khyung chen gyi rgyud
Text
ff. 269a–280b · 24 folio sides
- 269a
bdag dang dbyer med rgyal ba kun gyi thugs// de bzhin mchog gi sa la bzhugs pa la// snying po sangs rgyas thams cad bskyed mdzad pa'i// gsang ba'i thig pa 'di ni bsag bya'i phyir// de bzhin mchog gi snod chen bze bar mdzod// byang chub kyi sems rtsal chen gyi rgyud las/ rgyud kyi bdag po la bstod pa dang / rgyud la bstod pa dang / gtad pa'i le'u ste dgu pa'o// // byang chub kyi sems thig pa ltar spyod/ dam tshig ting nge 'dzin rtsal sprugs pa'i rtsel chen rdzogs so// // mtshan la rgya gar gyi skad smos pa bong du bsgyur ba/ byang chub kyi sems rtsal chen gyi rgyud ces bya ste spyir zhabs su bsgyur ro// rgya gar gyi mkhan po shrI sid+ha dang / bod kyi lo tsa ba chen po bai ro tsa nas bsgyur ba'o// / de nas bcom ldan 'das dpal rdo rje sems dpa' la sogs pa rnams kyis shin tu gus pas phyag 'tshal nas/ bcom ldan 'das dpal kun tu bzang pos rnam par grol ba'i lam la zhugs so// bde bar gshegs so// bstod cing mi smra bar 'khor lnga 'khod 'dug go// de nas bcom ldan 'das dpal kun tu bzang po nyid kyis nyid
- 269b
che ba'i lhun la bzhugs te brjod pa/ dmigs pa'i yul med mi rtog chos kyi lam// mi gnas thig le ji bzhin nyid kyi lam// rang byung ye shes kun tu ji bzhin gnas// yul med mi gnas gnyen pos bcos su med// spyod bzhis don rtsol khyad par don med pas// gzugs med chos sku bsgom pa ga la yod// sems ni gzhi ste chos rnams sna tshogs lam// mchog tu stong pa de bzhin chos la gnas// gnas dang mi gnas rang bzhin nyid kyi lam// ji bzhin nyid du bsgoms pas rnyed mi 'gyur// chags pas grol bar 'di la 'dod pa min// dbang po rno rtul chos lam 'dzin pas kyang // rnyed pa'i yul med snying po mi 'byung zhing // dpag cing gzhal bas 'di la dpog pa min// nam mkha'i mtha' bzhin gang yang mthong ba med// stong pa'i stong pa nor bu rin chen bzhin// dmigs pa med cing 'gyur bar mi byed par// rang bzhin gnas pas re ba thams cad skong // brtags med gzhag na legs pa'i 'byung ba che// dran dang zhi ba 'bad med snying rjes bstan// bla med byang chub snying po 'gro ba'i lam// de lta'i yul can sangs rgyas mthong ba med// sangs rgyas med pas sangs rgyas ming yang med// sangs rgyas ston pas ming du brtags pas nor// sangs
- 270a
rgyas gzhan nas thob byed nor ba'i lam// rang rig byang chub sems nyid sangs rgyas sku// gzhan gyi nor min ye nas gnas pa yin// bde ba 'dod pas bde la rgyab kyis phyogs// ma g.yos nang du btsal ba'i gnas med de// yul phyir chags la bsngo ba'i dmigs pa med// khyung chen nam mkhar ldings te 'gro pab bzhin// rang bzhin spro ba med cing bsdu ba med// rgya mtsho chen po bzhin du ye gnas la// chos rnams sna tshogs ma lus 'byung bar byed// kun tu bzang po'i spyod/ yul dag pa la// skye zhing 'pho ba'i gnas med de bzhin nyid// bshad pa bzhin du rtag pa'i chos kun la// rnyed par mi 'gyur nang gi sems la btsal// 'khrul pa/ rnams kyi sgo tsam nyid du ni// tshig dang yi ger ston pas bshad pa yin// rang rig byang chub snying po chos kyi dbyings// chos dbyings gzhan nas mi rnyed de bzhin nyid// mkhas pa rnams kyis de bzhin shes par gyis// byang chub kyi sems khyung chen gyi rgyud las/ sems las ma gtogs pa'i chos gud nas bstan du med pa'i le'u ste dang po'o// de nas bcom ldan 'das dpal kun tu bzang pos nyid la nyid brjod pa/ mi gnas dmigs pa'i yul med mi rtog chos kyi lam/
- 270b
