F130MW1KG13607_0130mdo sdeAll versions of this work

'phags pa seng ge'i sgra sgrags pa zhes bya ba theg pa chen po'i mdo

Āryasiṅhānādikannāmamahāyanasutra

Text

ff. 307b–313a · 12 folio sides

  1. 307b

    bzung bar gyis/ bka' stsal pa/ kun dga' bo de'i phyir/ chos kyi rnam grangs 'di rmad du byung ba'i chos kyi rnam grangs shes/ bya bar zung shig/ de bas na chos kyi rnam grangs/ 'di ni rmad du byung ba'i// chos kyi rnam grangs shes bya ba'i/ tshig bla dgas so// bcom ldan 'das kyis de skad ces bka' stsal nas/ tshe dang ldan pa kun dga' bo yid rangs te/ bcom ldan 'das kyis gsungs pa la mngon par stod do// 'phags pa rmad du byung ba'i chos kyis rnam grangs zhes bya ba rdzogs s+ho// rgya gar skad du/ Ar+ya sing hA nA di kan na ma ma hA ya na su tra/ bod skad du/ 'phags pa seng ge'i sgra sgrags pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo// 'di skad bdag gi thos pa'i dus cig na/ bcom ldan 'das sangs rgyas nyi zla'i gnas/ rnam par rgyal byed kyi khang bzangs kyi nang dge slong gi 'dun chen po dgra bcom pa bye ba khrag khrig brgya stong phrag dgu bcu rtsa dgu dang thabs cig tu bzhugs so// de'i tshe bcom ldan 'das kyi byang chub sems dpa' rnam par rgyal ba'i phung po la bka' stsal pa/ rnam par rgyal ba'i phung po khyod sangs rgyas kyi zhing 'di nas byang phyogs logs na/ gang ga'i klung drug bcu'i bye ma snyed kyi zhing sangs rgyas kyi zhing rdul phra rab snyed 'das pa na/ 'jig rten gyi khams mngon par dga' ba zhes bya ba zhig yod de/ de bzhin gshegs pa dgra bcom pa

  2. 308a

    yang dag par rdzogs pa'i sangs rgyas/ chos 'phags zhes bya ba da ltar bzhugs te/ 'tsho zhing bzhes la chos ston to// de bzhin gshegs pa de la lta ba dang / phyag bya ba dang / bsnyen bkur bya ba dang / mchod pa bya ba'i phyir song shig/ de nas byang chub sems dpa' rnam par rgyal ba'i phung po 'jig rten gyi khams der song nas/ bcom ldan 'das chos 'phags de'i zhabs la phyag 'tshal te/ lan bdun bskor ba byas nas phyogs cig tu 'dug go/ byang chub sems dpa' rnam par rgyal ba'i phung po phyogs cig tu 'dug pa dang / de nas bcom ldan 'das de bzhin gshegs pa chos 'phags des/ byang chub sems dpa' de la 'di skad ces bka' stsal to// rigs kyi bu khyod gang las 'dir 'ongs/ de nas byang chub sems dpa' rnam par rgyal ba'i phung po// bcom ldan 'das kyis bka' stsal pa/ de la cang mi smra bar kha rog 'dug go/ de'i tshe 'khor 'dus pa gang lha dang / klu dang / gnod sbyin dang / lha ma yin dang / na mkha' lding dang / mi 'am ci dang / lto 'phye chen po dang / mi dang mi ma yin pa de dag 'di snyam du swo te/ ci'i phyir byang chub sems dpa' rnam par rgyal ba'i phung po 'di 'jig rten gsum gyi bla mas bka' stsal pa la lan mi gsol bar kha rog 'dug go snyam mo// de nas bcom 'das kyis der seng ge bgyings pa lta bur phyogs bcur gzigs nas// 'khor thams cad the tshom du byur pa thugs su chud nas 'dzum pa mdzad do// bcom ldan 'das de bzhin

