་ཅག་སུ་ཡང་འདི་གཉིས་མ་གསོད་ཅིག །བྱ་པ་རྣམས་ཀྱིས་སྨྲས་པ། ལྷ་གཞན་གྱིས་བཀུམ་དུ་མཆིས་བཀའ་སྩལ་དུ་གསོལ། རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་གྲོང་ཁྱེར་བཱ་རཱ་ཎ་སཱིར་

  1106. 243b

    དྲིལ་སྒྲོགས་སུ་ཆུག་སྟེ། ལྷ་ཉིད་ཀྱིས་བཀའ་སྩལ་པ། ངའི་ཡུལ་ན་གནས་པ་སུས་ཀྱང་ཆུ་ན་རྒྱུ་བའི་འདབ་ཆགས་རྣམས་མ་གསད་ཅིག་ཅེས་སྒྲོགས་ཤིག །དེ་རྣམས་ཀྱིས་དྲིལ་བསྒྲགས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ངང་པའི་དཔོན་པོ་བཞིན་རྒྱས་གང་ཡིན་ པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་ཆུང་མ་གང་ཡིན་པ་དེ་ནི་ཀུན་དགའ་བོ་ཡིན་ནོ། །ངང་པ་གཅིག་གིས་ལྔ་བརྒྱར་མ་ཚང་བ་གང་ཡིན་པ་དེ་ནི་དགེ་སློང་ལྔ་བརྒྱར་གཅིག་གིས་མ་ཚང་བ་འདི་དག་ཉིད་ཡིན་ཏེ། དེ་ན་ཡང་འདི་རྣམས་ངང་པར་གྱུར་པ་ན་ད་ཡོངས་སུ་བཏང་སྟེ། ཀུན་ དགའ་བོ་ངང་པར་གྱུར་པས་ནི་ང་ཡོངས་སུ་མ་བཏང་ངོ་། །ད་ལྟར་ཡང་ང་འདི་དག་གིས་ཡོངས་སུ་བཏང་གི་དགེ་སློང་ཀུན་དགའ་བོས་ནི་ཡོངས་སུ་མ་བཏང་ངོ་། །དགེ་སློང་དག་གཞན་ཡང་ཇི་ལྟར་འདི་དག་གིས་ང་ཡོངས་སུ་བཏང་ན་དགེ་སློང་ཀུན་དགའ་བོས་ཡོངས་སུ་མ་བཏང་བ་དེ་ཉོན་ཅིག །དགེ་ སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་གང་རྒྱངས་ཅན་ཞེས་བྱ་བ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་སྐྱེ་བོའི་ཚོགས་དང་མི་མང་པོས་རབ་ཏུ་གང་བ་ན་རྒྱལ་སྲིད་བྱེད་དུ་འཇུག་གོ། །དེ་ལ་བློན་པོ་ལྔ་བརྒྱ་ཡོད་དེ། དེ་རྣམས་ཀྱི་མཐུས་མཚམས་ཀྱི་རྒྱལ་པོ་ རྣམས་ཀྱིས་ཟིལ་གྱིས་མི་ནོན་ཏོ། །ཇི་ཙམ་ན་ལྷོ་ཕྱོགས་ཀྱི་ལམ་ནས་བྱ་མ་བུམ་གྱི་དབྱུག་གུ་ཅན་ཞེས་བྱ་བ་དམག་སྟོང་ཐུབ་པ་ཞིག་འོངས་ནས། དེ་བློན་པོ་གཞན་ཞིག་གིས་རྒྱལ་པོ་ལ་ཕུལ་ཏེ། ལྷ་བྱ་མ་བུམ་གྱི་དབྱུག་གུ་ཅན་ཞེས་བགྱི་བ་དམག་སྟོང་ཐུབ་པ་འདི་ལྷའི་སླད་དུ་ལྷོ་ཕྱོགས་ཀྱི་ཤུལ་ ནས་མཆིས་ཀྱིས། ལྷས་འདི་ཡོངས་སུ་བཟུང་བའི་རིགས་སོ། །རྒྱལ་པོས་དེ་ཡོངས་སུ་བཟུང་ནས་ལོངས་སྤྱོད་ཀྱི་བགོ་བཤའ་ཡང་བྱས་སོ། །ཇི་ཙམ་དུས་གཞན་ཞིག་ན་རྒྱལ་པོ་གང་རྒྱངས་ཅན་གྱི་ཡུལ་གཞན་གྱི་རྒྱལ་པོ་རྣམས་མཐུ་དང་དཔུང་ཆེན་པོར་གྱུར་ཏོ། །དེ་རྣམས་དཔུང་གི་ ཚོགས་ཡན་ལག་བཞི་པོ་གླང་པོ་ཆེ་བའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་རྒྱལ་པོ་གད་རྒྱངས་ཅན་དང་གཡུལ་སྤྲད་པའི་ཕྱིར་འོངས་སོ། །རྒྱལ་པོ་གད་རྒྱངས་ཅན་གྱིས་ཀྱང་དཔུང་གི་ཚོགས་ཡན་ལག་བཞི་པོ་གླང་པོ་ཆེ་

  1107. 244a

    པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་ས་གཞན་གྱི་རྒྱལ་པོ་རྣམས་དང་གཡུལ་སྤྲད་པའི་ཕྱིར་སྤགས་ཏེ་བསུའོ། །རྒྱལ་པོ་གད་རྒྱངས་ཅན་གྱིས་ས་གཞན་གྱི་རྒྱལ་པོ་རྣམས་བཅོམ། བྲེད་པར་ བྱས། ཐག་བཅུག །པམ་པར་བྱས། རྒྱབ་ཀྱིས་བལྟས་པར་བྱས་ཏེ། རང་རང་གི་ཡུལ་དུ་དོང་ངོ་། །དེ་རྣམས་སླར་ཡང་འདུས་ནས་རྒྱལ་པོ་གད་རྒྱངས་ཅན་གྱི་བློན་པོ་ལྔ་བརྒྱ་ལ་ཁྱེད་ཅག་ཚུར་ཤེག་ཤིག་དང་། ཁྱེད་ཅག་ལས་ལོངས་སྤྱོད་ཆེས་ཁྱད་པར་དུ་འཕགས་པ་དག་གིས་བགོ་ བཤའ་བྱའོ་ཞེས་ཡོ་བྱད་ཀྱིས་ཁ་དྲངས་པ་དང་དེ་རྣམས་ཀྱིས་ཁས་བླངས་སོ། །དེ་ནས་ས་གཞན་གྱི་རྒྱལ་པོ་རྣམས་ཀྱིས་སླར་ཡང་དཔུང་གི་ཚོགས་ཡན་ལག་བཞི་པོ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་ རྒྱལ་པོ་གད་རྒྱངས་ཅན་དང་གཡུལ་སྤྲད་པའི་ཕྱིར་འོངས་སོ། །རྒྱལ་པོ་གད་རྒྱངས་ཅན་གྱིས་ཀྱང་དཔུང་གི་ཚོགས་ཡན་ལག་བཞི་པོ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས་ས་གཞན་གྱི་རྒྱལ་པོ་རྣམས་དང་ གཡུལ་སྤྲད་པའི་ཕྱིར་སྤགས་ཏེ་བསུའོ། །གད་རྒྱངས་ཅན་གྱི་བློན་པོ་ལྔ་བརྒྱ་གཡུལ་སྤྲད་པ་ན་ཕྱིར་ལོག་ནས་བྱ་མ་བུམ་གྱི་དབྱུག་གུ་ཅན་དམག་སྟོང་ཐུབ་དང་ལྷན་ཅིག་གཡུལ་འགྱེད་པར་བརྩམས་པ་རྒྱལ་པོས་མཐོང་ནས་བག་ཚ་བར་གྱུར་པ་དང་། བྱ་མ་བུམ་གྱི་དབྱུག་གུ་ཅན་དམག་སྟོང་ ཐུབ་ཀྱིས་ཚིགས་སུ་བཅད་དེ་སྨྲས་པ། ཁྱེད་ནི་བྱ་མ་བུམ་གྱི་དབྱུག །གྲོགས་པོ་གཅིག་པུས་མ་བཏང་གི། །ཡུན་རིང་པོ་ནས་གནང་བ་ཡི། །གྲོགས་པོ་ཀུན་གྱིས་ཁྱོད་བཏང་ངོ་། །དེས་དེ་དག་ཐམས་ཅད་ཁ་བཏག་གོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ རྒྱལ་པོ་གད་རྒྱངས་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བྱ་མ་བུམ་གྱི་དབྱུག་གུ་ཅན་གང་ཡིན་པ་དེ་ནི་ཀུན་དགའ་བོ་ཡིན་ནོ། །བློན་པོ་ལྔ་བརྒྱ་པོ་གང་ཡིན་པ་དེ་དག་ནི་དགེ་སློང་ལྔ་བརྒྱ་པོ་འདི་དག་ཉིད་ཡིན་ཏེ། དེ་ན་ཡང་འདི་དག་གིས་ང་ཡོངས་སུ་བཏང་ངོ་། །ད་ལྟར་ཡང་འདི་

  1108. 244b

    དག་གིས་ང་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །གཞན་ཡང་ཇི་ལྟར་འདི་དག་གིས་ང་ཡོངས་སུ་བཏང་གི་ཀུན་དགའ་བོས་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་ན་རིའི་ཕྱོགས་ཤིག་ན་རི་དགས་ཀྱི་ དཔོན་པོ་སེང་གེར་གྱུར་ཏེ། དེའི་ལྷག་མ་ཟ་བ་ཝ་ལྔ་བརྒྱ་རྗེས་བཞིན་དུ་འབྲང་ཞིང་རི་ལ་ཉེ་བར་བརྟེན་ཏེ་གནས་སོ། །སེང་གེས་སྲོག་ཆགས་རྣམས་བསད་དེ་ཤའི་དམ་པ་དང་ཁྲག་གི་དམ་པ་དེ་འཐུངས་ནས་བོར་ཏེ་འགྲོ་བས་དེ་རྣམས་དེ་ལྟ་བུས་དུས་རིང་མོ་ཞིག་འདས་པར་གྱུར་ཏོ། །ཇི་ཙམ་དུས་གཞན་ ཞིག་ན་རི་དགས་ཀྱི་རྒྱལ་པོ་སེང་གེ་མཚན་མོ་སྲོག་ཆགས་ཚོལ་བ་ན་ཁྲོན་པར་ལྷུང་བ་དང་ཝ་ལྔ་བརྒྱ་པོ་དེ་རྣམས་ལས་ཝ་ལྔ་བརྒྱར་གཅིག་གིས་མ་ཚང་བ་སོ་སོར་དོང་སྟེ། ཝ་གཅིག་པུ་ཞིག་སེང་གེ་ལ་རྟོག་ཅིང་ཁྲོན་པའི་ཁར་འདུག་སྟེ་གང་གིས་ན་འདི་ཕྱིན་པར་འགྱུར་བའི་ཐབས་དེ་ཅི་ཡོད་སྙམ་སེམས་ཤིང་ དེ་ཁྲོན་པའི་ཉེན་ཀོར་ཕན་ཚུན་སོང་བ་ལས་ཇི་ཙམ་ན་ཁྲོན་པ་དང་ཧ་ཅང་ཡང་མི་རིང་བ་ཞིག་ན་མཚེའུ་ཞིག་མཐོང་ནས། དེས་བརྟགས་ནས་ཕྱོགས་གཅིག་ནས་འོག་བྲུས་བཅུག་སྟེ་ཁྲོན་པར་མཚེའུའི་ཆུས་བཀང་བ་དང་། སེང་གེ་རང་ཉིད་བྱུང་བར་གྱུར་ཏོ། །ལྷས་ཚིགས་སུ་བཅད་དེ་སྨྲས་པ། སྟོབས་ ཆེ་བ་འམ་གཞན་ཀྱང་རུང་། །གྲོགས་པོ་དག་ཏུ་བྱ་དགོས་ཏེ། །ཝས་ནི་ཁྲོན་པ་རྙིང་པ་ནས། །སེང་གེ་ཕྱུང་བར་གྱུར་ལ་ལྟོས། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སེང་གེ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཝ་གཅིག་པོ་གང་ཡིན་པ་དེ་ནི་དགེ་སློང་ཀུན་ དགའ་བོ་ཡིན་ནོ། །ཝ་གཅིག་གིས་ལྔ་བརྒྱར་མ་ཚང་བ་གང་ཡིན་པ་དེ་ནི་དགེ་སློང་ལྔ་བརྒྱ་པོ་འདི་དག་ཡིན་ཏེ། དེ་ན་ཡང་འདི་དག་གིས་ང་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །ད་ལྟར་ཡང་འདི་དག་གིས་ང་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ ངོ་། །གཞན་ཡང་ཇི་ལྟར་འདི་དག་གིས་ང་ཡོངས་སུ་བཏང་ན་ཀུན་དགའ་བོས་ཡོངས་སུ་མ་བཏང་བ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་སེམས་དཔའ་མ་ངེས་པའི་ཕུང་པོ་ལ་གནས་པ་ན་ཕྱོགས་ཤིག་ན་རི་དགས་ལྔ་བརྒྱའི་རི་དགས་ཀྱི་དཔོན་པོར་གྱུར་ཏོ། །ཇི་ཙམ་ན་རྔོན་པ་ཞིག་གིས་རི་དགས་

  1109. 245a

    རྣམས་བཤོར་བའི་ཕྱིར་མཛོལ་དང་། རྙི་དང་། རྙོང་རབ་ཏུ་མང་པོ་དག་བཙུགས་སོ། །རི་དགས་ཀྱི་དཔོན་པོ་དེ་བག་རྐྱོང་ཞིང་གནས་པས་འཁོར་ལྔ་བརྒྱ་དང་རི་དགས་ཀྱི་ནགས་ན་རྒྱུ་ཞིང་དེ་རི་དགས་ཀྱི་ཚོགས་རྣམས་ཀྱི་སྣ་ལ་འགྲོ་བ་ན་རྙིས་ཟིན་ཏོ། །རྙིས་ཟིན་པ་དེ་ མཐོང་ནས་རི་དགས་ཐམས་ཅད་ནི་བྲོས་སོ། །རི་དགས་མོ་གཅིག་པུ་ཞིག་ཚོགས་ཀྱི་དཔོན་པོའི་དྲུང་ན་འདུག་གོ། །རི་དགས་ཀྱི་དཔོན་པོ་དེ་འབད་ཀྱང་རྙི་གཅད་པར་མ་ནུས་ཤིང་དེ་དེ་ལྟར་ཕྲ་ཤགས་བྱེད་པའི་རི་དགས་མོ་དེས་མཐོང་ནས་ཚིགས་སུ་བཅད་དེ་སྨྲས་པ། རྙི་འདི་གང་གིས་བཙུགས་ པ་ཡི། །རྔོན་པ་དེ་ནི་མཆི་ལགས་ཀྱིས། །སྐལ་ཆེན་པོ་ནི་འབད་མཛོད་ཅིག །རི་དགས་དམ་པ་འབད་མཛོད་ཅིག །དེས་ཀྱང་ཚིགས་སུ་བཅད་དེ་སྨྲས་པ། རྨིག་པ་སར་བཙུགས་འཐེན་ཀྱང་ནི། །འབྲེང་བའི་རྙི་ནི་དམ་པོ་ཡིས། །བདག་གིས་རྐང་པ་རབ་སྨས་ཀྱི། །གཅད་མི་ ནུས་ན་ཅི་བྱར་ཡོད། །དེ་ནས་རྔོན་པ་དེ་མདའ་དང་གཞུ་ལག་པར་ཐོགས་ཤིང་གོས་ངུར་སྨྲིག་བགོས་ནས་ཕྱོགས་དེར་ཕྱིན་ཏོ། །རི་དགས་མོ་དེས་རྔོན་པ་དེ་རི་དགས་ཀྱི་དཔོན་པོ་དེ་བསད་པའི་ཕྱིར་བསྒྲིམས་པས་ཉེ་བར་འོངས་པ་མཐོང་ངོ་། །མཐོང་ནས་ཀྱང་རིངས་པ་རིངས་པར་ཚིགས་སུ་བཅད་དེ་ སྨྲས་པ། རྙི་འདི་གང་གིས་བཙུགས་པ་ཡི། །རྔོན་པ་དེ་ནི་མཆིས་ལགས་ཀྱི། །སྐལ་ཆེན་ད་ནི་འབད་མཛོད་ཅིག །རི་དགས་དམ་པ་འབད་མཛོད་ཅིག །དེས་ཀྱང་ཚིགས་སུ་བཅད་དེ་སྨྲས་པ། རྨིག་པ་སར་བཙུགས་འཐེན་ཀྱང་ནི། །འབྲེང་བའི་རྙི་ནི་དམ་པོ་ཡིས། །བདག་གི་རྐང་ པ་རབ་སྨས་ཀྱིས། །བཅད་མི་ནུས་ན་ཅི་བྱར་ཡོད། །དེ་ནས་རི་དགས་མོ་དེ་སྙིང་སྟོངས་ནས་རྔོན་པ་དེའི་མདུན་དུ་མངོན་དུ་སོང་སྟེ། དེ་ལ་བསྙེན་ནས་ཚིགས་སུ་བཅད་དེ་སྨྲས་པ། རྔོན་པ་གཞུ་ནི་ཕོབ་མཛོད་ལ། །རྔོན་པ་རལ་གྲི་བླང་མཛོད་དེ། །ཐོག་མར་བདག་ཁུམ་དེ་ནས་ནི། །རི་དགས་ དཔོན་པོ་ལ་མཛོད་ཅིག །དེ་ནས་རྔོན་པ་དེ་ངོ་མཚར་གྱིས་བསྡུས་པའི་བློས་བསམས་པ་འདི་ཁྱོད་ཀྱི་ཅིར་འོང་། དེས་སྨྲས་པ། ཁྱིམ་ཐབ་བོ། །དེས་དེ་ལ་ཚིགས་སུ་བཅད་དེ་སླར་སྨྲས་པ། བདག་གིས་ཁྱོད་ཀྱང་མི་བསད་ལ། །རི་དགས་དཔོན་པོའང་མི་བསད་པར། །སྙིང་དུ་སྡུག་པའི་

  1110. 245b

    ཁྱིམ་ཐབ་དང་། །ཁྱོད་ནི་ལྷན་ཅིག་འགྲོགས་པར་བྱ། །དེས་ཀྱང་ཚིགས་སུ་བཅད་པས་སྨྲས་པ། ཇི་ལྟར་རྔོན་པ་བདག་དང་ནི། །སྡུག་པའི་ཁྱིམ་ཐབ་དགའ་བ་ལྟར། །དེ་བཞིན་རྔོན་པ་གཉེན་ཀུན་དང་། །ལྷན་ཅིག་ཏུ་ནི་དགར་གྱུར་ཅིག །དེ་ནས་རྔོན་པ་དེ་ལྷག་པར་ཡང་ངོ་མཚར་སྐྱེས་ ནས་རི་དགས་དེ་བཀྲོལ་ནས་ལྷན་ཅིག་དོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རི་དགས་ཀྱི་དཔོན་པོ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རི་དགས་མོ་གང་ཡིན་པ་དེ་ནི་ཀུན་དགའ་བོ་ཡིན་ནོ། །རི་དགས་གཅིག་གིས་ལྔ་བརྒྱར་མ་ཚང་བ་བྲོས་པ་གང་ཡིན་ པ་དེ་དག་ནི་དགེ་སློང་གཅིག་གིས་ལྔ་བརྒྱར་མ་ཚང་བ་འདི་དག་ཉིད་ཡིན་ཏེ། དེ་ན་ཡང་ང་འདི་དག་གིས་ཡོངས་སུ་བཏང་གི་ཀུན་དགའ་བོས་ནི་ཡོངས་སུ་མ་བཏང་ངོ་། །ད་ལྟར་ཡང་ང་འདི་དག་གིས་ཡོངས་སུ་བཏང་གི་དགེ་སློང་ཀུན་དགའ་བོས་ནི་ཡོངས་སུ་མ་བཏང་ངོ་། །དགེ་སློང་རྣམས་ཐེ་ཚོམ་སྐྱེས་ཏེ་ ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་རུལ་པ་རྙེད་པ་དང་བཀུར་སྟི་རུལ་པས་བཅོམ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་རུལ་པ་ འདི་རྙེད་པ་དང་བཀུར་སྟི་རུལ་པས་བཅོམ་པ་དེ་ཉོན་ཅིག །དགེ་སློང་དག་སྔོན་བྱུང་བ་རིའི་ཕྱོགས་གཅིག་ཅིག་ན་པད་མའི་རྫིང་ཆེན་པོ་ཞིག་ཡོད་དེ། དེ་དང་ཉེ་བ་ན་གླང་པོ་ཆེ་ཞིག་གནས་སོ། །ཕྱོགས་གཞན་ཞིག་ན་ཝ་ཞིག་ཀྱང་གནས་སོ། །ཇི་ཙམ་དུས་གཞན་ཞིག་ན་གླང་པོ་ཆེ་པད་མའི་རྫིང་དེ་ནས་ ཆུ་འཐུངས་ནས་འགྲོ་བ་དང་ཝ་འོང་བ་དེས་གླང་པོ་ཆེ་ལ་སྨྲས་པ། འཐབ་མོ་བྱའམ་ལམ་ལས་འཛུར། གླང་པོ་ཆེས་བསམས་པ། རུལ་པ་ཉོན་མོངས་སྤྱི་རྟོལ་ཅན་འདི་གལ་ཏེ་བདག་གིས་རྐང་ལག་གིས་སམ། སྣས་སམ། མཆེ་བས་བསད་ན་མི་གཙང་བས་མ་རུང་བར་འགྱུར་བས་མདོར་ན་ རུལ་པ་འདི་ནི་རུལ་པ་ཁོ་ནས་བསད་དོ་སྙམ་དུ་བསམས་ནས་ཚིགས་སུ་བཅད་དེ་སྨྲས་པ། ཁྱོད་ནི་རྐང་ལག་གིས་མི་བསད། །མཆེ་བས་མ་ཡིན་སྣས་མིན་ཏེ། །རུལ་པ་རུལ་པས་བསད་བྱ་བས། །ཁྱོད་ནི་རུལ་པས་བསད་པར་བྱ། །གླང་པོ་ཆེས་བསམས་པ། ལམ་བཟུར་ཏེ་སོང་དང་

  1111. 246a

    གདོན་མི་ཟ་བར་འོང་བདག་གི་རྗེས་བཞིན་འོང་ངོ་སྙམ་ནས། དེས་ལམ་བཟུར་ནས་མྱུར་བ་མྱུར་བར་སོང་བ་དང་། ཝས་བསམས་པ། ཚིག་ཙམ་ཁོ་ནས་བདག་གིས་འདི་བཅོམ་པ་ཡིན་ཏེ། དེས་ན་མྱུར་བ་མྱུར་བར་བྲོས་སོ་སྙམ་ནས། །དེའི་རྗེས་བཞིན་རྗེས་བཞིན་ འབྲེངས་པ་དང་། གླང་པོ་ཆེས་ཉེ་བར་འོངས་པར་ཤེས་ནས་ཤུགས་དྲག་པོས་དེའི་སྟེང་དུ་རྟུག་པ་བོར་བས་ཕོག་ནས་ཤི་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་རུལ་པ་འདི་རུལ་པས་བཅོམ་མོ། །ད་ལྟར་ ཡང་རུལ་པ་འདི་རྙེད་པ་དང་བཀུར་སྟི་རུལ་པས་བཅོམ་མོ། །གཞན་ཡང་དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་གཟིགས་པའི་རྗེས་སུ་མཐུན་པར་གྱུར་པ་གང་ལགས་པ་དེ་དག་ནི་འཁོར་བའི་འཇིགས་ པ་ཆེན་པོ་ལེགས་པར་རྒལ་བར་གྱུར་ལ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ལགས་པ་དེ་དག་ནི་ཚུལ་མ་ལགས་པས་མ་རུང་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་ དུས་ན་ཡང་ངའི་ཚིག་ཉན་པ་གང་ཡིན་པ་དེ་དག་ནི་འཇིགས་པ་ཆེན་པོ་ལས་ཐར་ལ་ལྷ་སྦྱིན་གྱི་ཚིག་ཉན་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུང་པར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་དང་ཉེ་བ་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་ན་སྤྲེའུའི་ ཚོགས་ཀྱི་དཔོན་པོ་གཉིས་ཤིག་གནས་ཏེ། རེ་རེ་ལ་ཡང་འཁོར་ལྔ་བརྒྱ་ལྔ་བརྒྱ་ཡོད་དོ། །དེ་ན་ཚོགས་ཀྱི་དཔོན་པོ་ཅིག་ཤོས་གཉིད་ལོག་པའི་རྨི་ལམ་ན་བདག་གསོན་པོ་ཉིད་དུ་འཁོར་ལྔ་བརྒྱ་དང་ཟངས་སུ་བཅུག་པ་མཐོང་ངོ་། །མཐོང་ནས་ཀྱང་སྐྲག་སྔངས་བྲེད་དེ་སྐྱི་བུང་ཞེས་བྱེད་ནས་ནམ་དོ་ མ་ནངས་ཏེ་ནངས་པ་དང་སྤྲེའུ་རྣམས་བསོགས་ཏེ་རྨི་ལམ་བཟླས་པར་བརྩམས་པ། ཤེས་ལྡན་དག་མདང་སུམ་ངས་རྨི་ལམ་ངན་པ་ཞིག་མཐོང་གིས། གནས་འདི་ནས་འདིར་འདོང་ངོ་། །སྤྲེའུ་རྣམས་ཀྱིས་སྨྲས་པ། དེ་བཞིན་དུ་བགྱིས་ཏེ་འབྲོས་པར་བགྱིའོ། །བྱང་ཆུབ་སེམས་དཔའ་

  1112. 246b

    རྣམས་ནི་རྨི་ལམ་རྣོ་བ་ཡིན་པས་བདག་ཉིད་ཆེན་པོ་དེས་ཚོགས་ཀྱི་དཔོན་པོ་ཅིག་ཤོས་ལ་སྨྲས་པ། བདག་གིས་རྨི་ལམ་འདི་འདྲ་བ་རྨིས་ནས་འདོང་ན་གཞན་དུ་འདོང་ངམ། དེ་ཡིད་མ་ཆེས་ནས་སྨྲས་པ། ཅི་རྨི་ལམ་དུ་རྨིས་སོ་ཅོག་བདེན་པར་འགྱུར་རམ། གལ་ཏེ་ཁྱོད་འགྲོ་ན་སོང་ཤིག ། ཁོ་བོ་ནི་སྤྱོད་ཡུལ་ཆེས་ཡངས་པར་འགྱུར་བས་མི་འགྲོའོ། །དེས་དེ་ཡིད་མ་ཆེས་པར་རིག་ནས་བདག་ཉིད་ཀྱིས་ཚོགས་དང་དེ་དོང་ངོ་། །ཇི་ཙམ་དུས་གཞན་ཞིག་ན་རི་འོར་དེ་ན་བྲན་མོ་ཞིག་ཐབ་ན་ཡོས་རྔོད་ན་མ་སྟེས་པས་ལུག་ཅིག་འཁྱམ་ཞིང་ཕྱོགས་དེར་ཕྱིན་ནས་དེ་ནས་དེ་དག་བཟའ་བར་བརྩམས་ པ་དང་དེ་འགལ་དུམ་གྱིས་བསྣུན་པས་མེ་འབར་བཞིན་རྒྱལ་པོའི་གླང་པོ་ཆེའི་བྲེས་སུ་ཞུགས་པ་འབར་བ་དེས་གླང་པོ་ཆེའི་བྲེས་བསྲེགས་ཏེ་གླང་པོ་ཆེ་མང་པོ་ཞིག་ཚིག་གོ། །རྒྱལ་པོས་སྨན་པ་བཀུག་སྟེ་སྨྲས་པ། གླང་པོ་ཆེ་མེས་ཚིག་པ་རྣམས་ལ་དཔྱད་ཅི་ཡོད། སྨན་པ་དེའི་ནས་ཀྱི་ཞིང་སྤྲེའུ་ རྣམས་ཀྱིས་མ་རུང་བར་བྱས་པས་དེས་བསམས་པ། སྤྲེའུ་འདི་རྣམས་ལ་ཤ་གཉེར་བའི་དུས་ལ་བབ་བོ་སྙམ་དུ་བསམས་ནས་སྨྲས་པ། ལྷ་སྤྲེའུའི་ཞག་གིས་གླང་པོ་ཆེ་རྣམས་བསྐུས་ན་གསོས་པར་འགྱུར་རོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་སྤྲེའུའི་ཞག་སྟ་གོན་ གྱིས་ཤིག །དེ་རྣམས་ཀྱིས་ཀྱང་རྔོན་པ་རྣམས་ལ་བསྒོ་བ་དང་། རྔོན་པ་རྣམས་ཀྱིས་རི་འོར་གྱི་ཉེ་འཁོར་ན་གནས་པའི་སྤྲེའུ་ཐམས་ཅད་བཟུང་སྟེ་ཕུལ་ལོ། །སྨན་པ་ཡུན་རིང་པོ་ནས་ཤ་ཁོན་རྗེས་སུ་འབྲེལ་བས་གསོན་པོ་ཉིད་དུ་ཟངས་སུ་བཅུག་གོ། །ལྷས་ཚིགས་སུ་བཅད་དེ་སྨྲས་པ། གྲོང་རྡལ་དང་ནི་གྲོང་ཁྱེར་ན། །མི་མཐུན་ཡོད་པར་གནས་མི་བྱ། །ལུག་དང་བྲན་མོ་མི་མཐུན་པས། །སྤྲེའུ་རྣམས་དག་ནི་བརླག་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྤྲེའུའི་ཚོགས་ཀྱི་དཔོན་པོ་རྨི་ལམ་རྣོ་བ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་ དུས་ཀྱི་ཚོགས་ཀྱི་དཔོན་པོ་ཅིག་ཤོས་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངའི་ཚིག་ཉན་པ་གང་ཡིན་པ་དེ་དག་ནི་འཇིགས་པ་ཆེན་པོ་ལས་རབ་ཏུ་ཐར་རོ། །ལྷ་སྦྱིན་གྱི་ཚིག་ཉན་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུངས་པར་གྱུར་ཏོ། །ད་ལྟར་ཡང་ངའི་ལྟ་བའི་རྗེས་

  1113. 247a

    སུ་མཐུན་པར་གྱུར་པ་གང་ཡིན་པ་དེ་དག་ནི་འཁོར་བའི་འཇིགས་པ་ཆེན་པོ་ལས་རབ་ཏུ་ཐར་ཏེ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་མ་རུངས་པར་གྱུར་ཏོ། །གཞན་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་ དེ་དག་ནི་བདེ་ལེགས་སུ་དོང་བར་གྱུར་ཅིང་། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་དུ་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་ཤིག་ན་སྤྲེའུའི་ཚོགས་ཀྱི་དཔོན་པོ་འཁོར་ལྔ་བརྒྱ་ལྔ་བརྒྱ་པ་གཉིས་ཤིག་གནས་སོ། ། དེ་ན་ཅིག་ཤོས་ཚོགས་དང་ལྷན་ཅིག་ལྗོངས་སུ་དོང་སྟེ་རིམ་གྱིས་རི་འོར་ཞིག་ཏུ་ཕྱིན་པ་དང་། རི་འོར་དེ་ན་ཤིང་ཀིམ་པ་ཀ་ཞེས་བྱ་བ་འབྲས་བུས་ཡལ་ག་གཡུར་ཟ་བར་འདུག་ནས་སྤྲེའུ་རྣམས་ཀྱིས་ཚོགས་ཀྱི་དཔོན་པོ་ལ་སྨྲས་པ། ཚོགས་ཀྱི་དཔོན་པོ་ལྗོན་ཤིང་ལྷག་པར་འབྲས་བུ་ཆགས་ པ་འབྲས་བུས་ཡལ་ག་གཡུར་ཟ་བ་ཞིག་མཆིས་ཀྱིས་འོ་སྐོལ་དུབ་པ་འབྲས་བུ་རྣམས་གསོལ་ལོ། །ཚོགས་ཀྱི་དཔོན་པོས་ཤིང་དེ་ལ་བརྟགས་ནས་ཚིགས་སུ་བཅད་དེ་སྨྲས་པ། གྲོང་གི་དྲུང་ན་འདུག་ཀྱང་ནི། །བྱིས་པས་འདི་ལ་མ་ཟོས་པས། །རྗེས་སུ་དཔགས་ན་ཤིང་འདི་ཡི། ། འབྲས་བུ་བཟར་མི་རུང་བར་ཤེས། །ཞེས་སྨྲས་ནས་དོང་ངོ་། །ཚོགས་ཀྱི་དཔོན་པོ་ཅིག་ཤོས་ཀྱང་ཚོགས་དེ་ཉིད་ཀྱི་རྗེས་བཞིན་འབྲངས་ནས་རིམ་གྱིས་རི་འོར་དེར་ཕྱིན་པ་དང་། སྤྲེའུ་རྣམས་ཀྱིས་ཀིམ་པ་ཀའི་ལྗོན་ཤིང་དེ་མཐོང་ནས་དེ་རྣམས་ཀྱིས་ཚོགས་ཀྱི་དཔོན་པོ་ལ་སྨྲས་པ། ཚོགས་ ཀྱི་དཔོན་པོ་ལྗོན་ཤིང་གི་འབྲས་བུ་མཆིས་ཀྱིས་འོ་སྐོལ་དུབ་པ་འབྲས་བུ་རྣམས་ལ་གསོལ་ལ་བདེ་བར་བཞུད་དོ། །དེས་སྨྲས་པ། ལེགས་ཀྱིས་དེ་བཞིན་དུ་གྱིས་ཤིག །དེ་རྣམས་ཀྱིས་ཟོས་པ་དང་ཐམས་ཅད་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དགེ་སློང་དག་ཇི་སྙམ་དུ་ སེམས། དེའི་ཚེ་དེའི་དུས་ཀྱི་ཚོགས་ཀྱི་དཔོན་པོ་དང་པོ་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དཔོན་པོ་གཉིས་པ་ཤོས་གང་ཡིན་པ་དེ་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་ལེགས་སུ་དོང་ངོ་། །ལྷ་སྦྱིན་གྱི་

  1114. 247b

    ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་ལེགས་སུ་འཁོར་བའི་རྒྱ་མཚོ་ཆེན་པོ་ལས་རྒལ་ཏོ། །ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་ དེ་དག་ནི་ཚུལ་མ་ཡིན་པས་མ་རུངས་པར་གྱུར་ཏོ། །གང་གི་ཚེ་ལྷ་སྦྱིན་གྱིས་བཅོམ་ལྡན་འདས་ལ་བགྲོངས་པའི་ཕྱིར་རྡོ་འཕངས་པ་དེའི་ཚེ་བྲམ་ཟེ་དང་ཁྱིམ་བདག་རྣམས་འཁྲུགས་ནས་ལྷ་སྦྱིན་བསད་ཀྱིས་འདོང་ངོ་ཞེས་བྱས་པ་དང་། འཇིག་རྟེན་ནི་མཛའ་བ་དང་། མི་མཛའ་བ་དང་། བར་མ་ དག་ཡོད་པས་གཞན་ཞིག་ལྷ་སྦྱིན་ལ་སྦྲན་ནས་དེ་སྐྲག་ནས་ཤིང་དྲུང་ཞིག་ཏུ་བརྟེན་ཏེ་སྤྱོད་ལམ་ཞི་བས་འདུག་གོ། །དེ་རྣམས་ཀྱིས་དེ་ལྟར་སྤྱོད་ལམ་ཞི་བ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་ལྷ་སྦྱིན་བདག་ཉིད་ཆེན་པོ་འདི་བཅོམ་ལྡན་འདས་བགྲོངས་པར་ག་ལ་འགྱུར། ཁ་ཅིག་གིས་ བདག་ཅག་བསླུས་ཀྱིས་ཚུར་འདོང་ངོ་ཞེས་དེ་རྣམས་དོང་ངོ་། །དགེ་སློང་རྣམས་ཀྱིས་ལྷ་སྦྱིན་དེ་ལྟ་བུའི་སྤྱོད་ལམ་གྱིས་གནས་པས་དེས་ན་གྲོང་མི་འཁྲུགས་ཀྱང་མ་བསད་དོ། །ཞེས་ཐོས་ནས་དེ་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་ པ་ལྷ་སྦྱིན་གྱི་ཆོས་ལྟ་བུའི་སྒོ་ནས་འཇིག་རྟེན་བསླུས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདི་ཆོས་ལྟ་བུའི་སྒོ་ནས་བྱི་བ་རྣམས་བྲིད་པ་དེ་ཉོན་ཅིག །དགེ་སློང་དག་སྔོན་བྱུང་བ་ ཕྱོགས་ཤིག་ན་བྱི་བ་རྣམས་ཀྱི་ཚོགས་ཀྱི་དཔོན་པོ་འཁོར་ལྔ་བརྒྱ་པ་ཞིག་གནས་སོ། །བྱི་ལ་མེ་སྐྱེས་ཞེས་བྱ་བ་ཞིག་ཡོད་དོ། །གཞོན་པའི་གནས་སྐབས་ན་ཕྱོགས་གང་དུ་གནས་པའི་ཉེ་འཁོར་དུ་དེས་བྱི་བ་ཐམས་ཅད་བསད་དོ། །དེ་ཡང་དུས་གཞན་ཞིག་ན་རྒས་པར་གྱུར་ཏེ་རྒས་ པས་ཕ་རོལ་གནོན་པས་བྱི་བ་གཟུང་མི་ནུས་ནས་དེས་བསམས་པ། སྔོན་བདག་གཞོན་པའི་གནས་སྐབས་ན་ནི་ཕ་རོལ་གནོན་པས་བྱི་བ་འཛིན་ནུས་ན་ད་ནི་མི་ནུས་ཏེ་འོན་ཀྱང་ཐབས་ཤིག་བཤམས་ལ་བཟའོ་སྙམ་ནས་དེ་འཇབ་ཅིང་འཇབ་ཅིང་བྱི་བ་རྣམས་བཙལ་བར་བརྩམས་ཏེ། དེས་བཙལ་

  1115. 248a

    བ་ན་བྱི་བ་ལྔ་བརྒྱའི་ཚོགས་ཡོད་པར་ཤེས་ནས། དེ་བྱི་བ་དེ་རྣམས་ཀྱི་ཁུང་བུ་དང་ཧ་ཅང་ཡང་མི་རིང་བ་ཞིག་ཏུ་ངན་གཡོའི་དཀའ་ཐུབ་ཀྱིས་དཀའ་ཐུབ་བྱེད་པ་ན། བྱི་བ་རྣམས་ཕན་ཚུན་འཁྱམས་པས་སྤྱོད་ལམ་ཞི་བས་གནས་པ་དེ་མཐོང་ནས། དེ་རྣམས་ཀྱིས་རྒྱང་རིང་ བོར་འདུག་ནས་སྨྲས་པ། ཞང་པོ་ཅི་བྱེད། དེས་སྨྲས་པ། ཁོ་བོ་གཞོན་པའི་གནས་སྐབས་ན་བསོད་ནམས་མ་ཡིན་པ་མང་དུ་བྱས་པས་དེ་ཟད་པར་བྱ་བའི་ཕྱིར་དཀའ་ཐུབ་སྤྱོད་དོ། །དེ་རྣམས་ཀྱིས་འདིས་དམ་པ་མ་ཡིན་པའི་ཆོས་སྡིག་པ་སྤངས་སོ་ཞེས་དེ་ལ་ཆོས་ཀྱི་རྒྱུ་ལས་བྱུང་བའི་དད་པ་ སྐྱེས་པར་གྱུར་ཏོ། །དེ་རྣམས་དེ་ལ་ཉི་མ་རེ་རེ་ཞིང་བསྐོར་བ་བྱས་ནས་ཁུང་དུ་འཇུག་པ་ན། དེས་དེ་རྣམས་ཀྱི་ནང་གི་ཐ་མ་བཟུང་ཞིང་བཟུང་ཞིང་ཟའོ། །ཇི་ཙམ་ན་ཚོགས་དེ་འགྲིབས་ནས་ཚོགས་ཀྱི་དཔོན་པོས་བསམས་པ། བདག་གི་བྱི་བ་རྣམས་ནི་ཉུང་བར་གྱུར་ལ་བྱི་ལ་འདི་ནི་ཉམ་སྐྱེས་ པར་གྱུར་པས་འདི་ལ་ནི་རྒྱུ་ཞིག་ཡོད་པར་འགྱུར་རོ་སྙམ་ནས། དེས་བྱི་ལ་དེ་ལ་བརྟག་པར་བརྩམས་པ་དང་། ཇི་ཙམ་ན་རྟུག་པ་སྤུ་ཅན་དུ་མཐོང་ནས་དེས་བསམས་པ། གདོན་མི་ཟ་བར་འདིས་བྱི་བ་རྣམས་བསད་པར་གྱུར་གྱིས། མ་ལ་བདག་གིས་ནི་མངོན་སུམ་དུ་བབ་པར་བྱའོ་ སྙམ་ནས། དེས་དེ་མི་མངོན་པའི་ས་ནས་བརྟག་པ་ལྷུར་ལེན་ཅིང་གནས་པ་ན། ཇི་ཙམ་ན་དེས་དེ་ཐ་མའི་བྱི་བ་ཟ་བ་མཐོང་ནས་དེ་དེ་ལོགས་སུ་སོང་སྟེ་རྒྱང་རིང་པོར་འདུག་ནས་ཚིགས་སུ་བཅད་དེ་སྨྲས་པ། ཞང་པོའི་ཡན་ལག་རྒྱས་གྱུར་ཅིང་། །བདག་གི་ཚོགས་ནི་འགྲིབས་ གྱུར་ལ། །འབྲས་བུ་རྩ་བ་ཟ་བ་ཡི། །རྟུག་པ་སྤུ་ཅན་མི་འབྱུང་བས། །དཀའ་ཐུབ་འདི་ཆོས་དཀའ་ཐུབ་མིན། །དཀའ་ཐུབ་འདི་ནི་དོན་ཕྱིར་ཏེ། །བྱི་བ་རྣམས་ནི་འགྲིབས་གྱུར་པས། །མེ་སྐྱེས་ཁྱོད་ནི་བཀྲ་ཤིས་ཤོག །དགེ་སློང་དག་ཇི་སྙམ་དུ་སེམས། དེའི་ཚེ་དེའི་ དུས་ཀྱི་བྱི་ལ་མེ་སྐྱེས་ཞེས་བྱ་བ་གང་ཡིན་པ་དེ་ནི་དེའི་ཚེ་དེའི་དུས་ན་ལྷ་སྦྱིན་ཡིན་ཏེ། དེ་ན་ཡང་འདིས་ཆོས་ལྟ་བུའི་སྒོ་ནས་བྱི་བ་རྣམས་ཟོས་སོ། །ད་ལྟར་ཡང་འདིས་ཆོས་ལྟ་བུའི་སྒོ་ནས་འཇིག་རྟེན་བསླུས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་

  1116. 248b

    རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་གཟིགས་པའི་རྗེས་སུ་མཐུན་པར་གྱུར་པ་གང་ལགས་པ་དེ་དག་བདེ་བ་དང་ལེགས་པར་འཁོར་བའི་འབྲོག་དགོན་པ་ལས་རྒལ་ཅིང་། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ལགས་པ་དེ་དག་ནི་ཚུལ་མ་ ལགས་པར་སྡུག་བསྔལ་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་ཀྱི་ཇི་ལྟར་འདས་པའི་དུས་ན་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་བ་དང་ལེགས་པར་འབྲོག་དགོན་པ་ ནས་ཐར་ལ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་པ་གང་ཡིན་པ་དེ་ཉོན་ཅིག །དགེ་སློང་དག་སྔོན་བྱུང་བ་ཚོང་དཔོན་གཉིས་ཤིག་ཤིང་རྟ་ལྔ་བརྒྱ་ལྔ་བརྒྱ་དང་ལྷན་ཅིག་ཚོང་སྒྱུར་ཞིང་དགོན་པའི་ལམ་ཞིག་ཏུ་ཞུགས་ཏེ། དེ་གཉིས་དགོན་པའི་ལམ་དུ་ཞུགས་ནས་གླང་རྣམས་རེས་འགའ་ནི་རྩྭ་ཉུང་། རེས་འགའ་ནི་ཆུ་ཉུང་། རེས་འགའ་ནི་མེད་དོ། །དེ་ནས་ཚོང་པ་དེ་གླང་རྣམས་དང་བཅས་ཏེ་ལྷག་པར་དུབ་པར་སྡུག་བསྔལ་གྱིས་དགོན་པའི་ལམ་དུ་ཞུགས་པ་ལས་ཕྱོགས་ཤིག་ན་གསིང་མ་དང་ཆུ་ཕུན་ སུམ་ཚོགས་པ་མཐོང་ནས་ཚོང་པ་རྣམས་ཀྱིས་དེར་གླང་རྣམས་གཏང་རང་རང་ཁྲུས་བྱས་ནས་ཆུ་མང་དུ་འཐུངས་སོ། །དེ་ནས་གླང་ཆུ་ཉུངས་པ་དང་། རྩྭ་ཉུངས་པས་ཡོངས་སུ་དུབ་པ་དེ་རྣམས་ཀྱིས་རྩྭ་འགྲངས་པར་ཟོས་ཆུ་འཐུངས་ཏེ་ངལ་སོས་པ་དང་། དེ་རྣམས་ཀྱི་ནང་ན་གླང་གཙོ་ བོ་གང་ཡིན་པ་དེས་དེ་རྣམས་ལ་ཤེས་པར་བྱས་པ། ཤེས་ལྡན་དག་བདག་ཅག་རྩྭ་ཉུང་ངུ་དང་། ཆུ་ཉུང་ངུས་ཡོངས་སུ་དུབ་པ་ལས་ཕྱོགས་འདི་ནི་གསིང་མ་དང་། ཆུ་ཕུན་སུམ་ཚོགས་པ་ཡིན་གྱིས། གལ་ཏེ་ཁྱེད་ཅག་འདོད་ན་འདི་ཉིད་དུ་འཐེན་ཏེ་འདུག་པར་བྱའོ། །གླང་ གཙོ་བོ་ཅིག་ཤོས་ཀྱིས་རང་གི་ཚོགས་རྣམས་ལ་སྨྲས་པ། ཤེས་ལྡན་དག་མི་རྣམས་ནི་མཐུ་དང་ལྡན་ཞིང་གདུལ་དཀའ་བ་འདུལ་བར་བྱེད་པ་ཡིན་གྱིས་གནོད་པ་འཐོབ་པར་འགྱུར་དུ་འོང་བས་བདག་ཅག་ཁལ་ཇི་ལྟར་བཀལ་བ་དེ་བཞིན་དུ་ཁྱེར་ཅིག །དེ་སྐད་ཅེས་སྨྲས་པ་དང་། གླང་

  1117. 249a

    གཙོ་བོ་ཅིག་ཤོས་ཁྲོས་ནས་རང་གི་ཚོགས་རྣམས་ལ་སྨྲས་པ། ཤེས་ལྡན་དག་ཟླ་བའི་རྒྱབ་སུས་མཐོང་། འདི་དག་ཁལ་ཁྱེར་ལ་རག །ཡུ་པུས་ནི་མི་བསྐུར་རོ། །ཇི་ཙམ་ན་ཚོང་པ་རྣམས་ཀྱིས་གླང་རྣམས་གཏད་པར་བརྩམས་པ་ན་གླང་དེ་རྣམས་ཕྱི་ ལང་བྱེད་ཅིང་འདུག་པ་དང་། ཚོང་པ་རྣམས་ཀྱིས་མང་དུ་བརྡེགས་ཤིང་ལྕག་གཟེར་བུ་ཅན་གྱིས་གཞུས་པས་ཁྲག་འཛག་ཅིང་ཤིང་རྟ་དང་སྦྱར་ཏོ། །གཞན་ནི་ཅང་མི་བྱེད་པར་ཁལ་མནོས་པས་དེ་དག་ལ་ཅུང་ཟད་ཀྱང་མ་བྱས་སོ། །ལྷས་ཚིགས་སུ་བཅད་དེ་སྨྲས་པ། གླང་གིས་ བ་ལང་འདི་དག་ནི། །ལོག་པ་དག་ཏུ་བཏམས་པས་ན། །རྨ་དག་འབྱུང་ཞིང་ཁྲག་འཛག་ལ། །ལྟོགས་ཤིང་སྐོམ་པར་ལྡན་ལ་ལྟོས། །གླང་གིས་བ་ལང་འདི་དག་ནི། །ལེགས་པ་དག་ཏུ་བཏམས་པས་ན། །དེ་རྣམས་དགོན་པ་ལས་རྒལ་ནས། །བསིལ་བའི་ ཆུ་ལ་འཐུང་ལ་ལྟོས། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གླང་གཙོ་བོ་ལེགས་པར་སྟོན་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་གླང་གཙོ་བོ་བསླུ་བར་བྱེད་པ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངའི་ཚིག་ཉན་པ་གང་ཡིན་པ་དེ་ དག་ནི་བདེ་བ་དང་ལེགས་པར་དགོན་པ་ནས་རྒལ་ཏོ། །ལྷ་སྦྱིན་གྱི་ཚིག་ཉན་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་ངའི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་བདེ་བ་དང་ལེགས་པར་འཁོར་བའི་འབྲོག་དགོན་པ་ནས་རྒལ་ཏོ། ། ལྷ་སྦྱིན་གྱི་ལྟ་བའི་རྗེས་སུ་མཐུན་པར་གྱུར་པ་གང་ཡིན་པ་དེ་དག་ནི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་བླུན་ཞིང་འཁོར་བླུན་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ལྷ་སྦྱིན་བླུན་ཞིང་འཁོར་བླུན་པ་དེ་ཉོན་ཅིག །དགེ་སློང་དག་སྔོན་བྱུང་བ་དགོན་པའི་གནས་ཞིག་ན་སྤྲེའུའི་ཚོགས་ཤིག་གནས་ཏེ། དེ་འཁྱམས་པ་ན་

