N1895MW22704_1895rgyud 'grelAll versions of this work

de kho na nyid bcu pa'i rgya cher 'grel pa

Tattvādaśakaṭīkā

Text

ff. 171a–190a · 39 folio sides

  1. 171a

    mgon pos gsungs pa de bzhin blo chung rnams kyi yul min ngo mtshar che/ /de yi rjes su gnang ba bsgoms pas de yi rnam par dpyad pa dag/ nus pa ji bzhin blo yi gsung rab dran nas brjod par byas/ /dbang gi nges par gyur pa zab mo rgya mtsho yi/ /'grel pa gsal po 'di na byas pa las/ /bdag gis dge ba skad cig bsags pa des/ /skye bo ma lus pa dag rgyal gyur cig /bzhi pa'i rim la rmongs pa yi/ /dpung gi tshogs gang 'jig byed pa/ /dbang bskur nges bstan dka' 'grel 'di/ /dga' ba'i dpal ldan mgon pos bris/ /dbang bskur ba nges par bstan pa'i dka' 'grel /slob dpon dga' ba skyong gis mdzad pa rdzogs so// //sa man+ta b+ha dra dang/ nag tshos bsgyur ba'o// (lhan skyes rdo rjes mdzad pa'i de kho na nyid bcu pa'i 'grel pa bzhugs//) //rgya gar skad du/ tat+twa da sha ka TI kA/ bod skad du/ de kho na nyid bcu pa'i rgya cher 'grel pa/ dpal rdo rje sems dpa' la phyag 'tshal lo/ /gang dag ngo bo dam pa bla ma'i cha yi snying rje'i mthu las ni/ /zung du 'jug pa'i dngos po de bzhin nyid du rdzogs pa'i byang chub 'gyur/ /de dag nyid las gus par phyag byar 'os shing rtag tu bsten par rigs/ /de la btud de de nyid bcu pa'i rnam bshad yang dag brtsom par bya/ /de nas slob dpon 'di'i zhal snga nas tshad ma dang dbu ma dang lung gi grub pa'i don la 'jug pa'i rim pa rgyas par bstan nas sngags kyi lugs kyi rjes su 'thun pa'i pha rol tu phyin pa'i man ngag mdor bsdus pa mdzad par bzhed pas rab tu byed pa'i brjod par bya ba bsgrub par bya ba dang sgrub par byed pa dang/ de kho na nyid kyi bdag nyid gzhan shes rab kyi pha rol tu phyin pa zhes bya ba'i ming can chos nyid kyi bdag nyid kyis sku gsum gyi ngo bo nyid kho na la dang por phyag bya ba'i phyir/ /gang zhig yod med sbyor ba spangs/ /de bzhin nyid

  2. 171b

    la phyag 'tshal 'dud/ /ces bya ba smos te/ chos rnams ji lta ba bzhin du yod pas de bzhin nyid de/ de bzhin nyid dang/ chos nyid dang/ chos kyi dbyings dang/ yang dag pa'i mdza' dang/ don dam pa dang/ stong pa nyid ces bya ba la sogs pa ni rnam grangs so/ /mgon po byams pas kyang/ stong pa nyid ni mdor bsdu na/ /de bzhin nyid dang yang dag mdza' / mtshan ma med dang don dam ste/ /chos kyi dbyings ni rnam grangs so/ /zhes ji skad gsungs pa lta bu'o/ /yod pa dang med pa dag tu zhen pa ni yod pa/ dang med pa'i sbyor ba ste/ de dag spangs pa ni bral ba'o/ /de nyid la phyag 'tshal zhing 'dud pa ste/ lhag par mos pas lan gnyis brjod de/ /de la yod pa'i sbyor ba ni yod pa ste/ bden pa dang/ dngos po dang 'khor ba dang/ skye ba dang rtag pa zhes bya ba la sogs pa don gcig go /med pa'i sbyor ba ni med pa ste/ mi bden pa dang/ dngos po med pa dang/ ma skyes pa dang/ mya ngan las 'das pa dang/ chad pa zhes bya ba la sogs pa don gcig go /de bzhin nyid la ni yod pa dang med pa'i sbyor ba dang bral bas 'gro ba rten cing 'brel par 'byung ba'i mtshan nyid can no/ /dngos po ngo bos skye ba med/ /ma skyes nam mkha' i me tog bzhin/ /ma skyes pa yi rang bzhin gyis/ /skye ba de bzhin nyid du 'dod/ /de phyir dngos po yod pa min/ /srid min mya ngan 'das pa min/ /bde ba ma yin mi bde min/ /rtag pa ma yin chad pa'ang min zhes bya ba ni bsdu ba'i tshigs su bcad pa'o/ /de nyid klu sgrub kyi zhal snga nas kyang/ blo gros dman pa 'ga' zhig gis/ /yod pa'am ni med mthong ba/ de yi dngos rnams nyer zhi zhing/ /dge ba'i blta bya nyid ma mthong/ /yod pa zhes bya rtag par lta/ /med pa'o snyam na'ang chad pa ste/ /mdza' de gnyis las rnam grol bar/ /chos 'di rgyal bas bstan pa yin/ /blo gang yod dang med pa las/ /rnam par 'das shing mi dmigs pa/ /de dag dmigs

  3. 172a

    med zab mo'i blos/ /rten cing 'brel 'byung don sgom byed/ /dngos pos grol ba ma yin la/ /de las dngos med kyis kyang min/ /dngos dang dngos med yongs shes nas/ /bdag nyid chen po grol par 'gyur/ /'khor ba dang ni mya ngan 'das/ /gnyis pa nyid ni yod ma yin/ /'khor ba nyid ni yongs shes na/ /mya ngan 'das pa zhes byar brjod ces gsungs so/ /yod pa dang med pa'i sbyor ba zhes bya ba ji lta bu zhe na/ smras pa/ re zhig 'gro ba 'di dag ni/ /gcig dang du ma bral phyir med/ /ri dang rgya mtsho sa gzhi dang/ /khyim la sogs pa tha dad par/ /sna tshogs 'di dag rab snang phyir/ /rang bzhin gcig par rig pa min/ /ri la sogs pa so so yang/ /so so'i cha yis rig pa min/ /de lta mod kyi rdul phra rab dag mi phyed pa'i lus can so so re re ba yin no zhe na/ de dag kyang yod pa yin te /phyogs cha'i bye brag gi tha dad pa'i phyir ro/ /de skad du yang klu sgrub kyi zhal snga nas kyis/ phyogs kyi cha shas tha dad pas/ /rdul phran la yang tha dad snang/ /cha shas cha shas can brtags gang/ / de la rdul phran ji ltar yod/ /ces gsungs pa dang/ gzhan las kyang/ drug gis gcig car sbyar ba yis/ /rdul phran cha shas drug po nyid/ /drug po rnams ni yul gcig na/ /gong bu rdul phran tsam du 'gyur/ /zhes bshad pa yin no/ /rdul phran rnams ma grub par ni gcig pa cung zad kyang mi 'grub la/ gcig pa nyid ma grub par yang de bsags pa'i ngo bo nyid du ma yang mi 'grub bo/ /gcig dang du ma dang bral ba'i dngos po gang zhig yod par 'gyur na mthong ba 'am 'dod par rung ba ma yin te/ de yang/ dngos po gang la rnam dpyad na/ /de dang de la gcig med pa/ /gang la gcig pa nyid med pa/ /de la du ma'ang yod ma yin/ /zhes bshad do/ /gcig dang du ma dang bral ba'i gtan tshigs 'di ni gsung rab dang ldan pa ma yin no zhe na/ ji ltar me long la ni gzugs//

  4. 172b

    gcig dang gzhan pa rnams spangs pa/ /snang yang de na yod ma yin/ /de bzhin dngos po dngos rnam nyid ces bya ba la sogs pa bcom ldan 'das nyid kyis shin tu gsal bar bstan pa'i phyir ro/ /'gro ba gang la yod pa ma grub pa de la med pa yang ma yin te/ med pa ni yod pa med pa'i rang bzhin yin pa'i phyir ro/ /de yang bcom ldan 'das kyis yod pa'i sngon 'gro med pa ste/ mer pa yod pa'i sngon 'gro yin/ /de phyir med par mi bsam ste/ /yod pa rung yang mi brtag go zhes gsungs la/ klu sgrub kyis kyang/ stong pa nyid du khas blangs na/ /rtag dang chad pa'i lta pa ste/ /yod par khas mi len pa la/ /chad pa med cing rtag pa med/ /med pa yod na yod par 'gyur/ /yod pa yod na med pa nyid/ /dper na ring thung yod pa bzhin/ /ring po la brten thung du bzhin/ /me nyid la brten yod pa'o/ /de phyir gang la gnyis ka med/ /ces pa'o/ /yod pa dang med pa'i sbyor ba dang bral ba'i tshig gis mdza' bzhi dang bral ba de bzhin nyid du bstan pa yin no/ /yod pa dang med pa nyid rnam par bsregs pa dgag pa'i bdag nyid yin pa'i phyir phyogs gzhan dag go /kye skyes bu de ltar na yod pa bkag pa de nyid med pa bkag par yang 'grub par 'gyur te/ ci'i phyir gnyis ka bkag ce na/ de bzhin du yang bcom ldan 'das kyis yod pa bkag pa nyid kyis 'gro ba dngos po med pa tsam du gsungs pa ting nge 'dzin gyi rgyal po la sogs pa las chos thams cad dngos po med pa/ mtshan ma med pa/ mtshan nyid med pa zhes bya ba la sogs pa'i tshig gis so/ /'dir kha cig gis lan smras te/ 'dir chad par smra ba'i yang yod pa'o/ / de yod pa bkag pas med pa nyid de/ 'gro ba rnams chad pa'i dngos por khas blangs par 'gyur bas de bsal bar bya ba'i phyir gnyis ka bkag par bstan to zhes zer ro/ /de'i lan 'di rig pa ma yin te/ gnyis ka dang gnyis ka ma yin pa'i smra ba'i yang

  5. 173a

    yod pa dag de dgag pa'i 'thad par thal bar 'gyur ro/ /'di las gzhan nyid ni stong pa 'ba' zhig tu smra ba gang gi phyir yod pa bkag pas med pa nyid nam mkha' i me tog ltar 'gro bar 'gyur bar khas blangs par 'gyur te/ de'i 'dod pa bsal bar bya ba'i phyir zung du 'jug pa 'di bstan pa nyid do/ /de yang rtogs par bya ba nyid do/ /gang la yang stong pa 'ba' zhig tu bstan pa ni de la yang shes kyi cha gtso bo bstan pa nyid kyi phyir ro/ /bden pa gnyis zung du 'jug pa'i dbral bar bya ba'i phyir ni ma yin no/ /gzhan dag ni gzhan du bzlog par byed do bstan pa'i dbye ba 'dir skyon med de/ kha cig gis dngos po bkag ste dngos po med tsam bstan to/ kha cig dngos po dang dngos po med pa dang bral ba'o/ /kha cig gis mdza' bzhi dang bral pa'o/ /yang de bzhin nyid tha dad pa ni med do/ /de ltar ni 'gyur mod kyi/ /ci'i phyir de bzhin nyid kho na la phyag 'tshal te/ sangs rgyas bcom ldan 'das la ma yin zhe na/ zhes bya ba de'i phyir/ /gang la rtog pa med pa nyid/ /byang chub rtogs pa'i rang bzhin can zhes smras te/ gang la ni gang gi phyir te/ de nyid de bzhin nyid do/ /rtog pa ni khong du chud pa'i sgo nas so/ /rnyog pa med pa ni dri ma med pa'o/ /byang chub rang bzhin ni yang dag par rdzogs pa'i sangs rgyas nyid kyi ngo bo yin pa de'i phyir de nyid la phyag bya ba yin te/ tha dad pa med pa'i phyir ro/ /yang gang gi phyir chos kyi rang bzhin gyis dri ma med pa dang rnyog pa med pa nyid ma 'khrul ba'i de bzhin nyid do/ /de ltar rang gi ngo bo ma rtogs pas phyin ci log gi ngo bor bzhag pa yang nyon mongs pa dang las dang skye ba rnams kyi 'khor bar 'byung ba'i phyir rnyog pa rnams so sor snang bar 'gyur ro/ /'di rnams kyi rang gi ngo bo ma rtogs pa ni glo bur gyi dri ma zhes brjod do/ /glo bur 'di dag shin tu spangs pa ni rnam par dag pa zhes bya'o/ /de

