N1845MW22704_1845rgyud 'grelAll versions of this work

'phags pa lag na rdo rje gos sngon po can gyi dkyil 'khor gyi cho ga thams cad rdzogs pa zhes bya ba

Āryabajrapāṇinīlambarasarbamaṇḍalbidhināmaati

Text

ff. 183b–193a · 20 folio sides

  1. 183b

    lots+tsha ba glang dpal gyi seng ges bsgyur ro// //slad kyis kyang paN+Di ta rgya gar phyag nas sgra rang 'gyur du bsgyur ro/ /bi las badzra las bla ma sman btsun khros pa la gnas/ /des dngos la gnad pa lags so/ /'di bris rnam dkar phung po yis/ /deng nas byang chub snying po'i bar/ /mi mthun phyogs las rnam rgyal te/ /gos sngon go 'phang myur thob shog/ (//dpal gos sngon can gyi dkyil 'khor cho ga slob dpon nA hA? rdzu? nas mdzad pa bzhugs//) // rgya gar skad du/ Arya badzra pA Ni nI lam ba ra sarba maN+Da la bi d+hi nA ma a ti/ bod skad du/ 'phags pa lag na rdo rje gos sngon po can gyi dkyil 'khor gyi cho ga thams cad rdzogs pa zhes bya ba/ /byang chub sems dpa' sems dpa' chen po 'jam dpal grub pa la phyag 'tshal lo/ /thams cad stong pa chen po'i mchog /mnga' brnyes phyag na rdo rje la/ /kun nas dad bas phyag 'tshal te/ /dkyil 'khor cho ga bdag gis bshad/ /rkyen thub sa non yan lag rdzogs// ting 'dzin dbang thob gzugs bzang zhing/ /log pa'i lam spangs mang pos bkur/ /de sogs yon tan kun ldan pas/ /yid dang mthun pa'i dben pa 'am/ /yang na nyams dga' bkra shis gnas/ /ri zlum dag gam chu bo'i 'gram byin che yon tan lnga gnas su/ /stegs bu sngon po mdzes pa la/ /me tog sngon po gcal bkram ste/ /steng du gos sngon sku gzugs bzhag /yan lag ye shes bskyed ldan pas/ /mchod pa'i cho ga sngon btang nas/ /phyi nang dgug dang bstim la gnas/ /sngags kyis bsnyen pa 'bum sogs bya/ /yang na mtshan ma gsum thob pas/ /bsgrub pa'i cho ga brtsam par bya/ /rab tu brtags pa'i sa gzhi la/ /zlum la mdzes pa'i maN+Dal brtsig /steng du dpal

  2. 184a

    ldan dkyil 'khor bskyed/ /spyan drang byin brlabs dbang bskur nas/ /phyi nang mchod pa ci 'byor dbul/ /stong pa dag kyang de bzhin no/ /de nas phyogs skyong srungs ma dgug /oM in+d+ra ye hUM dza:/ agna ye hUM dza:/ yam ye hUM dza/ nai ri te le hUM dza/ ba ru Na ye hUM dza:/ ba ya be ye hUM dza:/ ku bai ra ye hUM dza:/ i sha na ye hUM dza:/ he ta a d+hi pa ta ye hUM dza:/ surya tsan+d+ra ye hUM dza/ de skad ces brjod la spyan drang ngo/ /de nas sangs rgyas thams cad dgug /phyogs skyong la sogs byin gyis brlab/ /gtor ma tshul bzhin byin brlab ste/ /ci bder phyogs skyong tshogs la dbul/ /de nas las rnams bcol bar bya/ /lha dbang me lha gshin rje dang/ /bden bral chu lha rlung gi lha/ /gnod sbyin dbang ldan nyi zla dang/ /bran dang bka' nyan pho nya'i tshogs/ /rdo rje spyan dang snyan mnga' ba/ /rdzu 'phrul chen po'i don ldan pa/ /mngon shes can gyis mchod pa bzhes/ /sa phyogs dge ba'i gnas 'di ru/ / bdag gi dge ba'i grogs po mdzod/ /bdag gis bzod pa de yis ni/ /mi slu dam tshig dgongs mdzad la/ /rtags dang mtshan ma bstan du gsol/ /ces las bcol lo/ /lag pa sa la reg pa yis/ /sa yi lha mo dbus su bton/ /de la byin brlabs mchod pa bya/ /dngos su las bcol tshig 'di bsgo'o/ /skyob pa sangs rgyas thams cad kyi/ /spyod pa'i tshul dang khyad par las/ /sa dang pha rol phyin pa la/ /lha mo khyod ni dbang du gyur/ /skyob pa shAkya seng ge yis/ /ji ltar bdud kyi sde bcom pa/ /de ltar bdag gis bdud las ni/ /rgyal bar byas te dkyil 'khor bri/ /zhes brjod pas gnang ba byin nas/ /thim par bsam mo/ /sa bslang ba'o// //legs par byin pa'i gnas ched du/ /sa bdag

  3. 184b

    legs par blta byas la/ /zla bzhir dbang du phyogs bzhir blta/ /de yi lto ba'i dbus nas bru/ /ro la sogs pa'i skyon rnams bsal/ /mar gyi mdog dang 'dres par 'gyur/ /mchog tu gyur pas blang bar bya/ /sa brtag pa'o// // sa gzhi bzang po brko dus su/ /dag par byed pa'i gsang sngags bzlas/ /stegs bu khru ni bcu drug gam/ /bcu 'am lnga ru legs byas te/ /shin tu mthar par bcag par bya/ /mthon dman med par gyur pa dang/ /bdud rtsi lnga 'am pa yi lnga/ /dri dang sman gyis legs par byug /dag byed gsang sngags bzlas pa yis/ /rtsa ba'i yi ges grub par bya/ /sa sbyang ba'o// //de nas sa las 'od byung ste/ /yaM las rgya gram rlung du gyur/ /de steng baM las chu dkyil 'khor/ /gser gyi sa gzhi lam las bskyed/ /de steng sum las ri rab bskyed/ /rin chen sna bzhi'i rang bzhin can/ /de la lag pa brdeg par bya/ /de yi gsang sngags 'di dag bzlas/ /oM me di ni badzra b+ha wa band+ha ni hUM phaT/ ces bzlas sa 'od dang ldan te// 'od kyis stong gsum thams cad gsal/ /sa gzhi byin gyis brlab pa'o// //deng nas brtsams te gos sngon can/ /phyag rgya che dang ldan gyur bas/ /rgyan rnams thams cad yang dag ldan/ /pad+ma la sogs dbus btang nas/ / de yi steng du 'dug par bya/ /shar la sogs pa'i phyogs rnams su/ /mchod pa lnga 'am nyi shu brgyad/ /bdag gi thugs ka'i 'od zer gyis/ /phyogs bcu sangs rgyas spyan drangs te/ /bstim pas bkrag dang gzi byin bskyed/ /mngal nas skyes pa'i tshul can nam/ sna bug sngags kyi 'od zer las/ /yang na nyi zer tshul can gyis/ /'khor rnams gsal bar gyur pa las/ /ye shes bde gshegs spyan drangs bstim/ /de nas gsol ba gdab pa ni/ /gsang bdag dkyil 'khor

