byang chub kyi sems su 'dus pa'i mdo
Text
ff. 176b–185b · 19 folio sides
- 176b
dad pa che la ser sna chung // dka' ba sngos nas dang du len// shes bzhin che la bag dang ldan// lus srog mi lta chos la mos// grong khyer med cing dman cha 'dzin// de lta bu yi slob ma la// a ti bya bral rgyud 'di bstan// sems dpa' rdo rje yid la zhog/ sems la gab na shin tu mchog/ ces gsungs nas sems dpa' rdo rje la rgyud gdam shing gtad do// byang chub kyi sems shes bya mtha' gcod kyi rgyud las/ gdams shing gtad pa'i le'u ste rtsa bzhi pa'o// // byang chub kyi sems shes bya mtha' gcod kyi rgyud ces bya ba rdzogs so// // rgya gar skad du/ sar+b+ba d+har+m+maHsan+ni ma hA bo d+hi tsit+ta sU tra bod skad du/ chos thams cad rdzogs pa chen po byang chub kyi sems su 'dus pa'i mdo/ bcom ldan 'das dpal kun tu bzang po la phyag 'tshal lo// sde phyi med par 'di skad bshad pa'i dus na/ bcom ldan 'das de bzhin gshegs pa chos thams cad kyi snying po/ rdo rje rdzogs pa chen po'i bdag nyid chen po de/ 'og min chos nyid kyi mkha' dbyings nyid kyi klong / sems nyid kyi gnas/ rang byung ma bsgribs pa'i gzhal yas khang na/ dus gsum gcig pa'i sangs rgyas dang / mi skye lam la lta ba'i rnal
- 177a
'byor pa rnams dang / sa la gnas pa'i byang chub sems dpa' rnams dang / nges pa ma thob pa rnams dang / snying pos bsdus pa'i srid pa gsum yan chad dbye ba mi mnga' ba'i thugs rje'i dbang gis thabs cig go// de nas bcom ldan 'das dpal kun tu bzang po de la/ 'khor rnams kyis yong su 'dun to// de nas bcom ldan 'das dpal kun tu bzang po des/ 'khor rnams yongs su 'dun pa de gzigs nas/ yongs su kun tu snang ba zhes bya ba'i chos nyid la nyid gnas par mdzad do// mdzad pas 'khor rnams yongs su rtog pa skyes nas sems yongs su 'drogs so// yongs su sems 'drogs par gzigs nas/ nas bcom ldan 'das dpal kun tu bzang po des// 'khor rnams la nyid kyi rang bzhin 'di bstan to// e ma ho/ byang chub sems ni kun tu bzang // rgyu rkyen med pa'i rang byung sems// thams cad 'byung ba'i snying po des// mga' mgu rangs par kun 'dod na// 'dun pa ma skyes sems 'drogs pas// nga yi rang bzhin ma mthong ste// nga ni kun gyi rang bzhin te// chos kun snying po mthong ba med// ces gsungs so// de nas 'khor de rnams kyang sems kyi bsam pa so sor mthong ste/
- 177b
la la ni nyid kyi rang bzhin tu gyur to// la la ni ye shes skyes so// la la ni dga' bas 'dun to// la la ni mos pas 'dun to// la la ni ma dad pa'i sems byung ngo // la la ni dga' bar gyur na yang 'byed pa mi mnga' ba'i thugs rjes thabs cig go// de nas sems dpa' rdo rje nyid kyi rang bzhin des/ kun tu bzang po la 'di skad ces gsol to// e ma ho rdo rje snying po khyod// byang chub sems ni kun tu bzang // yin par thag bcad yongs su rtogs// rgyu rkyen med par 'byung mi sems// zhes zhus so// nas kun tu bzang po de nyid kyis mi dmigs pa'i don la zhugs nas thugs rje rang byung gi ye shes kyis 'od zer bskul ba spros pas/ dus gsum gyi de bzhin gshegs pa thams cad mnyes nas/ sems dpa' rdo rje la/ dus gsum gyi de bzhin gshegs pa thams cad kyis/ 'od zer bsdus te bskul bar mdzad do// don gyi tshig gis kyang 'di skad ces bskul lo// rdo rje snying po sems dpa' khyod// kun gyi rang bzhin khyod yin pas// sems nyid kun tu bzang po 'di// khyod kyis kun la bstan du gsol// ces bskul lo// de nas rdo rje sems dpa' des/ bde bar gshegs pa kun gyis bskul bar rig nas/ mi rtog pa'i ting nge 'dzin gyi sgo nas 'od zer phyogs