  6. 173b

    skad du mgon po byams pas kun nas nyon mongs med rnam dag/ de ni drir bcas dri ma med/ /chu khams gser dang nam mkha' bzhin/ /dag pa bzhin du dag par 'dod/ /gal te nyon mongs de ma gyur/ /lus can thams cad grol bar 'gyur/ /gal te rnam dag de ma gyur/ /'bad pa 'bras bu med par 'gyur/ /zhes pa'o/ /de ltar thams cad 'dir bsgrub par bya ba dang sgrub par byed pa'i tha snyad rnams ni kun rdzob nyid do/ /sangs rgyas nyid dang rdo rje 'dzin pa nyid ni kun rdzob la rab tu sgrub par bya'o zhes gsung rab las so// don dam pa ni de la de bzhin nyid ni nyon mongs pa dang ldan pa ma yin la rnam par dag pa yang ma yin te/ de skad du yang de nyid kyis/ nyon mongs ma yin mi mongs min/ /de nyid dag dang ma dag min/ /zhes pa'o/ 'dis ni rab tu byed pa'i brjod par bya ba'i dngos po gsum bstan te/ yod pa dang med pa'i sbyor ba spangs pa 'di dag nyid kyi chos nyid kyi bdag nyid kyi dngos po'o/ gang la rnyog pa med pa nyid rtog pa zhes bya ba dag ni rtogs par bya zhing bsgom par bya ste/ de nyid sgrub par byed pa'i dngos po'o/ /byang chub rang bzhin zhes bya ba 'di ni mngon sum du bya ba'i don sgrub par bya ba'i dngos po'o/ /de ltar ni 'gyur mod kyi tshad ma dang gzhal bya dag gi dngos po gang yin pa'i phyir dngos po lnga sbyar bar mi bstan zhe na/ de ni bden te/ /'on kyang de dag sngar gnas pa'i yod par tshad mas rab tu grub pa'i de bzhin nyid 'dir man ngag go sgo nas zung du 'jug pa rab tu sgrub pa yin te/ de dag ni 'di dam bstan to/ /gcig dang du ma dang bral ba'i phyir zhes bya ba la sogs pa'i yang rab tu sgrub pa'i rig pa nyid dran pa'i phyir ro/ /gang gi phyir sbyod pas rab tu grub pa nyid de bzhin nyid de kho na nyid la sogs pa'i dngos po ma yin te/ bla ma dam pa'i man ngag dang bral bas shes kyi cha 'ba' zhig ni thabs dang bral ba'i phyir ro/ /gang dag 'chad par 'gyur ba yi/ /bla ma'i

  7. 174a

    dag gi ma rgyan pa'i/ /dbu ma'ang 'bring po tsam nyid do/ /zhes pas gzhan du ni dngos po gsum po 'di dag bstan to/ /'dir dbu mas ni tshad ma dang gzhal bya 'jug pa ma yin te/ rang dang gzhan zhes bya ba la sogs pa'i rnam par dpyod pa mi bzod pa'i phyir ro/ /zhes snyam du sems so/ /de ni 'thad pa ma yin te/ tshad ma med pa'i phyir bsgrub par bya ba dang sgrub par byed pa'i dngos po gnas pa dka' o/ /de rnams kun rdzob nyid yin gyi don dam par ni ji ltar 'gyur zhes bya ba'i tshig gis so/ /tshad ma dang gzhal bya med pa rnams kyang kun rdzob du yod pa nyid yin na/ de ji ltar rang dang gzhan las zhes bya ba la sogs pa brtog ce na/ ji ltar 'gyur ba da ltar khas len pa yin te/ phal cher lam 'dir tshad ma rnams gtsug gi nor bu chos kyi grags pa'i rjes su 'brangs te/ de la brten nas de'i lam gyi rjes su 'brangs nas 'di thams cad kyi rnam par bzhag pa sbyar ba yin te/ rang gi yid kyis de dag sgeg pa ni ma yin no/ /de'i lam gyi rjes su 'brangs pas yang rang bzhin grub par 'gyur ro zhe na/ ma yin te/ ji lta bu zhe na/ re zhig phyi rol gyi don rgyas pa rnam par bzhag pa dgos pa'i dbang gis byas kyang gong ma gong ma'i rigs pas brtsad nas phyung ba yin no/ /de nyid kyi skabs dbye bar bya ste/ gang gis dngos por dpyad bya ste/ /de nyid la ni dngos de med/ /gang phyir gcig dang du ma dag /rang bzhin de la yod ma yin/ /'di dag de nges las 'ongs pa/ /gang yang mkhas pa rnams kyis smras/ /ji lta ji ltar don bsams pa/ /de lta de ltar rnam par nyams/ /des na mtshan nyid stong pa'i phyir// rang bzhin med par bstan pa'i phyir/ /zhes bya ba la sogs pa shin tu gsal bar brjod do zhes shin tu spros pas chog go /skabs su bab pa'i rjes su 'brel pa brjod par bya ste/ rab tu byed pa 'di'i brjod par bya ba ni de bzhin nyid kyi de kho na nyid do/ /de yang

  8. 174b

    phyag 'tshal bdag gtso bo yis bstan to/ /rjod par byed pa ni rab tu byed pa nyid do/ /'di dag gis ni yang brjod par bya ba dang rjod par byed pa'i mtshan nyid kyi 'brel pa don gyis bstan to/ /rab tu byed pa'i dgos pa yang brjod par bya ba'i don rtogs pa'o/ /de'i dgos pa'i gtso bo ni sems can gyi don byed pa'o/ /gtso bo ma yin pa ni de nyid bsgoms pas sangs rgyas la sogs pa'o/ /de skad du/ gzhan don phun tshogs sangs rgyas rnams/ /'bras bu'i gtso bo lhag par 'dod/ /sangs rgyas nyid sogs gzhan gang ni/ /de yi don phyir 'bras bur 'dod/ /ces pa'o/ /de lta bur gyur pa'i zung du 'jug pa'i de bzhin nyid yongs su shes pas 'dod pa don du gnyer ba khas blang bar bya bar 'gyur ba dag yin zhes pa la/ de bzhin nyid ni shes 'dod pas/ /rnam bcas ma yin rnam med min/ /zhes bya ba smras te/ rnam pa dang bcas pa'i 'jug pa ni rnam pa dang bcas pa'i shes pa'o/ /rnam pa gsal ba ni rnam pa med pa'o/ /rnam pa dang bcas pa zhes bya ba'i sgras mdo sde ba dang/ rnal 'byor spyod pa ba dag gzung ba'o/ /rnam pa med pa zhes bya ba yang bye brag tu smra ba dang/ rnal 'byor spyod pa'i bye brag dag bsdus pa'o/ /'di dag gis ni rnam pa bcas pa dang rnam pa med pa'i 'dod pa bsdus pa'o/ /de bzhin nyid ni shes 'dod pas skyes bu dag gi blang bya nyid dag tu mi 'gyur te/ gnyis kas kyang rang bzhin du khas blangs pa'i phyir ro/ /de yang dpyad mi bzod pas kho na nyid kyi mtshan nyid dang bral ba yin no/ /ji ltar yang gang gi phyir theg pa chen po la sems can rnams 'jug pa'i phyir gnas pa'i khyad par bstan par mdzad de/ de ltar na theg pa chen po'i nges don ni ma yin te/ drang ba'i don yin pa'i phyir ro/ /gtso bo'i nges don ni rang bzhin med pa nyid de/ de nyid

  9. 175a

    thos pa dang bsam pa dag gis bsgom par byas pas nges par 'bras bu 'byung bar 'gyur ro/ /ji skad du ting nge 'dzin gyi rgyal po las/ nges pa don gyi mdo sde'i bye brag shes/ /bde gshegs ji skad bstan pa'i stong pa nyid/ /slar yang gang zag sems can skyes bu rnams/ /chos rnams thams cad drang ba'i don du shes/ /chos bdag med la so sor rtog par byed/ /so sor rtog pas gal te sgom par byed/ /de yi rgyu yis mya ngan 'das thob 'gyur/ /gang yang gzhan dag zhi ba'i rgyur mi 'gyur/ /chos kun rang bzhin rtag tu stong pa nyid/ /rgyal sras dngos po rnam par bsgom pa ni/ /kun gyis kun tu thams cad stong par 'gyur/ /nyi tshe'i stong nyid mu stegs can rnams kyi zhes gsungs pa'o/ /dbu ma la 'jug pa las gsungs pa/ de ltar gang phyir shin tu zab mo'i dngos po ni/ /gang gis mi shes de ni rab tu bstan bya ba/ /kun gzhi yod cing gang zag stong nyid yod/ /phung po 'di dag nyid ni 'ba' zhig dang/ /'jig tshogs lta ba spangs pa'i sangs rgyas kyis/ /nga dang bdag ces ji ltar ston pa ltar/ /de ltar dngos po thams cad rang bzhin gyis/ /med pa'i drang ba'i don ni ston par 'gyur zhes pa'o/ /yang rnam bcas ma yin rnam med min/ zhes bya ba ni rnal 'byor spyod pa pa gang dag gi 'dod pa nyid blang bar bya ba ma yin pa de nye bar len pa'o/ /de dag gi gzung ba dang 'dzin pa'i dngos po stong pa'i bdag nyid de bzhin du khas blangs pa'i phyir gang gi phyir rang bzhin stong pa nyid khas len pas rang bzhin med pa'i mtshan nyid de bzhin nyid med pa'i phyir drang ba'i don du sems tsam du bstan pa yin no/ /ji skad du klu sgrub kyi zhal snga nas kyang/ 'di dag thams cad sems tsam zhes/ /thub pa chen pos bstan pa yin/ /'jig pa yongs su spangs phyir te/ /rang gi mtshan nyid de nyid min zhes pa'o/ yang na/ rnam bcas ma

  10. 175b

    yin rnam med min zhes bya ba ni rnam pa dang bcas pa'i dbu ma dang/ rnam pa med pa'i dbu ma bsal bar bya ba'i gtso bo 'di dag go /gang gi phyir zhi ba 'tsho'i zhal snga nas la sogs pa rnam pa dang bcas pas dbu ma nyid khas len par byed de/ de skad du/ bdag dang gzhan smras dngos po yi/ /chos 'di dag ni rang bzhin med/ /gcig dang du ma'i rang bzhin nyid/ /bral ba'i phyir na gzugs brnyan bzhin/ /dngos po gang gang rnam dpyad na/ /de dang de yi gcig nyid med/ /gang la gcig nyid yod min pa/ /de la du ma nyid kyang med/ /gcig dang du ma rnam spangs pa'i/ /rnam pa gzhan dang ldan pa yi/ dngos po mi rung de gnyis ni/ /phan tshun spangs te gnas phyir ro/ /de phyir dngos po 'di dag ni/ /kun rdzob pa nyid mtshan nyid 'dzin/ /gal te 'di dag don 'dod na/ /de la bdag gis ci byar yod/ /ma brtags gcig pu nyams dga' ba'i/ /skye dang 'jig pa'i chos can la/ /rang bzhin kun rdzob pa yin rig /rig pa'i lam gyi rjes 'brangs nas/ /dngos po kun gyi rang bzhin ni/ /gzhan dag 'dod pa 'gog pa yin/ /rtsod pa ngan pa'i gnas med do/ /ma brtags pa na nyams dga' ba'i/ /bdag rgyud snga ma snga ma la/ /brten nas phyi ma phyi ma yi// 'bras bu de dang 'dra ba yin/ /de phyir kun rdzob rgyu med na/ /rung min zhes pa rung ma yin/ /gal te 'di yi nyer len pa/ /yang dag yin na de smos shig /de phyir yang bdag nyid du na/ /dngos po gang yang grub pa med/ /de phyir de bzhin gshegs rnams kyis/ /chos rnams thams cad ma skyes gsungs/ /dam pa'i don dang mthun pa'i phyir/ /'di ni dam pa'i don zhes bya/ /yang dag tu na spros pa yi/ /tshogs rnams kun las de grol yin/ /rgyu dang 'bras bu'i dngos po 'di/ /kun rdzob nyid du ma bzlog pas/ /kun nas nyon mongs rnam byang sogs/ /rnam par bzhag pa 'khrugs pa med/ /rgyu dang 'bras bur gyur pa yang/ /shes pa 'ba' zhig kho na ste/ /rang gis grub pa gang yin pa/ /de ni shes par nus ma yin/ /rang nyid grub pa'i rang bzhin yang/ /rmi lam sgyu ma'i ngo bo bzhin/ /de yi