  4. 185a

    chen po'i phyir/ /bdag ni sa chen gzung bar byed/ /phyogs bcu sangs rgyas thams cad kyis/ /bdag la byin gyis brlab tu gsol/ /gsol ba gdab pa'o// //dbang thob gyur nas gsang sngags bzlas/ /sku yi 'od kyis gsang sngags rgyal/ /reg pas bdud dang srin po 'bros/ /bsam gtan de las ma yengs pas/ /sngags kyi phreng bas bzlas ba bya/ /zhes pa ni sa gzung ba'i cho ga'o/ /de nas phyogs bzhir rnal 'byor bzhi/ /khams gsum rnam rgyal la sogs bsam/ /shar nas gtso la mchod pa phul/ /gsol ba 'di yang gdab par bya/ /rdo rje rigs mchog dpal ldan gos sngon can/ /dpal ldan dkyil 'khor chen po dri ba'i phyir/ /mnyam pa'i ngang las 'bar ba'i skur bzhengs la/ /zhe sdang rigs kyi bgegs rnams bzlog tu gsol/ /ces gsol ba gdab par bya'o/ /lho nas gtso la mchod pa phul/ /gsol ba 'di dag gdab par bya/ /oM rin chen rigs mchog dpal ldan gos sngon can/ / dpal ldan rigs kyi dkyil 'khor bar ba'i phyir/ /mnyam pa'i ngang las 'bar ba'i sku bzhengs la/ /nga rgyal rigs kyi bgegs rnams bzlog tu gsol/ /ces gsol ba gdab par bya'o/ /nub nas gtso la mchod pa phul la/ / gsol ba 'di gdab par bya'o/ /oM pad+ma rigs mchog dpal ldan gos sngon can/ /pad+ma rigs kyi dkyil 'khor bri ba'i phyir/ /mnyam pa'i ngang las 'bar ba'i skur bzhengs la/ /'dod chags rigs kyi bgegs rnams bzlog tu gsol/ ces gsol ba gdab par bya'o/ /byang nas gtso la mchod pa dbul/ /gsol ba de'i dag gdab par bya'o/ /oM las kyi rigs mchog dpal ldan gos sngon can/ /las kyi rigs kyi dkyil 'khor bri ba'i phyir/ /mnyam pa'i ngang

  5. 185b

    las 'bar ba'i sku bzhengs la/ /phrag dog rigs kyi bgegs rnams bzlog tu gsol/ /ces gsol ba gdab par bya'o/ /de nas phyogs bzhi khro bo bzhis/ /dkyil 'khor gtso la gsol ba gdab/ /mnyes pa'i tshogs kyang ci nus bya/ /des ni bgegs rnams 'byer bar 'gyur/ /zhe'o/ /de ni gtso bo bslang ba'i cho ga'o/ /de nas brtsams te gos sngon can/ /shin tu khro ba'i gzugs su langs/ /mig gnyis nyi zla'i dkyil 'khor du/ /raM dang a gnyis bsam par bya/ /rkang par ljang gu yi ge hUM las/ /sna tshogs rdo rje 'od ldan bsam/ /mig dang rna ba'i nang du yang/ /khro bo'i tshogs ni bsam par bya/ /nga rgyal chen po bskyed nas ni/ /rdo rje dril bu bskor bya zhing/ /rkang pa rdo rje stabs ldan pas/ /phyogs mtshams su ni blta bya ste/ /hUM zhes 'jigs pa'i sgra sgrogs bsam/ /ha ha gad mo chen po rgod/ /nga rgyal bskyed pa'o/ /g.yon pa dril bu dkur brten nas/ /g.yas pa rdo rje gsor byas te/ /sangs rgyas thams cad mdun bsams te/ /bka' sgo bden pa brdar bar bya/ /gang dag sa phyogs 'di na gnas pa yi/ /lha'i tshogs dang/ klu'i tshogs dang/ gnod sbyin gyi tshogs dang/ lto 'phye'i tshogs la sogs pa thams cad dengs shig /hUM nga ni dpal ldan gos sngon can/ /sangs rgyas kun gyis gnang ba ste/ /lha dang klu dang lha ma yin/ /brjed byed la sogs bgegs kyi tshogs/ /gnas 'dir ma 'dug gzhan du dengs/ /gal te dam tshig las 'das na/ /stobs chen khro bo gos sngon gyis/ /klad pa 'gas pas gdon mi za/ /phaT na ma(rgyud 'grel): sa man+ta kA ya bAk tsit+ta badzra nan/ /na maM nI lAM ba ra hUM/ kha kha khA hi khA hi/ tiSh+Tha tiSh+Tha/ band+ha band+ha/ ha na ha na/ da ha da ha/ pa tsa pa tsa/ gardza gardza/ spho Ta ya spho Ta ya/ sarba big+hAM bi na ya ka nan/ mahA g+ha na dza bin ta na ta ka

