rmi lam nges par bstan pa
Svapnanirdeśa
Text
ff. 118a–118b · 2 folio sides
- 118a
pa'i rgya mtshor nub/ /sngags kyi de nyid rnal 'byor pas/ /dogs med don la rab tu gnas/ /srid pa yang 'di bla mar byas/ /dogs pa med pa'i yul gyis ston/ /lhan cig skyes pa drug pa bla ma mai tri pas mdzad pa rdzogs so// // bla ma badzra pA Ni dang/ mtshur gyis bsgyur ba'o// //rgya gar skad du/ swapna? ni ra de sha /bod skad du/ rmi lam nges par bstan pa/ sangs rgyas la phyag 'tshal lo/ /'dul ba dang ni chos mngon dang/ /mdo las rgyal ba skyes mchog gis/ /rmi lam lta bur chos gsungs pa/ /gsal bar 'dir ni bstan pa yin/ /rmi lam bden pa 'am brdzun pa 'am/ /sna tshogs sems sam rnam med sems/ /sgyu ma 'am yang na mi gnas las/ /dam pa ltar ni gang zhig 'dod/ /ma rtogs pa na rmi lam bden/ /rtogs na de ni brdzun 'gyur te/ /dang por rtag par shes bya ste/ /gnyis pa chad par gyur pa yin/ /rab tu sad pas rtog pa sel/ /nyams su myong ba sel ma yin/ /sems bcas sna tshogs sel bdag nyid/ gang zhig nyams su cher myong ba/ /skad cig 'jug pa kun gzhi rtsa/ /sna tshogs snang ba 'jug pa rnams/ /de dang der ni rnam par brtag /sems 'di nyid ni de ltar 'dod/ /gal te rmi lam rmi lam nyid/ /sems dngos sna tshogs de tshe brdzun/ /yod dang med pa 'jug med pa/ /gsal ba la ni chad pa med/ /ci ste ming med la ming btags/ /ming ni sgyu ma nyid du dogs/ /ming la ming ni rigs ma yin/ /ming ni mi gnas pa yin no/ /'dir ni drug las gnyis der byos/ /bzhi ni rtogs par bya ba'o// sna tshogs 'di dag rmi lam mtshungs/ /de ltar rgyal ba mchog gis gsungs/ /mi gnas gzhur ni rtogs bya ste/ /sangs rgyas pa kun nor yin pas/ /rang rig dang ni bla ma'i bka' / /lung gi khyad par gyis shes so/ /rmi lam nges par bstan pa slob dpon
- 118b
gnyis med rdo rjes mdzad pa rdzogs so// //bla ma badzra pA Ni dang dge slong tshul khrims rgyal bas bsgyur ba'o// //rgya gar skad du/ mA yA ni ru k+ta ti nA ma/ bod skad du/ sgyu ma nges par bstan pa zhes bya ba 'jam dpal gzhon nur gyur pa la phyag 'tshal lo/ /'gro rnams sgyu ma ji bzhin du/ /dngos med tshe na mngon sangs rgyas/ /mkhas pas bde ba'i bsam pa yis/ /'gro 'di ci phyir grol ma byas/ /sgyu ma mkhan byas sgyu ma ni/ /khyim ni rab tu 'bar ba la// kha cig la ni bden par snang/ /sgyu ma mkhan bzhin mkhas pas rig /sgyu mar mthong bas 'bad med par/ /'dod pa gang de rang 'ong 'gyur/ /'di la thams cad sgyu ma spyod/ /gang kun sgyu mar rtogs pa'i phyir/ /khyod kyis brdzun par ma rtogs par/ /sgyu ma rtag par smra bar gyis/ /chos dbyings ma skyes pa yi phyir/ /chad par thal bar mi 'gyur ro/ /chos rnams ma skyes mi 'gog phyir/ /bems por gyur pa ma yin no/ /chos rnams stong nyid las skyes pa'i/ /stong las chos nyid gzhan ma yin/ /de yi phyir na kun mkhyen gyis/ /sangs rgyas nyams par mi mdzad do/ /'bad med dbang gis thams cad du/ /chos kyi 'khor lo bskor ba'ang 'jug /rkang pa brkyang pa spangs nas ni/ /nga rgyal la sogs btang nas kyang/ /gnas med gnas la legs gnas te/ rnal 'byor pa yi chos la sbyong/ /bza' dang btung ba'i ro rnyed nas/ /dag pa nyid kyi gtam smra zhing/ /gang zhig spyad pa mi spyod pa/ /rdzogs pa'i byang chub spyod 'di min/ /skye bo de nyid gtam smra zhing/ /spyod pa 'di la yi rang byed/ /rig pa bsgrub pa nyams len pa'i/ /'byor pa'i skye bo rnyed par dka' / /sa yi mal la phyogs kyi gos/ /slongs mo'i zas ni za ba dang/ /skye med chos la bzod pa dang/ /'bad med brtse ba 'jug pa'o/ /chos gang skye bo las rgyal ba/ /de las rgyal ba de spyod pa/ /de yi 'bras bu tshe 'dir ltos//
Colophon
rmi lam nges par bstan pa slob dpon gnyis med rdo rjes mdzad pa rdzogs so/_/bla ma badzra pA Ni dang dge slong tshul khrims rgyal bas bsgyur ba'o