'phags pa 'gro ba thams cad yongs su bskyob par byed pa zhes bya ba'i yongs su bsngo ba
Text
ff. 332a–335a · 7 folio sides
- 332a
mdzad dam/ bcom ldan 'das kyis bka' stsal pa/ drang srong chen po ngas phyin ci log dag bzlog pa yang med 'grib par byas pa yang med do// drang srong chen pos gsol pa/ gal te de lta na khyod kyang dbang sgyur ma lags so// bcom ldan 'das kyis bka' stsal pa/ drang srong chen po de de bzhin te/ ma byung ba'i phyir nga yang dbang sgyur ma yin no// drang srong chen pos gsol pa/ go'u ta ma'i sras kyis pha ma 'grogs pa las/ sems can skye bo zhes gsung na/ sems can mang du 'grogs pa las/ sems can skye ba nyung ba 'di ji lta bu/ bcom ldan 'das kyis bka' stsal pa/ khyod la dpe' snyan par bya'o// drang srong chen po 'di lta ste dper na sa bon gcig las shing skye bar 'gyur te/ 'bras bu gcig las kyang 'bras bu mtha' yas par 'gyur ro// de la res 'ga' ni gcig sa bon gyi 'os su 'gyur gyi/ lhag ma tsha sa bon gyi 'os su mi 'gyur ba de ji lta bu/ drang srong chen pos gsol pa/ kye go'u ta ma rlung dang nyi mas shing thogs rnams marungs par bgyis so// bcom ldan 'das kyis bka' stsal pa/ drang srong chen po de de bzhin te/ lus kyi rlung gis kyang sems can gyi 'bras bu rnams ma rung bar byas so// drang srong chen po kha cig ni mngal na gnas pa nyid kyi tshe/ srin bu rnams kyis zos so// kha cig ni las kyi rlung rnams kyis phye mar byas so//
- 332b
drang srong chen po shing gi nyes pa nyung ngo // sems can gyi nyes pa ni mang ngo // drang srong chen po yang sems can gyi khams ni yongs su rtogs pas/ kun nas slang ngo zhes smra'o// drang srong chen pos gsol pa/ kye go'u ta ma de de bzhin te/ zhu ba brjod pa 'di ni rnam par dag go/ ci'i slad du skal pas bsreg par gyur pa bka' stsol cig/ bcom ldan 'das kyis bka' stsal pa/ drang srong chen po chos kyi dbyings 'dus ma byas pa'i skal pas bsregs par 'gyur ro// drang srong chen po gal te skal pas bsreg par mi 'gyur na/ chos kyi dbyings gnyis su 'gyur te/ la la mi rtag la la rtag par 'gyur ro// 'di tshe de bzhin gshegs pa bden pa sba bar mi 'gyur ro// drang srong chen po gang gi phyir 'di thams cad rtag pa ma yin rten pa ma yin/ dbugs phyin pa ma yin pa de'i tshe/ de bzhin gshegs pa thams cad mkhyen pa zhes bya ba'i ming thob po// drang srong chen pos bram ze'i khye'u la smras pa/ 'di thams cad mkhyen par mtshan gsol ba ni mthun no// bcom ldan 'das kyis bka' stsal pa/ drang srong chen po gal te skal pas bsregs par ma gyur na/ 'di ni dus bzang po'o// 'di ni dus ngan pa'o zhes bya bar dus tha dad pa med par 'gyur ro// drang srong chen pos gal te yang bskal pas bsreg par ma gyur na/ legs
- 333a