bsngo ba'i cha shas phra ba'i yul las byung ba te// rtog sgro ma chos kyi sku ni khyad par don med pas// rang byung ye shes mi rtog kun tu ji bzhin gnas// bya bral yul la mi gnas gnyen pos bcos su med// lhag pa'i don med 'di yi rang bzhin las/ snying po'i rang bzhin 'byung ba chos sku gzhan na med// mngon sum kun tu mi rtog yangs pa'i snying po la/ rtag tu 'dug par 'dod pa drang srong nyid// rnam dag lam der zhugs pas mnyam pa'i rgyal po thob// gang la thob par mi rigs bsnyad pa kun dang bral// chos dang chos min rtag tu 'dris shing dbyer med la// don dam chos de lhag pa'i gnas zhes bshad pa'ang med// 'khrul dang ma 'khrul byang chub lam de rtogs pas thob pa med// byang chub lam chen tshig gi mtha' las 'das// 'di dang sangs rgyas 'dra ste thams cad mkhyen// mi phyed rtag par bzhugs phyir bsam pa kun dang bral// de nyid de bzhin nyid la rtag tu bzhugs pa yin// lam med lam du 'jug pa 'khrul pas lam chen de// btsal bar 'dod pas ri dgas smig rgyu sgeg pa 'dra// rnyed pa'i yul med btsal bos de ni mi 'byung zhing // gang la ma chags ye shes dbyings 'das phyir// sa bcur ltos pa'i gnas kyang byang chub sgrib pa yin// de phyir byang chub nyid la rtag tu
- 271a
gzhol bar bya// mi gtang rang bzhin nyid kyi dran pa shin tu bskyed// mi g.yo rang bzhin gnas pas sman chen ma byas na// mtho ris bgrod pa'i rgyu des nyon mongs zin par 'gyur// lam med lam du 'jug pas yul 'di mi rnyed de// chus gdungs glang chen smig rgyu snyeg pa 'dra// bskal par bgrod kyang rnyed par rab tu dka'// byang chub kyi sems khyung chen gyi rgyud las/ yang dag pa'i don 'dis ma zin na/ sangs rgyas par bya ba'i thabs med pa'i le'u ste gnyis pa'o// / de nas yang bcom ldan 'das dpal kun tu bzang pos ched du brjod pa/ dkyil 'khor snying po 'di ni sku rnam bzhi// phyag rgya'i dkyil 'khor sku la ye nas rol// thams cad ma lus rdzogs pa'i klong chen 'di// lta ba'i yul med bya bral mya ngan 'das// nam mkha' la ni sa chu me rlung rdzogs// yang shes snying po 'di la chos rnams ma lus rdzogs// sku dang yeng shes yon ta na shar ba rnams// nyid las byung ba'i gzugs brnyan yin pas de// blo la gang snang snying po'i gol sar gsungs// bla med mchog la rang rig de bzhin pa// mi bsam mi g.yengs mi dmigs de bzhin nyid// dam par mi gzung de bzhin de bzhin gzhag/ brjod pasam rtog pa yin pas bsam mi khyab// grub
- 271b
mtha' mi spyod de bzhin de bzhin nyid// mtha' med yang dag mtha' ste mtha' las 'das// yul du mi lta de bzhin de bzhin gzhag/ gzhag pa'i sems kyang mi gtang btang snyoms gzhag/ phyag rgyar stong zhing sgom pa bsgom pa yin// mi gnas gnas pa'i yul med phyag rgya mchog/ yul med ji bzhin ngang la brtson par gnas// blun pa'i tshul du ci yang bsam pa med// kun tu bzang po'i snying po dkyil 'khor nyid// thams cad ma lus sbyor ba'i thig le che// rgyal po'i tshul du che ba'i ngang la gnas/ gzhan gyi 'khor ldan kun rdzogs 'du 'bral med// rgya mtsho'i tshul du sdud 'byung gting dpag dka'// mya ngan 'das 'khor lhun rdzogs ngang gis 'byung // dpe med dpag tu med de shin tu zab// rdo rje tshul du mi 'jig 'du 'bral med// ye shes dkyil 'khor kun dang de bzhin gnas// bskal pa'i me yi tshul du gcig pur gnas// snang srid ye rgyas btab nas gcig pur bzhugs// lhun rdzogs thabs mkhas 'khor ba'i lto ba can// khyung dang seng ge'i bu dang rgyal po'i bu// mngal gnas gnyen po'i tshul du gzhan zil gnon// gnyen por ma bsgrubs ye nyid gnyen po ltar// mi gnas gnas med dmigs pa med pa'i lam// rgyu 'bras mi 'byed mnyam pa'i snying
