sgyu ma mkhan bzang po lung bstan pa zhes bya ba theg pa chen po'i mdo
Bhadramāyakarabyākaraṇanāmamahāyānasūtra
Text
ff. 73a–100b · 56 folio sides
- 73a
bar bya'o/ / bcom ldan 'das kyis de skad ces bka' stsal nas/ byang chub sems dpa' glog thob dang / tshe dang ldan pa kun dga' bo dang / 'khor bzhi po rnams dang / lha dang / mi dang / lha ma yin dang / dri zar bcas pa'i 'jig rten thams cad/ bcom ldan 'das kyi gsungs pa la yi rangs te/ mngon par bstod do// 'ab pa dkon mchog brtsegs pa chen po'i chos kyi rnam grangs le'u stong phrag brgya pa las/ mi zad pa'i gter bstan pa'i le'u ste/ 'dus pa nyi shu pa rdzogs so// / rgya gar skad du/ b+ha dra mA ya kar bya ka ra Na nA ma ma hA yA na sU tra/ bod skad du/ sgyu ma mkhan bzang po lung bstan pa zhes bya ba theg pa chen po'i mdo// bas po gcig pa/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'da' rgyal po'i khab na/ bya rgod kyi phung po'i ri la dge slong stong nyis brgya lnga bcu'i dge slong gi dge 'dun chen po dang / byang chub sems dpa' sems dpa' chen po mngon par grags pa/ mngon par shes pa thob pa/ gzungs thob pa/ rdzu 'phrul gyi cho 'phrul thob pa/ mi skye ba'i chos la bzod pa thong ba lnga stong la 'di lta ste/ byang chub sems dpa'
- 73b
sems dpa' chen po seng ge dang / byang chub sems dpa' sems dpa' chen po seng ge blo gros dang / byang chub sems dpa' sems dpa' chen po tsan dan bzang po dang / byang chub sems dpa' sems dpa' chen po kha lo sgyur ba dang / byang chub sems dpa' sems dpa' chen po kha lo sgyur ba chen po dang / byang chub sems dpa' sems dpa' chen po 'od dpal dang / byang chub sems dpa' sems dpa' chen po 'od byed dang / byang chub sems dpa' sems dpa' chen po 'od gzi brjid dang ldan zhing nga ro snyan pa dang / byang chub sems dpa' sems dpa' chen po 'od bkod pa dang / byang chub sems dpa' sems dpa' chen po blo gsal ba dang / byang chub sems dpa' sems dpa' chen po sems can gyi snying po dang / byang chub sems dpa' sems dpa' chen po sems can kha lo sgyur ba dul ba dang ldan pa dang / byams pa la sogs pa bskal pa bzang po'i byang chub sems dpa' sems dpa' chen po thams cad dang / 'jam dpal gzhon nur gyur pa dang / de dag la sogs pa byang chub sems dpa' sems dpa' chen po lnga stong dang thabs cig tu bzhugs te/ lha rnams kyi dbang po brgya byin dang yang thabs cig go/ / mi mjed kyi bdag po tshangs pa dang yang thabs cig go// rgyal po chen po bzhi dang yang thabs cig go// lha dang / klu dang / gnod sbyin dang / lha ma yin dang
- 74a
nam mkha' lding dang / dri za dang / mi 'am ci dang / lto 'phye chen po du mas kyang yongs su bskor to// de nas bcom ldan 'das ni rgyal po khab kyi grong khyer chen po la rten cing bzhugs te/ rgyal po dang / blon po chen po rnams dang / bram ze dang / khyim bdag dang / grong rdal dang / ljongs kyi mi rnams kyis ni gus par byas/ bla mar byas/ bsnyen bkur byas mchod pa byas so// bcom ldan 'das kyis chos gos dang / zhal zas dang / gzims cha dang / gdan dang / snyun gsos dang / sman zong ni brnyes/ bcom ldan 'das kyi grags pa dang / snyan pa dang / tshigs su bcad pa rgya chen po ni mngon par 'phags te/ 'di ltar de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skye bu 'dul ba'i kha lo sgyur ba/ bla na med pa/ lha dang mi rnams kyi ston pa sangs rgyas bcom ldan 'das de ni thams cad mkhyen pa/ thams cad gzigs pa dang ldan pa ste/ thams cad ni mkhyen/ thams cad ni gzigs/ de bzhin gshegs pa'i stobs bcu dang ni ldan/ de bzhin gshegs pa'i mi 'jigs pa bzhi dang ni ldan so so yang dag par rig pa bzhi dang ni ldan sangs rgyas kyi chos ma 'dres pa bco brgyad dang
- 74b
ni ldan/ byams pa chen po dang snying rje chen po dang ni ldan/ sangs rgyas kyi spyan nyams pa mi mnga' ba dang ni ldan/ spyan lnga dang ni ldan/ cho 'phrul yang brnyes te/ na rjod pa'i cho 'phrul ni brnyes/ rjes su bstan pa'i cho 'phrul ni brnyes/ rdzu 'phrul gyi cho 'phrul ni brnyes so// bzhed na stong gsum gyi stong chen po'i 'jig rten gyi khams grong khyer dang bcas pa/ grong rdal dang bcas pa/ sa dang bcas pa/ 'gro ba dang bcas pa/ ri rab dang bcas pa/ rgya mtsho'i mthas gtugs pa/ lha'i gnas dang bcas pa/ khor yug dang 'obs su bcas pa/ rtswa dang / shing dang / rir bcas pa 'di nam mkha' la bskal pa 'am/ bskal pa bas lhag par skra'i rtse mo'i cha shas kyis 'dzin par mdzad do/ / yang de'i tshe rgyal po'i khab kyi grong khyer chen po na sgyu ma mkhan bzang po zhes bya ba bstan bcos la shin tu mkhas pa/ gsang sngags la shin tu mkhas pa/ bzo dang rig pa la 'byams pa/ las kyi mtha' byas zin pa/ rab tu byed pa byas pa/ sgra grags pa/ yul ma ga d+ha na sgyu ma mkhan nam/ sgyu ma mkhan gyi slob ma ji snyed pa de dag gi mchog tu grags pa/ phul du grags pa zhig gnas te/ des yul ma ga d+ha ril gyi skye bo'i tshogs thams cad 'dun par byas/ rmongs par byas mgo 'khor bar byas nas/
- 75a
ya mtshan gyi chos la bkod de/ bden pa mthong ba rnams dang / dad pa dang / chos kyi rjes su 'brang ba rnams dang / dge bsnyen dang / dge bsnyen ma rnams ni ma gtogs so/ / des sgyu mas rmongs par byed pa'i rig pa'i stobs bskyed pas rnyed pa dang / bkur sti dang / tshigs su bcad pa'ang lhag par rnyed do// sgyu ma mkhan bzang pos bcom ldan 'das kyi grags pa dang / snyan pa dang / tshigs su bcad pa lhag par mngon par 'phags te/ 'di ltar de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa sangs rgyas bcom ldan 'das de ni thams cad mkhyen pa/ thams cad gzigs pa ste/ thams cad ni mkhyen/ thams cad ni gzigs/ de bzhin gshegs pa'i stobs bcu dang ni ldan de bzhin gshegs pa'i mi 'jigs pa bzhi dang ni ldan/ so so yang dag par rig pa bzhi dang ni ldan/ sangs rgyas kyi chos ma 'dres pa bco brgyad dang ni ldan/ byams pa chen po dang snying rje chen po dang ni ldan/ sangs rgyas kyi spyan nyams pa mi mnga' ba dang ni ldan/ spyan lnga dang ni ldan/ cho 'phrul yang brnyes te/ kun rjod pa'i cho 'phrul ni brnyes/ rjes su
- 75b
bstan pa'i tshe 'phrul ni brnyes/ rdzu 'phrul gyi cho 'phrul ni brnyes so// bzhed na stong gsum gyi stong chen po'i 'jig rten gyi khams grong khyer dang bcas pa/ grong rdal dang bcas pa sa dang bcas pa/ 'gro ba dang bcas pa/ ri rab dang bcas pa/ rgya mtsho'i mthas gtugs pa/ lha'i gnas dang bcas pa/ khor yug dang 'ongs su brngas pa/ rtsa dang / dang / rir bcas pa 'di nam mkha' la bskal pa 'am/ bskal pa bas lhag par skra'i rtse mo'i cha shas tsam la 'dzin par mdzad do zhes thos so// thos nas kyang de 'di snyam du sems te/ yul ma ga d+ha ril gyi skye bo thams cad de dag gis 'dun par byas/ rmongs par byas/ mgo 'khor bar byas nas/ ya mtshan gyi chos la bkod de/ bram ze dang khyim bdag chen po gang dag yin pa de dag kyang bdag gi ming gis rab tu mgu bar gyur na/ de bzhin gshegs pa dgra bcom pa yang dag par rdzogs pa'i sangs rgyas de gcig pu da dung ma bgams/ rmongs param byas/ mgo 'khor bar ma byas kyis/ ma la bdag de bzhin gshegs pa dgra bcom pa yang dag par rdzogs pa'i sangs rgyas ga la ba der 'gro bar bya'o// song nas kyang bkram par byas te/ gal te rmongs pa'am/ mgo 'khor bar byas nus pa ldan/ de ldan yul ma ga d+ha thams cad bdag la gcig tu 'dul/ bdag gi rnyeng pa dang bkur sti'ing ches stobs dang ldan par 'gyuraro
- 76a
snyam mo/ / de nas yang sgyu ma mkhan bzang po sngon gyi dge ba'i rtsa bas bskul ba dang / sangs rgyas kyi mthus rgyal po'i khab kyi gro khyer chen po nas byung sde/ bya rgod kyi phung po'i ri ga la ba dang / bcom ldan 'das ga la ba der song ngo // song nas kyang sgyu ma mkhan bzang pos de bzhin gshegs pa nyi ma bye ba phrag 'bum pas lhag pa'i 'od zer 'bar ba/ zhal zla ba bye ba phrag 'bum pas lhag par dri ma med pa/ sku shing n+ya gro d+ha'i rgyal po ltar chu zheng gab pa/ mdzod spu nor bu dri ma med pa'i 'od dag pa ltar gsal ba/ spyan pad+ma dang ut+pa la sngon po kha bye ba lta bu'i bkrag yod pa/ spyi gtsug tshangs pas kyang bltar mi mthong ba/ 'khor gyi nang na gsung dbyangs yan lag drug cu dang ldan pas chos ston pa mthong ngo / / mthong nas kyang de'i sku de lta bu mthong / gsung gi 'phrin las de lta bu thos nas sems dang bar gyur cing de 'di snyam du sems te/ ma la bdag gis 'di ci thams cad mkhyen la/ thams cad gzigs pa dang ldan pa zhig yin nam/ 'on te ma yin pa gam par byas/ gor ma chag snyam mo// de nas yang sgyu ma mkhan bzang pos bcom ldan 'das kyi zhabs la mgo bos phyag 'tshal nas/ bgam pa'i bsam pas sang gi gdugs chod la spyan 'dren to zhes gsol to// 'di snyam du'ang sems te/ ci 'dis bdag gi sems/
- 76b