  11. 176a

    phyir na gzugs sogs sems/ /phyi rol tu yang 'dod pa min/ /sems tsam la ni brten nas su/ /phyi rol dngos med shes par bya/ /tshul 'dir brten nas de la yang/ /shin tu bdag med shes par bya/ /tshul gnyis shing rta zhon nas su/ /rig pa'i srab skyogs 'dzin byed pa/ /de dag de phyir ji bzhin don/ /theg pa chen po pa gnyis 'thob/ ces pa'o/ /rnam pa med pa'i dbu ma yang la ba'i na bza' can la sogs shes pas khas len te/ de skad du de yis nyer len las skyes dri ma yis/ /bdag nyid dbyer med pa bsgribs te/ /blo ni shel sgong dag pa ltar/ /gzhan gyi gzugs su snang ba yin/ /ji ltar shin tu mkhas pa yis/ /de ltar 'di nyid gnyis su snang/ /sems kyi rnam pa 'khrul pa'i phyir// gzung dang 'dzin pa tha dad do/ /brtags sogs bdag nyid ma lus pa/ /de phyir bya ba gsum du snang/ /don du 'dzin dang don dang ba/ /stong pa nyid dang ldan pa dag /don ston don snang rang bzhin dang/ /log pa'i don 'dzin dngos po ni/ /gcig tu glang chen gcig pu yi/ /sgyu ma'i rnam pa 'phrul byed de/ /glang chen don dang de snang ba/ mkhas pa la ni de dngos med/ /rang bzhin brtags pa la sogs pa/ /ji ltar grangs bzhin shes par bya/ /yongs su rdzogs pa'i ye shes ni/ /thams cad ro gcig bdag nyid de/ /thog mdza' med cing cha med pa/ /rnam pa med pa gzungs med pa/ /rang rig rnam par rtog par snang/ /rnam par rtog pa gzhan gyi rgyu/ /de nyid don dam pa yin te/ /rnam par rtog pa bzlog pa'o/ /don dam nyid la rnam rtog gi /mkhas pas rnam rtog gos pa med/ /dge ba 'am ni mi dge ba'i/ /gang phyir rnam rtog tha dad pa'i/ /de dag bsal bar bya phyir dmigs/ /slar yang bde la stong pa nyid/ /gang phyir lta kun byas pa rnams/ /stong pa nyid kyi rab dbye ste/ /bzung dang 'dzin pa spangs pa'o/ /gal te stong

  12. 176b

    pa nyid du bstan/ /de ni dbyu gu gcig lugs dang/ /khyad par yod par ji ltar 'gyur/ /rang rig la gnas ma gyur zhes/ /de phyir 'jigs la thug pa yi/ /chos rnams mdza' dag bstan nas ni/ stong pa'i bdag nyid bstan pa yin/ /thams cad mtshungs par rab tu dpyad byas na/ /phra bar lta bas blo yis thar byas te/ /sangs rgyas pa dang phyi rol rnam phye ba/ /gcig kyang mi dmigs stong par smra bar byed/ /ces bya ba la sogs pa'o/ /rnam pa med par smra ba'i rnal 'byor spyod pa rnams kyang yongs su grub pa'i shes pa de nyid khas len par byed de/ gzung ba dang 'dzin pa dag gis stong pa'i rang rig pa'i ngo bo ni med pa ma yin no/ /rnam pa med par smra ba'i dbu ma pas ni yongs su grub pa yang rnal 'byor gyi kun rdzob kyi ngo bo yin te/ /don dam par ma skyes pa nyid 'di ni bye brag go /de'i phyir rnam pa dang bcas pa dang rnam pa dman pa'i phyir/ de bzhin nyid ni shes 'dod pas/ bla mar bya ba ma yin no/ /gang gi phyir dbum pa yang rnam pa dang bcas pa nyid dam/ rnam pa med pa 'byung ba nyid ni ma yin te/ rnam par shes pa la brten pa'i phyir ro/ /'di dag ni nges pa'i don ston pa'i shes rab kyi pha rol tu phyin pa la sogs par shes pa cung zad kyang bstan pa yod pa ma yin no/ /gang gi phyir gzugs la sogs pa med pa'i rnam par shes pa stong pa nyid du gsungs so/ /'on kyang ji ltar rnam par shes pa ni rnam par shes pa'i rang bzhin gyis stong ngo/ /de bzhin du gzugs la sogs pa yang gsungs so/ /gang la sems tsam du bstan pa 'di la yang gzugs ni thams cad las rags pa yin pas gzugs su zhen pa bzlog pa'i phyir de ni drang ba'i don nyid do/ /de skad du mdo las/ las rnams sna tshogs sems kyis mthong ba dang/ /gang la phyi rol dngos po mthong ba med/ /gzugs su shin tu zhen gang bzlog pa'i phyir/ /de yang drang ba'i don phyir 'di nyid do/ /ston pa yis ni drang ba'i don yang

  13. 177a

    bstan/ /mdo dang gzhan nas kyang ni rnam par phye/ /drang ba'i don bstan phyir ni lung 'di dag /ji ltar nad kyi na ba la/ /sman gyi rdzas ni rab sbyor ltar/ /de bzhin sangs rgyas sems can la/ /sems tsam du ni bstan pa yin/ ces pa'o/ /de'i phyir phung po dang khams dang/ skye mched dang/ khams rnams dbye bas tha dad pa yin no/ /rang las ma yin gzhan las min/ /gnyis ka las min rgyu med min/ /dngos po gang dang gang la yang/ /skye ba nam yang yod ma yin/ /rang bzhin yod min ma skyes phyir/ /ji ltar rang las 'byung bar 'gyur/ /rang bzhin grub pa med pa'i phyir/ /gzhan las kyang ni 'byung mi 'gyur/ /rang nyid la brten gzhan nyid 'gyur/ /gzhan nyid las ni rang nyid do/ /ltos pa'i don ni de dag 'grub/ /tshu rol pha rol bzhin du bstan/ /rang dang gzhan dag mi rigs phyir/ /gnyis las byung ba yod ma yin/ /rgyu dang bral bar skye bar ni/ /'ga' zhig gang na 'ang yod ma yin/ /de nyid kyis na yod med min/ /rkyen gyi don la sbyor ba ni/ /med pa dag ni gang gi rgya/ /yod pa yang ni ji ltar skye/ /dngos po kun gyi rang bzhin nyid/ /skyes pa du ma'ang yod ma yin/ /de nyid dngos po thams cad kyis/ /dgag pa dag ni rigs ma yin/ /de zhig gnas pa'i dngos po ni/ /dgag pa ru ni rigs ma yin/ /mi gnas pa yi dngos po gang/ /'gag pa ru ni rigs ma yin/ /dngos don las gzhan 'jig pa med/ /don gzhan ma yin par yang 'dod/ /don gzhan dngos po rtag par 'gyur/ /don gzhan min yang dngos po med/ /gang du skyes pa de des 'thob/ / ma skyes de yi rang bzhin yin/ /rang gi rang bzhin ma skyes pa/ /de la skyes zhes ji ltar bya/ /skye ba dang ni 'gag pa dag /'du byas kyis ni rnam par brtags/ /rten cing 'brel ba'i 'khor lo yi/ /ngo bo nyid des rtogs pa med/ /de ltar des na dbu ma 'bags

  14. 177b

    pa klu sgrub dang/ 'phags pa lha dang/ zla ba grags pa la sogs pas bzhed pa rten cing 'brel par 'byung ba'i mtshan nyid de/ de bzhin nyid ni shes 'dod pas yin par 'gyur ro/ /bcom ldan 'das kyis kyang de nyid don yin par mnyam par bzhag pas gsungs te/ gang zhig rkyen las skyes pa de ma skyes/ /de la skye ba'i rang bzhin yod ma yin/ /rkyen la rag las gang de stong par bshad/ /gang zhig stong nyid shes de bag yod yin/ /gang zhig rten cing 'brel 'byung ba/ /de la rang bzhin cung zad med/ /gang la rang bzhin yod min pa/ /de la skye ba na ma yang med/ /gang gi skye bar 'gyur ba yi/ /chos ni nam yang yod mi 'gyur/ /ma skyes pa yi chos rnams la/ /byis pa rnams ni skye bar 'dod/ /ces bya ba la sogs pa'o/ /de'i phyir/ bla ma'i ngag gis ma brgyan pa'i/ dbu ma'ang 'phreng po tsam nyid de/ /zhes bya la smras te/ bye brag rnams bkag nas/ lhag ma khas blangs pa'i yul yin pa'i phyir ro/ /'dir bcom ldan 'das ma bla ma dam pa'i man ngag gis rgyan gyis brgyan pa'i zung du 'jug pa'i de bzhin nyid kyi dgongs pa ni mkhas pa rnams kyi yid 'phrog par byed pa nye bar bstan te/ gang gi phyir yang chos thams cad ni ma skyes pa'i de kho na nyid do/ /de ltar na yang de ni rten cing 'brel bar 'byung ba'i bdag nyid yin pa'i phyir ro/ /nam mkha' i me tog ltar shin tu med pa'i chos ma yin no/ /dngos po las gzhan stong pa min/ /stong pa las kyang de bzhin min/ /de phyir rten cing 'brel 'byung dngos/ /khyod kyis stong nyid rab tu bstan/ /kun rdzob stong pa nyid du bstan/ /stong pa nyid ni kun rdzob po/ /med na mi 'byung nges pa'i phyir/ /byas pa dang ni mi rtag bzhin/ /zhes pa'i tshig gis so/ /skyes pa dang ma skyes pa dag gi zung du 'jug pa nyid na de kho na nyid du rtogs par bya ste/ ma skyes pa tsam ni ma yin no/ /ma skyes pa yi sbyor ba yis/ /skye ba 'dir ni rab tu bshad/ /ces gsungs rab

  15. 178a

    las so/ /de phyir rab rib tsam gyis mthong ba bzhin du chos thams cad mthong ba ni mi shes pa'o/ /rab rib gsal ba ltar rnam pa thams cad du mthong ba med pa ni rgyal ba yin no/ /yang thams cad du mthong ba med pa ni rgyal ba ma yin no/ /yang thams cad du mthong ba med pa la ni kun rdzob kyi bden pa 'byung ba med de/ de med pa'i phyir zung du 'jug par ji ltar 'gyur/ byas pa nyid dang mi rtag pa ltar gnyi ga med na mi 'byung ba'i bdag nyid yin te/ shing dang shing sha pa ltar ni ma yin no/ /shing sha pa med kyang rA? ba la sogs pa yod pa'i phyir ro/ /byas pa nyid dang mi rtag pa nyid dag ni phan tshun spangs pa ma yin no/ /de'i phyir de dag bsgrub par bya ba dang sgrub par byed pa nyid du skyes bu'i bye brag gis so sor gnyis ka yang ma spangs pa nyid ni yod do/ /de bzhin du kun rdzob dang don dam pa dag kyang ngo/ /de'i phyir chos kyi dbyings mngon sum du byas pa'i dus su bcom ldan 'das la kun rdzob 'gog pa dag kyang med do/ /de'i phyir ji ltar brjod pa/ dngos rnams rang bzhin bral te rang bzhin gnyis ka las/ /skye ba yod min rgyu la mi ltos gang las min/ /gang gi gti mug mang po sprin gyi tshogs mtshungs pa/ /'jig rten pa ni yul des log par nges par snang/ /'ga' zhig ji ltar log pa'i rab rib kyis/ /sgra zla gnyis dang rma bya'i 'jug ma sbrang bu sogs/ /'dzin pa de ltar ma lus pa yang gti mug sbyon gyis shes/ /gang phyir 'dus byas pa ni rnam pa sna tshogs 'gyur/ /rnam rtog gang gis rab rib stobs kyi skra shad sogs/ /gzugs kyi 'khrul pa de nyid gang gis mthong ba med/ /dag pa'i ming gis de nyid 'dir shes te/ de ltar blo yi 'od zer gsal ba'i stobs kyis ni/ /de ni lag mthil skyu ru ra bzhin rtogs/ /ma lus srid gsum 'di dag ma skyes pa/ /tha snyad bden pa'i stobs kyis 'gog par 'gyur zhes pa'o/ /skad cig skad cig nyid la 'gog pa

