Q5397MW1KG13126_5397mdo 'grelAll versions of this work

las rnam par 'byed pa zhes bya ba

Karmabibhaṅganāma

Text

ff. 41a–46b · 12 folio sides

  1. 41a

    zhes bya ba dang / theg pa chen po'i mdo las 'byung ba mi dge ba bcu'i las kyi lam 'di dag ni dmyal ba chen po'i chu yin te/ mi dge ba bcu'i las kyi lam brten pas sems can dmyal bar lhung bar 'gyur ro// mi dge ba bcu'i las kyi lam bstan pa/ slob dpon chen po dpal mar me mdzad ye shes kyi zhal snga nas mdzad pa rdzogs so// // rgya gar gyi mkhan po de nyid dang zhus chen gyi lo tsA ba dge slong tshul khrims rgyal ba sa bsgyur cing zhus te gtan la phab pa'o// 5/ las rnam par 'byed pa zhes bya ba btsugs so// @#// rgya gar skad du/ karma bi b+haM ga nA ma/ bod skad du/ las rnam par 'byed pa zhes bya ba/ dkon mchog gsum la phyag 'tshal lo// ding sang dus kyi skye bo 'di dag gis// mtho ris bde ba dag kyang thob dka' na// mya ngan 'das la re ba yod min pas// bdag nyid kho na dran phyir bri bar bya// yod med rtag chad dang bral ba// bde ba'i longs spyod phun sum tshogs// 'gro rnams yongs su smin mdzad pa// dam pa skyes mchog de la 'dud// bcom ldan 'das gang 'jig rten dang / 'jig rten las 'das pa'i chen po las kyang phul du byung zhing khyad par du 'phags pa de la phyag 'tshal nas ji ltar bya zhe na/ las dge ba dang mi dge ba rnam par dbye bar bya ste/ mngon par mtho ba mtho ris lha dang mi// thob par byed pa sdom pa'i tshul khrims yin// de nyams gyur pas ngan song 'gro ba ni// dmyal ba yi dgas byol song 'di dag go/ lha dang mi yi gtam rgyas pa 'di ni 'jig rten gzhag pa dang / 'jig rten gdags pa dang // bye brag tu bshad pa chen po'i nang nas che long du btus pa mdzod kyi gnas gsum pa la sogs par blta bar bya'o// 'di ltar tsha ba'i sems can dmyal ba ni dzam+bu'i gling 'di'i 'og na dpag tshad

  2. 41b

    khri phrag gnyis na/ sems can dmyal ba chen por gnas so// gzhan bdun ni de'i steng na rim pa bzhin du gnas so// de dag gi tshe'i tshad kyi rim pa ni mi rnams kyi lo'i rim pa rnams la 'dod pa'i khams kyi lha rnams dang / yang sos pa la sogs pa dmyal ba rnams kyi nyin zhag dang zla ba dang lo'i rim pa rnams bsgres nas shes par bya ste/ 'di ltar mi rnams kyi tshe lo lnga bcu la sogs pa las bsgyur nas shes par bya'o zhes bshad pas so// grang ba'i sems can dmyal ba yang ti se'i 'og na snga ma de dag gi thad na gnas pa ste/ de dag gi tshe'i tshad kyang yul dbus kyi bres bcal ba'i ti la khal brgyad cus byur bur bkang ba'i nang nas/ skyes bu zhig gi sa lo brgya brgya na ti la re re phyung bas zad par gyur pa na sems can dmyal ba chu bur can gyi tshe zad pa yin te/ 'og ma rnams kyi tshe ni nyi shur bsgyur ro// 'di dag gi don yang cung zad tsam zhig mdo las bshad pa bri bar bya'o// de ltar de dag dmyal ba ni// bcu drug ces bya rgal bar dka'// drag po'i las kyi kun tu gang // re re la yang lhag bcu drug/ rtsig pa bzhi dang ngos bzhi ste// rnam phye ris su chad pa yin// lcags kyi ra bas kun nas bskor// lcags dag gis ni gang ba yin// dpag tshad brgya phrag du mar ni/ me lce dag gis khyab par gnas zhes bcom ldan 'das kyis gsungs so// mdzod las kyang de dag gis ni ngos bzhin/ me mar mur dang ro myags dang / spu gri la ma sogs chu bo yin zhes bshad do// sngon gyi mkhas pa chen po kha cig na re cha ba la sogs pa bdun po 'di dag ni mnar med pa'i sems can dmyal ba'i g.yas ngos dang g.yon ngos na gnas so zhes zer ro// nyi che ba dang / nye 'khor ba'i sems can dmyal ba dag la gnas kyi nges pa med de/ chu bo dang / ri dang / mya ngam la sogs

