gzhon nu ma bdun gyi rtogs pa brjod pa
Saptakumārikābādānama
Text
ff. 100b–110b · 21 folio sides
- 100b
sems can 'ga' yang yod ma yin/ /yang dang yang du dmyal bar ni/ /zangs bzhun bskol ba gang 'thungs pa/ /rgya mtsho nang gi chu la yang/ /de yi tshad tsam yod ma yin/ /phyi dang phag tu gyur pa na/ /mi gtsang pa ni gang zos pa/ /ri yi rgyal po lhun po yi/ /tshad las shin tu lhag par 'gyur/ /mdza' shes rab tu bral ba yis/ /'khor ba'i nang du gang rgyus pa/ /mig gi mchi ma'i thigs pa yi/ /snod du rgya mtsho rung ma yin/ /phan tshun dag tu rtsod pa'i phyir/ /mgo bo bcad pa gang yin pa/ /spungs na de ltar mthob ni/ /tshangs pa'i 'jig rten las kyang thal/ /srin bur gyur cing rab bkres pas/ /sa lud zos pa gang yin pa/ /'o ma'i rgya mtsho che nang du/ /de yis bkang na shin tu 'gang/ /yi dags 'jig rten mi bzang par/ /bkres skom sdug bsngal gang myong ba/ /de ni dran phyir rang gi snying/ /rang gi sha yang 'dor mi 'gyur/ /mi la dbul ba'i nyes pa yis/ /tho btsams pa ni gang myong de/ /brjod pas bdag la mthu med pa/ /rang gi lca la ngo tsha bzhin/ /ri bo'i ngos la yun ring du/ /lha yi bde ba myong 'gyur ba/ /lha rdzas yul gyis mi ngoms te/ /shing skam po la me bzhin no/ /dge ba'i las rnams yongs zad bas/ /bde 'gro las kyang shi 'phos te/ /tshe zangs la ltung ba ni/ /'dab chags bya ni mkha' la bzhin/ /las kyi shugs kyis 'gro ba ni/ /gang phyir 'khor lo bzhin du 'khor/ /de bas chags pa yongs spangs shing/ /thar pa la ni blo zhen bya/ /mya ngan bsal ba zhes bya ba/ /slob dpon rta dbyangs kyis mdzad pa rdzogs so// //rgya gar gyi mkhan po a dzi ta sh+rI b+ha dra dang/ zhus chen gyi lo tsA ba dge slong shAkya 'od kyis bsgyur cing zhus te gtan la phab pa'o// //rgya gar skad du/
- 101a
sapta ku ma ri kA bA dA nA ma/ bod skad du/ gzhon nu ma bdun gyi rtogs pa brjod pa/ dkon mchog gsum la phyag 'tshal lo/ /chags bral ldan dang legs par bshad pa dang/ /ngo mtshar dang ni de nyid don nges dang/ /dam pa rnams kyis gcig tu mnyan bya yi/ /rtogs pa brjod pa bdag gis bshad kyis nyon/ /'di ltar dge ba'i rtsa ba yongs su smin pa rnams la ni longs spyod chen po'am/ lang tsho'i bar du gcod par mi 'gyur bas/ mdzes bar 'gyur ba yin no/ /de yang 'di ltar rjes su thos te/ rgyal po kri kri zhes bya ba tshul dang dul ba la sogs pa yon tan gyi dpal phun sum tshogs pa dang ldan pa/ bcom ldan 'das yang dag bar rdzogs pa'i sangs rgyas 'od srungs la dad pa yang dag par thob pa zhig byung bar gyur te/ de'i bu mo bdun byung ba sangs rgyas rnams la dge ba'i rtsa ba rgya cher bskrun pa'i thabs dang ldan pas/ de dag 'khor bar yid shin tu byung bar gyur nas/ de rnams kyis dul ba dang/ zhe sar bcas pas pha ma la phyag byas te/ snyan pa'i tshig gis smras pa/ 'jig rten gnas la chu nang song ba zla ba'i gzugs bzhin g.yo bar mthong/ /'dod la khros la sprul gyi lus bskyil gdengs ka'i grib ma lta bur mthong/ /'gro ba 'di dag sdug bsngal me yis kun tu 'bar bar mthong bas na/ /rgyal po bdag cag nges par 'byung la mngon dga' dur khrod dag tu mchi/ /rgyal pos smras pa/ /byed ni byis pa bde la brten 'os shing/ /yid la bsams pa'i don yang ma byas na/ /dga' thub gnas su khyed rnams song shig ces/ /ji lta bur na nga yi smra bar nus/ /bu mos smras pa/ sa bdag khyed kyis mdzad spyod bdag cag rnams kyis
- 101b
'tshal lags te/ /'gro la thugs rjes brlan zhing des pa'i ngang tshul ldan pas na/ /dog pa med pa yang dag byams par mdzad na nyid kyis 'phar bar ni/ /rnam bskyed sdig med nyer son bdag rnams la lta smos ci 'tshal/ khyod dang lhan cig gnas kyang dbang med 'bral bar mngon phyogs pa'i/ /'phongs pa 'di yis phyir zhing nye bar gdung bar ma gyur ces/ /rgyal po shin tu dka' ba'i gnas su gyur pa gang dag yin pa yi/ /zhi ba'i go 'phangs thob par 'tshal ba'i yid ni skyes par gyur// de nas rgyal po de snying brtse ba'i dbang gis yid rnam par nyams shing/ mig gnyis zangs ltar dmar la mi 'gyur bas yang dang yang bltas nas smras pa/ ci phyir khang bzang rang gar gyur dang 'jam yangs pa'i/ /sna tshogs stan bzangs rgya chen rnam par spangs nas ni/ /dur khrod mi bzad skye bo ngan pa'i yid 'dra zhing/ /sa gzhi rus pa dkar po'i chal pa bkram par brten/ /gdung ba'i gdong can pha dang yul rmugs lta bur ni/ /mchi ma'i gdong can ma