  16. 178b

    'di dag ni/ /ring du song bas 'di ni thob par 'gyur ba yin/ /thabs kyi pha rol phyin thob 'bar ba snang ba 'dis/ /sngar gyi dge ba la sogs kyis thob mi g.yo ba/ /phyir mi ldog pa'i bdag nyid chen por 'gyur ba 'dis/ /rtogs pa de yang rgyal ba'i 'gog pa la sogs pa/ /ma lus phung po'i bud shing sgam po 'di zhi ba/ /bsreg pa'i rang bzhin rgyal ba rnams kyi chos kyi sku/ /skye med 'gag pa med pa'i dus 'dir sems 'gag pa/ /'di la sogs pa'i sku ni mngon sum byas pa yin/ /de yang kho bo cig la sogs pa zung 'jug pa smras pas 'dod pa gang gis kyang ma gtogs te/ de ltar sa bdun pa dang/ sangs rgyas kyi sas ni kun rdzob pa 'gog pa dang/ /sems 'gog pa'i tshogs rnams ni kun rdzob pa bkag pas de la zung du 'jug pa de nyid 'thad par mi 'gyur ro/ /de la gzugs brnyan gyi tshul gyis mthong ba nyid 'gog na de 'gal ba med do/ /gang gi phyir bcom ldan 'das kyis rang bzhin med par rtogs te/ gzugs brnyan mthong ba tsam bkag pas ni ma yin no/ /'on kyang rang bzhin gyis gnas skabs so/ /ji ltar mthong ba de la yod pa min/ /zhes gsungs so/ /de la mthong zhes bya ba ni so so'i skye bo'i 'o/ /de la yod pa ma yin zhes bya ba ni sangs rgyas kyi ye shes pa'o/ /de yang 'thad pa ma yin te/ 'jig rten 'khor kyang 'dir gzugs brnyan rtogs pa nyid ni rang gi ngo bo rtogs pa'o/ /ji ltar gzhan du gzugs brnyan mthong ba zhes ji ltar bya zhes gnyis ka grub pa nyid kyi dpe yin pa'i phyir ro/ /de'i phyir sangs rgyas kyi rang bzhin nyid kyang 'gro ba'i rang bzhin med pa nyid de/ gzugs brnyan bzhin du rab tu snang ngo/ /zhes bya ba'i tshig gis so/ /yang bden pa gnyis mi 'thad pa rig pa ma yin te/ des na de nyid brjod par bya ste/ kun rdzob kyi bden pa las don dam pa'i bden pa tha mi dad pa'i phyir zung du 'jug par rnam par bzhag pa bcom ldan 'das kyis dkon mchog

  17. 179a

    brtsegs pa la sogs pa las/ stong pa nyid kyi chos rnams stong pa nyid du mi byed de/ chos nyid stong pa nyid do zhes bya ba la sogs pa'i tshig gis so/ /kun rdzob kyi bden pa 'gog pa yang kun rdzob kyi bden pa las tha mi dad pa'i phyir ro/ /yang 'gog pa zhes bya ba kho bo cag gi ma yin te/ gzhan nyid kyi rang bzhin gyi gnas skabs ni kun rdzob 'dzin pa la med do/ /'on kyang kun rdzob pa 'di nyid ji lta ba bzhin du de yang ma skyes pa nyid de/ de nyid kyang 'gog pa yin no/ /de ltar na kho bo cag gi yang zung du 'jug pa mi 'thad pa ma yin no zhes pa'o/ /de yang 'thad pa ma yin te/ gang gi phyir skyes pa nyid rten cing 'brel bar 'byung ba nyid de/ de yang 'gag pa'i dus su med do/ /mo gsham gyi bu la sogs pa med pa'i phyir mo gsham gyi bu la sogs pa skyes pa'i rang bzhin du 'gyur ba ni med do/ /de rten cing 'brel bar 'byung ba khyim dang gos la sogs pa ni ma yin no/ /khyim la sogs pa dang gzugs brnyan la sogs pa la brten nas skyes pa de nyid zung du 'jug pa de nyid ni spong ba ma yin no/ /mo gsham gyi bu la sogs pa ni spong bar 'gyur ro/ /de bzhin du kun rdzob 'gog par gyur pa yang yin te/ ji ltar ni 'thad pa ma yin te/ 'di'i yang chad pa'i mthar ltung ba gzhan nyid du gsungs te/ chad pa las ni byas pa med/ / chad pa yang ni rab tu gsal zhes gsung rab las so/ /gzhan dag ni slar yang bla ma'i man ngag gis brgyan brjod par byed de/ ji ltar shin tu g.yer bas phung po dang/ skye mched dang/ khams rnams stong pa nyid du mthong ste/ de ltar yang sems tsam nyid la brten nas su/ /phyi rol don la mi brtag go /zhes bcom ldan 'das kyis bstan te/ bsgom par bya ba dang/ rjes su 'thun pa'i phyir ro/ /gsang sngags kyi tshul bstan pa'i de bzhin gshegs pa'i rgya'i rigs yin pa'i phyir dang/ gsal bar 'gyur

  18. 179b

    pa'i rig pa'i stobs kyis rnam par shes pa nyid phung po dang/ khams dang/ skye mched kyi bdag nyid rnams rig pas de yang phal cher rnam pa dang bcas pa dang/ cung zad rnam pa med pa yang stong pa nyid kyi ting nge 'dzin nyams su myong bar 'gyur ro/ /de yang ye shes rten cing 'brel par 'byung ba'i phyir dang/ rab tu gsal bar 'gyur ba'i phyir med pa la ma yin no/ /don dam par dngos po'i ngo bo ma skyes pa'i phyir yod pa ma yin no/ /'o na ji ltar gcig la yod pa dang med pa dag 'dir dgag ce na bden te/ yod pa nyid dang dngos po'i brten pas 'gal ba'i phyir ro/ /de skad du/ gang yang dngos por skye 'gyur ba'i/ /de la tshad ma la sogs 'gyur/ zhes pa dang dngos po 'di ni rnam rtog 'gyur zhes pa'o/ /de ltar yang tshad mar bya bar 'gyur ba'i tshul gyis 'di dag gis de ltar yang rnam pa thams cad kyi rang rig pa'i ye shes yod pa nyid rab tu bsgrub pa yin te/ ma dag pa nyid ni rang bzhin med pa ma yin te/ ma skyes pa'i rig pas kyang ye shes yod pa bsal ba'i phyir ro/ /de ltar phan tshun 'gal bar gyur pa dag rig pas ma yin no/ /bla ma dam pa'i man ngag gis brgyan pa ni tshad mas nye bar gtang pa dag ni ye shes rang bzhin med pa dag gi de'i bdag nyid nye bar bstan pa ni 'gal bdag nye bar bsdus nas rig par byas pa yin no/ /de ltar yang rnal 'byor spyod pa'i slob dpon gsal ba'i ro yi rang rig yod pa'i mchog yod pa spangs pas tshad ma'i bdag nyid chen po dpal ldan 'dir yang gzhan/ de lta phan tshun 'gal ba sel bar byed pa gcig pu brtan pa gzhan/ /dpal ldan zung 'jug bcings pa rtogs pa'i rgyal sras de ni rgyal gyur cig /de ltar yang gang gi phyir dbu ma'i grub mdza' spangs pa dag log par gnas par 'gyur ro/ /dbu ma'i sgrub par byed pa dag ji srid 'khor ba rgyun ma chad kyi bar du thabs kyi cha legs par gnas pa nyid do/ /

  19. 180a

    de dag kyang ma skyes pa'i stong pa nyid kyi 'bad pa med pa'i shes rab kyi cha yang legs par gnas pa'i phyir ro/ /yung ba dang rdo rgyus kyi spyod pa ltar zung du 'jug pa zhes bya ba'i de kho na gzhan ni dngos po dang dngos po med pa'i bdag nyid de/ de skad du bcom ldan 'das kyis/ dngos dang dngos med bdag nyid de/ /dngos dang dngos med rnam par spangs pa zhes pa'o/ /klu sgrub kyi zhal snga nas kyis gsungs pa/ /dngos dang dngos med gnyis las 'das/ /'ga' zhig ji ltar ma 'das 'dod/ /shes pa ma yin shes bya min/ /yod pa ma yin med min gang/ /gcig nyid ma yin du ma min/ /gnyis ka ma yin gnyis med min/ /gnas pa med pa gsal ba med/ /sems pa med pa mthong ba med/ /skye ba med pa 'jig pa med/ chad ba ma yin rtag pa yin/ /de ni nam mkha' dang 'dra mtshungs/ yi ge ye shes spyod yul min/ /gang gis rten cing 'brel 'byung ba/ /de phyir khyod kyis stong par bzhed/ /dam chos ngo bo de bzhin du/ /de bzhin gshegs pa de dang mtshungs/ /de yi de nyid don dam par/ /de bzhin nyid kyi rdzas su bzhin/ /yang dag slu ba med pa'i don/ /de rtogs sangs rgyas su ni brjod/ /sangs rgyas rnams dang sems can khams/ /don de nyid la tha dad med/ /bdag nyid dang ni gzhan yang 'di/ /des na khyod kyis mnyam par bzhed ces pa'o/ /'dir ni tshul gnas pa tsam nye bar bstan te/ bla ma dam pa'i man ngag nyid las kyang zung du 'jug pa'i de bzhin nyid gsal bar rtogs par bya'o/ /da ni de bzhin nyid kyi ngo bo nye bar bstan nas sngar bstan pa'i dbu ma'i bdag nyid byang chub kyi rang gi ngo bo nye bar bstan pa'i phyir/ dngos po 'di ni byang chub 'gyur/ /chags pa spangs pa'i rang bzhin nyid/ /ces bya ba smras te/ 'di ni zhes bya ba ni mngon sum tshad ma rab tu grags pa'o/ /dngos po zhes bya ba ni phung

