rin po che snang byed kyi rgyud
Text
ff. 107a–111b · 10 folio sides
- 107a
dri med bshes gnyen dang / zhu chen gyi lo tsa ba gzhags kum+bA ras/ rgyal po yon mchod don du u tshal gser khang du zhus shing gtan la phab pa'o// / / nA// rgya gar skad du/ rat+na ma hA b+hU hi tan tra na ma/ bod skad du/ rin po che snang byed kyi rgyud ces bya ba/ bcom ldan 'das bya bral dang la phyag 'tshal mo// kye kye chos kyi sku 'di gang nas byung // longs spyod spyi 'di gang nis byung // sprul pa'i sku 'di gang nas byung // gsang ba'i bdag pos bstan du gsol/ gsang ba'i bdag pos gsungs pa/ kye sems dpa' chen po nyon cig/ chos kyi sku 'di sems nyid ngang las byung // longs spyod sku 'di ye shes dang las byung // sprul pa'i sku 'di rig pa'i ngang las byung // zhes gsungs so// rin po che snang byed kyi rgyud las/ sku gsum byung ba'i kho'u ste dang po'o// / chos sku longs sku sprul sku gsum// gcig pa lags sam tha dad lags// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyin cig/ nam mkha' zla dang chu zla'i tshul// gcig pa ma yin tha dang min// rtogs na byang chub sems su gcig/ ma rtogs sems can tha dad snang //
- 107b
zhes gsungs so// gcig pa dang tha dad las grol ba'i le'u ste gnyis pa'o// // chos kyi sku ru ci phyir gdags// longs spyod sku ru ci phyir gdags// de yi nges tshig ji ltar lags// gsang ba'i bdag po bstan du gsol// gsang ba'i bdag pos yang gsungs pa// kye sems dpa' chen po nyon cig/ byang chub sems dpa'i chos nyid de// mi snang mngon du 'byin nus pas// chos kyi ska ru btags pa yin// 'byung ba lnga dang 'dod yon lnga// dug lnga'i ye shes longs spyod pas// longs spyod sku ru btags pa yin// 'byung ba lnga ru sku sprul nas// thams cad rig pas dbang bskur zhing // gang la gang tsam sprul mdzad pas// sprul pa'i sku ru btags pa yin// zhes sku gsum nges tshig gi le'u ste gsum pa'o// // sku gsum gnas lugs ji ltar lags// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ rigs drug dbyings na gnas tsam na// chos sku dri bcas chos kyi sku ru gnas// stobs ldan dbyings na gnas tsam na// rgyun du dum bu'i tshul du gnas// rtog med dbyings na gnas tsam na// dri med chos kyi sku ru gnas//
- 108a
zhes sku gsum rang gnas kyi le'u ste bzhi pa'o// / sku gsum bzhugs tshul ji ltar bzhugs// gsang ba'i bdag pos bstan du gsol// gsang ba'i bdag pos yang gsungs pa/ kye sems dpa' chen po nyon cig/ chos kyi sku ni mi snang rang bzhin yod par bzhugs/ longs sku snang la rang bzhin med par bzhugs/ sprul sku snang yang snang la rang bzhin yod par gsungs/ zhes sku gsum bzhugs tshul gyi le'u ste lnga pa'o// // don kyi rgyud 'di gang nas byung // seng ba'i bdan pos bstan du gsaso// dmang ba'i bdag pa sdug sungs te/ kyisems dpa nan ci// byang chub sems la/ nyon mongs skyon gyi mgos pas// dri med rnam dag rgyud du byung // cho 'phrul bsam gyis mi khyab pas// stong pa kun byung rgyud du byung // rig pa thams can brgyad pa yis/ 'dzin pa sdug bsngal rgyud du byung // zhes don gyi rgyud du byung ba'i le'u ste drug pa'o// // dri med rnam dag ji ltar lags// stong pa kun 'byung ji ltar lags// 'dzin pa sdug bsngal ji ltar lags// gsang ba'i bdag pos bstan du gsol// gsang ba'i bdag pos gsungs pa/ kye sems dpa'
- 108b