- 178a
bcur bkye nas slar bsdus te/ nyid kyi sems kyi sku bzhengs nas kun la snang bar mdzad do// kun gyi rang bzhin du yang bzhugs so// rang bzhin de kun la yang snang ngo // sems kyi rang bzhin yang snang bar mdzad do// de nas 'dus pa'i tshogs kyis/ sems dpa'i rang bzhin kun tu rdo rje la zhus pa e ma ho rdo rje snying po khyod// byang chub sems ni kun tu bzang // nyon mongs lnga yi sdug bsngal gang // khams gsum gnas pa'i sdug bsngal gang / rgyud drug 'khor ba'i sdug bsngal gang // mtho ris ngan song bde sdug gang // zhes zhus so// de nas sems dpa' rang bzhin kun tu rdo rjes/ 'dus pa'i tshigs la chos thams cad rtsa ba gcig las byung ba'i don bsdus pa 'di gsungs so// chos kun rtsa ba sems su gcig/ rtsa ba gcig la don gsum ni// bde dang sdug bsngal theg pa gsum/ phun sum rnam pa gsum tshogs pas// yo ga bzhi yi bye brag dbye// khyad par 'phags pa'i che lnga ston// gol sgrib drug drug skyon yon sel// gtan la rnam pa bdun gyis 'bebs// nges pa'i man ngag brgyad du ston// bden pa'i tshig dgus 'thun smras na// yongs su rdzogs pa'i mdo bcus ni// gcig gi rang bzhin
- 178b
ston par med// gcig dang gnyis dang gsum dang bzhi// lnga dang drug dang bdun dang brgyud// dgu dang bcu yi bar du ni// gcig don yongs su rdzogs par ston// ces gsungs so// byang chub sems kyi 'grel pa rdzogs pa chen po mdo bcu las/ gleng gzhi'i le'u dang po'o// // de nas 'dus pa'i tshogs thams cad sems dpa' rdo rje'i 'khor du 'khod nas/ dang ba'i sems kyi 'dun pas/ sems dpa' rdo rjes rtsa ba gcig pa'i don gsungs shig par rig nas bka' stsal pa/ kye 'dus pa'i tshogs chen de nyon cig/ byang chub sems kyi mdo 'di las// gcig ni kun gyi rang bzhin te// chos kyi dbyings sam byang chub sems// yin pas rtsa ba'i don du gzhag/ gcig pa'i don ni 'di lta ste// sangs rgyas sku dang ye shes dang // sems can lus dang bag chags dang // snang dang srid pa'i chos rnams kun// byung chub sems dang dbyings su 'dus// rgyu ru gcig la 'bras bur gcig/ dpe ru gcig la don du gcig/ rtsa bar byang chub sems su gcig/ rtags dang gtan tshigs 'thun par gcig/ spros pa med pa'i don du bstan// rgyu gcig byang chub sems 'di ni// dus gsum sangs rgyas thams cad kyi// mtshan mar mi gnas/
- 179a
chos skur gcig/ gsung de 'gags pa med par gcig/ ma bsgribs ye shes thugs su gcig/ spros pa med pa'i don du gcig/ sems can lus dang bag chags kyang // rgyu gcig byang chub sems las byung // rgyu dang rgyu yi rnam pa gnyis// rgyu ni 'byung chen rnam pa lnga// 'byung lnga'i rgyu ni byang chub sems// 'gro ba'i sdug bsngal byang chub sems// sems las rang rgyud grub byed pa// brkam chags lnga las 'byung lnga drug/ 'byung ba lnga las rang byung skyes// snang ba'i chos dang srid pa'i chos// mi rtog pa yi rgyu rkyen gyis// bskyed nas ji ltar 'byung ba yang // don dam skye ba med