/ shes sam/ 'on te mi shes shig su/ gal te shes na ni der 'ong bar mi 'thun ro// ji ste mi shes na ni des 'ong bar 'gyur rosnyam so// de nas bcom ldan 'das kyis sum mkhan bzang ba gdul ba'i dbang du'ang mdzad/ rgyal po'i khab kyi grong khyer chen po'i skye bo phal po che gdul ba'i dbang du'ang mdzad nas/ mkhyen bzhin du sgyu ma mkhan bzang po la dge slong gi dge 'dun dang bcas te/ cang mi gsung bas gnang bar mdzad do// de nas yang sgyu ma mkhan bzang po 'di snyam du sems te/ 'di dag rnam par mtho 'tsham pa'i bsam pa dang ldan pa la/ 'dir khas len pa dang sbyar/ na 'di ni thams cad mkhyen pa'ang ma yin la/ thams cad gzigs pa dang ldan pa'ang ma yin no snyam nas/ de nas sgyu ma mkhan bzang po/ bcom ldan 'das kyi zhabs la mgo bos phyag 'tshal nas/ bcom ldan 'das kyi thad nas song ngo // de nas bcom ldan 'das la/ tshe dang ldan pa mo'u 'gal gyi bu chen pos 'di skad ces gsol to// sgyu ma mkhan bzang pos ni sgyu ma'i za ma tog gis dge slong gi dge 'dun 'di la mtho 'tsham par 'gyur lags so/ / bcom ldan 'das kyis bka' stsal pa/ mo'u 'gal gyi bu khyod snying las chung bar gyis shig dang / ngas yun ring po nas spyad pa bsgrubs pas na/ de bzhin gshegs pa ni 'dir dus mkhyen pa yin te/ de bzhin gshegs pa la ni lha dang bcas pa'i 'jig rten gyis kyang mtho 'tsham par mi nus so//
- 77a
mo'u 'gal gyi bu gzhan yang 'dod chags ni mtho 'tsham par byed pa yin/ zhe sdang ni mtho 'tsham par byed pa yin/ gti mug ni mtho 'cham par byed pa yin na/ de dag ni de bzhin gshegs pa ya ngags nyal ba dang bcas te zad bral yongs su gyur/ gzod ma nas ma skyes pa'i chos can yin te/ des na de bzhin gshegs pa la lha dang bcas pa'i 'jig rten gyis kyang mtho 'tsham par mi nus so/ / mo'u 'gal gyi bu gzhan yang sgyu ma mkhan bzang po'i sgyu ma ni phyogs gcig pa yin pas/ sgyu ma yang dag pa ma yin gyi/ de bzhin gshegs pa'i sgyu ma ni yang dag pa yin te/ des na chos thams cad sgyu ma lta bur mngon par rdzogs par sangs rgyas so// mo'u 'gal gyi bu sems can gyi khams su gdags par 'dogs pa ji snyed pa de dag thams cad 'di lta ste/ sgyu ma mkhan bzang po'i sgyu ma 'di lta bu dang ldan par gyur kyang / de dag thams cad kyis de bzhin gshegs pa'i sgyu ma la brgya'i char yang nye bar mi 'gro// stong gi char yang nye bar mi 'gro/ / bye ba 'bum gyi char yang/ grangs su'ang / char yang / bgrang bar yang / dper yang nye bar mi 'gro'o// mo'u 'gal gyi bu 'di ji snyam du sems/ sgyu ma mkhan bzang pos stong gsum gyi stong chen po'i 'jig rten gyi khams 'di rgyan thams cad kyis brgyan par kun tu ston nus sam/ gsol pa/ ma lags so// bcom ldan 'das kyis bka' stsal pa/ de bzhin
- 77b
gshegs pa ni bzhed na 'jig rten gyi khams gang+gA'i klung gi bye ma snyed brgyan cing / de thams cad kyang skra'i rtse mo'i cha shas tsam la kun tu ston par mdzad kyang / de bzhin gshegs pa'i sgyu ma ril gyis bstan par ni mi 'gyur ro/ / mo'u 'gal gyi bu phyogs bcu na rlung gi dkyil 'khor gang dag yod pa 'di lta ste/ rlung gi dkyil 'khor rnam par 'thor byed ces bya ba dang / rlung gi dkyil 'khor yongs su gcod byed ces bya ba gang dag gis stong gsum gyi stong chen po'i 'jig rten gyi khams 'di yongs su gcod par byed cing / yongs su bcad nas kyang 'jig par byed pa dang / rlung gi dkyil 'khor kun tu 'thor byed dang / rnam par 'thor byed ces bya ba 'jig rten gyi bar na rgyu ba gang dag yin pa dang / rlung gi dkyil 'khor kun nas yongs su 'jog pa zhes bya ba srid pa'i rtse mo na rgyu ba gang dag yin pa dang / rlung gi dkyil 'khor rnam par 'jig pa zhes bya ba ri'i rgyal po ri rab kyang rnam par 'jig par byed na/ ri phal pa lta smos kyang ci dgos pa gang dag yin pa dang / rlung gi dkyil 'khor 'bar byed ces bya ba sreg pa'i bskal pa'i tshe ldang zhing gang gis na me lce de dag tshangs pa'i 'jig rten gyi bar 'phen par byed pa dang / rlung gi dkyil 'khor rnam par sgrub byed ces bya ba gang gis sreg pa'i bskal pa'i me de zhi bar byed pa dang / rlung gi dkyil 'khor rab tu tshim byed ces bya ba gang gis stong gsum gyi stong chen po'i 'jig rten gyi khams 'di sprin gyi dra ba gcig gis kun tu khebs par byed pa dang /
- 78a
rlung gi dkyil 'khor chus 'debs zhes bya ba gang gis na/ sreg pa'i bskal pa'i tshe char 'bebs par byed pa dang / rlung gi dkyil 'khor lhag par skems shes bya ba gang gis na/ chus 'jig rten lhag par skems par byed pa yod do// mo'u 'gal gyi bu ngas rlung gi dkyil 'khor las brtsams te/ bskal pa 'am/ bskal pa las lhag par chos bstan kyang de bzhin gshegs pas rlung gi dkyil 'khor las brtsams te chos bstan pa las mtha' thug pa med do/ / mo'u 'gal gyi bu 'di ji snyam du sems/ sgyu ma mkhan bzang pos rlung gi dkyil 'khor de dag gi nang du 'dug par nus sam/ gsol pa/ ma lags so// bcom ldan 'das kyis bka' stsal pa/ mo'u 'gal gyi bu nga ni rlung gi dkyil 'khor de dag thams cad kyi nang du spyod lam bzhis gnas par byed do/ / de bzhin gshegs pa ni bzhed na rlung gi dkyil 'khor thams cad yungs 'bru gcig gi nang du 'jog par mdzad/ 'jug par mdzad la/ yungs 'bru de'ang rnam par 'jig par mi 'gyur zhing / yungs 'bru de'i nang du rlung gi dkyil 'khor de dag thams cad kyi bya ba thams cad kyang nye bar ston par mdzad la/ rlung de dag phan tshun thug par yang mi 'gyur/ ltung bar yang mi 'gyur ro// mo'u 'gal gyi bu nga ni sgyu ma'i chos nyid de lta bu dang / de ma yin pa gzhan yang tshad med pa dang ldan no//
- 78b
de nas tshe dang ldan pa mo'u 'gal gyi bu chen po dang thams cad dang ldan pa'i 'khor de ngo mtshar du gyur nas/ bcom ldan 'das kyi zhabs la mgo bos phyag 'tshal te/ ngag mthun par tshig tu smras pa/ bcom ldan 'das bdag cag gis rnyed pa legs par rnyed de/ ston pa 'di ltar rdzu 'phrul che ba/ 'di ltar dbang che bar grags pa/ 'di ltar mthu/ che ba ni bdag cag gis legs par rnyed lags so// bcom ldan 'das gang dag de bzhin gshegs pa'i cho 'phrul 'di thos nas mos par bgyid cing / mos par bgyis nas kyang bla na med pa yang dag par rdzogs pa'i byang chub tu sems skyed par bgyid pa de dag kyang rnyed pa legs par rnyed pa lags so/ / de nas sgyu ma mkhan bzang po rgyal po'i khab kyi grong khyer chen po ga la ba der song ste/ de nyid kyi nub mo rgyal po'i khab kyi grong khyer chen po mis gang ba'i phyogs gang na grong khyer thams cad kyi btsog dgu dang / mi mthun pa thams cad 'bab pa dang 'byung ba'i sa phyogs der 'khor gyi khyams chen po dar gyi lda ldi dang / gdugs dang / rgyal mtshan dang / ba dan bsgreng bas brgyan pa/ gzhi lag mthil ltar mnyam pa/ me tog bkram pa/ spos bzang po mchog gis bdugs pa/ steng du bla re brel pa zhig mngon par sprul to// 'khor gyi khyams de'i nang du'ang rin po che'i shing ljon pa me tog dang 'bras
- 79a
bur bcas pa brgya stong mngon par sprul to/ / rin po che'i shing ljon pa thams cad kyi drung du'ang seng ge'i khri ras bcos bu du mas g.yogs pa/ rin po ba dan thams cad kyis brgyan pa mngon par sprul to/ / seng ge'i khri'i g.yas g.yon du'ang rin po che'i shing ljon pa me tog dang 'bras bur bcas pa bzhi bzhi mngon par sprul to// bcom ldan 'das dang dge slong gi dge 'dun gyis yongs su longs spyad par bya ba'i zhal zas ro brgya dang ldan pa'ang mngon par sprul to// rim gro byed pa gos dkar po bgos pa/ rgyan thams cad kyis brgyan pa lnga brgya'ang mngon par sprul to/ / sgyu ma mkhan bzang pos bkod pa de lta bu sprul ma thag tu/ de nas de'i mod la rgyal po chen po bzhi lus chen por sprul nas/ sgyu ma mkhan bzang po'i 'khor gyi khyams kyi bkod pa ga la ba der song nas/ sku ma mkhan bzang po la 'di skad ces smras so// bzang po khyod kyis de bzhin gshegs pa sang gdugs tshod la spyan drangs pa dang / khyod kyis de bzhin gshegs pas yongs su longs spyad par bya ba'i 'khor gyi khyams kyi bkod pa 'di lta bu 'di mngon par sprul pa ni rnyed pa legs par rnyed do/ / bzang po gzhan yang kho bo cag kyang de bzhin gshegs pa la mchod pa'i las bya ba la/ bcom ldan 'das kyis yongs su longs spyad pa dang / khyod la btang ba'i phyir 'khor gyi
- 79b
khyams kyi bkod pa 'di lta bu gnyis pa cung zhig ston par byed na/ kho bo cag la gnang bar gyis shig/ de nas sgyu ma mkhan bzang po shin tu ngo mtshar du gyur nas/ rgyal po chen po bzhi la gnang ba dang / de nas rgyal po chen po bzhis bcom ldan 'das kyis yongs su longs spyad par bya ba'i 'khor gyi khyams de lta bu zhig mngon par sprul to// de nas yang lha rnams kyi dbang po brgya byin lha'i bu sum khri dang lhan cig bzang po'i 'khor gyi khyams kyi bkod pa ga la ba der song nas/ sgyu ma mkhan bzang po la 'di skad ces smras so// bzang po khyod kyis de bzhin gshegs pa sang gdugs tshod la spyan drangs pa dang / de bzhin gshegs pas yongs su longs spyad par bya ba'i 'khor gyi khyams kyi bkod pa 'di lta bu 'di mngon par sprul pa ni rnyed pa legs par rnyed do/ / bzang po kho bo cag kyang de bzhin gshegs pa la mchod pa'i las bya zhing / bcom ldan 'das kyis yongs su longs spyad pa dang / khyod la btang ba'i phyir 'khor gyi khyams kyi bkod pa 'di lta bu gnyis pa cung zhig ston par byed na/ kho bo cag la gnang bar gyis shig/ de nas sgyu ma mkhan bzang po shin tu ngo mtshar du gyur nas/ lha rnams gyi dbang po brgya byin la gnang ba dang / de nas lha rnams kyi dbang po brgya byin gyis/ bcom ldan 'das kyis yongs su longs spyad par bya ba sum cu rtsa gsum pa'i lha rnams kyi khang bzangs rnam