chen po nyon cig/ gzhi la skyon gyis ma gos na// de ni phyi yi dri med yin// dug lnga sel du mi 'dzin na// de ni nang gi dri med yin// dbyings la skyed 'bri mi byed na// de ni gsang ba'i dri med yin// byas pa'i chos la mi ltos na// de ni phyi yi stong nyid yin// mtshan ma'i chos la mi gnas na// de ni nang gi stong nyid yin// chos nyid ngo yis mi 'dzin na// de ni gsang ba'i stong nyid yin// 'byung ba lnga la mi 'dzin na// de ni phyi yi rig pa yin// sgo lngar 'dzin pa ma zhugs na// de ni nang gi rig pa yin// ye shes rgyun du mi gcod na/ de ni gsang ba'i rig pa yin// zhes gsungs so// rgyud gsum bkrol ba'i le'u ste bdun pa'o// / rgyud kyi ngo bo nges tshig ji ltar lags// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ byang chub sems kyi chos nyid de// kun tu 'brel bas rgyud kyang yin// yang dag lam du zhugs pa yi// gzung du rung bas lung yang yin// nyams su blang ba'i chos nyid du// byang chub sems dpa' med pa'i phyir// de phyir man ngag dam pa yin// 'brel dang mtshang med pa yi// phun sum tshogs zhes de la bya// gdod nas
- 109a
snying po byang chub sems// de ni 'bras bu'i rgyud du bstan// zhes rgyud kyi ngo bo nges tshig bstan pa'i le'u ste brgyad pa'o// / chos rnams thams cad gang nas byung // gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ chos rnams thams cad rkyen las byung // rkyen ni snang ba dngos las byung // snang ba dngos ni yi ge gzugs su byung // zhes yi ge byung ba'i le'u ste dgu pa'o// / / chos rnams thams cad gang du 'dus// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ chos rnams thams cad ming du 'dus// ming rnams thams cad yi ger 'dus// yi ge rnams ni sgra ru 'dus// sgra rnams kun bzang gsung du 'dus/ chos dang yi ge 'dus pa'i le'u ste bcu pa'o// // kun bzang lta sgom spyod pa ji ltar legs// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ ma 'phangs rgyang gsum lta ba yin// srog gcod gsum po sgom pa yin// ma 'gags
- 109b
gsum po spyod pa yin// de yi don rnams ji ltar lags// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ mig gis ma 'phangs kun tu gsal// de ni phyi yi lta ba yin// sems kyis ma 'phangs kun la khyab// de ni nang gi lta ba yin// ye shes ma 'phangs kun tu rtogs// de ni gsang ba'i lta ba yin// snang la zhen pa med na phyi srog chod// de ni phyi yi sgom pa yin// gsal la 'dzin pa med na nang gi srog rtsa chod// de ni nang gi sgom pa yin// ye shes rgyun chad med na gsang ba'i srog rtswa chod// de ni gsang ba'i sgom pa yin// rol pa gang yang mi 'gegs pa// de ni phyi yi spyod pa yin/ dran rig gang yang mi 'gegs pa// de ni nang gi spyod pa yin// dpa' brtul gang yang mi 'gegs pa// de ni gsang ba'i spyod pa yin// lta sgom spyod pa'i le'u ste bcu gcig pa'o// // kun bzang che chung ji ltar lags// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ 'phel ba med pa'i chos sku che// 'gyur ldog med pa'i chos nyid che// skye shi med pas sems nyid che// sems
- 110a
nyid gnyis su med pas sangs rgyas stan rtor chung // phung po lhag ma med pas 'khor ba rang rlug chung // ye shes rangs zin pas glo bur rnam rtog chung // zhes rnam rtog che chung bstan pa'i le'u ste bcu gnyis pa'o// // che chung don la shar ba gces/ gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ phyogs med shar nas lta ba gces// 'dzin med shar nas sgom pa gtses// 'gag med shar nas spyod pa gces// shar tshul bstan pa'i le'u ste bcu gsum pa'o// // shar ba'i don la bag chags gces// bag chags zad par lta ba bskyal// gsang ba'i bdag pos bstan du gsol// kye sems dpa' chen po nyon cig/ snang srid yul gyi mdud pa dam po khrol// nang 'dzin pa'i sems kyi brtod phur dam po chung // sems kyi bag chags 'jun pa dam po shig/ ces bag chags zad par bskyal ba'i le'u ste bcu bzhi pa'o// / / bag chags zil gyis ji ltar gnan/ gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ 'gro ba'i