yang cig car ji ltar 'dor/ /g.yo med sems kyis yid ni rgyun du brtse ba yi/ /mdza' shes spangs nas ci phyir dka' thub bsten par dga' / /da nas bu mo de rnams kyi shin tu brtan pa'i yid kyis bsnyems par byas nas smras pa/ pha dang ma dang mdza' bshes zhes pas tha snyad tsam/ /'di dag srid par phyir zhing lhung dang gnod pa'i gzhi/ /'byung pa'i don mthong lkog tu gyur pa'i dri ma yis/ /mi yi bdag po 'jig rten 'jig pas yongs su skyo/ /mdza' bshes dang ni gnyen gyi ngo bo sna tshogs pa/ /g.yon can phung khrol ldan pa 'di la su zhig chags/ /'tsho ba'i 'jig rten rmi lam mig 'phrul dang 'dra la/ /'di na su zhig gang gis rang mi 'am skye bor rtag /mi yi dbang po srid
- 102a
gsum dam chos gsung gi 'od zer snang bcas shing/ /ji srid sangs rgyas nyi ma'i yid 'ong grags pa'i 'od zer 'phreng yod pa/ /de srid 'phongs pa'i mun nag tshogs kyis shin tu g.yogs gyur pa'i/ /srid pa'i mun pa mi zad mun rum nas ni 'byung bar rigs/ /ji ltar rlung gis brtabs pas bskyod pa'i me lce 'bar ba'i khyim las ni/ /'byung bar byed pa'i skyes bu de la phan par 'dod rnams zlog mi byed/ /de bzhin sdug bsngal me chen rtser gnas srid pa ma lus gnod pa yi/ /dra ba las ni nges par 'byung la phan phyir dam las bzlog mi bya/ /de nas rgyal po des bu mo de rnams la/ mdza' bshes dang rang mi dang rtsa lag rnams la bltos pa med pa'i tshig rtsub mo dang rang gi lus dang srog la yang shin tu ma chags pa'i tshig gis lhag par yang mya ngan gyis gdungs par gyur pa'i yid kyis de rnams la yang smras pa/ dus min dka' thub mngon par 'dod pa ni/ /yid dang rjes su mthun don du mi 'gyur te/ /bu mo dus min mngal dang ldan pa la /yan lag cha shas mdzes pa mi skye bzhin/ /dus la bab par dka' thub la sbyor ba/ /zla ba skyon dang bral blta bur mdzes/ /de bas gzhon nu phan med blo 'gyur 'di'i/ /log pa'i lam du 'jug las zlog par gyis/ /bde la brten cing sdug bsngal ma mthong bas /lus kyi sdug bsngal bzod par mi 'gyur te/ /a mra'i shing ni rtsa ba ma zug la/ /glang chen mchog gi mche ba snun dang mtshungs/ /khong nas me 'bar lta ngan sgra 'byin pa'i/ /ce spyang 'jigs pa'i sgra sgrogs tshang tshing gang/ /'jigs pa rnams kyang 'jigs par byed pa yi /mi bzad dur khrod dag ni 'jigs par bcas/ /khyod lus pad+ma'i rtsa ltar 'jam pa la/ /sems gang sog le lta bur rtse med 'dis/ /gzhan gyi
- 102b
ngor byed pa ni spong 'gyur ba/ /e ma'o gnam bsgos ba dag la brtse med sdang/ /bai DUrya ltar sngo ljang dur ba'i gos gyon cing/ /me tog rnam ba du ma'i tshogs ni bkram gyur dang/ /bung ba myos pa'i tshigs kyis khyab pa'i rtsed mo'i tshal/ /'dir ni bu mo khyed rnams mngon par dga' bar gyis/ /skyed mos tshal na rdzing khang dogs na me tog shing 'phyang zhing/ /rlung gis bskyod pa'i chu rlabs me tog mdzes pa'i phreng bas ske rags bcings/ /pad+ma dag dang utpal rgyas gseb dang pa sgra sgrogs pa/ / brgya byin gyis kyang rnyed dka' bu mo dga' bas gnas par gyis/ /me tog na pa mA li ka yi dris bsgos gyur pa yi/ /chu rlabs mdzes par gyur ba'i nye bar g.yo ba yi/ /rlung dang bcas pa'i khyim 'di dang ni nags tshal na/ /khu byug sgra 'byin pa yis bu mo dga' bar gyis/ /skar khung dra ba can na bya rnams skad 'byin me tog dris bsgos dang/ /sgeg pas khrus byas dri zhim bsgos pa'i dbugs dang 'dra ba'i rlung dag ni/ /khang bzangs mda' yab can dang bya gag bde bar nyal ba gang yin 'dir/ /bud med 'dus pa'i glu dbyangs rol mo ldan par khyed rnams dga' bar gyis/ /de nas gzhon nu ma de rnams pha'i tshig des yi ma rangs par gyur nas yang smras pa mi yi bdag po lha yul sa steng na/ /brgya phrag stong du spyod par ma byas pa'i/ /bde ba gzhan ni ci yang yod min te/ /bdag cag rnams ni don med mkhas pa yin/ /yul la lhag par sred cing goms pas na/ /dbang po rnams ni yul gyis ngoms pa med/ /srid pas 'jigs pa'i rtog pa'i blo can dag srid pa'i longs spyod zad par bya phyir 'jug /ngo bo nyid kyis 'gyur cing mi brtan la/ /rlung gis bskyod pa'i chu rlabs ltar 'jigs pas/ /sdom can dbang po drug las rnam rgyal rnams/ /phyir zhing srid par 'jug las ldog par byed//
- 103a