- 80a
par rgyal byed dang / yongs 'du sa brtol bas ches khyad par du 'phags pa'i 'khor gyi khyams gcig mngon par sprul te/ 'khor gyi khyams des sgyu ma mkhan bzang po'i bkod pa dang / rgyal po chen po bzhi'i bkod pa'ang mog mog por byas par gyur to// de nas sgyu ma mkhan bzang po 'di snyam du sems te/ d+ha'i bu 'di lta bu 'di dag kyang bcom ldan 'das la rim gro bya ba dang / mchod pa'i las bya ba'i phyir mngon par brtson te lhags pa dang sbyar na/ sems can 'di ni tha mal pa ma yin pas/ bdag gis sems can mchog de lta bu la mtho btsams par gyur na mi rung gis/ bya ba 'di lta bu 'di dag dor gor ma chag snyam mo// de nas sgyu ma mkhan bzang po sprul pa'i bya ba de dag 'dor bar byed/ dag med par byed do// gsang sngags dang rig sngags kyi stobs bskyed pa thams cad kyis med par byed cing mi snang bar bya bar brgal kyang zhal zas dang / rim gro pa dang / 'khor gyi khyams kyi bkod pa dang / seng ge'i khri'ang de kho na bzhin du snang ste/ gsang sngags dang rig sngags kyi stobs bskyed pa thams cad kyis med par bya ma nus pa dang / de shin tu ngo mtshar du gyur nas/ 'di snyam du sems te/ bdag sngon chad ni 'dod na sgyu ma ston par yang byed/ 'dod na sgyu ma med par yang byed na/ da ni de bzhin gshegs pa'i ched du gnas kyi bkod pa byas pa med par byed ma nus so//
- 80b
snyas so// de nas lha rnams kyi dbang po brgya byin gyis sgyu ma mkhan bzang po'i sems kyis rnam par rtog pa sems kyis yongs su shes nas/ sgyu ma mkhan bzang po la 'di skad ces smras so/ / bzang po ji ltar khyod kyis de bzhin gshegs pa'i phyir gnas kyi bkod pa byas pa 'di med par bya ma nus pa de bzhin du/ bzang po gang dag de bzhin gshegs pa la sems bskyed pa 'ga' tsam thob pa de dag gi sems bskyed pa de'ang med par mi 'gyur te/ de dag gi de ni yongs su mya ngan las 'das pa'i bar gyi rgyur 'gyur ro// de nas sgyu ma mkhan bzang po dga' mgu yi rangs te rab tu dga' zhing yid bde bar gyur nas/ de nyid kyi mtshan mo 'das pa dang / bcom ldan 'das la gdugs tshod la bab pa skul bar byed do// bcom ldan 'das gdugs chod lags pa'i dus dang tshod la bab na/ da gdugs tshod la bab par dgongs su gsol zhes gsol to// de nas bcom ldan 'das snga dro'i dus kyi tshe/ sham thabs mnabs/ chos gos gsol/ lhung bzed thogs te/ dge slong gi dge 'dun gyis yongs su bskor cing / dge slong gi dge 'dun gyi dpal gshegs te/ rgyal po'i khab kyi grong khyer chen por gshegs nas/ sgyu ma mkhan bzang po'i 'khor gyi khyams gal ba der gshegs te/ gang gis na snga ma mkhan bzang po'ang de bzhin gshegs pa ni bdag gis sprul pa'i bkod pan bzhugs so snyam du shes/ rgyal po chen
- 81a
po bzhi'ang de bzhin gshegs pa ni bdag cag gis sprul pa'i bkod pa na bzhugs so snyam du shes/ lha rnams kyi dbang po brgya byin yang de bzhin gshegs pa ni bdag gis sprul pa'i bkod pa na bzhugs so snyam du shes par 'gyur ba de lta bu'i rdzu 'phrul mngon par 'du mdzad pa mngon par mdzad do/ / rgyal po'i khab kyi grong khyer chen po de na gzhan mu stegs can dang / spyod pa pa dang / kun tu rgyu dang / bram ze dang / khyim bdag gang dag gis thos pa de dag ni ngo mtshar du gyur nas/ 'khor gyi khyams der song ste/ de ring dge sbyong go'u ta ma la mtho 'tsham pa blta bar bya'o snyam mo/ / rgyal po'i khab kyi grong khyer chen po de na dad pa'i dge slong dang / dge slong ma dang / dge bsnyen dang / dge bsnyen ma gang dag 'khod pa de dag ni 'khor gyi dkyil 'khor der dong nas/ de ring de bzhin gshegs pa la bgam pa'ang mnyan par bya/ cho 'phrul chen po'ang blta bar bya'o snyam mo// de nas sgyu ma mkhan bzang pos nga rgyal dang / rgyags pa dang / khengs pa nges par bcom nas/ bcom ldan 'das kyi zhabs la mgo bos phyag 'tshal te/ bcom ldan 'das la 'di skad ces gsol to// bcom ldan 'das rnam par mtho ba tsam pa'i bsam pa chen pos de bzhin gshegs pa 'dir gshegs su gsol ba gang lags pa'i nongs pa 'chags so// bcom ldan 'das gzhan yang
- 81b
zhal zas sprul pa dang / rim gro bgyid pa sprul pa dang / seng ge'i khri sprul pa dang / 'khor gyi khyams sprul pa de la bdag 'di snyam du sems can mchog de lta bu de la bslus par gyur na mi rung gis/ bya ba 'di ma mchis par bgyi snyam ste shin tu spangs kyang ma mchis par ma btub/ gsang sngags dang rig sngags kyi stobs bskyed pa thams cad kyis kyang ma mchis par bkyi rngo ma thog nas/ zhal zas dang rim gro bgyid pa dang / seng ge'i khri dang / 'khor gyi khyams kyi bkod pa'ang de kho na bzhin du gda' 'o// de skad ces gsol pa dang / bcom ldan 'das kyis/ sgyu ma mkhan bzang po la 'di skad ces bka' stsal to// bzang po sems can thams cad kyi nye bar spyad pa dang / yongs su spyad pa'ang 'di lta ste/ las kyi sgyu mas sprul pa yin no/ / bzang po dge slong gi dge 'dun 'di'ang 'di lta ste/ chos kyi sgyu mas sprul pa yin te/ bzang po nga'ang 'di lta ste/ ye shes kyi sgyu mas sprul pa yin no// bzang po stong gsum gyi stong chen po'i 'jig rten gyi khams 'di'ang 'di lta ste/ sna tshogs mngon par 'grub par byed pa'i sgyu mas sprul pa yin no// bzang po chos thams cad kyang 'di lta ste/ rkyen tshogs pa'i sgyu mas sprul pa yin no/ / bzang po 'on kyang de'i dus la bab par shes na/ ji ltar sprul pa'i bza' ba dang / bca' ba dang / myang ba dang / bldag pa dag khyod kyis phul cig/ de nas sgyu ma mkhan bzang pos
- 82a
sprul pa'i rim gro pa de dag dang / rgyal po chen po bzhidag dang / lha'i dbang po bcu byin 'khor dang bcas pa dang / lhan cig sprul pa'i bzab bdang / @# dang / myang ba dang / bldag pa des/ bcom ldan 'das dang dge slong gi dge 'dun yang dag par rim par byed do// de nas de'i tshe gnas brtan 'od srungs chen pos tshigs su bcad pa 'di smras so/ / sbyin pa 'di ni ci zhig 'dra// len par byed pa ci 'dra bar// de 'dra'i chos nyid thob 'gyur bar// yon ni rnam par sbyong gyur cig/ mo'u 'gal gyi bu chen pos smras pa/ gdan ni ji ltar bshams pa dang // de la gang dag bzhugs pa rnams// mi mnyam ma mchis mtshungs pa ste// mchod sbyin dge ba bla na med// shA ri'i bus smras pa/ rim gro byed pa'i sems gang dang / / len par byed pa'i sems gang dang // sbyin par byed pa ji lta bar// yon ni myur du sbyong bar shog/ rab 'byor gyis smras pa/ gtong med sbyin pa 'di btang ba// len pa med pa rnams kyis blangs// gang dag 'dir ni gshegs pa rnams// de dag yon sbyong byed pa yin// kun dga' bos smras pa/ 'di ni nam mkha'i sbyin pa ste// bsam gyis mi khyab rnams kyis spyad/ / gang dag sems lus grol ba de// 'jig rten na ni yon sbyong mchog/ byang chub sems dpa' 'od tog gis smras pa/ ji lta bur na sgyu ma'i mkhan// bzang pos bkod
- 82b
pa sprul byas pa/ / dngos kun de dang 'dra ba ste// byis pas de ni mi rtogs so// byang chub sems dpa' 'od bkod pas smras pa/ ji ltar gdun dang ljon shing dag/ du ma mngon par sprul byas pa/ / yid kyi sgyu ma lta bur stong // 'di la khyad par 'ga' yang med// byang chub sems dpa' seng ges smras pa/ seng ge'i sgra ni ma thos na// wa ni nags tshal nang na sgrogs de yis seng ge'i sgra thos nas/ / phyogs bcu dag tu 'bros par 'gyur// de bzhin sgyu mkhan bzang po yang // de bzhin gsheg pa ma mthong na// mu stegs nang du rgyal ba bas// bdag nyid / mchog ces sgrog par byed// bzang po de bzhin gshegs pa yi// sgyu mas sdu ma rdzogs byed pa// tshad mar gyur pa gsung na ni// de la bdud kyis gting mi dpogs// byang chub sem dpa' seng ge'i blo gros kyis smras pa/ zhal zas 'di ni sprul pa ste// bsnyen bkur byed pa'ang sprul pa yin// spyod par byed pa'ang sprul pa ste// sbyin pa dge babla na med// byang chub dpa' byams pas smras pa/ me ni mar dang til mar gyis// phyi phyir zhing ni rab tu mched// de bzhin bzang po'i sgyu ma yis// sangs rgyas sgyu ma nges par bstan// 'jam dpal gcon nur gyur pas smras pa/ ji ltar 'di na sngon gnas pa/ thams cad byed pa med pa ltar// de bzhin chos rnams thams cad ni// sngon gyi mtha' nas rtag tu mnyam/ sa
- 83a
bcom ldan 'das kyis sgyu ma mkhan bzang po shin du gdul ba'i dbang du mdzad nas/ khyim bdag gcig sprul te 'khor gyi khyams de'i nang du zhugs nas/ sgyu ma mkhan bzang po la 'di skad ces smras so/ / bzang po ci byed/ smras pa/ dge sbyong go'u ta ma 'di gdugs tshod gsol bar byed do// des smras pa/ bzang po thong de skad ma zer/ de bzhin gshegs pa de ni dge slong gi dge 'dun dang thabs cig tu rgyal po ma skyes dgra'i khab na gdugs tshod gsol zhing bzhugs so/ / sgyu ma mkhan bzang pos kyang / sangs rgyas kyi mthus de bzhin gshegs pa dge slong gi dge 'dun dang thabs cig du rgyal po ma skyes dgra'i khab na gdugs tshod gsol bar mthong ngo / / de nas yang bcom ldan 'das kyis khyim bdag gnyis pa zhig mngon par sprul nas de nang du/ zhugs te/ sgyu ma mkhan bzang po la 'di skad ces smras so// bzang po ci byed/ smras pa/ dge sbyong go'u ta ma 'di gdugs tshod gsol bar byed do// des smras pa/ thong de skad ma zer de bzhin gshegs pa de ni dge slong gi dge 'dun dang thabs cig tu kun tu rgyu'i srang na bsod snyoms kyi phyir rgyu zhing bzhugs so/ / sgyu ma mkhan bzang pos kyang / sangs rgyas kyi mthus de bzhin gshegs pa dge slong gi dge 'dun dang thabs cig tu kun tu rgyu'i srang na bsod snyoms kyi phyir rgyu ba mthong ngo / / de nas yang bcom ldan 'das kyis khyim bdag gzhan zhig sprul te/ de nang du zhugs nas/