  1118. 249b

    ཁྲོན་པར་ཟླ་བའི་གཟུགས་བརྙན་ཤར་བ་དེ་མཐོང་ནས་ཚོགས་ཀྱི་དཔོན་པོས་སྨྲས་པ། ཤེས་ལྡན་དག་ཟླ་བ་ཁྲོན་པར་ལྷུང་གིས་འཇིག་རྟེན་ཟླ་བ་མེད་པར་བྱ་འམ་ཅི་དབྱུང་ངོ་། །དེ་རྣམས་ཀྱིས་སྨྲས་པ། ལེགས་ཀྱིས་དབྱུང་ངོ་། །དེ་རྣམས་ཀྱིས་གྲོས་བྱ་བར་བརྩམས་པ། དེ་ཇི་ལྟར་དབྱུང་བར་བྱ། གཞན་དག་གིས་སྨྲས་པ། ཅི་མི་ཤེས་སམ། སྤྲེའུ་བརྒྱུས་ལ་དབྱུང་མོད་ཅེས་དེ་རྣམས་ཀྱིས་སྤྲེའུ་བརྒྱུས་ཏེ་དང་མོ་བས་ཤིང་གི་ཡལ་ག་ལ་འཇུས་ནས་དེའི་མཇུག་མ་ལ་གཞན་གྱིས་འཇུས་ཤིང་དེའི་ལའང་གཞན་གྱིས་འཇུས་ཏེ། དེ་བཞིན་དུ་ཐམས་ཅད་ འཇུས་པས་ཡལ་ག་ལྷག་པར་གཡུར་ཟོས་སོ། །ཆུ་གློངས་པ་དང་ཟླ་བའི་གཟུགས་བརྙན་ཡང་མི་མངོན་པར་གྱུར། ཡལ་ག་ཡང་ཆག་ནས་ཐམས་ཅད་ཁྲོན་པར་ལྷུང་སྟེ། ཚུལ་མ་ཡིན་པས་སྡུག་བསྔལ་བར་གྱུར་ཏོ། །ལྷས་ཚིགས་སུ་བཅད་དེ་སྨྲས་པ། འདི་ན་བླུན་པོ་གང་ དག་ལ། །འདྲེན་པ་བླུན་པོ་ཡོད་གྱུར་པ། །དེ་དག་ཐམས་ཅད་བརླག་འགྱུར་ཏེ། །ཟླ་བ་འབྱིན་པའི་སྤྲེའུ་བཞིན། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྤྲེའུའི་ཚོགས་ཀྱི་དཔོན་པོ་གང་ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་འདི་བླུན་ཞིང་འཁོར་ཡང་ བླུན་པ་ཡིན་ནོ། །ད་ལྟར་ཡང་འདི་བླུན་ཞིང་འཁོར་ཡང་བླུན་པ་ཡིན་ནོ། །སངས་རྒྱས་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། དེ་བཞིན་གཤེགས་པ་ཉིད་ཀྱིས་ ལས་བྱས་ཤིང་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་ང་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། ལས་ བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །གདོན་མི་ཟ་བར་ལྷ་སྦྱིན་གྱིས་དེ་བཞིན་གཤེགས་པའི་དགེ་འདུན་འབྱེད་པར་འགྱུར་རོ། །རྒྱུ་ལྔས་

  1119. 250a

    ན་དགེ་འདུན་བྱེ་བར་མི་འགྱུར་ཏེ། རེ་ཞིག་དང་པོར་སངས་རྒྱས་འཇིག་རྟེན་དུ་འབྱུང་བའི་ཚེ་དགེ་འདུན་བྱེ་བར་མི་འགྱུར་ཏེ། ཀྱེ་མའོ་གྲོགས་པོ་དག་སངས་རྒྱས་འཇིག་རྟེན་དུ་འབྱུང་ཞེས་གྲག་གོ་ཞེས་བྱ་བའི་འཇིག་རྟེན་དེ་ལ་ཕྱོགས་པས་སོ། །སྟོན་པ་ཡོངས་སུ་མྱ་ངན་ ལས་འདས་ནས་དགེ་འདུན་བྱེ་བར་མི་འགྱུར་ཏེ། གང་ལ་ལ་ཞིག་འདི་སྐད་དུ་ང་ཉིད་སྟོན་པ་ཡིན་ནོ་ཞེས་ཟེར་ན་དེ་ལ་གང་གི་ཚེ་བཅོམ་ལྡན་འདས་ཞལ་བཞུགས་ཤིང་འཚོ་ལ་གཞེས་པ་དེའི་ཚེ་ཁྱོད་གར་སོང་ཞེས་བརྗོད་པར་ཟད་པས་སོ། །ལྟ་བའི་ཉེས་པ་དང་། ཚུལ་ཁྲིམས་ ཀྱི་ཉེས་པ་མ་བྱུང་བའི་ཚེ་དང་། ཉན་ཐོས་ཟུང་མཆོག་ཏུ་མ་བསྟན་པ་དེའི་ཚེ་དགེ་འདུན་བྱེ་བར་མི་འགྱུར་ཏེ། དེ་ཅིའི་ཕྱིར་ཞེ་ན། དགེ་འདུན་བྱེ་བ་གདོན་མི་ཟ་བར་ཉན་ཐོས་ཟུང་གིས་སྡུམ་པར་བྱེད་པས་སོ། །མཚམས་མ་བཅད་པ་ན་དགེ་འདུན་བྱེ་བར་མི་འགྱུར་ཏེ། དེ་ཅིའི་ཕྱིར་ ཞེ་ན། མཚམས་ཀྱི་ནང་དུ་དགེ་འདུན་འབྱེད་པར་འགྱུར་གྱི་མཚམས་ཀྱི་ཕྱི་རོལ་དུ་ནི་མ་ཡིན་ནོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ངའི་དགེ་སློང་གི་དགེ་འདུན་སྐྱོན་མེད་པ་ལས་ཚུལ་ཁྲིམས་ཀྱི་སྐྱོན་དང་ལྟ་བའི་སྐྱོན་གྱི་སྐྱོན་བྱུང་སྟེ། ཚུལ་ཁྲིམས་ཀྱི་སྐྱོན་ནི་ཀ་ ལན་ད་ཀའི་བུ་བཟང་བྱིན་ལས་བྱུང་ངོ་། །ལྟ་བའི་སྐྱོན་ཡང་དགེ་སློང་འཆི་ལྟས་ཀྱིས་ཕྱུང་བས་གདོན་མི་ཟ་བར་ལྷ་སྦྱིན་གྱིས་དགེ་འདུན་འབྱེད་པར་འགྱུར་གྱིས། མ་ལ་ང་རྒྱལ་པོའི་ཁབ་ཏུ་དབྱར་བཞུགས་པར་དམ་བཅའོ་སྙམ་མོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། སློབ་ པ་དང་མི་སློབ་པའི་གང་ཟག་རྣམས་དང་། ཐབས་ཅིག་རྒྱལ་པོའི་ཁབ་ཏུ་གཤེགས་ན། ལྷ་སྦྱིན་གྱིས་དགེ་འདུན་གྱི་དབྱེན་བྱ་བར་མི་ནུས་ཀྱིས། མ་ལ་ང་སོ་སོའི་སྐྱེ་བོའི་དགེ་བའི་གང་ཟག་རྣམས་དང་ཐབས་ཅིག་འགྲོའོ་སྙམ་སྟེ། མཉན་ཡོད་དུ་ཇི་ཙམ་བཞེད་ཀྱི་བར་དུ་ བཞུགས་ནས་རིམ་གྲོ་བྱེད་པ་ཚེ་དང་ལྡན་པ་སྒྲ་ཅན་ཟིན་དང་། དགེ་སློང་ལྔ་བརྒྱ་དང་ཐབས་ཅིག་ཏུ་རྒྱལ་པོའི་ཁབ་གང་ན་བ་དེར་རྒྱུ་ཞིང་གཤེགས་ཏེ། རིམ་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ཏོ།། །།འདུལ་བ་གཞི། བམ་པོ་བརྒྱ་རྩ་ལྔ་པ། སངས་རྒྱས་

  1120. 250b

    བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པར་དབྱར་བཞུགས་པར་ཞལ་གྱིས་བཞེས་སོ། །དེའི་ཚེ་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་བ་བྱུང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ ང་དབྱར་གྱི་ཟླ་བ་གསུམ་པོ་འདི་ལ་ནང་དུ་ཡང་དག་པར་འཇོག་པར་བཞེད་ཀྱིས། བསོད་སྙོམས་སྟོབས་པ་དང་། གསོ་སྦྱོང་དེ་ཉིད་ཀྱི་ཚེ་མ་གཏོགས་པར་དགེ་སློང་སུ་ཡང་ངའི་སྤྱན་སྔར་མ་འོངས་ཤིག །དགེ་སློང་གི་དགེ་འདུན་གྱིས་ཀྱང་ཁྲིམས་སུ་བཅས་པ། ཚེ་དང་ལྡན་པ་དག་ དབྱར་གྱི་ཟླ་བ་གསུམ་པོ་འདི་ལ་བསོད་སྙོམས་སྟོབས་པ་དང་། གསོ་སྦྱོང་དེ་ཉིད་ཀྱི་ཚེ་མ་གཏོགས་པར་བཅོམ་ལྡན་འདས་ལ་བལྟ་བའི་ཕྱིར་བདག་ཅག་སུ་ཡང་འགྲོ་བར་མི་བྱའོ་ཞེས་བཅས་སོ། །དེའི་ཚེ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ནི་ལྷོ་ཕྱོགས་ཀྱི་རི་ལ་ དབྱར་གནས་པར་དམ་བཅས་སོ། །ལྷ་སྦྱིན་གྱིས་ཟླ་བ་གསུམ་དུ་དགེ་སློང་གི་དགེ་འདུན་ལ་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྟབས་ཏེ་ཟླ་བ་གསུམ་འདས་པ་དང་། དེས་དགེ་སློང་རྣམས་ལ་སྨྲས་པ། ཚེ་ དང་ལྡན་པ་དག་དགེ་སྦྱོང་གཽ་ཏ་མ་ནི་ཉན་ཐོས་རྣམས་ལ་འདི་སྐད་ཅེས་དགེ་སློང་དགོན་པ་པ་ཉིད་ཀྱིས་ནི་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་བ་ལས་འདའ་བ་དང་། བདེ་བ་དང་སྡུག་བསྔལ་ལས་འདས་པ་ཡང་ཐོབ་པར་འགྱུར་རོ། །བསོད་ སྙོམས་པ་ཉིད་དང་། ཕྱག་དར་ཁྲོད་པ་ཉིད་དང་། ཆོས་གོས་གསུམ་པ་ཉིད་དང་། བླ་གབ་མེད་པ་ཉིད་ཀྱིས་ནི་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་ལས་འདའ་བ་དང་། བདེ་བ་དང་སྡུག་བསྔལ་ལས་འདས་པ་ཐོབ་པར་འགྱུར་ རོ་ཞེས་ཆོས་འཆད་ཀྱིས། ཚེ་དང་ལྡན་པ་དག་གང་སུ་དག་བརྟུལ་ཞུགས་ཀྱི་གཞི་ལྔ་པོ་འདི་དག་མི་འདོད་པ་དང་། མི་བཟོད་པ་དང་། ཡིད་ལ་མི་འབབ་པ་དེ་ནི་དགེ་སྦྱོང་གཽ་ཏ་མ་ལས་རིང་དུ་འགྱུར། ཐག་རིང་དུ་འགྱུར་གྱིས་དེ་ཚུལ་ཤིང་ལོང་ཤིག་ཅེས་བྱས་པ་དང་། དགེ་

  1121. 251a

    སློང་ལྔ་བརྒྱས་ཚུལ་ཤིང་བླངས་ཏེ་ལྷ་སྦྱིན་སྟན་ལས་ལངས་ཏེ་སོང་བའི་རྗེས་བཞིན་རྗེས་བཞིན་དུ་དགེ་སློང་ལྔ་བརྒྱ་འབྲང་ངོ་། །ཚེ་དང་ལྡན་པ་སྒྲ་ཅན་ཟིན་སྒོ་ན་འདུག་པ་དེས་དེ་དག་ལྷ་སྦྱིན་གྱི་རྗེས་བཞིན་རྗེས་བཞིན་དུ་འབྲང་བ་མཐོང་ནས་དེས་སྨྲས་པ། ཚེ་དང་ལྡན་པ་དག་ ཅིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤངས་ཏེ་སྡིག་པ་འདོད་པ་འདིའི་རྗེས་བཞིན་རྗེས་བཞིན་དུ་འབྲང་། དེ་རྣམས་ཀྱིས་སྨྲས་པ། ཚེ་དང་ལྡན་པ་སྒྲ་ཅན་ཟིན་མུ་གེའི་དགོན་པ་ཉམ་ང་བ་འདི་འདྲ་བ་བྱུང་བ་ན། བཅོམ་ལྡན་འདས་ནི་ མི་སྣང་བ་ན་བཞུགས་ཏེ། བདག་ཅག་ལྷ་སྦྱིན་གྱི་མཐུས་སྲོག་དང་མ་བྲལ་མོད། གལ་ཏེ་ལྷ་སྦྱིན་གྱིས་ཟླ་བ་གསུམ་དུ་དགེ་སློང་གི་དགེ་འདུན་མ་གསོས་པར་གྱུར་ན། དགེ་སློང་གཅིག་ཀྱང་གསོན་པོར་མི་འགྱུར་རོ། །གང་གི་ཚེ་ལྷ་སྦྱིན་གྱིས་དེ་བཞིན་གཤེགས་པའི་ཉན་ཐོས་ ཀྱི་དགེ་འདུན་མཐུན་པ་ཕྱེ་བ་དེའི་ཚེས་ཆེན་པོ་འདི་གཡོས་པར་གྱུར། སྐར་མདའ་ལྷུང་། ཕྱོགས་རྣམས་དམར་པོར་གྱུར། བར་སྣང་ལ་ལྷ་རྣམས་རྔའི་སྒྲ་འབྱིན་ངེས་པ་ལ་མ་ཞུགས་པ་རྣམས་ངེས་པ་ལ་མི་འཇུག །འབྲས་བུ་མི་འཐོབ། འདོད་ཆགས་དང་བྲལ་བར་མི་འགྱུར། ཟག་ པ་རྣམས་ཟད་པར་མི་འགྱུར། ལུང་མི་འབོག །མི་ཀློག །མི་འདོན། མདོ་སྡེ་དང་། འདུལ་བ་དང་། ཆོས་མངོན་པ་འཛིན་པ་དང་། དགོན་པ་པ་རྣམས་མདོ་སྡེ་དང་། འདུལ་བ་དང་། ཆོས་མངོན་པ་དང་། དགོན་པ་སེམས་པ་ལ་རབ་ཏུ་སྦྱོར་བར་མི་བྱེད། ཉན་ཐོས་ཀྱི་བྱང་ ཆུབ་ཀྱི་ས་བོན་སྐྱེད་པར་མི་བྱེད་ཅིང་། རང་སངས་རྒྱས་ཀྱི་བྱང་ཆུབ་ཀྱི་མ་ཡིན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་མ་ཡིན་ནོ། །ལྷ་དང་མིར་བཅས་པའི་འགྲོ་བ་ཡང་འཁྲུགས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཆོས་ཀྱི་འཁོར་ལོ་རྒྱུན་ཆད་ དེ། སེམས་ཅན་གྱི་རྒྱུད་ལ་མི་འབྱུང་ངོ་། །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུས་བསམས་པ། ཅིའི་ཕྱིར་ས་ཆེན་པོ་འདི་གཡོས་པར་གྱུར་སྙམ་མོ། །དགྲ་བཅོམ་པ་རྣམས་ནི་མ་བསམས་པར་ཤེས་པ་མཐོང་བར་མི་འཇུག་པས་དེ་གཉིས་ཀྱིས་བསམ་པ་ལ་ཞུགས་ན། ལྷ་

  1122. 251b

    སྦྱིན་གྱིས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ཕྱེ་བར་མཐོང་ནས་དེ་གཉིས་འདི་སྙམ་དུ་སེམས་ཏེ། སོང་ལ་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དང་སླར་སྡུམས་བྱའོ་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་ཀྱིས་དབྱར་གྱི་ ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ནས་ཆོས་གོས་དང་ལྷུང་བཟེད་ཐོགས་ཏེ། རྒྱལ་པོའི་ཁབ་གང་ན་བ་དེར་རྒྱུ་ཞིང་དོང་ནས་རིམ་གྱིས་རྒྱུ་ཞིང་དོང་བ་དང་རྒྱལ་པོའི་ཁབ་ཏུ་ཕྱིན་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་ གྱི་བུས་ཆོས་གོས་དང་ལྷུང་བཟེད་མཁོས་སུ་ཕབ་ནས་རྐང་པ་གཉིས་བཀྲུས་ཏེ་བཅོམ་ལྡན་འདས་གང་ན་བ་དེར་དོང་ངོ་། །དེའི་ཚེ་ཚེ་དང་ལྡན་པ་སྒྲ་ཅན་ཟིན་སྒོ་ན་འདུག་གོ། །དེ་ནས་ཚེ་དང་ལྡན་པ་སྒྲ་ཅན་ཟིན་གྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །མཁན་པོ་ལྷ་སྦྱིན་ གྱིས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ཕྱེའོ། །དེས་སྨྲས་པ། ཚེ་དང་ལྡན་པ་བདག་ཅག་དོན་འདི་ཁོ་ནའི་ཕྱིར་འོངས་ཀྱིས། ཁྱོད་སེམས་ལས་ཆུང་ངུར་མཛོད་ཅིག །སླར་སྡུམས་བྱའོ་ཞེས་སྨྲས་ནས། བཅོམ་ལྡན་འདས་ཀྱི་སྤྱན་སྔར་དོང་སྟེ་ལྷགས་ནས་བཅོམ་ལྡན་ འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུས་འདི་སྐད་ཅེས་གསོལ་ཏོ། །བཙུན་པ་བདག་ཅག་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ བྱེ་བ་སླར་སྡུམས་བགྱིད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དང་མཽད་གལ་གྱི་བུ་དག་ལེགས་སོ་ལེགས་སོ། །གང་ཞིག་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བྱེད་པ་དེ་ནི་བསོད་ནམས་མང་པོ་ཚད་མེད་ཅིང་གྲངས་མེད་པ་ སྐྱེད་པར་འགྱུར་རོ། །དཔེར་ན་འགའ་ཞིག་གི་སྐྲ་དུམ་བུ་བརྒྱར་གཏུབས་པ་འཕྲོ་དང་འཕྲོར་སྦྱོར་བར་བྱེད་པ་དེ་བཞིན་དུ་གང་ཞིག །དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བྱེད་ན་དེ་ནི་བསོད་ནམས་མང་པོ་ཚད་མེད་ཅིང་གྲངས་མེད་པ་སྐྱེད་པར་འགྱུར་རོ། །ཤཱ་

  1123. 252a

    རིའི་བུ་དང་མཽད་གལ་གྱི་བུ་གང་ཟག་བཞི་པོ་འདི་དག་ནི་ཚངས་པའི་བསོད་ནམས་སྐྱེད་པར་འགྱུར་རོ། །བཞི་གང་ཞེ་ན་གང་ཟག་གང་ཞིག་སྔོན་མི་བཞུགས་པའི་ས་ཕྱོགས་སུ། དེ་བཞིན་གཤེགས་པའི་སྐུ་གདུང་གི་མཆོད་རྟེན་གནས་པར་བྱེད་པ་འདི་ནི་ཚངས་པའི་ བསོད་ནམས་སྐྱེད་པའི་གང་ཟག་དང་པོ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །གཞན་ཡང་གང་ཟག་གང་ཞིག་སྔོན་མེད་པའི་ས་ཕྱོགས་སུ་ཕྱོགས་བཞིའི་དགེ་སློང་གི་དགེ་འདུན་གྱི་གཙུག་ལག་ཁང་བྱེད་དུ་འཇུག་པ་འདི་ནི་ཚངས་པའི་བསོད་ནམས་སྐྱེད་པའི་ གང་ཟག་གཉིས་པ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །གཞན་ཡང་གང་ཟག་གང་ཞིག་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་བྱེ་བ་སླར་སྡུམས་བྱེད་པ་འདི་ནི་ཚངས་པའི་བསོད་ནམས་སྐྱེད་པའི་གང་ཟག་གསུམ་པ་ཡིན་ཏེ། བསྐལ་ པར་མཐོ་རིས་རྣམས་སུ་དགའ་བར་འགྱུར་རོ། །གཞན་ཡང་གང་ཟག་གང་ཞིག་བྱམས་པ་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ་རྒྱ་ཆེན་པོར་གྱུར་པ། ཚད་མེད་པ། ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་ བྱས་ནས་རྫོགས་པར་བྱས་ཏེ་གནས་ཤིང་དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་། འོག་དང་། ཐད་ཀར་རྣམ་པ་ཐམས་ཅད་དུ་ཐམས་ཅད་དང་ལྡན་པའི་འཇིག་རྟེན་འདི་བྱམས་པ་དང་ལྡན་པའི་སེམས་འཁོན་མེད་པ། འགྲན་ཟླ་མེད་ པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ། ཤིན་ཏུ་བསྒོམས་པས་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་པ་དང་། དེ་བཞིན་དུ་སྙིང་རྗེ་དང་། དགའ་བ་དང་། བཏང་སྙོམས་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་ པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ། ཤིན་ཏུ་བསྒོམས་པས་ཕྱོགས་གཅིག་ཏུ་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་ཤིང་དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་དང་། དེ་བཞིན་དུ་བཞི་པ་དང་། བླ་དང་། འོག་དང་། ཐད་

  1124. 252b

    ཀར་རྣམ་པ་ཐམས་ཅད་དང་ལྡན་པའི་འཇིག་རྟེན་འདི་བཏང་སྙོམས་དང་ལྡན་པའི་སེམས་འཁོན་མེད་པ། འགྲན་ཟླ་མེད་པ། གནོད་པ་མེད་པ། ཡངས་པ། རྒྱ་ཆེན་པོར་གྱུར་པ། ཚད་མེད་པ་ཤིན་ཏུ་བསྒོམས་པས་མོས་ཏེ། ཁྱབ་པར་བྱས་ནས་རྫོགས་པར་བྱས་ཏེ། གནས་པ་འདི་ནི་ཚངས་ པའི་བསོད་ནམས་སྐྱེད་པའི་གང་ཟག་བཞི་པ་ཡིན་ཏེ། བསྐལ་པར་མཐོ་རིས་རྣམས་སུ་དགའ་བར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་ བོས་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔ་ནས་ཆས་ཏེ་ལྷ་སྦྱིན་གང་ན་བ་དེར་དོང་ངོ་། །དེའི་ཚེ་ལྷ་སྦྱིན་ལྷོ་ཕྱོགས་ཀྱི་རིལ་ཀོ་ཀ་ལི་ཀ་ནི་དེའི་གཡས་སུ་བཞག །ཁཎ་ཌ་དྲ་བ་བྱ་ནི་གཡོན་དུ་བཞག་ནས་སངས་རྒྱས་ལྟར་འཆོས་ཤིང་འཆད་པ་ན། ལྷ་སྦྱིན་གྱིས་ཚེ་དང་ལྡན་པ་ ཤཱ་རིའི་བུ་དང་། མཽད་གལ་གྱི་བུ་གཉིས་རྒྱང་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་བསམས་པ། བདག་གིས་ཉན་ཐོས་ཆེན་པོ་དག་ཀྱང་དབང་དུ་བྱས་པས་ད་ནི་བདག་ཐམས་ཅད་མཁྱེན་པ་ཡིན་ནོ་སྙམ་ནས། ཀོ་ཀ་ལི་ཀ་དང་། ཁཎ་ཌ་དྲ་བ་བྱ་ལ་ལོངས་ཤིག་ལོངས་ཤིག ། ཅེས་གྲུ་ཕུགས་བྱས་པ་དང་། དེ་གཉིས་ཀྱིས་བསམས་པ། བདག་ཅག་གིས་འདི་ལྟར་འདི་དགེ་འདུན་འབྱེད་པའི་གྲོགས་བྱས་པ་དེ་ཉིད་བདག་ཅག་གིས་ཉེས་ཏེ། འདི་མཐུ་དང་ལྡན་པ་ཡིན་པས་གལ་ཏེ་བདག་ཅག་བརྡེགས་ན་གདོན་མི་ཟ་བར་འཆི་བར་འགྱུར་གྱིས་ལྡང་ངོ་སྙམ་ནས་དེ་གཉིས་ ལངས་པ་དང་། ཚེ་དང་ལྡན་པ་ཤཱ་རིའི་བུ་ནི་གཡས་ཕྱོགས་སུ་འདུག་གོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ནི་གཡོན་ཕྱོགས་སུ་འདུག་གོ། །དེ་ནས་ལྷ་སྦྱིན་གྱིས་ཚེ་དང་ལྡན་པ་ཤཱ་རིའི་བུ་ལ་སྨྲས་པ། ཤཱ་རིའི་བུ་ང་རྒྱབ་ན་ཐུགས་མི་བདེ་སྟེ་རེ་ཞིག་དེ་བསལ་གྱིས་ཁྱོད་དགེ་སློང་ རྣམས་ལ་ཆོས་ཀྱི་གཏམ་སྤོབས་པར་གྱིས་ཤིག །ཚེ་དང་ལྡན་པ་ཤཱ་རིའི་བུས་ཀྱང་མི་སྨྲ་བས་ལྷ་སྦྱིན་ལ་ཁས་བླངས་སོ། །དེ་ནས་ལྷ་སྦྱིན་བླ་གོས་བཞི་བལྟབ་ཏུ་བཏིང་། སྣམ་སྦྱར་བལྟབ་སྟེ་སྔས་སུ་བཅུག་ནས་གློ་གཡས་པ་ཕབ་སྟེ་གཉིད་ལོག་པ་ལས་ཚེ་དང་ལྡན་པ་ཤཱ་རིའི་བུས་ཇི་ལྟར་

  1125. 253a

    ལུས་གན་རྐྱལ་གྱིས་སྡུར་བའི་སྒྲ་འབྱིན་ཅིང་འདུག་པ་དེ་ལྟ་བུར་བྱིན་གྱིས་བརླབས་སོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་སྟོན་པ་ལུས་གན་རྐྱལ་གྱིས་སྡུར་ཅིང་གཉིད་ལོག་པའི་གནས་སྐབས་ལ་ལྟོས། དེ་ནས་ཚེ་ དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་འཁོར་རྣམས་སྐྱོ་བ་སྐྱེད་ཅིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཇི་ལྟར་སེམས་མཉམ་པར་བཞག་ན་ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་ པར་འཕགས་ནས་སྤྱོད་ལམ་རྣམ་པ་བཞི་བྱེད་དེ། འཆག་པ་དང་། འགྲེང་བ་དང་། འདུག་པ་དང་། ཉལ་བར་བྱེད་དོ། །མེའི་ཏིང་ངེ་འཛིན་ལའང་སྙོམས་པར་འཇུག་སྟེ། མེའི་ཏིང་ངེ་འཛིན་ལ་སྙོམས་པར་ཞུགས་པ་ན། ཚེ་དང་ལྡན་པ་མཽད་གལ་གྱི་བུ་ཆེན་པོའི་ལུས་ལས་འོད་ཟེར་ སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་གྱི་ཁ་དོག་དག་འབྱིན་པར་བྱེད་དོ། །ཆོ་འཕྲུལ་ཟུང་དུ་ཡང་སྟོན་པར་བྱེད་དེ། ལུས་ཀྱི་སྨད་ནས་མེ་འབར་བར་བྱེད་ཅིང་། ལུས་ཀྱི་སྟོད་ནས་ཆུ་གྲང་མོའི་རྒྱུན་འབེབས་པར་བྱེད་དོ། །ལུས་ཀྱི་སྟོད་ ནས་མེ་འབར་བར་བྱེད་ཅིང་། ལུས་ཀྱི་སྨད་ནས་ཆུ་གྲང་མོའི་རྒྱུན་འབེབས་པར་བྱེད་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་དེ་བཞིན་ཏེ། ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་ བཞི་བསྟན་ནས་རྫུ་འཕྲུལ་གྱི་མངོན་པར་འདུ་བྱེད་པ་དེ་དག་བསྡུས་ཏེ་སྟན་བཤམས་པ་ཉིད་ལ་འདུག་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོས་དགེ་སློང་རྣམས་སྐྱོ་བ་བསྐྱེད་དོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ཀྱིས་གང་ཐོས་ན་ལྷ་སྦྱིན་སྤོང་བར་འགྱུར་བ་དེ་ལྟ་བུའི་ཆོས་ བཤད་ནས་ཡང་སྨྲས་པ། ཚེ་དང་ལྡན་པ་དག་ཁྱེད་ཅག་ལས་གང་དག་སྟོན་པ་ལ་དགའ་བ་དེ་དག་ནི་ལོངས་ཤིག་འདོང་ངོ་ཞེས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཆས་པ་ན་དགེ་སློང་དེ་རྣམས་ཀྱང་དེའི་རྗེས་བཞིན་རྗེས་བཞིན་དུ་འབྲང་ངོ་། །ཀོ་ཀ་ལི་ཀས་ལྷ་སྦྱིན་བསླང་བ།

  1126. 253b

    ལོངས་ལོངས་ཉན་ཐོས་ཆེན་པོ་དག་གིས་ཁྱོད་ཀྱི་འཁོར་ཕྲོགས་སོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། གལ་ཏེ་ལྷ་སྦྱིན་གྱིས་འཁོར་མ་མཐོང་བར་ཁྲིད་ན་ཁྲག་དྲོན་དུ་སྐྱུགས་ནས་འཆི་བར་འགྱུར་བའི་གནས་གང་ཡིན་པ་འདི་ཡོད་ཀྱིས། མདོར་ན་མཐོང་བ་ཁོ་ནར་བྱས་ ལ་བཀྲིའོ་སྙམ་ནས་དེ་དག་དལ་གྱིས་འགྲོ་བའི་སྤྱོད་ལམ་གྱིས་དགེ་སློང་གི་དགེ་འདུན་དང་ལྷན་ཅིག་དོང་བ་དང་། ལྷ་སྦྱིན་ཀུན་ནས་དཀྲིས་པ་དྲག་པོས་མིག་སྡོག་ཅིང་བསྙགས་པ་ལས་ཚེ་དང་ལྡན་པ་ཤཱ་རིའི་བུས་འོབས་མཆོག་ཏུ་འཇིགས་སུ་རུང་བ་སའི་གཏིང་མི་སྣང་བ་ཞིག་སྤྲུལ་པ་དང་ལྷ་སྦྱིན་ཀོ་ ཀ་ལི་ཀ་དང་། ཁཎ་ཌ་དྲབ་བྱ་དང་། ཀ་ཏི་མོ་ར་ཀ་ཏི་ཥྱ་དང་། རྒྱ་མཚོས་བྱིན་རྣམས་དང་ལྷན་ཅིག་འོབས་དེའི་མཐར་ཀུན་དུ་བསྐོར་བར་བརྩམས་པ་ན་རྒལ་མ་ནུས་ནས་དེས་བསམས་པ། འཁོར་མི་འཐོབ་པར་མ་ཟད་ཚུལ་མ་ཡིན་པས་སྡུག་བསྔལ་བར་འགྱུར་རོ་སྙམ་དུ་བསམས་ནས་ སླར་ལོག་གོ། །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུས་ཀྱང་དགེ་སློང་གི་དགེ་འདུན་ཁྲིད་ནས་བཅོམ་ལྡན་འདས་གང་ན་བ་དེར་དོང་ངོ་། །དེ་ནས་དགེ་སློང་དེ་རྣམས་བདག་ཅག་གིས་བཅོམ་ལྡན་འདས་ཡོན་ཏན་ཚད་མེད་པ་དང་ལྡན་པ་སྤངས་ལ། ལྷ་སྦྱིན་སྡིག་པ་ཅན་ལ་ རྟེན་པ་ཅི་ཐ་ཚིག་ཅེས་འགྱོད་པ་སྐྱེས། ཡིད་ལ་གཅགས་པ་སྐྱེས། ཡུལ་ཡུལ་པོར་བྱས། ཕྲག་པ་བཅུམ། མགོ་སྨད་དེ་བཅོམ་ལྡན་འདས་ཀྱི་སྤྱན་སྔར་དོང་ངོ་། །དེ་ནས་བཅོམ་ལྡན་འདས་ཀྱི་ཐུགས་ཀྱིས་དགེ་སློང་དེ་རྣམས་ཀྱི་སེམས་མཁྱེན་ནས་དགེ་སློང་རྣམས་ལ་ བཀའ་སྩལ་པ། དགེ་སློང་དག་ཁྱེད་འོངས་པ་ལེགས་སོ། །རབ་ཏུ་བྱུང་བ་ལེགས་སོ། །ཁྱེད་ཀྱིས་མིའི་རྙེད་པ་ནི་ལེགས་པར་རྙེད་པ་ཡིན་ཏེ། བརྒྱ་ལམ་ན་ལན་འགའ་འཕགས་པའི་གནས་སུ་སྐྱེ་བ་དང་། དབང་པོ་མ་ཚང་བ་མ་ཡིན་པ་དང་། གླེན་པ་མ་ཡིན་པ་དང་། ལུག་ལྟར་ལྐུགས་པ་མ་ཡིན་པ་དང་། ལག་བརྡ་བྱེད་པ་མ་ཡིན་ཞིང་ལེགས་པར་སྨྲས་པ་དང་། ཉེས་པར་སྨྲས་པ་རྣམས་ཀྱིས་ཆོས་ཀྱི་དོན་ཤེས་པར་ནུས། བརྒྱ་ལམ་ན་ལན་འགའ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་།

  1127. 254a

    བརྒྱ་ལམ་ན་ལན་འགའ་དེ་བཞིན་གཤེགས་པས་གསུངས་པའི་ཆོས་འདུལ་བ་འཇིག་རྟེན་ལ་ཆོས་བཤད་པ་སྣང་ངོ་། །དགེ་སློང་དག་དེ་ལྟ་བས་ན་རྙེད་པར་དཀའ་བབས་ཀྱང་ཤིན་དུ་དཀའ་བ་ནི་འདི་ཡིན་ཏེ། འདི་ལྟ་སྟེ་འཕགས་པའི་གནས་སུ་སྐྱེ་བ་དང་། དབང་པོ་མ་ ཚང་བ་མ་ཡིན་པ་དང་། གླེན་པ་མ་ཡིན་པ་དང་། ལུག་ལྟར་ལྐུགས་པ་མ་ཡིན་པ་དང་། ལག་བརྡ་བྱེད་པ་མ་ཡིན་ཞིང་ལེགས་པར་སྨྲས་པ་དང་ཉེས་པར་སྨྲས་པ་རྣམས་ཀྱིས་ཆོས་ཀྱི་དོན་ཤེས་པར་ནུས་པའོ། །ད་ལྟར་འཇིག་རྟེན་དུ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་ དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ང་བྱུང་ཞིང་ཆོས་བཤད་པ་ཉེ་བར་ཞི་བར་ འགྱུར་བ། ཡོངས་སུ་མྱ་ངན་ལས་འདའ་བར་འགྱུར་བ། མངོན་པར་བྱང་ཆུབ་པར་འགྱུར་བ། བདེ་བར་གཤེགས་པས་རབ་ཏུ་གསུངས་པ་འདི་ལྟ་སྟེ། འདི་ཡོད་པས་འདི་འབྱུང་ལ། འདི་སྐྱེས་པས་འདི་སྐྱེ་བ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་ གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་ གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུགས་པ་རྣམས་འབྱུང་བར་འགྱུར་ཏེ། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ་ འདི་མེད་པས་འདི་མི་འབྱུང་ལ། འདི་འགགས་པས་འདི་འགག་པར་འགྱུར་བ་འདི་ལྟ་སྟེ་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་

  1128. 254b

    འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་རྣམས་འགག་པར་འགྱུར་ཏེ། སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་དེ་ལྟ་བས་ན་བདག་གི་དོན་དང་། གཞན་གྱི་དོན་དང་། གཉི་གའི་དོན་ལ་རྗེས་སུ་ལྟ་བ་རྣམས་ཀྱིས་ནི་འདི་ལ་རབ་ཏུ་བསླབ་པར་བྱ་སྟེ། ཅི་ནས་ཀྱང་རབ་ཏུ་བྱུང་བ་དོན་ཡོད་པ་དང་། འབྲས་བུ་དང་བཅས་པ་དང་། བདེ་བ་སྐྱེད་པ་དང་། རྣམ་པར་སྨིན་པ་བདེ་བ་དང་། གང་དག་གིས་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་རྣམས་ཡོངས་སུ་ལོངས་སྤྱོད་པ་དེ་དག་ལ་ཅི་ནས་ཀྱང་དེ་དག་གིས་ཕན་བཏགས་པའི་འབྲས་བུ་ཤིན་ཏུ་ཆེ་བ་དང་། ཕན་ཡོན་ཆེ་བ་དང་། གཟི་བརྗིད་ཆེ་བ་དང་། ཡངས་ཤིང་རྒྱ་ཆེ་བར་འགྱུར་བ་དེ་ལྟར་དགེ་སློང་དག་ཁྱེད་ཀྱིས་བསླབ་པར་བྱའོ། །གང་གི་ཚེ་བཅོམ་ལྡན་ འདས་ཀྱིས་དགེ་སློང་དེ་རྣམས་འོངས་པ་ལེགས་སོ་ཞེས་བྱ་བ་དང་རབ་ཏུ་བྱུང་བ་ལེགས་སོ་ཞེས་བྱ་བ་གསུངས་པ་དེའི་ཚེ་དེ་རྣམས་ཀྱི་ཞུམ་པ་དང་། མི་དགའ་བ་དང་། འགྱོད་པ་དང་། རྣམ་པར་འགྱོད་པ་དང་། ཡིད་ལ་གཅགས་པ་གང་ཡིན་པ་དེ་དག་ཐམས་ཅད་ཀྱི་ཐམས་ཅད་དུ་བྲལ་བར་གྱུར་ཏོ། །དེ་ ནས་དགེ་སློང་གཞན་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པས་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་བྱེ་བར་གྱུར་ལགས། བཅོམ་ལྡན་ འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ཕྲིན་ལས་བྱས་ཤིང་བསགས་པ་དང་ཚོགས་རྙེད་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་

  1129. 255a

    བསྟི་གནས་རྩ་བ་དང་། ལོ་མ་དང་། མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ། ཤིང་སྣ་ཚོགས་ཀྱིས་མཛེས་པར་བྱས་པ། བྱའི་ཚོགས་དུ་མས་བསྟེན་པ་གཞན་ཞིག་ན་དྲང་སྲོང་ལྔ་བརྒྱའི་གཙོ་བོ་དྲང་སྲོང་ཞིག་གནས་སོ། །ཇི་ཙམ་ན་དྲང་སྲོང་གཞན་ཞིག་ལྗོངས་ རྒྱུ་ཞིང་སོང་བ་ན་བསྟི་གནས་དེར་ཕྱིན་ན་དྲང་སྲོང་དེས་དེ་ལ་བཀུར་སྟི་ལེགས་པར་མ་བྱས་པས་དེ་མི་བཟོད་པ་སྐྱེས་ནས་དེའི་འཁོར་འབྱེད་པར་བྱེད་དེ། དྲང་སྲོང་སྡིག་པ་འདོད་པ་འདི་ཅུང་ཟད་ཀྱང་མི་ཤེས་ན་ཅི་སྟེ་དེའི་དྲུང་དུ་འདུག །ཚུར་ཁོ་བོ་དང་ལྷན་ཅིག་འདོང་ཁོ་བོས་ཁྱེད་མངོན་པར་ཤེས་པ་ལྔ་ རྣམས་ལ་རབ་ཏུ་དགོད་དོ་ཞེས་དེས་དེ་རྣམས་ལ་ཕྱེ་བས་དྲང་སྲོང་དེའི་གདམས་ངག་ཉན་དུ་མི་བཏུབ་བོ། །དྲང་སྲོང་དེས་བསམས་པ། སྡིག་པ་བྱེད་པ་འདིས་བདག་གི་དྲང་སྲོང་འདི་རྣམས་ཕྱེའོ་སྙམ་ནས། དེས་དེ་ལ་བཞམས་ཏེ་སྨྲ་བར་བརྩམས་པ། ཚེ་དང་ལྡན་པ་འཁོར་འབྱེད་པར་མ་བྱེད་ ཅིག །འདི་ནི་དྲང་སྲོང་གི་ཆོས་མ་ཡིན་ནོ། །འོན་ཀྱང་དེ་འབྱེད་བཞིན་ཏེ་འདུག་ཏུ་མ་བཏུབ་ནས་དྲང་སྲོང་དེ་ཡིད་མི་བདེ་ཞིང་ཐབས་ཅིག་སེམས་ཤིང་གནས་སོ། །སངས་རྒྱས་རྣམས་འབྱུང་བ་མེད་པ་ན་འཇིག་རྟེན་དུ་རང་སངས་རྒྱས་དམན་པ་དང་ངན་པ་ལ་སྙིང་བརྩེ་བ་ཅན། བས་མཐའི་ གནས་མལ་ལ་དགའ་བ། འཇིག་རྟེན་གྱི་ཡོན་གནས་གཅིག་པུ་རྣམས་འབྱུང་བར་འགྱུར་པས། དེ་ནས་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན་དྲང་སྲོང་དེའི་བསྟི་གནས་སུ་ཕྱིན་པ་དང་། དྲང་སྲོང་དེས་དེའི་ལུས་མཛེས་པ་དང་སྤྱོད་ལམ་ཞི་བ་མཐོང་ངོ་། །མཐོང་ནས་དེས་དེ་ལ་ དད་པ་བསྐྱེད་ནས་དེས་དེ་ལ་བྱ་བ་བྱས་ཏེ་སྨོན་ལམ་ལོག་པར་བཏབ་པ། དྲང་སྲོང་སྡིག་ཅན་གང་ཡིན་པ་འདིས་བདག་གི་འཁོར་ཕྱེ་བས་བདག་གིས་འདི་ཤེས་བྱ་ཐམས་ཅད་ལ་དབང་ཐོབ་པ་ན་ཡང་འཁོར་འབྱེད་པར་བྱེད་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་ དེའི་དུས་ཀྱི་ལྗོངས་ཀྱི་དྲང་སྲོང་གང་གིས་དེའི་འཁོར་ཕྱེ་བ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་གཉུག་མར་གནས་པའི་དྲང་སྲོང་གང་ཡིན་པ་དེ་ནི་ལྷ་སྦྱིན་ཡིན་ཏེ། ངས་དེའི་འཁོར་ཕྱེ་བའི་ལས་ཀྱི་རྣམ་པར་སྨིན་པ་གང་ཡིན་པ་དེས་ན་སྨོན་ལམ་ལོག་པར་བཏབ་པས་འདིས་ངའི་དགེ་འདུན་ཕྱེ་བ་

  1130. 255b

    ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་ཞེས་བྱ་བ་ནས། དགེ་སློང་དག་ཁྱོད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་ པ་ལྷ་སྦྱིན་གྱིས་ཕྱི་པ་དག་ནི་ནང་པར་བགྱིས། ནང་པ་དག་ནི་ཕྱི་པར་བགྱིས་པས་འཁོར་ཕྲོགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་དུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ཕྱི་བ་དག་ནི་ནང་པར་བྱས། ནང་པ་དག་ནི་ ཕྱི་པར་བྱས་པས་འཁོར་ཕྲོགས་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་ཤིག་ན་སྲོག་ཆགས་ཝ་ཞིག་གནས་ཏེ་དེ་ཤིན་ཏུ་བརྐམ་ཆགས་ཅན་ཞིག་པས་དགོན་པར་ཡང་རྒྱུ་གྲོང་འདབ་ཏུ་ཡང་རྒྱུའོ། །དེ་མཐར་གྱིས་རྒྱུ་བ་ན་རིམ་གྱིས་བཙོ་བླག་མཁན་ཞིག་གི་ཁྱིམ་དུ་ཞུགས་པ་ལས་རམས་ཀྱི་རྫ་ མར་ལྷུང་ནས་དེ་སྐྱུག་བྲོ་བར་གྱུར་ཏེ་དེ་དང་ཧ་ཅང་ཡང་མི་རིང་བ་ན་ཚྭ་སྒོའི་ཕུང་པོ་ཞིག་འདུག་པ་དེ་ལ་ཉལ་ནས་གློས་འགྲེས་པ་ལས་དེ་བས་ཀྱང་ལྷག་པར་ལུས་མ་རུང་བར་གྱུར་ཏེ། ཆུའི་ནང་དུ་ཞུགས་ནས་ལངས་ཏེ་སོང་བ་དང་ཉི་མའི་ཟེར་གྱིས་ཕོག་པས་ནོར་བུ་གཟིའི་ཁ་དོག་ལྟར་གྱུར་པ་ཇི་ཙམ་ན་ཝ་རྣམས་ ཀྱིས་མཐོང་ནས། དེ་རྣམས་ཕྱོགས་ཕྱོགས་སུ་བྲོས་ཏེ་རྒྱང་རིང་པོར་འཁོད་ནས་སྨྲས་པ། ཁྱོད་སུ་ཞིག་གང་ནས་འདིར་འོངས། དེས་སྨྲས་པ། ཁོ་བོ་ནི་བརྒྱར་འགྲོ་ཞེས་བྱ་སྟེ། ལྷ་རྣམས་ཀྱི་དབང་པོ་བརྒྱ་བྱིན་གྱིས་རྐང་བཞི་པ་རྣམས་ཀྱི་རྒྱལ་པོར་དབང་བསྐུར་ཏོ། །ཝ་རྣམས་ཀྱིས་བསམས་ པ། །འདིའི་ལུས་ཀྱི་ཁ་དོག་སྔོན་མ་མཐོང་བ་ལས་ན་གདོན་མི་ཟ་བར་དེ་ཁོ་ན་ཡིན་ནོ་སྙམ་ནས། ཝ་རྣམས་ཀྱིས་རྐང་བཞི་པ་ཐམས་ཅད་ལ་རིག་པར་བྱས་སོ། །སེང་གེ་རྣམས་ཀྱིས་བསམས་པ། བདག་ཅག་ལས་ཁྱད་པར་དུ་འཕགས་པ་སུ་ཞིག་ཡོད་ན་དེ་རྐང་བཞི་པ་རྣམས་ཀྱི་རྒྱལ་པོར་གྱུར་ རེ་ཞིག་དོང་ལ་རང་གི་ཚོགས་ཀྱི་དཔོན་པོ་ལ་རིག་པར་བྱའོ་སྙམ་ནས། དེ་རྣམས་ཀྱི་ཚོགས་ཀྱི་དཔོན་པོ་རལ་པ་ཅན་ཞིག་རིའི་ཕྱོགས་ཞིག་ན་གནས་པ་དེ་ལ་དེ་རྣམས་ཀྱིས་སྨྲས་པ་དང་། དེས་རྐང་བཞི་པ་གཞན་ཞིག་ལ་བསྒོ་བ། སོང་ལ་རྐང་བཞི་པའི་དཔོན་པོ་དེ་རྐང་བཞི་པ་འགའ་