byis pa srid pa'i btson rar phag lta bur/ /sems kyis spags pa'i spyod pas bslus gyur te/ /bde bar mngon par rlom zhing bskam pa dag /phongs shing 'jigs pa'i g.yang sa mdza' med lhung/ /bdag tu rtog pas sems g.yengs skyes gyur pa/ /de ni rab 'bar mtshon cha'i 'khrul 'khor 'dra/ /yul la rjes su brten pas sems bcom pa/ /yongs su smin na sdug bsngal mi bzad rgyu/ /'gro ba 'di dag mi brtan dbang med cing/ /sprul gdug tshogs kyis zin 'dra'i yul rnams dag /rtogs kyang gang zhig srid la chags 'gyur ba/ /de ni mi yi gzugs ldan phyugs nyid yin/ /rnga rtsid shing la 'thogs pa'i g.yag bzhin du/ /blo yi lam ni rnyog pas nyer 'gags shing/ /log par chags pa'i yal gas sems thogs pa'i/ /skyes bu ngan pa'i khyim brten 'phung bar 'gyur/ /dga' ba'i rgyu tsam 'tsho ba'i 'jig rten la/ /phongs pa rgyun mi 'chad par 'byung gyur na// yab gcig srid pa'i dga' ba mang po las/ /bslu bar mi 'gyur gang zhig mchis pa gsungs/ /mi dbang srid na skal pa mnyam pa yis/ /nye bar bsgrubs shing bsags par gyur kyang ni/ /bcom zhing sems ni dman pa dman pa yis/ /srid pa'i dgon pa gzhan du 'gro bar 'gyur/ /rgyal po rgyar chud gyur pa'i nya bzhin du/ /skyes bu legs par brtags shing byed pa dang/ /tha snyad kun la ngang gis mkhas pa dang/ /khyim gyi btson rar gnas shing 'jigs par 'gyur/ /sa yi bdag po 'bad pa mang po yis/ /khyim du rdzas rnams bsags pa byas pa dag /mi yis skad cig gis ni 'dor 'gyur te/ /legs spyad gcig pu 'di nyid lam du bstan/ /de bas 'jig rten
- 103b
mgon pos 'tsho ba yi/ /'jig rten mi rnams las bdag byas gsungs te/ /'chi ba mngon phyogs mi la rang gi las/ /bal be'u bzhin du rjes su 'brang/ /yongs su gyur na mi zad gnyen sdug dang/ /sdug dang 'dre bar mngon par 'dod des chog / sdug dang phrad pas dga' bar sems pa dag /nges par sdug dang bral ba'i sdug bsngal thob/ /mi dbang gzhan yang gang gis mthar 'jig pa'i/ /'tsho ba'i 'jig rten dag na sdug pa su/ /dam pa'i don la rnam spyod mkhas pa yang/ /sdug ces pa 'dis blo ni rnam par g.yengs/ /sa bdag khyed ni gal te bdag cag la/ /sdug pa 'ga' zhig mchis na bdag cag rnams/ /ma smad 'phags pas bsten cing mi 'phrogs pa'i/ /bde ba yid la 'dod pa bsgrub tu gsol/ /de nas rgyal po de brtse ba'i yi ma rangs par gyur kyang/ bde bar gshegs pa'i bstan pa la mngon par dad pas chos la bar chad byed pa'i 'jigs pa skyes pa dang rang gi bu mo rnams kyi sngon gyi skye ba rjes su dran te 'gro bar 'dod pas na skye ba dran par nges so snyam du rnam par bsams te shin tu yun ring por cang mi smra bar gyur to/ /mi yi skyes bu de yis ni/ /'chi ba med par shes pas na/ /song bas yongs su ma spangs par/ /ci zhig ltar na rjes gnang smras/ /de nas bu mo de rnams kyis me tog phreng ba dang/ byug pa dang rgyan rnams spangs nas dul ba dang ldan par zhugs pa'i lus la gos dkar po phra zhing rab tu 'phyang ba gon pas chu bo rlung gi shugs kyis bskyod pa'i dbu ba'i phreng ba lta bu 'am/ ston ka'i mtshan mo zla ba'i 'od kyi gos kyis bkab pa lta bu 'am/ drang srong me bdun gyi skar ma rang gi 'od zer gyi dra bas g.yogs pa lta bu dang/ rim gyis ro bsregs pa'i gnas me'i dbus su ro gzhag pa tsig tsig zer ba rnam par bkram pa dang/ ro rnam par
- 104a
mnam pa dri mi zhim pa 'jigs su rung ba dang/ mi'i thod pa bya rgod kyi mchu'i rtse mo rnon pos brtol ba'i bu ga nas glad pa dang chu ser rnam par 'dzag pas mi ro'i gdong la spags pas mdza' ma khyab cing 'jigs pa dang/ rnyings shing dengs la mdog rnam par 'gyur ba'i rus pa'i dum bu'i tshogs kyis gnon cing rtsub pas sa'i tshogs rnams bgrod par dka' ba dang lus can dag yid yongs su 'byung bar byed pa gshin rje'i gnas bzhin mya ngan dang yid mi bde ba dang/ sdug bsngal ba'i gnas su gyur pa'i dur khrod du phyin par gyur to/ /de la 'di skad ces bya ste/ mi yi khrag dang zhag gi dri ma zhim pas myos par gyur pa'i bya rgod dang/ /rgyu lto nar bas khyab cing mi sdug 'jigs pa'i ro yi yan lag rnams kyis khangs/ /kunda 'dra ba dkar zhing rtag tu rgod pa 'dra bar mdza' yas thod pa dang/ /n+ya gro d+ha snying sul nas 'ug pa sna tshogs hUM sgrogs 'jigs pa'i dur khrod phyin/ /ce spyang kha ni mer bcas rlangs pa'i sgra dag sgrogs pas 'jigs pa dang/ /la lar thod pa dkar po'i dra bas khyab cing bgrod dka' dang/ /srin bu'i rigs kyi tshogs kyis gzings shing sna khung bskyod pa dang/ /bung ba sbrang bu brgya phrag mang po ro la 'phu bas shing 'du/ /rus pa dkar dang dma' rlon rlung gis bskyod par 'gyur ba dang/ /ro bsregs me gsal 'phro dang shing skam rtsan sprul nyal dang/ /la lar mi yi lus ni mdung rnon phug nas bskyod pa dag /gshin rje dag tu dga' ston byed la 'jug pa'i tshang bar 'dra/ /la lar mi mgo'i thod pa'i gseb nas khrag dang chu ser 'dzag pa yi/ /khu ba mi sdug dag la sred ba'i sha za'i tshogs kyis khyab/ /la la cil cil zer ba'i ro bsregs ma yis bskor ba