  20. 180b

    po lnga'i bdag nyid do/ /'o na dngos po zhes bya ba ni bden pa'i rnam par rtog pa las byung ba rnam par rtog pa'i bdag nyid kyi 'khor ba nyid de/ de ji ltar byang chub tu 'gyur/ de skad du/ mi bden rtog pa las byung ba/ /dngos po rtog pa'i bdag nyid de/ /byis pa rnams ni rmongs pa'i blo/ /'khor bar 'di nyid bshad pa yin/ zhes pa'o/ /de'i phyir chags pa spangs pa'i zhes bya ba smras te/ gzung ba dang 'dzin pa'i dngos po ni chags pa zhes kha cig go /rnam par rtog pa tsam ni chags pa zhes bya ba ni gzhan dag go /de skad du/ dge ba 'am ni mi dge yang/ /gang gi rnam rtog tha dad pa/ /tsan dan la sogs gang dag 'byung/ /me yi bsreg pa nyid du 'gyur/ zhes pa'o/ /de ltar de'i phyir gnyis ka yang 'dir chags pa ma yin no/ /de'i phyir rang bzhin zhes bya ba smras te/ gang 'ga' zhig yod pa dang med pa la sogs pa'i rang bzhin no/ /de yis gang chags pa ni mngon par zhen pa'o/ /de dag spangs te bzung ba dang 'dzin pa'i dngos pos stong pa'i yang rnam par rtog pa'i rang bzhin gyi chags pa yod pa ma yin pa'i phyir de zhes bya ba ni bsam pa'o/ /dngos po zhes bya ba ni rten cing 'brel par 'byung ba tshogs pa las thob pas bya ba yin te/ de yang rnam par rtog pa'am/ thams cad kyang byang chub bo/ /ji skad du/ bla ma dam pa nyid kyi zhal snga nas/ bsten nas skyes pa brtags pas dngos su sdod/ /dngos po yod pa ma yin stong pa ma yin ngo bo nyid/ /tshad pa ma yin sems nyid sna tshogs 'di ni ngo bo gcig /gzugs la sogs pa rgyal ba lnga ni rgyal gyur cig /rnam rtog 'di nyid rten cing 'byung/ /'brel pa sgom pa ma yin no/ /de nyid mya ngan 'das pa ste/ /sems kyi 'khrul pa ma byed cig /kun rtog ces pa 'brel ba ltar/ /ji ltar bde ba bzhin du gnas/ /zhes bya

  21. 181a

    ?? pa la sogs pa'o/ /de nyid rang bzhin kun gyi chags pa yin na gang las skyes par 'gyur ba de'i phyir/ chag pa las ni 'khrul pa 'byung ba zhes bya smras te/ 'khrul pa ni rang gis kyang sgro btags pa'o/ /chags pa ni mngon par zhen pa'o/ /'khrul pa ni yod pa dang med pa la sogs pa'i dngos po'i rang bzhin du sgro btags pas yang nas yang du mngon par zhen te/ 'dir chags pa dang sdud pa dang/ rmongs pa nyid do/ /'khrul pa de gang las spang bar bya zhes bya ba de'i phyir/ /'khrul pa gnas ni med par 'dod ces bya ba smras te/ 'dir 'di'i don ni cung zad 'dir skye ba dang 'gag pas tsher ma dbyung ba lta bur ni ma yin no/ /'on kyang rang bzhin yong su shes pa'o/ /rang bzhin yang ma skyes pa nyid yin no/ /ji skad du bcom ldan 'das kyis/ 'jam dpal ma rig pa ni yod pa ma yin pa'i don no zhes pa'o/ /'di la bsal ba ci yang med/ /mnan par bya ba cung zad med/ /yang dag nyid la yang dag lta/ /yang dag mthong nas rnam par grol zhes bya ba'i tshig gis so/ / de bzhin nyid dang de kho na nyid dag tha dad pa'o snyam du byang chub rtogs te/ de yang de kho na nyid dang bral ba'o zhes 'dri ba ni/ de nyid cis na zhes pa'o/ /dngos rang bzhin zhes bya ba ni lan no/ /dngos po ni rab tu snang bar 'gyur ba'o/ /de ltar sems nyid rab tu spros pa'i rnam pa'i de'i bdag nyid kyi de kho na nyid do/ /dngos po'i rang bzhin yang de kho na nyid yin no/ /rtag par lta ba nyid la brten par 'gyur ba'i phyir/ dngos po dngos med gang yin pa'i/ /zhes bya ba smras te/ gang gis gang la gang gi phyir dngos po ni rang gi ngo bo yin pa dang/ dngos med ni stong pa nyid du rab tu bstan pa'o/ /de'i phyir dngos po'i rang bzhin gi ngo bo nyid ni de kho na nyid do/ /de skad du bcom ldan 'das kyis/ gzugs ni gzugs kyi rang bzhin gyis stong ngo zhes bya nas rnam par shes pa'i

  22. 181b

    bar du 'o/ /sems de yang sems ma yin zhes pa'o/ /'o na gzugs la sogs pa stong pa nyid kyi phyir chad par lta'o zhe na/ dngos po med par yang dngos por 'gyur zhes bya ba smras te/ rab tu bstan pa 'di ni dngos po ste zung du 'jug pa'i de bzhin nyid kyi de kho na nyid de/ gzhan bu ma yin no zhes bstan to/ /bcom ldan 'das kyis chos thams cad kyi rang bzhin gang zhe na/ gang rang bzhin med pa'o/ /rang bzhin dang rang bzhin med pa dag gi gnyis su med pa 'di ni gnyis su med pas gnyis su mi 'gyur ba'o/ /de ltar ni 'gyur mod kyi/ byang chub nyid ni bsgrub byar gyur pa dngos po'i rang bzhin du byas la/ da ni dngos po'i rang bzhin du de kho na nyid ji ltar brjod ce na/ de'i phyir rgyu dang 'bras bu'i rang bzhin gyis zhes bya ba smras te/ gang de bzhin bstan pa'i rig pas bsgrub par bya ba dang sgrub par byed pa dang de kho na nyid kyi bdag nyid kyis nyes pa med do zhes bya ba ni dgongs pa'o/ /yang na 'bras bu zhes bya ba ni dngos po'i ngo bo yin te/ rang bzhin ni rten cing 'brel par 'gyur ba nyid kyi rang rig pa zhes pa'o/ /rgyu dang zhes pa ni de bzhin nyid don dam par ma skyes pa ni lhan cig skyes pa yin pa'i phyir/ dngos po'i ngo bo'o/ /de skad du/ chos kyi dbyings las yang dag byung/ /mi mthun phyogs ni cung zad med ces pa'o/ yang bcom ldan das kyis gsungs pa/ chos rnams thams cad dngos po med/ /chos min mtshan nyid rnam par spangs/ /chos bdag med las yang dag btung/ /byang chub tshul ni bstan pa'o zhes pa'o/ /rgyu dang 'bras bu'i rang bzhin zhes pa la rang bzhin ni gnyug ma ste/ zung du 'jug pa'i ngo ba'o/ /de'i phyir dngos po'i de bzhin nyid ni de kho na nyid du bstan pa'o/ /de dag ni pha rol tu phyin pa'i man gag bla ma'i man ngag gis brgyan pa'o/ /de yang yang dag par shin tu mnyes par byas pa'i bla ma'i zhal gyi pad+ma nyid la gsal bar ro//

  23. 182a

    gzhan du ni ma yin no/ /da ni dngos po kun gyi rang bzhin gyis/ /dag pa de bzhin nyid du 'dod ces bya ba'i tshul gyis de bzhin nyid kyi chos thams cad legs par gnas pa yin/ /de bzhin nyid kyi de kho na nyid bsgom par bya ba sgrub par byed pa'i thabs shes nye bar bstan pa'i phyir /de ltar chos rnams ro gcig ste/ /thogs pa med cing gnas med par/ /ji ltar 'byung ba'i ting 'dzin gyis/ /'di dag thams cad 'od gsal te/ /zhes bya ba smras te/ de ltar ni 'di'i rim pas so/ /ro gcig pa ni de bzhin nyid du ro gcig pa'o/ /chos ni phung po dang/ skye mched dang khams rnams so/ /gzugs la sogs pa'i mtshan nyid ni gzugs la sogs pa rang gi mtshan nyid 'dzin pa'i phyir ro/ /thogs pa med cing zhes bya ba ni rang bzhin sgro btags med pa'o/ /gnas med par zhes bya ba ni ma skyes pa ste/ yod pa dang med pa'i rang bzhin la rab tu mi gnas pa'i phyir ro/ /'od gsal zhes bya ba ni rang bzhin gyi dri ma spangs pas rang rig pa'o/ rab tu 'od gsal ba'i phyir ro/ /de ltar gyur pa'i de bzhin nyid kyi bdag nyid kyi de kho na nyid kyi chos rnams ji ltar mthong zhe na/ de'i phyir ji ltar 'byung ba'i ting nge 'dzin gyis zhes bya ba smras te/ zhi gnas dang lhag mthong zung du 'jug pa dang ldan pa'i lam ni ji ltar 'gyur ba'i ting nge 'dzin no// 'di nyid ni sgrub par byed pa'i dngos po'o/ /'di ltar dngos po gsum du bstan to/ /ji ltar 'byung ba nyid kyi ting nge 'dzin kyang mngon par 'byung ba ni ji ltar 'byung ba'i ting nge 'dzin yang rab tu 'byung ba'i sems kyis 'gyur/ gang phyir de yi gnas rig pas/ /de nyid rgyun mi 'chad la skye/ /zhes bya ba smos te/ 'di lta re zhig bsgom pa rab tu grags pa sems can la snying rje chen po nye bar bzhag pas byang chub tu sems bskyed par bya'o/ /de yang rnam pa gnyis te/ dang po ni 'dod pa rnams la sman pa'i mtshan

  24. 182b

    nyid do/ /gnyis pa ni 'dod pa'i rnam pa yang pha rol tu phyin pa la sogs pa'i rab tu 'jug pa rnams 'jug pa byang chub kyi mtshan nyid do/ /de skad du /sems bskyed pa ni gzhan don byed/ /yang dag rdzogs pa'i byang chub 'dod/ /smon dang gnas pa'i bya ba 'di/ /de yi dbye ba rnam pa gnyis/ /de ni mgon pos yang dag bshad/ /dang po 'dod pa'i rnam pa ste/ /sbyin pa la sogs rnam 'jug pa/ /gnyis pa ru ni rnam par grags zhes pa'o/ /'dod pa'i rnam pa yang gsum ste/ 'dun pa dang bcas par 'jug pa'i dam pa'i chos kyi mngon par byang chub pa 'dod pa'i mtshan nyid dang/ bsam pa dang bcas par 'jug pa'i pha rol tu phyin pa'i spyod pa la 'dod pa'i mtshan nyid dang/ lhag pa'i bsam pa dang bcas par 'jug pa'i byang chub kyi phyogs kyi chos sum cu rtsa bdun bsgom par 'dod pa'i mtshan nyid de/ de la yang sems gsum ni chung ngu dang 'bring po dang chen po ste/ las dang po pa'i sas bsdus pa pha rol tu phyin pa'i tshul ni mngon par rtogs pa'i rgyan la sogs pa las bstan to/ /de las gzhan 'jug pa'i sems ni gnas skabs rnam pa gsum ni/ de la dang po 'jug pa'i lam gyis bsdus pa'i sbyor ba'i gnas skabs te/ de yang nges par 'byed pa'i cha dang 'thun pa zhes bstan to/ /de la rgyu'i gnas ni sa bcus gsungs pa mthong ba dang bsgom pa'i lam gyi spyod yul lo/ /de nas khyad par can gyi lam gyis bsdus pa ni 'bras bu'i gnas skabs so/ /de skad du/ mdza' dag la ni gnyis kyis khyab/ /de las gnas skabs rnam pa bzhi/ /'bras bu rgyu sbyor dang po yi/ /lam gyi gnas skabs tha dad pas/ /zhes bya ba'o// gang nas gzung nas yang sdom pa 'dzin pa sngon du 'gro bas sbyin pa la sogs pa'i bsod nams dang ye shes kyi tshogs la rab tu 'jug pa de ni 'jug pa'i sems so/ /de skad du/ 'gro bar 'dod dang 'gro ba yi/ /bye brag ji ltar shes par ltar/ /de bzhin grangs