- 272a
bo nyid/ 'khor ba mya ngan 'das pa'i snying po yin// gnyen por ma bsgrubs ye nas gnyen po ltar// 'phur skyes bya ni slong chag mkha' la 'phya/ lung la mi ltos yi ga mtshon med pa'i// nye lom bde rdzogs bya lam lhan grub nyid// 'jug sgo lam la mi ltos ya rgyas yin// khyung chen gshog rgyas mkha' la mi chags ltar/ theg pa kun rgyas bla med yangs pa'i sa// ye rgyas sa la mi chags bde ba lhun gyis rdzogs// khyung phrug sgo nga'i nang nas lus rgyas ltar// skye med de bzhin nyid kyi rang bzhin nyid// de bzhin thig le klong nas de bzhin rgyas// bya byed med pa'i chos 'di ma mthong nas// kun tu 'od sa bskal par mthong mi srid// byang chub kyi sems khyung chen gyi rgyud las/ sgom pa'i thabs rang bzhin dang / mtshan nyid dang / mtshan nyid bstan pa'i le'u ste gsum pa'o// // de nas bcom ldan 'das dpal kun tu bzang po nyid kyis nyid la brjod pa/ khyung chen nam mkhar mi gnas sa la mi gnas ltar// kun 'dus kun slong kun gyi yid bzhin no// mi dmigs mi skye ma 'gags snang ba med// 'dod yon nyon mongs spangs pas byang mi chub// sangs rgyas tshol bar mi byed de bzhin nyid// thams cad lhun gyis
- 272b
grub pas bya med bral// sa bcu mthar phyin pa nyid 'dzin dang de rtogs pas// de la'ang mi gnas gnas pa'i sa dang bral// lam med lam du 'dod pas 'gro ba 'khrul// 'bras bu thob re 'jog pas don mi mthong // yang dag mtha' la bsnyegs pas lung dang bral// de bzhin dbyings su 'dod pa'i bde mi rnyed// 'dod yon nyon mongs spangs/ pas byang mi chub// 'khor ba rgyab phyogs mya ngan yongs mi 'da'// sa dang pha rol phyin lam zad mtha' med// snang srid phyag rgyar bsgoms pas sangs mi rgya// byang chub sems lung yang dag dam pa'i lung // lung gi rgyal po gtan la ma phab na// tshig 'chal mu cor smra bas don mi rnyed// gang la'ang mi gnas mi gnas nyid kyang 'das// smig rgyu chu ru bsnyegs pas chu mi rnyed// bden pa gnyis 'dzin yi ges don mi rnyed// 'phur skyes bya 'am rgyal po'i phrug gu ltar// gzhan gyis mi rnyed ye nas de bzhin pas// tshad mas mi gzhig lung gi tshad ma yin// 'khrul pa'i tshad gsum rtog pa'i tshig la phab// byis pas bslus pa'i chos la de yod pas// bla med lam 'di mi dgos tshad med lung // shes rab chung ba 'di la dpog cing lam bgrod byed// 'di 'dod pa la 'di mi gnas te rtog pa'i lung // yang dag
- 273a
mi srid byang chub gting nas med// kun khyab ye sangs rgyas de sgo phugs med// tshig gi phebs par mi 'gyur 'bras thob min// khyung chen lus che 'dab ga shog rdzogs pa de// gzhan nas ma btsa la ye nas rdzogs pa ltar// rdo rje skye 'jig med pa de kho na// 'jug lta bsrung 'dzin phyi ma sogs rdzogs shing / phyag rgya'i dkyil 'khor sku rnams rdzogs pa yang // rang bzhin nyid kyis ye nas rdzogs pa las// btsal nas bsdus te rdzogs pa ma yin pa// lhun rdzogs tha snyad med pa'i byang chub ste// gzugs su ji ltar snang yang rang bzhin rdzogs// kun rdzogs snying po 'di ni nor bu'i tshul// 'di ma mthong ba rgya mtsho gang+gA yi// 'gram na 'dug pa'i bskams re rare shi bzhin no// rnam par mi rtog ye shes snying po 'di// theg pa yongs kyi chos la ma sbas shing // sangs rgyas gsung gi rgyud las sbas pa med// bgrod rtsol lam la sbyangs pas rnyed mi 'gyur// mi len mi spyod byang chub spyod rnams la// rnam pa kun tu rang bzhin ji bzhin gnas// mi rtog ye shes dbyings las 'das pa na// kun mnyam dbyer med rang bzhin snying po la// sku dang ye shes ting 'dzin brtag mi bya// dmigs pa'i gza' gtad zhi ba'i