- 104b
dang/ /mi ro'i khong nas rgyu long phung po gtor bas khyab par 'gyur/ /skyo bas brlan pa'i sems kyis ni/ /der ni bud med der brtags nas/ /'tsho ba'i 'jig rten rgyu mi rgyu'i/ /ngo bo nyid ni sems par gyur/ /skra yi snying ni rdul gyis rtsub shing dmar/ /mig spugs bya yi mchu dang sder mos brus/ /gsang gnas 'gyur zhing mi sdug rnag bcas par/ /bor ba'i bud med lus der rab tu bltas/ /dam pa'i spyod pa thang cig nyer g.yos shing/ /utpal 'dab ltar dkyus ring mig gis ni/ /ro yi gzeb de mngon par bltas nas kyang/ /tshig mang rnam pa du ma smras par gyur/ /'di nyid rdo thal byugs pas dga' ba'i gnas khang ni/ /zla zer gsal bas spras par byas pa ru/ /sdug pa'i phang bar brten cing gnas pa las/ /nga ni sa yi dkyil 'khor gzhi la nyal/ /sdug pa'i lag pa'i gseb du nyal ba na/ /'brug sgra sgrogs pa yis ni khyod sgrag na/ /mer bcas ltas ngan ce spyang sgra yis ni/ /dka' thub ma khyod ci phyir 'dir mi 'jigs/ /'di nyid rang gi khyim 'khor zla zer te/ /ro smad lci ba'i khur gyis dal 'gro la/ /rol cing rgod la sgeg par rnam lta ba/ /brtse med bya rnams da ltar za bar byed/ /'gro ba de dag ngan cing mi brtan te/ /snying rje med pa'i sdug des ci yi phyir/ /mi ro brgya yis khyab par gyur pa yi/ /dur khrod 'di ru khyod ni bor bar gyur/ /rang mi rtsa lag mdza' bshes sdug pa dang/ /pad+ma bung ba bzhin du gnas pa las/ /ci phyir mtshan mo rgyu bas 'jigs kyang ni/ /nyon mongs deng 'dir dur khrod dag tu dga' / /sngon ni mdzes shing snum la dkyus ring 'jam pa'i mig gis blta ba na/ /chags can rnams kyi mig 'bras mdza' dmar 'gyur zhing mi rnams nyams byed pa'i/ 'dod lha'i ri dags rgyar gyur bud med de nyid deng ni
- 105a
bya rnams kyis/ /mig phyung sdug bsngal byas pas chags dang bcas rnams shin tu 'jigs par byed/ /mi gtsang sna tshogs khong nas mi mdon sreg shing gi /lus la bdag gir chags pas long ba'i mig bslus zhes// bud med mchog 'di 'dod chags ldan pa rnams la ni/ /brkam pa'i bya yis mchu btogs gdong gis nye bar dgod/ /pi wang gling bu'i sgra rnams dang ni snyan pa'i glur bcas pas/ /mchog tu sdug pa'i pang na bag phebs bde bar gnyid log pa'i/ /bud med de ni ce spyang skad 'byin mu cor smra bcas shing/ /sa rdul gyis khyab rtsub pa'i dur khrod 'dir de nyal bar 'gyur/ /gang du rnam par brtags kyang sgra yi rtse mo tsam gyis ni/ /gtsang ba mi gtsang tshogs kyi tshad 'dir mi snang na/ /phung khrol chos can nang mang 'dod pa tha chad la/ /rang bzhin ngan rnams ci phyir de ni chags par 'gyur/ /bu mo 'gro ba kun gyis tshul yang 'di 'dra ba/ /rmi lam mig 'phrul chu zla lta bur rang bzhin gyis g.yo ba rtogs la ji srid srog 'di lhag ma dang/ /bcas shing lus gzhon gyur tshe chags dang nyer bral byos/ /gshin rje'i chu srin dga' ba'i khar ni tshud gyur cing/ /skra dkar tshogs kyis spyi nas nges par gzungs nas ni/ / srog mthar gyur pa'i gnod pa'i tsher ma'i gnas phug la/ /mchi mas mig khebs gyur tshe dge ba ji lta bya/ /'jig rten pha rol mi bzad mun nag g.yeng chen du/ /lhung zhing lus phyir 'gyur tshe dge ba 'dod gyur kyang/ /dug can sprul kha dog pa'i nang du chung gyur pa/ /sbal pa nga ro 'don dang mtshungs zhes mkhas rnams smra/ /ci phyir tshig rtsub phra ma ma 'brel spyi brtol smra ba dang/ /snyan tshig bcos mas 'jig rten bslus par gyur nas de ring ni/ /mi smra
- 105b