gnam zhing / stsogs pa dang / mi gtsang ba za bar 'gyur ro// de lta bu'i sdug bsngal bskal pa grangs khri stong du myong ste/ thar pa'i dus med do// rnam pa thar par dka'o// shin tu mi bzod pa yang brjod kyi mi lang ngo // gal te lag pa pho mtshan la reg gam/ mo mtshan la rig gam/ lag pa mi gtsang bas dge 'dun gyi kha zas gtsang ma la reg gam/ dge 'dun gyi kha zas la mi gtsang ba'i nang du bcug gAm/ mi gtsang ba'i kha zas dge 'dun zar bcug na/ de lta bu'i sdig pa rnam par smin pa ni/ thams cad mig nad kyi rims kyis btab pa dang / sdig pa mi shes so// phyin chad dge 'dun gyi kha zas gtsang sbra bya ba dang / lag pa gtsang mas dge 'dun gyi kha zas kyi gnod pa zung ba dang / lag pa gtsang bas khre 'bras bkru ba dang / kha zas gtsang mas/ sbyin pa byas pa ni/ bsod nams bsam gyis mi khyab par 'gyur ro// phyin chad 'di yongs su grags pa dang / myur ba'i yid kyi yongs su zung shig/ 'tsho ba rnam par dag pa'i mdo// rdzogs s+ho// // 'phags pa 'gro ba thams cad yongs su bskyob par byed pa zhes bya ba'i yongs su bsngo ba/ sangs rgyas dang / chos dang / dge 'dun thams cad la phyag 'tshal lo// sangs rgyas bcom ldan 'das dang / byang chub sems
- 333b
dpa' sems dpa' chen po thams cad bdag la dgongs su gsol/ bdag sdig pa thams cad so sor bshags so// bsod nams thams la rjes su yi rang ngo // sangs rgyas thams cad la gsol ba 'debs so// bsod nams thams cad sems can thams cad kyi bla na med pa thams cad mkhyen pa'i ye shes thob par bgyi ba'i sran du/ yongs su bsngo bar bgyi'o// bden pa dang bden pa'i tshig gang gis bden pa gsung pa/ sangs rgyas bcom ldan 'das kyi dge ba'i rtsa ba yang dag pa ji ltar yongs su bsngo bar byagyi'o// bden pa dang bden pa'i tshig des gang gi sems can thams cad kyi sdig pa mi dge ba'i nyes pa byas pa dang / log par smras pa dang / ngan du bsams pa dang / mdzad pa de ltar yongs su bsngo ba/ nyon mongs pa'i sgrib pa dang / las kyi sgrib pa dang / rnam par smin pa'i sgrib pa dang / shes bya'i sgrib pa dang / sgrib pa gang gis bsgribs shing g.yogs te/ kun nas bkris pa dang / bdag nyid dang / gzhan dag gis bsam pa dang / bag la nyal ba dang / khams dang / rang bzhin yang dag pa ji lta ba bzhin mtshal ba dang / dbang po dang / brtson 'grus kyi rim pa dang / dge ba dang / mi dge ba'i chos yang dag par ji lta ba bzhin ma tshal ba dang / khan ma tho ba dang / bcas pa dang / kha na ma tho ba med pa dang / bsten par bya ba dang / bsten par bya ba ma yin pa'i chos yang
- 334a
dag par ji lta ba bzhin ma tshal ba dang / skye bu dam pa dang phrad pa dang / dam pa'i chos nyan pa dang / tshul bzhin yid la bgyid pa dang / chos dang 'thun pa'i chos bsgrub pa mi sgrub par 'gyur ba dang / sgrib pa gang gis sgribs shing g.yogs te/ kun nas dkris pa rnams sems can 'dul ba dang / bdag 'dul ba dang / gzhan 'dul ba dang / gnyi ga 'dul ba dang / 'jam pos 'dul ba dang / khro bos 'dul ba dang / btang snyoms kyis 'dul ba dang / sdigs pas 'dul ba dang / bgrad pas 'dul ba dang / smad pas 'dul ba dang / sten pa dang / sten pa dang / bsnyen bskur bya bas 'dul ba dang / chos bshad pas 'dul ba dang / 'dzum bstan pas 'dul ba dang / nang du yang dag 'jog gis 'dul ba dang / spangs pa'i yon tan yo byad bsnyungs pas 'dul ba dang // sbyin pas 'dul/ tshul khrims dang / bzod pa dang / brtson 'grus dang / bsam gtan pa dang / shes rab kyi pha rol tu phyin pa spyod pas 'dul ba dang / dad / pa dang / tshul khrims dang / thos pa dang / gtong ba dang / shes rab dang / sgom pas 'dal ba dang / 'dul bas gang dag gis sems can gyi khams 'dul bar 'gyur ba de yang dag pa ji lta ba bzhin ma tshal ba dang / tshul khrims kyi rgyu mi 'byung / ting nge 'dzin gyi rgyu dang / dmigs pa'i rgyu dang / bsam gaM taH