  3. 42a

    pa'i thang dang / steng na gnas so// gtam rgyas par ni dran pa nye bar gzhag pa dang / 'jig rten gzhag pa dang / 'jig rten gdags pa la sogs par blta'o// yi dgas kyi rtsa ba'i gnas ni rgyal po'i khab kyi grong khyer chen po'i 'og dpag tshad lnga brgyan yod de/ de na yi dgas kyi rgyal po gshin rje gnas so// gzhan ni de las 'phros pa yin no// gtam rgyas par ni yi dgas kyi rtogs pa brjod par blta bar bya'o// byol song gi rtsa ba'i gnas ni rgya mtsho chen po yin no// thang dang / chu dang / ri dang / dur khrod la sogs pa na gnas pa ni de las 'phros pa yin te/ rgyas par ni de dang de dag tu blta bar bya'o// gnas gsum po na bde ba med// sdug bsngal rgyu dang bcas pa'i gtam// mdo dang bstan bcos dag na gsal// blo dang ldan pas blta bar bgyis// dmyal ba dang / yid dgas dang / byol song gi sdug bsngal rgyu dang bcas pa mdo dang bstan bcos dag na gsal lo// mi'i sdug bsngal brgya rtsa bcu dag ni/ 'phags pa thogs med kyis mdzad pa'i yo ga tsAr+ya blta bar bya'o// lha dag la ni sdug bsngal gzhan ni med kyi/ 'on kyang 'chi ltas lnga dang / nye ba'i 'chi ltas lnga 'byung ste/ 'di ltar gos la dri ma 'chags pa dang / me tog gi phreng ba rnyings pa dang / mchan khung nas rdul 'byung ba dang / lus la dri ma 'byung ba dang / rang gi stan la mi dga' bar 'gyur ba'o// nye ba'i 'chi ltas lnga ni gos dang rgyan dag las yid du mi 'ong ba'i sgra 'byung ba dang / lus kyi 'od chung bar 'gyur ba dang / khrus byas pa'i chu'i thigs pa lus la 'chags par 'gyur ba dang / g.yo ba'i bdag nyid can yang blo yul gcig la 'chags par 'gyur ba dang / mig 'byed pa dang 'dzum pa srid par 'gyur ba dgra ste/ nye ba lnga ni ma nges pa'o// sdug bsngal de dag

  4. 42b

    ci las byung zhe na/ las ni lci dang yang ba dag/ yul dang bsam pa'i dbye ba yis// nyan thos theg pa chen po'i lugs// rnam pa gnyis su shes par bya// lci ba'i ni gnyis te/ yul gyis lci ba dang / bsam pas lci ba'o// yang ba yang de dang 'dra'o// de yang nyan thos dang theg pa chen po'i lugs kyi lci ba dang yang bas sor ba dad par shes par bya'o// de la yang nyan thos kyi yul gyi lci ba ni// 'di ltar mtshams med pa lnga las pha bsad pa ma gtogs pa bzhi'o// de las kyang dge 'dun gyi 'khor lo'i dbye na lci ba'o// gzhan yang byams pa'i ting nge 'dzin la snyoms par zhugs pa dang / rdo rje lta bu'i ting nge 'dzin dang / srid pa'i rtse mo'i ting nge 'dzin las la nges pa'i rnal 'byor pa dang / mkhan po dang / slob dpon dang / dge slong dang / dge slong ma dang / pha dang ma dang / srid pa tham pa'i byang chub/ sems dpa' dang / nad pa dang / chos smra ba dang / nges pa'i sa la gnas pa'i byang chub sems dpa' dang / rgyun tu zhugs pa dang / lan cig phyir 'ong ba dang / phyir mi 'ong ba dang / dgra bcom pa dag gsod pa dang / de dag la rdeg pa dang / lcags sgrogs la sogs pas sdom pa dang / de dag gi yo byad rkub dang / mchod rten gyi dang / dge 'dun gyi dang / chos kyi dang / sangs rgyas kyi yo byad rku/ ba dang / gang zag snga ma de dag dang / dkon cho ga gsum la brdzun du smra ba dang / tshig rtsub po dang / de dag pa na dun 'byed pa dang / tshigs su bcad pa ma yin pa smra ba ni yul gyis lci ba'o// bsam pas lci ba ni log par lta ba chen po skyes pa dang / yid kyi nyes pa chen po'o// yul gyis yang ba ni byol song dang / dur khrod kyi sha za gsod pa la sogs pa'o// bsam pas yang ba ni de las gzhan pa rnams so// de la theg

