F321MW1KG13607_0321mdo sdeAll versions of this work

'phags pa don dam pa'i chos kyi rnam par rgyal ba zhes bya ba theg pa chen po'i mdo

Āryaparamārthādharmabijayanāmamahāyanasūtra

Text

ff. 206a–218b · 26 folio sides

  1. 206a

    @##/ rgya gar skad du/ ar+ya pa ra mAr+tha d+harma bi dza ya na ma ma ha ya na su tra/ bod skad du/ 'phags pa don dam pa'i chos kyi rnam par rgyal ba zhes bya ba theg pa chen po'i mdo// bam po gcig go// sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das mngon par rdzogs par sangs rgyas nas/ ring po ma lon nas/ g.ya'i ri la dge slong mngon par zhugs pa rnams dang / byang chub sems dpa' bye ba phrag dgu bcu rtsa dgu dang / thabs gcig tu bzhugs te/ lha bye ba phrag nyi shu rtsa brgyad dang / dge slong dang / dge slong ma dang / dge bsnyen dang / dge bsnyen ma rgyad khri drung stong dang / rgya drug khri dang / gcer bu ba bye ba phrag bcu gnyis dang / drang srong chen po mngon par shes pa lnga dang ldan pa/ gdung ba lngas yan lag tshig pa lnga brgya/ yan lag dgur ba sha med cing / rus mgo pags kyi g.yogs pa/ lto zhar zhing skra'i khu khyer ba lus dgur ba/ gzhi dang shing shun gyon pa/ lag na ril ba thogs pa/ brgyad khri bzhi stong dang yang thabs gcig go/ rgal bar 'dun pa rnams dang yang thabs gcig go// de nas bcom ldan 'das ri nag po rnams kyi nang na/ ri'i rgyal po ri rab ltar/ drang srong rnams kyi nang na lam me/ lha me lhang nge ste/ lus rnams/

  2. 206b

    kyi nang na/ glang po che'i rgyal po mche ba drug pa la/ srin bu me khyer gyi drung na nyi zla dang mtshungs shing / rtswa ka shi'i me tog gi nang na/ man dar ba'i yal ga dang 'dra la/ nam mkha' lding gi rgyal po bya rog gis bskor ba dang 'dra bar/ bcom ldan 'das drang srong rnams kyi nang na nyis gyur gyi mdzes so// de nas bcom ldan 'das rin po che btong ba zhes bya ba'i ting nge 'dzin la snyoms par bzhugs te/ rdzu 'phrul gyi cho 'phrul dpag tu med par mdzad cing / klo g.yas g.yon gnyis nas 'od zer phyung ste/ de bzhin gshegs pa bye ba dpag tu med pa byung / byang chub sems dpa' bye ba dpag tu med pa dang / rgya byin dang tshangs pa dang / 'jig rten skyong ba dpag tu med pa phyung / dgra bcom pa brgya stong dpag tu med pa phyung / dge slong dang / dge slong ma dang / dge snyen dang / dge snyen ma brgya stong dpag tu med pa phyung / 'khor los sgyur ba dang / stobs kyi 'khor los sgyur ba dang / khams kyi rgyal po dang / rigs sngags 'chang dpag tu med pa phyung / rgya dang ri brags pa dang / 'gro lding ba dang / lho phyogs pa dang / nags khrid pa dpag tu med pa phyung / rgyal rigs shing sa la chen po lta bu dang / bram ze dang / khyim bdag shing sa lnga chen po lta bu dang / mi gzugs dang cha byad dang / mdog dang / smra ba'i skad sna tshogs pa ji snyed pa dang / lha'i rigs ji snyed pa de dag thams cad de bzhin gshegs

  3. 207a

    pa'i sku las phyung ngo // de nas 'khor chen po de the tshom du gyur nas/ phan tshun gdong du lta'o// byang chub sems dpa' rnams rab tu dga' ste/ rin po che'i char 'bebs pa nas/ rgyan thams cad kyis bar gyi char 'bebs so// de nas bcom ldan 'das rin po che btong ba'i ting nge 'dzin las bzhed ste/ seng ge sgrings pas phyogs bcur rnam par gzigs so// bcom ldan 'das kyis phyogs bcur rnam par gzigs ma thag tu de nas phyogs bcu'i sangs rgyas kyi zhing dag nas sangs rgyas bcom ldan 'das ji snyed spyan la/ snang ba de dag thams cad lag 'thil tu bzhag pa bzhin du mi mjed kyi 'jig rten gyi khams su kun tu snang ngo // de bzhin gshegs pa thams cad kyis kyang / bcom ldan 'das shAkya thub pas/ ji ltar phyung ba de 'dra ba'i rdzu 'phrul gyi cho 'phrul phyung ste/ de bzhin gshegs pa rnams kyis sprul pa byung ba ji snyed pa de dag thams cad kyang bcom ldan 'das ga la ba de logs su dong ste phyin nas/ bcom ldan 'das kyi 'khor gyi nang du 'dus par gyur to// byang chub sems dpa' dpag tu med pa dag kyang / dge slong dang dge slong ma dang / dge sten dang dge snyen ma gang ga'i bye ma snyed dag dang / lhan gcig tu de bzhin gshegs pa la mchod pa chen po dpe med pa thogs ste 'dir lhags te de bzhin du/ lha dang / klu dang / gnod sbyin dang / dri za dang / lnga