  6. 186a

    rA ya hUM phaT/ bgegs bskrad pa'o/ /dpal ldan gos sngon snying po las/ /yi ge lnga yi sbyor ba yis/ /mtshon cha lnga yis thog phab pas/ /gdug pa thams cad brgyal bar 'gyur/ /thog 'bab pa'o/ /de nas rkang pa rdo rje stabs lag par gir stabs bskor ba yis/ /dbang ldan gyi phyogs nas brtsams te/ /rdo rje bskor ba lan gsum mam/ /yang na ji ltar nus pa yis/ /bsrung ba khro bo khang par bsam/ /sa bsrung ba'o/ /deng nas brtsams te dkyil 'khor gyi// lha yi sta gon bya bar gsungs/ /bdud rtsi lnga yi thig le yis/ /thig le lha yi gnas su ni/ /gdan du bsams la dbab par bya/ /de steng hUM las phyag mtshan gyur/ /de las so sor sku rdzogs te/ /dbang bskur byin gyis brlab par bya/ /de la phyi nang mchod pa dbul/ /bstod pa dag kyang de bzhin no/ /de nas gsol ba gdab par bya/ /bcom ldan rdo rje gos sngon can/ /rigs sngags rgyal la phyag 'tshal lo/ /bdag gi snying rje'i dkyil 'khor ni/ /mgon po bri bar 'dod pa ste// slong ma rnams la phar phyin dang/ /? la mchod pa'i don du yang/ /de la bcom ldan gus bdag la/ /byin brlabs gnang bar mdzad par 'os/ /dgongs shing bcom ldan gos sngon can/ /rdo rje 'chang chen sprul pa'o/ /bgegs rnams ma lus 'dul ba'i bdag /gsang sngags rigs sngags kun gyi lha/ /bdag la byin gyis brlab du gsol/ /bdag ni slob ma rnams kyi phyir/ /dpal ldan gos sngon dkyil 'khor bri/ /bdag dang slob mar bcas pa rnams/ /thugs rjes nye bar gzung du gsol/ / bdag la bar du gcod pa'i bgegs/ /'byung po sha za gnod sbyin dang/ /gang dag gnod sbyin sems ldan pa/ /thams cad bdag la bsrung du gsol/ /thun mong dngos grub thams cad dang/ /de bzhin mchog tu gyur pa dang/ /thugs rje chen pos dgongs mdzad la/ /

  7. 186b

    bdag la myur du stsal du gsol/ /de skad ces gsol ba gdab par bya'o/ /dkyil 'khor gyi lha sta gon gyi cho ga'o/ /de nas bsams te gos sngon gyis/ /rin chen dngul gyi bum pa 'am/ /yang na dkar po khams sogs la/ /nag po dang ni ra ri med/ /de lta bu yi bum pa la/ /pad+ma 'dab ma brgyad ldan pa'i/ /dbus su so so'i snying po 'am/ /yang na so so'i phyag mtshan dgong/ /de nyid 'od du zhu ba las/ /dkar po yi ni yi ge pa/ /de las bum pa'i gzhal yas khang/ /nang du pad+ma nyi ma'i gdan/ /lto che mgrin pa ring ba dang/ /mchu ni rkang ka'i dbyibs can la/ /dbus su so so'i snying po bsam/ /de nas phyag mtshan sku rdzogs 'gyur/ /mi dmigs dbyings nas sangs rgyas bskul/ /gnyis med gyur la mchod pa dbul/ /gong ma'i gsol ba gdab par bya/ /de nas sman lnga 'bru lnga dang/ /rin chen lnga dang snying po lnga/ /thun mong bum pa'i rdzas su blugs/ /rnam rgyal bum par lha tshogs bskyed/ /btung la snum po dag dang ni/ /mi 'chi lngas kyang dgang bar bya/ /las kyi bum pas khams gsum rgyal/ /'od zhu de yis las kun byed/ /sngags ni so so'i snying po'o/ /de nas bun pa thams cad kun/ /dpag bsam shing dang 'bras bu can/ /yon tan ldan pas kha brgyan nas/ /de ni ma nyams ras dag la/ /kha dog lnga dang ldan pa yis/ /rnam rgyal bum pa bcing bar bya/ / gzhan ma kha dog re re'o/ /shar du 'dab ma brgyad pa yi/ /maN+Dal byas te de ru bzhag /bum pa sta gon gyi cho ga'o/ /de nas slob ma lhag pa'i cho ga bya ste/ /chags dang grol ba'i gang zag ni/ /lhag par gnas pa gcig tu gyur/ /dang por phyi nang khrus byas te/ dri zhim byugs la gos bzang brgyan/ /de nas dkyil 'khor phyi rol dgod/ /slob dpon la ni gsol ba gdab/ /ston pa khyod la bdag dga' o/ /slob dpon khyod ni dgongs su gsol/ /byang chub sems dpa' i tshul bstan pa/ /byang chub

  8. 187a

    sems kyang bdag la gsol/ /de nyid dam tshig bdag la gsol/ /sangs rgyas chos dang dge 'dun dang/ /bla na med pa'i dkon mchog gsum/ /skyabs gsum dag kyang bdag la gsol /thar pa chen po'i grong mchog tu/ / mgon po bdag ni gzhug tu gsol/ /lan stsal pa/ khu tshur theg pa chen po yi/ /gsang sngags spyod pa'i tshig 'di ni/ /khyod la yang dag bshad par bya/ /tshul chen khyod kyis shes par gyis/ /zhe'o/ de ni sdig pa bshags pa dang/ /rjes su yi rang dang/ /chos kyi 'khor lo bskor ba dang/ mya ngan las mi 'da' bar gsol ba gdab pa dang/ byang chub mchog tu sems bskyed pa dang/ lus dbul ba ni gzhan du shes par bya'o/ /de'i rjes la sdom pa phog la 'dzin du gzhug /bslab pa yi ni tshul khrims dang/ /dge ba'i chos ni sdud pa dang/ /sems can don byed tshul khrims gsum/ /deng nas brtsams te bzung bar bya/ /rdo rje rigs mchog chen po la/ /rdo rje dril bu'i phyag rgya yang/ /yang dag nyid du bzung bar bgyi/ /slob dpon dag kyang bkur bar bgyi/ /rin chen rigs mchog chen po yis/ /dam tshig yid du 'ong ba la/ /nyin re bzhin ru dus drug tu/ /sbyin pa rnam bzhi rtag tu sbyin/ /byang chub chen po las byung ba'i/ /pad+ma'i rigs mchog dam pa la/ /phyi dang gsang ba theg pa gsum/ /yang dag nyid du bzung bar bgyi// las kyi rigs mchog chen po la/ /sdom pa thams cad ldan par ni/ /yang dag nyid du bzung bar bgyi/ /sems can kun gyi don gyi phyir/ /bdag gis sdom pa ma lus bzung/ /zhes sdom pa bzung ngo/ /de nas slob ma la 'od 'phros/ /phyag rgya che dang ldan 'gyur nas/ /de bzhin gshegs pa'i gnas rnams su/ /dri yi thig le re re gdab/ /lha rnams kyi ni gdan du bsam/ /spyi gtsug bde gshegs gos sngon can/ /mgrin par pad+ma'i gos sngon can/ /snying gar thugs kyi gos sngon no/ /lte bar rin chen