  3. 308b

    gshegs pa chos 'phags de 'dzum pa mdzad pa'i 'od kyi snang bar mdzad do// de nas skad cig de nyid las sa chen po g.yos par gyur te/ phyogs bcu nas kyang byang chub sems dpa' gzugs dang / kha dog dang / tshul du ma 'chang ba dag bcom ldan 'das kyi cho 'phrul chen po de mthong ngo // 'jig rten gyi khams der thams cad du 'dus te/ bcom ldan 'das de'i zhabs la mgo bos phyag 'tshal nas/ rang rang gi dge bas bsgrubs pas 'dug ste/ pus mo g.yas pa'i lha nga sa la btsugs nas/ bcom ldan 'das ga la ba de logs su thal mo sbar ba btud nas/ ngo mtshar rmad du gyur pa dang / rmad du gyur pas 'dzum dmyal nas/ bcom ldan 'das la 'di skad ces gsol to// bcom ldan 'das bdag cag gis 'od zer gyi cho 'phrul du ma dag mthong lags te/ bcom ldan 'das bdag gi 'od zer gyi snang ba 'di lta bu dag sngon nam yang ma mthong lags so// bcom ldan 'das 'di'i don de ni leg te/ gang bcom ldan 'das kyis 'dzum pa mdzad pa'i don de lta bu de bdag cag la thugs brtse bar thugs brtse bar dgongs te/ lung bstan du gsol/ de nas byang chub sems dpa' 'od 'phreng gis bcom ldan 'das la tshigasu bcad de gsol pa/ rnam 'dren gang zag de na thugs rje can// rgyu ma mchis par 'dzum pa mi mdzad na// bdag dang 'jig rten snang mdzad thugs rje can// 'dzum mdzad rgyu dang mdzad rgyu nges par gsungs// de nas bcom ldan 'das de bzhin gshegs pa chos 'phags 'jam bu'i chu bo'i gser

  4. 309a

    lhar snang zhing / 'od zer bye ba khrag khrig brgya stong du ma rab tu 'gyed pa/ sku'i gzugs dang mdog gzi brjid kyis 'bar ba de la/ byang chub sems dpa' 'od 'phreng gis 'di skad ces gsol to// bcom ldan 'das bdag gis cho 'phrul mang po mthong lags te/ bdag gi sngon 'od zer gyi snang ba 'di lta bu nams kyang ma mthong lags so// 'od 'phreng phyogs 'dir de bzhin gshegs pa'i 'od zer gyi snang ba 'di lta bu chung ngu zhig mdzad de/ mtshan ma snang ba de dag ni rgyu med pa ma yin byed rgyu med pa ma yin no// 'od 'phreng khyod de'i phyir legs par rab tu nyon la yid la zung shig dang / ngas khyod la bshad do// don gang gis ngas 'dzum pa mdzad pa thos nas kyang / rigs kyi bu khyod kyis skrag par mi bya/ dngangs par mi bya/ dngas par 'gyur bar mi bya/ som nyir mi bya/ the tshom du mi bya'o// de ci'i phyir zhe na/ sangs rgyas bcom ldan 'das rnams kyi yul ni bsam gyis mi khyab po// smon lam ni bsam gyis mi khyab po// rnam par 'khrul pa ni bsam gyis mi khyab po// don de dag yang dag par mthong nas the tshom ma byed cig/ 'od 'phreng gang 'di ltar de bzhin gshegs pa shAkya thub pas nga'i drung du byang chub sems dpa' rnam par rgyal ba'i phung btang ba 'di khyod kyis mthong ngam/ gsol pa/ bcom ldan 'das mthong lags so// bde bar gshegs pa mthong lags so// rigs kyi bu byang chub sems

  5. 309b

    dpa' rnam par rgyal ba'i phung po 'di la/ ngas khyod ga las 'ongs/ shes de skad dris na/ de cang mi smra bar kha rog 'dug ste/ rigs kyi brangs don gyi dbang 'di mthong nas/ 'di 'dzum pa mdzad do// de bzhin gshegs pas smras pa'i lan de ci'i phyir 'dis ma gsol snyam du 'khor 'di dag thams cad the tshom du gyur to// rigs kyi bu ngas smras pa'i skyes bu dam pa 'dis ci'i phyir ma gsol ce na/ 'ong ba dang 'gro ba med pa'i chos rnams la/ bcom ldan 'das bdag la khyod ga las 'ongs/ zhes 'ong ba med par mdzadado// / snyam mo// chos thams cad brjod du ma mchis par yang glo bar chud na/ bcom ldan 'das ga las 'ongs shes byung ba'i gnas la bdag gis gsol bar spro ba ma mchis so// / snyam du sems ste/ rigs kyi bu mdor na rigs kyi bu 'dis chos thams cad bstan te/ yang dag pa'i chos ston pa yin no// rigs kyi bu byang chub sems dpa' rnam par rgyal ba'i phung pos yi ge chos dang / tshig med pa dang / brjod du med pa dang / yi ge dang bral ba dang / mtshan ma med pa dang / mtshan ma dang bral ba dang / blang ba med pa dang / bla ba dang bral ba dang / 'ong ba med pa dang / thong ba med pa dang / gnas med pa dang / sems dang yid dang / rnam par shes pa dang bral ba dang / rgyu rkyen dang bral ba dang / tshig med pa dang / rnam par rig pa med pa dang / lta ba med pa dang / ther zug tu gnas pa med pa dang / tshig gis brjod pa med pa dang / brda med pa dang /