  4. 207b

    ma yin dang / nam mkha' lding dang / mi 'am ci dang / lto 'phye chen po dang / mi dang mi ma yin pa du ma de dag dang / bcom ldan 'das kyis rdzu 'phrul gyi cho 'phrul de mthong nas/ bcom ldan 'das ga la ba der dong ngo / de nas gang dag phyogs bcu nas lhags pa'i byang chub sems dpa' de dag gi mchod pa bla na med pas/ bcom ldan 'das la snyen bkur byas ste/ pha rol tu phyin pa drug gis yongs su bsgrubs pa'i stan dag la 'khod do// mi dang mi ma yin pa'i bar du yang ci rigs pa'i stan dag la 'khod do// gang dag bcom ldan 'das kyis sprul pa phyung ba de dag kyang mnar med pa yan bcad 'og min gyi gnas man cad du mngon par byung ste/ yang skar log go// phyogs bcu'i sangs rgyas rnams kyi sprul pa phyung ba/ ji snyed pa de dag thams cad ni bcom ldan 'das shAkya thub pa'i spu'i khung pu thams cad du nub po// gang dag bcom ldan 'das kyi sprul pa phyung ba de dag ni/ sangs rgyas thams cad kyi sku rnams su nub po// de nas byang chub sems dpa' sems dpa' chen po rgyal ba'i phung po zhes bya stan las langs ste/ bla gos phrag pa gcig du bzar nas/ pus mo g.yas pa'i lha nga sa la btsugs te// bcom ldan 'das ga la ba de logs su thal mo sbyar ba btud nas/ bcom ldan 'das la tshigs su gcad pa 'di dag gi mngon par bstod do// kye ma mi rnams kyis ni 'dren

  5. 208a

    pa yis/ sngon chad ma byung mdzad pa sna tshogs 'di// skye dgu kun la myur du kun stan pa/ de yis bdud sde thams cad mog mog bgyis// phan tshun dag tu tshig tu smra bgyid pa// kye ma'o shin tu ngo mtshar che zhes mchi// bdag cag zhig phyir ni 'dir lhags ke/ bdag cag bcom mo bdag bcag bcom zhes mchi// dka' thub can bdag dka' thub can min gyur// nyam chung lus la lpags pa tsam zhig las// bdag 'khogs bdag skams bde ba rnams las nyams// bdag cag rdzu 'phrul thob par gyur ma yin// yi ge ma mchis rdzu 'phrul gsum rnams kyi// bstan pa'i dgra rnams mog mog gyur par mdzad// bstan pa'i 'dren pa khyod kyis de ring ni// sangs rgyas sras la dus ston chen po mdzad// 'khor 'di thams cad the tsom 'chal bar 'gyur/ dga' ba skyes shing sems kyang rab dga' ste// gang zhig gnas nas lha tshogs bdag cag kyang // 'jig rten mgon po sangs rgyas gyur cig mchi// 'jam dbyangs sangs rgyas mang po gnyen bkur bgyis// sangs rgyas sras po mtha' yas rnams kyis bskor// 'jam pa'i dbyangs ni 'khor gyi nang na mchis// cho 'phrul rnam par phye ste bstan du gsol// 'di dag chos ni gang gi ltas shig lags// thub pa chos ni gang zhig gsungs par bzhed// 'khor 'di thams cad 'khod cing /

  6. 208b

    mchis lags na// sems can thugs rtse'i slad du bdag la gsungs/ sangs rgyas kyi byin gyis rlabs kyis 'khor de'i nang nas// drang srong chen po me smon zhes bya ba gcig gis byang chub sems dpa' rgyal ba'i phung po la 'di skad ces smras so// kye gzhon nu re shig kha rog shig/ kho bos dri ba dri bar bya'o// gal te kho bo'i dri ba khong du chud par byed na ni// de thams cad mkhyen pa zhes bya ba'i ming de dang mthun no// 'on te sred med kyi bu dang dbang phyug chen pos phyung ba'i 'gro lding ba rnams kyis sprul pa byed du zad na ni/ 'dir ngo mtshar yang mi che ste/ skye bu ngan pa dang / sgyu ma mkhan rnams kyis 'di grub po// de nas bcom ldan 'das kyis/ 'dzum pa'i zhal gyis drang srong gi tshogs la kun tu gzigs nas/ drang tshong chen po me sgron la 'di skad ces bkal stsal to// tshe dang ldan pa drang srong chen po ci nus kyis dris shig dang / rnam par sbyang bar bya'o// de nas bcom ldan 'das la drang srong chen po me sgron gyis 'di skad ces gsol kye go'u ta ma sems can gyi skye ba gang nas byung / ci'i slad du skal pas bsreg par 'gyur/ sems can rnams gnas gang du 'du bar 'gyur/ nang na sems can phra ba khru gang tsam 'am/ mtho gang tsam 'am/ 'dzub mo tsam 'am/ mthe bo tsam 'am/ nas dang gro dang / mon sran gre'u dang / til dang /