  9. 187b

    gos sngon can/ /gsang bar las kyi gos sngon no/ /dpung pa la sogs rkang lag bzhi/ /khams gsum rnam rgyal la sogs brtag /de nas spos dang me tog dang/ /mar me dri dang rnam lnga dbul/ /dri yi chu la bdud rtsi 'am/ /khams gsum rnam par rgyal ba bskyed/ /bcu gcig 'od zhu dag pa'i chus/ /ngag gi nyes pa sbyang par bya'o/ /bdud rtsi chu yang blud par bya/ /de nas bsrung skud byin rlabs te/ /dag pa'i chu gtor 'od zhu bas/ /khams gsum rnam par rgyal ba bskyed/ /bkug nas 'od du zhu ba las/ /'bar ba'i 'od lnga ldan par bya'o/ /de la mdud pa drug byas te/ /mdud pa re la lha re bstim/ /rdo rje de nyid sngags kyis grub/ /dpung pa g.yon par gdags par bya/ /de nas so shing byin brlabs te/ /u dum bA ra pa sha'i shing/ /ma yo ma gas 'bus ma zos/ /sor bcu gnyis pa'i ched du bya/ /'od zhu bskyed pa gong bzhin te/ /shar du kha ltas mi smra bar/ /bca' dang bru ba'i cho ga bya/ /bsam pas byang chub sems bskyed de/ /rtags ni gsum du shes par bya/ dang po 'jug pa'i rtags bstan te/ /bor bas slob dpon la bltas na/ /de ni 'jug tu rung par bshad/ /gal te rang la bltas gyur na /de ni phyir yang dor bar bya/ /gnyis pa bgegs kyi rtags rnams blta/ /gsum pa dngos grub grub rtags ni/ /sor mo 'am ni bor ba'i tshe/ /steng du lus na mchog 'grub 'gyur/ /shar du yang ni de bzhin te/ /mtshams dang byang du kha bltas na/ /zhi ba la sogs dngos grub 'gyur/ /de nas ngag gi nyes pa spyad/ /de nas ku sha byin brlabs te khams gsum rgyal po khro bo dang/ /las kyi gos sngon phyag rgya sngags/ /de yi byin brlabs sngags dang stan/ /de steng seng ge'i stobs kyis nyal/ /spro ba skyed pa'i cho ga bya/ /sangs rgyas chos dang mthun 'gyur ba'i/ /u dum bA ra'i me tog ni

  10. 188a

    'byung 'gyur yang na mi 'byung srid/ /skye ba 'di yis thob pa yis/ /'bras bu rdo rje'i theg ba'i chos/ /'byung 'gyur yang na mi 'byung srid/ /gsang sngags don 'di thob pa yis/ /dka' ba thams cad mthar phyin te/ /las 'bro dang ni thugs rjes 'byung/ /bcom ldan rdo rje 'dzin pa che/ /thogs pa med pa'i sku brnyes pa/ 'di yi tshul gyis mngon par bsgrub/ /sems can skal pa ngan pa yis/ /de yis ming yang thos mi 'gyur/ /khyad par 'gyur ba smos ci dgos/ /sang gi nyin mo khyed rnams kun/ /dkyil 'khor bzang po mthong ba yis/ /bla med mchog la reg par 'gyur/ /zhes spro ba bskyed pa'i chos gzhan yang bshad par bya'o/ /nang par sngar ni blo can langs/ /rmi lam ci mthor dri bar bya/ /gos sngon sku gzugs mthong ba dang/ /ri bo'i steng du 'dug pa dang/ /mchod rten skas la 'jog pa dang/ /me tog steng na 'jug pa dang/ /chos kyi bgro gleng byed pa dang/ /glegs bam dag la spyod pa dang/ /gzhan gyi dbang bskur dkyil 'khor mthong/ /de dang gzhan yang bzang 'gyur dang/ /yi rang tshig brjod gal te rtags/ /mi gsal bar ru gyur pa na/ /nyams pa rnams ni bskang bar bya/ /gal te bar chod rtags byung na/ /drag po'i sbyin sreg bya ba dang/ /drag po'i tshogs dang 'khor los bzlog /gong ma'i rtags dang ldan gyur pas/ /thig gdab pa yi cho ga bya/ /thig skud kha dog lnga ldan la/ /yi ge lngas ni byin brlabs te/ /de las rig lnga'i sku ru gyur/ /ye shes rigs lnga bkug cing bstim/ /'od zhu thig skud sna lngar grub/ /yang na ye shes byang chub sems/ /kha dog lnga dang ldan par dgug /des ni nam mkha' i thig gdab bo/ /sa yi thig kyang 'di lta ste/ dang po tshangs pa'i thig gnyis gdab/ /de bzhin 'khor lo rnam brgyad dang/ /glu chad khyams dang sgo bzhi dang/ /rta babs la