gnas zhes spyod pa lta bus mdun so'i phrag nas ni/ /bya rnams tsham tshom med par mchu yi skam pas lce 'byin 'gyur/ /chags pas ldangs shing log pa'i yul goms yon po'i bsam pa can/ /byis pa gang gis mig gis yul mthong brtan pa rnam 'jigs pa'i/ /mdzes pa'i ngo smad de ni de ring 'jigs dang bral ba yi/ /mi bzang bya rgod mchu dang sder mos 'jog cing tshul du 'gro /gang dag rang gi khang pa sa gzhi me tog sil mas gtor ba yis/ /rtsig pa'i ri mo yongs 'gyur bzhin dang zur gyis lta byed cing/ /sdug pa'i lag pa'i pad+mar brten cing dal gyis 'gro ba yi/ /bud med de yi rkang pa de ni wa dag za bar 'gyur/ /'di ltar lhan cig skyes pa'i mi sdug mi gtsang 'dam rdzab dang/ dregs pas myos shing sems lhung gyur pas sdug bsngal nyon mongs pa'i/ /lus la khyed kyis 'di ni rang bzhin ma zhir bltas nas ni/ /'tsho ba'i 'jig rten glog ltar rab tu 'jig la yid 'byung gis/ /yang dag ji bzhin thugs chud chos kyi rgyal pos sems can rnams/ /nyon mongs rma nang rgyun mi 'chad par 'dzag pas gdungs pa la/ /rang bzhin bsil ba'i chos gsung chu yi bum pas tshim mdzad pa/ /sman pa'i mchog gyur ston pa de la rtag tu phyag 'tshal lo/ shes par dka' zhing g.yo can ma zhi las dang nyon mongs ldan/ /rnam par 'gyur la ma zhi skye bar bshad pa gang yin pas/ /rmongs pa shing rta'i 'phang lo bzhin du dbang med 'khor bar ni/ /'jig rten mi bzad 'phongs pa'i rdo rjes lus ni nges 'joms 'gyur/ /gzhon nu'i tshe na ma yin lan bur ldan pa'i skra byas shing/ /gang la lang tsho mdzes pa'i nor bu'i phreng ba mchog bcings dang/ /bram zes me tog bcas pa'i zhi ba'i chu thigs kyis gtor
- 106a
pa'i/ /bud med mgo la mi bzad khwa rnams 'thog pa nyon mongs so/ /gang zhig bag ma'i dus su me tog bzang bsgos shing/ /ma yi lag pas dge mtshan bkra shis byas gyur pa'i/ /skra de de ring rab drag rlung gis bskyod? nas ni/ /dur khrod dag gi shing la rnga yab nyid du 'gyur/ /rang bzhin sgrin par lta dang zur gyi bltas gang song/ /sgeg pa'i gom stobs ngang ni dregs myos gang du song/ /dga' bas steg cing glu dang rgod pa gang du song/ /e ma sgyu ma'i gsang ba'i rab bkod ngo mtshar che/ /rgod cing ngal gyis rnam g.yo'i rna rgyan 'od kyis mkhur pa dmar po dang/ /gang du srog dang mnyam pa'i mdzes pa'i ri mo 'bad de bris pa dang/ /pad+ma gzhon nu'i snying po lta bur 'jam pa'i mkhur chos gang yin der/ /bya rnams dpral bar gnas shing khrag gis sbags pa'i mchu yis 'tshog par byed/ /'od can mu tig phreng ba'i spu ba dkar zhing spu yi chu bal can/ /nu ma rgyas pa'i ngur ba zung ldan brang gi rdzing mchog yangs pa dag /g.yo ba'i gos lhur byas pas 'phongs pa'i mig ni gang du chags 'gyur ba/ /der ni rnam par brnags pas sbrang bu'i tshogs rnams 'phungs par 'gyur/ /sngon ni tsan dan chu thigs phreng thor ta la'i lo ma rlung yab dang/ /mngag gzhug rnams kyis bzang mo'i gdu bu sgrar ldan pa dag g.yog byed cing/ /khang bzang zla zer gyis spras dkar bar mdzes pa'i sngas la brten gyur pa/ /de ni deng 'dir kha yi sgrog shog rtsub pas bskyod pa'i rlung gis g.yob par 'gyur/ /gang gis sngon ni 'di bskyod cing/ /gseb nang dag tu rnams spyad nas/ /lus kyi shing ni spangs nas ni/ /sems kyi spre'u de gar song/ /gang gis byed pa med 'di yang/ /byed pa lta
- 106b
bur ston byed pa/ /bdag med ro 'di spangs nas su/ /sems kyi bzhad gad mkhan gar song/ /gang zhig rmongs pas blo ldongs pas/ /nang na bdag tu 'dogs gyur cing/ /mu stegs can rnams rmongs byed pa'i/ /rnam shes srin bu de gar song// gang gi yun rings rnam rmongs kyang/ /yang dag par ni mi gnas pa/ /sna tshogs sems kyi sgyu ma mkhan/ /'gro ba 'di las gang du song/ /gang gis 'gro ba ser skya sogs/ /dka' thub pas kyang mi shes pa/ /nam mkha' i yul gyi spyod yul can/ /sems kyi rig 'dzin de gar song/ /g.yo dang mi g.yo sgo dgu po/ /mi gtsang 'dir ni spyod spyod pa/ /de ni lus kyi gseb 'di las/ /sems kyi bya de gang du song/ /mi zad yul las sdug bsngal 'bab pa'i lan tsha chen pos rab tu khengs gyur pa'i/ /srid pa'i rgya mtsho nyon mongs sbrul dang nyer 'dre gang yin der chud cing/ /mi shes chu srin 'khrug pa'i chu rlabs g.yo ba'i chu bor nub gyur pa/ /sems kyi mtshan ma spyod pa lus 'di spangs nas de ring gang du song/ /nyes bral bcom ldan de ni gdul ba'i thabs rnams gang dag yin mkhyen gyi/ /ma dul gang gi mthar ni dmyal bar me 'bar 'gro bar gyur pa yi/ /gser ltar ser ba'i gseb tu dbang med par ni 'dor byed pa/ /rang bzhin g.yo? bar byed pa'i sems kyi rta de gang du song/ /de nas rdo rje 'dzin pa'i 'od kyi 'khrig ma rgyas ljang ba/ /brgya byin dga' bas mig gdangs dul bcas nyer song ste/ /bu mo rnams la rang bzhin skal bzangs tshig pgis ni/ /rjes su mthun zhing dge bas legs so legs zhes smras/ /sring mo na tshod gzhon zhing 'dod lha'i gnas gyur dang/ /rgyal rigs 'byor pa'i dpal gyi bde ba spangs nas ni/ /sngon gyi drang srong rnams kyi bka' la zhugs gyur pa/ /dka' ? thub 'dis bdag yongs dga' skyod?