  6. 310a

    yi ge gcig la 'di wa ste/ yang dag pa ma yin pa dang / bsags pa med pa'i gnas dang / yi ge med pa dang / gdul ba med pa rnams la su zhig snyam du shes na/ rigs kyi bu bstan pa med par 'dir ston to// de nas bcom ldan 'das kyi mthus/ byang chub sems dpa' lus 'od gsal gyis bcom ldan 'das la 'di skad ces gsol to// bcom ldan 'das gal te chos thams cad bstan du ma mchis pa lags/ chos de dag thams cad lhag pas bstan par 'gyur ba lags so// bcom ldan 'das kyis bka' stsal pa/ rigs kyi bu ji skad smras pa de bzhin te/ lkug pa 'ba' zhig gis ma yin te/ sems can thams cad kyang mi shes bzhin du chos ston par byedado// / gsol pa/ bcom ldan 'das ji ltar sems can thams cad ma 'tshal bzhin du/ chos ston pa de bshad du gsol/ bde bar gshegs pa bshad du gsol/ de skad ces gsol pa/ dang / bcom ldan 'das kyis byang chub sems dpa' lus 'od gsal la 'di skad ces bka' stsal to// rigs kyi bu 'di lta ste dper na/ dmus long dag nyi ma shar kyang gzugs mthong bar mi 'gyur zhing / nyi ma'i 'od ci 'dra ba yang mi shes te/ ji ltar gzhan dag gis nyi ma'i mtshan nyid 'di lta bu zhig yin no zhes bstan pa dang / de ltar gzhan gyi sgral nyi ma yin par mngon par zhen to// rigs kyi bu de bzhin du chos thams cad nang du 'dus shing dbyings kyi nang du 'dus dbyings med cing yi ge med pa/ yi ge dang bral ba chos

  7. 310b

    thams cad brjod de med pa yin na/ rkyen gyi dbang gi sgra 'byung bar 'gyur ro// rigs kyi bu 'di lta ste/ dper na ri brag dang / sgra la rten nas/ brag ca'i sgra 'byung yang rigs kyi bu ri brag gi sgra stong pa yin no// rigs kyi bu 'di lta ste/ yi ge'i sgra 'byung bar 'gyur te yi ge sgra ni sdong pa yin no// rigs kyi bu sems can gang dag brjod pa de thams cad so so yang dag pa'i rig pa'i nang du 'dus par lta ste/ tshig gis brjod pa gang yin pa de ni/ so so yang dag par rig pa yin par lta ba dang / tshig gi brjod pa gang yin pa de ni don so so yang dag par rig pa yin par blta bar bya'o// de lta bas na rigs kyi bu khyod kyis sems can gyi gang cung zad g.yo ba de thams cad chos kyi sdom bzhir 'dus par lta bar bya ste/ 'byung po dag mi shes pas gnas mi g.yo'o// de nas mi dmus long de ji ltar shes pa de bzhin du chos nyid la mngon par zhen to// rigs kyi bu don yongasu tshol bar 'dod pas rang gi nye bar len pa phung po lnga las btsal bar bya'o// chos kyi rnam grangs 'di'i don ji lta ba bzhin bshad pa na/ stong gsum gyi stong chen po'i 'jig rten gyi khams thams cad rnam pa drug tu g.yos so// snang ba chen pos 'jig rten khyab par shin tu snang bar 'gyur to// bcom ldan 'das de bzhin gshegs pa chos 'phags kyi ljags kyi dbang po phyung ste/ stong gsum gyi stong chen po'i 'jig rten gyi khams thams cad ljags kyi dbang pos yang dag par bka' bar gyur to// ljags kyi dbang po de las 'od zer bye ba khrag