  7. 209a

    yungs 'bru tsam 'am/ sems can ji tsam zhig nang na mchis bstsol cig/ des pa nas bcom ldan 'das kyis drang srong chen po me sgron la drang srong chen po legs so legs so zhes bya ba byin no// drang srong chen po che skal pa drug bcu pa'i dri ba 'di ni mthun pa'o// drang srong chen po rnams ngo mtshar tu gyur te/ drang srong chen po me sgron gyi tshe'i tshad ni ma brjod par bdag cag lhan cig gnas pa rnams kyis kyang ma shes na/ 'dis ji ltar shes snyam mo// bcom ldan 'das kyis bka' stsal pa/ drang srong chen po de'i phyir legs par rab tu nyon la yid la zung shig dang / bshad do// drang srong chen po gang la la sems can gyis skye ba gang nas byung zhes smras pa de ni yi ge brjod pa ma yin pa'o// sems can zhes bya ba 'di ni ma rig pa'i rkyen nas/ skye ba dang rga shi'i bar du 'byung ba'o// drang srong chen po yang rgyu rkyen las sems can skye ste rgyu rkyen ni pha ma'o// drang srong chen po yang pha ma 'grogs pa ni de'i rgyu'o// gang gi tshe yongs su rtogs pas kun nas bslang ba'i las kyi rlung rnams kyis bud med kyi grong du 'jug pa de ni de'i rkyen to// drang srong chen po yang sdug bsngal 'phags pa'i bden pa dang / sdug bsngal kun 'byung dang / sdug bsngal 'gog pa dang / sdug bsngal 'gog par 'gro ba'i lam 'phags pa'i bden pa ni sems can no// nye bar len pa'i phung po

  8. 209b

    lnga dang khams bcwo brgyad ni sems can no// drang srong chen po sems can yang gzhan la khams kyang gzhan ma yin/ las kyang gzhan la sems can yang gzhan ma yin no// drang srong chen po sems can ni 'grib pa ma yin/ 'phel ba ma yin no// drang srong chen pos gsol pa/ kye go'u ta ma gal te/ sems can la 'grib pa ma mchis 'phel ba ma mchis na/ ci'i slad du sems can khyi'i skye gnas nas/ shi 'phos te dbang sgyur du 'gyur/ bcom ldan 'das kyis bka' stsal pa/ drang srong chen po de ni ji skad smras pa de bzhin du ma yin no// gal te dbang sgyur dbang sgyur yin du zin na ni/ dbang med par 'chi ba mi rigs so// drang srong chen po gang lus kyi gtso bo ma yin pa de ji ltar dbang sgyur du 'gyur/ drang srong chen po 'di lta ste dper na/ srin bu me khyer 'di snyam du/ bdag gis 'dzam bu gling du snang bar bya'o snyam sems pa'i rkyen gyis/ srin bu me khyer gyis 'dzam bu'i gling kun du snang ba byed dam/ sems ma dul ba ni dbang sgyur yang dag po ma yin no// drang srong chen po yang gal/ te dbang sgyur nyon mongs pa 'bri bar gyur na ni/ khri la nyon mongs pa shas che bar 'gyur ro// gang gi tshe dbang sgyur dang nyon mongs pa dag khri la yang yod cing / dbang sgyur la yang yod pa de'i/ sems can la 'grib pa yang mi dmigs/ 'phel ba yang mi dmigs so// drang srong chen pos gsol pa// go'u ta mas nyon mongs pa 'grib par

  9. 210a

    par byas pa dang / nyes par byas pa'i las rnams kyi rnam par smin pa tha dad pa med par 'gyur ro// drang srong chen po yang 'di lta ste/ bskal pas bsreg pa 'di ni de bzhin gshegs pa rnams kyi thabs mkhas pa ste/ drang srong chen po sems can ji snyed bskal bas bsreg par 'gyur ba thos nas/ dad par 'gyur ba'i sems can de snyed/ de bzhin gshegs pas bsdu ba'i dngos pos sdud par 'gyur ro// drang srong chen po 'di lta ste dper na/ kha chu ldag pa'i sbrul ni mig gis kyang rngub rna ba dang sna dang kha'i sgo nas kyang rngub po// drang srong chen po de bzhin gshegs pa la yang de lta ste/ sbyin pas kyang bsdud/ snyan par smra bas kyang sdud/ don spyod pas kyang sdud/ don 'thun pas kyang sdud do// drang srong chen po 'di lta ste dper na/ gser la gnod pa byas pa'i phyir mer 'jug pa ma yin gyi/ gser dul ma yin pa 'di ji ltar na/ dul mar 'gyur snyam nas/ de'i phyir mer 'jug ste/ shin tu bsregs pa'i phyir rin po che'i 'os su 'gyur ro// rin po ches spras na/ de'i rin tang med par 'gyur te/ drang srong chen po de'i phyir gser bsrung ba dang / bsreg pas rnam par spong ngo // drang srong chen po de bzhin du/ sangs rgyas bcom ldan 'das rnams kyang / rgyu med par bsreg

  10. 210b

    pa'i skal pa mi 'byin te/ 'dir sems can gang la yang gnod par mi 'gyur ro// de nas bcom ldan 'das la drang srong chen po me sgron gyis 'di skad ces gsol to/ bskal pas bsreg pa'i me phyung yang sems can gang la yang gnod par mi 'gyur ba ni ngo mtshar to// bcom ldan 'das kyis bka' stsal pa/ drang srong chen po de bzhin gshegs rnams ni sems can gang la yang gnod pa mi mdzad do// drang srong chen po 'di lta ste dper na/ phyogs bcu rnams su char phra mo'i rgyun 'bab pa de bas ni drang srong chen po de bzhin gshegs pa dang / sa bcu la gnas pa'i byang chub sems dpa' rnams nye bar gnas te/ rang gi lag gis sems can thar bar byed pa ches mang ngo // drang srong chen po de'i tshe sems can de dag gis de bzhin gshegs pa dang / byang chub sems dpa' de dag gi gzugs kyang mthong / kha dog mdzes pa yang mthong / bskal pas bsreg pa'i 'jigs pa las/ bdag nyid bsgol bar yang mthong nas dga' ba dang / mchog tu dga' ba skye ste/ 'di skad ces bdag cag kyang 'di ltar sgrol ba por gyur cig/ bdag cag kyang 'di ltar gzugs mdzes par gyur cig/ bdag cag kyang 'di ltar kha dog mdzes par gyur ces 'dzer to// kha cig ni yid 'byung nas sems rnam par grol te/ rgyun tu zhugs pa'i 'bras bu mngon sum du byed/ kha cig ni lan cig phyir 'ong ba'i 'bras bu dang / phyir mi 'ong