  1131. 256a

    ཞིག་གིས་མཐོང་ངམ། མ་མཐོང་རྟོགས་ཤིག །དེ་དེའི་དྲུང་དུ་སོང་སྟེ་བརྟགས་ན་སྔོན་མ་མཐོང་བ་ཡིན་ཞིང་སེང་གེ་རྣམས་མ་གཏོགས་པར་རྐང་བཞི་པ་ཐམས་ཅད་ཀྱིས་ཡོངས་སུ་བསྐོར་བར་གྱུར་ནས་དེ་དེའི་དྲུང་དུ་སོང་སྟེ་ཇི་ལྟར་མཐོང་བ་དག་སྨྲས་པ་དེས་ཐོས་ ནས་སེང་གེའི་ཚོགས་ཀྱིས་ཡོངས་སུ་བསྐོར་ཏེ་དེའི་དྲུང་དུ་དོང་ངོ་། །དེ་ནི་རྐང་བཞི་པ་དུ་མས་ཡོངས་སུ་བསྐོར་ཅིང་གླང་པོ་ཆེ་ལ་ཞོན་ནས་རྒྱུ་བ་ན་དེ་སེང་གེ་རྣམས་ཀྱིས་ཡོངས་སུ་བསྐོར་ཅིང་། དེ་ནས་ནི་སྟག་རྣམས་སོ། །དེ་ནས་ནི་རྐང་བཞི་པ་རྣམས་སོ། །དེ་རྣམས་ཀྱི་ཕྱི་རིམ་རྒྱང་རིང་ པོ་ནས་ནི་ཝ་རྣམས་འདོང་ངོ་། །དེའི་མ་རི་སུལ་ཞིག་ན་གནས་པ་དེ་ལ་དེས་ཝ་ཞིག་མངགས་ཏེ་བུས་རྒྱལ་སྲིད་ཉམས་སུ་མྱོང་གིས་ཚུར་སྤྱོན་ཅིག་ཅེས་སྤྲིང་བ་དང་། དེས་སྨྲས་པ། དེའི་འཁོར་ཅི་འདྲ་བ་ཞིག་དེས་སྨྲས་པ། དེའི་འཁོར་ནང་པ་ནི་སེང་གེ་དང་། སྟག་དང་། གླང་ པོ་ཆེ་དག་ཡིན་ནོ། །ཕྱི་པ་ནི་བདག་ཅག་ཉིད་ཡིན་ནོ། །དེས་སྨྲས་པ། མ་རུང་ཟིན་གྱིས་སོང་ཤིག །དེས་ཚིགས་སུ་བཅད་པས་ཀྱང་སྨྲས་པ། བདག་ནི་རི་འདིའི་སུལ་ན་བདེར་གནས་ཤིང་། །བསིལ་བའི་ཆུ་ལ་བསོད་ཉམས་འཐུང་བར་བྱེད། །དེ་ནི་ཇི་སྲིད་ཝ་སྒྲ་མི་གྲག་པ། ། དེ་སྲིད་གླང་པོ་ཆེ་ཡིས་བདེར་འགྲོ་འགྱུར། །དེ་སོང་སྟེ་དེས་ཝ་རྣམས་ལ་སྨྲས་པ། རྐང་བཞི་པ་རྣམས་ཀྱི་རྒྱལ་པོ་འདི་ནི་ཝ་ཁོ་ན་ཡིན་ཏེ། བདག་གིས་དེའི་མ་རི་སུལ་ག་གེ་མོ་ཞེས་བྱ་བ་ན་འདུག་པ་མཐོང་ངོ་། །དེ་རྣམས་ཀྱིས་སྨྲས་པ། གལ་ཏེ་དེ་ལྟ་ན་དེ་ཝ་ཡིན་ནམ་མ་ཡིན་ པ་བདག་ཅག་གིས་བརྟག་གོ། །ཆོས་ཉིད་ཀྱིས་ཝ་རྣམས་ནི་གང་ཞིག་གིས་ཝ་སྐད་ཐོས་ནས་སྐད་མ་བྱུང་ན་དེའི་སྤུ་རྣམས་འབྱི་བར་འགྱུར་བས་ཝ་སྐད་དབྱུང་བར་བརྩམས་ནས་དེས་བསམས་པ། གལ་ཏེ་བདག་གིས་སྐད་མ་ཕྱུང་ན་ནི་གདོན་མི་ཟ་བར་བདག་གི་སྤུ་རྣམས་འབྱི་ བར་འགྱུར་ལ། གལ་ཏེ་གླང་པོ་ཆེ་ལས་བབས་ནས་སྐད་ཕྱུང་ན་ནི་འདིས་བདག་བསད་དུ་འོང་གིས་འདི་ཉིད་དུ་སྐད་དབྱུང་ངོ་སྙམ་ནས་དེས་གླང་པོ་ཆེ་ལ་ཞོན་བཞིན་སྐད་དབྱུང་བར་བརྩམས་པ་དང་། གླང་པོ་ཆེས་ཤེས་ནས་ཝས་བདག་ལ་བཞོན་ནམ་ཞེས་དེས་དེ་བོར་ཏེ་རྐང་པས་

  1132. 256b

    བརྫིས་སོ། །ལྷས་ཚིགས་སུ་བཅད་དེ་སྨྲས་པ། གང་དག་ནང་པ་ཕྱི་པ་དང་། །ཕྱི་བ་ནང་པར་བྱེད་དེ་དག །འདི་འདྲ་བར་ནི་བརླག་འགྱུར་ཏེ། །གླང་པོ་ཆེ་ཡིས་ཝ་བཞིན་ནོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཝ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། །དེ་ན་ ཡང་འདིས་ནང་པ་དག་ནི་ཕྱི་རོལ་པར་བྱས། ཕྱི་རོལ་པ་དག་ནི་ནང་པར་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདིས་ནང་པ་དག་ནི་ཕྱི་རོལ་པར་བྱས། ཕྱི་རོལ་པ་དག་ནི་ནང་པར་བྱས་པས་འཁོར་རྣམས་ཕྲོགས་པར་གྱུར་ཏོ། །གང་གི་ཚེ་ཚེ་དང་ལྡན་པ་ ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་གྱི་འཁོར་ཕྲོགས་པ་དེའི་ཚེ། ལྷ་སྦྱིན་གྱིས་ཀོ་ཀ་ལི་ཀ་དང་། ཁཎ་ཌ་དྲབ་བྱ་དང་། ཁྱེད་གཉིས་ཀྱིས་ངའི་འཁོར་འཕྲོག་ཏུ་བཅུག་གོ་ཞེས་བརྡེགས་སོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་ རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གྱི་འཁོར་ནི་གཞན་གྱིས་ཕྲོགས་ལ། གཞན་ལ་འདིས་སྡུག་བསྔལ་བསྐྱེད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ ཡང་འདིའི་ཆུང་མ་གཞན་གྱིས་ཕྲོགས་ལ་གཞན་དག་ལ་ཚུལ་མ་ཡིན་པའི་སྡུག་བསྔལ་བསྐྱེད་པ་དེ་ཉོན་ཅིག །དགེ་སློང་དག་སྔོན་བྱུང་བ་ཕྱོགས་གཞན་ཞིག་ན་གླང་པོ་ཆེའི་ཚོགས་ཤིག་གནས་སོ། །དེ་ན་གླང་པོ་ཆེ་ཞིག་བལ་གླང་མོ་ཞིག་ལ་སྡུག་པར་འཛིན་པ་དང་། དེ་ནི་གླང་པོ་ཆེའི་ཕྲུ་ གུ་གཞན་ཞིག་ཡོད་པ་ལ་ལྷག་པར་ཆགས་ནས་དེས་གླང་པོ་ཆེའི་ཕྲུ་གུ་དེ་ལ་སྨྲས་པ། ཚོར་དུ་འོང་གིས་བདག་ཅག་འབྲོས་སམ་དེ་ནས་གླང་པོ་ཆེའི་ཕྲུ་གུ་དེས་སྨྲས་པ། གང་གིས་ན་བདག་ཅག་འབྲོས་པའི་ཐབས་ཅི་ཡོད། །དེས་སྨྲས་པ། བདག་གིས་ཐབས་ཤིག་ཤེས་སོ་ཞེས་ དེས་གླང་པོ་ཆེ་དེ་ལ་སྨྲས་པ། ཁྲུས་བྱ་བའི་ཕྱིར་རྫིང་དུ་འཇུག་པར་བྱའོ། །དེ་ཞུགས་པ་དང་དེས་སྨྲས་པ། བདག་ཅག་ལས་སུ་ཡུན་རིང་དུ་ནུབ་པར་འདུག་པར་བལྟའོ་བླུན་པོའི་ཕུང་པོ་ཅན་དེ་དེ་དང་ལྷན་ཅིག་ཆུ་ནང་དུ་ནུབ་པར་འདུག་པ་ན་དེ་ལངས་ཏེ་གླང་པོ་ཆེའི་ཕྲུ་གུ་དང་ལྷན་ཅིག་

  1133. 257a

    བྲོས་སོ། །གླང་པོ་ཆེ་རིང་ཞིག་འདུག་ནས་ལངས་ན་མི་སྣང་ནས་དེས་བསམས་པ། བདག་ཕམ་པར་འགྱུར་དུ་འོང་གིས་སླར་ཡང་ནུབ་པར་བྱའོ་སྙམ་ནས། དེ་སླར་ཡང་ནུབ་པར་བྱས་ནས་མཆེ་བ་ས་ལ་བཙུགས་ཏེ་འདུག་གོ། །དེ་རིང་ཞིག་ལོན་ནས་དབུགས་དོ་ཆད་ དེ་ལངས་ནས་གླང་པོ་ཆེ་མོ་དེ་མ་མཐོང་ནས་དེས་རྫིང་བུ་དེ་ཕན་ཚུན་དུ་དཀྲུག་པར་བརྩམས་པ་དང་། དེས་དེར་ཉ་དང་། རུས་སྦལ་དང་། སྦལ་པ་ལ་སོགས་པ་སྲོག་ཆགས་མང་པོ་ཚུལ་མ་ཡིན་པས་སྡུག་བསྔལ་བར་བྱས་སོ། །ལྷས་ཚིགས་སུ་བཅད་པས་སྨྲས་པ། ཀྱེ་མའོ་ཤ་ཡི་ཕུང་པོ་ ཆེ། །འདི་ལ་ཤེས་རབ་ཡོད་མ་ཡིན། །གཞན་གྱིས་ཆུང་མ་ཕྲོགས་གྱུར་ན། །གཞན་ལ་སྡུག་བསྔལ་སྟེན་པར་བྱེད། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ན་གླང་པོ་ཆེ་དམ་པ་གང་ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་ཆུང་མ་གཞན་གྱིས་ཕྲོགས་ལ་གཞན་ལ་ ཚུལ་མ་ཡིན་པའི་སྡུག་བསྔལ་བསྐྱེད་དོ། །ད་ལྟར་ཡང་འཁོར་གཞན་གྱིས་ཕྲོགས་ལ་གཞན་ལ་ཚུལ་མ་ཡིན་པའི་སྡུག་བསྔལ་བསྐྱེད་དོ།། །།སྡོམ་ནི། གླགས་དང་མཐོང་བ་ཉིད་དང་ནི། །ཨུཏྤལ་མདོག་ནི་བསད་པ་དང་། །རིལ་བ་དང་གསུམ་འོ་མ་དང་། །ས་འཚོ་མ་དང་བཟོད་ གསོལ་དང་། །གླང་དང་སེམས་པ་ཉིད་དང་ནི། །བྱ་དང་ཐ་མ་བཞི་ཡིན་ནོ། །དགེ་སློང་དག་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་ལ་གླགས་ བཙལ་བ་ལས་གླགས་རྙེད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་ལྷ་སྦྱིན་ལ་གླགས་བཙལ་བ་ལས་གླགས་རྙེད་པ་ དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་འཕོང་གི་སློབ་དཔོན་ཞིག་གནས་ཏེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་

  1134. 257b

    པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏོ། །དེ་ཟླ་བ་བརྒྱད་དམ་དགུ་ལོན་པ་ན་བུ་མོ་ཞིག་བཙས་ཏེ་བཙས་ནས་ཞག་བདུན་གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་རིགས་དང་མཐུན་པའི་མིང་བཏགས་ཏེ་དེ་བསྐྱེད་ བསྲིངས་ནས་ཆེན་མོར་གྱུར་ཏོ། །འཕོང་གི་སློབ་དཔོན་གྱིས་བསམས་པ། བུ་མོ་འདི་ནི་བདག་གིས་གཟུགས་དང་ལྡན་པའམ། ཚུལ་ཁྲིམས་དང་ལྡན་པའམ། ནོར་ཅན་སུ་ལ་ཡང་སྦྱིན་པར་མི་བྱ་སྟེ། འོན་ཀྱང་བདག་ལས་གནས་ལྔ་བསླབས་ཏེ་བྱང་བར་གྱུར་པ་གང་ཡིན་པ་ དེ་ལ་བདག་གིས་འདི་སྦྱིན་ནོ་སྙམ་མོ། །དེ་ལས་བྲམ་ཟེའི་ཁྱེའུ་གཉིས་ཤིག་འཕོང་བསླབས་པ་ལས། དེ་ན་གཅིག་ནི་གནས་ལྔ་ལ་བྱང་བར་གྱུར་ཏོ། །ཅིག་ཤོས་ཀྱིས་ནི་གཅོད་པ་ལ་བྱང་བར་གྱུར་ཏོ། །དེ་གཉིས་ལས་གནས་ལྔ་ལ་བྱང་བར་གྱུར་པ་གང་ཡིན་པ་དེ་ལ་དེས་བུ་མོ་ བྱིན་པ་དང་ཅིག་ཤོས་པོ་དེ་མི་བཟོད་པ་སྐྱེས་ནས་ཆོམ་རྐུན་པ་རྣམས་ཀྱི་ནང་དུ་ཞུགས་ཏེ། ཆོམ་རྐུན་ལྔ་བརྒྱའི་སྡེ་དཔོན་དུ་གྱུར་ནས་དེ་ཕྱོགས་གཅིག་ན་ལམ་བཅད་ནས་འཁོད་དོ། །སྔ་མ་པོ་དེས་བུ་མོ་དེ་བག་མར་བླངས་ནས་མདའ་ལྔ་བརྒྱ་ཤོང་བའི་དོང་པ་གཉིས་ཐོགས་ཏེ་ཤིང་ རྟར་ཞུགས་ནས་རང་གི་ཁྱིམ་དུ་དོང་ངོ་། །ཇི་ཙམ་ན་ཚོང་པ་ཆོམ་རྐུན་གྱིས་འཇིགས་པ་མདུན་དུ་དོང་བ་སྡོད་པ་དང་དེས་སྨྲས་པ། ཤེས་ལྡན་དག་དེང་ཤིག་ཅི་སྡོད། དེ་རྣམས་ཀྱིས་སྨྲས་པ། ཆོམ་རྐུན་པ་རྣམས་ཀྱིས་ལམ་བཅད་དོ། །དེས་སྨྲས་པ། ཚུར་ཅི་ཞིག་བྱར་ ཡོད་ཅེས་དེ་ཆས་པ་དང་ཚོང་པ་རྣམས་ཀྱིས་སྨྲས་པ། ཤེས་ལྡན་དག་རེ་ཞིག་སྡོད་ཅིག །འདི་ནི་འགྲོ་ལ་རག་སྟེ་འདི་བདག་ཉིད་འཆི་བ་དང་། ཆུང་མ་ཕྲོགས་པར་གྱུར་པའི་གནས་གང་ཡིན་པ་དེ་ཡོད་དོ། །རྐུན་པོ་རྣམས་ཤིང་ལྗོན་པ་ཞིག་ལ་འཛེགས་ནས་ཕྱོགས་སུ་ལྟ་ བར་བྱེད་ཅིང་འདུག་པ་དང་། དེ་རྣམས་ཀྱིས་དེ་ཤིང་རྟར་ཞུགས་པ་མཐོང་ནས་དེ་རྣམས་ཀྱིས་སྨྲས་པ། ཤེས་ལྡན་དག་མི་ཞིག་ཤིང་རྟར་ཞུགས་ནས་སོང་ངོ་། ཆོམ་རྐུན་པའི་སྡེ་དཔོན་གྱིས་དེ་ལ་ཕོ་ཉ་ཞིག་བཏང་སྟེ་ཤིང་རྟ་སླར་བཟློག་པ་དང་། དེས་སྨྲས་པ། ཤེས་

  1135. 258a

    ལྡན་དཔའ་བོ་ལ་དཔའ་བོའི་ལན་བྱིན་ཅིག །དེ་རྣམས་ཀྱིས་སྨྲས་པ། བདག་ཅག་ཀྱང་དཔའ་བོ་ཡིན་ནོ་ཞེས་སྡེ་དཔོན་གྱིས་མི་རྒོད་ལྔ་བརྒྱ་བཏང་བ་དང་དེས་དེ་རྣམས་བསད་དོ། །དེ་བཞིན་དུ་ཉི་ཤུ་ཞིག་འོངས་པ་དེ་དེ་རྣམས་ཀྱང་བསད་དེ། ཇི་ཙམ་ན་ཐམས་ ཅད་བསད་ནས་ཆོམ་རྐུན་པའི་སྡེ་དཔོན་འབའ་ཞིག་ལུས་པ་དང་དེས་རལ་གྲི་བླངས་ཏེ་མདུན་དུ་བསྡད་དོ། །དེས་མདའ་འཕངས་པར་བརྩམས་པ་ན་དེའི་རལ་གྲིས་གཏུབས་སོ། །ཇི་ཙམ་ན་དེས་མདའ་ལྔ་བརྒྱ་འཕངས་པ་དེ་དག་ཐམས་ཅད་དེས་གཏུབས་ནས་མདའ་གཅིག་ཅིག་ལུས་ཏེ་ དེས་དེ་མ་འཕངས་པ་དང་། དེ་ནས་བུ་མོ་དེས་སྨྲས་པ། མདའ་བཞག་སྟེ་ཅི་བགྱི་འཕོངས་ཤིག །དེས་སྨྲས་པ། མདའ་འདི་འབའ་ཞིག་ལུས་ཏེ་འདི་འཕངས་ན་ཁོ་བོ་བསད་ནས་ཁྱོད་ཀྱང་ཕྲོགས་པར་འགྱུར་རོ། །དེ་ནས་བུ་མོ་དེས་ལུས་ཀྱི་སྒྱུར་སྟངས་ཀྱིས་ལན་བུ་བཅོས་ པར་བརྩམས་པ་ན། དེ་ལ་ཆོམ་རྐུན་པའི་སྡེ་དཔོན་རྟོག་པར་བྱེད་པ་ན་དེས་དེའི་གནད་དུ་མདས་བསྣུན་པ་དང་། དེ་འཆི་ཀ་ན་ཚིགས་སུ་བཅད་དེ་སྨྲས་པ། ཤིང་རྟ་ཅན་གྱིས་བདག་མ་བསད། །འདོད་ཆགས་སྡིག་པའི་སེམས་ཀྱིས་ནི། །བདག་ནི་གཡུལ་གྱི་དབུས་ཞུགས་ ནས། །བག་མེད་བཞིན་ལ་ལྟ་བས་བསད། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཤིང་རྟ་ཅན་གང་ཡིན་པ་དེ་ནི་ཤཱ་རིའི་བུ་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བུ་མོ་གང་ཡིན་པ་དེ་ནི་མཽད་གལ་གྱི་བུ་ཡིན་ནོ། །དེའི་ཚེ་དེའི་དུས་ཀྱི་ཆོམ་རྐུན་པའི་སྡེ་དཔོན་གང་ ཡིན་པ་དེ་ནི་ལྷ་སྦྱིན་ཡིན་ཏེ། དེ་ན་ཡང་འདི་གཉིས་ཀྱིས་དེ་ལ་གླགས་བཙལ་བ་ལས་གླགས་རྙེད་དོ། །ད་ལྟར་ཡང་འདི་གཉིས་ཀྱིས་དེ་ལ་གླགས་བཙལ་བ་ལས་གླགས་རྙེད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་འཚོ་བྱེད་གཞོན་ནུས་བསྐྱེད་ཀྱི་ཨ་མྲའི་ ཚལ་ན་དབྱར་བཞུགས་པར་ཞལ་གྱིས་བཞེས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་དབྱར་ཉེ་བར་སྒྲུབ་པར་དབྱར་ཟླ་འབྲིང་པོའི་ཉ་དབུ་མ་དེ་ཉིད་ཀྱི་མཚན་མོ་ཡིན་པར་ཤེས་ཤིང་མངོན་པའི་ཟླ་ཉི་མོ་ལ་བློན་པོའི་ཚོགས་ཀྱིས་ཡོངས་སུ་བསྐོར་ཏེ་

  1136. 258b

    སྟེང་གི་ཁང་བཟངས་ཀྱི་གཞིར་སོང་ནས་བློན་པོ་རྣམས་ལ་སྨྲས་པ། ཀྱེ་གྲོགས་པོ་དག་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མ་དེ་ཉིད་ཀྱི་མཚན་མོ་ཡིན་པར་ཤེས་ཤིང་མངོན་པའི་ཟླ་ཉི་མོ་འདི་ལྟ་བུ་ལ་ངས་ཅི་ཞིག་བྱ། དེ་ནས་ཕོ་བྲང་སླས་ཀྱི་བུད་མེད་ཅིག་གིས་ལུས་ འཕགས་མའི་བུ་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ་ལྷ་འདོད་པའི་ཡོན་ཏན་ལྔ་འབྱོར་ཅིང་ལྡན་པས་རོལ་པར་མཛད། དགྱེས་པར་མཛད། དགྱེས་དགུར་སྤྱོད་པར་མཛད་ན་ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །དེ་ནས་ཕོ་བྲང་སླས་གཞན་ཞིག་གིས་ཡང་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་ བུ་ལ་ལྷ་འདོད་པའི་ཡོན་ཏན་ལྔ་འབྱོར་ཅིང་ལྡན་པས་རྒྱལ་པོའི་ཁབ་ཀྱི་གྲོང་ཁྱེར་གྱི་ཉེ་འཁོར་གྱི་ཤུལ་ཕྲ་མོ་རྣམས་བྱུལ་ཞིང་རོལ་པར་མཛད། དགྱེས་པར་མཛད། དགྱེས་མགུར་སྤྱད་པར་མཛད་ན་ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །གཞོན་ནུ་འཆར་ བྱེད་བཟང་པོས་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ་ལྷ་དཔུང་གི་ཚོགས་ཡན་ལག་བཞི་པ་གླང་པོ་ཆེ་པའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གོ་བསྐོན་ནས། གཞན་གྱི་ཡུལ་འཁོར་དང་། གཞན་གྱི་ཡུལ་དུ་གཤེགས་ཏེ། གཡུལ་ཆེན་པོའི་གཡུལ་སྤྲད་ནས་གཡུལ་ལས་རྒྱལ་བར་བགྱིས་ཏེ། རྒྱལ་ནས་གཡུལ་དེ་ཉིད་ལས་པགས་ཏེ་བཞུགས་ན་ལྷའི་བགྱི་བ་ནི་དེ་ལགས་པ་སྙམ་ བདག་སེམས་ལགས་སོ། །དེ་ནས་བློན་པོ་རྒན་པོ་གཞན་ཞིག་གིས་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ་ལྷ་འོད་སྲུང་རྫོགས་བྱེད་འདུས་པ་ཅན། ཚོགས་ཅན།

  1137. 259a

    ཚོགས་ཀྱི་སློབ་དཔོན། སྐྱེ་བོ་མང་པོས་གཟུགས་བཟང་པོར་བཀུར་བ། སྐྱེ་བོ་མང་པོས་མདུན་གྱིས་བལྟས་པ། ཀུན་ཏུ་འཚོ་ལྔ་བརྒྱའི་གཙོ་བོ་དེ་རྒྱལ་པོའི་ཁབ་ཏུ་དབྱར་གནས་པར་དམ་བཅས་པ་དེ་ལ་ལྷ་བསྙེན་བཀུར་མཛོད་ཅིག །ལྷའི་བགྱི་བ་ནི་དེ་ལགས་ པ་སྙམ་བདག་སེམས་ལགས་སོ། །ཡང་བློན་པོ་རྒན་པོ་གཞན་ཞིག་གིས་འདི་སྐད་ཅེས་སྨྲས་སོ། །ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉ་དབུ་མའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལྷ་ཀུན་དུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་ མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། །ཀ་ཏྱའི་བུ་ནོག་ཅན་དང་། ལྷ་གཅེར་བུ་པ་གཉེན་གྱི་བུ་འདུས་པ་ཅན། ཚོགས་ཅན། ཚོགས་ཀྱི་སློབ་དཔོན། སྐྱེ་བོ་མང་པོས་གཟུགས་བཟང་པོར་བཀུར་བ། ཚོགས་ཆེན་པོའི་མདུན་གྱིས་བལྟས་པ་ཞིག་མཆིས་ཏེ། དེ་རྒྱལ་པོའི་ ཁབ་འདི་ཉིད་དུ་དབྱར་གནས་པར་དམ་བཅས་པ་དེ་ལ་ལྷ་བསྙེན་བཀུར་མཛོད་ཅིག །ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །དེའི་ཚེ་འཚོ་བྱེད་གཞོན་ནུས་བསྐྱེད་འཁོར་དེ་ཉིད་ཀྱི་ནང་ན་འདུས་ཤིང་འདུག་པར་གྱུར་ཏོ། །དེ་ནས་ལུས་འཕགས་མའི་བུ་མ་ ག་དྷཱའི་རྒྱལ་པོ་མ་སྐྱེས་དགྲས་འཚོ་བྱེད་གཞོན་ནུས་བསྐྱེད་ལ་སྨྲས་པ་ཀྭའི་ནང་རྗེ་འཚོ་བྱེད་ཅིའི་ཕྱིར་ཅང་མི་སྨྲ། ཅི་ཅུང་ཟད་མི་སྨྲ་འམ། ལྷ་དབྱར་ཉེ་བར་སྒྲུབ་པ་དབྱར་ཟླ་འབྲིང་པོའི་ཉའི་མཚན་མོ་ལགས་པར་མཁྱེན་ཅིང་མངོན་པའི་ཟླ་ཉི་མོ་འདི་ལྟ་བུ་ལ། ལྷ་བཅོམ་ལྡན་འདས་ འདུས་པ་ཅན། ཚོགས་ཆེན་ཚོགས་ཀྱི་སློབ་དཔོན། སྐྱེ་བོ་མང་པོས་གཟུགས་བཟང་པོར་བཀུར་བ། ཚོགས་ཆེན་པོས་མདུན་གྱིས་བལྟས་པ་དེ་རྒྱལ་པོའི་ཁབ་འདི་ཉིད་ཀྱི་བདག་གི་ཨ་མྲའི་ཚལ་ན་དབྱར་བཞུགས་པར་ཞལ་གྱིས་བཞེས་པ་དེ་ལ་ལྷ་བསྙེན་བཀུར་མཛོད་ཅིག ། ལྷའི་བགྱི་བ་ནི་དེ་ལགས་པ་སྙམ་བདག་སེམས་ལགས་སོ། །དེའི་ཚེ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་ལ་སེམས་གཞོལ་བར་གྱུར། བཅོམ་ལྡན་འདས་ལ་འབབ་པར་གྱུར། བཅོམ་ལྡན་འདས་ལ་བབ་པར་གྱུར་ཏོ། །དེ་ནས་ལུས་

  1138. 259b

    འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་འཚོ་བྱེད་གཞོན་ནུས་བསྐྱེད་ལ་འདི་སྐད་ཅེས་སྨྲས་སོ། །འཚོ་བྱེད་སོང་ལ་གླང་པོ་ཆེའི་དམ་པ་ཆེན་པོ་སྟོད་ཅིག་དང་། དེ་ལ་ཁོ་བོ་ཞོན་ནས་བཅོམ་ལྡན་འདས་བལྟ་བའི་ཕྱིར་འགྲོའོ། །ལྷ་བཀའ་བཞིན་འཚལ་ཞེས་འཚོ་བྱེད་གཞོན་ནུས་བསྐྱེད་ ཀྱིས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ལས་མཉན་ནས་གླང་པོ་ཆེ་དམ་པ་ཆེན་པོ་དེ་དང་བལ་གླང་མོ་ལྔ་བརྒྱ་ཙམ་གཏད་ནས་ཕོ་བྲང་སླས་ལག་ན་སྒྲོན་མ་ཐོགས་པ་ལྔ་བརྒྱ་ཙམ་བལ་གླང་མོ་རེ་རེ་ཞོན་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ གང་ན་བ་དེར་སོང་སྟེ་ཕྱིན་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ལྷ་གླང་པོ་ཆེའི་དམ་པ་ཆེན་པོ་བསྒྲོན་ལགས་ཏེ། ལྷ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་ སྐྱེས་དགྲ་གླང་པོ་ཆེ་དམ་པ་ཆེན་པོ་ལ་ཞོན་ནས་ཕོ་བྲང་སླས་ལག་ན་སྒྲོན་མ་ཐོགས་པ་ལྔ་བརྒྱ་ཙམ་བལ་གླང་མོ་རེ་རེ་ཞོན་པས་མདུན་དུ་བདར་ནས་རྒྱལ་པོའི་ཁབ་ནས་བྱུང་སྟེ་བཅོམ་ལྡན་འདས་བལྟ་བ་དང་བསྙེན་བཀུར་བྱ་བའི་ཕྱིར་བཅོམ་ལྡན་འདས་ཀྱི་སྤྱན་སྔར་སོང་ངོ་། ། དེའི་ཚེ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ཡུལ་སྤོང་བྱེད་པ་རྣམས་དང་མི་མཐུན་པར་གྱུར་ཏོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་རྒྱལ་པོའི་ཁབ་ནས་བྱུང་མ་ཐག་ཁོ་ནར་བདག་འཚོ་བྱེད་གཞོན་ནུས་བསྐྱེད་འདིས་བསད་པར་འདོད་ པའམ། བསླུ་བར་འདོད་པའམ། ཁས་ལེན་དུ་གཞུག་པར་འདོད་པའམ། གཤེད་མའམ། ཕྱིར་རྒོལ་བའམ། མི་མཛའ་བ་དག་ལ་གཏད་པར་མི་འདོད་གྲང་སྙམ་དུ་བསམས་ནས་སྐྲག་པར་གྱུར། བག་ཚ་བར་གྱུར། སྤུ་ཟིང་ཞེས་བྱེད་པར་གྱུར་ནས་འཚོ་བྱེད་གཞོན་ ནུས་བསྐྱེད་ལ་འདི་སྐད་ཅེས་སྨྲས་སོ། །འཚོ་བྱེད་ཁྱོད་ཁོ་བོ་ལ་གསོད་པར་འདོད་པའམ། བསླུ་བར་འདོད་པའམ། ཁས་ལེན་དུ་གཞུག་པར་འདོད་པའམ། གཤེད་མ་པའམ། ཕྱིར་རྒོལ་བའམ། མི་མཛའ་བ་དག་ལ་གཏད་པར་མི་འདོད་གྲང་། དེས་འདི་སྐད་ཅེས་

  1139. 260a

    སྨྲས་སོ། །ལྷ་ཁྱོད་ལ་བདག་དགྲོངས་པར་འཚལ་བའམ། བསླུ་བར་འཚལ་བའམ། སྨྲར་གཞུག་པར་འཚལ་བའམ། གཤེད་མ་པའམ། ཕྱིར་རྒོལ་བའམ། མི་མཛའ་བ་དག་ལ་གཏད་པར་འཚལ་བ་མ་ལགས་སོ། །དེ་ནས་ལུས་འཕགས་ མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་འཚོ་བྱེད་གཞོན་ནུས་བསྐྱེད་ལ་འདི་སྐད་ཅེས་སྨྲས་སོ། །འཚོ་བྱེད་བཅོམ་ལྡན་འདས་དེ་ལ་འཁོར་ཇི་སྙེད་ཡོད། དགེ་སློང་སྟོང་ཉིས་བརྒྱ་ལྔ་བཅུ་ལྷག་ཙམ་མོ། །ཨེ་མའོ་འཚོ་བྱེད་ཁྱོད་ཀྱིས་ང་ཇི་ལྟར་བསད་པར་མི་འདོད། བསླུ་བར་ མི་འདོད། སྨྲར་གཞུག་པར་མི་འདོད། གཤེད་མ་པའམ། ཕྱིར་རྒོལ་བའམ། མི་མཛའ་བ་དག་ལ་གཏོད་པར་མི་འདོད། ད་ལྟར་བཅོམ་ལྡན་འདས་དེ་ལ་འཁོར་དེ་སྙེད་ཡོད་ན་ལུ་བའི་སྒྲ་ཡང་མི་གྲག །སྦྲིད་པའི་སྒྲ་ཡང་མི་གྲག་གོ །ལྷ་བཅོམ་ལྡན་འདས་དེ་ནི་སྒྲ་ཆུང་ བ་བཞེད། སྒྲ་ཆུང་བ་ལ་དགྱེས། སྒྲ་ཆུང་བས་འདུལ། སྒྲ་ཆུང་བའི་བསྔགས་པ་མཛད་པས་འཁོར་ཡང་སྒྲ་ཆུང་བ་ཉིད་དོ། །ལྷ་དེ་ལྟ་བས་ན་མྱུར་བ་མྱུར་བར་གླང་པོ་ཆེ་དམ་པ་ཆེན་པོ་ཐོབ་ཤིག །འདི་ལྟར་འཁོར་གྱི་ཁྱིམ་ན་འབྲུ་མར་གྱི་ཞུགས་མར་གྱི་འོད་གདའོ། ། དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་མྱུར་བ་མྱུར་བར་གླང་པོ་ཆེའི་དམ་པ་ཆེན་པོ་བཏབ་ནས་དེས་ཇི་ཙམ་བཞོན་པས་རུང་བའི་སའི་བར་དུ་བཞོན་པས་སོང་སྟེ་བཞོན་པ་ལས་བབས་ནས་རྐང་པ་ཁོ་ནས་ཀུན་དགའ་ར་བའི་ནང་དུ་ཞུགས་སོ། །དེའི་ཚེ་བཅོམ་ ལྡན་འདས་དགེ་སློང་གི་དགེ་འདུན་གྱི་གུང་ལ་མཚོ་ལྟར་དང་ཞིང་གསལ་ལ་རྙོག་པ་མེད་པས་བཞུགས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་འཁོར་གྱི་ཁྱམས་དང་ཉེ་བར་སོང་ནས་འཚོ་བྱེད་གཞོན་ནུས་བསྐྱེད་ལ་སྨྲས་པ། འཚོ་བྱེད་བཅོམ་ལྡན་ འདས་དེ་གང་ན་བཞུགས། ལྷ་བཅོམ་ལྡན་འདས་དེ་ནི་དགེ་སློང་གི་དགེ་འདུན་གྱི་གུང་ལ་མཚོ་ལྟར་དང་ཞིང་གསལ་ལ་རྙོག་པ་མེད་པར་བཞུགས་པ་ཕ་བི་ཁོ་ན་ལགས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་གང་ན་བ་དེར་སོང་

  1140. 260b

    སྟེ་ཕྱིན་ནས་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དགེ་སློང་གི་དགེ་འདུན་དང་ ཐུགས་དུལ་བ་ཉེ་བར་ཞི་བ་ཇི་ལྟ་བུ་དང་ལྡན་པ་དེ་བཞིན་དུ་གཞོན་ནུ་འཆར་བྱེད་བཟང་པོ་ཡང་སེམས་དུལ་བ་དང་། ཉེ་བར་ཞི་བ་དེ་འདྲ་བ་དང་ལྡན་པར་གྱུར་ཅིག །རྒྱལ་པོ་ཆེན་པོ་རང་ཉིད་དགའ་བར་རབ་ཏུ་བསྟན་པ་ལེགས་སོ་ལེགས་སོ། །རྒྱལ་པོ་ཆེན་པོ་རང་གི་སྟན་ལ་ འདུག་ཤིག །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་ སྐྱེས་དགྲས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གལ་ཏེ་ཞུ་བ་ལུང་བསྟན་པའི་སླད་དུ་སྐབས་ཕྱེ་བ་ལྟ་ན་བདག་ཕྱོགས་འགའ་ཞིག་ཞུ་ལགས་སོ། །རྒྱལ་པོ་ཆེན་པོ་ཅི་དང་ཅི་འདོད་པ་ཞུས་ཤིག །བཙུན་པ་ལས་ཀྱི་གནས་དང་བཟོའི་གནས་ཐ་དད་པ་ གང་དག་ལགས་པ་འདི་ལྟ་སྟེ། །ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་འཚལ་བ་དང་། རྟ་ལ་འཚལ་བ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞབས་འབྲིང་བ་བགྱིད་པ་དང་། །གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བགྱིད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་ རྣམས་ཀྱིས་བགྱི་བ་བགྱིད་ཅིང་སྦྱིན་པ་དག་སྩོལ། བསོད་ནམས་དག་བགྱིད་ལ་གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པས་རྩེ་བར་བགྱིད། དགའ་བར་བགྱིད། དགའ་མགུར་སྤྱོད་པར་བགྱིད་པ་དེ་ལྟ་བུ་རྣམས་ལ་ཡང་དག་པར་མཐོང་བའི་

  1141. 261a

    དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་ལགས་སམ།། །།འདུལ་བ་གཞི། བམ་པོ་བརྒྱ་རྩ་དྲུག་པ། རྒྱལ་པོ་ཆེན་པོ་ཁྱོད་ཀྱིས་འདི་འདྲ་བའི་ཞུ་བ་འདི་ལས་སྔོན་དགེ་སྦྱོང་དང་བྲམ་ཟེ་གཞན་རྣམས་ལ་དྲིས་པ་དྲན་ནམ། བཙུན་པ་དྲན་ལགས་ཏེ། བཙུན་པ་དུས་གཅིག་ཅིག་ན་བདག་འོད་སྲུང་རྫོགས་བྱེད་གང་ན་བ་དེར་མཆིས་ཏེ། མཆིས་ནས་འོད་སྲུང་རྫོགས་བྱེད་ལ་བདག་གིས་འདི་སྐད་ཅེས་བཙུན་པ་འོད་སྲུང་ལས་ཀྱི་གནས་དང་བཟོའི་གནས་ཐ་དད་པ་གང་དག་ལགས་པ་འདི་ ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་པ་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་ གཏོང་། བསོད་ནམས་དག་བྱེད་ལ། གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་ པ་འཐོབ་བམ་ཞེས་དྲིས་པ་ན་དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྦྱིན་པ་མེད་དོ། །མཆོད་སྦྱིན་མེད་དོ། །སྦྱིན་སྲེག་མེད་དོ། །ལེགས་པར་སྤྱད་པ་མེད་དོ། །ཉེས་པར་སྤྱད་པ་མེད་དོ། །ལེགས་པར་སྤྱད་པ་དང་ཉེས་པར་ སྤྱད་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་མེད་དོ། །འཇིག་རྟེན་འདི་མེད་དོ། །འཇིག་རྟེན་ཕ་རོལ་མེད་དོ། །མ་མེད་དོ། །ཕ་མེད་དོ། །སེམས་ཅན་བརྫུས་ཏེ་སྐྱེ་བ་མེད་དོ། །འཇིག་རྟེན་ན་དགྲ་བཅོམ་པ་ཡང་དག་པར་སོང་བ་ཡང་དག་པར་ཞུགས་པ་གང་དག་ཚེ་

  1142. 261b

    འདི་ཉིད་ལ་རང་གི་མངོན་པར་ཤེས་པས་འཇིག་རྟེན་འདི་དང་འཇིག་རྟེན་ཕ་རོལ་མངོན་སུམ་དུ་བྱས་ནས་བསྒྲུབས་ཏེ་བདག་ནི་སྐྱེ་བཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་པ་དག་མེད་དོ། །སྲོག་ནི་འདི་ ཉིད་ལ་འཚོ་ཞིང་དེ་ཕྱིས་ཆད་པར་འགྱུར། ཞིག་པར་འགྱུར་ཏེ་ཤི་བའི་འོག་ཏུ་མི་འབྱུང་ངོ་། །སྐྱེས་བུའི་ལུས་ནི་འབྱུང་བ་ཆེན་པོ་བཞི་ལས་གྱུར་པ་ཡིན་ཏེ། དེ་ནི་གང་གི་ཚེ་ཤི་བ་ན་དེའི་སའི་ལུས་ནི་སའི་བག་ལ་ཞ་ཆུའི་ལུས་ནི་ཆུའི་མེའི་ལུས་ནི་མེའི་རླུང་གི་ལུས་ནི་རླུང་ གི་བག་ལ་ཞ་བར་འགྱུར་རོ། །དབང་པོ་རྣམས་ནི་ནམ་མཁའི་རྗེས་སུ་འགྲོ་བར་འགྱུར་རོ། །སྐྱེས་བུའི་རོ་ནི་ཁྲི་དང་ལྔའི་མི་དག་གིས་ཁྱེར་ཏེ་དུར་ཁྲོད་དུ་འགྲོ་ཞིང་བསྲེགས་ཕན་ཆད་མི་མངོན་པར་འགྱུར་རོ། །བསྲེག་བྱ་དག་ནི་ཐལ་བར་འགྱུར་རོ། །རུས་པ་དག་ནི་ཐི་བའི་མདོག་འདྲ་བར་གནས་སོ། འདི་ལྟར་རྨོངས་པས་ཉེ་བར་བསྟན་པ་ནི་སྦྱིན་ལ་མཁས་པས་ཉེ་བར་བསྟན་པ་ནི་ལེན་ཏོ། །དེ་ལ་གང་དག་ཡོད་པར་སྨྲ་བ་དེ་དག་ཐམས་ཅད་ནི་གསོག་གསོབ་བརྫུན་དུ་སྨྲ་བ་བརྡོལ་བ་ཡིན་ནོ། །འདི་ལྟར་བྱིས་པ་དང་མཁས་པ་དེ་གཉིས་ནི་ཕྱིས་ཆད་པར་འགྱུར་ཞིག་པར་འགྱུར་ཏེ་ཤི་བའི་ འོག་ཏུ་མི་འབྱུང་ངོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་འོད་སྲུང་རྫོགས་བྱེད་ལ་བདག་གིས་ཡང་དག་པར་ མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་མ་མཆིས་པ་ཉིད་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་མངོན་སུམ་དུ་སྨད་པ་ ནི་བདག་གི་ཆ་མ་ལགས་སོ་སྙམ་ནས། བཙུན་པ་བདག་གིས་འོད་སྲུང་རྫོགས་བྱེད་ཀྱིས་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་བགྱིས། སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་ཀུན་དུ་

  1143. 262a

    རྒྱུ་གནག་ལྷས་ཀྱི་བུ་གང་ན་བ་དེར་མཆིས་ཏེ་མཆིས་ནས། ཀུན་དུ་རྒྱུ་གནག་ལྷས་ཀྱི་བུ་ལ་འདི་སྐད་ཅེས་བཙུན་པ་ཀུན་དུ་རྒྱུ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་ པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་། བསོད་ནམས་དག་བྱེད་ལ་གསོ་བ་རྣམས་གསོ་ཞིང་འདོད་པའི་ཡོན་ ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དྲིས་པས་ན། དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་ སྐད་སྨྲ་སྟེ། སེམས་ཅན་རྣམས་ཀུན་ནས་ཉོན་མོངས་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཀུན་ནས་ཉོན་མོངས་པར་འགྱུར་རོ། །སེམས་ཅན་རྣམས་རྣམ་པར་དག་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་ པར་རྣམ་པར་དག་པར་འགྱུར་རོ། །སེམས་ཅན་རྣམས་ཤེས་པ་མེད་པར་འགྱུར་བ་དང་། མཐོང་བ་མེད་པར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་མེད་པ་དང་མཐོང་བ་མེད་པར་འགྱུར་རོ། །སེམས་ཅན་རྣམས་ཤེས་པར་འགྱུར་བ་ དང་མཐོང་བར་འགྱུར་བ་ལ་རྒྱུ་མེད་རྐྱེན་མེད་དོ། །སེམས་ཅན་རྣམས་རྒྱུ་མེད་རྐྱེན་མེད་པར་ཤེས་པ་དང་མཐོང་བར་འགྱུར་རོ། །སྟོབས་མེད་དོ། །བརྩོན་འགྲུས་མེད་དོ། །སྟོབས་དང་བརྩོན་འགྲུས་མེད་དོ། །སྐྱེས་བུའི་རྩལ་མེད་དོ། །ཕ་རོལ་གནོན་པ་མེད་དོ། །སྐྱེས་བུའི་རྩལ་

  1144. 262b

    དང་ཕ་རོལ་གནོན་པ་མེད་དོ། །བདག་གི་རྩལ་མེད་དོ། །གཞན་གྱི་རྩལ་མེད་དོ། །བདག་གི་རྩལ་དང་གཞན་གྱི་རྩལ་མེད་དོ། །སེམས་ཅན་ཐམས་ཅད་དང་སྲོག་ཐམས་ཅད་དང་། འབྱུང་པོ་ཐམས་ཅད་མཐུ་མེད་སྟོབས་མེད་དབང་མེད་བརྩོན་འགྲུས་མེད། ཕ་རོལ་གནོན་པ་མེད་དོ། །འགྲོ་བ་ མཚམས་སྦྱོར་བའི་སྲིད་པ་དག་ངེས་པར་གྱུར་ཏོ། །འདི་ལྟར་འགྲོ་བ་དྲུག་པོ་དག་ཏུ་བདེ་བ་དང་སྡུག་བསྔལ་སོ་སོར་མྱོང་བར་འགྱུར་རོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་ཀུན་དུ་རྒྱུ་གནག་ལྷས་ཀྱི་བུ་ལ་བདག་གིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་རྒྱུ་མ་མཆིས་པ་ཉིད་དུ་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་ པས་གཟུགས་བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་ད་ཇི་ལྟར་མངོན་སུམ་དུ་སྨད་པར་བྱ་སྙམ་ནས། བདག་གིས་ཀུན་དུ་རྒྱུ་གནག་ལྷས་ཀྱི་བུའི་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་ བགྱིས། སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས། བདག་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་གང་ན་བ་དེར་མཆིས་ཏེ་མཆིས་ནས་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལ་འདི་སྐད་ཅེས་བཙུན་པ་ཡང་དག་རྒྱལ་བ་ཅན་ལས་ཀྱི་གནས་དང་བཟོའི་ གནས་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་ བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་ཁྲུས་མཁན་དེ་རྣམས་རང་རང་གི་བཟོའི་གནས་དང་ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་།