  8. 311a

    khrig brgya stong phrag du ma byung ste/ 'od zer de dag gis sems can dmyal ba chen po nas sogs pa las srid pa'i rtse mo'i bar gyi 'jig rten gyi khams thams cad snang bar byas so// de nas bcom ldan 'das kyis ljags kyi dbang po de nyid slar bsdus nas/ 'khor gyi dkyil 'khor thams cad la bka' stsal pa/ grogs po dag lce 'di lta bu yod pa 'di ni/ brdzun mi zer te/ grogs po dag ngas gtam chung zad ji lta ba bzhin bshad pa de ltar brtag pa dang / de ltar dad pa dang yid ches par gyis shig/ de nas sa bcu la gnas pa dang / lha dang / klu dang gnod sbyin dang / lha ma yin dang / na mkha' lding dang / mi 'am ci dang / lto 'phye chen po la sogs pa dang / mi dang mi ma yin pa 'khor thams cad stan las langs te/ thal mo sbyar nas tshig 'thun par 'di skad ces gsol to// bcom ldan 'das yang dag pa'i don bstan pa bshad du gsol/ bde bar gshegs pa bshadadu gsol/ sangs rgyas kyi mthus som nyi mi bgyi zhing the tshom mi bgyi'o// de nas bcom ldan 'das kyis thams cad dang ldan pa'i 'khor lnga lAn gsum du gzigs nas 'di skad ces bka' stsal to// rigs kyi bu dag skye bo mang po la phan pa dang / bde ba'i phyir/ seng ge'i sgras bshad par bya'o// rigs kyi bu gang 'jig rten gyi khams mi mjed na/ de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya ba da ltar bzhugs te/ 'tsho zhing bzhes la chos kyang bston to//

  9. 311b

    rigs kyi bu de ni de bzhin gshegs pa chos 'phags nga nyid yin te/ 'jig rten gyi khams mi mjed der sprul pa rnam pa sna tshogs kyis sems can rnams la chos ston pa mdzad do// / de nas thams cad dang ldan pa'i 'khor ngo mtshar du gyur cing / rmad du gyur pa de dag gis bcom ldan 'das la legs so zhes bya ba gsol te/ bcom ldan 'das de ltar sems can thams cad la seng ge'i sgra sgrags pa legs so legs so// bcom ldan 'das ji ltar 'khor 'dir seng ge'i sgra sgrags pa'i bcom ldan 'das kyi seng ge'i sgra 'di thos par 'gyur zhing / thos nas kyang yid ches par 'gyur ba'i sems can gang lags de dag kyang / bcom ldan 'das dge ba'i rtsa ba ngan ngon dang ldan pa ma lags na/ gang 'dzin pa dang / 'chang ba dang / klog pa dang / gzhan dag la rgya cher yang dag par rab tu ston pa dang / mdo sde 'di la me tog dang / bdugs pa dang / spos dang / phreng ba dang / byug pa dang / phye ma dang / na bza' dang / gdugs dang / rgyal mtshan dang / ba dan dag gis mchod pa bgyid pa lta smos kyang ci 'tshal te/ seng ge'i sgra sgrags pa'i mdo sde 'di sems can gang gi rna bar thos par 'gyur ba de ni/ bcom ldan 'das sangs rgyas thams cad kyis byin gyis brlabs pa lags so// de nas bcom ldan 'das kyis byang chub sem dpa' de dag la legs so zhes bya ba gnang ste/ rigs kyi bu ji skad smras pa de bzhin te/ legs so legs so// gang de bzhin gshegs pa'i yang dag pa'i se

  10. 312a

    ge'i sgra 'di thos nas rab tu dang ba'i sems kyis legs so zhes bya ba 'ga' zhig rjes su 'bul na yang / rigs kyi bu 'am rigs kyi bu mo de dge ba'i rtsa ba ngan ngon dang ldan pa ma yin te/ de dag ngas yongasu bzung ba yin no// byang chub sems dpa' sems dpa' chen po byams pas kyang 'gron du gnyer bar byed do// de dag gis nga'i byang chub phrag pa la khyer ba yin no// gang snyigs ma lnga dag la bab pa'i tshe/ mdo sde 'di la mos pa'i sems can de dag ni ngas smin par byas pa yin no// tshe rabs gzhan du yang mi 'pham pas yongs 'dzin par 'gyur ro// de'i skye ba'i rgya mtsho skams pa yin no// bdud pham par byas pa yin no// nyon mongs pa rnams bsams pa yin no// chos kyi rnga shin du brdungs pa yin no// srid pa gsum rnam par zlog pa yin no// phyir rgol ba rnams las nges par rgyal ba yin no// nyon mongs pa'i tshogs bcom pa yin no// rigs kyi bu la la zhig gis/ stong gsum gyi stong chen po'i 'jig rten khams grangs med pa phrag bcu'i rdul snyed kyi bskal par de bzhin gshegs pa thams cad la bde ba'i yo byad thams cad kyis bsnyen bkur byed kyang / de bzhin gshegs pa'i sngon gyi rnam par 'phrul pa 'di thos nas dang par mi byed na/ de nyes pa che ba yin no// de bzhin gshegs pa'i bkas rigs kyi bu de/ de bzhin gshegs pa la rim gro bya bas rim gror byed pa dang / rigs kyi bu 'am rigs kyi bu mo la la zhig gis/ de bzhin