  11. 211a

    ba'i 'bras bu mngon sum du byed/ kha cig ni dgra bcom pa nyid/ kha cig ni rang byang chub/ kha cig ni mi skye ba'i chos la bzod pa rab tu thob/ kha cig ni phyir mi ldog pa'i sa gnon/ kha cig ni rgyal chen bzhi'i rigs kyi lha rnams su skye/ kha cig ni sum bcu rtsa gsum du/ kha cig ni 'tshe mar/ kha cig ni dga' ldan du/ kha cig ni 'phrul dga'/ kha cig ni gzhan 'phrul dbang byed kyi lha rnams kyi nang du skye'o// drang srong chen po rnam grangs 'di lta bur/ 'og min gyi bar gyi lha rnams kyi nang du skye'o// de bzhin du 'khor lo sgyur ba rnams dang / stobs kyi 'khor lo sgyur ba rnams dang / khams kyi rgyal po rnams su 'gyur te/ drang srong chen po rgyal rigs dang / bram ze dang / khyim bdag rnams kyi bar du yang 'gyur ro// drang srong chen po rnam grangs 'di lta bus/ de bzhin gshegs pa'i gzugs kyi sku mthong zhing / bdag nyid kyang 'jig rten pa chen po las grol bar mthong nas/ de bzhin gshegs pa la byas pa gzo zhing byas pa shes par 'gyur ro// de bzhin gshegs pa las chos nyid thos nas/ bslab pa'i gnas rnams la bag byed par 'gyur ro// thabs 'dis ni ngan song du 'gro bar mi 'gyur ro// drang srong chen po yang sa bcu la gnas pa'i byang chub sems dpa' rnams kyi mig la/ sa'i khams ji snyed gnang bar 'gyur ba de bas ni sems can/

  12. 211b

    gyi khams gang 'khor ba la/ skyon chags par shes nas/ phung po ma lus pa'i mya ngan las 'das pa'i dbyings su yongs su mya ngan las 'da' bar byed ba ches mang ste/ drang srong chen po de'i phyir skal pas bsregs par 'gyur ro// de nas drang srong chen po me sgron gyis rang gi yid kyis rnam par dpyad nas tshig tu smras pa kye ma 'o gang bdag la drang srong chen po zhes 'bod pa/ shAkya'i sras po 'di'i che ba nyid ni rgya che'o// bdag gis 'di la bgam pas kyang cho ga ste// 'di ni thams cad mkhyen par mngon gyis bdag gis kyang 'di la yang dge pa'i ming gis bod par bya'o zhes smras so// de nas bcom ldan 'das la drang srong chen po mes sgron gyis 'di skad ces gsol to// yon tan gyi 'byung gnas su gyur cig mkhyen pa dpag tu ma mchis pas/ thams cad mkhyen pa zhes mtshan gsol ba sems can gnas gang du 'dra bar gyur pa/ bdag la bka' stsal cig/ bcom ldan 'das kyis bka' stsal pa/ drang srong chen po gnas med pa la/ sems can 'dra bar 'gyur ro// mnyam pa nyid la sems can 'du bar 'gyur ro// drang srong chen po theg pa gcig gis 'byung ba la sems can 'du bar 'gyur ro// byang chub kyi snying po la sems can 'du bar 'gyur ro// drang srong chen po phung po ma lus pa'i mya ngan las 'das pa'i dbyings su sems can 'du bar

  13. 212a

    'gyur ro// drang srong chen po 'di lta ste dper na/ chu klung tha dad pa dang / klung phran dang / klung chen po dag kyang rgya mtsho chen por bab nas ro gcig tu 'gyur ro// drang srong chen po de bzhin du sems can gyi khams ji snyed zag pa zad par byed pa/ de dag thams cad rnam par grol ba'i ngang du gyur pas 'du bar 'gyur ro// drang srong chen po 'khor bar 'du bas sems can 'du bar 'gyur ba ma yin pa'o zhes nga smra'o// drang srong chen po 'di lta ste dper na rlung gis bdas nas/ phye ma leb phyi byi zha la 'du bar 'gyur te/ rlung med na so sor 'gyes so// drang srong chen po de bzhin du sems can dmyal bar 'gro bar 'gyur bar phan tshun las 'brel ba'i sems can gyi khams de dag kyang der 'du bar 'gyur ro// drang srong chen po rnam grangs 'di lta bur/ phan tshun las kyi 'brel ba dag yi dgas su skye bar 'gyur/ dud 'gror skye bar 'gyur te/ der de dag 'du bar 'gyur ro// drang srong / chen po lha dang mi rnams su de dag 'du bar 'gyur ro// drang srong pos gsol pa/ thams cad zil gyis gnon pa/ thams cad mkhyen pa mir skyes pa 'dir sems can che ge mo zhes bgyi ba zhig dang 'dus par 'gyur ro// dud 'gror skyes pa 'di zhes bgyi ba nas yi dgas skyes pa 'di 'dus par 'gyuraro//

