N826MW22704_0826bstod tshogsAll versions of this work

dkon mchog gsum gyi bstod pa

Triratnastotra

Text

ff. 121b–122a · 2 folio sides

  1. 121b

    gyi yan lag thams cad rab tu 'dud pa'o/ /de ltar yon tan mdza' dag ma lus pa'i dkon mchog gsum la phyag 'tshal nas/ de dag la skyabs su song na/ ngan song rnams su mi skye bar lha'i nang du skye ste/ gsum pa skyabs su 'gro ba ni chos snang ba'i sgo ste/ ngan 'gro las yang dag par 'da' ba' o zhes gsungs pa dang/ 'di ltar shin tu dad pa'i sems de la yid zhugs pa gzhan du ma yengs pa'i yid gsal bas/ sangs rgyas sam/ chos sam/ dge 'dun la skyabs su song na de 'chi ba'i dus byas na bde 'gro ? ris kyi 'jig rten zur na gnas pa zhes bya ba ni der shin tu dad pa'i sems de skyabs su song ba'i rgyus skye bar 'gyur ro/ /der skyes nas kyang de'i lus gzi brjid dang ldan zhing rang gi lus rang gi 'od kyis brgyan la bde bar gnas par 'gyur ro zhes gsungs pa lta bu'o/ gal te phyag 'tshal ba dang skyabs su song ba'i dge ba de yongs su bsngo ba dang ldan na ni ji ltar bsngos pa'i thar pa'i rgyur 'gyur bar rig par bya'o// //de ltar nyes pa kun spangs shing/ /yon tan mdza' yas gtar gyur pa/ /dkon mchog gsum po'i bstod pa'i tshig /cung zad bshad pas dge ba'i tshogs/ /gang rnams de yis 'gro ba rnams/ /sangs rgyas sa la gnas par shog /dkon mchog gsum la bstod pa'i 'grel ba/ slob dpon rgyal ba'i sras kyis mdzad pa rdzogs so// // rgya gar gyi mkhan po dz+nyA na shan+ti dang/ bod kyi lo tsA ba bande dpal gyi lhun po'i sdes bsgyur cing zhus te gtan la phab pa'o// //rgya gar skad du/ tri ratna sto tra/ bod skad du/ dkon mchog gsum gyi bstod pa/ dkon mchog gsum la phyag 'tshal lo/ dmigs med chos kyi sku/ /longs spyod rdzogs pa'i sku/ /cir yang sprul sku la/ /gus pas phyag 'tshal lo/ /rnam dag chos kyi dbyings/ /sgrub pa'i 'phags lam brgyad/ /ston pa'i gsung rab la/ /gus pas phyag 'tshal lo/ /byang chub sems rnams

  2. 122a

    dang/ /dgra bcom dag la sogs/ /rang sangs rgyas rnams la/ /gus pas phyag 'tshal lo/ /dkon mchog gsum gyi bstod pa/ /slob dpon dbyig gnyen gyis mdzad pa rdzogs so// (//brgya lnga bcu pa zhes bya ba bram ze rta dbyangs kyis mdzad pa bzhugs//) //rgya gar skad du/ sha ta pany+tsA sha ti ka nA ma sya sto tra/ bod skad du/ brgya lnga bcu pa zhes bya ba'i bstod pa/ dkon mchog gsum la phyag 'tshal lo/ /gang zhig la ni nyes pa kun/ /gtan nas yong ye mi mnga' zhing/ /gang la'ang rnam pa thams cad du/ /yon tan thams cad gnas gyur ba/ /gal te sems shig yod na ni/ /de nyid la ni skyabs 'gro zhing/ /de bstod de ni bkur ba dang/ /de yi bstan la gnas pa'i rigs/ /thams cad mkhyen pa yon tan kun/ /mnga' la de yang nyams mi mnga' / /nyes pa bag chags bcas de yang/ /skyob pa gcig pu la mi mnga' / /bcom ldan 'das kyi sku dang ni/ /gsung dang thugs kyi phrin las la/ /zhe 'gras gyur pa gang gis kyang/ /chos dang ldan par glags mi rnyed/ /rgya mtshor gnya' shing bu ga ru/ /rus sbal mgrin pa chud pa ltar/ /dam chos dga' ston cher bcas pa'i/ /mi nyid bdag gis thob nas ni/ /mi rtag nyid dang rjes 'brel zhing/ /las kyi glags la dogs bcas pa/ /bdag gi lce 'di nyid kyis go /snying po ci phyir blang mi bya/ /de ltar thub pa'i yon tan gyi/ /yul lta grangs med shes mod kyi/ /rang gi don la gus pa yis/ /de yi phyogs gcig bsgrims te brjod/ /gang gi yon tan grangs dag dang/ /mthu la thug pa ma mchis la/ /rmad byung phrin las dpag med can/ /rang byung khyod la phyag 'tshal lo/ /'di snyed bgyi ba'i mdza' med na/ /'di ltar lags zhes ci zhig smos/ /khyod kyi yon tan slad du bdag /bsod nams snyam nas spyi brtol skyes/ /bstod pa gleng bslang ba ste le'u dang po'o// //

Colophon

dkon mchog gsum gyi bstod pa/_slob dpon dbyig gnyen gyis mdzad pa rdzogs so/