- 83b
ma mkhan bzang po la 'di skad ces smras so// bzang po ci byed/ smras pa/ de bzhin gshegs pa 'dir gdugs tshod gsol bar byed do// des smras pa/ bzang po thong de skad ma zer/ de bzhin gshegs pa de ni 'tsho byed kyi skyed mos tshal na 'khor bzhi la chos ston cing bzhugs so// sgyu ma mkhan bzang pos kyang / sangs rgyas kyi mthus de bzhin gshegs pa 'tsho/ byed kyi skyed mos tshal na 'khor bzhi la chos ston par mthong ngo // de nas lha rnams kyi dbang po brgya byin sgyu ma mkhan bzang po ga la ba der song ste phyin nas/ sgyu ma mkhan bzang po la 'di skad ces smras so/ / bzang po ci byed/ dge sbyong go'u ta ma 'di gdugs tshod gsol bar byed do// des smras pa/ bzang po thong de skad ma zer/ de bzhin gshegs pa de ni sum cu rtsa gsum pa'i gnas na shing yongs 'du'i drung na sum cu rtsa gsum pa'i lha rnams la chos ston cing bzhugs so/ / bzang pos kyang de bzhin gshegs pa sum cu rtsa gsum pa'i gnas na shing yongs 'du'i drung na chos ston par mthong ngo / / de nas yang sgyu ma mkhan bzang pos shing ljon pa sprul pa ji snyed pa de dag thams cad kyi lo ma thams cad dang / me tog thams cad la de bzhin gshegs pa'i sku mtshan gyis brgyan pa/ dge slong gi dge 'dun gyis yongs su bskor ba mthong ngo // sgyu ma mkhan bzang pos seng ge'i
- 84a
khri sprul pa gang dag yin pa dang / rgyal po chen po bzhis seng ge'i khri sprul pa gang dag yin pa de thams cad la'ang / de bzhin gshegs pa'i sku mtshan gyis brgyan pa/ dge slong gi dge 'dun gyis yongs su bskor ba mthong ngo // rgyal po'i khab kyi grong khyer chen po ni rtsig pa'am/ khyim mam/ khang bzang ngam/ srang ngam/ lam po che ji snyed yod pa de dag thams cad na'ang de bzhin gshegs pa'i sku mtshan gyis brgyan pa mthong ngo // de bzhin gshegs pa dgra bcom pa yang dag par rdzogs pa'i sangs rgyas de dag thams cad kyi spyan snga na'ang / sgyu ma mkhan bzang po bdag nyid phyag 'tshal nas nyes pa 'chags par mthong zhing / de nas sgyu ma mkhan bzang po'i mig lam na gang cung zad ci snang ba thams cad de bzhin gshegs pa ma gtogs pa gzhan cung zad kyang ma mthong nas/ de tshim zhing mgu la yi rangs te/ rab tu dga' zhing dga' ba dang yid bde bar gyur to// de dga' ba dang / yid bde ba de nyid kyis dad pa rjes su dran pa ting nge 'dzin thob bo// de ting nge 'dzin de las langs ma thag tu thal mo sbyar te/ bcom ldan 'das kyi spyan sngar 'dug nas tshigs su bcad pa 'di dag gsol to/ / bzhed na brgya phrag stong las lhag gyur cing / dper na gang+gA'i klung gi bye snyed kyi// sangs rgyas mang po sprul par mdzad pa yi// de bzhin
- 84b
gshegs kyi rdzu 'phrul de la mos/ / bdag gis sngon bslabs sgyu ma'i sa ma lags// 'dzam bu'i gling na bdag 'dra med snyam na// de ring rgyal ba'i rdzu 'phrul 'di mthong na// 'di / yi grangs dang char yang ma spyod do// bdag gi sha yi mig gis gang mthong ba// thams cad rgyal ba'i mtshan gyis brgyan pa'i sku// chos kyi rgyal po la ni 'di dag zhus// rgyal ba yang dag gang lags bka' stsol cig/ gang zhig mchod na legs par mchod pa lags// gang la 'bras bu chen por 'gyur ba lags// gang gi byang chub mthun par gzung ba 'di/ / kun tu spyan gyis bdag la bka' stsol cig/ de ring 'jig rten mgon la bag ma bgyis pa'i// nongs pa gang lags deng 'dir kun tu 'chag gang dag sems can mchog la gus mi gnas/ / sems can de dag rgyal ba'i bde las nyams// bdag la lha dang brgya byin tshangs pa dang // 'khor 'dus gyur pa 'di dag kun gson cig/ sems can thams cad rab tu dgrol slad du// byang chub sems ni bdag gis bskyed par bgyi// bdag gis sems can thams cad mgron du gnyer/ / bdud rtsi bde bas yang dag tshim par bgyi// gnyid kyis rab log sems can shes par bgyi// mthu dang sgrub pas rnam par sad par bgyi// rnam par 'phrul pa
- 85a
'di 'dra mthong gyur cing / / bde bar gshegs bka' yid 'ong ye shes dang // chags pa med pa'i spyod mchog thos nas ni// su zhig dag pa'i rgyu sems skyed mi bgyid/ / byang chub sems mkhas ji ltar spyad pa yi// byang chub lam ni bdag la bshad du gsol// gang la nyan thos rnams kyis mi dpogs pa'i// de dag rnams kyi spyod pa ji lta bu// cho ga spyod pa'i yon tan ji lta bu// mnyan par 'dod pa gus pa ji lta bu// nges pa rnams kyi spyod lam ci 'dra ba// bdag la the tsom ma mchis de bzhin gsungs/ / ji ltar thos pa tshol la goms pa lags// thos pa snying por bgyid pa'i dang po gang // gzhan la gsal bar ston pa ji lta bu// srog chags thams cad ji ltar chos la dad/ / ji ltar 'di dag shes kyi khe mi tshol// zang zing med pa'i sems la ji ltar gnas// byas pa shes shing rab tu phan 'dogs dang // sems can mi byed gnas par ji ltar 'gyur// grogs po gang dag bsten bgyi ji lta bu// sdig pa'i grogs rnams ji ltar rnam par spong // ji ltar sangs rgyas rnams dang phrad par 'gyur/ / de dag mthong nas ji ltar mchod par bgyi// ji ltar bslab pa dag la gus pa lags// de yi bslab pa bca' ba gang zhig lags// tshul khrims
- 85b
ji ltar rnam par dag par 'gyur/ / ting 'dzin rnam par dag pa ji ltar 'thob// ji ltar tshul bzhin rab tu sbyor ba lags// tshul bzhin ma lags ji ltar spong ba lags// rdzi ltar shin tu nges par bsams yid dang / / nyon mongs bdud kyi 'ching bas mi thub lags// ji ltar dang ldan don ni sems bgyid cing // sems kyis sems can rnams ni mi gtong lags/ / ji ltar sems can yongs su smismin bgyid cing // nor mchog 'dzin pa med la dpa' ba lags// ji ltar sems can spyod la 'jug pa dang // thabs dang byams pa snying rjes gnas pa lags// mngon par shes pa ji ltar yongs rdzogs 'gyur// dran dang blo gros gang gis rnam dag cing // so so yang dag rig gzungs bzod par 'gyur/ / smon lam rnam dag spyod lam mi ldog cing // zab mo shes ldan don dam mkhas pa lags// smon lam thams cad ji ltar 'grub par 'gyur/ / ji ltar de dag pha rol phyin 'phags shing // de bzhin byang chub rjes su mthun par 'gyur// byang chub sems dpa'i spyod pa kun shes shing // byang chub phyir ni spyod pa mi ldog pa/ / kun mkhyen legs par don bsams shes rab mtsho// ye shes 'byung gnas 'di ni bdag la gsung // bcom ldan phan yon bdag la bstan
- 86a
du gsol/ / bdag gis nan tan snying por bgyi bar 'tshal/ de nas bcom 'das kyis/ sgyum mkhan bzang po la slar tshigs su bcad de bka' stsal pa/ chos kun sprul par gang gis shes pa de// sangs rgyas bye ba phrag stong sprul par byed// sprul pa de dag zhing rnams bye bar 'gro// de dag song nas sems can bye ba 'grel/ / ji ltar bzang po khyod kyis gzugs med las// sna tshogs mtha' yas gzugs ni ston byed cing // de dag skye ba med cing 'gag med la// 'gro med 'ong med gnas pa med pa ltar/ / bzang po skyes bu khyu mchog rgyal ba yis// phung po dge 'dun tshogs bcas sprul de 'dra// de dang ye shes med par mi 'gyur te// sangs rgyas bsam yas rnams kyi rdzu 'phrul yin/ / ji ltar sgyu mas rmongs byas skye ba ni// sems pa yod min de bzhin nga rgyal med// 'di la grub pa med cing rdzas yod min// phyin ci log gi sems kyis mthong ba ltar// de bzhin sangs rgyas gzugs med kha dog dang // dbyibs min spyod pa ston yang spyod lam med// 'jig tshogs lta bas kun nas slang ma yin/ / sangs rgyas sangs rgyas snyam du 'du shes med// sangs rgyas gzugs su mi blta mtshan dang ni// na tshod rigs su ma yin sgra dang ni// 'chang bar
- 86b
'gyur bar ma yin sems dang ni/ / rnam shes yid kyis rab du phye ma yin// chos nyid gang yin sangs rgyas bcom ldan 'das// dus gsum stong zhing mtshan yang ma skyes pa/ rtag tu sgyu ma'i rang bzhin rnam par grol// de la chos su bgrang bar rab tu phye ba med// sangs rgyas 'byung gang chos nyid 'byung ba med// de la phung po yod min khams mi 'byung // chos de gnas pa ma g.yo rten pa med// de ni mig lnga'i gnas kyang ma yin no// gang zhig bdag gis sangs rgyas blta snyam sems// des ni gzhar yang sangs rgyas mthong mi 'gyur// 'dren pa mthong ba med pa mthong ba ste// dper na nam mkha' la ni bya rjes bzhin// bzang po gang khyod cung zad sangs rgyas lta// de kun don gcig yin par shes par gyis// nga dang gzhan gang yin pa de kun mtshungs/ / bar snang mthong dang 'dra bar mnyam pa yin// de dag ting 'dzin mnyam zhing shes rab mnyam// de dag rnam par grol bar mnyam pa yin// rnam grol ye shes mthong zhing stobs dang ni/ / rgyal ba'i yon tan kun gyis mnyam pa yin// de dag stong don go 'phang gnas par mnyam// thams cad chags pa med pa'i chos nyid gnas/ / kun kyang sgyu ma'i rang bzhin rnam par grol// de dag 'byung ba med par 'byung ba yin// bzang po rgyal ba gcig la mchod byed na// phyogs bcu'i sangs rgyas la ni mchod