  14. 212b

    zhes bgyi ba'i bar du ji ltar 'tshal bas bgyi ba bka' stsol cig/ bcom ldan 'das kyis bka' stsal pa/ drang srong chen po sems can gang zhig sems can gang dang lhan cig du sems can dmyal bar skyes nas 'dus par gyur pa des/ de mthong na yid mi bde bar 'gyur ba de zhe sdang bar yang 'gyur/ des de mthong nas gal te na de glad pa na bar yang 'gyur/ bshang ba 'am gci ba 'byung bar yang 'gyur te/ drang srong chen po 'di ni sems can dmyal bar skyes pa rnams kyi 'dra ba'i mtshan nyid do// gang la la de ltar gyur pa des kyang / bdag dang 'di lhan gcig tu sems can dmyal ba rnams na/ gnas gnas par mngon no zhes de ltar khong du chud par bya'o// drang srong chen pos gsol pa/ rigs gsal bar mdzad pa thams cad mkhyen pa/ dud 'gro dang lhan gcig tu gnas gnas pa rnams kyi mtshan mar 'gyur ba ji lta bur lags/ bcom ldan 'das kyis bka' stsal pa/ mir skyes pa'i sems can rnams kyi gang gi tshe/ phan tshun mthong ba na/ mkhon du 'dud par 'dzin cing / 'di las bdag gis skyon ji ltar rnyed sbrum du/ skyon tshol ba 'di ni drang srong chen po dud 'gror skyes pa'i sems can rnams kyi 'du ba'i mtshan nyid de/ bdag dang lhan gcig tu/ dud 'gro'i gnas na gnas par mngon no zhes de ltar

  15. 213a

    shes par bya'o// drang srong chen po yi dgas su skyes pa rnams ni/ dri nga ba 'dod cing kha zas la shin tu sred par 'gyur ro// pha rol sbyin par bsam kyang chags pa skye bar 'gyur ro// gang rnyed de yi dgas su skye nas/ lhun gcig 'dus par gyur pa de'i dbang phyug mthong nas/ phra dog skye bar 'gyur/ gzhan gyi nor la 'dod par 'gyur te/ 'di dgas su skyes pa rnams kyi 'du ba'i mtshan nyid do// de la bdag dang 'di ldan gcig tu yi dgas kyi nang na gnas par mngon no// zhes de ltar shes par bya'o// drang srong chen po mer skyes pa gang la la zhig tshe rabs gzhan dag na 'dus par gyur pa na/ des de mthong na/ 'dod chags kyi seMs skye bar 'gyur te/ drang srong chen po 'di ni mir skyes pa'i sems can rnams kyi 'du ba'i mtshan nyid do/ de la bdag dang 'di mi rnams kyi nang na gnas gnas par mngon no zhes de ltar shes par bya'o// drang srong chen pos gsol pa/ bcom ldan 'das gang dag lhur skyes te/ 'dus par gyur pa las/ mir skyes pa de dag gi ji lta bu lags/ bcom ldan 'das kyis bka' stsal pa/ drang srong chen po gang dag lhar skyes te/ 'dus par gyur pa de dag ni/ phan tshun mthong na lta ba la 'jug par 'gyur te ni des na/ bdag dang 'dir lhar skyes te/ lhan/ cig 'dus par

  16. 213b

    gyur to zhes shes par bya'o// drang srong chen po rnam pa de lta bu dag tu sems can 'du bar 'gyur ro// de nas drang srong chen po me sbyin dga' mgu ste/ yid rang nas bcom ldan 'das la 'di skad ces gsol to// bcom ldan 'das gang dag thams cad mkhyen pa nyid du smon par mi bgyid pa'i sems can de dag ni klas pa'o zhes bdag 'chad do// de nas yang bcom ldan 'das kyis drang srong chen po me sgron la 'di skad ces bka' stsal to// drang srong chen po nang na/ sems can zhes bya ba phra ba ji tsam zhig yod ces/ nga la de skad zer ba ni/ drang srong chen po gang sems can du dmigs pa de sems can phra mor rnams rnam par 'byed do// drang srong chen po 'di lta ste dper na/ la la zhig gis dmu long zhig la 'di skad du/ kye skyes bu kha dog dkar po zhes bya ba ci 'dra zhes smras na/ drang srong chen po 'di snyam du sems ma mthong ba'i phyir kha dog dkar po 'di 'dra'o zhes de smra bar nus sam/ drang srong chen pos gsol pa/ 'brel pa ga la mchis/ bcom ldan 'das kyis bka' stsal pa/ drang srong chen po de bzhin du ngas kyang dmu long ltar ma mthong ba'i phyir sems can zhes bya ba ni phra mo 'di lta bu zhig go zhes/ sems can brjod par mi nus so// drang srong chen po yang mig lha sems can zhes pa mi rnyed do// rna ba dang / sna dang / lce dang / lus dang / yid la sems can zhes bya ba mi rnyed do// drang srong chen po nye bar len

