gshin rje nag po gsang ba de kho na nyid kyi rgyud kha thun zhes bya ba
Yamakṛṣṇaguhyatatvakhathuntantranāma
Text
ff. 156a–160b · 10 folio sides
- 156a
rgya gar skad du/ ya ma kr-iSh+Na gu h+ya ta ta kha thun tan tra nA ma/ bod skad du/ gshin rje nag po gsang ba de kho na nyid kyi rgyud kha thun zhes bya ba/ bcom ldan 'das 'jam dpal gshed po yab yum la phyag 'tshal lo// 'di skad bshad pa'i dus gcig na/ bcom ldan 'das 'jam dpal ya mAn+ta ka nyid chos sku'i ngang las gzugs sku zhal gsum phyag drug par bzhengs te/ phrin las rnam bzhi lhun gyis grub pa'i gzhal yas khang phyi nang yongs rdzogs gsal ba'i pho brang ye shes las grub pa'i 'og min gyi gnas na/ yum be tA li dang gnyis su med par bzhugs so// de'i dus de'i tshe na 'dus pa'i 'khor yang ye shes dang las las grub pa dang thabs cig pa las/ dregs pa chen po'i ting nge 'dzin la snyoms par zhugs so// de'i ngang las bcom ldan 'das kyi sku gsung thugs las rdo rje'i tshig 'di gsungs so// kye ma ho// 'khor 'das thams cad 'khor lo'i ngang // 'khor lo thams cad 'jam dpal don// de nyid rig pa byang chub sems// bde ba chen por sangs rgyas so// oM a ho/ zhes bka' stsal to// 'jam dpal kha thun gyi rgyud las/ gleng gzhi'i le'u ste dang po'o// // de nas bcom ldan 'das 'jam dpal chen po des/ srid pa'i gdug pa 'dul ba zhes bya ba'i ting nge 'dzin la snyoms par zhugs so// de'i dus de'i tshe
- 156b
na gsod byed ya ma rA dza zhes bya ba/ ri rab kyi 'og chu'i dkyil 'khor gyi steng na gnas pa la sogs pa'i bdud dang / gshin rje dang / srin po dang / ma mo khrag 'thung dang / lha ma srin rnams shin tu gdug pa che bar gyur to// de rnams kyis srid pa gsum gyi sems can thams cad za zhing gsod pa dang rngam par gyur pa las/ bcom ldan 'das ya mAn+ta kas/ yum be tA li dang gnyis su med par sbyor ba mdzad de/ sras ya ma rA dza sprul nas gsod byed ya ma rA dza'i lcags mkhar bcu bdun gzer ba las/ de rnams shin tu dngangs te srog dang bral ba snyam du gyur nas/ 'jigs pa'i sems kyis bstod pa ni/ gtum chen dregs pa chen po thams cad 'joms pa'i lha// dbang byed bdud 'dul dur khrod chas kyis brgyan// khro rngam gdug pas srid gsum thal bar rlog/ sgrol byed sku mchog ma mo 'bangs su 'khor// gtum chen rab 'bar gshin rje 'joms mdzad lha// 'jigs byed ya ma rA dza'i sku la phyag 'tshal bstod// ces smras te/ sngags rnams sor bzhag ya ma rA dza du man ta ka ra na pre ta dza ya a mu kaM snying la gum rbad dza/ ni dza shag pa bam ril snying gong ma ra na nag po ya ma srog la phra su ga bam ril rbad/ ma ra ni rbad rbad/ bdag gi smod pa rig par bcas// dpa' bos bzhes su 'bangs su mchi// zhes dbus kyi gsod byed chen pos smras so// de
- 157a
nas sras mchog ya ma rA dzas bka' stsal pa// nga la bstod pa phul ba yis// phan par 'gyur ba ma yin gyis// nga yi lha la bstod pa dang // 'khor bcas khyed kyis srog snying phul// zhes gsungs so// de'i dus su lha gang yin snyam ste/ nam mkha'i dbus na yar bltas pa las/ srid pa gsum gyi rtse mo na gzi mdangs dang ldan pa'i lha ya mAn+ta ka mthong ste/ shin tu bred pa'i dbang gis bstod pa ni/ nyi ma 'bum pas lhag pa'i 'od stong phyogs bcur 'gyu// gdug byed mtshon cha mang pos bskal pa'i me ltar 'bar// rab brjid gshin rje 'joms la phyag 