- 273b
byang chub la// yang shes rol pas chos nyid bsgom mi bya// ting 'dzin ro la chags med thig ler dag/ gar thabs rol mo sna tshogs bsgyur ba yang // lus la ma bkod gzhan gyi yid sdud ltar// thabs kyi rgyal po lung gi snying po 'di// ngo bo nyid las ma g.yos kun gyi 'bras// bsgrubs pas grub pa'i 'bras bu kun yid tshi ma// byang chub kyi sems khyung chen gyi rgyud las/ ngo bo bstan pa dang / tshad mas gzhig tu mi rung bar bstan pa dang / lhun gyis rdzogs par bstan pa dang / brtag tu med par bstan pa dang / kun gyi 'bras bu bstan pa'i le'u ste bzhi pa'o// // de nas bcom ldan 'das dpal kun tu bzang pos/ nyid dang dbyer med pa'i 'khor rnams rmad du byung ba la nyid kyis brjod pa/ sgrib pa gnod dang chos spong las kyi phra rag/ rten cing 'brel bar 'byung ba 'di yi gting mi rnyed// mtshan nyid gsum gyi chos tshogs dag par 'gyur// bdag med rnam pa gnyis kyi tshig gnyis ye nas zhi// snying rje'i rgyun can sems can ma mthong sems can med// thams cad mnyam nyid rdo rje sems dpa' nyid kyi sku// gnyis med de bzhin nyid du gcig pa'i chos nyid yin// gdol pa can gyi chos min gnyen pos bcos su med// ting 'dzin bstan
- 274a
pas gzung yul bsgom yul bral// shes rab gsum gyis 'di la sbyang du ga la yod// thams cad mnyam pa'i dkyil 'khor kun gyi rang bzhin la/ rang byung yeng shes de la 'phyo ba yin pa ni// so so ma yin gcig gi ngang ste rgyu 'bras rnam par dag/ thugs rje'i zhing du byang chub rlabs chen nyid 'gyur bas// thams cad byang chub chen po'i mchog tu ma gyur med// sdom rtsol 'dul dang dam tshig bsam yas pa// mi shes byis pas bslad pas 'khrul pa yin pa'i phyir// ci yang mi dgos bsrung ba ci dgos bsgom mi dgos// 'di la dpyad pa mi dgos 'di la gzhan mi dgos// stong nyid bdag med ye mkhyen rang rig thugs nyid de// thams cad nad gso mdzad pa'i sman pa'i rgyal po yin// mtho ris bgrod pa'i rgyu des byang chub lam mi rnyed// dug gsum dug lnga ye nas dag pa'i sman chen po// ji bzhin rang bzhin gnas pas sman chen ma byas na// 'khrul rtog lam la gnas pa'i theg dman rnams// dug gsum dug lnga'i nad kyis 'tsho ba'i glags yod med// ye nas sa rdzogs lam gyi 'gro sa ye nas dag/ gdod nas thob zin thob par bya ba ci yang med// tshig gis mi phebs dbyibs dang kha dog spyod yul min// bstan cing brtag par
- 274b
dka' la brjod du rdul tsam med// mi dmigs mi gnas bsam pa kun dang bral ba yin// 'di zhes bstan pa'i lam la gcig dang du ma med// bdag gzhan bral ba'i ston mkhan rin chen mdzod// gcig pu lhun gyis grub pa'i dbang phyug rdo rje nyid// dkyil 'khor kun gyi bdag nyid dbang phyug gtso bo 'di// rlabs chen khams gsum 'gul ba kun bsad kyang // rang byung mkha' klong dag pa'i dbyings su rnam par dag/ srog med srog gcad dbyings kyi nam mkhar gcig pas na// nam mkha' dbye la dbyibs nyid rol pa mdzad// khams gsum kun bsad mi bskyod zhing du dag pa yin// srog dang sdig tu mthong ba'i chos lam gang spyod pa// chos lam de yis byung chub bskal pa'i mthar yang ni// rnyed par mi 'gyur bya rjes tshol ba 'dra ba yin// byang chub kyi sems khyung chen gyi rgyud las/ ci'ang thob par byar med pa'i le'u ste/ lnga pa'o// de nas yang bcom ldan 'das dpal rdo rje sems dpa' la sogs pas/ bcom ldan 'das kun tu bzang po nyid la spyan gzigs te cang mi smra bar bzhugs pas/ bcom ldan 'das dpal kun tu bzang po nyid kyis nyid la brjod pa/ sku yi dkyil 'khor dkyil 'khor mchog tu gyur//