- 107a
rnams ci 'dod smros/ /'dod pa'i dbang phyug lag mthil gnas bzhin shes par gyis/ /sum cu rtsa gsum bdag po'i bde ba'ang des rtogs la/ /lha rgyal brgya byin bdag yin khyed nyid gang 'dod dang/ /sring mo bdag gis nges par gang bya myur du smros/ /de nas gzhon nu de rnams yul gyi bde ba 'dod med cing/ /rang bzhin g.yo med sems kyis brgya byin zur mig gis bltas nas/ /rang gi dge ba yongs smin brtan par gyur ba'i rang bzhin gyis/ /kha na ma tho med gsal sna tshogs don ldan tshig 'di smras/ /brgya byin bdag cag skye ba'i sdug bsngal gyis ni gdungs gyur pa'i/ /srid pa'i bde ba zil ba'i kha chu 'dzag pa'i rgyun 'dra'i phyir/ /bzhin ras mdzes pa mya ngan mchi mas bris shing rnyogs pa yi/ /gnyen rnams spangs nas dka' thub 'di la rjes su zhugs pa min/ /gzhan yang 'gro ba ma lus tshul ngan gyis bcings mi bzad pa/ /'phongs pa brgya phrag stong gis btsom pas nyes par skyo 'gyur zhing/ /bkren pa nyams thag mthong bas nyes zad rnams kyi rjes 'brangs te/ /rga med mya ngan med pa'i go 'phangs thob phyir brtson pa yin/ /gal te 'gro la rjes brtse lhag bsam ngang tshul ldan gyur cing/ /ci ste brgya byin khyod kyis mchog ni yang dag ster nus na/ /'chi med mi 'phrogs tshangs bzhi tshangs pa'i go 'phangs rnams grol te/ /srid pa'i 'jigs pas yongs gdungs bdag cag rnams kyis thob par mdzod/ /lus las byung zhing 'dzag pa'i dri ma'i skyon gyis bsgos par gnas pa dang/ /ma yi mngal du mi gtsang 'dam gyi tshogs na mang dag ma spangs spyod/ /byung nas rus pa'i 'khrul 'khor gyis ni mgo btsir brgyal zhing nyams thag pas/ /nyon mongs
- 107b
sdug bsngal gcig nas gcig tu brgyud pa'i skye ba bcang par mdzod/ /rgas pa'i srin mos skra dkar mche ba dkar po myu gur ldan pa yi/ /kha gdangs nas ni 'gro la gzhung lugs med par ci nas 'dzin byed cing/ /gang 'di mi yi brtson dran blo gros dga' ba'i dpal ni rab 'joms pas/ /lha yi bdag po khyod kyis gal te nus na de las bskyab par mdzod/ /dbugs rgod g.yo zhing lto ba sra la lpags pa skya zhing rtsub pa dang/ /longs spyod 'bar ba sna tshogs thob kyang spyod par mi nus stobs med pa/ /gang zhig lus zin 'chi bdag pho nya'i skyes bu dang tshogs rab 'jigs so/ /lha dbang khyod ni mchog ster 'dod na de las bdag cag skyobs/ /mig ni phyir phyogs gyur cing mi g.yo gnas rnams gcod pas sdug bsngal ba/ /nyon mongs 'khrul pas rab tu lus bcom 'jigs pas phung po 'gyel ba dang/ /gnyen rnams mthong bas mchi mas mkhur ba dag dang mchu ni bkrus gyur pa/ /gang gis zin na rab tu 'jigs pa 'chi ba de las bdag cag bsrungs/ /gang gi yid khyab gyur na phyugs bzhin 'gyur zhing mya ngan gyis zin pa/ /bya dang mi bya'i rnam pa blo la mi sems smad pa'i gnas bskyed pa/ /tha mal bsil ba'i rlung gis g.yabs kyang lus tshim mi 'gyur ba'i/ /'dod chags me chen de ni mchog sbyin khyed kyis nges par zhi bar mdzod/ /gang gi shugs kyis mi 'gyur g.yo zhing so yi skros gnon la/ /skad cig gis kyang mi bzad dmyal ba'i 'bras bu ster byed sdig can ni/ /nges pa'i lo ma dang ni chu dag za ba'i thub rnams kyis kyang ma bton pa/ /yid kyi yul gnas khro ba'i sprul de brgya byin khyod kyis gsal bar mdzod/ /gang gis mig khebs gyur na blo gros ngan rnams zhi ba'i lam spong zhing/ /log lta'i dug gis nye bar
- 108a
spags pa'i yid kyis lam gzhan dag la brten/ /gang zhig rab rib bsal bas zag pa kun gyi rgyur na rab gsungs pa/ /log yid khyim na spyod pa rmongs pa'i mun nag brgya byin khyod kyis sol/ /brgya byin mchog ni de dag rnams/ /khyod la bdag cag rnams slong gi /dam bcas don la 'gal ba ni/ /mkhas pas 'dod par mi byed do/ /de nas brgya byin gyis de rnams 'dod pa'i yul dag slong bar mi byed cing/ /bltos pa med la gsal zhing mdzes? pa'i tshig gis rnam par 'khrul pa ngo mtshar du gyur cing yang dag par dad pas lus kyi spu zing byed de smras pa/ /mi 'byor dngos po slong bar gyur pa ni/ /'jig rten dag na bra zhing zhum 'gyur bas/ /gang 'di bdag gis sbyin par nus pa yi/ /mchog rnams sbyin gyi bu mo khyod kyis smos/ /de nas bu mo de rnams kyis de'i nang na mi mngon pa'i rgyus rnam par smra bas tshig des yang dag par skyo bas nye bar bskyed pa'i khro bas brgya byin la smras pa/ /ci phyir nye bar 'drid pa'i thabs dang ni/ /brgya byin mdzes med pa dag gang du lhags/ /bde ba tsam dang mi mkhas blo can nam/ /mi srun pa yi bgrod bya bdag cag min/ /'dir ni phyogs rnams rgya cher grags pa'i tshogs ldan pa'i// rgyal po'i rigs su gyur par khyod kyis mi shes sam/ /gang gi nor gyi snying po nges par bltas nas ni/ /nor bdag mi yang ji bzhin don dang ldan pa yi/ /rga bas gzir cing 'chi ba'i sdug bsngal gyi/ /dub cing yid 'thung zhum ba'i 'jigs spangs phyir/ /lha yi mgon po gnas skabs 'dir zhugs kyis/ /dreg pas ma yin byin min mi brtan min/ /bsod nams byed pa rnams la 'chi ba'i phyir/ /gang phyir khyod ko bdag cag sdug bsngal byed/ /gnyen