  17. 214a

    pa'i phung po lnga po dag la sems can zhes bya ba mi rnyed do// drang srong chen po khams bcwo brgyad dang / rten cing 'brel par 'byung ba yan lag bcu gnyis dang / nang stong pa nyid la sems can zhes bya ba mi rnyed/ phyi stong pa nyid dang / phyi nang stong pa nyid la sems can zhes bya ba mi rnyed do// drang srong chen po mig ni ngan pa'o// 'jig pa'o// skad cig kyang mi gnas pa'o// de bzhin du rna ba dang / sna dang / lce dang / lus dang / yid kyang ngan pa'o// 'jig pa'o// skad kyang mi gnas pa'o// drang srong chen po nye bar len pa'i phung po lnga yang ngan pa'o// 'jig pa'o// skad cig kyang mi gnas pa'o// drang srong chen po mi gtsang ba'i rdzas sum bcu rtsa drug kyang ngan pa'o// 'jig pa'o// skad cig kyang mi gnas pa'o// sems can zhes bya ba yang med/ gzugs kyang med de/ drang srong chen po rdzas 'dus pa ni sems can zhes bya ba'i grangs su 'gro'o// yongs su rtogs pa gang dag rdzas rnams rnam par 'byed pa de dag ni srog dang / gso ba dang skyes bu dang / gang zag dang / shed skyes dang / shed bu mi dmigs so// drang srong chen po gal te sems can yongs su zin na/ de bzhin gshegs pa 'phags pa'i bden pa bzhi po dag gos shin tu chos ston par mi 'gyur ba cig na/

  18. 214b

    drang srong chen po gang gi phyir sems can med pa de'i phyir de bzhin gshegs pa nyid thob ste/ de'i phyir ji lta ji ltar yang dag par bsgrub par byed pa de lnga de ltar yang dag par 'grub po// de nas bcom ldan 'das la drang srong chen po me sgron gyis 'di skad ces gsol to// bcom ldan 'das deng slan chad drang srong chen po me sgron bdag thams cad mkhyen pa nyid du smon par bgyid do// bcom ldan 'das gal te bdag skal pa mu ma mchis par sems can dmyal ba'i zhugs kyi 'obs su gnas par 'gyur ba'am/ ri rab 'og min gnas tsam du gyur pa 'thon po'i kha de nas bdag gis bdag 'dor bar 'gyur pa'am/ gdung ba lnga skal pas bsregs pa lta bur 'gyur ba'am/ nyi ma skal par gnas par 'gyur ba'am/ bskal pa sum bcu'i zla ba gcig tu sbyang bar 'gyur ba de lta bur dka' ba spyad par ni/ bcom ldan 'das bdag spro ste/ 'dun gyi thams cad mkhyen pa nyid kyi slad du ni/ brtson 'grus nyam par mi bgyi'o// drang srong mngon par shes pa lnga dang ldan pa ji snyed/ bcom ldan 'das kyi gan du lhags pa de dag kyang stan las langs ste/ bcom ldan 'das la 'di skad ces gsol to// bcom ldan 'das bdag cag kyang / deng slan chad bla na med pa yang dag par rdzogs pa'i byang chub tu smon par bgyi'o// rdo ci thog gis brtson 'grus

  19. 215a

    btsams par bgyi'o// drang srong rnams kyis tshig de skad smras ma thag tu/ bcom ldan 'das kyi sprin 'tshams nas/ 'dul ba can zhes bya ba'i 'od zer phyung / phyogs bcu'i sangs rgyas thams cad kyis kyang smin 'tshams nas 'dul ba can zhes bya ba'i 'od zer phyung ste/ 'od zer de dag gi mthus so chen po 'di rnam pa drug du g.yos/ rab tu g.yos/ 'gul rab tu 'gul/ ldeg rab tu ldeg ste/ shar phyogs mtho na/ lho phyogs dma'/ nub phyogs dma' na/ byang phyogs mtho'/ shar phyogs dma' na/ lho phyogs mtho/ nub phyogs mtho na byang phyogs dma'o// phyogs bcu'i sangs rgyas thams cad kyis kyang de bzhin gshegs pa'i steng du me tog gi char phab rnga bo che rnams brdung so// dri za'i bdag po yid du 'ong ba rnams kyis kyang / yan lag lnga pa'i sil snyan gyis bcom ldan 'das la mngon par bstod do// lha'i bdug pa'i dri rab tu zhim po dag kyang rlung gis ngad ldang ste/ de bzhin gshegs pa'i gan du ngad ldang bar byed do// byang chub sems dpa' rnams rab tu dga' ste/ mchog tu bde ba'i sems kyis de bzhin gshegs pa'i steng du/ do shal dang se mo do rnams 'thor zhing / rin po che'i char yang 'bebs/ me tog dang / bdug pa dang / spos dang / 'phreng ba dang / byug pa dang / phye ma dang / gos dang / gdugs