  25. 183a

    bzhin tha dad pa/ /mkhas pa yis ni shes par bya zhes pa'o/ /de la shes rab kyi pha rol tu phyin pa spangs pa ste sbyin pa la sogs pa'i dge ba mdza' dag mngon par 'byung ba'i chos yang dag par bsdus pa'i thabs ni bsod nams kyi tshogs so/ /shes rab nyid ni de nyid kyi thabs kyi dngos po yongs su gcod pas ye shes kyi tshogs so/ /de lta bas na yang dag pa'i thabs kyi rig pa phyin ci ma log pas ji ta ba bzhin du rang dang gzhan gyi don byed do/ /de ltar na thabs dang shes rab kyi de nyid bsten par bya ste/ sa la bzhugs pas kyang ngo/ /de skad du bcom ldan 'das kyis/ rmongs pa'i skye bo de ni 'di skad smra bar byed/ /tshul gcig nyid kyis byang chub thob par 'gyur/ /gang stong pa nyid kyi tshul yin te /zhes pa'o/ /'di'i yang thabs dang shes rab kyi rang bzhin rtogs pa sgro 'dogs pa dang skur pa 'debs pa dag spangs pa'i dbu ma rab tu mi gnas pa rtogs pa'o/ /shes rab kyis ni sgro 'dogs pa spangs pa'i phyir ro/ /thabs kyis ni skur pa 'debs pa spangs pa'i phyir ro/ de la dang po thos pa las byung ba'i shes rab bskyed par byas te lung gi sa don la nges par bya'o/ /de nas bsam pa las byung ba'i rig pa dang lung dag so sor brtags te nges pa dang drang ba'i don la nges pas yang dag pa'i don bsgom par bya'o/ /yang dag par ma skyes pa nyid do/ /de yang bstan pa'i rig pas rtogs par bya'o/ /de'i phyir rnal 'byor pas dang po sems brtan par bya ba'i phyir zhi gnas grub par bya'o/ /zhi gnas kyi yang rnyed pa la sogs pa la ltos pa dang bral bas tshul bzhin du gnas te/ sdug bsngal la sogs pa la bzod pas rtsom pas brtson 'grus bskyed par bya'o/ /ji skad du/ tshul khrims gang ldan de ni bzod pa yin/ /gang la rtson 'grus brtan pa bag yod pa/ /gang la yang dag rab tu ldan pa yi/ /de yi ting 'dzin myur du rdzogs par 'gyur zhes pa'o/

  26. 183b

    de'i phyir tshul khrims la sogs pa'i zhi gnas kyi tshogs la gnas pas yid dang 'thun pa'i sa phyogs su lus bsrang ste bde ba'i bstan la 'dug nas snying rje chen po mngon du bya ste sems rtse gcig pa bskyed par bya'o/ /de la re zhig dang por rnal 'byor pas ji ltar nus pas phung po dang/ skye mched dang kham dang gzugs can nam/ gzugs can ma yin pa thad pa'i chos thams cad kyi 'di nyid dmigs par bya ste/ gcig dang du ma'i rang bzhin gyis stong pa nyid du nges par byas la/ 'di nyid kyi rgyun la yang nas yang du sems bslan par bya'o/ /ji srid du sems dang lus sbyangs pa thob par gyur pa de nyid du'o/ /shin tu sbyangs pa thob par gyur pas zhi gnas rdzogs par 'gyur ro/ /de skad du/ dngos po mdza' dag nye bar dmigs par bya phung po la sogs tha dad des bzung stong pa nyid/ /de la rab tu 'jug pa'i yid ni ji bzhin du/ /de srid rab tu ting nge 'dzin dpal ldan zhes pa'o/ /de nas slar yang ting nge 'dzin la gnas pas shes rab kyi mig gis chos thams cad dbyang bar bya'o/ / dpyad nas slar rim par bsgom par bya'o/ /de yi the tshom gyi sa bon sel bar 'gyur ro/ /de bzhin du yang gang zhig gnas la dmigs pas ni sems brtan par 'gyur ro/ /de shes rab kyis dpyad pa las yang dag pa'i ye shes kyi snang ba skye bar 'gyur te/ de la mun pa la snang ba bzhin du ste/ de yi sgrib pa rnams spong bar 'gyur ro/ /de nyid kyi phyir 'di dag mig gis snang ba bzhin no yang dag pa'i ye shes skye ste/ phan tshun so so'i yon tan gyis nges par gnas pa'i phyir ro/ /snang ba dang mun pa bzhin phan tshun 'gal ba dag ni ma yin no/ /ji bzhin mnyam gzhag gyur pa'i shes rab ces bya ba'i tshig gis so/ /gcig tu shes rab kyi rjes su 'thun pa zhi gnas so/ /de'i don ni zhi gnas dang lhag mthong zung du 'jug pa dang ldan pa'i

  27. 184a

    lam sbyin pa dang tshul khrims la sogs pa thabs dang 'jug pa'i sems pha rol tu phyin pa'i tshul la rab tu grags ba'o/ /de nyid phul du byung bas snang ba la sogs pa'i ting nge 'dzin gyi rim pas drod la sogs pa'i nges par 'byed pa'i cha dang 'thun pa ni sbyor pa'i gnas skabs so/ /de nas mthong ba'i lam thob pa rgyu'i gnas skabs so/ /de nas bsgom pa'i rim gyis 'bras bu'i gnas skabs so/ /de ltar de nyid 'jug pa'i sems pha rol tu phyin pa'i tshul gyi rab tu dbye ba rnams ni kA ma la shI la sogs pas bsdus pa dang rgyas pa la sogs pa'i sgo nas bstan te/ de nyid du rtogs par bya'o/ /'dir rgyas pa'i 'jigs pas ma bris so/ /'di lta bur gyur pa'i 'jug pa'i sems ni 'dir dgongs pa ma yin no/ /'dir de dpyad pa las byas pas yongs su ma dag pa'i phyir ro/ /'dir dpyad pa med pa'i sems kyi sngon du bsgom bya ba nyid do/ /gang yang pha rol tu phyin pa'i man ngag ni bla ma'i man ngag gis brgyan pa dang bcas pa'i zung du 'jug pa'i dbu ma nges par rtogs pa'o/ /da ni don dam pa'i stong pa nyid rnam pa thams cad kyi mchog dang ldan pa'i shes rab nyid lhun gyis grub pa rgyan gyis 'jug par 'gyur ba ni zhi gnas te/ gzhan du ma yin no/ /chos rnams thams cad shes nas/ /bsgom du med nyid bsgom pa yin/ /zhes bya ba'i tshig gis so/ /de lta bur gyur pa'i zhi gnas dang lhag mthong zung du 'jug pa dang ldan pa'i lam mo/ /'bras bu thob pa la mos par gyur pa'i 'jug pa'i sems ni 'dir dgongs pa ma yin no/ /de skad du/ chos kyi phung po stong phrag rnams/ /rtogs pa zhes bya stong pa nyid/ /rtogs pa'i don ni dpyad pa yin/ /bla ma dam pa'i dpyad pa med/ /ces pa'o/ /gang gis bum pa la sogs 'dzin/ /bsam gtan de ni de la sbyar/ /rnam pa kun gyi lus gcig po/ /'di rtogs rtog pa chen por

  28. 184b

    'gyur/ /zhes bya ba yang ngo/ /'di dag ni gsal bar bya ba'i phyir/ gang phyir de yi gnas rig pas/ /de nyid rgyun mi 'chad las skye zhes bya ba bstan te/ de ni 'jug pa'i sems kyi gnas zung du 'jug pa de bzhin nyid bdag nyid/ bla ma dam pa'i man ngag gi rig pa/ de nyid stong pa snying rje dbyer med pa don dam pa byang chub sems kyi mtshan nyid do/ /rgyun mi 'chad ba ni skad cig ma so so la skye bar 'gyur ba'o/ /de'i bdag nyid kyi phyir rnal 'byor pa zhes bya'o/ /de la 'jug pa byang chub kyi sems gang zhe na/ shes dang shes bya rnam bral bas/ /'gro ba nyid ni gnyis med 'dod/ /ces bya ba smras so/ yang gnyis med ces bya ba ni rig byed smra ba ltar rtag pa gcig pu ni ma yin no/ /'on kyang gang gcig kyang ma yin du ma yang ma yin pa'i gnyis med pa ni dgongs pa'o/ /de ltar gyur pa ni yang 'gro ba nyid yang dngos po dang dngos po ma yin pa dang/ 'dod ba zhes bya ba la sogs pa bstan te/ de nyid ji ltar 'gyur zhes bya ba la sogs pa la she rab shes bya rnam bral ba /shes bya bas smras te/ dang zhes bya ba ni gang gi phyir gyi don te/ gang gi phyir shes dang shes bya rnam bral ba ni 'gro ba bdag nyid yin pa'i gnyis su med pa'o/ /de la shes dang shes bya rnam bral ba ni rnal 'byor spyod pas rab tu bsgrub pa ste/ 'gro ba ye shes tsam du rab tu bsgrubs par byas ba'i phyir ro/ /de'i yang shes pa tsam 'gro ba la gsal ba ni ma skyes pa'i phyir med pa ma yin no rang bzhin med pa'i phyir yod pa ma yin no/ /zhes pa'o/ /shes pa'i rang bzhin der bral ba'i 'gro ba'i bdag nyid ni dbum pas rab tu bsgrub pa'o/ /'di lta bu thabs dang shes rab kyi bdag nyid kyi shes pa gnyis med pa'i de kho na nyid byang chub kyi sems so/ /de ltar mi 'gyur mod kyi/ /'gro ba nyid gnyis su med pa'i de bzhin nyid kyi byang chub kyi sems zhes bya ba de kho na nyid stong pa

  29. 185a

    rnam par rtog pa'i rgyu mtshan yin pa'i phyir dang/ ji bzhin 'byung ba'i ting nge 'dzin zhes bya ba yang gnyen po'i phyogs la dpyod pa rnam par rtog pa'i rgyu mtshan no/ /de nyid byang chub rtog pa'i rang bzhin can zhes pas 'bras bu la dpyod pa'i rnam par rtog pa'i rgyu mtshan gyi phyir ro/ /'di dag ni yang rgyu mtshan gzhan gyi mngon du gyur par gzhan du snang bar 'gyur la/ gzhan ni yid la mi byed pas yongs su spang bar bya zhes bcom ldan 'das kyis bstan te/ rnam par mi rtog pa la 'jug pa las bstan pa dang ji ltar mi 'gal zhe na/ de la re zhig kha cig 'di skad smra ste/ bsgom pa 'byung ba'i tshogs pas dang por brjod pa nyid de/ bsgrub par bya ba dang sgrub par byed pa dang de kho na nyid do/ /gzhan du na bstan pa 'bras bu med par thal bar 'gyur ba'i phyir ro/ /phyi nas goms par gyur nas ni bsgrub bya la sogs pa'i rgyu mtshan spangs par bstan pa yin no/ /rgyu mtshan yang ni shes pa'i sbyor ba spangs pa'i phyir zhes pa'o/ /de'i shes pa'i dang por bya ba nyid ji ltar 'gal bar 'gyur/ /'di ni rab rib kyi lam ma yin te/ 'dis mi bzod pas lan ni gzhan/ /gnyis dang bral bar rlom pa yang/ /gang phyir de ni 'od gsal 'dod ces bya ba smras te/ 'dir ni 'dir dgongs pa yin te/ de yongs su shes pas de kho na nyid do/ /de kho na nyid rtogs par bya ba'i phyir dpyod pa gsum rnam par spang bar bya ba bstan pa yin te/ mdza' bzhi yongs su spong ba bzhin no/ /gnyen po'i phyogs la ma gnas shing/ /de nyid la yang mi chags pas/ /gang gi 'ang 'bras bu mi 'dod pas/ /de yi phyag rgya chen po shes/ /zhes bya ba'i tshig gis so/ /'dir yang phyag rgya chen po zhes bya ba ni phyag rgya chen po'i de kho na nyid kyi man ngag ste