  5. 43a

    pa chen po'i yul gyis lci ba ni 'di ltar bla ma rnams dang / sems dang po bskyed pa la sogs pa'i byang chub sems dpa' dang / pha dang ma dang / de kho na nyid kyi rnal 'byor pa dang / rang gi lha dang / dkon mchog gsum la sogs pa la snga ma'i tshul rnams bzhin du byed pa'o// don de nyid la dgongs nas bcom ldan 'das kyis rdo rje gtsug tor zhes bya ba/ rnal 'byor chen po'i rgyud las ji skad du/ gsang ba'i bdag po nyes par spyod pa de dag ni lci bar gyur pa dang / tha mal par gyur pa'o// de la pha ma la sogs pa gsod pa dang / rdeg pa ni lus kyi nyes par spyod pa lci ba'o// srog gcod pa la sogs pa gzhan gsum ni lus kyi nyes par spyod pa tha mal pa'o// dam pa'i chos spong ba dang / lha rnams la tshig rtsub po smra ba dang / pha ma dang bla mar gyur pa la sogs pa la tshig ngan pa smra ba ni ngag gi nyes par spyod pa lci ba'o// skyes bu 'ga' zhig dod pas dge ba nyams su len cing rtsom pa'i gtam gyi skabs su 'jig rten pha rol med do zhes bya ba'i tshig/ 'jig rten las 'das pa'i brdzun smra ba ni/ ngag gi nyes par spyod pa'i lci ba'o// dge ba'i bar chad byed pa'i tshig 'khrul pa smra ba dang / lkog 'phyas byed pa dang / mi dge ba'i las kyi gtam rnams ni ngag gi nyes par spyod pa tha mal ba'o// yid kyi nyes par spyod pa ni gsum ste/ de nyid las sems kyi nyes pa dang / sems las byung ba'i nyes pa dang / ma rig pa'i nyes pa'o// de dag kyang dge ba bcu'i las kyi lam de nyid la ma chags pa nyid ni/ sems kyi nyes par spyod pa'o// dregs pa dang / nga rgyal dang / khro ba dang / sems can rnam par 'jig pa dang / 'dod chags kyi sems kyis gzhan gyi bud med la chags pa dang / gzhan gyi

  6. 43b

    srog 'phrog pa dang / bla mar gyur pa la sems kyi gyu zhing rab tu sdang ba ni sems las byung ba'i nyes pa'o// dge ba bcu'i las kyi lam rnams dang / pha rol tu phyin pa drug 'dor zhing brjed ngas pa dang // / som nyir gyur pa dang / yid shin tu rmongs par gyur pa ni ma rig pa'i nyes par spyod pa'o// zhes gsungs so// de la bsam pas lci ba ni theg pa chen po pa sems snying rje'i dbang du gyur pa/ sems can// thams cad mi gtong bar rjes su 'dzin pa'i lci ba ni/ 'di ltar zhe sdang kho na yin te/ slob dpon zhi ba lha'i zhal snga nas/ bskal pa stong du bsags pa yi// sbyin dang bde gshegs mchod la sogs// legs spyad gang yin de kun kyang // khong khro gcig gis 'joms par byed ces gsungs so// 'di kho na lci ba yin pa'i khungs mang du yod mod kyi// re zhig bzhag go/ yang ba'i las kyang tshul 'di las shes par bya'o// theg pa gnyis po dag tu// lci dang yang ba'i las rnams bshad// 'dod chags zhe sdang gti mug gis// rnam pa gsum du 'gyur ba'o// de las srog gcod pa 'dod chags las skyes pa ni/ 'di ltar lus kyi yan lag gi phyir ram/ nor gyi phyir ram/ rtsed mo'i phyir ram/ bdag dang mdza' bo yongs su bskyab pa'i phyir srog gcod pa'o// zhe sdangang las byung ba ni gsod pa dang 'khon gyis byas pa'o// gti mug las byung ba ni mchod sbyin byed pa dang / rgyal po'i chos 'don pa tshad mar byas nas chos kyi blos gsod pa dang / mi mi bgrungs pa dag la chad pas bcad nas rgyal po'i bsod nams kyi snod/ du 'ong zhes zer nas gsod pa lta bu dang / par sig pa dag ji skad du/ pha dang ma rgas sam/ nad tshabs po ches thebs na bsad do// sbrul dang / sdig pa dang sbrang bu tre ma bu ka la sogs pa ni/ mi rnams