  11. 188b

    sogs so sor dbye/ /de nas nang du phur bu gdab/ /mdza' bskor dag ni gnyis su bskor/ /nang gi snam bu'i nang du ni/ /cha chung gcig la skor gnyis bskor/ /dbus su bskor ba gcig dang ldan/ /de nas rdul tshon brtsam par bya/ /dbus su mthing ga shar du dkar/ /lho yi pad+ma 'dab ma ser/ /nub kyi pad+ma 'dab ma dmar/ /byang gi pad+ma ljang khur bya/ /mtshams ni mthing ga yang dag ldan/ /'khor lo mdog kyang de bzhin no/ /dbus su rdo rje dgod pa ste/ /shar du 'khor lo dgod par bya/ /lhor ni rin chen 'bar ba dgod/ /nub tu pad+ma dmar po ste/ /byang du sna tshogs rdo rje ste/ /yum ni so sor 'khril ba'o/ /mtshams rnams su ni khams gsum rgyal/ /mgon po 'phags skyes rnam thes sras/ /so so'i phyag mtshan dgod par bya/ /gru chad dang ni lha mo mtshan/ /kha dog ljang gu tshon gyis bya/ /khyams kyi shar ni dkar por bya/ /lho ser nub ni rnam par dmar/ /byang gi khyams ni ljang gu'o/ /khyams te ji bzhin sgo de bzhin/ /shar gyi sgor ni lcags kyu ste/ /lhor ni zhags pa nub lcags sgrog / byang gi sgor ni dril bu dgod/ /sgo khyud phyi rol la sogs su/ /khyams dang pha khu dra ba dang/ /dra ba phyed pas rnam par brgyan/ /rta babs bzhi yang de bzhin te/ /twa ra na bzhi yis kyang brgyan/ /ri mo'i cho ga rdzogs gyur nas/ /dam tshig 'khor lo rdzogs par bskyed/ /ye shes 'khor lo kun nas bstim/ /de nas mchod pa'i cho ga brtsam/ /badzra d+hU pa sngags las byung/ /dkar mo spros kyi shangs la dbul/ /badzra puShpa'i sngags las byung/ /mthing ga me tog sku la gtor/ /badzra A lo ke sngags las byung/ /dmar mo mar mes dkyil 'khor gsal/ /badzra gand+he sngags las byung/ /ljang gu dri chab phyag zhabs bsil/ /de la sogs pa'i mchod pa'i tshogs/ /ci 'byor thams cad dbul bar bya/ /dang por sems

  12. 189a

    bskyed phyag 'tshal nas/ /skyabs gsol sdom pa bzung bar bya/ /dbang bzhi dkyil 'khor lha la blang/ /yang na nam mkha' i dbyings su blang/ /thos dang bsam pas bdag nyid 'jug pa'o// //de nas slob ma gzhug par bya// phyi rol khrus kyi cho ga bya/ /bum par gyur dang rdzas rnams dgra ma/ /ci 'byor yon rnams dbul bar bya/ /sems bskyed sdom pa la sogs sngon bzhin bya/ /sdom pa legs par 'dzin pa la/ /bka' bsgo dam tshig bdud rtsi blud/ /yid 'ong rnal 'byor chen po khyod/ /las 'phro dang ni thugs rjes 'gyur/ /bcom ldan rdo rje 'dzin pa che/ /thogs pa med pa'i sku brnyes pa/ /'di yi tshul gyis mngon par bsgrub/ /sems can skal pa ngan pa yis/ /de yis ming yang thos mi srid/ /spyad par 'gyur ba smos ci dgos/ /sang gi nyin mo khyed rnams kun/ /dkyil 'khor bzang po mthong ba yis/ /bla med mchog la reg par 'gyur/ /zhes spro ba bskyed pa'i chos gzhan yang bshad par bya'o/ //nang par sngar ni blo can langs// rmi lam ci mthong dri bar bya/ /gos sngon sku gzugs mthong ba dang/ /gos sngon dkyil 'khor chen por chud/ /nga yis khyod la dngos grub 'byung/ /sangs rgyas kun gyis byin gyis rlob/ /ces pa ni spro ba bskyed pa'o/ /gsang mchog gos sngon dkyil 'khor 'di/ /sems can dad pa med pa dang/ /gang yang log chos spyod pa dang/ /mnar med ngan song rgyud can dang/ /rna bar ming yang bsgrags mi bya/ /zhes pa ni gdams ngag go /gal te de la smras gyur na/ /dam can chad bas bcad nas ni/ /tshe yi 'du byed 'di bskul nas/ /mnar med dmyal bar myur du dengs/ /gos sngon chen pos mod la spong/ /zhes pa 'di ni skyon bstan pa'o/ /de nas snying nang sems dpa' bskyed/ /bdud rtsi lnga dang sbyar ba 'am/ /yang na dri yi chu blud de//

  13. 189b

    'thung zhig rdo rje 'bar ba'i chu/ /dam las 'das na bsreg par byed/ /dam tshig bsrungs na dngos grub ni/ /rdo rje 'dud rtsi'i chu yis 'grub/ /oM badzra satwa hUM mahA pany+tsa a mri ta/ /kha kha zhes pa ni mna' bsgag pa'o/ /de ring phan chad bu khyod kyi/ / gsang chen rdo rje nga yin gyis/ /da la brnyas par ma byed cig /gal te brnyas par gyur na ni/ /sangs rgyas thams cad mnyes pa min/ /tshe yi 'du byed 'di bskul nas/ /dmyal bar skye bar gdon mi za/ /zhes pa ni man ngag go /de nas rdo rje slob ma yis/ /slob dpon la ni gsol ba gdab/ /chos dbyings byin brlabs las byung ba'i/ /bcom ldan rdo rje 'chang chen po/ /di ring bdag la dbab tu gsol/ /zhes so/ /de nas slob ma mdza' yas la/ /raM dang bcas pa'i yi ge bsam/ /bskyod nas drod skul chu la phog /bskol bas sa yi dkyil 'khor zhu/ /lus nang me yis bsreg pa kun/ /yi ge'i gzugs su blang zhing bsreg /sdig pa tshig par gyur pa dang/ /bde gshegs byang chub sems phab ste/ /snying ngam lus nang 'khyil bar bsam/ /da nas rdo rje 'chang chen bsgom/ /me tog dkyil 'khor lha la dbul/ /pra tIts+tsha ho zhes brjod/ /de nas phreng ba mgo la bcing/ /oM mahA ba la badzra/ /a b+hi Shiny+tsa mi zhe'o/ /rmad 'byung gsang ba'i me tog 'di/ /gang la babs pa rigs kyi lha/ /las 'phro thugs rjes 'byung bar 'gyur/ /gtso bo'i thugs sogs mchog dngos grub/ /dbus dang nyen dngos grub nye/ /ring na dngos grub ring bar 'gyur/ /zhes pa la sogs bzhi dbab pa'i cho ga dang me tog go /dpal ldan chen po gos sngon can/ /khyod kyis mig dbye brtson par mdzod/ /tsak+Shu pra be sha ya phaT/ bkab pa'i lta bas blta byas te/ /dkar po mthong na zhi ba 'grub/ /ser po mthong na rgyas pa 'grub/ /dmar po mthong na dbang gi las/ /nag pos drag po'i