- 87a
'gyur te/ / 'di ltar de dgang yi chos dbyings dang // tha dad bya ba nam yang yod ma yin// de dag thams cad yon pa zhes sbyong bar mdzad// kun la phul ba'ang 'bras bu che bar 'gyur/ / de kun chos nyid dag pa mnyam pa brnyes// sangs rgyas rnams la tha dad bya ba'ang med// rgyal ba yang dag gang yin bshad bya yin/ gcig sems dang dran pa nyer gzhag cing // chos tshul rtogs la rnam par lta bas de// legs par nges bsams sems kyis nga la nyon// bzang po de kun ma skyes yang dag min// phyin ci log gis de kun mthong bar zad// gal te dngos po'i ngo bo yang dag na// dngos po thams cad du ni zad mi 'gyur// de phyir shin tu ma skyes yang dag min// de dag skye med zad la gnas pa med/ / des na bltar med ngo bo de dag snang // rnam par bltas na gnas pa yod ma yin// ji ltar bzang pos rgyal ba mthong ba dang // ji ltar phyogs su mngon par sprul mthong ba/ / gang gzhan phung po rgya chen rten stobs dang // phung po lnga po'ang de dang 'dra bar ltos// chos rnams thams cad rang bzhin med pa ste// sems can dang ni sangs rgyas mtshan nyid med/ / mtshan nyid med la mtshan du 'dod pa de// sangs rgyas las ni shin tu ring bar 'gyur// chos yod ma yin kun tu rtog pas bslad// dngos po med par yang
- 87b
ni brten nas shes/ / byed pa med cing byed pa po las 'das// ming du 'dzin pas stong par rab tu ston// gang gis rgyu dang byed po rkyen mi shes// des ni chags bral gyur pa chos kyang shes/ / 'dod chags bral ba'i chos ni shes gyur na// des ni rnam dag mig gis sangs rgyas mthong // yang de'i tshe tshigs su bcad pa dag brjod de bstan pa na/ sgyu ma mkhan bzang po chos la nges par rtog pa dang mthun pa'i bzod pa chung ngu skyes so/ / srog chags lnga stong ni bla na med pa yang dag par rdzogs pa'i byang chub kyi sems sngon ma bskyed pa skyes so// byang chub sems dpa' nyis brgya ni mi skye ba'i chos la bzod pa thob par gyur to// de nas yang bcom ldan 'das kyis zhal zas sprul pa de gsol nas/ sgyu ma mkhan bzang po'i yon yongs su sbyang bar bya ba'i phyir/ de'i tshe tshigs su bcad pa 'di dag bka' stsal to// gang gis sbyin dang gang la sbyin// sbyin pa ji ltar mi rtog pa// sbyin pa mnyam pa de nyid ni/ / bzang po la ni yongs rdzogs shog/ de nas bcom ldan 'das la/ tshe dang ldan pa kun dga' bos 'di skad ces gsol to// bcom ldan 'das 'khor gyi khyams 'di rgyan gyis brgyan bzhin du dgung bdun du gnas shing mi gda' bar mi 'gyur bar byin gyis brlab tu gsol/ de skad ces gsol pa dang / bcom ldan 'das kyis 'khor gyi khyam
- 88a
de ji ltar rgyan gyis brgyan bzhin du zhag bdun du gnas shing mi snang bar mi 'gyur bar byin gyis brlab pa mdzad do/ / de nas bcom ldan 'das da slong gi dge 'dun dang bcas te/ gdan las bzhengs nas gshegs so// de nas yang bcom ldan 'das nang du yang dag 'dzig las bzhengs nas/ chos bstan pa'i phyir bzhugs so/ / dge slong de dag dang / byang chub sems dasu de dag dang / lha dang / klu dang / gnod sbyin dang / dri za de dag kyang chos mnyan pa'i phyir/ bcom ldan 'das kyi thad du dong ngo / / de nas sbrum mkhan bzang po yang / bcom ldan 'das ka la ba der song ste phyin nas/ bcom ldan 'das kyi zhabs la mgo zos phyag 'tshal te/ bcom ldan 'das la lan gsum bskor ba byas nas/ gus pa dang bcas/ zhe sa dang bcas par thal mo sbyar te phyogs gcig tu 'dug go// phyogs gcig tu 'dug nas kyang / bcom ldan 'das la/ sgyu ma mkhan bzang pos 'di skad ces gsol to// bcom ldan 'das byang chub sems dpa' lam gang la zhugs na byang chub kyi snying por mchi bar 'gyur ba'i byang chub sems dpa' rnams kyi lam bshad du gsol/ de skad ces gsol pa dang / bcom ldan 'das kyis/ sgyu ma mkhan bzang po la 'di skad ces bka'
- 88b
stsal to/ / bzang po de'i phyir legs par rab tu nyon la yid la zung zhig dang ngas bshad do// sgyu ma mkhan bzang pos bcom ldan 'das legs so zhes gsol te/ bcom ldan 'das la nyan pa dang / bcom ldan 'das kyis de la 'di skad ces bka' stsal to// bzang po bzhi po 'di dag ni byang chub sems dpa' lam gang la zhugs na/ byang chub kyi snying por 'gro bar 'gyur ba'i byang chub sems dpa' rnams kyi lam yin te/ bzhi gang zhe na/ thams cad mkhyen pa nyid kyi sems mi 'dor ba dang / sems can yongs su mi gtong ba dang / dge ba'i rtsa ba thams cad tshol ba la ngoms mi shes pa nyid dang / dam pa'i chos yongs su bsrung ba'i phyir brtson 'grus rtsom pa ste/ bzang po bzhi po de dag ni byang chub sems dpa' lam gang la zhugs na/ byang chub kyi snying por 'gro bar 'gyur ba'i byang chub sems dpa' rnams kyi lam yin no// bzang po bzhi po 'di dag ni byang chub sems dpa' rnams kyi spyod pa yongs su dag pa yin te/ bzhi gang zhe na/ sdom pa gsum yongs su dag pa dang / gnas yongs su dag pa dang / shes pa yo su dag pa dang / skye ba yongs su dag pa ste/ bzhi po de dag yin no// bzang po bzhi po 'di dag ni gang la nyan thos dang / rang sangs rgyas thams cad kyis gting mi dpogs pa'i byang
- 89a
chub sems dpa' rnams kyi chos yin te/ bzhi gang zhe na/ bsam gtan zlog pa dang / sems kyis rnam par 'byed pa dang / sems can rnams la snying rje che ba dang / spobs pa dang skad sna tshogs pa nyid de/ bzhi po de dag yin no// bzang po bzhi po 'di dag ni byang chub sems dpa' rnams kyi 'phags pa'i spyod pa yin te/ bzhi gang zhe na/ dgon pa na gnas pa dang / 'du 'ji la mi dga' ba dang / de na gnas nas sems can rnams la byams pa dang / 'du byed rnams gang nas kyang mi 'ong gang du'ang mi 'gro bar shes pa ste/ bzhi po de dag yin no/ / bzang po byang chub sems dpa' chos bzhi dang ldan na sri zhu che zhing gus pa la gnas pa zhes brjod par bya ste/ bzhi gang zhe na/ byang chub sems dpa' lus dang srog la mi lta ba dang / sems rtag tu dga' ba dang / nga rgyal dang dregs pa spong ba dang / ji skad smra ba de bzhin du sgrub pa ste/ bzhi po de dag yin no// bzang po byang chub sems dpa' chos bzhi dang ldan na spyod lam phun sum tshogs pa yin te/ bzhi gang zhe na/ dus shes pa dang / chod shes pa dang / rab tu dben pa dang / yang dag pa nyid de/ bzhi po de dag yin no// bzang po byang chub sems dpa' chos bzhi dang ldan na the tsom med pa yin te/ bzhi gang zhe na/ 'gyod pa kun nas ldang ba rnam par gnon pa dang / mkhas pa dang shes rab chen po la bsnyen
- 89b
bkur byed pa dang / thos pa'i don sems pa dang / gzhan gyi nyes pa mi gleng zhing / gleng ba gang yin pa'ang byams pas gleng gi/ skyon gcor byed pas ma yin pa ste/ bzhi po de dag yin no// bzang po byang chub sems dpa' phan yon bzhi po 'di dag mthong na/ thos pa tshol bar byed de/ bzhi gang zhe na/ bdag dang gzhan gyi shes rab sbyong ba dang / phyogs bzhi nas lhags pa rnam kyi the tsom gcod pa dang / dam pa'i chos 'dzin pa dang / sangs rgyas kyi bsngags pa zad mi shes pa ste/ bzhi po de dag yin no// bzang po bzhi po 'di dag ni byang chub sems dpa' rnams kyi mang du thos pa'i snying po yin no/ / bzhi gang zhe na/ thos nas chos bye brag tu shes pa 'di ni 'di'i snying po yin no// thos nas bya ba ma yin pa mi byed pa 'di ni 'di'i snying po yin no/ / thos nas gzhan la ston par byed pa 'di ni 'di'i snying po yin no// thos nas don de nyid rnam par grol ba 'di lta ste/ sangs rgyas bcom ldan 'das rnams kyi byang chub la gtong bar byed pa 'di ni 'di'i snying po yin te/ bzhi po de dag yin no// bzang po bzhi po 'di dag ni byang chub sems dpa' chos ston par byed pa'i phan yon yin te/ bzhi gang zhe na/ las byas nas zas la yongs su spyod pa dang / chos gos dang / bsod snyoms dang / mal cha dang / stan dang / nad gsos dang / sman zong rnams rnyed pa dang
- 90a
gzhan gyi phyogs mthu chung bar byed pa dang / chos 'dod pa'i lha rnams phyi bzhin 'brang zhing / de dag gis bsrungs pas bdud kyis glags mi rnyed pa ste/ bzang po bzhi po de dag ni byang chub sems dpa'i chos ston par byed pa'i phan yon no// byang chub sems dpa' chos bzhi dang ldan na gzhan dag la chos ston par byed cing / 'di'i tshig gi/ lam gzung bar 'os par yang 'gyur te/ bzhi gang zhe na/ 'dod pa chung ba dang / chog shes pa dang / ngang tshul can bzang zhing mnyen pa dang / bdag nyid kyi chos sgrub pa ste/ bzhi po de dag yin no/ / bzang po byang chub sems dpa' chos bzhi dang ldan na/ shes kyi khe las 'byol zhing zang zing med par chos ston pa'ang yin te/ bzhi gang zhe na/ 'khor ba la 'jigs pa skyed pa dang / 'jig rten gyi zang zing dang 'du 'dzi don du mi gnyer ba dang / pha rol rjes su srung ba dang / 'phags pa'i rigs la gnas pa ste/ bzhi po de dag yin no// bzang po byang chub sems dpa' chos bzhi dang ldan na/ byas pa gzo ba dang / byas pa tshor ba dang / byas pa la lan du phan 'dogs pa yin te/ bzhi gang zhe na/ gzhan yang byang chub yang dag par len du 'jug pa dang / las byas pa chud mi gzon pa dang / bdag nyid la byams pa ltar gzhan la yang byams pa dang / skyes bu dam pa'i rtsal don du gnyer ba ste/ bzhi po