  7. 44a

    la gnod par byed pas bsad do// ri dgas dang phyug dang bya dang ma he la sogs pa ni longs spyod pa'i phyir/ bsad do zhes zer ba lta bu'o// ma byin par len pa chags pa las byung ba ni gang zhig gang don du gnyer ba des 'phrogs pa'am/ gzhan gyi rnyid pa'o// bkur sti'am/ grags pa'i phying ram bdag dang mdza' bo yongs su bskyab pa'i phyir 'phrog pa'o// zhe sdang las skyes pa ni sngar bzhin no// gti mug las byung ba ni rgyal po'i chos 'don pa chad mar byas nas mi bsrungs bdag chad pas bcud nus 'phrog pa lta bu dang / bram ze dag na re 'di thams cad tshangs pas zlum ze rnams la byin pa yin pa las/ da ltar bram ze rnams nyams pas rigs gzhan spyod du zad med// de bas na bram ze 'phrog pa ni rkub ma yin gyi/ bram ze bdag nyid kyi len par byed par zad pas bdag nyid kyis za ba dang / bdag nyid kyis 'thung ba dang / bdag nyid kyis gyon pa dang / bdag nyid kyis sbyin pa yin no// zhes zer ba lta bu'o// de las 'dod pas log par g.yem pa 'dod chags las byung ba ni/ gzhan gyi chung ma la chags pa'am/ rnyed pa'am/ bkur sti'i phying ngam/ bdag gam mdza' bo yongs su bsgrub pa'i phyir mi tshangs par spyod pa'o// zhe sdang las byung ba ni snga ma bzhin no// gti mug las byung ba ni par sig pa dag na re/ ma la sogs pa la nyal ba dang / ba lang 'brang gi mchod sbyin la cho ga can gyi chu 'thung ngo // rtswa bcad do// ma'i gan du nyal po la 'gro'o// srin mo'i gan du dang / dus gcig pa'i gan du 'gro bar bya'o zhes bya ba dang / ba lang la sogs pa la yang spyad par bya'o zhes zer ba lta bu'o// de lta bas na 'di lta bu byung ba na ni/ rgyal po bzhad gad lta bu byed pa

  8. 44b

    dang / bag ma len pa'i tshe dang sos pa dang / nor kun 'phrog tshe brdzun smras gnod med de/ brdzun lnga lhung bar byed pa min zhes bshad// ces zer ba dang / gang yang log par lta ba'i brdzun du smra ba'o// mi dge ba lhag ma dag kyang snga ma bzhin no// yid kyi gsum ni 'dod chags la sogs pa gsum gyi mjug tu skyes pa'o// srog gcod pa ni bsams bzhin du// ma nor bar ni gzhan bsad na'o// ma byin len pa gzhan gyi nor// mthu dang 'jab bus bdag gir byed/ log g.yem bgrod min pa la 'gro// 'du shes gzhan bsgyur brdzun tshig don// nyon mongs sems kyis pha rol 'byed// tshig rtsub po ni mi/ snyan pa'o// ngag 'khyal glu dang zlos gang dang // bstan bcos ngan dang 'du 'dzi'i gtam// brnab sems gzhan gyi nor la chags// gnod sems sems can la sdang ba'o// chu 'bras med zer log lha'o// de ltar theg pa chen po'i 'di ltar yin te/ de yang rnam par snang mdzad mngon par byang chub pa'i rgyud las/ bcom ldan 'das kyis bka' stsal ba/ byang chub sems dpa'i ched du bas mnas srog gcod pa las slar log par bya'o// dbyug pa thang zhing khon du 'dzin pa yang spang bar bya'o// des bdag nyid la ji lta ba de bzhin du gzhan gyi srog kyang yongs su bsrung bar bya'o// ma byin par len pa las slar ldog par bya ste/ des gzhan gyi yongs su bzung ba'i longs spyod la chags pa bskyed par yang mi bya na/ gzhan gyis yongs su bzung ba'i longs spyod la ma byin par len pa lta ci smos// 'dod pas lag par g.yem pa las ldog par bya ste/ des gzhan gyi sems yongs su bzung ba'i chung ma dang / rigs dang / mtshan ma dang / chos kyis bsrungs pa rnams la chags pa bskyed pa