- 108b
dang mdza' bshes 'khor gyi sbyor ba yi/ /dga' bas brgya byin yun ring 'tsho bar gyis/ /rang byas bgo skal ldan pa'i 'bar ba yi/ /gang phyir lha yi bdag por khyod gyur des/ /gzhan gces rgyu yis lha yi rgyal po yi/ dam pa'i phun sum tshogs thob mi 'gyur ro/ /de nas dbang po chen po des de'i tshig gsal zhing tshig gis don sna tshogs ston pa'i tshig rnams kyis lus tshim zhing mchog tu ngo mtshar du gyur la dad pa bzhin rab tu dngas shing mdzes pa dang/ /gzhan yang de rnams kyi bsam pa sad pa'i phyir shin tu bsti stang dang bcas pa'i tshig gis smras pa/ /kye ma ma dang 'dra ba'i sring mo dag /'jig rten dka' thub can dag kyang/ /mgon du bdag gi lha 'dod na/ /ci phyir 'di ni mchog ster ba/ /nga la khyed rnams brtse med 'gyur/ /de nas bu mo de rnams lhag par yang 'khrugs shing khro ba dang bcas pas brgya byin la smras pa/ /'di sogs kyi ni bzhin ras la/ /chags shing 'dzum dang zur mig gis /rnam lta'i gnas ni gzhan yin zhing// sbyin bya'i mchog kyang gzhan yin no/ /gal te brgya byin khyod kyis ni/ /mchog rab ster bar nus na ni/ /yul rnams kyi ni sha za ni/ /mi srun de las rgyal bar gyis/ /yang na 'dod pa spang dka' zhing/ /log pa'i rtog pa 'chags 'gyur na/ /rgyun de nyid la rtag tu mnos/ /gal te nus yod 'di 'drar gyis/ /mig stong ldan khyod mi brtan pa'i/ /'dod la yid ni chags gyur pas/ /khyod dang sbyin bya tha dad na/ /mchog ces pa 'di ji ltar smra/ /ji ltar chu bo 'jigs pa yi/ /shugs kyis bdas par gyur pa'i mi/ /gzhan dag bsgral bar bya'o zhes/ /yongs rtog byed pa rmongs pa'i gnas/ /skra rnams bregs par gyur nas ni/ /phyag dar khrod kyis gos 'chad zhing/ /dgon pa yul du 'dod
- 109a
par ni/ /nam zhig de ltar 'gyur zhig gu /gnya' shing gang tsam rnam lta zhing/ /sa yi lhung bzed lag thogs nas/ /dbyas med khyim nas khyim du ni/ /nam zhig slong mo spyad par 'gyur/ /rnyed dang bkur sti chags med cing/ /nyon mongs tsher ma 'dam rdzab dang/ /skyong bar byed dang grong khyer gyi/ /sbyin pa'i gnas su nam zhig 'gyur/ /rtswa yi tshogs las langs nas ni/ /ba mos lci ba'i gos dag dang/ /zas skom ngan don tsam gang gis/ /nam zhig lus la chags med 'gyur/ /shing drung ne tso ltar ljang ba'i/ /dur ba 'jam po'i gos can du/ /mthong chos bde ba'i dga' ston dang/ /nam zhig bdag ni nyal bar 'gyur/ /'dor bar 'gyur ba'i lus srog la/ /chu dang rtswa yi zil pa ltar// bltos med yun ring goms pa yis/ /bde ba chen po nam zhig thob/ /nam zhig chu ngogs sman ljongs su/ /gnas nas chu rlabs 'byung 'jig dang/ /'tsho ba 'jig rten gnas 'dra bar/ /yang dang yang du blta bar 'gyur/ /lta ba kun gyi mar gyur pa'i/ /'jig tshogs lta ba 'byin pa dang/ /srid pa'i longs spyod mi 'dod par/ /bdag ni nam zhig 'gyur zhig gu /rmi lam smig rgyu sgyu ma sprin/ /dri za'i grong khyer mtshungs par ni/ /rgyu dang mi rgyu'i 'jig rten dag /nam zhig rtogs par byed par 'gyur/ /ming po 'di ltar dga' ba yis/ /re ba'i yid kyi rnam rol pas/ /zang zing bcas shing g.yo ba yi/ /mchog de rnams kyis ci zhig bgyi/ /kye ma mchog rab sbyin par sems gzhan yang/ /log par rtog pa'i skad cig tsam dga' zhing/ /lha mgon 'dod pa ngo bo nyid kyis g.yo/ /g.yang sa chen por mun nag bcas 'dra bas/ /sems rgya che ba'i dam pas rnam par spangs/ /mi rigs 'tshe ba kun gyi rgyur gyur cig /'dod pas mi rnams
- 109b
'khrul bar byed pas na/ /'di ni smad bya 'jigs pa chen po ste/ /mi gtsang bsgos pa'i sbrul nag dag dang mtshungs/ /gang 'di thog mdza' med nas 'gro ba dang/ /'gro bar 'gyur dang gnas pa'i sems can lus/ /de ni gsod 'joms bsten dang mtshungs pas ni/ /sdig pa'i gzhir gyur 'dod pas ci zhig bya/ /lha dbang brgya byin 'dod pa'i yul 'di ni/ /phyag dar khrod 'drar byed 'dra'i ngo bo bas/ /brdzun par rtog cing rnam smin mi bzad pa'i/ /'dod pa'i yid kyis kyang ni su zhig bsten/ /bai DUrya ltar sngon ljang skye ba'i rtswa dang ni/ /me tog rgyas par gyur pa'i shing gi gnas spangs nas/ /lcags kyu rnon pos spyi bor 'tshog cing 'drid pa yang/ /glang chen