'phags pa sku gsum zhes bya ba theg pa chen po'i mdo
Āryakāyatrinanāmamahāyānasūtra
Text
ff. 110b–112a · 4 folio sides
- 110b
byed na/ ljongs rgyu zhing gshegs pa dang / grong spyil bu can du byon te/ grong spyil bu can gyi grong gi byang phyogs kyi shing sA la'i tshal na/ dge slong gi dge 'dun chen po dang thabs cig/ tu bzhugs so// de nas bcom ldan 'das kyis/ dge slong rnams la bka' stsal pa/ dge slong dag 'di dag ni tshul khrims yin no// 'di ni ting nge 'dzin yin no// 'di ni shes rab yin no// dge slong dag tshul khrims la goms par byas na/ ting nge 'dzin la yun ring du gnas par 'gyur ro// ting nge 'dzin la goms par byas na/ shes rab thob par 'gyur ro// shes rab la goms par byas na/ 'di lta ste/ 'dod chags dang / zhe sdang dang / gti mug dag las/ sems yang dag pa kho nar rnam par grol bar 'gyur ro// de ltar sems yang dag pa kho nar rnam par grol ba'i 'phags pa'i nyan thos kyis ni/ bdag gi zag pa 'di zad do// tshangs par spyod pa ni bsten to// bya ba ni byas so// 'di las srid pa gzhan mi shes so zhes yang dag pa kho nar shes par 'gyur ro/ / bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do// bslab pa gsum gyi mdo rdzogs so/ / / rgya gar skad du/ Ar+ya kA ya tri nA ma ma hA yA na sU tra/ bod skad du/ 'phags pa sku gsum pa zhes
- 111a
bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das/ rgyal po'i khab bya rgod phung po'i ri la bzhugs so// byang chub sems dpa' tshad med grangs med pa dang / lha dang / klu dang / 'khor thams cad dang thabs cig tu bzhugs te/ bcom ldan 'das la bkur stir bgyid cing mchod do/ / de'i tshe 'khor der byang chub sems dpa' sa'i snying po 'dug pa stan las langs nas/ bcom ldan 'das la 'di skad ces gsol to// bcom ldan 'das la sku du mnga'/ bcom ldan 'das kyis bka' stsal pa/ sa'i snying po bcom ldan 'das de bzhin gshegs pa la sku gsum mnga' ste/ chos kyi sku dang / longs spyod rdzogs pa'i sku dang / sprul pa'i sku'o// rigs kyi bu de bzhin gshegs pa'i sku gsum ni/ rang bzhin rnam par dag pa ni chos kyi sku'o// ting nge 'dzin rnam par dag pa ni longs spyod rdzogs pa'i sku'o// spyod pa rnam par dag pa ni sangs rgyas thams cad kyi sprul pa'i sku'o/ / rigs kyi bu de bzhin gshegs pa'i chos kyi sku ni nam mkha' ltar rang bzhin med pa'i don no// longs spyod rdzogs pa'i sku ni sprin ltar 'byung ba'i don no/ / sprul pa'i sku ni sangs rgyas thams cad kyi 'phrin las te/ char pa lta bu ste thams cad bangs pa'i don to// bcom ldan 'das la/ byang chub sems dpa'
- 111b
sa'i snying pos 'di skad ces gsol to/ / bcom ldan 'das kyi sku gsum gyi bshad pa ji ltar blta bar bgyi/ bcom ldan 'das kyis/ byang chub sems dpa' sa'i snying po la bka' stsal pa/ rigs kyi bu de bzhin gshegs pa'i sku gsum ni 'di ltar blta bar bya'o// chos kyi sku ni de bzhin gshegs pa'i ngo bo gang la blta bar bya'o// longs spyod rdzogs pa'i sku ni/ byang chub sems dpa'i ngo bo gang la blta bar bya'o/ / sprul pa'i sku ni mos par spyod pa'i so so skye bo'i ngo bo gang la blta bar bya'o// rigs kyi bu chos sku ni sangs rgyas thams cad dang rang bzhin mthun par gnas so/ / longs spyod rdzogs pa'i sku ni sangs rgyas thams cad dang ting nge 'dzin mthun par gnas so// sprul pa'i sku ni sangs rgyas thams cad dang 'phrin las mthun par gnas so// rigs kyi bu kun gzhi gnas su dag pa ni me long lta bu'i ye shes te/ chos kyi sku'o// nyon mongs pa'i yid gnas su dag pa ni mnyam pa nyid kyi ye shes so// yid kyi rnam par shes pa gnas su dag pa ni so sor kun tu rtog pa'i ye shes te/ longs spyod rdzogs pa'i sku'o// sgo lnga'i rnam par shes pa gnas su dag pa ni bya ba sgrub pa'i ye shes te/ sprul pa'i sku'o// de nas byang chub sems dpa' sa'i snying pos/ bcom ldan 'das la 'di skad ces gsol to// bcom ldan 'das bdag gis bcom ldan 'das las dam po'i chos thos pa ni rab tu legs so// bde bar gshegs pa rab
- 112a
tu legs so/ / bcom ldan 'das kyis bka' stsal pa/ rigs kyi bu bcom ldan 'das las chos kyi rnam grangs 'di gang gis rab tu 'dzin pa des/ bcom ldan 'das tshad med cing dpag tu med pa thob bo/ / bcom ldan 'das kyis de skad ces bka' stsal pa dang / byang chub sems dpa' sa'i snying po dang / lha dang / klu dang / gnod sbyin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// 'phags pa sku gsum pa zhes bya ba theg pa chen po'i mdo rdzogs so// / rgya gar skad du/ sad d+harma rA dza ma hA yA na sU tra/ bod skad du/ dam pa'i chos kyi rgyal po theg pa chen po'i mdo// de'i tshe srangs rgyas shing sA la gnyis kyi bar na bzhugs te/ mya ngan las 'das par gshegs kar/ sems can thams cad brgya stong khri 'bum phal mang po kun shing gi drung na/ sangs rgyas 'khor bar bskor te/ 'khod nas mig ni yar bcom ldan 'das kyi zhal du lta ste/ cung zad kyang mi g.yengs/ de nas yang dag par gshegs pas/ 'phrul gyi stobs kyis 'od chen po btang nas/ nam mkha'i khams thams cad khyab par snang ste/ 'od de'i nang nas chos kun mngon par bstan nas/ de'i tshe mang po'i nang na byang chub sems dpa'i ming ni nam mkha' mdzod ces bya ba zhig yod pa stan las langs te/
Colophon
'phags pa sku gsum pa zhes bya ba theg pa chen po'i mdo rdzogs so/