'tshal lo// zhes smras te/ dbus kyi yi dwags dang gshin rje rnams kyis rang gi snying po phul ba ni/ ya ma rA dza sa do me ya// ya me do ru Na yo da ya/ ya da yo ni ra ya k+She ya/ yak+She yats+tsha ni rA ma ya hUM phaT/ ces phul lo// de nas sha zan dmar po yab yum gyis smras pa/ au rnal ma rnal te gsod la rngam gshos la mer sris la chum zum bis thum/ lcags kyi sgra gcig mas dgra bo'i snying phyung zhig/ de'i tshe ma mo dang khrag 'thung rnams kyis rang gi dmod pa phul te spras pa/ ma ma e ka dza ti dza dza/ trag rag sha mu ta snying la ma b+h+yo b+h+yo/ e ka dza ti mi tsa ro la baM ri la rbad trag rag sha bruM ri la rbad/ rak+Sho te kum dza dza kha la ma li b+h+yo b+h+yo/ re ma ti snying la baM ri la rbad/ thun mugs snying la rngubs rbad/
- 157b
ya ya mon tsin d+ha na ma la b+h+yo dza dza/ snying kha rag srog la b+h+yo b+h+yo ma ma tsit+ta rbad bruM/ snying la tshal ba med baM ri la rbad/ ces smras so// de'i dus su gza' rA hu las smras pa/ rA hu tshal pa mu me pa sha mi ki kha ta hUM nan lam staM b+ha ya nan/ zhes smras so// de nas yang khram bdag bcu gnyis dang lha ma srin sde brgyad kyis smras pa/ oM ya ma rA dza sa do me ya b+h+yo/ ru lu ru lu baM ri la rbad nan/ oM dug nur dug nur che ge mo tshal pa nan tshal pa nan/ oM snying gshogs me kha lo mu lo tsa thun nan/ oM sa ti ru ru grang kra ra tsa nan/ a mu kaM mA ra ya nan/ oM a kro d+he ka many+dzu shrI ya man+ta ka ka la rU pa k+Sha ya nan sa du baM rbad ru lu hUM dza/ ru la tsa pa ya ni ti sha ru ni nan/ a mu kaM mA ra ya nan/ ni mA ra ya/ ni ma ra du/ ya ma snying ya ma khrag tshal pa baM ri la// daM duM nu hUM phaT/ badz+ra tsi duM ling rbad/ mu ya ma mu ya ma snying khrag tshil rbad/ ya ma rA dza sha truM mu tshil hi gug/ ling du la ling rbad ling / a mu kaM chom ling swA hA/ bdag cag bstan pa bsrung bar bgyi// zhes smras so// de'i tshe bcom ldan 'das kyis dam tshig snying po bsgrag pa ni/ oM hrIHSh+T+r-iHbi kri ta na na sa ma ya hUM hUM phaT swA hA/ zhes bka' stsal to// dam chu blud nas mna' bsgrags te/ bstan pa bsrung bar dam bcas te zas skal du bstan pa bshig pa'i dgra bo'i srog dbugs byin te/ gtor ma dang dam rdzas phog nas
- 158a
bka' las mi 'da' bar bka' bsgos pa ni/ oM ya mAn ta ga hrIHSh+T+rIHmany+dzu shrI sa ma ya u ne u ye dza/ zhes bka' stsal to// ma mo khrag 'thung thams cad kyi snying po'i mgo yon tan gyi sngags kyis gnan pa dang gshin rje'i mgo gnan pa 'bru bzhi pa bka' stsal pa/ oM sa ma ya many+dzu shrI ya mAn+ta ka ya ma rA dza/ zhes bka' stsal to// ya mAn+ta ka zhes pa ni/ gshin rje'i mgo gnan par bka' stsal to// de ltar thams cad btul te bstan pa bsrung bar dam bcas nas 'jig rten pa bde ba la bkod nas sangs rgyas kyi zhing du gyur to// 'jam dpal kha thun gyi rgyud las/ dregs pa btul ba'i le'u ste gnyis pa'o// // de nas bcom ldan 'das kyis dgyes pa'i ting nge 'dzin la snyoms par zhugs so// de nas thugs las sprul pa'i sras ya ma rA dzas gsol pa// e ma ho// sems can kun la gnod byed pa// btul nas dam tshig bkod pa ni// kye ma shin tu ngo mtshar to// de las rjes su bsgrub pa ni// gsang sngags ji lta'i rim pa dang // de dag btul ba'i rim pa rnams// las la bkol na ji ltar bkol// las kyi kha tshar ji ltar gdags// bcom ldan 'das kyis bshad du gsol// de nas bcom ldan 'das kyis bka' stsal pa// kye ma nyon cig 'dus pa'i 'khor// bcom ldan 'jam dpal bsgrub