  20. 215b

    dang / rgyal mtshan dang / ba dan dag gis kyang mchod pa byed do// lha'i tshogs rnams kyang rab tu dga' nas/ me tog man da ra ba dang / man dar ba'i char 'bebs so// thams cad dang ldan pa'i 'khor de yang dga' mgu yid rang ste/ ji ltar gyon pa'i gos rnams de bzhin gshegs pa'i sku la gsol to// de nas 'dul ba can zhes bya ba'i 'od zer des/ 'og min gyi gnas man chad/ sems can dmyal ba chen po mnar med pa yan chad snang bar bya ste/ phyogs bcu'i sangs rgyas thams cad la skor bar bya ste/ slar log te// bcom ldan 'das kyi dbu'i gtsug tu nub po// de nas bcom lnga 'das la tshe dang ldan pa rab 'byor gyis 'di skad ces gsol to// rgyu ma mchis par shAkya de ring 'dir// phyog bcu dag tu 'od zer mi gtong ste// 'khor 'di thams cad the tshom gyur lags na/ thub pas rgyu dang byed de bdag lung ston// mi'i 'dren pa'i rnam par 'phrul mthong nas// dga' bar gyur cing spro ba cher gyur te// rab tu dga' bas lag pa bstod bgyis nas// kha cig 'di na bcom ldan 'das shes mchi// rgya byin tshangs pa 'jig rten skyong ba rnams// nam mkhar gnas nas 'byung po'i tshogs dang stod// nam mkha' las ni lha'i me tog char du 'bebs// ma brdung rnga chen dag ni sgra yang 'byin// de nas bcom ldan 'das kyi tshe dang ldan

  21. 216a

    pa rab 'byor la 'di skad ces bka' stsal to// rab 'byor khyod kyis drang srong chen po me sgron mthong ngam/ rab 'byor gyis gsol pa/ bcom ldan 'das mthong lags so// bcom ldan 'das kyis bka' stsal pa/ rab 'byor drang srong chen po me sgron 'di ma 'ongs pa'i dus na/ sangs rgyas stong 'das pa'i 'og tu bskal pa bzang po 'di nyid la/ zla ba can gyi 'jig rten gyi khams su/ de bzhin gshegs pa dgra bcom pa yang dag par rdzogs pa'i sangs rgyas rnam par gzigs shes bya bar 'gyur ro// rab 'byor de bzhin gshegs pa rnam par gzigs kyi ming yang yid bzhin gyi nor bu rnam par dag pa'i bya ba byed par 'gyur ro// rab 'byor drang srong chen po brgyad khri bzhi stong gong chos kyi rnam grangs 'di thos ma thag tu phyir mi ldog pa rjes su thob ste/ rab 'byor de dag thams cad ni de bzhin gshegs pa byams pa'i gsung rabs las bcu la gnas par 'gyur ro// skal pa sum brgya'i 'og tu de bzhin gsheg pa dgra bcom pa yang dag par rdzogs pa'i sangs rgyas bdag gling zhes bya ba 'jig rten du 'byung bar 'gyur ro// rab 'byor byang chub sems dpa' 'tshad med pa dag gis chos kyi rnam grangs 'di thos ma thag tu dpa' bar 'gro ba'i ting nge 'dzin thob ste/ skad dang / skad ma yin pa shes pa'i ting nge 'dzin dang / rgyal bas dbang bskur ba'i

  22. 216b

    ting nge 'dzin dang / sgyu ma lta bu'i ting nge 'dzin dang / khams rnam par 'byed pa'i ting nge 'dzin dang / blo gros rgyal po'i ting nge 'dzin dang / rgya mtsho'i snying po'i ting nge 'dzin dang / mnyen pa'i sa'i ting nge 'dzin dang / bsam pa'i snying po'i ting nge 'dzin dang / 'od gsal ba'i ting nge 'dzin thob po// rab 'byor lha bye ba phrag gang ga'i klung gi bye ma snyed dag gis mi skye ba'i chos la bzod pa thob po// dge slong dang dge slong ma dang / dge snyen dang dge snyen ma stong phrag tshad med pa dag gis dgra bcom pa nyid mngon sum du byas so// rab 'byor lha dang klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang mi ma yin pa gang ga'i bye ma snyed dag gis/ bla na med pa yang dag par rdzogs pa'i byang chub tu sems bskyed do// rab 'byor de bzhin gshegs pas don gyis dbang 'di mthong nas/ 'dul ba can zhes bya ba'i 'od zer rnams phyung ngo // de nas bcom ldan 'ad kyis nyid kyi zhal ljags kyi dbang pos khyebs par mdzad de/ ljags kyi dbang po de las/ kha dog du ma/ kha dog tha dad pa'i 'od zer 'di lta ste/ sngon po dang / ser po dang / dmar po dang / dkar po dang / leb rgan dang / shel dang dngul gyi kha dog lta bu dag byung ste/ de dag 'jig rten gyi khams mtha' yas mu med pa dag tu mngon par byung nas slar log ste/

  23. 217a

    bcom ldan 'das la lan gsum skor ba byas nas/ bcom ldan 'das kyi zhabs gnyis su nub po// de nas byang chub sems dpa' sems dpa' chen po blo gros mi zad pa stan las langs te/ bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to// sangs rgyas bcom ldan 'das rnams ni rgyu ma mchis par mdzum pa mi mdzad na/ bcom ldan 'das 'dzum pa mdzad pa'i rgyu gang lags/ rkyen gang lags de skad ces gsol pa dang / bcom ldan 'das kyis byang chub sems dpa' blo gros mi zad pa la 'di skad ces bka' stsal to// rigs kyi bu ma dad pa rnams kyi don du ljags 'di lta bus ni rdzun mi gsung ngo snyam du bya ba'i phyir ljags kyi dbang pos 'dzum pa mdzad do// de nas bcom ldan 'das la byang chub sems dpa' blo glos mi zad pas 'di skad ces gsol to// bcom ldan 'das gang gis chos kyi rnam grangs 'di las tha na tshigs su bcad pa gcig tsam lung 'bog na/ rigs kyi bu 'am rigs kyi bu mo de dag bsod nams kyi phung po ji tsam zhig bskyed par 'gyur/ bcom ldan 'das kyis bka' stsal pa/ rigs kyi bu phyogs bcu'i sangs rgyas bcom ldan 'das sangs rgyas