pas na// spros pa med pa'i don du bstan// 'bras bus gcig pa'i don 'di yang // rgyu gcig pa yi tshul bzhin du// chos rnams kun gyi 'bras bur gcig/ de yang ji lta bu zhe na// dper na phyi nang chos rnams kun// gang rgyu de las grub pa'i rgyu// 'bras bu gcig pa'i don 'di yang // 'gro ba'i sems kyi phyin ci log/ brkam chags lnga yi sdug bsngal rgyus// 'bras bu gsal byed/ ltar 'khor// de la 'bras bu ming mi gdags// sdug bsngal kun 'byung 'gog pa lam// spong dang 'gegs dang sbyor ba dang // lam la mngon du byed pa dang //
- 179b
mongs lnga bcom 'bras bu de// mi skye mi 'gag 'bras bu min// bden pa gnyis kyi rtogs brjod kyis// mi rtag sdug bsngal stong bdag med// mdo chen bzhi yi don brtags te// chos nyid stong pa'i 'bras bu de// rgyu 'bras 'das pa'i 'bras bu min// phyi yi tan+t+ra sde gsum yang // byang chub yan lag kun sgo nas// rdo rje 'dzin dang / stug po bkod// thob pa rdo rje'i 'bras bu de// blang dor med pa'i 'bras bu min// nang pa bskyed dang rdzogs pa ni// rnam pa gsum gyi don sbyar nas// rang rgyud dag pa'i/ dkyil 'khor la// bsnyen bsgrub bzhi yi cho ga yis// bdag nyid lhun gyis grub byed pa// rtsol sgrub 'das pa'i 'bras bu min// ma skyes pa yi chos nyid ni// mi skye mi 'gag 'bras bu yin// 'byung ba lnga la rag ma las// sems nyid rang byung ye shes yin// sku gsung thugs la ma brten pas// rgyu 'bras 'das pa'i 'bras bu yin// ma bsgribs rang byung ye shes kyis// gang yang spang ba med par spyod// gzung 'dzin rnam rtog mi mnga' bas// blang dor med pa'i 'bras bu yin// sems nyid rang byung ye shes la// ye nas btsal zhing bsgrub med pas// rtsol sgrub gnyis kyi sgros dang bral// lhun gyis grub pa'i 'bras bu yin// sgro skur bral ba'i byang chub sems//
- 180a
spros pa med pa'i don gyis na// kun gyi snying po sangs rgyas sku// ma bsgribs ye shes chos kyi dbyings// mi 'gag dbyings kyi byang chub gsung // mi skye mi 'gag ye shes thugs// rgyu dang 'bras bu gnyis ma mchis// rtsa ba gcig pa'i byang chub sems// thams cad kun gyi rgyu ru snang // rgyu nyid rang byung skye med pas/ ming tsam spro mtshon 'bras bur gcig/ 'bras bu zhes ni btags pa med// btags pa de ni mtshon pa ste// mtshon pa'i don gyis gdags med mtshon// de yang mtshon pa'i bya ba'i don// mtshon du med pa'i don de yang // ma mtshon go bar mi 'gyur te// mtshon du med pa'i don tshig gis// mtshon te mtshon med go bar bya// thams cad chos ni skye ba med// ma skyes pa yi chos de ni// skye 'gag med pa'i byang chub sems// byang chub sems la skye ba med// ma mtshon skye med de mi mthong // skye ba med pa'i don tshig gis// skye me de mtshon mthong bar bya// thams cad chos ni sgro skur bral// sgro skur bral ba'i chos nyid ni// brjod du med pa'i byang chub sems// byang chub sems la brjod med par// ma brjod rig par mi 'gyur te// brjod du med pa'i don tshig gis// brjod de brjod med rig par bya// thams cad chos la skye 'gag med//
- 180b