- 275a
de bzhin nyid du 'dus sam ngo bo nyid// mchod bstod spyan drangs phyag rgya bzlas pa dang // phyag rgya'i skur ni 'di la bsgom mi dgos// sgyu 'dra'i gzugs brnyan 'di las 'byung bas na// lo ma mi bsnyen shel las 'bras thob min// rgyu 'dra'i phyag rgya lugs ma'i phyag rgya las// 'bras bu rnam par grol mi gnas mi gnas// de yi rnam grol dag pa'i lam chen rnyed 'gyur na// mthong thos la sogs phyag rgya'i ngo bor gnas// chags yod phyir na gnas pa yod pa min// lhun/ grub sangs rgyas kun dang rgyas btab pas// thams cad ma lus kun tu bzang po'i dang // ye shes snying po'i phyag rgya thams cad bzung // blang dor med pa'i skyes mchog bla med sa// 'di 'dra'i don nyid byis pas mi shes phyir// cir yang mi dmigs gti mug dang nyid 'di// 'khrul pa'i chos lam dag lo yangs mi gnas// zangs la gser rtsis gser du 'gyur rung zhing // zangs rtsis gser du 'gyur du yod pa min// 'di yis rtsi yis gzhan gyi 'bras rung gis// gzhan gyi don gyis 'di yi don mi rung // 'di ni gang dag bskrun du yod pa ma yin pas// byang chub bde chen rgyal ba'i yum zhes bya// rin chen sgrom bu mtheb rgyas btab pa bzhin// rang
- 275b
bzhin gnas pa 'di ni bstan pa dka'// srid gsum dbang sgyur de bzhin nyid du gnas// 'du byed lhag par gnas pa'i dbang yang rdzogs// dka' thub mi dgos snying por de ma thag pa nyid// sdug bsngal des ni sangs rgyas lam mi rnyed// sdom sogs la sogs rtsol bas byang chub ring // gang yang ma yin rang rig de kho yi// dka' thub spyod ba yis ni don 'tshol ba// glang po zhon nas glang rjes 'tshol ba 'dra'o// nang nas mi btsal nang gi rang bzhin nyid// phyi nas mi btsal phyi yi rang bzhin nyid// gnyis kar mi gnas gnas med gnas la gnas// gnas mchog rgyal ba'i dkyil 'khor de nyid ni// byang chub snying po'i ri bor thams cad gcig/ gang du'ang ma song gar yang mi 'gro zhing / yul la mi gnas phyogs nas ma yin te// 'di ltar bstan du med pa'i rang rig de// byang chub snying po nyid na de bzhin nyid// gang la ma song rang la rab tu gnas// bya bral nam mkha' ji bzhin lhun gnas pas// kha dog dbyibs kyi mtshon du ga la yod// yi ge'i rgyud med bsgom du med pa yin// byang chub kyi sems khyung chen gyi rgyud las/ byang chub kyi sems kyi btsal thabs kyi le'u ste drug pa'o// // de nas bcom ldan 'das dpal kun tu bzang pos nyid kyi nyid la brjod pa/
- 276a
bzhi bcu rtsa gnyis 'od 'bar dngos 'byung bas// thams cad kun g.yos stong gsum la sogs grags// 'byung ba lnga brtsegs thams cad kun tu g.yo/ gsum shar gsum gyis sna tshogs ma lus bsdus// dkyil 'khor 'od 'bar gsum du bsam yas te// yi ge'i 'khor los dkyil 'khor phyag rgyar bstan// sna tshogs 'od gsal mchog tu rmad grub pa// byed pa ston pa bor dmigs de la 'dud// me la yod par btags pas rtog pa'i rgyun// bskal par byang chub thob dka' 'khrul pa'i lam// byis pa'i lam bzhis 'bras bur gyur pa dka'// mtshan ma'i rgyu la chags pas yang dag don// rnyed pa'i yul med chags phyir chags la gnas// snang med byang chub sems kyi thig le 'di// cis kyang gzhig tu med pa'i rdo rje'i sku// 'khor lo rab bskor thig le gcig tu zlum// gang yang mi 'byed mnyam pa chen po'i ngang // mnyam nyid snying po rtogs pa las 'das pas// sku gsung thugs kyi snying po rtogs mi byed// rang bzhin 'od gsal yi ge rnam par zhi// dbyings la dbyings kyi 'od rnam gsal ba bas// yi ge'i ming tshig las 'das yi ge mchog/ stong gsum rgya chad stong nyid rnam par dag/ gang la'ang mi gnas stong gsum rgya chad nyid// gzhan