  14. 190a

    las 'grub 'gyur/ /khyod kyi mig gis ji ltar mthong/ /zhes pa ni dri bar bya'o/ /der nas brtsams te dpal ldan che/ /khyad nas brtsams te dkyil 'khor bstan/ /dkyil 'khor mthong ba'i 'og tu ni/ /yon phul gsol ba gdab par bya/ /ji ltar dus gsum sangs rgyas la/ /rdo rje sems dpas dbang bskur ltar/ /bdag kyi rab tu bsgral slad du/ /bde gshegs bum pa'i dbang mchog stsol/ /ces pa ni gsol ba gdab pa'o/ /de nas rdo rje rgyal po yis bum pa'i chu ni bsdus byas te/ / byang chub sems kyi ngo bo dag /rol mo sgra dang bcas pa yis/ /spyi gtsug dag tu dbang bskur ro/ /oM gsang ba gsum las legs byung ba'i/ /lha yi chu ni dag pa yis/ /dri med rdo rje chu dbang gis/ /mi bskyod dngos grub thob par shog /oM sarba ta thA ga ta A darsha a b+hi Shiny+tsa mi/ chu'i dbang ngo/ /oM sangs rgyas byin brlabs las byung ba'i/ /yid bzhin nor bu 'bar ba che/ /dam pa thams cad 'byung ba'i gnas/ /rin chen grub pa'i dbang bskur ro/ /oM sarba ta thA ga ta sa ma tA badzra a b+hi Shiny+tsa mi/ /zhes pa ni dbu rgyan gyi dbang ngo/ /oM ye shes lnga yi rtags 'chang ba/ /thugs mchog rdo rje bla na med/ /dus gsum 'gyur ba med pa yi/ /snang ba mdza' yas dbang bskur ro/ /oM sarba ta thA ga ta pra tya bak+She Na a b+hi Shiny+tsa mi/ /zhes pa ni rdo rje'i dbang ngo/ /oM chos sku sgyu ma'i sgra sgrogs shing/ /stong pa'i don las sad par byed/ /bla med dril bu'i dbang bskur bas/ /don yod grub pa'i dngos grub shog /oM sarba ta thA ga ta kri tyA nuSh+ThA na a b+hi Shiny+tsa mi/ /zhes pa ni dril bu'i dbang ngo/ /kye rdo rje'i ming gis dbang bskur bas/ /ci kyang mi tshugs mi shigs pa'i/ /byang chub chen po thob pa dang/ /rnam par snang mdzad dngos grub shog /oM sarba ta thA ga ta sh+ri sa ma ya k+Shu nya ta nAM ma a b+hi Shiny+tsa mi/ /zhes pa ni ming gi

  15. 190b

    dbang ngo/ /chos rnams sgyu ma lta bu ste/ /dag cing gsal la rnyog pa med/ /me long gi ni gzugs brnyan bzhin/ /rang byung lha ni shes par gyis/ /zhes pa ni me long ngo/ /lung las/ /dang po gsol ba gdab pa ste/ /gsan nas ye shes 'khor lo gzhug / sdig pa dag par chus? bkrus te/ /so so'i dbang rdzas lag tu sbyin/ /nyon mongs lnga yi dri ma bkru/ /dbu la rigs lnga'i sangs rgyas dgod/ /ce'o/ bcom ldan rdo rje 'dzin pa 'am/ /rdo rje'i dbang gis mngon sangs rgyas/ /ye shes lnga dang rdo rje 'di/ / khyod kyis rtag tu bcad bar gyis/ /zhes pa thugs kyi dam tshig go/ gsung rnams sgra brnyan lta bu ste/ /rtog pa med pas sna tshogs sgra/ /brjod bral dpag gis mi lang ba'i/ /dril bu 'di ni khyod kyis gzung/ /zhes pa ni gsung gi dam tshig go/ thabs dang shes rab gnyis med sgra/ /mi phyed rdo rje'i ngo bo 'di/ /'khyud pa'i phyag rgya'i dam tshig ste/ /khyod kyis kyang ni rtag tu bcad/ /zhes pa ni sku'i dam tshig go /'di ni sangs rgyas thams cad dang/ /dpal ldan rdor 'dzin lag na gnas/ /khyod kyis kyang ni rtag tu bcang/ /phyag na rdo rje brtul zhugs brtan/ /oM sarba ta thA ga ta badzra pA Ni hUM mahA yak+Sha se na pa ta ye hUM ta ye hUM ha ha ha hi/ zhes pa 'di ni rdo rje brtul zhugs so/ /chags dang grol ba'i gang zag gis/ /thun mong dkyil 'khor cho ga yin/ /gang zag rnam pa gnyis po de/ /dkyil 'khor 'di ru zhugs tsam gyis/ /dngos grub gnyis dang 'brel par byed/ /klu dang 'byung pos zin pa la/ /dang po cho ga sngon song nas/ /sme ba'i rdzas kyis dbral bar bya/ /de nas phral ba gso ba dang/ /nad pa chu yis bkru bar bya/ /de ltar byas nas dkyil 'khor 'dir/ /zhugs pa tsam gyis myur du thar/ /rims dang 'brum bu la sogs pa/ /gtor ma'i 'khor lo sngon song bas/ /dkyil 'khor 'di ru zhugs gyur na/ /myur du nyen las