- 334b
gyi rgyu dang / zhi gnas kyi rgyu dang / lhag mthong gi rgyu dang / mngon par shes pa'i rgyu dang / zag pa zad pa'i rgyu dang / so so yang dag par rig pa'i rgyu rnams rnam par dag par 'gyur ba dang / bsam gtan dang / rnam par thar pa dang / ting nge 'dzin dang / snyom par 'jug pa dag mngon du mi 'gyur ba dang / snang ba skyes shing skyes pa dag nub par 'gyur ba dang / rnyed pa 'dod pa dang / bsnyen bskur 'dod pa dang / grags pa 'dod pa dang / 'khor 'dod pa'i sems 'byung ba dang / 'dod pa rnam par rtog pa dang / gnod sems kyi rnam par rtog pa dang / 'tshe ba'i rnam par rtog pa dang / mi 'chi bar rnam par rtog pa dang / skyes bu la rnam par rtog pa dang / gnyen la rnam par rtog pa dang / gos dang / zas dang / mal bstan/ na ba'i gsos sman gyi rkyen gyis yo byad la rnam par rtog pa'i sems la kun nas gnas pa dang / tshe thung ba dang / gnod pa mang ba dang / mdog ngan pa dang / gzugs ngan pa dang / dbang chung ba dang / rigs dma' ba dang / longs spyod chung ba dang / shes rab 'chal pa dang / sems can dmyal ba dang / dud 'gro'i skye gnas dang / gshing rje'i 'jig rten dang / ngan song ngan 'gror 'gro ba dang / lus las byung ba'i sdug bsngal rnam pa du ma dang / sems las byung ba yid mi bde nyid la nyams su myong ba dang / smon lam log pa la dgapa
- 335a
ba dang / yang dag pa'i smon lam ma rtogs pa dang / gzhan yang sgrib pa gang dang gang gis sgribs shing / kun nas bsgrib pa'i sems can rnams kyis rnam par smin par 'gyur ba de dag thams cad bdag la smin nas/ sems can thams cad rnam par grol zhing rnam par dag par gyur cig/ sangs rgyas kyi khams ji tsam pa dang / chos kyi khams ji tsam pa dang / dge 'dun gyi khams ji tsam pa dang / yang dag pa'i mtha' ji tsam pa dang / gnyis su med pa ji tsam pa dang de bzhin nyid ji tsam pa dang / mnyam pa nyid ji tsam pa dang / 'dod pa dang / zhe sdang dang / gti mug gi khams ji tsam pa dang / 'khor bar gdags pa dang / 'dod par 'gyur ba ji tsam pa de tsam sems can thams cad kyi nyon mongs pa dang / nye ba'i nyon mongs pa thams cad dang / kun nas nyon mongs pa'i khams gang yin pa/ de bdag la smin nas sems can thams cad rnam par grol zhing rnam par dag par gyur cig/ bdag gi ji tsam du sngon gyi mtha' ma tshal ba dge ba'i rtsa ba bgyis shing brtsegs pa gang lags pa de sems can thams cad la yongs su bsngo bar bgyi'o// bdag ni 'dod chags la chags/ zhe sdang gis gdungs/ gti mug gis rmongs te nyon mongs pa dang / nye ba'i nyon mongs pa dang / kun nas nyon mongs pa dang ldan nas ji ltar dge ba'i rtsa ba yongs su bsngor bgyi ba yang dag pa ji lta ba bzhin mchil ma
Colophon
'phags pa 'gro ba thams cad yongs su skyobs par byed pa zhes bya ba'i yongs su bsngo ba rdzogs s+ho// //rgya gar gyi mkhan po byad t+ya pa ka ra pra b+ha dang/ lo ts+tsha ba ban d+he ye shes sdes sgyur cing zhus te gtan la phab pa/