  1145. 263a

    བསོད་ནམས་དག་བྱེད་ལ་གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་དེ་ལྟ་བུ་རྣམས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་ བམ་ཞེས་དྲིས་པ་ན། དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་བལྟ་ཞིང་འདི་སྐད་སྨྲ་སྟེ། བྱེད་པ་དང་། བྱེད་དུ་འཇུག་པ་དང་། གཅོད་པ་དང་། གཅོད་དུ་འཇུག་པ་དང་། སྲེག་པ་དང་། སྲེག་ཏུ་འཇུག་པ་དང་། རྡེག་པ་དང་། རྡེག་ཏུ་འཇུག་པ་དང་། སྲོག་ཆགས་ ལ་འཚེ་བ་དང་། མ་བྱིན་པར་ལེན་པ་དང་། འདོད་པ་དག་ལ་ལོག་པར་སྤྱོད་པ་དང་། ཤེས་བཞིན་དུ་བརྫུན་དུ་སྨྲ་བ་དང་། མྱོས་པར་འགྱུར་བའི་བཏུང་བ་འཐུང་བ་དང་། ཁྱིམ་འབུབས་པ་དང་། མདུད་པ་བཀྲོལ་བ་དང་། རིམ་གྱིས་འཕྲོག་པ་དང་། ལམ་འགོག་ཅིང་ འདུག་པ་དང་། གྲོང་འཇོམས་པར་བྱེད་པ་དང་། གྲོང་ཁྱེར་འཇོམས་པར་བྱེད་པ་དང་། ཡུལ་འཇོམས་པར་བྱེད་པ་དང་། ས་གཞི་ཆེན་པོ་འདི་ལ་སེམས་ཅན་གང་དག་ཡོད་པ་དེ་དག་ཐམས་ཅད་འཁོར་ལོའི་མཐའ་སྤུ་གྲི་ལ་བྱས་པས་དེ་དག་ཐམས་ཅད་ཀུན་དུ་གཅོད་པར་བྱེད། ཀུན་དུ་འཆེག་ པར་བྱེད། ཀུན་དུ་རྡུང་བར་བྱེད། ཀུན་དུ་འབྲལ་བར་བྱེད་ཅིང་དེ་དག་ཐམས་ཅད་ཀུན་དུ་བཅད། ཀུན་དུ་གཤེགས། ཀུན་དུ་བརྡུངས། ཀུན་དུ་དྲལ་ནས་ཤའི་ཐང་མ་གཅིག་ཏུ་བྱེད། ཤའི་ཚོམས་གཅིག་ཏུ་བྱེད། ཤའི་བུངས་གཅིག་ཏུ་བྱེད། ཤའི་ཕུང་པོ་གཅིག་ཏུ་ བྱེད་ཅིང་ཤའི་ཐང་མ་གཅིག་ཏུ་བྱས། ཤའི་ཚོམས་གཅིག་ཏུ་བྱས། ཤའི་བུངས་གཅིག་ཏུ་བྱས། ཤའི་ཕུང་པོ་གཅིག་ཏུ་བྱས་ནས་དེ་ལྟར་ཀུན་དུ་སྒྲུབ་པར་བྱེད་པ་ལས་གཞི་དེ་ལས་སྡིག་པ་ཡང་མེད། གཞི་དེ་ལས་སྡིག་པར་འགྱུར་བ་ཡང་མེད་དོ། །ཆུ་ཀླུང་གང་གཱའི་ལྷོ་ ཕྱོགས་ནས་ཀུན་དུ་གཅོད་པར་བྱེད། ཀུན་དུ་འཆེག་པར་བྱེད། ཀུན་དུ་རྡུང་བར་བྱེད། ཀུན་དུ་འདྲལ་བར་བྱེད་ཅིང་འགྲོ་ལ། ཆུ་ཀླུང་གང་གཱའི་བྱང་ཕྱོགས་ནས་སྦྱིན་པར་བྱེད། མཆོད་སྦྱིན་བྱེད་ཅིང་འགྲོ་བར་གྱུར་ན། གཞི་དེ་ལས་སྡིག་པ་དང་བསོད་ནམས་ཀྱང་མེད། གཞི་

  1146. 263b

    དེ་ལས་སྡིག་པ་དང་བསོད་ནམས་སུ་འགྱུར་བ་ཡང་མེད་དོ། །འདི་ལྟར་སྦྱིན་པ་དང་། དུལ་བ་དང་། ཡང་དག་པར་སྡོམ་པ་དང་། དོན་སྤྱོད་པ་དང་། དོན་མཐུན་པས་དེ་ལྟར་བྱེད་པ་ཡང་བསོད་ནམས་མི་བྱེད་པ་ཁོ་ན་ཡིན་ནོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་ རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་ལ་བདག་གིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲི་བ་དྲིས་ན་བྱེད་ པ་ཉིད་མ་མཆིས་པར་ལུང་སྟོན་པར་བགྱིད་དོ། །བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་ད་ཇི་ལྟར་མངོན་སུམ་དུ་སྨད་པར་བྱ་སྙམ་ནས། བདག་གིས་སྨྲ་འདོད་ ཀྱི་བུ་མོའི་བུ་ཡང་དག་རྒྱལ་བ་ཅན་ལ་མངོན་པར་བསྟོད་པ་ཡང་མི་བགྱིད་སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་བགྱིས། སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་མི་ཕམ་སྐྲའི་ལ་བ་ཅན་གང་ན་བ་དེར་མཆིས་ཏེ་མཆིས་ནས། མི་ཕམ་སྐྲའི་ ལ་བ་ཅན་ལ་འདི་སྐད་ཅེས་བཙུན་པ་མི་ཕམ་འཇིག་རྟེན་གྱི་ལས་ཀྱི་གནས་དང་བཟོའི་གནས་ཐ་དད་པ་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་ དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་ རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་། བསོད་ནམས་དག་བྱེད་ལ་གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་

  1147. 264a

    ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དྲིས་པ་ན་དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་བལྟ་ཞིང་འདི་སྐད་ཅེས་སྨྲ་སྟེ། ལུས་བདུན་པོ་འདི་དག་ནི་མ་བྱས་པ། བྱས་པས་མ་བྱས་པ་མ་སྤྲུལ་པ། སྤྲུལ་ པས་མ་བྱས་པ་གནོད་པར་བྱ་བ་མ་ཡིན་པ་ཐེར་ཟུག་ཏུ་གནས་པ། ཀ་བ་བཞིན་གནས་པ་དག་ཡིན་ཏེ། བདུན་གང་ཞེ་ན། འདི་ལྟ་སྟེ་སའི་ལུས་དང་། ཆུའི་ལུས་དང་། མེའི་ལུས་དང་། རླུང་གི་ལུས་དང་། བདེ་བ་དང་། སྡུག་བསྔལ་བ་དང་། སྲོག་གསོན་པ་ཉིད་ནི་བདུན་པ་སྟེ། ལུས་བདུན་པོ་དེ་དག་ནི་མ་བྱས་པ། བྱས་པས་མ་བྱས་པ། མ་སྤྲུལ་པ། སྤྲུལ་པས་མ་བྱས་པ། གནོད་པར་བྱ་བ་མ་ཡིན་པ། ཐེར་ཟུག་ཏུ་གནས་པ། ཀ་བ་བཞིན་དུ་གནས་པ་དག་ཡིན་ནོ། །དེ་དག་ནི་འདི་ལྟ་སྟེ། བསོད་ནམས་སུ་འགྱུར་བའི་ཕྱིར་རམ། སྡིག་པར་འགྱུར་ བའི་ཕྱིར་རམ། བསོད་ནམས་དང་སྡིག་པར་འགྱུར་བའི་ཕྱིར་རམ་བདེ་བར་འགྱུར་བའི་ཕྱིར་རམ། སྡུག་བསྔལ་བར་འགྱུར་བའི་ཕྱིར་རམ། བདེ་བ་དང་སྡུག་བསྔལ་བར་འགྱུར་བའི་ཕྱིར་གཡོ་བར་མི་བྱེད། རྣམ་པར་འགྱུར་བར་མི་བྱེད། གཅིག་ལ་གཅིག་གནོད་པར་མི་བྱེད་ དོ། །སྐྱེས་བུ་གང་གིས་སྐྱེས་བུའི་མགོ་གཅོད་པར་བྱེད་པ་དེས་ཀྱང་འཇིག་རྟེན་ན་གཡོ་བའམ་གནས་པ་ལ་གནོད་པ་ཅུང་ཟད་ཀྱང་མི་བྱེད་དེ། ལུས་བདུན་པོ་དག་ལ་བར་མེད་པར་མཚོན་ཐལ་བྱུང་དུ་འགྲོ་ཞིང་དེར་སྲོག་ལ་གནོད་པ་ཡང་མེད་དོ། །དེ་ལ་གསོད་པར་བྱེད་པའམ། གསོད་དུ་བཅུག་པའམ། དྲན་པར་བྱེད་པའམ། དྲན་པར་བྱེད་དུ་བཅུག་པའམ། སྐུལ་བར་བྱེད་པའམ། སྐུལ་དུ་བཅུག་པའམ། རྣམ་པར་རིག་པར་བྱེད་པའམ། རྣམ་པར་རིག་པར་བྱེད་དུ་བཅུག་པ་འགའ་ཡང་མེད་དོ། །བྱིས་པའམ་མཁས་པ་གང་དག་ཡིན་པ་དག་ནི་སྐྱེ་ གནས་གཙོ་བོ་དང་ལྡན་པ་ཁྲི་བཞི་སྟོང་དང་། རྟོག་པ་ཆེན་པོ་དྲུག་ཁྲི་དང་དྲུག་བརྒྱ་དང་། ལས་ལྔ་དང་། ལས་གསུམ་དང་། ལས་གཉིས་དང་ལས་དང་ལས་ཕྱེད་དང་། ལས་དྲུག་བཅུ་རྩ་གཉིས་དང་། རྟོག་པ་བར་མ་དྲུག་བཅུ་རྩ་གཉིས་དང་། འདུ་ཤེས་བདུན་དང་། སེམས་

  1148. 264b

    ཅན་དམྱལ་བ་བརྒྱ་ཉི་ཤུ་དང་། དབང་པོ་བརྒྱ་སུམ་བཅུ་དང་། རྡུལ་གྱི་ཁམས་སུམ་བཅུ་རྩ་དྲུག་དང་། ཀླུའི་རིགས་བཞི་ཁྲི་དགུ་སྟོང་དང་། ནམ་མཁའ་ལྡིང་གི་རིགས་བཞི་ཁྲི་དགུ་སྟོང་དང་། ཀུན་ཏུ་རྒྱུའི་རིགས་བཞི་ཁྲི་དགུ་སྟོང་དང་། ཀུན་ཏུ་འཚོའི་རིགས་བཞི་ཁྲི་དགུ་སྟོང་ དང་། གཅེར་བུ་པའི་རིགས་བཞི་ཁྲི་དགུ་སྟོང་དང་། འདུ་ཤེས་ཅན་གྱི་གནས་བདུན་དང་། འདུ་ཤེས་མེད་པའི་གནས་བདུན་དང་། ལྷ་མ་ཡིན་བདུན་དང་། ཤ་ཟ་བདུན་དང་། ལྷ་བདུན་དང་། མི་བདུན་དང་། མཚོ་བདུན་དང་། མཚོ་བདུན་བརྒྱ་དང་། འབྲི་བ་བདུན་ དང་། འབྲི་བ་བདུན་བརྒྱ་དང་། རྨི་ལམ་བདུན་དང་། རྨི་ལམ་བདུན་བརྒྱ་དང་། སད་པ་བདུན་དང་། སད་པ་བདུན་བརྒྱ་དང་། གཡང་ས་བདུན་དང་། གཡང་ས་བདུན་བརྒྱ་དང་། རིགས་བཙུན་པ་དྲུག་དང་། མངོན་པར་མཐོ་བ་བཅུ་དང་། སྐྱེས་བུ་ཆེན་པོའི་ས་བརྒྱད་པོ་དེ་དག་ ཏུ་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་སྦྱོར་ཅིང་འཁོར་ནས་སྡུག་བསྔལ་མཐར་བྱེད་དོ། །འདི་ལྟ་སྟེ། དཔེར་ན། སྐུད་པའི་དྲུ་བུ་ཡང་བ་སྟེང་གི་ནམ་མཁའ་ལས་འཕངས་པ་གཟངས་པ་ན་ས་ལ་འབབ་པ་དེ་བཞིན་དུ་བྱིས་པའམ། མཁས་པ་གང་དག་ཡིན་པ་དག་ ཀྱང་དེ་དག་བསྐལ་པ་ཆེན་པོ་བརྒྱད་ཁྲི་བཞི་སྟོང་དུ་མཚམས་སྦྱོར་ཅིང་འཁོར་ནས་སྡུག་བསྔལ་མཐར་བྱེད་དོ། །དེ་ལ་དགེ་སྦྱོང་དང་བྲམ་ཟེ་གང་དག་འདི་སྐད་ཅེས་བདག་ཚུལ་ཁྲིམས་སམ། བརྟུལ་ཞུགས་སམ། དཀའ་ཐུབ་བམ། ཚངས་པར་སྤྱོད་པ་ལ་གནས་པ་འདིས་ལས་ ཡོངས་སུ་མ་སྨིན་པ་ནི་ཡོངས་སུ་སྨིན་པར་བྱ་ཞིང་ཡོངས་སུ་སྨིན་པ་ནི་རེག་པར་བྱས་ནས་བྱང་བར་བྱའོ་ཞེས་ཟེར་བ་འགའ་ཡང་མེད་དོ། །བདེ་བ་དང་སྡུག་བསྔལ་འདི་ངེས་པ་ཡིན་ནོ། །ཡར་སྐྱེ་བ་དང་མར་འགྲིབ་པ་ནི་མི་སྲིད་དོ། །འདི་ལྟ་བུ་འདི་ཉིད་དང་གཞན་མ་ཡིན་པས་འཁོར་བ་གཞལ་ ལོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་བཞིན་དུ་མི་ཕམ་སྐྲའི་ལ་བ་ཅན་ལ་བདག་གིས་ཡང་དག་པར་མཐོང་

  1149. 265a

    བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་འཁོར་བ་དག་ཉིད་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་མཛེས་པར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་ད་ཇི་ ལྟར་མངོན་སུམ་དུ་སྨད་པར་བྱ་སྙམ་ནས་མི་ཕམ་སྐྲའི་ལ་བ་ཅན་གྱིས་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ། མངོན་པར་བསྟོད་པ་ཡང་མ་བགྱིས་སྨད་པ་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་གཅེར་བུ་པ་གཉེན་གྱི་བུ་གང་ན་བ་དེར་ མཆིས་ནས། གཅེར་བུ་པ་གཉེན་གྱི་བུ་ལ་འདི་སྐད་ཅེས་བཙུན་པ་གཉེན་གྱི་བུ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ཡིན་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་ པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་དང་། གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་ ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བྱ་བ་བྱེད་ཅིང་སྦྱིན་པ་དག་གཏོང་། བསོད་ནམས་དག་བྱེད་ལ། གསོ་བ་ནི་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་ བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དྲིས་པ་ན། དེ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་སྐད་སྨྲ་སྟེ། སྐྱེས་བུ་གང་ཟག་འདིས་སོ་སོར་མྱོང་བ་གང་ཡིན་པ་ཅི་ཡང་རུང་སྟེ། དེ་ཐམས་ཅད་ སྔོན་བྱས་པའི་རྒྱུ་ལས་བྱུང་བ་ཡིན་ནོ། །ལས་རྙིང་པ་རྣམས་ནི་དཀའ་ཐུབ་ཀྱིས་འབྱང་བར་འགྱུར་ལ། ལས་སར་པ་རྣམས་ནི་མི་བྱ་བའི་ཆུ་ལོན་གྱིས་བཟློག་པར་བྱའོ། །དེ་ལྟ་ན་ཕྱིན་ཆད་ཟག་པ་མེད་དོ། །ཟག་པ་མེད་ན་ལས་ཟད་དོ། །ལས་ཟད་ན་སྡུག་བསྔལ་ཟད་དོ། །

  1150. 265b

    སྡུག་བསྔལ་ཟད་ན་སྡུག་བསྔལ་མཐར་བྱེད་པར་འགྱུར་རོ་ཞེས་མཆི་སྟེ། བཙུན་པ་དཔེར་ན་མི་ཞིག་ཨ་མྲའི་འབྲས་བུ་རྣམས་དྲིས་ན་ལ་ཀུ་ཙའི་འབྲས་བུ་རྣམས་སུ་ལུང་སྟོན་པར་བགྱིད་ལ། ལ་ཀུ་ཙའི་འབྲས་བུ་རྣམས་དྲིས་ན་ཨ་མྲའི་འབྲས་བུ་རྣམས་ལུང་སྟོན་པར་བགྱིད་པ་དེ་ བཞིན་དུ་གཅེར་བུ་པ་གཉེན་གྱི་བུ་ལ་བདག་གིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་དྲིས་ན་སྔོན་བགྱིས་པའི་རྒྱུ་ལས་བྱུང་བ་ཉིད་ལུང་སྟོན་པར་བགྱིད་ནས། བཙུན་པ་དེ་ལ་བདག་འདི་སྙམ་དུ་སེམས་ཏེ། བདག་འདྲ་བའི་སྐྱེས་བུ་མཁས་པས་གཟུགས་ བཟང་པོར་བཀུར་བ་ཡུལ་ན་གཉུག་མར་གནས་པའི་དགེ་སྦྱོང་ངམ་བྲམ་ཟེ་ལ་མངོན་སུམ་དུ་སྨད་པ་ནི་བདག་གི་ཆ་མ་ལགས་སོ་སྙམ་ནས། བདག་གིས་གཅེར་བུ་པ་གཉེན་གྱི་བུའི་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པར་ཡང་མི་བགྱིད་དེ། མངོན་པར་བསྟོད་ པ་ཡང་མ་བགྱིས་སྨད་པར་ཡང་མ་བགྱིས་པར་སྟན་ལས་ལངས་ཏེ་མཆིས་ནས་བདག་ཀ་ཏྱའི་བུ་ནོག་ཅན་གང་ན་བ་དེར་མཆིས་ཏེ། མཆིས་ནས་ཀ་ཏྱའི་བུ་ནོག་ཅན་ལ་འདི་སྐད་ཅེས། བཙུན་པ་ཀ་ཏྱའི་བུ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ཡིན་པ་ འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་ཞོན་པ་དང་། རྟ་ལ་ཞོན་པ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བྱེད་པ་ དང་། །གོ་རེ་ལོང་དང་། བྲོ་ག་ལེན་པ་དང་། རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་བྱེད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་ཁྱབ་བྱེད་ཅིང་སྦྱིན་པ་དག་གཏོང་། བསོད་ ནམས་དག་བྱེད་ལ། གསོ་བ་རྣམས་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་བམ་ཞེས་དེ་སྐད་དྲིས་

  1151. 266a

    པ་དང་། ཀ་ཏྱའི་བུ་ནོག་ཅན་བདག་ལ་འདི་སྐད་ཅེས་རྒྱལ་པོ་ཆེན་པོ་བདག་ནི་འདི་ལྟར་ལྟ་ཞིང་འདི་སྐད་ཅེས་སྨྲ་སྟེ། གལ་ཏེ་འགའ་ཞིག་བདག་གི་གན་དུ་མཆིས་ཏེ་འདི་སྐད་ཅེས་འཇིག་རྟེན་ཕ་རོལ་ཡོད་དམ་ཞེས་འདྲི་ན། དེ་ལ་བདག་འཇིག་རྟེན་ཕ་རོལ་ཡོད་དོ་ཞེས་དྲི་བ་ དྲིས་པའི་ལན་འདེབས་སོ། །འཇིག་རྟེན་ཕ་རོལ་མེད་པ་དང་། འཇིག་རྟེན་ཕ་རོལ་ཡོད་པ་དང་མེད་པ་དང་། ཡོད་པ་ཡང་མ་ཡིན་མེད་པ་ཡང་མ་ཡིན་པ་དང་། དེ་བཞིན་དུ་འཇིག་རྟེན་ཕ་རོལ་འདི་ལྟ་བུ་ཉིད་དང་། འདི་ལྟ་བུ་ཉིད་མ་ཡིན་པ་དང་། གཞན་ཉིད་དང་གཞན་ཉིད་མ་ཡིན་པ་དང་། འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་པ་ཡིན་ནམ་ཞེས་འདྲི་ན་དེ་ལ་བདག་འཇིག་རྟེན་ཕ་རོལ་གཞན་མ་ཡིན་པ་ཉིད་དང་གཞན་མ་ཡིན་པ་ཉིད་མ་ཡིན་ནོ་ཞེས་དྲིས་པའི་ལན་འདེབས་སོ་ཞེས་མཆི་ནས་བདག་དེ་ལ་འདི་སྙམ་དུ་སེམས་ཏེ། རྒྱལ་པོའི་ཁབ་ འདི་ན་རབ་ཏུ་བྱུང་བར་གྱུར་པ་ཇི་སྙེད་གནས་པ་དེ་རྣམས་ཀྱི་ནང་ན་ལྷག་པར་བླུན་པ། ལྷག་པར་གླེན་པ། ལྷག་པར་སླུ་བར་བྱེད་པ་ནི་འདི་ལྟ་སྟེ། ཀ་ཏྱའི་བུ་ནོག་ཅན་འདི་ཡིན་ནོ་སྙམ་པ་ལས་དེ་ལ་ཡང་བདག་འདི་སྙམ་དུ་སེམས་ཏེ། གཟུགས་བཟང་པོར་བཀུར་བ་ཡུལ་ན་གཉུག་མར་ གནས་པའི་དགེ་སྦྱོང་ངམ་བྲམ་ཟེ་ལ་མངོན་སུམ་དུ་སྨད་པ་ནི་བདག་གི་ཆ་མ་ལགས་སོ་སྙམ་ནས་བདག་གིས་ཀ་ཏྱའི་བུ་ནོག་ཅན་གྱིས་སྨྲས་པ་ལ་མངོན་པར་བསྟོད་པ་ཡང་མི་བགྱིད། སྨད་པ་ཡང་མི་བགྱིད་དེ་མངོན་པར་བསྟོད་པ་ཡང་མ་བགྱིས། སྨད་པ་ཡང་མ་བགྱིས་པར་སྟན་ལས་ ལངས་ཏེ་མཆིས་ལགས་ཏེ། བཅོམ་ལྡན་འདས་ལ་བདག་དོན་དེ་ཁོ་ན་ཞུ་ལགས་ན། བཙུན་པ་འཇིག་རྟེན་གྱི་ལས་ཀྱི་གནས་དང་། བཟོའི་གནས་ཐ་དད་པ་གང་དག་ལགས་པ་འདི་ལྟ་སྟེ། ཕྲེང་རྒྱུད་པ་དང་། སྨྱུག་མ་མཁན་དང་། གདན་པ་དང་། རྩྭ་ཐུན་དང་། འདུལ་མཁན་དང་། གླང་པོ་ཆེ་ལ་འཚལ་བ་དང་། རྟ་ལ་འཚལ་བ་དང་། ཤིང་རྟ་མཁན་དང་། རལ་གྲིའི་ཐབས་དང་། གཞུའི་འཛིན་སྟངས་པ་དང་། ཞམ་འབྲིང་བགྱིད་པ་དང་། གོ་རེ་ལོང་དང་། བྲོ་ག་ལེན་པ་དང་རྒྱལ་པོའི་བུ་རབ་གནོན་ཚན་པོ་ཆེ་དཔའ་བ་རྟུལ་ཕོད་པ་རྣམས་དང་། མཉེས་པར་

  1152. 266b

    བགྱིད་པ་དང་། སྐྲ་མཁན་དང་། ཁྲུས་མཁན་དེ་རྣམས་རང་རང་གི་བཟོའི་གནས་དང་། ལས་ཀྱི་གནས་རྣམས་ཀྱིས་བགྱི་བ་བགྱིད་ཅིང་སྦྱིན་པ་དག་སྩོལ། བསོད་ནམས་དག་བགྱིད་ལ་གསོ་བ་དག་གསོ་ཞིང་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་རྩེ་བར་བགྱིད། དགའ་ བར་བགྱིད། དགའ་མགུར་སྤྱོད་པར་བགྱིད་ན་དེ་ལྟ་བུ་རྣམས་ལ་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་གདགས་པ་འཐོབ་ལགས་སམ། རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ལ་དྲི་ཡིས་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་དེ་ལུང་སྟོན་ཅིག །རྒྱལ་པོ་ཆེན་པོ་དཔེར་ན་འདི་ན་ཁྱོད་ ཀྱི་བྲན་མངག་གཞུག་པ་གོ་རེ་ལོང་རང་དབང་མེད་ལ་དགའ་མགུར་བྱར་མེད་པ་ཞིག་ཡོད་པ་དེས་ཁྱོད་སྟེང་གི་ཁང་བཟངས་ཀྱི་གཞི་ལ་འདུག་སྟེ་འདོད་པའི་ཡོན་ཏན་ལྔ་འབྱོར་ཅིང་ལྡན་པར་གྱུར་ནས་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ལུས་འཕགས་མའི་བུ་མ་ག་ངྷཱའི་རྒྱལ་པོ་མ་སྐྱེས་དགྲ་འདི་ཡང་མི་ཡིན་ལ་བདག་ཀྱང་མི་ཡིན་པ་ལས་གཞན་དུ་ན་ལུས་འཕགས་མའི་བུ་མ་ག་ངྷཱའི་བུ་མ་སྐྱེས་དགྲས་སྔོན་བསོད་ནམས་དག་བྱས་ཤིང་བསགས་པ་དེས་ན་ད་ལྟར་ སྟེང་གི་ཁང་བཟངས་ཀྱི་གཞི་ལ་འདུག་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད་དགའ་མགུར་སྤྱོད་པར་བྱེད་ཀྱིས། མ་ལ་བདག་གིས་ཀྱང་དགེ་བའི་ཆོས་ཅུང་ཟད་ཡང་དག་པར་བླངས་ཏེ་གནས་པར་བྱའོ་སྙམ་ཞིང་བདག་གིས་དགེ་བའི་ཆོས་ཅི་ཞིག་ཡང་དག་པར་བླངས་ ཏེ་གནས་པར་བྱ་སྙམ་པ་ལས། མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས་དེས་དེ་ལྟར་ཐག་བཅད་དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་།

  1153. 267a

    གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་པར་གྱུར་པ་དེ་ཁྱོད་ཀྱི་ཞོ་ཤས་འཚོ་བ་རྣམས་ལྗོངས་སུ་འཁྱམ་ཞིང་དོང་བས་མཐོང་ངོ་། །མཐོང་ནས་ཀྱང་དེ་རྣམས་འདི་སྙམ་དུ་སེམས་ཏེ། འདི་ནི་ལུས་འཕགས་མའི་བུ་མ་ག་དྷཱའི་ རྒྱལ་པོ་མ་སྐྱེས་དགྲའི་འབངས་མངག་གཞུག་པ་གོ་རེ་ལོང་རང་དབང་མེད་པ་དགའ་མགུར་བྱར་མེད་པ་ཡིན་ན། དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནར་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་ པ་ལས་སླར་ལོག་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་ནས་ཡང་དག་པའི་ལྟ་བ་དང་ ལྡན་གྱིས། མ་ལ་བདག་ཅག་རྒྱལ་པོའི་སྤྱན་སྔར་དོང་ལ་སྙན་དུ་གསོལ་ལོ་ཞེས་དེ་རྣམས་ཁྱོད་ཀྱི་དྲུང་དུ་འོངས་ནས་སྨྲས་པ། ལྷ་མཁྱེན་པར་མཛད་དུ་གསོལ། ལྷའི་འབངས་མངག་གཞུག་པ་གོ་རེ་ལོང་རང་དབང་མ་མཆིས་པ་དགའ་མགུར་བགྱིར་མ་མཆིས་པ་ཞིག་མཆིས་པ་དེ་སྐྲ་ དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་ དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་སྟེ། ཡང་དག་པའི་ལྟ་བ་དང་ལྡན་ལགས་སོ་ཞེས་སྨྲས་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། ཇི་ག་ཁྱོད་ ཀྱིས་དེ་སྐད་སྨྲ་བ་ལ་ཤེས་ལྡན་དག་དེང་ལ་མི་དེ་ཁུག་ཤིག་དང་སླར་ཡང་ངའི་བྲན་མངག་གཞུག་པ་གོ་རེ་ལོང་རང་དབང་མེད་པར་འགྱུར་རོ་ཞེས་སྨྲ་བར་འགྱུར་རམ། བཙུན་པ་མ་ལགས་སོ། །གཞན་དུ་ན་བདག་དེ་ལ་ལྟ་བའི་སླད་དུ་མཆི་སྟེ། དེས་སྔོན་བདག་ལ་མངོན་དུ་སྨྲ་བ་དང་།

  1154. 267b

    ཕྱག་འཚལ་བ་དང་། ལྡང་བ་དང་། ཐལ་མོ་སྦྱར་བ་དང་། འདུད་པའི་ལས་གང་ལགས་པ་བགྱིད་ལགས་པས་དེ་ཉིད་ལ་བདག་གིས་དེ་དག་བགྱི་ཞིང་། ཇི་སྲིད་འཚོའི་བར་དུ་དེ་ལ་འདི་ལྟ་སྟེ་ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་ རྣམས་ཀྱིས་བསྟབ་པར་བགྱིའོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟར་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་ འབྲས་བུ་བསྟན་ལགས་སོ། །རྒྱལ་པོ་ཆེན་པོ་དཔེར་ན་ཁྱོད་ཀྱི་ཡུལ་འདི་ན་ཁྱིམ་བདག་ཞིང་པ་སྐྲུན་པ་སྐྱེད་པ་རྒྱལ་པོའི་བང་མཛོད་འཕེལ་བར་བྱེད་པ་ཞིག་ཡོད་པ་དེས་ཁྱོད་སྟེང་གི་ཁང་བཟངས་ཀྱི་གཞི་ལ་འདུག་ནས་སྐྱེས་པ་མེད་པར་རོལ་མོས་རྩེ་བར་བྱེད། དགའ་བར་བྱེད། དགའ་མགུར་ སྤྱོད་པར་བྱེད་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་འདི་ཡང་མི་ཡིན་ལ། བདག་ཀྱང་མི་ཡིན་པ་ལས་གཞན་དུ་ན་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་སྔོན་བསོད་ནམས་དག་བྱས་ཤིང་བསགས་པ་དེས་ནད་ ལྟར་སྟེང་གི་ཁང་བཟངས་ཀྱི་གཞིར་སོང་ནས་སྐྱེས་པ་མེད་པའི་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱིས། མ་ལ་བདག་གིས་ཀྱང་དགེ་བ་ཅུང་ཟད་ཡང་དག་པར་བླངས་ཏེ་གནས་པར་བྱའོ་སྙམ་ཞིང་བདག་གིས་དགེ་བའི་ཆོས་ཅི་ཞིག་ཡང་དག་པར་བླངས་ཏེ་ གནས་པར་བྱ་སྙམ་པ་ལས། མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་ནས། དེས་དེ་ལྟར་ཐག་བཅད་དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་

  1155. 268a

    དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་པར་གྱུར་པ་དེ་ཁྱོད་ཀྱི་ཞོ་ཤས་འཚོ་བ་རྣམས་ལྗོངས་སུ་འཁྱམ་ཞིང་དོང་བས་མཐོང་ངོ་། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། འདི་ནི་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་ དགྲའི་ཁྱིམ་བདག་ཞིང་བསྐྲུན་པ་སྐྱེད་པའི་བང་མཛོད་འཕེལ་བར་བྱེད་པ་ཡིན་ན། དེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས། དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག ། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ། ལོག་པར་ལྟ་བ་ལས་སླར་ལོག་ནས་ཡང་དག་པའི་ལྟ་བ་དང་ལྡན་ གྱིས། མ་ལ་བདག་ཅག་རྒྱལ་པོའི་སྤྱན་སྔར་དོང་ལ་སྙན་དུ་གསོལ་ལོ་ཞེས་དེ་རྣམས་ཁྱོད་ཀྱི་དྲུང་དུ་འོངས་ནས་སྨྲས་པ། ལྷ་མཁྱེན་པར་མཛད་དུ་གསོལ། ལྷའི་ཁྱིམ་བདག་ཞིང་པ་སྐྲུན་པ་སྐྱེད་པ་རྒྱལ་པོའི་བང་མཛོད་འཕེལ་བར་བགྱིད་པ་ཞིག་མཆིས་པ་དེ་སྐྲ་དང་ཁ་སྤུ་བྲེགས་ཏེ་གོས་ ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ཚིག་རྩུབ་པོ་དང་། ཚིག་ ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་ཏེ་ལོག་པར་ལྟ་བ་ལས་སླར་ལོག་སྟེ། ཡང་དག་པའི་ལྟ་བ་དང་ལྡན་ལགས་སོ་ཞེས་སྨྲ་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། ཇི་ག་ཁྱོད་ཀྱིས་དེ་སྐད་སྨྲ་བ་ལ་ཤེས་ལྡན་དག་དེང་ལ་མི་དེ་ཁུག་ ཤིག་དང་སླར་ཡང་ངའི་ཞིང་པ་སྐྲུན་པ་སྐྱེད་པ་རྒྱལ་པོའི་བང་མཛོད་འཕེལ་བར་འགྱུར་རོ་ཞེས་སྨྲ་བར་འགྱུར་རམ། བཙུན་པ་མ་ལགས་སོ། །གཞན་དུ་ན་བདག་དེ་ལ་བལྟ་བའི་སླད་དུ་མཆི་སྟེ། དེས་སྔོན་བདག་ལ་མངོན་དུ་སྨྲ་བ་དང་། ཕྱག་འཚལ་བ་དང་། ལྡང་བ་དང་།

  1156. 268b

    ཐལ་མོ་སྦྱར་བ་དང་། འདུད་པའི་ལས་གང་དག་ལགས་པ་བགྱིས་ལགས་པས་དེ་ཉིད་ལ་བདག་གིས་དེ་དག་བགྱི་ཞིང་ཇི་སྲིད་འཚོའི་བར་དུ་དེ་ལ་ཡང་འདི་ལྟ་སྟེ། ཆོས་གོས་དང་། བསོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་གྱི་ཡོ་བྱད་རྣམས་ཀྱིས་བསྟབ་པར་ བགྱིའོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །རྒྱལ་ པོ་ཆེན་པོ་འདི་ལ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་ འདས་འཇིག་རྟེན་དུ་བྱུང་སྟེ། དེས་ཆོས་བཤད་པ་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་རྣམ་པར་བྱང་བ། ཚངས་པར་སྤྱོད་པ་རབ་ཏུ་སྟོན་ཏེ། ཆོས་དེ་ཁྱིམ་བདག་གམ། ཁྱིམ་བདག་གི་ བུས་མཉན་ཏེ། དེ་ཆོས་དེ་ཐོས་ནས་གནས་གསུམ་པོ་འདི་ལྟ་སྟེ། ཆགས་པའི་ཆོས་དང་། ཞེ་སྡང་གི་ཆོས་དང་། གཏི་མུག་གི་ཆོས་ལ་སྟོན་པའི་རྣམ་པར་དག་པ་ཚོལ་བར་བྱེད་དེ། ཅི་ཚེ་དང་ལྡན་པ་འདི་ལ་ཆགས་པ་གང་གིས་ཟིལ་གྱིས་གནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་། བན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་ཆགས་པ་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་ དང་། མ་བསལ་བའི་ཆགས་པ་དེ་ཡོད་དམ། འོན་ཏེ་ཚེ་དང་ལྡན་པ་འདི་ལ་ཆགས་པ་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་།

  1157. 269a

    ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་ཆགས་པ་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་ཆགས་པ་དེ་མེད་སྙམ་ན། དེ་འདི་སྙམ་དུ་སེམས་ཏེ། ཚེ་དང་ལྡན་པ་འདི་ལ་ ཆགས་པ་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་ སྟོན་པའི་ཆགས་པ་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་ཆགས་པ་དེ་མེད་དོ། །དེ་ཅིའི་ཕྱིར་ཞེ་ན། མ་ཆགས་པའི་ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་གང་དག་ཡིན་པ་དེ་དག་ཚེ་དང་ལྡན་པ་འདི་ལ་ཡོད་ ལ། འདི་ཆོས་གང་མདོར་བསྡུས་པའམ། རྒྱས་པར་འཆད་ཀྱང་རུང་འདིའི་ཆོས་ནི་ཞི་བ་གྱ་ནོམ་པ། ཟབ་པ་ཟབ་པར་སྣང་བ། མཐོང་བར་དཀའ་བ། རྟོགས་པར་དཀའ་བ། བརྟག་པར་བྱ་བ་མ་ཡིན་པ། རྟོག་གེའི་སྤྱོད་ཡུལ་མ་ཡིན་པ། ཞིབ་མོ་བརྟགས་པའི་མཁས་ པ་དང་མཛངས་པས་རིག་པར་བྱ་བ་ཡིན་ན། དེ་ཡང་འདི་ལྟར་ཚེ་དང་ལྡན་པ་འདི་གཅིག་ཏུ་ཆགས་པས་ཤེས་པར་སླ་བ་མ་ཡིན་པས་ཚེ་དང་ལྡན་པ་འདི་མ་ཆགས་པ་ཡིན་ཏེ། ཚེ་དང་ལྡན་པ་འདི་ནི་ཆགས་པ་མ་ཡིན་ནོ་སྙམ་མོ། །གང་གི་ཚེ་འདི་དང་པོ་ཆགས་པའི་ཆོས་ལ་ རྣམ་པར་དག་པར་མཐོང་ནས་དེའི་འོག་ཏུ་གཉིས་པ་ཞེ་སྡང་གི་ཆོས་དང་། གསུམ་པ་གཏི་མུག་གི་ཆོས་ལ་ཚོལ་བར་བྱེད་དེ། ཅི་ཚེ་དང་ལྡན་པ་འདི་ལ་གཏི་མུག་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་གཏི་མུག་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་གཏི་མུག་

  1158. 269b

    དེ་ཡོད་དམ། འོན་ཏེ་ཚེ་དང་ལྡན་པ་འདི་ལ་གཏི་མུག་གང་གིས་ཟིལ་གྱིས་ནོན་ཅིང་སེམས་ལ་ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དག་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་ པ་དང་། སྡུག་བསྔལ་བར་གྱུར་པ་དེ་ལྟ་དེ་ལྟར་སྟོན་པའི་གཏི་མུག་མ་སྤངས་པ་དང་། ཡོངས་སུ་མ་ཤེས་པ་དང་། མ་བཀག་པ་དང་། མ་བསལ་བའི་གཏི་མུག་དེ་མེད་སྙམ་ན། དེ་འདི་སྙམ་དུ་སེམས་ཏེ། ཚེ་དང་ལྡན་པ་འདི་ལ་གཏི་མུག་གང་གིས་ཟིལ་གྱིས་ནོན་ཅིང་སེམས་ལ་ ཁྱབ་ན་མི་ཤེས་བཞིན་ཁོ་ནར་ཤེས་སོ་ཞེས་སྨྲ། མ་མཐོང་བཞིན་ཁོ་ནར་མཐོང་ངོ་ཞེས་སྨྲ་ཞིང་གཞན་དག་ལ་ཡང་གང་དག་དེ་དག་ལ་ཡུན་རིང་པོར་གནོད་པ་དང་། ཕན་པ་མ་ཡིན་པ་དང་། སྡུག་བསྔལ་བར་འགྱུར་བ་དེ་ལྟ་དེ་ལྟར་སྟོན་པའི་གཏི་མུག་མ་སྤངས་པ་དང་། ཡོངས་ སུ་མ་ཤེས་པ་དང་། མ་བཀག་པ་དང་། མ་བསལ་བའི་གཏི་མུག་དེ་མེད་དོ། །དེ་ཅིའི་ཕྱིར་ཞེ་ན། གཏི་མུག་མེད་པའི་ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་གང་དག་ཡིན་པ་དེ་དག་ཚེ་དང་ལྡན་པ་འདི་ལ་ཡོད་ལ། འདི་ཆོས་གང་མདོར་བསྡུས་ པའམ། རྒྱས་པར་འཆད་ཀྱང་རུང་། འདིའི་ཆོས་ནི་ཞི་བ། གྱ་ནོམ་པ། ཟབ་པ་ཟབ་པར་སྣང་བ། མཐོང་བར་དཀའ་བ། རྟོགས་པར་དཀའ་བ། བརྟག་པར་བྱ་བ་མ་ཡིན་པ། རྟོག་གེའི་སྤྱོད་ཡུལ་མ་ཡིན་པ། ཞིབ་མོ་བརྟགས་པའི་མཁས་པ་དང་མཛངས་པས་ རིག་པར་བྱ་བ་ཡིན་ན། དེ་ཡང་འདི་ལྟར་ཚེ་དང་ལྡན་པ་འདི་གཅིག་པུ་གཏི་མུག་པས་ནི་ཤེས་པར་སླ་བ་མ་ཡིན་པས་ཚེ་དང་ལྡན་པ་འདི་གཏི་མུག་པ་མ་ཡིན་ཏེ། ཚེ་དང་ལྡན་པ་འདི་ནི་གཏི་མུག་མེད་པ་ཡིན་ནོ་སྙམ་མོ། །གང་གི་ཚེ་འདི་གསུམ་པ་གཏི་མུག་གི་ཆོས་ལ་རྣམ་པར་ དག་པར་མཐོང་ནས་དེའི་འོག་ཏུ་འདི་ལ་རྣམ་པ་དང་ལྡན་པའི་དད་པ་སྐྱེད་པར་བྱེད་དོ། །དད་པ་སྐྱེས་ནས་འདི་ལྟར་སློབ་པར་བྱེད་དེ། ཁྱིམ་ན་གནས་པ་ནི་གནོད་པ་ཅན་དང་། རྡུལ་ཁྲོད་ན་གནས་པ་ཡིན་ལ། རབ་ཏུ་བྱུང་བ་ནི་མངོན་པར་སྐབས་ཡོད་པ་ཡིན་ཏེ། ཁྱིམ་པ་

  1159. 270a

    ཁྱིམ་ན་གནས་པས་ནི་ཇི་སྲིད་འཚོའི་བར་དུ་གཅིག་ཏུ་སལ་གྱིས་དག་པར་ཚངས་པར་སྤྱོད་པ་ཡོངས་སུ་རྫོགས་པ། ཡོངས་སུ་དག་པ་རྣམ་པར་བྱང་བ་འབའ་ཞིག་པོ་འདི་ལ་སྤྱད་པར་སླ་བ་མ་ཡིན་པས། མ་ལ་བདག་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱའོ་སྙམ་སྟེ། དེས་དེ་ལྟར་ཐག་བཅད་ནས་ནོར་གྱི་ཚོགས་མང་པོའམ། ཉུང་ངུ་སྤངས་ཏེ་ཉེ་དུའི་འཁོར་མང་པོའམ་ཉུང་ངུ་སྤངས་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ ཁྱིམ་མེད་པར་རབ་ཏུ་བྱུང་ངོ་། །དེ་དེ་བཞིན་དུ་རབ་ཏུ་བྱུང་ནས་དེ་ཚུལ་ཁྲིམས་དང་ལྡན་པ་ལ་གནས་པ་ཡིན། སོ་སོར་ཐར་པའི་སྡོམ་པས་བསྡམས་པ་ཡིན། སྤྱོད་པ་དང་། སྤྱོད་ཡུལ་ཕུན་སུམ་ཚོགས་པ་ཡིན། ཐ་ན་ཁ་ན་མ་ཐོ་བ་ཕྲ་མོ་ལ་ཡང་འཇིགས་པར་ལྟ་བ་ཡིན། བསླབ་པའི་གཞི་རྣམས་བླངས་ཏེ་སློབ་པ་ཡིན་ནོ། །དེ་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་ཡིན་ཏེ། ཆད་པ་སྤངས་པ་ཡིན། མཚོན་ཆ་སྤངས་པ་ཡིན། འཛེམ་པ་དང་། སྙིང་རྗེར་ལྡན་པ་ཡིན། སེམས་ཅན་སྲོག་ཆགས་སུ་གྱུར་པ་ཐམས་ཅད་ལ་ཆུང་ ངུ་ན་སྲོག་ཆགས་གྲོག་སྦུར་ཡན་ཆད་སྲོག་གཅོད་པ་ལས་སླར་ལོག་པ་ཡིན་ནོ། །དེ་མ་བྱིན་པར་ལེན་པ་སྤངས་ནས་མ་བྱིན་པར་ལེན་པ་ལས་སླར་ལོག་པ་ཡིན་ཏེ། བྱིན་པ་ལེན་པ་ཡིན། བྱིན་པ་ལ་དགའ་བ་ཡིན་བྱིན་པ་ལྷུག་པར་བཏང་བ་ལ་དགའ་བ་ཡིན་ཏེ། རྐུན་མ་མ་ཡིན། བརྐམ་ཆགས་མ་ཡིན། གཙང་མ་ཡིན། དག་པ་ཡིན། བདག་ཉིད་ཁ་ན་མ་ཐོ་བ་མེད་པར་སྲུང་ཞིང་མ་བྱིན་པར་ལེན་པ་ལས་སླར་ལོག་པ་ཡིན་ནོ། །དེ་མི་ཚངས་པར་སྤྱོད་པ་སྤངས་ནས་མི་ཚངས་པར་སྤྱོད་པ་ལས་སླར་ལོག་པ་ཡིན་ཏེ། ཚངས་པར་སྤྱོད་པ་ཡིན། སྤྱོད་པ་ངན་ པ་སྤངས་པས་དག་པ་ཡིན། གཙང་བ་ཡིན། དྲི་ང་བ་མེད་པ་ཡིན། འཁྲིག་པ་དང་བྲལ་བ་ཡིན། སྨད་རིམ་གྱི་ཆོས་དང་བྲལ་བ་ཡིན། མི་ཚངས་པར་སྤྱོད་པ་ལས་སླར་ལོག་པ་ཡིན་ནོ། །དེ་བརྫུན་དུ་སྨྲ་བ་སྤངས་ནས་བརྫུན་དུ་སྨྲ་བ་ལས་སླར་ལོག་པ་ཡིན་ཏེ། བདེན་པར་

  1160. 270b

    སྨྲ་བ་ཡིན་བདེན་པ་ལ་དགའ་བ་ཡིན། མཉན་པར་འོས་པ་ཡིན། ཡིད་ཆེས་པ་ཡིན། བརྟན་པ་ཡིན། འཇིག་རྟེན་ལ་མི་བསླུ་བ་ཡིན་ཏེ། བརྫུན་དུ་སྨྲ་བ་ལས་སླར་ལོག་པ་ཡིན་ནོ། །དེ་ཕྲ་མའི་ཚིག་སྤངས་ནས་ཕྲ་མ་ལས་སླར་ལོག་པ་ཡིན་ཏེ། དེ་ཚུ་བི་དག་ལས་ ཐོས་ཏེ་དེ་དག་དབྱེ་བའི་ཕྱིར་ཕ་བི་དག་ལ་སྨྲ་བ་མ་ཡིན། ཕ་བི་དག་ལས་ཐོས་ཏེ་དེ་དག་དབྱེ་བའི་ཕྱིར་ཚུ་བི་དག་ལ་སྨྲ་བ་མ་ཡིན། བྱེ་བ་རྣམས་སྡུམས་བྱེད་པ་ཡིན། མཐུན་པ་རྣམས་ལ་གཟེངས་བསྟོད་པ་ཡིན། མཐུན་པ་ལ་དགའ་བ་ཡིན། མཐུན་པ་ལ་མགུ་བ་ཡིན། མཐུན་པར་བྱེད་པའི་ཚིག་སྨྲ་བ་ཡིན་ཏེ། ཕྲ་མ་ལས་སླར་ལོག་པ་ཡིན་ནོ། །དེ་ཚིག་རྩུབ་པོ་སྤངས་ནས་ཚིག་རྩུབ་པོ་ལས་སླར་ལོག་པ་ཡིན་ཏེ། དེ་གང་ཡང་ཚིག་གདུག་པ་དང་། རྩུབ་པ་དང་། ཕ་རོལ་ལ་མི་སྙན་པ་དང་། ཕ་རོལ་སྤ་འགོང་བར་བྱེད་པ་དང་། སྐྱེ་བོ་མང་ པོའི་ཡིད་ལ་མི་འཐད་པ་དང་། སྐྱེ་བོ་མང་པོའི་སྙིང་དུ་མི་སྡུག་པ་དང་། སྐྱེ་བོ་མང་པོ་མི་དགའ་བ་དང་། སྐྱེ་བོ་མང་པོའི་ཡིད་དུ་མི་འོང་བ་དང་། མཉམ་པར་གཞག་པ་མ་ཡིན་པ་དང་། མཉམ་པར་འཇོག་པར་འགྱུར་བ་མ་ཡིན་པ་དེ་ལྟ་བུའི་ཚིག་སྤངས་ནས་གང་ཡང་མི་ ཚུགས་པ་དང་། རྣར་སྙན་པ་དང་། སྙིང་ལ་འབབ་པ་དང་། དགའ་བར་བྱེད་པ་དང་། གྲོང་ཁྱེར་པ་དང་། སྙན་ཅིང་འཇེབས་པ་དང་། རྣམ་པར་གསལ་བ་དང་། རྣམ་པར་རིག་པར་བྱེད་པ་དང་། མཉན་པར་འོས་པ་དང་། མི་རྟེན་པ་དང་། འགལ་བ་མ་ཡིན་པ་ དང་། ཐུབ་པ་མེད་པ་དང་། སྐྱེ་བོ་མང་པོ་ལ་སྡུག་པ་དང་། སྐྱེ་བོ་མང་པོ་མགུ་བ་དང་། སྐྱེ་བོ་མང་པོ་ལ་དགའ་བ་དང་། སྐྱེ་བོ་མང་པོའི་ཡིད་དུ་འོང་བ་དང་། མཉམ་པར་གཞག་པ་དང་། མཉམ་པར་འཇོག་པར་འགྱུར་བ་དེ་ལྟ་བུའི་ཚིག་སྨྲ་བས། ཚིག་རྩུབ་པོ་ ལས་སླར་ལོག་པ་ཡིན་ནོ། །དེ་ཚིག་ཀྱལ་པ་སྤངས་ནས་ཚིག་ཀྱལ་བ་ལས་སླར་ལོག་པ་ཡིན་ཏེ། དེ་དུས་སུ་སྨྲ་བ་ཡིན། ཡང་དག་པར་སྨྲ་བ་ཡིན། དེ་ཁོ་ན་ཉིད་སྨྲ་བ་ཡིན། དོན་སྨྲ་བ་ཡིན། ཆོས་སྨྲ་བ་ཡིན། རྟོགས་པ་སྨྲ་བ་ཡིན། ཁོང་དུ་ཆུད་པར་བྱེད་པའི་