skye 'gag med pa'i chos nyid la// mtshon du yod par ma gsungs te// mtshon du med pas sgro skur bral// sgro skur bral ba'i byang chub sems// byang chub sems la mtshon du med/ tabarjod du med pa'i chos nyid la// sus kyang brjod par mi nus so// zhes gsungs so// rdzogs pa chen po byang chub kyi sems kyi mdo las/ rgyu 'bras gcig pa'i le'u ste gnyis pa'o// // de nas yang 'dus pa'i tshogs de dag thams cad/ sems dpa' rdo rje'i 'khor du dang ba'i sems kyis 'khor de 'dun pas/ sems dpa' rdo rjes rtsa ba gcig pa'i dpe dang don la 'thun par rig nas/ yang gsungs pa/ kye/ sems dpa'i tshogs chen de nyon cig/ rtsa ba gcig pa'i chos nyid la// dpe yang gcig la don kyang gcig/ dngos med 'dra ba dpe ru bstan// chos kun dpe ni nam mkha' 'dra// nam mkha' dag las thams cad byung // chos kun snying po byang chub sems// thams cad 'byung bas nam mkha' 'dra// rgyu med pa yi byang chub sems// ma skyes pas na nam mkha' 'dra// rkyen med pa yi byang chub sems// mi 'jig pas na nam mkha' 'dra// gnyen po med pa'i byang chub sems// thams cad 'joms pas nam mkha' 'dra// mtshon du med pa'i
- 181a
byang chub sems// bstan du med pas nam mkha' 'dra// ma bsgribs pa yi byang chub sems// kun tu gsal bas nam mkha' 'dra// thams cad bskyed pa'i byang chub sems// snang srid bskyed pas nam mkha' 'dra// rang byung zab ma'i don gzhig na// don dam ma skyes nam mkha' 'dra// snang dang srid dang yod pa dang // ta brtags shing chags pa'i chos rnams kun// don dam rang bzhin ma skyes pas// skye med dpe ni nam mkha' 'dra// nam mkha' lta bur chos kun brtags// dpe de 'dra ba'i don chos ni// yin pa dag la don zhes gdags// don ni skye ba med pa yin// skye ba med pa'i rang bzhin ni// rgyu med pa la skye ba med// sems la rgyu med skye ba med// srid pa'i chos la rgyus bskyed kyang // sems nyid dbyings la rgyu med pas// skye ba med pa'i don yin no// thams cad chos ni skye ba med/ teskye med byang chub mngon sangs rgyas// snang ba'i chos dang srid pa'i chos// de yang snang ba'i 'byung chen lnga// nam mkha' snang byed khyab pa de// sems nyid ma bsgribs kun la khyab// de bas nam mkha' byang chub sems// snang byed khyab pas mngon sangs rgyas// 'degs par byed pa'i 'byung ba rlung // byang chub sems kyi
- 181b
ye shes rlung // ya shes rlung gis kun 'degs pas// byang chub sems su mngon sangs rgyas// thams cad sdud pa'i 'byung ba chu// ye shes thugs rje rlan gyis sdud/ de bas byang chub sems kyi chu// byang chub sems su mngon sangs rgyas// mngon sum snang ba sra byed sa// thams cad bskyed pa'i byang chub sems// de bas sems kyi sa de las// byang chub sems su mngon sangs rgyas// thams cad drod snyoms tsha ba'i me// pad+ma rnam dag ye shes de// de bas sems nyid rnam dag pas// byang chub sems su mngon sangs rgyas// 'byung chen lnga yi sangs rgyas lnga// byang chub sems su mngon sangs rgyas// srid gsum lam lnga'i chos lnga yang // byang chub sems su mngon sangs rgyas// de yang ji lta bu zhe na// brkam chags lnga yi rnam smin gyis// lam sgo lnga ru zhugs phyin na// mi bde sdug bsngal lnga la spyod// zhe sdang lam gyi sgor zhugs pas// dmyal ba'i gnas na tsha grang spyod// snga phyi dran pa'i chos yod kyang // snga ma las kyi rnam smin gyis// tsha dang grang ba'i nyams myong ste// snying po byang chub sems de la// tsha grang nyams des bskyod pa med// de bas zhe sdang mi gnas stong // byang chub sems su mngon sangs rgyas// 'dod chags lam gyi sgor