- 90b
de dag yin no/ / byang chub sems dpa' chos bzhi po de dag dang ldan na/ sems can rnams la mdza' bshes mi phyed par 'gyur te/ bzhi gang zhe na/ bzod pa'i stobs kyi go bgos pa dang / lan du phan 'dogs par cung zad kyang re ba med pa dang / snying rje chen po mi 'dor ba dang / log par zhugs pa rnams mi spong ba ste/ byang chub sems dpa' chos bzhi po de dag dang ldan na// sems can rnams la mdza' bshes mi phyed par 'gyur ro// bzang po bzhi po 'di dag ni byang chub sems dpas bsten par bya ba'i grogs po yin te/ bzhi gang zhe na/ sbyor ba phun sum tshogs pa dang / bsam pa phun sum tshogs pa dang / spyod pa phun sum tshogs pa dang / gang dag 'di'i byang chub nye bar rton par byed pa ste/ bzhi po de dag yin no// bzang po bzhi po 'di dag ni byang chub sems dpa' rnams kyi mi dge ba'i grogs po yin par rig par bya ste/ bzhi gang zhe na/ theg pa dman pa ston pa dang / byang chub kyi sems la 'dun pa zlog par byed pa dang / gang dag bsten na mi dge ba'i chos 'phel bar 'gyur ba dang / dge ba'i chos rnams las yongs su nyams par 'gyur ba ste/ bzhi pa de dag yin no/ / bzang po byang chub sems dpa' chos bzhi dang ldan na/ sangs rgyas bcom ldan 'das rnams dang phrad par 'gyur te/ bzhi gang zhe na/ dran pa rtse gcig pa dang /
- 91a
sangs rgyas bcom ldan 'das rnams kyi bsngags pa yang dang yang du sgrogs pa dang / tshul khrims yongs su dag pa dang / lhag pa'i bsam pas smon lam 'debs pa ste/ bzhi po de dag yin no// bzang po byang chub sems dpas phan yon bzhi po 'di dag mthong na/ de bzhin gshegs pa la mchod pa bya bar spro bar 'gyur te/ bzhi gang zhe na/ yon gnas mchog la mchod pa 'gyur ba dang / bdag mthong nas sems can gzhan dag kyang de bzhin du mchod pa byed par 'gyur ba dang / de bzhin ga pa legs par mchod na byang chub kyi sems brtan par 'gyur ba dang / skyes bu chen po'i mtshan sum cu rtsa gnyis dang ldan pa mngon sum du mthong na dge ba'i rtsa ba sogs par 'gyur ba stebazang po byang chub sems dpas phan yon bzhi po de dag mthong na/ de bzhin gshegs pa la mchod pa bya bar spro bar 'gyur ro// bzang po de bzhin du byang chub sems dpas don gyi dbang bzhi mthong na bslab pa lhur len par 'gyur te/ bzhi gang zhe na/ ngan 'gro las yang dag par 'da' ba dang / bde 'gro 'thob par 'gyur ba dang / de bzhin gshegs pa la gus pa dang / smon lam yongs su rdzogs par 'gyur ba ste/ bzhi po de dag yin no// bzang po bzhi po 'di dag ni byang chub sems dpa' rnams kyi bslab pa yin te/ bzhi gang zhe na/ byang
- 91b
chub kyi sems mi 'dor ba dang / sems can thams cad la mnyam par sbyor ba dang / pha rol du phyin pa yongs su rgol ba dang / sangs rgyas kyi chos tshad med pa mnyam pa la mi skrag pa ste/ bzang po bzhi po de dag ni byang chub sems dpa' rnams kyi bslab pa yin no// bzang po bzhi po 'di dag ni byang chub sems dpa' rnams kyi bslab pa yongs su dag pa yin te/ bzhi gang zhe na/ bya ba ma yin pa mi spyod pa dang / stong pa nyid la mos pa dang / sangs rgyas kyi byang chub mi spong ba dang / lta ba bag la nyal ba dang bcas pa yang dag par 'joms pa ste/ bzang po bzhi po de dag ni/ byang chub sems dpa' rnams kyi bslab pa yongs su dag pa yin no// bzang po bzhi po 'di dag ni byang chub sems dpa' rnams kyi ting nge 'dzin gyi rigs yin te/ bzhi gang zhe na/ 'du 'ji med pa dang / rab tu dben pa dang / sems kyi rnyog pa med pa dang / dge ba'i rtsa ba nye bar rton pa ste/ bzang po bzhi po de dag ni byang chub sems dpa' rnams kyi ting nge 'dzin gyi rigs yin no/ / bzang po bzhi po 'di dag ni byang chub sems dpa' rnams kyi tshul bzhin rab tu sbyor ba yin te/ bzhi gang zhe na/ dge ba'i rtsa ba skyes na byang chub kyi sems mngon du byed pa dang / nang du yang dag 'jog pa la sgrib pa med pa dang / rnam par thar pa'i sgo dag la 'dris par byed pa dang / nyes pa la mi 'jug pa ste/ bzang po bzhi po de dag ni byang chub sems dpa' rnams
- 92a
kyi tshul bzhin rab tu sbyor ba yin no/ / bzang po bzhi po 'di dag ni byang chub sems dpa' rnams kyi tshul bzhin ma yin pa'i sems skye ba bzlog par bya ba yin te/ bzhi gang zhe na/ 'khor ba'i 'jigs pas skrag pa dang / rnal 'byor spyod pa dag la ma mos pa dang / dgongs pa dag la mi dka' ba dang / dge ba'i rtsa ba rnams mngon par 'du mi byed pa ste/ bzang po bzhi po de dag ni tshul bzhin ma yin pa'i sems skye ba bzlog par bya ba yin no// bzang po bzhi po 'di dag ni byang chub sems dpa' rnams kyi sems kyis nges par bsam pa yin te/ bzhi gang zhe na/ sems can 'ga'i don gyi phyir yang bskal pa phyi ma'i mthar thug par 'khor ba na 'khor bar bya'o snyam pa 'di ni sems kyis nges par bsam pa dang po yin no/ / bdag gis sems can thams cad kyi sems kyi spyod pa rnams kyi shes par bya zhing / de dag gi nyon mongs pa rab tu zhi bar bya ba dang / dbang po mchog dang mchog ma yin pa shes par bya ba'i phyir chos bstan par bya'o snyam pa 'di ni sems kyis nges par bsam pa gnyis pa yin no/ / bdag gis mi dge ba'i chos thams cad spangs shing dge ba'i chos thams cad dang ldan par byas nas/ byang chub kyi snying po la 'dug ste/ bdud gyi dpung pham par byas nas/ bla na med pa yang dag par rdzogs pa'i byang chub mngon par rdzogs
- 92b
par 'tshang rgya bar bya'o snyam pa 'di ni sems kyis nges par bsam pa gsum pa yin no/ / stong gsum gyi stong chen po'i 'jig rten gyi khams skad cig gcig gis go bar byas te chos bstan par bya'o snyam pa 'di ni sems kyis nges par bsam pa bzhi pa yin te/ bzang po bzhi po de dag ni byang chub sems dpa' rnams kyi sems kyis nges par bsam pa yin no// bzang po chos bzhi po 'di dag ni byang chub sems dpa' rnams kyi bdud 'dul ba yin te/ bzhi gang zhe na/ chos la sgyu ma lta bur so sor rtog pa dang / rdul bzhin du sbyor ba dang / chos thams cad la rnam par mi rtog pa dang / mtshan ma thams cad la mi gnas pa ste/ bzang po chos bzhi po de dag ni bdud 'dul ba yin no// bzang po bzhi po 'di dag ni byang chub sems dpa' rnams kyi don sems pa yin te/ bzhi gang zhe na/ gang zag med pa'i phyir chos rnams brten nas skye ba yin gyi/ chos 'ga' yang rgyu med par ni mi skye ba dang / brten nas skyes pa'i chos gang yin pa de ma skyes pa dang / dngos po med pa dang byang chub kyi phyir chud mi za ba ste/ bzang po bzhi po de dag ni byang chub sems dpa' rnams kyi don sems pa yin no// bzang po byang chub sems dpa' chos bzhi dang ldan na/ sems can rnams mi gtong ba yin te/ bzhi gang zhe na/ sngon gyi smon lam mi 'dor ba dang / yongs su skyo ba bzod pa dang
- 93a
lus dang srog la mi lta ba dang / / smra ba'i dngos pos sdud pa ste/ bzhi po de dag yin no// bzang po bzhi po 'di dag ni byang chub sems dpa' rnams kyi yongs su smin par byed pa yin te/ bzhi gang zhe na/ 'jig rten gyi zang zing sbyin pa yongs su gtong ba dang / yongs su smin pa la chos ston pa yongs su gtong ba dang / dus dus su skul bas dran par byed pa yongs su gtong ba dang / bdag nyid kyi bde ba spangs nas/ gzhan gyi dge ba'i rtsa ba ston pa dang yongs su smin par byed pa ste/ bzang po bzhi po de dag ni byang chub sems dpa' rnams kyi yongs su smin par byed pa yin no/ / bzang po byang chub sems dpa' chos bzhi dang ldan na/ ma bsdus pa sdud par byed pa la mi 'jigs pa yin te/ bzhi gang zhe na/ dge ba'i rtsa ba chung ngu la'ang mos pa dang / rtag tu rgyun mi 'chad par gzhan gyi don byed par spro ba dang / sbyin pa dang / dul ba dang / nges pa phun sum tshogs pa dang / rnyed pa dang / bkur sti dang / tshigs su bcad pa thams cad la don du gnyer ba med pa ste/ bzhi po de dag yin no// bzang po byang chub sems dpa' chos bzhi dang ldan na/ sems can gyi spyod pa la 'jug pa yin te/ bzhi gang zhe na/ mngon par shes pa thob pa dang / ye shes thob pa dang / ting nge 'dzin chen por gyur pa tshad med pa la 'jug pa dang / rnam pa
- 93b
thams cad kyi mchog dang ldan pa'i stong pa nyid sgom zhing rnam par grol ba dang ma 'dres pa ste/ bzhi po de dag yin no// bzang po byang chub sems dpa' chos bzhi dang ldan na/ thabs la mkhas pa yin par rig par bya ste/ bzhi gang zhe na/ sems bskyed pa thams cad la byang chub kyi sems sngon du 'gro ste/ tha na nyon mongs pa'i sems la'ang rung na/ dge ba'i sems la lta smos kyang ci dgos pa dang / sems can thams cad chos kyi snod nyid yin par lta ba dang / ngo bo nyid med par khong du chud pas chos thams cad log pa nyid du nges pa yin par lta ba dang / rnam par grol bar 'dod pas snyoms par 'jug pa thams cad la mngon par zhen pa med pa'i 'du shes sgom par byed pa ste/ byang chub sems dpa' chos bzhi po de dag dang ldan na/ thabs la mkhas pa yin par rig par bya'o// bzang po bzhi po 'di dag ni byang chub sems dpa' rnams kyi byams pa sgom pa yin no// bzhi gang zhe na/ bdag gis sems can thams cad bskyab par bya'o snyam du byams pa sgom pa dang / bdag gis sems can thams cad bsngal bar bya'o snyam du byams pa skom pa dang / bdag gis sems can thams cad bskul bar bya'o snyam du byams pa sgom pa dang / bdag gis sems can thams cad yongs su mya ngan las bzla'o snyam du byams bsgom