  9. 45a

    yang mi bya na/ yan lag ma yin par spyod pa dang / dbang po gnyis sprod pa lta ci smos/ brdzun du smra ba las ldog par bya ste/ de'i ched du bsam nas gang gis sangs rgyas kyi byang chub bslu bar 'gyur ba'i brdzun gyi tshig srog gi phyir yang smra bar mi bya'o// tshig rtsub po las ldog par bya ste/ des sems can rnams la mnyen pa dang / 'jam pa dang / yid la 'bab pa de lta bu'i tshig smra bar bya'o// de ci'i phyir zhe na/ gsang ba'i bdag po byang chub sems dpa' sems can thams cad kyi don bya ba'i thog mar 'gro ba ni tshig snyan pa yin pa'i phyir ro// phra ma las ldog par bya ste/ des ci nas kyang dbyen du mi 'gyur ba'i tshig dang / gnod par mi 'gyur ba'i tshig de ltar bsgrub par bya'i// byang chub sems dpa' rnams ni sems can dbye ba la zhugs pa ma yin no// tshig 'chal pa las ldog pa bya ste/ des yul dang dus dang don dang ldan pa'i rjes su 'jug pas sems can thams cad la yid du 'ong ba dang / ran par spyod pa'i tshig smra bar bya'o// de ci'i phyir zhe na/ byang chub sems dpa' ni tshig bzang po dang ldan pa'i phyir ro// brnab sems las ldog par bya ste/ des gzhan gyi longs spyod dang / gzhan gyi nor la tshogs pa'i sems can bskyed par mi bya'o// de ci'i phyir zhe na/ byang chub sems dpa' ni sems ma chags pa yin no// gal te byang chub sems dpa' bdag sems chags na thams cad mkhyen pa nyid kyi sgo'i phyogs gcig las nyams par 'gyur ro// gsang ba'i bdag po byang chub sems dpa'i rab tu dga' ba bskyed pa des 'di ltar bsam par bya ste/ gang bdag gis bya dgos pa de dang des rang 'byor par gyur pa de legs so snyam nas/ sems can de dag gi/

  10. 45b

    longs spyod de dag chud mi za ba la yang dang yang du dga' ba bskyed par bya'o// gsang ba'i bdag po gzhan yang gnod sems las ldog par bya ste/ des thams cad la bzod pa dang ldan pa dang / byams pa dang // khong khro ba med cing sems snyoms par bya'o// des mdza' bo la ji lta ba bzhin du dgra la yang de bzhin du bya'o// de ci'i phyir zhe na/ byang chub sems dpa' ni yid kyi gnas ngan len dang ldan pa ma yin gyi/ byang chub sems dpa' ni rang bzhin gyi bsam pa yongs su dag pa yin no// gsang ba'i bdag po de lta bas na byang chub sems dpa' gnod sems dang bral bar bya'o// gsang ba'i bdag po gzhan yang byang chub sems dpa' log par lta ba las ldog par bya ste/ des yang dag pa'i lta ba dang / 'jig rten pha rol la 'jig par lta ba dang / g.yo med pa dang / gya gyu med pa dang / drang ba dang / sangs rgyas dang / chos dang / dge 'dun dag la bsam pa nges par bya'o// de ci'i phyir zhe na/ gsang ba'i bdag po log par lta ba ni byang chub sems dpa'i kha na ma tho ba chen po ste/ dge ba'i rtsa ba thams cad gcod/ par 'gyur ro// 'di ni mi dge ba'i rtsa ba thams cad kyi phyi mo'o// gsang ba'i bdag po de lta bas na tha na band gad tsam du yang log par lta ba bskyed par mi byed pa'o zhes gsungs so// yul dang bsam pa nyon mongs dang / dus dang grangs dang yan lag sogs// chung dang 'bring dang chen po ste/ rnam pa gsum du shes par bya/ las kyi lam bcu po de dag kyang yul la sogs pa de dag gi dbang gis chung ngu dang / 'bring/ po dang / chen por 'gyur ro// de la yul gyis 'gyur ba ni sngar ji skad brjod pa'i chu la de las shes par bya'o// de la bsam pas gsum du 'gyur ba ni mi shes pas byas pa ni chung ngu'o// bag med pas byas