- 182a
zhugs pas// yi dgas gnas der bkres skom spyod// bsngos pas tshim pa'i chos yod kyang // snga ma las kyi rnam smin gyis// bkres dang skom pa'i nyams myong ste// snying po byang chub sems de la// bkres dang skom pas bskyod pa med// de bas 'dod chags mi gnas stong // byang chub sems su mngon sangs rgyas// gti mug lam gyi sgor zhugs pas// byol song gnas der blun lkugs spyod// rig pa phra mo'i chos yod kyang // snga ma las kyi rnam smin gyis// blun zhing lkugs pa'i nyams myong ste// snying po byang chub sems de la// blun lkugs nyams des bskyod pa med// de bas gti mug mi gnas stong // byang chub sems su mngon sangs rgyas// phrag dog lam gyi sgor zhugs pas// mi yi gnas su dge sdig spyod// dge sdig las kyi chos yod kyang // 'di dge shas chung rnam smin gyis// mi rtag 'gyur ba'i nyams myong ste// snying po byang chub sems de la// mi rtag nyams des bskyod pa med// de bas phrag dog mi gnas stong // byang chub sems su mngon sangs rgyas// nga rgyal lam gyi sgor zhugs pas// lha yi gnas der longs spyod kyis// ma rig lhung ba'i sdug bsngal spyod// bsams pas grub pa'i chos yod kyang // ma rig le lo'i rnam smin gyis// lhung ba'i sdug bsngal
- 182b
nyams myong ste// snying po byang chub sems de la// ltung ba'i nyams kyis mi bskyod de// de bas nga rgyal mi gnas stong // byang chub sems su mngon sangs rgyas// snang srid chos ni de bas ni// khams gsum gnas kyang de 'dra ste// 'dod pa'i khams ni ma rig pa// skye ba med par kun la rmongs// mi rtog gti mug chos kyi sku// gzugs kyi khams ni chags pa'i gnas// nga rgyal chags pa mngon grub pas// gzugs la nga rgyal lha mi ngoms// ltung bas chags med ye shes gsung // gzugs med khams ni dngos ma grub// yid yul chos la mu bzhir blta// gzung 'dzin med pa'i rig pa'i chos// ming dang mtshan ma'i yul 'das thugs// de bas snang srid snod bcud kun// byang chub sku gsung thugs su 'dus// 'das pa'i dpe ni nam mkha' 'dra// nam mkha' 'das pa kun gyi gnas// snang ba'i chos dang srid pa'i chos// 'das pa'i ngang la mi gnas med// snang ba sa chu me rlung bzhi// 'das pa nam mkha'i ngang la gnas// de yang snang ba 'byung ba'i rlung // nam mkha'i dang na yang zhing g.yo// rang gi mtshan nyid rdo rje rtsal// rtsal chen de yis 'byung chen chu// 'das la mi ltung 'deg par byed// de yang nam mkha'i dngon gnas// 'byung chen snang ba'i sdud byed chu// nam mkha'i ngang na rang bzhin
- 183a
brlan/ tarang gi mtshan nyid rdo rje rtsal// rtsal chen de yis 'byung chen sa// 'das la mi ltung 'degs par byed// de yang nam mkha'i ngang la gnas// 'byung chen snang ba'i cha snyoms ma// nam mkha'i ngang na rang bzhin tsha// rang gi mtshan nyid rdo rje rtsal// rtsal can de yis 'byung chen bzhi// 'das la mi 'jig smin par byed// de yang nam mkha'i ngang na gnas// ma 'das 'byung chen snang ba bzhi// 'das pa nam mkha'i ngang na gnas// srid pa'i rgyud drug snang ba yang // 'das pa nam mkha'i ngang la gnas// nam mkha' 'das pa'i dpe de bzhin// snang ba 'byung chen bzhi po yang // sems nyid 'das pa'i ngang na spyod// srid