- 276b
nas thob med snying po de bzhin nyid// de ltar de ltar gnas pa grol ba'i lam// ye sangs rgyas pas sangs rgyas bsgrub mi dgos// gdod nas byas zin btsal ba'i las mi dgos// lhun rdzogs bde ba nyid la ye bzhugs pas// 'bras bu'i sa thob mi ltos rang bzhin sa// mnyam nyid snying po ngang gi ji bzhin la// bskyed pa'i phyag rgya mi dgos bskyed mi dgos// mi gsungs mnyam par gsang sngags bzlas pa'i gsung // ma chags pa la shin tu chags pa dang // chags pa nyid na de la chags med pa/ tade ni chags pa rgyal po chen po ste// shin tu chags pa chen po yin par grags// ci la'ang mi gnas bsam pa las 'das pas// ting 'dzin bde ba'i ro la chags pa min// gzhi rtsa med pa'i byang chub sems nyid ni// chos rnams ma lus kun gyi rtsa ba yin// kha dog dbyibs med mtshan med rigs brgyud med// yod med mtha' 'das dbu ma yod ma yin// pho mo ma yin ma ni nga nyid kyang min// gang yang ma yin gang gi mthar mi gnas// mthar yang mi gnas yang dag mtha' las 'das/ khyung chen mkha' lding bya lam rjes med 'dra// khyung chen gshog rgyas mkha' la mi chags tshul// bsod nams rdzogs pa'i thig ler rgyu 'bras med// rang
- 277a
bzhin lhun grub dkyil 'khor 'od gsal bas// rigs kyi phyag rgya gsal bar bsgom mi dgos// mchog gsum chos sku'i dkyil 'khor bdag yin pas// sangs rgyas sras tshogs bcas la phyag mi 'tshal// shes rab 'bar ba'i hom khung bdag gi khar// khams gsum srid gsum ma lus kun bsregs pas/ 'phrin las rnam bzhis bsreg pa'i las mi dgos// skye med thig les 'khor ba kun bsad de// yeng shes snying pos thams cad kun sbyar nas// rgyu 'bras med pa'i ngang du ro gcig pas// gnyis med sbyar ba 'di la phyag mi dgos// phyogs bcu'i rgya chad stong khams ye nas dben// srid gsum ma lus ye nas dag pa'i zhing // ji bzhin btsan pa'i ye rgyas kun la btab// kun bza' brdal ba'i zhal bzang yangs pa yin// khams gsum snod bcud ma lus dus gcig gsol// 'khor ba ming med dpe med chen pos bsgral// sangs rgyas sems can byang chub chen por 'khyil// thams cad kun bsgral grol ba'i lam gnas pas// gnas sbyangs sbyor sgrol 'phrin las 'di la bya mi dgos// byang chub kyi sems khyung chen gyi rgyud las/ ma hA yo ga'i rtsol sgrub kyi las tshi chad de bya mi dgos par bstan
- 277b
pa'i le'u ste bdun pa'o// // de nas bcom ldan 'das dpal rdo rje sems dpas/ bcom ldan 'das dpal kun tu bzang po la/ e mtsho de bzhin gshegs pa'i gtso// the tsom thams cad gcod mdzad che ba'i mchog/ chos kyi chos nyid de bzhin nyid// bcom ldan 'das kyis bshad du gsol/ de nas bcom ldan 'das dpal kun tu bzang po nyid kyis/ nyid dang dbyer med pa'i ngo bo rdo rje 'dzin pa la bka' stsal pa/ gang yang shes par ma gyur ci yang shes med pa// rnam pa'i de bzhin ma yin de yi de ma yin// gzhan nas yod 'ongs ma yod de yi de bzhin nyid// ye shes mi gnas gnas pa'ang de nyid yul yang med/ rtag mtha' mi rtag mtha' gnyis 'jig pa'i lam// mtha' med mtha' la spyod pas dbus mi mthong // bsam gtan bsam gtan nyid la 'jug pa yang // 'byung 'jug lam sgo gzhan zad cig car 'jug/ dbang po rtul po ma rabs rim gyis 'jug/ dam pa cig car de bzhin nyid gnas pa// rim gyis gnas pa sgrib pa chen por gsungs// dug gi rigs shes pas ni dug mthong na// za bar mi byed de yis skrag par byed// khong du mi gtong lhan cig gnas mi byed//