- 94a
pa ste/ bzang po de dag ni byang chub sems dpa' rnams kyi byams pa sgom pa yin no// bzang po bzhi po 'di dag ni byang chub sems dpa' rnams kyi snying rje yin te/ bzhi gang zhe na/ ngan song du skyes pa rnams bde 'gro'i lam la dgod pa'i snying rje dang / sdig pa'i las dang ldan pa rnams dge ba'i chos la sbyor ba'i snying rje dang / thag pa dman pa la mos pa rnams theg pa chen po yang dag par len du 'jug pa'i snying rje dang / sems can thams cad yongs su mya ngan las bzla'o snyam pa'i snying rje ni bzhi pa yin te/ bzhi po de dag yin no/ / bzang po byang chub sems dpa' chos bzhi dang ldan na/ mngon par shes pa 'thob par 'gyur te/ bzhi gang zhe na/ lus dang sems yang ba dang / sgyu ma'i rang bzhin du rnam par 'byed pa dang / sems can thams cad la gus pa dang rim gro'i sems bskyed pa dang / zhi gnas la rtse gcig tu gyur pas rnam par g.yeng ba med pa yin no// bzang po byang chub sems dpa' chos bzhi dang ldan na/ so so yang dag par rig pa 'thob par 'gyur te/ bzhi gang zhe na/ don la rton pa yin gyi tshig 'bru la mi rton pa yin/ chos la rton pa yin gyi gang zag la mi rton pa dang / chos thams cad bdag med pa'i nges pa'i tshig dang / yi ge mi zad par shes nas chags pa med cing thogs pa med par ston pas ston par byed pa ste/ bzhi po
- 94b
dag yin no/ / bzang po byang chub sems dpa' chos bzhi dang ldan na/ gzungs 'thob par 'gyur te/ bzhi gang zhe na/ mang du thos pas ngoms mi shes pa dang / mang du thos pa rnams la chos bzhin du gus par bsnyen bkur byed pa dang / rtag tu gzhan dag la chos ston par brtson pa dang / tshig dang yi ge thams cad gtan la dbab pa'i phyir de bzhin gshegs pa'i dgongs te gsungs pa la 'jug pa yin no/ / bzang po byang chub sems dpa' chos bzhi dang ldan na/ bzod pa 'thob par 'gyur te/ bzhi gang zhe na/ mos pa dang / phyir mi ldog pa dang / tshogs dang / yongs su mi skyo ba ste/ bzhi po de dag yin no// bzang po byang chub sems dpa' chos bzhi dang ldan na/ spobs pa dag pa 'thob par 'gyur te/ bzhi gang zhe na/ chos smra ba gzhan dag gis bshad pa dang 'gal bar mi byed pa dang / chos smra ba la gus pa dang bcas shing zhe sa dang bcas par chos nyan pa dang / thos pas khengs pa med pa dang / thos pa nyung ngu rnams la rnyas par mi byed pa ste/ bzhi po de dag yin no// bzang po chos bzhi po 'di dag ni byang chub sems dpa' rnams kyi bsgyur ba ste/ bzhi gang zhe na/ 'dod chags dang / zhe sdang dang gti mug bskur ba dang / nyan thos las bsgyur ba dang / rang sangs rgyas las bsgyur ba dang / dge ba'i rtsa ba'i chos la 'du shes bsgyur ba ste/ bzhi po de dag yin no// bzang po
- 95a
chos bzhi po 'di dag ni byang chub sems dpa' rnams kyi don zab mo la sbyor ba yin te/ bzhi gang zhe na/ rten cing 'brel par 'byung bar rtogs par byed pa dang dgongs pa rtogs par byed pa dang / bdag gi ngo bo nyid rtogs par byed pa dang / 'di ltar stong pa'i don du chos de dag thams cad don gcig par rtogs par byed pa ste/ bzhi po de dag ni byang chub sems dpa' rnams kyi don zab mo la sbyor ba yin no/ / bzang po byang chub sems dpa' chos bzhi dang ldan na/ smon lam 'grub par 'gyur te/ bzhi gang zhe na/ tshul khrims dang bslab pa yongs su dag pa dang / las kyi sgrib pa rnam par sbyong ba dang / g.yo sgyu med pa dang / dge ba'i rtsa ba bskyed pa la sems dbang byed pa ste/ bzhi po de dag ni byang chub sems dpa' rnams kyi smon lam 'grub par 'gyur ba'o/ / bzang po byang chub sems dpa' chos bzhi dang ldan na/ pha rol tu phyin pa thams cad kyis 'phags shing phyir mi ldog pa'i chos can du 'gyur tebazhi gang zhe na/ thabs mkhas pa dang ldan pas pha rol tu phyin pa gcig gi nang du pha rol tu phyin pa gzhan thams cad kyang sdud par byed pa dang / thabs mkhas pa dang ldan pas sems can gcig gi rang bzhin rtogs pas/ de las gzhan pa'i sems can thams cad kyang shes pa dang / thabs mkhas pa dang ldan pas chos rnam par dag pa gcig gi tshul rtogs pas/ chos gzhan dag kyi
- 95b
rnam par dag pa'ang shes pa dang / chos nyid yin pas sangs rgyas thams cad sangs rgyas gcig tu mos pa ste/ bzang po byang chub sems dpa' chos bzhi po de dag dang ldan na/ pha rol du phyin pa thams cad kyis 'phags shing phyir mi ldog pa'i chos can du 'gyur ro/ / bcom ldan 'das kyis bzhi pa bsgrub pa 'di bshad pa na/ sgyu ma mkhan bzang po mi skye ba'i chos la bzod pa thob nas/ tshim zhing mgu la yi rangs te/ rab tu dga' zhing dga' ba dang yid bde bar gyur nas/ dga' ba dang mchog tu dga' ba de nyid kyis shing ta la bdun srid tsam gyi steng gi nam mkha' la 'phags so/ / de nas bcom ldan 'das kyis de'i tshe 'dzum pa mdzad do// 'dzum pa mdzad pa'i zhal gyi sgo nas 'od zer grangs med dpag tu med pa bkye bas sangs rgyas kyi zhing thams cad 'od zer des khyab par byas nas/ slar yang bcom ldan 'das kyi dbu'i gtsug tu nub bo// de nas tshe dang ldan pa kun dga' bo stan las langs te/ chos gos phrag pa gcig du bgos nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba bdud nas/ bcom ldan 'das la 'di skad ces gsol to/ / btsun pa bcom ldan 'das de bzhin gshegs pa ni rgyu ma mchis pa dang / rkyen ma mchis par 'dzum pa mi mdzad na/ 'dzum pa mdzad pa'i rgyu gang lags/ rkyen gang lags/ de'i
- 96a
tshe tshogs su bcad pa 'di dag kyang gsol to/ / ye shes 'byung gnas gzi brjid gzhal yas shes rab grags// 'jig rten gsum du yon tan pha rol phyin brnyes grags/ / rgyal ba rang byung gang gi slad du 'dzum bstan pa// mi yi dbang pos de ni bdag la bka' stsal gsol// phyogs rnams na ni 'gro bar sems can ji snyed gnas// de dag kun kyi sems kyi spyod pa rnams dang ni/ / dman dang mchog dang tha ma bar ma rgyu ldan mkhyen// ci slad 'dzum pa mdzad pa bdag la bstan du gsol// lha dang de bzhin zhugs 'bar sgra ni gang lags dang mi 'am ci dang mi dang brgya byin lha min dang / / mkha' lding lto 'phye tshangs pa'i sgra dang sgra gzhan rnams// sangs rgyas rdul bral gsung sgra'i char yang ga la spyod// 'od bzang nyi ma'i 'od dang nor bu'i 'od rnams dang / / brgya byin 'od dang tshangs pa'i 'od rnams ji snyed pa// ji ltar sangs rgyas 'od kyis khyab par gda' ba ltar// 'od rnams de dag thams cad rnam par gsal ma lags/ / sangs rgyas zhing de zab mo'i chos ni rjes su thob// stong pa bdag med sems can gang zag med mkhyen nas// yod dang med pa'i mtha' gnyis rnam par spangs nas su/ / dus gsum chu zla 'dra bar rab tu mkhyen pa'o// deng 'dir su zhig theg pa'i mchog la sems bdud de// su zhig sangs rgyas rigs dang chos kyi rigs la gnas// su
- 96b
zhig dkon mchog gsum po rgya cher skyed par bgyid/ / gang gi ched du 'dzum pa mdzad pa legs par gsungs// gal te rgyal ba nyan thos rnams la don ldan gsungs// de tshe bde gshes 'dzum pa zhabs kyi pus mor nub/ / gal te rkyen gyi theg pa gsung na phrag par nub// gang tshe sangs rgyas theg gsung de tshe spyi bor nub// ji ltar khyod kyis 'od zer 'bum snyed rab btang ba/ / bde bar gshegs kyi gtsug tu nub par gyur las na// phan mdzad lha yi lha ste phan pa mdzad pa po// 'dir ni sangs rgyas theg par lung ston dogs ma mchis de nas bcom ldan 'das kyis/ tshe dang ldan pa kun dga' bo la bka' stsal pa/ kun dga' bo khyed kyis rigs kyi bu bzang po mthong ngam/ gsol pa bcom ldan 'das mthong lags so/ / bka' stsal pa/ kun dga' bo rigs kyi bu bzang po 'di bskal pa dgu khri nyis stong na/ bskal pa legs par sprul pa la/ 'jig rten gyi khams bkod pa chen por de bzhin gshegs pa dgra bcom pa yang dag par rdzogs pa'i sangs rgyas rnam par 'phrul pa'i rgyal po zhes bya bar 'jig rten du 'byung bar 'gyur te/ kun dga' bo de bzhin gshegs pa dgra bcom pa yang dag par rdzogs pa'i sangs rgyas rnam par 'phrul pa'i rgyal po de'i 'jig rten gyi khams bkod pa chen po zhes bya ba de ni 'byor par 'gyur/ sa
- 97a
pa dang / bde ba dang / lo legs pa dang / nyams dga' ba dang / mi dang skye bo mang pos gang bar 'gyur zhing / lag mthil ltar mnyam pa dang / ka tsa lin de ltar reg na 'jam pa dang / me tog gi shing ljon pas brgyan pa dang / rol mo sna tshogs sgrogs pa dang / spos sna tshogs kyis bdugs pa dang / rtag tu rgyun mi 'chad par gdugs dang / rgyal mtshan dang / da dan bsgreng bar 'gyur ro// kun dga' bo bza' ba dang btung ba ni dper na sum cu rtsa gsum pa'i lha rnams kyi longs spyod lhultar bsams pa tsam gyis 'grub ste/ mi de dag gi nye bar spyad pa dang / yongs su spyad pa ni de lta bur 'gyur ro// kun dga' bo de'i tshe 'jig rten gyi khams bkod pa chen po de rtag tu bkod pa thams cad nye bar ston par byed de/ des na 'jig rten gyi khams de bkod pa chen po zhes bya'o// kun dga' bo sangs rgyas kyi zhing der sems can gang dag skyes pa de dag thams cad kyang rgya chen po la mos pa/ theg pa chen po la yang dag par zhugs pa sha stag tu 'gyur ro// kun dga' bo de bzhin gshegs pa rnam par 'phrul pa'i rgyal po'i tshe tshad ni lo khrir 'gyur ro/ / yongs su mya ngan las 'das nas kyang dam pa'i chos lo bye bar gnas par 'gyur ro// kun dga' bo gang gi tshe de bzhin gshegs pa rnam par 'phrul