  16. 191a

    thar bar 'gyur/ /bud med dag kyang bu 'dod na/ /dang po cho ga sngon song nas/ /khrus kyis dag nas gos bzang bgo/ /dkyil 'khor 'di ru zhugs pa yis/ /bus pa'i gdon rnam bzlog pa dang/ /bus pa dbyung bar gdon mi za/ /yi dags bgo pa pa'i cho ga yang/ /lha la sogs pa bkug gyur nas/ /sdom pa legs par bzung nas ni/ /dkyil 'khor 'di ru zhugs gyur nas/ /bdag gi bcol ba thams cad byed/ /thogs pa med pa'i rdo rje bzhin/ /ro yi las rnams byed 'dod pas// blang dang bsrung ba sngon song nas/ /dkyil 'khor 'di ru bcug gyur na/ /log chos drug dang ldan pa yang/ /gtsang ba'i gnas su nye bar 'gro/ /de bzhin gshegs pa'i sku gzugs la/ /dag pa'i cho ga sngon song nas/ /byin brlabs dkyil 'khor chen po 'dir/ /dbang bskur mchod pa phul gyur na/ /shin tu bkra shis don ldan te/ /bskur zhing bstim pa'i gnas su 'gyur/ /yon tan 'byung ba'i 'byung ba'i gnas/ /chags lam pa dang grol lam pa/ /mdze dang rims kyis zin? pa dang/ /bud med dang ni yi dags bkol/ /ro lang sku gzugs lhag par gnas/ /brgyad po dkyil 'khor 'di yis byed/ /de phyir dkyil 'khor cho ga brgyad/ /gcig par bsdu ba'i cho ga'o// //de nas gsang ba'i dbang bskur te/ /de yang bdud rtsi lnga yis byug /stegs bu'i steng na slob dpon dang/ /phyag rgya ma ni snyoms par zhugs/ /slob mas de la gsol ba gdab/ /oM rgyal ba thams cad rol pa yi/ /sangs rgyas chu yi rgyun phab ste/ /nyon mongs rtog pa sbyangs pa bzhin/ /bdag la byang chub sems dbang gsol/ /ji ltar rgyal ba'i dbu skabs pa/ /byang chub sems kyis bskus pa bzhin/ /bdag la byang chub sems khrus gsol/ /ces pa ni gsol ba gdab pa'o/ /de nas blo ldan slob dpon dang/ /slob ma

  17. 191b

    gnyis med sbyor byas pa'i/ /byang chub sems su gang gsungs pa/ /yum gyi b+ha gar blang bar bya/ /dper na bud ba me tog bzhin/ /yang na gsang ba'i rdo rje sker/ /sbom pos dbang po gnyis mnan te/ /slob ma'i kha ru dbab par bya/ /dper na ma la bu bzhin no/ /yang na slob ma gang yin pa/ /gdugs la sogs dang ldan byas nas/ /gsang chen bde ba'i rgyu mchog ste/ /bdud rtsi lnga dang ldan byas nas/ /bkra shis bstod pas bstod pa dang/ /slob ma'i lce las sbyin par bya/ /de nas slob ma chen po des/ byang chub bdud rtsi lces blangs nas/ /snying gar 'dod pa bsten par bya/ /bde ba de la brten gyur nas/ /lde ba'i dbus su bsam par bya/ /slob mas kyang ni 'di skad brjod/ /'chi bar gyur pa rab slong zhing/ /rtog pa'i dra ba sel mdzad pa/ /me la mchog gi bdud rtsi che/ /bzhi brgya rtsa bzhi'i nang sel cing/ /bla med byang chub mchog la reg /bdud rtsi mnga' bdag khyod la bstod/ /gsang chen dbyings la phyag 'tshal bstod/ /bcud ldan bdud rtsi khyod la bstod/ /ces pa ni gsang ba'i dbang ngo// //de nas shes rab ye shes kyi dbang bskur te/ /maN+Dal dri zhim legs byugs te/ /mchog tu dkar dmar thig le gdab/ /steng du mtshan ldan bud med bzhag /gnas rnams su ni lha tshogs dgod/ /dbyings nas bstim pa'i cho ga bya/ /de nas slob mas gsol ba gdab/ /ji ltar sangs rgyas thams cad kun/ /shes rab pha rol phyin pas 'grub/ /bdag kyang rab tu bsgral slad du/ /gsum pa'i dkyil 'khor bstan du gsol/ /ces pa ni gsol ba gdab bo// bu tshur shog cig rigs kyi bu/ /gang ltar dga' ba'i dngos grub ni/ /shes rab ma la brten nas 'grub/ /rtag tu shes rab don 'dod pas/ /pad+ma'i steng gis lce yis rig /dri chen dri chu bza' bar bya/ /tha dad rtog pa gyur mi bya/ /khu ba dkar