- 158b
'dod pa'i// rnal 'byor dam tshig ldan pa yis// dben pa chen po'i gnas nyid du// phrin las bzhi yi dkyil 'khor la// lha yi phyag mtshan be con dgod// bu don don du gnyer nas grub// dang po bla ma mnyes par bya// de nas phyi nang gsang ba'i dbang thob nas// dam tshig dag dang yang dag ldan// bdag nyid yab yum bskyed byas la// spyan drang mchod nas dngos grub blang // yid bzhin lta bu'i bsnyen pa grangs// oM a kro te ka ya mAn+ta ka ha na ma tha b+hany+dza hUM phaT/ 'bum phrag bcu ru bzlas byas na// dpa' bo 'jig rten gsum las rgyal// zhes gsungs so// 'jam dpal kha thun gyi rgyud las/ bsnyen pa'i le'u ste gsum pa'o// // de nas gzhan yang bshad bya ba// dur khrod dag gis gnas 'dug la// bdag nyid yab yum 'phro 'du las// mdun du sras mchog bskyed par bya// kha ni lhor bltas 'brub khung du// ling+ga bcug/ la thun gyis brab// rgyun du yon tan snying po grangs// oM sa ma ya many+dzu shrI mu tra ya mAn ta ka pany+tsa d+he ro ni hUM phaT/ de nas sngar gyi yon tan la// ma mo khrag thun 'bod rbad gsad// dril ba'i sngags kyis bsgrub par bya// gsod byed gtor ma rgyun du gtang // zhes gsungs so// 'jam dpal kha thun gyi rgyud las sgrub pa'i le'u ste bzhi pa'o// // de nas gzhan yang bshad bya ba// las la sbyar bar 'dod pa na// thun dang
- 159a
'khor lo gang rung bya// gza' skar ngan pa dag la gtad// zla ba mar ngo dag la bya// ro tshas ras la mi khrag dang // sbyar rtsi ldum bus snag tsha bya// skad sna bzhi yis gsod byed bstim// bya rog 'ug pa'i sgro rtsa yis// bcu gnyis rtsibs chen bri bar bya// 'khor lo'i las sngags 'di btags bskor// a mu kaM pra ma ya hUM phaT/ a mu kaM rak+ta tsa ra ya hUM phaT/ a mu kaM mu ra tsa ya hUM phaT/ a mu kaM mA ra ya hUM phaT/ phyi nang gsang ba'i rim pas bzlas// dmar zag chad nas rgyun gtor gtang // khri las mi mang mi nyung bya'o// yang na de bas thun la bya'o// thod pa nag po yin nges la// 'gram pa g.yas g.yon lhag pa dang // mchog ma bzhi ru sngags bris la// dmar thag dril ba'i thun gyis brab// mtshan mo gsod byed drag sngags bsnun// bdag nyid sku ni rgyan gcig bskyed// ya ma rA dza brgya rtsa gdon// khram bdag bskul zhing gshed bdun rbad// ya mA ra dza bskul byas la// seng ldeng phur pa snying la gdab// oM ya mAn+ta ka k+ShaM Ar+ya a tsa la k+ShaM/ oM ma dug tsa tsa tshal pa tshal pa rbad zad/ ma dug ka ya ma k+ShaM/ a mu ka srog rtsa la mugs tig rbad/ rtsa rtsa ra tsa rbad/ ma mo khrag la don ting mugs// srin po'i rus la chom chom tshal/ gshin rje'i khram la lhan lhan thob// dgra bo khram la khram ri li li ni dza rbad/ rnye kre d+ha de na bla de b+ha ba ta che ge mo ma
- 159b