  30. 185b

    dngos po'i de kho na nyid yongs su shes pa'o/ /yang dpyad pa gsum po 'di rnams kyang ste/ mdza' bzhi la ni mnyam brten nas/ /mdza' bzhi las ni rnam par dag /ces bya ba nyid kyi de kho na du ma ma yin pas 'gal ba ma yin no/ /gnyis dang bral ba ni/ gnyis med pa'o/ /rlom sems ni de kho na nyid du dpyod pa'i rnam par rtog pa'o/ /'di yang 'od gsal ba'i rang bzhin las med pas rang bzhin gyis rnam par dag pa'i phyir ro/ /de ltar sgrub par bya ba dang sgrub par byed par yang 'od gsal gyi rang bzhin du rtogs par bya'o/ /yang 'dir rgyu mtshan yongs su spangs pas yid la mi byed pa zhes bya ba ni 'dir mig btsum pa ltar bum pa dang snam bu la sogs pa ci yang mi mthong ba ni yid la byed pa med pa ni med do/ /yang ni rnam par dpyad pa'am/ bla ma'i man ngag gis dngos po mi dmigs pa nyid ni yid la mi byed pa'o/ /de skad du/ 'gro dang gnas dang 'dug pa dang/ /nyal ba na yang mnyam par bzhag /nyan dang lta dang de bzhin bsgom/ /reg pa dang ni myang ba dang/ /shes rab mig ni dgra pa yis/ / rnam par dpyad dang man ngag las/ /chos rnams thams cad ma skyes phyir/ /mthong ba yang ni mi mthong 'gyur zhes pa'o/ /de'i phyir rgyu mtshan gyi yid la mi byed la/ rgyu mtshan med par yongs su shes pa nyid do/ /yang ni rgyu mtshan la dpyod pa'i rnam par rtog pa zhes pa mtshan mar 'dzin pa'i rnam par dpyod pa'o/ /de yang ma skyes pa nyid de rnam par dag par bcom ldan 'das kyis bstan to/ /ji skad du bcom ldan 'das kyis ting nge 'dzin gyi rgyal po las/ gang dag shes phyir mtshan mar 'dzin// nye bar 'dzin par nges par bstan/ /mtshan mar 'dzin pa med pa'i dang/ /rnam par nges na bstan pa yin/ /mtshan ma'i rang bzhin shes na yang/ de ltar mtshan ma 'byung med 'gyur/ /mtshan ma 'di ni spang bar bya/ /mtshan ma med mthong la 'jug 'gyur

  31. 186a

    mtshan ma spros pa la spyod pas/ /mtshan ma las ni grol ba med/ /gang 'di mtshan ma skyes pa na/ /gang gis mtshan ma skyes pa yin/ /mtshan ma gang la gang gis reg /gang gis mtshan ma 'gog par byed/ /gang gis mtshan ma skye 'gyur ba/ /blo yi chas rnams thob pa med/ /sems 'di yis ni de bzhin sems/ /de phyir mtshan ma 'byung mi 'gyur/ /gang la mtshan ma ma skyes pa/ /ji ltar mtshan ma 'gag par 'gyur de zhes pa'o/ /de ltar gyur pa'i sems pa med pa dang/ rnam par rtog pa med pa zhes bya ba ni sems dpa' dang rnam par rtog pa 'di nyid dag ni rang bzhin med pa'i shes pa de dag med pa ni ma yin no/ /de skad du/ zung du 'jug pa'i dbu ma las/ sems pa'i rnam rtog sbyor ba yang/ /de ni bsam med rtog pa med/ /rnam pa kun mchog thams cad kyi/ /dbang po las 'das rnam pa med/ /dngos dang dngos med bdag nyid de/ /dngos dang dngos med rnam par spangs/ /mdza' bzhi dang ni mnyam ldan pas/ /mdza' bzhi las ni rnam par grol/ /sna tshogs gzhag pas sna tshogs med/ /dogs pa med pas bde ba che/ /'bras bu de nyid rnam rtog rnams/ dpyad pa nyid ni dpyad pa med/ /de dang de skyes thob pa rnams/ /ma skyes pa yi rang bzhin no/ /de phyir rang rig ma skyes phyir/ /gang gi ma skyes 'dod pa yi/ /dpyod pa'i mdza' la mi gnas so rtog pa'i mdza' la 'gyur ba med ces pa'o// yang bla ma'i zhal snga nas gsungs pa/ /rnam rtog 'di ni rten cing 'byung/ /'brel pa bsgom pa ma yin no/ /de nyid mya ngan 'das pa ste/ /sems ni 'khrul par ma byed cig/ ces pa'o/ /yang/ kun rtogs dogs pa kun bral nas/ /ji ltar bde ba bzhin du rgyu/ /zhes pa'o/ /de ltar yang bcom ldan 'das kyis/ gang gis de nyid 'dod pa yis/ /sems dpa' kun la mi sems pa/ /gang sems gang gi bsam du med/ /de ni

  32. 186b

    bsam du med par 'gyur/ /ji ltar sems can de bzhin sems/ /ji ltar sems pa de bzhin rgyal/ /gang gi blo yi bsam du med/ /sems 'di nyid ni rab tu brtan/ /gang gi rgyud 'dir sems pa ni/ /nam yang 'byung bar 'gyur ba med/ /gang la sems pa bsam med pa/ /sems pa thams cad rnam par bral/ /sems pa nyid ni bkug nas sems/ /ring po'i dus su rnam sems na/ /sems pa nyid ni yid byed pas/ /sems pa zad par 'gyur ba med/ /sems pa 'di ni sems pa che/ /chos kyi sems pa bla na med/ /chos kyi sems pa 'di yis ni/ yang dag sems la 'jug par 'gyur/ /'di dag nyid la dgongs nas bla ma rdo rjes gsungs pa/ ye shes gang zhig 'bad med par/ /bsam du med ces de la brjod/ /bsams nas gang zhig bsam med byed/ /de ni bsam du med mi 'gyur zhes pa'o/ /yang na thabs dang shes rab kyi gnyis su med pa de nyid gnyis su med pa'i rnam par dbyer med pa gcad du med pa de nyid ni 'gro ba nyid do/ /de'i phyir thabs dang shes rab kyi bdag nyid ni dngos po dang dngos po med pa dag ro mnyam pa'i dngos po na gnyis su med pa'i ye shes so/ /'di nyid kyang mchog gi rnal 'byor de'i rnal 'byor nyid ni rnal 'byor pa ste/ de'i spyod pa nye bar bstan pa'i phyir te/ de lta'i de nyid nges rtogs nas/ /ji lta de ltar gang de na/ /rnal 'byor mig ni rgyas 'gyur bas/ /kun tu seng ge de bzhin rgyu/ /zhes bya ba smras te/ 'di'i sngar bstan pa'i gnyis su med pa'i de kho na nyid ni bla ma dam pa'i man ngag gis nges par rtogs pa'i rnal 'byor pas so/ /gsung bar byas pa na de kho na nyid nges par rtogs pa'i rgyu nyid do/ /rang 'dod pa'i spyod pa'i rgyur yang bstan pa yin te/ gang zhig dngos med shes rab ste/ /thabs ni dngos po'i mtshan nyid do/ /thabs dang shes rab snyoms 'jug pa/ /rnal 'byor zhes ni bya bar bshad ces bya ba gsung rab las so/ /rnal 'byor gang la yod pa de ni

  33. 187a

    rnal 'byor pa'o/ /rgyu zhes bya ba ni rang 'dod pa'i gnas pas rgyu bar bya'o/ /gang des zhes bya ba ni zas kyis so/ /bza' dang bza' min de bzhin du/ /ji ltar rnyed pa bza' bar bya/ /'dod dang mi 'dod rnam rtog rnams/ / 'dzin pa 'dir ni mi bya'o/ /zhes gsung rab las so/ /ji lta de ltar zhes bya ba ni gang dang de'i lus dang ngag dang yid kyi rnam pas so/ /ji skad du bcom ldan 'das kyi rkang pa 'khru ba dang/ so rtsi za ba dang/ 'thor 'thung bza' ba dang/ /dril phyis dang/ lag pa nyed pa dang/ gos kyis smad 'gebs pa dang/ 'byung ba dang skad smra ba dang/ 'gro ba dang/ dgod pa dang/ khro ba dang/ ma rig pa dang sdang ba'i sems/ /skad cig kyang ni gzhan sems med/ /grub phyir dngos grub 'dod pa yis/ /gang gis blo ni gzhag mi bya/ zhes pa'o/ /mig ni rgyas pa zhes bya ba ni chos thams cad de bzhin nyid kyi bdud rtsi'i rang bzhin gyis gnyen po'i phyogs med pa dang/ dbang po ma bsdams pa med pa de 'dod pa'i longs spyod thams cad kyi sgo nas so/ /de skad du/ dka' thub sdom pa mi bzad pas/ /bsnyen kyang grub par mi 'gyur gyi/ /'dod pa'i longs spyod thams cad la/ /bsnyen na myur du 'grub par 'gyur zhes pa'o/ yang/ lus ngag yid ni yongs dag pas/ /thob po byang chub thob par 'gyur zhes pa'o/ 'o na gsang sngags kyi tshul gyi rnal 'byor pa dang bye brag ci yod ce na/ /phyag rgya bzhi'i rjes su 'gro ba med pa'i phyir dang/ lha'i nga rgyal gyi bde ba chen po'i ro med pas/ /btang snyoms kyi rnam pas mngon par byang chub pa dus ring pos rdzogs pa'i phyir bsgrub par bya ba dang sgrub par byed pa nyid kyi rnam pa bye brag nyid shin tu che'o/ /gzhan gyi pha rol tu phyin pa'i tshul gyi rnal 'byor pa las 'di khyad par yod de/ bla ma dam pa'i man ngag gis dpyad pa'i stong pa nyid zung du 'jug pa'i de bzhin

  34. 187b

    nyid nges par rtogs pas shin tu khyad par 'phags pa'i phyir ro/ /de'i phyir 'di nyid dka' ba'i spyod pa med pa 'di nyid stong pa nyid du ro gcig pa'i de kho na nyid shin tu shes pa dag ni yul gyi grong gi sprul 'dzin pa ltar sprul la rtse yang de'i 'bigs par mi 'gyur ro/ /'di nyid la de kho na nyid kyi ye shes phyag rgya chen po zhes kha cig brjod/ ji skad du thabs dang shes rab mnyam sbyor ba/ /bsgom pa nyid ni rnal 'byor mchog /phyag rgya chen po mnyam sbyor ba/ /bsgom pa ru ni rgyal bas bshad/ /ces pa'o/ / thabs dang shes rab mnyam par sbyor ba bsgom pa tsam ni phyag rgya chen po bsgom pa ma yin te/ pha rol tu phyin pa'i tshul dang/ sngags kyi tshul tha dad pa med par thal bar 'gyur ba'i phyir ro zhes sngags pa dag go /sbyin pa la sogs pa'i bya ba'i sgo nas pha rol tu phyin pa'i theg pa dman pa ma yin te/ dbang po rab kyi de'i yang sbyin pa la sogs pa'i sems tsam yin pa'i phyir ro/ /de skad du/ 'bras bur bcas pa'i nor thams cad/ /skye bo kun la btang sems pa/ /de phyir sems nyid de nyid ni/ /sbyin pa'i pha rol phyin par bshad ces pa'o/ /yang ni mig ni rgyas gyur pas zhes bya ba ni de bzhin nyid kyi rang bzhin chos thams cad rtogs par mig 'bru tshugs so/ /de skad du/ /stong pa nyid kyi stong gsum lta/ /mig ni 'bru tshugs byed par 'gyur/ /mgo ni dma' bar byed pa dang/ /sems dang sems byung blang bar byed ces pa'o/ /seng ge ji bzhin zhes bya ba ni seng ge bzhin du'o/ /kun tu zhes bya ni thams cad 'jig pa med pa'o/ /rjes su rnal 'byor ba rgyu bar bya zhes bya ba ni spyod lam bzhir spyod pas rgyu bar bya'o/ /de skad du/ lus kyi las ni spyod lam yin zhes bya ba la sogs pa'o/ /de skad du/ bcom ldan 'das kyis/ brgya byin dang mtshungs lha min yang/ /mdun na nges par gnas gyur kyang/ /de la 'jigs par mi bya ste/ /seng ge'i tshul du rgyu bar bya zhes pa'o/ /slar yang de nyid kyi