pa'i rgyu drug snang ba yang // 'das pa sems kyi ngang na spyod// snang srid snod bcud thams cad kun// sems nyid dbyings kyi yul che bas// thams cad sems yul de na gnas// nam mkha' bzhin du mi gnas med// de bas kun gyi gnas chen ni// byang chub sems kyi klong chen yin// 'das pa sems kyi klong chen yin// snang dang srid pa thams cad dang // snod dang bcud kyis bsdus pa dang // sangs rgyas sems can thams cad dang // bde dang sdug bsngal thams cad dang // phyi nang smos pa'i chos rnams kun// byang chub sems kyi
- 183b
bde chen pas// rnam par dag pa'i chos nyid la// snang dang srid pa gnyis su med// snod dang bcud kyang gnyis su med// sangs rgyas sems can gnyis su med// bde dang sdug bsngal gnyis kyang med// / na smos pa'i chos kun med// med pa'i don gyi snying po la// yod pa'i sgro skur gdab mi bya// gang zhig yod pa'i don mi bya// gang zhig med pa'i don ma mthong // 'di la yod pa'i sgro 'dogs pa// don gyi snying po ma shes pas// med pa bde ba'i yul ma mthong // de ni ma skyes chos ma rtogs// de yis dbyings kyi lam ma mthong // de ni gcig pu mun 'thoms nas// sgros med gnas ni thob mi 'gyur// byang chub sems kyi rang bzhin ni// sgro dang skur pa kun dang bral// gang gis sems de ma mthong bas// bskal pa du mar grangs bgrangs kyang // snying po rang sems ma mthong bas// bde ba'i don dang phrad mi 'gyur// zhes gsungs so// byang chub sems kyi mdo las/ dpe don gcig pa'i le'u ste gsum pa'o// // de nas yang 'dus pa'i tshogs de dag thams cad/ sems dpa' rdo rje'i 'khor du dang ba'i sem kyis 'khod de mos pas 'dun to// de nas sems dpa' rdo rje des/ 'khor 'dun pa de rtsa ba byang chub sems su gcig pa dang / rtags dang gtan tshigs la 'dun par
- 184a
rig nas/ yang gsungs pa/ kya ta 'dus pa'i tshogs chen da nyon cig/ rtsa ba gcig pa'i chos 'di ni// byang chub sems kyi rang bzhin te// chos rnams kun gyi rtsa ba yin// thams cad 'dus pa'i snying po yin// dus gsum sangs rgyas thams cad la// sku gsung thugs su gdags med kyang // gdags na snying po 'di la 'das// snang dang srid par smos pa'i chos// thams cad mngon du snang ba yang // thams cad 'byung ba 'di la 'dus// 'di ni snang srid snying po yin// snying po byang chub sems 'di la// thams cad 'dus shing 'byung bas na// de phyir snying po byang chub sems// byang chub sems kyi rnam grangs ni// gcig tu yod la bgrangs du med// bgrangs na mtha' yas brjod mi lang // gcig la rnam pa bgrang du med// gcig gis kun gyi rnam pa 'dzin// thams cad 'dus pa'i snying po yin// de phyir snying po byang chub sems// thams cad 'byung bas rgyu ru snang // de na rgyu gcig byang chub sems// thams cad byang chub sems las spros// 'dus kyang byang chub sems su 'dus// gnas kyang byang chub sems la gnas// bskyed kyang byang chub sems las bskyed// sangs rgyas sku dang ye shes kyang // sems nyid
- 184b