- 110b
ye shes rgyun du non// nyal ba'i ye shes kun tu stor// sdod pa'i ye shes kun tu yengs// 'gro ba'i mgon po 'dra dpag med// de bzhin ldan na bag chags zil gyis gnon/ bag chags zil gyis gnan pa'i le'u ste bco lnga pa'o// // 'gro mgon rten ni ji ltar rten// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ shes rab thabs kyi zhags bzung // dran pa rgyun gyi thags pa btags// mi brjed pa yi lcag gis brabs/ a na tshugs kyi me btsa'athob// ces 'gro mgon rten pa'i le'u ste bcu drug pa'o// man ngag gnad 'di gang du 'dus// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ rig pa spyi blugs shes na lta ba'i gnad// nyams myong btsan thabs skyes na sgom pa'i gnad// snang ba grogs su 'gro na spyod pa'i gnad// ye shes rgyun du gnas na 'bras bu'i gnad// chos rnams thams cad lta sgom spyod par 'dus// zhes man ngag gnad 'dus pa'i le'u ste bcu bdun pa'o// / 'bras bu'i grol tshul ji ltar gnas// gsang ba'i bdag pos bstan du gsol/
- 111a
gsang ba'i bdag po sa gsungs pa/ kye sems dpa' chen po nyon cig/ yid bzhin nor bu bzhin du thams cad 'byung // dngul po gter rnyed bzhin du dgos dgu rang la tshang // glang chen rab rgal bzhin du nyam nga bag tsha med// shel sgong g.ya' dag bzhin du sems kyi dri ma bral// su lo bstan kyang grol bar mi 'gyur te// rma bya mdongs la lta ba bzhin// bdag rang gcig pu nyams su len// chos nyid dbyings su byil gyis bzhud// 'bras bu grol tshul gyi le'u ste bco brgyad pa'o// / chos kyi mtshan nyid ji ltar gzung // gsang ba'i bdag po sa bstan du gsolo// gsang ba'i bdag pos gsungs pa/ kye sems dpa' chen po nyon cig/ skra/ gsum 'byung gnas kyi rgyud ces bya bar zung zhig/ rgyud thams cad 'byung bas na/ rin po che gsang ba'i rgyud ces bya bar zung zhig/ lha sgom thams cad kyi gnad 'byung bas gnad 'grol rin po che'i rgyud ces bya bar zung zhig/ nyon mongs skyon gyis ma gos pas/ dri med rnam dag rgyud ces bya bar zung zhig/ rgyu rkyen med la kun gdang bas na/ stong pa kun 'byung gyi rgyud ces bya bar yang zung zhig/ thams cad gsal bar byed pas na/ rin po che snang byed rgyud ces bya bar zung zhig/ mtshan che ba'i lo rgyus
- 111b
bstan pa'i le'u ste bcu dgu pa rdzogs so// rgya gar skad du/ rat+na ma hAHwi tan tra nA ma/ bod skad du/ rin po snang byed kyi rgyud ces bya ba/ bcom ldan 'das gsang bdag che la phyag 'tshal lo// thog ma tha ma med pa kun gyi gzhi// ming dang 'gyu ba med pa'i snying po 'di// rang bzhin lhun gyis grub pa'i chos kyi sku// gsang ba'i gzhal yas chos dbyings pho brang nas// ye sangs rgyas pa'i gsang bdag chen po la// 'khor gsum nang nas sems dpa' rdo rje des// rgyud dang gleng gzhi phun sum tshogs pa dang // sangs rgyas sems can khyad par ji lta bu// zhes gsol pa dang / ye sangs rgyas pa'i gsang bdag chen po yis// 'khor gyi nang nas sems dpa' rdo rje la// bshad pa'i tshig med byin gyis brlabs kyis bshad// rgyud kyi rang bzhin dngos po lnga yis bstan/ rgyud kyi nges tshig 'brel dang ma tshang med// phun sum tshogs pa'i don ni nges pa'i tshig/ sgra dang yi ge glegs bam dbye ba'i don// gleng gzhi'i don la rnam po gsum gyis bstan// sngon byung gleng gzhi phun sum tshogs pa lnga// de yi rjes 'jug phun sum tshogs lnga dang // de yi gdung sob phun sum tshogs