  24. 217b

    kyi spyan la snang bar gyur pa ji snyed pa de dag la yongs su mya ngan las 'das kyi bar du gang zhig gis/ bde bar sbyor ba thams cad kyis/ bsnyen bkur byas te/ yongs su mya ngan las 'das nas kyang rin po che sna bdun gyi mchod rten byed pa/ de bas gang zhig chos kyi rnam grangs 'di las/ zan tshigs su bcad pa gcig tsam lung 'bog na/ 'di bsod nams ches mang du bskyed do// rigs kyi bu chos kyi rnam grangs 'di 'chad pa na/ gang zhig dang ba'i sems kyis legs so zhes bya ba byin pa de la sangs rgyas thams cad kyis bstod par 'gyur ro// gang gis 'di la rim gro byas pa des nga la/ rim 'gro byas par 'gyur ro// de nas bcom ldan 'das kyis thams cad dang ldan pa'i 'khor de la rnam par gzigs nas/ 'di skad ces bka' stsal to// rigs kyi bu dag nga ni bden par smra ba ste/ sa phyogs gang na chos kyi rnam grangs 'di gnas pa'i sa phyogs de la/ sangs rgyas thams cad dgongs par 'gyur ro// rigs kyi bu dag chos kyi rnam grangs 'di ni 'dzam bu gling pa'i sems can rnams kyi sman du gyur par 'gyur ro// gang gis chos kyi rnam grangs 'di la lan gsum brjod dam/ brjod du bcug na/ des ston pa la chos kyi 'khor lo rab tu skor bar 'gyur ro// rab 'byor gang zhig chos kyi rnam grangs 'di yi ger 'dri 'am/ yi ger 'drir 'jug pa de bde ba dang bcas shing yid bde

  25. 218a

    ba dang bcas bzhin du/ byang chub mngon par rdzogs par 'tshang rgya bar 'gyur ro// des sangs rgyas thams cad kyi mdzod kyang gzung bar 'gyur ro// rigs kyi bu dag chos kyi rnam grangs 'di ni sems dmyal bar 'gro ba'i sems can rnams kyi rna lam du grags par 'gyur ro// gang dag mi'i skye gnas nas shi 'phos ste/ yongs su dag pa'i sangs rgyas kyi zhing rnams su skye ba de dag gi rna lam du chos kyi rnam grangs 'di grags par 'gyuraro// rab 'byor gang gis sangs rgyas stong la/ dge ba'i rtsa ba bskyed pa de'i rna lam du chos kyi rnam grangs 'di grags par 'gyur ro// rab 'byor rigs kyi bu'am rigs kyi bu mo gang chos kyi rnam grangs 'di thos nas/ dad dam/ 'chang ngam/ klog gam/ kun chub par byed dam/ gzhan dag la yang rgya cher yang dag par rab tu ston par 'gyur ba de'i lag tu byang chub song ngo zhes ngas bshad do// des mig lnga thob par 'gyur/ dbang po ma tshang bar mi 'gyur/ dran pa brjed pa med par 'chi ba'i dus byed par 'gyur/ sangs rgyas thams cad sgrub pa'i ting nge 'dzin thob par 'gyur/ rnam pa/ snang mdzad sprul pa'i ting nge 'dzin dang / gzungs kyi snying po'i ting nge 'dzin dang / brdzug gi nor bu'i phyag rgya'i ting nge 'dzin dang / dbang skur ba'i

  26. 218b

    ting nge 'dzin dang / spyan ras gzigs kyi phyag rgya'i ting nge 'dzin rab tu thob par 'gyur/ yi ge med pa'i za ma tog gi gzung thob par 'gyur/ chos thams cad la rnam par rgyal ba thob pa'i gzungs dang / the tshom rnam par sbyong ba'i gzungs dang / don dam pa rnam par nges pa'i gzungs thob par 'gyur te/ de dag la stsogs pa gzungs dang / ting nge 'dzin gyi sgo rgya stong mtha' yas pa thob par 'gyur ro// mngon par shes pa lnga dang ldan par 'gyur ro// bsam bzhin du 'chi 'pho dang / skye ba yongs su 'dzin par 'gyur ro// de nas bcom ldan 'das kyis 'jam dpal gzhon nur gyur pa la bka' stsal pa/ 'jam dpal sangs rgyas mang po la snyen bkur byas pa khyod la/ chos kyi rnam grangs 'di yongs su gtad kyis yang dang yang rgya cher yang dag par rab tu shod gcig/ 'phags pa don dam pa'i chos kyi rnam par rgyal ba/ zhes bya ba theg pa chen po'i mdo// rdzogs s+ho// / rgya gar skad du/ Ar+ya bo d+hi sad tA tsar+ya nir de shin na ma ma ha ya na su tra/ bod skad du/ 'phags pa byang chub sems dpa'i spyod pastan pa zhes bya ba theg pa chen po'i mdo// sangs rgyas dang byang chub sems dpa' thams cad la phyag 'tshal lo// 'di skad bdag gis thos pa

Colophon

'phags pa don dam pa'i chos kyi rnam par rgyal ba/ zhes bya ba theg pa chen po'i mdo/ /rdzogs s+ho/