  1161. 271a

    ཚིག་སྨྲ་བ་ཡིན་ཏེ། དུས་སུ་དང་། འདྲེན་མ་མ་ཡིན་པ་དང་། གླེང་གཞི་དང་བཅས་པ་དང་། དན་རྟགས་དང་བཅས་པ་དང་། ཆོས་དང་དོན་དང་ལྡན་པ་ཡིན་ཏེ་ཚིག་ཀྱལ་པ་ལས་སླར་ལོག་པ་ཡིན་ནོ། །དེ་ཉོ་ཚོང་སྤངས་ནས་དེ་ཉོ་ཚོང་ལས་སླར་ལོག་པ་ཡིན་ ཏེ། དེ་གཞལ་བླུགས་ལ་གཡོ་བྱེད་པ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་སྤངས་ནས་གཞལ་བླུགས་ལ་གཡོ་བྱེད་པ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་ལས་སླར་ལོག་པ་ཡིན་ནོ། །དེ་གསུག་ལེན་པ་དང་། འབྲིད་པ་དང་། བསྡིགས་ནས་རང་གིར་བྱེད་པ་སྤངས་ནས་གསུག་ལེན་པ་དང་། འབྲིད་པ་དང་། བསྡིགས་ནས་རང་གིར་བྱེད་པ་ལས་སླར་ལོག་པ་ཡིན་ནོ། །དེ་བསད་པ་དང་། བཅིངས་པ་དང་། གཅད་པ་དང་། དབུག་པ་དང་། བརྡེག་པའི་བསམ་པ་སྤངས་ནས་གསོད་པ་དང་། འཆིང་བ་དང་། གཅོད་པ་དང་། འབིགས་པ་དང་། རྡེག་པ་ཉམས་སུ་མྱོང་བར་བྱེད་པ་ལས་སླར་ལོག་པ་ཡིན་ནོ། །དེ་འོད་དང་བུད་མེད་དང་ལྷན་ཅིག་ཉལ་བ་སྤངས་ནས། འོད་དང་བུད་མེད་དང་ལྷན་ཅིག་ཉལ་བ་ལས་སླར་ལོག་པ་ཡིན་ནོ། །དེ་ཞིང་གི་གཞི་དང་། ཁྱིམ་ གྱི་གཞི་དང་། ཚོང་ཁང་གི་གཞི་ལེན་པ་སྤངས་ནས་ཞིང་གི་གཞི་དང་། ཁྱིམ་གྱི་གཞི་དང་། ཚོང་ཁང་གི་གཞི་ལེན་པ་ལས་སླར་ལོག་པ་ཡིན་ནོ། དེ་གླང་པོ་ཆེ་དང་། རྟ་དང་། བ་ལང་དང་། ལུག་དང་། བྱ་གག་དང་། ཕག་ལེན་པ་སྤངས་ནས་གླང་པོ་ཆེ་དང་། རྟ་དང་། བ་ལང་ དང་། ལུག་དང་། བྱ་གག་དང་། ཕག་ལེན་པ་ལས་སླར་ལོག་པ་ཡིན་ནོ། །དེ་བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལེན་པ་སྤངས་ནས་བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་ལེན་པ་ལས་སླར་ལོག་པ་ཡིན་ནོ། །དེ་བུད་ མེད་དང་། སྐྱེས་པ་དང་། ཁྱེའུ་དང་། བུ་མོ་ལེན་པ་སྤངས་ནས་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ལེན་པ་ལས་སླར་ལོག་པ་ཡིན་ནོ། །དེ་གསེར་དང་། དངུལ་ལེན་པ་སྤངས་ནས་གསེར་དང་། དངུལ་ལེན་པ་ལས་སླར་ལོག་པ་ཡིན་ནོ། །དེ་འབྲུ་རྗེན་པ་ལེན་པ་སྤངས་

  1162. 271b

    ནས་འབྲུ་རྗེན་པ་ལེན་པ་ལས་སླར་ལོག་པ་ཡིན་ནོ། །དེ་ཟ་མ་གཅིག་པ་ཡིན་ཏེ། ནུབ་མོའི་སྤངས་ཤིང་དུས་མ་ཡིན་པའི་ཁ་ཟས་སྤངས་པ་ཡིན། དུས་སུ་རྒྱུ་ཞིང་དུས་སུ་སྤྱོད་པས་སྦྱོར་བ་ལ་བརྩོན་པ་ཡིན། དེ་ལུས་འཚོ་བ་ཙམ་གྱི་ཆོས་གོས་ཀྱིས་ཆོག་ཤེས་ཤིང་ཚོད་ཟིན་པ་ཡིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པ་ཡིན་ནོ། །དེ་ལུས་འཚོ་བ་ཙམ་གྱི་ཆོས་གོས་ཀྱིས་ཆོག་ཤེས་ཤིང་ཚོད་ཟིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པས་གང་དང་གང་དུ་འགྲོ་བ་ན་ལྷུང་བཟེད་དང་བཅས་ཆོས་གོས་དང་བཅས་པས་ འགྲོའོ། །དཔེར་ན་འདབ་ཆགས་བྱ་གང་དང་གང་དུ་ལྡིང་བ་དེར་འདབ་མ་དང་ཆས་གཤོག་པ་དང་ཆས་ཏེ་ལྡིང་བ་དེ་བཞིན་དུ་དེ་ལུས་འཚོ་བ་ཙམ་གྱི་ཆོས་གོས་ཀྱིས་ཆོག་ཤེས་ཤིང་ཚོད་ཟིན། བསོད་སྙོམས་ལྟོ་འགྲངས་ཀྱིས་ཆོག་ཤེས་ཤིང་ཚོད་ཟིན་པས་གང་དང་གང་དུ་འགྲོ་བ་ན་ལྷུང་བཟེད་ དང་བཅས། ཆོས་གོས་དང་བཅས་པས་འགྲོའོ།། །།འདུལ་བ་གཞི། བམ་པོ་བརྒྱ་རྩ་བདུན་པ། རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ས་བོན་གྱི་ཚོགས་དང་། འབྱུང་པོའི་ཚོགས་སྣ་ཚོགས་རྩོམ་པ་ ལ་སྦྱོར་བར་བརྩོན་པས་གནས་པ་འདི་ལྟ་སྟེ། རྩ་བའི་ས་བོན་དང་། སྡོང་བུའི་ས་བོན་དང་། ཐོར་ཏོའི་ས་བོན་དང་། འགས་པའི་ས་བོན་དང་། ལྔ་བ་ས་བོན་གྱི་ས་བོན་ཉིད་དེ། དགེ་སྦྱོང་ནི་ས་བོན་གྱི་ཚོགས་དང་། འབྱུང་པོའི་ཚོགས་སྣ་ཚོགས་རྩོམ་པ་ལ་སྦྱོར་བར་བརྩོན་ པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གསོག་འཇོག་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། ཟས་ཀྱི་གསོག་འཇོག་དང་། སྐོམ་གྱི་གསོག་འཇོག་དང་། གོས་ ཀྱི་གསོག་འཇོག་དང་། དྲིའི་གསོག་འཇོག་དང་། མེ་ཏོག་ཕྲེང་གི་གསོག་འཇོག་དང་། ལོ་མའི་གསོག་འཇོག་དང་། མེ་ཏོག་གི་གསོག་འཇོག་དང་། འབྲས་བུའི་གསོག་འཇོག་སྟེ། དགེ་སྦྱོང་གི་གསོག་འཇོག་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་

  1163. 272a

    ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གནས་མལ་མཐོན་པོ་དང་། གནས་མལ་ཆེན་པོ་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པར་བྱེད་པ་འདི་ལྟ་སྟེ་སྟན་དང་། ཁྲི་དང་། ཁྲི་སྣམ་བུ་ཅན་ དང་། རས་ཀྱི་སྣམ་བུ་ཅན་དང་། བེའུ་རས་ཀྱིས་གཡོགས་པ་དང་། རས་ཡུག་ཆེན་གྱིས་གཡོགས་པ་དང་། རས་ཁྲ་བོས་གཡོགས་པ་དང་། པ་ལེ་ལའི་རས་ཀྱིས་གཡོགས་པ་དང་། གླང་པོ་ཆེའི་འཐབ་སྟན་དང་། རྟའི་འཐབ་སྟན་དང་། ངོས་གཅིག་པ་ལ་ལས་བྱས་ པ་དང་། ངོས་གཉིས་ཀ་བལ་ལས་བྱས་པ་དང་། སྟོད་པ་ལ་ལས་བྱས་པ་དང་། རྒྱབ་བལ་ལས་བྱས་པ་དང་། ཀ་ལིང་ཀའི་གོས་ཀྱིས་སྟེང་གཡོགས་དང་བཅས་པའི་གོས་དང་། ཕྱོགས་གཉིས་སུ་སྔས་དམར་པོ་བཅུག་པ་སྟེ། དགེ་སྦྱོང་ནི་གནས་མལ་མཐོན་པོ་དང་། གནས་མལ་ཆེན་པོ་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཆབ་དང་། གཞག་པ་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། མཉེ་བ་དང་། བཀྲུ་ བ་དང་། དྲིལ་ཕྱི་དང་། མེ་ཏོག་གི་ཕྲེང་བ་དང་། དྲི་དང་བྱུག་པ་དང་། ཁ་དོག་འཆང་བ་དང་། སེན་མོའི་ཁ་དོག་བསྒྱུར་བ་དང་། སོ་བྱི་དོར་བྱེད་པ་དང་། ཁར་ཕྱེ་མ་འདེབས་པ་དང་། གདོང་གི་བྱི་དོར་དང་། གདོང་མེ་ལོང་ལ་བལྟ་བ་དང་། གཙུག་ཕུད་འཆིང་བ་དང་། གདུགས་ཀྱི་རྩ་བ་སྦུ་བུ་ཅན་དང་། རལ་གྲི་དང་། རྔ་ཡབ་ནོར་བུའི་ཡུ་བ་ཅན་དང་། མཆིལ་ལྷམ་ཁྲ་བོ་དང་། གོས་སར་པ་དང་། རས་སར་པ་ཁ་ཚར་ཅན་འཆང་བའི་རང་བཞིན་དག་སྟེ། དགེ་སྦྱོང་ནི་གཞག་པ་དང་ཆ་བ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ལྟད་མོ་སྣ་ཚོགས་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། གླང་པོ་ཆེས་འགྱེད་པ་དང་། རྟས་འགྱེད་པ་དང་། ཤིང་རྟས་འགྱེད་པ་དང་།

  1164. 272b

    དཔུང་བུ་ཆུང་གིས་འགྱེད་པ་དང་། དབྱུག་པས་འགྱེད་པ་དང་། ཁུ་ཚུར་གྱིས་འགྱེད་པ་དང་། ཁྱུ་མཆོག་གིས་འགྱེད་པ་དང་། མ་ཧེས་འགྱེད་པ་དང་། ར་འགྱེད་པ་དང་། ལུག་འགྱེད་པ་དང་། བྱ་གག་འཐབ་པ་དང་། མཆིལ་པ་འཐབ་པ་དང་། འུར་བ་འཐབ་པ་དང་། བྱ་གག་དང་། མཆིལ་བ་དང་། འུར་བར་འཐབ་པ་དང་། བུད་མེད་འཐབ་པ་དང་། སྐྱེས་པ་འཐབ་པ་དང་། གཞོན་ནུ་འཐབ་པ་དང་། གཞོན་ནུ་མ་འཐབ་པ་དང་། ཤིང་འཇོག་པ་དང་། བྲོ་གར་གྱི་ཚོགས་དང་། ཕྲག་པ་ནས་འགོང་བ་དང་། རྒྱལ་མཚན་གྱི་རྩེ་མོ་དང་། དཔུང་ གི་ཚོགས་དང་། གཡུལ་བཤམས་པ་དང་། དམག་གི་ཚོགས་ལ་ལྟ་བ་དང་། འདུན་ཕལ་ཆེན་པོ་ལ་ལྟ་བར་འདོད་པ་སྟེ། དགེ་སྦྱོང་ནི་ལྟད་མོ་སྣ་ཚོགས་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་ དད་པས་བྱིན་པ་དག་སྤྱད་ནས་སྒྲ་སྣ་ཚོགས་ཉན་པ་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། གླང་པོ་ཆེའི་སྐད་དང་། རྟའི་སྐད་དང་། ཤིང་རྟའི་སྒྲ་དང་། དཔུང་བུ་ཆུང་གི་སྒྲ་དང་། རྔ་པ་ཊ་ཧའི་སྒྲ་དང་། དུང་གི་སྒྲ་དང་། རྔ་བོ་ཆེའི་སྒྲ་དང་། རོལ་མོའི་ཚོགས་པའི་ སྒྲ་དང་། གར་མཁན་གྱི་སྒྲ་དང་། གླུའི་སྒྲ་དང་། སྨྲ་བའི་སྒྲ་དང་། སེ་གོལ་གྱི་སྒྲ་དང་། ཐལ་མོའི་སྒྲ་དང་། བུམ་པའི་སྒྲ་དང་། རང་བཟོ་དང་། སྙན་དངགས་དང་། ཚིག་དང་ཡི་གེ་སྣ་ཚོགས་དང་། འཇིག་རྟེན་རྒྱང་བ་ན་དང་ལྡན་པ་དང་། གྲགས་པའི་གཏམ་ཉན་འདོད་ པ་དག་སྟེ། དགེ་སྦྱོང་ནི་སྒྲ་སྣ་ཚོགས་ཉན་པ་རྩོམ་པ་ལ་སྦྱོར་བར་བརྩོན་པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས། ཨུག་ཤུད་དང་། ཁྲས་དང་། རྒྱན་པོ་རྩོམ་པ་ལ་སྦྱོར་བར་བརྩོན་པར་ གནས་པ་འདི་ལྟ་སྟེ། མིག་བརྒྱད་པ་དང་། མིག་བཅུ་པ་དང་། ན་ཡའི་མིག་དང་། ཕྱོགས་ཕྱོགས་ནས་འགྱེད་པ་དང་། བུམ་པས་རྩེ་བ་དང་། ཙ་ལེ་དང་། སུ་ཁ་ལེ་དང་། ཕེག་གིས་རྩེ་བ་དང་། གུལ་ཙ་བ་དང་། ཐུར་མ་དང་། ལག་རྒྱན་དང་། སྐུགས་ཇི་ལྟ་བར་

  1165. 273a

    འགྱེད་པ་སྟེ། དགེ་སྦྱོང་ནི་ཨུག་ཤུད་དང་། ཁྲས་དང་། རྒྱན་པོ་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་གཏམ་སྣ་ཚོགས་རྩོམ་པ་ལ་སྦྱོར་བར་བརྩོན་པས་ གནས་པ་འདི་ལྟ་སྟེ། རྒྱལ་པོའི་གཏམ་དང་། ཆོམ་རྐུན་གྱི་གཏམ་དང་། དམག་གི་གཏམ་དང་། ཟས་ཀྱི་གཏམ་དང་། སྐོམ་གྱི་གཏམ་དང་། གོས་ཀྱི་གཏམ་དང་། ཚོང་དུས་ཀྱི་གཏམ་དང་། སྨད་འཚོང་གི་གཏམ་དང་། ལས་ངན་པ་བརྗོད་པའི་གཏམ་དང་། རྒྱ་མཚོ་ ཆེན་པོ་བརྗོད་པའི་གཏམ་དང་། འཇིག་རྟེན་བརྗོད་པའི་གཏམ་དང་། ལྗོངས་དང་། སྣ་ཆེན་པོ་ལ་གཏོགས་པ་བརྗོད་པའི་གཏམ་སྟེ། དགེ་སྦྱོང་ནི་གཏམ་སྣ་ཚོགས་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ ཅིག་དད་པས་བྱིན་པ་དག་སྤྱད་ནས་རྩོད་པའི་གཏམ་རྩོམ་པ་ལ་སྦྱོར་བར་བརྩོན་པས་གནས་པ་འདི་ལྟ་སྟེ། ཇི་ལྟར་ཁོ་བོས་ཆོས་འདུལ་བ་འདི་ཀུན་ཤེས་པ་དེ་བཞིན་དུ་ཁྱོད་ཀྱིས་ཀྱང་ཆོས་འདུལ་བ་འདི་ཀུན་ཤེས་མོད་ཀྱི་ངའི་ནི་རིགས་པ་དང་ལྡན་ལ་ཁྱོད་ཀྱི་ནི་རིགས་པ་དང་མི་ལྡན་ནོ། །ངའི་ ནི་འབྲེལ་ལ་ཁྱོད་ཀྱི་ནི་མི་འབྲེལ་ཏེ་སྔར་སྨྲ་བར་བྱ་བ་ནི་ཕྱིས་སྨྲས། ཕྱིས་སྨྲ་བར་བྱ་བ་ནི་སྔར་སྨྲ་ལ། ཁྱོད་ཀྱིས་ཧ་ཅང་མྱུར་བར་སྨྲས་པ་མི་གསལ་ལོ། །བརྩད་པས་མཇུག་བརྟུལ་གྱིས། ཁྱོད་ཀྱིས་རྩད་པའི་དོན་དུ་སྨྲས་པའི་ཚིག་དེ་ཐོང་ཤིག །ཚར་བཅད་ཟིན་ཏོ། །གལ་ཏེ་སྤོགས་ ནུས་ན་དྲིས་དང་། སྨྲོས་ཤིག་ཅེས་བྱ་བ་སྟེ། དགེ་སྦྱོང་ནི་རྩོད་པ་སྣ་ཚོགས་རྩོམ་པ་ལ་སྦྱོར་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་དང་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཕོ་ཉར་འགྲོ་བ་དང་། གཏོང་བ་ལོག་པའི་འཚོ་བས་འཚོ་བར་བྱེད་ པ་འདི་ལྟ་སྟེ། དེ་དག་རྒྱལ་པོའི་འམ། བློན་པོ་ཆེན་པོ་རྣམས་ཀྱིའམ། བྲམ་ཟེ་རྣམས་ཀྱིའམ། གྲོང་མི་རྣམས་ཀྱིའམ། ཡུལ་མི་རྣམས་ཀྱིའམ། ནོར་ཅན་རྣམས་ཀྱིའམ། ཚོང་དཔོན་རྣམས་ཀྱིའམ། དེད་དཔོན་རྣམས་ཀྱི་ཕོ་ཉ་ཚུ་བི་ནས་ཁྲིད་དེ་ཕ་བིར་སྣ་འདྲེན་པར་བྱེད་པ་དང་། ཕ་བི་ནས་ཕོ་ཉ་

  1166. 273b

    ཁྲིད་དེ་ཚུ་བིར་སྣ་འདྲེན་པར་བྱེད་པ་སྟེ། དགེ་སྦྱོང་ནི་ཕོ་ཉར་འགྲོ་བ་དང་། གཏོང་བ་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཚུལ་འཆོས་པ་དང་། ཁ་གསག་དང་། གཞོགས་སློང་ དང་། ཐོབ་ཀྱིས་འཇལ་བ་དང་། རྙེད་པས་རྙེད་པ་སྒྲུབ་པར་བྱེད་དེ་དགེ་སྦྱོང་ནི་ཚུལ་འཆོས་པ་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་དང་། རྙེད་པས་རྙེད་པ་སྒྲུབ་པ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་ དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། གནམ་འགྲུམ་པ་དང་། རྨ་མཚན་དང་། རྨི་ལམ་གྱི་མཚན་མ་དང་། མེས་ཚིག་པ་དང་། ཆུས་རེག་པ་དང་། བྱི་བས་ཟོས་པ་དང་། འབེབས་པ་དང་། སྐད་ཉན་པ་དང་། འབྱུང་པོ་ ཐམས་ཅད་ཀྱི་སྐད་དང་། ལུས་ཀྱི་དཔྱད་དང་། ཁྱིམ་སའི་དཔྱད་དང་། ནེ་ཙོའི་དཔྱད་དང་། བྱའི་དཔྱད་དང་། ཁ་ཅིག་མཐེ་བོའི་དཔྱད་ལ་སྦྱོར་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་ བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། རྒྱུ་སྐར་རྣམས་ལ་རབ་ཏུ་སྦྱོར་བ་དང་། ཡུད་ཙམ་དང་ལྡང་བ་དང་། རོ་བརྟག་པ་དང་། སྔགས་ཀྱི་ལས་དང་། ཞི་བའི་ལས་དང་། འབྱུང་པོའི་ལས་དང་། རྒྱས་པའི་ལས་དང་། དབང་དུ་བྱ་བའི་ལས་དང་། ཡི་གེ་འདྲི་བའི་ལས་དང་། བསང་གཏོར་བའི་ལས་དང་། གྲངས་དང་། ཁ་ཅིག་མེ་ལོང་གི་དཔྱད་ལ་སྦྱོར་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་བདག་སྤྱད་ནས་ཡོན་པོའི་དཔྱད་ཀྱིས་ལོག་པར་འཚོ་བས་འཚོ་བར་བྱེད་པ་འདི་ལྟ་སྟེ། ལུས་ཀྱི་དཔྱད། རྩ་བའི་སྨན། མིག་སྨན་སྦྱིན་པ་དང་། སྣུམ་བག་གི་རོ་སྦྱིན་པ་དང་། སྨན་སྦྱིན་པ་དང་། བུད་མེད་ཀྱི་དཔྱད་དང་། སྐྱེས་པའི་

  1167. 274a

    དཔྱད་དང་། གཞོན་ནུའི་དཔྱད་དང་། གཞོན་ནུ་མའི་དཔྱད་དང་། སྨན་ལ་སྦྱོར་བར་བྱེད་པ་སྟེ། དགེ་སློང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་ བྱིན་པ་དག་དཔྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ནོར་བུའི་མཚན་ཉིད་དང་། དབྱུག་པའི་མཚན་ཉིད་དང་། རལ་གྲིའི་མཚན་ཉིད་དང་། མདའི་མཚན་ཉིད་དང་། གླང་པོ་ཆེའི་མཚན་ཉིད་དང་། རྟའི་མཚན་ཉིད་དང་། མཚོན་ཆའི་མཚན་ཉིད་དང་། མ་ཧེའི་མཚན་ཉིད་དང་། ཁྱུ་མཆོག་གི་མཚན་ཉིད་དང་། རའི་མཚན་ཉིད་དང་། ལུག་གི་མཚན་ཉིད་དང་། བྱ་གག་གི་མཚན་ཉིད་དང་། མཆིལ་པའི་མཚན་ཉིད་དང་། འུར་བའི་མཚན་ཉིད་དང་། བུད་མེད་ཀྱི་མཚན་ཉིད་དང་། སྐྱེས་པའི་མཚན་ཉིད་དང་། གཞོན་ནུའི་མཚན་ ཉིད་དང་། གཞོན་ནུ་མའི་མཚན་ཉིད་དང་། ཚེ་ཐུང་བའི་རྟགས་དང་། ཚེ་རིང་བའི་རྟགས་དང་། སྐལ་བ་ཆུང་བའི་རྟགས་དང་། སྐལ་བ་ཆེ་བའི་རྟགས་དང་། བསོད་ནམས་ཆུང་བའི་རྟགས་དང་། བསོད་ནམས་ཆེ་བའི་རྟགས་དང་། མཐུ་ཆུང་བའི་རྟགས་དང་། མཐུ་ཆེ་བའི་ རྟགས་དང་། ཇོ་བོའི་མཚན་ཉིད་དང་། བྲན་གྱི་མཚན་ཉིད་དག་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་ འཚོ་བར་བྱེད་པ་འདི་ལྟ་སྟེ། སྨན་མས་ཅིག་ཅར་གཏོང་བ་དང་། སྦྲེངས་ཏེ་གཏོང་བ་དང་། སྐྱུག་པ་དང་། འཁྲུ་བ་དང་། སྣར་བླུགས་པ་དང་། དུ་བ་བརྔུབ་པ་དང་། དུགས་ཀྱི་ལས་དང་། བད་ཀན་གྱི་དཔྱད་དང་། ཕོ་བའི་དཔྱད་དང་། སྨེ་བའི་དཔྱད་དང་། ཕོལ་མིག་གི་དཔྱད་དང་། རི་ དགས་འཁྱིལ་བ་དང་། བྱ་རོག་འཁྱིལ་བ་དང་། མཁུར་བ་འགུལ་བ་དང་། ལྕེ་སོས་ཆོད་པ་དང་། རོ་ལངས་དང་། རོ་ལངས་ཕྱེད་ཀྱི་སྦྱོར་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་

  1168. 274b

    བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། དགུག་པ་དང་། ཀུན་དུ་དགུག་པ་དང་། རྣམ་པར་དགུག་པ་དང་། ཀུན་དུ་རྨོངས་པ་དང་། རྣམ་པར་རྨོངས་པ་དང་། རྣམ་པར་འཐོར་བ་དང་། རྣམ་པར་ འཇོམས་པའི་ཆོས་དང་། བདེ་བར་བྱེད་པ་དང་། སྡུག་བསྔལ་བར་བྱེད་པ་དང་། བུ་འཆགས་པར་བྱེད་པ་དང་། ཏིལ་གྱི་སྦྱིན་སྲེག་དང་། འབྲས་ཀྱི་སྦྱིན་སྲེག་དང་། ནོར་གྱི་སྦྱིན་སྲེག་དང་། འབྲུའི་སྦྱིན་སྲེག་དང་། མོན་སྲན་སྡེའུ་ཡི་སྦྱིན་སྲེག་དང་། མོན་སྲན་ན་གུའི་ སྦྱིན་སྲེག་དང་། རྫས་ཀྱི་སྦྱིན་སྲེག་དང་། སྲེག་བླུགས་ཀྱི་སྦྱིན་སྲེག་དང་། ཉི་མ་ལ་བཀུར་སྟི་བྱེད་པ་དང་། རྒྱུ་སྐར་ལ་བཀུར་སྟི་བྱེད་པ་དང་། ལྷ་ལ་བཀུར་སྟི་བྱེད་པ་དང་། ཁ་ཅིག་དམག་མང་པོ་འདྲེན་པ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་ སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། འཇིགས་པར་འགྱུར་བ་དང་། ཞི་བར་འགྱུར་བ་དང་། ལོ་ཉེས་པར་འགྱུར་བ་དང་། ལོ་ ལེགས་པར་འགྱུར་བ་དང་། ཆར་མི་འབབ་པར་འགྱུར་བ་དང་། ཆར་ལེགས་པར་འབབ་པར་འགྱུར་བ་དང་། ཡམས་ཀྱི་ནད་འབྱུང་བར་འགྱུར་བ་དང་། ཡམས་ཀྱི་ནད་འབྱུང་བར་མི་འགྱུར་རོ་ཞེས་བྱ་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་ སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཟུན་རྣམས་ཀྱི་རྒྱལ་པོ་རྒྱལ་བར་འགྱུར་ཞིང་ཕྱི་རོལ་པ་རྣམས་ཀྱི་རྒྱལ་པོ་ཕམ་པར་འགྱུར་བ་ དང་། ཕྱི་རོལ་པ་རྣམས་ཀྱི་རྒྱལ་པོ་རྒྱལ་བར་འགྱུར་ཞིང་ཟུན་རྣམས་ཀྱི་རྒྱལ་པོ་ཕམ་པར་འགྱུར་བ་དང་། ཟུན་རྣམས་ཀྱི་རྒྱལ་པོ་གཡུལ་དུ་འཇུག་པར་འགྱུར་ཞིང་ཕྱི་རོལ་པ་རྣམས་ཀྱི་རྒྱལ་པོ་འབྱུང་བར་འགྱུར་བ་དང་། ཕྱི་རོལ་པ་རྣམས་ཀྱི་རྒྱལ་པོ་གཡུལ་དུ་འཇུག་པར་འགྱུར་

  1169. 275a

    ཞིང་ཟུན་རྣམས་ཀྱི་རྒྱལ་པོ་འབྱུང་བར་འགྱུར་རོ། །ཞེས་བྱ་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་ དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཉི་མ་དང་ཟླ་བ་དག་ལམ་དུ་འགྲོ་ན་འདི་ལྟར་འགྱུར་རོ། །ཉི་མ་དང་ཟླ་བ་དག་ལམ་གོལ་བར་འགྲོ་ན་འདི་ལྟར་འགྱུར་རོ། །ཉི་མ་གཟས་ཟིན་པ་དང་། ཟླ་བ་གཟས་ཟིན་པ་དང་། སྐར་མདའ་ལྷུང་བ་དང་། ཕྱོགས་དམར་ པོར་གྱུར་པ་དང་། བར་སྣང་ལས་སྒྲ་འབྱུང་བ་དང་། ལམ་གོལ་བར་ཉི་མ་གཟས་ཟིན་པ་དང་། ཟླ་བ་གཟས་ཟིན་པ་དང་། སྐར་མདའ་ལྷུང་བ་དང་། ཕྱོགས་དམར་པོར་འགྱུར་བ་དང་། བར་སྣང་ལས་སྒྲ་འབྱུང་བ་དང་། ཉི་མ་དང་ཟླ་བ་འདི་གཉིས་འདི་ལྟར་རྫུ་ འཕྲུལ་ཆེ་ཞིང་འདི་ལྟར་མཐུ་ཆེ་བ་འཆར་བ་དང་། ནུབ་པ་དང་། བསྒྲིབས་པ་དང་། མ་བསྒྲིབས་པ་དང་། འདི་ལྟ་སྟེ་ལམ་དང་། ལམ་གོལ་བའི་གནས་དག་མི་མངོན་ན་འདི་ལྟར་འགྱུར་རོ་ཞེས་བྱ་བ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ ཡིན་ནོ། །རྒྱལ་པོ་ཆེན་པོ་འདི་ལྟར་ཡང་དགེ་སྦྱོང་ངམ་བྲམ་ཟེ་ཁ་ཅིག་དད་པས་བྱིན་པ་དག་སྤྱད་ནས་ཡོན་པོའི་དཔྱད་ཀྱིས་ལོག་པའི་འཚོ་བས་འཚོ་བར་བྱེད་པ་འདི་ལྟ་སྟེ། ཉི་མ་དང་ཟླ་བ་དག་ལམ་དུ་འགྲོ་ན་འབྲས་བུ་འདི་ལྟ་བུར་འགྱུར་བ་དང་། ཉི་མ་དང་ཟླ་བ་དག་ལམ་གོལ་ བར་འགྲོ་ན་འབྲས་བུ་འདི་ལྟ་བུར་འགྱུར་བ་དང་། ལམ་དུ་ཉི་མ་གཟས་ཟིན་པ་དང་། ཟླ་བ་གཟས་ཟིན་པ་དང་། སྐར་མདའ་ལྟུང་བ་དང་། ཕྱོགས་དམར་པོར་གྱུར་པ་དང་། བར་སྣང་ལས་སྒྲ་བྱུང་ན་འབྲས་བུ་འདི་ལྟ་བུར་འགྱུར་བ་དང་། ལམ་གོལ་བར་ཉི་མ་གཟས་ཟིན་པ་ དང་། ཟླ་བ་གཟས་ཟིན་པ་དང་། སྐར་མདའ་ལྟུང་བ་དང་། ཕྱོགས་དམར་པོར་གྱུར་བ་དང་། བར་སྣང་ལས་སྒྲ་བྱུང་ན་འབྲས་བུ་འདི་ལྟ་བུར་འགྱུར་བ་དང་། ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་མཐུ་ཆེ་བ་འཆར་བ་དང་ནུབ་པ་དང་། བསྒྲིབས་པ་དང་།

  1170. 275b

    མ་བསྒྲིབས་པ་དང་། འདི་ལྟ་སྟེ་ལམ་དང་། ལམ་གོལ་བ་མངོན་ན་འབྲས་བུ་འདི་ལྟ་བུར་འགྱུར་བ་སྟོན་པ་སྟེ། དགེ་སྦྱོང་ནི་ཡོན་པོའི་དཔྱད་ཀྱི་ལོག་པའི་འཚོ་བ་དེ་ལྟ་བུ་ལས་སླར་ལོག་པ་ཡིན་ནོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་ལྡན་པས་ནང་གི་བདེ་བ་ཁ་ན་མ་ཐོ་བ་ མེད་པ་ཉམས་སུ་མྱོང་བར་བྱེད་ཅིང་དེ་དབང་པོ་རྣམས་ཀྱི་སྒོ་བསྡམས་པ་དང་། ཀུན་དུ་བསྲུངས་པའི་དྲན་པ་དང་། འགྲུས་སྐྱོང་གི་དྲན་པ་དང་། ཡིད་དྲན་པས་བསྲུངས་པས་གནས་སྐབས་མཉམ་པར་སྤྱོད་པ་ཡིན་ཏེ། དེ་མིག་གིས་གཟུགས་རྣམས་མཐོང་ན་ཡིད་བདེ་བར་མི་ འགྱུར། ཡིད་མི་བདེ་བར་མི་འགྱུར། མཚན་མར་མི་འཛིན་མངོན་རྟགས་སུ་མི་འཛིན་ནོ། །གཞི་གང་གི་ཕྱིར་ཞེ་ན། མིག་གི་དབང་པོའི་སྡོམ་པས་མ་བསྡམས་པར་གནས་པ་ནི་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དག་འབྱུང་བས་སྡིག་པ་མི་དགེ་བའི་ཆོས་ རྣམས་སེམས་ཀྱི་རྗེས་སུ་འབྲང་བར་འགྱུར་རོ། །དེ་རྣམས་བསྡམ་པའི་ཕྱིར་སྒྲུབ་ཅིང་བསྲུང་བར་མིག་གི་དབང་པོས་མིག་གི་དབང་པོ་སྡོམ་པར་བྱེད་དོ། །རྣ་བས་སྒྲ་དང་། སྣས་དྲི་དང་། ལྕེས་རོ་དང་། ལུས་ཀྱིས་རེག་བྱ་དང་། ཡིད་ཀྱིས་ཆོས་རྣམས་ཤེས་ནས་ཡིད་བདེ་ བར་མི་འགྱུར། ཡིད་མི་བདེ་བར་མི་འགྱུར། མཚན་མར་མི་འཛིན། མངོན་རྟགས་སུ་མི་འཛིན་ནོ། །གཞི་གང་གི་ཕྱིར་ཞེ་ན། ཡིད་ཀྱི་དབང་པོའི་སྡོམ་པས་མ་བསྡམས་པར་གནས་པ་ནི་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དག་འབྱུང་བས་སྡིག་པ་ མི་དགེ་བའི་ཆོས་རྣམས་སེམས་ཀྱི་རྗེས་སུ་འབྲང་བར་འགྱུར་རོ། །དེ་རྣམས་བསྡམས་པའི་ཕྱིར་སྒྲུབ་ཅིང་བསྲུང་བར་ཡིད་ཀྱི་དབང་པོས་ཡིད་ཀྱི་དབང་པོ་སྡོམ་པར་བྱེད་དོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་། དབང་པོའི་སྒོ་བསྡམས་པ་དེ་དང་ལྡན་པས་ནང་ གི་བདེ་བ་གནོད་པ་མེད་པ་ཉམས་སུ་མྱོང་ཞིང་དེ་འགྲོ་བ་དང་ལྡོག་པ་ལ་ཤེས་བཞིན་དུ་གནས་པ་ཡིན་ནོ། །དེ་ལྟ་བ་དང་། རྣམ་པར་ལྟ་བ་དང་། བསྐུམ་པ་དང་། བརྐྱང་བ་དང་། སྣམ་སྦྱར་དང་། ཆོས་གོས་དང་། ལྷུང་བཟེད་ལེན་པ་དང་། འགྲོ་བ་དང་། འགྲེང་བ་དང་།

  1171. 276a

    འདུག་པ་དང་། ཉལ་བ་དང་། མི་ཉལ་བ་དང་། སྨྲ་བ་དང་། མི་སྨྲ་བ་དང་། གཉིད་ཀྱིས་དུབ་པ་སེལ་བ་ལ་ཡང་ཤེས་བཞིན་དུ་གནས་པ་ཡིན་ནོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་ལྡན་ཞིང་དབང་པོའི་སྒོ་བསྡམས་པ་དེ་དང་། དྲན་པ་ དང་ཤེས་བཞིན་མཆོག་དེ་དང་ལྡན་པས་ནང་གི་བདེ་བ་ཁ་ན་མ་ཐོ་བ་མེད་པ་ཉམས་སུ་མྱོང་བ་ཡིན་ནོ། །དེ་འཕགས་པའི་ཚུལ་ཁྲིམས་ཀྱི་ཕུང་པོ་དེ་དང་ལྡན་ཞིང་དབང་པོའི་སྒོ་བསྡམས་པ་དེ་དང་། དྲན་པ་དང་ཤེས་བཞིན་མཆོག་དེ་དང་ལྡན་པས་གནས་མལ་དབེན་པ་དགོན་པ་ དང་། ཤིང་དྲུང་དང་། ཁང་སྟོང་དག་ཏུ་གནས་པ་ཡིན་ཏེ། དེ་དགོན་པར་སོན་ཀྱང་རུང་། ཤིང་དྲུང་དུ་སོན་ཀྱང་རུང་། ཁང་སྟོང་དུ་སོན་ཀྱང་རུང་། འདུག་སྟེ་སྐྱིལ་མོ་ཀྲུང་བཅས་ཤིང་ལུས་དྲང་པོར་བསྲང་ནས་དྲན་པ་མངོན་དུ་བཞག་སྟེ། དེ་འཇིག་རྟེན་ལ་བརྣབ་ སེམས་སྤངས་ཏེ། བརྣབ་སེམས་དང་བྲལ་བའི་སེམས་ཀྱིས་ལན་མང་དུ་གནས་ཤིང་བརྣབ་སེམས་ཡོངས་སུ་སྦྱོང་བ་ཡིན་ནོ། །འཇིག་རྟེན་ལ་གནོད་སེམས་དང་། རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་སྤངས་ཏེ་ཡིད་གཉིས་ལས་ རྒལ་བ་ཡིན། ཐེ་ཚོམ་དང་སོམ་ཉི་ལས་རྒལ་བ་ཡིན་ཞིང་དགེ་བའི་ཆོས་རྣམས་ལ་ཐེ་ཚོམ་ཡོངས་སུ་སྦྱོང་བ་ཡིན་ནོ། །རྒྱལ་པོ་ཆེན་པོ་དཔེར་ན་མི་ཞིག་གིས་སྐྱིན་པོ་ཞིག་བླངས་ནས་ཞིང་བླས་ཀྱི་མཐའ་རྣམས་ལ་བརྩོན་པར་བྱས་ཏེ། དེའི་ལས་ཀྱི་མཐའ་དེ་རྣམས་ཆུད་ མ་ཟོས་ཤིང་གྲུབ་ནས་དེས་དེ་ལས་བུ་ལོན་དེ་ཡང་གཞལ་ལ་དེ་ལ་ཆུང་མ་གསོ་བ་ཆོག་ཙམ་ཞིག་ཀྱང་བདོག་ནས་དེ་འདི་སྙམ་དུ་སེམས་ཏེ། བདག་གིས་སྐྱིན་པོ་བླངས་ནས་ལས་ཀྱི་མཐའ་རྣམས་ལ་བརྩོན་པར་བྱས་ཏེ། བདག་གི་ལས་ཀྱི་མཐའ་དེ་རྣམས་ཆུད་མ་ཟོས་ཤིང་གྲུབ་ནས་ བདག་གིས་དེ་ལ་བུ་ལོན་དེ་ཡང་གཞལ། བདག་ལ་ཆུང་མ་གསོ་བ་ཆོག་ཙམ་ཞིག་ཀྱང་བདོག་གོ་སྙམ་སྟེ། དེ་གཞི་དེས་བདེ་བར་གྱུར་ཡིད་བདེ་བར་གྱུར་པ་དང་། དཔེར་ན་མི་ན་བ་ནད་ཚབས་ཆེ་བ་སྡུག་བསྔལ་བ་ཞིག་ཡོད་ལ། དེ་ཟས་ཟོས་པ་ནི་ལུས་ལ་འཇུར་མི་བཏུབ། སྐོམ་

  1172. 276b

    འཐུངས་པ་ནི་ཁོང་དུ་གནོད་པར་གྱུར་པ་ལས་དེ་དུས་གཞན་ཞིག་ན་ནད་མེད་ཅིང་མཐུ་དང་ལྡན་པར་གྱུར་ནས་དེ་འདི་སྙམ་དུ་སེམས་ཏེ། བདག་སྔོན་ན་བ་ན་ནད་ཚབས་ཆེ་བ་སྡུག་བསྔལ་བར་གྱུར་པ་ན། བདག་གིས་ཁ་ཟས་ཟོས་པ་ནི་ལུས་ལ་འཇུར་མི་བཏུབ། སྐོམ་འཐུངས་པ་ནི་ཁོང་དུ་ གནོད་པར་གྱུར་པ་ལས་ད་ནི་བདག་ནད་མེད་ཅིང་མཐུ་དང་ལྡན་པས་བདེ་སྟེ་བདག་གིས་ཟས་ཟོས་པ་ནི་ལུས་ལ་འཇུར་བཏུབ། སྐོམ་འཐུངས་པ་ནི་ཁོང་དུ་གནོད་པར་མ་གྱུར་ཏོ་སྙམ་སྟེ། གཞི་དེས་དགའ་བ་དང་། རབ་ཏུ་དགའ་བར་གྱུར་པ་དང་། དཔེར་ན་མི་ཞིག་བྲན་དུ་གྱུར་ཏེ། མངག་ གཞུག་པ་གོ་རེ་ལོང་ལྟོ་ཁོ ལ་རང་དབང་མེད་པར་གྱུར་པ་ལས་དེ་དུས་གཞན་ཞིག་ན་བྲན་མི་བྱེད་པར་གྱུར་ཏེ་མངག་གཞུག་པ་མི་བྱེད། གོ་རེ་ལོང་མི་བྱེད། ལྟོ་ཁོལ་མི་བྱེད་དེ། རང་དབང་ཡོད་ནས་དེ་འདི་སྙམ་དུ་སེམས་ཏེ། བདག་སྔོན་བྲན་དུ་གྱུར་པ་ན་མངག་གཞུག་པ་དང་། གོ་རེ་ལོང་ དང་། ལྟོ་ཁོལ་དང་། རང་དབང་མེད་པ་ལས་ད་ནི་བདག་བྲན་མི་བྱེད་པས་མངག་གཞུག་མི་བྱེད། གོ་རེ་ལོང་མི་བྱེད། ལྟོ་ཁོལ་མི་བྱེད་དེ། རང་དབང་ཡོད་དོ་སྙམ་ནས། དེ་གཞི་དེས་བདེ་བར་གྱུར། ཡིད་བདེ་བར་གྱུར་པ་དང་། དཔེར་ན་མི་ཞིག་བཙོན་དུ་བཟུང་སྟེ། ཕྱིན་ཀ་ལོག་ཏུ་དམ་ དུ་བཅིངས་པ་ལས་དེ་དེ་ལས་ནོར་གཞལ་བ་མེད་པར་བདེ་བར་ལེགས་པར་ཐར་པར་གྱུར་པ་དང་། དེ་འདི་སྙམ་དུ་སེམས་ཏེ། བདག་སྔོན་བཙོན་དུ་བཟུང་ནས་ཕྱིན་ཀ་ལོག་ཏུ་དམ་དུ་བཅིངས་པར་གྱུར་པ་ལས་ད་ནི་དེ་ལས་ནོར་གཞལ་མི་དགོས་པར་བདེ་བར་ལེགས་པར་ཐར་ཏོ་སྙམ་ནས། དེ་གཞི་དེས་བདེ་བར་གྱུར། ཡིད་བདེ་བར་གྱུར་པ་དང་། དཔེར་ན་མི་ཞིག་སྐྲག་པར་གྱུར་པ་ལས་བདེ་བ་དང་། ལོ་ཉེས་པ་ལས་ལོ་ལེགས་པར་གྱུར་ནས། དེ་འདི་སྙམ་དུ་སེམས་ཏེ། བདག་སྐྲག་པ་ལས་བདེ་བར་གྱུར་ཅིང་། ལོ་ཉེས་པ་ལས་ལོ་ལེགས་པར་གྱུར་ཏོ་སྙམ་སྟེ། དེ་ གཞི་དེས་བདེ་བར་གྱུར། ཡིད་བདེ་བར་གྱུར་པ་དེ་བཞིན་དུ་རྒྱལ་པོ་ཆེན་པོ་དེས་བདག་ཉིད་ཀྱི་སྒྲིབ་པ་ལྔ་པོ་འདི་དག་སྐྱིན་པོ་ཇི་ལྟ་བ་དང་། ནད་ཇི་ལྟ་བ་དང་། བྲན་ཇི་ལྟ་བ་དང་། བཙོན་ཇི་ལྟ་བ་དང་། འཇིག་པ་ཇི་ལྟ་བ་བཞིན་དུ་སྤངས་པ་ཡང་དག་པར་རྗེས་སུ་མཐོང་ངོ་། དེ་སྒྲིབ་

  1173. 277a

    པ་ལྔ་པོ་སེམས་ཉེ་བའི་ཉོན་མོངས་པར་བྱེད་པ། ཤེས་རབ་ཉམ་ཆུང་བར་བྱེད་པ། མི་མཐུན་པའི་ཕྱོགས་དང་མཐུན་པ། མྱ་ངན་ལས་འདས་པར་མི་འགྱུར་བ་དག་སྤངས་ནས། དེ་འདོད་པ་རྣམས་ལས་དབེན། སྡིག་པ་མི་དགེ་བའི་ཆོས་རྣམས་ལས་ དབེན། རྟོག་པ་དང་བཅས། དཔྱོད་པ་དང་བཅས། དབེན་པ་ལས་སྐྱེས་པའི་དགའ་བ་དང་། བདེ་བ་ཅན་བསམ་གཏན་དང་པོ་རྫོགས་པར་བྱས་ནས་གནས་སོ། །དེས་ལུས་དེ་ཉིད་དབེན་པ་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་ བྱེད། ཡོངས་སུ་ཚིམ་པར་བྱེད་ཡོངས་སུ་ཁྱབ་པར་བྱེད་དེ་དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དཔེར་ན་ཁྲུས་མཁན་ནམ་ཁྲུས་མཁན་གྱི་སློབ་མ་མཁས་པ་ཞིག་ ཁ་ཕོར་རམ། གཞོང་བུ་འམ། ཉ་ཕྱིས་ཀྱི་ནང་དུ་འདག་ཆལ་གྱི་ཕྱེ་མ་ཞིབ་མོ་བླུགས་ཏེ་ཆུས་བཏབ་སྟེ་བདས་ན་འདག་ཆལ་གྱི་གོང་བུ་དེ་གཤེར་དང་ལྡན། གཤེར་གྱིས་ཞེན་ཏེ། གཤེར་གྱིས་ཕྱི་ནང་ཁྱབ་པས་འབོ་བར་མི་འགྱུར། འཛག་པར་མི་འགྱུར་བ་དེ་བཞིན་ དུ་དེས་ལུས་དེ་ཉིད་དབེན་པ་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དོ། །དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་ པར་མ་གྱུར་པ་ཅུང་ཟད་ཀྱང་མེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་ བུ་བསྟན་ལགས་སོ། །དེ་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དངས་ཏེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ནས་གནས་ཤིང་། དེས་ལུས་དེ་ཉིད་