  11. 312b

    gshegs pa yang dag par bstan pa 'di thos nas dad cing sems rab tu dang bas legs so zhes bya ba 'bul na/ gang de bzhin gshegs pa la mchod cing bsnyen bkur byas pa de bas 'dis bsod nams ches lhag par brgya stong sogs par 'gyur ro// de lta bas na rigs kyi bu gang dag nga la skyabs su song ba de dag gis mdo sde 'di 'bri bar bya bcang bar bya'o// de nas byang chub sems dpa' rnam par rgyal ba'i phung po dang / 'od phreng dang / klog gi 'od dang / spyan rnam par dag pa dang / byams pa dang / mi 'jigs mdzad dang / spyan ras gzigs dbang phyug dang / mthu chen thob dang / 'jam dpal dang / spobs pa dpa'o dang / sgrib pa thams cad rnam par sel ba dang / spyan ras gzigs dbang phyug dang / kun tu bzang po dang / de dag la sogs pa byang chub sems dpa' bye ba khrag khrig brgya stong phrag brgyad stong phrag brgyad cu rtsa bzhis/ bcom ldan 'das la 'di skad ces gsol to// bcom ldan 'das slad mi'i dus/ snyigs ma lnga la bab pa na/ bdag cag gi mdo sde 'di rgyas par bgyi'o// bcom ldan 'das mdo sde 'di la mos pa'i sems can de ni/ yongs su mya ngan las 'das par rig par bya'o// bcom ldan 'das sems can dge ba'i rtsa ba ma bskyed pa rnams kyi rna bar mdo sde 'di thos par mi 'gyur te/ gang dag rgya cher 'jug pa de dag gi yon tan gyi mtha' ni bskal pa bye ba khrag khrig brgya stong du rtogs par dka' ba lags so// de nas byang chub sems dpa' de dag legs so zhes bya ba gnang ste rigs kyi bu

  12. 313a

    dag legs so// legs so// de ltar khyed rnams kyis bcom ldan 'das kyi bstan pa la gdos pa 'dzin pa lta bur gyis shig/ bcom ldan 'das kyis de skad ces bka' stsal la nas/ byang chub sems dpa' rnam par rgyal ba'i phung po dang / thams cad dang ldan pa'i 'khor dang / lha dang mi dang lha ma yin dang / dri zar bcas pa'i 'jig rten de dag/ bcom ldan 'das kyi gsungs pa la rings ste/ mngon par stod do// 'phags pa seng ge'i sgra sgrags pa zhes bya ba theg pa chen po'i mdo rdzogs s+ho// rgya gar gyi mkhan po bid+yA ka ra sing ha dang / lots+tsha ba ban de sgra rje ye shes snying pos bsgyur ba// / @rgya gar skad du/ Ar+ya d+harma ar+tha byi tsa yan/ bod skad du/ 'phags pa chos dang don rnam par 'byed pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal/ mgon med zas sbyin gyi kun dga' ra ba na/ dge slong gi dge 'dun chen po dang thabs gcig tu bzhugs te/ byang chub sems dpa'i dge 'dun chen po dang thabs gcig go// de nas bcom ldan 'das kyis byang chub sems dpa' sems dpa' chen po rgyal ba la bka' stsal pa/ rigs kyi bu sngon byung ba 'das pa'i dus/ bskal pa grangs med pa'i yang ches grangs med cing / tshad med par gyur pa de'i tshe/

Colophon

'phags pa seng ge'i sgra sgrags pa zhes bya ba theg pa chen po'i mdo rdzogs s+ho// rgya gar gyi mkhan po bi d+yA ka ra sing ha dang/ lots+tsha ba ban de ye shes snying pos bsgyur/