  35. 188a

    spyod pa/ /'jig rten chos las rnam log 'dis/ /smyon pa'i brtul zhugs la brten nas/ /dmigs pa med pas thams cad byed/ /rang byin brlabs pas rnam brgyan pa'o zhes bya ba smras te 'jigs pas na 'jig rten phung po lnga'o/ /de'i chos ni rang bzhin no/ /de las rnam par log pa ni shin tu 'das pa'o/ /rang bzhin dman pa de nyid kyi nyi tshe ba'i bde ba dang/ sdug bsngal dang/ rnyed pa dang/ ma rnyed pa dang/ grags pa dang/ ma grags pa dang/ bstod pa dang/ smad pa zhes bya ba 'jig rten pa'i chos kyang shin tu mnan pa yin no/ /de skad du/ gang 'dir 'jig rten la brten nas/ /phung po 'jig rten ngas bshad do/ /gang 'dir brten par byas pa'o/ /'jig rten chos las rnam par grol/ /byang chub sems dpa' mkhas pa gang/ /'jig rten rang bzhin shes pa nyid/ /phung po nyid kyang yang dag bstan/ /'jig rten chos dang mi ldan pas/ /rnyed pa dang ni ma rnyed pa/ /de bzhin grags dang ma grags pa/ /bstod dang smad dang bde dang sdug /'jig rten 'di rnams kyis ma g.yo/ /de ni der bstan shes rab che/ /'jig rten pa yi chos mkhas pa/ /'jig rten pa yi 'jig par mthong/ /'dis ni g.yo bar yang mi 'gyur/ /'jig rten gnyis las kun tu byung/ /phyin ci log la kun tu gnas/ /de las 'jig rten 'gro shes nyid/ / mkhas pas 'gro ba 'gro bar 'gyur/ /'gro ba drug ni 'jig rten bdag /'gro ba de 'dir rnam shes bya/ /de yi 'jig rten 'gro ba thob/ /mi bden skye bo 'gro ba gang/ /dpa' bo de ni 'jig rten rgyu/ /gang gis mi dgos pad+ma bzhin/ /'jig rten pa yang nyams mi 'gyur/ /chos dbyings gang phyir legs par gnas/ /'jig rten chos rnams mi shes pa/ /de nyid 'jig rten la spyod do/ /de nyid la ni blo ldan spyod/ /'jig rten khams nyid med par shes/ /'jig rten nam mkha' i mtshan nyid de/ /des na de rnams 'gro

  36. 188b

    bar shes/ /'jig rten chos kyi mi gos so/ /ji ltar 'jig rten rab shes pa/ /de ltar srog chags rnams la 'tshe/ /'jig rten pa yang mi nyams par/ /chos rnams kyi ni rang bzhin shes/ /'jig rten chos ni 'di nyid la/ phung po'i rang bzhin yod ma yin/ /gang zhig de ltar rab shes na/ /de rnams 'jig rten dag tu gnas/ /gang gis phung po yongs shes na/ /ma skyes pa gang mi 'byung ba'o/ /'jig rten de yang spyod pa yi/ /'jig rten la yang mi brtan no/ /'jig rten chos ni ma shes pa'i/ /mi mkhas pa ni rtsod par byed/ /'di dag bde ba 'am brdzun pa min/ /gang gis gnyis med ming gi gnas/ /rtsod pa 'di ni yod ma yin/ /de bzhin 'jig rten pa yi chos/ /nga yi shes nas yang dag bstan/ /gang la rtsod pa med pa'i mchog / gang phyir chos ni sangs rgyas bstan/ /'jig rten mnyam pa nyid shes na/ /'di la brdzun med bden pa'ang med/ /bden pa'am gal te brdzun pa'am/ /gal te bstan pa thob pa na/ /nga yi mdza' ru 'dzin par 'gyur/ /mi stegs dang ni khyad par med/ / ji bzhin chos ni 'byung ba'i don/ /de bzhin bden dang brdzun pa min/ /de phyir 'jig rten pa yi chos/ /gang phyir nga yis gnyis med bstan/ /gang gis 'jig rten 'di shes pa/ /ji bzhin 'jig rten 'di yi ches/ /da ni bden dang brdzun pa yis/ / mkhas pas lta ba mi len to zhes pa'o/ /smyon pa'i brtul zhugs ni yid kyis bsam pa med par byed pa nyid do/ /de la brten pa'o/ /de skad du/ 'gro ba bsam pa med par 'gro ste/ bgegs dang bral ba la 'jug pa yongs su ngal ba med pas ngal sos pas skye bo yongs kyis gnas sprul pa med/ 'dod pa dang mi 'dod pa la 'jug pa rnams la 'gro ba dang 'ong ba rnams gus pa ni lha'i bu bzhin du gyur te rol pas 'khor bar spyod ces pa'o/ /thams cad ces pa ni 'jig rten pa'i chos shin tu mnan pas yang

  37. 189a

    mya ngan las 'das pa ma yin/ /yang de nyid 'jig rten las la spyod pa'o/ /bza' ba la sogs pa dang skye ba yongs su 'dzin pa la sogs pa rnams bstan pa'i rig pas byed pa'o/ /dmigs pa med pas zhes bya ba ni dngos po'i de kho na nyid yod pa dang med pa la sogs pa'i dmigs pa med pas dus thams cad du rang rig pa'i bdag nyid ni dmigs pa med pa ste/ rang rig pa yang ma skyes pa'i phyir ro/ /de skad du/ ma skyes pa de nyid blo yi gang skyes skye ba dang bral te zhes pa'o// rang byin brlabs pas rnam brgyan pa'o zhes bya ba ni rang nyid gnyug ma'i de kho nyid kyi bdag nyid du 'byor ba'i sems kyi rgyun de'i bdag nyid du byin gyis brlabs pa'o/ /de bzhin nyid kyi rang bzhin las 'phro ba rang bzhin gyis rgyan pa ni brgyan no/ /de ltar na de nyid kyis 'jig rten chos las rnam log ces bya ba la sogs pa las khyad par byas pa'i phyir ro/ /'on kyang bdag nyid chen po sbyar bar bya'o/ /da ni skabs su bab pa'i don nye bar bsdu ba'i phyir/ /rnyog med de nyid gang bstan cing/ /gnyis su med par gang smras pa/ /mnyam dang mi mnyam spangs pa'o/ /blo gter rnams kyi shes byar rig ces bya ba smras te/ de kho na nyid nges par rtogs pa'i bdag nyid yin pa'i phyir rnyog pa med pa nyid kyi chos rnams kyi dngos po'i bdag nyid de/ de yang thabs dang shes rab tha mi dad pa'i gnyis su med pa'o/ /'dir gzhu mkhan po'i ming gi phyogs gcig bstan pas ni rang gi ming gi gzhu mtshon pa'o/ /de lta bur gyur pa'i yang 'di de kho na nyid kyi snying por gyur pa nyid bstan pa'o/ /de'i phyir mnyam pa dang mi mnyam pa spangs pa ste/ mya ngan las 'das par 'dzin pa dang/ 'khor bar 'dzin pa btang ba'o/ /blo gtar rnams kyi shes byar rigs zhes pa ni mkhas pa rnams kyis te/ gzhan dag gis spyod yul ma yin pa'i phyir ro/ /dge slong dag gam mkhas rnams

  38. 189b

    kyis/ /bsregs bcad bdar ba'i gser bzhin du/ /yongs su brtags nas nga yi bka' / /blang bar bya yi gus phyir min/ /zhes gsung rab las so/ /mkhas pas yang 'dir dpyod pa de yis kyang dam pa'i chos kyi rjes su 'gro bas rab tu 'dzin par bstan to/ /yang rtog ge skam po 'ba' zhig byis pa'i dmigs pa ni ma yin te/ de kho na nyid shes pa'i skal ba med pa'i phyir ro/ /de nyid yang 'dir rtog ge ngan pas zhes bya bar bstan to/ /de skad du/ yang bcom ldan 'das kyis/ rang bzhin ma yin brtags pa min/ /gang la byis pa'i rtog pas brtags/ /rtog ge ngan pas ro dang 'dra zhes bya ba la sogs pa'o/ /de phyir rtog ge'i dpyod pa yang ma yin no/ /rtog ge skam po rnam par spangs pa zhes bya ba la sogs pa'o/ /de kho na nyid bcu pa'i rgya cher bshad pa paN+Di ta chen po slob dpon lhan cig skyes pa'i rdo rjes mdzad pa rdzogs so// //rgya gar gyi mkhan po badzra pAN+Di las mnyan te/ slad kyi paN+Di ta kA lya warma dang/ lo tsa ba shAkya'i dge slong dz+nyA na a kA ra mtshur gyis bsgyur ba'o// // gzhung nyung don mang rgya che rab zab mgon po'i gzhung/ /snying po len la gzhung mang sbun pas ci zhig bya/ /rdo yi rang bzhin mchid bu yin te rin thang chung/ /rin chen dbyig gi snying po chung yang rin thang che/ /glen pa blo gros zhan pas snying po len mi nus/ / gzhung mang spros la dga' zhing gzhung mang don du gnyer/ /snying po'i don la skyon brjod log pa'i lam la zhugs/ /nyon mongs snying re rje la kho bos ci byar yod/ /legs sbyar sgra yi 'brel pa bod skad la med phyir/ /sgra dang don mi 'gal ba bsgyur ba shin tu dka' / /bla ma rdo rje'i spyan sngar yun rings sbyangs pa yi/ /shAkya'i dge slong dz+nyA na A kar mtshur gyis bsgyur/ /log pa'i nga rgyal ldan zhing sdang bar zhugs pa rnams/ /bsgyur ba smad par byed cing phyag sgrogs pa na/ /'di lam brten rang gi logs shig bsgyur//

  39. 190a

    'di la 'chos shing bsgyur na bsam ngan khyed rang shes/ /bdag gi lhag pa'i bsam pa rnam par dag pas bsgyur/ /rnam dag las byung bsod nams dri med bsags pa des/ /'jig rten mdza' dag 'khrul pa rnam spangs snying po'i don/ /zung 'jug dbu ma'i don ni yang dag rtogs par shog/ //dge zhing bkra shis par gyur cig/ (//badzra pA Ni'i rdo rje'i tshig bzhugs pa lags//) //rgya gar skad du/ badzra pA da la nA ma/ bod skad du/ rdo rje'i tshig ces bya ba/ rdo rje 'dzin pa la phyag 'tshal lo/ /dngos po kun gyis bdag gus pas/ /dang po bla ma mchog phyag 'tshal/ /slar yang ri khrod pa de bzhin/ /dgyes pa'i rdo rje ma rgyud du/ /de bzhin gshegs pas sbas pa gang/ /rnam bshad phyag na rigs ldan pas/ /las kyi phyag rgya sogs sgrub thabs/ /slob ma yis ni rtogs phyir bri/ /sangs rgyas kun bdag sdom pa ni/ /a baM rnam par rab tu gnas/ /yang dag dbang bskur shes bya ba/ /gcig pu'i rnam pa bde chen po/ / bum pa'i dbang ni dang po ste/ /gsang ba mchog ni gnyis pa yin/ /shes rab ye shes gsum pa ste/ /de ltar de bzhin bzhi pa yang/ /e yi cha byad bzang po dang/ /dbus su baM gyi rnam par brgyan/ /bde ba thams cad kyis ni gnas/ /sangs rgyas rin chen za ma tog /de las dga' ba skye bar 'gyur/ /skad cig dbye ba tha dad pas/ /skad cig ye shes bde ye shes/ /e baM rnam par rab tu gnas/ /rnam pa sna tshogs rnam par smin/ /rnam nyed de ni mtshan nyid bral/ /skad cig ma bzhi yang dag rtogs// 'di ltar rnal 'byor mas su shes/ /sna tshogs rnam pa sna tshogs brjod/ /'khyud dang 'o byed la sogs pa/ /rnam par smin pa de las bzlog /bde ba'i ye shes za ba'o/ /rnam par nyed pa dpyod par brjod/ /bdag gis bde bde spyad do zhes/ /mtshan nyid bral

Colophon

de kho na nyid bcu pa'i rgya cher bshad pa paN+Di ta chen po slob dpon lhan cig skyes pa'i rdo rjes mdzad pa rdzogs so/_/rgya gar gyi mkhan po badzra pAN+Di las mnyan te/_slad kyi paN+Di ta kA l+ya varma dang /_lo tsA ba shAkya'i dge slong dz+nyA na a kA ra mtshur gyis bsgyur ba'o