  1174. 277b

    ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་པར་མ་གྱུར་ པ་ཅུང་ཟད་ཀྱང་མེད་དོ། །དཔེར་ན་རིའི་རྩེ་མོའི་ཕྱོགས་ཤིག་ན་བཀོད་མའི་མཚོ་བྲན་ཞིག་ཡོད་པར་གྱུར་ལ། དེར་ནི་ཤར་ཕྱོགས་ནས་ཀྱང་ཆུ་མི་འབབ་པར་གྱུར་ལ། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན་ཞིང་། བྱང་ཕྱོགས་ནས་ཀྱང་ཆུ་མི་འབབ་ལ། དེར་ལྷས་ཀྱང་དུས་དུས་ སུ་ཆར་གྱི་རྒྱུན་མི་འབེབས་ཏེ། གཞན་དུ་ན་བཀོད་མའི་མཚོ་བྲན་དེ་ཉིད་ནས་བཀོད་མའི་ཆུའམ། བཀོད་མའི་ཆུ་ཆེན་པོ་ལུད་ནས་བཀོད་མའི་མཚོ་བྲན་དེ་ཐམས་ཅད་ཆུ་བསིལ་བས་གང་བར་བྱེད། ཡོངས་སུ་གང་བར་བྱེད། ཤིན་ཏུ་གང་བར་བྱེད། ཡོངས་སུ་ཁྱབ་པར་བྱེད་དེ། བཀོད་མའི་མཚོ་བྲན་དེ་ཐམས་ཅད་འདི་ལྟ་སྟེ། ཆུ་བསིལ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དེ་བཞིན་དུ་དེས་ལུས་དེ་ཉིད་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་རྒྱས་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་ འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། དེ་དགའ་བའི་འདོད་ཆགས་དང་བྲལ་བར་བཏང་སྙོམས་ལ་གནས་ཤིང་དྲན་པ་དང་ཤེས་བཞིན་ཅན་ཡིན་ ཏེ། བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་གང་དེ་དྲན་པ་དང་ལྡན་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་རྫོགས་པར་བྱས་ནས་གནས་ཏེ། དེས་ལུས་དེ་ཉིད་དགའ་བ་མེད་པའི་བདེ་བས་མངོན་དུ་རླན་པར་

  1175. 278a

    བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དགའ་བ་མེད་པའི་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། དཔེར་ན་ཨུཏྤལ་འམ། པད་ མའམ། ཀུ་མུ་དའམ། པད་མ་དཀར་པོ་ཆུ་ལས་སྐྱེས་ཤིང་ཆུ་ནས་ཆེན་པོར་གྱུར་པ་རྩེས་བཏགས་ཤིང་འདུག་པ་དེ་དག་གི་རྩ་བ་ནས་རྩེ་མོའི་བར་གྱི་གསབ་གསེབ་འདི་ལྟ་སྟེ། ཆུ་བསིལ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་པ་དེ་བཞིན་དུ་དེས་ལུས་དེ་ཉིད་དགའ་བ་མེད་པའི་ བདེ་བས་མངོན་དུ་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དགའ་བ་མེད་པའི་བདེ་བས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་བདེ་བ་ཡང་སྤངས་ཏེ་སྔ་ནས་སྡུག་བསྔལ་ཡང་ སྤངས་ཤིང་ཡིད་བདེ་བ་དང་། ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་བ་རྫོགས་པར་བྱས་ནས་གནས་ཏེ། དེ་ལུས་དེ་ཉིད་ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་ ལྷག་པར་མོས་ཏེ། ཁྱབ་པར་བྱས་ནས་རྫོགས་པར་བྱས་ཏེ་གནས་པས་དེའི་ལུས་ཐམས་ཅད་ལ་འདི་ལྟ་སྟེ། ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་དོ། །དཔེར་ན་ཁྱིམ་བདག་གམ་ཁྱིམ་བདག་གི་བུས་ རས་ཁྲུ་བརྒྱད་པའམ། དགུ་པས་དེ་མགོ་དང་། ལག་པ་དང་རྐང་པ་གཡོགས་ནས། དེའི་མགོ་དང་ལག་པ་ནས་རྐང་པའི་བར་ལུས་ཐམས་ཅད་འདི་ལྟ་སྟེ། རས་གཙང་མ་ཡོངས་སུ་དག་པས་མ་ཡོག་པའམ། ཡོག་པར་མ་གྱུར་བ་ཅུང་ཟད་ཀྱང་མེད་དོ། །དེ་བཞིན་དུ་དེས་ལུས་དེ་

  1176. 278b

    ཉིད་ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་ལྷག་པར་མོས་ཏེ་ཁྱབ་པར་བྱས་ནས་རྫོགས་པར་བྱས་ཏེ་གནས་པས་དེའི་ལུས་ཐམས་ཅད་ལ་འདི་ལྟ་སྟེ། ཡོངས་སུ་དག་པ་དང་། རྣམ་པར་བྱང་བའི་སེམས་ཀྱིས་མ་ཁྱབ་པའམ། ཁྱབ་པར་མ་གྱུར་པ་ཅུང་ཟད་ཀྱང་མེད་ དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་ སོ། །རྒྱལ་པོ་ཆེན་པོ་གང་གི་ཚེ་འཕགས་པའི་ཉན་ཐོས་བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་ པ་རྫོགས་པར་བྱས་ཏེ་གནས་པ་དེའི་ཚེ་དེའི་སེམས་རྒོད་པ་མ་ཡིན་ཞུམ་པ་མ་ཡིན་ནོ། །རྒོད་པ་མེད་ཅིང་ཞུམ་པ་མེད་པས་མི་གཡོ་བར་གནས་པ་ཐོབ་བོ། །དཔེར་ན་ཁང་པ་རྩེག་མའམ། ཁང་པ་རྩེག་མའི་ཁྱམས་སུ་འབྲུ་མར་གྱི་མེ་མར་བུས་པ་དེའི་མེ་ལྕེ་རླུང་ནས་བྱ་དང་མི་ དང་མི་མ་ཡིན་པའི་བར་གྱིས་མ་བསྐྱོད་ཅིང་མ་བསྒུལ་བ་དེའི་མེ་ལྕེ་དེ་རྒོད་པ་མ་ཡིན་ཞུམ་པ་མ་ཡིན་ནོ། །རྒོད་པ་མེད་ཅིང་ཞུམ་པ་མེད་པར་གནས་པས་མི་གཡོ་བར་འབར་བ་དེ་བཞིན་དུ། གང་གི་ཚེ་འཕགས་པའི་ཉན་ཐོས་བདེ་བ་ཡང་སྤངས་ཏེ། སྔ་ནས་སྡུག་བསྔལ་ཡང་སྤངས་ ཤིང་ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པ་བསམ་གཏན་བཞི་པ་རྫོགས་པར་བྱས་ཏེ་གནས་པ་དེའི་ཚེ་དེའི་སེམས་དེ་རྒོད་པ་མ་ཡིན། ཞུམ་པ་མ་ཡིན་ནོ། །རྒོད་པ་མེད་ཅིང་ཞུམ་པ་མེད་ པས་མི་གཡོ་བར་གནས་པ་ཐོབ་ནས་དེ་འདི་སྙམ་དུ་སེམས་ཏེ། བདག་གི་ལུས་ཀྱི་གཟུགས་འདི་ནི་རགས་པ་འབྱུང་བ་ཆེན་པོ་བཞིའི་རྒྱུ་ལས་བྱུང་བ་ཡིན་ཏེ། འདི་ལ་བདག་གི་རྣམ་པར་ཤེས་པ་རྟེན་ཅིང་འདི་ལ་གནས་ཏེ་འདི་ལ་ཁྱབ་པར་གནས་ཀྱིས། མ་ལ་བདག་གིས་ལུས་འདི་

  1177. 279a

    ལས་ཡིད་བསྐྱོད་དེ་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་ཞིག་མངོན་པར་སྤྲུལ་ལོ་སྙམ་ནས། དེ་ལུས་དེ་ལས་ཡིད་བསྐྱོད་དེ་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་ པ་མངོན་པར་སྤྲུལ་པར་བྱེད་དོ། །དཔེར་ན་ནོར་བུ་བཻཌཱུརྱ་བཟང་པོ་རིགས་དང་ལྡན་པ་གསལ་བ་དང་། དང་བ་དང་། དྲི་མ་མེད་པ་ཚོན་སྐུད་སྣ་ལྔ་པ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་ལ་བརྒྱུས་པ་དེ་སྐྱེས་བུ་མིག་དང་ལྡན་པས་ མཐོང་ན་འདི་ནི་སྐུད་པ་ཡིན་ནོ། །འདི་ནི་ནོར་བུ་ཡིན་ཏེ། སྐུད་པ་འདི་ལ་ནོར་བུ་བརྒྱུས་སོ་ཞེས་བྱ་བར་ཤེས་པ་དེ་བཞིན་དུ་དེ་ལུས་དེ་ལས་ཡིད་བསྐྱོད་དེ། ལུས་གཞན་ཞིག་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་མངོན་པར་སྤྲུལ་པར་བྱེད་དོ། །དཔེར་ ན་མི་ཞིག་གིས་རྩྭ་མུན་ཛ་ལས་ཐུར་མ་ཕྱུང་པ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་རྩྭ་མུན་ཛ་ཡིན་ནོ། །འདི་ནི་ཐུར་མ་ཡིན་ཏེ། མུན་ཛ་ལས་ཐུར་མ་ཕྱུང་བ་ཡིན་ནོ་ཞེས་ཤེས་པ་དེ་བཞིན་དུ་དེ་ལུས་དེ་ལས་ཡིད་བསྐྱོད་ནས་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་ བ་མ་ཡིན་ཞིང་དམན་པ་མ་ཡིན་པ་མངོན་པར་སྒྲུབ་པར་བྱེད་དོ། །དཔེར་ན་མི་ཞིག་གིས་ཟ་མ་ཏོག་ནས་སྦྲུལ་ཕྱུང་བ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་ཟ་མ་ཏོག་ཡིན་ནོ། །འདི་ནི་སྦྲུལ་ཡིན་ཏེ། ཟ་མ་ཏོག་ནས་སྦྲུལ་ཕྱུང་བ་ཡིན་ནོ་ཞེས་ཤེས་པ་དེ་བཞིན་དུ་དེ་ལུས་དེ་ལས་ ཡིད་བསྐྱོད་ནས་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་མངོན་པར་སྤྲུལ་པར་བྱེད་དོ། །དཔེར་ན་མི་ཞིག་གིས་རལ་གྲི་ཤུབས་ནས་ཕྱུང་བ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་ཤུབས་ཡིན་ནོ། །འདི་ནི་རལ་གྲི་ཡིན་ཏེ། རལ་གྲི་ ཤུབས་ནས་ཕྱུང་བ་ཡིན་ནོ་ཞེས་ཤེས་པ་དེ་བཞིན་དུ། དེ་ལུས་དེ་ལས་ཡིད་བསྐྱོད་ནས་ལུས་གཞན་ཡིད་ལས་བྱུང་བའི་གཟུགས་དབང་པོ་མ་ཚང་བ་མ་ཡིན་ཞིང་དམན་པ་མ་ཡིན་པ་མངོན་པར་སྤྲུལ་པར་བྱེད་དོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་

  1178. 279b

    བ་ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་ སུ་མྱོང་བར་བྱེད་དེ། འདི་ལྟ་སྟེ། གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། །རི་ལ་ཡང་ཐད་ཀར་འགྲོ། །ར་ བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་བྱེའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། ། ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་བྱེད་ དོ། །དཔེར་ན་གསེར་མགར་རམ་གསེར་མགར་གྱི་སློབ་མ་མཁས་པ་ཞིག་གིས་གསེར་ཤིན་ཏུ་ལས་སུ་རུང་བར་བྱས་པར་རིག་ནས་རྡུངས་སུ་བྱ་བའི་རྣམ་པ་ཕོར་བུ་འམ། མགུལ་རྒྱན་ནམ། ལག་རྒྱན་ནམ། རྐང་རྒྱན་ནམ། སོར་གདུབ་རྒྱའམ། གསེར་གྱི་ཕྲེང་བ་གང་དང་གང་ བྱེད་འདོད་པ་དེ་དང་དེ་མྱུར་བ་མྱུར་བར་བྱེད་པ་དེ་བཞིན་དུ། དེ་དེ་ལྟར་མཉམ་པར་བཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་དེ། འདི་ལྟ་སྟེ་གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་

  1179. 280a

    གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། །རི་ལ་ཡང་ཐད་ཀར་འགྲོ། །ར་བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་བྱེའུ་ ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ ཆེ་བ་ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་བྱེད་དོ། །དཔེར་ན་རྫ་མཁན་ནམ་རྫ་མཁན་གྱི་སློབ་མ་མཁས་པ་ཞིག་གིས་འཇིམ་པའི་གོང་བུ་ཤིན་ཏུ་ལས་སུ་རུང་བར་བྱས་པར་རིག་ནས་སྣོད་ཀྱི་རྣམ་པ་གང་དང་གང་ དུ་བསྒྲུབ་པར་འདོད་པ་དེ་དང་དེ་ཁོ་ན་མྱུར་བར་མྱུར་བར་སྒྲུབ་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་བཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ ཐོབ་ནས་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་དོ། །འདི་ལྟ་སྟེ་གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་ བར་གྱུར་ཅིང་མི་སྣང་བར་གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། རི་ལ་ཡང་ཐད་ཀར་འགྲོ། །ར་བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་འབྱུང་བ་དང་། བྱེའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་

  1180. 280b

    ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་བྱེད་དོ། །དཔེར་ན་བ་སོ་མཁན་ནམ་བ་སོ་མཁན་གྱི་སློབ་མ་མཁས་པ་ཞིག་གིས་བསོ་ཤིན་ཏུ་ལས་སུ་རུང་བར་བྱས་པར་རིག་ནས་གཟུགས་ཀྱི་རྣམ་པ་གང་དང་གང་དུ་བསྒྲུབ་ པར་འདོད་པའི་གཟུགས་ཀྱི་རྣམ་པ་དེ་དང་དེ་མྱུར་བ་མྱུར་བར་སྒྲུབ་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་ གཡོ་བ་ཐོབ་ནས་རྫུ་འཕྲུལ་གྱི་ཡུལ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེ་རྫུ་འཕྲུལ་གྱི་ཡུལ་རྣམ་པ་དུ་མ་ཉམས་སུ་མྱོང་བར་བྱེད་དེ། འདི་ལྟ་སྟེ་གཅིག་ཏུ་གྱུར་ནས་མང་པོར་གྱུར་པ་དང་། མང་པོར་གྱུར་ནས་གཅིག་ཏུ་གྱུར་པ་དང་། སྣང་བར་གྱུར་ཅིང་མི་སྣང་བར་གྱུར་པའི་ཤེས་པ་མཐོང་བ་ཉམས་སུ་མྱོང་བར་བྱེད་ཅིང་། རྩིག་པ་ལ་ཡང་ཐད་ཀར་འགྲོ། །རི་ལ་ཡང་ཐད་ཀར་འགྲོ། །ར་བ་ལ་ཡང་ཐད་ཀར་འགྲོ་སྟེ། ལུས་ཀྱིས་ཐོགས་པ་མེད་པར་འགྲོ་བ་ནི་དཔེར་ན་ནམ་མཁའ་ལ་བྱ་བ་བཞིན་ནོ། །ས་ལ་ཡང་སྟེང་དུ་ འབྱུང་བ་དང་བྱེའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་རྒྱུན་ཕྱོགས་ལས་བཟློག་པར་འགྲོ་སྟེ། དཔེར་ན་ས་ལ་བྱ་བ་བཞིན་ནོ། །ནམ་མཁའ་ལ་ཡང་སྐྱིལ་མོ་ཀྲུང་གིས་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ལ་ཡང་ལག་པས་འཛིན་ཅིང་ཀུན་དུ་ཉུག་པར་བྱེད་ལ། ཚངས་པའི་འཇིག་རྟེན་གྱི་བར་དུ་ལུས་ཀྱིས་དབང་སྒྱུར་བར་ཡང་བྱེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པ་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ།

  1181. 281a

    དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ལྷའི་རྣ་བ་ཤེས་པའི་མངོན་པར་ཤེས་པ་མངོན་སུམ་དུ་བྱ་བ་ལ་སེམས་མངོན་དུ་གཏོད་པར་བྱེད་ཅིང་། དེ་ལྷའི་རྣ་བ་རྣམ་པར་དག་པ་མིའི་ལས་འདས་ནས་མི་རྣམས་ཀྱིའམ། མི་མ་ཡིན་པ་ རྣམས་ཀྱིའམ། གང་དག་རིང་པོའམ། གང་དག་ཉེ་བའི་སྒྲ་གཉི་ག་ཐོས་པར་བྱེད་དོ། །དཔེར་ན་མི་དུང་འབུད་པ་ཞིག་རི་བྲག་ཆེན་པོའི་ཁར་འཛེགས་ནས་མཚན་ནམ་ཕྱེད་ཀྱི་དུས་སུ་དུང་བུས་ན་དེའི་སྒྲ་དེས་ཕྱོགས་ཐ་དད་པ་ཐོགས་པ་མེད་པར་ཁྱབ་པ་དེ་བཞིན་དུ། དེ་ལྟར་མཉམ་པར་གཞག་ པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ལྷའི་རྣ་བ་ཤེས་པའི་མངོན་པར་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་ གཏོད་པར་བྱེད་ཅིང་། དེ་ལྷའི་རྣ་བ་རྣམ་པར་དག་པ་མིའི་ལས་འདས་ནས་མི་རྣམས་ཀྱིའམ། མི་མ་ཡིན་པ་རྣམས་ཀྱིའམ། གང་དག་རིང་པོའམ། གང་དག་ཉེ་བའི་སྒྲ་གཉི་ག་ཐོས་པར་བྱེད་དོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་ སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་ མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་དེ་སེམས་ཀྱི་རྣམ་གྲངས་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེའི་ཡིད་ཀྱིས་སེམས་ཅན་གཞན་རྣམས་ཀྱི་ དང་། གང་ཟག་གཞན་རྣམས་ཀྱི་རྣམ་པར་རྟོག་པ་དང་། རྣམ་པར་དཔྱོད་པའི་ཡིད་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་

  1182. 281b

    འདོད་ཆགས་དང་བྲལ་བའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། བསྡུས་པ་དང་། རྣམ་པར་གཡེངས་པ་དང་། ཞུམ་པ་དང་། རབ་ཏུ་འཛིན་པ་དང་། རྒོད་པ་དང་། རྒོད་པ་མ་ཡིན་པ་དང་། ཉེ་བར་ཞི་བ་དང་། ཉེ་བར་ཞི་བ་མ་ཡིན་པ་དང་། མཉམ་པར་གཞག་པ་དང་། མཉམ་པར་གཞག་པ་མ་ཡིན་པ་དང་། བསྒོམས་པ་དང་། བསྒོམས་པ་མ་ཡིན་པ་དང་། རྣམ་པར་གྲོལ་བ་མ་ཡིན་པའི་སེམས་ལ་རྣམ་པར་གྲོལ་བ་མ་ཡིན་པའི་སེམས་ཡིན་ནོ་ ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དཔེར་ན་སྐྱེས་བུ་མིག་དང་ལྡན་པས་མེ་ལོང་གི་དཀྱིལ་འཁོར་ཤིན་ཏུ་ཡོངས་སུ་དག་པ་བླངས་ནས་རང་གི་བཞིན་གྱི་ མཚན་མ་ལ་རྟོག་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་སེམས་ཀྱི་རྣམ་གྲངས་ཤེས་པ་མངོན་ སུམ་དུ་བྱ་བའི་མངོན་པར་ཤེས་པ་ལ་སེམས་མངོན་པར་གཏོད་པར་བྱེད་ཅིང་། དེའི་ཡིད་ཀྱིས་སེམས་ཅན་གཞན་རྣམས་ཀྱི་དང་། གང་ཟག་གཞན་རྣམས་ཀྱི་རྣམ་པར་རྟོག་པ་དང་རྣམ་པར་དཔྱོད་པའི་ཡིད་ཇི་ལྟ་བ་བཞིན་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ལ་འདོད་ཆགས་དང་ བཅས་པའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་ མུག་དང་བྲལ་བ་དང་། བསྡུས་པ་དང་། རྣམ་པར་གཡེངས་པ་དང་། ཞུམ་པ་དང་། རབ་ཏུ་འཛིན་པ་དང་། རྒོད་པ་དང་། རྒོད་པ་མ་ཡིན་པ་དང་། ཉེ་བར་ཞི་བ་དང་། ཉེ་བར་ཞི་བ་མ་ཡིན་པ་དང་། མཉམ་པར་གཞག་པ་དང་། མཉམ་པར་གཞག་པ་མ་ཡིན་པ་དང་། བསྒོམས་པ་དང་།

  1183. 282a

    བསྒོམས་པ་མ་ཡིན་པ་དང་། རྣམ་པར་གྲོལ་བ་མ་ཡིན་པའི་སེམས་ལ་རྣམ་པར་གྲོལ་བ་མ་ཡིན་པའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །ཤིན་ཏུ་རྣམ་པར་གྲོལ་བའི་སེམས་ལ་ཤིན་ཏུ་རྣམ་པར་གྲོལ་བའི་སེམས་ཡིན་ནོ་ཞེས་ཡང་དག་པ་ཇི་ལྟ་བ་ བཞིན་རབ་ཏུ་ཤེས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་ སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱ་བའི་མངོན་པར་ ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེ་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། འདི་ལྟ་སྟེ་སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་ བཅུ་དང་། ལྔ་བཅུ་དང་། སྐྱེ་བ་བརྒྱ་དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བརྒྱ་ཕྲག་དུ་མ་དང་། སྐྱེ་བ་སྟོང་ཕྲག་དུ་མ་དང་། སྐྱེ་བ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་ པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་འཆགས་པའི་བསྐལ་པ་དུ་མ་རྗེས་སུ་དྲན་ཏེ། གང་དུ་བདག་སེམས་ཅན་འདི་དག་གི་ནང་དུ་སྐྱེས་པ་ན་མིང་ནི་འདི་ཞེས་བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཁ་ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་ སྡུག་བསྔལ་ནི་འདི་ལྟ་བུ་ཞིག་མྱོང་། ཡུན་ནི་འདི་སྲིད་ཅིག་གནས་གནས། ཚེ་ནི་འདི་ཙམ་ཞིག་ཐུབ་བོ། བདག་གནས་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་ག་གེ་མོ་ཞིག་ཏུ་སྐྱེས་སོ། །དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་རྣམ་པ་དང་བཅས།

  1184. 282b

    ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ།། །།འདུལ་བ་གཞི། བམ་པོ་བརྒྱ་རྩ་བརྒྱད་པ། དཔེར་ན་མི་ཞིག་གྲོང་ནས་གྲོང་དུ་སོང་ལ་དེ་ནས་ཀྱང་གྲོང་གཞན་དུ་སོང་སྟེ། དེ་ནས་ཀྱང་འདིར་འོངས་ནས་དེ་འདི་སྙམ་དུ་སེམས་ཏེ་བདག་གིས་གྲོང་ ཆེ་གེ་མོ་ནས་གྲོང་ཆེ་གེ་མོར་སོན་ཏོ། །དེ་ནས་ཀྱང་གྲོང་ཆེ་གེ་མོར་རོ། །དེ་ནས་ཀྱང་འདིར་འོངས་སོ་སྙམ་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་སྔོན་གྱི་གནས་རྗེས་སུ་དྲན་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེས་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། འདི་ལྟ་སྟེ། སྐྱེ་བ་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱ་དང་། སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བརྒྱ་ཕྲག་དུ་མ་དང་། སྐྱེ་བ་སྟོང་ཕྲག་དུ་མ་དང་། སྐྱེ་བ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་ དང་། འཆགས་པའི་བསྐལ་པ་དང་། འཇིག་པ་དང་འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་འཆགས་པའི་བསྐལ་པ་དུ་མ་རྗེས་སུ་དྲན་ཏེ། གང་དུ་བདག་སེམས་ཅན་འདི་དག་གི་ནང་དུ་སྐྱེས་པ་ན་མིང་ནི་འདི་ཞེས་ བྱ། རིགས་ནི་འདི་ཞེས་བྱ། རུས་ནི་འདི་ཞེས་བྱ། ཁ་ཟས་ནི་འདི་ལྟ་བུ་ཞིག་ཟ་ཟ། བདེ་བ་དང་། སྡུག་བསྔལ་ནི་འདི་ལྟ་བུ་ཞིག་མྱོང་། ཡུན་ནི་འདི་སྲིད་ཅིག་གནས་གནས། ཚེ་ནི་འདི་ཙམ་ཞིག་ཐུབ་བོ། །བདག་གནས་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས། དེ་ནས་ཀྱང་ ཤི་འཕོས་ནས་ག་གེ་མོ་ཞིག་ཏུ་སྐྱེས། དེ་ནས་ཀྱང་ཤི་འཕོས་ནས་འདིར་སྐྱེས་སོ་ཞེས་རྣམ་པ་དང་བཅས། ཡུལ་ཕྱོགས་དང་བཅས་པར་སྔོན་གྱི་གནས་རྣམ་པ་དུ་མ་རྗེས་སུ་དྲན་ནོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་

  1185. 283a

    ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་ པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་འཆི་འཕོ་དང་། སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེའི་ལྷའི་མིག་ རྣམ་པར་དག་པ་མིའི་ལས་འདས་པས་སེམས་ཅན་རྣམས་ཀྱི་འཆི་འཕོ་རྣམས་དང་། སྐྱེ་བ་རྣམས་དང་། ཁ་དོག་བཟང་པོ་རྣམས་དང་། ཁ་དོག་ངན་པ་རྣམས་དང་། དམན་པ་རྣམས་དང་། གྱ་ནོམ་པ་རྣམས་དང་། བདེ་འགྲོ་དང་། ངན་འགྲོར་འགྲོ་བ་རྣམས་ཀྱང་མཐོང་ ཞིང་སེམས་ཅན་ལས་ཇི་ལྟ་བ་བཞིན་ཉེ་བར་འགྲོ་བ་དག་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཏེ། སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན། ངག་དང་ཡིད་ཀྱི་ཉེས་པར་སྤྱོད་པ་དང་ལྡན་ཞིང་འཕགས་པ་རྣམས་ལ་སྐུར་པ་འདེབས་པ་དང་། ལོག་པར་ལྟ་བ་དང་། ལོག་ པར་ལྟ་བའི་ཆོས་ཀྱི་ལས་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བའི་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་དང་ལྡན། ངག་དང་ཡིད་ཀྱི་ལེགས་པར་སྤྱོད་པ་ དང་ལྡན་ཞིང་། འཕགས་པ་རྣམས་ལ་སྐུར་པ་མི་འདེབས་པ་དང་ཡང་དག་པར་ལྟ་བ་དང་ཡང་དག་པར་ལྟ་བའི་ཆོས་ཀྱི་ལས་བླངས་པའི་རྒྱུས། རྒྱུ་དེ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་རོ་ཞེས་བྱ་བར་ཤེས་སོ། །དཔེར་ན་སྐྱེས་བུ་ མིག་དང་ལྡན་པ་ཞིག་ལམ་པོ་ཆེའི་བཞི་མདོར་འདུག་ནས་སྐྱེ་བོའི་ཚོགས་ཆེན་པོ་འོང་བ་དང་། འགྲོ་བ་དང་། འགྲེང་བ་དང་། འདུག་པ་དང་། སྤྱོད་པ་སྣ་ཚོགས་ལ་རྟོག་པར་བྱེད་པ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་

  1186. 283b

    མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ་ལས་སུ་རུང་བ་ལ་གནས་པ། མི་གཡོ་བ་ཐོབ་ནས་འཆི་འཕོ་དང་། སྐྱེ་བ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེའི་ལྷའི་མིག་རྣམ་པར་དག་པ་མིའི་ ལས་འདས་པས་སེམས་ཅན་རྣམས་ཀྱི་འཆི་འཕོ་རྣམས་དང་། སྐྱེ་བ་རྣམས་དང་། ཁ་དོག་བཟང་པོ་རྣམས་དང་། ཁ་དོག་ངན་པ་རྣམས་དང་། དམན་པ་རྣམས་དང་། གྱ་ནོམ་པ་དང་། བདེ་འགྲོ་དང་། ངན་འགྲོར་འགྲོ་བ་རྣམས་ཀྱང་མཐོང་ཞིང་སེམས་ཅན་ལས་ཇི་ལྟ་བ་བཞིན་ཉེ་ བར་འགྲོ་བ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། སེམས་ཅན་འདི་དག་ནི་ལུས་ཀྱི་ཉེས་པར་སྤྱོད་པ་དང་ལྡན། ངག་དང་ཡིད་ཀྱི་ཉེས་པར་སྤྱོད་པ་དང་ལྡན་ཞིང་འཕགས་པ་རྣམས་ལ་སྐུར་པ་འདེབས་པ་དང་། ལོག་པར་ལྟ་བ་དང་ལོག་པར་ལྟ་བའི་ཆོས་ཀྱི་ལས་བླངས་པའི་ རྒྱུས་རྒྱུ་དེ་དང་རྐྱེན་དེས་ལུས་ཞིག་ནས། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །སེམས་ཅན་འདི་དག་ནི་ལུས་ཀྱི་ལེགས་པར་སྤྱོད་པ་དང་ལྡན། ངག་དང་ཡིད་ཀྱི་ལེགས་པར་སྤྱོད་པ་དང་ལྡན་ཞིང་འཕགས་པ་རྣམས་ལ་སྐུར་ བ་མི་འདེབས་པ་དང་། ཡང་དག་པར་ལྟ་བ་དང་། ཡང་དག་པར་ལྟ་བའི་ཆོས་ཀྱི་ལས་བླངས་པའི་རྒྱུས་རྒྱུ་དེ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་རོ་ཞེས་བྱ་བར་ཤེས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མད་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ཟག་པ་ཟད་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེས་འདི་ནི་སྡུག་བསྔལ་འཕགས་

  1187. 284a

    པའི་བདེན་པ་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བ་དང་། འདི་ནི་སྡུག་བསྔལ་འགོག་པ་དང་། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཡིན་ནོ་ཞེས་ཡང་དག་པ་ཇི་ལྟ་བ་ བཞིན་རབ་ཏུ་ཤེས་སོ། །དེས་དེ་ལྟར་ཤེས་ཤིང་དེ་ལྟར་མཐོང་ནས་འདོད་པའི་ཟག་པ་ལས་སེམས་རྣམ་པར་གྲོལ་བར་འགྱུར། སྲིད་པའི་ཟག་པ་དང་། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ། །རྣམ་པར་གྲོལ་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་ པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་རྣམ་པར་གྲོལ་བའི་ཡེ་ཤེས་ཉིད་མཐོང་བར་འགྱུར་རོ། །དཔེར་ན་གྲོང་རྡལ་ལམ་གྲོང་ཁྱེར་དང་ཧ་ཅང་ཡང་མི་རིང་བ་ན་མཚོ་བྲན་གཏིང་ཟབ་པ། གསལ་བ་དང་བ། རྣམ་པར་དང་བ་ཞིག་ཡོད་པ་དེར་སྐྱེས་བུ་ མིག་དང་ལྡན་པ་ཞིག་འགྲམ་དུ་འདུག་ནས་གསེག་མའམ། གྱོ་མོའམ། ཉ་འམ་རུས་སྦལ་ལམ། ཉ་ཕྱིས་སམ། དུང་རྣམས་མཐོང་བ་དེ་བཞིན་དུ། དེ་དེ་ལྟར་མཉམ་པར་གཞག་པའི་སེམས་ཡོངས་སུ་དག་པ། རྣམ་པར་བྱང་བ། ཉོན་མོངས་པ་མེད་པ། ཉེ་བའི་ཉོན་མོངས་ པ་དང་བྲལ་བ། དྲང་པོར་གྱུར་པ། ལས་སུ་རུང་བ་ལ་གནས་པ། མི་གཡོ་བ་ཐོབ་ནས་ཟག་པ་ཟད་པ་ཤེས་པ་མངོན་སུམ་དུ་བྱ་བའི་མངོན་པར་ཤེས་པ་ལ་སེམས་མངོན་དུ་གཏོད་པར་བྱེད་ཅིང་། དེས་འདི་ནི་སྡུག་བསྔལ་འཕགས་པའི་བདེན་པ་ཡིན་ནོ་ཞེས་ཡང་དག་པ་ཇི་ལྟ་བ་བཞིན་ རབ་ཏུ་ཤེས་སོ། །འདི་ནི་སྡུག་བསྔལ་ཀུན་འབྱུང་བ་དང་། འདི་ནི་སྡུག་བསྔལ་འགོག་པ་དང་། འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་ཡིན་ནོ་ཞེས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །དེས་དེ་ལྟར་ཤེས་ཤིང་དེ་ལྟར་མཐོང་ནས་འདོད་པའི་ ཟག་པ་ལས་སེམས་རྣམ་པར་གྲོལ་བར་འགྱུར། སྲིད་པའི་ཟག་པ་དང་། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ། །རྣམ་པར་གྲོལ་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་

  1188. 284b

    རྣམ་པར་གྲོལ་བའི་ཡེ་ཤེས་ཉིད་མཐོང་བར་འགྱུར་རོ། །རྒྱལ་པོ་ཆེན་པོ་ཇི་སྙམ་དུ་སེམས། དེ་ལྟ་ཡིན་ན་ངས་ཡང་དག་པར་མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་པ་མ་ཡིན་ནམ། བཙུན་པ་མང་ལགས་ཏེ། དེ་ལྟ་ལགས་ན་བཅོམ་ལྡན་འདས་ཀྱིས་ཡང་དག་པར་ མཐོང་བའི་དགེ་སྦྱོང་གི་ཚུལ་གྱི་འབྲས་བུ་བསྟན་ལགས་སོ། །དེ་སྐད་ཅེས་བཀའ་སྩལ་པ་དང་། ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་མཆི་མ་བླགས་ཏེ་དུས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་གོས་ཀྱི་མཐའ་མས་མཆི་མ་ཕྱིས་ནས་བཅོམ་ལྡན་ འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནོངས་ལགས་སོ། །བདེ་བར་གཤེགས་པ་ནོངས་ལགས་ཏེ། འདི་ལྟར་བདག་སྡིག་པའི་གྲོགས་པོའི་གྲོགས་ཅན། སྡིག་པའི་གྲོགས་པོའི་དབང་དུ་མཆིས་པ། སྡིག་ པའི་གྲོགས་པོས་ཟིན་པས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་བཀུམ་པས་བྱིས་པ་ཇི་ལྟ་བ་དང་། བླུན་པོ་ཇི་ལྟ་བ་དང་། མི་གསལ་བ་ཇི་ལྟ་བ་དང་། མི་མཁས་པ་ཇི་ལྟ་བ་ལགས་ཏེ། བཙུན་པ་བདག་ནོངས་པར་འཚལ་ཞིང་ནོངས་པར་མཐོང་ན་ཐུགས་བརྩེ་བ་ཉེ་བར་བཟུང་སྟེ་ ནོངས་པ་ལ་ནོངས་པར་གཟུང་དུ་གསོལ། རྒྱལ་པོ་ཆེན་པོ་ཉེས་པ་ལ་ཉེས་པར་ཁྱོད་ཀྱིས་ཁོང་དུ་ཆུད་པ་ནི་བདེན་ཏེ། འདི་ལྟར་ཁྱོད་སྡིག་པའི་གྲོགས་པོའི་གྲོགས་ཅན། སྡིག་པའི་གྲོགས་པོའི་དབང་དུ་སོང་བ། སྡིག་པའི་གྲོགས་པོས་ཟིན་པས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་ བསད་པ་ནི་བྱིས་པ་ཇི་ལྟ་བ་དང་། བླུན་པོ་ཇི་ལྟ་བ་དང་། མི་གསལ་བ་ཇི་ལྟ་བ་དང་། མི་མཁས་པ་ཇི་ལྟ་བ་ཡིན་ཏེ། རྒྱལ་པོ་ཆེན་པོ་ཁྱོད་ཀྱིས་འདི་ལྟར་ཉེས་པ་ཤེས་ཤིང་མཐོང་ལ་དེ་མཐོང་ནས་ཀྱང་བཤགས་ནས། ཕྱིས་སྡོམ་པར་བྱེད་ན་དགེ་བའི་ཆོས་རྣམས་མི་ཉམས་ཤིང་ འཕེལ་བ་ཉིད་དུ་འདོད་པར་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་གང་འགའ་ཞིག་ཉེས་པ་ཤེས་ཤིང་ཉེས་པ་མཐོང་ལ་དེ་མཐོང་ནས་ཀྱང་བཤགས་ནས་ཕྱིས་སྡོམ་པར་བྱེད་ན་དེའི་དགེ་བའི་ཆོས་རྣམས་མི་ཉམས་ཤིང་འཕེལ་བ་ཉིད་དུ་འདོད་དོ། །རྒྱལ་པོ་ཆེན་པོ་དེ་བཞིན་

  1189. 285a

    དུ་ཁྱོད་ཀྱིས་འདི་ལྟར་ཉེས་པ་ཤེས་ཤིང་ཉེས་པ་མཐོང་ལ་དེ་མཐོང་ནས་ཀྱང་བཤགས་ནས་ཕྱིས་སྡོམ་པར་བྱེད་ན་ཁྱོད་ཀྱི་དགེ་བའི་ཆོས་རྣམས་མི་ཉམས་ཤིང་འཕེལ་བ་ཉིད་དུ་འདོད་པར་བྱའོ། །དེ་ནས་བཅོམ་ལྡན་འདས་ལ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་ སྐྱེས་དགྲས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་། ། དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། བཅོམ་ལྡན་ འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་རྨ་བྱུང་ཞིང་ ཉམས་ཏེ། སྡིག་པའི་གྲོགས་པོའི་གྲོགས་ཅན། སྡིག་པའི་གྲོགས་པོའི་དབང་དུ་སོང་བ། སྡིག་པའི་གྲོགས་པོས་ཟིན་པ་དེས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་ཆོས་ལ་གནས་པ་རྒྱལ་པོ་ཆེན་པོ་བསད་དོ། །དགེ་སློང་དག་གལ་ཏེ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་ དགྲས་ཕ་ཆོས་དང་ལྡན་པ་ཆོས་ཀྱི་རྒྱལ་པོ་ཆོས་ལ་གནས་པ་རྒྱལ་པོ་ཆེན་པོ་བསད་པར་མ་གྱུར་ན། སྟན་འདི་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་མངོན་དུ་བྱས་པར་འགྱུར་བ་ གང་ཡིན་པའི་གནས་འདི་ཡོད་དོ། །དགེ་སློང་དག་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ནི་དེ་ལྟར་རྨ་བྱུང་ཞིང་དེ་ལྟར་ཉམས་པར་གྱུར་ཏོ། །དགེ་སློང་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། །གང་སྡོང་དུམ་ཚིག་པ་ལ་ཡང་ངན་སེམས་མི་བསྐྱེད་ན། རྣམ་

  1190. 285b

    པར་ཤེས་པ་དང་བཅས་པའི་ལུས་ལ་ལྟ་སྨོས་ཀྱང་ཅི་དགོས་ཀྱིས། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་དེ་ཉིད་ཀྱི་ནུབ་མོ་ནས་གཙང་ཞིང་བསོད་པའི་བཟའ་བ་དང་བཅའ་བ་དག་ལྟ་གོན་བྱས་ནས་ནང་པར་ སྔར་ལངས་ཏེ་གདན་བཤམས། ནོར་བུའི་ཆུ་སྣོད་བཞག་ནས། སྤྱན་འདྲེན་གྱིས་བཅོམ་ལྡན་འདས་ལ་གདུགས་ཚོད་གསོལ་པ། བཙུན་པ་བཅོམ་ལྡན་འདས་གདུགས་ཚོད་ལགས་ན། ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས་བཅོམ་ལྡན་འདས་སྔ་དྲོ་ན་ བཟའ་ཤམ་ཐབས་མནབས་ཆོས་གོས་དང་ལྷུང་བཟེད་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲའི་བཀད་ས་གང་ན་བ་དེར་གཤེགས་ཏེ་བྱོན་ནས། དགེ་སློང་ གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། གཙང་ཞིང་བསོད་པའི་བཟའ་བ་དང་། བཅའ་བ་དག་ རང་གི་ལག་ནས་སྟོབས་ཤིང་ཚིམ་པར་བྱེད་དེ། རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲའི་སྦྱིན་པ་ལ་རྗེས་སུ་ཡི་རང་བས་རྗེས་སུ་ཡི་རང་བར་མཛད་དེ། སྦྱིན་སྲེག་མཆོད་སྦྱིན་རྣམས་ཀྱི་མཆོག །སྡེབ་སྦྱོར་ མཆོག་ནི་ཉི་མའི་ལྷ། །མི་ཡི་མཆོག་ནི་རྒྱལ་པོ་སྟེ། །རྒྱ་མཚོ་ཆུ་བོ་རྣམས་ཀྱི་མཆོག །ཟླ་བ་རྒྱུ་སྐར་རྣམས་ཀྱི་གཙོ། །ཉི་མ་སྣང་བྱེད་རྣམས་ཀྱི་གཙོ། །སྟེང་དང་འོག་དང་ཐད་ཀར་ཡང་། །འགྲོ་བའི་འགྲོ་བ་ཇི་སྙེད་པ། །ལྷ་དང་བཅས་པའི་འཇིག་རྟེན་ན། །སྨྲ་བའི་

  1191. 286a

    མཆོག་ནི་རྫོགས་སངས་རྒྱས། །དེ་ནས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་ མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས། གདན་ ལས་བཞེངས་ཏེ་གཤེགས་སོ། །གང་གི་ཚེ་བཅོམ་ལྡན་འདས་ཀྱིས་ལུས་འཕགས་མའི་བུ་མ་ག་དྷཱའི་རྒྱལ་པོ་མ་སྐྱེས་དགྲ་གཞི་མེད་པའི་དད་པ་ལ་བཞག་པ་དེའི་ཚེ་གལ་ཏེ་ཁང་བཟངས་ཀྱི་སྟེང་ངམ། གླང་པོ་ཆེ་ལ་ཞོན་པ་ལས། བཅོམ་ལྡན་འདས་མཐོང་ ན་ཡང་དེའི་ཚེ་བདག་ཉིད་མཆོད་པར་བྱེད་དོ། །ཇི་ཙམ་དུས་གཞན་ཞིག་ན་གླང་པོ་ཆེ་ལ་ཞོན་པས་བཅོམ་ལྡན་འདས་མཐོང་ནས་དེས་བདག་ཉིད་མཆོངས་པ་དང་། བཅོམ་ལྡན་འདས་ཀྱི་རྫུ་འཕྲུལ་གྱིས་བླངས་སོ། །དེས་ཞོ་ཤས་འཚོ་བ་དང་། ནང་མི་རྣམས་ ལ་བསྒོ་བ། ཤེས་ལྡན་དག་ཤེས་པར་གྱིས་ཤིག་དེང་ཕན་ཆད་ང་བཅོམ་ལྡན་འདས་དང་བཅོམ་ལྡན་འདས་ཀྱི་ཉན་ཐོས་ལ་སྐྱབས་སུ་སོང་གིས་དེ་ལྟ་བས་ན་དེང་ཕན་ཆད་བཅོམ་ལྡན་འདས་ཀྱི་ཉན་ཐོས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་ བསྙེན་མ་རྣམས་ལ་སྒོ་མ་དགག་ཤིག །ལྷ་སྦྱིན་དང་། ལྷ་སྦྱིན་གྱི་ཉན་ཐོས་རྣམས་ལ་ནི་སྒོ་ཁོག་ཤིག །ཇི་ཙམ་དུས་གཞན་ཞིག་ན། ལྷ་སྦྱིན་རྒྱལ་པོ་མ་སྐྱེས་དགྲའི་ཁྱིམ་དུ་འཇུག་པར་བརྩམས་པ་དང་། སྒོ་བས་སྨྲས་པ། ནང་དུ་མ་འཇུག་པར་ སྡོད་ཅིག །ཅིའི་ཕྱིར་ལྷས་བཀའ་སྩལ་པ། དེང་ཕན་ཆད་ང་བཅོམ་ལྡན་འདས་དང་། བཅོམ་ལྡན་འདས་ཀྱི་ཉན་ཐོས་རྣམས་ལ་སྐྱབས་སུ་སོང་གིས། དེ་ལྟ་བས་ན་དེང་ཕན་ཆད་བཅོམ་ལྡན་འདས་ཀྱི་ཉན་ཐོས་དགེ་སློང་ངམ། དགེ་སློང་མའམ། དགེ་བསྙེན་

  1192. 286b

    མ་རྣམས་ལ་སྒོ་མ་དགག་ཤིག །ལྷ་སྦྱིན་དང་། ལྷ་སྦྱིན་གྱི་ཉན་ཐོས་རྣམས་ལ་ནི་སྒོ་ཁོག་ཤིག་ཅེས་བྱུང་ངོ་། །དེ་ཡང་སྒོ་ན་སྟོད་ཅིང་འདུག་པ་ལས་དགེ་སློང་མ་ཨུཏྤ་ལའི་མདོག་བསོད་སྙོམས་བླངས་ཏེ་རྒྱལ་པོའི་ཕོ་བྲང་ནས་ཕྱིར་བྱུང་བ་དང་། ལྷ་སྦྱིན་འདི་སྙམ་དུ་སེམས་ ཏེ། འདི་ནི་དགེ་སྦྱོང་མགོ་རེག་མོ་འདིའི་ལས་ཡིན་ཏེ། འདིས་རྒྱལ་པོ་མ་སྐྱེས་དགྲ་ནང་མི་དང་། གཞོན་ནུ་དང་། བློན་པོ་དང་བཅས་པ་དང་། བདག་ཏུ་དབྱེན་བྱས་པས་དེས་ན་བདག་འདི་འདྲ་བའི་གནས་སྐབས་སུ་གྱུར་ཏོ་སྙམ་དུ་བསམས་ནས། ཨུཏྤ་ལའི་ མདོག་ལ་འདི་སྐད་ཅེས་སྨྲས་སོ། །ཁྱོད་ལ་ཁོ་བོས་ཉེས་པ་ཅི་བྱས་ན། གང་གི་ཕྱིར་ཁྱོད་ཀྱིས་ཁོ་བོ་བསོད་སྙོམས་ཀྱི་ཁྱིམ་ལས་རིང་དུ་བྱས་ཞེས་དེས་དེ་བསད་པར་བརྩམས་ཏེ་དེ་ལ་བསྣུན་པ་ན། དེ་སྙིང་རྗེ་རྗེ་སྐད་དུ་ཚིག་རེ་རེ་ནས་དལ་གྱིས་སྨྲས་པ། འཕགས་ པ་རྣམས་མི་བཟོད་དེ། ཅི་བདག་རེ་ཞིག་ཁྱོད་བཅོམ་ལྡན་འདས་ཀྱི་མཆེད་ཤཱཀྱའི་རིགས་ལས་རབ་ཏུ་བྱུང་བ་ལ་དེ་ལྟར་བགྱིད་དམ། བདག་གིས་དེ་ལྟར་མ་བགྱིས་ཀྱིས་བཟོད་པ་མཛོད་ཅིག་ཅེས་དེ་སྐད་སྨྲས་ཀྱང་། ལྷ་སྦྱིན་གྱིས་དེའི་མགོ་བོར་ཁུ་ཚུར་གྱིས་བསྣུན་ ཏོ། །དེ་གནད་ཀྱི་ཚོར་བས་ཉེན་ཏེ་སྲོག་གི་འདུ་བྱེད་བྱིན་གྱིས་བརླབས་ཏེ་ཚེའི་འདུ་བྱེད་བཏང་ནས་བརྩོན་འགྲུས་ལ་གནས་ཏེ་དགེ་སློང་མའི་དབྱར་ཁང་དུ་སོང་ངོ་། །དགེ་སློང་མ་རྣམས་ཀྱིས་དེ་ལྟ་བུ་དེ་མཐོང་ནས་སྨྲས་པ། འཕགས་མ་ཅི་ནོངས། དེས་སྨྲས་ པ། ཕུ་ནུ་མོ་དག་འདུས་བྱས་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བ་ཡིན་པས་ཁྱེད་ཅག་དགེ་བའི་ཆོས་རྣམས་ལ་བག་ཡོད་པར་གྱིས་ཤིག །ལྷ་སྦྱིན་གྱིས་མཚམས་མེད་པ་གསུམ་པ་བྱས་ཀྱིས་ ཡོངས་སུ་མྱ་ངན་ལས་འདའ་བར་བྱའོ་ཞེས་དེ་ནས་དེས་དགེ་སློང་མའི་དགེ་འདུན་གྱི་མདུན་དུ་ཆོ་འཕྲུལ་རྣམ་པ་སྣ་ཚོགས་བྱས་ཏེ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དགེ་སློང་རྣམས་ཐེ་ཚོམ་སྐྱེས་