- 97b
pa'i rgyal po yongs su mya ngan las 'da' ba de'i tshe yang / byang chub sems dpa' sgra rnam par grags pa 'di nga'i 'og tu de bzhin gshegs pa dgra bcom pa yang dag par rdzogs pa'i sangs rgyas kun gyi khyab bdag ces bya bar 'jig rten du 'byung bar 'gyur ro/ / zhes byang chub sems dpa' sgra rnam par grags pa lung bstan nas yongs su mya ngan las 'da' 'o// de nas rigs kyi bu bzang po bar snang de las babs nas/ bcom ldan 'das kyi zhabs la mgo bos phyag 'tshal te/ bcom ldan 'das la 'di skad ces gsol to// bcom ldan 'das bdag gis de slan chad de bzhin gshegs pa dgra bcom pa yang dag par rdzogs pa'i sangs rgyas bye ba 'bum phrag du ma dang / chos dang / dge slong gi dge 'dun la skyabs su mchi'o// de bzhin gshegs pa de bzhin nyid gang gis de bzhin nyid las slar ma log pa de bzhin gshegs pa'i de bzhin nyid dang / dbyer ma mchis pa'i de bzhin nyid dang / ma tshang ba ma mchis pa'i de bzhin nyid dang / rnam par mi rtog pa'i de bzhin nyid dang / skye ba ma mchis pa'i de bzhin nyid dang / mngon par 'du bgyid pa ma mchis pa'i de bzhin nyid kyis/ de bzhin gshegs pa de bzhin nyid gsung ba bzhin du 'ad rgya ma mtshal/ de nas tshe dang ldan pa kun dga' bos/ rigs kyi bu bzang po la 'di skad ces smras so// bzang po khyod de bzhin gshegs pa'i chos nyid rjes su chos
- 98a
bam ci na/ khyod ji ltar na de bzhin gshegs pa de bzhin nyid gsung ba ltar khyod de skad smra/ bzang pos smras pa/ btsun pa kun dga' bo chos thams cad kyang bzhin gshegs pa'i chos nyid thob pa yin no/ / de ci'i phyir zhe na/ btsun pa kun dga' bo 'di ltar de bzhin gshegs pas de bzhin nyid dbyer med pa nyid du thugs su chud de/ bzhin nyid dbyer med pa gang yin pa der kho bo'ang chud cing / ji ltar kho bo chung pa de bzhin du sems can thams cad kyang chud la/ ji ltar sems can thams cad chud pa de bzhin du chos thams cad kyang chud pa'i phyir te/ btsun pa kun dka' bo de bzhin gshegs pa'i chos nyid ni gnyis kyis rab tu phye ba ma yin no// btsun pa kun dga' bo gnyis su med pa ni gang na ku tu shes pa med pa nyid dang / yongs su shes pa med pa nyid do// de ci'i phyir zhe na/ 'du shes yongs su shes pa'i shes pa ni sangs rgyas kyi ye shes yin pa'i phyir ro// de nas bcom ldan 'das la/ tshe dang ldan pa kun dga' bos 'di skad ces gsol to// bcom ldan 'das rigs kyi bu bzang po ni lha dang bcas pa'i 'jig rten mgo rmongs par bgyid pa ste/ sngon yang sgyu ma'i chos nyid kyis mgo rmongs par bgyis so/ / da yang shes rab dang ye shes kyis mgo rmongs par bgyid do// de ci'i slad du zhe na/ 'di'i shes rab dang ye shes kyi spobs pa ni
- 98b
de lta bu lags pa'i slad du'o/ / de nas bcom ldan 'das kyis/ sgyu ma mkhan bzang po la 'di skad ces bka' stsal to// bzang po khyod lha dang bcas pa'i 'jig rten mgo rmongs par byed pa bden nam/ gsol pa/ bcom ldan 'das kyis ji ltar mgo rmongs pa mdzad pa de bzhin du bdag kyang mgo rmongs par bgyid lags so// de ci'i slad du zhe na/ bcom ldan 'das 'di lta ste/ bdag med pa nyid kyis sems can du tha snyad btags te chos ston pa dang / srog med pa dang / gang zag med pa nyid kyis gang zag tu chos ston pa 'di ni mgo rmongs par bgyid pa chen po lags pa'i slad du'o/ / de bzhin gshegs pas ni byang chub kyi snying po la bzhugs nas/ chos 'ga' yang 'chi 'pho ba 'am/ 'gro ba 'am/ skye ba ma gzigs mod kyi/ 'chi 'pho ba dang / 'gro ba dang / skye ba'i chos ston par yang mdzad de/ bcom ldan 'das de lta lags pas/ de bzhin gshegs pa yang dag par gsung ba bka' stsol ba lta lha dang bcas pa'i 'jig rten gyi yul ga la lags/ / de nas bcom ldan 'das kyis/ sgyu ma mkhan bzang po la legs so zhes bya ba byin te/ rigs kyi bu legs so legs so// khyod ji skad smra ba de kho na bzhin te/ 'di lta ste/ bdag med pa nyid kyis sems can du tha snyad btags te/ chos ston pa dang / srog med pa dang / gang zag med pa nyid kyis gang zag
- 99a
tu chos ston pa 'di ni mgo rmongs pa chen po yin no/ / de bzhin gshegs pas ni byang chub kyi snying po la bzhugs nas/ chos 'ga' yang 'chi 'pho ba'am 'gro ba 'am/ skye ba ma gzigs mod kyi/ 'chi 'pho ba dang / 'gro ba dang / skye ba'i chos ston par yang mdzad de/ 'di la yongs su mya ngan las 'da' ba 'am/ yongs su mya ngan las 'da' ba'i phyir chos bstan pa'i chos ni 'ga' yang med do/ / de nas rigs kyi bu bzang pos/ bcom ldan 'das la rab tu 'byung bar gsol pa dang // bcom ldan 'das kyis/ byang chub sems dpa' byams pa la bka' stsal pa/ byams pa khyod kyis rigs kyi bu bzang po rab tu phyung zhig/ de nas byams pas rigs kyi bu bzang po rab tu phyung rdzogs par bsnyen par byas so/ / rab tu phyung rdzogs par bsnyen nas kyang / bcom ldan 'das la 'di skad ces gsol to// bcom ldan 'das byang chub sems dpa' rnams ni kha rog dang rtags dang / tshul gyis rab tu 'byung ba ma lags so// bcom ldan 'das de ci'i slad du zhe na/ byang chub sems dpa' gang zhig mtshan ma thams cad la'ang chags pa ma mchis la/ sems can yongs su smin par bgyi ba'i slad du khams gsum na'ang gnas na/ de ni byang chub sems dpa' rnams kyi rab tu byung ba lags so// yang de'i tshe bstan pa
- 99b
'di bshad pa na/ srog chags lnga stong gis ni bla na med pa yang dag par rdzogs pa'i byang chub tu sems bskyed do// dge slong nyis brgya ni len pa med par zag pa rnams las sems rnam par grol lo/ / de nas bcom ldan 'das la tshe dang ldan pa kun dga' bos 'di skad ces gsol to// bcom ldan 'das chos kyi rnam grangs 'di'i ming ci lags/ 'di'i ming ji skad ces gzung bar bgyi/ bcom ldan 'das kyis bka' stsal pa/ sgyu ma mkhan bzang po lung bstan pa zhes bya bar zung zhig/ rim gyis byang chub yang dag par 'byung ba zhes bya bar yang zung zhig/ kun dga' bo byang chub sems dpa' gang de bzhin gshegs pa blta bar 'dod pa dang / sems can rnams la sangs rgyas kyi mdzad pa bya bar 'dod pa des/ chos kyi rnam grangs 'di gzung bar bya/ bcang bar bya// bklag par bya/ gzhan dag la'ang bstan par bya'o// de ci'i phyir zhe na/ kun dga' bo gang gis 'di bzung ba dang / bcangs pa dang / bklags pa dang / gzhan dag la'ang rab tu bstan pa des ni/ de bzhin gshegs pa mthong ba yin/ des ni sems can rnams la sangs rgyas kyi mdzad pa'ang byas pa yin no// kun dga' bo de lta bas na khyod kyis skye bo mang po la bde ba dang / 'jig rten la snying brtse ba dang /
- 100a
'di lta ste/ lha dang mi rnams kyi don dang / phan pa dang bde ba'i phyir chos kyi rnam grangs 'di zung zhig/ chongs shig/ lkog shig/ kun chub par gyis shig/ kun dga' bo chos gang dag gis byang chub yang dag par 'byung ba dang / theg pa chen po 'di la'ang mang dag par 'byung bar 'gyur ba de dag ni/ theg pa chen po 'di las yang dag par rab tu ston te/ des na chos kyi rnam grangs 'di byang chub la yang dag par byung ba zhes bya'o// kun dga' bo khyod mos par bya'o// khong du chud par bya'o// gang zhig chos kyi rnam grangs 'di gleg bam du byed pa 'am/ lus la bsrel ba de'i lus la de bzhin gshegs pa yod pa yin na/ gang dag gis thos nas de bzhin nyid du sgrub pa lta smos kyang ci dgos/ de nas bcom ldan 'das la/ rigs kyi bu bzang pos 'di skad ces gsol to// bcom ldan 'das chos kyi rnam grangs 'di ni sngon gyi dge pa'i rtsa ba skul ba zhes bgyi lags so/ / de ci'i slad du zhe na/ bcom ldan 'das 'di ltar bdag gis chos kyi rnam grangs 'di thos nas/ dge ba'i rtsa ba sngon bsags pa thams cad mngon sum du gyur pa'i slad du lags so/ / bcom ldan 'das kyis de skad ces bka' stsal nas/ rigs kyi bu bzang po dang / tshe dang ldan pa kun dga'
- 100b
bo dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ / 'phags pa dkon mchog brtsegs pa chen po'i chos kyi rnam grangs le'u stong phrag brgya pa las/ sgyu ma mkhan bzang po lung bstan pa zhes bya ste/ 'dus pa nyi shu rtsa gcig pa rdzogs so/ / // rgya gar gyi mkhan po dzi nA mri tra dang / pradz+nyA bar ma dang / zhu chen gyi lo tsa ba ban de ye shes sde la sogs pas bsgyur cing zhus te gtan la phab pa/ shr-i ka bzhi brgya sum cu/ bam po gcig dang shr-i ka brgya sum cu'o// // rgya gar skad du/ Ar+ya ma hA pra ti hAr+ya u pa de sho nA ma ma hA yA na sU tra/ bod skad du/ 'phags pa cho 'phrul chen po bstan pa zhes bya ba theg pa chen po'i mdo// / bam po dang po/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na/ dge slong stong nyis brgya lnga bcu'i dge slong gi dge 'dun chen po dang / byang chub sems dpa' brgyad stong dang thabs cig tu bzhugs so// de nas
Colophon
rgya gar gyi mkhan po dzi na mi tra dang pradz+nyA bar ma dang/ zhu chen gyi lo tsa ba ban+de ye shes sde la sogs pas bsgyur cing zhus te gtan la phab pa/ sh+lau ka bzhi brgya sum bcu bam po gcig dang sh+lau ka brgya sum bcu'o