  11. 46a

    pa ni 'bring ngo // ma gus pas byas pa ni chen po'o// de la nyon mongs pas gsum du 'gyur ba ni 'dod chags la sogs pa'i nyon mongs pa chung ngu/ 'bring dang chen pos srog gcod pa la sogs pa'i las kyang de bzhin du byed pa'o// de la dus kyis 'gyur ba ni spor ba dang / dngos gzhi dang / mjug rnams las gcig dang ldan pa ni chung ba'o// gnyis dang ldan pa ni 'bring po'o// de dag gsum ka rdzogs pa ni chen po'o// de la las kyi lam bcu pa de dag grangs kyis 'gyur ba ni lan cig byas pa ni chung ba'o// lan gnyis byas pa ni 'bring ba'o// lan gsum phan chad byas pa ni chen po'o// de la yan lag gis 'gyur ba ni sog gcod pa la sogs pa de dag gi yan lag bal cher ma tshang ba ni chung ba'o// phal cher chang ba ni 'bring po'o// thams cad rdzogs shing tshang ba ni chen po'o// sogs zhes bya ba ni srog gcod pa la sogs pa de dag las gang yang rung ba lan cig byas pa tsam ni chung ba'o// de la 'gyod pa med pa ni 'bring po'o// de la gnyen po mi bsten pa ni chen po'o// bsdam par bya ba ni chung ngu'o// bshags par bya ba ni 'bring po'o// pham pa ni chen po'o// rtsed mo dang / gzhan gyi g.yapa la nags kyis byas pa ni chung ngu'o// rang nyid la nyon mongs pa dang nyes pa med kyang gzhan dpya zhing gzhan gyi sdig pa byed pa'i rkyen byed pa ni 'bring po'o// rang nyid la nyes pa yod cing gzhan gyis dpyas pa ni chen po'o// gzhan yang sdig pa'i grogs po dang mi dge ba'i bshes gnyen gyi dbang gis rang dbang med par byas pa ni chung ba'o// grags pa dang snyan pa'i phyir byas pa ni 'bring po'o// rnam par smin pa la mi 'jigs pa ni chen po'o// gzhan yang las kyi lam bcu po 'di dag gi don rgyas par ni/ 'phags pa dran pa nye bar gzhag pa la

  12. 46b

    sogs pa'i mdo sde dang / slob dpon bram ze chos ldan rab 'byor dbyangs kyis mdzad pa dang / 'phags pa thogs med kyis mdzad pa'i rnam par gtan la dbab pa bsdu ba la sogs pa/ g.yog tsAr+ya'i sa chen por blta'o// gzhan yang / bsam bzhin pa dang rdzogs pa dang / ma 'gyod gnyen po med pa dang / 'khor dang rnam par smin pa las// bsags pa'i las zhes bya ba yin yang // 'khor ba'i las ni lhags dang // nye ba gang dang goms pa gang // sngon byas de dag gang yin las// snga ma snga ma rnam smin 'gyur// yang / shin tu yid la gcags pa dang // las de gsar du byas pa dang // yang dang yang du byas bgoms// de las gang rung sngar myong 'gyur// mthong ba'i chos la myong 'gyur dang // skyes nas myong bar 'gyur ba dang // lan grangs gzhan du myong 'gyur dang // myong bar 'gyur bar ma nges pa'o// las ni dkar dang / gnag pa dang // 'dren ma'i las dang rnam pa gsum// mdo dang bstan bcos dag na gsal// de bas na las rnams bskal pa brgyar yang ni// chud mi za bar des bsags nas// smin nas lus can rnams la ni// 'bras bu nyid du ston par byed// ces bya ste/ de lta bu la yang nges par yid ches par bya'o// 'gro rgyud lnga yi sems can thams cad dag/ 'dzam gling 'dir skyes dge ba bcu spyad de// mthar gyis bla ma bzang po bsten byas te// zag pa med pa'i tshul khrims thob gyur cig/ las rnam par 'byed pa zhes bya ba/ slob dpon mkhas pa chen po dpal mar me mdzad ye shes kyis mdzad pa rdzogs so// // rgya gar gyi mkhan po de nyid dang / zhus chen gyi lo tsA ba dge slong tshul khrims rgyal bas bsgyur cing zhus te gtan la phab pa'o// 55/ 'i tshu ba kyi 'ang sa/ #// rgya gar skad du/ sa mA dI sa b+hA ra pa ri brta/ bod skad du/ ting nge/

Colophon

las rnam par 'byed pa zhes bya ba/_/slob dpon mkhas pa chen po dpal mar me mdzad ye shes kyis mdzad pa rdzogs so/_/rgya gar gyi mkhan po de nyid dang /_zhus chen gyi lo tsA ba dge slong tshul khrims rgyal bas bsgyur cing zhus te gtan la phab pa'o