  1193. 287a

    ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གྱིས་དགེ་སློང་མ་ཨུཏྤ་ལའི་མདོག་སྙིང་རྗེ་རྗེ་སྐད་དུ་སྨྲེས་བཞིན་དུ་ཁུ་ཚུར་གྱིས་བསྣུན་ཏེ་བཀུམ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ་ཇི་ལྟར་འདས་པའི་དུས་ན་ཡང་འདིས་འདི་སྙིང་རྗེ་རྗེ་སྐད་དུ་སྨྲེ་སྔགས་འདོན་བཞིན་དུ་བསད་དེ་ཤ་ཟོས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་ཏེ། དེའི་ལུག་རྫིས་ལུག་གི་ཁྱུ་ དེ་བསྐྱང་བའི་ཕྱིར་གྲོང་ཁྱེར་ནས་ཕྱི་རོལ་དུ་བྱུང་ངོ་། །དེ་ནས་བསྐྱངས་ནས་ཉི་མ་ནུབ་པའི་དུས་ཀྱི་ཚེ་རི་འོར་དུ་འདའ་བར་བརྩམས་པ་དང་། དེ་ན་ལུག་མ་རྒན་ཞིག་ཕྱི་ནས་འབྲང་ཞིང་སོང་བ་དེ་སྤྱང་ཀིས་བཟུང་བ་དང་སྨྲས་པ། ཞང་ཞང་ཅིག་ཁྱོད་བདེའམ། །ཞང་ ཞང་རེ་ལྟ་བདེར་གྱུར་ཏམ། །ཞང་ཞང་ཉག་གཅིག་དགོན་པ་ན། །ཇི་ག་བདེ་བ་བལྟར་ལགས་སམ། །དེས་ཀྱང་སྨྲས་པ། ཁོ་བོའི་མཇུག་མ་བརྫིས་ནས་སུ། །མཇུག་མའི་སྤུ་ཡང་བྱི་ནས་ནི། །ཞང་པོ་ཞེས་པའི་ཚིག་སྨྲས་པ། །ལུག་ཁྱོད་ཐར་ བར་རེའམ་ཅི། །ལུག་མ་མོས་ཡང་སྨྲས་པ། ཁྱོད་ཀྱི་མཇུག་མ་ཕོངས་ན་ཡོད། །བདག་གི་མདུན་ནས་འོངས་གྱུར་ན། །ཇི་ལྟ་བུ་ཡི་ཐབས་ཤིག་གིས། །བདག་གིས་མཇུག་མ་བརྫིས་པར་འགྱུར། །སྤྱང་ཀིས་ཡང་སྨྲས་པ། གླིང་བཞི་པ་འདི་རྒྱ་ མཚོར་བཅས། །རི་བོར་བཅས་པ་ཐམས་ཅད་ན། །བདག་གི་མཇུག་མ་ཡོད་ཡིན་ན། །ཁྱོད་ནི་གང་ནས་འོངས་པ་ཞིག །ལུག་མ་མོས་སྨྲས་པ། བཟང་པོ་ཁྱོད་ཀྱི་མཇུག་མ་ནི། །ཐམས་ཅད་ན་ནི་མཆིས་སོ་ཞེས། །བདག་གིས་གཉེན་ལས་སྔོན་ཐོས་ ནས། །ནམ་མཁའ་ལས་ནི་མཆིས་ལགས་སོ། །སྤྱང་ཀིས་སྨྲས་པ། མ་རྒན་ཁྱོད་ཉིད་དེ་རིང་ནི། །ནམ་མཁའ་ལས་ནི་འོངས་ནས་སུ། །བདག་གི་བཟའ་སྐལ་གང་ཡིན་པའི། །བདག་གི་རི་དགས་ཚོགས་དེ་བསྐྲོགས། །དེ་ནི་དེ་སྐད་སྨྲ་བཞིན་དུ། །

  1194. 287b

    སྡིག་པའི་ལས་ཅན་གྱིས་མཆོངས་ནས། །ལུག་གི་མགོ་བོ་བཅད་ནས་ནི། །བསད་དེ་ཤ་ཡང་ཟོས་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྤྱང་ཀི་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་ལུག་མ་རྒན་གང་ཡིན་ པ་དེ་ནི་དགེ་སློང་མ་ཨུཏྤ་ལའི་མདོག་འདི་ཉིད་ཡིན་ཏེ། དེ་ན་ཡང་འདི་སྙིང་རྗེ་རྗེ་སྐད་དུ་སྨྲེ་སྔགས་འདོན་བཞིན་དུ་བསད་དོ། །ད་ལྟར་ཡང་འདི་སྙིང་རྗེ་རྗེ་སྐད་དུ་སྨྲེ་སྔགས་འདོན་བཞིན་དུ་བསད་དོ། །དེ་ནས་ལྷ་སྦྱིན་འདི་སྙམ་དུ་སེམས་ཏེ། བདག་གིས་བཅོམ་ ལྡན་འདས་ལ་ཕ་རོལ་གནོན་པ་མང་དུ་བྱས་ཤིང་མཚམས་མེད་པ་ཡང་གསུམ་བྱས་ཏེ། བཅོམ་ལྡན་འདས་ལ་རྡོ་འཕངས་ནས་ཁྲག་ཕྱུང་བ་འདི་ནི་མཚམས་མེད་པ་དང་པོ་ཡིན་ནོ། །དགེ་འདུན་ཕྱེ་བ་ནི་གཉིས་པ་ཡིན་ནོ། །ཨུཏྤ་ལའི་མདོག་བསད་པ་འདི་ནི་ གསུམ་པ་ཡིན་ཏེ། ཐམས་ཅད་མཁྱེན་པ་ཉིད་ཀྱང་མ་ཐོབ་ལ། གཞན་ཡང་དགོས་པ་ཅུང་ཟད་ཀྱང་མ་གྲུབ་སྟེ། ད་ནི་གཞན་བྱར་མེད་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ་སྙམ་དུ་བསམས་ནས། ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་ འདུག་གོ། །ཇི་ཙམ་ན་རྫོགས་བྱེད་དེའི་དྲུང་དུ་ཕྱིན་ནས་སྨྲས་པ། ལྷ་སྦྱིན་ཅིའི་ཕྱིར་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག །དེས་སྨྲས་པ། གང་གིས་ན་བདག་ཞེ་སྡང་གི་དབང་དུ་སོང་བས་བཅོམ་ལྡན་འདས་ལ་ཕ་རོལ་གནོན་པ་མང་དུ་བྱས་ ཤིང་མཚམས་མེད་པའི་ལས་གསུམ་བྱས་པས་མནར་མེད་པའི་སེམས་ཅན་དམྱལ་བ་ཆེན་པོར་ཡུན་རིང་དུ་གནས་པར་འགྱུར་ན། བདག་ཅིའི་ཕྱིར་སེམས་ཁོང་དུ་ཆུད་ཅིང་མི་འདུག །དེས་སྨྲས་པ། བདག་གིས་ཤཱཀྱ་རྣམས་ཀྱི་ནང་ན་ཁྱོད་འབའ་ཞིག་མཁས་པ་ ཡིན་ནོ་སྙམ་དུ་ཤེས་ན་ཁྱོད་ཀྱང་བླུན་པ་ལྟ། གང་གིས་ན་ཁྱོད་འདི་ལྟར་སེམས་ཁོང་དུ་ཆུད་ཅིང་འདུག་པའི་འཇིག་རྟེན་ཕ་རོལ་ག་ལ་ཡོད། གལ་ཏེ་འཇིག་རྟེན་ཕ་རོལ་ཡོད་ན་ཁྱོད་ཀྱིས་ལས་འདི་འདྲ་བ་བྱས་པས་ཁྱོད་ཀྱི་ཕྱིར་ཁོ་བོ་ཡང་སེམས་ཁོང་དུ་ཆུད་ཅིང་འདུག་

  1195. 288a

    གོ། །དེ་ཡིད་ཆེས་པར་བྱ་བའི་ཕྱིར་དེས་དེའི་མདུན་དུ་རིལ་བ་བཅག་ནས། རེ་ཞིག་ལྷ་དང་བཅས་པའི་འཇིག་རྟེན་གྱིས་འདི་སླར་འབྱོར་པར་བྱོས་ཤིག །ཡེ་བག་མ་ཚ་ཤིག །འདི་ལ་བྱེད་པ་པོ་འམ། བྱེད་དུ་འཇུག་པ་པོ་ནི་འགའ་ཡང་ མེད་དོ། །དེ་ལྟ་མོད་ཀྱི་སོང་ལ་སེར་སྐྱའི་གཞིར་སོན་ནས་རྒྱལ་སྲིད་བྱོས་ཤིག་དང་བདག་གིས་ཁྱོད་ཀྱི་བློན་པོའི་མཆོག་བགྱིའོ། །དེ་ན་ལྷ་སྦྱིན་འཕགས་པ་ལ་སྐུར་བ་འདེབས་པའི་ལོག་པའི་ལྟ་བ་ཐོབ་སྟེ། དེས་ན་ཐམས་ཅད་ཀྱི་ཐམས་ཅད་དུ་དགེ་བའི་རྩ་བ་ རྣམས་ཆད་པར་གྱུར་ཏོ། །དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལྷ་སྦྱིན་གྱིས་དགེ་བའི་རྩ་བ་རྣམས་བཅད་དེ། དགེ་སློང་དག་ངས་ཇི་སྲིད་ལྷ་སྦྱིན་ལ་དཀར་པོའི་ཆོས་གཟིགས་པ་དེའི་བར་དུ་ངས་འདི་ལྟར་ལྷ་སྦྱིན་ངན་ སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་བའོ་ཞེས་ལྷ་སྦྱིན་ལུང་མ་བསྟན་ཏོ། །དཔེར་ན་གྲོང་ཁྱེར་རམ། གྲོང་རྡལ་དང་ཧ་ཅང་ཡང་མི་རིང་བ་ཞིག་ན་ཕྱི་ས་ཁུང་ཟབས་སུ་མི་གང་ལྷག་ཙམ་ཞིག་ཡོད་པ་དེར་མི་འགའ་ཞིག་མགོ་དང་། ལག་པ་དང་། རྐང་པ་དང་བཅས་པར་ནུབ་པར་གྱུར་པ་དེ་ལ་མི་ཡུན་རིང་པོར་དོན་དུ་འདོད་པ་ཕན་པར་འདོད་པ། བདེ་བར་འདོད་པ། གྲུབ་པ་དང་བདེ་བ་ལ་རེག་པར་འདོད་པ་འགའ་ཞིག་སོང་སྟེ། དེས་ཕྱིས་ཁུང་དེའི་ཉེ་འཁོར་ཀུན་ཏུ་བསྐོར་ཞིང་སོང་ སྟེ། མི་དེའི་ཕྱི་སས་མ་རེག་པའི་ཕྱོགས་འགའ་ཞིག་རྙེད་ན་འདི་དེ་ནས་བཟུང་སྟེ་དབྱུང་བར་བྱའོ་སྙམ་ནས། དེས་དེའི་ཉེ་འཁོར་ཀུན་ཏུ་བསྐོར་ཏེ་སོང་ན་མི་དེ་ལ་དེས་བཟུང་སྟེ་དབྱུང་བའི་ཕྱོགས་ཆུང་ངུ་ན་ལག་མཐིལ་ཙམ་ཡང་མི་གཙང་བས་མ་རེག་པ་ཅུང་ཟད་ ཀྱང་མེད་པ་དེ་བཞིན་དུ། དགེ་སློང་དག་ངས་ཇི་སྲིད་ལྷ་སྦྱིན་ལ་དཀར་པོའི་ཆོས་གང་ན་སྐྲའི་རྩེ་མོའི་ཆ་ཤས་ཙམ་ཡང་གཟིགས་པ་དེའི་བར་དུ་ནི་ངས་འདི་ལྟར་ལྷ་སྦྱིན་ངན་སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་བའོ་ཞེས་ལྷ་སྦྱིན་ལུང་མ་

  1196. 288b

    བསྟན་གྱི། ངས་གང་ནས་ལྷ་སྦྱིན་ལ་དཀར་པོའི་ཆོས་ཆུང་ངུ་ན་སྐྲའི་རྩེ་མོའི་ཆ་ཤས་ཙམ་ཡང་མ་གཟིགས་པ་དེ་ནས། ངས་འདི་ལྟར་ལྷ་སྦྱིན་ངན་སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་བའོ་ཞེས་ལྷ་སྦྱིན་ལུང་བསྟན་ཏོ། །དགེ་སློང་ དག་ལྷ་སྦྱིན་སྡིག་པ་མི་དགེ་བའི་ཆོས་གསུམ་དང་ལྡན་པས་ངན་སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་ངོ་། །དགེ་སློང་དག་གསུམ་གང་ཞེ་ན། ཐོག་མ་ཉིད་ནས་ལྷ་སྦྱིན་སྡིག་པ་འདོད་པར་གྱུར་ཅིང་སྡིག་པ་འདོད་པའི་དབང་དུ་གྱུར་པ་སྟེ། གང་ལྷ་སྦྱིན་ཐོག་མ་ཉིད་ནས་སྡིག་པ་འདོད་པར་གྱུར་ཅིང་སྡིག་པ་འདོད་པའི་དབང་དུ་གྱུར་པ་དམ་པ་མ་ཡིན་པའི་ཆོས་དང་པོ་འདི་དང་ལྡན་པས། ལྷ་སྦྱིན་ངན་སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་ངོ་། །དགེ་སློང་དག་གཞན་ཡང་ལྷ་ སྦྱིན་སྡིག་པའི་བཤེས་གཉེན་ཅན། སྡིག་པའི་གྲོགས་ཅན། སྡིག་པ་དང་སྡོང་བ་སྟེ། གང་ལྷ་སྦྱིན་ཐོག་མ་ཉིད་ནས་སྡིག་པའི་བཤེས་གཉེན་ཅན། སྡིག་པའི་གྲོགས་ཅན། སྡིག་པ་དང་སྡོང་བ་དམ་པ་མ་ཡིན་པའི་ཆོས་གཉིས་པ་འདི་དང་ལྡན་པས་ལྷ་ སྦྱིན་ངན་སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་ངོ་། །གཞན་ཡང་ལྷ་སྦྱིན་ཁྱད་པར་ངན་ངོན་ཅུང་ཟད་ཙམ་ཞིག་རྟོགས་ནས་གོང་དུ་བྱ་བ་ཡོད་བཞིན་དུ་སྒྱིད་ལུག་པར་གྱུར་ཏེ། གང་ལྷ་སྦྱིན་གྱིས་ཁྱད་པར་ངན་ངོན་ཅུང་ཟད་རྟོགས་ནས་གོང་དུ་བྱ་བ་ཡོད་ བཞིན་དུ་བར་དུ་སྒྱིད་ལུག་པ་དམ་པ་མ་ཡིན་པའི་ཆོས་གསུམ་པ་འདི་དང་ལྡན་པས་ལྷ་སྦྱིན་ངན་སོང་སེམས་ཅན་དམྱལ་བར་བསྐལ་པར་གནས་པས་གསོར་མི་རུང་ངོ་ཞེས་སྨྲའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བདེ་བར་གཤེགས་པས་དེ་ སྐད་ཅེས་གསུངས་ཏེ། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །འཇིག་རྟེན་འདི་ན་འགའ་ཡང་ནི། །ནམ་དུའང་སྡིག་འདོད་སྐྱེ་མ་གྱུར། །དེས་ན་སྡིག་པ་འདོད་རྣམས་ཀྱི། །འགྲོ་བ་གང་ཡིན་ཤེས་པར་གྱིས། །ལྷ་སྦྱིན་མཁས་པར་ཀུན་

  1197. 289a

    གྲགས་ཤིང་། །བསྒོམས་པ་ཡི་ནི་བདག་ཉིད་དུ། །བཀུར་ཅིང་དཔལ་གྱིས་ཤིན་ཏུ་ནི། །མཛེས་པར་རྣམ་པར་གྲགས་ཡིན་ན། །དེ་ནི་བག་མེད་དང་ལྡན་འདིར། །དེ་བཞིན་གཤེགས་ལ་ཁྱད་བསད་པས། །རྫོགས་སངས་རྒྱས་ནི་ རབ་མཁྱེན་པས། །བསྐལ་པར་གནས་པར་དེ་ལུང་བསྟན། །འཇུངས་ཤིང་སྡིག་པའི་ཀུན་རྟོག་ཅན། །ལོག་པར་ལྟ་བ་མ་གུས་པ། །སྒོ་བཞི་པར་ནི་ཤེས་པ་ཡི། །མནར་མེད་དམྱལ་བ་དེ་ཐོབ་བོ། །གནོད་པ་མེད་ཅིང་སྡིག་པའི་ལས། །མི་མཛད་ པ་ལ་གང་འཁུ་བ། །འཇིག་རྟེན་འདི་དང་ཕ་རོལ་དུའང་། །སྡིག་པ་དེ་ཉིད་རེག་པར་འགྱུར། །གང་ཞིག་དུག་གི་བུམ་པ་ཡིས། །རྒྱ་མཚོ་མ་རུང་བྱེད་འདོད་པ། །ཆུ་གཏེར་འཇིགས་རུང་ཆེན་པོ་དེ། །དེ་ཡིས་དེ་སུན་མི་ཕྱིན་ལྟར། །གང་ཞིག་དེ་ བཞིན་གཤེགས་པ་ལ། །ཁ་ཟེར་སུན་འབྱིན་དེ་དང་འདྲ། །ཡང་དག་གཟིགས་པ་ཞི་བའི་ཐུགས། །གང་ལ་ཕྱར་ཀས་མི་རྫི་བ། །དེ་འདྲ་བ་ནི་བཤེས་གཉེན་བྱ། །དེ་ནི་མཁས་པས་བསྟེན་བྱ་སྟེ། །དེ་ལྟ་བུ་ལ་བསྟེན་བྱས་ན། །ལེགས་པར་འགྱུར་ ཞིང་སྡིག་མི་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དེ་ནས་ལྷ་སྦྱིན་འཕགས་པ་ལ་སྐུར་པ་འདེབས་པའི་ལོག་པའི་ལྟ་བ་དང་ལྡན་ཏེ། དགེ་བའི་རྩ་བ་ཆད་པ་འཇིག་རྟེན་ཕ་རོལ་མེད་དོ་སྙམ་པའི་ངེས་པ་ཐོབ་ནས་ཉན་ཐོས་རྣམས་ལ་གཞི་ལྔས་ཆོས་སྟོན་པར་བྱེད་དེ། ཤེས་ལྡན་དག་དགེ་སྦྱོང་གཽ་ཏ་མ་ནི་ཞོ་དང་འོ་མ་ལ་ལོངས་སྤྱོད་དེ། དེང་ཕྱིན་ཆད་བདག་ཅག་གིས་ལོངས་སྤྱད་པར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་བེའུ་རྣམས་ལ་གནོད་པར་འགྱུར་བས་སོ། །དགེ་སྦྱོང་གཽ་ཏ་མ་ནི་ཤ་ལ་ལོངས་སྤྱོད་དེ། བདག་ཅག་གིས་ལོངས་སྤྱད་པར་མི་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་སྲོག་ཆགས་དག་གསོད་པར་འགྱུར་བས་སོ། །དགེ་སྦྱོང་གཽ་ཏ་མ་ནི་ལན་

  1198. 289b

    ཚྭ་ལ་ལོངས་སྤྱོད་དེ། བདག་ཅག་གིས་ལོངས་སྤྱད་པར་མི་བྱ་སྟེ། རྡུལ་ཁྲོད་ནས་བྱུང་བའི་ཕྱིར་རོ། །དགེ་སྦྱོང་གཽ་ཏ་མ་ནི་རས་ཁ་ཚར་བཅད་པ་དག་གྱོན་ཏེ། བདག་ཅག་གིས་རས་ཁ་ཚར་རིང་པོ་དག་བགོའོ། །དེ་ཅིའི་ཕྱིར་ཞེ་ན། གཞི་དེས་རས་ཐག་པ་རྣམས་ ཀྱི་སྐྱེས་བུའི་རྩལ་དོན་མེད་པར་འགྱུར་བས་སོ། །དགེ་སྦྱོང་གཽ་ཏ་མ་ནི་དགོན་པ་ན་གནས་ཏེ། བདག་ཅག་གྲོང་དུ་གནས་པར་བྱའོ། །དེ་ཅིའི་ཕྱིར་ཞེ་ན། གཞི་དེ་ལས་མི་རྣམས་ཀྱི་སྦྱིན་པའི་ཆོས་ལ་ལོངས་མ་སྤྱད་པར་འགྱུར་བས་སོ། །ཞེས་འཆད་པར་ བྱེད་དོ།། །།བར་སྡོམ་ལ། འོ་མ་ཤ་དང་ལན་ཚྭ་དང་། །གོས་དང་དགོན་པར་གནས་པའོ། །ཇི་ཙམ་ན་བཅོམ་ལྡན་འདས་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་པ་དང་ལྷ་སྦྱིན་གྱིས་བསམས་པ། བདག་གིས་དགེ་སྦྱོང་གཽ་ཏ་མ་ལ་གནོད་པ་ནི་ མང་པོ་ཞིག་བྱས་ན་དགེ་སྦྱོང་གཽ་ཏ་མ་བསད་པར་མ་ནུས་ཀྱིས། སོང་ལ་དེའི་ཆུང་མ་དབྲོག་པར་བྱའོ་སྙམ་ནས་དེ་སེར་སྐྱའི་གཞིར་སོང་སྟེ། དེས་གྲགས་འཛིན་མ་ལ་དགེ་སྦྱོང་གཽ་ཏ་མ་རབ་ཏུ་བྱུང་ནས་ཁྱོད་ཀྱི་ཕྱིར་བདག་འོངས་ཀྱིས། བདག་དང་ཁྱོད་དུ་ལྷན་ཅིག་ དགའ་མགུར་སྤྱད་པར་བྱའོ་ཞེས་སྤྲིང་བ། །དེས་ས་འཚོ་མ་ལ་བཟླས་པ་དང་། དེས་སྨྲས་པ། ཁྱོད་ཀྱིས་འདི་སྐད་ཅེས་བྱང་ཆུབ་སེམས་དཔའ་ནི་བདག་ཅག་གི་ལག་པ་ནས་འཛིན་པར་སྤྲོ་ན། གལ་ཏེ་ཁྱོད་ཀྱང་སྤྲོ་ན་ཚུར་ཤོག་ཤིག་ཅེས་སྤྲིང་ཤིག །དེས་ དེ་ལ་སྤྲིང་ནས་དེ་ངོ་ཚ་མེད་པས་ཕོ་བྲང་དུ་ཞུགས་སོ། །དེས་ཐེམ་སྐས་ལ་འཛེགས་ནས་ས་འཚོ་མ་མཐོང་བ་དང་། དེས་འཛུམ་པས་ཐལ་མོ་སྦྱར་བར་བརྩམས་ཤིང་དེ་ནི་ཚན་པོ་ཆེའི་སྟོབས་ཅན་ཡིན་པས་དེའི་ལག་པ་གཡོན་པས་དེའི་སོར་མོ་བསྡམས་པས་ ཁྲག་འཛག་པར་གྱུར་ཏོ། །དེ་ནས་དེས་བྱང་ཆུབ་སེམས་དཔའི་རོལ་པའི་རྫིང་དུ་བོར་རོ། །དེ་བོར་བ་ན་ཁུས་བཏབ་པ་ཤཱཀྱ་རྣམས་ཀྱིས་ཐོས་ནས། ལྷ་སྦྱིན་བྱང་ཆུབ་སེམས་དཔའི་ཕོ་བྲང་དུ་ཞུགས་ནས་བཙུན་མོ་རྣམས་འཕྲོག་གོ་ཞེས་བརྒྱུགས་པ་ན། དེ་

  1199. 290a

    རྣམས་དེ་རོལ་པའི་རྫིང་དུ་བོར་བ་མཐོང་ནས་དེ་རྣམས་ཀྱིས་གྲོས་བྱ་བར་བརྩམས་པ། འདི་བསད་དམ། ཡང་བསམས་པ། ཤི་ཟིན་པ་འདི་བསད་དེ་ཅི་རུང་། བཅོམ་ལྡན་འདས་ཀྱིས་འདི་ལྟར་ལྷ་སྦྱིན་ངན་སོང་སེམས་ཅན་དམྱལ་བར་ བསྐལ་པར་གནས་ཏེ་གསོར་མི་རུང་བའོ་ཞེས་འདི་ལུང་བསྟན་པ་ཉིད་དོ་ཞེས་དེ་རྣམས་ཀྱིས་དེ་བསྐྲད་པ་དང་གཏོར་ཁུང་ནས་བྱུང་སྟེ་བྲོས་པ་ལས་དེའི་གོས་རལ་ཏེ་དུམ་བུ་གཉིས་སུ་གྱུར་ཏོ། །དེས་བསམས་པ། འདི་ནི་ལེགས་ཀྱིས། བདག་གི་ཉན་ཐོས་རྣམས་ ལ་བསྐོན་ནོ་སྙམ་མོ། །དེས་དུས་གཞན་ཞིག་ན་ཤཱཀྱ་རྣམས་བསྡུས་ཏེ་སྨྲས་པ། བདག་རྒྱལ་སྲིད་ལ་ཞོག་ཤིག །དེ་རྣམས་ཀྱིས་སྨྲས་པ། བྱང་ཆུབ་སེམས་དཔའི་བཙུན་མོ་ཡོད་ཀྱིས་དེ་རེ་ཞིག་བདག་གིར་བྱོས་ལ། དེ་ནས་ཕྱིས་རྒྱལ་སྲིད་ གྱིས་ཤིག་ཅེས་དེ་སྐད་སྨྲས་པ་དང་། ལྷ་སྦྱིན་ཤཱཀྱ་རྣམས་ཀྱི་དོགས་པ་དང་བྲལ་ནས་ཁང་བཟངས་ཀྱི་སྟེང་དུ་འཛེགས་ཏེ་གྲགས་འཛིན་མའི་དྲུང་དུ་སོང་སྟེ་ཐལ་མོ་སྦྱར་ཏེ་སྨྲས་པ། ཁྱོད་ཀྱིས་བཀའ་སྩལ་པ་ཉན་གྱིས་ཐུགས་བག་མཛོད་ཅིག་དང་། བདག་གི་ བཙུན་མོའི་དམ་པར་བགྱིས་ལ་སེར་སྐྱའི་གཞི་ལ་རྒྱལ་སྲིད་བགྱིའོ། །གྲགས་འཛིན་མ་ནི་རབ་གནོན་ཆེན་པོའི་སྟོབས་དང་ལྡན་པ་ཡིན་པས་དེ་ཁྲི་བཟང་པོ་ལས་ལངས་ནས་ལག་པ་གཉིས་ནས་བཟུང་སྟེ། པུས་མོས་བརྡབས་ནས་དེའི་ལག་པ་གཉིས་ནས་ཁྲག་ འཛག་པར་གྱུར་ཏོ། །དེ་སྡུག་བསྔལ་ཚོར་བས་ཉེན་པ་དང་གྲགས་འཛིན་མས་སྨྲས་པ། ཁྱོད་ནི་ངོ་ཚ་མེད་ཅིང་བླུན་པོ་ཡིན་ཏེ། ཁྱོད་ཁོ་མོས་ལག་པ་ནས་བཟུང་བ་གང་ཡིན་པའང་བཟོད་པར་མི་ནུས་པར་ཁོ་མོ་འདོད་དམ། ཁོ་མོའི་ཁྱིམ་ཐབ་ཏུ་ནི་འཁོར་ལོས་སྒྱུར་ བའམ། བྱང་ཆུབ་སེམས་དཔའ་འགྱུར་རོ་ཞེས་དེས་སྤྱོས་ནས་དེ་ནས་ཕོ་བྲང་ནང་ནས་བྱུང་བ་དང་། ཤཱཀྱ་རྣམས་ཀྱིས་སྨྲས་པ། སོང་ལ་བཅོམ་ལྡན་འདས་ལ་བཟོད་པ་གསོལ་ཅིག །གལ་ཏེ་ཁྱོད་ལ་བཅོམ་ལྡན་འདས་ཀྱིས་བཟོད་པ་གནང་ན་དེའི་འོག་ཏུ་

  1200. 290b

    རྒྱལ་སྲིད་བྱས་སོ་ཅོག །དེས་བེའུ་ཡི་ལྟེ་བ་ལྟ་བུ་ཞེས་བྱ་བའི་དུག་མཆོག་ཏུ་རྣོ་བས་སེན་མོའི་གསེབ་བཀང་སྟེ་བཅོམ་ལྡན་འདས་གང་ན་བ་དེར་སོང་ལ། གལ་ཏེ་དགེ་སྦྱོང་གཽ་ཏ་མས་བཟོད་པ་བྱས་ན་དེ་ལྟ་ན་ལེགས། གལ་ཏེ་བཟོད་པ་མ་བྱས་ན་དེ་ཉིད་དུ་དེའི་ རྐང་པ་གཉིས་ལ་གཏུགས་ནས་སེན་མོ་བཀང་བའི་དུག་གིས་རྐང་པ་གཉིས་བསྐུ་བར་བྱའོ་སྙམ་དུ་བསམས་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཟོད་པར་གསོལ་ལོ། །བཅོམ་ ལྡན་འདས་ཀྱིས་དགོངས་པ། འདི་ཅི་འདྲ་བའི་སེམས་ཀྱིས་ངའི་སྤྱན་སྔར་འོངས་སྙམ་ན་དེ་བསད་པའི་སེམས་ཀྱིས་ཡིན་པར་གཟིགས་ནས། དེ་ནས་བཅོམ་ལྡན་འདས་ཀྱིས་ཞབས་ཀྱི་མཐིལ་ནས་ཞབས་ཀྱི་པུས་མོའི་ལྷ་ང་མན་ཆད་ཤེལ་གྱི་རང་བཞིན་དུ་མངོན་པར་སྤྲུལ་ནས་ཅང་མི་ གསུང་བར་བཞུགས་སོ། །དེས་བཅོམ་ལྡན་འདས་ཀྱི་ཞབས་གཉིས་ལ་སེན་མོས་རྨད་བྱུང་བར་བརྩམས་པ་ལས་དེའི་སེན་མོ་ཆག་ནས་དེ་སྐྱེངས་ཏེ་གསོལ་པ། འདི་ལྟར་ཁྱོད་ཀྱིས། གང་དག་སངས་རྒྱས་སྐྱབས་འགྲོ་བ། །དེ་དག་ངན་འགྲོར་འགྲོ་མི་ འགྱུར། །ཞེས་གསུངས་པས་ཁྱོད་ལ་སྐྱབས་སུ་མཆིའོ། །གལ་ཏེ་ངན་འགྲོར་མཆི་བར་གྱུར་ན་ཁྱོད་ཀྱི་དེ་བརྫུན་ལགས་པར་འགྱུར་རོ། །ཤིན་ཏུ་དྲག་པོའི་ལས་ཡོངས་སུ་རྫོགས་པར་བྱས་པ་རྣམས་ལ་ནི་ལུས་ཞིག་པ་ལ་མི་སྡོད་པས་དེ་གསོན་པོ་ཉིད་དུ་ མནར་མེད་པའི་མེ་འབར་བས་ཀུན་ནས་ཡོག་ནས་ཀུན་དགའ་བོ་ཚིག་གོ། །ཀུན་དགའ་བོ་བསྲེགས་སོ་ཞེས་ངུ་བར་བརྩམས་སོ། །དེ་ནས་ཚེ་དང་ལྡན་པ་ཀུན་དགའ་བོ་རང་གི་སྐྱེ་བོ་ལ་མཉེས་གཤིན་པ། སྙིང་རྗེ་དང་ལྡན་པ། བྱམས་པའི་བདག་ཉིད་ཅན་དེས་ སྨྲས་པ། ལྷ་སྦྱིན་ཚུར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སྐྱབས་སུ་སོང་ཤིག །དེ་སྡུག་བསྔལ་གྱི་ཚོར་བས་ཉེན་ཅིང་ལས་ཀྱི་འབྲས་བུ་མངོན་སུམ་དུ་མཐོང་ནས་བསམ་པ་ཐག་པ་ནས་སེམས་བསྐྱེད་ཅིང་ཚིག་

  1201. 291a

    ཏུ་ཡང་སྨྲས་པ། བདག་རུས་པའི་ཁོང་ནས་ཀྱང་སངས་རྒྱས་བཅོམ་ལྡན་འདས་ལ་སྐྱབས་སུ་འགྲོའོ་ཞེས་སྨྲས་ནས། རང་གི་ལུས་ཀྱིས་མནར་མེད་པའི་སེམས་ཅན་དམྱལ་བ་ཆེན་པོར་ལྷུང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་ རྣམས་ལ་བཀའ་སྩལ་པ། དགེ་སློང་དག་ལྷ་སྦྱིན་གྱིས་དགེ་བའི་རྩ་བ་མཚམས་སྦྱར་ཏེ། མནར་མེད་པའི་སེམས་ཅན་དམྱལ་བ་ཆེན་པོར་བསྐལ་པར་གནས་ནས་རང་བྱང་ཆུབ་མངོན་སུམ་དུ་བྱས་པར་འགྱུར་ཏེ། རང་སངས་རྒྱས་རུས་པ་ཅན་ཞེས་བྱ་བར་ འགྱུར་རོ། །དེ་མངོན་པར་བྱང་ཆུབ་མ་ཐག་ཏུ་བསོད་སྙོམས་ལ་སོང་ནས་དེ་མཐའ་གཅིག་ཏུ་བཞག་སྟེ། ལག་པ་འཁྲུ་ཞིང་སེམས་པ་ལ་ཞུགས་པ། བདག་ཅིའི་ཕྱིར་ཡུན་རིང་པོར་འཁོར་བ་ན་འཁོར་བར་གྱུར་སྙམ་པ་ལས་དེས་བསམས་ན། བདག་ གིས་ཚེ་རབས་ཚེ་རབས་སུ་བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་སེམས་དཔར་གྱུར་པ་དང་། ཐམས་ཅད་མཁྱེན་པ་ཤེས་བྱ་ལ་མངའ་བརྙེས་པ་ལ་ཡང་ཕ་རོལ་གནོན་པ་བྱས་ལ། དེ་ཡང་རྙེད་པ་དང་བཀུར་སྟིའི་ཕྱིར་ཡིན་པར་ཤེས་ནས། དེས་ བསོད་སྙོམས་དེ་ཡང་ལོངས་མ་སྤྱད་པར་སྟེང་གི་ནམ་མཁའ་ལ་མངོན་པར་འཕགས་ཏེ། འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ སུ་ཡོངས་སུ་མྱ་ངན་ལས་འདའ་བར་འགྱུར་རོ། །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱི་ཀུན་ཏུ་སྤྱོད་པ་ནི་དུས་དུས་སུ་སེམས་ཅན་དམྱལ་བར་རྒྱུ་ཞིང་འགྲོ་བ་ཡིན་ནོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་ བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱིས་ལྷ་སྦྱིན་རང་བྱང་ཆུབ་ཏུ་ལུང་བསྟན་གྱིས། ཚུར་བདག་ཅག་མནར་མེད་པའི་དམྱལ་བ་ཆེན་པོའི་ནང་དུ་དོང་ལ་ལྷ་སྦྱིན་སྤྲོ་བསྲིང་ངོ་ཞེས་དེ་ནས་ཚེ་དང་ལྡན་པ་

  1202. 291b

    ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་མནར་མེད་པའི་སེམས་ཅན་དམྱལ་བ་ཆེན་པོའི་ནང་དུ་དོང་ངོ་། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་སྨྲས་པ། ཚེ་དང་ལྡན་པ་མཽད་གལ་གྱི་བུ་ཆེན་པོ་སེམས་ཅན་དམྱལ་བ་ རྣམས་ལ་སོམས་ཤིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཇི་ལྟར་སེམས་མཉམ་པར་གཞག་ན་ཆར་པའི་རྒྱུན་གཏུན་ཤིང་ཙམ་འབབ་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་དང་། ཆུ་དེ་མནར་མེད་པའི་ལྕེ་རྣམས་ཀྱི་བར་དུ་བསྐམས་སོ། ། དེ་བཞིན་དུ་གཉའ་ཤིང་དང་། ཤིང་རྟའི་སྲོག་ཤིང་ཙམ་གྱི་ཆར་གྱི་རྒྱུན་དག་དབབ་པར་བརྩམས་པ་དང་། ཆུ་དེ་ཡང་བར་དུ་བསྐམས་སོ། །དེ་ནས་ཚེ་དང་ལྡན་པ་ཤཱ་རིའི་བུས་མོས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། དམྱལ་བ་དེ་ཐམས་ཅད་ཆུས་ བཀང་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ། ལྷ་སྦྱིན་གང་ཡིན་པ་དེ་ཚུར་ཤོག །ལྷ་སྦྱིན་བརྒྱ་སྟོང་ཕྲག་དུ་མ་འོངས་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ། བཅོམ་ལྡན་འདས་ཀྱི་གཅུང་ལྷ་སྦྱིན་གང་ཡིན་པ་དེ་ཚུར་ཤོག་ཤིག ། དེ་ནས་ལྷ་སྦྱིན་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གང་ན་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུའི་རྐང་པ་གཉིས་ལ་གཏུགས་པ་དང་དེ་གཉིས་ཀྱིས་སྨྲས་པ། ཁྱོད་ལ་གནོད་པའི་ཁྱད་པར་ཅུང་ཟད་ཡོད་དམ་ དེས་སྨྲས་པ། རེ་ཞིག་མནར་མེད་པའི་སེམས་ཅན་རྣམས་ཀྱི་སྤྱི་ཐུན་གང་ཡིན་པ་དེ་ལྟ་ཞོག་གི། །བདག་ལ་གང་ཟག་པ་ལྷག་པ་མཆིས་པ་གང་ལགས་པ་དེ་གསོན་ཅིག །ལྕགས་ཀྱི་རི་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ ཏུ་གྱུར་པ་དག་མཆིས་ནས་བདག་ལ་ཏིལ་བཞིན་འཐག་པར་བགྱིད་དོ། །སོག་ལེ་ཕྱོགས་གཉིས་ཀ་ན་སོ་མཆིས་པས་ཡན་ལག་དང་ཉིང་ལག་རྣམས་འཐུབ་པར་བགྱིད་དོ། །ལྕགས་ཀྱི་ཐོ་བ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་

  1203. 292a

    གཅིག་ཏུ་གྱུར་པ་དག་གིས་མྱུར་བ་མྱུར་བར་མགོ་ཕྱེ་མར་རློག་པར་བགྱིད་དོ། །ཕྱོགས་བཞི་ནས་གླང་པོ་ཆེ་དག་མཆིས་ནས་དེ་རྣམས་ཀྱིས་བདག་འབྲས་ཕྱེ་བཞིན་དུ་འཐག་པར་བགྱིད་དོ། །ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ གཉིས་ཀྱིས་སྨྲས་པ། ལྷ་སྦྱིན་ཁྱོད་ཀྱིས་ལྕགས་ཀྱི་རི་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པ་དག་འོངས་ཏེ་ཁྱོད་ལ་ཏིལ་བཞིན་འཐག་པར་བྱེད་དོ་ཞེས་སྨྲས་པ་གང་ཡིན་པ་དེ་ནི་འདི་ལྟར་ཁྱོད་ཀྱིས་བཅོམ་ལྡན་ འདས་དགྲོངས་པའི་ཕྱིར་རི་བྱ་རྒོད་ཀྱི་ཕུང་པོ་ལས་རྡོ་འཕངས་པ་དེའི་ལས་ཀྱི་འབྲས་བུ་ཡིན་ནོ། །སོག་ལེ་ཕྱོགས་གཉིས་ན་སོ་ཡོད་པ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་པ་དག་གིས་ཡན་ལག་དང་ཉིང་ལག་ ཐམས་ཅད་འཐུབ་པར་བྱེད་དོ་ཞེས་སྨྲས་པ་གང་ཡིན་པ་དེ་ནི་འདི་ལྟར་ཁྱོད་ཀྱིས་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ཕྱེ་བ་དེའི་ལས་ཀྱི་འབྲས་བུ་ཡིན་ནོ། །ལྕགས་ཀྱི་ཐོ་བ་འབར། རབ་ཏུ་འབར། ཀུན་ཏུ་རབ་ཏུ་འབར་ཏེ། མེ་ལྕེ་གཅིག་ཏུ་གྱུར་ པ་རྣམས་ཀྱིས་མྱུར་བ་མྱུར་བར་གླད་པ་ཕྱེ་མར་རློག་གོ་ཞེས་སྨྲས་པ་གང་ཡིན་པ་དེ་ནི་འདི་ལྟར་ཁྱོད་ཀྱིས་དགེ་སློང་མ་དགྲ་བཅོམ་པ་ཨུཏྤ་ལའི་མདོག་ཁུ་ཚུར་གྱིས་བསྣུན་ཏེ་བསད་པ་དེའི་ལས་ཀྱི་འབྲས་བུ་ཡིན་ནོ། །ཕྱོགས་བཞི་ནས་གླང་པོ་ཆེ་རྣམས་ལྷགས་ཏེ་དེ་ རྣམས་ཀྱིས་བདག་འབྲས་ཕྱེ་བཞིན་དུ་འཐག་པར་བྱེད་དོ་ཞེས་སྨྲས་པ་གང་ཡིན་པ་དེ་ནི་འདི་ལྟར་ཁྱོད་ཀྱིས་བཅོམ་ལྡན་འདས་དགྲོངས་པའི་ཕྱིར་གླང་པོ་ཆེའི་དམ་པ་ནོར་སྐྱོང་རྦད་པ་དེའི་ལས་ཀྱི་འབྲས་བུ་ཡིན་ནོ། །དེ་ལྟ་མོད་ཀྱི་ཁྱོད་བཅོམ་ལྡན་འདས་ཀྱིས་ལུང་ བསྟན་ཏོ། །བཙུན་པ་ཤཱ་རིའི་བུ་ཅི་ཞིག་ཏུ། དགེ་སློང་དག་ལྷ་སྦྱིན་གྱིས་དགེ་བའི་རྩ་བ་མཚམས་སྦྱར་ནས་མནར་མེད་པའི་སེམས་ཅན་དམྱལ་བ་ཆེན་པོར་བསྐལ་པར་གནས་ནས་རང་སངས་རྒྱས་རུས་པ་ཅན་ཞེས་བྱ་བར་འགྱུར་རོ་ཞེས་གསུང་ངོ་། །དེས་

  1204. 292b

    སྨྲས་པ། བཙུན་པ་ཤཱ་རིའི་བུ་གལ་ཏེ་དེ་ལྟ་ན་བདག་བློ་གཅིག་པུས་མནར་མེད་པའི་སེམས་ཅན་དམྱལ་བ་ཆེན་པོར་གནས་པར་བཟོད་དོ།། །།འདུལ་བ་གཞི། བམ་པོ་བརྒྱ་རྩ་དགུ་པ་སྟེ་ཐ་མའོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་དེ་གཉིས་ཀོ་ཀ་ལི་ཀ་ལ་སོགས་པ་གང་ན་བ་དེར་དོང་བ་དང་། ཇི་ཙམ་ན་ཀོ་ཀ་ལི་ཀའི། ལྕེ་ཐོང་གཤོལ་བརྒྱས་རྨེད་དོ། །མི་མཇེད་ཀྱི་བདག་པོ་ཚངས་པས་ཀོ་ཀ་ལི་ཀ་ལ་སྨྲས་པ། ཀོ་ཀ་ལི་ཀ་དགེ་སློང་ཤཱ་རིའི་བུ་དང་། མཽད་གལ་གྱི་ བུ་དེས་པ། ཚངས་པ་མཚུངས་པར་སྤྱོད་པ་ལའོ་བྱམས་པ་དག་ལ་སེམས་དད་པ་སྐྱེད་ཅིག་ཅེས་སྨྲས་པ་དང་། ཀོ་ཀ་ལི་ཀས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་མཐོང་ནས་སྨྲས་པ། སྡིག་པ་ཅན་འདི་གཉིས་འདིར་ཡང་འོངས་པ་ལྟ་ ཞེས་ཚིག་ཏུ་སྨྲས་མ་ཐག་ཏུ་ཀོ་ཀ་ལི་ཀའི་ལྕེ་ལ་ཐོང་གཤོལ་སྟོང་གིས་རྨེད་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་འདི་དག་ལ་ཅི་བྱར་ཡང་མེད་དོ་སྙམ་ནས་སླར་ལོག་སྟེ། འོད་སྲུང་རྫོགས་བྱེད་གང་ན་བ་དེར་དོང་ བ་དང་། དེ་ནས་འོད་སྲུང་རྫོགས་བྱེད་ཀྱིས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱི་རྐང་པ་ལ་གཏུགས་ནས་སྨྲས་པ། འཕགས་པ་ཤཱ་རིའི་བུ་བདག་གིས་ཆོས་ལོག་པར་བཤད་ནས་སྐྱེ་བོའི་ཚོགས་བསླུས་པ་དེའི་ལས་ཀྱི་རྣམ་པར་སྨིན་པས་ བདག་གི་ལྕེ་ལ་ཐོང་གཤོལ་ལྔ་བརྒྱས་རྨེད་དོ། །སློབ་མ་རྣམས་ཀྱིས་ཇི་ལྟ་ཇི་ལྟར་བདག་གི་ཆད་པ་ལ་བགྱི་བ་བགྱིད་པ་དེ་ལྟ་དེ་ལྟར་བདག་གིས་ཆེས་མི་བཟད་པའི་ཚོར་བ་ཉམས་སུ་མྱོང་བ་ལགས་ཀྱིས། བདག་གི་གནས་སྐབས་དེ་དག་ལ་རིག་པར་བགྱིས་ ནས། དེའི་ཆད་པ་ལ་བྱ་བ་མ་བྱེད་ཅིག་ཅེས་བཟློག་ཏུ་གསོལ། དེ་བཞིན་དུ་བྱའོ་ཞེས་ཁས་བླངས་ནས། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱིས་དམྱལ་བར་བརྒྱུས་ཏེ་རྫུ་འཕྲུལ་གྱིས་འཛམ་བུའི་གླིང་དུ་ཕྱིན་ནས་དེ་གཉིས་ཀྱིས་

  1205. 293a

    བཅོམ་ལྡན་འདས་དང་། དགེ་སློང་རྣམས་དང་། སྐྱེ་བོའི་ཚོགས་ལ་ལྷ་སྦྱིན་དང་། ཀོ་ཀ་ལི་ཀ་དང་། རྫོགས་བྱེད་ལ་སོགས་པ་སེམས་ཅན་དམྱལ་བར་སྐྱེས་པ་རྣམས་ཀྱི་གནས་སྐབས་རྒྱས་པར་བསྙད་དོ། །དགེ་སློང་རྣམས་ཐེ་ཚོམ་ སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལྷ་སྦྱིན་གྱིས་བཅོམ་ལྡན་འདས་ཀྱིས་བཀའ་བཀའ་མ་ལགས་པར་བགྱིས་པས་མནར་མ་མཆིས་པའི་སེམས་ཅན་དམྱལ་བ་ཆེན་པོར་ལྟུང་བ་ལ་གཟིགས། བཅོམ་ལྡན་ འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ངའི་ཚིག་ཚིག་མ་ཡིན་པར་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་བྱང་ཆུབ་ སེམས་དཔའ་མ་ངེས་པའི་ཕུང་པོ་ལ་གནས་པ་ན་བ་ལང་རྣམས་ཀྱི་ནང་དུ་སྐྱེས་ནས་ཁྱུ་མཆོག་ཏུ་གྱུར་ཏེ། དེ་ནུབ་མོ་གྲོང་ཁྱེར་ནས་བྱུང་ནས་རྒྱལ་པོའི་མོན་སྲན་གྲེའུའི་ཞིང་ལ་ཟ་ཞིང་ཉིན་པར་གྲོང་ཁྱེར་ན་གནས་སོ། །ཇི་ཙམ་ན་དེའི་དྲུང་དུ་བོང་བུ་ཞིག་འོངས་ནས་སྨྲས་ པ། ཞང་པོ་ཁྱོད་ཀྱི་ཁྲག་དང་། ཤ་དང་། པགས་པ་ནི་རྒྱས་ལ། ཁྱོད་རྒྱུ་བ་ནི་ལན་འགའ་ཡང་བདག་གིས་མ་མཐོང་ངོ་། །དེས་སྨྲས་པ། ཚ་བོ་བདག་ནི་ནུབ་མོ་རྒྱལ་པོའི་མོན་སྲན་གྲེའུའི་ཞིང་ལ་ཟའོ། །དེས་སྨྲས་པ། ཞང་པོ་བདག་ཀྱང་ཁྱོད་དང་ལྷན་ ཅིག་མཆིའོ། །དེས་སྨྲས་པ། ཚ་བོ་ཁྱོད་ནི་སྐད་འབྱིན་འདོད་པས་གནོད་པ་བྱས་པར་མི་འགྱུར་གྲང་། དེས་སྨྲས་པ། ཞང་པོ་མི་དབྱུང་གིས་འདོང་ངོ་། །དེ་གཉིས་ཀྱིས་རྒྱལ་པོའི་མོན་སྲན་གྲེའུའི་ཞིང་གི་འགྲེང་རིབ་རྣམས་དྲལ་ཏེ་ཞུགས་ ནས་བོང་བུས་ཇི་སྲིད་འགྲངས་པ་དེ་སྲིད་སྐད་མ་ཕྱུང་ངོ་། །དེ་ནས་སྨྲས་པ། ཞང་པོ་རེ་ཞིག་གླུ་ཞིག་བླང་ངམ། ཁྱུ་མཆོག་གིས་སྨྲས་པ། ཁོ་བོ་མ་སོང་གི་བར་དུ་ཡུད་ཙམ་ཞིག་སྡོད་ལ་དེའི་འོག་ཏུ་ཅི་དགའ་བ་གྱིས་ཤིག་ཅེས་སྨྲས་ནས་བྲོས་པ་དང་།