gzung 'dzin bral ba yin// des na byang chub sems kyi sku// sems can lus dang bag chags kyang // sems kyi brkam chags lnga las byung // des na 'byung ba'i byang chub sems// byang chub sems ni gzung 'dzin bral// byang chub sems ni spros dang bral// byang chub sems ni rnam par dag/ byang chub sems la dbyibs ma mchis// byang chub sems la kha dog med// byang chub sems la sgro skur bral// thams cad spangs pa'i byang chub sems// chos rnams kun gyi rtsa ba ru// gcig pas chos kun rtsa ba yin// rtsa ba byang chub sems 'di ni// kun gyi rang bzhin 'di byas pas// thams cad byed pa'i rgyal po yin// byed pa'i rgyal pos kun byas pas// dngos su grub pa gang yang med// gang zhig dngos su grub 'dod pas// de yi chos kun gang mi 'grub// de bas dngos med kun gyis grub// dngos med gang gis grub pa de// des ni rtsa ba sems grub ste// chos rnams kun gyi rtsa ba grub// byed pa'i rgyal po grub pa yin// de bas su gang grub pa des// dngos med gang gis mngon gsal na// des ni thams cad kun grub pas// mi gnas dngos med rgyal po 'grub// 'di yis thams cad byed pa 'grub// de yis thams cad byed par 'gyur// de las thams cad
- 185a
'byung bar 'gyur// de las 'byung ba thams cad 'byung // de las srid pa thams cad 'byung // snang ba'i chos kyang de las 'byung // thams cad thams cad kun 'byung bas// de phyir snying po byang chub sems// chos rnams kun gyi rtsa ba'o// zhes byang chub sems kyi mdo las/ rtsa ba byang chub sems kyi le'u ste bzhi pa'o// // de nas 'dus pa'i tshogs de dag thams cad ston pa kun tu bzang po'i spyan sngar rab tu shin tu 'dun pa'i sgo nas 'khod de/ thams cad mgrin gcig pa'i sgo nas zhus pa/ ston pa kun tu bzang po yis// chos rnams kun tu snang bar mdzad// ston pa rdo rje sems dpa' yis// don de rtsa ba gcig tu bstan/ rtsa ba gcig gi don bstan pa// chos rnams kun gyi rtsa ba rtogs// zhes zhus so// de nas sems dpa' rdo rje des/ chos thams cad rtsa ba gcig pa'i mdo dang 'grel pa 'di gsungs so// chos kun rtsu ba gcig pa 'di lta ste// dam chos sems nyid gcig tu bstan pa la// grangs dang rnam pa yongs kyis bgrang du med// ma bcos ji bzhin rtogs pa'i rnal 'byor pas// ti bya nam mkha'i lam la mkhas pa bzhin// mi rtog nam mkha' lta bur gnas par bya// rgyu med ma byung rkyen med ma skyes
- 185b
pa'i/ thams cad 'byung ba'i snying po byang chub la// yod pa'i sgo dang med pa'i skur ba dang // yin min sgo skur brtags pa ga la yod// ces gsungs so// byang chub kyi sems kyi mdo dang 'grel pa rdzogs so// // de nas 'dus pa chen po'i tshogs la/ sems dpa' rdo rje des rtsa ba gcig la don gnyis 'byung ba'i rnam pa bgrang ba'i mdo 'di gsungs so// kye'adus pa'i tshogs chen de nyon cig/ gnyis ni rnam pa'i bye brag ste// theg pa rnam pa gnyis su bstan// 'jig rten pa yi theg pa dang // mya ngan 'das pa'i theg pa gnyis// 'jig rten pa yi theg pa ni// rgyud drug gnas pa'i sems can kun// khams gsum 'khor ba'i gnas gzung nas// / brkam chags lnga yi sbyor ba yis// khams gsum 'khor ba'i tshogs sog ste// bde ba'i don med stong par 'gyur// de la don 'di bstan par bya// mu stegs rtag dang chad pa gnyis// dge sdig las kyi chos rnams la// 'bras bu yod par ma rtogs te// chad pa'i mtha' ru lhung ba ste// rdzogs chen 'di yi byin rlabs kyis// snying po byang chub sems chen la// gzung 'dzin mtshan ma mi mnga' bas// chad pa'i mtha' ru lhung mi 'gyur// rtag par lta ba'i sems rnams kyis// yod pa rnams la gzhi mthong