dbang po khur bskyed yul gyis bslus pa yin/ /mdung rtses lus skyon grong gi khra nga'i tshogs rnams kyis/ /gshog pa'i rlung gis rab tu g.yob bar byed 'gyur la/ /mdza' bo rnams kyang g.yo byas mig gis lta byed pa/ /skyes bu 'jigs par gyur pa'ang yul gyis bslus pa yin/ /byis pa log rtog rlung gis rab 'bar 'dod pa yis/ /rang yid khang pa bdag nyid kyis ni sreg byed na/ /smyig ma lo brgya lon pa phan tshun bdar ba yis/ /rang nyid kyis ni sreg par byed pa ji bzhin no/ /brgya byin gzhan yang rnam rgyal khang par gnas nas ni/ /'od 'phro nor bu'i dpal gyis dga' ba 'di las ni/ /me chen rab 'bar 'jigs pa'i mnar med par phyin pas/ /gang 'di dug can yul gyis bde ba bde legs min/ /mtho ris gnas nas 'gro ba ngan pa'i nang 'jug cing/ /skad cig gis lhung 'pho ba'i sdug bsngal gyis gzir ba/ /gang dag sdug bsngal myong 'gyur lha yi 'jig rten mngon dga' ba/ /sngar myong 'gyur ba de ni bde ba myong ma yin/ /gser gyi pad+ma kha 'byed dang pa nyal ba dang/ /gang 'dir lha yi khang
- 110a
par rdzing bur gru la brgal ba dang/ /'dod pa'i las kyis slar yang mi ro rul ba yis/ /gzings pa'i chu bo rab med nang du lhung bar 'gyur/ /yongs su gyur na dga' bral rmi lam lta bu yi/ /lha rnams bde ba de ni brgya byin su zhig 'dod/ /'tsho ba'i 'jig rten khros pa'i sbrul gyi lce ltar g.yo ba ni/ /thams cad rtogs pas bdag cag thar la gzhol bar gnas/ /srid mtsho tshang tshing nang na gnas pa'i byis pa rnams/ /'di bde yin zhes pa de log par brtag tsam ste/ /gang 'di srid pa ma lus sdug bsngal kun bskyed cing/ /yang dag gsung ba'i sangs rgyas rnams kyis nges par gsungs/ /'tsho ba'i 'jig rten rang bzhin sdug bsngal mang pos g.yengs gyur te/ /gang tshe 'di na bde ba myong ba'ang bya rog blta ltar mtshungs/ /de yang phrad gyur sdug bsngal du mas zil gyis gnon 'gyur te/ /chu bo'i chu ni rgya mtshor phyin pa dag dang mtshungs pa dang/ /gang phyir bud med lag pa ge sar bcas pa'i pad+ma'i 'dab 'dra dang/ /gang du bu cung zad 'khrol pa tsan dan bsil bas bsgos par gyur pa yis/ /reg cing zangs ltar dmar btsos sor mo zlu ba pas brtse bas 'khyud par byas pa dang/ /bsil yab rlung gis rgyan 'phreng gtor bas gnyid log khyab par gyur pa dag 'jig ma'i rtse mo gcer ba'i lam du thal ba dang 'dres rlung dmar ni/ /drag pos g.yab cing dub la lci ba'i lus kyis slar yang nyal 'gyur te/ /de bas 'tsho ba'i 'jig rten skad cig thang cig g.yo bar shes gyis la/ /'phongs pa'i 'bras 'byin 'dod pa spongs la tshangs pa'i gzhi la brten par gyis/ /de nas bu mo rnams la mig stong ldan/ /dga' bas lus kyis ba spu ldang gyur cing/ /brtson pa mngon dga' i sems dang lhan cig gis/ /sum cu rtsa gsum
- 110b
mngon phyogs song bar gyur/ /de nas bu mo de rnams rab byung nyer son zhing/ /de nyid don la rnam brtags blo mig dag gyur pas/ /dregs pa'i chu rlabs g.yo zhing 'jigs par byed pa yi/ /sdug bsngal mtsho chen mdza' med 'khor ba brgal bar gyur/ /'gro ba ma rig ldongs pa kun gyi mig gcig pu/ /rang bzhin 'gro don rnam byed nges pa'i bdag nyid kyi/ /thub pas sems can rnams la tshul 'di gsungs pas na/ /sems can rnams kyi srid pa'i tsher ma zad par shog /gzhon nu ma bdun gyi rtogs pa brjod pa/ /slob dpon chen po gsang ba sbyin gyis mdzad pa rdzogs so// //rgya gar skad du/ sabta gu Na pa ri bar+NanA ka thA/ bod skad du/ yon tan bdun yongs su brjod pa'i gtam/ 'jam dpal gzhon nur gyur pa la phyag 'tshal lo/ /las ni du ma la brten pa'i/ /san tshogs yon tan 'dod pa yis/ /'bad bya sa bon med par ni/ /myu gu skye ba yod pa ma yin/ /nyes med yon tan bsdu ba ni/ /sna tshogs pa dag rnam bya ste/ /nyes pa dag ni gcig pu yis/ /yon tan mang po 'joms par byed/ /tshe ring de bzhin nad med dang/ /gzugs dang skal ba bzang dang rigs/ /nor dang shes rab dag dang bdun/ /yon tan med sde dag las gsungs/ /de bas zlag pa nyes pa yin/ /de dag re res ji ltar ni/ /yon tan thams cad 'joms 'gyur ba/ /de ltar nga ni bshad par bya/ /nad med gzugs dang skal pa bzang/ /rigs nor shes rab phun sum tshogs/ /tshe ring ba ni med gyur na/ /bsad sar phyin pa'i rgyan dang 'dra// tshe dang gzugs sogs yon tan ni/ /'di dag nad med mi ldan na/ /don med par ni nyams 'gyur te/ /ma ning bud med mchog yod mtshungs/ /yon tan ldan pa mthong na yang/ /gzugs ngan skyo ba skye 'gyur te/ /yon tan phun
Colophon
gzhon nu ma bdun gyi rtogs pa brjod pa/_slob dpon chen po gsang bas sbyin gyis mdzad pa rdzogs so/