  1206. 293b

    བོང་བུས་སྐད་ཕྱུང་བ་རྒྱལ་པོའི་མི་རྣམས་ཀྱིས་ཐོས་ནས་བཟུང་སྟེ། ཤེས་ལྡན་དག་བོང་བུ་འདིས་ནི་རྒྱལ་པོའི་མོན་སྲན་གྲེའུའི་ཞིང་འདི་ཐམས་ཅད་ཟོས་ཀྱིས་ཆད་པས་གཅད་པར་བྱའོ་ཞེས་དེ་རྣམས་ཀྱིས་རྣ་བ་བཅད་དེ་མགུལ་དུ་གཏུན་ཅིག་བཏགས་ནས་བཏང་ ངོ་། །དེ་ཕན་ཚུན་འཁྱམ་པ་ཁྱུ་མཆོག་གིས་མཐོང་ནས་དེས་དེ་ལ་ཚིགས་སུ་བཅད་དེ་སྨྲས་པ། ལེགས་པར་གླུ་བླངས་གླུ་རབ་བླངས། །ཁྱོད་ཀྱིས་གླུ་ཡི་འབྲས་བུ་ཐོབ། །ཁྱོད་ཀྱི་གླུ་ཡིས་བདག་གི་ཡང་། །རྣ་བ་དེའུ་ནི་ཡལ་བར་གྱུར། །ཚིག་ མི་སྲུང་བ་གང་ཡིན་པ། །དེ་ལ་འདི་འདྲ་འབྱུང་འགྱུར་གྱིས། །རྣ་རྡུམ་གཏུན་གྱིས་རྣམ་བརྒྱན་པ། །ད་ནི་འཁྱམ་པར་བྱེད་ལ་རག །དེས་ཀྱང་ཚིགས་སུ་བཅད་དེ་སླར་སྨྲས་པ། སོ་ཆག་ཁྱོད་ནི་ཁ་རོག་ཤིག །གླང་རྒན་ཁྱོད་ནི་ཁ་རོག་ཤིག ། ལག་ན་དབྱུག་ཐོགས་མི་གསུམ་པོ། །ཁྱོད་ཉིད་ཀྱང་ནི་ཚོལ་བར་བྱེད། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱུ་མཆོག་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་བོང་བུ་གང་ ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདིས་ངའི་ཚིག་ཚིག་ཏུ་མ་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདིས་པའི་ཚིག་ཚིག་ཏུ་མ་བྱས་པས་འདི་ཚུལ་མ་ཡིན་པས་སྡུག་བསྔལ་བར་གྱུར་ཏོ། །གཞན་ཡང་ཇི་ལྟར་འདིས་ ངའི་ཚིག་ཚིག་ཏུ་མ་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ཞིག་ན་ཁྱིམ་བདག་ཅིག་གནས་པ་དེ་ལ་གླང་མཚན་དང་ལྡན་པ་ཞིག་ཡོད་ནས། དེས་དེ་དགེ་སྦྱོང་དང་། བྲམ་ཟེ་དང་། རང་ གི་སྐྱེ་བོ་དང་། ཕོངས་པ་དང་། མགོན་མེད་པ་དང་། བཀྲེན་པ་དང་། ནད་པ་རྣམས་ཟན་བྱིན་ནས་ཅི་དགར་སྤྱོད་དུ་བཏང་ངོ་། །དེ་དུས་གཞན་ཞིག་ན་ཕན་ཚུན་དུ་རྒྱུ་རྒྱུ་བ་ལས་འདམ་དུ་སོང་ནས་ཁྱིམ་བདག་གིས་ཉི་མ་ནུབ་ཙམ་ན་ཐོས་ཏེ་

  1207. 294a

    བཙལ་བ་ལས། དེའི་དྲུང་དུ་ཕྱིན་ནས་དེས་བསམས་པ། ད་ནི་དབྱུང་མི་ནུས་ཀྱིས་སང་ནང་པར་དབྱུང་བར་བྱའོ་སྙམ་མོ། །གླང་གིས་སྨྲས་པ། བདག་གི་མདུན་དུ་ཞགས་པ་ཞིག་ཞོག་ལ་བཞུད་ཅིག་དང་། གལ་ཏེ་ཝ་འོངས་ པར་གྱུར་དང་། བདག་གི་རྭས་ཞགས་པ་བླངས་ཏེ་དེ་ལ་གདབ་པར་བགྱིའོ། །དེས་དེའི་མདུན་དུ་ཞགས་པ་ཞིག་བཞག་ནས་སོང་བ་དང་མཚན་མོ་ཇི་ཙམ་ན་ཝ་ཞིག་འོངས་ནས་དེས་སྨྲས་པ། པད་མའི་རྩ་བ་དང་། པད་མ་དཀར་པོ་དག་འབྱིན་པ་ འདི་སུ་ཞིག །གླང་གིས་སྨྲས་པ། ཁོ་བོ་ཡིན་ནོ། །འདམ་གྱི་ནང་དུ་བྱིང་ནས་འདུག་གོ། །ཝས་བསམས་པ། བདག་ཟས་དང་ཕྲད་དོ་སྙམ་ནས་དེས་དེ་ལ་གཙེ་བར་བརྩམས་པ་དང་། གླང་གིས་སྨྲས་པ། ཁྱོད་ཕྱོགས་འདི་ནས་སོང་ ཤིག །ཚུལ་མ་ཡིན་པས་སྡུག་བསྔལ་བར་གྱུར་ཏ་རེ། འོན་ཀྱང་དེ་ལྡོག་ཏུ་མ་བཏུབ་ནས་དེ་ཁོ་ན་བཞིན་དུ་འཚེ་བ་དང་། གླང་གིས་ཚིགས་སུ་བཅད་དེ་སྨྲས་པ། ཁོ་བོ་པད་མའི་རྩ་མི་འབྱིན། །ཁོ་བོ་པད་མ་དཀར་པོའང་མིན། །གལ་ཏེ་ཁྱོད་ནི་ ཟ་འདོད་ན། །རྒྱབ་ཏུ་སོང་ལ་བཟའ་བར་གྱིས། །ཝས་བཟའ་སྙམ་ནས་རྒྱབ་ཏུ་ཞོན་པ་དང་། ཁྱུ་མཆོག་གི་རྭས་ཞགས་པ་བཏབ་པས་ཝའི་སྐེ་ནས་ཐོགས་ནས་ནམ་མཁའ་ལ་འཕྱང་བ་དང་། གླང་གིས་ཚིགས་སུ་བཅད་དེ་སྨྲས་པ། ཁྱོད་ཅི་གར་མཁན་ ཛབ་ཀེ་བའམ། །འོན་ཏེ་གར་སློབ་ཁྱེའུ་ཞིག་ཡིན། །དགོན་པར་བྱ་དགའ་སྟེར་བ་མེད། །བཟོ་ནི་གྲོང་ཁྱེར་བསྟན་པར་གྱིས། །ཝས་ཀྱང་ཚིགས་སུ་བཅད་དེ་སྨྲས་པ། བདག་ནི་གར་མཁན་ཛབ་ཀེ་བའམ། །གར་སློབ་ཁྱེའུ་ནི་མ་ཡིན་ཏེ། ། བརྒྱ་བྱིན་གྱིས་ནི་སྐས་བཙུགས་པས། །བདག་ནི་ཚངས་པའི་འཇིག་རྟེན་འགྲོ། །གླང་གིས་ཡང་ཚིགས་སུ་བཅད་དེ་སྨྲས་པ། བརྒྱ་བྱིན་གྱིས་ནི་སྐས་མ་བཙུགས། །ཚངས་པའི་འཇིག་རྟེན་སྨོས་ཅི་དགོས། །ཐབས་ཀྱི་ཞགས་པས་ཁྱོད་ཐོགས་

  1208. 294b

    པས། །ཁྱོད་ནི་འཚོ་བར་མ་མཐོང་ངོ་། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱུ་མཆོག་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་ཝ་གང་ཡིན་པ་དེ་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདིས་ངའི་ཚིག་ཚིག་ཏུ་མ་བྱས་པས་ ཚུལ་མ་ཡིན་པས་སྡུག་བསྔལ་བར་གྱུར་ཏོ། །ད་ལྟར་ཡང་འདིས་ངའི་ཚིག་ཚིག་ཏུ་མ་བྱས་པས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་ པ་ལྷ་སྦྱིན་གྱིས་བཅོམ་ལྡན་འདས་ཀྱི་བཀའ་མ་མཉན་པས་མནར་མ་མཆིས་པར་གཞོལ་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདིས་ ངས་སྨྲས་པའི་ཚིག་མ་མཉན་པས་མནར་མེད་པར་གཞོལ་བར་གྱུར་པ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཕོ་བྲང་འབྱོར་བ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་ཞིག་ན་རྒྱལ་པོ་སེམས་པ་ ཞེས་བྱ་བ་རྒྱལ་སྲིད་བྱེད་དུ་བཅུག་སྟེ། བསོད་ནམས་ཀྱི་མཐུས་ལྷ་རྣམས་ཀྱིས་བར་སྣང་ལ་སྟན་འཛིན་ཏོ། །རྒྱལ་པོ་དེའི་མདུན་ན་འདོན་དེ་ལ་བུ་སྤུན་གཉིས་ཡོད་པ་ལས། དེ་ལ་ཕུ་བོ་ཤོས་ནི་མངོན་པར་འབྱུང་བ་ལ་དགའ་ལ། ནུ་བོ་ཤོས་ནི་མདུན་ ན་འདོན་ལ་དགའ་བར་གྱུར་ཏོ། །ཕུ་བོ་ཤོས་ཀྱིས་ཕ་ཆོས་དང་ཆོས་མ་ཡིན་པས་མདུན་ན་འདོན་བྱེད་པ་མཐོང་ནས་དེས་བསམས་པ། བདག་ཕ་ཤི་ནས་མདུན་ན་འདོན་དུ་གྱུར་ཏེ། བདག་གིས་ཀྱང་ཆོས་དང་ཆོས་མ་ཡིན་པས་མདུན་ན་འདོན་བྱས་ན་ སེམས་ཅན་དམྱལ་བ་རྣམས་སུ་གཞོལ་བར་འགྱུར་གྱིས། མ་ལ་བདག་རབ་ཏུ་འབྱུང་བར་བྱའོ་སྙམ་ནས་དེས་ཕ་ལ་གསོལ་ཏེ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ངོ་། །ཇི་ཙམ་དུས་གཞན་ཞིག་ན་མདུན་ན་འདོན་ཤི་ནས་ནུ་བོ་ཤོས་མདུན་

  1209. 295a

    ན་འདོན་དུ་བཅུག་སྟེ། དེ་ཆོས་དང་ཆོས་མ་ཡིན་པས་མདུན་ན་འདོན་བྱེད་པར་བརྩམས་ཏེ། སྐྱེ་བོའི་ཚོགས་ལ་འཚེ་བར་བྱེད་དོ། །ཇི་ཙམ་ན་མི་ཞིག་ཕན་ཚུན་འཁྱམ་འཁྱམ་པ་ལས་ཕུ་བོ་ཤོས་རབ་ཏུ་བྱུང་བ་དེའི་དྲུང་དུ་སོང་བ་དང་། དེས་ དེ་ལ་དྲིས་པ། ཁྱོད་གང་ནས་འོངས། དེས་སྨྲས་པ། རྒྱལ་པོའི་ཕོ་བྲང་ཆེ་གེ་མོ་ཞེས་བྱ་བ་ནས་སོ། །དེ་གཏམ་དྲི་བར་བརྩམས་པ་དང་། དེས་སྨྲས་པ། རྒྱལ་པོའི་མདུན་ན་འདོན་ཤི་ནས་དེའི་བུ་ནུ་བོ་ཤོས་མདུན་ན་འདོན་དུ་བཅུག་སྟེ། དེ་ ཆོས་མ་ཡིན་པས་མདུན་ན་འདོན་བྱེད་པས་སྐྱེ་བོའི་ཚོགས་འཚེ་བར་བྱེད་དོ། །དེས་སྨྲས་པ། དུས་ཅུང་ཟད་ཅིག་ནོགས་ཤིག་དང་། བདག་ཉིད་དེར་སོང་ནས་ཕན་པ་མ་ཡིན་པ་ལས་བཟློག་པར་བྱ་ཞིང་། ཇི་ལྟར་ཡུལ་མི་རྣམས་ལ་མི་གནོད་པར་ ཕན་པར་བྱེད་པ་ལ་སྦྱར་བར་བྱའོ། །མི་དེས་གཉེན་རྣམས་ཀྱི་དྲུང་དུ་སོང་སྟེ་སྐབས་དེ་སྨྲས་པ་ཐོས་པ་གཅིག་ནས་གཅིག་ཏུ་བརྒྱུད་ནས། ནུ་བོ་ཤོས་དེས་ཐོས་ནས་དེས་རྒྱལ་པོ་ལ་སྨྲས་པ། ལྷ་བདག་གི་ཕུ་བོ་དེ་མཆིས་ལགས་སོ། །རྒྱལ་ པོས་སྨྲས་པ། ལེགས་ཀྱིས་དེ་ཉིད་མདུན་ན་འདོན་དུ་འགྱུར་རོ། །དེས་སྨྲས་པ། ལྷ་ཁྱོད་ལ་བདག་གིས་དུས་འདི་སྲིད་ཅིག་ཏུ་ཞམ་འབྲིང་བགྱིས་པ་ནི་དོན་མ་མཆིས་སོ། །རྒྱལ་པོས་སྨྲས་པ། འདི་ནི་འཇིག་རྟེན་གྱི་ཆོས་ཡིན་ཏེ། དེ་ཕུ་ བོ་ཡིན་པས་སོ། །འོན་ཀྱང་རྣམ་པ་གཅིག་གིས་ཁྱོད་མདུན་ན་འདོན་དུ་འགྱུར་བ་ཡོད་དེ། གལ་ཏེ་དེ་འོངས་ནས་ཁྱོད་ཀྱིས་བདག་ཕུ་བོ་ལགས་སོ་སྨྲོས་ཤིག །དེས་སྨྲས་པ། བཀའ་བཞིན་འཚལ་དེ་བཞིན་དུ་སྨྲ་བར་བགྱིའོ། །ཇི་ཙམ་ན་ དེ་འོངས་པ་དེ་རྒྱལ་པོ་འཁོར་དང་བཅས་པས་མཐོང་ནས་ལངས་པ་དང་། དེ་ནི་མ་ལངས་སོ། །དེས་དེ་ལ་སྨྲས་པ། ཁྱོད་ཁོ་བོའི་ནུ་བོ་ཡིན་ན་ཅིའི་ཕྱིར་མི་ལྡང་། དེས་སྨྲས་པ། ཁྱོད་ཉིད་ནུ་བོ་ཡིན་གྱི་ཁོ་བོ་ནི་ཕུ་བོ་ཡིན་ནོ། །གལ་ཏེ་ཁྱོད་

  1210. 295b

    ཡིད་མི་ཆེས་ན་བདག་ཅག་ནི་རྒྱལ་པོའི་ཕོ་བྲང་དུ་ཆེན་པོར་གྱུར་པས་ལྷ་ལ་ཞུའོ། །ཕུ་བོས་རྒྱལ་པོ་ལ་དྲིས་པ། ཀྱེ་རྒྱལ་པོ་བདག་ཅག་གཉིས་ལས་ཕུ་བོ་གང་ལགས་པ་གསུང་ཤིག །རྒྱལ་པོས་ཤེས་བཞིན་དུ་བརྫུན་གྱི་ཚིག་སྨྲས་པ། འདི་ནི་ཕུ་བོ་ ཡིན་ནོ། །ཁྱོད་ནི་ནུ་བོ་ཡིན་ནོ་ཞེས་ཚིག་སྨྲས་མ་ཐག་ཁོ་ནར་ལྷ་རྣམས་ཀྱིས་སྟན་བཏང་བས་ས་ལ་རྡབ་ནུས་ཏེ། དེའི་ཁ་ནས་རུལ་པའི་དྲི་བྱུང་བར་གྱུར་ཏོ། །མདུན་ན་འདོན་གྱི་ཕུ་བོ་ཤོས་ཀྱིས་ཚིགས་སུ་བཅད་དེ་སྨྲས་པ། བརྫུན་གྱི་ཚིག་ནི་གསུངས་ པས་ན། །ལྷ་རྣམས་འདི་ནས་དོང་བ་དང་། །ཞལ་ཡང་མནམ་པར་གྱུར་ནས་སུ། །མཐོ་རིས་ལས་ཀྱང་ཉམས་པར་གྱུར། །རྒྱལ་པོ་བདེན་པར་གསུང་ཤིག་ཀྱེ། །སྔོན་གྱི་ཇི་ལྟ་བཞིན་དུ་འགྱུར། །གལ་ཏེ་བརྫུན་ནི་གསུང་མཛད་ན། །སེམས་ པ་འོག་ཏུ་ངེས་པར་བཞུད། །གང་ཞིག་ཆོས་བཞིན་འདྲི་བ་ལ། །ཆོས་མ་ཡིན་པ་སྟོན་བྱེད་ན། །ཆུ་ན་རྒྱུ་བའི་ཉ་བཞིན་དུ། །དེ་ནི་ལྕེ་མ་མཆིས་པར་འགྱུར། །རྒྱལ་པོས་བདེན་པར་གསུང་ཤིག་ཀྱེ། །སྔོན་གྱི་ཇི་ལྟ་བཞིན་དུ་འགྱུར། །གལ་ ཏེ་བརྫུན་ནི་གསུང་མཛད་ན། །སེམས་པ་འོག་ཏུ་ངེས་པར་བཞུད། །གང་ཞིག་ཆོས་བཞིན་འདྲི་བ་ལ། །ཆོས་མ་ཡིན་པ་སྟོན་བྱེད་ན། །དེར་ནི་སྐྱེས་པ་མི་སྐྱེ་ཞིང་། །དེར་ནི་སྐྱེས་པར་སྐྱེ་མི་འགྱུར། །རྒྱལ་པོ་བདེན་པར་གསུང་ཤིག་ཀྱེ། ། སྔོན་གྱི་ཇི་ལྟ་བཞིན་དུ་འགྱུར། །གལ་ཏེ་བརྫུན་ནི་གསུང་མཛད་ན། །སེམས་པ་འོག་ཏུ་ངེས་པར་བཞུད། །གང་ཞིག་ཆོས་བཞིན་འདྲི་བ་ལ། །ཆོས་མ་ཡིན་པ་སྟོན་བྱེད་ན། །ལྷས་ནི་དུས་སུ་ཆར་མི་འབེབས། །དེར་ནི་དུས་མ་ཡིན་པར་འབབ། ། རྒྱལ་པོ་བདེན་པར་གསུང་ཤིག་ཀྱེ། །སྔོན་གྱི་ཇི་ལྟ་བཞིན་དུ་འགྱུར། །གལ་ཏེ་བརྫུན་ནི་གསུང་མཛད་ན། །སེམས་པ་འོག་ཏུ་ངེས་པར་བཞུད། །གང་ཞིག་ཆོས་བཞིན་འདྲི་བ་ལ། །ཆོས་མ་ཡིན་པ་སྟོན་བྱེད་ན། །སྦྲུལ་བཞིན་དུ་ནི་སྐྱེ་བོ་དེའི། །

  1211. 296a

    ལྕེ་གཉིས་དག་ནི་འབྱུང་བར་འགྱུར། །རྒྱལ་པོ་བདེན་པར་གསུང་ཤིག་ཀྱེ། །སྔོན་གྱི་ཇི་ལྟ་བཞིན་དུ་འགྱུར། །གལ་ཏེ་བརྫུན་ནི་གསུང་མཛད་ན། །སེམས་པ་འོག་ཏུ་ངེས་པར་བཞུད། །དེ་ལྟར་རྒྱལ་པོ་སེམས་པ་ཡིས། །ཤིན་ཏུ་ མི་བཟད་ལས་བྱས་ནས། །སྡིག་པ་བྱེད་པ་རྣམས་ཀྱི་གནས། །དམྱལ་བ་མནར་མེད་ཐོབ་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཕུ་བོ་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་རྒྱལ་པོ་སེམས་པ་ གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་འདི་ངས་སྨྲས་པའི་ཚིག་མ་མཉན་པས་མནར་མེད་པའི་སེམས་ཅན་དམྱལ་བ་ཐོབ་བོ། །ད་ལྟར་ཡང་འདི་ངས་སྨྲས་པའི་ཚིག་མ་མཉན་པས་མནར་མེད་པའི་སེམས་ཅན་དམྱལ་བ་ཐོབ་བོ། །དགེ་སློང་ རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་སྨན་པར་གསུངས་པའི་བཀའ་ལྷ་སྦྱིན་གྱིས་མ་མཉན་པར་གྱུར་པས་མནར་མ་མཆིས་པར་གཞོལ་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདས་པའི་དུས་ན་ཡང་འདི་ལྟར་ངས་ཕན་པར་སྨྲས་པའི་ཚིག་མ་མཉན་པས་ཚུལ་མ་ཡིན་པས་སྡུག་བསྔལ་བར་གྱུར་པ་དེ་ཉོན་ཅིག །དགེ་སློང་ དག་སྔོན་བྱུང་བ་རི་འོར་ཞིག་ན་འཁྲུལ་འཁོར་གྱི་སློབ་དཔོན་ཞིག་གནས་ཏེ། དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་ལོན་པ་ན་ཁྱེའུ་ཞིག་བཙས་སོ། །བཙས་ནས་ཉི་མ་བདུན་གསུམ་ཉི་ཤུ་གཅིག་ཏུ་དེའི་བཙས་པའི་བཙས་སྟོན་རྒྱ་ཆེར་བྱས་ནས་རིགས་

  1212. 296b

    དང་མཐུན་པའི་མིང་བཏགས་ཏེ། དེ་བསྐྱེད་བསྲིངས་ནས་ཆེན་པོར་གྱུར་པ་དང་དེའི་ཕ་ཤིའོ། །དེ་རི་འོར་ཞིག་ན་འཁྲུལ་འཁོར་གྱི་སློབ་དཔོན་གཞན་ཞིག་ཡོད་པ་ལ་འཁྲུལ་འཁོར་གྱི་བཟོ་བསླབ་པར་བརྩམས་ནས། དེས་རི་འོར་ཞིག་ན་ཁྱིམ་ བདག་ཅིག་ཡོད་པ་ལས་བུ་མོ་བླངས་པ་དང་། དེས་སྨྲས་པ། གལ་ཏེ་ཉི་མ་ག་གེ་མོ་ཞིག་ལ་འོངས་ན་ནི་སྦྱིན་ནོ། །གཞན་དུ་ན་ནི་མི་སྦྱིན་ནོ། །དེས་འཁྲུལ་འཁོར་གྱི་སློབ་དཔོན་ལ་སྨྲས་པ། མཁན་པོ་རི་འོར་ཆེ་གེ་མོ་ཞེས་བགྱི་བ་ན་ཁྱིམ་བདག་ ཅིག་མཆིས་པ་ལ་བདག་གིས་བུ་མོ་བསླངས་ན་དེའི་མཆིད་ནས་གལ་ཏེ་ཉི་མ་ག་གེ་མོ་ཞེས་བྱ་བ་ལ་འོངས་ན་ནི་སྦྱིན་གྱི། འོན་ཏེ་མ་འོངས་ན་ནི་མི་སྦྱིན་ནོ་ཞེས་མཆིའོ། །འཁྲུལ་འཁོར་གྱི་སློབ་དཔོན་གྱིས་སྨྲས་པ། བུ་གལ་ཏེ་དེ་ལྟ་ན་འདོད་ཁོ་བོ་ཉིད་ ཀྱིས་བླང་བར་བྱའོ་ཞེས་དེ་དེ་དང་ལྷན་ཅིག་ཤིང་ལས་བྱས་པའི་རྨ་བྱ་ལ་ཞོན་ནས་ཉི་མ་གང་ལ་ངེས་པར་བྱས་པ་དེ་ཉིད་ཀྱི་ཉི་མ་ལ་རི་འོར་དེར་ཕྱིན་པ་འཇིག་རྟེན་གྱིས་མཐོང་ནས་མཆོག་ཏུ་ངོ་མཚར་སྐྱེས་སོ། །དེ་ནས་བུ་མོ་བསླངས་ཏེ་སླར་ཡང་འཁྲུལ་འཁོར་ལ་ཞོན་ཏེ་ རང་གི་ཁྱིམ་དུ་འོངས་ནས་འཁྲུལ་འཁོར་བསྡུས་ཏེ་དེའི་མ་ལ་གཏད་ནས་སྨྲས་པ། ཁྱོད་ཀྱི་བུ་འདིས་འཁྲུལ་འཁོར་འགྲོ་བའི་སྦྱོར་བ་ཤེས་ཀྱི་སླར་ལྡོག་པ་མི་ཤེས་ཀྱིས་འདི་ལ་འཁྲུལ་འཁོར་མ་སྦྱིན་ཅིག་ཅེས་བསྒོའོ། །དེས་ཡང་ནས་ཡང་དུ་མ་ལ་སྨྲས་པ། ཡུམ་འཁྲུལ་འཁོར་བདག་ལ་སྩོལ་ཅིག་དང་སྐྱེ་བོའི་ཚོགས་དབང་དུ་བགྱིའོ། །དེས་སྨྲས་པ། བུ་ཁྱོད་ཀྱི་སློབ་དཔོན་ན་རེ་འདིས་འཁྲུལ་འཁོར་འགྲོ་བའི་སྦྱོར་བ་ཤེས་ཀྱི་སླར་ལྡོག་པ་མི་ཤེས་ཀྱིས་མ་སྦྱིན་ཅིག་ཅེས་ཟེར་བས་ཚུལ་མ་ཡིན་པས་སྡུག་བསྔལ་བར་ འགྱུར་དུ་འོང་ངོ་། །དེ་བས་ན་ཁོ་མོས་མི་སྦྱིན་ནོ། །དེས་སྨྲས་པ། ཡུམ་བདག་གིས་འགྲོ་བ་དང་ལྡོག་པ་འཚལ་མོད་ཀྱི་སློབ་དཔོན་དེ་ཕྲག་དོག་གིས་མི་སྟེར་མོད། བུད་མེད་ནི་སེམས་ཡང་ཞིང་འདོད་ཆེན་ཆེ་བ་ཡིན་པས་དེ་དེ་ལ་བྱིན་ནས་འཁྲུལ་འཁོར་

  1213. 297a

    སྦྱར་ཏེ་ཞོན་ནས་སོང་བ་དང་། སྐྱེ་བོའི་ཚོགས་ཆེན་པོ་དགའ་བར་གྱུར་ཏོ། །དེ་ནས་འཁྲུལ་འཁོར་གྱི་སློབ་དཔོན་གྱིས་མཐོང་ནས་དེས་སྨྲས་པ། ཕ་བི་སླར་མི་འོང་བར་སོང་ངོ་། །དེས་ཇི་ལྟ་ཇི་ལྟར་འཁྲུལ་འཁོར་གཅུས་པ་དེ་ལྟ་དེ་ལྟར་ ཤིན་ཏུ་ཐག་རིང་པོར་ལྡིངས་ནས་ཇི་ཙམ་ན་རྒྱ་མཚོ་ཆེན་པོར་ལྡིངས་པ་དང་། རྒྱ་མཚོ་ཆེན་པོར་ནི་ལྷས་རྒྱུན་དུ་ཆར་འབེབས་པ་ཡིན་པས་དེས་སྦྱོར་ཁ་རྣམས་བངས་ནས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ལྷས་ཚིགས་སུ་བཅད་དེ་སྨྲས་པ། གང་ ཞིག་དོན་འདོད་བརྩེ་བས་ཕན་པ་ཡིས། །ཇི་སྐད་བསྟན་པའི་ཚིག་ནི་མི་འཛིན་ཅིང་། །འཆོས་པ་མེད་ཅིང་སུ་ཚིག་མི་མཉན་གང་། །དེ་ནི་ཤིང་ལས་བྱས་པའི་བྱ་ཡིས་ཁྱེར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་འཁྲུལ་ འཁོར་གྱི་སློབ་དཔོན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་སློབ་མ་གང་ཡིན་པ་དེ་ནི་ལྷ་སྦྱིན་འདི་ཉིད་ཡིན་ཏེ། དེ་ན་ཡང་ངས་ཕན་པར་སྨྲས་ན། ངའི་ཚིག་འདིས་མ་མཉན་པས་ཚུལ་མ་ཡིན་པས་སྡུག་བསྔལ་བར་གྱུར་ཏོ། ། ད་ལྟར་ཡང་ངས་ཕན་པར་སྨྲས་ན་ངའི་ཚིག་འདིས་མ་མཉན་པས་མནར་མེད་པའི་སེམས་ཅན་དམྱལ་བར་གཞོལ་བར་གྱུར་ཏོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་དགེ་འདུན་གྱི་དབྱེན་ཞེས་བགྱི། དགེ་ འདུན་མཐུན་པ་ཞེས་བགྱི་ན་དེ་ལ་དབྱེན་ནི་གང་ལགས། དགེ་འདུན་མཐུན་པ་ནི་གང་ལགས། ཉེ་བ་འཁོར་འདི་ལྟར་དགེ་སློང་རྣམས་ཆོས་ཀྱིས་ཆོས་མ་ཡིན་པའི་འདུ་ཤེས་དང་། ཆོས་མ་ཡིན་པས་ཆོས་ཀྱི་འདུ་ཤེས་དང་། མི་མཐུན་པ་ལ་མཐུན་པའི་འདུ་ ཤེས་ཀྱིས་ལས་རྣམས་བྱེད་ན་འདི་ནི་དགེ་འདུན་གྱི་དབྱེན་ཞེས་བྱའོ། །འདི་ལྟར་ཆོས་ལ་ཆོས་ཀྱི་འདུ་ཤེས་དང་། མཐུན་པ་ལ་མཐུན་པའི་འདུ་ཤེས་ཀྱིས་ལས་རྣམས་བྱེད་ན། འདི་ནི་དགེ་འདུན་མཐུན་པ་ཞེས་བྱའོ། །གང་ན་དགེ་སློང་གཅིག་གནས་པ་དེ་ན་དགེ་

  1214. 297b

    འདུན་གྱི་དབྱེན་དུ་མི་འགྱུར་རོ། །གང་ན་གཉིས་དང་གསུམ་ནས་བརྒྱད་ཀྱི་བར་གནས་པ་དེ་ན་ཡང་དགེ་འདུན་གྱི་དབྱེན་དུ་མི་འགྱུར་རོ། །གང་ན་དགེ་སློང་དགུ་འམ་ལྷག་པ་ཡོད་པ་དེ་ན་རྒྱུ་གཉིས་ཀྱིས་དགེ་འདུན་གྱི་དབྱེན་དུ་འགྱུར་ཏེ། གསོལ་བའི་ལས་དང་ཚུལ་ ཤིང་ལེན་པས་སོ། །གསོལ་བའི་ལས་ཇི་ལྟ་བུ་ཞེ་ན་འདི་ལྟར་ལྷ་སྦྱིན་གྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་དེ། ཚེ་དང་ལྡན་པ་དགེ་སྦྱོང་གཽ་ཏ་མ་ནི་འདི་སྐད་ཅེས་བརྟུལ་ཞུགས་ཀྱི་གཞི་ ལྔས་དགེ་སློང་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་། སྡུག་བསྔལ་ལས་འདའ་བར་འགྱུར། བདེ་བ་དང་སྡུག་བསྔལ་ལས་འདས་པ་ཐོབ་པར་གྱུར་ཏེ། ཚེ་དང་ལྡན་པ་དག་ལྔ་གང་ཞེ་ན། དགེ་སློང་དགོན་པ་ཉིད་ནི་ དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་། སྡུག་བསྔལ་ལས་འདའ་བར་འགྱུར། བདེ་བ་དང་སྡུག་བསྔལ་ལས་འདས་པ་ཐོབ་པར་འགྱུར་རོ། །ཚེ་དང་ལྡན་པ་དག་དགེ་སློང་ཤིང་དྲུང་ཉིད་དང་། བསོད་སྙོམས་པ་ཉིད་ དང་། ཆོས་གོས་གསུམ་པ་ཉིད་དང་། ཕྱག་དར་ཁྲོད་པ་ཉིད་ནི་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་ལས་འདའ་བར་འགྱུར། བདེ་བ་དང་སྡུག་བསྔལ་ལས་འདས་པ་ཐོབ་པར་འགྱུར་རོ་ཞེས་ཟེར་ན། ཚེ་དང་ ལྡན་པ་དག་ཁྱེད་ཅག་ལས་གང་བརྟུལ་ཞུགས་ཀྱི་གཞི་ལྔ་པོ་འདི་དག་གིས་དག་པ་དང་། གྲོལ་བ་དང་། ངེས་པར་འབྱུང་བར་མི་བཟོད་པ་དེ་དག་དགེ་སྦྱོང་གཽ་ཏ་མ་ལས་རིང་དུ་གྱིས་ཤིག །ཐ་དད་པར་གྱིས་ཤིག །རྒྱང་སྲིངས་ཤིག་ཅེས་ཟེར་བ་འདི་ནི་ གསོལ་བ་སྟེ། དེ་ལྟ་བུ་ནི་གསོལ་བའི་ལས་ཀྱིས་ཡིན་ནོ། །ཚུལ་ཤིང་ལེན་པ་ཇི་ལྟ་བུ་ཞེ་ན། འདི་ལྟར་ལྷ་སྦྱིན་གྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་དེ། ཚེ་དང་ལྡན་པ་དག་དགེ་

  1215. 298a

    སྦྱོང་གཽ་ཏ་མ་ནི་འདི་སྐད་ཅེས་བརྟུལ་ཞུགས་ཀྱི་གཞི་ལྔས་དགེ་སློང་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་ལས་འདའ་བར་འགྱུར། བདེ་བ་དང་སྡུག་བསྔལ་ལས་འདས་པ་ཐོབ་པར་འགྱུར་ཏེ། ཚེ་དང་ ལྡན་པ་དག་ལྔ་གང་ཞེ་ན། དགེ་སློང་དགོན་པ་པ་ཉིད་ནི་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་། སྡུག་བསྔལ་ལས་འདའ་བར་འགྱུར། བདེ་བ་དང་སྡུག་བསྔལ་ལས་འདས་པ་ཐོབ་པར་འགྱུར་རོ། །དགེ་སློང་ཤིང་དྲུང་པ་ ཉིད་དང་། བསོད་སྙོམས་པ་ཉིད་དང་། ཆོས་གོས་གསུམ་པ་ཉིད་དང་། ཕྱག་དར་ཁྲོད་པ་ཉིད་ནི་དག་པ་དང་། གྲོལ་བ་དང་། ངེས་པར་འབྱུང་བ་དང་། བདེ་བ་དང་སྡུག་བསྔལ་ལས་འདའ་བར་འགྱུར། བདེ་བ་དང་སྡུག་བསྔལ་ལས་འདས་པ་ཐོབ་ པར་འགྱུར་རོ་ཞེས་ཟེར་ན། ཚེ་དང་ལྡན་པ་དག་ཁྱེད་ཅག་ལས་གང་བརྟུལ་ཞུགས་ཀྱི་གཞི་ལྔ་པོ་འདི་དག་གིས། དག་པ་དང་། གྲོལ་བ་དང་། ངེས་པར་འབྱུང་བར་མི་བཟོད་པ་དེ་དག་དགེ་སྦྱོང་གཽ་ཏ་མ་ལས་རིང་དུ་འགྱུར། ཐ་དད་པར་འགྱུར། རྒྱང་སྲིང་བར་ འགྱུར་གྱིས་ཚུལ་ཤིང་ལོང་ཤིག་ཅེས་ལྷ་སྦྱིན་བདག་ཉིད་དང་ལྔས་ཚུལ་ཤིང་ལེན་པ་ཡིན་ཏེ། དེ་ལྟ་བུ་ནི་ཚུལ་ཤིང་ལེན་པས་ཡིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་རེ་ཞིག་གནས་ནས་ཕྱུང་བས་དགེ་ འདུན་གྱི་དབྱེན་དུ་འགྱུར་ལ་གནས་ནས་ཕྱུང་བའི་རྗེས་སུ་ཕྱོགས་པས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པས་མ་ལགས། གནས་ ནས་འབྱིན་པའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས་སམ། བཙུན་པ་རེ་ཞིག་གནས་ནས་ཕྱུང་བའི་རྗེས་སུ་ཕྱོགས་པས་དགེ་འདུན་གྱི་དབྱེན་དུ་གྱུར་ལ་གནས་ནས་ཕྱུང་བས་མ་ལགས། གནས་ནས་འབྱིན་པའི་རྗེས་སུ་ཕྱོགས་པས་མ་ལགས། གནས་

  1216. 298b

    ནས་ཕྱུང་བའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས་སམ། བཙུན་ པ་རེ་ཞིག་གནས་ནས་ཕྱུང་བའི་རྗེས་སུ་ཕྱོགས་པའི་རྗེས་སུ་ཕྱོགས་པས་དགེ་འདུན་གྱི་དབྱེན་དུ་འགྱུར་ལ་གནས་ནས་ཕྱུང་བས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པས་མ་ལགས། གནས་ནས་འབྱིན་པས་མ་ལགས། གནས་ནས་འབྱིན་ པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས་སམ། བཙུན་པ་རེ་ཞིག་གནས་ནས་འབྱིན་པས་དགེ་འདུན་གྱི་དབྱེན་དུ་འགྱུར་བ་ལ་གནས་ནས་ཕྱུང་བས་མ་ལགས། གནས་ནས་ཕྱུང་བའི་ རྗེས་སུ་ཕྱོགས་པས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས་སམ། བཙུན་པ་རེ་ཞིག་གནས་ནས་འབྱིན་པའི་རྗེས་སུ་ཕྱོགས་པས་དགེ་འདུན་གྱི་དབྱེན་དུ་འགྱུར་ལ་གནས་ནས་ཕྱུང་བས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས་སམ། བཙུན་པ་རེ་ཞིག་གནས་ནས་འབྱིན་པའི་རྗེས་སུ་ཕྱོགས་པའི་རྗེས་སུ་ཕྱོགས་པས་དགེ་འདུན་གྱི་དབྱེན་དུ་འགྱུར་བ་ལ་གནས་ནས་ ཕྱུང་བས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པས་མ་ལགས། གནས་ནས་ཕྱུང་བའི་རྗེས་སུ་ཕྱོགས་པའི་རྗེས་སུ་ཕྱོགས་པས་མ་ལགས། གནས་ནས་འབྱིན་པས་མ་ལགས། གནས་ནས་འབྱིན་པའི་རྗེས་སུ་ཕྱོགས་པས་མ་ལགས་

  1217. 299a

    སམ། ཉེ་བ་འཁོར་གནས་ནས་ཕྱུང་བ་འབའ་ཞིག་མ་གཏོགས་པར་འདི་དག་ཐམས་ཅད་ཀྱིས་དགེ་འདུན་གྱི་དབྱེན་དུ་འགྱུར་རོ།། །།བར་སྡོམ་ལ། དགེ་འདུན་དབྱེན་དང་མཐུན་པ་དང་། །གཅིག་ཏུ་དགེ་འདུན་དབྱེན་མིན་ དང་། །ཐ་མ་དགུ་པོ་དབྱེན་དང་ནི། །གནས་དབྱུང་གསུམ་པོ་དྲུག་ཚན་ཡིན། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཉན་ཐོས་ཀྱི་དགེ་འདུན་མཐུན་པའི་ དབྱེན་བགྱིས་ནས་མནར་མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་རོ་ཞེས་གང་གསུངས་པ་བཙུན་པ་ཇི་ཙམ་གྱིས་ན་ཉན་ཐོས་ཀྱི་དགེ་འདུན་མཐུན་པའི་དབྱེན་བགྱིས་ནས། མནར་ མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་ལགས། ཉེ་བ་འཁོར་འདི་ལྟར་དགེ་སློང་ཆོས་མ་ཡིན་པ་ལ་ཆོས་མ་ཡིན་པའི་འདུ་ཤེས་དང་། དབྱེན་ལ་ཆོས་མ་ཡིན་པའི་འདུ་ཤེས་ཀྱིས་ དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱིས་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་གིས་ཉན་ཐོས་ཀྱི་ དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཆོས་མ་ཡིན་པའི་འདུ་ཤེས་ དང་། དབྱེན་ལ་ཆོས་ཀྱི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་

  1218. 299b

    བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས་མནར་མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཆོས་མ་ ཡིན་པའི་འདུ་ཤེས་དང་། དབྱེན་ལ་ཡིད་གཉིས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཆོས་ ཀྱི་འདུ་ཤེས་དང་། དབྱེན་ལ་ཆོས་མ་ཡིན་པའི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་ གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ ཆོས་ཀྱི་འདུ་ཤེས་དང་། དབྱེན་ལ་ཆོས་ཀྱི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཆོས་

  1219. 300a

    ཀྱི་འདུ་ཤེས་དང་། དབྱེན་ལ་ཡིད་གཉིས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ ཆོས་ལ་ཆོས་མ་ཡིན་པའི་འདུ་ཤེས་དང་། དབྱེན་ལ་ཆོས་མ་ཡིན་པའི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་རོ། ། ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཆོས་མ་ཡིན་པའི་འདུ་ཤེས་དང་། དབྱེན་ལ་ཆོས་ཀྱི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་ གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་ འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཆོས་མ་ཡིན་པའི་འདུ་ཤེས་དང་། དབྱེན་ལ་ཡིད་གཉིས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་དགེ་

  1220. 300b

    འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ཐོ་བའི་ལས་ཀྱིས་ ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཆོས་ཀྱི་འདུ་ཤེས་དང་། དབྱེན་ལ་ཆོས་མ་ཡིན་པའི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་ པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ཁ་ན་མ་ ཐོ་བའི་ལས་ཀྱིས་ནི་རེག་པར་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཆོས་ཀྱི་འདུ་ཤེས་དང་། དབྱེན་ལ་ཆོས་ཀྱི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་ དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་མཚམས་མེད་པའི་ ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཆོས་ཀྱི་འདུ་ཤེས་དང་། དབྱེན་ལ་ཡིད་གཉིས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་ དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་

  1221. 301a

    པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཡིད་གཉིས་དང་། དབྱེན་ལ་ཆོས་མ་ཡིན་པའི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་ བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས་མནར་མེད་པའི་ཁ་ན་ མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཡིད་གཉིས་དང་། དབྱེན་ལ་ཆོས་ཀྱི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་མ་ཡིན་པ་ལ་ཡིད་གཉིས་དང་། དབྱེན་ལ་ཡིད་གཉིས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་ གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཡིད་གཉིས་དང་། དབྱེན་ལ་ཆོས་མ་ཡིན་པའི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད།

  1222. 301b

    ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་ མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཡིད་གཉིས་དང་། དབྱེན་ལ་ཆོས་ཀྱི་འདུ་ཤེས་ཀྱིས་དགེ་སློང་རྣམས་ལ་གོ་བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་གྱི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །ཉེ་བ་འཁོར་འདི་ལྟར་དགེ་སློང་གིས་ཆོས་ལ་ཡིད་གཉིས་དང་། དབྱེན་ལ་ཡིད་གཉིས་ཀྱིས་དགེ་སློང་རྣམས་ལ་གོ་ བར་བྱེད། ཀུན་ཏུ་གོ་བར་བྱེད། སློབ་པར་བྱེད། འཛིན་དུ་འཇུག་པར་བྱེད་ཅིང་། དགེ་འདུན་མཐུན་པའི་དབྱེན་བྱ་བའི་ཕྱིར་ཕ་རོལ་གནོན་པར་བྱེད་ན། འདི་ཙམ་གྱིས་ན་ཉེ་བ་འཁོར་དགེ་སློང་ཉན་ཐོས་ཀྱི་དགེ་འདུན་མཐུན་ པའི་དབྱེན་བྱས་ནས། མནར་མེད་པའི་ཁ་ན་མ་ཐོ་བ་སྐྱེ་ཞིང་། མཚམས་མེད་པའི་ཁ་ན་མ་ཐོ་བའི་ལས་ཀྱིས་ནི་རེག་པར་མི་འགྱུར་རོ། །དེ་ལྟར་ན་དེ་དག་ནི་མུ་བཅྭ་བརྒྱད་དུ་འགྱུར་ལ། དེ་དག་ལས་དྲུག་ལ་ནི་མཚམས་ མེད་པའི་ཁ་ན་མ་ཐོ་བའི་ལས་ཀྱིས་རེག་པར་འགྱུར་ཏེ། དབྱེན་ལ་ཆོས་མ་ཡིན་པར་འདུ་ཤེས་པ་གང་དག་ཡིན་པའོ། །ལྷག་མ་རྣམས་ནི་མཚམས་མེད་པའི་ཁ་ན་མ་ཐོ་བའི་ལས་ཀྱིས་རེག་པར་མི་འགྱུར་རོ། །དགེ་

  1223. 302a

    འདུན་གྱི་དབྱེན་གྱི་གཞི་རྫོགས་སྷོ།། །།འདུལ་བ་གཞི་རྫོགས་སོ།། །།ཐུབ་དབང་ཟླ་བའི་ཞལ་ནས་བྱུང་གྱུར་པ། །གསུང་གི་མེ་ཏོག་ ཆར་པ་ཡིད་འོང་རྣམས། །ལྟ་བ་ངན་ཟློག་རྙི་བ་མེད་པ་ཡི། །རང་བཞིན་ཡུན་རིང་སྐྱེ་དགུའི་ནང་གནས་ཤོག །ཁ་ཆེའི་མཁན་པོ་སརྦ་ཛྙཱ་དེ་བ་དང་། རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། ཁ་ཆེའི་མཁན་ པོ་དྷརྨཱ་ཀ་ར་དང་། ལོ་ཙྪ་བ་བན་དེ་དཔལ་གྱི་ལྷུན་པོས་བསྒྱུར་ཅིང་། རྒྱ་གར་གྱི་མཁན་པོ་བིདྱཱ་ཀ་ར་པྲ་བྷ་དང་། ཞུ་ཆེན་གྱི་ལོཙྪ་བ་བན་དེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །། བཟོད་པ་དཀའ་ཐུབ་དམ་པ་བཟོད་པ་ནི། །མྱ་ངན་འདའ་བ་མཆོག་ཅེས་སངས་རྒྱས་གསུང་། །རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ།། །།ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་ དཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎཿ།། །།

Colophon

'dul ba gzhi rdzogs so/ thub dbang zla ba'i zhal nas byung gyur pa/ gsung gi me tog tshar pa yid 'od rnams/ lta ba ngan zlog rnyi ba med pa yi/ rang bzhin yun ring skye dgu'i nang gnas shogag /kha che'i mkhan po sa rba dz+nyA de ba dang / rgya gar gyi mkhan po bi d+yA ka ra pra b+ha dang / kha che'i mkhan po d+ha rmA ka ra dang / lo tsA ba ban de dpal gyi lhun pos bsgyur cing / rgya gar gyi mkhan po bi d+yA ka ra pra b+ha dang / zhu chen gyi lo ts+tsha ba ban de dpal brtsegs kyis bsgyur cing zhus te gtan la phab pa'o/ bzod pa dka' thub dam pa bzod pa ni/ mya ngan 'da' ba mchog ces sangs rgyas gsung / rab tu byung gzhan la gnod pa dang / gzhan la 'tshe ba dge spyod ma yin no/ ye d+ha rmA he tu pra b+ha bA he tun+he ShAn+ta thA ga to h+ya ba data/ te ShAny+tsa yo ni ro d+ha i baM bA dI ma hA shra ma naH/