- 278a
lta ngan la spyod zhi ba'i theg dman dang // sa bcu pha rol phyin bcu'i lam spyod pas// rgyu 'bras lhun grub mnyam nyid mchog gi lam// ye grol mnyam gnas sgro dang skur zhi ba'i// ye nas byar med 'di yi don mthong na// 'jug par mi nus 'di yis skrag gyur nas// chud par mi byed lhan cig 'grogs mi byed// 'di la lta ba bzang ste ye khyab kun la brdal// spyod pa bzang ste chus gdungs glang chen bzhin// ci la'ang mi spyod de bzhin bde bar gnas// phyi dang nang med ye shes yangs pa'i mkha'// dus gsum dus med gcig ste khyad par med// sngon med phyis med gdod nas dag pa yin// lta bas ltar med lta ba'i tshig las 'das// yid kyis 'jog med sgom pa chen po'i klung // gdod nas dag pa'i bdang rtsi de ltar gnas// rnam rtog 'khor ba bcad pa de yi las// rgyu 'bras ro gcig mnyam gnas mchog tu gsungs// gang na mi gnas byang chub sems la gnas// rgyu dang rkyen las ma byung skye shi med// rang bzhin 'od gsal bdud rtsi chen por gsungs// mchog gi dngos la mchog gyur gar gnas pa// rgyal mchog lhun gyis grub pa'i dngos grub pas// lha klu mthu chen rnams kyis dbrog tu med// 'jig
- 278b
rten 'das dang 'jig rten 'di nyid kyis// bsgom pa thams cad 'di las 'byung bar 'gyur// 'jig rten dngos grub la sogs ci rung rung // dngos po gzhan las bdud rtsi med par grags// ston pa thabs la mkhas pas bshad pas kyang // dngos grub 'di ni ster bar ston mi spyod// sangs rgyas nyid la'ang 'di ni mnga' ba med// de phyir sangs rgyas nyid kyis kyang ni ster mi spyod// bsam gtan brjod med mchog gi bdud rtsi 'di// phal gyis mi thob ris su chad med de// rnam pa can la shin tu// gsang bar 'gyur// lta ba mi dgos lta ba mchog tu grags// ci spyad mi rtog skye ba 'di yi don// nyam nga'i rkyen gyis mi sgrib chen po 'di// su yis rtogs pa dngos grub 'di yi lam// gtsang sme'i blo rtog bor bas don la snyeg/ ma sring kun sbyar mtshams med lnga spyod cing // cha shas phra ba'ang ma rigs mnyan pos ni// shin tu bsad pa 'di yi dam tshig mchog/ chu srin rdzas 'dzin tshul gyis mi gtong na// khyad par gyur pa'i bdud rtsi mchog nyid 'grub// byas zin bde ba lhun gyis grub pa yi// nye lam bde rdzogs lhun gyis grub pa'i sa// blo 'chal 'di lta'i don la mi spyod pa// mching bu byi dor byas kyang rin chen min// sol ba bsgrags par
- 279a
byas kyang tsan dan min// seng ge'i skad kyis gzhan zil gnon pa dang // nam mkha'i khams nas thams cad 'byung ba bzhin// ma mnan ma byung ngang gis rang bzhin 'byung // byang chub kyi sems khyung chen gyi rgyud las/ theg pa chen po la 'jug pa'i thabs dang / zhugs pa skyon med pa dang / bdud rtsi bstan pa'i le'u ste brgyad pa'o// // de nas bcom ldan 'das dpal kun tu bzang po nyid kyis nyid la brjod pa/ skye bo rmongs pa'i nyon mongs de nyid ni// sems kyi tshul khrims min par nga smra zhing // chos rnams kyi ni chos nyid kyang ni de nyid min// gzhan na med de de nyid de lta'i ngang // sems can sangs rgyas gnyis kyi ngo bo nyid// gcig min tha dad min te brtag par dka'// nyon mongs lnga nyid byang chub chen po'i lam// gzhan gyis ma bslad de nyid de ltar min// shes rab thabs med shes rab thabs bsam yas// ci yang ma yin thams cad kun gyi sku// ngo mtshar rmad byung e ma khyad par can// nyid la nyid kyis yang dag don bshad pa// sems can don du ma gsungs sangs rgyas cir bstan to// e ma'o sangs rgyas dam pa nyid la rol pas kyang // ngo mtshar rmad kyi chos 'di gtang mi