  18. 192a

    ? rnam pa gnyis/ /lce yi dbus su brtan par bzung/ /dka' thub med cing brtul zhugs che/ /'di dang ldan pa 'grub par 'gyur/ /zhes pa ni sdom pa dbog pa'o/ /de nas slob ma chen po des/ /rang gi bsam pa'i blo brtags pa/ /ji snyed sdom pa bzung bar bya/ /sdom pa 'dzin pa'i slob ma de/ /dmigs med yum gyi dkyil 'khor lta/ /rtag tu gcer bu'i tshul can gyis/ /rdo rje dril bu kha phye la/ /mthong ba'i slob ma gsol ba gdab/ /rmad 'byung btsun mo'i b+ha ga'i mchog /ye shes thams cad bskyed pa'i gnas/ /ma smin ma grol grol ba'i sar/ /ye shes dam pa bskyed du gsol/ /zhes pa ni gsol ba gdab pa'o/ /de nas bde ba'i stan bting la/ /seng ge'i stabs kyis nyal ba yis/ /lag pa steng 'og bsnol nas ni/ /mchog dga' ba yi gtam dang ldan/ /gnas dgu ru ni sen mo gdab/ /zur gyis smeg dang kha sprad stsogs/ /chags pa bskyed pa'i cho ga bya/ /yum gyi bya rgod rtse mo mchog /dbang po'i lag pas blang bar bya// pad+ma kha byer gyur pa dang/ /gnyis su med par sbyar gyur te/ /bskyod pa dal gyis bskyod par bya/ /bskyod pa'i rlung gis mes bskul te/ /bde chen byang chub sems phab ste/ /so so'i gnas su 'od tshad bzung/ /rdo rje skye ru phyin pa dang/ /yi ge 'od kyis bur 'gyur te/ /oM khyod kyi stobs kyis thams cad 'dus/ /log pa'i man ngag der bsam mo/ /ma bzlog pa ni lce yis blang/ /gal te bzlog par gyur pa na/ /rtog pa thams cad nub par 'gyur/ /de las langs te de bzhin bsam/ /shes rab ye shes kyi dbang ngo// //de nas lung bstan par bya ste/ /khams gsum 'gro rnams thams cad la/ /chos kyi 'khor lo bskor bar bya/ /dus 'di nas ni bzung nas ni/ /srid pa'i gzeb las sgrol bar 'gyur/ /nyon mongs sdug

  19. 192b

    bsngal gtan bcad nas/ /bla med byang chub mchog la reg /di ring phan chad bu khyod ni/ /rgyal ba'i sras kyi thu bo yin/ /zhes pa ni lung bstan pa dang dbugs dbyung ba'o/ /ji lta ji ltar 'dul 'gyur ba'i/ /de ltar chos kyi 'khor lo bskor// khams gsum sems can thams cad la/ /'khor lo bskor bas mya ngan 'das/ /ces pa dang/ dud dang ral gri padmo dang/ /rdo rje la sogs pa 'di ni rjes su gnang ba'o/ /de nas slob ma dam pa des/ /rin chen gser dngul byu ru dang/ /dung dang mu tig ku mu ta/ /ba lang rta dang glang po che/ /yul dang bu smad la sogs pa/ /mdor na rang las gces pa'i rdzas/ /thams cad bla ma de la dbul/ /bla ma dam par gyur pa la/ /rang srog gis kyang mnyes byed na/ /gzhan pa'i rdzas lta smos ce dgos/ /zhes pa ni yon dbul lo/ /de nas dam tshig dbog bya ste/ /gsang dang don dam yang dag la/ /thob par gyur pa'i slob ma yis/ /dam tshig yid bzhin nor bu bsrung/ /yang dag rdo rje slob dpon la/ /mi dge log pa spyod 'dod na/ /de ni dbang gi tshig nas ltung/ /thun mong khyad par mched dang yum/ /de la ngan sems zung mi bya/ /slob dpon rdo rje mched gyur la/ /rang gi srog kyang phan gdags na/ /sgrib pa kun byang tshogs rdzogs nas/ /bar chod thams cad zhi bar 'gyur/ /de min dbang gi tshig nas ltung/ /byang chub sems ni spang mi bya/ /dge slong khrims la rtag par gnas/ /sdom pa thams cad lhag par bsrung/ /'di ni rnal 'byor sa gzhi 'dra/ /rnal 'byor pa yi rdzas rnams la/ /rtog pa thams cad spang bar bya/ /gzhan yang dam tshig mdza' yas pa/ /thams cad 'bad de bsrung bar bya/ /dam tshig gi dngos grub kun gyi mchog /dam tshig dngos grub kun gyi bdag /dam tshig gis ni 'byung po 'dul/ /dam tshig rtog pa'i dra ba gcod/ /gang dag dam tshig mi ldan pa/ /dbang gis tshig nas mnar med par/ /

  20. 193a

    sangs rgyas bzhugs kyi bar du gnas/ /zhes pa ni dam tshig dpog pa'o/ /de nas brtsams te bkra shis kyi/ /smon lam rjes su gdab par bya/ /bum pa'i lha dang dkyil 'khor lha/ /spyan drang nam mkhar gshegs su gsol/ /dam tshig dkyil 'khor rang la bsdu/ /dkyil 'khor phyags la chu bor dbo/ /snod rnams dag par bkru bar bya/ /rang nyid mi dmigs dbyings su bsdu/ /de la las kyi lhar bsgyur la/ /bzod gsol lus srung cho ga bya/ /dkyil 'khor chen po'i cho ga 'di/ /rgyu dang 'bras bu'i don la rmongs/ /yang dag don dang mi ldan zhing/ /'dod pa log pa'i lam zhugs dang/ /dka' thub pa dang rtog pa can/ /de la zur tsam bstan mi bya/ /gal te de la bstan gyur na/ /tshe yi 'du byed des bskul nas/ /dmyal bar bskal pa stong du gnas/ /bdag 'dra'i ma rig rmongs pa yis/ /bsgrub pa'i thabs 'di brtsam par mi 'os kyang/ /sems can bdag pas dman phyir bdag gis brtsams/ /'di la bdag gis byang chub ci thob pa/ /des ni sems can gos sngon grub par shog /bdag gi dge ba'i rtsa ba 'dis/ /khams gsum sems can thams cad kun/ /zhing mchog gtsang mar skye bar shog /dbang gis 'bras bu smin gyur cig /sems can las dang skal ldan nas/ /rdo rje 'chang chen zhal mthong shag /de yi theg chen don rtogs te/ /mngon par rdzogs par sangs rgyas nas/ /thugs rje chen po'i byin rlabs kyis/ /sems can 'gro don byed par shog /dpal gos sngon can gyi dkyil 'khor gyi cho ga /slob dpon nA gArdzu nas mdzad pa rdzogs so// (//sngags kyi rgyan gyi sgrub thabs nA gArdzu nas mdzad pa bzhugs//) //rgya gar skad du/ man+t+rA laM kA ra sA d+ha na/ bod skad du/ sngags kyi rgyan gyi sgrub thabs/ /bcom ldan 'das thugs kyi rang bzhin phyag na rdo rje

Colophon

dpal gos sngon can gyi dkyil 'khor gyi cho ga/_slob dpon nA gA rdzu nas mdzad pa rdzogs so/