ra ya rbad/ ces pas phur pa gdab par bya// de nas de nyid yum bskul la// ma mo khrag 'thung snying po dang // khrag thun 'di yis dbab par bya// mgo 'phyang ma dza dza/ dun mug bla rtsal dza dza/ rtsa bo che la dun dun mugs/ nang khrol smad lnga la rtsal baM/ dun baM dun ri li li rbad/ khrag dang dug gnyis bsres la brdeg/ de nas gsod byed bskul byas la// drag sngags bdag gis sngar ltar brdeg/ de yi yum dang ma tshogs bskul// khrag thun dag ni brdeg par bya// dgra bo khrag thun mugs/ oM mu ya mug ti rngubs che ge mo la cho tsho/ bal hu bal hu spu snying gong rtsa thun nan/ bal thun nan/ che ge mo nan/ khrag thun long khrag/ a mu kaM khong khrag la ya/ nad rnams so sor btang ba dang // ban+de la sogs gsad pa ni// man ngag dam pas bya ba yin// thun drug dril ba'i man ngag la// mda' yis gzir bar bya ba ste// 'ug pa ma yi mda' zor ni// zla ba zad khar 'phang zhing bskul// dug gis myos byed rak+tas 'jig/ nyung dkar mtshon la khram shing brab// dang la phur pa gdab par bya// sngags pa nang 'gras rtag 'grogs na// ro langs rak+Sha nag po bya// yang na thugs kyi srung bzlog bya// las rnams grub nas dur khrod du// drang srong sngags dang dmod pas gnan// gtor ma gtang la phrin las gzhol// zhes gsungs so// 'jam dpal kha thun
- 160a
gyi rgyud las// byed par las la bkol de gsad pa'i le'u ste lnga pa'o// // de nas yang dag bshad bya ba// las kyi kha tshar rim pa ni// rnal 'byor bkra shis 'dod pa ni// tshe yi man+ta 'di ltar bya// oM a kro te ka ya mAn+ta ka kA la rU pa A yuHpha la sid+d+hi b+h+yAM dza// zhes pas tshe yi bsgrub pa bya// tshe yi dngos grub chen po thob// gzhan yang ser ba dbab 'dod na// dung dkar phreM b+hU ti pr-i/ yug ti smin trag du tsar shar sha lta hril phob/ nyung dkar dag la sngags te 'phang // gzhan yang ser ba bcad pa ni// oM kA la rU pa tsa ya bi dong sa sho sha ya mo ha ya staM b+ha ya hUM phaT/ ti shaM shu ma li ti di bi ri hi ha ya ru ru ti swA hA// phe ska na ya phaT/ skye 'gram nyung dkar dag la bsngags// gang 'ong phyogs su gtang byas na// 'chad par 'gyur te the tshom med// snying dang 'dra te shin tu zab// gzhan yang ltas ngan 'bebs 'dod na// ya ma ni rakya kyed trab 'ur phob// ces gsungs so// 'jam dpal kha thun gyi rgyud las/ las kha tshar gyi le'u ste drug pa'o// // de nas bcom ldan 'das la 'khor gyis bstod pa ni/ e ma ho// yab gcig 'jam dpal gshen rje gshed// dbu drug phyag kyang bcu gnyis te// zhabs kyang rnam pa drug du bgrad// gdug pa'i mtshon cha sna tshogs bsnams// dur khrod 'bar ba'i rgyan dang ldan// ma mo gshin rje kun gyi
- 160b
bdag/ lha mchog nyid la dad pas bstod// ces bstod par gyur to// 'jam dpal kha thun gyi rgyud las 'khor gyis bstod pa'i le'u ste bdun pa'o// // de nas bcom ldan 'das kyis bka' stsal pa/ e ma ho nga yi rgyud 'di ni// rgyud kyi snying po de kho na nyid ces bya ba ste/ rgyud thams cad las khyad par du gyur pa yin pas/ shin tu gsang zhing sba ba las// kun la bstan na 'jig 'gyur la// zhig nas sems can dmyal bar skye/ 'on tang na sangs rgyas kyi bstan pa la dgra dar ba'i dus su/ sangs rgyas che ba'i yon tan du bstan pa yin pas shin tu brnag cing gzung bar bya'o// zhes gsungs so// 'jam dpal kha thun gyi rgyud las/ rgyud yongs su bzung ba'i le'u ste brgyad pa'o// // gshin rje nag po gsang ba de kho na nyid kyi rgyud ces bya ba rdzogs so// // rgyud 'di 'jam dpal gyis 'og min du gsungs nas/ rgyal po dza zhes bya ba bsod nams bsags pa de la babs/ des bkra shis bde ldan gyi dga' rab rdo rje la/ des 'jam dpal bshes gnyen la/ des gtsug lag dpal dge la/ des ba su d+ha ra la/ des yang dbang gter la/ bka' re re las spel du mi rung ngo // rgya rgya rgya// //