- 279b
dgos// rtag pa chen po rtag par rol pa che// 'di la gnas pa'i skal ldan legs pa che// 'di la spyod pa'i skal ldan legs pa bzang // 'di la lta ba'i skal ldan lta ba bzang // 'di la gnas pa'i skal ldan 'dug sa bzang // lam 'dir 'gro ba rnams kyis sa rnams rdzogs// pha rol phyin bcu sa bcu ye nas dag/ 'dug sar 'dug pas sangs rgyas sa la gnas// gang du'ang ma phyin de bzhin nyid kyi ngang // nye lam 'di las bde ba'i nye lam med// gang yang ma bsgrubs 'bras bu'i ngo bo nyid// rab mdzes ngo mtshar che ba'i gsang chen 'di// bdag nyid chen po skal ldan nyag gcig las// sus kyang 'di nyid rig par dka' ba'i phyir// nyid la nyid kyis bstan pa ngo mtshar che// rgyud kyi rgyal po chen po rgyas pa'i sgo// byang chub kyi sems khyung chen gyi rgyud las/ chos nyid kyi don brtag par dka' ba dang nyid dam pa'i le'u ste dgu pa'o// // de nas yang bcom ldan 'das chen pos rgyud kyi don bshad pas mnyes par gyur to// mnyes nas rgyud kyi bdag po la bstod pa/ dpal gyi sku mnga' bcom ldan nyag gcig gtso// bzang po bla med chen po don mdzad pa// don chen khyad par 'phags pa rgyud kyi don//
- 280a
nyid kyis nyid la bshad byas reg mdzes mchog/ yang dag nyid kyis yang dag nyid gsungs pa// yang dag nyid la snang ba mchog gi don// rgyal ba snum mdzad khyod la phyag kyang 'tshal// dpa' bo thar lam ston mdzad khyod nyid la// yang nas yang du bdud cing phyag kyang 'tshal// e ma'o rab mdzes ngo mtshar che ba'i don// sangs rgyas kyis gsungs ma yin bdag nyid chos// rgyu 'bras gnyis zad rnam grol dag pa'i sku// zla rgyas sku 'dra'i sku la bstod par bgyid// dam chos bdag med rnam par dag pa'i chos// dpal gyi thugs las gsung du grags pa yin// dri med gsung mchog khyod la phyag kyang 'tshal// 'di 'chang klog dang kha ton rab sems pa'i// rgyal sras 'khor bcas gang yang 'di 'dzin pa'i// skal ldan nyag gcig de la bzhin phyag 'tshal// de rjes lta zhing de bzhi gang 'chang ba'i// ma rabs tha mal pa la sangs rgyas su// lta zhing lta zhing de bzhin bzhin phyag 'tshal// 'di la gang mos khra dang khyi la sogs// de yang sangs rgyas nyid de kun las 'phags// 'phags rgyas khyod rnams la'ang de bzhin bzhin phyag 'tshal// mchog gsum mchog tu gyur pa'i rgyal po la// khyad
- 280b
par bstod pa rab mdzes don dang ldan// de nas rgyud kyi bdag pos gtad pa/ chos 'phags chos rgyal bla med snying po 'di// yongs la khyab par mdzes pas na// thugs rje'i gzer khyod dam pa rnams kyi don// yang dag bden pa de la ye nas gnas// sangs rgyas sa la rtag par bzhugs pa yi// lhun grub mchog la 'di yis gzhag par bya'o// byang chub sems kyi ga'u klong chen du// sangs rgyas sems can ma lus bsres te shog/ byang chub kyi sems khyung chen gyi rgyud las/ bdag po la bstod pa dang / chos la bstod pa dang / de 'dzin pa la mchog gsum gyi tshul du bstod pa dang / rgyud gtad pa'i le'u ste bcu pa'o// / ta rgyas pa chen po sha bu rgyas pa'i sgo bkag ste/ rgyas pa bag yangs bde bar gzhag pa'i khyung chen gyi rgyud rgyas pa chen po'i mtha' rdzogs so// // rgya gar gyi mkhan po shrI sid+ha dang / bod kyi lo tsa ba bai ro tsa nas bsgyur ba'o// // rgya gar skad du/ bo d+hi tsit+ta sa mA d+hi/ bod skad du/ byang chub sems bsgom pa/ bcom ldan 'das dbyings gsum rnam par dag pa'i ngangal